སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ནས་ཚེ་གཅིག་ཏུ་ཚངས་པར་སྤྱོད་པ།

༈ ཡང་སྟོན་པ་རྒྱལ་པོའི་ཁབ་ན་བཞུགས་པའི་ཚེ། ཡུལ་ཡངས་པ་ཅན་ན་འཕོང་གི་སློབ་དཔོན་དབང་པོའི་མགོ་ཞེས་བྱ་བ་འཕོང་གི་རིག་པ་ཐམས་ཅད་ཀྱི་མཐར་ཕྱིན་པ་ཞིག་གནས་པ་དེས། ལིཙྪ་བི་གཞོན་ནུ་ལྔ་བརྒྱ་ལ་འཕོང་གི་རིག་པ་བསླབས་ནས། དེ་དག་ཀྱང་དེ་ལ་མཐར་ཕྱིན་པར་གྱུར་ཏེ་སྟོབས་པོ་ཆེར་གྱུར་ཏེ། དེ་ནས་ཕྱི་ཞིག་ན་རྒྱལ་པོའི་ཁབ་ན་གནས་པ་རྣམས་དང་། ཡངས་པ་ཅན་ན་གནས་པ་རྣམས་འགྲས་པར་གྱུར་ཏེ། རྒྱལ་པོའི་ཁབ་ན་གནས་པ་རྣམས་ཀྱིས་དཔུང་གི་ཚོགས་ཡན་ལག་བཞི་གོ་བཀོན་ནས་ཡངས་པ་ཅན་རྣམས་ཀྱི་སྟེང་དུ་དྲངས་པའི་ཚེ། འཕོང་གི་སློབ་དཔོན་དབང་པོའི་མགོ་འཁོར་ལྔ་བརྒྱ་དང་བཅས་པ་དེས་ལན་ལྔ་ཡི་བར་དུ་ཕམ་པར་བྱས་ཏེ་ཕྱིར་བདས་ནས་རྒྱལ་པོའི་ཁབ་ཀྱི་མི་རྣམས་ཁ་བཏགས་པས། འཕོང་གི་སློབ་དཔོན་དབང་པོའི་མགོས་མི་ལྔ་སྟོང་མདའ་འཕངས་ཏེ་བསད་དོ་ཞེས་ཐོག་ཐག་ཏུ་གྲགས་སོ། །དེ་ནས་རྒྱལ་པོའི་ཁབ་ཀྱི་མི་རྣམས་ཀྱིས་དབང་པོའི་མགོ་འདུལ་བར་གསོལ་པ་བཏབ་པས། བཅོམ་ལྡན་འདས་རྒྱལ་པོའི་ཁབ་ནས་མི་སྣང་བར་གྱུར་ནས། ཡངས་པ་ཅན་དུ་གཤེགས་ཏེ་ཕྱིན་ཆད་དབང་པོའི་མགོ་འཕོང་མི་ཤེས་པར་བྱིན་གྱིས་བརླབས་ནས་དེ་རྨོངས་པར་གྱུར་ཏེ། ཅིའི་ཕྱིར་བདག་འདི་ཁོ་ན་ལྟར་མ་རུངས་པར་གྱུར། དོན་འདི་བཅོམ་ལྡན་འདས་ལ་གསོལ་ལོ་སྙམ་ནས་དྲུང་དུ་ཕྱིན་ཏེ་ཞབས་ལ་ཕྱག་བྱས་ནས་ཆོས་མཉན་པའི་ཕྱིར་སྤྱན་སྔར་འདུག་པ་ན། བཅོམ་ལྡན་འདས་ཀྱིས་དེའི་ཁམས་དབང་མོས་པ་དང་འཚམ་པར་ཆོས་བསྟན་པས་དེ་ཉིད་སྟན་དེ་ལ་འཁོད་བཞིན་དུ་རྒྱུན་དུ་ཞུགས་པའི་འབྲས་བུ་ཐོབ་ནས་རབ་ཏུ་བྱུང་བར་གསོལ་པ་དང་། བཅོམ་ལྡན་འདས་ཀྱིས། ལིཙྪ་བི་ལྔ་བརྒྱ་པོ་རྣམས་ལ་སྒྲོན་ཅིག་གསུངས། དེ་ནས་དེ་ཡངས་པ་ཅན་དུ་སོང་ནས། དེ་ཐམས་ཅད་ལ་རབ་ཏུ་འབྱུང་བར་འདོད་པར་འགྱུར་བའི་ཆོས་བསྟན་ཅིང་དེ་རྣམས་ཀྱིས་ཀྱང་ཕ་མ་ལ་གནང་བ་ཞུས་ཏེ། དབང་པོའི་མགོ་དང་ལྷན་ཅིག་ཏུ་བཅོམ་ལྡན་འདས་ཀྱི་སྤྱན་སྔར་ཕྱིན་ནས་ཆོས་ཉན་པས། ལིཙྪ་བི་ལྔ་བརྒྱ་པོ་རྣམས་ཀྱང་སྟན་དེ་ཉིད་ལ་འཁོད་བཞིན་དུ་བདེན་པ་མཐོང་ནས། དེ་ཐམས་ཅད་རབ་ཏུ་བྱུང་ཞིང་བསྙེན་པར་རྫོགས་ནས་བརྩོན་པས་ཀུན་ཀྱང་དགྲ་བཅོམ་པ་མངོན་དུ་གྱུར་ཏོ། །དེའི་ཚེ་དགེ་སློང་རྣམས་ངོ་མཚར་དུ་གྱུར་པ་ལ། བཅོམ་ལྡན་འདས་ཀྱིས། ད་ལྟར་འབའ་ཞིག་མ་ཡིན་ཏེ། སྔོན་བྱུང་བ་འདས་པའི་དུས་ན་གྲོང་ཁྱེར་གྲུ་འཛིན་ཞེས་བྱ་བ་ན། རྒྱལ་པོ་དབང་ཆེན་ཞེས་བྱ་བའི་བུ་དབང་ཆེན་སྡེ་ཞེས་བྱ་བ་བཟོ་དང་སྒྱུ་རྩལ་གྱི་གནས་མཐའ་དག་ལ་བྱང་ཆུབ་པ་ཞིག་ཡོད་པ་དེས་བལྟས་པས། བློན་པོ་ལྔ་བརྒྱ་ཡོད་པ་ཀུན་གྱིས་ཆོས་མ་ཡིན་པས་རྒྱལ་སྲིད་བྱེད་པ་མཐོང་ནས་དེ་སྐྱོ་སྟེ་ཕ་མ་ལ་གནང་བ་ཞུས་ནས་དཀའ་ཐུབ་ཀྱིས་ནགས་སུ་སོང་བ་ལས། ཕྱིས་ཡབ་རྒྱལ་པོ་དེ་འདས་ནས། ཉི་འོག་གི་རྒྱལ་པོ་དག་གིས་ཡུལ་ལ་གནོད་པ་བྱེད་པ་ན། བློན་པོ་རྣམས་ཀྱིས་རྒྱལ་བུ་སྤྱན་དྲངས་ཏེ་རྒྱལ་སར་བཞུག་གོ་སྙམ་ནས། བློན་པོའི་མཆོག་གཅིག་ཡོད་པ་དེ་རྒྱལ་བུའི་དྲུང་དུ་སོང་སྟེ་དོན་དེ་གསོལ་བ་ན། རྒྱལ་བུའི་གལ་ཏེ་ཁྱོད་དགེ་བ་བཅུའི་ལས་ཀྱི་ལམ་ལ་གནས་པར་གྱུར་ན་དེའི་འོག་ཏུ་འོང་ངོ་གསུངས་པས། བློན་པོའི་མཆོག་དེས་རང་ཉིད་དགེ་བཅུའི་ལས་ཀྱི་ལམ་ལ་གནས་པར་བྱས་ཤིང་བློན་པོ་གཞན་ལྔ་བརྒྱ་པོ་དག་ཀྱང་དགེ་བཅུའི་ལམ་ལ་བཀོད་ནས། རྒྱལ་བུ་དེ་སྤྱན་དྲངས་ནས་རྒྱལ་སར་བཅུག་གོ དེ་ན་ཡུལ་ཁམས་མཐའ་དག་དགེ་བཅུའི་ལམ་ཡང་དག་པ་ལ་བཀོད་པར་བྱས་ཏེ། དེའི་དུས་ཀྱི་རྒྱལ་བུ་བྱང་ཆུབ་སེམས་དཔའི་སྤྱོད་པ་ལ་གནས་པ་དེ་ནི་ང་ཡིན་ལ། བློན་པོའི་མཆོག་དེ་ནི་དབང་པོའི་མགོ་དང་། བློན་པོ་ལྔ་བརྒྱ་པོ་ནི་ལིཙྪ་བི་ལྔ་བརྒྱ་པོ་འདི་ཡིན་ཏེ། དེའི་ཚེ་ཡང་ངས་དབང་པོའི་མགོ་འདི་ཁོ་ན་ལ་བརྟེན་ནས་བློན་པོ་ལྔ་བརྒྱ་པོ་དེ་དག་སྡིག་པ་ལས་བཟློགས་ཏེ། དགེ་བ་བཅུའི་ལས་ཀྱི་ལམ་ལ་བཀོད་དོ། །གཞན་ཡང་འདི་རྣམས་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ནས་ཚེ་གཅིག་ཏུ་ཚངས་པར་སྤྱོད་པ་སྤྱད་ནས་དབང་པོ་ཡོངས་སུ་སྨིན་པར་བྱས་པས་ད་ལྟར་རྣམ་པར་གྲོལ་ལོ་གསུངས།