འདོད་པའི་ཉེས་དམིགས་དང་ཆོག་ཤེས་པའི་ཕན་ཡོན་ཀྱང་བསྟན་པ།
༈ ཡང་བཅོམ་ལྡན་འདས་སྔ་དྲོའི་དུས་ཀྱིས་ཚེ་གྲོོང་ཁྱེར་མཉན་ཡོད་དུ་བསོད་སྙོམ་ལ་ཕེབས་པའི་ཚེ། ཁྱིམ་བདག་གཅིག་གིས་རོ་བརྒྱ་དང་ལྡན་པའི་ལ་དུ་འགྲང་ཚད་གཅིག་ཕུལ་བ་ལ་བྲམ་ཟེའི་ཁྱེའུ་གཅིག་ཆགས་ནས། ཀྱེ་ག་ཏ་མ་བདག་ལ་ལ་དུ་དེ་བྱིན་ཅིག ཅེས་སྨྲས་པ་དང་། བཅོམ་ལྡན་འདས་ཀྱིས་ཁྱེའུ་གལ་ཏེ་ཁྱོད་ཀྱིས་འདི་སྐད་དུ་ལ་དུ་འདི་བདག་ལ་མི་དགོས་སོ་ཞེས་བྱས་ན་དེའི་འོག་ཏུ་ངས་སྦྱིན་ནོ་ཞེས་གསུངས་པས། ཁྱེའུས་ཀྱང་དེ་ལྟར་སྨྲས་ཏེ་ལ་དུ་སྩལ་ལོ། །དེ་ཁྱིམ་བདག་མགོན་མེད་ཟས་སྦྱིན་གྱིས་མཐོང་ནས། བཅོམ་ལྡན་འདས་ནི་བསོད་སྙོམས་གཞན་བཞེས་མི་སྲིད་དེ་དེ་ནི་གནས་མེད་ཅིང་སྐབས་མ་ཡིན་ནོ་སྙམ་དུ་རིག་ནས། བྲམ་ཟེའི་ཁྱེའུ་དེ་ལོགས་སུ་བཀར་ནས་དེ་ལ་ཀཱར་ཥ་པ་ཎ་ལྔ་བརྒྱ་བྱིན་ཏེ། ལ་དུ་དེ་བཅོམ་ལྡན་འདས་ལ་སླར་འབུལ་དུ་བཅུག་གོ །དེར་དགེ་སློང་རྣམས་ཐེ་ཚོམ་དུ་གྱུར་ནས་བཅོམ་ལྡན་འདས་ལ་གསོལ་པ་ན་བཀའ་སྩལ་པ། དགེ་སློང་དག་བྲམ་ཟེ་དེས་ཚེ་རབས་སྟོང་ཕྲག་དུ་མར་བླངས་པའི་འདུ་ཤེས་ཀུན་ཏུ་བསྟེན་ཅིང་བསྒོམས་ཏེ། མང་དུ་བྱས་ནས་འདི་རྟག་ཏུ་གཞན་འབའ་ཞིག་ལ་རེ་བར་གྱུར་པས་ན། ངས་འདི་ད་ལྟར་ལ་དུས་བྲིད་ནས་བླངས་པའི་འདུ་ཤེས་བཟློག་སྟེ། འདི་ཉིད་འདིའི་རབ་ཏུ་འབྱུང་བ་དང་། ཕུང་པོ་ཡོངས་སུ་སྤོང་བའི་རྒྱུར་འགྱུར་ཏེ་མ་འོངས་པའི་དུས་ན་ཡང་དག་པར་རྫོགས་པའི་སངས་རྒྱས་རི་བོ་ཞེས་བྱ་བ་ཞིག་འབྱུང་བར་འགྱུར་ཏེ། དེའི་དུས་སུ་བྲམ་ཟེ་འདིས་མིའི་ལུས་ཐོབ་ནས། རྒྱུ་འདི་ཁོ་ནས་རབ་ཏུ་བྱུང་སྟེ་དགྲ་བཅོམ་པ་ཉིད་མངོན་དུ་བྱེད་པར་འགྱུར་རོ་གསུངས། འདིས་ནི་འདོད་པའི་ཉེས་དམིགས་དང་ཆོག་ཤེས་པའི་ཕན་ཡོན་ཀྱང་བསྟན་པ་ཡིན་ནོ། །