ཚུལ་ཁྲིམས་བསྲུང་ཞིང་སྨོན་ལམ་བཏབ་པས་ད་ལྟར་དགྲ་བཅོམ་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་དེ་ན་བྲམ་ཟེ་རིགས་ཆེ་ཞིང་མཐོ་བ་རྣམ་ཐོས་བུའི་ནོར་དང་ལྡན་པ་ལུས་འཕགས་ཞེས་པ་དང་། དེའི་བུ་ལྷག་འཕགས་ཞེས་པ་རིགས་གནས་བཅྭོ་བརྒྱད་ལ་བྱང་ཞིང་གཞུང་གིས་རྩོད་པ་ཐམས་ཅད་ཚར་གཅོད་ནུས་པ་ཞིག་ཡོད་དོ། །དེའི་ཚེ་བྲམ་ཟེ་ལུས་འཕགས་ཀྱིས་མཆོད་སྦྱིན་བྱ་བར་འདོད་ནས་ཁྱུ་མཆོག་ལྔ་བརྒྱ་དང་། བ་ལང་དང་། མ་ཧེ་དང་། མ་ཧེ་མོ་དང་། བཞོན་པ་དང་། བེའུ་དང་། བེའུ་ཆུང་དང་། ར་དང་། ལུག་དང་། སྲོག་ཆགས་ཕྲ་མོ་རྣམས་ཀྱང་བསགས་ཏེ་སྡོང་པོ་ལ་བཏགས་ཤིང་གཞན་བཟའ་བཅའ་མང་པོའང་བཤམས། ཉི་འོག་གི་དགེ་སྦྱོང་དང་བྲམ་ཟེ་རྣམས་ཀྱང་བོས་ཏེ། དེའི་བསམ་པ་ལ། དགེ་སློང་ག་ཏ་མ་འདི་ཐམས་ཅད་མཁྱེན་པ་ཡིན་པས་འདིས་མི་མཁྱེན་པ་དང་ཐུགས་སུ་མི་ཆུད་པ་ཅི་ཡང་མེད་པས། བདག་གི་མཆོད་སྦྱིན་ཡང་ཡན་ལག་འགའ་ཙམ་གྱི་སྒོ་ནས་ཉམས་པར་གྱུར་ན་མི་རུང་གིས་འདི་ལ་ཡང་དྲི་བར་བྱའོ་སྙམ་ནས་འབྱོར་པ་ཆེན་པོ་དང་བཅས་པས་བཅོམ་ལྡན་འདས་ཀྱི་སྤྱན་སྔར་སོང་ནས་སྔར་གྱི་དོན་དེ་གསོལ་པ་ན། བཅོམ་ལྡན་འདས་ཀྱིས་དེ་ལས་བརྩམས་ནས་མཐུན་པའི་ཆོས་བསྟན་པས་བྲམ་ཟེ་ལུས་འཕགས་དང་ཁྱེའུ་ལྷག་འཕགས་གཉིས་སྟན་དེ་ལ་འཁོད་བཞིན་དུ་རྒྱུན་དུ་ཞུགས་པའི་འབྲས་བུ་ཐོབ་བོ། །དེ་ནས་ལྷག་འཕགས་ཀྱིས་སྨྲས་པ། ཕྱིན་ཆད་བདག་ཅག་བྲམ་ཟེ་རྣམས་ལ་སྟོན་མོ་མི་བགྱིད་དོ། །ལུས་འཕགས་ཀྱིས་དེ་སྐད་མ་ཟེར་ཅིག སངས་རྒྱས་ལ་སོགས་པའི་དགེ་སློང་གི་དགེ་འདུན་བཤོས་གསོལ་ཏེ། ཡོན་ཕུལ་བའི་འོག་ཏུ། དེའི་ལྷག་མ་ལས་བྲམ་ཟེ་ལ་ཡང་སྦྱིན་པར་བྱའོ། །དེ་ནས་དེས་ཀྱང་དེ་ལྟར་བྱའོ་ཞེས་སྨྲས་ནས་སངས་རྒྱས་འཁོར་དང་བཅས་པ་སང་གི་གདུགས་ཚོད་ལ་སྤྱན་དྲངས་ཤིང་། ཁྱིམ་དུ་ཕྱིན་པ་ན་ཁྱུ་མཆོག་ལ་སོགས་པའི་སྲོག་ཆགས་ཐམས་ཅད་ཀྱང་བདེ་བར་བཏང་ཞིང་། མཚན་མོ་ཞལ་ཟས་བཟང་པོ་དག་སྟ་གོན་བྱས་ཏེ། ནང་པར་གདན་ཁྲིའི་བཀོད་པ་སོགས་བཤམས་ནས་དུས་ལ་བབས་པ་ན་སངས་རྒྱས་འཁོར་དང་བཅས་པ་སྤྱན་དྲངས་ཤིང་། རང་གི་ལག་ནས་བཟའ་བཅའ་གཙང་མ་མང་པོ་བསྟབས་ཤིང་རས་ཟུང་རེའི་ན་བཟའ་ཡང་ཕུལ་ཏེ་ཆོས་ཉན་པ་ན། བཅོམ་ལྡན་འདས་ཀྱིས་ཀྱང་ཆོས་ཀྱི་གཏམ་ཡང་དག་པས་དགའ་བར་མཛད་ནས་སླར་གཤེགས་སོ། །དེ་ནས་མཆོད་སྦྱིན་གྱི་གནས་དེར་བྲམ་ཟེ་ཐམས་ཅད་ཁྲོས་ཏེ་འདི་སྐད་དོ། །ལྟོས་དང་བདག་ཅག་གི་ཕྱིར་མཆོད་སྦྱིན་བརྩམས་པ་ལས་དགེ་སྦྱོང་ག་ཏ་མ་ལ་སྦྱིན་ནོ་ཞེས་ཟེར་རོ། །དེར་བྲམ་ཟེ་ལུས་འཕགས་ཀྱིས། ཁྱེད་ལ་དགེ་སྦྱོང་ག་ཏ་མས་ཅི་གནང་། བདག་གིས་ཁྱེད་ཀྱི་ཡོན་བཤམས་པ་ནི་ཁྱེད་ལ་སྦྱིན་པར་བྱའོ་ཞེས་སྨྲས་ཀྱང་མ་ཉན་ཏེ། ངེད་ལ་ཕྱིན་ཆད་ཁྱོད་ཀྱི་ཡོན་མི་དགོས་སོ་ཞེས་སྨྲས་ཏེ་གསོད་པར་བརྩམས་པ་ན། དེ་ཕ་སྤད་གཉིས་པོ་བྲོས་ཏེ་བཅོམ་ལྡན་འདས་ཀྱི་སྤྱན་སྔར་ཕྱིན་ནས་རབ་ཏུ་བྱུང་བས་གཉིས་ཀས་དགྲ་བཅོམ་པ་མངོན་དུ་བྱས་སོ། །དེར་དགེ་སློང་རྣམས་ཀྱིས་དེ་གཉིས་ཀྱི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་འོད་སྲུང་འཇིག་རྟེན་དུ་བྱོན་པའི་ཚེ་བྲམ་ཟེ་ཞིག་གིས་མཆོད་སྦྱིན་བྱ་བར་བརྩམས་པ་ལས། དེར་འཐབ་མོ་བྱུང་སྟེ་བྲམ་ཟེ་གཞན་ཞིག་ལ་མཚོན་བསྣུན་ཏེ་བསད་པས་གཞི་དེ་ལས་བྲམ་ཟེ་ཐམས་ཅད་ཁྲོས་ནས་དམོད་པས་གསོད་པར་གྲོས་པ་ན། དེ་ཕ་སྤད་བྲོས་ནས་སངས་རྒྱས་འོད་སྲུང་གི་སྤྱན་སྔར་རབ་ཏུ་བྱུང་ཞིང་། ཚེ་གཅིག་ཏུ་ཚངས་པར་སྤྱད་ནས་འཆི་ཁར་སྨོན་ལམ་བཏབ་སྟེ་དེའི་དུས་ཀྱི་བྲམ་ཟེ་ཕ་སྤད་ནི་ད་ལྟར་གྱི་འདི་གཉིས་ཏེ། དེའི་དུས་སུ་ཚུལ་ཁྲིམས་བསྲུང་ཞིང་སྨོན་ལམ་བཏབ་པས་ད་ལྟར་དགྲ་བཅོམ་པ་ཐོབ་བོ་གསུངས།