མཁན་མོ་སངས་རྒྱས་འོད་སྲུང་གིས་ཤེས་རབ་ཀྱིས་མཆོག་ཏུ་བསྟན་པ་བཞིན་མ་འོངས་པ་ན་བདག་ཀྱང་ཤཱཀྱ་ཐུབ་པས་དེ་ལྟར་ལུང་སྟོན་པ།
༈ དེ་བཞིན་དུ་རྒྱལ་པོ་གསལ་རྒྱལ་གྱི་བུ་མོ་བདེ་བྱེད་མའི་རྟོགས་པ་བརྗོད་པའང་གོང་དུ་ལས་བརྒྱ་པའི་སྐབས་ལྟར་ལས། འདིས་ཕྱིར་མི་འོངས་ཐོབ་ནས་སྐྱེ་བོའི་དབུས་སུ་རྫུ་འཕྲུལ་བསྟན་ནས་དད་པར་བྱས་པའི་འོག་ཏུ་ཆོས་བསྟན་པས་སྐྱེ་བོ་འབུམ་ཕྲག་དུ་མས་བདེན་པ་མཐོང་བ་དང་། དེའི་འོག་ཏུ་རབ་ཏུ་བྱུང་ནས་དགྲ་བཅོམ་པར་གྱུར་པའི་ཚེ། སྟོན་པས་ཉན་ཐོས་ཀྱི་དགེ་སློང་མ་ཤེས་རབ་ཆེ་བ་དང་སྤོབས་པ་ཆེ་བ་རྣམས་ཀྱི་མཆོག་ཏུ་བསྟན་པ་དང་། དེའི་ལས་ཀྱི་རྒྱུ། སྔོན་སངས་རྒྱས་འོད་སྲུང་གི་དུས་ཚོང་དཔོན་གྱི་བུ་མོར་གྱུར་པ་རབ་ཏུ་བྱུང་ནས་སྦྱིན་པ་དང་ཚུལ་ཁྲིམས་ལོ་ཁྲི་ཉིས་སྟོང་གི་བར་དུ་བསྲུངས་ནས། རང་གི་མཁན་མོ་སངས་རྒྱས་འོད་སྲུང་གིས་ཤེས་རབ་ཀྱིས་མཆོག་ཏུ་བསྟན་པ་བཞིན་མ་འོངས་པ་ན་བདག་ཀྱང་ཤཱཀྱ་ཐུབ་པས་དེ་ལྟར་ལུང་སྟོན་པར་གྱུར་ཅིག་ཅེས་སྨོན་ལམ་བཏབ་པར་གསུངས་པའི་ཁྱད་པར་ཙམ་མོ། །ཡང་རྒྱལ་པོ་གསལ་རྒྱལ་གྱི་བུ་མོ་མི་སྡུག་པ་རསྠའི་རྟོགས་པ་བརྗོད་པའང་གོང་དུ་མཛངས་བླུན་དུ་གསུངས་པའི་བུ་མོ་རྡོ་རྗེའི་ལོ་རྒྱུས་ལྟར་ལས། དེ་རྒྱལ་པོས་ལྷོ་ཕྱོགས་ནས་འོང་བའི་དེད་དཔོན་ཕྱུག་པོ་གང་གཱ་ཞེས་པ་ལ་ནུབ་མོ་མི་མཐོང་བར་བྱས་ཏེ་བྱིན་པ། ཕྱི་ནངས་གཟུགས་མཐོང་བས་མི་དགའ་བར་གྱུར་ཀྱང་རྒྱལ་པོ་ལ་འཇིགས་ནས་འདོར་མ་བཟོད་དེ་ཕུག་ཏུ་སྦས་ཤིང་། མཛའ་སྡེའི་ཚོགས་ལའང་པཎ་ལྔ་བརྒྱ་པོ་འཇལ་ནས་ནང་དུ་སྦས་པའི་ཚེ། བུ་མོ་དེ་སྐྱོ་བར་གྱུར་ནས་ཁང་ཕུག་ཏུ་འགག་ཏུ་སོང་བ་ན། སངས་རྒྱས་ཀྱིས་མཁྱེན་ནས་དེར་གཤེགས་ཏེ་བྱམས་པའི་འོད་བཀྱེས་ཤིང་འགག་ཐག་བཀྲོལ་ནས་དབུགས་ཕྱུང་སྟེ། འཇིག་རྟེན་ན་ངོ་མཚར་རྨད་དུ་བྱུང་བའི་གནས་དྲུག་ཡོད་དེ། དེ་བཞིན་གཤེགས་པ་དང་། དེ་བཞིན་གཤེགས་པས་གསུངས་པའི་ཆོས་འདུལ་བ་དང་། མིར་སྐྱེ་བ་དང་། འཕགས་པ་གནས་པར་སྐྱེ་བ་དང་། དབང་པོ་ཚང་བ་དང་། དགེ་བའི་ཆོས་ལ་འདུན་པ་དང་། ངོ་མཚར་རྨད་དུ་བྱུང་བ་འཇིག་རྟེན་དུ་འབྱུང་བ་ཡོད་དོ། །དེ་ནས་དེ་ལ་ཆོས་བསྟན་པས་འབྲས་བུ་དང་པོ་ཐོབ་ཅིིང་སངས་རྒྱས་ལ་བཤོས་དང་ན་བཟའ་ཡང་ཕུལ། དེར་མི་སྡུག་པ་མེད་ཅིང་ལྷའི་བུ་མོ་བཞིན་དུ་ཁང་ཕུག་འོད་ཀྱིས་སྣང་བར་བྱས་པ་ན། དེད་དཔོན་མྱོས་པར་བྱས་པའི་འོག་ཏུ་མཛའ་སྡེ་རྣམས་དེར་ཕྱིན་པས་མཐོང་ནས་ངོ་མཚར་དུ་གྱུར་ཏེ་ཕྱིར་ལོག་པའི་གཏམ་དེད་དཔོན་ལ་བཤད་པས། དེ་མི་དགའ་བཞིན་ཁྱིམ་དུ་འོངས་པས་དེ་ལྟར་གྱུར་པ་མཐོང་ཞིང་གཏམ་དྲིས་པས་དེ་ཡང་སངས་རྒྱས་ལ་དད་པ་རྙེད་ཅིང་། བུ་མོ་དེ་རབ་ཏུ་བྱུང་བས་དགྲ་བཅོམ་པའི་གོ་འཕང་ཐོབ་པར་གྱུར་པའི་ཁྱད་པར་ཙམ་མོ། །ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་པའི་ཚེ། མཉན་ཡོད་ཀྱི་དེད་དཔོན་ཞིག་ཆུང་མ་དང་བཅས་ཏེ་རྒྱ་མཚོར་སོང་བ་ལས། རྒྱ་མཚོའི་ནང་དུ་ཁྱེའུ་ཞིག་བཙས་པར་མིང་རྒྱ་མཚོ་བཏགས། དེ་རང་གི་ཡུལ་དུ་འཁོར་ནས་ཆེར་སྐྱེས་པ་ན། དེས་ཚོང་པ་ལྔ་བརྒྱ་ཁྲིད་དེ་རྒྱ་མཚོ་ཆེན་པོར་ཕྱིན་པས། སྲིན་པོ་ནག་པོའི་རླུང་གིས་གྲུ་དེ་ཕུ་མདའ་བསྐོར་བ་ན། དེད་དཔོན་རྒྱ་མཚོ་ནི་མུ་སྟེགས་བྱེད་ལ་དགའ་བས་སྟོན་པ་དྲུག་ལ་གསོལ་འདེབས་བྱེད་ཅིང་། གཞན་དག་གིས་ནི། གུ་ལང་དང་ཆུ་ལྷ་དང་ཀུ་བེ་ར་ལ་སོགས་པ་དང་། རང་རང་འདོད་པའི་ལྷ་ལ་འབོད་པར་བྱས་ཀྱང་སྐྱབས་བྱེད་པ་ནི་སུ་ཡང་མ་བྱུང་ངོ་། །དེ་ནས་དེར་དགེ་བསྙེན་ཞིག་འདུག་པ་དེས་སངས་རྒྱས་ལ་སྐྱབས་སུ་འགྲོ་བར་བསྐུལ་བས་ཐམས་ཅད་ཀྱིས་སངས་རྒྱས་ལ་སྐྱབས་སུ་སོང་བ་དང་། དེ་སངས་རྒྱས་ཀྱིས་མཁྱེན་ནས་རྒྱལ་བྱེད་ཀྱི་ཚལ་ན་བཞུགས་བཞིན་དུ་ཉི་མ་སྟོང་བས་ལྷག་པའི་འོད་བཀྱེ་སྟེ་ཚོང་པ་དེ་དག་ཀུན་ཏུ་སྣང་བར་བྱས་སོ། །དེར་བྱམས་པ་ཆེན་པོའི་འོད་དེས་ལུས་སེམས་ལ་སིམ་པ་བསྐྱེད་ཅིང་སྲིན་པོ་ནག་པོའི་རླུང་ཡང་བཟློག་པར་གྱུར་ཏེ་བདེ་བར་ཡུལ་དུ་འཁོར་བ་ན་དེ་དག་འ ཆི་བས་སྐྱོ་བར་གྱུར་ཏེ། སྦྱིན་པ་དང་བསོད་ནམས་ཀྱི་ལས་བསགས་ཤིང་ཉེ་དུ་རྣམས་དབུགས་དབྱུང་ནས་ཐམས་ཅད་སངས་རྒྱས་ཀྱི་བསྟན་པ་ལ་རབ་ཏུ་བྱུང་ནས་བརྩོན་པས་དགྲ་བཅོམ་པར་གྱུར་ཏོ། །དེར་དགེ་སློང་རྣམས་ངོ་མཚར་དུ་གྱུར་པ་ན། སྔོན་རྒྱ་མཚོའི་འགྲམ་ཞིག་ན་དྲང་སྲོང་མངོན་པར་ཤེས་པ་ལྔ་དང་ལྡན་པ་ཞིག་གནས་པ་ལ་རྒྱ་མཚོར་འགྲོ་བའི་ཚོང་པ་ལྔ་བརྒྱས་སྐྱབས་གསོལ་ནས་སོང་བ་ན། རིན་པོ་ཆེ་དག་བླངས་ནས་ཕྱིར་ལྡོག་པའི་ལམ་དུ་སྲིན་པོ་ནག་པོའི་རླུང་གིས་བསྐོར་བ་ལས་དྲང་སྲོང་དེས་ཡོངས་སུ་བསྐྱབས་སོ། །དེ་ནས་དེ་རྣམས་བདེ་བར་འཁོར་ཏེ་དྲང་སྲོང་གི་ཐད་དུ་སོང་ནས། ཀྱེ་དྲང་སྲོང་ཆེན་པོ་དཀའ་བས་འབད་པ་དང་། སྙིང་རྗེའི་རང་བཞིན་འདིས་ཅི་ཞིག་སྒྲུབ། དེས་སྨྲས་པ། འཇིག་རྟེན་ལོང་བ་འདྲེན་པ་མེད་པ་རྣམས་བསྐྱབ་པའི་ཕྱིར་སངས་རྒྱས་སུ་འགྱུར་བར་འདོད་དོ། །དེ་དག་གིས། དེའི་ཚེ་བདག་ཅག་ལའང་དགོངས་པར་གསོལ། དྲང་སྲོང་གིས་དེ་ལྟར་བྱའོ་ཞེས་བྱས་སོ། །དེའི་དུས་ཀྱི་དྲང་སྲོང་དེ་ནི་ང་ཡིན་ཏེ། དེའི་ཚེ་ཡང་ངས་ཚོང་པ་འདི་རྣམས་རྒྱ་མཚོ་ལས་ཡོངས་སུ་བསྐྱབས་པར་བྱས་སོ། །གཞན་ཡང་འདི་རྣམས་ཀྱིས་སངས་རྒྱས་འོད་སྲུང་གི་དུས་རབ་ཏུ་བྱུང་ཞིང་དབང་པོ་སྨིན་པར་བྱས་པས་དགྲ་བཅོམ་པ་ཐོབ་བོ་གསུངས་སོ། །ཡང་སྐབས་འདིར་སྣ་མའི་མེ་ཏོག་གི་རྟོགས་བརྗོད་འབྱུང་སྟེ་སྤྱིའི་ཁོག་གོང་དུ་ལས་བརྒྱ་པར་བཤད་པ་ལྟར་ཅུང་མི་འདྲ་བའི་ཁྱད་པར། དེ་ཉིད་བཙས་པའི་ཚེ་ལུས་ལ་ལྷའི་སྣ་མའི་མེ་ཏོག་གི་རལ་གུ་གྱོན་བཞིན་པར་བཙས་ཏེ། དེ་འཕགས་པ་མ་འགགས་པས་ཡོངས་སུ་བསྐྱངས་ཤིང་། ལོ་བདུན་ལོན་པ་ན་རབ་ཏུ་བྱུང་བས་དགྲ་བཅོམ་པ་མངོན་དུ་བྱས་ཏེ་ཕྱག་དར་ཁྲོད་ཀྱི་གོས་ཚེམ་པ་ན་ཁབ་ལན་རེ་འཛུགས་པ་ན་རྣམ་ཐར་བརྒྱད་ལ་འཇུག་ལྡང་བྱེད་དོ། །ཕྱིས་ཞིག་ན་གནས་བརྟན་མ་འགགས་པས། དེ་ཆུ་ཀླུང་ཁང་ལྡན་དུ་ཆུ་ལེན་དུ་མངགས་པ་ན། དེས་ཁྲུས་བྱས་ཏེ་བུམ་པ་ཆུས་བཀང་ནས་ནམ་མཁའ་ལ་སོང་སྟེ་རེས་འགའ་ནི་བུམ་པ་སྔོན་དུ་བཏང་ལ་དགེ་ཚུལ་ཉིད་རྗེས་ལ་འོང་ཞིང་། རེས་འགའ་ནི་རང་ཉིད་སྔོན་དུ་འགྲོ་ལ་བུམ་པ་ཕྱི་ནས་འོང་ངོ་། །དེ་བཅོམ་ལྡན་འདས་ཀྱིས་གཟིགས་ནས་འཁོར་རྣམས་ཀྱི་ནང་དུ་ཤཱ་རིའི་བུ་ལ་བཀའ་སྩལ་པ་ཤཱ་རིས་བུ་དགེ་ཚུལ་དྲན་པ་དང་ལྡན་པ། དབང་པོ་ཤིན་ཏུ་མཉམ་པར་བཞག་པ། བུམ་པ་ཆུས་བཀང་སྟེ་འོང་བ་འདི་མཐོང་ངམ། འདོད་ཆགས་ཞེ་སྡང་རབ་སྤངས་ཤིང་། །མ་རིག་པ་དང་བྲལ་ནས་ནི། །ལུས་ཀྱི་ཐ་མ་འཛིན་བྱེད་པས། །དེ་ནི་ཆུ་ཆུན་རབ་ཏུ་མཛེས། །ཞེས་བསྔགས་པ་མཛད་པ་ལ། དགེ་སློང་རྣམས་ངོ་མཚར་དུ་གྱུར་ནས། དེའི་ལས་ཞུས་པ་ན། སྔོན་སངས་རྒྱས་རྣམ་གཟིགས་ཀྱི་དུས་སུ་དེད་དཔོན་ཞིག་གཞོན་ནུ་ནས་རབ་ཏུ་བྱུང་བར་འདོད་ཀྱང་གཡེངས་པས་ཁྱེར་ཏེ་རབ་ཏུ་བྱུང་མ་ནུས་པས། དེ་རྒས་པ་ན་འགྱོད་པ་ཆེན་པོ་སྐྱེས་ཏེ། སངས་རྒྱས་ཀྱི་དབུ་སྐྲ་དང་སེན་མོའི་མཆོད་རྟེན་ལ་སྣ་མའི་མེ་ཏོག་བཏགས། སངས་རྒྱས་འཁོར་དང་བཅས་པ་ལ་བཤོས་གསོལ་ནས། མ་འོངས་པ་ན་སངས་རྒྱས་རྣམས་མཉེས་པ་བྱེད་པར་གྱུར་ཅིགམི་མཉེས་པར་བྱེད་པར་མ་གྱུར་ཅིག གང་གི་བསྟན་པ་ལ་རབ་ཏུ་བྱུང་བ་དེར་གཞོན་ནུའི་ཚེ་ནས་འཕགས་པའི་ཆོས་རྣམས་རྟོགས་པར་གྱུར་ཅིག་ཅེས་སྨོན་ལམ་བྱས་པ་དང་། སངས་རྒྱས་འོད་སྲུང་གི་དུས་རབ་ཏུ་བྱུང་ནས་ལོ་ཁྲིའི་བར་དུ་ཚངས་སྤྱོད་སྲུང་བའི་ཁྱད་པར་ཙམ་མོ། །ཡང་སྟོན་པ་རྒྱལ་བྱེད་ཀྱི་ཚལ་ན་བཞུགས་པའི་ཚེ། མཉན་ཡོད་ཀྱི་ཁྱིམ་བདག་རྣམ་ཐོས་བུའི་ནོར་དང་ལྡན་པ་ཞིག་གི་ཆུང་མ་ལ། ཁྱེའུ་གཟུགས་བཟང་བ་ལྟ་ན་སྡུག་པ་ཞིག་བཙས་ཏེ་དེའི་ལག་པ་གཉིས་ན་ལས་ཀྱི་རྣམ་པར་སྨིན་པ་ལས་བྱུང་བའ་ིགསེར་གྱི་དོང་ཙེ་མཚན་མས་བཏབ་པ་གཉིས་བྱུང་སྟེ་ཇི་ཙམ་བླངས་ཀྱང་དེ་ཙམ་དུ་བྱུང་བས་མིང་ལག་ན་གསེར་ཐོགས་ཞེས་བཏགས་སོ། །དེ་ཆེར་སྐྱེས་པ་ན་བསམ་པ་དགེ་ཞིང་སྙིང་རྗེའི་སེམས་དང་ལྡན་ཏེ་ལམ་སྲང་དུ་འགྲོ་བའི་ཚེ། དགེ་སྦྱོང་དང་བྲམ་ཟེ་དང་བཀྲེན་པ་དང་སྡུག་ཅིང་ཕོངས་པ་རྣམས་མཐོང་ན་ལག་པ་གཉིས་བརྐྱངས་ནས་དེ་ལ་གསེར་གྱི་དོང་ཙེའི་ཕུང་པོ་སྤུངས་ཏེ་སྦྱིན་པར་བྱེད་པས། དེའི་གྲགས་པས་མཉན་ཡོད་ཐམས་ཅད་ཁྱབ་པར་གྱུར་ཏོ། །དེ་ནས་དེ་རྒྱལ་བྱེད་ཀྱི་ཚལ་དུ་སོང་ནས་བཅོམ་ལྡན་འདས་ལ་དད་པའི་སེམས་སྐྱེས་ཏེ་ཞབས་ལ་ཕྱག་བྱས་ཤིང་ལག་པ་གཉིས་བརྐྱངས་ནས་གསེར་དངུལ་གྱི་ཕུང་པོ་ཆེན་པོ་སྤུངས་ཏེ་ཕུལ་པས་ཐམས་ཅད་ངོ་མཚར་བར་གྱུར་ཅིང་། དེ་ནས་དེ་ལ་སངས་རྒྱས་ཀྱིས་ཆོས་བསྟན་པས་རྒྱུན་དུ་ཞུགས་པ་ཐོབ་ཅིང་རབ་ཏུ་བྱུང་བས་དགྲ་བཅོམ་པའི་གོ་འཕང་ཐོབ་བོ། །དེར་དགེ་སློང་རྣམས་ཀྱིས་དེའི་ལས་ཀྱི་རྒྱུ་ཞུས་པ་ན། སྔོན་སངས་རྒྱས་འོད་སྲུང་འཇིག་རྟེན་དུ་བྱོན་ནས་མྱ་ངན་ལས་འདས་པའི་སྐུ་གདུང་རིན་པོ་ཆེ་སྣ་བཞི་ལས་གྲུབ་པ་འཁོར་ཡུག་ཏུ་དཔག་ཚད་གཅིག་དང་། འཕང་དུ་རྒྱང་གྲགས་གཅིག་ཡོད་པ་རྒྱལ་པོ་ཀྲི་ཀིས་བརྩིགས་ཏེ་དེའི་དུས་སྟོན་བྱེད་པ་ལ། རྒྱན་པོ་པ་ཞིག་གི་གསེར་གྱི་དོང་རྩེ་གཉིས་མཆོད་རྟེན་དེའི་སྲོག་ཤིང་ལ་བཏགས་ནས་ཕྱག་བྱས་ཏེ་བདག་གང་དང་གང་དུ་སྐྱེས་པ་དེར་ལག་པ་ལ་གསེར་ཡོད་པ་ཁོ་ནར་གྱུར་ཅིག་ཅེས་བྱས་སོ། །དེའི་དུས་ཀྱི་རྒྱན་པོ་བ་དེ་ནི་འདི་ཡིན་ཏེ། དེའི་ཚེ་སྦྱིན་པ་དང་སྨོན་ལམ་གྱི་འབྲས་བུས་ད་ལྟར་འདི་བཞིན་གྱུར་ཏེ་དགྲ་བཅོམ་པའི་འབྲས་བུ་མངོན་དུ་བྱས་སོ་གསུངས། འདི་དང་གོང་གི་མཛངས་བླུན་གྱི་སྐབས་གཉིས་ལས་ཀྱི་རྒྱུ་སོགས་ཅུང་མི་གཅིག་གོ །