མཆོད་རྟེན་སོགས་རྟེན་རྙིང་པ་ལ་ཞིག་གསོས་བགྱིས་པའི་ཕན་ཡོན་བསྟན་པ།

༈ ཡང་སྟོན་པ་མཉན་ཡོད་དུ་བཞུགས་པའི་ཚེ། ཡུལ་མ་ག་དྷཱ་ན་ཁྱིམ་བདག་གཅིག་ལ་ཁྱེའུ་ལྟ་ན་སྡུག་པ་ཞིག་བཙས་ཏེ། དེ་ཉིད་བཙས་མ་ཐག་པར་བང་མཛོད་དུ་གསེར་གྱི་གླང་པོ་ཆེའི་ཕྲུ་གུ་ཞིག་ཀྱང་བྱུང་བས་ཁྱེའུའི་མིང་ལ་གླང་པོ་སྐྱོང་དུ་བཏགས། ཁྱེའུ་དེ་ཇི་ཙམ་ཆེར་སྐྱེས་པ་བཞིན་དུ་གསེར་གྱི་གླང་པོ་ཆེ་ཡང་ཆེར་སྐྱེས་ཤིང་འགྲོ་སྡོད་ཀྱང་ལྷན་ཅིག་ཏུ་བྱེད་ལ་གླང་པོ་ཆེའི་གཅིན་དང་གཅི་བ་ཐམས་ཅད་གསེར་དུ་བྱུང་ཞིང་། དེའི་གཏམ་རྒྱལ་བུ་མ་སྐྱེས་དགྲས་ཐོས་ནས་བདག་རྒྱལ་པོར་ནམ་གྱུར་པ་ན་འདིའི་གླང་པོ་ཆེ་དེ་འཕྲོག་པར་བྱའོ་སྙམ་དུ་བསམ་པ་ལས། ཕྱིས་རྒྱལ་པོར་གྱུར་པ་དང་། གླང་པོ་སྐྱོང་བོས་ནས་ཁྱོད་ཀྱི་གླང་པོ་ཆེ་འདིར་ཞོག་ལ་སོངས་ཤིག་ཅེས་བསྒོའོ། །དེར་གླང་པོ་སྐྱོང་གིས་རྒྱལ་པོའི་བཀའ་བཞིན་གླང་པོ་ཆེ་ཕོ་བྲང་གི་ནང་དུ་བཞག་ནས་ཕྱིར་སོང་བ་དང་། རིང་པོར་མ་ལོན་པར་གླང་པོ་ཆེ་དེ་ཡང་དེ་ཉིད་དུ་སའི་འོག་ཏུ་ནུབ་ནས་སྒོའི་ཕྱི་རོལ་དུ་གླང་པོ་སྐྱོང་གི་ཐད་ནས་སྟེང་དུ་དོན་ནས་བྱུང་བས། ཁྱིམ་དུ་ཕྱིན་པ་ན། རྒྱལ་པོ་མ་སྐྱེས་དགྲ་ནི་རྒྱལ་སྲིད་ཆོས་བཞིན་དུ་སྐྱོང་བ་མ་ཡིིན་གྱི་རང་གི་ཕ་ཡང་གསོད་པར་བྱེད་ན་གཞན་ལ་ལྟ་ཅི་སྨོས་ཀྱི་དེས་ན་གླང་པོ་འདིའི་ཕྱིར་སྲོག་ལ་རྒོལ་བའི་ཉེན་ཡོད་པས་སངས་རྒྱས་བཅོམ་ལྡན་འདས་ལ་སྐྱབས་སུ་འགྲོ་བར་བྱའོ་སྙམ་དུ་སེམས་ནས་ཁྱེའུས་ཕ་མ་ལ་གསོལ་ནས། གླང་པོ་ཆེ་དེ་ཉིད་ལ་ཞོན་ནས་རྒྱལ་བྱེད་ཀྱི་ཚལ་དུ་སོང་ནས་བཅོམ་ལྡན་འདས་ལ་རབ་ཏུ་བྱུང་བར་གསོལ་པས། སྟོན་པས་ཚུར་ཤོག་གིས་བསྙེན་པར་རྫོགས་ཏེ་ཆོས་བསྟན་པས་དགྲ་བཅོམ་པའི་གོ་འཕང་ཐོབ་ཅིང་། གསེར་གྱི་གླང་པོ་ཆེ་དེ་ཡང་རྟག་ཏུ་དྲུང་ན་འདུག་གོ །དེའི་ཚེ་མཉན་ཡོད་པ་ཐམས་ཅད་གསེར་གྱི་གླང་པོ་དེ་ལ་བལྟ་བའི་ཕྱིར་འདུས་ཏེ་འདུ་འཛི་མང་བར་གྱུར་པ་ན། བཅོམ་ལྡན་འདས་ཀྱིས་དགེ་སློང་གླང་པོ་སྐྱོང་ལ་ཁྱོད་ཀྱིས་གླང་པོ་ཆེ་མྱུར་དུ་སྤོངས་ཤིག་ཅེས་བཀའ་སྩལ་པས། བདག་གིས་ཀྱང་སྔ་མོ་ནས་སྤང་བར་བསམས་ཀྱང་འགྲོར་མ་ཉན་ནོ་ཞུས་པས། ཁྱོད་ཀྱིས་གླང་པོ་ཆེ་ལ། ང་ནི་སྐྱེ་བའི་ཕྱོགས་ཟད་དེ་ད་ཕྱིན་ཆད་མི་དགོས་སོ་ཞེས་ལན་གསུམ་དུ་སྨྲོས་ཤིག་དང་མེད་པར་འགྱུར་རོ་ཞེས་གསུངས་པས། དགེ་སློང་གིས་ཀྱང་དེ་ལྟར་སྨྲས་པས་གླང་པོ་ཆེ་དེ་ཡང་སའི་ནང་དུ་ནུབ་བོ། །དེར་དགེ་སློང་རྣམས་ངོ་མཚར་དུ་གྱུར་ནས་ལས་ཀྱི་རྒྱུ་ཞུས་པས། སྔོན་ཚེ་ལོ་ཉི་ཁྲི་བའི་དུས་སུ་སངས་རྒྱས་འོད་སྲུང་འཇིག་རྟེན་དུ་བྱོན་ནས་མྱ་ངན་ལས་འདས་པའི་འོག་ཏུ་རིང་བསྲེལ་མཆོད་རྟེན་མང་དུ་བྱས་པ་ལས། མཆོད་རྟེན་གཅིག་གི་ནང་དུ་བྱང་ཆུབ་སེམས་དཔའ་ཐོག་མར་དགའ་ལྡན་གྱི་གནས་ནས་ཡུམ་གྱི་ལྷུམས་སུ་གཤེགས་དུས་ཀྱི་གླང་པོ་ཆེའི་གཟུགས་ཤིག་ཡོད་པ་དེ་ཕྱིས་ཅུང་ཟད་ཞིག་པར་གྱུར་པ་དང་། སྐྱེ་བོ་དད་པ་ཅན་ཞིག་གིས་མཐོང་ནས་འཇིམ་པས་སླར་གསོས་ཏེ་ལྡོང་རོས་ཀྱིས་བྱུགས་ནས་བདག་མ་འོངས་པའི་དུས་སུ་རྟག་ཏུ་ཆོ་རིགས་བཙུན་ཞིང་ལོངས་སྤྱོད་ཟད་མི་ཤེས་པ་དང་ལྡན་པར་ཤོག་ཅིག་ཅེས་སྨོན་ལམ་བཏབ་བོ། །མི་དེ་ཚེ་འཕོས་ནས་མཐོ་རིས་ཀྱི་ལྷར་སྐྱེས་ཤིང་། དེ་ནས་མིའི་འཇིག་རྟེན་དུ་སྐྱེས་ཏེ། རྟག་ཏུ་ཆོ་རིགས་བཙུན་པ་དང་ལོངས་སྤྱོད་དང་ལྡན་ཞིང་། གཟུགས་བྱད་ཁྱད་པར་དུ་འཕགས་ཤིང་གསེར་གྱི་གླང་པོ་ཆེས་རྟག་ཏུ་སྲུང་བར་གྱུར་ཏོ། །དེའི་དུས་ཀྱི་མི་དེ་ནི་གླང་པོ་སྐྱོང་ཡིན་ཏེ། དེ་ཚུན་ཆད་དུ་ལྷ་དང་མིའི་ནང་ན་ལོངས་སྤྱོད་ཆེན་པོ་དང་ལྡན་པར་གྱུར་ཅིང་། དཀོན་མཆོག་གསུམ་ལ་གུས་ཤིང་བསྟི་སྟང་བྱས་པས་ད་ལྟ་ང་དང་འཕྲད་ནས་བསྟན་པ་ལ་རབ་ཏུ་བྱུང་སྟེ་དགྲ་བཅོམ་པར་གྱུར་ཏོ་གསུངས། འདིས་ནི་མཆོད་རྟེན་སོགས་རྟེན་རྙིང་པ་ལ་ཞིག་གསོས་བགྱིས་པའི་ཕན་ཡོན་བསྟན་པ་ཡིན་ནོ། །