རྟེན་ལ་ཡོན་ཆབ་དང་ཁྲུས་སོགས་ཕུལ་བའི་ཕན་ཡོན་ཀྱང་བསྟན་པ།
༈ ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་པའི་ཚེ། མཉན་ཡོད་ཀྱི་ཚོང་པ་ལྔ་བརྒྱ་ཙམ་དགོན་པའི་ལམ་དུ་ཞུགས་པ་ལས་དེ་དག་ལ་ལམ་སྟོར་ནས། བྱེ་སྟོོངས་ཤིག་ཏུ་ཕྱིན་ཏེ། དེ་དག་རྒྱགས་ཟད་ཅིང་ངལ་ཞིང་དུབ་སྟེ་ཉི་ཚན་གྱིས་གདུང་ནས་ཉ་བྱེ་ཚན་དུ་བོར་བ་ལྟར་གྱུར་ཏེ་ཤིན་ཏུ་སྡུག་བསྔལ་ཞིང་ཉམ་ཐག་པས་གུ་ལང་ལ་སོགས་པ་རང་རང་འདོད་པའི་ལྷ་རྣམས་ལ་བོས་ཀྱང་ཅུང་ཟད་ཀྱང་སྐྱོབ་པར་བྱེད་པ་མ་བྱུང་བས། དེར་དགེ་བསྙེན་སངས་རྒྱས་ཀྱི་བསྟན་པའི་རྒྱུས་ཤེས་པ་ཞིག་ཡོད་པ་དེས་བསྐུལ་ནས། ཚོང་པ་དེ་ཐམས་ཅད་ཀྱིས་སངས་རྒྱས་ལ་སྐྱབས་སུ་སོང་བས། དེའི་ཚེ་བཅོམ་ལྡན་འདས་ཀྱིས་དེ་དག་འདུལ་བའི་དུས་ལ་བབས་པར་མཁྱེན་ནས་མིག་འབྱེད་འཛུམ་གྱི་ཡུན་ཙམ་གྱིས་སངས་རྒྱས་དགེ་འདུན་གྱི་འཁོར་དང་བཅས་པ་རྒྱལ་བྱེད་ཀྱི་ཚལ་དུ་མི་སྣང་བར་གྱུར་ཏེ་ཕྱོགས་དེར་གཤེགས་སོ། །དེར་བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་པས། ལྷའི་དབང་པོ་བརྒྱ་བྱིན་གྱིས་ཆར་བབ་ཅིང་སེར་བུ་བསིལ་བ་ཡང་བཏང་བས་དེ་དག་སྐོམ་པ་དང་ཚ་བས་གདུང་བ་ཞི་བར་བྱས་ཏེ། བཅོམ་ལྡན་འདས་ཀྱིས་ལམ་བསྟན་པས་དེ་དག་བདེ་བར་མཉན་ཡོད་ཀྱི་གྲོང་དུ་ཕྱིན་ནས་ངལ་བསོས་པ་དང་། དེ་དག་ལ་བཅོམ་ལྡན་འདས་ཀྱིས་བདེན་པ་བཞིའི་ཆོས་བསྟན་པས་ཚོང་པ་དེ་རྣམས་ཕལ་ཆེར་འབྲས་བུ་བཞི་ལ་བཀོད་ཅིང་ཁ་ཅིག་བྱང་ཆུབ་གསུམ་གྱི་ལམ་དུ་སྨིན་པར་མཛད་དེ་དགེ་བའི་རྩ་བ་དཔག་ཏུ་མེད་པ་བསྐྱེད་དོ། །དེར་དགེ་སློང་རྣམས་ངོ་མཚར་དུ་གྱུར་པ་ན། སྔོན་འདས་པའི་དུས་ཡང་དག་པར་རྫོགས་པའི་སངས་རྒྱས་ཙནྡན་ཞེས་བྱ་བ་འཇིག་རྟེན་དུ་བྱོན་ནས་རྒྱལ་པོའི་ཕོ་བྲང་གི་འཁོར་ཞིག་ཏུ་ལྗོངས་རྒྱུ་ཞིང་བྱོན་པ་ན། རྒྱལ་རིགས་ཀྱི་སྤྱི་བོ་ནས་དབང་བསྐུར་བའི་རྒྱལ་པོ་དེས་སྤྱན་དྲངས་ཏེ་ཟླ་བ་གསུམ་གྱི་བར་དུ་སངས་རྒྱས་དགེ་འདུན་དང་བཅས་པ་བསྙེན་བཀུར་བ་ལས། དེའི་ཚེ་ཐན་པ་ཆེན་པོ་བྱུང་སྟེ་ཆུ་ཀླུང་དང་ཁྲོན་པ་རྣམས་ཀྱང་ཆུ་ཉུང་བར་གྱུར་ལ་ཤིང་རྣམས་ཀྱང་མེ་ཏོག་དང་འབྲས་བུ་མེད་པར་གྱུར་པས། རྒྱལ་པོ་དེས་གྲོང་ཁྱེར་གྱི་དབུས་སུ་འབྱོར་པ་ཆེན་པོ་དང་ལྡན་པས་སྤོས་ཆུའི་རྫིང་བུ་བསྐྱིལ་ཏེ་སངས་རྒྱས་འཁོར་དང་བཅས་པ་ལ་སྐུ་ཁྲུས་གསོལ་པས། དེའི་མོད་ལ་ལྷའི་དབང་པོ་བརྒྱ་བྱིན་གྱིས་ཆར་ཕབ་སྟེ་ཡུལ་ཁམས་ཐམས་ཅད་འབྱོར་བར་བྱས་སོ། །གཞི་དེས་སྐྱེ་བོ་ཕལ་མོ་ཆེ་བཅོམ་ལྡན་འདས་ལ་དད་པ་རྙེད་ནས་སྤོས་ཀྱིས་བྱུགས་པའི་མཆོད་རྟེན་བརྩིགས་ཏེ་ཞལ་བསྲོས་སོ། །དེའི་ཚེ་སངས་རྒྱས་ཙན་དན་ལ་སྐྱབས་སུ་སོང་བ་གང་ཡིན་པ་དེ་ཐམས་ཅད་ནི་ཡོངས་སུ་མྱང་ངན་ལས་འདས་ཏེ། དེའི་ནང་ནས་ང་འབའ་ཞིག་ལུས་སོ་གསུངས། འདིས་ནི་རྟེན་ལ་ཡོན་ཆབ་དང་ཁྲུས་སོགས་ཕུལ་བའི་ཕན་ཡོན་ཀྱང་བསྟན་ཏོ། །