མ་འོངས་པ་ན་རྫོགས་པའི་སངས་རྒྱས་ཚར་ཚར་བླ་མ་ཞེས་བྱ་བར་འགྱུར་བར་ལུང་བསྟན་པ།
༈ ཡང་བཅོམ་ལྡན་འདས་རྒྱལ་བྱེད་ཀྱི་ཚལ་དུ་བཞུགས་པའི་ཚེ་མཉན་ཡོད་ན་ཐག་པ་ཟླ་བ་ཞེས་བྱ་བ་ཤིན་ཏུ་དབུལ་བ་ལག་གླས་འཚོ་བ་ཞིག་ཡོད་པ་དེས་བདག་སྔར་ཡང་བསོད་ནམས་མ་བསགས་པས་འདིར་འོང་ལ། དེ་ཡང་བསོད་ནམས་མ་བསགས་ན་སྐྱེ་བ་ཕྱི་མར་མགོན་མེད་པར་འགྱུར་བས། བདག་གིས་བཅོམ་ལྡན་འདས་ལ་སྣ་འགའ་ཙམ་གྱིས་མཆོད་པ་ཞིག་ངེས་པར་བྱའོ་སྙམ་སྟེ། ཁྱིམ་བདག་གཞན་གྱི་རས་བཏགས་ནས། དེ་ལས་རས་ཀྱི་ཚར་ཚར་ཞིག་ཁྱེར་ཏེ་སྲང་དུ་ཞུགས་པ་ན། བཅོམ་ལྡན་འདས་ཀྱིས་དེ་ལ་ཐུགས་བརྩེ་བའི་སླད་དུ་ཕྱོགས་དེར་གཤེགས་ནས་ན་བཟའ་ཅུང་རལ་བར་བསྟན་པས་དེས་རས་ཀྱི་དེ་ཚར་ཚར་བཅོམ་ལྡན་འདས་ལ་ཕུལ་ཞིང་བཅོམ་ལྡན་འདས་ཀྱིས་ཀྱང་དེའི་མོད་ལ་ཆོས་གོས་དྲུབ་པར་བསྟན་ཏོ། །དེ་མཐོང་བ་དང་དེ་ལྷག་པར་ཡང་དགའ་བར་གྱུར་ཏེ་བཅོམ་ལྡན་འདས་ཀྱི་ཞབས་ལ་ཕྱག་བྱས་ཏེ། སྦྱིན་པ་ཆུང་ལ་ཞིང་ནི་རྒྱ་ཆེ་སྟེ། །མཐུ་ཆེན་ཁྱོད་ཉིད་ཐུགས་སུ་ཆུད་པར་བས། །སྦྱིན་པ་ཆེན་པོར་གྱུར་པ་འདི་ཡིས་ནི། །བདག་ནི་རྒྱ་ཆེར་གྲགས་པའི་སངས་རྒྱས་ཤོག སྦྱིན་པ་འདི་ནི་ཆུང་ངུ་ལགས་ཀྱིས་ཀྱང་། །བདག་གི་སེམས་ནི་རབ་ཡངས་དཔག་ཡས་ཏེ། །མི་དང་ལྷ་མཆོག་རྒྱལ་བས་བཞེས་ནས་ནི། །སྦྱིན་པ་ཆུང་ཡང་འབྲས་བུ་ཆེན་པོར་འགྱུར། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ནི་ཕྱི་མར་ཞི་བ་མཐུ་ཆེ་བས། །རྒྱ་ཆེན་གྲགས་པ་མི་དང་ལྷས་མཆོད་པ། །རང་བྱུང་འཇིག་རྟེན་ཕན་པ་སྙིང་བརྩེར་ལྡན། །ཚར་ཚར་བླ་མ་ཞེས་བྱ་རྒྱལ་བར་འགྱུར། །དེ་ནས་བཅོམ་ལྡན་འདས་ཞལ་འཛུམ་པ་དང་བཅས་ཏེ། མ་འོངས་པ་ན་རྫོགས་པའི་སངས་རྒྱས་ཚར་ཚར་བླ་མ་ཞེས་བྱ་བར་འགྱུར་བར་ལུང་བསྟན་ཏོ། །