སངས་རྒྱས་མཆོད་པ་དང་སྐུ་གཟུགས་བཞེངས་པ་དང་གཞན་དགེ་བ་ལ་བསྐུལ་བའི་ཕན་ཡོན་སོགས་དང་ཐབས་ཤེས་ཁྱད་པར་ཅན་གྱིས་ཟིན་པའི་དགེ་བའི་རྩ་བ་ནི་བྱང་ཆུབ་ཀྱི་བར་དུ་ནམ་ཡང་མི་འཛད་པ་ཡང་བསྟན་པ།
༈ ཡང་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་ན་བཞུགས་པའི་ཚེ། ཡུལ་དེ་ན་ཚོང་དཔོན་ཕྱུག་ཅིང་ནོར་མང་བ་རྣམ་ཐོས་བུའི་ནོར་དང་ལྡན་པ་མུ་སྟེགས་བྱེད་ལ་དགའ་བ་ཞིག་ཡོད་པ་དེ། ཚེ་དང་ལྡན་པ་མོའུ་འགལ་གྱི་བུ་ཆེན་པོས་དད་པར་བྱས་ཏེ། བསྟན་པ་ལ་བཙུད་ནས་དེས་བཅོམ་ལྡན་འདས་ལ་བསྙེན་བཀུར་བྱ་བར་འདོད་ནས་འཕགས་པ་མོའུ་འགལ་གྱི་བུ་ཆེན་པོ་ལ་གྲོགས་བགྱི་བར་གསོལ་ནས་མཆོད་པའི་ཡོ་བྱད་རབ་ཏུ་མང་པོ་དག་བཤམས་སོ། །དེར་མོའུ་འགལ་གྱི་བུས། ལྷའི་དབང་པོ་བརྒྱ་བྱིན་ལ་གྲོགས་བྱེད་པར་བསྐུལ་བས། ལྷའི་དབང་པོ་འོད་མའི་ཚལ་བྱ་ཀ་ལན་ད་ཀ་གནས་པ་དགའ་བྱེད་ཀྱི་ཚལ་དུ་སྤྲུལ། ས་སྲུང་གི་བུ་དང་རབ་བརྟན་དང་འདྲ་བའི་གླང་པོ་ཆེ་སྟོང་ཕྲག་མང་པོ་དག་ཁྲིད་འོངས་ནས་དེ་དག་གིས་སངས་རྒྱས་འཁོར་དང་བཅས་པའི་སྟེང་དུ་གདུགས་རྩིབས་བརྒྱ་དང་ལྡན་པ་འཛིན་ཅིང་། བདེ་སོགས་མ་ལ་སོགས་པའི་ལྷའི་བུ་མོ་སྟོང་ཕྲག་མང་པོ་ལ་རྔ་ཡབ་ནོར་བུའི་ཡུ་བ་ཅན་གཡོབ་ཏུ་བཅུག རབ་དགའ་དང་ཟུར་ཕུད་ལྔ་པ་དང་ཏུམ་བུ་རུ་སོགས་དྲི་ཟ་སྟོང་ཕྲག་མང་པོ་ལ་རོལ་མོའི་ཁྱད་པར་སྣ་ཚོགས་པར་ལེན་པར་བསྐུལ། ལྷའི་བདུད་རྩི་དང་ཞལ་ཟས་དག་ཀྱང་སྦྱར་ཏེ། ཁྱིམ་བདག་དེས་ལྷ་དང་མིའི་ཡོ་བྱད་རབ་ཏུ་མང་པོ་བཅོམ་ལྡན་འདས་ལ་བསྙེན་བཀུར་ཞིང་ཞབས་ལ་ཕྱག་བྱས་ནས་བླ་ན་མེད་པའི་བྱང་ཆུབ་ཏུ་སྨོན་ལམ་བཏབ་བོ། །དེར་བཅོམ་ལྡན་འདས་ཞལ་འཛུམ་པ་དང་བཅས་འོད་ཟེར་རྣམས་དབུའི་གཙུག་ཏོར་དུ་འདུས་པར་གྱུར་ཏོ། །དེར་ཀུན་དགའ་བོས་དེའི་རྒྱུ་རྐྱེན་གསོལ་པས། ཁྱིམ་བདག་དེ་མ་འོངས་པ་ན་ཡང་དག་པར་རྫོགས་པའི་སངས་རྒྱས་ལྷའི་ཟས་སྦྱིན་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །དེར་དགེ་སློང་རྣམས་ངོ་མཚར་དུ་གྱུར་པ་ན། སྔོན་བྱུང་བ་འདས་པའི་དུས་ན་བཅོམ་ལྡན་འདས་ཉིད་རྒྱལ་རིགས་ཀྱི་སྤྱི་བོ་ནས་དབང་བསྐུར་བའི་རྒྱལ་པོ་ཞིག་ཏུ་འཁྲུངས་པའི་ཚེ། སངས་རྒྱས་གང་པོ་ཞེས་བྱ་བ་འཇིག་རྟེན་དུ་བྱོན་ཏེ། དེ་འཁོར་དང་བཅས་པ་རྒྱལ་པོ་དེས་སྤྱན་དྲངས་ནས་ཟླ་བ་གསུམ་གྱི་བར་དུ་མཆོད་ཅིང་། སངས་རྒྱས་ཀྱི་སྐུ་གཟུགས་རིན་པོ་ཆེ་ལས་བྱས་ཏེ། དགའ་སྟོན་བྱས་པས་སྲོག་ཆགས་འབུམ་ཕྲག་དུ་མ་དགེ་བའི་རྩ་བ་ལ་བཀོད་ནས་མྱ་ངན་ལས་འདས་པར་བྱས་སོ། །རྒྱུ་དེས་ངས་འཁོར་བ་ན་ཡང་བདེ་བ་མཐའ་ཡས་པ་ཉམས་སུ་མྱོང་སྟེ། ད་ལྟར་ཡང་ཚོང་དཔོན་དང་བརྒྱ་བྱིན་གྱིས་འདི་ལྟ་བུའི་མཆོད་པ་བྱས་སོ་གསུངས། འདི་རྣམས་ཀྱིས་སངས་རྒྱས་མཆོད་པ་དང་སྐུ་གཟུགས་བཞེངས་པ་དང་གཞན་དགེ་བ་ལ་བསྐུལ་བའི་ཕན་ཡོན་སོགས་དང་ཐབས་ཤེས་ཁྱད་པར་ཅན་གྱིས་ཟིན་པའི་དགེ་བའི་རྩ་བ་ནི་བྱང་ཆུབ་ཀྱི་བར་དུ་ནམ་ཡང་མི་འཛད་པ་ཡང་བསྟན་པ་ཡིན་ནོ། །ཡང་བཅོམ་ལྡན་འདས་ཉན་ཐོས་ཀྱི་དགེ་འདུན་དང་བཅས་པ་ཡུལ་མ་ག་དྷཱ་ན་ལྗོངས་རྒྱུ་ཞིང་གཤེགས་པ་ལས་གང་གཱའི་ཀླུང་གི་འགྲམ་དུ་བྱོན་པ་ན། དེར་མཆོད་རྟེན་ཞིག་རལ་དུ་གྱུར་པ་རླུང་དང་ཉི་ཚན་གྱིས་བཤིག་པ་ཞིག་འདུག་པ་མཐོང་ནས། དགེ་སློང་རྣམས་ཀྱིས་འདི་སུའི་ལགས་ཞེས་གསོལ་པས། བཅོམ་ལྡན་འདས་ཀྱིས་འདི་ནི་རང་སངས་རྒྱས་ཙནྡན་ཞེས་བྱ་བ་ཞིག་བྱུང་བས་དེའི་ཡིན་ཏེ། སྔོན་ཝཱ་རཱ་ཎ་སཱིར་རྒྱལ་པོ་ཚངས་བྱིན་ཞེས་བྱ་བ་ཞིག་བྱུང་སྟེ། དེ་ལ་བུ་མེད་ནས་ལྷ་ལ་གསོལ་བ་བཏབ་པས། ནམ་ཞིག་ན་རྒྱལ་པོ་དེའི་སྐྱེད་མོས་ཚལ་གྱི་རྫིང་ཞིག་ཏུ་པདྨ་ཆེན་པོ་ཞིག་སྐྱེས་ཏེ། དེ་ཁ་བྱེ་བའི་ནང་ན་ཁྱེའུ་གཟུགས་བཟང་ལྟ་ན་སྡུག་པ་མཚན་དང་དཔེ་བྱད་ཀྱིས་བརྒྱན་པ་ཞིག་སྐྱིལ་མོ་ཀྲུང་གིས་འདུག་སྟེ། དེའི་ཁ་ནས་པདྨའི་དྲི་འབྱུང་ལ་ལུས་ལས་ནི་ཙནྡན་གྱི་དྲི་བྱུང་ངོ་། །དེ་ཀུན་དགའ་ར་བའི་སྲུང་མས་སྦྲན་པས་རྒྱལ་པོ་འཁོར་དང་བཅས་པ་སྐྱེད་ཚལ་དེར་དོང་བ་ན། ཁྱེའུ་དེས་རྒྱལ་པོ་ལ་སྨྲས་པ། ཡབ་ཚུར་གཤེགས་བདག་ནི་ཁྱོད་ལ་སྲས་མི་མངའ་བས་སྲས་ལགས་སོ། །དེར་རྒྱལ་པོ་ཡང་དགའ་མགུ་ཡི་རང་ནས། བུ་དེ་ནི་ཁྱོད་ཇི་སྐད་ཟེར་བ་བཞིན་ནོ་ཞེས་བྱས་ཏེ་པདྨའི་སྙིང་པོ་ལས་བླངས་ཏེ་ཁྱེར་རོ། །དེ་ནས་ཁྱེའུ་དེས་གང་དང་གང་དུ་རྐང་པ་བཞག་པ་དེ་དང་དེར་པདྨ་དག་བྱུང་ངོ་། །དེ་ནས་དེའི་མིང་ཙནྡན་ཞེས་བཏགས་ཏེ། དེ་ཉིད་ཆེར་སྐྱེས་པའི་ཚེ་གྲོང་ཁྱེར་དུ་དུས་སྟོན་ལ་ཕྱིན་པས། གང་དུ་འགྲོ་བ་དེར་པདྨ་ལྟ་ན་སྡུག་པ་རེ་བྱུང་ཞིང་། དེ་ཉི་མའི་ཟེར་གྱིས་ཕོག་མ་ཐག་ཏུ་རྙིངས་ཤིང་བསྐམས་སོ། །དེ་སེམས་ཅན་དག་པ་བསམ་པ་དགེ་བ་སྔོན་གྱི་སངས་རྒྱས་ལ་དགེ་བའི་རྩ་བ་བསྐྱེད་པ་དེས་མཐོང་ནས་ཚུལ་བཞིན་ཡིད་ལ་བྱེད་པ་སྐྱེས་ཏེ། ཇི་ལྟར་པདྨ་འདི་དག་སྐྱེས་པའི་མོད་ལ་མཛེས་པར་འདུག་ལ་ཉི་མའི་ཟེར་གྱིས་གདུངས་པས་ནི་རྙིངས་ཤིང་སྐམ་པར་གྱུར་པ་དེ་བཞིན་དུ་ལུས་འདི་ཡང་དེ་དང་འདྲའོ་སྙམ་མོ། །དེ་དེ་ལྟར་སེམས་ཤིང་འཇལ་ལ་ཉེ་བར་རྟོག་པ་ན། བྱང་ཆུབ་ཀྱི་ཕྱོགས་དང་མཐུན་པའི་ཆོས་སུམ་ཅུ་རྩ་བདུན་མངོན་དུ་གྱུར་ཏེ། དེས་སྐྱེ་བོའི་ཚོགས་ཀྱི་ནང་ན་འདུག་བཞིན་དུ་རང་སངས་རྒྱས་ཀྱི་བྱང་ཆུབ་མངོན་དུ་བྱས་སོ། །དེ་ལ་གནས་གཙང་གི་ལྷ་རྣམས་ཀྱིས་གོས་ཚོན་ཅན་ཕུལ་བས་དེ་བགོས་ནས་ནམ་མཁའ་ལ་འཕགས་ཏེ་ཆོ་འཕྲུལ་སྣ་ཚོགས་པ་བསྟན་པས། རྒྱལ་པོ་དང་བློན་པོ་དང་གྲོང་རྡལ་གྱི་མི་རྣམས་དད་ནས་དགེ་བའི་རྩ་བ་རྣམ་པ་སྣ་ཚོགས་ཀྱང་བསྐྱེད་དོ་གསུངས། དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། དེ་སངས་རྒྱས་འོད་སྲུང་གི་བསྟན་པ་ལ་རབ་ཏུ་བྱུང་སྟེ། དེར་དབུ་སྐྲ་དང་སེན་མོའི་མཆོད་རྟེན་ལ་སྲོས་དང་མེ་ཏོག་གིས་མཆོད་ཅིང་། རང་སངས་རྒྱས་ཀྱི་བྱང་ཆུབ་ཀྱི་ལམ་ཡང་བསྒོམས་པས་ཡིན་པར་གསུངས་སོ། །