གཡོ་སྒྱུས་གཞན་ཁྲིམས་ལ་སྦྱར་བའི་ཉེས་དམིགས་སོགས་ཀྱང་བསྟན་པ།

༈ ཡང་སྟོན་པ་མཉན་ཡོད་ན་བཞུགས་པའི་ཚེ། ཡུལ་ཤུར་པར་ཀའི་ཁྱིམ་བདག་གི་བུ་རྨོངས་པ་ཞེས་བྱ་བ་དེ་ཆེར་སྐྱེས་ནས་བརྟག་པ་བརྒྱད་སོགས་ལ་བྱང་བར་གྱུར་པ་ན། དེའི་ལུས་ལ་ཤུ་བ་ཡུངས་འབྲུ་ཙམ་ཤ་སྟག་གིས་ཁྱབ་པར་གྱུར་ཏེ། དེ་དག་ཀྱང་སྨིན་ཏེ་རྡོལ་ནས། དེའི་ལུས་རྨས་ཞུ་ལུབ་ཏུ་གཡོགས་པར་གྱུར་ཏེ། དེ་སྨན་པ་སོགས་ཀྱིས་གསོས་ཀྱང་སོས་པར་མ་ནུས་ཏེ་ལུས་ལ་རྣག་ཁྲག་འཛག་ཅིང་དྲི་ང་བར་གྱུར་པས། ལུས་ལ་སྤོས་བྱུགས་ཤིང་གོས་ཀྱིས་གཡོགས་པས་མིང་སྦས་པ་ཞེས་བྱར་ཐོགས་སོ། །དེ་ནས་དེའི་ཕ་མ་གཉིས་ཤི་བའི་འོག་ཏུ། དེས་ཞིང་ལས་དང་ཚོང་དང་གྲུའི་ལས་སོགས་ལས་གང་བྱས་ཀྱང་འཇིག་ཅིང་མི་འགྲུབ་པར་གྱུར་ཏེ། དེས་བསམ་པ། བདག་གི་ལས་བྱས་སོ་ཅོག་འཇིག་ཅིང་འགྲུབ་པར་མི་འགྱུར་ན། འཇིག་རྟེན་ན་མི་འཇིག་པའི་ཆོས་གང་འཇིག་པར་མི་འགྱུར་བ་འགའ་ལྟ་ཡོད་དམ་ཞེས་སྙམ་མོ། །དེའི་ཚེ་དེ་ལ་དགའ་བའི་ལྷ་ཞིག་གིས། ཁྱོད་བཅོམ་ལྡན་འདས་ཀྱི་དྲུང་དུ་སོང་ལ་དོན་འདི་དྲིས་དང་། དེས་ཁྱོད་ལ་ལུང་སྟོན་པར་འགྱུར་རོ་ཞེས་བསྐུལ་ཞིང་ཡུལ་དེའི་ཚོང་པ་དག་ལས་ཀྱང་སངས་རྒྱས་ཀྱི་བསྔགས་པ་ཐོས་པས་དེ་སྤྲོ་བར་གྱུར་ཏེ་མཉན་ཡོད་དུ་སོང་ནས། བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་ཆོས་མཉན་པ་ན། བཅོམ་ལྡན་འདས་ཀྱིས་དེ་དང་མཐུན་པའི་ཆོས་བསྟན་པས་རྒྱུན་ཞུགས་ཀྱི་འབྲས་བུ་ཐོབ་སྟེ། བདག་གི་ལུས་འདི་ལྟར་མ་གྱུར་ན་རབ་ཏུ་བྱུང་སྟེ་སྙམ་པའི་མོད་ལ་ལུས་ཀྱང་སྔ་མ་ལྟར་སོར་ཆུད་ནས་ཚུར་ཤོག་གིས་བསྙེན་པར་རྫོགས་པས་དགྲ་བཅོམ་པའི་གོ་འཕང་མངོན་དུ་བྱས་སོ། །དེ་ནས་དེ་མཉན་ཡོད་དུ་བསོད་སྙོམས་ལ་བྱོན་པ་ན་ལམ་དུ་བ་དྲུས་མས་བརྡུངས་ཏེ་བསད་ནས། དེ་འཆི་ཀར་དབང་པོ་རྣམས་རྣམ་པར་དྭངས་ཞིང་བཞིན་གྱིས་མདོག་ཡོངས་སུ་དག་པ་ལ་པགས་པའི་མདོག་དཀར་པོར་གྱུར་ཏོ། །དེ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་པ་ན་བཀའ་སྩལ་པ། རིགས་ཀྱི་བུ་དེ་ནི་ངའི་ཆོས་ཀྱི་རྗེས་སུ་མཐུན་པའི་ཆོས་རྟོགས་པས་ན་ནོར་དུ་གྱུར་པ་ཡིན། རིགས་ཀྱི་བུ་དེ་ནི་མྱ་ངན་ལས་འདས་ཀྱིས། འདིའི་རུས་བུ་ལ་རུས་བུའི་མཆོད་པ་གྱིས་ཤིག དེ་ནས་དགེ་སློང་རྣམས་ཀྱིས་རུས་བུ་ལ་མཆོད་པ་བྱས་ཤིང་མཆོད་རྟེན་བརྩེགས་ནས། བཅོམ་ལྡན་འདས་ལ་དེའི་ལས་ཀྱི་རྒྱུ་ཞུས་པས། བཅོམ་ལྡན་འདས་ཀྱིས་སྔོན་བྱུང་བ་འདས་པའི་དུས་ན། གྲོང་ཁྱེར་ཝཱ་རཱ་ཎ་སཱི་ན། རྒྱལ་པོ་ཚངས་པས་བྱིན་ཞེས་བྱ་བ་ཞིག་རྒྱལ་པོ་བྱེད་དེ། དེའི་ཚེ་གྲོང་དེའི་ཁྱིམ་བདག་གཉིས་འགྲས་ནས། གཅིག་དེས་རྒྱལ་པོ་ལ་ནོར་མང་པོ་ཕུལ་ཞིང་། གཅིག་དེས་རྒྱལ་པོ་ལ་བརྙས་པས་དེ་གཉིས་ཤགས་འགྱེད་པའི་ཚེ་གཡོ་ཤགས་ཀྱིས་ཕམ་པར་བྱས་ནས་ཁྱིམ་བདག་དེ་ལ་བྱིན་ཏེ། དེས་རང་གི་ཁྱིམ་དུ་ཁྲིད་ནས་ལྕག་གིས་ཞེན་པར་གཞུས་ནས། ལྕག་རྨ་དེ་དག་གི་ནང་དུ་དུག་གི་ཕྱེ་མ་གཏོར་ཏེ། དེའི་ལུས་དེ་ཤ་རྣག་བུ་བཞིན་དུ་གྱུར་ནས། དེ་ཕུ་ནུ་རྣམས་ཀྱིས་ནོར་མང་པོས་བསླུས་ཏེ་སྨན་པའི་ལུང་གིས་དེའི་ལུས་སོས་པར་བྱས་སོ། །དེ་སོས་པ་དང་སྐྱོ་བ་ཆེན་པོ་སྐྱེས་ཏེ་དཀའ་ཐུབ་ཀྱི་ནགས་སུ་སོང་བས་སློབ་དཔོན་ལ་མ་ལྟོས་པར་རང་བྱང་ཆུབ་ཀྱི་འབྲས་བུ་མངོན་དུ་མཛད་ནས། སྔར་གྱི་ཁྱིམ་བདག་དེ་ལ་ཐུགས་བརྩེ་བའི་སླད་དུ་དེར་སོང་ནས་ནམ་མཁའ་ལ་འབར་བ་ལ་སོགས་པའི་ཆོ་འཕྲུལ་བསྟན་པས། སྔར་གྱི་ཁྱིམ་བདག་དེ་ཡང་ཆེས་དད་པར་གྱུར་ཏེ་རྐང་པ་ལ་ཕྱག་བྱས་ནས་བཟོད་པར་གསོལ་ཞིང་། ཇི་སྲིད་འཚོ་ཡི་བར་ཡོ་བྱད་ཐམས་ཅད་ཀྱིས་བསྙེན་བཀུར་བྱས་ཤིང་སྐུ་མྱ་ངན་ལས་འདས་ནས་ཀྱང་སྐུ་གདུང་ལ་མཆོད་རྟེན་བརྩིགས་ཤིང་བཀུར་སྟི་ཆེན་པོ་བྱས་ཏེ་སྨོན་ལམ་བཏབ་བོ། །དེའི་དུས་ཀྱི་ཁྱིམ་བདག་དེ་ནི་རྨོངས་པའམ་སྦས་པ་འདི་ཉིད་ཡིན་ལ། དེའི་ཚེ་ཁྱིམ་བདག་དེའི་ལུས་ལ་ལྕག་གིས་བཞུས་ནས་དུག་གི་ཕྱེ་མས་གཏོར་བའི་ལས་དེའི་རྣམ་སྨིན་གྱིས་གང་དང་གང་དུ་སྐྱེས་པ་དེ་དང་དེར་ལུས་འདི་ལྟ་བུ་འབའ་ཞིག་ཏུ་གྱུར་ལ། ཕྱིས་རང་སངས་རྒྱས་ལ་བཀུར་སྟི་བྱས་ནས་སྨོན་ལམ་བཏབ་པའི་མཐུས་གང་དུ་སྐྱེས་པ་དེར་ཕྱུག་ཅིང་ནོར་མང་ལ་ལོངས་སྤྱོད་ཆེ་བའི་རིགས་སུ་སྐྱེས་ཤིང་། ད་ལྟར་རང་སངས་རྒྱས་བྱེ་བ་ཕྲག་འབུམ་བས་ཀྱང་ཆེས་ཁྱད་པར་དུ་འཕགས་པ་ང་ལྟ་བུ་མཉེས་པར་བྱས་ཤིང་རབ་ཏུ་བྱུང་བར་འདོད་པའི་མོད་ལ་ལུས་ཀྱི་བཀྲ་མི་ཤིས་པ་ཀུན་མེད་པར་གྱུར་ཏེ། རབ་ཏུ་བྱུང་ནས་དགྲ་བཅོམ་པའི་བར་དུ་གྱུར་ཅིང་། གཞན་ཡང་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་ཞིང་དབང་པོ་ཡོངས་སུ་སྨིན་པར་བྱས་པས་ད་ལྟར་རྣམ་པར་གྲོལ་ལོ་གསུངས། འདིས་ནི་གཡོ་སྒྱུས་གཞན་ཁྲིམས་ལ་སྦྱར་བའི་ཉེས་དམིགས་སོགས་ཀྱང་བསྟན་པ་ཡིན་ནོ། །ཡང་སྟོན་པ་མཉན་ཡོད་དུ་བཞུགས་པའི་ཚེ། ཡུལ་དེའི་བྲམ་ཟེ་ཞིག་གི་མཆོད་སྦྱིན་བྱེད་པ་ལ། རྒྱལ་ཁམས་ཐ་དད་པའི་བྲམ་ཟེ་རྣམས་འདུས་ཏེ་དེ་དག་ཡོན་ལ་མ་འཆམ་ནས་འཐབ་མོ་ཆེན་པོ་བྱུང་བའི་སྐབས་སུ་བྲམ་ཟེ་གཞན་ཞིག་གིས་མཆོད་སྦྱིན་གྱི་གནས་དེ་ནས་གསེར་དངུལ་དང་བཟའ་བཅའ་མང་པོ་ཁྱེར་ཏེ་བྲོས་པ་ན། བྲམ་ཟེ་དེ་དག་གིས་བཟུང་ནས་ཁུ་ཚུར་དང་རྡོག་པ་དག་གིས་ཤིན་ཏུ་བརྡུང་ཞིང་བོར་བས། དེ་སེམས་སྐྱོ་ནས་རྒྱལ་བྱེད་ཀྱི་ཚལ་དུ་འོངས་ཏེ། བཅོམ་ལྡན་འདས་ཀྱི་སྤྱན་སྔར་ཚུར་ཤོག་གིས་བསྙེན་པར་རྫོགས་ནས་བརྩོན་པས་དགྲ་བཅོམ་པའི་གོ་འཕང་ཐོབ་སྟེ། རང་གི་མངོན་པར་ཤེས་པས་བརྟགས་པས་སྔར་གྱི་མཆོད་སྦྱིན་བདག་པོ་སོགས་བྲམ་ཟེ་སྟོང་ཕྲག་མང་པོ་འདུལ་བར་འགྱུར་བར་མཐོང་ནས་དེ་དག་གི་མཐོང་སར་རྫུ་འཕྲུལ་གྱིས་ནམ་མཁའ་ལས་མཆོད་སྦྱིན་གྱི་ཁང་བར་གཤེགས་པས། དེ་ཐམས་ཅད་རབ་ཏུ་དགའ་ནས་པང་གིས་འཁྱུད་དེ་སྟན་ལ་བཞག་ནས་རྐང་པ་ལ་ཕྱག་བྱས་ཏེ་ཆོས་མཉན་པའི་ཕྱིར་འཁོད་པ་ལ། དེ་དག་དང་མཐུན་པའི་ཆོས་བསྟན་པས། མཆོད་སྦྱིན་གྱི་བདག་པོ་དང་། བྲམ་ཟེ་དེ་དག་སྟན་དེ་ལ་འཁོད་བཞིན་དུ་རྒྱུན་ཞུགས་ཀྱི་འབྲས་བུ་མངོན་དུ་བྱས་ཤིང་། འཁོར་དེ་དག་གི་ནང་ནས་ཕལ་ཆེར་ནི་སངས་རྒྱས་ལ་གཞོལ་བ་དང་། ཆོས་ལ་འབབ་པ་དང་། དགེ་འདུན་ལ་འབབ་པར་བྱས་ཏེ་བཀོད་དོ། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་འོད་སྲུང་གི་དུས་སུ། ཝཱ་རཱ་ཎ་སཱིའི་བྲམ་ཟེ་ཞིག་གཏན་ཚིགས་སྔ་མ་ལྟ་བུས་རབ་ཏུ་བྱུང་ཞིང་ཚེ་གཅིག་ལ་ཚངས་པར་སྤྱོད་པ་སྤྱད་ནས། འཆི་ཁར་སྨོན་ལམ་བཏབ་པའི་ལས་ཀྱི་འབྲས་བུས་དེ་ལྟར་གྱུར་པར་གསུངས་སོ། །