དགེ་སློང་ཚུལ་ཁྲིམས་དང་ལྡན་པ་དང་རྟེན་གསུམ་སོགས་བཀུར་སྟི་ཆེན་པོས་སྤྱན་དྲངས་ཏེ་གྲོང་སོགས་བསྐོར་བ་དང་སྐྱབས་སུ་སོང་བའི་ཕན་ཡོན་ཀྱང་བསྟན་པ།
༈ ཡང་སྟོན་པ་རྒྱལ་པོའི་ཁབ་འོད་མའི་ཚལ་ན་བཞུགས་པའི་ཚེ་ཡུལ་འདམ་བུའི་ཚལ་གྱི་སྐྱེ་བོ་མང་པོ་ལ་མི་ནད་བྱུང་ནས་ཤིན་ཏུ་ཉམ་ཐག་ནས་འཇིག་རྟེན་པའི་ལྷ་མཐུ་བོ་ཆེ་རྣམས་ལ་གསོལ་བ་བཏབ་ཀྱང་ཞི་བར་མ་ནུས་ཏེ་དེར་དགེ་བསྙེན་ཞིག་གནས་པ་དེས་སྦྲན་ནས་ཀུན་གྱིས་བཅོམ་ལྡན་འདས་ལ་གསོལ་བ་བཏབ་པས། བཅོམ་ལྡན་འདས་ཀྱིས་མཁྱེན་ནས་དགེ་སློང་གི་དགེ་འདུན་གྱི་འཁོར་དང་བཅས་ཏེ་ཡུལ་འདམ་བུའི་ཚལ་དུ་གཤེགས་ནས། གྲོང་ཁྱེར་གྱི་མི་ཐམས་ཅད་ལ་བྱམས་པས་ཁྱབ་པར་མཛད་པས། མི་མ་ཡིན་རྣམས་བྱེར་ཏེ་ཡམས་ཀྱི་ནད་ཞི་བར་གྱུར་ཏོ། །དེར་ཡུལ་དེའི་བྲམ་ཟེ་དང་ཁྱིམ་བདག་ཐམས་ཅད་རབ་ཏུ་དགའ་བར་གྱུར་ཏེ་སངས་རྒྱས་འཁོར་དང་བཅས་པ་ལ་མཁོ་བའི་ཡོ་བྱད་ཐམས་ཅད་ཀྱིས་བསྙེན་བཀུར་ཞིང་། བཅོམ་ལྡན་འདས་ཀྱིས་དེ་དག་ལ་བདེན་བཞིའི་ཆོས་བསྟན་པས་སྐྱེ་བོ་ཕལ་ཆེར་གྱིས་འབྲས་བུ་བཞི་ལས་ཅི་རིགས་པ་ཐོབ་ཅིང་། བྱང་ཆུབ་གསུམ་དང་འབྲེལ་བའི་དགེ་བའི་རྩ་བ་རྒྱ་ཆེན་པོ་བསྐྱེད་དོ། །དེའི་ཚེ་དགེ་སློང་རྣམས་ངོ་མཚར་དུ་གྱུར་པ་ན། བཅོམ་ལྡན་འདས་ཀྱིས། སྔོན་བྱུང་བ་འདས་པའི་དུས་ན་སངས་རྒྱས་བཅོམ་ལྡན་འདས་ཟླ་བ་ཞེས་བྱ་བ་འཇིག་རྟེན་དུ་བྱོན་ཏེ། དེ་ལྗོངས་རྒྱུ་ཞིང་རྒྱལ་པོའི་ཕོ་བྲང་གི་འཁོར་ཞིག་ཏུ་བྱོན་པ་ན། རྒྱལ་རིགས་ཀྱི་སྤྱིི་བོ་ནས་དབང་བསྐུར་བའི་རྒྱལ་པོ་དེས་སངས་རྒྱས་འཁོར་དང་བཅས་པ་སྤྱན་དྲངས་ཏེ་ཟླ་བ་གསུམ་གྱི་བར་དུ་བསྙེན་བཀུར་ཕུལ་བའི་ཚེ། གྲོང་ཁྱེར་དེའི་སྐྱེ་བོ་མང་པོ་ལ་མི་ནད་བྱུང་སྟེ་ཤིན་ཏུ་གནོད་པར་གྱུར་པ་ན། རྒྱལ་པོ་དེས་རྫོགས་པའི་སངས་རྒྱས་ཟླ་བ་ལ་ཡམས་ནད་ཞི་བའི་ཐབས་མཛད་པར་གསོལ་བ་བཏབ་པས། བཀའ་སྩལ་པ། རྒྱལ་པོ་ཆེན་པོ་སོང་ལ་ངའི་ཆོས་གོས་སྣམ་སྦྱར་འདི་རྒྱལ་མཚན་གྱི་རྩེ་མོ་ལ་ཐོགས་ལ་བཀུར་སྟི་ཆེན་པོ་དང་ལྡན་པས། བདག་གི་ཡུལ་སྐོར་དུ་ཆུག་ཅིག འདི་ལ་དགའ་སྟོན་ཆེན་པོ་ཡང་གྱིས་ཤིག སྐྱེ་བོ་ཕལ་མོ་ཆེ་ཐམས་ཅད་ཀྱང་སངས་རྒྱས་རྗེས་སུ་དྲན་པ་ཡང་དག་པར་འཛིན་དུ་ཆུག་ཅིག་དང་། དེས་ནི་ཁྱེད་བདེ་ལེགས་སུ་འགྱུར་རོ། །རྒྱལ་པོས་ཀྱང་ཇི་སྐད་བསྟན་པ་བཞིན་དུ་ཐམས་ཅད་དེ་ཁོ་ན་ལྟར་བྱས་པས་དེའི་རྒྱུ་རྐྱེན་གྱིས་ཡམས་ནད་ཐམས་ཅད་ཞི་བར་གྱུར་ཏོ། །རྒྱུ་དེས་སྐྱེ་བོ་ཐམས་ཅད་རབ་ཏུ་དགའ་ནས་དཀོན་མཆོག་གསུམ་ལ་སྐྱབས་སུ་སོང་ངོ་། །དེའི་དུས་ཀྱི་རྒྱལ་པོ་དེ་ནི་ང་ཡིན་ཏེ། ལས་ཀྱི་རྒྱུ་དེས། ངས་འཁོར་བ་ན་ལྷ་མིར་སྐྱེ་བ་འཐོབ་པའི་བདེ་བ་ཆེན་པོ་ཉམས་སུ་མྱོང་ལ། ད་ལྟར་ཡང་ལས་དེས་འབྱོར་པ་དང་ལྡན་ཞིང་། ངས་ཅི་བསམ་པ་དང་ཅི་འདོད་པ་དེ་ཐམས་ཅད་དེ་བཞིན་དུ་གྲུབ་པར་གྱུར་ཏོ་གསུངས། འདིས་ནི་དགེ་སློང་ཚུལ་ཁྲིམས་དང་ལྡན་པ་དང་རྟེན་གསུམ་སོགས་བཀུར་སྟི་ཆེན་པོས་སྤྱན་དྲངས་ཏེ་གྲོང་སོགས་བསྐོར་བ་དང་སྐྱབས་སུ་སོང་བའི་ཕན་ཡོན་ཀྱང་བསྟན་ཏོ། །ཡང་སྟོན་པ་རྒྱལ་པོའི་ཁབ་འོད་མའི་ཚལ་ན་བཞུགས་པའི་ཚེ། ལྷས་བྱིན་གྱིས་རྒྱལ་པོ་མ་སྐྱེས་དགྲ་བསླུས་ཏེ། ཕ་ཆོས་ལྡན་གྱི་རྒྱལ་པོ་གཟུགས་ཅན་སྙིང་པོ་བཀྲོངས་ནས་རྒྱལ་སར་ཞུགས་ཏེ་སུ་མ་དད་པ་དེ་མཐུ་དང་ལྡན་ཞིང་དད་པ་ཅན་རྣམས་མཐུ་ཆུང་བར་གྱུར་པའི་ཚེ། རྒྱལ་པོའི་བློན་པོ་རྒན་པོ་མ་དད་པ་ཞིག་ཡོད་པ་དེས་བྲམ་ཟེ་རྣམས་ལ་མཆོད་སྦྱིན་བྱས་ཏེ་དེར་བྲམ་ཟེ་འབུམ་ཕྲག་དུ་མ་འདུས་པ་ན། དེ་དག་གིས་སུ་ཡང་དགེ་སྦྱོང་གོ་ཏ་མ་ལ་བལྟར་མི་འགྲོ་བར་ནང་ཁྲིམས་བཅས་ཏེ། སྲང་གི་དབུས་སུ་རིག་བྱེད་ལས་འབྱུང་བའི་ཆོ་ག་བཞིན་དུ། བརྒྱ་བྱིན་ལ་གསོལ་བ་བཏབ་སྟེ་སྤྱན་དྲངས་པ་ན། བཅོམ་ལྡན་འདས་ཀྱིས་དེ་རྣམས་འདུལ་བའི་དུས་ལ་བབ་པར་མཁྱེན་ནས། ལྷའི་དབང་པོ་བརྒྱ་བྱིན་གྱི་གཟུགས་སུ་སྤྲུལ་ཏེ་མཆོད་སྦྱིན་གྱི་འདུན་ཁང་དེ་ལྷའི་འོད་ཀྱིས་སྣང་བར་མཛད་དེ་དེར་གཤེགས་ཏེ། གདན་ལ་བཞུགས་པ་ན། རྒྱལ་པོའི་ཁབ་ཀྱི་གྲོང་ཁྱེར་ཀུན་ཏུ་ལྷའི་དབང་པོ་མཆོད་སྦྱིན་ལ་གཤེགས་སོ་ཞེས་གྲགས་པར་གྱུར་པས་དེར་སྲོག་ཆགས་འབུམ་ཕྲག་དུ་མ་འདུས་སོ། །དེར་བྲམ་ཟེ་རྣམས་དགའ་ཞིང་སེམས་དད་པར་གྱུར་པ་ན། བཅོམ་ལྡན་འདས་ཀྱིས་བརྒྱ་བྱིན་གྱི་གཟུགས་དེ་ཉིད་མི་སྣང་བར་མཛད་དེ་སྐུ་དངོས་སུ་བསྟན་ནས། དེ་རྣམས་ལ་འཕགས་པའི་བདེན་པ་བཞི་རྟོགས་པར་འགྱུར་བའི་ཆོས་བསྟན་པས། བྲམ་ཟེ་དྲུག་ཁྲི་ཉིས་སྟོང་གི་བདེན་པ་མཐོང་ཞིང་སྲོག་ཆགས་འབུམ་ཕྲག་དུ་མས་ཀྱང་བཅོམ་ལྡན་འདས་ལ་དད་པ་རྙེད་དོ། །དེར་དགེ་སློང་རྣམས་ངོ་མཚར་དུ་གྱུར་པ་ན་བཅོམ་ལྡན་འདས་ཀྱི་སྔོན་གྱི་དུས་སུ་རྒྱལ་པོ་རྒྱལ་རིགས་ཀྱི་སྤྱི་བོ་ནས་དབང་བསྐུར་བ་ཞིག་ཏུ་འཁྲུངས་ཏེ། དེའི་ཚེ་སངས་རྒྱས་དབང་པོ་འདུལ་ཞེས་བྱ་བ་འཇིག་རྟེན་དུ་བྱོན་ཏེ། དེ་ཉིད་འཁོར་དང་བཅས་པ་རྒྱལ་པོ་དེས་ཟླ་བ་གསུམ་གྱི་བར་དུ་སྤྱན་དྲངས་ནས་གཙུག་ལག་ཁང་བརྩེགས་ཏེ་བསྙེན་བཀུར་ཕུལ་ཞིང་། དེའི་ཚེ་རྒྱལ་པོའི་ཕོ་བྲང་གི་འཁོར་དེ་མུ་སྟེགས་ཅན་གྱིས་དབང་དུ་གྱུར་པས། དེ་དག་དད་པའི་ཕྱིར་རྒྱལ་པོས་ཆོ་འཕྲུལ་ཆེན་པོ་མཛད་པར་གསོལ་པ་བཏབ་ཅིང་། སངས་རྒྱས་དབང་པོའི་ཏོག་གིས་ཀྱང་ཆོ་འཕྲུལ་ཆེན་པོ་བསྟན་པས་སྐྱེ་བོ་ཐམས་ཅད་རབ་ཏུ་དགའ་ནས་བསྟན་པ་སྲུང་བ་ལ་གཅེས་པར་གྱུར་ཏོ། །རྒྱུ་དེས་འཁོར་བར་བདེ་བ་མཐའ་ཡས་པ་མྱོང་ཞིང་། ད་ལྟར་སངས་རྒྱས་པ་ན་ཡང་ངའི་བསྟན་པ་འདི་མཛེས་པར་གྱུར་ཏོ་གསུངས། །ཡང་སྟོན་པ་འོད་མའི་ཚལ་ན་བཞུགས་པའི་ཚེ། ལྷས་བྱིན་གྱིས་བསྐུལ་ནས། རྒྱལ་པོ་མ་སྐྱེས་དགྲས་རྒྱལ་པོའི་ཁབ་ཀྱི་མི་རྣམས་བཅོམ་ལྡན་འདས་ཀྱི་སྤྱན་སྔར་འགྲོ་བ་དང་བསོད་སྙོམས་འབུལ་དུ་མི་ཆོག་པའི་ཁྲིམས་བཅས་པས་དགེ་བསྙེན་དད་པ་ཅན་རྣམས་མྱ་ངན་གྱིས་ནོན་པ་ཀུན་དགའ་བོས་བཅོམ་ལྡན་འདས་ལ་གསོལ་པས། བཀའ་སྩལ་པ། འདི་ལ་དེ་བཞིན་གཤེགས་པ་ཉིད་དུས་མཁྱེན་གྱིས་ཁྱོད་སྙིང་མ་ཆུང་ཞིག གཞན་ཡང་ངའི་བསྟན་པ་ཇི་སྲིད་ཡོད་ཀྱི་བར་དུ་ཡང་། ཉན་ཐོས་རྣམས་ཀྱི་ཡོ་བྱད་མེད་པར་མི་འགྱུར་ན། ད་ལྟར་ལྟ་ཅི་སྨོས། དེར་བརྒྱ་བྱིན་ལྷའི་དབང་པོས་སྐབས་དེ་ལྟར་གྱུར་པར་རིག་ནས། བཅོམ་ལྡན་འདས་ཀྱི་སྤྱན་སྔར་ལྷགས་ཏེ་ཇི་སྲིད་འཚོའི་བར་དུ་བསྙེན་བཀུར་བྱ་བར་ཞུས་པས། བཀའ་སྩལ་པ། ཀ་ཤི་ཀ་འཇིག་རྟེན་ན་བསོད་ནམས་འདོད་པ་མང་གིས་འདི་ལྟར་ང་ལ་སེམས་དད་པར་བྱས་པ་ཉིད་ཀྱིས་ཆོག་གོ །དེ་ནས་བརྒྱ་བྱིན་གྱིས་ལོ་ལྔའི་བར་དུ་ཞུས་ཀྱང་སྔར་ལྟར་གསུངས་ཤིང་། དེ་ནས་དགུང་ལྔར་ཞུས་པས་གནང་སྟེ། བརྒྱ་བྱིན་གྱིས་འོད་མའི་ཚལ་དེ་ཁང་བཟང་རྣམ་པར་རྒྱལ་བྱེད་དང་འདྲ་བར་བསྟན་ཏེ་ལྷའི་གདན་ཆ་རྣམས་དང་། ལྷའི་རྫིང་བུ་དང་། ལྷའི་བདུད་རྩིའི་ཞལ་ཟས་དག་ཀྱང་བསྟན་ཏེ། ལྷ་འབུམ་ཕྲག་དུ་མའི་འཁོར་དང་བཅས་ཏེ་འོངས་ནས་མངོན་པར་མཆོད་ཅིང་ཆོས་ཉན་པར་བྱས་སོ། །དེར་རྒྱལ་པོ་མ་སྐྱེས་དགྲ་ཁང་བཟང་གི་སྟེང་ན་འཁོད་པས་མཐོང་ནས་འགྱོད་པ་སྐྱེས་ཏེ་དད་པར་གྱུར་ཅིང་འཁོར་རྣམས་ཀྱིས་ཀྱང་གསོལ་པས། རྒྱལ་པོ་མ་སྐྱེས་དགྲས་ནང་ཁྲིམས་བཤིག་སྟེ་ཐམས་ཅད་ལ་དྲིལ་བསྒྲགས་ནས་བཅོམ་ལྡན་འདས་ལ་བཀུར་སྟི་ཅི་དགའ་བ་གྱིས་ཤིག་ཅེས་བྱས་པས། སྐྱེ་བོ་དཔག་ཏུ་མེད་པ་འདུས་ནས་ལྷ་མི་ཐམས་ཅད་ཀྱིས་མཆོད་ཅིང་བཀུར་སྟི་ཆེན་པོ་བྱས་སོ། །དེར་བཅོམ་ལྡན་འདས་ཀྱིས་ཆོས་བསྟན་པས་ལྷ་དང་མི་དུ་མས་བདེན་པ་མཐོང་ངོ་། །དེའི་ཚེ་དགེ་སློང་རྣམས་ངོ་མཚར་དུ་གྱུར་པ་ན། སྔོན་འདས་པའི་དུས་སངས་རྒྱས་རིན་པོ་ཆེའི་རི་བོ་ཞེས་བྱ་བ་འཇིག་རྟེན་དུ་བྱོན་པའི་ཚེ། བཅོམ་ལྡན་འདས་ཉིད་ཡུལ་དེའི་རྒྱལ་པོ་རྒྱལ་རིགས་ཀྱི་སྤྱི་བོ་ནས་དབང་བསྐུར་བ་ཞིག་ཏུ་འཁྲུངས་ཏེ། དེའི་ཚེ་རྒྱལ་པོའི་ཕོ་བྲང་གི་འཁོར་དེ་ན་ཡམས་ཀྱི་ནད་བྱུང་བས། དེ་ཞི་བའི་ཕྱིར་རྒྱལ་པོ་དེས་སངས་རྒྱས་འཁོར་དང་བཅས་པ་ཟླ་བ་གསུམ་གྱི་བར་དུ་གདུགས་ཚོད་ལ་སྤྱན་དྲངས་པས། ཟླ་བ་གསུམ་ནས་ནད་ཡམས་རྒྱུན་ཆད་པས་རྒྱལ་པོ་དང་གྲོང་ཁྱེར་གྱི་མི་རྣམས་སེམས་དད་པར་གྱུར་ནས་སངས་རྒྱས་འཁོར་དང་བཅས་པ་ལ། ལོ་ལྔའི་བར་དུ་དགའ་སྟོན་བྱས་སོ། །རྒྱུ་དེས་འཁོར་བར་བདེ་བ་ཆེན་པོ་ཉམས་སུ་མྱོང་ཞིང་ད་ལྟར་སངས་རྒྱས་ནས་ཀྱང་འདི་ལྟ་བུའི་བཀུར་སྟི་བྱས་ལ། ཡོངས་སུ་མྱ་ངན་ལས་འདས་པའི་འོག་ཏུ་ཡང་ངའི་བསྟན་པ་ལ་ལོ་ལྔ་པའི་དགའ་སྟོན་བརྒྱ་ཕྲག་དུ་མ་བྱེད་པར་འགྱུར་རོ་གསུངས།