ད་ལྟར་གྱི་ལས་ཀྱང་ཡོད་དེ་སེང་གེ་དེ་གཉིས་ང་ལ་སེམས་དགའ་བར་གྱུར་པས་ལྷའི་ཡུལ་དུ་སྐྱེས་པ།
༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་ཀོ་ས་ལ་དང་། ཡུལ་མ་ག་དྷཱའི་བར་མཚམས་ནས་སེང་གེ་མཐུ་རྩལ་ཆེ་བ་གཉིས་གནས་ཏེ། དེ་གཉིས་ཀྱིས་སྐྱེ་བོ་མང་བོ་ཁ་འདོགས་པར་བྱེད་པས་དེ་གཉིས་ཀྱི་བར་གྱི་ལམ་གྱི་རྒྱུ་འགྲུལ་ཐམས་ཅད་ཆད་དོ། །དེ་ནས་བཅོམ་ལྡན་འདས་ཀྱི་དེ་གཉིས་འདུལ་བའི་དུས་ལ་བབ་པར་མཁྱེན་ནས། ཀུན་དགའ་བོ་ལ་བཀའ་སྩལ་ནས་འཁོར་མང་པོ་དང་བཅས་ཏེ་ཡུལ་མ་ག་དྷཱའི་ཕྱོགས་སུ་ལྗོངས་རྒྱུ་ཞིང་ལམ་དེ་ནས་གཤེགས་པས། དེའི་ཚེ་སེང་གེ་གཉིས་པོ་ཕན་ཚུན་འཐབ་པར་ཆས་པ་ལས། བཅོམ་ལྡན་འདས་དེ་གཉིས་ཀྱི་མདུན་ལོགས་སུ་བཞུགས་པས། སེང་གེ་དེ་གཉིས་ཀྱིས་བཅོམ་ལྡན་འདས་མཐོང་བ་དང་རབ་ཏུ་དགའ་ནས་འཐབ་པའི་སེམས་ཞི་སྟེ་ཞབས་ལ་བཏུད་དེ་དྲུང་དུ་འཁོད་པ་དང་། བཀའ་སྩལ་པ། བཞིན་བཟང་ཁྱེད་གཉིས་སྔོན་གྱི་ཉེས་པར་སྤྱོད་པའི་ལས་ཀྱིས་དུད་འགྲོོའི་ནང་དུ་སྐྱེ་ན། ཁྱེད་གཉིས་ད་ལྟར་ཡང་དེ་འབའ་ཞིག་གི་རྒྱུ་བྱེད་ཅིང་འདུག་གོ །བཞིན་བཟང་གཉིས་འདི་ལྟར། འདུ་བྱེད་ཐམས་ཅད་ནི་མི་རྟག་གོ །ཆོས་ཐམས་ཅད་ནི་བདག་མེད་དོ། །མྱ་ངན་ལས་འདས་པ་ནི་ཞི་བའོ། །ང་ལ་སེམས་དགའ་བར་གྱིས་ཤིག་དང་། དུད་འགྲོའི་སྐྱེ་གནས་དང་བྲལ་བར་འགྱུར་ཡང་སྲིད་དོ། །ཞེས་བཀའ་བསྩལ་ནས་བཅོམ་ལྡན་འདས་གཤེགས་སོ། །སེང་གེ་དེ་གཉིས་ཀྱང་ཟས་བཅད་དེ། བཅོམ་ལྡན་འདས་ལ་མངོན་པར་དགའ་བཞིན་དུ་ཤི་འཕོས་ཏེ། ལྷའི་ནང་དུ་སྐྱེས་སོ། །དེར་གནས་གསུམ་ལ་བརྟགས་པས་བཅོམ་ལྡན་འདས་ལ་སེམས་དགའ་བས་དུད་འགྲོ་ལས་ལྷར་སྐྱེས་པ་མཐོང་ནས། ཞག་མ་ལོན་པར་བཅོམ་ལྡན་འདས་ཀྱི་སྤྱན་སྔར་འོངས་ནས་ཆོས་ཉན་པས་བདེན་པ་མཐོང་ནས་ཕྱིར་ལྷ་ཡུལ་དུ་སོང་ངོ་། །དེའི་ཚེ་རྒྱལ་བྱེད་ཀྱི་ཚལ་འོད་ཀྱི་སྣང་བ་ཆེན་པོས་ཁྱབ་པས། དགེ་སློང་རྣམས་ཀྱིས་དེའི་དོན་དྲིས་པ་ན། བཅོམ་ལྡན་འདས་ཀྱིས་ནགས་ཁྲོད་ཀྱི་སེང་གེ་གཉིས་ཀྱིས་ཆོས་ཐོས་ཤིང་དད་པའི་སེམས་ཀྱིས་ཚེ་འཕོས་ཏེ་ལྷ་ཡུལ་དུ་སྐྱེས་ནས་མདང་སུམ་འདིར་འོངས་ཏེ་བདེན་པ་མཐོང་ནས་རང་གནས་སུ་སོང་ངོ་གསུངས་པས་ཐམས་ཅད་ངོ་མཚར་དུ་གྱུར་པ་ན་བཀའ་སྩལ་པ། ད་ལྟར་འབའ་ཞིག་མ་ཡིན་ཏེ། སྔོན་འདས་པའི་དུས་ན་ཡུལ་ཀཱ་ཤིའི་རྒྱལ་པོ་ཚངས་སྦྱིན་དང་། བི་དེ་ཧིའི་རྒྱལ་པོ་དབང་ཆེན་སྡེ་གཉིས་མི་མཐུན་ཏེ་སྐྱེ་བོ་ཕལ་མོ་ཆེ་ཁ་འདོགས་པར་བྱེད་པ་ལ། དྲང་སྲོང་ཆེན་པོ་མངོན་ཤེས་ལྔ་དང་ལྡན་པ་ཞིག་གིས་རྫུ་འཕྲུལ་གྱིས་འདུམ་པར་མཛད་ཅིང་ཆོས་བསྟན་པས། རྒྱལ་པོ་དེ་གཉིས་ཀྱིས་རང་རང་གི་བུ་རྒྱལ་སར་བཞག་སྟེ། དྲང་སྲོང་གི་ཐད་དུ་གཉིས་ཀ་རབ་ཏུ་བྱུང་བས་བསམ་གཏན་བཞི་དང་མངོན་ཤེས་ལྔ་ཐོབ་བོ། །དེའི་དུས་ཀྱི་དྲང་སྲོང་བྱང་ཆུབ་སེམས་དཔའི་སྤྱོད་པ་ལ་གནས་པ་དེ་ནི་ད་ལྟར་ང་ཡིན་ལ། རྒྱལ་པོ་དེ་གཉིས་ནི་སེང་གེ་འདི་ཡིན་ཏེ། དེའི་ཚེ་ཡང་འདི་གཉིས་འཁོན་བྱང་བར་བྱས་ནས་བསམ་གཏན་གྱི་བདེ་བ་ལ་བཀོད་དོ་གསུངས། དེར་དེ་གཉིས་ཀྱི་ལས་ཀྱི་རྒྱུ་ཞུས་པས། འདི་ལ་འདས་པའི་ལས་ཀྱང་ཡོད་དེ། སྔོན་སངས་རྒྱས་འོད་སྲུང་གི་བསྟན་པ་ལ་འདི་གཉིས་དགེ་བསྙེན་དུ་གྱུར་ཏེ། དེའི་ཚེ་ཁྲོས་པའི་སེམས་ཀྱིས་སྐྱེ་བོ་མང་པོ་ལ་དུད་འགྲོ་ཞེས་པའི་ཚིག་སྨྲས་པས་དུད་འགྲོའི་སྐྱེ་གནས་སུ་གྱུར་ལ། སྐྱབས་འགྲོ་དང་བསླབ་གཞི་བསྲུངས་ཤིང་འཆི་ཁར་སྨོན་ལམ་བཏབ་པས་སངས་རྒྱས་དང་མཇལ་ཞིང་ཆོས་ཐོས་ནས་བདེན་པ་མཐོང་བར་གྱུར་ཏོ། །ད་ལྟར་གྱི་ལས་ཀྱང་ཡོད་དེ་སེང་གེ་དེ་གཉིས་ང་ལ་སེམས་དགའ་བར་གྱུར་པས་ལྷའི་ཡུལ་དུ་སྐྱེས་པའོ་གསུངས་སོ། །