རིང་བསྲེལ་ཅན་གྱི་མཆོད་རྟེན་ཁྱད་འཕགས་ལ་མཆོད་པ་དང་ཕྲ་རྒྱན་དང་མཆོད་རྫས་ཀྱི་རིགས་སོགས་ཕུལ་བའི་ཕན་ཡོན་བསྟན་པ།
༈ ཡང་བཅོམ་ལྡན་འདས་རྒྱལ་བྱེད་ཀྱི་ཚལ་ན་བཞུགས་པའི་ཚེ། མཉན་ཡོད་ཀྱི་ཚོང་དཔོན་རྣམ་ཐོས་བུའི་ནོར་དང་ལྡན་པ་ཞིག་གི་ཆུང་མ་ལ། བུ་མོ་གཟུགས་བཟང་ཞིང་ལྟ་ན་སྡུག་པ་ལྷའི་རྒྱན་གྱིས་བཀླུབས་པ་ནོར་བུ་རིན་པོ་ཆེ་མགུལ་དུ་ཐོགས་པ་ཞིག་བཙས་ཏེ། དེ་ལས་འོད་བྱུང་བ་དེས་མཉན་ཡོད་ཐམས་ཅད་སྣང་བར་བྱས་པས་མིང་འོད་བཟང་མ་ཞེས་པར་བཏགས་སོ། །དེ་ཆེར་སྐྱེས་པ་ན་དད་པ་ཆེ་ཞིང་སྦྱིན་པ་ལ་དགའ་བ་སྟེ། སློང་བ་སུ་དང་སུ་འོང་བ་ལ་རང་གི་མགུལ་ནས་རྒྱན་བཀྲོལ་ཏེ་སྦྱིན་པར་བྱེད་དོ། །བྱིན་ནས་ཀྱང་ཡང་རྒྱན་འབྱུང་བར་འགྱུར་རོ། །དེ་ནས་དེ་རྒྱལ་པོའི་བུ་དང་བློན་པོའི་བུ་དང་། ཚོང་དཔོན་གྱི་བུ་མང་པོ་ཞིག་གིས་བསླངས་པས། ཕ་དེས་དེ་དག་གཅིག་ལ་བྱིན་ན་གཞན་ཀུན་དང་དགྲར་འགྱུར་རོ་སྙམ་དུ་སེམས་མི་དགའ་བར་གྱུར་པ་ན། བུ་མོ་དེས་ཡབ་ལ་ཐུགས་ངན་མ་མཛད་ཅིག་དང་། ད་སྟེ་ཞག་བདུན་ན་བདག་ཉིད་ཀྱིས་ཁྱིམ་ཐབ་འདམ་པར་འཚལ་ལོ། །དེ་རྒྱལ་པོ་གསལ་རྒྱལ་ལ་ཞུས་ནས་དྲིལ་བསྒྲགས་ཏེ་ཐམས་ཅད་ཚོགས་པ་ན། བུ་མོ་འོད་བཟང་མ་ཤིང་རྟ་ལ་ཞོན་ཏེ་ཆོས་གོས་ཚོན་ཅན་གྱིས་རྒྱལ་མཚན་བསྒྲེངས་ནས། སངས་རྒྱས་བཅོམ་ལྡན་འདས་ཀྱི་སྐུ་གཟུགས་རི་མོར་བྲིས་ཏེ་བསྟོད་པ་འདོན་བཞིན་སྲང་དུ་ཞུགས་སོ། །དེར་རྒྱལ་པོའི་བུ་སོགས་དེ་ཐམས་ཅད་ཀྱིས་ཡིད་སྨོན་བྱེད་ཅིང་བལྟ་བ་ལ་བུ་མོ་དེས་བདག་ཁྱོད་རྣམས་གང་གི་སྒོ་ནས་ཀྱང་སྐུ་བརྙས་པ་མ་ལགས་ཏེ་བདག་ནི་འདོད་པ་གཏན་དོན་དུ་མི་གཉེར་བས་སངས་རྒྱས་ལ་སྐྱབས་སུ་སོང་ཞིང་དེར་རབ་ཏུ་བྱུང་བར་བྱའོ་ཞེས་བྱས་པས་དེ་དག་ཕྱིར་ལོག་གོ །དེ་ནས་བུ་མོ་དེས་བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་ཆོས་ཉན་པས་བདེན་པ་མཐོང་ཞིང་། རབ་ཏུ་བྱུང་བར་གསོལ་བས། བཅོམ་ལྡན་འདས་ཀྱིས་གདུལ་བྱ་མང་པོ་དག་དེས་འདྲེན་པར་གཟིགས་ནས་བཀའ་སྩལ་པ། བུ་མོ་སོང་ལ་འཁོར་རྣམས་ཀྱང་ལྟོས་ཤིག དེ་ནས་བུ་མོ་འོད་བཟང་མ་རྒྱལ་བྱེད་ཀྱི་ཚལ་ནས་ཕྱིར་བྱུང་སྟེ་སྐྱེ་བོ་མང་པོ་འདུས་པའི་ནང་དུ་སོང་བ་དང་། དེ་དག་གིས་འདི་མཐུས་འཕྲོག་པར་བྱའོ་སྙམ་དུ་བཟུང་བར་བརྩམས་ཏེ་བསྙགས་པ་ན། ངང་པའི་རྒྱལ་པོ་འདབ་མ་བརྐྱང་བ་བཞིན་དུ་བུ་མོ་དེ་ནམ་མཁའ་ལ་འཕགས་ཏེ་ཆོ་འཕྲུལ་སྣ་ཚོགས་པ་བསྟན་པས་དེ་དག་དད་པར་གྱུར་ནས་དེའི་རྐང་པ་ལ་ཕྱག་བྱས་ཤིང་བཟོད་པར་གསོལ་བ་ན་བུ་མོ་དེ་ནམ་མཁའ་ལས་བབ་ནས་སྐྱེ་བོ་ཕལ་པོ་ཆེའི་གུང་དུ་འདུག་སྟེ་ཆོས་བསྟན་པས་སྲོག་ཆགས་འབུམ་ཕྲག་དུ་མས་བདེན་པ་མཐོང་བར་བྱས་སོ། །དེ་ནས་དེ་བཅོམ་ལྡན་འདས་ཀྱིས་སྐྱེ་དགུའི་བདག་མོ་ཆེན་མོ་ལ་གཏང་ནས་རབ་ཏུ་བྱུང་ཞིང་བསྙེན་པར་རྫོགས་པས་དགྲ་བཅོམ་པ་ཉིད་མངོན་དུ་བྱས་སོ། །དེར་དགེ་སློང་རྣམས་ངོ་མཚར་དུ་གྱུར་ནས་ལས་ཀྱི་རྒྱུ་ཞུས་པ་ན། སྔོན་སངས་རྒྱས་རྣམ་གཟིགས་ཀྱི་མཆོད་རྟེན་དེ་ལ་རྒྱལ་པོ་མཉན་ཡོད་ཀྱི་བཙུན་མོ་དམ་པ་དེ་རྒས་ནས་རྒྱན་རྣམ་པ་སྣ་ཚོགས་པ་ལུས་ལས་བཀྲོལ་ཏེ་མཆོད་རྟེན་ལ་ཕུལ་ཞིང་། ཞབས་ལ་ཕྱག་བྱས་ནས། དགེ་བའི་རྩ་བ་དང་སེམས་བསྐྱེད་པ་དང་སྦྱིན་པར་བྱ་བའི་ཆོས་ཡོངས་སུ་གཏོང་བ་འདིས། བདག་གིས་ཀྱང་དགྲ་བཅོམ་པ་ཐོབ་པར་གྱུར་ཅིག ། ཅེས་སྨོན་ལམ་བྱས་སོ། །དེའི་དུས་ཀྱི་རྒྱལ་པོ་མཉན་ཡོད་ཀྱི་བཙུན་མོ་དམ་པ་དེ་ནི་འོད་བཟང་མ་འདི་ཡིན་ཏེ། རྒྱུ་དེས་ད་ལྟར་དགྲ་བཅོམ་པའི་བར་དུ་གྱུར་པར་གསུངས་སོ། །འདི་རྣམས་ཀྱིས་ནི་རིང་བསྲེལ་ཅན་གྱི་མཆོད་རྟེན་ཁྱད་འཕགས་ལ་མཆོད་པ་དང་ཕྲ་རྒྱན་དང་མཆོད་རྫས་ཀྱི་རིགས་སོགས་ཕུལ་བའི་ཕན་ཡོན་བསྟན་པ་ཡིན་ནོ། །