སྐྱབས་འགྲོ་སོགས་ཀྱི་ཕན་ཡོན་བསྟན་པ།
༈ གླེང་གཞི་མཉན་ཡོད་ན་བཞུགས་པའི་ཚེ། ཡུལ་དེའི་ཚོང་པ་ལྔ་བརྒྱ་ཙམ་ཟོང་ཁྱེར་ཏེ་ཡུལ་གཞན་དུ་ཕྱིན་པ་ན། དགོན་པའི་ནགས་ཁྲོད་གཅིག་ཏུ་གནོད་སྦྱིན་གདུག་པ་ཅན་གཞན་གྱི་སྲོག་འཕྲོག་པ་ཞིག་ཡོད་པ་དེས་རླུང་ནག་པོ་བཏང་ནས་ཚོང་པ་དེ་དག་གི་སྟེང་དུ་བརྒྱུགས་པས། དེ་དག་སྐྲག་སྟེ་རང་རང་འདོད་པའི་ལྷ་ལ་གསོལ་བ་བཏབ་པ་ན། དེ་ན་དགེ་བསྙེན་ཞིག་ཡོད་པ་དེས། ཀྱེ་སྐྱབས་མ་ཡིན་པ་འདི་རྣམས་ལ་སྐྱབས་བཙལ་ཏེ་ཅི་རུང། བཅོམ་ལྡན་འདས་ལ་སྐྱབས་སུ་སོང་དང་དེས་འཇིགས་པ་ཐམས་ཅད་ལས་ཡོངས་སུ་སྐྱོབ་པར་འགྱུར་རོ་སྨྲས་པས། ཐམས་ཅད་ཀྱིས་བཅོམ་ལྡན་འདས་ལ་སྐྱབས་སུ་སོང་ཞིང་མཚན་བརྗོད་དེ་ཕྱག་བྱས་སོ། །དེའི་ཚེ་བཅོམ་ལྡན་འདས་ཀྱིས་དེ་དག་འདུལ་བའི་དུས་ལ་བབ་པར་གཟིགས་ནས། ཕྱག་གླང་པོ་ཆེའི་སྣ་ལྟ་བུ་བརྐྱངས་ཏེ། ཚོང་པ་ལྔ་བརྒྱ་པོ་དེ་དག་ཟོང་དང་བཅས་པ་དགོན་པའི་ནགས་ཁྲོད་དེ་ནས་བླངས་ཏེ་མཉན་དུ་ཡོད་པ་ནས་ཧ་ཅང་མི་རིང་བ་ཞིག་ཏུ་བཞག་གོ །ཚོང་པ་རྣམས་ཀྱིས་དེ་ལྟར་གྱུར་པ་མཐོང་ནས་ཤིན་ཏུ་དགའ་སྟེ་བཅོམ་ལྡན་འདས་ཀྱི་སྤྱན་སྔར་ཕྱིན་པ་དང་། དེ་དག་གི་བསམ་པ་དང་བག་ལ་ཉལ་ཐུགས་སུ་ཆུད་ནས་ཆོས་བསྟན་པས་སྟན་དེ་ཉིད་དུ་བདེན་པ་མཐོང་ཞིང་། དེའི་རྗེས་སུ་སྟོན་པས་ཚུར་ཤོག་གིས་རབ་ཏུ་བྱུང་སྟེ་དགྲ་བཅོམ་པ་མངོན་དུ་བྱས་སོ། །དེའི་ཚེ་དགེ་སློང་རྣམས་ངོ་མཚར་དུ་གྱུར་པ་ལ་བཅོམ་ལྡན་འདས་ཀྱིས་ད་ལྟར་འབའ་ཞིག་ཏུ་མ་ཟད་འདས་པའི་དུས་ནའང་ཚོང་པ་ལྔ་བརྒྱ་པོ་འདི་འཇིགས་པ་ཆེན་པོ་ལས་བསྐྱབས་ནས། བསམ་གཏན་གྱི་བདེ་བ་ལ་བཀོད་པར་བྱས་པ་ཡིན་ཏེ། ཚོང་པ་ལྔ་བརྒྱ་པོ་འདི་དག་སྔར་ཡང་ཚོང་པར་གྱུར་ཏེ་ལམ་དུ་ཆས་པ་ན། ནགས་ཁྲོད་དུ་གནོད་སྦྱིན་གདུག་པ་ཅན་གྱིས་སྲོག་ལ་རྒོལ་བ་ན། བཅོམ་ལྡན་འདས་ཉིད་དྲང་སྲོང་མངོན་ཤེས་ལྔ་དང་ལྡན་ཞིང་རྫུ་འཕྲུལ་དང་མཐུ་ཆེ་བ་ཞིག་ཏུ་གྱུར་ཏེ་དེས་རྫུ་འཕྲུལ་གྱིས་བླངས་ཤིང་བསྐྱབས་པས་དེ་དག་དགའ་ནས་དྲང་སྲོང་གི་ཐད་དུ་རབ་ཏུ་བྱུང་སྟེ་ཚངས་པར་སྤྱོད་པ་སྤྱད་པས་བསམ་གཏན་བཞི་དང་མངོན་ཤེས་ལྔ་བསྐྱེད་དོ། །གཞན་ཡང་ཚོང་པ་ལྔ་བརྒྱ་པོ་འདི་དག་སངས་རྒྱས་འོད་སྲུང་གི་བསྟན་པ་ལ་ཚངས་པར་སྤྱད་ནས་འཆི་ཁར་སྨོན་ལམ་བཏབ་པས་ད་ལྟར་དགྲ་བཅོམ་པའི་བར་དུ་གྱུར་པར་གསུངས་སོ། །འདིས་ནི་སྐྱབས་འགྲོ་སོགས་ཀྱི་ཕན་ཡོན་བསྟན་ཏོོ། །