མ་འོངས་པ་ན་ཡང་དག་པར་རྫོགས་པའི་སངས་རྒྱས་སྤོས་མཆོག་ཅེས་བྱ་བར་འགྱུར་རོ་ཞེས་ལུང་བསྟན་པ།
༈ ཡང་བཅོམ་ལྡན་འདས་རྒྱལ་བྱེད་ཀྱི་ཚལ་དུ་བཞུགས་པའི་ཚེ། ཡུལ་དེའི་དེད་དཔོན་ཞིག་རྒྱ་མཚོར་ལན་གསུམ་དུ་ཕྱིན་པས་ཐམས་ཅད་གྲུ་མ་རུངས་པར་གྱུར་ནས། ཕྱིས་ཞིག་ན་ད་ནི་བདག་གིས་སངས་རྒྱས་བཅོམ་ལྡན་འདས་ལ་བརྟེན་ནས་དེའི་ཐུགས་རྗེས་གྲུའི་དོན་འགྲུབ་པར་འགྱུར་སྲིད་པས། དེ་ལྟ་ན་ནོར་གྱི་ཕྱེད་ཀྱིས་མཆོད་པ་བྱའོ་ཞེས་བྱས་ཏེ་རྒྱ་མཚོར་ཞུགས་པས། སངས་རྒྱས་ཀྱི་མཐུས་རིན་པོ་ཆེའི་གླིང་དུ་ཕྱིན་ནས་ཕྱིར་བདེ་བར་འཁོར་བ་ན། དེད་དཔོན་དེ་རིན་པོ་ཆེ་ལ་སེར་སྣ་སྐྱེས་ཏེ་གཏོང་བར་མ་ནུས་ནས། ཞོའི་བཞི་ཆ་ཞིག་གིས་ཨ་ག་རུའི་སྤོས་ཉོས་ཏེ་རྒྱལ་བྱེད་ཀྱི་ཚལ་དུ་སོང་ནས། ངོ་ཚ་བཞིན་དུ་སྒོ་ཁང་དུ་འདུག་སྟེ་བདུག་པ་ན། སངས་རྒྱས་ཀྱི་མཐུས་བདུག་པ་དེ་སྟེང་གི་ནམ་མཁར་འཕགས་ཏེ་མཉན་དུ་ཡོད་པ་ཐམས་ཅད་ཁྱབ་པར་གྱུར་ཏེ་སྤྲིན་ཆེན་པོ་བཞིན་དུ་འཁྲིགས་པར་གྱུར་པ་དང་། དེ་མཐོང་བས་མཆོག་ཏུ་ངོ་མཚར་བར་གྱུར་ཏེ་རང་གི་སེམས་ལ་རྣམ་པར་སྨད་ནས། བདག་གིས་བཅོམ་ལྡན་འདས་བསླུ་བར་མི་རུང་ངོ་སྙམ་སྟེ། དེད་དཔོན་དེས་སངས་རྒྱས་འཁོར་དང་བཅས་པ་ཁྱིམ་དུ་སྤྱན་དྲངས་ཤིང་ཞལ་ཟས་བཟང་པོས་ཚིམས་པར་བྱས་ཏེ། རིན་པོ་ཆེ་རིན་ཐང་ཆེ་བ་དག་གིས་གཏོར་རོ། །དེར་སངས་རྒྱས་ཀྱི་མཐུས་རིན་པོ་ཆེ་རྣམས། བཅོམ་ལྡན་འདས་ཀྱི་དབུའི་སྟེང་གི་ནམ་མཁའ་ལ་འཕགས་ཏེ། རིན་པོ་ཆེའི་ཁང་པ་དང་ཁང་པ་བརྩེགས་པ་རིན་པོ་ཆེའི་རྒྱལ་མཚན་ཕལ་གྱིས་བསྒྲུན་{བསྐྲུན} དུ་མེད་པ་ཤ་སྟག་ཏུ་གྱུར་ནས་འདུག་གོ །དེ་མཐོང་བ་དང་ལྷག་པར་ཡང་དགའ་བ་སྐྱེས་ཏེ། བཅོམ་ལྡན་འདས་ཀྱིས་ཞབས་ལ་ཕྱག་བྱས་ནས་བླ་ན་མེད་པའི་བྱང་ཆུབ་ཏུ་སྨོན་ལམ་བཏབ་བོ། །དེའི་ཚེ་བཅོམ་ལྡན་འདས་ཞལ་འཛུམ་པ་མཛད་ནས། མ་འོངས་པ་ན་ཡང་དག་པར་རྫོགས་པའི་སངས་རྒྱས་སྤོས་མཆོག་ཅེས་བྱ་བར་འགྱུར་རོ་ཞེས་ལུང་བསྟན་ཏོ། །