མཆོད་པའི་རས་མ་སོགས་འགོམ་དགོས་བྱུང་ནས་མདོའི་ཚིག་བརྗོད་བཞིན་ཕྱིན་ན་ཉེས་པ་འགོག་པའི་ཁུངས་ཀྱང་བསྟན་པ།

༈ ཡང་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་དུ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་པའི་ཚེ། ཁྱིམ་བདག་མགོན་མེད་ཟས་སྦྱིན་ཉིད་ཉིན་རེ་བཞིན་དུ་ནངས་སྔ་བར་ལངས་ཏེ་རྒྱལ་བྱེད་ཀྱི་ཚལ་རང་ཉིད་ཀྱི་ལག་གིས་འཕྱག་པར་བྱེད་པ་ལས། ཉིན་གཅིག་བྲེལ་བ་ཞིག་བྱུང་ནས། ཕྱག་དར་ལུས་པར། བཅོམ་ལྡན་འདས་ཀྱིས་གཞན་དག་ལ་བསོད་ནམས་ཀྱིས་གནས་བསྟན་པའི་ཕྱིར་ཕྱགས་མ་ཕྱག་ཏུ་བསྣམས་ནས་རྒྱལ་བྱེད་ཀྱི་ཚལ་འཕྱག་པར་མཛད་དོ། །དེ་མཐོང་ནས་ཉན་ཐོས་མཆོག་ཟུང་དང་། འོད་སྲུང་། ཀུན་དགའ་བོ། ནམ་གྲུ་སོགས་ཉན་ཐོས་ཆེན་པོ་རྣམས་ཀྱིས་ཀྱང་ཕྱག་ནས་འདུ་ཁང་དུ་གཤེགས་པ་ན། བཅོམ་ལྡན་འདས་ཀྱིས་བཀའ་སྩལ་པ་དགེ་སློང་དག་ལྔ་པོ་འདི་དག་ནི་ཕྱག་དར་བྱས་པའི་ཕན་ཡོན་ཏེ་ལྔ་གང་ཞེ་ན། བདག་ཉིད་སེམས་དགའ་བར་འགྱུར་བ་དང་། གཞན་སེམས་དགའ་བར་འགྱུར་བ་དང་། ལྷ་རྣམས་མགུ་བར་འགྱུར་བ་དང་། མཛེས་པར་འགྱུར་བའི་དགེ་བའི་རྩ་བ་སོག་པ་དང་། ལུས་དང་བྲལ་བའི་འོག་ཏུ་བདེ་འགྲོ་མཐོང་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེའོ། །དེ་ནས་མགོན་མེད་ཟས་སྦྱིན་ཕྱོགས་དེར་ཕྱིན་པ་ན་གཏམ་དེ་ཐོས་པས། གང་དུ་བཅོམ་ལྡན་འདས་ཉན་ཐོས་ཆེན་པོ་དག་དང་ཐབས་ཅིག་ཏུ་ཕྱག་དར་མཛད་པ་དེའི་སྟེང་དུ་བདག་གི་རྐང་པས་བརྫིས་ཏེ་ཇི་ལྟར་འགྲོ་བར་བྱ་སྙམ་སྟེ། ངོ་ཚ་ཞིང་གདོང་སྨད་དེ་གནས་དེར་འདུག་པ་ན། བཅོམ་ལྡན་འདས་ཀྱིས་མཁྱེན་བཞིན་དུ་དེའི་རྒྱུ་དྲིས་ནས་བཀའ་སྩལ་པ་ཁྱིམ་བདག་སངས་རྒྱས་བཅོམ་ལྡན་འདས་ནི་ཆོས་ལ་གུས་པ། དགྲ་བཅོམ་པ་རྣམས་ཀྱི་བླ་མ་ནི་ཆོས་ཡིན་པས་ན་སངས་རྒྱས་ཀྱི་བཀའ་ཁ་ཏོན་གྱིས་ལ་ནང་དུ་ཤོག་ཅིག དེ་ནས་མགོན་མེད་ཟས་སྦྱིན་ཚིགས་སུ་བཅད་པ་བརྗོད་ཅིང་བཅོམ་ལྡན་འདས་ཀྱི་དྲུང་དུ་ཕྱིན་ཅིང་ཞབས་ལ་ཕྱག་བྱས་ནས་འཁོད་པ་ལ། བཅོམ་ལྡན་འདས་ཀྱིས་ཆོས་ཀྱི་གཏམ་ཡང་དག་པས་སྤྲོ་བར་མཛད་དོ། །དེར་དགེ་སློང་རྣམས་ཀྱིས། བཙུན་པ་བཅོམ་ལྡན་འདས་ཆོས་ལ་ཞེ་ས་སྐྱེས་ཤིང་གུས་པ་སྐྱེས་ཏེ་ཆོས་ཀྱི་བསྔགས་པ་འབའ་ཞིག་གསུང་པ་ངོ་མཚར་ལགས་སོ། །བཀའ་སྩལ་པ། དགེ་སློང་དག་ད་ལྟར་དེ་བཞིན་གཤེགས་པས་བླ་ན་མེད་པའི་ཡེ་ཤེས་བརྙེས་ཟིན་པའི་སྐབས་སུ་ཆོས་ལ་ཞེ་ས་སྐྱེས་ཤིང་གུས་པ་སྐྱེས་ཏེ། ཆོས་ཀྱི་བསྔགས་པ་འབའ་ཞིག་བརྗོད་པ་འདི་ལྟ་བུ་ལ་ངོ་མཚར་ཅི་ཆེ་སྟེ། སྔོན་ཉོན་མོངས་པ་མ་སྤངས་ཤིང་གནོད་པ་དུ་མའི་གནས་སུ་གྱུར་པའི་སྐབས་ཀྱང་། ངས་ཆོས་ཀྱི་ཕྱིར་རང་གི་སྲོག་ཡོངས་སུ་གཏོང་བར་བྱས་ཏེ་སྔོན་ཝཱ་རཱ་ཎ་སཱིའི་རྒྱལ་པོ་ཚངས་བྱིན་གྱི་བཙུན་མོ་ལ་བུ་ཆགས་པར་གྱུར་ནས་དེའི་མཐུས་ལེགས་པར་གསུངས་པ་མཉན་འདོད་པར་གྱུར་ནས་རྒྱལ་པོ་ལ་སྦྲན་པས། རྒྱལ་པོས་གསེར་བྱེ་བ་ཐོགས་ཏེ་ཡུལ་ཀུན་ཏུ་ལེགས་པར་གསུངས་པ་ཚོལ་ཀྱང་མ་རྙེད་དོ། །དེ་ནས་ཁྱེའུ་དེ་བཙས་པ་ན་གཟུགས་བཟང་བ་ལྟ་ན་སྡུག་པ་ཞིག་བྱུང་སྟེ་མིང་ལེགས་པར་གསུངས་པ་ཚོལ་བ་ཞེས་བྱ་བར་བཏགས་སོ། །དེ་ཉིད་ཆེར་སྐྱེས་ཏེ་ཕ་ཤི་བའི་འོག་ཏུ་རྒྱལ་པོར་བཅུག་པ་ན། བློན་པོ་དང་ཡུལ་གྱི་གཙོ་བོ་དག་ལེགས་པར་གསུངས་པ་ཚོལ་བར་བསྐོས་ཏེ་འཛམ་བུ་གླིང་ཐམས་ཅད་དུ་གསེར་བྱེ་བ་བསྟན་ཀྱང་མ་རྙེད་ནས་དེ་སེམས་རབ་ཏུ་གདུང་བར་གྱུར་པ་ན། བརྒྱ་བྱིན་ལྷའི་དབང་པོས་མངོན་ཤེས་ཀྱིས་དེའི་དོན་རྟོགས་ནས་ཉམས་སད་པར་བྱ་བའི་ཕྱིར་གནོད་སྦྱིན་མི་སྡུག་པ་ཞིག་ཏུ་སྤྲུལ་ནས་རྒྱལ་པོའི་མདུན་དུ། ལེགས་སྤྱོད་ཆོས་ནི་སྤྱད་པར་བྱ། །ཉེས་པར་སྤྱོད་པ་དེ་མི་བྱ། །འཇིག་རྟེན་འདི་དང་ཕ་རོལ་ཏུ། །ཆོས་སྤྱོད་བདེ་ལ་རྟེན་པར་འགྱུར། །ཞེས་སྨྲས་པས་རྒྱལ་པོ་ཡ་མཚན་དུ་གྱུར་ནས་སྨྲས་པ། གསང་བ་ཚིགས་སུ་བཅད་པ་དེ། །བདག་གི་མཉན་གྱིས་ཡང་གསུངས་ཤིག ། གནོད་སྦྱིན་གྱིས། གལ་ཏེ་བདག་གིས་སྨྲས་པ་བཞིན་བྱེད་ན་དེ་བཞིན་དུ་བྱའོ། །རྒྱལ་པོས། བདག་ལ་བཀའ་སྩལ་པ་ཅི་མཆིས། གནོད་སྦྱིན་གྱིས། ཉིན་མཚན་བདུན་གྱི་བར་དུ་མེ་དོང་དུ་སེང་ལྡེང་གི་ཤིང་གིས་མེ་སྦར་ནས། གལ་ཏེ་དེར་མཆོང་བར་བྱེད་ན་དེའི་འོག་ཏུ་ཁྱོད་ལ་ཚིགས་སུ་བཅད་པ་ཡང་བཟླས་པར་བགྱིའོ། །རྒྱལ་པོས་དེ་ཐོས་པས་སེམས་རབ་ཏུ་དགའ་སྟེ་དེ་ལྟར་ཁས་བླངས་ནས། ཡུལ་ཐམས་ཅད་དུ་དྲིལ་བསྒྲགས་ཏེ། དེང་ནས་ཞག་བདུན་རྒྱལ་པོ་ལེགས་པར་གསུངས་པ་མཉན་པའི་ཕྱིར་མེ་དོང་དུ་བདག་ཉིད་མཆོང་བར་ཆད་ཀྱིས། ཁྱེད་ཀྱི་ནང་ནས་གང་རྨད་དུ་བྱུང་བ་མཐོང་བར་འདོད་པ་དེ་དག་འདིར་ཤོག་ཅིག་ཅེས་བྱས་པས་སྐྱེ་བོ་འབུམ་ཕྲག་དུ་མ་འདུས་ཤིང་ནམ་མཁའ་ལ་ལྷ་འབུམ་ཕྲག་དུ་མ་འདུས་ཏེ་འཁོད་པའི་ནང་དུ་གནོད་སྦྱིན་དེ་ནམ་མཁའ་ལ་འཕགས་ནས་བྱང་ཆུབ་སེམས་དཔའ་ལ་སྨྲས་པ། རྒྱལ་པོ་ཆེན་པོ་ཇི་ལྟར་དམ་བཅས་པ་བཞིན་དུ་མཛོད་ཅིག དེར་རྒྱལ་པོས་བུ་ཐུ་བོ་རྒྱལ་སར་དབང་བསྐུར་ནས་སྐྱེ་བོ་རྣམས་ལ་ཉེས་པ་བཤགས་ཤིང་དབུགས་ཕྱུང་ནས་མེད་དོང་གི་དྲུང་དུ་སོང་སྟེ། ང་ནི་ཆོས་ཕྱིར་མེ་འབར་ཉི་མ་ཁྲག་མདོག་འདྲ་བའི་མདག་མེའི་དོང་། །ཤས་ཆེར་འཇིགས་བྱེད་ནང་དུ་མཆོང་བར་སེམས་ཏེ་སྲོག་ཕྱིར་འཇིགས་པ་མེད། །མེ་དོང་འདི་ནི་བདག་གི་བསོད་ནམས་མཐུ་ཡིས་རྫིང་བུ་རབ་བཟང་བ། །ཙནྡན་འདམ་གྱིས་བསྒོས་པའི་ཆུ་བསིལ་པདྨས་གང་བར་འགྱུར་ཡང་དག ། ཅེས་ཚིགས་སུ་བཅད་པ་དེ་སྨྲས་ནས་མེ་དོང་དུ་མཆོངས་པས་དེ་མ་ཐག་པར་མེ་དོང་རྫིང་བུར་གྱུར་ཅིང་། བརྒྱ་བྱིན་ཡང་ཤིན་ཏུ་ངོ་མཚར་བར་གྱུར་ཏེ་རང་གི་གཟུགས་སུ་བསྒྱུར་ནས། སྔར་གྱི་ཚིགས་བཅད་དེ་ཉིད་སླར་ཡང་སྨྲས་སོ། །དེ་ནས་བྱང་ཆུབ་སེམས་དཔས་ཚིག་བཅད་དེ་བློ་ལ་བཟུང་ནས་གསེར་གྱིས་གླེགས་བམ་ལ་བྲིས་ཏེ་འཛམ་བུ་གླིང་ཀུན་ཏུ་གོ་བར་བྱས་སོ། །དེའི་དུས་ཀྱི་རྒྱལ་པོར་གྱུར་པ་དེ་ནི་ང་ཡིན་ཏེ། དེའི་ཚེ་ཡང་ངས་ལེགས་པར་གསུངས་པ་མཉན་པའི་ཕྱིར་རང་གི་སྲོག་ཡོངས་སུ་བཏང་ན་ད་ལྟར་ལྟ་ཅི་སྨོས། དགེ་སློང་དག་དེ་བས་ན་འདི་ལྟར་བསླབ་པར་བྱ་སྟེ། ཆོས་ལ་བཀུར་སྟི་བྱའོ། །བླ་མར་བྱའོ། །རི་མོར་བྱའོ། །མཆོད་པར་བྱའོ། །ཞེས་གསུངས་སོ། །འདིས་ནི་ཆོས་ལ་གུས་པ་བསྐྱེད་དགོས་པ་དང་། མཆོད་པའི་རས་མ་སོགས་འགོམ་དགོས་བྱུང་ནས་མདོའི་ཚིག་བརྗོད་བཞིན་ཕྱིན་ན་ཉེས་པ་འགོག་པའི་ཁུངས་ཀྱང་བསྟན་པ་ཡིན་ནོ། །