འཕགས་པ་ལ་ངན་སེམས་ཀྱིས་མི་སྙན་པ་བརྗོད་པ་དང་། དགེ་འདུན་གྱི་སྤྱི་རྫས་མ་བྱིན་པར་ལེན་པ་སོགས་ཀྱི་ཉེས་དམིགས་བསྟན་པ།

༈ ཡང་སྟོན་པ་བྱ་རྒོད་ཕུང་པོའི་རི་བོ་ན་བཞུགས་པའི་ཚེ། རྒྱལ་པོའི་ཁབ་ཀྱི་གྲོང་ཁྱེར་དང་མི་རིང་བ་ཞིག་ན་ཆུའི་ལྡེང་ཀ་མི་གཙང་བས་གང་བ་ཞིག་ཏུ་སྲིན་བུ་ཆེན་པོ་སྦྲུལ་དང་འདྲ་བ་རྐང་པ་བཞི་ཡོད་པ་ཆུའི་ནང་ན་རྒྱུག་ཅིང་བར་འགའ་ཕྱིར་འབྱུང་ཞིང་བར་འགའ་ཆུའི་སྟེང་དུ་འཕྱོ་ཞིང་སྡུག་བསྔལ་ཚད་མེད་པ་མྱོང་བ་ཞིག་ཡོད་དོ། །དེར་སྟོན་པ་འཁོར་དགྲ་བཅོམ་པའི་ཚོགས་དང་བཅས་པ་གཤེགས་ནས། སྲིན་བུ་དེའི་སྔོན་གྱི་རྒྱུ་ཁྱེད་ཅག་སུས་ཤེས། ཞེས་བཀའ་སྩལ་པ་དགེ་སློང་རྣམས་ཀྱིས་མངོན་ཤེས་ཀྱིས་བསམས་ཀྱང་དེས་སྔོན་ཅི་བྱས་པ་མ་རྟོགས་ནས་དོན་དེ་གསོལ་པ་དང་། བཀའ་སྩལ་པ། སྔོན་སངས་རྒྱས་རྣམ་གཟིགས་འཇིག་རྟེན་དུ་བྱོན་ནས་མྱ་ངན་ལས་འདས་པའི་འོག་ཏུ་དགེ་སློང་སྟོང་ཕྲག་བཅུ་གནས་དབེན་པ་ཞིག་ཏུ་བཞུགས་ཏེ་ཏིང་ངེ་འཛིན་གྱི་དོན་ཚོལ་བས་ཐམས་ཅད་ཀྱིས་རྒྱུན་དུ་ཞུགས་པ་ནས་དགྲ་བཅོམ་པའི་བར་གྱི་འབྲས་བུ་ཐོབ་སྟེ་སོ་སོའི་སྐྱེ་བོ་ནི་མེད་དོ། །དེའི་ཚེ་ཚོང་པ་ལྔ་བརྒྱ་རྒྱ་མཚོར་འགྲོ་བ་ལས། ལམ་དུ་མཆོད་པར་འདོད་ཀྱང་ཡོན་བདག་མང་བས་སྐབས་མ་རྙེད་ནས། རྒྱ་མཚོ་ནས་ཕྱིར་འཁོར་བ་ན་མཆོད་པར་བགྱིའོ། །ཞེས་སོང་བ་ལས། རྒྱ་མཚོ་ལས་བདེ་བར་འཁོར་ཞིང་རིན་པོ་ཆེ་མང་དུ་རྙེད་པའི་ནང་དུ། རིན་པོ་ཆེ་མཆོག་གཅིག་དགེ་འདུན་རྣམས་ལ་བསོད་སྙོམས་ཀྱི་ཟོང་དུ་ཕུལ་ཞིང་། དགེ་འདུན་རྣམས་ཀྱིས་ཀྱང་བཞེས་ཏེ་ལས་བྱེད་ཀྱི་དགེ་སློང་ཞིག་ལ་གཏད་དོ། །ཕྱིས་དགེ་འདུན་དག་བསོད་སྙོམས་ཀྱིས་བྲེལ་བར་གྱུར་ནས་རིན་པོ་ཆེ་དེ་བསོད་སྙོམས་དུ་བསྒྱུར་སྙམ་སྟེེ། ལས་བྱེད་པའི་དགེ་སློང་དེ་ལ་སྔར་ཚོང་པས་ཕུལ་བའི་རིན་པོ་ཆེ་དེ་བྱིན་ཅིག་གསུངས་པ་ན། དེས་ཚོང་པས་རིན་པོ་ཆེ་ང་ལ་བྱིན་གྱིས། ཁྱེད་རྣམས་ལ་མ་བྱིན་ནོ། །དེར་དགེ་སློང་རྣམས་ཀྱིས་ཡང་བསྒྱུར་གྱིས་གནད་བཀྲོལ་བ་ན། དེ་ཁྲོས་ནས་ཁྱེད་རྣམས་སྐྱག་པ་ཟའམ། རིན་པོ་ཆེ་ནི་ངའི་ཡིན་ནོ་ཞེས་སྨྲས་པ་དང་། དགེ་འདུན་རྣམས་ཀྱང་སོ་སོར་གྱེས་སོ། །དེ་ལྟར་ལས་བྱེད་པ་དེ་དགེ་འདུན་ལ་ངན་སེམས་ཀྱིས་ཚིག་ངན་སྨྲས་པས། ཚེ་འཕོས་ནས་མནར་མེད་པའི་སེམས་ཅན་དམྱལ་བ་ཆེན་པོར་ལྷུང་སྟེ་ངན་སྐྱུགས་ཀྱི་ནང་ན་བསྐལ་པ་དགུ་བཅུ་རྩ་གཅིག་གི་བར་འདྲེའོ། །དེ་ལས་ཐར་ནས་གནས་འདིར་ངན་སྐྱུགས་ཀྱི་ཁུང་བར་སྐྱེས་ནས། སྔོན་འདས་པའི་སངས་རྒྱས་གཙུག་ཏོར་ཅན་གྱིས་ཀྱང་དགེ་སློང་གི་དགེ་འདུན་དང་བཅས་པ་འདིར་གཤེགས་ནས་ཉེ་གནས་རྣམས་ལ་སྔོན་གྱི་ལས་གྱུར་པ་བསྟན་ཏེ། དེ་ནས། སངས་རྒྱས་ཐམས་ཅད་སྐྱོབ་ཀྱང་དགེ་སློང་གི་དགེ་འདུན་དང་བཅས་ཏེ་འདིར་གཤེགས་ནས་སྔོན་གྱི་ལས་གྱུར་པ་བསྟན་ཏོ། །དེ་ནས་ཚེ་འཕོས་ཏེ་ཕྱིར་ཡང་སེམས་ཅན་དམྱལ་བར་སྐྱེས་ཏེ། ལོ་ཁྲི་ཕྲག་གྲངས་མེད་པ་ཞིག་ཏུ་སྡུག་བསྔལ་མྱོང་ནས་ཕྱིར་ཡང་ཁུང་འདིར་སྐྱེས་སོ། །དེའི་འོག་ཏུ་སངས་རྒྱས་ལོག་པར་དད་སེལ་དང་། གསེར་ཐུབ་དང་། འོད་སྲུང་གིས་ཀྱང་ཉེ་གནས་རྣམས་དང་བཅས་འདིར་གཤེགས་ཏེ་སྔོན་གྱི་ལོ་རྒྱུས་བསྟན་ཏོ། །ད་སངས་རྒྱས་བདུན་པོའི་ཐ་མ་སངས་རྒྱས་ཤཱཀྱ་ཐུབ་པ་ངས་ཀྱང་ཁྱེད་ལ་འདིར་སྲིན་བུ་བསྟན་ཏེ། དེ་བཞིན་དུ་བསྐལ་པ་བཟང་པོའི་སངས་རྒྱས་སྟོང་པོ་ཉེ་གནས་དང་བཅས་ཏེ། འདིར་གཤེགས་ནས་སྲིན་བུ་འདིས་སྔོན་ཅི་ལྟར་བྱས་པའི་ལོ་རྒྱུས་སྟོན་པར་འགྱུར་རོ། །ཞེས་གསུང་པས་འཁོར་རྣམས་ཀྱིས་ཐོས་ནས་ལུས་ཀྱི་བ་སྤུ་ཀུན་ལངས་ནས། སོ་སོ་ནས་ལུས་དང་ངག་དང་ཡིད་ཀྱི་ལས་ཤིན་ཏུ་སྲུང་བར་གྱུར་ཏོ། །འདིས་ནི་འཕགས་པ་ལ་ངན་སེམས་ཀྱིས་མི་སྙན་པ་བརྗོད་པ་དང་། དགེ་འདུན་གྱི་སྤྱི་རྫས་མ་བྱིན་པར་ལེན་པ་སོགས་ཀྱི་ཉེས་དམིགས་བསྟན་པ་ཡིན་ནོ། །