འཕགས་པ་སྦྱིིན་པའི་ཕ་རོལ་དུ་ཕྱིན་པ་ཞེས་བྱ་བའི་ཐེག་པ་ཆེན་པོའི་མདོ་ལས།

༈ གཞན་ཡང་འཕགས་པ་སྦྱིིན་པའི་ཕ་རོལ་དུ་ཕྱིན་པ་ཞེས་བྱ་བའི་ཐེག་པ་ཆེན་པོའི་མདོ་ལས། བྱང་ཆུབ་སེམས་དཔའ་སེམས་དཔའ་་ཆེན་པོ་མི་ཡི་དབང་པོ་གཙུག་གི་ནོར་བུས་གསོལ་པ། བཅོམ་ལྡན་འདས་རིགས་ཀྱི་བུའམ་རིགས་ཀྱི་བུ་མོ་དང་སེམས་བསྐྱེད་པས་གང་ལ་མངོན་པར་བརྩོན་པར་བགྱི་ལགས། བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་དང་པོ་སེམས་བསྐྱེད་པས་དགེ་བ་བཅུའི་ལས་ཀྱི་ལམ་དག་ལ་མངོན་པར་བརྩོན་པར་བྱའོ། །དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བ་བཅུའི་ལས་ཀྱི་ལམ་དག་ལ་ཇི་ལྟར་མངོན་པར་བརྩོན་པར་བྱེད་ཅེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྲོག་གཅོད་པ་སྤོང་བ་ནས། ལོག་པར་ལྟ་བའི་བར་དག་སྤངས་པ་ཡིན་ནོ། །དེ་ལ་སྲོག་གཅོད་པ་སྤངས་པ་ནི་འདི་སྙམ་དུ་སེམས་ཏེ། སྲོག་ཅེས་བྱ་བ་ནི་ཐ་ན་སྲོག་ཆགས་གྲོགས་སྦུར་ཡན་ཆད་ལ་ཡང་སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་ཏེ། བདག་ལ་ཡང་སྲོག་འདི་སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་གྱི་སུ་ཡང་བདག་གསོད་པའམ། གསོད་དུ་འཇུག་པའམ། བསད་པ་ལ་རྗེས་སུ་ཡི་རང་བར་མ་གྱུར་ཅིག བདག་གིས་ཀྱང་སུ་ལ་ཡང་གསད་པར་མི་བྱ། གསོད་དུ་གཞུག་པར་མི་བྱ། བསད་པ་ལ་རྗེས་སུ་ཡི་རང་བར་མི་བྱའོ་སྙམ་མོ། །དེ་ལྟ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྲོག་གཅོད་སྤངས་པ་ཡིན་ནོ། །མངལ་ན་གནས་པ་ཡན་ཆད་ཀྱང་། །ཀུན་ལ་སྲོག་ནི་སྡུག་པའི་ཕྱིར། །བདག་གི་སྲོག་ཕངས་གང་ཡིན་པ། །དེ་ནི་སྲོག་ཆགས་གསོད་མི་བྱེད། །དེ་བཞིན་དུ་མ་བྱིན་པ་ལེན་པ་སྤངས་པ་ནི། ནོར་ཞེས་བྱ་བ་ནི་ཐ་ན་རིགས་ངན་དང་གཡུང་པོ་ཡན་ཆད་ལའང་སྡུག་ཅིང་ཕངས་པ་ཡིན་པས། སུ་ཡང་བདག་ལ་འཕྲོག་པ་དང་། འཕྲོག་ཏུ་འཇུག་པ་དང་། ཕྲོགས་པ་ལ་རྗེས་སུ་ཡི་རང་བར་མ་གྱུར་ཅིག བདག་གིས་ཀྱང་སུ་ལའང་འཕྲོོག་པར་མི་བྱ། འཕྲོག་ཏུ་གཞུག་པར་མི་བྱ། ཕྲོགས་པ་ལ་རྗེས་སུ་ཡི་རང་བར་མི་བྱའོ་སྙམ་པའོ། །ཤིང་དང་བོང་བ་ཡན་ཆད་ལ། །གཞན་གྱིས་བོར་བར་གྱུར་པ་ཡང་། །གང་ལ་ཕ་ཡི་ནོར་སྡུག་པ། །དེ་ནི་ནོར་ལ་འཕྲོག་མི་བྱེད། །འདོད་པས་ལོག་པར་གཡེམ་པ་སྤངས་པ་ནི། ཆུང་མ་ཞེས་བྱ་བ་ནི་ཐ་ན་དུད་འགྲོའི་སྐྱེ་གནས་སུ་གྱུར་པ་རྣམས་ལ་ཡང་སྡུག་ཅིང་ཕངས་པ་ཡིན་ཏེ་སུ་ཡང་བདག་ལ་འཕྲོག་པའམ་འཕྲོག་ཏུ་འཇུག་པའམ། ཕྲོགས་པ་ལ་རྗེས་སུ་ཡིི་རང་བའམ། ནན་གྱིས་མནན་ཏེ་དགའ་མགུར་ཡོངས་སུ་ལོངས་སྤྱོད་པར་མ་གྱུར་ཅིག བདག་གིས་ཀྱང་སུ་ལ་ཡང་དབྲོག་པར་མི་བྱ་བ་ནས། དགའ་མགུར་ལོངས་སྤྱོད་པར་མི་བྱའོ་སྙམ་པའོ། །བྲན་མོར་གྱུར་པ་ཡན་ཆད་ཀྱང་། །གཞན་གྱི་བཞག་པར་གྱུར་པ་ལ། །གང་ལ་རང་གི་ཆུང་མ་སྡུག ། དེ་ནི་ཆུང་མ་འཕྲོག་མི་བྱེད། །བརྫུན་དུ་སྨྲ་བ་སྤངས་པ་ནི། །བདེན་པ་ཞེས་བྱ་བ་དེ་ནི་ཐ་ན་གནོད་སྦྱིན་དང་འབྱུང་པོ་དང་ཤ་ཟ་རྣམས་ལའང་སྡུག་ཅིང་ཕངས་ལ་དགའ་ཞིང་ཡིད་དུ་འོང་བ་ཡིན་ཏེ། བདག་ལའང་སྡུག་ཅིང་ཕངས་པས་བདག་ལ་རྫུན་སྨྲ་བས་སུན་འབྱིན་པའམ། སུན་འབྱིན་དུ་འཇུག་པའམ། སུན་ཕྱུང་བ་ལ་རྗེས་སུ་ཡི་རང་བར་མ་གྱུར་ཅིག བདག་གིས་ཀྱང་སུ་ལའང་བརྫུན་དུ་སྨྲ་བས་སུན་དབྱུང་བར་མི་བྱ་བ་ནས། རྗེས་སུ་ཡི་རང་བར་མི་བྱའོ་སྙམ་པའོ། །གནོད་སྦྱིན་འབྱུང་པོ་ཡན་ཆད་ཀྱང་། །གང་ལ་བདེན་པར་སྨྲ་བ་སྡུག ། ཤེས་རབ་ཅན་དེ་བརྫུན་ཚིག་གིས། །ལུས་ཅན་ཀུན་ལ་སུན་མི་འབྱིན། །ཕྲ་མའི་ཚིག་སྤངས་པ་ནི། ཕྲ་མ་ནི་ཐ་ན་གང་ཟག་ཕྲ་མ་ཅན་རྣམས་ལའང་ཡིད་མི་སྡུག་ཅིང་མི་འདོད་ལ་མི་དགའ་ཞིང་ཡིད་དུ་མི་འོང་བ་ཡིན་ཏེ་བདག་ལའང་ཡིད་དུ་མི་འོང་བ་ཡིན་གྱིས། སུ་ཡང་བདག་ལ་ཕྲ་མ་ཟེར་བས་གླེང་བའམ། གླེང་དུ་འཇུག་པའམ། གླེང་བ་ལ་རྗེས་སུ་ཡི་རང་བར་མ་གྱུར་ཅིག བདག་གིས་ཀྱང་སུ་ལའང་ཕྲ་མ་ཟེར་བས་གླེང་བར་མི་བྱ་བ་ནས། ཡི་རང་བར་མི་བྱའོ་སྙམ་པའོ། །ངག་རྩུབ་མོ་སྨྲ་བ་སྤངས་པ་ནི། ངག་རྩུབ་པོ་ཞེས་བྱ་བ་འདི་ནི་ཐ་ན་གང་ཟག་ངག་རྩུབ་པོ་དང་ལྡན་པ་རྣམས་ལ་ཡང་མི་སྡུག་ཅིང་ཡིད་དུ་མི་འོང་བ་ཡིན་ཏེ། བདག་ལའང་ཡིད་དུ་མི་འོང་བ་ཡིན་གྱིས། སུ་ཡང་བདག་ལ་ངག་རྩུབ་པོ་སྨྲ་བ་དང་། གཏུམ་པོའི་ཚིག་དང་། བརླང་པོའི་ཚིག་དང་། མི་བདེན་པའི་ཚིག་གིས་ཐོ་འཚམ་པའམ། ཐོ་འཚམ་དུ་འཇུག་པའམ། ཐོ་འཚམ་པ་ལ་རྗེས་སུ་ཡི་རང་བར་མ་གྱུར་ཅིག བདག་གི་ཀྱང་སུ་ལ་ཡང་ངག་རྩུབ་པོ་སྨྲ་བ་ནས། ཡི་རང་བར་མི་བྱའོ་སྙམ་པའོ། །གང་དག་སུ་ཡང་རུང་བ་ལ། །ཕྲ་མ་ངག་རྩུབ་མི་སྡུག་པ། །དེ་ནི་ཕྲ་མ་མི་ཟེར་ཏེ། །རྩུབ་པའི་ཚིག་ཀྱང་སྲུང་བར་བྱེད། །ཚིག་ཀྱལ་པ་སྤངས་པ་ནི། ཚིག་ཀྱལ་པ་ཞེས་བྱ་བ་ནི་ཐ་ན་གང་ཟག་ཚིག་ཀྱལ་པ་ཅན་དག་ལ་ཡང་མི་སྡུག་ཅིང་ཡིད་དུ་མི་འོང་བ་ཡིན་ཏེ། བདག་ལའང་ཡིད་དུ་མི་འོང་བས། སུ་ཡང་བདག་ལ་ཚིག་ཀྱལ་པ་སྨྲས་པས་དྲན་པར་བྱེད་པའམ། དྲན་པར་བྱེད་དུ་འཇུག་པའམ། དྲན་པར་བྱས་པ་ལ་རྗེས་སུ་ཡི་རང་བར་མ་གྱུར་ཅིག བདག་གིས་ཀྱང་སུ་ལ་ཡང་ཚིག་ཀྱལ་པ་སྨྲ་བས་དྲན་པར་མི་བྱ་བ་ནས། ཡི་རང་བར་མི་བྱ་སྙམ་པའོ། །བརྣབ་སེམས་སྤངས་པ་ནི། བརྣབ་སེམས་ནི་ཐ་ན་གང་ཟག་བ རྣབ་སེམས་ཅན་རྣམས་ལ་ཡང་མི་སྡུག་ཅིང་ཡིད་དུ་མི་འོང་བ་ཡིན་ཏེ། བདག་ལ་ཡང་མི་འདོད་པས་སུ་ཡང་བདག་ལ་བརྣབ་སེམས་ཀྱི་ཚིག་གིས་བརྗོད་པའམ། རྗོད་དུ་འཇུག་པའམ། བརྗོད་པ་ལ་རྗེས་སུ་ཡི་རང་བར་མ་གྱུར་ཅིག བདག་གིས་ཀྱང་སུ་ལའང་བརྣབ་སེམས་ཀྱི་ཚིག་བརྗོད་པར་མི་བྱ་བ་ནས། ཡི་རང་བ་མི་བྱའོ་སྙམ་པ་སྟེ། ཀྱལ་པའི་ཚིག་དང་བརྣབ་སེམས་གཉིས། །གང་ཞིག་བདག་ཉིད་མི་འདོད་པ། །དེ་ནི་ཀྱལ་པའི་ཚིག་མི་སྨྲ། །བརྣབ་སེམས་ཀྱང་ནི་སྲུང་བར་བྱེད། །གནོད་སེམས་སྤངས་པ་ནི། གནོད་སེམས་ནི་ཐ་ན་གང་ཟག་གནོད་སེམས་སུ་གྱུར་པའི་སེམས་དང་ལྡན་པ་རྣམས་ལའང་མི་སྡུག་ཅིང་མི་འདོད་ལ་ཡིད་དུ་མི་འོང་བ་ཡིན་ཏེ། བདག་ལའང་མི་འདོད་ཅིང་ཡིད་དུ་མི་འོང་བས། སུ་ཡང་བདག་ལ་གནོད་སེམས་ཀྱི་ཚིག་གིས་འཆད་པའམ། འཆད་དུ་འཇུག་པའམ། བཤད་པ་ལ་རྗེས་སུ་ཡི་རང་བར་མ་གྱུར་ཅིག བདག་གིས་ཀྱང་སུ་ལའང་གནོད་སེམས་ཀྱི་ཚིག་གིས་བཤད་པར་མི་བྱ་བ་ནས་རྗེས་སུ་ཡི་རང་བར་མི་བྱའོ་སྙམ་པའོ། །ལོག་པར་ལྟ་བ་སྤངས་པ་ནི། བྱང་ཆུབ་སེམས་དཔའ་འདི་སྙམ་དུ་སེམས་ཏེ། ལོག་པར་ལྟ་བ་ཞེས་བྱ་བ་ནི་ཐ་ན་གང་ཟག་ལོག་པར་ཞུགས་པ་རྣམས་ལ་ཡང་མི་སྡུག་ཅིང་། མི་འདོད་ལ་མི་དགའ་ཞིང་ཡིད་དུ་མི་འོང་བ་ཡིན་ཏེ། བདག་ལ་ཡང་ལོག་ལྟ་འདི་མི་སྡུག་ཅིང་མི་འདོད་ལ་མི་དགའ་ཞིང་ཡིད་དུ་མི་འོང་བ་ཡིན་གྱིས། སུ་ཡང་བདག་ལ་ལོག་པར་ལྟ་བའི་ཚིག་གིས་སྟོན་པའམ། སྟོན་དུ་འཇུག་པའམ། བསྟན་པ་ལ་རྗེས་སུ་ཡི་རང་བར་མ་གྱུར་ཅིག བདག་གིས་ཀྱང་སུ་ལའང་ལོག་པར་ལྟ་བའི་ཚིག་གིས་བསྟན་པར་མི་བྱ། སྟོན་དུ་གཞུག་པར་མི་བྱ། བསྟན་པ་ལ་རྗེས་སུ་ཡི་རང་བར་མི་བྱའོ་སྙམ་མོ། །དེ་ལྟ་ན་བྱང་ཆུབ་སེམས་དཔའ་སེམས་དཔའ་ཆེན་པོ་ལོག་པར་ལྟ་བ་སྤངས་པ་ཡིན་ནོ། །གནོད་སེམས་ལོག་པར་ལྟ་བ་གཉིས། །ཡོང་གིས་མི་འདོད་གང་ཡིན་པ། །དེ་ནི་གནོད་སེམས་མི་བྱེད་དེ། །གང་ལའང་ལོག་པར་མི་འཇུག་{འདུག} གོ །རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ནི་དགེ་བ་བཅུའི་ལས་ཀྱིས་ལམ་འདི་དག་ཏུ་བརྩོན་པར་བྱེད་དོ། །རིགས་ཀྱི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་དང་པོ་སེམས་བསྐྱེད་པས་ནི་ཕ་རོལ་ཏུ་ཕྱིན་པ་བཅུ་ལ་མངོན་པར་བརྩོན་པར་བྱའོ། །བཅུ་གང་ཞེ་ན་འདི་ལྟ་སྟེ། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ་གཏན་དང་། ཤེས་རབ་དང་། ཐབས་དང་། སྨོན་ལམ་དང་། སྟོབས་དང་། ཡེ་ཤེས་ཀྱི་ཕ་རོལ་ཏུ་ཕྱིན་པའོ། །དེ་ལ་ཇི་ལྟར་བརྩོན་པར་བྱེད་ཅེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་ནི་སྦྱིན་པ་སྦྱིན་པར་བྱེད། ཚུལ་ཁྲིམས་སྲུང་བར་བྱེད། བཟོད་པ་སྒོམ་པར་བྱེད། བརྩོན་འགྲུས་རྩོམ་པར་བྱེད། བསམ་གཏན་ལ་བསམ་གཏན་དུ་བྱེད། ཤེས་རབ་འབར་བར་བྱེད། ཐབས་ལ་མཁས་པར་བྱེད། སྨོན་ལམ་འདེབས་པར་བྱེད། སྟོབས་ལ་འཇུག་པར་བྱེད། ཡེ་ཤེས་ལ་འཇུག་པར་བྱེད་དོ། །དེ་ལ་སྦྱིན་པའི་ཕ་རོལ་དུ་ཕྱིན་པ་ལ་ཇི་ལྟར་བརྩོན་པར་བྱེད་ཅེ་ན། བྱང་ཆུབ་སེམས་དཔའ་ཆེན་པོ་ནི། ཟས་དང་། སྐོམ་དང་། བཞོན་པ་དང་། གོས་དང་། རྒྱན་སོགས་ནས་རྐང་སྦྱིན་པའི་བར་ལ་མངོན་པར་བརྩོན་པར་བྱེད་དོ། །དེ་ལ་ཟས་སྦྱིན་པས་ནི། ཚེ་དང་། ཁ་དོག་དང་། སྟོབས་དང་། བདེ་བ་སྦྱིན་པར་འགྱུར་ཏེ། ཁ་ཟས་སྦྱིན་པ་བྱིན་ན་ནི། །དེས་ན་ཚེ་དང་ཁ་དོག་དང་། །སྟོབས་དང་བདེ་བ་ལྔ་པ་སྤོབས། །ཤེས་རབ་ཅན་གྱིས་བྱིན་པ་ཡིན། །ཁ་ཟས་བྱིན་པས་དགའ་བ་དང་། །ཚེ་རིང་སྟོབས་ལྡན་བདེ་སྐྱིད་འགྱུར། །སྐྱིད་ཅིང་བརྟེན་པ་དེ་དག་ནི། །ཐོགས་མེད་སྤོབས་དང་ལྡན་པར་འགྱུར། །ཕྱུག་ཅིང་ནོར་མང་དཔལ་དང་ལྡན། །མི་ནི་དེས་ཤིང་བློ་ལྡན་ལ། །བསོད་ནམས་ལྡན་ཞིང་མཁས་ལ་ཞི། །ཁ་ཟས་བྱིན་པས་དེ་ལྟར་འགྱུར། །བྱང་ཆུབ་སེམས་དཔའ་སྐོམ་སྦྱིན་པ་ན། སངས་རྒྱས་ཀྱིས་བསྔགས་པའི་སྨོན་ལམ་བཞིན་དུ་སྐོམ་གྱིས་སྦྱིན་པ་འདིས་ནི། བདག་སེམས་ཅན་ཐམས་ཅད་ཀྱི་ཉོན་མོངས་པ་སྲིད་པའི་རྒྱ་མཚོ་ཐམས་ཅད་སྐེམ་པར་བྱེད་པར་གྱུར་ཅིག རྣམ་པར་གྲོལ་བའི་རོའི་སྐོམ་གྱིས་ཀྱང་ཚིམ་པར་བྱེད་པར་གྱུར་ཅིག ཅེས་སྨོན་ལམ་འདེབས་པར་བྱ་ཞིང་། རྒ་ཤིའི་ཆུ་སྲིན་གྱིས་དཀྲུགས་པའི། །ཉོན་མོངས་སྲེད་པའི་མཚོ་སྐེམ་ནས། །རྣམ་གྲོལ་རོ་ཡི་སྐོམ་གྱིས་ནི། །མི་རྣམས་བདག་གིས་ཚིམ་པར་བྱ། །སྐོམ་བྱིན་པ་ནི་མཁས་པ་དེ། །ཀུན་ཏུ་འབར་ཞིང་རབ་འབར་བའི། །ཡི་དྭགས་ཉམས་པར་མི་སྐྱེ་ཞིང་། །སྐོམ་པའི་གནོད་པ་འབྱུང་མི་འགྱུར། །དེ་བཞིན་དུ་ཤིང་རྟའམ་ཁྱོགས་སམ་རྟའམ་གླང་པོ་ཆེ་སོགས་བཞོན་པ་དང་། ལྷ མ་སྦྱིན་པར་བྱེད་ན། བཞོན་པ་སྦྱིན་པ་འདིས་བདག་སེམས་ཅན་ཐམས་ཅད་ཀྱི་བདེ་བ་དང་། རྫུ་འཕྲུལ་གྱི་གཞི་སྡུད་པར་གྱུར་ཅིག ཅེས་དང་། བཞོན་པ་ཤིང་རྟ་བྱིན་པ་ཡིས། །རྟག་ཏུ་སེམས་ཅན་ཐམས་ཅད་ཀྱིས། །ཐེག་པ་ཆེན་པོ་ཐོབ་གྱུར་ཅིག ། རྫུ་འཕྲུལ་རྐང་པ་ཐོབ་པར་ཤོག ། བཞོན་པ་བྱིན་པས་དྲང་སྲོང་ཆེ། །སངས་རྒྱས་ཞིང་ནས་ཞིང་དག་ཏུ། །བློ་ལྡན་བྱ་ཡི་ཤུགས་འདྲ་བར། །རྫུ་འཕྲུལ་གྱིས་ནི་མཁའ་ལ་འགྲོ། །ཞེས་དང་། གོས་སྦྱིན་པ་ན་གོས་ཀྱི་སྦྱིན་པ་འདིས་བདག་སེམས་ཅན་ཐམས་ཅད་ཀྱི་ངོ་ཚ་ཤེས་པ་དང་། ཁྲེལ་ཡོད་པ་དང་། མདོག་ཡོངས་སུ་དག་པར་བྱེད་པར་གྱུར་ཅིག གོས་ཀྱི་སྦྱིན་པ་འདིས་ནི་བདག ། སེམས་ཅན་ཀུན་གྱི་ངོ་ཚ་ཤེས། །ཁྲེལ་ཡོད་པ་ནི་སྦྱོང་བ་དང་། །མདོག་ཀྱང་དག་པར་བྱེད་གྱུར་ཅིགགོས་སྦྱིན་ཤིན་ཏུ་དཔལ་དང་ལྡན། །རྟག་ཏུ་རིགས་ལྡན་གཟུགས་བཟང་ཞིང་། །མི་དེ་ངོ་ཚ་ཤེས་པར་འགྱུར། །མི་ནི་གྲགས་དང་སྐལ་དང་ལྡན། །ཞེས་དང་། རྒྱན་གྱི་རིགས་སྦྱིན་ན། རྒྱན་སྦྱིན་པ་འདིས་བདག་གིས་སེམས་ཅན་ཐམས་ཅད་ཀྱི་ལུས་མཚན་དང་དཔེ་བྱད་བཟང་པོ་དག་གིས་བརྒྱན་པ་མཐོང་བར་གྱུར་ཅིག གསེར་གྱི་རྒྱན་ནི་བྱིན་པ་ཡིས། །མཚན་རྣམས་ཀྱིས་ནི་བརྒྱན་པ་ཡི། །སེམས་ཅན་ཐམས་ཅད་མཐོང་གྱུར་ཅིང་། །བདག་ཀྱང་བྱང་ཆུབ་འཚོལ་བར་ཤོག ། ནོར་བུ་མུ་ཏིག་བྱིན་པ་ཡིས། །གང་དང་གང་དུ་དེ་སྐྱེ་བ། །སྐྱེ་གནས་དེ་དང་དེ་དག་ཏུ། །རིན་ཆེན་ཆར་ནི་འབབ་པར་འགྱུར། །ཞེས་དང་། མར་མེ་སྦྱིན་ན། བདག་སེམས་ཅན་ཐམས་ཅད་ཀྱི་ལྷའི་མིག་ཡོངས་སུ་དག་པར་འགྱུར་བའི་དོན་བྱེད་པར་གྱུར་ཅིག ཀུན་མཁྱེན་ཡེ་ཤེས་འགྱུར་བ་ཡི། །མར་མེ་སྦྱིན་པ་དེས་ན་བདག ། སེམས་ཅན་ཀུན་གྱི་ལྷ་ཡི་མིག ། རྣམ་པར་དག་པར་བྱེད་གྱུར་ཅིག ། མི་དེ་མར་མེ་བྱིན་པ་ཡིས། །འཇིག་རྟེན་དག་ན་དུས་ཀུན་ཏུ། །སངས་རྒྱས་རྣམས་ཀྱི་སྤྱན་ལྔ་དང་། །རིམ་གྱིས་སུ་ནི་ལྡན་པར་འགྱུར། །ཞེས་དང་། རོལ་མོའི་སྒྲ་སྦྱིན་ན། རོལ་མོའི་སྒྲའི་སྦྱིན་པ་འདིས་བདག་སེམས་ཅན་ཐམས་ཅད་ཀྱི་ལྷའི་རྣ་བ་ཡོངས་སུ་རྫོགས་པར་བྱེད་པར་གྱུར་ཅིག རོལ་མོའི་སྒྲ་བྱིན་དེས་ན་བདག ། སེམས་ཅན་ཀུན་ལ་ལྷ་རྣ་དང་། །སངས་རྒྱས་བྱང་ཆུབ་འགྲོོ་ཕན་པ། །རབ་ཏུ་རྫོགས་པར་བྱེད་གྱུར་ཅིག ། རོལ་མོ་སྒྲ་ནི་བྱིན་པས་ན། །རྫོགས་པའི་སངས་རྒྱས་གྲགས་ལྡན་པ། །དཔའ་བོ་རྣམས་ཀྱི་ལྷ་ཡི་སྙན། །གང་དུ་སྐྱེས་པ་དེ་ཡིས་འཐོབ། །ཅེས་དང་། སྤོས་དང་བྱུག་པ་སོགས་སྦྱིན་ན། སྤོས་དང་ཕྱེ་མ་དང་བྱུག་པའི་སྦྱིན་པ་འདིས། བདག་གིས་སེམས་ཅན་ཐམས་ཅད་ཚུལ་ཁྲིམས་དང་། ཐོས་པ་དང་། ཏིང་ངེ་འཛིན་གྱི་སྤོས་ཀྱི ས་བྱུགས་པར་གྱུར་ཅིག ། སྤོས་དང་ཕྱེ་མ་བྱིན་པ་དང་། །བྱུག་པ་དག་ནི་བྱིན་པ་ཡིས། །ཚུལ་ཁྲིམས་ཐོས་དང་ཏིང་ངེ་འཛིན། །ལུས་ཅན་རྣམས་ཀྱིས་ཐོབ་གྱུར་ཅིག ། སྤོས་དང་ཕྱེ་མ་བྱིན་པ་དང་། །བྱུག་པ་བྱིན་པས་སྐྱོབ་རྣམས་ཀྱི། །ལྷ་ཡི་ཤངས་དང་ལྷ་ཡི་སྐུ། །སྐྱོན་མེད་དེ་ཡིས་ཐོབ་པར་འགྱུར། །ཞེས་དང་། མེ་ཏོག་དང་མེ་ཏོག་གི་ཕྲེང་བ་སྦྱིན་ན། མེ་ཏོག་དང་མེ་ཏོག་གི་ཕྲེང་བའི་སྦྱིན་པ་འདིས། བདག་གིས་སེམས་ཅན་ཐམས་ཅད་ཀྱི་ལུས་གཟུངས་དང་། སྤོབས་པ་དང་། བྱང་ཆུབ་ཀྱི་ཡན་ལག་རིན་པོ་ཆེའི་མེ་ཏོག་གིས་བརྒྱན་པར་བྱེད་པར་གྱུར་ཅིག མེ་ཏོག་མེ་ཏོག་ཕྲེང་བྱིན་པས། །མྱུར་བར་རྣམ་པ་ཐམས་ཅད་དུ། །བྱང་ཆུབ་ཡན་ལག་མེ་ཏོག་གིས། །ལུས་ཅན་ཀུན་ལ་བརྒྱན་པར་ཤོག ། མེ་ཏོག་མེ་ཏོག་ཕྲེང་བྱིན་པས། །གང་དང་གང་དུ་སྐྱེས་པ་དེར། །རྒྱལ་པོ་བློན་པོ་ཞང་བློན་གྱིས། རྟག་ཏུ་མཆོད་ཅིང་རིམ་གྲོ་བྱེད། །ཅེས་དང་། ཤིང་ཏོག་དང་བུར་སྦྲང་མར་དང་ལན་ཚྭ་སོགས་ཀྱི་རོ་བྲོ་བ་སྦྱིན་ན། རོའི་སྦྱིན་པ་འདིས་བདག་གིས་སེམས་ཅན་ཐམས་ཅད་ལ་རོ་བྲོ་བའི་མཆོག་ཏུ་འགྱུར་བའི་སྐྱེས་བུ་ཆེན་པོའི་མཚན་ཡོངས་སུ་རྫོགས་པར་བྱེད་པར་གྱུར་ཅིག རོ་ཡི་སྦྱིན་པས་སེམས་ཅན་ཀུན། །ཀུན་མཁྱེན་རོ་ཡི་སྙིང་པོ་ཡིས། །རྫོགས་སངས་རྒྱས་པའི་བྱང་ཆུབ་ཀྱི། །སྤྱོད་པ་ཡོངས་སུ་རྫོགས་གྱུར་ཅིག ། རོ་ཡི་སྦྱིན་པས་ཡིད་གཞུངས་ཤིང་། །དྲན་ལྡན་བློ་གྲོས་རྒྱ་མཚོ་བཞིན། །དེས་ནི་རོ་ཡི་རྣམ་གྲངས་ཐོབ། །ལྷུན་གྱིས་གྲུབ་པར་ལོངས་སྤྱོད་ལྡན། །ཞེས་དང་། གནས་ཁང་སོགས་སྦྱིན་ན། གནས་ཀྱི་སྦྱིན་པ་འདིས་བདག་སེམས་ཅན་ཐམས་ཅད་ཀྱི་གནས་དང་སྐྱོ བ་པ་དང་། གླིང་དང་། སྐྱབས་དང་དཔུང་གཉེན་དུ་གྱུར་ཅིག ། གཞལ་མེད་ཁང་གནས་སྦྱིན་པ་ཡིས། །བདག་ནི་འཛམ་བུ་གླིང་དག་ཏུ། །ལུས་ཅན་ཀུན་གྱི་སྐྱོབ་དང་གླིང་། །སྐྱབས་དང་དཔུང་གཉེན་འགྱུར་བར་ཤོག ། གཞལ་མེད་ཁང་གནས་སྦྱིན་པ་ཡིས། །གང་དང་གང་དུ་སྐྱེས་པ་ན། །ཁྱིམ་དང་གནས་དང་ཡུལ་འཁོར་གྱི། །བདག་པོ་དང་ནི་གཙོ་བོར་འགྱུར། །ཞེས་དང་། མལ་དང་སྔས་སྦྱིན་ན། མལ་དང་སྔས་ཀྱི་སྦྱིན་པ་འདིས། བདག་སེམས་ཅན་ཐམས་ཅད་ཀྱི་སྒྲིབ་པ་ཐམས་ཅད་གཏན་སྤངས་པའི་འཕགས་པ་དང་། ལྷའི་ཚངས་པའི་གནས་དེ་བཞིན་གཤེགས་པའི་གཟིམས་མལ་དང་འཕངས་སྦྱིན་པར་གྱུར་ཅིག མལ་དང་སྔས་རྣམས་བྱིན་པས་བདག་ལ་ནི། །བསོད་ནམས་ཚོགས་ནི་ཅུང་ཟད་ཅི་ཡོད་པ། །དེས་ནི་བདག་གིས་སྐྱེ་བོའི་སྒྲིབ་པ་དག ། སྡིག་པའི་བློ་གྲོས་ངན་པ་འཇོམས་པར་ཤོག ། ལུས་ཅན་རྣམས་ཀྱི་ལྟ་བ་ངན་པ་ཡི། །དྲྭ་བ་ཤེས་རབ་མཚོན་གྱིས་གཅོད་པར་ཤོག ། བདེ་བར་གཤེགས་པ་རྣམས་ལ་འོས་པ་ཡི། །མལ་མཆོག་ཚངས་གནས་བསྟན་པ་སྦྱིན་པར་ཤོག ། མལ་དང་སྔས་རྣམས་སྦྱིན་པར་བྱེད་པའི་མི། །བསྟན་བཅོས་དག་ལ་མཁས་པར་སྐྱེ་བར་འགྱུར། །ཞི་གནས་ཐོབ་ཅིང་རྒྱ་ཆེར་བྱིན་པ་དང་། །པདྨ་ལས་བྱུང་གཟི་ཅན་གཞོན་ནུར་འགྱུར། །ཞེས་དང་། ཁྲི་སྟན་སོགས་སྦྱིན་ན། སྟན་གྱི་སྦྱིན་པ་འདིས་བདག་གིས་སེམས་ཅན་ཐམས་ཅད་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཀྱི་ས་གཞི་ལ། བྱང་ཆུབ་ཀྱི་སྙིང་པོ་རྡོ་རྗེའི་གདན་ཐོབ་པ་བྱེད་པར་གྱུར་ཅིག སྟན་གྱི་སྦྱིན་པ་འདི་ཡིས་ནི། །བྱང་ཆུབ་སྙིང་པོའི་རྡོ་རྗེའི་གདན། །བཟང་ཞིང་སྲ་ལ་བརྟན་པ་དག ། ལུས་ཅན་ཀུན་ལ་འབྱུང་བར་ཤོག ། སྣ་ཚོགས་རིན་ཆེན་བདུན་ལས་བྱས། །འཕང་དུ་དཔག་ཚད་གཉིས་ཡོད་ལ། །ཁོ་ར་ཁོར་ཡུག་དཔག་ཚད་གཅིག ། རི་རབ་བཞིན་དུ་སྦ་བ་དང་། །རིན་ཆེན་ལྗོན་ཤིང་བརྒྱས་བསྐོར་ཅིང་། །གཞལ་མེད་ཁང་གིས་ལེགས་པར་བརྒྱན། །དྲིལ་བུ་གཡེར་ཀའི་དྲྭ་བས་བཀབ། །ནོར་བུ་རིན་ཆེན་སྤྲས་གསལ་བ། །ཚངས་པ་མཚུངས་པར་སྤྱོད་རྣམས་ལ། །ཁྲིའུ་དང་སྟན་དང་སྟེགས་བྱིན་པས། །འཁོར་བ་དག་ན་འཁོར་བའི་ཚེ། །དེ་འདྲའི་སྟན་ནི་ཐོབ་པར་འགྱུར། །ཞེས་དང་། མཁོ་བའི་ཡོ་བྱད་དག་སྦྱིན་ན། ཡོ་བྱད་བྱིན་པ་འདིས་བདག་སེམས་ཅན་ཐམས་ཅད་ཀྱི་བྱང་ཆུབ་ཀྱི་ཡོ་བྱད་ཡོངས་སུ་རྫོགས་པར་བྱེད་པར་གྱུར་ཅིག ཡོ་བྱད་ཡོངས་སུ་བཏང་བ་དེས། །བདག་གིས་ཀྱང་ནི་ལུས་ཅན་གྱིས། །བྱང་ཆུབ་ཡོ་བྱད་བཙལ་བ་དག ། ཡོངས་སུ་རྫོགས་པར་བྱེད་གྱུར་ཅིག ། ཡོ་བྱད་རབ་ཏུ་བྱིན་པ་ཡིས། །གང་དང་གང་དུ་སྐྱེས་པ་དེར། །རྣམ་པ་ཀུན་གྱི་མཆོག་ལྡན་པའི། །ཡན་ལག་ཐམས་ཅད་རྫོགས་པར་འགྱུར། །ཞེས་དང་། སྨན་སྦྱིན་ན། སྨན་བྱིན་པ་འདིས་བདག་སེམས་ཅན་ཐམས་ཅད་ཀྱི་རྒ་བ་དང་འཆི་བ་མེད་པའི་བདུད་རྩིའི་བདེ་བ་ཡོངས་སུ་རྫོགས་པར་བྱེད་པར་གྱུར་ཅིག རྩི་དང་སྨན་གྱི་སྦྱིན་པ་ཡིས། །སེམས་ཅན་ཐམས་ཅད་ཚེ་དཔག་མེད། །ཐམས་ཅད་མཁྱེན་པའི་བདུད་རྩི་ཡང་། །མྱུར་བ་ཉིད་དུ་ཐོབ་གྱུར་ཅིག ། རྩི་དང་སྨན་གྱི་སྦྱིན་པ་ཡིས། །ཟླ་བ་ཉ་ལྟར་ནད་མེད་ཅིང་། །གནོད་ཆུང་སྐྱིད་ཅིང་བདེ་བར་གནས། །མི་རྣམས་ཚེ་ནི་རིང་བར་འགྱུར། །ཞེས་དང་། བྲན་སོགས་སྦྱིན་ན། བྲན་དང་བྲན་མོ་དང་ལས་བྱེད་པ་དང་ཞོ་ཤས་འཚོ་བ་ཡོངས་སུ་གཏོང་བའི་སྦྱིན་པ་འདིས། བདག་སེམས་ཅན་ཐམས་ཅད་ཀྱི་རང་དགའ་དང་རང་དབང་དང་རང་བྱུང་གི་ཡེ་ཤེས་ཡོངས་སུ་རྫོགས་པར་བྱེད་པར་གྱུར་ཅིག བྲན་དང་བྲན་མོ་བཏང་བ་ཡིས། །མདོར་ན་ལུས་ཅན་ཐམས་ཅད་ཀྱིས། །རང་བྱུང་གི་ནི་ཡེ་ཤེས་ཀྱི། །སྙིང་པོ་ཡོངས་སུ་རྫོགས་གྱུར་ཅིག ། བྲན་དང་བྲན་མོ་བཏང་བ་ཡིས། །མི་ནི་བྲན་དུ་མི་སྐྱེ་ཞིང་། །བརྟན་པོ་རང་དབང་ཡོད་པས་འཚོ། །ཞུམ་པ་མེད་ཅིང་འཇིགས་པ་མེད། །ཅེས་དང་། གསེར་དངུལ་སོགས་སྦྱིན་ན། གསེར་དང་དངུལ་དང་ནོར་བུ་དང་མུ་ཏིག་དང་། བཻཌཱུ ཪྱ་དང་། དུང་དང་། མན་ཤེལ་དང་། བྱེ་རུ་དང་། རིན་པོ་ཆེ་ཐམས་ཅད་བྱིན་པ་དེས། བདག་སངས་རྒྱས་ཀྱི་ཞིང་བྱེ་བ་ཁྲག་ཁྲིག་ཕྲག་འབུམ་མཐའ་ཡས་མུ་མེད་པ་དག་ཏུ་འོད་ཟེར་སྔོན་པོ་དང་སེར་པོ་དང་དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུས་སྣང་བར་བྱེད་པར་གྱུར་ཅིག རིན་ཆེན་བྱིན་པ་དེས་ན་བདག ། འོད་ཟེར་སྣ་ཚོགས་སྣང་བ་ཡིས། །སངས་རྒྱས་དྲང་སྲོང་ཆེ་རྣམས་ཀྱི། །ཞིང་རྣམས་ཐམས་ཅད་སྣང་བྱེད་ཤོག ། རིན་ཆེན་སྣ་ཚོགས་བྱིན་པ་ཡིས། །ངེས་པ་གང་དང་གར་སྐྱེས་པ། །འཇིག་རྟེན་མཚན་མོ་ཡན་ཆད་དུ། །དེས་ནི་འོད་ཟེར་སྣང་བར་བྱེད། །ཅེས་དང་། རྟ་གླང་སྦྱིན་ན། རྟ་དང་གླང་པོ་ཆེ་དང་། ཤིང་རྟའི་བཞོན་པ་ཡོངས་སུ་གཏོང་བའི་སྦྱིན་པ་འདིས། བདག་གིས་སེམས་ཅན་ཐམས་ཅད་ཐེག་པ་ཆེན་པོ་དང་། ཐེག་པ་མཆོག་དང་ཐེག་པ་མི་མཉམ་པ་དང་མཉམ་པ་དང་། སངས་རྒྱས་ཀྱི་ཐེག་པ་བླ་ན་མེད་པ་གཙོ་བོ་དམ་པར་རབ་མཆོག་གིས་སྡུད་པར་བྱེད་པར་གྱུར་ཅིག བདག་གིས་གླང་ཆེན་བྱིན་པ་ཡིས། །སངས་རྒྱས་ཐེག་པ་ཐེག་པ་ཆེ། །ཐེག་པ་མཆོག་གིས་ལུས་ཅན་རྣམས། །མྱུར་དུ་སྡུད་པར་བྱེད་པར་ཤོག ། གླང་ཆེན་བྱིན་ཞིང་རྟ་བྱིན་པས། །གསལ་ཞིང་མཁས་ལ་ཤེས་ཉན་ཅན། །ཐེག་པ་ཆེ་ལ་མོས་པ་དང་། །མི་དེ་སྐལ་བ་ཅན་དུ་འགྱུར། །ཞེས་དང་། སྐྱེད་ཚལ་སོགས་སྦྱིན་ན། སྐྱེད་མོས་ཀྱི་ཚལ་དང་། དཀའ་ཐུབ་ཀྱི་ནགས་ཚལ་དང་། གཙུག་ལག་ཁང་ཡོངས་སུ་གཏོང་བའི་སྦྱིན་པ་འདིས་བདག་སེམས་ཅན་ཐམས་ཅད་ཀྱི་བསམ་གཏན་གྱི་ཡན་ལག་ཡོངས་སུ་རྫོགས་པར་བྱེད་པར་གྱུར་ཅིག ལྷ་ཁང་སྐྱེད་མོས་ཚལ་བྱིན་པས། །བདག་གིས་སེམས་ཅན་ཐམས་ཅད་ཀྱི། །བསམ་གཏན་ཡན་ལག་རིམ་བཞིན་དུ། །ཡོངས་སུ་རྫོགས་པར་བྱེད་པར་ཤོག ། ལྷ་ཁང་སྐྱེད་མོས་ཚལ་བྱིན་པས། །རྣལ་འབྱོར་ཅན་གྱི་མི་དེ་ནི། །བསམ་གཏན་ཡན་ལག་ཡོངས་རྫོགས་ཤིང་། །རྣལ་འབྱོར་ཀུན་ལ་དཀའ་ཐུབ་ཆེ། །ཞེས་དང་། བུ་དང་ཆུང་མ་སོགས་བྱིན་ན། དེ་བཞིན་གཤེགས་པས་བསྙེན་བ ཀུར་མཛད་མཛད་པའི་སྨོན་ལམ་བཞིན་དུ་ཆུང་མ་དང་། བུ་དང་བུ་མོ་ཡོངས་སུ་གཏོང་བའི་སྦྱིན་པ་འདིས་བདག་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་འཚང་རྒྱ་བར་བྱེད་པར་གྱུར་ཅིག བུ་ཡིས་སྦྱིན་པ་དེས་ན་མྱུར་བར་ཡང་། །སེམས་ཅན་རྣམས་ནི་རེ་རེའི་དོན་གྱི་ཕྱིར། །སེམས་ཅན་ཐམས་ཅད་བླ་ན་མེད་པ་ཡི། །བྱང་ཆུབ་དམ་པ་འཚང་རྒྱ་བྱེད་པར་ཤོག ། ཆུང་མ་བུ་དང་བུ་མོ་གཏོང་བྱེད་པ། །དེ་ལ་བྱང་ཆུབ་ཟག་མེད་དཀའ་བ་མེད། །བརྩོན་འགྲུས་ལྡན་པའི་མི་ནི་གང་ལ་ཡང་། །དཀའ་བ་ཅི་ཡང་མེད་པར་བལྟ་བར་བྱ། འབྲུ་ནོར་དང་བང་མཛོད་སྦྱིན་ན། དེ་བཞིན་གཤེགས་པས་གསུངས་པའི་སྨོན་པ་བཞིན་དུ་ནོར་དང་འབྲུ་དང་བང་མཛོད་ཡོངས་སུ་གཏོང་བའི་སྦྱིན་པ་འདིས་ནི། བདག་སེམས་ཅན་ཐམས་ཅད་ཀྱི་དམ་པའི་ཆོས་ཀྱི་མཛོད་ཡོངས་སུ་རྫོགས་པར་བྱེད་པར་གྱུར་ཅིག ནོར་དང་དབྱིག་རྣམས་གཏོང་བའི་བསོད་ནམས་ནི། །མཁའ་ལས་ལྷག་པ་བདག་ལ་ཅི་ཡོད་པས། །མི་རྣམས་རྒྱུད་ནི་དམ་པའི་ཆོས་མཛོད་ཀྱིས། །རྒྱལ་པོའི་མཛོད་ལྟར་མྱུར་དུ་རྒྱས་གྱུར་ཅིག ། ནོར་དང་འབྲུ་དང་བང་མཛོད་བུད་མེད་རྣམས། །གཏོང་བའི་བསོད་ནམས་བདག་ལ་ཅི་ཡོད་པ། །དེས་ནི་བདག་གིས་བྱང་ཆུབ་མྱུར་ཐོབ་ཅིང་། །དམ་པའི་ཆོས་ཀྱི་མཛོད་ནི་ཐོབ་པར་ཤོག ། ཅེས་དང་། རྒྱལ་སྲིད་ཀྱི་དབང་ཕྱུག་སོགས་སྦྱིན་ན། དེ་བཞིན་གཤེགས་པས་བསྟན་པའི་སྨོན་ལམ་བཞིན་དུ། གླིང་བཞི་དང་། འཛམ་བུའི་གླིང་དང་། རྒྱལ་སྲིད་ཀྱི་དབང་ཕྱུག་སོགས་ཐམས་ཅད་ཡོངས་སུ་གཏོང་བའི་སྦྱིན་པ་འདིས། བདག་སེམས་ཅན་ཐམས་ཅད་དམ་པའི་ཆོས་ཀྱི་རྒྱལ་སྲིད་ཀྱི་དབང་ཕྱུག་འཐོབ་པ་ཐོབ་པར་གྱུར་ཅིག གླིང་བཞི་རིལ་གྱིས་བཏང་བ་འདི་དག་ལས། །བདག་གིས་བསོད་ནམས་ཅུང་ཟད་ཅི་བསྒྲུབ་པ། །དེས་ནི་མི་རྣམས་འདི་དག་དམ་ཆོས་ཀྱི། །རྒྱལ་སྲིད་འཐོབ་པའི་མཐའ་ནི་ཐོབ་གྱུར་ཅིག ། འཛམ་བུ་གླིང་ནི་སྦྱིན་པ་ཡིས། །རིན་ཆེན་སྣ་བདུན་ལྡན་པ་ཡི། །རྒྱལ་པོ་གླང་བཞི་དབང་བྱེད་པ། །དབང་ཕྱུག་རྣམ་པར་རྒྱལ་བར་འགྱུར། །ཞེས་དང་། གཙུག་གི་ནོར་བུ་དང་ཅོད་པཎ་སྦྱིན་ན། གཙུག་གི་ནོར་བུ་དང་ཅོད་པཎ་ཡོངས་སུ་གཏོང་བའི་སྦྱིན་པ་འདིས་བདག་སེམས་ཅན་ཐམས་ཅད་ཀྱི་སྤྱི་གཙུག་བལྟར་མི་མཐོང་བ་ཐོབ་པར་བྱེད་པར་གྱུར་ཅིག མགོ་བོའི་ནོར་བུའི་ཅོད་པཎ་བྱིན་པ་ཡི། །བསོད་ནམས་ཚོགས་ནི་བདག་ལ་ཅི་ཡོད་པ། །དེས་ནི་འདིར་ནི་སེམས་ཅན་ཐམས་ཅད་ཀྱི། །སྤྱི་གཙུག་བལྟར་མེད་རྟག་ཏུ་འཐོབ་གྱུར་ཅིག ། གཙུག་གི་ནོར་བུ་བྱིན་དེས་བདག ། ནྱ་གྲོ་ལྟ་བུར་ཆུ་ཞིང་གབ། །གསེར་དང་ནོར་བུ་བྱས་པ་ཡིས། །གཙུག་ཏོར་ཕུན་སུམ་ཚོགས་པར་ཤོག ། ཅེས་དང་། རང་གི་རྐང་པ་སྦྱིན་ན། དེ་བཞིན་གཤེགས་པས་བརྙེས་པའི་སྨོན་ལམ་བཞིན་དུ་རྐང་པ་སྦྱིན་པ་འདིས། མི་རྣམས་དང་སེམས་ཅན་ཐམས་ཅད་རྟག་ཏུ་མྱུར་བར་ཁྱིམ་ནས་མངོན་པར་བྱུང་ནས་སྐྱེ་བ་དང་རྒ་བ་དང་ན་བ་དང་འཆི་བའི་གནོད་པ་ཞི་བར་བྱ་བའི་དོན་གྱི་ཕྱིར་འདོད་བཞིན་དུ་བག་བརྐྱང་ནས་རབ་ཏུ་དགའ་ཞིང་དབང་པོ་ཞི་ལ་སྐྱབས་སུ་འོས་པའི་ཟླ་བའི་འོད་ལྟར་གཟུགས་ཞི་བ་སྣང་བྱེད་ཉི་མ་སྣ་ཚོགས་ཀྱི་གཟི་བརྗིད་ལྟར་སྙིང་རྗེ་ལས་བྱུང་བའི་འོད་ཟེར་འཕྲོོ་བས་མཚམས་མེད་པ་ཡན་ཆད་མུན་པར་ཞུགས་པས་ཉམ་ཐག་པའི་མི་རྣམས་ཀྱི་མུན་པ་སྣང་བར་བྱས་ནས་ལུས་རབ་ཏུ་ཚ་བའི་སྡུག་བསྔལ་རྣམས་སེལ་ཅིང་། པདྨའི་རྐང་པ་འཁོར་ལོ་རྩིབས་སྟོང་དང་ལྡན་པའི་མཚན་གྱིས་སྤྲས་ལ་མཉམ་ཞིང་འཇམ་པ་དང་། སོར་མོ་རིང་ཞིང་ངང་པའི་རྐང་པ་ལྟར་དྲྭ་བས་འབྲེལ་བ་དང་། སེན་མོ་མེ་ལོང་བཟང་པོ་དག་པར་ཕྱིས་པ་ལྟ་བུས་བརྒྱན་ཏེ། མེ་ཏོག་ཀུན་ད་ལྟར་འདུག་པ་དང་། ལོང་བུ་མི་མངོན་པ་དང་རྗེ་ངར་སྨྱུག་མ་དང་རི་དྭགས་ཨེེ་ན་ཡའི་བྱིན་པ་འདྲ་བའི་ཡ་མཚན་གྱི་སྟབས་ཀྱིས་དལ་བུས་དལ་གྱིས་བྱང་ཆུབ་ཀྱི་སྙིང་པོའི་གདན་རྡོ་རྗེའི་སྟེགས་བུའི་གདན། ཆོས་ཀྱི་སེང་གེའི་ཁྲི་ལ་བདུད་རྣམ་པར་གཞོམ་པའི་ཕྱིར་ཤིན་ཏུ་རྣམ་པར་གནོན་པར་གྱུར་ཅིག རྐང་པ་བྱིན་པ་འདི་ཡིས་ནི། །རྐང་མཐིལ་འཁོར་ལོའི་མཚན་ཅན་གྱིས། །བྱང་ཆུབ་སྙིང་པོའི་གདན་བཟང་ལ། །བརྟན་པོས་ཤིན་ཏུ་གནོན་པར་ཤོག ། རྐང་པ་སྦྱིན་པ་འདིས་ནི་བདག ། བྱང་ཆུབ་སྙིང་པོའི་གདན་མཆོག་ལ། །འདུག་ནས་བདུད་རྣམས་སྡེ་དང་དཔུང་། །བཞོན་དང་བཅས་པ་འདུལ་བར་ཤོག ། ཅེས་དང་། དེ་བཞིན་དུ་ལག་མཐིལ་སྦྱིན་ན། ལག་མཐིལ་སྦྱིན་པས་མྱུར་དུ་བདག ། རྣམ་འདྲེན་ལག་ན་རིན་ཆེན་དང་། །ལག་པ་རིང་ཞིང་གསེར་མདོག་ལྡན། །འཇིག་རྟེན་མཆོག་གནས་འགྱུར་བར་ཤོག ། སྙིང་རྗེས་ནོན་པར་གྱུར་ནས་ནི། །ཆོས་ཀྱི་ལག་པ་བསྟོད་བྱས་ལ། །ངན་སོང་ཀུན་ལས་ལུས་ཅན་རྣམས། །བདག་གིས་རྟག་ཏུ་འབྱིན་པར་ཤོག ། ཅེས་དང་། རྣ་བ་དང་སྣ་བཏང་ན། རྣ་བ་དང་ནི་སྣ་བཏང་བས། །སྲོག་ཆགས་རྣམ་ནི་ཐམས་ཅད་ཀྱང་། །དབང་པོ་ཀུན་དང་ལྡན་གྱུར་ཏེ། །ཡན་ལག་ཐམས་ཅད་རྫོགས་པར་ཤོག ། རྣ་བ་དང་ནི་སྣ་བཏང་བས། །གང་དང་གང་དུ་སྐྱེས་པ་དེར། །ལྟ་ན་སྡུག་ཅིང་གཟུགས་བཟང་ལ། །མི་ནི་དེ་བཞིན་མཛེས་པར་འགྱུར། །ཞེས་དང་། མིག་སྦྱིན་ན། མིག་གི་སྦྱིན་པ་འདིས་ནི་བདག ། བླ་མེད་བྱང་ཆུབ་སངས་རྒྱས་ནས། །སེམས་ཅན་ཀུན་གྱི་ཆོས་ཀྱི་མིག ། རྣམ་པར་དག་པ་བྱེད་གྱུར་ཅིག ། མིག་བྱིན་བརྟུལ་ཞུགས་བཟང་པོ་དེས། །དྲི་མ་མེད་ཅིང་སྐྱོན་མེད་ལ། །དག་ཅིང་ཡངས་ལ་མཛེས་བཟང་དང་། ཞི་བའི་མིག་ནི་ཐོབ་པར་འགྱུར། །ཨུད་པལ་སྔོན་པོའི་འདབ་འདྲ་དང་། །བྱིའུ་ཀུན་ལའི་མིག་འདྲ་ཞིང་། །མིག་གི་རྫི་མ་བ་ཡི་འདྲ། །དེ་འདྲའི་མིིག་ནི་དེ་ཡིས་འཐོབ། །ཞེས་དང་། མགོ་བོ་སྦྱིན་ན། མགོ་བོ་ཡོངས་སུ་གཏོང་བ་ཡིས། །བསོད་ནམས་བདག་ལ་ཅི་ཡོད་པ། །དེས་ནི་སེམས་ཅན་ཀུན་མཁྱེན་གྱི། །གོ་འཕང་མི་གཡོ་ཐོབ་གྱུར་ཅིག ། ཅེས་དང་། པགས་ཤུན་ཡོངས་སུ་གཏོང་ན། པགས་ཤུན་ཡོངས་སུ་བཏང་བ་ཡིས། །བདག་གིས་སུ་ནི་ལུས་ཅན་རྣམས། །པགས་ཤུན་ལུས་ལས་སྐྱེས་པ་དག ། འཇམ་སྲབ་གསེར་གྱི་མདོག་བསྒྱུར་ཤོག ། ཅེས་དང་། རང་གི་ཤ་དང་ཁྲག་ཡོངས་སུ་གཏོང་ན། ཤ་དང་ཁྲག་གིས་སྦྱིན་པ་ཡི། །རྣམ་སྨིན་བདག་ལ་ཅི་ཡོད་དེས། །སྙིང་པོ་མེད་པ་མ་ལུས་ལས། །འགྲོ་ཀུན་སྙིང་པོ་ཐོབ་གྱུར་ཅིག ། ཅེས་དང་། རྐང་སྦྱིིན་ན། རྐང་གི་སྦྱིན་པ་འདི་ཡིས་ནི། །བདག་གི་སེམས་ཅན་ཐམས་ཅད་ཀྱིས། །རྣག་གི་ལུས་ཀྱི་ཟ་མ་ཏོག ། རྡོ་རྗེ་མི་ཤིགས་རྫོགས་བྱེད་ཤོག ། ཅེས་སྨོན་ལམ་འདེབས་སོ། །གཞན་ཡང་བྱང་ཆུབ་སེམས་དཔའ་དེ་འདི་སྙམ་དུ་སེམས་ཏེ། ཁ་དོག་ཕུན་སུམ་ཚོགས་པ་བྱིན་པས་ནི། ཁ་དོག་དང་ལྡན་པར་གྱུར་གྱིས་བདག་གིས་ཁ་དོག་ཕུན་སུམ་ཚོགས་པ་སྦྱིན་པར་བྱ་གོར་མ་ཆག་སྙམ་དུ་སེམས་ཤིང་། དེ་བཞིན་དུ་དྲི་ཕུན་སུམ་ཚོགས་པ་བྱིན་པས་ནི་གྲགས་པའི་དྲི་དང་ལྡན་པར་འགྱུར། རོ་དྲོ་བ་ཕུན་སུམ་ཚོགས་པ་བྱིན་པས་ནི་ཡོ་བྱད་གྱ་ནོམ་པ་རྣམས་འཐོབ་པར་འགྱུར། རེག་པ་ཕུན་སུམ་ཚོགས་པ་བྱིན་པས་ནི་རྐང་ལག་འཇམ་ལ་གཞོན་ཤ་ཆགས་པར་འགྱུར། རང་གི་ལག་ནས་བྱིན་པས་ནི་བསྙེེན་བཀུར་བྱེད་པ་འཐོབ་པར་འགྱུར། གུས་པར་བྱས་ཏེ་བྱིན་པས་ནི་གཉེན་ལ་སོགས་པའི་ནང་དུ་གཞན་གྱི་བཀུར་སྟི་བྱ་བར་འགྱུར། དུས་སུ་བྱིན་པས་ནི་དེའི་ནོར་རྣམས་དུས་སུ་འགྲུབ་ཅིང་རྒྱས་པར་འགྱུར། མཐུན་པ་དང་ཡིད་དུ་འོང་བ་བྱིན་པས་ནི་མལ་དང་གོས་ལ་སོགས་པ་ལོངས་སྤྱོད་ཡིད་དུ་འོང་བ་རྣམས་ལ་སེམས་འཇུག་པར་འགྱུར། གཞན་ལ་མི་གནོད་པར་བྱིན་པས་ནི་ལོངས་སྤྱོད་བརྟན་པ་དག་འཐོབ་པར་འགྱུར། མི་དགའ་བ་དང་དུ་ལེན་པའི་སྦྱིན་པས་ནི་འཁོར་སྙིང་ཉེ་བར་འགྱུར། ཟས་བྱིན་པས་ནི་སྟོབས་དང་ལྡན་པར་འགྱུར། སྐོམ་བྱིན་པས་ནི་སྐོམ་པ་མེད་པར་འགྱུར། གོས་བྱིན་པས་ནི་ཁ་དོག་དང་ལྡན་པར་འགྱུར། མར་མེ་བྱིན་པས་ནི་མིག་དང་ལྡན་པར་འགྱུར། རོལ་མོའི་སྒྲ་བྱིན་པས་ནི་རྣ་བ་ཉམས་པ་མེད་པར་འགྱུར། བཞོན་པ་བྱིན་པས་ནི་བདེ་བ་དང་ལྡན་པར་འགྱུར། སྨན་བྱིན་པས་ནི་ནད་ཉུང་བར་འགྱུར། མེ་ཏོག་བྱིན་པས་ནི་གཞན་གྱིས་མཆོད་པར་འགྱུར། མེ་ཏོག་ཕྲེང་བ་སྦྱིན་པས་ནི་གཞན་གྱི་རིམ་གྲོ་བྱ་བར་འགྱུར། བསྟོད་པ་བྱིན་པས་ནི་ཚངས་པའི་དབྱངས་དང་ལྡན་པར་འགྱུར། སྟན་བྱིན་པས་ནི་བླ་མའི་གནས་ཐོབ་པར་འགྱུར། བཞོན་པ་བྱིན་པས་ནི་རྫུ་འཕྲུལ་དང་ལྡན་པར་འགྱུར། བྱུག་པ་བྱིན་པས་ནི་རྨ་མེད་པར་འགྱུར། ཕྱག་དར་བྱ་བ་བྱིན་པས་ནི་རྡུལ་དང་བྲལ་བར་འགྱུར། དྲིལ་བུ་བྱིན་པས་ནི་ཚེ་རབས་དྲན་པར་འགྱུར། གནས་སྦྱིན་པས་ནི་ཐམས་ཅད་བྱིན་པར་འགྱུར། ཆོས་བྱིན་པས་ནི་བདུད་རྩི་བྱིན་པར་འགྱུར་གྱིས་བདག་གིས་ཆོས་ཀྱི་སྦྱིན་པར་བྱ་བར་གོར་མ་ཆག་སྙམ་མོ། །དེ་སྦྱིན་པ་དེ་ལྟ་བུ་སྦྱིན་པ་ན་ཆགས་པས་སྦྱིན་པར་མི་བྱེད། སྡང་བས་སྦྱིན་པར་མི་བྱེད། རྨོངས་པས་སྦྱིན་པར་མི་བྱེད། ཚིག་པ་ཟ་ཞིང་སྦྱིན་པར་མི་བྱེད། བརྙས་བཞིན་དུ་སྦྱིན་པར་མི་བྱེད། རྡེག་ཅིང་སྦྱིན་པར་མི་བྱེད། ཚར་བཅད་དེ་སྦྱིན་པར་མི་བྱེད། ཁྱད་དུ་གསོད་ཅིང་སྦྱིན་པར་མི་བྱེད། སྨད་དེ་སྦྱིན་པར་མི་བྱེད། ང་རྒྱལ་གྱིིས་ཁེངས་བཞིན་དུ་སྦྱིན་པར་མི་བྱེད། འགྱིང་བཞིན་དུ་སྦྱིན་པར་མི་བྱེད། ལྷག་མར་གྱུར་པར་མི་བྱེད། རུལ་ཞིང་མྱགས་པ་སྦྱིན་པར་མི་བྱེད་ཀྱི་སྦྱིན་པ་གང་དང་གང་སྦྱིན་པ་དེ་གུས་པར་བྱས་ཏེ་སྦྱིན་པར་བྱེད། བླ་མར་བྱེད། རི་མོར་བྱེད། མཆོད་པར་བྱས་ཤིང་བརྗོད་ནས་སྦྱིན་པར་བྱེད། མང་དུ་སྦྱིན་པར་བྱེད། བཟང་པོ་སྦྱིན་པར་བྱེད། རབ་ཏུ་དགའ་བས་སྦྱིན་པར་བྱེད། དགའ་ཞིང་མགུ་བས་སྦྱིན་པར་བྱེད། གཙང་བ་དང་རྒྱ་ཆེར་སྦྱིན་པར་བྱེད། རང་གི་ལག་ནས་སྦྱིན་པར་བྱེད། གུས་པ་དང་བཅས་པ་དང་། ཞེ་ས་དང་བཅས་པས་སྦྱིན་པར་བྱེད། བསམ་པ་དག་ཅིང་བཟང་ལ་དགེ་བས་སྦྱིན་པར་བྱེད། སེར་སྣ་མེད་པས་སྦྱིན་པར་བྱེད། བརྐམ་པ་མེད་པར་སྦྱིན་པར་བྱེད། ཞུམ་པ་མེད་པར་སྦྱིན་པར་བྱེད། འཇིགས་པ་མེད་པར་སྦྱིན་པར་བྱེད། རྒྱ་ཆེ་ཞིང་ཡངས་པར་སྦྱིན་པར་བྱེད་དོ། །དེ་སྦྱིན་པ་དེ་ལྟ་བུ་དེ་སྦྱིན་པ་ན་འདི་སྙམ་དུ། འདི་ནི་ཚུལ་ཁྲིམས་དང་ལྡན་པ་ཡིན་གྱིས་བདག་གིས་སྦྱིན་པར་བྱའོ། །འདི་ནི་ཚུལ་ཁྲིམས་འཆལ་བ་ཡིན་ནོ། །འདི་ནི་དགེ་བའི་ཆོས་དང་ལྡན་པ་ཡིན་ནོ། །འདི་ནི་དགེ་བའི་ཆོས་མ་ཡིན་པ་དང་ལྡན་པ་ཡིན་ནོ། །འདི་བྱིན་ན་ནི་འབྲས་བུ་ཆེ་བ་དང་། ཕན་ཡོན་ཆེ་བ་དང་མཐུ་ཆེ་བར་འགྱུར་རོ། །འདི་ལ་བྱིན་ན་ནི་འབྲས་བུ་མི་ཆེ་བ་དང་། ཕན་ཡོན་མི་ཆེ་བ་དང་། མཐུ་མི་ཆེ་བར་འགྱུར་རོ་སྙམ་དུ་མི་སེམས་སོ། །གཞན་ཡང་ཡང་དག་པའི་བློ་དང་ལྡན་གྱི་ཡང་དག་པ་མ་ཡིན་པ་མ་ཡིན་པའི་ཕྱིར་དེ་སྦྱིན་པ་དེ་སྦྱིན་པ་ན། འདི་སྙམ་དུ་སྦྱིན་པ་འདི་དང་དགེ་བའི་རྩ་བ་དང་། ཆོས་ཀྱི་སྦྱིན་པ་དེ་ཡོངས་སུ་གཏོང་བ་དེས་ན་བདག་རྒྱལ་པོར་གྱུར་ཅིག་ཅེའམ། རྒྱལ་པོ་གཞན་ནམ། བློན་པོ་ཆེན་པོའམ། ལྷའམ། ཀླུའམ། ལྷའི་བུའམ། ལྷ་གཞན་གང་ཡང་རུང་བ་ཞིག་ཏུ་གྱུར་ཅིག་ཅེས་སེམས་བསྐྱེད་པར་མི་བྱེད་དོ། །འོ་ན་གང་དུ་ཞེ་ན། གཞན་དུ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱེད་དེ། དགེ་བའི་རྩ་བ་འདི་དང་། ཆོས་ཀྱི་ཕྱིར་ཡོངས་སུ་གཏོང་བ་འདིས་ན། བདག་སེམས་ཅན་མ་བསྒྲལ་བ་རྣམས་སྒྲོལ་བ་དང་། མ་གྲོལ་བ་རྣམས་དགྲོལ་བར་བྱེད་པ་དང་། དབུགས་མ་བྱིན་པ་རྣམས་དབུགས་འབྱིན་པ་དང་། ཡོངས་སུ་མྱ་ངན་ལས་མ་འདས་པ་རྣམས་ཡོངས་སུ་མྱ་ངན་ལས་ཟློ་བར་བྱེད་པ་དང་། འཇིག་རྟེན་ལོང་བ་འདྲེན་པ་མེད་པ་དང་། སྐྱོ་བ་མེད་པ་དང་། སྐྱབས་མེད་པ་དང་། གནས་མེད་པ་དང་། གླིང་མེད་པ་དང་། དཔུང་གཉེན་མེད་པ་རྣམས་ཀྱི་འདྲེན་པ་དང་། ཡོངས་སུ་འདྲེན་པ་དང་། སྒྲོལ་བ་དང་། སྐྱབས་དང་། གནས་དང་། གླིང་དང་། དཔུང་གཉེན་དུ་གྱུར་ཅིག་ས་ཡོངས་སུ་བསྔོ་བར་བྱེད་དོ། །ཆོས་ཕྱིར་སྦྱིན་པ་འདིས་ནི་བདག ། འཁོར་བ་ཡི་ནི་རྒྱ་མཚོ་ལས། །གཞན་མིན་ཐེག་པ་ཆེན་པོ་ཡིས། །སེམས་ཅན་རྣམས་ནི་སྒྲོལ་གྱུར་ཅིག ། སྐྱེ་བོ་ཐམས་ཅད་ཉོན་མོངས་པའི། །འཆིང་བ་དག་ལས་གྲོལ་བར་ཤོག ། དབུགས་མ་བྱིན་པ་དབུགས་འབྱིན་ཅིང་། །མྱ་ངན་འདས་ལམ་སྟོན་གྱུར་ཅིག ། འཇིག་རྟེན་ལོང་བ་འདྲེན་མེད་པའི། །ཡོངས་སུ་འདྲེན་པར་བདག་གྱུར་ཅིག ། ལུས་ཅན་རྣམས་ལ་སྐྱོབ་པ་དང་། །དཔུང་གཉེན་གླིང་དང་སྐྱབས་གྱུར་ཅིག ། རིགས་ཀྱི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྦྱིན་པའི་ཕ་རོལ་དུ་ཕྱིན་པ་ལ་མངོན་པར་བརྩོན་པར་བྱེད་པ་ཡིན་ནོ། །ཞེས་བཀའ་སྩལ་པས། བྱང་ཆུབ་སེམས་དཔའ་མིའི་དབང་པོ་གཙུག་གི་ནོར་བུ་ཚིམ་ཞིང་མགུ་ལ་ཡི་རངས་ཏེ་མངོན་པར་བསྟོད་དོ། །