འདུ་འཛིའི་ཉེས་དམིགས་སོགས་བསྟན་པ།
༈ གླེང་གཞི་མཉན་ཡོད་ན་བཞུགས་སོ། །དེའི་ཚེ་གྲོང་ཁྱེར་དེ་ན་ཁྱིམ་བདག་ཕྱུག་པོ་རྣམ་ཐོས་བུའི་ནོར་དང་ལྡན་པ་ཞིག་གི་ཆུང་མ་ལ་བུ་ཆགས་པར་གྱུར་ཏེ། དེ་ཉིད་འཕགས་པ་མ་འགགས་པས་རང་གི་འདུལ་སྐལ་དུ་གཟིགས་ཏེ་དེའི་ཁྱིམ་དུ་གཅིག་པུར་བྱོན་པས། ཁྱིམ་བདག་དེས་ཆུང་མའི་ལྟོ་ན་གནས་པ་དེ་བུར་གྱུར་ན་འཕགས་པའི་ཞབས་འབྲིང་དུ་འབུལ་བར་ཞུས་སོ། །དེ་ཟླ་དུས་ཚང་བ་ན་ཁྱེའུ་གཟུགས་བཟང་ཞིང་ལྟ་ན་སྡུག་པ་ཞིག་བཙས་ཏེ། དེ་མངལ་ན་གནས་པའི་ཚེ་མ་དེ་གཅིག་པུར་དབེན་པ་ལ་དགའ་བར་གྱུར་པས་ཁྱེའུའི་མིང་དགོན་པ་བ་ཞེས་བཏགས་སོ། །དེ་ནས་ཁྱེའུ་དེ་འགྲོ་ནུས་པར་གྱུར་པ་དང་། རང་བཞིན་གྱིས་སྔོན་གྱི་ཚེ་རབས་དྲན་པར་གྱུར་ཏེ། སྔོན་ཆད་འདུ་འཛིའི་ཉེས་པས་སྡུག་བསྔལ་ཆེན་པོ་མྱོང་བར་དྲན་ནས་དབེན་པའི་ཕྱོགས་འབའ་ཞིག་ཏུ་གནས་པར་བྱེད་དོ། །ཕྱིས་ཞིག་ན་འཕགས་པ་མ་འགགས་པས་ཁྱིམ་བདག་ལ་སྔར་གྱི་དམ་བཅའ་བསྐུལ་ནས་བསླང་ཞིང་། ཁྱེའུས་ཀྱང་དགའ་བཞིན་དུ་མ་འགགས་པའི་ཕྱིར་འབྲངས་ཏེ་གཙུག་ལག་ཁང་དུ་ཕྱིན་ནས། དེར་རབ་ཏུ་བྱུང་ཞིང་བསྙེན་པར་རྫོགས་ཏེ་བརྩོན་པས་དགྲ་བཅོམ་པའི་གོ་འཕང་ཐོབ་ནས། དེ་སུ་དང་ཡང་མི་ཕྲད་པར་དགོན་པ་དང་ནགས་ཁྲོད་དང་བས་མཐའ་འབའ་ཞིག་ཏུ་གནས་པར་བྱེད་དོ། །དེར་དགེ་སློང་རྣམས་ཀྱིས་དེའི་རྒྱུ་ཞུས་པས། བཅོམ་ལྡན་འདས་ཀྱིས། འདི་ཉིད་སྔོན་སངས་རྒྱས་འོད་སྲུང་གི་དུས་སུ་རབ་ཏུ་བྱུང་ཞིང་དགེ་སློང་ཞལ་ཏ་བྱེད་པ་འདུ་འཛི་མང་བར་གྱུར་ནས། འདུ་འཛིའི་ཉེས་པ་དེས་ཚུལ་ཁྲིམས་འཆལ་ཞིང་། དཀོན་མཆོག་གི་དཀོར་ལ་བག་མེད་པར་སྤྱད་པས་ལས་དེའི་རྒྱུའི་སྐྱེ་བ་ལྔ་བརྒྱ་ཡི་དྭགས་སུ་སྐྱེས་ཏེ་སྡུག་བསྔལ་བར་གྱུར་ཏེ། དེ་རྗེས་སུ་དྲན་པས་གཅིག་པུར་གནས་པར་དགའ་བར་གྱུར་ཞིང་དེའི་སྐབས་སུ་དབང་པོ་སྨིན་པར་བྱས་པས་ད་ལྟར་འབྲས་བུ་ཐོབ་པ་དང་། ཆོས་བཞིན་དུ་ཅུང་ཟད་གཅིག་ཞལ་ཏ་བྱས་པས་ལོངས་སྤྱོད་ཆེ་བའི་རིགས་སུ་སྐྱེས་པར་གསུངས། འདིས་ནི་འདུ་འཛིའི་ཉེས་དམིགས་སོགས་བསྟན་ཏོ། །