སེམས་ཅན་ལ་བྱམས་པ་དང་སྙིང་རྗེ་དང་བདག་གཞན་བརྗེ་བ་བསྒོམ་པའི་ཕན་ཡོན་བསྟན་པ།
༈ ཡང་སྟོན་པ་མཉན་ཡོད་དུ་བཞུགས་པའི་ཚེ། དགེ་སློང་རྣམས་དབྱར་གྲོལ་ནས་བཅོམ་ལྡན་འདས་ལ་བསྙུན་གསོལ་པའི་ཚེ། བཅོམ་ལྡན་འདས་ཀྱིས་ཀྱང་བྱམས་པའི་ཐུགས་ཀྱིས་སྤྲོ་བ་བསྐྱེད་ནས་དགེ་སློང་རྣམས་ལ་ཁམས་དྲི་སྩལ་པ་ན། ཀུན་དགའ་བོས་བཅོམ་ལྡན་འདས་ཀྱིས་དགེ་སློང་དག་ལ་ཐུགས་བརྩེ་ཞིང་བྱམས་པའི་ཐུགས་བསྐྱེད་ནས་ཡུན་ཇི་སྲིད་ཅིག་ལགས་ཞེས་གསོལ་པ་དང་། བཅོམ་ལྡན་འདས་ཀྱིས་སྔོན་འདས་པའི་དུས་བསྐལ་པ་གྲངས་མེད་བརྗོད་དུ་མེད་པའི་ཕ་རོལ་ན། སྡིག་པ་བྱས་པས་མི་གཉིས་དམྱལ་བར་ལྷུང་སྟེ། དམྱལ་བའི་སྲུང་མས་ཤིང་རྟ་འདྲེན་དུ་བཅུག་ནས། ལྕགས་ཀྱི་ཐོ་བས་བརྡེགས་ཏེ་ཕན་ཚུན་མི་དལ་བར་རྒྱུག་ཏུ་བཅུག་གོ །དེ་ལ་མི་གཅིག་དེ་སྟོབས་ཆུང་སྟེ། འདྲེན་མ་ནུས་པར་འདུག་པ་ན། ལྕགས་ཀྱི་ཐོ་བས་བརྡེགས་ཏེ་ཚེ་བརྗེས་ནས་ཕྱིར་སོས་ཏེ་སྔ་མ་བཞིན་སྡུག་བསྔལ་བ་ལ། གྲོགས་པོ་གཅིག་དེས་དེ་ལྟ་བུའི་སྡུག་བསྔལ་མཐོང་ནས། བྱམས་ཤིང་སྙིང་རྗེ་བའི་སེམས་སྐྱེས་ཏེ། དམྱལ་སྲུང་དེ་ལ་བདག་འབའ་ཞིག་གིས་ཤིང་རྟ་འདི་དྲང་གིས་མི་འདི་ཐོངས་ཤིག་སྨྲས་པ་དང་། དམྱལ་སྲུང་ཁྲོས་ནས་ལྕགས་ཀྱི་ཐོ་བས་བརྡེགས་ཏེ་དེར་ཚེ་འཕོས་པ་དང་། སུམ་ཅུ་རྩ་གསུམ་གྱི་ལྷར་སྐྱེས་སོ། །དེའི་དུས་བྱམས་ཤིང་སྙིང་བརྩེ་བའི་སེམས་བསྐྱེད་པ་དེ་ནི་ད་ལྟར་ང་ཡིན་ནོ། །ངས་དེའི་ཚེ་སེམས་ཅན་དམྱལ་བ་པ་དེ་ལ་ཐོག་མར་སྙིང་བརྩེ་བའི་སེམས་བསྐྱེད་དེ། སེམས་ཅན་ཐམས་ཅད་ལ་ཡང་ད་ཙམ་གྱིས་བར་དུ་ཐུགས་བརྩེ་ཞིང་བྱམས་པའི་སེམས་བསྐྱེད་དོ། །ཞེས་གསུངས། འདིས་ནི་སེམས་ཅན་ལ་བྱམས་པ་དང་སྙིང་རྗེ་དང་བདག་གཞན་བརྗེ་བ་བསྒོམ་པའི་ཕན་ཡོན་བསྟན་པ་ཡིན་ནོ། །