སྟོན་པ་རྒྱལ་པོའི་ཁབ་ཏུ་བཞུགས་ཏེ་ཡུལ་ག་ཡར་གཤེགས་པ།

༈ ཡང་སྟོན་པ་རྒྱལ་པོའི་ཁབ་ཏུ་བཞུགས་ཏེ་ཡུལ་ག་ཡར་གཤེགས་པ་ན། ཆམ་པས་བསྙུན་ནས་སྨན་པའི་རྒྱལ་པོ་འཚོ་བྱེད་ཀྱིས་ལྕགས་མདའ་ཞེས་པའི་སྨན་མར་བཀོལ་ཏེ་ཕུལ་བ་ན། ལྷས་བྱིན་གྱིས་འགྲན་སེམས་ཀྱིས་མང་དུ་བསླངས་ནས་ཟོས་པ་མ་ཞུ་སྟེ་ལྟོ་ནད་ཀྱིས་འཆི་ལ་ཐུག་པ་ན། ཀུན་དགའ་བོས་གསོལ་བ་བཏབ་ནས། བཅོམ་ལྡན་འདས་ཀྱིས་ཕྱག་ལྷས་བྱིན་གྱི་མགོར་བཞག་སྟེ། ལྷས་བྱིན་བདེན་པ་དང་བདེན་པའི་ཚིག་གང་གིས་གཤེད་མར་གྱུར་བའི་མི་ཁྱོད་དང་། སྒྲ་གཅན་ཟིན་ཐལ་མོ་སྦྱོར་བ་གཉིས་ལ་ངའི་སེམས་སྙོམས་ན། བདེན་པ་དང་བདེན་པའི་ཚིག་དེས་ཁྱེད་ཀྱི་ནད་མེད་པར་གྱུར་ཅིག ཅེས་བཀའ་སྩལ་པའི་མོད་ལ་ནད་ཞི་བར་གྱུར་ཏོ། །དེའི་ཚེ་ལྷས་བྱིན་གྱིས། དེ་ལ་ངོ་མཚར་ཆེ་རྒྱུ་ཅི་ཡོད་དེ། གལ་ཏེ་འདིས་སྨན་དཔྱད་མ་བསླབས་སུ་ཟིན་ན། འདི་ཇི་ལྟར་འཁོར་གྱི་ཚོགས་འདི་སྙེད་འཆོས་ནུས་ཞེས་སྨྲས་ནས། བཅོམ་ལྡན་འདས་དགྲོང་བའི་ཐབས་འབའ་ཞིག་ཤོམ་མོ། །དེ་དགེ་སློང་རྣམས་ཀྱིས་ཚོར་ནས་བཅོམ་ལྡན་འདས་ལ་གསོལ་པ་དང་། བཅོམ་ལྡན་འདས་ཀྱིས། ད་ལྟར་འབའ་ཞིག་མ་ཡིན་ཏེ། འདས་པའི་དུས་ནའང་འདིས་ཇི་ལྟར་བྱས་པ་མི་ཤེས་པ་དང་། བྱས་པ་མི་གཟོ་བ་དང་། བྱས་པ་ཆུད་གཟོན་པར་གྱུར་པ་དེ་ཉོན་ཅིག སྔོན་རི་ཁྲོད་ཀྱི་གྲོང་ཞིག་ན་མི་དབུལ་པོ་ཞིག་ཡོད་པ་རི་ལ་ཤིང་འཐུ་རུ་སོང་བ་དང་། ཡུལ་ངན་བྱུང་ནས་བྲག་ཕུག་ཆེན་པོ་ཞིག་གི་ནང་དུ་སོང་ངོ་། །དེའི་ཚེ་བྱང་ཆུབ་སེམས་དཔའ་དོམ་དུ་སྐྱེས་པར་གྱུར་ཏེ། དེར་ཡང་ལུས་ཀྱི་ལོག་པར་ལྟུང་དུ་ཟིན་ཀྱང་སེམས་ཀྱིས་ལོག་པ་ལྟུང་བར་མ་གྱུར་ནས། བྱམས་པ་དང་སྙིང་རྗེའི་སེམས་དང་ལྡན་ཞིང་གཞན་ལ་མི་འཚེ་བས་རྩ་བ་དང་འབྲས་བུས་འཚོ་བར་བྱེད་དོ། །དེ་ས་ཕུག་དེར་རྩ་བ་དང་འབྲས་བུ་བསགས་ནས་ལྷགས་པས་ཉེན་པའི་ཚེ་དེའི་ནང་དུ་ཞུགས་ཏེ་གནས་པ་དེ་མི་ཕུག་ཏུ་སོང་བ་དེས་མཐོང་ནས་ཤིན་ཏུ་སྐྲག་པར་གྱུར་པ་ན། དེ་དོམ་དེ་ཉིད་ཀྱིས་མཐོང་ནས་དེ་ལ་སྙིང་བརྩེ་བའི་ཕྱིར་མིའི་སྐད་དུ། ཁྱོད་ང་ལ་འཇིགས་མི་དགོས་སོ་ཞེས་སྨྲས་ནས་མི་དེ་ལུས་ཀྱིས་བསྐྱབས་ཏེ། རྩ་བ་དང་འབྲས་བུ་དག་བྱིན་ནས། ཞག་བདུན་གྱི་བར་དུ་བསྐྱངས་ནས་ཡུལ་ངན་སངས་བ་ན། མི་དེ་ལ། ཁྱོད་ཁྱིམ་དུ་སོང་ལ་ང་འདི་ན་འདུག་ཅེས་སུ་ལའང་མ་སྨྲ་ཞིག་ཅེས་སྨྲས་ཏེ་ཕྱིར་བསྐྱལ་ལོ། །དེ་ནས་དེས་ཤིང་ཁུར་ཏེ་ཕྱིར་འགྲོ་བའི་ལམ་ཏུ་རྔོན་པ་གཉིས་འོང་བ་དང་ཕྲད་ནས་གཏམ་བྱས་ཏེ། དེ་གཉིས་ཀྱིས་ཤ་ཡི་སྐལ་བ་སྦྱིན་ཆད་བྱས་ཏེ་མི་དེས་དེ་གཉིས་ཁྲིད་དེ། དོམ་དེ་ཕུག་ན་འདུག་པ་བསྟན་པས་དེ་གཉིས་ཀྱིས་དུག་མདས་བསྣུན་ཏེ་བསད་ཅིང་དེའི་ཚེ་དོམ་གྱིས། རི་སུལ་སྟུག་པོར་གནས་པ་ན། །བདག་གིས་སུ་ཡི་ཅི་ཞིག་ཕྲོགས། །རྩྭ་དང་རྩ་བ་འབྲས་བུ་ཟ། །སུ་ལའང་འཚེ་བར་མི་བྱེད་ན། །འཆི་བའི་དུས་ལ་བབ་ཟིན་གྱིས། །ད་ནི་བདག་གིས་ཅི་བྱར་མེད། །ལུས་ཅན་རྣམས་ཀྱི་སྐྱིད་སྡུག་ནི། །ལས་རྣམས་ལ་ནི་བརྟེན་པར་བྱ། །ཞེས་ཚིགས་སུ་བཅད་པའང་སྨྲས་སོ། །དེ་ནས་ཤ་ཆ་གསུམ་དུ་བསྒོས་ཏེ་མི་དེ་ལ་སྐལ་བ་བྱིན་པས་མི་དེས་ལག་པ་བརྐྱངས་ནས་ལེན་པར་རྩོམ་པ་ན་ལག་གཉིས་ས་ལ་ལྷུང་ངོ་། །དེ་མཐོང་བ་དང་རྔོན་པ་གཉིས་ཀྱིས། དེ་ཅི་ཞེས་དྲིས་པས། མི་དེས་འདིས་ང་ཞག་བདུན་གྱི་བར་དུ་ཡུལ་ངན་བྱུང་བའི་ཚེ་ལུས་ཀྱིས་བསྐྱབས་ཏེ། རྩ་བ་དང་འབྲས་བུ་ཡོངས་སུ་བསྐྱང་བ་ལས། དེ་ལ་བདག་གིས་བྱས་པ་མི་གཟོ་བ་བྱས་པ་དེས་ན་བདག་ལ་འབྲས་བུ་འདི་འོངས་སོ་ཞེས་སྨྲས་པས། དེ་གཉིས་མི་དགའ་བར་གྱུར་ཏེ། འདི་ནི་སེམས་ཅན་ཕལ་པ་ཞིག་མིན་ངེས་ཀྱི་འདིའི་ཤ་བཟའ་བར་མི་ནུས་ཏེ་མཆོད་པའི་འོས་ཡིན་ནོ་སྙམ་སྟེ་ཤ་དེ་ཁྱེར་ནས་གཙུག་ལག་ཁང་ཞིག་ཏུ་ཕྱིན་ཏེ་དགེ་འདུན་རྣམས་ལ་ཕུལ་ལོ། །དེ་དགྲ་བཅོམ་པ་ཞིག་གིས་མཐོང་ནས་སྐལ་བ་བཟང་པོའི་བྱང་ཆུབ་སེམས་དཔར་ཤེས་ནས། རི་དྭགས་སྐལ་བ་ཆེན་པོ་འདི། །བྱང་ཆུབ་སེམས་དཔའ་གཉའ་ཤིང་འཛིན། །སྙིང་རྗེ་ཆེ་དང་ལྡན་པ་སྟེ། །འཇིག་རྟེན་གསུམ་ན་མཆོད་གནས་ཡིན། །ཞེས་སྨྲས་ཏེ། དགྲ་བཅོམ་པ་དེ་དང་། དགེ་སློང་དེ་རྣམས་དང་རྔོན་པའི་མི་དེ་གཉིས་བཅས་ཀྱིས་ཤ་དེ་དག་བསྲེགས་ནས་སྐུ་གདུང་གི་མཆོད་རྟེན་བྱས་ཏེ་མཆོད་པ་ཆེན་པོ་བྱས་སོ། །དེའི་དུས་ཀྱི་བྱང་ཆུབ་སེམས་དཔའ་ིསྤྱོད་པ་ལ་གནས་པའི་དོམ་དེ་ནི་ང་ཉིད་ཡིན་ནོ། །དེའི་ཚེ་མིར་གྱུར་པ་དེ་ནི་ལྷས་བྱིན་ཏེ། འདི་ནི་དེའི་ཚེ་ཡང་བྱས་པ་མི་ཤེས་པ་དང་བྱས་པ་མི་གཟོ་བ་དང་བྱས་པ་ཆུད་གཟོན་པར་གྱུར་ཏོ་གསུངས།