ངག་བག་མེད་པའི་རྣམ་སྨིན་དང་། རབ་ཏུ་བྱུང་བ་དང་ཆོས་ཐོས་པའི་ཕན་ཡོན་སོགས་བསྟན་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། འཕགས་པ་ཤཱ་རིའི་བུའི་ཉིན་མཚན་དུས་གསུམ་དུ་ལྷ་ཡི་མིག་གིས་གཟིགས་ནས། གང་འདུལ་བའི་བསྐལ་པ་ཡོད་པ་དེར་གཤེགས་པར་མཛད་པ་ལས། ཚོང་པ་ཞིག་ཡུལ་གཞན་དུ་འགྲོ་བའི་ཕྱིི་ལ་ཁྱི་ཞིག་ཁྲིད་ཡོད་བ་དེས་ཤ་བརྐུས་པས། ཚོང་པ་དེ་ཁྲོས་ཏེ་ཁྱི་དེའི་རྐང་པ་བཅག་ནས་ས་སྟོང་ཞིག་ཏུ་བོར་ཏེ་སོང་བས་ཤིན་ཏུ་ཉམ་ཐག་པར་མཐོང་ནས། གྲོང་དུ་བསོད་སྙོམས་བསླངས་ནས་རྫུ་འཕྲུལ་གྱིས་ནམ་མཁའ་ལ་འཕུར་ཏེ། ཁྱིའི་གམ་དུ་བྱོན་ནས་དེ་ལ་ཁ་ཟས་བྱིན་ཅིང་ཆོས་བསྟན་པས་ཁྱི་དེ་ལྷག་པར་དགའ་བཞིན་ཚེ་འཕོས་པས། མཉན་ཡོད་དུ་བྲམ་ཟེ་ཞིག་གི་བུར་སྐྱེས་ཏེ་མིང་ཀྱུན་ཏེ་ཞེས་པར་བཏགས་སོ། །དུས་གཞན་ཞིག་ན་བྲམ་ཟེ་དེའི་སྒོར་འཕགས་པ་ཤཱ་རིའི་བུ་གཅིག་པུར་བསོད་སྙོམས་ལ་བྱོན་པས། བྲམ་ཟེ་དེས་ཅིའི་ཕྱིར་གཅིག་པུར་འགྲོ་བར་བྱེད་དགེ་ཚུལ་ཡང་མེད་དམ་ཞེས་དྲིས་པར་ཤཱ་རིའི་བུས་བདག་ལ་དགེ་ཚུལ་མེད་པས་གཅིག་པུར་འགྲོ་བ་ཡིན་ནོ། །ཁྱོད་ལ་བུ་ཞིག་ཡོད་ཟེར་ན་བདག་ལ་སྦྱིན་དུ་རུང་ངམ་མི་རུང་གསུངས་པས། བྲམ་ཟེས་བདག་ལ་བུ་ཀྱུན་ཏེ་བྱ་བ་ཞིག་ཡོད་དེ། ད་དུང་ཆུང་བས་ཅི་ཡང་མི་ནུས་པས། ནམ་སྐྱེས་པ་ན་སྦྱིན་ནོ། །ཞེས་སྨྲས་ཏེ། དེ་ནས་ལོ་བདུན་སོང་བ་ན་ཕུལ་ལོ། །ཤཱ་རིའི་བུས་ཁྱེའུ་ཀྱུན་ཏེ་ཁྲིད་ནས་དགེ་ཚུལ་དུ་བཅུག་སྟེ་ཆོས་བསྟན་པས་དགྲ་བཅོམ་པར་གྱུར་ཏེ། དེས་མངོན་ཤེས་ཀྱིས་བརྟགས་པས་ཚེ་སྔ་མ་ཁྱིར་གྱུར་ནས་འཕགས་པའི་དྲིན་གྱིས་མིའི་ལུས་དང་འབྲས་བུ་ཐོབ་པར་མཐོང་ནས། བདག་ནི་སློབ་དཔོན་འདིའི་དྲིན་གྱིས་སྡུག་བསྔལ་ལས་ཐར་བར་གྱུར་པས། ནམ་འཚོའི་བར་དུ་སློབ་དཔོན་གྱི་བསྙེན་བཀུར་བྱ་བའི་ཕྱིར་དགེ་ཚུལ་བྱའི་བསྙེན་པར་རྫོགས་པར་མི་བྱའོ་སྙམ་དུ་དམ་བཅས་སོ། །དེའི་ཚེ་ཀུན་དགའ་བོས་དགེ་ཚུལ་དེའི་སྔོན་གྱི་ལས་ཀྱི་རྒྱུ་ཞུས་པས། སྟོན་པས་བཀའ་སྩལ་པ། སྔོན་འདས་པའི་དུས་ན་སངས་རྒྱས་འོད་སྲུང་གི་ཚེ། དགེ་སློང་དག་ཅིག་མཉམ་དུ་འཁོད་པ་ལས། དགེ་སློང་གཞོན་ནུ་སྐད་སྙན་པ་ཞིག་ཡོད་པ་དེས་བསྟོད་པར་དང་དབྱངས་བྱས་པས་ཐམས་ཅད་མགུ་བར་གྱུར་པ་ན། དགེ་སློང་རྒན་པོ་སྐད་མི་སྙན་པ་ཞིག་གིས་ཀྱང་དབྱངས་བྱས་པས། དེ་ལ་དགེ་སློང་གཞོན་ནུ་དབྱངས་སྙན་དེས་ཁྱོད་ཀྱི་དབྱངས་ནི་ཁྱི་ཟུག་པ་དང་འདྲའོ་ཞེས་སྨྲས་པ་དང་། དགེ་སློང་རྒན་པོ་དེས་ཁྱོད་ཀྱིས་ང་ཤེས་སམ། བདག་ནི་དགྲ་བཅོམ་པ་སྟེ། དགེ་སྦྱོང་གི་ཡོན་ཏན་དང་ལྡན་ནོ་ཞེས་སྨྲས་པས། དགེ་སློང་གཞོན་ནུ་དེ་འཇིགས་ཤིང་སྐྲག་ནས་འགྱོད་ཚངས་བྱས་སོ། །ལས་དེས་སྐྱེ་བ་ལྔ་བརྒྱའི་བར་དུ་ཁྱིར་སྐྱེས་ཤིང་། རབ་ཏུ་བྱུང་སྟེ་ཚུལ་ཁྲིམས་བསྲུངས་པས། འདིར་ང་དང་ཕྲད་ནས་རྣམ་པར་གྲོལ་བར་གྱུར་ཏོ། །སྟོན་པས་དེ་སྐད་ཅེས་གསུངས་པས། ཀུན་དགའ་བོ་ལ་སོགས་པ་འཁོར་མང་པོ་རྣམས་རྗེས་སུ་ཡི་རངས་ནས་མངོན་པར་བསྟོད་དོ། །འདིས་ནི་ངག་བག་མེད་པའི་རྣམ་སྨིན་དང་། རབ་ཏུ་བྱུང་བ་དང་ཆོས་ཐོས་པའི་ཕན་ཡོན་སོགས་བསྟན་པ་ཡིན་ནོ། །དེས་མདོ་སྡེ་མཛངས་བླུན་ནས་བྱུང་བའི་གཏམ་རྒྱུད་རྣམས་མདོར་བསྡུས་པའི་ཚུལ་གྱིས་མ་ཚང་བ་མེད་པར་བསྟན་ཟིན་ཏེ་མདོ་གཞན་ན་ལོ་རྒྱུས་འདི་དག་ལ་འདྲ་མིན་དང་རྒྱས་བསྡུས་ཅི་རིགས་འབྱུང་བ་ནི་མདོ་སྡེ་སོ་སོའི་དགོངས་པར་ཤེས་པར་བྱའོ།། །།