ཚུལ་ཁྲིམས་ཡང་དག་པར་བསྲུང་ཞིང་འཆི་ཁར་སྨོན་ལམ་བཏབ་པའི་འབྲས་བུ་བསྟན་པ།
༈ ཡང་གླེང་གཞི་མཉན་ཡོད་ན་བཞུགས་ཏེ། དེའི་ཚེ་དགོན་པའི་ནགས་ཁྲོད་ཅིག་ན་བཀོད་མའི་ཆུ་འཁྱིལ་བའི་མཚེའུ་ཞིག་ཀྱང་ཡོད་དེ། དེ་ན་དྲང་སྲོང་ལྔ་བརྒྱ་ཙམ་རྟེན་ཅིང་དཀའ་ཐུབ་སྤྱོད་དོ། །དེ་ནས་བཅོམ་ལྡན་འདས་ཀྱིས་དེ་དག་འདུལ་བའི་དུས་ལ་བབ་པར་གཟིགས་ནས་མཉན་ཡོད་ནས་མི་སྣང་བར་གྱུར་ཏེ། ནགས་ཁྲོད་དེར་གཤེགས་པ་དང་། དྲང་སྲོང་ལྔ་བརྒྱ་པོས་མཐོང་ནས། དེ་དག་གིས། དགེ་སྦྱོང་ག་ཏ་མ་གཡེལ་བ་མང་དུ་ལེན་ཅིང་འཚོ་བ་སྤོང་བ་བཏང་བ་དེ་འདིར་འོངས་ཀྱིས། བདག་ཅག་གིས་ལག་བརྡས་སྤྱིལ་བོ་བསྟན་པ་མ་གཏོགས་པར་དེ་ལ་གཏམ་སྨྲ་བར་མི་བྱའོ། །ཞེས་སྨྲས་ཏེ་ཅང་མི་ཟེར་བར་འཁོད་དོ། །དེ་ནས་བཅོམ་ལྡན་འདས་དྲུང་དུ་བྱོན་ཏེ་ཐམས་ཅད་ལ་བཀའ་སྩལ་ཡང་ལག་བརྡས་སྤྱིལ་བོ་བསྟན་པ་ཙམ་ལས་ལན་མི་གསོལ་བར་གྱུར་པས། སྤྱིལ་བོའི་ནང་དུ་རྩྭ་བཏིང་བ་ལ་བཞུགས་ནས་དེ་དག་དྲང་བའི་ཕྱིར་བཀོད་མའི་ཆུ་འཁྱིལ་བའི་མཚེའུ་དེ་བསྐམ་པར་བྱིན་གྱིས་བརླབས་སོ། །དེ་ནས་དྲང་སྲོང་དག་གིས་དེ་མཐོང་ནས་མྱ་ངན་གྱིས་གདུང་སྟེ་ལྷ་ལ་གསོལ་པ་བཏབ་པས། ལྷས་གཟུགས་བསྟན་ཏེ། བཅོམ་ལྡན་འདས་ལ་སྐྱབས་སུ་འགྲོ་བར་བསྐུལ་བས་དེ་དག་དགའ་ནས་བཅོམ་ལྡན་འདས་ཀྱི་དྲུང་དུ་ཕྱིན་ནས་བཟོད་པར་གསོལ་ཞིང་ཆོས་མཉན་པའི་ཕྱིར་སྤྱན་སྔར་འདུག་པ་ན་དེ་དག་གི་བསམ་པ་དང་བག་ལ་ཉལ་སོགས་ཐུགས་སུ་ཆུད་ནས་དེ་དང་མཐུན་པའི་ཆོས་བསྟན་པས། དྲང་སྲོང་ལྔ་བརྒྱ་པོ་སྟན་ལ་འཁོད་བཞིན་དུ་བདེན་པ་རྟོགས་པའི་མོད་ལ་ཕྱིར་མི་འོང་གི་འབྲས་བུ་མངོན་དུ་བྱས་སོ། །དེ་ནས་དེ་དག་སྟོན་པས་ཚུར་ཤོག་གིས་བསྙེན་པར་རྫོགས་ནས་ལུང་ཕོག་ཅིང་། དེ་དག་གིས་ཀྱང་བརྩོན་པས་དགྲ་བཅོམ་པའི་གོ་འཕང་ཐོབ་བོ། །དེར་བཅོམ་ལྡན་འདས་རྒྱལ་བྱེད་ཀྱི་ཚལ་དུ་གཤེགས་ཤིང་། དགེ་སློང་ལྔ་བརྒྱ་པོ་ནགས་ཁྲོད་དེར་འཁོད་པ་ལ་བྲམ་ཟེ་དང་ཁྱིམ་བདག་དད་པ་ཅན་རྣམས་ཀྱིས་ཐོས་ནས། དེར་གཙུག་ལག་ཁང་བརྩེགས་ཤིང་བསྙེན་བཀུར་བར་བྱས་སོ། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པས། འདི་རྣམས་སྔོན་སངས་རྒྱས་འོད་སྲུང་གི་བསྟན་པ་ལ་དགེ་སློང་དུ་གྱུར་ཏེ་ཚུལ་ཁྲིམས་ཡང་དག་པར་བསྲུང་ཞིང་འཆི་ཁར་སྨོན་ལམ་བཏབ་པའི་འབྲས་བུ་ཡིན་པར་གསུངས་སོ། །