སྐྱབས་སུ་སོང་བའི་ཕན་ཡོན་ཀྱང་བསྟན་པ།

༈ ཡང་སྟོན་པ་མཉམ་ཡོད་ན་བཞུགས་པའི་ཚེ། ཡུལ་དེའི་ཁྱིམ་བདག་གི་ཁྱེའུ་ཞིག་བརྟག་པ་བརྒྱད་སོགས་ལ་བྱང་བར་གྱུར་ནས། ཕ་དེས་མཛའ་སྡེ་རྣམས་ཀྱི་ནང་དུ་བཏང་བ་ན། དེ་དག་ལྟ་བ་དང་འདོད་པ་མི་མཐུན་པར་སྨྲ་བ་ཤ་སྟག་སྟེ། རང་རང་གང་ལ་དགའ་བ་དེའི་བསྔགས་པ་བརྗོད་པར་བྱེད་པ་ལས། ཁྱིམ་བདག་གི་ཁྱེའུ་དེས་ཀུན་ལ་དྲིས་ཤིང་བརྟགས་པས་ཀུན་ལ་ཡིད་ཆེས་ཀྱི་གནས་སུ་རུང་བར་མ་མཐོང་ངོ་། །དེ་ནས་ཕྱི་ཞིག་ན་དགེ་བསྙེན་ཞིག་གིས་སངས་རྒྱས་ཀྱི་བསྔགས་པ་བརྗོད་པས་དེ་སྤྲོ་བར་གྱུར་ཏེ། སངས་རྒྱས་ཀྱི་སྤྱན་སྔར་ཕྱིན་ཅིང་ཆོས་ཉན་པས། དེ་སྦྱིན་པ་ལ་སྤྲོ་བར་གྱུར་ཀྱང་ཁྱིམ་ན་ཡོ་བྱད་ཀྱི་དངོས་པོ་ཅི་ཡང་མེད་པར་མཐོང་ནས། བདག་རྒྱ་མཚོ་ཆེན་པོའི་ནང་དུ་སོང་ནས་སྦྱིིན་པ་དང་བསོད་ནམས་བྱའོ་སྙམ་སྟེ་དེ་ཚོང་པ་ལྔ་བརྒྱ་ཙམ་དང་འགྲོགས་ནས་རྒྱ་མཚོ་ཆེན་པོའི་ནང་དུ་སོང་བས། རིན་པོ་ཆེའི་གླིང་དུ་ཕྱིན་ནས་དགོས་པ་གྲུབ་སྟེ་ཕྱིར་འོངས་པ་ན་རླུང་མི་བཟད་པ་བྱུང་ནས། གྲུ་བོ་ཆེ་དེ་རིའི་གཅོང་རོང་ཞིག་ཏུ་བཙངས་ཏེ། དུས་རླབས་ཕྱིར་ལོག་པ་དང་། ཚོང་པ་དེ་དག་འཇིགས་ཤིང་སྐྲག་ནས། བདག་ཅག་ནི་ཤི་ཟིན་ནོ་ཞེས་སྨྲེ་སྔགས་སྣ་ཚོགས་པ་འདོན་པར་བྱེད་པ་ན། དེད་དཔོན་དེས་མ་འཇིགས་ཤིག སངས་རྒྱས་བཅོམ་ལྡན་འདས་ལ་སྐྱབས་སུ་དེངས་ཤིག་དང་། དེས་བདག་ཅག་གི་སྐྱབས་མཛད་པར་འགྱུར་རོ་སྨྲས་པས། ཐམས་ཅད་ཀྱིས་སངས་རྒྱས་ལ་སྐྱབས་སུ་སོང་བས། དེའི་མོད་ལ་གྲུབ་ཕྱིར་ལྡོག་སྟེ་རྒྱ་མཚོའི་འགྲམ་དུ་བདེ་བར་ཕྱིན་ནོ། །དེར་མཐར་གྱིས་ཚོང་པ་རྣམས་མཉན་ཡོད་དུ་ཕྱིན་རྫས་རྣམས་བཞག་སྟེ། སངས་རྒྱས་བཅོམ་ལྡན་འདས་ཀྱི་ཞབས་ལ་ཕྱག་བྱེད་པར་ཕྱིན་པས། བཅོམ་ལྡན་འདས་ཀྱིས་དེ་དག་དང་མཐུན་པའི་ཆོས་བསྟན་པས་དེད་དཔོན་ལ་སོགས་པའི་ཚོང་པ་ལྔ་བརྒྱ་པོ་སྟན་དེ་ཉིད་ལ་འཁོད་བཞིན་དུ་བདེན་པ་མཐོང་ངོ་། །དེ་ནས་དེ་རྣམས་དགེ་སློང་ཚུར་ཤོག་གིས་བསྙེན་པར་རྫོགས་ནས་བརྩོན་པས་དགྲ་བཅོམ་པ་མངོན་དུ་བྱས་སོ། །དེར་དགེ་སློང་རྣམས་ངོ་མཚར་དུ་གྱུར་པ་ལ། བཅོམ་ལྡན་འདས་ཀྱིས། ད་ལྟར་འབའ་ཞིག་མ་ཡིན་ཏེ། སྔོན་བྱུང་བ་འདས་པའི་དུས་ནའང་། གྲོང་ཁྱེར་ཝཱ་སཱ་རཱ་ཎ་སཱི་ན་དཀའ་ཐུབ་ཀྱི་གནས་ཞིག་ན། དྲང་སྲོང་མངོན་པར་ཤེས་པ་ལྔ་དང་ལྡན་ཞིང་རྫུ་འཕྲུལ་དང་མཐུ་ཆེ་བ་ཞིག་གནས་ཏེ། དེ་ལ་སྐྱེ་བོ་མང་པོས་བཀུར་སྟི་བྱའོ། །དེ་ནས་ཡུལ་དེའི་ཚོང་པ་ལྔ་བརྒྱ་ཙམ་རྒྱ་མཚོར་སོང་བ་ལས། ཕྱིར་ལོག་པ་ན་རྒྱ་མཚོའི་དུས་རླབས་འཁྲུགས་པས་དེ་དག་ཤིན་ཏུ་འཇིགས་ཤིང་སྐྲག་པར་གྱུར་པའི་ཚེ། དེད་དཔོན་གྱིས་ཚོང་པ་གཞན་རྣམས་ལ་བསྐུལ་ནས་ཐམས་ཅད་དྲང་སྲོང་དེ་ལ་སྐྱབས་སུ་སོང་བས། དྲང་སྲོང་དེས་ཚོང་པ་ལྔ་བརྒྱ་པོ་རྫུ་འཕྲུལ་གྱིས་རྒྱ་མཚོ་ཆེན་པོའི་ནང་ནས་ཕྱུང་སྟེ། རང་གི་དཀའ་ཐུབ་ཀྱི་ཚལ་དུ་བཀོད་དོ། །དེ་ནས་ཚོང་པ་རྣམས་ཀྱིས་བདག་ཅག་གསོན་པོར་གྱུར་པ་འདི་དྲང་སྲོང་འདིའི་མཐུ་ཡིན་ནོ་སྙམ་ནས་སྦྱིན་པ་དག་བྱིན་ཅིང་བསོད་ནམས་དག་བྱས་ཏེ། དྲང་སྲོང་དེའི་ཐད་དུ་ཐམས་ཅད་རབ་ཏུ་བྱུང་བས་བསམ་གཏན་དང་མངོན་པར་ཤེས་པ་བསྐྱེད་དོ། །དེའི་དུས་ཀྱི་དྲང་སྲོང་བྱང་ཆུབ་སེམས་དཔའི་སྤྱོད་པ་ལ་གནས་པ་དེ་ང་ཡིན་ལ། དེད་དཔོན་དང་ཚོང་པར་གྱུར་པ་གང་ཡིན་པ་དེ་ནི་ད་ལྟར་གྱི་འདི་རྣམས་ཡིན་ཏེ། དེའི་ཚེ་ཡང་འཇིགས་པ་ཆེན་པོ་ལས་བསྐྱབས་ནས་བསམ་གཏན་དང་མངོན་ཤེས་ལ་བཀོད་དོ། །གཞན་ཡང་འདི་དག་སངས་རྒྱས་འོད་སྲུང་གི་བསྟན་པ་ལ་དགེ་སློང་དུ་གྱུར་ནས་དབང་པོ་ཡོངས་སུ་སྨིན་པར་བྱས་པས། ད་ལྟར་རྣམ་པར་གྲོལ་བར་གྱུར་ཏོ་གསུངས། འདིས་སྐྱབས་སུ་སོང་བའི་ཕན་ཡོན་ཀྱང་བསྟན་ནོ། །