དགེ་བའི་རྩ་བ་འདིས་ཚོང་དཔོན་འདི་མ་འོངས་པ་ན་རང་སངས་རྒྱས་མདོག་འཇམ་ཞེས་བྱ་བར་འགྱུར་རོ་ཞེས་ལུང་བསྟན་པ།

༈ ཡང་བཅོམ་ལྡན་འདས་རྒྱལ་བྱེད་ཀྱི་ཚལ་ན་བཞུགས་པའི་ཚེ། མཉན་ཡོད་ན་ཚོང་དཔོན་ཕྱུག་པོ་ཞིག་ཡོད་པ་དེས། ལོངས་སྤྱོད་རྣམས་ཆུ་ཟླའམ་སྨིག་རྒྱུ་ལྟ་བུ་མི་རྟག་ཅིང་མི་བརྟན་པ་སྙིང་པོ་མེད་པ་གནོད་པ་དུ་མའི་འབྱུང་ཁུངས་སུ་འདུག་པས་བདག་གིས་སངས་རྒྱས་འཁོར་དང་བཅས་པ་ལ་ཁྲུས་དང་ཞལ་ཟས་ཀྱིས་མཆོད་པར་བྱའོ་སྙམ་ནས་སངས་རྒྱས་འཁོར་དང་བཅས་པ་སྤྱན་དྲངས་ཏེ། ཐོག་མར་བསྲོ་ཁང་དུ་སྤོས་དང་། ཏིལ་མར་ཁྱེར་ཏེ་ཁྲུས་དང་སྐུ་མཉེ་ཕུལ་ཞིང་། དེ་ནས་རང་གི་ལག་གིས་ཁ་ཟས་བཟང་པོ་གཙང་མ་ཅི་བཞེད་པར་ཕུལ་ནས་ཆོས་ཉན་ཏེ་ཞབས་ལ་ཕྱག་བྱས་པ་ན། བཅོམ་ལྡན་འདས་ཞལ་འཛུམ་པ་དང་བཅས། དགེ་བའི་རྩ་བ་འདིས་ཚོང་དཔོན་འདི་མ་འོངས་པ་ན་རང་སངས་རྒྱས་མདོག་འཇམ་ཞེས་བྱ་བར་འགྱུར་རོ་ཞེས་ལུང་བསྟན་ཏོ། །