སྐྱབས་འགྲོ་དང་བསླབ་གཞི་བླངས་ནས་འཆི་ཀར་སྨོན་ལམ་བཏབ་པའི་འབྲས་བུ།

༈ ཡང་སྟོན་པ་རྒྱལ་པོའི་ཁབ་ན་བཞུགས་པའི་ཚེ། རི་ཁྲོད་ཅིག་ན་བྲམ་ཟེ་དབུལ་པོ་ཞིང་ལས་ཀྱིས་འཚོ་བ་ཞིག་ལ་བུ་འོད་སྲུང་ཞེས་བྱ་བ་ཞིག་ཡོད་པ་དེ་ཆེར་སྐྱེས་པ་ན། ཕ་དེས་ཞིང་ལས་བྱེད་པས་སྲོག་ཆགས་སྟོང་ཕྲག་དུ་མ་ཁ་འདོགས་པར་མཐོང་ནས་སེམས་སྐྱོ་སྟེ། སངས་རྒྱས་ཀྱི་སྤྱན་སྔར་རབ་ཏུ་བྱུང་འདོད་དེ་འོང་བའི་ལམ་དུ། གཅེར་བུ་པ་གཉེན་གྱི་བུ་དང་ཕྲད་པས། དགེ་སྦྱོང་ག་ཏ་མ་འདི་ཡིན་ནོ་སྙམ་སྟེ་དེའི་ཐད་དུ་རབ་ཏུ་བྱུང་བས་མིང་ཡང་གཅེར་བུ་པ་འོད་སྲུང་དང་རུས་གཅིག་པ་ཞེས་གྲགས་སོ། །དེ་ནས་ཕྱིས་ཞིག་ན་ཚེ་ཟད་པའི་རྟགས་མཐོང་ཏེ་ཞག་བདུན་ནས་འཆི་བར་ཤེས་ཏེ་མྱ་ངན་གྱིས་ནོན་པ་ན། དེ་ལ་དགའ་བའི་ལྷ་ཞིག་གིས་བཅོམ་ལྡན་འདས་ལ་བལྟ་བར་བསྐུལ་བས། དེ་རྒྱལ་པོའི་ཁབ་ནས་བྱུང་སྟེ། འོད་མའི་ཚལ་གྱིས་ལོགས་སུ་ཆས་པ་ལས། ལམ་ཕྱེད་ཙམ་དུ་སླེབ་པ་ན། དགེ་སློང་རྣམས་ནི་ངོ་ཚ་ཤེས་ཤིང་ཁྲེལ་ཡོད་པ་ཡིན་ལ། བདག་ནི་གཅེར་བུར་འདུག་པས་དེ་དག་དང་མངོན་སུམ་དུ་ཕྲད་པར་འགྲོ་མི་ནུས་སོ་སྙམ་སྟེ། དེ་ཉིད་དུ་འདུག་པ་ན་བཅོམ་ལྡན་འདས་ཀྱིས་དེ་ཉིད་འདུལ་བའི་དུས་ལ་བབ་པར་དགོངས་ཏེ། དེར་གཤེགས་ནས་རྟེན་ཅིང་འབྲེལ་བར་འབྱུང་བའི་ཆོས་ཟབ་མོ་བསྟན་པས། དེས་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་ཏེ་སྐྱབས་འགྲོ་དང་བསླབ་གཞི་རྣམས་ཀྱང་བླངས་སོ། །དེ་ནས་མི་རིང་བར་བ་དྲུས་མ་ཞིག་གིས་བརྡུངས་ཏེ་ཚེ་འཕོས་པ་ལས། དེ་འཆི་ཀར་དབང་པོ་རྣམས་དྭངས་ཤིང་བཞིན་གྱིས་མདོག་ཡོངས་སུ་དག་ལ་པགས་པའི་མདོག་དཀར་པོར་འདུག་གོ །དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་ན་བཀའ་སྩལ་པ། དགེ་སློང་དག་རིགས་ཀྱི་བུ་དེ་ནི་ནོར་དུ་གྱུར་པ་ཡིན་ཏེ། དེས་ངའི་ཆོས་ཀྱི་རྗེས་སུ་མཐུན་པའི་ཆོས་མངོན་པར་རྟོགས་པས་ན། དེས་ན་ང་ལ་གནོད་པ་མ་བྱས་ཀྱིས་དགེ་སློང་དག་རིགས་ཀྱི་བུ་དེས་ནི་འདི་ལྟ་སྟེ་ཆོས་ལ་ལྷག་པར་བྱ་བ་བྱས་ནས། མྱ་ངན་ལས་འདས་ཀྱིས། དེའི་རུས་བུ་ལ་རུས་བུའི་མཆོད་པ་གྱིས་ཤིག ཅེས་མཆོག་ཏུ་ལུང་བསྟན་པས། རྒྱལ་པོའི་ཁབ་དེར་ལྷ་རྣམས་ཀྱི་གཅེར་བུ་བ་འོད་སྲུང་དང་རུས་གཅིག་པ་མྱ་ངན་ལ་འདས་སོ་ཞེས་བསྒྲགས་སོ། །དེ་ཐོས་པ་དང་མུ་སྟེགས་བྱེད་རྣམས་དགའ་སྟེ་ལམ་སྲང་རྣམས་སུ་བ་དན་སྒྲེང་ཞིང་། དགེ་སྦྱོང་ག་ཏ་མ་ན་རེ་ངའི་ཆོས་འདུལ་བ་འབའ་ཞིག་ལ་ཐར་པ་ཡོད་ཀྱི་གཞན་ལ་མེད་དོ་ཞེ་ན། ངེད་ཀྱི་ཚངས་པ་མཚུངས་པར་སྤྱོད་པ་འདི་ཡང་ཡོངས་སུ་མྱ་ངན་ལས་འདས་སོ་ཞེས་ལྷ་རྣམས་ཀྱིས་སྒྲོགས་པར་བྱེད་དོ་ཞེས་རུས་བུ་མཆོད་པར་སོང་བས་དགེ་སློང་རྣམས་དང་འདོད་པ་མི་མཐུན་པར་གྱུར་ནས། སུའི་ཚངས་པ་མཚུངས་པར་སྤྱོད་པ་ཡིན་པ་ལྷ་རྣམས་ལ་འདྲི་བར་བྱས་པས། ལྷ་རྣམས་ཀྱིས་འདི་ནི་དགེ་སློང་རྣམས་ཀྱི་ཚངས་པ་མཚུངས་པར་སྤྱོད་པ་ཡིན་ཏེ། འདིས་བཅོམ་ལྡན་འདས་ལས་ཆོས་རྟོགས་ནས་དེས་ན་བར་མ་དོར་མྱ་ངན་ལས་འདས་པར་གྱུར་ཏོ། །ཞེས་སྨྲས་པ་ཀུན་ཏུ་རྒྱུ་རྣམས་སྐྱེངས་པར་གྱུར་ཏོ། །དེར་དགེ་སློང་རྣམས་ཀྱིས་དེའི་རུས་བུ་ལ་མཆོད་པ་བྱས་ཤིང་། དེའི་ལས་ཀྱི་རྒྱུ་ཞུས་པས། སྔོན་སངས་རྒྱས་འོད་སྲུང་གི་བསྟན་པ་ལ། འདི་ཉིད་བྲམ་ཟེའི་ཁྱེའུ་ཞིག་ཏུ་གྱུར་ནས་སྐྱབས་འགྲོ་དང་བསླབ་གཞི་བླངས་ནས་འཆི་ཀར་སྨོན་ལམ་བཏབ་པའི་འབྲས་བུར་གསུངས་སོ། །