ཞེ་ཆེན་རྒྱལ་ཚབ་གསུང་འབུམ་པོད་དགུ་པ།གླེགས་བམ། ཏ༽ཞེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ།
ཞེ་ཆེན་མཁན་པོ་པདྨ་ཀུན་བཟང་ནས་པར་དུ་བསྐྲུན།
མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།
དཔེ་སྐྲུན་གསལ་བཤད།
བསྐལ་བཟང་སངས་རྒྱས་སྟོང་གི་གདུལ་ཞིང་། སྟོང་གསུམ་མི་མཇེད་ཀྱི་ཆ་ཤས་འཛམ་གླིང་གི་བྱང་ཕྱོགས། བོད་གངས་ཅན་གྱི་བསྟན་པ་རྒྱ་མཚོའི་ཕྱི་མོ། གསང་སྔགས་སྔ་འགྱུར་བའི་བསྟན་པའི་འབྱུང་གནས། སྟོད་ན་རྡོར་སྨིན་གཉིས། སྨད་ན་ཀཿདཔལ་གཉིས། བར་ན་ཞེ་རྫོགས་གཉིས་ཞེས་གྲགས་པའི་བྱེ་བྲག་གསང་སྔགས་རྙིང་མའི་གདན་ས་ཆེ་རྒུའི་ཡ་རྒྱལ། ཞེ་ཆེན་བསྟན་གཉིས་དར་རྒྱས་གླིང་ཞེས་སྔ་འགྱུར་བཀའ་གཏེར་ཆོས་ཀྱི་རྒྱ་མཚོ་ཆེན་པོ་འཛིན་སྐྱོང་སྤེལ་གསུམ་གྱི་ཕྱག་རྗེས་བཀྲ་ཤིས་རེ་ཁ་ཆེས་ཆེར་བཀྲ་བར། མཁས་གྲུབ་གཉིས་ལྡན་གྱི་སྐྱེས་མཆོག་བགྲང་ལས་འདས་པ་བྱོན་པའི་དབུས་སུ་མངོན་པར་འཕགས་པ། གངས་ལྗོངས་རྒྱལ་བསྟན་ཡོངས་རྫོགས་ཀྱི་ཤིང་རྟ་བཀའ་བབས་བདུན་ལྡན་༧འཇམ་དབྱངས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པ་དང་། མཁས་གྲུབ་དབང་པོ་མ་ཧཱ་པཎྜི་ཏ་འཇམ་དབྱངས་མི་ཕམ་ཕྱོགས་ལས་རྣམ་རྒྱལ་རྣམ་གཉིས་ཀྱི་ཐུགས་སྲས་ཐུ་བོ། ཞེ་ཆེན་རྒྱལ་ཚབ་རིན་པོ་ཆེ་འགྱུར་མེད་པདྨ་རྣམ་རྒྱལ་དཔལ་བཟང་པོ་གང་གི་གསུང་འབུམ་མདོ་སྔགས་རིག་གནས་ཀྱི་མཛོད་ཆེན་འདི་ཉིད། སྔོན་ཆད་རྗེ་དེའི་སྲས་ཀྱི་ཐུ་བོ་ཞེ་ཆེན་ཀོང་སྤྲུལ་རིན་པོ་ཆེས་གདན་སར་ཤིང་པར་དུ་བཀོད་པ་སྙིགས་དུས་ཀྱི་སྐྱེ་འགྲོ་བསོད་ནམས་དམན་རྐྱེན་ཉམས་རྒུད་རྩ་བརླག་ཏུ་སོང་ཡང་། ཕྱིས་རྒྱ་གར་འཕགས་ཡུལ་དུ་མགོན་པོ་གང་དེའི་དགོངས་བརྒྱུད་ཀྱི་བྱིན་རླབས་ཐོབ་ཅིང་བསྟན་པ་ཡོངས་རྫོགས་ཀྱི་མངའ་བདག ༧སྐྱབས་རྗེ་དིལ་མཁྱེན་རྡོ་རྗེ་འཆང་འགྱུར་མེད་ཐེག་མཆོག་བསྟན་པའི་རྒྱལ་མཚན་མཆོག་གིས་མ་དཔེ་འཚོལ་བསྡུས་ཀྱི་སླར་ཡང་པར་བསྐྲུན་མཛད་ཅིང་བཤད་ལུང་གི་རྒྱུན་ཡང་སྤེལ་བར་མཛད་དེ་རྒྱལ་བསྟན་སྤྱི་བྱེ་ལ་སྨན་པའི་སྐུ་དྲིན་བླ་མེད་བསྐྱངས་པ་དེ་ལྟར་ཡང་། ད་ཆ་མདོ་དབུས་ཁམས་གྱི་མཚོན་པའི་འཛམ་གླིང་མཐའ་གྲུ་ཀུན་ཏུ་རྒྱལ་བསྟན་སྤྱི་དང་། ཡང་སྒོས་སྔ་འགྱུར་བའི་ལྟ་གྲུབ་དྲི་མ་མེད་པ་ཐོས་བསམ་སྒོམ་པས་འཛིན་སྐྱོང་སྤེལ་བའི་བསྟི་གནས་དགོན་སྡེ་ཁག་གི་ནང་སློབ་གཉེར་བ་ལོ་རེ་བཞིན་ཇེ་མང་དུ་འགྲོ་བ་ཚོར། འཁྲུལ་མེད་རྒྱལ་བ་དགྱེས་པའི་ལམ་གནད་གསལ་བོར་སྟོན་པའི་ལེགས་བཤད་རྨད་དུ་བྱུང་བ་རྣམས་གཟིགས་ཆོག་ཡོང་བ་དང་། དེང་གི་ཆར་སྔོན་མེད་འཕྲུལ་ཡིག་ལེགས་ཐོན་གྱིས་དཔེ་དེབ་སྤུས་དག་ཡོང་ངེས་དང་། འཇམ་མགོན་རྒྱལ་བ་ཡབ་སྲས་ཀྱི་རྡོ་རྗེའི་གསུང་གི་ཕྲིན་ལས་འཛམ་གླིང་ཕྱི་ནང་ཀུན་ཏུ་ཁྱབ་བརྡལ་ཡོང་བའི་རེ་འདུན་ཆེན་པོས། རྒྱལ་བསྟན་སྤྱི་དང་རང་བསྟན་ལ་ལྷག་བསམ་རྣམ་པར་དཀར་བ་ཞེ་ཆེན་དགོན་གྱི་མཁན་པོ་པདྨ་ཀུན་བཟང་མཆོག་ནས་དེང་རབས་ཀྱི་གློག་ཀླད་འཕྲུལ་འཁོར་ལ་བརྟེན་ནས་པར་བསྐྲུན་གནང་བཞིན་ཡོད་པར་ཡི་རང་བསྔགས་བརྗོད་བྱེད་པ་དང་ཆབས་ཅིག གསུང་རབ་འདིས་རྒྱལ་བའི་དགོངས་པ་དྲི་མ་མེད་པ་གསང་ཆེན་སྔ་འགྱུར་བའི་ལྟ་གྲུབ་ཀྱི་གནད་གསང་གསལ་བར་སྟོན་པ་ཀུན་གྱིས་མཁྱེན་རྟོགས་ཐུབ་པས་རང་གཞན་གྱི་འདི་ཕྱིའི་དོན་འབྲས་རླབས་ཆེན་ཡོང་རྒྱུའི་རེ་སྨོན་བཅས། ཞེ་ཆེན་རབ་འབྱམས་བདུན་པར་འབོད་པ། དགེ་སྦྱོང་ངག་དབང་ཆོས་དཔལ་རྒྱ་མཚོས་ཕྱི་ལོ་ ༢༠༡༠ ཟླ་ ༢ ཚེས་ ༢༤ བཟང་པོ་ལ།
གསལ་བཤད་ཉུང་ངུ་།
༈ དེ་ཡང་མི་རིང་བའི་འདས་པའི་ལོ་རབས་འགའི་ཡུན་ལ་བོད་གངས་ཅན་གྱི་ཆོས་དང་རིག་གཞུང་ལ་ཉམས་རྒུད་ཚབས་ཆེན་ཐེབས་ནས། དེང་གི་དུས་འདིར་བོད་ཀྱི་རིག་གཞུང་ཟེར་བ་དེ་སྒྲ་གཅན་གྱི་ཁ་ནས་ཕྱེད་ཙམ་ཐར་པའི་ཟླ་བ་ལྟ་བུ་ཞིག་ཡིན་ལ། འདི་ཉིད་ཉམས་པ་སླར་གསོ་དང་མི་ཉམས་ཡུན་རིང་དུ་གནས་པའི་ཆེད་དུ་མཁས་པ་དང་ལྷག་བསམ་ཅན་གྱི་སྐྱེས་བུ་དམ་པ་དག་གིས་སྔ་རབས་ཀྱི་མཁས་པའི་གསུང་རབ་རྣམས་སྤུས་ལེགས་ཀྱི་ཡིག་གཟུགས་སུ་སྤེལ་ནས་འགྲེམ་སྤེལ་གནང་བཞིན་པ་འདི་དག་ནི་འཆི་ཁ་མ་ལ་སྲོག་བསྩལ་པ་ལྟ་བུའི་བསྟན་པའི་སྲོག་སྙིང་གསོ་བའི་བྱ་བ་གལ་ཆེན་ཞིག་ཡིན་ལ། འདིར་ཡང་ཁམས་ཞེ་ཆེན་བསྟན་གཉིས་དར་རྒྱས་གླིང་གི་མཁན་རིན་པོ་ཆེ་པདྨ་ཀུན་བཟང་ལགས་ཀྱིས་མཁས་པའི་དབང་ཕྱུག་ཞེ་ཆེན་རྒྱལ་ཚབ་སྐུ་ཕྲེང་བཞི་པ་འགྱུར་མེད་པདྨ་རྣམ་རྒྱལ་གྱི་གསུང་རབ་འདི་དག་དེབ་ཏུ་བསྐྲུན་པ་འདི་བསྔགས་འོས་ཀྱི་མཛད་པ་བླ་ན་མེད་པ་ཞིག་ཏུ་ཤེས་ཏེ། དེ་ཡང་ཞེ་ཆེན་རྒྱལ་ཚབ་རིན་པོ་ཆེ་ནི་བོད་གངས་ཅན་གྱི་ཆོས་དང་རིག་གཞུང་སྤྱི་དང་ཁྱད་པར་གསང་སྔགས་སྔ་འགྱུར་གྱི་མདོ་རྒྱུད་རྒྱ་མཚོའི་གནས་ལ་ཐུགས་སྤྱན་ནམ་མཁའ་ལྟར་ཡངས་པའི་མཁས་གྲུབ་གཉིས་ལྡན་གྱི་སྐྱེས་ཆེན་དམ་པ་ཞིག་ཡིན་པར་མ་ཟད་འཇམ་མགོན་མི་ཕམ་རིན་པོ་ཆེས་བསྟན་པ་ཡོངས་རྫོགས་ཀྱི་བདག་པོར་མངའ་གསོལ་བའི་གསང་སྔགས་སྔ་འགྱུར་གྱི་བསྟན་པ་ལ་མཛད་རྗེས་བླ་ན་མེད་པའི་མཁས་པའི་དབང་ཕྱུག་ཆེན་པོ་ཞིག་སྟེ། རྗེ་འདི་ཉིད་ཀྱིས་འཇམ་མགོན་བླ་མའི་གསུང་གི་མཛད་པ་ལ་ཆེད་དུ་དམིགས་ཏེ་མཆན་འགྲེལ་དང་ཁ་སྐོང་། གཞན་ཡང་དེ་དག་གི་ཟབ་དོན་རྗེན་པར་ཕྱུང་བའི་ཡིག་ཆ་ངེས་དོན་བདེ་གཤེགས་སྙིང་པོའི་དོན་གཏན་ལ་ཕབ་པའི་ལེགས་བཤད་སོགས་བསྟན་བཅོས་མང་དུ་བཞག་ཡོད་པ་ཡིན་ལ། བཤད་སྲོལ་ལ་ཡང་ངེས་ཤེས་རིན་པོ་ཆེའི་སྒྲོན་མེ་དང་རྗེ་འདི་ཉིད་ཀྱི་བདེན་གཉིས་གློག་གི་སྒྲོན་མ་འདི་གཉིས་ཀྱི་དོན་ཤེས་ན་གསང་སྔགས་སྔ་འགྱུར་གྱི་མདོ་སྔགས་ཀྱི་ལྟ་གྲུབ་ཡོངས་རྫོགས་ཀྱི་གནད་ཟིན་པ་ཡིན་ཞེས་ཟེར་བ་ལྟ་བུ་ཡིན་ནོ། །དེས་ན་འཇམ་མགོན་བླ་མ་ཡབ་སྲས་གཉིས་ཀྱི་གསུང་དག་ནི་གསང་སྔགས་སྔ་འགྱུར་པའི་བསྟན་པའི་ཟབ་གནད་ཀྱི་ཉི་མ་རང་རྒྱུད་ལ་འདྲེན་པའི་སྐྱ་རེངས་དཀར་པོའི་འོད་སྣང་ལྟ་བུ་ཞིག་ཡིན་པས་འཇམ་པའི་དབྱངས་དངོས་ཀུན་མཁྱེན་མི་ཕམ་རྒྱ་མཚོའི་ཡིག་ཆ་དག་ལ་སྦྱང་བརྩོན་བྱེད་པའི་བློ་གསར་དག་གིས་ཀྱང་རྗེ་ཉིད་ཀྱི་མདོ་སྔགས་ཀྱི་གསུང་རབ་དག་ལ་ལྟ་ཀློག་ཡང་ཡང་བྱེད་པ་ཤིན་ཏུ་གལ་ཆེ་བའི་གནས་སུ་སེམས་སོ། །
གསེར་ལྗོངས་བླ་མ་རུང་དུ་འཆི་མེད་རིག་འཛིན་གྱིས་བྲིས།
ཐོག་མའི་སྙན་སྒྲོན།
དེ་ཡང་ཀུན་མཁྱེན་མི་ཕམ་རིན་པོ་ཆེས་བསྟན་བཅོས་བརྩམ་པ་བཀས་སྐུལ་ཞིང་། གསུང་རྩོམ་རིགས་བསྟན་པའི་གཙིགས་སུ་ཆེ་བས་འཐོར་ཟགས་སུ་མ་སོང་བར་ཕྱོགས་གཅིག་ཏུ་བསྡུ་དགོས་པར་ཡང་བཀའ་གནང་ལས་གྲུབ་པའི་བཀའ་འབུམ་འདི་ཉིད་འགྲེམས་སྤེལ་ཞུས་པའི་ཐོག་མའི་སྙན་སྒྲོན་ནི།
ལྷ་མོ་དྲི་མ་མེད་པའི་མདོ་ལས་ལུང་བསྟན་པ་ལྟར་ཆོས་རྒྱལ་ཡབ་མེས་རིམ་བྱོན་དང་འགྱུར་སྔ་ཕྱིའི་ལོ་པཎ་མཁས་གྲུབ་གོང་མ་རྣམས་ཀྱི་ཐུགས་རྗེ་དང་ཕྲིན་ལས་ཚད་མེད་པ་ལས་བྱུང་བའི་དེང་སང་བོད་བརྒྱུད་ནང་བསྟན་རིག་གཞུང་ཞེས་མི་རིགས་གཞན་དང་གཞན་གྱི་མི་སྣ་གཟུར་གནས་ཤེས་ཡོན་ཅན་རྣམས་འགྲམ་ཆུ་ལྡངས་ཏེ་ངོ་མཚར་བའི་གནས། སྔོན་བྱོན་དམ་པ་ཚོའི་མཁྱེན་ནུས་རྩལ་དགུ་ཡོད་ཚད་བོད་བརྒྱུད་ནང་བསྟན་ཆོས་དང་རིག་གཞུང་ནོར་བུ་མཐོན་ཀ་ལྟ་བུ་འདི་ཁོ་ནའི་ཆེད་དུ་འབད་འབད་དུང་དུང་གི་མཛད་འཕྲིན་ལ་གཞིགས་ན་བསམ་ཡུལ་ལས་འདས།
འོན་ཀྱང་འདོད་བྲལ་སྡུག་འཕྲད་ཀྱི་འཕོ་འགྱུར་ནི་སུ་ལའང་བྱུང་དང་འབྱུང་བཞིན་པ་ལྡོག་མེད་ཅིག་ཡིན་སྟབས། གཅིག་དགུ་ལྔ་དགུའི་ཛ་དྲག་ལས་འགུལ་གྱི་འཛིན་ཁྲིས་བདེ་ལྡན་ཁ་བའི་ལྗོངས་ཀྱི་ཆོས་དང་རིག་གཞུང་{སྔ་འགྱུར་པའི་གདན་ས་ཆེན་མོ་འདི་གའི་རིག་གཞུང་ལ་བསམས་ན་ཀུན་གཟིགས་རབ་འབྱམས་གཉིས་པའི་གསུང་འབུམ་པོད་དགུ་ལོངས་པ་དང་། ཀོང་སྤྲུལ་ཡོན་ཏན་རྒྱ་མཚོའི་སྐུ་སྐྱེ་གོང་མ་གྲུབ་ཐོབ་ཆེན་པོ་ཤེས་རབ་ཡར་འཕེལ་གྱི་གསུང་འབུམ་པོད་ལྔ་ཙམ་དང་། རྒྱལ་དབང་བཅུ་བཞི་པས་མ་ཧཱ་པཎྜི་ཏ་ཞེས་མཚན་གྱི་ཅོད་པན་དཔྱངས་པ་མ་ཧཱ་པཎྜི་ཏ་དབོན་སྤྲུལ་མཐུ་སྟོབས་རྣམ་རྒྱལ་གྱི་གསུང་འབུམ་པོད་དྲུག་ལྷག་དང་། རྒྱལ་ཚབ་རིན་པོ་ཆེའི་གསུང་འབུམ་སྤར་ཤིང་སོགས་ནི་ད་ལྟ་མིང་ཙམ་ལས་མེད། གསུང་འབུམ་འདིའི་མ་ཕྱི་ཙམ་ཞིག་ཆོས་བརྒྱུད་འདི་ལ་ལྷག་བསམ་སྟོན་ཟླ་ལྟར་དཀར་བའི་སངས་རྒྱས་བསྟན་འཛིན་ལགས་ཀྱིས་རང་ཉིད་ཀྱི་ལུས་སྲོག་དཀའ་ངལ་གང་ལའང་ལྟོས་མེད་དུ་ཧུར་འབུངས་ཞེ་བསྐྱེད་ཀྱི་དཀའ་དྲིན་ལས་རྣམ་པ་ཚོའི་སྤྱན་ལམ་དུ་འབུལ་ཆོག་ཆོག་བྱུང་འདུག}ཤིན་ཏུ་ཕངས་པ་མི་ཉུང་བ་ཞིག་གྱུར་མིད་གཏོང་བའི་ན་ཟུག་ཟློས་ན་སེམས་བློང་བློང་པོ་ལས་ཅི་ཡོད།
དེ་བས་བོད་བརྒྱུད་ནང་བསྟན་རིག་གཞུང་མྱུར་སྐྱོབ་དང་རྒྱུན་འཛིན་སླར་གསོའི་བྱ་གཞག་འུར་བཤད་ཙམ་དུ་མ་ལུས་པ། མིག་རྒྱང་རིང་པོས་དཔེ་སྐྲུན་འགྲེམས་སྤེལ་སོགས་ཞུས་ཏེ་རྒྱ་ཆེ་བའི་སློབ་གཉེར་བ། ཉམས་ལེན་པ། ཞིབ་འཇུག་པ་དག་གི་སྤྱན་ལམ་དུ་འབུལ་ཐུབ་ན་དོན་དམ་པ་བོད་མི་རིགས་ཀྱི་ཆོས་དང་རིག་གཞུང་རྒྱུན་འཛིན་ནམ་བསྟན་འགྲོའི་དོན་ཕན་འབྲས་མངོན་དུ་འགྱུར་བ་སོགས་ཀྱི་དགེ་མཚན་ལ་སུ་མི་རངས།
ད་ལམ་འདིར་རྙེད་གྲགས་ཀྱི་འདུ་ཤེས་རིང་དུ་དོར་ནས་ལྷག་པའི་བསམ་པ་ཁོ་ནས་མཁན་རིན་པོ་ཆེ་པདྨ་ཀུན་བཟང་མཆོག་གིས༧འཇམ་མགོན་མཁྱེན་ཀོང་ཟུང་དང་ཀུན་མཁྱེན་མི་ཕམ་རིན་པོ་ཆེ་རྣམ་གསུམ་གྱི་སྲས་ཀྱི་ཐུ་བོ་མཁས་གྲུབ་གཉིས་ལྡན༧རྒྱལ་ཚབ་རིན་པོ་ཆེ་འགྱུར་མེད་པདྨ་རྣམ་རྒྱལ་མཆོག་གི་གསུང་འབུམ༼ཆོས་ཚན་ཅི་ཡོད་ཨ་དུམ་ནང་བཞུགས་དཀར་ཆག་ནོར་བུའི་ཕྲེང་བར་གཟིགས། ༽འདི་ཉིད། བོད་བརྒྱུད་ནང་བསྟན་རིག་གཞུང་སྤྱི་དང་། ཁྱད་པར་དུ་སྔ་འགྱུར་པའི་ལྟ་གྲུབ་བམ་ཀུན་མཁྱེན་མི་ཕམ་རིན་པོ་ཆེའི་ཡིག་ཆ་འཛིན་པ་དག་ལ་མེད་དུ་མི་རུང་བ་ཞིག་ཏུ་དགོངས་ཏེ་རྒྱ་ཆེའི་དོན་གཉེར་ཅན་རྣམ་པའི་སྤྱན་ལམ་དུ་འགྲེམས་སྤེལ་གནང་བ་སྟེ། ཞུ་དག་ལག་བསྟར་བྱས་ཚུལ་ནི། དེ་ཡང་ཡིག་ནོར་ངེས་ཅན་རྣམས་ཐད་ཀར་བསྒྱུར་པ་དང་། ལ་ལ་{}གུག་རྟགས་ནང་ལ་དཔེར་ན་་་་་འཆུགས་{འཁྱུགས}འདི་ལྟ་བུ་བསྒྱུར་པའི་དེ་མ་ཐག་གུག་རྟགས་ནང་དུ་བསྒྱུར་ཡིག་དེ་ཁོལ་ཕྱུང་དང་། ཚིག་གཅིག་ཐེངས་མང་ནོར་རིགས་གུག་རྟགས་ནང་དུ་་་སྒེག་{སྒེགས་འདིའི་རིགས་འདི་ལྟར་ཞུས། }འདི་ལྟ་བུ་དང་། གསར་བཏགས་རིགས་[]གུག་རྟགས་ནང་དུ་[གྱིས་ཞུ་མཆན། ]འདི་ལྟ་བུ་དང་། ལྷག་རིགས་{}གུག་རྟགས་ནང་དུ་{ལ་ལྷག}འདི་ལྟ་བུ་དང་། མ་ཕྱི་ནང་མི་གསལ་བའི་རིགས་གུག་རྟགས་ནང་དུ་[ཡང་མ་དཔེ་མི་གསལ། ]འདི་ལྟ་བུ་དང་། ཞེས་མཆན་བླུགས་ཡོད། གཞན་ཡང་མ་ཕྱི་ནང་མི་གསལ་བ་དང་དོགས་ཅན་ཁ་ཤས་སྣང་ཡང་རང་སར་བཞག་པ་ལས་ཕྲི་བསྣན་རྔོ་མི་ཐོགས། དེ་མིན་དཔེར་ན་དགའ་བའི་ཞེ་ས་ལ་དགྱེས་པ་དང་དགེས་པ། ཆུ་བོ་ཆུང་ངུ་ལ་ཆུ་ཕྲན་དང་ཆུ་བྲན་ལྟ་བུ་དང་། བྱ་ཚིག་དང་བྱེད་ཚིག་གང་ལྟར་རུང་རིགས་མ་ཕྱི་ལྟར་རང་སར་བཞག་དགོས་པ་ལ་ཕན་ཚུན་བསྒྱུར་པ་དང་ཆད་ལྷག་གི་ནོངས་པ་སོགས་ནི་བཤགས་ཡུལ་རྣམས་ཀྱི་མདུན་དུ་མཐོལ་བཤགས་བཟོད་གསོལ་ཞུ།
འདི་ལ་ཐེངས་དང་པོ་མཁན་ཀུན་བཟང་བསོད་ནམས་དང་ཕྲན་གཉིས་ཀྱིས་མ་ཕྱི་དང་ལན་གཉིས་བསྡུར་པ་དང་། འཕྲུལ་པར་རྐྱང་ཐོག་ལན་གཅིགཐེངས་གཉིས་པར་དཔལ་ཡུལ་བཤད་གྲྭའི་དགེ་སློབ་རྣམས་ཀྱིས་མ་ཕྱི་དང་འཕྲུལ་པར་གཉིས་སྦྲགས་ཚར་གཅིག་དང་འཕྲུལ་པར་རྐྱང་ཐོག་ལན་གཅིགཐེངས་གསུམ་པ་ཞེ་ཆེན་བཤད་གྲྭའི་དགེ་སློབ་རྣམས་ཀྱིས་མ་དཔེ་དང་ཚར་གཅིག་གཏུགས་པ་དང་འཕྲུལ་པར་རྐྱང་ཐོག་ལན་གཅིགཐེངས་བཞི་པར་ཕྲན་པས་འཕྲུལ་པར་རྐྱང་ཐོག་ཚར་གསུམ་དང་ཞུས་མཐར་མ་ཕྱི་དང་འཕྲུལ་པར་གཉིས་སྦྲགས་ཚར་གཅིག་ཡང་འཕྲུལ་པར་རྐྱང་ཐོག་ཐེངས་གཉིས་བཅས་བསྡོམས་༡༤ལྷག་བསྐྱར་ཞིབ་ཞུས་པ་ཡིན། སྔར་ཤིང་པར་དུ་མ་འཁོད་པའི་ཕྲན་ཚེགས་དང་མ་དཔེ་ནང་མི་གསལ་བ་དང་ལྡེབ་ཆད་རིགས་མཁོ་འདོན་རྒྱབ་སྐྱོར་གནང་མཁན་དག་ལ་སྙིང་ཐག་པ་ནས་ཐུགས་རྗེ་ཆེ་ཞུ། ཕྲན་ནས་ལོ་གཅིག་ལྷག་རིང་ལ་རང་གི་སློབ་སྦྱོང་དང་དཀའ་ཚེགས་ལ་མ་ལྟོས་པ། ཡིད་བཞིན་གྱི་ནོར་བུ་འདི་ལྟ་བུ་ལ་ཞབས་ཕྱི་ཞུ་བའི་གོ་སྐབས་འཕྲད་པ་འདི་སྐལ་བ་རེ་བཟང་སྙམ་པའི་དགའ་སྤྲོ་དང་འགན་འཁྲི་ཞིག་ཏུ་བརྩིས་ཏེ། གཟབ་ཁུལ་གྱིས་སྙམ་འཇོག་དང་ཕོ་ཚོད་ཧམ་ཤེད་དུ་མ་སོང་བ་ཞིག་ཏུ་བསམས་ནས། ཚིག་གསར་གཉིས་སོགས་ལ་ཁུངས་བཅོལ་ཏེ་བརྡ་སྤྲོད་མཁས་དབང་དང་། ཞུ་དག་ཉམས་མྱོང་པ། ཆོས་གྲོགས་རྣམས་ལ་བཀའ་འདྲི་ཞུས་ཏེ་རང་ནུས་ཅི་ཡོད་ཀྱིས་ཞབས་ཕྱི་སེམས་གཏིང་ནས་ཞུས་ཀྱང་། སྐྱེས་སྦྱོང་གི་ཤེས་ཡོན་དང་ཉམས་མྱོང་ཞན་པ་བཅས་ཀྱི་དབང་གིས་སྐྱོན་ཆ་དང་ནོར་འཁྲུལ་རིགས་ཅི་ཡང་ཡོད་ངེས་པས་རྒྱ་ཆེའི་གཟིགས་པ་པོ་རྣམས་ནས་བཀའ་བཀྱོན་དང་བཅས་ལེགས་བཅོས་ཡོ་བསྲང་གི་དགོངས་འཆར་ལྷུག་སྩོལ་ཡོད་པ་ཞུ་རྒྱུ་བཅས།
བསོད་ནམས་ཆོས་འཕེལ་གྱིས་ཁྲིན་ཏུའི་གྲོང་ཁྱེར་ནས། ༢༠༡༡ལོའི་ཟླ་བ་༥ཚེས་༣ལ།
ལས་དང་པོ་པ་ལ་ཕན་པའི་བསྐྱེད་རྫོགས་ཀྱི་གོ་དོན།
༄༅། །ལས་དང་པོ་པ་ལ་ཕན་པའི་བསྐྱེད་རྫོགས་ཀྱི་གོ་དོན་ཕྱོགས་མཚོན་ཉུང་གསལ་གོ་བདེར་བརྗོད་པ་བཞུགས་སོ། །ན་མོ་གུ་རུ་བཛྲ་ས་{ཡ}ཏྭ་ཡ། དངོས་གཅིག་དངོས་པོ་ཀུན་གྱི་དེ་བཞིན་ཉིད། །འོད་གསལ་སེམས་ཀྱི་རང་བཞིན་འདུས་མ་བྱས། །ཟུང་འཇུག་སྒྱུ་འཕྲུལ་དྲྭ་བའི་རོལ་གར་མཁན། །དེ་ལ་ཕྱག་བྱས་དེ་གྲུབ་སྒོ་ཙམ་བརྗོད། །དེའང་ཐེག་པ་ཆེན་པོའི་རིགས་ཅན་སྐལ་བ་མཆོག་དང་ལྡན་པ་དག ཐེག་པ་ཐུན་མོང་བའི་ལམ་གྱིས་ངེས་པར་འབྱུང་བ་དང་བྱང་ཆུབ་ཀྱི་སེམས་རིན་པོ་ཆེ་ལ་བློ་ལེགས་པར་འབྱོངས་ཤིང་། དབང་བཞིས་རྒྱུད་སྨིན་ཅིང་དམ་ཚིག་དང་ལྡན་པས་ལམ་རིམ་པ་གཉིས་ལ་སློབ་པར་འདོད་པས། སྤྱིར་བསྐྱེད་པའི་རིམ་པ་ལ། ཆོ་གའི་ཁྱད་པར་རྒྱུད་ནས་གསུངས་པའི་བསྐྱེད་ཆོག་ཚང་བ། རང་འབྲས་ཀྱི་ཁྱད་པར་སྔགས་ཀྱི་མཐུ་བསྐྱེད་ནུས་པ། ངོ་བོའི་ཁྱད་པར་ཞུ་བདེ་དང་སྟོང་ཉིད་ཀྱི་རང་བཞིན། བྱེད་ལས་ཀྱི་ཁྱད་པར་རྫོགས་རིམ་གྱི་སྨིན་བྱེད་དུ་འགྲོ་བ་སྟེ་ཁྱད་ཆོས་བཞི་ལྡན་དང་། རྫོགས་རིམ་ལའང་། རྒྱུའི་ཁྱད་པར་རྡོ་རྗེའི་ལུས་ལ་གནད་དུ་བསྣུན་པ། བྱེད་ལས་ཀྱི་ཁྱད་པར་རྩ་རླུང་ཐིག་ལེ་དབུ་མར་དག་པ། རྣམ་པའི་ཁྱད་པར་ལྷན་སྐྱེས་ཀྱི་བདེ་བ་སྟོང་གཟུགས་དང་ངོ་བོ་གཅིག་ཏུ་གྱུར་པའི་བདེ་སྟོང་ཟུང་དུ་འཇུག་པ་སྟེ་ཁྱད་ཆོས་གསུམ་དང་ལྡན་པ་སོགས་གསར་རྙིང་གི་སྔགས་བླ་མེད་ཀྱི་རྒྱུད་སྡེ་རབ་འབྱམས་དང་། གྲུབ་པ་བརྙེས་པའི་རྣལ་འབྱོར་གྱི་དབང་ཕྱུག་རྣམས་ཀྱི་མན་ངག་ལས་ཇི་ལྟར་འབྱུང་བ་བཞིན་དུ་ངེས་རྫོགས་ཀྱི་ལམ་མཚན་ཉིད་པ་དགོས་ནའང་། དེ་ཙམ་མི་ཤེས་ཤིང་ལག་ཏུ་མི་ལོན་པའི་གང་ཟག་ལས་དང་པོ་པས་མོས་བསྒོམ་རྗེས་མཐུན་ཙམ་བྱེད་པ་ལ། ཐུན་མོང་དང་ཁྱད་པར་གྱི་ཆོ་གའི་ཡན་ལག་སྔོན་འགྲོའི་རིགས་རྣམས་སོང་ནས། དངོས་གཞི་བསྐྱེད་རིམ་གྱི་སྐབས། སྦྱང་བྱ་འཆི་བར་སྐྱེ་གསུམ་གྱི་བག་ཆགས་དག་པ་དང་། སྦྱངས་འབྲས་སྐུ་གསུམ་གྱི་ཡོན་ཏན་གཞི་ལ་རྫོགས་པར་བྱེད་ཅིང་ལམ་གོང་མ་རྫོགས་རིམ་གྱི་སྨིན་བྱེད་དུ་འགྱུར་ཚུལ་སོགས་ལ་གོ་མྱོང་ཅི་རིགས་དང་ལྡན་པའི་ངང་། རྒྱུ་ཏིང་ངེ་འཛིན་གསུམ་གྱིས་ཁོག་ཕུབ་པ། འབྲས་བུ་རྟེན་དང་བརྟེན་པར་བཅས་པའི་དཀྱིལ་འཁོར་བསྐྱེད་པ། དམིགས་པའི་གཙོ་བོ་ལྷའི་སྣང་ཞེན་ལ་བསླབ་པ་སོགས་ཁྲིད་གཞུང་ལས་བསྟན་པ་ལྟར་ལ། དེ་དག་ཀྱང་སྟོང་ཉིད་སྙིང་རྗེ་ཟུང་དུ་འཇུག་པའི་རིག་རྩལ་མ་འགགས་ལྷ་སྐུ་ཕྱག་རྒྱའི་རྣམ་པར་ཤར་བས། རྟེན་གཞལ་ཡས་ཁང་། བརྟེན་པ་ལྷ་གཙོ་འཁོར་ཞལ་ཕྱག་རྒྱན་ཆ་ལུགས་བཞུགས་ཚུལ་སོགས་རང་གི་བློ་ཡུལ་དུ་གསལ་ཅི་ནུས་སུ་བསྒོམ་ཞིང་། དེའང་ལས་དང་པོ་པས་ཐོག་མ་ནས་གཞུང་ནས་བཤད་ཚོད་ལྟ་བུའི་གསལ་སྣང་འབྱུང་མི་ནུས་ཀྱང་། དེས་སྐྱོ་སུན་དང་རེ་དོགས་ཀྱི་བློ་མང་མི་བསྐྱེད་པར་རིམ་གྱིས་ངང་བསྲིང་སྟེ་ཡུན་ཐུང་གྲངས་མང་བའི་ཚུལ་གྱིས། གསལ་ན་གསལ་ཏེ་འཕྲོ་བཅད། མི་གསལ་ན་མི་གསལ་ཏེ་འཕྲོ་བཅད། བསམ་གཏན་གྱི་དུག་བྱིང་རྒོད་ཀྱི་སྐྱོན་བསལ་ནས་བགས་ཀྱིས་འདྲིས་པར་བྱ་ཞིང་། ཅུང་ཟད་གོམས་ན་སྐྱོན་སེལ་བོགས་འདོན་སོགས་བསྐྱེད་རིམ་ལྷ་ཁྲིད་གྱི་གཞུང་སྤྱི་ནས་གསུངས་པ་ལྟར་རང་གི་རྒྱུད་ཚོད་དང་སྦྱར། གང་ལྟར་ཡང་སྣང་ལ་རང་བཞིན་མེད་པ། གསལ་ལ་རྟོག་པ་མེད་པ། བདེ་ལ་ཞེན་འཛིན་མེད་པ། ཆོས་སྐུའི་ངོ་བོ། ལོངས་སྐུའི་རྣམ་པ། སྤྲུལ་སྐུའི་ཕྲིན་ལས་དབྱེར་མི་ཕྱེད་པའི་བདག་ཉིད། ཟུང་འཇུག་ཆུ་ཟླའམ་འཇའ་ཚོན་ལྟ་བུར་མ་འདྲེས་ཡོངས་རྫོགས་སུ་སེམས་རྩེ་གཅིག་ཏུ་བསྒོམ་པ་ནི་རྣམ་པ་གསལ་བ་དང་། རྟེན་བརྟེན་པ་གཙོ་འཁོར་ཞལ་ཕྱག་རྒྱན་ཆས་སོགས་དེ་ཐམས་ཅད་ཀྱང་ཐ་མལ་རང་མཚན་པ་མ་ཡིན་པར་སངས་རྒྱས་ཆོས་སྐུའི་ཡོན་ཏན་རྣམས་རྟགས་ཀྱི་ཕྱག་རྒྱར་ཤར་བ་སྟེ། དེ་ཡང་གདོད་མའི་རིག་པ་བདེ་གཤེགས་སྙིང་པོ་ཟབ་གསལ་དབྱེར་མེད་འདུས་མ་བྱས་ཆེན་ལ་ཟག་མེད་འབྲས་ཆོས་ཉེར་ལྔ་ཉི་མ་དང་འོད་ཟེར་གྱི་ཚུལ་དུ་ཡེ་ནས་འདུ་འབྲལ་སྤངས་པ་ཉིད་རྟགས་ཀྱི་ཕྱག་རྒྱ་དེ་དང་དེར་ཤར་བར་ཤེས་པ་ནི་རྣམ་དག་དྲན་པ་དང་། དེའང་མ་ཡིན་པ་ལ་ཡིན་པར་འདུ་ཤེས་པ་ལྟ་བུ་མ་ཡིན་པར་གདོད་མའི་གཤིས་ལུགས་ཀ་དག་སྤྲོས་བྲལ་ཆེན་པོ་འཆིང་གྲོལ་ལས་འདས་པ་ཉིད་རང་བྱུང་གདོད་མའི་མགོན་པོ་ཁྱབ་བདག་བདེ་བ་ཆེན་པོར་ཡེ་ནས་གནས་པ་ལ་དེ་ལྟར་ཡིན་པའི་ངེས་ཤེས་ཟབ་མོ་ཐ་མལ་གྱི་རྐྱེན་གྱིས་མི་འཕྲོག་པར་རྡོ་རྗེ་ལྟར་བརྟན་པ་ནི་ང་རྒྱལ་བརྟན་པ་སྟེ། དེ་གསུམ་དང་ལྡན་ན་ཡང་དག་པའི་ལམ་དུ་འགྱུར་བ་ཡིན་གྱི། དེ་ལས་གཞན་དུ་ཁ་མིག་རྣ་བ་ཅན་རང་མཚན་པར་བསྒོམ་པ་དང་། དག་པའི་སངས་རྒྱས་དབྱིངས་ན་བཞུགས་པའི་ཡེ་ཤེས་གྱི་རྣམ་པར་རང་རྒྱུད་ལ་གསར་དུ་རྒྱས་འདེབས་པ་ཙམ་དང་། མ་ཡིན་པ་ལ་ཡིན་ནོ་སྙམ་པའི་དོན་མི་འགྱུར་གྱི་ང་རྒྱལ་གྱི་རྣམ་པ་ཙམ་གྱིས་ནི་སྔགས་བླ་མེད་ཀྱི་སྐབས་འདིར་ཇི་བཞིན་པར་མི་འགྱུར་རོ། །དེས་ན་དོན་དམ་བྱང་ཆུབ་སེམས་ཀྱི་རང་རྩལ་ཕུང་ཁམས་སྐྱེ་མཆེད་ཀྱི་ཆོས་ཀུན་གདན་གསུམ་ཚང་བ་ལྷ་ཡི་འཁོར་ལོར་ཡེ་ནས་གནས་པ་ལྷག་པ་ཀུན་རྫོབ་ཀྱི་བདེན་པ་ཉིད་གནས་ཚུལ་ཡང་དག་དང་མཐུན་པར་བསྒོམ་པ་ནི་དམ་ཚིག་སེམས་དཔའ་དང་། དབྱིངས་ཡེ་དབྱེར་མེད་ཟག་མེད་འབྲས་ཆོས་ལྔ་དང་ཡེ་ནས་འདུ་འབྲལ་སྤང་པ་ལྷག་པ་དོན་དམ་གྱི་བདེན་པ་ཉིད་ཡེ་ཤེས་སྙིང་པོའི་སྲོག་ཏུ་བཞུགས་པ་ནི་ཡེ་ཤེས་སེམས་དཔའ། དེ་ལྟ་བུའི་ལྷག་པའི་བདེན་པ་གཉིས་པོ་ཡང་སོ་སོ་མ་ཡིན་ཐ་མི་དད་པའི་རང་བཞིན་ཏིང་ངེ་འཛིན་གྱི་ངོ་བོར་སྣང་བ་ནི་ཏིང་འཛིན་སེམས་དཔའ་སྟེ། དེ་གསུམ་ཀའང་ཆོས་ཉིད་དེ་བཞིན་ཉིད་ཀྱི་ཀློང་དུ་དབྱེར་མེད་རོ་མཉམ་དུ་རྟོགས་པའི་བློ་ཆེན་རྣམས་ལ་ནི་དབང་བསྐུར་རྒྱས་གདབ་སྤྱན་འདྲེན་སོགས་ཀྱི་སྤྲོས་པ་ཆེར་མ་བྱས་ཀྱང་ཆོག་ལ། དེ་ལྟ་བུའི་བློ་རིག་དང་མི་ལྡན་པར་ལྷ་བདག་ཐ་དད་དུ་འཛིན་པ་རྣམས་ཀྱི་ཞེན་རྟོག་སྦྱང་བའི་སླད་དུ་ནི། དམ་ཚིག་པ་རང་ལྷར་གསལ་བ་ལ། ཡེ་ཤེས་པ་དབྱིངས་ནས་སྤྱན་དྲངས་ཏེ་དབང་བསྐུར་རྒྱས་གདབ་དབྱེར་མེད་དུ་བསྟིམས་པ་དང་། མཆོད་བསྟོད་སོགས་བྱས་ནས་ཏིང་འཛིན་དམིགས་པའི་འཕྲོ་འདུ་དང་བཅས་ཏེ་བཟླས་པ་ལ་འཇུག་པ་སོགས་ཏེ། དེ་ཡང་བླ་མེད་ཐུན་མིན་གྱི་སྐབས་འདིར་མཆོད་པ་སོགས་ཀྱི་ལས་རིམ་ཡང་ཐེག་པ་འོག་མ་རྣམས་ལས་ཁྱད་པར་དུ་གྱུར་པ་སྟེ། དཔེར་ན་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་བཞི་པོ་ཡང་དབང་བཞིའི་ལམ་ཁྱེར་དང་རྗེས་སུ་འབྲེལ་བ་སྟེ། ཕྱི་ཉེར་སྤྱོད་འདོད་ཡོན་གྱི་མཆོད་པ་རྣམས་ཀྱང་བུམ་དབང་གི་ལམ་ཁྱེར་བསྐྱེད་རིམ་དང་རྗེས་སུ་འབྲེལ་བར་ཕྱི་རོལ་གྱི་ཡུལ་སྣང་གཟུགས་སྒྲ་ལ་སོགས་པ་ཀུན་ཀྱང་སྣང་སྟོང་སྒྱུ་མ་ལྟ་བུ་གཟུགས་རྡོ་རྗེ་མ་སོགས་མཆོད་པའི་ལྷ་མོའི་རྣམ་པར་ཤར་བ་ལ་ཞེན་མེད་སྒྱུ་མའི་རོལ་པས་ལྷ་ལ་ལྷ་རོལ་པའི་ཚུལ་གྱིས་ལོངས་སྤྱོད་པས་ཚོགས་གཉིས་མིག་འཕྲུལ་བཞིན་དུ་རྫོགས་པར་བྱེད་པ་དང་། ནང་སྨན་རག་གཏོར་གསུམ་སོགས་དམ་ཚིག་གི་རྫས་ཀྱི་མཆོད་པའང་གཙང་དམེ་བླང་དོར་མེད་པར་ལོངས་སུ་སྤྱོད་པའི་བརྟུལ་ཞུགས་ཀྱིས་རྩ་རླུང་ཐིག་ལེ་དྭངས་མའི་ཁམས་རྣམས་རྒྱས་པར་བྱེད་པས་གསང་དབང་གི་ལམ་གྱི་གྲོགས་སུ་འགྱུར་བ་དང་། གསང་བ་སྦྱོར་སྒྲོལ་གྱི་མཆོད་པ་ལས་དང་ཡེ་ཤེས་ཀྱི་ཕྱག་རྒྱ་གང་རུང་ལ་བརྟེན་ནས་ཡབ་ཡུམ་སྙོམས་པར་འཇུག་པ་གསུམ་པའི་དབང་གི་ལམ་ཁྱེར་ལ་བརྟེན་ནས་ཞུ་བདེ་འགྱུར་མེད་ཀྱི་ཡེ་ཤེས་ཀྱིས་མཚན་རྟོག་དབྱིངས་སུ་གསོད་པར་བྱེད་པ་དང་། ཡང་གསང་དེ་ཁོ་ན་ཉིད་མཆོད་བྱ་མཆོད་བྱེད་ལས་འདས་པ་གདོད་མའི་གཤིས་ལུགས་སྤྲོས་བྲལ་དེ་ཁོ་ན་ཉིད་དབང་བཞི་པའི་ཡེ་ཤེས་དོན་དམ་འོད་གསལ་གྱི་ངོ་བོར་མཉམ་པར་འཇོག་པ་སྟེ། ལམ་གཞན་ལས་བདེ་ཞིང་མྱུར་བའི་རྒྱུ་མཚན་ཡང་དེ་ཡིན་ནོ། །དེ་ཐམས་ཅད་ཀྱང་རང་ལས་སྤྲུལ་ཞིང་རང་ལ་མཆོད་པ་འཕྲུལ་དགའི་ཚུལ་ཏེ་ཐ་དད་ཞེན་འཛིན་དང་བྲལ་བར་གཉིས་མེད་མཉམ་པའི་ངང་དུ་ལོངས་སྤྱད་པ་ནི་སྒྱུ་མ་ལྟ་བུའི་ཏིང་ངེ་འཛིན་ལ་རྩལ་སྦྱང་བའི་གནད་དོ། །སྲོག་སྡོམ་གྱི་གཟེར་བཞིར་གསུངས་པ་ནི། ཏིང་འཛིན་ལྷ་ཡི་གཟེར་ནི་གོང་དུ་སྨོས་པ་ལྟར་གསལ་དག་བརྟན་གསུམ་ཚང་བའི་ལྷ་སྐུའི་རྣལ་འབྱོར་ལ་དམིགས་པ་རྩེ་གཅིག་ཏུ་གཏད་དེ་བསྒོམ་པ་སྟེ་སྔགས་ཀྱི་ཞི་གནས་སྒྲུབ་པའི་སྒོ་བླ་ན་མེད་པའོ། །སྙིང་པོ་སྔགས་ཀྱི་གཟེར་ནི། རང་དམ་ཚིག་སེམས་དཔའ་ལྷར་གསལ་བའི་ཐུགས་ཀར་རང་འདྲ་བའི་ཡེ་ཤེས་སེམས་དཔའ་རྒྱན་ཆ་ལུགས་སྤངས་པ་གསང་བ་སྒྱུ་འཕྲུལ་པའི་ལུགས་ཡོངས་གྲགས་དང་། ཁ་ཅིག་ཏུ་རྒྱན་ཕྱག་མཚན་བསྒོམ་པར་ཡང་གསུངས་པ་ཡོད་དེ། གང་ལྟར་ཡང་དེའི་ཐུགས་ཀར་ཏིང་འཛིན་སེམས་དཔའ་ས་བོན་སྔགས་ཕྲེང་དང་བཅས་པ་གསལ་བཏབ་སྟེ། དམིགས་པ་མ་ཡེངས་པར་སེམས་རྩེ་གཅིག་པས་ཡིད་བཟླས་རླུང་བཟླས་ངག་བཟླས་སོགས་མི་ཚིག་གིས་བར་མ་ཆོད་ཅིང་སྒྲ་ཆེ་ཆུང་མྱུར་བུལ་སོགས་ཀྱི་སྐྱོན་དང་བྲལ་བར་ཆུ་བོའི་གཞུང་བཞིན་དུ་བཟླ་བ་སྟེ་ཡེ་ཤེས་ལྷའི་ཐུགས་སྲོག་གནད་ནས་བསྐུལ་བའི་སྒོ་ཡིན་ལ། སྔགས་དེ་ཡང་དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེ་རྣམ་པ་ཐམས་ཅད་པར་འཆར་བས་ལས་དང་དངོས་གྲུབ་ཐོགས་མེད་དུ་གྲུབ་པའི་མཐུ་བསམ་གྱིས་མི་ཁྱབ་པ་ལ་ཡིད་ཆེས་བསྐྱེད་པ་གལ་ཆེའོ། །འཕྲོ་འདུ་ཕྲིན་ལས་ཀྱི་གཟེར་ནི། སྣང་གྲགས་རྟོག་གསུམ་ལྷ་སྔགས་ཆོས་ཉིད་ཀྱི་དཀྱིལ་འཁོར་དུ་ཤེས་པའི་ངང་ནས་ཐུགས་སྲོག་ས་བོན་སྔགས་ཕྲེང་དང་བཅས་པ་ལས་འོད་ཟེར་སྤྲོ་བསྡུ་སོགས་ཀྱི་དམིགས་པས་རང་གཞན་གྱི་དོན་གཉིས་ཇི་ལྟར་འདོད་པ་བཞིན་དུ་སྒྲུབ་པའི་དམིགས་པ་ཁ་བསྒྱུར་ཏེ། བྱེ་བྲག་ཞི་རྒྱས་སོགས་ཀྱི་ལས་རབ་འབྱམས་སྒྲུབ་པ་ལ། དོན་གྱི་སེམས་སྟོང་ཉིད་སྙིང་རྗེ་ཟུང་དུ་འཇུག་པའི་རང་རྩལ་གཏོང་བའི་སེམས་ཞི་བ་དང་སྤྲོ་བ་སོགས་ལས་གང་དང་གང་སྒྲུབ་འདོད་ཀྱི་བསམ་པས། ཐུགས་སྲོག་སྔགས་ཕྲེང་དང་འོད་ཟེར་སོགས་ཀྱང་ཞི་བ་ལ་དཀར་པོ་བདུད་རྩིའི་རང་བཞིན་དང་། རྒྱས་པ་ལ་སེར་པོ་རིན་པོ་ཆེའི་ཆར་འབེབས་པ་སོགས་ལས་མཐུན་གྱི་དམིགས་པའི་འཕྲོ་འདུས་ཀྱིས་འཇིགས་བརྒྱད་ཞི་བ་དང་འབྱོར་དྲུག་རྒྱས་པ་སོགས་ལས་རབ་འབྱམས་གང་འདོད་དུ་སྒྲུབ་པའི་དམིགས་པའི་བསྒྱུར་སོ་སྟེ། དམིགས་གཏད་གཅིག་ཁོ་ནས་ཐམས་ཅད་སྒྲུབ་ནུས་པ་མ་ཡིན་ནོ། །དེ་དག་ཀྱང་འོད་གསལ་གཉུག་མའི་གཤིས་ལ་སྐུ་དང་ཡེ་ཤེས་མཛད་པ་ཕྲིན་ལས་སོགས་ཡེ་ནས་ལྷུན་གྲུབ་ཏུ་བཞུགས་པའི་བྱ་བ་གྲུབ་པའི་ཡེ་ཤེས་ཀྱི་རོལ་རྩལ་གང་འདུལ་སྒྱུ་འཕྲུལ་གྱི་བཀོད་པ་བསམ་གྱིས་མི་ཁྱབ་པའི་ཕྲིན་ལས་རྟོག་མེད་ལྷུན་གྲུབ་ཀྱི་ཚུལ་དུ་འབྱུང་བ་དང་། སྟོང་ཉིད་རྟེན་འབྱུང་དུ་ཤར་བས་ནམ་ཡང་འབྲས་བུ་བསླུ་མེད་ཀྱི་ཚུལ་ལ་ངེས་ཤེས་ཁྱད་པར་ཅན་བསྐྱེད་པ་དང་། ལས་རབ་འབྱམས་སྒྲུབ་པའི་གཞི་སྣང་གྲགས་དཀྱིལ་འཁོར་གསུམ་དུ་ཤར་བ་དེ་ཡང་། གདོད་མའི་གསང་ཆེན་བདེ་གཤེགས་སྙིང་པོའམ་གཉུག་མ་ལྷན་སྐྱེས་བདེ་བ་ཆེན་པོའི་རང་མདངས་འགག་པ་མེད་པར་སྣ་ཚོགས་སུ་སྣང་བ་ཡིན་པས་ན། ཕུང་ཁམས་སྐྱེ་མཆེད་ཀྱིས་བསྡུས་པའི་རྟོག་ཚོགས་ཀྱི་ཆོས་ཀུན་གཉུག་མའི་རྡོ་རྗེ་གསུམ་གྱི་ངོ་བོར་ཡེ་ནས་གནས་པ་ལ་དེ་ལྟར་ཡིན་པའི་ངེས་ཤེས་ཀྱིས་གསལ་གདབ་ཙམ་ལས། ངོ་བོར་སྔར་མ་དག་པ་ཞིག་ཕྱིས་ལམ་གྱིས་གསར་དུ་དག་པར་བསྒྱུར་བ་ལྟ་བུར་གོ་བར་མི་བྱའོ། །དགོངས་པ་མི་འགྱུར་བའི་གཟེར་ནི། སྨོས་མ་ཐག་པ་ལྟར་བསྐྱེད་བཟླས་ལ་སོགས་པ་དེ་ཐམས་ཅད་ཀྱང་འདུས་བྱས་བློས་སྤྲུལ་གྱི་བཀོད་པ་མ་ཡིན་པར་དོན་དམ་ཆོས་ཉིད་དག་མཉམ་ཆེན་པོའི་རང་རྩལ་སྣང་སྲིད་གཞིར་བཞེངས་རང་བྱུང་གི་དཀྱིལ་འཁོར་ཆེན་པོར་གནས་པ་ལ་བདག་གཞན་དང་། དམ་ཡེ་དང་། བསྒྲུབ་བྱ་དང་། སྒྲུབ་བྱེད་དང་། དག་མ་དག་ལ་སོགས་པ་གཉིས་ཆོས་ཀྱི་མཚན་མ་རྡུལ་ཆ་ཙམ་ཡང་མ་གྲུབ་པས་གཉིས་མེད་མཉམ་པའི་ཀློང་དུ་འཁོར་འདས་ཡེ་སངས་རྒྱས་པར་ལྟ་བས་ཐག་བཅད་ནས་གོམས་ཤིང་འདྲིས་པར་བྱེད་པ་སྟེ། གནས་ལུགས་ཟབ་མོའི་ལྟ་བ་འདི་ལྟ་བུས་ཟིན་ན་ཡེ་ཤེས་འཇིག་རྟེན་གང་སྒྲུབ་ཀྱང་གོལ་བར་མི་འགྱུར་ཞིང་མཆོག་དངོས་གྲུབ་པའི་ཉེ་རྒྱུ་བླ་ན་མེད་པར་འགྱུར་བ་ཡིན་ནོ། །བསྙེན་སྒྲུབ་ཡན་ལག་བཞིར་གསུངས་པ་ནི། གཞི་བསྙེན་སོགས་ཀྱི་སྐབས། ཞག་དང་པོ་སྒྲུབ་རྫས་དང་ཡོ་བྱད་སྟ་གོན་བྱས་ནས་ཆོ་ག་ཚར་གཅིག་གཏོང་བ་བསྙེན་པ། དེ་ནས་སྒྲུབ་པ་ཇི་ཙམ་བྱེད་པའི་ཞག་གྲངས་ཀྱི་ཕྱེད་སྔ་མ་ལ་འོད་ཟེར་དཀར་པོའི་སྤྲོ་བསྡུས་སྡིག་སྒྲིབ་སྦྱོང་བའི་དམིགས་པ་གཙོ་བོར་བྱེད་པ་ཉེ་བསྙེན། དེ་ཕྱིན་ཆད་ཕྱེད་ཕྱི་མ་ལ་འོད་ཟེར་དམར་པོ་སྤྲོ་བསྡུས་དངོས་གྲུབ་རང་ལ་བསྡུ་བའི་དམིགས་པ་གཙོ་བོར་བྱེད་པ་སྒྲུབ་པ། ཞག་ཐ་མ་ལ་འོད་ཟེར་མཐིང་ག་ཚུར་བསྡུ་བས་དངོས་གྲུབ་ལེན་པ་ནི་སྒྲུབ་པ་ཆེན་པོའོ། །དེ་ཉིད་ཆོ་ག་ཐུན་གཅིག་ལ་སྦྱར་ན་ཏིང་འཛིན་གསུམ་བསྒོམ་པ་ཡན་ཆད་བསྙེན་པ། རང་ལྷ་གཙོ་བོར་བསྒོམ་པ་ཉེ་བསྙེན། ཡུམ་བསྒོམས་ཏེ་མཁའ་གསང་བརླབས་པ་དང་འཁོར་གྱི་ལྷ་ཚོགས་ཚང་བར་བསྒོམ་པ་སྒྲུབ་པ། དབང་བསྐུར་རྒྱས་གདབ་སྤྱན་འདྲེན་སོགས་ནས་བཟླས་པ་མཆོད་བསྟོད་སོགས་ཆོ་གའི་ཡན་ལག་གཞན་རྣམས་སྒྲུབ་པ་ཆེན་པོར་ཕུར་པ་རྣལ་འབྱོར་གྱི་རྒྱུད་ལས་གསུངས་སོ། །རྗེས་སྤྱོད་ཚོགས་དང་གཏོར་འབུལ་སོགས་ཀྱི་སྐབས་ཀྱང་། མཆོད་སྦྱིན་གྱི་མགྲོན་མཐའ་དག་བདེ་གཤེགས་སྙིང་པོའི་རང་བཞིན་ཅན་ཡེ་གདོད་མ་ནས་ལྷན་སྐྱེས་བདེ་བ་ཆེན་པོའི་སྐུར་གཅིག་པས་ད་ལྟ་གཉིས་འཛིན་གྱི་འཁྲུལ་པ་གློ་བུར་བའི་སྦུབས་སུ་ཆུད་མ་ཆུད་ཀྱི་དབང་གིས་སྣང་ཚུལ་དུ་དག་མ་དག་ཅི་ལྟར་དུ་སྣང་རུང་། གནས་ཚུལ་ནས་དེ་ལྟར་མ་ཡིན་ཏེ། དཔེར་ན་འདུས་བྱས་ཀྱི་ཆོས་རྣམས་རྟོགས་རུང་མ་རྟོགས་རུང་རང་གི་ངོ་བོ་སྐད་ཅིག་མའི་ཆོས་ཉིད་ཅན་ཡིན་པ་བཞིན། ཡིན་ཚུལ་ནས་གདོད་ནས་རྣམ་པར་གྲོལ་པའི་ཆོས་ཉིད་རྟགས་ཀྱི་ཕྱག་རྒྱ་གཙོ་འཁོར་སྤྲུལ་པ་བཀའ་སྡོད་ཕོ་ཉ་ཕྱག་བརྙན་གྱི་ཚུལ་སོགས་གང་འདུལ་སྤྲུལ་པའི་རོལ་གར་བསམ་མི་ཁྱབ་པར་སྣང་བས། དོན་ལ་དཀྱིལ་འཁོར་གྱི་ལྷ་ལ་དམན་མཆོག་ཏུ་འཛིན་པའི་འདུ་ཤེས་དང་བྲལ་བའི་ངང་ནས། ཚོགས་གཏོར་སོགས་ངོ་བོ་ཟག་མེད་ཡེ་ཤེས་ཀྱི་བདུད་རྩི། རྣམ་པ་ཤ་ལྔ་བདུད་རྩི་ལྔ་སོགས་གསང་སྔགས་ནང་གི་དམ་རྫས་སུ་དམིགས་ནས་ཕུལ་བས་ཀུན་ཀྱང་གཙང་དམེ་བླང་དོར་གཉིས་འཛིན་དང་བྲལ་བར་གཉིས་མེད་མཉམ་པའི་ཀློང་དུ་ལོངས་སྤྱོད་པས་གནས་སྐབས་སུ་རང་གཞན་གྱི་ཚོགས་གཉིས་རྫོགས་ཤིང་སྒྲིབ་གཉིས་བྱང་བ་དང་། བྱང་ཆུབ་སྒྲུབ་པའི་ལམ་གྱི་བར་ཆད་སེལ་ཞིང་། མཐར་ཐུག་འོག་མིན་གསང་ཆེན་རོལ་པར་ཚོམ་བུ་གཅིག་ཏུ་གྲོལ་བར་བྱེད་པའི་ལམ་གྱི་གྲོགས་མཛད་པར་མོས་པ་དང་། དངོས་གྲུབ་ལེན་པ་སོགས་ཀྱི་སྐབས་ཀྱང་དོན་ལ་ལྷ་བདག་ཐ་དད་དུ་མ་གྲུབ་ཀྱང་ཀུན་རྫོབ་སྒྱུ་མ་ཙམ་དུ་སྒྱུ་མ་མཁན་གྱི་སྒྱུ་མའི་རོལ་གར་བཞིན་དུ་ལྷ་སྔགས་ཏིང་ངེ་འཛིན་གྱི་དམིགས་པའི་འཁྲུལ་འཁོར་གྱིས་མཆོག་དང་ཐུན་མོང་གི་གྲུབ་པ་མཐའ་དག་ལག་མཐིལ་ན་གནས་པའི་གཏེར་བཞིན་དུ་དངོས་སུ་འབྱིན་པ་ནི་རྟེན་ཅིང་འབྲེལ་བར་འབྱུང་བའི་ནུས་པའི་མཐུ་བསམ་གྱིས་མི་ཁྱབ་པའི་ཆོས་ཉིད་ཡིན་པ་ལ་ཡིན་པར་ཤེས་པའི་ངེས་ཤེས་དང་ལྡན་པར་བྱ་བ་དང་། མཇུག་བསྡུ་རིམ་གྱི་སྐབས་སུའང་། རང་གཞན་རྣམས་འཆི་བའི་ཚེ་འབྱུང་བའི་ཐིམ་རིམ་གྱི་མཐར་དཀར་དམར་རླུང་གི་བྱེད་པས་རང་བཞིན་བརྒྱད་ཅུའི་ཀུན་རྟོག་མཐའ་དག་འགག་པའི་ཚེ་འོད་གསལ་བསམ་མི་ཁྱབ་པའི་ཡེ་ཤེས་སྒྲིབ་གཡོགས་དང་བྲལ་བ་སྟོན་གནམ་དྭངས་པ་ལྟར་མངོན་དུ་འཆར་བ་ཉིད་ལམ་དུ་བྱེད་པའི་ཕྱིར། རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་ཐམས་ཅད་འོད་གསལ་དུ་བསྡུས་ནས་མཉམ་པར་འཇོག་པ་དང་། དེ་ལས་ལངས་ནས་ཟུང་འཇུག་འོད་གསལ་གྱི་ལྷ་སྐུར་ལྡང་བའི་ཕྱིར་སྣང་གྲགས་ཀྱི་ཆོས་ཀུན་ལྷ་ཡི་འཁོར་ལོར་གསལ་གདབ་པས་རྟག་ཆད་ཀྱི་མཐའ་བསལ་ཞིང་། ཐེག་ཆེན་བླ་ན་མེད་པའི་ཐབས་མཁས་ཀྱི་སྒོ་སྨོན་ལམ་དང་ཤིས་བརྗོད་སོགས་ཀྱིས་མཐའ་བརྒྱན་ནས། ཐུན་མཚམས་སུའང་ལྷའི་ང་རྒྱལ་ལ་གནས་པའི་སྒོ་ནས་རྒྱུན་གྱི་སྤྱོད་ལམ་ལ་འཇུག་པ་སོགས་སྦྱོར་རྗེས་ཀྱི་ཆོ་གའི་ཡན་ལག་ཐམས་ཅད་ཚང་ལ་མ་འཁྲུལ་པར་ཉམས་སུ་ལེན་པར་བྱ་བ་གལ་ཆེ་སྟེ་དེ་དག་རེ་རེའང་དགོས་པ་ཁྱད་པར་བ་དང་འབྲེལ་བ་འབའ་ཞིག་ཡིན་པའི་ཕྱིར་རོ། །དེ་ལྟར་ཉམས་སུ་བླངས་པས་བསྐྱེད་རྫོགས་སམ་ཚོགས་གཉིས་ཟུང་འབྲེལ་དུ་འགྱུར་ཏེ། སྣང་བ་ལྷར་གསལ་བ་ནི་བསྐྱེད་རིམ་ཐབས་ཀྱི་ཆ་སྟེ། དེས་བསོད་ནམས་ཀྱི་ཚོགས་རྫོགས། གཟུགས་སྐུའི་རྟེན་འབྲེལ་སྒྲིག དེ་ཉིད་ཨ་འཐས་ཞེན་འཛིན་དང་བྲལ་བར་འོད་གསལ་གཉུག་མའི་རང་བཞིན་དུ་ཤེས་པ་ནི་ཤེས་རབ་རྫོགས་པའི་རིམ་པ་སྟེ། དེས་ཡེ་ཤེས་ཀྱི་ཚོགས་རྫོགས། མཐར་ཐུག་ཆོས་སྐུའི་རྟེན་འབྲེལ་སྒྲིག་པར་བྱེད་པ་ཡིན་ནོ། །གཞན་ཡང་སྣང་བརྟགས་ཀྱི་ཆོས་འདི་ཐམས་ཅད་མ་བརྟགས་ཉམས་དགའ་སྣང་ཙམ་དུ་བདེན་པ་ནི་ཀུན་རྫོབ་བདེན་པ་དང་། དེ་ལ་རང་བཞིན་གྱིས་གྲུབ་པ་རྡུལ་ཙམ་ཡང་མ་དམིགས་པའི་གཤིས་ལུགས་སྟོང་པ་ཉིད་ནི་དོན་དམ་བདེན་པ་སྟེ། དེ་གཉིས་ཀྱང་སྣང་སྟོང་ཐ་དད་དུ་མ་གྱུར་པར། གང་སྣང་བཞིན་པའི་གཟུགས་སོགས་ཀྱི་ཆོས་འདི་སྟོང་ཞིང་། སྟོང་བཞིན་པའི་ཆོས་ཉིད་ལས་མ་གཡོས་བཞིན་དུ་རྟེན་འབྱུང་གི་ཆོས་ཀུན་སྣ་ཚོགས་སུ་སྣང་བ་མི་འགག་པ་སྟེ། སྣང་སྟོང་ཟུང་དུ་འཇུག་པའི་ཆོས་ཀྱི་དབྱིངས་སྒྲོ་འདོགས་སོ་གཉིས་དང་བྲལ་བ་མཐར་ཐུག་རྣམ་གྲངས་མ་ཡིན་པའི་དོན་དམ་ཟབ་མོ་ལྟ་བ་ཁས་ལེན་དང་བྲལ་བ་ཉིད་ལེགས་པར་གཏན་ལ་ཕབ་ནས། དེའི་ངང་དུ་བསལ་བཞག་སྤང་ལེན་དང་བྲལ་བར་མཉམ་པར་འཇོག་པའི་སྒོམ་པ་ཉམས་མྱོང་དང་འབྲེལ་བས་སྤྲོས་པའི་མཚན་མ་མཐའ་དག་འགོག་པ་ནི་གཞི་མཐའ་བྲལ་དབུ་མ་ཆེན་པོའི་དགོངས་པར་གནས་ལ། འདི་ལྟར་སྣ་ཚོགས་སུ་སྣང་བ་སེམས་ཀྱི་རང་མདངས་ཡིན་ཞིང་། སེམས་ཉིད་སྟོང་པ་སྐྱེ་མེད་ཀྱི་ངོ་བོའི་འདུག་ཚུལ་ཏེ། གསལ་བ་སེམས་ཀྱི་མཚན་ཉིད། སྟོང་པ་སེམས་ཀྱི་ཆོས་ཉིད། དེ་གཉིས་ཡེ་ནས་འདུ་འབྲལ་མེད་པའི་དབྱེར་མེད་མཉམ་པ་ཆེན་པོ་ངོ་བོ་སྐྱེ་འགག་གནས་གསུམ་དང་བྲལ་བའི་ཟུང་འཇུག་བློ་འདས་ཆེན་པོར་གཏན་ལ་ཕབ་ནས་མ་བཅོས་གཉུག་མའི་ཀློང་དུ་མ་ཡེངས་མི་བསྒོམ་རང་བབས་སུ་འཇོག་པའི་རྣལ་འབྱོར་གྱིས་ཡིད་བྱེད་ཀྱིས་མཚན་མ་མཐའ་དག་འགོག་པ་ནི་ལམ་ཕྱག་རྒྱ་ཆེན་པོའི་ཉམས་ལེན་དང་། འཁོར་འདས་ཀྱི་ཆོས་ཐམས་ཅད་རིག་པ་བྱང་ཆུབ་སེམས་ཀྱི་ཀློང་དུ་རྫོོགས་ཤིང་། སེམས་ཉིད་ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། རིག་རྩལ་འགག་པ་མེད་པ་སྤྲུལ་པའི་སྐུ་སྟེ་སྐུ་གསུམ་འདུ་འབྲལ་མེད་པའི་ངོ་བོར་ཡེ་ནས་སངས་རྒྱས་པའི་རང་བཞིན་ཅན་ཏེ། ཡུལ་སྟོང་པའི་དབྱིངས་དང་ཡུལ་ཅན་རིག་པའི་ཡེ་ཤེས་གཉིས་ཡེ་ནས་འདུ་འབྲལ་སྤང་བའི་མཚན་ཉིད་ཅན་གྱི་རིག་སྟོང་ཆོས་ཟད་ཟང་ཐལ་རྗེན་པའི་རང་མདངས་སྐྱོང་བས། རྩོལ་སྒྲུབ་རེ་དོགས་ཀྱི་ཡིད་དཔྱོོད་ཕྲ་མོས་ཀྱང་མ་གོས་པ་ནི་འབྲས་བུ་ཡེ་གྲོལ་རྫོགས་པ་ཆེན་པོ་སྟེ། དེ་ཐམས་ཅད་ཀྱང་བློ་དང་སྒྲ་རྟོག་གི་ཞེན་ཡུལ་དུ་གྱུར་པའི་ཡུལ་དང་ཡུལ་ཅན་ཐ་དད་དུ་འཛིན་པའི་ཆ་ནི་ཀུན་རྫོབ་བདེན་པའི་ཡུལ་ཅན་ཏེ། དེ་ནི་ཇི་ཙམ་དུ་རྣོ་བ་དང་ཟབ་པར་རློམ་ཡང་འདུ་བྱེད་སེམས་ཀྱི་ཀུན་རྟོག་གི་སྤྲོས་པ་ཙམ་ལས་མ་འདས་པས། དེས་གཉིས་འཛིན་གྱི་མཚན་མ་ནམ་ཡང་འགོག་པར་ནུས་པ་མ་ཡིན་ནོ། །གང་བལྟ་བྱ་དང་རྟོག་བྱེད་རྟོགས་པ་གསུམ་ཐ་དད་དུ་མ་སོང་བར་ངོ་བོ་མཉམ་ཉིད་བརྗོད་བྲལ་དུ་གཏན་ལ་ཕེབས་པས། ངོ་བོ་མཐོང་བྱ་མཐོང་བྱེད་སོགས་ཐ་སྙད་ཀྱི་སྤྲོས་པ་མཐའ་དག་ཆད་པའི་སྨྲ་བསམ་བརྗོད་བྲལ་གྱི་གཤིས་ལུགས་རྡོ་རྗེ་ནམ་མཁའི་དཀྱིལ་ལྟ་བུ་མཐོང་བ་མེད་པའི་ཚུལ་གྱིས་མཐོང་བ་ནི་དོན་དམ་བདེན་པའི་ཡུལ་ཅན་གྱི་ཡེ་ཤེས་ཏེ། བཅོམ་ལྡན་འདས་ཀྱིས་མདོ་ལས། ཚིག་བྲལ་ངག་གི་ལམ་གྱིས་མི་མཚོན་པའི། །དེ་བཞིན་ཉིད་ཆོས་རང་བཞིན་ནམ་མཁའ་འདྲ། །སེམས་དང་ཡིད་ཀྱི་རྒྱུ་བ་རྣམ་སྤངས་པ། །མཆོག་རབ་ངོ་མཚར་ཆེ་བ་དམ་པ་ཤེས། །ཞེས་དང་། སྒྲ་གཅན་འཛིན་གྱིས་ཡུམ་ལ་བསྟོད་པ་ལས་ཀྱང་། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །ཞེས་སོགས་གསུངས་པས་མཚོན་ནུས་ལ། དངོས་གནས་འཕགས་རྒྱུད་མཉམ་བཞག་གི་ཡེ་ཤེས་ཀྱིས་བསྡུས་མོད། རྗེས་མཐུན་པ་བརྒྱུད་པའི་མན་ངག་གིས་ཟིན་ཅིང་། བླ་མའི་ཐུགས་རྗེ་དང་རང་གི་མོས་གུས་ཀྱི་རྒྱུ་རྐྱེན་རྟེན་འབྲེལ་ཚོགས་པ་ལ་བརྟེན་ནས། ད་ལྟ་སོ་སྐྱེའི་གནས་སྐབས་ནས་སྒོམ་པ་མེད་པ་མ་ཡིན་ཏེ། ཆོས་ཉིད་དོན་སྤྱིའི་ཚུལ་གྱིས་བློ་ལ་ཤར་བ་དཔེ་ཆུ་ནང་གི་ཟླ་གཟུགས་ལྟ་བུ་སྟེ། འདི་ལ་དཔེ་ཡི་ཡེ་ཤེས་ཞེས་བྱ། དེ་ཡང་ཆོས་ཉིད་སྤྲོས་བྲལ་ཡིན་པའི་གནད་ཀྱིས་དེའི་དོན་སྤྱི་བློ་ལ་སྣང་བས་བློ་ཡང་སྤྲོས་བྲལ་གྱི་རྣམ་པར་སྐྱེ་བ་ཡིན་ཞིང་། དེ་ཙམ་གྱིས་གང་ཟག་དེ་འཕགས་པར་ཐལ་བའང་མེད་དེ། རང་སའི་སྒྲིབ་པ་མ་སྤངས་པའི་ཕྱིར། དཔེར་ན་གང་ཟག་མཐོང་ལམ་པས་དོན་གྱི་འོད་གསལ་མངོན་དུ་བྱས་ཀྱང་། ད་དུང་སྒོམ་སྤོང་གི་དྲི་མ་མ་དག་པས་དེ་སངས་རྒྱས་སུ་མི་འགྱུར་བ་བཞིན་ནོ། །ཆོས་ཉིད་དེ་ཡང་གསར་བྱུང་མ་ཡིན་པར་ཡེ་ནས་གནས་པས་དེ་ཉིད་ངོ་སྤྲད་ནས་གོམས་སུ་འཇུག་པ་ཡོད་པ་ཡིན་ནོ། །དེ་ཉིད་བསལ་བཞག་སྤང་ལེན་དང་བྲལ་བར་སྐྱོང་བ་མཉམ་བཞག་དང་། རྗེས་ཐོབ་ཚོགས་གཉིས་ཟུང་དུ་འབྲེལ་བའི་བསགས་སྦྱང་གི་སྒོ་ཚད་མེད་པ་ལ་སྦྱོར་བས་རིགས་ཁམས་ལ་སྒྲིབ་པའི་དྲི་མ་བྲལ་སྟོབས་ཀྱིས་མཐོང་བ་ཇེ་དག་ཏུ་སོང་ནས་རིམ་གྱིས་ཟུང་འཇུག་འཕགས་པའི་ཡེ་ཤེས་ལ་དངོས་སུ་སྦྱོར་བར་བྱེད་པ་ལ་ངེས་དོན་གྱི་མདོ་རྒྱུད་རྣམས་དགོངས་པ་མཐུན་མོད། སྔགས་བླ་མེད་ཀྱི་སྐབས་འདིར་མདོ་ལམ་ལྟ་བུའི་དཀའ་ཚེགས་ངལ་དུབ་ལ་ལྟོས་མི་དགོས་པར་ཐོག་མ་ནས་ལྟ་བ་རང་བྱུང་གི་ཡེ་ཤེས་ཉིད་ཆོས་ཅན་མཚན་མའི་རྩོལ་སྒྲུབ་ཀྱིས་གསར་དུ་བྱས་པ་མ་ཡིན་པར་ཆོས་ཉིད་འདུས་མ་བྱས་ཀྱི་ངོ་བོར་ཡེ་ནས་གནས་པས་ན། སྲིད་ཞི་ཀུན་ཁྱབ་ཆ་མེད་ཀུན་འགྲོ་ཁྱབ་པའི་བདག་ཉིད་འཁོར་འདས་ཀུན་གྱི་སྲོག་ཏུ་ཞུགས་པ་དེ་ཉིད་སྨིན་གྲོལ་ཟབ་མོའི་ཐབས་མཁས་ལ་བརྟེན་ནས་བཅར་ཕོག་ཏུ་ངོ་སྤྲད་ནས། དེ་ཉིད་ཀུན་བཟང་ཆོས་སྐུའི་དགོངས་པར་ཐག་བཅད་དེ་སྒོམ་པར་བྱེད་པས་འབྲས་བུ་ལམ་བྱེད་དང་ཐབས་ཀྱི་ཐེག་པར་གྲུབ་པ་ཡིན་ལ། དེ་ལྟར་སྣང་སྲིད་དག་མཉམ་ཆེན་པོའི་ལྟ་བ་ཀློང་དུ་གྱུར་པས། སྡུག་བསྔལ་བྱང་ཆུབ་དང་ཀུན་འབྱུང་ལམ་བདེན་གྱི་ངོ་བོར་ཤར་བས་མ་དག་རང་མཚན་པ་བཙལ་གྱིས་མི་རྙེད་པའི་བདེ་ཆེན་བྱང་ཆུབ་སེམས་སྤྲིན་དག་པ་རབ་འབྱམས་ལྷའི་འཁོར་ལོར་ཤར་བས་ཐ་མལ་གྱི་མཚན་རྟོག་དབྱིངས་སུ་སྡོམ་པར་བྱེད་པའི་སྒོམ་སྤྱོད་འབྲས་བུའི་ཆོས་ཀུན་ཀྱང་ཐ་དད་དུ་འཛིན་པའི་ཞེན་རྟོག་དང་བྲལ་བར་ཉམས་སུ་ལེན་པའི་ཐབས་མཁས་ཀྱི་སྒོ་རྨད་དུ་བྱུང་བས་བསྐལ་པ་མང་པོའི་ཚོགས་ཀྱང་དུས་སྐད་ཅིག་མ་རེ་ལ་འདུམ་པར་བྱས་ནས། དབང་རྣོན་སྐལ་བ་མཆོག་དང་ལྡན་པ་རྣམས་སྙིགས་དུས་ཀྱི་ཚེ་གཅིག་ལ་ཟུང་འཇུག་རྡོ་རྗེ་འཆང་གི་གོ་འཕང་ལ་དངོས་སུ་སྦྱོར་བར་བྱེད་པ་ཡིན་ཞིང་། དེ་ཡང་མ་དག་ལས་རླུང་གིས་བསྐྱོད་པའི་འཁྲུལ་རྟོག་སེམས་ཀྱི་བག་ཆགས་མཐུ་བརྟས་པས། དག་པ་ཡེ་ཤེས་ཀྱི་ཁམས་སྙིང་པོའི་ཚུལ་དུ་བཞུགས་ཀྱང་མངོན་དུ་མ་གྱུར་པ་ནི་གཞི་སེམས་ཅན་གྱི་སྐབས་དང་། གཉེན་པོ་ཡེ་ཤེས་ཀྱི་རང་འོད་སྦྱང་བྱ་འཁོར་བའི་ཆོས་དང་འདྲེས་ནས་སྦྱོང་བྱེད་ལམ་གྱི་རྣམ་པར་ཤར་བས་མ་དག་རླུང་སེམས་རགས་པའི་ཆ་རྣམས་བཅོམ་ནས་ལས་རླུང་དང་ཡེ་རླུང་གི་བྱེད་པ་འགྲན་པའི་སྐབས་སུ་ལམ་རྣལ་འབྱོར་གྱི་སྐབས་དང་། གཉེན་པོ་མཐར་ཕྱིན་ནས་མ་དག་རླུང་སེམས་ཀྱི་འགྱུ་ཆ་ཕྲ་མོ་ཙམ་ཡང་མ་ལུས་པར་ལྷག་མེད་དུ་བཅོམ་ནས། དག་པ་ཡེ་རླུང་དང་ཡེ་ཤེས་ཀྱི་རང་མདངས་འབའ་ཞིག་པ་མངོན་དུ་གྱུར་པའི་ཚེ་མཐར་ཕྱིན་འབྲས་བུའི་སྐབས་ཏེ། གནས་སྐབས་ཀྱི་སྒྲིབ་པ་དག་ཚུལ་དང་ཡོན་ཏན་སྣང་ཚུལ་ལ་ལྟོས་ནས་ཀུན་རྫོབ་ཐ་སྙད་དཔྱོད་པའི་ཚད་མའི་ངོར་རྣམ་པ་གསུམ་དུ་བཞག་མོད། མཐར་ཐུག་དོན་དམ་དཔྱོད་པའི་ངོར་དེ་གསུམ་ཀའང་རང་བཞིན་མཉམ་པ་ཆེན་པོའི་ཀློང་དུ་དབྱེར་མེད་རོ་གཅིག་པས་དག་མ་དག་སོགས་ཀྱི་གཉིས་ཆོས་སུ་གྲུབ་པ་ཅུང་ཟད་ཀྱང་མེད་པས་གཉིས་མེད་བྱང་ཆུབ་སེམས་ཀྱི་ཀློང་དུ་འཁོར་འདས་ཡེ་སངས་རྒྱས་པ་ཞེས་བྱ་སྟེ། ལྷུན་རྫོགས་བདེ་བ་ཆེན་པོའི་ས་ལ་ད་ལྟ་ཉིད་ནས་གནས་པར་ཤེས་པར་བྱ་བ་ནི་གནད་གལ་པོ་ཆེ་ཡིན་ནོ། །བཤད་ཡམ་ཚིག་གི་སྦུན་པ་རིང་དོར་ནས། །དོན་གནད་སྙིང་པོར་བསྡུས་པའི་ནས་སྔོན་འདི། །སྐལ་བཟང་དོན་མཐུན་མཆེད་ལ་འབུལ་བ གྱི་ན། །ཉམས་མྱོང་ལུས་ཟུངས་གསོས་སུ་བཞེས་པར་རིགས། །ད་རེས་དལ་འབྱོར་གྲུ་བོ་རྙེད་གྱུར་ཅིང་། །བླ་མའི་གདམས་ངག་གྲུ་འཛིན་ཐོབ་དུས་འདིར། །བརྩོན་པས་སྲིད་མཚོ་བརྒལ་ལ་མ་བརྩོན་ན། །མཐའ་མེད་སྡུག་བསྔལ་རྦ་ལ་འཕྱན་ཏ་རེ། །ལང་ཚོའི་མེ་ཏོག་མགུལ་རྒྱན་ཡུད་ཀྱིས་རྙིང་། །བཟློག་མེད་འཆི་བདག་གྲིབ་སོ་མྱུར་དུ་འོང་། །ཚེ་སྲོག་གློག་གི་ཟློས་གར་མི་བརྟན་གཡོ། །མྱུར་བར་མྱུར་བར་བརྩོན་པའི་དཔུང་སྐྱེད་ཅིག །ད་ལྟ་རང་དབང་ཆོས་ལ་སྤྱོད་དུས་འདིར། །དོན་མེད་འཁྲུལ་པའི་བྱ་བ་མ་བཏང་ན། །དོན་ཆེན་དམ་ཆོས་འགྲུབ་དུས་ནམ་ཞིག་ཡོད། །ཕྱིས་ནས་འགྱོད་པའི་དུས་ཤིག་འབྱུང་ཏ་རེ། །ཐོག་མར་དགེ་བ་སྲིད་ལ་རྒྱབ་ཀྱིས་ཕྱོགས། །བར་དུ་དགེ་བ་དབེན་པར་སྒྲུབ་ཚུགས་བརྟན། །ཐ་མར་དགེ་བ་དོན་གཉིས་གཏེར་ཁ་འབྱེད། །བསམ་དོན་ཆོས་བཞིན་འགྲུབ་པའི་བཀྲ་ཤིས་ཤོག །ཅེས་པའང་དམ་གཙང་རྡོ་རྗེའི་མཆེད་ཟུང་རྩེ་གཅིག་སྒྲུབ་ལ་གཞོལ་འདུན་གྱི་ཐུགས་དམ་གསལ་འདེབས་ཙམ་དུ། དགེ་སློང་རྨོངས་པ་འགྱུར་མེད་པདྨ་རྣམ་རྒྱལ་གྱིས་གོ་སླ་གཙོ་བོར་བཟུང་ནས་ཉུང་ངུའི་ངག་གིས་ཡིད་ངོར་གང་དྲན་འཕྲལ་མར་བྲིས་ཏེ་ཕུལ་བའི་དགེ་བས་སྒྲུབ་པའི་རྒྱལ་མཚན་ཡུན་དུ་བརྟན་ཅིང་གྲུབ་གཉིས་ཀྱི་འབྲས་བུ་མངོན་དུ་འབྱིན་པའི་རྒྱུར་གྱུར་ཅིག སརྦ་མདྒལཾ།། །།
སེམས་དོན་དངོས་གཞིའི་ཉམས་ལེན་གནད་བསྡུས་རབ་གསལ་སྒྲོན་མེ།
༄༅། །སེམས་དོན་དངོས་གཞིའི་ཉམས་ལེན་གནད་བསྡུས་རབ་གསལ་སྒྲོན་མེ་བཞུགས། ན་མོ་གུ་རུ་མཉྫུཤྲཱི་ཡེ། ཆོས་སྐུ་རྡོ་རྗེ་འཆང་ཆེན་དང་། །གཉིས་སུ་མ་དམིགས་བླ་མ་ལ། །དངོས་པོ་ཀུན་གྱིས་ཕྱག་བྱས་ནས། །ཉམས་ལེན་གནད་བསྡུས་རབ་གསལ་བྲི། །དེ་ཡང་དབང་ཐོབ་ཅིང་དམ་ཚིག་ལ་གནས་པས་ཐེག་ཆེན་ཐུན་མོང་དང་ཐུན་མོང་མ་ཡིན་པའི་ལམ་གྱིས་རྒྱུད་སྦྱོང་བ་སྔོན་དུ་འགྲོ་བས་འདིར་བདག་མེད་གཉིས་གཏན་ལ་འབེབས་ཚུལ་སོགས་ཤིན་ཏུ་གོ་བདེ་བར་བརྗོད་ན། ཐོག་མར་མདའ་འཕེན་པ་ལ་འབེན་ངོས་ཟིན་དགོས་པ་བཞིན་གང་ཟག་གི་བདག་ལྷན་སྐྱེས་སམ་ངར་འཛིན་གྱི་ཞེན་ཡུལ་དུ་གྱུར་པའི་ང་ཞེས་པ་འདི་གང་ལ་བཏགས་ཀྱི་རྩ་བ་ངོས་ཟིན་པར་བྱ་དགོས་ཏེ། དེ་ཡང་ངའམ་བདག་དེ་ཕྱི་རོལ་གྱི་སྣོད་སོགས་ཡུལ་གྱི་སྟེང་ན་ནི་ཡོད་པར་མི་མཐོང་སྟེ་དེ་ལ་སུས་ཀྱང་ང་མི་ཟེར་ཞིང་། དེ་བཞིན་གང་ཟག་གཞན་རྒྱུད་ཀྱིས་བསྡུས་པའི་ལུས་སེམས་སོགས་ཕུང་ལྔའི་ཚོགས་པ་ལའང་ང་ཞེས་མི་འཛིན་ཏེ་དེ་ལ་གཞན་ཞེས་བཏགས་པའི་ཕྱིར། དེས་ན་ང་ཞེས་པ་འདི་གང་ལ་བཏགས་ཤིང་ཡོད་ན། སྤྱིར་ཕོ་མོ་མ་ནིང་དང་རིགས་བརྒྱུད་སོགས་རྣམ་པའི་འཛིན་ཚུལ་བྱེ་བྲག་པ་མང་ཡང་། རྩ་བ་ནི་རང་རྒྱུད་ཀྱིས་བསྡུས་པའི་ལུས་དང་སེམས་དང་མིང་གསུམ་པོ་འདིའི་སྟེང་དུ་འཛིན་པས་ཡོད་ན་འདིའི་སྟེང་ན་ཡོད་དགོས་ཀྱི་དེ་ལས་གཞན་དུ་མི་སྲིད་དོ། །དེ་གསུམ་ལ་ཇི་ལྟར་འཛིན་ན། ལུས་ཀྱི་ནང་དོན་ལྔ་སྣོད་དྲུག་གང་ན་ཡང་ངའོ་སྙམ་དུ་འཛིན། དེ་བཞིན་ལུས་ཀྱི་ཕྱིའི་མགོའི་སྐྲ་རྩེ་ནས་རྐང་སེན་ཡན་ཡན་ལག་ཉིང་ལག་སོགས་གང་ཡིན་ཡང་འདྲ་སྟེ། ཐ་ན་མེ་སྟག་ཙམ་ཕོག་གམ་ཚེར་མ་ཙམ་ཟུག་ཀྱང་། ང་ཚིག་གོ །ང་རྨས་སོ། །ང་ཚའོ་སྙམ་དུ་ འཛིན། སེམས་ཀྱང་ཡུལ་རྐྱེན་ལ་ལྟོས་སམ་མི་ལྟོས་གང་ལྟར་ཡང་། དེ་རིང་ང་སྐྱིད་དོ། །སྡུག་གོ །ངས་ཤེས་སོ། །མི་ཤེས་སོ་སྙམ་དུ་འཛིན། མིང་ནི་ཕ་མའམ་མཁན་སློབ་ཀྱིས་བཏགས་པ་སོགས་གང་ཡིན་ཡང་འདྲ་སྟེ། མིང་དེ་གཞན་གྱིས་བརྗོད་པ་ན། ང་བོས་སོ། །ང་ལ་ཟེར་རོ། །ང་བསྟོད་དོ། །སྨད་དོ་ཞེས་འཛིན། དེས་ན་དེ་གསུམ་པོ་གང་ལ་བཟུང་ཡང་འདྲ་སྟེ། ངར་འཛིན་དེ་ལ་བརྟེན་ནས་ཆགས་སོགས་ཉོན་མོངས་པ་དང་། དེས་ལས་བསྐྱེད། དེའི་འབྲས་བུ་འཁོར་བའི་སྡུག་བསྔལ་གྱི་ཕུང་པོ་འདི་འགྲུབ་པ་ཡིན་པས་སྲིད་པའམ་འཁོར་བའི་རྩ་བ་ནི་ངར་འཛིན་ལྷན་སྐྱེས་འདི་ལ་ཐུག འོན་ཀྱང་གྲུབ་མཐས་བློ་མ་བསྒྱུར་པའི་བྱིས་པ་རྣམས་ཀྱིས་ཕྱི་རོལ་པས་ཀུན་ཏུ་བརྟགས་པའི་བདག་རྟག་གཅིག་རང་དབང་བ་ལྟ་བུར་ནི་མི་འཛིན་ཏེ། བདེ་སྡུག་སོགས་རེས་འགའ་བར་འཛིན་ཅིང་གྲུབ་པས་རྟག་པ་མེད་ལ། རྣམ་པའི་འཛིན་ཚུལ་ཡང་ཐ་དད་པས་གཅིག་པུར་མི་རུང་ཞིང་། བདེ་སྡུག་སོགས་རྐྱེན་ལ་རག་ལས་པ་ལས་ངའམ་བདག་དེ་ལ་རང་དབང་མེད་པ་སོགས་མངོན་སུམ་གྱིས་བསལ་ལོ། །བདག་སྔར་ཡོད་ཕྱིས་མེད་པར་གྱུར་པའང་མེད་དེ་བཏགས་དོན་བཙལ་ན་མི་རྙེད་པའི་ཕྱིར་རོ། །དེས་ན་སྲིད་རྩའི་ངར་འཛིན་ལྷན་སྐྱེས་ཀྱི་ཞེན་ཡུལ་གྱི་ངའམ་བདག་དེ་ཡོད་ན་ལུས་སེམས་མིང་གསུམ་པོ་དེའི་སྟེང་ན་ཡོད་དགོས་པས་དེ་ལ་བརྟག་པ། ལུས་ནི་ཡན་ལག་དང་ཉིང་ལག་ཚོགས་པའི་བདག་ཉིད་དུ་མ་སྤུངས་པའི་མཚན་ཉིད་ཅན་ཏེ་མཐར་གྱིས་བསིལ་ན་གཟུགས་མཐའ་རྡུལ་ཕྲན་ཆ་མེད་ལས་མ་འདས། སེམས་ནི་རྣམ་ཤེས་ཚོགས་བརྒྱད་སེམས་བྱུང་དང་བཅས་པ་སྟེ། དེ་ཡང་ཚོར་འདུ་སོགས་རེ་རེ་ལའང་ཡུལ་དང་རྣམ་པའི་ཁྱད་པར་གྱིས་དུ་མར་འགྱུར་ཏེ་མཐར་ཤེས་པ་སྐད་ཅིག་ཆ་མེད་ལས་མ་འདས། མིང་སོགས་ལྡན་མིན་འདུ་བྱེད་རྣམས་ནི་བེམ་ཤེས་དེ་གཉིས་ཚོགས་པའི་གནས་སྐབས་སོགས་ལ་གློ་བུར་དུ་བཏགས་པ་ཙམ་སྟེ་བཏགས་དོན་འཚོལ་ན་གང་དུའང་མ་གྲུབ་སྟེ་མི་རྙེད་དོ། །གཞན་རིགས་རུས་སོགས་ཀྱང་དེ་དང་འདྲ། དེས་ན་དེ་ལྟར་བརྟགས་ཅིང་གཞལ་བས་རྡུལ་སོགས་དེ་དག་རེ་རེ་ནས་བདག་མ་ཡིན་ཏེ། མཚན་ཉིད་མི་མཐུན་ཞིང་སྐད་ཅིག་མར་འགྱུར་ཞིང་འགག་པས་མི་རྟག་ལ། རྡུལ་སོགས་དེ་དག་རེ་རེ་བཞིན་བདག་ཏུ་འཛིན་ཡང་མི་འཛིན་ལ་དེ་ལྟར་འཛིན་དགོས་ན་ཐུག་མེད་དུ་འགྱུར་རོ། །དེ་ཐམས་ཅད་ཚོགས་པའོ་སྙམ་ན་ཡང་མ་ཡིན་ཏེ། ཚོགས་པ་ཞེས་པའང་རྡུལ་དང་སྐད་ཅིག་མ་དེ་དག་བསགས་ཤིང་འདུས་པ་ཙམ་ལས་གཞན་མེད་ན། རྩོམ་གཞི་དེ་དག་རེ་རེ་ནས་བདག་ཏུ་མ་གྲུབ་པས། དེས་བརྩམ་པའི་དུ་མའམ་ཚོགས་པའང་བདག་ཏུ་མི་གྲུབ་བོ། །འོ་ན་དེ་གསུམ་ལས་གཞན་ནམ་སྙམ་ན་དེ་ཡང་མིན་ཏེ། གལ་ཏེ་གཞན་དུ་གྲུབ་ན་ཕུང་སོགས་དེ་དག་རེ་རེ་ནས་བསལ་བའི་ཤུལ་དུ་ཡོད་དགོས་ཀྱང་མ་དམིགས་པས་མངོན་སུམ་གྱི་ཁེགས་སོ། །དེས་ན་བདག་ཕུང་གཅིག་ཐ་དད་གང་དུའང་མ་གྲུབ་པས་དེ་གཉིས་ཕན་ཚུན་གཅིག་ལ་གཅིག་ལྡན་པའམ་རྟེན་བརྟེན་པའི་ཚུལ་གྱིས་གནས་པའང་མི་སྲིད་དེ། དཔེར་ན་ཤིང་རྟའི་ཁ་ཤིང་དང་སྲོག་ཐུར་འཕང་ལོ་སོགས་ཚོགས་པ་ལ་ཤིང་རྟར་བཏགས་པ་བཞིན་ལེགས་པར་བརྟགས་ན་དེ་ཉིད་དང་གཞན་དུ་གྲུབ་པ་གང་ཡང་མེད་དེ་བཏགས་པ་ཙམ་ལས་དོན་ལ་དེ་གཉིས་འབྲེལ་བ་གང་ཡང་མེད་དོ། །འོ་ན་སེམས་ཅན་རྣམས་ཅིའི་ཕྱིར་འཁྲུལ་ཞིང་དེ་ལྟར་འཛིན་སྙམ་ན། དེ་ནི་ཐོག་མེད་ནས་ཕྱིན་ཅི་ལོག་ཏུ་ཞེན་པའི་དབང་གིས་དོན་ལ་མེད་ཀྱང་ཡོད་པ་ལྟར་བཟུང་བས་འཁྲུལ་ཏེ་ཐག་པ་ལ་སྦྲུལ་དུ་བཟུང་བ་བཞིན་ནོ། །དེ་ཡང་ཐག་པ་འཁྱིལ་ལུགས་དང་མུན་ཚབ་ཚུབ་སོགས་ཀྱི་རྐྱེན་ལས་མིག་འཁྲུལ་ཏེ་སྦྲུལ་དུ་བཟུང་བས་འཇིགས་སྐྲག་སྐྱེ་ཡང་། དེའི་ཚེ་ཐག་པ་ཕར་སོང་བ་དང་སྦྲུལ་དེའི་སྟེང་དུ་ཚུར་འོང་སྟེ་གནས་པའང་མེད། ཐག་པ་དེ་སྦྲུལ་མ་ཡིན་ལ། དེ་ལས་གཞན་པའི་སྦྲུལ་གྲུབ་པ་མེད་པས་དོན་ལ་དེ་གཉིས་འབྲེལ་བ་གང་ཡང་མེད་ཀྱང་ཡོད་པར་བཟུང་བ་ནི་ཕྱིན་ཅི་ལོག་གི་ཞེན་པའི་དབང་གིས་སོ། །དེའི་ཚེ་མར་མེ་སོགས་ཀྱི་རྐྱེན་ལ་བརྟེན་ནས་མིག་གསལ་བས་ཐག་པ་དངོས་སུ་མཐོང་ཞིང་དེའི་མཚན་ཉིད་ལེགས་པར་རྟོགས་པ་ན། སྦྲུལ་འཛིན་གྱི་འཇིགས་སྐྲག་ཞི་ཡང་། དེའི་ཚེ་ཐག་པ་སྔར་མེད་ཚུར་འོང་བ་དང་སྦྲུལ་སྔར་ཡོད་ཕར་བསལ་དུ་མེད་དེ་ཐག་པའི་སྟེང་དུ་སྦྲུལ་ཡེ་ནས་མ་གྲུབ་པའི་ཕྱིར་རོ། །དེ་བཞིན་དུ་ཕྱིན་ཅི་ལོག་ཏུ་ཞེན་པའི་དབང་གིས་ལྔ་ཕུང་ལ་བདག་ཏུ་བཟུང་བས་འཁྲུལ་ཡང་། གོང་སྨོས་ལྟར་དཔྱད་པ་གནད་དུ་སོང་བའི་ངེས་ཤེས་ཁྱད་པར་ཅན་སྐྱེས་ཚེ་ངར་འཛིན་དེ་ལྡོག་ཀྱང་། སྔར་གྱི་ནོར་བའི་བློ་འཁྲུལ་པ་དེ་བསལ་ཙམ་ལས། དོན་ལ་ངའམ་བདག་དེ་ཡེ་ནས་ཡོད་མ་མྱོང་བས་ད་གསར་དུ་གསལ་བྱའི་དངོས་པོ་རང་མཚན་པར་གྲུབ་པ་ནི་ཅི་ཡང་མེད་དེ་མི་རྙེད་དོ། །འདི་ཉན་ཐོས་ཀྱི་རྟོགས་བྱ་མཐར་ཐུག་ཡིན། འདིས་རང་རྒྱུད་ཀྱི་ཕུང་ལྔའི་ཚོགས་པ་ལ་ངའམ་བདག་རང་བཞིན་གྱིས་གྲུབ་པ་མེད་པར་རྟོགས་པས། འཇིགས་ལྟ་དེས་བསྐྱེད་པའི་ཆགས་སོགས་ཉོན་མོངས་པ་རྣམས་ལྡོག་ནུས་ཀྱང་ཆོས་ཐམས་ཅད་ལ་བདག་མེད་པའམ་མཉམ་པ་ཉིད་ཀྱི་དོན་རྫོགས་པར་རྟོགས་པ་མིན་པས། འཁོར་གསུམ་དུ་བདེན་པར་འཛིན་པའི་ཤེས་སྒྲིབ་ཉིད་ལྡོག་མི་ནུས་ཤིང་། སྲིད་ཞི་མཉམ་ཉིད་དུ་རྟོགས་པ་མིན་པའི་ཕྱིར་ཞི་མཐའ་འགོག་མི་ནུས་པའི་གནད་ཀྱང་དེ་ཡིན་ནོ། །ནམ་མཉམ་པ་ཉིད་ཀྱི་དོན་རྟོགས་པ་དེའི་ཚེ་ཞི་མཐར་ལྷུང་མི་སྲིད་དེ་མཐར་ཐུག་ཐེག་གཅིག་ཏུ་སྒྲུབ་པའི་ཚུལ་ལ་མཁས་པར་བྱའོ། །དེ་བཞིན་དུ་ཆོས་བདག་ཀྱང་། ངར་འཛིན་དེའི་དབང་གིས་གང་ལ་ཞེན་པའི་ཡུལ། ངའི་ལུས། ངའི་སེམས། ངའི་མིང་ལྟ་བུས་མཚོན་གང་ལ་ཆགས་ཤིང་ཞེན་པའི་ཡུལ་ཕྱི་ནང་སྣོད་བཅུད་སོགས་ཕུང་ཁམས་སྐྱེ་མཆེད་ཀྱི་ཆོས་ཐམས་ཅད་དོ། །དེ་ལ་ཡང་བརྟགས་ན་གོང་དང་མཚུངས་ཏེ། གཟུགས་མཐའ་རྡུལ་ཕྲན་དང་། ཤེས་པ་སྐད་ཅིག་ཆ་མེད་གཉིས་ཀྱང་གྲུབ་མཐའི་བློས་བཏགས་པ་ཙམ་ལས་དོན་དུ་གྲུབ་པ་མེད་དེ། རྡུལ་ཆ་མེད་དེ་ཡང་རགས་པ་བརྩམ་པའི་ཚེ་སྟེང་འོག་སོགས་ཀྱི་ཆས་ཕྱེ་བས་ཆ་དྲུག་གམ་བཅུར་འགྱུར་བས་ཆ་མེད་གྱི་དམ་བཅའ་ཉམས་ལ། དེ་ལྟར་མི་འགྱུར་ན་རྡུལ་ཇི་ཙམ་ཚོགས་ཀྱང་ཆ་མེད་གཅིག་གི་གོ་ས་ལས་མེད་པའི་ཕྱིར་རགས་པ་བརྩམ་མི་ནུས་པས་གོང་བུའང་རྡུལ་ཕྲན་དུ་འགྱུར་ལ་དེར་མ་ཟད་རྡུལ་ཕྲན་རྣམས་བོངས་ཚད་མཉམ་པས་ཕན་ཚུན་གཅིག་ལ་གཅིག་ཞུགས་པའམ་གནས་པའི་གོ་སྐབས་ཀྱང་མི་སྲིད་དོ། །ཤེས་མཐའ་སྐད་ཅིག་ཆ་མེད་ཀྱང་དེ་དང་འདྲ་སྟེ། དེས་རྒྱུན་བརྩམ་པའི་ཚེ་སྐད་ཅིག་སྔ་ཕྱི་ལ་ལྟོས་པའི་ཆ་གཉིས་དང་དེར་ལྟོས་ཀྱི་དབུས་ཀྱང་གྲུབ་པར་འགྱུར་ལ། དེ་ལྟར་མི་འགྱུར་ན་བསྐལ་པའང་སྐད་ཅིག་ཏུ་འགྱུར་ཏེ་དེ་ལས་རྒྱུན་རིང་བར་བརྩམ་མི་ནུས་པའི་ཕྱིར་རོ། །དེ་ལྟར་བེམ་ཤེས་གཉིས་ཀ་མ་དམིགས་པས། མིང་སོགས་ལྡན་མིན་རྣམས་ནི་དེ་གཉིས་ཚོགས་པའི་གནས་སྐབས་ཀྱི་ཁྱད་པར་སོགས་ལ་བཏགས་པ་ལས་གཞན་དུ་མ་གྲུབ་ལ། དེ་གསུམ་གྱིས་འདུས་བྱས་ཀྱི་ཆོས་ཀུན་བསྡུས་པའི་ཕྱིར། དེ་མ་གྲུབ་པས་འདུས་མ་བྱས་རྣམས་ཀྱང་དགག་བྱ་བཅད་ཙམ་ལ་ལྟོས་ནས་བཏགས་པ་ལས་གཞན་དུ་མ་གྲུབ་པའི་ཕྱིར་དོན་ལ་ཡོད་པ་མི ན་ལ། དེ་ལྟར་འདུས་བྱས་དང་འདུས་མ་བྱས་ཀྱིས་བསྡུས་པའི་ཆོས་ཐམས་ཅད་མིང་རྐྱང་བཏགས་ཡོད་ཙམ་ལས་རང་བཞིན་ནམ་དོན་དམ་པར་གྲུབ་པ་ནི་ཅུང་ཟད་ཀྱང་མེད་དེ་མི་རྙེད་དོ། །བཏགས་ཡོད་ཀྱི་མིང་རྐྱང་དེ་ཡང་སྔོན་གྱི་བརྡ་སྤྲོད་པ་སོགས་གྱིས་ཡུལ་དུས་ཀྱི་དབང་གིས་ཅི་རིགས་སུ་གསར་དུ་བཏགས་པ་ལས་མིང་དོན་ངོ་བོ་ཉིད་ཀྱིས་འབྲེལ་བ་མེད་ལ། མིང་མཐའ་དེ་ཡང་དེད་ན་ཡི་གེ་སིལ་བུ་ལས་མ་འདས་ཤིང་། དེ་ཡང་བརྟགས་ན་རང་བཞིན་མེད་པའི་ཕྱིར། དངོས་མཐའ་ཆོས་ཉིད་དང་། རྟོག་མཐའ་མི་རྟོག་པ། བརྗོད་མཐའ་བརྗོད་བྲལ་དེ་ཐམས་ཅད་མཉམ་པ་ཉིད་ལས་མ་འདས་སོ། །འོ་ན་སྣང་བ་འདི་ཅིའི་ཕྱིར་སྙམ་ན། དེ་ནི་རྟེན་ཅིང་འབྲེལ་བར་འབྱུང་བའི་དབང་གིས་ཏེ། རྟེན་འབྲེལ་དེ་ཡང་ངོ་བོ་སྟོང་ཉིད་ཡིན་པའི་གནད་ཀྱིས། འདི་ལྟར་སྣང་དུ་རུང་བ་ཡིན་ལ། དེ་ལྟ་མ་ཡིན་པར་དོན་དམ་པར་དངོས་པོར་གྲུབ་པ་ཞིག་ན་དེ་དག་ཕན་ཚུན་བརྟེན་པར་མི་འགྱུར་བས་མཐར་རྒྱུ་འབྲས་ཀྱི་རྣམ་བཞག་ཐམས་ཅད་རྒྱུན་ཆད་པར་འགྱུར་རོ། །དེས་ན་ད་ལྟ་སྣང་བཞིན་པའི་ཆོས་འདི་ཐམས་ཅད་ལ་སྣང་དུས་ཉིད་ནས་རང་བཞིན་གྱིས་གྲུབ་པ་ཅུང་ཟད་ཀྱང་མེད་པས་གཟུགས་སོགས་སྟོང་པ་ཉིད་ཡིན་ལ། སྟོང་བཞིན་པའི་ཆོས་ཉིད་ལས་མ་གཡོས་པར་སྣ་ཚོགས་སུ་སྣང་བ་མི་འགག་པས་སྟོང་པ་ཉིད་གཟུགས་སོགས་དང་། སྣང་བ་བསལ་བའི་ཕ་རོལ་ན་སྟོང་པ་དང་སྟོང་པ་བསལ་བའི་ཕ་རོལ་ན་སྣང་བ་དམིགས་སུ་མེད་པས་གཟུགས་སོགས་ལས་སྟོང་པ་ཉིད་གཞན་མ་ཡིན་ལ། སྟོང་པ་ཉིད་ལས་གཟུགས་སོགས་གཞན་མ་ཡིན་པས། ཡེ་ནས་སྣང་སྟོང་ཟུང་དུ་འཇུག་པའི་ཆོས་ཉིད་སྤྲོས་བྲལ་མཉམ་པ་ཆེན་པོ་ནི་ཆོས་ཀུན་གྱི་གནས་ལུགས་མཐར་ཐུག་པ་སྟེ། དེའི་ཕྱིར་ཟུང་འཇུག་གི་དོན་དེ་ཇི་བཞིན་པར་རྟོགས་མ་རྟོགས་ཀྱི་བྱེད་པས། གནས་སྣང་ཀུན་ནས་མཐུན་པ་སངས་རྒྱས་ཀྱི་གཟིགས་པ་དང་། མི་མཐུན་པར་འཛིན་པ་འཁོར་བའི་འཁྲུལ་སྣང་སྟེ་ཀུན་ཏུ་ཐ་སྙད་པའི་ཚད་མ་ལའང་དག་མ་དག་གི་དབང་གིས་གཉིས་སུ་སྣང་ཞིང་། དེའི་དབང་གིས་འཁོར་འདས་བཅིང་གྲོལ་སོགས་གཞི་ལམ་འབྲས་བུའི་རྣམ་བཞག་ཐམས་ཅད་མ་འདྲེས་པར་འཇོག་ནུས། རྟོགས་བྱ་མཐར་ཐུག་པའི་དབང་དུ་ནི་དེ་ཐམས་ཅད་ངོ་བོ་དབྱེར་མེད་དེ་དམ་པའི་དོན་གྱི་བདེན་གཅིག་མཉམ་པ་ཉིད་དོ། །དེ་ལྟར་ཟད་འཕེལ་མེད་པའི་ཆོས་ཉིད་མཉམ་པའི་དོན་ཤེས་ཤིང་གོམས་ནུས་ན་ཡུལ་ཅན་གྱི་བློའམ་ཤེས་པ་དེ་ཉིད་ཀྱང་དེའི་ངང་དུ་གྲོལ་བས་སྣང་སྟོང་ཡོད་མེད་སོགས་གཟུང་འཛིན་གྱི་རྟོག་པའི་གཉིས་སྣང་གང་ཡང་ཡོད་མི་སྲིད་དེ། གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་གསུངས། དེ་ལྟ་བུའི་སྤྲོས་པ་དབྱིངས་སུ་ཞི་བའི་འཕགས་པའི་མཉམ་བཞག་ནི་འདི་ཞེས་མཚན་མར་གྲུབ་པ་ཅུང་ཟད་ཀྱང་མེད་དེ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །སོགས་དང་། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་གསུངས། དེ་ལྟའི་བློ་བྲལ་གྱི་གཤིས་ལ་སྐྱོན་ཕར་བསལ་བ་དང་ཡོན་ཏན་ཚུར་བཞག་ཏུ་ཅུང་ཟད་ཀྱང་མེད་པས་གང་ལའང་དགག་སྒྲུབ་དང་ཡིད་སྨོན་བྱར་མེད་དེ། ཆོས་འབྱུང་བ་མེད་པའི་མདོ་ལས། སེམས་ཅན་རང་བཞིན་བྱང་ཆུབ་ཉིད་དུ་གསུངས། །བྱང་ཆུབ་རང་བཞིན་སེམས་ཅན་ཐམས་ཅད་དེ། །སེམས་ཅན་རྣམས་དང་བྱང་ཆུབ་གཉིས་མེད་ཡིན། །དེ་ལྟར་གང་རྟོགས་སྐྱེས་ཆེན་མཆོག་ཏུ་འགྱུར། །ཞེས་དང་། ནམ་མཁའ་རིན་པོ་ཆེའི་མདོ་དང་གཤེད་དམར་གྱི་རྒྱུད་སོགས་མདོ་རྒྱུད་བསྟན་བཅོས་དུ་མ་ལས། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཅེས་གསུངས། དེས་ན་སྒྲ་བློས་བཏགས་པའི་རང་བཞིན་མེད་པའམ་སྐྱེ་མེད་འགགས་མེད་སོགས་ཀྱང་དོན་དམ་མཐར་ཐུག་ལ་འཇུག་པའི་སྒོ་ཙམ་ལས་དོན་དམ་དངོས་མ་ཡིན་ཏེ་རྣམ་གྲངས་པའི་དོན་དམ་མམ་མཐུན་པའི་དོན་དམ་ཞེས་བྱ་སྟེ་རྣམ་ཤེས་ཀྱི་ཡུལ་ལས་མ་བརྒལ་ལ། མཐར་ཐུག་ཟུང་འཇུག་རྣམ་གྲངས་མིན་པའི་དོན་དམ་ནི། ཡུལ་ཡུལ་ཅན་ནམ་ཤེས་བརྗོད་ཀྱི་ཐ་སྙད་ཐམས་ཅད་དང་བྲལ་བ་སྟོང་མཚན་སྨོན་མེད་རང་བཞིན་གྱིས་འོད་གསལ་བའི་བདག་ཉིད་ཅན་འཕགས་པའི་མཉམ་བཞག་གི་ཡེ་ཤེས་ཟབ་མོའི་ཡུལ་ཏེ། མདོ་ལས། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་བདག་གིས་རྙེད། །སུ་ལ་བསྟན་ཀྱང་གོ་བར་མི་འགྱུར་བས། །མི་སྨྲ་ནགས་འདབས་ཉིད་དུ་གནས་པ་སྙམ། །ཚིག་བྲལ་ངག་གི་ལམ་གྱིས་མི་མཚོན་པའི། །དེ་བཞིན་ཉིད་ཆོས་རང་བཞིན་ནམ་མཁའ་འདྲ། །སེམས་དང་ཡིད་ཀྱི་རྒྱུ་བ་རྣམ་སྤངས་པ། །མཆོག་རབ་ངོ་མཚར་ཆེ་བ་དམ་པ་ཤེས། །ཞེས་གསུངས། དེ་ལྟ་བུའི་ཟུང་འཇུག་སྤྲོས་བྲལ་དེ་ཡུལ་དུ་བྱས་ནས་ཡུལ་ཅན་བློས་དོན་སྤྱི་བསྒོམ་པ་མདོ་ལས། དེ་ཉིད་ཡུལ་ཅན་སེམས་ཀྱི་ཐོག་ཏུ་གཏན་ལ་ཕབ་ནས་དོན་རང་མཚན་བསྒོམ་པ་སྔགས་ཀྱི་མྱུར་ལམ་མོ། དེ་གང་ཞེ་ན། འདི་ལྟར་ཕྱི་ནང་སྣོད་བཅུད་ཀྱིས་བསྡུས་པའི་སྣང་ཞིང་སྲིད་པའི་ཆོས་ཐམས་ཅད་རྩ་བ་སེམས་ཀྱིས་སྤྲུལ་ཞིང་སེམས་ལ་སྣང་བས་རང་སེམས་ལས་ཐ་དད་པའི་ཕྱི་རོལ་གྱི་དངོས་པོ་བདེན་པར་གྲུབ་པ་མི་སྲིད་དེ་དཔེ་རྨི་ལམ་གྱི་སྣང་བ་བཞིན་ནོ། །དེ་ཡང་གཉིད་ཀྱི་སྐབས་སུ་བག་ཆགས་ཀྱི་དབང་གིས་རྟ་གླང་སོགས་རྨི་ལམ་གྱི་སྣང་བ་སྣ་ཚོགས་པ་རྨིས་ཀྱང་། རྨི་ལམ་དེ་སྔར་གཉིད་དུ་མ་སོང་བའི་སྐབས་ཀྱང་མེད། ཕྱིས་སད་པའི་སྐབས་ཀྱང་མེད། བར་དེར་ཡང་འཁྲུལ་ངོར་སྣང་ཙམ་ལས་རྟ་གླང་ཡུལ་ཁམས་སོགས་རང་བཞིན་གྱིས་གྲུབ་པ་ཅུང་ཟད་ཀྱང་མེད་པ་དེ་བཞིན་དུ། ད་ལྟའི་ཉིན་དུས་སད་པའི་གནས་སྐབས་ཀྱིས་གནས་དོན་ལུས་ཀྱི་སྣང་བ་མུ་མེད་པར་ཤར་བ་འདི་ཡང་སྔར་གདོད་མའི་གཞི་ལས་མ་འཁྲུལ་པའི་སྐབས་སུའང་མེད། ཕྱིས་འཁྲུལ་པ་དབྱིངས་སུ་ཐིམ་པའི་སྐབས་ཀྱང་མེད། ད་ལྟའི་བློ་འཁྲུལ་ངོར་དོན་ལ་མེད་ཀྱང་ཡོད་པ་ལྟར་སྣང་བ་དཔེ་ངྷ་དུ་ར་ཟོས་པའི་མིག་སྔར་སྐྲ་ཤད་འཛག་པ་བཞིན་ནོ། །དེས་ན་ཕྱི་དོན་འཁྲུལ་པའི་སྣང་བ་འདི་ཐ་སྙད་དུ་སེམས་དངོས་མ་ཡིན་ལ། སེམས་ལས་གཞན་དུ་གྲུབ་པའང་ཅུང་ཟད་མེད་པས་མེད་སྣང་སྟོང་གཟུགས་ཏེ། དོན་དམ་པར་དབྱེ་གཞི་ཟད་པའི་དབྱེར་མེད་ཆེན་པོ་ཡིན། དེ་ལྟར་ཤེས་ན་ཕྱི་དོན་རང་བཞིན་མེད་པ་སེམས་ཙམ་གྱི་གྲུབ་མཐའ་གཏན་ལ་ཕེབས། དེའི་ཚེ་ནང་གི་ཤེས་པའམ་སེམས་རང་གི་ངོ་བོ་ལ་བྱུང་གནས་འགྲོ་གསུམ་གྱི་མཐའ་བརྟག་པས། དང་པོ་བྱུང་ས་དང་བྱུང་མཁན་མེད་དེ་སྟོང་། བར་དུ་གནས་ས་དང་གནས་མཁན་མེད་དེ་སྟོང་། མཐར་འགག་ས་དང་འགག་རྒྱུ་མ་གྲུབ་པས་སྟོང་། ཁ་དོག་དང་དབྱིབས་སོགས་འདི་ཞེས་ངོས་བཟུང་བྱར་མེད་ཀྱང་། སྣ་ཚོགས་སུ་སྣང་བའི་འཆར་གཞི་མ་འགགས་པ། དེ་ལྟར་ཤར་དུས་ཉིད་ནས་རང་བཞིན་སྟོང་ཉིད་ལས་མ་འདས་ཤིང་། སྟོང་ཉིད་དེའི་རང་མདངས་མ་འ གགས་པ་སྣ་ཚོགས་སུ་སྣང་བས་ཡེ་ནས་སྣང་སྟོང་ཟུང་འཇུག་སྟོང་ཉིད་བཞི་སྦྱོར་གྱི་དགོངས་པ་ལྟར་ནང་སེམས་ཀྱི་སྟེང་དུ་སྒྲོ་འདོགས་ལེགས་པར་ཆོད་ན་གཞི་སྤྲོས་བྲལ་དབུ་མའི་ལྟ་བ་རྟོགས། དེ་ལྟ་བུའི་སྣང་སྟོང་ཟུང་འཇུག་གི་སེམས་ཀྱི་གནས་ལུགས་དེའི་སྟེང་དུ་མ་ཡེངས་མི་སྒོམ་རང་བབས་ཀྱིས་མ་བཅོས་རང་སར་བཞག་པས་གནས་འགྱུ་ངོ་བོ་དབྱེར་མེད་སེམས་ཀྱི་ཆོས་ཉིད་གསལ་སྟོང་རྗེན་པ་གཉུག་མ་ལྷན་གཅིག་སྐྱེས་པའི་ཡེ་ཤེས། སྣང་སེམས་དབྱེར་མེད་ཆུ་དང་ཟླ་གཟུགས་ཀྱི་དཔེ་བཞིན་དུ་དུ་མ་རོ་གཅིག་ཏུ་རྟོགས་ན་ལམ་ཕྱག་ཆེན་གྱི་སྒོམ་པ་མངོན་དུ་འགྱུར། དེ་ལྟ་བུའི་གསལ་སྟོང་དབྱེར་མེད་ཀྱི་གཉུག་མའི་གཤིས་ལུགས་ལ་བལྟས་པས་རིག་མེད་བེམ་པོ་ལྟ་བུ་མ་ཡིན་པར་སྣང་རིག་ངོས་བཟུང་དང་བྲལ་བའི་མཉམ་པ་ཆེན་པོ་རིག་སྟོང་སྐྱེ་མེད་ཀ་དག་ཏུ་རྩད་ཆོད་ན་འབྲས་བུ་ཡེ་གྲོལ་རྫོགས་ཆེན་ཁྲེགས་ཆོད་ཀྱི་དགོངས་པ་སྟེ། དེ་ཡང་སྔ་མ་རྣམས་སུ་སེམས་ཡུལ་དུ་བྱས་ནས་གཏན་ལ་ཕབ་ནས་བསྒོམ་པས་ཡིད་དཔྱོད་ཀྱི་ཤན་ཡོད་ལ། འདིར་སེམས་ཉིད་དམ་རིག་པ་ཉིད་སྐྱེ་མེད་དུ་རྩད་བཅད་ནས་མངོན་སུ མ་རང་ཐོག་ཏུ་ཕབ་པས་ཡིད་དཔྱོད་དང་གཤིས་ཤོར་གྱི་གོལ་ས་ཆུང་། དེའི་ཕྱིར་ཀུན་མཁྱེན་ཆོས་ཀྱི་རྒྱལ་པོ་དང་རྗེ་རིག་འཛིན་གཏེར་བདག་གླིང་པ་སོགས་ཀྱིས་སྔོན་འགྲོ་ཆོས་ཅན་སེམས་ཀྱི་ཁང་བུ་བཤིག་པ་དང་། དངོས་གཞི་ངོ་སྤྲོད་ཀྱི་སྐབས་སུ་ཆོས་ཉིད་རིག་སྟོང་སྐྱེ་མེད་དུ་གཏན་ལ་འབེབས་ཚུལ་གཉིས་གསུངས་པའི་གནད་དེ་ཡིན། དེས་ན་རྫོགས་ཆེན་གྱི་རྒྱུད་གཞུང་རྣམས་སུ་སེམས་རིག་ཤན་འབྱེད་ཀྱི་སྐོར་རྒྱ་ཆེར་གསུངས་ཀྱང་། དོན་གྱི་གནད་འགག་སྙིང་པོ་དཔལ་ལྡན་བླ་མའི་ཞལ་རྒྱུན་ནི། ད་ལྟའི་སེམས་ཉིད་དམ་རིག་པ་མ་བཅོས་པར་ཐད་ཀར་བཞག་པས་འདས་མ་འོངས་སོགས་དུས་གསུམ་གྱི་སྤྲོས་པ་ཞི་བའི་བཞི་པའི་ཆ། སྣང་རིག་ངོས་བཟུང་དང་བྲལ་ཞིང་འདི་ཞེས་མཚན་མར་མི་དམིགས་ཀྱང་། ཡིད་ཆེས་ཀྱི་ཁོ་ཐག་ནང་ནས་ཆོད་རྒྱུ་ཡོད་པ། དེ་ལྟར་ཆོད་ཀྱང་ཆོད་རྒྱུ་དང་ཆོད་མཁན་གཉིས་སུ་མ་གྲུབ་པའི་ཆོས་ཉིད་མཉམ་པ་ཆེན་པོ་འདི་ཡིན་ཏེ། འདིའི་ངོ་བོ་ཅི་ལྟ་བུ་ཞེ་ན། ངོ་བོ་སྟོང་པ་དམིགས་སུ་མེད་པ། རང་བཞིན་གསལ་བ་ལྷུན་གྱིས་གྲུབ་པ། ཐུགས་རྗེ་ཀུན་ཁྱབ་འགག་པ་མེད་པ། སྐུ་གསུམ་དབྱེར་མེད་ཀྱི་རིག་པ་ཡིན་ཏེ། དེ་ཡང་ཚུར་བསྡུ་ན། སེམས་ཀྱི་ཆོས་ཉིད་ཡེ་ནས་རང་བབས་ཀྱི་ཡིན་ལུགས། གཉུག་མའི་རིག་པ་བཟོ་བཅོས་དང་བྲལ་བ་འདི་ཡིན། འདི་ལ་དགག་ཕྱོགས་ནས་མཚོན་ན། གཟུང་བྱར་ཡོད་པ་མིན། ཆད་པའི་མེད་པ་མིན། དེ་གཉིས་ཀ་ཚོགས་པ་མིན། གཉིས་མིན་གྱི་ཕུང་གསུམ་པའང་མིན་ཏེ། འདི་ཞེས་སྤྲོས་པ་གང་གིའང་ངོ་བོ་དམིགས་སུ་མེད་པས། ཡིན་པ་ཅིར་ཡང་མེད་པའི་ལྟ་བ། ཉམས་མྱོང་ངོ་བོའི་སྒྲུབ་ཕྱོགས་ནས་བརྗོད་ན། སྟོང་ཧ་རེ་བ། གསལ་སིང་ངེ་བ། དྭངས་སང་ངེ་བ། མཉམ་ཁད་དེ་བ། ཡངས་ཕྱལ་ལེ་བ། དཔེས་མཚོན་ན། མཐའ་དབུས་མེད་པ་ནམ་མཁའ་ལྟ་བུ། གསལ་བ་རྒྱ་མ་ཆད་པ་མཁའ་ལ་ཉི་མས་ཁྱབ་པ་ལྟ་བུ། ཕྱི་ནང་མེད་པ་ཤེལ་སྒང་ལྟ་བུ། འཛིན་ཞེན་མེད་པ་བར་སྣང་གི་བྱ་རྗེས་ལྟ་བུ། སྐྱེ་འགག་མེད་པ་ནམ་མཁའ་ལྟ་བུ། ཡོན་ཏན་ལྷུན་གྱིས་རྫོགས་པས་ནོར་བུ་ལྟ་བུ། ཉེས་པའི་སྐྱོན་གྱིས་མ་གོས་པས་པདྨ་ལྟ་བུ་སྟེ། གདམས་པ་འདི་ལ་ལོག་རྟོག་ལྡོག་པའི་སྒོ་ནས་བརྗོད་ན། རིས་སུ་མ་ཆད་པའི་གསལ་བ་ཆེན་པོ། དམིགས་སུ་མེད་པའི་སྟོང་པ་ཆེན་པོ། སོ་སོར་དབྱེ་བ་མེད་པའི་ཟུང་འཇུག་ཆེན་པོ། སྒྲ་བློའི་རྟོག་ཡུལ་ལས་འདས་པས་བློ་བྲལ་ཆེན་པོ། དོན་གྱི་ཚུལ་བརྗོད་ན། ཚིག་གིས་མི་མཚོན་པས་བརྗོད་དུ་མེད་པ། རྣམ་ཤེས་ཀྱིས་མི་ཤེས་པས་བསམ་དུ་མེད་པ། མཐའ་ལ་མི་གནས་པས་སྤྲོས་བྲལ་ཆེན་པོ། ཐམས་ཅད་ཀུན་ཡིན་ཀུན་མིན་ཐམས་ཅད་དེའི་ངང་དུ་རྫོགས་པས་བསྒོམ་པ་ལ་མིན་པ་མེད་པ། བརྗོད་བྲལ་སོ་སོ་རང་རིག ཀ་དག་ལྷུན་གྲུབ་ཟུང་འཇུག རང་བྱུང་གི་ཡེ་ཤེས་ཐིག་ལེ་ཉག་གཅིག ཡོན་ཏན་གྱི་ལྡན་ཆོས་དུ་མ་དང་ལྡན་པས་སྤྱོད་པ་ལ་རྩོལ་སྒྲུབ་དང་འབྲས་བུ་ལ་རེ་དོགས་ཟད་པའི་དབྱིངས་ཟག་མེད་བདེ་གཤེགས་སྙིང་པོ་རྣམ་ཀུན་མཆོག་ལྡན་གྱི་སྟོང་ཉིད་དེ། མདོ་ཧྲིལ་གྱིས་དྲིལ་ན། སེམས་ནི་ལས་རླུང་གི་གཡོ་བས་ཀུན་ཏུ་བསྐྱོད་པའི་མི་འཆར་དགུ་འཆར་མི་དྲན་དགུ་དྲན་གཟུང་འཛིན་གྱི་རྣམ་པར་ཤར་བའི་ཀུན་རྟོག་རང་ཁ་མ་འདི་ཡིན་ལ། རིག་པའམ་རང་བྱུང་གི་ཡེ་ཤེས་ནི་སེམས་དེའི་ཆོས་ཉིད་གཟུང་འཛིན་གྱི་ཀུན་ཏུ་རྟོག་པས་བསླད་མ་ཞུགས་པའི་སྨྲ་བསམ་བརྗོད་མེད་བློ་འདས་ཆེན་པོ་སྟེ། དེ་ཡང་གཅིག་དུ་བྲལ་སོགས་དབུ་མའི་རིགས་པས་དཔྱད་དམ། སྔོན་འགྲོ་སེམས་ཀྱི་ཁང་བུ་བཤིག་པའི་མན་ངག་ཙམ་གང་ལ་བརྟེན་ཡང་འདྲ་སྟེ། རིགས་དཔྱད་དེས་སྟོང་ཉིད་དུ་གཏན་ལ་འབེབས་པའི་ཚེ། དུས་གསུམ་གྱི་སེམས་དང་སེམས་བྱུང་སོགས་གཞིག་ཅིང་གཞོལ་དུ་རུང་བའི་ཆ་རྣམས་ནི་འདུས་བྱས་སེམས་ཀྱི་མཚན་ཉིད་ཡིན་ལ། དེས་གཏན་ལ་དབབ་པའི་འབྲས་བུའམ་སེམས་ཀྱི་ཆོས་ཉིད་དཔྱད་རུང་མ་དཔྱད་རུང་ངོ་བོ་ལ་དུས་གསུམ་གྱི་སྐྱེ་འགག་དང་འཕོ་འགྱུར་བྲལ་བ། སྟོང་པ་གསལ་བ་རིག་པའི་སྙིང་པོ་ཅན་ཡེ་ནས་འཆིང་གྲོལ་ལས་འདས་པས། དེ་ཉིད་ཐད་ཀར་ངོ་འཕྲོད་ཕན་ཆོད་ཇི་ཙམ་དུ་དཔྱད་ཀྱང་། ངོ་བོའི་བཞུགས་ཚུལ་དེ་ལས་ཅུང་ཟད་ཀྱང་བསྐྱོད་དུ་མེད་དེ་ཆོས་ཉིད་འདུས་མ་བྱས་རང་གི་མཚན་ཉིད་ཡིད་པས་སོ། །འདི་ནི་ངེས་དོན་གྱི་མདོ་རྒྱུད་ཐམས་ཅད་ཀྱི་བསྟན་བྱའི་སྙིང་པོ་སྟེ། འཁོར་ལོ་བར་པར་གནས་ལུགས་རྣམ་ཐར་གསུམ་ལྡན་སྐྱེ་མེད་འགག་མེད་སོགས་དང་། ཐ་མར་བརྟན་ཞི་རྟག་པ་འཕོ་མེད་གཡུང་དྲུང་སོགས་དང་། སྔགས་སུ་རྒྱུ་ཡི་རྒྱུད་དང་གཉུག་མའི་སེམས་བདེ་བ་ཆེན་པོ་རང་བྱུང་གི་ཡེ་ཤེས་སོགས་དུ་མའི་སྒྲའམ་བརྡ་ཐ་སྙད་ཀྱིས་བསྟན་པའི་དོན་གྱི་སྙིང་པོ་ནི་ཆོས་ཉིད་འགྱུར་མེད་ཀྱི་གཤིས་ལུགས་འདི་ཉིད་ཡིན་པས་ཚིག་གི་རྗོད་སྒྲོས་ཙམ་ལ་ཞེན་ནས་དགག་སྒྲུབ་ཀྱི་ངལ་བ་མི་བྱ་བར་དོན་གྱི་གནད་འ ཚོལ་བ་ལ་མཁས་པར་བྱའོ། །དེས་ན་ཡེ་ནས་འཁྲུལ་མ་མྱོང་བའི་སངས་རྒྱས་ཀུན་ཤེས་ཀུན་རིག་ཀུན་བྱེད་རྒྱལ་པོ་བྱང་ཆུབ་ཀྱི་སེམས་དེ་ཉིད་ཡིན་སྙམ་དང་ཕོ་ཚོད་དུ་མ་སོང་བར་རྩ་གདར་ལེགས་པར་བཅད། འདི་ཚུལ་བཞིན་རྟོགས་པ་ནི་བླ་མ་སངས་རྒྱས་ཆོས་སྐུར་མཐོང་བའི་མོས་གུས་ཀྱིས་དགོངས་པའི་གསང་མཛོད་བྱིན་རླབས་འཕོ་བ་ཁོ་ན་ལ་རག་ལས་པས། དོན་མེད་སྟོང་སྐོར་གྱི་དཔྱད་པ་བརྒྱ་བས་བླ་མའི་མོས་གུས་ཀྱི་གསོལ་འདེབས་ཚིག་གཅིག་དགའ། དེ་ལྟར་བླ་མའི་བྱིན་རླབས་དང་རང་གི་སྒོམ་སྟོབས་ཀྱིས་རིག་ངོ་འཁྱུག་མེད་འཕྲོད་ཕྱིན་ཆད། སྤྲ་སྤྲོ་མང་པོ་ལས་རླུང་འཕེལ་བའི་གྲོགས་ཡིན་པས་དོན་མེད་བྱ་བྱེད་ཀྱི་གཡེང་རྐྱེན་ཐམས་ཅད་བོར་ནས། སྔར་ངོ་འཕྲོད་པའི་རིག་སྟོང་གཉུག་མའི་རང་ཞལ་དེ་ཉིད་རྗེན་པར་སྐྱོང་བ་གལ་ཆེ། དེའི་ཚེ་འདུ་བྱེད་སེམས་ཀྱི་རྙོགས་མས་བསླད་དེ་རེས་འགའ་རིག་ངོ་སྐྱོང་དཀའ་འབྱུང་ཡང་། དེ་ཐམས་ཅད་ཀྱི་རྩ་བ་རང་སེམས་སྐྱེ་མེད་ཉིད་དུ་ཐག་ཆོད་ན། དེ་ལས་ཤར་བའི་བཟང་ངན་གྱི་རྟོག་པ་གང་གིས་ཀྱང་ཕན་གནོད་མེད་པས་གཉེན་པོ་གཞན་མི་དགོས་པར་རང་གིས་རང་གྲོལ་བ་སྦྲུ ལ་མདུད་ལྟ་བུ་སོགས་གྲོལ་ཚུལ་གསུམ་པོ་རིམ་བཞིན་གོམས་སྟོབས་ཀྱིས་འབྱུང་བ་ཡིན་ལ། དེ་ལྟར་དགེ་སྡིག་གི་རྟོག་པ་གང་ཤར་ཡང་དེས་རང་རྒྱུད་མི་འཆིང་བའི་གནད་ཀྱང་། རྟོག་པ་དེ་སྐད་ཅིག་གཉིས་པར་རྗེས་མཐུད་མི་བྱེད་པ་དེ་ཙམ་གཅིག་པུས་མིན་གྱི། རྣམ་རྟོག་སྐད་ཅིག་དང་པོ་དེ་སྐྱེས་དུས་ནས་རིག་སྟོང་སྐྱེ་མེད་ཀྱི་དགོངས་པས་རྒྱས་ཐེབས་པའི་གནད་ཀྱིས་ཏེ། དཔེར་ན་གསེར་གླིང་ནས་རྡོ་བཙལ་གྱིས་མི་རྙེད་པ་བཞིན། ཐམས་ཅད་རང་བྱུང་ཡེ་ཤེས་ཆེན་པོའི་རང་བཞིན་ལས་གཞན་དུ་གྱུར་པ་རྡུལ་ཙམ་མེད་པའི་གནད་ཀྱིས་སོ། །དེས་ན་རྫོགས་ཆེན་རྟོགས་པའི་རྣལ་འབྱོར་པའི་ངོ་ཁ་ལ། ཐེག་པ་ལ་མཐོ་དམན། ལམ་ལ་མྱུར་བུལ། ལས་ལ་དགེ་སྡིག་སོགས་བཟང་ངན་མེད་པར་ཐམས་ཅད་རང་བྱུང་ཡེ་ཤེས་གཅིག་གི་ངང་དུ་རྫོགས་ཤིང་གྲོལ་བས་ན་རྫོགས་པ་དང་། དེ་ལས་རྟོགས་བྱའི་གཞི། བགྲོད་བྱེད་ཀྱི་ལམ། གྲུབ་པའི་འབྲས་བུ་སོགས་གོང་ན་གཞན་མེད་པས་ཆེན་པོ་སྟེ་རྫོགས་ཆེན་གྱི་སྒྲ་བཤད་ཡང་དེ་ཡིན་ནོ། །འདི་ལ་བློ་ཆུང་ཁ་ཅིག་གིས། དོན་དམ་པའི་རང་མཚན་ནི་གཉིས་སྣང་གང་ཡང་མེད་པ་འཕགས་པའི་མཉམ་བཞག་གི་ཡུལ་ཡིན་ན། ད་ལྟ་སོ་སྐྱེའི་སྐབས་སུ་ཀུན་རྟོག་གི་སྤྲོས་པ་མ་འགགས་པར་དེ་མངོན་དུ་བྱེད་པར་ཇི་ལྟར་རུང་སྙམ་དུ་བསམ་ན། སྤྱིར་མདོ་སྔགས་ཀྱི་ལམ་ཐམས་ཅད་དངོས་སམ་བརྒྱུད་ནས་དོན་དམ་འོད་གསལ་བའི་ཆོས་ཉིད་མཉམ་པ་ཆེན་པོ་དེ་རྟོགས་པའི་ཐབས་འབའ་ཞིག་ཏུ་ཟད་མོད། ལམ་པའི་གང་ཟག་གིས་དབང་པོའི་ཁྱད་པར་གྱིས་ད་ལྟ་མངོན་དུ་བྱེད་ནུས་མི་ནུས་སྣ་ཚོགས་ཡོད་པ་ནི་བསྙོན་དུ་མེད་ཀྱང་། གཙོ་བོར་དབང་པོ་རྣོན་པོའི་དབང་བྱས་གསང་སྔགས་རྡོ་རྗེ་ཐེག་པར། རིམ་པ་གཉིས་ཀྱི་མན་ངག་གིས་སེམས་ཉིད་ཆོས་སྐུར་ངོ་སྤྲོད་པའི་ཐབས་ཟབ་མོ་ཇི་སྙེད་ཅིག་གསར་རྙིང་གི་རྒྱུད་སྡེ་རྣམས་སུ་གསུངས་པ་དེ་ཐམས་ཅད་སོ་སྐྱེ་ལས་དང་པོ་པ་ལ་དགོངས་ཀྱི། ས་ཐོབ་ཀྱི་འཕགས་པ་ཆོས་ཉིིད་མངོན་དུ་རྟོགས་ཟིན་ལ་ད་གསར་དུ་ངོ་སྤྲོད་མི་དགོས་པའི་ཕྱིར་རོ། །དེ་ཡང་ཐེག་ཆེན་འཁོར་ལོ་བར་ཐར་སྤྲོས་བྲལ་མཉམ་པ་ཉིད་དང་རང་བཞིན་འོད་གསལ་སོགས་གཞིའི་གནས་ཚུལ་རྒྱ་ཆེར་གསུངས་པ་ལ་དགོངས་ནས། རབ་དབྱེར། ཕ་རོལ་ཕྱིན་པའི་སྤྲོས་བྲལ་ལས། །ལྷག་པའི་ལྟ་ཞིག་ཡོད་ན་ནི། །ལྟ་དེ་སྤྲོས་པ་ཅན་དུ་འགྱུར། །སྤྲོས་བྲལ་ཡིན་ན་ཁྱད་པར་མེད། །ཅེས་གསུངས་མོད། ཡུལ་ཆོས་དབྱིངས་སྤྲོས་བྲལ་ཡིན་ཀྱང་དེ་ཉིད་ད་ལྟ་ནས་མངོན་སུམ་དུ་ངོ་སྤྲད་ཅིང་ལམ་དུ་བྱེད་པའི་ཐབས་རྣམས་མདོ་ལམ་ན་སྦས་ཤིང་མ་བསྟན་པས་རྨོངས་པའི་ཆ་ཡོད་ལ། དེ་ཉིད་སྔགས་སུ་མ་སྦས་ཤིང་གསལ་རྫོགས་སུ་བསྟན་པས་མ་རྨོངས་ལ། ཐབས་མང་དཀའ་བ་མེད་པས་དབང་རྣོན་ལས་དང་པོ་པ་ལ་ད་ལྟ་ནས་ཆོས་ཉིད་གཅེར་མཐོང་དུ་ངོ་སྤྲད་ནས་མངོན་སུམ་དུ་གོམས་པར་བྱེད་ནུས་པས། རྒྱུ་འབྲས་ལམ་བྱེད་ཀྱི་ཐེག་པའི་དབྱེ་བ་དང་ངེས་ཚིག་ཁ་ཤས་ཆོས་རྣམས་ཚུལ་གསུམ་སྒྲོན་མེ་སོགས་ལས་རྒྱ་ཆེར་གསུངས་པ་དང་། མདོ་གདམས་ངག་འབོག་པའི་རྒྱལ་པོར། འཇམ་དཔལ་གྱིས་སྟོན་པ་ལ། འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུངས་ལགས་ན། །རྒྱུ་འབྲས་ལྷུན་གྲུབ་ཏུ་སྤྱོད་ཅིང་། །སངས་རྒྱས་གཞན་ནས་མི་འཚོལ་བའི། །ངེས་པའི་ཐེག་པ་ཅིས་མ་གསུངས། །ཞེས་ཞུས་པའི་ལན་དུ། སྟོན་པས། རྒྱུ་ལ་མོས་པ་རྒྱུ་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པའི་ཉེ་ལམ་ནི། །མ་འོངས་དུས་ན་འབྱུང་བར་འགྱུར། །ཞེས་གསུངས་པ་བཞིན། རྒྱུ་འབྲས་ལྷུན་གྲུབ་ཟུང་འཇུག་བདེ་བ་ཆེན་པོའི་ཡེ་ཤེས་ཉིད་ད་ལྟ་ནས་མངོན་དུ་བྱེད་པའི་ཡུལ་ཅན་རང་རིག་ལྟ་བའི་ལྟ་བའམ་མངོན་སུམ་ཉམས་མྱོང་གི་ལྟ་བའི་སྒོ་ནས་མདོ་ལས་སྔགས་ཁྱད་པར་དུ་འཕགས་པའི་ཚུལ་ཀུན་མཁྱེན་ཆོས་རྗེས་སྔགས་ཀྱི་སྤྱི་དོན་ཚངས་དབྱངས་འབྲུག་སྒྲར་གསུངས་པ་བཞིན་ནོ། །དེས་ན་ཀློང་ཆེན་ལས། ཡེ་ཤེས་བས་ཀྱང་ཉོན་མོངས་གཙོ། །ཉོན་མོངས་འཆིང་བའི་ཞགས་པ་ཡིས། །རང་བྱུང་ཡེ་ཤེས་གཏན་ལ་འབེབས། །གཉིས་མེད་ཀློང་དུ་ཐག་ཆོད་པས། །རང་སར་གྲོལ་བར་ཡིད་ཀྱང་ཆེས། །ཞེས་སོགས་གསུངས་པ་ལྟར། ད་ལྟའི་རང་སེམས་ཀྱི་ཆོས་ཉིད་རིག་སྟོང་རྗེན་པ་འདི་སངས་རྒྱས་ཆོས་སྐུའི་ཡེ་ཤེས་ཡིན་ནོ་ཞེས་སྨྲས་ན། ལས་དང་པོ་པ་ཁ་ཅིག་ཡིད་མི་ཆེས་ཏེ། ཆོས་སྐུ་ནི་སྤྲོས་བྲལ་གཉིས་སྣང་མེད་པ་ཡིན་ན། འདི་ནི་གཉིས་སྣང་མཚན་མའི་སྤྱོད་ཡུལ་འདུ་བྱེད་སེམས་ཀྱི་ཆོས་ཉིད་ཡིན་པས་ཇི་ལྟར་གཅིག་སྙམ་དུ་འཛིན། དེ་ནི་བྱིས་པ་ཤེད་མ་བྱེ་བ་ལ་ཆབ་རོམ་འདི་ཆུ་ཡིན་ནོ་ཞེས་བསྟན་ན། ཆུ་ནི་བརླན་ཞིང་གཤེར་ལ། འདི་ནི་སྲ་བ་རྡོ་ལྟར་སྣང་བས་ག་ལ་གཅིག་སྙམ་དུ་བདེན་པར་མི་འཛིན་པ་བཞིན་ནོ། །ཡང་དེ་ལས་ཅུང་དྲག་པ་དག རང་གི་རྟོག་དཔྱོད་དང་ཡིད་ཆེས་པའི་ལུང་ཙམ་ལ་བརྟེན་ནས། ད་ལྟའི་སེམས་འདི་འཁྲུལ་པ་ཡིན་ཡང་འདིའི་ཆོས་ཉིད་དམ་འཁྲུལ་པ་དག་པའི་འབྲས་བུ་ནི་ཡེ་ཤེས་ཡིན་ནོ་སྙམ་དུ་འཛིན། དེ་ནི་ཆབ་རོམ་ལ་ད་ལྟ་ཆུ་དངོས་སུ་མི་སྣང་ཡང་འདིའི་ངོ་བོའམ་ཞུ་ན་ཆུ་ཡིན་ནོ་སྙམ་ནས་ཆུའི་རྒྱུར་འཛིན་པ་བཞིན་ནོ། །དབང་རྣོན་ཁ་ཅིག་བླ་མའི་ཐུགས་རྗེ་དང་རང་གི་དད་མོས་སོགས་ཀྱི་རྐྱེན་ལས། ད་ལྟའི་རང་སེམས་འདི་ཉིད་སྐྱེ་མེད་དུ་ཐད་ཀར་ངོ་འཕྲོད་པའི་ཚེ། ཆོས་ཐམས་ཅད་ཀྱི་ཆོས་ཉིད་དམ་ཆོས་དབྱིངས་ཀུན་ཏུ་འགྲོ་བའི་དོན་ཉིད་མངོན་དུ་མ་གྱུར་ཏེ་མཐོང་སྤང་གི་སྒྲིབ་པའི་སྦུབས་ལས་མ་གྲོལ་ཡང་། རང་སེམས་ཉིད་སྐྱེ་མེད་དུ་རྟོགས་པ་དེས་མཚོན་ནས་ཆོས་ཐམས་ཅད་སྐྱེ་མེད་དུ་གོ་ནུས་པ། དཔེ་ཆབ་རོམ་གྱི་ཕྱོགས་གཅིག་ནས་དུམ་བུ་ཞིག་མྱོང་བས། ཆབ་རོམ་ཐམས་ཅད་དེ་ལས་མ་འདས་པས་ཆུ་མིན་གྱི་སྒྲོ་འདོགས་ཀྱིས་སྐབས་མི་རྙེད་པ་བཞིན་ཏེ། འདིས་འཕགས་པའི་ཡེ་ཤེས་ཉིད་མཚོན་ནུས་སུ་གྱུར་པས་དཔེ་ཡི་ཡེ་ཤེས་ཏེ་གནས་སྐབས་རྣམ་གྲངས་པའི་ཁོངས་སུ་གཏོགས་ཀྱང་སྔར་གྱི་གོ་མྱོང་ལས་ཁྱད་པར་དུ་འཕགས་ཏེ་རི་མོར་བྲིས་པའི་ཟླ་གཟུགས་དང་ཆུ་ཟླའི་ཁྱད་པར་གྱི་དཔེ་བཞིན་ནོ། །དོན་འོད་མངོན་དུ་གྱུར་ཚེ་ཆབ་རོམ་ཐམས་ཅད་ཆུར་ཞུ་བ་དང་འདྲ་ཡང་། ད་དུང་ཆབ་རོམ་དེ་རྐྱེན་མེ་དང་ཉི་མ་སོགས་ཀྱིས་ཞུ་བའི་སྐབས། དེ་རིམ་གྱིས་ཞུ་བ་ལས་ཐམས་ཅད་དུས་གཅིག་ཏུ་མིན་པ་བཞིན། སྒོམ་སྤང་གིས་བསྡུས་པའི་གཉིས་སྣང་གི་མཚན་མ་རགས་ཕྲ་ཐམས་ཅད་རིམ་གྱིས་ཆོས་ཉིད་མཉམ་པ་ཆེན་པོའི་ཀློང་དུ་ཟད་པའམ་ཐིམ་དགོས། མཐར་ཆབ་རོམ་ཐམས་ཅད་ཆུར་ཞུ་བ་ལྟར་གཉིས་སྣང་གི་མཚན་མ་ཅུང་ཟད་ཀྱང་མི་མངའ་བས་རྟག་པར་མཉམ་པར་བཞག་བཞིན་པ་ནི་མཐར་ཕྱིན་སངས་རྒྱས་ཀྱི་ས་ཁོ་ནའོ། །འདི་ལའང་དཔྱད་ན་སངས་རྒྱས་རང་སྣང་གི་སྐུ་དང་ཞིང་ཁམས་སོགས་ནི་ཆོས་ཉིད་མཉམ་པ་ཆེན་པོའི་རང་གདངས་འབའ་ཞིག་ལས་ཤར་བའི་ཕྱིར། བརྟེན་ནས་བཏགས་པའི་ཆོས་ཙམ་གྱི་ངོ་བོར་ཡང་གྲུབ་པ་མེད་པས་ཟག་མེད་འདུས་མ་བྱས་འབའ་ཞིག་པས་དོན་དམ་ཆོས་ཉིད་ཀྱི་སྐུ་དང་། དེ་ལས་ཤར་བའི་གདུལ་བྱ་གཞན་སྣང་དུ་རྟེན་འབྲེལ་སྒྱུ་མའི་སྣང་ཆ་མ་འགགས་པ་ཙམ་ལ་ཀུན་རྫོབ་བརྡ་ཡི་སྐུ་སྟེ་གཉིས་སུ་གསུངས། དེས་ན་གཟུགས་སྐུ་གདུལ་བྱའི་སྣང་ངོར་སྐྱེ་འཇིག་ལྟ་བུར་སྣང་བ་ནི་གདུལ་བྱའི་བློ་སྐྱོན་དུ་ཟད་ལ། དེ་བཞིན་དུ་ཡུལ་ལ་ལྟོས་པའི་མཁྱེན་པས་དུས་གསུམ་གྱི་ཤེས་བྱ་རིམ་གཟིགས་ལྟ་བུར་སྣང་བའང་སྣང་ཚུལ་ཀུན་རྫོབ་ཀྱི་དབང་གིས་ཏེ། དོན་ལ་མཁྱེན་ཡུལ་ཡང་རང་བཞིན་མེད་པས་མཉམ་པ་ཉིད་ཀྱི་ཕྱིར། གནས་ཚུལ་ལམ་ཆོས་ཉིད་དོན་དམ་པར་ནམ་ཡང་འཕོ་འགྱུར་མེད་དེ་ནམ་མཁའ་བཞིན་ནོ། །དེས་ན་ད་ལྟར་གྱི་ལམ་པའི་རྟོགས་པ་ལ་སྐྱེ་བ་དང་འཕེལ་འགྲིབ་གཉིས་ཀ་ཡོད། ས་དང་པོ་ཡན་གྱི་རྟོགས་པ་ལ་འཕེལ་བ་ཡོད། འགྲིབ་པ་མེད། སངས་རྒྱས་ཀྱི་ས་ན་འཕེལ་འགྲིབ་གཉིས་ཀ་མེད་དེ། དེའི་ཚེ་ཐེག་པ་ཐུན་མོང་བའི་ལུགས་ལྟར་ན་མ་རིག་བག་ཆགས་ཀྱི་ས་སོགས་བཞི་དང་། སྔགས་ཐུན་མོང་དུ་སྣང་གསུམ་འཕོ་ཆགས་ཀྱི་སྒྲིབ་པ་དང་། ཐུན་མིན་རྫོགས་ཆེན་ལྟར་ན་མ་དག་རླུང་སེམས་ཀྱི་འགྱུ་ཆ་སྟེ་ཤིན་ཏུ་ཕྲ་བའི་རྟེན་འབྱུང་མཐའ་དག་དབྱིངས་སུ་ཟད་པའམ་འགགས་པས། དེ་ཕན་སངས་རྒྱས་ཀྱི་ཡེ་ཤེས་སྐུ། རྡོ་རྗེའི་སྐུ། རྟག་པའི་སྐུ། གཡུང་དྲུང་གི་སྐུ། དུས་གསུམ་འཕོ་འགྱུར་མེད་དེ་དུས་བཞི་མཉམ་པ་ཉིད་དོ། །དེས་ན་ཆོས་ཉིད་ཀྱི་ངོས་ན་འཕོ་འགྱུར་མེད་ཀྱང་། ཆོས་ཅན་གྱི་ངོས་ནས་འཕོ་འགྱུར་ལྟར་སྣང་བ་ནི་འདུ་བྱེད་སེམས་ཀྱི་ཤན་ཤོར་བ་ཡིན་པས་གོ་མྱོང་རྟོགས་གསུམ་ཤན་ཕྱེད་པར་བྱ་སྟེ། གོ་བ་ལྷན་པ་དང་འདྲ་སྟེ་གོག་ནས་འགྲོ། །ཉམས་ན་བུན་དང་འདྲ་སྟེ་ཡལ་ནས་འགྲོ། །རྟོགས་པ་རི་རྒྱལ་དང་འདྲ་སྟེ་འཕོ་འགྱུར་མེད། །ཅེས་གསུངས། དེའི་ཕྱིར་ད་ལྟའི་ལམ་པའི་རྣལ་འབྱོར་པ་རྣམས་ལ་མཉམ་རྗེས་ཡོད་མེད་ཀྱི་ཆོས་སྐད་འདི་ལའང་ཉམས་རྟོགས་ཀྱི་ཤན་རེ་ཕྱེད་དགོས་ཏེ། རྟོགས་པའི་མཉམ་རྗེས་དབྱེར་མེད་ནི་མཐར་ཕྱིན་སངས་ཀྱི་ས་ཁོ་ན་ལས་གཞན་དུ་མི་འབྱུང་སྟེ། དག་ས་པ་རྣམས་ལའང་རྗེས་ཐོབ་བཏགས་པ་ཡོད་པར་གསུངས་པས་སོ། །གཞན་ཡང་ཕྱག་རྫོགས་ཀྱི་ལམ་གྱིས་རིག་ངོ་འཕྱུག་མེད་འཕྲོད་ན་ཕྱག་རྒྱ་པ་སོགས་དམ་པ་དུ་མས་དེ་ཉིད་མངོན་སུམ་ཡིན་ཕྱིར་དོན་འོད་མཚན་ཉིད་པར་བཞེད། ཀུན་མཁྱེན་ཆེན་པོ་སོགས་དོན་འོད་མངོན་གྱུར་ལ་ཀུན་རྫོབ་ཀྱི་ཡོན་ཏན་བརྒྱ་ཕྲག་བཅུ་གཉིས་སོགས་ཡོད་དགོས་པས་མངོན་སུམ་ཡིན་ཡང་དཔེ་ཡི་འོད་གསལ་དུ་བཞེད། དོན་ལ་དེ་གཉིས་ཀྱང་མི་འགལ་ཏེ། སྔ་མས་ཆོས་ཉིད་གནས་ཚུལ་དབང་བཙན་དང་ཕྱི་མས་ཆོས་ཅན་སྣང་ཚུལ་དབང་བཙན་དུ་གསུངས་པའི་ཕྱིར། ཟུར་ལུགས་ཀྱི་སེམས་ཕྱོགས་པ་རྣམས། ད་ལྟའི་རང་སེམས་སྐྱེ་མེད་དུ་ཤེས་ཤིང་ངོ་འཕྲོད་པ་དེ་གནས་སྐབས་རྣམ་གྲངས་པའི་ཁོངས་སུ་གཏོགས། དེས་སྟོང་ཉིད་དམ་ཆོས་ཉིད་དེ་མངོན་སུམ་དུ་རྟོགས་ཀྱང་ཡོན་ཏན་མངོན་གྱུར་དུ་མི་སྣང་བ་ནི། ཆོས་ཅན་གྱི་སྣང་བ་ཐམས་ཅད་ཆོས་ཉིད་ཀྱིི་ཀློང་དུ་གྲོལ་མ་ཐུབ་པས་ཡིན། སྟོང་ཉིད་དེ་ལ་རིམ་གྱིས་གོམས་པས་མཐར་ཆོས་ཅན་གྱི་འཁྲུལ་པ་མཐའ་དག་ཆོས་ཉིད་ཀྱི་ཀློང་དུ་གྲོལ་བའམ་དག་པའི་ཚེ། མཐར་ཕྱིན་སངས་རྒྱས་ཀྱི་སའི་བར་གྱི་ཡོན་ཏན་རྣམས་རྩོལ་མེད་དུ་རང་སྣང་བ་ཡིན་པས། ངོ་བོ་ལ་འཕོ་འགྱུར་མེད་ཀྱང་འཕོ་འགྱུར་ལྟར་སྣང་བ་ནི་ལམ་པའི་བློ་ངོར་འཇོག་པར་མཛད་པ་ཉིད་ལེགས་སོ། །དེས་ན་ལམ་པའི་གང་ཟག་ཚོགས་ལམ་པས་གོ སྦྱོར་ལམ་པས་མྱོང་། མཐོང་ལམ་པས་རྟོགས་ཞེས་ཆོས་ཉིད་ཀྱི་བདེན་པ་ལེགས་པར་གཟིགས་པའི་འཕགས་ཆེན་དག་གིས་གསུངས་པ་འདི་གནད་ཟབ་པར་གོ་སྟེ། ད་ལྟ་ཚོགས་ལམ་ལས་དང་པོ་པས་བླ་མ་བསྟེན་ཞིང་གདམས་ངག་ཉན་ནས་ཟུང་འཇུག་གི་གནས་ལུགས་ལ་ཐོས་བསམ་གྱི་གོ་བས་སྒྲོ་འདོགས་ལེགས་པར་བཅད་སྟོབས་ཀྱིས། ནམ་རང་སེམས་སྐྱེ་མེད་དུ་ངོ་འཕྲོད་ཐག་ཆོད་ཀྱི་ཉམས་མྱོང་དཔེ་ཡི་འོད་གསལ་རྒྱུད་ལ་སྐྱེ་བ་ན་དེས་དོན་འོད་ལ་དངོས་སུ་སྦྱོར་བས་སྦྱོར་ལམ་སྟེ། སྦྱོར་ལམ་ཡིན་མིན་དཔེ་ཡི་འོད་གསལ་སྐྱེས་མ་སྐྱེས་ཀྱིས་འབྱེད། དེ་ཉིད་དོན་འོད་དངོས་སུ་ན་འཕར་པའི་ཚེ་མཐོང་ལམ་ཆོས་ཉིད་ཀྱི་བདེན་པ་དངོས་སུ་རྟོགས་པ་ཡིན། དེ་ཕན་མཐོང་ཟིན་གོམས་པ་སྒོམ་ལམ་གྱིས་བསྡུས། མཐར་ཕྱིན་པ་ནི་མི་སློབ་པའི་ལམ་ཉིད་མངོན་དུ་བྱས་པའོ། །དེའི་ཕྱིར་རྣམ་གྲངས་པའི་དོན་དམ་འདི་ལའང་གོ་མྱོང་དང་ཐབས་ཟབ་མོ་ལས་ཤར་མ་ཤར་སོགས་ཀྱིས་བཟང་ངན་དང་ལམ་མྱུར་བུལ་གྱི་ཁྱད་པར་དུ་མ་ཡོད། མངོན་སུམ་དུ་མཐོང་ཚུལ་ལའང་། གསལ་བ་མཐར་ཕྱིན་མ་ཕྱིན་གྱི་བྱེ་བྲག་གིས། དཔེར་ན་དབང་པོའི་ཡུལ་དུ་མཐོང་ཡང་། ཐག་ཉེ་རིང་གིས་གསལ་བ་མཐར་ཕྱིན་མ་ཕྱིན་ཡོད་པ་བཞིན་གོང་འོག་གི་ཁྱད་ཆེ། འཕགས་ས་ཐོབ་ཕན་ཆོད་ལམ་མྱུར་བུལ་དང་ཁྱད་པར་ཡོད་མེད་སོགས་སྣ་ཚོགས་གསུངས་པ་ཡོད་ཀྱང་ཚུར་མཐོང་གིས་དཔྱད་པར་མི་བྱ་སྟེ་བསམ་མི་ཁྱབ་པའི་གནས་སོ། །མདོར་ན་འཁོར་འདས་ཀྱི་ཆོས་ཐམས་ཅད་འབྱུང་བའི་སྤྱི་གཞི་ཆོས་ཉིད་མཉམ་པ་ཆེན་པོ་ནི། ངོ་བོ་སྐྱེ་འགག་རྟག་ཆད་འགྲོ་འོང་གཅིག་ཐ་དད་དེ་སྤྲོས་པའི་མཐའ་བརྒྱད་དང་བྲལ་བས་ཀ་དག དེའི་རང་བཞིན་སྟོང་པ་ཕྱང་ཆད་མ་ཡིན་པར་ཡེ་ནས་སྐུ་དང་ཡེ་ཤེས་སོགས་སངས་རྒྱས་ཀྱི་ཆོས་རྒྱ་མཚོ་ལྟ་བུ་གཞན་ནས་བཙལ་བ་མེད་པར་རང་ལ་རང་ཆས་སུ་གནས་པས་ལྷུན་གྲུབ། གསལ་སྟོང་ཟུང་འཇུག་རིག་པའི་རྩལ་ལས་འཁོར་འདས་ཀྱི་ཆོས་ཐམས་ཅད་འབྱུང་བའི་འཆར་གཞི་མ་འགགས་པ་ནི་ཐུགས་རྗེ་ཀུན་ཁྱབ་སྟེ། དེ་གསུམ་ཡང་མཚོན་ཚུལ་གྱི་ལྡོག་པ་ནས་མིང་ཐ་དད་དུ་བཏགས་པ་ཙམ་ལས་ངོ་བོ་ཐ་དད་དུ་གྱུར་པ་ནི་ཅུང་ཟད་ཀྱང་མེད་དེ་སྟོང་གསལ་འགག་མེད་ཀུན་ཁྱབ་ཀྱི་ཡེ་ཤེས་འཁོར་འདས་ཀྱི་ཆོས་ཐམས་ཅད་ལ་ཁྱབ་ཅིང་རྗེས་སུ་སོང་བའི་ཆོས་ཉིད་མཉམ་པ་ཆེན་པོའོ། །དེ་ལྟ་བུའི་ཆོས་ཉིད་རང་གི་ངོ་བོ་ནི། སྔར་ཡང་འཁྲུལ་མ་མྱོང་། ཕྱིས་ཀྱང་འཁྲུལ་བ་མི་སྲིད། ད་ལྟ་འཁྲུལ་བ་གཞི་ལ་མི་གནས་པས། ཡེ་ནས་འཁྲུལ་མ་མྱོང་བའི་སངས་རྒྱས་ཆོས་སྐུ་ཉག་གཅིག་ཡིན། དེའི་ཕྱིར་རང་བྱུང་གི་ཡེ་ཤེས། རྒྱུ་ལས་མ་བྱུང་རྐྱེན་གྱིས་མ་བསྐྱེད། ཚིག་དང་རྟོག་དཔྱོད་ལ་རག་མ་ལས་པས། སེམས་ལས་མ་བྱུང་བའི་སངས་རྒྱས། རྒྱུ་ལས་མ་བྱུང་བའི་འབྲས་བུ། ལུང་ལས་མ་བྱུང་བའི་གདམས་ངག་ཅེས་གསུངས། དེ་ལྟར་རྟོགས་ཤིང་ཉམས་སུ་མྱོང་ན་ཆོས་ཀུན་གྱི་གཏིང་ཕྱིན་པ་སྟེ། རང་བྱུང་བདེ་བ་འཁོར་ལོའི་རྒྱུད་ལས། སེམས་ལས་མ་བྱུང་སངས་རྒྱས་རྙེད། །རྒྱུ་ལས་མ་བྱུང་འབྲས་བུ་རྟོགས། །ལུང་ལ་མ་བརྟེན་ཆོས་རྣམས་ཤེས། །ཐེག་དགུའི་ཆོས་རྣམས་གཅིག་ལས་མེད། །དུག་ལྔ་མྱ་ངན་འདས་པར་དག །ཐུགས་ཀྱི་ཀློང་རྡོལ་ཆོས་ཀྱི་སྐུ། །ཞེས་གསུངས། དེ་ནི་སྐྱེ་སོགས་འགྱུར་བཅས་ཀྱི་མཚན་མའི་སྐྱོན་གྱིས་ནམ་ཡང་བསླད་དུ་མེད་པས་བརྟན་ཞི་རྟག་པ་འཕོ་མེད་གཡུང་དྲུང་གི་རང་བཞིན་ཡིན་པས་གཞོན་ནུ། དེ་ཉིད་ད་ལྟ་ཟག་བཅས་སེམས་ཀྱི་རྩ་བར་གྱུར་པའི་ལས་རླུང་གི་རྒྱུ་བ་བུམ་པ་ལྟ་བུའི་རྒྱར་འཐུམ་ཡང་། སྟོབས་སོགས་བླ་མེད་ཀྱི་ཡོན་ཏན་མཐའ་དག་རང་ལ་རང་ཆས་སུ་གསལ་བས་བུམ་ནང་གི་སྐུ་ལྟ་བུ་སྟེ་གཞོན་ནུ་བུམ་སྐུ་ཞེས་བྱ། དེ་ཉིད་ཀྱི་རྩལ་སྣང་སྣ་ཚོགས་སུ་ཤར་ཏེ། ཐུགས་རྗེ་ལྟར་ཤར་བས་སེམས་ཅན་ལ་སྙིང་རྗེ་འབྱུང་། འོད་ལྟར་ཤར་བས་ཡེ་ཤེས་ལྔའི་རང་འོད་གསལ། ཡེ་ཤེས་ལྟར་ཤར་བས་སེམས་ཀྱི་དྲི་མ་དག་པའི་ཡེ་ཤེས་རང་ལ་གནས། སྐུ་ལྟར་ཤར་བས་འོད་གསལ་དྭངས་མའི་ལྷ་སྐུ་རང་འཆར། གཉིས་མེད་ལྟར་ཤར་བས་གཅིག་ཐ་དད་དུ་འཛིན་པ་མེད། མཐའ་གྲོལ་ལྟར་ཤར་བས་གཞི་རྫོགས་འཕོ་འགྱུར་དང་བྲལ་བ་ཐིག་ལེ་ཉག་གཅིག་ཏུ་གྲོལ། དག་པ་ཡེ་ཤེས་ལྟར་ཤར་བས་མྱང་འདས་ཀྱི་སྣང་བ་མི་འགག མ་དག་འཁོར་བ་ལྟར་ཤར་བས་རིགས་དྲུག་གི་འཁྲུལ་སྣང་སྒྱུ་མ་ལྟར་ཤར་བ་སྟེ་སྒོ་བརྒྱད་ཀྱི་འཆར་གཞི་མ་འགགས་པས་གཞི་ལྷུན་གྲུབ་ཀྱི་སྦུབས་ཞེས་བྱའོ། །དེ་ལྟ་བུའི་འཆར་ཚུལ་བརྒྱད་ཀྱང་རང་གི་གཞི་སྣང་གི་རྩལ་ཡིན་གྱི། ད་ལྟ་ཕྱོགས་ག་ཤད་ན་མེད་དེ། རང་རིག་གི་སྣང་བ་ཡིན་པས་རང་རིག་དང་ལྷན་ཅིག་ཏུ་གནས་སོ། །སངས་རྒྱས་དང་སེམས་ཅན་ཡང་རང་ངོ་ཤེས་མ་ཤེས་ཙམ་སྟེ། འཁོར་འདས་རིག་པར་རྒྱུ་གཅིག་པ་ལག་པའི་ལྟོ་རྒྱབ་བཞིན་ནོ། །དེས་ན་གདོད་མའི་གཞི་ལས་གཞི་སྣང་ཤར་བའི་ཚེ། གཞི་ཆོས་ཉིད་ཀྱི་རང་སྣང་ལ་འཁྲུལ་པ་མེད་ཀྱང་། དེ་ཉིད་རྒྱུ་ལྷན་ཅིག་སྐྱེས་པའི་མ་རིག་པས་རང་ངོ་མ་ཤེས། རྐྱེན་ཀུན་ཏུ་བརྟགས་པའི་མ་རིག་པས་བདག་གཞན་སོ་སོར་བརྟག་པས་གཟུང་འཛིན་གྱི་རྟོག་པ་ཇེ་རགས་སུ་སོང་བས་གློ་བུར་འཁྲུལ་པའི་སྦུབས་སུ་ཆུད་པས་སྒོ་གསུམ་མམ་གནས་དོན་ལུས་ཀྱི་སྣང་བ་མུ་མེད་པར་ཤར་བས་གཞི་ཆོས་ཉིད་ཀྱི་རང་ཞལ་བསྒྲིབས་ཏེ། གཞིའི་ཡོན་ཏན་རྣམས་མངོན་གྱུར་ལྟ་ཅི་རང་ལ་ཡོད་པ་ཙམ་ཡང་མི་ཤེས་སོ། །དེ་ནི་གང་ཟག་རང་རང་གི་སྒོས་བཙན་གྱི་སྒྲིབ་པའི་ཉེས་སྐྱོན་ཏེ་འཁྲུལ་སྣང་དབང་བཙན་དུ་བྱས་པ་ཡིན་ལ། གནས་ཚུལ་དབང་བཙན་དུ་བྱས་ན། གཞི་ཆོས་ཉིད་རང་མལ་ནས་མ་གཡོས་པའི་གནད་ཀྱིས། དེས་ཁྱབ་ཚད་གཞི་སྣང་ཡེ་ཤེས་ཆེན་པོའི་རོལ་པ་ལས་མ་འདས་པས། སྣང་བ་སྐུ། གྲགས་པ་གསུང་། དྲན་རྟོག་ཐུགས་ཏེ་སྒོ་གསུམ་རྡོ་རྗེ་གསུམ་སྣང་སྤྱོད་ཐམས་ཅད་དཀྱིལ་འཁོར་གསུམ་གྱི་རང་བཞིན་དུ་ཡེ་ནས་གནས་པས། གང་ལའང་བསལ་བཞག་སྤང་བླང་བྲལ་བར་ལམ་དུ་ཁྱེར་ཞིང་ཉམས་སུ་བླངས་པས། མ་དག་འཁྲུལ་པའི་དྲི་མ་རྣམས་གཉིད་སངས་པས་རྨི་ལམ་ལོག་པ་ལྟར་རང་དག་རང་སངས་སུ་སོང་ནས་སྣང་སྤྱོད་ཐམས་ཅད་སྐུ་དང་ཡེ་ཤེས་སུ་འཆར་བའི་གནད་དེ་ཡིན་ནོ། །དེས་ན་སེམས་ཅན་ཐམས་ཅད་ཐོག་མར་གཞི་སྣང་གི་སྟེང་ནས་འཁྲུལ་ཞིང་ད་ལྟ་དེའི་ངང་དུ་གནས་ཏེ། གཞི་སྣང་དེ་ཉིད་གཞི་མཉམ་པ་ཆེན་པོ་ལས་ཤར་བའི་གནད་ཀྱིས། སེམས་ཅན་ཐམས་ཅད་འཆི་བའི་ཚེ་འབྱུང་བའི་ཐིམ་སྡུད་མཐར་རང་བཞིན་བརྒྱད་ཅུའི་ཀུན་རྟོག་རྣམས་རིམ་པས་འགགས་ཏེ་གཞི་ཆོས་ཉིད་ཀྱི་ངང་དུ་དར་གཅིག་གནས་པའི་དོན་ཡང་དེ་ཡིན་ནོ། །དེའི་ཕྱིར་ཕྱི་ནང་གཞན་གསུམ་སྦྱར་ཏེ། ཕྱི་འབྱུང་བ་སྣོད་བཅུད་ཀྱི་སྐྱེ་འཇིག ནང་འབྱུང་ལུས་རླུང་སེམས་ཀྱི་འཕེལ་སྡུད། གཞན་རྟེན་དང་བརྟེན་པའི་བསྐྱེད་རིམ་དང་། དེ་ཉིད་རྫོགས་རིམ་འོད་གསལ་དུ་བསྡུ་ཚུལ་སོགས་དག་བྱ་དག་བྱེད་གཞི་འབྲས་ངོ་བོ་དབྱེར་མེད་དུ་ཤེས་པར་བྱ་བ་ནི་གསང་ཆེན་བླ་མེད་ཀྱི་རྒྱུད་སྡེའི་དགོངས་པ་མཐར་ཐུག་པའོ། །དེས་ན་ཐུན་མིན་རྫོགས་པ་ཆེན་པོ་རང་ལུགས་ཀྱི་ཐོག་མའི་གཞི་ལས་གཞི་སྣང་ཤར་བའི་སྟེང་ནས་གྲོལ་འཁྲུལ་གྱི་སྒོ་གཉིས་བྱུང་ཚུལ་དང་། ད་ལྟར་གྱི་དུས་སུ་འཆི་བའི་འོད་གསལ་དང་། ཆོས་ཉིད་བར་དོའི་སྣང་བ་རྣམས་རིམ་པར་ཤར་བའི་ཚེ། རྣལ་འབྱོར་པ་རྣམས་དབང་པོའི་ཁྱད་པར་གྱིས་འཆི་སྲིད་ཆོས་སྐུ་དང་བར་དོ་ལོངས་སྐུ་སོགས་སུ་གྲོལ་ཚུལ་དང་། སེམས་ཅན་ཕལ་པ་རྣམས་འོད་གསལ་ངོས་མི་ཟིན་ཞིང་སྒྲ་འོད་ཟེར་གསུམ་སོགས་ལ་འཇིགས་སྣང་སྐྱེ་བ་སོགས་གཟུང་འཛིན་གྱི་རྟོག་པས་བསྒྲིབས་ནས་འཁྲུལ་སྣང་བར་དོའི་ཡིད་ལུས་སོགས་གྲུབ་ཚུལ་འདི་གཉིས་དོན་གྱི་གནད་གཅིག གནས་སྐབས་ལམ་ཉམས་སུ་ལེན་པའི་ཚེ། ཉམས་ཀྱི་འཆར་ཆ་སྣ་ཚོགས་པས་མཚོན། ཕྱི་ཚོགས་དྲུག་གི་སྣང་བ། ནང་དུག་ལྔའི་རྟོག་པ། གསང་བ་རང་སེམས་ཀྱི་གནས་ལུགས་གང་ལའང་དགག་སྒྲུབ་ཏུ་ཞེན་ན་འཆིང་ཞིང་རང་སར་བཞག་ན་གྲོལ་བའི་གནད་དེ་ཡིན། མཐར་ཐུག་ཁྲེགས་ཆོད་ཀྱི་ལམ་མཐར་ཕྱིན་ཏེ་ལུས་རྡུལ་ཕྲན་དུ་དེང་ཁར་རླུང་སེམས་དྭངས་པའི་འཆར་ཆར་ཟད་པར་སོགས་ཀྱི་སྤྲུལ་བསྒྱུར་རྩོལ་མེད་དུ་སྟོན་ནུས་པ་དང་། ཐོད་རྒལ་གྱི་ལམ་སྣང་རྩོལ་མེད་དུ་ཤར་བ་སོགས་ཀྱང་གཞི་འོད་ཀྱི་རང་མདངས་རླུང་སེམས་ཀྱི་ཆ་ཕྲ་བ་དང་འདྲེས་སྟོབས་ཀྱིས་བསྐྱེད་པས། ལམ་བདེན་རྣམས་འདུས་བྱས་ཀྱི་ཆ་འདྲེས་ཕྱིར་རིམ་གྱིས་འཕེལ་འགྲིབ་ཀྱི་མཐར་ནང་དབྱིངས་ཀ་དག་གི་ཀློང་དུ་རྩལ་གཞི་ཐིམ་དུ་སོང་ནས་གདོད་མའི་ཀ་དག་གི་གྲོལ་སར་བྱང་ཆུབ་མངོན་དུ་མཛད་དགོས་པ་ཡིན། དེས་ན་གདོད་མའི་མགོན་པོའམ་དང་པོའི་སངས་རྒྱས་ཞེས་པའང་ཡེ་ཐོག་གདོད་མའི་གཞི་དབྱིངས་ཡེ་ནས་འཁྲུལ་མ་མྱོང་བའི་སྟེང་དུ་ཕྱིན་ཏེ་གྲོལ་བས་དེ་སྐད་ཅེས་བྱ། དེའི་ཕྱིར། སངས་རྒྱས་ཐོག་མ་ཐ་མ་མེད། །ཅེས་དང་། དང་པོའི་སངས་རྒྱས་ང་ཡིན་པས། །ཅེས་གསུངས། དེ་ཉིད་སླར་མི་ལྡོག་པའི་གནད་ནི། གཞིའི་གནས་ཚུལ་ལམ་ཆོས་ཉིད་ཟབ་མོ་ཇི་བཞིན་པར་མངོན་དུ་གྱུར་ཏེ། སྣང་ཚུལ་འཁྲུལ་པའི་སྒྲིབ་པ་བག་ཆགས་དང་བཅས་པ་གཏན་འགགས་སུ་གྱུར་པས། དཔེ་ས་བོན་མེས་ཚིག་པའམ་འབྲུམ་ནད་ལན་གཅིག་བྱང་བ་བཞིན་དུ་སྤང་བ་དེ་ཉིད་སླར་མི་ལྡོག་སྟེ་གནས་གྱུར་མཐར་ཐུག་པ་གྲུབ་པའི་ཕྱིར་རོ། །དེས་ན་ཟབ་མོའི་ལམ་ལ་རྣལ་འབྱོར་དུ་བྱ་བར་འདོད་པ་རྣམས་ཀྱིས། གཞི་ཆོས་ཉིད་ཀྱིས་ཁྱབ་ཚད་གཞི་སྣང་ཡེ་ཤེས་ཀྱི་རོལ་པ་ལས་མ་འདས་པར་ཤེས་པར་བྱས་ནས། གང་ལའང་དགག་སྒྲུབ་དང་ཞེན་འཛིན་མི་བྱ་བར། གཞི་ཆོས་ཉིད་མཉམ་པ་ཆེན་པོ་སྟོང་གསལ་འགག་མེད་ཀུན་ཁྱབ་ཀྱི་རིག་པ་ཉིད་མ་བཅོས་ཅོག་བཞག་ཅེར་མཐོང་ཡེ་གྲོལ་ཆེན་པོས་ངོ་ཤེས། རྩལ་རྫོགས། བརྟན་པ་ཐོབ་པར་བྱ་བ་ནི་ཅིས་ཀྱང་གལ་ཆེའོ། །ཨ་ཧོ། གདོད་མའི་གཞི་དབྱིངས་འོད་གསལ་བདེ་གཤེགས་ནི་སྙིང་པོར། །འཁོར་འདས་གཉིས་སྣང་སྤྲོས་པའི་མཚན་མ་ཡིས་དབེན་ཡང་། །གཞི་སྣང་ལྷུན་གྲུབ་བཀོད་པ་ཕྱིར་གསལ་དུ་མཆེད་ཚེ། །གྲོལ་དང་འཁྲུལ་པའི་སྒོ་འདི་གློ་བུར་དུ་བྱུང་ངོ་། །རང་སྣང་ཡེ་ཤེས་རོལ་པ་རང་རྩལ་དུ་ཤེས་པས། །གཞི་གནས་ལྷན་སྐྱེས་མ་རིག་ས་བོན་དེ་བཅོམ་ནས། །ཕུ་བོ་ཀུན་བཟང་ཀ་དག་གྲོལ་ས་རུ་ཕེབས་སོང་། །འུ་ཅག་མ་རིག་འཁྲུལ་པས་སྲིད་པ་འདི་གྲུབ་བོ། །འོན་ཀྱང་ས་འོག་གསེར་དང་བུམ་ནང་གི་སྒྲོན་བཞིན། །རིགས་ཁམས་ཆོས་ཉིད་སྟོང་གསལ་ཀུན་ཁྱབ་གྱི་ཡེ་ཤེས། །དུས་གསུམ་འཕོ་འགྱུར་བྲལ་བར་རང་ཆས་སུ་བཞུགས་ཕྱིར། །སྒྱིད་ལུག་ཞུམ་པ་མི་དགོས་ཉམས་ལེན་ལ་དྲིལ་མཛོད། །རྩོལ་བཅས་ཐེག་པའི་ལམ་ལ་བསྐལ་མང་དུ་སྦྱངས་འབྲས། །རང་གནས་ཡེ་ཤེས་མངོན་སྟོན་ཨ་ཏི་ཡི་གསེང་ལམ། །རྩོལ་མེད་ཐེག་པ་མཆོག་ལ་རང་དབང་དུ་སྤྱོད་ཚེ། །སྔོན་བྱོན་རིག་འཛིན་བྱེ་བའི་གཤེགས་ཤུལ་དེ་སྙོག་རན། །སྲིད་པ་སྲིན་མོའི་གླིང་ནས་ཞེན་ལོག་གི་རྟ་ཕོ། །ངེས་འབྱུང་ལྕག་གིས་བསྐུལ་བའི་བརྩོན་འགྲུས་ཀྱི་རླུང་གཤོག །ཐབས་ཤེས་མཁའ་ལ་བསྐྱོད་པའི་མྱུར་འགྲོས་ཤིག་མེད་ན། །སྡུག་བསྔལ་གསུམ་གྱི་བཙོན་ལས་ཐར་དུས་ཤིག་མི་ཡོང་། །ལས་འབྲས་ཡིད་ཆེས་ལྟ་བ་མངོན་མཐོ་ཡི་ཐེམ་སྐས། །བཅོས་མིན་སྲིད་ལས་ངེས་འབྱུང་ཐར་ལམ་གྱི་སྒོ་མོ། །སྐྱབས་གསུམ་སྙིང་ནས་བསྟེན་པ་སངས་རྒྱས་པའི་ཁྱད་ཆོས། །འདི་གསུམ་མེད་ཐབས་མེད་དོ་དུས་ཀུན་ཏུ་བརྩོན་མཛོད། །གཞན་ཕན་བྱང་ཆུབ་སེམས་འདི་རྒྱལ་སྲས་ཀྱི་གཞུང་ལམ། །ལྟ་སྤྱོད་ཟུང་དུ་འཇུག་པ་རྣམ་མཁྱེན་གྱི་ཉེ་རྒྱུ། །ཀུན་ཀྱང་ཡེ་ཤེས་དམ་པས་རྩིས་ཟིན་ཞིག་མེད་ན། །ཡང་དག་ཐེག་ཆེན་ལམ་དུ་ཇི་ལྟར་དུ་འགྱུར་ཨང་། །སྨིན་བྱེད་དབང་བཞིའི་བདུད་རྩིས་སྐུ་བཞི་ཡི་ས་བོན། །བརླན་བྱས་དམ་ཚིག་རྣམ་དག་སོ་ནམ་ལ་མཁས་པས། །བསྐྱེད་རྫོགས་རིམ་གཉིས་མྱུག་འབྲས་གོང་འཕེལ་ཞིག་མེད་ན། །སྔགས་སུ་ཞུགས་པར་རློམ་ཡང་རི་མོ་ཡི་མར་མེ། །ཁྱད་པར་དོན་བརྒྱུད་དགོངས་པའི་བྱིན་རླབས་ཀྱི་དབང་བསྐུར། །མོས་གུས་སྙིང་ལ་སིམ་པའི་ཁྱད་ཆོས་ཤིག་མེད་ན། །བཤད་བཤད་ཚིག་སྐམ་སྙན་ཡང་རང་གནས་ཀྱི་ཡེ་ཤེས། །མངོན་སུམ་གཏན་ལ་འབེབས་ཚེ་དམུས་ལོང་བཞིན་འཁྱམ་མོ། །བླ་མ་སངས་རྒྱས་དངོས་མཐོང་གདམས་ཟབ་ཀྱི་བདུད་རྩི། །དད་གསུམ་སྙིམ་པས་འཐུང་བའི་སྐལ་བཟང་ཞིག་མཆིས་ན། །དམུས་ལོང་མིག་ཕྱེས་བཞིན་དུ་རང་གནས་ཀྱི་ཡེ་ཤེས། །བྱིན་རླབས་མཐུ་ཡིས་མངོན་ལ་དཀའ་བ་རང་ཅི་ཡོད། །ནག་ཐོམ་ལུང་མ་བསྟན་གྱི་མགོ་བསྐོར་ཡང་མི་འདུག །གསལ་སྟོང་གུས་བཅད་ཉམས་ཀྱི་བསླུ་བྲིད་ཀྱང་རྗེས་མེད། །འདི་ཞེས་དམིགས་གཏད་མེད་ཀྱང་ཡིད་ཆེས་ཀྱི་ཉི་མ། །མ་བསྒྲིབས་ཁོང་ནས་འཆར་འདི་སྒྲུབ་བརྒྱུད་ཀྱི་ཁྱད་ནོར། །སྣང་སྲིད་འཁོར་འདས་ཆོས་ཀུན་སེམས་ཉིད་ཀྱི་རོལ་པ། །སེམས་ཉིད་བརྟགས་ན་མི་རྙེད་སྐྱེ་མེད་ཀྱི་འདུག་ཚུལ། །སྣང་སེམས་དབྱེར་མེད་ཆུ་དང་ཟླ་གཟུགས་ཀྱི་དཔེ་བཞིན། །དུ་མ་རོ་གཅིག་གོ་བའི་རྣལ་འབྱོར་ཚོ་སྐྱིད་དོ། །ཡེ་གྲོལ་རིག་པ་ཀ་དག་སྤྲོས་བྲལ་གྱི་དབྱིངས་སུ། །ཡེ་ཤེས་རང་གསལ་འགགས་མེད་ལྷུན་གྲུབ་ཀྱི་འཆར་ཆ། རིག་རྩལ་ཐུགས་རྗེས་ཀུན་ཁྱབ་ཆོས་ཀུན་གྱི་འབྱུང་གནས། །སྐུ་གསུམ་འདུ་འབྲལ་མེད་པའི་གཤིས་ལུགས་འདི་ཨ་ཧོ། །ངོ་བོ་ཡེ་ནས་སྟོང་པས་རྟག་མཐའ་ལ་མི་གནས། །རང་བཞིན་འོད་དུ་གསལ་བས་ཆད་མཐའ་ཡིས་མ་རེག །གཉིས་སུ་བརྗོད་ཀྱང་གཉིས་མེད་མཉམ་པ་ཡི་ཀློང་དུ། །འཁོར་འདས་ཆོས་ཀུན་མ་བཙལ་ཡེ་རྫོགས་སུ་གནས་སོ། །མེད་ལ་ཡོད་པར་བཟུང་བའི་སྐྱེ་བོ་རྣམས་འཁྲུལ་ལུགས། །སྨིག་རྒྱུའི་ཆུ་ལ་ཆུ་རག་རྒྱབ་པ་ཡི་ངལ་བ། །བརྒྱ་ཕྲག་ཁུར་དུ་ལེན་པའི་དཀའ་ལས་དེས་ཅི་བྱ། །ཡིན་ཚུལ་གནད་ལ་ཕེབས་ན་བཅིང་གྲོལ་ནི་གཉིས་མེད། །མཉམ་ཉིད་ཀློང་དུ་ཕེབས་ན་ལྟ་སྒོམ་གྱི་ཡང་རྩེ། །བློས་བྱས་གྲུབ་མཐའི་འཆིང་བ་བརྒྱ་ཕྲག་ནི་རང་གྲོལ། །ཅིར་སྣང་ཡེ་ཤེས་ཆེན་པོའི་རོལ་པ་ལས་མ་འདས། དགག་སྒྲུབ་ཆེད་འཛིན་མི་དགོས་རྩིས་མེད་དུ་སྐྱུར་ཐོངས། །གནད་འདི་མ་རྟོགས་གསལ་སྟོང་གུད་བཅད་ཀྱི་ཉམས་ལ། །རྫོགས་ཆེན་རིག་ངོར་འཁྲུལ་པའི་བྱིས་པ་ནི་ཁ་ཅིག །ཡིད་མིག་རླུང་གི་ཁུར་བཀལ་རྣམ་རྟོག་ནི་གཙེས་གཙེས། །ཐ་མ་སྲོག་རླུང་སྒྲུབ་པའི་ངལ་བ་དེས་ཅི་བྱ། མང་དག་དྲན་མེད་སྒོམ་གྱི་དངོས་གཞི་རུ་བཟུང་ནས། །ཐོམ་མེ་ཡེ་རེའི་ངང་དུ་མི་ཚེ་ཀུན་ཟད་ཀྱང་། ཁོ་ཐག་ནང་ནས་མ་ཆོད་ཡི་མུག་ནི་སྐྱེ་ཤོམ། །ཐ་མལ་དལ་འབྱོར་སྟོང་ཟད་འགྱུར་ཉེན་རང་ཆེའོ། །ཁ་ཅིག་རྩེ་གཅིག་ཉམས་ཀྱི་བསླུ་བྲིད་ལ་ཞེན་ནས། །ཉིན་མཚན་འོད་གསལ་འཁོར་ཡུག་སྒོམ་མེད་དུ་རློམ་རྣམས། །རྐྱེན་ངན་ཐོག་ཏུ་བབས་ཚེ་ཐ་མལ་ལས་ལོད་པའི། །ཉམས་ལེན་བྱས་ཡུས་འགྲན་ཡང་ཕན་རྒྱུ་ཞིག་བདོག་གམ། །དེ་སོགས་འདུ་བྱེད་སེམས་ཀྱི་ཀུན་རྟོག་གི་སྤྲོས་པ། །ཐ་མལ་ལས་རླུང་གཡོ་བའི་ཆོ་འཕྲུལ་དུ་གདའ་བས། །དེ་ཀུན་དབྱེར་མེད་བོར་ཏེ་གང་ཤར་གྱི་རིག་ངོ་། །མ་བཅོས་སོ་མར་སྐྱོངས་དང་གོལ་འཕྱུག་རང་ཆུང་ངོ་། །དེ་སྐད་ཡིད་ལ་གང་ཤར་ཐོལ་བྱུང་གི་གླུ་ཕྲེང་། །ཕ་རྒོད་བླ་མའི་གཅེས་ཕྲུག་པདྨ་ནི་བི་ཛས། །དོན་མཐུན་རྡོ་རྗེའི་མཆེད་པོ་འགའ་ཞིག་ལ་སྨན་ཕྱིར། །རེ་དོགས་མེད་པའི་སེམས་ཀྱིས་བྱུང་རྒྱལ་དུ་སྨྲས་སོ། །མངྒལཾ།། །།
ན་མོ་གུ་རུ་བུདྡྷ་ངྷརྨ་ཀ་ཡ་ཡ། ལགས། ཉིད་ནས་རྗེས་ཐོབ་ཀྱི་ཉམས་ལེན།
༄༅། །ན་མོ་གུ་རུ་བུདྡྷ་ངྷརྨ་ཀ་ཡ་ཡ། ལགས། ཉིད་ནས་རྗེས་ཐོབ་ཀྱི་ཉམས་ལེན་དང་སྤྱོད་པ་སྐྱོང་ཚུལ་དགོས་ཕེབས་པར། སྤྱིར་མདོ་སྔགས་ཀྱི་གཞུང་རྣམས་ནས་ལམ་གྱི་བགྲོད་ཚུལ་དང་། མཉམ་རྗེས་ཀྱི་ཉམས་ལེན་སྐྱོང་ཚུལ་ཇི་སྙེད་ཅིག་གསུངས་པ་དེ་ཐམས་ཅད་ཐུགས་ལ་མངའ་བཞིན་ལ། དེ་ཐམས་ཅད་ཀྱང་རྩ་བ་རང་རྒྱུད་ཀྱི་བདག་འཛིན་དང་ཉོན་མོངས་པའི་གཉེན་པོར་ཅི་འགྲོ་བྱ་བ་ལ་དགོངས་པ་མཐུན་མོད། མདོ་ལམ་དུ་ཕྱི་རོལ་གྱི་ཡུལ་ལ་བདེན་མེད་ཤེས་པས། ནང་བདེན་འཛིན་གྱི་བློ་འགོག་པའི་ཚུལ། དཔེར་ན་ཆགས་ཡུལ་བུད་མེད་མཛེས་མ་ལྟ་བུ་ལ་བརྟེན་ནས། ཚུལ་མིན་ཡིད་བྱེད་ཀྱི་རྒྱུའམ་བློ་དེས་ཆགས་པ་སྐྱེད་པས་ན། དེའི་གཉེན་པོར་ཕྱི་རོལ་གྱི་ཡུལ་བུད་མེད་དེ་ལ་བརྟགས་ཏེ་མི་སྡུག་པ་བསྒོམ་པའམ་སྒྱུ་མ་ལྟ་བུར་སྦྱངས་ནས་བདེན་སྟོང་དུ་བསྒོམ་པའི་ལམ་མམ་ཐབས་ཙམ་བསྟན་ཀྱང་། ད་ལྟའི་རང་སེམས་སྐད་ཅིག་མ་འདིའི་སྟེང་དུ་ཡུལ་མེད་རང་གསལ་ཆགས་སྡང་རང་གྲོལ་དུ་འགྲོ་བའི་ལམ་གནད་མ་བསྟན་པས་རིང་བའི་ལམ་ཞེས་བྱ་སྟེ། དཔེ་ཁྱིས་རྡོ་དེད་པའི་ཚུལ་གསུངས་པ་དང་མཐུན། རྒྱུ་དེས་ཉོན་མོངས་རང་མཚན་པ་སོགས་ལམ་དུ་ཁྱེར་མི་ནུས་པས་ཐབས་ལ་རྨོངས་པའི་ཆ་ཡོད། སྔགས་སྤྱི་དང་བྱེ་བྲག་བླ་མེད་ཐུན་མིན་ཕྱག་རྫོགས་ཀྱི་སྐབས་སུ། སྣང་བ་སེམས། སེམས་སྟོང་ཉིད། སྟོང་ཉིད་སྤྲོས་བྲལ། སྤྲོས་བྲལ་ཟུང་འཇུག ཟུང་འཇུག་བརྗོད་བྲལ་ལམ་བློ་འདས་སུ་གཏན་ལ་ཕབ་ནས་མངོན་སུམ་ལམ་དུ་བྱེད་པས་ཁྱད་པར་དུ་འཕགས་ཏེ། དཔེ་སེང་གེས་རྡོ་འཕེན་པ་ལ་བསྙེགས་པའི་དཔེ་གསུངས་པ་དང་དོན་གཅིག འདིས་ཉོན་མོངས་ཡེ་ཤེས། སྡུག་བསྔལ་བདེ་ཆེན། འཁོར་བ་མྱང་འདས་སུ་ཤེས་ཤིང་ལམ་དུ་ཁྱེར་ནུས་པས་ཐབས་ལ་མ་རྨོངས་ཤིང་དཀའ་བ་མེད་པ་སོགས་ཀྱིས་ཁྱད་པར་དུ་བྱས་པས་མྱུར་བའི་ལམ་ཡིན། དོན་ལ་ཁ་ཕྱིར་བལྟས་དང་ནང་བལྟས་ཀྱི་ཁྱད་ཡོད། འོན་ཀྱང་རང་རྒྱུད་ལ་མ་སྦྱར་ན་གོ་བ་ཙམ་གྱིས་མི་ཕན་ཏེ་ཁ་ཕྱིར་བལྟས་སུ་སོང་ན་གཉིས་ཀ་འདྲ། དེ་ཡང་སྣང་བ་སེམས་ཡིན་མིན་དང་། སྣང་སྣང་ཡུལ་གཅིག་ཐ་དད། སེམས་སེམས་ཉིད་དམ་སེམས་རིག་གི་དབྱེ་བའི་ཁྱད་པར་སོགས་ལ། ཕྱག་རྫོགས་གཉིས་ཀྱི་སྐབས་ཚིག་གི་བརྗོད་སྒྲོས་རྩིང་ཞིབ་ཕྲན་བུ་ཙམ་ལས། དོན་གྱི་གནད་ལ་ཆོས་ཉིད་ཀྱི་བདེན་པ་གཟིགས་པ་ཀུན་འགལ་མེད་གནད་གཅིག་པར་ཤེས་དགོས་ཏེ། སྣང་བ་སེམས་ཡིན་མིན་དང་སྣང་སྣང་ཡུལ་གྱི་དབྱེ་བའི་ཐད། བྱེ་མདོ་དབུ་སེམས་སོགས་གཞུང་ཆེན་སོ་སོའི་བཞེད་ཚུལ་དང་དགག་སྒྲུབ་སོགས་ཀྱི་སྤྲོས་པ་ནི་སྐབས་འདིར་འཆད་བྱ་མ་ཡིན་ལ། ཕྱག་རྫོགས་གཉིས་ཀྱི། ཕྱག་ཆེན་སྐབས། རྗེ་རྒོད་ཚང་བས། རང་གི་སེམས་ལ་སྣང་བ་དེ་རང་སེམས་སུ་ཁས་བླངས་ཀྱི། གཞན་ལ་སྣང་བ་དེ་རང་གི་སེམས་སུ་ཁས་བླང་བ་མིན་གསུངས་པ་དང་། རྫོགས་ཆེན་སྐབས། ཀུན་མཁྱེན་ཆེན་པོས། སྣང་བ་སེམས་ཡིན་གྱི་སྣང་ཡུལ་སེམས་མ་ཡིན་གསུངས་པ་དོན་གྱི་གནད་གཅིག་པས། ཕྱི་དོན་ནམ་ཀུན་ལ་མཐུན་པར་སྣང་བའི་ཡུལ་འདི་ནི། བག་ཆགས་ཀྱི་དབང་གིས་མེད་བཞིན་སྣང་བ་སྐྲ་ཤད་དམ་རྨི་ལམ་ལྟ་བུ་ཡིན་པས་སེམས་དང་སེམས་ལས་གཞན་དུ་གྲུབ་པ་ཅུང་ཟད་ཀྱང་མེད་དེ། འཇུག་པར། སེམས་ཉིད་ཀྱིས་ནི་སེམས་ཅན་འཇིག་རྟེན་དང་། །སྣོད་ཀྱི་འཇིག་རྟེན་སྣ་ཚོགས་ཤིན་ཏུ་འགོད། །འགྲོ་བ་མ་ལུས་ལས་ལས་སྐྱེས་པར་གསུངས། །སེམས་སྤངས་ནས་ནི་ལས་ཀྱང་ཡོད་མ་ཡིན། །ཞེས་དང་། མདོ་ལས། སྣ་ཚོགས་ལུས་དང་ལོངས་སྤྱོད་དང་། །བདེ་སྡུག་ཉིད་དུ་སྣང་བ་ནི། །སེམས་ཀྱིས་སྤྲུལ་ཞིང་སེམས་ཀྱིས་བྱས། །དཔེར་ན་རྨི་ལམ་ཇི་བཞིན་ནོ། །ཞེས་གསུངས། དེས་ན། བལྟ་བྱ་ཐུན་མོང་བ་ཞེས་པའང་ལས་མཐུན་པར་བསགས་པ་རྣམས་ཀྱི་བག་ཆགས་སེམས་སམ་ཀུན་གཞི་ལ་བཞག་པ་ཉིད་རྐྱེན་གྱིས་ཕྱི་རོལ་དུ་ཡུལ་གྱི་ངོ་བོར་སད་པ་ཉིད་ཡིན་གྱི་དོན་ལ་ཐུན་མོང་དུ་གྲུབ་པའི་བལྟ་བྱ་རང་མཚན་པར་གྲུབ་པ་ནི་མེད་དེ། ཆུ་གཅིག་ལའང་ལས་སྣང་དག་མ་དག་གི་དབང་གིས་སྣ་ཚོགས་སུ་སྣང་བ་བཞིན་ནོ། །རང་ལ་སྣང་བ་དེ་ནི་རང་སེམས་ལས་གཞན་དུ་མ་གྲུབ་པ་ནི་འོག་ནས་འཆད་པར་འགྱུར་ལ། དེ་བཞིན་སེམས་སེམས་ཉིད་དང་སེམས་རིག་གི་ཁྱད་པར་ཡང་དོན་གྱི་གནད་གཅིག་སྟེ། ཕྱག་ཆེན་པས་ཁམས་གསུམ་གྱི་སེམས་སེམས་བྱུང་མཐའ་དག་འཁྲུལ་སེམས་མ་རིག་པ་འཁོར་བའི་བག་ཆགས་ཀྱི་གཞི་འཛིན་པ་ཡིན་ལ། དེའི་ཆོས་ཉིད་མ་འཁྲུལ་པའི་གཤིས་ལུགས་སམ་དག་པའི་སེམས་ཉིད་རང་བཞིན་ལྷན་ཅིག་སྐྱེས་པ་ལ་ཆོས་སྐུ་ཕྱག་རྒྱ་ཆེན་པོར་བཞེད་པར་རྫོགས་ཆེན་གྱི་སྐབས་སུ། རང་ངོ་རང་གིས་མ་རིག་པའི་འཁྲུལ་སེམས་གཟུང་འཛིན་གྱི་རྟོག་པ་ལ་སེམས་དང་། རང་ངོ་རང་གིས་རིག་པའི་ཡེ་ཤེས་ཟུང་འཇུག་འདུས་མ་བྱས་ལ་རིག་པར་བརྟགས་ཤིང་ངོ་སྤྲད་པས་མི་མཐུན་པ་ཅིའང་མེད་དོ། །དེས་ན་གནས་ལུགས་ཟབ་མོའི་དོན་ལ་ཐོས་བསམ་གྱིས་སྒྲོ་འདོགས་ལེགས་པར་ཆོད་པའམ། བླ་མའི་བྱིན་རླབས་འཕོ་བའི་སྟོབས་ཀྱིས་གནས་ལུགས་ལ་རྡོ་རུས་འཕྲོད་པའི་ཉམས་མྱོང་ཁོ་ཐག་ཆོད་པ་ཞིག་མེད་ན་དབུ་ཕྱག་རྫོགས་གསུམ་གང་ལྟར་བཤད་ཀྱང་མི་ཕན་ཏེ་ཡིད་དཔྱོད་ཀྱི་ལྟ་བ་ལས་མ་འདས་ཤིང་ལམ་མཚན་ཉིད་པར་ཡང་མི་འགྱུར་རོ། །དེ་ལྟར་ལེགས་པར་རྟོགས་ཤིང་ཡང་དག་པའི་གནས་ལུགས་ཀྱི་དོན་ལ་ཐེ་ཚོམ་གྱི་སྒྲོག་དང་བྲལ་བའི་ངེས་ཤེས་ཟབ་མོ་སྐྱེས་ན། དབུ་ཕྱག་ཞེས་མར་འཕེན་རྒྱུ་དང་། རྫོགས་ཆེན་ཞེས་ཡར་བསྙེགས་ནས་བླང་རྒྱུ་གཉིས་མེད་དེ་ཆོས་ཉིད་མཉམ་པ་ཉིད་ཡིན། དེར་མ་ཟད་མ་ཀི་མུ་སྟེགས་རྟག་ཆད་ནས་ཡ་ཀི་ཨ་ཏི་ཡོ་གའི་བར་གྱི་ཐེག་པ་ཐམས་ཅད་རང་བྱུང་ཡེ་ཤེས་ཉག་གཅིག་གི་རྩལ་ལམ་ངོ་བོར་རྫོགས་པ་ལ་རྫོགས་པ་ཆེན་པོ་ཞེས་སྒྲ་དོན་སྦྱོར་ཏེ་བརྗོད་དགོས་ན་གྲུབ་མཐའི་བློས་བཏགས་ཀྱི་ལྟ་སྒོམ་གྱི་འཆིང་བས་སྲིན་བུའི་ཁ་ཆུ་བཞིན་རང་གིས་རང་ཉིད་བཅིངས་པ་ནི་ངལ་བ་ཙམ་དུ་ཟད་དེ། དེ་ལྟར་ཤེས་ནས་ལམ་ཁྱེར་ཉམས་སུ་ལེན་ཚུལ་དངོས་ལ། སྤྱིར་པཎྜི་ཏའི་དཔྱད་སྒོམ་དང་། ཀུ་སཱ་ལི{སུ་ལུ}འི་འཇོག་སྒོམ་གཉིས་གང་ཟག་གི་བློ་རིམ་དང་བསྟུན་ནས་གསུངས་པ་ལས། སྔ་མའི་དབང་དུ་བྱས་ན་གཞུང་ལུགས་ཆེན་པོ་རྣམས་སུ། ཡུལ་མངོན་ལྐོག་དང་ཤེས་པས་རང་རིག་མི་རིག་སོགས་ཐ་སྙད་ཀྱི་འཇོག་མཚམས་དང་། གཅིག་དུ་བྲལ་སོགས་དབུ་མའི་རིགས་ཆེན་བཞིའམ་ལྔ་གསུངས་པ་སོགས་ཡོད་ཀྱང་། རང་རེ་ཀུ་སཱ་ལི་པ་རྣམས་ཀྱིས་དོན་གནད་སྙིང་པོ་བླ་མའི་མན་ངག་བཞིན་འདི་ལྟར་གཟུང་བར་བྱ་སྟེ། ཆགས་ཡུལ་གྱི་བུད་མེད་དང་སྡང་ཡུལ་གྱི་དགྲ་བོ་ལྟ་བུས་མཚོན་ཚོགས་དྲུག་གི་ཡུལ་སྣང་བཟང་ངན་གང་དང་ཅི་སྣང་ཡང་། རྣམ་པ་དེ་རང་གི་སེམས་ལས་གཞན་དུ་མ་གྲུབ་སྟེ། ཡུལ་དེའི་རྣམ་པ་རང་སེམས་ལ་མ་སྣང་ན་ནི་ཡུལ་དེ་ཡོད་པའི་སྒྲུབ་བྱེད་ཀྱང་མེད་ལ། དེས་ཆགས་སྡང་སོགས་ཕན་གནོད་གང་ཡང་མི་བསྐྱེད་དེ་རང་རེ་ལ་སྒྲ་མི་སྙན་པའི་མི་བཞིན་ནོ། །དེས་ན་རང་སེམས་སུ་སྣང་བ་དེ་ལ་དགག་སྒྲུབ་ཏུ་ཞེན་པས་ལས་བསགས་ཤིང་འཁོར་བར་འཁྱམས་པ་ཡིན་ཏེ། དེ་ལྟར་མ་བཟུང་ཞིང་མི་ཞེན་ན་སྣང་ཙམ་པོ་དེས་ཕན་གནོད་གང་ཡང་མེད་དེ། འདིར་ནི་སྣང་ཙམ་དགག་མིན་ཏེ། །བདེན་པར་རྟོག་པ་བཟློག་པར་བྱ། །ཞེས་དང་། སྣང་བས་མི་འཆིང་ཞེན་པས་འཆིང་། །ཞེན་པ་ཆོད་ཅིག་ན་རོ་པ། །ཞེས་དང་། ཨོ་རྒྱན་ཆེན་པོས། འདི་ལྟར་མིག་གི་ཡུལ་དུ་སྣང་བ་ཡི། །ཞེས་སོགས་ཚོགས་དྲུག་ལམ་ཁྱེར་གྱི་གནད་གསུངས་པ་རྣམས་དོན་གནད་གཅིག་ཏུ་འབབ་པར་ཤེས་དགོས། དེས་ན་མ་ཀི་དམྱལ་བར་ལྟུང་སྟེ་ཚ་གྲང་གི་སྡུག་བསྔལ་མྱོང་ཡང་རང་སེམས་དེའི་རྣམ་པར་སྣང་བ་ཙམ་ཡིན་གྱི། དེ་ལྟར་རང་སེམས་ལ་མ་སྣང་ན་ཚ་གྲང་དང་དམྱལ་སྲུང་སོགས་ཡོད་པར་གང་གིས་ཤེས། དེ་བཞིན་ཡ་ཀི་སངས་རྒྱས་ཀྱི་འབྲས་བུ་ཐོབ་སྟེ་སྐུ་དང་ཞིང་ཁམས་ཡེ་ཤེས་ཡོན་ཏན་མཛད་པ་ཕྲིན་ལས་སོགས་ཀྱང་རང་སེམས་རྣམ་པར་དག་པའི་སྣང་བ་ཙམ་ལས་གཞན་དུ་གྲུབ་པ་ནི་ཅི་ཡང་མེད་དེ། ད་ལྟའི་སངས་རྒྱས་ཤཱཀྱ་ཐུབ་པའི་ཞིང་འདི་ལའང་རང་སེམས་དག་མ་དག་དབང་གིས་སྣང་ཚུལ་སྣ་ཚོགས་སུ་གསུངས་པ་བཞིན་ནོ། །དེའི་ཕྱིར་ད་ལྟའི་དུས་ཀྱི་དགྲ་གཉེན་བདེ་སྡུག་སོགས་དག་མ་དག་གི་སྣང་བ་དགག་སྒྲུབ་ཀྱི་ཞེན་པའི་ཡུལ་དུ་གྱུར་པ་འདི་ཐམས་ཅད་རང་སེམས་ཀྱི་འཆར་ཆ་ཙམ་ལས་དོན་གཞན་དུ་གྲུབ་པ་མེད་དེ་དཔེ་ཆུ་དང་ཟླ་གཟུགས་བཞིན་ནོ། །དེས་ན་བདེ་སྡུག་སོགས་སེམས་ལ་ཅི་ཤར་ཅི་སྣང་དེ་ཐམས་ཅད་སེམས་ལས་རྫས་ཐ་དད་དུ་གྲུབ་པ་མེད་ལ། གལ་ཏེ་སེམས་ལས་གཞན་དངོས་པོ་ཐ་དད་དུ་གྲུབ་པ་ཞིག་ན་དེ་ནམ་ཡང་མྱོང་བར་མི་ཤེས་ཤིང་དེ་བཟློག་པའི་ཐབས་ཀྱང་མེད་ལ་བཟློག་ཀྱང་མི་ནུས་སོ། །དེ་གང་ལ་སྣང་བའི་གཞི་རང་གི་སེམས་ཉིད་ལ་བརྟགས་ན་དུས་གསུམ་དུ་སྐྱེ་འགག་གནས་གསུམ་དང་བྲལ་བའི་ཆོས་ཉིད་སྟོང་པ་ཡིན། སྟོང་པ་དེ་ཡང་གསར་དུ་བྱས་པའི་སྟོང་པ་མིན། ཡེ་ནས་གནས་པའི་ཆོས་ཀྱི་དབྱིངས་སྟོང་པ་ཉིད་སྤྲོས་མཚན་ཀུན་བྲལ་རང་བཞིན་འདུས་མ་བྱས་ཡིན། དེ་ལྟ་བུའི་སེམས་ཉིད་དམ་སྤྲོས་བྲལ་ལམ་སྟོང་ཉིད་དེ་ཡང་བེམ་སྟོང་ཕྱོགས་གཅིག་པའི་འདུས་མ་བྱས་ནམ་མཁའམ་མོ་གཤམ་གྱི་བུ་ལྟ་བུ་ཅི་མེད་ཅང་མེད་མིན། ཀུན་ཤེས་ཀུན་རིག་གི་མཚན་ཉིད་རང་རིག་རང་གསལ་སྟོང་པའི་རང་རྩལ་ཅིར་ཡང་འཆར་ཤེས་པ་འདི་ཡིན་ཏེ། དེ་ལྟར་མིན་ན་མཐར་ཕྱིན་སངས་རྒྱས་ཀྱི་ཐུགས་ཇི་ལྟ་ཇི་སྙེད་ཀྱི་མཁྱེན་པའི་ཡེ་ཤེས་ཀྱང་ཇི་ལྟར་འཆར། དེས་ན་སྣང་སྟོང་གསལ་སྟོང་རིག་སྟོང་དབྱེར་མེད་ཟུང་འཇུག་བརྗོད་བྲལ་བློ་འདས་ཡེ་ཤེས་ཆེན་པོ་དུས་བཞི་མཉམ་པ་ཉིད་ཡིན། དེ་ལྟར་ཤེས་ནས་ལེགས་པར་བརྟགས་ན། ཆགས་ཡུལ་ལྷ་ཡི་བུ་མོ་དང་། སྡང་ཡུལ་ཕ་བསད་ཀྱི་ཤན་པ་གཉིས་ཀའང་རང་སེམས་ཀྱི་སྣང་ཆ་ཙམ་ལས་གཞན་དུ་གྲུབ་པ་མེད་ལ་དེ་གཉིས་གང་ལ་སྣང་བའི་གཞི་སེམས་ཉིད་དམ་གཤིས་རང་གི་ངོ་བོ་ནི་ཟུང་འཇུག་སྤྲོས་བྲལ་སྟོང་ཉིད་ཡིན་པའི་གནད་ཀྱིས་དེ་གཉིས་ཀས་ཕན་གནོད་དུ་བྱ་བ་རྡུལ་ཙམ་ཡང་མི་དམིགས་ཏེ། དཔེ་ནམ་མཁའ་ཚོན་རྩི་མི་ཆགས་པའམ་མེ་ལོང་དྭངས་པའི་ངོས་སུ་ཞི་བ་དང་ཁྲོ་བོའི་གཟུགས་བརྙན་སོགས་རྣམ་འགྱུར་ཇི་ལྟར་ཤར་ཡང་དེས་མེ་ལོང་རང་གི་ངོ་བོ་ལ་ཕན་གནོད་སོགས་ཀྱི་ཁྱད་པར་གང་ཡང་བྱར་མེད་པ་བཞིན་ནོ། །དེ་ལྟར་མ་ཤེས་ཏེ་བདེན་པར་བཟུང་ན་འཁྲུལ་པས་འཁོར་བ་ཞེས་བྱ། མ་རིག་པ་ཞེས་བྱ། ལུང་མ་བསྟན་ཞེས་བྱ། ཀུན་གཞི་ཞེས་བྱ། བདེན་པར་མ་བཟུང་ན་གཉེན་པོ་གཞན་མེད་པར་རང་གྲོལ་བས་མྱང་འདས་ཞེས་བྱ། རིག་པ་ཞེས་བྱ། ཡེ་ཤེས་ཞེས་བྱ། ཆོས་སྐུ་ཞེས་བྱ་སྟེ། རྣལ་འབྱོར་གྱི་དབང་ཕྱུག་འབྲུག་སྨྱོན་ཀུན་དགའ་ལེགས་པས། རིག་པ་ཀ་དག་མ་རིག་ལུང་མ་བསྟན། །ཀུན་ལེགས་བདག་ལ་བསྒོམ་བྱ་དེ་ལས་མེད། །ཅེས་དང་། རྒྱུད་ལས། མ་རིག་ཡེ་ཤེས་ཐ་དད་མེད། །ཅེས་གསུངས། དེས་ན་རང་སེམས་སྐད་ཅིག་མ་འདིའི་སྟེང་ནས་འཁོར་འདས་ཀྱི་ཤན་འབྱེད་དགོས། དེ་ལྟར་ཤེས་ན་ཕྱི་ཚོགས་དྲུག་གི་སྣང་བ། ནང་དགག་སྒྲུབ་ཀྱི་ཞེན་ཆ། གསང་བ་ཉོན་མོངས་པ་རྣམ་རྟོག་སོགས་གང་དང་ཅི་ཤར་ཡང་། ཐམས་ཅད་ཆོས་ཉིད་ཀྱི་རོལ་པ། ཆོས་ཉིད་ཀྱི་རང་རྩལ། བྱུང་ཡང་ཆོས་ཉིད་སྐྱེ་མེད་ཀྱི་ངང་ལས་བྱུང་། གནས་ཀྱང་ཆོས་ཉིད་སྐྱེ་མེད་ཀྱི་ངང་དུ་གནས། འགགས་ཀྱང་ཆོས་ཉིད་སྐྱེ་མེད་ཀྱི་ངང་དུ་འགག་པས། འཁྲུལ་ཡང་ཆོས་ཉིད་ཀྱི་ངང་ལས་འཁྲུལ། གྲོལ་ཡང་ཆོས་ཉིད་ཀྱི་ངང་དུ་གྲོལ་ཏེ། ཆོས་ཉིད་ལས་གཞན་པའི་ཆོས་ཞེས་བྱ་བ་རྡུལ་ཆ་ཙམ་ཡང་བཙལ་བས་མི་རྙེད་ལ། ཆོས་ཉིད་རང་གི་ངོ་བོ་ནི་བློ་དང་སྒྲ་རྟོག་མཚན་མའི་ཞེན་ཡུལ་ལས་འདས་པས་བསམ་གྱིས་མི་ཁྱབ་པ་རྡོ་རྗེ་ནམ་མཁའ་དྭངས་པའི་དཀྱིལ་ལྟ་བུ་སྟེ། ཏི་ལི་པས། ཀྱེ་ཧོ་འདི་ནི་རང་རིག་ཡེ་ཤེས་ཏེ། །ངག་གི་ལམ་འདས་ཡིད་ཀྱི་སྤྱོད་ཡུལ་མིན། །ཏི་ལི་ངས་ནི་ཅི་ཡང་བསྟན་དུ་མེར། །རང་གིས་རང་ཉིད་མཚོན་ཏེ་ཤེས་པར་བྱོས། །ཞེས་གསུངས། ཆོས་ཉིད་དེའི་ངང་དུ་བཟང་ངན་ཀྱི་རྟོག་ཚོགས་སོགས་གང་ཤར་ཡང་ཆུ་རླབས་རྒྱ་མཚོར་ཐིམ་པ་བཞིན་ཐམས་ཅད་ཆོས་སྐུའི་རོལ་པར་ཤར་བས་ཕན་གནོད་སོགས་གང་ཡང་མེད་དེ། དོ་ཧ་ལས། གཉུག་མའི་ཡིད་ནི་རྟག་ཏུ་སྡོད་དང་རྣལ་འབྱོར་ཆུ་ལ་ཆུ་བཞག་བཞིན་དུ་ཤེས་པར་བྱོས། །ཞེས་གསུངས། དེ་ལྟར་ཤེས་ན། ཚོགས་དྲུག་ལམ་ཁྱེར། སྐྱིད་སྡུག་ལམ་ཁྱེར། ན་ཚ་ལམ་ཁྱེར། དུག་ལྔ་ལམ་ཁྱེར། རྣམ་རྟོག་ལམ་ཁྱེར་སོགས་ལམ་ཁྱེར་ཐམས་ཅད་ཀྱི་རྩ་བའི་གནད་འདི་རང་ལ་ཐུག དེས་ན་ཕྱི་རོལ་ཡུལ་གྱི་སྟེང་དུ་ཕར་མི་དཔྱད་པར་ཡུལ་སྣང་སེམས་ཀྱི་ཐོག་ཏུ་ཐག་བཅད་ནས་དེའི་ངང་དུ་བསལ་བཞག་སྤང་གཉེན་མེད་པར་བཞག་པས་དྲན་སྣང་ཆོས་ཉིད་དུ་འཆར་བར་འགྱུར་ཏེ། གླིང་རྗེ་རས་པས། མ་བཅོས་སོ་མ་བཞག་ན་རྟོགས་པ་འཆར། །ཆུ་བོའི་རྒྱུན་བཞིན་སྐྱོང་ན་ཡོངས་ཀྱང་འཆར། །དམིགས་གཏད་མཚན་མ་ཐམས་ཅད་ཡོངས་སྤོངས་ལ། །རྟག་ཏུ་མཉམ་པར་ཞོག་ཅིག་རྣལ་འབྱོར་པ། །ཞེས་གསུངས། འདི་ཀ་རྩོལ་མེད་ཡང་དག་གི་དྲན་པ་ཡིན་ཏེ། རྗེ་གྲུབ་ཆེན་ཤེར་ཡས། ནམ་དྲན་ཡང་འཇོག་མ་བྱས་ན། །གཉུག་མའི་དྲན་པ་ཡིན་པར་གོ །ཞེས་གསུངས། དེས་ན་རྗེས་སྣང་ཡེ་ཤེས་སུ་འཆར་བའི་ཐབས་ལའང་འདི་ལས་ཟབ་པ་གཞན་མེད་དེ། བསྒོམ་དོན་དྲུག་པ་ལས། རྣམ་པར་རྟོག་པའི་མཚན་མ་ཅི་བྱུང་ཡང་། །རྟོག་པ་དེ་ཉིད་ཆོས་ཉིད་ཡིན་ཤེས་ན། །ཆོས་ཀྱི་དབྱིངས་ཉིད་གཞན་དུ་བསྒོམ་མི་དགོས། །ཞེས་གསུངས། འོན་ཀྱང་གང་ཟག་བློ་ཆུང་ཁ་ཅིག་མྱོང་བ་གནད་དུ་མ་སྨིན་པས་གོ་ཡུལ་དང་སྟོང་ཕྱོགས་ལ་འཛིན་པ་ཞུགས་ནས། སེམས་ནང་དུ་ཆད། སྣང་བ་ཕྱི་རོལ་དུ་ལུས་པ་ལྟ་བུ་གཟུང་འཛིན་རྒྱང་ཆད་དང་སྟོང་ཐོག་ཏུ་བསྒོམ་པ་དེ་ཡང་སྣང་ཐོག་ཏུ་བསྒོམ་མི་བཏུབ་པ་སོགས་འདུ་བྱེད་སེམས་ཀྱི་ཀུན་རྟོག་གིས་དཀྲུགས་པའི་ཉམས་མཐོ་དམན་སྣ་ཚོགས་འབྱུང་ཤེས་ཆེ་བས། དེ་ལྟར་བྱུང་ན་ནང་སེམས་ཀྱི་སྟོང་ཐོག་དེར་མི་བཞག་པར་ཕྱི་རོལ་གྱི་ཡུལ་ཆགས་སྡང་ཉོན་མོངས་བདེ་སྡུག་སོགས་གང་སྐྱེ་བ་དེའི་སྣང་ཐོག་ཏུ་བཞག་སྟེ་རྩལ་སྦྱང་ཞིང་བོགས་འདོན། འདི་སྤྲོས་བྲལ་རོ་གཅིག་ཏུ་ན་འཕར་བའི་ཐབས་སུའང་གསུངས། ཡང་རང་སེམས་ངོ་མ་འཕྲོད་པ་ཁ་ཅིག བླ་མ་ལ་མོས་གུས་མེད་པས་ནང་གི་མྱོང་བ་ནི་མ་ཤར། ཕྱི་རོལ་གྱི་དཔེ་ཆའི་གོ་བ་ཙམ་ལ་གདེང་དུ་བཟུང་སྟེ། རིག་པའམ་སེམས་ཉིད་རང་བབས་སུ་སྐྱོང་བ་ལ་བློ་མ་ཚིམས་པར། སེམས་ཞེས་ངན་པ་ཞིག་ཕར་བསལ་བའི་ཤུལ་དུ། རིག་པ་ཞེས་དྭངས་དྭངས་གསལ་གསལ་ཞིག་ཚུར་བསྒྲུབ་རྒྱུ་ཡོད་པར་རློམ་ནས། རྣམ་རྟོག་སྔ་ཕྱིའི་བར་གྱི་རྣམ་ཤེས་གསལ་རིག་གི་ཆ་ཙམ་ལ་འཛིན་པ་ཞུགས་ནས་ཁ་གནམ་དུ་གདང་། མིག་བར་སྣང་དུ་བགྲད་ནས། ཡིད་མིག་རླུང་གི་ཁུར་བཀལ་བཀལ་བས། མཐར་རྫོགས་ཆེན་མ་འགྲུབ་སྲོག་རླུང་གྲུབ་ནས། ཅི་ཡིན་འདི་ཡིན་དང་། ཅི་ཤེས་དེ་ཤེས་མེད་དང་། བསྒོམ་ན་སྙིང་མ་བདེ། བསྐྱུར་ན་བློས་མ་ཐེབས། ཅི་བྱས་ཀྱང་མ་ཡོང་བར། ཐ་མར་སྨྱོ་འཁྲུལ་དུ་འགྲོ་བ་ནི་དེང་སང་ཤིན་ཏུ་མང་འདུག་པས། ཧ་ཅང་གི་ཞི་ལྷག་དང་སེམས་རིག་སོགས་འདུ་བྱེད་སེམས་ཀྱི་ཀུན་རྟོག་གི་སྤྲོས་པའི་བརྟག་དཔྱད་དང་སེམས་འཛིན་གྱི་རྩོལ་བ་དྲག་པོ་མི་བྱེད་པར། གཙོ་བོར་བླ་མའི་མོས་གུས་ལ་གནད་དུ་བསྣུན་ནས་ད་ལྟའི་ཐ་མལ་གྱི་ཤེས་པ་སོ་མ་འདི་ཀ་རང་བབས་རང་འགྲོས་སུ་བཏང་ནས། ཉམས་གང་ཤར་རྩིས་མེད་དུ་བོར་ཐུབ་ན་དེ་རང་ཟབ་པར་མྱོང་གྲུབ་ལགས། མདོར་ན་བློ་ལ་ཡུལ་སྣང་ངམ་ཡུལ་ལ་བློ་སྣང་བ་གང་ཡིན་ཡང་འདྲ་སྟེ་དེའི་སྟེང་དུ་རྩོལ་མེད་ཡང་དག་གི་དྲན་པ་བསྟེན་ཏེ་གང་ཤར་དགག་སྒྲུབ་མེད་པར་དེའི་ཐོག་ཏུ་བཞག་ན། མཐར་སྣང་སེམས་དབྱེར་མེད་དུ་མ་རོ་གཅིག་ཏུ་རྟོགས་ཤིང་རྟོགས་བྱེད་ཀྱི་མཁན་པོ་དེ་ཡང་གཞི་མེད་རྩ་བྲལ་དུ་སོང་བས་བསྒོམ་བྱ་ཆོས་ཉིད་དང་སྒོམ་བྱེད་ཀྱི་བློ་གཉིས་མེད་དུ་གྲོལ་ནས་བསྒོམ་མེད་ཆོས་སྐུའི་རྒྱལ་སར་དབང་བསྒྱུར་ནུས་ཏེ། དེའི་གནད་ཀྱང་། ཆོས་རྗེ་རྒོད་ཚང་པས། ཧྲིལ་གྱིས་དྲིལ་ན། བདེ་སྡུག་སྐྱོན་ཡོན། ཕན་གནོད་གང་བྱུང་བ་དེའི་སྟེང་དུ་སྤང་བླང་མེད་པར་ལྷན་གྱིས་སྡོད། དེ་ཡང་རང་སེམས་ལ་སྣང་བ་ལས་ཡུལ་དངོས་པོར་མ་གྲུབ་པ་ཡིན། དེ་ལ་ཉམས་སུ་ལེན་ལུགས་ནི་དྲན་པས་མ་ཡེངས་པར་སྐྱོང་བ་སྟེ། དེ་ཡང་རྣལ་འབྱོར་བཞིའི་སྐབས་སུ། རྩེ་གཅིག་ཏུ་གཟུང་དྲན་གཙོ་ཆེ། སྤྲོས་བྲལ་གྱི་སྐབས་སུ་སྟོང་ཉིད་དྲན་པ་སྟེ། ཆགས་སྡང་སྐྱེས་པ་དང་སྟོང་ཉིད་དྲན་ཡོང་། སྤྲོས་བྲལ་དངོས་པོ་སྟོང་དགོས་པས་སྟོང་པའི་ཁ་ཟིན་ཆེ། རྩོལ་བའི་རྣམ་པ་ཡོད། རོ་གཅིག་དུས་རྟོག་ཆོས་ཡང་དག་རྩོལ་མེད་དྲན་པ་འབྱུང་། རྣམ་རྟོག་རང་སྒོམ་དུ་ཤར་བས་རྩོལ་བ་མེད། རྟོག་པ་ཆོས་ཉིད་དུ་གསལ་འདེབས་མི་དགོས། རྗེས་སྣང་སྒྱུ་མ་ཙམ་སྟེ། སྟོང་ཉིད་རྒྱུ་འབྲས་སུ་ཤར། རྒྱུ་འབྲས་སྟོང་ཉིད་དུ་ཤར་བའི་དུས་སུ་བློ་འདས་ཀྱི་དྲན་པ་དང་ཐག་ཉེ། སྒོམ་མེད་དུ་བློ་འདས་ཀྱི་དྲན་པ་འབྱུང་། འདིའི་སྐབས་སུ་གཟུང་ཡུལ་དུ་སྣང་བ་སྒྱུ་མ་ཙམ་ཡང་མེད་དོ། །ཉམས་སུ་ལེན་དུས་འདིར་གང་ཤར་གྱི་རྟོག་པ་རང་སེམས་གཞི་རྩ་ཆོད་པ་བླ་མའི་དྲིན་གྱིས་རྟོགས་པ་ན། དེའི་ངང་སྐྱོང་བ་ཡིན། རྟོག་པ་བྱུང་ན་རང་ངོ་ཤེས་པའི་སྟེང་དུ་སྡོད། དེ་ལྟར་རྒྱུན་དུ་སྐྱོང་བ་ལས་མེད་དོ། །དེའི་ཚེ་གཟུང་འཛིན་མཁའ་ལྟར་དག་པའི་སེམས་དེ་ལ་བདག་ཏུ་འཛིན་པ་མི་འདུག་པས་སྦྱིིན་པ་ཚང་། ཉེས་ལྟུང་གི་དྲི་མས་མ་གོས་པས་ཚུལ་ཁྲིམས་ཚང་། བདེ་སྡུག་གི་རྟོག་པའི་ཟུག་རྔུ་མེད་པས་བཟོད་པ་ཚང་། དེ་ལ་མ་ཡེངས་པར་གནས་པས་བརྩོན་འགྲུས་ཚང་། མཉམ་རྗེས་མེད་པས་བསམ་གཏན་ཚང་། འཁྲུལ་པ་མེད་པས་ཤེས་རབ་ཚང་། རོ་སྙོམས་སྐོར་དྲུག་ཀྱང་ཚང་སྟེ། རྟོག་པ་ཆོས་སྐུར་ཤར་བས་རྣམ་རྟོག་ལམ་ཁྱེར། དུག་ལྔ་ཡེ་ཤེས་སུ་གྲོལ་བས་ཉོན་མོངས་ལམ་ཁྱེར། ལྷ་འདྲེའི་བར་ཆད་རང་སེམས་སུ་ཤེས་པས་འཇིགས་པ་མེད་པ་ལྷ་འདྲེ་ལམ་ཁྱེར། གང་ཤར་བདེ་ཆེན་དུ་ཤར་བས་སྡུག་བསྔལ་ལམ་ཁྱེར། གང་ལའང་ཟུག་རྔུ་མེད་པས་ན་ཚ་ལམ་ཁྱེར། དེ་ལ་མཉམ་རྗེས་མེད་པས་སྐྱེ་འཆིའི་རྟོག་པ་མེད་པ་དེ་འཆི་བ་ལམ་ཁྱེར་ཡིན་གསུངས། དེ་བཞིན་ཞེ་ཆེན་གྲུབ་ཆེན་ཤེས་རབ་ཡར་འཕེལ་གྱིས། སེམས་སྤྲོས་བྲལ་རྟོགས་ན་དབུ་མ་ཡིན། །ཆོས་རོ་གཅིག་རྟོགས་ན་ཕྱག་རྒྱ་ཆེ། །གཤིས་སྒོམ་མེད་རྟོགས་ན་རྫོགས་ཆེན་ནོ། །ཡང་ཆེན་པོ་གསུམ་གྱི་གྲོལ་ཚུལ་བཤད། །རིག་ཐོག་ནས་གྲོལ་ན་རྫོགས་པ་ཆེ། །འཛིན་པ་དང་འབྲེལ་ན་ལྟ་བ་མིན། །གནས་ཐོག་ནས་གྲོལ་ན་ཕྱག་ཆེན་ཏེ། །གཟུང་དྲན་དང་འབྲེལ་ན་སྒོམ་པ་མིན། །འགྱུ་ཐོག་ནས་གྲོལ་ན་དབུ་མ་ཡིན། །ཞེན་པ་དང་འབྲེལ་ན་སྤྱོད་པ་མིན། །ཞེས་དང་། དྲང་པོར་བརྗོད་ན་འདི་ལྟར་གནས། །ཤེས་རབ་ཅན་ལ་ལྟ་བ་མེད། །ས་མཐར་སོན་ལ་སྒོམ་པ་མེད། །དེ་གཉིས་འདས་ལ་སྤྱོད་པ་མེད། །གསུམ་མེད་འབྲས་བུ་ག་ལ་ཡོད། །བཞི་པོ་ཡོད་ན་མཐར་ཐུག་མིན། །བྱིས་པ་ཉེར་སྤྱོད་ས་ཞེས་སྨྲ། །ལྟ་སྒོམ་སྤྱོད་འདོད་རེ་བ་དེ། །ཚི་ཆད་ནད་དུ་ཆེ་ཞེས་གསུངས། །ལྷོད་ཉམས་ཁོང་ཡངས་ཨེ་མ་ཧོ། །མཐའ་དབུས་མེད་པའི་ལྟ་བ་ལ། །གཟའ་ལྟད་མེད་པ་སྒོམ་པའི་མཆོག །འདི་སྡོད་མེད་པའི་སྤྱོད་པ་ལ། །ཐོབ་བྱ་མེད་པ་འབྲས་བུའི་མཆོག །ལྟ་བ་མེད་པ་ལྟ་བའི་མཆོག །སྒོམ་པ་མེད་པ་སྒོམ་པའི་མཆོག །སྤྱོད་པ་མེད་པ་སྤྱོད་པའི་མཆོག །མཆོག་གསུམ་དབྱེར་མེད་འབྲས་རྩེར་འདོད། །ཕྱོགས་རིས་མེད་པ་ལྟ་བའི་རྩེ། །དམིགས་མེད་གསལ་ཆ་སྒོམ་པའི་རྩེ། །འདུ་བྱེད་ཞིག་པ་སྤྱོད་པའི་རྩེ། གཉིས་མེད་དག་གསལ་འབྲས་རྩེར་འདོད། །འཛིན་པ་མེད་པའི་ལྟ་བ་ལ། །གཏད་སོ་མེད་པ་སྒོམ་པའི་མཆོག །འདི་བྱ་མེད་པར་སྤྱོད་པ་ལ། །ཐོབ་ཤོར་མེད་པ་འབྲས་བུའི་མཆོག །ཡེ་སྟོང་རྩ་བྲལ་ལྟ་བ་ལ། །མཚན་མ་རང་གྲོལ་སྒོམ་པའི་མཆོག །ཡིད་སྨོན་མེད་པར་སྤྱོད་པ་ལ། །མངོན་འདུ་མི་བྱེད་འབྲས་བུའི་མཆོག །རང་རྒྱུད་མེད་པ་ལྟ་བའི་མཆོག །འདུ་ཤེས་ཡུལ་མེད་སྒོམ་པའི་མཆོག །བྱེད་པོ་མེད་པ་སྤྱོད་པའི་མཆོག །བསལ་བཞག་དག་པ་འབྲས་བུའི་མཆོག །ཡེ་སྟོང་ཆོས་ཉིད་དྲན་པ་ལ། །ཚུར་མཐོང་འདུ་ཤེས་ཞིག་པ་མཆོག །གནས་ལུགས་སྒོམ་ཡེངས་མེད་ཤེས་ན། །བྱང་ཆུབ་ཐོབ་པར་ཐེ་ཚོམ་མེད། །ལྟ་འདོད་སྒོམ་འདོད་སྤྱོད་འདོད་གསུམ། །ནམ་སླེབས་ཚེ་ན་འཁྲུལ་ཞེས་གསུངས། །དེ་དོན་འགྲེལ་ན་འདི་ཡིན་ཏེ། །གནས་ལུགས་རང་ཤུགས་ལྟ་བ་སོགས། །ཡོད་པ་ཙམ་གྱིས་མི་སྐྱོན་ཏེ། །སེམས་ཉིད་ངང་གིས་གནས་སྐབས་ཡིན། །ལྟ་འདོད་སླེབས་ཚེ་གློ་བུར་དུ། །བདག་འཛིན་རྣམ་རྟོག་སྐྱེས་པ་ཡིན། །དེ་བཞིན་རང་བབས་སྒོམ་པ་པོ། །ཡོད་པ་ཙམ་གྱིས་མི་སྐྱོན་ཏེ། །སེམས་ཉིད་རང་བཞིན་གནས་སྐབས་ཡིན། །སྒོམ་འདོད་སླེབས་ཚེ་གློ་བུར་དུ། །སྒོམ་འཛིན་རྣམ་རྟོག་ཞུགས་པ་ཡིན། །ལྟ་སྒོམ་རང་ཡན་སྤྱོད་པ་པོ། །ཡོད་པ་ཙམ་གྱིས་མི་གནོད་དེ། །སེམས་ཉིད་གཉིས་སུ་མེད་སྐབས་ཡིན། །སྤྱོད་འདོད་བྱུང་ཚེ་གློ་བུར་དུ། །གཉིས་འཛིན་ཀུན་རྟོག་བདོ་སྐབས་ཏེ། །འཁྲུལ་སྣང་འཁྲུལ་འཛིན་རྒྱུན་ཆད་མེད། །མདོར་ན་ལྟ་སྒོམ་སྤྱོད་པ་གསུམ། །ཤུགས་འབྱུང་ཐམས་ཅད་བཟང་བ་ཡིན། །ལྟ་བསམ་སྒོམ་བསམ་སྤྱོད་བསམ་སོགས། །རྗེས་སླེབས་ཐམས་ཅད་ངན་པར་གོ །རང་རྒྱུད་ཅན་དེ་ཡིད་དཔྱོད་ཡིན། །ཡེ་ཤེས་བློ་འདས་ཡིན་ཕྱིར་རོ། །སེམས་ཉིད་དྲན་པ་སྐད་ཅིག་མར། །གཟུང་འཛིན་མི་དགོས་སྒོམ་སྤྱོད་བདེ། །སྐད་ཅིག་གཉིས་པར་ཤེས་གསལ་གྱི། །རྒོད་ནས་བདེ་སྟོང་དཀའ་མོར་འགྱུར། །ཇི་སྲིད་གཉིས་འཛིན་ཡོད་ཕྱིན་ཆད། ཆོས་རྣམས་འདི་དང་འདིའོ་ཞེས། །རྣམ་པར་རྟོག་ལས་འདའ་བ་མེད། །ཡང་ན་བྱིང་རྨུགས་འཐིབ་གསུམ་གྱིས། །དྲན་སྣང་མི་གསལ་བན་བུན་འགྱུ། དེ་ལ་གོམས་ཀྱང་ཐར་པ་མེད། ཇི་སྲིད་གནས་ལུགས་ཤེས་མཐོང་གི། །རེ་དོགས་ཡོད་པ་དེ་སྲིད་དུ། །སྣང་སྟོང་རྣལ་མ་ག་ལ་མཐོང་། །ཇི་སྲིད་ཀུན་གཞི་ཡོད་རིང་ལ། །རང་ངོ་རྣམ་དག་མི་མཐོང་གིས། །ནམ་ཞིག་རང་སའི་ལྟ་བ་དེ། །རྡོ་རྗེ་ལྟ་བུས་ཆོམ་ཕྱིན་ཆད། །དབྱིངས་རིག་གཉིས་སུ་སྣང་བ་མེད། །དེ་ལྟར་བསམ་ན་འདི་དགོས་ཏེ། །རང་སེམས་གཉིས་མེད་སོར་རྟོག་གིས། །མཚན་འཛིན་བདག་བློ་ཡང་ཡང་བཤིག །ནམ་ཞིག་ལྟ་བ་རྟོགས་ཙ་ན། །མ་བཅོས་བཞག་ན་ཤར་གྲོལ་མཉམ། །སྣང་བ་སྐད་ཅིག་ཐད་ཀར་ཆོད། །སྒོམ་ཡུན་ཐུང་ཡང་བོགས་སྐྱེད་ཆེ། །གཞན་ཡང་སྒོམ་གནད་ལ་གཅེས་པའི། །ཤེས་བྱ་ཐམས་ཅད་མདོར་བསྡུ་ན། །རང་སྣང་གསལ་བའི་ཤེས་རབ་ཀྱིས། །ཡིན་མིན་ལ་ཤན་མི་འབྱེད་ན། །གཉིས་འཛིན་སྣང་བ་ཀུན་ནུབ་ཀྱང་། །ཧྭ་ཤང་ཡིན་གྱིས་སོར་རྟོག་མེད། །ས་མཐར་སླེབས་པའི་གང་ཟག་ལ། །དྲན་པ་ཡིད་བྱེད་མེད་ལགས་ཀྱང་། །སོར་རྟོག་ཡེ་ཤེས་མེད་མི་འགྱུར། ཕྱི་སྤྱོད་ཚུལ་གནས་ཐོས་བསམ་རེམ། །ནང་སྤྱོད་མཚམས་ནང་བསྐྱེད་རྫོགས་སྒོམས། །གསང་སྤྱོད་རྫོགས་ཆེན་ལུགས་སུ་གྱིས། །ཡང་གསང་ཁྲེགས་ཆོད་ཐོད་རྒལ་འཕགས། །དེ་ལས་ལྷག་པའི་ཞལ་གདམས་མེད། །ཅེས་དང་། རྩེ་གཅིག་ཉམས་མྱོང་སྦུབས་ཡིན་ཏེ། །སྟོང་གསལ་ངང་སྒོམ་བྱས་བྱས་ནས། །སྐྱོན་ཡོན་གང་འགྲོ་ངེས་པ་མེད། །མཚན་ལྡན་བླ་མ་བསྟེན་པ་མཆོག །སྤྲོས་བྲལ་ཉམས་སྦུབས་ནས་ཐོན་ཏེ། །སྐྱེ་མེད་སྟོང་པའི་ཆོས་རྣམས་ལ། །སྒྲོ་སྐུར་དབེན་པའི་དུས་ཡིན་ཡང་། །སྣང་སྟོང་བསྲེ་བ་མཆོག་ཏུ་གོ །རོ་གཅིག་སྣང་སེམས་གཉིས་འདྲེས་ཏེ། །བཟང་ངན་དབྱེ་བ་མེད་པ་ལ། །བསལ་བཞག་མི་དགོས་སྒོམ་སྤྱོད་བདེ། །ཆོས་རྣམས་ལ་ཤན་འབྱེད་པ་མཆོག །སྒོམ་མེད་དྲི་མ་འདག་སྐབས་ཏེ། །ལྟ་སྒོམ་བྱ་རྩོལ་ཀུན་བྲལ་ཡང་། །རང་རིག་དག་གསལ་སྤྲོས་བྲལ་གྱི། །རང་ཚུགས་འཛིན་པ་མཆོག་ཏུ་གོ །སེམས་དོན་རྣམ་པ་མང་བཤད་ཀྱང་། །རྣམ་རྟོག་སྔ་ཕྱི་མ་འདྲེས་པར། །ཐད་ཀར་ཤེས་རབ་བཅར་ཕོག་ཏུ། །ངོས་ཟིན་རང་བྱུང་ཡེ་ཤེས་ཡིན། །རེ་དོགས་མེད་པར་ཁོང་ལྷོད་ཅིང་། །རང་བབས་རང་ཡན་བྱེད་དགོས་ལགས། །ཡང་ན་སྣང་བ་ཕྱིར་མ་ལུས། །རང་སེམས་ནང་དུ་མ་ཆད་པར། །སྣང་ཐོག་ཤེས་པ་དེ་ཀར་འཇིག །སྣང་སྟོང་གཉིས་ལ་སྔ་ཕྱི་མེད། །དེ་ལ་བདེན་གཉིས་ཟུང་འཇུག་ཟེར། །སེམས་ཉིད་རྣམ་དག་དེ་ན་ཡོད། །སྣང་སེམས་འཕྲད་ལ་མ་འདྲེས་བཟང་། །རང་སེམས་སྒོམ་བྱེད་ནང་ན་བདོག །བསྒོམ་བྱའི་སྣང་བ་གཞན་ཡོད་ཕྱིན། །འཚོལ་རྟོག་དཔྱོད་ཀྱི་ཞི་གནས་མེད། །ཡེངས་དྲན་འཐབ་པ་ལྷག་མཐོང་མིན། །སྣང་སེམས་གཉིས་པོ་དབྱེར་མེད་པར། །གནས་འགྱུ་རིག་གསུམ་བྱེད་ན་གྱིས། །ཞེས་དང་། ཨེ་མ་ཉམས་མྱོང་རྟོགས་པའི་གླུ། །རྣམ་ཐར་ངེས་པ་ཅན་བརྗོད་ན། །རང་རིག་དབྱིངས་སུ་ནམ་སྤར་ཚེ། །ཆོས་སྐུ་ཕྱིར་གསལ་ཀུན་གཞི་ནང་། ཆ་གཉིས་མཐོང་སྟེ་ངོ་མཚར་སྐྱེས། །རང་བབས་ངང་དུ་ལྷོད་དེར་བཞག །རེས་འགའ་ཀུན་གཞིའི་རྣམ་ཤེས་ཀྱི། །འོད་གསལ་དྭངས་སང་ཝལ་ལེར་མཐོང་། །ལྟ་བ་མཐར་ཐུག་མིན་པར་གོ །ཐ་མལ་ཤེས་པའི་རང་མདངས་བསྐྱངས། །རེས་འགའ་བྱིང་རྨུགས་ཆེ་དུས་སུ། །ཀུན་གཞིར་འཐུམ་ནས་དྲན་ཤེས་ཉམས། །ལྟ་སྒོམ་སྤྱོད་པ་མོག་པོར་སོང་། །རིག་གདངས་གསལ་ཆ་ལམ་ཁྱེར་བྱས། །རེས་འགའ་རང་བཞིན་ཤུགས་འབྱུང་ངམ། །ཡང་ན་ལམ་དུ་ཁྱེར་ཤེས་དུས། །ཀུན་གཞི་ཆོས་སྐུའི་བག་ལ་ཞ། །མཐར་ཐུག་ལྟ་བ་དེ་རུ་རྟོགས། །སྐབས་རེར་ཡེངས་པ་ཡོད་ན་ཡང་། །རྒྱ་མཚོར་འཕར་བའི་རྦ་རླབས་བཞིན། །ཆོས་ཉིད་ངང་ལས་འདའ་བ་མེད། །ངོ་བོ་མཐོང་བའི་གནད་གཅིག་རྟོགས། །མདོར་ན་དུས་རྣམས་ཐམས་ཅད་དུ། །ནམ་མཁའ་སྤར་འཛིན་བྱས་པ་འདྲ། །ངེས་མེད་ལྟ་སྒོམ་སྣ་ཚོགས་མཐོང་། །ངང་སྒོམ་ཤེས་འདོད་མ་སྐྱེས་དུས། །གཤིས་ལུགས་འགྱུར་མེད་ཡོངས་གྲུབ་མཐོང་། གཉིས་སྣང་མཚན་མའི་གོས་ཕུད་དུས། །རང་རིག་གཅེར་བུར་འཕྱོ་བ་མཐོང་། །རང་བབ་རང་ཡན་ནམ་གཏུབ་ཚེ། །ཚོགས་དྲུག་ལྷུག་འཆར་ཇི་སྙེད་མཐོང་། །ནམ་དྲན་ཡང་འཇོག་མ་བྱས་ན། །གཉུག་མའི་རང་ས་ཟིན་པར་གོ །རེ་དོགས་བཟོ་བཅོས་མ་བྱས་ན། །འཛིན་མེད་རྗེན་ཅེར་མཐོང་བར་གོ །རང་ངོ་ཤེས་ཤིང་གློད་ཐུབ་ན། །གདོད་ནས་རྣམ་དག་ཡིན་པར་གོ །ཧ་ཅང་སྒྲིམ་ན་རྗེས་ཐོབ་འགག །བདེན་གཉིས་མཐོང་དུས་དཀའ་འོ་བུ། །ཧ་ཅང་གློད་ན་མཉམ་བཞག་ཉམས། །ལུང་མ་བསྟན་དུ་འགྲོ་ངེས་ཨང་། །སྒྲིམ་གློད་བྱེད་བློ་མ་རྩོམ་པར། །ཐ་མ ལ་ཤེས་པ་སྐྱོངས་ཤིག་བུ། །བསམ་སྒོམ་མ་བྱེད་རང་སར་ཞོག །རྒྱ་ཡན་ལྷོད་ཟིན་གཅེས་སོ་ཨང་། །མ་ཡེངས་དྲན་པས་རྒྱང་སོ་ཚུགས། །ལམ་བདེན་མཐར་ཐུག་ཡིན་ནོ་བུ། །དེ་ལྟར་གོམས་འདྲིས་བྱེད་མཁས་ན། །འགོག་བདེན་ཆོས་སྐུར་གདོན་མི་ཟ། །ནམ་དྲན་མ་བཅོས་སོ་མར་སྐྱོངས། །རང་བྱུང་ཡེ་ཤེས་དེ་དུས་རིག །རྣམ་རྟོག་སྔ་ཕྱི་མ་མཐུད་ན། །འཆར་སྒོ་མང་ཡང་ཡོན་ཏན་ལགས། །ཞེས་དང་། ཚེ་གཅིག་དམ་ཆོས་སྤྱོད་པའི་གང་ཟག་རྣམས། །ངན་སོང་གསུམ་དུ་སྐྱེས་ཀྱང་འགྱོད་མེད་ཡིན། །ཅི་ཡོད་ཆོས་ཕྱོགས་བཏང་བའི་གང་ཟག་རྣམས། །འཁྱག་གྲི་ལྟོགས་གྲིར་ཤི་ཡང་འགྱོད་མེད་ཡིན། །ཚེ་འདིར་འདོད་དགུར་མ་ཆགས་ཆོས་སེམས་ན། །བར་དོར་སྡུག་བསྔལ་མྱོང་ཡང་འགྱོད་མེད་ཡིན། །མཚན་ལྡན་བླ་མ་མཉེས་པའི་གང་ཟག་རྣམས། །ཚེ་མཐར་སྨྱོ་འཁྲུལ་བྱུང་ཡང་འགྱོད་མེད་ཡིན། །སྤྱི་སྒོས་དོན་དུ་ཚོགས་ངན་མ་བསགས་ན། །ཕོ་སྒོ་མ་བཟང་ཟེར་ཡང་འགྱོད་མེད་ཡིན། །ཚེ་འདིར་དགྲ་གཉེན་གཉིས་ལ་མ་ཞེན་ན། །འཆི་དུས་ཆགས་སྡང་སྐྱེས་ཀྱང་འགྱོད་མེད་ཡིན། །བདེ་སྡུག་འབྱོར་རྒུད་སྔོན་ལས་ཡིན་བསམ་ན། །ཕྱིན་ཆད་སྡུག་པོར་སོང་ཡང་འགྱོད་མེད་ཡིན། །ཆོས་སེམས་འདྲེས་ན་ཅི་བྱས་དགེ་བར་འགྱུར། །དགེ་སྦྱོར་གྲངས་མང་མ་སོག་འགྱོད་མེད་ཡིན། །བློ་ཕུག་དཀོན་མཆོག་གསུམ་ལ་རྒྱུན་གཏད་ན། །འཆི་བདག་གློ་བུར་སླེབས་ཀྱང་འགྱོད་མེད་ཡིན། །ལོངས་སྤྱོད་འཁོར་གཉེན་ཆགས་ཞེན་ཤས་ཆུང་ན། །ཤེས་མེད་ཐབས་རྡུགས་{སྡུག} བསམ་ཀྱང་འགྱོད་མེད་ཡིན། །རང་སེམས་ཆགས་སྡང་བདེ་སྡུག་བཏུལ་མཁས་ན། །དགྲ་འདུལ་གཉེན་སྐྱོང་ཞན་ཡང་འགྱོད་པ་མེད། །ཡོད་བསྐྱངས་མེད་བཙལ་སྲིད་ལེན་དབེན་བྱས་ན། བསོག་འཇོག་མ་ཤེས་ཟེར་ཀྱང་འགྱོད་མེད་ཡིན། །ཆོས་ཀྱིས་ཚིམ་མེད་སྡིག་ལ་འཛེམ་མཁས་ན། །བློ་གྲོས་ལུགས་བཟང་བྱས་པ་འགྱོད་མེད་ཡིན། །དེ་བཞིན་བྱས་པས་འགྱོད་མེད་ཀུན་བསམ་ན། །རྣམ་དཀར་ལས་ལ་དགའ་སྤྲོ་འཕེལ་བར་འགྱུར། །དགེ་སྦྱོར་བྱེད་དུས་ལུས་ལ་ན་ཚ་དང་། །སེམས་ལ་བཟོད་མེད་སྡུག་བསྔལ་ཅི་བྱུང་ཡང་། །ལས་ངན་འཛད་རྟགས་ཡིན་གྱིས་དགའ་བ་སྒོམས། །ལས་འཕྲོ་མེད་ན་དམ་ཆོས་མི་དྲན་གསུངས། །ཡོད་ཀྱང་བདུད་ཀྱི་བར་ཆད་སྣ་ཚོགས་འཇུག །སྤྱིར་ན་ལོ་བརྒྱ་ལོན་པའི་རྒས་འཁོགས་ཀྱང་། །གང་འདོད་ཚེ་འདིར་བསམ་པ་མ་གཏོགས་པར། །འཆི་བསམ་དགེ་སྦྱོར་སྐད་ཅིག་བྱེད་མཁན་དཀོན། །ཁྱད་པར་ལས་ཀྱིས་གཅིག་ཏུ་མ་ངེས་ཏེ། །ལ་ལ་ཆུང་དུས་འཛིན་ཞེན་ཆུང་ན་ཡང་། །རྒས་ནས་འཛིན་ཆགས་ཞེན་པ་ཇེ་ཆེར་འགྲོ། །ལ་ལ་ལས་ངན་བརྡོལ་ཏེ་འཆི་སེམས་མེད། །ཚེ་འདིའི་དོན་དུ་སྡིག་པ་སྣ་ཚོགས་སོག །ལ་ལ་འཁོར་བར་མི་སྐྱོ་ངེས་འབྱུང་བྲལ། །ལོག་ལྟས་ཁེངས་ཏེ་དད་པ་གཏན་ནས་མེད། །ལ་ལ་རྒྱུན་པར་བདུད་ཀྱི་དབང་དུ་འཆོར། །དུག་ལྔ་ཆེར་འཁྲུགས་དགེ་སྡིག་ངོ་མི་ཤེས། །རང་མཐོང་ང་རྒྱལ་ཆོས་མིན་འདྲེས་པ་སོགས། །བསམ་འདས་བརྗོད་དཀའ་ཐམས་ཅད་བརྟག་དཔྱད་ཀྱིས། །ཡང་སྒོས་དགོན་སྡེར་གྲྭ་ཁྱུར་ཞུགས་ལགས་ཀྱང་། དང་པོ་ཟབ་ཆོས་ཐོས་ཚེ་སྐྱོ་ཤས་སྐྱེ། །ཕྱིས་ནས་ཐོས་པས་གོ་དྲེད་ཕན་པ་མེད། །མི་ནག་ཕོ་མོའི་རྗེས་སྙེག་{སྙོགས} ཟིན་མེད་ཀྱི། །བྱ་བ་སྣ་ཚོགས་འགྲན་སེམས་མ་གཏོགས་པ། །ཆོས་མཐུན་བསམ་སྦྱོར་སྐད་ཅིག་སྐྱེ་བར་དཀའ། །མདོར་ན་ཕོ་མོ་མཆོག་དམན་ཐམས་ཅད་ཀྱིས། ཚེ་འདིར་ཕོངས་རྒུད་འཛད་དོགས་མ་གཏོགས་པ། །ཕྱི་མའི་འགྲོ་དོན་བྱེད་བསམ་གཅིག་ཀྱང་དཀའ། །གལ་ཏེ་ལས་ཀྱིས་དམ་ཆོས་དྲན་ན་ཡང་། །དགེ་སྦྱོར་ཕྱིས་བྱ་བསམས་ཏེ་བསླུས་པ་མང་། །ཞེས་དང་། ཀ་ཡེ་རང་དོན་ཆོས་སྐུ་རྟོགས་ནས་གཞན་དོན་བྱེད་པ་ལ། །ཐབས་མཁས་བསྡུ་བ་རྣམ་བཞི་ཚད་མེད་དགོས་པར་གསུངས་པས་ན། །འུ་ཅག་རང་སེམས་མ་དུལ་གོང་ནས་གཞན་རྣམས་འདུལ་འདོད་ལ། །མཛུབ་མོ་ནང་དུ་བཀུག་ནས་རང་རྒྱུད་བརྟག་ཚེ་ནོངས་པར་འགྱུར། །རྟོགས་གྲོལ་མེད་བཞིན་གོང་ནས་རྟོགས་པ་ལྡན་རློམ་སེམས་པ་ནི། །སྦལ་བ་རང་ཉིད་སེང་གེ་ཡིན་རློམ་བྱས་འདྲ་འདི་ཀོ་མཚར། །ང་རྒྱལ་ཅན་གྱིས་མཉམ་ཉིད་ལྟ་བ་ཀློང་དུ་མི་ཕེབས་གསུངས། །ནང་རྟགས་ཕྱི་ལ་མ་ཤར་བར་དུ་སྐུ་ཁམས་བདེ་མོར་བཞུགས། །ད་དུང་ངོ་མཚར་ལྟད་མོ་བལྟ་རྒྱུ་མང་སྟེ་ཡ་རེ་ཆ། །གསུངས། དེ་བཞིན་ཞེ་ཆེན་སྒྲུབ་ཆེན་བསྟན་འཕེལ་གྱིས་ཀྱང་། ཕྱི་ནོར་རྫས་ལོངས་སྤྱོད་འགྱུར་བར་མཐོང་། །ནང་གང་ལའང་དགོས་མེད་ཤེས་པ་ན། །དེ་སྦྱིན་པ་ཀུན་གྱི་རྒྱལ་པོ་ཡིན། །ད་གསོག་ནས་སྦྱིན་པ་གཏོང་མི་དགོས། །ཕྱི་སྣང་བ་མི་རྟག་འགྱུར་བར་མཐོང་། །ནང་ཞེན་ཆགས་འཛིན་པ་གཅོད་ནུས་ན། །དེ་ཉམས་ལེན་རྒྱལ་པོ་ཞེས་སུ་གྲགས། །ད་ཙུག་ཙུག་བྱེད་ནས་སྒོམ་མི་དགོས། །ཕྱི་གནད་དོན་ཟབ་མོའི་ཐབས་ཀྱིས་ཟིན། །ནང་རང་རིག་ངང་དུ་སྤྱོད་ཤེས་ན། །དེ་གསང་སྔགས་ཟབ་མོའི་ཉམས་ལེན་ཡིན། །ད་ཤ་ཆང་མ་སྤངས་ན་ཡང་རུང་། །ཕྱི་འཁོར་འདས་ཆོས་ཀུན་བདེན་མེད་ཤེས། །ནང་སྒོམ་དུ་མེད་པའི་དོན་རྟོགས་ན། །དེ་མདོ་རྒྱུད་ཟབ་མོའི་དགོངས་དོན་ཡིན། །ད་དཔེ་ཆ་གཅེས་པོ་མེད་ཀྱང་རུང་། །ཕྱི་འགྲོ་དྲུག་ཕ་མའི་རང་བཞིན་ཤེས། །ནང་ཅི་ཕན་ཐབས་ལ་བརྩོན་ནུས་ན། །དེ་བྱང་ཆུབ་སེམས་དཔའི་བློ་སྦྱོང་ཡིན། །ད་སྙིང་རྗེ་ཁ་སྤྱང་སྒྲུབ་དོན་མེད། །ཕྱི་སྣང་བ་སྒྱུ་མའི་རང་བཞིན་ཤེས། །ནང་སྐྱེ་མེད་གནས་ལུགས་སྐྱོང་ཤེས་ན། །དེ་རང་རིག་དོན་གྱི་བླ་མ་ཡིན། །ད་བླ་མ་གཞན་ནས་འཚོལ་མི་དགོས། །ཕྱི་བརྗོད་བྱའི་ཆོས་རྣམས་བྲག་ཆ་འདྲ། ནང་བརྗོད་དུ་མེད་པའི་དོན་རྟོགས་ན། །དེ་ཤེས་པ་ཀུན་གྱི་རྒྱལ་པོ་ཡིན། །ད་ཤེས་བྱའི་སློབ་གཉེར་མེད་ཀྱང་རུང་། །ཕྱི་རང་ལུས་རི་ཁྲོད་དབེན་པ་མཐོང་། །ནང་སེམས་ཉིད་རྐྱེན་ཁར་མ་ཤོར་ན། །དེ་དབེན་པ་ཀུན་གྱི་མཆོག་ཅིག་ཡིན། །ད་དབེན་གནས་ཕྱི་ནས་བཙལ་མི་དགོས། །ཕྱི་སྤྲོས་བཅས་དགེ་བའི་ཞེན་པ་བྲལ། །ནང་རེ་དོགས་འཁྲུལ་པ་ཟད་པ་ན། །དེ་མཚན་མེད་དོན་གྱི་དགེ་སྦྱོར་ཡིན། །ད་གྲངས་ཀྱི་དགེ་སྦྱོར་བྱེད་དོན་མེད། །ཕྱི་སྣང་གྲགས་ཆོས་ལ་ཞེན་པ་སྤངས། །ནང་སྟོང་ཉིད་ཆོས་སྐུའི་ཉམས་ལེན་བརྩོན། །དེ་སྒོམ་པ་ཀུན་གྱི་རྒྱལ་པོ་ཡིན། ད་སྡུག་སྒུར་མཚམས་བཅད་བྱ་མི་དགོས། །ཕྱི་སྣང་བ་གཞལ་ཡས་ཁང་དུ་ཤེས། །ནང་བཅུད་གྱི་སེམས་ཅན་སངས་རྒྱས་བསྒོམ། །དེ་བསྐྱེད་རྫོགས་ཐབས་ཀྱི་མན་ངག་ཡིན། །ད་ཞིང་ཁམས་ལོགས་སུ་བསྒོམ་དུ་མེད། །ཕྱི་ཅིར་སྣང་སྐུ་གསུམ་ཞིང་ཁམས་མཐོང་། །ནང་སེམས་ཉིད་དོན་དང་སྦྱོར་ཤེས་ན། །དེ་སྐུ་གསུམ་ཞིང་ཁམས་དངོས་ཡིན་པས། །ད་ཆོས་སྐུ་ལོགས་ནས་བསྒོམ་དུ་མེད། །ཅེས་དང་། སྐྱབས་མེད་པའི་ཉམ་ཆུང་སྤྲང་པོ་ངས། །མགོན་བསླུ་མེད་དཀོན་མཆོག་རྣམ་གསུམ་ལ། །དུས་ནམ་ཡང་མ་བརྗེད་གསོལ་འདེབས་བགྱིས། །རང་སྐྱིད་ཀྱང་སྐྱིད་པ་འགྲོ་ལ་བསྔོས། །སྐྱིད་བདེ་བའི་ཆོས་ལ་ཆགས་ཞེན་སྤང་། །རང་སྐྱིད་མེད་སྡུག་ཟད་ངང་ལ་བསྡད། །སེམས་སྡུག་ཀྱང་སྔོན་གྱི་ལས་ཡིན་བསམ། །མ་འགྲོ་དྲུག་སྡུག་བསྔལ་བྱང་བར་སྨོན། །ལས་ཆོས་སུ་ཤེས་པའི་སྤྲང་སྨྱོན་ང་། །དུས་དེང་སང་ཅི་བྱས་ཆོས་སུ་སོང་། །ཞེས་དང་། བདག་སྤྲང་པོ་དགའ་བའི་སྐྱིད་གླུ་འདི། །ཁྱེད་དད་པ་ཅན་གྱི་སེམས་རྟེན་མཛོད། །སེམས་བལྟས་པས་མཐོང་བ་མ་བྱུང་སྟེ། །ད་མ་བལྟས་ན་ཡང་སལ་སེར་གདའ། །དོན་སྨྲ་བརྗོད་བྲལ་བའི་ངང་དུ་ཉལ། །འདི་སྤྲང་པོ་ང་ཡི་ལྟ་བ་ཡིན། །སེམས་གསལ་ལ་འཛིན་མེད་རང་གི་སེམས། །གང་བསམས་ཀྱང་སེམས་ཀྱི་ངང་དུ་གདའ། །སེམས་ཡེངས་སུ་མེད་ལ་སྒོམ་དུ་མེད། །འདི་སྒོམ་མེད་བདག་གི་སྒོམ་པ་ཡིན། །རང་བྱ་བྱེད་ཆོས་མིན་ཐམས་ཅད་བཞག །ལས་ཅི་བྱས་ཆོས་སུ་འགྲོ་བར་བྱས། །དོན་བྱར་མེད་ངང་དུ་ཅི་བདེར་འདུག །འདི་སྨྱོ་རྒན་ང་ཡི་སྤྱོད་པ་ཡིན། །སེམས་གཡོ་སྒྱུ་མེད་ཅིང་གུས་ལྡན་པས། རང་བསྟན་ལ་རབ་དགའ་ལྷག་བསམ་ལྡན། །ཚེ་གཅིག་ཏུ་སྒྲུབ་པའི་རྒྱལ་མཚན་བཙུགས། །འདི་སྒྲུབ་ཆེན་བདག་གི་དམ་ཚིག་ཡིན། །མ་འགྲོ་དྲུག་རྒྱལ་བའི་ཞིང་དུ་སྦྱངས། །རང་སྒོ་གསུམ་ལྷ་སྔགས་ཆོས་སྐུར་ཤར། །ད་རེ་དོགས་མེད་པའི་ངང་དུ་ཉལ། །འདི་རྟོགས་ལྡན་ང་ཡི་འབྲས་བུ་ཡིན། །ལར་ལྟ་སྒོམ་སྤྱོད་འབྲས་ཐམས་ཅད་ལ། །དོན་བརྟགས་ན་སེམས་ལས་གཞན་དུ་མེད། །སེམས་སྐྱེ་མེད་ཆོས་སྐུའི་ངང་ཉིད་ནས། །རང་རིག་པ་ཀུན་ཏུ་བཟང་པོར་ཤར། །དེས་མ་རྟོགས་འགྲོ་བའི་དོན་མཛད་སྣང་། །ཨེ་ཧེ་ཧེ་བྱ་དང་བྱེད་པོ་ཀུན། །བདག་རང་ལས་གཞན་ཞིག་ཅང་ཡོད་དམ། །ད་གཏད་མེད་ངང་དུ་ཅི་བདེར་ཉལ། །སེམས་ཁོང་གྲོལ་སྒྲུབ་པའི་རྒྱལ་མཚན་འཛུགས། །ཆོས་ཅི་སྐྱེལ་ཆོས་ཀྱིས་འདའ་བར་མཛོད། །གཞན་སུ་མ་མགུ་ཡང་ཞེ་བློ་བདེ། །ཁྱེད་སྙིང་གཅེས་གྲོགས་ལ་སྙིང་གཏམ་ཡིན། །སྙིང་དམར་པོར་བཏོན་ཀྱང་འདི་ལས་ཅི། །མ་མཁའ་འགྲོ་སྟོང་གི་སྙིང་ཁྲག་ཡིན། །ཁྱེད་འདི་ལ་ཉམས་བཞེས་མཛད་པར་ཞུ། །གསུངས། མདོར་ན་ཞེ་ཆེན་པ་ཆེན་པོ་ཆོས་རྗེ་ངྷརྨ་རཱ་ཛས། དངོས་གཞི་རང་སེམས་གཉུག་མ་འདི། །བློས་བྱས་ཆོས་དང་མ་འདྲེས་པས། །བལྟ་བྱ་ལྟ་བྱེད་དང་བྲལ་བའི། །ཐ་མལ་ཤེས་པའི་རང་ངོ་སྐྱོངས། །སྒོམ་རྒྱུ་རྡུལ་ཙམ་ལོགས་ན་མེད། །རྣམ་རྟོག་འཕྲོ་འདུ་གང་ཤར་ཡང་། །ཤར་གྲོལ་ཆུ་རླབས་ཆུར་ཐིམ་འདྲ། །གང་ཤར་རིག་པས་ཟིན་ཙམ་ན། །རྣམ་རྟོག་ཆུ་ལ་རི་མོ་འདྲ། །བལྟ་བྱ་ལྟ་བྱེད་ཤེས་པ་ཡང་། །གཉིས་ཀ་གཞི་མེད་རྩ་བྲལ་དུ། །སོང་ན་ཉམས་ལེན་བྱས་པའི་རྟགས། །དེ་ལ་འཛིན་ཞེན་བཟང་འཛིན་སོགས། །མ་ཞུགས་སྐྱོང་བ་གནད་འགག་ཡིན། །དེ་ལ་ཡང་ཡང་གོམས་པ་ན། །སྒོམ་མེད་རང་མདངས་འབྲལ་མི་ཤེས། །སྒོམ་མེད་ཡེངས་མེད་བློ་འདས་པའི། །ཆོས་ཉིད་དོན་གཅིག་རྟོགས་ནས་འོང་། །རྣམ་རྟོག་དྲི་མ་མ་དག་པར། །རང་རིག་ཡེ་ཤེས་རྟོགས་མི་སྲིད། །སེམས་དང་རིག་པ་དབྱེ་ཤེས་པ། །ཆོས་རྫོགས་པ་ཆེན་པོའི་ཁྱད་ཆོས་ལགས། །བལྟས་པས་མཐོང་རྒྱུ་ཅང་མེད་པས། །ལྟ་མཁན་རང་གི་ངང་ལ་ཞོག །སྒོམ་མེད་རང་མདངས་ཤེས་པ་སྐྱོངས། །སྤྱོད་པ་ཚུལ་འཆོས་དགག་སྒྲུབ་སྤོངས། །འབྲས་བུ་རྩོལ་མེད་རང་ལ་རྫོགས། །ལྟེམ་རྐྱང་མེད་པའི་མོས་གུས་ཀྱིས། །བླ་མར་གསོལ་གདབ་དབང་བཞི་ལོངས། །ཐུགས་ཡིད་བསྲེས་ལ་མཉམ་པར་ཞོག །བློ་འདས་ཆོས་སྐུ་ནང་ནས་འཆར། །གནད་ཀྱི་མདོ་འགག་སྙིང་གཏམ་ཡིན། །ཞེས་དང་། གནས་དབེན་པར་གཅིག་པུར་འདུག་པའི་ཚེ། །བུས་བག་མེད་སྤྱོད་པ་མ་བྱེད་པར། །གནས་འཁོར་བར་ཞེན་པ་གཏིང་ནས་ལོག །ལྷ་དཀོན་མཆོག་གསུམ་ལ་བློ་རྩེ་གཏོད། །བྱམས་སྙིང་རྗེ་བྱང་ཆུབ་སེམས་བསྐྱེད་སྦྱོངས། །ཕ་བླ་མ་ལ་གསོལ་བ་སྙིང་ནས་ཐོབ། །སེམས་གར་འགྲོ་འདིར་འགྲོར་མ་བཏང་བར། །དྲན་ཤེས་བཞིན་གཉིས་ཀྱི་ཐག་པས་ཟུངས། །རི་ཁྲོད་དུ་མ་ཚུགས་གྲོང་ཡུལ་འགྲིམ། །བཟང་བརྫུ་ཞིག་དགོས་པས་རི་ཁྲོད་འགྲོ། །འགྲོ་འདུག་གི་ངང་ལ་མི་ཚེ་ཟད། །དེ་འདྲ་ཡི་བྱ་བྱེད་མ་མང་ལགས། །ཆོས་ཀུན་གྱི་རྩ་བ་སེམས་ལ་ཐུག །དེ་རང་ངོ་བལྟས་པས་སྟོང་པ་ཡིན། །འགྱུ་བ་ནི་སྟོང་གསལ་ངང་དུ་གྲོལ། །གནས་འགྱུ་ལ་དགག་སྒྲུབ་མ་མཛད་པར། །གང་ཤར་ལ་བཟོ་བཅོས་མེད་པར་ཞོག །ཚོགས་དྲུག་གི་ཡུལ་སྣང་གང་ཤར་ཡང་། །དགག་སྒྲུབ་དང་ཆེད་འཛིན་མ་བྱེད་པར། །རང་ས་རུ་ཞོག་དང་སྒྱུ་མར་འཆར། །སྨིག་རྒྱུ་ལ་ཆུ་རགས་བྱེད་པ་འཁྲུལ། །རྐྱེན་བཟང་ངན་གྱི་བར་ཆད་བྱུང་ཙ་ན། །ཕ་བླ་མ་ལ་གསོལ་བ་ཡང་ཡང་ཐོབ། གེགས་སེལ་དང་བོགས་འདོན་དགོས་ཙ་ན། །རྗེ་བླ་མའི་གདམས་ངག་དཔེ་ཆར་ལྟོས། །དབེན་པ་རུ་སྐྱོ་སྣང་བྱུང་གྱུར་ན། །གྲུབ་ཐོབ་གོང་མའི་རྣམ་ཐར་ལྟོས། །ད་རང་དབང་རང་ལ་ཡོད་དུས་འདིར། །དམ་ཆོས་ཤིག་རྒྱུད་ལ་སྐྱེ་ངེས་མཛོད། །ན་བ་དང་འཆི་བ་བྱུང་ཙ་ན། །སེམས་འཇིགས་སྐྲག་མེད་པའི་གདེང་ཐོབ་དགོས། །མི་ཚེ་སྐད་ཅིག་ཡུད་ཙམ་ལ། །གཏན་གྱི་འདུན་མ་མི་སྒྲུབ་པར། །འཇིག་རྟེན་བྱ་བས་གཡེང་བྱེད་པ། །ཕུང་ལ་དེ་བས་ཆེ་བ་མེད། །བླ་མ་སངས་རྒྱས་མཇལ་དུས་འདིར། །དད་པ་རྩེ་གཅིག་མི་བྱེད་པར། །སྐུར་འདེབས་ལོག་ལྟ་བྱེད་པ་རྣམས། །སྡིག་ལ་དེ་བས་ཆེ་བ་མེད། །དལ་འབྱོར་ལན་གཅིག་ཐོབ་དུས་འདིར། །དཀར་པོ་དགེ་བ་མི་སྒྲུབ་པར། །སྡིག་ལ་མི་ཚེ་བསྐྱལ་བ་ཀུན། །གྲོས་ལ་དེ་བས་ཉེས་པ་མེད། །ཚེ་ལ་ལོང་མེད་དུས་འདི་ལ། །ཉིན་མོ་ཁ་ཡེངས་མིག་ཡེངས་དང་། །མཚན་མོ་གཉིད་ལ་བསྐྱལ་བྱེད་པ། །ནོར་ཚབས་དེ་ལས་ཆེ་བ་མེད། །རང་མགོ་རང་གིས་འདོན་དུས་འདིར། །འགྱོད་མེད་གྲབས་སུ་མི་བྱེད་པར། །མི་ཚེ་སྟོང་ཟད་བྱེད་པ་ཀུན། །གྱོང་ལ་དེ་བས་ཆེ་བ་མེད། །ཁམས་གསུམ་འཁོར་བའི་སེམས་ཅན་རྣམས། །ལན་གཅིག་སྐྱེས་པའི་ཐ་མ་དེར། །འཆི་བ་མ་གཏོགས་འགྲོ་ས་མེད། །དེ་ཚེ་ཕན་པ་ཆོས་ལས་མེད། །འདུས་བྱས་ཆོས་ལ་སྙིང་པོ་མེད། །འཁོར་བའི་ལས་ལ་ཟིན་པ་མེད། །ཇི་ཙམ་ཡོད་ཀྱང་ཆོག་ཤེས་མེད། །འདོད་པའི་བློ་ལ་ཟད་པ་མེད། །བསགས་ཀྱང་ཤི་དུས་ཁྱེར་ཐབས་མེད། །ངན་སོང་སྡུག་བསྔལ་བཟོད་ཐབས་མེད། །བླ་མ་མ་གཏོགས་རེ་ས་མེད། །དེ་ཕྱིར་སྙིང་ལ་རུས་པ་སྐྱེད། །གཏན་བདེ་ཚགས་སུ་ཚུད་པར་མཛོད། །ཅེས་གསུངས། དེས་ན་ཨོ་རྒྱན་དུས་གསུམ་མཁྱེན་པས། ལྟ་བའི་ཕྱོགས་སུ་སྤྱོད་པ་དང་། སྤྱོད་པའི་ཕྱོགས་སུ་ལྟ་བ་མ་ཤོར་བ་གལ་ཆེ་བར་གདམས་པ་བཞིན། མཉམ་བཞག་ཏུ་ལ་བཟླ་བ་དང་། རྗེས་ཐོབ་སྤྱོད་པས་ཤན་འབྱེད་ཚུལ་ཇི་སྙེད་ཅིག་གསུངས་པ་རྣམས་ནང་རང་ཉམས་དང་དཔགས་ཏེ། གཙོ་བོར་གཞི་ཚུལ་ཁྲིམས་ཀྱིས་བཟུང་། ཐག་ལྟ་བས་བཅད། ཉམས་སུ་ཏིང་ངེ་འཛིན་གྱིས་བླངས། བོགས་མོས་གུས་ཀྱིས་འདོན། གེགས་རེ་དོགས་དང་བདེན་ཞེན་བསལ། གྲོགས་རོ་སྙོམས་ཀྱི་སྤྱོད་པ་ལམ་དུ་ཁྱེར། དུས་རྒྱུན་དུ་ངེས་འབྱུང་དང་འཆི་བ་མི་རྟག་པ་བསམས་ཏེ་ཆོས་ལ་སྐུལ་ལྕག་འདེབས། རྟག་ཏུ་དྲན་ཤེས་བག་ཡོད་དང་མ་བྲལ་བར་སྟོང་ཉིད་སྙིང་རྗེ་ཐབས་ཤེས་བསྐྱེད་རྫོགས་སོགས་ཟུང་དུ་འཇུག་པའི་ལམ་ཚང་ལ་མ་ནོར་བར་བསླབ་སྟེ། རང་རྒྱུད་ཀྱི་བདག་འཛིན་ཉོན་མོངས་ཀྱི་གཉེན་པོར་ཅི་འགྲོ་བྱ། སྤངས་བསྒྱུར་ཁྱེར་གསུམ་རང་གི་བློ་ནུས་དང་བསྟུན། རྟག་པར་ཆོས་བརྒྱད་མགོ་སྙོམས་ཏེ་དམན་པའི་ས་བཟུང་། ཆོས་དང་གང་ཟག་གང་ལའང་སྐུར་བ་མི་གདབ། བཟང་ངན་འབྲིང་གསུམ་སྤྱི་བོར་བཀུར་བདེ་སྡུག་ན་ཚ་སོགས་སྐྱིད་སྡུག་གང་བྱུང་ཡང་སྔོན་ལས་སུ་ཤེས་པས་ལམ་དུ་ཁྱེར། རྐྱེན་ཅི་བྱུང་ཡང་རྐྱེན་ཐོག་ཏུ་ཆོས་མ་ཤོར་བར་བྱ། འགྲོ་དོན་སེམས་བསྐྱེད་བཟང་པོ་དང་ལྡན་པས་གཞན་ཕན་གྱི་སྨོན་ལམ་རྒྱ་ཆེན་པོ་གདབ། ཕྱི་ཚུལ་གཞན་གྱིས་མ་མཐོང་བར་ནང་དུ་རང་རྒྱུད་ཀྱི་ཉོན་མོངས་ཅི་ཐུལ་དང་ཉམས་ལེན་གྱི་བོགས་ཅི་ཐོན་མཛད་ན་དོན་གྱི་གནད་ཐམས་ཅད་ཚང་ཁུལ་ལགས། རང་ལ་མེད་པའི་ཟོབ་གཏམ་ཟང་མ་འདིས། །གཞན་ལ་ཕན་པའི་དོན་དུ་འགྱུར་བ་ཅི། །རྒྱུས་ཤེས་རྣམས་གྱིས་མཐོང་ན་ཁྲེལ་བའི་རྒྱུ། །འོན་ཀྱང་མང་ཐོས་ཆོས་ཀྱི་སྤྱན་ལྡན་པའི། །གསུང་གིས་བསྐུལ་དོན་རྔ་ལ་དབྱུ་གུ་བཞིན། །ཕུལ་འདི་དད་དམ་གཙང་མའི་ནང་མཆོད་དུ། །བཞེས་ནས་ནོངས་གྱུར་གཟིགས་ན་བཟོད་པར་གསོལ། །དགེ་བས་གོང་མའི་རྒྱལ་ས་ཟིན་པར་སྨོན། །ཞེས་པའང་བསླབ་གསུམ་སྦྱངས་ཡོན་གྱིས་མངོན་པར་མཐོ་བའི་དགེ་བའི་བཤེས་གཉེན་ཆེན་པོ་འཇིགས་མེད་སྒྲ་དབྱངས་ཀྱི་བཞད་ངོར། ཞེ་ཆེན་བན་རྒན་པདྨ་རྣམ་རྒྱལ་གྱིས་རང་དགོན་གྱི་བླ་མ་མཁས་གྲུབ་གོང་མ་རྣམས་ཀྱི་གསུང་ལས་ཅུང་ཟད་བཏུས་ཏེ་ཕུལ་བ་དགེ། །།
ཉམས་ལེན་གྱི་མདོ་འགགཅུང་ཟད་བཤད་པ།
༄༅། །ཉམས་ལེན་གྱི་མདོ་འགགཅུང་ཟད་བཤད་པ། རྒྱལ་བ་གཉིས་པ་དཔལ་བསམ་ཡས་པ་ཀུན་མཁྱེན་ངག་གི་དབང་པོ་ལ་ཕྱག་འཚལ་ལོ། །དེ་ལ་སྐབས་སུ་བབ་པའི་ཉམས་ལེན་གྱི་མདོ་འགག་ཅུང་ཟད་བཤད་ན། ཐོག་མར་བདེ་བའི་སྟན་ལ་ལུས་གནད་རྣམ་སྣང་ཆོས་བདུན་བདེ་ལུགས་སུ་ལྷོད་ཆ་དང་བཅས་པར་བཅའ། ཁྱད་པར་མིག་ཡེ་ཤེས་འཆར་བའི་སྒོ་ཡིན་པས་ཐད་དྲང་གི་ནམ་མཁར་རྟེན་མེད་དུ་ཧ་རེ་བལྟ། ངག་གནད་རླུང་རང་བབས་སུ་འབྱུང་འཇུག་ཡང་སྣ་ནས་མི་བྱ་བར་ཁ་ནས་རབ་ཏུ་དལ་བུས་བྱ་སྟེ། འདི་དག་རེ་རེ་བཞིན་དགོས་པ་ཆེན་པོ་ཡོད་པ་ཡིན་པས་གཡས་ཆུང་དུ་མི་གཏོང་བ་གལ་ཆེའོ། །དེ་ནས་ངེས་འབྱུང་སྐྱོ་ཤས་སྙིང་རྗེ་བྱང་ཆུབ་ཀྱི་སེམས་སྒོམ་པ་སྔོན་དུ་འགྲོ་བས། རང་གི་སྤྱི་བོར་པད་ཟླའི་སྟེར་དུ་རྩ་བའི་བླ་མ་ཉིད་རྒྱན་ཆ་ལུགས་དཀྱུས་མའི་རྣམ་པར་བསྒོམས་ལ། མོས་གུས་མཆི་མ་འཁྲུགས་པའི་སྒོ་ནས་ཟབ་ལམ་གྱི་རྟོགས་པ་ཁྱད་པར་ཅན་མྱུར་དུ་རང་གི་རྒྱུད་ལ་སྐྱེད་པར་གསོལ་བ་གདབ། དེ་ཡང་ཁ་ཙམ་ཚིག་ཙམ་གྱིས་མི་ཕན་ཏེ། རྫོགས་པ་ཆེན་པོའི་རྟོགས་པ་རྒྱུད་ལ་སྐྱེ་བ་ལ་བརྒྱུད་ལྡན་བླ་མའི་ཐུགས་རྒྱུད་ཀྱི་བྱིན་རླབས་འཕོ་དགོས། དེ་འཕོ་བ་སློབ་མའི་མོས་གུས་ལ་རག་ལས་པའི་ཕྱིར་འདི་ཁོ་ན་གཙོ་ཆེ་བས་བཏོན་བཏོན་སྒྲུབ་སྒྲུབ་མང་པོའི་བྱས་ཡུས་མི་འདྲེན་པར་ཕུར་ཚུགས་སུ་གསོལ་བ་འདེབས་པ་གལ་ཆེ། མཐར་དབང་བཞི་ལེན་པའི་དམིགས་གནད་དང་བཅས་བླ་མ་དང་རང་སེམས་དབྱེར་མེད་དུ་བསྲེས་ཏེ་གཤིས་བདེ་བ་ཆེན་པོ་གསལ་སྟོང་འཛིན་བྲལ་དུ་སྐྱོང་བ་སྟེ། དེའང་ཅི་ཡང་དྲན་མེད་ནག་ཐོམ་ལུང་མ་བསྟན་པ་ཀུན་གཞིའི་ངང་དེ་བསྒོམ་དུ་འདོད་པ་མ་ཡིན། ཀུན་གཞིའི་རྣམ་ཤེས་གསལ་རིག་ཙམ་གནས་ཆ་ཅན་དེའི་ངང་དུ་བསྒོམ་པ་མ་ཡིན། དེ་བཞིན་དུ་མི་རྟོག་པའི་ཉམས་ཧད་དེ་བ་དེའི་ངང་དུ་བསྒོམ་པ་མ་ཡིན། ཡུལ་དུ་ཤར་ཟིན་པའི་རྣམ་རྟོག་མི་འགྱུ་དགུ་འགྱུ་དེ་ཀ་བསྒོམ་དུ་འདོད་པ་མ་ཡིན། འོ་ན་གང་ཞེ་ན། རྣམ་རྟོག་སྔ་མ་འགགས། ཕྱི་མ་མ་སྐྱེས། ད་ལྟ་བ་ལ་བློའི་རྩིས་གདབ་དང་བྲལ་བའི་རང་རིག་ཟང་ཀ་མ་གསལ་སྟོང་ཟུང་འཇུག་ནམ་མཁའ་ལྟ་བུའི་དགོངས་པ་འཆར་བ་དེ། བློ་འདས་རྫོགས་པ་ཆེན་པོ་ཀ་དག་ཁྲེགས་ཆོད་ཆོས་ཟད་ཟང་ཐལ་རྗེན་པ་ཡིན་པས་དེ་ཉིད་ངོ་ཤེས་པར་བྱས་ལ་རང་བབ་བདེ་ལུགས་སུ་འཇོག་པ་ལ་ཉམས་ལེན་སྐྱོང་བ་ཞེས་བྱའོ། །ལྟ་སྒོམ་སྤྱོད་གསུམ་གང་གི་སྐབས་སུའང་འདི་ཉིད་རྗེན་ལ་འབུད་ཤེས་དགོས། དེ་མ་ཤེས་ན་གཅིག་གིས་སྐྱེ་འགག་གནས་གསུམ་དང་བྲལ་བར་བསྟན། གཅིག་གིས་དེ་ལྟ་བུའོ་སྙམ་དུ་བསམ་པས་མིང་མེད་མིང་དུ་སོང་བ་བཞིན་བློས་བྱས་ཡིད་དཔྱོད་ཀྱི་གཟེབ་ནས་ནམ་ཡང་རྟོགས་པའི་དུས་མི་ཡོང་། བློ་འདས་རིག་སྟོང་རྗེན་པའི་ཆོས་སྐུ་འདི་བརྗོད་པའི་ཚིག་དང་བརྟག་དཔྱད་ཀྱི་བློས་དོན་སྤྱི་ཙམ་ལས་གཏན་ལ་འབེབས་མི་ནུས་ཀྱང་། བླ་མའི་བྱིན་རླབས་དང་རང་གི་སྒོམ་སྟོབས་འཛོམས་པས་ཇི་ཞིག་ན་བྱིས་པས་བསམ་མནོ་རྙེད་པ་བཞིན་སྒྲོ་འདོགས་ནང་ནས་ཆོད་ཡོང་བས་མི་བསྐྱུར་བར་རྒྱུན་དུ་བརྩོན་འགྲུས་ཀྱི་སྒོམ་པ་གལ་ཆེའོ། །ལས་དང་པོ་བའི་སྐབས་སུ་ཧ་ཅང་ཀློད་ཆེས་ན་འཁྲུལ་འབྱམས་སུ་འགྲོ་ཉེན་ཆེ་བས་དྲན་རྫི་མི་བརྗེད་པར་བརྟེན་དགོས། གནས་འགྱུ་རིག་གསུམ་གང་གི་སྐབས་སུའང་རིག་མཁན་གྱི་རིག་པ་སོ་མའི་ངང་དུ་ཅེར་གྱིས་བལྟས་ཏེ་སྒོམ་པ་གནད་གལ་པོ་ཆེའོ། །དེ་ལྟར་སྒོམ་པའི་སྐབས་སུ་རིག་པ་ལྷོད་པའི་རྟགས་སུ་རྣམ་རྟོག་འཕྲོ་རྒོད་དང་ཉོན་མོངས་པའི་རྟོག་ཚོགས་སྔར་བས་མང་བ་སྙམ་པ་དང་། བདེ་གསལ་མི་རྟོག་པ་ལ་སོགས་པའི་ཉམས་ཀྱི་འཆར་སྒོ་མཐའ་ཡས་པ་ཞིག་འཆར་བས་དེ་དག་གང་ལའང་རེ་དོགས་དགག་སྒྲུབ་ཞེན་འཛིན་མི་བྱ་བར་ཤར་མཁན་གྱི་རིག་པ་ལ་ཅེར་གྱིས་བལྟས་ལ་བསྒོམས་པས་དེ་དག་གྲོགས་སུ་འཆར་བ་ཡིན། ཞེན་འཛིན་བྱུང་ན་འཆིང་བར་འགྱུར་རོ། །ཤེས་པ་ཧ་ཅང་བྱིང་རྨུགས་སུ་གྱུར་ཏེ་རིག་པའི་གསལ་ཆ་མ་ཐོན་ན་སྙིང་ཁར་ཨའམ་འོད་ཀྱི་གང་བུ་བསྒོམས་ལ་དེ་ཉིད་སྤྱི་བོ་ནས་རྒྱངས་ཀྱིས་ཐོན་ཏེ་མདའ་གང་ཙམ་གྱི་ནམ་མཁར་ལྡིང་སྟབས་སུ་གནས་པར་སྒོམ་ལ་རླུང་ཕྱིར་བཟུང་བས་སེལ་ལོ། །ཧ་ཀྱང་རྒོད་ཆེས་ན་ལུས་སེམས་ཁོང་ལྷོད་ལྟ་སྟངས་སྨད། སྣ་རྩེར་ཐིག་ལེ་བསྒོམས་པས་སེལ་ལོ། །གཞན་ཡང་། སྐབས་འགར་སྤྲིན་མེད་པའི་ནམ་མཁའ་དྭངས་པའི་ཚེ་ཉི་མ་ལ་རྒྱབ་བསྟན་ནས་མིག་ནམ་མཁའི་དཀྱིལ་དུ་གཏད་ཅིང་རླུང་རབ་ཏུ་དལ་བར་ཕྱིར་བཟུང་བས་སྐད་ཅིག་ལ་རིག་སྟོང་ཟང་ཐལ་རྗེན་པའི་ཆོས་སྐུ་ཁོང་ནས་འཆར་བ་ནི་ནམ་མཁའ་སུམ་ཕྲུགས་ཀྱི་དགོངས་པ་ཞེས་མཆོག་ཏུ་ཟབ་པའི་མན་ངག་གོ །ཡང་ལུས་ཆོས་བདུན། རླུང་རང་བབ། སེམས་རྟོག་མེད་དུ་དར་ཅིག་བཞག་རྗེས། རྐང་ལག་བརྒྱངས་ཏེ་གན་རྐྱལ་དུ་ཉལ་ནས་མིག་ནམ་མཁར་གཏད། ཧ་དྲག་པོ་གསུམ་བརྗོད་ལ་རླུང་ཕྱིར་བཏང་སྟེ་སེམས་རང་སོར་བཞག་པས་རྟོག་བྲལ་ཆོས་ཟད་ཀྱི་དགོངས་པ་འཆར་བ་ཡིན་ནོ། །ཡང་ལུས་གནད་ཆོས་བདུན་སོགས་སྔར་ལྟར་རང་བབ་ཏུ་བཞག་པའི་ཚེ་གང་སྣང་ཡང་སྣང་ཐོག་ཏུ་མི་བཞག་པར་སྟོང་ཐོག་གི་སྟེང་ཕྱི་ནང་བར་མེད་ཧར་སངས་སུ་བུན་ནེ་ཤིག་གེ་ལྟ་སྟངས་བཅུན་ནས་བཞག་པས་སྟོང་པ་ནམ་མཁའ་ལྟ་བུའི་རྟོགས་པ་འཆར་རོ། །ཡང་སྟོང་ཐོག་ཏུ་མི་བཞག་པར་སྣང་བ་རང་གསལ་འཛིན་མེད་ཀྱི་ངང་དུ་བཞག་པས་སྣང་བ་འཛིན་མེད་ཁྲོལ་ཁྲོལ་གྱིས་རྟོགས་པ་འཆར་རོ། །ཡང་རིག་པའི་དྭངས་ནས་འཕྲོ་འདུའི་རྟོག་པ་འཆར་བ་ལ་གཏད་པས། རྟེན་མེད་འཛིན་མེད་དུ་གྲོལ་བ་རྦ་རླབས་ཆུར་ཐིམ་པ་ལྟ་བུའི་རྟོགས་པ་འཆར་རོ། །འདི་དག་ནི་ཉམས་བཙན་ཐབས་སུ་སྐྱེ་བས་ངེས་ཤེས་རྒྱུད་ལ་སྐྱེད་པའི་ཐབས་ཟབ་མོའོ། །མདོར་ན་སྔར་སྨོས་པའི་རིག་པ་རང་གནས་ཀྱི་བསམ་གཏན་ཀ་དག་ཆོས་ཟད་ཀྱི་དགོངས་པ། དགེ་སྡིག་སྐྱོན་ཡོན་ལས་འདས་པ། གྲུབ་བསལ་འཕོ་འགྱུར་དང་བྲལ་བ། གཟུང་འཛིན་བློ་འདས་ཀྱི་ཡེ་ཤེས། དབུ་ཕྱག་རྫོགས་གསུམ་གྱི་དགོངས་པའི་སྐྱེལ་སོ་མཐར་ཐུག་པ་དེ་ཉིད་དུས་ཐམས་ཅད་དུ་ཡོད་པས་ངོ་ཤེས་པར་བྱས་ཏེ་དེའི་ངང་དུ་ཆེད་དུ་རྩོལ་བས་མ་བསྒྲིམས་མ་ཡེངས་པས་ཕྱལ་བར་མ་སོང་བར་རང་བབ་མ་བཅོས་ཆུ་བོའི་རྒྱུན་གྱི་རྣལ་འབྱོར་སྐྱོང་བ་ལ་ཉམས་ལེན་གྱི་སྙིང་པོ་འདུ་བ་ཡིན། དེའི་སྐབས་སུ་ཚོགས་དྲུག་གི་ཤེས་པ། དུག་ལྔའི་རྟོག་ཚོགས། ཉམས་ཀྱི་འཕེལ་འགྲིབ་གང་དང་ཅི་ཤར་ཡང་ནམ་མཁའ་ལ་འཇའ་ཚོན་ནམ་ཆུ་ལ་རྦ་རླབས་བཞིན་རིག་པ་བྱང་ཆུབ་སེམས་ཀྱི་རྩལ་ལས་རོལ་པར་ཤར་བ་སྟེ་སྣང་ན་སྣང་བར་མཉམ། སྟོང་ན་སྟོང་པར་མཉམ། བདེན་ན་བདེན་པར་མཉམ། རྫུན་ན་རྫུན་པར་མཉམ། ཐམས་ཅད་རིག་པའི་ཆོ་འཕྲུལ་ལས་གཞན་མེད་པས་དགག་སྒྲུབ་བླང་དོར་སྤང་གཉེན་ཞེན་འཛིན་གང་ཡང་མི་བྱ་བར་ཤར་མཁན་གྱི་རིག་པ་སོ་མའི་ངང་དུ་ཕྱམ་བདལ་འཛིན་མེད་དུ་ཀློད་པས་གང་ཤར་རང་གྲོལ་རྟོགས་པའི་རྩལ་སྦྱང་བར་གཅེས་སོ། །དེའི་ཚེ་གནས་པའི་ཆ་ཞི་གནས་དང་། རིག་སྟོང་ཟང་ཐལ་རྗེན་པར་རྟོགས་པའི་ཆ་ནས་ལྷག་མཐོང་ཞེས་བཏགས་ཀྱང་དོན་ལ་སོ་སོར་དབྱེར་མེད་དོ། །རིག་པའི་ངོ་བོ་སྟོང་པར་རྟོགས་པས་རྟག་པའི་མཐའ་ལས་གྲོལ། རང་བཞིན་གསལ་བར་མཐོང་བས་ཆད་པའི་མཐའ་ལས་གྲོལ། བདེ་གསལ་མི་རྟོག་པའི་ཉམས་ལ་སྒོམ་དུ་མི་རེ་བས་ཁམས་གསུམ་གྱི་ས་ལས་གྲོལ། གཉེན་པོའི་འཛིན་སྟངས་ཞིག་པས་གོལ་སྒྲིབ་གཤིས་ལ་མི་གནས། བློས་བྱས་ཡིད་དཔྱོད་ཀྱི་གཟེབ་ནས་བྱང་ཆུབ་ཕྱི་དུས་ལ་མི་རེ་བར་ད་ལྟ་ཉིད་ནས་སྐུ་གསུམ་རང་ཆས་སུ་གནས་པ་ཉིད་ལམ་དུ་བྱེད་པ་འདི་རྫོགས་པ་ཆེན་པོའི་ཁྱད་པར་གྱི་ཆོས་སོ། །དེ་ལྟར་རྟོགས་པའི་རྣལ་འབྱོར་པ་ཅི་ལྟར་གནས་ཀྱང་བློ་བདེ་བའི་ཉི་མ་ཁོང་ནས་འཆར་བ་ལགས་སོ། །གེགས་དང་གོལ་ས་ཐམས་ཅད་རེ་དོགས་བདེན་ཞེན་འཛིན་པ་ལས་བྱུང་བས་གང་ལའང་མི་འཛིན་པ་གལ་ཆེའོ། །ལུས་ལ་ན་ཚ། སེམས་ལ་སྡུག་བསྔལ། ཉོན་མོངས་ཞེན་འཛིན་དགག་སྒྲུབ་རང་མཚན་པ་གང་དང་ཅི་ཤར་ཡང་དེ་ཉིད་ངོས་བཟུང་ལ་བླ་མའི་གསོལ་འདེབས་བྱིན་ཕེབས་པ་གཅིག་བྱས་ཏེ། དགག་སྒྲུབ་ཀྱི་ཤེས་པ་དེ་གང་ནས་བྱུང་གང་ན་གནས་གང་དུ་སོང་སོགས་གོ་སྤྱི་ཙམ་དུ་མ་སོང་བར་ཞིབ་ཏུ་བརྟགས་ཤིང་བཙལ་ན། གང་དུའང་མ་གྲུབ་ཅི་ལའང་མི་གནས། འདི་ཞེས་ཚིག་གིས་མི་མཚོན་པའི་གཟུང་འཛིན་བློ་འདས་གྱི་ཡེ་ཤེས་རིག་སྟོང་རྗེན་པའི་ཆོས་སྐུ་ཁོང་ནས་མི་འཆར་མི་སྲིད་པས། དེ་འཆར་བ་དང་དེ་ཁའི་ངང་བསྐྱངས་པས་གེགས་དང་གོལ་ས་མཐའ་དག་རང་གྲོལ་དུ་འགྲོ་བ་ཡིན་ནོ། །བོགས་འདོན་ཐམས་ཅད་ཀྱི་རྒྱལ་པོ་བླ་མའི་མོས་གུས་ཡིན་པར་ཐ་མལ་མི་རུ་བཟུང་བའི་བློ་སྤངས་ཏེ། སངས་རྒྱས་དངོས་སུ་མཐོང་བའི་དད་མོས་དང་མ་བྲལ་བ་གཅེས་སོ། །གཞན་ཡང་། མི་རྟག་པ་དང་། སྙིང་རྗེ། བསྐྱེད་རིམ། རྫོགས་རིམ་མཚན་བཅས་མཚན་མེད་རྣམས་སྤེལ་མར་བསྒོམ་ན། གཅིག་བོགས་གཅིག་གིས་ཐོན་ཏེ་ཆོད་ཤིན་ཏུ་ཆེ་བ་ཡིན། ཐུན་རྗེས་སུ་བསྔོ་བ་དང་། ཐུན་མཚམས་སུའང་ཆོས་ཐམས་ཅད་སྒྱུ་མ་ལྟ་བུར་ལྟ་བའི་ལམ་ཁྱེར་དང་མ་བྲལ་བར་བྱ། མཚན་མོ་གཉིད་ཀྱི་རྣལ་འབྱོར་ཡང་ཉལ་ཁ་ལ་གཉིད་འོད་གསལ་དུ་འཆར་བར་གསོལ་བ་བཏབ་རྗེས་བླ་མ་དང་རང་སེམས་བསྲེས་ཏེ་རིག་པ་སོ་མའི་ངང་བསྐྱངས་ལ་རྣམ་རྟོག་གཞན་གྱིས་བར་མ་ཆོད་པར་གཉིད་དུ་འགྲོ་བར་བྱའོ། །གཞན་ཡང་ཤེས་པར་བྱ་བའི་གནད་ནི་ལྟ་བས་ལ་མ་ཟློས་ན་གཟུང་འཛིན་བདེན་ཞེན་གྱི་འཆིང་བ་མི་ཞིག་པས་མཉམ་བཞག་གི་སྐབས་སུ་ཆོས་ཐམས་ཅད་མེད་ཕྱལ་ལྷུན་འགྲུབ་གཅིག་པུར་ལ་བཟླ་བ་གཅེས་སོ། །སྒོམ་པའི་ངང་མ་བསྐྱངས་ན་ཡིན་པ་ཙམ་གྱིས་གནད་ཐོག་ཏུ་མི་ཕེབས་པས་བརྩོན་འགྲུས་རྒྱུན་བསྲིང་བ་གལ་ཆེའོ། །སྤྱོད་པས་ཤན་མ་འབྱེད་ན་དགེ་སྟོང་སྡིག་སྟོང་ནག་པོ་ཁ་འབྱམས་སུ་འགྲོ་ཉེན་ཆེ་བས་རྗེས་ཐོབ་ཏུ་སྒྱུ་མ་ལྟ་བུ་དང་འགྲོགས་ནས་ལས་འབྲས་མི་བསླུ་བའི་ངེས་ཤེས་བརྟན་པོས་ཅི་བྱེད་དགེ་བའི་ལས་སུ་བསྒྱུར་བ་གནད་དོ། །ཐབས་ཤེས་ཡ་བྲལ་དུ་གྱུར་ན་ནམ་ཡང་འཆིང་བས་སྟོང་ཉིད་དང་སྙིང་རྗེ། བསོད་ནམས་དང་ཡེ་ཤེས་ཀྱི་ཚོགས་གཉིས་ཟུང་དུ་འབྲེལ་བ་རྒྱལ་བ་དགྱེས་པའི་ལམ་བཟང་དུ་འཇུག་པ་གལ་ཆེའོ། །འདི་དག་ནི་མཆོག་ཏུ་གཅེས་པའི་ཆིངས་གལ་པོ་ཆེ་ལགས་པས་ཐུགས་ལ་དེ་བཞིན་བཞག་འཚལ། མི་རྟག་སྐྱོ་ཤས་རྒྱུད་ལ་མ་སྐྱེས་ན། །ལྟར་སྣང་ཚེ་འདི་སྒྲུབ་པའི་བྲེལ་དོ་ཡིས། །དམ་ཆོས་གཤའ་མ་འགྲུབ་དུས་མི་གདའ་བས། །བཅོས་མིན་ངེས་འབྱུང་རྒྱུད་ལ་སྐྱེ་བར་ཤོག །སྙིང་རྗེ་བྱང་ཆུབ་སེམས་མཆོག་མ་འབྱོངས་ན། །རང་དོན་ཡིད་བྱེད་འཛིན་པའི་མུན་ཁྲོད་ནས། །ཐེག་ཆེན་ལམ་བཟང་སྣང་དུས་མི་གདའ་བས། །ཡང་དག་བྱང་ཆུབ་སེམས་མཆོག་འབྱོང་བར་ཤོག །འཕགས་ས་མ་ཐོབ་གཞན་དོན་ལྟར་སྣང་ཅན། །གཞན་ལ་མི་ཕན་རང་ཉིད་འཆིང་བའི་རྒྱུ། །རྣམ་གཡེང་འདུ་འཛིའི་མགོ་བོ་མི་འཁོར་བར། །དབེན་པའི་གནས་སུ་སྒྲུབ་ལ་བརྩོན་པར་ཤོག །ཐབས་ཤེས་ཡ་བྲལ་སྐྱེས་བུ་རྐང་ཆག་བཞིན། །རྣམ་མཁྱེན་ས་ལ་འགྲོད་པའི་མཐུ་ཟད་པས། །སྟོང་ཉིད་སྙིང་རྗེ་བསྐྱེད་རྫོགས་ཚོགས་གཉིས་པོ། །ཟུང་འབྲེལ་མ་ནོར་ལམ་ལ་འཇུག་པར་ཤོག །བརྒྱུད་ལྡན་བླ་མའི་བྱིན་རླབས་མ་འཕོས་ན། །སྡུག་བཙིར་བསྒོམས་པས་གནས་ལུགས་མི་རྟོགས་པས། །མོས་གུས་ཚད་དུ་གྱུར་པའི་རྟེན་འབྲེལ་གྱིས། །དགོངས་བརྒྱུད་འཕོ་བའི་དབང་མཆོག་ཐོབ་པར་ཤོག །རང་རིག་འོད་གསལ་བློ་འདས་རྫོགས་པ་ཆེ། །སྐུ་དང་ཡེ་ཤེས་ཡེ་ནས་ལྷུན་གྲུབ་པས། །ཡིན་ལུགས་ཅོག་བཞག་བཞི་ཡི་མན་ངག་གིས། །ཟད་པའི་ས་ལ་གཏན་སྲིད་ཟིན་པར་ཤོག །ནམ་ཞིག་འགྲོ་ལ་ཕན་པའི་གནས་ཐོབ་ཚེ། །གཞན་དོན་མི་སྐྱོ་བཟོད་པའི་གོ་བགོས་ཏེ། །མཁའ་མཉམ་མ་རྣམས་སྲིད་པའི་ཆུ་བོ་ལས། །བདག་ཉིད་གཅིག་པུས་ཡོངས་སུ་བསྒྲལ་གྱུར་ཅིག །རྣལ་འབྱོར་པ་ཡན་པ་བློ་བདེས་གྲོགས་པོ་ཀ་མ་ལའི་མིང་ཅན་ལ་གདམས་པ་ལས་དང་པོ་ལ་སྨན་པའི་ཨུ་པ་དེ་ཤའོ། །རེ་ཞིག་རྫོགས་སོ། །ཨི་ཐི།། །།
དགེ་བའི་བཤེས་གཉེན་ཉིད་ནས་དྲི་བ་གནང་སྐོར།
༄༅། །དགེ་བའི་བཤེས་གཉེན་ཉིད་ནས་དྲི་བ་གནང་སྐོར། །ན་མོ་མཉྫུ་ཤྲཱི་ཡེ། དགེ་བའི་བཤེས་གཉེན་ཉིད་ནས་དྲི་བ་གནང་སྐོར། ཡེ་ཐོག་གདོད་མའི་སྤྱི་གཞིའི་སྐབས་ངོ་བོར་རང་བཞིན་ཐུགས་རྗེ་གསུམ་དབྱེར་མེད་པའི་ཆོས་ཉིད་མཉམ་པ་ཆེན་པོ་ཡིན་ཡང་། ཡིན་པ་ཙམ་གྱིས་མངོན་གྱུར་དུ་རྟོགས་དགོས་པའི་ཁྱབ་པ་མེད་དེ། དཔེ་སྐྱེས་བུ་ལ་བྱད་གཟུགས་རང་ཆས་སུ་ཡོད་ཀྱང་རྐྱེན་མེ་ལོང་སོགས་དང་མ་འཕྲད་ཀྱི་བར་དུ་མངོན་སུམ་སྒྲོ་འདོགས་མི་ཆོད་པ་བཞིན། དེས་ན་འདིའི་སྐབས་སུ་རྒྱུ་བདག་ཉིད་གཅིག་པའི་མ་རིག་པ་མ་སྤངས་ལ་མི་ལྡན་པའི་ཚུལ་གྱིས་གནས་པ་དང་། ཆོས་ཉིད་རང་གིས་རང་ལ་བྱེད་པ་འགལ་བའི་ཕྱིིར་རང་རིག་པའི་ཚུལ་གྱིས་མངོན་གྱུར་དུ་རྟོགས་པ་མེད་ལ། གལ་ཏེ་ཐུགས་རྗེའི་རྩལ་ཡེ་ཤེས་ཀྱིས་གནས་ལུགས་མངོན་དུ་གྱུར་པའམ་རྟོགས་ཟིན་དུ་ཡོད་ན་གཞི་དང་འབྲས་བུའི་གནས་སྐབས་ཀྱི་ཁྱད་པར་གང་གིས་འབྱེད། གཞི་ལས་གཞི་སྣང་ཤར་བའི་སྐབས་སུ་གྲོལ་འཁྲུལ་གྱི་སྒོ་གཉིས་འབྱུང་བའི་འཐད་པ་ནི། རྐྱེན་མེ་ལོང་དང་འཕྲད་པའི་ཚེ་དེར་བཞིན་གྱི་རྣམ་པ་ཤར་བ་ན་རྒན་པོ་རྣམས་ཀྱིས་རང་གི་བྱད་དུ་རྟོགས་ནས་འཇིགས་དངངས་སོགས་མི་སྐྱེ་ལ། བྱིས་པས་དེ་ལྟར་མ་ཤེས་ཏེ་འཇིགས་སྐྲག་སོགས་སྐྱེ་བ་བཞིན་ནོ། །དེས་ན་རང་ངོར་སྣང་གཞི་ལས་འཕགས་བྱེ་བྲག་ཕྱེད། ཕྱེད་ཐོག་ཏུ་གྲོལ་སོགས་གསུངས་པའི་གནད་ཀྱང་དེ་ཡིན་པས། དེའི་ཚེ་ཐུགས་རྗེའི་རྩལ་ཡེ་ཤེས་ཆེན་པོས་གཞི་སྣང་གི་བཀོད་པ་ཐམས་ཅད་རང་བྱུང་གི་ཡེ་ཤེས་ཀུན་བྱེད་བྱང་ཆུབ་ཀྱི་སེམས་ཀུན་བཟང་ཆོས་སྐུའི་རོལ་པར་ངོ་ཤེས་ཐག་ཆོད་གདེང་དང་ལྡན་པས་ཆོས་ཉིད་རང་ས་ཟིན་ཏེ་དེ་ལས་མི་གཡོ་བ་ནི། བློ་ནི་དེ་ཕྱོགས་འཛིན་པའི་རིགས་པས་ཀྱང་གྲུབ་ནུས་ཤིང་། དེའི་ཚེ་ཤེས་རབ་རང་བྱུང་གི་ཡེ་ཤེས་ཀྱིས། རྒྱུ་བདག་ཉིད་གཅིག་པ་དང་། རྐྱེན་ལྷན་སྐྱེས་ཀུན་བརྟགས་ཀྱི་མ་རིག་པའི་ས་བོན་མཐའ་དག་གཏན་བཅོམ་ཏུ་སོང་བས་སླར་འཁྲུལ་གཞི་བྱེད་མི་སྲིད་དོ། །མདོར་ན་གཞི་འབྲས་གཉིས་པོ་ངོ་བོ་རང་བཞིན་ཐུགས་རྗེ་གསུམ་དབྱེར་མེད་པའི་ཆོས་ཉིད་ཙམ་དུ་འདྲ་ཡང་། སྔ་མའི་སྐབས་སུ་རང་ངོ་རང་གིས་མ་ཤེས་པས་འཁྲུལ་གཞི་ཡང་བྱེད་སྲིད་པས་གཞི་དབྱིངས་ལུང་མ་བསྟན་ཞེས་བྱ། འཁོར་འདས་གཉིས་ཀའི་སྤྱི་གཞི་ཡིན་པས་དྲི་བཅས་དེ་བཞིན་ཉིད་དང་དོན་གཅིག ཕྱི་མའི་སྐབས་སུ་ཐུགས་རྗེའི་རང་རྩལ་ཡེ་ཤེས་ཆེན་པོའམ་སོ་སོར་རྟོགས་པའི་ཤེས་རབ་ཟག་མེད་ཀྱིས་རང་ངོ་རང་གིས་ཤེས་པས་མ་དག་འཁྲུལ་པའི་སྒོ་འགགས་ཤིང་། དག་པ་ཡེ་ཤེས་ཀྱི་སྒོ་ངོ་བོ་ཉིད་ལ་ཐིམ་པས་ཆོས་ཉིད་རང་ས་ཟིན་ཏེ། ནང་གསལ་ཀ་དག་གཞོན་ནུ་བུམ་སྐུར་གྲོལ་བས་སླར་མི་ལྡོག་པ་མཐར་འབྲས་དག་པ་གཉིས་ལྡན་གྱི་ཆོས་སྐད་དངོས་ཡིན་པས་འདི་གཉིས་ཀྱི་ཁྱད་པར་ལགས། གཞི་ལས་གཞི་སྣང་འཆར་ཚུལ་འདི་ཐུན་མོང་བ་ལྟར་ན་ཤིན་ཏུ་ཕྲ་བའི་རྟེན་འབྲེལ་གྱི་ཆ་སྟེ། མཐར་གྱིས་གཏུགས་ན་ཆོས་ཉིད་ཅིར་ཡང་མ་ཡིན་པ་ལས་ཅིར་ཡང་འཆར་དུ་རུང་བའི་གནད་ཀྱིས། གྲོལ་འཁྲུལ་སོགས་ཐམས་ཅད་ཀྱི་མཐའ་ཆོས་ཉིད་ལ་ཐུག་པས་ཆོས་ཉིད་ཀྱི་རིགས་པ་ལས་མ་འདས་ཀྱང་ཐ་སྙད་ཙམ་དུ་དཔྱད་ན། གཞི་འཁྲུལ་མ་མྱོང་བའི་སངས་རྒྱས་དང་། རྟོགས་པ་མངོན་གྱུར་གྱི་སངས་རྒྱས་གཉིས། ཆོས་ཉིད་གནས་ཚུལ་དབང་བཙན་དུ་བྱས་ན། ཇི་ལྟར་སྔོན་བཞིན་ཕྱིས་དེ་བཞིན། །འགྱུར་བ་མེད་པ་ཆོས་ཉིད་དོ། །ཞེས་གསུངས་པ་བཞིན་ངོ་བོ་དབྱེར་མེད་པས་སྔར་འཁྲུལ་མ་མྱོང་། ཕྱིས་འཁྲུལ་པ་མི་སྲིད། ད་ལྟ་གཞི་ལ་འཁྲུལ་པ་མི་གནས་པས་མཉམ་ཡང་། ཆོས་ཅན་སྣང་ཚུལ་དབང་བཙན་དུ་བྱས་ན། སྔ་མ་གཞིའི་སྐབས་སུ། གཞི་ཀ་དག་གི་ངོས་ན་འཁྲུལ་པ་མེད་ཀྱང་ལྷུན་གྲུབ་ཀྱི་ལྡོག་ཆ་ནས་འཁྲུལ་པའི་ས་བོན་མ་སྤངས། ཐུགས་རྗེའི་འཆར་གཞིར་ཡེ་ཤེས་རང་ལ་ཡོད་ཀྱང་མངོན་དུ་རྟོགས་ཟིན་མིན་པས་འཁྲུལ་གྲོལ་གཉིས་ཀའི་གཞི་བྱེད་པར་འཐད་ལ། ཕྱི་མ་འབྲས་བུའི་སྐབས་སུ། རང་གནས་ཀྱི་ཡེ་ཤེས་མངོན་སུམ་དུ་རྟོགས་ཟིན་པས་འཁྲུལ་པའི་ས་བོན་གཏན་དུ་བཅོམ་པ་དཔེ་འབྲུམ་ནད་བྱང་བའི་སྐྱེས་བུ་བཞིན་ནོ། །དེས་ན་ཆོས་ཉིད་འདུས་མ་བྱས་ཡིན་ཀྱང་དེའི་ངང་ངམ་རྩལ་ལས་ཆོས་ཅན་གྱི་སྣང་བ་ཐམས་ཅད་འཆར་རུང་བ་ནི་གཤིས་སྟོང་ཉིད་སྤྲོས་བྲལ་ཡིན་པའི་གནད་ཀྱིས་ཏེ། གང་ལ་སྟོང་པ་ཉིད་རུང་བ། །དེ་ལ་ཅིར་ཡང་རུང་བ་ཡིན། །ཞེས་གསུངས་པ་བཞིན། དེའི་ཕྱིར་གཞི་དབྱིངས་སྟོང་པ་ཕྱང་ཆད་མིན་པར་གསལ་བ་རིག་པའི་སྙིང་པོ་ཅན་ཡིན་པས་གྲོལ་འཁྲུལ་སོགས་ཐམས་ཅད་འཐད་པ་ཡིན་གྱི། དེ་ལས་གཞན་དུ་སྟོང་རྐྱང་འདུས་མ་བྱས་ཀྱི་ཕྱོགས་ཁོ་ནར་ཆད་ན་ནི། དེ་ལས་འཁོར་འདས་ཀྱི་ཆོས་སམ་སྣང་བ་གང་ཡང་འཆར་མི་རུང་བས་མཐར་ཆད་མཐའ་ལས་མ་འདས་ཤིང་དོན་བྱེད་ཀྱིས་སྟོང་མོད། འདིར་ནི་དབྱིངས་དང་ཡེ་ཤེས་གཉིས་སུ་མེད་པའི་གནད་ཀྱིས་འཁོར་འདས་ལམ་གྱི་ཆོས་ཐམས་ཅད་འཆར་རུང་བས་ཁྱད་ཆེ་སྟེ། དངོས་དང་དངོས་མེད་འདུས་བྱས་ཉིད། །མྱ་ངན་འདས་པ་འདུས་མ་བྱས། །ཞེས་གདགས་གཞི་ཡང་འདི་ཡིན་ཏེ། དེ་ལས་གཞན་དུ་ན་གང་ཞིག་གང་དུ་མྱ་ངན་ལས་འདས། དེས་ན་ཟུང་འཇུག་འདུས་མ་བྱས་འདིའི་ངོར་གཞི་ལམ་འབྲས་བུའི་ཆོས་ཀུན་འཆར་རུང་ཞིང་འཁྲུལ་གྲོལ་གྱི་བྱ་བ་བྱེད་ནུས་པས། སྒྱུ་མ་རྡོ་རྗེ་བཙན་པོ་མཆོག །ཅེས་གསུངས། དེས་ན་གཞི་ལམ་འབྲས་གསུམ་དུ་སྣང་སྟོང་ཟུང་དུ་འཇུག་པ་འདི་གལ་ཆེ། གཞི་སྣང་སོགས་ཀྱི་འཆར་ཆ་འདི་ཐམས་ཅད། དཔེ་མན་ཤེལ་ལ་རྐྱེན་དང་འཕྲད་ན་འཇའ་ཚོན་སོགས་འཆར་རུང་མ་འགགས་པ་བཞིན་དུ། འཆར་གཞི་ཀ་དག་སྟོང་པ་ཆེན་པོའི་དབྱིངས་སུ་རང་བཞིན་ལྷུན་གྱིས་གྲུབ་པའི་ཚུལ་དུ་ཡེ་ནས་འབྲལ་མེད་དུ་ཡོད་དགོས་ཀྱི། དེ་ལྟ་མིན་ན། རྒྱུ་མེད་རྐྱེན་ལ་མི་ལྟོས་ཕྱིར། །རྟག་ཏུ་ཡོད་པའམ་མེད་པར་འགྱུར། །ཞེས་པའི་སྐྱོན་དུ་འགྱུར། འཆར་གཞིའི་དབྱིངས་ལ་དེ་ལྟར་ཡོད་པས། གཞི་ཉིད་དེ་དང་དེའི་ཕྱོགས་སུ་ལྷུང་བར་མི་འགྱུར་ཏེ། ངོ་བོ་སྟོང་ཉིད་ལས་མ་འདས་ཤིང་རྒྱ་ཆད་ཕྱོགས་ལྷུང་སོགས་སྤྲོས་པ་གང་གིས་ཀྱང་བསླད་དུ་མེད་པའི་ཕྱིར། དེ་ལས་ཤར་བའི་གཞི་སྣང་སོགས་འོད་གསལ་གྱི་རྟགས་སྣང་རྣམས། སྣང་ཚུལ་ལ་ལྟོས་ན་སྔར་ཕྱིར་གསལ་དུ་མི་སྣང་བ་ཉིད། ཕྱིས་སྣང་བས་གློ་བུར་དུ་བྱུང་བ་ལྟ་བུར་སྣང་ནའང་། གནས་ཚུལ་དོན་དམ་གྱི་ངོས་ན་རྟགས་སྣང་འདི་རྣམས་གཞི་ཆོས་ཉིད་མཉམ་པ་ཆེན་པོའི་རང་མདངས་འབའ་ཞིག་ཏུ་ཟད་པས། གཞི་ཆོས་ཉིད་མཉམ་པ་ཆེན་པོ་ནི་གསར་བྱུང་དང་གློར་བུ་བ་མིན་པའི་ཕྱིར། དེ་ལས་ཤར་བའི་རྟགས་སྣང་སོགས་ཀྱང་དེ་དང་ངོ་བོ་ཐ་དད་དུ་དབྱེར་མེད་པས་རང་བྱུང་འདུས་མ་བྱས་རྟག་པ་ཆེན་པོར་གྲུབ་པའི་ཚུལ་ཞིབ་པར་གཉུག་སེམས་སྐོར་དུ་གཟིགས། དེས་ན་འོད་གསལ་གྱི་རྟགས་སྣང་འདི་རྣམས་རང་བྱུང་ཡེ་ཤེས་ཆེན་པོའི་རང་མདངས་རྩོལ་མེད་དུ་ཤར་བ་ཤེས་པར་བྱ་དགོས་ཀྱི། འདུས་བྱས་མཚན་མའི་ཆོས་སུ་གཟུང་བར་མི་བྱ་སྟེ། དེ་ལྟར་བཟུང་ན་ངེས་གསང་འབྲས་བུའི་ལམ་གྱི་གནད་ཐམས་ཅད་སྟོར་པར་འགྱུར་བའི་ཕྱིར། ཀུན་གཞི་དང་ཆོས་སྐུ། རྣམ་ཤེས་དང་ཡེ་ཤེས། སེམས་དང་རིག་པ་སོགས་དབྱེ་དགོས་པའི་གནད་འདི་ལ་ཐུག མདོར་ན་མ་དག་རླུང་སེམས་ཀྱི་འཆར་ཆ་རྩ་རླུང་གི་བྱེད་བཅིང་སོགས་ལས་སྣང་བ་དང་། སྦྱོར་རྫོགས་ཀྱི་ཐབས་ཟབ་མོ་ལ་བརྟེན་ནས་རང་བྱུང་རྩོལ་བ་མེད་པར་རང་ཤར་བའི་ཡེ་ཤེས་ཀྱི་རང་གདངས་འོད་གསལ་བའི་རྟགས་སྣང་གཉིས་ལ། དག་མ་དག་སོགས་ཀྱི་ཁྱད་པར་གནམ་ས་ཙམ་ཡོད་པར་གསུངས་པས་ཤེས་སོ། །གདོད་མའི་གཞི་ལས་གཞི་སྣང་ཐོག་མར་ཤར་བའི་ཚེ་གྲོལ་མི་གྲོལ་གྱི་ཁྱད་པར་ནི། གཞིའི་དབང་པོ་རྣོ་རྟུལ་གྱི་ཁྱད་པར་ཏེ། མདོ་དགོངས་འདུས་དང་། ཀུན་བྱེད་སོགས་ལས་གསུངས་པ་བཞིན་ཆོས་ཉིད་ཅིར་ཡང་མ་ཡིན་པ་ལས་ཅིར་ཡང་འཆར་དུ་རུང་བའི་ཕྱིར། ལྕགས་ཀྱི་རྣོ་རྟུལ་དང་འབྲུའི་ཤང་ལྕུག་བཞིན། དེས་གཞི་བཟང་ངན་ཅན་དུ་མི་འགྱུར་ཏེ། གཞི་ཉིད་སྤྲོས་པ་གང་གིའང་མཐར་མ་ལྷུང་བའི་གནད་ཀྱིས་ཏེ། ཞིབ་པར་ཀཿཐོག་ཤཱཀ་རྡོར་གྱིས་མཛད་པའི་ཐེག་པའི་སྤྱི་མཛོད་དུ་གཟིགས། དེས་ན་ཆོས་ཉིད་འདུས་མ་བྱས་རང་གི་ངོ་བོ་ལ་གཟུང་འཛིན་སོགས་མེད་ཀྱང་། དེ་ལས་ཤར་བའི་རྩལ་སྣང་ལ་བདག་ཏུ་བཟུང་བའི་རྐྱེན་གྱིས། ཐག་པ་ལ་སྦྲུལ་དུ་འཁྲུལ་པ་བཞིན། འཁྲུལ་པ་འདི་གློ་བུར་དུ་བྱུང་བ་ཡིན་ལ། འཁྲུལ་པ་དེ་ཡང་གཞི་སྣང་ཆོས་ཉིད་ཀྱི་རོལ་པ་ལས་མ་འདས་པས་མཐར་གྱིས་དེད་ན་དག་མཉམ་ཆོས་སྐུའི་རོལ་པ་ལས་མི་འདའ་འོ། །དེས་ན་འཁྲུལ་གྲོལ་གཉིས་པོ་འདི་གཞི་ཆོས་ཉིད་ཀྱི་ངང་ནས་མི་བཞག་སྟེ་ཆོས་ཉིད་ལ་གྲོལ་འཁྲུལ་གཉིས་མེད་པས་སོ། །གཞི་སྣང་གི་སྟེང་ནས་འཇོག་སྟེ་དེ་ཉིད་ཡང་རྩལ་དུ་རིག་མ་རིག་གིས་གྲོལ་འཁྲུལ་གཉིས་བྱུང་བའི་ཕྱིར་རོ། །དེའི་ཕྱིར་གཞི་ལ་འཆར་གཞིའི་ཡེ་ཤེས་ཡོད་ཀྱང་དེ་ལས་ཤར་བའི་ཤེས་རབ་རང་བྱུང་ཉིད་མེད་པས་གཞི་ཉིད་འབྲས་བུར་མ་སྨིན་ལ། འབྲས་བུའི་སྐབས་རང་རྩལ་ཤེས་རབ་རང་བྱུང་གིས་རང་ངོ་རང་གིས་རིག་པས་གཞི་ཉིད་འབྲས་བུར་སྨིན་ཟིན་ཏེ། འདིའི་སྨིན་མ་སྨིན་ཆོས་ཉིད་དོན་དམ་དཔྱོད་ངོས་ནས་མིན་ལ། ཐ་སྙད་ཀུན་རྫོབ་ཀྱི་དབང་གིས་ཏེ་ཐེག་པ་ཐུན་མོང་བ་ལྟར་ན་གནས་གྱུར་དུ་བཏགས་པ་དང་འདྲ། ལྷུན་གྲུབ་སྒོ་བརྒྱད་འཆར་ཚུལ་སོགས་སྤྱིར་རྒྱུད་གཞུང་དགོངས་འགྲེལ་བཅས་དང་། ཁྱད་པར་ལམ་པ་ལ་ཇི་ལྟར་འཆར་ཚུལ་དང་ངོ་སྤྲོད་སྐོར། མཁའ་འགྲོ་སྙིང་ཐིག་གི་མཐོང་སྣང་འོད་དྲྭ་སོགས་ལས་གསལ་བར་གསུངས་པ་བཞིན་ཏེ། དོན་ལ་འཆར་ཚུལ་སྔ་མ་དྲུག་པོ་རང་རྩལ་ཡེ་ཤེས་ཆེན་པོར་རྟོགས་ནས་རང་བཞིན་མཉམ་པ་ཆེན་པོའི་དོན་ལ་དབང་འབྱོར་ན་དག་པ་ཡེ་ཤེས་ཀྱི་སྒོ་དང་། དེ་ལྟར་མ་ཤེས་པར་གཟུང་འཛིན་བདག་ཏུ་ཞེན་པའི་དབང་གིས་དགག་སྒྲུབ་རང་མཚན་པར་ཤོར་ན་མ་དག་འཁྲུལ་པའི་སྒོ་ཡིན་པས། དོན་ལ་རིག་པ་ཡེ་ཤེས་དང་། མ་རིག་འཁྲུལ་སེམས་གཉིས་ལ་རྩ་བ་ཐུག་པས། ད་ལྟའི་རང་སེམས་ཀྱི་འཆར་ཆ་སྐུ་དང་ཡེ་ཤེས་སོགས་དག་མ་དག་གི་ཆོས་འདི་ཐམས་ཅད་ཇི་ལྟར་ཤར་གནས་གྲོལ་བའི་ཚུལ་ལ་རྩད་གདར་ལེགས་པར་གནང་ན་གོ་བའི་གནད་ཟབ་པར་མཐོང་། དགའ་རབ་རྡོ་རྗེ་ལ་རྡོ་རྗེ་སེམས་དཔས་རྒྱལ་ཐབས་སྤྱི་བླུགས་ཀྱི་དབང་བསྐུར་དུས་དང་མཐར་ཟག་ཟད་འོད་སྐུར་གཤེགས་དུས་གཉིས་གང་དུ་གྲོལ་གསུངས་པ། སྤྱིར་ཐེག་ཆེན་ངེས་དོན་ཟབ་མོ་ཐམས་ཅད་ཞལ་འཆམས་པར། མཆོག་གི་སྤྲུལ་སྐུ་ཐུབ་པ་ཆེན་པོ་ཡང་གཟོད་མ་ཉིད་ནས་མངོན་པར་བྱང་ཆུབ་པས། གདུལ་བྱའི་ངོ་སྐལ་དུ་སེམས་དང་པོ་བསྐྱེད་པ་ནས་བཟུང་། མཐར་སངས་རྒྱས་ནས་ཆོས་འཁོར་བསྐོར་ཞིང་སྤྲུལ་པ་སྡུད་པའི་བར་དེ་ཐམས་ཅད་སངས་རྒྱས་ཉག་གཅིག་གི་རྣམ་འཕྲུལ་དུ་གསུངས་པ་བཞིན། ངེས་གསང་མཐར་ཐུག་པའི་སྐབས་འདིར། སྟོན་པ་ཀུན་ཏུ་བཟང་པོ་ཉིད་རྡོ་རྗེ་སེམས་དཔའ་དང་། རྡོ་རྗེ་འཆང་དང་། ལྷའི་བུ་སེམས་ལྷག་ཅན་དང་། སྤྲུལ་པའི་སྐུ་དགའ་རབ་རྡོ་རྗེ་སོགས་གང་ལ་གང་འཚམ་གྱི་རྣམ་འཕྲུལ་སྒྱུ་མ་ལྟ་བུ་ཡིན་པས་ཚུལ་མཐོང་གི་བློ་དང་སྒོ་བསྟུན་ནས་འདིའི་ཚེ་གྲོལ་དང་མ་གྲོལ་གྱི་ཐ་སྙད་དང་བློས་བསམ་དུ་མེད་དོ། ལམ་མས་སྦྱོང་གི་གང་ཟག་རང་མཚན་པ་དང་སྒོ་བསྟུན་ན་ནི། ཐོག་མར་རྒྱལ་ཐབས་སྤྱི་བླུགས་སམ་རིག་པ་རྩལ་གྱི་དབང་གི་བརྡ་ཐབས་སོགས་ལ་བརྟེན་ནས། ཆོས་ཉིད་ཡིད་དཔྱོད་དུ་མ་ལུས་པར་མངོན་སུམ་རང་ཐོག་ཏུ་ཕབ་ནས་ངོ་སྤྲད་པས་ཆོས་ཉིད་མངོན་སུམ་གྱི་དོན་མཐོང་ཞིང་། མཐོང་ཟིན་སྒོམ་པའི་རྣལ་འབྱོར་གྱིས་ཉམས་སྣང་གོང་དུ་འཕེལ་ཞིང་རིག་པ་ཚད་ལ་ཕེབས་ནས། མཐར་ཆོས་ཟད་གདོད་མའི་ཀློང་དུ་ཆོས་ཅན་གྱི་སྣང་བ་ཐམས་ཅད་རྩལ་གཞི་ཐིམ་དུ་སོང་ནས་ནང་དབྱིངས་ཀ་དག་གི་གྲོལ་སར་མི་སློབ་པའི་ཟུང་འཇུག་མངོན་དུ་མཛད་པར་སེམས། རྒྱལ་ཐབས་སྤྱི་བླུགས་ཀྱི་དོན། དཔེ་འཁོར་ལོས་སྒྱུར་བའི་རྒྱལ་པོ་རྒྱལ་སར་དབང་བསྐུར་བའི་ཚེ་ལྷའི་གླང་པོ་ཆེ་ས་སྲུང་གི་བུའི་སྣས་གསེར་གྱི་བུམ་པ་ཐོགས་ཏེ་སྤྱི་བོ་ནས་ཁྲུས་བྱས་ཤིང་རྒྱལ་སར་དབང་བསྐུར་བ་ལྟར། ཡེ་ཤེས་རང་གནས་ཀྱི་དགོངས་པ་མངོན་སུམ་དུ་ངོ་སྤྲད་ནས་རང་རྩལ་ཡེ་ཤེས་ཆེན་པོར་དབང་བསྐུར་བས་ཅིར་སྣང་ཡེ་ཤེས་ཆེན་པོར་གྲོལ་བའི་རྒྱལ་ཐབས་ལ་དབང་འབྱོར་པར་བྱེད་པའི་དོན་ལ་གསུངས་ཡོད་ཚོད་ཨེ་ཡིན་སྙམ། སྣང་བཞི་མཐར་ཕྱིན་ནས་འཕོ་ཆེན་གྱི་སྐུར་བཞེངས་པ་དང་། གཞི་སྣང་ཀ་དག་གི་དབྱིངས་སུ་ཐིམ་ནས་སླར་གང་འདུལ་གཟུགས་སྐུར་བཞེངས་པ་གཉིས་དོན་གནད་གཅིག་པས་གཉིས་ཀ་མི་སློབ་པའི་ཟུང་འཇུག་གི་ཡེ་ཤེས་ཀྱི་སྐུར་བསྡུ་དགོས་སམ་སྙམ། མཐོང་བའི་རྗེས་ལ་འཇོག་པ་དང་། རིག་པ་སྤྱི་བླུགས་སུ་འཇོག་པ་གང་ཡིན་ཡང་དོན་གྱི་གནད་གཅིག་ཏུ་འབབས་པས། རང་བབས་གཉུག་མའི་གཤིས་ལུགས་སམ་རིག་པ་རང་གནས་ཀྱི་བསམ་གཏན་ཀ་དག་བློ་འདས་ཀྱི་ཡེ་ཤེས་སྐྱོན་ཡོན་གྲུབ་བསལ་ལས་འདས་པའི་ཆོས་ཉིད་མཉམ་པ་ཆེན་པོ་ཉིད་ངོས་ཟིན་པར་བྱས་ཏེ། དེའི་ངང་དུ་བསལ་བཞག་མེད་པར་སྐྱོང་བ་ལ་དོན་གྱི་གནད་འདུ། ཅིར་སྣང་ཡེ་ཤེས་སོགས་ཀྱི་དོན་ཉིད་ཀྱི་གསུང་བཞིན་ལགས། གསལ་སྟོང་གུད་བཅད་ནི། ཐོག་མར་དབང་དུས་སུ་བཞི་ཆ་གསུམ་བྲལ་གྱི་རིག་པ་ངོ་སྤྲོད་ཚུལ་གྱི་བརྡ་ཐབས་དུ་མ་དང་། ནམ་མཁའ་སུམ་ཕྲུགས་སོགས་ལ་བརྟེན་ནས། རིག་པ་གསལ་སྟོང་གི་ཉམས་མྱོང་སྤྲིན་བར་གྱི་ཉི་ཞུར་ཙམ་བྱུང་བ་ལ་མཐར་ཐུག་གི་དོན་ལ་རློམ་ནས། དུས་གསུམ་གྱི་རྟོག་པ་སེམས་སེམས་བྱུང་མཐའ་དག་ཆོས་ཉིད་མཉམ་པ་ཆེན་པོར་མ་ཤེས་པར། གསལ་སྟོང་ལ་འཛིན་པ་ཞུགས་ནས་ཡང་ཡང་གུད་དུ་བཅད་དེ། ཡིད་མིག་རླུང་གི་ཁུར་བཀའ་བས། བློ་བྲལ་བློས་བྱས་དང་། འཛིན་མེད་འཛིན་བཅས་སུ་སོང་སྟེ། མཐར་རྫོགས་ཆེན་མ་གྲུབ་སྲོག་རླུང་གྲུབ་སྟེ་མི་མིན་རོ་མིན་དུ་སོང་བ་ནི་དེང་སང་ཤིན་ཏུ་མང་བར་འདུག་པ་འདི་ལགས་པས། དོན་ལ་མཉམ་ཉིད་ཕྱོགས་ལྷུང་དང་བྲལ་བའི་བསྒོམ་པ་མ་བཅོས་ཆུ་བོའི་རྒྱུན་བཞིན་སྐྱོང་བ་ལས་བཅས་བཅོས་དང་དགག་སྒྲུབ་མང་པོ་གོལ་རྒྱུ་ལས་མ་འདས། ནག་ཐམ་ལུང་མ་བསྟན་ནི་ངོ་བོ་ཀུན་གཞིའི་སྟེང་ཅི་ཡང་དྲན་མེད་ཐམ་མེ་བ་དེའི་ངང་ལས། གནས་ལུགས་ཡང་དག་པའི་དོན་ལ་སྒྲོ་འདོགས་མ་ཆོད་ཅིང་ལྷག་མཐོང་རང་བྱུང་གི་ཡེ་ཤེས་ཁོང་ནས་མ་ཤར་བས། འདི་ཡིན་དེ་ཡིན་དང་འདི་ཤེས་དེ་ཤེས་མེད་པའི་སྨྲ་བརྗོད་མེད་པ་ཙམ་གྱི་ངང་དེར་གོམས་པ་སྟེ། ངོ་བོ་མ་རིག་པ་འཁོར་བའི་ས་ལ་བརྟེན་པ་ཡིན། འདི་དང་ལྷག་མཐོང་ཤེས་རབ་རང་རྩལ་རྫོགས་ཏེ་གནས་ལུགས་ཟབ་མོའི་དོན་ཇི་བཞིན་པ་མངོན་དུ་གྱུར་པའི་སྨྲ་བསམ་བརྗོད་མེད་ཀྱི་ཡེ་ཤེས་གཉིས། སྨྲ་བརྗོད་མེད་པ་ཙམ་དུ་འདྲ་ཡང་། གནས་ལུགས་ཀྱི་དོན་ལ་ངེས་ཤེས་སྐྱེས་མ་སྐྱེས་དང་། ཐེ་ཚོམ་གྱི་སྒྲོ་འདོགས་ཆོད་མ་ཆོད་སོགས་མིག་ཕྱེ་བཙུམ་གྱི་ཁྱད་ལྟ་བུ་ཡོད་པ་ནི་ནང་གི་མྱོང་བས་ཤེས་ནུས་པ་འདི་ལགས། ཕྱི་མ་འདི་རིག་པ་རང་བྱུང་གི་ཡེ་ཤེས་ཟག་མེད་འཕགས་པའི་ས་ལ་བརྟེན་པ་འདི་ཡིན། འདིའི་ངང་གོམས་ན་རིགས་རྩལ་སོ་སོར་རྟོགས་པའི་ཤེས་རབ་ཀྱིས་ཆོས་ཀུན་གྱི་རང་སྤྱིའི་མཚན་ཉིད་འབྱེད་པ་སོགས་ལམ་རྟགས་ཀྱི་ཡོན་ཏན་རྣམས་ཀྱང་རྩོལ་མེད་དུ་འཆར་ནུས། དེས་འདི་གཉིས་ཤན་འབྱེད་དགོས་ཀྱང་། གང་ཟག་སྔོན་སྦྱངས་ཅན་དང་ཉམས་མྱོང་ནང་ནས་ཤར་བ་ལས་ཕལ་གྱིས་རྟོགས་དཀའ་ཞིང་ནོར་སོ་ཆེ་བས། ལས་དང་པོ་པ་རྣམས་ཀྱིས་མཉམ་བཞག་གི་སྐབས་སུ། ངའི་འདི་སེམས་ཡིན་ནམ་རིག་པ་ཡིན། རྣམ་ཤེས་ཡིན་ནམ་ཡེ་ཤེས་ཡིན། ཀུན་གཞི་ཡིན་ནམ་ཆོས་སྐུ་ཡིན་སྙམ་དུ་ཧ་ཅང་དཔྱད་ཆེས་ན་སེམས་གཡེངས་ཤིང་འཁྲུགས་པའི་རྒྱུ་བྱེད་དེ། གང་ཡང་ཡིད་དཔྱོད་ཀྱི་ས་ལས་མ་འདས་པས་གནས་ལུགས་རྟོགས་པ་ལ་ཕན་གོ་ཆུང་། དེས་ན་རང་བབས་བཅོས་མེད་ཉིད་སྒོམ་གྱི་ངོ་ཏིར་བཟུང་ན་ལེགས་ཏེ། རྣམ་རྟོག་དེ་ཉིད་ཆོས་ཉིད་ཡིན་ཤེས་ན། །ཆོས་ཀྱི་དབྱིངས་ཉིད་གཞན་དུ་བཙལ་མི་དགོས། །ཞེས་དང་། རྗེ་མི་ལས། བསམ་དུ་མེད་པ་བསྒོམ་ཤེས་ན། །ཉོན་མོངས་གྲི་ཟད་བརྡར་ཟད་ཡིན། །བསམ་མནོ་མང་པོ་བཏང་ཕྱིན་ཆད། །ཇི་ལྟར་བསྒོམས་ཀྱང་འཁྲུལ་པའི་གཟེབ། །ཅེས་གསུང་། དེས་ན་ནང་མྱོང་བས་རིམ་པར་གཏན་ལ་ཕབ་དགོས་ཀྱི། ཕྱི་རྟོག་གེའི་དཔྱད་སྐམ་ཙམ་གྱིས་ནི་གར་ཡང་མི་ཕྱིན་ནོ། །མི་མཇེད་ཀྱི་སྒྲ་བཤད། ལས་ཉོན་སྡུག་བསྔལ་ལས་མི་མཇེད་པའམ་བསྲན་ཐུབ་པ་སྟེ་བཟོད་བསྲན་ཆེ་བའི་དོན་དུ་མཛོད་འགྲེལ་པད་དཀར་དུ་བཤད་པ་དེ་ལས་གཞན་མ་མཐོང་། མཐར་ཐུག་འབྲས་དབྱིངས་ཟག་མེད་སྒྲིབ་བྲལ་དུ་སོན་པའི་ཚེ། སྣང་སྟོང་ཟུང་དུ་འཇུག་པའི་ཆོས་དབྱིངས་ཀྱི་གནས་ལུགས་མཐར་ཐུག་པ་མངོན་དུ་གྱུར་པའི་ཕྱིར། དབྱིངས་ཀ་དག་གི་ལྡོག་ཆ་ནས་ནང་གསལ་ཆོས་སྐུ་དང་། དེའི་སྣང་ཆ་མ་འགགས་པ་རང་སྣང་ལྷུན་གྲུབ་ཀྱི་ལྡོག་ཆ་ནས་ལོངས་སྐུའི་ཞིང་བཀོད་སོགས་ཡིན་པས། དོན་ལ་དེ་གཉིས་དུས་ལ་སྔ་ཕྱི་སོགས་ཀྱི་ཁྱད་པར་དབྱེར་མེད་པར་ཟུང་འཇུག་མཉམ་པ་ཉིད་དུ་གོ་ན་བདེའམ་སྙམ། དེས་ན་ཆོས་ཉིད་ངོ་བོའི་བཞུགས་ཚུལ་ལ་གཟིགས་བྱ་གཟིགས་བྱེད་གཉིས་མ་གྲུབ་པས་རང་བཞིན་མཉམ་པ་ཉིད་ལས་མ་འདས་ཀྱང་། དེ་ལས་ཤར་བའི་ཞིང་སྐུའི་བཀོད་པ་སོགས་ཀྱང་མ་འགགས་ཤིང་མ་འདྲེས་པར་འཆར་བས་དེ་དང་དབྱེར་མེད་དུ་གཟིགས་པ་མི་འགལ་ཏེ་རྟོགས་བྱ་མཐར་ཐུག་བདེན་གཉིས་དབྱེར་མེད་དུ་གཟིགས་པའི་ཡེ་ཤེས་ཉིད་དག་པ་མཐར་ཐུག་པའི་ཕྱིར་རོ་སྙམ། ལར་འདི་སྐོར་རང་བློར་འཕྲལ་ཤར་ཙམ་ལས། གཞུང་འགྲེལ་སོགས་དང་བསྟུན་ནས་དཔྱད་པ་མ་གྲུ བ་ཅིང་། ཡིད་ངོར་སྣང་བ་མ་ངེས་པ་ཤིན་ཏུ་མང་སྟབས་ཞིབ་པར་ཁ་ཚོན་མི་ཆོད་ཅིང་ནོར་འཁྲུལ་ཡང་མང་དུ་ཡོད་མཆི་བས་ཉིད་ཀྱི་ཆོས་སྤྱན་རྣམ་པར་དག་པས་གཟིགས་ཤིང་། ཀུན་མཁྱེན་ཆེན་པོའི་གསུང་སོགས་དགོངས་འགྲེལ་ཚད་མ་རྣམས་དང་བསྡུར་ནས་ནོར་བའི་གནས་རྣམས་དོར་བར་མཛོད་ཅིག ཅེས་པའང་མདོ་རྒྱུད་ལུང་རིགས་སྨྲ་བའི་སྤོབས་པ་ཅན་མཁན་འཇིགས་མེད་སྒྲ་དབྱངས་ཀྱི་གསུང་ལན་དུ་རྨོངས་པ་པད་རྣམ་གྱིས་ཡིད་ངོར་གང་ཤར་ནད་མལ་ནས་བྲིས་ཏེ་ཕུལ་བར་དགེ། །།
གྲུབ་ཐོབ་ཆེན་པོ་ཤེས་རབ་ཡར་འཕེལ་གྱི་གསུངས་ལས།
༄༅། །གྲུབ་ཐོབ་ཆེན་པོ་ཤེས་རབ་ཡར་འཕེལ་གྱི་གསུངས་ལས། ཡང་འཕགས་ལམ་ཆོས་ཉིད་ཀྱི་བདེན་པ་མངོན་སུམ་དུ་གཟིགས་པའི་གྲུབ་ཐོབ་ཆེན་པོ་ཤེས་རབ་ཡར་འཕེལ་གྱི་གསུངས་ལས། འདིར་གཞི་ལམ་འབྲས་བུའི་རྣམ་བཞག་དཔེ་དོན་སྦྱར་ཏེ་མདོར་བསྡུས་གོ་བདེར་བཤད་ན། འདི་ལྟར་སྤྱི་གཞི་བདེ་གཤེགས་སྙིང་པོའི་གནས་ལུགས་ཀ་དག་ལྷུན་གྲུབ་དབྱེར་མེད་དུ་འདོད་པ་སྟེ། དེ་ཡང་ངོ་བོ་ཀ་དག་གི་ཆ་ནས་དུས་གསུམ་འཕོ་འགྱུར་བྲི་གང་མེད་པ། མཐའ་དབུས་བསམ་བརྗོད་རྣམ་དབྱེ་ལས་འདས་སོ། །རང་བཞིན་གསལ་དག་གི་ཆ་ནས་ཁ་དོག་མཚན་མ་ཅིར་ཡང་མ་གྲུབ་ལ་ཀུན་གྱི་འཆར་གཞི་འགགས་མེད་ལྷུན་གྱིས་གྲུབ་པ། སྣང་སེམས་གང་ཡང་མེད་ལ་ཆོས་ཉིད་ངོ་བོ་ནང་གསལ་ཕྱི་རྒྱ་མ་རལ་བར་བཞུགས་པ་དཔེར་ན་ཤེལ་འོད་ནང་གསལ་དུ་འཁྱིལ་བ་བཞིན་ནོ། །དེ་ཉིད་མ་འགྱུར་བཞིན་དུ་ལྷུན་གྲུབ་ཐུགས་རྗེའི་རོལ་རྩལ་སྣ་ཚོགས་སུ་འགྱུར་ཏེ་ཕྱིར་གསལ་སྣང་སྲིད་འཁོར་འདས་ལམ་གསུམ་གྱི་རྣམ་པར་མཆེད་པ་འདི་ཡང་བརྟགས་ན་སྐྱེ་འགག་གནས་གསུམ་མེད་པ་དཔེར་ན་ཤེལ་གང་དྲི་མེད་ལ་ཉི་ཟེར་ཕོག་པའི་རྐྱེན་གྱིས་ནང་འོད་ཕྱིར་གསལ་བ་དེ་ཡང་རང་བཞིན་གྱིས་མ་སྐྱེས་པ་བཞིན་ནོ། །སྤངས་རྟོགས་མཐར་ཕྱིན་འབྲས་བུའི་དཔེ་ཡང་ཤེལ་ཉི་མ་མེད་པར་བཞག་དུས་ནང་གསལ་དུ་སོང་བ་དེ་བཞིན་དུ་ཐོས་བསམ་བསྐྱེད་པའམ། ཡང་ན་གཞི་རིག་པའི་ཆོས་ཉིད་དུང་མདོག་ལྟ་བུ་ལས། གཞི་སྣང་ལམ་གྱི་རིམ་པ་ཇི་སྙེད་ཤར་བ། དཔེར་ན་མཁྲིས་ནད་ཅན་གྱི་ངོར་དུང་ལ་བརྟེན་པ་མེད་པའི་ཚུལ་དུ་སེར་པོར་སྣང་བ་དང་སེར་པོར་མཐོང་བ་ལྟ་བུ་ནི་ཀུན་གཞི་དང་དེའི་རྣམ་ཤེས། དེ་ལས་མཆེད་དེ་སེར་སྣང་མིག་གི་དབང་པོར་ཤར་བ་ལྟ་བུ་སྒོ་ལྔའི་ཡུལ་དང་ཤེས་པ། སེར་སྣང་བདེན་གྲུབ་ཏུ་ཤར་བ་ལྟ་བུ་ནི་ཡིད་ཤེས། དེ་ལ་བདག་འཛིན་ངང་གིས་འཆར་བ་ལྟ་བུ་ནི་ཉོན་ཡིད་དེ་བྱིས་པ་ཤེད་མ་རྒྱས་པས་དུང་སེར་པོར་སེམས་པ་བཞིན་ནོ། །དེ་ཡང་སོ་སྐྱེའི་གནས་སྐབས་ཐོས་བསམ་སྒོམ་ལོ་བྱས་པས་བདེན་མེད་ལ་ངེས་པ་ཙམ་འདྲོངས་ཀྱང་ཀ་དག་བདེ་གཤེགས་སྙིང་པོ་མཐོང་དཀའ་བ་ལྟ་ཅི་སྨྲོས། འཁྲུལ་སྣང་ཙམ་ཡང་ལྡོག་མི་བཏུབ་པ་དཔེར་ན་རྒད་པོ་མཁྲིས་ནད་ཅན་གྱིས་དུང་གི་ཁ་དོག་ཇི་བཞིན་མཐོང་བ་ལྟ་ཞིག་སེར་སྣང་ཙམ་ཡང་ལྡོག་མི་བཏུབ་པ་དང་མཚུངས་པར་གནས་ཀྱང་། ཞི་ལྷག་གོམས་སྟོབས་ཀྱིས་འཁྲུལ་སྣང་འཁྲུལ་འཛིན་རིམ་གྱིས་བྲི་ནས་མཐར་རོ་གཅིག་གི་ལྟ་བ་རྟོགས་དུས་ཀུན་གཞིའི་ཕྱོགས་ཆ་གཅིག་ཙམ་དག་ཤུལ་དུ་ཆོས་སྐུ་བདེ་གཤེགས་སྙིང་པོ་མཐོང་བ་ནི་དོན་དམ་ཆོས་ཉིད་ཀྱི་བདེན་པ་དང་། ཀུན་གཞི་མ་དག་པའི་ཕྱོགས་ཐམས་ཅད་ཀུན་རྫོབ་བརྫུན་པ་བསླུ་བའི་ཆོས་ཅན་དུ་བཞག་ན་བདེའོ། །དཔེར་ན་སྐྱེས་བུ་དེའི་མཁྲིས་ནད་ཅུང་ཟད་བྱང་བས་དུང་གི་ཁ་དོག་ཕྱོགས་ཙམ་མཐའ་ནས་མཐོང་ཞིང་གཞན་པ་ཐམས་ཅད་སེར་པོར་སྣང་སྲིད་ན་དེ་དང་འདྲའོ། །དེ་ལྟར་ལམ་བདེན་བསྒོམས་འབྲས་འགོག་བདེན་ཆོས་སྐུ་མཐའ་དབུས་མེད་པར་མངོན་དུ་གྱུར་པ་གང་ཞིག་དཔེར་ན་མཁྲིས་ནད་གཏན་ནས་བྱང་བས་དུང་གི་ཁ་དོག་མཐའ་དབུས་ཡོངས་རྫོགས་མཐོང་བ་ལྟ་བུ་སྟེ། དེ་ཡང་དཔེས་ཕྱོགས་གཅིག་ཙམ་མཚོན་ནུས་ཀྱི་ཐམས་ཅད་མཚོན་ནུས་ན་དོན་དུ་འགྱུར་བར་གསུངས་པས་དེ་གཉིས་འབྱེད་པའང་ཤེས་བྱ་གལ་པོ་ཆེ་ཡིན་ཏེ། མཚོན་བྱེད་དཔེའི་ཡེ་ཤེས་ལ་བརྟེན་ནས་མཚོན་བྱ་དོན་གྱི་ཡེ་ཤེས་ཁོང་དུ་ཆུད་པའི་ཕྱིར། དཔེ་ལ་བརྟེན་ནས་དོན་ངོ་ཤེས། །རྟགས་ལ་བརྟེན་ནས་ཡིད་ཆེས་སྐྱེ། །ཞེས་སོ། །གཞན་ཡང་འཁྲུལ་སྣང་ཚོགས་བརྒྱད་ཇེ་འཕེལ་ཇེ་རགས་སུ་མཆེད་པ་ལུགས་འབྱུང་དང་། ལམ་བདེན་གོམས་སྟོབས་ཀྱིས་ཚོགས་བརྒྱད་ཇེ་འགྲིབ་ཇེ་ཕྲར་ལུགས་ལྡོག་ཏུ་སོང་བ་གཉིས། ཟླ་བ་ཡར་ངོ་ལ་འཕེལ་བ་དང་མར་ངོ་ལ་འགྲིབ་པ་གཉིས་ཀྱི་དཔེ་དང་། ཡང་གཞི་འབྲས་གཉིས་ལ་གནམ་སྟོང་གི་ཟླ་བ་ནང་གསལ་དུ་ཡོད་པའི་དཔེ་དང་སྦྱར་ཀྱང་ཆོག དེ་བཞིན་དུ་ཐོས་བསམ་སྒོམ་གསུམ་བྱ་མཁས་ན་དོན་དམ་བདེན་པ་རྟོགས་པར་འགྱུར་རོ། །ཞེས་དང་། ཡང་འདིར་བཤད་བྱ་འཁོར་འདས་ལམ་གསུམ་གྱི་རྣམ་གཞག་མདོར་བསྡུས་བརྗོད་ན། སྟོང་ངོས་ནས་ངོ་བོ་ཀ་དག་ཡིན་པའི་ཕྱིར་བསམ་བརྗོད་རྣམ་དབྱེ་ཅིར་ཡང་མ་གྲུབ་ལ། སྣང་ངོས་ནས་དབྱེ་ན་རིག་པ་བྱང་ཆུབ་ཀྱི་སེམས་ནི་གང་དུའང་མ་གྲུབ་པར་ཀུན་གྱི་འཆར་གཞིར་གནས་པ་ནམ་མཁའ་ལྟ་བུའོ། །རིག་པའི་རྩལ་ནི་འཆར་ཚུལ་གང་ཡང་མ་འགགས་པ་མེ་ལོང་གཡའ་དག་པའི་ངོས་ལྟ་བུའོ། །རོལ་པ་སྣང་སྲིད་སྣ་ཚོགས་སུ་ཤར་བའི་ཆོས་སྒྱུ་མའི་དཔེ་བརྒྱད་ལྟ་བུའོ། །རོལ་པ་འདི་དག་ལ་ལྟོས་ནས་སྣང་བ་དང་སྣང་ཡུལ་བཞག་སྟེ། ཕྱི་ནང་གང་ནའང་མེད་ལ་སྣང་བའི་གཟུགས་བརྙན་སྒྱུ་མའི་དཔེ་བརྒྱད་ལྟ་བུར་ཤར་བ་ལ། ཆོས་དང་ཆོས་ཅན་སོགས་བཏགས་ཀྱང་རང་ལུགས་ལ་མེད་པ་གསལ་སྣང་ཆེན་པོར་འདོད་ཀྱི། སེམས་དང་སེམས་བྱུང་ནི་རིག་པའི་རྩལ་ལས་མ་དག་པའི་རོལ་པར་ཤར་བ་ཡིན་ནོ། །མདོར་ན་རིག་པ་ཉིད་འཁོར་འདས་གང་དུའང་མ་གྲུབ་ལ་ཀུན་གྱི་འཆར་གཞི་མ་འགགས་པར་བཞུགས་ཤིང་། འཁོར་འདས་སུ་སྣང་བ་དེ་རིག་པའི་རྩལ་ཡིན་ལ། རོལ་པ་གསལ་སྣང་སེམས་དང་སེམས་ལས་གཞན་དུ་མ་གྲུབ་པར་སྟོང་གསལ་གཞི་མེད་ཡིན་ནོ། །དེ་ཕྱིར་གྲོལ་དུས་རྩལ་དང་རོལ་པ་གཞི་མེད་རྩ་བྲལ་ཡིན་པའི་གནད་ཀྱིས་རྨི་ལམ་སད་པ་ལྟར་དངོས་པོ་མཚན་མ་ཐམས་ཅད་རང་སར་དག་ནས་རང་རིག་ཆོས་སྐུ་འགྱུར་མེད་དང་པོའི་རང་མལ་ལས་མི་གཡོ་བར་ཤེས་པར་བྱའོ། །ད་དུང་བསྡུ་ན། རྩལ་ནི་རིག་པའི་ནུས་པས་འཁོར་འདས་སོ་སོར་ཤར་བ་ཉི་ཟེར་གྱིས་པདྨོ་འབྱེད་པ་དང་ཀུ་མུཏ་ཟུམ་པ་བཞིན་ནོ། །རོལ་པ་ནི་རིག་པའི་གདངས་ལ་རོལ་པ་མར་མེ་འོད་ལ་རོལ་པའམ་ཉི་མ་ཟེར་ལ་རོལ་པ་ལྟ་བུའོ། །རྒྱན་ནི་རང་སྣང་བཀོད་པར་སྣང་དུས་རང་ཤར་རིག་ངོར་བརྒྱན་པ་ནམ་མཁའ་ལ་འཇའ་སྤྲིན་ཉི་ཟླ་གཟའ་སྐར་གྱིས་བརྒྱན་པ་དང་འདྲ་གསུངས། ཡར་ཤེས་བྱའི་ཆོས་ཀུན་རྣམ་པར་དག་པའི་གཞི་ལ་དབྱིངས་དང་། ཤེས་བྱེད་སེམས་དང་སེམས་བྱུང་ཐམས་ཅད་རྣམ་པར་དག་པ་ལ་རིག་པ་ཡེ་ཤེས་ཟེར་རོ། །ཡར་མར་ལམ་དུས་ལྷུན་གྲུབ་ཀྱི་སྟོང་ཆ་ནས་སེམས་ཉིད་ཀྱི་དོད་པོ་ལ་ཆོས་ཉིད་དང་། སྣང་ཆ་ནས་སེམས་དང་སེམས་ཅན་སོགས་ཀྱི་དོད་པོ་ལ་ཆོས་དང་ཆོས་ཅན་སོགས་བཏགས་སོ། །ཡང་ཀུན་རྫོབ་ཐབས་ཀྱི་ཆ་ནས་ལམ་བདེན་དང་། དོན་དམ་ཐབས་བྱུང་གི་ཆ་ནས་འགོག་བདེན་སོགས་བཏགས་སྐབས་ཡོད། ཡང་འདི་ལྟར་སྣང་བའི་ཆོས་ཐམས་ཅད་སེམས་ཀྱང་མིན་ལ། སེམས་ཀྱི་བག་ཆགས་སྣང་བ་ལས་གཞན་མིན་ཕྱིར། ཡུལ་ཅན་གྱི་ངོས་ནས་གཞལ་ནའང་སྟོང་གཟུགས་ཡིན། སྣང་ཡུལ་གྱི་གཟུགས་བརྙན་རང་སྣང་དེ་ཉིད་སྣང་ཡུལ་ཡང་མིན་ལ་སྣང་ཡུལ་མ་ཡིན་པ་གཞན་ཡང་མ་ཡིན་པའི་ཕྱིར། ཡུལ་ངོས་ནས་གཞལ་ནའང་སྟོང་གཟུགས་ཡིན་ནོ། །དེ་བཞིན་དུ་སྣང་བ་ཐམས་ཅད་བདེན་མེད་བརྫུན་པར་ཤེས་ན་ཡང་དག་ཀུན་རྫོབ་དང་། དེ་དག་བདེན་པར་བཟུང་ན་ལོག་པའི་ཀུན་རྫོབ་ཟེར་རོ། །སེམས་བྱང་སེམས་པའི་ཤེས་རབ་ཀྱིས་ཆོས་ཐམས་ཅད་རང་བཞིན་མེད་པར་ཤེས་པ་རྣམ་གྲངས་པའི་དོན་དམ། ཟུང་འཇུག་འཕགས་པའི་ཡེ་ཤེས་ཀྱིས་མི་ཕྱེད་རོ་མཉམ་ཆེན་པོར་རྟོགས་པ་ནི་རྣམ་གྲངས་མིན་པའི་དོན་དམ་ཞེས་བྱ། ཡང་རྒྱུད་ལས། སེམས་ནི་མིང་བཞིའི་ཕུང་པོ་ཡིན། །ཞེས་གསུངས་པས། འདུ་ཤེས་མཚན་མར་འཛིན་པ་ཅན་ལ་རྒྱ་ཆེ་ཆུང་བར་མ་གསུམ། ཚོར་བ་མྱོང་ཞེན་ཅན་ལ་བདེ་སྡུག་བར་མ་གསུམ། འདུ་བྱེད་མངོན་གྱུར་འབད་རྩོལ་ཅན་ལ་སེམས་བྱུང་ལྔ་བཅུ་རྩ་གཅིག རྣམ་ཤེས་རིག་ཅིང་གུད་གཅོད་ཅན་ལ་ཚོགས་བརྒྱད་ཡོད་ལ། དེ་ཐམས་ཅད་ལས་འདས་པའི་དམིགས་མེད་ཀྱི་ཉམས་མྱོང་ཞིག་མེད་ན་བླ་མས་ངོ་སྤྲད་མི་ཤེས་ཤིང་། སློབ་མས་གོ་དཀའ་བ་ཞིག་ཡོད། ཁྱད་པར་ཡིད་ཤེས་ཀུན་གཞི་ལ་ཐིམ་ཞིང་ཆོས་སྐུར་སད་དུས་ཤེས་རབ་སྟོང་པ་ཉིད་ཟེར་བ་ཡིན། དེ་ཙ་ན་ཕུང་ལྔའི་ནང་ཚན་རྣམ་ཤེས་འགགས་པ་ཡིན་ཏེ། དཀོན་མཆོག་བརྩེགས་པ་ལས། སེམས་དང་ཡིད་དང་རྣམ་པར་ཤེས་པ་དང་ཡང་བྲལ་ལ་ཏིང་ངེ་འཛིན་གྱི་གནས་མི་འདོར་བ་འདི་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀྱི་གསང་བ་བསམ་གྱིས་མི་ཁྱབ་པའོ། །ཞེས་སོ། །དེ་བཞིན་དུ་ཡིད་ཤེས་ལས་གྲོལ་དུས་ད་ལྟར་གནས་པ་མེད་པའི་ཕྱིར་ན་མཚན་མ་མེད་པའམ་རང་བཞིན་མེད་པ་ཟེར་རོ། །དེ་ཙ་ན་ཕུང་ལྔའི་ནང་ཚན་འདུ་ཤེས་འགགས་པ་ཡིན་ནོ། །དེའི་དུས་སུ་ནང་ཤེས་པའི་ཉམས་མྱོང་དང་། ཕྱི་སྣང་བའི་གནས་ཆ་གཉིས་ཀ་མེད་པའི་ཕྱིར་ཕུང་ལྔའི་ནང་ཚན་གྱི་ཚོར་བ་འགགས་པ་ཡིན་ནོ། །དེ་ཙ་ན་རང་རྒྱུད་ཡིད་སྨོན་གྱི་འབད་རྩོལ་ཞིག་ནས། རང་ཤར་རང་གྲོལ་དུ་ཡོད་པའི་ཕྱིར་ན་ཕུང་ལྔའི་ནང་ཚན་འདུ་བྱེད་འགགས་པ་ཡིན་ནོ། འདི་དག་མདོ་རྒྱུད་མན་ངག་རྣམས་དང་ཞུ་དག་ཕེར་རུང་མི་ཕེར་རུང་རང་གི་ཉམས་མྱོང་གི་སྟེང་ནས་བཤད་པ་ཡིན། དེ་ལྟར་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་གསུམ་ལེགས་པར་སྒོམ་ཤེས་ན་ཐར་མཁྱེན་གྱི་ལམ་སྣ་ཟིན་ཙམ་ཡིན། རྣམ་ཐར་སྒོ་གསུམ་དང་མ་ལྡན་ན་ཐར་པ་དང་ཐམས་ཅད་མཁྱེན་པ་དཀའོ། །དེ་ཅིའི་ཕྱིར་ན་སྟོང་པ་ཉིད་ལ་གོམས་ན་ཆོས་སྐུ། མཚན་མ་མེད་པ་ལ་གོམས་ན་ལོངས་སྐུ། སྨོན་པ་མེད་པ་¡eལ་ཞུ་མཆན། ¡fགོམས་ན་སྤྲུལ་སྐུ་འགྲུབ་པ་ཡིན་ནོ། །དེ་ལ་ལྟ་བ་སྟོང་པ་ཉིད། སྒོམ་པ་མཚན་མ་མེད་པ། སྤྱོད་པ་སྨོན་པ་མེད་པའམ། ཡང་ན་ལྟ་བ་ངོས་བཟུང་མེད་པ། སྒོམ་པ་རབ་ཏུ་མི་གནས་པ། སྤྱོད་པ་ཡིད་སྨོན་མེད་པ་ཞེས་བཏགས་ཀྱང་ཕྱོགས་རེ་དང་བསྟུན་ན་འགལ་བ་མེད་དོ། །དེར་གོམས་ཚུལ་རྣམ་གཡེང་དང་བྲལ་བའི་ཞི་གནས་ཀྱི་ངང་ནས་རེ་དོགས་བསམ་སྒོམ་ལས་འདས་པའི་རང་བབས་རང་ཡན་རང་ཤར་རང་གྲོལ་རང་གསལ་སྟོང་ཧྲིག་གེར་རིག་ཙམ་དྲན་ཙམ་ཤེས་ཙམ་དེ་ཡང་དག་ཡིན་པར། རྡོ་རྗེའི་ཚིག་ལས། ཆམ་གནས་ཐོལ་ཤར་རིག་པའི་གདངས༔ ཧྲིག་གིས་རིག་པ་ལྷག་མཐོང་ཡིན༔ ཞེས་དང་། ལྷོད་དེ་གནས་ལ་དེར་འཛིན་མེད༔ ཧྲིག་གེར་འགྱུ་བ་ངོས་བཟུང་བྲལ༔ ལྷང་ངེར་གྲོལ་ལ་རྗེས་ཤེས་མེད༔ སྐུ་གསུམ་ལྷུན་གྲུབ་དེ་ལ་ཟེར༔ ཞེས་སོ། །དེ་ཡང་ཞི་གནས་ཀྱི་ངང་བརྗེད་ནས་ཡེངས་རྗེས་སུ་དྲན་རིག་ཤེས་གསུམ་བྱུང་བ་ལ་འདོད་པ་གཏན་ནས་མ་ཡིན་པར་ཤེས་དགོས། དེའི་ཕྱིར་ཤེས་བྱའི་ཆོས་ཐམས་ཅད་ལ་སྐྱེ་འགག་གནས་གསུམ་མེད་པ་དང་། ཤེས་བྱེད་ཀྱི་སེམས་ལའང་བྱུང་གནས་འགྲོ་གསུམ་མེད་པ་ཞིག་མ་རྟོགས་བར་དུ་སེམས་ངོ་མ་འཕྲོད་པ་ཡིན་ནོ། །དེ་ལྟར་ནའང་ཁ་ཅིག་གིས་ཇི་ལྟར་བསྒོམས་ཀྱང་སྣང་ཐོག་ཏུ་ཞིག་འགྲོ་བ་མ་གཏོགས་བསྒོམ་བྱ་སྒོམ་བྱེད་མི་འདུག་ཟེར་ཞིང་ཁེངས་སེམས་བྱེད་པ་དེ་ཡང་བརྟག་ཅིང་དཔྱད་ན་ཀུན་གཞི་ཡིན་གྱིས་ཆོས་སྐུ་མ་ཡིན་ཏེ། ཀུན་གཞི་ཆོས་སྐུར་ཐིམ་ཙ་ན་བསྒོམ་བྱ་འོད་གསལ་གྱི་སྣང་བ་ཡོད་ལ་སྒོམ་བྱེད་ཀྱི་གཉེན་པོ་མེད་པར་མྱོང་བས་གྲུབ་བོ། །ཡང་ན་གཟུགས་ཀྱི་མཚན་ཉིད་གཞིག་ཅིང་གཞོམ་དུ་རུང་བ་འབྱུང་ཆེན་བཞི། འབྱུང་ཆུང་ཡུལ་དབང་བཅུ་སྟེ། རྣམ་པར་རིག་བྱེད་མ་ཡིན་པ་སོགས་ཕྱི་ནང་ཆོས་སེམས་གཉིས་གཡོ་མེད་ཞི་གནས་ཀྱི་རྟར་བསྐྱོན་ནས། ནོར་མེད་སོར་རྟོག་གིས་ལེགས་པོར་དཔྱད་ཤེས་ན་དམན་མཆོག་ཙམ་མ་གཏོགས་དོན་གཅིག་པར། བཅོམ་ལྡན་འདས་ཀྱིས་འོད་སྲུང་འདི་ལ་ཆོས་རྣམས་ཀྱི་སོ་སོར་རྟོག་པའི་ཤེས་རབ་གང་ཞེ་ན་སེམས་ཡོངས་སུ་ཚོལ་བའི་བརྩོན་འགྲུས་སོ། །ཞེས་གསུངས། གང་ལྟར་ཆོས་སེམས་གཉིས་ཀ་ལ་རབ་ཏུ་མི་གནས་ཐོས་བསམ་སྒོམ་གསུམ་ཀུན་གྱི་དུས་སུ་རྟོགས་དཀའ་ཤོས་ཡིན་ནོ། །ཞེས་དང་། ཡང་གཞི་ལ་རྣམ་དབྱེ་མེད་ཀྱང་གཞི་སྣང་ལ་བརྟེན་ནས་ཐེག་རིམ་སོགས་རྣམ་བཞག་མཐའ་ཡས་པར། བྱམས་པས། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །རྟེན་པའི་ཆོས་ཀྱི་བྱེ་བྲག་གིས། །དེ་ཡི་དབྱེ་བ་རྣམ་པར་བརྗོད། །ཅེས་སོ། །ལམ་བདེན་ལ་གནས་དུས་ཞི་ག ནས་ཀྱིས་ཏིང་ངེ་འཛིན་འགྲུབ་ཅིང་། ལྷག་མཐོང་གིས་གཟུངས་འགྲུབ་པར་ཡེ་ཤེས་རྒྱས་པ་ལས་གསུངས་སོ། །དེ་ཡང་ཡེ་གནས་ཆོས་ཉིད་སྟོང་གསལ་ལ་མཐའ་དབུས་ངོས་བཟུང་མེད་པར་རིག་པ་ནི་ལྟ་བ་ཡིན་ལ། ཆོས་ཉིད་དྲན་པ་དེ་ཉིད་གཡོ་མེད་རྒྱུན་ཆགས་པ་ལ་དམིགས་གཏད་འདུ་ཤེས་མཚན་མ་མེད་པར་གནས་པ་ནི་སྒོམ་པ་ཡིན་ནོ། །དེ་ལྟར་སྒོམ་ཐོག་ཏུ་ལྟ་བ་འཛིན་ཞེན་མེད་པར་རང་བབ་རང་ཡན་རང་གྲོལ་དུ་འགྱུ་བ་ནི་སྤྱོད་པའོ། །ངོ་བོ་སྟོང་པ་རང་བཞིན་གསལ་བ་ཐུགས་རྗེ་ཀུན་ཁྱབ་དེ་གསུམ་དབྱེར་མེད་རྒྱ་མདུད་གཅིག་ཏུ་དྲིལ་ནས་རྒྱུད་ལ་འབྱོང་ན་འབྲས་བུ་ཡིན་ནོ། །ལམ་བདེན་རྣམ་པར་དག་པ་དེ་ལྟ་བུ་ལ་གོམས་འདྲིས་བྱས་ན་འགོག་བདེན་མངོན་དུ་འགྱུར་ངེས་པ་ཐུགས་ཆུབ་མཛོད། ཅེས་གསུངས་པ་སོགས་འཕགས་ལམ་ཆོས་ཉིད་ཀྱི་བདེན་པ་མ ངོན་དུ་གཟིགས་པའི་ཞལ་ལུང་ཡིན་པས་ཤིན་ཏུ་དོན་ཆེ་བར་སེམས་ཤིང་། ཞིབ་པར་རྫོགས་ཆེན་རིང་ལུགས་ཀྱི་ཡང་རྩེ་རང་རིག་གཅེར་མཐོང་དུ་སྐྱོང་ཐབས་སོགས། རྗེ་འདི་ཉིད་ཀྱི་གསུངས་ཕྱག་རྫོགས་དབུ་གསུམ་གྱི་མན་ངག་གི་སྒོམ་ཁྲིད་སྙིང་པོའི་གནད་བསྡུས་རྣམས་སུ་གཟིགས་ན་དོན་གྱི་གནད་སློང་ཞིང་གྲུབ་མཐའི་རྐང་ཟིན་པ་ཡོད་དོ། །ཞེས་པའང་ཞར་ལ་འཕྲོས་པ་དགེ།
རྗེ་སྐུ་ཚེ་གཅིག་ལ་མངོན་སངས་རྒྱས།
༄༅། །རྗེ་སྐུ་ཚེ་གཅིག་ལ་མངོན་སངས་རྒྱས། །མཚན་ཐོས་པ་དོན་ལྡན་པྲཛྙཱའི་ཞབས། །ཡོངས་གྲུབ་ཐོབ་ཕྲེང་བའི་ཚོགས་ལ་འདུད། །རྒྱུད་སྨིན་ཅིང་གྲོལ་བར་བྱིན་གྱིས་རློབས། དེ་ཡང་ཐར་པ་དོན་དུ་གཉེར་བའི་གང་ཟག་ཁྱད་པར་བ་རྣམས་ཀྱིས་ཉམས་སུ་ལེན་བྱ་ནི། ཐོག་མར་སྲིད་ལས་ངེས་པར་འབྱུང་འདོད་ཀྱི་བློ་དམ་པ་ཞིག་རྒྱུད་ལ་མ་སྐྱེས་ན་སྡུག་རུས་ཀྱིས་སྒོ་གསུམ་དགེ་ལ་བརྩོན་ཁུལ་བྱས་པ་ཐམས་ཅད་ཁ་ཙམ་ཚིག་ཙམ་དུ་འགྲོ་ཕྱིར་དལ་འབྱོར་ལ་སྙིང་པོ་ལེན་དུས་དགའ་སྤྲོ་དང་བཅས་ཏེ་ཉིན་མཚན་མེད་པར་དགེ་ལ་སྦྱོར་བ་དགེ་བཤེས་སྤྱན་སྔ་བ་ལྟ་བུ་ཞིག་དགོས། ཚེ་ལ་རྟག་བརྟན་མེད་ཚུལ་བསམ་དུས། དགྲ་འཆི་བདག་ནམ་འོང་ཆ་མེད་པས། སང་དང་འཇིག་རྟེན་ཕྱི་མ་གཉིས་པོ་གང་སྔ་མི་ཤེས་པ་ལ་བསམ་སྟེ། འཇིགས་སྐྲག་སྔངས་གསུམ་གྱིས་ཚེ་འདིར་སྣང་ལ་བློ་མི་འཇུག་པ་དགེ་བཤེས་ཁ་རག་སྒོམ་ཆུང་ལྟ་བུ་ཞིག་དགོས། དགེ་སྡིག་རྒྱུ་འབྲས་སྨིན་ཚུལ་ལ་བསམ་དུས་ཚེ་ཕྱི་མར་བདེ་སྡུག་གང་མྱོང་ཀུན་སློང་བསམ་པའི་ཁྱད་པར་ལ་རག་ལས་ཕྱིར་དགེ་སྦྱོར་ཐམས་ཅད་ལ་བསམ་ངན་ཕྲ་མོ་ཙམ་ཡང་མ་འདྲེས་པ་དགེ་བཤེས་འབན་གུང་རྒྱལ་ལྟ་བུ་ཞིག་དགོས། འཁོར་བ་ཐམས་ཅད་ཉེས་པའི་རང་བཞིན་ཡིན་ཚུལ་ལ་བསམ་དུས་མེ་ཡི་འོབས་སམ་སྲིན་མོའི་གླིང་ལྟ་བུར་མཐོང་བས་སྲིད་པའི་ཕུན་ཚོགས་ལ་བློ་མི་འཇུག་པ་གཅུང་དགའ་བོས་དམྱལ་གནས་གཟིགས་པ་ལྟ་བུ་ཞིག་དགོས། ཆོས་དང་འཇིག་རྟེན་གྱི་ཕུན་ཚོགས་གང་ལ་རེ་བ་བྱས་ཀྱང་རེ་བ་བཞིན་མི་འགྲུབ་པས་སྡུག་བསྔལ་བསྐྱེད་པའི་ཕྱིར་རེ་བ་སྤངས་དགོས་ཏེ་སེར་སྐྱ་མོ་རེ་ཐག་ཆད་པས་བདེ་བ་བཞིན་ནོ། །ནོར་གྱི་གསོག་འཇོག་དང་ཚོང་ཁེ་འཕེལ་སྐྱེད་སོགས་ཟང་ཟིང་གི་བསྲུང་བསྲེལ་ཐམས་ཅད་སྤང་དགོས་ཏེ་ཆུ་བསྐྱར་གྱིས་ཉ་རོ་བོར་བས་བདེ་བ་འཐོབ་པ་བཞིན་ནོ། །བུད་མེད་ཀྱི་བྱ་བས་གཡེངས་ནས་རྟག་ཏུ་སྡུག་བསྔལ་ཞིང་དགེ་བ་ལས་ཉམས་པར་འགྱུར་བས་ཁྱིམ་ཐབས་སྤང་དགོས་ཏེ་སྦྲུལ་ཚང་ནང་ནས་དོན་པས་བདེ་བ་ཐོབ་པ་བཞིན་ནོ། །ཏིང་ངེ་འཛིན་རང་ཤུགས་ཀྱིས་རྒྱུད་ལ་སྐྱེ་བས་མི་དགེ་བ་འགྲིབ་ཅིང་དགེ་བ་འཕེལ་བའི་ཕྱིར་གནས་དབེན་པ་བསྟེན་དགོས་ཏེ་རྔོན་པས་དབེན་པའི་ཡོན་ཏན་མཐོང་ནས་བསྡད་པས་བསམ་གཏན་སྐྱེས་པ་བཞིན་ནོ། །གནས་དབེན་པར་བསྡད་ཀྱང་སེམས་འདུ་འཕྲོས་མ་དབེན་ན་ལུས་སྒོམ་ཆེན་དང་སེམས་ཚོང་འདུས་པའི་དཔེ་ལྟར་འགྱུར་བས་སེམས་དབེན་བསྟེན་དགོས་ཏེ་མདའ་མཁན་གྱིས་དཔུང་ཚོགས་མ་མཐོང་བ་བཞིན་ནོ། །དམིགས་པ་བརྟན་པོ་ཐོབ་པ་ལ་རང་གཅིག་པུར་གནས་པ་ཞིག་དགོས་ཏེ་གཞོན་ནུ་མས་གདུ་བུ་གཅིག་བཅུག་པས་བྱ་བ་གྲུབ་པ་བཞིན་ནོ། །ཆོས་སྣང་བའི་སྒོ་དད་པ་ཡིན་པས་གྲུབ་མཐའ་གང་ལ་ཡང་ཕྱོགས་རིས་མི་བྱེད་པར་དག་སྣང་སྐྱེད། ཡོན་ཏན་ཐམས་ཅད་ཀྱི་གཞི་རྟེན་ཚུལ་ཁྲིམས་ཡིན་པས་བསྲུང་སྡོམ་རྣམས་མིག་གི་འབྲས་བུ་བཞིན་གཅེས་སྤྲས་སུ་བྱ། ཐེག་པ་ཆེན་པོའི་ལམ་རྩ་གཞན་ཕན་གྱི་བསམ་སྦྱོར་ཡིན་པས། བདག་བས་གཞན་གཅེས་ཀྱི་བྱམས་སྙིང་རྗེ་བྱང་ཆུབ་ཀྱི་སེམས་རིན་པོ་ཆེ་ལ་བློ་སྦྱངས། སངས་རྒྱས་ཀྱི་བསྟན་པའི་སྙིང་པོ་ལུང་རྟོགས་གཉིས་ཡིན་པས་ཐོས་བསམ་སྒོམ་གསུམ་དང་བཤད་སྒྲུབ་ལས་གསུམ་ལ་བློ་ནུས་ཅི་ཡོད་ཀྱིས་བརྩོན་དགོས། ཁྱད་པར་རྩ་བའི་བླ་མ་ཉིད་སྐྱབས་གནས་ཀུན་འདུས་སུ་ཐག་ཆོད་པས་ཅི་མཛད་འགྲོ་བ་འདུལ་བའི་ཐབས་མཁས་ཀྱི་ཕྲིན་ལས་སུ་མཐོང་བ། བྱས་པ་གཟོ་བ། བཀའ་དྲིན་དྲན་པ། བློ་སྣ་མོས་གུས་ཀྱིས་འཕྲོག་ཅིང་གདུང་ཤུགས་དྲག་པོས་རིག་པ་བསྒྱུར་ནུས་པ། ཡང་ཡང་མི་བརྗེད་པར་དྲན་པས་ཐ་མལ་གྱི་སྣང་བ་འགོག་ནུས་པ་སྟེ་ཁྱད་པར་བཞི་ལྡན་གྱི་མོས་གུས་དྲག་པོས་ཅི་མཛད་ཁྱེད་ཤེས་ཀྱི་རེ་ལྟོས་ཡིད་བསྒྱུར་དུ་བྱས་ཏེ་གསོལ་བ་ཕུར་ཚུགས་སུ་འདེབས་ནུས་ན་བྱིན་རླབས་འཕྲལ་དུ་འཇུག ཉོན་མོངས་པ་གློ་བུར་དུ་འགག ཡེ་ཤེས་སྐད་ཅིག་འཕེལ་བ་སོགས་སྐྱོན་ཐམས་ཅད་སེལ་ཞིང་ཡོན་ཏན་ཐམས་ཅད་ནམ་ཟླའི་དྲོད་འཕེལ་བ་བཞིན་ཐོག་བ བས་སུ་འཆར་བ་ཆོས་ཉིད་ཡིན་ནོ། །འཁོར་འདས་ལམ་གསུམ་གྱི་རྣམ་བཞག་མདོར་བསྡུ་ན། སྟོང་ངོས་ནས་རང་ངོ་ཀ་དག་ཡིན་པའི་ཕྱིར་བསམ་བརྗོད་རྣམ་དབྱེ་ཅིར་ཡང་མ་གྲུབ་ལ། སྣང་ངོས་ནས་དབྱེ་ན་རིག་པ་བྱང་ཆུབ་ཀྱི་སེམས་ནི་གང་དུའང་མ་གྲུབ་པར་ཀུན་གྱི་འཆར་གཞིར་གནས་པ་ནམ་མཁའ་ལྟ་བུའོ། །རིག་པའི་རྩལ་ནི་འཆར་ཚུལ་གང་ཡང་མ་འགགས་པ་མེ་ལོང་གཡའ་དག་པའི་ངོས་ལྟ་བུའོ། །རོལ་པ་སྣང་སྲིད་སྣ་ཚོགས་སུ་ཤར་བའི་ཆོས་སྒྱུ་མའི་དཔེ་བརྒྱད་ལྟ་བུའོ། །རོལ་པ་འདི་དག་ལ་ལྟོས་ནས་སྣང་བ་དང་སྣང་ཡུལ་བཞག་སྟེ། ཕྱི་ནང་གང་ནའང་མེད་ལ་སྣང་བའི་གཟུགས་བརྙན་སྒྱུ་མའི་དཔེ་བརྒྱད་ལྟ་བུར་ཤར་བ་ལ་ཆོས་དང་ཆོས་ཅན་སོགས་བཏགས་ཀྱང་རང་ལུགས་ལ་མེད་པ་གསལ་སྣང་ཆེན་པོར་འདོད་ཀྱི་སེམས་དང་སེམས་བྱུང་ནི་རིག་པའི་རྩལ་ལས་མ་དག་པའི་རོལ་པར་ཤར་བ་ཡིན་ནོ། །མདོར་ན་རིག་པ་ཉིད་འཁོར་འདས་གང་དུའང་མ་གྲུབ་ལ་ཀུན་གྱི་འཆར་གཞི་མ་འགགས་པར་བཞུགས་ཤིང་། འཁོར་འདས་སུ་སྣང་བ་དེ་རིག་པའི་རྩལ་ཡིན་ལ། རོལ་པ་གསལ་སྣང་སེམས་ནང་སེམས་ལས་གཞན་དུ་མ་གྲུབ་པར་སྟོང་གསལ་གཞི་མེད་ཡིན་ནོ། །དེ་ཕྱིར་གྲོལ་དུས་རྩལ་དང་རོལ་པ་གཞི་མེད་རྩ་བྲལ་ཡིན་པའི་གནད་ཀྱིས་རྨི་ལམ་སད་པ་ལྟར་དངོས་པོ་མཚན་མ་ཐམས་ཅད་རང་སར་དག་ནས་རང་རིག་ཆོས་སྐུར་འགྱུར་མེད་དང་པོའི་རང་མལ་ལས་མི་གཡོ་བར་ཤེས་པར་བྱའོ། །སེམས་ལ་གོམས་འདྲིས་བྱེད་དུས་གནས་ལུགས་ཨེ་ཤེས་ཨེ་མཐོང་མི་ལྟ་བ་དང་། རེ་དོགས་མེད་པར་ཁོང་ལྷོད་དེ་སྡོད་པ་དང་། བཟང་ངན་གང་ཡང་མི་བསྒོམ་པ་གསུམ་རྟག་པ་རྒྱུན་གྱིས་ཉམས་ལེན་གཅེས་གནད་ཡིན་ནོ། །ཡང་སྟོང་པ་མི་བསྒྲུབ་པ་དང་། སྣང་བ་མི་དགག་པ་གཉིས་ལ་མཉམ་རྗེས་ཀྱི་དོན་འདུའོ། །ཁྱད་པར་གནས་ཆ་མི་རྩོལ། འགྱུ་ཆ་མི་འགོག རིག་ཆ་མི་བསྒོམ། ཡང་གནས་ན་རང་བབས་སུ་འཇོག་པ་གནད་ཡིན་གྱིས་སྣང་བ་མངོན་གྱུར་མ་བྱེད། འགྱུ་ན་རང་ཡན་དུ་གཏོང་བ་གནད་ཡིན་གྱིས་ཆེད་འཛིན་བཅོས་བཟོ་མ་བྱེད། རིག་ན་རང་གྲོལ་དུ་སྡོད་པ་གནད་ཡིན་གྱིས་རེ་དོགས་གཉེན་པོ་མི་སྣོན་པ་གསུམ་ཡང་གཅེས་བསྡུས་ཡིན་ནོ། །ལར་གནས་འགྱུ་རིག་གསུམ་སྦྱངས་འབྲས་ལོངས་སྤྲུལ་ཆོས་གསུམ་ཡིན་ཕྱིར་དེ་གང་ལ་གོམས་ཀྱང་བཟང་ངན་མེད་ཀྱིས་བླང་དོར་མ་བྱེད། ཡང་དགོས་ལྟ་མཁན་རང་ལྟ་བའི་གནས་སམ་ཡུལ་གཉིས་རེ་མི་རུང་སྟེ། བལྟ་བྱ་མ་ཚོལ་ལྟ་བྱེད་མཁན་པོ་ཚོལ། །ཞེས་སོགས་ཀྱི་དོན་ནོ། །ཡང་གནས་ན་གནས་མཁན་ཁོ་རང་གིས་གཞན་སྒོམ་པ་འདྲ་མོ་མ་བྱེད་པར་གནས་མཁན་ཁོ་རང་གིས་ཁོ་རང་གི་ངོ་བོ་གཅིག་པུ་སྐྱོངས། འགྱུ་ན་འགྱུ་མཁན་ཁོ་རང་གིས་གཞན་སྤྱོད་པ་འདྲ་མོར་མ་བྱེད་པར་འགྱུ་མཁན་ཁོ་རང་གིས་ཁོ་རང་གི་ངོ་བོ་གཅིག་པུ་སྐྱོངས། རིག་ན་རིག་མཁན་ཁོ་རང་གིས་གཞན་ལ་བལྟ་བ་འདྲ་མོ་མ་བྱེད་པར་རིག་མཁན་ཁོ་རང་གིས་ཁོ་རང་གི་ངོ་བོ་གཅིག་པུ་སྐྱོངས། མདོར་བསྡུ་ན་གནས་འགྱུ་རིག་གསུམ་གང་ཡིན་ཀྱང་བལྟ་བྱ་ལྟ་བྱེད་བསྒོམ་བྱ་སྒོམ་བྱེད་སོགས་བློ་རྩེ་གཉིས་རེ་གཏན་ནས་འཚོལ་མི་ཉན་ཏེ་གཉིས་འཛིན་སྒོམ་གྱིས་གྲོལ་སྟོབས་ཆུང་། ཞེས་སོ། །དེས་ན་ངོ་བོ་རང་བཞིན་ཐུགས་རྗེ་གསུམ་པོ་གཉིས་མེད་གཅིག་དྲིལ་གྱིས་ལ་ཉམས་སུ་ལོངས་དང་གནས་འགྱུ་རིག་གསུམ་ཡེ་ཤེས་སུ་འཆར་བར་འགྱུར་རོ། །ཞེས་པའང་བསླབ་གསུམ་ལྡན་པ་འཇུ་བླ་ཨཱ་ཡུ་དང་མ་ཏི་ཟུང་གི་ཐུགས་དམ་གསལ་འདེབས་སུ་མི་རྒན་ཚེ་རིང་འབྲུག་རྒྱལ་གྱིས་སྣང་བཞི་ཟད་སར་འཁྱོལ་བའི་རྣལ་འབྱོར་པ་གྲུབ་ཆེན་ཤེས་རབ་ཡར་འཕེལ་གྱི་གསུང་རབ་ལས་ཅུང་ཟད་བཏུས་ཏེ་གྲུབ་པ་མཆོག་གི་བསྟི་གནས་བདེ་ཆེན་པདྨ་འོད་གླིང་དུ་སྣང་གསལ་གྱི་ངོགས་སུ་བྲིས་པ་དགེ། སྒོམ་དང་མི་བསྒོམ་གཉིས་ཀ་བཅོས་མ་སྟེ། །རྣལ་མའི་དོན་ལ་བསྒོམ་བྱ་སྒོམ་བྱེད་མེད། །སྒོམ་ཆེན་རྒན་བུ་སྒོམ་གྱིས་མི་འཆི་བར། །སྒོམ་ཆེན་ཆོས་སྐུའི་གཏན་སྲིད་ཟིན་པར་སྨོན། །མངྒལཾ།
ན་མོ་གུ་རུ་བཛྲ་དྷཱ་ར་ཡ། དེ་ཡང་འཁོར་བ་མཐའ་དག
༄༅། །ན་མོ་གུ་རུ་བཛྲ་དྷཱ་ར་ཡ། དེ་ཡང་། འཁོར་བ་མཐའ་དག་སྡུག་བསྔལ་གྱི་རང་བཞིན་དུ་ཤེས་པའི་ངེས་འབྱུང་གི་བློ་བཅོས་མ་མ་ཡིན་པ་དང་། སེམས་ཅན་ཐམས་ཅད་ཕ་མར་ཤེས་པའི་བྱམས་སྙིང་རྗེ་བྱང་ཆུབ་ཀྱི་སེམས་རིན་པོ་ཆེ་འདི་གཉིས་རྒྱུད་ལ་མེད་ན་བསྐྱེད་རྫོགས་བསྒོམ་ལོ་དང་བཟླས་བརྗོད་བྱས་ལོ་གང་དང་ཅི་བྱེད་ཀྱང་ཡང་དག་པའི་ལམ་དུ་འགྲོ་མི་སྲིད་ཅིང་། དུས་རྒྱུན་དུ་འཆི་བ་མི་རྟག་པ་དྲན་པའི་བློ་སྣ་ཐུང་ངེ་བ་ཞིག་མ་བྱུང་ཕྱིན་ཅི་བྱེད་ཚེ་འདིའི་འདུན་མར་སོང་ནས་ཆོས་གཤའ་མ་ཞིག་འགྲུབ་པའི་དུས་མི་ཡོང་བས་ཐོག་མར་བློ་ཙབ་ཙུབ་མང་པོ་མི་བྱེད་པར་སྐྱེས་བུ་གསུམ་གྱི་ལམ་ལ་བློ་སྦྱོང་གནད་དུ་འགྲོ་བ་རེ་ཅི་ནས་གལ་ཆེ་ཞིང་། དེ་ཉིད་སྟོན་པའི་གཞུང་ཐེག་པ་ཆེན་པོའི་མདོ་སྡེ་རྣམས་དང་། དེའི་དགོངས་འགྲེལ་འཕགས་བོད་མཁས་པ་རྣམས་ཀྱིས་མཛད་པའི་ལེགས་བཤད་ཀྱི་གཞུང་སྤྱི་དང་། ཁྱད་པར་ཞི་ལྷའི་སྤྱོད་འཇུག དྭགས་པོའི་ཐར་རྒྱན། བློ་སྦྱོང་དོན་བདུན་མ་སོགས་ལ་ལྟ་རྟོག་ཐེམ་པར་བྱ་དགོས། ཐ་ནའང་ཀློང་སྙིང་སྔོན་འགྲོའི་ཁྲིད་ཡིག་དེ་ལས་དང་པོ་པ་ལ་ཤིན་ཏུ་སྨན་པའི་ཞལ་གསལ་དུ་བཞུགས་འདུག་པས་གོ་བ་ལོང་ངེས་ཀྱི་ལྟ་རྟོག་དང་རང་རྒྱུད་ལ་ཅི་འབྱོར་གྱི་ཉམས་ལེན་ལག་ཏུ་ལོན་པ་ཞིག་ཅིས་ཀྱང་གལ་ཆེ། སྐྱབས་འགྲོ་ནས་བཟུང་རྡོ་རྗེ་ཐེག་པའི་བར་གྱི་ཁས་བླངས་ཀྱི་བསླབ་སྡོམ་རྣམས་བློ་ནུས་དང་བསྟུན་གནང་བཀག་གི་གནས་རྣམས་ཞིབ་མོར་བསྲུང་ཅི་ནུས་སུ་བསྲུང་། གལ་ཏེ་སྲུང་མ་ནུས་པ་རྣམས་འཕྲལ་དང་འཕྲལ་དུ་བཤགས་སྡོམ་གྱི་སོར་ཆུད་པར་བྱ། དུས་རྒྱུན་དུ་སྟོབས་བཞི་དང་ལྡན་པའི་སྒོ་ནས་བྱང་ཆུབ་ལྟུང་བཤགས། བཤགས་རྒྱུད་རྒྱས་བསྡུས། ཡིག་བརྒྱ་རྣམས་ཅི་འགྲུབ་བྱ། བཅོམ་ལྡན་འདས་ཀྱིས་ང་དང་ང་འདྲ་བ་མ་གཏོགས་གང་ཟག་གི་ཚོད་གང་ཟག་གིས་མི་བཟུང་གསུངས་པས་ཆོས་དང་གང་ཟག་སུ་ལའང་སྐྱོན་རྟོག་དང་དཔྱས་གདབ་མི་བྱ་བར་དད་པ་དང་དག་སྣང་ཕྱོགས་མེད་དུ་སྦྱངས། སྦྱིན་སོགས་དགེ་བའི་དངོས་པོ་ཆེ་ཕྲ་ཅི་སྒྲུབ་ཀྱང་གཞི་བསམ་སྦྱོར་བ་རྣམ་པར་དག་པས་རྒྱལ་བ་དགྱེས་པའི་ལམ་དུ་འགྲོ་ངེས་བྱ། གཞན་ཕན་རྒྱ་ཆེན་འབྱུང་བའི་མཁོས་ཀས་དབེན་ནའང་བསམ་པ་བཟང་པོ་བྱང་ཆུབ་ཀྱི་སེམས་དང་མི་འབྲལ་ངོས་དགེ་བ་གང་བྱེད་སྦྱོར་རྗེས་དག་པས་འགྲོ་ལ་བསྔོ་བ་གལ་ཆེ། བསྐྱེད་རིམ་གྱི་སྐོར་ངེས་རྫོགས་མཚན་ཉིད་པ་འབྱུང་དཀའ་ཡང་མོས་སྒོམ་ཙམ་ནི་ཅིས་ཀྱང་མེད་ཐབས་མེད་པས་དེ་དག་གི་གནད་དགེ་རྩེའི་ཟུང་འཇུག་སྙེ་མ་དེ་རང་ལུགས་ཆོ་གའི་འགྲོས་སྦྱར་ཞལ་གསལ་བལྟ་བདེར་འདུག་པས་དེར་གཟིགས། ངག་སྒྲིབ་སྦྱོང་བྱེད་རྡོར་བཟླས་དང་ངག་བཟླས་ཅི་འགྲུབ་ལ་འཕྲོ་འདུ་དམིགས་པའི་བསྒྱུར་ཁ་རྣམས་ཀྱང་བསྙེན་གཞུང་ལྟར་བློས་གང་འཆུན་གལ་ཆེ། རྫོགས་རིམ་མཚན་བཅས་ཀྱི་སྐོར་རྣམས་ཁེ་ཡང་ཆེ་ལ་ཉེན་ཡང་ཆེ་བས་གེགས་སེལ་སོགས་གནད་དུ་མ་སོང་ན་སྐྱོན་མང་ལྡང་ཕྱིར་བློས་འཆུན་དཀའ་བར་སྣང་། མཚན་མེད་རྫོགས་རིམ་ཕྱག་རྫོགས་ཀྱི་སྐོར་རྣམས་ཁྲིད་ཡིག་ཁུངས་མ་ཞིག་ལ་གཞི་བཅོལ་ནས་ཉམས་ལེན་མགོ་རྐང་ཚང་བ་རེ་བྱ་དགོས། དེ་ཡང་རྫོགས་ཆེན་སྐོར་ལ་རིག་འཛིན་གོང་མ་རྣམས་ཀྱིས་མཛད་པའི་ཡིག་ཆ་ཤིན་ཏུ་མང་ནའང་། གཙོ་བོར་ཀུན་མཁྱེན་ཆོས་ཀྱི་རྒྱལ་པོའི་གསུངས་རྣམས་ཀུན་བཟང་རྡོ་རྗེ་འཆང་གི་བཀའ་དང་ཁྱད་པར་མེད་པའི་བྱིན་རླབས་ཀྱི་ཚན་ཁ་ཆེ་ཞིང་། ཟབ་གནད་མན་ངག་གི་ཆེ་བ་དུ་མས་ཁྱད་པར་དུ་འཕགས་པ་ཡིན་པས་དེ་དག་ལམ་གྱི་སྲོག་ཏུ་གཟུང་། གཞན་དཔེ་ཉོབ་མང་པོ་ཀློག་ན་གྲུབ་མཐའ་སོ་སོའི་ཆོས་སྐད་འདྲ་མིན་དང་གདུལ་བྱའི་བློ་ཁྱད་ཀྱིས་སློབ་དཔོན་སོ་སོས་དགོངས་པ་ཅན་དུ་གསུངས་པའི་ཚིག་མང་པོས་སྒྲོ་འདོགས་མི་ཆོད་པའི་ཁར་སླར་ཡང་རྣམ་རྟོག་གི་འཚུབ་མ་ལྡང་ཉེན་འདུག་པས། དེང་སང་ལས་དང་པོ་པའི་སྐབས་འདིར་ཚད་ཐུབ་ཀྱི་གདམས་པའི་བེ་བུམ་གཅིག་ལ་བསྟེན་ཞིང་བླ་མའི་མན་ངག་ཁོ་ན་གཙོ་བོར་བྱས་ན་ཁེ་ཆེ་བར་མངོན། དེ་ཡང་བླ་མ་རྣམས་ཀྱིས་ཁྲིད་ཚུལ་ཕྱག་བཞེས་འདྲ་མིན་མང་ནའང་། དོན་དུ་སེམས་ཞེས་བྱ་བའི་རིག་རིག་ཏུར་ཏུར་པོ། ད་ལྟ་དགེ་སྦྱོར་འཕེལ་ན་དགའ་བ་དང་། བུལ་ན་མི་དགའ་བ་སྐྱེ་མཁན་འདི། དང་པོ་གང་ནས་བྱུང་། བར་དུ་གང་ན་གནས། མཐར་གར་འགྲོ། གཟུགས་ཁ་དོག་གཅིག་ཐ་དད་སོགས་གོ་ཡུལ་ཙམ་དུ་མ་སོང་བར་ལེགས་པར་བརྟགས་ཤིང་བཙལ་བས་ཅི་ཡང་མ་རྙེད། གང་དུའང་མ་གྲུབ་པའི། སྐྱེ་འགག་གནས་གསུམ་མཚན་མའི་ཆོས་ལས་འདས་ཤིང་དང་པོ་ངོ་བོ་ངོས་བཟུང་དང་བྲལ་བ་འདི་ལ་ངོ་བོ་སྟོང་པ་ཟེར། སྟོང་པ་དེའང་ཕྱང་ཆད་ནམ་མཁའ་ལྟ་བུར་མ་གྱུར་པར་སྣང་བཏགས་འཁོར་འདས་ཀྱི་ཆོས་ཐམས་ཅད་མ་འདྲེས་པར་གསལ་བའི་ཆ་འདི་ལ་རང་བཞིན་གསལ་བ་ཟེར། དེའི་རྩལ་ལས་དགེ་མི་དགེའི་རྟོག་ཚོགས་ཅི་དང་ཅི་ཤར་ཡང་ཤར་མཁན་གྱི་རིག་ངོར་བལྟས་པས་རང་ཞི་རང་གྲོལ་དུ་གྱུར་པའི་རིག་ཆ་སིང་ངེ་བ་དེ་ལ་ཐུགས་རྗེ་རིག་པའི་རྩལ་ཟེར། དེ་གསུམ་ཡང་སོ་སོ་བ་མ་ཡིན་པར་ངོ་བོ་གཅིག་ལ་ལྡོག་པའི་ཆ་ནས་བཏགས་པ་ཡིན་ཞིང་། མདོར་ན་དུས་གསུམ་གྱི་རྟོག་པས་མ་བསླད་པའི་བཞི་པའི་ཆ་རང་བྱུང་གི་ཡེ་ཤེས་ས་{སལ}ལེ་སིང་ངེ་ཡེ་རེ་ཝལ་ལེ་ཁྱུག་གེ་བ་འདི་ཀ་ཆོས་སྐུ་རང་གནས་ཀྱི་ཡེ་ཤེས་ཡིན་པས་འདི་ཉིད་ངོ་ཤེས་པར་བྱས་ནས་རང་བབས་སུ་སྐྱོང་བ་ཡིན། འདི་ལ་ཕྱག་ཆེན་པས་ཐ་མལ་གྱི་ཤེས་པ་དང་། དབུ་མ་པས་དོན་དམ་གྱི་བདེན་པ་དང་། ཞི་བྱེད་པས་ཐུག་ཕྲད་ཀྱི་ཤེས་པ་སོགས་མིང་གི་འདོགས་ཚུལ་མང་ཡང་དོན་དུ་གཅིག སེམས་རྣམ་རྟོག་མི་འཕྲོ་བར་ཀྱི་ལེར་གནས་པ་ལ་གནས་པ་དང་། ཡུལ་ལ་རྣམ་རྟོག་ཁྲོལ་གྱིས་འཕྲོ་བ་འགྱུ་བ་སྟེ། གནས་འགྱུ་གང་གི་སྐབས་སུ་ཡང་དེ་ཉིད་རིག་པའི་རིག་ཆ་ཟང་མ་ཞིག་ཡོང་བས་དེ་ངོས་ཟིན་པར་བྱས་ལ་དེའི་ངང་དུ་ཅེར་གྱིས་བལྟས་ནས་རང་བབས་སུ་འཇོག་པ་ལ་ཉམས་ལེན་སྐྱོང་བ་ཞེས་བྱ། དེའི་ཚེ་གཉེན་སོགས་འདོད་པའི་ཡུལ་ལ་གདུང་བའི་འདོད་ཆགས། དགྲ་ལ་སོགས་པ་ལ་སེམས་མི་བཟོད་པའི་ཞེ་སྡང་། ཅི་ཡང་དྲན་མེད་ནག་ཐམ་བླང་དོར་ལ་རྨོངས་པའི་གཏི་མུག་སྟེ་དུག་གསུམ་གྱི་རྟོག་པ་གང་ཤར་ཡང་སྤང་བླང་གཉེན་པོས་མ་བསླད་པར་དེ་ཁའི་རང་ངོ་ལ་ཅེར་གྱིས་བལྟས་པས་རང་ཡལ་རྗེས་མེད་དུ་སོང་ནས་གསལ་བདེ་རྣམ་པར་མི་རྟོག་པའི་ཡེ་ཤེས་རྒྱུད་ལ་སྐྱེ་བ་ཡིན། དེ་བཞིན་དུག་ལྔ་ཡེ་ཤེས་ལྔར་གནས་གྱུར་ཅེས་པའང་དུག་ལྔ་གང་སྐྱེས་ཀྱི་རང་ངོར་བལྟས་པས་རང་ཡལ་རྗེས་མེད་དུ་གྲོལ་བ་འདི་ལ་ཟེར། མིག་གི་ཡུལ་དུ་གཟུགས་སོགས་ཚོགས་དྲུག་གི་སྣང་བ་ཅི་ཤར་ཡང་དགག་སྒྲུབ་རེ་དོགས་མི་བྱེད་པར་མཐོང་མཁན་གྱི་རིག་པ་སོ་མའི་ངང་དུ་ཀློད་པས་འཛིན་ཞེན་རང་སར་གྲོལ་བ་ལ་ཚོགས་དྲུག་རང་གྲོལ་གྱི་ཐ་སྙད་བཏགས་པ་ལགས། དེ་འདྲའི་དགེ་མི་དགེ་ལུང་མ་བསྟན་གྱི་རྟོག་པ་ཅི་ཤར་ཡང་། ཡང་གཉེན་ལྟ་བུས་དགག་ཀྱང་མི་དགག ངན་པ་བཟང་པོར་བསྒྱུར་པ་ལྟ་བུས་བསྒྱུར་ཀྱང་མི་བསྒྱུར། ཐ་མལ་པ་ལྟར་རྗེས་སུ་ཡང་མི་འབྲང་བར། རྣམ་རྟོག་ཁོ་རང་གི་སྟེང་དུ་རང་སར་ཀློད་པས་སྦྲུལ་མདུད་རང་གིས་རང་གྲོལ་བ་བཞིན་དུ་གང་ཤར་གཉེན་པོ་མེད་པར་རྒྱ་གྲོལ་དུ་སོང་བས་གཤིས་ལ་ཕན་གནོད་དང་བྲལ་བར་གདེང་ཆོས་པ་ནི་རྫོགས་པ་ཆེན་པོ་གྲོལ་ལུགས་རྟོགས་པའི་གདེང་ཞེས་ཐེག་རྩེ་བླ་ན་མེད་པའི་མན་ངག་གི་གནད་དོ། །དེ་དག་གི་སྐབས་སུ་དབུ་མར་ལས་རླུང་འདུས་པའི་རྟགས་སུ་བདེ་གསལ་མི་རྟོག་པ་ལ་སོགས་པའི་སྣང་ཉམས་དང་ཤེས་ཉམས་མཐའ་ཡས་པ་ཞིག་འབྱུང་བས་དེ་དག་གང་ལའང་མཆོག་འཛིན་དང་རློམ་སེམས་མི་བྱེད་པར་བློ་བྲལ་རིག་སྟོང་རྗེན་པའི་ངང་དུ་ཡང་ཡང་བཤིགས་ཀྱིན་སྒོམ་པས་ཉམས་རྣམས་རྫོགས་ཏེ་མཐར་ཐུག་རྟོགས་པ་དོན་གྱི་ཡེ་ཤེས་མཐོང་ལམ་གྱི་བདེན་པ་མངོན་དུ་འགྱུར་བར་གསུངས་སོ། །དེ་ལྟར་ཉམས་སུ་ལེན་པའི་སྐབས་ཀུན་ཏུ་གེགས་སེལ་བོགས་འདོན་ཐམས་ཅད་ཀྱི་རྒྱལ་པོ་བླ་མ་སངས་རྒྱས་དངོས་སུ་མཐོང་བའི་མོས་གུས་དང་མ་འབྲལ་བར་གསོལ་འདེབས་དབང་བཞི་ལེན་ཅིང་ཐུགས་ཡིད་དབྱེར་མེད་དུ་བསྲེ་བ་ལམ་གྱི་སྲོག་ཏུ་བཟུང་ཞིང་། སྐབས་སྐབས་སུ་མཁྱེན་བརྩེའི་སྒོམ་ཕྱོགས་དྲིས་ལེན་སྐོར་ལའང་ལྟ་རྟོག་ཞིབ་ཏུ་བྱ། ཉམས་མཐོ་དམན་ཅི་བྱུང་ཡང་དགག་སྒྲུབ་མི་བྱེད་པར་རེ་དོགས་ཁོང་ནས་ལྷོད། བརྩོན་འགྲུས་རྒྱུན་བསྲིང་། མཉམ་བཞག་གི་སྒོམ་པ་དེ་རྗེས་ཐོབ་སྤྱོད་པ་དང་བསྲེ་ཅི་ནུས་བྱ། ཡུལ་རྐྱེན་དྲག་པོ་འཕྲད་ཚེ་སྒྲིམ་སྟེ་གཉུག་མའི་རང་ཚུགས་བཟུང་། སྐབས་སྐབས་སུ་ནམ་མཁའ་སུམ་ཕྲུགས་ཀྱི་དགོངས་པས་འགག་བསྡམས་པ་དང་རིག་པ་རྐྱང་དེད་ཀྱིས་ལ་བཟླ་བ་སོགས་གནད་དུ་གང་འགྲོ་བྱ། མདོར་ན་རྩོལ་མེད་ཡང་དག་གི་དྲན་པ་ཆུ་བོའི་རྒྱུན་བཞིན་དུ་བརྟེན་ནས་སྟོང་ཉིད་སྙིང་རྗེའི་སྙིང་པོ་ཅན་གྱི་བྱང་ཆུབ་ཀྱི་སེམས་རིན་པོ་ཆེ་རྒྱུན་དུ་གོམས་པ་ཅི་ནས་གལ་ཆེའོ། །དེ་ལྟར་མཛད་ན་བླ་མའི་བྱིན་རླབས་དང་། རང་གི་སྒོམ་སྟོབས་ལྷན་ཅིག་ཏུ་འཚོགས་པས་ཇི་ཞིག་ན་གོ་མྱོང་རྟོགས་གསུམ་ནང་ནས་ཤར་བས་སྒྲོ་འདོགས་ཡིན་ལུགས་སུ་ཆོད་པས་སུ་ལའང་འདྲིི་མི་དགོས་པའི་ངེས་ཤེས་བློ་བདེ་ཁོང་ནས་རྙེད་པ་ཞིག་འབྱུང་ཞེས་མཚུངས་མེད་བླ་མ་རྫོགས་པའི་སངས་རྒྱས་དངོས་དེའི་ཞལ་སྔ་ནས་ཐོས་པ་ལགས་སོ། །རང་བྱུང་རྒྱལ་པོ་པདྨའི་བསྟན་དང་མཇལ། །རང་དབང་དམ་པའི་ཆོས་ལ་སྤྱོད་དུས་འདིར། །རང་གྲོལ་རྟོགས་པའི་གནད་ལ་གོམས་བྱས་པས། །རང་གཞན་གདོད་མའི་རྒྱལ་སར་དབང་འབྱོར་ཤོག །ཅེས་པའང་ཡིད་ནོར་དམ་པ་གང་གི་བཞེད་སྐོང་དུ་སྙོམ་ལས་པ་དེས་འཕྲལ་མར་བྲིས་ཏེ་ཕུལ་བ་དགེ། །།
གདོད་ནས་རྣམ་གྲོལ་འོད་གསལ་གཉུག་མའི་གཤིས།
༄༅། །གདོད་ནས་རྣམ་གྲོལ་འོད་གསལ་གཉུག་མའི་གཤིས། །ལྟ་སྒོམ་སྤྱོད་གསུམ་བྲལ་བའི་དབྱིངས་ཆེན་པོར། །བཏང་བཞག་འགྲོ་འོང་བྲལ་བས་ཕྱག་འཚལ་ནས། །ལྟ་སྒོམ་སྤྱོད་པའི་མདོ་འགག་ཚིག་གསུམ་ཞུ། །འཁོར་འདས་ཆོས་ཀུན་སེམས་ཀྱི་རོལ་པ་ཙམ། །སེམས་ཉིད་དུས་གསུམ་སྐྱེ་འགག་འཕོ་འགྱུར་བྲལ། །བརྟགས་པས་མི་མཚོན་དཔྱད་པའི་བློས་མི་རེག །མཐའ་བྲལ་ཆོས་ཉིད་ཡངས་པའི་ཀློང་དུ་ཞོག །གང་ལྟར་འཛིན་པ་དེ་བཞིན་ཉིད་དུ་མིན། ཇི་ལྟར་བཟུང་ཡང་ཕྱིར་ཞིང་འཁྲུལ་པའི་གཟེབ། །ཡང་དག་དོན་ལ་རྟོགས་དང་མ་རྟོགས་མེད། །དེ་བས་སེམས་འཛིན་དམིགས་གཏད་བོར་ན་ལེགས། །སྒོམ་པ་མ་ཡིན་འདི་སྒོམ་གཏད་སོ་ཞིག །མི་སྒོམ་མིན་ཏེ་ཡེངས་འཁྲུལ་གདོད་ནས་དག །བློ་བྲལ་གཤིས་ལ་ཕེབས་ན་རྣལ་མའི་དོན། །རང་དྭངས་མི་གཡོ་འོད་གསལ་ཆེན་པོར་ཞོག །ཡེ་གྲོལ་ཉིད་ལ་བསྐྱར་གྲོལ་མི་དགོས་ཕྱིར། །རྩལ་ཀྱི་རྟོག་ཚོགས་བཟང་ངན་གང་ཤར་ཡང་། །རང་གིས་རང་གྲོལ་གཉེན་པོས་འཆོས་པ་སྤངས། །མ་བཅོས་གཉུག་མར་ཀློད་པའི་ལམ་ཁྱེར་གཅེས། །སྟོང་གསལ་ཤར་གྲོལ་འགགས་མེད་རིག་པའི་གཤིས། །ཡེ་ནས་སྐུ་གསུམ་དགོངས་པའི་ངོར་གནས་པས། །ཡིན་ལུགས་ཅོག་བཞག་བཞི་ཡི་ག སེང་ལམ་ནས། །གདོད་མའི་གསང་ཆེན་ཚེ་འདིར་འགྲུབ་པར་མཛོད། །མདོར་ན་ཅིར་སྣང་ལྷ་སྐུའི་ཕྱག་རྒྱ་ཆེ། །སྒྲ་གྲག་བརྗོད་པ་གྲགས་སྟོང་སྙིང་པོ་གསུང་། །དྲན་རྟོག་རང་གྲོལ་འོད་གསལ་རྒྱན་གྱི་ཐུགས། །རྡོ་རྗེ་གསུམ་གྱི་རྣལ་འབྱོར་འབྲལ་མེད་མཛོད། །དེ་སྐད་མཆོག་སྤྲུལ་གྲུབ་པའི་སྤྱོད་འཆང་དེས། །གསུང་གི་བསྐུལ་ངོ་མི་ལྡོག་གཡར་ཁྲལ་ཙམ། །སྤྲུལ་མིང་འགྱུར་མེད་པདྨ་རྣམ་རྒྱལ་གྱིས། །བྲིས་པའི་དགེ་བས་འགྲོ་རྣམས་སངས་རྒྱས་ཤོག །དགེའོ།། །།
ལགས་སྤྲོས་བྲལ་སེམས་ཀྱི་གནས་ལུགས་འདི་ལ།
༄༅། །ལགས། སྤྲོས་བྲལ་སེམས་ཀྱི་གནས་ལུགས་འདི་ལ། ཡོད་ཟེར་མཁན་དང་མེད་ཟེར་མཁན་གཉིས་ཀ་མི་འབྱུང་སྟེ། ཡོད་པ་མ་ཡིན་རྒྱལ་བས་འདི་མ་གཟིགས། །མེད་པ་མ་ཡིན་འཁོར་འདས་ཀུན་གྱི་གཞི། །ཞེས་གསུངས་པ་ལ། ངོ་བོ་ཀ་དག་ལ་རང་བཞིན་ལྷུན་གྲུབ་ཀྱི་གདངས་ཤར་བ་རྩལ་འགགས་མེད་སྣ་ཚོགས་སུ་སྣང་བ། གར་ཡང་རྒྱ་མ་ཆད་པ། རྟག་ཆད་གང་གི་ཕྱོགས་སུ་མ་ལྷུང་བ་ཞིག་ཡིན། བསྒོམ་པའང་། སྔར་འདས་ཀྱི་རྗེས་མི་གཅོད། མ་འོངས་པའི་མདུན་མི་བསུ། ད་ལྟར་གྱི་ཤེས་པ་འདི་ཡིན་གྱི་རྩིས་གདབ་གང་ཡང་མ་བྱས་པ་གཞི་ཆ་གསུམ་བྲལ་གྱི་ཤེས་པ། སེམས་བྱུང་གི་དྲི་མས་མ་གོས་པས་ས་{སལ} ལེ། ཡུལ་གྱི་ཕྱི་ལ་མ་འབྲངས་པས་སང་ངེ་། རྒྱ་གར་ཡང་མ་ཆད་པས་ཡེ་རེ། རྣམ་རྟོག་སྐྱེ་མེད་དུ་དག་པས་ཝལ་ལེ། གང་ཤར་གྱི་ངོ་བོ་ལ་རྩིས་གདབ་སྤངས་པས་ཁྱུག་གེ་བཞག་པ་ཡིན། རྣམ་རྟོག་བཀག་ཀྱང་མི་བཀག སྒྲུབ་ཀྱང་མི་སྒྲུབ། འདི་སྒོམ་གྱི་དམིགས་གཏད་མེད་པ། ཚོགས་དྲུག་ལྷུག་པར་བཞག དགེ་མི་ད གེའི་རྣམ་རྟོག་གང་ཤར་ཡང་དགག་སྒྲུབ་མི་བྱེད་པར་དེ་ཀའི་ངང་ལ་ཀློད། བདེ་གསལ་མི་རྟོག་པ་སོགས་ལེགས་པའི་ཉམས་དང་། དུག་གསུམ་རྣམ་རྟོག་སྐྱེ་བ་སོགས་དམན་པའི་ཉམས་ལྟ་བུ་གང་ཤར་ཡང་ལེགས་པར་མི་ཞེན། ངན་པར་མི་དགག སྣང་སྲིད་དག་མཉམ་ཆེན་པོའི་ལྟ་བས་གཉིས་འཛིན་གྱི་མདུད་པ་བཅད། ཡག་ཏུ་འདོད་པ། ཉེས་སུ་དོགས་པ། རེ་དོགས་འཁུ་འཕྲིག་འདི་རྣམས་གཉིས་འཛིན་ཡིན། བློ་གཉིས་འཛིན་གྱི་དབང་དུ་སོང་ན་སྔར་ཡང་བདག་རྟོག་གཟུང་འཛིན་གཉིས་སུ་བཟུང་བས་འཁོར་བར་འཁྱམས་པ་ཡིན། དོན་དམ་ཀ་དག་གི་ཀློང་དུ་དགེ་མི་དགེའི་མཚན་མ་མེད་ཀྱང་། ཀུན་རྫོབ་བདེན་པ་བསླུ་བ་མེད་པ་ཡིན་པས་རྒྱུ་འབྲས་ཆེད་དུ་མི་གསོད་པར་དགེ་ཚོགས་རྒྱ་མཚོ་ལྟ་བུ་བསྐྲུན་དགོས། འགྲོ་ཀུན་ཕ་མར་ཤེས་པའི་སྙིང་རྗེ་དང་ལྷག་པར་བྱང་ཆུབ་སེམས་འདི་མེད་ཐབས་མེད། ཧ་ཅང་གྲིམ་པ་དང་ཧ་ཅང་ལྷོད་ཆེ་བས་སྒོམ་མི་འབྱུང་གྲིམ་ལྷོད་རན་པར་གྱིས། རིག་པ་འདི་ལ་གཏད་བྱ་བའི་གཏད་ས་གཉིས་འཛིན་དམ་བྲིང་ངེ་བ་ཞིག་ཡོད་པ་མིན། བྱང་ཆུབ་ཀྱི་སེམས་སྔོན་དུ་འགྲོ་བས་སྤྱི་བོར་སྐྱབས་ཀུན་འདུས་པའི་བདག་ཉིད་མཚུངས་མེད་བླ་མ་བསྒོམ། མོས་གུས་དྲག་པོས་གསོལ་བ་བཏབ་པས་བླ་མ་འོད་ཞུ་རང་ལ་ཐིམ། བླ་མའི་ཐུགས་དང་རང་སེམས་དབྱེར་མེད་བདེ་བ་ཆེན་པོ་ཆོས་ཉིད་བློ་འདས་ཆེན་པོའི་དགོངས་པ་སྐྱོང་དགོས་པ་ཡིན། སྐབས་སུ་བསྲུང་འཁོར་གྱི་དམིགས་ཟབ་དང་ལྷག་པ་རང་རིག་ཀ་དག་གི་ངང་ནས་འཁོར་འདས་བདེ་སྡུག་ལེགས་ཉེས་ལྷ་འདྲེ་གདོན་བགེགས་ཀྱི་ཚོགས་གང་ཡང་མ་གྲུབ་པའི་ལྟ་བའི་གདེང་བསྐྱེད་པ་གལ་ཆེ། མདོར་ན་རེ་དོགས་འཁུ་འཕྲིག་སྤོངས་མཛོད། པདྨ་བི་ཛས་སོ། །
བླ་མ་ལ་ཕྱག་འཚལ་ལོ། །དང་པོ་ཆོས་ལ་འཇུག་པའི་སྒོ།
༄༅། །བླ་མ་ལ་ཕྱག་འཚལ་ལོ། །དང་པོ་ཆོས་ལ་འཇུག་པའི་སྒོ་ངེས་འབྱུང་ཡིན་པས་ཐོག་མར་བློ་ལྡོག་རྣམས་བཞི་རང་རྒྱུད་ཆོས་དང་འདྲེ་ངེས་མཛོད། ཐེག་པ་ཆེན་པོའི་ལམ་གྱི་རྩ་བ་བྱམས་སྙིང་རྗེ་བྱང་ཆུབ་ཀྱི་སེམས་རིན་པོ་ཆེ་ཡིན་པས་བདག་བས་གཞན་གཅེས་ཀྱི་བློ་རྒྱུད་ལ་ཅི་ཁེལ་མཛོད། རྟོགས་པ་དོན་བརྒྱུད་ཀྱི་ཡེ་ཤེས་བཙན་ཐབས་སུ་རྒྱུད་ལ་སྐྱེད་པ་བླ་མའི་བྱིན་རླབས་ལ་རག་ལས་པས་བླ་མ་སངས་རྒྱས་ཆོས་སྐུར་ལྟ་བའི་མོས་གུས་དཀར་པོ་གཅིག་ཐུབ་ལ་གནད་དུ་སྣུན་མཛོད། ཐོག་མེད་ནས་གོམས་པའི་ཨ་འཐས་བདེན་འཛིན་གྱི་རི་བོ་གཞིག་དཀའ་བས་དཔྱོད་པའི་འཁོར་ལོ་བར་མེད་དུ་བསྐོར་བ་ལ་འཁོར་འདས་ཀྱི་ཆོས་ཐམས་ཅད་བདེན་མེད་སྒྱུ་མ་ལྟ་བུའི་ལམ་ཁྱེར་ལ་བརྩོན་མཛོད། ཆོས་ཐམས་ཅད་སྟོང་ཞིང་བདག་མེད་པ་སྤྲོས་པའི་མཚན་མ་དང་བྲལ་བའི་གནས་ལུགས་སྣང་སྟོང་ཟུང་འཇུག་རྣམ་ཀུན་མཆོག་ལྡན་གྱི་སྟོང་ཉིད་ལ་ངེས་ཤེས་ཀྱི་གོ་བ་ནང་ནས་སྐྱེས་པའི་ཚེ་གཤིས་ལུགས་མ་བཅོས་བཞི་ཆ་གསུམ་བྲལ་གྱི་ངང་དུ། རང་བབས་སུ་ལྷོད་ཀྱིས་ཀློད། སྒོམ་སེམས་འཛིན་གྱི་་་་་་་་་་་་་་་་
བསྐྱེད་རིམ་སྤྱིའི་རྣམ་པར་བཞག་པ་ཉུང་གསལ་གོ་བདེར་བརྗོད་པ་རབ་གསལ་ནོར་བུའི་མེ་ལོང།
༄༅། །བསྐྱེད་རིམ་སྤྱིའི་རྣམ་པར་བཞག་པ་ཉུང་གསལ་གོ་བདེར་བརྗོད་པ་རབ་གསལ་ནོར་བུའི་མེ་ལོང་ཞེས་བྱ་བ་བཞུགས་སོ། །ན་མོ་གུ་རུ་ངྷེ་བ་དྷཱ་ཀི་ནཱི་ཡཻ། གང་མཚན་ཐོས་དང་དྲན་པས་ཀྱང་། །རྡོ་རྗེའི་ཡེ་ཤེས་བསྐྱེད་མཛད་པ། །བླ་མ་ལྷག་པའི་ལྷ་མཆོག་ལ། །བཏུད་ནས་བསྐྱེད་རིམ་མདོ་ཙམ་བརྗོད། །དེ་ལ་འདིར་རྒྱལ་བ་རྡོ་རྗེ་འཆང་ཆེན་པོས་གདུལ་བྱ་སེམས་ཅན་གྱི་སྐལ་བ་དང་འཚམ་པར་ཆོས་སྒོ་བསམ་གྱིས་མི་ཁྱབ་པ་ཞིག་གསུངས་པ་ཀུན་གྱི་སྐྱེལ་སོ་ནི་འབྲས་བུ་གསང་ཆེན་རྡོ་རྗེ་ཐེག་པ་ཉིད་ཡིན་ལ། དེའི་ལམ་ནི་ཐབས་བསྐྱེད་པའི་རིམ་པ་དང་། ཤེས་རབ་རྫོགས་པའི་རིམ་པ་གཉིས་སུ་ངེས་པ་ལས། འདིར་རིམ་པ་དང་པོ་བསྐྱེད་རིམ་གྱི་གོ་དོན་དང་སྒོམ་ཚུལ་ཆོ་གའི་འབྲེལ་དང་སྦྱར་ཏེ། གང་ཟག་ལས་དང་པོ་པ་རྣམས་ལ་ཕན་པའི་བསམ་པས་ལུང་འདྲེན་དང་བཤད་ཡམ་སོགས་བོར་ནས། ཤིན་ཏུ་ཉུང་གསལ་གོ་བདེར་བརྗོད་པ་ལ། སྤྱིར་རྡོ་རྗེ་ཐེག་པ་ནི་ཐེག་པ་ཆེན་པོའི་ཡང་ཆེན་པོར་གྱུར་པ་ཡིན་པས་ན་ཐེག་ཆེན་གྱི་བསམ་སྦྱོར་ལ་གནས་པ་གཞིར་བཞག་ཏུ་དགོས་པས། ཐོག་མ་ནས་ཅི་བྱུང་གང་བྱུང་མེད་པར་སྔགས་སུ་ཞུགས་རློམ་དང་བསྙེན་སྒྲུབ་སོགས་བྱས་ལོ་བགྱིས་པས་ཆོག་པར་མི་འཛིན་པར་འདི་ལྟར་བསམ་པར་བྱ་སྟེ། ཡང་ཡང་རྙེད་དཀའ་ཞིང་ཕན་ཐོགས་ཆེ་བའི་དལ་འབྱོར་གྱི་མི་ལུས་རིན་པོ་ཆེ་འདི་ལན་གཅིག་ཐོབ་ཏུ་ཟིན་ཀྱང་ཡུན་རིང་མི་སྡོད་པས་འཆི་བའི་ཆོས་ཅན་ལས་མ་འདས། དེ་ཡང་ནམ་འཆི་དང་འདིར་འཆིའི་ངེས་པ་མེད། འཆི་བའི་རྐྱེན་མང་། འཚོ་བའི་རྐྱེན་ཉུང་། དེས་ཀྱང་འཆི་རྐྱེན་བྱེད་པ་མང་། འཆི་བ་དེ་ཐོག་བབ་ཏུ་བྱུང་ན་སུས་ཀྱང་བཟློག་མི་ནུས། འཆི་བའི་ཚེ་རང་གི་རྗེས་སུ་འབྲང་བ་ནི་ལས་དཀར་ནག་གཉིས་མ་གཏོགས་གཞན་གང་ཡང་མེད། ཟག་བཅས་མི་དགེ་བའི་ལས་ཀྱིས་རྣམ་སྨིན་ངན་སོང་དུ་འཕངས་ན་ཚ་གྲངས་བཀྲེས་སྐོམ་བཀོལ་སྤྱོད་སོགས་ཀྱི་སྡུག་བསྔལ་མཐའ་མེད། གལ་ཏེ་ཟག་བཅས་དགེ་བས་མཐོ་རིས་ཀྱི་གནས་རྣམས་སུ་འཕངས་ཀྱང་རྟག་མི་ཐུབ་སྟེ་ནམ་ཞིག་འགྱུར་དང་འདུ་བྱེད་ལས་མ་འདས། དེས་ན་སྲིད་པའི་གནས་རིས་གང་དུ་སྐྱེས་ཀྱང་སྡུག་བསྔལ་གསུམ་གྱི་རང་བཞིན་ལས་བདེ་བའི་གོ་སྐབས་ཅུང་ཟད་ཀྱང་མེད་པས། ད་རེས་ཡར་འགྲོ་མར་འགྲོའི་ས་མཚམས། འདུན་མ་གཏན་ལེགས་དང་གཏན་ཉེས་ཀྱི་སྐབས་འདིར། ཚེ་འདིའི་བདེ་སྡུག་རྒྱལ་ཕམ་སྐྱིད་སྡུག་ཅི་བྱུང་ནའང་བྱུང་དགོས་པ་མེད། གཏན་དུ་སྡུག་བསྔལ་ལས་ཐར་པའི་རྣམ་གྲོལ་གྱི་འབྲས་བུ་ཐོབ་པ་ཞིག་མི་བྱེད་རེ་སྙམ་དུ་ཞེ་ཐག་པ་ནས་ངེས་འབྱུང་གི་བློ་ཞིག་སྐྱེ་བ་མེད་ན་ཐེག་ཆེན་ལྟ་ཅི་ཐེག་དམན་གྱི་ལམ་མཚན་ཉིད་པར་ཡང་མི་འགྱུར། དེའི་སྟེང་དུ་ཐེག་པ་ཆེན་པོ་པ་རྣམས་ལ་ནི་གཞན་ཕན་གྱི་ལྷག་པའི་བསམ་པ་ཉིད་གལ་ཆེ་བས། འདི་ལྟར་ནམ་མཁའི་མཐའ་དང་མཉམ་པའི་སེམས་ཅན་དགྲ་གཉེན་རིས་སུ་མ་ཆད་པ་འདི་ཐམས་ཅད་ཚེ་རབས་སྔ་མར་ཕ་མ་དང་གཉེན་གྱིས་འབྲེལ་བའི་དྲིན་ཆེན་ཤ་སྟག་སྟེ། འདི་ཐམས་ཅད་འདོད་པ་བདེ་བ་འདོད་ཀྱང་ཐབས་ལ་མི་མཁས་པའི་དབང་གིས་རྟག་པར་སྡུག་བསྔལ་གྱི་རྒྱུ་འབྲས་ལ་འཁོར་མོ་ཡུག་ཏུ་སྤྱོད་པ་འདི་རྣམས་སྙིང་རེ་རྗེ། འདི་རྣམས་བདེ་བ་དང་ལྡན། སྡུག་བསྔལ་དང་བྲལ་ཏེ་མྱུར་དུ་བླ་ན་མེད་པ་རྫོགས་པའི་སངས་རྒྱས་ཀྱི་གོ་འཕང་ཐོབ་ན་ཅི་མ་རུང་། དེའི་ཚུལ་ལ་བདག་གཅིག་པུས་ཅི་ནས་ཀྱང་འགོད་པར་བྱ། འོན་ཀྱང་དེའི་ནུས་པ་བདག་ལ་ད་ལྟ་མེད་པས། བདག་གིས་རྫོགས་པའི་སངས་རྒྱས་ཀྱི་གོ་འཕང་དེ་དུས་མྱུར་བ་ཉིད་དུ་ཅི་ནས་ཀྱང་ཐོབ་པར་བྱ། དེའི་ཆེད་དུ་མདོ་སྔགས་ཀྱི་ལམ་གྱི་ཟབ་གནད་རྣམས་འགལ་མེད་གཅིག་ཏུ་དྲིལ་ནས་ཉམས་སུ་བླང་བར་བགྱིའོ་སྙམ་པའི་ཀུན་སློང་དང་ཀུན་སྤྱོད་ཀྱི་ཁྱད་པར་ལ་གནས་པ་འདི་གལ་ཆེ་བས་ཡང་ནས་ཡང་དུ་རང་གི་རྒྱུད་ལ་སྦྱར་ཏེ་སྒོམ། རྟག་ཏུ་དྲན་པ་དང་ཤེས་བཞིན་བསྟེན། དེའི་འགལ་ཟླ་རང་དོན་ཡིད་བྱེད་ཀྱི་བློ་སྤངས། སྒོ་གསུམ་གྱི་བརྩོན་པ་མཐའ་དག་རྟག་པར་གཞན་ཕན་དུ་འགྱུར་ཞིང་བྱང་ཆུབ་ཆེན་པོའི་རྒྱུར་བསྒྱུར་ཤེས་པ་ཞིག་མེད་ན་ནམ་ཡང་ཐེག་ཆེན་གྱི་གྲལ་དུ་མི་ཚུད། ང་ཐེག་པ་ཆེན་པོ་པ་ཡིན་ཞེས་ཁས་བླངས་པ་ཙམ་གྱིས་ཅིའང་མི་རུང་བས་ཐོག་མར་འདི་ཁོ་ན་ལ་བློ་འབྱོང་བ་གཅེས་སོ། །དེ་ལྟ་བུའི་ཐེག་ཆེན་གྱི་བསམ་སྦྱོར་ལ་གནས་པའི་གང་ཟག་དེ་འབྲས་བུ་གསང་སྔགས་རྡོ་རྗེ་ཐེག་པ་ལ་འཇུག་པའི་ཚེ། ཐོག་མར་སྨིན་བྱེད་ཀྱི་དབང་ཐོབ་དགོས། དེ་མ་ཐོབ་ན་ཉན་པ་ཙམ་ཡང་མི་དབང་ན་སྒྲུབ་པ་སོགས་ལྟ་ཅི། དབང་དེ་ཡང་ཐོབ་པ་ཙམ་གྱིས་མི་ཆོག་དེའི་སྲོག་དམ་ཚིག་ལ་གནས་དགོས། དེ་ལ་མ་གནས་ན་གང་བརྩམ་གྱི་འབྲས་བུ་ཕྱིན་ཅི་ལོག་ཏུ་འགྱུར་བས་ཚེ་འདིར་བཀྲ་མི་ཤིས་ཤིང་ཕྱི་མ་རྡོ་རྗེའི་དམྱལ་བ་ལས་འགྲོ་ས་གཞན་མེད། ཚུལ་བཞིན་བསྲུང་ནུས་ན་མ་བསྒོམས་ཀྱང་སྐྱེ་བ་བདུན་ན་གྲོལ་བར་གསུངས། དེའི་རྩ་བ་ཡང་བླ་མའི་སྐུ་གསུང་ཐུགས་ཀྱི་དམ་ཚིག་དང་མི་འགལ་བར་བྱ་བ་ཡིན། རྟག་ཏུ་བླ་མ་ལ་གསོལ་བ་འདེབས་ནུས་ན་བྱིན་རླབས་ངང་གིས་འཇུག ཉམས་རྟོགས་ཡོན་ཏན་ཐམས་ཅད་དབྱར་དུས་ཀྱི་ས་ཆུ་དྲོས་པ་བཞིན་འོང་། ཐེག་པ་ཆེན་པོའི་ལམ་གྱི་ཡོན་ཏན་ཆེ་སྐྱེ་ཆུང་སྐྱེ་ཐམས་ཅད་བླ་མ་དགེ་བའི་བཤེས་གཉེན་ལ་རག་ལས་པར་གསུངས། དངོས་གཞིའི་བསྐྱེད་བཟླས་རྫོགས་གསུམ་གང་བསྒོམས་ཀྱང་དེ་ཉིད་བླ་མའི་སྐུ་གསུང་ཐུགས་ཀྱི་རྣམ་རོལ་དུ་ཤེས་པར་བྱེད་པ་འདི་གལ་ཆེའོ། །དེ་ལྟར་ངེས་འབྱུང་བྱང་སེམས་མོས་གུས་ཀྱི་སྐལ་བས་མ་ཕོངས་པ་དག་ལམ་རིམ་གཉིས་ཀྱི་རྣལ་འབྱོར་ལ་བརྩོན་པར་བྱེད་པ་ལ། ཐོག་མར་གཞི་ལམ་འབྲས་བུའམ་རྒྱུད་གསུམ་གྱི་རྣམ་བཞག་ལ་གོ་མྱོང་ཅི་རིགས་མ་བསྐྱེད་པའི་ཐབས་མེད་དེ་མདའ་འཕེན་པ་ལ་ཐོག་མར་འབེམ་ངེས་དགོས་པ་བཞིན་ནོ། །དེའི་ཚུལ་རྒྱས་པ་ནི་ངེས་དོན་གྱི་མདོ་རྒྱུད་ཟབ་མོ་དགོངས་འགྲེལ་མན་ངག་གི་ཡི་གེ་རྣམས་དང་། ཞིབ་པར་བླ་མ་མཚན་ལྡན་བརྒྱུད་པའི་མན་ངག་དང་ལྡན་པའི་ཞལ་ལས་ཤེས་པར་བྱ་བ་ལས་འདིར་ཡི་གེ་ཉུང་ངུས་མཚོན་པར་མི་ནུས་མོད། ལས་དང་པོ་པ་རྣམས་ལ་གོ་གཞི་སྐྱེད་བྱེད་ས་བོན་ཙམ་ཞིག་སྨོས་ན། དེ་ཡང་སྦྱང་གཞི་ནི། མདོ་སྔགས་ཐུན་མོང་དུ་གྲགས་པ་ལྟར་ན་ཆོས་ཉིད་དེ་བཞིན་ཉིད་དམ་བདེ་བར་གཤེགས་པའི་སྙིང་པོ་ཉིད་དེ། འདིའི་རང་བཞིན་ནམ་མཚན་ཉིད་ནི་རྒྱལ་བའི་བཀའ་འཁོར་ལོ་བར་པ་ནས། གནས་ལུགས་རྣམ་ཐར་གསུམ་ལྡན་ངོ་བོ་སྟོང་ཕྱོགས་ནས་གཏན་ལ་འབེབས་པར་མཛད་ཅིང་། བཀའ་འཁོར་ཕྱི་མར་ཟག་པ་མེད་པའི་ཡོན་ཏན་གྱི་ཆོས་དང་རྣམ་དབྱེར་མེད་པའི་འོད་གསལ་བའི་ཡེ་ཤེས་སྣང་ཕྱོགས་ཀྱི་ཆ་ནས་སྟོན་པར་མཛད་པ་ཡིན་ལ། སྔགས་སུ་དེ་གཉིས་ཟུང་འཇུག་བརྗོད་བྲལ་ལྷན་ཅིག་སྐྱེས་པའི་ཡེ་ཤེས་རང་སེམས་འོད་གསལ་གཉུག་མ་རྡོ་རྗེའི་སེམས་སུ་སྟོན་པར་མཛད་པ་སྟེ། དེ་ཡང་དོན་གྱི་ཨེ་ཝཾ་རྣམ་མཆོག་གི་སྟོང་ཉིད་དང་མཆོག་ཏུ་མི་འགྱུར་བའི་བདེ་བ་ཆེན་པོ་ཟུང་དུ་འཇུག་པའི་ཡེ་ཤེས་ཆ་མེད་ཀུན་འགྲོ་ཁྱབ་པའི་བདག་ཉིད་ངོ་བོ་འཇིག་འདྲལ་ལས་འདས་པའི་རང་བཞིན་འདུས་མ་བྱས་ཉིད་ལ་སྦྱང་གཞིར་བྱས་ཏེ། དེ་ལས་ཤར་བའི་རྩལ་སྣང་ཐམས་ཅད་ཀྱང་། རྒྱུ་སེམས་ཅན་གྱི་སྐབས་སུ་མ་དག་འཁྲུལ་པའི་སྣང་བ་དང་། ལམ་རྣལ་འབྱོར་པའི་སྐབས་སུ་དག་མ་དག་གཉིས་ཚོགས་ཉམས་ཀྱི་སྣང་བ་དང་། འབྲས་བུ་སངས་རྒྱས་ཀྱི་གནས་སྐབས་སུ་ཤིན་ཏུ་རྣམ་དག་སྐུ་དང་ཡེ་ཤེས་ཀྱི་རང་བཞིན་དུ་འཆར་བས་ན། གནས་སྐབས་སྣང་ཚུལ་དུ་ཇི་ལྟར་ཡང་རུང་། གནས་ཚུལ་ཡང་དག་མཐར་ཐུག་པ་ནི་མིག་སྐྱོན་དག་པས་དུང་གི་ཁ་དོག་དཀར་པོར་མཐོང་བ་བཞིན་སྒྲིབ་པ་རྣམ་པར་དག་པ་སངས་རྒྱས་ཀྱི་སྤྱན་གྱིས་ཇི་ལྟར་གཟིགས་པ་བཞིན་དག་པ་རབ་འབྱམས་ལྷ་ཡི་འཁོར་ལོར་ཡེ་ནས་གནས་པར་འདོད་དོ། །སྦྱང་བྱ་ནི། དེ་ལྟར་སྙིང་པོའི་རང་བཞིན་གདོད་མ་ནས་རྣམ་པར་དག་ཅིང་ངོ་བོ་དུས་གསུམ་འཕོ་འགྱུར་དང་བྲལ་ཡང་། དེ་ལྟར་མ་རྟོགས་པའི་དབང་གིས་རྩལ་སྣང་ལ་བདག་ཏུ་བཟུང་སྟེ་ཕྱིན་ཅི་ལོག་ཏུ་ཞེན་པའི་མཐུ་བརྟས་པ་ལས་འཁྲུལ་སྣང་གློ་བུར་དུ་བྱུང་སྟེ་དཔེར་ན་ཉི་མ་སྤྲིན་གྱིས་བསྒྲིབས་པ་བཞིན་དུ་སྙིང་པོའི་རང་ཞལ་བསྒྲིབས་ནས་གནས་དོན་ལུས་ཀྱི་སྣང་བ་མུ་མཐའ་མེད་པར་ཤར་བ་སྟེ་ཀུན་འབྱུང་ལས་ཉོན་དང་ཟག་བཅས་འབྲས་གྱུར་གྱི་ཆ། མདོར་ན་མདོ་སྔགས་སོ་སོའི་རང་ལམ་གྱི་རྒྱུན་མཐའི་ཡེ་ཤེས་ཀྱིས་གཞོམ་བྱ་ཤིན་ཏུ་ཕྲ་བའི་ཆ་བཅས་མེད་སྣང་གློ་བུར་གྱི་སྒྲིབ་པ་ཕྲ་རགས་རྣམས་ཡིན། དེ་ལས་སྔགས་ཀྱི་སྐབས་འདིར་བསྐྱེད་རིམ་གྱིས་སྦྱང་བྱ་ནི་རགས་པའི་ཆ་དང་། ཤིན་ཏུ་ཕྲ་བ་སྣང་གསུམ་གྱི་འཕོ་སྒྲིབ་སོགས་ནི་རྫོགས་རིམ་གྱིས་སྦྱང་བར་བྱ་བའོ། །སྦྱོོང་བྱེད་ནི་སྤྱིར་ཐེག་ཆེན་གྱི་དགེ་རྩ་ཆེ་ཕྲ་གང་རུང་རིགས་ཁམས་ཀྱི་སྒྲིབ་བྱེད་གློ་བུར་བའི་དྲི་མ་རྣམས་སྦྱོང་བྱེད་ཀྱི་ཐབས་སམ་བྲལ་རྒྱུར་འགྱུར་མོད་ཀྱི། འདིར་ནི་འབྲས་བུ་གསང་སྔགས་ཀྱི་དབང་དུ་བྱས་ཏེ། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་དག་མཉམ་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོ་ལས་མི་འདའ་བའི་ཚུལ་ལྟ་བས་ཐག་བཅད་ནས་ཚུལ་དེ་དང་རྣམ་པ་མཐུན་པའི་ཐབས་ཤེས་བསྐྱེད་རྫོགས་ཀྱི་ལམ་རིམ་པ་གཉིས་པོ་ལ་བརྩོན་པར་བྱེད་པའོ། །སྦྱངས་འབྲས་ནི། དེ་ལྟར་ལམ་ལ་གོམས་པ་མཐར་ཕྱིན་པས་མེད་སྣང་གློ་བུར་གྱི་སྒྲིབ་པ་སྤྲིན་ལྟ་བུ་དེ་ལས་གྲོལ་ནས་དག་པ་གཉིས་ལྡན་གྱི་ངོ་བོར་གནས་གྱུར་པ་སངས་རྒྱས་སྐུ་གསུམ་གྱི་བདག་ཉིད་དེ་གཞི་ལ་གནས་པའི་ཡོན་ཏན་མཐའ་དག་མངོན་གྱུར་དུ་སྣང་བ་བྲལ་བའི་འབྲས་བུའོ། །དེའི་ཕྱིར་ཆོས་ཉིད་ངོ་བོའི་གནས་ཚུལ་དབང་བཙན་དུ་བྱས་ན། གཞི་ལམ་འབྲས་བུའི་གནས་སྐབས་གང་ལའང་རང་གི་ངོ་བོ་འགྱུར་བ་མེད་པས་རྟག་ཏུ་བྲི་གང་བསལ་བཞག་དང་བྲལ་བར་གནས་པ་ཡིན་ལ། དེར་མ་ཟད་ཀུན་རྫོབ་འཁོར་བའི་ཆོས་རྣམས་ཀྱང་མེད་སྣང་གློ་བུར་བ་སྔོན་མེད་ཕྱིས་མེད་པར་འདིར་བག་ཆག་གི་དབང་གིས་མེད་བཞིན་སྣང་བའི་འཁྲུལ་སྣང་སྟོང་གཟུགས་ཏེ་ནམ་ཡང་བདེན་པས་སྟོང་པའི་ཕྱིར་རྨི་ལམ་གྱི་བུ་སྐྱེ་བ་མེད་ན་དེ་ལ་ཤི་བའང་མི་འབྱུང་བ་བཞིན་ནམ་ཡང་ཟད་འཕེལ་མེད་པ་ཆོས་ཉིད་མཉམ་པའི་དོན་འདི་ཤེས་པ་མདོ་སྔགས་གང་གི་ལུགས་ལའང་གནད་ཆེ་ཞེས་ཐམས་ཅད་མཁྱེན་པ་མི་ཕམ་རིན་པོ་ཆེའི་ཞལ་ནས་ཐོས་སོ། །དེས་ན་ཐེག་ཆེན་མདོ་སྔགས་ཀྱི་ལམ་རྣམས་དགོངས་པའི་སྐྱེལ་སོ་གཅིག་པར་ཤེས་དགོས་ཏེ། ཀུན་ཀྱང་རྣམ་གྲོལ་གྱི་ལམ་དུ་གཅིག་པར་འདོད་པའི་ཕྱིར་ནའོ། །མདོར་ན་རང་བཞིན་གནས་པའི་གཞི་ཡེ་ནས་འཆིང་གྲོལ་ལས་འདས་པ་ནི་སྦྱང་གཞི། འཁྲུལ་པས་བརྟག་པའི་གཞི་མེད་སྣང་གློ་བུར་བ་རྣམས་ནི་སྦྱང་བྱ། དེའི་སྦྱོང་བྱེད་གཉེན་པོའི་ཡེ་ཤེས་ལམ་བདེན་གྱི་ཆར་གྱུར་འཁོར་དང་བཅས་པ་ནི་སྦྱོང་བྱེད་ལམ། འཁྲུལ་པ་དག་པའི་ཆ་ནི་བྲལ་བའི་འབྲས་བུ་ཡིན་པས་ན། གཞི་དང་ལམ་གཉིས་ཤེས་བྱ་ཤེས་བྱེད་དུ་འབྲེལ། ལམ་དང་འབྲས་བུ་གཉིས་འཐོབ་བྱ་འཐོབ་བྱེད་དུ་འབྲེལ། གཞི་དང་འབྲས་བུ་གཉིས་ཀ་ངོ་བོ་བདག་གཅིག་ཏུ་འབྲེལ་བའི་གནད་ལེགས་པར་ཤེས་དགོས། དེ་མ་ཤེས་པར་སྙིང་པོའི་རང་བཞིན་དྲང་དོན་ཙམ་དུ་བཟུང་ནས། ད་ལྟ་རྒྱུ་སྒྲུབ་པས་འབྲས་བུ་ཕྱི་དུས་རིང་མོ་ཞིག་ནས་གདོད་ཐོབ་པར་འདོད་པའི་འདུས་བྱས་ཀྱི་མཚན་མ་ཞིག་ལ་བློ་རྩེ་གཏད་ནས་སྣང་སྟོང་ཐ་དད་དུ་ཞེན་པ་རྣམས་ཀྱིས་ནི་ཟུང་འཇུག་འབྲས་བུའི་ལམ་གྱི་ལྟ་སྒོམ་སྤྱོད་འབྲས་ལ་ཕྱོགས་ཙམ་གྱི་གོ་གཞི་ཡང་ཆགས་པར་མི་འགྱུར་བས་བཅོས་མ་ལམ་ཀྱི་གཟུགས་བརྙན་དུ་འགྱུར་བའི་ཕྱིར་ཐོག་མར་འདི་ཙམ་ལའང་གོམས་འདྲིས་བྱ་བ་ནི་ཤིན་ཏུ་གལ་ཆེའོ། །དེ་ལྟར་ངེས་ནས་ལམ་ལ་འཇུག་པ་ལ་ལམ་བྱེད་ལྔ་སོགས་རྒྱས་བསྡུས་ཅི་རིགས་གསུངས་པ་ཡོད་ནའང་། འདིར་ནི་དོན་གནད་སྙིང་པོ་བསྡུས་ཏེ་ཕྱི་ནང་གསང་བའི་བསྙེན་སྒྲུབ་ཀྱི་གོ་དོན་ཀུན་མཁྱེན་བླ་མ་འཇམ་དཔལ་དགྱེས་པས་འདི་ལྟར་གསུངས་ཏེ། བསྒྲུབ་བྱའི་ལྷ་ནི། ཆོས་ཉིད་དོན་གྱི་ལྷ་རང་བྱུང་གི་ཡེ་ཤེས་བྱང་ཆུབ་སེམས་ཀྱི་དཀྱིལ་འཁོར་ཏེ། དེའི་ངང་ན་སྣང་སྲིད་ཀྱི་ཆོས་ཐམས་ཅད་ཡེ་ནས་འདུ་འབྲལ་མེད་ཀྱང་། དེ་ལྟར་མ་རྟོགས་པའི་འགྲོ་བ་ལ། རང་དང་ལྷ་རྒྱུད་ཐ་དད་པའི་ཚུལ་ཅན་དུ་སྣང་བའི་ཚེ། བདག་འཆིང་བ་ཀུན་ལྡན་ལས་ཉོན་གྱི་སྦུབས་སུ་འཐུམ་པ་ན། ལྷ་ནི་རྣམ་གྲོལ་ཡེ་ཤེས་ཀྱི་སྐུ་ཅན། ཆོས་ཉིད་ཀྱི་དོན་མངོན་དུ་མཛད་ནས་རང་དོན་མཐར་ཕྱིན་ལ། གཞན་དོན་དུ་མཁྱེན་བརྩེ་ནུས་པ་ཚད་མེད་པའི་སྒོ་ནས། སྨོན་ལམ་དང་ཡེ་ཤེས་ཆེན་པོ་རྣམ་པ་རྟགས་ཀྱི་ཕྱག་རྒྱར་སྣང་བ་འཇམ་དཔལ་དང་གཤིན་རྗེ་གཤེད་སོགས་ཞི་ཁྲོ་གང་ཞིག་སྤྲུལ་པའི་འཁོར་ལོ་དང་བཅས་པ་དེ་ཉིད། སྐུའི་མཚན་མ་དང་། གསུང་རིག་སྔགས་དང་། ཐུགས་ཏིང་ངེ་འཛིན་གྱི་འཇུག་པའི་སྒོ་ནས་དངོས་གྲུབ་ཡིད་བཞིན་རྩོལ་ཞིང་རྣམ་གྲོལ་གཏན་དུ་བདེ་བའི་གོ་འཕང་ལ་ངེས་པར་འགོད་པའི་ཕྲིན་ལས་བསླུ་མེད་མཛད་པ་སྟེ། རྣམ་པ་རྟགས་ཀྱི་ལྷ་དེ་ཉིད་བསྐྱེད་བཟླས་མཆོད་སྒྲུབ་བྱེད་པ་ནི་ཕྱི་ལྟར་སྒྲུབ་པའི་ཚུལ་ལོ། །ནང་ལྟར་སྒྲུབ་པ་ནི། ལྷ་དེ་དག་རང་གི་དབུ་མའི་གྲོང་ཁྱེར་དུ། སྙིང་པོ་ཡེ་ཤེས་ཀྱི་རླུང་དང་ཐིག་ལེའི་དྭངས་མ་ཡིན་ལ། རང་གི་མ་དག་པའི་སྒོ་གསུམ་སྤྱོད་ཡུལ་དང་བཅས་པ་ནི། གཡོ་བྱེད་ལས་རླུང་གི་ཆོ་འཕྲུལ་ཙམ་ཡིན་པས། རྩ་གནས་སུ་རང་བཞིན་གྱིས་བཞུགས་པའི་ལྷའི་འཁོར་ལོ་གསལ་ཏེ། རླུང་སྔགས་དབྱེར་མེད་ཀྱིས་སྒྲུབ་ལ། དེ་ཐམས་ཅད་ཀྱི་རྩ་བ་ཙིཏྟ་འོད་ཀྱི་གུར་ཁང་བྱང་ཆུབ་སེམས་ཀྱི་ཐིག་ལེ་བདེ་ཆེན་འགྱུར་བ་མེད་པ། འདུས་མ་བྱས་པའི་རང་སྣང་ལ་དམིགས་ཏེ་བསྒྲུབ་པས་མྱུར་དུ་འགྲུབ་བོ། །གསང་བ་ལྟར་ན། འཁོར་འདས་ཐམས་ཅད་ཡེ་ནས་མཉམ་པའི་དབྱིངས་རང་སེམས་གདོད་ནས་མ་སྐྱེས་པ་རང་བྱུང་ཡེ་ཤེས་ཀྱི་དོན་རྟོགས་ན། བསྒྲུབ་བྱའི་ལྷ་ལོགས་སུ་ཅུང་ཟད་ཀྱང་མེད་དེ། རྩོལ་མེད་ལྷུན་གྲུབ་ཏུ་གྲུབ་པ་ཡིན་ལ། འཁོར་འདས་གཉིས་དབྱིངས་དེ་ལས་སྣང་བའི་ཆོ་འཕྲུལ་ཙམ་དུ་ཟད་དོ། །དེས་ན་རང་རིག་པ་ཡེ་ནས་རྩོལ་སྒྲུབ་མེད་པའི་དོན་ལ་མཉམ་པར་བཞག་པས་སྒྲུབ་པ་ནི་ཆེས་ཟབ་མོའི་མཐར་ཐུག་སྟེ། དེ་དག་གདམས་པ་ཐེབས་ཚུལ་གྱིས་རྣལ་འབྱོར་པའི་ཉམས་དང་བསྟུན་ཏེ་བསྒྲུབས་པས་ཀུན་གྱི་མཐའ་ལྷ་དང་རང་སེམས་གདོད་ནས་དབྱེར་མེད་ཆེན་པོའི་གྲུབ་མཐའ་བསྙེགས་ནས་གྲུབ་པ་ཆེན་པོར་འགྱུར་རོ། །ཞེས་གསུངས། མདོར་ན་གཞི་རང་སེམས་གཉུག་མ་ལྷན་ཅིག་སྐྱེས་པའི་ཡེ་ཤེས་ཡེ་ནས་འཆིང་གྲོལ་ལས་འདས་པ་དང་། འབྲས་བུ་མཐར་ཐུག་པ་འོག་མིན་ན་བཞུགས་པའི་དཔལ་རྡོ་རྗེ་སེམས་དཔའ་ལ་སོགས་པ་བསྒོམ་བྱའི་ལྷ་གང་ཡིན་པ་དང་། ལམ་རྣལ་འབྱོར་པས་ཀུན་བརྟགས་བསྐྱེད་རིམ་གྱིས་ལྷ་སྐུ་ཕྱག་རྒྱའི་རྣམ་པར་ཤར་བ་གསུམ་རང་བཞིན་དབྱེར་མེད་པ་བླ་མའི་ཐུགས་བདེ་སྟོང་གི་སྣང་ཆ་ཡེ་ཤེས་ཆེན་པོའི་རོལ་པར་ཤེས་ན་དོན་གྱི་གནད་ཐམས་ཅད་ཚང་བ་ཡིན་ནོ། །གཞན་ཡང་གསང་བདག་ཆེན་པོས། ཆོ་གའི་ཁྱད་པར་རྒྱུད་ནས་གསུངས་པའི་བསྐྱེད་ཆོག་ཚང་བ་ཞེས་གསུངས་ཏེ་སྐྱེ་གནས་བཞིའི་བག་ཆགས་སྦྱོང་བྱེད་ཀྱི་ལམ་ཡན་ལག་དང་བཅས་པ་ཚང་བ། རང་འབྲས་ཀྱི་ཁྱད་པར་སྔགས་ཀྱི་མཐུ་བསྐྱེད་ནུས་པ་ཞེས། སྤྱིར་བསྐྱེད་རིམ་རྐྱང་པའི་ལམ་གྱིས་འཇིག་རྟེན་ཆོས་མཆོག་ཆེན་པོའི་བར་དེ་ཕྲ་ཡང་ལ་སོགས་པའི་ཡོན་ཏན་བརྒྱད་དང་ལྡན་པ་འདོད་གཟུགས་ཀྱི་རིག་འཛིན་རྣམས་གྲུབ་པ་ཡིན་ཡང་། སྔ་འགྱུར་ཐུན་མིན་གསང་བ་སྒྱུ་འཕྲུལ་ནས་གསུངས་པ་ལྟ་བུའི་ལམ་ངེས་རྫོགས་མཚན་ཉིད་པས་ཐོག་མར་ཏིང་འཛིན་རྣམ་གསུམ་གྱི་སྐབས་ནས་ཉམས་ལྔ་མཐར་ཕྱིན་པར་བསླབ་པ་སོགས་བསྐྱེད་རྫོགས་ཟུང་འབྲེལ་གྱི་ལམ་ལ་ཐོག་མ་ཉིད་ནས་བསླབས་པས་དོན་གྱི་འོད་གསལ་མཐོང་ལམ་ཟུང་འཇུག་གི་ལྷ་སྐུ་ལ་སྦྱོར་ནུས་པ་ལ་རིགས་པའི་གནོད་བྱེད་མེད་དེ། ཐུན་མོང་མདོ་ལམ་གྱིས་ཀྱང་རིང་མོ་ཞིག་ན་དོན་གྱི་འོད་གསལ་མཐོང་ལམ་འདྲེན་ནུས་པར་བཤད་པའི་ཕྱིར་རོ། །ངོ་བོའི་ཁྱད་པར་ཞུ་བ དེ་དང་སྟོང་ཉིད་ཀྱི་རང་བཞིན་ཞེས་ཐབས་ལམ་མཚན་ཉིད་པ་ལྟར་ན་ཞུ་བདེ་ལས་བྱུང་བའི་སྟོང་ཉིད་དང་། གྲོལ་ལམ་པ་ལྟར་ན་མཆོག་ཏུ་མི་འགྱུར་བའི་བདེ་བ་དང་རྣམ་ཀུན་མཆོག་ལྡན་གྱི་སྟོང་ཉིད་གཉིས་ཟུང་དུ་འཇུག་པའི་རང་རྩལ་ལྷ་སྐུའི་ཕྱག་རྒྱར་སྣང་བའོ། །བྱེད་ལས་ཀྱི་ཁྱད་པར་དག་རྫོགས་སྨིན་གསུམ་ཚང་བ་ཞེས། སྦྱོང་བྱེད་ཀྱི་ལམ་དེ་ཉིད། སྦྱང་བྱ་འཁོར་བའི་ཆོས་འཆི་བར་སྐྱེ་གསུམ་སོགས་དང་རྣམ་པ་མཐུན་པས་དེ་དག་བྱང་ཞིང་དག སྦྱངས་འབྲས་མྱང་འདས་དང་བཞུགས་ཚུལ་མཐུན་པས་སྐུ་གསུམ་གྱི་ས་བོན་གསོས་འདེབས་ཏེ་འབྲས་བུ་གཞི་ལ་རྫོགས། ཡེ་ཤེས་ཁྱད་པར་ཅན་རྒྱུད་ལ་སྐྱེ་བའི་གཞི་འདིང་བས་རྫོགས་རིམ་གྱི་སྨིན་བྱེད་དུ་འགྲོ་བ་སྟེ། དེ་ལྟར་ཁྱད་ཆོས་བཞི་དང་ལྡན་པ་ནི་བསྐྱེད་རིམ་གྱི་རྣལ་འབྱོར་རོ། །དེ་ལྟར་ངེས་པར་བྱས་ཏེ་ཆོ་གའི་འགྲོས་དང་སྦྱར་ཏེ་བཤད་པ་དངོས་ལ་གསུམ། སྔོན་འགྲོ། དངོས་གཞི། རྗེས་སོ། །དང་པོ་ལའང་སྤྱི་དང་ཁྱད་པར་གཉིས་ལས། དང་པོ་ཐུན་མོང་སྤྱི་ཡི་སྔོན་འགྲོ་ནི། གོང་དུ་བསྟན་པ་ལྟར་གྱིས་ངེས་འབྱུང་དང་ལྷག་པའི་བསམ་པ་ཡང་དག་པ་རྒྱུད་ལ་བསྐྱེད་ནས། སྐྱབས་སུ་འགྲོ་བ་ནི། གང་ལ་སྐྱབས་སུ་འགྲོ་ན་བླ་མ་མཆོག་གསུམ་དཀྱིལ་འཁོར་གྱི་ལྷ་ཚོགས། གང་སྐྱབས་འགྲོ་ན་རང་གཞན་སེམས་ཅན་ཐམས་ཅད། རྒྱུ་ཅིའི་ཕྱིར་འགྲོ་ན་སྐྱབས་གནས་ཀྱི་ཡོན་ཏན་ཤེས་པས། སྤྱིར་འཁོར་བའི་སྡུག་བསྔལ། སྒོས་རང་དོན་ཡིད་བྱེད། ཡང་སྒོས་ཐ་མལ་འཁྲུལ་འཛིན་གྱི་ཞེན་རྟོག་ལས་སྐྱོབ་བའི་ཕྱིར། ཚུལ་ཇི་ལྟར་ན་ཀུན་རྫོབ་ཏུ་སྟོན་པ་ལམ་གྲོགས་ཀྱི་ཚུལ་དུ་ཁས་ལེན་པ་དང་། དོན་དམ་པར་རང་སེམས་དང་གཉིས་སུ་མེད་པར་ཤེས་པས། དུས་ཇི་སྲིད་བྱང་ཆུབ་ཀྱི་བར་ཏེ་སྐྱབས་ཡུལ་རང་རྒྱུད་ལ་ནམ་གྲུབ་པའི་བར་རོ། །དེ་ལྟར་ཤེས་པར་བྱས་ནས། མདུན་གྱི་ནམ་མཁར་སྐྱབས་ཡུལ་སྤྱི་ལྟར་གསལ་གདབ་སྟེ་རང་གཞུང་གི་སྐྱབས་འགྲོའི་ཚིག་ཉིད་ལན་གསུམ་སོགས་ངག་ཏུ་བརྗོད་ལ་རྒྱུད་ལ་འགྲེས་ངེས་བྱའོ། །སེམས་བསྐྱེད་ནི། ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་དུ། ཐོབ་བྱ་བླ་མེད་ཀྱི་འབྲས་བུ་ཉིད་ཐོབ་པར་འདོད་པས་འབྲས་བུ་ལ་དམ་བཅའ་བ་སྨོན་པ་དང་། རྒྱུ་ལ་དམ་བཅའ་བ་འཇུག་པ་སེམས་བསྐྱེད་དེ་ཀུན་རྫོབ་བརྡ་ལས་བྱུང་བ་དང་། དོན་དམ་ཆོས་ཉིད་སྒོམ་སྟོབས་ལས་ཤར་བ་བདག་དང་སེམས་ཅན་ཐམས་ཅད་ཡེ་ནས་སངས་རྒྱས་པའི་རང་བཞིན་མཉམ་པ་ཉིད་ཡིན་པ་ལ་ཡིན་པར་ཤེས་པའི་ངེས་ཤེས་ཀྱིས་གསལ་གདབ་སྟེ་དེའི་ངང་དུ་བསལ་བཞག་དང་བྲལ་བར་བསྒོམ་པ་དོན་དམ་སེམས་བསྐྱེད་དེ་མདོར་ན་སྟོང་ཉིད་སྙིང་རྗེའི་སྙིང་པོ་ཅན་གྱི་བྱང་ཆུབ་ཀྱི་སེམས་སོ། །དེ་ལྟར་གསལ་གདབ་ནས་ཚོགས་ཞིང་དཔང་པོའི་ཚུལ་དུ་བྱས་ཏེ་རང་གཞུང་གི་སེམས་བསྐྱེད་ཀྱི་ཚིག་བརྗོད། རྗེས་ལ་སེམས་ཅན་རྣམས་བ དེ་འདོད་ཀྱི་བྱམས་པ། སྡུག་བསྔལ་དང་བྲལ་འདོད་ཀྱི་སྙིང་རྗེ། སྡུག་བསྔལ་མེད་པའི་བདེ་བ་ལ་གནས་འདོད་ཀྱི་དགའ་བ། ཉེ་རིང་ཆགས་སྡང་གི་བློ་དང་བྲལ་བའི་བཏང་སྙོམས་ཏེ་ཚད་མེད་པ་བཞི་ལ་བློ་སྦྱང་བར་བྱའོ། །འགལ་རྐྱེན་སྦྱོང་བྱེད་རྡོར་སེམས་བསྒོམ་བཟླས་ནི། རྟེན་གྱི་སྟོབས་བླ་མ་རྡོར་སེམས་སྤྱི་བོར་བསྒོམ་ནས། སུན་འབྱིན་གྱི་སྟོབས་སྔར་བྱས་ཀྱི་ལས་ལ་འགྱོད་པ་དྲག་པོས། སྡོམ་པའི་སྟོབས་སམ་སོར་ཆུད་པའི་སྟོབས་ཕྱིན་ཆད་སྲོག་ལ་བབས་ཀྱང་མི་བགྱི་སྙམ་པས། གཉེན་པོ་ཀུན་ཏུ་སྤྱོད་པའི་སྟོབས་ཡིག་བརྒྱ་བཟླས་པའི་རྐྱེན་གྱིས་བླ་མ་རྡོ་རྗེ་སེམས་དཔའི་ཐུགས་ཀའི་སྔགས་འཁོར་ལས་བདུད་རྩིའི་རྒྱུན་བབས། རང་གཞན་གྱི་སྤྱི་བོ་ནས་ཞུགས་ལུས་གང་ཉམས་ཆག་དང་རྟོག་སྒྲིབ་ཐམས་ཅད་སང་གིས་དག་པར་བསམ་པ་སྟེ། དེ་ལྟར་གཉེན་པོ་སྟོབས་བཞི་དང་ལྡན་པས་ཡིག་བརྒྱ་ཅི་ནུས་བཟླ། མཐར་གནོང་འགྱོད་ཀྱིས་གསོལ་བ་གདབ་པས་རྡོར་སེམས་འོད་དུ་ཞུ་ནས་རང་ལ་ཐིམ་པར་བསམ་ལ་སྡིག་ལྟུང་རང་བཞིན་མེད་པའི་ངང་དུ་མཉམ་པར་བཞག་གོ །མཐུན་རྐྱེན་སྒྲུབ་པ་མནྜལ་ནི། ཕྱི་ལྟར་ན་རི་གླིང་ཉི་ཟླ་སྣོད་བཅུད་ཀྱི་དཔལ་འབྱོར། ནང་ལྟར་ན་རང་གིས་བདག་ཏུ་བཟུང་བའི་གནས་ཁང་དང་བུ་ནོར། གསང་བ་ལྟར་ན་རང་ལུས་ཕུང་ཁམས་སྐྱེ་མཆེད་ཀྱི་ཚོགས་པ་བཅས། རྣམ་པ་ཡེ་ཤེས་ཆེན་པོའི་རང་བཞིན་ཀུན་ཏུ་བཟང་པོའི་མཆོད་སྤྲིན་ལྟ་བུར་སྤྲུལ་ནས། དོན་དམ་པར་མཆོད་བྱ་མཆོད་བྱེད་དང་བྲལ་བ་བློ་བྲལ་གདོད་མའི་ངང་དུ་འབུལ་བར་མོས་པས་འདོན་ཚིག་དང་སྦྲགས་ཏེ་ཅི་རིགས་པར་འབུལ་ལོ། །བྱིན་རླབས་ཁྱད་པར་ཅན་རྒྱུད་ལ་འཇུག་པར་བྱེད་པ་བླ་མའི་རྣལ་འབྱོར་ནི། རང་གི་རྩ་བའི་བླ་མ་ཉིད་སངས་རྒྱས་ཐམས་ཅད་འདུས་པའི་བདག་ཉིད་དུ་མདོ་རྒྱུད་ཀུན་ནས་གསུངས་པ་ལྟར་ཡིན་པ་ལ་ཡིན་པར་ཤེས་པའི་ངེས་ཤེས་ཀྱིས་ཐག་བཅད། ཡོན་ཏན་སངས་རྒྱས་དང་མཉམ་ཡང་བཀའ་དྲིན་སངས་རྒྱས་ལས་ལྷག་པའི་ཚུལ་ཤེས་པས་བློ་སྣ་མོས་གུས་ཀྱིས་འཕྲོག་པའི་གདུང་བ་དྲག་པོས། ཀུན་འདུས་ནོར་བུའི་ལུགས་སམ། བརྒྱུད་པའི་བླ་མ་རྣམས་ཐོ་བརྩེགས་སམ་ཁྲོམ་ཚོགས་ཀྱིས་བསྐོར་བར་གསལ་གདབ་ལ། རང་གཞན་སེམས་ཅན་རྣམས་སྒོ་གསུམ་འཇུག་པ་གཅིག་པས་ཕྱག་འཚལ་བ་དང་། མཆོད་པ་འབུལ་བ་དང་། སྡིག་པ་བཤགས་པ་དང་། དགེ་བ་ལ་རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བར་བསྐུལ་བ་དང། གཟུགས་སྐུ་མྱ་ངན་ལས་མི་འདའ་བར་གསོལ་བ་གདབ་པ། དགེ་ཚོགས་བླ་ན་མེད་པའི་བྱང་ཆུབ་ཏུ་བསྔོ་བ་བཅས་བདུན་རྣམ་དག་ཕུལ། སླར་ཡང་མོས་གུས་གདུང་བའི་ཤུགས་བསྐྱེད་ལ་བརྒྱུད་པའི་གསོལ་འདེབས་སོགས་ཡོད་ན་འདོན། མཐར་དབང་བཞི་ལེན་པའི་དམིགས་པ་དང་བཅས་འོད་དུ་ཞུ་ནས་རང་ལ་ཐིམ་པས་བླ་མ་དང་རང་སེམས་དབྱེར་མེད་པའི་གནས་ལུགས་གཤིས་བདེ་བ་ཆེན་པོ་གསལ་སྟོང་བརྗོད་བྲལ་རྣམ་པར་མི་རྟོག་པའི་ངང་དུ་ཅི་གནས་སུ་མཉམ་པར་འཇོག་པ་ནི་དོན་དམ་བླ་མའི་རྣལ་འབྱོར་ཏེ། རྗེས་བསྔོ་བ་སོགས་བྱའོ། །སྔོན་འགྲོ་འདི་དག་གི་དོན་བསྒོམ་ཚུལ་བསླབ་བྱ་ཕན་ཡོན་བཅས་ཞིབ་པར་གཞན་དང་གཞན་དུ་བརྗོད་ཟིན་པས་དེར་བལྟ་བར་བྱའོ། །གཉིས་པ་ཁྱད་པར་གྱི་སྔོན་འགྲོ་ལ། འགལ་རྐྱེན་བསལ་བ་དང་མཐུན་རྐྱེན་སྒྲུབ་པ་གཉིས་ལས། དང་པོ་ལ་བགེགས་བསྐྲད་པ་དང་། མཚམས་བཅད་པ་གཉིས་ཀྱི། དང་པོ་ནི། རང་སེམས་སྟོང་པ་ཉིད་ཀྱི་རང་རྩལ་ཆུ་ལས་ཉ་འཕར་བའི་ཚུལ་གྱིས་ཁྲོ་བོའི་རྒྱལ་པོ་རྟ་མགྲིན་ནམ་ཞེ་སྡང་རྡོ་རྗེ་སོགས་མཚམས་ལྷ་གང་ཡིན་གྱི་སྐུར་ལམ་གྱིས་གསལ་བཏབ་ནས། བགེགས་གཏོར་བསངས་སྦྱངས་ཏེ་སྟོང་པར་བྱས། སྟོང་པའི་ངང་ལས་རིན་པོ་ཆེའི་སྣོད་དུ་གཏོར་རྫས་འདོད་ཡོན་ལྔ་ལྡན་གྱི་བཅུད་ཀྱིས་ཁེངས་པར་མོས་ལ། ༀ་གྱིས་མ་དག་པའི་དྲི་མ་སྦྱངས། ཨཱཿས་རྫས་རྣམས་མང་པོར་སྤེལ། ཧཱུྃ་གིས་རང་རང་གང་མོས་ཀྱི་ལོངས་སྤྱོད་དུ་འཆར་བར་བྱས། ཧོཿས་ཟག་བཅས་ཀྱི་དྲི་མ་བསལ་ནས་ཡེ་ཤེས་ཀྱི་བདུད་རྩིར་སྦར་ཏེ་བྱིན་གྱིས་བརླབས། ཐུགས་ཀའི་འོད་ཟེར་གྱིས་བགེགས་རྣམས་མདུན་དུ་བཀུག་ལ་གཏོར་མ་སྔགས་དང་ཕྱག་རྒྱས་བསྔོ། བདེན་པའི་ཚིག་གིས་བཀའ་བསྒོ་སྟེ་བདག་གི་བྱང་ཆུབ་སྒྲུབ་པ་ལ་བར་ཆད་མ་བྱེད་ཅིག་ཅེས་ལས་གཞུང་གི་ཚིག་བརྗོད་ལ་གཏོར་མ་ཕྱི་རོལ་དུ་དོར། གལ་ཏེ་བསྒོ་བའི་བཀའ་ལ་མི་ཉན་པར་བར་གཅོད་རྩོམ་པའི་རིགས་རྣམས་ལ། བདག་ཉིད་ཁྲོ་བོའི་རྒྱལ་པོར་གསལ་བའི་ཐུགས་ཀ་ནས་སྤྲུལ་པའི་ཁྲོ་མཚོན་མེ་དཔུང་གི་ཆར་མི་བཟད་པ་སྟོང་ཁམས་ཀྱི་རྡུལ་གྱི་གྲངས་དང་མཉམ་པ་སྤྲོས་པས་བགེགས་རྣམས་རྒྱང་རིང་དུ་བསྐྲད་པར་མོས་ཏེ། གུ་གུལ་གྱིས་བདུག ཡུངས་ཐུན་གྱིས་བྲབ། དྲག་སྔགས་བཟླ་ཞིང་དྲག་པོའི་མཚམས་རྔམས་ཀྱང་བྱའོ། །གཉིས་པ་མཚམས་བཅད་པ་ནི། རྐུན་པོ་ཕྱིར་ཕྱུང་ནས་སྒོ་གཅོད་པ་ལྟར་སྤྲུལ་པའི་ཁྲོ་མཚོན་གྱི་ཚོགས་རྣམས་ཚུར་འདུས་ཞུ་ལུབ་ཏུ་འགྲེས་པའི་རྣམ་པ་ཅན་གྱི་འོག་ཐམས་ཅད་རྡོ་རྗེའི་ས་གཞི། ཕྱོགས་མཚམས་ཐམས་ཅད་རྡོ་རྗེ་གྱེན་ལངས་དང་མཆུ་རྒྱུག་སྤེལ་མའི་རྩིག་པའི་ར་བ་དབྱིབས་ཟླུམ་པོ་མཐོ་ཞིང་ཡངས་པ་ལྕགས་རི་ལྟ་བུས་བསྐོར་བ། དེའི་སྟེང་དུ་རྡོ་རྗེའི་གུར་དབུས་མཐོ་ཞིང་མཐར་རིམ་གྱིས་གཞོལ་བ་ཕྱིར་འཕྱར་བ་སོགས་རྒྱ་གུར་གྱི་ཐོད་འདྲ་བ་ར་བ་ལ་ཁ་གཅོད་བཏབ་པ་ལྟར་ཕུབ་ཅིང་། རྭ་གུར་སྦྲེལ་མཚམས་ནས་ནང་དུ་རྡོ་རྗེའི་དྲྭ་བས་སྟེང་ཁེབས་པའི་བླ་རེ་དང་། རྭ་གུར་གྱི་ཕྱི་རོལ་དུ་རྡོ་རྗེའི་ཕྲེང་བ་ཁོ་ན་བསྣོལ་ཞིང་སྦྲེལ་བ་རྡོ་རྗེའི་དྲྭ་བས་གཡོགས་པ། གུར་གྱི་རྩེ་མོར་རྡོ་རྗེ་ཕྱེད་པའི་ཏོག་དང་། ར་བའི་ཕྱིར་རྐེད་པ་ལ་རྡོ་རྗེའི་ཕྲེང་བས་བཅིངས་པ། རྡོ་རྗེ་ཐམས་ཅད་སྔོན་པོ་ཤ་སྟག་ཏུ་སྒོམ་ཞིང་། དེ་ལས་སྤྲུལ་པའི་ཁྲོ་མཚོན་མེ་དཔུང་རྡོ་རྗེའི་ཚྭ་ཚྭ་འཕྲོ་བས་བགེགས་དང་བར་ཆད་ཐམས་ཅད་བསྲུང་ཞིང་མདོར་ན་བསྐལ་པའི་རླུང་ཡང་མི་ཐར་བར་བསམ། འདི་ནི་སྲུང་གུར་སྤྱི་འགྲེ་ཡིན་ལ། བྱེ་བྲག་ཏུ་སྲུང་གུར་གྱི་འཁོར་ལོའི་རྩིབས་ལ་ཁྲོ་བཅུ་བཀོད་པ་སོགས་དང་། སྲུང་གུར་གྱི་ཕྱི་རོལ་དུ་མཚོན་ཆ་ལྔའི་གུར་དང་། འབྱུང་བཞིའི་སྲུང་འཁོར་བསྒོམ་པ་སོགས་ཀྱང་ཡོད་དེ་སྐབས་ཐོབ་གང་གཙོ་ལྟར་སྦྱར་ཤེས་པར་བྱ་ཞིང་། དེའི་ནང་དུ་རང་དང་བསྲུང་བྱ་མི་ནོར་འཁོར་བཅས་ཚུད་པར་བསམ་ལ་རང་གཞུང་གི་ཚིག་བརྗོད། མཐར་བསྲུང་བྱ་བདག་དང་སྲུང་བྱེད་ཁྲོ་མཚོན་སྲུང་བའི་བྱ་བ་དང་བཅས་གསུམ་ཀ་མི་དམིགས་པའི་ཤེས་རབ་ཀྱིས་ཟིན་པ་ནི་དེ་ཁོ་ན་ཉིད་ཀྱི་སྲུང་འཁོར་ཏེ་སྲུང་བ་ཀུན་གྱི་མཆོག་ཏུ་འགྱུར་རོ། །སྐབས་འདིར་ཆོ་ག་ལ་ལར་ལྷ་དང་འཁོན་བཅུག་སྦྱོང་བའི་ཕྱིར་ཉམས་ཆག་བཤགས་པ་དང་། མི་འདའ་བ་རྡོ་རྗེའི་དམ་བཅའ་བ་སོགས་གཞན་ཡང་འབྱུང་བས་དེ་ལྟ་ན་སྐབས་དང་བསྟུན་ཏེ་ཚིག་རྗེས་དོན་དྲན་གྱིས་དམིགས་པ་འཕྲུལ་ཤེས་པར་བྱའོ། །གཉིས་པ་མཐུན་རྐྱེན་སྒྲུབ་པ་ལ། བྱིན་དབབ་པ་དང་། མཆོད་རྫས་བརླབ་པ་གཉིས་ལས། དང་པོ་ནི། གང་དབབ་པར་བྱ་ན་ཡེ་ཤེས་ལྷའི་འབྲས་ཆོས་རྣམ་ལྔའི་གཟི་བརྗིད་བྱིན་རླབས་ཆེན་པོ། གང་ལ་དབབ་ན་བདག་སྒྲུབ་པ་པོ་དང་གནས་ཁང་སྒྲུབ་པའི་ཡོ་བྱད་དང་བཅས་པ་ལ། གང་གི་ཆེད་དུ་དབབ་ན་ཡེ་ཤེས་ལྷའི་རྡོ་རྗེ་གསུམ་གྱི་བྱིན་རླབས་འབེབས་པའི་སྦྱོར་བས་ཐོབ་བྱ་རང་གནས་ཀྱི་ཡེ་ཤེས་གཙོ་བོར་གྱུར་པའི་དངོས་གྲུབ་ཐམས་ཅད་ཐོབ་རུང་གི་ནུས་མཐུའི་གཟི་བྱིན་བསྐྱེད་པ། ཚུལ་ཇི་ལྟར་དབབ་ན། རང་ཉིད་ཀྱི་མོས་གུས་དྲག་པོས་བསྐུལ་བས་རྩ་བ་གསུམ་གྱི་ལྷ་ཚོགས་ཐམས་ཅད་ཏིལ་གྱི་གང་བུ་ཁ་ཕྱེས་པ་ལྟར་མཁའ་ཁྱབ་ཏུ་སད་པ་རྣམས་ཀྱི་རྡོ་རྗེ་གསུམ་གྱི་བྱིན་རླབས་དང་དངོས་གྲུབ་ཐམས་ཅད། སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པས་མཚོ་ཆེན་པོ་ལ་ཁ་བ་བབས་པ་ལྟར་བདག་གནས་ཡོ་བྱད་རྣམས་ལ་ཐིམ་པས་བྱིན་གྱིས་བརླབས་པར་བསམ་ལ་བྱིན་འབེབས་ཀྱི་ཚིག་བརྗོད། ཁྱད་པར་གྱི་རྫས་བདུག་ཅང་ཏེའུ་སོགས་རོལ་མོའི་སྒྲས་བསྐུལ་ཏེ་དབབ་པར་བྱའོ། །གཉིས་པ་མཆོད་རྫས་བརླབ་པ་ལ། སྤྱིར་བསང་སྦྱང་བྱ་བ་དང་། སོ་སོར་བྱིན་གྱིས་བརླབ་པ་གཉིས་ལས། དང་པོ་ནི། རང་ཉིད་ལྷར་གསལ་བའི་ཐུགས་ཀ་ནས་རྃ་ཡྃ་ཁྃ་གསུམ་འཕྲོས་པས། རྃ་ལས་མེ་བྱུང་བས་མཆོད་རྫས་ཀྱི་མ་དག་པའི་ཉེས་སྐྱོན་བསྲེགས། ཡྃ་ལས་རླུང་བྱུང་བས་དངོས་འཛིན་གཏོར། ཁྃ་ལས་ཆུ་བྱུང་བས་བག་ཆགས་བཀྲུས། སྭ་བྷཱ་ཝའི་སྔགས་སོགས་ཀྱིས་རང་བཞིན་སྟོང་པར་སྦྱངས་ཏེ་སྟོང་ཉིད་ནམ་མཁའ་ལྟ་བུའི་ངང་ལ་མཉམ་པར་བཞག་གོ །གཉིས་པ་ལའང་ཐུན་ཁྱད་གཉིས་ལས། ཐུན་མོང་ཕྱི་ནང་གི་ཉེར་སྤྱོད་རྣམས། བྷྲཱུྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ། ༀ་མམ་རང་རང་གི་ས་བོན་མིང་ཡིག་དང་པོ་ཐིག་ལེས་བརྒྱན་པ་ལས་བྱུང་བའི་ཡིད་དུ་འོང་བའི་ལྷ་རྫས་ཀྱི་མེ་ཏོག་སོགས་ཕྱི་མཆོད་དང་། རང་བྱུང་གི་རྫས་དབང་པོ་ལྔའི་མེ་ཏོག་སོགས་ནང་གི་ཉེར་སྤྱོད། འདོད་ཡོད་ལྔ། བཀྲ་ཤིས་རྫས་རྟགས། རྒྱལ་སྲིད་སྣ་བདུན་སོགས་མཆོད་རྫས་ཀྱི་རྣམ་པ་མ་ཚང་བ་མེད་པ་དེ་རེ་རེ་ལས་ཀྱང་སོ་སོའི་མཆོད་རྫས་ཐོགས་པའི་ལྷ་མོ་དཔག་ཏུ་མེད་པ་སྤྲུལ་ནས་མཆོད་པའི་སྤྲིན་སྤྲོ་བས་ནམ་མཁའི་ཁམས་གང་བར་མོས་ལ་སྔགས་སོགས་བརྗོད་དོ། །ཁྱད་པར་བ་ལ་སྨན་གཏོར་རཀྟ་གསུམ་ལས། སྨན་ཕུད་ནི། རང་བྱུང་བདེ་སྐྱོང་གི་སྣོད་ཀ་པཱ་ལར་བཅུད་བདེ་གཤེགས་རིགས་ལྔ་ཡབ་ཡུམ་གྱི་དམ་ཚིག་གི་རྫས། དབུས་སུ་མི་ཤ་དང་དྲི་ཆེན། ཤར་དུ་བ་ལང་གི་ཤ་དང་ཁུ་བ། ལྷོར་ཁྱི་ཤ་དང་ཤ་ཆེན་གྱི་དྭངས་མ། ནུབ་ཏུ་རྟ་ཤ་དང་རྡུལ། བྱང་དུ་གླང་ཆེན་གྱི་ཤ་དང་དྲི་ཆུ་རྣམས་རིམ་བཞིན་ཧྲཱིཿཔཱྃ་ཧཱུྃ་ལཱྃ་ཏྲཱྃ་མཱྃ་ༀ་མཱུྃ་ཨཱཿཏཱྃ་རྣམས་ལས་རིགས་ལྔ་ཡབ་ཡུམ་བཅུ་བསྐྱེད། མཉམ་པར་སྦྱོར་བའི་སྦྱོར་མཚམས་ནས་བདེ་བའི་སྒྲ་དང་འོད་ཟེར་གྱིས་ཕྱོགས་དུས་ཀྱི་རྒྱལ་བ་སྲས་དང་བཅས་པ་རྣམས་སྤྱན་དྲངས། འདོད་ཆགས་ཆེན་པོའི་མེས་འོད་དུ་ཞུ་ནས་རིགས་ལྔ་ཡབ་ཡུམ་ལ་ཐིམ་པས་མཁའ་གསང་ནས་བདུད་རྩི་དཀར་དམར་གྱི་རྣམ་པར་བྱུང་ཐོད་པའི་ནང་ཁེངས་མཐར་རིགས་ལྔ་ཡབ་ཡུམ་ཡང་འོད་དུ་ཞུ་ནས་བདུད་རྩི་ལ་ཐིམ་པས་ཁ་དོག་དྲི་རོ་ནུས་མཐུ་ཕུན་སུམ་ཚོགས་པ་ཡེ་ཤེས་ལྔ་ཡི་ངོ་བོར་གྱུར་པར་བསམས་ལ་སྔགས་བརྗོད། འདིར་བཤད་པ་ནི་གསུང་པདྨ་རིགས་དང་སྦྱར་ཏེ་རྣམ་སྣང་དང་འོད་དཔག་གོ་བརྗེ་བའི་དབང་ལྟར་བྱས་པ་ཡིན་ལ། གཞན་རྡོར་སེམས་སྒྱུ་དྲྭ་སོགས་སུ་རྡོ་རྗེའི་རིགས་ཡིན་པའི་དབང་གིས་མི་བསྐྱོད་པ་དང་སྦྱར་བ་དང་། གདན་བཞི་སོགས་རྣམ་སྣང་གི་རིགས་ཡིན་པའི་ཕྱིར་སངས་རྒྱས་ཀྱི་རིགས་སུ་སྦྱར་བ་སོགས་ཡོད་པས་གང་ལྟར་ཡང་མི་འགལ་ལ་གནས་སྐབས་རང་གཞུང་དང་བསྟུན་དགོས་པ་ཡིན་ནོ། །གཏོར་མ་ནི། གཏོར་གཞོང་རིན་པོ་ཆེའི་སྣོད་ས་གཞི་དང་མཉམ་པར་གཏོར་རྫས་འདོད་ཡོན་གྱི་ཕུང་པོ་ལྷ་རྣམས་ཇི་ལྟར་དགྱེས་པའི་ལོངས་སྤྱོད་གྱི་རྣམ་པ་བསམ་གྱིས་མི་ཁྱབ་ལ་མཁའ་ཁྱབ་ཏུ་སྤྲུལ་ཞིང་སྤེལ་བ་སྟེ། སྤྱིར་གཏོར་མ་ལ་ཤེས་པ་གསུམ་སོགས་བཤད་པ་ཡོད་ཀྱང་འདིར་མཆོད་རྫས་སུ་ཤེས་པའི་སྐབས་ཐོབ་དང་སྦྱར་བའོ། །རཀྟ་ནི། ཡུམ་གྱི་མཁའ་མཚོན་བྱེད་བྷནྡྷ་རློན་པ་སྐྲ་དང་བཅས་པའི་ནང་དུ། འདོད་གཟུགས་གཟུགས་མེད་ཀྱི་ཁམས་གསུམ་མམ། ལུས་སྣང་བ་འདོད་ཁམས། ངག་ཕྱེད་སྣང་གཟུགས་ཁམས། སེམས་སྣང་མེད་གཟུགས་མེད་ཀྱི་ཁམས་ཏེ་སྒོ་གསུམ་དུ་ཞེན་ཅིང་ཆགས་པའི་ཀུན་རྟོག་ཐམས་ཅད་བསྡུས་ཤིང་སྦྱངས་ནས་ཆགས་མེད་བདེ་བ་ཆེན་པོའི་རཀྟའི་རྒྱ་མཚོར་བསྐྱིལ་བ་འདོད་ཡོན་གྱི་སྤྲིན་འཕྲོ་བའི་རང་བཞིན་མཁའ་ཁྱབ་ཏུ་སྤེལ་བའོ། །དེ་ལྟར་སྔོན་འགྲོ་འཇུག་ལྡོག་གི་སྦྱོར་བ་རྣམས་ལ་སྦྱང་བྱ་སྦྱོང་བྱེད་སྦྱངས་འབྲས་གསུམ་རྟེན་འབྲེལ་གྱི་འགྲོས་མཚུངས་པའི་སྒོ་ནས་དག་རྫོགས་སྨིན་གསུམ་བརྩི་ན། སྦྱང་བྱ་འཁོར་བའི་དུས་ཇི་ལྟར་འདོད་པའི་སྲིད་པར་འཇུག་པ་ལ་སྐྱེ་གནས་ཀྱི་སྐྱོན་དང་ཕྱི་མའི་གནས་ལུས་ལོངས་སྤྱོད་ཀྱི་འགལ་རྐྱེན་རྣམས་སྦྱང་ཞིང་སྲུང་བ་དང་། མཐུན་རྐྱེན་བསོད་ནམས་ཆ་མཐུན་གྱི་ལས་གསོག་པ་རྣམས་དག་པར་བྱེད། སྦྱངས་འབྲས་དངོས་གཞི་སངས་རྒྱས་ཀྱི་མཛད་པ་ལ་བར་དུ་གཅོད་པའི་བདུད་བཞི་བཅོམ་པ་དང་ཚོགས་གཉིས་གསོག་ཅིང་འོད་ཟེར་ཆེན་པོས་དབང་བསྐུར་བ་དང་སངས་རྒྱས་ཀྱི་ཞིང་ཡོངས་སུ་སྦྱོང་བའི་ཏིང་ངེ་འཛིན་མངོན་དུ་བྱེད་པ་སོགས་དང་མཐུན་པས་འབྲས་བུར་རྫོགས་པར་བྱེད། སྦྱོང་བྱེད་སྔོན་འགྲོ་འདི་དག་གིས་རྩ་རླུང་ཐིག་ལེའི་གེགས་དང་གོལ་ས་ཆོད་ཅིང་ཉམས་རྟོགས་ཀྱི་རྩལ་ཁ་བསྐྱེད་པའི་ཐབས་རྨད་བྱུང་དུ་འགྱུར་བས་རྫོགས་རིམ་གྱི་སྨིན་བྱེད་དུ་འགྲོ་བ་ཡིན་ནོ། །འདིའི་གོང་འོག་ཏུ་བཤད་པའི་དག་རྫོགས་སྨིན་གསུམ་སྦྱོར་ཚུལ་སོགས་ཕལ་ཆེར། སྔ་འགྱུར་བསྟན་པའི་ཉི་མ་སྨིན་གླིང་ལོ་ཆེན་རིན་པོ་ཆེས་མཛད་པའི་ཟབ་ལམ་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་ཆོ་གའི་རྣམ་བཤད་ཆེན་མོ་ལས་ཡིན་པར་ཤེས་པར་བྱའོ། །གཉིས་པ་དངོས་གཞིའི་ཏིང་ངེ་འཛིན་ལ་གསུམ། སྐུ་ཕྱག་རྒྱའི་རྣལ་འབྱོར། གསུང་བཟླས་པའི་རྣལ་འབྱོར། ཐུགས་འོད་གསལ་གྱི་རྣལ་འབྱོར་རོ། །དང་པོ་སྐུ་ཕྱག་རྒྱའི་རྣལ་འབྱོར་ལའང་ལྔ་སྟེ། རྒྱུ་ཏིང་ངེ་འཛིན་གསུམ་གྱིས་ཁོག་ཕུབ་པ། འབྲས་བུ་རྟེན་དང་བརྟེན་པའི་དཀྱིལ་འཁོར་བསྐྱེད་པ། དེ་ལ་ཡེ་ཤེས་པ་སྤྱན་དྲངས་ཤིང་བརྟན་པར་བཞུགས་སུ་གསོལ་བ། ཕྱག་འཚལ་དང་མཆོད་བསྟོད་ཀྱི་ལས་རིམ་བྱ་བ། དམིགས་པའི་གཙོ་བོ་ལྷའི་སྣང་ཞེན་ལ་བསླབ་པའོ། །དང་པོ་ལ་གསུམ་ལས། དེ་བཞིན་ཉིད་ཀྱི་ཏིང་ངེ་འཛིན་ནི། འདིའི་སྦྱང་བྱ་ལུས་ཅན་རྣམས་འཆི་བའི་ཚེ་ན། ནང་དུ་ས་ཆུ་མེ་རླུང་བཞི་རིམ་པས་རྣམ་ཤེས་ལ་ཐིམ་པའི་ཚེ་ཕྱི་རོལ་དུ་གཟུགས་སྒྲ་དྲི་རོ་རེག་གི་བར་ཐིམ་པས་དབུགས་ཀྱི་འགྱུ་བ་ཆད་ཅིང་། རོ་རྐྱང་གི་དྭངས་མ་རྣམས་ཡས་མར་གྱི་སྣ་རྩེར་འདུས་ནས་རེག་ཆོས་ལ་ཐིམ་པའི་དུས་སུ་རྣམ་ཤེས་འོད་གསལ་དུ་འཇུག་སྟེ། འདུས་པའི་དྭངས་མ་གཉིས་ཨ་ཧཾ་ལ་ཞུགས་པ་སྙིང་གའི་དྭངས་མ་ལྔ་འདུས་ཀྱི་ཐིག་ལེར་ཐིམ་པས་ཕྲ་རགས་ཀྱི་རྟོག་པ་འགགས་ནས་སྟོང་པའི་འོད་གསལ་སྔ་མ་སྔ་མ་ལས་ཕྱི་མ་ཕྱི་མ་བོགས་ཕྱིན་པའི་ཚུལ་གྱི་སྣང་མཆེད་ཐོབ་གསུམ་གྱིས་སྒྲིབ་པ་རགས་པ་དང་། ཉེར་ཐོབ་ཀྱིས་ཕྲ་བ་ཐིམ་པས་ངོ་མ་ཤེས་ན་ལྡོག་པ་ཅན་གྱི་བསླད་བྱེད་རྐྱེན་གསུམ་དང་བྲལ་བའི་ནམ་མཁའ་ལྟ་བུ་སྒྲིབ་བྲལ་གསལ་སྟོང་མི་རྟོག་པའི་རྣམ་པ་ཅན་དུ་གནས་པ་དར་ཅིག་འོང་བ་དེ་ཡིན། དེ་ཡང་འཆི་བའི་འོད་གསལ་དངོས་ནི་སྦྱང་གཞི་སྟེ། དེ་ངོ་ཤེས་པས་བར་དོ་མེད་པར་གྲོལ་བར་བྱེད་པ་ཡིན་ལ། དེར་མ་ཟད་དེ་དང་ཆ་འདྲ་མཚན་མོ་གཉིད་ཀྱི་སྐབས་སོགས་སུའང་ཡོད་པས་དེ་ངོས་ཟིན་ན་རྨི་ལམ་མེད་པར་འོད་གསལ་གྱི་ངང་དུ་འབྱམས་པར་བྱེད་པ་སོགས་ཀྱི་གནད་དེ་ཡིན་ལ། འདིར་སྦྱང་བྱ་ནི་དེ་ཉིད་ངོ་མ་ཤེས་ན་ལྡོག་པ་ཅན་གྱི་བག་ཆགས་ཤིན་ཏུ་ཕྲ་བའི་ཆ་དེའོ། །སྦྱངས་འབྲས་ནི་ཤིན་ཏུ་སྤྲོས་པ་དང་བྲལ་བའི་ཡེ་ཤེས་སངས་རྒྱས་ཆོས་ཀྱི་སྐུ་ཡིན་ཞིང་། སྦྱོང་བྱེད་ནི་ཆོས་ཐམས་ཅད་སྟོང་ཞིང་བདག་མེད་པར་བསྒོམ་པ་སྟེ། དེ་ཡང་འདི་ལྟར་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་སེམས་དང་ཡེ་ཤེས་ཀྱི་རང་སྣང་ཙམ་ལས་གཞན་དུ་གྲུབ་པ་རྡུལ་ཙམ་ཡང་མེད་ལ། ཡེ་ཤེས་ཀྱང་སེམས་ཀྱི་ཆོས་ཉིད་ལས་གཞན་དུ་མ་དམིགས་པའི་ཕྱིར། ད་ལྟ་རང་རེ་རྣམས་ཀྱི་སེམས་ཀྱི་ཆོས་ཉིད་སྟོང་གསལ་འགག་མེད་ཀྱི་ཡེ་ཤེས་སྤྲོས་པའི་མཚན་མ་དང་བྲལ་བའི་རང་བཞིན་མཉམ་པ་ཉིད་འདི་ཡིན་ལ། འདི་རྣམ་ཐར་སྒོ་གསུམ་དང་སྦྱར་ན། གསར་དུ་བྱས་པ་ལྟ་བུ་མ་ཡིན་པར་རང་བཞིན་འདུས་མ་བྱས་པའི་ཆོས་ཉིད་ངོ་བོ་སྟོང་པར་གནས་པ་ནི་རྣམ་པར་ཐར་པའི་སྒོ་སྟོང་པ་ཉིད་དང་། སྟོང་ཉིད་དེའི་རང་བཞིན་འདི་ལྟ་བུའོ་ཞེས་མཚན་མའི་བློ་ཡི་སྤྱོད་ཡུལ་ལས་འདས་པ་ནི་མཚན་མ་མེད་པ་དང་། དེ་ལྟ་བུའི་ཆོས་ཉིད་མཉམ་པའི་ངང་ལ་འབྲས་བུ་འ ཐོབ་བྱ་འཐོབ་བྱེད་ལས་འདས་པས་གང་ལའང་ཡིན་སྨོན་མེད་པ་ནི་འབྲས་བུ་སྨོན་པ་མེད་པའོ། །དེ་ལྟ་བུའི་ཆོས་ཉིད་སྤྲོས་པ་དང་བྲལ་བ་ལ་བློ་ཡང་སྤྲོས་པ་དང་བྲལ་བར་བཞག་པས་བསལ་བཞག་སྤང་ལེན་དང་བྲལ་བར་རྡོ་རྗེ་ནམ་མཁའི་དཀྱིལ་ལྟར་གདོད་མ་ནས་རྣམ་པར་དག་པ་ནི་དེ་བཞིན་ཉིད་ཀྱི་ཏིང་ངེ་འཛིན་ནོ། །དེ་ལྟར་བསྒོམས་པས་ལམ་དུ་འགྲོ་ཚུལ་ནི། དངོས་གཞིའི་དུས་སུ་སྤྲོས་བྲལ་རྣམ་པར་མི་རྟོག་པའི་སྟོང་པ་ཉིད་ཀྱི་ངང་དུ་མཉམ་པར་བཞག་པ་དེ་ཉིད་འཆི་བའི་འོད་གསལ་དང་། འབྲས་བུ་ཆོས་སྐུ་གཉིས་ཀ་དང་རྣམ་པ་མཐུན་པར་མ་ཟད། རྗེས་དེ་མ་ཐག་ཏུ་འདི་ནི་འཆི་བ་དག་པ་ཆོས་སྐུའི་ཞེས་དག་རྫོགས་ཀྱི་མོས་པས་གཞི་འབྲས་གཉིས་སྦྲེལ་བའི་ང་རྒྱལ་བྱ་སྟེ། དེ་ལྟར་བསྒོམས་པས། མར་འཁོར་བའི་དྲི་མ་འཆི་སྲིད་དང་རྟག་ལྟ་སྣང་ཞེན་གཟུགས་མེད་ཀྱི་ཁམས་སྦྱང་ཞིང་དག་པར་བྱེད། ཡར་ཆོས་སྐུ་མངོན་དུ་བྱེད་པའི་འོད་གསལ་གྱི་ས་བོ ན་གསོས་འདེབས་པས་འབྲས་བུ་རྫོགས་པར་བྱེད་པའི་རྟེན་འབྲེལ་སྒྲིགལམ་གོང་མ་རྫོགས་རིམ་དོན་གྱི་འོད་གསལ་རྒྱུད་ལ་སྐྱེ་བའི་གཞི་འདིང་བས་སྨིན་བྱེད་དུ་འགྲོ་བ་ཡིན་ནོ། །ཀུན་སྣང་གི་ཏིང་ངེ་འཛིན་ནི། འདིའི་སྦྱང་བྱ་འཆི་སྲིད་ཀྱི་སྐད་ཅིག་བཞི་པའི་རྗེས་དེ་ཉིད་ལ་ལྷུན་གྲུབ་གཟུགས་སྐུའི་འོད་གསལ་སྟོན་གནམ་སྤྲིན་དང་བྲལ་བ་ལྟ་བུ་ལ་ཡེ་ཤེས་ལྔ་ཡི་ཞིང་སྣང་རིགས་ལྔའི་ཚོམ་བུའི་རྣམ་པ་སྒྱུ་མ་ལྟ་བུར་ཤར་ཡང་ཉམས་ལེན་གྱི་གནད་དང་མི་ལྡན་པས་ངོ་མ་འཕྲོད་པར་སླར་ཡང་རྣམ་རྟོག་གི་བཞོན་པ་རླུང་གི་རྐྱེན་ལས་སྣང་གསུམ་ལུགས་འབྱུང་གི་རིམ་པས་ཤིན་ཏུ་ཕྲ་ཞིང་དྭངས་པའི་བར་དོའི་ཡིད་ལུས་དབང་པོ་ཀུན་ཚང་ཐོགས་མེད་ལྡན། ལས་ཀྱི་རྫུ་འཕྲུལ་དང་མངོན་ཤེས་ཕྲ་མོ་དང་ལྡན་པ་ཟས་སུ་གསུར་གྱི་དྲི་ལ་སྤྱོད་ཅིང་འཇིགས་སྐྲག་དང་སྡུག་བསྔལ་གྱི་སྣང་བ་ངེས་མེད་རྨི་ལམ་ལྟར་ཡད་ཡུད་ཕྱད་ཕྱོད་དུ་སྣང་བ་དྲི་ཟ་ཉེར་བར་ལེན་པ་ཞེས་ཀྱང་བྱ་བ་དེ་ཡིན་ལ། སྦྱངས་འབྲས་ནི་སངས་རྒྱས་རྣམས་ཀྱི་ལོངས་སྤྱོད་རྫོགས་སྐུ་ཡེ་ཤེས་སྒྱུ་མའི་གར་མཁན་མཚན་དང་དཔེ་བྱད་ཀྱིས་བརྒྱན་པ་རང་སྣང་དོན་གྱི་འོག་མིན་ན་བཞུགས་པ་དེ་ཡིན་ཅིང་། སྦྱོང་བྱེད་ནི། དེ་བཞིན་མ་རྟོགས་པའི་འགྲོ་བ་ལ་སྒྱུ་མ་ལྟ་བུའི་སྙིང་རྗེ་མཁའ་ཁྱབ་ཏུ་སྒོམ་པ་སྟེ། དེ་ཡང་ནམ་མཁའི་དབྱིངས་དག་པ་ལས་གློ་བུར་དུ་འཇའ་ཚོན་གྱི་རྣམ་པར་ཤར་ཡང་ནམ་མཁའི་ཆོ་འཕྲུལ་ཙམ་ལས་བདེན་པར་མ་གྲུབ་པ་བཞིན་དུ་སྟོང་ཉིད་དེ་བཞིན་ཉིད་ཀྱི་གནས་ལུགས་ལ་འཁོར་འདས་གཉིས་སུ་མ་གྲུབ་པས་གཉིས་མེད་ཀྱི་ངང་ལས་མ་གཡོས་བཞིན་དུ་སྒྱུ་མའི་རང་མ ཚང་མ་ཤེས་པས་བསླུས་པ་ལྟར། རྩལ་སྣང་ལ་བདེན་པར་བཟུང་བས་འཁྲུལ་ཏེ། འཁོར་བའི་གནས་སུ་རང་དབང་མེད་པར་འཁྱམས་པའི་འགྲོ་བ་འདི་དག་གཏན་དུ་སྡུག་བསྔལ་ལས་བསྒྲལ་བར་བྱའོ་སྙམ་དུ་སེམས་ཅན་གྱི་ཁམས་ཐམས་ཅད་ལ་ཁྱབ་པའི་སྙིང་རྗེ་འཛིན་མེད་སྒྱུ་མ་ལྟ་བུར་ཤར་བ་སྟེ། དེ་ཇི་ལྟར་ལམ་དུ་ཁྱེར་ན། ཀུན་སྣང་གི་ཏིང་ངེ་འཛིན་དེ་ཉིད་སྤྱོད་ཡུལ་སྒྱུ་མ་ལྟར་སྣང་བའི་ཆ་ནས་བར་དོ་དང་འབྲས་བུ་ལོངས་སྐུ་གཉིས་ཀ་དང་མཐུན་པའི་ལམ་དེ་ཉིད་བསྒོམས་ཏེ། བར་དོ་དག་པ་ལོངས་སྤྱོད་རྫོགས་པའི་སྐུའོ་ཞེས་ང་རྒྱལ་བྱ། འདིས་བར་སྲིད་དང་ཆད་ལྟ་སྟོང་ཞེན་གཟུགས་ཁམས་དག་པར་བྱེད། འབྲས་བུ་ལོངས་སྐུར་རྫོགས་པའི་རྟེན་འབྲེལ་སྒྲིག འོད་གསལ་ལས་ཟུང་འཇུག་གི་ལྷར་ལྡང་བའི་རྒྱུ་སྙིང་རྗེ་ཆེན་པོའི་གཞི་འདིང་བའི་སྨིན་བྱེད་དུ་འགྲོའོ། །རྒྱུའི་ཏིང་ངེ་འཛིན་ནི། འདིའི་སྦྱང་བྱ་བར་དོའི་སེམས་ཅན་དེ་ཕྱི་མའི་སྐྱེ་གནས་ལ་ཕྱོགས་པ་ན་སྐྱེ་གནས་ལ་སྲེད་པ་སྐྱེ་སྟེ། དེ་ཡང་བརྫུས་ཏེ་སྐྱེ་ན་གནས་ལ། དྲོད་གཤེར་ལས་སྐྱེ་ན་དྲི་རོ་ལ། སྒོ་ང་དང་མངལ་ལས་སྐྱེ་ན་ཕ་མའི་འདུ་འཕྲོད་ལ་སྟེ། གང་དུ་སྐྱེ་འགྱུར་གྱི་གནས་ལ་སྲེད་པ་སྐྱེས་པའི་རྐྱེན་གྱིས་དེར་འཇུག་མ་རག་གི་སྐད་ཅིག་མའི་བར་དོའི་རླུང་སེམས་དེ་ཡིན་ལ། སྦྱངས་འབྲས་ནི་ལོངས་སྤྱོད་རྫོགས་པའི་གང་འདུལ་གྱི་སྤྲུལ་པ་རགས་པའི་སྐུ་འཛིན་པའི་ཚུལ་སྟོན་པར་བཞེད་པ་ཉིད་ཡིན་ཅིང་། སྦྱོང་བྱེད་ནི་སྟོང་ཉིད་སྙིང་རྗེ་ཟུང་དུ་འཇུག་པའི་རང་གི་རིག་པ་ཡི་གེ་ཨཱཿཧཱུྃ་ཧྲཱིཿསོགས་སོ་སོའི་ས་བོན་གཙོ་བོའི་སྐུ་མདོག་དང་མཐུན་པར་བདེ་གསལ་སྟོང་ཉིད་ཀྱི་རང་བཞིན་དུ་བསྒོམ་པ་སྟེ། དེ་ཡང་ཏིང་ངེ་འཛིན་སྔ་མ་གཉིས་ལ་རིམ་པར་བསླབས་ཏེ་གོམས་པ་ལས་དེ་གཉིས་ཟུང་དུ་འཇུག་པ་ལྷན་སྐྱེས་མི་འགྱུར་བའི་བདེ་བ་ཆེན་པོ་བརྟན་གཡོ་སྲིད་ཞིའི་ཆོས་ཐམས་ཅད་ལ་ཁྱབ་ཅིང་རྗེས་སུ་སོང་བ་ངོ་བོ་རྡོ་རྗེ་ལྟར་མི་ཕྱེད་པའི་རང་རིག་པ་བྱང་ཆུབ་སེམས་ཀྱི་རྟེན་དུ་གྱུར་པ་དྭངས་མའི་སྲོག་ཆེན་པོ་ཉིད་རྣམ་པ་ཤིན་ཏུ་དྭངས་ཤིང་གསལ་ལ་གང་དུའང་འགྱུར་བ་མེད་ཅིང་ཅིར་ཡང་འཆར་དུ་རུང་བ་གསལ་བརྟན་གྱིས་ཁྱད་པར་དུ་བྱས་པ་སྟེ། དེ་ནི་སྤྲུལ་སྐུའི་རྟོགས་པ་རྒྱུ་མཐུན་དུ་སྒྲུབ་པའི་རྒྱུའི་ཏིང་ངེ་འཛིན་ཏེ། མི་ཤིགས་པའི་ཐིག་ལེ་ཆེན་པོའི་ངོ་བོ་ཉིད་དུ་ཤར་བའི་ས་བོན་གྱི་ཡེ་གེ་འདིས་དཀྱིལ་འཁོར་ཐམས་ཅད་སྤྲུལ་པར་བྱེད་ཅིང་། འདི་ཉིད་བདེ་གསལ་སྟོང་པ་ཉིད་ཀྱི་རང་བཞིན་དུ་བསྒོམས་པས་དཀྱིལ་འཁོར་ཐམས་ཅད་ཀྱང་བདེ་གསལ་གྱི་རྣམ་འཕྲུལ་སྟོང་པ་ཉིད་ཀྱི་རང་གཞིན་ཅན་དུ་འཆར་བའི་རྒྱུ་བྱེད་པ་ཡིན་ནོ། །དེ་ཇི་ལྟར་ལམ་དུ་ཁྱེར་ན། རྒྱུའི་ཏིང་ངེ་འཛིན་ནི་དཀྱིལ་འཁོར་ཐམས་ཅད་བསྐྱེད་པའི་ས་བོན་དུ་འགྱུར་བ་ལྟར་སྐྱེ་གནས་སུ་འཇུག་ཀའི་བར་དོའི་རླུང་སེམས་དེ་ཉིད་སྲིད་པ་ཕྱི་མའི་ས་བོན་བྱེད་ཅིང་། སངས་རྒྱས་སྤྲུལ་པའི་སྐུས་ཀྱང་གདུལ་བྱ་རྣམས་ཀྱི་ངོར་རྣམ་འཕྲུལ་སྣ་ཚོགས་པ་སྟོན་པའི་ཆ་ནས་དེ་གསུམ་རྣམ་པ་མཐུན་པས་ན་འདི་ནི་སྐྱེ་བ་དག་པ་སྤྲུལ་སྐུའོ་ཞེས་ང་རྒྱལ་བྱེད་པའོ། །འདིས་སྐྱེ་གནས་སུ་འཇུག་ཀ་མའི་སྲེད་བཅས་ཀྱི་ཤེས་པ་དང་སྣང་སྟོང་ཐ་དད་དུ་ཞེན་པའི་རྟོགས་པ་འདོད་ཁམས་རྣམས་སྦྱོང་ཞིང་དག འབྲས་བུ་ལོངས་སྐུ་ལས་གང་འདུལ་གྱི་སྤྲུལ་སྐུར་བཞེངས་པའི་རྟེན་འབྲེལ་སྒྲིག རྫོགས་རིམ་བདེ་བ་དང་རླུང་སེམས་ལས་བྱུང་བའི་ལྷ་སྐུར་ལྡངས་པའི་གཞི་བཏིང་བས་སྨིན་བྱེད་དུ་འགྱུར་རོ། །དེ་ལྟར་ཏིང་ངེ་འཛིན་གསུམ་པོ་འདིས་ནི། སྦྱང་བྱ་འཆི་བར་སྐྱེ་གསུམ་གྱི་བག་ཆགས་སྦྱང་བ་དང་། སྦྱོང་བྱེད་ལམ་རང་གི་ངོ་བོའང་སྟོང་ཉིད་སྙིང་རྗེ་སྙིང་པོ་ཅན་ཏེ་ཐེག་ཆེན་གྱི་ལམ་ཐམས་ཅད་ཀྱི་སྲོག་ཤིང་གཅིག་པུ་ཡིན་པས་འདི་དང་བྲལ་བའི་ལམ་རྣམས་ལམ་གྱི་གཟུགས་བརྙན་ཙམ་དུ་འགྱུར་བས་ཐོག་མར་འདི་ཁོ་ན་ལ་འབད་པ་བསྐྱེད་པ་གལ་ཆེ་ཞིང་། འདི་ལ་གོ་མྱོང་ཅི་རིགས་སྐྱེས་ན་བསྐྱེད་རིམ་ཕྱི་མ་རྣམས་ཀྱི་དག་སྦྱོར་རེ་རེ་བཞིན་ཞིབ་པར་མ་གྲུབ་ཀྱང་འགལ་བ་ཆུང་སྟེ་དོན་གྱི་གནད་རྣམས་འདིར་ཚང་བའི་ཕྱིར་རོ། །གཉིས་པ་རྟེན་དང་བརྟེན་པའི་དཀྱིལ་འཁོར་བསྐྱེད་པ་ལ་གཉིས། རྟེན་གཞལ་ཡས་ཁང་བསྐྱེད་པ་དང་། བརྟེན་པ་ལྷ་བསྐྱེད་པའོ། །དེའི་དང་པོ་ལའང་གསུམ་སྟེ། འོག་གཞི་འབྱུང་བ་རིམ་བརྩེགས་བསྐྱེད་པ། གཞལ་ཡས་ཁང་བསྐྱེད་པ། གདན་བསྐྱེད་པའོ། །དང་པོ་ནི། འདིའི་སྦྱང་བྱ་སེམས་ཅན་རྣམས་གང་དུ་སྐྱེ་བའི་སྣོད་ཀྱི་འཇིག་རྟེན་ཆགས་པའི་གཞི་ནམ་མཁའི་ཁམས་དང་། ཆགས་པར་འགྱུར་བའི་རྒྱུའི་གཙོ་བོ་སེམས་དང་། བྱེ་བྲག་ལས་མཐུན་པར་བསགས་པའི་སེམས་ཅན་སྤྱི་མཐུན་གྱི་ལས་ཀྱི་བག་ཆགས་སེམས་ལ་བགོས་པ་ཡུལ་སྣང་འགྱུར་ཐུན་མོང་དུ་སྨིན་པ། འབྱུང་བཞིའི་དཀྱིལ་འཁོར་རི་རབ་དང་བཅས་པ་དེའོ། །སྦྱངས་འབྲས་ནི་སངས་རྒྱས་རྣམས་གང་དུ་འཚང་རྒྱ་བའི་ཞིང་ཆོས་ཀྱི་དབྱིངས་ཡིན་ལ་དེའི་ཕྱག་རྒྱ་ཡུལ་ལྔའི་མཁའ་ཀློང་རྣམ་པར་དག་པའོ། །སྦྱོང་བྱེད་ནི། སྲུང་འཁོར་གྱི་ནང་དུ་ནམ་མཁར་གནས་པའི་རྒྱུའི་ས་བོན་ལས། ཡི་གེ་ཨེ་ཡཾ་རཾ་བཾ་ལཾ་སུཾ་རྣམས་ཆད་པ་ལས་འོད་ཟེར་སྤྲོས་པས་འབྱུང་བ་ལྔ་དང་དེར་འཛིན་གྱི་ཞེན་རྟོག་སྦྱངས། འབྱུང་ལྔའི་དྭངས་མ་ཡེ་ཤེས་ལྔ་ཡི་ཡོན་ཏན་ཐམས་ཅད་བསྡུས་ཏེ་ཞུ་བ་ལས་ཨེ་ལས་ནམ་མཁའ་ཆོས་འབྱུང་མཐིང་ག་གདེངས་ཀ་གྱེན་དུ་རྒྱས་ཤིང་རྩ་བ་ཕྲ་བ་ཐུར་དུ་ཟུག་པ། དེའི་སྟེང་ནས་རིམ་བརྩེགས་ཀྱིས་ཡཾ་ལས་རླུང་གི་དཀྱིལ་འཁོར་ལྗང་གུ་དབྱིབས་རྡོ་རྗེ་རྒྱ་གྲམ་གྱི་རྣམ་པ་ཅན་དུ་བ་ལྟ་བུའི་འོད་ཟེར་ལྗང་ནག་གི་མུ་ཁྱུད་ཀྱིས་བསྐོར་བ། རཾ་ལས་མེ་དཀྱིལ་དམར་པོ་གྲུ་གསུམ་པ་མེ་ལྕེ་འབར་བའི་ཕྲེང་བས་བསྐོར་བ། བཾ་ལས་ཆུ་ཡི་དཀྱིལ་འཁོར་དཀར་པོ་ཟླུམ་པོར་འཁྱིལ་བའི་མཐའ་ལ་འོད་ཟེར་དཀར་པོས་བསྐོར་བ། ལཾ་ལས་ས་ཡི་དཀྱིལ་འཁོར་གསེར་གྱི་རང་བཞིན་གྲུ་བཞི་པ་འོད་ཟེར་སེར་པོས་བསྐོར་བ། སུཾ་ལས་རིན་པོ་ཆེ་སྣ་བཞི་ལས་གྲུབ་པའི་རི་རབ་བང་རིམ་བཞི་པ་དབྱིབས་གྲུ་བཞི་མཐའ་ལྕགས་རིས་ཡོངས་སུ་བསྐོར་བ་རྣམས་རེག་ལ་མ་འབྱར་བར་བསྒོམ་པ་སྟེ། འབྱུང་ལྔ་རྣམ་པར་དག་པ་རིགས་ཀྱི་ཡུམ་ལྔའོ་ཞེས་གཞི་འབྲས་སྦྲེལ་བའི་ང་རྒྱལ་བྱ། འདིར་བཤད་པ་ནི་ཞི་བ་སྟེ། ཁྲོ་བོ་ལ་རཀྟའི་མཚོ་དང་། ཞིང་ཆེན་གྱི་ས་གཞི་དང་། ཀེང་རུས་ཀྱི་རི་རབ་སོགས་བསྒོམ་པར་བྱ་སྟེ་རང་གཞུང་དང་བསྟུན་ནོ། །གཉིས་པ་གཞལ་ཡས་ཁང་བསྐྱེད་པ་ནི། འདིའི་སྦྱང་བྱ་སེམས་ཅན་རྣམས་གང་དུ་རྒྱུ་ཞིང་ལོངས་སྤྱོད་པའི་གནས་སུ་གྱུར་པའི་ཡུལ་དང་ཁང་ཁྱིམ་ལ་སོགས་པའི་ཞེན་རྟོག་རྣམས་ཡིན་ལ། སྦྱངས་འབྲས་ནི། ཆོས་ཀྱི་དབྱིངས་ཀྱི་ཡེ་ཤེས་སྤྲོས་པ་ཐམས་ཅད་དང་བྲལ་བ་ནི་སངས་རྒྱས་ཐམས་ཅད་ཀྱི་བརྟེན་པའི་གནས་སུ་བཤད་པས་ན་དེ་ཉིད་ཀྱི་རང་བཞིན་གཞལ་ཡས་ཁང་ནི་རྡོ་རྗེ་བཙུན་མོའི་བྷ་གའི་མཁའ་ཀློང་མཚོན་པ་སྟེ་གསང་བ་མཆོག་གི་དགྱེས་པ་དང་། ཐར་པ་ཆེན་པོའི་གཞལ་མེད་ཁང་མྱ་ངན་ལས་འདས་པའི་གྲོང་ཁྱེར་ཆེན་པོ་གནས་ལུགས་ཇི་ལྟ་བའི་དོན་གྱི་འོག་མིན་རང་སྣང་རྣམ་པར་དག་པའི་གཞལ་མེད་ཁང་སྟེ་རྣམ་སྣང་གི་ངོ་བོར་རྣམ་པར་དག་པའོ། །སྦྱོང་བྱེད་ནི་སངས་རྒྱས་རང་སྣང་གི་ཕོ་བྲང་ཉིད་ལམ་དུ་བྱེད་པ་སྟེ། དེ་ཡང་རྒྱུའི་ས་བོན་ལས་ཡི་གེ་བྷྲཱུྃ་ཁ་དོག་ལྔ་ལྡན་ཆད་རི་རབ་ཀྱི་སྟེང་དུ་བབས་པ་འཕྲོ་འདུས་འོད་དུ་ཞུ་བ་ལས། རྒྱུ་བསོད་ནམས་དང་ཡེ་ཤེས་ཀྱི་ཚོགས་གཉིས་ལས་གྲུབ་པ། ངོ་བོ་ཡེ་ཤེས་ལྔ་ཡི་རང་བཞིན། རྣམ་པ་དབྱིབས་དང་རྒྱན་བཀོད་ཕུན་སུམ་ཚོགས་པའི་གཞལ་ཡས་ཁང་ཉིད་བསྒོམ་པ་སྟེ། དེ་ཡང་སྲུང་གུར་ཡངས་ཤིང་རྒྱ་ཆེ་བར་གྱུར་པའི་ནང་། རི་རབ་ཀྱི་སྟེང་དུ་རྡོ་རྗེའི་རྡུལ་ཕྲ་མོ་འདུས་པའི་ས་གཞི་ཁད་མཉམ་པར་བྱས་པའི་ཕྱི་མཐར་རྡོ་རྗེའི་ར་བ་ལྕགས་རི་ལྟ་བུས་བསྐོར་བ་ལས་ཁ་དོག་ལྔའི་མེ་དཔུང་འཕྲོ་བ། དེའི་ནང་དུ་དུར་ཁྲོར་ཆེན་པོ་བརྒྱད་མཆོད་རྟེན་ཤིང་མེ་སྤྲིན་ཆུ་གྲུབ་པ་ཕྱོགས་སྐྱོང་ལྷ་ཀླུ་སོགས་དུར་ཁྲོད་ཀྱི་ཆས་རྣམས་ཀྱིས་འཇིགས་པར་བྱས་པས་བསྐོར་བ། དེའི་ནང་དུ་རྒྱུ་རིན་པོ་ཆེ་སྣ་ཚོགས་པའི་རང་བཞིན་ཅན་གྱི་པདྨ་འདབ་མ་སྟོང་དང་ལྡན་པ་ལྟེ་བ་ཟླུམ་པོ་ལེབ་ཆགས་ཅན་ཁ་དོག་ལྗང་གུ་གེ་སར་དམར་པོ་ཟིལ་ཕོག་དང་བཅས་པ། དེའི་སྟེང་དུ་ཉི་མའི་དཀྱིལ་འཁོར་དྭངས་ཤིང་གསལ་བ་གེ་སར་གྱི་རྒྱ་དང་མཉམ་པ། དེའི་དབུས་སུ་སྣ་ཚོགས་རྡོ་རྗེ་ལྟེ་བ་མཐིང་ག་གྲུ་བཞི་པ་ཤར་གྱི་ར་གསུམ་དཀར་པོ་སོགས་ཕྱོགས་མདོག་ཅན། དེའི་ལྟེ་བའི་གཞི་ལ་གཞལ་ཡས་ཁང་ཀུན་ནས་གྲུ་བཞི་པ། རིན་པོ་ཆེ་ལྔའི་རྩིག་པ་ནང་ནས་རིམ་པར་གཙོ་བོའི་རིགས་ཀྱི་ཁ་དོག་ནས་བརྩམས་ནས་ཕྱི་ནང་ལྔ་བསྒྲགས་སུ་གནས་པ། ཕྱིའི་འགྲམ་རྨང་ན་འདོད་ཡོན་གྱི་སྣམ་བུ་རིན་པོ་ཆེ་དམར་པོའི་སྟེགས་བུས་བསྐོར་བ་ལ་ཤར་སྟོད་ནས་རིམ་པར་མཆོད་པའི་ལྷ་མོ་རྣམས་གཉིས་གཉིས་ཞལ་ནང་བསྟན་གྱིས། པི་ཝཾ་མ་སྔོན་མོ། གླིང་བུ་མ་སེར་མོ། རྔ་ཟླུམ་མ་དམར་མོ། རྫ་རྔ་མ་ལྗང་གུ་རྣམས་རང་རང་གི་ཕྱག་མཚན་འཛིན་པ། དེ་བཞིན་དུ་ལྷོར་སྒེག་མོ་སྔོན་མོ་དང་བཞད་མ་དམར་མོ་གཉིས་རང་རྒྱ་ཅན། གླུ་མ་སེར་མོ་ཏིང་ཤག་འཛིན་པ། གར་མ་ལྗང་གུ་གར་རྒྱ་ཅན། ནུབ་ཏུ་མེ་ཏོག་མ་སེར་མོ། སྤོས་མ་ནག་མོ། མར་མེ་མ་དམར་མོ། དྲི་མ་ལྗང་གུ་རྣམས་རང་རང་གི་ཕྱག་མཚན་ཅན། བྱང་དུ་གཟུགས་མ་དཀར་མོ་མེ་ལོང་། རོ་མ་དམར་མོ་ཟས་གཞོང་། རེག་མ་ལྗང་གུ་ན་བཟའ། ཆོས་དབྱིངས་མ་དཀར་མོ་ཆོས་འབྱུང་འཛིན་པ་ཐམས་ཅད་ཞི་ཚུལ་སྒེག་ཉམས་ཅན་དར་དང་རིན་པོ་ཆེས་བརྒྱན་པ། སྒོ་ཁྱུད་ཀྱི་མཚམས་དང་ཤར་ལྷོ་ལ་སོགས་པའི་མཚམས་རྣམས་སུ་ཟླ་ཕྱེད་རྡོ་རྗེ་རེ་རེས་མཚན་པ། རྩིག་པའི་སྟེང་གི་ཁར་ཕ་གུ་སེར་པོ་ལ་རིན་པོ་ཆེའི་ཕྲ་ཚོམ་གྱིས་མཛེས་པ་བད་ཀྱི་ཚུལ་དུ་འཕྱར་བ། དེའི་སྟེང་དུ་བྲེ་སྤུངས་སམ་ཀ་ཐུང་གིས་བཏེགས་པའི་གདུང་མ། དེའི་སྟེང་དུ་ཐོག་ཕུབ་པའི་ཕྱམ་གྱི་སྣ་ལ་ཙི་པ་ཏྲའི་ཁ་ནས། རིན་པོ་ཆེའི་དྲྭ་བ་དྲྭ་ཕྱེད་དང་། གཞན་ཡང་མེ་ཏོག་གི་ཕྲེང་བ་དང་། དར་དཔྱངས་མེ་ལོང་དང་ཟླ་ཕྱེད་རྔ་ཡབ་རླུང་གིས་བསྐྱོད་པ་དང་བཅས་པ་ཇི་ལྟར་རིགས་པས་མཛེས་པ། ཕྱམ་གྱི་སྟེང་དུ་རྒྱ་ཕིབས་འདོད་སྣམ་གྱི་ཕྱི་མཐའ་ཁེབས་པ་ཙམ་དུ་ཕྱིར་འཕྱར་བའི་ནང་གི་འོག་ཏུ་རིན་པོ་ཆེ་དཀར་པོའི་ཤར་དུ་སྤྱི་བླུགས་མགོ་ཐུར་བསྟན་ལྟ་བུ་ཕྲེང་བར་བསྒྲིགས་པའི་རྩེ་རྣམས་ཕྱམ་གྱི་མ་མཐའི་ཐད་བུ་ཀར་སླེབ་པ། རྒྱ་ཕིབས་ཀྱི་ཐོག་ཏུ་དེའི་རྩ་བ་གནོན་བྱེད་རིན་པོ་ཆེའི་སྤང་ལེབ་དཀར་པོ་བང་རིམ་གསུམ་མམ་བཞི་ཡོད་པ་བསླངས་ནས་བསྒྲིགས་པ་པུ་ཤུ་མཆོད་རྟེན་རིས་སམ་ལན་ཀན་དུ་གྲགས་པ་སྟེ། འདི་ལ་པད་འདབ་བྱེད་པར་ཡང་བཤད་དེ་གནད་གཅིག་གོ །གཞལ་ཡས་ཁང་གི་ནང་དུ་ཀ་བ་བརྒྱད་ཀྱིས་བཏེགས་པའི་གདུང་བཞི་བསྣོལ་མའི་སྟེང་དུ་ཕྱམ་ཉི་ཤུ་རྩ་བརྒྱད་བཏང་བའི་དབུས་ཀྱི་མཐོང་ཀ་མ་གཏོགས་བཀབ་པའི་སྟེང་དུ་རིན་པོ་ཆེའི་སྤང་ལེབ་བསྒྲིགས་པའི་གྲལ་མ། ཐོག་ས་རིན་པོ་ཆེ་གཅལ་དུ་བཀྲམ་པ། དབུས་ཕྱུར་བུ་ཞེས་པའི་དོན་མཐོང་ཀའི་ཟུར་བཞིར་ཀ་བའམ་ཤིང་བརྩིགས་ཀྱི་བཀོད་པས་བཏེགས་པའི་སྟེང་དུ་རྒྱ་ཕིབས་བཀལ་བའི་རྩེ་མོར་རྡོ་རྗེ་རིན་པོ་ཆེའི་ཏོག་གིས་མཛེས་པར་བྱས་པ། ཕྱོགས་བཞིའི་རྩིག་པའི་དབུས་དྲང་ཐད་དུ་སྒོ་བཞི་ཕྱི་རོལ་སྒོ་ཁང་དང་བཅས་པའི་མར་སྣེ་ཟུར་གཉིས་དང་ཡར་སྣེ་འདོད་ཡོན་གྱི་སྣམ་བུ་ལ་ཐུག་པའི་ཟུར་གཉིས་བཅས་སུ་ཀ་བ་བཞི་བཞིའི་སྟེང་དུ་གདུང་བཞི་བསྣོལ་མར་བཏང་བ། རྟ་བབས་ལ་རྒྱུ་འབྲས་གཉིས་ལས། རྒྱུའི་རྟ་བབས་ནི་སྒོར་འཇུག་པའི་ཐེམ་སྐས་ཏེ། སྒོ་གཡས་གཡོན་གྱི་སྒོ་ཕུབ་ཀྱི་མཚམས་དང་། སྒོ་དངོས་ཀྱི་ཕྱི་མཚམས་སུ་ཐེམ་སྐས་བཞི་བཞི་སྟེ་བརྒྱད་དོ། །འབྲས་བུའི་རྟ་བབས་ནི། སྒོ་སྟེང་གི་སྔར་གྱི་གདུང་བཞི་བསྣོལ་མའི་སྟེང་དུ་རྟ་བབས་སྣམ་བུ་བཞི་མའམ་བརྒྱད་མ་གང་རུང་ལས་འདིར་བརྒྱད་བརྩེགས་ལྟར་ན། རིམ་པར། རྟ་རྐང་། ཆུ་སྐྱེས། སྒྲོམ། ཟ་ར་ཚགས། སྣ་འཕྱང་། ཆུན་འཕྱང་། ཤར་བུ། རྒྱ་ཕིབས་ཏེ་བརྒྱད་དོ། །དེ་ཡང་རྟ་རྐང་ནི་གཞི་སྔོན་པོ་ལ་གསེར་གྱི་རྡོ་རྗེ་འགྲེང་བུ་བསྒྲིགས་པ། ཆུ་སྐྱེས་ནི་རིན་པོ་ཆེ་དམར་པོའི་པད་འདབ་བསྒྲིགས་པ། སྒྲོམ་ནི་ཀ་ཐུང་གི་བར་ལ་རིན་པོ་ཆེ་སྣ་ཚོགས་ཀྱི་སྒྲོམ་ལེབ་བཙུད་པ། ཟ་ར་ཚགས་ནི་སྣ་འཕྱང་ལས་དཔྱངས་པའི་རིན་པོ་ཆེ་དཀར་པོའི་དྲྭ་མིག སྣ་འཕྱང་ནི་ཕ་གུ་དང་འདྲ། ཆུན་འཕྱང་ནི་གཞི་བར་སྟོང་ལ་སེང་མགོའི་ཁ་ནས་རིན་པོ་ཆེའི་དྲྭ་བ་དྲྭ་ཕྱེད་འཕྱང་བ། ཤར་བུ་དང་རྒྱ་ཕིབས་གཉིས་ནི་སྔ་མ་ལྟ་བུ་ལ་རྒྱ་ཕིབས་ཀྱི་ཟུར་བཞིར་ཁྱུང་མགོའི་ལྐོག་མ་ནས་དྲིལ་བུ་རླུང་བསྐྱོད་དང་བཅས་པ་དཔྱང་བ། རྟ་བབས་ཀྱི་མདུན་དབུས་སུ་གླང་རྒྱབ་མིག་གསུམ་བསྐོར་བའི་ནང་དུ་རིན་པོ་ཆེའི་དྲྭ་བ་དང་དྲྭ་ཕྱེད་ཀྱིས་མཛེས་པ། རྒྱ་ཕིབས་ཀྱི་སྟེང་དུ་པདྨའི་ལྟེ་བར་གསེར་གྱི་འཁོར་ལོ་དང་དེའི་གཡས་གཡོན་གཉིས་སུ་ཐབས་ཤེས་རི་དྭགས་ཕོ་མོ་རྭ་ཡོད་མེད་གཉིས་ཀྱིས་བརྟེན་པའི་སྟེང་དུ་རིན་པོ་ཆེའི་གདུགས་དཀར་པོས་མཛེས་པ། གཞན་ཡང་སྟེང་དང་བར་མཚམས་རྣམས་སུ་རིན་པོ་ཆེའི་བླ་རེ་དང་རྒྱལ་མཚན་དང་བ་དན་དང་རྔ་ཡབ་དང་གསེར་གྱི་སྐུད་པ་ལ་བརྒྱུས་པའི་དྲིལ་གཡེར་རླུང་གིས་བསྐྱོད་པས་སྒྲ་འབྱིན་པ་སོགས་མཛེས་པའི་རྒྱན་ཐམས་ཅད་ཀྱིས་བརྒྱན་པ་ཕྱི་གསལ་ནང་གསལ་དྭངས་ཤིང་ཐོགས་པ་མེད་པ་སྟེ་འདི་ནི་སྤྱི་ཙམ་དུ་ཡིན་ལ་བྱེ་བྲག་སྒྱུ་འཕྲུལ་སོགས་སོ་སོའི་སྒེར་ཆོས་ཡོད་པ་རྣམས་དེ་བཞིན་ཤེས་པར་བྱ་ལ། ཁྲོ་དཀྱིལ་གྱི་སྐབས་སུ་གདུལ་བྱ་མ་རུངས་པ་རྣམས་འདུལ་བའི་ཕྱིར་དུར་ཁྲོད་འབར་བའི་གཞལ་མེད་ཁང་གི་བཀོད་པ་ཞེས་ཐོད་པ་སྐམ་རློན་རྙིང་གསུམ་སྤེལ་མའི་རྩིག་པ། ལྷ་བརྒྱད་ཀྱི་ཀ་བ། ཀླུ་བརྒྱད་ཀྱི་གདུང་མ། རྒྱུ་སྐར་ཉེར་བརྒྱད་ཀྱི་ཐོག་ཕུབ། གཟའ་བརྒྱད་དང་ཉི་ཟླའི་སྐར་ཁུང་། སྦྲུལ་དང་ཐོད་པའི་དྲྭ་ཕྱེད། རྟ་བབས་རྣམས་ཀྱང་སོར་མོ་དང་ཐོད་པ་དང་དོན་སྙིང་ལྔ་དང་ཉི་ཟླའི་ཕྲེང་བས་སྤྲས་པ་རྐང་ལག་གི་ཤར་བུ། རྒལ་ཚིགས་ཀྱི་མདའ་ཡབ། ལྷ་ཆེན་པོའི་ཐོད་པ་སྦུབས་པའི་རྒྱ་ཕིབས་ཀྱི་སྟེང་དུ་ཙི ཏྟའི་ཏོག་གིས་མཛེས་པ། མི་རོའི་རྒྱལ་མཚན། ཞིང་ལྤགས་ཀྱི་བླ་བྲེ། རོ་སྐྲའི་རྔ་ཡབ། རྒྱུ་མའི་རྡ་རྡི། གློ་སྙིང་གི་འཕྱང་འཕྲུལ་སོགས་དང་། ཕྱི་ནང་གི་ས་གཞི་ཐམས་ཅད་དུ་དུར་ཁྲོད་དང་ཁྲག་མཚོར་འཁྱིལ་བ། ཕྱི་ནང་ཀུན་ཏུ་འཇིགས་པའི་མེ་འོད་དང་རླུང་ནག་འཚུབ་མར་འཁྱིལ་བ་སོགས་ཏེ། རྒྱུད་གཞུང་ལ་ལར་མཆོག་ཆེན་གྱི་གདུང་དང་མཆོག་ཕྲན་གྱི་དྲལ་ཕྱམ་ཞེས་འབྱུང་བ་མཆོག་ཆེན་ནི་མི་རོ་དང་། མཆོག་ཕྲན་ནི་རྒྱལ་རིགས་ལས་གོལ་བ་བྲག་གི་རྩང་པ། བྲམ་ཟེའི་རིགས་ལས་གོལ་བ་སྤང་གི་ཕྱི་བ། རྗེ་རིགས་ལས་གོལ་བ་ན གས་ཀྱི་སྤྲེའུ། གདོལ་པའི་རིགས་ལས་གོལ་བ་ཆུའི་སྦལ་བ་རྣམས་སུ་གུ་རུ་རིན་པོ་ཆེས་མཛད་པའི་ཕུར་འགྲེལ་ལས་གསུངས། དཀྱིལ་འཁོར་སོ་སོའི་ནང་ཁང་དང་ལྷ་གནས་སོགས་ནི་རང་རང་གི་གཞུང་དུ་བཤད་པ་ལྟར་ཤེས་པར་བྱ་བ་ལས་འདིར་མཚོན་པར་མི་ནུས་སོ། །དེ་ལྟར་བསྒོམ་པའི་ཚེ་སོ་སོའི་དག་པ་མ་དྲན་ན་བསྒོམ་བྱ་རང་རྒྱུད་པར་གོལ་བའི་ཕྱིར། སངས་རྒྱས་ཀྱི་ཡོན་ཏན་དང་བསམ་གྱིས་མི་ཁྱབ་པའི་ཐུགས་རྗེ་དང་ཕྲིན་ལས་ཀྱིས་བསྡུས་པའི་རྣམ་བྱང་ཕྱོགས་ཀྱི་ཆོས་རྣམས་གདུལ་བྱ་འདུལ་བའི་སླད་དུ་གཞལ་ཡས་ཁང་དང་ལྷ་སྐུའི་ཕྱག་རྒྱའི་རྣམ་པར་ཤར་བ་ཡིན་པས་དེ་ལྟར་དྲན་པར་བྱ་དགོས་ཏེ། དེ་ཡང་གཞལ་ཡས་ཁང་གི་རྒྱུ་རིན་པོ་ཆེ་སྣ་ཚོགས་ལས་གྲུབ་པ་ནི་སངས་རྒྱས་ཀྱི་ཡེ་ཤེས་ཉིད་དབྱིབས་དང་ཁ་དོག་ཏུ་སྣང་བས་གདུལ་བྱའི་རེ་བ་སྐོང་བའོ། །དབྱིབས་གྲུ་བཞི་པ་ནི་ཆོས་ཀྱི་དབྱིངས་ཀུན་ཏུ་མི་མཉམ་པ་མེད་པའོ། །སྒོ་བཞི་ནི་ཞི་རྒྱས་དབང་དྲག་གི་ཕྲིན་ལས་བཞིའམ་བྱམས་སོགས་ཚད་མེད་བཞིས་བདེ་བ་ཆེན་པོའི་ཕོ་བྲང་དུ་འདྲེན་པའམ་ཡང་ན་རྒྱུ་འབྲས་བྱེད་པ་ངོ་བོ་བཞིས་སྟོང་པའི་རྣམ་ཐར་བཞིའི་ས་ནས་སྐྱེ་མེད་ཆོས་ཀྱི་དབྱིངས་ཀྱི་ཕོ་བྲང་དུ་འཇུག་པའོ། །ལམ་སྟེགས་ཀྱི་རྟ་བབས་བརྒྱད་ནི། ལྷ་མི་ཉན་རང་བྱང་སེམས་བྱ་སྤྱོད་རྣལ་འབྱོར་མ་ཧཱ་སྟེ་བརྒྱད་དོ། །ཡང་ན་ཨ་ནུ་མན་གྱི་རྩོལ་བཅས་ཀྱི་ཐེག་པ་བརྒྱད་པོ་བགྲོད་ནས་གཉིས་སུ་མེད་པའི་ཐེག་པ་རྩོལ་བྲལ་ཨ་ཏིར་བགྲོད་པའོ། །འབྲས་བུའི་རྟ་བབས་བཞི་ནི་སྦྱིན་དང་སྙན་སྨྲ་དོན་མཐུན་དོན་སྤྱོད་དེ་བསྡུ་བའི་དངོས་པོ་བཞིའོ། །དེ་རེ་རེ་ལ་སྣམ་བུ་བརྒྱད་དམ་བཞི་ནི་རྣམ་གྲོལ་གྱི་ཐེག་པ་བརྒྱད་དམ་ཉན་རང་བྱང་སེམས་གསང་སྔགས་ཏེ་བཞིའི་གྲུབ་མཐའི་ཡོན་ཏན་རྫོགས་པའོ། །འཁོར་ལོ་ལ་སོགས་པ་ནི་ཆོས་ཀྱི་འཁོར་ལོ་རྒྱུན་མི་ཆད་པར་བསྐོར་བའོ། །འདོད་ཡོན་གྱི་སྣམ་བུ་ནི་ལུས་ཚོར་སེམས་ཆོས་ཏེ་དྲན་པ་ཉེ་བར་བཞག་པ་བཞིའོ། །རྟ་བབས་ཀྱི་ཀ་བ་བཞི་ནི། མི་དགེ་བའི་ཆོས་མ་སྐྱེས་པ་མི་སྐྱེད་པ་དང་སྐྱེས་པ་བསྡམས་པ་དང་དགེ་བའི་ཆོས་མ་སྐྱེས་པ་བསྐྱེད་པ་དང་སྐྱེས་པ་སྤེལ་བ་སྟེ་ཡང་དག་པའི་སྤོང་བ་བཞིའོ། །སྒོ་ཁང་བཞི་ནི་འདུན་པ་དང་བརྩོན་འགྲུས་དང་སེམས་པ་དང་སེམས་དཔྱོད་པ་སྟེ་རྫུ་འཕྲུལ་གྱི་རྐང་པ་བཞིའོ། །རྩིག་པ་རིམ་པ་ལྔ་ནི་དད་པ་དང་བརྩོན་འགྲུས་དང་དྲན་པ་དང་ཏིང་ངེ་འཛིན་དང་ཤེས་རབ་སྟེ། རྣམ་བྱང་ལ་དབང་བྱེད་པའི་དབང་པོ་ལྔའོ། །ཕ་གུ། བྲེ་ཕུལ་གྱི་སྣམ་བུ། ཤར་བུ། མདའ་ཡབ། ཕྱུར་བུ་ལྔ་ནི་དད་སོགས་ལྔ་པོ་སྟོབས་སུ་གྱུར་པས་མི་མཐུན་ཕྱོགས་ཀྱིས་བརྫི་བར་མི་ནུས་པའི་སྟོབས་ལྔའོ། །རིན་པོ་ཆེའི་དྲྭ་བ་དང་། དྲྭ་ཕྱེད་དང་། མེ་ཏོག་གི་ཕྲེང་བ་དང་། དར་དཔྱངས་དང་། མེ་ལོང་དང་། ཟླ་གདུང་དང་། རྔ་ཡབ་སྟེ་རྒྱན་རྣམས་ནི། དྲན་པ་དང་ཆོས་རབ་རྣམ་འབྱེད་དང་བརྩོན་འགྲུས་དང་དགའ་བ་དང་ཤིན་སྦྱངས་དང་ཏིང་ངེ་འཛིན་དང་བཏང་སྙོམས་ཏེ་བྱང་ཆུབ་ཡན་ལག་བདུན་ནོ། །ནང་གི་ཀ་བ་བརྒྱད་ནི། ཡང་དག་པའི་ལྟ་བ་དང་རྟོག་པ་དང་ངག་དང་ལས་མཐའ་དང་འཚོ་བ་དང་རྩོལ་བ་དང་དྲན་པ་དང་ཏིང་ངེ་འཛིན་ཏེ་འཕགས་པའི་ལམ་ཡན་ལག་བརྒྱད་དོ། །ཀ་ཞུ་རྣམས་ནི། གཟུགས་ཅན་གཟུགས་ལ་ལྟ་བ། གཟུགས་མེད་གཟུགས་ལ་ལྟ་བ། སྡུག་པའི་རྣམ་པར་ཐར་པ། ནམ་མཁའ་མཐའ་སོགས་སྐྱེ་མཆེད་བཞི། འགོག་པའི་སྙོམས་འཇུག་བཅས་རྣམ་ཐར་བརྒྱད་དོ། །གདུང་བཞི་ནི་རང་དོན་དུ་སྤངས་རྟོགས་གཉིས་ཞལ་གྱིས་བཞེས་པ་དང་། གཞན་དོན་དུ་ལམ་དང་ལམ་གྱི་གེགས་སྟོན་པ་གཉིས་ལ་མི་འཇིགས་པ་སྟེ་བཞིའོ། །ནང་གི་ཕྱམ་ཉེར་བརྒྱད་ནི། ཕྱི་སྟོང་པ་ཉིད་དང་། དེ་བཞིན་དུ། ནང་དང་། ཕྱི་ནང་དང་། ཆེན་པོ་དང་། ཐོག་ཐ་དང་། འདུས་བྱས་དང་། འདུས་མ་བྱས་དང་། སྟོང་པ་ཉིད་དང་། མཐའ་ལས་འདས་པ་དང་། རང་བཞིན་དང་། མི་དམིགས་པ་དང་། དོན་དམ་པ་དང་། དོར་བ་མེད་པ་དང་། དངོས་པོ་མེད་པ་དང་། ཆོས་ཐམས་ཅད་དང་། རང་མཚན་དང་། དངོས་དངོས་མེད་དང་། རང་གཞན་སྟོང་པ་ཉིད་དེ་སྟོང་ཉིད་བཅོ་བརྒྱད་དང་། སྦྱིན་ཚུལ་བཟོད་བརྩོན་བསམ་གཏན་ཤེས་རབ་ཐབས་སྟོབས་སྨོན་ལམ་ཡེ་ཤེས་ཏེ་ཕར་ཕྱིན་བཅུའམ། ཡང་ན་སངས་རྒྱས་ཀྱི་སྟོབས་བཅུ་དང་མ་འདྲེས་པའི་ཆོས་བཅོ་བརྒྱད་དོ། །གྲལ་ཐོག་ནི་བསམ་གྱིས་མི་ཁྱབ་པའི་ཡོན་ཏན་ནོ། །ཕྱུར་བུ་འདེགས་བྱེད་བཞི་ནི་ཆོས་དང་དོན་དང་ངེས་ཚིག་དང་སྤོབས་པ་སྟེ་སོ་སོ་ཡང་དག་པར་རིག་པ་བཞིའོ། །རྩེ་མོའི་ཏོག་ནི་སངས་རྒྱས་ཀྱི་དཀྱིལ་འཁོར་ཐམས་ཅད་རང་རིག་པ་ཡེ་ཤེས་ཀྱི་ཀློང་དུ་འཁྱིལ་བའོ། །དེ་བཞིན་དུ་བླ་བྲེ་ནི་ཆོས་ཉིད་རྣམ་པར་དག་པ། གདུགས་ནི་ཐུགས་རྗེ་ཆེན་པོས་འགྲོ་བ་སྐྱོབ་པ། བ་དན་ནི་སྙིང་རྗེ་ཆེན་པོ། རྒྱལ་མཚན་ནི་བདུད་ལས་རྣམ་པར་རྒྱལ་ཞིང་ཆོས་མི་ནུབ་པ། དྲིལ་བུ་ནི་སྟོང་ཉིད་ཀྱི་ཆོས་ཀྱི་སྒྲ་སྒྲོགས་པ། འོད་ཟེར་ཀུན་ཏུ་འཕྲོ་བ་ནི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ། ཕྱི་དང་ནང་མེད་པ་ཀུན་ཏུ་དྭངས་གསལ་མི་སྒྲིབ་པར་སྣང་བ་ནི་ཐམས་ཅད་ཡེ་ཤེས་ཀྱི་རྩལ་སྣང་འབའ་ཞིག་ཏུ་གྱུར་པ། འོག་གཞི་སྣ་ཚོགས་རྡོ་རྗེ་སྟོང་པ་ཉིད་ཀྱི་རང་བཞིན་དབྱེར་མི་ཕྱེད་པའི་ཡེ་ཤེས། རྭ་བཅུ་གཉིས་ནི་མ་རིག་པ་དང་འདུ་བྱེད་དང་རྣམ་པར་ཤེས་པ་དང་མིང་གཟུགས་དང་སྐྱེ་མཆེད་དྲུག་དང་རེག་པ་དང་ཚོར་བ་དང་སྲེད་པ་དང་ལེན་པ་དང་སྲིད་པ་དང་སྐྱེ་བ་དང་རྒ་ཤི་སྟེ་རྟེན་འབྲེལ་བཅུ་གཉིས་རྣམ་པར་དག་པ། ཉི་གདན་ནི་རང་བཞིན་གྱིས་འོད་གསལ་བའི་ཆོས་ཉིད། པད་ཕྲེང་ནི་ཉེས་སྐྱོན་གྱིས་མ་གོས་པའི་ཆོས་ཉིད། དུར་ཁྲོད་བརྒྱད་ནི་མིག་རྣ་སྣ་ལྕེ་ལུས་ཡིད་ཉོན་ཡིད་ཀུན་གཞི་སྟེ་རྣམ་ཤེས་ཚོགས་བརྒྱད་རང་སར་དག་པ་དང་སྒྱུ་མ་རྨི་ལམ་གཟུགས་བརྙན་སྨིག་རྒྱུ་ཆུ་ཟླ་མིག་ཡོར་བྲག་ཆ་སྤྲུལ་པ་སྟེ་སྒྱུ་མའི་དཔེ་བརྒྱད་མཚོན་བྱེད་དོ། །རྡོ་རྗེའི་ར་བ་ནི་ཅིས་ཀྱང་མི་ཤིགས་པའི་རང་བཞིན་མི་རྟོག་པའི་ཡེ་ཤེས། མེ་དཔུང་ནི་ཡེ་ཤེས་ཀྱི་མེས་ཕྱི ན་ཅི་ལོག་གི་བདུད་དང་ཉོན་མོངས་བསྲེགས་པ་སྟེ། དེ་ལྟར་གོང་སྨོས་དྲན་པ་ཉེར་བཞག་སོགས་ཀྱང་གནས་གྱུར་ཁྱད་པར་ཅན་ཟག་པ་མེད་པ་སངས་རྒྱས་ཀྱི་ས་ཡིས་བསྡུས་པའོ། །དེ་ལྟར་མཚོན་བྱ་མཚོན་བྱེད་ཀྱི་དག་པ་རྣམས་སོ་སོར་དྲན་པ་གལ་ཆེ་ཡང་། ལས་དང་པོ་པས་སྒོམ་ཐེངས་གཅིག་ལ་མཐའ་དག་དྲན་པར་མ་ནུས་ན་གཞལ་ཡས་ཁང་གི་ཆོས་དེ་ཐམས་ཅད་སངས་རྒྱས་ཀྱི་སྤངས་རྟོགས་བསམ་གྱིས་མི་ཁྱབ་པའི་ཡོན་ཏན་རྣམས་དེ་དང་དེའི་མཚོན་བྱེད་དུ་ཤར་བ་ཡིན་ནོ་སྙམ་པས་ཀྱང་དག་དྲན་རྗེས་མཐུན་པར་འགྱུར་རོ། །མདོར་ན་སངས་རྒྱས་རང་སྣང་གི་ཕོ་བྲང་ཉིད་ལམ་དུ་བྱེད་པའི་ཕྱིར་རྟེན་གྱི་དཀྱིལ་འཁོར་སྒོམ་པ་སྟེ། དེ་ལམ་དུ་བྱས་པས་སངས་རྒྱས་ཐམས་ཅད་ཀྱི་ཞིང་ཁམས་རྣམས་ཀྱང་ལམ་དུ་བྱས་པར་འགྱུར་ཞིང་། ལམ་དུ་ཁྱེར་ཚུལ་ནི་གཞི་འབྲས་སྦྲེལ་བའི་དག་རྫོགས་ཀྱི་ང་རྒྱལ་བྱེད་པའོ། །དེ་དག་ནི་ལམ་གོང་མའི་སྨིན་བྱེད་དུ་ཇི་ལྟར་འགྲོ་ན། འབྱུང་བ་རིམ་བརྩེགས་རི་རབ་དང་བཅས་པ་ནི་རྩ་འཁོར་ལོ་ལྔ་དང་དབུ་མ་དཀྱིལ་འཁོར་གྱི་གཞི་པད་ཉི་རྒྱ་གྲམ་ནི་རྩ་འཁོར་གྱི་ལྟེ་བའི་རླུང་ཐིག དེ་རྣམས་དང་རོ་གཅིག་ཏུ་འདྲེས་པའི་སེམས་གསལ་སྟོང་བདེ་བའི་ཆ་ནི་གཞལ་ཡས་ཁང་སྟེ། དེ་ཉིད་ལེགས་པར་བསྒོམས་པས་རྩ་རླུང་ཐིག་ལེ་རྣམས་མཉེན་ཅིང་དུལ་བས་རྫོགས་རིམ་གྱི་ཡེ་ཤེས་རྒྱུད་ལ་སྐྱེ་བའི་གཞི་བཏིང་བས་ལམ་གོང་མའི་སྨིན་བྱེད་དུ་འགྲོ་བ་ཡིན་ནོ། །གསུམ་པ་གདན་བསྐྱེད་པ་ནི། འདིའི་སྦྱང་བྱ་སེམས་ཅན་རྣམས་གང་དུ་སྐྱེ་བ་ལེན་པར་འགྱུར་བའི་གནས་མའི་པདྨ་དང་ཁུ་ཁྲག་དྲོད་གཤེར་ལ་སོགས་པའི་ཞེན་རྟོག་གམ་བག་ཆགས། སྦྱངས་འབྲས་སངས་རྒྱས་སྤྲུལ་པའི་སྐུས་འཁོར་བའི་གནས་སུ་གང་འདུལ་གྱི་བཀོད་པ་སྟོན་ཡང་སྐྱེ་གནས་བཞི་སོགས་ཀྱི་ཉེས་པས་མི་གོས་པ་དང་། ཐུགས་རང་བཞིན་གྱིས་རྣམ་པར་དག་པས་འོད་གསལ་ཞིང་ཐབས་ཤེས་ཟུང་འཇུག་གི་ཡེ་ཤེས་མཐར་ཕྱིན་པ་ཉིད་ཡིན་ལ། སྦྱོང་བྱེད་ཀྱི་ལམ་དངོས་ནི། གཞལ་ཡས་ཁང་གི་དབུས་ཀྱི་ལྟེ་བར་པདྨ་དང་། དེའི་སྟེང་དུ་ཉི་མའི་དཀྱིལ་འཁོར་དམར་པོ་དང་ཟླ་བའི་དཀྱིལ་འཁོར་དཀར་པོ་ཉ་གང་བ་ཉིས་བརྩེགས་པདྨའི་ལྟེ་བ་དང་མཉམ་པར་བསྒོམ་པ་སོགས་གཙོ་འཁོར་སོ་སོའི་གདན་ཇི་ལྟར་འོས་པ་སྟེ། དཔེར་ན། སྒྱུ་འཕྲུལ་ལྟར་ན། གཙོ་བོ་རིགས་ལྔ་ལ་སྲོག་ཆགས་དང་རིན་པོ་ཆེའི་ཁྲི་དང་ཉི་ཟླ་པདྨ་སྟེ་ལྔ་བརྩེགས། སེམས་དཔའ་རྣམས་ལ་ཉི་ཟླ་པདྨ་སུམ་བརྩེགས། ཐུབ་དྲུག་ལ་པད་རྐྱང་། སྒོ་བ་ཁྲོ་བོ་ལ་ཉི་རྐྱང་། བྱ་བྱེད་གཉིས་ལ་ཉི་ཟླ་པདྨ་རིན་པོ་ཆེའི་ཁྲི་སྟེ་བཞི་བརྩེགས་གསུངས་པ་ལྟ་བུས་མཚོན་ཏེ་རང་གཞུང་ལྟར་སྐབས་ཐོབ་སྦྱར་ཤེས་དགོས་ཤིང་། ཁྲོ་བོ་རྣམས་ལ་ནི་ཁྱད་པར་གྱི་གདན་རུ་ཏྲ་ལྷ་ཆེན་ཕྱོགས་སྐྱོང་ཕོ་མོ་ཞིང་ཆེ་ཆུང་སྲོག་ཆགས་སོགས་ཏེ། གང་ལྟར་ཡང་གདན་རྣམས་ཀྱི་དག་སྦྱོར་ལ། སེང་གེའི་ཁྲི་ནི་མི་འཇིགས་པ་བཞི། དེ་བཞིན་དུ་གླང་པོ་ཆེ་ནི་སྟོབས་བཅུ། རྟ་ནི་རྫུ་འཕྲུལ་གྱི་རྐང་པ་བཞི། རྨ་བྱ་ནི་དབང་བཅུ། ཤང་ཤང་ནི་ཕྲིན་ལས་བཞིས་འགྲོ་བ་འདུལ་བའོ། །ཉི་ཟླ་གཉིས་ནི་ཐུགས་རང་བཞིན་གྱིས་རྣམ་པར་དག་པས་འོད་གསལ་ཞིང་ཐབས་ཤེས་ཟུང་དུ་འཇུག་པ། པདྨ་ནི་ཉེས་པའི་སྐྱོན་གྱིས་མ་གོས་པ། རིན་པོ་ཆེ་ནི་གདུལ་བྱའི་རེ་བ་ཡོངས་སུ་སྐོང་བའི་བརྡའོ། །དེ་བཞིན་དུ་ཁྲོ་གདན་རྣམས་ཀྱང་མ་རིག་པ་དང་གཟུང་འཛིན་གྱི་ཀུན་རྟོག་དང་ལས་ཉོན་དང་བདུད་བཞི་སོགས་བཅོམ་པའི་བརྡ་སྟེ་ཞིབ་པར་རང་གཞུང་དང་སྦྱར། དེ་ལས་གཞན་རྣམས་གོང་དུ་བསྟན་པས་འཐུས། སྟོབས་བཅུ་དང་དབང་བཅུ་ནི། མཁས་འཇུག་སྡོམ་བྱང་ལས། གནས་དང་གནས་མིན་རྣམ་སྨིན་ཁམས། །མོས་དང་དབང་པོ་བསམ་གཏན་དང་། །ལམ་དང་སྔོན་གནས་འཆི་འཕོ་དང་། །ཟག་པ་ཟད་མཁྱེན་སྟོབས་བཅུའོ། །ཚེ་དང་སེམས་དང་ཡོ་བྱད་དང་། །ལས་དང་སྐྱེ་བ་མོས་པ་དང་། །སྨོན་ལམ་རྫུ་འཕྲུལ་ཡེ་ཤེས་དང་། །ཆོས་ལ་དབང་བ་དབང་བཅུའོ། །ཞེས་སོ། །དེ་ལྟར་བསྒོམས་པས་གདན་པདྨ་ནི་རྩ་འཁོར། ཉི་མ་ནི་གཏུམ་མོའི་མེ། ཟླ་བ་ནི་སྤྱི་བོའི་ཧཾ་སྟེ་འབར་འཛག་གི་ཞུ་བ དེ་ལ་བརྟེན་ནས་མི་འགྱུར་བའི་བདེ་བ་ཐོབ་པའི་གཞི་བཏིང་བས་ལམ་གོང་མའི་སྨིན་བྱེད་དུ་འགྱུར་རོ། །གཉིས་པ་བརྟེན་པ་ལྷ་བསྐྱེད་པ་ལ་བསྐྱེད་ཆོག་དངོས་དང་། བྱིན་གྱིས་རློབ་ཅིང་དབང་བསྐུར་བ་གཉིས། དང་པོ་ལ་གསུམ་སྟེ། སྐྱེ་གནས་བཞིའི་བག་ཆགས་སྦྱོང་བྱེད་ཀྱི་བསྐྱེད་ཆོག་སྤྱིར་བསྟན་པ། བྱེ་བྲག་རྡོ་རྗེའི་ཆོ་ག་སུམ་བསྐྱེད་དང་སྦྱར་བ། ལྷའི་མཚན་ཉིད་དོ། །དང་པོ་ནི། དཔལ་སྒྱུ་འཕྲུལ་དྲྭ་བ་ལས། སྐྱེ་གནས་བཞི་པོ་དག་བྱའི་ཕྱིར། །བསྐྱེེད་པའང་དེ་བཞིན་རྣམ་པ་བཞི། །སྤྲོས་ཅན་སྤྲོས་དང་སྤྲོས་པ་མེད། །ཤིན་ཏུ་སྤྲོས་པ་མེད་བཞིའོ། །ཞེས་གསུངས་པ་ལྟར། བཞི་ལས། དང་པོ་ཤིན་ཏུ་སྤྲོས་པ་རྒྱས་པ་སྒོང་སྐྱེས་སྦྱོང་བྱེད་བདག་སྲས་གཞན་སྲས་ཀྱི་ཆོ་ག་ལའང་རྒྱས་བསྡུས་གཉིས་ཀྱི། དང་པོ། སྒྲུབ་སྡེའི་ལུགས་བཀའ་བརྒྱད་གསང་རྫོགས་ནས་གསུངས་པ་ལྟར་ན། སྤྱིར་བདག་སྲས་གཞན་སྲས་ཞེས་པའི་དོན། བདག་སྲས་ཞེས་པ་རང་སེམས་བདེ་བར་གཤེགས་པའི་སྙིང་པོ་ནི་འཁོར་འདས་ཀྱི་ཆོས་ཐམས་ཅད་ཀྱི་འཆར་གཞིར་གནས་པས་ན་རིག་པའི་ངོ་བོ་དེ་གཙོ་བོ་ཡབ་ཡུམ་དུ་བསྐྱེད་ནས་དེའི་སྲས་སུ་གཞན་དེ་བཞིན་གཤེགས་པ་རྣམས་བསྐྲུན་ཏེ་འཁོར་དུ་བཀོད་པའི་དོན་ཡིན་ལ། གཞན་སྲས་ནི་བདག་སྲས་ཀྱི་སྐབས་སུ་གཞན་དེ་བཞིན་གཤེགས་པ་ཐམས་ཅད་རང་ལ་བསྟིམས་ནས་མངལ་འབྱིན་གྱི་སྒོ་ནས་སྲས་ཀྱི་རྣམ་པར་འཁོར་དུ་བཀོད་པ་དེ་རྣམས་གཙོ་བོའི་ཐུགས་སུ་གྱུར་ནས་བདག་གི་རྟོག་ཚོགས་ཡི་གེའི་རྣམ་པར་ཡོད་པ་མཁའ་རུ་ཕབ་སྟེ་སྲས་སུ་བསྐྲུན་ནས་འཁོར་དུ་བཀོད་པའི་དོན་ནོ། །དེ་ཡང་བདག་གི་སྲས་སུ་གཞན་བྱ་བ་ལ་ལྔ་སྟེ། རྒྱུའི་ས་བོན་གྱི་ཡི་གེ་གདན་སྟེང་དུ་བབས་པ་སྤྲོ་བསྡུས་ཡོངས་སུ་གྱུར་པ་ལས་རྒྱུའི་ཧེ་རུ་ཀ་གཙོ་བོ་ཡབ་ཡུམ་དུ་བསྐྱེད་པ་དང་། ཡབ་ཡུམ་མཁའ་གསང་མཉམ་པར་སྦྱོར་བའི་བདེ་བའི་འོད་ཟེར་གྱིས་ཕྱོགས་བཅུའི་སངས་རྒྱས་ཐམས་ཅད་བཀུག་ནས་ཡབ་ཀྱི་སྤྱི་བོ་ནས་ཞུགས་ཏེ་ཡུམ་མཁར་བསྟིམ་པ་དང་། ཡང་འོད་ཟེར་འཕྲོས་པས་སེམས་ཅན་རྣམས་བཀུག་ལ་སྒྲིབ་པ་སྦྱོང་སྟེ་ཡུམ་མཁར་བསྟིམ་པ་དང་། འཁོར་འདས་ཀུན་གྱི་སྤྱི་དཔལ་ཆེན་པོ་ནི་ངའོ་ཞེས་འཁོར་འདས་གཉིས་སུ་མེད་པའི་བདག་ཉིད་ལ་ཆེ་བའི་ང་རྒྱལ་བསྐྱེད་པ་དང་། ལྷ་ཚོགས་རྣམས་མཁའ་གསང་ནས་བཏོན་ཏེ་སོ་སོའི་གདན་ལ་དགོད་པར་བྱེད་པའོ། །གཞན་སྲས་ལ་བརྒྱད་དེ། དཔེར་ན་སྒོང་སྐྱེས་རྣམས་དང་པོ་སྒོང་ང་སྨིན་པ་དང་། དེ་ནས་སྒོང་ཁྱིམ་བརྡོལ་ནས་དབང་པོ་དང་ཡན་ལག་ལ་རྫོགས་པ་དེ་བཞིན་དུ། གཙོ་བོ་ཡབ་ཡུམ་འོད་དུ་ཞུ་ནས་འོད་ཀྱི་གོང་བུ་ས་བོན་ཕྱག་མཚན་དང་བཅས་པར་གྱུར་པ་དང་། དེ་ཡོངས་སུ་གྱུར་པ་ལས་འབྲས་བུའི་ཧེ་རུ་ཀ་ཡབ་ཡུམ་དུ་བསྐྱེད་པ་དང་། དེའི་ཚེ་ཡབ་ཀྱི་རྟོག་པ་ཐམས་ཅད་ཡི་གེའི་ངོ་བོར་གྱུར་ནས་སྲས་འདོན་གྱི་ནུས་པ་མེད་པར་བསམ་པ་དང་། ཡུམ་ལས་འོད་ཟེར་འཕྲོས་པས་བསྐུལ་ཏེ་འཁོར་གྱི་ལྷ་རྣམས་ལ་སྲས་བསྐྱེད་པའི་དོན་དུ་གསོལ་བ་གདབ་པ་དང་། འཁོར་གྱི་ལྷ་རྣམས་དགྱེས་པས་འོད་དུ་ཞུ་ནས་གཙོ་བོ་ཡབ་ཡུམ་གྱི་ཐུགས་ཀར་བསྟིམས་ཏེ་གཙོ་བོའི་ཐུགས་སུ་གྱུར་ནས་དཀྱིལ་འཁོར་ཀུན་གྱི་ཁྱབ་བདག་ཡེ་ཤེས་ཆེན་པོའི་བདག་ཉིད་ངའོ་ཞེས་ང་རྒྱལ་བཟུང་བ་དང་། ཡབ་ཡུམ་མཁའ་གསང་བྱིན་གྱིས་བརླབས་ཤིང་མཉམ་པར་སྦྱོར་བའི་ཡུམ་གྱི་མཁར་དཀྱིལ་འཁོར་གཞལ་ཡས་ཁང་གདན་དང་བཅས་པ་བསྐྱེད་པ་དང་། བདག་གི་རྟོག་པ་ཞེ་གཉིས་ཡི་གེའི་ངོ་བོར་གནས་པ་ཡོངས་སུ་གྱུར་པ་ལས་གཙོ་འཁོར་གྱི་ལྷ་ཚོགས་ཡོངས་རྫོགས་སུ་གསལ་བཏབ་སྟེ་ཡུམ་མཁའ་ནས་ཕྱིར་གདོན་པ་དང་། དབྱིངས་ནས་ཡེ་ཤེས་པ་སྤྱན་དྲངས་ཤིང་བསྟིམས་ལ་གནས་གསུམ་རྡོ་རྗེ་གསུམ་གྱིས་རྒྱས་གདབ་སྟེ་འཁོར་རྣམས་གདན་ལ་བཀོད། གཙོ་བོ་འབྲས་བུའི་ཧེ་རུ་ཀ་ལ་བསྟིམ། གཞལ་ཡས་ཁང་དང་། གདན་རྣམས་ཀྱང་རང་རང་ལ་བསྟིམ་པའོ། །བསྡུས་པ་ནི། རྒྱུད་སྡེའི་ལུགས་ལྟར་སྒྱུ་འཕྲུལ་དྲྭ་བ་དང་བསྟུན་པ་སྟེ། འདི་ལའང་རྒྱས་བསྡུས་དང་དམ་པ་སྔ་མ་རྣམས་ཀྱི་བཞེད་པ་འདྲ་མིན་མང་ཡང་དེ་དག་གཞན་དུ་ཤེས་པར་བྱ་ལ། འདིར་བསྡུས་པ་ཉིད་སྟོན་ཏེ། སྐྱབས་སེམས་ཀྱི་རྗེས་འདི་ལྟར་སྒོ་ང་ལས་སྐྱེ་བ་རྣམས་ལན་གཉིས་སུ་སྐྱེ་བ་ལྟར། རང་ཉིད་སྐད་ཅིག་གིས་གཙོ་བོ་ཡབ་ཡུམ་གསལ་བཏབ་ལ། མདུན་མཁར་བསྒོམ་བྱའི་དཀྱིལ་འཁོར་སྤྱན་དྲངས་པའམ་གསལ་བཏབ་སྟེ། མཆོད་བསྟོད་དང་གསོལ་གདབ་རྒྱུན་བཤགས་སོགས་བྱས་རྗེས་སླར་ཡང་བཛྲ་མུས་སྟོང་པའི་ངང་དུ་མཉམ་པར་བཞག་པ་ཙམ་ཁྱད་པར་གྱི་ཆོས་སུ་ངེས་པར་བྱས་ནས། ཐུན་མོང་དུ་མངལ་སྐྱེས་སྦྱང་བ་རྒྱས་འབྲིང་གི་བསྐྱེད་རིམ་དང་སྦྱ ར་བ་སྟེ། དོན་དུ་རྡོ་རྗེའི་ཆོ་ག་གསུམ་བསྐྱེད་སོགས་སྟོན་པའི་ཆོ་ག་ཕལ་ཆེར་ལ། ཚོགས་ཞིང་གསལ་བཏབ་སྟེ། ཚོགས་བསགས་ཀྱི་རིམ་པ་རྣམས་སོང་རྗེས་རང་ལ་བསྡུས་ནས་མི་དམིགས་པར་བཞག དེ་ནས་བགེགས་བསྐྲད་སོགས་ཆོ་གའི་ཡན་ལག་རྣམས་བྱས་རྗེས་དེ་བཞིན་ཉིད་ཀྱི་ཏིང་ངེ་འཛིན་བསྒོམ་པ་ནས་རིམ་བཞིན་ལྷ་བསྐྱེད་པའི་ཚུལ་དེའོ། །དེ་ལྟར་གྱི་བསྐྱེད་ཚུལ་རྒྱས་བསྡུས་གཉིས་པོ་དེ་གང་ཡིན་ཀྱང་སྣང་སྟོང་གི་ཞེན་པ་སྦྱང་ཕྱིར་ཡང་ཡིན་པས། རྒྱས་པའི་དུས་སུ་བདག་སྲས་ཀྱི་གཙོ་འཁོར་ཐམས་ཅད་འོད་ཞུ་བ་དང་། བསྡུས་པའི་ཚེ་གཉིས་ཀ་མི་དམིགས་པའི་ངང་དུ་འཇོག་པ་གཉིས་ཀས་ཕྱི་སྣང་བ་དང་རྟོག་ཚོགས་ཐམས་ཅད་རེ་ཞིག་འགགས་པའི་འཆི་སྲིད་དག བག་ཆགས་མཐའ་དག་དབྱིངས་སུ་དག་པའི་ཆོས་སྐུ་གཞི་ལ་རྫོགས། གཉིས་སྣང་གི་སྤྲོས་པ་འགགས་པའི་ཡེ་ཤེས་ཀྱི་ངང་ལ་གནས་པའི་འོད་གསལ་བའི་རྫོགས་རིམ་གྱི་སྨིན་བྱེད་དུ་འགྱུར་བ་དང་། ཡང་རྒྱས་པའི་ཚེ་སླར་ཡང་གཞན་སྲས་ཀྱི་གཙོ་བོ་དང་དཀྱིལ་འཁོར་གྱི་ལྷ་ཚོགས་གསལ་བ་དང་། བསྡུས་པའི་དུས་རང་རང་གི་གཞུང་གི་མངོན་རྟོགས་བསྒོམས་པས། འཆི་སྲིད་ཀྱི་རྗེས་སུ་སླར་ཡང་རླུང་སེམས་རིམ་གྱིས་མཆེད་ནས་བར་སྲིད་དང་། དེ་ནས་སྐྱེ་སྲིད་ཀྱི་སྣང་བ་རྒྱ་ཆེན་པོར་འབྱམས་པ་མཐའ་དག་སྦྱོང་ཞིང་དག་མི་སློབ་པའི་ཟུང་འཇུག་གི་ལྷ་སྐུ་ཆོས་སྐུའི་ངང་ལས་གཟུགས་སྐུའི་བཀོད་པ་ཆོས་དབྱིངས་དང་མཉམ་པར་འབྱམས་ཀླས་སུ་འཆར་བ་གཞི་ལ་རྫོགས། རྫོགས་རིམ་པའི་རྣལ་འབྱོར་པ་འོད་གསལ་ལས་སློབ་པའི་ཟུང་འཇུག་གི་ལྷ་སྐུར་ལྡང་ནུས་པའི་སྨིན་བྱེད་དུ་འགྲོ་བ་ཡིན་ཞེས་བདག་གི་མཁན་པོ་གསང་ཆེན་རྒྱུད་སྡེའི་མངའ་བདག་ངེས་པ་དོན་གྱི་མཁས་པ་ཆེན་པོ་གུ་ཎས་གསུངས་སོ། །གཉིས་པ་མངལ་སྐྱེས་སྦྱོང་བྱེད་ལ། མངོན་བྱང་བཞི་བསྐྱེད། ཆོ་ག་གསུམ་བསྐྱེད། མངོན་བྱང་ལྔ་བསྐྱེད་གསུམ་ལས། དང་པོ་ནི། ཧེ་རུ་ཀ་གལ་པོ་ལས། དང་པོ་སྟོང་པ་བྱང་ཆུབ་སེམས། །གཉིས་པ་ས་བོན་བསྡུ་བ་སྟེ། །གསུམ་པ་ལ་ནི་གཟུགས་རྫོགས་པ། །བཞི་པ་ལ་ནི་ཡེ་གེ་འགོད། །ཅེས་གསུངས་པ་ལྟར། མངོན་བྱང་དང་པོ་ནི། སྤྲོས་བྲལ་རྣམ་པར་མི་རྟོག་པའི་ཏིང་ངེ་འཛིན་ལ་མཉམ་པར་བཞག་ནས། དེའི་ངང་ལས་དེ་ལྟར་མ་རྟོགས་པའི་སེམས་ཅན་རྣམས་ལ་ཞེན་མེད་སྒྱུ་མ་ལྟ་བུའི་སྙིང་རྗེ་བྱང་ཆུབ་ཀྱི་སེམས་བསྒོམ་པ་སྟེ། འདིས་མར་སྦྱང་བྱ་རང་བཞིན་བརྒྱད་ཅུའི་རྟོག་ཚོགས་ཐམས་ཅད་འཁྲུལ་སྟོབས་ཀྱིས་ནུབ་པའི་འཆི་སྲིད་དང་། སླར་ཡང་ལས་རླུང་མཆེད་པའི་སྟོབས་ཀྱིས་བར་དོའི་སྣང་བ་ཡད་ཡུད་དུ་འབྱུང་བ་བཅས་དག ཡར་ཆོས་སྐུ་དང་ལོངས་སྐུ་གཉིས་གཞི་ལ་རྫོགས་པ་བྱེད། བར་དུ་འོད་གསལ་དང་སྒྱུ་ལུས་གཉིས་ཀྱི་སྨིན་བྱེད་དུ་འགྱུར་རོ། །མངོན་བྱང་གཉིས་པ་ནི། ངོ་བོ་སྟོང་ཉིད་སྙིང་རྗེ་ཟུང་དུ་འཇུག་པའི་ཡེ་ཤེས། རྣམ་པ་ལྷའི་ས་བོན་གྱི་རྣམ་པར་བསྒོམ་པ་སྟེ། འདིས་དྲི་ཟ་ཉེ་བར་ལེན་པ་བར་དོའི་རྣམ་ཤེས་དེ་ཕ་མའི་ཁུ་ཁྲག་གི་དབུས་སུ་ཞུགས་ཤིང་འདྲེས་པའི་ཆ་སྦྱོང་ཞིང་དག སྤྲུལ་སྐུ་གཞི་ལ་རྫོགས། དཔེའི་འོད་གསལ་ལས་སྒྱུ་ལུས་ཀྱི་ལྷ་སྐུར་ལྡང་བའི་སྨིན་བྱེད་དུ་འགྱུར་རོ། །མངོན་བྱང་གསུམ་པ་ནི། ས་བོན་གྱི་ཡི་གེ་ཉིད་ཐུགས་རྡོ་རྗེ་ཕྱག་མཚན་གྱི་རྣམ་པར་གྱུར་ཞིང་དེ་ལས་སྐུ་ཡོངས་རྫོགས་སུ་བསྐྱེད་པ་སྟེ། འདིས་ཁུ་རྡུལ་རླུང་སེམས་ཀྱི་ཆ་འདྲེས་པ་དེ་རླུང་གི་བྱེད་ལས་ཀྱིས་མེར་ནུར་ལྟར་གོར་མཁྲང་གྱུར་ཁྱབ་འཇུག་ཉ་དང་རུས་སྦལ་གྱི་རྣམ་པ་དང་མིག་སོགས་དབང་པོ་དང་ཡན་ལག་ཡོངས་སུ་རྫོགས་པ་དེ་བྱང་ཞིང་དག་ཟུང་འཇུག་ངོ་བོ་ཉིད་སྐུ་གཞི་ལ་རྫོགས། དོན་གྱི་འོད་གསལ་ཟུང་འཇུག་གི་ལྷ་སྐུར་ལྡང་བའི་སྨིན་བྱེད་དུ་འགྱུར་རོ། །མངོན་བྱང་བཞི་པ་ནི། ལྷ་མངལ་འབྱིན་གྱི་ས་བོན་སྤྲོ་བའམ། མིན་ཀྱང་གནས་གསུམ་ལ་ཡི་གེ་བཀོད་དེ་རྒྱས་གདབ་པ་སྟེ། འདིས་བྱིས་པ་དེ་བཙས་ནས་དབང་པོ་ཡུལ་ལ་སད་དེ་སྣ་ཚོགས་པའི་དངོས་པོ་ལ་སྤྱོད་པའི་ཞེན་པ་དག སངས་རྒྱས་ཀྱི་ལྷུན་གྱིས་གྲུབ་པའི་འབྲས་བུ་གཞི་ལ་རྫོགས། རྫོགས་རིམ་པ་སློབ་པའི་ཟུང་འཇུག་གི་ལྷ་སྐུར་ལྡང་ནས་འདོད་ཡོན་གྱི་སྣང་བ་ལ་ཞེན་མེད་དུ་རོལ་བས་རིག་པའི་རྒྱན་དུ་འཆར་བའི་སྨིན་བྱེད་དུ་འགྱུར་རོ། །གཉིས་པ་རྡོ་རྗེའི་ཆོ་ག་གསུམ་བསྐྱེད་ནི་འོག་ཏུ་སྟོན་ནོ། །གསུམ་པ་མངོན་བྱང་ལྔ་བསྐྱེད་ནི། དགྱེས་རྡོར་ལས། ཟླ་བ་མེ་ལོང་ཡེ་ཤེས་ཏེ། །བདུན་གྱི་བདུན་པ་མཉམ་པ་ཉིད། །རང་ལྷའི་ས་བོན་ཕྱག་མཚན་ནི། སོ་སོར་རྟོག་པར་བརྗོད་པར་བྱ། །ཐམས་ཅད་གཅིག་གྱུར་ནན་ཏན་ཉིད། །རྫོགས་པ་ཆོས་དབྱིངས་དག་པ་སྟེ། །ཞེས་གསུངས་ཏེ། དེ་ཡང་གཞི་དུས་སུ་དཀར་དམར་རླུང་སེམས་ཚོགས་པ་དང་བཅས་པ་ཡེ་ཤེས་ལྔ་ཡི་ངོ་བོར་སངས་རྒྱས་པ་གཞིའི་མངོན་བྱང་། ལམ་དུས་སུ་ཚོགས་སྦྱོར་དུ་དཔེའི་ཡེ་ཤེས་དང་། མཐོང་སྒོམ་དུ་དོན་གྱི་འོད་གསལ་མངོན་དུ་བྱས་པའི་སྟོང་གཞི་ཟུང་འཇུག་དང་བཅས་པ་ལམ་གྱི་མངོན་བྱང་ཡིན་པས། དེ་རྒྱུད་ལ་སྐྱེད་བྱེད་བསྐྱེད་རིམ་གྱི་དུས་སུ་ཟླ་ཉི་ཕྱག་མཚན་སོགས་བསྒོམ་པའོ། །འབྲས་དུས་སུ་སྐུ་ལྔ་ཡེ་ཤེས་ལྔ་མི་སློབ་པའི་ཟུང་འཇུག་གི་ཡོན་ཏན་ཐམས་ཅད་ནི་འབྲས་བུའི་མངོན་བྱང་ངོ་། །དེ་ལྟར་གཞི་ལམ་འབྲས་གསུམ་དུ་སྦྱོར་ཚུལ་ངེས་པར་བྱས་ནས། བྱེ་བྲག་ལམ་གྱི་མངོན་བྱང་ལྔ་བསྒོམ་ཚུལ་ནི། སྦྱང་གཞི་གཟུགས་ཀྱི་ཕུང་པོ་དང་ནམ་མཁའི་ཁམས། ལུས་ཀུན་གཞིའི་རྣམ་ཤེས། ཉོན་མོངས་པ་གཏི་མུག མངལ་སྐྱེས་ཀྱི་ཕའི་ཁམས། དྲོད་གཤེར་སྐྱེས་ཀྱི་གཤེར། སྒོང་སྐྱེས་ཀྱི་ཕ། རྫུས་སྐྱེས་ཀྱི་སྟོང་པའི་ཆ་སོགས་སྦྱོང་བྱེད་མངོན་བྱང་དང་པོ་མེ་ལོང་ཡེ་ཤེས་དང་། རྣམ་སྣང་གི་ངོ་བོ་ཨཱ་ལི་ལས་བྱུང་བའི་ཟླ་བའི་དཀྱིལ་འཁོར་བསྒོམ་པ་དང་། དེ་བཞིན་དུ་ཚོར་ཕུང་ས་ཁམས་ཉོན་ཡིད་སེར་སྣ་ང་རྒྱལ། མངལ་སྐྱེས་ཀྱི་མའི་ཁམས་དམར་ཆ། སྒོང་སྐྱེས་ཀྱི་མའི་ཆ། དྲོད་གཤེར་སྐྱེས་ཀྱི་དྲོད། རྫུས་སྐྱེས་ཀྱི་གསལ་བའི་ཆ་རྣམས་སྦྱོང་བྱེད་མངོན་བྱང་གཉིས་པ་མཉམ་ཉིད་དང་རིན་འབྱུང་གི་ངོ་བོ་ཀཱ་ལི་ལས་བྱུང་བའི་ཉི་མའི་དཀྱིལ་འཁོར་བསྒོམ་པ་དང་། ཁུ་རྡུལ་གཉིས་ཀྱི་བར་དུ་དྲི་ཟ་ཉེ་བར་ལེན་པའི་སེམས་བར་དོའི་རྣམ་ཤེས་ཞུགས་པ་དང་། འདུ་ཤེས་ཀྱི་ཕུང་པོ་མེ་ཡི་ཁམས། ངག་ཡིད་ཀྱི་རྣམ་པར་ཤེས་པ། ཉོན་མོངས་པ་འདོད་ཆགས། སྐྱེ་གནས་བཞིར་འཇུག་པའི་བར་དོའི་རྣམ་ཤེས་རྣམས་སྦྱོང་བྱེད་མངོན་བྱང་གསུམ་པ། སོར་རྟོག་དང་འོད་དཔག་མེད་ཀྱི་ངོ་བོ་ས་བོན་ཕྱག་མཚན་དང་བཅས་པར་བསྒོམ་པ་དང་། ཁུ་རྡུལ་སེམས་གསུམ་རོ་གཅིག་ཏུ་འདྲེས་པ། འདུ་བྱེད་ཀྱི་ཕུང་པོ་རླུང་ཁམས་སྒོ་གསུམ་གྱི་བྱ་བ་དང་སྒོ་ལྔའི་རྣམ་ཤེས། ཉོན་མོངས་ཕྲག་དོག སྐྱེ་གནས་བཞིའི་མངལ་སྒོང་གཉིས་ཀྱི་བར་དོའི་རྣམ་ཤེས་དང་ཁུ་ཁྲག་འདྲེས་པ། དྲོད་སྐྱེས་ཀྱི་རྣམ་ཤེས་དང་དྲོད་གཤེར་འདྲེས་པ། རྫུས་སྐྱེས་ཀྱི་གསལ་ལ་སྟོང་པ་ཙམ་དང་བར་སྲིད་ཀྱི་རྣམ་ཤེས་འདྲེས་པའི་ཆ་རྣམས་སྦྱོང་བྱེད་མངོན་བྱང་བཞི་པ་བྱ་གྲུབ་དང་དོན་གྲུབ་ཀྱི་ངོ་བོ་ཟླ་ཉི་ཕྱག་མཚན་ས་བོན་དང་བཅས་པ་རོ་གཅིག་ཏུ་འདྲེས་པའི་ཐིག་ལེ་གོང་བུའི་རྣམ་པ་ཅན་དུ་བསྒོམ་པ་དང་། མངལ་གྱི་གནས་སྐབས་ཡོངས་སུ་རྫོགས་ནས་ཕྱིར་བཙས་པ་དང་། རྣམ་ཤེས་ཀྱི་ཕུང་པོ་ཆུའི་ཁམས། ཡིད་ཀྱི་རྣམ་ཤེས་ཚོགས་བརྒྱད་ཀྱི་ཆོས་ཉིད་དུ་འཛིན་པའི་ཆ། ཉོན་མོངས་ཞེ་སྡང་། སྐྱེ་གནས་བཞིར་སྐྱེ་བ་ལེན་པའི་སྐྱེ་མཆེད་རྫོགས་པའི་གནས་སྐབས་རྣམས་སྦྱོང་བྱེད་མངོན་བྱང་ལྔ་པ་ཆོས་དབྱིངས་ཡེ་ཤེས་དང་མི་བསྐྱོད་པའི་ངོ་བོ་སྐུ་ཡོངས་རྫོགས་སུ་བསྒོམ་པ་རྣམས་སོ། །འདིའི་དག་རྫོགས་སྨིན་གསུམ་ནི། འགྲོ་བའི་ལུས་རྟེན་ཁྱད་པར་ཅན་ཁམས་དྲུག་ལྡན་གྱི་མི་ལྟ་བུ་ལ་ཁམས་ཀྱི་སྦྱང་གཞི་རྩ་ཐིག་རླུང་སེམས་རགས་པའི་ཆ་མངོན་གྱུར་དུ་ཡོད་པ་ཐབས་ཀྱིས་ཟིན་པས་གྲོལ་བར་འགྱུར་ཏེ། དང་པོར་དབང་གིས་སྨིན་པར་བྱས་ནས། རྟོག་བཅས་ཀྱི་ལམ་བསྐྱེད་རིམ་གྱི་དུས་སུ་མངོན་བྱང་ལྔ་བསྒོམ་པའི་ཚེ་ནའང་གནད་དུ་བསྣུན་བྱའི་གཙོ་བོ་དཀར་དམར་སེམས་གསུམ་ཡིན་པའི་ཕྱིར་འཁོར་བ་དང་མཐུན་པའི་རྣམ་པ་ལམ་བྱེད་ཀྱིས་སྦྱང་བྱ་སྲིད་པའི་རང་བཞིན་ཁུ་རྡུལ་རླུང་གསུམ་སེམས་དང་བཅས་པའི་ཆ་ཐམས་ཅད་རྣམ་པར་དག རྒྱལ་བའི་བཞུགས་ཚུལ་དང་མཐུན་པར་མོས་པ་ལམ་བྱེད་བསྒོམས་པས་འབྲས་ཆོས་ལྔ་དང་ཡེ་ཤེས་ལྔའི་ཡོན་ཏན་ཐམས་ཅད་གཞི་ལ་རྫོགས། དེ་གཉིས་ཀ་སྣང་བ་དང་། མཆེད་པ་དང་། ཉེར་ཐོབ་དང་། འོད་གསལ་དང་། ཟུང་འཇུག་ལ་སོགས་པའི་རྫོགས་རིམ་གྱི་སྨིན་བྱེད་དུ་འགྱུར་བ་ཡིན་ནོ། །གསུམ་པ་དྲོད་གཤེར་སྐྱེས་སྦྱོང་བྱེད་ཨ་ནུ་ཡོ་གའི་དགོངས་པ་སྤྲོས་མེད་ཀྱི་བསྐྱེད་རིམ་ནི། བང་མཛོད་འཕྲུལ་གྱི་ལྡེའུ་མིག་ལས། ཨ་ནུ་ཡོ་གའི་ཐེག་པར་ནི། །སྙིང་པོ་ཙམ་ཞིག་བརྗོད་བྱས་པས། །མ་སྐྱེས་རྫོགས་པའི་ལྷ་སྐུར་བསྒོམ། །ཞེས་གསུངས་པ་ལྟར། སེམས་ཅན་དྲོད་གཤེར་ལས་སྐྱེས་པ་རྣམས་ནི་མངལ་སྐྱེས་ལྟར་ཡུན་རིང་དུ་སྨིན་མི་དགོས་པར། དྲོད་གཤེར་གཉིས་ལྷན་དུ་འདུས་པར་རྣམ་ཤེས་ཞུགས་པས་དེའི་མོད་ལ་གཟུགས་ཀྱི་དངོས་པོ་ཡོངས་སུ་རྫོགས་པར་འགྲུབ་པ་བཞིན། མ་ཧཱ་ཡོ་ག་ནས་བཤད་པའི་མངོན་བྱང་ལྔ་ལ་སོགས་པའི་རྣམ་པ་དང་བསྐྱེད་ཆོག་རྒྱས་པའི་ཚིག་གི་སྤྲོས་པ་ལ་མ་བརྟེན་པར། དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་དུ་ཤེས་པ་ལུང་ཆེན་ཨ་ནུའི་ལྟ་བ་ལས་མ་གཡོས་བཞིན་དུ། རྩལ་སྣང་སྙིང་རྗེའི་འཕེན་པ་གཏད་པས་དྲོད་གཤེར་སྐྱེས་རྣམས་གནས་ལུས་ལ་སྲེད་པའི་བག་ཆགས་སྦྱང་བའི་ཕྱིར། གང་བསྐྱེད་བྱའི་ལྷའི་སྙིང་པོ་བརྗོད་པ་ཙམ་གྱིས། དོན་དམ་ཤེས་རབ་ཀྱི་དབྱིངས་སྟོང་ཉིད་ཀུན་ཏུ་བཟང་པོའི་ཀློང་ནས། ཀུན་རྫོབ་བདེན་པའི་སྣང་ཆ་རྟེན་དང་བརྟེན་པའི་ལྷའི་ཕྱག་རྒྱ་ཡོངས་སུ་བསྒོམ་ཞིང་བདེ་སྟོང་དབྱེར་མེད་ཀྱི་ལམ་ལ་སློབ་པ་སྟེ། འདི་ལ་ཡུལ་སྣང་བདེན་མེད་དུ་ཤེས་པ་སྒྱུ་མའི་བསྐྱེད་རིམ་ཞེས་བྱའོ། །བཞི་པ་རྫུས་སྐྱེས་སྦྱོང་བྱེད་མན་ངག་ཨ་ཏི་ཡོ་གའི་དགོངས་པ་དང་མཐུན་པ་ཤིན་ཏུ་སྤྲོས་མེད་ཀྱི་བསྐྱེད་རིམ་ནི། སེམས་ཅན་རྫུས་ཏེ་སྐྱེ་བ་རྣམས་གསལ་སྟོང་གི་ཆ་ལ་རྣམ་ཤེས་ཞུགས་པ་ཙམ་གྱིས་ལུས་ཡོངས་སུ་རྫོགས་པར་གྲུབ་པ་ནི་དྲོད་གཤེར་སྐྱེས་ལས་ཀྱང་མྱུར་བ་ལྟར་དེ་སྦྱོང་བྱེད་ཀྱི་ལམ་ཡང་། རྡོ་རྗེ་དྲིལ་བུ་ལས། སེམས་ཅན་རྫུས་ཏེ་སྐྱེ་བ་བཞིན། །ས་བོན་མེད་པར་རྣམ་པར་བསྒོམ། །ཞེས་གསུངས་པ་ལྟར། འདི་ལྟར་སྣང་གྲགས་རྟོག་ཚོགས་ཀྱིས་བསྡུས་པའི་ཆོས་ཐམས་ཅད་ཡེ་ནས་རྒྱལ་བའི་སྐུ་གསུང་ཐུགས་རྡོ་རྗེའི་ངོ་བོར་སངས་རྒྱས་པས་མ་བསྐྱེད་ལྷུན་གྱིས་རྫོགས་པའི་དཀྱིལ་འཁོར་རྩོལ་བྲལ་འབྲས་བུའི་ས་ལ་ད་ལྟ་ནས་གནས་པ་མན་ངག་ཨ་ཏི་ཡོ་གའི་ལྟ་བའི་ངང་ལས་རྟེན་དང་བརྟེན་པའི་དཀྱིལ་འཁོར་ཡོངས་སུ་རྫོགས་པ་ཆུ་ལས་ཉ་འཕར་བའི་ཚུལ་དུ་སྐད་ཅིག་གིས་གསལ་འདེབས་པ་སྟེ། རིག་འཛིན་འཇིགས་མེད་གླིང་པས། དབང་པོ་ཡང་རབ་རྣམས་ཀྱིས་རང་བཞིན་ཐེག་མཆོག་རྒྱལ་པོའི་ལྟ་བ་སྤྱི་འབྱམས་ཀྱི་རྩལ་སེམས་བསྐྱེད་ཀྱི་འཕེན་པའི་དབང་གིས་ཤིན་ཏུ་སྤྲོས་པ་མེད་པའི་བསྐྱེད་རིམ་ཆོ་ག་དང་ཚིག་གི་བྱ་བ་ལ་མ་ལྟོས་པར་སེམས་ཀྱི་རང་བཞིན་གདོད་ནས་ལྷ་ཡི་ཕྱག་རྒྱར་གསལ་ཞིང་རྫོགས་པ་དཔེར་ན་མེ་ལོང་ལ་གཟུགས་བརྙན་བཙན་ཐབས་སུ་ཤར་བ་ལྟར་བསྐྱེད་རྫོགས་དབྱེར་མེད་དུ་སྒོམ་པ་སྟེ་འདི་ལྟར། ལྷ་ཉིད་རང་ལ་རང་ཉིད་ལྷ། །རང་དང་ལྷན་ཅིག་སྐྱེས་པ་སྟེ། །དམ་ཚིག་ཡེ་ཤེས་གཉིས་མེད་པས། །སྤྱན་འདྲེན་བཞུགས་གསོལ་འདིར་མི་དགོས། །རང་ལས་སྤྲུལ་ཞིང་རང་དབང་བསྐུར། །རང་རིག་རྩ་བ་གསུམ་དུ་གནས། །ཞེས་པ་སྟེ་གདོད་ནས་ལྷའི་རང་བཞིན་ཡེ་ཤེས་སྒྱུ་མར་རྫོགས་པ་རྫུས་སྐྱེས་སྦྱོང་བའི་བསྐྱེད་རིམ་ཏེ། ཀུན་མཁྱེན་གྱིས། ཇི་ལྟར་རྫུས་སྐྱེས་སྐད་ཅིག་སྣང་བ་བཞིན། །མིང་ལས་རིམ་བཞིན་བསྐྱེད་རྫོགས་སྒོམ་མི་དགོས། །ཞེས་སོ། །ཞེས་གསུངས་པ་ལྟ་བུ་སྟེ་རྩོལ་བྲལ་ཨ་ཏིའི་ལུགས་སོ། །སྤྱིར་བསྐྱེད་རྫོགས་ཟུང་འཇུག་གསུམ་པོ་རེ་རེ་ལའང་བསྐྱེད་རིམ་གྱི་བསྐྱེད་རིམ་ནས་ཟུང་འཇུག་གི་ཟུང་འཇུག་བར་གསུམ་རེ་ཡོད་པར་གསུངས་པས་ལྷའི་རྣམ་པ་ཞིག་གསལ་བ་ཐམས་ཅད་བསྐྱེད་རྫོགས་གཉིས་ཀྱི་ཟླས་ཕྱེ་བའི་བསྐྱེད་རིམ་ཡིན་མི་དགོས་སོ། །དེས་ན་རིམ་གཉིས་སུ་ཕྱེ་བའི་བསྐྱེད་རིམ་ནི་རིམ་པ་གཉིས་པའི་ཡེ་ཤེས་རྒྱུད་ལ་མ་སྐྱེས་པའི་གང་ཟག་གིས་དེའི་སྨིན་བྱེད་དུ་དང་པོ་བསྒོམ་པ་སྟེ་སྔགས་ཀྱི་ལྟ་བ་ལ་ངེས་པ་རྙེད་ནས་རྟོག་པའི་གཟུགས་བརྙན་ལྷའི་རྣམ་པར་ཤར་བ་ལ་གོམས་སུ་འཇུག་པ་ཡིན་ལ། རྫོགས་རིམ་གྱི་རྟོགས་པ་ཁྱད་པར་ཅན་སྐྱེས་ནས་ཡེ་ཤེས་ཀྱི་རྩལ་སྣང་ལྷའི་རྣམ་པར་ཤར་བ་ཡིན་པས་སློབ་པའི་ཟུང་འཇུག་གི་དངོས་རྒྱུའོ། །རྒྱུ་མཚན་དེ་ལྟ་བས་ན་ལས་དང་པོ་པས་བསྐྱེད་རིམ་བསྒོམ་པ་རྣམ་རྟོག་གི་གཟུགས་བརྙན་ཙམ་ཞིག་ཡིན་ཡང་ལྟ་བའི་གདེང་གིས་ཟིན་ནས་ཡེ་ཤེས་དངོས་དང་རྗེས་སུ་མཐུན་པ་ཞིག་མེད་ན་དེའི་རྒྱུ་དང་སྨིན་བྱེད་དུ་མི་འགྱུར་བས་ན་དེ་ཏིང་དང་དགོངས་པ་མི་འགྱུར་བའི་གཟེར་གཉིས་པོ་འདི་གལ་ཆེའོ། །དེས་ན་ཉམས་སུ་ལེན་རྒྱུའི་ཆོས་རིམ་པ་གཉིས་པོ་གཞུང་དང་ཆོ་གར་བསྟན་པ་དེ་ཙམ་གྱིས་དེ་དང་དེ་ཁོ་ནར་མི་འགྱུར་ཏེ་ལས་དང་པོ་པས་རྫོགས་རིམ་གྱི་ཡེ་ཤེས་ལ་མཉམ་པར་བཞག་ཀྱང་སེམས་ཀྱི་དམིགས་པ་ལས་མི་འདའ་ལ། རྟོགས་པ་མཆོག་ལྡན་གྱིས་བསྐྱེད་རིམ་གྱི་སྤྲོས་པ་བསྒོམས་ཀྱང་ཡེ་ཤེས་ཀྱི་རང་རྩལ་ཡིན་པའི་ཕྱིར་རོ། །རྫོགས་རིམ་གྱི་ཡེ་ཤེས་མ་སྐྱེས་པའི་གང་ཟག་གིས་རྩ་རླུང་དག་གཏུམ་མོ་སོགས་ཀྱི་སྐབས་སུ་ལྷའི་རྣམ་པ་གསལ་བ་ནི་དངོས་སུ་ལྷན་སྐྱེས་ཡེ་ཤེས་འཆར་བྱེད་ཡིན་པས་རྟོག་པའི་གཟུགས་བརྙན་ཡིན་ཡང་རྫོགས་རིམ་གྱི་ལྷ་སྐུར་བ སྡུ་བའོ། །ལྟ་དགོངས་མཐོན་པོར་གྱུར་པ་རྣམས་ཀྱིས་བསྐྱེད་རིམ་གྱི་སྤྲོས་པ་ཆེན་པོ་དག་བསྒོམ་པ་ནི་གདུལ་བྱའི་དབང་དང་། ཁྱད་པར་དཀྱིལ་འཁོར་དེ་དང་དེར་སློབ་མ་འཇུག་ཅིང་སྨིན་པའི་རྟེན་འབྲེལ་ཁྱད་དུ་མི་གསོད་པ་ཡིན་གྱི་རང་ལ་ཆེད་དུ་དགོས་པ་ནི་མ་ཡིན་ནོ། །ཞེས་མཁན་གུ་ཎས་གསུངས་སོ། །དེ་ཡང་ཐོག་མར་ལས་དང་པོ་པས་བསྐྱེད་རིམ་བསྒོམ་པའི་སྐབས་སུ་ལྷ་སྐུའི་གསལ་སྣང་ཐོན་པ་ན་དེ་ལྟར་གསལ་བའི་ལྷ་དེ་དང་པོ་གང་ནས་བྱུང་། ད་ལྟ་གང་དུ་གནས། མཐར་གང་དུ་འགྲོ། རང་གི་ངོ་བོ་ཇི་ལྟ་བུ་ཞེས་བརྟགས་ན། དེ་ཉིད་དང་པོ་གང་ནས་ཀྱང་མ་འོང་། མཐར་གང་དུའང་མི་འགྲོ། ད་ལྟ་གང་ལའང་གནས་པ་མེད་དེ་རང་སེམས་ཀྱི་སྣང་ཆར་ཤེས་འོང་། དེའི་ཚེ་སེམས་རང་གི་ངོ་བོ་ལའང་དེ་བཞིན་དུ་བརྟགས་པས་རང་གི་སེམས་ཉིད་སྐྱེ་འགག་གནས་གསུམ་གྱི་མཚན་མས་གདོད་ནས་སྟོང་པའི་གནས་ལུགས་ཉིད་གོ་ཡོང་དེ་ལྟར་གོ་ན་བསྐྱེད་རིམ་གྱི་ལྷ་སྐུ་དང་རང་སེམས་དབྱེར་མེད་ཆུ་ཟླའམ་འཇའ་ཚོན་ལྟ་བུ་སྣང་ལ་རང་བཞིན་མེད་པ་ཟུང་འཇུག་གི་གནད་གསང་ཞིག་རིག་འོང་། དེ་རིག་ན་སྣང་སྤྱོད་ཐམས་ཅད་ལ་བསྲེ་ཞིང་རྩལ་སྦྱངས་པས་རིམ་གྱིས་ཡུལ་སྣང་ཐམས་ཅད་སྒྱུ་མ་ལྟ་བུའི་བསྐྱེད་རིམ་གསལ་སྟོང་འཛིན་བྲལ་དུ་ཤར་བ་དང་བསྒོམ་བྱའི་ལྷ་དང་བླ་མ་རང་སེམས་གསུམ་དབྱེར་མེད་པའི་གནད་ལ་གོ་མྱོང་ཅི་རིགས་པར་སྐྱེ་རྒྱུ་ཡོད་འདུག་པ་ནི་རང་གིས་ཀྱང་ཕྱོགས་ཙམ་མྱོང་བའི་གཏམ་སྟེ་ད་ལྟའི་རྡོ་རྗེའི་མཆེད་པོ་རྣམས་དང་ཕྱི་རབས་ཀྱི་བསྙེན་སྒྲུབ་བྱེད་པ་པོ་རྣམས་ལ་ཕན་སེམས་ཀྱིས་འདིར་སྨྲས་པ་ཡིན་ནོ། །དེ་ལྟར་སྐྱེ་གནས་བཞིའི་རིམ་པ་དང་སྦྱར་ནས་བསྐྱེད་རིམ་སྒོམ་ཚུལ་བཞིར་བྱུང་བ་རྣམས་གཙོ་བོ་རང་རང་གི་སྐྱེ་བ་གང་གིས་བསྡུས་པ་དང་བྱེ་བྲག་རང་རང་གི་བློ་ཚོད་དང་མཐུན་པར་བསྒོམ་པར་བྱ་བ་ཡིན་ཏེ། ཀུན་མཁྱེན་ཆོས་རྗེས། དེ་ལྟར་སྒོམ་ཚུལ་རྣམ་པ་བཞི་ཉིད་ཀྱང་། །གཙོ་བོར་སྐྱེ་བ་གང་བསྡུས་དེས་བསྒོམས་ལ། །བག་ཆགས་སྦྱོང་ཕྱིར་ཀུན་གྱིས་དེ་བཞིན་བསྒོམ། །ཁྱད་པར་ལས་དང་པོ་ཡིས་སྒོང་སྐྱེས་བཞིན། །ཉུང་ཟད་བརྟན་པས་མངལ་སྐྱེས་བཞིན་སྒོམ་ལ། །བརྟན་པ་ཆེ་བས་དྲོད་གཤེར་སྐྱེས་བཞིན་སྒོམ། །ཤིན་ཏུ་གོམས་པ་ཡང་དག་བརྟན་པ་ཡིས། །བརྫུས་སྐྱེས་བཞིན་དུ་སྐད་ཅིག་དཀྲོང་བསྐྱེད་བྱ། །ཞེས་གསུངས་པ་བཞིན་ནོ། །གཉིས་པ་བྱེ་བྲག་རྡོ་རྗེའི་ཆོ་ག་སུམ་བསྐྱེད་དང་སྦྱར་བ་ནི། འདི་ལ་འོག་མིན་བགྲོད་པའི་ཐེམ་སྐས་སུ། ཐོག་མར་ཕྱག་མཚན་ནས་བསྒོམ་པར་གསུངས་ཀྱང་། འདིར་ཡོངས་གྲགས་སྤྱི་ལྟར་སྦྱར་ན། སྔ་འགྱུར་གཏེར་མའི་ཕྱོགས་འདིར་མངལ་སྐྱེས་སྦྱོང་བྱེད་བསྡུས་པ་འདི་ཉིད་མང་ཞིང་དེ་ལྟ་ན། །འདིའི་སྦྱང་བྱ་བར་དོའི་རྣམ་ཤེས་དེ་ཕ་མའི་ཁུ་ཁྲག་གི་དབུས་སུ་ཞུགས་ནས་རིམ་གྱིས་ལུས་རྫོགས་པ་དང་མཐུན་པར། གདན་ཉི་མ་མའི་རྡུལ། ཟླ་བ་ཕའི་ཁུ་བ། ས་བོན་རྒྱུའི་ཏིང་ངེ་འཛིན་ཡི་གེ་གདན་ལ་བབས་པ་བར་དོའི་རྣམ་ཤེས་མའི་མངལ་དུ་དཀར་དམར་ཚོགས་པ་ལ་འཇུག་མ་རག་གི་གནས་སྐབས་དེ་ཡིན། ས་བོན་ལྷ་གང་ཡིན་གྱི་ཕྱག་མཚན་དུ་བསྒྱུར་བ་ནི་ཁམས་དཀར་དམར་གྱི་དབུས་སུ་རྣམ་ཤེས་ཞུགས་ནས་ཁུ་རྡུལ་སེམས་གསུམ་གཅིག་ཏུ་འདྲེས་པ་དེ་སྦྱོང་། དེ་ལས་འོད་ཟེར་སྤྲོ་བསྡུ་ནི་མངལ་གྱི་ལུས་དེ་ཉིད་འབྱུང་བ་བཞིའི་བྱེད་ལས་ཀྱིས་ཕུང་ཁམས་སྐྱེ་མཆེད་རིམ་གྱིས་གྲུབ་པ་དང་། ཕྱག་མཚན་དེ་ཡོངས་སུ་གྱུར་པ་ལས་སྐུ་ཡོངས་སུ་རྫོགས་པ་ནི་མངལ་གྱི་སེམས་ཅན་དེ་རྣམས་ལུས་རྫོགས་ནས་བཙས་པའི་བར་གྱི་བག་ཆགས་རྣམས་སྦྱོང་བར་བྱེད་པ་ཡིན་ལ། དེ་ལྟར་བསྐྱེད་ཚུལ་འདིས་སྐྱེས་ནས་གཞན་གྱི་བག་ཆགས་ཀྱང་ཞར་ལ་སྦྱོང་བར་ནུས་ཏེ་སྒོང་སྐྱེས་ལ་ས་བོན་ནི་དྲི་ཟའི་སེམས། ཕྱག་མཚན་ནི་མངལ་དུ་ཁུ་ཁྲག་གི་དབུས་སུ་ཞུགས་པ། སྤྲོ་བསྡུས་ཡོངས་སུ་གྱུར་པའི་གོང་བུ་ནི་སྒོ་ངར་གྱུར་པ་དེ་ལས་སྐུར་གྱུར་པ་ནི་སྒོ་ང་དེ་ལས་གཟུགས་སུ་སྨིན་པ་སྦྱོང་བར་བྱེད། དེ་བཞིན་དུ་དྲོད་གཤེར་ལ་གདན་གྱི་ཉི་མ་དྲོད། ཟླ་བ་གཤེར། ས་བོན་ཕྱག་མཚན་ནི་བར་དོའི་རླུང་སེམས། སྤྲོ་བསྡུ་དང་སྐུ་རྫོགས་པ་ནི་དེ་གསུམ་འདུས་པ་ལས་དྲོད་གཤེར་གྱི་དབུས་ནས་ལུས་གྲུབ་པ་དེ་སྦྱོང་། རྫུས་སྐྱེས་ལ་གདན་ནི་སྐྱེ་གནས། ས་བོན་ཕྱག་མཚན་ནི་བར་དོའི་རླུང་སེམས། སྤྲོ་བསྡུ་ནི་གནས་ལུས་ལ་སྲེད་པ་དང་ལེན་པའི་མཐུས་གསོས་བཏབ་པ། སྐུ་རྫོགས་པ་ནི་ལུས་སྐད་ཅིག་གིས་འགྲུབ་པ་དེ་མཚོན་ཞིང་སྦྱོང་བར་བྱེད་དོ། །སྦྱངས་འབྲས་ནི་སངས་རྒྱས་རྣམས་གང་འདུལ་གྱི་སྤྲུལ་པའི་སྐུར་བཞེངས་པ་ན་ལྷུམས་སུ་ཞུགས་ནས་བལྟམས་པའི་ཚུལ་བར་གྱི་མཛད་པ་དེའོ། །སྦྱོང་བྱེད་ནི་ནམ་མཁར་གནས་པའི་རྒྱུ་ཡི་ས་བོན་གྱི་ཡི་གེ་ཉིད་གདན་གྱི་སྟེང་དུ་བབས་པ་ནི་གསུང་ཡིག་འབྲུའི་ཆོ་ག དེ་རིགས་ཀྱི་ཕྱག་མཚན་གང་ཡིན་ལ་སྙིང་པོ་ས་བོན་གྱི་ཡི་གེས་མཚན་པར་གྱུར་པ་ལས་འོད་ཟེར་དཔག་ཏུ་མེད་པ་འཕྲོས་པས་ཕྱོགས་བཅུའི་སངས་རྒྱས་རྣམས་མདུན་གྱི་ནམ་མཁར་སྤྱན་དྲངས་ནས་འོད་ཟེར་གྱི་ཚུལ་དུ་ཕྱག་མཚན་ས་བོན་དང་བཅས་པ་ལ་ཐིམ་པ་ནི་ཐུགས་ཕྱག་མཚན་གྱི་ཆོ་གའོ། །ཕྱག་མཚན་ས་བོན་དང་བཅས་པ་དེ་ཡོངས་སུ་གྱུར་པ་ལས་འབྲས་བུའི་རྡོ་རྗེ་འཛིན་པ་བསྐྱེད་བྱའི་ལྷ་གང་ཡིན་གྱི་སྐུ་མཚན་དཔེ་གསལ་རྫོགས་སུ་གྱུར་པ་ནི་སྐུ་ཡོངས་སུ་རྫོགས་པའི་ཆོ་ག་ཡིན་ཞིང་། འདི་ནི་སྐྱེ་སྲིད་དག་པ་སྤྲུལ་པའི་སྐུར་ལམ་དུ་ཁྱེར་བ་སྟེ། དེས་ལམ་གོང་མའི་ཚེ་གདན་གྱི་པདྨ་ལ་གནས་པའི་ཉི་ཟླ་ཁ་སྦྱོར་ནི་དབུ་མའི་རྩ་འཁོར་གྱི་མདུད་པའི་གནས་རྣམས་སུ་བདེ་དྲོད་འབར་འཛག་གི་ཁ་སྦྱོར་བ། ས་བོན་དང་ཕྱག་མཚན་ནི་རླུང་སེམས་ངྷཱུ་ཏིར་ཐིམ་པ། སྤྲོ་བསྡུས་ཡོངས་སུ་གྱུར་པ་ནི་ཞུ་བདེ་ལས་བྱུང་བའི་བདེ་སྟོང་། སྐུ་རྫོགས་པ་ནི་དེ་ལས་རང་བཞིན་ལྷན་སྐྱེས་ཀྱི་བདེ་སྟོང་ཡེ་ཤེས་ཀྱི་ལྷ་སྐུར་འགྲུབ་རུང་དུ་མཚོན་པས་ན་རྫོགས་རིམ་གྱི་སྨིན་བྱེད་དུ་འགྲོའོ། །འདི་ནི་གཙོ་བོ་རྐྱང་པའི་དབང་དུ་བྱས་པ་སྟེ། གཞན་ཡང་ཡན་ལག་གི་ལྷ་བསྐྱེད་པའི་དབང་དུ་བྱས་ན། གཙོ་བོའི་སྐུ་རྫོགས་པར་བསྒོམ་པ། ཡུམ་གྱི་ས་བོན་བསྐྱེད་པ། དེ་ལས་ཡུམ་བསྒོམ་པ། སེམས་དཔའ་སུམ་བརྩེགས་བསྒོམ་པ། རིགས་བདག་གི་རྒྱས་འདེབས་བཅས་ལྔ་པོ་ཡོད་པ་རྣམས་ལ། དེ་ལྔས་རིམ་པར་གཞི་དུས་སུ་བྱིས་པ་བཙས་པ། ནར་སོན་ནས་འདོད་པའི་ཚོར་བས་གདུངས་ཏེ་དོན་དུ་གཉེར་བ། ཆུང་མ་ལེན་པ། སྒོ་གསུམ་གྱི་ནུས་པ་རིམ་གྱིས་འཕེལ་བ། རང་རིགས་ཀྱི་བྱ་བ་ལ་དབང་བསྒྱུར་བ་རྣམས་སྦྱོང་བ་དང་། འབྲས་དུས་སུ་སངས་རྒྱས་སྤྲུལ་པའི་སྐུ་བལྟམས་པ་དང་བྱང་ཆུབ་དོན་དུ་གཉེར་བས་རབ་ཏུ་བྱུང་ནས་དཀའ་ཐུབ་མཛད་པ་དང་། དེ་ལས་བཞེངས་ཏེ་བྱང་ཆུབ་སྙིང་པོར་གཤེགས་པ་དང་། བདུད་བཏུལ་ཏེ་བསམ་གཏན་བསྐྱེད་པ་དང་། རྣམ་པ་ཐམས་ཅད་མཁྱེན་པའི་ཡེ་ཤེས་བརྙེས་པ་རྣམས་ཡིན་ལ། ལམ་གོང་མའི་ཚེ་བདེ་སྟོང་ཡེ་ཤེས་ཀྱི་ལྷ་སྐུར་གྲུབ་པར་བྱ་བའི་ཕྱིར། བདེ་རླུང་སེམས་ལས་ལྷ་སྐུར་ལྡང་བ་དང་། དེ་ནས་མཆོག་གི་དངོས་གྲུབ་དོན་དུ་གཉེར་བའི་འདོད་པས་ཕྱག་རྒྱ་གཉིས་གང་རུང་ལ་བསྟེན་པ་དང་། དེས་ལྷན་སྐྱེས་ཀྱི་ཡེ་ཤེས་རིམ་གྱིས་གོམས་པར་བྱེད་པ་དང་། དེས་མཆོག་གི་དངོས་གྲུབ་ལ་མྱུར་དུ་སྦྱོར་བའི་གཞི་འདིང་བས་ན་སྨིན་བྱེད་དུ་འགྲོའོ། །དེ་བཞིན་དུ་འཁོར་བསྐྱེད་པ་ཡོད་པ་རྣམས་ལ། སྦྱང་བྱ་ནི། བྱིས་པ་དེས་བུ་དང་བུ་མོ་བསྐྱེད་པ་སྦྱོང་བར་བྱེད། སྦྱངས་འབྲས་ནི་སངས་རྒྱས་ཐམས་ཅད་བདེ་བ་ཆེན་པོས་དགྱེས་པའི་རོལ་མོའི་སྤྲིན་ལས་སྤྲུལ་པ་མཐའ་ཡས་པ་སྤྲོས་པ་དང་། འཁོར་རྣམས་བྱང་ཆུབ་ཀྱི་གོ་འཕང་ལ་བཀོད་པས་རང་རིགས་སུ་བསྐྱེད་པ་མཚོན་ཅིང་། སྦྱོང་བྱེད་འཁོར་གྱི་ས་བོན་ནས་ལྷར་བསྒོམ་པ་སོགས་ཏེ་བྱེ་བྲག་རང་རང་གི་གཞུང་གི་དགོངས་པ་དང་བསྟུན་པ་ལས་འདིར་བརྗོད་པར་མི་ནུས་སོ། །གསུམ་པ་བསྐྱེད་པ་ལྷ་ཡི་མཚན་ཉིད་ནི། ཡི་དམ་གང་ལ་བརྟེན་པའི་མངོན་རྟོགས་ལྟར་བསྒོོམ་པར་བྱ་བ་ལས་འདིར་མཐའ་གཅིག་ཏུ་ངེས་བཟུང་བྱར་མེད་ཀྱང་། སྤྱི་ཙམ་དུ་བསྒོམ་བྱའི་ལྷ་ཞི་བ་དང་ཁྲོ་བོ་གཉིས་སུ་ངེས་པས། ཞི་བ་རྣམས་ལ། ཞི་ཚུལ་དགུ་དང་། སྔ་འགྱུར་ཕལ་ཆེར་ལ་ལོངས་སྤྱོད་རྫོགས་སྐུའི་རྒྱན་ཆས་བཅུ་གསུམ་སོགས་དང་། ཁྲོ་བོ་རྣམས་ལ་གར་གྱི་ཉམས་དགུ་དང་། དཔལ་དང་དུར་ཁྲོད་དྲག་པོའི་ཆས་སོགས་ཏེ། དེ་ལ་ཞི་ཚུལ་དགུ་ནི། ང་རྒྱལ་མ་སྤངས་གནས་སུ་དག་པའམ་སྐྱེ་བ་དག་པ་མཚོན་བྱེད་སྐུ་ཤ་དང་ཕྱག་ཞབས་མཉེན་ཤ་ཆགས་པ། དེ་བཞིན་དུ་ཞེ་སྡང་དང་ན་བ་གནས་སུ་དག་པས་དཀུ་སྐབས་བྱེད་ཅིང་རིམ་པར་འཚམས་པས་ལྕུག་པ། འདོད་ཆགས་དང་འཆི་བ་གནས་སུ་དག་པས་ཐབས་ཤེས་ཕན་ཚུན་འཁྲིལ་བའམ་འཁྲིལ་བག་ཆགས་པས་ལྷོད་པོར་མ་གྱུར་པ། ཕྲག་དོག་དག་པས་སྐུ་དྲངས་ཤིང་ཚིགས་མཚམས་སོགས་འཕྲུལ་ལྡེ མ་ཆགས་པ། གཏི་མུག་དང་རྒ་བ་གནས་སུ་དག་པས་སྐུ་འཇམ་ཞིང་གཞོན་ཤ་ཆགས་པའི་ངང་ཚུལ་ཅན་ཏེ་ངོ་བོའི་ཡོན་ཏན་ལྔ་དང་། མ་རིག་པ་སྤངས་པས་སྐུ་གཙང་ཞིང་ཁ་དོག་མ་འདྲེས་པར་གསལ་བ། ཟད་པར་གྱི་སྐྱེ་མཆེད་རྫོགས་པའམ་ཡེ་ཤེས་རྒྱས་པས་བཀྲག་ཅིང་མུ་མེད་པའི་འོད་ཟེར་འཕྲོ་བས་འཚེར་བ། མཚན་གྱི་མེ་ཏོག་ལ་དཔེ་བྱད་བཟང་པོའི་འབྲས་བུ་ཡོངས་སུ་རྫོགས་པར་བརྗིད་ཅིང་ཡིད་དུ་འོང་བས་ལྷུན་སྟུག་པ། ཆེ་བའི་ཡོན་ཏན་རྫོགས་པས་གདུལ་བྱ་རྣམས་ཟིལ་གྱིས་གནོན་པའི་གཟི་བྱིན་དང་ལྡན་པ་སྟེ་རྣམ་པའི་ཡོན་ཏན་བཞི་བཅས་དགུའོ། །རྒྱན་ཆས་བཅུ་གསུམ་ལས། གདུལ་བྱའི་ཉོན་མོངས་པའི་གདུང་བ་སེལ་བའི་བརྡར་ལྷ་རྫས་ལས་གྲུབ་པའི་དར་གྱི་ཆས་གོས་ལྔ་ནི། སྐུ་རྒྱབ་ཏུ་དར་མཐིང་ཁྲའི་ཟིལ་དིར་ཐུར་དུ་དཔྱང་བ། སྙན་གོང་དུ་དར་སྣ་ལྔ་ཡི་ཅོད་པཎ་ནམ་དར་དཔྱངས་འཕུར་བ། དཔུང་པའི་སྟོད་ཙམ་དུ་སླེབ་པའི་གར་གྱི་ཕུ་དུང་འདུང་མ། དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས་ཚི་གུ་ནི་ཁ་དོག་སྣ་ཚོགས་པའི་སྨད་དཀྲིས་ཏེ་འདི་ལ་འབའ་ཏི་སྨུག་པོའི་ཤམ་ཐབས་བྱས་པའང་སྣང་ངོ་། །འདོད་ཡོན་མ་སྤངས་རྒྱན་དུ་རྫོགས་པས་འགྲོ་བའི་རེ་བ་སྐོང་བའི་བརྡར་རིན་པོ་ཆེའི་རྒྱན་བརྒྱད་ནི། དབུ་ལ་རིན་པོ་ཆེའི་དབུ་རྒྱན་ཟེ་སྲོག་ཁང་པ་ནོར་བུའི་རྩེ་བྲན་ཅན། སྙན་གཉིས་སུ་རིན་པོ་ཆེའི་སྙན་རྒྱན་ནོར་བུའི་ཕྲ་ཚོམ་ཅན། རིན་པོ་ཆེ་སྣ་ཚོགས་པ་སྤེལ་མར་བརྒྱུས་པའི་མགུལ་རྒྱན་ཐུང་ངུ་། རྒྱུ་དེ་མཚུངས་ནུ་སྟེང་ཙམ་དུ་སླེབ་པའི་སེན་མོ་དོ། ལྟེ་འོག་ཏུ་སླེབ་པའི་དོ་ཤལ་ཏེ་རིམ་པ་གསུམ། དཔུང་རྒྱན་རིན་པོ་ཆེའི་ཕྲ་ཚོམ་ཅན། ཕྱག་གདུབ་གཉིས་དང་། ཞབས་གདུབ་གཉིས་དང་། ཕྱག་ཞབས་ཀྱི་སོར་མོའི་གདུབ་བུ་རྣམས་བཀོད་པ་དེ་མཚུངས། སྐ་རགས་རིན་པོ་ཆེའི་ཕྲ་ཚོམ་གྱིས་མཛེས་པར་བྱས་པ་སྟེ། འདི་ལ་དོ་ཤལ་དང་སེ་མོ་དོ་གཉིས་གཅིག་ཏུ་བྱས་པ་དང་། ཡང་ཕྱག་ཞབས་ཀྱི་གདུ་བུ་རྣམས་གཅིག་ཏུ་བྱས་ཏེ་སོར་གདུབ་ཐ་དད་དུ་བགྲང་བ་དང་། ཡང་སོར་གདུབ་མེད་པའི་སྔ་མ་བརྒྱད་སོ་སོར་བགྲང་བ་སོགས་བརྩི་ཚུལ་འདྲ་མིན་ཅུང་འདུག་ཀྱང་དོན་ལ་གོང་གི་དེ་རྣམས་སོ། །གཞན་ཡང་བྱང་ཆུབ་ཡན་ལག་བདུན་མཚོན་བྱེད། རིན་པོ་ཆེའི་དོ་ཤལ་དྲན་པ། དབུ་རྒྱན་ཆོས་རབ་རྣམ་འབྱེད། གདུ་བུ་བརྩོན་འགྲུས། སྙན་ཆ་ཤིན་སྦྱངས། དཔུང་རྒྱན་ཏིང་ངེ་འཛིན། སེ་མོ་དོ་བཏང་སྙོམས། མེ་ཏོག་གི་ཕྲེང་བ་དགའ་བ་རྣམས་དང་། ཡབ་ལ་རུས་པའི་རྒྱན། མགུལ་རྒྱན་སྦྱིན་པ། གདུ་བུ་ཚུལ་ཁྲིམས། རྣ་ཆ་བཟོད་པ། སྤྱི་བོའི་འཁོར་ལོ་བརྩོན་འགྲུས། སྐ་རགས་བསམ་གཏན། མཆོད་ཕྱིར་ཐོགས་ཏེ་སེ་ར་ཁར་གྲགས་པ་ཤེས་རབ་སྟེ་ཕར་ཕྱིན་དྲུག་དང་སྦྱར་བ་དང་། ཡུམ་རྣམས་ཀྱང་མཚན་མའི་རྟོག་པའི་སྒྲིབ་གཡོགས་དང་བྲལ་བ་མཚོན་བྱེད་སྐུ་གཅེར་བུ། མི་འགྱུར་བའི་བདེ་བ་ཆེན་པོ་དགའ་བ་བཅུ་དྲུག་དང་ལྡན་པ་མཚོན་བྱེད་བཅུ་དྲུག་ལོན་པའི་ན་ཚོད་ཅན། དབྱིངས་དང་ཡེ་ཤེས་ཕྱོགས་མེད་དུ་རྒྱས་པ་མཚོན་བྱེད་དབུ་སྐྲ་གྲོལ་བ། ཆོས་དབྱིངས་མཚོན་བྱེད་རུས་པའི་འཁོར་ལོ། མགུལ་རྒྱན་མཉམ་ཉིད། རྣ་ཆ་སོར་རྟོག གདུ་བུ་མེ་ལོང་། སྐ་རགས་བྱ་གྲུབ་སྟེ་རུས་པའི་ཕྱག་རྒྱ་ལྔས་སྤྲས་པ། སྟོང་ཉིད་དང་སྙིང་རྗེ་མི་འབྲལ་བའི་བརྡར་ཡབ་ཡུམ་གཉིས་སྐུ་ལུས་ཕན་ཚུན་འཁྲིལ་བ། ཟག་མེད་ཀྱི་དགའ་བ་ཆེན་པོ་སྤྲོས་བྲལ་དང་རོ་གཅིག་པའི་བརྡར་ཞལ་སྦྱོར་ཞིང་ཕན་ཚུན་མཆུ་སྒྲོས་འཇིབ་པ། ཞི་ལྷག་ཟུང་དུ་འཇུག་པའི་བརྡར་རྡོ་རྗེ་དང་པདྨ་མཉམ་པར་སྦྱོར་བས་གཉིས་སུ་མེད་པར་བཞུགས་པ་ལ་སོགས་པའོ། །དེ་བཞིན་དུ་ཁྲོ་བོ་ལ། གར་གྱི་ཉམས་དགུ་ལས། སྒེག་པ་ནི་ཆགས་ཉམས་ཏེ་རྒྱན་གྱིས་བརྒྱན་ཅིང་ཡབ་ཡུམ་འཁྲིལ་བ་སོགས་འཆོར་སྒེག་སྟེ་རྣམ་སྣང་གི་ངོ་བོ་དང་། དཔའ་བ་ནི་ཁྲོ་ཉམས་ཏེ་སྟོབས་དང་ལྡན་པས་ཐུབ་པར་དགའ་བ་རིན་འབྱུང་། མི་སྡུག་པ་ནི་རྨོངས་ཉམས་ཏེ་མཐོང་བ་ཙམ་གྱིས་འཇིགས་པར་བྱེད་པ་མི་བསྐྱོད་པ་སྟེ། དེ་གསུམ་ནི་སྐུ་ཡི་ཉམས་སོ། །བཞད་པ་ནི་ཆགས་དགྱེས་དྲེགས་པའི་རྒྱུ་ལས་བྱུང་བ་ཧ་ཧ་དང་ཧི་ཧི་སོགས་བཞད་པའི་གད་མོ་འབྱིན་པ་སྟེ་འོད་དཔག་མེད། དྲག་ཤུལ་ནི་ཟུངས་ཤིག་རྒྱོབ་ཅིག་སོགས་ཚིག་རྩུབ་མོས་གཤེ་བ་སྟེ་དོན་གྲུབ། འཇིགས་རུང་ནི་འབྲུག་སྒྲ་ལྟར་ཆེམ་པའི་ང་རོ་དྲག་པོ་སྒྲོག་པ་བཟོད་པར་དཀའ་བ་སྟེ་མཱ་མ་ཀཱི། དེ་གསུམ་ནི་གསུང་གི་ཉམས་སོ། །སྙིང་རྗེ་ནི་དམིགས་པ་མེད་པའི་ཐུགས་རྗེས་རྨོངས་པའི་འགྲོ་ཁམས་རྗེས་སུ་འཛིན་པ་སྟེ་དམ་ཚིག་སྒྲོལ་མ། རྔམས་པ་ནི་མ་རུངས་པའི་སེམས་ཅན་ཁྲོ་བས་འདུལ་བའི་ཕྱིར་ཁྲོ་ཆགས་ཀྱིས་ཐུགས་ཚོམ་པ་ལྟ་བུས་ཅི་ཡང་ནུས་པ་སྟེ་གོས་དཀར་མོ། ཞི་བ་ནི་ཐམས་ཅད་ཆོས་ཉིད་དུ་རོ་མཉམ་པའི་རྣམ་པར་མི་རྟོག་པའི་ཐུགས་ཏེ་བྱན་མའི་རང་བཞིན། དེ་གསུམ་ནི་ཐུགས་ཀྱི་ཉམས་ཏེ་དེ་ལྟར་དགུའོ། །དཔལ་གྱི་ཆས་བརྒྱད་ནི་དཔལ་ཆེན་པོའི་སྐུ་ལ་ཡེ་ནས་རང་ཆས་སུ་གནས་པའི་ཕྱིར་དཔལ་གྱི་ཆས་ཏེ། འདི་ལ་ངོས་འཛིན་གྱི་ཁྱད་པར་ཅུང་ཟད་མི་མཐུན་པ་འགའ་ཞིག་ཡོད་པར་མཐོང་མོད། རྟོག་པ་ལྷ་རྒྱུད་ལྟར་ན། དབུ་སྐྲ་གྱེན་བརྫེས་འཁོར་བ་རུ་བཟློག་ཆས། །རྡོ་རྗེའི་ཁྱུང་གཤོག་ཐབས་དང་ཤེས་རབ་ཆས། །མཐིང་དམར་ཅོད་པཎ་རྟག་ཆད་ཟིལ་གནོན་ཆས། །སྤྱི་གཙུག་རྡོ་རྗེ་ལྷག་པར་རིག་པའི་ཆས། །དབང་གི་བསེ་ཁྲབ་གཟི་འབར་བགྲོད་པའི་ཆས། །གཉིས་མེད་སྦྱོར་བ་ཤེས་རབ་ཡུམ་གྱི་ཆས། གནོད་གདུག་ཟློག་བྱེད་དཔའ་བོ་ལྗགས་ཀྱི་ཆས། །ཉོན་མོངས་སྲེག་བྱེད་རྡོ་རྗེ་མེ་ཡིས་ཆས། །ཞེས་དོན་རྟགས་བཅས་གསལ་བར་གསུངས་སོ། །དུར་ཁྲོད་ཀྱི་ཆས་བརྒྱད་ནི། རྒྱལ་བྱེད་དཔའ་རྟགས་ཀྱི་རྒྱན་ཏེ། སྔོན་བྱུང་རུ་ཏྲ་བསྒྲལ་བའི་ལོངས་སྤྱོད་ཀྱི་ཆས་རྣམས་དཔལ་ཆེན་པོའི་སྐུ་ཡི་རྒྱན་དུ་བཞེས་པ་སྟེ། དེ་ཡང་བགོ་བའི་གོས་གསུམ། འདོགས་པའི་རྒྱན་གཉིས། བྱུགས་པའི་རྩི་གསུམ་ལས། དང་པོ་གསུམ་ནི། མི་ལྤགས་ཀྱི་གཡང་གཞི། གླང་ཆེན་གྱི་སྟོད་གཡོགས། སྟག་ལྤགས་ཀྱི་ཤམ་ཐབས་རྣམས་སོ། །གཉིས་པ་གཉིས་ནི། ཐོད་པ་དང་སྦྲུལ་རྒྱན་ཏེ། ཐོད་པ་ལ། སྐམ་པོ་ལྔ་ཡི་དབུ་རྒྱན། རློན་པ་ལྔ་བཅུའི་དོ་ཤལ། ཚལ་བུའི་དཔུང་རྒྱན། ཕྱག་ཞབས་ཀྱི་གདུ་བུ་སོགས་སོ། །སྦྲུལ་རྒྱན་ལ། ཀླུ་རྒྱལ་རིགས་དཀར་པོའི་སྐྲ་ཆིངས། རྗེ་རིགས་སེར་པོའི་སྙན་ཆ། བྲམ་ཟེའི་རིགས་དམར་པོའི་མགུལ་ཆུ། དམངས་རིགས་ལྗང་གུའི་ཕྱག་ཞབས་ཀྱི་གདུ་བུ། གདོལ་པའི་རིགས་ནག་པོའི་དོ་ཤལ་ཏེ་ཐམས་ཅད་གདུག་པ་སྦྲུལ་གྱི་རྣམ་པ་ཅན་ནོ། །གསུམ་པ་གསུམ་ནི། དཔྲལ་བར་ཐལ་ཆེན་གྱི་ཚོམ་བུ། འཁུར་ཚོས་སམ་འབུར་གསུམ་ལ་རཀྟའི་ཐིག་ལེ། ཨོག་མར་ཞག་གི་ཟོ་རིས་རྣམས་སོ། །ལྷ་ཞི་མ་ཁྲོའི་རིགས་ཁ་ཅིག་ལ། མཁྱེན་པའི་སྟོབས་བཅུས་གཏི་མུག་འཇོམས་པའི་བརྡར་གླང་ཆེན་གྱི་པགས་པས་སྟོད་གཡོགས། དཔའ་བརྟུལ་དྲག་པོའི་ལས་ཀྱིས་ཞེ་སྡང་བཅོམ་པའི་བརྡར་སྟག་ལྤགས་ཀྱི་ཤམ་ཐབས་དཀྲིས་པ། བྱང་ཆུབ་སེམས་ཀྱིས་འདོད་ཆགས་བཅོམ་པའི་བརྡར་དར་དཔྱངས་ཀྱིས་བརྒྱན་པ་དང་། ང་རྒྱལ་བཅོམ་པའི་བརྡར་ཐོད་སྐམ་ལྔ་སངས་རྒྱས་ལྔའི་བདག་ཉིད་ཅན་གྱི་དབུ་རྒྱན། ཕྲག་དོག་བཅོམ་པས་སེམས་བྱུང་ལྔ་བཅུ་རྣམ་པར་དག་པའི་བརྡར་མགོ་རློན་ལྔ་བཅུ་ཕྲེང་བར་བརྒྱུས་པའི་དོ་ཤལ། ཕར་ཕྱིན་དྲུག་གི་རང་བཞིན་རུས་པའི་ཕྱག་རྒྱས་སྐུ་ལ་བརྒྱན་པ་སོགས་ཏེ་རང་གཞུང་ནས་ཇི་སྐད་བསྟན་པ་བཞིན་བསྒོམ་པར་བྱའོ། །གཉིས་པ་བྱིན་གྱིས་རློབ་ཅིང་དབང་བསྐུར་བ་ལ་གཉིས་ལས། དང་པོ་བྱིན་གྱིས་རློབ་པ་ལ། སྦྱང་བྱ་ནི། བྱིས་པ་དེ་ཉིད་ཀྱི་ལུས་ངག་ཡིད་གསུམ་གྱི་ནུས་པའི་རྩལ་ནར་སོན་པ་སྦྱོང་བར་བྱེད། སྦྱངས་འབྲས་ནི། སངས་རྒྱས་པ་ན་སྐུ་གསུང་ཐུགས་ཀྱི་གསང་བ་བསམ་གྱིས་མི་ཁྱབ་པ་ལ་མངའ་བརྙེས་པ་ཉིད་ཡིན་ཞིང་། སྦྱོང་བྱེད་ནི། དམ་ཚིག་གི་འཁོར་ལོ་བསྐྱེད་ཟིན་པའི་དཀྱིལ་འཁོར་གྱི་ལྷ་གཙོ་འཁོར་རྣམས་ཀྱི་སྤྱི་བོ་དུང་ཁང་གི་འཁོར་ལོར་ༀ་དཀར་པོར་གསལ་ཞིང་འབར་བ་སྐུ་རྡོ་རྗེ་དང་། མགྲིན་པའི་འཁོར་ལོར་ཨཱཿཡིག་དམར་པོར་འབར་ཞིང་གསལ་བ་གསུང་རྡོ་རྗེ། སྙིང་གར་གཙོ་བོ་ཡབ་ཡུམ་གྱི་ཡེ་ཤེས་སེམས་དཔའི་མདུན་དང་། གཞན་རྣམས་ཀྱི་ཐུགས་སྲོག་ས་བོན་གྱི་མདུན་ཕྱོགས་སུ་ཧཱུྃ་མཐིང་ག་གསལ་ཞིང་འབར་བ་ཐུགས་རྡོ་རྗེ་སྟེ། འདི་ལ་གནས་གསུམ་སོ་སོར། འཁོར་ལོ་པདྨ་རྡོ་རྗེར་སྒོམ་པའི་དབུས་སུ་ཡིག་འབྲུ་བསྒོམ་པ་དང་། རྣམ་སྣང་། སྣང་མཐའ། མི་བསྐྱོད་པའི་སྐུར་བསྒོམ་པ་སོགས་ཀྱི་དབྱེ་བ་ཡོད་དེ་རང་གཞུང་དང་བསྟུན་ནོ། །གང་ལྟར་ཡང་ལུས་ངག་ཡིད་གསུམ་རྣམ་པར་དག་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསུམ་གྱི་རང་བཞིན་དུ་མོས་པ་བརྟན་པོས་གཞི་འབྲས་སྦྲེལ་བའི་ང་རྒྱལ་བྱ་ཞིང་། ལམ་གོང་མའི་དུས་ན་ཁུ་རྡུལ་རླུང་གི་ཁམས་གསུམ་སྐུ་གསུང་ཐུགས་ཏེ། དེ་རྣམས་ཀྱི་སྙིགས་མ་ཟད་ནས་དྭངས་མ་འཕེལ་བ་ལས་བྱུང་བའི་ཡེ་ཤེས་རྒྱུད་ལ་སྐྱེ་བའི་གཞི་འདིང་བའོ། །གཉིས་པ་དབང་བསྐུར་བ་ལ། སྦྱང་བྱ་ནི། བྱིས་པ་དེ་རྩ་ཁམས་འཕེལ་བས་ཉོན་མོངས་པའི་རྣམ་རྟོགས་རགས་པར་གྱུར་པ་དེ་སྦྱོང་བར་བྱེད། སྦྱངས་འབྲས་ནི། སངས་རྒྱས་པ་ན་དེ་བཞིན་གཤེགས་པ་ཐམས་ཅད་ཀྱི་བདག་ཉིད་ཁམས་གསུམ་ཆོས་ཀྱི་རྒྱལ་པོར་དབང་བསྐུར་བ་དེ་ཡིན་ཞིང་། སྦྱོང་བྱེད་ནི། ལྷ་ཚོགས་ཐམས་ཅད་ཀྱི་སྤྱི་བོ། དཔྲལ་བ། རྣ་ལྟག་གཡས། ལྟག་པ། རྣ་ལྟག་གཡོན་ཏེ་མགོ་བོའི་གནས་ལྔར་རང་རང་གི་རིགས་ཀྱི་བདག་པོ་གཙོ་བོར་བྱས་ཏེ་དབུས་སུ་བཞག་པའི་ཤུལ་དུ་རྣམ་སྣང་ཉིད་བྱས་པའི་སྔགས་དང་ཕྱག་རྒྱས་དབང་བསྐུར་བ་སྟེ། བསྐུར་ཚུལ་ས་བོན་རིགས་ལྔ་ཡབ་ཡུམ་མཉམ་པར་སྦྱོར་བའི་སྦྱོར་མཚམས་ནས་ཡེ་ཤེས་ལྔ་ཡི་རང་བཞིན་བྱང་ཆུབ་སེམས་ཀྱི་ཆུ་རྒྱུན་བབས་པས་རང་གི་ལུས་གང་། སྒྲིབ་པ་བྱང་། དུག་ལྔ་ཡེ་ཤེས་ལྔར་དག་པར་བྱས། ཆུའི་ལྷག་མ་ཡར་ལུད་པ་ལས་རིགས་ཀྱི་བདག་པོ་རང་ཆས་སུ་བཞུགས་པ་ལ་ཐིམ་པས་ཐོབ་བྱ་རང་གནས་ཀྱི་ཡེ་ཤེས་མངོན་དུ་གྱུར་པའི་ང་རྒྱལ་འཛིན་པ་སྟེ། འདི་ལའང་དབང་ལྷ་རྣམས་སྤྱན་དྲངས་ཤིང་དབང་བསྐུར་བ་སོགས་ཀྱི་རྣམ་བཞག་ཡོད་དེ་སྐབས་དང་བསྟུན་ནོ། །དེས་རྫོགས་རིམ་གྱི་སྐབས་སུ་དགའ་བཞི་ལུགས་འབྱུང་ལྡོག་གི་རིམ་པས་དུག་ལྔ་ཡེ་ཤེས་ལྔར་དབང་བསྐུར་ཞིང་རླུང་སེམས་གཙུག་ཏོར་དུ་ཐིམ་པའི་རྒྱུ་བྱེད་པས་ལམ་གོང་མའི་སྨིན་བྱེད་དུ་འགྲོ་བ་ཡིན་ནོ། །གསུམ་པ་ཡེ་ཤེས་པ་སྤྱན་དྲངས་ཤིང་བཞུགས་སུ་གསོལ་བ་ནི། འདིའི་སྦྱང་བྱ་ནི། བྱིས་པ་དེ་རང་དང་རིགས་མཐུན་པའི་འགྲོ་བ་སྔ་མ་རྣམས་དང་བློ་གྲོས་ཀྱི་ནུས་པ་མཉམ་པར་གྱུར་པ་དེ་སྦྱོང་བར་བྱེད། སྦྱངས་འབྲས་ནི། སངས་རྒྱས་པའི་ཚེ་ན་དེ་བཞིན་གཤེགས་པ་ཐམས་ཅད་ཡེ་ཤེས་གཅིག་ཏུ་གྱུར་པར་དགོངས་པ་གཉིས་སུ་མེད་པར་རོ་མཉམ་པ་ཉིད་ཡིན་ཅིང་། སྦྱོང་བྱེད་ནི། ཡེ་ཤེས་སྤྱན་དྲངས་ཤིང་སྟིམ་པར་བྱེད་པ་སྟེ། འདི་ལ་གཉིས་རང་བཞིན་ཡེ་ཤེས་ཀྱི་དཀྱིལ་འཁོར་སྤྱན་དྲངས་པ་དང་། བཞུགས་སུ་གསོལ་བའོ། །དང་པོ་ནི། བདག་དམ་ཚིག་སེམས་དཔའི་ཐུགས་སྲོག་ས་བོན་ལས་འོད་ཟེར་ལྕགས་ཀྱུ་ལྟ་བུ་རང་བཞིན་ལྷུན་གྱིས་གྲུབ་པའི་ཞིང་ཁམས་ཐམས་ཅད་དུ་ཁྱབ་པར་འཕྲོས་པས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་ཆོས་སྐུ་མཉམ་པ་ཆེན་པོ་ལས་མ་གཡོས་བཞིན་དུ་གཟུགས་སྐུ་གང་འདུལ་ཕྱག་རྒྱའི་རོལ་གར་རྟེན་དང་བརྟེན་པར་བཅས་པ་བསྒོམ་པའི་དཀྱིལ་འཁོར་གྱི་ལྷ་དེའི་རྣམ་པར་བཞེངས་ཏེ་མདུན་གྱི་ནམ་མཁར་མངོན་སུམ་དུ་བྱོན་པར་མོས་ཏེ། ཁྱད་པར་གྱི་རྫས་བསྲེགས་པའི་སྤོས་བཏུལ་ཞིང་། རོལ་མོ་སྣ་ཚོགས་པའི་སྒྲ་དང་བཅས་ཏེ། ཡིད་རྩེ་གཅིག་པའི་དད་པས་སྤྱན་འདྲེན་གྱི་ཚིག་དབྱངས་སྙན་པོས་བརྗོད་ཅིང་བདག་དམ་ཚིག་པའི་དཀྱིལ་འཁོར་བསྒོམ་པའི་སྟེང་གི་ནམ་མཁར་སྲུང་འཁོར་གྱི་མེ་རི་འདབ་འབྱར་ཙམ་དུ་བཞུགས་པར་བསྒོམ་པའོ། །གཉིས་པ་བཞུགས་སུ་གསོལ་བ་ནི། དེ་ལྟར་སྤྱན་དྲངས་པའི་ཡེ་ཤེས་ཀྱི་ལྷ་རྣམས་དམ་ཚིག་གི་འཁོར་ལོར་བཞུགས་སུ་གསོལ་བ་སྟེ། སྤྱི་ཙམ་དུ་ཛཿཧཱུྃ་བཾ་ཧོཿཞེས་བརྗོད་པས། ཛཿས་དམ་ཚིག་པ་ལ་ཡེ་ཤེས་པ་བཀུག་པ་དང་། ཧཱུྃ་གིས་གཉིས་སུ་མེད་པར་བསྟིམས་པ་དང་། བྃ་གྱིས་འདོད་པ་མ་གྲུབ་ཀྱི་བར་དུ་མི་གཤེགས་པར་བཅིངས་པ་དང་། ཧོཿས་དགྱེས་ཤིང་བརྟན་པར་བཞུགས་སུ་གསོལ་བའོ། །དེས་དམ་ཡེ་ལ་མཆོག་དམན་ཐ་དད་དུ་འཛིན་པའི་ཞེན་རྟོག་སྤོང་བ་དང་། ཡེ་ཤེས་ཀྱི་འཁོར་ལོ་ཉིད་རང་གི་སེམས་དང་དབྱེར་མེད་དུ་ཤེས་པ་དང་། སངས་རྒྱས་ཐམས་ཅད་ཀྱི་བྱིན་རླབས་བདག་ཉིད་ལ་འཇུག་པ་སོགས་ཀྱི་དགོས་པ་ཡོད་ཅིང་། ལམ་གོང་མའི་ཚེ་དཔེའི་འོད་གསལ་གྱིས་དོན་གྱི་ཡེ་ཤེས་མཚོན་པར་བྱེད་པ་དང་། འཁོར་འདས་གཉིས་མེད་ཀྱི་ཡེ་ཤེས་རྒྱུད་ལ་སྐྱེ་བའི་གཞི་འདིང་བའོ། །བཞི་པ་གཉིས་མེད་ཀྱི་དཀྱིལ་འཁོར་ལ་མཆོད་བསྟོད་བྱ་བ་ལ་གཉིས། དག་རྫོགས་སྨིན་གསུམ་སྤྱིར་བསྟན་པ་དང་། ལས་རིམ་དངོས་བཤད་པའོ། །དང་པོ་ནི། འདི་དག་གི་སྦྱང་བྱ་ནི། བྱིས་པ་དེ་བཟའ་བཏུང་གོས་རྒྱན་གནས་ཁང་སོགས་ལ་ཅི་དགར་སྤྱོད་ཅིང་། ཡུལ་ནོར་གྱི་བཅད་རིས་དང་ཁེ་གྲགས་སྒྲུབ་པ་རྣམས་ཏེ་དེ་དག་དག་པར་བྱེད། སྦྱངས་འབྲས་ནི། སངས་རྒྱས་པའི་ཚེ་ན་དེ་ཉིད་དུ་མཆོད་པའི་བཀོད་པ་མཐའ་ཡས་པའི་སྤྲིན་རྟག་ཏུ་འབྱུང་བ་དང་ཕྱག་གི་གནས་མཆོད་པའི་ཞིང་བླ་ན་མེད་པ་ཉིད་ཡིན་པས་དེ་ཉིད་རྫོགས་པར་བྱེད། སྦྱོང་བྱེད་ནི། ཕྱག་མཆོད་བསྟོད་པའི་ལས་རིམ་རྣམས་ཏེ། དེས་ལམ་གོང་མའི་ཚེ་རིག་པ་བརྟུལ་ཞུགས་ཀྱི་རོལ་རྩེད་ལ་ཅི་དགར་སྤྱོད་པའི་གཞི་འདིང་བས་སྨིན་བྱེད་དུ་འགྲོའོ། །གཉིས་པ་སྦྱོང་བྱེད་ཀྱི་ལས་རིམ་དངོས་བཤད་པ་ལ་གསུམ་སྟེ། ཕྱག་འཚལ་བ་དང་། མཆོད་པ་འབུལ་བ་དང་། བསྟོད་པ་བྱ་བའོ། །དང་པོ་ནི། སྤྱིར་དམ་ཡེ་དབྱེར་མེད་ཆུ་ལ་ཆུ་བཞག་པ་འདྲེས་པ་ལྟར་གཉིས་མེད་མཉམ་པའི་ངང་དུ་ལྷ་བདག་དབྱེར་མེད་དུ་རྟོགས་པ་ནི་འདྲེས་པ་ནན་ཏན་གྱི་ཕྱག་ཅེས་རྣལ་འབྱོར་མཆོག་གི་ཡུལ་ཡིན་ཏེ། དེས་བསྒྲེས་ནས་མཆོད་པ་སོགས་ལའང་ཤེས་པར་བྱའོ། །དེ་ལྟར་རྟོགས་ན་ཀུན་རྫོབ་མཚན་མའི་ཕྱག་མཆོད་སོགས་ཟུར་དུ་མ་བྱས་ཀྱང་ཆོག་མོད། འདིར་ཀུན་རྫོབ་ཙམ་དུ་འཇིག་རྟེན་སྲི་ཞུའི་ཚུལ་དུ་སྔགས་ཕྱི་པ་སོགས་དང་སྒོ་བསྟུན་ཏེ་ཕྱག་མཆོད་སོགས་འབུལ་ནའང་རང་སེམས་ཀྱི་རོལ་པ་ཙམ་དུ་ཐག་བཅད་དེ་གཉིས་སུ་མེད་པའི་ངོ་བོར་ཤེས་པར་བྱས་ན་རྣལ་འབྱོར་བླ་མེད་ཀྱི་དགོངས་པར་འགྱུར་རོ། །དེ་བས་ན་འཕྲུལ་དགའི་ལྷ་རྣམས་རང་གི་སྤྲུལ་པའི་ལོངས་སྤྱོད་ལ་བརྩེ་བའི་ཚུལ་གྱིས་རང་ཉིད་གཙོ་བོའི་ཐུགས་ཀ་ནས་སྐུ་གཉིས་པའི་རྣམ་པར་འཐོན་པའམ་ཡང་ན་ཐུགས་ཀ་ནས་སྤྲུལ་པའི་ལྷ་མོ་སོགས་ཀྱིས་ཕྱག་བྱས་པར་མོས་པ་སྟེ། ཨ་ཏི་པུ་ཧོཿཞེས་ཕྱག་འཚལ་བའི་བརྡ་དང་། པྲ་ཏི་ཙ་ཧོཿཞེས་པས་མཉེས་ནས་ལན་བྱིན་པར་མོས་པའོ། །གཉིས་པ་མཆོད་པ་ལ། ཕྱི་ནང་གསང་བ་དེ་ཁོ་ན་ཉིད་དང་བཞི་ལས། དང་པོ་ཕྱི་མཆོད་ནི། བདག་ཉིད་གཙོ་བོའི་ཐུགས་ཀ་ནས་འདོད་ཡོན་གྱི་ལྷ་མོའི་སྤྲིན་སྤྲོས་ནས་ལྷ་ལ་ལྷས་མཆོད་པའི་ཚུལ་གྱིས་ནམ་མཁའ་རབ་འབྱམས་གང་བར་དམིགས་ནས་འབུལ་བ་སྟེ། དེ་ཡང་རང་གཞུང་གི་འབུལ་ཚིག་དང་སྦྲགས། སོ་སོའི་མཆོད་རྫས་ཐོགས་པའི་སྤྲུལ་པའི་ལྷ་མོ་རྣམས་ཀྱིས་མཆོད་ཅིང་གནས་སོ་སོར་ཐིམ་པར་མོས་པ་སྟེ། དྭངས་བསིལ་མངར་བའི་ཞལ་སྐྱེམས་མཆོད་ཡོན། ཕྱག་ཞབས་བསིལ་བྱེད་རྙོག་བྲལ་གྱི་ཞབས་བསིལ། རྣམ་བཀྲའི་མེ་ཏོག་སྤྱན། དྲི་ཞིམ་བདུག་སྤོས་ཤང་། སྣང་གསལ་མར་མེ་སྤྱན། དྲི་ལྡན་བསིལ་ཆབ་ཐུགས་ཀ བཅུད་ལྡན་ཞལ་ཟས་ལྗགས། སྙན་པའི་རོལ་མོ་སྙན་དབང་རྣམས་ལ་མཆོད་པ་སྟེ། དེ་དག་གི་མཚོན་དོན་ཀྱང་། རིག་པའི་ཡེ་ཤེས་ཉིད་རྣམ་པར་བཀྲ་བས་མེ་ཏོག དམིགས་མེད་ཀྱི་སྙིང་རྗེས་རྟོག་པ་སྲེག་པས་སྤོས། ལྷན་སྐྱེས་འོད་གསལ་གྱིས་མ་རིག་པའི་མུན་པ་སེལ་བས་མར་མེ། ཤིན་ཏུ་ཟབ་པའི་དོན་དབྱིངས་རིག་སྤྲོས་བྲལ་གྱི་ཡེ་ཤེས་སུ་ཤར་བས་ཆོས་ཐམས་ཅད་ལ་ཁྱབ་པས་བྱུག་པ། དེས་ཀུན་རྟོག་གི་དྲི་མ་འཁྲུད་པས་ཞབས་བསིལ། ཏིང་འཛིན་ཟག་མེད་ཀྱི་མྱོང་བ་ནི་ཞལ་ཟས་དང་མཆོད་ཡོན། གྲགས་སྟོང་གཞོམ་མེད་ཀྱི་སྔགས་སྒྲ་ནི་རོལ་མོའོ། །དེ་བཞིན་དུ་ཕྱི་དབང་ལྔའི་ཡུལ་དུ་བདེ་བ་བསྐྱེད་གཟུགས་སྒྲ་དྲི་རོ་རེག་བྱ་སྟེ་འདོད་ཡོན་ལྔ། ནང་ཡབ་ཡུམ་སྙོམས་པར་འཇུག་པ་ན་ཕན་ཚུན་དགྱེས་པས་ལྟ་བ་གཟུགས། སྦྱོར་བ་ཧ་སིའི་སྒྲ། བདེ་བས་ཚིམ་པའི་དྲི། ཞུ་བདེ་མྱོང་བའི་རོ། མཁའ་གསང་དང་དཀར་དམར་རེག་པའི་རེག་བྱ། དེས་ཕྱི་ནང་གི་ཆོས་ཐམས་ཅད་བདེ་སྟོང་དུ་འཆར་བའི་ཆོས་ཏེ་ནང་གི་འདོད་ཡོན་དང་། དགའ་མཆོག་ཁྱད་པར་ལྷན་སྐྱེས་ཀྱི་དགའ་བ་བཞི་བཞི་ཅུ་དྲུག་གི་ཉམས་ཀྱི་འགྱུར་བ་ལྷ་མོའི་ཕྱག་རྒྱར་སྣང་བ་རྣམས་སོ། །གཉིས་པ་ནང་མཆོད་ལ་ཐུན་ཁྱད་གཉིས་ཀྱི། ཐུན་མོང་བ་ནི། མཚོན་བྱེད་བམ་གཙང་ལ་ལ་རང་བྱུང་དུ་གནས་པའི་དམ་རྫས་མིག་ལྕེེ་རྣ་བ་སྣ་སྙིང་སྟེ་དབང་ལྔའི་མེ་ཏོག ཚིལ་ཆེན་བསྲེགས་གསུར་གྱི་བདུག་སྤོས། ཞུན་ཆེན་རོ་སྐྲ་ལ་སྦར་བའི་མར་མེ། མཁྲིས་པའི་དྲི་ཆབ། ཤ་ཆེན་གྱི་ཞལ་ཟས་སོགས་ཏེ། དེ་དག་གིས་མཚོན་དོན་ལུས་ཅན་རྣམས་ལ་རང་བྱུང་དུ་གྲུབ་པའི་རྫས་སྒོ་ལྔའི་རྣམ་ཤེས་ཀྱི་རྟེན་གཟུགས་ཅན་དྭངས་པའི་དབང་པོ་ལྔ་ནི་རང་ཡུལ་ལ་མ་འདྲེས་པར་དབང་བྱེད་པས་རྣམ་བཀྲའི་མེ་ཏོག ཚིལ་ཆེན་གྱི་རྒྱུ་ཤ་སྟེ་དེ་ཉིད་ཀྱི་སྙིགས་མ་དྲིར་འགྱུར་བས་ཚིལ་གསུར་གྱི་སྤོས། ཞུན་ཆེན་གྱི་འབྲས་བུ་ཁུ་བ་ལས་ལུས་ཀྱི་བཀྲག་མདངས་སུ་འགྱུར་བས་ཞུན་མེ། མཁྲིས་པ་ནི་དྲི་མཛོད་ཡིན་པས་བྱུག་པ། བཟའ་བཏུང་སོགས་འཇུ་བའི་དྭངས་མ་ཁྲག་དང་ཤར་སྨིན་ཏེ་ཕུང་ཁམས་སྐྱེ་མཆེད་ཀྱི་ལྷ་རྣམས་གསོ་བར་བྱེད་པའི་ཕྱིར་ཞལ་ཟས་སོ། །གཞན་ཡང་ཕྱི་ནང་གི་འདོད་ཡོན་གྱི་མཆོད་རྫས་དངོས་སུ་བཤམས་པ་དང་། ཡིད་ཀྱིས་སྤྲུལ་པ་དང་། བདག་པོས་མ་བཟུང་བ་དང་། སྨོན་ལམ་གྱི་སྟོབས་ལས་བྱུང་བའི་མཆོད་སྤྲིན་བསམ་གྱིས་མི་ཁྱབ་པ་བློས་བརྟགས་ཏེ་འབུལ་བའོ། །ནང་མཆོད་ཁྱད་པར་བ་ལ་སྨན་གཏོར་རཀྟ་གསུམ་ལས། སྨན་མཆོད་ནི། འཁོར་འདས་ཀྱི་ཆོས་ཐམས་ཅད་མ་བཅོས་རང་བྱུང་གི་བདུད་རྩིར་གནས་པའི་ཕྱིར་རྩ་བརྒྱད་ཡན་ལག་སྟོང་སྦྱར་ཚུལ་བཞིན་སྒྲུབ་པའི་དམ་རྫས་ཆོས་ཉིད་མཉམ་པའི་ངང་ལས་བྱུང་ཞིང་གཉིས་འཛིན་གྱི་རྟོག་པ་སེལ་བའི་བདུད་རྩི་སྨན་གྱི་བཅུད་ལེན་རིགས་ལྔ་ཡེ་ཤེས་ལྔ་ཡི་ངོ་བོར་གྲུབ་པ་ཉིད་མཐེབ་སྲིན་ཉི་ཟླའི་ག འུས་བཅུས་ཏེ་ཕུལ་བས་ལྷ་རྣམས་མཉེས་པར་མོས་པ་དང་། ལྷ་རྣམས་ཀྱི་གནས་གསུམ་ནས་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་ཡི་གེ་འབྲུ་གསུམ་གྱི་རྣམ་པར་འཕྲོས་ནས་བདུད་རྩིའི་སྟེང་དུ་གནས་པ་མཐེབ་སྲིན་གྱིས་བླངས་ཏེ་རང་གི་གནས་གསུམ་དང་ལྕེ་ལ་བཞག་པས་རྡོ་རྗེ་གསུམ་གྱི་དངོས་གྲུབ་ཐོབ་པར་མོས་པ་སྟེ། སྦས་དོན་གྱི་དབང་དུ་བྱས་ན་བདུད་རྩི་ལྔ་ནི་ཕུང་ལྔའི་དྭངས་མ། ཤ་ལྔ་ནི་དབང་ལྔའི་དྭངས་མ་སྟེ། དེ་དག་འཛག་མེད་དུ་བཅིངས་པ་ལས་འཆི་མེད་གྲུབ་པས་ན་བདུད་རྩིའོ། །གཏོར་མའི་མཆོད་པ་ནི། ཕྱི་སྣོད་རྣམ་དག་དབྱིངས་ཀྱི་གཏོར་གཞོང་དུ། ནང་བཅུད་གཏོར་རྫས་བཟའ་བཏུང་གི་དངོས་པོ་མཁོ་དགུའི་ལོངས་སྤྱོད་འདོད་ཡོན་ལྔའི་སྤྲིན་ཆེན་པོར་སྤྲོས་ཏེ་ཕུལ་བས། ལྷ་རྣམས་ཀྱི་ལྗགས་རྡོ་རྗེའི་རྣམ་པ་ཅན་ལས་བྱུང་བའི་འོད་ཀྱི་སྦུ་གུས་བཅུད་དྲངས་ཤིང་གསོལ་བས་ཐུགས་དམ་བསྐང་བར་མོས་པ་སྟེ། ངེས་དོན་དུ་ཡུལ་ལྔའི་བཟའ་བ་དང་། རྣམ་ཤེས་ཀྱི་བཏུང་བ་རྣམས་འོད་གསལ་གྱི་ཀློང་དུ་གསོལ་ཞིང་ཐིམ་པར་མོས་པའོ། །རཀྟའི་མཆོད་པ་ནི། ཉོན་མོངས་པའི་རྩ་བ་ནི་ཁམས་གསུམ་དུ་ཆགས་ཤིང་ཞེན་པའི་ཀུན་རྟོག་སྟེ། དེས་འཁོར་བ་འགྲུབ་པར་བྱེད་པས་ན་འཁོར་བ་རྩད་ནས་གཅོད་པའི་ཕྱིར་ཆགས་རྟོག་ཐམས་ཅད་ཁྲག་གི་རྣམ་པར་བསྡུས་ནས་ཆགས་མེད་བདེ་ཆེན་གྱི་ངང་དུ་བཅོམ་སྟེ་དྭངས་མའི་རྒྱ་མཚོར་འཁྱིལ་བ་འཁོར་བ་སྐྱེ་མེད་ཀྱི་དབྱིངས་སུ་གྲོལ་བའི་དམ་རྫས་ཉིད་འཁོར་འདས་མཉམ་ཉིད་ཀྱི་དབྱིངས་སུ་འབུལ་བ་སྟེ། ངེས་དོན་དུ་མཁའ་གསང་གི་རྩེར་ཉི་ཟླའི་འགྲོས་བཅིངས་པས་འཁོར་བའི་རྒྱུན་གཅོད་པར་བྱེད་པའོ། །དེ་ལྟར་ཕུལ་བས་འཁོར་བ་ཁྲག་གི་རྒྱ་མཚོ་ལྷག་མེད་དུ་གསོལ་བས་འཁོར་བའི་གནས་སྟོང་པར་མོས་པའོ། །གསུམ་པ་གསང་མཆོད་ལ་གཉིས་ལས། སྦྱོར་མཆོད་ནི། སྣང་བ་ཐམས་ཅད་ཐབས་ཡབ་ཀྱི་རང་བཞིན། སྟོང་པ་ཐམས་ཅད་ཤེས་རབ་ཡུམ་གྱི་ཕྱག་རྒྱར་གནས་པས། དེ་གཉིས་ངོ་བོ་དབྱེར་མི་ཕྱེད་པར་གནས་པ་ནི་ཆོས་ཐམས་ཅད་རང་བཞིན་གཉིས་སུ་མེད་པར་སྦྱོར་བ་སྟེ་སྣང་སྲིད་ཡེ་སྦྱོར་ཀྱི་དགོངས་པ་ཡིན་ལ། དེའི་རྩལ་སྣང་རང་ཉིད་ལྷ་ཡབ་ཡུམ་དུ་གསལ་ཏེ་འདུ་ཤེས་སུམ་ལྡན་གྱིས་མཉམ་པར་སྦྱར་བས་ཡས་བབས་དང་མས་བརྟན་གྱི་དགའ་བ་བཞི་ལུགས་འབྱུང་ལྡོག་གི་སྦྱོར་བས་བདེ་སྟོང་གཉིས་སུ་མེད་པའི་མཆོད་སྤྲིན་ཟག་བྲལ་སྒྱུ་མའི་བཀོད་པས་ཕུང་ཁམས་སྐྱེ་མཆེད་གདོད་ནས་དག་པའི་ལྷ་ཡི་འཁོར་ལོར་རྫོགས་པ་རྣམས་མཉེས་པར་བྱེད་པའོ། །སྒྲོལ་མཆོད་ནི། བསྒྲལ་བྱ་བདག་ཏུ་ལྟ་བའི་དབང་གིས་གཟུང་འཛིན་ལ་མངོན་པར་ཞེན་པའི་རྒྱུ་ལས་བྱུང་བའི་ཉོན་མོངས་པའི་དགྲ་བོ་ཐར་པ་ལ་བར་དུ་གཅོད་ཅིང་འབྲས་བུ་ཁམས་གསུམ་གྱི་འཁོར་བར་འཆིང་བྱེད་ཡིན་པས་དེ་ཐམས་ཅད། སྒྲོལ་བྱེད་གཉིས་སུ་མེད་པའི་ཡེ་ཤེས་རང་རིག་པའི་ངོ་བོར་རྫོགས་པའི་མཚོན་ཆ་ཆེན་པོས། རིག་སྟོང་སྐྱེ་མེད་གདོད་ནས་དག་པའི་ཆོས་དབྱིངས་མཉམ་པ་ཆེན་པོའི་ཀློང་དུ་བསྒྲལ་བ་ནི་སྲིད་གསུམ་ཡེ་སྒྲོལ་གྱི་དགོངས་པ་ཡིན་ལ། དེའི་རྩལ་སྣང་དེ་ལྟར་མ་རྟོགས་པའི་འགྲོ་བ་རྣམ་སྨིན་རྩུབ་མོས་འཕངས་པའི་བདུད་དང་རུ་ཏྲ་མ་རུངས་ཞིང་བཅུའི་ཚོགས་རྣམས་ཀུན་སློང་སྙིང་རྗེ་ཆེན་པོའི་རྣམ་པ་སྒྱུ་མ་ལྟ་བུའི་ཚུལ་གྱིས་བརྟེན་པ་དབྱིངས་སུ་བསྒྲལ་ཞིང་རྣམ་ཤེས་བདེ་བ་ཆེན་པོའི་འཁོར་ལོར་སྦྱར་ཏེ་དུག་གསུམ་སྙིགས་མ་ཤ་ཁྲག་རུས་པའི་ཕུང་པོ་རྣམས་ལྷ་རྣམས་ཀྱི་ཞལ་དུ་ཕུལ་བས་དགྱེས་པར་མོས་པའོ། །བཞི་པ་དེ་ཁོ་ན་ཉིད་ཀྱི་མཆོད་པ་ནི། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་མཉམ་པ་ཉིད་སྤྲོས་བྲལ་ཐིག་ལེ་ཉག་གཅིག་གི་ངང་དུ་རྫོགས་པས། གང་ལ་མཆོད་པར་བྱ་བའི་ཡུལ་དང་། གང་གིས་མཆོད་པར་བྱེད་པའི་གང་ཟག་དང་། ཇི་ལྟར་མཆོད་པའི་ཚུལ་གསུམ་གཉིས་མེད་བྱང་ཆུབ་སེམས་ཀྱི་དཀྱིལ་འཁོར་དུ་དབྱེར་མེད་པར་རོ་མཉམ་པས་ཅིར་སྣང་ཀུན་བཟང་སྤྱོད་པའི་ཕྱག་རྒྱ་ཟུང་འཇུག་བདེ་བ་ཆེན་པོར་འབུལ་བ་སྟེ་མཆོད་པ་ཀུན་གྱི་ནང་ནས་བླ་ན་མེད་པའོ། །གསུམ་པ་བསྟོད་པ་ནི། ཀརྨ་མཱ་ལེར། རྡོ་རྗེ་གསོར་ཞིང་དྲིལ་བུ་གསིལ། །རིགས་ལྔའི་ཕྱག་རྒྱ་དྲིལ་སྟབས་བྱ། །ཞེས་པ་ལྟར་སོ་སོའི་ཕྱག་རྒྱའི་མཐར་ཐལ་མོ་སྦྱར་བས་བཏུད་དེ་ཆེ་བའི་ཡོན་ཏན་རྗེས་སུ་དྲན་པའི་ངང་ནས་བསྟོད་པ་སྟེ། དེ་ཡང་སྤྱི་ཙམ་དུ། གདོད་མ་ནས་རང་བཞིན་གྱིས་དག་པའི་ཆོས་ཀྱི་དབྱིངས་ཉིད་གློ་བུར་གཟུང་འཛིན་ཀུན་རྟོག་གི་སྤྲོས་པ་མཐའ་དག་དང་བྲལ་བས་དག་པ་གཉིས་ལྡན་མཐར་ཐུག་པ་སངས་རྒྱས་ཆོས་ཀྱི་སྐུ་མཉམ་པ་ཆེན་པོ་ལས་མ་གཡོས་བཞིན་དུ། གང་འདུལ་གདུལ་བྱའི་ངོ་ཁར་ཡེ་ཤེས་ཆེན་པོ་རྟགས་ཀྱི་ཕྱག་རྒྱར་ཤར་བ་ཞི་བ་མཚན་དཔེས་བརྒྱན་པ་དང་ཁྲོ་བོ་འཇིགས་རུང་གར་གྱིས་སྒེག་པ་སོགས་གཙོ་འཁོར་གྱི་བཀོད་པ་སྣ་ཚོགས་སུ་སྟོན་ཡང་དོན་དམ་པར་དེ་དང་དེའི་ངོ་བོར་རང་མཚན་དུ་གྲུབ་པ་རྡུལ་ཙམ་ཡང་མི་མངའ་བ་དང་། དབྱངས་ཀྱི་ཡན་ལག་རྫོགས་པའི་གསུང་གཅིག་གིས་མཐའ་ཀླས་པའི་གདུལ་བྱར་ཆོས་སྒོ་བསམ་ལས་འདས་པ་རང་རང་གི་མོས་པ་བཞིན་དུས་སྐད་ཅིག་མ་གཅིག་ལ་སྟོན་ཡང་དོན་དམ་པར་སྒྲ་ཚིག་བྱ་རྩོལ་དང་བྲལ་བ་གཞོམ་མེད་རྡོ་རྗེ་ནཱ་དའི་སྒྲ་དབྱངས་དང་། ཇི་ལྟ་ཇི་སྙེད་མཁྱེན་པའི་ཡེ་ཤེས་སྐད་ཅིག་མ་གཅིག་གིས་དུས་གསུམ་གྱི་ཤེས་བྱའི་རྣམ་པ་མཐའ་དག་མངོན་སུམ་དུ་གཟིགས་ཀྱང་ངོ་བོ་གཟིགས་བྱ་གཟིགས་བྱེད་ལས་འདས་པའི་རང་བཞིན་མཉམ་པ་ཉིད་ཀྱི་ངང་དུ་རྟག་ཏུ་མཉམ་པར་བཞག་པ་ལས་མི་གཡོ་བ་དང་། སྟོབས་བཅུ་མི་འཇིགས་མ་འདྲེས་ལ་སོགས་པའི་ཡོན་ཏན་གྱི་ཆོས་བསམ་མི་ཁྱབ་པ་ལ་དབང་འབྱོར་ཡང་ངོ་བོ་ཟག་མེད་ཀྱི་དབྱིངས་དང་དུས་གསུམ་འདུ་འབྲལ་མེད་པར་དབྱེར་མེད་རོ་མཉམ་པ་དང་། གང་འདུལ་གྱི་ཕྲིན་ལས་བསམ་གྱིས་མི་ཁྱབ་པ་ཇི་སྲིད་འཁོར་བའི་མཐའ་གཏུགས་པ་དེ་སྲིད་དུ་མཐའ་ཀླས་གདུལ་བྱའི་ཡུལ་ལ་རྟག་ཁྱབ་ལྷུན་གྲུབ་ཏུ་འཇུག་ཀྱང་འབད་རྩོལ་རྣམ་རྟོག་གི་གཡོ་བ་རྡུལ་ཙམ་མི་མངའ་བ་སྟེ་སྐུ་གསུང་ཐུགས་ཡོན་ཕྲིན་ལས་མི་ཟད་པ་རྒྱན་གྱི་འཁོར་ལོའི་ཆེ་བའི་ཡོན་ཏན་དང་། དེའི་རྩལ་ལས་སྣང་བའི་རྟེན་དང་བརྟེན་པའི་དཀྱིལ་འཁོར་ཡོངས་རྫོགས་ཀྱི་བརྡ་དོན་རྟགས་ཀྱི་ཁྱད་པར་རྣམས་རང་རང་གི་གཞུང་ནས་ཇི་སྐད་བསྟན་པ་བཞིན་རྗེས་སུ་དྲན་པའི་ངང་ནས་རྡོ་རྗེའི་གླུས་བསྟོད་པ་སྟེ། དོན་དམ་པར་ཐོག་མཐའ་མེད་པའི་བྱང་ཆུབ་ཀྱི་སེམས་སྤྲོས་བྲལ་བདེ་བ་ཆེན་པོ་རང་སེམས་གཉུག་མ་ལྷན་ཅིག་སྐྱེས་པའི་ཡེ་ཤེས་ཉིད་རྣམ་པ་རྟགས་ཀྱི་ཕྱག་རྒྱ་དཀྱིལ་འཁོར་གྱི་འཁོར་ལོར་ཡོངས་སུ་སྣང་བས་ན་བསྟོད་ཡུལ་བསྟོད་མཁན་ཇི་ལྟར་བསྟོད་པའི་ཚུལ་གསུམ་ཀའང་རང་བཞིན་མཉམ་པ་ཉིད་དུ་ཤེས་པར་བྱ་བ་ནི་ཅིས་ཀྱང་གལ་ཆེའོ། །ལྔ་པ་དམིགས་པའི་གཙོ་བོ་ལྷའི་སྣང་ཞེན་ལ་བསླབ་པ་ལ་བཞི། རྣམ་པ་གསལ་བ། ང་རྒྱལ་བརྟན་པ། དག་པ་དྲན་པ། བདེ་གསལ་སྟོང་པ་ཉིད་དུ་འཆར་བ་ལ་བསླབ་པའོ། །དང་པོ་ནི། ངེས་རྫོགས་མཚན་ཉིད་པའི་དབང་དུ་བྱས་ན། ལྷ་ལ་སེམས་བཟུང་བ། འགྱུར་བའི་སྐྱོན་བཅོས་པ། ལྷ་དང་དབྲལ་བ། ལྷ་ལམ་དུ་བསླང་བ། ལྷ་དང་བསྲེ་བ། ལྷ་དོན་ལ་སྦྱར་བ། ལྷ་ལམ་དུ་ཁྱེར་བ་དང་བདུན་ངེས་པ་དོན་གྱི་རྡོ་རྗེ་འཆང་ཆེན་པོ་རྗེ་བླ་མ་བཀའ་དྲིན་མཚུངས་མེད་མཚན་བརྗོད་དཀའ་བ་པདྨ་གར་དབང་བློ་གྲོས་མཐའ་ཡས་ཀྱི་ཞལ་སྔ་ནས་སྩལ་པའི་བསྙེན་སྒྲུབ་སྤྱི་གཅེས་རབ་གསལ་ནོར་བུའི་སྒྲོན་མེ་ལས་ཞིབ་པར་གསུངས་པ་བཞིན་ཤེས་པར་བྱ་སྟེ། འདི་ཉིད་དེའི་ཟུར་འདེབས་ཀྱི་ཞབས་ཏོག་ཏུ་བྱས་པ་ཡིན་པའི་ཕྱིར་འདིར་ཡི་གེས་འཇིགས་ལ། དོན་གྱི་མདོ་འགག རྟེན་དང་བརྟེན་པའི་དཀྱིལ་འཁོར་ཡོངས་སུ་རྫོགས་པ་དུས་གཅིག་ཅར་དུ་གསལ་བཏབ་སྟེ་གཙོ་བོའི་སྐུའི་རྣམ་པ་སྤྱི་ལ་སེམས་འཛིན་པ་དང་། བྱེ་བྲག་དབུའི་གཙུག་ཏོར་ནས་གདན་ཁྲིའི་བར་སྐུ་དང་ཕྱག་མཚན་བརྒྱན་ཆས་ཕྲ་མོ་རེ་རེ་བཞིན་སོ་སོ་ནས་གསལ་གདབ། དེ་ལ་གསལ་སྣང་སྐྱེས་པ་ན་ཐམས་ཅད་དུས་གཅིག་ཏུ་གསལ་གདབ་པ་སོགས་ནས་རིམ་གྱིས་རྟེན་དང་བརྟེན་པའི་དཀྱིལ་འཁོར་ཡོངས་སུ་རྫོགས་པ་དྭངས་པའི་མཚོ་ལ་གཟའ་སྐར་ཤར་བ་ལྟར་སེམས་རྩེ་གཅིག་ཏུ་གཏད་དེ་མཉམ་པར་འཇོག དེ་ཡང་ཐོག་མར་རང་གི་སེམས་གང་གཟུང་སླ་ས་ནས་བརྩམས་ཏེ་བསྒོམ་པ་ལས་གོ་རིམ་དང་ཐུན་གྲངས་སོགས་མཐའ་གཅིག་ཏུ་ངེས་པ་མེད་དེ་རང་གི་ཁམས་དང་བསྟུན། དེ་ལྟར་གོམས་པས་མཐར་གསལ་བརྟན་གྱི་ཚད་བརྒྱད་དང་ལྡན་པ་ལ་བསླབ་པར་བྱ་སྟེ། དེ་ལ་གསལ་བའི་ཚད་བཞི་ནི། སྤྱན་གྱི་དཀར་ནག་ཚུན་ཆད་མ་འདྲེས་པར་གསལ་བས་ས་{སལ} ལེ། རིག་པའི་གསལ་ངར་དང་བྲལ་བའི་བྱིང་ཉམས་ཅན་མ་ཡིན་པར་གསལ་སྟོང་སིང་{ སེང}བག་དང་བཅས་པའི་རིག་པའི་ངར་དང་ལྡན་པས་སིང་ངེ་། སེམས་མེད་བེམ་པོའི་རྣམ་པ་འཇའ་ཚོན་ལྟ་བུ་མ་ཡིན་པར་བ་སྤུའི་ཁུང་བུ་དང་དབུ་སྐྲའི་ཉག་མ་ཚུན་ཆད་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་ཟིན་པས་དབང་ཤེས་དྭངས་པའི་ཡོན་ཏན་བརྒྱ་ཕྲག་ཏུ་འཆར་ཞིང་བཀྲ་ཧྲིག་གེར་བཞུགས་པས་ལྷག་གེ། དེ་ལྟ་བུའི་སྐུ་དེ་ཡང་དེ་ལྟར་ཡིན་ནོ་དང་ཡོད་དོ་ཙམ་གྱི་རྗེས་དཔག་གི་བློ་རྟོག་མ་ཡིན་པར་ཡིད་ངོར་མངོན་སུམ་ལྟ་བུར་འཆར་བས་ལྷང་ངེ་བ་སྟེ་བཞིའོ། །བརྟན་པའི་ཚད་བཞི་ནི། ལེ་ལོ་དང་བརྗེད་ངེས་སོགས་ཀྱིས་མི་གཡོ། རབ་རིབ་དང་མོག་མོག་པོར་གྱུར་པ་སོགས་ཀྱིས་མི་འགྱུར། ཡུན་རིང་དུ་མཉམ་པར་བཞག་ཀྱང་རྣམ་རྟོག་ཕྲ་མོ་ཙམ་གྱིས་ཀྱང་མི་བརྫི་བས་མངོན་པར་མི་འགྱུར་བ། སྐུ་མདོག་དང་ཞལ་ཕྱག་བྱོན་བཞུགས་འོད་ཟེར་སྤྲོ་བསྡུ་སོགས་ཇི་ལྟར་བསྒོམ་ཡང་དེ་ལྟར་བསྒྱུར་དུ་བཏུབ་པ་སྟེ་བཞིའོ། །དེ་ལྟར་གསལ་བརྟན་གྱི་ཚད་བརྒྱད་དང་ལྡན་པ་ལ་རྣམ་པ་གསལ་བ་ཞེས་བྱའོ། །གཉིས་པ་ང་རྒྱལ་བརྟན་པ་ནི། ཞིབ་པར་གོང་དུ་བསྟན་པའི་གཞི་འབྲས་སྦྲེལ་བའི་ང་རྒྱལ་བྱ་ཚུལ་དེ་ཡིན་ལ། འདིར་དོན་གྱི་མདོ་འགག སྐྱོན་ཀུན་ཟད་ཡོན་ཏན་ཀུན་རྫོགས། སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྤྱི་དཔལ་བསྒོམ་བྱའི་ལྷ་གང་ཡིན་པ་དེ་ཉིད་ངའོ་སྙམ་དུ་ང་རྒྱལ་བཟུང་བ་སྟེ། དེ་ཡང་མ་ཡིན་པ་ལ་ཡིན་པར་བཟུང་བ་མིན། ཡིན་པ་ལ་ཡིན་པར་ཤེས་པའི་ངེས་ཤེས་ཏེ། གཉུག་མའི་སྒོ་གསུམ་རྡོ་རྗེ་གསུམ་གྱི་ངོ་བོར་ཡེ་ནས་གནས་པས་དེ་ལས་ཤར་བའི་རྟོག་ཚོགས་ཕུང་ཁམས་སྐྱེ་མཆེད་ཀྱི་ཆོས་འདི་ཐམས་ཅད་ཀྱང་ཡེ་ནས་དག་པ་ལྷ་ཡི་ཕྱག་རྒྱ་ལས་མི་འདའ་བས་ན། བསྒོམ་བྱའི་ལྷ་ཡང་དེ་ལས་གཞན་དུ་མ་གྲུབ་པའི་ཕྱིར། བསྒོམ་བྱའི་ལྷ་དང་སྒོམ་བྱེད་ཀྱི་མཁན་པོ་རང་བཞིན་གཉིས་སུ་མེད་པར་རྟོགས་པའི་ངེས་ཤེས་སམ་ང་རྒྱལ་གྱི་རྒྱུན་ལྷང་ངེ་བ་དེ་ལ་འཛིན་མེད་ཀྱི་རྩིས་བཏབ་ནས་གཉུག་མར་ཁྱེར་ཤེས་ན་ཡང་དག་པའི་ཉེ་ལམ་དུ་འགྲོ་ཞིང་། དེ་ཡང་སྦྱང་བྱ་ལ་ཐ་མལ་མ་དག་པའི་སྣང་བ་དང་། མ་དག་པར་ཞེན་པའི་ང་རྒྱལ་ལམ་འཛིན་པ་ཞིག་ཡོད་པ་དེ། སྦྱོང་བྱེད་སྔ་མ་རྣམ་པ་གསལ་བ་དང་དག་པ་དྲན་པ། ཕྱི་མ་ང་རྒྱལ་ལ་བསླབ་པའི་ཐབས་ཀྱིས་རིམ་པར་དག་པའི་གསལ་སྣང་དང་དག་པའི་ང་རྒྱལ་དུ་སྒྱུར་བ་ཡིན་ནོ། །གསུམ་པ་དག་པ་དྲན་པ་ནི། གོང་དུ་ལྷ་བསྐྱེད་པའི་སྐབས་སུ་བསྟན་པའི་རྟེན་དང་བརྟེན་པའི་དག་པ་སྤྱི་དང་། བྱེ་བྲག་ཏུ་བསྒོམ་བྱའི་ལྷ་ཞལ་གཅིག་པ་ནི། ཆོས་སྐུ་ཐིག་ལེ་ཉག་གཅིག གསུམ་པ་ནི། སྐུ་གསུམ་མམ་རྣམ་ཐར་གསུམ། ཕྱག་གཉིས་པ་ནི་ཐབས་དང་ཤེས་རབ་ཟུང་དུ་འཇུག་པ། བཞི་པ་ནི་ཚད་མེད་བཞིས་འཕྲོ་བའི་དོན་མཛད་པ། དྲུག་པ་ནི་ཡེ་ཤེས་ལྔ་དག་བསམ་གྱིས་མི་ཁྱབ་པ་སྟེ་ཡེ་ཤེས་དྲུག ཞབས་གཉིས་པ་ནི་སྲིད་ཞིའི་མཐའ་ལ་མི་གནས་པ། བཞི་པ་ནི་རྫུ་འཕྲུལ་གྱི་རྐང་པ་བཞི། སྐུ་མདོག་དཀར་པོ་ནི་ཉེས་པའི་སྐྱོན་གྱིས་མ་གོས་པ་དང་མེ་ལོང་ལྟ་བུའི་ཡེ་ཤེས། སེར་པོ་ནི་ཆེ་བའི་ཡོན་ཏན་རྒྱས་པ་དང་མཉམ་ཉིད་ཡེ་ཤེས། དམར་པོ་ནི་གདུལ་བྱའི་དོན་ལ་ཐུགས་རྗེས་རྗེས་སུ་ཆགས་པ་དང་སོར་རྟོགས་ཡེ་ཤེས། ལྗང་གུ་ནི་ཐོགས་པ་མེད་པའི་ཕྲིན་ལས་ལྷུན་གྱིས་གྲུབ་པ་དང་བྱ་གྲུབ་ཡེ་ཤེས། མཐིང་གའམ་ནག་པོ་ནི་ཆོས་ཉིད་འགྱུར་བ་མེད་པ་དང་ཆོས་དབྱིངས་ཡེ་ཤེས། ཕྱག་མཚན་ཡང་རྡོ་རྗེ་འདུས་མ་བྱས་པ། འཁོར་ལོ་ཉོན་མོངས་གཅོད་པ། རིན་པོ་ཆེ་ཡོན་ཏན་འབྱུང་བ། པདྨ་སྐྱོན་གྱིས་མ་གོས་པ། རྒྱ་གྲམ་མམ་རལ་གྲི་ཕྲིན་ལས་ཐོགས་པ་མེད་པ། དྲིལ་བུ་ནི་དབྱིངས་སྐྱེ་མེད་སྟོང་པ་ཉིད། ཀ་པཱ་ལ་ནི་རྣམ་པར་མི་རྟོག་པའི་ཡེ་ཤེས་བདེ་བ་སྐྱོང་བྱེད། ཁ་ཊྭཱྃ་ག་ནི་དུག་གསུམ་སྐུ་གསུམ་གྱི་ཀློང་དུ་སྒྲོལ་བ། གྲི་གུག་ནི་སྐྱེ་འཆི་རྩད་ནས་གཅོད་པ། དུང་ཆེན་ནི་ཡེ་ཤེས་ཆེན་པོས་བདུད་བཞི་བཅོམ་ནས་འཁོར་བ་དབང་དུ་སྡུད་པའམ་ཞལ་དུ་སྟོབ་པ་སོགས་དང་། ལྷ་ཡབ་ཏུ་སྣང་བ་ནི་ཐབས་མི་འགྱུར་བའི་བདེ་བ་ཆེན་པོ། ཡུམ་དུ་སྣང་བ་ནིི་ཤེས་རབ་རྣམ་ཀུན་མཆོག་ལྡན་གྱི་སྟོང་པ་ཉིད། ཡབ་ཡུམ་ཞལ་སྦྱོར་བ་ནི་བདེ་སྟོང་འདུ་འབྲལ་མེད་པ་སོགས་སོ་སོའི་དག་སྦྱོར་རང་རང་གི་གཞུང་ལས་བསྟན་པ་བཞིན་བསྒོམ་པར་བྱ་བ་ཡིན་ལ། དོན་གྱི་མདོ་འགག་ནི། གཉུག་མ་ཆོས་ཉིད་ཀྱི་སྟེང་ན་སངས་རྒྱས་ཀྱི་ཡོན་ཏན་རྣམས་རང་བཞིན་ལྷུན་གྲུབ་ཏུ་བཞུགས་པ་ལས། ཡོན་ཏན་གང་དང་གང་ཞིག་ལྷ་དེ་དང་དེའི་ངོ་བོར་གདོད་ནས་དག་པ་སྟེ། མདོར་ན་རང་གི་རྟོག་ཚོགས་ལྷར་དག ལྷ་ཡེ་ཤེས་སུ་དག ཡེ་ཤེས་ནི་གཟུང་འཛིན་མེད་པས་རབ་ཏུ་ཕྱེ་བ་སྟེ་སངས་རྒྱས་ཆོས་ཀྱི་སྐུ་ཡིན། ཆོས་སྐུ་ལ་ཞལ་ཕྱག་སོགས་ཀྱི་མཚན་མ་རྡུལ་ཙམ་མེད་ཀྱང་བསམ་གྱིས་མི་ཁྱབ་པའི་ཡོན་ཏན་རྣམས་ཞལ་ཕྱག་རྒྱན་ཆའི་རྣམ་པར་ཤར་བས་ལྷུན་གྱིས་གྲུབ་པའི་ཕྲིན་ལས་ལ་དབང་སྒྱུར་བ་ཡིན་པས། དེ་ལྟར་ཏིང་ངེ་འཛིན་གྱིས་སྒོམ་པའི་ལྷ་དེ་ཡང་རྣམ་པར་དག་པ་སྟེ། རང་རྒྱུད་དངོས་པོར་གྲུབ་པ་རྡུལ་ཙམ་ཡང་མེད་དོ་སྙམ་པ་སྟེ། དག་པ་དེ་དག་ཀྱང་མངོན་རྟོག་ནམ་སྒོམ་གྱི་ཚེ་དྲན་པར་བྱ་དགོས་མོད། ཁྱད་པར་འདིར་དག་པ་རྣམས་ལ་དེར་མོས་པ་ཤུགས་དྲག་པོས་བསླབ་པ་ཡིན་ཞིང་། དག་པ་དེ་དག་རེ་རེ་བཞིན་མོས་པ་བརྟན་པོ་རེ་བཞག་པའི་མཐར་སྔར་བཤད་ཀྱི་ལྷའི་རྣམ་པའི་གསལ་སྣང་དང་ང་རྒྱལ་སྦྲེལ་བའི་ཏིང་ངེ་འཛིན་ལ་མཉམ་པར་འཇོག་པ་ཡིན་ནོ། །བཞི་པ་བདེ་གསལ་སྟོང་པ་ཉིད་ཀྱི་ངང་དུ་བསླབ་པ་ནི། བསྒོམ་བྱའི་ལྷའི་དེ་ཁོ་ན་ཉིད་ནི་བདེ་གསལ་སྟོང་པ་ཉིད་ཀྱི་ཡེ་ཤེས་ཏེ། ལྷ་ཡབ་ཡུམ་རྣམས་རྗེས་ཆགས་ཀྱིས་སྙོམས་པར་འཇུག་པའི་ཏིང་ངེ་འཛིན་བསྒོམས་པས་ཞུ་བདེ་དྲངས་ཏེ། ལུས་སེམས་བདེ་བར་ཤར་བའི་ངང་ལས་ལྷ་སྐུའི་རྣམ་པ་གསལ་ཞིང་། ང་རྒྱལ་ལྷང་ངེ་བ་ལ་དེར་འཛིན་གྱིས་མ་བསླད་པར་སློབ་པའི་གནད་ཀྱིས་རྒྱས་ཐེབས་ན་དཀྱིལ་འཁོར་ཐམས་ཅད་ཆོས་སྐུར་འཆར་བར་བྱེད་པའི་ཐབས་རྨད་དུ་བྱུང་བ་སྟེ། དེ་ལྟར་མི་ནུས་ནའང་གསལ་དག་བརྟན་པའི་བསྐྱེད་རིམ་དེ་ཉིད་བདེན་འཛིན་གྱི་ཞེན་རྟོག་དང་བྲལ་ཞིང་ངོ་བོ་སྟོང་པ། རང་བཞིན་ཆུ་ཟླའམ་འཇའ་ཚོན་ལྟ་བུ་སྣང་ཡང་མཚན་མར་མ་གྲུབ་པའི་ཤེས་རབ་ཀྱིས་ཟིན་པ་ལ་བསླབ་པ་གལ་ཆེ་སྟེ་བསྐྱེད་རིམ་ལ་རྫོགས་རིམ་གྱིས་རྒྱས་ཐེབས་པས་དཀྱིལ་འཁོར་ཐམས་ཅད་ཆོས་སྐུར་འཆར་བའི་ཐབས་ཏེ། དེ་ཡང་ཀུན་རྫོ བ་ཀྱི་བསྐྱེད་རིམ་སྣང་བཅས་ཀྱིས་བསོད་ནམས་ཀྱི་ཚོགས་དང་། དེ་ཉིད་རང་བཞིན་ཡོངས་ཤེས་ཀྱི་ལྟ་བས་རྩིས་ཟིན་པའི་ཡོངས་གྲུབ་འདུས་མ་བྱས་པས་ནི་དོན་དམ་ཡེ་ཤེས་ཀྱི་ཚོགས་ཏེ་ཚོགས་གཉིས་ཟུང་འབྲེལ་གྱི་ལམ་དང་། དེར་མ་ཟད་སྣང་བ་གཟུགས་སྐུ་སྟོང་པ་ཆོས་སྐུ་སྟེ་སྐུ་གཉིས་དང་། སྣང་བ་ཀུན་རྫོབ་ཐབས། སྟོང་པ་དོན་དམ་ཤེས་རབ་སྟེ་བདེན་གཉིས་ཐབས་ཤེས་ཟུང་དུ་འཇུག་པའི་ལམ་ཚང་ལ་མ་ནོར་བ་སྟེ། སྔགས་ཀྱི་མྱུར་ལམ་ཟབ་མོའི་ཁྱད་ཆོས་སུ་ཤེས་པར་བྱའོ། །དེ་ལྟར་མ་ཤེས་པར་བསྐྱེད་རིམ་རྐྱང་པ་ལ་དངོས་མཚན་རང་རྒྱུད་པར་བཟུང་ན། བྱང་ཆུབ་ཀྱི་ལམ་དུ་མི་འགྱུར་བའི་སྟེང་འཁོར་བར་འཆིང་བྱེད་ཀྱི་སྒྲིབ་པ་རྔམ་པོ་ཆེ་ཡིན་ཏེ། ཞི་བ་རང་རྒྱུད་པར་བཟུང་ནས་བསྒོམས་ན་གཟུགས་ཁམས་ཀྱི་ལྷ་དང་། ཁྲོ་བོ་རང་རྒྱུད་པར་བསྒོམས་པས་ལས་ཀྱི་སྲིན་པོ་དང་རུ་ཏྲར་སྐྱེས་པའི་ལོ་རྒྱུས་གསང་སྔགས་ཀྱི་གླེང་གཞི་རྣམས་སུ་འབྱུང་བ་བཞིན་ནོ། །དེ་ལྟར་གསལ་དག་བརྟན་པའི་བསྐྱེད་རིམ་དེ་ཉིད་ཇི་སྲིད་སྐྱོ་ཞིང་ངལ་དུབ་ཏུ་མ་གྱུར་བར་བསྒོམ་པ་གལ་ཆེ་ཞིང་བསྒོམས་པས་སྐྱོ་བར་གྱུར་ན་དེའི་ཚེ་བཟླས་པ་ལ་འཇུག་པར་བྱ་བ་ཡིན་ནོ། །ཡང་སྤྲོས་མེད་ཀྱི་རྒྱུན་ཁྱེར་དང་ཡོ་ག་གོང་མའི་ལུགས་ཕལ་ཆེར་ལ། བྱིན་གྱིས་རློབ་ཅིང་དབང་བསྐུར་བ་ནས་བསྟོད་པའི་བར་འདི་རྣམས་མི་འབྱུང་བ་མང་ཡང་དོན་ལ་གནད་ཀྱིས་མི་འགལ་ཏེ། རང་སེམས་གཉུག་མའི་ངོ་བོར་དབྱིངས་དང་ཡེ་ཤེས་སྐུ་གསུང་ཐུགས་ཡོན་ཏན་ཕྲིན་ལས་ཏེ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་ལྷག་པ་དོན་དམ་པའི་བདེན་པ་ནི་ཡེ་ཤེས་སེམས་དཔའི་ངོ་བོ་དང་། དེའི་རྩལ་ལས་ཤར་བའི་ཕུང་ཁམས་སྐྱེ་མཆེད་ཀྱིས་བསྡུས་པའི་རྟོག་ཚོགས་ཀྱི་ཆོས་ཐམས་ཅད་ཀྱང་གདན་གསུམ་ཚང་བའི་ལྷ་ཡི་འཁོར་ལོར་ཡེ་ནས་གནས་པ་ལྷག་པ་ཀུན་རྫོབ་ཀྱི་བདེན་པ་ཡིན་ལ། དེ་ཉིད་ལམ་དུ་བྱེད་པ་རྟེན་དང་བརྟེན་པའི་དཀྱིལ་འཁོར་བསྒོམ་པ་ནི་དམ་ཚིག་སེམས་དཔའ་སྟེ་དེས་ན་དེ་གཉིས་ངོ་བོ་གསེར་དང་གསེར་གྱི་ཁ་དོག་དང་གཡུ་དང་གཡུ་ཡི་སྔོན་པོ་བཞིན་དུ་གདོད་ནས་རང་བཞིན་དབྱེར་མེད་མཉམ་པ་ཉིད་དུ་བཞུགས་པས། དེ་དང་ཚུལ་མཐུན་པར་ཏིང་ངེ་འཛིན་གྱིས་གོམས་པར་བྱེད་པ་ནི་ཏིང་ངེ་འཛིན་སེམས་དཔའ་སྟེ། དེས་ན་དེ་གསུམ་རང་བཞིན་མཉམ་པ་ཉིད་ཡིན་པས་དེ་ལྟར་གོ་ན་དམ་ཡེ་ཐ་དད་དམན་མཆོག་ཏུ་འཛིན་པའི་ཞེན་རྟོག་མི་འབྱུང་ལ། དེ་མ་བྱུང་ཕྱིན་དེ་ཉིད་སྦྱོང་བྱེད་ཀྱི་ལམ་རྒྱས་གདབ་དབང་བསྐུར་སོགས་མི་དགོས་ཤིང་། སྤྱན་འདྲེན་མཆོད་བསྟོད་སོགས་དེའི་ངོ་བོར་རྫོགས་པ་ཡིན་ཏེ། གསང་སྙིང་ལས། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་དང་། རྨད་བྱུང་ལས། ཡེ་ནས་ལྷུན་མཉམ་དཀྱིལ་འཁོར་ལ། །ཡིན་པར་ཤེས་ནས་བསྒོམ་པ་ལ། །ཐ་དད་བློ་ཡི་རིམ་པ་ཡིས། །སྤྱན་འདྲེན་གཤེགས་གསོལ་འདིར་མི་དགོས། །ཞེས་དང་། བརྟག་གཉིས་ལས། ལྷ་ཉིད་རང་ལ་རང་ཉིད་ལྷ། །རང་དང་ལྷན་ཅིག་སྐྱེས་པ་ལ། །སྤྱན་འདྲེན་བཞུགས་གསོལ་འདིར་མི་དགོས། །རང་སེམས་བླ་མ་ལྷ་རུ་གནས། །ཞེས་དང་། སྤྲོས་པ་མེད་པའི་རང་བཞིན་ལ། །ལྷ་དང་སྔགས་ནི་ཡང་དག་གནས། །ཞེས་གསུངས་ཏེ། མདོར་ན་ཀུན་མཁྱེན་ཆོས་རྗེས་སེམས་ཉིད་ངལ་གསོར། རང་སེམས་ཡེ་ནས་ལྷ་ཡི་རང་བཞིན་ལ། །ལུས་ནི་དཀྱིལ་འཁོར་སྒྲ་ཚིག་གསང་སྔགས་ཉིད། །ཐམས་ཅད་ལྷུན་རྫོགས་ཡེ་ཤེས་ཆེན་པོའི་ངང་། །དམ་ཚིག་ཡེ་ཤེས་གཉིས་མེད་དགུག་གཞུག་མེད། །གཤེགས་གསོལ་མི་དགོས་བཟང་ངན་བླང་དོར་མེད། །ཡེ་ནས་དཀྱིལ་འཁོར་ཡིན་པས་བདག་ཉིད་ལ། །ཡིན་པར་ཤེས་པའི་ཚུལ་གྱིས་གསལ་འདེ བས་ལས། །མ་གྲུབ་པ་ལ་ཡང་གྲུབ་བྱེད་པ་མིན། །ཞེས་གསུངས་པ་བཞིན་ཤེས་པར་བྱ་བ་ནི་གནད་གལ་པོ་ཆེའོ། །སྤྱི་དོན་གཉིས་པ་གསུང་བཟླས་པའི་རྣལ་འབྱོར་ལ་གསུམ། སྲོག་སྡོམ་གཟེར་བཞིའི་གནས་སྤྱིར་བསྟན་པ། སྒོམ་དོན་གྱི་དམིགས་རིམ་བྱེ་བྲག་ཏུ་བཤད་པ། མཇུག་ཆོ་གའི་ཡན་ལག་གཞན་སྨོས་པའོ། །དང་པོ་ནི། གསང་རྫོགས་ཀྱི་རྒྱུད་ལེའུ་སོ་དགུ་པ་ལས། ཡེ་ཤེས་འཇིག་རྟེན་གང་ལ་ཡང་། །སྲོག་སྡོམ་གཟེར་བཞིས་མ་ཐེབས་ན། །ནམ་ཡང་དོན་མེད་ཡུག་པ་བརྐྱང་། །ཡོངས་རྫོགས་དཔལ་གྱི་སྲོག་འཕྲོག་ཐབས། །གཅིག་ཤེས་པས་ནི་ཀུན་སྲོག་ཐོབ། །དཔེར་ན་སྒྲ་གཅན་འཛིན་གྱི་ཁས། །ནམ་མཁའི་ཉི་མ་གཅིག་ཟིན་པས། །ཆུ་བྲན་སྟོང་གི་ཉི་མ་ཀུན། །མ་བཟུང་བར་ཡང་སྟོང་སྲོག་ཐོབ། །དེ་ཕྱིར་སྲོག་སྡོམ་གཟེར་བཞི་གཅེས། །ཞེས་གསུངས་ཏེ། འདིར་ཡུག་པ་བརྐྱང་ནི་ལག་སྟོང་བྱིས་པ་འདྲིད་པ་སྟེ་ངལ་བ་དོན་མེད་དུ་འགྱུར་བའི་དོན་ནོ། །དེ་ལ་བསྐྱེད་རིམ་ཐམས་ཅད་ཀྱི་སྲོག་ནི་སྲོག་སྡོམ་གྱི་གཟེར་བཞིར་འདུ་སྟེ། དེའི་དོན་ཡང་རང་གི་སྒོ་གསུམ་བྱ་བྱེད་དང་བཅས་པ་བདེ་བར་གཤེགས་པའི་སྐུ་གསུང་ཐུགས་མཛད་པ་ཕྲིན་ལས་སུ་སྡོམ་པར་བྱེད་པའི་གཟེར་བུ་ལྟ་བུའི་མན་ངག་སྟེ། དེ་ལ་དང་པོ་ཏིང་ངེ་འཛིན་གྱི་གཟེར་ནི། དམིགས་རྟེན་ཐོད་སྐུ་སོགས་ལ་ཐོག་མར་བརྟེན་ནས་ལྷའི་རྣམ་པ་ལ་སེམས་རྩེ་གཅིག་ཏུ་གཏད་ནས་བསྒོམས་པས་ཉམས་ལྔ་མཐར་ཕྱིན་ཡུལ་གསུམ་གྱད་དུ་གྱུར་ནས་ལུས་ཐ་མལ་དུ་འཛིན་པའི་མངོན་ཞེན་ལྷའི་སྐུར་རྫོགས་པར་བྱེད་པ་སྟེ། ཉམས་ལྔ་ནི། ཐོག་མར་རྣམ་རྟོག་གཡོ་བའི་ཉམས་རྣམ་རྟོག་ངོ་ཤེས་པ་རི་གཟར་གྱི་འབབ་ཆུ་ལྟ་བུ། དེ་ནས་རིམ་པར། རྣམ་རྟོག་ཅུང་ཟད་ངལ་སོས་པ་ཐོབ་པའི་ཉམས་རོང་ཁུང་གི་འབབས་ཆུ་ལྟ་བུ། རྣམ་རྟོག་ཐང་ཆད་པ་གོམས་པའི་ཉམས་མི་རྒན་གྱི་སྤྱོད་པ་ལྟ་བུ། རྣམ་རྟོག་གིས་ཅུང་ཟད་བསྐྱོད་དུ་ཡོད་པ་བརྟན་པའི་ཉམས་མཚོ་ཆུང་བསིར་བུས་བསྐྱོད་པ་ལྟ་བུ། སྐྱོད་དུ་མེད་པས་རང་དབང་ཐོབ་པ་མཐར་ཕྱིན་པའི་ཉམས་མཚོ་ཆེན་རླབས་དང་བྲལ་བ་ལྟ་བུའོ། །དེ་ལྟར་གོམས་པས་ཡུལ་གསུམ་གྱད་དུ་གྱུར་པ་ནི། དང་པོ་བསམ་པ་ཡིད་ཀྱི་ཡུལ་དུ་གསལ་བ་སྟེ་ཡིད་ངོར་རྟེན་དང་བརྟེན་པའི་དཀྱིལ་འཁོར་བཀྲ་ལམ་གྱིས་གསལ་བ་དང་། དེ་ནས་མཐོང་བའི་ཡུལ་དུ་གསལ་བ་ཞེས་ཏིང་ངེ་འཛིན་གོམས་པའི་མཐུས་རང་གི་དབང་པོའི་སྤྱོད་ཡུལ་དུའང་ལྷ་སྐུའི་རྣམ་པ་འཆར་བ་དང་། དེ་ནས་རེག་པའི་ཡུལ་ལམ་ལུས་ཀྱི་ཡུལ་དུ་གསལ་བ་ཞེས་རླུང་སེམས་ལྷ་སྐུར་སྨིན་པའི་དབང་གིས་སྐབས་རེར་ཕྱི་རོལ་གཞན་གྱི་སྣང་ངོར་ཡང་རང་ལུས་བསྐྱེད་པའི་ལྷ་སྐུར་མངོན་སུམ་དུ་མཐོང་བའི་བར་དེ། དེས་རྣམ་སྨིན་རིག་འཛིན་ལ་དངོས་སུ་སྦྱོར་བ་ཡིན་ཞེས་རྡོ་རྗེ་འཆང་མཁྱེན་བརྩེའི་དབང་པོའི་ཞལ་ལས་དངོས་སུ་ཐོས་སོ། །འདིའི་དག་རྫོགས་སྨིན་གསུམ་ཞིབ་པར་གོང་དུ་བཤད་པས་བསྐྱར་ཟློས་མ་དགོས་ཀྱང་། སྐབས་འདིར་འཛིན་བདེ་བའི་ཕྱིར་རྩོད་དུས་ཀྱི་ཐམས་ཅད་མཁྱེན་པ་ཤྲཱི་ནི རྨ་ཀའི་གསུང་ལྟར་སྦྱར་ན། འདིས་མར་འཁོར་བའི་གནས་སྐབས་ན་སྐྱེ་གནས་བཞིར་སྐྱེ་བའི་ལུས་ཀྱི་བག་ཆགས་སྦྱོང་ཞིང་དག་པར་བྱེད། ཡར་སངས་རྒྱས་ཀྱི་གནས་སྐབས་སུ་སྐུ་ཡི་གསང་བ་བསམ་གྱིས་མི་ཁྱབ་པ་ཞལ་ཕྱག་མཚན་མ་ལས་འདས་པ་དང་། སྐུ་རྣམ་པ་ཐམས་ཅད་པ་གང་ལ་གང་འདུལ་དུ་སྣང་བའི་འབྲས་བུ་གཞི་ལ་རྫོགས། བར་ལམ་གྱི་གནས་སྐབས་ན་རྩ་ཡི་དྲྭ་བ་དག་པ་ལྷ་རུ་སྦྱངས་པས་རྡོ་རྗེའི་ལུས་ལ་གནད་དུ་བསྣུན་པའི་རྫོགས་རིམ་ཐམས་ཅད་ཀྱི་སྨིན་བྱེད་དུ་འགྲོའོ། །གཉིས་པ་སྙིང་པོ་སྔགས་ཀྱི་གཟེར་ནི། འཆད་འགྱུར་ལྟར་སེམས་དཔའ་སུམ་བརྩེགས་ཐུགས་སྲོག་ས་བོན་གྱི་མཐར་སྙིང་པོ་སྔགས་ཀྱིས་བསྐོར་བ་ལ་སེམས་རྩེ་གཅིག་ཏུ་གཏད་དེ་ངག་བཟླས་འབྲུ་འབུམ་ལྟ་བུ་གྲངས་དང་། ལོ་ཟླ་ལྟ་བུ་དུས་དང་། ཞལ་མཐོང་བ་སོགས་མཚན་མ་དང་སྦྱར་ནས་བཟླས་ཤིང་། ཁྱད་པར་རླུང་འབྱིན་འཇུག་གནས་གསུམ་སྔགས་སུ་ཤེས་པས་རྡོ་རྗེའི་བཟླས་པ་ལ་བརྩོན་པར་བྱེད་པ་སྟེ། འདིས་མར་འཁོར་བའི་གནས་སྐབས་ན་བརྗོད་པ་སྒྲའི་རང་བཞིན་འགྲོ་བའི་ངག་གི་བག་ཆགས་དག་པར་བྱེད། ཡར་སངས་རྒྱས་ཀྱི་དུས་ན་གསུང་གི་གསང་བ་བསམ་གྱིས་མི་ཁྱབ་པ་སྒྲ་ཚིག་བརྗོད་པ་ལས་འདས་པ་གསུང་རྣམ་པ་ཐམས་ཅད་པ་ཐེག་པ་བསམ་གྱིས་མི་ཁྱད་པར་འཆར་བའི་འབྲས་བུ་གཞི་ལ་རྫོགས། བར་ལམ་ཉམས་སུ་ལེན་པའི་དུས་ན་ངག་རླུང་གི་རང་བཞིན་སྙིང་པོ་སྔགས་ཀྱི་རང་བཞིན་དུ་སྦྱངས་པས་ཕ་རྒྱུད་ལྟར་རླུང་ལ་བརྟེན་པའི་རྫོགས་རིམ་ཐམས་ཅད་ཀྱི་སྨིན་བྱེད་དུ་འགྲོའོ། །གསུམ་པ་དགོངས་པ་མི་འགྱུར་བའི་གཟེར་ནི། དཔལ་ཆེན་པོ་ལ་སོགས་པ་ཡི་དམ་གྱི་ལྷ་ཞི་བ་དང་ཁྲོ་བོ་དང་ཕྲ་མེན་དང་ཡེ་ཤེས་དང་འཇིག་རྟེན་པའི་ཚུལ་འཛིན་པའི་བཀའ་སྡོད་སྲུང་མ་སོགས་ཀྱི་ལྷ་ཅི་ལྟར་སྒྲུབ་ཀྱང་དེ་ཉིད་རང་སེམས་ལས་གུད་ན་མེད་པར་རྟོགས་པས་ལྷ་དང་ཆོས་ཉིད་རོ་མཉམ་ཆེན་པོའི་བཅུད་དུ་སྨིན་པ་སྟེ། དེ་ཡང་ཕྱི་ནང་སྣོད་བཅུད་རྟེན་དང་བརྟེན་པའི་དཀྱིལ་འཁོར་དུ་གསལ་བ་དེ་ཐམས་ཅད་ཀྱང་རང་སེམས་ཀྱི་སྣང་ཆ་ཙམ་ལས་གཞན་དུ་མ་གྲུབ་ཅིང་། སེམས་ཉིད་ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཤར་གྲོལ་འཛིན་མེད་སྤྲུལ་པའི་སྐུ་སྟེ་སྐུ་གསུམ་གྱི་ངོ་བོར་གདོད་ནས་གྲུབ་པ་དང་། དེའི་རྩལ་ལས་ཤར་བའི་ཐབས་ཀུན་རྫོབ་སྣང་བའི་ཆ་ཡབ། ཤེས་རབ་དོན་དམ་སྟོང་པའི་ཆ་ཡུམ། སྣང་སྟོང་དབྱེར་མེད་ཡེ་ཤེས་ཀྱི་སྐུ་ཅན་ཟུང་འཇུག་སྒྱུ་འཕྲུལ་དྲྭ་བའི་འཁོར་ལོ་སྟེ། མདོར་ན་དངོས་སྣང་སྐུ། སྒྲ་གྲགས་གསུང་། དྲན་རྟོག་ཐུགས། སྣང་སྲིད་གཞིར་བཞེངས་རང་བྱུང་གི་དཀྱིལ་འཁོར་དུ་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་དུ་རྟོགས་པའི་གནས་ལུགས་ལྟ་བས་རྩིས་ཟིན་པར་བྱས་ཏེ། བདག་གཞན་དམ་ཡེ་བསྒྲུབ་བྱ་སྒྲུབ་བྱེད་དག་མ་དག་སོགས་ཐ་དད་གཉིས་ཆོས་ཀྱི་འཛིན་རྟོག་མཐའ་དག་གཉིས་མེད་མཉམ་པའི་ཀློང་དུ་བསྡོམས་པ་སྟེ་འདི་ནི་བསྐྱེད་རིམ་ཙམ་དུ་མ་ཟད་རྫོགས་རིམ་གྱི་སྲོག་ཀྱང་ཡིན་པས་བསྐྱེད་བཟླས་རྫོགས་གསུམ་གང་གི་སྐབས་སུའང་མེད་ཐབས་མེད་པའི་གཅེས་གནད་གཅིག་པུ་སྟེ། དཔལ་ཆེན་ཞལ་ལུང་ལས། དགོངས་པའི་གཟེར་ནི་ཞི་ཁྲོའི་ལྷ། །ཡོངས་རྫོགས་དཔལ་ཆེན་རང་སེམས་ལས། །གུད་ན་མེད་ཅིང་རུ་ཏྲ་ཡང་། །ལོགས་སུ་མེད་དོ་རང་གི་སེམས། །སེམས་ཉིད་སྟོང་པ་ཆོས་ཀྱི་སྐུ། །གསལ་ལ་མ་འདྲེས་ལོངས་སྤྱོད་རྫོགས། །སྣ་ཚོགས་རང་ཤར་སྤྲུལ་པའི་སྐུ། །སྣང་བ་ཡབ་ལ་སྟོང་པ་ཡུམ། །སྣང་སྟོང་དབྱེར་མེད་ཡེ་ཤེས་སྐུ། །འགྱུ་དྲན་རྣམ་རྟོག་བསམ་ཡས་ཀྱང་། །ཡོངས་སུ་རྫོགས་པ་དཔལ་གྱི་འཁོར། །བསམ་གྱིས་མི་ཁྱབ་ཡེ་སངས་རྒྱས། །རང་བཞིན་ཉིད་ལས་གཡོས་པ་མེད། །དགོངས་པ་མི་འགྱུར་གཟེར་མེད་ན། །དཔལ་ཆེན་སྒྲུབ་ཀྱང་ཐུན་མོང་ལས། །མཆོག་མི་འགྲུབ་ཅིང་རུ་ཏྲར་གོལ། །ཞེས་དང་། རྩ་རྒྱུད་པད་སྡོང་བརྩེགས་པ་ལས། དེ་ཉིད་ལྡན་པའི་རྣལ་འབྱོར་གྱིས༔ དུར་ཁྲོད་འདྲེ་ངན་བསྒྲུབས་གྱུར་ཀྱང༔ མཆོག་དང་ཐུན་མོང་འབྲས་བུ་གང༔ ཅི་འདོད་རང་བྱུང་ལྷུན་གྲུབ་འབྱུང༔ དེ་ཉིད་མ་རྟོགས་ཨ་འཐས་བློས༔ ཡེ་ཤེས་སེམས་དཔའ་བསྒྲུབས་གྱུར་ཀྱང༔ གནས་སྐབས་བདེན་འབྲས་ཕྲའུ་ལས༔ཡང་དག་འབྲས་བུ་སྲིད་མཐའ་ཙམ༔ ཞེས་གསུངས། དེས་ན་འདོན་རྒྱུ་དང་སྒྲུབ་རྒྱུའི་ལྷའི་ཁྱད་པར་གཙོ་བོ་མིན་ཞིང་གནད་འདི་ཉིད་གལ་ཆེ་བ་ཡིན་པས་འདི་ཁོ་ན་ལམ་གྱི་སྲོག་ཏུ་བཟུང་བར་མཛོད་ཅིག འདིས་མར་འཁོར་བའི་གནས་སྐབས་ན་ངན་སེམས་བག་ཆགས་རང་རིག་རང་གསལ་དུ་གནས་པའི་ཆ་དག་པར་བྱེད། ཡར་སངས་རྒྱས་ཀྱི་དུས་ན་ཐུགས་ཀྱི་གསང་བ་བསམ་གྱིས་མི་ཁྱབ་པ་དམིགས་བསམ་སྤྲོས་དང་བྲལ་བའི་ཆོས་ཉིད་དང་། ཐུགས་རྣམ་པ་ཐམས་ཅད་པ་མངོན་ཤེས་བསམ་གྱིས་མི་ཁྱབ་པའི་འབྲས་བུ་གཞི་ལ་རྫོགས། བར་དུ་ཉམས་སུ་ལེན་པའི་གནས་སྐབས་སུ་སྣང་སྟོང་གཉིས་སུ་མེད་པའི་ཆོས་ཉིད་ལ་གོམས་པས་ཀུན་རྫོབ་དང་དོན་དམ་བྱང་ཆུབ་ཀྱི་སེམས་ལ་བརྟེན་པའི་བདེ་གསལ་སྟོང་པ་ཉིད་ཀྱི་རྫོགས་རིམ་བསྒོམ་པའི་སྨིན་བྱེད་དུ་འགྲོའོ། །བཞི་པ་འཕྲོ་འདུ་ཕྲིན་ལས་ཀྱི་གཟེར་ནི། གང་འདོད་ཀྱི་ལས་རབ་འབྱམས་ལ་རང་དབང་དུ་བྱེད་པའི་ཆོ་འཕྲུལ་ཏེ། སྒྲུབ་གཞི་ལྷ་དང་དཀྱིལ་འཁོར་དུ་གསལ་བའི་རང་ལྷའི་སྐུ་ཡི་ཆ་ཤས་དང་ཐུགས་སྲོག་ས་བོན་སྔགས་ཕྲེང་ལས་ལས་མཐུན་གྱི་འོད་ཟེར་འཕྲོས་པས་དོན་གཉིས་བྱས། སྣོད་བཅུད་དཀྱིལ་འཁོར་གསུམ་དུ་སྦྱང་སྟེ་{སྦྱར་ཏེ}། དེ་ཡང་འོད་ཟེར་དཀར་པོས་ཞི་བ། སེར་པོས་རྒྱས་པ། དམར་པོས་དབང་། ལྗང་གུའམ་ནག་པོས་དྲག་པོ། མཐིང་གའམ་སྣ་ལྔའི་འོད་ཟེར་གྱིས་ལས་ཐམས་ཅད་པའམ་མཆོག་གི་དངོས་གྲུབ་སོགས་གང་འདོད་སྒྲུབ་པའི་འཕྲོ་འདུའི་དམིགས་པའི་མདེ་ཁ་བསྒྱུར་བ་སྟེ། རྒྱུད་ལས། འཕྲོ་འདུ་སྣ་ཚོགས་གཟེར་མེད་ན། །དམིགས་གཏད་གཅིག་གིས་དོན་མི་འགྲུབ། །འཕྲོ་འདུ་ལས་ཁ་བསྒྱུར་ཤེས་ན། །ཐེ་བྲང་ཐ་ཆུང་གཅིག་གིས་ཀྱང་། །ཕྲིན་ལས་ཐོགས་མེད་ལས་ཀུན་འབྱུང་། །ཞེས་གསུངས། འདིས་མར་འཁོར་བའི་གནས་སྐབས་ན་ལུས་ངག་ཡིད་གསུམ་བྱ་བ་དགྲ་འདུལ་གཉེན་སྐྱོང་ཚོང་སོ་ནམ་ལ་སོགས་པའི་རྣམ་པ་སྦྱོང་ཞིང་དག་པར་བྱེད། ཡང་དག་པར་ས ངས་རྒྱས་ཀྱི་གནས་སྐབས་ན་སྐུ་གསུང་ཐུགས་རྣམ་པ་ཐམས་ཅད་པའི་ཕྲིན་ལས་བསམ་གྱིས་མི་ཁྱབ་པའི་འབྲས་བུ་གཞི་ལ་རྫོགས། བར་ལམ་ཉམས་སུ་ལེན་པའི་གནས་སྐབས་ན་དོན་གཉིས་ལྷུན་གྱིས་གྲུབ་པའི་བྱ་བ་བྱེད་རྩོལ་དག་པའི་ལམ་ལ་བསླབས་པས་རྫོགས་རིམ་གྱི་སྐབས་ན་ལུས་ངག་ཡིད་ཀྱི་བྱེད་ལས་ལ་ལྟོས་པའི་དམིགས་བཅས་ཐུན་མོང་བའི་ལམ་དང་དམིགས་མེད་ཡེ་ཤེས་ཀྱི་དགོངས་པ་མངོན་སུམ་འོད་གསལ་གྱི་རྣལ་འབྱོར་སྣང་སྲིད་འོད་སྐུར་སྦྱོང་བའི་སྨིན་བྱེད་དུ་འགྲོའོ། །དེ་ལྟར་གཟེར་བཞིའི་མན་ངག་གནད་དུ་ཚུད་པས་སྐུ་དངོས་སུ་མཐོང་སྟེ་སྐུའི་སྲོག་འཕྲོག ངག་ལ་བདེན་པ་འགྲུབ་པས་གསུང་གི་སྲོག་འཕྲོག ཆོས་ཉིད་ལ་རང་དབང་ཐོབ་པས་ཐུགས་ཀྱི་སྲོག་འཕྲོག བདེ་གཤེགས་ཞི་ཁྲོའི་སྐུ་གསུང་ཐུགས་དང་རང་གི་སྒོ་གསུམ་དུ་མ་རོ་གཅིག་ཏུ་འདྲེས་པས་འཁོར་འདས་ཀུན་ལ་སྟོང་སྲོག་ཐོབ། ཡེ་ཤེས་ཀྱི་རྩལ་འབྱོངས་ཤིང་ཕྲིན་ལས་སྣ་ཚོགས་ལ་རང་དབང་བསྒྱུར་བ་ཡིན་ཏེ། དེ་ཡང་དགོངས་པ་མི་འགྱུར་བའི་གཟེར་ནི་ལྟ་བ་ཡིན་པས་གཞི། ཏིང་འཛིན་ལྷའི་གཟེར་ནི་སྒོམ་པ། སྙིང་པོ་སྔགས་ཀྱི་གཟེར་ནི་སྒོམ་པ་ཡང་ཡིན་ལ་ཤུགས་ཀྱིས་སྤྱོད་པ་ཡིན་པས་དེ་གཉིས་ལམ། འཕྲོ་འདུ་དམིགས་པའི་གཟེར་ནི་མཆོག་ཐུན་གྱི་དངོས་གྲུབ་སྒྲུབ་ཅིང་སངས་རྒྱས་ཀྱི་ཕྲིན་ལས་ད་ལྟ་ནས་བྱེད་པས་འབྲས་བུ་སྟེ། དེ་ཐམས་ཅད་ཀྱང་ཐ་དད་དམ་ཡ་བྲལ་རེས་འཇོག་ཅན་མིན་པར་ཐོག་མ་ནས་ཟུང་འཇུག་ཏུ་ཤེས་དགོས་ཏེ། འདི་ལྟར་དགོངས་པ་མི་འགྱུར་བ་ཆོས་ཉིད་དག་མཉམ་ཆེན་པོའི་དབྱིངས་སུ་ཡེ་ནས་སངས་རྒྱས་པའི་རང་རྩལ་ཀུན་རྫོབ་རྡོ་རྗེ་དབྱིངས་ཀྱི་དཀྱིལ་འཁོར་དུ་རང་ཤར་བའི་བསྐྱེད་རྫོགས་ཟུང་དུ་འཇུག་པའི་ངང་ནས་གྲགས་སྟོང་སྔགས་ཀྱི་རང་སྒྲ་ཅིར་ཡང་བསྒྱུར་ཞིང་འཕྲོ་འདུ་ཕྲིན་ལས་ཀྱི་རོལ་པ་ལ་སློབ་སྟེ། སངས་རྒྱས་རྣམས་ཀྱི་སྐུ་གསུང་ཐུགས་ཡེ་ཤེས་ཆེན་པོ་བྱེད་རྩོལ་སྤྲོས་པ་དང་བྲལ་བཞིན་དོན་གཉིས་ལྷུན་གྱིས་གྲུབ་པར་བཞུགས་པའི་འབྲས་བུ་ད་ལྟ་ནས་ལམ་དུ་བྱེད་པས་རྡོ་རྗེ་ཐེག་པའམ་འབྲས་བུའི་ཐེག་པ་ཞེས་བྱ། དེ་ཡང་གཞི་ལྟ་བ་ཡེ་ཤེས་ཀྱི་འཁོར་ལོ་འཁོར་འདས་མཉམ་ཉིད་དུ་རྟོགས་པས་སྲིད་ཞི་གཉིས་ཀའི་སྲོག་ལ་དབང་བསྒྱུར། ལམ་བསྒོམ་པ་ལྷ་སྔགས་ཀྱི་འཁོར་ལོ་ཐབས་ཤེས་ཟུང་དུ་འཇུག་པས་བསྐྱེད་རྫོགས་གཉིས་ཀའི་སྲོག་ལ་རང་དབང་། འབྲས་བུ་རྩོལ་མེད་ཆོས་ཉིད་ཀྱི་འཁོར་ལོ་དོན་གཉིས་ལྷུན་གྲུབ་ཀྱི་སྤྱོད་པས་ཐབས་ཆེན་བསམ་གྱིས་མི་ཁྱབ་པའི་སྲོག་ལ་རང་དབང་བ་སྟེ། དཔེར་ན་སྒྲ་གཅན་གྱི་ཁས་ནམ་མཁའི་ཟླ་བ་བཟུང་བས་ཆུ་ནང་གི་ཟླ་བ་ཇི་སྙེད་པ་ཐམས་ཅད་རང་ཟིན་པ་ལྟར་སྲོག་སྡོམ་གཟེར་བཞིའི་མན་ངག་གཅིག་ཤེས་པས་མདོ་རྒྱུད་བསམ་གྱིས་མི་ཁྱབ་པའི་དགོངས་གནད་དུས་གཅིག་ཏུ་ཉམས་སུ་ལོངས་པ་ཡིན་ཏེ། དགོངས་པ་མི་འགྱུར་བའི་གཟེར་གྱིས། འཁོར་འདས་མཉམ་པ་ཉིད་དུ་ཤེས་པས་སྤང་བླང་གཞི་ནས་དག་པའི་གནད། དེ་བཞིན་དུ་རོ་མཉམ་སྟོང་ཉིད་དུ་ཤེས་པས་དངོས་འཛིན་བདེན་ཞེན་འཇིག སྣང་སྟོང་ཟུང་འཇུག་ཏུ་ཤེས་པས་ཚོགས་གཉིས་མཉམ་དུ་རྫོགས། ལྟ་བའི་རྩིས་ཟིན་པས་བསྐྱེད་རྫོགས་ཡ་བྲལ་དུ་མི་འགྱུར། དགོངས་པའི་ངང་ལས་མི་གཡོ་བས་ལྟ་ཐོག་ཏུ་སྒོམ་པ་འཁྱོལ། གྱ་ནོམ་ལྷར་ཞེན་ལས་གྲོལ་བས་བསྐྱེད་རིམ་གྱི་གོལ་ས་སྤོང་། སྣང་སྲིད་གཞིར་བཞེངས་སུ་རྫོགས་པས་བདག་གཞན་གྱི་གཉིས་འཛིན་མེད། ཡེ་གྲོལ་གཞི་རྫོགས་སུ་རྟོགས་པས་དུག་ལྔས་གོས་པ་མེད། ཆོས་སྐུའི་དགོངས་པ་བརྙེས་པས་སྐུ་གསུམ་རང་ལ་རྫོགས། གཞི་འབྲས་རོ་གཅིག་ཏུ་ཤེས་པས་ལམ་གྱི་རྩོལ་སྒྲུབ་མི་དགོས། སྒོམ་པ་འབྲས་བུར་འཁྱོལ་བས་སངས་རྒྱས་གཞན་ནས་མི་འཚོལ། འབྲས་བུ་གཞི་ལ་འཁྱོལ་བས་འཐོབ་བྱའི་ཞེན་འཛིན་གྲོལ། ཆོས་ཉིད་ཀློང་དུ་གཅིག་པས་དམ་ཡེའི་འཛིན་པ་དག རིགས་བརྒྱའི་ཁྱབ་བདག་རྟོགས་པས་ལྷ་གཅིག་སྒྲུབ་པས་ཐམས་ཅད་འགྲུབ། མཆོག་གི་དངོས་གྲུབ་བརྙེས་པས་དོན་གཉིས་ལྷུན་གྱིས་གྲུབ། བཟང་ངན་སྤང་བླང་ལས་འདས་པས་གཙང་སྦྲའི་ཀུན་སྤྱོད་ལ་མི་ལྟོས། བྱར་མེད་ཡེ་ཟིན་དུ་ཤེས་པས་ཆོ་གའི་ཁྲིགས་རིམ་མི་དགོས། གྲུབ་མཐའི་འཛིན་པ་དག་པས་ཐེག་པའི་རྩེ་མོར་ཕྱིན་པའི་གནད་དེ་གནད་ཆེན་པོ་བཅོ་བརྒྱད་དང་། བསྐྱེད་རིམ་ལྷ་ཡི་གཟེར་ལ། སྣང་ཆ་ལྷ་རུ་གསལ་བས་སྟོང་པ་ཕྱོགས་གཅིག་ཏུ་མི་གོལ། ཀུན་རྫོབ་ལམ་དུ་བྱེད་པས་བདེན་གཉིས་ཟུང་དུ་འཇུག དངོས་པོ་ཨ་འཐས་སྦྱོང་བས་ཐ་མལ་གྱི་བདེན་ཞེན་སྤོང་། ཆོ་གའི་ཡན་ལག་རྫོགས་པས་བསོད་ནམས་ཀྱི་ཚོགས་ཆེན་རྫོགས། སྐུ་ཡི་རྣམ་པ་གསལ་བས་གཟུགས་སྐུའི་ཉེ་རྒྱུར་འགྱུར། འབྲས་བུའི་བཞུགས་ཚུལ་དང་མཐུན་པས་སྐུ་གསུམ་ལྷུན་གྱིས་གྲུབ་པའི་གནད་དེ་དྲུག་དང་། སྙིང་པོ་སྔགས་ཀྱི་གཟེར་ལ། གསུང་རྡོ་རྗེ་ལམ་དུ་བྱེད་པས་ངག་གི་སྒྲིབ་པ་སྦྱོང་། སེམས་དཔའ་སུམ་བརྩེགས་སུ་བསྒོམས་པས་སྒོ་གསུམ་མཉམ་དུ་གྲོལ། དམིགས་པ་སྔགས་ཕྲེང་ལ་གཏད་པས་ཐ་མལ་གྱི་རྟོག་པ་སྤོང་། ཟླ་བ་སྐར་ཕྲེང་ལྟར་བཟླས་པས་རང་བབས་ཀྱི་ཏིང་འཛིན་ལ་གནས། མགལ་མེའི་འཁོར་ལོ་ལྟར་བཟླས་པས་བདེ་སྟོང་ཡེ་ཤེས་བསྐྱེད། བུང་བ་ཚང་ཞིག་ལྟར་བཟླས་པས་སྒྲ་གྲགས་སྔགས་སུ་གྲོལ། སྙིང་པོའི་སྲོག་ནས་བགྲངས་པས་ལྷས་བྱིན་གྱིས་བརླབས། ངག་གི་ནུས་པ་འཕེལ་བས་ཅི་སྨྲས་གཞན་དོན་དུ་འགྱུར། རིག་སྔགས་ཀྱི་འདེན་ཚིག་གྲུབ་པས་སྨོན་ལམ་གང་བཏབ་འགྲུབ། རྒྱལ་བའི་གསུང་ལ་དབང་བས་སྣང་སྲིད་ལྷ་འདྲེས་བཀའ་བཞིན་སྒྲུབ་པའི་གནད་དེ་བཅུ་དང་། འཕྲོ་འདུ་ཕྲིན་ལས་ཀྱི་གཟེར་ལ། མཆོག་གི་དངོས་གྲུབ་འགྲུབ་པས་ཐུན་མོང་ཤུགས་ཀྱིས་འབྱུང་། དམིགས་པའི་མདེ་ཁ་བསྒྱུར་བས་ལས་ཚོགས་གཞན་ལ་མི་ལྟོས། ཕྲིན་ལས་མཐའ་རུ་ཕྱིན་པས་གཞན་དོན་འབད་མེད་དུ་འབྱུང་། འགྲོ་དོན་ལྷུན་གྱིས་གྲུབ་པས་སངས་རྒྱས་ཀྱི་མཛད་པ་འགྲུབ། སེམས་བསྐྱེད་ཀྱི་འཕེན་པས་འཕངས་པས་ཐེག་པ་དམན་པར་མི་གོལ། གདུལ་བྱ་སྨིན་ཅིང་གྲོལ་བས་གདུང་བརྒྱུད་འཛིན་པའི་གནད་དེ་དྲུག་བཅས་རྩ་བ་བཞི་ལ་ཁྱད་ཆོས་ཀྱི་གནད་བཞི་བཅུ་དང་ལྡན་པས་ན། གསང་སྔགས་རྡོ་རྗེ་ཐེག་པའི་ལམ་གནད་མ་ལུས་པ་འདིར་འདུ་ཞིང་། འདི་དང་མི་ལྡན་པའི་ལམ་ནི་ཤི་བའི་རོ་དང་འདྲ་བར་མཁས་པ་ཤྲཱི་རྒྱལ་པོས་གསུངས་སོ། །གཉིས་པ་སྒོམ་དོན་གྱི་དམིགས་རིམ་བྱེ་བྲག་ཏུ་བཤད་པ་ལ། དངོས་གྲུབ་མྱུར་དུ་འགྲུབ་པའི་རྒྱུ་ལྷ་སྔགས་དབྱེར་མེད་ལ་ངེས་ཤེས་ཀྱི་མོས་པ་བསྐྱེད་པ། བསྙེན་སྒྲུབ་ཡན་ལག་བཞིའི་ཛབ྄་དམིགས་བྱེ་བྲག་ཏུ་བཤད་པ། ཇི་ལྟར་བཟླ་བའི་ཚུལ་དགོས་པ་ཕན་ཡོན་བཅས་བཤད་པ་དང་གསུམ་ལས། དང་པོ་ནི། སྤྱིར་བཟླ་བྱའི་སྔགས་ཀྱི་ངོ་བོ་ནི་ཐབས་ཤེས་ཀྱི་ཡི་གེ་ཨཱ་ལི་དང་ཀཱ་ལི་གཉིས་སུ་འདུ་ཞིང་། དབྱངས་གསལ་གྱི་ཡི་གེ་དེ་ཐམས་ཅད་ཀྱང་བརྗོད་མེད་བརྗོད་པ་ཀུན་གྱི་རྒྱུར་གྱུར་པའི་ཡི་གེ་ཨ་ལས་བྱུང་ཞིང་ཨ་ཡི་ངོ་བོར་གནས་ལ། ཨ་ཉིད་ནི་སྐྱེ་བ་མེད་པ་སྟེ། དོན་དམ་པར་སྐྱེ་འགག་གནས་དམིགས་འགྲོ་འོང་ལ་སོགས་པ་སྤྲོས་པའི་མཚན་མས་གདོད་ནས་སྟོང་ཞིང་རང་བཞིན་མཉམ་པ་ཉིད་ཀྱི་ཕྱིར་འཁོར་འདས་ཀྱི་ཆོས་ཐམས་ཅད་མིང་དུ་བཏགས་པ་ཙམ་ལས་རང་བཞིན་གྱིས་གྲུབ་པ་མེད་པར་ཡེ་ནས་སངས་རྒྱས་པ་ནི་མ་སྐྱེས་པའི་ཕྱིར་ཆོས་ཀྱི་སྐུ་སྟེ། གསང་སྙིང་ལས། ཨ་ནི་སྟོང་དང་མི་སྟོང་གི། །དབུ་མའང་དམིགས་སུ་ཡོད་མ་ཡིན། །ཐམས་ཅད་མིང་ཙམ་སངས་རྒྱས་ཀུན། །ཡི་གེའི་ཕྲེང་བ་ཉིད་ལ་གནས། །ཞེས་སོ། །དེ་ལྟ་བུའི་རང་བཞིན་བརྗོད་མེད་ཀྱི་ཡི་གེ་ཨ་ཉིད་ཀྱིས་གོ་ཕྱེས་ནས་སྣ་ཚོགས་སུ་སྣང་བའི་ངག་གི་འདུ་བྱེད་ལས་བྱུང་བའི་ཡི་གེ་ཨཱ་ལི་ཀཱ་ལིའི་ཚོགས་པ་དེ་དག་ཐམས་ཅད་ཀྱང་མི་འགག་པའི་ཕྱིར་ཡེ་ནས་སངས་རྒྱས་པའི་རང་བཞིན་ལོངས་སྤྱོད་རྫོགས་པའི་སྐུར་གནས་ཏེ། དེ་ཉིད་ལས། ཨ་ཉིད་སྣ་ཚོགས་པར་སྣང་བའི། །ཀ་ལ་སོགས་པ་བཞི་བཅུ་གཉིས། །སྒྲ་ཡི་མིང་གིས་ཐམས་ཅད་བསྡུས། །མངོན་རྫོགས་རྒྱལ་པོར་དེ་ཉིད་ངེས། །ཞེས་སོ། །དེ་ལྟ་བུའི་སྐྱེ་འགག་མེད་པའི་དབྱིངས་ནས་སྣ་ཚོགས་སུ་འཕྲུལ་ཞིང་རྣམ་པར་སྣང་བའི་ངོ་མཚར་རྨད་དུ་བྱུང་བ་ཐབས་ཆེན་ཡི་གེའི་ཚོགས་པས་ཀུན་རྫོབ་ཐ་སྙད་ཙམ་དུ་མིང་ཚིག་བརྗོད་པ་ཀུན་གྱི་གཞི་འཛིན་ཅིང་གདུལ་བྱར་གང་འདུལ་གྱི་ཆོས་སྒོ་བསམ་མི་ཁྱབ་པར་སྟོན་པའི་འཕྲུལ་ཆེན་ཡི་གེ་ནི་སངས་རྒྱས་སྤྲུལ་པའི་སྐུའི་གསུང་གི་ཆེ་བ་ཡིན་ཏེ། སྔ་མ་ལས། ཨེ་མ་ཧོ་ངོ་མཚར་ཡ་མཚན་གྱི། །འཕྲུལ་ཆེན་བཞི་བཅུ་རྩ་ལྔའི་མིང་། །ཚིག་རྣམས་མ་ལུས་འཛིན་པའི་གནས། །སྣ་ཚོགས་དོན་ཆེན་སྨྲ་ཞིང་སྟོན། །ཞེས་སོ། །དོན་དམ་པར་དངོས་པོར་གྲུབ་པ་མེད་པའི་ཡི་གེ་ནི་རང་སེམས་ཀྱི་སྣང་ཆ་ཡིན་པས་སྣང་བའི་དུས་ཉིད་ནས་རང་བཞིན་གྱིས་གྲུབ་པ་མེད་དེ་སེམས་ཉིད་ཡེ་ནས་སྟོང་ཞིང་བདག་མེད་པ་སྤྲོས་བྲལ་མཉམ་པ་ཆེན་པོའི་ངང་ལས་ནམ་ཡང་གཡོ་བ་མེད་པའི་ཕྱིར་གཟུང་འཛིན་གྱི་བློ་ཡི་སྤྱོད་ཡུལ་ལས་འདས་པ་ནི་ཡི་གེ་སངས་རྒྱས་སྤྲུལ་པའི་སྐུའི་ཐུགས་སུ་གནས་པ་སྟེ། དེ་ཉིད་ལས། དངོས་མེད་ཡི་གེའི་རང་བཞིན་སེམས། །བདག་མེད་མཐའ་བྲལ་མི་དམིགས་ཀྱང་། །ཞེས་སོ། །དེ་ཉིད་ཀྱི་ངང་ལས་མ་གཡོས་ཀྱང་རོལ་པ་འགག་མེད་རྟེན་འབྱུང་གི་སྣང་ཆ་བརྡར་བཏགས་པའི་ཡི་གེའི་གཟུགས་དབྱིབས་སོགས་ཐ་དད་པ་ལ་བརྟེན་ནས་མིང་ཚིག་སྣ་ཚོགས་རྣམ་པར་འཕྲུལ་བའི་སྤྲིན་ལས་ལྷ་བསྐྱེད་པའི་ས་བོན་དང་། གླེགས་བམ་གྱི་སྣང་བརྙན་སོགས་ཐུགས་རྗེའི་རོལ་པ་ཅིར་ཡང་སྤྲུལ་ནས་འགྲོ་བའི་དོན་མཐའ་ཀླས་པར་མཛད་པ་ནི་ཡི་གེ་སངས་རྒྱས་སྤྲུལ་པའི་སྐུར་ཤར་བ་སྟེ། དབྱིབས་དང་ཁ་དོག་མིང་ཚིག་གིས། །རོལ་པ་ཅིར་ཡང་སྤྲུལ་ཞིང་སྟོན། །ཞེས་སོ། མདོར་ན། ཕྱོགས་བཅུར་དུས་བཞིར་གཤེགས་པ་ཡི། །ཡེ་ཤེས་སེམས་དཔའི་སྐུ་གསུང་ཐུགས། །དཀྱིལ་འཁོར་བཞི་བཅུ་རྩ་ལྔ་ཉིད། །ཡི་གེ་མགོ་ནས་ཀྵ་ལ་རྫོགས། །ཞེས་སོགས་གསུངས་པ་ལྟར་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡེ་ཤེས་རྡོ་རྗེའི་རང་བཞིན་ཡིན་ཞིང་། བྱེ་བྲག་ཏུ་བཟླ་བྱའི་སྔགས་རྣམས་གྲུབ་པ་བཞིས་བྱིན་གྱིས་བརླབས་པའི་ནུས་པ་མཐུ་ཅན་དུ་གྱུར་པ་སྟེ། གྲུབ་པ་བཞི་ནི། ཆོས་ཉིད་ངོ་བོ་ཉིད་ཀྱིས་གྲུབ་པ་ཡི་གེ་ཐམས་ཅད་སྟོང་ཆེན་མཉམ་པ་ཉིད་ཀྱི་ངོ་བོ་ཅན་དུ་ཡེ་ནས་གྲུབ་པ། ཆོས་ཅན་རང་བཞིན་གྱིས་གྲུབ་པ་རང་གི་ངོ་བོ་ཐུན་མོང་མིན་པར་སྣང་བའི་རང་བཞིན་བསླུ་མེད་དུ་གྲུབ་པ། བྱིན་གྱིས་བརླབས་ཀྱིས་གྲུབ་པ་ཆོས་ཀུན་ལ་མངའ་དབང་འབྱོར་པ་སངས་རྒྱས་རྣམས་ཀྱིས་ཡི་གེ་གཅིག་ནས་མང་པོའི་བར་གྱི་སྔགས་རྣམས་སུ་ཡེ་ཤེས་ཉིད་རྣམ་པར་འཕྲུལ་བར་བསྟན་པས་བྱིན་གྱིས་བརླབས་ཀྱིས་གྲུབ་པ། ནུས་པའི་མཐུས་གྲུབ་པ་སྨན་དང་ནོར་བུ་བཞིན་དུ་སྔགས་དེ་དག་ལ་དངོས་གྲུབ་སྒྲུབ་པའི་ནུས་པ་ཐོགས་མེད་མི་བསླུ་བར་ཡོད་པའོ། །རྒྱུ་མཚན་དེའི་ཕྱིར་གནས་སྐབས་དང་མཐར་ཐུག་གི་འདོད་པའི་དོན་རྣམས་སྔགས་ཀྱི་མཐུས་སྒྲུབ་མི་ནུས་པ་གང་ཡང་མེད་དོ། །དེས་ན་ལྷ་སྔགས་དབྱེར་མེད་དུ་རྟོགས་པའི་ངེས་པས་དད་མོས་རྩེ་གཅིག་པར་བཟླ་བ་ནི་ཤིན་ཏུ་གལ་ཆེ་སྟེ། རྒྱུད་ལས། སྔགས་ཉིད་རྣལ་འབྱོར་མ་ཡི་གཟུགས། །རྣལ་འབྱོར་མ་ཉིད་སྔགས་ཀྱི་གཟུགས། །ཅི་སྟེ་གོ་འཕང་མཆོག་འདོད་པས། །དེ་གཉིས་དབྱེ་བར་མི་བྱའོ། །ཞེས་དང་། དད་པ་བརྟན་པོས་བསྒྲུབ་པ་ན། །ནམ་མཁའ་མེད་པར་གྱུར་ན་ཡང་། །སྔགས་ཀྱི་དངོས་གྲུབ་མེད་མི་སྲིད། །ལྷ་དང་དྲང་སྲོང་གིས་བཤད་པའི། །རིག་སྔགས་བསླུ་བ་མི་སྲིད་ན། །འདོད་ཆགས་བྲལ་བས་བཤད་པ་ཡི། །གསང་སྔགས་སྦྱོར་བས་བསླུ་བ་ནི། །མ་བྱུང་འབྱུང་བར་མི་འགྱུར་རོ། །ཞེས་གསུངས། མདོར་ན་སངས་རྒྱས་ཀྱི་ཡེ་ཤེས་ནི་གདུལ་བྱའི་བློ་ངོར་རྣམ་པ་ཐམས་ཅད་པར་འཆར་རུང་བ་ཡིན་ལ། དེ་ཡང་སངས་རྒྱས་ཀྱིས་འདུལ་བ་ལ་སངས་རྒྱས་དངོས་སུ་སྣང་བ་དང་། ཕལ་པས་འདུལ་བ་ལ་ཕལ་པར་སྣང་བ་གཉིས་སངས་རྒྱས་གཅིག་གི་ཡེ་ཤེས་ཀྱི་རོལ་པར་ཁྱད་མེད་པས་དོན་ལ་བཟང་ངན་མེད་པ་ལྟར་འདིར་ཡང་སངས་རྒྱས་ཉིད་ཕལ་པའི་ངོར་སྔགས་ཀྱི་རྣམ་པར་བསྟན་པ་ཡིན་ལ། སྔགས་གྲུབ་པས་ལྷ་མངོན་སུམ་དུ་བྱོན་པའང་ལྷ་ཉིད་སྔགས་སུ་འཕྲུལ་བ་བསྒྲུབས་པས་སྔགས་ཉིད་ལྷར་འཕྲུལ་བའི་ཚུལ་གྱིས་གདུལ་བྱ་ལ་དངོས་གྲུབ་སྩོལ་བ་ཙམ་དུ་ཟད་པས་ལྷ་སྔགས་རང་སེམས་གསུམ་དབྱེར་མེད་པའི་ཚུལ་ལ་ངེས་ཤེས་བསྐྱེད་པ་ཅིས་ཀྱང་གལ་ཆེའོ། །གཉིས་པ་ལ་གཉིས། བཟླས་པའི་གཞི་དགོད་པ་དང་། སྤྲོ་བསྡུའི་དམིགས་པ་བྱེ་བྲག་ཏུ་བཤད་པའོ། །དང་པོ་ནི། རང་ཉིད་དམ་ཚིག་སེམས་དཔའ་ཡི་དམ་གྱི་ལྷ་གང་ཡིན་གསལ་དག་བརྟན་གསུམ་དང་ལྡན་པར་བསྒོམ་པའི་ཐུགས་ཙིཏྟ་རིན་པོ་ཆེ་འོད་ཀྱི་རང་བཞིན་མཆོང་གུར་ཕུབ་པ་ལྟ་བུ་སྟེ་ཁ་དོག་སྨུག་པོ་དབྱིབས་ཆ་ལང་ཁ་སྦྱར་བ་ལྟ་བུ་ཟུར་བརྒྱད་པ་ཕྱི་གསལ་ནང་གསལ་འོད་ཀྱི་རང་བཞིན་ཅན་ནམ་འོད་ལྔའི་ཐིག་ལེའི་ཀློང་དུ་ཉི་ཟླའི་གདན་ལ་ཡེ་ཤེས་སེམས་དཔའ་རང་འདྲ་བའམ་ཡང་ན་རྒྱན་ཕྱག་མཚན་སྤངས་པ། ཁ་ཅིག་སྤྲུལ་པ་དང་སྤྲུལ་གཞིའི་དབང་དུ་བྱས་ཏེ་སྤྱན་རས་གཟིགས་ཀྱི་ཐུགས་ཀར་འོད་དཔག་མེད་དང་། མཚོ་རྒྱལ་གྱི་ཐུགས་ཀར་ཕག་མོ་བསྒོམ་པ་ལྟ་བུ་སྟེ་རང་གཞུང་དང་བསྟུན་ལ། དེའི་ཐུགས་ཀར་རིགས་སོ་སོའི་ཕྱག་མཚན་རྡོ་རྗེ་ལྟ་བུ་འགྲེངས་སྟབས་སུ་གནས་པའི་ལྟེ་བར་ཉི་ཟླ་བ རྩེགས་པའམ། ཞི་བ་ལ་ཟླ་བ། ཁྲོ་བོ་ལ་ཉི་མའི་གདན་སྲན་མ་བཀས་པ་ཙམ་གྱི་ལྟེ་བར་ཏིང་ངེ་འཛིན་སེམས་དཔའ་རྩ་བའི་ཐུགས་སྲོག་ཧྲཱིཿདང་ཧཱུྃ་སོགས་ཡི་དམ་གང་ཡིན་གྱི་ས་བོན་ལྷའི་ཁ་དོག་དང་མཚུངས་པར་མར་མེ་ལྟར་གསལ་ཞིང་འཚེར་བ་ལངས་སྟབས་སུ་ལྷའི་ཞལ་བསྟན་ཕྱོགས་ལྟར་གནས་པའི་མཐའ་བསྐོར་དུ་སྔགས་ཕྲེང་བཀོད་པ་སྟེ། སྒྲུབ་ཐབས་ཁ་ཅིག་ཏུ་བདག་དམ་ཚིག་པའི་ཐུགས་ཀར་ས་བོན་དང་སྔགས་ཕྲེང་བསྒོམ་པ་ལས་ཡེ་ཤེས་སེམས་དཔའ་དང་ཕྱག་མཚན་མེད་པ་ཡང་འབྱུང་བས་རང་གཞུང་དང་བསྟུན། བསྒོམ་བྱའི་ཡི་གེ་ཡང་བོད་ཡིག་ཉིད་གསུང་རྡོ་རྗེའི་ངོ་བོར་གདོད་ནས་གྲུབ་པ་དང་། དེར་མ་ཟད་སངས་རྒྱས་ཀྱི་ཡེ་ཤེས་དང་། རྣམ་འཕྲུལ་ཚད་མེད་པའི་གསང་བ་ཟབ་མོ་གདུལ་བྱའི་ཡུལ་ལ་མཉམ་པོར་འཇུག་པ་ལས་རྒྱ་བོད་ཀྱི་ཡིག་གཟུགས་ཀྱི་ཁྱད་པར་ཙམ་ལ་བྱིན་གྱི ས་རློབ་པར་ནུས་མི་ནུས་སོགས་ཀྱི་དབྱེ་བསལ་མ་དམིགས་པའི་ཕྱིར་གཤར་གཟབ་གང་རུང་རང་གི་བློ་ལ་འཆར་བ་གང་བདེར་བྱ་བ་ལས་གཞན་དུ་བསྒྱུར་མི་དགོས་སོ། །སྔགས་ཕྲེང་བཀོད་ཚུལ་ཡང་རྩ་བའི་ཐུགས་སྲོག་ས་བོན་གྱི་ཡི་གེ་དེའི་མདུན་ནས་བརྩམས་ཏེ་བཟླས་བྱའི་སྔགས་ཀྱི་ཡིག་འབྲུ་རྣམས་ཤིན་ཏུ་ཕྲ་བ་སྤུས་བྲིས་པ་བཞིན་གསལ་ཞིང་འབར་བའི་ཕྲེང་བས་བསྐོར་བ་སྟེ། དེ་ཡང་རང་གཞུང་དང་བསྟུན་སྔགས་ཕྲེང་གཡས་སུ་འཁོར་དགོས་པ་རྣམས་སྔགས་ངོ་ཕྱིར་བསྟན་དང་། ཕྱི་ནས་བཀླག་ཕྱོགས་ལྟར་ཡིག་འབྲུ་རྣམས་ལངས་ཐབས་སུ་གཡོན་དུ་བཀོད་པ་ཕྲེང་བ་ལྟར་འཁོར་བའི་མགོ་འདྲེན་ༀ་ལྟ་བུ་དང་ཧཱུྃ་ཧྲཱིཿསོགས་མཇུག་གི་སྔགས་འབྲུ་ཐུག་པ། དེ་ཡང་རིང་བའི་རིགས་ལ་མདུན་ནས་ཡིག་མགོ་བརྩམས་པའི་སྔགས་མགོ་ནང་བསྟན་དང་སྔགས་མཇུག་ཕྱི་རོལ་དུ་ཐད་ཀར་འགྲིགས་པའི་རིམ་པ་གཉིས་གསུམ་སྦྲུལ་འཁྱིལ་བ་ལྟར་བསྒོམས་ལ་བཟླས་པའི་དུས་གཡས་སུ་བཀླག་ཐབས་སུ་འཁོར་དགོས་པ་ཡིན། སྔགས་ཕྲེང་གཡོན་དུ་འཁོར་དགོས་པ་རྣམས་ཐུགས་སྲོག་གི་མདུན་ནས་སྔ་མ་ལྟར་ཡིག་འབྲུ་རྣམས་ལངས་སྟབས་སུ་སྔགས་ངོ་ནང་བསྟན་ནང་ནས་བཀླག་ཕྱོགས་སུ་གཡས་བསྐོར་དུ་བཀོད། སྔགས་རིང་རྣམས་ཕྱི་ནང་བསྐོར་ལུགས་སྔ་མ་ལྟར་བྱ། བཟླ་བའི་སྐབས་གཡོན་དུ་འཁོར་དགོས་པ་ཡིན། སྔགས་ཕྲེང་གཡས་གཡོན་དུ་འཁོར་ཚུལ། སྤྱིར་བཏང་ལྷ་ཡབ་ཀྱི་རིགས་རྣམས་གཡས་འཁོར་དང་། ཡུམ་རྣམས་ལ་གཡོན་འཁོར་ལྟ་བུར་འདུག་ཀྱང་མཐའ་གཅིག་ཏུ་ངེས་པ་མེད་པས་རང་གཞུང་དང་བསྟུན། ཡང་སྔགས་ཕྲེང་དངོས་འཁོར་མི་དགོས་པར་དེ་ལས་འོད་ཟེར་སྤྲོ་བསྡུ་སོགས་བྱེད་པའི་རིགས་ལ་སྔགས་ངོ་བསྟན་ཕྱོགས་གོང་ལས་གོ་བཟློག་སྟེ་བཀོད་ལུགས་ཀྱིས་གཡས་གཡོན་བསྐོར་ཕྱོགས་ཉིད་གཙོ་ཆེ་བས་དེ་ལྟར་སྐབས་དང་སྦྱར་ཤེས་པར་བྱའོ། །གཉིས་པ་སྤྲོ་བསྡུའི་དམིགས་པ་བྱེ་བྲག་ཏུ་བཤད་པ་ལ་ལྔ་ལས། དང་པོ་བསྙེན་པའི་ཡན་ལག་བཀོད་པའི་བཟླས་པའམ་ཟླ་བ་སྐར་ཕྲེང་ལྟ་བུ་ནི། ས་བོན་དང་སྔགས་ཕྲེང་འོད་ཟེར་འཕྲོ་བ་ལ་ཡང་ཡང་སེམས་བཟུང་། དེ་ནས་རིམ་པར་ལྷ་ཐམས་ཅད་ཀྱི་ཞལ་ནས་སྔགས་སྒྲ་སྒྲོགས་པ་དང་། སྔགས་འབྲུ་རྣམས་ཀྱང་རང་སྒྲ་དང་བཅས་གདན་ལས་ཅུང་ཟད་འཕར་ཏེ་ཐོག་མར་འོད་ཟེར་འཁོར། དེ་ནས་སྔགས་ཕྲེང་ཉིད་རིམ་གྱིས་ཇེ་མགྱོགས་སུ་འཁོར་བ་ལས་འོད་ཟེར་འཕྲོས། ལུས་ཀྱི་ནང་ཐམས་ཅད་གང་། ནད་གདོན་སྡིག་སྒྲིབ་བག་ཆགས་དང་བཅས་སངས་ཀྱིས་བསལ་བར་མོས་པའོ། །གཉིས་པ་ཉེ་བར་བསྙེན་པ་མགལ་མེ་འཁོར་བ་ལྟ་བུའམ་ཁྱོགས་ཀྱི་བཟླས་པ་ནི། ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་ཞིག་འཕྲོས་པ་ཡིག་འབྲུ་རྣམས་གཅིག་རྗེས་གཅིག་ནོན་རེག་ལ་མ་འབྱར་ཞིང་བར་མ་ཆད་པའི་ཕྲེང་བ་སྔགས་ཀྱི་རང་སྒྲ་དང་བཅས་པ་མགལ་མེའི་འཁོར་ལོ་བསྐོར་བ་བཞིན་ཡེ་ཤེས་པ་དང་དམ་ཚིག་སེམས་དཔའི་ཞལ་ནས་རིམ་པར་ཐོན་པ་ཡུམ་གྱི་ཞལ་དུ་ཞུགས། ཐུགས་རྒྱུད་བསྐུལ་སྐུ་ཡི་ནང་བརྒྱུད་པདྨ་ནས་བྱུང་སྟེ་ཡབ་དང་ཡེ་ཤེས་སེམས་དཔའ་གཉིས་ཀྱི་རྡོ་རྗེའི་ལམ་ནས་སྟེང་དུ་ཡར་བྱང་ཆུབ་ཀྱི་སེམས་བདེ་བ་ཆེན་པོའི་ངོ་བོར་བདེ་ཕྲིལ་ཕྲིལ་བྱུང་བ་ཐུགས་ཀའི་ས་བོན་ལ་ཐིམ་པས་མཆོག་གི་དངོས་གྲུབ་ཐོབ་པར་མོས་པ་ནི་ཡེ་ཤེས་ཀྱི་བཟླས་པ་སྟེ། དེས་ཐིག་ལེ་བརྟན། གསལ་ཉམས་སྐྱེ། ཐུར་སེལ་དབུ་མར་ཐིམ་པར་བྱེད། རྒྱུན་རིང་ན་རླུང་སྟོད་དུ་འཚང་{འཆུགས}པའི་གེགས་འབྱུང་བ་སྲིད་དོ། །དེ་སེལ་བྱེད་སྔགས་ཕྲེང་ཡབ་ཀྱི་རྡོ་རྗེ་ནས་ཡུམ་གྱི་པདྨར་ཕྱིན་པ་ཡུམ་གྱི་ཞལ་ནས་ཡབ་ཀྱི་ཞལ་དུ་ཞུགས་སྙིང་གའི་ས་བོན་ལ་ཐིམ། དེ་ལས་སྔར་ལྟར་སྔགས་ཕྲེང་བར་མ་ཆད་དུ་བྱུང་ནས་འཁོར་བར་བསྒོམ་པ་ནི་དོ་ལིའམ་ཁྱོགས་ཀྱི་བཟླས་པ་སྟེ། དེས་མི་རྟོག་པའི་ཉམས་སྐྱེ། སྲོག་རླུང་དབུ་མར་ཐིམ། སྟོད་འཚང་གི་གེགས་སེལ། རྒྱུན་རིང་ན་ཐིག་ལེ་ཉམས་པ་དང་དམིགས་པ་གསལ་ཆ་ཆུང་བར་འགྱུར་ཉེན་ཡོད་པས། དེ་གཉིས་སྤེལ་ནས་བསྒོམས་ན་ལེགས་པས། སྔ་དྲོ་དང་སྲོད་ལ་ཚུར་འཁོར་བ་དང་ཉིན་གུང་དང་ཕྱི་དྲོ་ཕར་འཁོར་བར་བསྒོམ། དེ་གཉིས་ཀ་ལ་འཁོར་ལོའི་བཟླས་པ་ཞེས་བྱ་སྟེ། མདུན་བསྐྱེད་ཡོད་པ་རྣམས་ལའང་འདི་བཞིན་སྦྱར་ཏེ་བདག་མདུན་གྱི་བར་དུ་སྔགས་ཕྲེང་སྤྲོ་བསྡུ་བྱའོ། །གསུམ་པ་སྒྲུབ་པའི་ཡན་ལག་རྒྱལ་པོའི་ཕོ་ཉ་ལྟ་བུའམ་སྤྲོ་བསྡུའི་བཟླས་པ་ནི། སྔགས་བཟླས་པའི་རྐྱེན་གྱིས་ཐུགས་སྲོག་སྔགས་ཕྲེང་དང་བཅས་པ་ལས་འོད་ཟེར་ཁ་དོག་ལྔ་ལྡན་ནམ་མཁའ་གང་བར་འཕྲོས་པའི་རྩེ་ལས་མཆོད་པའི་ལྷ་མོ་མཆོད་རྫས་ཐོགས་པ་དཔག་ཏུ་མེད་པ་འཕྲོས། མཁའ་ཁྱབ་ཀྱི་རྒྱལ་བ་སྲས་དང་བཅས་པ་ལ་ཐུགས་མཉེས་པའི་མཆོད་པ་བསམ་གྱིས་མི་ཁྱབ་པ་ཕུལ། ལྷ་རྣམས་ཟག་མེད་ཀྱི་བདེ་བ་ཆེན་པོས་ཐུགས་མཉེས་པར་བྱས། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་གྱི་རྣམ་པར་རམ། འོད་ཟེར་དཀར་དམར་མཐིང་གསུམ་གྱི་རྣམ་པར་ཆར་བབས་པ་ལྟར་བྱོན་ནས་རང་གི་སྒོ་གསུམ་ལ་ཐིམ་པས་སྒྲིབ་གཉིས་བག་ཆགས་དང་བཅས་པ་དག ཚོགས་གཉིས་ཡོངས་སུ་རྫོགས། དབང་བཞི་ཆིག་རྫོགས་སུ་ཐོབ་པར་བསམ་པ་ནི་བདག་དོན་བྱིན་རླབས་བསྡུ་བའི་དམིགས་པའོ། །ཡང་འོད་ཟེར་འཕྲོས་ཏེ་ཁམས་གསུམ་རིགས་དྲུག་གི་སེམས་ཅན་རྣམས་ལ་ཕོག་པས་ལས་ཉོན་སྡིག་སྒྲིབ་དང་སོ་སོའི་སྡུག་བསྔལ་ཐམས་ཅད་སྐད་ཅིག་ལ་སྦྱངས། ཉན་རང་བྱང་སེམས་རྣམས་ཀྱང་ཤེས་སྒྲིབ་ལས་གྲོལ་བར་བྱས། ཐམས་ཅད་ཀྱི་ལུས་ངག་ཡིད་གསུམ་རྡོ་རྗེ་གསུམ་གྱི་ངོ་བོར་གནས་གྱུར་པར་བསམ་པ་ནི་གཞན་དོན་ཕྲིན་ལས་གྱི་བཟླས་པ་སྟེ། འདིའི་སྐབས་སུ་ལས་བཞི་གང་འདོད་ཀྱི་དམིགས་པའང་འཕྲུལ་ཤེས་པར་བྱའོ། །བཞི་པ་སྒྲུབ་པ་ཆེན་པོའི་ཡན་ལག་བུང་བ་ཚང་ཞིག་པ་ལྟ་བུ་ནི། ལྷ་སྔགས་ལས་སྤྲོས་པའི་འོད་ཟེར་གྱིས་སྣོད་གཞལ་ཡས་ཁང་། བཅུད་ལྷ་ཡི་འཁོར་ལོ། སྒྲ་གྲགས་སྔགས་ཀྱི་རང་བཞིན། དྲན་རྟོག་ཡེ་ཤེས་ཀྱི་རོལ་པར་བསྒྱུར་བར་མོས་ལ་འཛིན་མེད་ཀྱི་ངང་ནས་བཟླ་བ་ནི་བདག་གཞན་གཉིས་མེད་ཀྱི་བཟླས་པའོ། །ཛབ་྄ དགོངས་བཞི་པོ་འདི་རིམ་ཅན་དུ་སྦྱོར་བ་དང་། གང་ཡང་རུང་བ་རེ་ཟུང་སྦྱོར་བ་སོགས་ཡོད་པ་ལས་རང་གཞུང་དངོས་བསྟན་ཉིད་གལ་ཆེའོ། །ལྔ་པ་ཐུན་མོང་མ་ཡིན་པ་མན་ངག་གི་ལུགས་ལྟར་བསྙེན་སྒྲུབ་ཆིག་ཆོད་དུ་བྱས་ན། བཟླས་པའི་ཐོག་མར་རང་ཡི་དམ་དུ་གསལ་བའི་སྤྱི་བོར་བླ་མ་པད་འབྱུང་ཡབ་ཡུམ་རྡོ་རྗེ་འཆང་གི་ཆ་ལུགས་ཅན་དུ་བཞུགས་པ་ལ་བཀའ་བརྒྱུད་བླ་མའི་ཚོགས་ཀྱིས་བསྐོར་བར་མོས་ལ། མོས་གུས་དྲག་པོས་ཐུགས་རྒྱུད་བསྐུལ་བས་སྐུའི་གནས་གསུམ་འབྲུ་གསུམ་ལས་འོད་ཟེར་དཀར་དམར་མཐིང་གསུམ་བདུད་རྩིའི་རྣམ་པར་བྱུང་། རང་གི་སྤྱི་བོ་ནས་ཞུགས། ལུས་གང་སྒྲིབ་པ་དག ཐུགས་རྒྱུད་ཀྱི་བྱིན་རླབས་མ་ལུས་པ་ཞུགས་ནས་ལྷ་སྔགས་ཐམས་ཅད་མྱུར་དུ་འགྲུབ་པའི་དངོས་གྲུབ་ཐོབ་པར་བསམས་ལ། བཛྲ་གུ་རུ་བརྒྱ་རྩ་ཙམ་བཟླ། བླ་མ་རང་བསྟིམ། དེ་ནས་ངག་བྱིན་རླབས་དང་། ཕྲེང་བ་བྱིན་རླབས་སོགས་བྱས་རྗེས། རང་ལྷར་གསལ་བའི་ཐུགས་ཀ་ནས་རྟེན་དང་བརྟེན་པའི་ཛབ྄་ཁང་མདུན་དུ་ཕྱེས་ཏེ། ཐུགས་ཀའི་ས་བོན་སྔགས་ཕྲེང་ལས་འོད་ཟེར་དང་སྔགས་ཕྲེང་མགལ་མེ་ལྟར་བརྒྱུད། ལྗགས་ཀྱི་རྩེ་ནས་ནམ་མཁར་འཁྲིགས་པའི་འོད་ཟེར་ཆེན་པོས་མཁའ་ཁྱབ་ཀྱི་རྒྱལ་བ་སྲས་བཅས་ལ་ཀུན་བཟང་བདེ་བ་ཆེན་པོའི་མཆོད་སྤྲིན་དམ་པ་ཕུལ། ཐུགས་དགྱེས་ཤིང་ངོམས་པའི་ཚུལ་དུ་དགོངས་ཏེ་དེ་ཐམས་ཅད་ཆོས་ཀྱི་སྐུ་ལས་གཟུགས་ཀྱི་སྐུ་བསྒོམ་པའི་ལྷའི་དཀྱིལ་འཁོར་གྱི་རྣམ་པར་མཁའ་ཁྱབ་ཏུ་སད་པ་ཏིལ་གྱི་གང་བུ་བཞིན་དུ་ཛབ྄་ཁང་གི་ལྷ་དང་གཉིས་སུ་མེད་པར་བཞུགས་ཤིང་དེ་དག་གི་སྐུ་གསུང་ཐུགས་ཀྱི་འོད་ཟེར་རང་ལ་ཐིམ། ཡང་མདུན་མཁར་འཁྲིགས་པའི་སྔགས་འབྲུ་རྣམས་ལས་འོད་ཟེར་དཔག་ཏུ་མེད་པ་འཕྲོས། རྩ་བ་དང་བརྒྱུད་པར་བཅས་པ་སོགས་རིག་འཛིན་བླ་མའི་ཚོགས་མཉེས་པར་བྱས། བྱང་ཆུབ་སེམས་དཔའ་རྣམས་མཉམ་པའི་ངང་ལས་འགྲོ་དོན་ལ་བཞེངས། མ་མོ་མཁའ་འགྲོ་རྣམས་དཔའ་བསྐྱེད། ཆོས་སྐྱོང་དམ་ཅན་རྣམས་ལས་ལ་བཙུད། ཉན་རང་རྣམས་འགོག་པ་ལས་བསླངས། འཇིག་རྟེན་དྲེགས་བྱེད་རྣམས་དབང་དུ་བསྡུས། ཕས་ཀྱི་རྒོལ་བ་བདུད་དང་མུ་སྟེགས་དཔའ་བཀོང་། ཁམས་གསུམ་སེམས་ཅན་རྣམས་ཀྱི་ལོག་རྟོག་ཟིལ་གྱིས་མནན། དགྲ་བགེགས་གདུག་པ་ཅན་ཚར་བཅད། ཕྱོགས་དུས་འགྲོ་བ་ཐམས་ཅད་ཀྱི་སྒྲིབ་པ་མཐའ་དག་བཅོམ་ནས་གནས་སྐབས་དང་མཐར་ཐུག་གི་རེ་བ་ཡོངས་སུ་རྫོགས་པར་བྱས་ཏེ་ཡི་དམ་ལྷའི་གོ་འཕང་ལ་བཀོད། སླར་ཡང་འོད་ཟེར་དེས་ཕོག་པས་ཕྱི་སྣོད་ཐམས་ཅད་གཞལ་ཡས་ཁང་། ནང་བཅུད་ཐམས་ཅད་ལྷ་དང་ལྷ་མོ་སྟེ། སྣང་སྲིད་སྣོད་བཅུད་ཐམས་ཅད་བསྒོམ་པའི་ལྷའི་དཀྱིལ་འཁོར་ཉག་གཅིག་ཏུ་རྫོགས་ཤིང་། དེ་རྣམས་ཀྱི་ཞལ་དང་ནམ་མཁའ་ཁྱབ་པའི་སྔགས་ཕྲེང་གི་འཁོར་ལོ་ལས་ཀྱང་གང་བཟླ་བྱའི་གསང་སྔགས་ཀྱི་རང་སྒྲ་འབྲུག་སྟོང་ལྡིར་བའམ། རི་རབ་འབུམ་ཉིལ་བའམ། གནམ་ལྕགས་ཀྱི་སྒྲ་ལྟ་བུའི་ནམ་མཁའི་ཁམས་ཁྱབ་ཅིང་། སྔགས་ཀྱི་འོད་ཟེར་དེ་ཡང་རྩ་བའི་ལྷའི་མདོག་གམ། ཡང་ན་དབུས་མཐིང་ནག ཤར་སྨུག་ནག ལྷོར་སེར་ནག ནུབ་དམར་ནག བྱང་ལྗང་ནག་ཏུ་འབར་ཞིང་འཁྲུགས་པའི་ཏིང་ངེ་འཛིན་ལ་རྩེ་གཅིག་ཏུ་གནས་པར་བྱས་ཏེ་བཟླ་བར་བྱའོ། འདི་ནི་གཙོ་བོར་ཁྲོ་བོ་ལ་སྦྱར་བ་སྟེ། གཞན་དུ་ཞི་བ་ལ་ཁོག་འདྲ་ཞིང་འོད་ཟེར་འཇམ་ལ་བདེ་བ་བསྐྱེད་པ་དང་། སྔགས་ཀྱི་སྒྲ་ཚངས་པའི་དབྱངས་ལྟར་སྙན་པ་ཉིད་དུ་བྱའོ། །བཟླས་དམིགས་དེ་དག་གི་སྐབས་ཀུན་ཏུ་ཐམས་ཅད་རོ་མཉམ་ཡེ་ཤེས་ཆེན་པོའི་ངང་དུ་ཤེས་ཤིང་། སྣང་སྲིད་ཐམས་ཅད་རང་རིག་པའི་དབང་དུ་བསྒྱུར་ཏེ་ཐམས་ཅད་ཀྱི་བྱིན་རླབས་དངོས་གྲུབ་གང་འདོད་ཐོབ་པའི་དམིགས་གནད་དང་ལྡན་པར་བྱའོ། །ཐུན་འཇོག་ཁར་ནམ་མཁའི་ཡིག་འབྲུ་འོད་ཟེར་དང་བཅས་པ་རྣམས་དང་། སྣང་སྲིད་ལྷའི་དཀྱིལ་འཁོར་དུ་ཤར་བ་ཐམས་ཅད་ཛབ་྄ ཁང་གི་ལྷ་ལ་ཐིམ། ཛབ྄་ཁང་གི་ལྷ་རྣམས་རང་ལ་ཐིམ་པ་རང་ལུས་བཀྲག་མདངས་གཟི་བརྗིད་ཆེས་ཆེར་འཕེལ་ཞིང་ལུས་ཐམས་ཅད་བསྒོམ་པའི་ལྷ་སྐུ་ཕྲ་མོས་ཐེམ་མེར་གང་བར་བསམ། གཙོ་འཁོར་གྱི་བཟླས་པ་ཀུན་ལ་དེ་ལྟར་སྦྱར་རོ། །ཐུན་མཐར་དབྱངས་གསལ་རྟེན་སྙིང་ཡིག་བརྒྱ་རྣམས་གསུམ་གསུམ་གྱིས་སྔགས་ཀྱི་ཉམས་པ་སྐོང་ཞིང་ནུས་པ་བརྟན་པར་བྱ་བ་སོགས་སྤྱི་ལྟར་རོ། །འདི་ནི་སྔ་འགྱུར་རིག་འཛིན་བརྒྱུད་པའི་མན་ངག་གནད་བསྡུས་ཀུན་མཁྱེན་བླ་མ་འཇམ་དཔལ་དགྱེས་པའི་ཐུགས་བཅུད་དེ། གཞན་ཡང་རྩ་གསུམ་སྤྱི་བྱེ་བྲག་ཏུ་སྒྲུབ་ཚུལ་དང་། ཞི་རྒྱས་དབང་དྲག་བསྲུང་བཟློག་བསད་དམིགས་སོགས་ཐུན་མོང་དང་ཐུན་མིན་རྣམས་ནི་རྩ་བའི་བསྙེན་ཡི ག་དང་ཞིབ་པར་བླ་མའི་ཞལ་ནས་བླངས་ཏེ་གསང་བས་སྒྲུབ་ན་དངོས་གྲུབ་རྣམ་གཉིས་ལག་རྩེར་སོན་པར་འགྱུར་རོ། །གསུམ་པ་ཇི་ལྟར་བཟླ་བའི་ཚུལ་དགོས་པ་ཕན་ཡོན་དང་བཅས་པ་བཤད་པ་ལ། ཇི་ལྟར་བཟླ་བའི་ཚུལ་ནི། སྤྱིར་ངག་བཟླས་སྐད་གསོང་མཐོན་པོར་བཟླ་བ་དང་། མཆུ་དང་ལྕེ་རྩེ་འགུལ་ཙམ་གྱིས་ཤུབ་བུར་བཟླ་བ་དང་། རླུང་བཟུང་སྟེ་སྔགས་ཀྱི་གཟུགས་དང་སྒྲ་ལ་སེམས་གཏད་པ་འགོག་བཟླས་དང་། རླུང་འཛིན་པ་ཙམ་ཡང་མི་བྱ་བར་ཡིད་ཁོ་ནས་སྔགས་ཀྱི་གཟུགས་སམ་སྒྲ་གདངས་དྲན་པ་ཡིད་བཟླས་དང་། ས་བོན་གྱི་ནཱ་ད་ལས་དབུགས་ཕྱིར་དབྱུང་བ་དང་ལྷན་ཅིག་ཧཱུྃ་གི་སྒྲས་སྐུའམ་འོད་ཟེར་སྤྲོས་ཏེ་དོན་གཉིས་བསྒྲུབ། ནང་དུ་འཇུག་པའི་ཨོཾ་གྱི་སྒྲས་ཚུར་བསྡུས། གནས་པའི་ཚེ་ཨཱཿའི་སྒྲས་ནཱ་ད་ལ་ཐིམ་པའམ། ཡང་ན་རང་སྔགས་དང་སྦྱར་ཏེ་རྡོ་རྗེའི་བཟླས་པ་བྱ་བ་སོགས་ཡོད་ཀྱང་། འདིར་ངག་བཟླས་ཙམ་གྱི་དབང་དུ་བྱས་ཏེ། གང་ལ་བཟླ་བའི་གཞི་བགྲང་ཕྲེང་གི་མཚན་ཉིད་དང་། དེ་ཇི་ལྟར་བྱིན་གྱིས་བརླབས་པ། ལས་སོ་སོ་དང་བསྟུན་ཏེ་འདྲེན་ཚུལ་སོགས་གཞུང་སྤྱི་མཐུན་ལྟར་བྱ་བ་ལས་འདིར་ཡི་གེས་འཇིགས་ལ། བཟླ་ཚུལ་དངོས་ནི། ཨོ་རྒྱན་ཆེན་པོས། མ་ཡེངས་ཏིང་འཛིན་ལྡན་པས་བཟླ༔ གཞན་དུ་ཡེངས་པར་གྱུར་ན་ནི༔ བསྐལ་པར་བཟླས་ཀྱང་འབྲས་མི་འབྱིན༔ ཞེས་གསུངས་པས་སེམས་རྣམ་པར་གཡེང་བས་ཇི་ཙམ་དུ་བཟླས་ཀྱང་ངག་སྒྲིབ་ཅུང་ཟད་སྲབ་པ་ཙམ་ལས་འདོད་པའི་དངོས་གྲུབ་ཆེན་པོ་འབྱིན་པར་མི་འགྱུར་བས། ལྷའི་གསལ་སྣང་དང་སྔགས་ཕྲེང་འོད་ཟེར་སྤྲོ་བསྡུ་སོགས་ལ་སེམས་གཏད་དེ་ཏིང་ངེ་འཛིན་རྩེ་གཅིག་པའི་ངང་ནས་གཞན་དུ་མ་ཡེངས་པར་བཟླ་བ་གལ་ཆེ་ཞིང་། དེ་ཡང་ཤེས་ན་ཡི་གེའི་སྐྱེ་གནས་སྒྲའི་འབྱིན་ཚུལ་ལྕེ་མཆུའི་བྱེད་རྩོལ་སོགས་མ་འཁྲུགས་པར། ཡི་གེ་རེ་རེ་ནས་ཤིན་ཏུ་མྱུར་བ་དང་། ཧ་ཅང་བུལ་བ་མ་ཡིན་པ་དང་། ཡི་གེ་རིང་པོ་རྣམས་ཐུང་བ་དང་། ཐུང་ངུ་རྣམས་རིང་བ་མ་ཡིན་པ་དང་། ཡི་གེ་གཞན་ལྷག་པའམ་ཡི་གེ་དེ་ཉིད་ཆད་པ་མ་ཡིན་པ་དང་། གཞན་ཡང་སྒྲ་ཧ་ཅང་ཆེ་བ་དང་ཆུང་བ་ལ་སོགས་པའི་སྐྱོན་རྣམས་སྤངས་ལ། ཐུན་སྒང་དུ་གཞན་དང་གཏམ་སྨྲ་བ་དང་། གླལ་བ་དང་ལུ་བ་སོགས་གཞན་གྱིས་བར་མ་ཆད་པར་བཟླ་བར་བྱ་སྟེ། རྔམ་གློག་ལས། སྒྲ་ཆེན་མ་ཡིན་ཆུང་བ་མིན། །མགྱོགས་པར་མ་ཡིན་བུལ་བར་མིན། །དྲག་པོར་མ་ཡིན་ཞན་པར་མིན། །ཡིག་འབྲུ་ཡན་ལག་ཉམས་པས་མིན། །ཡེངས་པ་མ་ཡིན་སྨྲ་བཞིན་མིན། །གླལ་སོགས་བར་དུ་ཆོད་པས་མིན། །ཞེས་གསུངས། དེ་ཡང་སྔགས་ཀྱི་སྒྲ་དོན་ཤན་སྦྱོར་བ་ཤེས་ན་དོན་གྱི་གཟུངས་འགྲུབ་པ་སོགས་ཀྱི་དགོས་པ་ཡོད་དེ། རྒྱུད་ལས། དོན་ལ་ཐེ་ཚོམ་མེད་པ་ཡི། །མཁས་པ་ལ་ནི་དངོས་གྲུབ་ཉེ། །ཞེས་གསུངས། དེ་ལྟར་སྦྱོར་མ་ཤེས་ཀྱང་དད་མོས་རྩེ་གཅིག་པས་བཟླས་ན་དངོས་གྲུབ་ཆེན་པོ་ཇི་ལྟ་བ་བཞིན་འབྱུང་སྟེ། ཡང་ན་བླུན་པོ་དད་པ་ཅན། །དེ་ལ་སྦྱོར་བའི་དངོས་གྲུབ་ཉེ། །ཞེས་གསུངས་ཤིང་། སྔོན་གྱི་གྲུབ་ཐོབ་འདར་ཕྱར་དང་ས་པཎ་གྱིས་འཕྲོག་བྱེད་བརྟུལ་བའི་ལོ་རྒྱུས་ཀྱིས་ཀྱང་ཤེས་སོ། །གལ་ཏེ་སྔགས་རྒྱ་སྐད་དུ་ཡོད་པ་བོད་སྐད་དུ་བསྒྱུར་བ་དང་། རྒྱ་བོད་འདྲེས་པར་ཡོད་པའི་བོད་སྐད་རྣམས་རྒྱ་སྐད་དུ་བསྒྱུར་བ་དང་། མཁའ་འགྲོའི་བརྡ་སྐད་སོགས་ཡུལ་གཞན་གྱི་སྐད་དུ་ཡོད་པ་བརྡ་སྤྲོད་པའི་ལུགས་དང་བསྟུན་ནས་གསར་དུ་བཅོས་ཏེ་བཟླས་ན་ནི་དངོས་གྲུབ་མེད་དེ། ཅིའི་ཕྱིར་ན་སྔོན་གྱི་གསང་སྔགས་གསུང་བ་པོ་ཉིད་ཀྱིས་སྐད་དེ་དང་དེར་བྱིན་གྱིས་བརླབས་ཀྱིས་གསར་དུ་བཅོས་ཤིང་བསྒྱུར་བ་དེར་མ་ཡིན་པའི་ཕྱིར་གང་གསུང་པ་པོ་དེའི་བ དེན་ཚིག་འགྲུབ་པར་མི་འགྱུར་བའི་ཕྱིར་རོ། །སྤྱིར་ཡང་གསང་སྔགས་ཀྱི་ཆོ་ག་སོགས་ལ་དཔྱད་པས་དངོས་གྲུབ་རིང་བར་བཤད་དེ། རྟོག་ཅིང་དཔྱོད་པའི་རྟོག་གེ་མཁན། །དེ་ལ་དངོས་གྲུབ་ཤིན་ཏུ་རིང་། །ཞེས་དང་། རྫས་དང་སྔགས་ཀྱི་སྦྱོར་བ་ལ། །དཔྱད་ན་དངོས་གྲུབ་མི་འབྱུང་སྟེ། །གལ་ཏེ་ཡིད་གཉིས་ཟ་གྱུར་ཏམ། །བསམ་པ་འགྱུར་རམ་དད་པ་ཉམས། །དེ་ཚེ་དངོས་གྲུབ་ཉེ་བ་ཡང་། །ཕྱིར་ལྡོག་འགྱུར་བར་གདོན་མི་ཟ། །ཞེས་གསུངས། དེས་ན་དད་མོས་རྩེ་གཅིག་པས་བཟླ་བར་གཅེས་སོ། །བཟླ་བྱའི་སྔགས་ཀྱང་ཕལ་ཆེར་ལྷའི་མཚན་ནས་བོས་ཏེ་ཐུགས་རྒྱུད་བསྐུལ་བ་ཡིན་ཏེ། ཡིག་དྲུག་ལ་མཚོན་ན། བོད་སྐད་དུ་ཀྱེ་ནོར་བུ་པདྨ་ཞེས་མཚན་ནས་འབོད་པ་དང་། སིངྔྷི་ལྟ་བུ་ལ། རྡོ་རྗེའི་བླ་མ་པདྨ་དངོས་གྲུབ་སྩོལ་ཅེས་ཐུགས་དམ་བསྐུལ་བ་ལྟ་བུ་ཡིན་པས། དོན་ལ་ཡེ་ཤེས་ཀྱི་ལྷ་ལ་བོས་མ་བོས་ཀྱིས་གསན་མི་གསན་དང་ཉེ་རིང་གི་ཁྱད་པར་མ་དམིགས་ཀྱང་། སངས་རྒྱས་ཐམས་ཅད་ཀྱི་གསུང་ཆོས་སྐུའི་རང་བཞིན་ཡེ་ཤེས་ཀྱི་རིག་སྔགས་དེ་ཉིད་བཟླས་པས་སྒྲིབ་པ་རིམ་གྱིས་ཟད་པ་ན་འབྲས་བུའི་ལྷ་དང་ཇེ་ཉེར་འགྱུར་བ་ཆོས་ཉིད་ཀྱིས་ཡེ་ཤེས་ལྷ་ཡི་བྱིན་རླབས་རྒྱུད་ལ་འཇུག་པར་འགྱུར་བ་ཡིན་ནོ། །བཟླས་པའི་ཚད་ཀྱང་། གོང་དུ་ཕྱོགས་ཙམ་སྨྲོས་པ་ལྟར། རབ་མཚན་མའི་བསྙེན་པ་དངོས་ཉམས་མི་ལམ་གང་རུང་དུ་ལྷ་འགྲུབ་པའི་མཚན་མ་མཐོང་བ། འབྲིང་དུས་ཀྱི་བསྙེན་པ་ཟླ་དྲུག་སོགས་རང་གཞུང་ལས་བཤད་པ་དང་མཐུན་པ། ཐ་མ་གྲངས་བསྙེན་གྱི་དབང་དུ་བྱས་ན། དཀྱིལ་འཁོར་གྱི་གཙོ་བོའི་སྔགས་འབྲུ་རེ་ལ་འབུམ་ཕྲག་རེ། འཁོར་གྱི་ལྷ་རྣམས་གཙོ་བོའི་བཅུ་ཆ་རེ་ཀུན་ལ་འབུམ་གྱི་རྗེས་སུ་ཁྲི་རེ། ཁྲིའི་རྗེས་སུ་སྟོང་། སྟོང་གི་རྗེས་སུ་བརྒྱ། བརྒྱ་ལ་བཅུ། བཅུ་ལ་གཅིག་སྟེ་རང་གི་བཅུ་ཆ་ཁ་སྐོང་དུ་བཟླ། ཡང་ཡི་གེ་བཅོ་ལྔ་མན་ཆད་ལ་འབྲུ་འབུམ། སུམ་ཅུ་ཡན་ཆད་ལ་ཁྲིའི་ཚད་ཡིན་པར་ཡང་བཤད། ཐམས་ཅད་ཀྱང་རྫོགས་ལྡན་ལ་གྲངས་དངོས་བསྟན། སུམ་ལྡན་གྱི་དུས་སུ་ཉིས་འགྱུར། ཉིས་ལྡན་གྱི་དུས་སུམ་འགྱུར་རྩོད་ལྡན་ལ་བཞི་འགྱུར་དུ་བཟླ་དགོས་པར་གསུངས་པ་སོགས་ཡོད་དེ་གཙོ་བོར་རྣལ་འབྱོར་རང་གི་ནང་ཤེར་ཏིང་གི་ནུས་པ་དང་བསྟུན་པ་གཅེས་སོ། །དེ་ལྟར་བཟླ་བའི་ཚེ་སྔགས་སྟོང་ཕྲག་རེའི་མཚམས་སུ་སྟོང་ཚིག་གི་མཆོད་བསྟོད་བྱ་བར་གསུངས་ཀྱང་དེ་ཙམ་མ་འགྲུབ་ན་བཟླས་པ་གྲུབ་པའི་རྗེས་སུ་མཆོད་བསྟོད་དང་། དབྱངས་གསལ་ཡིག་བརྒྱ་རྟེན་སྙིང་རྣམས་བརྗོད་སྐུ་གསུང་ཐུགས་ཀྱི་དམ་ཚིག་འགལ་བ་དང་སྔགས་ཆད་ལྷག་སོགས་ཀྱི་ཉེས་པ་བསྐང་ཞིང་ནུས་པ་བརྟན་པར་བྱ་བ་དང་དངོས་གྲུབ་ལེན་པ་སོགས་རང་གཞུང་ལྟར་བྱ། གཞན་མཚམས་ཀྱི་སྤང་བླང་སོགས་དང་ཐུན་མཚམས་ཀྱི་བྱ་བ་ཞིབ་པར་དམ་པ་སྔ་མ་རྣམས་ཀྱི་གསུངས་སྤྱི་དང་། ཁྱད་པར་རྗེ་བླ་མས་མཛད་པའི་བསྙེན་སྤྱི་ཆེན་མོ་སོགས་ལས་ཤེས་པར་བྱ་ཞིང་ལག་ཏུ་ལོན་པ་གཅེས་སོ། །དེ་ལྟར་གཙོ་བོ་ལྷའི་རྣལ་འབྱོར་རྩེ་གཅིག་ཏུ་བསྒོམ་ཞིང་གྲངས་དུས་མཚན་མའི་བསྙེན་པ་ཚུལ་བཞིན་དུ་བྱས་པས་ཚེ་འདིར་བགེགས་དང་བར་ཆད་ཞི་བ་དང་། ངག་ལ་ནུས་པ་འབྱུང་བ་དང་། ལྷ་མཉེས་པས་རྒྱུད་བྱིན་གྱིས་རློབ་པ་དང་། ཚོགས་གཉིས་རྫོགས་པས་བསམ་པ་འགྲུབ་པ་དང་། གཞི་ལམ་འབྲས་གསུམ་གྱི་རྟེན་འབྲེལ་ཁྱད་པར་ཅན་འགྲིགས་ཤིང་རྒྱུད་སྨིན་པ་དང་། ཚེ་རབས་ཐམས་ཅད་དུ་ལྷག་པའི་ལྷས་རྗེས་སུ་འཛིན་པ་དང་། མཐར་ཐུག་རིགས་ཀྱི་བདག་པོའི་ཐུགས་ཀློང་དུ་མངོན་པར་བྱང་ཆུབ་པ་དང་། གནས་སྐབས་སུའང་ལས་དང་དངོས་གྲུབ་ཀྱི་ཁྱད་པར་རབ་འབྱམས་ལ་དབང་བ་དང་། རྡོ་རྗེ་སློབ་དཔོན་གྱི་བྱ་བ་དཀྱིལ་འཁོར་གྱི་ལས་ལ་དབང་འབྱོར་པ་སོགས་དགོས་པ་དང་ཕན་ཡོན་ཚད་མེད་པ་དང་ལྡན་པ་ཡིན་ནོ། །གསུམ་པ་མཇུག་ཆོ་གའི་ཡན་ལག་གཞན་བཤད་པ་ལ་བཞི། ཚོགས་མཆོད། གཏོར་སྐྱོང་། དངོས་གྲུབ་བླང་བ། ནོངས་བཤགས་སོགས་སོ། །དང་པོ་ནི། སྤྱིར་ཚོགས་ཀྱི་འཁོར་ལོའི་ངོ་བོ་ཐབས་ཤེས་དབྱེར་མེད་ཀྱི་ཀུན་སྤྱོད་ཁྱད་པར་ཅན། ངེས་ཚིག་ག་ཎ་ཙཀྲའི་སྒྲ་ལས་བདེ་བ་ཆེན་པོ་ཚོགས་ཆེན་འདུས་པའི་འཁོར་ལོས་ཉོན་མོངས་པའི་དྲྭ་བ་གཅོད་པ། དབྱེ་ན། སྐལ་ལྡན་མི་ཡི་ཚོགས་ཐབས་ཤེས་ཟུང་དུ་ཚོགས་པ། འབྱོར་ལྡན་ཡོ་བྱད་ཀྱི་ཚོགས་གསང་སྔགས་ནང་གི་དམ་རྫས་ཚང་བ། དགྱེས་ལྡན་ལྷ་ཡི་ཚོགས་དཀྱིལ་འཁོར་གྱི་ལྷ་རྣམས་བསྒོམས་ཤིང་སྤྱན་དྲངས་པ། དེ་གསུམ་འདུས་ཏེ་ལོངས་སྤྱོད་པ་ལས་ཐོབ་པའི་བསོད་ནམས་དང་ཡེ་ཤེས་ཀྱི་ཚོགས་སོ། །ཇི་ལྟར་བྱ་བའི་ལས་རིམ་ལ། ཚོགས་ཀྱི་འཁོར་ལོ་ལ་ཚུལ་བཞིན་དུ་སྒྲ་ཇི་བཞིན་པར་དངོས་སུ་སྤྱོད་ནུས་པའི་གང་ཟག་དཀོན་ཕྱིར། འདིར་དེང་སང་སྔགས་པ་རྣམས་ཀྱི་ལག་ལེན་ཐུན་མོང་བ་ལྟར་ཡེ་རྒྱ་ལ་བརྟེན་པའི་མོས་སློབ་ཀྱི་ཚོགས་མཆོད་བྱ་བ་ལ། སྦྱོར་བ་ཡོ་བྱད་ཀྱི་ཤོམ་ནི། གང་དུ་བྱ་བའི་དཀྱིལ་འཁོར་གྱི་མདུན་དུ་ཕྱི་ནང་གསང་བའི་མཆོད་ཚོགས་དང་། དམ་ཚིག་གི་རྫས་སུ་འོས་པའི་བཟའ་བཅའ་བཏུང་བའི་རིགས་སོགས་ཅི་འབྱོར་བ་ལག་ལེན་ལྟར་བཤམས། དེ་ཉིད་བྱིན་གྱིས་བརླབ་པ་ནི། རྫས་རྣམས་ལ་བདུད་རྩི་བྲན་ཏེ། རང་ཉིད་གཙོ་བོའི་ང་རྒྱལ་ལ་གནས་པའི་ཐུགས་ཀ་ནས་ཡི་གེ་རྃ་ཡྃ་ཁྃ་གསུམ་འཕྲོས་ཡེ་ཤེས་ཀྱི་མེ་རླུང་ཆུར་གྱུར་པས་མ་དག་པའི་དངོས་འཛིན་ཐམས་ཅད་བསྲེགས་གཏོར་བཀྲུས་ནས། སྟོང་པར་སྦྱངས། སྟོང་པའི་ངང་ལས་བྷྲཱུྃ་ལས་ཚོགས་གཞོང་རིན་པོ་ཆེའམ་རང་བྱུང་བྷཉྫ་འབར་བའི་ནང་དུ། བཅུད་འབྲུ་གསུམ་སོགས་འོད་དུ་ཞུ་བ་ལས་བྱུང་བའི་བྱང་ཆུབ་སེམས་ཀྱི་ངོ་བོ་ཤ་ལྔ་བདུད་རྩི་ལྔ་ཡེ་ཤེས་ལྔ་ཡི་རང་བཞིན་འདོད་ཡོན་གྱི་རྣམ་པ་ཅིར་ཡང་འཆར་བར་མོས་ཏེ་མཁའ་ཁྱབ་ཏུ་སྤེལ་ལོ། །ཚོགས་ཞིང་སྤྱན་འདྲེན་པ་ནི། རང་ཉིད་རྩ་བའི་ལྷ་ཡབ་ཡུམ་དུ་གསལ་བའི་ཐུགས་སྲོག་གམ་མཉམ་པར་སྦྱོར་བའི་སྦྱོར་མཚམས་ནས་འོད་ཟེར་དཔག་ཏུ་མེད་པ་འཕྲོས་པས་འོག་མིན་གྱི་གནས་དང་རང་བཞིན་སྤྲུལ་པའི་ཞིང་རབ་འབྱམས་ནས་བླ་མ་རྩ་གསུམ་དཀྱིལ་འཁོར་གྱི་ཚོགས་རྣམས་ཏིལ་གྱི་གང་བུ་ཁ་ཕྱེ་བ་ལྟར་ནམ་མཁའི་ཁྱོན་ཐམས་ཅད་ཁྱབ་ཅིང་གང་བར་སད་དེ་མངོན་སུམ་དུ་བྱོན་པར་མོས་པའོ། །དེ་ནས་མཆོད་པ་དངོས་ལ་གསུམ་གྱི། དང་པོ་མཆོད་པ་ནི། ཚོགས་ཕུད་ཆ་དང་པོ་དེ་ཉིད་ངོ་བོ་ཟག་མེད་ཡེ་ཤེས་ཀྱི་བདུད་རྩི་ལ་རྣམ་པ་འདོད་ཡོན་དྲུག་གི་ལྷ་མོ་དང་མཁོ་དགུའི་ལོངས་སྤྱོད་ཟད་མི་ཤེས་པ་ནམ་མཁའ་དང་མཉམ་པར་སྤྲུལ་ཏེ་འབུལ་བའོ། །གཉིས་པ་བཤགས་པ་ནི། ཚོགས་བར་པ་ཆ་གཉིས་པ་དེ་ཉིད་བདུད་རྩི་ལྔའི་རྣམ་པར་དམིགས་ཏེ་ཕུལ་བས་ལྷ་རྣམས་དགྱེས་པ་བསྐྱེད། ཐུགས་དམ་བསྐང་། ཉམས་ཆག་དང་རྟོག་སྒྲིབ་བྱང་ཡེ་ཤེས་ཆེན་པོས་བྱིན་གྱིས་བརླབ་པར་མོས་ལ་ཡིག་བརྒྱ་སོགས་བརྗོད་དོ། །ཐ་མ་བསྒྲལ་བ་ནི། སྔར་བྱིན་རླབས་མ་བྱས་གོང་ཟུར་དུ་བཅད་པའི་ལིངྒ་སོགས་ཡོད་ན་དང་། མེད་ན་ཆ་གསུམ་པ་ཉིད་མདུན་དུ་བཀོད་པ་ལ། འདོད་ཡོན་ལྷ་མོ་ཧཱུྃ་གི་རྣམ་པས་ཚུར་རང་ལ་བསྡུ། དེ་ཉིད་དམིགས་རྟེན་དུ་བྱས་ཏེ། རང་ཉིད་ལྷར་གསལ་བའི་ཐུགས་ཀ་ནས་འོད་ཟེར་དང་སྤྲུལ་པའི་ཕོ་ཉ་བསམ་གྱིས་མི་ཁྱབ་པ་འཕྲོས་ཏེ་བསྒྲལ་བྱ་ཞིང་བཅུ་ཚང་པ་སྟེ། རྒྱུད་ལས། སངས་རྒྱས་བསྟན་པ་བཤིག་པ་དང་། །དཀོན་མཆོག་དབུ་འཕང་སྨད་པ་དང་། །དགེ་འདུན་འདུ་བའི་སྒོ་འཕྲོག་དང་། །ཐེག་ཆེན་ཆོས་ལ་སྨོད་པ་དང་། །བླ་མའི་སྐུ་ལ་བསྡོ་བ་དང་། །རྡོ་རྗེའི་ནང་དབྱེན་བྱེད་པ་དང་། །སྒྲུབ་ལ་བར་ཆད་བྱེད་པ་དང་། །གང་ཞིག་དམ་ལས་ལོག་པ་དང་། །སྙིང་རྗེ་མེད་པའི་སྲིན་པོ་དང་། །མུ་སྟེགས་ལོག་ལྟར་གཏོང་བ་དང་། །སྒྲུབ་པ་པོ་ལ་དོ་བསྡོ་བ། །འདི་རྣམ་བསྒྲལ་བའི་ཞིང་བཅུ་ཡིན། །ཞེས་སོ། །ཡང་ན་དམ་ཚིག་གསལ་བཀྲ་ལས། དཀོན་མཆོག་སློབ་དཔོན་སྐུ་དགྲ་གཉིས། །དམ་ཉམས་ལོག་དང་འཁུ་བ་དང་། །འདུ་བར་འོང་དང་ཡོངས་ལ་གནོད། །དམ་དགྲ་ངན་པའི་ངང་ཚུལ་ཅན། །ངན་སོང་གསུམ་དང་བཅུ་པོ་ནི། །རྣལ་འབྱོར་ཅན་གྱིས་དང་དུ་བླང་། །ཞེས་གསུངས་པ་ལྟར། དེ་རྣམས་རང་དབང་མེད་པར་བཀུག་སྟེ་ལྕགས་ཀྱུས་སྙིང་ནས་བཟུང་། ཞགས་པས་རྐེ་ནས་དྲངས། ལྕགས་སྒྲོག་གིས་ཡ ན་ལག་བཅིང་། དྲིལ་བུས་མྱོས་པར་བྱས་ཏེ་མཚན་མའི་རྟེན་ལ་བསྟིམ། སྐྱོབ་བྱེད་ཀྱི་ལྷ་དང་ཕྲལ་ནས་ཉམ་ཐག་པའི་ཚུལ་ཅན་དུ་གནས་པར་མོས་ལ། དོན་གྱི་སེམས་སྟོང་ཉིད་སྙིང་རྗེ་སྙིང་པོ་ཅན་ཏེ་ཚད་མེད་པའི་སྙིང་རྗེ་ཆེན་པོ་དང་སྒྱུ་མ་ལྟ་བུའི་ཏིང་ངེ་འཛིན་ཟུང་དུ་འཇུག་པས། གཏོང་བའི་སེམས་རྣམ་པ་ཞེ་སྡང་གི་གཟུགས་སུ་ཤར་བས། རང་དཔལ་ཆེན་པོ། ལག་གི་ཕུར་པ་སྲས་མཆོག་ཀཱི་ལ་ཡ། ལིངྒ་གནོད་བྱེད་ཀུན་འདུས་ཏེ་གསལ་བ་གསུམ་དང་ལྡན་པའི་ངང་ནས། ཕུར་པ་གཟས་པོའི་སྙིང་གར་བཏབ་པས་ཁོའི་ཚེ་བསོད་དཔལ་འབྱོར་བཀྲག་དང་གཟི་མདངས་ཐམས་ཅད་ཨའི་རྣམ་པར་བསྡུས་ནས་རང་ལ་བསྟིམས་པས་བདག་གི་རྡོ་རྗེའི་ཚེ་སྲོག་དང་གཉིས་སུ་མེད་པའི་བྱང་ཆུབ་ཀྱི་སེམས་སུ་གྱུར་པར་བསམ་པ་ཚེ་ལུང་དང་། ཀུན་གཞི་ནྲྀའི་རྣམ་པར་གནས་པ་ཕུར་རྩེའི་ཧཱུྃ་གིས་བླངས་ཏེ་ཁོང་གསེང་བརྒྱུད་ཕཊ་ཀྱིས་འཕངས་པས་གློ་བུར་གྱི་དྲི་མ་སྦྱངས་ནས་རྣམ་ཤེས་དྭངས་མའི་ཐིལ་ལེར་གྱུར་པ་འོག་མིན་དུ་དཔལ་ཆེན་པོ་སོགས་རྩ་བའི་ལྷ་གང་ཡིན་གྱི་ཐུགས་ཀར་ཐིམ་ནས་སྲས་སུ་དབང་བསྐུར་བར་མོས་པ་ཁྲུས་ལུང་སྟེ། དེ་ལྟར་ཚེ་ཁྲུས་སྤར་གསུམ་གྱི་དགོངས་པ་དང་ལྡན་པས་བརྟེན་པ་དབྱིངས་སུ་བསྒྲལ། རྟེན་གཞི་བག་ཆགས་གི་ཕུང་པོ་ཕོ་རྐང་པ་གཡས་དང་། མོ་རྐང་པ་གཡོན་ནས་བཟུང་རིམ་པར་གཏུབ་སྟེ་ངོ་བོ་དུག་གསུམ་རྣམ་པ་ཤ་ཁྲག་རུས་པའི་ཕུང་པོར་བསམ་སྟེ་ལྷ་གཙོ་འཁོར་བཀའ་སྡོད་སྤྲུལ་པ་དང་བཅས་པའི་ཞལ་དུ་བཏབ་པས་ཁམས་གསུམ་གྱི་འཁོར་བ་གནས་ནས་སྟོང་པར་མོས་པ་སྟེ། དེས་བདག་མི་འཕམ་སྟེ་དགྲའི་ཚེ་བསོད་རང་གི་ཚེ་བསོད་ཀྱི་གསོས་སུ་གྱུར་པས་འཚེང་། དགྲ་མི་འཕམ་སྟེ་རྣམ་སྨིན་ལས་ངན་གྱི་སྐྱེ་རྒྱུན་ཆད་ནས་དཔལ་ཆེན་པོའི་སྲས་སུ་གྱུར་པས་འཚེང་། ལྷ་མི་འཕམ་སྟེ་འཁོར་གྱི་བཀའ་སྡོད་སྲུང་མའི་ཚོགས་རྣམས་གཟུགས་ཕུང་ཤ་ཁྲག་ལོངས་སྤྱོད་ཀྱིས་ཚིམས་པས་འཚེང་བ་སྟེ་འབྲས་བུ་འཚེང་བ་གསུམ་ལྡན་དུ་འགྱུར་རོ། །འདི་དག་གི་ཚུལ་རྒྱས་པ་ནི་ཁོ་བོས་བྱས་པའི་ཡང་ཕུར་དང་རྡོ་རྗེ་ཕུར་པའི་རྣམ་བཤད་སོགས་སུ་བལྟ་བར་བྱའོ། །དེ་ནས་ཚོགས་ལ་རོལ་བ་ནི་ལས་ཀྱི་རྡོ་རྗེས་འདུས་པའི་གཙོ་བོ་ལ་ཕྱག་བྱས་ནས་ཐབས་ཤེས་ཀྱི་རྫས་བརྡ་དང་བརྡ་ཡི་འབུལ་ལེན་བྱས་རྗེས་འདུས་པ་གཞན་རྣམས་ལའང་རྒན་གཞོན་གྱི་རིམ་པ་བཞིན་བྲིམ་པ་ལ། ཚོགས་གྲལ་དུ་རྩོད་པ་དང་། ཀུ་ཅོ་དང་། ཐ་མལ་གྱི་བདེན་ཞེན་སོགས་སྤངས་ཏེ། ཚིམ་པ་དང་། དགའ་བ་དང་། འཛིན་ཞེན་མེད་པའི་སྒོ་ནས་བདུད་རྩིའི་མཆོད་རྫས་ལྟེ་བའི་གཏུམ་མོའི་མེས་བཞུ་བའི་དྭངས་མས་ལུས་དཀྱིལ་གྱི་ལྷ་རྣམས་མཆོད་པར་བསམ་པ་ནང་གི་བསྲེག་བླུགས་ཀྱིས་ལོངས་སྤྱོད། གཞན་ཡང་ཡེ་རྒྱ་ཙམ་ལ་བརྟེན་པའི་གསང་བའི་ཚོགས་མཆོད་དང་། ཡུལ་སྟོང་པ་ཉིད་དང་། ཡུལ་ཅན་རང་རིག་ཟུང་དུ་འཇུག་པས་འཁོར་འདས་གདོད་ནས་དཀྱིལ་འཁོར་དུ་གྲུབ་པ་ཉིད་འཁོར་གསུམ་མི་དམིགས་བདེ་བ་ཆེན་པོ་དེ་ཁོ་ན་ཉིད་ཀྱིས་མཆོད་པར་མོས་པ་དང་། རྡོ་རྗེ་སློབ་དཔོན་ནམ་ལས་ཀྱི་རྡོ་རྗེས་གནང་བ་ཐོབ་ན་རྡོ་རྗེའི་གླུ་གར་སོགས་ཀྱང་རྣལ་འབྱོར་པའི་ཉམས་དང་སྦྱར་ཏེ་བྱའོ། །དེ་ནས་ལྷག་མ་རྣམས་གསོག་འཇོག་མེད་པར་བསྡུས་པའི་དམེ་གཏོར་མཆོད་པའི་རས་མ་དང་བཅས་པའི་སྟེང་དུ་ཕུད་ཆ་གསུམ་པའང་བསྣན་ཏེ། ལས་ཀྱི་རྡོ་རྗེས་བསྐུལ་ནས། སློབ་དཔོན་གྱི་ལྕེ་རྟ་མགྲིན་ཡབ་ཡུམ་རོལ་བ་མཛད་པའི་བྱང་སེམས་ཀྱི་བདུད་རྩི་བབ་པར་བསམ་ལ། སྔགས་རྒྱས་ཛ་གད་ཀྱི་ཁ་ཕྲུ་བཏབ་སྟེ་བདུད་རྩིར་སྤེལ་བ་དཀྱིལ་འཁོར་གྱི་བྱང་ཤར་རམ་ཤར་ལྷོར་ཞིང་ལྤགས་སོགས་གདན་ལ་བཀོད། ལྷག་མགྲོན་རྣམས་སྔགས་རྒྱས་བཀུག་ལ་མེ་ཏོག་ལ་སོགས་པས་མཆོད་ནས། སྔོན་ཚེ་དཔལ་ཆེན་པོའི་སྤྱན་སྔར་ཇི་ལྟར་ཞལ་གྱིས་བཞེས་པ་བཞིན་དུ་ལྷག་གཏོར་ཟག་མེད་འདོད་ཡོན་གྱི་དམ་རྫས་ཆེན་པོ་འདི་བཞེས་ལ་བདག་རྣལ་འབྱོར་པས་ཇི་ལྟར་བཅོལ་བའི་ལས་རྣམས་སྒྲུབ་པར་མཛོད་ཅིག ཅེས་བསྒོས་ཏེ་སྒྲུབ་ཁང་གི་ཕྱི་རོལ་ནས་གོམ་པ་བདུན་ཅུ་བོར་བ་ནི་སྲིན་མོའི་ཟ་ལམ་ཡིན་པས་དེར་བསྐྱལ་ཞིང་རྗེས་སྨོན་ལམ་གདབ་པ་སོགས་ཆོ་ག་རང་གཞུང་ལྟར་བྱའོ། །གཉིས་པ་གཏོར་སྐྱོང་བྱ་བ་ནི། དཀྱིལ་འཁོར་གྱི་ལྷ་ཚོགས་རྣམས་དབྱིངས་ནས་ཐུགས་དམ་གྱི་རྒྱུད་བསྐུལ་ཞིང་། སྲུང་མའི་གཏོར་མ་རྣམས་གཏོར་གྲལ་ནས་ཕྱིར་སྤགས་པ་ལ། སྨན་རག་གིས་བྲན། གཏོར་རྫས་རྣམས་ངོ་བོ་དགྲ་བགེགས་ཀྱི་ཤ་ཁྲག་རུས་པ་ལ་རྣམ་པ་ཟག་མེད་ཡེ་ཤེས་ཀྱི་བདུད་རྩིར་སྤེལ་ཏེ། སྐྱེ་བ་མེད་པའི་དབྱིངས་ལས་རང་ཤར་བའི་བརྒྱུད་གསུམ་དམ་ཅན་དྲེགས་པའི་ཚོགས་འཁོར་དང་བཅས་པ་རྣམས་ལ་སྔོན་གྱི་ཐ་ཚིག་གཉེན་པོ་བསྒྲགས་ཏེ་ལས་བཞིའི་ཕྲིན་ལས་ཐོགས་པ་མེད་པར་སྒྲུབས་ཤིག་ཅེས་ལས་བཅོལ་ཏེ་ཕྱིར་འབུལ། སྐབས་འདིར་ཟོར་བསྐུལ་ཡོད་པའི་རིགས་ལ། གཏོར་རྫས་ནད་མཚོན་དུག་གི་ངོ་བོར་དམིགས་ཏེ་སྡང་དགྲ་གནོད་བྱེད་ཀྱི་ཕྱོགས་སུ་འཕང་བས་ཁ་ཕུང་རྗེས་མེད་དུ་བརླགས་པར་མོས། དེ་ནས་གཏོར་གཞོང་བཤལ་བའི་སྨན་ཕུད་ཀྱིས་བརྟན་མའི་གཏོར་མ་ལ་བྲན་ཞིང་། འབྲུ་གསུམ་གྱིས་བྱིན་གྱིས་བརླབས། ནང་དུ་རྟེན་འབྲེལ་བཅུ་གཉིས་གནས་སུ་དག་པའི་རང་གཟུགས་ཕྱི་རོལ་དུ་བརྟན་ཞིང་ཆགས་པས་བོད་ཁམས་སྐྱོང་བའི་གཙོ་མོ་བཅུ་གཉིས་འཁོར་སྨན་ཕྲན་འབུམ་དང་བཅས་པ་ལ་འབུལ་ཞིང་གངས་ལྗོངས་མཐའ་དབུས་བདེ་བའི་ཕྲིན་ལས་བཅོལ་ལོ། །དེ་ནས་རྟ་བྲོ་བྱ་བ་ནི། གཏོར་གཞོང་ཁ་སྦུབས་པ་རི་རབ་ཏུ་གསལ་བའི་འོག་ཏུ་དམིགས་བྱ་མནན་ཞིང་། རྡོ་རྗེས་རྒྱས་གདབ་པའི་ཁར་བྲོ་ཡི་ལས་བྱ་བ་སྟེ་སྣོད་བཅུད་ཐམས་ཅད་དཔལ་རྟ་མཆོག་ཧེ་རུ་ཀ་སོགས་ལས་མཐུན་གྱི་ཁྲོ་བོ་དང་ཁྲོ་མོའི་ཚོགས་ཀྱིས་གང་བས་ཐབས་ཤེས་གཉིས་སུ་མེད་པར་བྲོ་བརྡུང་བས་གནས་སྐབས་སུ་ཞི་རྒྱས་དབང་དྲག་གི་ལས་གང་ཡིན་འགྲུབ་ཅིང་། མཐར་ཐུག་རྟོག་ཚོགས་ཐམས་ཅད་སྐུ་དང་ཡེ་ཤེས་བདེ་བ་ཆེན་པོའི་རོལ་མོར་འཆར་བའི་དམིགས་པ་མེད་པའི་དབྱིངས་སུ་ཐིམ་པར་མོས་པའོ། །གསུམ་པ་དངོས་གྲུབ་བླང་བ་ནི། སྤྱིར་བསྙེན་སྒྲུབ་མཐར་ཕྱིན་པ་སོགས་ཀྱི་སྐབས་སུ་བྱ་བ་ཡིན་ལ། དེའི་ཚུལ་རྒྱས་པ་ནི་རང་རང་གི་རྩ་བའི་སྒྲུབ་དཀྱིལ་བསྙེན་ཡིག་སོགས་ལས་ཤེས་པར་བྱ་བ་ལས་འདིར་ཡི་གེས་འཇིགས་ལ། དཀྱུས་ཙམ་དུ་ལས་གཞུང་གི་འཇུག་ཐོག་དེར། སྒྲུབ་གཏོར་ལྷར་གསལ་བ་ལ་མོས་གུས་ཀྱིས་གསོལ་བ་གདབ་ཅིང་ཐུགས་དམ་བསྐུལ་བས། རྩ་བའི་ལྷ་རྣམས་ཀྱི་གནས་གསུམ་ནས་སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐམས་ཅད་འབྲུ་གསུམ་དང་འོད་ཟེར་གྱི་རྣམ་པར་འཕྲོས་ཏེ་རང་གི་གནས་གསུམ་དུ་ཐིམ་པས། ལུས་ངག་ཡིད་གསུམ་གྱི་སྒྲིབ་པ་བྱང་། སྐུ་གསུང་ཐུགས་ཀྱི་བྱིན་རླབས་དང་དངོས་གྲུབ་ཐོབ་པར་མོས་ལ་སྒྲུབ་གཏོར་གནས་གསུམ་དུ་འཇོག་པའམ་ནང་མཆོད་ཀྱི་བདུད་རྩི་མྱོང་ཞིང་གནས་གསུམ་དུ་ཐིག་ལེ་བྱ། མཐར་རོ་མཉམ་གཉུག་མའི་ངང་དུ་མཉམ་པར་བཞག་པར་བྱའོ། །བཞི་པ་ནོངས་པ་བཤགས་སོགས་བྱ་བ་ནི། གཏང་རག་གི་མཆོད་བསྟོད་བྱས་རྗེས། དཀྱིལ་འཁོར་གྱི་ལྷ་རྣམས་ཀྱི་སྤྱན་སྔར་གདུང་བ་དྲག་པོས། བདག་སྒྲུབ་པ་པོ་ཤེར་ཏིང་གི་ནུས་པ་དབེན་པས་དགོངས་སྤྱོད་རྒྱ་མཚོ་གདེང་དུ་མ་གྱུར་པ་དང་། བྱིང་རྒོད་ཀྱི་དབང་དུ་གྱུར་ཏེ་ཏིང་ངེ་འཛིན་མ་གསལ་བ་དང་། ཛབ྄་བཟླས་མ་དག་ཅིང་ཆོ་གའི་ཡན་ལག་ཉམས་པ་དང་། རྫས་དང་ཡོ་བྱད་མ་འབྱོར་ཞིང་འབགས་བཙོག་ཏུ་ཤོར་བ་སོགས་སྤྱི་དང་ཁྱད་པར་རྩ་བ་དང་ཡན་ལག་གི་དམ་ཚིག་དང་འགལ་བའི་ཉེས་པ་གང་དང་གང་བྱུང་བ་དེ་ཐམས་ཅད་བླ་མ་དང་དཀྱིལ་འཁོར་གྱི་ལྷ་ཚོགས་མཆེད་ལྕམ་འདུས་པ་རྒྱ་མཚོའི་སྤྱན་སྔར་མཐོལ་ཞིང་བཤགས་ན་འཕྲལ་དང་ཡུན་གྱི་སྒྲིབ་པར་མི་འགྱུར་བར་བྱང་ཞིང་དག་པར་མཛད་དུ་གསོལ་སྙམ་པས། རིགས་སོ་སོའམ་སྤྱི་ཁྱབ་ཏུ་རྡོ་རྗེ་སེམས་དཔའི་ཡི་གེ་བརྒྱ་བ་ཉིད་བཟླ་བར་བྱའོ། །དེ་ནས་ཡེ་ཤེས་པ་གཤེགས་བསྟིམས་གོང་འོས་བྱས་ནས་དམ་ཚིག་པ་བསྡུ་བའམ་ཡང་ན་ཡེ་ཤེས་ཀྱི་ལྷ་ལ་གཤེགས་གསོལ་མི་བྱ་བར་དམ་ཡེ་དབྱེར་མེད་དུ་བསྡུ་བ་ནི་སྔགས་བླ་མེད་ཀྱི་ཁྱད་ཆོས་ཐུན་མོང་མ་ཡིན་པའོ། །གསུམ་པ་ཐུགས་འོད་གསལ་གྱི་རྣལ་འབྱོར་ནི། འདིའི་སྦྱང་བྱ། བྱིས་པ་འདི་ཉིད་ལང་ཚོ་རྫོགས་ནས་འཆི་བ་སླར་ཡང་འབྱུང་བ་མཚོན་པ་སྟེ། སྣོད་བཅུད་སྲུང་འཁོར་ལ་བསྡུ་བ་ནས་རིམ་གྱིས་ནཱ་དའི་བར་དུ་བསྡུ་བ་དེ་རྣམས་ཀྱིས་འཆི་བའི་ཚེ་ཕྱི་ནང་གི་ཐིམ་རིམ་དང་འཆི་སྲིད་ཆོས་སྐུའི་འོད་གསལ་དང་བཅས་པ་མཚོན་བྱེད་དང་། དེ་ལས་ཐུན་མཚམས་ཀྱི་ལྷར་ལྡང་བས་བར་སྲིད་དང་མཐུན་པ་ཡིན་ཅིང་། སྦྱོང་བྱེད་ཀྱི་རིམ་པ་ནི། ལྷ་སྔགས་ཀྱི་རྣལ་འབྱོར་སྔར་བཤད་པ་བཞིན་ལ་ཅི་ནུས་སུ་བསླབ་ཅིང་མི་ནུས་ན་བསྡུ་རིམ་བྱ་བ་སྟེ། དེ་ཡང་གོང་དུ་བསྐྱེད་རིམ་གྱི་སྐབས་གྱ་ནོམ་ལྷར་ཞེན་གྱི་རྟོག་པ་མེད་ན་སྐབས་འདིར་ཡང་རྟེན་དང་བརྟེན་པའི་དཀྱིལ་འཁོར་ཐམས་ཅད་ནམ་མཁའ་ལ་འཇའ་ཡལ་བ་ལྟར་སྐད་ཅིག་གིས་སྦྱངས་ནས་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོའི་ངང་དུ་མི་དམིགས་པར་མཉམ་པར་བཞག་པ་རིལ་འཛིན་དང་། ཡོད་ན་རྗེས་གཞིག་གིས་བྱ་བར་གསུངས་པས། རང་གི་སྙིང་གའི་འོད་ཀྱིས་ཕྱི་རོལ་དག་པའི་སྣོད་བཅུད་ཐམས་ཅད་འོད་དུ་ཞུ་ནས་སྲུང་འཁོར་ལ་ཐིམ། དེ་ནས་ནང་གི་འབྱུང་རིམ་སྲུང་འཁོར་དུར་ཁྲོད་སོགས་རིམ་པར་གཞལ་ཡས་ཁང་ལ། དེ་འཁོར་རྣམས་ལ། དེ་གཙོ་བོ་ཡབ་ཡུམ་ལ། ཡུམ་ཡབ་ལ། དེ་ཐུགས་ཀའི་ཡེ་ཤེས་སེམས་དཔའ་ལ། དེ་རིམ་བཞིན་ཏིང་འཛིན་སེམས་དཔའ་ཐུགས་སྲོག་ས་བོན་ལ། དེ་གྱེན་རྫོགས་ནཱ་དའི་བར་དུ་ཡལ་ནས་མཐར་དམིགས་བསམ་སྤྲོས་པ་དང་བྲལ་བའི་ཀ་དག་གི་ཀློང་དུ་མཉམ་པར་བཞག་པས་རྟག་མཐའ་བསལ། དེ་ལས་སླར་ཡང་སྔགས་བརྗོད་པའི་རྐྱེན་གྱིས་ཆུ་ལས་ཉ་ལྡང་བའི་ཚུལ་དུ་རང་རྩ་བའི་སྐུར་ལངས་ཏེ་གནས་གསུམ་བྱིན་རླབས་དང་གོ་བགོ་ལུས་སྲུང་སོགས་བྱས་ནས་སྣང་སྤྱོད་ཐམས་ཅད་སྐུ་དང་ཡེ་ཤེས་ཀྱི་རོལ་པར་ལམ་དུ་ཁྱེར་བས་ཆད་མཐའ་བསལ་ཏེ་སྤྱོད་ལམ་རྒྱུན་གྱི་རྣལ་འབྱོར་ལ་བརྩོན་པར་བྱའོ། །དེ་དག་གི་སྦྱངས་འབྲས་ནི། སངས་རྒྱས་གཟུགས་སྐུའི་སྣང་བ་ནི་ཆོས་སྐུའི་ཕྲིན་ལས་ཡིན་ལ། ཆོས་སྐུའི་ཡེ་ཤེས་ཀྱང་དབྱིངས་ཀྱི་ངོ་བོ་ཡིན་པས་དེར་ཐིམ་པ་སྟེ། སྤྱིར་ཆོས་སྐུའི་ཡེ་ཤེས་སྤྲོས་བྲལ་འདུས་མ་བྱས་ཀྱིས་ཁྱད་པར་དུ་བྱས་པའི་ཕྱིར་ངོ་བོ་ཐིམ་བྱ་ཐིམ་བྱེད་ལས་འདས་མོད། གདུལ་བྱ་གཞན་སྣང་དུ་མི་སྣང་བའི་ཆ་ཙམ་ལ་ཐིམ་པའི་ཐ་སྙད་བཏགས་པའོ། །དེ་ལས་སླར་ཡང་གཟུགས་སྐུའི་སྣང་བ་རྒྱུན་མི་འཆད་པ་གདུལ་བྱ་རང་རང་གི་སྐལ་བ་དང་འཚམ་པར་འཆར་བར་མཚོན་པའོ། །ལམ་གོང་མའི་དུས་སུ་དབང་བཞི་པའི་ཉམས་ལེན་སྣོད་བཅུད་འོད་གསལ་དུ་བཅུག་ནས་སླར་ཡང་ཟུང་འཇུག་སྒྱུ་མ་ལྟ་བུའི་སྐུར་ལྡང་ནུས་པའི་གཞིར་འགྱུར་བས་སྨིན་བྱེད་དུ་འགྲོ་བ་ཡིན་ནོ། །འདི་ཡན་ཆད་སྤྱིར་བསྐྱེད་རིམ་གཙོ་ཆེ་བའི་དབང་དུ་བྱས་མོད། དོན་ལ་སྔ་འགྱུར་གྱི་བརྒྱུད་པ་རིན་པོ་ཆེའི་མན་ངག་ཡང་དག་པ་དང་ལྡན་ཕྱིར་བསྐྱེད་རྫོགས་ཟུང་འཇུག་གི་ལམ་དུ་འགྱུར་བ་ཡིན་ཏེ། དེའི་ཚུལ་སྔར་ཡང་བསྟན་མོད། འདིར་དོན་གྱི་མདོ་འགག་ནི། འདི་ལྟར་ཕུང་ཁམས་སྐྱེ་མཆེད་ཀྱིས་བསྡུས་པའི་རྟོག་ཚོགས་ཀྱི་ཆོས་ཕྱི་ནང་དུ་སྣང་བ་འདི་ཐམས་ཅད་སྤང་འགེགས་སྦྱང་བའི་ལམ་གྱིས་གསར་དུ་བཅོས་ཤིང་བསྒྱུར་བ་མིན་པར་ཡེ་གདོད་མ་ནས་གདན་གསུམ་ཚང་བའི་དག་པ་རབ་འབྱམས་ལྷའི་འཁོར་ལོ་ཆེན་པོར་གནས་པ་སྟེ། ཀུན་བྱེད་ལས། ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ཡི། །སྙིང་པོ་སྐུ་ཡི་དཀྱིལ་འཁོར་བཀོད་པ་ནི། །ཇི་ལྟར་སྣང་ཞིང་གནས་པའི་ཆོས་རྣམས་ཀུན། །སྐྱེ་བ་མེད་པའི་ཆོས་ཉིད་ངང་ལ་བཀོད། །ཇི་ལྟར་གྲག་ཅིང་གནས་པའི་ཆོས་རྣམས་ཀུན། །སྐྱེ་མེད་དབྱིངས་ལ་ཚིག་གི་གསུང་དུ་བཀོད། །སྙིང་པོ་བརྗོད་དུ་མེད་པའི་གསུང་ལ་འདུས། །འདི་ཡང་ཀུན་བྱེད་རྒྱལ་པོས་བཀོད་པ་ཡིན། །ཞེས་དང་། གུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །ཅེས་གསུངས། དེ་ཡང་རྟོག་ཚོགས་ཀྱི་ཆོས་རྣམས་ལྷར་དག་ཅིང་། ལྷ་ནི་མཉམ་ཉིད་ཡེ་ཤེས་ཀྱི་སྐུ་ཅན། ཡེ་ཤེས་ནི་གཟུང་འཛིན་གྱི་རྟོག་པས་མི་ཕྱེད་པའི་སེམས་ཀྱི་ཆོས་ཉིད་རང་བྱུང་གི་ཡེེ་ཤེས་གཟོད་མ་ནས་རྒྱལ་བ་ཀུན་གྱི་ཐུགས་རྡོ་རྗེའི་ངོ་བོར་རྣམ་པར་དག་པ་ཡིན་པས། གནས་ཚུལ་ཡང་དག་དང་མཐུན་པར་ལྟ་བས་ཐག་བཅད་ཅིང་། སྒོམ་པས་ཉམས་སུ་བླངས་པས་འཁོར་བའི་ཆོས་མེད་སྣང་སྒྱུ་མ་ལྟ་བུའི་སྣང་ཆ་དང་འཛིན་ཞེན་གྱི་ཆ་རྣམས་རང་སར་དག་ནས་བདེ་གསལ་སྟོང་པ་ཉིད་ཀྱི་རང་བཞིན་ཅིར་སྣང་ཡེ་ཤེས་ཆེན་པོར་འཆར་བར་འགྱུར་བས་ན། ཕྱི་ནང་རྟོག་ཚོགས་ཀྱི་ཆོས་ཐམས་ཅད་རང་སེམས་ཀྱི་རྩལ་སྣང་དུ་ངེས་ཤིང་། སེམས་ཉིད་གདོད་ནས་ལྷ་སྐུར་གནས་པས་ན། རང་སེམས་སྤངས་པའི་ཕ་རོལ་ན་ལྷ་མེད། ལྷ་སྤངས་པའི་ཕ་རོལ་ན་སེམས་མེད། སེམས་དང་ལྷ་སྐུ་ཟུང་འཇུག གསལ་སྟོང་ཞེན་བྲལ་སྒྱུ་མ་ལྟ་བུས་སྣང་སྤྱོད་ཐམས་ཅད་ལ་རྒྱས་ཐེབས་པར་བྱས་ཏེ། གཟུགས་སུ་སྣང་བ་ཐམས་ཅད་ལྷའི་སྐུ་སྒྱུ་མ་ལྟ་བུ། སྣང་ལ་རང་བཞིན་མེད་པ། གསལ་ལ་རྟོག་པ་མེད་པ། བདེ་ལ་ཞེན་པ་མེད་པ། ཆོས་སྐུའི་ངོ་བོ། ལོངས་སྐུའི་རྣམ་པ། སྤྲུལ་སྐུའི་ཕྲིན་ལས་དབྱེར་མི་ཕྱེད་པར་མཛད་པའི་བདག་ཉིད་ཅན་དུ་དག་སྣང་སྦྱོང་ཞིང་ལམ་དུ་ཁྱེར་བས། སྣང་བ་ཐམས་ཅད་རང་སྣང་། སྟོང་པ་ཐམས་ཅད་རང་སྟོང་། སྣང་སྟོང་ཟུང་འཇུག་ལྷ་སྐུའི་ཕྱག་རྒྱ་དག་པ་རབ་འབྱམས་ཀྱི་འཁོར་ལོར་འཆར་བར་འགྱུར་ཞིང་། དེ་བཞིན་དུ་ཟིན་མ་ཟིན་སྙན་མི་སྙན་སོགས་ཕྱི་ནང་གི་སྒྲར་གྲགས་པ་ངག་གི་བརྗོད་པ་རླུང་གི་བྱེད་རྩོལ་དང་བཅས་པ་ཡེ་ནས་གྲགས་སྟོང་སྐྱེ་བ་མེད་པ་རྒྱལ་བའི་གསུང་གཞོམ་མེད་ནཱ་དའི་སྒྲ་དབྱངས་ཆེན་པོར་གནས་པས། སྒྲ་སྐད་བརྗོད་པ་སྤངས་པའི་ཕ་རོལ་ན་སྔགས་མེད། སྔགས་སྤངས་པའི་ཕ་རོལ་ན་སྒྲ་སྐད་བརྗོད་པ་མེད། རླུང་སྔགས་དབྱེར་མེད་གྲགས་སྟོང་སྐྱེ་མེད་རྡོ་རྗེའི་བཟླས་པས་བརྟན་གཡོའི་སྒྲ་སྐད་བརྗོད་པ་ཀུན་ལ་རྒྱས་ཐེབས་ན་གསུང་གསང་བ་བསམ་མི་ཁྱབ་པ་གྲགས་སྟོང་གཞོམ་མེད་བྲག་ཆ་ལྟ་བུར་གྲོལ་བར་འགྱུར་ལ། ཡིད་ཀྱི་ཡུལ་དུ་འགྱུ་བའི་བཟང་ངན་གྱི་རྟོག་ཚོགས་མཐའ་དག་རང་བབས་གཉུག་མའི་ངང་དུ་བཞག་པས་ཡེ་ནས་རྒྱལ་བའི་ཐུགས་རྡོ་རྗེའི་ངོ་བོར་གནས་ཏེ། སེམས་ཀྱི་རང་བཞིན་སྤྲོས་བྲལ་བདེ་བ་ཆེན་པོ་གཉིས་མེད་མཉམ་པའི་ཀློང་དུ་སྤང་གཉེན་རོ་མཉམ་པ་ནི་གཤིས་ལུགས་ཇི་ལྟ་བ་དང་། དེའི་རང་རྩལ་སྣ་ཚོགས་སུ་ཤར་བའི་རོལ་པ་འགགས་པ་མེད་པ་སྣང་ལུགས་ཇི་སྙེད་པ་སྟེ། དེ་གཉིས་ངོ་བོ་ཟུང་འཇུག་བརྗོད་བྲལ་ལྷན་ཅིག་སྐྱེས་པའི་ཡེ་ཤེས་ཀྱི་ངོ་བོར་མི་ཕྱེད་རོ་མཉམ་པ་ནི་སངས་རྒྱས་ཀྱི་ཐུགས་རྣམ་པར་མི་རྟོག་པའི་ཡེ་ཤེས་ཡིན་པས། རང་བཞིན་གྱིས་འོད་གསལ་བའི་སེམས་ཉིད་སྤངས་པའི་ཕ་རོལ་ན་རྒྱལ་བའི་ཐུགས་མེད། ཐུགས་སྤངས་པའི་ཕ་རོལ་ན་འོད་གསལ་གཉུག་མའི་སེམས་མེད། སྣང་སེམས་རོ་མཉམ་བློ་བྲལ་རྫོགས་པ་ཆེན་པོའི་ཀློང་དུ་འཁོར་འདས་རོ་མཉམ་འཁྲུལ་གཞི་མིང་མེད་ཀ་དག་ཆེན་པོར་དོན་གྱི་ལ་ཟློས་ན་དྲན་སྣང་ཐམས་ཅད་ཡེ་ཤེས་ཆེན་པོར་འཆར་བ་ཡིན་པས་དོན་ལ་ཐུགས་རྡོ་རྗེ་རྫོགས་རིམ་གྱི་གནད་ཀུན་འདུ་བ་ཡིན་ཞིང་ཁྱད་པར་ཐུན་མིན་རྫོགས་པ་ཆེན་པོའི་ལམ་གྱི་གཅེས་གནད། ཐོག་མར་སེམས་རིག་ལ་ཤན་ཕྱེས་ཏེ། ད་ལྟར་གྱི་རིག་པ་དྲན་བསམ་བཅོས་བསླད་དང་བྲལ་བ་འདི་ཀ་ཆོས་སྐུ་ཀ་དག་གི་དགོངས་པ་རང་བྱུང་གི་ཡེ་ཤེས་སུ་ངོ་རང་ཐོག་ཏུ་སྤྲད། སྔ་ཕྱིའི་དྲན་རྟོག་མེད་པའི་ད་ལྟར་གྱི་རིག་པ་སོ་མ་བཞི་ཆ་གསུམ་བྲལ་གྱི་ངང་བསྐྱངས་ཏེེ་ཐག་གཅིག་ཐོག་ཏུ་བཅད། རང་ཤར་རང་གྲོལ་རྦ་རླབས་ཆུར་ཐིམ་པ་ལྟར་དྲན་རྟོག་རྗེས་མེད་བྱུང་ཚོར་གཞིར་ཐིམ་གདེང་གྲོལ་ཐོག་ཏུ་བཅའ་བ་སོགས་ལྟ་སྒོམ་སྤྱོད་འབྲས་ཀྱི་གནད་ཟབ་མོ་རྣམས་ནི་ཞིབ་པར་བླ་མའི་ཞལ་ལས་ཤེས་པར་བྱའོ། །དེ་ལྟ་བུའི་རྣལ་འབྱོར་བསྒོམ་པའི་ཚེ་མཉམ་རྗེས་ཀུན་ཏུ་གསང་སྔགས་ཤེས་བྱ་བཅུའི་སྒོ་ནས་ཉམས་སུ་ལེན་པ་དང་། དམ་ཚིག་དྲུག་ལ་གནས་པ་གལ་ཆེ་བས། དང་པོ་ནི། རིག་འཛིན་འཇིགས་མེད་གླིང་པས། འདི་ལྟར་སྒྲུབ་ཐབས་ཐམས་ཅད་སྒྱུ་མ་ལྟར་ཤེས་པར་བྱའོ། །མིང་ཚིག་ཐམས་ཅད་སྨྲིག་རྒྱུས་རི་དྭགས་འབྲིད་པ་ལྟར་སྙིང་པོ་མེད་པར་ཤེས་པར་བྱའོ། །སྤྱོད་ལམ་ཐམས་ཅད་རྨི་ལམ་དུ་ཤེས་པར་བྱའོ། །དངོས་པོ་ཐམས་ཅད་མེ་ལོང་གི་གཟུགས་བརྙན་ལྟར་རང་བཞིན་མེད་པར་ཤེས་པར་བྱའོ། །གནས་ཡུལ་ཐམས་ཅད་དྲི་ཟའི་གྲོང་ཁྱེར་ལྟར་ཤེས་པར་བྱའོ། །སྒྲ་ཐམས་ཅད་བྲག་ཆ་ལྟར་ཤེས་པར་བྱའོ། །ལྷ་སྐུ་ཐམས་ཅད་ཆུ་ནང་གི་ཟླ་བ་ལྟར་སྣང་ལ་རང་བཞིན་མ་གྲུབ་པར་ཤེས་པར་བྱའོ། །ཏིང་ངེ་འཛིན་རྣམས་ཆུ་ལས་ཆུ་བུར་བརྡོལ་བ་ལྟར་ཤེས་པར་བྱའོ། །འཕྲོ་འདུ་ཐམས་ཅད་མིག་ཡོར་ལྟར་སྣ་ཚོགས་སུ་འགྱུར་བར་ཤེས་པར་བྱའོ། །ཆོ་འཕྲུལ་ཐམས་ཅད་སྤྲུལ་པ་ལྟར་རྣམ་པ་སྣ་ཚོགས་མཚན་ཉིད་མེད་པར་ཤེས་པར་བྱ་སྟེ་ཤེས་བྱ་བཅུའོ། །ཞེས་གསུངས། གཉིས་པ་ནི། མན་ངག་སྟོན་པའི་བླ་མ་ལ་སངས་རྒྱས་དངོས་སུ་བལྟ་བའི་མོས་གུས་ཀྱི་གདུང་བ་རྒྱུན་མི་བཅད་པ་དང་གཅིག ཏིང་ངེ་འཛིན་བསྒོམ་པའི་མཐུན་ཕྱོགས་གྲོགས་སུ་འགྱུར་བ་རྣམས་བསྒྲུབ་པ་དང་གཉིས། མི་མཐུན་པའི་ཕྱོགས་འགལ་རྐྱེན་རྣམས་འདོར་བ་དང་གསུམ། འགྲོ་འཆག་ཉལ་འདུག་སོགས་སྤྱོད་ལམ་ཀུན་ཏུ་བསྒོམ་བྱའི་ཏིང་ངེ་འཛིན་ཡིད་ནས་ཡལ་བར་མི་འདོར་བ་དང་བཞི། ཡི་དམ་གང་བསྒོམ་པ་དེ་མི་སྤང་ཞིང་དེ་ཉིད་ཀྱི་བསྒོམ་བསྒྲུབ་མཐར་དབྱུང་བ་དང་། ཡི་དམ་གྱི་ལྷ་ལ་སྤང་ལེན་མི་བྱ་བར་ལྷ་གང་བསྒོམ་ཡང་སངས་རྒྱས་ཐམས་ཅད་དགོངས་པ་རོ་གཅིག་ཏུ་རྟོགས་པས་གཅིག་བསྒོམ་ཡང་སངས་རྒྱས་ཐམས་ཅད་བསྒོམ་པ་ཡིན། སངས་རྒྱས་ཐམས་ཅད་ཀྱང་རང་གི་སེམས་རྟོགས་པ་ལས་ལོགས་ནས་བསྒོམ་དུ་མེད། ཡི་དམ་གྱི་ལྷ་ཡང་རང་སེམས་ཀྱི་སྣང་བ་ཡིན་པས་ལོགས་ནས་བསྒྲུབ་རྒྱུ་དང་བསྒོམ་རྒྱུ་གཅིག་ཀྱང་མེད། མདོར་ན་སངས་རྒྱས་ཐམས་ཅད་ཡི་དམ་གྱི་ལྷ་ལ་འདུས། ཡི་དམ་གྱི་ལྷ་མང་པོ་བསྒོམ་ཡང་རང་སེམས་ཀྱི་སྣང་བ། གཅིག་བསྒོམ་ཡང་རང་སེམས་ཀྱི་སྣང་བ་ཡིན་སྙམ་དུ་ཤེས་པ་དང་ལྔ། རང་གི་བསྒོམ་བྱའི་ཡི་དམ་གྱི་ལྷ་དང་སྙིང་པོ་སྒོམ་དོན་དང་སྤྱོད་པ་རྣམས་སྣོད་མིན་ལ་ཤིན་ཏུ་གསང་ཞིང་སྦ་བ་དང་དྲུག་སྟེ། དམ་ཚིག་དེ་རྣམས་ལ་གནས་པར་བྱའོ། །ཞེས་རྗེ་བླ་མས་གསུངས་སོ། །རྩ་བའི་གསུམ་པ་རྗེས་ཀྱི་བྱ་བ་ལ། བསྔོ་སྨོན་བཀྲ་ཤིས་བརྗོད་པ་གསུམ་ལས། དང་པོ་བསྔོ་བ་ནི། གང་བསྔོ་རྒྱུའི་དགེ་བ་དེ་ལྟར་བསྐྱེད་རྫོགས་ཀྱི་ལམ་རིམ་པ་གཉིས་ལ་སྦྱོར་དངོས་རྗེས་གསུམ་ཚང་བའི་སྒོ་ནས་ཚུལ་བཞིན་དུ་སློབ་པར་བྱས་པ་དེ་ཉིད་ཀྱིས་མཚོན་རྟེན་དུ་བྱས་ཏེ་དུས་གསུམ་བྱས་ཡོད་ཀྱི་རྣམ་དཀར་མཐའ་དག གང་དུ་བསྔོ་ན་མཐའ་གཉིས་ལ་མི་གནས་པ་ཡང་དག་པར་རྫོགས་པའི་བྱང་ཆུབ་སྐུ་བཞི་ཡེ་ཤེས་ལྔ་ཡི་བདག་ཉིད་ཁྱབ་དག་རིགས་དྲུག་པ་རྡོ་རྗེ་འཆང་གི་སར། སུའི་ཆེད་དུ་བསྔོ་ན་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་བླ་མེད་ཡེ་ཤེས་ཀྱི་འབྲས་བུ་ཐོབ་པར་བྱ་བའི་ཕྱིར། ཚུལ་ལམ་རྣམ་པ་ཇི་ལྟ་བུས་བསྔོ་ན། དོན་དམ་པར་ཆོས་ཐམས་ཅད་རང་བཞིན་གཉིས་སུ་མེད་པས་བསྔོ་བྱ་སྔོ་བྱེད་སོགས་ཀྱི་སྤྲོས་པ་མ་དམིགས་ཀྱང་། ཀུན་རྫོབ་ཐ་སྙད་ཙམ་དུ་གང་གིས་བྱེད་པ་པོ་དང་། གང་ལ་བྱ་བའི་ཡུལ་དང་། ཇི་ལྟར་བྱ་བའི་དགེ་བ་ཐམས་ཅད་རྨི་ལམ་སྒྱུ་མ་ལྟ་བུར་སྣང་ལ་རང་བཞིན་མེད་པའི་ཚུལ་གྱིས་ཇི་ལྟར་དུས་གསུམ་དུ་གཤེགས་པའི་རྒྱལ་བ་སྲས་དང་བཅས་པས་དགེ་རྩ་བླ་ན་མེད་པའི་བྱང་ཆུབ་ཏུ་ཇི་ལྟར་བསྔོ་བར་མཛད་པ་དེ་བཞིན་དུ་བདག་གིས་ཀྱང་ཡོངས་སུ་བསྔོ་བར་བགྱི འོ་སྙམ་དུ་འདུན་པ་རྩེ་གཅིག་པས་བསྔོ་བའི་ཚིག་བརྗོད། དེ་ལྟར་བསྔོས་པའི་དགོས་པའམ་ཕན་ཡོན་ནི་བསྒྲུབ་པ་མི་ཟད་པ་སྟེ། བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་སྐམ་བར་དུ་དེ་མི་ཟད། །དེ་བཞིན་བྱང་ཆུབ་ཡོངས་བསྔོའི་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་ཟད། །ཅེས་སོ། །གཉིས་པ་སྨོན་ལམ་ནི། བསམ་པ་བྱང་ཆུབ་སེམས་ཀྱིས་ཟིན་པས་རང་གཞན་གྱི་དོན་རྒྱ་ཆེན་པོར་འགྱུར་བའི་སྨོན་ལམ་རྣམ་པར་དག་པ་འདེབས་པ་སྟེ། རང་གཞུང་གང་ཡིན་གྱི་སྨོན་ཚིག་རྣམས་དང་། གཞན་ཡང་། སངས་རྒྱས་མཆོད་པ། དམ་ཆོས་འཛིན་པ། ལུས་ཀུན་ཏུ་སྟོན་པ། ཞིང་ཀུན་ཏུ་འཇུག་པ། ཕར་ཕྱིན་རྫོགས་པ། སེམས་ཅན་སྨིན་པར་བྱེད་པ། ཞིང་སྦྱོང་བ། བྱང་སེམས་རྣམས་དང་སྤྱོད་ཡུལ་མཐུན་པར་གནས་ལ། སྤྱོད་པ་ཀུན་ཏུ་དོན་ཡོད་པ། བྱང་ཆུབ་ཆེན་པོ་འཐོབ་པ་སྟེ་སྨོན་ལམ་ཆེན་པོ་བཅུ་སྨོན་ལམ་གྱི་འཁོར་འབུམ་ཕྲག་གྲངས་མེད་པ་འཕགས་པ་ཀུན་ཏུ་བཟང་པོས་གསུངས་པའི་བཟང་པོ་སྤྱོད་པའི་སྨོན་ལམ་དང་། བྱེ་བྲག་བསྟན་པ་རྒྱས་པའི་སྨོན་ལམ་སོགས་ཅི་ལྟར་རིགས་པར་བྱའོ། །གསུམ་པ་བཀྲ་ཤིས་ནི། ཕྱོགས་དུས་ཀྱི་རྒྱལ་བ་སྲས་བཅས་དཀྱིལ་འཁོར་གྱི་ལྷ་ཚོགས་རྣམས་ཀྱིས་བཀྲ་ཤིས་པའི་བདེན་ཚིག་བརྗོད། རྡོ་རྗེའི་གླུ་དབྱངས་ལེན། མེ་ཏོག་མནྡ་ར་བའི་ཆར་ཆེན་པོ་འབེབས་པར་བསམས་ལ། རང་ཉིད་ཀྱང་དེ་དང་མཐུན་པའི་ཤིས་བརྗོད་དབྱངས་རོལ་མེ་ཏོག་འཐོར་བ་སོགས་བྱ་སྟེ། ཕྱོགས་བཅུ་དུས་བཞིའི་གནས་སྐབས་ཇི་ལྟ་བུར་སྤྱོད་ཀྱང་ཀུན་ཏུ་མི་མཐུན་པའི་མིང་ཡང་མི་གྲགས་ཤིང་བསམ་དོན་ཡིད་བཞིན་དུ་འགྲུབ་པའི་དགེ་མཚན་དང་ལེགས་པའི་དཔལ་འབྱོར་གོང་དུ་སྤེལ་བར་བྱའོ། །དེ་ལྟར་བཤད་པ་ནི་མོས་སྒོམ་ཙམ་གྱི་དབང་དུ་བྱས་ཏེ་ཆོ་གའི་ཐུན་གཅིག་ལ་སྦྱོར་དངོས་རྗེས་གསུམ་ཚང་བའི་ལུགས་ཀྱི་བསྐྱེད་རིམ་དང་གོ་དོན་གཙོ་བོར་སྨོས་པ་ཡིན་ཞིང་། འདི་ལ་བསྙེན་སྒྲུབ་ཡན་ལག་བཞི་སྦྱོར་བའི་དབང་དུ་བྱས་ན། ཏིང་ངེ་འཛིན་གསུམ་བསྒོམ་པ་ཡན་ཆད་བསྙེན་པ། རང་ལྷ་གཙོ་བོར་བསྒོམ་པ་ཉེ་བསྙེན། ཡུམ་བསྒོམ་སྟེ་མཁའ་གསང་བྱིན་གྱིས་བརླབས་པ་དང་འཁོར་གྱི་ལྷ་ཚང་བར་བསྒོམ་པ་སྒྲུབ་པ། དབང་བསྐུར་རྒྱས་གདབ་སྤྱན་འདྲེན་སོགས་ནས་བཟླས་པ་མཆོད་བསྟོད་སོགས་སྒྲུབ་པ་ཆེན་པོ་སྟེ། ཕུར་པ་རྣལ་འབྱོར་ཆེན་པོའི་རྒྱུད་ལས། སྤྱིར་ན་གསང་སྔགས་ངེས་པ་ལ། །ཏིང་འཛིན་གསུམ་བསྐྱེད་བསྙེན་པ་ཡིན། །བདག་ཉིད་ལྷར་བསྐྱེད་ཉེ་བསྙེན་ཏེ། །ཡུམ་བསྐྱེད་སྒྲུབ་པར་ཤེས་པར་བྱ། །གཞན་རྣམས་སྒྲུབ་པ་ཆེན་པོ་ཡིན། །ཞེས་གསུངས། ཚུལ་འདི་ལྟར་ཆོ་གའི་སྦྱོར་དངོས་རྗེས་གསུམ་ཚང་བར་སྟན་ཐོག་གཅིག་ལ་ཐུན་གཅིག་ཏུ་ཚུལ་བཞིན་ཉམས་སུ་བླང་བས་ཀྱང་བསྐལ་པ་གཅིག་གི་ཚོགས་འདུམ་པར་གསུངས་པས་མཚོན་གསང་སྔགས་ཐབས་ཀྱི་ཆེ་བ་རྨད་དུ་བྱུང་བས་གྲངས་མེད་གསུམ་གྱི་ཚོགས་ཀྱང་དབང་རྣོན་ཤེས་བརྩོན་ཕུལ་དུ་ཕྱིན་གྱིས་སྙིགས་དུས་ཀྱི་ཚེ་གཅིག་ལའང་འདུམ་པའི་གནད་ཀྱང་དེ་ཡིན་པས་ཚུལ་འདི་ལྟ་བུ་ལ་གཅིག་ཏུ་བརྩོན་པར་བྱ་བ་གལ་ཆེ་ཞིང་། བྱེ་བྲག་བསྙེན་སྒྲུབ་ཡན་ལག་བཞི་སོགས་ལ་ཇི་ལྟར་འཇུག་པར་བྱ་བ་དང་། དེ་དག་གི་སྤང་བླང་ལག་ལེན་གྱི་ཚུལ་ཞིབ་པར་ནི་དམ་པ་སྔ་མ་རྣམས་ཀྱི་གསུང་སྤྱི་དང་ཁྱད་པར་རྗེ་བླ་མའི་གསུང་རྣམས་ལས་རྟོགས་པར་བྱ་བ་ཁོ་ནའོ། །སླར་སྨྲས་པ། བདག་འདྲ་ཡུལ་དུ་སྐལ་བ་ཆེས་དམན་ཡང་། །སངས་རྒྱས་དངོས་བྱོན་བཤེས་གཉེན་དུ་མ་ཡིས། །རྗེས་བཟུང་སྨིན་གྲོལ་བདུད་རྩི་མང་ཙམ་མྱོང་། །དེ་སླད་སྙིགས་མའི་དུས་མཐར་སྐལ་བཟང་སྙམ། །མི་ཚེ་ཕལ་ཆེར་གཡེང་བས་ཁྱེར་མོད་ཀྱི། །བཅུ་ལྷག་བགྲང་བྱར་བསྙེན་སྒྲུབ་བརྩོན་ཁུལ་བགྱིས། །ངེས་རྫོགས་ལམ་ལ་བརྟན་པ་ཐོབ་མིན་ཡང་། །མོས་སྒོམ་ཙམ་ལ་ཅུང་ཟད་འདྲིས་པར་བྱས། །རྒྱས་བཤད་ཚིག་གི་སྤྲོས་པས་ཅི་ཞིག་བྱ། །དེང་སང་སྐྱེ་བོ་ཚུལ་འདིས་མགུ་འགྱུར་རམ། །དེས་ན་རང་གིས་ཕྱོགས་ཙམ་མྱོང་བའི་དོན། །སྔོན་བྱོན་དམ་པའི་གསུང་ལས་ཅུང་ཟད་བཏུས། །ད་ལྟར་བཞུགས་དང་སླད་ནས་འབྱོན་པ་ཡི། །ཆོས་གྲོགས་གསར་བུ་རྣམས་ལ་སྨན་པའི་བློས། །གོ་སླ་གཙོ་བོར་བཟུང་ནས་བྲིས་པ་སྟེ། །འདི་ལ་འགལ་འཁྲུལ་གང་མཆིས་མགོན་ལ་བཤགས། །སྔོན་དུས་གདམས་ཟབ་གསེར་གྱིས་ཉོས་ཏེ་བསྒྲུབས། །དེང་དུས་དཔེ་ཀློག་ཙམ་ལའང་ངལ་བར་འཛིན། །དེ་ཕྱིར་རང་འདྲའི་ཐོས་ཆུང་གསར་བུ་ལ། །ཅུང་ཟད་ཕན་དུ་རེ་ལས་གཞན་དུ་ཅི། །སྙིགས་མ་ཚེ་ཐུང་གློ་བུར་རྐྱེན་ངན་མང་། །ཡུན་རིང་སྡོད་པའི་དུས་སྐབས་མི་འདུག་གིས། །དོན་གནད་སྙིང་པོ་རང་གི་རྒྱུད་ལ་དྲིལ། །མི་ཚེ་སྟོང་ཟད་མ་གཏོང་གྲོགས་པོ་རྣམས། །རྒྱ་ཆེན་ཤེས་བྱའི་མཐའ་རྒྱ་སུ་ཡིས་ཆོད། །ཕྱོགས་ཙམ་ཤེས་ཀྱང་རང་རྒྱུད་མ་སྦྱར་ཅི། །དེ་བས་སྙིགས་དུས་ཉོན་མོངས་རྒྱུད་དྲག་ཚེ། །ཕན་པའི་ཐབས་མཆོག་རྡོ་རྗེ་འཆང་གིས་བསྟན། །འདི་དང་ཕྲད་རྣམས་སྲིད་པ་ཐ་མ་རུ། །ལན་གཅིག་མིན་པར་གསང་རྒྱུད་དུ་མར་གསུངས། །དེས་ན་ད་ལྟ་རང་དབང་འབྱོར་དུས་འདིར། །རིམ་གཉིས་ལམ་ལ་ཅི་ནུས་འབད་པར་མཛོད། །སྦྱང་གཞི་འོད་གསལ་གཉུག་མའི་རྡོ་རྗེ་གསུམ། །སྦྱང་བྱ་གློ་བུར་སྣང་གསུམ་འཕོ་སྒྲིབ་བཅས། །སྦྱོང་བྱེད་རྡོ་རྗེ་གསུམ་གྱི་རྣལ་འབྱོར་གྱིས། །སྦྱངས་འབྲས་ཚེ་འདིར་མངོན་གྱུར་བཀྲ་ཤིས་ཤོག །ཅེས་པའང་བྱང་ཕྱོགས་ཐུབ་པའི་རྒྱལ་ཚབ་ཆེན་པོར་སངས་རྒྱས་ཉིད་ཀྱིས་ལུང་བསྟན་པའི་སྤྲུལ་པའི་སྐུ་ངེས་གསང་བཀའ་ཡི་སྡུད་པོ་གསང་བདག་རྡོ་རྗེ་ཆོས་དང་ཞལ་མི་གཉིས་པ་རྗེ་བླ་མ་རྡོ་རྗེ་འཆང་ཆེན་པོ་བློ་གྲོས་མཐའ་ཡས་ཀྱི་ཞལ་སྔ་ནས་བསྩལ་བའི་བསྙེན་སྤྱི་ཆེན་པོའི་ཟུར་འདེབས་ཀྱི་ཚུལ་དུ་རང་འདྲའི་བློ་དམན་རྣམས་ལ་སྨན་ཕྱིར་བྲི་འདུན་ཡོད་པའི་ཁར། མཆོག་གི་སྤྲུལ་སྐུ་ཀུན་བཟང་བློ་གྲོས་གཞན་ཕན་མཐའ་ཡས་ཀྱི་གསུང་གིས་བསྐུལ་བ་དང་། ཉེ་ཆར་སྒྲུབ་བརྩོན་འཇམ་དབྱངས་བློ་གསལ་གྱིས་འབད་པ་ཆེན་པོས་ནན་གྱིས་བསྐུལ་ཞིང་། གཅུང་ཐུབ་བསྟན་དགེ་ལེགས་རྒྱ་མཚོ་དང་བླ་མ་དམ་པ་ཞིང་སྐྱོང་ནས་ཀྱང་མྱུར་དུ་གྲུབ་ན་ལེགས་པའི་མཐུན་འགྱུར་བཅས། འབྱུང་འཁྲུགས་ནད་ཀྱི་ཆུ་གཏེར་ལུས་ལ་མཚོ་ལྟར་ཁོལ་ཡང་། མཆོག་གསུམ་ཐུགས་རྗེའི་ཟླ་བ་ཡིད་ལ་བྱས་ཏེ། རང་ལོ་ང་གཉིས་པ་ཆུ་ཁྱི་སྟོན་ཟླ་འབྲིང་པོའི་ཚེས་ལ། སྔོན་བྱོན་མཁས་གྲུབ་དུ་མའི་གདན་ས་བདེ་ཆེན་པདྨ་འོད་གླིང་གི་ཡང་དབེན་བདེ་མཆོག་བཀྲ་ཤིས་དགེ་འཕེལ་དུ། ཐུན་སྒོམ་ཌ་རུ་{དཱ་རི}དྲ་བ་འགྱུར་མེད་པདྨ་རྣམ་རྒྱལ་གྱིས་བྲིས་པ་སྟེ། འདིས་ཀྱང་འབྲེལ་བཅས་སྐྱེ་ཀུན་དཔལ་མགོན་བླ་མའི་ཞབས་དྲུང་དུ་སྐྱེས་ཏེ་གསང་ཆེན་ལམ་གྱི་རྟེན་འབྲེལ་མཐའ་དག་ཡིད་བཞིན་དུ་འགྲུབ་པའི་རྒྱུར་གྱུར་ཅིག དགེའོ། །དགེའོ། །དགེའོ།། །།
ངེས་དོན་སྙིང་པོའི་གནད་མདོར་བསྡུས་པ་རིན་པོ་ཆེའི་སྒྲོན་མེ།
༄༅། །ཨངྷཱ་རྠགརྦྷཥཥྚིསྶཾགྲཧཿརཏྣཾབྷཱནྣཱམབིཧརཏིསྨ། །༷༷
ངེས་དོན་སྙིང་པོའི་གནད་མདོར་བསྡུས་པ་རིན་པོ་ཆེའི་སྒྲོན་མེ་ཞེས་བྱ་བ་བཞུགས་སོ། །
ན་མོ་གུ་རུ་མཉྫུ་ཤྲཱི་ཡེ། སེམས་ཀྱི་རང་བཞིན་འོད་གསལ་བ། །རང་བྱུང་ཟག་མེད་བདེ་བ་ཆེ། །བདེ་གཤེགས་སྙིང་པོ་ལ་བཏུད་ནས། །ངེས་དོན་སྙིང་པོ་མདོ་ཙམ་བཤད། །འདིར་ངེས་དོན་སྙིང་པོའི་གནད་མདོར་བསྡུ་ན། གདོད་མའི་འོད་གསལ་བདེ་གཤེགས་སྙིང་པོ་ནི་འཁོར་འདས་ཀུན་གྱི་སྤྱི་གཞིར་གནས་ཏེ། རང་གི་ངོ་བོ་ལ་གྲོལ་འཁྲུལ་གང་ཡང་མེད་མོད། དེ་ཉིད་ཀྱི་ངང་ངམ་རྩལ་ལས་རང་ངོ་རང་གིས་རིག་དང་མ་རིག་པའི་དབང་གིས་འཁོར་འདས་གཉིས་གསར་དུ་བྱུང་བ་སྟེ། རྒྱུད་རང་ཤར་ལས། ང་མེད་པ་ཡི་སྔོན་རོལ་དུ། །སངས་རྒྱས་སེམས་ཅན་གཉིས་མེད་དེ། །ལམ་དང་འབྲས་བུ་ག་ལ་ཡོད། །ང་ལས་མ་བྱུང་གཅིག་ཀྱང་མེད། །ང་ནི་སྟོང་པ་ཆེན་པོའོ། །ཞེས་སོགས་དང་། པདྨ་དབང་ཆེན་བདེ་གཤེགས་སྤྱི་དྲིལ་ལས། ཀུན་ནས་ཉོན་མོངས་འཁོར་བའི་ཆོས། །རྣམ་པར་བྱང་བ་མྱ་ངན་འདས། །རྩ་བ་སེམས་ཀྱི་ཆོས་ཉིད་འདུས། །སེམས་ནི་རང་བཞིན་འོད་གསལ་བ། །མ་མཛད་མ་བཅོས་ལྷུན་གྱིས་གྲུབ། །ཅེས་དང་། སྙིང་པོ་རབ་ཏུ་བསྟན་པའི་མདོ་ལས། ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །འདི་ཡོད་པས་ན་འགྲོ་ཀུན་དང་། །མྱ་ངན་འདས་པ་ཐོབ་པ་ཡིན། །ཞེས་དང་། དབུས་མཐའ་ལས། འཁོར་བ་དང་ནི་མྱ་ངན་འདས། །གཉིས་འདི་གློ་བུར་བྱུང་བ་སྟེ། །ཞེས་དང་། དབུ་མ་ཆོས་དབྱིངས་བསྟོད་པ་ལས། གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱངས་པར་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་དེ་ཡིན་ནོ། །ཞེས་དང་། དོ་ཧ་ལས། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལས་སྲིད་དང་མྱ་ངན་འདས་འཕྲོ་བ། །ཞེས་གསུངས། འདིའི་ངོ་བོ་ནི། ཡེ་ནས་གནས་པ། འགྱུར་བ་མེད་པ། རང་བཞིན་གྱིས་འོད་གསལ་བ། སྣང་ཆ་ནས་གཟུགས་སྐུ་མཚན་དཔེའི་འབྱུང་ཁུངས་དང་། སྟོང་ཆ་ནས་ཆོས་སྐུ་སྤྲོས་མཚན་གྱི་མཐའ་ཀུན་བྲལ་བར་ཡེ་ནས་གནས་པ་ཉིད། ཡོན་ཏན་ལྷུན་གྱིས་གྲུབ་པས་ནོར་བུ་དང་། གཞན་དུ་མི་འགྱུར་བས་ནམ་མཁའ། ཡེ་ནས་རླན་ཞིང་ཁྱབ་པས་ཆུའི་དཔེ་སོགས་རྒྱུད་བླ་མར་གསུངས་པ་དང་། རྫོགས་ཆེན་དུ་གཞིའི་མཚོན་དཔེ། སྟོང་ལ་ཁྱབ་པས་ནམ་མཁའ། དྲི་མ་མེད་པས་མན་ཤེལ། འགྱུར་བ་མེད་པས་རྡོ་རྗེ། བྱིན་རླབས་འབྱུང་བས་ནོར་བུ། གསལ་ལ་མི་འགགས་པས་ཉི་མ་ལྟ་བུ་སོགས་རྒྱུད་ནས་གསུངས་པ་དོན་གྱི་གནས་གཅིག་པས། འདིའི་རང་རྩལ་ཕྱིར་མ་གཡོས་པའི་ཚེ་འཁྲུལ་པའང་མིན་ལ་གྲོལ་བའང་མིན་པས་གཞི་ཙམ་དུ་གནས་སོ། །དེའི་རང་རྩལ་ཕྱིར་གཡོས་པའི་ཚེ་རང་ངོ་རང་གིས་མ་རིག་པས་གཞིའི་གནས་ཚུལ་དང་མི་མཐུན་པར་ཐག་པ་ལ་སྦྲུལ་དུ་འཁྲུལ་བཞིན་བློ་གཟུང་འཛིན་ཅན་དུ་ཤར་དུས་སེམས་སམ་རྣམ་ཤེས་ཞེས་བྱ་སྟེ་འཁྲུལ་པ་ཡིན་ཞིང་། དེས་འཁོར་བའི་བག་ཆགས་ཐམས་ཅད་འཛིན་ཅིང་སྡུད་པའི་གཞི་བྱེད་ལ། རྩལ་དེས་རང་ངོ་རང་གིས་རིག་སྟེ་ཐག་པ་ལ་ཐག་པར་མཐོང་བ་བཞིན་ཕྱིན་ཅི་མ་ལོག་པར་ཆོས་ཉིད་ཀྱི་གནས་ཚུལ་ཇི་ལྟ་བ་དང་མཐུན་པར་ཤར་དུས་རིག་པའམ་ཡེ་ཤེས་ཞེས་བྱ་སྟེ། དེས་མ་རིག་པ་དང་འཁོར་བའི་བག་ཆགས་ཐམས་ཅད་འཇོམས་པར་བྱེད་ཅིང་རྣམ་པར་གྲོལ་བར་བྱེད་པ་སྟེ། མུ་ཏིག་ཕྲེང་བ་ལས། འདི་ན་སྣ་ཚོགས་སྣང་བ་ཀུན། །ཐག་པ་ལ་ནི་སྦྲུལ་མཐོང་བཞིན། །དེ་མ་ཡིན་ལ་དེར་བཟུང་བས། །ཕྱི་ནང་སྣོད་བཅུད་གཉིས་སུ་ཆགས། །དེ་ཡང་བརྟགས་ན་ཐག་པ་ཉིད། །སྣོད་བཅུད་ཡེ་ནས་སྟོང་པ་ཉིད། །དོན་དམ་ཀུན་རྫོབ་གཟུགས་ཅན་ནོ། །སྦྲུལ་མཐོང་དེ་ཉིད་མཐོང་བས་བདེན། །ཐག་མཐོང་ཡང་དག་ཉིད་དུ་བདེན། །དཔེར་ན་ཐོ་ལ་བྱ་གནས་བཞིན། །བདེན་པ་གཉིས་ཀྱི་རང་བཞིན་ནི། །འཇིག་རྟེན་ཀུན་རྫོབ་ཙམ་དུ་སྟེ། །ཡང་དག་ཉིད་ལ་འབྲེལ་བ་མེད། །སྟོང་པ་ཉིད་ཀྱི་དབྱིངས་ལ་ནི། །དེ་ཡི་ངོ་བོར་ཐམས་ཅད་གྲོལ། །ཞེས་དང་། རིན་ཆེན་སྤུངས་པ་ལས། འཁྲུལ་མ་མྱོང་བའི་མ་རིག་རྩད། །མ་བརྟགས་ཡེ་ནས་ཆོད་ནས་འདུག །གང་དུ་འདི་ཀུན་སུས་མ་ཚོར། །ཞེས་དང་། ཀླུ་སྒྲུབ་ཀྱིས། འཁོར་བ་རྣམ་རྟོག་ཙམ་ཉིད་དེ། །རྣམ་རྟོག་མེད་པ་ཐར་པ་ཡིན། །ཞེས་གསུངས་སོ། །དེས་ན་སེམས་རྣམ་ཤེས་ཚོགས་བརྒྱད་ཆོས་ཅན་དང་། དེའི་རང་བཞིན་ནམ་ཆོས་ཉིད་ཀྱི་ཡེ་ཤེས་གཉིས་ཐ་སྙད་དུ་གཅིག་མ་ཡིན་ཏེ། སེམས་རྟོགས་པ་ཙམ་གྱིས་སེམས་ཀྱི་ཆོས་ཉིད་ཡེ་ཤེས་མི་རྟོགས་པ་དང་། ངོ་བོ་འཁྲུལ་མ་འཁྲུལ་དང་། གཟུང་འཛིན་ཡོད་མེད་སོགས་ཀྱི་ཁྱད་པར་ཡོད་པའི་ཕྱིར། དོན་དམ་པར་ཐ་དད་པ་མ་ཡིན་ཏེ། སེམས་ཀྱི་རང་བཞིན་ཡེ་ཤེས་ཡིན་པ་དང་། ཡེ་ཤེས་རྟོགས་དུས་སེམས་ཀྱང་དེ་ལས་ཐ་དད་དུ་མ་དམིགས་པ་དང་། ཡེ་ཤེས་རྟོགས་ཚེ་སེམས་རང་གྲོལ་དུ་འཆར་བ་སོགས་ཀྱི་ཕྱིར། དེས་ན་དེ་གཉིས་གཅིག་ཐ་དད་གང་དུའང་ཁས་ལེན་པར་མི་བྱ་སྟེ། ཀུན་གསལ་ལས། སེམས་དང་ཡེ་ཤེས་རྣམ་པ་གཉིས། །གཅིག་མིན་ཐ་དད་མ་ཡིན་ཏེ། །དབྱེ་བ་རབ་ཏུ་དཀའ་བའི་ཆོས། །སེམས་ནི་ཡེ་ཤེས་རྩལ་ཡིན་ཏེ། །སེམས་ཀྱི་གཞི་མ་ཡེ་ཤེས་ཡིན། །ཞེས་དང་། ཏིང་འཛིན་རྒྱལ་པོ་ལས། སེམས་ཀྱི་རང་བཞིན་ཤེས་པས་ནི། །ཕྱིར་ཡང་ཡེ་ཤེས་འབྱུང་བར་འགྱུར། །ཞེས་དང་། ས་ཆེན་གྱིས་མཛད་པའི་དབང་བཞི་ངོ་སྤྲོད་ལས། རང་བྱུང་ཡེ་ཤེས་སྐྱེས་པ་ལ། །རྟོག་པ་ཀུན་ཀྱང་ཡེ་ཤེས་སུ། །ངོ་བོ་ཉིད་ཀྱིས་འཆར་བ་ཡིན། །བསྒོམ་དང་མ་བསྒོམ་གཉིས་སུ་མེད། །རྣམ་རྟོག་ཆོས་ཀྱི་དབྱིངས་སུ་ཐིམ། །རྟོག་པའི་དབང་དུ་འགྲོ་མི་སྲིད། །ཅེས་དང་། རྗེ་མི་ལས། དེ་ལྟར་རྟོགས་པའི་རྣལ་འབྱོར་པས། །རྣམ་ཤེས་མ་མཐོང་ཡེ་ཤེས་མཐོང་། །ཞེས་གསུངས། གཞན་ཡང་དགོངས་པ་ངེས་འགྲེལ་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་རྟོག་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་བདེན་གཉིས་གཅིག་པ་དང་ཐ་དད་པ་ལ་སྐྱོན་བཞི་བཞི་གསུངས་པ་ལྟ་བུ་སྟེ། གཞི་འདི་ལ་ཡེ་ཤེས་སུ་བཞག་པའང་། ཆོས་དབྱིངས་སྣང་སྟོང་ཟུང་འཇུག་ཡིན་པས་ན་སྟོང་རྐྱང་ཙམ་མིན་པར་རིག་གདངས་ཀྱི་ཆ་ཡོད་པ་དང་། རང་གི་ངོ་བོ་འཁྲུལ་གྲོལ་ལས་འདས་པ་དེ་ལས་མ་གཡོས་པས་ན་མ་འཁྲུལ་ཙམ་གྱི་ཆ་ནས་བཞག་གི། གཞི་ལས་རྩལ་ཤར་ཟིན་པའི་ཡེ་ཤེས་ཀྱིས་ཇི་བཞིན་པར་རྟོགས་ནས་གྲོལ་ཟིན་པའི་ཡེ་ཤེས་དང་ནོར་བར་མི་བྱ་ཞིང་། དེ་བཞིན་དུ་གདོད་མའི་གཞི་དབྱིངས་དང་། མཐར་ཐུག་གི་ཀ་དག་གྲོལ་ས་གཉིས་ཀྱང་དབྱིངས་སྣང་སྟོང་ཟུང་འཇུག་རང་བཞིན་འགྱུར་མེད་ཀྱི་ཆ་ནས་དབྱེར་མེད་ཡིན་གྱི། ཐ་སྙད་དུ་སླར་འཁྲུལ་གཞི་བྱེད་མི་བྱེད་དང་། རང་རྩལ་ཤེས་རབ་རྫོགས་མ་རྫོགས་དང་། ལྷན་ཅིག་སྐྱེས་པའི་མ་རིག་པའི་ས་བོན་སྤངས་མ་སྤངས་སོགས་ཀྱི་ཁྱད་པར་ཆེའོ། །དེའི་ཕྱིར་གཞི་གནས་ཀྱི་ཡེ་ཤེས་ངོ་བོ་རང་བཞིན་ཐུགས་རྗེ་གསུམ་དང་། དེ་ལས་ཤར་བའི་ཡེ་ཤེས་སློབ་ལམ་གྱིས་བསྡུས་པ་དང་། མཐར་ཕྱིན་འབྲས་བུའི་ཡེ་ཤེས་སངས་རྒྱས་ཀྱི་མཁྱེན་པ་གསུམ་ཡང་ཐ་སྙད་དུ་གཅིག་མ་ཡིན་ལ། དོན་དམ་པར་ཐ་དད་མ་ཡིན་ཏེ། རྩ་བ་སྤྲོས་བྲལ་རང་བྱུང་གི་ཡེ་ཤེས་སུ་གཅིག་པའི་ཕྱིར། དེས་ན་ལམ་གྱི་སྐབས་ལྟ་བ་འཁོར་འདས་སམ་གཞི་འབྲས་དབྱེར་མེད་དུ་ཁས་ལེན་པའང་ཐོག་མའི་སྤྱི་གཞི་ཙམ་གྱི་ངོས་ནས་མ་ཡིན་ཏེ། དེའི་ཚེ་གྲོལ་འཁྲུལ་གཉིས་ཀ་མེད་པའི་ཕྱིར་སུ་ཞིག་ལ་ལྟོས་ནས་དབྱེར་མེད་བརྗོད། འོ་ན་གང་སྙམ་ན། རྩལ་ལས་ཤར་ཟིན་མ་དག་འཁྲུལ་པའི་ཕུང་ཁམས་སྐྱེ་མཆེད་སོགས་ཀྱི་ཆོས་འདི་རྣམས་གནས་ཚུལ་ལ་དག་པ་རབ་འབྱམས་སངས་རྒྱས་ཀྱིས་ཇི་ལྟར་གཟིགས་པ་བཞིན་བདེན་གཉིས་དབྱེར་མེད་མཉམ་པ་ཆེན་པོར་ཡེ་ནས་སངས་རྒྱས་པའི་རང་བཞིན་དུ་གཏན་ལ་ཕབ་ནས་ངོ་བོ་དབྱེར་མེད་དུ་ཁས་ལེན་པ་ཡིན་པས་དེ་ལྟར་ཤན་ཕྱེད་པ་གལ་ཆེའོ། །མདོར་ན་སྒྱུ་འཕྲུལ་གསང་སྙིང་ལས། ཨེ་མ་ཧོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །སུས་ཀྱང་མ་བཅིངས་བཅིང་མེད་དེ། །བཅིང་བར་བྱ་བ་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡི། །ནན་གྱིས་མཁའ་ལ་མདུད་པ་འདོར། །བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །བསྟན་ཕྱིར་སྤྲོ་བ་སྣ་ཚོགས་མཛད། །ཅེས་དང་། ཇི་སྙེད་འཇིག་རྟེན་འཁྲུལ་པའི་ཆོས། །མ་རིག་རྟོག་པའི་གཟུང་འཛིན་གྱིས། །ཕྱི་ནང་རྟེན་འབྲེལ་གཉིས་སུ་འཁོར། །མི་མཐུན་བདེ་སྡུག་མྱོང་བར་འགྱུར། །རང་བཞིན་ཉིད་ལས་ཉམས་པ་མེད། །ཅེས་གསུངས་པ་བཞིན་གཞི་ཡེ་ནས་འཆིང་གྲོལ་མེད་པའི་གནས་ལུགས་ཟབ་མོ་ཉིད་གཏན་ལ་མ་ཕེབས་ན་རྣམ་གྲོལ་མཐར་ཐུག་གི་འབྲས་བུ་མངོན་དུ་བྱེད་མི་ནུས་པའི་ཕྱིར། དོན་གྱི་གནད་འདི་ལ་ངེས་དོན་གྱི་མདོ་རྒྱུད་བསྟན་བཅོས་ཐམས་ཅད་དགོངས་པ་མཐུན་པས། དེའི་ཚུལ་ནི་ད་ལྟ་རྩལ་ལས་ཤར་ཟིན་གྱིི་འཁྲུལ་པའི་སྐབས་དྲི་མས་བསྒྲིབས་པའི་དུས་ཉིད་ནའང་གཞི་རང་གི་ངོ་བོ་ལ་ནི་དྲི་མ་མེད་པས་རང་བཞིན་རྣམ་དག་ཆེན་པོའམ་སེམས་ཀྱི་རང་བཞིན་འོད་གསལ་བ་ཞེས་བྱ་སྟེ། ཡེ་ཤེས་ནམ་མཁའ་དང་མཉམ་པའི་རྒྱུད་ལས། པདྨ་འདམ་གྱིས་མ་གོས་ལྟར། །བྱང་ཆུབ་སེམས་ཀྱི་ངོ་བོ་ལ། །གཟུང་འཛིན་དྲི་མ་གཞི་ལ་མེད། །དེ་ཕྱིར་རང་བྱུང་སྙིང་པོ་འདི། །སུས་ཀྱང་མ་བྱས་བཟོ་བཅོས་མིན། །རང་བྱུང་རིག་པའི་རྒྱལ་པོ་ཡིན། །ཞེས་དང་། རང་ཤར་ལས། །འགྱུར་མེད་བྱང་ཆུབ་སེམས་ལ་འཁྲུལ་པ་ག་ལ་ཡོད། །འཁྲུལ་མེད་བྱང་ཆུབ་སེམས་ནི་འགྲོ་བ་ཡོངས་ལ་ཁྱབ། །བྱང་ཆུབ་སྙིང་པོ་སངས་རྒྱས་ཀུན་དང་མཉམ། །ཞེས་དང་། བློ་གྲོས་རྒྱ་མཚོས་ཞུས་པའི་མདོ་ལས། ཅི་སྟེ་ནམ་མཁའ་ཉོན་མོངས་བྱ་བར་ནུས། །དེ་ལ་རྗེས་ཀྱང་བསྟན་པར་ནུས་སྲིད་ཀྱི། །རང་བཞིན་འོད་གསལ་རྫོགས་པའི་བྱང་ཆུབ་སེམས། །དེ་ནི་ནམ་ཡང་ཉོན་མོངས་བྱ་མི་ནུས། །ཞེས་དང་། མདོ་སྡེ་རྒྱན་ལས། སེམས་ནི་རྟག་ཏུ་རང་བཞིན་འོད་གསལ་འདོད། །དེ་ནི་གློ་བུར་ཉེས་པས་མ་རུངས་བྱས། །ཆོས་ཉིད་སེམས་ལས་གཞན་པའི་སེམས་གཞན་ནི། །འོད་གསལ་མ་ཡིན་རང་བཞིན་ལ་བརྗོད་དོ། །ཞེས་དང་། རྒྱུད་བླ་མ་ལས། སེམས་ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དེ། །ཡང་དག་མིན་རྟོག་ལས་བྱུང་འདོད་ཆགས་སོགས། །གློ་བུར་དྲི་མས་དེ་ཉོན་མོངས་མི་འགྱུར། །ཞེས་དང་། བསྟོད་པར། ས་ཡི་དཀྱིལ་ན་ཡོད་པའི་ཆུ། །དྲི་མ་མེད་པར་གནས་པ་ལྟར། །ཉོན་མོངས་ནང་ན་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་གསུངས། འདིའི་སྣང་ཆ་ནས་གཟུགས་སྐུའི་ཡོན་ཏན་དང་། སྟོང་ཆ་ནས་ཆོས་སྐུའི་ཡོན་ཏན་རྫོགས་པར་ལྡན་ཡང་། ད་ལྟ་སེམས་ཅན་གྱི་སྐབས་དྲི་མས་བསྒྲིབས་ཏེ་མངོན་དུ་མི་སྣང་བའི་ཆ་ནས་ཁམས་སམ་རིགས་དང་། སངས་རྒྱས་པའི་ཚེ་དྲི་མ་མཐའ་དག་དང་བྲལ་དུས་བྱང་ཆུབ་ཅེས་བརྗོད་ཀྱང་། ངོ་བོ་སེམས་ཉིད་ཀྱི་ནུས་པ་རྫོགས་པར་སྣང་མི་སྣང་ཙམ་ལས་སྔར་མེད་གསར་སྐྱེར་འདོད་པ་ནི་མིན་ཏེ། རྒྱུད་བླ་མ་ལས། འདུས་མ་བྱས་ཤིང་ལྷུན་གྱིས་གྲུབ། །ཅེས་དང་། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་དང་། སྤྲོས་བྲལ་དོན་གསལ་ཆེན་པོའི་རྒྱུད་ལས། ཆོས་སྐུ་རང་བྱུང་ཡེ་ཤེས་ལ། །རྒྱུ་རྐྱེན་མེད་པས་འདུས་བྱས་མེད། །ཅེས་དང་། འཁོར་ལོ་སྡོམ་པ་ལས། རང་བཞིན་ལྷུན་གྱིས་གྲུབ་པ་ལ། །རྒྱུ་དང་རྐྱེན་གྱིས་བསྐྱེད་པ་འཁྲུལ། །ཞེས་གསུངས། དེ་ལ་འཁོར་ཆོས་ལས་དང་ཉོན་མོངས་པ་རྣམས་བརྟེན་པ་མེད་པའི་ཚུལ་གྱིས་བརྟེན་པ་ནི། ཉི་མཁའི་ངོས་ལ་སྤྲིན་བརྟེན་པ་ལྟར། གཞི་ལ་མ་རེག་མ་འབྱར་ལ་དེའི་ངང་དུ་གནས་པ་སྟེ། དོན་ལ་རང་བཞིན་མེད་པས་རྟེན་བརྟེན་པར་མ་གྲུབ་བཞིན་བརྟེན་པར་བཏགས་པ་སྟེ། རྒྱུད་བླ་མར། ས་ནི་ཆུ་ལ་ཆུ་རླུང་ལ། །རླུང་ནི་མཁའ་ལ་རབ་ཏུ་གནས། །མཁའ་ནི་རླུང་དང་ཆུ་དག་དང་། །ས་ཡི་ཁམས་ལ་གནས་མ་ཡིན། །དེ་བཞིན་ཕུང་པོ་ཁམས་དབང་རྣམས། །ལས་དང་ཉོན་མོངས་དག་ལ་བརྟེན། །ལས་དང་ཉོན་མོངས་ཚུལ་བཞིན་མིན། །ཡིད་ལ་བྱེད་ལ་རྟག་ཏུ་གནས། །ཚུལ་བཞིན་མ་ཡིན་ཡིད་བྱེད་ནི། །སེམས་ཀྱི་དག་པ་ལ་རབ་གནས། །སེམས་ཀྱི་རང་བཞིན་ཆོས་རྣམས་ནི། །ཐམས་ཅད་ལ་ཡང་གནས་མ་ཡིན། །ཞེས་དང་། བསྟོད་པར། དྲི་མེད་ཉི་མ་ཟླ་བ་ཡང་། །སྤྲིན་དང་ཁུག་སྣ་དུ་བ་དང་། །སྒྲ་གཅན་གདོང་དང་རྡུལ་ལ་སོགས། །སྒྲིབ་པ་ལྔ་ཡིས་བསྒྲིབ་པར་འགྱུར། །དེ་བཞིན་འོད་གསལ་བ་ཡི་སེམས། །འདོད་དང་གནོད་སེམས་ལེ་ལོ་དང་། །རྒོད་པ་དང་ནི་ཐེ་ཚོམ་སྟེ། །སྒྲིབ་པ་ལྔ་ཡིས་བསྒྲིབ་པར་འགྱུར། །ཞེས་གསུངས། མདོར་ན་རྩ་ཤེས་ལས། ལས་དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས་གསུངས་པ་བཞིན་དོན་དུ་མེད་སྣང་གློ་བུར་བ་ཟག་བཅས་ལས་ཉོན་སོགས་འཁོར་བའི་ཆོས་འདི་རྣམས་གང་ལས་བྱུང་ན། ཐོག་མེད་ནས་གཟུང་འཛིན་རྣམ་རྟོག་གི་སྤྲོས་པའི་བག་ཆགས་ལས་བྱུང་ཞིང་། སྤྲོས་པ་དེ་གང་ལས་བྱུང་ན་སེམས་ལས་བྱུང་། སེམས་ནི་ད་ལྟའི་སེམས་གཟུང་འཛིན་གྱི་རྣམ་པར་ཤར་བ་འདི་ཡིན་པས། འདི་གང་ལས་བྱུང་ན་གདོད་མའི་འོད་གསལ་ཆེན་པོའི་རྩལ་ལ་བདག་ཏུ་ཞེན་པ་ལས་བྱུང་ཞིང་། གདོད་མའི་འོད་གསལ་ཆེན་པོ་ནི་ཟུང་འཇུག་སྤྲོས་པ་དང་བྲལ་བས་གང་ལའང་མི་གནས་ཤིང་གང་གི་ཡང་ཕྱོགས་སུ་ལྷུང་བ་མེད་པས། ཆོས་ཐམས་ཅད་དེའི་ངང་ལས་བྱུང་། ངང་དུ་གནས། དེའི་ངང་དུ་ཐིམ་པས་འཁྲུལ་པའི་ཕུ་ཐག་ཆོད་པ་འདི་རང་བཞིན་རྫོགས་པ་ཆེན་པོའི་ཁྱད་ཆོས་ཡིན་ལ། དེ་ཉིད་ཤིན་ཏུ་གསལ་བར་གོ་བདེར་བརྗོད་ན། ཡེ་ཐོག་གཞི་ཡི་གནས་ལུགས་སམ་འོད་གསལ་ནི་རྟོགས་ཟིན་འཁྲུལ་ཟིན་གཉིས་ཀ་མིན་པས་གཞི་དབྱིངས་ལུང་མ་བསྟན་ཞེས་བྱ་སྟེ་དཔེ་འཆི་བའི་འོད་གསལ་བཞིན་ནོ། །དེ་ཡང་སེམས་ཅན་རྣམས་འཆི་བའི་ཚེ་སྣང་གསུམ་མཐའི་ཉེར་ཐོབ་འོད་གསལ་ལ་ཐིམ་པའི་སྐབས་སུ་ཤར་བའི་འོད་གསལ་དེའི་རང་གི་ངོ་བོ་ནི་དྭངས་གསལ་སྒྲིབ་གཡོགས་དང་བྲལ་བ་སྟོན་གནམ་དྭངས་པ་ལྟ་བུ་སྟེ། དེའི་ཚེ་འཁྲུལ་སེམས་གཟུང་འཛིན་གྱི་ཀུན་རྟོག་རགས་ཕྲ་རྣམས་ནི་ཆོས་ཉིད་ཀྱིས་རྩལ་གཞི་ཐིམ་དུ་སོང་བས་དེའི་དུས་ན་མེད་པའི་ཕྱིར་རོ། །འོན་ཀྱང་ཕལ་པ་རྣམས་ལ་ལམ་རྐྱེན་མེད་པས་འོད་གསལ་དེའི་རང་རྩལ་ཡེ་ཤེས་ནི་མ་ཤར་བས། ཡུལ་འོད་གསལ་ཡོད་ཀྱང་ཡུལ་ཅན་མེད་པས་སུ་ཞིག་གིས་ངོས་ཟིན། དེ་ལྟར་ངོས་མ་ཟིན་པའི་ཆ་ནས་སེམས་མེད་མུན་པའི་གནས་སྐབས་སམ་བརྒྱལ་བ་ཞེས་བྱ་སྟེ། འོད་གསལ་རང་གི་ངོ་བོ་ནི་ནག་ཐོམ་ལུང་མ་བསྟན་བརྒྱལ་བ་ལྟ་བུ་མིན་ནོ། །དེ་ལས་རིམ་པར་སྔོན་གྱི་བག་ཆགས་ཀྱི་དབང་གིས་སྣང་གསུམ་ཕྲ་བ་ནས་ཇེ་རགས་སུ་ཤར་ནས་བར་དོའི་ཡིད་ལུས་རྨི་ལམ་གྱི་སྣང་བ་ལྟར་འཆར་ཏེ། འདིས་སེམས་ཅན་རྣམས་གདོད་མའི་གཞི་ལས་འཁྲུལ་ཚུལ་མཚོན་ནུས། ཡང་ད་ལྟར་འོད་གསལ་ཟིན་པ་རྣམས་སྔར་བླ་མས་ངོ་སྤྲད་པའི་སེམས་ཀྱི་ཆོས་ཉིད་རིག་སྟོང་རྗེན་པ་ལ་ཡང་ཡང་གོམས་པར་བྱས་པའི་ལམ་གྱི་འོད་གསལ་བ་ལྟ་བུ་དེས། དེ་དུས་ཤར་བའི་གཞིའི་འོད་གསལ་མ་ལྟ་བུ་དེ་ངོས་ཟིན་ནས་བར་དོ་མེད་པར་ཡར་གྱི་ཟང་ཐལ་དུ་གྲོལ་བར་བྱེད་དེ་འདིས་གདོད་མའི་གཞི་ལས་གཞི་སྣང་གཡོས་ཚེ་ཀུན་ཏུ་བཟང་པོས་ཤེས་རབ་རང་བྱུང་གི་ཡེ་ཤེས་ཀྱིས་རང་ངོ་རང་གིས་རིག་སྟེ་གཞི་གནས་ལྷན་སྐྱེས་ཀྱི་མ་རིག་པ་བཅོམ་ནས་ནང་དབྱིངས་འོད་གསལ་ཆེན་པོ་ཀ་དག་གི་གྲོལ་སར་མངོན་པར་བྱང་ཆུབ་སྟེ་འགྲོ་བ་རྣམས་ལ་ཐོག་མའི་ལམ་སྟོན་པ་པོར་བྱུང་ཚུལ་ཡང་མཚོན་ནུས་ཤིང་། དེ་ལྟར་སེམས་ཡེ་ཤེས་སུ་གནས་གྱུར་པའམ་སེམས་འགགས་པའི་སྤངས་པ་དེ་སླར་མི་ལྡོག་པ་ནི་བློ་གཉེན་པོའི་ངང་ཚུལ་དང་འབྲལ་མི་རུང་བའི་ཕྱིར་དང་། དེ་ལ་ཟློག་བྱེད་ཀྱི་རྐྱེན་གཞན་མེད་པའི་ཕྱིར་ཏེ། རྣམ་འགྲེལ་ལས། སེམས་ཀྱི་རང་བཞིན་འོད་གསལ་ཏེ། །དྲི་མ་རྣམས་ནི་གློ་བུར་པ། །ཞེས་དང་། འཚེ་བ་མེད་དང་ཡང་དག་དོན། །རང་བཞིན་ལ་ནི་ཕྱིན་ལོག་གིས། །འབད་དུ་ཟིན་ཀྱང་མི་ཟློག་སྟེ། །བློ་ནི་དེ་ཕྱོགས་འཛིན་ཕྱིར་རོ། །ཞེས་གསུངས་པ་བཞིན་ནོ། །གདོད་མའི་དབྱིངས་ལས་ཐུགས་རྗེའི་རྩལ་གཡོ་ཚུལ་ཡང་། ད་ལྟའི་རང་སེམས་ཀྱི་འཆར་ཆ་སྣ་ཚོགས་པ་འདི་ལ་བྱུང་གནས་འགྲོ་གསུམ་གྱི་མཐའ་ལེགས་པར་བརྟགས་ན་གང་ནས་ཀྱང་མ་བྱུང་། གར་ཡང་མི་གནས། གང་དུའང་མི་འགྲོ་སྟེ་སེམས་ཀྱི་ཆོས་ཉིད་སྤྲོས་པ་དང་བྲལ་བའི་དབྱིངས་ལས་བྱུང་ཞིང་། དེར་གནས། དེར་ཐིམ་པའི་ཚུལ་འདིས་ཤེས་ཏེ། སེམས་ཀྱི་ཆོས་ཉིད་ནི་ཡེ་ནས་འཆིང་གྲོལ་ལས་འདས་པའི་རང་བཞིན་མཉམ་པ་ཉིད་ངོ་བོ་དུས་གསུམ་འཕོ་འགྱུར་དང་བྲལ་བའི་ཟག་མེད་འདུས་མ་བྱས་འདི་ཡིན་པས་ན། ད་ལྟའི་རང་སེམས་སྐད་ཅིག་མ་འདིའི་སྟེང་ནས་འཁོར་འདས་གྲོལ་འཁྲུལ་ཐམས་ཅད་ཀྱི་ཕུག་ཆོད་དགོས་ཀྱི་དེ་ལས་གཞན་དུ་ཆོད་ཐབས་མེད་དོ། དེས་ན་ད་ལྟ་ནས་སེམས་ཉིད་རྫོགས་པ་ཆེན་པོ་རིག་སྟོང་མཉམ་པ་ཉིད་ཀྱི་དོན་ངོས་ཟིན་པར་བྱས་ནས་ཡང་ཡང་གོམས་པར་བྱ་བ་ནི་ཅིས་ཀྱང་གལ་ཆེ་ཞིང་འདི་ཉིད་རྫོགས་རིམ་ཀུན་གྱི་བླ་མར་གྱུར་པའི་གནད་ཀྱང་དེ་ཡིན་ནོ། །མདོར་ན་ཀུན་བཟང་སྨོན་ལམ་ལས། སྣང་སྲིད་འཁོར་འདས་ཐམས་ཅད་ཀུན༔ གཞི་གཅིག་ལམ་གཉིས་འབྲས་བུ་གཉིས༔ རིག་དང་མ་རིག་ཆོ་འཕྲུལ་ཏེ༔ ཞེས་དང། ཀུན་གྱི་གཞི་ནི་འདུས་མ་བྱས༔ རང་བྱུང་ཀློང་ཡངས་བརྗོད་དུ་མེད༔ འཁོར་འདས་གཉིས་ཀའི་མིང་མེད་དོ༔ དེ་ཉིད་རིག་ན་སངས་རྒྱས་ཏེ༔ མ་རིག་སེམས་ཅན་འཁོར་བར་འཁྱམས༔ ཞེས་དང་། ཀུན་ཏུ་བཟང་པོ་ང་ཡིས་ཀྱང་༔ རྒྱུ་རྐྱེན་མེད་པ་གཞི་ཡི་དོན༔ དེ་ཉིད་གཞི་ལ་རང་བྱུང་རིག༔ཕྱི་ནང་སྒྲོ་སྐུར་སྐྱོན་མ་བཏགས༔ དྲན་མེད་མུན་པའི་སྒྲིབ་མ་གོས༔ དེ་ཕྱིར་རང་སྣང་སྐྱོན་མ་གོས༔ ཞེས་དང་། དང་པོ་སེམས་ཅན་འཁྲུལ་པ་ཀུན༔ གཞི་ལ་རིག་པ་མ་ཤར་བས༔ ཅི་ཡང་དྲན་མེད་ཐོམ་མེ་བ༔ དེ་ཀ་མ་རིག་འཁྲུལ་པའི་རྒྱུ༔ དེ་ལ་ཧད་ཀྱིས་བརྒྱལ་བ་ལས༔དངངས་སྐྲག་ཤེས་པ་ཟ་ཟི་འབྱུང་༔ དེ་ལས་བདག་གཞན་དགྲར་འཛིན་སྐྱེས༔ བག་ཆགས་རིམ་བཞིན་བརྟས་པ་ལས༔ འཁོར་བ་ལུགས་སུ་འཇུག་པ་འབྱུང་༔ ཞེས་སོགས་རྒྱས་པར་གསུངས་པ་བཞིན་ནོ། །མྱ་ངན་ལས་འདས་པའི་ཆོས་སྐུ་དང་ཡེ་ཤེས་སོགས་ནི་ནམ་མཁའ་གོ་འབྱེད་དང་། ཉི་མ་ལ་ཟེར་བཞིན་འོད་གསལ་བའི་དབྱིངས་ལ་ནམ་ཡང་འབྲལ་མི་ཤེས་པའི་ཆོས་ཉིད་ཀྱི་ཚུལ་དུ་དབྱེར་མེད་པར་བརྟེེན་ཏེ། །རྒྱུད་བླ་མར། རྣམ་དབྱེར་བཅས་པའི་མཚན་ཉིད་ཅན། གློ་བུར་དག་གིས་ཁམས་སྟོང་སྟེ། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་དང་། དགོངས་འདུས་ལས། ལངྐའི་བདག་པོ། སེམས་ཀྱི་དེ་བཞིན་ཉིད་གང་ཡིན་པ་དང་། རྡོ་རྗེ་སེམས་དཔའི་དེ་བཞིན་ཉིད་གང་ཡིན་པ་འདི་གཉིས་སུ་མེད་དེ་གཉིས་སུ་བྱར་མེད་དོ། །ཞེས་དང་། རང་ཤར་ལས། རང་རིག་སྒྲོན་མ་རང་སྣང་འོད་ཀྱི་ཡུལ། །རང་ལ་གནས་ཏེ་རང་གསང་ཐབས་ཀྱིས་ཆོད། །དུས་གསུམ་སངས་རྒྱས་དགོངས་པའི་མཆོག་དོན་ཡིན། །སངས་རྒྱས་ཀུན་དང་མི་གཡོ་མཉམ་པར་གནས། །ཞེས་དང་། ཀུན་སྨོན་ལས། རིག་པའི་གསལ་ཆ་མ་འགགས་པ༔ ངོ་བོ་གཅིག་ལ་ཡེ་ཤེས་ལྔ༔ ཡེ་ཤེས་ལྔ་པོ་སྨིན་པ་ལས༔ ཐོག་མའི་སངས་རྒྱས་རིགས་ལྔ་འབྱུང༔ དེ་ལས་ཡེ་ཤེས་མཐའ་རྒྱས་པས༔ སངས་རྒྱས་བཞི་བཅུ་རྩ་གཉིས་བྱུང༔ ཡེ་ཤེས་ལྔ་ཡི་རྩལ་ཤར་བས༔ ཁྲག་འཐུང་དྲུག་ཅུ་ཐམ་པ་བྱུང༔ དེ་ཕྱིར་གཞི་རིག་འཁྲུལ་མ་མྱོང༔ ཞེས་དང་། ཡེ་ཤེས་ཀློང་གི་རྒྱུད་ལས། རིག་པ་མ་བསླད་ཆོས་སྐུ་ཡིན། །རང་བཞིན་ངོ་བོ་ཉིད་ཀྱི་སྐུ། །རྒྱུ་རྐྱེན་མ་སྐྱེས་འགྱུར་བ་མེད། །འདུས་མ་བྱས་པའི་ནམ་མཁའ་འདྲ། །ཞེས་དང་། རྨད་བྱུང་ལས། སངས་རྒྱས་སྐུ་དང་ཡེ་ཤེས་ཞིང་ཁམས་དང་། །ཡེ་ཤེས་ཡོན་ཏན་ཕྲིན་ལས་ཇི་སྙེད་པ། །ཡེ་ཤེས་དེ་ཉིད་དེ་ལྟར་སྣང་བ་ཡིན། །གཞན་ནས་མ་ཡིན་དེ་ལྟར་ལྷུན་གྱིས་གྲུབ། །ཞེས་སོ། །མདོར་ན་འཕགས་པ་འདའ་ཀ་ཡེ་ཤེས་ལས། སེམས་རྟོགས་ན་སངས་རྒྱས་ཡིན་པས་སངས་རྒྱས་གཞན་དུ་མི་འཚོལ་བའི་འདུ་ཤེས་རབ་ཏུ་བསྐྱེད་པར་བྱའོ། །ཞེས་དང་། བརྟག་གཉིས་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དེ་བསལ་ན་ནི་སངས་རྒྱས་དངོས། །ཞེས་དང་། གུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །ཅེས་དང་། གསང་སྙིང་ལས། དུས་བཞི་ཕྱོགས་བཅུ་གང་ནས་ཀྱང་། རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་པས། །སངས་རྒྱས་གཞན་དུ་མ་ཚོལ་ཅིག །ཅེས་དང་། ཀུན་བྱེད་ལས། ཀུན་བྱེད་བྱང་ཆུབ་ང་ཡི་རང་བཞིན་ལས། །མ་བཙལ་རང་བཞིན་ལྷུན་གྱིས་གྲུབ་པ་ནི། །རྒྱལ་བ་ཀུན་གྱི་སྙིང་པོ་སྐུ་གསུམ་སྟེ། །ང་ཡི་རང་བཞིན་མ་བཅོས་ཆོས་སྐུར་གྲུབ། །ང་ཡི་ངོ་བོ་མ་བཅོས་ལོངས་སྤྱོད་རྫོགས། །ང་ཡི་ཐུགས་རྗེ་མངོན་ཕྱུང་སྤྲུལ་སྐུ་གསུམ། །བཙལ་ནས་གྲུབ་པའི་འབྲས་བུར་བསྟན་པ་མིན། །མ་བཙལ་ཡེ་ནས་ལྷུན་གྱིས་གྲུབ་པ་ཡིན། །ཞེས་གསུངས་པ་ལྟར་སངས་རྒྱས་སྐུ་གསུམ་ཡང་རང་རིག་པ་བྱང་ཆུབ་སེམས་ཀྱི་དཀྱིལ་འཁོར་དུ་ཡེ་ནས་མ་བཙལ་ལྷུན་གྱིས་རྫོགས་པའི་བདག་ཉིད་དུ་བཞུགས་པ་སྟེ། གནས་ལུགས་ཡང་དག་པའི་དོན་ལ་དེ་ལྟར་ཡིན་ནོ། །འོན་ཀྱང་གང་ཟག་བློ་དམན་པ་རྣམས་ལ་དང་པོ་ནས་བསྟན་ན་བདག་ཏུ་ལྟ་བ་སོགས་ཀྱི་གཞིར་འགྱུར་བས་ན། རྒྱལ་བས་བཀའ་འཁོར་དང་པོར་བདེན་བཞི་སྤང་གཉེན་དུ་ལྟ་བས་གང་ཟག་གི་བདག་མེད་རྟོགས་པའི་སྒོ་ཙམ་ལས་ཀུན་གཞི་དང་བདེ་གཤེགས་སྙིང་པོའི་རང་བཞིན་སོགས་དངོས་སུ་མ་བསྟན་ཏེ་དགོངས་འགྲེལ་ལས། ལེན་པའི་རྣམ་པར་ཤེས་པར་ཟབ་ཅིང་ཕྲ། །ས་བོན་ཐམས་ཅད་ཆུ་བོའི་རྒྱུན་བཞིན་འབབ། །བདག་ཏུ་རྟོག་པར་གྱུར་ན་མི་རུང་བས། །ངས་འདི་བྱིས་པ་རྣམས་ལ་ཡོངས་མ་བསྟན། །ཞེས་དང་། དཔལ་ཕྲེང་གི་མདོ་ལས། བཅོམ་ལྡན་འདས་དེ་བཞིན་གཤེགས་པའི་སྙིང་པོ་ལས་ཕྱི་རོལ་དུ་གྱུར་པ་བྱིས་པ་སོ་སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་དང་། ལས་དང་པོ་པ་སྟོང་པ་ཉིད་ཀྱིས་སེམས་རྣམ་པར་གཡེངས་པའི་བྱང་ཆུབ་སེམས་དཔའ་རྣམས་ལགས་སོ། །ཞེས་དང་། ཐལ་འགྱུར་ལས། གནས་ལུགས་འདུག་ཚུལ་འདི་ལྟ་བུ། །བཤད་ན་ཉན་ཐོས་རང་སངས་རྒྱས། །རབ་ཏུ་སྐྲག་སྟེ་བརྒྱལ་བར་འགྱུར། །དེས་ན་མཆོག་ཏུ་གསང་བར་བྱ། །ཞེས་གསུངས། བར་པར་རྣམ་ཐར་གསུམ་ལྡན་གྱི་ཆོས་དབྱིངས་ངོ་བོ་སྟོང་ཕྱོགས་ནས་ཇི་ལྟ་བ་བཞིན་སྟོན་པར་མཛད་དེ། དེ་ཡང་གནས་སྐབས་སུ་འཁོར་འདས་ཀྱི་ཆོས་ཐམས་ཅད་རང་བཞིན་གྱིས་མ་གྲུབ་པ་ཉིད་དོན་དམ་དང་། དེའི་སྣང་ཆ་རྟེན་འབྱུང་སྒྱུ་མ་ལྟ་བུ་ལ་ཀུན་རྫོབ་ཏུ་བཞག་སྟེ་འཕགས་སློབ་ཀྱི་རྗེས་ཐོབ་ཀྱི་གཟིགས་པ་དང་མཐུན་པར་བདེན་པ་གཉིས་སུ་དབྱེ་བར་མཛད་ཀྱང་། མཐར་ཐུག་ཤེར་མདོ་ནས་སྟོང་ཉིད་བཞི་སྦྱོར་དུ་གསུངས་པ་སོགས་ཀྱི་དགོངས་པ་སྣང་སྟོང་ཟུང་འཇུག་ཆོས་དབྱིངས་སྒྲོ་འདོགས་སོ་གཉིས་དང་བྲལ་བ། དམ་པའི་དོན་གྱི་བདེན་གཅིག་རྣམ་གྲངས་མ་ཡིན་པའི་དོན་དམ་འཕགས་སློབ་ཀྱི་མཉམ་བཞག་གི་གཟིགས་པ་དང་མཐུན་པར་གཏན་ལ་ཕབ་ནས། དེའི་དོན་ལ་གཟུང་འཛིན་མེད་པའི་སེམས་ཀྱིས་མཉམ་པར་འཇོག་པར་གསུངས་ཏེ། མདོ་ལས། གཟུགས་ཀྱི་རང་བཞིན་གང་ཡིན་པ། །དེ་ནི་སྟོང་པ་ཉིད་བཞིན་དུ། །སྟོང་པ་ཉིད་ཀྱང་གཟུགས་སུ་བརྗོད། །རང་བཞིན་གདོད་ནས་མ་སྐྱེས་པའོ། །ཞེས་དང་། ཚིག་བྲལ་ངག་གི་ལམ་གྱིས་མི་མཚོན་པའི། །དེ་བཞིན་ཉིད་ཆོས་རང་བཞིན་ནམ་མཁའ་འདྲ། །སེམས་དང་ཡིད་ཀྱི་རྒྱུ་བ་རྣམ་སྤངས་པ། །མཆོག་རབ་ངོ་མཚར་ཆེ་བ་དམ་པ་ཤེས། །ཞེས་དང་། ཡུམ་ལ་བསྟོད་པར། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུམ་ལ་ཕྱག་འཚལ་ལོ། །ཞེས་དང་། མངོན་རྟོགས་རྒྱན་ལས། ཚུ་རོལ་ཕ་རོལ་མཐའ་ལ་མིན། །དེ་དག་བར་ན་མི་གནས་པ། །དུས་རྣམས་མཉམ་པ་ཉིད་ཤེས་ཕྱིར། །ཤེས་རབ་ཕ་རོལ་ཕྱིན་པར་འདོད། །ཅེས་དང་། འདི་ལ་བསལ་བྱ་ཅིའང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་དང་། འཕགས་པ་ཀླུས། ཀུན་རྫོབ་དང་ནི་དོན་དམ་དག །སོ་སོའི་ཆར་ནི་ཤེས་གྱུར་ཏེ། །གང་དུ་ཡང་དག་འདྲེས་གྱུར་པ། །ཟུང་དུ་འཇུག་པར་དེ་བཤད་དོ། །ཞེས་དང་། བརྗོད་པར་བྱ་བ་ལྡོག་པ་སྟེ། །སེམས་ཀྱི་སྤྱོད་ཡུལ་ལྡོག་པས་སོ། །མ་སྐྱེས་པ་དང་མི་འགག་པ། །ཆོས་ཉིད་མྱ་ངན་འདས་དང་མཚུངས། །ཞེས་དང་། ཞི་བ་ལྷས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་དང་། གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་གསུངས། དེ་ཡང་ཆོས་ཉིད་ཀྱི་རང་མཚན་ཇི་ལྟ་བ་མངོན་དུ་གཟིགས་པ་འཕགས་པའི་ས་ན་ཡིན་ཡང་། དེའི་དོན་སྤྱི་བསྒོམ་པ་ཚོགས་སྦྱོར་གྱི་སྐབས་སུའང་མེད་པ་ནི་མ་ཡིན་ཏེ། ཆོས་ཉིད་རང་གི་ངོ་བོ་སྤྲོས་བྲལ་གཉིས་སྣང་མེད་པའི་མཚན་ཉིད་ཅན་ཡིན་པ་དང་། དེ་གསར་བྱུང་མིན་པར་ཡེ་ནས་སེམས་ཀྱི་ཆོས་ཉིད་དུ་གནས་པའི་གནད་ཀྱིས། དེའི་དོན་སྤྱི་བློ་ལ་སྣང་བ་དཔེ་ནམ་མཁའི་གཟུགས་བརྙན་ཆུ་ལ་ཤར་བ་ལྟ་བུ་ཡིན་པས། བློ་ཡང་སྤྲོས་བྲལ་གཉིས་སྣང་མེད་པའི་རྣམ་པར་འཆར་བ་སྟེ། དེའང་རི་མོར་བྲིས་པ་དང་། ཆུ་ཟླ་དང་། གནམ་ཟླའི་དཔེས་གོ་མྱོང་རྟོགས་གསུམ་གྱི་ཁྱད་པར་གསུངས་པ་བཞིན་སྔ་མ་གཉིས་ཅི་རིགས་སོ་སྐྱེའི་སར་ཡོད་དེ། འདི་ལ་མདོ་ལས་སྟོང་ཉིད་དོན་སྤྱིའི་ཚུལ་དུ་རྟོགས་པ་དང་སྔགས་སུ་དཔེ་ཡི་ཡེ་ཤེས་ཞེས་གསུངས་ཏེ་དོན་གཅིག་གོ །དེ་ཙམ་གྱིས་སོ་སྐྱེའི་གང་ཟག་དེ་འཕགས་པར་ཐལ་བའི་ཉེས་པའང་མེད་དེ། ད་དུང་མཐོང་སྤང་གི་སྒྲིབ་པ་ལས་མ་གྲོལ་བའི་ཕྱིར། དཔེར་ན་ས་དང་པོའི་འཕགས་པ་དེ་སངས་རྒྱས་སུ་མི་འགྱུར་བ་བཞིན་ནོ། །དེ་ལྟར་བྱང་སེམས་བློ་ཆེ་བ་རྣམས་ཀྱིས་ལེགས་པར་རྟོགས་ཤིང་གོམས་པས། གཉེན་པོའི་ཡེ་ཤེས་དེ་ཉིད་ཀྱིས། སྤང་བྱ་གློ་བུར་གྱི་དྲི་མ་རྣམས་རིམ་གྱིས་སྤང་བའམ་བྲལ་བའི་སྟོབས་ཀྱིས་ཆོས་དབྱིངས་ཀུན་ཏུ་འགྲོ་བའི་དོན་རྟོགས་ཤིང་། ཆོས་དབྱིངས་དེ་སྟོང་རྐྱང་མིན་པར་ཡེ་ནས་སྣང་སྟོང་ཟུང་དུ་འཇུག་པའི་གནད་ཀྱིས་ཡོན་ཏན་བརྒྱ་ཕྲག་བཅུ་གཉིས་སོགས་རིགས་ཁམས་ཀྱི་ཡོན་ཏན་རྣམས་གོང་འཕེལ་གྱི་ཚུལ་དུ་དག་སར་ཞིང་དག་སྦྱོར་དང་སྲིད་ཞི་མཉམ་ཉིད་མཐར་ཐུག་སངས་རྒྱས་ཀྱི་སའི་སྐུ་དང་ཞིང་ཁམས་གྱི་བར་དུ་སྣང་བ་ཡིན་ནའང་། བློ་ཆུང་བ་རྣམས་ཀྱིས་དེ་ལྟར་མ་རྟོགས་ཤིང་སྙིང་པོའི་རང་བཞིན་རང་ལ་ཡོད་པར་མ་ཐོས་ནས། སྟོང་རྐྱང་རྣམ་གྲངས་པ་ཙམ་ལ་དོན་དམ་མཐར་ཐུག་ཏུ་བཟུང་བའི་དབང་གིས། སེམས་ཞུམ་སེམས་ཅན་དམན་ལ་བརྙས་པ་སོགས་ཀྱི་སྐྱོན་ལྔ་པོ་འཇུག་པས་མཉམ་པ་ཆེན་པོའི་དོན་གཏན་ལ་མི་ཕེབས་པས། སྐྱོན་དེ་རྣམས་སྤང་བའི་ཕྱིར། འཁོར་ལོ་ཐ་མར་རང་བཞིན་སྐུ་དང་ཡེ་ཤེས་སོགས་སངས་རྒྱས་ཀྱི་ཆོས་གངྒཱའི་ཀླུང་གི་བྱེ་མ་སྙེད་ཀྱི་གྲངས་ལས་བརྒལ་བའི་གཞལ་མེད་བསམ་མི་ཁྱབ་པའི་ཚོགས་རྣམས་འབྲལ་མི་ཤེས་པའི་ཆོས་ཉིད་ཀྱི་ཚུལ་དུ་རིགས་ཁམས་ལ་ད་ལྟ་སེམས་ཅན་གྱི་དུས་ནས་འཕེལ་འ བྲི་མེད་པར་ས་འོག་གི་གཏེར་དང་བུམ་ནང་གི་སྒྲོན་མེ་སོགས་ཀྱི་དཔེས་གནས་ཚུལ་མཐར་ཐུག་པ་ཇི་བཞིན་པར་སྟོན་པར་མཛད་པ་ཡིན་ཏེ། རྒྱུད་བླ་མར། སྤྲིན་དང་རྨི་ལམ་རྒྱུ་བཞིན་དེ་དང་དེར། །ཤེས་བྱ་ཐམས་ཅད་རྣམ་ཀུན་སྟོང་པ་ཞེས། །གསུངས་ནས་ཡང་འདིར་རྒྱལ་རྣམས་སེསམ་ཅན་ལ། །སངས་རྒྱས་སྙིང་པོ་ཡོད་ཅེས་ཅི་སྟེ་གསུངས། །ཞེས་དྲིས་པའི་ལན་དུ། སེམས་ཞུམ་སེམས་ཅན་དམན་ལ་བརྙས་པ་དང་། ཡང་དག་མིན་འཛིན་ཡང་དག་ཆོས་ལ་སྐུར། །བདག་ཆགས་ལྷག་པའི་སྐྱོན་ལྔ་གང་དག་ལ། །ཡོད་པ་དེ་དག་དེ་སྤང་དོན་དུ་གསུངས། །ཞེས་གསུངས། དེ་ལྟར་སྤངས་པས་ཡོན་ཏན་ཅི་ཞིག་ཐོབ་ན། རང་གཞན་གྱི་རྒྱུད་ལ་སངས་རྒྱས་ཀྱི་སྙིང་པོ་ཡོད་པར་ཤེས་པས་རང་སེམས་ཞུམ་པ་བཟློག་ནས་ཐར་པ་སྒྲུབ་པ་ལ་དཀའ་བ་མེད་པར་ཤེས་པའི་སྤྲོ་བ་དང་། སེམས་ཅན་གཞན་ལ་བརྙས་པ་བཟློག་ནས་སྟོན་པ་བཞིན་དུ་ཐམས་ཅད་སངས་རྒྱས་སུ་མཉམ་པའི་གུས་པ་སྐྱེ་བ་དང་། ཡང་དག་པའི་དོན་སྐུ་དང་ཡེ་ཤེས་ཀྱི་དགོངས་པ་རང་ལ་གནས་པ་མི་ཤེས་པར་བཟློག་ནས་དོན་དམ་པའི་དབྱིངས་རྟོགས་པའི་ཤེས་རབ་དང་། གནས་ལུགས་དེ་ལྟར་ཤེས་པས་ཡོད་མེད་རྟག་ཆད་ཀྱི་སྒྲོ་སྐུར་བཟློག་ནས་ཡང་དག་པའི་དོན་རྟོགས་པའི་ཡེ་ཤེས་དང་། བདག་ཉིད་ལ་མཆོག་ཏུ་རློམ་པའི་ལྷག་པར་ཆགས་པ་བཟློག་ནས་བདག་གཞན་མཚུངས་པར་རྟོགས་ཏེ་གཞན་ལ་བྱམས་པ་ཆེན་པོ་སྐྱེ་བར་འགྱུར་ཏེ། སྔ་མ་ལས། སྤྲོ་དང་སྟོན་པ་བཞིན་གུས་དང་། །ཤེས་རབ་ཡེ་ཤེས་བྱམས་ཆེན་ཏེ། །ཆོས་ལྔ་སྐྱེ་ཕྱིར་དེ་ལས་ནི། །ཁ་ན་མ་ཐོ་མེད་མཚུངས་ལྟ། །སྐྱོན་མེད་ཡོན་ཏན་ལྡན་པ་དང་། །བདག་དང་སེམས་ཅན་མཚུངས་བྱམས་ལས། །སངས་རྒྱས་ཉིད་ནི་མྱུར་དུ་ཐོབ། །ཅེས་གསུངས། དེ་ལྟའི་ཡོན་ཏན་གྱི་ཆོས་རྒྱུད་ལ་སྐྱེས་ཏེ་མཉམ་པ་ཆེན་པོའི་དོན་རྟོགས་པས་རྫོགས་སྨིན་སྦྱངས་པ་རྒྱ་མཚོ་ལྟ་བུ་ལ་འཇུག་ནུས་པའི་ཕྱིར། བདེ་གཤེགས་སྙིང་པོའི་སྒྲ་ཐོས་པ་ཙམ་གྱིས་ཀྱང་བྱང་ཆུབ་ལས་ཕྱིར་མི་ལྡོག་པར་མདོ་ལས་གསུངས་སོ། །འདི་ལ་ཁ་ཅིག་དྲང་དོན་དུ་འདོད་པ་ནི་རྣམ་པར་འཁྱམས་ཏེ། དེ་ལྟ་ན། སེམས་ཞུམ་པ་སོགས་ལྔ་པོ་སྐྱོན་དུ་མི་འགྱུར་ཞིང་སྤང་མི་དགོས་ལ་མི་ནུས་ཤིང་། གཉེན་པོའི་འཛིན་སྟངས་ལྔ་པོ་འཆང་བའང་དོན་ལ་མི་གནས་པས་དགོས་པ་མེད་པ་དང་། རྒྱུད་བླའི་རང་ཚིག་དང་ཡང་དངོས་སུ་འགལ་བའི་ཕྱིར་རོ། །དེས་ན་སྙིང་པོའི་རང་བཞིན་མ་བསྟན་པ་དང་། གསལ་བར་མ་བསྟན་པ་དང་། རྫོགས་པར་བསྟན་པའི་ཆ་ནས་བཀའ་འཁོར་སྔ་མ་གཉིས་ལ་བླ་ན་མཆིས་པ། སྐབས་མཆིས་པ། དྲང་བའི་དོན་རྩོད་པའི་གཞིར་གྱུར་པ་སོགས་དང་། ཕྱི་མ་ལ་དེ་ལས་ལྡོག་སྟེ། བླ་ན་མ་མཆིས་པ། སྐབས་མ་མཆིས་པ། ངེས་པའི་དོན་རྩོད་པའི་གཞིར་གྱུར་པ་སོགས་ཀྱི་བསྔགས་པ་རྒྱ་ཆེར་གསུངས་པ་ཡིན་ནོ། །ཚུལ་དེ་ལྟར་མ་ཤེས་པར་བཀའ་འཁོར་གསུམ་གོ་བཟློག་དང་། དྲང་ངེས་ཀྱི་འཆད་ཚུལ་སྣ་ཚོགས་པ་ཞིག་བྱུང་མོད། འོ་སྐོལ་ནི་སངས་རྒྱས་རང་ཉིད་ཀྱིས་ཇི་ལྟར་བཞག་པ་ལས་འགོང་སྟེ་སྨྲ་བར་མི་ནུས་པས། དེ་གང་སྙམ་ན། མདོ་སྡེ་དགོངས་པ་ངེས་འགྲེལ་ལས། བཅོམ་ལྡན་འདས་ཀྱིས་དང་པོར་ཡུལ་ཝཱ་རཱ་ཎ་སཱི་དྲང་སྲོང་སྨྲ་བ་རི་དྭགས་ཀྱི་ནགས་སུ་ཉན་ཐོས་ཀྱི་ཐེག་པ་ལ་ཡོངས་སུ་ཞུགས་པ་རྣམས་ལ་འཕགས་པའི་བདེན་པ་བཞིའི་རྣམ་པར་བསྟན་པས་ཆོས་ཀྱི་འཁོར་ལོ་ངོ་མཚར་རྨད་དུ་བྱུང་བ། སྔོན་ལྷ་གྱུར་པའམ་མིར་གྱུར་པ་སུས་ཀྱང་ཆོས་དང་མཐུན་པར་འཇིག་རྟེན་དུ་མ་བསྐོར་བ་གཅིག་རབ་ཏུ་བསྐོར་ཏེ་ཞེས་དང་། བཅོམ་ལྡན་འདས་ཀྱིས་ཆོས་རྣམས་ཀྱི་ངོ་བོ་ཉིད་མ་མཆིས་པ་ཉིད་ལས་བརྩམས། སྐྱེ་བ་མ་མཆིས་པ་དང་། འགག་པ་མ་མཆིས་པ་དང་། གཟོད་མ་ནས་ཞི་བ་དང་། རང་བཞིན་གྱིས་མྱ་ངན་ལས་འདས་པ་ཉིད་ལས་བརྩམས་ནས། ཐེག་པ་ཆེན་པོ་ལ་ཡང་དག་པར་ཞུགས་པ་རྣམས་ལ་སྟོང་པ་ཉིད་སྨོས་པའི་རྣམ་པས་ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་གཉིས་པ་བསྐོར་ཏེ། ཞེས་དང་། བཅོམ་ལྡན་འདས་ཀྱིས་ཆོས་རྣམས་ཀྱི་ངོ་བོ་ཉིད་མ་མཆིས་པ་ཉིད་ལས་བརྩམས། སྐྱེ་བ་མ་མཆིས་པ་དང་། འགག་པ་མ་མཆིས་པ་དང་གཟོད་མ་ནས་ཞི་བ་དང་། རང་བཞིན་གྱིས་མྱ་ངན་ལས་འདས་པ་ཉིད་ལས་བརྩམས་ནས། ཐེག་པ་ཐམས་ཅད་ལ་ཡང་དག་པར་ཞུགས་པ་རྣམས་ལ་ལེགས་པར་རྣམ་པར་ཕྱེ་བ་དང་ལྡན་པ། ཤིན་ཏུ་ངོ་མཚར་རྨད་དུ་བྱུང་བའི་ཆོས་ཀྱི་འཁོར་ལོ་གསུམ་པ་བསྐོར་ཏེ་ཞེས་དང་། སྔ་མ་གཉིས་ཀྱི་སྐབས་སུ་བླ་ན་མཆིས་པ་སོགས་བཞི་དང་། ཕྱི་མ་ལ་བླ་ན་མ་མཆིས་པ་སོགས་ཀྱིས་བསྔགས་པར་མཛད་དོ། །དེ་ལྟར་བསྔགས་པའང་འཁོར་ལོ་ཐ་མའི་མདོ་ཡིན་ཚད་ལ་ནི་མ་ཡིན་ཏེ། སྙིང་པོའི་རང་བཞིན་གསལ་བར་བསྟན་པའི་མདོ་རྣམས་ཡིན་པར་ཀུན་མཁྱེན་མི་ཕམ་རིན་པོ་ཆེས་བཞེད་དོ། །དེ་ལྟ་བུའི་ཆོས་འཁོར་རིམ་པ་གསུམ་པོ་དག་གིས་གང་དུ་སྒྲིབ་བྱེད་གློ་བུར་བའི་དྲི་མ་རགས་པ་དང་། ཕྲ་བ་དང་། ཤིན་ཏུ་ཕྲ་བའི་ཚུལ་རྣམས་སྦྱོང་བྱེད་ཀྱི་ཐབས་རྒྱ་ཆེ་ཆུང་ལས། དོན་དུ་གཤེགས་སྙིང་གཅིག་པུའི་སྟེང་གི་དྲི་མ་སྦྱོང་བ་ལ་གསུམ་ཀ་མཐུན་ཞིང་། འདི་ལྟར་དང་པོས་མི་རྟག་པ་སོགས་ཀྱིས་འཁོར་བ་ལས་ཡིད་འབྱུང་ཞིང་མྱ་ངན་ལས་འདས་པའི་སྒོར་འཇུག་པའི་རྒྱུ་བྱེད། གཉིས་པས་གཞི་སྟོང་ཉིད། ལམ་མཚན་མེད། འབྲས་བུ་སྨོན་མེད་དེ་རྣམ་པར་ཐར་པའི་སྒོ་གསུམ་གྱིས་འཇིག་རྟེན་པའི་བདག་ཏུ་ལྟ་བ་ལ་སོགས་པའི་མཚན་འཛིན་གྱི་གཉེན་པོར་འགྱུར་ཞིང་། གསུམ་པ་ཕྱིར་མི་ལྡོག་པའི་གཏམ་གྱིས་བདེ་བར་གཤེགས་བའི་ཚུལ་རྒྱ་ཆེན་པོ་ཁོང་དུ་ཆུད་པར་བྱེད་པ་ལ་དགོངས་པ་སྟེ། གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ་ལས། རིགས་ཀྱི་བུ་འདི་ལྟར་དཔེར་ན་ནོར་བུ་མཁན་མཁས་པས་ནོར་བུ་སྦྱོང་བའི་ཚུལ་ལེགས་པར་ཤེས་པ་དེས། ནོར་བུ་རིན་པོ་ཆེའི་རིགས་ནས་ཡོངས་སུ་མ་དག་པའི་ནོར་བུ་བླངས་ཏེ་ལན་ཚྭའི་ཆུ་རྙོག་པོར་སྤངས་ནས་སྐྲའི་རེ་བས་ཡོངས་སུ་སྦྱོང་བར་བྱེད་དོ། །དེ་བཞིན་དུ་དེའི་འོག་ཏུ་ཟས་ཀྱི་ཁུ་བས་སྦངས་ཏེ་བལ་གྱི་ལྭ་བས་ཡོངས་སུ་སྦྱོང་བར་བྱེད་དོོ། །དེ་བཞིན་དུ་དེའི་འོག་ཏུ་སྨན་བཟང་པོའི་ཁུས་སྦངས་ཏེ་རས་སྲབ་མོས་ཡོངས་སུ་སྦྱོང་བས་ཡོངས་སུ་སྦྱོང་བར་བྱེད་དོ། །ཡོངས་སུ་སྦྱངས་ཏེ་དྲི་མ་དང་བྲལ་བ་ནི་བཻཌཱུཪྱའི་རིགས་ཆེན་པོ་ཞེས་བརྗོད་དོ། །དེ་བཞིན་དུ་དེ་བཞིན་གཤེགས་པ་ཡང་། ཡོངས་སུ་མ་དག་པའི་སེམས་ཅན་ལ་དང་པོ་མི་རྟག་པ་དང་། སྡུག་བསྔལ་བ་སོགས་ཡིད་འབྱུང་བའི་གཏམ་གྱིས་འདུལ་བ་ལ་འཛུད་པར་མཛད་པ་དང་། དེའི་འོག་ཏུ་རྣམ་པར་ཐར་པ་གསུམ་གྱིས་དེ་བཞིན་གཤེགས་པའི་ཚུལ་རྟོགས་པར་མཛད་པ་དང་། དེའི་འོག་ཏུ་ཕྱིར་མི་ལྡོག་པའི་འཁོར་ལོའི་གཏམ་གྱིས་དེ་བཞིན་གཤེགས་པའི་ཡུལ་ལ་འཇུག་པར་མཛད་དོ། །ཞུགས་པར་གྱུར་ཅིང་ཆོས་ཉིད་རྟོགས་ན་ནི་བླ་ན་མེད་པའི་ཡོན་གནས་སོ། །ཞེས་གསུངས། གཞན་ཡང་། མྱ་ངན་ལས་འདས་པའི་མདོ་ལས། བུད་མེད་བུ་ཆུང་ངུ་ཁ་མྱགས་པ་གསོ་བའི་སྨན་བཏང་བའི་དཔེ་སྔོན་དུ་བཏང་ནས། རིགས་ཀྱི་བུ། དེ་བཞིན་གཤེགས་པ་ཡང་སེམས་ཅན་ཐམས་ཅད་བསྒྲལ་བའི་ཕྱིར། སེམས་ཅན་ཐམས་ཅད་ལ་བདག་མེད་པའི་ནན་ཏན་སྟོན་ཏེ། དེ་ལ་ནན་ཏན་དུ་བྱས་པས་བདག་ཅེས་བྱ་བའི་སེམས་མེད་དེ། ཡོངས་སུ་མྱ་ངན་ལས་བཟླའོ། །དེ་ལའང་འཇིག་རྟེན་རྒྱང་འཕེན་པའི་ངན་པར་བལྟ་བ་བསལ་བའི་ཕྱིར། བདག་མེད་པའི་ཆོས་བསྒོམས་པས་ཡོངས་སུ་དག་པའི་ལུས་སུ་འབྱུང་བའི་ཕྱིར་ཇི་ལྟར་བུད་མེད་དེ་ལ་བུའི་ཕྱིར་མཁྲིས་པས་ནུ་མ་ལ་བསྐུས་པ་བཞིན་དུ། དེ་བཞིན་གཤེགས་པ་ཡང་དེ་དང་འདྲ་སྟེ། སྟོང་པ་ཉིད་བསྒོམ་པའི་ཕྱིར་ཆོས་ཐམས་ཅད་ལ་བདག་མེད་ཅེས་གསུངས་སོ། །ཇི་ལྟར་བུད་མེད་དེས་ནུ་མ་ཕྱིས་བཀྲུས་ནས་བུ་བོས་ཏེ། ནུ་ཞོ་བླུད་དོ་ཞེས་བྱ་བ་ཇི་བཞིན་དུ། ངས་དེ་བཞིན་གཤེགས་པའི་སྙིང་པོ་བསྟན་པ་ཡང་དེ་དང་འདྲ་སྟེ། དགེ་སློང་ཁྱོད་མ་སྐྲག་པར། ཇི་ལྟར་བུ་ལ་མས་བོས་ཏེ། ནུ་ཞོ་བགས་ཀྱིས་འཐུང་བ་བཞིན་དུ། དགེ་སློང་ཁྱོད་ཀྱང་བྱེ་བྲག་ཕྱེད་པར་གྱིས་ཤིག གཞན་དུ་ཅི་ཡང་མེད་པའི་སྟོང་པ་ཉིད་བསྒོམས་པ་ལས་ནི། སངས་རྒྱས་ཀྱི་སྐུ་དང་ཡེ་ཤེས་འབྱུང་བར་མི་འགྱུར་ཏེ། འབྲས་བུ་ནི་རྒྱུའི་རྗེས་སུ་བྱེད་པ་བཞིན་ནོ། །ཞེས་དང་། ངས་ཤེས་རབ་ཀྱི་ཕ་རོལ་ཏུ་ཕྱིན་པར་ཆོས་ཐམས་ཅད་སྟོང་པ་ཉིད་དུ་བསྟན་པ་ནི། ཉན་ཐོས་དང་རང་སངས་རྒྱས་དང་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་རྣམས་དང་། གཞན་མུ་སྟེགས་ཅན་རྣམས་ཀྱིས་དངོས་པོ་ལ་མངོན་པར་ཞེན་པ། བདག་ཏུ་ལྟ་བ་ཅན་འདུ་ཤེས་ཀྱི་འཛིན་པས་བཅིངས་པ་རྣམས་ལ་ཕན་གདགས་པའི་ཕྱིར་གསུངས་ཀྱི། དེ་ཁོ་ན་ཉིད་དུ་ན། ཆོས་ཐམས་ཅད་རང་བཞིན་གྱིས་འོད་གསལ་བ་སྟེ། དེ་བཞིན་ཉིད་ཀྱི་དོན་ལྷུན་གྱིས་གྲུབ་པའི་ངོ་བོ་ཉིད་དུ་རིག་པར་བྱའོ། །ཞེས་དང་། དགེ་སློང་དག དཔེར་ན་སོས་ཀའི་དུས་ལ་བབས་པ་ན། སྐྱེ་བོ་དག་ཁྲུས་རས་བཅིངས་ཏེ། རང་གི་རྒྱན་དང་ཉེ་བར་སྤྱོད་པ་དག་གིས་ཆུ་ལ་རྩེའོ། །དེ་ནས། དེར་གཅིག་གིས་རིགས་དང་ལྡན་པའི་ནོར་བུ་བཻཌཱུཪྱ་ཆུའི་ནང་དུ་བཞག་པ་དང་། དེ་ནས་བཻཌཱུཪྱའི་དོན་དུ་དེ་དག་ཐམས་ཅད་རྒྱན་བཞག་ནས་ཆུ་ལ་ཞུགས་པར་གྱུར་ཏོ། །དེ་ནས་དེ་ན་ཡོད་པའི་གསེག་མའམ་གྱོ་མོ་དེ་དག་ལ་ནོར་བུའོ་སྙམ་ནས་བཟུང་སྟེ། བདག་གིས་ནོར་བུ་རྙེད་དོ་སྙམ་ནས་དབྱུང་ངོ་། །ཕྱུང་ནས་ཀྱང་རྫིང་བུའི་འགྲམ་དུ་བལྟས་པ་ན་འདི་ནི་ནོར་བུ་ཡིན་ནོ་སྙམ་པའི་འདུ་ཤེས་རབ་ཏུ་འཇུག་གོ །རྫིང་གི་ཆུ་དེ་ཡང་ནོར་བུའི་འོད་དང་བར་སྣང་ངོ་། །དེ་དག་དེ་ལྟར་སྣང་བའི་ཚུལ་མཐོང་ནས། ཨེ་མ་ཧོ་ནོར་བུའོ་སྙམ་པའི་འདུ་ཤེས་རབ་ཏུ་ཞུགས་སོ། །དེ་ནས་དེ་རྣམས་ལས་ཐབས་མཁས་ཤིང་ཡིད་གཞུངས་པ་གཅིག་གིས་ནོར་བུ་དེ་ཡང་དག་པར་རྙེད་པར་གྱུར་ཏོ། །དགེ་སློང་དག་དེ་བཞིན་དུ་ནོར་བུ་ལྟར་ཆོས་ཀྱི་དེ་ཁོ་ན་ཉིད་མི་ཤེས་པ་ཁྱེད་རྣམས་ཀྱི་ཐམས་ཅད་མི་རྟག་པ་དང་། ཐམས་ཅད་སྡུག་བསྔལ་བ་དང་། ཐམས་ཅད་བདག་མེད་པ་དང་། ཐམས་ཅད་མི་སྡུག་པའོ་ཞེས་འཛིན་པ་ཐམས་ཅད་ཀྱིས་བསྒོམ་ཞིང་བསྒོམ་པའི་བྱ་བ་ལ་མང་དུ་བྱས་ཤིང་། མང་དུ་བྱས་པ་ལ་བློ་ཉེ་བར་བཞག་པ་དེ་དག་ཐམས་ཅད་ནི་དོན་མེད་དོ། །དགེ་སློང་དག་དེའི་ཕྱིར་རྫིང་གི་གསེག་མ་དང་གྱོ་མོ་རྣམ་པར་གནས་པ་ལེན་པ་ལྟར་མི་འགྱུར་བར་ཁྱེད་ཅག་ཐབས་ལ་མཁས་པར་གྱིས་ཤིག ཅེས་དང་། ཡང་དེ་བཞིན་གཤེགས་པའི་གསང་བའི་སྙིང་པོ་སངས་རྒྱས་ཀྱི་རང་བཞིན་ཡོངས་སུ་དག་པ་མི་འགྱུར་མི་འཕོ་བར་སྟོན་ཏོ། །གལ་ཏེ་ཡོད་པར་སྨྲ་ན་མཁས་པ་ཤེས་རབ་ཅན་དག་ཆགས་པར་མི་རིགས། གལ་ཏེ་མེད་པར་སྨྲ་ན་བརྫུན་དུ་སྨྲ་བར་འགྱུར་རོ། །བུས་པ་མ་རབས་ནི་ཆད་པར་སྨྲ་ཞིང་། དེ་བཞིན་གཤེགས་པའི་གསང་བའི་སྙིང་པོ་མི་ཤེས་སོ། །གལ་ཏེ་སྡུག་བསྔལ་བར་སྨྲ་ན་ལུས་ལ་བདེ་བའི་རང་བཞིན་ཡོད་པ་མི་ཤེས་སོ། བུས་པ་གླེན་པ་དག་ལུས་ཐམས་ཅད་མི་རྟག་གོ་སྙམ་སྟེ་རྫ་སོ་མ་བཏང་བ་དང་འདྲ་བར་འཛིན་ཏོ། །དེ་ལ་མཁས་པ་ཤེས་རབ་ཅན་དག་ནི་རྣམ་པར་ཕྱེ་སྟེ་ཐམས་ཅད་ཀྱིས་ཐམས་ཅད་དུ་མི་རྟག་པར་མི་སྨྲའོ། །དེ་ཅིའི་ཕྱིར་ན། བདག་གི་ལུས་འདི་ལ་སངས་རྒྱས་ཀྱི་རང་བཞིན་ཁོ་ན་ཡོད་པའི་ཕྱིར། བུས་པ་གླེན་པ་དག་སངས་རྒྱས་ཀྱི་ཆོས་ཐམས་ཅད་བདག་མེད་དོ་སྙམ་དུ་འཛིན་ཏེ། མཁས་པ་ཤེས་རབ་ཅན་དག་ནི་བདག་མེད་པ་བླ་དྭགས་བཏགས་པར་ཟད་དེ། བདེན་པ་མེད་པས་རྣམ་པར་ཕྱེའོ། །དེ་ལྟར་ཤེས་ནས་ཐེ་ཚོམ་མི་བསྐྱེད་དོ། །ཡང་དེ་བཞིན་གཤེགས་པའི་སྙིང་པོ་སྟོང་པར་སྨྲ་ན། བུས་པ་གླེན་པ་དག་གིས་ཐོས་ནས་ཆད་པའམ་མེད་པར་ལྟ་བ་སྐྱེའོ། །མཁས་པ་ཤེས་རབ་ཅན་དག་ནི་དེ་བཞིན་གཤེགས་པའི་རིགས་མི་འགྱུར་མི་འཕོ་བར་བྱེ་བྲག་དབྱེའོ། །གང་རྣམ་པར་གྲོལ་བ་སྒྱུ་མ་ལྟ་བུར་སྨྲ་ན། བུས་པ་གླེན་པ་དག་རྣམ་པར་གྲོལ་པ་རྣམས་བདུད་ཀྱི་ཆོས་ཡིན་ནོ་སྙམ་དུ་འཛིན་ཏོ། །མཁས་པ་ཤེས་རབ་ཅན་རྣམ་པར་ཕྱེ་སྟེ་མིའི་ནང་ན་སེང་གེ་ལྟ་བུར་དེ་བཞིན་གཤེགས་པ་ཉག་གཅིག་ནི་རྟག་པ་གནས་པ་མི་འགྱུར་མི་འཕོ་བར་བྱེད་དོ། །ཞེས་པ་ནས། ཆོས་ཐམས་ཅད་བདག་མེད་དེ། དེ་བཞིན་གཤེགས་པའི་སྙིང་པོ་ཡང་བདག་མེད་དོ་ཞེས་སྨྲས་ན། བུས་པ་གླེན་པ་དག་གཉིས་སུ་འཛིན་ཏོ། །མཁས་པ་ཤེས་རབ་ཅན་ནི་རང་བཞིན་གྱིས་གཉིས་སུ་མེད་པར་རྟོགས་སོ། །བདག་དང་བདག་མེད་པ་རང་བཞིན་གྱིས་གཉིས་སུ་མེད་དོ། །དེ་བཞིན་གཤེགས་པའི་སྙིང་པོའི་མདོ་འདི་དེ་ལྟར་དཔག་ཏུ་མེད་ཅིང་ཚད་མེད་མཐའ་ཡས་པར་སངས་རྒྱས་བཅོམ་ལྡན་འདས་རྣམས་ཀྱིས་ཡོངས་སུ་བསྔགས་པས། ངས་ཀྱང་ཡོན་ཏན་དང་ལྡན་པའི་མདོ་སྡེ་ཐམས་ཅད་ལས་རྒྱས་པར་གསུངས་སོ། །ཞེས་དང་། གཞན་ཡང་དེ་བཞིན་གཤེགས་པའི་སྙིང་པོའི་མདོ་ལས་སྟོང་གསུམ་དར་ཡུག་གི་དཔེ་སོགས་ཀྱིས་བསྟན་པས་མཚོན་ངེས་དོན་གྱི་མདོ་སྡེ་རྣམས་ནས་རྒྱ་ཆེར་གསུངས་ཤིང་། ཕྱིར་མི་ལྡོག་པའི་འཁོར་ལོའི་མདོ་ལས། བྱང་ཆུབ་སེམས་དཔའ་སྒྲ་དབྱངས་སྙན་པས་གསོལ་པ། སངས་རྒྱས་བཅོམ་ལྡན་འདས་ཀྱིས་ཆོས་བསྟན་པ་མཐུན་ལགས་སམ། རིགས་ཀྱི་བུ་སངས་རྒྱས་བཅོམ་ལྡན་འདས་ཀྱིས་ཆོས་བསྟན་པ་ནི་མཐུན་ནོ། །སངས་རྒྱས་བཅོམ་ལྡན་འདས་ཀྱིས་ཆོས་བསྟན་པ་ཇི་ཙམ་ཞིག་མཐུན། བཀའ་སྩལ་པ། སངས་རྒྱས་བཅོམ་ལྡན་འདས་རྣམས་ཀྱིས་ཆོས་བསྟན་པ་ནི་ཕྱིར་མི་ལྡོག་པའི་འཁོར་ལོར་མཐུན་ནོ། །ཞེས་གསུངས། དེའི་དོན་དངོས་ནི། རྒྱུད་བླ་མར། ཇི་ལྟར་མདོག་ངན་པདྨའི་ཁོང་གནས་པ། །མཚན་སྟོང་གིས་འབར་དེ་བཞིན་གཤེགས་པ་ནི། །དྲི་མེད་ལྷ་ཡི་མིག་ལྡན་མིས་མཐོང་ནས། །ཆུ་སྐྱེས་འདབ་མའི་སྦུབས་ནས་འབྱིན་བྱེད་པ། །དེ་བཞིན་བདེ་གཤེགས་མནར་མེད་གནས་ལ་ཡང་། །སངས་རྒྱས་སྤྱན་གྱིས་རང་ཆོས་ཉེར་གཟིགས་ཏེ། །སྒྲིབ་མེད་ཕྱི་མའི་མུར་གནས་སྙིང་རྗེ་ཡི། །བདག་ཅན་སྒྲིབ་པ་ལས་ནི་གྲོལ་བར་མཛད། །ཅེས་སོགས་དཔེ་དགུས་རྒྱས་པར་གསུངས་པའི་དོན་ཤིང་རྟ་ཆེན་པོ་འཕགས་པ་ཐོགས་མེད་ཀྱིས་རྒྱས་པར་བཀྲལ་བ་དང་། དཔལ་མགོན་འཕགས་པ་ཀླུ་སྒྲུབ་ཀྱིས། ཇི་ལྟར་སྦུན་པས་གཡོགས་གྱུར་པ། །སོ་བ་འབྲས་བུར་མི་འདོད་ལྟར། །དེ་བཞིན་ཉོན་མོངས་ཀྱིས་གཡོགས་པ། །དེ་ནི་སངས་རྒྱས་ཞེས་མི་བཏགས། །ཇི་ལྟ་སྦུན་པ་ལས་གྲོལ་ནས། །འབྲས་བུ་སྣང་བར་འགྱུར་བ་ལྟར། །དེ་བཞིན་ཉོན་མོངས་ལས་གྲོལ་ན། །ཆོས་ཀྱི་སྐུ་ཉིད་རབ་ཏུ་གསལ། །ཆུ་ཤིང་སྙིང་པོ་མེད་དོ་ཞེས། །འཇིག་རྟེན་ན་ནི་དཔེར་བྱེད་ཀྱང་། །དེ་ཡི་འབྲས་བུ་སྙིང་པོ་ཉིད། །མངར་མོ་ཟ་བར་བྱེད་པ་ལྟར། །སྙིང་པོ་མེད་པའི་འཁོར་བ་ལས། །ཉོན་མོངས་གཟེབ་དང་བྲལ་གྱུར་ན། །དེ་ཡི་འབྲས་བུ་སངས་རྒྱས་ཉིད། །ལུས་ཅན་ཀུན་ལ་བདུད་རྩིར་འགྱུར། །ཞེས་སོགས་བསྟོད་ཚོགས་རྣམས་ནས་གསལ་བར་བསྟན་པ་བཞིན་ནོ། །དེའི་ཕྱིར་རང་ལུགས་ཀུན་མཁྱེན་ཆེན་པོའི་བཞེད་པ་ནི། བཀའ་འཁོར་ཕྱི་མ་གཉིས་ཀའི་ངེས་དོན་མཐར་ཐུག་གི་ཟབ་གནད་གཅིག་པར་བློ་གཉིས་སྣང་གི་སྤྱོད་ཡུལ་ལས་འདས་པའི་དྲི་མེད་འཕགས་པའི་ཡེ་ཤེས་ལམ་བདེན་ཟག་མེད་ཉིད་སྒྲ་ཇི་བཞིན་པར་ཞལ་གྱིས་བཞེས་ཏེ། ཤིང་རྟ་ཆེན་པོར། དྲང་དོན་དང་ངེས་དོན་གྱི་རྣམ་པར་བཞག་པ་ནི། ཆོས་ཐམས་ཅད་ཀྱི་ཆོས་ཉིད་དེ་བཞིན་ཉིད་དབྱིངས་རང་བཞིན་གྱིས་དག་པ་སེམས་ཉིད་འོད་གསལ་བའི་དགོངས་པ་ནི་རང་བཞིན་གྱིས་དག་ཅིང་འཕོ་འགྱུར་མེད་པ་སྐྱེ་འགག་གནས་གསུམ་ལས་འདས་པ་ནམ་མཁའི་ངོ་བོ་ནི་ངེས་པའི་དོན་ཡིན་ལ། དེ་སྟོན་པའི་བཀའ་དང་བསྟན་བཅོས་མ་ལུས་པ་ངེས་པའི་དོན་གྱི་ཁོངས་སུ་བསྡུའོ། །ཆོས་ཅན་སྣང་ཚད་ལ་སྐྱེ་བ་དང་། འགག་པ་དང་། འོང་བ་དང་། འགྲོ་བ་དང་། དག་པ་དང་། མ་དག་པ་དང་ཕུང་པོ་དང་། ཁམས་དང་། སྐྱེ་མཆེད་ལ་སོགས་པའི་རིམ་པ་རྣམ་པ་སྣ་ཚོགས་པར་སྣང་བ་རྨི་ལམ་ལྟ་བུ་སྨྲ་བསམ་བརྗོད་པའི་རིམ་པས་གཞལ་ཞིང་སྒྲོ་བཏགས་ནས་བསྟན་པ་ཐམས་ཅད་དྲང་བའི་དོན་ཞེས་བྱའོ། །དེ་སྟོན་པའི་བཀའ་དང་བསྟན་བཅོས་ཐམས་ཅད་ཀུན་རྫོབ་ཀྱི་ནང་དུ་བསྡུའོ། །དཔེར་ན་སེམས་ཉིད་ནམ་མཁའ་ལྟ་བུ་ཞེས་སྨྲ་བརྗོད་དང་བསམ་པས་རློམ་པ་ནི་ཀུན་རྫོབ་ལ། དོན་དམ་པའི་གཤིས་གང་ཡིན་པ་དེ་ནི་ངེས་པའི་དོན་ཏེ་ཡང་དག་པ་བཞིན་ནོ། །ཞེས་བསྟོད་ཚོགས་དང་། ཏིང་རྒྱལ་སོགས་ཀྱི་ལུང་གིས་སྒྲུབ་པར་མཛད་པ་བཞིན་ཤེས་པར་བྱའོ། །འོ་ན་ཁྱི་ཕག་སོགས་སེམས་ཅན་རྣམས་ཀྱི་སེམས་ཀྱི་རྒྱུད་ལ་སྟོབས་བཅུའི་ཡེ་ཤེས་ཡོད་དམ་སྙམ་ན། སྟོབས་བཅུའི་ཡོན་ཏན་དེའི་རྒྱུད་ཀྱི་གཤེགས་སྙིང་ལ་ཡེ་ནས་ཡོད་དེ། ཁམས་རང་གི་ཆོས་ཉིད་ཀྱི་ཡོན་ཏན་ཡིན་པས་ཁམས་ཡོད་ན་ཡོན་ཏན་ཡོད་མོད་ཀྱི་དེ་མངོན་དུ་མི་འགྱུར་ཏེ། རལ་གྲི་ལ་གཅོད་པའི་བྱ་བ་ཡོད་ཀྱང་ཤུབ་ཏུ་ཆུད་པས་གཅོད་པའི་བྱ་བ་མངོན་གྱུར་དུ་མེད་པ་དང་། མེ་ལོང་ལ་གཟུགས་བརྙན་འཆར་རུང་གི་ཡོན་ཏན་ཡོད་ཀྱང་སྒྲོམ་དུ་བཅུག་པ་ལ་མངོན་དུ་མི་འཆར་བ་དང་འདྲ་སྟེ། རང་རྒྱུད་ལྡན་གྱི་གང་ཟག་དེའི་རྒྱུད་ལ་ཡོད་པའི་སྒྲིབ་པས་ཁམས་ཀྱི་ཡོན་ཏན་མངོན་དུ་མི་སྣང་ཏེ། དེར་མ་ཟད་དེའི་རང་སེམས་ཀྱི་ཆོས་ཉིད་རྣམ་ཀུན་མཆོག་ལྡན་གྱི་སྟོང་ཉིད་ཡོད་ཀྱང་མངོན་དུ་མི་འགྱུར་ན་ཡོན་ཏན་ཅི་ལ་མངོན། དེའི་ཕྱིར་མངོན་གྱུར་དུ་མེད་པ་འདི་ལ་བསམ་ནས། སྟོབས་བཅུ་སྐྱེ་རུང་གི་རྒྱུ་ཙམ་ཡོད་ཀྱི་དངོས་སུ་མེད་ཟེར་བ་ཡོད་པའང་དཔྱད་ཚུལ་དེའི་དབང་དུ་དེ་ལྟར་རུང་མོད། སྐྱེ་རུང་གི་རྒྱུ་དེ་འདུས་བྱས་ཀྱི་སེམས་སྐད་ཅིག་མའི་ཕྲེང་བ་འདི་ཡིན་ན་སེམས་ཡིན་ཚད་སྟོབས་བཅུ་སྐྱེ་རུང་དུ་སྒྲུབ་དཀའ་ལ། སྒྲིབ་གཉིས་བག་ཆགས་སྦྱངས་སྟོབས་ཀྱིས་སེམས་ཉིད་རང་གིས་བྱེད་པ་ཡིན་ན། འདི་འདུས་མ་བྱས་ཀྱི་དབྱིངས་ཀྱི་ཡོན་ཏན་ཡིན་པས་སྨིན་པའི་རྒྱུར་མི་རུང་ངོ་། །འདི་ལྟ་བུའི་ཁམས་དེ་སྔགས་ཀྱི་སྐབས་སུ་གཉུག་སེམས་གསུངས་པ་དེ་ཡིན་ཏེ། གླང་ཆེན་རབ་འབོག་གི་རྒྱུད་ལས། སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། །ཆོས་རྣམས་རྣམ་དག་ཡེ་ནས་འོད་གསལ་ཞིང་། །རྣལ་འབྱོར་ཉིད་དབྱིངས་སྨྲ་བསམ་ལས་འདས་པའི། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །ཅེས་དང་། མཉམ་སྦྱོར་གྱི་འགྲེལ་པ་རོང་ཟོམ་ཆོས་བཟང་གིས་མཛད་པ་ལས། བྱང་ཆུབ་སེམས་ནི་རྡོ་རྗེ་སྟེ། །སངས་རྒྱས་ཀུན་གྱི་བདག་ཉིད་ཡིན། །ཞེས་གསུངས་ཏེ། རང་གི་སེམས་ཉིད་གདོད་ནས་རྣམ་པར་དག་པ་གང་ཡིན་པ་དེ་ནི་དུས་ཐམས་ཅད་དུ་བརྟན་པའི་ཕྱིར་རྡོ་རྗེ་སྟེ། དུས་གསུམ་གྱི་སངས་རྒྱས་ཀུན་གྱི་བདག་ཉིད་ཀྱང་དེ་ཡིན་པས། དེ་བས་ན་དེ་ཉིད་དུ་སྦྱར་ན་དེ་ཉིད་ཡིན་པའི་ཕྱིར་དེ་གྲུབ་པར་འགྱུར་རོ་ཞེས་བྱ་བའི་དོན་ཏོ། །ཡིན་པ་ལ་སྒྲུབ་ཅི་དགོས་ཞེ་ན། འདི་ལྟར་མ་ཤེས་ཤིང་གོམས་པར་མ་གྱུར་པ་རྣམས། ཤེས་ཤིང་གོམས་པ་ཀློང་དུ་གྱུར་པ་ཙམ་ལ་དངོས་གྲུབ་ཐོབ་ཅེས་ཐ་སྙད་དུ་འཇོག་པ་མ་གཏོགས་པར། མ་ཐོབ་པ་ཐོབ་པར་བྱར་མེད་དོ་ཞེས་ཤེས་པར་བྱའོ། །བྱང་ཆུབ་ཀྱི་སེམས་ནི་འགྱུར་བ་མེད་པའི་དེ་བཞིན་ཉིད་དོ། །ཞེས་དང་། རྗེ་གཏེར་ཆེན་བླ་མས། ཀུན་ཁྱབ་འགྱུར་མེད་རྟག་བརྟན་རྡོ་རྗེའི་སེམས། །མཐའ་ཡས་དངོས་པོ་ཀུན་གྱི་ངོ་བོ་ཉིད། །ཅེས་དང་། ཆོས་རྗེ་ཞེ་ཆེན་པ་ངྷརྨ་རཱ་ཛས། འཁོར་འདས་ཆོས་ཀུན་བྱེད་པོ་རང་གི་སེམས། །གཉིས་འཛིན་འཆིང་བའི་འཁྲུལ་སྣང་སྦུབས་རྒྱ་ལས། །ཡེ་གྲོལ་བདེ་གཤེགས་སྙིང་པོ་འདུས་མ་བྱས། །ལྷུན་རྫོགས་དོན་གྱི་སངས་རྒྱས། །ཞེས་གསུངས། འདི་རང་གི་ངོ་བོ་ཡེ་ནས་རྣམ་པར་ཤེས་པའི་ཆོས་ལས་འདས་པ་དང་སྒྲིབ་པ་ཀུན་ལས་ངེས་པར་གྲོལ་བའི་གཉིས་མེད་ཡེ་ཤེས་ཀྱི་མཚན་ཉིད་ཅན་ཡིན་པས་འདི་མངོན་དུ་གྱུར་ན་འོད་གསལ་མངོན་དུ་གྱུར་པ་ཡིན་པས་དབུ་མའི་རིགས་དཔྱད་དང་ཐབས་ལམ་སོགས་མཚན་བཅས་ཀྱི་ལམ་གཞན་གསར་དུ་སྣོན་མི་དགོས་ཏེ་སྦྱོར་རྫོགས་ཀྱི་ཉམས་ལེན་བཞིན་ནོ། །དེའི་ཕྱིར་དབང་རྣོན་ཨིནྡྲ་བོ་ངྷི་ལྟ་བུ་གང་ཟག་ཅིག་ཅར་བ་དབང་དུས་སུ་གྲོལ་བའང་ཡོད་པ་ཡིན་ལ། སོ་སོར་རྟོག་པའི་ཤེས་རབ་ཅེས་པའང་སོ་སོ་རང་རིག་པའི་ཡེ་ཤེས་ཀྱིས་ཡུལ་དང་ཡུལ་ཅན་གཉིས་སུ་མེད་པར་རྟོགས་པར་བྱ་ཡི། རིགས་དཔྱད་མེད་དགག་ཙམ་དང་སེམས་ཙམ་པའི་རྣམ་ཤེས་རང་རིག་རང་གསལ་ཙམ་ནི་མ་ཡིན་ཏེ་དོན་དམ་བློའི་ཡུལ་དུ་བྱར་མེད་པར་གསུངས་པའི་ཕྱིར་རོ། །དེས་ན་གཉུག་སེམས་འོད་གསལ་དེ་ནམ་ཡང་རྒྱུན་ཆད་པ་མེད་ལ། ངོ་བོ་སྟོང་པས་དམིགས་མཚོན་གང་ཡང་མེད་ཀྱང་། སྟོང་རྐྱང་མིན་ཏེ་མཚན་མ་མེད་པའི་རང་འོད་གསལ་བ་ཡིན། སྒྲིབ་པ་མ་ཟད་པའི་སེམས་རྒྱུད་ཀྱི་གཤེགས་སྙིང་ལ་སྟོབས་བཅུའི་ཡེ་ཤེས་མངོན་གྱུར་དུ་མེད་པ་ནི་བདག་ཅག་ཀྱང་འདོད་མོད། བླ་མེད་ཆོས་ཀྱི་ཡོན་ཏན་དབྱིངས་དེ་ལ་མེད་པ་མིན་ཀྱང་། མངོན་དུ་མི་འགྱུར་བ་ནི་སྒྲིབ་པ་ཡོད་པའི་ཕྱིར་ཏེ། ཐོག་མེད་གྱུར་ཀྱང་ཐ་མ་དང་ལྡན་པ། །རང་བཞིན་གྱིས་དག་རྟག་པའི་ཆོས་ཅན་ནི། །ཐོག་མེད་སྦུབས་ཀྱིས་བསྒྲིབས་ཕྱིར་མི་མཐོང་སྟེ། །ཇི་ལྟར་གསེར་གྱི་གཟུགས་ནི་སྒྲིབ་པ་བཞིན། །ཞེས་དང་། བསྟོད་པར། ཇི་ལྟར་རིན་ཆེན་བཻཌཱུཪྱ། །དུས་རྣམས་ཀུན་ཏུ་འོད་གསལ་ཡང་། །རྡོ་ཡི་ནང་དུ་གནས་གྱུར་པ། །དེ་ཡི་འོད་ནི་གསལ་མ་ཡིན། །དེ་བཞིན་ཉོན་མོངས་ཀྱིས་བསྒྲིབས་པའི། །ཆོས་དབྱིངས་ཤིན་ཏུ་དྲི་མེད་པའང་། །འཁོར་བར་འོད་ནི་གསལ་མ་ཡིན། །མྱ་ངན་འདས་ན་འོད་གསལ་འགྱུར། །ཞེས་སོ། །འདིས་ཁྱི་རྒྱ་ལ་མཚན་དཔེ་ཡོད་མེད་སོགས་ཀྱི་ལོག་རྟོག་ཐམས་ཅད་ཀྱང་སེལ་ནུས་ཏེ། དེ་སྒྲིབ་པ་དག་ཟིན་དང་ཡོན་ཏན་མངོན་གྱུར་གྱི་སངས་རྒྱས་དངོས་མ་ཡིན་པའི་ཕྱིར་རོ། །གནས་ཚུལ་དབང་བཙན་དུ་བྱས་ན། ཁམས་རང་གི་ངོ་བོ་ལ་སངས་རྒྱས་ཀྱི་ཡོན་ཏན་དྲུག་ཅུ་རྩ་བཞི་པོ་སོགས་ཡེ་ལྡན་མིན་ན། དེ་འདྲའི་ཁམས་དེ་ཡོད་ཀྱང་སངས་རྒྱས་ཀྱི་རིགས་སུ་མི་འགྲུབ་སྟེ་སྟོང་རྐྱང་བཞིན། དེའི་ཕྱིར་ལུང་སྔ་མའི་འཕྲོར། ཁམས་ཡོད་ན་ནི་ལས་བྱས་པས། །ས་ལེ་སྦྲམ་དག་མཐོང་བར་འགྱུར། །ཁམས་མེད་ན་ནི་ལས་བྱས་ཀྱང་། །ཉོན་མོངས་འབའ་ཞིག་སྐྱེད་པར་བྱེད། །ཅེས་སོ། །འདི་ལ་ཁ་ཅིག་འདི་སྙམ་དུ། སྔོན་རྣལ་འབྱོར་བསྒོམ་པར་འདོད་པ་ཞིག་གིས་སློབ་དཔོན་ལ་ལུང་ནོད་དུ་ཕྱིན་པའི་ཚེ། སློབ་དཔོན་གྱིས་སྒོམ་ནུས་མི་ནུས་སད་པའི་ཕྱིར། ཁྱོད་ཀྱི་མགོ་ལ་མ་ཧེའི་རྭ་གཉིས་སྒོམས་ཤིག་གསུངས་པས། དེས་དེ་བཞིན་ཉན་ཏེ་རང་གནས་སུ་བསྒོམས་པས་ཏིང་ངེ་འཛིན་གྲུབ་སྟེ་ཐོག་མར་ཀུན་བརྟགས་པའི་གཟུགས་ཡིད་ངོར་དངོས་སུ་གསལ་བ་དང་། མཐར་དབང་འབྱོར་པའི་གཟུགས་ཐོགས་རེག་གི་རྣམ་པ་ཅན་དངོས་སུ་བྱུང་བས། གཞན་ལ་སྦྲན་ནས་སྤོང་ཁང་གི་སྒོ་བཤིག་སྟེ་འགྲོ་དགོས་པར་བྱུང་བ་བཞིན་དོན་ལ་མེད་ཀྱང་བསྐྱེད་རིམ་བསྒོམ་པ་སོགས་ཀྱིས་མངོན་དུ་འགྱུར་རུང་བ་དང་། རང་གི་རྟོག་པ་མ་ཡིན་ཡང་གཞན་གྱི་སྨོན་ལམ་གྱིས་ཀྱང་གྲུབ་སྟེ་ཐགས་མཁན་རྒན་པོ་ལ་ཤིང་གི་ལྷ་མོས་དངོས་གྲུབ་བྱིན་པས་ལུས་མདུན་རྒྱབ་གཉིས་ཀར་བྱད་བཞིན་དང་རྐང་ལག་ཡོད་པར་གྱུར་པའི་ལོ་རྒྱུས་བཞིན། ལྷག་པའི་ལྷས་བྱིན་གྱིས་བརླབས་པ་ལས་ཀྱང་དེ་ལྟར་སྣང་དུ་རུང་བ་སོགས་ཀྱི་ཕྱིར། རྟེན་ཅིང་འབྲེལ་འབྱུང་གི་ནུས་པའི་མཐུ་ཙམ་ལས་དོན་ལ་ཡོད་མི་དགོས་སོ་སྙམ་ན། རྟེན་ཅིང་འབྲེལ་འབྱུང་གི་དབང་གིས་དེ་ལྟར་འབྱུང་བ་ནི་མི་འགལ་ཞིང་སྔགས་ཕྱི་རྒྱུད་རྣམས་སུ་ལྷ་བསྐྱེད་ཚུལ་དེ་དང་ཕྱོགས་མཐུན་ལྟ་བུར་གསུངས་པ་ཡོད་ཅིང་། དེར་མ་ཟད་ཀུན་བརྟགས་གོམས་པའི་བསྐྱེད་རིམ་འཇིག་རྟེན་པའི་ལམ་དེ་འདྲ་ཕྱི་ནང་གཉིས་ཀར་ཡོད་དེ། མུ་སྟེགས་ཁ་ཅིག་གིས་ནམ་མཁའ་འདི་དངོས་པོར་བསྒོམས་པས་དབྱུག་པ་སོགས་ཀྱིས་བརྡུང་དུ་རུང་བ་དང་། བསྐྱེད་རིམ་ལ་གོམས་པ་དང་རིགས་སྔགས་ཀྱི་མཐུས་གཟུགས་གཞན་དུ་བསྒྱུར་བ་དང་། དངོས་པོ་སྤྲུལ་བསྒྱུར་བྱེད་པ་སོགས་དང་། དཀའ་བཟློག་མ་སོགས་ཀྱིས་བྱིན་གྱིས་བརླབས་པས་མིག་འཕྲུལ་སོགས་ཐུན་མོང་གི་གྲུབ་པ་ཐོབ་པ་དང་། རླུང་སེམས་ཙམ་གྱི་སྒྱུ་ལུས་དང་གྲོང་འཇུག་བྱེད་པ་སོགས་ཇི་སྙེད་པ་ཡོད་མོད། དེ་ཙམ་ནི་ཐར་པའི་རྒྱུར་འགྲོ་བའང་མ་ཡིན་ལ། སྔགས་ཕྱི་རྒྱུད་རྣམས་སུ་ཞུགས་པས་ཀྱང་རང་ལམ་དེས་འདོད་གཟུགས་ཀྱི་རིག་འཛིན་ཙམ་མངོན་དུ་བྱས་ཏེ། རྟེན་དེར་སྔགས་བླ་མེད་ལ་ཞུགས་ནས་གཟོད་ཕྱག་རྒྱ་ཆེན་པོ་མཆོག་ལ་སྦྱོར་དགོས་པར་གསུངས་པའི་གནད་ཀྱང་དེར་ཐུག་པས། འདིས་སྔགས་བླ་མེད་ནས་གསུངས་པའི་རྫོགས་རིམ་གྱི་ལྷ་སྐུ་དང་སྒྱུ་འོད་སོགས་རྩོལ་མེད་དུ་འཆར་བའི་གནད་ལ་ཅིའང་གནོད་མི་ནུས་ཏེ། འདི་ནི་ཆོས་ཉིད་ཀྱི་རང་གདངས་འབའ་ཞིག་ལས་ཤར་དགོས་པའི་ཕྱིར། དེ་ལྟ་མ་ཡིན་ན། མཐར་ཐུག་རང་བཞིན་རྫོགས་པ་ཆེན་པོའི་གཞི་ཀ་དག་ལྷུན་གྲུབ་ཟུང་འཇུག་ཀྱང་མི་འགྲུབ་ལ། ཀུན་ཏུ་བཟང་པོ་ཡེ་ཐོག་གདོད་མའི་གྲོལ་གཞིར་མངོན་པར་བྱང་ཆུབ་པའི་ཚེ་ནང་གསལ་ཕྲ་བའི་ཡེ་ཤེས་གཏིང་གསལ་འགག་པ་མེད་པ་ལས་ཕྱིར་གསལ་རང་སྣང་ལོངས་སྐུའི་ཞིང་སྐུ་སོགས་ཀྱང་འཆར་མི་སྲིད་པར་འགྱུར་ཏེ། ཀུན་ཏུ་བཟང་པོས་དེའི་སྔོན་དུ་བསྐྱེད་རིམ་ཀུན་བརྟགས་ཀྱི་ལམ་སོགས་གང་ཡང་བསྒོམ་པར་མ་གསུངས་ཤིང་། གཞན་གྱིས་བྱིན་གྱིས་བརླབ་པ་སོགས་ཀྱང་མ་གསུངས་པའི་ཕྱིར། དེ་བཞིན་སེམས་ཅན་རྣམས་འཆི་བའི་ཚེ་འཆི་བའི་འོད་གསལ་དང་ཆོས་ཉིད་བར་དོའི་སྣང་བ་རྣམས་འཆར་བར་གསར་སྙིང་གི་རྒྱུད་སྡེར་གསུངས་ན། དེ་ནི་དེ་དག་གིས་སྔར་གོམས་པའི་སྟོབས་ཀྱིས་ནི་མ་ཡིན་ཏེ། གལ་ཏེ་ཡིན་ན་ལམ་མ་བསྒོམ་པའི་སེམས་ཅན་མི་སྲིད་པར་འགྱུར་ལ། ཡི་དམ་གྱི་ལྷའི་བྱིན་བརླབས་ལས་ཤར་བ་ཡང་མིན་ཏེ། ཡིན་ན་དེ་དག་དེའི་ཚེ་ཅིས་མི་གྲོལ། དེས་ན་སྔགས་བླ་མེད་ཐུན་མོང་བ་ཕྲ་ཐིག་སོགས་དང་། ཐུན་མིན་སྦྱོར་རྫོགས་ཀྱི་ཉམས་ལེན་སྐབས་ཀ་དག་སྟོང་ཆེན་འོད་གསལ་གྱི་དོན་ལ་མཉམ་པར་བཞག་པས་མཁའ་སྣང་དུ་བ་མེ་ཁྱེར་སོགས་དང་འཇའ་ཐིག་ལྷ་སྐུ་སོགས་རྩོལ་མེད་དུ་འཆར་བ་འདི་ཐམས་ཅད་ཆོས་ཉིད་ཀྱི་རྩལ་འབའ་ཞིག་ལས་ཤར་བ་ཡིན་པ་ལ་བརྙོན་དུ་མེད་ལ། དེ་ལྟ་ན་ཆོས་ཉིད་དེ་སྟོང་རྐྱང་མིན་པར་སྐུ་དང་ཡེ་ཤེས་ཀྱི་སྣང་བ་དང་ཡེ་ནས་འདུ་འབྲལ་མེད་པ་འདི་ཆོས་ཉིད་ཀྱི་རིགས་པས་གྲུབ་པ་ཡིན་པས་སུས་ཀྱང་གཞིག་པར་མི་ནུས་སོ། །དེའི་ཕྱིར་ཀུན་གཟིགས་རོང་པས་རང་བྱུང་ཡེ་ཤེས་ཆེན་པོར་གསང་སྔགས་ཀྱི་ཚུལ་ལས་སྣང་བ་ཐམས་ཅད་རང་བྱུང་གི་ཡེ་ཤེས་རང་སྣང་བའི་དཀྱིལ་འཁོར་དུ་འདོད་པ་འདི་ལ། རང་གི་གྲུབ་མཐའ་འཛིན་པ་ལ་ལ་དག འདི་དག་ནི་གཉེན་པོའི་དོན་དུ་གསུངས་པ་ཡིན་ཏེ། མཚན་ཉིད་པ་མ་ཡིན་ནོ་ཞེའམ། ཀུན་བརྟགས་པ་དང་དབང་འབྱོར་པའི་གཟུགས་ཡིན་ཏེ་མཚན་ཉིད་པ་མ་ཡིན་ནོ་ཞེའམ། ལུང་དེའང་དགོངས་པའི་དབང་གིས་གསུངས་པ་ཡིན་ཏེ། གཟུགས་བོར་གསུངས་པ་མ་ཡིན་ནོ་ཞེས་དེ་སྐད་མ་ཟེར་ཅིག་ཅེས་དང་། གསང་སྔགས་ཀྱི་ཚུལ་ལས་ཇི་སྐད་གསུངས་པ་འདི་དག་ནི། མཚན་ཉིད་པར་གྲུབ་པ་ཡིན་ཏེ་ཡོངས་སུ་བརྟགས་པ་མ་ཡིན་ནོ། །དེའི་དབང་གིས་བཀའ་འདི་ཡང་གཟུགས་བོར་གསུངས་པ་ཉིད་ཡིན་ཏེ། དགོངས་པའི་ཚིག་མ་ཡིན་ནོ། །ཞེས་སོགས་དང་། ཐེག་ཆེན་ཚུལ་འཇུག་ལས། ཐིག་ལེ་ཆེན་པོ་དྲུག་བཤད་པའི་སྐབས་སུ། ཆོས་ཉིད་ནི་འགྱུར་བ་མེད་པ། ཐིག་ལེ་ནི་སྤྲོས་པ་དང་བྲལ་བའི་དོན་ཏེ། སྣ་ཚོགས་པའི་ཆོས་ཀྱིས་རང་གི་རང་བཞིན་གཞན་དུ་འགྱུར་བའང་མེད་ལ་མཚན་མའི་སྤྲོས་པས་ཟིན་པའང་མེད། མཚན་མ་བསལ་ཞིང་དོར་བ་ཡང་མ་ཡིན་ཏེ། མཚན་མ་ཉིད་ཀྱི་ངོ་བོ་ཉིད་དེ་ལྟ་བུ་ཡིན་པས་ཆོས་ཉིད་ཀྱི་ཐིག་ལེ་ཞེས་བྱའོ། །དེ་ཉིད་སངས་རྒྱས་ཀྱི་ཆོས་ཐམས་ཅད་ཀྱི་འབྱུང་གནས་སུ་གྱུར་པས་དབྱིངས་ཀྱི་ཐིག་ལེའོ། །དེ་བཞིན་དུ་དྲི་མ་ཐམས་ཅད་གདོད་ནས་དག་པས་དབྱིངས་རྣམ་པར་དག་པའི་ཐིག་ལེ། རང་བཞིན་གྱིས་འོད་གསལ་ཏེ་རང་བྱུང་གི་ཡེ་ཤེས་རང་ཤར་བས་ཡེ་ཤེས་ཆེན་པོའི་ཐིག་ལེ། དེ་ལས་ཀུན་ཏུ་བཟང་པོའི་རོལ་པའི་རྒྱན་མི་འགོག་པས་ཀུན་ཏུ་བཟང་པོའི་ཐིག་ལེ། དེ་ལྟ་བུའི་དོན་དེ་ཡང་ད་གཟོད་བགྲོད་ཅིང་སྦྱང་བ་ལ་མི་ལྟོས་ཏེ་ཡེ་ནས་ལྷུན་གྱིས་གྲུབ་པས། ལྷུན་གྱིས་གནས་པའི་ཐིག་ལེའོ། །དེ་ལ་དང་པོ་གཉིས་ནི་སེམས་ཅན་གྱི་འཁྲུལ་པས་མ་བསླད་པའོ། །བར་མ་གསུམ་ནི་གཉེན་པོའི་ཐབས་ཀྱིས་མ་བཅོས་པའོ། །ཐ་མ་ནི་རྩོལ་བ་ལས་འདས་པར་ལ་བཟླ་བའོ། །འདི་དག་གིས་ཀྱང་བྱང་ཆུབ་སེམས་ཀྱི་རང་བཞིན་དང་། ཆེ་བ་དང་། གོལ་ས་བ ཅད་པ་རྣམས་བསྟན་པ་ཡིན་ལ། བྱང་ཆུབ་སེམས་ཀྱི་བཞག་ཐབས་ཀྱང་རྩོལ་བ་དང་བྲལ་བར་ལ་བཟླ་བ་དང་གདེང་ཆོད་པ་ཉིད་ཡིན་ནོ། །ཞེས་གསུངས་པ་བཞིན་ནོ། །དེའི་ཕྱིར་གཞུང་ཁ་ཅིག་ཏུ་འཁོར་ལོ་བར་བ་ནས་གསུངས་པའི་ཆོས་དབྱིངས་སྟོང་ཉིད་ལ་སྙིང་པོའི་རང་བཞིན་གསུངས་ཀྱི་ཟག་མེད་ཀྱི་ཡོན་ཏན་རྣམས་དྲང་བའི་དོན་ཙམ་ལས་དོན་ལ་མེད་ཅེས་གསུངས་པའང་ཡོད་མོད། དེ་ནི་མདོ་ཕྱོགས་ཀྱི་གཞུང་ཁ་ཅིག་འཆད་པའི་ཚེ་བཤད་དུ་རུང་ཙམ་ཡིན་ཡང་། འབྲས་བུ་གསང་སྔགས་ཀྱི་ཐེག་པ་དང་མཚམས་སྦྱོར་བའི་སྐབས་འདིར་ནི་དེ་ལྟར་སྦྱར་ནས་བཤད་མི་རུང་སྟེ། སྔགས་ཀྱི་སྒྱུ་འོད་སོགས་ཐབས་ཟབ་མོ་ལ་བརྟེན་ནས་ཡེ་ཤེས་འཆར་བའི་གནད་རྣམས་སྲོག་དང་བྲལ་བར་བྱས་པའི་ཕྱིར་རོ། །དེས་ན་ཆོས་དབྱིངས་འོད་གསལ་ལམ། རང་བྱུང་ཡེ་ཤེས་སམ། གཉུག་སེམས་འོད་གསལ་ལམ། བདེ་གཤེགས་སྙིང་པོ་ཞེས་པ་རྣམས་དོན་གཅིག་པས་འདི་སངས་རྒྱས་ཀྱི་རིགས་མཚན་ཉིད་པ་ཡིན། དེ་ཡང་སྒྲིབ་བཅས་ཀྱི་རྒྱུད་ལ་ཡོད་ཚེ་འཚང་རྒྱ་རུང་གི་རིགས་དང་། སངས་རྒྱས་ཚེ་མངོན་གྱུར་ཡིན་ཡང་། རང་གི་ངོ་བོ་འདུས་མ་བྱས་པའི་ཆོས་ཉིད་ཡིན་པས་སྔ་ཕྱི་སོགས་ཀྱི་ཁྱད་པར་གནས་ཚུལ་ལ་མེད་དེ་ངོ་བོ་འགྱུར་མེད་ཡིན་པས་སོ། །སྣང་ཚུལ་གྱི་དབང་དུ་བྱས་ན་གློ་བུར་གྱི་དྲི་མ་ཡོད་མེད་ཀྱིས་གནས་སྐབས་གསུམ་དུ་འགྱུར་ཏེ། རྒྱུད་བླ་མ་ལས། མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང་། །དེ་བཞིན་གཤེགས་པ་ཞེས་བརྗོད་དོ། །ཞེས་དང་། བསྟོད་པར། ཇི་ལྟར་སོ་གའི་དུས་སུ་ཆུ། །དྲོའོ་ཞེས་ནི་བརྗོད་པར་བྱེད། །དེ་ཉིད་གྲང་བའི་དུས་སུ་ནི། །གྲང་ངོ་ཞེས་ནི་བརྗོད་པ་ཡིན། །ཉོན་མོངས་དྲྭ་བས་གཡོགས་པ་ལ། །སེམས་ཅན་ཞེས་ནི་བརྗོད་པ་སྟེ། །དེ་ཉིད་ཉོན་མོངས་བྲལ་གྱུར་ན། །སངས་རྒྱས་ཞེས་ནི་བརྗོད་པར་བྱེད། །ཅེས་གསུངས། རྒྱུ་མཚན་དེའི་ཕྱིར་ངེས་དོན་བཀའ་འཁོར་ཕྱི་མ་འདི་ཉིད་གསུངས་པའི་རྗེས་ཐོབ་དེ་མ་ཐག་པར་འབྲས་བུ་གསང་སྔགས་རྡོ་རྗེ་ཐེག་པའང་འབྱུང་མ་རག་པའི་ཕྱིར། ཇི་ལྟར་མེ་ཡི་སྔོན་དུ་དྲོད་འབྱུང་བ་ལྟར། ཆོས་དབྱིངས་འོད་གསལ་བསམ་མི་ཁྱབ་པའི་གནས་ལུགས་ཇི་ལྟ་བ་བཞིན་བསྟན་ཏེ། དེ་ཡང་བྲལ་གཞི། བྲལ་རྒྱུ། བྲལ་འབྲས་ཙམ་ལས་ཆོས་ཉིད་རང་གི་ངོ་བོ་དབང་བཙན་དུ་བྱས་ན་བསྐྱེད་བྱ་སྐྱེད་བྱེད་ཀྱི་རྒྱུ་འབྲས་མཚན་ཉིད་པ་མིན་པར་བསྟན་པས། འབྲས་བུ་གསང་སྔགས་རྡོ་རྗེ་ཐེག་པ་དང་ཡང་ལམ་གྱི་མཚམས་སྦྱོར་བླ་ན་མེད་པ་སྟེ། གོང་བཤད་བྲལ་གཞི་སོགས་གསུམ་པོ་དང་། རྡོ་རྗེ་ཐེག་པའི་ལུགས་ཀྱི་རྒྱུད་གསུམ་ཐབས་ཤེས་ཀྱིས་ཁྱད་པར་དུ་ཕྱེ་བ་ཙམ་ལས་ངོ་བོ་གཞི་འབྲས་དབྱེར་མེད་ཆེན་པོར་གནད་གཅིག་པས་ན། སྔོན་གྱི་གསར་རྙིང་གི་མཁས་གྲུབ་དམ་པ་རྣམས་ཀྱིས་མདོ་སྔགས་ཕྱི་ནང་སྦྱར་ཏེ་བཤད་པ་མཛད་པ་ཡིན་ཏེ། ཨོ་རྒྱན་ཆེན་པོས། གདོད་ནས་དག་པའི་རིག་པ་ནི། །ཡེ་ནས་ཆོས་སྐུར་གནས་པ་ལ། །དབུལ་པོའི་ཁྱིམ་གྱི་ས་འོག་ན། །གནས་པའི་ནོར་བུ་རིན་ཆེན་བཞིན། །ངོ་མ་ཤེས་པས་འཁོར་བར་འཁྲུལ། །ངོ་སྤྲོད་དེ་ངོ་ཤེས་པ་ནི། །ཆོས་དབྱིངས་ཡེ་ཤེས་རྟོགས་པ་སྟེ། །སངས་རྒྱས་ཞེས་སུ་གྲགས་པའོ། །ཞེས་དང་། ས་ཆེན་གྲགས་རྒྱལ་གྱིས་ལམ་འབྲས་ཚིགས་བཅད་མར། རང་སེམས་གདོད་ནས་སྤྲོས་བྲལ་རྒྱུ་རྒྱུད་དང་། །དབང་གི་ཡེ་ཤེས་ལམ་གྱི་ལྟ་བ་དང་། །ཉམས་མྱོང་སངས་རྒྱས་ས་ལ་ཁྱད་པར་མེད། །རྟོགས་པའི་ཁྱད་པར་ཟླ་བའི་དཔེ་ཡིས་བསྟན། །ཞེས་དང་། ལྟ་བ་འཁོར་འདས་དབྱེར་མེད་ལས། །རང་བཞིན་རྒྱུ་ལ་བསམ་ན་ལྷུན་གྲུབ་སྟེ། །མཐའ་ཡས་ཡོན་ཏན་ཚོགས་ནི་གནས་གྱུར་ཡིན། །དེས་ན་ལྷུན་གྲུབ་གནས་གྱུར་མི་འགལ་བ། །འདི་ནི་འབྲས་བུའི་འཁོར་འདས་དབྱེར་མེད་ཡིན། །ཞེས་དང་། ལམ་འབྲས་གཞུང་རྡོ་རྗེའི་ཚིག་རྐང་གི་འགྲེལ་པར། ཀུན་གཞི་ཞེས་པ་ནི་ཐབས་ཀྱིས་ཟིན་པ་དང་མ་ཟིན་པའི་བྱེ་བྲག་གིས་འཁོར་འདས་གཉིས་ཀའི་གཞིར་གྱུར་པའོ། །རྒྱུ་ནི་འབྲས་བུ་སྐྱེ་རུང་གི་ནུས་པའི་མཐུ་ལ་བྱ། རྒྱུད་ནི་སེམས་ཅན་ནས་རྡོ་རྗེ་འཛིན་པའི་བར་དུ་སེམས་ཉིད་རིག་པ་རྒྱུན་མི་འཆད་པའོ། །འཁོར་འདས་ཚང་བ་ནི། འཁོར་བའི་ཆོས་ཐམས་ཅད་མཚན་ཉིད་ཀྱི་ཚུལ་དུ་ཚང་། མྱ་ངན་ལས་འདས་པའི་ལམ་ཐམས་ཅད་ཡོན་ཏན་གྱི་ཚུལ་དུ་ཚང་། འབྲས་བུའི་ཆོས་ཐམས་ཅད་ནུས་མཐུའི་ཚུལ་དུ་ཚང་ངོ་། །འདི་ཉིད་ལ་རྩ་རྒྱུད་ཅེས་བྱ་སྟེ། ལུས་ལ་རྟེན་འབྲེལ་བསྒྲིགས་པས་རྟོགས་པར་བྱ་རྒྱུ་སེམས་ཀུན་གཞི་ཡིན་པས་སོ། །ཞེས་ཀུན་གཞི་རྩ་བའི་རྒྱུད། ལུས་ཐབས་ཀྱི་རྒྱུད། ཕྱག་རྒྱ་ཆེན་པོ་འབྲས་བུའི་རྒྱུད་དེ་རྒྱུད་གསུམ་དུ་རྣམ་པར་བཞག་སྟེ་གསུངས་པ་དང་། རྒྱལ་དབང་རང་བྱུང་ཞབས་ཀྱི་ཟབ་མོ་ནང་དོན་རང་འགྲེལ་དུ། དྲི་མེད་རྒྱལ་བའི་སྙིང་པོ་ནི། །མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་ལམ་ལ་གནས་པ་དང་། །དེ་བཞིན་གཤེགས་རྣམས་རིམ་པ་བཞིན། །གསུངས་ཕྱིར་དེ་དོན་རྟོགས་པར་བྱ། །ཞེས་བྱ་བ་སྨོས་ཏེ་འདི་མཆོག་ཏུ་རྟོགས་པར་དཀའ་བའི་རྡོ་རྗེ་ཐེག་པའི་བརྗོད་བྱ་སྟེ་བསམ་གྱིས་མི་ཁྱབ་པའི་གནས་བཞིས་འཁྱུད་པའི་སངས་རྒྱས་ཀྱི་བྱང་ཆུབ་ལ་བརྟེན་པ་ཡིན་ནོ། །དེ་ལ་རྡོ་རྗེ་ནི་འགྱུར་བ་མེད་པ་སངས་རྒྱས་ཡིན་ལ། དེའི་ལམ་དུ་འགྲོ་བ་ནི་ཐེག་པ་སྟེ་རྒྱལ་བའི་སྲས་རྣམས་དེར་ཕྱིན་པར་བྱེད་པའམ། ཡང་ན་མི་ཤིགས་པའི་སངས་རྒྱས་ཀྱི་སྙིང་པོ་ནི་འཁོར་འདས་ཐམས་ཅད་དེ་ལས་མི་གཡོ་བའི་གཞི་ཡིན་པས་རྡོ་རྗེ་ཐེག་པའོ། །གནས་འདི་ལ་དྲི་མ་ཐམས་ཅད་ཀྱིས་གོས་པ་མེད་པས་དྲི་མ་མེད་པའོ། །དེ་ཉིད་སངས་རྒྱས་ཐམས་ཅད་ཀྱི་ངོ་བོ་ཡིན་པས་སངས་རྒྱས་ཀྱི་སྙིང་པོ་ཞེས་བྱའོ། །འདི་ལ་གནས་སྐབས་གསུམ་དུ་འགྱུར་ཏེ་མ་དག་པ་དང་བཅས་པ་སེམས་ཅན་གྱི་གནས་སྐབས་དང་། མ་དག་པ་དང་དག་པ་གཉིས་ལྡན་པས་བྱང་ཆུབ་སེམས་དཔའ་ལམ་པའི་གནས་སྐབས་དང་། ཤིན་ཏུ་རྣམ་པར་དག་པ་དེ་བཞིན་གཤེགས་པའི་གནས་སྐབས་ཏེ། དེ་ལྟར་རྣམ་པ་གསུམ་པོ་འདི་ལ་མིང་གི་ཐ་སྙད་ཀྱི་རྣམ་གྲངས་གཞི་དང་ལམ་དང་འབྲས་བུ་དང་། གཞི་རྒྱུད་དང་། ཐབས་རྒྱུད་དང་། འབྲས་བུའི་རྒྱུད་གསུམ་དང་། གཞི་དངོས་པོའི་གནས་ལུགས་དང་། ལམ་གྱི་རིམ་པ་དང་། འབྲས་བུ་སྐྱེ་བའི་རིམ་པ་ཞེས་བྱ་བ་ལ་སོགས་པ་སྔོན་གྱི་མཁས་གྲུབ་རྣམས་ཀྱིས་གསུངས་སོ། །ཞེས་སོགས་གནས་བཞི་དམ་པའི་ཡུལ་དུ་གྱུར་པ་ཕལ་གྱིས་བསམ་གྱིས་མི་ཁྱབ་པའི་ཚུལ་ནོར་བུའི་དཔེ་དང་བཅས་ཏེ་རྒྱས་པར་གསུངས་པ་དང་། ཀུན་མཁྱེན་ཆོས་རྗེས་ངེས་དོན་ཤིང་རྟ་ཆེན་མོར། འདིར་བཀའ་ཐ་མ་ལས་ཁམས་རང་བཞིན་གྱིས་དག་པ་ཡོན་ཏན་ཡེ་ལྡན་དུ་ཡོད་ལ། ལམ་ཉམས་སུ་བླང་དུས་ཡོན་ཏན་སྐྱེ་བ་ལྟར་སྣང་བ་ཁས་ལེན་པ་དང་། སྔགས་ལས་རང་བཞིན་གྱི་དཀྱིལ་འཁོར་འགྲོ་བ་ཀུན་ལ་གནས་པར་བསྟན་པ་གཉིས་ཁྱད་མེད་པས་གཞི་གཅིག་ལ། ལམ་ཡང་ཐབས་ཤེས་ཚོགས་གཉིས་སུ་གཅིག་པ་དང་། འབྲས་བུའང་སྐུ་དང་ཡེ་ཤེས་སུ་གཅིག་པས་སྔོན་གྱི་སློབ་དཔོན་ཆེན་པོ་པདྨ་འབྱུང་གནས་ལ་སོགས་པས་ཕྱི་ནང་དུ་བཤད་པ་མཛད་པ་ཡིན་ནོ། །ཞེས་དང་། རྗེ་གཏེར་ཆེན་བླ་མས། གཞི་རྒྱུད་བདེ་གཤེགས་སྙིང་པོའི་ཁམས། །ཐབས་རྒྱུད་ལམ་གྱིས་ཡོངས་སྦྱོོང་ནས། །འབྲས་རྒྱུད་སྐུ་བཞིར་མཚམས་སྦྱར་བའི། །བླ་མ་དེ་ལ་གུས་ཕྱག་འཚལ། །ཞེས་གསུངས། འོན་ཀྱང་འཁོར་ལོ་ཐ་མར་ཆོས་དབྱིངས་སམ་སྙིང་པོའི་རང་བཞིན་ཇི་ལྟ་བར་གཏན་ལ་ཕབ་ནས་བསྟན་ཀྱང་། དེ་མངོན་དུ་བྱེད་པའི་ཐབས་ཐུན་མོང་བ་རྒྱུ་ཚོགས་གཉིས་ལ་གོམས་སྟོབས་ཀྱིས་དུས་རིང་མོ་ཞིག་ནས་མངོན་དུ་བྱེད་པར་བསྟན་གྱི་ད་ལྟ་ནས་མངོན་དུ་བྱེད་པའི་ཐབས་ཐུན་མིན་རྣམས་མ་བསྟན་པས་ཐབས་ལ་རྨོངས་པའི་ཆ་ཡོད་དེ། ཨཱཪྱ་དེ་ཝས་བདག་བྱིན་རླབས་ལས། བསྐལ་པ་བྱེ་བ་མཐའ་ཡས་སུ། །ཐོས་པའི་ཕ་རོལ་སོན་གྱུར་ཀྱང་། །བདག་བྱིན་བརླབ་ལས་ཕྱིར་ཕྱོགས་པས། །དེ་ཡིས་དེ་ཉིད་མཐོང་མི་འགྱུར། །ཞེས་བདག་བྱིན་བརླབ་དང་། དཀྱིལ་འཁོར་འཁོར་ལོའི་རིམ་པ་གཉིས་ཏེ་གསང་ཤེར་གྱི་ལམ་རང་ལུས་ཐབས་ལྡན་དང་། གཞན་ལུས་ཕོ་ཉའི་ལམ་སྟེ་མཚན་བཅས་ཀྱི་རྫོགས་རིམ་ཡིན་ལ། དེའི་རྟེན་དུ་བསྐྱེད་རིམ་དགོས་ཤིང་། དེ་ཐམས་ཅད་ཀྱང་སྨིན་བྱེད་དབང་དང་དམ་ཚིག་ལ་མ་བརྟེན་པར་སྒོམ་དུ་མི་རུང་བས་ན། དོན་ལ་སྨིན་བྱེད་ཀྱི་དབང་དང་། གྲོལ་བྱེད་ཀྱི་ལམ་རིམ་པ་གཉིས་ལ་མ་བརྟེན་པར། དབང་བཞི་པའི་ཡེ་ཤེས་ལྷན་ཅིག་སྐྱེས་པ་ཉིད་རྟོགས་མི་ནུས་པར་གསུངས་སོ། །རྒྱུ་མཚན་དེས་བྱང་སེམས་བློ་ཆེན་བརྩོན་ལྡན་རྣམས་ཀྱང་གྲངས་མེད་གསུམ་གྱི་དུས་ལ་ལྟོས་དགོས་ཤིང་། དེ་ཡང་སངས་རྒྱས་ཁོ་ནའི་སྤྱོད་ཡུལ་ལས་ས་བཅུའི་བྱང་སེམས་ཆེན་པོ་རྣམས་ཀྱིས་ཀྱང་ཁམས་ཀྱི་ཡོན་ཏན་ཡེ་ལྡན་ཡིན་པར་གཟིགས་ཀྱི་མཐའ་དག་མངོན་གྱུར་དུ་ནི་གཟིགས་པ་མིན་པར་གསུངས་ཏེ། རྒྱུད་བླ་མའི་འགྲེལ་པར། སྤྲིན་མཐོང་མཁའ་ལ་ཉི་བཞིན་ཕྱོགས་གཅིག་བློ་གྲོས་ཅན། །བློ་མིག་དག་པའི་འཕགས་རྣམས་ཀྱིས་ཀྱང་ཐམས་ཅད་མཐོང་མ་ལགས། །བཅོམ་ལྡན་འདས་ཁྱོད་ཆོས་སྐུ་རྣམ་དག་བློ་གྲོས་མཐའ་ཡས་པ། །ཤེས་བྱ་མཐའ་མེད་མཁའ་དབྱིངས་ཁྱབ་པ་དེ་དག་གིས་ཀུན་མཐོང་། །ཞེས་སོ། །སྤང་བྱའི་དྲི་མ་ལས་ཉོན་རྣམ་སྨིན་གྱི་ཕྲ་བ་གང་ཟད་ཕན་ཆད་སྤང་བྱ་གཏན་མེད་པ་ནི། མ་རིག་བག་ཆགས་ཀྱི་ས་དང་། ཟག་པ་མེད་པའི་ལས་དང་། ཡིད་ཀྱི་རང་བཞིན་གྱི་ཕུང་པོ་དང་། བསམ་མི་ཁྱབ་འགྱུར་གྱི་འཆི་འཕོ་བ་སྟེ་དེ་བཞི་པོ་ཡིན་ལ། དེ་ཐམས་ཅད་སྤངས་པ་ནི་སངས་རྒྱས་ཀྱི་ས་ཁོ་ན་ཡིན་ཏེ་ཉན་རང་སོགས་ལ་མི་སྲིད་དོ། །དེ་བཞི་པོ་སྤངས་ན་མཐར་ཐུག་གི་ཡོན་ཏན་སྟོབས་སོགས་སངས་རྒྱས་ཀྱི་ཆོས་རྒྱ་མཚོ་ལྟ་བུ་མངོན་དུ་གྱུར་པ་ནི་དབྱིངས་ཀྱི་ཡོན་ཏན་ཉིད་མངོན་དུ་གྱུར་པ་ཡིན་པས། འདི་སངས་རྒྱས་ཀྱི་རིགས་ཁོ་ན་ཡིན་གྱི་ཉན་རང་སོགས་ཀྱི་མ་ཡིན་ཏེ། སངས་རྒྱས་ཀྱི་སའི་ཡོན་ཏན་དང་རྣམ་དབྱེར་མེད་པའི་ཕྱིར་རོ། །གལ་ཏེ་ཉན་རང་སོགས་ཀྱིས་ཀྱང་འདི་ལྟ་བུའི་ཁམས་ཡོད་པར་ཐོས་ཤིང་རྟོགས་ན་ནི་དེ་དག་ཀྱང་རིམ་གྱིས་སངས་རྒྱས་སུ་འགྱུར་ཏེ་མདོ་སྡེ་པད་དཀར་སོགས་ནས་གསུངས་པ་བཞིན་མཐར་ཐུག་ཐེག་གཅིག་ཏུ་སྒྲུབ་པའི་གནད་འདི་ལ་ཐུག་པའི་ཕྱིར་རོ། །མཐར་ཐུག་སངས་རྒྱས་ཀྱི་སར་རིག་པར་ཡེ་ཤེས་ཀྱི་སྟོབས་ལས་སྒྲིབ་གཉིས་བག་ཆགས་བཅས་ཟད་པའི་རྗེས་སུ་ཡེ་ཤེས་ཉིད་འགག་པ་མ་ཡིན་ཏེ། སྣང་བས་མུན་པ་ལོག་ཀྱང་སྣང་བ་མི་ལྡོག་པ་བཞིན་དུ། སྒྲིབ་གཉིས་དང་བྲལ་བའི་ཡེ་ཤེས་ནམ་མཁའ་དང་མཉམ་པའི་གནས་གྱུར་མཐར་ཐུག་སྟེ་ནམ་ཡང་ཟད་མི་ཤེས་སོ། །འོ་ན་རོང་ཟོམ་སོགས་ཀྱིས་ཡེ་ཤེས་མེད་པར་མ་གསུངས་སམ་སྙམ་ན། དེ་ནི་གཞན་བྱུང་གི་ཡེ་ཤེས་སློབ་ལམ་དུ་ཟག་མེད་གསར་ཐོབ་འདུས་བྱས་ཀྱི་ཆ་རྣམས་དེའི་ཚེ་འགགས་ཟིན་པའམ་ཡུལ་ཡུལ་ཅན་ཐ་དད་དུ་འཛིན་པའི་སྤྲོས་པ་ཉེ་བར་ཞི་བའི་ཆ་ཙམ་ལ་དགོངས་ཀྱི་རང་བྱུང་གི་ཡེ་ཤེས་ནི་མེད་པར་མ་གསུངས་ཏེ། ཐེག་ཆེན་ཚུལ་འཇུག་ལས། དེ་བས་ན་སངས་རྒྱས་རང་གི་ངོ་བོ་ནི་ཆོས་ཀྱི་དབྱིངས་རྣམ་པར་དག་པ་ཉིད་ཡིན་པར་ལུང་དང་རིགས་པ་གཉིས་ཀས་མངོན་ནོ། །དེ་ལྟ་ན་སེམས་ཅན་དང་སངས་རྒྱས་ཀྱི་རང་བཞིན་མཉམ་སྟེ། ཆོས་ཐམས་ཅད་ནི་ངོ་བོ་ཉིད་ཀྱིས་སྟོང་པའོ། །ཆོས་ཐམས་ཅད་ནི་རང་བཞིན་གྱིས་མྱ་ངན་ལས་འདས་པའོ། །ཆོས་ཐམས་ཅད་ནི་རང་བཞིན་གྱིས་འོད་གསལ་བའོ། །ཆོས་ཐམས་ཅད་ནི་ཡེ་ནས་མངོན་པར་རྫོགས་པར་སངས་རྒྱས་པའོ། །གང་གིས་དོན་འདི་ལྟ་བུ་རྟོགས་ཏེ། བདག་དང་སངས་རྒྱས་དབྱེར་མེད་པའི་བློ་དང་ལྡན་ཞིང་ཕུང་པོ་ལྔ་སྒྱུ་མ་ཙམ་དུ་སྣང་བའང་དེ་བཞིན་གཤེགས་པ་ཉིད་ཡིན་པའི་བློ་དང་ལྡན་ན། ལམ་གྱི་མཆོག་ཡིན་ཏེ། གང་གིས་ཁྱད་པར་ཡོད་པར་མཐོང་བ་ནི་ལམ་གྱི་མཆོག་མ་ཡིན་ནོ། །ཞེས་སོགས་དང་། དེ་ཡང་འདི་ལྟར་མངོན་དུ་སངས་རྒྱས་པ་དེ་མཚན་ཉིད་ཇི་ལྟར་སངས་རྒྱས་ཞེ་ན། ཐམས་ཅད་སྙིང་པོ་བྱང་ཆུབ་ཀྱི་རང་བཞིན་གཞན་ལ་ལྟོས་པ་མེད་པར་རང་བྱུང་གི་ཡེ་ཤེས་རང་ཤར་བ་ཡིན་ལ། ཡེ་ཤེས་དེ་ཉིད་ཀྱང་མཚན་མ་ཐམས་ཅད་ལས་འདས་པ་སྟེ། བསྙད་པ་ཐམས་ཅད་དང་བྲལ་བའི་མཚན་ཉིད་དོ། །དེ་ཅིའི་ཕྱིར་ཞེ་ན། དེའི་རང་བཞིན་དེ་ཡིན་པའི་ཕྱིར་རོ། །ཞེས་དང་། གདེང་ཆེན་པོ་གསུམ་ནི། མ་བྱས། མ་བཅོས། ལྷུན་གྱིས་གྲུབ་པའོ། །དེ་ལ་མ་བྱས་པ་ནི་སེམས་ཅན་འཁྲུལ་པས་ཇི་ལྟར་བསླད་ཀྱང་། སེམས་ཀྱི་རང་བཞིན་འགྱུར་བ་མེད་པའོ། །མ་བཅོས་པ་ནི། རྒྱལ་བ་རྣམས་ཀྱི་ཐབས་ཀྱིས་ཇི་ལྟར་བཅོས་ཀྱང་། བྱང་ཆུབ་སེམས་ཀྱི་ཡོན་ཏན་བོགས་དབྱུང་དུ་མེད་པའོ། །ལྷུན་གྱིས་གྲུབ་པ་ནི་དེ་ལྟ་བས་ན་བགྲོད་ཅིང་སྦྱང་བ་ལས་འདས་པའོ། །འདིས་རྫོགས་པ་ཆེན་པོའི་དོན་མཐའ་དག་བསྡུས་སོ། །ཞེས་དང་། མན་ངག་རྩ་བ་གསུམ་ནི། ལུང་ལ་མ་བརྟེན་པའི་མན་ངག རྒྱུ་ལས་མ་བྱུང་བའི་འབྲས་བུ། སེམས་ལས་མ་བྱུང་བའི་ཆོས་སོ། །དེ་ལ་བྱང་ཆུབ་ཀྱི་སེམས་ནི་ཆོས་ཐམས་ཅད་ཀྱི་སྙིང་པོ་ཡིན་པས། བློ་ལ་བཅང་བའི་མན་ངག་དམ་པ་ཡིན་ཡང་། ལུང་གི་སྒྲ་ལ་བརྟེན་པའང་མ་ཡིན་ནོ། །བྱང་ཆུབ་ཀྱི་སེམས་ནི་རང་བཞིན་གྱིས་འོད་གསལ་བ་ཡིན་ཡང་། སེམས་ལས་བྱུང་བའི་ཆོས་ཤེས་རབ་དང་ཏིང་ངེ་འཛིན་དང་སྙིང་རྗེས་བསྡུས་པའང་མ་ཡིན་ནོ། །བྱང་ཆུབ་སེམས་ནི་མངོན་པར་རྫོགས་པར་སངས་རྒྱས་པ་ཡིན་ཡང་། བསོད་ནམས་དང་ཡེ་ཤེས་ཀྱི་ཚོགས་ཀྱི་རྒྱུ་ལས་བསྒྲུབ་པའང་མ་ཡིན་ནོ། །ཞེས་གསུངས་ཏེ། བྱང་ཆུབ་ཀྱི་སེམས་དང་རང་བྱུང་གི་ཡེ་ཤེས་དོན་གཅིག ཁྱད་པར་དཀོན་ཅོག་འགྲེལ་ལས། སེམས་ཡེ་ཤེས་སུ་བསྐྱེད་པའི་སྐབས་ལྔ་ཀའང་གནས་གྱུར་པ་མེད་པའི་བྲལ་འབྲས་རང་བྱུང་གི་ཡེ་ཤེས་འབའ་ཞིག་ཏུ་གསུངས་པ་དང་། དམ་ཚིག་མདོ་རྒྱས་ལས་ཀྱང་། ཡེ་ཤེས་ཀྱི་དམ་ཚིག་སྐབས་སུ། ས་ཆུ་མེ་རླུང་སྣོད་བཅུད་བཅས། །ཀུན་ཀྱང་རང་བཞིན་ཆོས་ཉིད་དོན། །ཆོས་ཉིད་དོན་ལས་གཞན་མེད་པས། །རང་བྱུང་ཡེ་ཤེས་གསལ་བའོ། །ཞེས་གསུངས་ཏེ། སྒྲིབ་པ་གདོད་ནས་དག་པས་རང་བྱུང་གི་ཡེ་ཤེས་སུ་འོད་གསལ་བ་སྟེ། འདི་ལྟ་བུ་ནི་ངེས་དོན་གྱི་མདོ་སྡེ་ལས་ཀྱང་གསུངས་ཏེ། དྲི་མ་མེད་པར་གྲགས་པས་བསྟན་པའི་མདོ་ལས། གསོག་དང་། གསོབ་དང་། སྙིང་པོ་མེད་པ་ཡིན་ཡང་། བསོད་ནམས་གསོག་མ་ཡིན་པ་དང་། ཡེ་ཤེས་གསོབ་མ་ཡིན་པ་དང་། རང་བྱུང་གི་ཡེ་ཤེས་སུ་དབང་བསྐུར་བའི་སྙིང་པོ་མེད་པ་མ་ཡིན་པར་གསུངས་པ་དང་། གཞན་ཡང་སྡོང་པོ་བཀོད་པ་སོགས་མདོ་དུ་མ་ནས། ནམ་མཁའ་བཞིན་དུ་རང་བྱུང་གི་ཡེ་ཤེས་འཕོ་འགྱུར་མེད་པ་དང་། སོ་སོའི་སྐྱེ་བོའི་ཤེས་པའང་རང་བཞིན་གྱིས་རྣམ་པར་བྱང་བ་ཅན་དང་། དེ་བཞིན་གཤེགས་པའི་སྙིང་པོ་ཅན་དང་། ཟག་པ་མེད་པའི་སེམས་ཅན་ནོ་ཞེས་བྱ་བ་ལ་སོགས་པ་གསུངས་མོད་ཀྱི། དེ་དག་ཏུ་ནི་མཚན་མའི་ཆོས་ཀྱང་ཤས་ཆེར་འདོད་ལ། འདིར་སངས་མ་རྒྱས་པའི་ཆོས་རྡུལ་ཙམ་ཡང་མི་འདོད་དོ། །ཞེས་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་རང་བྱུང་གི་ཡེ་ཤེས་ཉག་གཅིག་ཏུ་བསྟན་པས་ཤེས་སོ། །དེས་ན་མདོ་ལས། དེ་བཞིན་གཤེགས་པ་ཆོས་ཀྱི་སྐུ། །ཡེ་ཤེས་ནམ་མཁའ་ལྟ་བུ་སྟེ། །དེ་བཞིན་གཤེགས་པ་ཡེ་ཤེས་སྐུ། །གཟུང་དུ་མེད་ཅིང་རེག་ཏུ་མེད། །ཅེས་དང་། ཇི་ལྟར་ནམ་མཁའ་མུ་མེད་ཅིང་། །ཚད་ཡོད་མ་ཡིན་མཐའ་ཡས་ལྟར། །དེ་བཞིན་ཡེ་ཤེས་ཆེན་པོ་ཡི། །མཐའ་ནི་དམིགས་པར་མི་འགྱུར་རོ། །ཞེས་དང་། འཇུག་པར། སེམས་འགག་པ་སྟེ་སྐུ་ཡིས་མངོན་སུམ་མཛད། །ཞེས་གསུངས་ཏེ་དེའི་ཚེ་སངས་རྒྱས་ཀྱི་ཡེ་ཤེས་སྒྲིབ་བྲལ་མངོན་འགྱུར་མཐར་ཐུག་པར་གྲུབ་པའི་ཕྱིར་རོ། །དེས་ན་བདེ་གཤེགས་སྙིང་པོའི་རང་བཞིན་ནི་ཚོགས་སྦྱོར་སོགས་སློབ་ལམ་དུ་དད་པས་དོན་སྤྱི་ཕྱོགས་རེ་ཙམ་འཇལ་བ་ལས་ཐམས་ཅད་རྟོགས་ནུས་པ་མ་ཡིན་ཏེ། སྙིང་པོའི་མདོར། གང་སོ་སོ་སྐྱེ་བོ་དང་། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་རྣམས་ཀྱིས་ཀྱང་ཇི་ལྟ་བ་བཞིན་དུ་སངས་རྒྱས་ཀྱི་སྙིང་པོ་མཐོང་བ་མ་ཡིན་ནོ། །ཞེས་སོགས་དམུས་ལོང་གིས་མར་གྱི་ཁ་དོག་དྲིས་པ་དང་གླང་པོ་ཆེའི་མཚན་ཉིད་གཞལ་བ་སོགས་ཀྱི་དཔེས་བསྟན་པས་མཚོན་ཏེ། མདོར་ན་རྒྱུད་བླ་མ་ལས། རང་བྱུང་རྣམས་ཀྱི་དོན་དམ་ནི། །དད་པ་ཉིད་ཀྱིས་རྟོགས་བྱ་ཡིན། །ཉི་མའི་དཀྱིལ་འཁོར་འོད་འབར་བ། །མིག་མེད་པས་ནི་མཐོང་བ་མེད། །ཅེས་གསུངས་པ་བཞིན་ནོ། །དེ་ལྟ་ནའང་འབྲས་བུ་གསང་སྔགས་རྡོ་རྗེ་ཐེག་པར་ནི། སྨིན་བྱེད་ཀྱི་དབང་དང་། གྲོལ་བྱེད་ཀྱི་ལམ་བདག་བྱིན་རླབས་བསྒོམ་པ་སོགས་བསྐྱེད་རྫོགས་ཟབ་མོའི་ཐབས་མཁས་ཀྱི་མྱུར་ལམ་ལ་བརྟེན་ནས། ད་ལྟ་སོ་སྐྱེའི་ས་ནས་ཀྱང་ཡིད་ཆེས་སྐྱེ་ཞིང་མངོན་དུ་བྱར་ཡོད་པ་ནི་སྔགས་ཀྱི་ཁྱད་ཆོས་ཐུན་མིན་ཏེ། ཧེ་བཛྲ་ལས། གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མས་དུས་ཐབས་བསྟན་པ་དང་། །རང་གི་བསོད་ནམས་ལས་ཤེས་བྱ། །ཞེས་སོ། །རྒྱུ་མཚན་དེས་ཐབས་ཀྱི་ཐེག་པ་དང་འབྲས་བུའི་ཐེག་པར་གྲུབ་པ་ཡིན་ཏེ། ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ཏེ། །སྔགས་གྱི་ཐེག་པ་ཁྱད་པར་འཕགས། །ཞེས་གསུངས། དེ་ལྟར་ཐབས་ཀྱིས་ཁྱད་པར་དུ་འཕགས་པ་བཞིན་དུ་ལྟ་བས་ཀྱང་འཕགས་ཏེ། ཁ་ཅིག་གིས་ཡུལ་ཆོས་དབྱིངས་སྤྲོས་བྲལ་ཙམ་གྱི་ཆ་ལ་དགོངས་ནས་ཁྱད་མེད་དུ་བརྗོད་ཀྱང་། ལྟ་བ་ནི་དེ་གཏན་ལ་འབེབས་བྱེད་ཡུལ་ཅན་གྱི་ངོས་ནས་འཇོག་དགོས་པའི་ཕྱིར། དོན་དམ་བདེ་བ་ཆེན་པོ་དང་། ཀུན་རྫོབ་སྐུ་དང་ཡེ་ཤེས་སུ་བལྟ་བ་སོགས་ཀྱིས་ཁྱད་པར་དུ་འཕགས་ཏེ། རོང་ཟོམ་པས། སྔགས་དང་མཚན་ཉིད་ཀྱི་གྲུབ་མཐའ་མཐུན་པ་ནི། དོན་དམ་སྤྲོས་བྲལ། ཀུན་རྫོབ་སྒྱུ་མར་འདོད་པ་སྤྱིར་མཐུན། སྒྱུ་མ་ཙམ་ཉིད་སེམས་སྣང་ཡིན་པ་རྣལ་འབྱོར་སྤྱོད་པ་དང་མཐུན། སེམས་ཀྱི་ཚུལ་ཇི་ལྟར་འདོད་པ་བྱང་སེམས་གཅིག་པུར་སྨྲ་བ་དང་མཐུན། སྤྱོད་པས་གཞན་དོན་ལམ་ཉམས་སུ་ལེན་པ་དང་། འབྲས་བུ་བླ་མེད་ཡེ་ཤེས་ཀྱང་མཐུན། སྔགས་སུ་སངས་རྒྱས་ཀྱི་ས་གསུམ་དང་བདུད་རྩི་འོད་སོགས་གསུངས་པ་ཡང་། མཚན་ཉིད་ལ་ཆོས་སྐུ་མཛད་པ་བཅས་དང་། སངས་རྒྱས་ཀྱི་ཆོས་ལྔ་ཞེས་གསུངས་པ་མཚུངས་པར་ཤེས་པར་བྱའོ། ཅུང་ཟད་མི་མཐུན་པ་ནི། བདེན་གཉིས་དབྱེར་མེད། ཀུན་རྫོབ་ལྷའི་དཀྱིལ་འཁོར་དུ་འདོད་པ་དང་། སེམས་ཀྱི་རང་བཞིན་རང་བྱུང་ཡེ་ཤེས་སུ་འདོད་པ་དང་། ཆོས་ཐམས་ཅད་སངས་རྒྱས་པར་འདོད་པར་མི་མཐུན་ནོ། །འོ་ན་མདོ་ལས། སོ་སོའི་སྐྱེ་བོའི་ཤེས་པ་ཟག་པ་མེད་པའི་སེམས་དང་ལྡན་པ་དང་། རང་བྱུང་ཡེ་ཤེས་མི་འཇིག་པ་ཡོད་པར་གསུངས་པ་དང་། ཤཱཀྱ་ཐུབ་པའི་ཞིང་དག་པར་གསུངས་པ་དང་། རྟག་ཏུ་སྐྱེ་མེད་ཆོས་ནི་དེ་བཞིན་ཉིད། །སོགས་ཀྱི་མདོ་སྡེ་ལས་ཀྱང་བདེན་གཉིས་དབྱེར་མེད་དང་། རང་བྱུང་ཡེ་ཤེས་དང་། ཆོས་ཐམས་ཅད་རང་བཞིན་གྱིས་སངས་རྒྱས་སུ་གསུངས་པས་ཁྱད་པར་མི་རིགས་སྙམ་ན། དེ་ལྟར་གསུངས་པ་བདེན་ཏེ། ཁྱད་པར་འདི་དག་ཉན་ཐོས་དང་ཐུན་མོང་དུ་གྲགས་པའི་གཞུང་ལས་བྱེ་བྲག་ཕྱེ་སྟེ་གསུངས་པ་ཡིན་ལ། འདི་དང་སྔགས་ཅུང་ཟད་སྒོ་མཐུན་པ་ནི་འདོད་པ་ཉིད་དེ་ཐེག་པའི་བྱེ་བྲག་ཐམས་ཅད་ཐ་དད་དུ་མེད་དེ་བྱང་སེམས་ཀྱི་སྤྱོད་པ་རླབས་པོ་ཆེ་དང་། ཀུན་གཞིའི་རྣམ་ཤེས་ལྟ་བུ་ཐེག་ཆེན་དུ་གསུངས་པའི་ཁྱད་ཆོས་དག་ཀྱང་ཉན་ཐོས་ཀྱི་ལུང་ལས་ས་བོན་ཙམ་གྲགས་པ་བཞིན་ནོ། །ཞེས་དང་། གསང་སྔགས་ཀྱི་གཞུང་ལ་གྲགས་པའི་ལྟ་བ་ནི། དོན་དམ་པར་སྐྱེ་འགག་མེད་པར་འདོད་པ་དབུ་མ་དང་མཐུན་ལ། ཀུན་རྫོབ་ཏུ་ཕུང་ཁམས་སྐྱེ་མཆེད་སྒྱུ་མ་ཙམ་དུ་ལྟ་བའང་མཐུན་ནོ། །བྱེ་བྲག་ཏུ་ན། སྒྱུ་མའི་མཚན་ཉིད་དེ་དག་ཀྱང་། ཡོངས་སུ་དག་པའི་ལྷའི་མཚན་ཉིད་དུ་ལྟ་བ་དང་། བདེན་པ་གཉིས་ཀྱང་དབྱེར་མེད་པར་ལྟ་བས་ཁྱད་པར་དུ་བྱས་པའོ། །ཞེས་གསུངས་པས་མཚོན་ཞིབ་པར་ལྟ་བའི་བརྗེད་བྱང་དུ་གསལ་བར་བསྟན་པ་བཞིན་ཏེ། སྔགས་ཐུན་མིན་གྱི་ལྟ་བ་མདོ་ཙམ་ནི་འོག་ཏུ་འཆད་པར་འགྱུར་རོ། །དེ་ལྟ་བུའི་བླ་ན་མེད་པའམ་ཐེག་པ་ཆེན་པོ་སངས་རྒྱས་ཀྱི་རིགས་དེ་ལ་དབྱེ་ན། རྒྱུད་བླ་མར། གཏེར་དང་འབྲས་བུ་ཤིང་བཞིན་དུ། །རིགས་དེ་རྣམ་གཉིས་ཤེས་བྱ་སྟེ། །ཐོགས་མེད་རང་བཞིན་གནས་པ་དང་། །ཡང་དག་བླང་བ་མཆོག་ཡིན་ནོ། །ཞེས་གསུངས་པས། རང་བཞིན་གནས་པའི་རིགས་དང་། སྒྲུབ་པའི་རིགས་གཉིས་ཀྱི། དང་པོ་ནི། མྱང་འདས་ལས། རིགས་ཀྱི་བུ། དེ་ལ་སེམས་ཀྱི་ཆོས་ཉིད་རང་བཞིན་གྱིས་འོད་གསལ་བ་རང་བཞིན་གྱིས་ངོ་བོ་ཉིད་མེད་པ་ནི། རང་བཞིན་གྱིས་དག་པའི་སེམས་ཇི་ལྟར་སྣང་བ་མཚན་དང་དཔེ་བྱད་འབར་བའི་ཡོན་ཏན་གྱིས་བགོས་པ་དང་ཐ་དད་པར་མ་ཡིན་ཏེ། འོན་ཀྱང་སྣང་བ་དང་སྟོང་པའི་རང་བཞིན་གྱིས་རྣམ་པར་ཕྱེའོ། །ཞེས་གསུངས་པས། འདི་ལའང་དབྱེ་ན། ཆོས་ཉིད་རང་བཞིན་གྱིས་གནས་པའི་རིགས་དབྱིངས་ཟག་མེད་ངོ་བོ་ཉིད་སྐུའི་བྲལ་རྒྱུའམ་བྲལ་གཞི་ལྷུན་གྱིས་གྲུབ་པས་རིན་པོ་ཆེའི་སྐུ་ལྟ་བུ་དང་། ཆོས་ཅན་རང་བཞིན་གྱིས་གནས་པའི་རིགས་ལོངས་སྤྱོད་རྫོགས་སྐུའི་བྲལ་རྒྱུ་འཁོར་ལོས་སྒྱུར་བ་ལྟ་བུ་དང་། དེའི་གཟུགས་བརྙན་སྣང་བ་སྤྲུལ་སྐུའི་བྲལ་རྒྱུ་གསེར་གྱི་གཟུགས་བརྙན་ལྟ་བུ་སྟེ་མཐར་ཕྱིན་འབྲས་བུའི་སྐུ་གསུམ་གྱི་འཆར་གཞིར་གྱུར་པའི་ཆ་ནས་ལྡོག་པས་གསུམ་དུ་འགྱུར་ནའང་། དོན་ལ་དེ་གསུམ་ངོ་བོ་དབྱེར་མེད་པའི་ཆོས་ཉིད་སྣང་སྟོང་ཟུང་འཇུག་སྤྲོས་བྲལ་མཉམ་པ་ཆེན་པོའི་ཡེ་ཤེས་ཆོས་ཀྱི་སྐུ་རང་བྱུང་འདུས་མ་བྱས་ཆེན་ཏེ། སྣང་སྟོང་ཐ་དད་དུ་དབྱེ་གཞི་ཟད་པའི་དབྱེར་མེད་ཆེན་པོ་ཡིན་པས། གོང་བཤད་ཀྱི་དཔེ་རྣམས་ཀྱིས་ཀྱང་ཕྱོགས་རེ་ཙམ་ལས་རྫོགས་པར་མཚོན་མི་ནུས་པས་དེ་བཞིན་གཤེགས་པ་ཉིད་དང་དཔེ་མཚུངས་པར། སྔ་མ་ལས། འཇིག་རྟེན་འདས་ཕྱིར་འཇིག་རྟེན་ན། །འདི་ལ་དཔེ་ནི་མ་དམིགས་པས། །དེ་བཞིན་གཤེགས་པ་ཉིད་དང་ཁམས། །འདྲ་བ་ཉིད་དུ་བསྟན་པ་ཡིན། །ཞེས་སོ། །འདི་ཉིད་སྒྲིབ་བྲལ་མངོན་དུ་གྱུར་དུས་ཐེག་ཆེན་གྱི་འགོག་བདེན་མཐར་ཐུག་པ་དག་པ་གཉིས་ལྡན་ངོ་བོ་ཉིད་སྐུ་ཡིན་ལ། སྒྲུབ་པའི་རིགས་ནི་དབྱིངས་ཡེ འམ་ཆོས་ཉིད་དང་ཆོས་ཅན་རང་བཞིན་གྱིས་གནས་པའི་རིགས་དེ་གཉིས་པོ་སད་པ་ལ་བརྟེན་ནས་དེའི་སྟེང་གི་དྲི་མ་གློ་བུར་བ་རྣམས་སེལ་བྱེད་སེམས་བསྐྱེད་པ་སོགས་གནས་སྐབས་སློབ་ལམ་གྱིས་བསྡུས་པའི་ཐབས་ཤེས་ཚོགས་གཉིས་ཟུང་འབྲེལ་ལ་སློབ་པ་སྟེ། སྡོང་པོ་བཀོད་པ་ལས། ཀྱེ་རྒྱལ་བའི་སྲས་དག བྱང་ཆུབ་ཀྱི་རིགས་ཞེས་བྱ་བ་འདི་ནི་ཆོས་ཀྱི་དབྱིངས་ལྷུར་ལེན་པ་སྟེ། ནམ་མཁའ་ལྟར་ཡངས་པ་རང་བཞིན་གྱིས་འོད་གསལ་བ་མཐོང་ནས་བསོད་ནམས་དང་ཡེ་ཤེས་ཀྱི་ཚོགས་ཆེན་པོ་ལ་རྗེས་སུ་སློབ་པ་དག་གོ །ཞེས་གསུངས། དེས་ན་སྔ་མ་ནི་བྲལ་གཞི་དང་། ཕྱི་མ་ནི་དེའི་སྟེང་གི་དྲི་མ་སེལ་བྱེད་ཀྱི་ལམ་མོ། །ལམ་བདེན་བྲལ་རྒྱུས་བསྡུས་པ་ཀུན་གཞི་ལ་བརྟེན་ཡང་དེས་ཐོབ་པའི་ཆ་བྲལ་འབྲས་རིགས་སམ་སྙིང་པོ་ལ་བརྟེན་པས་འཕོ་འགྱུར་མེད་པའི་ཐར་པ་དམ་པའི་རྒྱུ་བྱེད་པར་གསུངས་སོ། །དེ་ལྟ་བུའི་རང་བཞིན་གནས་རིགས་དེ་ཡོད་པར་གང་གིས་ཤེས་ན། སྤྱིར་དུ་བ་ལས་མེ་བཞིན་རིགས་སད་པའི་རྟགས་ཀྱིས་རིགས་ཉིད་ཡོད་པར་རྗེས་སུ་དཔོག་སྟེ། རང་བཞིན་ཆོས་སྐུའི་རིགས་སད་པའི་རྟགས་ནི། འཇུག་པར། སོ་སོ་སྐྱེ་བོའི་དུས་ནའང་སྟོང་པ་ཉིད་ཐོས་ནས། །ནང་དུ་རབ་ཏུ་དགའ་བ་ཡང་དང་ཡང་དུ་འབྱུང་། །རབ་ཏུ་དགའ་བ་ལས་བྱུང་མཆི་མས་མིག་བརླན་ཞིང་། །ལུས་ཀྱི་བ་སྤུ་ལྡང་བར་འགྱུར་བ་གང་ཡིན་པ། །དེ་ལ་རྫོགས་པའི་སངས་རྒྱས་ཐོབ་བློའི་ས་བོན་ཡོད། །དེ་ཉིད་ཉེ་བར་བསྟན་པའི་སྣོད་ནི་དེ་ཡིན་ཏེ། །དེ་ལ་དམ་པའི་དོན་གྱི་བདེན་པ་བསྟན་པར་བྱ། །ཞེས་སོ། །གཟུགས་སྐུ་ཆོས་ཅན་གྱི་རིགས་སད་པའི་རྟགས་ནི། མདོ་རྒྱན་ལས། སྦྱོར་བའི་སྔོན་དུ་སྙིང་རྗེ་དང་། །མོས་པ་དང་ནི་བཟོད་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་སོ། །རིགས་དེ་སད་པའི་ཕན་ཡོན་ཡང་། དེ་ཉིད་ལས། རིང་མོ་ཞིག་ནས་ངན་སོང་དུ། །སོང་ཡང་མྱུར་དུ་ཐར་པར་འགྱུར། །དེ་ནའང་སྡུག་བསྔལ་ཆུང་ངུ་མྱོང་། །སྐྱོ་བྱས་སེམས་ཅན་སྨིན་པར་བྱེད། །ཅེས་གསུངས་པས། རིགས་དེ་ལན་གཅིག་སད་ཕན་ཆད་ངན་སོང་དུ་མི་སྐྱེ་བ་དང་། གལ་ཏེ་སོང་ཡང་དར་གྱི་ཕོ་ལོངས་བརྡབས་པའི་ཡུན་ཙམ་གྱིས་ཐར་ཞིང་། དེར་ཡང་སྡུག་བསྔལ་ཆུང་བ་དང་། སྐྱོ་ཤས་དྲག་པོས་སེམས་ཅན་ཡང་སྨིན་པར་བྱེད་དེ། སྟོན་པ་ཉིད་དམྱལ་བར་ཤིང་རྟ་འདྲེན་པའི་གྱད་དུ་གྱུར་པའི་ཚེ། སྙིང་རྗེ་ཆེན་པོའི་རིགས་སད་པའི་རྐྱེན་གྱིས་མོད་ལ་ཐར་ཏེ་སུམ་ཅུ་རྩ་གསུམ་གྱི་ལྷར་སྐྱེས་ཤིང་། དེ་ནས་འཕོས་ཏེ་འཛམ་གླིང་དུ་རྫ་མཁན་གྱི་བུ་ཁྱེའུ་སྣང་བྱེད་དུ་གྱུར་ཏེ། དེ་བཞིན་གཤེགས་པ་ཤཱཀྱ་ཐུབ་པའི་སྤྱན་སྔར་བྱང་ཆུབ་ཏུ་ཐུགས་བསྐྱེད་པར་གསུངས་པ་དང་། གཞན་ཡང་མཛའ་བོའི་བུ་མོ་སོགས་ཀྱི་སྐྱེས་རབས་གསུངས་པ་བཞིན་ནོ། །དེ་ལྟ་བུའི་རིགས་འདི་འགྲོ་ལ་མེད་ན་གང་དག་ལ་སྡུག་བསྔལ་བྱུང་བས་དེ་དག་སྐྱོ་བར་ཡང་མི་འགྱུར་ལ། འགའ་ཞིག་འཁོར་འདས་ལ་བླང་དོར་བྱེད་པའི་བློ་ཡང་མི་འབྱུང་བར་རིགས་པ་དང་། ཐར་པ་འདོད་པའང་སེམས་ལ་འཆར་མི་སྲིད་པ་ལས། སུས་ཀྱང་མ་བསྟན་པར་སྐྱེ་བོ་འགའ་ལ། གཞན་སྡུག་བསྔལ་འབྱུང་བ་ལ་སྙིང་རྗེ་སྐྱེ་བ་དང་། སྡུག་བསྔལ་མྱོང་བས་ཡིད་འབྱུང་བ་སོགས་ཀྱང་ཐོག་མེད་ནས་ཆོས་ཁམས་དགེ་བའི་མཐུར་ཤེས་པར་བྱ་སྟེ། རྒྱུད་བླ་མར། གལ་ཏེ་སངས་རྒྱས་ཁམས་མེད་ན། །སྡུག་ལ་སྐྱོ་བར་མི་འགྱུར་ཞིང་། །མྱ་ངན་འདས་ལ་འདོད་པ་དང་། །དོན་གཉེར་སྨོན་པའང་མེད་པར་འགྱུར། །སྲིད་དང་མྱ་ངན་འདས་ལ་དེའི། །སྡུག་བདེའི་སྐྱོན་ཡོན་མཐོང་བ་འདི། །རིགས་ཡོད་ལས་ཡིན་གང་ཕྱིར་འདི། །རིགས་མེད་དག་ལ་མེད་ཕྱིར་རོ། །ཞེས་གསུངས། ཁྱད་པར་རྒྱུད་སྡེ་རྣམས་སུ་སྦས་དོན། རྩ་བ་སྤྲོས་བྲལ་གྱི་ཐིག་ལེ་སེམས་ཉིད་ལྷན་ཅིག་སྐྱེས་པའི་ཡེ་ཤེས་སྟོང་གསལ་འགགས་མེད་སྐུ་གསུམ་གྱི་རང་བཞིན་དུ་གནས་པའི། ཆོས་སྐུའི་རྟགས་ཆོས་ཐམས་ཅད་རང་བཞིན་སྟོང་པར་སྣང་བ་དང་། ལོངས་སྐུའི་རྟགས་མིག་ཡུལ་དུ་དབྱིངས་རིག་གི་རྟགས་བཅུ་འཆར་བ་དང་། སྤྲུལ་སྐུའི་རྟགས་ཚོགས་དྲུག་གི་ཡུལ་སྣང་གི་ནུས་པ་སོ་སོར་འབྱིན་པ་གསུམ་བསླུ་བ་མེད་པའི་རྟགས་སུ་རང་བྱུང་ཞབས་ཀྱིས་གསུངས་པ་དང་། མཐར་ཐུག་ཀུན་བྱེད་ལས། ང་ཡི་རང་བཞིན་ཤེས་འདོད་པས། །དཔེ་ནི་ནམ་མཁའ་ལྟ་བུར་ལྟོས། །དོན་ནི་སེམས་ཉིད་སྐྱེ་བ་མེད། །རྟགས་ནི་རིག་པ་བྱང་ཆུབ་སེམས། །ཞེས་དཔེ་ནམ་མཁའ་དག་པ། དོན་སེམས་ཉིད་སྐྱེ་མེད། རྟགས་དྲན་རིག་སྣ་ཚོགས་སུ་གསལ་བ་སོགས། དཔེ་དོན་རྟགས་གསུམ་གྱིས་མཚོན་ནས་ཆོས་ཉིད་ཡིད་དཔྱོད་དུ་མ་ལུས་པར་མངོན་སུམ་དུ་ངོ་སྤྲད་ནས་རྩོལ་མེད་ཀྱི་ལམ་ལ་ད་ལྟ་ནས་གོམས་སུ་ཡོད་པ་ནི། ཐུན་མིན་མན་ངག་རྫོགས་པ་ཆེན་པོའི་ཁྱད་ཆོས་སོ། །གང་དུ་རིགས་མེད་པའམ་རིགས་ཆད་གསུངས་པ་ནི་རིགས་མ་སད་པ་རྣམས་ལ་དམ ན་པ་ལ་དགག་སྒྲ་སྦྱར་བ་ཡིན་གྱིས། རང་བཞིན་གནས་རིགས་མེད་པའི་འགྲོ་བ་ནི་འགའ་ཡང་མེད་དེ། དེ་བཞིན་གཤེགས་པའི་སྙིང་པོའི་མདོར། ཀྱེ་རིགས་ཀྱི་བུ། འདི་ནི་ཆོས་རྣམས་ཀྱི་ཆོས་ཉིད་དེ་དེ་བཞིན་གཤེགས་པ་རྣམས་བྱུང་ཡང་རུང་། མ་བྱུང་ཡང་རུང་། སེམས་ཅན་འདི་དག་ནི་རྟག་ཏུ་དེ་བཞིན་གཤེགས་པའི་སྙིང་པོ་ཅན་ནོ། །ཞེས་དང་། དཔལ་ཕྲེང་ལས། བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། །ཅེས་དང་། ཨིནྡྲ་བྷཱུ་ཏིས་ཡེ་ཤེས་གྲུབ་པ་ལས། སེམས་ཅན་ཀུན་གྱི་ཡིད་ཁྱབ་པར། །རྡོ་རྗེ་སེམས་དཔའ་རྟག་པར་བཞུགས། །དེ་ལྟར་ཤེས་པའི་རྣལ་འབྱོར་གྱི། །དབང་པོས་གང་ལའང་བརྙས་མི་བྱ། །ཞེས་དང་། དཔལ་མཆོག་དང་པོ་ལས། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ནི་ཐམས་ཅད་ཀྱི་རང་བཞིན་ཡིན་པའི་ཕྱིར། སེམས་ཅན་ཐམས་ཅད་ནི་དེ་བཞིན་གཤེགས་པའི་སྙིང་པོ་ཅན་ནོ། །ཞེས་དང་། དཔལ་སྡོམ་པ་ལས། སངས་རྒྱས་རྣམས་ནི་བྱོན་གྱུར་ཏམ། མ་བྱོན་ན་ཡང་རྣམ་ཀུན་ཏུ། །རྒྱུན་ཆད་མེད་པའི་ཆོས་ཉིད་ནི། །འཕེལ་འགྲིབ་སྤངས་ཏེ་གནས་པ་ཡིན། །ཞེས་དང་། ཀུན་སྨོན་ལས། ཁམས་གསུམ་སེམས་ཅན་ཐམས་ཅད་ཀྱང། །ཀུན་གཞི་སངས་རྒྱས་ང་དང་མཉམ། །ཞེས་གསུངས་ཏེ། འདིའི་ཀུན་གཞི་ནི་སྦྱོར་བ་དོན་གྱི་ཀུན་གཞིའམ་ཀུན་གཞིའི་ཡེ་ཤེས་བདེ་གཤེགས་སྙིང་པོ་ཉིད་ཡིན་ཏེ། རྒྱན་སྟུག་པོར། ས་རྣམས་སྣ་ཚོགས་ཀུན་གཞི་སྟེ། །བདེ་གཤེགས་སྙིང་པོ་དགེ་བའང་དེ། །སྙིང་པོ་དེ་ལ་ཀུན་གཞིའི་སྒྲས། །དེ་བཞིན་གཤེགས་རྣམས་སྟོན་པར་མཛད། །ཅེས་དང་། ཇི་ལྟར་ཟླ་བ་སྐྱེ་འབྲི་བ། །མི་ཤེས་འགྲོ་བ་རྣམ་རྟོག་ཀྱང་། །ཟླ་བ་སྐྱེ་འབྲི་མེད་པ་བཞིན། །གླིང་དང་གླིང་དུ་རབ་ཏུ་སྣང་། །དེ་བཞིན་ཀུན་གཞིའི་རྣམ་ཤེས་ལ། །བྱིས་པ་མི་ཤེས་འགྲོ་རྣམས་ཀྱིས། །རྟག་ཏུ་སྐྱེ་འབྲིར་རྣམ་རྟོག་སྟེ། །དེ་ནི་ཟག་མེད་སངས་རྒྱས་སོ། །ཞེས་དང་། ཟག་མེད་རང་ལུགས་རང་ཐོབ་ན། །དེ་དག་བརྟན་ཅིང་རྟག་པར་འགྱུར། །ཅེས་སོ། །དེས་ན་མཐར་གྱིས་རྣམ་གྲོལ་གྱི་འབྲས་བུ་མི་ཐོབ་པ་ནི་མ་ཡིན་ནོ། །དེས་ན་རྒྱུ་རིགས་དེ་གཉིས་སད་པ་ལ་བརྟེན་ནས་ཐེག་པ་ཆེན་པོའི་བྱང་ཆུབ་ཏུ་སེམས་བསྐྱེད་ནས། གཙོ་བོར་མཉམ་བཞག་ཏུ་རྣམ་པར་མི་རྟོག་པའི་ཡེ་ཤེས་ལ་གོམས་པས་ཆོས་སྐུ་ལ་སྒྲིབ་པའི་དྲི་མ་སེལ་ཞིང་། རྗེས་ཐོབ་ཏུ་སྙིང་རྗེ་སྒྱུ་མ་ལྟ་བུ་དང་འགྲོགས་ཏེ་ཐབས་ལ་མཁས་པས་ཚོགས་གཉིས་ལ་སྤྱོད་པས་གཟུགས་སྐུ་གཉིས་ལ་སྒྲིབ་པའི་དྲི་མ་བསལ་ནས། མཐར་ཐུག་བྲལ་འབྲས་ཟག་མེད་ཀྱི་ཡོན་ཏན་བསམ་མི་ཁྱབ་པས་འཁྱུད་པའི་དབྱིངས་ཀྱི་ངོ་བོ་ཉིད་སྐུའམ་གཞན་སྣང་གཟུགས་སྐུའི་འཆར་གཞི་ནམ་མཁའི་ཟླ་བ་ལྟ་བུ་སངས་རྒྱས་རང་སྣང་གི་སྐུ་གསུམ་པོ་གཞན་ནས་བཙལ་བ་མེད་པར་ཡེ་ཤེས་རང་ལ་རང་སྣང་བར་བྱེད་པ་སྟེ། རྒྱུད་བླ་མར། རང་བཞིན་འོད་གསལ་ཞེས་བརྗོད་གང་ཡིན་ཉི་དང་མཁའ་བཞིན་གློ་བུར་གྱི། །ཉོན་མོངས་ཤེས་བྱའི་སྤྲིན་ཚོགས་སྟུག་པོས་བསྒྲིབས་པ་ལས་ནི་བྲལ་གྱུར་པ། །དྲི་མེད་སངས་རྒྱས་ཡོན་ཏན་ཀུན་ལྡན་རྟག་བརྟན་གཡུང་དྲུང་སངས་རྒྱས་ཉིད། །དེ་ནི་ཆོས་ལ་མི་རྟོག་རྣམ་འབྱེད་ཡེ་ཤེས་དག་ལ་བརྟེན་ནས་འཐོབ། །ཅེས་དང་། ཐོག་མ་དབུས་མཐའ་མེད་ཅིང་རྣམ་དབྱེར་མེད། །གཉིས་མེད་གསུམ་བྲལ་དྲི་མེད་རྣམ་རྟོག་ཉིད། །ཆོས་དབྱིངས་རང་བཞིན་གང་ཡིན་དེ་རྟོགས་པ། །མཉམ་པར་བཞག་པའི་རྣལ་འབྱོར་པ་ཡིས་མཐོང་། །གཞལ་མེད་གདྒཱའི་བྱེ་མ་ལས་འདས་པ། །དཔག་མེད་མཉམ་མེད་ཡོན་ཏན་རྣམས་དང་ལྡན། །དེ་བཞིན་གཤེགས་པའི་དྲི་མེད་དབྱིངས་དེ་ནི། །བག་ཆགས་བཅས་པའི་ཉེས་ཀུན་གཏན་སྤངས་པའོ། །ཞེས་དང་། གསང་སྙིང་ལས། གཅིག་དང་དུ་མར་བྲལ་པ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་སོ། །དེ་ལས་ཤར་བའི་གཟུགས་སྐུ་གཉིས་པོ་ནི་རྒྱུ་གདུལ་བྱའི་སྣོད་དག་པ་དང་རྐྱེན་སྔོན་གྱི་ཐུགས་བསྐྱེད་དང་ཚོགས་གཉིས་ལ་གོམས་པའི་ལྷན་ཅིག་བྱེད་རྒྱུས་རང་བྱུང་ཟག་མེད་ཀྱི་ཡེ་ཤེས་ཉིད། དཔེ་ཆུ་ཟླའི་ཚུལ་དུ་གདུལ་བྱ་གཞན་སྣང་དུ་སྟོན་པའི་ཆ་ནས་སྨིན་འབྲས་སུ་བཞག་པ་སྟེ། སྔ་མ་ལས། སྣ་ཚོགས་དམ་ཆོས་འོད་ཟེར་སྣང་བའི་སྐུས། །འགྲོ་བའི་རྣམ་གྲོལ་དོན་སྒྲུབ་ལ་བརྩོན་པ། །མཛད་པ་ཡིད་བཞིན་ནོར་བུ་རྒྱལ་བཞིན་ཏེ། །སྣ་ཚོགས་དངོས་ཀྱང་དེ་ཡི་རང་བཞིན་མིན། །འཇིག་རྟེན་ཞི་བའི་ལམ་དུ་འཇུག་པ་དང་། །རབ་ཏུ་སྨིན་དང་ལུང་སྟོན་རྒྱུ་ཡི་གཟུགས། །གང་ཡིན་དེ་ཡང་འདིར་ནི་རྟག་གནས་ཏེ། །ནམ་མཁའི་ཁམས་སུ་གཟུགས་ཀྱི་ཁམས་བཞིན་ནོ། །ཞེས་དང་། གསང་སྙིང་ལས། ལོག་པར་རྟོག་བརྟག་རྣམ་དག་ཅིང་། །ཡེ་ཤེས་དབྱིངས་ལས་མི་གཞན་ཕྱིར། །ཐུགས་རྗེ་ཆེན་པོས་འབྲེལ་བ་ལས། །འགྲོ་དྲུག་དུས་གནས་མ་ལུས་སྣང་། །ཞེས་དང་། ཀླུ་སྒྲུབ་ཀྱིས། དྲི་མ་མེད་པའི་ཆོས་སྐུ་ལ། །ཡེ་ཤེས་རྒྱ་མཚོ་གནས་གྱུར་པས། །སྣ་ཚོགས་ནོར་བུ་ཇི་བཞིན་དུ། །དེ་ལས་སེམས་ཅན་དོན་འབྱུང་ངོ་། །ཞེས་གསུངས། མདོར་ན་ཤིང་རྟ་ཆེན་མོར། སྐབས་འདིར་སངས་རྒྱས་ཁོ་ནའི་སྤྱོད་ཡུལ་ལས་གདུལ་བྱ་ལ་མི་སྣང་བ་དབྱིངས་ཀྱི་སྐུ་གསུམ་ཆོས་སྐུ་ཉག་གཅིག་ཏུ་རོ་གཅིག་པ་ནང་དབྱིངས་ཕྲ་བའི་ཡེ་ཤེས་སུ་ཡོད་པ་དང་། དེའི་བྱིན་རླབས་དང་གདུལ་བྱའི་སྨོན་ལམ་ལས་ཕྱིར་གསལ་གཞན་སྣང་དུ་ཤར་བ་ཡེ་ཤེས་ཕྲིན་ལས་དག་པའི་གཟུགས་སྐུ་གཉིས་སྣང་བ་ནི་ནམ་མཁའི་ཟླ་བ་དང་ཆུ་ཟླ་ལྟར་ཤེས་པར་བྱའོ། །ཞེས་དང་། གྲུབ་མཐའ་མཛོད་ལས། རིགས་གཉིས་ལ་སངས་རྒྱས་སྐུ་གསུམ་ཡེ་ལྡན་དུ་ཡོད་པས། སངས་རྒྱས་ཀྱི་སའི་རྒྱས་འགྱུར་སྣང་ཆ་ལོངས་སྐུ་དང་། དེའི་སྟོང་ཆ་ཆོས་སྐུ་རང་བཞིན་གནས་རིགས་གཉིས་དབྱེར་མེད་པའི་བྱིན་རླབས་ལས། སྤྲུལ་སྐུ་གདུལ་བྱ་གཞན་སྣང་དུ་སྟོན་པ་འཁོར་སྒྱུར་གྱི་གཟུགས་བརྙན་གསེར་རིར་ཤར་བའི་དཔེས་གསུངས་པ་བཞིན་ནོ། །དེ་ལྟར་མ་ཤེས་པར་རང་བཞིན་གནས་རིགས་མེད་དགག་སྟོང་རྐྱང་འདུས་མ་བྱས་དང་རྒྱས་འགྱུར་ལམ་གྱི་གསར་སྐྱེ་འདུས་བྱས་ཁོ་ནར་ཞེན་པས་ནི། མཐར་ཐུག་གི་འབྲས་བུའི་སྐབས་སུ་སློབ་ལམ་གྱི་རྟོགས་པ་རྒྱུན་ཆད་པས་ཉན་ཐོས་ཀྱི་འགོག་པ་མར་མེ་ཤི་བའི་དཔེ་ལྟར་སྐུ་དང་ཡེ་ཤེས་སོགས་གང་ཡང་བཞག་ཏུ་མེད་པའི་ལུགས་འཛིན་པ་དེ་བྱུང་བ་ཡིན་ཞིང་། དེ་ལྟར་ན་ཐེག་ཆེན་འགོག་བདེན་གྱི་དྲི་ཙམ་ཡང་མི་བྲོ་སྟེ། གཞི་སྤྲོས་པའི་མཐར་ལྷུང་བ་དང་། ལམ་ཐེག་ཆེན་གྱི་ཚོགས་གཉིས་ལ་དགོས་པ་མེད་པ་དང་། འབྲས་བུ་ཐེག་གསུམ་གྱི་མྱང་འདས་ལ་ཁྱད་པར་མེད་པ་དང་། མཐར་ཐུག་འབྲས་ཆད་ཀྱི་གཡང་ལས་བརྒལ་མི་ནུས་པས་དོན་དམ་པའི་སྐྱབས་ཀྱང་རྙེད་པར་མི་འགྱུར་བས་ན། ཚུལ་དེ་ལ་དགོངས་ཏེ་ཀུན་མཁྱེན་ཆོས་རྗེས་ཡིད་བཞིན་རིན་པོ་ཆེའི་མཛོད་དུ། ཚུལ་འདི་མི་ཤེས་སྟོང་པ་ཕྱང་ཆད་པ། །ཚིག་ཏུ་ཡོད་མེད་མཐའ་བྲལ་ཞེས་སྨྲ་ཡང་། །བྲལ་གཞི་མི་ཤེས་སྲིད་རྩེའི་ལྟ་བ་ཅན། །བསྟན་པ་འདི་ལས་ཕྱི་རོལ་གྱུར་པས་ན། །ནམ་མཁའི་ཡིད་ཅན་ཐལ་བས་བྱུག་ན་རུང་། །ཞེས་ལོག་པར་ལྟ་བ་ཕུར་བུ་པའི་ཁོངས་སུ་བསྡུ་བར་མཛད་པ་དང་། དོ་ཧ་ལས། མདའ་བསྣུན་ན་རེ་ན མ་མཁའི་ཡིད་ཅན་ལ། །ཐར་པ་ནམ་ཡང་ཡོད་པ་མ་ཡིན་ལོ། །ཞེས་གསུངས་པ་བཞིན་ནོ། །གལ་ཏེ་སློབ་ལམ་དུ་རྒྱུ་ཚོགས་གཉིས་ཀྱིས་སྔར་མེད་གསར་དུ་བསྐྱེད་དོ་སྙམ་ན། སངས་རྒྱས་ཆོས་སྐུའམ་ངོ་བོ་ཉིད་སྐུ་དང་ལོངས་སྐུ་འདུས་བྱས་དང་མི་རྟག་པར་འགྱུར་བས་དེ་ལྟ་ན། རྒྱུད་ཉི་ཚེ་བས་བསྡུས་པ་དང་། འགྱུར་བཅས་ཀྱི་ཟུག་རྔུ་མ་སྤང་བ་དང་། མཁའ་ཁྱབ་ཡེ་ཤེས་རྡོ་རྗེའི་སྐུ་ཅན་མ་ཡིན་པ་དང་། རྡོ་རྗེའི་སྐུ་ལ་མི་རྟག་པར་བལྟས་པའི་ཉེས་པ་ཚད་མེད་པར་གསུངས་པས་མཚོན་སྐྱོན་མཐའ་ཡས་པའི་ཕྱིར་ཐེག་པ་ཆེན་པོའི་དོན་ལས་གཞན་དུ་གྱུར་པའོ། །དེའི་ཕྱིར་ཆོས་དབྱིངས་རིན་པོ་ཆེའི་མཛོད་ལས། གང་གི་ཚེ་དག་པ་གཉིས་ལྡན་གྱི་བྱང་ཆུབ་བརྙེས་པ་དེའི་ཚེ། ཆོས་ཀྱི་སྐུ་དང་། ལོངས་སྤྱོད་རྫོགས་པ་དང་། སྤྲུལ་པ་སྐུའི་ཡེ་ཤེས་དང་སྣང་བ་ཐམས་ཅད་ཀྱང་། སངས་རྒྱས་ཉིད་ཀྱི་རིག་པ་ཀློང་དུ་ཕེབས་པའི་རང་སྣང་ཙམ་ལས་གཞན་དུ་གྲུབ་པ་མེད་དེ། སྐུ་དང་ཡེ་ཤེས་ཀྱི་སྣང་བ་དེ་དག་རང་ལ་ཡོད་པ་དེའི་ཚེ་མངོན་དུ་གྱུར་པ་ལས་གཞན་མེད་པའི་ཕྱིར་རོ། །བསོད་ནམས་དང་ཡེ་ཤེས་ཀྱི་ཚོགས་ལས་བྱུང་བ་མ་ཡིན་ནམ་ཞེ་ན། སྨྲས་པ། ཚོགས་གཉིས་ནི་ཡེ་ནས་སྣང་བ་དང་སྟོང་པའི་ཡོན་ཏན་དུ་རྫོགས་པ་ཡིན་པ་ལ་ལྷུན་གྲུབ་ཅེས་བརྗོད་དེ། གློ་བུར་དུ་བསགས་པ་དེ་ནི་དྲི་མ་སེལ་བྱེད་ཀྱི་རྐྱེན་གྱི་ཆ་ཙམ་ལ་རྒྱུ་ཚོགས་གཉིས་ཞེས་བཏགས་པ་ཙམ་སྟེ། ནོར་བུ་དྲི་མས་གོས་པ་ཁྲུས་རས་དང་འདག་ཆལ་གྱིས་ཕྱི་བ་ལ་ནོར་བུ་མཐོང་བའི་རྒྱུར་བརྗོད་པ་བཞིན་ནོ། །དེའི་ཕྱིར་སྐུ་གསུམ་རང་བྱུང་ཡེ་ཤེས་ཀྱི་སྣང་བར་འདུས་ལ། རང་བྱུང་གི་ཡེ་ཤེས་སྐུ་གསུམ་ལ་སོགས་པའི་ཆོས་རྣམས་ཀྱི་འཆར་གཞི འམ་སྟོན་པར་གནས་ཏེ། ཀུན་བྱེད་ལས། རང་བྱུང་ཡེ་ཤེས་ཀུན་གྱི་སྟོན་པར་གཅིག །ང་ཡི་རང་བཞིན་རྣམ་གསུམ་སྣང་བ་ལས། །སྟོན་པའི་གྲངས་ནི་རྣམ་པ་གསུམ་དུ་བྱུང་། །ཞེས་སོ། །ཞེས་གསུངས་པ་དང་། དེ་བཞིན་དུ་རོང་ཟོམ་པའི་མཉམ་སྦྱོར་འགྲེལ་པ་ལས། དེ་ཉིད་རང་བྱུང་ཡིན་ཏེ། རྒྱུ་དང་རྐྱེན་ལས་མ་བསྐྱེད་པའི་བཅོམ་ལྡན་འདས་སོ། །ཇི་ལྟར་ཞེ་ན། བྱང་ཆུབ་ཀྱི་སེམས་ནི་རིགས་དང་བཤེས་གཉེན་གྱི་སྟོབས་ཀྱིས་བསྐྱེད་པ་མ་ཡིན། བསོད་ནམས་དང་ཡེ་ཤེས་ཀྱི་ཚོགས་ཀྱིས་མངོན་པར་བསྒྲུབ་པ་མ་ཡིན། འབྲས་བུའི་ངོ་བོ་བླ་ན་མེད་པའི་སེམས་དང་། ཐོག་མ་མེད་པའི་རིགས་ཀྱི་སེམས་དག་ཀྱང་རང་བཞིན་བྱེ་བྲག་ཏུ་གྱུར་པ་མེད་དེ། ཐམས་ཅད་དུ་མི་ཕྱེད་པའི་ཕྱིར་རྡོ་རྗེ་སེམས་དཔའ་ཞེས་བྱའོ། །ཀུན་ཏུ་བཟང་པོ་ཞེས་བྱའོ། །གང་ཡང་དེའི་དབང་དུ་མཛད་པའི་གཟུགས་ཀྱི་སྐུ་རྣམས་ལའང་དེ་སྐད་ཅེས་བྱའོ། །ཞེས་དང་། འདི་སྐད་དུ། སེམས་ཅན་ཀུན་གྱི་སེམས་གང་ནི། །རྡོ་རྗེ་ཞེས་སུ་བཤད་པ་ཡིན། །བརྟན་པའི་ཕྱིར་ནི་སེམས་དཔར་བརྗོད། །ཅེས་སོགས་གསུངས་པ་ལྟ་བུ་སྟེ། སེམས་ཉིད་ཐེག་པ་སྤྱི་ལ་གྲགས་པའི་དང་པོ་རིགས་ཀྱི་སེམས་ཀྱི་བདག་ཉིད་དང་། རིགས་དང་བཤེས་གཉེན་གྱི་སྟོབས་ལ་བརྟེན་ནས་བྱང་ཆུབ་ཏུ་སེམས་བསྐྱེད་པ་ནས་བཟུང་སྟེ། རྡོ་རྗེ་ལྟ་བུའི་ཏིང་ངེ་འཛིན་ལ་ཐུག་པའི་རྒྱུ་ཡི་གནས་སྐབས་ཀྱི་སེམས་དང་། འབྲས་བུའི་ངོ་བོ་བླ་ན་མེད་པ་སངས་རྒྱས་ཀྱི་ས་ཡིས་བསྡུས་པ་རྣམས་གནས་ཡོངས་སུ་བསྒྱུར་བ་མེད་པ་ནི་རྡོ་རྗེ་སེམས་དཔའ་ཞེས་བྱ། རྡོ་རྗེ་སེམས་དཔའ་ནི་རང་གི་བདེ་བའོ། །རང་གི་བདེ་བ་ནི་སེམས་ཀྱི་མཚན་ཉིད་དོ། །སེམས་ཀྱི་མཚན་ཉིད་ནི་སེམས་ཅན་དང་སངས་རྒྱས་གཉིས་སུ་མེད་པའོ། །ཞེས་གསུངས་པ་བཞིན་ཤེས་པར་བྱའོ། །དེས་ན་རིགས་གཉིས་ཀྱང་དབྱིངས་གཅིག་གི་སྣང་སྟོང་གི་ལྡོག་ཆས་ཕྱེ་བ་ཙམ་ལས་ངོ་བོའམ་རང་བཞིན་དབྱེར་མེད་ཟག་མེད་འདུས་མ་བྱས་ཆེན་ལ་བཞག་པ་འདི་ཀུན་མཁྱེན་ཆོས་རྗེའི་དགོངས་པ་རྨ་མེད་པ་ཡིན་ཏེ། ཤིང་རྟ་ཆེན་མོར། དེའང་རང་བཞིན་གྱིས་དག་ཅིང་ངོ་བོ་ཉིད་དྲི་མ་མེད་པའི་སེམས་ཉིད་སངས་རྒྱས་ཀྱི་ཡེ་ཤེས་དམ་པ་ཡེ་ནས་གནས་པའི་སེམས་ཀྱི་རང་བཞིན་འོད་གསལ་བའི་སྣང་ཆ་ལས་སངས་རྒྱས་གཟུགས་སྐུའི་ཡོན་ཏན་ལྷུན་གྲུབ་ཏུ་ཡོད་པ་དཔེ་དགུས་བསྟན་ཅིང་། སྟོང་ཆ་ལ་ཆོས་སྐུའི་ཡོན་ཏན་ནམ་མཁའ་ལྟ་བུའི་དཔེ་མདོ་དང་རྒྱུད་ཐམས་ཅད་ནས་བཤད་ལ། དེ་གཉིས་དབྱེར་མི་ཕྱེད་པ་ནི་ཐོག་མ་མེད་པའི་ཆོས་ཁམས་དགེ་བ་སྟེ། འགྱུར་བ་མེད་པས་རང་བཞིན་གནས་པའི་རིགས་དང་། དྲི་མ་སྦྱངས་ནས་ཡོན་ཏན་རྒྱས་པར་མངོན་པས་རྒྱས་འགྱུར་གྱི་རིགས་ཞེས་བཏགས་ཀྱང་། རྩ་བ་རང་རིག་པའི་ཡེ་ཤེས་འོད་གསལ་བའོ། །ཞེས་གསུངས། དེ་བཞིན་ཀུན་གཟིགས་རོང་ཟོམ་པའི་གསུངས། མཉམ་སྦྱོར་འགྲེལ་པའི་ལུང་གོང་དུ་དྲངས་པ་དང་། དམ་ཚིག་མདོ་རྒྱས་ལས་ཀྱང་། འདི་ལྟར་རྡོ་རྗེ་ལྟར་མི་ཤིགས་པ་ནི། ཐོག་མ་མེད་པའི་དུས་ཅན་གྱི་བྱང་ཆུབ་ཀྱི་སེམས་དང་། རིགས་དང་བཤེས་གཉེན་གྱི་སྟོབས་ལ་བརྟེན་ནས་བྱང་ཆུབ་ཀྱི་སེམས་བསྐྱེད་པ་ནས་བཟུང་སྟེ་རྡོ་རྗེ་ལྟ་བུའི་ཏིང་ངེ་འཛིན་ལ་ཐུག་གི་བར་དུ་དེའི་རྒྱུའི་གནས་སྐབས་ཀྱི་སེམས་དང་། འབྲས་བུའི་ངོ་བོ་དཔག་བསམ་གྱི་ཤིང་དང་ཡིད་བཞིན་གྱི་ནོར་བུ་རིན་པོ་ཆེ་ལྟ་བུའི་ཆོས་ཀྱི་སྐུ་མཛད་པ་དང་བཅས་པའི་སེམས་རྣམས་རང་བཞིན་བྱེ་བྲག་མེད་པས་རྡོ་རྗེ་ལྟར་མི་ཕྱེད་པ་ཀུན་ཏུ་བཟང་པོའི་སེམས་ཞེས་གཞི་ལམ་འབྲས་གསུམ་དབྱེར་མེད་པའི་རང་བྱུང་གི་ཡེ་ཤེས་ལ་བྱང་ཆུབ་ཀྱི་སེམས་སམ་རིགས་སུ་གསུངས་པས་མཚོན། ཆོས་ཀྱི་རྒྱལ་པོ་སྨིན་གླིང་པ་སྐུ་མཆེད་སོགས་སྔ་འགྱུར་གྱི་པཎ་གྲུབ་ཐམས་ཅད་ཀྱིས་ཚུལ་དེ་དང་མཐུན་པར་ཞལ་གྱིས་བཞེས་པ་ཤ་སྟག་སྟེ། ཞིབ་པར་རྗེ་ཐམས་ཅད་མཁྱེན་པ་འཇམ་དཔལ་དགྱེས་པའི་གསུངས་བདེ་གཤེགས་སྙིང་པོའི་སྟོང་ཐུན་དང་གཞན་སྟོང་ཁས་ལེན་སེང་གེའི་ང་རོ། །གཉུག་སེམས་སྒྲུབ་པ་ཡན་ལག་དང་བཅས་པ་ལས་ཤེས་པར་བྱ་ལ། དེ་དང་མཐུན་པར་འགྲོ་བའི་མགོན་པོ་ཨ་ཏི་ཤས་ཀྱང་། ཆོས་ཀྱི་དབྱིངས་ལ་ལྟ་བའི་གླུ་ལས། ཇི་ལྟར་སྦྲུམ་མའི་ལྟོ་ན་བུ། །ཡོད་ཀྱང་མཐོང་བ་མ་ཡིན་པ། །དེ་བཞིན་ཉོན་མོངས་ཀྱིས་གཡོགས་པའི། །ཆོས་ཀྱི་དབྱིངས་ཀྱང་མཐོང་མ་ཡིན། །ཆོས་དབྱིངས་གང་ཕྱིར་བདག་མ་ཡིན། །བུད་མེད་མ་ཡིན་སྐྱེས་མ་ཡིན། །གཟུང་བ་ཀུན་ལས་རྣམ་གྲོལ་བ། །ཇི་ལྟར་འཛིན་པར་བརྟག་པར་བྱ། །མི་གཙང་མི་རྟག་སྡུག་བསྔལ་ཞེས། །བྱ་བ་གསུམ་པོས་སེམས་སྦྱོང་བྱེད། །སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྐད་གསུངས་པ་སྟེ། །དེ་དག་ཀུན་གྱིས་ཉོན་མོངས་ལྡོག །ཁམས་དེ་ཉམས་པར་བྱེད་མ་ཡིན། །ཞེས་དང་། ཆོས་དབྱིངས་རང་བཞིན་ནམ་མཁའ་ཡི། །ཁམས་ལྟར་རྒྱུ་མེད་རྐྱེན་མེད་དེ། །སྐྱེ་དང་རྒ་དང་གནས་པ་དང་། །འཇིག་པ་མེད་པ་འདུས་མ་བྱས། །སངས་རྒྱས་ཆོས་དབྱེར་མེད་པ་དང་། །དེ་རིགས་དེ་བཞིན་ཐོབ་པ་དང་། །བརྫུན་མེད་བསླུ་མེད་འཚེ་མེད་པས། །གདོད་ནས་རང་བཞིན་ཞི་ཉིད་དོ། །ཞེས་ཀུན་བརྟགས་ལས་ཉོན་གྱིས་སྟོང་ཞིང་ཟག་མེད་ཀྱི་ཡོན་ཏན་དང་རྣམ་དབྱེར་མེད་པའི་ཆོས་དབྱིངས་སྣང་སྟོང་ཟུང་འཇུག་འདུས་མ་བྱས་ལ་རིགས་སུ་འཇོག་པར་མཛད་པ་དང་། ཏི་ལི་པས་འོག་མིན་ནས་སྤྱན་དྲངས་པའི་བཀའ་ཡང་དག་པའི་ཚད་མ་ཞེས་འཁའ་འགྲོ་མའི་མན་ངག་ལས། ཇི་ལྟར་མར་མེ་བུམ་ནང་གནས། །ཕྱི་རོལ་དུ་ནི་སྣང་མི་འགྱུར། །བུམ་པ་དེ་ཉིད་བཅག་གྱུར་ན། །དེ་འོག་མར་མེའི་འོད་སྣང་འགྱུར། །དེ་བཞིན་བུམ་པ་རང་ལུས་ཉིད། །འོད་གསལ་མར་མེ་ལྟ་བུ་ཡིན། །བླ་མའི་ཞལ་གྱིས་ལེགས་བཅག་ན། །སངས་རྒྱས་ཡེ་ཤེས་གསལ་བར་འགྱུར། །ཞེས་དང་། ཏཻ་ལོས་ནཱ་རོ་ལ་གནང་བའི་ཕྱག་ཆེན་གངྒཱ་མར། དཔེར་ན་ནམ་མཁའི་རང་བཞིན་ཁ་དོག་དབྱིབས་ལས་འདས། །དཀར་ནག་དག་གིས་གོས་ཤིང་འགྱུར་བ་མེད། །དེ་བཞིན་རང་སེམས་སྙིང་པོ་ཁ་དོག་དབྱིབས་ལས་འདས། །དགེ་སྡིག་དཀར་ནག་ཆོས་ཀྱིས་གོས་པ་མེད། །དཔེར་ན་གསལ་དྭངས་ཉི་མའི་སྙིང་པོ་དེ། །བསྐལ་པ་སྟོང་གི་མུན་པས་སྒྲིབ་མི་འགྱུར། །དེ་བཞིན་རང་སེམས་སྙིང་པོའི་འོད་གསལ་དེ། །བསྐལ་པའི་འཁོར་བས་སྒྲིབ་པར་མི་ནུས་སོ། །ཞེས་དང་། སློབ་དཔོན་གཉིས་མེད་རྡོ་རྗེས་མཛད་པའི་དེ་ཁོ་ན་ཉིད་བཅུ་པ་ཞེས་མངའ་བདག་མཻ་ཏྲི་པའི་གདམས་སྐོར་ལས། དེ་བཞིན་ཉིད་ནི་ཤེས་འདོད་པས། །རྣམ་བཅས་མ་ཡིན་རྣམ་མེད་མིན། །བླ་མའི་ངག་གིས་མ་བརྒྱན་པའི། །དབུ་མའང་འབྲིང་པོ་ཙམ་དུ་གནས། །ཞེས་དང་། བྲམ་ཟེ་ཆེན་པོས་མངའ་བདག་མར་པ་ལ་གདམས་པའི་མགུར་ལས་ཀྱང་། སྟོང་ཉིད་སྙིང་རྗེ་དབྱེར་མེད་པ། །རྒྱུན་ཆད་མེད་པ་གཉུག་མའི་སེམས། །གདོད་ནས་དག་པའི་དེ་བཞིན་ཉིད། །ནམ་མཁས་ནམ་མཁའ་སྦྱོར་བ་མཐོང་། །ཞེས་དང་། རྗེ་མི་ལས་སྙི་བ་རིན་ཆེན་ལ་གནང་བའི་སྙན་བརྒྱུད་དངོས་པོ་གསལ་བྱེད་ལས། ལུས་ཅན་དག་ནི་ཀུན་ལ་ཡང་། །སྙིང་པོའི་དོན་འདི་གདོད་ནས་གནས། །དེས་ན་སེམས་ཅན་སངས་རྒྱས་རྒྱུ། །རྒྱུ་ལས་འབྲས་བུ་ཐེབས་པ་ལ། །གདོད་ནས་ཐེབས་ཀྱིས་ད་ལྟར་མིན། །ཞེས་སྤྱིར་བསྟན་ནས། བྱེ་བྲག་ངོམས་རྫོང་སྙན་བརྒྱུད་རྩ་བ་ཚེ་རིང་སྐོར་གསུམ་གྱི་ཞུས་ལན་རྡོ་རྗེའི་མགུར་ལས། དོན་དམ་བདེན་པའི་དབང་དུ་ནི། །བགེགས་བས་སངས་རྒྱས་ཉིད་ཀྱང་མེད། །ཅེས་སོགས་དང་། ཀུན་རྫོབ་བདེན་པའི་དབང་དུ་ནི། །འཁོར་བ་དང་ནི་མྱ་ངན་འདས། །ཐམས་ཅད་ཡོད་ཅེས་ཐུབ་པས་གསུངས། །ཞེས་གནས་སྐབས་སུ་རྣམ་གྲངས་པའི་བདེན་གཉིས་སོ་སོར་ཕྱེས་ནས། མཐར་ཐུག་ཏུ། ཡོད་པ་དངོས་པོར་སྣང་བ་དང་། །མེད་པ་སྟོང་པའི་ཆོས་ཉིད་གཉིས། །ངོ་བོ་དབྱེར་མེད་རོ་གཅིག་པས། །རང་རིག་གཞན་རིག་ཡོད་མིན་ཏེ། །ཐམས་ཅད་ཟུང་འཇུག་ཡངས་པ་ཡིན། །ཞེས་རྣམ་གྲངས་མ་ཡིན་པའི་དོན་དམ་ཉིད་རྩལ་འདོན་དུ་མཛད་ནས། དེ་ལྟར་རྟོགས་པའི་མཁས་པ་ཡིས། །རྣམ་ཤེས་མ་མཐོང་ཡེ་ཤེས་མཐོང་། །ཆོས་ཅན་མ་མཐོང་ཆོས་ཉིད་མཐོང་། །དེ་ལས་སྙིང་རྗེ་ཤུགས་འབྱུང་སྟེ། །སྟོབས་དང་མི་འཇིགས་གཟུངས་ལ་སོགས། །སངས་རྒྱས་ཡོན་ཏན་གང་ཡིན་པ། །ནོར་བུ་རིན་ཆེན་ཚུལ་དུ་འབྱུང་། །དེ་རྣལ་འབྱོར་བདག་གི་རྟོགས་ཚད་ཡིན། །ཞེས་དྲི་མེད་འཕགས་པའི་ཡེ་ཤེས་ཀྱིས་གཟིགས་ཚུལ་སྒྲ་ཇི་བཞིན་པར་དྲང་ཐད་དུ་སྟོན་པར་མཛད་པ་དང་། ཞང་རིན་པོ་ཆེས་ལམ་མཆོག་མཐར་ཐུག་ཏུ། ངེས་དོན་མཐར་ཐུག་སྙིང་པོ་ཆོས་ཀྱི་སྐུ། །ངོ་བོ་ཉིད་ཀྱིས་རྣམ་དག་འོད་གསལ་དབྱིངས། །དུས་གསུམ་རྒྱལ་བ་བྱོན་རུང་མ་བྱོན་རུང་། །འཕགས་པའི་ཚོགས་ཀྱིས་རྟོགས་རུང་མ་རྟོགས་རུང་། །ཐུབ་པ་རྣམས་ཀྱིས་གསུངས་རུང་མ་གསུངས་རུང་། །དགོངས་འགྲེལ་མཁན་པོས་དཀྲོལ་རུང་མ་དཀྲོལ་རུང་། །ཆོས་ཉིད་འོད་གསལ་སྤྲོས་བྲལ་རྣམ་དག་འདི། །ཡེ་ནས་ལྷུན་གྲུབ་འཕེལ་འགྲིབ་མེད་པར་གནས། །ནམ་མཁའ་དག་ལ་འཇིག་རྟེན་ཆགས་འཇིག་གི། །མེ་ཡིས་བསྲེགས་དང་རླུང་གིས་གཏོར་ལ་སོགས། །བསྐལ་པ་དཔག་མེད་མང་པོར་གནོད་བྱས་ཀྱང་། །མཁའ་ལ་མི་གནོད་འཕེལ་འགྲིབ་མེད་པ་ལྟར། །ཉི་འོད་རབ་གསལ་སྤྲིན་གྱིས་རབ་བསྒྲིབས་པས། །མུན་པ་འཐིབས་དང་སྤྲིན་ཚོགས་ཡལ་བའི་ཚེ། །གསལ་བར་འགྱུར་བའི་འཕེལ་འགྲིབ་ལྟར་སྣང་གི། །ཉི་མའི་སྙིང་པོ་འཕེལ་དང་འགྲིབ་མི་སྲིད། །དེ་ལྟར་གནས་པའི་འགྱུར་མེད་ཆོས་སྐུ་འདི། །རང་གི་སེམས་ལས་མ་གཏོགས་གཞན་ན་མེད། །སྣ་ཚོགས་འཁོར་བ་མ་ལུས་སེམས་ལས་ཤར། །རང་སེམས་མ་རྟོགས་ཕྱིན་ལོག་འཁྲུལ་སྣང་གིས། །དཀྲུགས་པས་འཁོར་བའི་སྣོད་བཅུད་སྡུག་བསྔལ་འཕེལ། །རང་སེམས་ངེས་རྟོགས་མྱ་ངན་འདས་པ་ཡི། །ཡེ་ཤེས་མཐའ་ཡས་བདེ་བ་ཆེན་པོར་ཤར། །དེ་ཕྱིར་མ་ལུས་རང་གི་སེམས་ཉིད་ལས། །འཕྲོས་ཕྱིར་རང་གི་ཆོས་ཉིད་ངོ་ཤེས་ན། །སེམས་ཅན་ཀུན་གྱི་ཆོས་ཉིད་ཤེས་པར་འགྱུར། །དེ་ཤེས་མྱ་ངན་འདས་སོགས་ཆོས་ཀུན་ཤེས། །ཆོས་ཀུན་ཡོངས་ཤེས་ཁམས་གསུམ་ཀུན་ལས་འདའ། །གཅིག་ཤེས་པས་ནི་ཆོས་ཀུན་མཁས་པར་འགྱུར། །ཞེས་དང་། རྒྱལ་དབང་རང་བྱུང་ཞབས་ཀྱིས་ནང་དོན་རང་འགྲེལ་དུ། རྒྱུད་བླ་དང་ཐེག་བསྡུས་ཀྱི་ལུང་གིས་རིགས་ཀྱི་དབྱེ་བ་རྒྱས་པར་བཤད་ནས། ཡང་རྒྱས་འགྱུར་གྱི་རིགས་དེ་གསར་དུ་བྱུང་བ་སྙམ་དུ་ཁ་ཅིག་སེམས་ན་དེ་ལྟ་མ་ཡིན་ཏེ་ཞེས་སོགས་ཀྱིས་རང་བཞིན་གནས་རིགས་ཆོས་དབྱིངས་དང་། རྒྱས་འགྱུར་ཚོགས་བརྒྱད་དག་པའི་ཡེ་ཤེས་དེ་དབྱིངས་དང་ཡེ་ཤེིས་གཉིས་སུ་གསལ་བར་བསྟན་ནས་དེ་གཉིས་ཀྱང་། ཆུ་ཁམས་གསེར་དང་ནམ་མཁའ་རྣམས། །དག་པ་བཞིན་དུ་རྣམ་དག་འདོད། །ཅེས་དབུས་མཐའི་ལུང་གིས་རང་བཞིན་རྣམ་དག་ཏུ་སྒྲུབ་ཅིང་། གཞུང་ཆུང་གཉིས་ནས་ཀྱང་གསལ་བར་བསྟན་པ་བཞིན། རྗེ་བདུན་པས་ཀྱང་། ཡོན་ཏན་གྱི་ཆོས་དྲུག་ཅུ་རྩ་བཞི་དང་རྣམ་དབྱེར་མེད་པའི་དབྱིངས་སྟོང་ཉིད་ལ་རྣམ་མཆོག་གི་སྟོང་ཉིད་དུ་བཞེད་པ་དང་། སི་ཏུ་ཀུན་མཁྱེན་སོགས་ཀྱི་བཞེད་ཚུལ་བཀའ་བརྒྱུད་ཡོངས་ལ་གྲགས་པ་ལྟར་དང་། ཀྱེ་རྡོ་རྗེ་ལས། ངེས་པར་དངོས་པོ་ཐམས་ཅད་ཀྱི། །དག་པ་དེ་བཞིན་ཉིད་དུ་བརྗོད། །ཕྱེས་ནས་རེ་རེའི་དབྱེ་བ་ཡིས། །ལྷ་རྣམས་ཀྱིས་ནི་བརྗོད་པར་བྱ། །ཕུང་པོ་ལྔ་དང་དབང་པོ་དྲུག །སྐྱེ་མཆེད་དྲུག་དང་འབྱུང་ཆེན་ལྔ། །རང་བཞིན་གྱིས་ནི་རྣམ་པར་དག །ཉོན་མོངས་ཤེས་བྱའི་སྒྲིབ་སྦྱང་བྱ། །རང་རིག་བདག་ཉིད་དག་པ་ཉིད། །དག་པ་གཞན་གྱིས་རྣམ་གྲོལ་མིན། །ཞེས་གསུངས་པའི་དོན་རྒྱུད་གསུམ་ལ་དག་པ་གསུམ་གསུམ་སྦྱོར་ཏེ་འཆད་པའི་ཚུལ་ཡང་དོན་གྱིས་འདི་དང་གནད་གཅིག་སྟེ། རྗེ་བཙུན་རྩེ་མོས་མཛད་པའི་རྣམ་བཤད་ཉི་ཟེར་ལས། དེ་བཞིན་ཉིད་ལས་ནི་ཆོས་ཀྱི་སྐུའོ། །རང་རིག་པ་ལས་ནི་ལོངས་སྤྱོད་རྫོགས་པའོ། །ལྷ་སོ་སོ་ལས་ནི་སྤྲུལ་པའི་སྐུའོ། །ཡང་ན་དེ་བཞིན་ཉིད་ནི་དབྱིངས་ཡིན་ལ། རང་རིག་པ་ནི་ཡེ་ཤེས་ཡིན་པས། །དེ་གཉིས་ལས་ལྷ་སོ་སོའི་གཟུགས་ཀྱི་སྐུ་འབྱུང་ངོ་། །ཞེས་དང་། ཅི་གལ་ཏེ་དེ་ལྟར་འབྲས་བུ་ནི་ཆོས་སྐུ་དང་གཟུགས་སྐུ་དབྱེར་མེད་པ་ཡིན་ལ། ལམ་གྱི་དུས་སུའང་དབྱེར་མེད་ཡིན་མོད། རྒྱུའི་རྒྱུད་རང་བཞིན་གྱིས་རྣམ་པར་དག་པ་ཡིན་ནམ་མ་ཡིན། མ་ཡིན་ན་གྲོལ་བར་མི་འགྱུར་ལ། ཡིན་ན་ལམ་ལ་དོན་མེད་པར་འགྱུར་རོ་སྙམ་ན། དེ་ལ་རང་བཞིན་གྱིས་སངས་རྒྱས་ཀྱི་སྐུ་གནས་སོ་ཞེས་སྟོན་པ་ནི། ཞལ་ཕྱག་རྣམ་པའི་གཟུགས་ཅན་ཉིད། །སོགས་ཀྱིས་དེ་བཞིན་གཤེགས་པའི་གཟུགས་སྐུ་དང་། མཆོག་ཏུ་བདེ་བ་གཟུགས་མེད་པ། །སོགས་ཀྱིས། ཆོས་ཀྱི་སྐུ་སྟེ་དེ་གཉིས་ཀའང་། །འགྲོ་བ་ཀུན་ལ་ལྷན་ཅིག་སྐྱེས། །ཞེས་སེམས་ཅན་ལ་ལྷན་སྐྱེས་སུ་གནས་པ་དང་། འོན་ཀྱང་བག་ཆགས་ཕལ་ལས་སོ། །ཞེས་ད་ལྟ་གློ་བུར་གྱི་དྲི་མས་སྒྲིབ་པའི་དོན་དུ་གསུངས་པ་བཞིན། རྒྱུ་རྒྱུད་ཀྱི་དག་པ་གསུམ་གྱི་དབྱིངས་དེ་བཞིན་ཉིད་ཆོས་སྐུའི་བྲལ་རྒྱུ་རང་བཞིན་གནས་རིགས་དངོས་དང་། རང་རིག་པ་ཡེ་ཤེས་ལོངས་སྐུ་དང་། ལྷ་སྐུའི་དག་པ་སྤྲུལ་སྐུའི་བྲལ་རྒྱུ་ཡིན་པས་ཕྱི་མ་གཉིས་རྒྱས་འགྱུར་དང་དོན་གཅིག དེས་ན་རྒྱུ་རྒྱུད་ཀྱི་གསུམ་པོ་རང་བཞིན་གྱིས་དག་པས་སོལ་བ་ལ་དཀར་པོའི་ནུས་པ་མེད་པ་ལྟར་སྦྱང་དུ་མི་རུང་བ་མ་ཡིན་པ་དང་། དེ་བཞིན་ཉིད་ལྟ་བ། གཞན་གཉིས་བསྐྱེད་རྫོགས་བསྒོམ་པ་སྟེ་ལམ་རྒྱུད་ཀྱི་གསུམ་པོའང་གནས་ཚུལ་དང་མཐུན་པར་རང་བཞིན་གྱིས་དག་པས་མུ་སྟེགས་བྱེད་ཀྱི་ལམ་ལྟར་དྲི་མ་སྦྱོང་མི་ནུས་པ་མ་ཡིན་པ་དང་། འབྲས་རྒྱུད་ཀྱི་སྐུ་གསུམ་རང་བཞིན་གྱིས་དག་པས་སྤང་བ་སླར་མི་ལྡོག་པ་ཆུ་ཁམས་གསེར་སོགས་གོང་སྨོས་དབུས་མཐའི་ལུང་གིས་སྒྲུབ་སྟེ་རྗེ་བཙུན་གྲགས་པས་རྣམ་འགྲེལ་དག་ལྡན་དུ་གསུངས་པ་དང་། ས་པཎ་གྱིས་རང་བཞེད་མཐར་ཐུག་བསྟོད་འགྲེལ་དུ། སེམས་ཀྱི་ཆོས་ཉིད་རང་བཞིན་གྱིས་དག་ཀྱང་སེམས་ཀྱི་མཚན་ཉིད་ལ་གློ་བུར་གྱི་དྲི་མས་བསྒྲིབས་པའི་ཚུལ་དང་། དྲི་མ་དེ་གློ་བུར་བ་ཡིན་པས་སྦྱང་དུ་རུང་བ་དང་། དེ་བསལ་བས་སངས་རྒྱས་སུ་འགྱུར་ཚུལ། དེའི་ཚེ་ཆོས་ཉིད་ལ་ལྟོས་ནས་གནས་གྱུར་བ་མེད་པ་རིགས་ཚོགས་ཀྱི་དགོངས་པ་དང་། ཡོན་ཏན་སྣང་ཚུལ་ལ་ལྟོས་ནས་གནས་གྱུར་ཡོད་པ་བསྟོད་ཚོགས་ཀྱི་དགོངས་པ་སྟེ། དེ་གཉིས་གནད་ཀྱིས་མི་འགལ་བ་དང་། སངས་རྒྱས་ལ་ཡེ་ཤེས་མེད་པར་འདོད་པ་ཕྱོགས་སྔར་བཞག་ནས། རང་བཞེད་སངས་རྒྱས་ལ་ཡེ་ཤེས་མེད་པ་མ་ཡིན་པ་དང་། སྐུ་མེད་པ་མ་ཡིན་པ་དང་། དེ་གཉིས་དབྱེར་མེད་པར་གསུངས་པ་དང་། སྙེ་མོ་སྒོམ་ཆེན་གྱི་དྲིས་ལན་དུ། སེམས་སྟོང་པར་རྟོགས་པ་ལ་སྡེ་སྣོད་གསུམ་དང་རྒྱུད་སྡེ་བཞིར་བརྩི་མི་གཏུབ་ཉན་ཐོས་འགོག་པ་དང་མཚུངས། ཟུང་འཇུག་ཏུ་རྟོགས་པ་ལ་བརྩི་ན་བཞག་ཏུ་རུང་། སེམས་སྟོང་ཆ་རྐྱང་པར་དཀོན་མཆོག་གསུམ་མི་ཚང་། རིག་སྟོང་ཟུང་འཇུག་ལ་ས་བོན་ཚང་། ཟུང་འཇུག་གི་དོན་ལེགས་པར་རྟོགས་ན་མངོན་གྱུར་དུ་ཚང་བ་ཡིན། ཞེས་གསུངས་པས་མཚོན། སྤྲོས་བྲལ་དུ་གཏན་ལ་ཕབ་ནས་ཟུང་འཇུག་ཏུ་ཉམས་སུ་ལེན་པ། ཞེས་དང་། རྒྱུ་དུས་ཀྱི་ལྟ་བ་དུག་ཅན་དང་། འབྲས་དུས་ཀྱི་ལྟ་བ་དུག་མེད་ཅེས་སྔ་མ་ཐོས་བསམ་གྱིས་གཞལ་བའི་དཔྱད་སྟོང་སྤྲོས་བྲལ་ཙམ་སྟེ་དེས་གོ་མི་ཆོད་པར་ཕྱི་མ་བདེ་སྟོང་རིག་སྟོང་ཟུང་འཇུག་དབང་དང་རིམ་གཉིས་ལས་བྱུང་བ་སངས་རྒྱས་ཀྱི་སའི་ཡེ་ཤེས་དང་ངོ་བོ་གཅིག་པར་བཞེད་པ་སོགས། དཔལ་ལྡན་ས་སྐྱ་པ་རྣམས་ལ་ཡོངས་སུ་གྲགས་པ་དང་། གཞན་ཡང་བདག་ཉིད་ཆེན་པོ་ཙོང་ཁ་པས་ཀྱང་སྔགས་ཀྱི་ཚུལ་ཁྲིམས་རྣམ་བཤད་སོགས་སུ། ཆོས་ཉིད་རང་བཞིན་གྱིས་དག་པ་རང་བཞིན་མེད་པའི་སྟོང་ཉིད་སྤྲོས་བྲལ་དང་། ཆོས་ཅན་གཟུགས་སོགས་ཕུང་ལྔ་རྣམ་སྣང་སོགས་སངས་རྒྱས་ལྔའི་བདག་ཉིད་དེ་རང་བཞིན་དུ་གསུངས་པ་སོགས་དང་། ཁྱད་པར་ལམ་གྱི་གཙོ་བོ་རྣམ་གསུམ་དུ། གང་ཞིག་འཁོར་འདས་ཆོས་རྣམས་ཐམས་ཅད་ཀྱི། །རྒྱུ་འབྲས་ནམ་ཡང་བསླུ་བ་མེད་མཐོང་ཞིང་། །དམིགས་པའི་གཏད་སོ་གང་ཡིན་ཀུན་ཞིག་པ། །དེ་ཚེ་སངས་རྒྱས་དགྱེས་པའི་ལམ་ལ་ཞུགས། །སྣང་བ་རྟེན་འབྲེལ་བསླུ་བ་མེད་པ་དང་། །སྟོང་པ་ཁས་ལེན་བྲལ་བའི་གོ་བ་གཉིས། །ཇི་སྲིད་སོ་སོར་གནས་པ་དེ་སྲིད་དུ། །ད་དུང་ཐུབ་པའི་དགོངས་པ་རྟོགས་པ་མེད། །ནམ་ཞིག་རེས་འཇོག་མེད་པར་ཅིག་ཅར་དུ། །རྟེན་འབྲེལ་མི་བསླུར་མཐོང་བ་ཙམ་ཉིད་ནས། །ངེས་ཤེས་ཡུལ་གྱི་འཛིན་སྟངས་ཀུན་འཇིག་ན། །དེ་ཚེ་ལྟ་བའི་དཔྱད་པ་རྫོགས་པ་ལགས། །ཞེས་སྣང་སྟོང་ཟུང་འཇུག་རྣམ་གྲངས་མིན་པའི་དོན་དམ་ཉིད་རྩལ་འདོན་མཛད་པ་དང་། ཀུན་མཁྱེན་དོལ་པོ་སངས་རྒྱས་ཀྱིས་རི་ཆོས་ངེས་དོན་རྒྱ་མཚོར་གསུངས་པ་སོགས་ཀྱང་། གནས་སྐབས་སུ་སྣང་སྟོང་གཉིས་རྩལ་འདོན་ཆེ་ཆུང་དང་། བདེན་གཉིས་འཇོག་མཚམས་ཐ་དད་པ་སོགས་གྲུབ་མཐའི་ཞལ་བཞེས་ཕྲ་མོའི་ཁྱད་པར་ཙམ་ལས། དོན་ལ་བདེན་གཉིས་རོ་མཉམ་རྣམ་གྲངས་མིན་པའི་དོན་དམ་མཐར་ཐུག་བློ་བྲལ་ཡེ་ཤེས་ཆེན་པོའི་ཀློང་དུ། ཆོས་ཉིད་ཀྱི་བདེན་པ་གཟིགས་པའི་འཕགས་ཆེན་རྣམས་ཀྱི་དགོངས་པའི་གསང་མཛོད་ཆུ་དང་ལན་ཚྭ་བཞིན་དབྱེར་མེད་རོ་མཉམ་པས་ན་ཚུར་མཐོང་བྱིས་བློས་གཞལ་བྱའི་ཡུལ་མིན་ཏེ། མགོན་པོ་ཨ་ཏི་ཤས། གང་ཕྱིར་དེ་ནི་རྒྱ་མཚོ་ལྟར། །སྒྲ་དང་དཔེ་དང་བློ་རྣམས་ཀྱིས། །གཏིང་དང་ཕ་རོལ་མི་རྙེད་པས། །དེ་ཕྱིར་རབ་ཏུ་ཟབ་པ་ཉིད། །ཅེས་དང་། ཆོས་ལ་སྐུར་བ་མི་འདེབས་ཤིང་། །གང་མོས་དེ་ལ་འདུན་པར་བྱ། །ཞེས་དང་། གཞན་ཡང་བདེ་མཆོག་ཉུང་ངུའི་རྒྱུད་དང་བྱམས་གཞུང་དང་། རིན་ཆེན་ཕྲེང་བ་སོགས་ལས་གསུངས་པའི་དོན་རྣམས་དྲན་པར་བྱས་ནས་བདག་ཉིད་ཀྱིས་བདག་ཉིད་སྲུང་བར་བྱེད་པ་འདི་ཤིན་ཏུ་གལ་ཆེ་བར་མངོན་ནོ། །དེའི་ཕྱིར་ཚིག་སྤྱི་སྦས་མཐར་གང་ལྟར་བཤད་ཀྱང་མི་འགལ་བས། དོན་གནད་མདོ་ཙམ་སྨོས་ན། སློབ་དཔོན་ལེགས་ལྡན་གྱིས་མཛད་པའི་དབུ་མའི་བསྟན་བཅོས་རིན་ཆེན་སྒྲོན་མར། དབུ་མ་ལ་ཕྲ་རགས་གཉིས་སུ་གསུངས་པ་ལྟར། རགས་པ་ཕྱིའི་དབུ་མ་ཐལ་རང་གི་སྐབས་སུ། འཁོར་ལོ་བར་བའི་བསྟན་བྱའི་གཙོ་བོ་གནས་སྐབས་སུ་ཆོས་ཐམས་ཅད་རང་བཞིན་གྱིས་མ་གྲུབ་པ་དང་། ཀུན་རྫོབ་རྟེན་འབྱུང་གི་སྣང་བ་གཉིས་མི་འགལ་བར་གཏན་ལ་ཕབ་ནས། །མཐར་ཐུག་རྣམ་གྲངས་མ་ཡིན་པའི་དོན་དམ་ལ་སྦྱོར་བར་མཛད་པ་ཡིན་ལ། ཕྲ་བ་ནང་གི་དབུ་མའི་སྐབས་དེ་ཉིད་གཞིར་བཞག་གི་སྟེང་དུ། འཁོར་ལོ་ཐ་མའི་བསྟན་དོན་རྟོགས་བྱ་ལྟ་བས་གཏན་ལ་འབེབས་པའི་ཡུལ་ཆོས་དབྱིངས་དེ་ཡང་མེད་དགག་ཕྱོགས་གཅིག་པའི་སྟོང་རྐྱང་ཙམ་མིན་པར་སྐུ་དང་ཡེ་ཤེས་ཀྱིས་བརྒྱན་པའི་སྣང་བ་དང་ཐ་མི་དད་པའི་རང་བྱུང་ཟག་མེད་འདུས་མ་བྱས་སུ་སྒྲུབ་པའི་ཁྱད་པར་ཙམ་སྟེ། གཉིས་ཀས་མཉམ་བཞག་ཏུ་བསལ་བཞག་དང་བྲལ་བའི་ཆོས་དབྱིངས་ལ་མཉམ་པར་འཇོག་པ་སྟེ་དེའི་ངོར་གཟུང་འཛིན་མཚན་མའི་སྤྲོས་པ་མཐའ་དག་འགོག་པ་ལ་ཁྱད་པར་མེད་ལ། རྗེས་ཐོབ་ཏུ་སྔ་མས་སྟོང་ཉིད་ལ་དོན་དམ་དང་། སྣང་བ་ལ་ཀུན་རྫོབ་ཏུ་བཞག་སྟེ་བདེན་གཉིས་དབྱེ་བར་མཛད་ཅིང་། ཕྱི་མས་གནས་སྣང་མཐུན་མི་མཐུན་ལ་བདེན་གཉིས་འཇོག་པའི་ཁྱད་པར་རོ། །དེ་ཡང་སྔ་མ་གཏན་ལ་མ་ཕེབས་ན་ཕྱི་མ་ཉིད་གཏན་ལ་འབེབས་མི་ནུས་པས། ཐོག་མར་དབུ་མ་རིགས་ཚོགས་ཀྱི་དགོངས་པ་ཐལ་འགྱུར་བ་ལྟར། ཆོས་རྣམས་མ་སྐྱེས་པ། མི་འགག་པ། གཟོད་མ་ནས་ཞི་བ། རང་བཞིན་གྱིས་མྱ་ངན་ལས་འདས་པ། ཟུང་འཇུག་འཕགས་པའི་ཡེ་ཤེས་ཀྱི་སྤྱོད་ཡུལ་དུ་གྱུར་པའི་མཐར་ཐུག་རྣམ་གྲངས་མིན་པའི་དོན་དམ་ཉིད་གཏན་ལ་ཕེབས་པར་བྱ་ཞིང་། དེ་ཕེབས་པ་ན་བྱམས་གཞུང་དང་བསྟོད་ཚོགས་སོགས་ཀྱི་དགོངས་པ་ལྟར་སྐུ་དང་ཡེ་ཤེས་སོགས་ཟག་པ་མེད་པའི་ཆོས་རྣམས་ཀྱང་ཆོས་ཀྱི་དབྱིངས་དེ་དང་ངོ་བོ་ཐ་མི་དད་པའི་ཕྱིར་རང་བྱུང་འདུས་མ་བྱས་སུ་མི་འགྲུབ་པའི་གནས་མེད་ལ། ཆོས་དབྱིངས་སྣང་སྟོང་ཟུང་འཇུག་མི་འགལ་བའང་གོང་གི་བདེན་གཉིས་དཔྱོད་པའི་མཐར་ཐུག་དཔྱོད་རིགས་ཀྱིས་གྲུབ། དེ་མ་གྲུབ་ན་ཐལ་འགྱུར་རང་ཡང་མི་འགྲུབ། དེ་ཉིད་ད་ལྟ་སེམས་ཅན་ལ་མི་སྣང་ཞིང་སངས་རྒྱས་ཀྱི་སར་མངོན་གྱུར་དུ་སྣང་བ་དང་། ད་ལྟའི་བག་ཆགས་འཁྲུལ་སྣང་འདི་སེམས་ཅན་ལ་སྣང་སངས་རྒྱས་དུས་མི་སྣང་བ་གཉིས་གཉིད་དུ་སོང་མ་སོང་གི་སྣང་བ་དང་། མ་སད་པ་དང་སད་དུས་ཀྱི་རྨི་ལམ་བཞིན་ཐ་སྙད་དུ་ཚད་མས་གྲུབ་པས་བདེན་གཉིས་འཇོག་མཚམས་ཕྱི་མ་འདི་ཡང་བདེ་བླག་ཏུ་ཤེས་ནུས། དེ་ལྟར་བདེན་མི་བདེན་སོགས་སུ་བཞག་པ་འདི་ཐ་དཔྱོད་ངོར་ཡིན་པས་དོན་དཔྱོད་ངོར་བདེན་གྲུབ་ཏུ་སྒྲུབ་པ་མིན་པའི་གནད་གཞན་སྟོང་ཁས་ལེན་དུ་གསུངས་པ་ལྟར་ཤེས་པར་བྱ་ལ། དེ་ལྟའི་ཚུལ་གྱིས་ཆོས་དབྱིངས་སྣང་སྟོང་ཟུང་འཇུག་རྣམ་གྲངས་མིན་པའི་དོན་དམ་འདི་ཉིད་མཐར་ཐུག་ཐེག་གཅིག་ཏུ་སྒྲུབ་པའི་གཞི་ཡིན་པས། འདི་ཉིད་སྔགས་སུ་ཨེ་ཝཾ་དང་། རྒྱུ་ཡི་རྒྱུད་དང་། རྡོ་རྗེའི་བདག་དང་། ཕྱག་རྒྱ་ཆེན་མོ་དང་། རྣམ་ཀུན་མཆོག་ལྡན་དང་། གཉུག་མའི་སེམས་དང་། རང་བྱུང་གི་ཡེ་ཤེས་སོགས་སུ་གསུངས་པ་ཡིན་པས། དེ་ལྟར་ཤེས་ན་འདི་ཉི ད་ངེས་དོན་མཐར་ཐུག་ཏུ་གྲུབ་པ་ལ་བསྙོན་དུ་མེད་པའི་ཕྱིར། ཚུལ་འདི་ནི་སྔགས་ཕྱི་རྒྱུད་རྣམས་སུ། བདག་གི་དེ་ཁོ་ན་ཉིད་དང་། དོན་དམ་མཚན་མ་མེད་པའི་བྱིན་རླབས་རྡོ་རྗེ་དབྱིངས་ཀྱི་ལྷ་དང་། ནང་པར་མ་ཧཱའི་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བ་དང་། ཨ་ནུའི་དབྱིངས་ཡེ་དབྱེར་མེད་དང་། མཐར་ཐུག་རྫོགས་ཆེན་གྱི་ཀ་དག་ལྷུན་གྲུབ་ཟུང་འཇུག་གདོད་མ་གཞི་ཡི་བཞུགས་ཚུལ་གསུངས་པ་རྣམས་དང་དོན་གཅིག་པས། ཐོག་མར་འདི་ཉིད་གཏན་ལ་མ་ཕེབས་ན་ཕྱི་མ་ཕྱི་མ་རྣམས་གཏན་ལ་ཕེབས་པར་མི་འགྱུར་ཞིང་། འདི་ཉིད་ལེགས་པར་གོ་ན་ཕྱི་མ་རྣམས་ཀྱང་རིམ་བཞིན་གཏན་ལ་འབེབས་པ་ལ་དཀའ་བ་མེད་པའི་རྣམ་དཔྱོད་ཀྱི་མཐུ་ཐོབ་པར་འགྱུར་བས། ཚུལ་འདི་ལྟར་ཤེས་པ་ཅིས་ཀྱང་གལ་ཆེའོ། །དེའི་ཕྱིར་དོན་གྱི་གནད་འདི་ལ། ཀུན་མཁྱེན་ཆོས་ཀྱི་རྒྱལ་པོ་དང་། རྒྱལ་དབང་རང་བྱུང་ཞབས། ཀུན་མཁྱེན་དོལ་པོ་གསུམ་དགོངས་པ་མཐུན་པར་སྔོན་གྱི་དམ་པ་རྣམས་བཞེད་པ་ཉིད་དོན་ལ་གནས་པར་མཐོང་སྟེ། གསུམ་ཀས་འཁོར་ལོ་ཐ་མ་ངེས་དོན་མཐར་ཐུག་ཏུ་བཞེད་ཅིང་། སྔ་མ་གཉིས་ཀྱི་གསུང་ཅི་རིགས་སྔར་དྲངས་པས་ཤེས་ལ། ཀུན་མཁྱེན་དོལ་པོས་རི་ཆོས་ངེས་དོན་རྒྱ་མཚོར། དྲི་མ་སྦྱང་བའི་གཞི་བདེ་གཤེགས་སྙིང་པོ། དྲི་མ་སྦྱོང་བའི་ལམ་རྡོ་རྗེའི་རྣལ་འབྱོར། དྲི་མ་དག་པའི་གཞི་བྲལ་འབྲས་ཆོས་སྐུ་ཞེས་དང་། གང་ཞིག་ཆོས་རྣམས་ཀུན་གྱིས་དབེན་ཡང་ཟག་མེད་བགྲང་ཡས་ཆོས་ཀྱི་སྐུ། །ཆོས་དང་གང་ཟག་བདག་དང་བྲལ་ཡང་དེ་བཞིན་ཉིད་བདག་དག་པའི་བདག །ཡོད་མེད་རྟག་ཆད་མཐའ་ལས་འདས་ཀྱང་རྟག་བརྟན་གཡུང་དྲུང་ཉིད་དུ་བཞུགས། །དངོས་རྣམས་ཀུན་གྱི་རང་བཞིན་མེད་ཀྱང་རང་བཞིན་འོད་གསལ་ལ་བཏུད་ནས། །ཞེས་མཆོད་བརྗོད་དུ་གསུངས་པ་ལྟར། དོན་དམ་པ་སྟོང་པ་ཉིད་དང་བདག་མེད་པ་དང་། མཐའ་དང་བྲལ་བ་དང་། རང་བཞིན་མེད་པའི་སྤྲོས་བྲལ་མཉམ་པ་ཆེན་པོར་གཏན་ལ་ཕབ་ནས། དེ་ཉིད་ཟག་མེད་ཀྱི་ཡོན་ཏན་གྱི་ཆོས་རྣམས་དང་དབྱེར་མེད་པ་དང་། དེ་ལས་འཁོར་འདས་ཀྱི་ཆོས་ཀུན་འབྱུང་བའི་གཞིར་གྱུར་པ་དང་། རང་བཞིན་འགྱུར་མེད་ཀྱི་ཆ་ནས་ཆོས་ཀྱི་སྐུ་དང་དག་པའི་བདག་སོགས་ཀྱི་སྒྲས་ཐ་སྙད་དུ་བསྟན་པ་དང་། ཁྱད་པར་རིགས་ཀྱི་སྐབས། སྡུད་པའི་ལུང་། འདས་པའི་དེ་བཞིན་ཉིད་གང་མ་བྱོན་དེ་བཞིན་ཉིད། །ད་ལྟར་དེ་བཞིན་ཉིད་གང་དགྲ་བཅོམ་དེ་བཞིན་ཉིད། །ཆོས་ཀུན་དེ་བཞིན་ཉིད་གང་རྒྱལ་བའི་དེ་བཞིན་ཉིད། །ཆོས་ཀྱི་དེ་བཞིན་ཉིད་འདི་ཐམས་ཅད་བྱེ་བྲག་མེད། །ཅེས་དང་། འདི་ནི་ཆོས་གཏེར་མཆོག་དང་ཆོས་མཛོད་དམ་པ་ཡིན། །སངས་རྒྱས་རིགས་ཡིན་འགྲོ་བའི་བདེ་དང་སྐྱིད་པའི་མཛོད། །འདས་དང་མ་བྱོན་ཕྱོགས་བཅུའི་འཇིག་རྟེན་མགོན་པོ་རྣམས། །དེ་དག་འདི་ལས་འཁྲུངས་ཀྱང་ཆོས་དབྱིངས་ཟད་མི་འགྱུར། །ཞེས་དྲངས་ཏེ་གཞི་འབྲས་ངོ་བོ་དབྱེར་མེད་པའི་ཤེར་ཕྱིན་དང་འཁོར་ལོ་ཐ་མར་རང་བཞིན་གནས་རིགས་སུ་གསུངས་པ་དོན་གཅིག་པར་བཞེད་པ་དང་། དཔལ་ལྡན་ཟླ་བས་མཛད་པའི་སྒྲོན་གསལ་དུ། རྒྱལ་བ་ཀུན་གྱི་གནས་ནི་སེམས་ཅན་ཐམས་ཅད་དེ་དེ་བཞིན་གཤེགས་པའི་སྙིང་པོ་ཡིན་པའི་ཕྱིར་རོ། །ཞེས་གསུངས་པས་མཚོན་མཐར་ཐུག་རྒྱུད་སྡེ་རྣམས་སུ་གསུངས་པའི་སྟོང་ཉིད་སྙིང་རྗེ་དབྱེར་མེད་པའི་རྡོ་རྗེའི་རིགས་ཆེན་པོ་སྟེ་དེ་གཉིས་དབྱེར་མེད་པ་ལ་སྦྱང་གཞིར་བཞག་ནས། དེ་སྦྱོང་བའི་ལམ། རྒྱལ་བའི་ས་བོན་བཟང་པོ་ལས་བྱུང་བསོད་ནམས་ཚོགས་ལས་གང་འཁྲུངས་པ། །ཞེས་དང་། གློ་བུར་གྱི་དྲི་མ་མཐའ་དག་བསལ་བའི་ཆེད་དུ་རྣམ་པར་དག་པའི་ཡེ་ཤེས་ཀྱི་ཚོགས་འཁོར་དང་བཅས་པ་སྒྲུབ་པ་ལ་བརྩོན་པ་གང་ཡིན་པ་ཞེས་ཐུན་མོང་དུ་སྐུ་གཉིས་ལ་སྒྲིབ་བྱེད་ཀྱི་དྲི་མ་སེལ་བའི་ཕྱིར་ལམ་ཚོགས་གཉིས་ལ་སློབ་དགོས་པ་དང་། ཐུན་མིན་རྡོ་རྗེའི་རྣལ་འབྱོར་སོགས་ལ་བརྟེན་ནས་ཟུང་འཇུག་གཉིས་སུ་མེད་པའི་ཡེ་ཤེས་ཉིད་རྩལ་འདོན་དུ་མཛད་དེ་རང་བཞེད་སྙིང་པོ་དྲིལ་ཏེ་གསུངས་པ། འདིར་གཉིས་མེད་ཡེ་ཤེས་ཞེས་པ་ལ། གང་དང་གང་གཉིས་སུ་མེད་ན། ཆོས་ཀྱི་དབྱིངས་དང་རང་བྱུང་གི་ཡེ་ཤེས་གཅིག་ཏུ་འདྲེས་ཤིང་རོ་མཉམ་པ་སྟེ། དེ་ཉིད་མཐར་ཐུག་གི་སྟོང་ཉིད་སྙིང་རྗེ་དང་། ཐབས་དང་ཤེས་རབ་དང་། བདེ་སྟོང་དབྱེར་མེད་ཟུང་འཇུག་རོ་གཅིག་པ་ཡང་ཡིན་ལ། མཐར་ཐུག་གནས་ལུགས་ཀྱི་ཤེས་དང་ཤེས་བྱ་གཅིག་པ་དང་། དབྱིངས་རིག་དབྱེར་མེད་རོ་གཅིག་པ་ཡང་ཡིན་ནོ། །དེ་ལྟ་བུའི་ཤེར་ཕྱིན་མཚན་ཉིད་པ་དེ་ནི། གཞི་ཤེར་ཕྱིན་དང་། འབྲས་བུའི་ཤེར་ཕྱིན་མཐར་ཐུག་པ་སྟེ་ངོ་བོ་དབྱེར་མེད་པའི་དེ་བཞིན་ཉིད་དོ། །དེ་མངོན་དུ་བྱེད་པའི་ལམ་དང་། དེ་སྟོན་པའི་གཞུང་ལ་ནི་བཏགས་པ་ཙམ་སྟེ། དེ་བཞིན་དུ་དབུ་མ་ཆེན་པོ་དང་། ཕྱག་རྒྱ་ཆེན་པོ་དང་། ལྷན་ཅིག་སྐྱེས་སྦྱོར་དང་། སངས་རྒྱས་ཐམས་ཅད་དང་མཉམ་པར་སྦྱོར་བ་དང་། རྡོ་རྗེའི་རྣལ་འབྱོར་དང་། ཤིན་ཏུ་རྣལ་འབྱོར་དང་། བདེ་དགྱེས་དང་། གསང་འདུས་དང་། དུས་འཁོར་ལ་སོགས་པ། དེ་བཞིན་ཉིད་ཀྱི་རྣམ་གྲངས་སུ་གཏོགས་པ་ཇི་སྙེད་གསུངས་པ་རྣམས་ལ་ཡང་གཞུང་དང་ལམ་གང་ཡིན་པ་བཏགས་པ་དང་། གཞི་དང་འབྲས་བུ་ངོ་བོ་དབྱེར་མེད་གང་ཡིན་པ་ཐམས་ཅད་མཚན་ཉིད་པ་ཉིད་དུ་དོན་ལ་གནས་ཏེ། འདི་ནི་མདོ་རྒྱུད་ཟབ་མོ་མཐར་ཐུག་པ་ཐམས་ཅད་ཀྱི་སྤྱི་འགྲེལ་ཆེན་པོ་དང་། རྡོ་རྗེའི་ཚིག་ཏུ་གསུངས་པ་ཐམས་ཅད་ཀྱི་མདུད་འགྲོལ་ཆེན་པོ་དང་། དགོངས་ཏེ་གསུངས་པའམ་དགོངས་ཆེན་ཟབ་མོ་ཐམས་ཅད་ཀྱི་དོན་འགྲེལ་ཆེན་པོ་ཡིན། འོན་ཀྱང་དེ་དག་དེ་ལྟར་ཚུལ་བཞིན་དུ་རྟོགས་པ་ལ། སྐྱོ་མ་སྔ་བཙན་གྱི་བག་ཆགས་སྤངས་ནས་རྟོན་པ་བཞི་དང་། ས་བཅུ་པ་རྣམས་ཀྱི་མན་ངག་ཟབ་མོ་ཉམས་སུ་མྱོང་བའི་སྒྲོན་མེ་བཟང་པོ་ལ་བརྟེན་དགོས་སོ། །དེའི་ཕྱིར་འཁོར་ལོ་ཕྱི་མ་གཉིས་དང་། རྡོ་རྗེ་ཐེག་པ་དོན་གཅིག་མོད་ཀྱི་ཉམས་སུ་ལེན་པ་ན། ལ་ཟློ་བ་ཆོས་ཉིད་ཟབ་མོ་ལ་འཁོར་ལོ་བར་པ་དང་མཐུན་པར་རྟོག་མེད་སྤྲོས་བྲལ་དུ་མཉམ་པར་བཞག་ནས། རྗེས་ཐོབ་ཤན་འབྱེད་པའི་ཚེ། ཆོས་རྣམས་ལ་ཡང་དག་པར་སོ་སོར་རྟོག་པ་ན་འཁོར་ལོ་ཐ་མ་དང་། རྡོ་རྗེ་ཐེག་པ་ལས་གསུངས་པ་བཞིན་ལེགས་པར་རྣམ་པར་ཕྱེ་སྟེ་ངོ་སྤྲད་ན་ཐེག་པ་ཆེན་པོའི་གསུང་རབ་ཐམས་ཅད་ཀྱི་དོན་ཟབ་མོ་ཉམས་སུ་ལེན་པ་ཚང་ལ་མ་ནོར་ཞིང་ཡོངས་སུ་དག་པར་འགྱུར་རོ། །ཞེས་གསུངས་ཏེ། དོན་དམ་པར་ཆོས་དབྱིངས་ཟད་འཕེལ་མེད་པ་དང་། ཀུན་རྫོབ་གློ་བུར་གྱི་དྲི་མའང་དོན་ལ་ཡོད་མ་མྱོང་བས་ཟད་འཕེལ་མེད་པའི་ཆོས་ཉིད་མཉམ་པ་ཆེན་པོ་རྒྱལ་བའི་ཡུམ་གྱི་དགོངས་དོན་སྒྲ་ཇི་བཞིན་པར་བཞེད་པ་དང་། ཡང་འབྲས་བུའི་སྐབས་སུ། འདིར་གཞི་འབྲས་ངོ་བོ་དབྱེར་མེད་ཅེས་པའང་དོན་དམ་ཆོས་སྐུའི་དབང་དུ་བྱས་ཀྱི་ཀུན་རྫོབ་གཟུགས་སྐུའི་ནི་མ་ཡིན་ལ། ལམ་མི་དགོས་པ་ཡང་མ་ཡིན་ཏེ། མཉམ་བཞག་རྣམ་པར་མི་རྟོག་པའི་ཤེས་རབ་གང་ཡིན་པ་ཡེ་ཤེས་ཀྱི་ཚོགས་ཀྱིས་ཆོས་སྐུ་གདོད་ནས་བཞུགས་པའི་དྲི་མ་བྲལ་བར་བྱེད་ཅིང་། རྗེས་ཐོབ་སྒྱུ་མ་ལྟ་བུར་རྟོགས་པའི་ཡེ་ཤེས་དང་ལྡན་པ་བསོད་ནམས་ཀྱི་ཚོགས་ཀྱིས་གཞན་དོན་བརྡའི་སྐུ་བསྐྱེད་པའི་ཕྱིར་རོ། །ཞེས་གསུངས་ཏེ་རྒྱུད་བླའི་ལུང་སོགས་དྲངས་ནས་དེ་ལྟར་ལེགས་པར་ཤན་ཕྱེས་འདུག་པས། ལྟ་བ་བཀའ་རྟགས་ཀྱི་ཕྱག་རྒྱ་དང་འགལ་མིན་དང་། སྤྱོད་ཕྱོགས་སྤངས་པའི་ཧྭ་ཤང་གི་ལུགས་སུ་འགྱུར་མིན་སོགས་དཔྱད་པ་ནི་གཞི་མེད་པའི་སྐུར་འདེབས་ཙམ་སྟེ། བློ་དང་ལྡན་པ་རྣམས་ཀྱིས་འདིའི་ལུང་དོན་ལ་གཟུ་བོར་དཔྱད་པས་ཤེས་ནུས་སོ། །དེས་ན་ལེགས་པར་བརྟགས་ན། རགས་པ་ཕྱིའམ་ཤེས་རབ་རྒྱུའི་དབུ་མ་ལ་བརྟེན་ནས་བདེན་གཉིས་ཀྱི་མཚན་ཉིད་ལེགས་པར་ཕྱེས་ཏེ་བདག་མེད་གཉིས་ཀྱི་དོན་གཏན་ལ་ཕབ་ནས་ངེས་པའི་ཤེས་པ་ཐེ་ཚོམ་གྱི་སྨག་དང་བྲལ་བ་སྐྱེས་པ་ན། མཉམ་བཞག་སྒོམ་པའི་ཚེ་ཕྲ་བ་ནང་ངམ་ཟུང་འཇུག་འབྲས་བུའི་དབུ་མ་གཉིས་མེད་ཡེ་ཤེས་ཆེན་པོའི་དོན་ལ་རིམ་གྱིས་སྦྱོར་ཞིང་གོམས་པར་བྱེད་པ་ལ། ངེས་དོན་གྱི་དབུ་མ་རྣམ་གཉིས་མཐར་ཐུག་གི་དགོངས་པར་མི་མཐུན་པ་ཅིའང་མེད་དེ། ཐལ་འགྱུར་པས་བློ་གཉིས་སྣང་ངམ་རྣམ་ཤེས་ཀྱི་སྤྱོད་ཡུལ་དུ་གྱུར་པའི་རྣམ་གྲངས་པའི་དོན་དམ་ནི་གནས་སྐབས་སུ་འཇུག་པའི་སྒོ་ཙམ་ལས་མཐར་ཐུག་ཏུ་མི་བཞེད་ལ། སོ་སོ་རང་རིག་ཡེ་ཤེས་དམ་པའི་སྤྱོད་ཡུལ་དུ་གྱུར་པའི་ཟུང་འཇུག་རྣམ་གྲངས་མ་ཡིན་པའི་དོན་དམ་སྨྲ་བསམ་བརྗོད་མེད་ཤེས་རབ་ཕར་ཕྱིན་མཚན་ཉིད་པ་ཉིད། དམ་པའི་དོན་གྱི་བདེན་པ་གཅིག་པུར་གསུངས་ལ། དེ་བཞིན་གཞན་སྟོང་པས་ཀྱང་ཐ་དཔྱོད་ངོར། རྣམ་ཤེས་ཡུལ་དང་བཅས་པ་ནི་བསླུ་བ་བརྫུན་པ་ཀུན་རྫོབ་གློག་དང་སྤྲིན་ལྟ་བུ་སྟེ་དེའི་ངོར་མི་བདེན་ལ། ཡེ་ཤེས་ཡུལ་དང་བཅས་པ་ནི་རྟག་པ་བརྟན་པ་འཕོ་འགྱུར་མེད་པས་བསལ་བཞག་དང་བྲལ་བའི་ཆོས་ཉིད་ནི་མཐར་ཐུག་མི་བསླུ་བའི་དབང་གིས་དོན་དམ་བདེན་པར་བཞག་ཅིང་སྒོམ་པས་ན་དོན་གྱིས་གནད་གཅིག་ཅིང་། གྲུབ་མཐའི་ཁས་ལེན་ཡོད་མེད་ཀྱང་། རང་ལུགས་ཀུན་མཁྱེན་ཆེན་པོའི་བཞེད་པ། ཐེག་ཆེན་འཕགས་པའི་གཉམ་བཞག་གི་ཡེ་ཤེས་སམ་དོན་དམ་ཉིད་ཡུལ་དུ་བྱེད་པའི་ཚེ་ན། དེའི་ངོར་མེད་དགག་དང་མ་ཡིན་དགག་གི་འཛིན་སྟངས་སོགས་སྤྲོས་པ་གང་ཡང་ཡོད་མི་སྲིད་པའི་ཕྱིར། ཟུང་འཇུག་སྤྲོས་བྲལ་མཉམ་པ་ཆེན་པོའི་ངོར་གྲུབ་མཐའི་ཁས་ལེན་གང་ཡང་བྱར་མེད་ལ། རྗེས་ཐོབ་ཐ་སྙད་ཡུལ་དུ་བྱེད་པའི་ཚེ་གཞི་ལམ་འབྲས་བུའི་རྣམ་བཞག་སོགས་ཚད་མའི་ལུང་ལས་ཇི་སྐད་གསུངས་པ་ལྟར་ཤན་ཕྱེས་ཏེ་གདོན་མི་ཟ་བར་ཁས་ལེན་པར་གསུངས་པའི་གནད་ཀྱང་གཉིས་ཀར་མི་འགལ་ཏེ། གཉིས་ཀས་དོན་དཔྱོད་དམ་མཉམ་བཞག་གི་ངོར་ཡོད་མེད་སོགས་ཀྱི་སྤྲོས་པའི་མཚན་རྟོག་མཐའ་དག་བཀག་ནས་བསལ་བཞག་དང་བྲལ་བའི་སྤྲོས་བྲལ་མཉམ་པ་ཆེན་པོར་ལ་བཟླ་ཞིང་མཉམ་པར་འཇོག་པ་དང་། རྗེས་ཐོབ་ཀུན་རྫོབ་ཐ་དཔྱོད་ངོར་རང་རང་གི་གྲུབ་མཐའི་ཞལ་བཞེས་ཀྱི་བདེན་གཉིས་སོ་སོར་ཕྱེས་ཏེ་ཁས་ལེན་པའི་ཕྱིར་ནའོ། དེ་བས་ན་དོན་ལ་རྟོན་པར་བྱ་ཡི། ཚིག་ཙམ་གྱི་རྗེས་སུ་འབྲངས་ཏེ། དགག་སྒྲུབ་ཀྱི་སྤྲོས་པས་ངལ་བར་མི་བྱའོ། །དེས་ན་སྣང་སྟོང་གང་རུང་རེའི་ཕྱོགས་སུ་ཞེན་ཅིང་བཟུང་བས་ནི་མཐར་འཛིན་གྱི་ལྟ་བ་ངན་པ་བཟློག་མི་ནུས་པས། ཆོས་དབྱིངས་སྣང་སྟོང་ཟུང་འཇུག་མཐར་ཐུག་རྣམ་གྲངས་མ་ཡིན་པའི་དོན་དམ་སྲིད་ཞི་མཉམ་ཉིད་དུ་ལེགས་པར་གཏན་ལ་འབེབས་དགོས་ཤིང་། དེ་ཉིད་གཏན་ལ་འབེབས་པའི་ཚུལ་ཡང་། ཡིད་བཞིན་མཛོད་ཀྱི་ལེའུ་བཅོ་བརྒྱད་པར་གསུངས་པ་ལྟར། ཐ་སྙད་དུ་སྣང་བ་ཀུན་རྫོབ་ཀྱི་ཆོས་ཀུན་དོན་ལ་མེད་ཀྱང་བག་ཆགས་འཁྲུལ་པའི་དབང་གིས་སྔོན་མེད་ཕྱིས་མེད་པར་འདིར་མེད་བཞིན་སྣང་བའི་འཁྲུལ་སྣང་སྟོང་གཟུགས་ངྷ་དུ་རས་མྱོས་པའི་མིག་ལ་སྐྲ་ཤད་འཛག་པ་སོགས་སུ་སྣང་བ་བཞིན་དོན་ལ་ཡོད་མ་མྱོང་བས་སྣང་སྟོང་ཐ་དད་དུ་དབྱེ་བའི་གཞི་ཟད་ལ། དོན་དམ་རང་བཞིན་གྱིས་འོད་གསལ་བའི་སྐུ་དང་ཡེ་ཤེས་སོགས་ཀྱང་ཟག་པ་མེད་པའི་དབྱིངས་དང་སོ་སོ་མ་ཡིན་ཐ་མི་དད་པའི་རང་བཞིན་ཡེ་ནས་མཉམ་པ་ཉིད་དུས་གསུམ་འཕོ་འགྱུར་དང་བྲལ་བས་ན་སྣང་སྟོང་ཐ་དད་དུ་དབྱེར་མེད་པའི་ཕྱིར། བློས་བཏགས་པའི་བདེན་པ་གཉིས་ཀྱང་མིང་ཙམ་ཚིག་ཙམ་སྟེ་དོན་ལ་རང་བཞིན་གྱིས་མ་གྲུབ་པའི་ཕྱིར་དབྱེར་མེད་རྣམ་དག་ཆེན་པོ་སྲིད་ཞི་མཉམ་ཉིད་དུ་ཤེས་པར་བྱ་སྟེ། ཀུན་རྫོབ་རྣམ་ཆད་རྣམ་དབྱེའི་ཡུལ་འདས་པས། །བཏགས་པའི་བདེན་གཉིས་འདས་ཕྱིར་སྤྲོས་ཀུན་ཞི། །བདེན་པ་དབྱེར་མེད་གྲུབ་དང་མ་གྲུབ་མེད། །དབྱིངས་ལ་སྣང་སྟོང་རང་བཞིན་གཉིས་མེད་པས། །བདེན་པ་དེ་ཡང་དབྱེར་མེད་ཅེས་སུ་བརྗོད། །ཅེས་སོ། །འདི་ལ་ཐ་སྙད་པའི་ཀུན་ཏུ་ཚད་མ་ལ་བརྟེན་ནས་གནས་སྣང་གི་དབང་གིས་བདེན་པ་གཉིས་སུ་བཞག་ན། འདི་ལྟར་འཁྲུལ་སྣང་འཁོར་བའི་ཆོས་རྣམས་ཀུན། །མི་བདེན་བསླུ་ཕྱིར་ཀུན་རྫོབ་བདེན་པ་ལགས། །ཟབ་ཞི་འོད་གསལ་མྱ་ངན་འདས་པའི་ཆོས། །འགྱུར་མེད་རང་བཞིན་དོན་དམ་བདེན་པར་འདོད། །ཅེས་གསུངས་པས། གོང་དུ་སྨོས་པའི་བདེན་གཉིས་དབྱེར་མེད་སྤྲོས་བྲལ་མཉམ་པ་ཆེན་པོར་གཏན་ལ་འབེབས་པ་ཉིད་སྔོན་དུ་བཏང་ནས། དེ་ལྟ་བུའི་གནས་ཚུལ་དང་སྣང་ཚུལ་ཀུན་ནས་མཐུན་པར་གྱུར་པའི་ཡུལ་དང་ཡུལ་ཅན་གཉིས་ཀ་དོན་དམ་དང་། གནས་སྣང་མི་མཐུན་པའི་ཡུལ་ཡུལ་ཅན་གཉིས་ཀ་ཀུན་རྫོབ་ཏུ་བཞག་སྟེ། འདི་ནི་ཐ་སྙད་དུ་བསླུ་མི་བསླུའི་དབང་གིས་དེ་ལྟར་འཇོག་དགོས་ཏེ། དེ་ལྟ་མ་ཡིན་ན་དུང་དཀར་འཛིན་དང་སེར་འཛིན་གཉིས་ལའང་བདེན་རྫུན་དུ་བཞག་མི་ཤེས་པས་ཐ་སྙད་ཀྱི་རྣམ་བཞག་ཐམས་ཅད་འཁྲུགས་པར་འགྱུར་བས་སོ། །དེས་ན་གནས་སྣང་མཐུན་པའི་སྟོབས་ཀྱིས་ཐོབ་པའི་མྱང་འདས་ཀྱི་ཆོས་ཐམས་ཅད་དོན་དམ་ཡིན་ལ། མི་མཐུན་པའི་སྟོབས་ཀྱིས་བྱུང་བའི་འཁོར་བའི་ཆོས་ཐམས་ཅད་ཀུན་རྫོབ་ཏུ་བཞག་ཏུ་རུང་སྟེ། ཐ་དཔྱོད་ཀྱིས་དཔྱད་ན་སྐུ་དང་ཡེ་ཤེས་ཀྱི་སྣང་བ་ཐམས་ཅད་ལས་ཉོན་འཁྲུལ་པས་བསྐྱེད་པ་མིན་ཞིང་། ཡང་དག་པའི་ཡེ་ཤེས་ཀྱི་དབང་ལས་བྱུང་བ་དང་། སྒྲིབ་པས་བསླད་མ་ཞུགས་པའི་ཕྱིར་བདེན་ཞིང་མི་བསླུ་བར་གྲུབ་བོ། །འཁོར་བའི་ཆོས་རྣམས་ནི་དེ་ལས་ལྡོག་པས་བདེན་པར་མ་གྲུབ་ཅེས་བྱའོ། །འདིའི་བདེན་མི་བདེན་ནི་མི་བསླུ་བ་དང་བསླུ་བར་ཐ་སྙད་དཔྱོད་བྱེད་ཀྱི་ཚད་མས་གྲུབ་པ་ཡིན་ནོ། །དེ་ལྟ་ན་གནས་སྣང་མཐུན་པར་གྱུར་པའི་ཡུལ་ཅན་ལ་ཡེ་ཤེས་ཞེས་བྱ་སྟེ་གཟུང་འཛིན་མེད་པས་སོ། །མི་མཐུན་པར་འཛིན་པ་ལ་རྣམ་ཤེས་ཤེས་བྱ་སྟེ་གཟུང་འཛིན་ཅན་ནོ། །གནས་སྣང་མཐུན་པའི་ཡུལ་ལ་ཚད་མའི་གནོད་པ་བསྟན་པས་ནམ་ཡང་ལྡོག་བྱེད་མེད་པས་བརྟན་པ་འཇིག་རྟེན་པའི་དཔེར་བྱས་ན་ཐག་པ་ལ་ཐག་པར་འཛིན་པའི་བློ་བཞིན་ནོ། །གནས་སྣང་མི་མཐུན་པའི་ཡུལ་ལ་ཚད་མས་གནོད་པ་མཐོང་ན་ལྡོག་སྟེ་ཐག་པ་ལ་སྦྲུལ་འཛིན་གྱི་བློ་བཞིན་མི་བརྟན་ནོ། །དེས་ན་བློ་གྲོས་མི་ཟད་པའི་མདོར། ཡེ་ཤེས་ནི་རྟག་རྣམ་ཤེས་ནི་མི་རྟག་གསུངས་པའི་དོན་ཡང་དེ་ཡིན་ནོ། །དེའི་ཕྱིར་དབྱིངས་དང་གཉིས་སུ་མེད་པའི་ཡེ་ཤེས་འདི་ཆོས་ཉིད་དང་ཐ་དད་མེད་པའི་དབང་གིས་རྟག་པར་གྲུབ་སྟེ། སྡོང་པོ་བཀོད་པ་ལས། འཇིག་རྟེན་ཁམས་མང་ལ་ལ་དག །བསམ་གྱིས་མི་ཁྱབ་ཚིག་གྱུར་ཀྱང་། །ནམ་མཁའ་འཇིག་པར་མི་འགྱུར་བ། །རང་བྱུང་ཡེ་ཤེས་དེ་བཞིན་ནོ། །ཞེས་དང་། སྤྲོས་བྲལ་དོན་གསལ་ཆེན་པོའི་རྒྱུད་ལས། ངས་བསྟན་རྒྱུད་ལུང་ཐམས་ཅད་དུ། །འགྱུར་བ་མེད་དང་འདུས་མ་བྱས། །རྡོ་རྗེ་ལྟ་བུའི་ཚིག་བརྗོད་ན། །རང་བྱུང་ཡེ་ཤེས་ཆེན་པོར་བཤད། །ཅེས་དང་། རྡོ་རྗེ་སྙིང་འགྲེལ་ལས། ཇི་ལྟར་བུམ་པ་ཞིག་གྱུར་ཀྱང་། །ནམ་མཁའ་ལ་ནི་འཇིག་པ་མེད། །དེ་བཞིན་སེམས་ནི་ཞིག་གྱུར་ཀྱང་། །ཡེ་ཤེས་ལ་ནི་འཇིག་པ་མེད། །ཅེས་དང་། འཕགས་པ་ཀླུས། ཇི་ལྟར་མེ་ཡིས་དག་པའི་གོས། །སྣ་ཚོགས་དྲི་མས་དྲི་མ་ཅན། །ཇི་ལྟར་མེ་ཡི་ནང་བཅུག་ན། །དྲི་མ་ཚིག་གྱུར་གོས་མིན་ལྟར། །དེ་བཞིན་འོད་གསལ་བ་ཡི་སེམས། །འདོད་ཆགས་ལ་སོགས་དྲི་མ་ཅན། །ཡེ་ཤེས་མེ་ཡིས་དྲི་མ་བསྲེག །དེ་ཉིད་འོད་གསལ་མ་ཡིན་ནོ། །ཞེས་གསུངས། འདི་ཆོས་ཅན་ལ་ལྟོས་ནས་སྐྱེ་འགག་ལྟར་སྣང་ན་ཡང་། དེ་རྣམ་ཤེས་འཁྲུལ་པ་ཅན་ལ་སྣང་ཚུལ་ཡིན་པས། དེས་ཆོས་ཉིད་མ་འཁྲུལ་པའི་གཤིས་ལུགས་དོན་དམ་པར་གནོད་མི་ནུས་ཏེ། དཔེར་ན་སྣོད་ཀྱི་དབང་གིས་ནམ་མཁའ་འཕེལ་འགྲིབ་ལྟར་སྣང་ཡང་། དེས་ནམ་མཁའ་འདུས་བྱས་དང་མི་རྟག་པར་སྒྲུབ་མི་ནུས་པ་བཞིན་ནོ། །དེ་ལྟ་བུའི་ཆོས་ཉིད་དམ་ཡེ་ཤེས་རང་གི་ངོ་བོ་ལ་ཡེ་ནས་ཉེས་པའི་རྡུལ་གྱིས་མ་གོས་པས་གཙང་བ། རང་བཞིན་འཕོ་འགྱུར་མེད་པས་རྟག་པ། ནམ་ཡང་སྡུག་བསྔལ་གྱིས་ཟིལ་གྱིས་མི་ནོན་པས་བདེ་བ། འཁོར་འདས་ཀུན་ལ་ཁྱབ་ཅིང་བདག་བདག་མེད་ཀྱི་སྤྲོས་པ་ཉེ་བར་ཞི་བས་དམ་པའི་བདག་སྟེ། ཚུར་མཐོང་བྱིས་བློའི་ཡུལ་ལས་ཕ་རོལ་བསྐལ་དོན་དུ་གྱུར་པའི་ཡོན་ཏན་གྱི་ཆོས་བཞི་དང་ལྡན་ཏེ། མགོན་པོ་བྱམས་པས་རྒྱུད་བླ་མར། གཙང་བདག་བདེ་བ་རྟག་ཉིད་ཕྱིར། །ཡོན་ཏན་ཕ་རོལ་ཕྱིན་པ་འབྲས། །ཞེས་དང་། མཚན་བརྗོད་ལས། རང་བཞིན་གྱིས་དག་དག་པའི་བདག །ཐོག་མ་མེད་ནས་སྤྲོས་མེད་བདག །ཅེས་གསུངས་པ་བཞིན་ནོ། །དེར་མ་ཟད་ཆོས་ཉིད་རང་བཞིན་གྱིས་རྣམ་པར་དག་པའི་དབང་གིས་དེ་ལས་ཤར་བའི་ཆོས་ཅན་ཕུང་ཁམས་སྐྱེ་མཆེད་ཀྱིས་བསྡུས་པའི་ཕྱི་ནང་གི་ཆོས་འདི་ཐམས་ཅད་ཀྱང་། གནས་ཚུལ་མཐར་ཐུག་པའི་དབང་དུ་བྱས་ན་སྐུ་དང་ཡེ་ཤེས་ཀྱི་ངོ་བོར་ཡེ་ནས་སངས་རྒྱས་པའི་རང་བཞིན་མཉམ་པ་ཉིད་ལས་མ་གཡོས་ཏེ། མཐར་ཐུག་སངས་རྒྱས་ཀྱི་སྤྱན་སྒྲིབ་པ་ཐམས་ཅད་དང་བྲལ་བས་དེ་ལྟར་གཟིགས་པའི་ཕྱིར། སྡོང་པོ་བཀོད་པ་ལས། གང་ཞིག་བདག་དང་སེམས་ཅན་རྣམས། །རང་བཞིན་མཉམ་པར་རབ་གནས་ཤིང་། །མི་གནས་ལེན་པ་མེད་པ་དེ། །དེ་དག་བདེ་བར་གཤེགས་པར་གསུངས། །གཟུགས་དང་ཚོར་བ་འདུ་ཤེས་དང་། །རྣམ་པར་ཤེས་དང་སེམས་པ་དག །གྲངས་མེད་དེ་བཞིན་གཤེགས་པ་རྣམས། །དེ་དག་ཐུབ་པ་ཆེན་པོར་འགྱུར། །ཞེས་དང་། གསང་འདུས་ལས། མདོར་ན་ཕུང་པོ་ལྔ་རྣམས་ནི། །སངས་རྒྱས་ལྔར་ནི་རབ་ཏུ་གྲགས། །རྡོ་རྗེའི་སྐྱེ་མཆེད་རྣམས་ཉིད་ནི། །བྱང་ཆུབ་སེམས་དཔའི་དཀྱིལ་འཁོར་མཆོག །ཅེས་སོགས་དང་། ཀུན་སྤྱོད་ལས། འགྲོ་བ་འདི་ཀུན་སངས་རྒྱས་ལྔའི་བདག་ཉིད། །ཅེས་དང་། དུས་འཁོར་ལས། སེམས་ཅན་རྣམས་ནི་སངས་རྒྱས་ཡིན་ཏེ་སངས་རྒྱས་ཆེན་པོ་གཞན་འདིར་འཇིག་རྟེན་ཁམས་ན་ཡོད་མ་ཡིན། །ཞེས་དང་། གསང་སྙིང་ལས། ཨེ་མ་ཧོ་ཕྱོགས་བཅུ་སྟོང་ཁམས་ཡེ་ནས་དབེན། །སྲིད་པ་གསུམ་ནི་དག་པའི་ཞིང་། །སྙིགས་མ་ལྔ་ཉིད་བདེ་ལྡན་གནས། །ཕུང་པོ་ལྔ་ཉིད་རྫོགས་སངས་རྒྱས། །ཐམས་ཅད་མཆོག་གི་སྙིང་པོ་བས། །གཞན་དུ་རྒྱལ་བས་ཆོས་མི་བཙལ། །ཉིད་ལས་གཞན་ཞེས་བྱ་བའི་ཆོས། །བཙལ་ཡང་རྒྱལ་བས་མི་བརྙེས་སོ། །ཞེས་གསུངས་སོ། །འོ་ན་སངས་རྒྱས་ཀྱིས་ཕུང་སོགས་སྡུག་ཀུན་གྱི་མཚན་གཞིར་ཡང་མ་གསུངས་སམ་སྙམ་ན། དེ་ནི་དགོས་པའི་དབང་གིས་ཏེ། ཇི་སྐད་དུ། བདག་གོ་ཞེས་ཀྱང་བསྟན་གྱུར་ལ། །བདག་མེད་ཅེས་ཀྱང་བསྟན་པར་གྱུར། །རྒྱལ་བ་རྣམས་ཀྱིས་བདག་དང་ནི། །བདག་མེད་འགའ་མེད་ཅེས་ཀྱང་བསྟན། །ཞེས་གསུངས་པ་ལྟར། སངས་རྒྱས་ལ་བདག་རྟོག་མེད་ཀྱང་ང་དང་ང་ཡིར་གསུངས་པ་འཇིག་རྟེན་མཐུན་འཇུག་ཡིན་པ་དང་། ང་བདག་མེད་ཀྱང་བྱིས་པའི་ངོར་ཡོད་པ་ལྟར་གཟིགས་པ་མི་འགལ་བ་ཐེག་ཆེན་སྤྱི་ལ་གྲགས་པ་བཞིན་དུ། སྣང་སྲིད་སྐུ་དང་ཡེ་ཤེས་སུ་གཟིགས་ཀྱང་། སེམས་ཅན་མ་དག་པའི་འཁྲུལ་ངོར་སྡུག་ཀུན་ལྟར་སྣང་བ་མི་ཁེགས་པས་དེ་ལྟར་གཟིགས་ནས་ཚུལ་དེ་བཞིན་བསྟན་པ་མི་འགལ་ལོ། །དེ་བཞིན་དུ་སེམས་ཅན་སངས་རྒྱས་ཡིན་ན་སེམས་ཅན་དམྱལ་བར་སྡུག་བསྔལ་ཚེ་སངས་རྒྱས་ལ་སྡུག་བསྔལ་ཡོད་པར་ཐལ་བ་སོགས་ཀྱང་མི་འགྲུབ་སྟེ། དོན་དམ་པར་འཁོར་བ་མ་གྲུབ། ཀུན་རྫོབ་སྣང་ཚུལ་དུ་དེར་སྐྱེས་པ་དེ་སྒྲིབ་པ་དག་ཟིན་གྱི་སངས་རྒྱས་མ་ཡིན་པས། རང་རྒྱུད་ལྡན་གྱི་སྒྲིབ་པའི་དབང་གིས་འཁྲུལ་སྣང་རྨི་ལམ་ལྟ་བུར་མྱོང་བ་ཡིན་པའི་ཕྱིར་སྐྱོན་མེད་ལ། གནས་ཚུལ་དུ་སྡུག་བསྔལ་སོགས་མ་གྲུབ་སྟེ། སྒྱུ་འཕྲུལ་རྒྱས་པ་ལས། ཡང་དག་ཤེས་པའི་རང་རིག་བློ་མེད་ན། །བདེ་གཤེགས་ཞིང་ཡང་ངན་སོང་གནས་སུ་མཐོང་། །ཐེག་མཆོག་མཉམ་པའི་དོན་ཉིད་རྟོགས་པ་ན། །ངན་སོང་གནས་ཉིད་འོག་མིན་དགའ་ལྡན་གནས། །ཞེས་གསུངས། དེས་ན་མ་དག་འཁོར་བའི་སྣང་བ་ཐམས་ཅད་འཁྲུལ་སྣང་ཡིན་པས་དེའི་ངོར་སྣང་བ་ལྟར་མིན་ལ། དག་པ་མྱང་འདས་ཀྱི་སྐུ་དང་ཡེ་ཤེས་སོགས་ཀྱི་སྣང་བ་ཐམས་ཅད་མ་འཁྲུལ་པ་ཡིན་པས། འདི་གཉིས་ཁོ་ནས་ཐ་སྙད་ཚད་མའི་སྒྲུབ་ཚུལ་ཤེས་པར་བྱའོ། །དེ་ཡང་དམྱལ་སོགས་མ་དག་འཁོར་བའི་སྣང་བ་འདི་ཐམས་ཅད་སེམས་སྡིག་པ་ཅན་གྱི་དབང་གིས་རང་གི་འཁྲུལ་ངོར་སྣང་བ་ནི། སྤྱོད་འཇུག་ལས། ལྕགས་སྲེག་ས་གཞི་སུ་ཡིས་བྱས། །མོ་ཚོགས་འདི་དག་ཅི་ལས་བྱུང་། །དེ་ཕྱིར་དེ་དག་ཐམས་ཅད་ནི། །སྡིག་སེམས་ཡིན་པར་ཐུབ་པས་གསུངས། །ཞེས་སོ། །དག་པ་སངས་རྒྱས་ཀྱི་ཞིང་སྐུའི་བཀོད་པ་སོགས་ནི་རང་སེམས་དག་པའི་དབང་གིས་སྣང་བ་ཡིན་པར་མདོ་རྒྱུད་དགོངས་པ་མཐུན་ཞིང་། ཚངས་པ་རལ་པ་ཅན་དང་ཤཱ་རིའི་བུ་གཉིས་ཞིང་འདི་དག་མ་དག་ཏུ་རྩོད་པས་ཀྱང་ཤེས་པར་ནུས་ལ། ཁྱད་པར་སྔགས་བླ་མེད་ཀྱི་རྒྱུད་སྡེ་རྣམས་སུ་ནང་གི་རྩ་རླུང་ཐིག་ལེའི་ཁམས་དང་སེམས་ཉིད་དག་མ་དག་གིས་བྱུང་བར་གསུངས་པ་བཞིན་ཡིན་ལ། དེས་ན་ཆོས་ཐམས་ཅད་རང་སེམས་ཀྱི་རྟོག་པས་ཕར་བཏགས་པ་ཙམ་ལས་དོན་ལ་གྲུབ་པ་མེད་ཀྱང་། རྟོག་བཏགས་ཀྱི་ཡུལ་དེ་ཉིད་རང་རང་གི་བློ་ངོར་གནས་སྐབས་རྟེན་འབྱུང་གི་དབང་གིས་སྣང་བ་བསླུ་མེད་ཉིད་ལ་ཐ་སྙད་ཚད་གྲུབ་ཅེས་བྱ་སྟེ། ལས་མཐུན་པར་བསགས་ཤིང་བག་ཆགས་མཐུན་པར་སད་པའི་ད་ལྟ་རང་རེ་མི་ལྟ་བུ་ལ་མེ་ཉིད་ཚ་བར་སྣང་བ་འདི་ཚད་མས་གྲུབ་པས་སུས་ཀྱང་མེ་ཚ་བ་མིན་ཞེས་བསྙོན་དུ་མེད་ལ། དེ་བཞིན་དགེ་སྡིག་སོགས་ཀྱང་འདྲ། དོན་དམ་པར་དེ་ལྟར་མཐའ་གཅིག་ཏུ་ཆད་པ་ནི་མེད་དེ། རི་དྭགས་མེ་ཡི་གཙང་སྦྲ་ཅན་སོགས་ལ་མེ་ཚ་བར་མི་སྣང་བའི་ཕྱིར་དང་། དབང་ཐོབ་པ་རྣམས་ཀྱིས་དངོས་པོ་སྤྲུལ་བསྒྱུར་སྣ་ཚོགས་པར་སྟོན་ནུས་པས་ཤེས་ལ། ལེགས་པར་བརྟགས་ན། དངོས་གཅིག་ཡིད་ནི་ཐ་དད་ཕྱིར། །དོན་མ་གྲུབ་པར་སྣང་བ་ཡིན། །ཞེས་པ་ལྟར། རང་གི་ལུས་གཅིག་པུ་འདི་ལའང་། ནང་གི་སྲིན་བུ་དང་། ཕྱི་རོལ་གྱི་བྱ་རྒོད་དང་། འདོད་ལྡན་དང་། ཆགས་བྲལ་དང་། རང་གཞན་དགྲ་གཉེན་སོགས་དུ་མས་བལྟས་ན། གནས་དང་། བཟའ་བ་དང་། གཙང་བ་དང་། མི་གཙང་བ་དང་། བདག་གི་དང་། གཞན་གྱི་དང་། སྙིང་དུ་སྡུག་པ་དང་། མི་སྡུག་པ་དང་། བར་མ་སོགས་མཐོང་ཚུལ་དང་འཛིན་ཚུལ་ཐ་དད་པ་དང་། འཕགས་པ་རྣམས་ཀྱིས་གཟིགས་ན་ལུས་རང་བཞིན་གྱིས་གྲུབ་པ་མེད་པ་སོགས་དང་། མཐར་ཐུག་སངས་རྒྱས་ཀྱི་སར་གཟུགས་ཕུང་དག་པ་རྣམ་སྣང་གི་ངོ་བོར་གསུངས་པ་རྣམས་དེ་ལྟར་བསྙོན་མེད་དུ་གྲུབ་པ་ཡིན་ཞིང་། དེ་ཡང་ལེགས་པར་བརྟགས་ན་ལུས་ཞེས་པའང་བཙལ་ན་མི་དམིགས་ཤིང་རྡུལ་ཕྲ་རབ་ཙམ་དུའང་གྲུབ་པ་མེད་པ་ནི་ད་ལྟར་ཡང་དཔྱད་པ་གནད་དུ་སོང་བས་ཤེས་ནུས་པ་འདིའི་ཕྱིར། དེ་ཉིད་གཞན་གྱི་ལུས་སོགས་ཕྱི་ནང་གི་ཆོས་ཐམས་ཅད་ལ་སྦྱར་བས་རང་བཞིན་མེད་པར་གཏན་ལ་འབེབས་ནུས་པས་ན། དོན་དམ་པར་དེ་ཐམས་ཅད་ཀྱང་རང་བཞིན་གྱིས་དབྱེ་བསལ་མེད་པར་ཆོས་ཉིད་མཉམ་པ་ཆེན་པོར་ཤེས་དགོས་ཀྱང་། ཐ་སྙད་དུ་ནི་ད་ལྟ་སེམས་ཅན་ཕལ་པ་ལ་སྣང་བ་ནི་མ་དག་འཁྲུལ་པའི་སྣང་བ་ཡིན་པས་དེའི་ངོར་སྣང་བ་ལྟར་མི་བདེན་ཞིང་། ལམ་བྱང་སེམས་ཀྱི་སྣང་བའང་ད་དུང་གོང་ནས་གོང་དུ་མཐོང་བ་རྣམ་པར་དག་རྒྱུ་ཡོད་པའི་ཕྱིར་དེའི་ངོར་དབང་བཙན་དུ་མིན་ལ། མཐར་ཐུག་སངས་རྒྱས་ཀྱི་སའི་གཟིགས་པ་དེ་ལས་གོང་དུ་བོགས་དབྱུང་དུ་མེད་པའི་ཕྱིར་གནས་ཚུལ་མཐར་ཐུག་པར་གྲུབ་པས་དེ་ལྟར་ངེས་པར་བྱ་སྟེ། མདོར་ན་བརྗོད་མཐའ་བརྗོད་བྲལ། རྟོག་མཐའ་མི་རྟོག་པ། རྣམ་ཤེས་ཀྱི་མཐའ་ཡེ་ཤེས། ཆོས་ཅན་གྱི་མཐའ་ཆོས་ཉིད་ལ་ཐུག་པའི་ཕྱིར། རྟོག་ཚོགས་ལྷར་དག ལྷ་ཡེ་ཤེས་སུ་དག ཡེ་ཤེས་ནི་གཟུང་འཛིན་མཚན་མའི་སྤྱོད་ཡུལ་ལས་འདས་པའི་ཕྱིར། རང་བཞིན་གཉུག་མའང་སྒྲིབ་བྲལ་གྱི་ཕུང་ཁམས་སྐྱེ་མཆེད་རྣམས་ནི་གདོད་མ་ནས་ཆོས་ཀྱི་དབྱིངས་དང་ཐ་མི་དད་པའི་ཕྱིར་རང་བཞིན་རྣམ་དག་ཆེན་པོར་གྲུབ་པ་ཡིན་ནོ། །འོ་ན་ལམ་བསྒོམ་པ་ལ་དོན་མེད་དོ་སྙམ་ན་མ་ཡིན་ཏེ། སེམས་ཅན་རྣམས་ཀྱིས་དེ་ལྟར་མ་རྟོགས་པའི་དབང་གིས་འཁྲུལ་སྣང་རྨི་ལམ་ལྟ་བུ་འདི་གློ་བུར་དུ་བྱུང་ཞིང་དེ་ལྟར་ཞེན་པའི་འཁྲུལ་རྟོག་གི་བག་ཆགས་སྦྱོང་བའི་ཕྱིར་བསྐྱེད་རྫོགས་སོགས་ཀྱི་ལམ་བསྒོམ་པ་སྟེ། དེས་ན་ལམ་དང་འབྲས་བུའི་ཆོས་རྣམས་ལ་བདེན་པར་ཞེན་པས་ནི་མ་ཡིན་ཏེ། སྒྱུ་མ་མཁན་གྱིས་སྤྲུལ་པའི་དམག་གིས་ལམ་གྱི་འཇིགས་པ་སེལ་བར་བྱེད་པའམ་བད་ཀན་ཅན་གྱི་མིག་ནད་སྦྱོང་བ་བཞིན་ནོ། །དེའི་ཕྱིར་རྟོགས་བྱ་མཐར་ཐུག་པའི་དབང་དུ་བྱས་ན། ཀུན་རྫོབ་དང་དོན་དམ་གྱིས་བསྡུས་པའི་ཆོས་ཐམས་ཅད་རང་བཞིན་དབྱེར་མེད་པར་ཡེ་ནས་སངས་རྒྱས་པའི་རང་བཞིན་སྤྲོས་བྲལ་དག་མཉམ་ཆེན་པོར་གཏན་ལ་ཕེབས་དགོས་ཀྱི། ཚུར་མཐོང་གི་བྱིས་བློས་ཕྱོགས་རེར་གཞལ་བའི་ཡོད་མེད་སྣང་སྟོང་དག་མ་དག་སོགས་གཉིས་ཆོས་ཀྱི་སྤྲོས་པ་གང་གི་ཕྱོགས་སུའང་ཞེན་ཅིང་ལྷུང་བར་མི་བྱའོ། །མདོར་ན། བཅོམ་ལྡན་འདས་ཀྱིས། གང་ཟག་ལ་མི་རྟོན་ཆོས་ལ་རྟོན། ཚིག་ལ་མི་རྟོན་དོན་ལ་རྟོན། དྲང་དོན་ལ་མི་རྟོན་ངེས་དོན་ལ་རྟོན། རྣམ་ཤེས་ལ་མི་རྟོན་ཡེ་ཤེས་ལ་རྟོན་པར་གསུངས་པ་བཞིན། ཤེས་བྱ་བདེན་གཉིས་ཀྱི་གནས་ཚུལ་ལ་ཕྱིན་ཅི་མ་ལོག་པར་ལུང་རིགས་མན་ངག་ཚད་མས་གཞལ་འབྲས། འོ་མ་ལས་མར་དང་། མར་ལས་ཉིང་ཁུ་བཞིན། དེ་བཞིན་གཤེགས་པའི་གསུང་རབ་མདོ་རྒྱུད་ཀྱི་དགོངས་པ་མཐའ་དག་སྙིང་པོ་གཅིག་ཏུ་བསྡུ་ཤེས་དགོས་པས། མཚན་ཉིད་རྒྱུའི་ཐེག་པའི་གྲུབ་མཐའི་རྩེ་མོ་ནི། བཀའ་འཁོར་བར་ཐ་གཉིས་ཀའི་ངེས་དོན་གྱི་བཅུད་བསྡུས་པ་རྒྱུད་བླ་སོགས་བྱམས་གཞུང་དང་འཕགས་པ་ཀླུས་བསྟོད་ཚོགས་སོགས་ནས་བསྟན་དོན་ཐེག་མཆོག་དབུ་མ་ཆེན་པོ་ཉིད་ཡིན་ལ། འབྲས་བུ་སྔགས་ཀྱི་སྐྱེལ་སོ་མཐར་ཐུག་འོད་གསལ་རྫོགས་པ་ཆེན་པོ་ཡིན་པས། དེ་གཉིས་དོན་གྱི་དགོངས་པ་གནད་གཅིག་ཏུ་འབབས་པའི་ཚུལ་ཡང་། ལང་ཀར་གཤེགས་པ་ལས། ཆོས་ལྔ་རང་བཞིན་གསུམ་དང་ནི། །རྣམ་པར་ཤེས་པ་ཚོགས་བརྒྱད་དང་། །བདག་མེད་དོན་ནི་རྣམ་གཉིས་པོར། །ཐེག་ཆེན་མཐའ་དག་བསྡུས་པ་ཡིན། །ཞེས་དང་། ཡུམ་བར་མ་ལས། བྱམས་པ། ཡོངས་སུ་བརྟགས་པའི་གཟུགས་གང་ཡིན་པ་དེ་ནི་རྫས་མེད་པར་བལྟའོ། །རྣམ་པར་བརྟགས་པའི་གཟུགས་གང་ཡིན་པ་དེ་རྣམ་པར་རྟོག་པའི་རྫས་ཡོད་པའི་ཕྱིར་ཡོད་པར་བལྟ་ཡི་རང་དབང་དུ་འཇུག་པ་ནི་མ་ཡིན་ནོ། །ཆོས་ཉིད་ཀྱི་གཟུགས་གང་ཡིན་པ་དེ་ནི་རྫས་མེད་པའང་མ་ཡིན། ཡོད་པའང་མ་ཡིན། དོན་དམ་པས་རབ་ཏུ་ཕྱེ་བ་ཡིན་པར་བལྟ་བར་བྱའོ། །ཞེས་སོགས་གསུངས་པ་བཞིན། ཆོས་ཐམས་ཅད་རང་བཞིན་གསུམ་དུ་གཏན་ལ་ཕབ་པ་ལས། ཡོངས་གྲུབ་ཆོས་དབྱིངས་འགྱུར་མེད་བདེ་གཤེགས་སྙིང་པོའི་རང་བཞིན། སྟོང་ཆ་ཆོས་སྐུ། སྣང་ཆ་གཟུགས་སྐུ། མཁྱེན་ཆ་སྟོབས་སོགས་སངས་རྒྱས་ཀྱི་ཆོས་གདྒཱའི་ཀླུང་གི་བྱེ་མའི་གྲངས་ལས་འདས་པ་དང་རྣམ་དབྱེར་མེད་པར་གསུངས་པ་ནི། རྫོགས་ཆེན་གྱི་ངོ་བོ་རང་བཞིན་ཐུགས་རྗེ་གསུམ་དབྱེར་མེད་པའི་གཞི་གནས་ཀྱི་ཡེ་ཤེས་སྐུ་གསུམ་རང་ཆས་སུ་ཡོད་པར་གསུངས་པ་དང་དོན་གཅིག དག་མ་དག་གི་རྟེན་འབྱུང་གཞན་དབང་སྒྱུ་མ་ལྟ་བུ་ནི། གཞི་སྣང་ལྷུན་གྲུབ་ཀྱི་རྩལ་ལས་གྲོལ་འཁྲུལ་གྱི་སྒོ་གཉིས་གསུངས་པའི་ཤིན་ཏུ་ཕྲ་བའི་རྟེན་འབྱུང་གི་རྩ་བར་དོན་གྱིས་གནད་ཐུག ཡང་དག་པ་མ་ཡིན་པའི་ཀུན་རྟོག་རྩ་བ་བདག་གཉིས་སུ་འཛིན་པ་དང་དེས་བསྐྱེད་པའི་འཁྲུལ་སྣང་འཁྲུལ་འཛིན་དང་བཅས་པ་མ་དག་གཞན་དབང་འཁོར་བའི་ཆོས་རྣམས་ནི་སྐྲ་ཤད་དང་ཟླ་བ་གཉིས་སྣང་བཞིན་གཞི་རྩ་མེད་པས་དོན་ལ་ཡོད་མ་མྱོང་བས་མཚན་ཉིད་ཆད་པའམ་མེད་པ་ཡིན་ལ། དེ་ལྟ་བུའི་འཁྲུལ་གཞི་འཁྲུལ་འཛིན་དང་བཅས་དབྱིངས་སུ་དག་པའི་སྟོང་གཞི་རྣམ་ཀུན་མཆོག་ལྡན་གྱི་རང་རྩལ་དག་པ་གཞན་དབང་སྐུ་དང་ཡེ་ཤེས་སོགས་གདོད་མ་གཞི་ཡི་གནས་ལུགས་ཆོས་ཉིད་མཉམ་པ་ཆེན་པོ་ལས་ཐ་མི་དད་པའི་ཕྱིར་མཐར་ཐུག་ཀ་དག་གི་གྲོལ་ས་དངོས་ཡིན་པ་དང་། ལམ་ཉམས་སུ་ལེན་ཚུལ་ཡང་། ཡང་དག་པའི་གནས་ལུགས་བསལ་བཞག་འཆིང་གྲོལ་ལས་འདས་པའི་དོན་ཉིད་གཏན་ལ་ཕབ་ནས་དེའི་ངང་གོམས་པར་བྱེད་པ་ལ་མཐུན་པ་ཡིན་ཏེ། རྒྱལ་བའི་སྲས་པོ་གཞན་ཕན་མཐའ་ཡས་ཀྱིས། བྱོན་དང་འབྱོན་གྱུར་རྒྱལ་ཀུན་གྱི། །བགྲོད་པ་གཅིག་པའི་ལམ་ཡིན་ཕྱིར། །རྒྱལ་སྲས་ཐུ་བོ་མཆོག་རྣམས་ཀྱང་། །གཅིག་ཏུ་བརྩོན་པས་རང་གིར་མཛད། །དེས་ན་བདག་གཞན་མཉམ་བརྗེ་ཡི། །རིམ་པས་སྨོན་འཇུག་སེམས་སྦྱངས་ནས། །མྱུར་ལམ་སྔགས་ཀྱི་མན་ངག་ལ། །བརྟེན་ནས་ཉམས་སུ་ལེན་པ་དང་། །ཁྱད་པར་དོན་དམ་བྱང་ཆུབ་སེམས། །སྒོམ་པའི་རིམ་པ་སེམས་ཕྱོགས་ཀྱི། །ཏནྟྲ་རྣམས་སུ་ཐུབ་དབང་གིས། །ཇི་ལྟར་གསུངས་བཞིན་བསྒོམ་པར་བྱ། །འདི་ཡི་ངེས་པའང་སེམས་ཀྱི་གསང་། །རང་བཞིན་གྱིས་ནི་འོད་གསལ་བ། །གང་ལ་སྣང་སྟོང་ཕྱོགས་གཉིས་ཀྱིས། །ཀ་དག་ལྷུན་གྲུབ་ཅེས་བརྗོད་ཡིན། །དེར་ཡང་ཆོས་ཅན་ཆོས་ཉིད་དང་། །ཟུང་དུ་འཇུག་པའི་དབྱེ་བ་ཡིས། །ངོ་བོ་རང་བཞིན་ཐུགས་རྗེ་ཞེས། །གཞི་གནས་ཡེ་ཤེས་གསུམ་དང་ནི། །དེ་དག་རེ་རེ་ངོ་བོ་དང་། །གདངས་དང་རྩལ་ལས་རྣམ་དབྱེ་བའི། །སྐུ་གསུམ་ངོ་སྤྲོད་དེར་ཡང་ནི། །གཞི་ལམ་འབྲས་དུས་གསུམ་གྱིས་དབྱེ། །དེ་སླད་ཡེ་གཞི་ཆོས་ཀྱི་དབྱིངས། །སྤྲོས་དང་བྲལ་བའི་ཀ་དག་ཡིན། །སྤྱི་གཞི་རྟེན་འབྱུང་སྒྱུ་མ་ལ། །གཞི་སྣང་ཆེན་པོར་ངོ་སྤྲོད་མཛད། །གང་ལ་རྣལ་འབྱོར་སྤྱོད་གཞུང་ལས། །ངོ་བོ་ཉིད་རྣམ་འབྱེད་པ་དང་། །སྡུག་དང་མི་སྡུག་རྣམ་འབྱེད་པའི། །རྟེན་ཅིང་འབྲེལ་འབྱུང་གཉིས་སུ་གསུངས། །ཚུལ་འདི་ལེགས་པར་ཤེས་གྱུར་ན། །ཕར་ཕྱིན་ཐེག་པའི་ཟབ་གནད་ཀུན། །ངེས་གསང་ཐེག་པ་འདིར་འདུ་ཞིང་། །ནང་འགལ་སྤྲོས་པ་ཀུན་ཆོད་གྱུར། །དེ་ཕྱིར་ཀུན་བརྟགས་གཞན་དབང་དང་། །ཡོངས་སུ་གྲུབ་པར་གང་བརྗོད་པའི། །མཚན་ཉིད་གསུམ་གྱི་རྣམ་བཞག་དེར། །ཕན་ཚུལ་སྦྱོར་བས་དོན་འདི་རྟོགས། །གང་ཕྱིར་དབུ་མའི་གཞུང་ལས་ཀྱང་། །ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མིན་ཞེས། །དེ་ཡི་སྒྲུབ་པའང་གསུངས་པར་མཛད། །འདི་ལས་མཚན་ཉིད་གསུམ་གྱི་གནད། །མཐའ་དག་རྒྱལ་ཚབ་མ་ཕམ་པས། །ལེགས་པར་བཤད་དང་མཐུན་པ་རུ། །གསུངས་ལས་རྣམ་བཞག་ལོག་པ་མེད། །དེ་ཡང་རྒྱལ་བའི་ཡུམ་ཉིད་ལས། །གཟུགས་སོགས་ཆོས་རྣམས་མཐའ་དག་ལ། །ཆོས་ཉིད་དང་ནི་ཀུན་བརྟགས་དང་། །རྣམ་པར་བརྟགས་པ་གསུམ་གསུམ་དུ། །དབྱེ་བའི་དོན་འདི་ཉིད་ཡིན་ཕྱིར། །ཡུམ་དོན་ཚད་མར་འཛིན་རྣམས་ཀྱང་། །ཐ་སྙད་རྣམ་བཞག་འདི་ལས་གཞན། །བྱས་ན་དོན་ལས་རིང་བར་འགྱུར། །འོན་ཏེ་བདེན་པའི་རྣམ་བཞག་ལ། །ཕྱི་མ་ཉིད་ནི་ཕྱི་མ་དང་། །གཞན་གཉིས་གཞན་དུ་བཞག་པ་ཡིན། །སྐབས་འདིའི་ཚུལ་ལ་ཕལ་ཆེར་རྩོད། །དེ་ཕྱིར་དབུ་མ་པ་རྣམས་ལ། །ཀུན་རྫོབ་འཇོག་ཚུལ་མཚུངས་མིན་ལས། །དོན་དམ་བདེན་པ་སྤྲོས་བྲལ་དུ། །འཆད་ལ་རྣམ་དབྱེ་ཡོད་མ་ཡིན། །གལ་ཏེ་དོན་དམ་སྤྲོས་བྲལ་ལས། །གཞན་ཡོད་ན་ནི་ལྟོས་བཞག་ཕྱིར། །གཅིག་དེ་དབུ་མ་ཉིད་ཡིན་ན། །དེ་ཚེ་གཞན་དེ་མཐར་ལྟར་འགྱུར། །མདོར་ན་ཐུབ་པའི་གསུང་རབ་ཀུན། །སྔ་མའི་སྦས་དོན་ཕྱི་མ་ཡིས། །གསལ་བར་བཤད་པ་ཉིད་ཡིན་པས། །ཐེག་པ་མཐོ་དམན་ཇི་སྙེད་ཀྱང་། །གཞུང་དང་མན་ངག་སྦས་དོན་གྱི། །རྣམ་པར་བཞག་ལས་གཞན་མེད་ཕྱིར། །དངོས་བསྟན་དོན་ལ་ཁྱད་ཆེ་ཡང་། །མཐར་ཐུག་དོན་ལ་ཁྱད་ཡོད་མིན། །དེ་སླད་འཕགས་ཡུལ་མཁས་པའི་གཞུང་། །ལ་ལར་ཁྱད་ཆེར་གསུངས་པ་དང་། །གཞན་དུ་ཁྱད་པར་མེད་བཤད་པ། །ཀུན་གྱི་དགོངས་གཞི་འདི་ཡིན་ཡང་། །གངས་རིའི་ལྗོངས་འདིར་དེ་འདྲ་བའི། །རྣམ་དབྱེ་ལེགས་པར་མ་ཕྱེད་བཞིན། །རང་ཕྱོགས་བསྒྲུབ་ཅིང་གཞན་གྱི་ཕྱོགས། །དགག་ལ་ཁྱད་ཆོས་ཡིན་པར་རློམ། །དེ་བཞིན་བདེན་དང་གྲུབ་མཐའ་དང་། །སྔགས་ཀྱི་རིམ་གཉིས་དབྱེ་བསྡུ་སོགས། །ལེགས་པར་ཁོང་དུ་མ་ཆུད་བཞིན། །དགག་སྒྲུབ་བགྱིས་པ་དུ་མ་མཐོང་། །དེས་ན་ཚིག་ལ་མི་རྟོན་པར། །དོན་ལ་རྟོན་པའི་མན་ངག་གིས། །ཐུབ་གསུངས་མཐའ་དག་འགལ་མེད་དུ། །སྒྲུབ་པའི་ཚུལ་འདི་མཁྱེན་པར་མཛོད། །ཅེས་རྗེ་ཉིད་ཀྱི་རིགས་ཀྱི་བདག་པོ་གཅིག་པུ་གྲུབ་དབང་བྱང་ཆུབ་རྡོ་རྗེའི་ཡང་སྲིད་རིན་པོ་ཆེར་མདོ་རྒྱུད་དགོངས་པའི་ཟབ་གནད་མཐའ་དག་སྙིང་པོར་བསྡུས་ཏེ་ཐུགས་བཅུད་གསང་བ་ཟབ་མོ་ཉིད་གདམས་པར་མཛད་པ་བཞིན་ནོ། །དེ་ལྟར་ལེགས་པར་གཏན་ལ་ཕེབས་ནས་གནས་ཚུལ་དང་མཐུན་པར་ལམ་ཉམས་སུ་ལེན་པ་ལའང་། རྒྱུ་འབྲས་ཀྱི་ཐེག་པ་གཉིས་ལས། མཚན་ཉིད་རྒྱུ་ཡི་ཐེག་པ་ཆེན་པོར་སེམས་ཉིད་སངས་རྒྱས་ཀྱི་རྒྱུ་ཙམ་དུ་བཟུང་ནས། འབྲས་བུ་སངས་རྒྱས་ཉིད་གདོད་ཐོབ་པར་བྱ་བའི་སླད་དུ། རིགས་དང་བཤེས་གཉེན་གྱི་སྟོབས་ལས། སྨོན་འཇུག་གི་སེམས་བསྐྱེད་ནས། མོས་བསྔོ་ཡི་རང་སོགས་ཐབས་ལ་མཁས་པས་ཕར་ཕྱིན་དྲུག་སོགས་ཚོགས་གཉིས་ཟུང་བྲེལ་གྱི་ལམ་ལ་སློབ་པར་བྱེད་པ་ཡིན་ལ། འབྲས་བུ་གསང་སྔགས་ཀྱི་ཐེག་པར་ནི། སེམས་ཉིད་ད་ལྟ་ནས་སངས་རྒྱས་ཀྱི་ངོ་བོར་གནས་པ་ཉིད་དབང་གིས་སྨིན་པར་བྱས་ཏེ། དམ་ཚིག་རྣམ་པར་དག་པས་རྒྱུད་བསྡམས་ནས། གནས་ཚུལ་ཡང་དག་དང་མཐུན་པར་བསྐྱེད་རྫོགས་ཀྱི་ལམ་བསྒོམ་པ་སྟེ། གལ་པོ་ལས། མཚན་ཉིད་རྒྱུ་ཡི་ཐེག་པ་ཡིས། །སེམས་ཅན་སངས་རྒྱས་རྒྱུ་རུ་ཤེས། །འབྲས་བུ་སྔགས་ཀྱི་ཐེག་པ་ཡིས། །སེམས་ཉིད་སངས་རྒྱས་ཉིད་དུ་བསྒོམ། །ཞེས་སོ། །སྔགས་ལའང་བྱ་སྤྱོད་སོགས་ཕྱི་རྒྱུད་རྣམས་སུ། སྔར་མདོ་ལས་བཤད་པའི་བདེན་གཉིས་དབྱེར་མེད་ལ་ངེས་ཤེས་ཆེར་སོང་བས། དོན་དམ་པར་བདག་དང་ལྷ་གཉིས་ཐ་དད་དུ་མ་གྲུབ་ཀྱང་། ཀུན་རྫོབ་ཏུ་ཡོངས་སུ་དག་པའི་ལྷ་དང་བདག་གཉིས་རྗེ་ཁོལ་ལམ་སྤུན་གྲོགས་སོགས་སུ་བལྟས་ཏེ། སྐུ་གསུང་ཐུགས་ཀྱི་མཚན་མ་ཅི་རིགས་པ་ཡིད་ལ་བྱེད་ཅིང་སྒྲུབ་པས། བདག་གི་རྒྱུད་བྱིན་གྱིས་རློབ་ཅིང་དངོས་གྲུབ་གཉིས་ཐོབ་པར་བྱེད་པའི་ངེས་ཤེས་ཁྱད་པར་ཅན་གྱི་ལྟ་བ་ལ་བརྟེན་པ་སྟེ། དེ་ཡང་ཀུན་གཟིགས་རོང་པས་ཕྱག་ན་རྡོ་རྗེ་དབང་བསྐུར་བའི་ཏནྟྲ་ལས་ཇི་སྐད་བསྟན་པའི་དོན། གསང་སྔགས་ཀྱི་སྐབས་འདིར་ཐ་མལ་གྱི་མངོན་རྗེས་ལས་འདས་པའི། ཡིད་ཆེས་པའི་ལུང་དང་མན་ངག་དམ་པ་ལ་བརྟེན་ཏེ་སྐྱེས་པའི་སོ་སོར་རྟོག་པའི་ཤེས་རབ་ཀྱིས་བཅད་པའི་དོན། ཕན་ཚུན་ལྟོས་པ་དང་། བྱ་བ་བྱེད་པ་དང་། ཆོས་ཉིད་ཀྱི་རིགས་པ་རྣམས་དང་མི་འགལ་བའི་ཀུན་ཁྱབ་ཀྱི་ཚད་མ་གསུམ་གསུངས་ཏེ། དེ་ཡང་ཆོས་ཉིད་རྟོགས་པར་བྱ་བའི་ཕྱིར་ཐབས་ཀྱི་མཚན་མ་སྣ་ཚོགས་སུ་བརྟགས་པ་རྣམས་ལ་ནི་རྣམ་པར་སྨིན་པའི་ལྷ་ཞེས་བྱ། ཆོས་ཉིད་རྟོགས་པ་ནི་འབྲས་བུའི་ངོ་བོའི་ལྷ་ཞེས་བྱ་སྟེ། ཆོས་ཉིད་དང་ཆོས་ཉིད་ཐོབ་པར་བྱེད་པ་ལ་མི་བསླུ་བ་ཐམས་ཅད་ནི་ཚད་མར་གྲུབ་པས། སྐུ་གསུང་ཐུགས་སུ་སྦྱོར་བའི་དམ་ཚིག་གིས། སྐུ་གསུང་ཐུགས་ཀྱི་དངོས་གྲུབ་གྲུབ་པར་བྱེད་པ་འདི་ཡང་རྟེན་ཅིང་འབྲེལ་ཏེ་འབྱུང་བ་ཡིན་པའི་ཕྱིར་ཆོས་ཉིད་ཀྱིས་ཆོས་ཉིད་སྟོན་པར་བྱེད་པ་ཡིན་ནོ། །དེ་ལྟར་ངེས་པར་བྱས་ནས། འཇུག་པའི་སྒོ་ཆུ་དབང་སོགས་ཀྱིས་སྨིན་པར་བྱས་ཏེ། སྤྱོད་པ་ཁྲུས་དང་གཙང་སྦྲར་གནས་ཤིང་། བདག་དང་། ལྷ་དང་། བཟླས་བརྗོད་དང་། བསམ་གཏན་གྱི་དེ་ཁོ་ན་ཉིད་སོགས་ལ་བརྟེན་ཏེ། བདག་གི་སྒོ་གསུམ་མ་དག་པ་ལ། དག་པ་ལྷའི་སྐུ་གསུང་ཐུགས་ཀྱི་མཚན་མས་རྒྱས་བཏབ་སྟེ་བསྒོམས་ཤིང་སྒྲུབ་པས། ཐུན་མོང་གི་གྲུབ་པ་འདོད་གཟུགས་ཀྱི་རིག་འཛིན་སོགས་དང་། ཐུན་མོང་མ་ཡིན་པ་མཐར་ཐུག་གི་འབྲས་བུ་མི་ཚེ་བཅུ་དྲུག་གམ་བདུན་སོགས་ནས་ལྕགས་ལ་གསེར་འགྱུར་གྱི་རྩིས་ཐེབས་པ་བཞིན་དུ། རིགས་གསུམ་རིགས་བཞི་སོགས་རིགས་ཀྱི་གཙོ་བོ་གང་ཡིན་པ་དང་གཉིས་སུ་མེད་པར་བྱང་ཆུབ་པར་བྱེད་པ་ནི་རྟེན་ཅིང་འབྲེལ་བར་འབྱུང་བའི་དབང་གིས་ཏེ། རྒྱུད་ལས། དཔེར་ན་གཙུབ་སྟན་བརྟེན་ནས་སུ། །གཙུབ་ཤིང་ག ཙུབ་པར་བྱེད་གྱུར་ན། །མི་ཡི་རྩོལ་བ་བྱེད་རྒྱུ་ལས། །སྟོབས་དང་ལྡན་པའི་མེ་འབྱུང་ངོ་། །དེ་བཞིན་སྔགས་དང་ཕྱག་རྒྱ་ལྷ། །གསུམ་ནི་འདུས་པར་གྱུར་པ་ལས། །ཆེན་པོ་དག་ནི་འབྱུང་འགྱུར་ཏེ། །བྱུང་ནས་ཡིད་ལ་གང་བསམ་པའི། །ལས་རྣམས་བྱེད་པར་འགྱུར་བ་ཡིན། །ཞེས་གསུངས། འདི་ལ་མཐར་ཕྱིན་འབྲས་བུའི་ཡེ་ཤེས་ཉིད་ལྷ་སྔགས་ཆོས་ཉིད་ཀྱི་ཚུལ་དུ་ཤར་བ་ཅི་རིགས་པ་ལམ་དུ་བྱེད་པའི་ཆ་ནས་འབྲས་བུ་ལམ་བྱེད་ཀྱི་ཚུལ་ཡོད་པས་མདོ་ལམ་ལས་འཕགས་ཤིང་མྱུར་བའི་ལམ་ཡིན་ནོ། །ཐབས་ཀྱི་ཐེག་པའམ་སྔགས་བླ་མེད་ནང་རྒྱུད་སྡེ་གསུམ་དུ་ནི། དེ་ལས་ཀྱང་མཉམ་པ་ཆེན་པོའི་དོན་ལ་ངེས་ཤེས་ཁྱད་པར་དུ་གྱུར་པས། དོན་དམ་དུ་མ་ཟད་ཀུན་རྫོབ་ཏུའང་མི་གཉིས་པའི་བསམ་སྤྱོད་དང་ལྡན་པ་སྟེ། འཁོར་འདས་ཀྱི་ཆོས་ཐམས་ཅད་དག་མཉམ་བདེན་པ་དབྱེར་མེད་བློའི་སྤྱོད་ཡུལ་ལས་འདས་པའི་ལྷག་པའི་ཆོས་སྐུ་ཆེན་པོར་ཡེ་ནས་སངས་རྒྱས་པའི་རང་བཞིན་དུ་ལྟ་བས་གཏན་ལ་ཕབ་ནས། དབང་བཞིས་སྨིན་པར་བྱས་ཏེ་མཉམ་པའི་དམ་ཚིག་ལ་གནས་པས། གནས་སྐབས་བཞིའི་འཁྲུལ་པ་སེལ་བྱེད་ཀྱི་ལམ་བསྐྱེད་རྫོགས་ཟུང་འཇུག་ཏུ་བསྒོམས་ཤིང་། སྤྱོད་པ་གང་ལའང་གཙང་དམེ་བླང་དོར་དགག་སྒྲུབ་དང་བྲལ་བར་ལམ་དུ་ཁྱེར་བ་སྟེ། མདོར་ན་མཉམ་པ་ཆེན་པོའི་དགོངས་སྤྱོད་ཀྱིས་ལམ་དང་འབྲས་བུའི་ཆོས་ཀུན་ལ་བཟླས་པས་མཐར་འབྲས་ལ་ཚེ་འདིའམ་བར་དོ་སོགས་སུ་དངོས་སུ་སྦྱོར་བར་བྱེད་པ་ཡིན་ཏེ། སྒྱུ་འཕྲུལ་ལམ་རིམ་ལས། བླ་མེད་ཐེག་པའི་ནང་དུ་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་ཏུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུའང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་དང་། རྡོ་རྗེ་གསང་བའི་རྒྱུད་ལས། བླ་མེད་སྔགས་ཀྱི་དངོས་གྲུབ་གང་། །ཤིན་ཏུ་བརྩོན་པས་གང་སྒྲུབ་པ། །ཚེ་འདི་ཉིད་ལ་སངས་རྒྱས་ཏེ། །གདུལ་བྱའི་ཞིང་དུ་མཛད་པ་སྟོན། །གྲངས་མེད་རྡོ་རྗེ་འཆང་རྣམས་ཀྱི། །ཟབ་མོའི་ཉེ་ལམ་མཐར་ཐུག་པའོ། །ཞེས་སོགས་གསུངས་པ་བཞིན་ནོ། །དེ་ལའང་བསྐྱེད་རྫོགས་རྣམ་པ་གསུམ་གྱི། བསྐྱེད་པ་མ་ཧཱ་ཡོ་ག་བས་ནི། སེམས་ཉིད་དབྱིངས་དང་ཡེ་ཤེས་དང་སྐུ་གསུང་ཐུགས་ཡོན་ཏན་ཕྲིན་ལས་ཏེ་དོན་དམ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པར་མཉམ་པ་དང་། དེ་ལས་ཤར་བའི་ཀུན་རྫོབ་ཕུང་ཁམས་སྐྱེ་མཆེད་སོགས་གདན་གསུམ་ཡོངས་རྫོགས་ལྷ་ཡི་འཁོར་ལོ་སྐུ་དང་ཡེ་ཤེས་སུ་ཡེ་ནས་རྣམ་པར་དག་པའི་བདེན་པ་དབྱེར་མེད་སྤྱོད་ཡུལ་དང་བྲལ་བར་གཏན་ལ་འབེབས་ཏེ། དེ་ཡང་ངེས་དོན་གྱི་མདོ་སྡེ་ཟབ་མོ་རྣམས་སུ་སྐུ་དང་ཡེ་ཤེས་ཀྱིས་བརྒྱན་པའི་ཆོས་དབྱིངས་སྤྲོས་བྲལ་ལ་བྲལ་གཞིར་གསུངས་ཀྱང་། དེ་ཉིད་ཐོས་བསམ་གྱིས་དོན་སྤྱི་གཏན་ལ་འབེབས་པ་ཙམ་ལས་ད་ལྟ་ནས་མངོན་དུ་བྱར་མེད་ལ། སྔགས་སུ་དབང་དང་རིམ་པ་གཉིས་ཀྱི་མཐུ་ལས་སྐྱེས་པའི་སོ་སོ་རང་རིག་པའི་ཡེ་ཤེས་སེམས་བྱུང་སེམས་པའི་མཚན་ཉིད་ལས་འདས་པའི་ཡུལ་ཅན་ཟབ་མོས་མངོན་སུམ་རང་ཐོག་ཏུ་འབེབས་པས་ཁྱད་པར་ཤིན་ཏུ་ཆེའོ། །དེའི་ཚུལ་ཡང་སྒྱུ་འཕྲུལ་རྩ་རྒྱུད་ལས། རྟོགས་པ་བཞི། དག་པ་གསུམ། མཉམ་པ་བཞི། བདག་ཉིད་ཆེན་པོའི་གཏན་ཚིགས་རྣམས་སུ་གསུངས་ཏེ། དང་པོ། འཁོར་འདས་ཀྱི་ཆོས་ཐམས་ཅད་སེམས་དང་ཡེ་ཤེས་ཀྱི་རང་སྣང་ཙམ་སྟེ་དོན་དམ་པར་རྩ་བ་རང་བྱུང་གི་ཡེ་ཤེས་སུ་རྒྱུ་གཅིག་པ་དང་། དེ་ལས་ཤར་བའི་ཀུན་རྫོབ་ཀྱི་ཆོས་རྣམས་ཀྱང་དེའི་ངང་ཚུལ་ལས་མ་འདས་པས། དཔེ་ཡིག་འབྲུའི་ཚུལ་གྱིས་སྐུ་དང་ཡེ་ཤེས་སུ་སྣང་བ་དང་། བདེན་པ་དེ་གཉིས་ངོ་བོ་དབྱེར་མེད་པར་ཕན་ཚུན་གཅིག་གིས་གཅིག་བྱིན་གྱིས་བརླབས་ཏེ་ངོ་བོ་ཐ་མི་དད་པར་གནས་པ་དང་། དེ་ལྟའི་གནས་ལུགས་ཟབ་མོ་དེ་ཐ་སྙད་ཀྱི་བློས་སྤྱོད་ཡུལ་དང་བྲལ་བར་རང་རིག་པའི་ཡེ་ཤེས་ཀྱིས་མངོན་དུ་བྱེད་པ་སྟེ། རྒྱུད་དེ་ཉིད་ལས། རྒྱུ་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་རྒྱལ་པོར་ཆེ། །ཞེས་སོ། །གཉིས་པ། སྣོད་འབྱུང་བ་ལྔ་ཡུམ་ལྔ། བཅུད་ཕུང་པོ་ལྔ་བདེ་གཤེགས་རིགས་ལྔ། རྒྱུད་རྣམ་ཤེས་ཚོགས་བརྒྱད་ཡེ་ཤེས་ལྔར་ཡེ་ནས་རྣམ་པར་དག་པ་ཡིན་ཏེ། སྣོད་བཅུད་རྒྱུད་རྣམས་དག་རྟོགས་ཤིང་། ཞེས་སོ། །གསུམ་པ། སྤྲོས་པ་ཕྱོགས་རེ་ཆོད་པ་རྣམ་གྲངས་པ་དང་མཐའ་དག་ཆོད་པ་རྣམ་གྲངས་མ་ཡིན་པའི་དོན་དམ་གཉིས་ཀ་རང་བཞིན་མ་གྲུབ་ཙམ་གྱིས་ཕྱེ་བས་དོན་དམ་ཙམ་དུ་མཉམ་པ་དང་། སྣང་ལ་དོན་བྱེད་ནུས་པ་ཡང་དག་དང་དོན་བྱེད་མི་ནུས་པ་ལོག་པའི་ཀུན་རྫོབ་གཉིས་ཀ་ངོ་བོ་སྣང་ཙམ་ལ་བརྟགས་ན་དབེན་པའི་ཕྱིར་ཀུན་རྫོབ་ཏུ་མཉམ་པ་ནི་ཐུན་མོང་གི་མཉམ་པ་གཉིས་དང་། ཡེ་ནས་དབྱིངས་དང་ཡེ་ཤེས་གཉིས་སུ་མེད་པའི་གནས་ལུགས་ཡིན་པའི་ཕྱིར། རྣམ་གྲངས་པ་དང་རྣམ་གྲངས་མ་ཡིན་པའི་དོན་དམ་གཉིས་ཀའང་ལྷག་པའི་དོན་དམ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པར་མཉམ་པ་དང་། ཡང་དག་དང་ལོག་པའི་ཀུན་རྫོབ་གཉིས་ཀའང་གནས་ཚུལ་དུ་ཡེ་ནས་དག་པའི་ཕྱིར་ལྷག་པའི་ཀུན་རྫོབ་སྐུ་དང་ཡེ་ཤེས་ཀྱི་ངོ་བོར་མཉམ་པ་ནི་ལྷག་པའི་མཉམ་པ་གཉིས་བཅས་བཞི་སྟེ། མཉམ་གཉིས་ལྷག་པའི་མཉམ་གཉིས་ཀྱིས། །དཀྱིལ་འཁོར་ཀུན་ཏུ་བཟང་པོའི་ཞིང་། །ཞེས་སོ། །བཞི་པ་ནི། འཁོར་འདས་ཀྱི་ཆོས་རྣམས་སྣང་ལུགས་ནས་དུ་མར་སྣང་ཡང་། གནས་ལུགས་བདག་ཉིད་ཆེན་པོ་རང་བྱུང་གི་ཡེ་ཤེས་ཉག་གཅིག་ཏུ་ངེས་ཏེ། མཐར་ཐུག་དཔྱོད་རིགས་ཀྱིས་དེ་ལྟར་གྲུབ་པའི་ཕྱིར། རང་བྱུང་ཡེ་ཤེས་གནས་མེད་སྣང་། །ཞེས་གསུངས་སོ། །དེ་ལྟར་གནས་ཚུལ་ལ་དག་པ་རབ་འབྱམས་ལྷ་ཡི་འཁོར་ལོར་ཡེ་གདོད་མ་ནས་གནས་ཀྱང་། སྣང་ཚུལ་འཁྲུལ་པ་ཅན་ལ་དེ་ལྟར་སྣང་མ་ནུས་པས། ཇི་ལྟར་མིག་ནད་ཅན་གྱི་མིག་སྐྱོན་སྦྱོང་བ་བཞིན་དུ། འཁྲུལ་པ་དེ་སྦྱོང་བར་བྱེད་པའི་ཐབས་གཙོ་བོར་བསྐྱེད་རིམ་ཡན་ལག་དང་བཅས་པ་སྒོམ་པ་ནི་རྣལ་འབྱོར་ཆེན་པོའམ་མ་ཧཱ་ཡོ་གའི་ལུགས་ཏེ། དེ་ཡང་བསྒོམ་བྱའི་ལྷ་རྡོ་རྗེ་སེམས་དཔའ་ལྟ་བུ་དེ་ནི། རྡོ་རྗེ་སྟོང་པ་ཉིད་དང་། སེམས་དཔའ་ཡེ་ཤེས་ཆེན་པོ་ཟུང་དུ་འཇུག་པ་སྟེ། གོང་དུ་སྨོས་པའི་གཞི་འབྲས་རོ་གཅིག་པའམ་དབྱེར་མེད་པའི་དབྱིངས་ཡེ་སྣང་སྟོང་ཟུང་དུ་འཇུག་པའི་གཉུག་མའི་སེམས་ཆོས་ཉིད་མཉམ་པ་ཆེན་པོ་དེ་ཉིད་ཡིན་ལ། དེ་ནི་རིགས་དང་དཀྱིལ་འཁོར་ཀུན་གྱི་སྤྲོ་གཞི་སྟེ། དེའི་སྣང་ཆ་ཟག་མེད་ཀྱི་ཡོན་ཏན་རྣམས་གང་འདུལ་མཚན་མ་རྟགས་ཀྱི་ཕྱག་རྒྱ་རྟེན་དང་བརྟེན་པའི་དཀྱིལ་འཁོར་གྱི་འཁོར་ལོར་ཡེ་ནས་ཤར་བའམ་གནས་པའི་དོན་ལ། དེ་ལྟར་རྟོགས་པའི་ངེས་ཤེས་ཀྱི་ལྟ་བས་ཟིན་པས། མར་འཆི་བར་སྐྱེ་གསུམ་གྱི་རྟོག་པ་དག་ཅིང་། ཡར་སྐུ་གསུམ་གྱི་འབྲས་བུ་གཞི་ལ་རྫོགས་པ་དང་། ལམ་གོང་མའི་སྨིན་བྱེད་དུའང་འགྱུར་བའི་ཕྱིར། གནས་ཚུལ་ཡང་དག་པའི་དོན་དང་མཐུན་པར། འོད་གསལ་སྟོང་པ་ཆེན་པོ། སྒྱུ་ལུས་སྙིང་རྗེ་སྒྱུ་མ། ཟུང་འཇུག་ཕྱག་རྒྱ་གཅིག་སྤྲོས་སོགས། གསལ་བརྟན་དག་གསུམ་ཚང་བའི་བསྐྱེད་རིམ་ཡན་ལག་དང་བཅས་པ་ལ་བསླབ་པ་སྟེ། འདི་ལ་བསྐྱེད་རིམ་གཙོ་བོར་སྨོས་ཀྱང་གོང་སྨོས་ལྟར་ལྟ་ད གོངས་ཐབས་ཤེས་ཟབ་མོས་ཁྱད་པར་བྱས་པའི་ཕྱིར་བསྐྱེད་རྫོགས་ཞེས་རིམ་པ་གཉིས་ཀྱི་ཟླས་དྲངས་པའི་བསྐྱེད་རིམ་ཙམ་ནི་མ་ཡིན་ཏེ་ངོ་བོ་ཟུང་འཇུག་གི་ལྷ་སྐུར་གྲུབ་པའི་ཕྱིར་དོན་ལ་བསྐྱེད་རྫོགས་དབྱེར་མེད་རྫོགས་རིམ་གྱི་ལྷ་སྐུར་འགྱུར་བས། འདི་ལྟ་བུའི་ལམ་ངེས་རྫོགས་མཐར་ཕྱིན་པ་ལས་ཟག་མེད་ལ་དངོས་སུ་སྦྱོར་ནུས་པར་རིགས་པའི་གནོད་བྱེད་མེད་དེ་ངོ་བོ་ཟུང་འཇུག་གི་ལམ་དུ་གྲུབ་པའི་ཕྱིར་རོ། །འདིས་སྦྱང་བྱ་ཐ་མལ་འཁྲུལ་འཛིན་གྱི་ཞེན་རྟོག་བག་ཆགས་དང་བཅས་པ་སྦྱངས་ནས། སྦྱངས་འབྲས་སངས་རྒྱས་ཐམས་ཅད་ཀྱི་སྐུ་རྡོ་རྗེ་དང་མཉམ་པ་ཉིད་ཀྱི་ཡེ་ཤེས་མངོན་དུ་བྱེད་པ་ཡིན་ཏེ། སྒྱུ་འཕྲུལ་རྔམ་གློག་ལས། སྲིད་གསུམ་ཡེ་ནས་དག་པའི་རང་བཞིན་ལ། །བདག་ཏུ་རྟོག་པའི་སྲིད་རྩའི་ཉེས་དམིགས་ཀྱིས། །ཡུན་རིང་དུས་ནས་འཁྱམས་པའི་འགྲོ་བ་རྣམས། །ཡེ་ནས་དོན་གྱི་སངས་རྒྱས་ཡིན་མོད་ཀྱང་། །རྨོངས་པའི་དབང་གིས་འཁོར་བའི་འཁོར་ལོར་འཁྱམས། །ལོག་རྟོག་ཉིད་ནས་དངོས་མེད་བྱང་ཆུབ་སེམས། །འཁྲུལ་འཁོར་ཉིད་ཀྱང་མི་ཟད་རྒྱན་དུ་ཆེ། །སྙིགས་མ་ལྔ་ཉིད་བདེ་ལྡན་གནས་སུ་དག །ཕུང་པོ་ལྔ་ཉིད་མངོན་པར་རྫོགས་པའི་སྐུ། །སྲིད་རྩའི་ཉེས་དམིགས་བྱང་ཆུབ་སྙིང་པོར་གནས། །ཕྱི་ནང་སྣོད་བཅུད་ཡབ་ཡུམ་ངང་དུ་གསལ། །ཞེས་དང་། གསང་སྙིང་ལས། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་དཀྱིལ་འཁོར་ཉིད། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་སྟེ། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཤིང་། །ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་དང་། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ནམ་ལྷུན་གྱིས་གྲུབ། །འདི་ནི་སངས་རྒྱས་ཐམས་ཅད་ཀྱི། །འདའ་བར་མི་མཛད་དམ་ཚིག་མཆོག །གང་ཞིག་འདི་ལ་མོས་གྱུར་པ། །སངས་རྒྱས་དཀྱིལ་འཁོར་ཐམས་ཅད་ཀྱིས། །ཕྱོགས་དུས་ཀུན་ནས་ཐམས་ཅད་དུ། །དཀྱིལ་འཁོར་མ་ལུས་བསྙེན་པ་ཡི། །ཉེ་བའི་སྲས་སུ་དགོངས་པར་འགྱུར། །བསྐལ་པ་ཞིང་གི་རྡུལ་སྙེད་དུ། །ཤིན་ཏུ་སྦྱངས་ལ་རབ་གནས་ཤིང་། །དཀྱིལ་འཁོར་མ་ལུས་བསྙེན་པ་ཡི། །འབྲས་བུ་གསང་ཆེན་འདི་ཡིན་ཏེ། །འཇིག་རྟེན་དྲུག་གི་ཕྱོགས་བཅུ་ན། །འདས་དང་ད་ལྟར་བྱུང་བ་ཡི། །རྒྱལ་བའི་དཀྱིལ་འཁོར་མ་ལུས་པ། །བསྙེན་ནས་སྐུ་ལྔ་ལྷུན་གྱིས་རྫོགས། །འབྱུང་དང་མ་འོངས་ཐམས་ཅད་ཀྱང་། །འདི་ཡིས་ལྷུན་གྱིས་འགྲུབ་པར་འགྱུར། །འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །བཙལ་ཡང་རྒྱལ་བས་མི་བརྙེས་སོ། །ཞེས་གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཡེ་ནས་སངས་རྒྱས་པའི་རང་བཞིན་ཉིད། ལམ་ཐོས་བསམ་བསྒོམ་གསུམ་གྱིས་གཏན་ལ་ཕབ་ནས་མཉམ་པ་ཉིད་ཀྱི་དོན་ལ་རྟོགས་གོམས་ཀྱི་སྦྱོར་བས་མཐར་འབྲས་ལ་དངོས་སུ་སྦྱོར་བ་ལ་མི་བསླུ་བའི་གཏན་ཚིགས་ཕན་ཡོན་དགོས་ཆེད་སོགས་གསལ་བར་བསྟན་པ་བཞིན་ནོ། །རྫོགས་པ་ཨ་ནུ་ཡོ་གས་ནི། དབྱིངས་སྟོང་ཉིད་ཀུན་ཏུ་བཟང་མོའི་དཀྱིལ་འཁོར་དང་། ཐབས་བདེ་བ་ཀུན་ཏུ་བཟང་པོའི་དཀྱིལ་འཁོར་གཉིས་དབྱེར་མེད་པ་ནི་སྲས་བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་ཡིན་པས། དེ་ཉིད་རིགས་དང་དཀྱིལ་འཁོར་ཀུན་གྱི་ཁྱབ་བདག་ཏུ་ངེས་པའི་བདེ་སྟོང་གི་ལྟ་བ་ཞེས། དོན་ལ་རང་བྱུང་ཟག་མེད་བདེ་བ་ཆེན་པོ་ཞེས་པ་ཡེ་ནས་བདེ་སྟོང་འདུ་འབྲལ་སྤངས་པའི་ལྷན་ཅིག་སྐྱེས་པའི་ཡེ་ཤེས་ཉིད་ཡིན་ལ་དེ་ཉིད་ཀྱིས་ཆོས་ཐམས་ཅད་ལ་ཁྱབ་ཅིང་རྗེས་སུ་སོང་བས་སྣང་སྲིད་ཡེ་ནས་སངས་རྒྱས་པར་གཏན་ལ་ཕབ་ནས། གཙོ་བོར་ཤེས་རབ་རྫོགས་པའི་རིམ་པ་ཁམས་འཇུ་འདུལ་སོགས་ཀྱི་ཐབས་ལ་བརྟེན་ནས། ཐབས་བྱུང་རྣམ་ཀུན་མཆོག་ལྡན་གྱི་སྟོང་པ་དང་མཆོག་ཏུ་མི་འགྱུར་བའི་བདེ་བ་ཟུང་དུ་འཇུག་པའི་ཡེ་ཤེས་འོད་གསལ་ནམ་མཁའི་གཟུགས་ཅན་བསམ་མི་ཁྱབ་པ་ཉིད་ལམ་དུ་བྱེད་པ་སྟེ། དེ་ཡང་དབྱིངས་ཡེ་གཉིས་མེད་བདེ་ཆེན་བྱང་ཆུབ་ཀྱི་སེམས་ངོ་བོ་རྡུལ་དང་སྐད་ཅིག་མའི་ཆོས་ལས་འདས་པའི་ཡེ་ཤེས་ནམ་མཁའི་གཟུགས་ཅན་མཁའ་ཁྱབ་མཁའ་ཡི་རྡོ་རྗེ་ཅན་གྱིས། བརྟན་གཡོ་འཁོར་འདས་ཀྱི་ཆོས་ཐམས་ཅད་ལ་ཁྱབ་ཅིང་ཐམས་ཅད་དེའི་རང་བཞིན་ལས་མ་འདས་པ་ནི། ཀུན་སྤྱོད་ལས། གང་དུ་བདེ་ཆེན་ཞེས་བྱ་གཅིག་པུ་ཉིད། །གཅིག་པུའི་ཉམས་ཀྱིས་དུ་མའི་གར་བྱེད་དོ། །ཞེས་དང་། ཀྱེ་རྡོ་རྗེ་ལས། སངས་རྒྱས་མ་ཡིན་སེམས་ཅན་ནི། །གཅིག་ཀྱང་ཡོད་པ་མ་ཡིན་ནོ། །དམྱལ་བ་ཡི་དྭགས་བྱོལ་སོང་དང་། ལྷ་དང་ལྷ་མིན་མི་རྣམས་དང་། །བཤང་བའི་སྲིན་བུ་སོགས་ཀྱིས་ཀྱང་། །བདེ་བ་གང་ཕྱིར་མི་ཤེས་པ། །རྟག་ཏུ་རང་བཞིན་བདེ་བ་ཅན། །འཇིག་རྟེན་ཁམས་ནི་གང་དུ་ཡང་། །སངས་རྒྱས་གཞན་དུ་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཉིད། །སངས་རྒྱས་གཞན་དུ་བསྟན་པ་མེད། །ཅེས་སོ། །ཁྱད་པར་མི་ཡི་རྟེན་ཅན་ཁམས་དྲུག་ལྡན་གྱི་རྡོ་རྗེ་ལུས་ཀྱི་རྩ་ཐིག་རླུང་གསུམ་ལ་ཁྱབ་བྱེད་ཆོས་ཉིད་ཀྱི་ཚུལ་དུ་ཏིལ་ལ་མར་གྱིས་ཁྱབ་པ་བཞིན་བཞུགས་ཏེ། རང་ཤར་ལས། ལུས་ལ་ཡེ་ཤེས་ཆེན་པོས་ཁྱབ། །ཏིལ་འབྲུ་ལ་ནི་མར་བཞིན་དུ། །ལུས་ཀྱི་བཀྲག་མདངས་གཟི་བརྗིད་རྣམས། །ཡེ་ཤེས་བརླན་གྱིས་ཁྱབ་པར་བྱེད། །ཅེས་སོ། །འདི་ལ་ཡེ་ཤེས་ཀྱི་དབུ་མ་དང་། ཡེ་ཤེས་ཀྱི་རླུང་། ཡེ་ཤེས་ཀྱི་ཐིག་ལེ་ཞེས་ཕྲ་བའི་སྒོ་གསུམ་རྡོ་རྗེ་གསུམ་དུ་སྒྲུབ་པའི་གཞི་སྟེ། གང་ལ་གནད་དུ་བསྣུན་བྱའི་གཞི་ནི་འོད་གསལ་གཉུག་མའི་ཆོས་ཉིད་འགྱུར་མེད་བདེ་བ་ཆེན་པོའི་ཡེ་ཤེས་ཉིད་ཡིན་ཏེ། སྒྱུ་འཕྲུལ་རྡོ་རྗེ་ལས། ལུས་ཅན་སྙིང་ལ་གང་གནས་པ། །རང་བྱུང་ཡེ་ཤེས་ཟག་མེད་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ལ་ཁྱབ། །མི་གནས་ཆོས་སྐུའི་རང་བཞིན་ཡིན། །ཞེས་དང་། དཔེ་ཆུང་རང་གནས་ལས། མི་ཤིགས་ཐིག་ལེ་ཡེ་ཤེས་ནི། །སྐུ་གསུང་ཐུགས་ཀྱི་རྡོ་རྗེའི་བདག །གཅིག་དང་དུ་མ་རྣམ་སྤངས་པ། །སྣ་ཚོགས་སྣང་ལ་མཚོན་དུ་མེད། །ཅེས་དང་། རིམ་ལྔ་ལས། རྟག་ཏུ་སྙིང་ལ་གནས་པ་ཡི། །ཐིག་ལེ་གཅིག་ལ་འགྱུར་བ་མེད། །དེ་སྒོམ་བྱེད་པའི་སྐྱེས་བུ་ལ། །ངེས་པར་ཡེ་ཤེས་སྐྱེ་བར་འགྱུར། །ཞེས་དང་། བརྟག་གཉིས་ལས། ལུས་ལ་ཡེ་ཤེས་ཆེན་པོ་གནས། །རྟོག་པ་ཐམས་ཅད་ཡང་དག་སྤངས། དངོས་པོ་ཀུན་ལ་ཁྱབ་པ་པོ། །ལུས་གནས་ལུས་ལས་མ་སྐྱེས་པའོ། །ཞེས་གསུངས་ཏེ། དེ་ཡང་ཆོས་རྣམས་ལ་སྟོང་ཉིད་ཀྱིས་ཁྱབ་ཅིང་། ཀུན་རྫོབ་ལ་བརྟེན་ནས་དོན་དམ་སྟོང་ཉིད་གཏན་ལ་འབེབས་ཀྱང་། སྟོང་ཉིད་འདུས་བྱས་སུ་མི་འགྱུར་བ་བཞིན། ལྷན་སྐྱེས་བདེ་བ་ཆེན་པོའི་ཡེ་ཤེས་ཀྱིས་དངོས་པོ་ཀུན་ལ་ཁྱབ་ཅིང་། ལུས་ཐབས་ལྡན་གྱི་ལམ་སོགས་ཀྱིས་མངོན་དུ་བྱེད་རུང་ཀྱང་། ཡེ་ཤེས་དེ་ཉིད་དེ་ལས་གསར་དུ་སྐྱེས་པ་ནི་མིན་ནོ། །འདི་ལ་རྒྱུད་སྡེ་གོང་འོག་སོགས་ཀྱི་ཁྱད་པར་གྱིས་སྐུ་དང་ཐིག་ལེ་སོགས་སྣ་ཚོགས་བཤད་པ་ཡོད་ཀྱང་དོན་ལ་གནད་གཅིག་སྟེ་ཟག་མེད་རང་བྱུང་གི་ཡེ་ཤེས་འབའ་ཞིག་ཡིན། བདེ་བ་ཆེན་པོ་ཞེས་པའང་འགྱུར་བཅས་ཀྱི་ཟུག་རྔུ་དང་བྲལ་བའི་རང་བྱུང་ཟག་མེད་ཀྱི་བདེ་བ་དང་སྟོང་པ་ཟུང་དུ་འཇུག་པའི་ཡེ་ཤེས་བརྗོད་བྲལ་ལྷན་ཅིག་སྐྱེས་འདུས་མ་བྱས་ཆེན་ཉིད་ལ་བརྗོད་ཀྱི་ཚོར་བདེ་འགྱུར་བ་ཅན་ནི་མིན་ཏེ། ཨིནྡྲ་བོ་ངྷིས། དབང་པོ་གཉིས་སྦྱོར་བདེ་བ་ནི། །དེ་ཉིད་ཡིན་ཞེས་སྐྱེ་ངན་སྨྲ། །དེ་ནི་བདེ་ཆེན་དེ་ཉིད་དུ། །རྒྱལ་བ་མཆོག་གིས་མ་གསུངས་སོ། །ཞེས་དང་། བདེ་ཆེན་མི་རྟག་མ་ཡིན་ཏེ། །བདེ་བ་ཆེན་པོ་རྟག་ཏུ་རྟག །ཅེས་གསུངས། དེས་ན་དོན་དམ་བྱང་ཆུབ་ཀྱི་སེམས་བདེ་བ་ཆེན་པོ་དང་། ཀུན་རྫོབ་མཚན་མའི་རྩ་ཐིག་རླུང་གསུམ་རྟེན་བརྟེན་པའམ་ཆོས་ཅན་དང་ཆོས་ཉིད་ཀྱི་ཚུལ་དུ་འབྲེལ་བའི་དབང་གིས། ཕྱིའི་བསྐྱེད་རིམ་སྤྲོས་རྩོལ་སོགས་ལ་མ་ལྟོས་པར། ནང་རྡོ་རྗེ་ལུས་ཀྱི་རྩ་རླུང་གི་བྱེད་བཅིང་སོགས་རང་ལུས་ཐབས་ལྡན་དང་གཞན་ལུས་ཕོ་ཉའི་ལམ་གང་རུང་ལ་བརྟེན་ནས་གནད་དུ་བསྣུན་པས། རླུང་སེམས་འཇུག་པ་གཅིག་པའི་གནད་ཀྱིས་རགས་རླུང་དབུ་མར་ཐིམ་པས་སེམས་འགག་པའི་ཡེ་ཤེས་དཔེ་དོན་གྱི་འོད་གསལ་མངོན་དུ་བྱེད་པ་སྟེ། དེའི་ཚེ་རང་བཞིན་བརྒྱད་བཅུའི་ཀུན་རྟོག་བཞོན་པ་དང་བཅས་པ་མཐའ་དག་ཐིམ་པའི་འོད་གསལ་བའི་དབྱིངས་རིག་གདངས་མ་འགགས་པའི་བདག་ཉིད་ཅན་ནི། སེམས་དང་ཡེ་ཤེས་ཀྱི་ཟླས་ཕྱེ་བས་ཡེ་ཤེས་ཡིན་གྱི་སེམས་མ་ཡིན་ལ། ཡེ་ཤེས་དེ་ཉིད་ལ་ཡང་ཡང་གོམས་པས་ནང་གི་ས་ལམ་བགྲོད་དེ། མཐར་མ་དག་རླུང་སེམས་ཀྱི་ཆ་དཀར་དམར་རླུང་གི་བྱེད་པ་སྣང་གསུམ་འཕོ་སྒྲིབ་ཕྲ་བ་བཅས་འདོད་ཆགས་ཆེན་པོའི་ལམ་གྱིས་སྦྱངས་ནས། ཐོག་མར་གང་ལས་བྱུང་བའི་གཞི་འགྱུར་མེད་བདེ་བ་ཆེན་པོའི་དབྱིངས་སུ་དག་པའམ་ཐིམ་ནས། འབྲས་བུ་གསུང་རྡོ་རྗེ་དང་གཉིས་སུ་མེད་པའི་ཡེ་ཤེས་ཆེན་པོ་ཉིད་མངོན་དུ་བྱེད་པ་ཡིན་ཏེ། དུས་འཁོར་ལས། གང་དུ་འཇིག་རྟེན་གསུམ་པོ་མཐའ་དག་སྣང་འགྱུར་མི་ཡི་བདག་པོ་སླར་ཡང་གང་དུ་ཐིམ་པའོ། །ཞེས་དང་། མདོའི་དོན་བསྡུས་ལས། ཕྱི་ནང་བྱེ་བྲག་ཇི་སྙེད་པའི། །ཆོས་རྣམས་ཐམས་ཅད་བྱང་ཆུབ་སེམས། །ཇི་བཞིན་ངང་དུ་ཡེ་གནས་པས། །ཤེས་པར་བྱ་བ་རྒྱུད་དོན་ཡིན། །ཞེས་དང་། ཐིག་ལེ་མཆོག་གི་རྒྱུད་ལས། འོད་གསལ་བ་ཡི་སེམས་ཉིད་ནི། །དབྱིངས་དང་ཡེ་ཤེས་དབྱེར་མེད་པར། །བདེ་བ་ཆེ་དེ་སུས་སྒོམ་པ། །འབྲས་བུ་ཚེ་འདིར་མངོན་འཚང་རྒྱ། །ཞེས་གསུང་པ་བཞིན་ནོ། །རྫོགས་པ་ཆེན་པོ་ཨ་ཏི་ཡོ་གས་ནི། བྱ་བྲལ་ལྷུན་རྫོགས་ཀྱི་ལྟ་བ་ཞེས། གཤིས་གང་དུའང་མ་གྲུབ་ལ། གང་ལྟར་ཡང་འཆར་བའི་གཞི་མ་འགགས་པའི་རིག་པ། ངོ་བོ་སྟོང་། རང་བཞིན་གསལ། ཐུགས་རྗེའི་རྩལ་མ་འགགས་པའི་ཆོས་ཉིད། ཡེ་སངས་རྒྱས་པའི་མགོན་པོ་རང་ཆས་སུ་ཡེ་ནས་ལྡན་པ་སྟེ། ངོ་བོའི་ངོས་ནས་འཁོར་འདས། བཅིང་གྲོལ་མཐའ་དབུས། དག་མ་དག་སོགས་གཉིས་ཆོས་ཀྱི་སྤྲོས་པའི་མཐའ་ཀུན་དང་བྲལ་བས་མཐའ་བྲལ་ཙམ་དུའང་བཞག་ཏུ་མེད་ལ། རང་བཞིན་གྱི་ངོས་ནས་སྐུ་དང་ཡེ་ཤེས་སོགས་ཡོད་པའི་ཐ་སྙད་དུ་མ་དང་ལྡན་པ། ཐུགས་རྗེའི་ངོས་ནས་རིག་རྩལ་སྣ་ཚོགས་ཀྱི་འཆར་གཞི་དང་གོ་འབྱེད་པ། དེ་དག་ཀྱང་གཅིག་ཐ་དད་སོགས་གྲུབ་མཐའི་ཞེན་རྟོག་གི་སྤྱོད་ཡུལ་ལས་འདས་པའི་རང་བཞིན་མཐའ་གྲོལ་ཀློང་ཡངས་ཆེན་པོར་ཡེ་ནས་གནས་སོ། །དེ་ཡང་མ་དག་འཁྲུལ་པའི་སྣང་བ་རྣམས་ནི་རྨི་ལམ་དང་འདྲ་བས། ངོ་བོ་མེད་པ་རྟེན་མེད་པ། གདོད་ནས་ཡོད་མ་མྱོང་ལ། མ་འཁྲུལ་པའི་ཡེ་ཤེས་སམ་བདེ་བར་གཤེགས་པའི་སྙིང་པོ་ནི། རྟག་པ། བརྟན་པ་འཕོ་འགྱུར་མེད་པ། དྲི་མ་ཡེ་ནས་སངས་ཤིང་ཡོན་ཏན་ཡེ་ནས་རྒྱས་པའི་འདུས་མ་བྱས་ལྷུན་གྲུབ་ཆེན་པོ། ཚུ་རོལ་མཐོང་བའི་བློས་བསམ་གྱིས་མི་ཁྱབ་པ། དཔེ་ཉི་མཁའ་ལྟ་བུ་སྟེ། དེ་ལྟར་རྟོགས་ན་མངལ་གྱི་གྲོང་ཁྱེར་རྒྱུན་བཅད་ནས་ཁམས་གསུམ་དུ་མི་ལྡོག་པས་གྲོང་ཁྱེར་རྒྱུན་གཅོད་ཀྱི་ལྟ་བ་ཞེས་གསུངས་ཏེ། དོན་ལ་གོང་སྨོས་རང་བྱུང་ཟག་མེད་ཀྱི་ཡེ་ཤེས་ངོ་བོ་རང་བཞིན་ཐུགས་རྗེ་གསུམ་དབྱེར་མེད་པ་ཡེ་ནས་སྐུ་གསུམ་གྱི་ངོ་བོར་ལྷུན་གྱིས་གྲུབ་པས། དེའི་རྩལ་ལས་ཤར་བའི་རོལ་པ་སྣང་སྲིད་འཁོར་འདས་ཀྱི་ཆོས་ཐམས་ཅད་ཡེ་ནས་རྒྱལ་བའི་སྐུ་གསུང་ཐུགས་རྡོ་རྗེའི་རང་བཞིན་ནམ་དཀྱིལ་འཁོར་ལས་མ་འདས་པ་ཡིན་ཏེ། ཀུན་བྱེད་ལས། ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ཡིས། །སྙིང་པོ་སྐུ་ཡི་དཀྱིལ་འཁོར་བཀོད་པ་ནི། །ཇི་ལྟར་སྣང་ཞིང་གནས་པའི་ཆོས་རྣམས་ཀུན། །སྐྱེ་བ་མེད་པའི་ཆོས་དབྱིངས་ངང་ལ་བཀོད། །ཇི་ལྟར་གྲགས་ཤིང་གནས་པའི་ཆོས་རྣམས་ཀུན། །སྐྱེ་མེད་དབྱིངས་ལས་ཚིག་གི་གསུང་དུ་བཀོད། །སྙིང་པོ་བརྗོད་དུ་མེད་པའི་གསུང་ལ་འདུས། །དེ་ཡང་ཀུན་བྱེད་རྒྱལ་པོས་བཀོད་པ་ཡིན། །ཀྱེ་སྟོན་པའི་སྟོན་པ་ཀུན་བྱེད་རྒྱལ་པོ་ཡིས། །སྙིང་པོ་རིག་པའི་དཀྱིལ་འཁོར་བཀོད་པ་ནི། །ཇི་ལྟར་དྲན་རིག་རྟོག་པ་ཐམས་ཅད་ཀུན། །མ་སྐྱེས་ཀུན་བྱེད་ཉིད་ཀྱི་དོན་དུ་རིག །ཀུན་བྱེད་ང་ཡི་སྐུ་གསུང་ཐུགས་ཉིད་ནི། །མ་བཅོས་རྣལ་དུ་བཞག་པའི་དཀྱིལ་འཁོར་གསུམ། །མ་བཀོད་དུས་གཅིག་རྫོགས་པའི་དོན་རྟོགས་པས། ལྷུན་གྲུབ་སྙིང་པོའི་དོན་ལ་འཇུག་པར་བྱེད། །ཅེས་སོ། །དེས་ན་ད་ལྟའི་རིག་པ་རང་གནས་ཀྱི་བསམ་གཏན་སྐྱོན་ཡོན་གྲུབ་བསལ་ལས་འདས་པའི་ཆོས་ཉིད་མཉམ་པ་ཆེན་པོ་འདི། བློས་བྱས་དང་ཡིད་དཔྱོད་དུ་མ་སོང་བར། བླ་མའི་ཐུགས་རྗེ་དང་། རང་གི་དད་མོས། གདམས་ངག་གི་ཟབ་ཁྱད་ལ་བརྟེན་ནས་མངོན་སུམ་དུ་ངོ་འཕྲོད་པར་བྱས་ཏེ། དེ་ཉིད་ཀུན་བཟང་ཆོས་སྐུའི་དགོངས་པར་ཐག་བཅད། རང་གྲོལ་སྤང་གཉེན་དང་བྲལ་བར་གདེང་བཅས། ཚོགས་དྲུག་གི་ཡུལ་སྣང་གང་ལའང་དགག་སྒྲུབ་སྤང་གཉེན་དང་བྲལ་བར་ལམ་དུ་ཁྱེར་བས། ཕྱི་ཆོས་ཅན་ལ་བལྟས་པས་འཁྲུལ་སྣང་རྟེན་མེད་དུ་སྣང་བ་སྒྱུ་མའི་དཔེ་བརྒྱད་དུ་རྟོགས་ནས་དགག་སྒྲུབ་དང་ཞེན་འཛིན་བྲལ། ནང་ཆོས་ཉིད་ལ་བལྟས་པས་རོ་མཉམ་གྲུབ་བསལ་མེད་པ་ནམ་མཁའ་ལྟར་རྟོགས་ནས་སྤྲོས་བྲལ་ཆོས་ཟད་ཀྱི་ངང་དུ་རེ་དོགས་ཀྱི་འཛིན་པ་ཞིག གསང་བ་རིག་པ་ལ་བལྟས་པས་སྟོང་གསལ་འགག་མེད་ཆེན་པོ་ཆོས་སྐུ་ལྷུན་གྲུབ་ཏུ་རྟོགས་ནས་རྩོལ་སྒྲུབ་བཅོས་བསླད་དང་བྲལ་ཏེ། དེའི་ཚེ་ཐེག་པ་གཞན་གྱིས་མི་མཐོང་བའི་དོན་མཐོང་བས། དཔེ་རི་རབ་ཀྱི་རྩེར་ཕྱིན་པས་གླིང་བཞི་དུས་གཅིག་ལ་མཐོང་བ་དང་འདྲ་བའི་ཕྱིར་རི་བོ་ཅོག་བཞག་གི་སྒོམ་པ་ཞེས་བྱ་སྟེ། སྔ་མ་ལས། ཀྱེ་ང་ནི་ཀུན་བྱེད་རྒྱལ་པོ་བྱང་ཆུབ་སེམས། །ང་ལ་སྒྲོ་སྐུར་བྱ་བའི་ཡུལ་མེད་པས། །གང་ལའང་སེམས་པར་མ་བྱེད་སྒོམ་མ་བྱེད། །སྒོ་གསུམ་མ་བཅོས་ཇི་བཞིན་ལྷུག་པར་ཞོག །ཇི་ལྟར་ཤར་ཡང་རང་བཞིན་ངང་གིས་གྲོལ། །སྐྱེ་མེད་ནམ་མཁའ་ལྟ་བུར་ཕྱོགས་འདས་པས། །རང་བཞིན་རྫོགས་པ་ཆེན་པོར་ཤེས་པར་གྱིས། །ཞེས་དང་། མ་བཅོས་རྣལ་མ་ཀུན་གྱི་ཆོས་ཉིད་ཡིན། །ཆོས་ཉིད་ལས་ནི་སངས་རྒྱས་གུད་ན་མེད། །སངས་རྒྱས་མིང་དུ་བཏགས་པ་བླ་དྭགས་ཡིན། །ཆོས་ཉིད་བྱ་བ་གཞན་མེད་རང་སེམས་ཏེ། །རང་སེམས་མ་བཅོས་ཆོས་ཀྱི་སྐུ་རུ་བཤད། །མ་བཅོས་པ་ལ་ཡེ་ནས་སྐྱེ་མེད་པས། །སྐྱེ་མེད་དོན་ལ་བཙལ་ཞིང་སྒྲུབ་ཏུ་མེད། །བཙལ་ཞིང་སྒྲུབ་པས་བྱར་མེད་འགྲུབ་མི་འགྱུར། །ཞེས་དང་། ཐལ་འགྱུར་ལས། རང་བཞིན་དག་པ་ཆེན་པོའི་མཐའ། །ཆོས་རྣམས་རང་སར་བཞག་པ་སྟེ། །སྣང་ཤེས་ཆོས་ཉིད་ཟུང་འཇུག་པས། །ཡེ་གྲོལ་ཅོག་བཞག་ཉིད་ལ་ཐུག །དགོངས་པ་བློ་ལས་འདས་པ་དང་། །མཚན་བཅས་རང་སར་དག་པ་དང་། །སྟོང་དང་དངོས་པོའི་མཐའ་གྲོལ་དང་། །འབྱུང་ཟད་རྟོག་པ་མེད་པ་དང་། །བློ་ཟད་ཡིད་ལས་འདས་པའོ། །ཞེས་གསུངས། ཐབས་དེས་གྲུབ་པའི་དགོངས་པ་ནི་ཁམས་གསུམ་ཡོངས་གྲོལ་ཞེས་བྱ་སྟེ། རྫོགས་ཆེན་རྟོགས་པའི་རྣལ་འབྱོར་པས་བལྟས་ན། སྣང་སྲིད་འཁོར་འདས་ཐམས་ཅད་ལ་མ་གྲོལ་བ་གཅིག་ཀྱང་མེད་དེ། དང་པོ་འཁྲུལ་མ་མྱོང་། ད་ལྟ་འཁྲུལ་པ་གཞི་ལ་མི་གནས། ཐ་མ་འཁྲུལ་མི་སྲིད་པའི་ཕྱིར་དེ་སྐད་ཅེས་བྱའོ། །དེ་ལྟར་རྟོགས་ཐོག་ཏུ་བཞག་པས། དགག་སྒྲུབ་དང་རེ་དོགས་སྤང་གཉེན་གཟུང་འཛིན་གྱིས་བསྡུས་པའི་མཚན་རྟོག་རང་སར་དེངས་ནས། ཆོས་ཟད་ཡེ་གྲོལ་གྱི་དགོངས་པར་གནས་ཏེ། དེའི་ཚེ་འཁྲུལ་པ་དོན་ལ་མེད་པར་རྟོགས་པས་འཁོར་བ་སྤང་དུ་མེད་པས་བློ་བདེ། ཆོས་ལ་ཕྱོགས་རིས་མེད་པས་གྲུབ་མཐའི་འཁྲུལ་པ་ཞིག་སྟེ་ཆོས་སུ་འཛིན་ཞེན་མེད་པས་བློ་བདེ། ཚིག་གིས་དོན་ཐོག་ཏུ་མི་ཕེབས་པས་ཡིད་དཔྱོད་ཚིག་ཕྱིར་འབྲངས་ཀྱང་སངས་མི་རྒྱ་བར་ཤེས་ཏེ། ཐ་སྙད་ཚིག་ལ་གདེང་དུ་མི་འཛིན་པས་བློ་བདེ་བ་གསུམ་ཁོང་ནས་འཆར་བ་ཡིན་ཏེ། མདོར་ན། ཀུན་བྱེད་ལས། བྱར་མེད་འདི་ལ་གང་གནས་པ། །ལུས་ནི་གང་ཟག་ལྷ་མི་ཡང་། །དགོངས་པ་ཆོས་ཉིད་སངས་རྒྱས་ཡིན། །ཞེས་གསུངས། དེ་ལྟར་བཞག་པས་མ་དག་རླུང་སེམས་ཀྱི་འགྱུ་བ་མཐའ་དག་རང་འགགས་སུ་སོང་ནས་ཡེ་གྲོལ་བདེ་གཤེགས་སྙིང་པོའི་རང་བཞིན་ཆོས་ཟད་མིང་མེད་ཆེན་པོ་ཀ་དག་བློ་འདས་རིག་སྟོང་ཐུགས་རྡོ་རྗེ་ཆོས་སྐུའི་དགོངས་པ་མངོན་དུ་གྱུར་ཏེ་ད་ལྟ་ཉིད་ནས་ལྷུན་མཉམ་བདེ་བ་ཆེན་པོའི་ས་ལ་ཕྱིན་པར་བྱེད་པ་གནད་ཀྱི་མེ་བཙའ་ལྟ་བུ་སྟེ། ཀུན་བྱེད་ལས། དེ་ཕྱིར་སེམས་དཔའ་རྡོ་རྗེ་ཁྱོད་ཀྱིས་ཀྱང་། །སྒྲ་ལ་མ་དགའ་དོན་ཉིད་རྟོགས་པར་གྱིས། །གང་གིས་དེ་ལ་རྟོགས་པ་སྐྱེས་མ་ཐག །ཀུན་བྱེད་རྒྱལ་པོའི་དོན་ལ་དབང་འབྱོར་འགྱུར། །ཞེས་སོ། །དེ་ཡང་ཐབས་ལམ་པ་ལྟར་རྩ་རླུང་གི་བྱེད་བཅིང་སོགས་ལ་བརྟེན་ནས་རགས་རླུང་དབུ་མར་བསྟིམ་སྟེ། རང་བཞིན་བརྒྱད་ཅུའི་ཀུན་རྟོག་འགོག་པ་སོགས་ཀྱི་རྩོལ་བ་ལ་མ་ལྟོས་པར། གྲོལ་ལམ་བླ་མའི་མན་ངག་གིས་རང་གནས་ཀྱི་ཡེ་ཤེས་ད་ལྟ་ནས་མངོན་སུམ་དུ་ངོ་སྤྲོད་དུ་ཡོད་པ་ནི་རང་བཞིན་རྫོགས་པ་ཆེན་པོའི་ལམ་གྱི་ཁྱད་ཆོས་ཏེ། ཞིབ་པར་སེམས་དང་རིག་པ། ཀུན་གཞི་དང་ཆོས་སྐུའི་དབྱེ་བ་སོགས་རྫོགས་པ་ཆེན་པོའི་རྒྱུད་གཞུང་རྣམས་དང་ཁྱད་པར་ཀུན་མཁྱེན་ཆེན་པོའི་གསུང་རབ་ལས་རྟོགས་པར་བྱ་ཞིང་། དོན་ལ་རྫོགས་ཆེན་གྱི་རིག་ངོ་འཕྱུག་མེད་འཕྲོད་ན་སྔགས་ལམ་གྱི་དཔེ་ཡི་འོད་གསལ་སྐྱེས་པ་ཡིན། འདི་ཉིད་མངོན་སུམ་ཡིན་ཕྱིར་དོན་གྱི་ཡེ་ཤེས་དངོས་སུ་བཞེད་པ་ཡོད་ཀྱང་། རང་ལུགས་ཀུན་མཁྱེན་ཆེན་པོ་ནི། དོན་གྱི་ཡེ་ཤེས་དངོས་མཐོང་ལམ་ཡིན་པས་དེ་ལ་ཡོན་ཏན་བརྒྱ་ཕྲག་བཅུ་གཉིས་མངོན་གྱུར་དུ་ཡོད་དགོས་པའི་ཕྱིར། འདིར་མངོན་སུམ་གྱིས་མཐོང་བ་ཡིན་ཡང་ད་དུང་མཐོང་སྤང་གི་དྲི་མའི་སྦུབས་ལས་མ་གྲོལ་བའི་ཕྱིར་དོན་གྱི་འོད་གསལ་དངོས་མ་ཡིན་ལ། དཔེའི་འོད་གསལ་དུ་བཞེད་དོ། །དེ་ཉིད་ལ་གོམས་པས་དོན་གྱི་ཡེ་ཤེས་བཙན་ཐབས་སུ་འདྲེན་པས་ཟུང་འཇུག་འཕགས་པའི་ས་ལ་སྦྱོར་བར་བྱེད་པ་སྟེ། དེ་ཡང་སྣང་ཚུལ་དུ་མ་དག་རླུང་སེམས་གྱི་གཡོ་བ་སྟོབས་སུ་གྱུར་ཏེ། རིག་པ་རང་གནས་ཀྱི་ཡེ་ཤེས་བཞོན་པ་དང་བཅས་པ་བག་ལ་ཞ་བའི་ཚུལ་གྱིས་མངོན་དུ་མ་གྱུར་པའི་སྐབས་གཞི་སེམས་ཅན་དང་། གཉེན་པོ་ཡེ་ཤེས་ཉིད་ངོས་ཟིན་ཏེ་རྣམ་ཤེས་དང་ཡེ་ཤེས་ཀྱི་བྱེད་པ་འདྲེས་པའི་སྐབས་སུ་ལམ་རྣལ་འབྱོར་པ་དང་། མ་དག་རླུང་སེམས་ཀྱི་འགྱུ་ཆ་མཐའ་དག་དང་བྲལ་ཏེ་ཡེ་ཤེས་དང་ཡེ་རླུང་གི་བྱེད་པ་འབའ་ཞིག་ཏུ་གྱུར་པ་ནི་འབྲས་བུ་སངས་རྒྱས་ཀྱི་སའི་རྣམ་པར་བཞག་སྟེ། འདིའི་ལུགས་ལ། ཆོས་ཉིད་དང་། རྩལ་དང་། རོལ་པ་གསུམ། ཐ་སྙད་དུ་གཅིག་མ་ཡིན་ཏེ། ཆོས་ཉིད་ནི། ངོ་བོ་སྟོང་། རང་བཞིན་གསལ། ཐུགས་རྗེའི་འཆར་ཚུལ་མ་འགགས་པའི་རིག་པ་བྱང་ཆུབ་ཀྱི་སེམས་ཡིན་ལ། དེའི་རྩལ་ཡེ་ཤེས་སུ་ཤར་དུས། དེ་ལས་རོལ་པ་སངས་རྒྱས་ཀྱི་སྐུ་དང་ཞིང་ཁམས་སོགས་དང་། རྩལ་མ་རིག་འཁྲུལ་སེམས་སུ་ཤར་དུས། དེ་ལས་རོལ་པ་སེམས་ཅན་གྱི་ཕུང་ཁམས་སྐྱེ་མཆེད་སོགས་འཁོར་བའི་ཆོས་རྣམས་སྣང་བ་ཡིན་པས། དེ་ལྟ་ན་སྣང་བ་དང་སྣང་ཡུལ། རྩལ་དང་རོལ་པ། ཀུན་གཞི་དང་ཆོས་སྐུ། གཞི་ལམ་འབྲས་གསུམ་སོགས་སོ་སོར་ཕྱེས་ཏེ་ཐ་སྙད་ཀྱི་རྣམ་བཞག་རྣམས་ཞིབ་མོར་བྱེད་དགོས། དོན་དམ་པར་ཐ་དད་དུ་མ་ཡིན་ཏེ། རོལ་པ་ནི་མེད་སྣང་སྟོང་གཟུགས་སྒྱུ་མའི་དཔེ་བརྒྱད་ལྟ་བུ་དོན་ལ་ཡོད་མ་མྱོང་ལ། རྩལ་ནི་ཤར་གྲོལ་རྗེས་མེད་ངོ་བོ་ངོས་བཟུང་དང་བྲལ་བ་ནམ་མཁའི་བྱ་རྗེས་ལྟ་བུ། ཆོས་ཉིད་བྱང་ཆུབ་ཀྱི་སེམས་ནི་ངོ་བོ་བསམ་བརྗོད་ལས་འདས་པའི་མཐའ་ཟད་མིང་མེད་སྤྲོས་བྲལ་མཉམ་པ་ཆེན་པོ་ཡིན་པས། གཅིག་ཐ་དད་དུ་དབྱེ་བའི་གཞི་མེད་དོ། །དེས་ན་སྣང་སེམས་རོ་མ ཉམ་གདོད་ནས་ཀ་དག་ཡེ་གྲོལ་ཆེན་པོར་ཤེས་པར་བྱ་སྟེ་གྲུབ་མཐའ་འོག་མའི་ཞེ་འདོད་དང་བསྲེ་བར་མི་བྱ་སྟེ། མུ་ཏིག་ཕྲེང་བ་ལས། ཐོག་མ་ཉིད་ཀྱི་ཀ་དག་ལ། །འཁྲུལ་ཞེས་ཙམ་དུ་བརྗོད་དུ་མེད། །དེ་བཞིན་མ་འཁྲུལ་པའང་ཅི། །དེ་ཕྱིར་འཁྲུལ་པ་གདོད་ནས་དག །ཅེས་དང་། ཐལ་འགྱུར་ལས། རང་སེམས་གྲོལ་བ་ཞེས་བྱ་བ། །གཅིག་ནས་གཅིག་ཏུ་སོང་བ་མེད། །གང་གིས་བཀྲོལ་བ་མེད་པའི་སེམས། །གཞི་ནས་རྫོགས་པས་འགྲོ་འོང་མེད། །བརྟགས་པས་མ་རྙེད་རྒྱུ་མཚན་མེད། །གཞི་རྩ་མེད་པས་སྟོང་གསལ་གནས། །རང་གསལ་གནས་པའི་སེམས་དེ་ནི། །གནད་ཀྱིས་གྲོལ་བས་ཕྱོགས་རིས་མེད། །དུས་ཀྱིས་གྲོལ་བས་ལྟོས་གཞི་མེད། །འབད་མེད་གྲོལ་བས་བརྩོན་འགྲུས་མེད། །གདེང་གིས་གྲོལ་བས་འབད་རྩོལ་མེད། །དེ་ལ་གདེང་གིས་གྲོལ་བ་བཤད། །ཡེ་ནས་གྲོལ་བས་བསྐྱར་གཞི་མེད། །ངང་གིས་གྲོལ་བས་གཉེན་པོ་མེད། །ཅེར་གྱིས་གྲོལ་བས་མཐོང་སར་ཡལ། །ཡོངས་སུ་གྲོལ་བས་འབད་མེད་པའོ། །ཞེས་གསུངས། འོན་ཀྱང་། ལྟ་བ་ཡེ་གྲོལ་དུ་རྟོགས་ཀྱང་སྒོམ་པ་ཡིན་ཐོག་ཏུ་མ་བཞག་ན་གཟུང་འཛིན་གྱི་འཁྲུལ་པ་མི་ཆོམས་ཤིང་མ་བསྒོམས་པར་སངས་རྒྱ་བའི་ལམ་ནི་རྡོ་རྗེ་འཆང་གིས་ཀྱང་མ་བསྟན་པར་གསུངས་པ་བཞིན། ལས་དང་པོ་བས་དབེན་པ་བསྟེན་ཏེ་རྩེ་གཅིག་ཏུ་ཉམས་སུ་ལེན་པར་བྱ་བ་གལ་ཆེ། གནས་ལུགས་རྟོགས་མ་རྟོགས་ཀྱི་ཚད་འཛིན་པ་ཡོད་མེད་དུ་གསུངས་པ་བཞིན་ཞེན་མེད་འཛིན་མེད་གང་ཤར་སྤང་བླང་དང་བྲལ་བར་འགག་སྡོམས། དད་མོས་སྙིང་རྗེས་བསྐྱེད་རྫོགས་སོགས་ཟུང་དུ་འཇུག་པས་འཁྲུལ་པ་ཡེ་ཤེས་སུ་དག་པའི་ལམ་གནད་དུ་གང་འགྲོ་ལ་བརྩོན་པར་བྱ་དགོས་སོ། །འདི་ལའང་གཞི་ཀ་དག་གི་ཉམས་ལེན་སེམས་ཀློང་སོགས་སུ། རང་བྱུང་ཟག་མེད་ཀྱི་དབྱིངས་ཀྱི་ཡོན་ཏན་སྐུ་དང་ཡེ་ཤེས་སོགས་བལྟར་མི་མངོན་པའི་ཆོས་ཉིད་ཀྱི་ཚུལ་དུ་བཞུགས་པའི་རིག་སྟོང་ཆོས་ཟད་རྗེན་པའི་གཤིས་ལུགས་འཆིང་གྲོལ་ལས་འདས་པ་ཉིད་ལམ་དུ་བྱེད་ཀྱི། ད་ལྟ་ནས་ཆོས་ཉིད་འོད་གསལ་བའི་རྟགས་སྣང་རྣམས་མངོན་སུམ་ལམ་དུ་བྱེད་པ་མིན་པས། གང་ཟག་བློ་ཆུང་བ་ཁ་ཅིག་ལ་ཡིད་དཔྱོད་དང་གཤིས་ཤོར་གྱི་གོལ་ས་འབྱུང་བའི་ཉེན་ཡོད་ལ། ལྷུན་གྲུབ་ཐོད་རྒལ་གྱི་ཉམས་ལེན་ཡང་གསང་མན་ངག་སྙིང་ཐིག་གི་དགོངས་པ་སྒོ་ཡུལ་རླུང་རིག་སོགས་ཀྱི་གནད་ཟབ་མོ་ལ་བརྟེན་ནས། ཡེ་ཤེས་རིན་པོ་ཆེའི་གསང་མཛོད་ཕྱེས་ཏེ་ཆོས་ཉིད་ཡིད་དཔྱོད་དུ་མ་སོང་བར། མངོན་སུམ་འོད་གསལ་གྱི་རྟགས་སྣང་བཞིའི་ཡེ་ཤེས་ལམ་དུ་བྱས་པས། དབང་རྣོན་སྐལ་བ་མཆོག་དང་ལྡན་པ་རྣམས་ཟླ་དྲུག་སོགས་ཀྱིས་རང་སྣང་ལོངས་སྐུའི་ཞིང་ཁམས་གཏན་ལ་ཕེབས་ཤིང་མཐར་ཕྱིན་གཞོན་ནུ་བུམ་སྐུར་གྲོལ་ཏེ་མི་སློབ་པའི་ཟུང་འཇུག་མངོན་དུ་བྱེད་པར་གསུངས་པས་ན། རིགས་ཁམས་ཆོས་ཉིད་འོད་གསལ་བའི་ཡེ་ཤེས་ལ་ངེས་པ་ཇི་ཙམ་སྐྱེས་པ་དེ་ཙམ་དུ། དེ་ཉིད་མངོན་དུ་བྱེད་པའི་ལམ་མམ་ཐབས་ཇེ་ཟབ་ཏུ་སོང་བ་ཡིན་ཏེ་མཐར་ཕྱིན་པ་ནི་རང་བཞིན་རྫོགས་པ་ཆེན་པོའི་ལམ་འབའ་ཞིག་ཡིན་པས་འདི་ནི་རྫོགས་རིམ་ཀུན་གྱི་མཐར་ཐུག་པའམ་བླ་མར་གྱུར་པ་ཡིན་ནོ། །མདོར་ན། འཁོར་འདས་ཀྱི་ཆོས་ཐམས་ཅད་དག་མཉམ་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོར་ཡེ་ནས་སངས་རྒྱས་པའི་རང་བཞིན་དུ་རྟོགས་པ་ནི་ལྟ་བ། རྟོག་ཚོགས་སྐུ་དང་ཡེ་ཤེས་ཀྱི་དཀྱིལ་འཁོར་ཆེན་པོར་ཡེ་ནས་ལྷུན་གྱིས་གྲུབ་པར་གནས་པའི་དོན་ལ་བློ་མ་བཅོས་པར་འཇོག་པ་ནི་སྒོམ་པ། ལྟ་སྒོམ་ཟུང་དུ་འབྲེལ་བའི་སྒོ་ནས་སྣང་གྲགས་ཀྱི་ཆོས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་ཆེན་པོར་ལོངས་སྤྱོད་པ་ནི་སྤྱོད་པ། སྒོ་གསུམ་རྡོ་རྗེ་གསུམ་གྱི་རང་བཞིན་དུ་ཤེས་ཏེ་དེ་ལས་མི་འདའ་བ་ནི་དམ་ཚིག དེ་མངོན་དུ་གྱུར་པ་ནི་འབྲས་བུ་ཡིན་པས་ན། དེ་ལྟར་ལྟ་སྒོམ་སྤྱོད་འབྲས་སོགས་ཀྱི་ཆོས་རྣམས་དོན་ལ་དབྱེར་མི་ཕྱེད་པར་ཉམས་སུ་ལེན་པ་ནི་འབྲས་བུ་ལམ་དུ་བྱེད་པ་ཞེས་གསང་སྔགས་ནང་རྒྱུད་བསྐྱེད་རྫོགས་རྣམ་པ་གསུམ་གྱི་བསྟན་བྱའི་སྙིང་པོ་ཡིན་ལ། དེ་ཡང་དག་པ་མྱ་ངན་ལས་འདས་པ་སངས་རྒྱས་ཀྱི་སྐུ་དང་ཞིང་ཁམས་ནས། མ་དག་པ་འཁོར་བའི་སྣོད་བཅུད་ཕུང་ཁམས་སྐྱེ་མཆེད་སོགས་དང་། བར་མ་རྣལ་འབྱོར་པའི་ཉམས་ཀྱི་སྣང་བས་བསྡུས་པ་ཇི་ལྟར་སྣང་བའི་ཆོས་འདི་ཐམས་ཅད་ལ། དོན་དམ་དཔྱོད་བྱེད་ཀྱི་ཚད་མས་གཞལ་ན། རྒྱུ་རྐྱེན་ལས་མ་སྐྱེས་པའི་ཕྱིར་དང་། དུས་གློ་བུར་དུ་མ་བྱུང་བའི་ཕྱིར་དང་། བྱེད་པོས་མ་བྱས་པའི་ཕྱིར་དང་། སྐྱེས་པའི་དངོས་པོ་འདི་འདྲ་ཞེས་མ་དམིགས་པའི་ཕྱིར་དོན་དམ་སྐྱེ་བར་མེད་པར་མཉམ་ཞིང་། ཐ་སྙད་དཔྱོད་བྱེད་ཀྱི་ཚད་མས་གཞལ་ན། ཀུན་རྫོབ་སྣང་ཙམ་པོ་འདི་ལས་མཐུན་པར་བསགས་པའི་འགྲོ་བ་རྣམས་ལ་མཐུན་སྣང་དུ་གྲུབ་པའི་ཕྱིར་དང་། སྣང་ཙམ་པོ་འདི་མེད་ན་དོན་དམ་ཤེས་བྱེད་ཀྱང་མེད་པའི་སྐྱོན་དུ་འགྱུར་བའི་ཕྱིར་དང་། སྣང་བ་འདི་ཐམས་ཅད་མཁྱེན་པའི་ཕྱག་གིས་ཀྱང་མ་ཁེགས་པར་སྣང་འདུག་པའི་ཕྱིར་དང་། རང་རིག་པའི་རྩལ་ཐམས་ཅད་དུ་མ་འགགས་པར་རང་སྣང་བའི་ཕྱིར་རོལ་པ་འགགས་པ་མེད་པར་ཡང་མཉམ་ལ། མཐར་ཐུག་བདེན་གཉིས་དབྱེར་མེད་དུ་དཔྱོད་པའི་ཚད་མས་གཞལ་ན། དེ་གཉིས་ལ་རང་བཞིན་བཟང་ངན་མེད་པའི་ཕྱིར་དང་། ངོ་བོ་དབྱེར་མེད་པའི་ཕྱིར་དང་། འདུག་ས་ཐ་མི་དད་པའི་ཕྱིར་དང་། དུས་སྔ་ཕྱི་མེད་པའི་ཕྱིར་དབྱེར་མེད་བསམ་ཡུལ་ལས་འདས་པར་མཉམ་པས་ན། དག་མ་དག་སོགས་གཉིས་ཆོས་ཀྱི་སྤྲོས་པ་ཐམས་ཅད་བློས་བཏགས་པ་ཙམ་ལས། ཡུལ་རང་གི་ངོས་ནས་གྲུབ་པ་ཅུང་ཟད་ཀྱང་མེད་པས། འཁོར་འདས་ཀྱི་ཆོས་ཀུན། སྣང་ན་སྣང་མཉམ། སྟོང་ན་སྟོང་མཉམ། བདེན་ན་བདེན་མཉམ། རྫུན་ན་རྫུན་མཉམ། ཐམས་ཅད་སྤྲོས་བྲལ་མཉམ་པ་ཆེན་པོ་ལས་མི་འདའ་བས་གང་ལའང་དགག་སྒྲུབ་ཞེན་འཛིན་མེད་པར་རང་སར་བཞག་པས་གང་སྣང་ཡེ་ཤེས་ཀྱི་རོལ་པར་འཆར་བའི་གནད་དེ་ཡིན་པས། དེ་ལྟར་མ་ཤེས་པར་གཟུང་འཛིན་གྱི་བློས་དགག་སྒྲུབ་ཏུ་ཞེན་ན་གང་གིས་ཀྱང་འཁྲུལ་གཞི་བྱེད་དེ་ཐོག་མའི་འོད་གསལ་ཆེན་པོའི་རྩལ་ལ་བདག་ཏུ་ཞེན་པས་སེམས་ཅན་རྣམས་འཁྲུལ་པ་བཞིན་ནོ། །དེ་བཞིན་དུ་ཡ་ཀི་སངས་རྒྱས་ཀྱི་གསུང་ནས། མ་ཀི་འགྲོ་དྲུག་གི་བརྗོད་པའི་བར། ཡང་དག་པའི་དོན་དང་ལྡན་པའི་ཆོས་དང་། ཕྱིན་ཅི་ལོག་གྲུབ་མཐའ་ངན་པའི་གཏམ་དང་། བར་མ་ལུང་མ་བསྟན་གྱི་རིགས་སོགས་ཇི་ལྟར་གྲགས་པ་འདི་ཐམས་ཅད་ཀྱང་། དོན་དམ་པར་བྲག་ཅའི་སྒྲ་བཞིན་ཕྱི་ནང་གང་དུའང་བཙལ་ན་མི་རྙེད་དེ་རང་བཞིན་སྐྱེ་བ་མེད་པར་མཉམ་ལ་ཀུན་རྫོབ་ཏུ་མིང་ཚིག་ཡི་གེ་སོགས་ཀྱི་རྣམ་པར་ཤར་ཞིང་བརྡ་སྤྲོད་པ་སོགས་ཀྱི་ནུས་པ་མ་འགགས་པར་ཡང་མཉམ་ལ། དེ་ལྟར་གྲགས་པའི་དུས་ཉིད་ནའང་རང་བཞིན་གྱིས་སྐྱེ་བ་མེད་ལ། སྐྱེ་བ་མེད་བཞིན་མིང་ཚིག་བརྗོད་པའི་ངོ་བོར་སྣང་བས་ན། ལེགས་པར་བརྟགས་ན་སྒྲ་ཐམས་ཅད་གྲགས་སྟོང་བརྗོད་མེད་ཡི་གེའི་རང་བཞིན་ལས་མ་འདས་པས་དེ་ལྟར་ཤེས་ན་གང་གིས་ཀྱང་མི་འཆིང་ཞིང་སྒྲ་གྲགས་བརྗོད་པ་ཐམས་ཅད་གསང་སྔགས་ཀྱི་བཟླས་པ་ལས་མི་འདའ་འོ། །དེ་ལྟར་མ་ཤེས་པར་རང་མཚན་དུ་ཞེན་ན་གང་གིས་ཀྱང་འཆིང་སྟེ། དཔེར་ན་དྲག་སྔགས་རང་མཚན་པར་བཟླས་པས་ལོག་པར་གོལ་བའི་ཚུལ་གསུངས་པ་བཞིན་ནོ། །དེ་བཞིན་དུ་ཡིད་ཀྱི་ཡུལ་དུ། དག་པ་ལྷ་སྐུའི་གསལ་སྣང་སོགས་བསྐྱེད་རྫོགས་ཀྱི་སེམས་འཛིན་དང་། མ་དག་པ་ཉོན་མོངས་དུག་ལྔ་དུག་གསུམ་རྩ་བ་བདག་ཏུ་འཛིན་པ་སོགས་ཏེ། བར་མ་དགེ་མི་དགེ་ལུང་མ་བསྟན་གྱི་འགྱུ་དྲན་གྱི་རྟོག་པ་ཅི་དང་ཅི་ཤར་ཡང་རྩ་བ་སེམས་ཉིད་གཅིག་པུའི་རང་རྩལ་ལས་མ་འདས་ཤིང་སེམས་ནི་དང་པོ་བྱུང་བས་སྟོང་། བར་དུ་གནས་པས་སྟོང་། མཐར་འགགས་པས་སྟོང་སྟེ། དུས་གསུམ་སྐྱེ་འགག་སོགས་ཀྱི་སྤྲོས་པའི་མཚན་མ་ཐམས་ཅད་དང་བྲལ་བའི་ཆོས་ཉིད་མཉམ་པ་ཆེན་པོ་ཡིན་ལ། སྤྲོས་བྲལ་སྟོང་ཉིད་དེའི་རང་རྩལ་མ་འགགས་པར་ཤར་བའི་ཕྱིར། ཤར་བའི་དུས་ན་མཉམ་ཤར། གནས་པའི་དུས་ན་མཉམ་གནས། གྲོལ་བའི་དུས་ན་མཉམ་གྲོལ་ཏེ། ཐམས་ཅད་བཟང་ངན་མེད་པར་ཆོས་ཉིད་མཉམ་པ་ཆེན་པོའི་ཀློང་དུ་རང་གྲོལ་བས་གཤིས་ལ་འཕོ་འགྱུར་དང་བྲི་གང་བསལ་བཞག་བྲལ་བའི་གནད་ཀྱིས། གང་ཤར་ཡང་སྤང་བླང་དགག་སྒྲུབ་བྲལ་བར་རང་སར་བཞག་པས་གཉེན་པོ་གཞན་མི་དགོས་པར་རང་གིས་རང་གྲོལ་ཏེ་ཀུན་ཀྱང་ཡེ་ཤེས་ཆེན་པོར་འཆར་བ་ཡིན་པས། དེ་ལྟར་མ་ཤེས་པར་གང་ལའང་མཚན་མར་ཞེན་ན་འཆིང་བར་འགྱུར་ཏེ། བསྐྱེད་རིམ་རང་རྒྱུད་པར་བཟུང་བས་རུ་ཏྲ་སོགས་སུ་གོལ་བ་དང་། ཐབས་ལམ་རང་མཚན་པར་ཞེན་པས་མངལ་གྱི་སྲིན་བུར་སྐྱེ་བ་སོགས་རྒྱུད་སྡེ་རྣམས་ནས་གསུངས་པ་བཞིན་ནོ། །དེས་ན་སྣང་གྲགས་རྟོག་ཚོགས་ཀྱིས་བསྡུས་པའི་ཆོས་གང་ལའང་སྤང་བླང་དགག་སྒྲུབ་དང་བྲལ་བར་ཆོས་ཉིད་མཉམ་པའི་དོན་ལ་གདེང་བཅས་ཏེ་དེའི་ངང་ལས་མི་གཡོ་བར་བྱ་བ་ནི་མཉམ་བཞག་ཏུ་ལ་བཟླ་བའི་ཚུལ་ཡིན་ལ། རྗེས་ཐོབ་སྤྱོད་པས་ཤན་འབྱེད་པའི་སྐབས་སུ་ནི། ཇི་སྲིད་གཟུང་འཛིན་གྱི་འཁྲུལ་རྟོག་དབྱིངས་སུ་མ་དག་པའི་བར་དུ། ཀུན་རྫོབ་ལས་དང་ལས་ཀྱི་འབྲས་བུ་སོགས་བསླུ་མེད་དུ་ཡོད་པས། འཛིན་མེད་སྒྱུ་མ་ལྟ་བུའི་རྩིས་ཟིན་པའི་ངང་ནས་ཐབས་ཤེས་ཟུང་དུ་འཇུག་པའི་ལམ་ཐེག་ཆེན་གྱི་དགེ་རྩ་དམ་པ་གསུམ་ལྡན་དུ་སྒྲུབ་པ་སོགས་བླང་དོར་ཚུལ་བཞིན་བྱ་བ་ལས་སྟོང་ལྟ་ཧད་པོས་ཁྱད་དུ་མི་གསོད་པ་ནི་ཅིས་ཀྱང་གལ་ཆེ་སྟེ་ཨོ་རྒྱན་དུས་གསུམ་མཁྱེན་པས་ཀྱང་རྗེས་སུ་གདམས་པར་མཛད་པ་བཞིན་ནོ། །དེའི་ངོར་ནི་སངས་རྒྱས་ཀྱི་སྐུ་གཟུགས་རྩིག་ངོས་བྲིས་པ་ཚུན་ཆད་སེམས་ཅན་དམན་པ་དུད་འགྲོ་ཡན་གང་གི་མིག་ལམ་དུ་སྣང་བ་དང་། གཟུངས་སྔགས་ཁྱད་པར་ཅན་དང་སངས་རྒྱས་ཀྱི་མཚན་སོགས་རྣ་བར་ལན་གཅིག་ཐོས་པ་དང་། དཀོན་མཆོག་གསུམ་ལ་དང་བའི་སེམས་སྐད་ཅིག་མ་གཅིག་སྐྱེས་ཏེ། སྐྱབས་འགྲོ་ཚིག་གཅིག་བརྗོད་པའམ། ཐལ་མོ་ཡ་གཅིག་གདེང་བའམ་མེ་ཏོག་གཅིག་ནམ་མཁར་འཐོར་བ་ཡན་ཆོད་རྣམ་གྲོལ་གྱི་འབྲས་བུ་ལས་ཕྱིར་མི་ལྡོག་པར་མདོ་རྒྱུད་བསྟན་བཅོས་ཚད་མའི་ལུང་ལས་འབྱུང་བ་བཞིན་ཀུན་ལ་དག་སྣང་སྦྱང་ཞིང་ངེས་ཤེས་བསྐྱེད། ཆོས་ཉིད་བསམ་མི་ཁྱབ་པའི་དོན་དྲན་པའི་ངང་ནས་ཆོས་དང་གང་ཟག་ལ་སྐུར་བ་མི་གདབ་གཙོ་བོར་རང་རྒྱུད་ཀྱི་མ་དག་འཁྲུལ་པའི་སྣང་བ་འདི་སྦྱོང་བའི་ཐབས་ལ་བརྩོན་པར་བྱའོ། །དེས་ན་རང་བཞིན་གནས་རིགས་གདོད་མའི་འོད་གསལ་ཆེན་པོ་འཆིང་གྲོལ་ལས་འདས་པ་ནི་བྲལ་གཞི། དེའི་སྟེང་གི་སྒྲིབ་བྱེད་ཀྱི་དྲི་མ་མེད་སྣང་གློ་བུར་བ་རྣམས་ནི་བྲལ་བྱ། དེ་སེལ་བྱེད་གཉེན་པོ་ལམ་བདེན་གྱི་ཆར་གཏོགས་འཁོར་དང་བཅས་པ་ནི་བྲལ་རྒྱུའམ་བྲལ་བྱེད། མཐར་ཐུག་སྒྲིབ་པ་མཐའ་དག་དང་བྲལ་ནས་གཞི་ལ་གནས་པའི་ཡོན་ཏན་མཐའ་དག་མངོན་སུམ་དུ་གྱུར་ཏེ་དག་པ་གཉིས་ལྡན་མཐར་ཐུག་པ་སངས་རྒྱས་རང་སྣང་གི་སྐུ་གསུམ་ཞིང་ཁམས་མཛད་པ་ཕྲིན་ལས་དང་བཅས་པའི་ཡེ་ཤེས་ཀྱི་རོལ་པ་ཚད་མེད་པ་ནི་བྲལ་བའི་འབྲས་བུ་སྟེ། འདིའི་སྐབས་སུ་ཀུན་གཞི་ཚོགས་བརྒྱད་དང་བཅས་པ་དབྱིངས་སུ་དག་པས་སློབ་ལམ་གྱི་ཐོབ་པ་ཆད་དེ་ལམ་བདེན་ཟག་བཅས་ཀྱི་ཆར་གཏོགས་སེམས་སེམས་བྱུང་སོགས་ཀྱི་སྤྲོས་པ་རྣམས་འགག་སྟེ་རྒྱུན་ཆད་ཀྱང་། རང་བཞིན་འོད་གསལ་སྒྲིབ་བྲལ་གྱི་སེམས་ཆེན་པོའམ་ཟག་པ་མེད་པའི་ཡེ་ཤེས་མཐར་ཐུག་པ་མངོན་དུ་གྱུར་པས་ཡུལ་ཡུལ་ཅན་ཐ་དད་དུ་འཛིན་པའི་ཞེན་རྟོག་ཕྲ་མོ་ཙམ་ཡང་མི་མངའ་མོད་ཀྱི། མཉམ་ཉིད་ཕྱོགས་ལྷུང་དང་བྲལ་བའི་མཁྱེན་པའི་ཡེ་ཤེས་སྐད་ཅིག་མ་གཅིག་གིས། དུས་གསུམ་གྱི་ཤེས་བྱ་མཐའ་དག་ཅིག་ཅར་དུ་གཟིགས་ཤིང་། དམིགས་པ་མེད་པའི་སྙིང་རྗེ་ཆེན་པོ་རྒྱུན་ཆད་པ་མེད་པས་ཇི་སྲིད་འཁོར་བའི་མཐའ་མ་རྫོགས་ཀྱི་བར་དུ། རྟག་ཁྱབ་ལྷུན་གྱིས་གྲུབ་པའི་ཕྲིན་ལས་གདུལ་བྱའི་ཡུལ་ལ་རྩོལ་མེད་དུ་འཇུག་པས་ལུས་ཅན་མཐའ་དག་གནས་སྐབས་དང་མཐར་ཐུག་གི་ཕན་བདེའི་དཔལ་ལ་འགོད་པར་མཛད་པ་ནི་གནས་གྱུར་མཐར་ཐུག་པ་ཐོབ་པའི་དབང་གིས་སོ། །འདིའི་གནས་གྱུར་ཀྱང་། སྒྲིབ་བྱེད་མཐའ་དག་དང་བྲལ་བའི་ཡེ་ཤེས་ཟག་པ་མེད་པ་ཉིད་ཇི་བཞིན་པར་མངོན་དུ་གྱུར་པའི་ཆ་ཙམ་ལ་བརྗོད་ཀྱི། ཐེག་པ་འོག་མ་པ་རྣམས་འདོད་པའི་གནས་གྱུར་མཚན་ཉིད་པ་ནི་མིན་ཏེ། དུས་གསུམ་འཕོ་འགྱུར་དང་བྲལ་བའི་ཆོས་ཉིད་བསམ་མི་ཁྱབ་པའི་རང་བཞིན་རང་བྱུང་ཟག་མེད་ཀྱི་ཡེ་ཤེས་འདུས་མ་བྱས་ཀྱིས་ཁྱད་པར་དུ་བྱས་པའི་ཕྱིར། དེས་ན་སངས་རྒྱས་ཀྱི་མཁྱེན་བརྩེ་ནུས་གསུམ་སོགས་ཡེ་ཤེས་བསམ་མི་ཁྱབ་པ་ནི་ཆོས་ཀྱི་དབྱིངས་དང་ཐ་མི་དད་པར་དབྱེར་མེད་རོ་མཉམ་པས་ནམ་ཡང་རྒྱུན་ཆད་པ་མི་སྲིད་ལ། མཁྱེན་བརྩེ་ནུས་གསུམ་གྱི་ཕྲིན་ལས་གང་ལ་འཇུག་པའི་ཡུལ་གདུལ་བྱ་སེམས་ཅན་གྱི་ཁམས་ལའང་མཐའ་མེད་པའི་ཕྱིར། དེ་མ་ཟད་ཀྱི་བར་དུ་གང་འདུལ་ཞིང་སྐུའི་བཀོད་པ་དང་ཡེ་ཤེས་ཡོན་ཏན་མཛད་པ་ཕྲིན་ལས་ཀྱི་མཐའ་རྫོགས་པར་མི་འགྱུར་བས་ན་མཐའི་ཚད་དང་རྣམ་པའི་གྲངས་དང་དུས་སམ་ཡུན་འདི་ཙམ་ཞེས་སུས་ཀྱང་ཚད་བཟུང་དུ་མེད་དེ་ཆོས་ཀྱི་དབྱིངས་དང་སེམས་ཅན་གྱི་ཁམས་ཇི་ཙམ་གནས་པ་དེ་ཙམ་མ། །དེའི་ཕྱིར་དབུ་མ་འཇུག་པར། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང་། །ཡིད་བཞིན་ནོར་བུ་བཞིན་དུ་རྣམ་མི་རྟོག །འགྲོ་སྒྲོལ་བར་དུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བ་ཡིན། །ཞེས་གསུངས། རྡོ་རྗེའི་གནས་འདི་ནི་ཕལ་གྱིས་བསམ་གྱིས་མི་ཁྱབ་ཅིང་རྟོགས་དཀའ་བའི་གནས་སངས་རྒྱས་རང་ཉིད་ཀྱིས་མཁྱེན་པའི་སྤྱོད་ཡུལ་ཏེ། རྒྱུད་བླ་མ་ལས། སངས་རྒྱས་ཁམས་དང་སངས་རྒྱས་བྱང་ཆུབ་དང་། །སངས་རྒྱས་ཡོན་ཏན་སངས་རྒྱས་ཕྲིན་ལས་ཏེ། །དག་པའི་སེམས་ཅན་གྱིས་ཀྱང་བསམ་བྱ་མིན། །འདི་ནི་འདྲེན་པ་རྣམས་ཀྱི་སྤྱོད་ཡུལ་ལོ། །ཞེས་སོ། །དེས་ན་སངས་རྒྱས་དང་སེམས་ཅན། འཁོར་བ་དང་མྱང་འདས། དག་མ་དག་ལ་སོགས་པའི་གཉིས་ཆོས་ཀྱི་སྤྲོས་པ་མཐའ་ཡས་ཤིང་མུ་མེད་པར་སྣང་བ་འདི་ཐམས་ཅད། དོན་ལ་ཆོས་དབྱིངས་མཉམ་པ་ཆེན་པོའི་ཀློང་ལས་ནམ་ཡང་མ་གཡོས། མི་གཡོ། གཡོ་བར་མི་འགྱུར་བས་ན། གང་ལའང་དགག་སྒྲུབ་སྤང་བླང་རེ་དོགས་ཞེན་འཛིན་སོགས་ཀྱིས་བསླད་མི་གཞུག་པར། རང་བྱུང་གདོད་མའི་གཤིས་ལུགས། ཡེ་ནས་འཆིང་གྲོལ་ལས་འདས་པའི་དོན་ལ་ཡིད་ཆེས། ཐག་ཆོད། བརྟན་པ་ཐོབ་པར་བྱ་བ་ནི། ངེས་དོན་གྱི་མདོ་རྒྱུད་མན་ངག་ཀུན་གྱི་བསྟན་དོན་ཟབ་གནད་སྙིང་པོ་གཅིག་ཏུ་དྲིལ་བ་སྟེ། ཀློང་རབ་འབྱམས་རྒྱལ་པོའི་རྒྱུད་ལས། འཁོར་འདས་ཀུན་ལ་དབང་བསྒྱུར་ཀྱང་། །མཉམ་པའི་དོན་ལས་གཡོས་པ་མེད། །ཐམས་ཅད་ཀུན་ཏུ་བཟང་པོར་གཅིག །ཅེས་དང་། ཀུན་བྱེད་ལས། ཇི་ལྟར་སྣང་བ་དེ་བཞིན་ཉིད་དུ་གཅིག །འདི་ལ་སུས་ཀྱང་བཅོས་པར་མ་བྱེད་ཅིག །མ་བཅོས་མཉམ་པའི་རྒྱལ་པོ་དེ་ལ་ནི། །མི་རྟོག་ཆོས་སྐུའི་དགོངས་པ་ལྷུན་གྱིས་གྲུབ། །ཅེས་དང་། སྒྱུ་འཕྲུལ་རྒྱས་པ་ལས། མཉམ་ཉིད་དོན་རྟོགས་རང་རིག་རྒྱལ་པོ་ནི། །རྒྱ་མཚོ་ཆེན་པོར་ཆུ་ཀླུང་ཀུན་འབབ་ལྟར། །བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་དང་། སྐྱེ་མེད་རིན་པོ་ཆེའི་མཛོད་ལས། གར་ཡང་མ་རྟོག་ཅིར་ཡང་མ་བསམས་ཤིག །བཅས་བཅོས་མ་བྱེད་རང་བཞིན་ལྷུག་པར་ཞོག །མ་བཅོས་པ་ནི་སྐྱེ་མེད་རིན་ཆེན་མཛོད། །དུས་གསུམ་སངས་རྒྱས་ཀུན་གྱི་དགོངས་པ་ཡིན། །ཞེས་སོ། །དེ་ལྟར་རྟོགས་པའི་དགོས་ཆེད་དམ་ཕན་ཡོན་ཡང་། ཡིད་བཞིན་རིན་པོ་ཆེའི་མཛོད་ལས། ཡང་ཟབ་ལྟ་བའི་མཐར་ཐུག་འདི་ཤེས་པས། །གོལ་སྒྲིབ་ལས་གྲོལ་རྟག་ཆད་ཀུན་དང་བྲལ། །བསྒྲུབ་པ་དོན་ཡོད་མྱུར་དུ་འཚང་རྒྱ་ཞིང་། །མདོ་རྒྱུད་ཀུན་ལ་ལྟ་བའི་མིག་དང་ལྡན། །དེ་ཕྱིར་གནས་ལུགས་འོད་གསལ་མཁྱེན་པར་མཛོད། །ཅེས་རྗེས་སུ་གདམས་པར་མཛད་པ་བཞིན་ནོ། །སྨྲས་པ། གདོད་མའི་འོད་གསལ་བདེ་གཤེགས་སྙིང་པོ་ནི། །ངོ་བོ་སྟོང་པས་རྟག་པའི་མཐའ་ལས་གྲོལ། །རང་བཞིན་འོད་གསལ་ཆད་པའི་མུ་དང་བྲལ། །གང་ལའང་མི་གནས་གཉིས་མེད་མཉམ་པ་ཉིད། །དེ་ཡི་ངང་ལས་འཁོར་འདས་བཀོད་པའི་སྤྲིན། །བསམ་གྱིས་མི་ཁྱབ་མཁའ་ཡི་མུ་མཉམ་ཡང་། །དོན་ལ་གཉིས་མེད་མཉམ་ཉིད་ཆོས་སྐུར་གྲུབ། །ཆོས་སྐུའི་ཀློང་དུ་དགག་སྒྲུབ་སྤང་ལེན་ཅི། །འཁོར་བ་མིང་མེད་འཁྲུལ་གཞི་ཀ་ནས་དག །ཡེ་ཤེས་རང་གསལ་དུས་གསུམ་འགྱུར་བ་མེད། །སྲིད་ཞི་རོ་མཉམ་བསལ་བཞག་བྲི་གང་བྲལ། །དེ་ཚུལ་ཤེས་རྣམས་ཐེག་པ་མཆོག་ལ་སྦྱོར། །དེ་ཕྱིར་རིག་འཛིན་བརྒྱུད་པའི་མན་ངག་བཞིན། །དོན་གནད་སྙིང་པོ་མདོ་ཙམ་བརྗོད་པར་བྱས། །འདི་ལ་ནོངས་གྱུར་གང་མཆིས་འཕགས་ལ་བཤགས། །དགེ་བས་རང་གནས་ཡེ་ཤེས་མངོན་བྱེད་ཤོག །འདི་ལྟར་སྨྲ་བའང་བླ་མའི་དྲིན་ཡིན་པས། །སྐྱེ་ཀུན་བླ་མ་མཆོག་དང་མི་འབྲལ་བར། །དེའི་གསུང་ཟབ་རྒྱས་ཆོས་མཛོད་ཀུན་འཛིན་ཅིང་། །གཞན་ལ་སྟོན་པའི་སྐལ་བཟང་ཐོབ་གྱུར་ཅིག །རྒྱལ་བ་རིག་འཛིན་བརྒྱུད་པའི་བདེན་བྱིན་གྱིས། །ངེས་གསང་བསྟན་མཆོག་སྲིད་མཐར་ཆེར་རྒྱས་ཤིང་། །འགྲོ་ཀུན་ཐེག་མཆོག་ལམ་བཟང་འདིར་ཞུགས་ཏེ། །ཀུན་ཀྱང་རྣམ་མཁྱེན་གྲོང་ཁྱེར་མཛེས་བྱེད་ཤོག །བཀྲ་ཤིས་གང་ཞིག་ལྷན་སྐྱེས་བདེ་བ་ཆེ། །ཤེས་རབ་རང་བྱུང་སྒྲོན་མེ་འཇམ་པའི་དཔལ། །ལུས་ཅན་ཀུན་གྱི་སྙིང་ལ་རྟག་གནས་པའི། །བདེན་པ་དེ་ཡིས་དུས་ཀུན་ཤིས་གྱུར་ཅིག །ཅེས་པའང་ངེས་པ་དོན་གྱི་ཐམས་ཅད་མཁྱེན་པ་འཇམ་མགོན་རྣམ་གསུམ་གྱི་ཞབས་ཀྱི་ཆུ་སྐྱེས་སྤྱི་བོར་ལེན་པའི་ཞེ་ཆེན་བན་རྒན་འགྱུར་མེད་པདྨ་རྣམ་རྒྱལ་ལམ་འཇམ་དབྱངས་བློ་གྲོས་རྒྱ་མཚོས་རང་ལོ་ང་བཞི་པ་ཤིང་བྱི་གནམ་ལོ་གསར་འཆར་གྱི་དུས་ཚེས་དགེ་བར་བདེ་མཆོག་བཀྲ་ཤིས་དགེ་འཕེལ་དུ་ལྷག་པའི་ལྷའི་བ སྙེན་མཚམས་ལ་གནས་པའི་ཐུན་གསེང་དུ་བྲིས་པ་སྟེ། འདིས་ཀྱང་སྙིང་པོའི་ལམ་བཟང་གསལ་ཞིང་ཡུན་རིང་དུ་གནས་པའི་རྒྱུར་གྱུར་ཅིག། །།
ངེས་དོན་སྙིང་པོའི་གནད་མདོར་བསྡུས་པའི་ས་བཅད།
༄༅། །ངེས་དོན་སྙིང་པོའི་གནད་མདོར་བསྡུས་པའི་ས་བཅད། །ན་མོ་མཉྫུ་ཤྲཱི་ཡེ། འདིར་ངེས་དོན་སྙིང་པོའི་གནད་མདོར་བསྡུས་པ་རིན་པོ་ཆེའི་སྒྲོན་མེ་འཆད་པ་ལ་དོན་གསུམ། ཀླད་དོན། གཞུང་དོན། མཇུག་དོན་ནོ། །དང་པོ་ལ། མཚན་སྨོས་པ། ཕྱག་འཚལ་བ། མཆོད་པར་བརྗོད་ཅིང་རྩོམ་པར་དམ་བཅའ་བ་དང་གསུམ་ལས། དང་པོ། ངེས་དོན་སྙིང་པོའི་སོགས། གཉིས་པ། ན་མོ་གུ་རུ་སོགས། གསུམ་པ། སེམས་ཀྱི་རང་བཞིན་སོགས་སོ། །གཉིས་པ་གཞུང་དོན་ལ། གཞི་གཏན་ལ་དབབ་པ། ལམ་ཉམས་སུ་ལེན་ཚུལ། མཐར་ཕྱིན་འབྲས་བུ་བསྟན་པ་དང་གསུམ་ལས། དང་པོ་ལ་བཞི། གདོད་མ་གཞིའི་གནས་ལུགས། དེ་ལས་འཁོར་འདས་གཉིས་བྱུང་ཚུལ། སེམས་དང་ཡེ་ཤེས་ཀྱི་དབྱེ་བ། འཁྲུལ་དུས་ཀྱང་རང་བཞིན་འོད་གསལ་དག་པའི་ཆོས་ཉིད་ཇི་ལྟར་བཞུགས་ཚུལ་ལོ། །དང་པོ། འདིར་ངེས་དོན་སྙིང་པོའི་སོགས། གཉིས་པ། འདིའི་རང་རྩལ་ཕྱིར་གཡོས་པའི་ཚེ་སོགས། གསུམ་པ་ལ། དབྱེ་བ་དངོས་དང་། གཅིག་ཐ་དད་ལ་བརྟག་པ་གཉིས། དང་པོ། དེས་ན་སེམས་རྣམ་ཤེས་ཚོགས་བརྒྱད་སོགས། གཉིས་པ། གཞན་ཡང་དགོངས་པ་ངེས་འགྲེལ་སོགས། བཞི་པ་ལ། རང་བཞིན་དག་པའི་ཆོས་ཉིད་ཇི་ལྟར་བཞུགས་པའི་ཚུལ། དེ་ལ་ཟག་མེད་ཀྱི་ཡོན་ཏན་རྣམས་ཇི་ལྟར་བརྟེན་པ། དེ་དག་མདོ་སྔགས་ཀྱི་དགོངས་པ་མཐུན་པར་སྦྱར་ཏེ་རྒྱས་པར་བཤད་པ་དང་གསུམ་ལས། དང་པོ་ལ་གསུམ་སྟེ། ཆོས་ཉིད་ཡེ་ནས་དག་པའི་ཚུལ། དེ་ལ་གློ་བུར་གྱི་དྲི་མ་ཇི་ལྟར་བརྟེན་པ། དེ་རྣམས་ཀྱི་དོན་བསྡུས་ཏེ་སྤྲོས་པ་གཅོད་ཚུལ་ལོ། །དང་པོ། མདོར་ན་སྒྱུ་འཕྲུལ་གསང་སྙིང་ལས། ཨེ་མ་ཧོ་སོགས། གཉིས་པ། དེ་ལ་འཁོར་ཆོས་ལས་དང་ཉོན་མོངས་སོགས། གསུམ་པ། མདོར་ན་རྩ་ཤེར་ལས། ལས་དང་སོགས། གཉིས་པ་ལ། ཟག་མེད་ཀྱི་ཡོན་ཏན་བརྟེན་ཚུལ་སྤྱིར་བསྟན་པ་དང་། བྱེ་བྲག་སེམས་ཉིད་རྫོགས་པའི་སངས་རྒྱས་སུ་བསྟན་པ་གཉིས་ལས། དང་པོ། མྱ་ངན་ལས་འདས་པའི་ཆོས་སོགས། གཉིས་པ། མདོར་ན་འཕགས་པ་འདའ་ཀ་ཡེ་ཤེས་སོགས། གསུམ་པ་ལ་བཞི། མདོ་ནས་ཇི་ལྟར་གསུངས་པ། དེ་ཉིད་སྔགས་དང་མཚམས་སྦྱོར་ཚུལ། ཐེག་ཆེན་བླ་མེད་ཀྱི་རིགས་ཁམས་ངོས་བཟུང་བ། བདེན་གཉིས་ཀྱི་རྣམ་དབྱེ་བསྟན་པའོ། །དང་པོ་ལ། བཀའ་འཁོར་གསུམ་དུ་ཇི་ལྟར་བསྟན་ཚུལ་གྱི་དབྱེ་བ། དེའི་གོ་རིམ་དང་དྲང་ངེས་ཀྱི་དབྱེ་བསལ། དེ་ལ་གཞན་གྱི་ལོག་རྟོག་བཟློག་པ་དང་གསུམ་ལས། དང་པོ་ལའང་གསུམ། འཁོར་ལོ་དང་པོ་ནས་སྙིང་པོའི་རང་བཞིན་དངོས་སུ་མ་བསྟན་པའི་ཚུལ། བར་པར་ངོ་བོ་སྟོང་ཕྱོགས་ནས་ཇི་ལྟར་བསྟན་པ། ཐ་མར་ཆོས་དབྱིངས་སྣང་སྟོང་ཟུང་དུ་འཇུག་པའི་ཡེ་ཤེས་ཇི་བཞིན་པ་བསྟན་པའི་ཚུལ་ལོ། །དང་པོ། འོན་ཀྱང་གང་ཟག་བློ་དམན་པ་རྣམས་ལ་སོགས། གཉིས་པ་ལ་དངོས་དང་། ཞར་བྱུང་སྟོང་ཉིད་དོན་སྤྱིའི་ཚུལ་དུ་བསྒོམ་པའི་ཚུལ་གཉིས། དང་པོ། བར་པར་རྣམ་ཐར་གསུམ་ལྡན་སོགས། གཉིས་པ། དེ་ཡང་ཆོས་ཉིད་ཀྱི་སོགས། གསུམ་པ། དེ་ལྟར་བྱང་སེམས་བློ་ཆེ་བ་སོགས། གཉིས་པ། དེས་ན་སྙིང་པོའི་རང་བཞིན་སོགས། གསུམ་པ། འོ་ན་ཁྱི་ཕག་སོགས། གཉིས་པ་སྔགས་དང་མཚམས་སྦྱོར་ཚུལ་ལ། དངོས་དང་། མདོ་ལས་སྔགས་ཁྱད་པར་དུ་འཕགས་པའི་གནད་བཤད་པ་གཉིས་ལས། དང་པོ། དེས་ན་ཆོས་དབྱིངས་འོད་གསལ་ལམ་སོགས། གཉིས་པ། འོན་ཀྱང་འཁོར་ལོ་ཐ་མར་སོགས། གསུམ་པ་ཐེག་ཆེན་བླ་མེད་ཀྱི་རིགས་ཁམས་ངོས་བཟུང་བ་ལ། རིགས་གཉིས་ཀྱི་དབྱེ་བ། དེ་ཡོད་པར་རྟགས་ཀྱིས་ངེས་ཚུལ། དེ་ལས་འབྲས་བུ་སྐུ་གསུམ་འགྲུབ་ཚུལ། དེ་ལ་གཞན་ལུགས་དགག་པ། རང་ལུགས་རྣམ་པར་དག་པའི་ཕྱོགས་བཞག་པ་དང་ལྔ་ལས། དང་པོ། དེ་ལྟ་བུའི་བླ་ན་མེད་པའམ་སོགས། གཉིས་པ། དེ་ལྟ་བུའི་རང་བཞིན་གནས་རིགས་སོགས། གསུམ་པ། དེས་ན་རྒྱུ་རིགས་དེ་གཉིས་སོགས། བཞི་པ། དེ་ལྟར་མ་ཤེས་པར་སོགས། ལྔ་པ་ལ། རང་ལུགས་དངོས་དང་། དེ་གྲུབ་མཐའ་གཞན་གྱིའང་དགོངས་པའི་ཞེ་ཕུག་ཡིན་པར་བསྟན་པ། ཞར་བྱུང་དབུ་མ་རྣམ་གཉིས་ཀྱི་དགོངས་པ་མི་འགལ་བར་སྒྲུབ་པ་གསུམ་ལས། དང་པོ། དེས་ན་རིགས་གཉིས་ཀྱང་སོགས། གཉིས་པ། དེ་དང་མཐུན་པར་འགྲོ་བའི་མགོན་པོ་སོགས། གསུམ་པ། དེའི་ཕྱིར་ཚིག་སྤྱི་སྦས་སོགས། བཞི་པ་བདེན་གཉིས་ཀྱི་རང་བཞིན་བསྟན་པ་ལ། དོན་དམ་དུ་དབྱེར་མེད་ཚུལ་དང་། ཐ་སྙད་དུ་ཇི་ལྟར་དབྱེ་བའི་ཚུལ་བསྟན་པ་གཉིས་ལས། དང་པོ། དེས་ན་སྣང་སྟོང་གང་རུང་རེའི་སོགས། གཉིས་པ་ལ། དངོས་དང་། ཞར་བྱུང་གཉིས། དང་པོ། འདི་ལ་ཐ་སྙད་པའི་ཀུན་ཏུ་ཚད་མ་སོགས། གཉིས་པ་ལ། རང་བྱུང་གི་ཡེ་ཤེས་རྟག་པར་སྒྲུབ་པ། སྣང་བ་ལྷར་སྒྲུབ་པ། དེ་ལ་གཞན་གྱི་ལོག་རྟོག་བཟློག་པ་དང་གསུམ་ལས། དང་པོ། དེས་ན་གནས་སྣང་མཐུན་པར་གྱུར་པའི་སོགས། གཉིས་པ། དེར་མ་ཟད་ཆོས་ཉིད་རང་བཞིན་གྱིས་སོགས། གསུམ་པ། འོ་ན་སངས་རྒྱས་ཀྱིས་ཕུང་སོགས་སོ། །གཉིས་པ་ལམ་ཉམས་སུ་ལེན་ཚུལ་དངོས་ལ་གཉིས། མདོ་སྔགས་ཀྱི་ལམ་ཉམས་སུ་ལེན་ཚུལ་གྱི་དབྱེ་བ་སྤྱིར་བསྟན། བྱེ་བྲག་རྡོ་རྗེ་ཐེག་པའི་ལམ་ཉམས་སུ་ལེན་ཚུལ་རྒྱས་པར་བཤད་པའོ། །དང་པོ་ནི། དེ་ལྟར་ལེགས་པར་གཏན་ལ་ཕེབས་ནས་སོགས། གཉིས་པ་ལ་སྔགས་ཕྱི་ནང་གཉིས་ལས། དང་པོ། སྔགས་ལའང་བྱ་སྤྱོད་སོགས། གཉིས་པ་ལ། སྔགས་ཕྱི་པ་ལས་ཁྱད་པར་དུ་འཕགས་པའི་ཚུལ་གྱིས་མདོར་བསྟན། ནང་པ་གསུམ་གྱི་ཁྱད་པར་རྒྱས་པར་བཤད། གསུམ་ཀའི་གནད་བསྡུས་ཏེ་ལ་ཤན་འབྱེད་པའི་ཚུལ་དང་གསུམ་ལས། དང་པོ་ཐབས་ཀྱི་ཐེག་པའམ་ནང་རྒྱུད་སོགས། གཉིས་པ་ལ་གསུམ། མ་ཧཱ། ཨ་ནུ། ཨ་ཏི་ཡོ་གའོ། །དང་པོ། དེ་ལའང་བསྐྱེད་རྫོགས་རྣམ་པ་གསུམ་གྱི་བསྐྱེད་པ་མ་ཧཱ་སོགས། གཉིས་པ། རྫོགས་པ་ཨ་ནུ་ཡོ་གས་སོགས། གསུམ་པ། རྫོགས་པ་ཆེན་པོ་ཨ་ཏི་ཡོ་གས་སོགས། གསུམ་པ་གནད་བསྡུས་ཏེ་ལ་ཤན་འབྱེད་པ་ནི། མདོར་ན་འཁོར་འདས་ཀྱི་ཆོས་ཐམས་ཅད་སོགས་སོ། །གསུམ་པ་མཐར་ཕྱིན་འབྲས་བུ་བསྟན་པ་ནི། དེས་ན་རང་བཞིན་གནས་རིགས་གདོད་མའི་འོད་གསལ་སོགས་སོ། །རྩ་བའི་གསུམ་པ་མཇུག་གི་དོན་ལ། གཞུང་དོན་སྙིང་པོར་དྲིལ་ནས་གདམས་པ། དེ་ལྟར་རྟོགས་པའི་དགོས་ཆེད་དམ་ཕན་ཡོན། རྩོམ་པ་མཐར་ཕྱིན་ནས་ནོངས་པ་བཤགས་ཤིང་དགེ་བ་བསྔོ་བ། བྱེད་པ་པོའི་མིང་དང་གནས་སྨོས་པ་བཅས་བཞི་ལས། དང་པོ། དེས་ན་སངས་རྒྱས་དང་སེམས་ཅན་སོགས། གཉིས་པ། དེ་ལྟར་རྟོགས་པའི་སོགས། གསུམ་པ། སྨྲས་པ། གདོད་མའི་འོད་གསལ་བདེ་གཤེགས་སྙིང་པོ་ནི། སོགས། བཞི་པ་ནི། ཅེས་པའང་སོགས་སོ། །ཐོག་མར་གང་དྲན་འཕྲལ་བྲིས་པར། །སླད་ནས་ས་བཅད་འདི་ལྟར་མཐོང་། །མཆོག་སྤྲུལ་དམ་པའི་བཞེད་སྐོང་དུ། །འདི་ཡང་བི་ཛས་བྲིས་པ་དགེ། །མངྒལཾ།། །།
བདེན་གཉིས་བསལ་བཞག་དང་བྲལ་བའི་དོན་གྱི་དགོངས་བཤད་གློག་གི་སྒྲོན་མ།
༄༅། །ཏཌིཏཿཔྲདཱིཔཿརྀཏཱདྭིཨབིནིངྷརབིདྷཱནཾསྱཱརྠསྱཤཡབྷཱཥཾནཱམབིཧརཏིསྨ།
༄༅། །བདེན་གཉིས་བསལ་བཞག་དང་བྲལ་བའི་དོན་གྱི་དགོངས་བཤད་གློག་གི་སྒྲོན་མ་ཞེས་བྱ་བ་བཞུགས་སོ། །
ན་མོ་གུ་རུ་མཉྫུ་ཤྲཱི་ཡེ། ཆོས་ཀུན་མཉམ་པ་ཉིད་དུ་ལེགས་གཟིགས་པས། །དག་པ་ཆེན་པོའི་དགོངས་སྤྱོད་མངོན་གྱུར་ནས། །དབྱེར་མེད་བསལ་བཞག་བྲལ་བའི་དགོངས་གནད་མཆོག །སྟོན་མཛད་རྒྱལ་བ་རིག་འཛིན་བརྒྱུད་བཅས་རྒྱལ། །འདིར་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་བསྡུ་ན། འདུ་བྱེད་འཁོར་བའི་ཆོས་ཐམས་ཅད་ཀྱི་རྩ་བ་མ་རིག་པ་དང་། མྱ་ངན་ལས་འདས་པའི་ཆོས་ཀུན་རིག་པ་ཡེ་ཤེས་ཏེ་དེ་གཉིས་སུ་འདུ་ཞིང་། དེ་གཉིས་ཀའང་དོན་དམ་པར་རང་བཞིན་གཉིས་སུ་མེད་པས་ཟད་འཕེལ་མེད་པའི་ཆོས་ཉིད་མཉམ་པ་ཆེན་པོ་རྒྱལ་བའི་ཡུམ་གྱི་དགོངས་པ་སྒྲ་ཇི་བཞིན་པ་ལས་མ་འདས་ཏེ། ཤེར་ཕྱིན་སྡུད་པ་ལས། འདི་ནི་ཆོས་གཏེར་མཆོག་དང་ཆོས་མཛོད་དམ་པ་ཡིན། །སངས་རྒྱས་རིག་ཡིན་འགྲོ་བའི་བདེ་དང་སྐྱིད་པའི་མཛོད། །འདས་དང་མ་བྱོན་ཕྱོགས་བཅུའི་འཇིག་རྟེན་མགོན་པོ་རྣམས། །དེ་དག་འདི་ལས་འཁྲུངས་ཀྱང་ཆོས་དབྱིངས་ཟད་མི་འགྱུར། །ཤིང་དང་འབྲས་བུ་མེ་ཏོག་ནགས་ཚལ་ཇི་སྙེད་པ། །དེ་དག་ཐམས་ཅད་ས་ལས་ཡང་དག་འབྱུང་ཞིང་འཐོན། །འོན་ཀྱང་ས་ལ་ཟད་པ་མེད་ཅིང་འཕེལ་བ་མེད། །ཡོངས་སུ་མི་ཉམས་རྣམ་པར་མི་རྟོག་སྐྱོ་བ་མེད། །སངས་རྒྱས་སྲས་དང་ཉན་ཐོས་རང་རྒྱལ་ལྷ་རྣམས་དང་། །འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། །ཤེས་རབ་ནམ་ཡང་ཟད་པ་མེད་ཅིང་འཕེལ་བ་མེད། །སེམས་ཅན་ཐ་མ་འབྲིང་དང་མཆོག་གྱུར་ཇི་སྙེད་པ། །དེ་ཀུན་མ་རིག་ལས་བྱུང་བདེ་བར་གཤེགས་པས་གསུངས། །རྐྱེན་རྣམས་ཚོགས་ནས་སྡུག་བསྔལ་འཁྲུལ་འཁོར་རབ་ཏུ་འབྱུང་། །མ་རིག་འཁྲུལ་འཁོར་འདི་ནི་ཟད་མེད་འཕེལ་བ་མེད། །ཡེ་ཤེས་ཚུལ་སྒོ་ཐབས་དང་རྩ་བ་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། །རྐྱེན་རྣམས་ཚོགས་ནས་ཡེ་ཤེས་འཁྲུལ་འཁོར་རབ་ཏུ་འབྱུང་། །ཤེས་རབ་ཕ་རོལ་ཕྱིན་ལ་ཟད་མེད་འཕེལ་བ་མེད། །བྱང་ཆུབ་སེམས་དཔའ་གང་ཞིག་རྟེན་ཅིང་འབྲེལ་འབྱུང་བ། །སྐྱེ་མེད་ཟད་པ་མེད་པར་ཤེས་རབ་འདི་ཤེས་ཏེ། །ཉི་མ་སྤྲིན་བྲལ་འོད་ཟེར་འཕྲོ་བས་མུན་བསལ་ལྟར། །མ་རིག་འཐིབ་པོ་བཅོམ་ནས་རང་བྱུང་ཐོབ་པར་འགྱུར། །ཞེས་གསུངས། དེའི་དོན་མན་ངག་གི་དགོངས་པ་བཞིན་ཅུང་ཟད་བཤད་ན། ཤེར་ཕྱིན་ཐེག་པ་ཆེན་པོའི་རྣལ་འབྱོར་གཞུང་བརྒྱ་པ་དངོས་གྲུབ་དཔལ་འབར་གྱིས་རྒྱལ་ཡུམ་སྙིང་པོའི་རྣམ་བཤད་དུ། དངོས་བསྟན་སྟོང་ཉིད་དང་། སྦས་དོན་སེམས་ཀྱི་ལྡོག་ཆ་ནས་སྦྱར་ཏེ། མྱོང་བ་མཚན་ཉིད་བཞི་ལྡན་གྱི་ཚུལ་དུ་ཤར། རྟོགས་པ་ཟབ་མོ་བརྒྱད་ལྡན་དུ་ཐོབ། འཁོར་འདས་ཡུལ་འཛིན་ལས་གྲོལ་པའི་ཚུལ་གྱིས་ཉམས་སུ་ལེན་པར་གསུངས་ཏེ། དེ་ལ་མྱོང་བ་མཚན་ཉིད་བཞི་ལྡན་ནི། གཟུགས་སོགས་ལ་དངོས་འཛིན་དང་བྲལ་བས་སྟོང་ཉིད་དུ་ཉམས་སུ་མྱོང་བ་ནི་གཟུགས་སྟོང་པའོ། །ཞེས་སྣང་མེད་ཀྱི་རྣལ་འབྱོར་དང་། ཉམས་མྱོང་སྟོང་པ་ཉིད་ཡུལ་སྣང་གཟུགས་ཀྱི་རྣམ་པར་ཤར་བ་ནི། སྟོང་པ་ཉིད་གཟུགས་སོ་ཞེས་སྣང་བཅས་ཀྱི་རྣལ་འབྱོར་དང་། དེ་ལྟར་སྣང་སྟོང་གཉིས་གཅིག་སྤངས་ནས་ཅིག་ཤོས་གྲུབ་པ་མེད་པས། གཟུགས་ལས་ཀྱང་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ་ཞེས་ཟུང་འཇུག་བགྲོད་པ་གཅིག་པའི་ཉམས་ལེན་བསྟན་ཏེ། དཔེ་ཆུ་ཟླའི་གཟུགས་བརྙན་དང་རྨི་ལམ་བཞིན་ཚོར་བ་སོགས་ཕུང་པོ་ལྷག་མ་བཞི་ལའང་སྦྱར་ཏེ་གསུངས། རྟོགས་པ་ཟབ་མོ་བརྒྱད་ལྡན་ནི། དེ་ལྟར་གཟུགས་སོགས་འཁོར་འདས་ཀྱི་ཆོས་ཐམས་ཅད་མཚན་ཉིད་བཞི་ལྡན་དུ་འདུག་པ་དེ་ལ་ཡུམ་དོན་ཟབ་མོ་སྟོང་པ་ཉིད་ཅེས་བྱ་སྟེ། དེ་ཡང་སེམས་ཉིད་གསལ་རིག་གི་ངོ་བོ་ལ་བལྟས་པས། དང་པོར་སྐྱེ་ས། བར་དུ་གནས་ས། མཐར་འགག་ས་མ་རྙེད་པས་སྐྱེ་འགག་གནས་གསུམ་དང་བྲལ་བ་དེ་ལ། འདི་དང་འདིའོ་ཞེས་ཡིད་ཀྱི་བསམ་མ་ཤེས། མ་ཤེས་པ་དེ་ངག་གིས་སྨྲ་མ་ཤེས། རྒྱུ་མཚན་དེས་སྒྲས་བརྗོད་པ་དང་། རྟོག་པའི་ཡུལ་ལས་འདས་པས་སྟོང་ཉིད་ནམ་མཁའི་རྣལ་འབྱོར་ཡུམ་ཤེས་རབ་ཀྱི་ཕ་རོལ་དུ་ཕྱིན་མ་ཞེས་འདོད་དེ། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །ཅེས་སོགས་གསུངས། དེ་ལྟ་བུའི་སྟོང་ཉིད་ཟབ་མོ་དེ། མཚོན་བྱེད་གང་གིས་ཀྱང་མཚོན་དུ་མེད་པས་མཚན་ཉིད་མེད་པ། སྟོང་ཉིད་རྒྱུ་རྐྱེན་གྱིས་འཕྲལ་དུ་མ་བསྐྱེད་པར་ཡེ་ནས་སྟོང་པས་མ་སྐྱེས་པ། སྟོང་ཉིད་རང་གི་ངོ་བོ་མ་སྐྱེས་ཀྱང་རྩལ་ཅི་ཡང་མི་འགག་པས་མ་འགགས་པ། སྟོང་ཉིད་ཟབ་མོའི་གཤིས་ལ་འཁྲུལ་པའི་དྲི་མ་གདོད་ནས་མེད་པས་དྲི་མ་མེད་པ། དྲི་མ་མེད་པ་དེ་ཡང་འཕྲལ་ལ་བསལ་བ་མ་ཡིན་གྱི་ཡེ་ནས་དག་པ་ཡིན་པས་དྲི་མ་དང་བྲལ་བ་མེད་པ། སྟོང་ཉིད་ཟབ་མོའི་གཤིས་ལུགས་རང་བཞིན་ལྷུན་གྲུབ་ཀྱི་སངས་རྒྱས་ལ་སྐྱོན་ཡོན་བསལ་བཞག་དང་བྲལ་ཞིང་གང་སྟོང་འཕེལ་འགྲིབ་མེད་པས། བྲི་བ་མེད་པ་གང་བ་མེད་པའོ། །ཞེས་གསུངས། འཁོར་འདས་ཡུལ་འཛིན་ལས་གྲོལ་ཚུལ་ལ་བདུན་ལས། དང་པོ་ཕུང་ལྔའི་གྲོལ་ཚུལ། སྟོང་པ་ཉིད་ཀྱི་གཤིས་ལུགས་ལ། གཟུགས་མེད། ཚོར་བ་མེད། འདུ་ཤེས་མེད། འདུ་བྱེད་མེད། རྣམ་པར་ཤེས་པ་མེད་ཅེས་གཟུགས་སོགས་མེད་པ་སྣང་མེད་ཀྱི་རྣལ་འབྱོར་དངོས་བསྟན་དང་། སྟོང་པ་ཉིད་ཀྱི་འཆར་སྒོ་ལ་འཁོར་འདས་ཀྱི་ཆོས་ཅིར་ཡང་འཆར་བས་གཟུགས་ཡོད་སོགས་སྣང་བཅས་དང་། སྟོང་པ་ཉིད་གཟུགས་སོགས་སུ་སྣང་ཡང་སྟོང་ཉིད་ཁོ་རང་ལས་གཞན་པའི་གཟུགས་མེད་སོགས་ཟུང་འཇུག་བགྲོད་པ་གཅིག་པའི་ཉམས་ལེན་སྦས་དོན་དུ་གསུངས་པ་འགྲེ། གཉིས་པ་དབང་པོ་དྲུག་གི་གྲོལ་ཚུལ། སྟོང་ཉིད་རང་ངོ་འཕྲོད་པས། སྟོང་པ་ཉིད་ཀྱི་གཤིས་ལ། མིག་མེད། རྣ་བ་མེད། སྣ་མེད། ལྕེ་མེད། ལུས་མེད། ཡིད་མེད་ཅེས་བྱའོ། །གསུམ་པ་ཡུལ་དྲུག་གྲོལ་ཚུལ། དེ་ལྟར་ཡུལ་ཅན་གྱི་དབང་པོ་དྲུག་ཡུལ་ལ་རྒྱུ་བས། ཡུལ་གཟུགས་སྒྲ་སོགས་དྲུག་ཏུ་འཛིན་པ་མེད་དེ། གཟུགས་མེད་པ་ནས་ཆོས་མེད་དོ་ཞེས་སོ། །བཞི་པ་ཁམས་བཅོ་བརྒྱད་གྲོལ་ཚུལ་ནི། དབང་པོ་དྲུག་རྟོག་མེད་དུ་ཤར། ཡུལ་དྲུག་རང་སྣང་དུ་ཤེས། རྣམ་ཤེས་ཚོགས་དྲུག་གི་འཛིན་པ་ཆོད་པས་ཏེ། མིག་གི་ཁམས་མེད་པ་ནས། ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་ཡང་མེད་དོ། །ཞེས་སོ། །ལྔ་པ་རྟེན་འབྲེལ་གྱི་གྲོལ་ཚུལ་ནི། དངོས་བསྟན་སྟོང་ཉིད་ཀྱི་གཤིས་ལ། ཀུན་བྱང་གི་རྟེན་འབྲེལ་ཡན་ལག་བཅུ་གཉིས་གྲུབ་པ་མེད་ཀྱང་། སྦས་དོན་སྟོང་ཉིད་ཀྱི་འཆར་སྒོ་ལ། ཀུན་ནས་ཉོན་མོངས་ཀྱི་རྟེན་འབྲེལ་ལས་འཁོར་བ་འབྱུང་ཚུལ་དང་། རྣམ་བྱང་གི་རྟེན་འབྲེལ་ལས་མྱང་འདས་ཐོབ་ཚུལ་གཉིས་ཀྱི། དང་པོ། སེམས་ཉིད་བདེ་བར་གཤེགས་པའི་སྙིང་པོ་རང་བཞིན་རྣམ་དག་གི་སངས་རྒྱས་སུ་ཡེ་ནས་གནས་ཀྱང་ལྷན་ཅིག་སྐྱེས་པའི་མ་རིག་པས་ངོ་མ་ཤེས་པ་མ་རིག་པ། མ་རིག་པའི་རྐྱེན་གྱིས་འདུ་བྱེད་ཀྱི་ལས་བསགས་ཏེ། རྣམ་པར་ཤེས་པ་རིག་རིག་པོ་ཤར། རྣམ་པར་ཤེས་པས་ཡུལ་ལ་སྤུ་རིས་བཅད་དེ། འདི་ནི་འདིའོ་ཕ་གི་ནི་ཕ་གིའོ་ཞེས་ཤེས་པར་བྱེད། གང་དུ་ཤེས་ན་མིང་དང་གཟུགས་སུ་ཤེས། གང་གིས་ཤེས་ན་སྐྱེ་མཆེད་དྲུག་གིས་ཤེས། མིང་གཟུགས་ལས་སྐྱེ་མཆེད་མཆེད་པས་ཡུལ་དབང་ཕྲད་པའི་རེག་པ་བྱུང་། རེག་པས་ཚོར་བ་ཉམས་སུ་མྱོང་། མྱོང་བས་སྲེད་པ་སྐྱེས། སྲེད་པས་མངལ་དུ་ཞུགས། ཞུགས་པས་སྲིད་པ་འཁོར་བར་ལུས་ལེན། ལུས་བླངས་པས་སྐྱེ་བ་དང་། རྒ་བ་དང་། ན་བ་དང་། འཆི་བ་ལ་སོགས་པ་འཁོར་བ་སྡུག་བསྔལ་གྱི་ཕུང་པོ་འབའ་ཞིག་པ་འདི་བྱུང་ངོ་། །གཉིས་པ་རྣམ་བྱང་གི་རྟེན་འབྲེལ་ཀྱང་། བླ་མ་དམ་པའི་མན་ངག་གིས། གནས་ལུགས་ཟབ་མོ་ངོ་སྤྲོད་པ་ལས། མ་རིག་པ་ཡུལ་མེད་དུ་དགའདུ་བྱེད་རྩ་བ་བྲལ། རྣམ་ཤེས་རང་སྟོང་དུ་ཡལ་ཏེ་མིང་དང་གཟུགས་སུ་མ་བཟུང་བས་སྐྱེ་མཆེད་དྲུག་རང་སྣང་དུ་དག་དག་པས་ཡུལ་ལ་རང་རྒྱུད་དུ་མ་རེག མ་རེག་པས་ཚོར་བ་ཉམས་སུ་མི་མྱོང་། མ་མྱོང་བ་ལ་སྲེད་པ་མི་སྐྱེ། མ་སྲེད་པས་མངལ་དུ་མི་ཞུགས་ཏེ་སྲིད་པ་འཁོར་བར་ལུས་མི་ལེན། ལུས་མ་བླངས་པས་སྐྱེ་རྒ་ན་འཆིའི་སྡུག་བསྔལ་ལས་གྲོལ་བའི་མྱ་ངན་ལས་འདས་པ་ཐོབ་པར་འགྱུར་རོ། །འདིར་སྲིད་པའི་འོག་ཏུ་ལེན་པ་བཤད་པ་འགལ་ཞེ་ན་མི་འགལ་ཏེ། སྲིད་པའི་སྒྲ་འཇུག་པའི་ཡུལ་ལ། འཁོར་བ་འགྲུབ་བྱེད་ཀྱི་ལས་ལ་སྲིད་པར་བཤད་པ་དང་། སྲིད་པ་འཁོར་བ་ཞེས་འཁོར་བ་སྤྱི་ལ་བཤད་པ་གཉིས་ལས། འདིར་ཕྱི་མའི་དབང་དུ་བྱས་པས་སྐྱོན་མེད་དོ་གསུངས། དྲུག་པ་བདེན་བཞི་ལས་གྲོལ་ཚུལ། ཟབ་མོ་སྟོང་པ་ཉིད་ཀྱི་གཤིས་ལ། སྡུག་བསྔལ་གསུམ་ཅི་རིགས་པས་བསྡུས་པའི་སྡུག་བསྔལ་བ་དང་། ཟག་བཅས་ལས་ཉོན་གྱིས་བསྡུས་པའི་ཀུན་འབྱུང་བ་དང་། སྡུག་ཀུན་འགག་པའི་འགོག་པ་དང་། འགོག་པ་ཐོབ་ཕྱིར་དུ་བརྩོན་པའི་ལམ་མེད་ཀྱང་། སྟོང་ཉིད་ཀྱི་འཆར་སྒོར། སྡུག་ཀུན་རྒྱུ་འབྲས་ཀྱིས་བསྡུས་པའི་འཁོར་བ་དང་། འགོག་ལམ་རྒྱུ་འབྲས་ཀྱིས་བསྡུས་པའི་མྱང་འདས་འཆར་ཞེས་སོ། །བདུན་པ་སྐུ་དང་ཡེ་ཤེས་ཀྱི་གྲོལ་ཚུལ། དབྱིངས་རང་བཞིན་གྱིས་རྣམ་པར་དག་པའི་ངང་དུ་རིག་པ་ཡེ་ཤེས་ཐིམ་ནས་ཤེས་བྱ་ཤེས་བྱེད་ཀྱི་རྟོག་པ་ལས་འདས་ཏེ། མཁྱེན་པའི་ཡེ་ཤེས་རང་རྒྱུད་པ་མེད་པས་ཡེ་ཤེས་མེད་ཅེས་དང་། དེ་ལྟར་རང་སྣང་འཁྲུལ་པ་གྲོལ་ཙམ་ལས་ལོགས་སུ་སངས་རྒྱས་ཞེས་ཁ་མིག་རྣ་བ་ཅན་ཐོབ་རྒྱུ་མེད་པས་ཐོབ་པ་མེད་ཅེས་དང་། དེ་ལྟ་ན་ཡང་སྨོན་ལམ་གྱི་དབང་གིས་གཞན་སྣང་ལ་གཟུགས་ཀྱི་སྐུ་མཁྱེན་པའི་ཡེ་ཤེས་དང་ལྡན་པ་གདུལ་བྱ་ལ་མི་འགག་པར་སྣང་བས་ན་མ་ཐོབ་པ་ཡང་མེད་དོ་ཞེས་སོ། །དེ་ཐམས་ཅད་སྦས་དོན་གསལ་རིག་སེམས་ཀྱི་ལྡོག་པ་ནས་བཤད་ན། སྔར་གྱི་དོན་ཚན་དེ་རྣམས་འདི་ལྟར་སྦྱར་ཏེ། གཟུགས་སེམས་སོ། །སེམས་ཉིད་གཟུགས་སོ། །གཟུགས་ལས་སེམས་གཞན་མ་ཡིན་ནོ། །སོགས་དང་། ཆོས་ཐམས་ཅད་སེམས་ཉིད་དེ། མཚན་ཉིད་མེད་པ་སོགས་སུ་སྦྱར་ཏེ། དེའི་དོན་ཡང་། སྣང་སྲིད་འཁོར་འདས་ཀྱི་ཆོས་ཐམས་ཅད་རང་སེམས་སུ་འདུས་ཏེ། སྤྱོད་འཇུག་ལས། ལྕགས་བསྲེགས་ས་གཞི་སོགས་ནས། སྡིག་སེམས་ཡིན་པར་ཐུབ་པས་གསུངས། །ཞེས་སོ། །སེམས་གསལ་རིག་གི་ངོ་བོ་ལ་ངོས་བཟུང་མེད་པས་ཆོས་ཐམས་ཅད་སྟོང་ཉིད་དུ་རོ་གཅིག་སྟེ། ཀླུས། རྟེན་ཅིང་འབྲེལ་འབྱུང་མ་གཏོགས་པའི། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་སོ། །སྟོང་གསལ་སེམས་ཀྱི་འཆར་སྒོ་ལ་འཁོར་འདས་ཀུན་འབྱུང་བ་ཡང་འཐད་དེ། ཆོས་མངོན་པའི་མདོར། ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །འདི་ཡོད་པས་ན་འགྲོ་ཀུན་དང་། །མྱ་ངན་འདས་པ་ཐོབ་པར་འགྱུར། །ཞེས་སོགས་གསུངས་ཏེ། དེ་ལྟ་བུའི་གནས་ལུགས་ཟབ་མོ་གཅིག་ངོ་འཕྲོད་པས། ཕྱི་ན་འདྲེ་མེད། ནང་ན་ལྷ་མེད། འཁོར་འདས་མགོ་སྙོམས། སྤང་གཉེན་གྱི་རྫུན་ཕུག་སྡིབ། གང་ཤར་ཆོས་སྐུའི་རོལ་པ་ལས་གཡོ་མ་ཤེས་པའི་དགའ་བ་ལ་ཨང་གསུངས། ཡང་ཤེར་ཕྱིན་དུས་གསུམ་རྒྱལ་བའི་ཡུམ་ཡིན་པ་ནི། ཡུམ་ཤེས་རབ་ཀྱི་ཕ་རོལ་དུ་ཕྱིན་མ་ཞེས་པ། ཐོག་མ་མེད་པའི་དུས་ནས་ཡོད་པའི་ཆོས། གསལ་སྟོང་ཟུང་དུ་འཇུག་པའི་དབྱིངས་འཁོར་འདས་འཆིང་གྲོལ་ཀུན་གྱི་གཞི། སྐྱོན་ཡོན་བསལ་བཞག་དང་བྲལ་བའི་སྤྲོས་བྲལ། སྐྱེ་འགྲོ་མཐའ་དག་གི་རྒྱུད་ཀྱིས་མ་བསྡུས་པའི། རིག་སྟོང་གཉིས་སུ་མེད་པའི་ཟག་མེད་ཀྱི་ཡེ་ཤེས་ཉིད་ལ་འཇོག་གི། སྐྱེ་འགྲོ་སོ་སོའི་རྒྱུད་ཀྱིས་བསྡུས་པའི་ཆོས་ཉིད་ཙམ་ལ་མི་འཇོག་སྟེ། དེ་ནི་ཕྱོགས་རིས་སུ་ཆད་པ་དང་། བརྟན་གཡོ་ཀུན་ལ་མ་ཁྱབ་པ་དང་། འདས་མ་འོངས་ཀྱི་རྒྱལ་བ་ཐམས་ཅད་ཀྱི་ཡུམ་དུ་བཞག་ཏུ་མི་རུང་བའི་ཕྱིར་རོ། །ཡུམ་ཤེར་ཕྱིན་དེ་ཉིད་དུས་གསུམ་རྒྱལ་བ་ཐམས་ཅད་ཀྱི་ཡུམ་ཡིན་པ་དང་། ཡུམ་དེ་ཉིད་རྟེན་གྱི་གང་ཟག་ཀུན་ལ་ཁྱབ་ཀྱང་སོ་སོའི་རྒྱུད་ཀྱིས་མ་བསྡུས་པས་ཕྱོགས་རིས་དང་བྲལ་ཞིང་གཅིག་ཏུ་གྲུབ་པ་དང་། ནམ་མཁས་ཕྱོགས་ཀུན་ཁྱབ་ཀྱང་ནམ་མཁའ་ལ་དབྱེ་བ་མེད་པ་བཞིན་དུ། གསལ་སྟོང་ཟུང་འཇུག་གི་ཡུམ་གྱིས་བརྟན་གཡོ་ཀུན་ལ་ཁྱབ་ཀྱང་གསལ་སྟོང་གི་ཆོས་དབྱིངས་ལ་དབྱེ་བ་མེད་པ་དང་། ཙན་དན་དང་ཤུག་པ་ལ་སོགས་པའི་ལྗོན་པ་སྣ་ཚོགས་པ་དང་ལྡན་པའི་ནགས་ཚལ་ལ། ཤར་ནས་ཉི་མ་ཤར་བའི་ཚེ་རང་རང་གི་ངོ་སྐལ་གྱི་གྲིབ་མ་མི་འདྲ་བར་སྣང་ཡང་། ནུབ་རིར་ཉི་མ་ནུབ་པའི་ཚེ་གྲིབ་མ་ཞེས་པར་རོ་གཅིག་པ་བཞིན་དུ། སྐྱེ་འགྲོ་མཐའ་དག་གི་རྒྱུད་ལ་ཡུམ་གྱི་དོན་ཆ་འདྲ་ཚང་བའི་གསལ་སྟོང་གི་ཆོས་ཉིད་ཉི་ཚེ་བ་རེ་ཡོད་པ་ཡུམ་དོན་ལ་ངོ་འཕྲོད་པའི་ཚེ། ཀུན་ཁྱབ་ཆོས་ཀྱི་དབྱིངས་གཅིག་ཉིད་དུ་རོ་གཅིག་པ་དང་། དེའི་རྒྱུན་གོམས་ཤིང་ཉམས་སུ་བླངས་པ་ལས། གློ་བུར་གྱི་དྲི་མ་མ་ལུས་པ་དང་བྲལ་བའི་ཚེ། སྤངས་རྟོགས་མཐར་ཐུག་གི་འདྲེན་པ་ཆེན་པོ་སངས་རྒྱས་ཐོབ་ཅེས་པའི་ཐ་སྙད་འདོགས་ཤིང་། དེ་ལྟ་ནའང་རྗེ་བཙུན་གྱིས། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པ་ཆོས་ཉིད་དོ། །ཞེས་གསུངས་པ་ལྟར་སྔར་སློབ་པའི་གནས་སྐབས་ཀྱི་ཀུན་ཁྱབ་ཆོས་དབྱིངས་ཀྱི་ཡུམ་དང་། ཕྱིས་མི་སློབ་པའི་གནས་སྐབས་ཀྱི་ཀུན་ཁྱབ་ཆོས་དབྱིངས་ཀྱི་ཡུམ་གཉིས་བཟང་ངན་དུ་འགྱུར་བ་ནི་ཅུང་ཟད་ཀྱང་མེད་དོ། །ཞེས་དེ་དག་གི་དོན་ཤེར་ཕྱིན་སྡུད་པའི་ལུང་དང་སྦྱར་ཏེ་རྒྱ་ཆེར་གསུངས་པ་དང་། ཚུལ་འདི་ལྟ་བུའི་འཆད་ཚུལ་ནི། དེང་སང་གི་མདོ་དོན་སྨྲ་བ་དག་གི་བློ་ཡུལ་དུ་ཤོང་བ་དཀའ་མོད། དེ་ལྟ་ནའང་ཤེར་ཕྱིན་ཟབ་མོའི་བརྗོད་དོན་ཉམས་སུ་ལེན་པ་ལ་མེད་དུ་མི་རུང་བའི་ཆོས་ཤིག་ཡིན་པས་བློ་གྲོས་དང་ལྡན་པ་དག་གིས་གཅེས་སྤྲས་སུ་བྱོས་ཤིག ཅེས་དང་། ཟབ་མོའི་ཉམས་ལེན་གྱི་གནད་བསྡུས་བསྟན་པ་ལ། མཉམ་བཞག་ཏིང་ངེ་འཛིན་གསུམ་ལྡན་དུ་བསྒོམ་པ་དང་། རྗེས་ཐོབ་བགྲོད་པ་གཅིག་པའི་ཁྱེར་སོ་གཉིས་ཀྱི། དང་པོ་ལ་སྟོང་མཚན་སྨོན་མེད་གསུམ་ལས། སྟོང་པ་ཉིད་ཀྱི་ཏིང་ངེ་འཛིན་ནི། སེམས་ཀྱིས་སེམས་ལ་བལྟས་པས། སེམས་དེ་ཅིར་ཡང་མ་གྲུབ་པ་ནམ་མཁའ་ལྟ་བུ་ཡིན་ཏེ། ཇི་ལྟར་འདྲ་ན། དང་པོ་སྐྱེ་བས་སྟོང་སྟེ་བྱུང་ས་མེད། ཐ་མ་འགགས་པས་སྟོང་སྟེ་འགྲོ་ས་མེད། བར་དུ་གནས་པས་སྟོང་སྟེ་ངོས་བཟུང་མེད་པས་ནམ་མཁའ་ལྟ་བུའོ། །མཚན་མ་མེད་པའི་ཏིང་ངེ་འཛིན་ནི། དེ་ལྟར་སེམས་ཀྱི་རང་བཞིན་སྟོང་པ་ཉིད་དུ་འདུག་པས་སྒོམ་པའི་ཚེ་ན། དམིགས་པ་ཅན་ནམ་མཚན་མ་ཅན་དུ་སྒོམ་དུ་མེད་དེ། གཤིས་སྤྲོས་བྲལ་གྱི་སྟེང་དུ་བློ་བྲལ་དུ་འཇོག་པ་ཡིན་ནོ། །དེ་ཇི་ལྟར་སྒོམ་སྙམ་ན། བསྒོམ་བྱའི་བློ་དང་བྲལ། སྒོམ་བྱེད་ཀྱི་མཁན་པོ་མེད། བསྒོམ་པ་དང་མི་སྒོམ་པའི་རྩིས་བཏབ་དང་བྲལ་ནས། སེམས་མ་བཅོས་པར་རྗེན་ནེ་བཞག་པར་བྱའོ། །སྨོན་པ་མེད་པའི་ཏིང་ངེ་འཛིན་ནི། དེ་ལྟར་སེམས་ཀྱི་ངོ་བོ་སྐྱེ་འགག་གནས་གསུམ་དང་བྲལ་བ། སྨྲ་བསམ་བརྗོད་མེད་ཀྱི་དེ་ཁོ་ན་ཉིད་ལ་ཤེར་རབ་ཀྱི་ཕ་རོལ་དུ་ཕྱིན་པ་ཞེས་བྱ། རྫོགས་པའི་བྱང་ཆུབ་བྱ་བ་ཡང་དེ་ལ་ཟེར་བ་ཡིན་གྱི། དེ་བས་གཞན་པའི་ཡར་ལ་འབྲས་བུ་ཐོབ་བྱ་སྨོན་པ་གཞན་མེད་དོ། །དོན་དེ་རྟོགས་ན་འཁོར་བར་ལྷུང་མཁན་མེད་དེ་ཀུན་འབྱུང་བ་མེད་སྡུག་བསྔལ་བ་མེད་ཅེས་སོ། །དེ་ལྟ་བུའི་དོན་རྟོགས་ནས་ལམ་ཅིག་ཆར་དུ་ཆོད་ཅིང་རིམ་པར་བགྲོད་མི་དགོས་ཏེ། ལམ་མེད་འགོག་པ་མེད་ཅེས་སོ། །མདོར་ན་ཐམས་ཅད་སེམས་ཀྱི་རང་སྣང་དུ་རྟོགས་པས་ཕྱི་ཡི་སྒྲོ་འདོགས་ཆོད། སེམས་ཀྱི་རང་བཞིན་ཅིར་ཡང་མ་གྲུབ་པ་སྟོང་པ་ཉིད་དུ་རྟོགས་པས་ནང་གི་སྒྲོ་འདོགས་ཆོད། སྟོང་པ་ཉིད་ལ་ལྟ་རྒྱུ་དང་ཉམས་སུ་ལེན་རྒྱུ་ཅི་ཡང་མ་རྙེད་པས་རིག་པ་རང་བབས་སུ་ཁྲོལ་ལེ་བཞག་པས་གསང་བའི་སྒྲོ་འདོགས་ཆོད། དོན་དེ་ཉིད་ལས་མ་གཏོགས་པའི་བསྒྲུབ་བྱ་གཞན་ན་མེད་པས་མཐར་ཐུག་གི་སྒྲོ་འདོགས་ཆོད། སྒྲོ་འདོགས་ཐམས་ཅད་དང་བྲལ་བའི་སེམས་དེ་མཐའ་བྲལ་དུ་གནས་པ་ཉམས་ལེན་གྱི་མཆོག་ཡིན་ནོ། །དེ་ལྟ་བུའི་ངང་ལ་མ་ཡེངས་པར་གནས་པ་ནི་མཉམ་བཞག་ཅེས་བྱ་ཞིང་། མཉམ་པར་བཞག་རྒྱུ་མེད་པའི་ངང་ལ་མཉམ་པར་བཞག་སྟེ། བདག་ནི་མཉམ་པར་བཞག་ཅེའམ་ལངས་ཞེས་རློམ་སེམས་མེད། ཅིའི་ཕྱིར་ཞེ་ན་ཆོས་ཀྱི་རང་བཞིན་ཡོངས་ཤེས་ཕྱིར། ཞེས་སོ། །རྗེས་ཐོབ་བགྲོད་པ་གཅིག་པའི་ལམ་ཁྱེར་ནི། དེ་ལྟར་མཉམ་བཞག་ལས་ལངས་པའི་རྗེས་ཐོབ་ཀྱི་ཚེ། གཟུགས་སོགས་སྣང་བ་ཐམས་ཅད་སྣང་སྟོང་ཞེན་པ་དང་བྲལ་བ་སྒྱུ་མ་ལྟ་བུར་ལམ་དུ་ཁྱེར། སྒྲ་གྲགས་ཐམས་ཅད་གྲགས་སྟོང་ཞེན་པ་དང་བྲལ་བ་བྲག་ཆ་ལྟ་བུར་ལམ་དུ་ཁྱེར། དྲན་སྣང་རྟོག་པའི་རི་མོ་ཐམས་ཅད་རིག་སྟོང་དབྱེར་མེད་རྨི་ལམ་ལྟ་བུར་ལམ་དུ་ཁྱེར་རོ། །ཞེས་གསུངས་ཤིང་། གཞན་ཡང་སྔགས་ཀྱི་ལམ་ཁྱེར་དང་སྦྱོར་ཚུལ་དང་། གོང་གི་དོན་དེ་རྣམས་ལ་ཤེར་ཕྱིན་སྡུད་པ་སོགས་དང་སྦྱར་ཏེ་ལུང་ཁུངས་མང་དུ་ཡོད་ཀྱང་འདིར་མ་བྲིས་སོ། །ཚུལ་འདི་ཀུན་མཁྱེན་རོང་སྟོན་ཆེན་པོའི་སློབ་མའི་ཁྱུ་མཆོག་གཞུང་བརྒྱ་པའི་གསུང་མན་ངག་གི་གནད་དང་ལྡན་པས་ཟུང་འཇུག་གི་གནད་ལ་གོ་སྐྱེད་ཆེ་བར་མཐོང་ནས་ཅུང་ཟད་བསྡུས་ཏེ་བཀོད་པ་ཡིན་ནོ། །མདོར་ན་དོན་དམ་པར་ཆོས་ཐམས་ཅད་དབྱེ་གཞི་ཟད་པའི་ཆོས་ཉིད་མཉམ་པ་ཆེན་པོ་ལས་མ་འདས་ཀྱང་། ཐ་སྙད་ཙམ་དུ་འཕགས་པ་རྣམས་ཀྱི་རྗེས་ཐོབ་ཀྱི་གཟིགས་པ་དང་མཐུན་པར་ཤེས་བྱ་བདེན་གཉིས་སུ་འཇོག་པར་མཛད་དེ། ཡབ་སྲས་མཇལ་བའི་མདོ་ལས། འཇིག་རྟེན་མཁྱེན་པའི་བདེན་པ་འདི་གཉིས་ཏེ། །ཁྱེད་ཀྱིས་གཞན་ལས་མ་གསན་རང་གིས་རིག །དེ་ནི་ཀུན་རྫོབ་བདེན་དང་དོན་དམ་སྟེ། །བདེན་པ་གསུམ་པ་གང་ཡང་མ་མཆིས་སོ། །ཞེས་གསུངས། དེ་གཉིས་ཀྱི་ཁྱད་པར་ལ། གནས་སྐབས་རྣམ་གྲངས་པའི་དོན་དམ་འཕགས་པའི་རྗེས་ཐོབ་ཀྱི་གཟིགས་པ་ལྟར་ན། མགོན་པོ་ཨ་ཏི་ཤས། ཀུན་རྫོབ་ཇི་ལྟར་གནས་པ་འདི། །རིགས་པས་དཔྱད་ན་འགའ་མི་རྙེད། །མ་རྙེད་པ་དེ་དོན་དམ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་གསུངས་པས། ཆོས་ཐམས་ཅད་ལ་བརྟགས་ན་རང་བཞིན་གྱིས་མ་གྲུབ་པའི་སྟོང་པའི་ཆ་དེ་ལ་དོན་དམ་དང་། སྟོང་བཞིན་དུ་མ་འགགས་པར་སྣ་ཚོགས་སུ་སྣང་བའི་ཆ་ལ་ཀུན་རྫོབ་ཅེས་དབྱེ་བ་མཛད་དེ། འདི་གཉིས་ཀྱང་ཀུན་རྫོབ་ཏུ་ངོ་བོ་གཅིག་པ་དང་དོན་དམ་པར་ཐ་དད་ན་སྐྱོན་བཞི་བཞི་གསུངས་ཏེ། ཐ་སྙད་དུ་ངོ་བོ་གཅིག་ན། འདུ་བྱེད་མཐོང་བས་དོན་དམ་མཐོང་བར་ཐལ་བ། དོན་དམ་ཉོན་མོངས་སྐྱེ་བའི་དམིགས་རྐྱེན་དུ་ཐལ་བ། དོན་དམ་དང་ཀུན་རྫོབ་ལ་དབྱེ་བ་མེད་པར་ཐལ་བ། དོན་དམ་ཐོས་བསམ་སོགས་ལ་མི་ལྟོས་པར་ཐལ་བའི་སྐྱོན་བཞི་དང་། དོན་དམ་པར་ངོ་བོ་ཐ་དད་ན། དོན་དམ་རྟོགས་པའི་བློས་ཀུན་རྫོབ་ཀྱི་བདེན་ཞེན་མི་སེལ་བར་ཐལ་བ། དོན་དམ་དེ་ཀུན་རྫོབ་དེའི་ཆོས་ཉིད་མ་ཡིན་པར་ཐལ་བ། ཀུན་རྫོབ་རང་བཞིན་མེད་པ་ཙམ་དོན་དམ་མ་ཡིན་པར་ཐལ་བ། བདེན་གཉིས་སོ་སོར་གཟིགས་པའི་འཕགས་པ་རྣམས་ལ་བཅིངས་གྲོལ་དུས་གཅིག་ཏུ་ཐལ་བའི་སྐྱོན་བཞིས་གནོད་པས་ཆོས་ཐམས་ཅད་གཅིག་ཐ་དད་དང་བྲལ་བའི་ངོ་བོ་དབྱེར་མེད་དུ་འདོད་དེ། དགོངས་འགྲེལ་ལས། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་རྟོག་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་གསུངས། དེས་ན་ཐ་སྙད་དུ་ངོ་བོ་གཅིག་ལ་ལྡོག་པ་ཐ་དད་དུ་གསུངས་ཏེ། བྱང་ཆུབ་སེམས་འགྲེལ་ལས། ཀུན་རྫོབ་ལས་ནི་ཐ་དད་པར། །དེ་ཉིད་དམིགས་པ་མ་ཡིན་ཏེ། །ཀུན་རྫོབ་སྟོང་པ་ཉིད་དུ་བཤད། །སྟོང་ཉིད་ཁོ་ན་ཀུན་རྫོབ་ཡིན། །མེད་ན་མི་འབྱུང་ངེས་པའི་ཕྱིར། །བྱས་དང་མི་རྟག་ཇི་བཞིན་ནོ། །ཞེས་སོ། །དེ་བཞིན་ཆོས་ཅན་རྣམ་ཤེས་དང་ཆོས་ཉིད་ཡེ་ཤེས་གཉིས་ཀྱང་ངོ་བོ་ཐ་དད་དང་ལྡོག་པས་ཐ་མི་དད་གང་རུང་དུ་ཁས་བླངས་ན། གོང་བཤད་ཀྱི་སྐྱོན་རྣམས་རང་སར་གནས་པ་ཡིན་ཞིང་། མཐར་ཐུག་གི་དོན་ལ་དེ་ཐམས་ཅད་དབྱེ་གཞི་ཟད་པའི་དབྱེར་མེད་ཆེན་པོར་ལ་བཟླ་དགོས་པས། དེའི་ཚུལ་གྱིས། དོན་དམ་རྣམ་གྲངས་མིན་པའི་དབང་དུ་བྱས་ཏེ་བདེན་གཉིས་སུ་རྣམ་པར་བཞག་ན། དབུ་མ་འཇུག་པར། དངོས་ཀུན་ཡང་དག་བརྫུན་པ་མཐོང་བ་ཡིས། །དངོས་རྙེད་ངོ་བོ་གཉིས་ནི་འཛིན་པར་འགྱུར། །ཡང་དག་མཐོང་ཡུལ་གང་དེ་ཉིད་དེ། །མཐོང་བ་བརྫུན་པ་ཀུན་རྫོབ་བདེན་པར་གསུངས། །ཞེས་པ་ལྟར། ཤེས་བྱ་ཐམས་ཅད་མཁྱེན་པ་སངས་རྒྱས་བཅོམ་ལྡན་འདས་ཀྱིས་ཆོས་ཐམས་ཅད་ལ། གནས་ཚུལ་ཡང་དག་པའི་ཡེ་ཤེས་ཀྱིས་མཐོང་བ་དོན་དམ་དང་། བློ་རྫུན་པ་འཁྲུལ་པས་མཐོང་བ་ཀུན་རྫོབ་སྟེ། གནས་སྣང་མཐུན་པའི་ཡུལ་ལ་དོན་དམ་དང་། མི་མཐུན་པར་འཛིན་པའི་ཡུལ་ལ་ཀུན་རྫོབ་ཏུ་གསུངས་པས། མཐར་ཐུག་སངས་རྒྱས་ཀྱི་གཟིགས་པ་ནི་དེ་ལས་གོང་དུ་བོགས་དབྱུང་དུ་མེད་པས། དེའི་ངོར་གཟིགས་པ་ནི་གནས་ཚུལ་མཐར་ཐུག་ཏུ་གྲུབ་པས། དེས་ཇི་ལྟར་གཟིགས་ན། མདོ་རྒྱ་ཆེ་རོལ་པ་ལས། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་བདག་གིས་རྙེད། །སུ་ལ་བསྟན་ཀྱང་གོ་བར་མི་འགྱུར་བས། །མི་སྨྲ་ནགས་ཀྱི་ནང་དུ་གནས་པ་སྙམ། །ཚིག་བྲལ་ངག་གི་ལམ་གྱིས་མི་མཚོན་པའི། །དེ་བཞིན་ཉིད་ཆོས་རང་བཞིན་ནམ་མཁའ་འདྲ། །སེམས་དང་ཡིད་ཀྱི་རྒྱུ་བ་རྣམ་སྤངས་ན། །མཆོག་རབ་ངོ་མཚར་ཆེ་བ་དམ་པ་ཤེས། །ཞེས་སོགས་གསུངས་པ་ལྟར་སྤྲོས་པ་མཐའ་དག་ཉེ་བར་ཞི་བའི་རྣམ་གྲངས་མ་ཡིན་པའི་དོན་དམ་ཉིད་ཡིན་པས། དེའི་ངོར་ཡོད་མེད་དང་སྣང་སྟོང་གི་ལྡོག་པ་ཙམ་དུ་ཡང་དབྱེ་བ་མེད་པས་དབྱེ་གཞི་ཟད་པའི་དབྱེར་མེད་མཉམ་པ་ཉིད་དེ། འཇུག་པར། བདེན་པ་གཉིས་སུའང་རང་བཞིན་མེད་པའི་ཕྱིར། །དེ་དག་རྟག་པ་མ་ཡིན་ཆད་མ་ཡིན། །ཞེས་སོ། །དེའི་ངང་དུ་ཇི་ལྟར་སྣང་བའི་ཆོས་ཐམས་ཅད་ཀྱང་ཆོས་ཀྱི་དབྱིངས་དེ་དང་གཉིས་སུ་མེད་ཅིང་གཉིས་སུ་བྱར་མེད་པའམ་ངོ་བོས་ཐ་མི་དད་ཕྱིར། གོང་གི་བདེན་གཉིས་ངོ་བོ་གཅིག་ལ་ལྡོག་པ་ཐ་དད་དུ་བརྟགས་པའང་གནས་སྐབས་རྣམ་གྲངས་པའི་དོན་དམ་ལ་འབྱུང་གི་རྣམ་གྲངས་མ་ཡིན་པའི་དོན་དམ་འདི་ལ་ཇི་ལྟར་འབྱུང་སྟེ། སྤྲུལ་པའི་སློབ་དཔོན་མཁས་པ་ཆེན་པོ་ཨ་རོ་ཡེ་ཤེས་འབྱུང་གནས་ཀྱིས། འོ་ན་བདེན་པ་གཉིས་ཞེས་བྱ་བ་ཇི་ལྟ་བུ་ཞེ་ན། དེ་ནི་འཁྲུལ་པ་ཅན་སྐྲག་གིས་དོགས་པའི་ཕྱིར། འཁྲུལ་པའི་དབང་དུ་ཐ་སྙད་ཙམ་དུ་བཏགས་པ་ཡིན་གྱི། ཡང་དག་པར་ན་ངེས་པའི་དོན་དུ་གང་ཅི་ཡང་མ་ཡིན་པའི་སེམས་ཀྱི་ཡུལ་ལས་འདས་པ་ལ་བདེན་པ་གཉིས་སུ་ལྟ་ག་ལ་ཡོད། ཅེས་དང་། གྲུབ་མཆོག་ཀརྨ་པཀྵིས་མཛད་པའི་མ་མོ་རྦོད་གཏོང་གི་བསྟན་པ་རྒྱ་མཚོ་མཐའ་ཡས་པ་ལས། རྒྱུད་ཀྱི་གླེང་གཞི་དང་གླེང་སློང་སྟོན་འཁོར་བསྟན་པ་སོགས་ཐམས་ཅད་གདུལ་བྱ་འདུལ་བྱེད་དུ་སྣང་བ་ལ་ཡིན་གྱི་དོན་དམ་པར་དབྱིངས་དང་ཡེ་ཤེས་གཉིས་སུ་མེད་པའི་དགོངས་པ་མཉམ་པ་ཉིད་ལ་དེ་དག་ཏུ་སྣང་བ་གང་ཡང་མེད་པར་གསུངས་ནས། དེ་བཞིན་བདེན་པ་གཉིས་ཀྱང་ཀུན་རྫོབ་ཅེས་བྱ་ཤེས་པ་འཁྲུལ་པས་བཏགས་པར་གྱུར་པས་ན་དེ་དྲངས་པའི་ཕྱིར་དོན་དམ་དུ་བཏགས་ཀྱི། ཀུན་རྫོབ་ལ་ཞེན་པ་མེད་པས་དོན་དམ་ཞེས་གསུངས་པའང་མེད། སེམས་ཅན་དང་སངས་རྒྱས་ཀྱང་སེམས་ཅན་འཁྲུལ་པ་ཅན་དྲངས་པའི་ཕྱིར་སངས་རྒྱས་ཞེས་བསྟན་གྱི་སེམས་ཅན་འཁྲུལ་པ་མེད་པས་སངས་རྒྱས་ཀྱང་མེད་སོགས་རྒྱུ་འབྲས་ཚོགས་གཉིས་ཆོས་ཅན་ཆོས་ཉིད་འཁོར་འདས་སོགས་ཐམས་ཅད་ལ་སྦྱར་ཏེ་གསུངས། མདོར་ན་མ་མོའི་རྒྱུད་ལས། འཁོར་བ་རྟོགས་པའི་ཕ་རོལ་ན། །སངས་རྒྱས་སྐུ་ལྔ་གཞན་ན་མེད། །དེ་བཞིན་སངས་རྒྱས་སེམས་ཅན་དང་། །ཆོས་ཅན་ཆོས་ཉིད་བདེན་གཉིས་དང་། །སངས་རྒྱས་སྐུ་དང་ཕྱག་མཚན་སོགས། །མིང་ནི་གཉིས་སུ་བཏགས་པ་རྣམས། །སེམས་ཅན་ཡོད་ཀྱི་བར་དུ་སྣང་། །གདུལ་བྱ་འདུལ་བྱེད་གཅིག་རྫོགས་ན། །གཉིས་སུ་སྣང་དང་བཏགས་པ་ཟད། །གཅིག་གི་འཛིན་པའང་ཡོད་མ་ཡིན། །ཞེས་གསུངས་ཤིང་། མདོར་ན་པཎ་ཆེན་བི་མ་ལས་མཛད་པའི་མུ་ཏིག་ཕྲེང་བའི་རྒྱུད་འགྲེལ་ལས། བདེན་པ་གཉིས་ཀྱང་དོན་དམ་པའི་ངོས་ན་འབྲེལ་བ་མེད་དེ་རང་བཞིན་གང་དུའང་མ་གྲུབ་པའི་ཕྱིར་རོ། །འཇིག་རྟེན་པའི་ངོས་ནས་ཀུན་རྫོབ་ཙམ་དུ་བདེན་པ་སྟེ། ཡང་དག་པ་ཉིད་ལ་དོན་དམ་དང་ཀུན་རྫོབ་གཉིས་ལ་འབྲེལ་བ་མེད་དོ། །ཅིའི་ཕྱིར་ན། ཀུན་རྫོབ་རྣམ་པ་དང་ཡུལ་འཁྲུལ་པ། དོན་དམ་མ་འཁྲུལ་པ་ཡང་དག་པ་ཡིན་པས་སོ། །ཞེས་གསུངས། དེས་ན་རྣམ་གྲངས་མིན་པ་ཁོ་ན་དོན་དམ་དང་། ཐ་སྙད་ཤེས་བརྗོད་འཇུག་གསུམ་གྱི་ཡུལ་དུ་གྱུར་པ་ཐམས་ཅད་ཀུན་རྫོབ་ཏུ་བྱས་ཏེ། སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་གསུངས་པ་ལྟར་བདེན་གཉིས་སུ་འཇོག་པའི་སྐབས་གཞལ་བྱ་ཡུལ་གྱི་ངོས་ནས་ཟུང་འཇུག་སྤྲོས་བྲལ། གཞལ་བྱེད་ཡུལ་ཅན་གྱི་ངོས་ནས་གཅིག་པ་བཀག་པའི་ཐ་དད་དུ་འགྱུར་ཏེ། ཐ་སྙད་རྣམས་དོན་དམ་དུ་མི་གནས་པའི་ཕྱིར་རོ། །དེས་ན་རྒྱུད་བླ་སོགས་སུ་དོན་གྱི་དགོངས་ཆེན་བཤད་པའི་སྐབས། ཡང་དག་མཐའ་ནི་འདུས་བྱས་ཀྱིས། །རྣམ་པ་ཐམས་ཅད་དབེན་པ་སྟེ། །ཉོན་མོངས་ལས་དང་རྣམ་སྨིན་དོན། །སྤྲིན་ལ་སོགས་པ་ཉིད་དུ་འརྗོད། །ཉོན་མོངས་སྤྲིན་འདྲ་བྱ་བ་ཡིན། །ལས་ནི་རྨི་ལམ་ལོངས་སྤྱོད་བཞིན། །ཉོན་མོངས་ལས་ཀྱི་རྣམ་པར་སྨིན། །ཕུང་པོ་སྒྱུ་མ་སྤྲུལ་པ་བཞིན། །སྔར་ནི་དེ་ལྟར་རྣམ་བཞག་ནས། །སླར་ཡང་བླ་མའི་རྒྱུད་འདིར་ནི། །ཉེས་པ་ལྔ་དག་སྤང་བའི་ཕྱིར། །ཁམས་ཡོད་ཉིད་ཅེས་བསྟན་པ་ཡིན། །ཞེས་གསུངས་པ་ལྟར། མཐར་ཐུག་རྣམ་གྲངས་མ་ཡིན་པའི་དོན་དམ་ཡང་དག་པའི་མཐའ་ཉིད་ཟག་བཅས་ལས་ཉོན་རྣམ་སྨིན་སོགས་གློ་བུར་གྱི་ཆོས་འདུས་བྱས་ཀྱི་མཚན་མ་ཀུན་གྱིས་སྟོང་པའི་ཕྱིར། སྔར་འཁོར་ལོ་བར་བའི་སྐབས་སུ་ཟག་བཅས་འཁོར་བའི་ཆོས་ཐམས་ཅད་སྤྲིན་དང་རྨི་ལམ་སོགས་བཞིན་དོན་ལ་ཡོད་མ་མྱོང་བར་གཞི་མེད་རྩ་བྲལ་དུ་གཏན་ལ་ཕབ་ནས་སླར་འཁོར་ལོ་ཐ་མར་གནས་ཚུལ་ཇི་བཞིན་པར་སྟོན་པར་མཛད་པ་སྟེ། དོན་ལ་ད་ལྟ་སེམས་ཅན་གྱི་ཁམས་སུ་སངས་རྒྱས་ཀྱི་རིགས་རྣམ་པར་དག་པ་ཉིད་མེད་ཅེས་སྨྲ་བ་རྣམས་ཀྱིས་ད་ལྟའི་མ་དག་འཁྲུལ་སྣང་འདི་ཉིད་ཚད་མར་བྱས་ཏེ་རྟགས་སུ་བཀོད་པ་ལས་སྒྲུབ་བྱེད་གཞན་མེད་ན། འཁྲུལ་སྣང་འདི་རྨི་ལམ་གྱི་སྣང་བ་ལྟར་སྔོན་མེད་ཕྱིས་མེད་པར་འདིར་མེད་བཞིན་སྣང་ཡང་གཞི་རྩ་མེད་པས་དོན་ལ་ཡོད་མ་མྱོང་བར་རྒྱལ་བའི་ཡུམ་སོགས་ལས་ལེགས་པར་གཏན་ལ་ཕབ་པའི་དངོས་ཤུགས་ཀྱིས་རང་བཞིན་དག་པ་ཆེན་པོར་བསྟན་པའི་དོན་ཉིད་མ་སྦས་པར་འཁོར་ལོ་ཐ་མར་བསྟན་ཏེ་བདེན་གཉིས་ཐ་སྙད་དུའང་མ་འདྲེས་པས་དབྱེར་མེད་ན་དོན་དམ་པར་ལྟ་ཅི་སྨོས་ཏེ་དབྱེ་གཞི་ཟད་པའི་དབྱེར་མེད་རྣམ་དག་ཆེན་པོ་ཉིད་རྩལ་འདོན་དུ་མཛད་པ་དང་དོན་གྱི་གནད་གཅིག་པས་བཀའ་འཁོར་བར་ཐ་དང་དེའི་དགོངས་འགྲེལ་རྗེ་བཙུན་བྱམས་མགོན་དང་ཤིང་རྟ་ཆེན་པོ་ཀླུ་ཐོགས་རྣམ་གཉིས་རྗེས་འབྲང་དང་བཅས་པའི་དགོངས་པ་བུ་རམ་གྱི་རོ་གཟུགས་བཞིན་འགལ་མེད་དོན་གཅིག་ཏུ་ཤེས་སོ། །དེས་ན་ཐ་སྙད་ཚད་མས་གཞལ་ན་ཆོས་ཐམས་ཅད་ལ་གནས་སྣང་མི་མཐུན་པ་དང་མཐུན་པ་གཉིས་བྱུང་བའི་དབང་གིས། སེམས་ཅན་དང་སངས་རྒྱས། འཁྲུལ་པ་དང་གྲོལ་བ། གཞི་ལམ་འབྲས་བུའི་རྣམ་བཞག་སོགས་ཀུན་འཐད་ཀྱི། དེ་ལྟར་མ་ཡིན་པར་གཞན་དུ་གནས་ཚུལ་འབའ་ཞིག་པར་ཀུན་ལ་སྣང་ན་འཁྲུལ་པ་གཏན་མི་སྲིད་ལ། སྣང་ཚུལ་འཁྲུལ་པ་འདི་ལས་གཞན་དུ་གནས་ཚུལ་ཡང་དག་བཙལ་དུ་མེད་ན་སུ་ཡང་གྲོལ་མི་སྲིད་ཅིང་ལམ་ལ་འབད་པ་དགོས་མེད་དུ་ཐལ་ལོ། །ཡང་སངས་རྒྱས་ཀྱི་གཟིགས་ཚུལ་དང་སེམས་ཅན་གྱི་སྣང་ཚུལ་གཉིས་གནས་སྣང་མཐུན་མི་མཐུན་ཙམ་མིན་པར་ངོ་བོས་སམ་དོན་དམ་པར་ཐ་དད་ན་འཁོར་འདས་གཉིས་ལྟེ་ཆད་དུ་འགྱུར་ཏེ་དེ་གཉིས་འབྲེལ་བ་མེད་པའི་ཕྱིར་རོ། །དེ་ལྟ་ན་ཀ་བུམ་བཞིན་ཕན་ཚུན་གཅིག་ལ་གཅིག་མི་ལྟོས་པའི་ཕྱིར་གཞི་ལམ་འབྲས་བུ་གང་དུའང་བཞག་ཏུ་མེད་པའི་སྐྱོན་དུ་འགྱུར་རོ། །དེས་ན་གནས་སྣང་མཐུན་མི་མཐུན་ཡོད་པའི་དབང་གིས་སངས་རྒྱས་ཀྱི་ཐུགས་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་གནས་སྣང་ཐམས་ཅད་མ་འདྲེས་པར། དོན་དམ་པར་དག་པ་ཆེན་པོའི་རང་བཞིན་དུ་སེམས་ཅན་དང་སངས་རྒྱས་མཉམ་པར་ཡང་གཟིགས། ཀུན་རྫོབ་ཏུ་བློ་འཁྲུལ་པ་ཅན་གྱིས་དེ་ལྟར་མ་ཤེས་པའི་དབང་གིས་མི་མཉམ་པ་འཁྲུལ་སྣང་རྨི་ལམ་ལྟ་བུར་སྡུག་བསྔལ་གྱིས་ཉམ་ཐག་པར་ཡང་གཟིགས། འཁྲུལ་པ་དེ་སེལ་བྱེད་ཀྱི་ལམ་དང་དེ་ལྟར་བསྟན་པ་ལ་དགོས་པ་ཡོད་པར་ཡང་མཁྱེན་ནས། སྔོན་གྱི་ཐུགས་རྗེ་ཆེན་པོའི་རྒྱུ་ལས་འཇིག་རྟེན་ན་མཆོག་གི་སྤྲུལ་པའི་སྐུ་ཐུབ་པ་ཆེན་པོ་སོགས་སུ་སྣང་བར་མཛད་ནས་ཆོས་བསྟན་པས་སེམས་ཅན་དཔག་ཏུ་མེད་པའི་དོན་འབད་མེད་ལྷུན་གྲུབ་རྒྱུན་མི་ཆད་པར་མཛད་པ་ཡིན་ཏེ། རྒྱུད་བླ་མར། ཡང་དག་རྫོགས་སངས་ཆོས་ཉིད་ཕྱིར། །སེམས་ཅན་ཁམས་ནི་གཏེར་དང་འདྲ། །གློ་བུར་ཁྱབ་དང་མ་གྲུབ་ཕྱིར། །དེ་ཡི་ཉོན་མོངས་སྤྲིན་ཚོགས་བཞིན། །དེ་འཐོར་བ་ནི་ཉེར་གནས་ཕྱིར། །ཐུགས་རྗེ་མི་ཟད་རླུང་དང་འདྲ། །གཞན་གྱི་དབང་གིས་ངེས་འབྱུང་དང་། །བདག་དང་སེམས་ཅན་མཚུངས་གཟིགས་དང་། །མཛད་པ་ཡོངས་སུ་མ་རྫོགས་ཕྱིར། །འཁོར་བ་སྲིད་དུ་མཛད་མི་འཆད། །ཅེས་གསུངས། དེ་ཉིད་དཔེས་ཕྱོགས་ཙམ་མཚོན་ན། འཇིག་རྟེན་འདི་ན་སྨན་པ་མཁས་པ་རང་ཉིད་མིག་སྐྱོན་དང་བྲལ་བས་དུང་གི་ཁ་དོག་དཀར་པོ་དངོས་སུ་མཐོང་བ་ཞིག་གིས། གཞན་སེམས་ཅན་མཁྲིས་ནད་དམ་བད་ཀན་སོགས་ཀྱི་མིག་སྐྱོན་ཅན་དུང་ལ་སེར་པོར་མཐོང་ཞིང་དེ་ལྟར་དུ་བདེན་པར་འཛིན་པ་ཞིག་མཐོང་ན། ཀྱེ་མ་འདི་ནི་མཁྲིས་ནད་སོགས་ཀྱི་རྒྱུ་ལས་མིག་ལ་སྐྱོན་བྱུང་བར་ཟད་ཀྱི། ད་ནི་བདག་གིས་འདི་ཡི་མིག་ནད་དེ་བསལ་ནས་དུང་གི་ཁ་དོག་འདི་ཡི་གནས་ཚུལ་དཀར་པོ་ཉིད་ཇི་བཞིན་པར་མཐོང་ནུས་པར་བྱའོ་སྙམ་དུ་བསམ་ཞིང་། དེ་ཡང་དང་པོ་ནས་ཁ་དོག་དཀར་པོའོ་ཞེས་བརྗོད་ཀྱང་དེས་ཇི་བཞིན་དུ་མི་མཐོང་བས་ཡིད་མི་ཆེས་པ་ལ། ཐོག་མར་སྨན་དང་དཔྱད་སོགས་ཀྱིས་ནད་དེ་རིམ་པར་སྦྱང་བ་ན། མཐར་དེའི་མིག་སྐྱོན་དེ་ཡོངས་སུ་དག་པའི་དབང་གིས་དུང་གི་ཁ་དོག་དཀར་པོ་གནས་ཚུལ་ཇི་ལྟ་བ་བཞིན་མཐོང་སྟེ། སྨན་པ་དང་ནད་པ་གཉིས་ཀའི་མཐོང་ཚུལ་ལ་ཁྱད་མེད་པར་གྱུར་ནས་ཤིན་ཏུ་ངོ་མཚར་བ་དེ་བཞིན་དུ། སངས་རྒྱས་བཅོམ་ལྡན་འདས་རྣམས་ཀྱིས་རང་ངོར་འཁྲུལ་པ་མི་མངའ་ཞིང་བདག་དང་སེམས་ཅན་སོགས་ཆོས་ཐམས་ཅད་མཉམ་ཉིད་ཕྱོགས་ལྷུང་མེད་པར་རང་བཞིན་དག་པའི་ཆོས་ཉིད་དུ་གཟིགས་ཀྱང་། སེམས་ཅན་རྣམས་ཀྱིས་དེ་ལྟར་མ་རྟོགས་པའི་དབང་གིས་འཁྲུལ་པ་མེད་སྣང་གློ་བུར་བ་རྨི་ལམ་བཞིན་དུ་གནས་དོན་ལུས་གསུམ་གྱི་སྣང་བ་མུ་མེད་པར་ཤར་ཏེ་སྡུག་བསྔལ་གྱིས་ཉམ་ཐག་པར་གཟིགས་ནས། ཐུགས་དམིགས་པ་མེད་པའི་བརྩེ་བའི་སྙིང་རྗེ་ཆེན་པོ་སྐྱེས་ཏེ། དེ་དག་ལ་ཐོག་མ་ནས་རང་བཞིན་དག་པའི་སྙིང་པོའི་ཁམས་བསྟན་ན་དེ་དག་གིས་མི་རྟོགས་ཤིང་དོན་དུ་མི་འགྱུར་བས། དང་པོར་མི་རྟག་པ་སོགས་བདེན་བཞི་དང་རྟེན་འབྲེལ་བདག་མེད་པའི་དོན་ཅན་གྱི་ཆོས་འཁོར་དང་པོ་གཉིས་བསྐོར་བར་མཛད་ནས། མཐར་འཁོར་ལོ་ཐ་མར་རང་བཞིན་འོད་གསལ་སྐུ་དང་ཡེ་ཤེས་ཀྱིས་བརྒྱན་པའི་དབྱིངས་ཟག་མེད་ཉིད་སྒྲ་ཇི་བཞིན་པར་སྟོན་པར་མཛད་ནས་དེའི་སྒྲིབ་པ་གློ་བུར་པ་རྣམས་བསལ་བྱེད་ཀྱི་རྒྱུ་བསོད་ནམས་དང་ཡེ་ཤེས་ཀྱི་ཚོགས་གཉིས་པོ་ལ་བསླབ་ཏུ་བཅུག་པས། མཐར་འཁྲུལ་པ་མ་རིག་པ་གཉིད་འཐུག་པོ་ལྟ་བུ་དེ་སངས་པའི་རྒྱུ་ལས་རྨི་ལམ་ལྟ་བུའི་འཁྲུལ་སྣང་མཐའ་དག་གཞི་མེད་དུ་སངས་ནས་ཆོས་ཉིད་མཉམ་པ་ཆེན་པོའི་དོན་དེ་ཡང་དག་པར་མངོན་དུ་བྱེད་པ་ཡིན་ཏེ། འཇུག་པར། འདི་ན་ཇི་ལྟར་སད་བཞིན་ཇི་སྲིད་དུ། །མ་སད་དེ་བཞིན་དེ་ལ་གསུམ་པོ་ཡོད། །སད་པར་གྱུར་ན་གསུམ་ཆར་ཡོད་མིན་ལྟར། །གཏི་མུག་གཉིད་སད་ལའང་དེ་བཞིན་ནོ། །ཞེས་གསུངས། དེ་ལྟར་འཁྲུལ་པ་མཐའ་དག་དབྱིངས་སུ་ཐིམ་པའམ་དག་པའི་ཚེ་སངས་རྒྱས་དང་སེམས་ཅན་རང་བཞིན་མཉམ་ཞིང་གཉིས་སུ་བྱར་མེད་དེ་ཟད་འཕེལ་མེད་པའི་ཆོས་ཉིད་མཉམ་པ་ཆེན་པོའི་ཀློང་དུ་དགོངས་པ་འདུ་འབྲལ་མེད་པར་གནས་པ་ཙམ་སྟེ། གནུབས་ཀྱི་མདོ་འགྲེལ་ལས། རང་རིག་པ་འོད་གསལ་བའི་དགོངས་པ་ལ་ནི་སངས་རྒྱས་སེམས་ཅན་མ་དམིགས་པའི་ཕྱིར་རོ། །ཞེས་དང་། རྒྱལ་བ་རིལ་གྱི་སྐུ་གྲུབ་ཀྱང་དེ་ཁོ་ན་ཉིད་ལ་མང་ཞིང་རགས་པ་མེད་ལ། སྡུག་བསྔལ་ཅན་གྱི་འགྲོ་བ་ཇི་སྙེད་དུ་ཤར་ཡང་ཉུང་བ་དང་ཕྲ་བ་མེད་དོ། །ཞེས་དང་། གཞི་ཉིད་ཡེ་ཆོས་སྐུ་ཆེན་པོར་གྲུབ་པ་ལ་དངོས་པོ་གཉིས་པའི་རྣམ་པ་མེད་དེ། སྐྱིད་པ་ཆེན་པོའི་ལྷུན་ལ་བཞུགས་པ་ལ། སྐྱེ་ཤི་འཕོ་འགྱུར་མི་མངའ་བའི་ཕྱིར་འཕེལ་འགྲིབ་བྲལ་ལོ། །ཞེས་གསུངས་པ་དང་མཐུན་པར། དཀོན་མཆོག་བརྩེགས་པ་ལས། བསྐལ་པ་བྱེ་བ་བསམ་ཡས་སུ། །ང་ཡི་ཆོས་འདི་གནས་གྱུར་ལ། །ཉིན་རེ་བཞིན་དུ་དུས་གསུམ་དུ། །ཁམས་གསུམ་སེམས་ཅན་ཇི་སྙེད་པ། །སངས་རྒྱས་ས་ལ་འགོད་བྱེད་ཀྱང་། །སེམས་ཅན་ཁམས་ལ་དབྲི་བ་མེད། །ཅེས་དང་། ཤེར་མདོ་སོགས་ལས། བྲི་བ་མེད། གང་བ་མེད་སོགས་གསུངས་པའི་དོན་དེའོ། །དེའི་ཚེ་སངས་རྒྱས་དང་སེམས་ཅན་འཁོར་བ་དང་མྱང་འདས་ཆོས་ཅན་དང་ཆོས་ཉིད་གཅིག་ཐ་དད་ལ་སོགས་པའི་གཉིས་ཆོས་ཀྱི་སྤྲོས་པ་མཐའ་དག་ཉེ་བར་ཞི་བས་ངོ་བོ་གཟིགས་བྱ་གཟིགས་བྱེད་ལས་འདས་པའི་ཕྱིར་སངས་རྒྱས་ཀྱིས་ཀྱང་སྤྲོས་པའི་རྣམ་པར་མི་གཟིགས་ཏེ། རང་བྱུང་ཡེ་ཤེས་ཆེན་པོ་ཉག་གཅིག་གི་ཀློང་དུ་ལམ་དང་འབྲས་བུའི་ཆོས་ཀུན་རྫོགས་པས་མཐར་ཕྱིན་པ་ཡིན་ཏེ། རྒྱུད་གསང་སྙིང་ལས། གཅིག་དང་དུ་མ་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་གསུངས་པ་བཞིན་ནོ། །དེས་ན་འཁོར་ལོ་བར་ཐ་དང་ངེས་གསང་རྒྱུད་ཀྱི་དགོངས་པ་མཐའ་དག་དོན་གྱི་གནད་གཅིག་ཅིང་གནས་སྐབས་སྒྲ་མཐུན་དོན་དཔག་གི་ཚུལ་དུ་ཤེས་པར་བྱས་ཏེ་ལམ་གྱི་གནད་ཚོལ་བ་ལ་མཁས་པར་བྱ་དགོས་པས། འདིར་ནམ་མཁའ་རིན་པོ་ཆེའི་མདོ་དང་། གཤེད་དམར་གྱི་རྒྱུད་དང་དགོངས་འགྲེལ་མངོན་རྟོགས་རྒྱན་དང་རྒྱུད་བླ་སོགས་མདོ་རྒྱུད་བསྟན་བཅོས་དུ་མ་ནས་ཚིག་མཐུན་པར་གསུངས་པའི། འདི་ལ་བསལ་བྱ་ཅི་ཡང་མེད། །གཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཅེས་པའི་ཚིགས་སུ་བཅད་པ་གཅིག་པོ་འདི་ལ་སྒྲ་མཐུན་དོན་དཔག་གི་ཚུལ་དུ་ཅུང་ཟད་བཤད་ན། ཕར་ཕྱིན་དང་མཐུན་པའི་ཚིག་སྤྱི། སྔགས་བླ་མེད་དང་མཐུན་པའི་སྦས་དོན། ཐེག་རྩེ་ཨ་ཏི་དང་མཐུན་པའི་མཐར་ཐུག་གི་དོན་གསུམ་དང་། དང་པོ་ལ་བཀའ་འཁོར་བར་ཐ་ལྟར་གཉིས་སུ་དབྱེ་བས་བཞི་ལས། དང་པོ་འཁོར་ལོ་བར་པ་ལྟར་ཆོས་ཉིད་མཉམ་པའི་ངོས་ནས་གཞལ་ན། དཔལ་མགོན་འཕགས་པ་ཀླུས། གང་གིས་རྟེན་ཅིང་འབྲེལ་བར་འབྱུང་། །འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་ཅིང་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །ཞེས་དབུ་མ་རྩ་བའི་མཆོད་བརྗོད་དུ་གསུངས་པ་ལྟར། རྟེན་ཅིང་འབྲེལ་བར་འབྱུང་བའི་དབང་གིས་བྱུང་བའི་ཀུན་བྱང་གི་ཆོས་ཐམས་ཅད་མ་བརྟགས་ཉམས་དགའ་ཙམ་དུ་སྣང་ཡང་། དོན་དམ་པར་རང་བཞིན་གྱིས་གྲུབ་པ་མེད་པས། གང་སྣང་བའི་གཟུགས་སོགས་ཆོས་ཐམས་ཅད་རང་བཞིན་གྱིས་སྟོང་པས་གཟུགས་སྟོང་པ་དང་། གནས་སྐབས་རྟེན་འབྲེལ་གྱི་སྣང་བ་མ་འགགས་པར་ཤར་བས་སྟོང་པ་ཉིད་གཟུགས་དང་། སྣང་ཙམ་ཉིད་ན་ངོ་བོ་སྟོང་ཉིད་ལས་མ་གཡོས་པས་གཟུགས་ལས་ཀྱང་སྟོང་པ་ཉིད་གཞན་མ་ཡིན་པ་དང་། ངོ་བོ་སྟོང་ཉིད་ལས་མ་གཡོས་པར་གཟུགས་སོགས་སུ་སྣང་བས་སྟོང་པ་ཉིད་ལས་ཀྱང་གཟུགས་གཞན་མ་ཡིན་པ་སྟེ་སྟོང་ཉིད་བཞི་སྦྱོར་གྱི་དགོངས་པ། ཀླུས། ཀུན་རྫོབ་དང་ནི་དོན་དམ་དག །སོ་སོའི་ཆར་ནི་ཤེས་གྱུར་ཏེ། །གང་དུ་ཡང་དག་འདྲེས་གྱུར་པ། །ཟུང་དུ་འཇུག་པར་དེ་བཤད་དོ། །ཞེས་གསུངས་ཏེ། དེ་ཡང་གཞལ་བྱ་ཡུལ་གྱི་སྒོ་ནས་ཆོས་དབྱིངས་མཉམ་པ་ཆེན་པོ་ལ་དབྱེ་གཞི་ཟད་པས་སྔར་མ་འདྲེས་པ་ལ་ད་གསར་དུ་འདྲེ་བར་བྱ་བ་ཅུང་ཟད་ཀྱང་མེད་དེ་གདོད་ནས་དབྱེར་མེད་ཡིན། གཞལ་བྱེད་ཡུལ་ཅན་གྱི་ངོས་ནས་གཞལ་ན། ད་ལྟ་ཚོགས་སྦྱོར་གྱི་སྐབས་སུ་ཐོས་བསམ་གཙོ་བོར་གྱུར་པས་སྒྲོ་འདོགས་ཡིན་ལུགས་སུ་བཅད་སྟོབས་ཀྱིས། ནམ་ས་དང་པོའི་ཆོས་ཉིད་ཀྱི་བདེན་པ་མཐོང་བ་ནི་མཉམ་བཞག་ཏུ་ཡུལ་ཡུལ་ཅན་གཉིས་མེད་དུ་འདྲེས་ཤིང་རྟོགས་ལ་མཐར་ཕྱིན་པ་ནི་སངས་རྒྱས་ཀྱི་ས་སྟེ་མཉམ་རྗེས་དབྱེར་མེད་རོ་མཉམ་དུ་གྱུར་པའོ། །དེས་ན་ཆོས་ཐམས་ཅད། ངོ་བོ་སྟོང་པ་ཉིད། རང་བཞིན་མཚན་མེད། འབྲས་བུ་སྨོན་པ་མེད་པ་སྟེ་རྣམ་ཐར་སྒོ་གསུམ་གྱི་རང་བཞིན་ཅན། མཐའ་བྲལ་དབུ་མ་ཆེན་པོའམ། ཡུམ་ཆེན་མོ་ཤེས་རབ་ཀྱི་ཕ་རོལ་དུ་ཕྱིན་མ། དོན་དམ་པའི་དབྱིངས་སྲིད་ཞི་མཉམ་པ་ཉིད། མཐར་ཐུག་དམ་པའི་དོན་གྱི་བདེན་གཅིག འཕགས་པ་རྣམས་ཀྱི་སོ་སོ་རང་རིག་པའི་ཡེ་ཤེས་ཀྱི་སྤྱོད་ཡུལ་དུ་གྱུར་པ་ཟབ་ཞི་སྤྲོས་བྲལ་འོད་གསལ་བའི་ཡེ་ཤེས་སྨྲ་བསམ་བརྗོད་མེད་བློ་འདས་ཆེན་པོ་རྡོ་རྗེ་ནམ་མཁའི་དཀྱིལ་ལྟ་བུ་ནི་རྟོགས་བྱ་མཐར་ཐུག་གཏན་ལ་དབབ་བྱའི་གཞི་རྣམ་གྲངས་མ་ཡིན་པའི་སྟོང་ཉིད་རྣམ་ཀུན་མཆོག་ལྡན་ཏེ། ཤེར་ཕྱིན་སྡུད་པར། གང་ཞིག་ཡོད་པ་མ་ཡིན་དེ་ནི་མེད་ཅེས་བྱ། །བྱིས་པ་རྣམས་ཀྱིས་དེ་བརྟགས་ཡོད་དང་མེད་པར་བྱེད། །ཡོད་དང་མེད་པ་འདི་གཉིས་མེད་པའི་ཆོས་ཡིན་ཏེ། །བྱང་ཆུབ་སེམས་དཔའ་གང་གིས་འདི་ཤེས་ངེས་པར་འབྱུང་། །གང་འདིར་ཕུང་པོ་ལྔ་དང་སྒྱུ་མ་འདྲར་ཤེས་ཤིང་། །སྒྱུ་མ་གཞན་དང་ཕུང་པོ་གཞན་དུ་མི་བྱེད་ལ། །སྣ་ཚོགས་འདུ་ཤེས་བྲལ་ཞིང་ཉེ་བར་ཞི་སྤྱོད་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་དང་། མདོ་དགོངས་འགྲེལ་ལས། སོ་སོ་རང་རིག་མཚན་ཉིད་སྤྱོད་ཡུལ་དེ། །བརྗོད་དུ་མེད་ཅིང་ཐ་སྙད་ཡོངས་ཆད་པ། །རྩོད་དང་བྲལ་བ་དོན་དམ་ཆོས་ཡིན་ཏེ། །དེ་ནི་རྟོག་གེ་ཀུན་ལས་འདས་མཚན་ཉིད། །ཅེས་དང་། དཀོན་མཆོག་ཏ་ལ་ལས། དེ་བཞིན་གཤེགས་པ་རྟག་ཏུ་སྐྱེ་མེད་ཆོས། །ཆོས་རྣམས་ཐམས་ཅད་བདེ་བར་གཤེགས་པ་འདྲ། །བྱིས་པའི་བློ་ཅན་མཚན་མར་འཛིན་པས་ན། །འཇིག་རྟེན་དག་ན་མེད་པའི་ཆོས་ལ་སྤྱོད། །ཅེས་དང་། ཡུམ་ལ་བསྟོད་པ་ལས། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །མ་སྐྱེས་མི་འགག་ནམ་མཁའི་ངོ་བོ་ཉིད། །སོ་སོ་རང་རིག་ཡེ་ཤེས་སྤྱོད་ཡུལ་བ། །དུས་གསུམ་རྒྱལ་བའི་ཡུལ་ལ་ཕྱག་འཚལ་ལོ། །ཞེས་དང་། མངོན་རྟོགས་རྒྱན་ལས། ཚུ་རོལ་ཕ་རོལ་མཐའ་ལ་མིན། །དེ་དག་བར་ན་མི་གནས་པ། །དུས་གསུམ་མཉམ་པ་ཉིད་ཤེས་ཕྱིར། །ཤེས་རབ་ཕ་རོལ་ཕྱིན་པར་འདོད། །ཅེས་དང་། སློབ་དཔོན་ཕྱོགས་ཀྱི་གླང་པོས། ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས། །བསྒྲུབ་བྱའི་དོན་དེ་དང་ལྡན་པས། །གཞུང་ལམ་དེ་ལ་དེ་སྒྲ་ཡིན། །ཞེས་དང་། དབུ་མ་རྩ་བར། བརྗོད་པར་བྱ་བ་ལྡོག་པ་སྟེ། །སེམས་ཀྱི་སྤྱོད་ཡུལ་ལྡོག་པས་སོ། །མ་སྐྱེས་པ་དང་མི་འགག་པ། །ཆོས་ཉིད་མྱ་ངན་འདས་དང་མཚུངས། །ཞེས་དང་། གཞན་ལས་ཤེས་མིན་ཞི་བ་དང་། །སྤྲོས་པ་རྣམས་ཀྱིས་མ་སྤྲོས་པ། །རྣམ་རྟོག་མེད་དོན་ཐ་དད་མིན། །དེ་ནི་དེ་ཡི་མཚན་ཉིད་དོ། །ཞེས་དང་། འཇུག་པ་ལས། སོ་སོའི་སྐྱེ་བོ་རྣམས་ནི་རྟོག་པས་བཅིངས། །མི་རྟོག་རྣལ་འབྱོར་པ་ནི་གྲོལ་གྱུར་པས། །རྟོག་རྣམས་ལོག་པར་གྱུར་པ་གང་ཡིན་པ། །རྣམ་པར་དཔྱོད་པའི་འབྲས་བུར་མཁས་རྣམས་གསུངས། །ཞེས་སོ། །ཚུལ་འདི་ལ་བསལ་བར་བྱ་བ་ཀུན་ནས་ཉོན་མོངས་པ་འཁོར་བའི་ཕྱོགས་རྩ་བ་ཆོས་དང་གང་ཟག་གི་བདག་ཏུ་འཛིན་པ་དང་། དེས་བསྐྱེད་པའི་ལས་ཉོན་རྣམ་སྨིན་སོགས་འདུ་བྱེད་ཟག་བཅས་ཀྱི་ཆོས་རྣམས་གནས་སྐབས་ཕྱིན་ཅི་ལོག་ཏུ་ཞེན་པས་སྒྲོ་བཏགས་པ་ཙམ་ལས་དོན་ལ་གྲུབ་པ་ནི་ཅི་ཡང་མེད་དོ། །རྣམ་པར་བྱང་བ་མྱ་ངན་ལས་འདས་པའི་ཆོས་བདག་མེད་པ་གཉིས་ཀྱིས་བསྡུས་པའི་ལམ་དང་འབྲས་བུའི་ཆོས་བཞག་པར་བྱ་བའང་ཅུང་ཟད་མེད་དེ་དེ་གཉིས་ཀའང་རང་བཞིན་གདོད་ནས་མ་སྐྱེས་པས་ཆོས་ཉིད་མཉམ་པ་ཉིད་དེ། རྒྱལ་སྲས་ཞི་བ་ལྷས། འགྲོ་བ་འདི་དག་ཐམས་ཅད་ནི། །རྟག་ཏུ་མ་སྐྱེས་མི་འགག་ཉིད། །འགྲོ་བ་རྨི་ལམ་ལྟ་བུ་སྟེ། །རྣམ་པར་དཔྱད་ན་ཆུ་ཤིང་འདྲ། །མྱ་ངན་འདས་དང་མ་འདས་པ། །དེ་ཉིད་དུ་ནི་ཁྱད་པར་མེད། །ཅེས་གསུངས། དེ་ལྟ་བུའི་གནས་ཚུལ་ཡང་དག་པའི་དོན་ཉིད་ལ་ཐོས་བསམ་གྱིས་སྒྲོ་འདོགས་བཅད་དེ་ཡང་དག་པར་བལྟ་བ་སྟེ། ཡུལ་ཆོས་དབྱིངས་སྤྲོས་པ་དང་བྲལ་བ་ལ་ཡུལ་ཅན་གོམས་བྱེད་ཀྱི་བློ་ཡང་སྤྲོས་པ་དང་བྲལ་བར་འཕགས་པའི་མཉམ་བཞག་དང་རྗེས་སུ་མཐུན་པར་གཉིས་སྣང་མེད་པའི་ཚུལ་དུ་གོམས་པར་བྱ་བ་སྟེ། རྣམ་པར་མི་རྟོག་པ་ལ་འཇུག་པའི་གཟུངས་ཀྱི་མདོ་ལས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྣམ་པར་རྟོག་པའི་མཚན་མའི་རྣམ་པ་ཐམས་ཅད་ཡིད་ལ་མི་བྱེད་པས་ཡོངས་སུ་སྤོང་བ་ན། དེ་ལྟར་རྣམ་པར་མི་རྟོག་པའི་དབྱིངས་ལ་ཤིན་ཏུ་བརྩོན་པ་ཡིན་ཏེ། རེ་ཞིག་རྣམ་པར་མི་རྟོག་པའི་དབྱིངས་ལ་ནི་མ་རེག་མོད་ཀྱི། རྣམ་པར་མི་རྟོག་པའི་དབྱིངས་ལ་རེག་པར་འགྱུར་བའི་ཚུལ་བཞིན་པའི་ཏིང་འཛིན་ནི་ཡོད་དོ། །ཞེས་དང་། སྡུད་པ་ལས། གཟུགས་རྣམས་མི་མཐོང་ཚོར་བ་དག་ཀྱང་མི་མཐོང་ཞིང་། །འདུ་ཤེས་མཐོང་བ་མེད་ལ་སེམས་པ་མི་མཐོང་ཞིང་། །གང་ལ་རྣམ་པར་ཤེས་དང་སེམས་ཡིད་མཐོང་མེད་པ། །འདི་ནི་ཆོས་མཐོང་ཡིན་ཞེས་བདེ་བར་གཤེགས་པས་གསུངས། །ཞེས་དང་། ཡེ་ཤེས་སྣང་བ་རྒྱན་གྱི་མདོ་ལས། ཀུན་ཏུ་རྟོག་པས་མ་བརྟགས་པ། །རབ་ཏུ་མི་གནས་པ་ཡི་ཡིད། །དྲན་པ་མེད་ཅིང་ཡིད་བྱེད་མེད། །དམིགས་པ་མེད་ལ་ཕྱག་འཚལ་ལོ། །ཞེས་དང་། ཏིང་རྒྱལ་ལས། དམིགས་པ་མེད་ཅིང་མཚན་མ་མེད། །རྣམ་རྟོག་མེད་ཅིང་སྤྲོས་པ་མེད། །སྐྱེ་མེད་དེ་ནི་དེ་བཞིན་ཉིད། །ཅེས་དང་། ལང་གཤེགས་ལས། ཅི་ཙམ་སེམས་ཀྱི་སྤྱོད་ཡུལ་བ། །ཡོད་དང་མེད་པ་མཐའ་གཉིས་ཏེ། །སྤྱོད་ཡུལ་རྣམ་པར་སྤང་བ་ན། །སེམས་ཀྱང་ཡང་དག་འགག་པར་འགྱུར། །ཞེས་དང་། ཡོད་མིན་མེད་མིན་ཡོད་མེད་མིན། །དེ་ལྟར་འཇིག་རྟེན་ནམ་མཐོང་ན། །དེ་ཚེ་སེམས་ཀྱང་རྣམ་ལྡོག་སྟེ། །བདག་མེད་པ་ཡང་མཐོང་བར་འགྱུར། །ཞེས་དང་། དབུ་མ་རྩ་བ་ལས། གང་དག་རང་དངོས་གཞན་དངོས་དང་། །དངོས་དང་དངོས་མེད་ཉིད་ལྟ་བ། །དེ་དག་སངས་རྒྱས་བསྟན་པ་ལ། །དེ་ཉིད་མཐོང་བ་མ་ཡིན་ནོ། །བཅོམ་ལྡན་དངོས་དང་དངོས་མེད་པ། །མཁྱེན་པས་ཀཱ་ཏ་ཡ་ན་ཡི། །གདམས་ངག་ལས་ནི་ཡོད་པ་དང་། །མེད་པ་གཉིས་ཀ་དགག་པར་མཛད། །ཅེས་དང་། ཡོད་ཅེས་བྱ་བ་རྟག་པར་འཛིན། །མེད་ཅེས་བྱ་བ་ཆད་པར་བལྟ། །དེ་ཕྱིར་ཡོད་དང་མེད་པ་ལ། །མཁས་པས་གནས་པར་མི་བྱའོ། །ཞེས་དང་། རྒྱལ་སྲས་ཞི་བ་ལྷས། སྟོང་ཉིད་བག་ཆགས་གོམས་པས་ནི། །དངོས་པོའི་བག་ཆགས་སྤོང་འགྱུར་ཞིང་། །ཅི་ཡང་མེད་ཅེས་གོམས་པས་ནི། །དེ་ཡང་ཕྱིས་ནས་སྤོང་བར་འགྱུར། །གང་ཚེ་གང་ཞིག་མེད་དོ་ཞེས། །བརྟག་བྱའི་དངོས་པོ་མི་དམིགས་པ། །དེ་ཚེ་དངོས་མེད་རྟེན་བྲལ་བ། །བློ་ཡི་མདུན་ན་ཇི་ལྟར་གནས། །གང་ཚེ་དངོས་དང་དངོས་མེད་དག །བློ་ཡི་མདུན་ན་མི་གནས་པ། །དེ་ཚེ་རྣམ་པ་གཞན་མེད་པས། །དམིགས་པ་མེད་པར་རབ་ཏུ་ཞི། །ཞེས་དང་། ཨ་ཏི་ཤས། ཆོས་ཉིད་སྤྲོས་དང་བྲལ་བ་ལ། །ཤེས་པའང་སྤྲོས་དང་བྲལ་བར་བཞག །ཅེས་དང་། དེ་ཉིད་ཀྱིས་དབུ་མའི་མན་ངག་བཀྲལ་བ་ལས། ཅིར་ཡང་མི་འཛིན་པ་ནི་གཟུང་བ་དང་འཛིན་པའི་རྟོག་པ་དང་བྲལ་བས་སོ། །དྲན་པ་དང་ཡིད་ལ་བྱེད་པ་ཐམས་ཅད་སྤངས་པ་ནི་འདས་པ་དང་མ་འོངས་པ་ལ་དམིགས་པའི་རྟོག་པ་སྤང་བའོ། །ཞེས་དང་། སློབ་དཔོན་བྷ་བྱའི་དབུ་མ་རིན་ཆེན་སྒྲོན་མེར། སྐབས་དེར་ཤེས་པ་ཅི་ལ་ཡང་མི་གནས། ཅིར་ཡང་མི་རྟོག ཅིར་ཡང་སེམས་པ་མེད་པ། མཐའ་ཐམས་ཅད་ལ་མི་གནས་པ། ཤེས་པ་ཅིའི་ངོ་བོར་ཡང་མ་སྐྱེས་པ་ཅི་ཡང་མ་ཡིན་པ་བསྒོམ་པར་བྱའོ། །ཞེས་དང་། འཇམ་མགོན་ས་སྐྱ་པཎ་ཆེན་གྱིས། བློ་སྦྱོང་ཞེན་པ་བཞི་བྲལ་གྱི་ཁྲིད་ཡིག་ཏུའང་དེ་དང་མཐུན་པར། འཁོར་བ་ནི་བློ་འཁྲུལ་པ་ལ་སྣང་ཡང་ཤེས་རབ་ཀྱིས་བརྟགས་ན་ངོ་བོར་གྲུབ་པ་ཅི་ཡང་མེད། དེས་ན་འདས་པ་ལ་སེམས་མི་གཞུགམ་འོངས་པ་ལ་སེམས་མི་འཇུག ད་ལྟར་བ་ལ་རྣམ་པར་ཤེས་པ་མི་འཇུག་པ་གཅིག་གོ་བར་བྱས་ནས། ཆོས་ཐམས་ཅད་སྤྲོས་བྲལ་དུ་ཤེས་པར་བྱའོ། །ཞེས་གསུངས་ཤིང་། རྗེ་བཙུན་གྲགས་པས། ལམ་འབྲས་གཞུང་ཁྲིད་ཚིགས་བཅད་མར། སྐྱེ་དང་འགགས་དང་གནས་པ་ཡོད་མིན་ན། །བརྗོད་བྲལ་འདི་ལ་ཅི་ཞིག་བསམ་པར་བྱ། །བརྗོད་མེད་རྗོད་པ་འདི་ལ་དོན་མེད་ཅིང་། །བསམ་མིན་བསམ་པར་བྱ་བའི་གནས་མིན་ལ། །བསྒོམ་དུ་མེད་པ་འདི་ལ་ཅི་ཞིག་སྒོམ། །དེ་ལྟར་ཤེས་ན་འཛིན་པ་མེད་པར་འགྱུར། །ཞེས་དང་། རྗེ་བདག་ཉིད་ཆེན་པོ་ཙོང་ཁ་པས། མཉམ་བཞག་ནམ་མཁའ་ལྟ་བུའི་སྟོང་ཉིད་དང་། །རྗེས་ཐོབ་སྒྱུ་མ་ལྟ་བུའི་སྟོང་པ་གཉིས། །བསྒོམས་ནས་ཐབས་ཤེས་ཟུང་དུ་འབྲེལ་བ་ཡི། །རྒྱལ་སྲས་སྤྱོད་པའི་ཕ་རོལ་འགྲོ་བ་བསྔགས། །ཞེས་སོགས་གསུངས་པ་ལྟར་མཉམ་བཞག་ཏུ་ནམ་མཁའ་ལྟ་བུའི་སྟོང་ཉིད་དོན་སྤྱིའི་ཚུལ་དུ་བསྒོམས་ཤིང་། རྗེས་ཐོབ་ཏུ་སྒྱུ་མ་ལྟ་བུའི་རྩིས་ཟིན་པའི་སྒོ་ནས་ཚོགས་གཉིས་ཟུང་འབྲེལ་དུ་བསླབས་པས། རིམ་གྱིས་སྒྲིབ་པ་བྱང་སྟོབས་ཀྱིས་སྤྲོས་བྲལ་མཉམ་པ་ཆེན་པོའི་དོན་མཐོང་མེད་ཚུལ་གྱིས་མཐོང་བར་འགྱུར་ཏེ། སྡུད་པ་ལས། ནམ་མཁའ་མཐོང་ཞེས་སེམས་ཅན་ཚིག་ཏུ་རབ་ཏུ་བརྗོད། །ནམ་མཁའ་ཇི་ལྟར་མཐོང་སྟེ་དོན་འདི་བརྟག་པར་གྱིས། །དེ་ལྟར་ཆོས་མཐོང་བ་ཡང་བདེ་བར་གཤེགས་པས་བསྟན། །མཐོང་བ་དཔེ་གཞན་གྱིས་ནི་བསྙད་པར་ནུས་མ་ཡིན། །ཞེས་དང་། འཇུག་པ་ལས། གང་ཚེ་སྐྱེ་མེད་དེ་ཉིད་ཡིན་ཞིང་བློ་ཡང་སྐྱེ་བ་དང་བྲལ་བ། །དེ་ཚེ་དེ་རྣམས་རྟེན་ལས་དེ་ཡིས་དེ་ཉིད་རྟོགས་པ་ལྟ་བུ་སྟེ། །ཇི་ལྟར་སེམས་ནི་གང་གི་རྣམ་པ་ཅན་དུ་གྱུར་པ་དེ་ཡི་ཡུལ། །དེ་ཡོངས་ཤེས་པ་དེ་བཞིན་ཐ་སྙད་ཉེ་བར་བརྟེན་ནས་རིག་པ་ཡིན། །ཞེས་དང་། དེའི་འགྲེལ་པར། དེ་ལྟར་ཡེ་ཤེས་ཀྱི་ཡུལ་དེ་ཁོ་ན་ཉིད་ལ་རྣམ་པ་ཐམས་ཅད་དུ་ཡུལ་ཅན་སེམས་དང་སེམས་ལས་བྱུང་བ་རྣམས་མི་འཇུག་པས་སྐུ་ཁོ་ནས་མངོན་དུ་མཛད་པར་ཀུན་རྫོབ་ཏུ་རྣམ་པར་བཞག་གོ །ཞེས་དང་། ཨ་ཏི་ཤས། སྟོང་པ་ཉིད་ལ་ཐ་དད་ནི། །ཅུང་ཟད་ཡོད་པ་མ་ཡིན་ཏེ། །རྟོགས་མེད་ཚུལ་གྱིས་རྟོགས་པས་ན། །སྟོང་ཉིད་མཐོང་ཞེས་ཐ་སྙད་བཏགས། །ཞེས་གསུངས། དེ་ལྟ་བུའི་གནས་ལུགས་ཡང་དག་པའི་དོན་མཐོང་ན་སྲིད་ཞིའི་འཆིང་བ་ཀུན་ལས་རྣམ་པར་གྲོལ་བར་འགྱུར་ཏེ། རྒྱལ་བའི་ཡུམ་ལས། བྱང་ཆུབ་སེམས་དཔའ་གང་ཞིག་རྟེན་ཅིང་འབྲེལ་འབྱུང་བ། །སྐྱེ་མེད་ཟད་པ་མེད་པར་ཤེས་རབ་འདི་ཤེས་ན། །ཉི་མ་སྤྲིན་མེད་འོད་ཟེར་འཕྲོ་བས་མུན་བསལ་ལྟར། །མ་རིག་ཐིབས་པོ་སངས་ནས་རང་བྱུང་ཐོབ་པར་འགྱུར། །ཞེས་དང་། འཇུག་པར། ཤེས་བྱའི་བུད་ཤིང་སྐམ་པོ་མ་ལུས་པ། །བསྲེགས་པས་ཞི་དེ་རྒྱལ་རྣམས་ཆོས་ཀྱི་སྐུ། །དེ་ཚེ་སྐྱེ་བ་མེད་ཅིང་འགག་པ་མེད། །སེམས་འགག་པ་སྟེ་སྐུ་ཡི་མངོན་སུམ་མཛད། །ཅེས་དང་། དེའི་འགྲེལ་པར། རྣམ་པར་རྟོག་པ་ཐམས་ཅད་ཉེ་བར་ཞི་བའི་ཕྱིར་ཞི་བ་ཡིན་ཏེ་མེ་བཞིན་དུ་འདས་པ་ནི་མ་ཡིན་ནོ། །ཞེས་གསུངས་པས་རང་བྱུང་ཡེ་ཤེས་ཀྱི་སྐུ་སྤྲོས་པ་དང་བྲལ་བའི་མཚན་ཉིད་ཅན་མངོན་དུ་མཛད་ནས་འཁོར་བ་མ་སྟོང་བར་དུ་རྟོག་མེད་ལྷུན་གྲུབ་ཀྱི་ཕྲིན་ལས་གདུལ་བྱའི་ཡུལ་ལ་འཇུག་པ་ཡིན་ཏེ། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང་། །ཡིད་བཞིན་ནོར་བུ་བཞིན་དུ་རྣམ་མི་རྟོག །འགྲོ་སྒྲོལ་བར་དུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བ་ཡིན། །ཞེས་སོ། །གཉིས་པ་འཁོར་ལོ་ཐ་མའི་བསྟན་དོན་ཆོས་ཉིད་དག་པ་ཆེན་པོའི་ངོས་ནས་གཞལ་ན། ཐེག་པ་ཆེན་པོ་རྒྱུད་བླ་མའི་བསྟན་བཅོས་ལས། དྲི་མེད་དེ་བཞིན་ཉིད་དང་དྲི་མ་མེད། །དྲི་མེད་སངས་རྒྱས་ཡོན་ཏན་རྒྱལ་བའི་མཛད། །གང་ལས་དཀོན་མཆོག་དགེ་བ་གསུམ་འབྱུང་བ། །དོན་དམ་གཟིགས་པ་རྣམས་ཀྱི་ཡུལ་ཡིན་ནོ། །ཞེས་གསུངས་པས། དཔེ་ཇི་ལྟར་ན་ཉི་མ་རང་བཞིན་གྱིས་འོད་གསལ་ཞིང་མུན་སོགས་ཀྱི་དྲི་མ་མེད་ཀྱང་རྐྱེན་གློ་བུར་བ་སྤྲིན་སོགས་ཀྱིས་བསྒྲིབས་ཏེ་མི་སྣང་བ་བཞིན་དུ། སེམས་ཅན་ཐམས་ཅད་ཀྱི་རྒྱུད་ལ་ཡེ་ནས་དག་པའི་ཆོས་ཉིད་ཟག་པ་མེད་པའི་ཆོས་རྣམས་དང་རྣམ་དབྱེར་མེད་པ་བདེ་བར་གཤེགས་པའི་སྙིང་པོ་གནས་པ་ནི་གང་རྟོགས་པར་བྱ་བ་ཁམས་སམ་རང་བཞིན་གནས་པའི་རིགས་དང་། ཉི་མ་སྤྲིན་སྦུབས་ལས་གྲོལ་ཏེ་སྒྲིབ་བྱེད་ཐམས་ཅད་དང་བྲལ་བ་བཞིན་ཁམས་དེ་གློ་བུར་གྱི་སྒྲིབ་པའི་སྦུབས་ལས་གྲོལ་ཏེ་དག་པ་གཉིས་ལྡན་མཐར་ཐུག་པ་ནི་གང་ཐོབ་པར་བྱ་བ་བྲལ་འབྲས་བྱང་ཆུབ་དང་། ཉི་མ་དེ་སྤྲིན་གྱིས་བསྒྲིབས་པ་དང་མ་བསྒྲིབས་པའི་གནས་སྐབས་ཀུན་ཏུ་རང་གི་ངོ་བོ་ལ་ཁྱད་པར་མེད་པ་བཞིན། བྱང་ཆུབ་ཆེན་པོ་དང་འབྲེལ་བའི་སྟོབས་སོགས་ཀྱི་ཡོན་ཏན་རྣམས་ཀྱང་དྲི་མས་བསྒྲིབས་མ་བསྒྲིབས་ཙམ་ལས་དོན་ལ་ཁྱད་པར་མེད་པར་ད་ལྟ་ནས་རིགས་ཁམས་ལ་ཆོས་ཉིད་ཀྱི་ཚུལ་དུ་འབྲལ་མི་ཤེས་པར་གནས་པ་ནི་རྟོགས་པ་དེའི་ཡོན་ཏན་དང་། ཉི་མ་ལ་རྣམ་རྟོག་མེད་ཀྱང་འཇིག་རྟེན་ན་མུན་པ་སེལ་བ་དང་མེ་ཏོག་གི་ཁ་འབྱེད་པ་བཞིན་དུ། སངས་རྒྱས་ལ་འབད་རྩོལ་གྱི་རྣམ་རྟོག་དང་སྤྲོས་པ་མི་མངའ་ཡང་ལྷུན་གྲུབ་རྒྱུན་མི་ཆད་པའི་ཕྲིན་ལས་གདུལ་བྱའི་ཡུལ་ལ་རྟག་པར་འཇུག་པས་གནས་སྐབས་དང་མཐར་ཐུག་གི་རྒུད་པ་སེལ་ཞིང་རྣམ་གྲོལ་གྱི་པདྨོ་བཞད་པར་མཛད་པ་ནི་ཡོན་ཏན་རྣམས་ཐོབ་པའི་ནུས་པ་སྟེ་བཞི་ལས། སྔ་མ་དག་བྱ་རྒྱུ་དང་། ཕྱི་མ་གསུམ་དག་བྱེད་རྐྱེན་ཏེ་གང་ལས་དཀོན་མཆོག་དགེ་བ་གསུམ་འབྱུང་བ་ནི་དོན་དམ་གཟིགས་པ་རྣམས་ཀྱི་ཡུལ་ཡིན་གྱི་ཕལ་པས་བསམ་གྱིས་མི་ཁྱབ་སྟེ་གང་ཟག་ལས་དང་པོ་པ་རྣམས་ཀྱིས་དད་པས་རྟོགས་པར་བྱ་བ་ཙམ་མོ། །དེའི་ཕྱིར་གཞུང་དེ་ཉིད་ལས། སངས་རྒྱས་ཁམས་དང་སངས་རྒྱས་བྱང་ཆུབ་དང་། །སངས་རྒྱས་ཡོན་ཏན་སངས་རྒྱས་ཕྲིན་ལས་ཏེ། །དག་པའི་སེམས་ཅན་གྱིས་ཀྱང་བསམ་བྱ་མིན། །འདི་ནི་འདྲེན་པ་རྣམས་ཀྱི་སྤྱོད་ཡུལ་ལོ། །ཞེས་དང་། རང་བྱུང་རྣམས་ཀྱི་དོན་དམ་ནི། །དད་པ་ཉིད་ཀྱིས་རྟོགས་བྱ་ཡིན། །ཉི་མའི་དཀྱིལ་འཁོར་འོད་འབར་བ། །མིག་མེད་པས་ནི་མཐོང་བ་མེད། །ཅེས་དང་། མདོ་ལས། དོན་དམ་པ་ནི་དད་པས་རྟོགས་པར་བྱའོ། །ཞེས་གསུངས། དེས་ན་རྟོགས་བྱ་ཁམས་ཟག་མེད་རྣམ་ཀུན་མཆོག་ལྡན་གྱི་སྟོང་ཉིད་ནི་སྔར་སྨོས་པ་བཞིན་ཟུང་འཇུག་རྣམ་གྲངས་མིན་པའི་དོན་དམ་དབྱེ་གཞི་ཟད་པའི་དབྱེར་མེད་རྣམ་དག་ཆེན་པོ་ཉིད་ཡིན་པས་སྟོང་པའི་དབྱིངས་དང་འོད་གསལ་བའི་ཡེ་ཤེས་གཉིས་ཀྱང་སྣང་སྟོང་རིས་སུ་ཆད་པ་མེད་དེ་མཉམ་པ་ཉིད་དོ། །དེའི་ངོར་དབྱིངས་འདི་ལ་བསལ་བར་བྱ་བ་ཀུན་ནས་ཉོན་མོངས་པ་གསུམ་གྱིས་བསྡུས་པའི་ཟག་བཅས་འཁོར་བའི་ཆོས་གློ་བུར་པ་ཐམས་ཅད་ནི་དོན་ལ་མེད་པའི་བློ་འཁྲུལ་བ་ཙམ་ཡིན་པས་གཤིས་ལ་ཡེ་ནས་མ་ཞུགས་པས་ད་གསར་དུ་བསལ་བར་བྱ་རྒྱུ་ནི་ཅི་ཡང་མེད་དེ། འཇམ་དཔལ་རྣམ་པར་རོལ་པ་ལས། སྲིང་མོ་གང་རང་བཞིན་གྱིས་འོད་གསལ་བ་ལ་གློ་བུར་གྱི་ཉོན་མོངས་པ་བྱུང་ཡང་རང་བཞིན་གྱིས་འོད་གསལ་བ་དེ་ནི་གློ་བུར་གྱི་ཉོན་མོངས་པ་དེས་ཀུན་ནས་ཉོན་མོངས་པར་བྱེད་མི་ནུས་སོ། །ཞེས་གསུངས། དེའི་དོན་ཡང་། ད་ལྟ་འཁྲུལ་སྣང་འདི་རྟེན་གཞིའི་རྩ་བ་དང་བྲལ་བས་སམ་དྲི་མ་དེ་གདོད་ནས་མ་གྲུབ་པ་ནི་གོང་དུ་འཁོར་ལོ་བར་བའི་སྐབས་སུ་གཏན་ལ་ཕབ་ཟིན་པ་བཞིན་ནོ། །མྱ་ངན་ལས་འདས་པའི་ཆོས་སྐུ་དང་ཡེ་ཤེས་སོགས་སངས་རྒྱས་ཀྱི་ཡོན་ཏན་གདྒཱའི་ཀླུང་གི་བྱེ་མའི་གྲངས་ལས་འདས་པ་ནི། ཆོས་ཀྱི་དབྱིངས་དང་ངོ་བོ་དབྱེར་མེད་ཅིང་ཐ་མི་དད་པའི་ཕྱིར་ད་གསར་དུ་སྒྲུབ་སྟེ་བཞག་པར་བྱ་བ་ཅུང་ཟད་ཀྱང་མེད་དེ་ཆོས་དབྱིངས་དེའི་རང་བཞིན་ཡིན་པའི་ཕྱིར། མདོ་ལས། སངས་རྒྱས་ཐམས་ཅད་ཀྱིས་ཤིན་ཏུ་ནན་ཏན་དུ་བཙལ་ཡང་དེ་བཞིན་གཤེགས་པའི་སྙིང་པོ་ལ་དྲི་མ་མ་བརྙེས་ཏེ། སེམས་ཅན་ཐམས་ཅད་ལ་དྲི་མ་མེད་པའི་དབྱིངས། སངས་རྒྱས་ཀྱི་དབྱིངས། མཚན་དང་དཔེ་བྱད་བཟང་པོ་མཐའ་ཡས་པའི་དབྱིངས་ཡོད་དེ། དཔེར་ན་ཆུ་དང་འབྲུ་མར་བསྲེས་པ་མི་མངོན་པ་དེ་བཞིན་དུ། སངས་རྒྱས་ཀྱི་དབྱིངས་ཀྱང་ཉོན་མོངས་པ་བྱེ་བས་གཡོགས་མོད་ཀྱི་ཉོན་མོངས་པ་དང་སངས་རྒྱས་ཀྱི་དབྱིངས་འདྲེས་པར་གྱུར་པའི་གནས་མེད་དོ། །དབྱིངས་ཀྱང་ཉོན་མོངས་པ་བྱེ་བའི་ནང་ན་འདུག་མོད་ཀྱི་བུམ་པའི་ནང་ན་མར་མེ་འདུག་པ་བཞིན་དུ་བུམ་པ་བཅག་ན་མར་མེ་རབ་ཏུ་འབར་ཞིང་མཛེས་ཏེ། དེ་བཞིན་གཤེགས་པའི་སྙིང་པོ་སྟོན་པར་བྱེད་པ་ནི་སངས་རྒྱས་སོ། །ཞེས་དང་། རྒྱུད་བླ་མར། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་དང་། ཀླུས་ཆོས་དབྱིངས་བསྟོད་པར། ཇི་ལྟར་མར་མེ་བུམ་ནང་ན། །ཅུང་ཞིག་སྣང་བར་མི་འགྱུར་བ། །དེ་བཞིན་ཉོན་མོངས་བུམ་ནང་ན། །ཆོས་ཀྱི་དབྱིངས་ཀྱང་མི་མཐོང་ངོ་། །ཕྱོགས་ནི་གང་དང་གང་དག་ནས། །བུམ་པར་བུ་ག་བཏོད་གྱུར་པའི། །དེ་དང་དེ་ཡི་ཕྱོགས་ཉིད་ནས། །འོད་ཀྱི་རང་བཞིན་འབྱུང་བར་འགྱུར། །གང་ཚེ་ཏིང་འཛིན་རྡོ་རྗེ་ཡིས། །བུམ་པ་དེ་ཉིད་བཅག་གྱུར་པ། །དེ་ཚེ་དེ་ནི་ནམ་མཁའ་ཡི། །མཐར་ཐུག་པར་ནི་སྣང་བར་བྱེད། །ཆོས་ཀྱི་དབྱིངས་ནི་སྐྱེ་མ་ཡིན། །ནམ་ཡང་འགག་པར་འགྱུར་བ་མེད། །དུས་རྣམས་ཀུན་ཏུ་ཉོན་མོངས་མེད། །ཐོག་མ་བར་མཐའ་དྲི་མ་བྲལ། །ཞེས་ཆོས་དབྱིངས་ཡེ་ཤེས་དྲི་བྲལ་དུ་གསུངས་ཤིང་། མདོ་རྒྱན་ལས་ཀྱང་། ཆོས་ཉིད་སེམས་ལས་གཞན་པའི་སེམས་རྣམས་ནི། །འོད་གསལ་མ་ཡིན་རང་བཞིན་ལ་བརྗོད་དོ། །ཞེས་གསུངས་པས་ད་ལྟའི་སེམས་ཀྱི་རང་བཞིན་ནམ་ཆོས་ཉིད་འོད་གསལ་བའི་ཡེ་ཤེས་འདུས་མ་བྱས་ཉིད། ཆོས་ཅན་འཁྲུལ་སེམས་ཚོགས་བརྒྱད་ཀྱིས་བསླད་དུ་མེད་པའི་རང་བཞིན་རྣམ་དག་ཡིན་པའི་གནད་ཀྱིས་སྒྲིབ་པ་སྦྱང་རུང་དང་། ཡོན་ཏན་སྣང་རུང་དུ་སྒྲུབ་པ་ཡིན་ཏེ། ལང་གཤེགས་ལས། ཆོས་ཐམས་ཅད་ཀྱི་དོན་དམ་པ་འཕགས་པའི་ཡེ་ཤེས་ཆེན་པོ་སྟོང་པ་ཉིད་གང་ཞེ་ན། འདི་ལྟ་སྟེ། སོ་སོ་རང་གིས་རིག་པ་འཕགས་པའི་ཡེ་ཤེས་ཐོབ་པ་ནི་ལྟ་བ་དང་ཉེས་པ་ཐམས་ཅད་ཀྱི་བག་ཆགས་ཀྱིས་སྟོང་སྟེ། འདི་ནི་ཆོས་ཐམས་ཅད་ཀྱི་དོན་དམ་པ་འཕགས་པའི་ཡེ་ཤེས་ཆེན་པོ་སྟོང་པ་ཉིད་ཅེས་བྱའོ། །ཞེས་གསུངས། གཞན་དུ་སེམས་མེད་ལ་སྒྲིབ་པ་མེད་མོད་དེ་སྒྲིབ་པ་དང་བྲལ་ཡང་དེས་ཅིའང་མཁྱེན་མི་སྲིད་པས་དགོས་ནུས་དབེན་པའི་ཕྱིར་ནམ་མཁའ་སྟོང་པར་སྒྲུབ་པའི་ངལ་བ་བཞིན་ནོ། །གཞན་ཡང་ཆོས་དབྱིངས་དེ་མེད་དགག་གི་སྟོང་པ་ཕྱོགས་གཅིག་ཏུ་བཟུང་ན་སངས་རྒྱས་ཀྱི་སྐུ་དང་ཞིང་ཁམས་སོགས་ཀྱང་མེད་པར་འགྱུར་བ་དང་། དེར་བརྟེན་པའི་ཚོགས་བསགས་པ་དང་སྒྲིབ་པ་སྦྱང་བ་རྣམས་ཀྱང་མེད་པར་འགྱུར་ཞིང་། རྒྱུ་དང་འབྲས་བུའི་ཐེག་པ་དག་གིས་གཞི་གང་དུ། ལམ་གང་གིས་དྲི་མ་སྦྱོང་བའི་ཐབས་ཇི་སྙེད་བསྟན་པ་རྣམས་ཀྱང་ཉམས་པར་འགྱུར་ཏེ། སྦྱང་གཞི་མེད་པས་སྦྱོང་བྱེད་ཀྱི་དགོས་པ་མེད་པ་དང་། ཡེ་ཤེས་ཀྱིས་སྟོང་པས་གཞན་དོན་མཛད་པ་དང་མཁྱེན་པར་མི་འགྱུར་བ་དང་། བཅིང་པ་དང་གྲོལ་བའི་གཞི་མེད་པ་དང་། སོ་སོ་རང་གིས་རིག་པར་བྱ་བའི་ཆོས་མེད་པར་འགྱུར་བ་སོགས་ཀྱི་སྐྱོན་མང་བའི་ཕྱིར། དཀོན་མཆོག་བརྩེགས་པ་ལས། གང་ཟག་ཏུ་བལྟ་བ་རི་རབ་ཙམ་དུ་གནས་པ་སླའི། མངོན་པའི་ང་རྒྱལ་ཅན་སྟོང་པ་ཉིད་དུ་བལྟ་བ་ནི་དེ་ལྟ་མ་ཡིན་ནོ། །ཞེས་དང་། ཅི་ཡང་མེད་པ་ཞེས་བྱ་བ་ནི་གཅེར་བུ་པ་རྣམས་ལའང་ཡོད་མོད་ཀྱི་ཐར་པ་ནི་དེ་ལྟར་མ་ཡིན་ནོ། །ཞེས་དང་། ཡུམ་ལས། ཡེ་ཤེས་མེད་ན་ཡོན་ཏན་འཕེལ་མེད་བྱང་ཆུབ་མེད། །རྒྱ་མཚོ་འདྲ་བའི་སངས་རྒྱས་ཆོས་ཀྱང་མེད་པར་འགྱུར། །ཞེས་དང་། ཀླུས། སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་རྣམས་ཕུང་པར་འགྱུར། །ཞེས་སོགས་དང་། ཀུན་མཁྱེན་བླ་མས། བྲལ་གཞི་མི་ཤེས་སྲིད་རྩེའི་ལྟ་བ་ཅན། །སོགས་གསུངས་པའི་དོན་ཡང་དེ་ཡིན་ནོ། །དེའི་ཕྱིར་ཆོས་ཐམས་ཅད་རང་བཞིན་མེད་པར་དགག་པའི་ཤུལ་དུ་དངོས་སྨྲ་བའི་ལུགས་ལྟར་ཀ་བུམ་སོགས་དགག་གཞི་དངོས་པོ་རང་མཚན་པ་ཞིག་འཇོག་རྒྱུ་མེད་མོད་ཀྱང་ཐ་སྙད་དུ་ཕྱང་ཆད་ནམ་མཁའ་ལྟ་བུ་ཅི་མེད་ཅང་མེད་མ་ཡིན་པར་སྐུ་དང་ཡེ་ཤེས་སོགས་སངས་རྒྱས་ཀྱི་ཆོས་རྣམས་འཆར་རུང་གི་དབྱིངས་ཟག་མེད་རྣམ་ཀུན་མཆོག་ལྡན་འདི་ལ་མ་ཡིན་དགག་གི་སྒྲས་བསྟན་པ་ཡིན་ཏེ། སྟོང་ཚུལ་འདི་ནི་བཀའ་འཁོར་བར་པ་ནས་ཀྱང་གསུངས་པ། ཤེར་ཕྱིན་སྟོང་ཕྲག་ཉི་ཤུ་ལྔ་པ་ལས། དེ་ལ་གཞན་གྱི་དངོས་པོ་སྟོང་པ་ཉིད་གང་ཞེ་ན། དེ་བཞིན་གཤེགས་པ་རྣམས་བྱུང་ཡང་རུང་། མ་བྱུང་ཡང་རུང་སྟེ། ཆོས་ཀྱི་གནས་ཉིད་དང་། ཆོས་ཉིད་དང་། ཆོས་ཀྱི་དབྱིངས་དང་། ཆོས་སྐྱོན་མེད་པ་ཉིད་དང་། དེ་བཞིན་ཉིད་དང་། མ་ནོར་བའི་དེ་བཞིན་ཉིད་དང་། གཞན་མ་ཡིན་པའི་དེ་བཞིན་ཉིད་དང་། ཡང་དག་པའི་མཐའ་ནི་དེ་བཞིན་ཉིད་དུ་གནས་པ་སྟེ། དེ་ལྟར་ཆོས་ཉིད་དེ་དག་གཞན་གྱིས་སྟོང་པ་གང་ཡིན་པ་དེ་ནི་གཞན་གྱི་དངོས་པོས་སྟོང་པ་ཉིད་ཅེས་བྱ་སྟེ། རབ་འབྱོར་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐེག་པ་ཆེན་པོའོ། །ཞེས་གསུངས། ལུང་ཚིག་འདི་ལ་བརྟེན་ནས་ཀུན་མཁྱེན་དོལ་པོ་སོགས་ཀྱིས་གཞན་སྟོང་ཞེས་མཚན་གསོལ་བ་ནི། དཔེར་ན་ཤེར་སྙིང་ལས། སྡུག་བསྔལ་ཐམས་ཅད་རབ་ཏུ་ཞི་བར་བྱེད་པའི་སྔགས་སོགས་གསུངས་པ་ལ་བརྟེན་ནས་ཕ་དམ་པས་དམ་ཆོས་སྡུག་བསྔལ་ཞི་བྱེད་ཅེས་མཚན་གསོལ་ཏེ་སྤྱི་མིང་སྒེར་དུ་ཐོགས་པ་བཞིན་ནོ། །མདོར་ན། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡིན། །རྟོག་མེད་ཏིང་འཛིན་ལ་གནས་ན། །མཁའ་བཞིན་དྲི་མ་མེད་པར་འགྱུར། །ཞེས་དང་། ཕྱོགས་ཀྱི་གླང་པོས། རྣམ་པར་རྟོག་ལས་མ་གཏོགས་པ། །འཁོར་བ་ཞེས་བྱ་གང་ཡང་མེད། །རྣམ་རྟོག་དེ་དང་བྲལ་བས་ན། །ཁྱོད་ནི་རབ་ཏུ་མྱ་ངན་འདས། །ཞེས་འཇམ་དཔལ་གྱི་བསྟོད་པར་གསུངས་པ་དང་། ས་ཆེན་གྱིས། ཡེ་ཤེས་རྣམ་པར་རྟོག་པ་ཡི། །དབང་དུ་གྱུར་ན་གྲོལ་བ་མེད། །རྣམ་པར་རྟོག་པ་ཡེ་ཤེས་ཀྱིས། །དབང་དུ་གྱུར་ན་འཁོར་བ་མེད། །ཅེས་གསུངས་པ་སོགས་ཀྱང་དོན་གྱི་གནད་འདི་ལ་དགོངས་སོ། །དེས་ན་དེ་བཞིན་གཤེགས་པ་རྣམས་བྱོན་ཀྱང་རུང་། མ་བྱོན་ཀྱང་རུང་། བསྟན་ཀྱང་རུང་། མ་བསྟན་ཀྱང་རུང་། རྟོགས་ཀྱང་རུང་། མ་རྟོགས་ཀྱང་རུང་སྟེ། གནས་ཚུལ་ཡང་དག་པའི་དོན་ལ་ཆོས་ཉིད་ཡེ་ནས་རྣམ་དག་ཡིན་པས། ཚུལ་དེ་ལ་ལས་དང་པོ་པས་དད་པ་དང་མོས་པར་བྱས་ཏེ། ཡིད་ཆེས་པའི་ལུང་ལས་བྱུང་བ་བཞིན་ཡང་དག་པའི་ཤེས་རབ་ཀྱི་མིག་གིས་བལྟ་ཞིང་། བསལ་བཞག་དང་བྲལ་བའི་དོན་དང་རྗེས་སུ་མཐུན་པར་མཉམ་པར་བཞག་པ་སོགས་མཉམ་རྗེས་སུ་གོམས་པའི་ཚོགས་གཉིས་ཀྱིས་ལྷན་ཅིག་བྱེད་རྐྱེན་བྱས་ནས། ཡང་དག་པའི་དོན་ཟུང་འཇུག་འཕགས་པའི་ཡེ་ཤེས་ཆོས་དབྱིངས་ཀུན་ཏུ་འགྲོ་བའི་དོན་མངོན་སུམ་དུ་མཐོང་ནས་དེ་ལ་ཡང་ཡང་གོམས་པས་སྒོམ་པའི་ལམ་མཐར་ཕྱིན་ཏེ། རྒྱུན་མཐའི་ཡེ་ཤེས་རྡོ་རྗེ་ལྟ་བུས་མ་རིག་བག་ཆགས་ཀྱི་ས་སོགས་བཅོམ་ནས་ཕྲ་བའི་རྟེན་འབྲེལ་འགག་པ་ན། རྣམ་པར་གྲོལ་བའི་འབྲས་བུ་སངས་རྒྱས་བདེ་ཆེན་རྡོ་རྗེའི་སྐུ་མངོན་དུ་མཛད་པ་སྟེ། དེ་ཕན་བརྟེན་ནས་བཏགས་པའི་ཆོས་ཙམ་ལས་ཀྱང་འདས་མོད་གདུལ་བྱར་སྔོན་གྱི་སྨོན་ལམ་དང་ཚོགས་གཉིས་ཀྱི་ལྷན་ཅིག་བྱེད་རྐྱེན་གྱིས། རང་བྱུང་ཟག་པ་མེད་པའི་ཡེ་ཤེས་ཉིད་རྣམ་པ་ཐམས་ཅད་པར་འཆར་བའི་ཚུལ་གྱིས་སྐུ་སོགས་སྣང་བ་ནི། བརྒྱ་བྱིན་གཟུགས་བརྙན་ས་གཞིར་སྣང་བ་སོགས་དཔེ་དགུས་བསྟན་པ་བཞིན་ཏེ། རྒྱུད་བླ་མར། རང་བཞིན་འོད་གསལ་ཞེས་བརྗོད་གང་ཡིན་ཉི་དང་མཁའ་བཞིན་གློ་བུར་གྱི། །ཉོན་མོངས་ཤེས་བྱའི་སྤྲིན་ཚོགས་སྟུག་པོའི་སྒྲིབ་པ་ཡིས་ནི་བསྒྲིབས་གྱུར་པ། །དྲི་མེད་སངས་རྒྱས་ཡོན་ཏན་ཀུན་ལྡན་རྟག་བརྟན་གཡུང་དྲུང་སངས་རྒྱས་ཉིད། །དེ་ནི་ཆོས་ལ་མི་རྟོག་རྣམ་འབྱེད་ཡེ་ཤེས་དག་ལ་བརྟེན་ནས་འཐོབ། །ཅེས་དང་། ཇི་ལྟར་བཻཌཱུར་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །འགྲོ་བར་གཟུགས་བརྙན་འཆར་ནུབ་རྙོག་མེད་དང་། །རྙོག་པའི་རང་བཞིན་རབ་འཇུག་དབང་གིས་འཇུག །ཇི་ལྟར་འཇིག་རྟེན་དག་ན་གཟུགས་སྣང་ལྟར། །དེ་བཞིན་ཡོད་དང་ཞིག་ཅེས་དེ་མི་བལྟ། །ཞེས་གསུངས། གཞན་དག་སངས་རྒྱས་ཀྱི་གཟུགས་སྐུ་ངོ་བོས་མི་རྟག་ལ་རྒྱུན་གྱིས་རྟག་པར་འདོད་པ་དང་འདི་མི་མཚུངས་ཏེ། འདིར་ནི་གཞན་སྣང་གདུལ་བྱའི་ངོར་ཆུ་སྣོད་ཀྱི་ཟླ་གཟུགས་བཞིན་རང་རང་གི་སྐལ་བར་འཆར་ནུབ་ལྟར་སྣང་ཡང་། འཆར་གཞི་ནམ་མཁའི་ཟླ་བ་ལྟ་བུ་སངས་རྒྱས་རང་གི་ངོ་བོ་ནི་ཆོས་སྐུ་མཉམ་པ་ཉིད་ལས་ནམ་ཡང་གཡོ་མི་སྲིད་དེ། རྡོ་རྗེ་གཅོད་པ་ལས། གང་དག་ང་ལ་གཟུགས་མཐོང་ཞིང་། །གང་དག་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་སྟེ། །སྐྱེ་བོ་དེ་དག་ང་མི་མཐོང་། །འདྲེན་པ་རྣམས་ནི་ཆོས་ཉིད་ལྟ། །ཆོས་ཉིད་ཤེས་བྱ་མ་ཡིན་པས། །ཀུན་གྱིས་ཤེས་པར་ཡོངས་མི་ནུས། །ཞེས་དང་། རྒྱུད་བླར། འདུས་མ་བྱས་ཤིང་ལྷུན་གྱིས་གྲུབ། །ཅེས་གསུངས་པས། རང་བྱུང་ཟག་པ་མེད་པའི་ཡེ་ཤེས་ཆོས་ཉིད་འདུས་མ་བྱས་ཀྱི་རང་བཞིན་ཡིན་པའི་ཕྱིར་ངོ་བོས་རྟག་ལ་གདུལ་བྱའི་སྣང་ངོར་རྒྱུན་གྱིས་མི་རྟག་པར་འཇོག་པའི་ཁྱད་པར་ཏེ་ཞིབ་པར་འཁོར་ལོ་ཐ་མའི་མདོ་སྡེ་རྣམས་དང་སྔགས་རྒྱུད་རྣམས་ནས་གསལ་བར་བསྟན་པ་བཞིན་ནོ། །དེས་ན་ཚུལ་འདིར་དད་ཅིང་མོས་པ་ཙམ་ཡང་བསོད་ནམས་བསམ་མི་ཁྱབ་པའི་འབྱུང་གནས་ཡིན་ཏེ། རྒྱུད་བླ་མར། བློ་ལྡན་རྒྱལ་བའི་ཡུལ་དེ་ལ་མོས་པ། །སངས་རྒྱས་ཡོན་ཏན་ཚོགས་ཀྱི་སྣོད་གྱུར་ཏེ། །བསམ་མེད་ཡོན་ཏན་ཚོགས་ལ་མངོན་དགའ་བས། །སེམས་ཅན་ཀུན་གྱི་བསོད་ནམས་ཟིལ་གྱིས་གནོན། །ཞེས་སོགས་རྒྱ་ཆེར་གསུངས་པ་བཞིན་ནོ། །གསུམ་པ་སྦས་དོན་རྡོ་རྗེ་ཐེག་པ་སྔགས་བླ་མེད་ཀྱི་དགོངས་པ་བཞིན་ལྷག་པའི་བདེན་གཉིས་དབྱེར་མེད་ཀྱི་ངོས་ནས་གཞལ་ན། སྤྱིར་ནང་རྒྱུད་སྡེ་གསུམ་གྱིས་ཆོས་ཐམས་ཅད་ཡེ་ནས་སངས་རྒྱས་པར་འདོད་ཀྱང་གཞི་གཏན་ལ་དབབ་ཚུལ་གྱི་ལྟ་བའི་ཁྱད་པར་གྱིས། མ་ཧཱ་ཡོ་གའི་གཞུང་གིས་ནི། གནས་ཚུལ་དུ་དག་པ་ལྷ་ཡི་རང་བཞིན་དུ་གནས་ཀྱང་། སྣང་ཚུལ་དུ་འཁྲུལ་པ་ཅན་ལ་དེ་ལྟར་སྣང་མ་ནུས་པར་འདོད་དེ། ཐ་སྙད་དུ་ཡོངས་སུ་དག་པའི་ལྷ་དང་མ་དག་པའི་འཁོར་བ་གཉིས་སུ་འབྱེད་པའི་ཚུལ་གྱིས་སྣང་བའི་རང་བཞིན་ལྷར་སྒྲུབ་པའོ། །དེ་ཡང་སྨིན་གླིང་ལོ་ཆེན་རིན་པོ་ཆེས། གཤེགས་པ་གཤེགས་མ། སེམས་དཔའ་སེམས་མ། ཁྲོ་བོ་ཁྲོ་མོ་ལ་གདན་གསུམ་ཟེར་བ་གཉུག་མའི་ཕུང་ཁམས་སྐྱེ་མཆེད་ལྷའི་རང་བཞིན་དུ་བཞུགས་པས་རང་བཞིན་གཉིས་སུ་མེད་པ་ཡིན་གྱི། གཟུགས་ཕུང་ལ་རྣམ་སྣང་གནས་པ་ལྟ་བུའི་རྟེན་བརྟེན་པར་མི་འདོད་དེ། མ་དག་པའི་གཟུགས་ནི་རྟེན་འབྲེལ་གྱི་འཆར་སྒོ་མ་འགགས་པ་ཙམ་ལས་བདེན་པར་མ་གྲུབ་པ་གཉུག་མའི་ལུས་རྣམ་སྣང་དུ་བཞུགས་པ་ནི་གཤིས་ལུགས་ཡིན་པས་བདེན་པའོ། །དེས་ན་དེ་གསུམ་ལ་གདན་གསུམ་གྱི་ཐ་སྙད་འདོགས་པ་ནི་འཇིག་རྟེན་པའི་ཁ་སྐད་དུ་དཔོན་སློབ་ཐམས་ཅད་གདན་འཛོམས་པ་ཞེས་པ་དང་འདྲའོ་གསུངས། འདི་ནི་ལས་དང་པོ་པའི་ངོར་ཚད་མས་བསྒྲུབ་པར་བྱ་བ་ཡིན་པའི་ཕྱིར་གཉིས་སྣང་གི་བློ་ཅན་རྟོག་གེ་བའི་རྒོལ་བ་རྣམས་ལ་ཡང་རིགས་པའི་སྟོབས་ཀྱིས་སྒྲུབ་ནུས་པ་ཡིན་ནོ། །ལུང་གི་གཞུང་ལས། ཆོས་ཐམས་ཅད་དབྱིངས་ཡེ་གཉིས་མེད་བདེ་བ་ཆེན་པོའི་རང་བཞིན་དུ་གནས་པའི་ཕྱིར་རྒྱ་མཚོ་ལས་རླབས་ལྟར་བདེ་ཆེན་གཅིག་ཉིད་དུ་མའི་རོལ་པར་ཤར་བ་ལ་ཁྱད་མེད་པས། སྐྱེ་བ་རྒྱུ་ཡི་སངས་རྒྱས་ལ་སོགས་པའི་ཚུལ་དུ་སེམས་ཅན་ཐམས་ཅད་རང་བཞིན་གྱིས་སངས་རྒྱས་སུ་འདོད་པ་ནི། སྣང་སྲིད་ཡེ་སངས་རྒྱས་པ་ལྟ་བའི་ལུང་ཞེས་བྱ་སྟེ། རྣལ་འབྱོར་ཅན་ལ་ལམ་གྱི་སྟོབས་ལས་དེ་ལྟར་བསླུ་མེད་དུ་གྲུབ་པ་ཡིན་ནོ། །ཨ་ཏིའི་གཞུང་ལས། རིག་པ་རང་བྱུང་གི་ཡེ་ཤེས་ཉིད་སངས་རྒྱས་ཐམས་ཅད་ཀྱི་ཡེ་ཤེས་ཀྱི་སྐུ་མཐར་ཐུག་པ་ཡིན་ལ། དེ་ངོས་ཟིན་པའི་ཚེ་ཇི་ལྟར་སྣང་བ་ཐམས་ཅད་དེའི་རྩལ་དུ་ཤར་ཞིང་དོན་གྱི་ངོ་བོ་དེ་དང་གཉིས་སུ་མེད་པའི་ཕྱིར། སྣང་ཚུལ་ལ་སངས་རྒྱས་ཀྱི་སྐུ་དང་ཡེ་ཤེས་སུ་སྣང་ཡང་རུང་། སེམས་ཅན་གྱི་ལུས་དང་ཉོན་མོངས་པར་སྣང་ཡང་རུང་། དེ་གཉིས་ཀ་ངོ་བོ་ཡེ་ནས་འཁོར་འདས་མིང་མེད་ཀྱི་ཡེ་ཤེས་ཆེན་པོར་རྣམ་པར་དག་པའི་ཕྱིར། དེ་ལྟ་བུའི་ཡེ་ཤེས་ཅན་གྱི་ངོར་ཆོས་ཐམས་ཅད་ཡེ་ནས་རྣམ་པར་དག་ཅིང་རང་གྲོལ་བ་ལས། གནས་སྣང་འབྱེད་པ་དང་། དག་མ་དག་ཅེས་རིས་སུ་ཆད་པ་མེད་པས་ན། ཐ་མལ་གྱི་སྣང་བ་འདི་རྣམས་མདོག་མ་བརྗེས། སྤུ་མ་བསྒྱུར་བར་སངས་རྒྱས་སུ་གནས་པ་ཞེས་བྱ་སྟེ། ཇི་ལྟར་སྣང་བ་དེ་ཉིད་ཡེ་ནས་རྣམ་པར་དག་པ་ཀུན་བཟང་བདེ་བ་ཆེན་པོའི་གནས་ཉིད་ཡིན་གྱི། དེ་ལས་གཞན་ཞིག་ཏུ་དག་པ་ཞེས་བྱ་བ་རྡུལ་ཙམ་མེད་པར་འདོད་དོ། །འདི་ནི་རིག་པ་རང་སྣང་གི་བློ་ཅན་གྱི་ངོར་ཆོས་ཉིད་ཀྱི་སྟོབས་ལས་མངོན་སུམ་དུ་གྲུབ་པའི་ཕྱིར་ལམ་ཐམས་ཅད་ཀྱི་དགོངས་པའི་སྐྱེལ་སོ་ཡིན་ནོ། །ཞེས་བཀའ་བརྒྱད་རྣམ་བཤད་ཆེན་མོ་ལས་གསུངས་ཏེ། ཞིབ་པར་འོག་ཏུ་སྟོན་ཏོ། །འདིར་སྐབས་ཀྱི་བསྟན་བྱ་ནི། སྤྱིར་བདེན་གཉིས་དབྱེར་མེད་ཙམ་མདོ་ནས་ཀྱང་བསྟན་མོད་ཀྱི། འདིར་ནི་དོན་དམ་དཀོར་བདུན་དང་། ཀུན་རྫོབ་སྐུ་དང་ཡེ་ཤེས་ཏེ་ལྷག་པའི་བདེན་པ་དབྱེར་མེད་ཀྱི་དོན་ཉིད་སྟོན་པ་ཡིན་པས། དེའི་ཚུལ་ཡང་། ལོ་ཆེན་རིན་པོ་ཆེས་དྲིས་ལན་དུ། བདེན་གཉིས་གཏན་ལ་འབེབས་ལུགས་འདི་ནི་རྒྱུད་འདིའི་ཁྱད་ཆོས་ཏེ། དེང་སང་གི་ཀློག་པ་པོ་རྣམས་ཀྱི་ཐུགས་ལ་ཤོང་དཀའ་བར་གདའ་སྟེ། ཅིའི་ཕྱིར་ན། དེང་སང་བདེན་གཉིས་ཀྱི་རྣམ་གཞག་མཛད་པ་ཕལ་ཆེར་འཁོར་ལོ་བར་པའི་དངོས་བསྟན་ཐལ་རང་གི་བཤད་སྒྲོས་ཁྱབ་ཆེ་བར་སྣང་བའི་རྒྱུ་མཚན་གྱིས་སོ། །དེས་ན་རྒྱུད་འདིའི་ལུགས་ལ། ཆོས་ཐམས་ཅད་རང་རང་གིས་སྟོང་པའི་མེད་དགག་དེ་ལ་རྣམ་གྲངས་པའི་དོན་དམ་དང་། སྣང་ལ་དོན་བྱེད་ནུས་མི་ནུས་ཀྱིས་དབྱེ་བའི་ཡང་ལོག་གི་ཀུན་རྫོབ་ཐམས་ཅད་མ་དག་པ་ལས་སྣང་ལོག་པའི་ཀུན་རྫོབ་ཏུ་བཞག་ནས། གནས་ལུགས་བདེན་གཉིས་ཟུང་འཇུག་དེ་ལ་ལྷག་པའི་སྒྲ་སྦྱར་ཏེ། ལྷག་པ་དོན་དམ་བདེན་པ་ནི་མ་ཡིན་དགག་གི་སྟོང་ཉིད་དེ། ཆོས་ཐམས་ཅད་སེམས་སུ་འདུ་ལ། ཆོས་ཉིད་ཅི་ཡང་མ་ཡིན་པ་དེ་ལ་དབྱིངས། དེ་ཉིད་རང་གསལ་སྒྲིབ་གཡོགས་དང་བྲལ་བའི་ཆ་དེ་ཡེ་ཤེས། དེ་ལས་སངས་རྒྱས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ལྔ་འཆར་བའི་ནུས་པ་ཡེ་ནས་ལྷུན་གྲུབ་ཏུ་བཞུགས་པ་འབྲས་ཆོས་ཏེ། རིམ་པ་བཞིན། རང་བཞིན་དོན་དམ། ཡེ་ཤེས་དོན་དམ། འབྲས་བུའི་དོན་དམ་ལ་ལྔར་ཕྱེས་པས་དཀོར་བདུན་ཞེས་གསུངས་ཏེ། དཔེར་ན། མེ་ལོང་དང་། དེའི་གདངས་དང་། དེ་ལ་གཟུགས་བརྙན་འཆར་རུང་གི་ནུས་པ་ཡོད་པ་ལྟ་བུས་མཚོན་ནོ། །ལྷག་པ་ཀུན་རྫོབ་ཀྱི་བདེན་པ་ནི། དོན་དམ་སྟོང་རྐྱང་དུ་མ་སོང་བར་སྐུ་དང་ཡེ་ཤེས་འཆར་རུང་དུ་ཡོད་པའི་མཐུས་དེའི་རྩལ་སྣང་སྣོད་བཅུད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བ་ལ་བཞག་སྟེ། དཔེར་ན་མེ་ལོང་ལ་ཤར་བའི་གཟུགས་བརྙན་བཞིན་ནོ། །ལྷག་པ་བདེན་པ་དབྱེར་མེད་ནི། བདེན་པ་གཉིས་པོ་དེ་སྣང་སྟོང་གི་ཕྱོགས་གང་དུའང་མ་ལྷུང་བར་ངོ་བོ་དབྱེར་མི་ཕྱེད་པར་མཉམ་པ་ཉིད་དུ་གནས་ཤིང་། དེར་འཛིན་གྱི་བསམ་བརྗོད་དང་བྲལ་བས་ན། ཐ་སྙད་ཙམ་དུ་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བ་ཞེས་གསུངས་སོ། །དེས་ན་གནས་ལུགས་བདེན་གཉིས་ཟུང་འཇུག་འདི་ནི་དོན་དམ་རྟེན་འབྲེལ་ལས་འདས་པའི་ཟུང་འཇུག་ཅེས་དང་། སྤྱིར་གྲགས་པའི་སྣང་ལུགས་བདེན་གཉིས་ཟུང་འཇུག་དེ་ལ་ཀུན་རྫོབ་རྟེན་འབྲེལ་ལས་མ་འདས་པའི་ཟུང་འཇུག་ཅེས་བཤད་ན། ཀུན་མཁྱེན་ཇོ་ནང་པའི་དགོངས་པའི་གནས་ལུགས་གཞན་སྟོང་དང་། སྣང་ལུགས་རང་སྟོང་དུ་བྱས་པའི་ཟུང་འཇུག་གི་དོན་དང་ཡང་གནད་གཅིག་ཏུ་འབབ་བམ་སྙམ་པའི་གོ་ཕྱོགས་འཆར་བར་སྣང་། ཞེས་གསུངས་ཤིང་། གཞན་ཡང་། སྤྱིར་གློ་བུར་པའི་ཆོས་མེད་སྣང་འདི་ཙམ་ལ་དགོངས་ནས་ཀླུ་སྒྲུབ་ཀྱིས་བཀའ་བར་པའི་དགོངས་འགྲེལ་རྣམས་སུ་སྟོང་ཉིད་མེད་དགག་ཙམ་མཐར་ཐུག་གི་དོན་དུ་གསུངས་ཀྱང་། ཐ་མའི་དགོངས་འགྲེལ་རྣམས་སུ་ནི། བར་པར་སྦས་དོན་གྱི་ཚུལ་དུ་ཡོད་པའི་མྱ་ངན་ལས་འདས་པའི་ཆོས་ཀྱི་སྒྲུབ་གཞི་ཟུང་འཇུག་འོད་གསལ་བའི་ཡེ་ཤེས་ཉིད་རྩལ་དུ་བཏོན་ནས་གསུངས་པས་སློབ་དཔོན་གྱི་དགོངས་པའི་མཐར་ཐུག་པ་ནི་འདི་ཡིན་པའི་གནད་ཀྱིས་འཕགས་ཡུལ་གྱི་མཁས་པའི་ཁྱུ་མཆོག་ཤནྟི་པས་ཀྱང་ཤིང་རྟའི་སྲོལ་འབྱེད་གཉིས་པོ་གྲུབ་མཐའ་གཅིག་ཏུ་བྱས་པའི་དབུ་མའི་བསྟན་བཅོས་མཛད་པ་ཡིན། དེས་ན་སྔ་འགྱུར་གྱི་རིང་ལུགས་འཛིན་པ་རྣམས་ཀྱི་ལྟ་བ་ཐོགས་མེད་སྐུ་མཆེད་ཀྱི་གཞུང་དང་གཙོ་བོར་མཐུན་ཞེས་པ་རང་བྱུང་འོད་གསལ་གྱི་དོན་རྩལ་དུ་བཏོན་ནས་ཉམས་ལེན་གྱི་མཐིལ་དེ་ལ་གཏུགས་ནས་མདོ་སྔགས་ཀྱི་གཞུང་ཐམས་ཅད་སྤྲོས་བྲལ་མཐར་ཐུག་ཞེན་མེད་གཅིག་པོ་ལ་མཛད་པས་ན་དེ་ལྟར་གསུངས་པ་ཡིན་ནོ། །ཞེས་དགེ་མང་མཁན་ཡོན་དགས་གསུངས། མདོར་ན་དབང་བཞིའི་ལམ་རྫོགས་པར་སྟོན་པའི་རྒྱུད་ཐམས་ཅད་ཀྱི་ལུང་གི་སྤྱི་དཔལ་གསང་བ་སྙིང་པོ་ལས། ཨེ་མ་ཧོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །སྣ་ཚོགས་ལུས་དང་ལོངས་སྤྱོད་དང་། །གནས་དང་སྡུག་བསྔལ་ལ་སོགས་པ། །བདག་དང་བདག་གིར་སོ་སོར་འཛིན། །སུས་ཀྱང་མ་བཅིངས་བཅིང་མེད་དེ། །བཅིང་བར་བྱ་བ་ཡོད་མ་ཡིན། །རྣམ་རྟོག་བདག་ཏུ་འཛིན་པ་ཡིས། །ནན་གྱིས་མཁའ་ལ་མདུད་པ་འདོར། བཅིང་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་དང་། ཨེ་མ་ཧོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་གསུངས་པས། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་སེམས་དང་ཡེ་ཤེས་ཀྱི་རང་སྣང་ཙམ་སྟེ། དོན་ལ་དག་མཉམ་བདེན་པ་དབྱེར་མེད་སྤྱོད་ཡུལ་དང་བྲལ་བའམ་ལྷག་པའི་ཆོས་སྐུ་ཆེན་པོར་ཡེ་ནས་སངས་རྒྱས་པའི་རང་བཞིན་དུ་གནས་ཀྱང་། སེམས་ཅན་འཁྲུལ་པ་ཅན་རྣམས་ལ་གསང་བ་བཞིས་ཆོད་དེ་ཇི་བཞིན་པར་མ་རྟོགས་པ་ནི། ལྷག་པ་དོན་དམ་བདེན་པ་དཀོར་བདུན་ངོ་བོ་ཉིད་དུ་ཡེ་ནས་ལྷུན་གྱིས་གྲུབ་པར་གནས་ཀྱང་རྒྱུ་ལྷན་ཅིག་སྐྱེས་པའི་མ་རིག་པས་ངོ་མ་ཤེས་ཏེ་ཡེ་ནས་གསང་། ལྷག་པ་ཀུན་རྫོབ་ཀྱིི་བདེན་པ་སྐུ་དང་ཡེ་ཤེས་ཀྱི་དཀྱིལ་འཁོར་རང་ཆས་སུ་གནས་ཀྱང་རྐྱེན་ཀུན་ཏུ་བརྟགས་པའི་མ་རིག་པས་རང་སྣང་ལ་མཚན་མར་བཟུང་ནས་འཁྲུལ་ཏེ་རང་བཞིན་གྱིས་གསང་། དེ་གཉིས་དབྱེར་མེད་ཀྱི་བདེན་པ་ངོ་བོ་ཉིད་དམ་རང་བྱུང་དུ་གནས་ཀྱང་དེ་ལྟར་ངོ་མ་ཤེས་པར་སྣང་སྟོང་ཐ་དད་དུ་བཟུང་བས་ངོ་བོ་ཉིད་ཀྱིས་གསང་། དབྱེར་མེད་སྤྱོད་ཡུལ་དང་བྲལ་བ་དེ་རང་ལ་གནས་ཀྱང་གཞན་དུ་བཙལ་ཞིང་ཡུལ་ཡུལ་ཅན་ཐ་དད་དུ་བཟུང་བས་ཤིན་ཏུ་གསང་སྟེ་ཉམ་ཐག་པར་གྱུར་ཀྱང་། རང་བཞིན་དོན་དམ་པའི་ཆོས་ཉིད་ལས་མ་འདས་པས། དག་མཉམ་ཆོས་སྐུ་ཆེན་པོར་གྲུབ་པས་ན། འཁྲུལ་པ་བརྟགས་པའི་ཞེན་སྣང་སྟེ་འཁོར་འདས་གཉིས་སུ་སྣང་ཞིང་ཞེན་པའི་གཉིས་འཛིན་གྱི་བློ་དེ་གཉིས་མེད་ཡེ་ཤེས་སུ་གཏན་ལ་འབེབས་པའི་ཆེད་དུ་གཉིས་འཛིན་གྱི་ཞེན་པ་དེ་ཉིད་གཞལ་བྱར་བྱས་ནས། སྣང་སྤྱོད་ཐམས་ཅད་སྐུ་དང་ཡེ་ཤེས་ཆེན་པོར་གཏན་ལ་འབེབས་བྱེད། རྒྱུ་གཅིག་པ་དང་། ཡིག་འབྲུའི་ཚུལ་དང་། བྱིན་གྱིས་བརླབས་དང་། མངོན་སུམ་པའི་གཏན་ཚིགས་ཀྱིས། ཆོས་ཉིད་སྐྱེ་མེད། རོལ་པ་འགགས་མེད། ངོ་བོ་དབྱེར་མེད། མཚན་ཉིད་བློ་བྲལ་ཡུལ་མེད་རང་གསལ་དུ་རང་རིག་པའི་མངོན་སུམ་གྱི་ཚད་མས་གཏན་ལ་ཕབ་ནས་སྣང་སྲིད་ཡེ་སངས་རྒྱས་པའི་རང་བཞིན་དུ་མི་ཕྱེད་རྡོ་རྗེའི་གྲུབ་པའི་མཐའ་ཆེན་པོ་འཆར་བ་སྟེ། སྤྱིར་རྟོགས་པ་བཞིའི་གཏན་ཚིགས་འདི་ལ་སྦྱོར་ཚུལ་མང་སྟེ། ཐུན་མོང་བ་གྲུབ་མཐའ་བཞི་དང་སྦྱོར་ན། ཆོས་ཐམས་ཅད་སེམས་དང་ཡེ་ཤེས་ཀྱི་རང་སྣང་དུ་རྒྱུ་གཅིག་པས་ཕྱི་པས་དོན་གྱི་བདེན་ཞེན་འགོག་པ་སེམས་ཙམ། སེམས་ཉིད་ཡིག་འབྲུ་ལས་མཚོན་ཏེ་ཆོས་ཐམས་ཅད་སྐྱེ་མེད་སྤྲོས་བྲལ་དུ་གཏན་ལ་འབེབས་པ་དབུ་མ། སེམས་ཉིད་དག་པ་མཐའ་བཞིར་རྟོགས་པའི་བྱིན་རླབས་ཀྱིས་ཀུན་རྫོབ་རྡོ་རྗེ་དབྱིངས་ཀྱི་དཀྱིལ་འཁོར་སོགས་སུ་སྣང་བ་སྔགས་ཕྱི་རྒྱུད། ཆོས་ཐམས་ཅད་བདག་ཉིད་ཆེན་པོ་རང་བྱུང་གི་ཡེ་ཤེས་སུ་མངོན་སུམ་པར་རྟོགས་པ་སྔགས་ནང་རྒྱུད་བླ་མེད་ཀྱི་དགོངས་པའོ། །ཐུན་མིན་རང་གི་ལྟ་བ་གཏན་ལ་འབེབས་བྱེད་ལ་གཉིས་ཀྱི་ཅིག་ཆར་བ་ལྟར་ན་ཆོས་ཀུན་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོར་རྟོགས་པའི་སྐད་ཅིག་མ་གཅིག་ལ་ལྡོག་ཆས་དབྱེ་བ་ཙམ་ཡིན་ལ། རིམ་གྱིས་པ་ལྟར་ན། སྔ་མ་སྔ་མས་གཞལ་འབྲས་ཕྱི་མ་ཕྱི་མས་གཞལ་བྱར་བྱས་ཏེ་རིམ་གྱིས་མངོན་སུམ་པར་གཏན་ལ་འབེབས་པའོ། །ལམ་དང་སྦྱར་ན། བསྐྱེད་རིམ་པས། དེ་ཏིང་སྟོང་ཆེན། ཀུན་ཏིང་སྒྱུ་མ། ཟུང་འཇུག་གཅིག་སྤྲོས་རྣམས་ལ་བརྟན་པ་ཐོབ་ནས། ཚོགས་སྒྲུབ་ཀྱིས་ཟག་མེད་ཉིད་མངོན་དུ་བྱེད་པའོ། །རྫོགས་རིམ་ལ། སྟེང་སྒོ་ལྟར་ན། སྙིང་དབུས་མི་ཤིགས་པའི་ཐིག་ལེ་ནི་ཆོས་ཀུན་འབྱུང་བའི་གཞིར་གྱུར་པས་རྒྱུ་གཅིག་པ། དེ་ཉིད་ཀྱི་གདངས་རྩ་ཁམས་ཡི་གེ་སྤྲིན་དུ་གནས་པ་ནི་ཡིག་འབྲུའི་ཚུལ། དེ་ལ་གནད་དུ་བསྣུན་པས་རྟོག་ཚོགས་སྐུ་དང་ཡེ་ཤེས་སུ་འཆར་བ་ནི་བྱིན་གྱིས་བརླབས་དང་། མཐར་བདེན་གཉིས་དབྱེར་མེད་ཀྱི་དོན་མངོན་སུམ་ཡུལ་མེད་དུ་རྟོགས་པར་བྱེད་པ་ནི་མངོན་སུམ་པའོ། །འོག་སྒོ་དང་སྦྱར་ན། ཡུམ་མཁའ་ཆོས་འབྱུང་རྡོ་རྗེ་བཙུན་མོའི་བྷ་ག་ནི་ཆོས་ཀུན་འབྱུང་བའི་དབྱིངས་ཡིན་པས་རྒྱུ་གཅིག་པ་དང་། ཐབས་བདེ་བ་ཆེན་པོ་ཡབ་ཀྱི་བྱང་སེམས་ཝཾ་ཡིག་གི་རྣམ་པར་གནས་པ་ནི་ཡིག་འབྲུའི་ཚུལ། དེ་གཉིས་མཉམ་པར་སྦྱོར་བའི་ཐབས་མཁས་ཀྱིས་བདེ་བ་ཆེན་པོའི་ཡེ་ཤེས་རང་ལ་གསལ་བ་ནི་བྱིན་གྱིས་བརླབས་དང་། ཡས་བབས་མས་བརྟན་གྱི་དགའ་བཞི་ལུགས་འབྱུང་ལྡོག་གི་མཐར་མ་དག་སྙིགས་མའི་རླུང་སེམས་འགགས་ནས་དཔེ་དང་དོན་གྱི་ཡེ་ཤེས་མངོན་དུ་བྱེད་པ་ནི་མངོན་སུམ་པའི་གཏན་ཚིགས་སོ། །གཞན་ཡང་ཨ་ནུའི་དབྱིངས་ཡེ་དབྱེར་མེད་སྲས་བདེ་བ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་དུ་མངོན་སུམ་པར་རྟོགས་པ་དང་། ཨ་ཏིའི་ངོ་བོ་རང་བཞིན་ཐུགས་རྗེ་གསུམ་དབྱེར་མེད་པའི་ཆོས་ཉིད་བྱང་ཆུབ་སེམས་སུ་ཡེ་ནས་སངས་རྒྱས་པའི་རང་བཞིན་དུ་རྟོགས་པ་རྣམས་ཀྱང་དོན་གྱིས་གནད་གཅིག་གོ །གང་ལྟར་ཡང་། བཀའ་འཁོར་བར་པར་ཆོས་ཉིད་མཉམ་པ་ཆེན་པོ་བསྟན་ཀྱང་དག་པ་ཆེན་པོ་ཉིད་སྦས་ནས་མ་བསྟན། བཀའ་འཁོར་ཕྱི་མར་སྐུ་དང་ཡེ་ཤེས་ཀྱིས་བརྒྱན་པའི་ཆོས་ཉིད་དག་པ་ཆེན་པོའི་རང་བཞིན་རྩལ་འདོན་དུ་བསྟན་ཀྱང་ཆོས་ཅན་འཁྲུལ་པའི་དྲི་མ་རྣམས་སྦྱང་བྱ་གློ་བུར་པར་བསྟན་གྱི་རང་བཞིན་དག་པར་མ་བསྟན། སྔགས་ཕྱི་རྒྱུད་རྣམས་སུ་ཆོས་ཉིད་དག་པ་མཐའ་བཞི་དང་བྲལ་བར་རྟོགས་པའི་བྱིན་རླབས་ལས་ཀུན་རྫོབ་རིགས་གསུམ་སོགས་ཀྱི་ལྷའི་འཁོར་ལོར་ཤར་བའམ་དག་པར་བསྟན་ཀྱང་ད་ལྟ་ནས་སངས་རྒྱས་ཀྱི་ངོ་བོར་མ་བསྟན། དེས་ན་དེ་རྣམས་ཀྱི་གྲུབ་པའི་མཐའ་འདིའི་གཏན་ཚིགས་དང་པོ་གསུམ་གྱི་ཁོངས་སུ་ཅི་རིགས་པ་འདུ་བ་ཡིན་ལ། འདིར་ནི་རྟོགས་རུང་མ་རྟོགས་རུང་བདེན་པ་གཉིས་ཀའི་གནས་ཚུལ་དུ་ཡེ་ནས་སངས་མ་རྒྱས་པའི་ཆོས་གཅིག་ཀྱང་མི་འདོད་པས་དག་པའི་ངོས་ནས་མཉམ་པ་དང་མཉམ་པའི་ངོས་ནས་དག་པ་སྟེ་བདེན་གཉིས་དབྱེར་མེད་དུ་འདོད་པས་སྔ་མ་རྣམས་ལས་ཁྱད་པར་དུ་འཕགས་ཏེ། སློབ་དཔོན་སངས་རྒྱས་གསང་བའི་ལམ་རིམ་དུ། སྒྱུ་འཕྲུལ་རྒྱས་པའི་ལུང་ཚིག་དྲངས་པ་ལས། བླ་མེད་ཐེག་པའི་ནང་དུ་ནི། །དོན་དམ་དུ་ནི་དབྱེར་མེད་པ། །ཀུན་རྫོབ་ཏུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་གསུངས། དེས་ན་བདེན་གསུམ་དབྱེར་མེད་པའི་དོན་འདི་ལ་མ་དག་པའི་ཕུང་ཁམས་སྐྱེ་མཆེད་སོགས་བསལ་བར་བྱ་བ་ཀུན་ནས་ཉོན་མོངས་པའི་ཕྱོགས་ནི་ཅི་ཡང་མེད་དེ་སྣོད་བཅུད་རྒྱུད་གསུམ་གྱིས་བསྡུས་པའི་ཆོས་ཐམས་ཅད་སྐུ་དང་ཡེ་ཤེས་ཀྱི་ངོ་བོར་ཡེ་ནས་དག་པས་སྡུག་བསྔལ་བྱང་ཆུབ་དང་ཀུན་འབྱུང་ལམ་བདེན་དུ་ཤར་བས་སངས་རྒྱས་ཉིད་ལས་གཞན་པའི་ཆོས་མ་དག་རང་མཚན་པ་གཞན་གྱིས་ལྟ་ཅི་སངས་རྒྱས་རང་ཉིད་ཀྱིས་སྤྱན་ལྔ་རྣམ་པར་དག་པས་བཙལ་ཀྱང་མི་རྙེད་པའི་ཕྱིར། གསང་སྙིང་ལས། སྣོད་བཅུད་རྒྱུད་རྣམས་དག་རྟོགས་ཤིང་། །མཉམ་གཉིས་ལྷག་པའི་མཉམ་གཉིས་ཀྱིས། །དཀྱིལ་འཁོར་ཀུན་ཏུ་བཟང་པོའི་ཞིང་། །ཞེས་དང་། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་གསུངས། རྣམ་པར་བྱང་བའི་ཆོས་གསར་དུ་བཞག་པའམ་བསྣན་པར་བྱ་བའང་ཅུང་ཟད་ཀྱང་མེད་དེ། དོན་དམ་དབྱིངས་དང་ཡེ་ཤེས་གཉིས་སུ་མེད་པའི་ངོ་བོར་རྒྱལ་བའི་སྐུ་གསུང་ཐུགས་ཡོན་ཕྲིན་ལས་སོགས་འབྲས་བུའི་ཆོས་ཀུན་ཡེ་ནས་གནས་པའམ་རྫོགས་པའི་བྱང་ཆུབ་སེམས་ཀྱི་རང་རྩལ་ལམ་ཆོ་འཕྲུལ་དུ། ཀུན་རྫོབ་སྐུ་དང་ཡེ་ཤེས་ཀྱི་དཀྱིལ་འཁོར་ཡང་གཞན་ནས་བཙལ་བ་མེད་པར་རང་སྣང་བའི་ཕྱིར། རྒྱུད་དེ་ཉིད་ལས། དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་ཚོལ་ཅིག །ཅེས་དང་། མན་ངག་ལམ་རིམ་ལས། ཐབས་ཀྱི་ལྟ་སྤྱོད་ཆེན་པོ་ནི། །བླ་མེད་ཐེག་པ་ལས་འཕགས་པས། །དོན་དམ་དུ་ནི་དཀོར་བདུན་ལ། །ཀུན་རྫོབ་ཏུ་ནི་མཉམ་རྫོགས་སོ། །ཡང་དག་སྐྱེས་མཆོག་དམ་པ་ཡིས། །དོན་དམ་ཀུན་རྫོབ་དབྱེར་མེད་པར། །ཡང་དག་ཉིད་དུ་རབ་ཏུ་རྟོགས། །མཉམ་པ་ཉིད་ལས་མ་གཡོས་བཞིན། །ཐབས་ཀྱི་ཕྱག་རྒྱ་ཆེན་པོར་སྟོན། །ཐབས་དང་ཤེས་རབ་རྣམ་པར་དག །ཐམས་ཅད་དག་ཅེས་བྱ་བའང་། །དངོས་པོ་བསལ་དག་མ་ཡིན་ཏེ། །སྣང་སྤྱོད་ཉིད་ནས་རྣམ་པར་དག །དེ་ཕྱིར་ཀུན་རྫོབ་རྫུན་མི་བལྟ། །ཞེས་དང་། འདུས་མ་བྱས་ཉིད་འདུས་བྱས་སྣང་། །འདུས་བྱས་སྣང་བ་རྡོ་རྗེ་ཉིད། །རྒྱལ་འགྲོས་མ་མཛད་མ་བཅོས་པར། །རང་བཞིན་ངང་གིས་དབྱེར་མེད་པའང་། །དེ་མི་ཞེན་པ་གྲོལ་ཕྱིར་ལས། །ཐ་སྙད་གཉིས་པར་བསམ་བརྗོད་འདས། །ཞེས་དང་། གཤེགས་སྐུ་སྒྱུ་མར་སྣང་བ་དང་། །ལོག་རྟོག་སྒྱུ་མར་སྣང་བ་གཉིས། །གཞི་རྩ་མེད་དེ་རང་བཞིན་སྟོང་། །རིགས་དང་རྒྱུད་དང་བརྟག་ཏུ་མེད། །རིགས་དང་ཁ་དོག་དབྱིབས་མེད་པས། །ཕྱི་ནང་སྣོད་བཅུད་ཐམས་ཅད་སྣང་། །སྣང་བ་ཉིད་ན་ཆོས་ཀྱི་སྐུ། །ཅིར་ཡང་འགྱུར་ཞིང་ཐམས་ཅད་འགྲུབ། །ཅེས་གསུངས། མདོར་ན་གནུབས་ཀྱི་མདོ་འགྲེལ་ལས། སེམས་ཀྱི་དཀྱིལ་འཁོར་རང་བཞིན་གྱིས་འོད་གསལ་བ་དེ་ཁོ་ན་ཉིད་ཇི་བཞིན་པ་བརྟགས་ན་མེད་ལ་མ་བསམས་ན་སྣང་སྟེ་མཚན་ཉིད་ཡོངས་སུ་ལྡན་པར་མི་ཟིན་པས། ལམ་པའི་བསམ་པས་རེག་དཀའ་བའི་ཡེ་ཤེས་ཆེན་པོ་ལ་དུས་གསུམ་དུ་གཡོ་བ་མེད་པ་འདི་ནི། ཏིང་ངེ་འཛིན་གྱི་སྒོ་འབུམ་ཕྲག་ལྷུན་གྱིས་རྫོགས་པས་དགོངས་པ་འདུས་པ་ཞེས་ཀྱང་བརྗོད་དེ་རྒྱལ་བ་རིལ་དགོངས་པ་དེ་ལས་མི་འདའ་བའི་ཕྱིར་རོ། །ཞེས་གསུངས་པས། དེ་ལྟ་བུའི་གནས་ལུགས་ཡང་དག་པའི་དོན་ཡེ་ནས་བཅིང་གྲོལ་དང་བྲལ་བ་དེ་ཉིད་བླ་མ་མཚན་ལྡན་གྱིས་སློབ་བུ་སྣོད་ལྡན་ལ་བརྡ་ཐབས་རྟེན་འབྲེལ་དུ་མས་དབང་དུས་སོགས་སུ་བཙན་ཐབས་སུ་ངོ་སྤྲད་པའི་མངོན་སུམ་གྱི་དོན་ལ་ཡང་དག་པར་བལྟ་ཞིང་གོམས་པར་བྱེད་པ་སྟེ། དེ་ལྟར་ལམ་ལ་སློབ་པའི་ཚུལ་ཡང་། རྒྱུད་ལས། ཤེས་འཇུག་མཚན་ཉིད་འབྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་གསུངས་པ་ལྟར། རྒྱུ་ཤེས་པའི་མཚན་ཉིད་བདེན་གསུམ་དབྱེར་མེད་ཀྱི་དོན་ལ་ཐོས་བསམ་གྱི་ལྟ་བས་སྒྲོ་འདོགས་བཅད། རྐྱེན་འཇུག་པའི་མཚན་ཉིད་ཐབས་གྲོལ་གྱི་ལམ་རིམ་པ་གཉིས་ལ་བརྩོན་པས། འབྲས་བུ་རིག་འཛིན་བཞིའི་གོ་འཕང་བགྲོད་ནས་མཐར་འབྲས་ལ་དངོས་སུ་སྦྱོར་བ་སྟེ། དེ་ཡང་ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ཏེ། །སྔགས་ཀྱི་ཐེག་པ་ཁྱད་པར་འཕགས། །ཞེས་པས། གསང་སྔགས་ཀྱི་དེ་ཁོ་ན་ཉིད་སེམས་ཀྱི་དཀྱིལ་འཁོར་རང་བཞིན་གྱིས་འོད་གསལ་བ་རྣམ་པར་རྟོག་པ་མཐའ་དག་གིས་བསླད་མི་ནུས་པ། བློས་བྱས་ཀྱི་བསྒོམས་པས་ཇི་ལྟར་འབད་ཀྱང་ཇི་ལྟ་བ་བཞིན་མཐོང་བར་མི་ནུས་པ་དེ། རང་བཞིན་བསལ་བཞག་མེད་པ་གདོད་མའི་ཆོས་ཉིད་ཀྱི་གནད་ལས་མཐོང་བར་བྱེད་པའི་མན་ངག་ཟབ་མོ་བསྟན་པའི་ཕྱིར་འདི་ལྟ་བུའི་ཐབས་ནི་སྔགས་བླ་མེད་ཀྱི་གཞུང་ན་ཡོད་མོད་ཀྱི་མདོ་ལམ་ན་མེད་པའི་ཕྱིར། མདོ་ལམ་དུ་སྟོང་ཉིད་དོན་སྤྱིའི་ཚུལ་དུ་གཏན་ལ་ཕབ་ནས་གོམས་ཚུལ་ལས་ད་ལྟ་སོ་སྐྱེའི་སར་དོན་རང་མཚན་སྒོམ་པ་མེད་ཀྱང་། སྔགས་སུ་ཐབས་མ་སྦས་པར་གསལ་བར་བསྟན་པས། གང་ཟག་གི་སྐལ་བའི་ཁྱད་པར་གྱིས་ད་ལྟ་མངོན་དུ་བྱེད་ནུས་མི་ནུས་དང་། དེ་ཡང་དབང་རབ་ཅིག་ཅར་བ་དབང་དུས་སུ་ངོ་འཕྲོད་པའམ་གཏན་ཚིགས་བསྟན་པ་ཙམ་གྱིས་རྟོགས་ནུས་པ་དང་། དབང་འབྲིང་ལ་རྩ་མདུད་འགྲོལ་བའི་དམིགས་གནད་སོགས་གོམས་སྟོབས་ཀྱིས་རིམ་གྱིས་རྟོགས་པ་དང་། དབང་རྟུལ་བསགས་སྦྱང་སོགས་བརྒྱུད་ནས་རྟོགས་ཚུལ་སོགས་ཀྱི་དབྱེ་བ་ཡོད་མོད་ཀྱི། སྤྱི་ལྡོག་ཏུ་ད་ལྟ་ཚོགས་སྦྱོར་གྱི་ལམ་དུའང་ཆོས་ཉིད་རང་མཚན་མངོན་སུམ་དུ་མཐོང་བ་ནི་ཡོད་དེ། ཞི་བྱེད་ཆུ་ཀླུང་རོལ་པ་ལས། རང་གི་བསགས་པ་རབ་ཏུ་གྱུར་པ་དང་། བླ་མ་དམ་པ་བསྟེེན་ལ་མཁས་པ་དང་། །རྣལ་འབྱོར་རིག་པ་དྭངས་པའི་མངོན་སུམ་དུ། །མཐོང་ལམ་ཆེ་ཆུང་སྐྱེ་བ་ཁོ་ནར་བཤད། །ཅེས་དང་། ངེས་དོན་འདུས་པའི་རྒྱུད་ལས། ད་ལྟ་ཆོས་སྐུར་མ་ཤེས་ན། །གསང་སྔགས་མན་ངག་ཅི་ལ་ཆེ། །དེ་ཕྱིར་བསྟན་ཤེས་སྒོམ་མ་དགོས། །ཞེས་གསུངས། དེ་ལས་གཞན་དུ་ན། གསང་སྔགས་འབྲས་བུའི་ལམ་མ་ཡིན་ཞིང་རྒྱུ་ལ མ་བྱེད་དང་ཁྱད་མེད་དུ་ཐལ་བ་དང་། ཆོས་ཉིད་ངོ་སྤྲོད་ཀྱི་མན་ངག་རྒྱུན་ཆད་པར་ཐལ་བ་དང་། རང་རིག་པའི་ཚད་མ་རྒྱུན་ཆད་པར་ཐལ་བ་དང་། མངོན་སུམ་རྟོགས་བྱེད་ཀྱི་རིགས་པའི་གཏན་ཚིགས་རྒྱུན་ཆད་པར་ཐལ་བའི་སྐྱོན་བཞིས་གནོད་ཅིང་། མཐོང་ཚུལ་ཡང་གསལ་བ་མཐར་ཕྱིན་མ་ཕྱིན་གྱི་བྱེ་བྲག་གིས། དཔེར་ན་དབང་པོའི་ཡུལ་དུ་མཐོང་ཡང་ཐག་ཉེ་རིང་གིས་གསལ་བ་མཐར་ཕྱིན་མ་ཕྱིན་ཡོད་པ་བཞིན། ལམ་རིམ་ལས། དབང་པོ་དྭངས་པའི་སྤྱོད་ཡུལ་ལས། །ཉེ་རིང་དྲུང་ཕྱིན་སྟོབས་འཕེལ་བས། །རྒྱུ་རྐྱེན་གོང་འོག་འབྲས་བུ་བགྲོད། །གསལ་བས་བྱེ་བྲག་རིམ་པར་འགྲོ། །ཞེས་གསུངས་པ་བཞིན་ཀཿཐོག་ཤཱཀ་རྡོར་བཞེད། དེས་ན་ཡེ་ནས་གནས་པའི་ཆོས་ཉིད་དེ་ཆོས་ཅན་སེམས་ཀྱི་ཐོག་ཏུ་ད་ལྟ་ནས་ངོ་སྤྲད་ཅིང་གོམས་སུ་ཡོད་པས་ན་འབྲས་བུ་ལམ་བྱེད་དང་རྡོ་རྗེ་ཐེག་པའི་ངེས་ཚིག་ཀྱང་གྲུབ་སྟེ། གལ་པོ་ལས། མཚན་ཉིད་རྒྱུ་ཡི་ཐེག་པ་ཡིས། །སེམས་ཅན་སངས་རྒྱས་རྒྱུ་རུ་ཤེས། །འབྲས་བུ་རྡོ་རྗེ་ཐེག་པ་ཡིས། །སེམས་ཉིད་སངས་རྒྱས་ཉིད་དུ་སྒོམ། །རྒྱུ་དང་འབྲས་བུ་གང་ཡིན་པའི། །ཕྱོགས་ཀྱང་རབ་ཏུ་ཤེས་པར་བྱ། །ཞེས་སོ། །དེས་ན་གཞི་རྒྱུད་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཡེ་ནས་འཆིང་གྲོལ་ལས་འདས་པ་ཉིད། ལམ་རྒྱུད་ཐོས་བསམ་སྒོམ་པའི་ཤེས་རབ་ཀྱིས་ཡང་དག་པར་མཐོང་ཞིང་གོམས་པར་མཐར་ཕྱིན་པར་བྱས་ན། འབྲས་རྒྱུད་སངས་རྒྱས་ཀྱི་སྐུ་དང་ཡེ་ཤེས་སོགས་རྣམ་པར་གྲོལ་བའི་ཆོས་རྣམས་རང་བྱུང་ཡེ་ཤེས་བདེ་བ་ཆེན་པོའི་ངང་དུ་གཞན་ནས་བཙལ་བ་མེད་པར་ཡེ་ནས་ལྷུན་གྱིས་གྲུབ་པའི་ཚུལ་དུ་རྫོགས་པར་འགྱུར་ཏེ། གསང་སྙིང་ལས། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་རྣལ་འབྱོར་གྱིས། །རང་བྱུང་ཀུན་ངོམས་ལྷུན་གྱིས་གྲུབ། །འདི་ནི་སངས་རྒྱས་ཐམས་ཅད་ཀྱིས། །འདའ་བར་མི་མཛད་དམ་ཚིག་མཆོག །ཅེས་གསུངས། དེ་ཡང་སྔགས་ཕྱི་རྒྱུད་སོགས་སུ་མཐར་ཕྱིན་སངས་རྒྱས་རྣམས་ཆོས་ཀྱི་དབྱིངས་ཀྱི་ངོ་བོར་གཅིག་ཀྱང་སྦྱངས་པའི་ཡེ་ཤེས་ཐ་དད་པས་ཤིང་སྣའི་མེ་དཔུང་བཞིན་དུ་འདོད་མོད། འདིར་ནི་བདག་ཉིད་ཆེན་པོ་རང་བྱུང་གི་ཡེ་ཤེས་ཉག་གཅིག་གི་ཀློང་དུ་འཁོར་འདས་ཀྱི་ཆོས་ཐམས་ཅད་ལྷུན་གྱིས་རྫོགས་པས་གཅིག་ཐ་དད་སོགས་གཉིས་ཆོས་ཀྱི་སྤྲོས་པ་མཐའ་དག་ཞི་བ་སྟེ་མ་འདྲེས་ཡོངས་རྫོགས་ཀྱིས་ཁྱད་པར་དུ་བྱས་པ་ཡིན་ནོ། །བཞི་པ་མཐར་ཐུག་རང་བཞིན་རྫོགས་པ་ཆེན་པོའི་དགོངས་པ་ཆོས་ཐམས་ཅད་རང་བྱུང་ཡེ་ཤེས་ཉག་གཅིག་ཏུ་ལ་བཟླ་བའི་ཚུལ་གྱིས་བཤད་ན། ཀློང་ཆེན་ལས། ཐེག་པའི་ཁྱད་པར་ཇི་སྙེད་དུ། །བརྒྱད་ཁྲི་བཞི་སྟོང་གསུངས་པ་ཡང་། །ཀློང་ཆེན་གཅིག་གི་ཡོན་ཏན་ཏེ། །གདུལ་བྱ་རྣམས་ལ་བསྟན་པར་ཟད། །ཅེས་གསུངས་ཏེ། དེ་ཡང་དབུ་ཕྱག་རྫོགས་གསུམ་གྱི་ཁྱད་པར་ལ་བཞེད་པ་མང་ཡང་དོན་གྱི་སྙིང་པོ་གནད་བསྡུས་པ། སྨིན་གླིང་ལོ་ཆེན་རིན་པོ་ཆེས་དྲིས་ལན་དུ། དབུ་མ་ལ། དགེ་ལྡན་པ་ལྷག་མཐོང་ཐོས་བསམ་གྱི་དཔྱད་སྒོམ་ལ་གཙོ་བོར་མཛད་པ་དང་། སྔར་གྱི་རྔོག་བཙན་ལུགས་སོགས་ཀྱི་བཞེད་པ་ལྟར་བོད་འདིར་དབུ་མ་པ་གཞན་རྣམས་ཐོག་མར་དཔྱད་པས་ལྟ་བའི་བག་ཆགས་བཞག་ནས། སྒོམ་དུས་འཇོག་སྒོམ་ལ་གཙོ་བོར་མཛད་འདུག ཕྱག་ཆེན་ལའང་དབང་བཞི་པའི་མན་ངག་གི་དབང་དུ་བྱས་ན་བླ་མ་དང་ལྷའི་བྱིན་རླབས་དང་བྱེད་བཅིང་གི་གནད་སོགས་ཀྱིས་ཡེ་ཤེས་འབེབས་པས་མདོའི་དབུ་མ་དང་མི་འདྲ། ཡང་དབང་སོགས་ལ་མ་ལྟོས་པའི་དེང་སང་གནས་ལུགས་ཕྱག་ཆེན་དུ་གྲགས་པ་ལྟར་ན་རྒྱུད་བླའི་མན་ངག་ཡིན་པར་བཞེད་པས་དབུ་མ་དང་འདྲ་དགོས་པར་མངོན། ཕྱག་རྫོགས་ཀྱི་ཁྱད་པར། ཕྱག་ཆེན་པ་ལྟ་བས་ཡུལ་ལ་ཕར་རྒྱས་བཏབ་ནས་གསལ་སྟོང་དུ་གཏན་ལ་འབེབས། རྫོགས་ཆེན་པས་ཆོས་ཐམས་ཅད་སེམས་ཀྱི་རོལ་པར་བསྡུས་ནས་ཡུལ་རིག་སྟོང་དུ་གཏན་ལ་འབེབས་པ་ཡིན། རྫོགས་ཆེན་སྡེ་གསུམ་ཀ་ཡུལ་སྣང་བ་དང་བཅས་པ་ཡུལ་ཅན་རིག་པའི་ཀློང་དུ་རྫོགས་པར་འདྲ་ཡང་སེམས་སྡེས་ཆོས་ཐམས་ཅད་རང་བྱུང་གི་ཡེ་ཤེས་བརྗོད་བྲལ་དུ་འདོད། ཀློང་སྡེས་སེམས་ཉིད་རྩལ་སྣང་དང་བཅས་པ་ཆོས་ཉིད་ཀུན་ཏུ་བཟང་མོའི་ཀློང་ལས་འགྲོ་ས་མེད་པར་ཡེ་གྲོལ་རང་དག་ཏུ་འདོད། མན་ངག་སྡེས་ཡེ་ནས་ཟུང་འཇུག་བློ་འདས་རང་བྱུང་གི་ཡེ་ཤེས་རྩོལ་བྲལ་དུ་འདོད་པས། མདོར་ན་བསྐྱེད་རྫོགས་གསུམ་གྱི་དབང་བཞི་པའི་ཡེ་ཤེས་ལུས་རྫོགས་པར་སྟོན་པ་ལ་སྡེ་གསུམ་རིམ་གྱིས་འབྱུང་ངོ། །བསྐྱེད་ཚུལ་ཡང་རིག་པ་རང་བྱུང་གི་ཡེ་ཤེས་ཇི་ལྟར་གཏན་ལ་ཕབ་པའི་ངང་ལ། བསལ་བཞག་དང་། བྱ་རྩོལ་དང་། སྤང་བླང་བྲལ་བའི་ཆོས་ཉིད་ཀྱི་ངང་དུ་སྐྱེལ་བ་ཡིན་ནོ་གསུངས། གཞན་ཡང་སྔགས་མཚན་བཅས་ཐུན་མོང་བའི་ལམ་གྱིས་རླུང་དབུ་མར་གཞུག་པའི་ཐབས་ལས་དཔེ་དོན་གྱི་ཡེ་ཤེས་འདྲེན་པར་བྱེད་པ་ལའང་། གྲོལ་ལམ་བླ་མའི་མན་ངག་རྫོགས་པ་ཆེན་པོའི་ངོ་སྤྲོད་ལ་བརྟེན་དགོས་ཏེ། དེ་ལས་གཞན་དུ་རླུང་དབུ་མར་ཞུགས་ཀྱང་ཡེ་ཤེས་ངོས་མི་ཟིན། དེ་མ་ཟིན་ན་རླུང་དབུ་མར་ཞུགས་ཀྱང་ཅི་ཞིག་ཕན། དོན་འོད་མཚོན་པའི་སྒོར་མ་གྱུར་ན་རྩ་རླུང་ཐིག་ལེ་སོགས་ཟག་བཅས་འཇིག་རྟེན་པའི་ལམ་ཕྱི་རོལ་པ་སོགས་དང་ཁྱད་མེད་པར་རྒྱ་གར་གྱི་སློབ་དཔོན་ཨིནྡྲ་བོ་དྷི་དང་བོད་ཀྱི་རོག་བདེ་གཤེགས་ཆེན་པོ་སོགས་གསུངས། དེས་ན་ཐབས་ལམ་པ་དག་གིས་མི་ཤེས་སུ་མི་རུང་བའི་གནད་ནི། སློབ་དཔོན་ཤྲཱི་སེངྷ་ནས་བཻ་རོ་ལ་བརྒྱུད་པའི་གཤིན་རྗེའི་རྫོགས་རིམ་མཐར་ཐུག་ཐབས་ལམ་གནད་ཀྱི་ལྡེའུ་མིག་ལས། རྟེན་གཞལ་ཡས་ཁང་ལུས་གནས་རྩ་ཡི་ཕོ་བྲང་ན་ནང་གི་མཁའ་འགྲོ་རྩ་ཡིག་གི་ཚུལ་དུ་བཞུགས། རྩ་གནས་ཡི་གེའི་ཕོ་བྲང་ན་དེ་ཁོ་ན་ཉིད་སྟོང་ཉིད་ཡེ་ཤེས་ཀྱི་མཁའ་འགྲོ་བདེ་སྟོང་གཉིས་མེད་ཀྱི་ཡེ་ཤེས་སྲོག་མི་ཤིགས་པའི་ཐིག་ལེ་བཞུགས་སོ། །དེ་ཡང་ལུས་གང་ན་གནས་པ་ན་རྩ་གནས། རྩ་གང་ན་གནས་པ་ན་རླུང་གནས། རླུང་གང་དུ་གནས་པ་ན་ཐིག་ལེ་གནས། ཐིག་ལེ་གང་དུ་གནས་པ་ན་སྤྲོས་མེད་ལྷན་ཅིག་སྐྱེས་པའི་ཡེ་ཤེས་གནས་སོ། །ཞེས་སོགས་ལུས་གནས་རྩ་ཡི་ཆགས་ཚུལ། རྩ་གནས་ཡི་གེ་སྤྲིན་གྱི་འཁོར་ལོ། དེ་ན་ལྷ་གཙོ་འཁོར་སོགས་ཇི་ལྟར་གནས་པའི་ཚུལ་རྣམས་གསལ་བར་གསུངས་ཤིང་། དེ་ལས་རྩ་ཐམས་ཅད་སྲོག་ཤིང་གི་རྩ་གསུམ་ལ་འདུས་ཤིང་། དེ་ཡང་རང་བཞིན་གཉུག་མའི་ཨ་བ་ངྷཱུ་ཏི་གཉིས་མེད་སྟོང་པའི་རྩ་ཡིན་ཏེ་ཅིར་ཡང་མ་གྲུབ་པ་སྤྲོས་བྲལ་ཆོས་ཀྱི་སྐུ། བཤད་ཚོད་ཀྱི་ཨ་བ་ངྷཱུ་ཏི་ལུས་དཀྱིལ་སྒལ་ཚིག་མདུན་སྲོག་ཤིང་ཀ་བ་ལྟར་གནས་ཏེ་དབྱིབས་དཀར་འཚེར་རླུང་དང་ཐིག་ལེ་གང་གིས་ཀྱང་དབེན་པ། དེའི་གཡས་སུ་རོ་མ་དམར་མོ་རྡུལ་དང་། གཡོན་རྐྱང་མ་དཀར་མོ་ཁུ་བས་གང་བ། རྩ་གསུམ་པོ་དེའང་སྐུ་གསུང་ཐུགས་རྡོ་རྗེ་སྟེ། རྐྱང་མ་སྐུ། རོ་མ་གསུང་། ཀུན་འདར་མ་ཐུགས་རྡོ་རྗེར་གསུངས་པ་དང་། སྐུ་སོགས་དེ་ཐམས་ཅད་གཞི་དངོས་པོ་གཤིས་ཀྱི་གནས་ལུགས་རང་བྱུང་གི་ཡེ་ཤེས་ཕྱོགས་གཅིག་ཏུ་མ་ངེས་ཏེ། རྒྱ་གར་ཡང་མ་ཆད། ཕྱོགས་གང་དུའང་མ་ལྷུང་བའི་གནད་ཀྱིས་སྣང་ཚུལ་ཡང་ངེས་མེད་དུ་ཤར་བས་ཕྱོགས་གཅིག་ཏུ་ཆད་པ་མེད་པ་དང་། རྩ་ཡིག་དེ་རྣམས་ཀྱང་རང་རང་གི་བག་ཆགས་དང་མཐུན་པར་ཤར་ཏེ། རྒྱ་གར་ལ་རྒྱ་ཡིག བོད་ལ་བོད་ཡིག ལྷ་ལ་ལྷའི་ཡི་གེ་སོགས་སུ་གནས་པར་བཤད། གཞན་ཡང་རླུང་དང་ཐིག་ལེའི་རྣམ་གཞག་རྒྱས་པར་གསུངས་ཤིང་། དེ་ཁོ་ན་ཉིད་སྟོང་ཉིད་ཡེ་ཤེས་ཀྱི་མཁའ་འགྲོའི་བཞུགས་ཚུལ་ཡང་། རྩ་སྟོང་ཕྲག་བདུན་ཅུ་རྩ་གཉིས་ནི་རྟེན་བྱེད་པས་སྐུ་རྡོ་རྗེ། རྩ་ལ་གནས་པའི་ཡི་གེ་རྣམས་ནི་བརྡ་སྤྲོད་པས་གསུང་། ཡི་གེའི་ཕོ་བྲང་ན་རླུང་དང་ཐིག་ལེ་དཀར་དམར་ཐམས་ཅད་རང་གསལ་བར་བྱེད་པས་ཐུགས་རྡོ་རྗེ། དེས་ན་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་རང་གི་ལུས་ལ་རྫོགས་པར་གནས་པ་ལས་གཞན་གུད་ན་མེད་དོ་ཞེས་དང་། དེ་ལས་རླུང་ལ། འཕེན་པ་ལས་ཀྱི་རླུང་ནི་དྭངས་མ་ཕྲ་བའི་སྲོག་འཛིན་གྱི་རླུང་གིས་ཡིད་ཀྱི་རྣམ་ཤེས་ཀྱི་རླུང་བསྐྱེད། ཁ་ནང་དུ་བལྟས་ནས་རང་རྒྱུད་ཀྱི་རྩ་ལ་རྒྱུས་པས་ང་བདག་ཏུ་འཛིན་པ་སྐྱེ། ཉོན་མོངས་པའི་ཚུབ་ལང་། ཁ་ཕྱིར་བལྟས་ཏེ་རྟོག་ངན་སྣ་ཚོགས་འགྱུས་ནས་ལས་སྣ་ཚོགས་བསགས་པས་འཁོར་བར་འཕེན་པར་བྱེད། གསལ་བ་ཡེ་ཤེས་ཀྱི་རླུང་ནི་རིག་པའི་རླུང་ཡིན་ཏེ། རིག་པ་གསལ་བ་ཅིར་ཡང་མ་འགགས་པར་གསལ་ལ་གང་གིས་ཀྱང་སྒྲིབ་པ་མེད་པར་གསལ་བ་སྟེ། གནས་ནི་ཀུན་འདར་མ་ན་གནས་ཏེ་མཉམ་རྒྱུའི་སྐབས་རིག་པ་རྟོག་མེད་དྭངས་ཆ་དང་བཅས་ཏེ་འགྱུ་བ་ཡིན། དེ་ངོས་བཟུང་བ་ལ་འབྱུང་བ་མཉམ་པར་གནས་པ་གཅིག་ལ། རླུང་ཕྱིར་འགྲོའི་ནང་འགྲོའི་ཁུག་པ་གཅིག་ལ་གཅིག་ཏུ་བགྲང་བའི་ཉིན་ཞག་ཕྲུགས་གཅིག་ལ་ཉི་ཁྲི་ཆིག་སྟོང་དྲུག་བརྒྱ་དང་བཅུ་རྒྱུ་བ་ལས། གཡས་ནས་གཡོན་དུ་འཕོ་བ་དང་། གཡོན་ནས་གཡས་སུ་འཕོ་བའི་སྐབས་འཕོ་མཚམས་བཅུ་གཉིས་སུ་མཉམ་གནས་ཀྱི་རླུང་རྒྱུ་བས་བཅུ་གཉིས་པོ་སྙིགས་མའི་རླུང་ཡིན། བཅུ་གསུམ་པ་མཉམ་གནས་ཡེ་ཤེས་ཀྱི་རླུང་དབུས་ཀུན་འདར་མ་ན་རྒྱུ་བ་ཡིན་ནོ། །རིག་པའི་རླུང་ལ་དྭངས་སྙིགས་གཉིས་ལས། དྭངས་མའི་རླུང་ནི། གནས་དྭངས་མ་ལྔ་འདུས་ཀྱི་དབུས་ངོ་བོ་སྲོག་མི་ཤིགས་པའི་ཐིག་ལེ། བྱང་ཆུབ་ཀྱི་སེམས་སྤྲོས་བྲལ་ཆོས་ཀྱི་སྐུ། ལམ་ཀུན་འདར་མ་ནས་རྒྱུ། དུས་འཕོ་མཚམས་བཅུ་གསུམ་པ་ལའོ། །སྙིགས་མའི་རླུང་གནས་གསང་འཁོར། ངོ་བོ་རྣམ་ཤེས་ཚོགས་བརྒྱད། ལམ་རྩ་འདབ་བརྒྱད་འཁོར་བརྒྱད་ཁྲི་བཞི་སྟོང་དུ་གསུངས། དེ་ལས་དྭངས་མའི་རླུང་འཕོ་མཚམས་བཅུ་གསུམ་པ་ངོས་བཟུང་བ་ནི། རླུང་གཡས་གཡོན་གཉིས་ནས་མཉམ་དུ་ཤ་ར་ར་རྒྱུ་དུས། རིག་པ་གསལ་སྟོང་རྟོག་པ་མེད་པ། ངོས་བཟུང་ཅིས་ཀྱང་སྟོང་པ། སྤྲོས་མེད་ནམ་མཁའ་ལྟ་བུའི་ཉམས་སྔར་བས་ལྷག་པའི་ཤེས་པ་གཅིག་ཤར་བ། དེ་ནི་ནང་གི་སྒྲ་གཅན་འཛིན་རྩ་དབུ་མའི་ནང་དུ་ཉི་ཟླ་རོ་རྐྱང་གཉིས་ཀྱི་རླུང་ཚུད་ནས་རྒྱུ་བའི་རྟགས་ཡིན། དེ་ནི་སངས་རྒྱས་ཀྱི་དགོངས་པ་དངོས་སུ་ཤར་བ་ཡིན། སེམས་ཅན་ཐམས་ཅད་ལ་ཉིན་ཞག་ཕྲུགས་གཅིག་ལ་ཐེངས་རེ་མི་འཆར་མི་སྲིད་ཀྱང་བླ་མའི་མན་ངག་མེད་པས་ངོས་མི་ཟིན། ཡུན་ཡང་འགའ་ཞིག་ལ་སེ་གོལ་བདུན་གྱི་ཡུན་ཙམ་ལས་མི་འཆར་བའང་ཡོད། བསོད་ནམས་བསགས་པ་འགའ་ཞིག་ལ་ཟན་རེ་ཟ་ཡུན་ཙམ་ལ་འཆར། སྲོག་རྩོལ་ལ་གནད་དུ་བསྣུན་པའི་རྣལ་འབྱོར་པ་ལ་ཉི་མ་ཕྱེད་དང་ཟླ་བ་དང་ལོ་ལ་སོགས་པར་མི་གཡོ་བའི་ཉམས་ཤར་ནས་བརྟན་པ་ཐོབ་པ་ཡོད། དུང་བ་སྒོམ་པ་དང་བདེ་བ་སྒོམ་པ་དང་། དེ་བཞིན་དུ་སྒྱུ་ལུས། ཞི་གནས། འོད་གསལ་སྒོམ་པ་སོགས་ཐམས་ཅད་འདི་ངོས་ཟིན་ཅིང་རྟོགས་པར་བྱ་བ་ལས་མེད། འདི་ངོས་ཟིན་ཅིང་རྟོགས་པའི་དུས་རླུང་ཨ་བ་དྷཱུ་ཏིར་ཆུད་པ་ཡིན། འདི་ནི་གསང་བའི་ངེས་པའོ། །ནང་གི་ངེས་པ་ནི་རླུང་གཡས་གཡོན་གཉིས་ནས་མཉམ་དུ་རྒྱུ་བའི་དུས་སོ། །ཕྱིའི་ངེས་པ་ནི། ཟླ་བ་གཟས་ཟིན་པའི་དུས་དྭངས་མ་ཀུན་འདར་གྱི་རླུང་རྒྱུ་བའོ། །དེ་ལྟར་ཕྱི་ནང་གསང་བའི་རྟགས་གསུམ་གྱིས་ཡེ་ཤེས་ཀྱི་རླུང་ངོས་བཟུང་ནས། ལུས་གནད་བསྲང་། མ་ནིང་གི་རླུང་དལ་ལ་འཇམ་པར་བཟུང་། མ་སྒོམ་པའི་མངོན་སུམ་གསལ་བའི་ཡེ་ཤེས་ཀྱི་རླུང་ཐུག་ཕྲད་གསུམ་དུ་ཤར་བ་དེ། སྒོམ་པའི་མངོན་སུམ་བཞག་ཐབས་གསུམ་གྱིས་ཀློང་ལ་བཞག་གོ །འདིའི་གནད་ངོས་ཟིན་ན་བསྐལ་པར་བསགས་པའི་སྒྲིབ་པའང་སྐད་ཅིག་གཅིག་གིས་འདག་ལ། སངས་རྒྱས་ཀྱི་དགོངས་པ་ཡང་འདིས་མངོན་སུམ་དུ་གཏན་ལ་ཕབ་པ་ཡིན་ནོ་གསུངས། དེས་ན་གནད་འདི་ངོས་ཟིན་ན་རིག་པ་རང་བབས་སུ་བཞག་པས་རླུང་དབུ་མར་མི་ཞུགས་པ་མ་ཡིན་ཏེ། དུས་འཁོར་གྱི་སོར་བསམ་དང་རྫོགས་ཆེན་གྱི་བཞག་ཐབས་རྣམས་བཞིན་ནོ། །དེ་བཞིན་ཐབས་ལམ་དངོས་གཞིའི་ཉམས་ལེན་སྐབས་མེད་དུ་མི་རུང་བའི་མན་ངག་གི་ངོ་སྤྲོད་དྲུག་གསུངས་ཏེ། དང་པོ་མི་བཏང་བ་གསུམ་གྱིས་སྲོག་བཟུང་བ་ནི། ཐིག་ལེ་རྡོ་རྗེའི་ཁ་ནས་མི་བཏང་། ཡིད་ཆགས་པའི་དབང་དུ་མི་བཏང་། ལྟ་སྒོམ་བློ་ཡུལ་དུ་མི་བཏང་བའོ། །གཉིས་པ་བཅད་པ་གསུམ་གྱི་འཁོར་བའི་རྒྱུན་ལམ་བཅད་པ་ནི། འཇིག་རྟེན་པའི་རིགས་རྒྱུད་བཅད། འདོད་ཆགས་ཀྱི་གཞི་རྩ་བཅད། འཁོར་བའི་རྒྱུན་ལམ་བཅད་པ་སྟེ། དེ་གསུམ་རིམ་པར་ཐིག་ལེ་མ་ཤོར་བ། ཆགས་རྟོག་རང་སར་གྲོལ་བ། རང་བྱུང་གི་ཡེ་ཤེས་མངོན་དུ་རྟོགས་པས་སྐྱེ་ཤི་འཁོར་བ་ལས་གྲོལ་བའོ། །གསུམ་པ་དགའ་བཞི་ངོས་བཟུང་བ་ལ་དབྱེ་ན་བཅུ་དྲུག་ལས། གོ་རིམ་ལ་ལྟོས་པའི་དགའ་བ་བཞི་ནི། ཐབས་ཤེས་ཀྱི་འདོད་ཡོན་ལྔ་ལ་སློབ་པའི་དུས་སུ་གཟུགས་ནས་རེག་པའི་བར་གྱི་བདེ་ཉམས་ཅི་སྐྱེས་ཐམས་ཅད་དགའ་བ། མཁའ་གསང་རྩེ་སྤྲད་དུས་ཀྱི་བདེ་བ་ཆེར་འབར་བ་མཆོག་དགའ། ནང་སྤྲད་སྲུབ་པའི་དུས་ཀྱི་བདེ་བ་ལྷན་ཅིག་སྐྱེས་དགའ། ཁ་སྦྱོར་བཞི་འཛོམས་པའི་དུས་བདེ་བ་ལ་མི་རྟོག་པ་དང་ལྡན་པ་དགའ་བྲལ་གྱི་ཡེ་ཤེས་སོ། །གནས་ལ་ལྟོས་ནས་བཞག་པའི་དགའ་བཞི་ལའང་གཉིས། ཕྱིའི་གནས་ལ་ལྟོས་པ། ལུས་ཁོལ་བུར་བདེ་བ་སྐྱེས་པ་དགའ་བ། ལུས་ཕལ་ཆེར་ལ་ཁྱབ་སྙམ་བྱེད་པ་མཆོག་དགའ། ལུས་ཐམས་ཅད་ལ་བདེ་བ་སྐྱེས་པ་དགའ་བྲལ། ཕྱི་ནང་གི་དངོས་པོ་གར་བལྟས་ཀྱང་བདེ་ཉམས་འབའ་ཞིག་སྐྱེས་པ་ལྷན་ཅིག་སྐྱེས་དགའི་ཡེ་ཤེས་སོ། །ནང་གི་དགའ་བ་ལ་ལྟོས་ནས། ཡབ་ཡུམ་སྙོམས་པར་ཞུགས་པའི་སྐབས། ཐིག་ལེ་སྤྱི་བོ་ནས་མགྲིན་པར་བབས་དུས་ཀྱི་བདེ་བ་ཅི་སྐྱེས་དགའ་བ། དེ་བཞིན་སྙིང་གར་བབས་པ་མཆོག་དགའ། ལྟེ་བར་དགའ་བྲལ། གསང་བར་ལྷན་ཅིག་སྐྱེས་དགའ་འོ། །སྤང་བྱ་ལ་ལྟོས་ནས་བཞག་པའི་དགའ་བཞི། བདེ་བ་ལ་སེམས་ཟིན་ཏེ་གཟུང་འཛིན་གྱི་རྟོག་པ་རགས་རིམ་འགགས་པ་དགའ་བ། དེ་བཞིན་བདག་འཛིན་གྱི་རྟོག་པ་རགས་རིམ་འགགས་པ་མཆོག་དགའ། རང་དང་ཕྱག་རྒྱར་འཛིན་པའི་རྣམ་རྟོག་འགགས་པ་དགའ་བྲལ། ཉམས་ཐམས་ཅད་རང་སྣང་རང་སྟོང་རང་རིག་ཏུ་རྟོགས་ཏེ་ཟག་བཅས་ཀྱི་དགའ་བདེ་རང་ཁ་མའི་འཛིན་རྟོག་འགགས་པ་ལྷན་ཅིག་སྐྱེས་དགའི་ཡེ་ཤེས་སོ། །རང་གི་ངོ་བོའི་སྒོ་ནས་བཞག་པ་ནི། བདེ་ཉམས་ཆུང་བ་དགའ་བ། ཆེར་འཕེལ་བ་མཆོག་དགའ། བདེ་བ་ལ་མི་རྟོག་པ་དགའ་བྲལ། བདེ་སྟོང་གཉིས་མེད་རང་རིག་ཡེ་ཤེས་སུ་རྟོགས་པ་ལྷན་ཅིག་སྐྱེས་དགའི་ཡེ་ཤེས་སོ། །བཞི་པ་དབང་གསུམ་གྱིས་ལམ་དུ་གཞུག་པ། གསང་དབང་གིས་བདེ་སྟོང་གཉིས་མེད་ལྷན་ཅིག་སྐྱེས་པའི་ཡེ་ཤེས་རང་སྣང་དུ་ངོས་ཟིན་པ། ཤེར་དབང་གིས་ལྷན་སྐྱེས་ཀྱི་ཡེ་ཤེས་དེ་རང་སྣང་མཐའ་དབུས་མེད་པར་ཡུལ་མེད་རང་གསལ་དུ་ཤར་ཏེ་རྟོགས་ཤིང་ཡིད་ཆེས་ཐག་ཆོད་པ། བདེ་བ་ཆེན་པོའི་དབང་གིས་དེ་ལྟར་རྟོགས་པ་དེ་ཉམས་སུ་མྱོང་བ་སྟེ། བདེ་སྟོང་གཉིས་མེད་ལྷན་ཅིག་སྐྱེས་པའི་ཡེ་ཤེས་རང་རིག་པས་མངོན་སུམ་དུ་རྟོགས་ཤིང་ཉམས་སུ་མྱོང་ནས་ཡེ་ཤེས་རང་གནས་ཀྱི་དགོངས་པ་དེ་བདེ་བ་ཆེན་པོ་ལ་གནས་པའོ། །མདོར་ན་ཡབ་ཡུམ་སྙོམས་འཇུག་གི་བདེ་བ་རང་སྣང་དུ་ངོས་ལྷང་གིས་ཟིན་པ་གསང་དབང་། བདེ་བ་རང་སྟོང་དུ་ངོས་ཟིན་པ་ཤེར་དབང་། བདེ་སྟོང་གཉིས་སུ་མེད་པར་ངོས་ཟིན་པ་བདེ་བ་ཆེན་པོའི་དབང་ངོ་། །ལྔ་པ་བསྒྱུར་བ་གསུམ་གྱིས་ཉམས་སུ་བླང་བ་ནི། བདེ་བ་རང་སེམས་རང་སྣང་དུ་བསྒྱུར་བ་བདེ་བ་གང་སྐྱེས་དེ་ཀ་སེམས་ཉིད་རང་གྲོལ་དུ་ངོ་སྤྲད་ལ་ཉམས་སུ་བླང་། རང་སྣང་འོད་གསལ་སྟོང་ཉིད་དུ་བསྒྱུར་བ་རང་སྣང་དུ་ཉམས་སུ་མྱོང་བ་དེ་རང་གསལ་སྒྲིབ་གཡོགས་དང་བྲལ་བར་གཞི་རྩ་མེད་པར་ངོས་བཟུང་ནས་ཅིར་སྣང་སྟོང་པར་ངོ་སྤྲད་ལ་ཉམས་སུ་བླང་། སྟོང་ཉིད་རང་གྲོལ་བདེ་བ་ཆེན་པོར་བསྒྱུར་བ། བདེ་སྟོང་དབྱེར་མེད་རང་གྲོལ་བདེ་བ་ཆེན་པོར་ངོ་སྤྲད་དེ་ཉམས་སུ་བླང་བའོ། །དེས་བདེ་སྟོང་གཉིས་མེད་ལྷན་ཅིག་སྐྱེས་པའི་ཡེ་ཤེས་རང་གྲོལ་མངོན་སུམ་དུ་རྟོགས་ཤིང་ཉམས་སུ་མྱོང་བའོ། །དྲུག་པ་ཐུག་ཕྲད་གསུམ་གྱིས་ངོ་སྤྲད་པ་ལ། གཞི་ལྷུན་གྲུབ་རྣམ་གསུམ། དགའ་བ་སྔ་མ་གཉིས་སུ་རང་བྱུང་ཡེ་ཤེས་ཀྱི་རང་སྣང་སྒྱུ་མ། དགའ་བྲལ་གྱིས་རང་སྟོང་སྤྲོས་བྲལ། ལྷན་ཅིག་སྐྱེས་དགས་རང་རིག་རང་གསལ་ལྷུན་གྲུབ་སྟེ། ལྷུན་གྲུབ་རྣམ་གསུམ་མ་འདྲེས་ཡོངས་རྫོགས་བདེ་བ་ཆེན་པོའོ། །དེ་བཞིན་དུ་ལམ་ཐུག་ཕྲད་རྣམ་གསུམ་གསལ་བ་སྟོང་པ་གཉིས་མེད་རང་གསལ་ཏེ་མ་སྒོམ་པའི་མངོན་སུམ་ཐུག་ཕྲད་དེ་སྒོམ་པས་ཉམས་སུ་བླང་བའོ། །འབྲས་བུ་སྐུ་གསུམ་ལྷུན་གྲུབ་ཀྱི་དགོངས་པ་མངོན་དུ་འཆར་ཏེ། སྐུ་གསུམ་དེ་མཐའ་དང་བྲལ་ཚུལ། སྤྲུལ་སྐུ་བདེ་བ་ཆེན་པོར་མ་འགགས་པས་སྟོང་པ་ཕྱང་ཆད་ཀྱི་མཐའ་དང་བྲལ། ཆོས་སྐུ་སྤྲོས་བྲལ་གྱིས་དངོས་པོ་རྫས་གྲུབ་ཀྱི་མཐའ་དང་བྲལ། དེ་གཉིས་དུས་སྔ་ཕྱི་མེད། རང་བཞིན་བཟང་ངན་མེད། འདུག་ས་ཐ་དད་མེད་པར་རིག་པ་རང་གསལ་གྱི་ལོངས་སྐུ་ངོ་བོ་ཐ་དད་ཀྱི་མཐའ་དང་བྲལ། སྣང་བ་ཅིར་ཡང་སྣང་། སྟོང་པ་ཅིར་ཡང་སྟོང་། རིག་པ་ཅིར་ཡང་རིག་པས་སྐུ་གསུམ་མཚན་ཉིད་མ་འདྲེས་ལ་ཡོངས་སུ་རྫོགས་པ་མཐའ་བྲལ་མཉམ་པ་ཉིད་དུ་ཉམས་སུ་མྱོང་བར་རང་ལུགས་རྩོལ་མེད་དུ་བཞག་པའི་ངང་ལས་མི་འདའ་བས་སོ་མ། གཉེན་པོ་མི་བརྟེན་པས་རང་བཏང་། དགག་སྒྲུབ་མེད་པར་ལྷུག་པ། དེ་ལྟར་བཞག་ཐབས་གསུམ་གྱི་ངང་དུ་ལྷོད་ཀྱིས་ཀློད་ལ་ཙེན་གྱིས་བཞག་གོ །ཞེས་དང་། ཐབས་འདིས་ཡབ་ཡུམ་གྱི་ལུས་ལྷ་སྐུ་སྒྱུ་མ་ལྟ་བུ་ལ། རང་གི་རྩ་འཁོར་རྟེན་གཞལ་ཡས་ཁང་དུ་བརྟེན་པ་ལྷ་ཡབ་ཡུམ་བླ་མ་བཀའ་བརྒྱུད་ཀྱི་ཚོགས་དང་བཅས་པ་ལ་བདེ་བ་ཆེན་པོའི་མཆོད་པ་རྒྱུན་མི་ཆད་པར་ཕུལ་བས་བསོད་ནམས་ཀྱི་ཚོགས་རྫོགས་ཤིང་། འཕེན་པའི་ལས་རླུང་ཚར་ཆོད་ནས་འབྱུང་བ་དྭངས་སྙིགས་ཕྱེད། རིག་པ་ཡེ་ཤེས་ཀྱི་རླུང་སྐུ་གསུམ་ལྷུན་གྲུབ་ཏུ་ངོ་འཕྲོད་ཡིད་ཆེས་ཐག་ཆོད་པས་ཡེ་ཤེས་ཀྱི་ཚོགས་རྫོགས། ཡིད་ཆེས་ཀྱི་ངང་དུ་དུས་རྒྱུན་ཆད་མེད་པར་གནས་པ་ནི་མི་ནུབ་པའི་རྒྱལ་མཚན་ཚུགས་པའོ། །ཞེས་དང་། ཡང་ཐིག་ལེ་གསང་བ་ནས་ཡར་དྲངས་ཏེ་ལྟེ་བར་བརྟན་པའི་ཚེ་རང་ལུས་བདེ་སྟོང་དུ་རྟོགས་པ་ཙམ་སྟེ། དགའ་བ་བཞི་ལས་དགའ་བའི་དགའ་བ། ལྷུན་གྲུབ་གསུམ་ལས་བདེ་ཉམས་ཤས་ཆེ་བས་རྣམ་པ་སྒྱུ་མ་ལྷུན་གྲུབ། ཐུག་ཕྲད་གསུམ་ལས། བཞི་པ་དང་པོའི་བདེ་བ་ཡིན་པས་སྤྲུལ་སྐུ་ཐུག་ཕྲད། སྐུ་གསུམ་ལས་བདེ་ཉམས་ཐམས་ཅད་ཀྱི་འཆར་གཞི་ཡིན་ཞིང་དེ་ལས་སྤྲུལ་པས་སྤྲུལ་སྐུའོ། །དེ་བཞིན་དུ། སྙིང་ཁར་བརྟན་པས་རང་དང་སྣང་བའི་དངོས་པོ་ཐམས་ཅད་བདེ་སྟོང་དུ་རྟོགས་པ་དེ་མཆོག་དགའི། བདེ་བའི་རང་བཞིན་སྟོང་པར་ཤར་བས་རང་བཞིན་སྤྲོས་བྲལ་ལྷུན་གྲུབ། སྟོང་པ་ཆོས་སྐུ་ཐུག་ཕྲད། བདེ་སྟོང་གི་ཉམས་དང་ལྡན་པས་ཆོས་སྐུ་སྤྲོས་བྲལ། མགྲིན་པར་བརྟན་པས་མྱང་འདས་ཀྱི་ཆོས་ཐམས་ཅད་བདེ་སྟོང་གཉིས་མེད་དུ་འཆར་བ་དེ་ལྷན་ཅིག་སྐྱེས་དགའི། བདེ་སྟོང་གཉིས་མེད་ཀྱི་ཉམས་ཤར་བས་མཚན་ཉིད་རང་རིག་ལྷུན་གྲུབ། གཉིས་མེད་དུ་ཤར་བས་ལོངས་སྐུ་ཐུག་ཕྲད། དེ་ལས་རིག་པ་རང་རིག་གི་མཚན་ཉིད་རང་གསལ་དུ་རྟོགས་ཤིང་རིག་པས་ལོངས་སྤྱོད་པས་ལོངས་སྐུ། སྤྱི་བོར་བརྟན་པའི་ཚེ་འཁོར་འདས་ཐམས་ཅད་ལ་ཁྱབ་པའི་བདེ་སྟོང་གཉིས་མེད་དགའ་བྲལ་གྱི་ཞེས དགའ་བྲལ་ཏེ། སྐུ་གསུམ་ལྷུན་གྲུབ་མ་འདྲེས་ཡོངས་རྫོགས་ལྷུན་གྱིས་གནས་པའི་བདེ་ཆེན་སྤྲོས་བྲལ་ནམ་མཁའ་ལྟ་བུ་སྨྲ་བསམ་བརྗོད་དུ་མེད་པ་བརྡ་ཐ་སྙད་ལས་འདས་པའི་སྐུ་དང་ཡེ་ཤེས་ཡིན་ནོ། །ཞེས་དང་། བདེ་སྟོང་གཉིས་མེད་ལྷན་ཅིག་སྐྱེས་པའི་ཡེ་ཤེས་དེ་ཉིད་ལ་བདེན་པར་བཟུང་ངམ་སྙམ་པར་མི་བྱ་སྟེ། སྡུག་བསྔལ་ཡོད་ཀྱི་བར་ལ་བདེ་སྟོང་ལྷན་ཅིག་སྐྱེས་པའི་ཡེ་ཤེས་ཞེས་བསྟན་གྱི། དེ་ཁོ་ན་ཉིད་ཀྱི་དོན་དུ་ན། སྡུག་བསྔལ་མཚན་མའི་དངོས་པོ་མ་གྲུབ་པས། བདེ་སྟོང་དབྱེར་མེད་དུའང་བདེན་པར་བཟུང་དུ་མེད་དོ། །སྨྲ་བསམ་བརྗོད་དུ་མེད་པ་མིང་དང་ཐ་སྙད་ཐམས་ཅད་ལས་འདས་པར་རིག་པར་བྱའོ། །ཞེས་སོགས། ཐབས་ལམ་པ་ཆེན་པོ་གྲགས་པ་ཤེས་རབ་ཀྱི་གསུངས། རྡོ་རྗེ་ལུས་ཀྱི་གནས་ལུགས། དེ་ལ་གནད་དུ་བསྣུན་པའི་མན་ངག་ལག་ཁྲིད། གེགས་སེལ་བོགས་འདོན། དྲོད་རྟགས་ཡོན་ཏན་བཞིའི་ཁོངས་སུ་བསྡུས་ཏེ་ཤིན་ཏུ་གསལ་རྒྱས་སུ་བཞུགས་པ་ཐབས་ལམ་ཚུལ་བཞིན་བསྟེེན་པའི་སྔགས་པ་ཚད་ལྡན་འདྲ་སྲིད་ན་ལྟ་རྟོག་ཐེམས་པ་ཅིས་ཀྱང་གལ་ཆེ་བར་མངོན་ནོ། །དེ་ལ་རྫོགས་ཆེན་གྱི་ཐོག་མའི་སྤྱི་གཞི་ནི། རིག་པ་རང་ཤར་གྱི་རྒྱུད་ལས། ང་མེད་པའི་སྔོན་རོལ་ན། གཞིའི་གནས་ལུགས་འདི་ལྟར་གནས་ཏེ། གཞི་ཀ་དག་ཆེན་པོ་ཞེས་བྱ་བ་ངོ་བོ་རང་བཞིན་ཐུགས་རྗེ་གསུམ་དུ་གནས་སོ། །ཞེས་སོགས། རྒྱ་ཆེར་གསུངས་པ་བཞིན། རྟོགས་ཏེ་སངས་རྒྱས་མ་བྱུང་བས་མྱང་འདས་སུ་རྒྱ་མ་ཆད། མ་རྟོགས་ཏེ་འཁྲུལ་པ་མ་བྱུང་བས་འཁོར་བར་ཕྱོགས་སུ་མ་ལྷུང་བའི་ཡེ་ཐོག་གཞིའི་སྐབས་སུ། གཞིའི་ཆོས་ཉིད་ངོ་བོ་སྟོང་པས་སྤྲོས་མཚན་ཀུན་བྲལ་ཀ་ནས་དག་པ། རང་བཞིན་གསལ་བས་ཆོས་ཀུན་གྱི་འབྱུང་གཞིར་ལྷུན་གྱིས་གྲུབ་པ། ཀུན་ཁྱབ་ཐུགས་རྗེའི་རང་རྩལ་མཁྱེན་ཆ་མ་འགགས་པར་འཆར་གཞིར་གནས་པ་ནི་གཞི་གནས་ཀྱི་ཡེ་ཤེས་གསུམ་སྟེ། དེ་ཉིད་རྟོགས་ན་མྱང་འདས་དང་། མ་རྟོགས་ན་འཁོར་བ་འབྱུང་རུང་གི་ཆར་གནས་པས་གཉིས་ཀའི་སྤྱི་གཞི་ལུང་མ་བསྟན་ཞེས་བྱ་སྟེ། སྒྲོན་མ་སྣང་བྱེད་ལས། སྔོན་བྱུང་ཐོག་མ་ཀ་དག་གཞི། །ངོ་བོ་རང་བཞིན་ཐུགས་རྗེ་ནི། །ཡེ་ཤེས་གསུམ་གྱི་བདག་ཉིད་དོ། །ཞེས་གསུངས་པས་འཁོར་འདས་ཀྱི་ཆོས་ཀུན་དེ་ལས་མ་གཡོས་པའོ། །དེ་ལས་འཁྲུལ་པ་ཇི་ལྟར་འབྱུང་སྙམ་ན་ལུང་སྔ་མའི་འཕྲོར། དེ་ལས་མ་ངེས་ལྷུན་གྲུབ་གཞི། །མ་རིག་གསུམ་དང་རྐྱེན་བཞི་དང་། །ཤེས་པ་སྦགས་པས་འཁྲུལ་པའོ། །ཞེས་གསུངས་པས། མ་རིག་པ་གསུམ་ནི། ཐོག་མའི་སྤྱི་གཞི་མཉམ་པ་ཆེན་པོའི་ངོ་བོ་མི་རྟོག་པའི་ཆ་དེ་རང་ངོ་མ་ཤེས་ན་འཁྲུལ་པ་འབྱུང་རུང་གི་ཆ་ཙམ་མ་འགགས་པ་དེ་ལ་རྒྱུ་བདག་ཉིད་གཅིག་པའི་མ་རིག་པ་ཞེས་བྱ་སྟེ་གཞི་མཉམ་པ་ཆེན་པོོ་ལས་མ་གཡོས་པའི་ཕྱིར་འདི་ལ་ཐོག་མ་བཞག་ཏུ་མེད་དེ། རྒྱུད་བླ་མར། ཐོག་མེད་གྱུར་ཀྱང་ཐ་མ་དང་ལྡན་པ། །ཞེས་གསུངས། དེ་ནས་ཀ་དག་སྟོང་པ་ཆེན་པོས་འཆར་གཞིའི་གོ་ཕྱེས་ཏེ། ལྷུན་གྲུབ་འོད་གསལ་གྱི་འཆར་ཆ་མ་འགགས་པའི་གདངས་དེ། ཐུགས་རྗེའི་རྩལ་བསྐྱོད་བྱེད་ཡེ་ཤེས་ཀྱི་རླུང་གིས་རྟ་བྱས་ཏེ། འཆར་ལུགས་དྲུག་སྒོ་གཉིས་དང་བརྒྱད་ཀྱི་ཆ་ནས་ལྷུན་གྲུབ་རིན་པོ་ཆེའི་སྣང་བ་ཞེས་བྱ་སྟེ་གཞི་སྣང་ཡེ་ཤེས་ཆེན་པོའི་བཀོད་པ་རང་ཤར་བའི་ཚེ། གཞི་གཞི་སྣང་གཉིས་ཀའི་ངོ་བོ་ལ་འཁྲུལ་པ་མེད་ཀྱང་། སྔར་གྱི་རྒྱུ་བདག་ཉིད་གཅིག་པའི་མ་རིག་པ་མ་སྤངས་མི་ལྡན་པའི་ཚུལ་གྱིས་ཡོད་པའི་དབང་གིས། རང་བཞིན་འོད་གསལ་གྱི་སྣང་ཆ་དེ་རང་རྩལ་དུ་མ་ཤེས་པ་ནི་སྣང་བ་དེ་དང་དུས་སྔ་ཕྱི་མེད་པར་བྱུང་བས་ལྷན་ཅིག་སྐྱེས་པའི་མ་རིག་པ་ཞེས་བྱ། དེའི་ཚེ་མ་ཤེས་པ་ཙམ་དུ་མི་སྡོད་པར་ཤེས་པ་སྤུན་པོ་ཕ་ཀི་ལས་བདག་བྱུང་ངམ། བདག་ལས་ཕ་ཀི་བྱུང་སྙམ་དུ་ཐུགས་རྗེ་རང་རིག་ཏུ་མ་ཤེས་པའི་གཟུང་འཛིན་གྱི་ཆ་ཤིན་ཏུ་ཕྲ་བ་བྱུང་བ་ནི་ཀུན་ཏུ་བརྟགས་པའི་མ་རིག་པ་ཞེས་བྱ་སྟེ། ཀུན་མཁྱེན་ཆོས་རྗེས་གཞི་སྣང་ཡེ་ཤེས་སྒྲོན་མེར། བདག་ཉིད་གཅིག་པ་ཡེ་ལྡན་གྱི་ཚུལ། ལྷན་ཅིག་སྐྱེས་པ་དུས་མཉམ་གྱི་ཚུལ། ཀུན་ཏུ་བརྟགས་པ་ཕྱིས་འབྱུང་གི་ཚུལ་དུ་རང་མ་རིག་པའི་ཆ་ལས་སོ་སོར་བཏགས་སོ། །ཞེས་གསུངས། རྐྱེན་བཞི་ནི་རྒྱུའི་རྐྱེན་མ་རིག་པ་གསུམ་མམ་ལྷན་ཅིག་སྐྱེས་པའི་མ་རིག་པས་རང་ངོ་མ་ཤེས་པ། དམིགས་པའི་རྐྱེན་འོད་སྣང་སོགས་སྣ་ཚོགས་སུ་སྣང་བ། བདག་པོའི་རྐྱེན་རང་སྣང་དུ་མ་ཤེས་ཏེ་གཞན་དུ་བཟུང་བས། དེ་མ་ཐག་རྐྱེན་གཟུང་འཛིན་གྱི་འཁྲུལ་པ་ཇེ་རགས་སུ་སོང་བས་རང་སྣང་ཡེ་ཤེས་ཉིད་བསྒྲིབས་ཏེ་འཁྲུལ་པའི་སྦུབས་སུ་ཆུད་དེ་འཁྲུལ་སྣང་མུ་མེད་པར་ཤར་བ་ཡིན་པས། ད་ལྟ་སེམས་གྱི་གཞི་རྩ་བཅད་དེ་འཁྲུལ་པ་འདི་གཞི་ལ་བཟློག་ནུས་ན། གཞི་ཆོས་ཉིད་རང་མལ་ནས་མ་གཡོས་པའི་གནད་ཀྱིས་འཁྲུལ་པའི་གཞི་རྩ་སྟོང་ཞིང་ཅིར་སྣང་ཡེ་ཤེས་ཆེན་པོའི་རོལ་པ་ལས་མ་འདས་པའི་ཕྱིར། ཇི་ལྟར་སྣང་ཡང་ངོ་བོ་ལ་མ་གྲོལ་བ་མེད་པས་བློས་ཕར་མི་གཟུང་། གང་ལྟར་རིག་ཀྱང་རྟོག་པ་ལ་ངོས་བཟུང་མེད་པས་རང་གྲོལ་འཛིན་པས་མི་བསླད་དེ་བློས་ཚུར་མི་མཐུད། སྣང་རིག་རང་གྲོལ་དུ་ཤར་བས་ཡིན་མིན་གྱི་རྩིས་གདབ་མེད་པའི་ངང་ལས་སོ་མར་གློད་པས། དེའི་ཚེ་ཡེ་གྲོལ་དུ་འདུག་པས་བསྐྱར་ནས་གྲོལ་རྒྱུ་མེད་པར་ངོ་ཤེས། རང་གྲོལ་དུ་འདུག་པས། གང་ཤར་སྤང་བླང་མི་དགོས་པར་ཡིད་ཆེས། ཡོངས་གྲོལ་དུ་འདུག་པས། རྗེས་བསྙག་གཉེན་པོ་མི་དགོས་པར་ཐག་ཆོད། ཅེར་གྲོལ་དུ་འདུག་པས་དུས་མཉམ་སྔ་ཕྱི་མེད་པར་གདེང་འཆོས་པ་སྟེ། དོན་ལ་དུས་གསུམ་གྱི་རྟོག་པ་སེམས་སེམས་བྱུང་ཐམས་ཅད་ཆོས་ཉིད་མཉམ་པ་ཆེན་པོར་གྲོལ་བའི་དུས་བཞི་མཉམ་པ་ཉིད་གནས་ལུགས་བཞི་ཆ་གསུམ་བྲལ་རང་བྱུང་ཡེ་ཤེས་ཉིད་མངོན་སུམ་དུ་རྟོགས་ཤིང་གོམས་པ་མཐར་ཕྱིན་པ་ན། དེ་དང་འཛིན་སྟངས་འགལ་བའི་ཀུན་བརྟགས་དང་ལྷན་སྐྱེས་ཀྱི་མ་རིག་པ་གཉིས་དངོས་སུ་བཅོམ་པའི་མཐུས། རྒྱུ་བདག་ཉིད་གཅིག་པའི་མ་རིག་པའང་ཤེས་བྱ་གཤིས་ལ་མ་ཞུགས་པས་སྣང་བས་མུན་པ་བཞིན་དུ་ཡུལ་ཕྱུང་ནས་ས་བོན་རྩ་སྟོང་དུ་སོང་བས། སེམས་སེམས་བྱུང་གི་རྒྱུ་བ་མཐའ་དག་ཐོག་མར་གང་ལས་བྱུང་བའི་གཞི་ཀ་དག་མཉམ་པ་ཆེན་པོར་ལྡོག་པའམ་ཐིམ་ནས་སླར་མི་སྐྱེ་བ་ས་བོན་མེས་ཚིག་པའམ་འབྲུམ་ནད་ལན་གཅིག་བྱང་བའི་སྐྱེས་བུ་བཞིན་དགོངས་པའི་བཙན་ས་ཟིན་པའོ། །དེ་ལྟར་གྲོལ་བ་རྣམས་ཀྱང་རྐྱེན་བཞིའི་དབང་གིས་ཏེ། རྒྱུའི་རྐྱེན་རིག་པ་རང་བྱུང་གི་ཡེ་ཤེས་རང་ལ་གསལ་བ། དམིགས་པའི་རྐྱེན་འོད་སྣང་སོགས་སྣ་ཚོགས་སུ་ཤར་བ། བདག་པོའི་རྐྱེན་དེ་ཉིད་རང་སྣང་དུ་ཤེས་པ། དེ་མ་ཐག་རྐྱེན་རང་བྱུང་ཡེ་ཤེས་ཆེན་པོ་དེས་མ་དག་འཁྲུལ་པའི་ས་བོན་གཏན་བཅོམ་དུ་སོང་ནས་གདོད་མའི་གཞི་དབྱིངས་ཀ་དག་གི་ཀློང་དུ་གྲོལ་བ་ལ་སྔ་ཕྱིར་གྲོལ་བ་དང་ད་ལྟ་དང་བར་དོ་སོགས་སུ་གྲོལ་བ་ལ་ཁྱད་མེད་དུ་གསུངས་ཏེ། ཐོད་རྒལ་གྱི་རྒྱབ་ཡིག་ཉི་ཟླ་གཟའ་སྐར་ལས། ཀུན་ཏུ་བཟང་པོའི་གྲོལ་ཚུལ་ནི། གཞི་སྣང་ཤར་བ་ངོ་ཤེས་པའི་སྐད་ཅིག་ལ་གདོད་མར་གྲོལ་ཏེ། དབྱིངས་དང་ཡེ་ཤེས་འདུ་འབྲལ་མེད་པ་ནང་གསལ་ཆོས་ཉིད་ཀྱི་དགོངས་པར་བཞུགས་པ་ནི། ངེས་དོན་འདུས་པའི་རྒྱུད་ལས། དེ་ཚེ་ཀུན་བཟང་ཆོས་དྲུག་གིས། །རང་ངོ་ཤེས་པས་གཞི་ལ་ཕྱིན། །ཅེས་པས། ཆོས་དྲུག་ནི། དབྱིངས་སྣང་ཤར་དུས། རྒྱུའི་རྐྱེན་ལྷན་ཅིག་སྐྱེས་པའི་རིག་པ། ཡུལ་གྱི་རྐྱེན་འོད་དང་སྐུར་སྣང་བ། མཚུངས་པ་དེ་མ་ཐག་པའི་རྐྱེན་སྣང་རིག་དུས་མཚུངས་པ་གསུམ་གྱི་ཚེ། རྒྱུ་ལས་མ་བྱུང་བའི་འབྲས་བུ་ཡེ་ནས་རང་རིག་པ་སངས་རྒྱས་སུ་གྲུབ་པ། སེམས་ལས་མ་བྱུང་བའི་སངས་རྒྱས་རིག་པ་ཡེ་ཤེས་སུ་སྣང་བ། ལུང་ལས་མ་བྱུང་བའི་མན་ངག་རང་གིས་རིག་པས་སངས་རྒྱས་སོ། །འདི་ལྟ་བུའི་ཡེ་ཐོག་དང་པོར་བྱུང་བ་ནི་འཁོར་འདས་སྤྱིའི་དཔལ་དམ་པ་ཀུན་ཏུ་བཟང་པོ་ཡིན་ལ། དབྱིངས་སྣང་ལས་གྲོལ་བ་ཐམས་ཅད་ཀྱང་ཡིན་ལ། ཁྱད་པར་བར་དོའི་གཞི་སྣང་ཤར་བ་ལ་གྲོལ་ཚད་ལུགས་འདི་ཡིན་ནོ། །ཞེས་གསུངས། དེ་ཕན་ཅིར་སྣང་ཡེ་ཤེས་ཆེན་པོའི་དགོངས་པ་ལས་མི་གཡོ་བ་རིན་ཆེན་གསེར་གླིང་དུ་ཕྱིན་པ་ལྟ་བུའོ། །དེ་ལྟར་གདོད་མའི་སྤྱི་གཞི་ལས་གྲོལ་འཁྲུལ་གྱི་སྒོ་ཇི་ལྟར་འབྱུང་ཚུལ་ཡང་། ད་ལྟའི་གཉིད་དང་འཆི་བའི་འོད་གསལ་འདི་ཉིད་ཀྱིས་མཚོན་ནུས་ཏེ། གཉིད་ཀྱི་སྐབས། སྒོ་ལྔ་ཉོན་ཡིད་དང་བཅས་པ་ཡིད་ཤེས་ལ་ཐིམ། ཡིད་ཤེས་ཀུན་གཞིའི་རྣམ་ཤེས་ལ། དེ་ཀུན་གཞི་རྟོག་མེད་ལ། དེ་ཆོས་དབྱིངས་སུ་ཐིམ་པས་ཕྲ་རགས་ཀྱི་འཛིན་པ་ནུབ་ལ་སྟོང་གསལ་སྤྲོས་པ་དང་བྲལ་བའི་ཆོས་ཉིད་འཆར་བས་དེ་ངོས་ཟིན་ན་འཁྲུལ་པར་ཟློག་སྟེ། གསང་བ་རིན་པོ་ཆེའི་རྒྱུད་ལས། ཚོགས་བདུན་ཀུན་གཞིའི་རྣམ་ཤེས་སུ། །ཐིམ་པས་ཀུན་གཞི་དབྱིངས་སུ་དག །དེ་ཚེ་གདོད་མའི་ལྷན་ཅིག་སྐྱེས། །སྟོང་གསལ་རང་བྱུང་ཡེ་ཤེས་སོ། །དེ་ཉིད་རྣལ་འབྱོར་པས་ཤེས་བྱ། །ཞེས་གསུངས། དེ་ལས་སླར་མཆེད་པའི་ཚེ། ཆོས་དབྱིངས་ལས་ཀུན་གཞི། དེ་ལས་ཀུན་གཞིའི་རྣམ་ཤེས། དེ་ལས་ཡིད་ཤེས་གཅིག་པུ་ལངས་པས་རྨི་ལམ་འཆར་བ་དང་། དབང་པོ་སོ་སོར་བརྟེན་པའི་རྩར་རླུང་ཞུགས་པས་གཉིད་སད་དེ་ཉིན་སྣང་གི་ཡུལ་ལ་གཟུང་འཛིན་རགས་པ་འཆར་བར་ཤིང་རྟ་ཆེན་མོར་གསུངས། འདིས་གྲོལ་འཁྲུལ་དང་ཁྱད་པར་སེམས་ཕྲ་བ་ནས་རིམ་གྱིས་མཆེད་ཚུལ་མཚོན། དེ་བཞིན་ཆོས་དྲུག་པ་རྣམས། སེམས་ཅན་རྣམས་འཆི་བའི་ཚེ་ས་ཆུ་མེ་རླུང་རྣམས་རིམ་པས་ཐིམ་མཐར། རླུང་རྣམ་ཤེས་ལ་ཐིམ་སྟེ། ཕྱི་དབུགས་ཆད་པའི་བར་རགས་པ་ཐིམ་པ་དང་། དེ་ནས་ནང་དབུགས་གནས་པའི་དང་པོར། རྟོག་པ་ཐིམ་པའི་རིམ་པ་ཕྱི་རྟགས་ཟླ་བ། ནང་རྟགས་དུ་བ། ༡ སྣང་བའི་སྐབས། དེ་མཆེད་པ་ལ་ཐིམ། ཞེ་སྡང་གི་རྟོག་པ་སོ་གསུམ་འགག ཕྱི་རྟགས་ཉི་མ། ནང་རྟགས་མེ་ཁྱེར། ༢ མཆེད་པའི་སྐབས་དེ་སྣང་བ་ཉེར་ཐོབ་ལ་ཐིམ། འདོད་ཆགས་ཀྱི་རྟོག་པ་བཞི་བཅུ་འགག ཕྱི་རྟགས་ནག་ལམ་སྒྲ་ག ཅན་གྱི་སྣང་བ། ནང་རྟགས་བུམ་ནང་གི་མར་མེ། ༣ སྣང་བ་ཉེར་ཐོབ་དེ་འོད་གསལ་ལ་ཐིམ། གཏི་མུག་གི་རྟོག་པ་བདུན་འགག ཕྲ་བ་ཐིམ། ཕྱི་རྟགས་སྐྱ་རེངས་ཤར་བ་ལྟ་བུ། ནང་རྟགས་སྟོན་གནམ་དྲི་མེད། ༤ བཞི་པ་འོད་གསལ་དེ་འཆི་སྲིད་ཀྱི་དངོས་གཞིར་བཞེད་ཅིང་། དེ་ངོས་ཟིན་པ་རྣམས་འོད་གསལ་དེ་ལ་ཇི་ཙམ་འདོད་པར་གནས་ཤིང་། དེ་ནས་ཟུང་འཇུག་གི་སྐུར་ལངས་པར་བཞེད་པས་འདིས་གྲོལ་ཚུལ་དང་། ངོ་མ་ཤེས་པ་རྣམས་དེ་ལས་རིམ་པར་ལུགས་བཟློག་ཏུ། གཏི་མུག་གི་རྟོག་པ་བདུན་ལངས། ཉེར་ཐོབ་ཤར། དེ་ནས་འདོད་ཆགས་ཀྱི་རྟོག་པ་བཞི་བཅུ་ལངས། མཆེད་པ་ཤར། དེ་ནས་ཞེ་སྡང་གི་རྟོག་པ་སོ་གསུམ་ལངས། སྣང་བ་ཤར། དེ་ནས་ཁྱབ་བྱེད་ཀྱི་རླུང་གིས་འདུ་བྱས་ཏེ་རྣམ་པར་ཤེས་པ་སྔར་གྱི་ཕུང་པོ་རྙིང་པའི་སྒོ་དགུ་གང་རུང་གི་ལམ་ལས་འཕོས་ནས་བར་དོའི་སྲིད་པ་འགྲུབ་པར་གསུངས་ཏེ་འདིས་ཐོག་མའི་འཁྲུལ་ཚུལ་མཚོན་ནུས། ཁྱད་པར་ཐུན་མིན་རྫོགས་ཆེན་སྐབས། རྣམ་ཤེས་ནམ་མཁའ། ནམ་མཁའ་འོད་གསལ། འོད་གསལ་ཟུང་འཇུག་ལ་ཐིམ་པའི་སྐབས་སོགས་སུ་རང་སྣང་ལོངས་སྐུའི་སྣང་བ། རིགས་ལྔའི་ཚོམ་བུ། ཡེ་ཤེས་བཞི་སྦྱོར། ལྷུན་གྲུབ་སྒོ་བརྒྱད་སོགས་ཆོས་ཉིད་བར་དོའི་སྣང་བ་རྣམས་འཆར་ཚུལ་དང་། ལམ་གོམས་སྟོབས་དང་བསྟུན་རིམ་པར་གྲོལ་ཚུལ་སོགས་སྙན་བརྒྱུད་སྐོར་གསུམ་སོགས་ཀུན་མཁྱེན་བླ་མའི་གསུངས་ལས་ཤེས་པར་བྱ་བ་ཁོ་ན་སྟེ། དོན་ལ་གདོད་མའི་གཞི་སྣང་སྐབས་གྲོལ་བ་དང་། ཆོས་ཉིད་བར་དོའི་སྐབས་རང་སྣང་དུ་ངོ་ཤེས་པ་ལ་ཁྱད་མེད་དེ་གཉིས་ཀ་གཞི་ཀ་དག་གི་གྲོལ་སར་སྔ་ཕྱི་ཁྱད་མེད་པའི་གནད་ཀྱིས་སོ། །མདོར་ན་སེམས་ཅན་རིས་བཅད་ཅན་གྱི་བློ་ངོར་འཁྲུལ་པའི་སྣང་བ་འདི་དོན་ལ་མེད་ཀྱང་རྨི་ལམ་བཞིན་དུས་གློ་བུར་དུ་བྱུང་ཞིང་མཐར་གཞི་མེད་དུ་དྭངས་ཙམ་ལ་འཁྲུལ་གྲོལ་གྱི་ཐ་སྙད་བཏགས་པ་ཡིན་གྱི། གཞན་དུ་དངོས་སྨྲ་བའི་འདོད་པ་ལྟར་ཐོག་མའི་སྤྱི་གཅིག་ལས་འཁྲུལ་ཞིང་སླར་དེར་ཐིམ་པ་ལྟ་བུའི་དངོས་པོ་རང་རྒྱུད་པར་གྲུབ་པ་ནི་ཅིའང་མེད་དེ། རྗེ་བཙུན་བྱམས་མགོན་གྱིས། འཁོར་བ་དང་ནི་མྱ་ངན་འདས། །གཉིས་འདི་གློ་བུར་བྱུང་བ་སྟེ། །ཞེས་དང་། དེ་ཕྱིར་ཐར་པ་ནོར་ཙམ་ཟད་པའོ། །ཞེས་དང་། ཀླུས། གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱངས་པར་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་དེ་ཡིན་ནོ། །ཞེས་གསུངས་པ་དང་མཐུན། དོན་ལ་རིག་པ་ཡེ་ཤེས་ངོ་མ་ཤེས་ཏེ་འཁྲུལ་པས་མ་རིག་པ་ནས་རྒ་ཤིའི་བར་གྱི་རྟེན་འབྲེལ་བཅུ་གཉིས་ལུགས་འབྱུང་དུ་བྱུང་ཡང་། རྩ་བ་རིག་པའི་ཡེ་ཤེས་ངོས་ཟིན་པའི་སྐད་ཅིག་ལ་མ་རིག་པ་ཡུལ་ཕྱུང་། འདུ་བྱེད་རྩ་བ་སྟོང་། སྡུག་བསྔལ་རབ་ཆད་ནས་ལུགས་བཟློག་སྟོང་པ་བཅུ་གཉིས་སུ་ཤར་ནས་སྲིད་པའི་ས་བོན་སྟོང་པར་ཤེས་པར་བྱ་བ་གལ་ཆེའོ། །དེ་ལྟར་འཁྲུལ་གྲོལ་སོགས་ཀྱི་རྣམ་བཞག་ཀུན་འཐད་པ་ནི་ཆོས་ཉིད་ཅི་ཡང་མ་ཡིན་པ་ལས་ཅི་ཡང་འཆར་ཤེས་པ་ཟུང་འཇུག་མཉམ་པ་ཆེན་པོའི་གནད་ཀྱིས་ཏེ་རིགས་པའི་རྒྱལ་པོ་རྟེན་འབྲེལ་གྱི་རིགས་པས་གཞལ་ན་ངེས་ཤེས་སྐྱེ་བར་འགྱུར་གྱི། གཞན་དག་འགལ་བར་འཛིན་པ་རྣམས་ཀྱིས་ནི་རིགས་པའི་རྒྱལ་པོ་འདིའི་ཟབ་གནད་གར་སོང་གི་རྗེས་མགོ་ཙམ་ཡང་མ་རྙེད་པའི་རྣམ་འགྱུར་རོ། །དེས་ན་རིག་པ་ཡེ་ཤེས་ལ་བདག་ཏུ་བཟུང་བའི་དབང་གིས་འཁྲུལ་སེམས་གཟུང་འཛིན་འདི་གློ་བུར་བྱུང་ཞིང་མཐར་རིག་པ་ཡེ་ཤེས་ཀྱི་སྟོབས་ཀྱིས་རང་སར་འགག་པར་བྱེད་པས་ན། ཡེ་ཤེས་ཀྱི་རྩལ་ལ་བདག་ཏུ་བཟུང་བས་སེམས་བྱུང་གིས་སེམས་ལས་ཡེ་ཤེས་གསར་དུ་བྱུང་བ་ནི་མ་ཡིན་ཏེ། ཀུན་གསལ་ལས། སེམས་ནི་ཡེ་ཤེས་རྩལ་ཡིན་ཏེ། །སེམས་ཀྱི་གཞི་མ་ཡེ་ཤེས་ཡིན། །ཞེས་གསུངས། དེས་ན་ད་ལྟའི་སེམས་ཀྱི་ཆོས་ཉིད་དམ་རང་བཞིན་རྟོགས་ན་རང་བྱུང་ཡེ་ཤེས་དེ་ཡིན་པས་གཞན་དུ་བཙལ་མི་དགོས་ཏེ། རྒྱུད་ལས། ཉོན་མོངས་ཡེ་ཤེས་དབྱེར་མི་ཕྱེད། །མ་ཤེས་པ་ལ་ཁམས་གསུམ་སྟེ། །དེ་ཤེས་པ་ལ་སྐུ་གསུམ་ཀློང་། །ཡེ་ནས་ཡིན་པས་བཙལ་མི་དགོས། །ཞེས་དང་། ཏིང་འཛིན་རྒྱལ་པོ་ལས། སེམས་ཀྱི་རང་བཞིན་ཤེས་པས་ནི། །ཕྱིར་ཡང་ཡེ་ཤེས་འབྱུང་བར་འགྱུར། །ཞེས་གསུངས། དེ་རྣལ་འབྱོར་པས་ཇི་ལྟར་རྟོགས་པའི་ཚད་ཀྱང་། ས་ཆེན་གྱིས་དབང་བཞི་ངོ་སྤྲོད་དུ། རང་བྱུང་ཡེ་ཤེས་སྐྱེས་པ་ལ། །རྟོག་པ་ཀུན་ཀྱང་ཡེ་ཤེས་སུ། །ངོ་བོ་ཉིད་ཀྱིས་འཆར་བ་ཡིན། །ཞེས་དང་། རྗེ་མི་ལས། རྣམ་ཤེས་མ་མཐོང་ཡེ་ཤེས་མཐོང་། །ཞེས་སོགས་གསུངས་པ་བཞིན་ཏེ་ཆོས་ཉིད་ཀྱི་བདེན་པ་གཟིགས་པ་རྣམས་དོན་གྱི་དགོངས་པ་གཅིག་པར་ཤེས་པར་བྱའོ། །དེའི་ཕྱིར་ཐེག་པ་དང་གྲུབ་མཐའ་ཐམས་ཅད་ཀྱི་མཐར་ཐུག་གི་དགོངས་པའི་སྐྱེལ་སོ་རང་བཞིན་རྫོགས་པ་ཆེན་པོ་ཡིན་པས་དེ་ཉིད་ཀྱི་དགོངས་པ་སྒྲ་ཇི་བཞིན་པ་ནི། རང་བྱུང་བདེ་བ་འཁོར་ལོའི་རྒྱུད་ལས། སེམས་ལས་མ་བྱུང་སངས་རྒྱས་རྙེད། །རྒྱུ་ལས་མ་བྱུང་འབྲས་བུ་རྟོགས། །ལུང་ལས་མ་བསྟན་ཆོས་རྣམས་ཤེས། །ཐེག་དགུའི་ཆོས་རྣམས་དེ་ལས་མེད། །དུག་ལྔ་མྱ་ངན་འདས་པར་དག །ཐུགས་ཀྱི་ཀློང་རྡོལ་ཆོས་ཀྱི་སྐུ། །ཞེས་གསུངས་པས། སེམས་ལས་མ་བྱུང་བའི་སངས་རྒྱས། རྒྱུ་ལས་མ་བྱུང་བའི་འབྲས་བུ། ལུང་ལས་མ་བྱུང་བའི་གདམས་ངག་སྟེ་ཆེ་བ་གསུམ་གྱིས་རྩོལ་བཅས་ཀྱི་ཐེག་པ་ཀུན་ལས་འཕགས་སོ། །དེ་ཡང་ཆོས་ཐམས་ཅད་རང་བྱུང་གི་ཡེ་ཤེས་སུ་ཡེ་ནས་སངས་རྒྱས་ཤིང་དུས་གསུམ་འཕོ་འགྱུར་མེད་པར་ཡེ་ནས་གནས་པའི་ཕྱིར། ཡུལ་ཡུལ་ཅན་མེད་པར་སྣང་སྲིད་ཆོས་སྐུར་སངས་རྒྱས་པས། ཐེག་པ་གཞན་དག་སེམས་ལས་སངས་རྒྱས་འབྱུང་བར་འདོད་དེ་འབད་རྩོལ་གྱིས་སྒྲུབ་པ་ལས་དཔགས་པའི་ཆེ་བ་ནི། ངེས་དོན་འདུས་རྒྱུད་ལས། སེམས་ལས་མ་བྱུང་སངས་རྒྱས་ནི། །རང་བྱུང་ཡེ་ཤེས་ཆོས་སྐུ་དེ། །སངས་རྒྱས་ཀུན་གྱི་ངེས་པའི་དོན། །རྣལ་འབྱོར་ཀུན་གྱི་དམ་པའི་ལམ། །ཐམས་ཅད་མཁྱེན་པའི་ཡེ་ཤེས་མཆོག །ཅེས་དང་། ཐོག་མཐའ་ཆོད་ན་དུས་གསུམ་གཅིག །ཆོས་སྐུ་གཅིག་ཕྱིར་འཕོ་འགྱུར་མེད། །སྔ་ཕྱི་མེད་པར་རང་བྱུང་སྐུ། །སེམས་ལས་མ་བྱུང་སངས་རྒྱས་ཡིན། །ཞེས་དང་། ཚོགས་བསགས་སྒྲིབ་སྦྱངས་ཀུན་བཏགས་པའི། །སེམས་བྲལ་རང་བྱུང་ཆོས་ཀྱི་སྐུ། །སེམས་ལས་མ་བྱུང་སངས་རྒྱས་འདི། །ཐེག་པ་ཀུན་ལས་ཁྱད་པར་འཕགས། །ཞེས་དང་། ལ་ཤན་ལས། རྣམ་པ་ཀུན་ལྡན་སྟོང་ཆེན་པ། །སངས་རྒྱས་བས་ཀྱང་སྔར་སངས་རྒྱས། །ཞེས་སོ། །དེ་ལྟར་ཆོས་ཀུན་རང་བྱུང་ཡེ་ཤེས་སུ་ཡེ་ནས་སངས་རྒྱས་པ་དེ་ཉིད། རྒྱུ་ལས་མ་བྱུང་། རྐྱེན་གྱིས་མ་བསྐྱེད། གཉེན་པོས་མ་བཅོས་པར། འདུས་མ་བྱས་ཀྱི་ཡོན་ཏན་མངོན་དུ་རྟོགས་ཤིང་སངས་རྒྱས་ཀྱི་ཆེ་བའང་། མདོ་བཅུ་ལས། རྒྱུ་ལས་མ་བྱུང་འབྲས་བུ་ནི། །བྱང་ཆུབ་སེམས་ཀྱི་འབྲས་བུ་སྟེ། །རྒྱུ་ལས་མ་བྱུང་འབྲས་བུ་ཡིན། །ཞེས་དང་། ངེས་དོན་འདུས་པ་ལས། རང་བྱུང་ཡེ་ཤེས་རྒྱུས་མ་བསྐྱེད། །རྐྱེན་མེད་རང་གསལ་རྒྱུན་མི་ཆད། །གཉེན་པོ་རྐྱེན་གྱིས་བཅོས་སུ་མེད། །རྒྱུ་ལས་མ་བྱུང་འབྲས་བུ་ཡིན། །ཞེས་དང་། སྐྱེ་མེད་རང་བྱུང་དོན་རྟོགས་ན། །ཚོགས་གཉིས་མ་བསགས་ཁྱད་པར་འཕགས། །དེ་ཕྱིར་ཚོགས་སོག་རྩེད་མོ་འདྲ། །ཞེས་སོ། །དེ་ཡང་ཀུན་ཏུ་བཟང་པོ་དགེ་བ་སྤུ་ཙམ་མ་བྱས་པར་སངས་རྒྱས་ཞེས་བརྗོད་ཀྱང་ལེགས་པར་བརྟགས་ན། ཟག་མེད་རང་ངོ་ཤེས་པ་དེ་འདུས་བྱས་ཀྱི་དགེ་རྩ་གང་གིས་ཀྱང་མི་མཚོན་ཞིང་ཐམས་ཅད་ཀྱང་དེ་རྟོགས་པའི་ཐབས་འབའ་ཞིག་ཏུ་ཟད་པས། དོན་ལ་སྒྲིབ་གཉིས་མ་སྤངས་ཡེ་སངས། ཚོགས་གཉིས་མ་བསགས་ཡེ་རྫོགས་སུ་གྱུར་པར་ཀུན་མཁྱེན་ཆོས་ཀྱི་རྒྱལ་པོ་དང་རྟོགས་ལྡན་ཤཱཀ་རྡོར་སོགས་བཞེད་ཅིང་། ཆོས་མངོན་པ་ལས་ཀྱང་། སྙིང་པོའི་རང་བཞིན་ལ་དོན་དམ་པའི་དགེ་བ་དང་ཡོད་པའི་དགེ་བ་ཞེས་བཤད། དེ་ལྟར་ཆོས་ཀུན་རང་བྱུང་ཡེ་ཤེས་སུ་སངས་རྒྱས་ཤིང་ཅིར་སྣང་ཆོས་ཉིད་ཅེར་མཐོང་ཡིན་པས་ཚིག་དང་རྟོག་དཔྱོད་མ་ཡིན་པར་སྣང་བ་གང་སྣང་འདིས་རིག་པའི་རང་ངོ་བསྟན་ནས་རྟོགས་ཏེ་ཉམས་སུ་མྱོང་བའི་ཆེ་བའང་། མདོ་བཅུ་ལས། ལུང་ལས་མ་བྱུང་གདམས་ངག་ནི། །ཆོས་ཉིད་བྱང་ཆུབ་སེམས་ཀྱི་དོན། །སྤྲུལ་པ་གང་ཟག་སྐལ་ལྡན་གྱིས། །ཅི་ལྟར་རྟོགས་ཤིང་རིག་པ་དེ། །ལུང་ལས་མ་བྱུང་གདམས་ངག་ཡིན། །ཞེས་དང་། ངེས་དོན་འདུས་པ་ལས། ཡེ་ནས་རིག་པ་རང་ལ་ཤར། །དུས་དེ་ཉིད་དུ་མ་རིག་སངས། །དེ་ཕྱིར་ལུང་ལས་མ་བྱུང་བའི། །ངེས་དོན་སྙིང་པོའི་ཆོས་ཞེས་བྱ། །ཞེས་གསུངས། དེ་ཡང་རང་བྱུང་ཡེ་ཤེས་ཉིད་ཕྱི་འབྱུང་བ་ལྔ་དང་འདོད་ཡོན་ལྔ་ལ་སོགས་པར་སྣང་ཞིང་རང་གི་ཡེ་ཤེས་མངོན་སུམ་དུ་ཕྱུང་ནས་ཚིག་དང་ཡི་གེ་མ་ཡིན་པར་དོན་མངོན་སུམ་དུ་ངོ་སྤྲོད་ཅིང་གཉིས་སུ་མེད་པར་གཏན་ལ་འབེབས་ཏེ། ངེས་དོན་འདུས་པ་ལས། སྣང་བ་ཆོས་དབྱིངས་བླ་མ་ནི། །འབྱུང་ཆེན་ལྔ་ཡི་བླ་མ་སྟེ། །འདོད་ཡོན་ལྔ་སོགས་ཆོས་རྣམས་ནི། །ཚིག་དང་ཡི་གེས་མི་མཚོན་པར། །ལྡེམ་དགོངས་རང་གི་ངོ་བོ་ནི། །སྣང་བ་ཆོས་ཀྱི་དབྱིངས་སུ་བསྟན། །ཞེས་དང་། ཀློང་ཆེན་ལས། སྟོང་པ་བས་ཀྱང་སྣང་བ་གཙོ། །སྣང་བ་རང་ཤར་ངེས་མེད་ཀྱིས། །སྟོང་པ་འཛིན་མེད་གཏན་ལ་འབེབས། །གཉིས་མེད་ཀློང་དུ་ཐག་ཆོད་པས། །རང་སར་གྲོལ་བར་ཡིད་ཀྱང་ཆེས། །ཞེས་དང་། ཀུན་བྱེད་ལས། བྱང་ཆུབ་སེམས་ཀྱི་ཡེ་ཤེས་དེ། །སྟོན་པ་ས་ཡི་སྐུར་བྱུང་ནས། །ཚིག་དང་ཡི་གེས་མི་མཚོན་ཏེ། །རང་གི་རང་བཞིན་སྟོན་བྱེད་པ། །བདག་ཏུ་མི་རྟོག་གཞན་མི་རྟོག །མི་རྟོག་མཉམ་པའི་དངོས་པོ་སྟོན། །ཁམས་གསུམ་སེམས་ཅན་ཐམས་ཅད་ཀྱིས། །དེ་རྟོགས་སངས་རྒྱས་ཀུན་དང་མཉམ། །ཞེས་སོགས་འབྱུང་ལྔས་ཆོས་སྟོན་ཅིང་རང་གི་ངོ་བོས་གཏན་ལ་འབེབས་པར་གསུངས་པ་དང་། ཁྱད་པར་ནང་ཉོན་མོངས་སོགས་སུ་རང་བྱུང་ཡེ་ཤེས་ཉིད་མངོན་དུ་སྣང་ནས་གཉིས་སུ་མེད་པར་ངོ་སྤྲོད་ཅིང་རང་གྲོལ་དུ་གཏན་ལ་འབེབས་ཏེ། སེམས་ཅན་སངས་རྒྱས། སྡུག་བསྔལ་བདེ་ཆེན། ཉོན་མོངས་ཡེ་ཤེས་སུ་ངོ་སྤྲོད་ཅིང་གཏན་ལ་འབེབས་པ་ནི། ཀློང་ཆེན་ལས། སངས་རྒྱས་བས་ཀྱང་སེམས་ཅན་གཙོ། །སེམས་ཅན་དངོས་སུ་མཐོང་བ་ཡིས། །དངོས་མེད་སངས་རྒྱས་གཏན་ལ་འབེབས། །གཉིས་མེད་ཀློང་དུ་ཐག་ཆོད་པས། །རང་སར་གྲོལ་བར་ཡིད་ཀྱང་ཆེས། །ཞེས་དང་། བདེ་ཆེན་བས་ཀྱང་སྡུག་བསྔལ་གཙོ། །སྡུག་བསྔལ་ཞེན་ཆགས་མཚན་མ་ཡིས། །བདེ་ཆེན་ཆགས་མེད་གཏན་ལ་འབེབས། །གཉིས་སུ་མེད་པར་ཐག་ཆོད་པས། །རང་སར་གྲོལ་བར་ཡིད་ཀྱང་ཆེས། །ཞེས་དང་། ཡེ་ཤེས་བས་ཀྱང་ཉོན་མོངས་གཙོ། །ཉོན་མོངས་འཆིང་བའི་ཞགས་པ་ཡིས། །རང་བྱུང་ཡེ་ཤེས་གཏན་ལ་འབེབས། །ཉོན་མོངས་ཡེ་ཤེས་དབྱེར་མེད་དེ། །གཉིས་མེད་ཀློང་དུ་ཐག་ཆོད་པས། །རང་སར་གྲོལ་བར་ཡིད་ཀྱང་ཆེས། །ཞེས་དང་། ནམ་མཁའ་ཀློང་ཡངས་ལས། དུག་ལྔ་སྤངས་པའི་ཕ་རོལ་ན། །སངས་རྒྱས་བྱ་བའི་མིང་ཡང་མེད། །དེ་ཉིད་རྟོགས་ན་སངས་རྒྱས་ཡིན། །ནོར་བུ་རིན་ཆེན་རྙེད་པའི་མི། །འཇིག་རྟེན་སོ་ནམ་མི་དགོས་བཞིན། །མ་སྒོམ་སེམས་ཀྱི་དོན་རྟོགས་ན། །དེ་ལས་མི་འདའ་དམ་ཚིག་ཡིན། །ཞེས་གསུངས། དེས་ན་ད་ལྟའི་རིག་པ་རང་བྱུང་གི་ཡེ་ཤེས་གཤིས་གང་དུའང་མ་གྲུབ་ལ་གདངས་འཆར་ཚུལ་མི་འགགས་པ། ངོ་བོ་སྟོང་། རང་བཞིན་གསལ། ཐུགས་རྗེ་འགགས་མེད་ཀུན་ཁྱབ་ཀྱི་ཆོས་ཉིད་ཡེ་སངས་རྒྱས་པའི་དགོངས་པ་ཡེ་ནས་གནས་པའི་དོན་འདི་ལ་ངོ་བོ་སྟོང་པའི་ངོས་ནས་གཞལ་ན། འཁོར་བ་དང་མྱང་འདས། བཅིང་བ་དང་གྲོལ་བ། བླང་བྱ་དང་དོར་བྱ། ཉོན་མོངས་དང་ཡེ་ཤེས། མཐའ་དབུས་དང་ཕྱོགས་ཆ་སོགས་གཉིས་ཆོས་ཀྱི་སྤྲོས་པ་ཐམས་ཅད་དང་བྲལ་བས་མཐའ་བྲལ་ཙམ་དུའང་བཞག་ཏུ་མེད་པའི་ཕྱིར་གང་བསལ་བར་བྱ་བ་ལས་ཉོན་སྡུག་བསྔལ་སོགས་ཤེས་བྱ་ལ་མ་གྲུབ་ཅིང་མི་སྲིད་པས་ཅི་ཡང་མེད་དེ། ཡི་གེ་མེད་པའི་རྒྱུད་ལས། རང་བྱུང་གི་ཡེ་ཤེས་ལ་དཔྱད་པའི་ཡུལ་མེད་དོ། །སྔར་འདས་པ་མེད་དོ། །ཕྱིས་འབྱུང་བ་མེད་དོ། །ད་ལྟ་སྣང་བ་མེད་དོ། །ལས་མེད་དོ། །བག་ཆགས་མེད་དོ། །མ་རིག་པ་མེད་དོ། །སེམས་མེད་དོ། །ཤེས་རབ་མེད་དོ། །འཁོར་བ་མེད་དོ། །མྱ་ངན་ལས་འདས་པ་མེད་དོ། །རིག་པ་ཉིད་ཀྱང་ཡོད་པ་མ་ཡིན་ཏེ། ཡེ་ཤེས་སུ་སྣང་བ་གང་ཡང་མེད་དོ། །ཞེས་གསུངས། རང་བཞིན་འོད་གསལ་གྱི་ངོས་ནས་སྐུ་དང་ཡེ་ཤེས་སོགས་སངས་རྒྱས་ཀྱི་ཆོས་རྒྱ་མཚོ་ལྟ་བུ་དང་། ཐུགས་རྗེའི་ངོས་ནས་མཁྱེན་ཆ་མ་འགགས་པར་ཡེ་ནས་ལྷུན་གྲུབ་ཏུ་གནས་པས་ད་གསར་དུ་སྒྲུབ་ཅིང་བཞག་པར་བྱ་བའང་ཅུང་ཟད་མེད་དེ། རྒྱུད་ཉི་ཟླ་ཁ་སྦྱོར་ལས། རང་བཞིན་གྱི་སྣང་བ་ལས་ནི་སྐུ་ལྔ་དང་། རིགས་ལྔ་དང་། ཡེ་ཤེས་ལྔ་དང་། རླུང་ལྔ་དང་། ཤེས་རབ་ལྔ་དང་། འོད་ལྔར་ཡེ་ནས་ཤར་རོ། །ཞེས་དང་། ཐུགས་རྗེ་རིག་པའི་ཆ་ནས་ཐམས་ཅད་མཁྱེན་པ་དང་། རྣམ་པ་ཐམས་ཅད་མཁྱེན་པའི་ཡེ་ཤེས་སུ་གནས་སོ། །ཞེས་གསུངས། དེ་དག་ཀྱང་སོ་སོ་མ་ཡིན། གཅིག་པ་མ་ཡིན། གྲུབ་མཐའི་རྟོག་དཔྱོད་དང་། ཞེན་པའི་ཡུལ་དང་། ཡིད་དཔྱོད་ཀྱི་ཡུལ་ལས་འདས་པའི་རང་བཞིན་མཐའ་གྲོལ་ཀློང་ཡངས་ཆེན་པོར་ཡེ་ནས་གནས་སོ། །དེའི་ཕྱིར་སློབ་དཔོན་འཇམ་དཔལ་བཤེས་གཉེན་གྱི་དགོངས་པ་གཤིན་རྗེའི་རྫོགས་རིམ་སེམས་ཕྱོགས་མན་ངག་སྙན་བརྒྱུད་མར། འཁྲུལ་མ་འཁྲུལ་མེད་པར་གནས་ལུགས་ཡིན། རྟོགས་མ་རྟོགས་མེད་པར་གནས་ལུགས་ཡིན། བསྒོམས་མ་སྒོམ་མེད་པར་གནས་ལུགས་ཡིན་ཏེ། འཁྲུལ་མ་འཁྲུལ་གཉིས་བྱུང་ན་གནས་ལུགས་གཞན་དབང་དུ་འགྲོ། རྟོགས་ན་གནས་ལུགས་མ་རྟོགས་ན་གནས་ལུགས་མིན་ན་གནས་ལུགས་ཀྱི་ལྟ་བ་ཀུན་བརྟགས་སུ་འགྲོ། བསྒོམས་ཙ་ན་གནས་ལུགས་མ་སྒོམ་ན་གནས་ལུགས་མིན་ན་སྒོམ་པས་འདུས་བྱས་སུ་འགྲོ། ལྟ་བ་ལ་རྟོགས་དགོས་ན་ལྟ་བ་ཀུན་བརྟགས། ལྟ་བ་དྲན་དགོས་ན་ཀུན་ཏུ་བཟང་པོ་ལམ་པ་རུ་འགྲོ། བསྒོམ་པ་ལ་སྒོམ་དགོས་ན་སྒོམ་པ་འདུས་བྱས། སྒོམ་པ་དྲན་དགོས་ན་ཀུན་ཏུ་བཟང་པོ་ལམ་པར་འགྲོ་བས། བལྟར་མེད་སྒོམ་མེད་ཀྱི་ངང་ལ་བློ་རང་ལུགས་སུ་བཞག་གོ །ཞེས་དང་། རང་བཞིན་སྤྲོས་བྲལ་ལྷུན་གྲུབ་སེམས་ཀྱི་རང་བཞིན་སྤྲོས་བྲལ་མཚན་རྟོག་ངེས་བཟུང་ཐམས་ཅད་ཀྱིས་སྟོང་པ། རྣམ་པ་སྒྱུ་མ་ལྷུན་གྲུབ་ཡེ་ཤེས་རང་འོད་མ་འགགས་པར་ཤར་བ་ཚོགས་བརྒྱད་ཀྱི་ཡུལ་མ་འགགས་ལ་དེར་འཛིན་གྱི་རྣམ་རྟོག་དང་བྲལ་བ། རང་རིག་ལྷུན་གྲུབ་ངོ་ཤེས་མཁན་གྱི་རིག་པ་རིག་བྱ་རིག་མཁན་གཉིས་མེད་རང་རིག་རང་གསལ། ཉམས་སུ་མྱོང་དུ་མེད་པའི་ཚུལ་གྱིས་མྱོང་། རིག་ཏུ་མེད་པའི་ཚུལ་གྱིས་རིག་པའོ། །དེ་ལ་སེམས་ཀྱི་སྟོང་ཆ་ལ་རང་བཞིན་སྤྲོས་བྲལ་ལྷུན་གྲུབ་ཅེས་བྱ་སྟེ་སེམས་ཡོད་པ་དངོས་པོའི་མཐའ་སེལ། སྣང་ཆ་ལ་སྒྱུ་མ་ལྷུན་གྲུབ་ཅེས་བྱ། དེས་མེད་པ་སྟོང་པའི་མཐའ་སེལ། རིག་ཆ་ལ་མཚན་ཉིད་རང་རིག་ལྷུན་གྲུབ་ཅེས་བྱ། དེས་རིག་མེད་བེམ་པོའི་མཐའ་སེལ་ལོ། །ལྷུན་གྲུབ་གསུམ་པོ་སྣང་ཚུལ་ནས་མ་འདྲེས་ལ་ངོ་བོ་ཡོངས་སུ་རྫོགས་པས་མ་འདྲེས་ཡོངས་རྫོགས་བདེ་བ་ཆེན་པོ་ཞེས་བྱའོ། །ཞེས་དང་། དངོས་གཞིའི་ངོ་སྤྲོད་སྐབས་རང་བཞིན་སྤྲོས་བྲལ་ལྷུན་གྲུབ་མ་བརྟགས་པར་སྟོང་། རྣམ་པ་སྒྱུ་མ་ལྷུན་གྲུབ་མ་བལྟས་པར་གསལ། མཚན་ཉིད་རང་རིག་ལྷུན་གྲུབ་མ་བསམས་པར་མཁྱེན་ཏེ། གནས་སྐབས་རྣལ་འབྱོར་མངོན་སུམ་ལ་བརྟེན་ཏེ་བསྒོམས་པས། ཡིད་ཀྱི་མངོན་སུམ་སྤྲོས་པའི་རང་བཞིན་ཆོས་ཉིད་དུ་ངོ་འཕྲོད་ནས་མ་བུ་མཇལ་བའི་དུས་ན་སྤྲོས་བྲལ་ཆོས་སྐུར་ངོ་སྤྲད། དབང་པོའི་མངོན་སུམ་དུ་སྒོ་ལྔ་ཡུལ་གྱི་རང་བཞིན་སྣང་བ་རང་སར་གྲོལ་བའི་དུས་སུ། ཡེ་ཤེས་ཀྱི་རྣམ་པ་སྒྱུ་མ་སྤྲུལ་སྐུར་ངོ་སྤྲད། རང་རིག་མངོན་སུམ་དུ་རིག་པ་རང་ས་ཟིན་པའི་དུས་ན་རང་རིག་ལོངས་སྤྱོད་རྫོགས་སྐུར་ངོ་སྤྲད་དོ། །དེ་ཡང་གཞི་ལྷུན་གྲུབ་གསུམ་མ་འདྲེས་ཡེ་ཤེས་རང་གསལ་གྱི་ངང་དུ་རྫོགས། ལམ་ཐུག་ཕྲད་གསུམ་ལ་མ་འདྲེས་ལ་རྟོགས་པ་རང་གསལ་གྱི་ངང་དུ་རྫོགས། འབྲས་བུ་སྐུ་གསུམ་མ་འདྲེས་ལྷུན་གྱིས་གྲུབ་པའི་ངང་དུ་ཡོངས་སུ་རྫོགས་པ་ཐིག་ལེ་ཉག་གཅིག་ཡུལ་མེད་རང་གསལ་དུ་ངོ་སྤྲད་དོ། །ཞེས་དང་། མཉམ་བཞག་རང་གི་ངོ་བོ། མ་སྒོམ་པའི་མངོན་སུམ་པས་མངོན་སུམ་ཡུལ་མེད་རང་གསལ་དུ་མཐོང་བ་ལྷག་མཐོང་། བསྒོམས་པའི་མངོན་སུམ་གྱིས་རིག་པ་ཀློང་དུ་ཕེབས་པ་ཞི་གནས། བཞག་ཐབས་གསུམ་གྱིས་ཡིན་དོན་ལས་མ་འདས་ཙམ་དུ་གནས་པ་ཟུང་འབྲེལ་ལོ། །ཞེས་གསུངས། གཞན་ཡང་། ཨ་རོ་ཡེ་ཤེས་འབྱུང་གནས་ཀྱིས་ཅོག་བཞག་ཆེན་མོར། སེམས་ཀྱི་རང་བཞིན་ནི་ཆོས་ཉིད་ཡོད་མེད་ལ་སོགས་པའི་ངོ་བོ་ཉིད་ཐམས་ཅད་དང་བྲལ་བ། སྣང་སྐད་ཅིག་ཀྱང་མ་མྱོང་སྟེ་ནམ་མཁའ་བཞིན་ནོ། །སེམས་ཀྱི་མཚན་ཉིད་ནི་རྣམ་པར་རྟོག་པའི་ངོ་བོར་གནས་ཏེ། དཔེར་ན་མེའི་རང་བཞིན་ཆོས་ཉིད་ལ་ཚ་བ་མེད་ཀྱང་ཆོས་ཅན་མཚན་ཉིད་སྲེག་པ་བཞིན་ནོ། །མཚན་ཉིད་ཀྱིས་རང་བཞིན་བསྒྲིབས་ཏེ་རྒྱ་མཚོ་རླབས་ཀྱིས་རྙོགས་པ་བཞིན་ནོ། །མཚན་ཉིད་རྟོག་པའི་བག་ཆགས་མཐུ་བརྟས་པས་བག་ཆགས་ཀྱི་སེམས་ཉིད་རྟོག་པའི་དབང་གིས་ཕྱི་ནང་གི་དངོས་པོ་འདྲ་བར་སྣང་སྟེ་མིག་སྐྱོན་ཅན་གྱི་སྣང་བའམ་ལྷོ་སྤྲིན་བཞིན་ནོ། །སེམས་ཀྱི་རང་བཞིན་ཆོས་ཉིད་ནི་མི་འགྱུར་བས་བྱང་ཆུབ་ཀྱི་སྙིང་པོ་ཆོས་ཀྱི་སྐུ་ཡིན་ལ། མཚན་ཉིད་ཆོས་ཅན་ནི་ཀུན་རྫོབ་སྟེ་རྫུན་པ་བསླུ་བ་ཡང་དག་མ་ཡིན་པས་སྤང་དུ་བཏུབ་བོ། དེ་ལྟར་བག་ཆགས་ཀྱི་སེམས་ཉིད་སྣང་བའི་གཞི་དེ་ལ་ཡང་ལོག་རྟོག་གིས་ཕྱིན་ཅི་ལོག་ཏུ་འཁྲུལ་ཏེ། སེམས་ལས་གཞན་དུ་སངས་རྒྱས་དང་སེམས་ཅན་སྐྱེས་པ་དང་བུད་མེད་ས་ཆུ་མེ་རླུང་སོགས་མཚན་མ་སྣ་ཚོགས་རང་བྱུང་དུ་བདག་ཉིད་སོ་སོར་ཡོད་པར་བརྟགས་ནས་སེམས་ཅན་རྣམས་རང་གིས་བརྟགས་པའི་མཚན་མ་ལ་རང་སྤྱོད་དེ་དཔེར་ན་ཐོ་ཡོར་ལ་མིར་འཁྲུལ་ནས་མིར་བལྟ་བ་བཞིན། དེ་ནི་ཀུན་བརྟགས་ཡིན་ཏེ་སེམས་ཅན་གྱི་ཤེས་པའི་ཡུལ་ཡིན་ན། དེ་ལྟ་བུར་མཚན་མ་ལ་དམིགས་ནས་ཉོན་མོངས་སྐྱེ། དེའི་དབང་གིས་དགེ་སྡིག་སོགས་ལས་བསགས། དེ་རྣམས་ཀྱི་དབང་གིས་འབྲས་བུ་ཕུང་པོ་ལྔ་གྲུབ་སྟེ་འཁོར་བར་སྣང་ངོ་། །སེམས་ཀྱི་རང་བཞིན་མངོན་དུ་གྱུར་ཅིང་། མཚན་ཉིད་ཀྱིས་བསྡུས་པ་སྤངས་པ་ལ་ནི་སངས་རྒྱས་ཞེས་བྱ་སྟེ། དེ་ཙ་ན་ཡང་སྤངས་ཤིང་བོར་བའམ་སྔ་ན་མེད་པ་ཐོབ་པའི་རྒྱུ་ཅི་ཡང་མེད་དོ། །སེམས་ཀྱི་རང་བཞིན་བྱུང་ཆུབ་ཀྱི་སྙིང་པོ་དེ་མཚན་ཉིད་རྟོག་པ་དང་བྲལ་བ་ལ་སྤངས་པ་ཐོབ་ཅེས་བྱ་སྟེ། དཔེ་ནམ་མཁའ་སྤྲིན་དང་བྲལ་བ་བཞིན་ནོ། །དེའི་ཚེ་གཟུགས་སྐུ་རྣམས་དང་ཆེ་བའི་ཡོན་ཏན་ཐམས་ཅད་ཀྱང་ཐུགས་རྗེ་དང་སྨོན་ལམ་གྱི་དབང་གིས་རང་བཞིན་གྱིས་འབྱུང་སྟེ་དཔག་བསམ་གྱི་ཤིང་དང་འདྲའོ། །དེ་ལྟར་སྣང་བའི་འཁོར་འདས་ཀྱི་ཆོས་ཐམས་ཅད་བདེན་པ་གཉིས་ཀྱི་རང་བཞིན་ཡིན་ཏེ། དེ་ཡང་དངོས་པོ་སོ་སོར་སྣང་ཞིང་བྱ་བ་བྱེད་ནུས་པ་ནི་ཆོས་ཅན་ཀུན་རྫོབ་ཀྱི་བདེན་པ་སྟེ། དེ་ནི་རྣམ་པར་རྟོག་པ་ཉིད་སྣང་བས་སྤང་བར་བྱ་བའོ། །སོ་སོར་སྣང་ཡང་གང་ལའང་རང་བཞིན་མེད་པས་གང་ཅི་ཡང་མ་ཡིན་པ་སྟེ། སེམས་ཀྱིས་བསམ་དུ་མེད་ཅིང་། ཚིག་གིས་བརྗོད་དུ་མེད་པ་ནི་ཆོས་ཉིད་དེ་དོན་དམ་པའི་བདེན་པའོ། །དངོས་སུ་ན་ཀུན་རྫོབ་རང་བཞིན་མེད་པ་ཉིད་དོན་དམ་པའི་བདེན་པའོ། །དེ་མངོན་དུ་གྱུར་པ་ནི་སངས་རྒྱས་སོ། །ཞེས་དང་། ཆོས་ཐམས་ཅད་ཀྱི་རྩ་བ་ནི་སེམས་ཀྱི་སྣང་བ་ཡིན་ཏེ། དེ་ཡང་སེམས་དེ་ཇི་སྲིད་དུ་རྟོག་པ་དང་བཅས་པ་ལས་ནི་འཁོར་བ་སྣང་ལ། སེམས་དེ་རྟོག་པ་དང་བྲལ་བ་ལས་ནི་རྟོག་མེད་ཉིད་རྣམ་པར་མི་རྟོག་པའི་ཡེ་ཤེས་སུ་འགྱུར་རོ། །དེ་ལས་ནི་མྱ་ངན་ལས་འདས་པའི་ཆོས་རྣམས་སྣང་ངོ་། །དེ་བས་ན་འཁོར་བ་ནི་རྣམ་པར་རྟོག་པའི་གཟུགས་བརྙན་ལ། མྱ་ངན་འདས་པ་ནི་ཡེ་ཤེས་ཀྱི་གཟུགས་བརྙན་ཡིན་ནོ། །འོ་ན་འཁོར་བ་རྟོག་པ་ལས་ཇི་ལྟར་སྣང་ཞེ་ན། དེ་ཡང་སེམས་ཀྱི་རང་བཞིན་ཆོས་ཉིད་ནི་སྣང་སྐད་ཅིག་ཀྱང་མ་མྱོང་སྟེ། དཔེར་ན་རྒྱ་མཚོ་དྭངས་པ་དང་ནམ་མཁའ་བཞིན་ནོ། །སྣང་བ་འདི་ནི་ཐོག་མ་མེད་པ་ནས་སེམས་ཀྱི་མཚན་ཉིད་ཆོས་ཅན་རྟོག་པའི་ངོ་བོར་གནས་པའི་རྟོག་པའི་བག་ཆགས་ཉིད་སྣང་བ་ཡིན་ཏེ། དཔེར་ན་རྒྱ་མཚོ་རྦས་རྙོགས་པའམ་ནམ་མཁའ་ལྷོ་སྤྲིན་བཞིན་ནོ། །གཞི་དེ་ལས་ལོག་སྟེ་འཁྲུལ་པས་དཔེ་ཐ་གུ་ལ་སྦྲུལ་དུ་འཁྲུལ་ནས་སྦྲུལ་དུ་ལྟ་བ་བཞིན་དུ། རྒྱུ་འབྲས་བདེ་སྡུག་སོགས་མཚན་མའི་དངོས་པོ་རང་རྒྱུད་པར་བརྟགས་པས་སོ་སོར་བདེན་ཞིང་བྱ་བ་བྱེད་ནུས་པར་རྟོག་པས་བརྟས་པར་མངོན་དུ་སྣང་ངོ་། མཚན་མ་དེ་ལ་དམིགས་ནས་ཆགས་སྡང་ལ་སོགས་པའི་ཉོན་མོངས་པ་སྐྱེ་ལ། དེའི་སྐྱོན་གྱིས་ལས་དགེ་སྡིག་སོགས་སྤྱད་པས། འབྲས་བུ་ཕུང་པོ་ལྔར་གྲུབ་སྟེ་འཁོར་བ་ནི་དེ་ལྟར་སྣང་ངོ་། །འོ་ན་འཁོར་བའི་རྒྱུ་རྟོག་པ་ཅི་ལྟར་སྤོང་ཞེ་ན། དེ་ནི་དོན་རབ་འབྱེད་པ་དང་། དེ་བཞིན་ཉིད་ལ་དམིགས་པ་དང་། དེ་བཞིན་གཤེགས་དགེའི་བསམ་གཏན་གསུམ་བསྒོམས་ནས་སྤོང་སྟེ། དེ་ཡང་དང་པོས་ནི་ལྷག་མཐོང་བསྐྱེད། གཉིས་པས་ནི་ཞི་གནས་སྐྱེ། གསུམ་པས་ནི་ཟུང་འབྲེལ་དུ་བསྒོམ་པའོ། །ཞེས་དང་། མཉམ་བཞག་དངོས་གཞིའི་སྐབས། ཕྱི་ནང་གི་དངོས་པོ་ཡོད་པར་བརྟགས་ན་རྟག་པའི་སྐྱོན། མེད་པར་བརྟགས་ན་ཆད་པའི་སྐྱོན། དབུས་ཙམ་དུ་བརྟགས་ན་མཐའ་བཞི་ལས་མ་གྲོལ་བའི་སྐྱོན། སེམས་བཀག་ནས་དྲན་པ་རྒྱུན་བཅད་ན་འདུ་ཤེས་མེད་པའི་སྙོམས་འཇུག སེམས་དམིགས་ཤིང་མཚན་མ་རྩེ་གཅིག་པར་བྱེད་ན་མཚན་མ་རྩེ་གཅིག་པ། དྲན་པ་དང་རྟོག་པའི་རྗེས་སུ་འབྲངས་ན་སོ་སོའི་སྐྱེ་བོ། ཞི་བ་ལ་ཆགས་ན་འཇིག་རྟེན་གྱི་བསམ་གཏན། བྱུང་ཚོར་སྣ་ཚོགས་ཀྱི་རྗེས་སུ་འབྲངས་ན་རྒོད་པའི་སྐྱོན། ཇི་བཞིན་པའི་དོན་མི་གསལ་བའམ་སེམས་རློང་ནས་དྲན་པ་མེད་ན་བྱིང་བའི་སྐྱོན་ནོ། །གཞན་ཡང་སྣང་ལ་རང་བཞིན་མེད་པའོ་སྙམ་དུ་རྟོག་ན་ཡོད་མེད་དང་རྟག་ཆད་ཀྱི་མཐའ་སྟེ། དེ་ཡང་སྣང་བར་རྟོག་པ་ནི་ཡོད་ཅིང་རྟག་པའི་སྐྱོན། རང་བཞིན་མེད་པར་རྟོག་ན་ནི་མེད་པའམ་ཆད་པའི་སྐྱོན་ནོ། །གཞན་ཡང་ཆོས་ཐམས་ཅད་རང་བཞིན་མེད་པ་དང་། སྟོང་པ་ཉིད་དང་། སྐྱེ་བ་མེད་པ་ལ་སོགས་པར་རྟོག་ནའང་ཅི་ཡང་མཐོང་བ་མེད་པའི་དོན་ལ་སྒྲོ་འདོགས་པ་སྟེ། དེ་ཡང་། ཆོས་རྣམས་རང་བཞིན་མ་སྐྱེས་རྟོགས་པའི་མཁའ་ལ་སྐྱེ་མེད་སྟོང་པར་སྒྲོ་མི་འདོགས། །ཞེས་འབྱུང་ངོ་། །གཞན་ཡང་ཐ་ན་མཐོང་བ་མེད་པའི་དོན་ནི་འདི་ཙམ་མོ། །འདི་ཡིན་ནོ་སྙམ་ན་ཡང་འདུ་ཤེས་དང་བཅས་པའི་མཐའ་སྟེ། མི་རྟོག་ཟབ་མོ་ཉམས་མྱོང་བ། །མྱོང་བ་ཡོད་ཕྱིར་དེ་ཉིད་མིན། །ཞེས་འབྱུང་ངོ་། །མདོར་ན་དེའི་ཚེ་རང་གི་སེམས་ལ་སྣང་བའམ་གཡོ་བའམ་ཉམས་སུ་མྱོང་བའམ་རྟོག་དཔྱོད་ཀྱི་བག་ཆགས་ཅི་ཡང་མེད་པར་བློ་དྭངས་མ་ཡིད་ནམ་མཁའ་བཞིན་དུ་རྒྱང་ཅད་ལ། དེའི་ངང་དུ་ཡུན་རིང་བཞག་གོ །ཞེས་དང་། དེ་ལྟར་རྣམ་པར་མི་རྟོག་པའི་ཏིང་འཛིན་བསྒོམ་པ་ལ་གཞན་གྱིས་བརྒལ་བའི་ལན་དུ། འདིར་ནི་རྒྱུ་འབྲས་ལ་སོགས་པ་ཡོད་པར་ཤེས་ཤིང་ཡོད་མེད་ལ་སོགས་པའི་མཐའ་གང་ལའང་མི་གནས་པས་མུ་སྟེགས་རྟག་ཆད་ཀྱི་ལྟ་བར་མི་འགྱུར་རོ། །རང་རིག་པའི་ཡེ་ཤེས་གསལ་བར་གནས་པས་མི་དྲན་པ་གཏི་མུག་གམ་སེམས་མེད་པའི་སྐྱོན་ཡང་མེད་དོ། །རྣམ་ཤེས་དྲུག་པོ་མི་འགོག་པས་འགོག་པ་དང་འདུ་ཤེས་མེད་པའི་མཐར་ཡང་མི་ལྟུང་ངོ་། །ཐབས་སྙིང་རྗེའི་སྤྱོད་པ་མི་གཏོང་བས་ཞི་བ་ཕྱོགས་གཅིག་པའམ་འདུས་མ་བྱས་ཀྱི་མུར་ཡང་མི་ལྟུང་ངོ་། །སྟོང་པའི་མཐར་ཡང་མི་ལྟུང་སྟེ། དེ་ནི་ཆོས་ཀུན་སྟོང་ཉིད་དུ་དམིགས་ཤིང་དེ་ལ་འཛིན་པ་ཡིན་ན། འདིར་ནི་ཆོས་ཀུན་རང་བཞིན་མེད་པར་རྟོགས་ནས་ཅིར་ཡང་མི་རྟོག་པས་སྐྱོན་དེ་ཡང་མེད་དོ། །ཞི་གནས་དང་ལྷག་མཐོང་ཟུང་དུ་འབྲེལ་བར་རང་བཞིན་དུ་གནས་ཤིང་བྱིང་རྨུགས་ཀྱི་དབང་དུ་མི་གཏོང་བས་འཇིག་རྟེན་པའམ་ལུང་མ་བསྟན་པར་མི་འགྱུར་རོ། །གོ་རིམ་ལོག་པའི་སྐྱོན་ཡང་མེད་དེ། ཤེས་རབ་ཀྱི་ཕ་རོལ་དུ་ཕྱིན་པ་ལས། དང་པོ་སེམས་བསྐྱེད་པ་ཉིད་ནས་རྣམ་པ་ཐམས་ཅད་མཁྱེན་པ་ཉིད་ལ་བསླབ་པར་བྱའོ། །དེ་ནི་ཆོས་ཐམས་ཅད་དམིགས་སུ་མེད་པའོ། །ཞེས་འབྱུང་ངོ་། །གཞན་ཡང་མདོ་ལས། འཇིག་རྟེན་ཁམས་ནི་སྟོང་དག་ཏུ། །ངས་ནི་མདོ་སྡེ་མང་བཤད་ཀྱང་། །ཚིག་འབྲུ་ཐ་དད་དོན་གཅིག་སྟེ། །ཐམས་ཅད་བརྗོད་པར་ནུས་མ་ཡིན། །ཚིག་གཅིག་བསྒོམ་པར་གྱུར་ན་ནི། །དེ་དག་ཐམས་ཅད་བསྒོམ་པར་འགྱུར། །ཞེས་དང་། མང་དུ་ཐོས་པ་ཞེས་བྱ་བ་ནི་དོན་ལ་མཁས་པ་ལ་བྱ་ཡི་ཚིག་ལ་མཁས་པ་ལ་མི་བྱའོ། །ཞེས་བྱ་བ་ལ་སོགས་པ་མདོ་སྡེ་མང་པོ་ནས་འབྱུང་ངོ་། །ཞེས་དང་། ཡང་དེ་ཉིད་ཀྱིས་མཛད་པའི་སེམས་ཀྱི་མུན་སེལ་སྒྲོན་མེར། སེམས་དོན་རྣམ་པ་བཅུས་བསྟན་ཏེ། ༡ སེམས་ཀྱི་རང་བཞིན་ནི་ཡེ་ནས་རྣམ་པར་དག་ཅིང་འོད་གསལ་བ་གསང་སྔགས་ཀྱི་རང་བཞིན། ༢ སེམས་ཀྱི་ངོ་བོ་ནི་རིག་ཅིང་གསལ་བ་མ་བསྒྲིབས་ལུང་མ་བསྟན་བག་ཆགས་དང་བཅས་པ། ༣ སེམས་ཀྱི་དཔེ་ནི་ནམ་མཁའ་དང་འདྲ་སྟེ་དབྱི བས་དང་ཁ་དོག་སོགས་སུ་གྲུབ་པ་མེད། ༤ སེམས་དེ་གང་གིས་མི་རྟོག་ན། ཉོན་མོངས་རང་ཁ་མར་བཟུང་བས་སོ་སྐྱེས་མི་རྟོགས། རྟག་ཆད་དུ་འཛིན་པས་མུ་སྟེགས་པས་མི་རྟོགས། གཟུང་འཛིན་རྡུལ་ཕྲན་དངོས་པོར་གྲུབ་པར་འདོད་པས་ཉན་ཐོས་ཀྱིས་མི་རྟོགས། སེམས་དངོས་པོར་བཟུང་བས་སེམས་ཙམ་པས་མི་རྟོགས། བརྟགས་པས་མ་བརྟགས་པ་ཐོབ་པར་འདོད་པས་དབུ་མ་པས་མི་རྟོགས། མཚན་མ་གཙོ་བོར་འཛིན་པས་བསྐྱེད་རིམ་པས་མི་རྟོགས། ཐ་སྙད་ཀྱིས་བརྗོད་བྲལ་མི་རྟོགས་པས་ཚད་མ་པས་མི་རྟོགས་སོ། །༥ སེམས་རྟོགས་པའི་ཡོན་ཏན་ནི་ནོར་བུ་རིན་པོ་ཆེ་དང་འདྲ་སྟེ་སངས་རྒྱས་ཀྱི་ཆེ་ཡོན་ཐམས་ཅད་སེམས་ལས་འབྱུང་། ༦ སེམས་མ་རྟོགས་པའི་སྐྱོན་ལ། ཡེངས་པ། གོལ་བ། ནོར་བའོ། །ཡེངས་པ་ལ་གསུམ། ཆགས་པ་ཅན་རྩ་རླུང་ལ་ཡེངས། ཤེས་རབ་ཅན་རྟོག་དཔྱོད་ལ་ཡེངས། མཚན་མ་ཅན་ལྷ་ལ་ཡེངས་པའོ། །གོལ་ས་གསུམ་ནི། སེམས་རྟག་ཆད་དུ་བལྟས་ན་མུ་སྟེགས་སུ་གོལ། རང་ཁ་མར་བཟུང་ན་སྐྱེ་བོར་གོལ། དངོས་པོར་བཟུང་ན་སེམས་ཙམ་དུ་གོལ་ལོ། །འཆོར་བ་གསུམ་ནི་ཐ་སྙད་ལ་དགའ་ན་བཤད་པར་འཆོར། ཞེན་པ་ལ་དགའ་ན་གསོག་འཇོག་ཏུ་འཆོར། གཏི་མུག་ལ་དགའ་ན་རང་ག་མར་འཆོར་རོ། ༧ སེམས་རྟོགས་པའི་ཐབས་ནི་ལུང་མན་ངག་རང་གི་ཉམས་མྱོང་གསུམ་གྱིས་གཏན་ལ་འབེབས། ༨ སེམས་ཀྱི་བཞག་ཐབས་ནི་བླ་མའི་ཞལ་ལས་ཤེས། ༩ སེམས་རྟོགས་པའི་ཚད་ནི་སེམས་དང་ཆོས་སུ་འདྲེས་པ། ༡༠ སེམས་རྟོགས་པའི་འབྲས་བུ་ནི་སྒོམ་པ་ཀློང་དུ་གྱུར་ཏེ་སངས་རྒྱས་པའོ་གསུངས། ཡང་། ལྟ་བའི་ལྡེའུ་མིག་ཏུ། གང་གིས་བརྟག་པར་བྱ་བའི་གང་ཟག་འཁོར་བ་ལ་རྒྱབ་ཀྱིས་ཕྱོགས་པར་འདོད་པས་བརྟག གང་ལ་བརྟག་པའི་གཞི་ཉོན་མོངས་པ་སྤྱི་དང་བྱེ་བྲག་ལ་བརྟག་སྟེ། སྤྱི་ལ་བརྟག་པ་མ་བརྟགས་ཉམས་དགའ་ཙམ་དུ་ཉོན་མོངས་རང་བཞིན་གྱིས་སྐྱེ་ཞིང་། དེའི་འབྲས་བུ་སྨིན་ཏེ་ཆགས་པར་བྱ་བའི་ཡུལ་དུ་གྱུར་པ་དེ་ལ་འཁོར་བ་ཞེས་བྱ་སྟེ་དེ་ལ་བརྟག་གོ །བྱེ་བྲག་ཏུ་བརྟགས་ན། ཡུལ། ཤེས་པ། ཐར་པ་གསུམ་མོ། །དཔེ་ནི་ཡུལ་སྒྱུ་མ། ཤེས་པ་རྨི་ལམ། ཐར་པ་ཆུ་ཟླ་དང་འདྲའོ། །བརྟག་ཐབས་ནི། དང་པོ་ཡུལ་ལ་བརྟགས་ཏེ་གཟུང་བར་བྱ་བའི་ཡུལ་ནི། སྒྱུ་མ་ལྟ་བུ་མེད་བཞིན་དུ་སྣང་ལ་མི་རྟག་པ། མི་བརྟན་པ། རང་བཞིན་མེད་པར་བརྟག་གོ །གཉིས་པ་ཤེས་པ་ལ་བརྟག་པ། ཤེས་པ་རྨི་ལམ་དང་འདྲ་སྟེ་རྨི་ལམ་གྱི་དུས་ན་བདེ་སྡུག་བསམ་གྱིས་མི་ཁྱབ་ཀྱང་། སད་ནས་གང་ལའང་མ་གྲུབ་པ་ལྟར། སེམས་སྣ་ཚོགས་སུ་སྣང་བ་ལ་བརྟགས་ན། དབྱིབས། ཁ་དོགའདུག་ས། ངོ་ཏི་གང་ཡང་མ་རྙེད་པར་འོད་གསལ་ནམ་མཁའ་ལྟར་དག་པ་རང་བཞིན་གང་ཡང་མེད་པའོ། །འོ་ན་སེམས་དེ་ལྟར་ཡིན་ན་མི་གྲོལ་བ་ཅི་ཞེ་ན། རྣམ་རྟོག་གློ་བུར་པས་བསྒྲིབས་ཏེ་འཁོར་རོ། །རྣམ་རྟོག་དེ་ཅིས་བསལ་ཞེ་ན། ལྟ་སྒོམ་ཕྱིན་ཅི་མ་ལོག་པས་སོ། །སངས་རྒྱས་དང་སེམས་ཅན་གྱི་ཁྱད་པར་ཅི་ཞེ་ན། གང་སེམས་རྣམ་རྟོག་གི་སྒྲིབ་པ་དང་བཅས་པ་དེ་ནི་ཉོན་མོངས་པའི་ཡིད་ཅེས་བྱ་སྟེ་རང་ཁ་མའོ། །གང་རྣམ་རྟོག་དག་ནས་སེམས་སྒྲིབ་པ་མེད་པ་དེ་ནི་རྡོ་རྗེའི་ཡིད་ཅེས་བྱ་སྟེ་སངས་རྒྱས་སོ། །འོ་ན་དེ་ལྟ་བུའི་སངས་རྒྱས་དེ་གང་ལས་འབྱུང་། ཉོན་མོངས་པ་སྤངས་པ་ལས་འབྱུང་ངམ་ཞེ་ན། སྤོང་བས་མི་སྤངས་ཏེ། རང་བཞིན་ཤེས་པ་ལས་འབྱུང་ངོ་། །གསུམ་པ་ཐར་པ་ལ་བརྟག་པ། སངས་རྒྱས་ཀྱི་སྐུ་དང་ཞིང་ཁམས་ཐམས་ཅད་ཆུ་ཟླ་ལྟར་གསལ་ལ་རྟོག་པ་མེད་པར་བརྟག་པར་བྱའོ། །རྟོགས་པའི་ཚད་ནི་སྒྱུ་མ་ལ་སོགས་པ་དཔེ་ཙམ་མ་ཡིན་པར་འགོ་སྙོམས་པའོ། །འབྲས་བུ་ནི་སངས་རྒྱས་པའོ། །ཞེས་གསུངས། ཉོན་མོངས་མི་སྤོང་བར་ཇི་ལྟར་ལམ་དུ་ཁྱེར་སྙམ་ན། འཇམ་དཔལ་རྫོགས་པ་ཆེན་པོའི་དབང་གཞུང་ངོ་སྤྲོད་སྐབས། ཉོན་མོངས་རང་ཁ་མའི་རྗེས་སུ་འབྲངས་ན་སོ་སྐྱེ། དེ་ཉིད་དགྲ་ལྟར་སྤོང་ན་ཉན་ཐོས། དེ་འགེགས་ན་རང་རྒྱལ། སྦྱངས་ན་བྱང་ཆུབ་སེམས་དཔའི་ཐེག་པ། དེ་ལྟར་བསྒྱུར་ན་སྔགས་ཕྱི་བ། དེ་ལུང་རིགས་ཀྱིས་བཙལ་ཏེ་རིག་པའི་རྩལ་དུ་འདོད་ན་མ་ཧཱ། དེ་བཙལ་བས་མ་རྙེད་པ་ཆོས་དབྱིངས། མ་རྙེད་པར་ཤེས་མཁན་དེ་ཡེ་ཤེས་སུ་བྱས་ན་ཨ་ནུ། ཉོན་མོངས་རང་ཁ་མར་སྤྱད་ན་ལྷུན་གྲུབ་ཁ་འབྱམས། ཉོན་མོངས་ཡེ་ཤེས་ཐ་དད་དུ་འདོད་ན་དག་པ་ཕྱོགས་གཅིག་པ། དེས་ན་ཉོན་མོངས་གང་སྐྱེས་དེའི་རང་བཞིན་གང་དུའང་མི་རྟོག་པ་རང་གསལ་བ་ཞིག་ཡོད་པས། དེ་ལྟར་བསྒོམས་པས་རང་གསལ་དུ་ཤར་བ་དང་། མ་བསྒོམས་ཀྱང་རང་གསལ་བར་གནས་པ་དང་། གཞི་རང་གསལ་དུ་ཡོད་པ་གསུམ་དབྱེར་མེད་པར་མཉམ་དྲིལ་{དཀྲིལ} གྱིས་རྟོགས་པ་ནི་མཚན་ཉིད་རང་རིག་པའི་ཡེ་ཤེས་སོ། །ཞེས་གསུངས་ཏེ་སེམས་ཕྱོགས་ཀྱི་དགོངས་པ་ཡི་གེ་རྙིང་པ་དག་ལས་ཅུང་ཟད་བཏུས་ཏེ་བཀོད་པ་ཡིན་ལ། ཐུན་མིན་མན་ངག་སྡེའི་ཟབ་གནད་སེམས་རིག་ཤན་འབྱེད་སོགས་ནི་ཀུན་ཏུ་བཟང་པོ་དྲི་མེད་འོད་ཟེར་གྱི་དགོངས་པའི་གསང་མཛོད་ལོན་དགོས་པས་ཞིབ་པར་ཡང་ཏིག་རྣམ་པ་གསུམ་དང་མཛོད་ཆེན་བདུན་སོགས་ལ་ཐོས་བསམ་གྱིས་སྒྲོ་འདོགས་ཆོད་པ་དང་ཁྱད་པར་བླ་མ་མཚན་ལྡན་གྱི་དགོངས་བརྒྱུད་ཡེ་ཤེས་འཕོ་བ་ཁོ་ན་ལ་རག་ལས་པས་ལྟར་སྣང་རྟོག་གེའི་དཔྱད་སྐམ་ཙམ་གྱིས་གར་ཡང་མི་ཕྱིན་མོད། འདིར་ལས་དང་པོ་ལ་གོ་གཞི་སྐྱེད་བྱེད་ཙམ་དུ་དངོས་དང་འདྲ་མཚུངས་གི་ཁྱད་པར། རྡོ་གྲུབ་རིན་པོ་ཆེའི་ཞལ་སློབ་གཞོན་ནུ་ཆོས་ཀྱི་བློ་གྲོས་སམ་གཅོད་སྨྱོན་ཡེ་ཤེས་རྡོ་རྗེས་འདི་ལྟར་གསུངས་ཏེ། དེ་ཡང་མདོ་ལམ་གསུམ་འབྲས་བུ་ཕྱི་དུས་ལ་རེ་ཞིང་སྔགས་ཕྱི་རྒྱུད་གསུམ་ཡང་སྤྲོས་པས་འཆིང་། ཡོ་ག་འོག་མ་གཉིས་ཀྱང་འབད་རྩོལ་ལས་མ་འདས་པས། འདིར་དབང་བཞི་པའི་དོན་གྱི་འོད་གསལ། ཡེ་ནས་ཕྱག་རྒྱ་ཆེན་པོའི་རང་བཞིན། དབུ་མ་རབ་ཏུ་མི་གནས་པའི་ཡིན་ལུགས་ཨ་ཏི་བྱ་རྩོལ་ལས་འདས་པའི་དོན་ལ་མཉམ་པར་འཇོག་པ་འདི་ཁོ་ན་གཙོ། དེ་ཡང་དབྱིངས་དང་རིག་པ་གཉིས་སུ་འདུ་བས་འདིར་གཞི་ལམ་འབྲས་གསུམ་གྱི་ཚུལ་དུ་ཞུ་བ་ལ། གཞི་དབྱིངས་སྙིང་ཁ་ན་འོད་ལྔའི་ཕུང་པོ་ཡེ་ནས་རང་བཞིན་གྱིས་གནས་པ་དང་། གཞིའི་རིག་པ་ནི་ལུ་གུ་རྒྱུད་ཀྱི་གདངས་འོད་རྩར་གནས་པ་དེའོ། །ལམ་གྱི་དབྱིངས་ནི་འོད་ལྔའི་དྲྭ་བ། ལམ་གྱི་རིག་པ་ནི་དབྱིངས་སྣང་ལྷ་སྐུར་སྨིན་པའོ། །འབྲས་བུའི་དབྱིངས་ནི་ཀ་དག་གི་རང་སྣང་ནམ་མཁའ་སྤྲིན་མེད་པ་ལྟ་བུ། འབྲས་བུའི་རིག་པ་ནི་ནང་གསལ་ཐིམ་ལ་མ་རྨུགས་པ་འཆར་གཞི་ཙམ་དུ་གནས་པའོ། །དེ་ལྟར་གཞི་དེ་ལས་གཞི་སྣང་གཡོས་པའི་སྐད་ཅིག་ལ་རིག་པ་ཆུ་ལ་རི་མོ་བྲིས་པ་ལྟར་གཞི་ཐོག་ཏུ་གྲོལ་བས་རྟོགས་པ་སངས་རྒྱས་དང་། མ་རིག་པ་ཆུ་མེར་བ་ལྟར་འཁྲུལ་རྐྱེན་གྱི་འབྱུང་ཁུངས་སུ་གྱུར་པ་མ་རྟོགས་པ་སེམས་ཅན་ཞེས་གཞི་གཅིག་ལམ་གཉིས་སུ་གྱེས་པ་ནི་རིག་མ་རིག་གི་ཁྱད་པར་ཡིན། འདི་གསར་མའི་ཀུན་གཞི་རྒྱུ་རྒྱུད་རང་བཞིན་འོད་གསལ་བ་བདེ་བར་གཤེགས་པའི་སྙིང་པོ་རྟོགས་ན་སངས་རྒྱས་ཀྱི་རྒྱུ་དང་། མ་རྟོགས་ན་སེམས་ཅན་གྱི་རྒྱུ་ཞེས་འཆད་པ་དང་ཁ་གསལ་མི་གསལ་ཙམ་ལས་དོན་གཅིག་པ་ཡིན་ནོ། །ལམ་ཉམས་སུ་ལེན་པའི་གནས་སྐབས་ན་འདི་བཞིན་མ་འཁྲུལ་པའི་ངོ་བོ་སྐྱོང་བ་ལ་འདྲ་མཚུངས་ཀྱི་སྐྱོན་ཞུགས་ཉེན་ཆེ་བས་སྤང་བླང་གི་གནད་འདི་ལྟར་ཤེས་དགོས་ཏེ། ངོ་བོ་དབྱིངས་གཅིག་ལས་མ་འདས་ཀྱང་། རིག་པ་ཡིན་ལུགས་ཆུ་དང་འདྲ་བའི་རྩལ་ལས་སེམས་ཀྱི་འཆར་ཚུལ་ཆུ་བུར་འདྲ་བ་ཤར་དུས་སེམས་ལས་རིག་པ་མ་བྱུང་བས་རིག་པ་སེམས་ཀྱི་དབང་དུ་མ་གྱུར་པ་ཤེས་དགོས། རིག་པ་གཅིག་ལ་ཤེས་རབ་ནི་རང་རྩལ་ཕྱིན་ཅི་མ་ལོག་པ་གཟུང་འཛིན་ལས་གྲོལ་བ། ཡིན་ནི་རྩལ་ཕྱིན་ཅི་ལོག་གཟུང་འཛིན་དུ་སྐྱེས་པ་སྟེ་འདྲ་གཞི་མཚུངས་ལ་དོན་མི་མཚུངས་པའི་ཁྱད་པར་ཤེས་དགོས། དབྱིངས་གཅིག་ལ་ཀུན་གཞི་ལུང་མ་བསྟན་གྱི་རྟོག་མེད་དང་ཆོས་སྐུ་ཡེ་ནས་སྤྲོས་པ་དང་བྲལ་བའི་ངོ་བོ་གཉིས་ངོ་བོ་རྟོག་མེད་ཙམ་དུ་འདྲའོ་སྙམ་ཡང་མ་ཡིན་ཏེ་ཀུན་གཞི་ལས་ཁྱད་ཆོས་དྲུག་གིས་གཞི་ལས་འཕགས་པ། རང་ངོར་སྣང་བ། རང་སར་གནས་པ། བྱེ་བྲག་ཕྱེད་པ། ཕྱེད་ཐོག་ཏུ་གྲོལ་བ། གཞན་ལས་མ་བྱུང་བ་སྟེ་ཀུན་བཟང་ཆོས་དྲུག་གོ །མཆན། འཕགས་པ་ནི་ཆོས་སྐུ་ཡིན་པར་ཤེས་དགོས། འཁྲུལ་གྲོལ་གཉིས་གཞི་རིག་པའི་ངང་དུ་གཅིག་ཀྱང་གཉིད་དུ་སོང་བ་དང་སད་པ་ལྟ་བུའི་ཁྱད་པར་ཤེས་དགོས། འཁྲུལ་སྣང་དང་གཞི་སྣང་གཉིས་རིག་པའི་ངང་དུ་སྣང་ཚུལ་འདྲ་ཡང་གཞི་སྣང་ཉིན་མོ་དང་། འཁྲུལ་སྣང་མཚན་མོ་ལྟ་བུའི་ཁྱད་པར་ཤེས་དགོས། རྟོགས་མ་རྟོགས་གཉིས་རིག་པར་གཅིག་ཀྱང་འཁྲུལ་པའི་ཞེན་འཛིན་སངས་མ་སངས་ཀྱི་ཁྱད་པར་ཤེས་དགོས། ཤེས་རབ་དང་བག་ཆགས་གཉིས་རིག་པའི་རྩལ་དུ་འདྲ་ཡང་སྤང་གཉེན་གྱི་ཁྱད་པར་རྩྭ་དང་མེ་ལྟ་བུ་ཤེས་དགོས། ཆོས་ཉིད་མ་བུ་ཞེས་པ་རིག་པ་མ་ལྟ་བུ་གཞི་ལ་ཡེ་ཤེས་བུ་ལྟ་བུ་ཟུང་དུ་འཇུག་པ་སྟེ། དེ་ཡང་རིག་པའི་གདངས་གཅིག་ཀྱང་གཞི་ལ་གནས་ཚེ་ཡེ་ཤེས་དང་། རྩལ་དུ་ཤར་བ་ལ་འོད་ཅེས་རྗོད་བྱེད་ལ་ཁྱད་འཇུག་པའི་རྒྱུ་མཚན་དེ་ཡང་ཤེས་དགོས། མཉམ་བཞག་གི་རིག་པ་སྟོང་གསལ་དུ་གནས་པ་དང་སེམས་རང་སར་ལྷན་ནེར་གནས་པ་གཉིས་རང་བཞིན་གྱི་གནས་ཚུལ་འདྲ་ཡང་རིག་པ་དྭངས་ལ་ཡུལ་མེད་དང་སེམས་ཡུལ་ཅན་འཛིན་པས་བཅིང་བའི་ཁྱད་པར་ཤེས་དགོས། དེ་བཞིན་སེམས་རིག་ཡུལ་ཐོག་ཏུ་སྒོམ་པའི་རྗེས་ཐོབ་ལ། སེམས་རྟོག་མེད་དང་རིག་པ་རྟོག་མེད་གཉིས་མི་རྟོག་པ་འདྲ་ཡང་། རིག་པ་ཟང་ཐལ་ཡུལ་ལ་འཇུག་པའི་རྒྱུ་མེད་པ་དང་སེམས་ཡུལ་ཐོག་ཏུ་ལྷན་ནེར་སྡོད་པའི་ཁྱད་ཡོད། རིག་པ་རང་གནས་ཀྱི་བསམ་གཏན་དང་རྩ་རླུང་འཛིན་རྩོལ་གྱི་སྒོམ་པ་གཉིས་ཡིད་རྩེ་གཅིག་ཏུ་གནས་ཚུལ་འདྲ་ཡང་། རང་བབས་ཀྱི་བསམ་གཏན་ནི་ཆོས་ཉིད་ཀྱི་ངང་དྭངས་དུས་རྟག་ཏུ་ཡོད་ལ་རྩ་རླུང་གི་སྒོམ་པ་ནི་བྱིངས་རྒོད་ཤས་ཆེ་ལ་རྩོལ་བའི་རྐྱེན་ཁ་ན་ཡོད་པའི་ཁྱད་ཡོད་རིག་པ་རང་ཤར་ཡུལ་ལ་སྣང་བ་དང་རྣམ་རྟོག་རང་གར་ཤོར་བ་གཉིས་ཡུལ་ལ་འཕྲོ་ཡུལ་འདྲ་ཡང་། རིག་པ་ཐལ་བྱུང་དུ་ཤར་ནས་འཛིན་མེད་དུ་གྲོལ་བ་དང་། རྣམ་རྟོག་གཟུང་འཛིན་དུ་ཞེན་ཅིང་ཡུལ་ཕྱིར་འབྲང་བའི་ཁྱད་ཡོད། རིག་པའི་སྣང་ཡུལ་རང་ཤར་དང་འཁྲུལ་སྣང་སྣ་ཚོགས་སུ་ཤར་བ་གཉིས་མ་དག་པའི་དངོས་པོར་སྣང་ཚུལ་ཙམ་དུ་འདྲ་ཡང་། རྣལ་འབྱོར་པ་ལ་ཆུ་ཟླ་དང་རྨི་ལམ་ལྟར་ངང་གིས་བདེན་མེད་དུ་ཤར་བས་མི་འཆིང་ལ་ཕལ་པ་རྣམས་འཆིང་བའི་ཁྱད་ཡོད། འོད་གསལ་ཡེ་གདངས་ཀྱི་ཐིག་ལེ་དང་རླུང་སེམས་བཟུང་བའི་འཇའ་ཐིག་གཉིས་སྟོང་གཟུགས་ཤར་ཙམ་དུ་འདྲ་ཡང་། རང་བཞིན་རྣམ་དག་གི་ཐིག་ལེ་དབྱིངས་རིག་གི་སྣང་ཆ་ཡིན་པས་རྩ་རླུང་འཛིན་རྩོལ་ལ་མི་ལྟོས་ཤིང་རྟོག་བྲལ་དྭངས་མ་རང་གནས་བསམ་གཏན་གྱིས་བརྒྱན་པ། རྩ་རླུང་གི་རྟགས་རྣམས་ནི་རླུང་གི་རྩོལ་བའི་རྗེས་སུ་བྱེད་པས་འཕེལ་འགྲིབ་མང་ཞིང་རྟོག་པ་དང་བཅས་པ་བསམ་གཏན་ལ་བརྟན་པ་མི་ཐོབ་པ་སོགས་ཁྱད་པར་ཤིན་ཏུ་ཆེ། ཕྱི་མ་འདི་ནི་ལམ་འབྲས་རྒྱུད་གསུམ། གསང་འདུས་ཕྲ་ཐིག་སྦྱོར་དྲུག་སོགས་སྒོམ་པའི་སྐབས་འཆར་ཡང་སྙིང་ཐིག་གི་མངོན་སུམ་དང་ཁྱད་ཤིན་ཏུ་ཆེ་བ་དེ་ལྟར་ཡིན། རིག་པའི་སྐུ་དང་རྟོག་པའི་སྐུ་གཉིས་ལྷ་སྐུ་འཆར་ཙམ་དུ་འདྲ་ཡང་རྒྱ་ཆེ་ཆུང་དང་རྟག་མི་རྟག་རྟོག་པ་གོམས་རྗེས་བྱེད་དགོས་མི་དགོས་ཀྱི་ཁྱད་ཡོད། ཐེག་པ་འོག་མའི་ཡིད་དཔྱོད་ཀྱི་ལྟ་སྒོམ་དང་རིག་པ་མངོན་སུམ་ལྟ་སྒོམ་གཉིས་མིང་འདྲ་ཡང་དབང་པོ་དང་རིག་པ་ལ་སྣང་མི་སྣང་གི་ཁྱད་ཡོད། རང་བཞིན་རྫོགས་པ་ཆེན་པོའི་སྣང་བ་བཞི་ལ་བརྟན་པ་ཐོབ་པས་རང་སྣང་ཆོས་ཉིད་ཀྱི་བར་དོ་དང་། རྟོག་བཅས་ལྷའི་སྒྱུ་ལུས་གཉིས་ལྷ་སྐུར་སྣང་བ་ཙམ་དུ་འདྲ་ཡང་རང་སྣང་དུ་ཤེས་དུས་གྲོལ་མི་གྲོལ་དང་སྣང་བ་རྒྱ་ཆེ་ཆུང་གི་ཁྱད་ཡོད། དེ་ཡང་ཆོས་ཉིད་ཀྱི་བར་དོ་རིག་གདངས་སུ་སྣང་ལ། ལྷའི་སྒྱུ་ལུས་རྟོག་པ་གོམས་རྗེས་སུ་སྣང་བ་འདི་གཉིས་ཀྱི་ཁྱད་ཡིན། ཕྱེད་སྤྲུལ་ལོངས་སྐུའམ་རང་བཞིན་སྤྲུལ་སྐུའི་ཞིང་སྣང་དང་། མས་བགྲོད་སངས་རྒྱས་ནས་དག་པའི་ཞིང་དུ་མཛད་པ་སྟོན་པ་གཉིས་ལོངས་སྐུའི་སྣང་ཆ་ལས་དག་པའི་ཞིང་ཁམས་འཆར་ཚུལ་འདྲ་ཡང་རང་སྣང་དང་གཞན་སྣང་གི་ཁྱད་ཡོད། དེ་ཡང་རང་བཞིན་སྤྲུལ་སྐུའི་ཞིང་རང་སྣང་ལྷུན་གྲུབ་ཀྱི་སྒོ་ལས་ཤར་བ་ཡིན་ལ་ཅིག་ཤོས་འཁྲུལ་སྣང་དང་རྗེས་སུ་མཐུན་པར་སྣང་བ་འདི་གཉིས་ཀྱི་ཁྱད་ཡིན། མཐར་ཐུག་གི་གྲོལ་ས་ཡེ་སྟོང་བསམ་གྱིས་མི་ཁྱབ་པའི་ཀ་དག་དང་། ངེས་མེད་གཞིའི་ལྷུན་གྲུབ་གཉིས་རིག་པའི་ཡོན་ཏན་ངོ་བོ་རང་བཞིན་ཐུགས་རྗེ་སོགས་འདྲ་ཡང་འཁྲུལ་གཞི་བྱེད་མི་བྱེད་དྲི་མ་དག་མ་དག་གི་ཁྱད་ཡོད། འདི་མ་ཤེས་ན་འབྲས་བུ་གཞི་ཐོག་ཏུ་གྲོལ་བ་ཡིན་ཞེས་བབ་ཅོལ་དུ་སྨྲ་བ་ལས་ཆ་མེད་པ་ཡིན། དེ་ལྟ་ན་ཀ་དག་ལ་གྲོལ་ས་དང་ལྷུན་གྲུབ་ལ་གྲོལ་གཞིར་ཤེས་དགོས། གྲོལ་སའི་དབྱིངས་ཀ་དག་དང་ཉམས་སུ་ལེན་དུས་ཀྱི་ཕྱི་ནང་གི་དབྱིངས་ཀ་དག་གཉིས་རིག་པ་རྒྱ་ཆད་ཕྱོགས་ལྷུང་མེད་པ་དང་ཡུལ་སྣང་དག་པ་ཙམ་དུ་འདྲ་ཡང་། ད་ལྟའི་ཀ་དག་ནང་རླུང་སེམས་མ་དག་པའི་རྐྱེན་དབང་རེས་འགའ་བ་དང་དྲི་མ་དང་བཅས་པས་མཉམ་རྗེས་རེས་འཇོག་ཅན་ཡིན། གྲོལ་ས་ལ་རླུང་སེམས་ཀྱི་ཆ་དག་ཟིན་པས་འཁོར་འདས་ཀ་དག་ཏུ་གནས་པ་སྟེ་ཁྱད་ཤིན་ཏུ་ཆེ། རིག་པ་ནང་གསལ་རྗེན་ལ་བུད་དུས་མི་འགག་པར་སྣ་ཚོགས་སུ་སྣང་ཞིང་འཆར་བ་དང་། སེམས་སེམས་བྱུང་གི་རྟོག་པ་སྣ་ཚོགས་སུ་འཕྲོ་བ་གཉིས་སྣང་སེམས་ཤར་ཚུལ་ཙམ་དུ་འདྲ་ཡང་། རིག་པ་ངང་དྭངས་ཟང་ཀ་མ་ཐལ་བྱུང་ཤར་གྲོལ་རིས་མེད་དུ་གནས་པས་རྐྱེན་དབང་དུ་མི་འགྲོ་ལ། བྱུང་ཚོར་སེམས་ཀྱི་རང་བཞིན་ནི་རྟོག་པ་ཡུལ་ལ་ཡེངས་ནས་ཐ་མལ་རང་ཁར་འགྲོ་བའི་ཁྱད་ཡོད། སྒོམ་བྱུང་གི་ཤེས་རབ་རང་རྩལ་རྫོགས་པ་དང་ཀུན་རྟོག་ཡུལ་གྱི་སྟེང་དུ་འཕྲོ་བ་གཉིས་འཆར་ལུགས་ཙམ་འདྲ་ཡང་། ཤེས་རབ་ནི་ཟང་ཐལ་ཐད་ཀར་ཞིག་ནས་ཕན་ཚུན་འཁོར་རྒྱུའི་རྟོག་པ་མ་གྲུབ་ལ། ཀུན་རྟོག་ནི་ཕྱི་རོལ་དུ་ཡུལ་འཛིན། ནང་ལོག་ཏུ་གཅིག་ལ་གཅིག་མཐུད་ཀྱི་གཟུང་འཛིན་རང་ཁ་མར་འགྲོ་བའི་ཁྱད་ཡོད། འདི་མ་ཤེས་ན་སོ་སོར་རྟོགས་པའི་ཤེས་རབ་ཡིད་ཀྱི་རྣམ་ཤེས་དང་ནོར་ནས་ལྟ་བ་ཐམས་ཅད་བཅོས་མར་གྱུར་ཏེ་ངོས་མི་ཟིན་པ་འདི་འོང་། ལར་རྫོགས་པ་ཆེན་པོ་ཐད་དྲང་དུ་བསྟན་པའི་དོན་དམ་མ་སྐྱེས་མི་འགག་དང་། གྲུབ་མཐའ་འོག་མར་དགོངས་གཞི་རེེ་ལ་ལྟོས་ནས་སྐྱེ་མེད་འགག་མེད་སོགས་གསུངས་པ་སྟོང་གསལ་སྤྲོས་བྲལ་རང་བྱུང་གི་ཡེ་ཤེས་སུ་བཤད་པ་འདྲ་ཡང་། རྫོགས་ཆེན་པས་མངོན་སུམ་གནད་ལ་ཕབ་པའི་དོན་ཁོང་ནས་འཆར་བས་ཡིད་དཔྱོད་ཀྱི་ལྟ་བ་ལ་མ་ལྟོས། རྣམ་པར་ཤེས་པ་ཚོགས་བརྒྱད་གྱི་རྟོག་པ་སྐྱེ་མེད་ཀྱི་དབྱིངས་སུ་འགོགས་པ་དང་། གྲུབ་མཐའ་གཞན་གྱིས་དོན་དམ་དེ་འདྲ་ཞིག་ཡིན་སྙམ་ནས་རྟོག་པས་ཡིད་དཔྱོད་བྱས་པ་གཉིས། སྟོང་སྒོམ་མུན་རྡོ་དང་མ་བྲལ་པ་དང་བྲལ་ནས་འོད་གསལ་རྡོ་རྗེ་སྙིང་པོའི་ལྟ་བ་རང་བྱུང་གི་ཡེ་ཤེས་ཚིག་ལམ་གྱིས་མི་མཚོན་པ་མངོན་སུམ་དུ་བསྟན་པའི་ཁྱད་པར་ཤིན་ཏུ་ཆེ། འདི་མ་ཤེས་ན་ལམ་སྔགས་སུ་ཞུགས་ཀྱང་འབྲས་བུ་ཡེ་ཤེས་ལམ་བྱེད་ཀྱི་རྒྱུས་མེད་པར་ལྟ་སྒོམ་རྒྱུ་ལམ་བྱེད་ལས་ཅུང་ཟད་ཀྱང་འཕགས་མ་ནུས་ནས་ལུང་མ་བསྟན་སྒྲུབ་ལོ་དང་རྟོགས་ལོ་ཡིན་ལོའི་ངང་དུ་མི་ཚེ་ཆུད་འཛའ་བ་འདི་འོང་། ཁྱད་པར་གསང་ཆེན་རྡོ་རྗེ་སྙིང་པོའི་རྣལ་འབྱོར་གྱིས་ཡུལ་དང་རིག་པ་ལུས་ཀྱི་གནད་བཅུན་པས་རིག་པ་མངོན་སུམ་དུ་གཞལ་བ་དང་གསང་སྐོར་སོགས་ཟུང་འཇུག་གི་གྲུབ་མཐའ་གཞན་པ་དག་གིས་དཔེ་དོན་རྟགས་གསུམ་གྱིས་རིག་པ་གཞལ་བ་ཉིད་གཞལ་ལུགས་འདྲ་ཡང་མིག་ཡོད་མེད་གཉིས་ཀྱིས་དུང་གི་ཁ་དོག་གཞལ་བ་ཙམ་གྱི་ཁྱད་ཡོད་པ་སོགས་ཤེས་པར་མ་བྱས་ན་ལམ་རྫོགས་ཆེན་དུ་རློམ་པ་ཙམ་གྱིས་གང་ཟག་རྫོགས་པ་ཆེན་པོར་གཏན་ནས་འགྲོ་བ་མ་ཡིན་ཞེས་ཡབ་རྗེ་ཆོས་ཀྱི་རྒྱལ་པོ་དེ་ཉིད་ཀྱི་ཞལ་གསུང་ཚད་མའོ། །ཞེས་གསུངས་འདུག་པ་རྣམས་འདུས་གསལ་ལྟ་བདེར་འདུག་པས་འདིར་ཡིག་ཚོགས་ལ་མ་འཛེམ་པར་བྲིས་པའོ། །མདོར་ན་འཁྲུལ་པ་རྨི་ལམ་ལྟ་བུ་འདི་དོན་ལ་ཡོད་མ་མྱོང་བས་གཤིས་ལ་དྲི་མ་མེད་དེ་སྤང་བྱ་ཡེ་ནས་ཟད་པའམ་སངས་པ་ནི་སྤངས་པ་ཕུན་ཚོགས་དང་། ཡོན་ཏན་མ་བཙལ་ལྷུན་གྱིས་རྫོགས་ཤིང་རང་བྱུང་ཡེ་ཤེས་ཀྱི་ངོ་བོར་རྒྱས་པ་ནི་རྟོགས་པ་ཕུན་ཚོགས་ཏེ། ཡེ་ནས་སྤངས་རྟོགས་འབྲལ་མི་ཤེས་པའི་ཆོས་ཉིད་དུས་གསུམ་གྱི་སངས་རྒྱས་ཀུན་གྱི་དགོངས་པ་དེ་རང་ལ་རང་ཆས་སུ་ད་ལྟ་ནས་འཕེལ་འགྲིབ་མེད་པར་གནས་པ་ནི། ཡེ་ཤེས་གཏིང་རྫོགས་ཀྱི་རྒྱུད་ལས། སེམས་ཅན་མ་འཁྲུལ་སངས་རྒྱས་མེད་པའི་གོང་། །ངོ་བོ་ཉིད་ཀྱི་སྐུ་ལ་རང་བྱུང་སེམས། །དེ་ཉིད་མ་འཁྲུལ་གནས་ལུགས་ཡིན་པའི་ཕྱིར། །དེ་རྟོགས་ཆོས་སྐུ་མྱ་ངན་འདས་པའི་ཆོས། །ཀུན་ཏུ་བཟང་པོ་རང་བྱུང་ཡེ་ཤེས་ཐུགས། །རང་སེམས་རང་གིས་རིག་པ་ཆོས་ཀྱི་རྗེ། །ཞེས་དང་། ཀུན་བྱེད་ལས། མ་བཅོས་རྣལ་མ་ཀུན་གྱི་ཆོས་ཉིད་དེ། །ཆོས་ཉིད་ལས་ནི་སངས་རྒྱས་གུད་ན་མེད། །སངས་རྒྱས་མིང་དུ་བཏགས་པ་བླ་དྭགས་ཙམ། །ཆོས་ཉིད་ཅེས་བྱ་གཞན་མེད་རང་སེམས་ཏེ། །རང་སེམས་མ་བཅོས་ཆོས་ཀྱི་སྐུ་རུ་བཤད། །མ་བཅོས་པ་ལ་ཡེ་ནས་སྐྱེ་མེད་པས། །སྐྱེ་མེད་དོན་དེ་བཙལ་ཞིང་སྒྲུབ་ཏུ་མེད། །བཙལ་ཞིང་སྒྲུབ་པས་བྱར་མེད་མཐོང་མི་འགྱུར། །ཞེས་དང་། གུ་རུ་རིན་པོ་ཆེས་མཛད་པའི་གསང་སྔགས་ལམ་རིམ་གྱི་རང་འགྲེལ་ལས། གཤིས་ལ་འཁྲུལ་པ་མེད་པས་སྤངས་པ་ཕུན་ཚོགས། ངོ་བོ་གཉིས་མེད་དུ་ཡོངས་པས་རྟོགས་པ་ཕུན་ཚོགས། དེ་ལྟར་ཡེ་ནས་སངས་རྒྱས་མ་ཡིན་ན་བསྒོམས་ཀྱང་སངས་རྒྱས་སུ་མི་འགྱུར་ཏེ། ས་ལེ་སྦྲམ་ཡེ་ནས་གསེར་མ་ཡིན་ན་བྱས་ཀྱང་གསེར་དུ་མི་འགྲོ་བ་བཞིན་ནོ། །ཞེས་དང་། གཞན་ཡང་གནུབས་ཀྱི་མདོ་འགྲེལ་ལས། གང་རྒྱུ་རྐྱེན་ལས་འཕྲལ་དུ་མ་གྲུབ་པའི་ཡེ་ཤེས་བྱེད་པ་པོ་ཀ་ནས་དག་པས་རྒྱུ་རྐྱེན་ལ་རག་མ་ལས་པར་ཇི་སྙེད་པའི་ཆོས་སུ་མ་འགགས་པར་རང་ཤར་བ་སྟེ་འགྲེ་ལྡོག་སྤྱི་ཚུགས་གར་འདྲེས་ཀྱང་སྙིང་པོ་བྱང་ཆུབ་ཉིད་ཡིན་པའི་ཕྱིར། ཞེས་དང་། གལ་ཏེ་ལས་དང་ལས་ཀྱི་རྣམ་པར་སྨིན་པ་དག རྒྱུ་འབྲས་ཀྱི་ཆོས་རྣམས་གློ་བུར་བ་མ་ཡིན་ན། དེ་ཁོ་ན་ཉིད་ཀྱང་དྲི་མ་ཅན་བས་མཚན་ཉིད་བཤད་པ་བཞིན་མི་འགྱུར་ན། དེ་བས་དེ་བཞིན་ཉིད་དུ་བརྗོད་པའང་ཕྱི་མོའི་ཆོས་ཉིད་མི་འགྱུར་བའི་བླ་དྭགས་སོ། །ཞེས་དང་། རྟོག་པ་བཟང་ངན་གཉིས་ལ་སངས་རྒྱས་དང་སེམས་ཅན་དུ་བརྟགས་པས། ཞེན་པ་གཉིས་ཀྱིས་དེ་ལྟར་མཐོང་གི་ངོ་བོ་ལ་གཉིས་པ་མེད་པར་བཀའ་སྩལ་ཏེ། ཞེས་དང་། ཆོས་ཀུན་རྩ་བ་སེམས་འདི་ཉིད་ལ་འདུས། །སེམས་ཉིད་གནས་གྱུར་ཡེ་ཤེས་ལྔར་སྣང་བ། །ཞེས་པ་དངོས་པོ་གཉིས་ཀྱི་གཞི་རྩ་ནི་རང་གི་རིག་པ་ཁོ་ན་བས། སེམས་ཚོགས་བརྒྱད་ཀྱི་དངོས་པོ་ཡེ་ནས་ཡེ་ཤེས་ལྔ་ཡིན་པ་ཉིད་རིག་པ་ལ་ཤར་བའི་བླ་དྭགས་གནས་གྱུར་ཞེས་བརྗོད་དོ། །དོན་དེ་ལ་རང་གི་བློ་ཡིད་ལ་བྱ་བསམ་མེད་པར་འདུག་ན། ཡེ་ཤེས་ལྔ་དེ་ཁོ་ན་ལས་གཞན་ན་མེད་དོ། །དེ་ལྟ་བུའི་རིག་པ་གཅིག་དུ་མ་དང་བྲལ་བའི་མཚན་ཉིད་ལྔ་མ་འགགས་གསལ་བ་དང་ཡེ་ཤེས་ལྔ་ངོ་བོ་ཐ་དད་མེད་པས་རང་རིག་པ་ཉིད་ལ་འདུས་པའོ། །སེམས་ཀྱི་ཆོས་ཉིད་ཇི་བཞིན་པར་རྟོགས་ན། བརྡལ་ཁྱབ་ས་ཉིད་ནོན་པས་འདུས་པར་གསུངས། ཞེས་པ། རང་རིག་པའི་ཆོས་ཉིད་དེ་ཁོ་ན་བ་དེ་ཇི་ལྟ་བར་མཐོང་བ་ནི་ཤེས་ཤིང་རིག་པའོ། །དེ་ལྟར་གྱུར་ན་སེམས་འཕྲལ་དུ་སངས་རྒྱས་མིན་པ་ལས་ཡིན་པར་བཟོས་ཤིང་མ་བསྒྱུར་ཏེ། ཡེ་ནས་འཁྲུལ་པ་མེད་པའི་དོན་མ་བསླད་པར་གནས་པས། གཞན་དུ་བགྲོད་པ་མེད་{མོད}པའི་ཕྱིར་ཀུན་ཏུ་བཟང་པོ་དབྱེ་བ་མེད་པ་ཉིད་ཆེད་དུ་མ་མནན་པར་ནོན་པར་སེམས་རིལ་འདུས་པར་སྟོན་པས་བཀའ་སྩལ་པའོ། །ཞེས་གསུངས། དེ་ལྟ་བུའི་གནས་ལུགས་ཡང་དག་པའི་དོན་ཉིད་ལ་ཡང་དག་པའི་བརྒྱུད་པའི་མན་ངག་གི་གནད་དང་ལྡན་པས་མངོན་སུམ་རང་གནས་ཀྱི་ཡེ་ཤེས་རང་གསལ་འཛིན་ཞེན་དང་བྲལ་བའི་མིག་གིས་དབྱིངས་རིག་དབྱེར་མེད་ཀྱི་དོན་ལ་བལྟ་ཞིང་གོམས་པར་བྱེད་པ་སྟེ། དེའི་ཚུལ་ཀུན་མཁྱེན་བླ་མས། ཡངས་དོག་མཐོ་དམན་མེད་པའི་རིག་པ་ལ། །འདི་ཞེས་ངོས་བཟུང་མ་བྱེད་ནམ་མཁའི་ངང་། །མ་སྐྱེས་རྣམ་པར་དག་པའི་ཆོས་ཉིད་དེ། །ཡིན་མིན་བློ་ལས་འདས་པའི་རང་བཞིན་ལ། །དུས་གསུམ་ཡིད་ཀྱིས་ཚོལ་སྤྲོ་མ་བྱེད་ཞོག །ཇི་སྲིད་ཕྱོགས་རིས་ཞེན་པའི་སེམས་ཡོད་པར། འདག་འཛིན་ཉིད་དེ་མ་རིག་མུན་པའི་ཀློང་། །གནས་ལུགས་རྟོགས་པའི་ནུས་མེད་འཆིང་བྱེད་ཉིད། །དེ་བས་ཆེད་དུ་དམིགས་པ་ཡོད་ན་ཐོངས། །གང་ལ་དམིགས་པ་འཆིང་བའི་གཟེབ་ཡིན་ཏེ། །གཉིས་སུ་འཛིན་པས་རྣལ་མའི་དོན་མི་མཐོང་། །ཡིན་མིན་བློ་ཡིན་དགག་སྒྲུབ་ཞེན་པ་ཡིན། །དེ་ལ་དོན་དུ་འཛིན་པས་མ་འཆིང་ཀྱེ། །ཞེས་དང་། འདི་ལྟར་སྣང་བ་བག་ཆགས་འཁྲུལ་པའི་གཟུགས། །སེམས་ལ་སྣང་ཡང་སེམས་སུ་མ་གྲུབ་པ། །སེམས་ལས་གཞན་དུའང་ཅུང་ཟད་མེད་པ་སྟེ། །ཇི་ལྟར་ངྷ་དུ་ར་ཡི་སྣང་བའམ། །བད་ཀན་དབང་གིས་ཉ་ལྕིབས་སྐྲ་ཤད་བཞིན། །གང་ནའང་མེད་ལ་སྣང་བར་ཤེས་པར་མཛོད། །འཁྲུལ་སྣང་འཁྲུལ་འཛིན་འཁྲུལ་པའི་སེམས་ལས་བྱུང་། །སེམས་ནི་དངོས་མེད་ནམ་མཁའི་རང་བཞིན་དུ། །གཞི་རྩ་རྟེན་མེད་འབྱུང་བའི་ས་མེད་པར། །ཡེ་སྟོང་སྤྲོས་དང་བྲལ་བར་མཁྱེན་འཚལ་ལོ། །བཙལ་བའི་ཡུལ་མེད་སྟོང་ལ་དངོས་པོ་མེད། །ཚོལ་བའི་སེམས་མེད་མ་སྐྱེས་རྣམ་པར་དག །གཟུང་འཛིན་གཉིས་མེད་བདག་མེད་ཡངས་པའི་ཀློང་། །མཁའ་མཉམ་བསམ་བརྗོད་འདས་པའི་རང་བཞིན་དུ། སྣ་ཚོགས་འཁོར་འདས་ཆོས་རྣམས་ཕྱམས་གདལ་བས། །ཡེ་བབས་རང་བཞིན་གཉུག་མའི་ཡེ་ཤེས་ནི། །མཁའ་འདྲ་འཕོ་འགྱུར་ཕྱོགས་རིས་མེད་པའི་དོན། །ད་ལྟའི་དུས་ནས་གནས་པར་མཁྱེན་འཚལ་ལོ། །ཞེས་དང་། སེམས་འགག་ཆ་ནི་ཁྲེགས་ཆོད་དང་། །ཡེ་ཤེས་རང་གསལ་ཐོད་རྒལ་གཉིས། །ཟུང་འཇུག་རང་བྱུང་ཡེ་ཤེས་ཏེ། །སྙིང་ཏིག་གསང་བའི་ལམ་དུ་བཤད། །གང་ཚེ་སྤྲོས་ཀུན་ཉེར་ཞིའི་ཚེ། །རང་རིག་ཡེ་ཤེས་མངོན་པར་སྣང་། །དེ་ཕྱིར་དོན་འདི་ཤེས་པར་བྱ། །དེང་སང་དུས་ཀྱི་སྒོམ་ཆེན་ཕལ། །རྟོག་པར་ཁོལ་བུར་འཆིང་འཆིང་ནས། །མི་རྟོག་ཡེ་ཤེས་ངོས་མ་ཟིན། །སེམས་གནས་བཟང་ཡང་གོང་མ་ཡི། །བསམ་གཏན་གཟུགས་མེད་རྣམ་བཞིར་གོལ། །སྙིང་ཏིག་བསྒོམ་པར་འདོད་པ་ཡི། །རྣལ་འབྱོར་ཕལ་ཡང་དེ་དང་འདྲ། །ཡང་ན་ཆད་པ་ནམ་མཁའ་འདྲ། །ལེགས་ཀྱང་གཟུགས་མེད་ཞི་གནས་ཙམ། །ཡང་ན་རྟག་པ་ཐེར་ཟུག་པ། །འདོད་ལ་ཞེན་པས་བསམ་གཏན་དུ། །གོལ་བའི་རིགས་ཀྱང་ཤིན་ཏུ་མང་། །དེས་ན་རྟག་ཆད་ལས་གྲོལ་བའི། ཡེ་ཤེས་མཆོག་འདི་ཤེས་པར་མཛོད། །ཅེས་དང་། ཁྱད་པར་ཡིད་བཞིན་རིན་པོ་ཆེའི་མཛོད་ལས། གང་ལ་གནད་མེད་སྤྲོས་བྲལ་ཚིག་ཏུ་ཤོར། །རྟོག་པའི་བཟོ་རྒྱས་མཐའ་བྲལ་གདེང་བཅས་ཏེ། །རྣམ་རྟོག་ཅི་སྐྱེས་སྐྱེ་འགག་གྲངས་འདེབས་ཀྱང་། །གནས་ལུགས་དོན་དང་རྒྱང་རིང་གནམ་ས་བཞིན། །ཟང་ཐལ་ཆིག་རྫོགས་འབྲེལ་ཐག་ཆད་པ་ཡི། །སལ་ལེ་ཧྲིག་གེ་བར་མཚམས་ངོས་བཟུང་ནས། །དོན་མཐོང་འདོད་པས་དོན་མེད་ཕྱིན་ཅི་ལོག །སྐད་ཅིག་ཡུད་ཙམ་ངོས་བཟུང་འགྱུར་བའི་ཕྱིར། །སྔ་ཕྱི་སྒོམ་གྱི་བར་དེར་སུ་ཡིས་བཅུག །དེ་འདྲའི་ལམ་ངན་མདོ་རྒྱུད་དང་འགལ་བས། །ཐར་པ་འདོད་ན་རིང་དུ་སྤང་བར་བྱ། །ཞེས་སོགས་གསུངས་པས། ཀུན་གཞི་ལུང་མ་བསྟན་དང་། ཀུན་གཞིའི་རྣམ་ཤེས་གསལ་རིག་ཙམ་དང་སྟོང་ཉམས་ལ་ཞེན་པས་གུད་དུ་བཅད་པའི་འདུ་བྱེད་སེམས་ཀྱི་ཀུན་རྟོག་ལ་རྫོགས་པ་ཆེན་པོ་རང་བྱུང་གི་ཡེ་ཤེས་སུ་མི་རློམ་པར། ཀུན་ཏུ་བཟང་པོ་ཡེ་ཤེས་ཟང་ཐལ་གྱི་དགོངས་པ་དུས་གསུམ་གྱི་རྟོག་པའི་སེམས་སེམས་བྱུང་གི་སྤྲོས་པ་མཐའ་དག་དབྱིངས་སུ་ཞི་བའི་དུས་བཞི་མཉམ་པ་ཉིད་ཀྱི་ཡེ་ཤེས་བཞི་ཆ་གསུམ་བྲལ་ཉིད་ཇི་ལྟ་བར་མངོན་སུམ་རང་ཐོག་ཏུ་ཕེབས་པས་ངོ་རང་ཐོག་ཏུ་འཕྲོད། ཡུལ་གྱིས་མ་བསྒྱུར། འཛིན་པས་མ་བསླད། སྤང་གཉེན་མ་ཞུགས་པའི་རིག་པ་དེ་ཉིད་ཇི་ལྟར་འདུག་ཀྱང་ཆོས་སྐུ་རང་བྱུང་གི་ཡེ་ཤེས་ལས་མ་འདས་པར་ཐག་གཅིག་ཐོག་ཏུ་ཆོད། ཅིར་སྣང་ཅིར་ཤར་ཐམས་ཅད་དང་པོ་ཆོས་ཉིད་ཀྱི་རྩལ་ལས་བྱུང་། ད་ལྟ་ཆོས་ཉིད་ཀྱི་ངང་དུ་གནས། མཐར་ཆོས་ཉིད་ཀྱི་ངང་དུ་ཐིམ་པས་གདེང་གྲོལ་ཐོག་ཏུ་བཅའ་བ་གསུམ་གྱིས་ཉམས་སུ་ལེན་དགོས་ཏེ། རིག་འཛིན་དགའ་རབ་རྡོ་རྗེས། ཡིན་པར་གྲུབ་པ་མེད་པའི་རིག་པ་འདི། །སྣ་ཚོགས་འཆར་ཚུལ་ཅིར་ཡང་མི་འགག་པས། །སྣང་སྲིད་ཀུན་ཀྱང་ཆོས་སྐུའི་ཞིང་དུ་ཤར། །ཤར་བ་དེ་ཉིད་རང་གི་ཀློང་དུ་གྲོལ། །ཞེས་གསུངས། དེས་ན་རྫོགས་པ་ཆེན་པོ་ཡེ་གྲོལ་ཀ་དག་གི་གནས་ལུགས་ཡང་དག་པའི་དོན་དེ་ཉིད་མཐོང་ན་གཉེན་པོ་གཞན་ལ་ལྟོས་མི་དགོས་པར་གཟུང་འཛིན་གྱི་མཚན་མ་ཐམས་ཅད་རྣམ་པར་གྲོལ་བ་ཡིན་ཏེ། རིག་པ་རང་ངོ་ལ་འཁོར་ཆོས་གང་གིས་ཀྱང་མ་གོས་པས་སྲིད་པ་ཉེར་ལེན་གྱི་རྒྱུ་ཟད་པས་ཡེ་གྲོལ། གཉེན་པོ་གང་གིས་ཀྱང་མ་བཅོས་པར་གང་ཤར་ཐམས་ཅད་སྦྲུལ་མདུད་རང་གྲོལ་བ་བཞིན་དུ་འགྲོལ་བྱེད་གཞན་ལ་མ་ལྟོས་པས་རང་གྲོལ། ཚོགས་བརྒྱད་ཀྱི་ཤེས་པ་ཐམས་ཅད་ཡུལ་ཡུལ་ཅན་གཉིས་སུ་མེད་པ་སྐད་ཅིག་ཉིད་ལ་ཐོག་བབས་ཆེན་པོར་རང་བཞིན་གྱིས་གྲོལ་བས་གཅེར་གྲོལ། དུས་གསུམ་གྱི་ཤེས་བྱ་གང་དུའང་མི་གནས་པས་མཐའ་གྲོལ་ཏེ་གྲོལ་ལུགས་ཆེན་པོ་བཞིའི་གདེང་ཆོས་ཏེ་འཁྲུལ་སེམས་གཟུང་འཛིན་གྱི་རྟོག་པ་དབྱིངས་སུ་འགག ཅིར་སྣང་རང་བྱུང་ཡེ་ཤེས་ཆེན་པོ་ཐིག་ལེ་ཉག་གཅིག་གི་ཀློང་དུ་རྫོགས་ནས་དགོངས་པ་ལ་འཕོ་འགྱུར་མེད་པ་ཀུན་ཏུ་བཟང་པོའམ་ཀུན་བྱེད་རྒྱལ་པོའི་དོན་ལ་མངའ་འབྱོར་བར་འགྱུར་ཏེ། ཀུན་བྱེད་ལས། ཀུན་བྱེད་ང་ཡི་སྐུ་གསུང་ཐུགས་ཉིད་ནི། །མ་བཅོས་རྣལ་དུ་བཞག་པའི་དཀྱིལ་འཁོར་གསུམ། །མ་བཀོད་དུས་གཅིག་རྫོགས་པའི་དོན་རྟོགས་ན། །ལྷུན་གྲུབ་སྙིང་པོའི་དོན་ལ་འཇུག་པར་བྱེད། །ཅེས་དང་། དེ་ཕྱིར་སེམས་དཔའ་རྡོ་རྗེ་ཁྱོད་ཉིད་ཀྱང་། །སྒྲ་ལ་མ་དགའ་དོན་ཉིད་རྟོགས་པར་གྱིས། །གང་གིས་དེ་ལ་རྟོགས་པ་སྐྱེས་མ་ཐག །ཀུན་བྱེད་རྒྱལ་པོའི་དོན་ལ་དབང་འབྱོར་འགྱུར། །ཞེས་དང་། བྱར་མེད་འདི་ལ་གང་གནས་པ། །ལུས་ནི་གང་ཟག་ལྷ་མི་ཡང་། །དགོངས་པ་ཆོས་ཉིད་སངས་རྒྱས་ཡིན། །ཞེས་སོ། །འོ་ན་རྣལ་འབྱོར་པ་དང་སངས་རྒྱས་གཉིས་ཡོན་ཏན་ལའང་ཁྱད་མེད་དམ་སྙམ་ན་དེ་ནི་མ་ཡིན་ཏེ། ཨ་རོས་མཛད་པའི་ཅིག་ཅར་བའི་སྒོམ་རིམ་ལས། དཔེར་ན་གནམ་སྟོང་གི་དུས་ན་ཟླ་བ་མེད་པ་མ་ཡིན་ཡང་ཉི་མ་ལ་སོགས་པའི་རྐྱེན་གྱིས་མི་མཐོང་ངོ་། །དེ་ཚེས་པ་དང་ཉ་བའི་ཚེས་ཆེ་ཆུང་ཡོད་པས་ཡོན་ཏན་མི་མཉམ་ཡང་ཟླ་བ་ཡིན་པར་གཅིག་གོ །དེ་བཞིན་དུ་སངས་རྒྱས་དངོས་ནི་ཆོས་ཉིད་ཡིན་ནོ། །དེ་ནི་ལོག་རྟོག་གིས་བསྒྲིབས་པས་སེམས་ཅན་གྱི་དུས་ན་མི་མཐོང་ངོ་། །རྣལ་འབྱོར་པས་བདག་དང་ཕྱི་ནང་གི་དངོས་པོ་ཀུན་ཆོས་ཉིད་དུ་མཐོང་ནས་དེའི་ངང་ལ་གནས་པ་མེད་པའི་ཚུལ་གྱིས་གནས་ན། སངས་རྒྱས་དང་རྟོགས་པ་ཆེ་ཆུང་ཡོད་ཀྱང་ཆོས་ཉིད་ཀྱི་གནས་པར་གཅིག་གོ །དེ་ལ་དགོངས་ནས་ནོར་ཅན་གྱི་མདོ་ལས། དགེ་བསྙེན་ཙུནྡ་ལུས་མ་རབས་ཀྱང་སེམས་སངས་རྒྱས་སོ། །ཞེས་གསུངས། ཡོན་ཏན་ནི་ཁྱད་ཞུགས་ཏེ། སངས་རྒྱས་ཀྱིས་ནི་རྣམ་པར་རྟོག་པ་རྩད་ནས་བཅོམ་པས་ན། བདག་ཏུ་འཛིན་པ་དང་ཡུལ་ལ་ཆགས་སྡང་ལ་སོགས་པའི་ཉོན་མོངས་པ་གཏན་དུ་སྤངས་པའོ། །རྣམ་པར་མི་རྟོག་པ་ལྷུན་གྱིས་གྲུབ་པས་ན་མཉམ་པར་བཞག་པ་དང་བཞེངས་པ་མི་མངའོ། །མི་རྟོག་པའི་ངང་ལས་ཀྱང་མཛད་པ་དང་ཡོན་ཏན་བསམ་གྱིས་མི་ཁྱབ་པ་ཡང་རང་བཞིན་གྱིས་འབྱུང་ལ། རྣལ་འབྱོར་པ་ལ་ནི་ཡོན་ཏན་དེ་ལྟ་བུ་མེད་པས་མི་མཉམ་མོ། །ཞེས་དང་། མངོན་དུ་གྱུར་པའི་འབྲས་བུ་ནི་རྣམ་པར་རྟོག་པ་ཟད་པ་ལ་བྱ་སྟེ། མདོ་ལས། རྣམ་པར་རྟོག་པ་ཟད་ནས་སུ། །རྣམ་པར་མི་རྟོག་བྱང་ཆུབ་ཡིན། །ཞེས་འབྱུང་། འོན་ཀྱང་གང་ཟག་གི་མོས་པ་དང་། བརྩོན་འགྲུས་དང་། དབང་པོ་རྣོ་རྟུལ་གྱི་དབང་གིས་གྲོལ་ཐར་འཐོབ་པ་ལ་སྔ་ཕྱི་ནི་ཡོད་དེ། མདོ་དགོངས་པ་ངེས་འགྲེལ་ལས་ཀྱང་། གནས་ངན་ལེན་གྱི་བག་ཆགས་ནི་བསྐལ་པའམ་བསྐལ་པ་གྲངས་མེད་པའམ། ཞེས་པ་ནས། སྲོད་དང་ཐོ་རངས་དང་སྐད་ཅིག་དང་ཐང་ཅིག་དང་ཡུད་ཙམ་གྱིས་འབྱང་བར་འགྱུར་རོ། །ཞེས་འབྱུང་ངོ་། །དེའི་ཚེ་མི་རྟོག་པའི་ཡེ་ཤེས་དེ་འབྱུང་བའི་ཐབས་ནི། སྡོང་པོ་བརྒྱན་པ་ལས། ཆུ་དང་རྡུལ་བྲལ་བ་བཞིན་དུ། སངས་རྒྱས་ཀྱི་རང་བཞིན་ཡེ་ནས་ཡོད་པ་དེ་ལྷུན་གྱིས་གྲུབ་བོ། །ཞེས་འབྱུང་ངོ་། །ཞེས་གསུངས་པ་བཞིན་ལ། དེར་མ་ཟད་མདོ་འགྲེལ་མུན་པའི་གོ་ཆ་ལས། འཁོར་རྣམས་ངུས་ཏེ། བསྐལ་པ་དེ་སྙེད་དུ་བཙལ་ཡང་གསང་སྔགས་མ་རྟོགས་ཐོས་པ་ཙམ་གྱི་སྐལ་བའང་མེད་པ་དང་། ཇི་ལྟར་བྱ་བའི་ཐབས་མ་ནོར་བ་ཞུས་པའི་ལན་དུ། ཁྱེད་རྣམས་དེ་སྐད་མ་སྨྲ་ཞིག གསང་བ་དེ་ཁོ་ན་ཉིད་ཀྱི་མཚན་ཉིད་བཤད་པ་བཞིན། རྡོ་རྗེ་སེམས་དཔའ་ཁོ་ནའི་ཡུལ། ངོ་བོ་མེད་པ་བརྗོད་པ་དང་བྲལ་བས་གཞན་ལ་བསྟན་པར་དཀའ་བ་ཡུལ་བྲལ་ཞིང་མཚན་ཉིད་མེད་པས་ན། དངོས་པོ་བསལ་ཞིང་དོན་བཙལ་དུ་མེད་པ། དཔེ་དང་བྲལ་བས་ཉེ་བར་བསྟན་དུ་མེད་པ། ཅི་ཡང་མ་ཡིན་པའི་ཕྱིར་གང་དུའང་མ་ངེས་པས་ཚིག་ལམ་དང་བྲལ་བའི་ཕྱིར་དང་། བྱང་ཆུབ་སེམས་དང་རྣམ་པ་ཐམས་ཅད་དུ་ཕྱོགས་རེར་མཚུངས་པ་མེད་པས་མཚོན་བྱེད་མེད་པ། རང་རིག་སྟོང་པ་དང་། རིག་མེད་སྟོང་པ་བས། ནམ་མཁའི་ཁོངས་སུ་གསང་བ་མ་འདུས་པའི་ཕྱིར་མཚོན་དུ་མི་བཏུབ་པ། མུ་མཐའ་མེད་པ། དེའི་ངེས་པར་བཟུང་བ་མེད་པ། ཐུན་མོང་གི་མངོན་སུམ་དང་། རྗེས་སུ་དཔག་པ་དང་། མུ་བཞི་འགོག་པ་དང་། རྟེན་ཅིང་འབྲེལ་བར་འབྱུང་བ་ལ་སོགས་པ་དང་། རང་གི་དོན་དང་གཞན་གྱི་དོན་དུ་རྒྱུ་ལྐོག་གྱུར་དང་། རང་བཞིན་ལྐོག་ཏུ་གྱུར་པ་ལ་སོགས་པ་རྣམས་ཀྱིས་མི་རིག་སྟེ། དེའི་ཕྱིར་ཁྱེད་ཀྱིས་མ་ཤེས་པ་ལྟར། ཀུན་ཏུ་འོད་དང་། ས་བཅུ་ལ་གནས་པའི་རྒྱལ་བ་དང་། བྱང་ཆུབ་སེམས་དཔས་ཀྱང་། ད་དུང་སྤྱོད་ཡུལ་དུ་མེད་པའི་འབྲས་བུ་མ་བརྙེས། དེའི་དོན་མ་མཐོང་ཇི་བཞིན་དུ་མ་སོན་ནོ། །དེ་ཅིའི་ཕྱིར་ཞེ་ན། གསང་སྔགས་ཀྱི་དེ་ཁོ་ན་ཉིད་ཞེས་པ་ལ་སོགས་པ། ཡེ་ཇི་བཞིན་དེ་ནི། ཐ་སྙད་རིལ་ངང་གིས་མ་སྤངས་བྲལ་བ་ལ། བཤད་པ་བཞིན་རྒྱལ་བ་དང་ས་པ་ཡང་བླ་དྭགས་པས། ངོ་བོ་ལ་རང་རྒྱུད་དུ་མེད་པ་དེའི་ཕྱིར་དོན་དུ་གཉེར་བ་མེད་པའི་ངོ་བོ་ལ། ས་བཅུ་པའི་བྱང་ཆུབ་སེམས་དཔས། ལྷན་ཅིག་སྐྱེས་པའི་མུན་པས་བསྒྲིབས་པའི་དབང་གིས་མཛུབ་མོའི་རྩེ་མོ་ལྟར་རང་གིས་རང་ལ་རེག་མ་ནུས་པས། ད་དུང་སྤྱོད་ཡུལ་དུ་བྱེད་པ་དང་མ་བྲལ་ཏེ། དེའི་ཕྱིར་མ་རྟོགས་མ་ཐོབ་བོ། །རྒྱུད་དག་པའི་བདེ་བར་གཤེགས་པ་ཀུན་ནི་ཡེ་སྙིང་པོ་བྱང་ཆུབ་ལ། བྱང་ཆུབ་སྙིང་པོ་ཉིད་ཀྱི་འདུ་ཤེས་ཀྱང་མི་ག ཡོ་བའི་དགོངས་པ་ལ་བཞུགས་པས། མྱ་ངན་ལས་འདས་པ་མཐར་དབྱུང་བའི་ཕྱིར། ད་དུང་མངོན་པར་མ་རྫོགས་པར་ཅིའི་ཕྱིར་དུ། ཞེས་གསུངས་སོ། །ཞེས་གསུངས་པ་དང་། རྒྱུད་བླ་མར་ཡང་ས་བཅུ་པ་ལ་གནས་པའི་བྱང་སེམས་དེས་གཞན་དོན་དུ་དབང་བཅུ་བརྙེས་པས་མཛད་པ་བཅུ་གཉིས་སོགས་སྟོན་པ་སངས་རྒྱས་དང་མཚུངས་ཀྱང་རང་དོན་དུ་སྤངས་རྟོགས་རྒྱ་མཚོ་དང་གནག་རྗེས་ཀྱི་ཆུའི་དཔེ་ཡིས་བསྟན་པ་དང་། དེར་མ་ཟད་རྒྱུའི་སངས་རྒྱས་དང་། སྔགས་ཕྱི་རྒྱུད་ཀྱི་རིགས་གསུམ་རིགས་བཞི་རྣམ་སྣང་སོགས་སྨིན་པ་རྒྱ་མཚོའི་འཁོར་རྣམས་ནི་སྔགས་ཀྱི་མཐར་ལམ་ལྷུན་གྲུབ་རིག་འཛིན་དང་དོན་གཅིག་པའི་ཕྱིར། རྒྱུན་མཐར་ཟབ་མོའི་དབང་ལ་བརྟེན་པའི་ནང་གི་མངོན་པར་བྱང་ཆུབ་པ་ལྔའི་ཚུལ་གྱིས་རང་སའི་སྒྲིབ་པ་ཕྲ་བ་བཅོམ་ནས་མཐར་ཐུག་གི་བྱང་ཆུབ་ཆེན་པོ་མངོན་དུ་མཛད་པར་སྒྱུ་འཕྲུལ་ལམ་རིམ་སོགས་ལས་རྒྱས་པར་གསུངས་པ་བཞིན་པས། གདུལ་བྱའི་དབང་པོ་རྣོ་རྟུལ་དང་སྐལ་བའི་ཁྱད་པར་གྱིས་མུན་པའི་ས་ནས་སེམས་བརྒྱད་སྐྱེ་ཚུལ་སོགས་གསུངས་པ་བཞིན་སྔགས་བླ་མེད་ལ། གཞི་ནས་ཞུགས་པ་དང་། ལམ་ནས་ཞུགས་པ་དང་། འབྲས་བུ་ནས་ཞུགས་པ་གསུམ་གསུངས་པས་མཚོན་སྣ་ཚོགས་སུ་འབྱུང་བ་ཡང་མི་འགལ་ལ། དེ་བཞིན་མདོ་ལས། བྱང་ཆུབ་སེམས་དཔའ་མི་སྐྱེ་བའི་བཟོད་པ་ཐོབ་པ་དེ་འདོད་ན་ཞག་བདུན་གྱིས་སངས་རྒྱས་ནུས་པར་གསུངས་པའང་། འདོད་ན་ཞེས་པའི་ཚིག་གི་ནུས་པས་བྱང་སེམས་བཟོད་ཐོབ་དེས་མྱུར་དུ་སངས་རྒྱས་པར་འདོད་ན་མྱུར་ལམ་སྔགས་བླ་མེད་ལ་ཞུགས་ནས་མཐར་འབྲས་མངོན་དུ་བྱེད་པའི་དོན་དུའང་བཤད་དེ། དོན་ལ་གདུལ་བྱའི་ཁམས་དབང་མོས་པ་ཐ་དད་པའི་ཕྱིར། དེ་དག་འདུལ་བའི་དོན་དུ་སངས་རྒྱས་བཅོམ་ལྡན་འདས་རྣམས་ཐབས་ལ་མཁས་པའི་དབང་གིས་འདུལ་བྱེད་ཀྱི་ཐེག་པ་དང་བསྟན་པ་སྣ་ཚོགས་སྒྲ་ཇི་བཞིན་ཡིན་མིན་ཅི་རིགས་ཡོད་པས་གནས་སྐབས་དེ་དང་དེར་བཤད་པ་ཉིད་སྐབས་ཐོབ་གཙོ་བོར་བྱེད་པ་ལས། གང་རུང་རེའི་ཕྱོགས་བཟུང་ནས། འདི་མཐའ་འདི་ཙམ་ཞེས་ཚུར་མཐོང་གི་བློས་དཔྱད་དེ་ཅིག་ཤོས་འགལ་བར་མི་བསམ་སྟེ་ཆོས་ཉིད་བསམ་མི་ཁྱབ་པའི་གནས་དྲན་པར་བྱའོ། །དེས་ན་ཐེག་ཆེན་སྦྱོར་མཐོང་གིས་སྟོང་ཉིད་དོན་སྤྱི་དང་རང་མཚན་མངོན་དུ་རྟོགས་པ་དང་། སྔགས་ཀྱི་ཐབས་ཟབ་མོ་ལས་སྐྱེས་པའི་དཔེ་དོན་གྱི་འོད་གསལ་གཉིས་ཁྱད་མེད་དུ་གསུངས་པ་ནི་རྟོགས་བྱ་ཡུལ་གྱི་སྒོ་ནས་བཞག་པ། མདོ་སྔགས་གཉིས་ལ་ཆོས་དབྱིངས་མི་འདྲ་བ་རེ་མེད་པའི་དབང་གིས་ཏེ། ཆོས་ཀྱི་དབྱིངས་ལ་དབྱེར་མེད་ཕྱིར། །རིགས་ནི་ཐ་དད་རུང་མ་ཡིན། །ཞེས་གསུངས། རྟོགས་བྱེད་ཐབས་ཀྱི་ཁྱད་པར་གྱིས་རྟོགས་ཚུལ་ལ་མངོན་རྗེས་དང་ལམ་མྱུར་བུལ་སོགས་ཁྱད་པར་གཏན་མེད་པ་ནི་མིན་ཏེ། རྒྱུའི་ས་བཅུ་དང་སྔགས་ཀྱི་རིག་འཛིན་བཞིའི་དགོངས་ཉམས་བཞིན། རྟེན་པའི་ཆོས་ཀྱི་བྱེ་བྲག་གིས། །དེ་ཡི་དབྱེ་བ་རྣམ་པར་བརྗོད། །ཅེས་གསུངས། དེ་བཞིན་ཀཿཐོག་པ་ཤཱཀྱ་རྡོ་རྗེས་འདི་ལྟར་གསུངས་ཏེ། ཕྱི་ཐུབ་པ་རྒྱུད་ཀྱི་ཐེག་པ་དང་རྒྱུ་མཚན་ཉིད་ཀྱི་ཐེག་པའི་ཁྱད་པར་ལ། དབྱིངས་དང་ཡེ་ཤེས་ཀྱི་ཁྱད་པར། དབུ་མ་པས་དབྱིངས་སྤྲོས་མཐའ་བརྒྱད་བྲལ་ཤེས་བརྗོད་གཞལ་བྱ་ལས་འདས་པར་འདོད་པ་ལ། ཀྲི་ཡ་པས། རིག་པ་རང་གསལ་བས་དབྱིངས་ཡེ་གཉིས་མེད་དག་པ་མཐའ་བཞིའི་དྲི་མ་དང་བྲལ་བ་དང་། ཡོ་གས་དབྱིངས་ཡེ་གཉིས་སུ་མེད་པའི་རྣམ་པར་སྣང་མཛད་ཆེན་པོར་འདོད་པའོ། །དོན་དམ་ལས་སྣང་མི་སྣང་གི་ཁྱད་པར། དབུ་མ་པས་དབྱིངས་དེ་ཉིད་དོན་དམ་བདེན་པ་ཡིན་པས་སྣང་བ་མེད་ལ། ཀྲི་ཡས་དེ་མ་རྟོགས་པའི་སྐྱོན་གྱིས་ཕུང་ཁམས་སྐྱེ་མཆེད་དུ་སྣང་ལ། རྟོགས་པའི་ཡོན་ཏན་སྐུ་དང་ཡེ་ཤེས་སུ་སྣང་བའོ། །དེ་ཡང་དོན་དམ་ལ་སྣང་བ་གང་ཡང་འབྱུང་རུང་དུ་ཡོད་པའོ། །ཡོ་ག་ནི་དེའི་བྱིན་བརླབས་ཀྱིས་སྣང་བར་འདོད་ལ། དག་མ་དག་ནི་རྟོགས་མ་རྟོགས་ཀྱི་བྱེ་བྲག་གོ །ཀུན་རྫོབ་ལྷ་ཡི་ཁྱད་པར། ཀྲི་ཡ་པས་སྣང་ཚད་རིགས་གསུམ་ལྷའི་དལ་དུ་འདོད་ལ། ཡོ་ག་པ་རིགས་ལྔ་ལྷའི་དལ་དུ་འདོད་པས་དབུ་མ་འཁྲུལ་པར་འདོད་པ་ལས་འཕགས་སོ་གསུངས། ཡང་སྔགས་ནང་པའི་འཕགས་ཆོས་ཕ་རོལ་དུ་ཕྱིན་པ་དང་ཡོ་ག་མན་ཆད་ནས་ཀྱང་ཐེག་པ་ཐོད་རྒལ་བ་དང་ཅིག་ཅར་བ་འོང་བར་གསུངས་པས། ཅིག་ཅར་བ་ནི་ཐེག་པ་རེ་རེའི་སྒོར་ཞུགས་ཀྱང་གང་གིའང་ཕྱོགས་འཛིན་མེད་པར་མཉམ་པ་རིས་མེད་དུ་རྟོགས་ཤིང་གྲོལ་བར་གསུངས་འདུག་པས་དེ་ཚོ་ལ་ཁྱད་པར་འདུག་པ་ནི་མ་སྤོགས་སོ། །ཐེག་པ་རང་རང་གི་གཞུང་ལུགས་ལ་བརྟེན་པའི་གཞི་ལམ་འབྲས་བུ་གསུམ་ཀ་ལ་ཁྱད་པར་ཡོད་དེ། རང་རང་གི་སྐབས་ནས་བཤད་པ་བཞིན་དང་། གོང་འོག་གི་དམིགས་ཕྱེ་སྟེ་བཤད་ཅིང་སྟོན་པ་བཞིན་ནོ། །དེ་ལ་གཉིས། རྒྱུ་མཚན་ཉིད་དང་སྔགས་ནང་པ་ཤན་དབྱེ་བ་དང་། སྔགས་ཕྱི་ནང་གི་ཁྱད་པར་རོ། །སྔ་མ་ནི། ཁྱད་པར་མི་འདྲ་བ་དཔག་ཏུ་མེད་པ་གསུངས་ཀྱང་། ཆོས་ཉིད་ལ་བླང་དོར་བྱེད་མི་བྱེད་ཀྱི་ཁྱད་པར། མཚན་ཉིད་ཀྱི་མཐར་ཐུག་གི་སྐབས་ན་ཡང་རང་བཞིན་ནམ་དོན་དམ་དུ་སྐྱེ་བ་མེད་ཅིང་གཉིས་སུ་མེད་པར་འདོད་ཀྱང་། འཁྲུལ་སྣང་ངམ་ཀུན་རྫོབ་ཏུ་ཉོན་མོངས་བྱང་ཆུབ་ཐ་དད་དུ་འདོད་པས་སྤང་བླང་དང་མ་བྲལ། གསང་སྔགས་ནང་པ་ནི་སྤྱིར་འཁོར་འདས་གཉིས་མེད་རང་བྱུང་ཡེ་ཤེས་སུ་ལྷག་མ་མེད་པར་རྫོགས་ལ། བྱེ་བྲག་ཏུ་ཉོན་མོངས་པ་རང་བྱུང་གི་ཡེ་ཤེས་སུ་མངོན་སུམ་དུ་སྣང་བས་སྤང་གཉེན་གཉིས་མེད་པར་རང་སྣང་རང་གྲོལ་དུ་ཉམས་སུ་ལེན་ཏེ། ལམ་རིམ་ལས། ཡུལ་དང་ཤེས་པར་སྣང་བ་ཡང་། །རང་བྱུང་ཡེ་ཤེས་རང་སྣང་ཟད། །ཅེས་སོ། །ལམ་བྱང་ཆུབ་གཞན་ནས་ཚོལ་མི་ཚོལ་གྱི་ཁྱད་པར་ཡང་། རྒྱུ་མཚན་ཉིད་པ་དོན་དམ་གོང་ལྟར་འདོད་ཀྱང་། ད་ལྟར་སྣང་བ་འདི་ཉིད་འཁྲུལ་སྣང་ཀུན་རྫོབ་ཏུ་འདོད་ལ། སེམས་ཀྱང་རྒྱུའི་རྣམ་པ་ཙམ་དུ་འདོད་ཅིང་ལམ་ལ་བརྟེན་ནས་འབྲས་བུ་སངས་རྒྱས་ཉིད་ཐོབ་པར་འདོད། གསང་སྔགས་ནི་ད་ལྟར་གྱི་སྣང་བ་འདི་ཉིད་ཆོས་ཉིད་རང་སྣང་བ་ལ་བདེན་རྫུན་གཉིས་སུ་མེད་ཅིང་ཆོས་ཀུན་ཡེ་ནས་སངས་རྒྱས་པས། འབྲས་བུ་གཞན་ནས་མི་འཚོལ་ཞིང་དེ་ཉིད་རྟོགས་པས་མངོན་དུ་བྱེད་པ་སྟེ། གསང་སྙིང་ལས། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །ཞེས་སོ། །མཛད་པ་ཐབས་ཀྱི་ཁྱད་པར། ཐབས་མཆོག་དཔག་གིས་མི་ལངས་ཏེ། མདོ་ལས། ཐབས་མཁས་ཆེ་དང་མང་ཡས་ཡངས། །ཞེས་པས། ཐབས་མཁས་པ་ཕྱིན་ཅི་ལོག་གི་གདུལ་བྱ་ཐབས་སྣ་ཚོགས་ཀྱིས་བརྒྱུད་ནས་ཡང་དག་པའི་ལམ་ལ་འཛུད། ཆེ་བ་ཉོན་མོངས་པ་ཉིད་མ་སྤངས་པར་ལྟ་བ་དང་ཏིང་ངེ་འཛིན་དུ་ལྡན་པས་མངོན་དུ་སྤྱད་ན་ཡང་དག་པའི་ལམ་དུ་འགྱུར། མང་བ་ཞི་རྒྱས་དབང་དྲག་སོགས་གང་ལ་གང་འདུལ་དུ་སྟོན་པ། ཡས་པ་ཐབས་སྒོ་བསམ་གྱིས་མི་ཁྱབ་པས་དོན་མཛད། ཡངས་པ་ཉོན་མོངས་སྤོང་མི་སྤོང་སོགས་གང་ཡང་དགག་པ་མེད་པར་ཤོང་བའོ། །དེ་ལྟར་གཞི་ཤེས་བྱ་ཇི་ལྟ་བ་ཉིད་མངོན་དུ་རྟོགས་མ་རྟོགས་ཀྱི་ཁྱད་ཡོད་པས། ལམ་ལའང་ཁྱད་ཡོད་དེ་འབྲས་བུ་ཉིད་ལམ་དུ་བྱེད་ཅིང་ཐབས་སྒོ་དཔག་གིས་མི་ལངས་པ་བཞིན་ནོ། །འབྲས་བུ་ལའང་ཁྱད་ཡོད་དེ། ངོ་བོ་འདུས་བྱས་མ་བྱས་ཀྱི་ཁྱད་པར་དང་། སྤང་ཐོབ་ལྷག་མ་དང་བཅས་མ་བཅས་ཀྱི་ཁྱད་ཡོད་དེ། སྔ་མ་མཚན་ཉིད་པ་ནི་རྒྱུ་ལམ་དུ་བྱས་པས་འབྲས་བུ་འདུས་བྱས་སུ་འགྱུར་ལ། གསང་སྔགས་ནི་ཆོས་ཀུན་རང་བྱུང་གི་ཡེ་ཤེས་ཡིན་ལ་དེ་ཉིད་ཇི་ལྟ་བ་བཞིན་མངོན་དུ་གྱུར་པས་འདུས་མ་བྱས་པའོ། །ཕྱི་མ་མཚན་ཉིད་པ་ནི་ཤུགས་ཀྱིས་སྤང་བྱ་ལྷག་མ་དང་བཅས་པས་ཐོབ་བྱ་ལྷག་མ་དང་བཅས་པ་ཡིན་ཏེ་གོང་མའི་ཤུགས་ཀྱིས་ཤེས་སོ། །གསང་སྔགས་པ་ནི་འབྲས་བུ་སྐུ་གསུམ་གྲངས་མཐུན་ཡང་ངོ་བོས་ཁྱད་པར་ཡོད་ལ། དེ་ཡང་གནས་ལུགས་ཀུན་རྫོབ་ཏུ་བདེན་པ་དབྱེར་མེད་དུས་གསུམ་འདུ་འབྲལ་མེད་པར་རྟོགས་པས་འབྲས་བུ་རྡོ་རྗེའི་སྐུ་མངོན་དུ་གྱུར། ཆོས་ཀུན་ལྷག་མ་མེད་པར་འདུས་མ་བྱས་ཀྱི་ཡེ་ཤེས་ལྷུན་གྲུབ་བདག་ཉིད་ཆེན་པོར་རྟོགས་པས་ངོ་བོ་ཉིད་སྐུ་ཐོབ་པའོ། །སྔགས་ཕྱི་ནང་གི་ཁྱད་པར་ལ། ངོ་བོས་དབྱེ་བ། དོན་དམ་དབྱིངས་ཡེ་གཉིས་སུ་མེད་པ་ཙམ་ཞིག་རྟོགས་ཀྱང་ཆོས་ཀུན་བདག་ཉིད་ཆེན་པོར་མ་རྟོགས་པས། ལྷ་ཡེ་ཤེས་སེམས་དཔའ་ལ་དངོས་གྲུབ་རེ་ཞིང་སྤྱོད་པ་བླང་དོར་བྱེད་པ་ནི་སྔགས་ཕྱི་པ། ཆོས་ཀུན་བདག་ཉིད་ཆེན་པོར་རྟོགས་པས་ལྷ་དང་དངོས་གྲུབ་ཀྱང་རིག་པའི་ཆོ་འཕྲུལ་ལས་མ་གཡོས་ཤིང་། སྤྱོད་པ་བླང་དོར་མེད་པར་དམ་རྫས་བདུད་རྩི་ལྔ་ལ་སོགས་པར་ལོངས་སྤྱོད་པ་ནི་སྔགས་ནང་པའོ། དེ་གཉིས་ཀྱི་ཁྱད་པར་ལ་ཡང་། ཤེས་བྱ་གཞིའི་ཁྱད་པར། གཤིས་ཡིན་ཚུལ་ལ་ཁྱད་མེད་ཀྱང་དེ་ཉིད་ཐེག་པའི་འདོད་ལུགས་ལ་ཁྱད་ཡོད་དེ། སྔགས་ཕྱི་པས་དོན་དམ་དབྱིངས་ཡེ་གཉིས་སུ་མེད་པའི་ཆོས་ཉིད་ཀྱི་ལྷ་རྣམ་པར་སྣང་མཛད་ལ་སོགས་པར་འདོད་ལ། ཀུན་རྫོབ་ནི་དེའི་བྱིན་རླབས་དག་པ་དང་མ་དག་པ་གཉིས་སུ་འདོད་ཅིང་བདེན་པ་གཉིས་སུ་འདོད། ནང་པའི་མ་ཧཱ་ཡོ་ག་ཡང་བདེན་གཉིས་སྤྱོད་ཡུལ་དང་བྲལ་བས་ཀུན་རྫོབ་ཏུ་ཡང་འཁོར་འདས་གཉིས་སུ་མེད་པར་འདོད་དོ། །བགྲོད་པ་ལམ་ལ་ལྟ་སྒོམ་སྤྱོད་གསུམ་ལས། ལྟ་བའི་ཁྱད་པར་གཤིས་འདོད་ཚུལ་བཞིན་དེ་རྟོགས་པའི་ལྟ་བ་ལའང་ཁྱད་ཡོད་དེ་རང་རང་གི་སྐབས་ནས་བཤད་པ་བཞིན་ནོ། །སྒོམ་པའི་ཁྱད་པར། སྔགས་ཕྱི་པ་མཚན་མེད་དོན་དམ་ཀྱི་ཕྱོགས་སུ་ལྷུང་ལ། མཚན་བཅས་ཀུན་རྫོབ་ཀྱི་ཕྱོགས་སུ་ལྷུང་སྟེ། དེའང་དམ་ཚིག་དང་ཡེ་ཤེས་ཐ་དད་པར་འདོད་ཅིང་དངོས་གྲུབ་གཞན་ནས་རེ་བ་དང་བཅས་པའོ། །ནང་པས་བདེན་པ་དབྱེར་མེད་བདག་ཉིད་ཆེན་པོར་རྟོགས་པས་ལྷ་ལ་སོགས་པ་ཐམས་ཅད་སེམས་ཀྱི་ཆོ་འཕྲུལ་རང་སྣང་ཡིན་ཏེ་དངོས་གྲུབ་གཞན་ནས་རེ་བའི་རྩོལ་བ་མེད་པའོ། །སྤྱོད་པའི་ཁྱད་པར། ཕྱི་པས་དག་མ་དག་གཉིས་སུ་ཕྱེས་ནས་བླང་དོར་རྩོལ་བ་དང་བཅས་པ། ནང་པས་ཆོས་ཀུན་བདག་ཉིད་ཆེན་པོར་དབྱེར་མེད་པར་རྟོགས་པས་སྤྱོད་པ་ལ་བླང་དོར་མེད་པའོ། །ཐོབ་པ་འབྲས་བུའི་ཁྱད་པར་ལ། གྲངས་རྫོགས་མ་རྫོགས་ཡོ་ག་པ་རིགས་ལྔ་ཐོབ་ཀྱང་སྐུ་གསུམ་ལས་མེད་ལ། ནང་པ་སྐུ་ལྔ་ལྷུན་གྲུབ་མངོན་དུ་གྱུར་པས་ཐོབ་བྱ་ལྷག་མ་མེད། འདུས་བྱས་མ་བྱས་ཀྱི་ཁྱད་པར། ཕྱི་པས་དངོས་གྲུབ་གཞན་ལ་རེ་ཞིང་རྩོལ་བས་སྒྲུབ་པས་འདུས་བྱས་ཡིན་ལ། ནང་པ་ཡེ་ནས་བདག་ཉིད་ཆེན་པོར་སངས་རྒྱས་པ་ཉིད་མངོན་དུ་གྱུར་པས་འདུས་མ་བྱས་པའོ། །དགོངས་པའི་བཞུགས་ཚུལ་གྱི་ཁྱད། ཕྱི་པའི་དགོངས་པ་ངོ་བོ་གཅིག་ཀྱང་སྦྱངས་པའི་ཡེ་ཤེས་མ་འདྲེས་པར་འདོད་ལ། ནང་པ་ནི་ཐུན་མོང་མ་ཡིན་པའི་དབྱེར་མེད་ཆེན་པོ་མ་འདྲེས་ལ་ཡོངས་སུ་རྫོགས་པར་བཞུགས་སོ་གསུངས། དེ་བཞིན་དུ་ནང་པ་གསུམ་གྱི་ཁྱད་པར་ཡང་། ཡོད་བསྐྱེད་རྫོགས་གཉིས་ཀ་ཡོད་ཀྱང་བསྐྱེད་རིམ་གཙོ་བོར་སྟོན་པ་མ་ཧཱ་ཡོ་ག ཡོད་བསྐྱེད་རྫོགས་གཉིས་ཀ་ཡོད་ཀྱང་རྫོགས་རིམ་གཙོ་བོར་སྟོན་པ་ཨ་ནུ། བསྐྱེད་རྫོགས་གཉིས་ཀའི་ཐ་སྙད་ལས་གྲོལ་བ་ཨ་ཏི་ཡོ་ག་སྟེ། དེ་ལས་མ་ཧཱ་དང་ཨ་ནུའི་ཁྱད་པར་ཡང་། གཞི་ལམ་འབྲས་གསུམ་ལས། དང་པོ། མ་ཧཱས་དོན་དམ་སྣང་བ་འདི་ཉིད་དུ་དངོས་སུ་ཁས་ལེན་མི་ནུས་ཤིང་། ཀུན་རྫོབ་ཀྱི་སྣང་བ་སེམས་ཀྱི་ཆོ་འཕྲུལ་ལྷ་ཡི་དལ་དུ་འདོད་ལ། དེ་གཉིས་སུ་མེད་པ་ནི་བདེན་པ་དབྱེར་མེད་དུ་འདོད་པ་ཡིན་ཏེ། དེས་ན་འཁྲུལ་པས་བརྟགས་པའི་སྣང་བ་འདི་ཉིད་ཆོས་ཉིད་དུ་ཁས་ལེན་མི་ནུས་པས། དོན་དམ་ཕྱོགས་འཛིན་གྱི་རྒྱ་དང་མ་བྲལ་བའོ། །ཀུན་རྫོབ་ཀྱང་སེམས་ཀྱི་ཆོ་འཕྲུལ་དུ་འདོད་པས། གཞི་ངོ་བོ་སེམས་དང་བཅས་ཤིང་དངོས་སུ་མི་བདེན་པས་བདེན་རྫུན་གྱི་མཐའ་དང་མ་བྲལ་བའོ། །དབྱེར་མེད་ཀྱང་དེ་གཉིས་ཀྱི་ངོ་བོ་དབྱེར་མེད་ཡིན་པས་མཉམ་པ་ཉིད་ཀྱི་དགོངས་པ་མངོན་དུ་མ་གྱུར་པའོ། །ཨ་ནུས་དབྱིངས་སམ་དོན་དམ་ལ་སྣང་བ་རྩལ་རྫོགས་སུ་འདོད་ཅིང་། འཁྲུལ་པས་བརྟགས་པའི་སྣང་བ་འདི་ཉིད་ཆོས་ཉིད་རང་སྣང་མངོན་སུམ་དུ་སྣང་བར་འདོད་ཅིང་རྟོགས་པས་ཕྱོགས་འཛིན་གྱི་རྒྱ་དང་བྲལ་བའོ། །ཀུན་རྫོབ་བམ་ཡེ་ཤེས་ནི། དོན་དམ་དབྱིངས་ཀྱི་རྩལ་ལས་རོལ་པ་རང་སྣང་བས། གཞི་ངོ་བོ་སེམས་གཅིག་མ་གྲུབ་ཅིང་བདེན་རྫུན་གཉིས་སུ་མེད་པའོ། །དབྱེར་མེད་ཀྱང་མ་ཧཱའི་ངོ་བོ་དབྱེར་མེད་ལས་ཨ་ནུ་མཚོན་ཚུལ་ཡང་དབྱེར་མེད་ཅིང་མཉམ་པ་ཉིད་ཀྱིས་འཕགས་སོ། །གཉིས་པ། དེ་ལྟར་གཞིའམ་ལྟ་བ་ལ་ཁྱད་ཡོད་པས། ལམ་སྒོམ་པ་ལའང་ཁྱད་ཡོད་དེ། མ་ཧཱས་ཡན་ལག་གསུམ་གྱིས་ལྷ་སྒོམ་ཞིང་བསྐྱེད་རྫོགས་རིམ་པར་སྒོམ། སྤྱོད་པའང་དམ་རྫས་དང་རྩོལ་སྒྲུབ་ལ་རག་ལས། ཨ་ནུ་ནི་ལྷ་སྐད་ཅིག་དྲན་རྫོགས་སུ་བསྒོམ་ཞིང་བསྐྱེད་རྫོགས་དུས་གཅིག་རང་བྱུང་རང་སྣང་དུ་ཉམས་སུ་ལེན། སྤྱོད་པའང་དམ་རྫས་དང་རྩོལ་བ་ལ་རག་མ་ལས་ཤིང་ལྟ་བ་དང་ཏིང་ངེ་འཛིན་ལ་འདུས་པར་གསུངས། གསུམ་པ་ནི། འབྲས་བུ་ལྟ་བ་ལ་ཁྱད་ཡོད་པས་དེ་མངོན་དུ་བྱས་པ་འབྲས་བུ་ལ་ཁྱད་པར་ཡོད་པ་ཡིན་ཏེ། གཤིས་དག་པར་བྱར་མེད་ཅིང་རྩོལ་མེད་བདེ་བ་ཆེན་པོར་གནས་པ་ལ་རྩོལ་སྒྲུབ་ཀྱིས་དག་པར་བྱས་པས་འབྲས་བུ་སྐུ་ལྔ་ཐོབ་ཀྱང་། ཤེས་བྱ་ཇི་ལྟ་བ་བཞིན་མངོན་སུམ་དུ་གྱུར་མ་གྱུར་གྱི་ཁྱད་པར་ཡོད་དེ། རང་རང་གི་འབྲས་བུའི་སྐབས་ནས་སྟོན་པ་བཞིན་ནོ་གསུངས། ཡང་དེ་གཉིས་ཀ་ལས་ཨ་ཏི་རྗོགས་ཆེན་འཕགས་པའི་ཆེ་བའམ་ཡོན་ཏན་ལ། ལྟ་སྒོམ་སྤྱོད་འབྲས་བཞི་ལས། ལྟ་བའི་ཁྱད་པར་ནི། མ་ཧཱ་ཡོ་ག་པས་སྣང་བ་སེམས་ཀྱི་ཆོ་འཕྲུལ་དང་། ཨ་ནུས་སེམས་ཀྱི་རྩལ་དུ་སྣང་བར་འདོད་ལ། ཨ་ཏིས་འཁོར་འདས་གཉིས་ཀྱིས་བསྡུས་པའི་ཆོས་ཐམས་ཅད་རང་བྱུང་གི་ཡེ་ཤེས་རང་སྣང་བས་ཁྱད་པར་ཡོད་དེ། འོག་མ་གཉིས་ནི་སེམས་ལ་སྣང་བ་ཆོ་འཕྲུལ་དང་རྩལ་དུ་འདོད་པས། གཞི་ངོ་བོ་སེམས་སུ་ལྟ་ཞིང་ཤུགས་ཀྱིས་འཛིན་པའི་ཆ་དང་མ་བྲལ་བའོ། ཨ་ཏི་ནི་ཆོས་ཀུན་རང་བྱུང་ཡེ་ཤེས་ལ་རྒྱ་ཆད་ཕྱོགས་ལྷུང་མེད་པས་ཆོས་ཀུན་མཉམ་པ་ཉིད་དུ་རང་གྲོལ་བའོ། །ཡང་མ་ཧཱས་སྣང་བ་ཆོས་ཉིད་དུ་འདོད་ལ། བརྟགས་ཞེན་ཆོས་ཉིད་དུ་མི་འདོད། ཨ་ནུས་སྣང་བརྟགས་གཉིས་ཆོས་ཉིད་དུ་འདོད་ལ་ཞེན་པ་མི་འདོད། །ཨ་ཏིས་ཆོས་ཀུན་རང་བྱུང་གི་ཡེ་ཤེས་མངོན་སུམ་དུ་སྣང་བས། ཞེན་པ་བཅོས་བསླད་མེད་པར་ཆོས་ཉིད་རང་སྣང་དུ་འདོད་ཅིང་ཆོས་ཉིད་མིན་པའི་ཆོས་གཅིག་ཀྱང་མེད་པའོ་གསུངས། དེ་བཞིན་བསྐྱེད་རྫོགས་གཉིས་སེམས་ཉིད་རང་སྣང་བར་མཐུན་ལ། ཤེས་བྱ་གཏིང་ཕྱིན་མ་ཕྱིན་གྱི་ཁྱད་པར་ཡོད་དེ། མ་ཧཱའི་བདེན་གཉིས་དང་། ཨ་ནུའི་དབྱིངས་ཡེ་གཉིས་མེད་ལ་སོགས་པའི་ཕྱོགས་འཛིན་གྱི་ཞེན་པ་ཡིས་བདེན་པ་ལྡོག་མི་ཐུབ་ལ་ཤེས་བྱ་ལྷག་མ་དང་བཅས་པའོ། །ཨ་ཏིས་ནི་བདེན་པ་ལྡོག་ཐུབ་ཅིང་ཤེས་བྱ་ལྷག་མ་མེད་པར་ཆོས་ཀུན་རང་སྣང་མཉམ་པ་ཉིད་དུ་རྟོགས་པས། གཉིས་དང་གཉིས་མེད་ཀྱི་ཕྱོགས་ལ་མི་གནས་ཤིང་རང་གྲོལ་ལོ། །སྒོམ་པ་ནི། མ་ཧཱ་དང་ཨ་ནུ་གཉིས། མཚན་བཅས་མཚན་མེད་དང་བསྙེན་སྒྲུབ་བཞི་ལ་སོགས་པ་རྩོལ་སྒྲུབ་ལས་མ་འདས་ལ། ཨ་ཏི་ནི་བསྒོམ་བྱ་སྒོམ་བྱེད་མེད་པར་རང་ཉིད་ཀྱི་ངང་བསྒོམ་ཡིན་ཏེ། ཡེ་ཤེས་ཀློང་དུ་ཕྱིན་པ་ལ་མ་ཡེངས་དོན་དང་མི་འབྲལ་བའི་དགོངས་པའོ། །སྤྱོད་པ་ནི། འོག་མ་གཉིས་བྱ་བྱེད་རྩོལ་སྒྲུབ་ཅན་ལ། ཨ་ཏི་ནི་བྱ་བྱེད་རྩོལ་སྒྲུབ་མེད་ལ་བྱ་བྲལ་བདེ་བ་ཆེན་པོར་གནས་པའོ། །འབྲས་བུ་ནི། འོག་མ་གཉིས་ཞེ་འདོད་རྩོལ་སྒྲུབ་ཀྱིས་བསྒྲུབས་པས་ཤུགས་ཀྱིས་སྤང་ཐོབ་ཅན་དུ་འགྱུར་ལ། ཨ་ཏི་ནི་ཤེས་བྱ་ཇི་ལྟ་བ་ཉིད་ཆེ་བ་ལྔར་སངས་རྒྱས་ལ། དེ་ཉིད་བཅོས་པ་མེད་པར་མངོན་དུ་བྱས་པས་སྤང་ཐོབ་ལྷག་མ་མེད་པའོ། །ཞེས་གསུངས། ཆེ་བ་ལྔ་ནི། ཆོས་ཀུན་སེམས་ཉིད་རང་སྣང་བ་ཡིན་པ་ལ། དེ་ཉིད་སྤངས་གར་ཡང་མ་སྤངས་པར་མངོན་སུམ་པར་སངས་རྒྱས་པའི་ཆེ་བ་ནི། མདོ་བཅུ་ལས། མངོན་པར་སངས་རྒྱས་ཆེ་བ་ནི། །འདུས་མ་བྱས་པའི་བྱང་ཆུབ་སེམས། །སྣང་སྲིད་ཐམས་ཅད་ཁྱད་པར་འཕགས། །རྫོགས་པ་ཆེན་པོའི་ཆེ་བར་བཤད། །ཅེས་སོ། །དེས་སྐྱེ་བོ་མུ་སྟེགས་དང་ཉན་རང་ལས་གྲོལ་ཞིང་དཔག ལྟོས་ཅི་ལ་ཡང་མི་ལྟོས་ཏེ་དེ་ཉིད་ཡིན་པར་སངས་རྒྱས་པའི་ཆེ་བའང་། དེ་ཡིན་སངས་རྒྱས་ཆེ་བ་ནི། མ་ནོར་བ་ཡི་བྱང་ཆུབ་སེམས། །གཏན་ཚིགས་ཀུན་ལས་ཁྱད་པར་འཕགས། །ཡོ་ག་དག་གི་ཆེ་བར་བཤད། །ཅེས་སོ། །དེས་དབུ་སེམས་དང་ཀྲི་ཡོག་སྡེ་གསུམ་ལས་གྲོལ་ཞིང་དཔག རག་གང་ལ་ཡང་མ་ལུས་པར་བདག་ཉིད་ཆེན་པོར་སངས་རྒྱས་པའི་ཆེ་བའང་། བདག་ཉིད་སངས་རྒྱས་ཆེ་བ་ནི། །ལྷུན་གྱིས་གྲུབ་པའི་བྱང་ཆུབ་སེམས། །རྩོལ་ཞིང་བསྒྲུབ་ལས་ཁྱད་པར་འཕགས། །མ་ཧཱ་ཡོ་གའི་ཆེ་བར་བཤད། །ཅེས་སོ། །དེས་མ་ཧཱ་ཡོ་ག་ལས་གྲོལ་ཞིང་དཔག གནས་ཅི་ལ་ཡང་མི་གནས་པར་ཆོས་ཀྱི་དབྱིངས་སུ་སངས་རྒྱས་པའི་ཆེ་བའང་། ཆོས་དབྱིངས་སངས་རྒྱས་ཆེ་བ་ནི། །ཐམས་ཅད་འབྱུང་བའི་བྱང་ཆུབ་སེམས། །འབྱུང་གནས་ཀུན་ལས་ཁྱད་པར་འཕགས། །ཨ་ནུ་ཡོ་གའི་ཆེ་བར་བཤད། །ཅེས་སོ། །དེས་ཨ་ནུ་ཡོ་ག་ལས་གྲོལ་ཞིང་དཔག ཐམས་ཅད་ནས་ཐམས་ཅད་དུ་སངས་རྒྱས་པས་སངས་རྒྱས་ལས་མེད་པའི་ཆེ་བ་ནི། ཐམས་ཅད་སངས་རྒྱས་ཆེ་བ་ནི། སྒྲོ་སྐུར་འདས་པའི་བྱང་ཆུབ་སེམས། །བསམ་དཔྱོད་ཀུན་ལས་ཁྱད་པར་འཕགས། །ལ་ཟློས་ས་ཡི་ཆེ་བར་བཤད། །ཅེས་སོ། །དེས་ཨ་ཏིའི་རྒྱུད་ལུང་མན་ངག་ལས་གྲོལ་ཞིང་དཔག་པར་གསུངས། དེ་དག་ཀྱང་སྔར་མ་གྲུབ་པ་གཅིག་བསྒྲུབ་པ་དང་། མ་ཡིན་པ་གཅིག་ཡིན་པར་བྱས་པ་མ་ཡིན་ཏེ། མན་ངག་རྩ་བ་བསྡུས་པའི་རྒྱུད་ལས། བྱང་ཆུབ་སེམས་ཀྱི་ངོ་བོ་དེ། །རང་བཞིན་གདོད་ནས་རྣམ་པར་དག །སངས་རྒྱས་སྒམ་པོས་འདི་མ་མཛད། །སེམས་ཅན་སྒྲིན་པོས་འདི་མ་བཅོས། །ཞེས་དང་། ཀློང་ཆེན་ལས། སེམས་ཉིད་ཀློང་ཆེན་ཡངས་པ་རུ། །འཁོར་འདས་མ་ལུས་ཆོས་སོ་ཀུན། །ཆེ་བ་ལྔ་རུ་མངོན་སངས་རྒྱས། །ཞེས་གསུངས་པ་བཞིན། ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་མཉམ་པ་ཉིད་དུ་ཐག་ཆོད་ཅིང་གདེང་དང་ལྡན་པར་བྱ་བ་གལ་ཆེའོ། །མ་མཐོང་དགུ་མཐོང་ཨ་གྲོ་བན་སྡོམ་དེས། །མི་ཤེས་ཤེས་མདོག་བྱས་ནས་སྨྲས་པ་ཡིན། །ནན་གྱིས་དྲིས་ན་ཤེས་རྒྱུ་གཅིག་ཀྱང་མེད། །མཆེད་གྲོགས་རྒྱུས་ཤེས་རྣམས་ཀྱི་ཐུགས་ན་གསལ། །འོན་ཀྱང་སྔོན་བྱོན་དམ་པའི་གསུང་གི་ཤས། །རང་དང་སྐལ་མཉམ་དྲན་པའི་གསོས་ཙམ་དུ། །ཅུང་ཟད་བཏུས་ལ་འགལ་བ་མེད་སྙམ་བགྱིས། །ནོངས་ན་བླ་མ་ལྷ་ཡི་སྤྱན་སྔར་བཤགས། །དགེ་བས་ངེས་གསང་སྙིང་པོའི་བསྟན་འདི་དང་། །མི་འབྲལ་དཔལ་མགོན་བླ་མ་མཉེས་བྱས་ནས། །ཆོས་བརྒྱད་འཆིང་བྲལ་དབེན་པའི་ནགས་ཁྲོད་དུ། །རྩེ་གཅིག་སྒྲུབ་པའི་སྐལ་བཟང་ཐོབ་གྱུར་ཅིག །བསྟན་འཛིན་སྐྱེས་བུའི་ཞབས་པད་བརྟན་གྱུར་ཅིག །བཤད་སྒྲུབ་བསྟན་པའི་མངའ་ཐང་རྒྱས་གྱུར་ཅིག །འགྲོ་ཀུན་བདེ་སྐྱིད་དགེ་བཅུར་སྤྱོད་གྱུར་ཅིག །དོན་གཉིས་མཐར་ཕྱིན་སངས་རྒྱས་འགྲུབ་གྱུར་ཅིག །ཅེས་པའང་ཞེ་ཆེན་བན་རྒན་པད་རྣམ་གྱིས་ནད་མལ་ནས་ངེས་སྒྲོན་བཤད་པའི་ཞར་ལ་ཟིན་ཐུན་དུ་བཏབ་པའི་ཡི་གེ་པ་ནི་མཆོག་སྤྲུལ་འགྱུར་མེད་ཀུན་བཟང་བློ་གྲོས་གཞན་ཕན་མཐའ་ཡས་ཀྱིས་མཛད་པ་ལ་སླར་མེ་སྟག་ཟླ་བ་དང་པོའི་ཚེས་རྒྱལ་དང་ཕུར་བུའི་འགྲུབ་སྦྱོར་ལ་ཕྲི་བསྣན་ཅུང་ཟད་གྲུབ་པར་བགྱིས་པ་དགེ་ལེགས་འཕེལ།། །།
རྡོ་རྗེ་ཕུར་པ་ཡང་གསང་སྤུ་གྲིའི་རྣམ་བཤད་མདོར་བསྡུས་སྙིང་པོར་དྲིལ་བ་རིག་པ་འཛིན་པའི་ཞལ་ལུང་།
༄༅། །བཛྲ་ཀིལཱཔྲགུཧྱཨུརྞྞཤསྟྲཾབྱཁྱཱནཾསཾཧརགརྦྷཾཔིཎྜབིདྱཱངྷརསྱམུཁཱགམབིཧརཏིསྨ།
༄༅། །རྡོ་རྗེ་ཕུར་པ་ཡང་གསང་སྤུ་གྲིའི་རྣམ་བཤད་མདོར་བསྡུས་སྙིང་པོར་དྲིལ་བ་རིག་པ་འཛིན་པའི་ཞལ་ལུང་བཞུགས་སོ། །
ༀ་སྭསྟི། སངས་རྒྱས་ཀུན་གྱི་ཡེ་ཤེས་སྐུ། །ངང་ཉིད་རྡོ་རྗེ་ཆོས་དབྱིངས་ལས། །འབར་བའི་ཁྲོ་བོ་མི་བཟད་པ། །དཔལ་ཆེན་རྡོ་རྗེ་གཞོན་ནུས་སྐྱོངས། །རྒྱུད་ལུང་མན་ངག་ཀུན་གྱི་བཅུད། །ཨོ་རྒྱན་མཁན་པོའི་ཞལ་ལུང་བཞིན། །ལམ་འདིར་འཇུག་འདོད་གང་ཟག་ལ། །སྨན་སླད་རྣམ་བཤད་མདོ་ཙམ་འགོད། །འདིར་སངས་རྒྱས་ཐམས་ཅད་ཀྱི་ཡེ་ཤེས་གཅིག་ཏུ་འདུས་པའི་རང་གཟུགས་དཔལ་ཆེན་པོ་རྡོ་རྗེ་གཞོན་ནུ་ཉིད་ཡི་ད མ་གྱི་ལྷར་བཟུང་ནས་བསྙེན་ཅིང་སྒྲུབ་པར་འདོད་པའི་གང་ཟག་སྐལ་བ་དང་ལྡན་པ་དག་གིས་ཐོག་མར་མི་ཤེས་སུ་མི་རུང་བའི་གནད་ཀྱི་མདོ་འགག་ཅུང་ཟད་བཤད་པ་ལ་བཞི། བསྒྲུབ་པར་བྱ་བའི་ལྷ་ངོས་བཟུང་བ། དགོས་དོན་རྣམ་པ་དྲུག་གིས་ཁོག་དབུབ་པ། ཐལ་འབྱིན་རྣམ་པ་བཞིའི་གོ་དོན་སྤྱིར་བཤད་པ། སྒྲུབ་ཐབས་ལས་ཀྱི་རིམ་པའི་སྒོམ་དོན་བྱེ་བྲག་ཏུ་སྙིང་པོར་དྲིལ་བའོ། །དང་པོ་ལ། ངོ་བོ་ནི། སངས་རྒྱས་ཐམས་ཅད་ཀྱི་ཐུགས་རྡོ་རྗེ་ཆོས་ཀྱི་དབྱིངས་ཀྱི་ཡེ་ཤེས་རང་བྱུང་འདུས་མ་བྱས་པ་ཉིད་རྣམ་པ་གང་ལ་གང་འདུལ་གྱི་རྟགས་ཀྱི་ཕྱག་རྒྱ་གཟུགས་ཀྱི་སྐུར་བཞེངས་པ་དཔལ་ཆེན་པོ་རྡོ་རྗེ་གཞོན་ནུ་སྟེ། ངེས་ཚིག་ནི། ཆོས་དབྱིངས་སྐྱེ་བ་མེད་པའི་དོན་ཉིད་གཉེན་པོ་གཞན་གྱིས་མི་ཤིགས་རྐྱེན་གང་གིས་ཀྱང་མི་འགྱུར། དངོས་འཛིན་མཚན་རྟོག་མཐའ་དག་ཕར་འཇོམས་པ་ལ་ཐོགས་པ་མེད་པའི་མཐུ་དང་ལྡན་པས་རྡོ་རྗེ། གཞོན་ནུ་ནི་འཕོ་འགྱུར་བགྲེས་རྒུད་མེད་པའི་དོན་ཏེ། གཞི་ལམ་འབྲས་བུའི་གནས་སྐབས་ཀྱི་དུས་ཐམས་ཅད་དུ་རང་གི་ངོ་བོ་འགྱུར་བ་མེད་པར་སྤྲོས་བྲལ་ཐིག་ལེ་ཉག་གཅིག་ཆོས་སྐུ་བདེ་བ་ཆེན་པོར་ཡེ་ནས་ངང་གིས་གནས་པའི་དོན་ནོ། །འདིའི་ཡབ་ནི་སངས་རྒྱས་ཐམས་ཅད་འདུས་པའི་སྐུ་ཀུན་ཏུ་བཟང་པོ་ཆེ་མཆོག་ཧེ་རུ་ཀ་དང་། ཡུམ་ནི་ཀུན་ཏུ་བཟང་མོ་གནམ་ཞལ་དབྱིངས་ཀྱི་དབང་ཕྱུག་མ་སྟེ། གཉིས་ཀའང་ཆོས་ཀྱི་སྐུའི་རང་བཞིན་ལས་མ་གཡོས་པར་རང་རྩལ་འགག་པ་མེད་པར་རང་འཁྲུངས་པའོ། །རིགས་ནི། གསང་རྒྱུད་ལས། ཀུན་གྱི་བདག་ཉིད་རྡོ་རྗེ་གཞོན་ནུའི་སྐུ། །ཞེས་གསུངས་པས་སྤྱིར་རིགས་ལྔ་ཁྲག་འཐུང་འདུས་པའི་སྤྱི་དཔལ་ཆེན་པོ་ཡིན་ལ། བྱེ་བྲག་ཏུ་ཐུགས་རྗེ་རིག་པའི་ཡེ་ཤེས་ཉིད་རྣམ་པ་ཀུན་ཉོན་འཁོར་བའི་གཞི་རྩ་བདག་འཛིན་ཉོན་མོངས་པ་དང་དེས་བསྐྱེད་པའི་རུ་ཏྲ་ལ་སོགས་པའི་བདུད་དང་ལོག་པར་འདྲེན་པའི་ཚོགས་རྣམས་འཇོམས་པ་ལ་ངང་གིས་ཁྲོས་པའི་བདག་ཉིད་ཀརྨ་ཧེ་རུ་ཀ་སྟེ་ཕྲིན་ལས་ཀྱི་རིགས་སུ་གཏོགས་པའོ། །སྐུ་དང་མཚན་གྱི་རྣམ་གྲངས་ཀྱང་ཞི་བའི་དུས་ན་རིགས་འདུས་རྡོ་རྗེ་སེམས་དཔའ། ཕྱི་ཀྲི་ཡོག་གི་དུས་སུ་རྡོ་རྗེ་རྣམ་པར་འཇོམས་པ། བྱང་ཆུབ་སེམས་དཔའི་དུས་ན་ཕྱག་ན་རྡོ་རྗེ་སོགས་འགྲོ་བ་གང་ལ་གང་འདུལ་གྱི་མཚན་དང་སྐུ་ཡི་བཀོད་པ་ནི་སྤྱིར་བསམ་གྱིས་མི་ཁྱབ་སྟེ་བདེ་གཤེགས་ཐམས་ཅད་རྡོ་རྗེ་གཞོན་ནུའི་སྤྲུལ་པ་ཡིན་པའི་ཕྱིར། བི་ཏོ་ལས། ཀུན་ཁྱབ་རྡོ་རྗེ་གཞོན་ནུའི་སྐུ། །ཞེས་གསུངས། བྱེ་བྲག་ཏུ་སྐུ་གསུང་ཐུགས་ཡོན་ཏན་ཕྲིན་ལས་སོགས་ཀྱིས་འདུལ་བའི་དབང་དུ་བྱས་ན། སྐུའི་འདུལ་བ་ལ་འཇམ་དཔལ་གཤིན་རྗེ་གཤེད། གསུང་གིས་འདུལ་བ་ལ་པད་མ་དབང་ཆེན། ཐུགས་ཀྱིས་འདུལ་བ་ལ་བཛྲ་ཧེ་རུ་ཀ ཡོན་ཏན་གྱིས་འདུལ་བ་ལ་ཆེ་མཆོག ཕྲིན་ལས་ཀྱིས་འདུལ་བ་ལ་བཛྲ་ཀཱི་ལ་ཡ། གཟི་བརྗིད་ཀྱིས་འདུལ་བ་ལ་བླ་མེད་མངོན་རྫོགས། དྲག་པོས་འདུལ་བ་ལ་དྲེགས་པ་ཀུན་འདུལ། སྟོབས་ཀྱིས་འདུལ་བ་ལ་སྟོབས་ལྡན་ནག་པོ། བྱིན་རླབས་ཀྱིས་འདུལ་བ་ལ་བླ་མ་རིག་འཛིན། འདོད་ཡོན་གྱིས་འདུལ་བ་ལ་ཨ་པ་ར་ཙིཏྟ། སྲུང་བས་འདུལ་བ་ལ་མི་གཡོ་མགོན་པོ། བཟློག་པས་འདུལ་བ་ལ་གཙུག་ཏོར་རྣམ་པར་རྒྱལ་བ་སོགས་སུ་སྣང་བར་མཛད་དེ། བི་ཏོ་ལས། བདེ་བར་གཤེགས་པ་གར་གྱི་བདག །འདོད་དགུར་བསྒྱུར་བས་གར་ཡང་བདེ། །གར་གྱི་དབང་ཕྱུག་ཆེན་པོ་ལ། །མཁས་པས་ཕྱོགས་རིས་མི་བརྟག་གོ །ཞེས་གསུངས། མདོར་ན་སྐུར་སྣང་བ་ཐམས་ཅད་རྡོ་རྗེ་གཞོན་ནུའི་སྐུ། གསུང་དུ་གྲགས་པ་ཐམས་ཅད་ཀཱི་ལ་ཡ། ཐུགས་སུ་གསལ་བ་ཐམས་ཅད་ངང་ཉིད་རྡོ་རྗེ་ཆོས་དབྱིངས་ཏེ། སྐུ་མདོག་ཕྱག་མཚན་རྒྱན་ཆ་ལུགས་སོགས་ཀྱང་གསང་རྒྱུད་ལས། རྡོ་རྗེ་གཞོན་ནུ་དབུ་སྟོང་ཕྱག་སྟོང་སྤྱན་བྱེ་བ་མངའ་བ་དང་། ཕུར་པ་མྱང་འདས་ལས། དབུ་དགུ་ཕྱག་བཅོ་བརྒྱད་པ་དང་། རྩ་རྒྱུད་རྡོ་རྗེ་ཁྲོས་པ་སོགས། རྒྱུད་ཕལ་ཆེར་ནས། ཞལ་གསུམ་ཕྱག་དྲུག་པ་དང་། ཞལ་བཞི་པ་དང་། ཞལ་གཅིག་ཕྱག་གཉིས་པར་བསྟན་པ་སོགས་དང་། སྐུ་མདོག་ཀྱང་མཐིང་ན ག་སོགས་ཐ་དད་པ་གདུལ་བྱའི་ངོར་གང་ལ་གང་འདུལ་དུ་སྟོན་པར་མཛད་དེ། རྩ་བར། བྱམས་དང་སྙིང་རྗེས་གང་འདུལ་བ། །སངས་རྒྱས་ཕྲིན་ལས་རྫོགས་མཛད་ནས། །ཞེས་གསུངས། དེ་ཐམས་ཅད་ཀྱང་གདུལ་བྱའི་དབང་གིས་སྣ་ཚོགས་སུ་སྣང་བ་ཙམ་ལས་དོན་ལ་གཅིག་ཉིད་དེ། སྤྲོས་བྲལ་ཆོས་ཀྱི་སྐུ་ཐིག་ལེ་ཉག་གཅིག་ལས་ནམ་ཡང་མ་གཡོས་པས་དཀྱིལ་འཁོར་གསུམ་སོགས་ཀྱང་བདག་རྩ་བའི་དཀྱིལ་འཁོར་རྡོ་རྗེ་གཞོན་ནུར་འདུས་ཤིང་། དེར་མ་ཟད་སྣང་བ་ཐམས་ཅད་ཐབས་ཡབ་ཀྱི་རང་བཞིན་རྡོ་རྗེ་གཞོན་ནུ། སྟོང་པ་ཐམས་ཅད་ཤེས་རབ་ཡུམ་གྱི་རང་བཞིན་འཁོར་ལོ་རྒྱས་འདེབས། སྣང་སྟོང་དབྱེར་མེད་པ་ནི་ཐབས་དང་ཤེས་རབ་གཉིས་སུ་མེད་པའི་སྲས་འབར་བ་ཁྲོ་བོའི་ཚོགས་ཀྱི་དཀྱིལ་འཁོར་ཏེ་སྲིད་པ་ཐམས་ཅད་རྡོ་རྗེ་ཕུར་བུའི་དཀྱིལ་འཁོར་དུ་ཡེ་ནས་གནས་པ་ཡིན་ཏེ། སྲིད་པ་རྡོ་རྗེ་ཕུར་བུའི་ལྷ། །ཞེས་གསུངས། མདོར་ན་རང་སེམས་གཞིའི་རྡོ་རྗེ་གཞོན་ནུ་གདོད་མ་ནས་སྐྱེ་བ་མེད་པའི་སེམས་ཉིད་སྤྲོས་པའི་མཐའ་དང་བྲལ་བ། བགྲོད་པ་ལམ་གྱི་རྡོ་རྗེ་གཞོན་ནུ་ཐབས་ཤེས་ཟུང་དུ་འཇུག་པའི་བསྐྱེད་རྫོགས་ཀྱི་ལམ་གྱི་རྣལ་འབྱོར། མཐར་ཕྱིན་འབྲས་བུའི་རྡོ་རྗེ་གཞོན་ནུ་སངས་རྒྱས་ཀྱི་ཐུགས་གཉིས་སུ་མེད་པའི་ཡེ་ཤེས་ཏེ་གནས་སྐབས་ཀྱི་སྣང་ཚུལ་ལ་ལྟོས་ནས་གསུམ་དུ་རྣམ་པར་གཞག་མོད། གནས་ཚུལ་དོན་དམ་པའི་དབང་དུ་བྱས་ན་གསུམ་ཀའང་རང་བྱུང་གི་ཡེ་ཤེས་བདེ་བ་ཆེན་པོ་ཆོས་ཀྱི་སྐུར་ལྷུན་གྱིས་རྫོགས་པ་ཡིན་ཏེ། རྩ་རྒྱུད་རྡོ་རྗེ་ཁྲོས་པ་ལས། རང་སེམས་གཞི་ཡི་རྡོ་རྗེ་གཞོན་ནུ་ནི། །ས་བོན་ཀུན་ཁྱབ་ཏིལ་མར་འདྲ། །རྟོགས་ན་སངས་རྒྱས་ངོ་མཚར་ཆེ། །བགྲོད་པ་ལམ་གྱི་རྡོ་རྗེ་གཞོན་ནུ་ནི། །ཐབས་ཤེས་སྐུ་གསུམ་ཡེ་ཤེས་ལྔ། །ཆུ་བོ་རྒྱུན་གྱི་རྣལ་འབྱོར་བྱ། །རྟོགས་པ་འབྲས་བུའི་རྡོ་རྗེ་གཞོན་ནུ་ནི། །སྐུ་ལྔ་ཡེ་ཤེས་དགུ་ལྡན་ཏེ། །མ་འཁྲུལ་རྟོགས་པ་མངོན་གྱུར་བྱ། །གཞི་ལམ་འབྲས་བུ་རྟོགས་གྱུར་ན། །ཆོས་སྐུ་སྤྲོས་བྲལ་མངོན་དུ་འགྱུར། །ཞེས་གསུངས་པ་བཞིན་ཤེས་པར་བྱ་བ་ནི་ལམ་འདི་ཙམ་དུ་མ་ཟད་གཞན་ཐམས་ཅད་ལའང་ཅིས་ཀྱང་གལ་ཆེ་སྟེ། བཀྲ་ཤིས་རིག་པ་ཁུ་བྱུག་གི་རྒྱུད་ལས། ཆོས་སྐུ་རོ་གཅིག་འགྲོ་དོན་བྱེད་མཉམ་སྟེ། །མོས་པའི་བློ་ལ་སོ་སོ་ཉིད་དུ་གསལ། །ཡེ་ཤེས་དབྱིངས་སུ་ཕྱག་རྒྱ་ཀུན་གཅིག་ཕྱིར། །བདེ་གཤེགས་གཅིག་བསྒོམ་རྒྱལ་བ་ཀུན་གྱི་ངང་། །ཞེས་གསུངས་པ་ཡིན་ནོ། །གཉིས་པ་དགོས་དོན་རྣམ་པ་དྲུག་གིས་ཁོག་དབུབ་པ་ལ་དྲུག་ལས། དང་པོ་ལྟ་བས་ཐག་བཅད་པ་ནི། ངང་ཉིད་རྡོ་རྗེ་ཆོས་དབྱིངས་ལས། །འབར་བའི་ཁྲོ་བོ་མི་ཟད་པས། །ཞེས་གསུངས་ཏེ། དེ་ཡང་། ཕུར་ནི་སྐྱེ་བ་མེད་པའི་དབྱིངས། པ་ནི་འགགས་པ་མེད་པའི་ཡེ་ཤེས་ཏེ། ཆོས་དབྱིངས་སྐྱེ་བ་མེད་པའི་ངང་ལས་རང་གསལ་གྱི་ཡེ་ཤེས་འགགས་པ་མེད་པར་རང་ཤར་བས་སྣང་སྲིད་ཐམས་ཅད་རྡོ་རྗེ་ཕུར་པའི་དཀྱིལ་འཁོར་དུ་ཡེ་ནས་སངས་རྒྱས་པར་སྟོན་པ་སྟེ། ད་ལྟར་གྱི་སྣང་བ་སྣ་ཚོགས་སུ་སྣང་བ་འདི་ཡེ་ཤེས་རིག་པའི་རྩལ་མ་འགགས་པར་སྣང་བའི་ཕྱིར་དོན་ལ་ཡེ་ཤེས་ཡིན་ཏེ་རྟགས་ལྷ་ཡི་ཕྱག་རྒྱར་རྫོགས། དེ་ལྟར་སྣང་བའི་དུས་ཉིད་ནས་ངོ་བོ་སྟོང་ཉིད་སྤྲོས་བྲལ་ལས་མ་གཡོས་པར་གནས་པ་ནི་སྟོང་པའི་དབྱིངས་ཏེ། དོན་ཆོས་ཉིད་དུ་རྫོགས། དོན་རྟགས་དེ་གཉིས་ཀའང་སྣང་སྟོང་ཐ་མི་དད་པར་ངོ་བོ་དབྱེར་མེད་བརྗོད་བྲལ་མཉམ་པ་ཉིད་དུ་གནས་པ་ནི་སྲས་བདེ་བ་ཆེན་པོ་བྱང་ཆུབ་སེམས་སུ་རྫོགས་པ་སྟེ། དེ་ནི་དབྱིངས་དང་ཡེ་ཤེས་དབྱེ་རྒྱུ་མེད་པའི་ལྟ་བ་ཞེས་བྱ་སྟེ་ཨ་ཏི་ཡོ་གའི་ལྟ་བ་མཐར་ཐུག་པའོ། །གཉིས་པ་བསྒོམ་པས་དྲོད་བཙལ་བ་ནི། སྲོག་གི་གོ་རུ་ཤར་བ་དང་། །སྙིང་གི་དཀྱིལ་དུ་བསྒོམ་པར་བྱ། །ཞེས་དང་། སྲིད་པ་རྡོ་རྗེ་ཕུར་པའི་ལྷ། །ཡེ་ཤེས་ཁྲོ་བོ་གྲུབ་པར་མཛོད། །ཅེས་པས་བསྟན་ཏེ། དེ་བཞིན་ཉིད་ཀྱི་ཏིང་ངེ་འཛིན་དབྱིངས་ཡེ་དབྱེར་མེད་བདེ་བ་ཆེན་པོའི་ངང་ལས་ཀུན་ཏུ་སྣང་བའི་ཏིང་ངེ་འཛིན་དེ་ལྟར་མ་རྟོགས་པའི་སེམས་ཅན་ལ་སྙིང་རྗེ་ཆེན་པོ་སྐྱེས་པས་རྐྱེན་བྱས་ཏེ་རང་གི་རིག་པ་འོད་ཁ་དོག་ལྔ་ལྡན། དེ་ལས་རྒྱུ་ཡི་ཏིང་ངེ་འཛིན་རང་གི་རིག་པ་ཡི་གེ་ཧཱུྃ་མཐིང་ག་འོད་འབར་བར་བསམ་ལ། དེ་ལས་འོད་འཕྲོས་པས། ཕྱི་ཡུལ་གྱི་དངོས་པོ་འབྱུང་བ་ལྔར་སྣང་བ་ནི་ཡུམ་ལྔའི་རང་བཞིན་ཡེ་ཤེས་ཀྱི་རང་རྩལ་མ་འགགས་པས་གཞལ་ཡས་ཁང་དུ་གསལ་ཏེ་ཕྱི་ཕུར་པའི་དབྱིབས་ལ་ནང་གཞལ་ཡས་ཁང་། དེ་ཡང་དབལ་གསུམ་ངན་སོང་གསུམ། རྒྱ་མདུད་འོག་མ་འདོད་ཁམས་ཀྱི་གནས་རིས། ལྕིམ་གཞོག་གི་སྨད་གཟུགས་ཁམས། སྟོད་གཟུགས་མེད་ཀྱི་ཁམས་ཏེ་ཁམས་གསུམ་ཕུར་བུར་གསལ་བའི་རྒྱ་མདུད་གོང་མ་རུ་འབར་བ་ཆེན་པོ་ཆེ་མཆོག་ཁྲོ་བོའི་བཞུགས་གནས་དྲག་པོའི་གཞལ་མེད་ཁང་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པར་བསྒོམ། ནང་བཅུད་ཁམས་གསུམ་གྱི་སེམས་ཅན་ཐམས་ཅད་དཔལ་ཆེན་པོ་རྡོ་རྗེ་གཞོན་ནུའི་སྐུའི་དཀྱིལ་འཁོར་ཏེ། བདག་རྩ་བ། ཕྱོགས་བཅུ་ཁྲོ་བོ། ཕུར་པ་སྲས་ཀྱི་དཀྱིལ་འཁོར་ཏེ་དཀྱིལ་འཁོར་རྣམ་པ་གསུམ་དང་། དེ་དག་གི་སྲོག་གི་གོ་སྙིང་གི་དཀྱིལ་དུ་ཡེ་ཤེས་སེམས་དཔའ་ཐུགས་སྲོག་ས་བོན་ཙིཏྟའི་སྒོ་སྲུང་དང་བཅས་པ་མ་འདྲེས་ཡོངས་རྫོགས་སུ་གསལ་གདབ་སྟེ། དེ་ཡང་རེས་ཐམས་ཅད་རང་ལ་བསྡུ་ཞིང་བསྒོམ། རེས་སྤྲོས་ལ་བསྒོམ་སྟེ། ཐམས་ཅད་ཀྱང་སྣང་བཞིན་དུ་སྟོང་། སྟོང་བཞིན་དུ་སྣང་། སྣང་སྟོང་གཉིས་མེད་བདེ་བ་ཆེན་པོའི་རང་བཞིན། རྟག་པ་མ་ཡིན་ཏེ་ཡེ་ནས་ཆོས་དབྱིངས་སྤྲོས་བྲལ་དུ་གནས། ཆད་པ་མ་ཡིན་ཏེ་རང་གསལ་འོད་ཀྱི་ཡེ་ཤེས་རང་ལ་གསལ། གཅིག་པུ་མ་ཡིན་ཏེ་སྣ་ཚོགས་སུ་སྣང། དུ་མར་མི་གནས་ཏེ་བདེ་ཆེན་བྱང་ཆུབ་ཀྱི་སེམས་སུ་རོ་མཉམ་པ་སྟེ། སྲིད་པ་ཐམས་ཅད་ཡེ་ནས་སངས་རྒྱས་པའི་རང་བཞིན་རྡོ་རྗེ་ཕུར་པའི་དཀྱིལ་འཁོར་དུ་གནས་པ་ལ་གནས་པར་ངོ་ཤེས་པའི་ངེས་ཤེས་ཀྱིས་གསལ་གདབ་ཅིང་། ཆོས་ཉིད་ཀྱི་དབྱིངས་ནས་ཡེ་ཤེས་ཀྱི་ཁྲོ་བོའི་ཚོགས་ཀྱི་ཐུགས་རྗེ་འབྱུང་བའི་ཕྱིར། སྤྱན་དྲང་རྒྱུ་མེད་ཀྱང་ཡེ་ཤེས་ཀྱི་ཁྲོ་བོ་བཀྲག་གསལ་དུ་བསྒོམ། བཞུགས་སུ་གསོལ་རྒྱུ་མེད་ཀྱང་འབྲལ་མེད་ཀྱི་ངང་དུ་བསམ། ཕྱག་འཚལ་རྒྱུ་མེད་ཀྱང་འགྱུར་མེད་ཀྱི་ངང་ན་མོས་པར་བྱ། མཆོད་པ་འབུལ་རྒྱུ་མེད་ཀྱང་ཞེན་མེད་ཀྱི་རོལ་པ་རྒྱུན་མི་བཅད། བསྒོམ་བསྒྲུབ་བྱ་རྒྱུ་མེད་ཀྱང་རྩོལ་བས་མ་ཡེངས་པར་བྱས་ཏེ། སྔགས་བཟླས་པའི་འོད་ཟེར་གྱིས་ཡེ་ཤེས་ཀྱི་ཁྲོ་བོ་རྣམས་ཀྱི་སྐུ་གསུང་ཐུགས་ཀྱི་ཡེ་ཤེས་ཀྱི་ཆུ་རྒྱུན་བྱུང་སྟེ། ཁམས་གསུམ་གྱི་སེམས་ཅན་རྣམས་ཀྱི་རྟོག་སྒྲིབ་སྦྱང་། ཟག་པ་མེད་པའི་སེམས་ཉིད་རང་སྣང་ཡེ་ཤེས་ཀྱི་དཀྱིལ་འཁོར་ཆེན་པོར་གསལ་ལམ་མེ་བའི་ངང་དུ་མཉམ་པར་བཞག་སྟེ་གོམས་པར་བྱས་པས་གཞན་སྣང་རྐྱེན་གྱིས་མི་འཁྲུགས་ཏེ་རང་སྣང་ཐམས་ཅད་ཡེ་ཤེས་ཀྱི་རོལ་པར་འཆར་བར་འགྱུར་རོ། །གསུམ་པ་སྤྱོད་པས་བོགས་དབྱུང་བ་ནི། ཐབས་ཀྱི་སྤྱོད་པས་འགྲོ་དོན་དུ། །བྱམས་དང་སྙིང་རྗེས་གང་འདུལ་བ། །ཞེས་གསུངས་ཏེ། ཕྱི་དང་ནང་གི་འབྱུང་བས་བསྡུས་པའི་སྣང་བ་ཐམས་ཅད་ཆེ་མཆོག་གི་སྐུ་ཡི་དཀྱིལ་འཁོར། སྒྲ་སྐད་ཐམས་ཅད་ཀཱི་ལ་ཡ་ཆོས་ཉིད་ཀྱི་རང་སྒྲ། དྲན་རྟོག་ཐམས་ཅད་ཡེ་ཤེས་ཀྱི་རང་འོད་དུ་གསལ་བ་སྟེ། དེ་ལྟར་ཤེས་པས་མི་དགེ་བཅུ་སྐྱེ་བའི་ཡུལ་མེད། སྤྱོད་པ་ཐམས་ཅད་དགེ་བཅུའི་ངང་དུ་སྤྱོད། སྣང་བ་ལྷར་ཤེས་པས་ཆགས་སྡང་དང་གཟུང་འཛིན་གྱི་ཡུལ་མེད། གྲགས་པ་སྔགས་སུ་ཤེས་པས་སྙན་མི་སྙན་གྱི་འཛིན་པ་ལས་གྲོལ། དྲན་རྟོག་ཡེ་ཤེས་སུ་གསལ་བས་རྣམ་ཤེས་ཚོགས་བརྒྱད་ཀྱི་རྟོག་པས་མི་འཁྲུགས་ཏེ། ཡེ་ཤེས་མི་ཟད་པ་རྒྱན་གྱི་འཁོར་ལོར་རང་ཤར་ཏེ་ཅི་བྱེད་ཐམས་ཅད་དེའི་ངང་ལས་མ་གཡོས་པར་སྤྱོད་པ་ནི་སྤྱོད་པའི་མཆོག་སྟེ། དེ་ལྟར་མ་རྟོགས་པའི་སེམས་ཅན་རྣམས་ལ་བྱམས་པ་དང་སྙིང་རྗེ་ཆེན་པོས་ཀུན་ནས་བསླངས་ཏེ་གང་ལ་གང་འདུལ་གྱི་ཕྲིན་ལས་ཐབས་ལ་མཁས་པའི་སྤྱོད་པ་ཟབ་མོ་རྣམས་ལ་གཞུང་བཞིན་དུ་སློབ་པར་བྱའོ། །བཞི་པ་དབང་གིས་གདེང་བཙལ་བ་ནི། སངས་རྒྱས་ཕྲིན་ལས་རྫོགས་མཛད་ནས། །དབང་དང་བྱིན་རླབས་འདིར་སྩོལ་ཅིག །ཅེས་པ་སྟེ། གོང་དུ་སྨོས་པའི་ལྟ་སྒོམ་སྤྱོད་པ་གསུམ་པོ་དེ་རང་གི་རྒྱུད་ཐོག་ཏུ་ཁེལ་བས་སངས་རྒྱས་ཐམས་ཅད་ཀྱི་ཕྲིན་ལས་དུས་གཅིག་ཏུ་རྫོགས་ཏེ་སྒོ་གསུམ་ལྷ་ཡི་རང་བཞིན་དུ་གསལ་ཞིང་གཉིས་སུ་མེད་པར་ཆོས་ཉིད་བདེ་བ་ཆེན་པོར་རྫོགས་པ་ནི་དབང་དང་བྱིན་རླབས་ཐམས་ཅད་ཀྱི་མཆོག་ཡིན་ཏེ་ཆོས་ཉིད་བདེ་བ་ཆེན་པོའི་དབང་ཞེས་བྱ། གཞན་ཕྱི་ནས་བསྐུར་བའི་དབང་ནི་བསྐུས་པ་དང་འདྲ་བར་གསུངས་སོ། །ལྔ་པ་དམ་ཚིག་གི་དོན་ལས་མི་འདའ་བ་ནི། སྙིང་རྗེས་བསྒྲལ་བའི་དམ་ཚིག་ནི། །ཞེས་སོགས་ཀྱིས་བསྟན་ཏེ། གོང་སྨོས་ལྟར་རྟོགས་གོམས་ཀྱི་སྦྱོར་བས་གནས་ལུགས་ཟབ་མོ་ཕྱིན་ཅི་མ་ལོག་པར་རྟོགས་པའི་གདེང་ཚད་དང་ལྡན་པས། ཀུན་ཁྱབ་སྙིང་རྗེ་ཆེན་པོས་མཚམས་སྦྱར་ཏེ་གདུལ་བྱ་གདུལ་དཀའ་བའི་སེམས་ཅན་རྣམས་ཐབས་ལ་མཁས་པའི་ཕྲིན་ལས་དྲག་པོ་མངོན་སྤྱོད་ཀྱི་སྦྱོར་བས་རྣམ་སྨིན་ལས་ངན་པའི་སྐྱེ་རྒྱུན་བཅད་ནས་འབྲས་བུ་སངས་རྒྱས་ཀྱི་ས་ལ་བསྒྲལ་བར་བྱའོ་སྙམ་དུ་སེམས་བསྐྱེད་པ་སྟེ། དེ་ཡང་ཞེ་སྡང་གིས་བསད་ཅིང་གཏི་མུག་གིས་མནན་པ་ལྟ་བུ་མ་ཡིན་པར། ཕུང་པོ་ཐམས་ཅད་རྡོ་རྗེ་གཞོན་ནུའི་སྐུར་གྱུར་ཏེ། རྣམ་པར་ཤེས་པ་ཆོས་ཀྱི་དབྱིངས་སྤྲོས་པ་དང་བྲལ་བ་རྡོ་རྗེ་ལྟར་འཕོ་འགྱུར་མེད་པར་བསྒོམ་པ་སྟེ། དེ་ལྟ་བུའི་དོན་དམ་བྱང་ཆུབ་སེམས་ཀྱི་ལྟ་བ་དང་སྙིང་རྗེར་འབྲེལ་བས་ལས་གང་རྩོམ་དོན་དང་ལྡན་ཞིང་ཚུལ་དེ་ལྟ་བུར་སྒྲུབ་པ་ནི་ཕར་ཐེབས་ལ་ཚུར་མི་ལྡོག་པའི་མན་ངག་གི་གནད་ཀྱང་ཡིན་ལ། སྒོ་གསུམ་དེའི་དོན་ལས་མི་འདའ་བ་ནི་དམ་ཚིག་ཐམས་ཅད་ཀྱི་མཆོག་ཀྱང་ཡིན་ནོ། །དྲུག་པ་འབྲས་བུས་ལ་བཟླ་བ་ནི། སྲིད་པ་རྡོ་རྗེ་ཕུར་པའི་ལྷ། །ཡེ་ཤེས་ཁྲོ་བོར་གྲུབ་པར་མཛོད། །ཅེས་པས། སྣང་སྲིད་ཐམས་ཅད་དཔལ་རྡོ་རྗེ་ཕུར་པའི་དཀྱིལ་འཁོར་གྱི་ལྷར་ཡེ་ནས་རྫོགས་པས། ཞིང་ཁམས་ཐམས་ཅད་ཡེ་ཤེས་སུ་དག་པའི་སྣང་བ་འཆར་ཏེ། ཆོས་ཐམས་ཅད་རང་བྱུང་གི་ཡེ་ཤེས་སུ་རང་གསལ་བ་དེ་ཀ་སྤྲུལ་པའི་སྐུ། གསལ་བའི་དུས་ཉིད་ནས་སྤྲོས་པ་དང་བྲལ་བས་ཆོས་ཀྱི་སྐུ། དེ་གཉིས་དབྱེར་མེད་པས་བདེ་བ་ཆེན་པོ་ལོངས་སྤྱོད་རྫོགས་པའི་སྐུ། དེ་གསུམ་ཡེ་ནས་མ་བཅོས་པའི་རང་བཞིན་དུ་བཞུགས་པས་ངོ་བོ་ཉིད་སྐུ། དེ་སེམས་ཅན་ཐམས་ཅད་ཀྱི་རྒྱུད་ལ་འཕོ་འགྱུར་མེད་པར་གནས་པས་མི་འགྱུར་རྡོ་རྗེའི་སྐུའོ། །དེ་ཉིད་རྟོགས་པ་དང་གོམས་པ་ལས་མཐར་ཕྱིན་པ་ནི་འབྲས་བུ་ཞེས་བྱ་སྟེ། སྔགས་ཕྱི་རྒྱུད་པའི་འབྲས་བུ་བཞིན་གཞན་ནས་རེ་བ་མ་ཡིན་ནོ། །དེ་ལྟར་དགོས་པའི་དོན་དྲུག་པོ་དེ་ནི་དཔེ་ཡིད་བཞིན་གྱི་ནོར་བུ་རིན་པོ་ཆེ་ལག་ཏུ་གཏོད་པ་དང་འདྲ་སྟེ། རྣལ་འབྱོར་གྱི་དབང་ཕྱུག་ཆེན་པོ་རྣམས་ཀྱིས་ཚུལ་བཞིན་དུ་ཉམས་སུ་བླངས་པས་གནས་སྐབས་དང་མཐར་ཐུག་གི་དོན་ཐམས་ཅད་ཡིད་བཞིན་དུ་འགྲུབ་ཅིང་འབྲས་བུ་རིག་འཛིན་གྱི་ས་ལ་དཀའ་བ་མེད་པར་ཕྱིན་པར་འགྱུར་རོ། །གསུམ་པ་ཐལ་འབྱིན་རྣམ་པ་བཞིའི་དགོངས་པའི་དོན་སྤྱིར་བཤད་པ་ནི། རྡོ་རྗེ་ཕུར་པ་རྣལ་འབྱོར་ཆེན་པོའི་རྒྱུད་ལས། རྡོ་རྗེ་གཉིས་སུ་མེད་པ་སྟེ། །མི་འགྱུར་ཆོས་ཀྱི་སྐུ་རུ་བཤད། །ཕུར་པ་ཡེ་ཤེས་གཉིས་མེད་དོན། །དབྱིངས་དང་ཡེ་ཤེས་འབྲེལ་བར་བཤད། །ཅེས་གསུངས་པ་ལྟར། སྤྱིར་ཕུར་པའི་ངོ་བོ་ནི་ཆོས་སྐུ་རིག་པའི་ཡེ་ཤེས་ཡིན་ལ་དྲང་དོན་དུ་གཟུགས་སྐུ་རྣམ་པ་གཉིས། རང་བཞིན་ནི་བདེ་ཆེན་བྱང་ཆུབ་ཀྱི་སེམས་སྐྱེ་འགྲོ་རྩི་ཤིང་ནགས་ཚལ་ཐམས་ཅད་ཕུར་པར་ཤར་བ། ངེས་ཚིག་ནི། ཆོས་སྐུ་ཡེ་ནས་རང་གནས་རང་སངས་ཐབས་ཀྱི་ཕུར་པ་རིག་པས་སམ། འདེབས་ཤིང་ཐེབས་ལ་མི་བཟློག་པར་བརྟན་པས་ཕུར་པའོ། །དབྱེ་ན་བཞི་སྟེ། རྒྱུད་ལས། ཕུར་པ་རྣམ་བཞིའི་དགོངས་པ་ཡིས། །གང་ཟག་རྣམ་བཞི་མཐར་དབྱུང་ངོ་། །རིག་པ་ཡེ་ཤེས་ཕུར་བུ་ནི། །ཆོས་ཀྱི་དབྱིངས་ཀྱི་ཀློང་དུ་གདབ། །ཐུགས་རྗེ་སྤྲུལ་པའི་ཕུར་པ་ནི། ཁམས་གསུམ་སེམས་ཅན་ལ་གདབ་བོ། །གསང་བ་བྱང་སེམས་ཕུར་བུ་ནི། །ཡུམ་གྱི་མཁའ་ཀློང་ཡངས་པར་གདབ། །མཚན་མ་རྫས་ཀྱི་ཕུར་པ་ནི། །དགྲ་དང་བགེགས་ལ་གདབ་པའོ། །ཞེས་པའི་དོན། བརྡལ་ཁྱབ་ཡེ་ཤེས་ཀྱི་ཕུར་པ་དང་། གསང་བ་བྱང་སེམས་ཀྱི་ཕུར་པ་དང་། ཚད་མེད་སྙིང་རྗེའི་ཕུར་པ་དང་། མཚན་མ་རྫས་ཀྱི་ཕུར་པ་སྟེ། དེ་རེ་རེ་ལའང་ཕུར་པའི་རྒྱུ། གདབ་པའི་ཡུལ། ཐེབས་པའི་ཚད། མ་ཐེབས་པའི་སྐྱོན་དང་བཞི་བཞིས་སྟོན་པ་ལས། དང་པོ་ཁྱབ་བརྡལ་ཡེ་ཤེས་ཀྱི་ཕུར་པའི་རྒྱུ་ནི། རང་རིག་པའི་ཡེ་ཤེས། གདབ་པའི་ཡུལ་ཆོས་ཀྱི་དབྱིངས། ཐེབས་པའི་ཚད་དབྱིངས་དང་ཡེ་ཤེས་གཉིས་སུ་མེད་པའི་དོན་རྟོགས་པ། མ་ཐེབས་པའི་སྐྱོན་དེ་ལྟར་རྟོགས་མ་ནུས་པས་འབྲས་བུ་འཁོར་བར་འཁྱམས་པའོ། །གཉིས་པ་བྱང་ཆུབ་སེམས་ཀྱི་ཕུར་པའི་རྒྱུ་ནི། དཔལ་ཆེན་ཡབ་ཀྱི་བྱང་སེམས། གདབ་པའི་ཡུལ་འཁོར་ལོ་རྒྱས་འདེབས་ཡུམ་གྱི་མཁའ་ལ། ཐེབས་པའི་ཚད་སྤྲུལ་པའི་སྲས་མཆོག་འབྱིན་ནུས་པ། མ་ཐེབས་པའི་སྐྱོན་དེ་ལྟར་བསྐྱེད་མ་ནུས་པས་འཁོར་བའི་འགྲམ་རྡོ་བྱེད་པའོ། །གསུམ་པ་ཚད་མེད་སྙིང་རྗེའི་ཕུར་པའི་རྒྱུ་ནི། ཀུན་གཞི་ལ་སྙིང་རྗེ་བྱང་ཆུབ་ཀྱི་སེམས་སྐྱེས་པ། གདབ་པའི་ཡུལ་འགྲོ་དྲུག་གི་སེམས་ཅན་ཐམས་ཅད་ལ། ཐེབས་པའི་ཚད་འགྲོ་བའི་དོན་ནུས་ཤིང་སྙིང་རྗེའི་དཔྱང་ཐག་མ་ཆད་པ། མ་ཐེབས་པའི་སྐྱོན་སྙིང་རྗེའི་རྒྱུན་ཐག་ཆད་ཅིང་ལས་ཀྱི་སྲིན་པོར་གོལ་བའོ། །བཞི་པ་མཚན་མ་རྫས་ཀྱི་ཕུར་པའི་རྒྱུ་ནི། གསེར་དངུལ་ཟངས་ལྕགས་སམ་ལས་མཐུན་གྱི་ཤིང་སྟེ་ཞིབ་པར་དབྱིངས་དང་གྲངས་ཚད་བྱིན་རླབས་སྒྲུབ་ཚུལ་སོགས་གཞུང་ལས་གསུངས་པ་བཞིན་ཤེས་པར་བྱ་སྟེ། འདིའི་ཁོངས་སུ་བསྐྱེད་རིམ་ཡང་འདུའོ། །གང་ལ་གདབ་པའི་ཡུལ་ནི་ནད་གདོན་དབུལ་ཕོངས་དགྲ་བགེགས་གནོད་གདུག་ཚོགས་ལ། ཐེབས་པའི་ཚད་ནི་དགྲ་བགེགས་སོགས་སྒྲོལ་ནུས་པ། མ་ཐེབས་པའི་སྐྱོན་ནི་དགྲ་བགེགས་སོགས་སྒྲོལ་མ་ནུས་པས་བསྟན་པ་བསྲུང་བར་མ་ནུས་པའོ། །དེ་ལྟར་ཡང་རྩ་རྒྱུད་ལས། རིག་པ་ཡེ་ཤེས་ཕུར་པ་དེ། །གཟུང་འཛིན་མེད་པའི་ངང་དུ་གདབ། །ལྷང་གིས་རྟོགས་ན་ཐེབས་པའི་ཚད། །འབྲས་བུ་ཆོས་སྐུ་སྐྱེ་མེད་ཐོབ། །མ་ཐེབས་མ་བཏབ་འཁོར་བར་འཁྱམས། །ཞེས་སོགས་རྒྱས་པར་གསུངས་སོ། །དེ་ལྟ་བུའི་ཕུར་པ་རྣམ་པ་བཞི་པོ་དེ་གང་ཟག་གི་སྣོད་ཀྱི་རིམ་པ་དང་སྦྱར་ནས་ཉམས་ལེན་མཐར་ཇི་ལྟར་དབྱུང་བའི་ཚུལ་ནི། གང་ཟག་བློ་ཡངས་ཤིང་ཤེས་རབ་ཆེ་ལ་དབང་པོ་རྣོ་བ་ནམ་མཁའ་ལྟ་བུ་དེས་རིག་པ་ཡེ་ཤེས་ཀྱི་ཕུར་པའི་དགོངས་པ་མཐར་དབྱུང་སྟེ། དེ་ལ་རིག་པ་རྩལ་གྱི་དབང་བསྐུར་ནས་རང་རིག་ཡེ་ཤེས་ཀྱི་ཕུར་པའི་དོན་བསྟན་པས་གཟུང་འཛིན་མེད་པའི་དོན་གྱི་ཡེ་ཤེས་ལྷང་གིས་རྟོགས་ནས་མཐར་ཕྱིན་པས་འཁྲུལ་སྣང་ཐལ་འབྱིན་དུ་ཕུག་སྟེ་གཉིས་མེད་ཡེ་ཤེས་ཆེན་པོ་ཆོས་ཀྱི་སྐུ་ཐོབ་པར་འགྱུར་རོ། །གང་ཟག་འདོད་ཆགས་ཆེ་ཞིང་བརྩོན་འགྲུས་དང་ལྡན་པ་བྱ་ཀ་ལནྟ་ཀ་ལྟ་བུས་བྱང་ཆུབ་སེམས་ཀྱི་ཕུར་པ་མཐར་དབྱུང་སྟེ། དེ་ལ་ཡུམ་བཀྲ་ཤིས་མཚན་དང་ལྡན་པ་གཏད་ནས་གསང་བ་ཤེས་རབ་ཡེ་ཤེས་ཀྱི་དབང་བསྐུར་ཏེ་ལྷག་པའི་བྱང་ཆུབ་སེམས་ཀྱི་ཕུར་པ་གཉིས་སུ་མེད་པའི་བདེ་བ་ཆེན་པོའི་དོན་བསྟན་པས་མ་དག་པའི་རླུང་སེམས་དབྱིངས་སུ་ནུབ་ནས་དག་པའི་ཡེ་ཤེས་མངོན་དུ་འཆར་བར་བྱེད་ཅིང་མཐར་ཕྱིན་པ་ལས་ལྷ་དང་ལྷ་མོའི་དཀྱིལ་འཁོར་གྱི་དབང་ཕྱུག་ལོངས་སྤྱོད་རྫོགས་པའི་སྐུ་ཐོབ་པར་བྱེད་དོ། །གང་ཟག་དད་པ་དང་སྙིང་རྗེ་བརྟན་པོས་གཞན་དོན་དང་སྤྲོས་པ་ལ་དགའ་བ་རི་བོ་ལྟ་བུས་ཚད་མེད་སྙིང་རྗེའི་ཕུར་པ་མཐར་དབྱུང་བར་བྱེད་དེ། དེ་ལ་རང་གཞན་གྱི་དོན་དུ་ཚད་མེད་བཞིས་བློ་སྦྱངས་ཏེ་བླ་ན་མེད་པའི་བྱང་ཆུབ་ཏུ་སེམས་བསྐྱེད་དུ་བཅུག་ལ་སྔགས་ཀྱི་དབང་བསྐུར་ནས་ཚད་མེད་པ་བཞིའི་དམ་བཅའ་བཟུང་ཞིང་ལས་ཀྱི་མན་ངག་བསྟན་པས་བདག་གཞན་མཉམ་པ་ཆེན་པོའི་དོན་རྒྱུད་ལ་སྐྱེས་ནས་འགྲོ་དྲུག་ཐུགས་རྗེའི་དཔྱང་ཐག་གིས་ཟིན་པས་འཁོར་བའི་གནས་ལས་སྒྲོལ་ཞིང་མཐར་ཕྱིན་སྤྲུལ་པའི་སྐུ་ཐོབ་པར་བྱེད་དོ། །འདི་ལ་ཐུགས་རྗེ་སྤྲུལ་པའི་ཕུར་པ་ཞེས་བསྐྱེད་རིམ་དུ་གསུངས་པའང་ཡོད་དེ། དེ་ལྟར་ན་བུམ་དབང་གིས་སྨིན་པར་བྱས་ནས་ལམ་ཁྱེར་བསྟན་པས་སྣོད་བཅུད་གཞལ་ཡས་ཁང་དང་ལྷ་ཡི་རང་བཞིན་གསལ་སྟོང་འཇའ་ཚོན་ལྟ་བུ་བསྒོམས་ཏེ་ཐ་མལ་གྱི་ཞེན་རྟོག་དག་ནས་སྤྲུལ་སྐུ་ཐོབ་པར་བྱེད་པའོ། །གང་ཟག་ཞེ་སྡང་བས་གདུག་པ་དང་གནག་པ་ཆེ་བ་བསྟན་པ་སྲུང་བར་བློ་ཕྱོགས་པའི་ཙནྡན་ལྟ་བུ་དེས་མཚན་མ་རྫས་ཀྱི་ཕུར་པའི་དོན་མཐར་དབྱུང་སྟེ། དེ་ལ་དྲག་པོ་སྒྲོལ་བའི་དབང་བསྐུར་ནས་རྡོ་རྗེ་ཕུར་པའི་བསྙེན་སྒྲུབ་ལས་སྦྱོར་དང་བཅས་པའི་སྔགས་བསྟན་པས་སྣང་སྲིད་ཕུར་པའི་དཀྱིལ་འཁོར་དུ་རྟོགས་ནས་ལས་རབ་འབྱམས་མཐར་ཕྱིན་ཏེ་སྲིད་པ་ཕུར་པའི་དགོངས་པ་མངོན་དུ་འགྱུར་རོ། །འདི་རྣམས་ལ་གང་ཟག་གིས་ཕུར་པའི་དོན་དེ་མཐར་དབྱུང་བ་དང་། ཕུར་པ་དེས་གང་ཟག་དེ་མཐར་དབྱུང་བ་གཉིས་ཡོད་པས་ཇི་ལྟར་སྦྱར་ཀྱང་རུང་སྟེ་དོན་གྱི་གནད་གཅིག་གོ །ཕུར་པ་དེ་བཞི་སྒྲུབ་རྫས་གང་ལ་བརྟེན་ནས་སྒྲུབ་ན། རིག་པ་ཡེ་ཤེས་ཀྱི་ཕུར་པ་ནི། ལྷ་ཕུར་དང་ཤེལ་ལམ་མེ་ལོང་ལ་བརྟེན་ནས་སྒྲུབ། བྱང་ཆུབ་སེམས་ཀྱི་ཕུར་པ་སྒྲུབ་པའི་སྣོད་བྷནྡྷ་མཚན་ལྡན་དང་རྡོ་རྗེ་པདྨའི་འདུ་འཕྲོ་ལས་སྒྲུབ། ཚད་མེད་སྙིང་རྗེའི་ཕུར་པ་ལས་ཀྱི་ཕུར་པ་དང་ལྷ་སྔགས་ཏིང་ངེ་འཛིན་དང་ཡུལ་སེམས་ཅན་ལ་བརྟེན་བྱས་ཏེ་སྒྲུབ། འདུས་བྱས་རྫས་ཀྱི་ཕུར་པ་བསྙེན་པའི་དུས་སུ་ཕུར་པ་དང་ཡུངས་དཀར། སྒྲུབ་པའི་དུས་སུ་འཁོར་ལོ་དང་ལིངྒ། ལས་རྫོགས་པའི་དུས་སུ་མནན་བསྲེག་འཕང་གསུམ་ལ་བརྟེན་ཏེ་སྒྲུབ། སྒྲུབ་ལུགས་ཀྱང་རིག་པ་ཡེ་ཤེས་ཀྱི་ཕུར་པ་རང་བཞིན་གྱི་དཀྱིལ་འཁོར་དུ་སྒྲུབ་ལ་ལྟ་བའི་གཏིང་ཕྱུང་། བྱང་སེམས་ཀྱི་ཕུར་པ་བདེ་སྟོང་གཉིས་སུ་མེད་པའི་དཀྱིལ་འཁོར་དུ་སྒྲུབ་ལ་སྤྱོད་པས་ལ་དོར། ཚད་མེད་སྙིང་རྗེའི་ཕུར་པ་ཏིང་ངེ་འཛིན་གྱི་དཀྱིལ་འཁོར་དུ་སྒྲུབ་སྟེ་སྒོམ་པས་ཉམས་སུ་བླང་། འདུས་བྱས་རྫས་ཀྱི་ཕུར་པ་གཟུགས་བརྙན་གྱི་དཀྱིལ་འཁོར་དུ་སྒྲུབ་སྟེ་ཕྲིན་ལས་ཡོངས་སུ་རྫོགས་པར་བྱེད་པ་སྟེ་ཞིབ་པར་གཞུང་དང་བླ་མའི་མན་ངག་ལས་ཤེས་པར་བྱའོ། །ཕུར་པ་སྒྲུབ་ཅིང་གདབ་པའི་དགོས་ཆེད་ནི་བར་ཆད་འདུལ་ཞིང་ཕྲིན་ལས་བཞི་ལྷུན་གྱིས་གྲུབ་པས་འབྲས་བུ་སྐུ་གསུང་ཐུགས་སུ་སྦྱོར་བའོ། །བར་གཅོད་འབྱུང་ཚུལ་ནི། དཔེར་ན་སོས་ཀ་ལྗང་བུའི་དུས་ན་སད་སེར་འབྱུང་བར་དཀོན་ལ། སྟོན་གྱི་ལོ་ཐོག་སྨིན་པ་ལ་སད་སེར་འབྱུང་བ་མང་བ་བཞིན་དུ་གང་ཟག་དམ་པ་དངོས་གྲུབ་ཐོབ་ལ་ཁད་ལ་བར་ཆད་མང་གི་གང་ཟག་མ་སྨིན་པ་དག་ལ་བར་གཅོད་མི་འབྱུང་སྟེ། ཅིའི་ཕྱིར་ན་གཞན་འཕྲུལ་དབང་བྱེད་ཀྱི་གནས་ན་བདུད་དགའ་རབ་དབང་ཕྱུག་དང་། བཙུན་མོ་པདྨའི་ཕྲེང་བ་ཅན་མས་འཁོར་བའི་སེམས་ཅན་རྣམས་ཁོང་གི་མངའ་འབངས་སུ་འདོད་པས། གང་ཟག་དམ་པ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་ན་ཁོང་གིས་སེམས་ཅན་མང་པོ་བྱང་ཆུབ་ལ་བཀོད་པས་ཁོའི་འཁོར་ཟད་ཀྱིས་དོགས་ནས་བར་གཅོད་རྩོམ་པར་བྱེད་པ་ཡིན་ཏེ་དཔེར་ན་ཐུབ་པ་སངས་རྒྱས་པའི་སྔ་རོལ་དུ་བདུད་ཀྱི་དམག་བྱུང་བ་བཞིན་ནོ། །བདུད་འཇུག་ཚུལ་ལ་གཉིས་ཏེ། རྣལ་འབྱོར་ལམ་གྱི་རྟགས་ཐོན་པ་རྣམས་ལ་དངོས་སུ་བར་གཅོད་རྩོམ་ལ། དེ་མན་ཆད་བདུད་ཀྱིས་བྱིན་གྱིས་བརླབས་ཏེ་བློ་སྒྱུར་བར་བྱེད། དེ་ལ་ཚུལ་གཉིས་ཏེ་བདག་ཉིད་བྱིན་གྱིས་བརླབས་ཏེ་བླ་མ་དང་མཆེད་ལ་སྣང་བ་ལྡོག ཆོས་དང་དད་པ་དམ་ཚིག་ལྟ་བ་སྤྱོད་པ་སྒོམ་པ་ཏིང་འཛིན་ཕྲིན་ལས་སོགས་ལ་བློ་ལྡོག་པར་བྱེད། སྡིག་པའི་གྲོགས་པོ་དང་འདོད་ཡོན་འདུ་འཛི་རྣམ་གཡེང་ལ་དགའ། རྒྱུ་འབྲས་འཆོལ་བར་སྤྱོད། ཐ་མ་ལས་ཀྱི་མཐའ་ལྡོག་པ་སོགས་འབྱུང་ཞིང་། གཞན་བརླབས་ཏེ་གཉེན་འདུན་འཁོར་སློབ་ཡོན་བདག་ཏུ་བརྫུས་ནས་ཆོས་ལས་ལྡོག་པ་དང་། དགྲ་རྐུན་དང་མི་མ་ཡིན་པ་སོགས་ལ་གནོད་པ་བྱེད་དུ་འཇུག་པ་དང་། ཆོས་པ་འདྲེས་ཁྱེར་ནས་རྩོད་དུ་འཇུག ཐ་ན་བྱོལ་སོང་དང་ནོར་ཕྱུགས་སོགས་ཅིར་ཡང་སྤྲུལ་ཏེ་ཆོས་ཀྱི་བར་ཆོད་བྱེད་ཡོང་བས་དེ་དག་དང་པོ་སྙིང་རྗེ་བྱང་སེམས་བསྒོམ་ལ་ཞི་དུལ་གྱི་སྤྱོད་པས་དགྲོལ། དེས་མ་ལོག་ན་བདུད་དུ་བལྟས་ནས་འདུལ་བར་བྱེད་པ་ལ་ནི་རྡོ་རྗེ་ཕུར་པ་ལས་ལྷག་པ་གཞན་མ་མཆིས་པས་ཕུར་པ་ཡི་དམ་དུ་གྱུར་ན་ར བ། ཡི་དམ་གཞན་ཡོད་ཀྱང་རྡོ་རྗེ་གཞོན་ནུ་སྲུང་མའི་ཚུལ་དུ་བསྒྲུབ་དགོས་ཏེ་སྲུང་མ་ཡེ་ཤེས་པ་དང་འཇིག་རྟེན་པ་གཉིས་ཀ་ཡིན་པས་སོ། །ཡི་དམ་གང་སྒྲུབ་རུང་ཐེག་ཆེན་གྱི་ཆོས་གང་སྤྱོད་ཀྱི་བར་ཆད་རྡོ་རྗེ་གཞོན་ནུས་སྲུང་བར་འགྱུར་ཏེ། གསང་བ་བསམ་མི་ཁྱབ་པའི་མདོ་ལས། ཕྱག་ན་རྡོ་རྗེ་དང་པོ་བྱང་ཆུབ་ཏུ་ཐུགས་བསྐྱེད་པའི་དུས་སུ། བྱང་ཆུབ་ཏུ་སེམས་བསྐྱེད་ནས་ཐེག་ཆེན་སྐྱོང་བ་ཐམས་ཅད་ཀྱི་སྲུང་མར་ཞལ་གྱིས་བཞེས་ཤིང་། སྒྲུབ་པ་པོ་ཐམས་ཅད་ཀྱི་ལུས་དང་གྲིབ་མ་ལྟར་འགྲོགས་ནས་སྐྱོབ་པར་གསུངས་པས། དེའི་ཕྱིར་བསྐུལ་བ་ཙམ་གྱིས་ཕྲིན་ལས་མཛད་ངེས་པས་སྲུང་མར་བསྙེན་ཅིང་སྒྲུབ་ན་བར་གཅོད་ཀུན་ཐུལ་ནས་མཆོག་གི་དངོས་གྲུབ་ཐོབ་པའི་དགོས་པ་ཡོད་ཅེས་ཨོ་རྒྱན་དུས་གསུམ་མཁྱེན་པས་གསུངས་པ་ཡིན་ནོ། །བཞི་པ་སྒྲུབ་ཐབས་ལས་ཀྱི་རིམ་པའི་སྒོམ་དོན་བྱེ་བྲག་ཏུ་སྙིང་པོར་དྲིལ་ནས་སྟོན་པ་ལ། སྤྱིར་ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ་དང་། སྒྲུབ་ཆོས་བསྙེན་སྒྲུབ་ཡན་ལག་བཞིའམ་བསྙེན་སྒྲུབ་ལས་གསུམ་གྱི་སྒོ་ནས་ཇི་ལྟར་ཉམས་སུ་ལེན་པའི་ཚུལ་རྣམས་ནི། གཏེར་གཞུང་རྩ་བ་རྡོ་རྗེའི་ཚིག་དང་གསལ་བྱེད་སྨིན་གླིང་གཏེར་ཆེན་རིན་པོ་ཆེ་སྐུ་མཆེད་སོགས་ཀྱིས་མཛད་པའི་སྒྲུབ་དཀྱིལ་བསྙེན་ཡིག་སོགས་ལས་ཤེས་པར་བྱ་བ་ལས་འདིར་མ་སྤྲོས་ཤིང་། འདིར་སྐབས་སུ་བབས་པ་བདག་དོན་བྱང་ཆུབ་ནར་མའི་སྒྲུབ་པའི་སྒྲུབ་ཐབས་ལས་ཀྱི་བྱང་བུའི་སྒོམ་དོན་ཙམ་ཞིག་མདོར་བསྡུས་ཏེ་བརྗོད་པ་ལ། སྒྲུབ་ཐབས་རྩ་བའི་ཐོ་ཡིག་ལས། བིཏྱོཏྟ་མ་འབུམ་སྡེའི་བཅུད། །རྩ་བ་ཡང་སྙིང་དྲག་སྔགས་འབྲེལ། །ཡང་གསང་ཕུར་བུའི་གཞུང་བསྲང་སྡོམ། །སྔོན་འགྲོ་དངོས་གཞི་རྗེས་རིམ་གསུམ། །དང་པོ་མཚམས་བཤགས་བརྡ་སྒོ་དབྱེ། །ཕྱག་འཚལ་དམ་བཅའ་བྱིན་དབབ་བརླབ། །ཅེས་གསུངས་པ་ལྟར། སྔོན་འགྲོ། དངོས་གཞི། རྗེས་གསུམ་གྱི། དང་པོ་སྔོན་འགྲོ་ལ་བདུན་ལས། བར་ཆད་སྲུང་བའི་ཕྱིར་མཚམས་གཅོད་པ་ནི། རྒྱས་པར་བསྙེན་སྒྲུབ་སོགས་ཀྱི་སྐབས་སྒྲུབ་ཁོག་ལས་འབྱུང་བ་ལྟར་ཕྱི་མཚམས་ལེགས་པར་བཅད། ནང་མཚམས་སྐྱབས་སུ་འགྲོ་བ་དང་བྱང་ཆུབ་ཏུ་སེམས་བསྐྱེད་ནས། དོན་དམ་བྱང་སེམས་ཀྱི་ངོ་བོར་རང་སེམས་སྐྱེ་མེད་ཆོས་སྐུར་དག་པའི་ངང་ལས་སྐད་ཅིག་གིས་དཔལ་རྡོ་རྗེ་གཞོན་ནུ་ཡབ་ཡུམ་དུ་གསལ་བའི་ཐུགས་ཀ་ནས་སྤྲུལ་པའི་ཁྲོ་ཚོགས་ཕུར་བུ་འབར་བའི་སྤྲིན་འཕྲོས་པས་བདུད་བགེགས་ལོག་འདྲེན་ཐམས་ཅད་ཚར་བཅད། སླར་འདུས་པས་རྡོ་རྗེ་ཕུར་བུའི་ཚོགས་ཀྱིས་ཕྱོགས་མཚམས་སྟེང་འོག་ཐམས་ཅད་གཏམས་ཤིང་བསྐལ་པའི་རླུང་ཡང་མི་ཐར་བར་བསམ། གསང་མཚམས་བར་དུ་གཅད་བྱ་གཅོད་བྱེད་ཐམས་ཅད་རང་སེམས་འཁྲུལ་པའི་རྣམ་རྟོག་སྟེ་སེམས་ཉིད་སྟོང་གསལ་ཆོས་སྐུར་རྟོགས་པས་བར་ཆད་ཀྱི་མིང་ཙམ་ཡང་མ་གྲུབ་པར་ཤེས་པ་ནི་མི་ཤིགས་རྡོ་རྗེའི་མཚམས་ཏེ། དེ་ལྟར་ཕྱི་མཚམས་བཅད་པས་རྣམ་གཡེང་ཞི། ནང་མཚམས་བཅད་པས་བར་ཆད་ཞི། གསང་མཚམས་བཅད་པས་རང་སེམས་ཆོས་སྐུར་གནས་པ་འབྱུང་བ་ཡིན་ལ་མཐར་ཐུག་གི་དགོངས་པ་སྐུ་གསུམ་ཐོབ་པར་གསུངས་སོ། །གཉིས་པ་ལྷ་དང་འཁོན་བཅུག་སྦྱང་བའི་ཕྱིར་བཤགས་པ་བྱ་བ་ལ། དགོངས་གསོལ་བརྗོད་པའི་ཚེ་བླ་མ་རིག་འཛིན་རྡོ་རྗེ་ཕུར་པའི་དཀྱིལ་འཁོར་གྱི་ལྷ་ཚོགས་མངོན་སུམ་བཞིན་དུ་མདུན་གྱི་ནམ་མཁར་བྱོན་ཏེ་བཞུགས་པའི་སྤྱན་སྔར། ཐོག་མ་མེད་པའི་དུས་ནས་བདག་ཏུ་འཛིན་པའི་དབང་གིས་མཉམ་པ་ཆེན་པོའི་ལྟ་སྤྱོད་གདེང་དུ་མ་གྱུར་པས་རྩ་བ་དང་ཡན་ལག་གི་དམ་ཚིག་དང་འགལ་བར་སྤྱད་པ་སོགས་བདེ་གཤེགས་བཀའ་དང་འགལ་བའི་ནོངས་པ་ཐམས་ཅད་ག ནོང་འགྱོད་ཀྱི་བསམ་པ་དྲག་པོས་བཤགས་པས་ཉམས་གྲིབ་ཉེས་སྐྱོན་ཐམས་ཅད་དག་ཅིང་བྱང་ནས། ཐུགས་ཀྱིས་དགོངས་ཤིང་བྱིན་གྱིས་རློབ་པའི་གནས་སུ་རུང་བར་མོས་པ་སྟེ། དེས་གནས་སྐབས་མཐར་ཐུག་ཏུ་སྒྲིབ་གཉིས་བྱང་ཞིང་མཆོག་གི་དངོས་གྲུབ་ཐོབ་པར་བྱེད་དོ། །གསུམ་པ་གནས་ངན་གྱི་རྟོག་པ་བསལ་བའི་ཕྱིར་བརྡ་སྒོ་དབྱེ་བ་ནི། སྣོད་བཅུད་ཕུང་ཁམས་སྐྱེ་མཆེད་སོགས་སུ་འཛིན་པའི་མ་དག་པའི་སྣང་ཞེན་ཐམས་ཅད་དབྱིངས་སུ་སྦྱངས་ནས། སྔགས་བརྗོད་པའི་རྐྱེན་གྱིས་རྡོ་རྗེ་ཕུར་བུ་རང་བཞིན་ལྷུན་གྱིས་གྲུབ་པའི་ཡེ་ཤེས་ཀྱི་དཀྱིལ་འཁོར་ཆེན་པོའི་སྒོ་བཞི་ཤག་གིས་བྱེ་ནས་ཚད་མེད་པ་བཞིའི་འཇུག་པའི་སྐོར་ཕྱོགས་སུ་ཞུགས་པས་རང་བྱུང་གདོད་མའི་ལྷ་དང་མངོན་སུམ་དུ་མཇལ་བར་མོས་པ་སྟེ། འདིས་ཐ་མལ་གྱི་ཞེན་རྟོག་སྦྱོང་བར་བྱེད་དོ། །བཞི་པ་ཆེ་ཆུང་བཟང་ངན་དུ་རྟོག་པ་བསལ་བའི་བརྡ་ཕྱག་འཚལ་བ་ནི། ཀུན་རྫོབ་ཏུ་ལྷ་དང་སློབ་དཔོན་རྡོ་རྗེའི་མཆེད་དཀྱིལ་འཁོར་གྱི་ལྷ་ལ་ལུས་ངག་ཡིད་གསུམ་གུས་པས་ཕྱག་འཚལ་བ་སྟེ། དོན་དམ་པར་ཕྱག་འཚལ་བའི་ཡུལ་དཀྱིལ་འཁོར་གྱི་ལྷ་དང་འཚལ་བྱེད་བདག་ཉིད་རང་བཞིན་གཉིས་སུ་མེད་པར་རང་རིག་པའི་ངང་དུ་རྟོགས་པར་བྱེད་པ་སྟེ། འདིས་ལྷ་བདག་ཐ་དད་དུ་འཛིན་པའི་ཞེན་རྟོག་དག་པར་བྱེད་དོ། །ལྔ་པ་རྒྱལ་བའི་གདུང་འཚོབ་པར་བྱ་བའི་ཕྱིར་དམ་བཅའ་བ་ནི། ལྷག་པའི་ལྷ་ཡི་སྤྱན་སྔར་དུས་འཁོར་བ་ཇི་སྲིད་མ་སྟོང་གི་བར་གཟུགས་སྐུ་རྣམ་པ་གཉིས་ཀྱིས་འགྲོ་བའི་དོན་བྱ་བའི་ཕྱིར་རང་བཞིན་ཆོས་ཀྱི་སྐུ་མངོན་དུ་བྱའོ་སྙམ་དུ་བྱང་ཆུབ་མཆོག་ཏུ་སེམས་བསྐྱེད་ཅིང་ལྟ་སྤྱོད་ཟུང་དུ་འབྲེལ་བའི་སྤྱོོད་པ་རླབས་པོ་ཆེས་རྟག་ཏུ་འགྲོ་བའི་དོན་ལས་མི་འདའ་བའི་དམ་བཅའི་གོ་ཆ་བགོ་བ་སྟེ། འདིས་ནི་དོན་གཉིས་མཐར་ཕྱིན་པའི་རྒྱུ་བྱེད་དོ། །དྲུག་པ་བྱིན་དབབ་པ་ནི། དག་མཉམ་བདེ་བ་ཆེན་པོའི་རང་བཞིན་མ་རྟོགས་པའི་དབང་གིས་ཐ་མལ་རང་རྒྱུད་དུ་ཞེན་པ་གཟུང་འཛིན་གཉིས་སྣང་སྲིད་པ་སྣོད་བཅུད་ཀྱིས་བསྡུས་པའི་ཆོས་རྣམས། ཡེ་ནས་རྣམ་པར་དག་པ་མཉམ་ཡངས་གདལ་བ་ཆེན་པོ་ཆོས་སྐུ་ཐིག་ལེ་ཉག་གཅིག་གི་རང་བཞིན་རྡོ་རྗེ་ཕུར་པའི་དཀྱིལ་འཁོར་དུ་སྒྲུབ་པ་དང་། སྒྲུབ་པ་པོ་རྣམས་ཀྱིས་ཡེ་ཤེས་ལྷ་ཡི་དབང་དང་བྱིན་རླབས་དངོས་གྲུབ་མ་ལུས་པ་བླང་བའི་ཕྱིར་དུ་དབྱིངས་དང་ཡེ་ཤེས་གཉིས་སུ་མེད་པའི་རང་བཞིན་ཆོས་སྐུ་མཉམ་པ་ཆེན་པོའི་ངང་ལས། གང་འདུལ་རྟགས་ཀྱི་ཕྱག་རྒྱ་ཡེ་ཤེས་ཀྱི་ཁྲོ་བོའི་ཚོགས་ཀྱི་ཐུགས་དམ་གནད་ནས་བསྐུལ་ཞིང་སྤྱན་དྲངས་པས། གཟུགས་སྐུ་རྩ་བ་གསུམ་གྱི་ལྷ་ཚོགས་ནམ་མཁའ་གང་བར་མངོན་སུམ་དུ་བྱོན་ནས་ཡབ་ཡུམ་བདེ་བར་རོལ་པའི་སྐུའི་གནས་ནས་བྱིན་རླབས་ཀྱི་ངོ་བོ་བྱང་སེམས་བདུད་རྩིའི་ཆུ་རྒྱུན་བབས་པས་སྒོ་གསུམ་གྱི་དྲི་མ་དག་སྟེ་སྐུ་གསུང་ཐུགས་རྡོ་རྗེའི་རང་བཞིན་དཔག་པར་དཀའ་བའི་ཡེ་ཤེས་མཆོག་གིས་བྱིན་གྱིས་བརླབས་ཏེ་དབང་ཆེན་རྣམས་ཀྱིས་དབང་བསྐུར། བྱིན་ཆེན་རྣམས་ཀྱིས་བྱིན་དབབ། མཐུ་ཆེན་རྣམས་ཀྱིས་མཐུ་བསྩལ་ཏེ། སྒྲུབ་པའི་རྟགས་དང་མཚན་མ་བཟང་པོ་མྱུར་དུ་བསྟན་པ་དང་། དཔལ་ཆེན་བཛྲ་ཀཱི་ལ་ཡ་ཡི་དབང་དང་བྱིན་རླབས་དངོས་གྲུབ་ཐམས་ཅད་བསྩལ་ནས་མཐར་བདག་གནས་ཡོ་བྱད་ཐམས་ཅད་ལ་ཐིམ་པར་མོས་པ་སྟེ། འདིས་རྡོ་རྗེ་གསུམ་གྱི་ཡེ་ཤེས་ཀྱིས་ཐ་མལ་དུ་སྣང་བའི་སྒོ་གསུམ་སྒྲུབ་རྫས་དང་བཅས་པ་དག་མཉམ་སྤྲོས་པ་མེད་པའི་དགོངས་ཀློང་ཟབ་མོར་ཐ་མལ་གྱི་འཛིན་རྟོག་སྦྱངས་ཏེ་ལྕགས་ལ་གསེར་འགྱུར་གྱི་རྩིས་ཐེབས་པ་བཞིན་རྩ་བ་གསུམ་གྱི་ཡེ་ཤེས་རོལ་པའི་ཀློང་དུ་བྱིན་གྱིས་རློབ་པར་བྱེད་པ་ཡིན་ནོ། །བདུན་པ་ཚོགས་བསགས་པའི་ཕྱིར་མཆོད་རྫས་བྱིན་གྱིས་བརླབ་པ་ནི། ཐོག་མར་བདག་ལྷར་གསལ་བའི་ཐུགས་ཀ་ནས་ཡི་གེ་རྃ་ཡྃ་ཁྃ་གསུམ་འཕྲོས་པས་མཆོད་རྫས་ཀྱི་ཉེས་སྐྱོན་དངོས་འཛིན་བག་ཆགས་དང་བཅས་པ་བསྲེགས་གཏོར་བཀྲུས་ནས་དག་པར་བྱས། སླར་ཡང་ༀ་དཀར་པོ་འཕྲོས་པས་རྫས་རང་ག་མའི་རྟོག་པ་སྦྱང་། ཨ་{ༀ} དམར་པོ་འཕྲོས་པས་གཟུང་འཛིན་བག་ཆགས་ཀྱི་ངན་རྟོག་བསྲེགས། ཧཱུྃ་མཐིང་ག་འཕྲོས་པས་མཆོད་རྫས་ཐམས་ཅད་ཟག་མེད་བདུད་རྩིའི་རང་བཞིན་དུ་སྤྱིར་བརླབས་ཤིང་། བྱེ་བྲག་ཏུ། གཙང་དམེ་གཉིས་རྟོག་གི་འཛིན་པ་དང་བྲལ་བའི་དམ་རྫས་ཤ་ལྔ་བདུད་རྩི་ལྔ་རིགས་ལྔ་ཡེ་ཤེས་ལྔ་ཡི་རང་བཞིན་ཟག་པ་མེད་པའི་བདུད་རྩིའི་རྒྱ་མཚོ། རྒྱུད་དྲུག་འཁོར་བ་དབྱིངས་སུ་བསྒྲལ་བའི་ཆགས་མེད་རཀྟའི་རྒྱ་མཚོ་ཤ་ཆེན་གྱི་ལྷུ་དུམ་གྱིས་བརྒྱན་པ། ཕྱི་འདོད་ཡོན་ལྔ་ལྡན་གྱི་གཏོར་ཆེན། ནང་སྣོད་གཞལ་ཡས་ཁང་བཅུད་ལྷར་གསལ་བ་གསང་བ་ཆོས་ཀྱི་དབྱིངས་ཀྱི་གཏོར་གཞོང་དུ་ཉོན་མོངས་རྣམ་རྟོག་གི་གཏོར་མ་རིག་པ་ཡེ་ཤེས་ཀྱི་རྒྱན་གྱིས་བརྒྱན་པ། སྟོབས་དུས་ལྷར་ཤེས་པ། མཆོད་དུས་མཆོད་པར་ཤེས་པ། ཟོར་དུས་མཚོན་ཆར་ཤེས་པ་སྟེ་སོ་སོར་སྔགས་བརྗོད་ཅིང་བརླབ་ལ། ཕྱི་མཆོད་རྣམས་ཀྱང་འབྲུ་གསུམ་གྱིས་འདོད་ཡོན་གྱི་ལྷ་མོ་མཆོད་རྫས་ཐོགས་པ་དཔག་ཏུ་མེད་པར་སྤྲུལ་ནས་བརླབ་བོ། །དེས་ལྷ་རྣམས་མཉེས་ཤིང་མྱུར་དུ་ཚོགས་རྫོགས་པའི་དགོས་པ་ཡོད་དོ། །གཉིས་པ་དངོས་གཞི་ལ། ཏིང་ངེ་འཛིན་གྱི་དཀྱིལ་འཁོར་བསྐྱེད་པ་དང་། རང་བཞིན་ཡེ་ཤེས་ཀྱི་ད ཀྱིལ་འཁོར་དགུག་པ་གཉིས་ལས། དང་པོ་ལ། ཐོག་མར་ཏིང་འཛིན་འབྱུང་རིམ་བརྩེགས། །གཞལ་ཡས་རྟེན་བཅས་རྟེན་གནས་སུ། །རྩ་བ་ཁྲོ་བཅུ་ཕུར་བུ་རྫས། །སྒོ་སྐྱོང་སྲུང་མའི་ཚོགས་བསྐྱེད་བྱ། །ཞེས་དོན་བརྒྱད་དུ་གསུངས་པ་ལས། དང་པོ་ཏིང་ངེ་འཛིན་གསུམ་གྱིས་ཁོག་དབུབ་པ་ནི། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་རང་སེམས་ཀྱི་སྣང་བ་ཙམ་དུ་རྫོགས་པའི་སྟོང་པ་ཉིད་ཀྱི་རྡོ་རྗེ་སོ་སོ་རང་རིག་པའི་ངོ་བོར་འབར་ཞིང་འཕྲོས་པས་ཞེ་སྡང་ལ་སོགས་པ་དུག་ལྔའི་རྣམ་རྟོག་གནས་སུ་གཅོད་པ་དེ་བཞིན་ཉིད་ཀྱི་ཏིང་ངེ་འཛིན་ཏེ། འདིས་མར་འཁོར་བའི་དུས་སུ་འཆི་སྲིད་ཀྱི་བག་ཆགས་དང་དངོས་འཛིན་སྦྱངས་ཤིང་དག ཡར་ཆོས་སྐུའི་རིགས་ཀྱི་ནུས་པ་གསོས་འདེབས་པས་མྱང་འདས་ཀྱི་འབྲས་བུ་རྫོགས་པར་བྱེད། བར་དུ་འོད་གསལ་རྒྱུད་ལ་སྐྱེ་བའི་གཞི་འདིང་བས་ལམ་གོང་མའི་སྨིན་བྱེད་དུ་འགྲོའོ། །གནས་ལུགས་ཟབ་མོ་དེ་ལྟར་མ་རྟོགས་པའི་འགྲོ་བ་རིགས་དྲུག་གི་སྡུག་བསྔལ་རྩ་བ་ནས་གཅོད་པར་བྱའོ་སྙམ་དུ་སྙིང་རྗེའི་མཚོན་ཆ་ཆེན་པོ་སེམས་ཅན་གྱི་ཁམས་ཐམས་ཅད་དུ་ཁྱབ་པར་འབར་བ་ཀུན་སྣང་གི་ཏིང་ངེ་འཛིན་ཏེ། འདིས་མར་འཁོར་བའི་དྲི་མ་བར་དོའི་བག་ཆགས་དང་སྟོང་པ་ཕྱོགས་རེ་བར་ཞེན་པའི་རྟོག་པ་སྦྱངས་ཤིང་དག ཡར་ལོངས་སྐུ་མངོན་དུ་འགྱུར་བའི་ས་བོན་གསོས་འདེབས་ཤིང་འབྲས་བུ་རྫོགས། བར་དུ་འོད་གསལ་ཡེ་ཤེས་ཀྱི་ལྷ་སྐུར་ལྡང་བའི་རྒྱུ་སྙིང་རྗེ་ཆེན་པོ་རྒྱུད་ལ་སྐྱེ་བའི་གཞི་འདིང་བས་རྫོགས་རིམ་གྱི་སྨིན་བྱེད་དུ་འགྲོའོ། །སྟོང་པ་ཉིད་དང་སྙིང་རྗེ་དབྱེར་མེད་པ་ནམ་མཁའི་དབྱིངས་ནས་སེམས་ཀྱི་རྟེན་དྭངས་མའི་སྲོག་ཧཱུྃ་ཡིག་སྔོན་པོ་ཐིག་ལེའི་ངོ་བོ་ཉིད་དུ་ཤར་བ་རྒྱུའི་ཏིང་ངེ་འཛིན་ཏེ། འདིས་མར་སྐྱེ་གནས་སུ་འཇུག་པའི་བག་ཆགས་དང་སྣང་སྟོང་ཐ་དད་དུ་འཛིན་པའི་རྟོག་པ་སྦྱངས་ཤིང་དག ཡར་སྤྲུལ་སྐུ་མངོན་དུ་འགྱུར་རུང་ཐར་པའི་ས་བོན་གསོས་འདེབས་པའི་འབྲས་བུར་རྫོགས། བར་དུ་རླུང་སེམས་ལས་བྱུང་བའི་ཡེ་ཤེས་ཀྱི་ལྷ་སྐུར་ལྡང་ནུས་པའི་གཞི་འདིང་བས་རྫོགས་རིམ་གྱི་སྨིན་བྱེད་དུ་འགྲོའོ། །གཉིས་པ་རྟེན་འབྱུང་བ་རིམ་བརྩེགས་བསྒོམ་པ་ནི། དྭངས་མའི་སྲོག་ཧཱུྃ་ལས་ཨེ་ཡྃ་རྃ་སུྃ་ཀེཾ་རྃ་རྣམས་ཆད་པ་འཕྲོ་འདུས་ཡོངས་སུ་གྱུར་པ་ལས། ཨེ་ལས་ནམ་མཁའ་མཐིང་ནག་གྲུ་གསུམ་ཆོས་ཀྱི་འབྱུང་གནས་རྒྱ་ཁྱོན་ཚད་མེད་པར་བསྒོམ་སྟེ། འདིས་ནི་ཕྱི་ལྟར་ན་འབྱུང་བ་ནམ་མཁའ། ནང་ལྟར་ན་སེམས་རྣམ་པར་ཤེས་པ། གསང་བ་ལྟར་ན་ཉོན་མོངས་པ་གཏི་མུག གསལ་བ་ལྷ་དང་སྦྱར་ན་རྣམ་སྣང་ཡབ་ཡུམ། བདེ་བ་ཡེ་ཤེས་དང་སྦྱར་ན་ཆོས་དབྱིངས་ཡེ་ཤེས། སྟོང་པ་ཆོས་ཉིད་དང་སྦྱར་ན་ཐམས་ཅད་སྟོང་པའི་དབྱིངས་སུ་གཅིག་པར་མཚོན་པ་སྟེ། དག་བྱ་དག་བྱེད་དག་འབྲས་རྣམས་འདི་བཞིན་འོག་མ་རྣམས་ལའང་ཤེས་པར་བྱའོ། །དེའི་སྟེང་དུ་ཡྃ་ལས་རླུང་གི་དཀྱིལ་འཁོར་ལྗང་གུ་རྒྱ་གྲམ་རྒྱ་ཁྱོན་ནམ་མཁའ་དང་མཉམ་པར་བསྒོམ་པ་ནི། འབྱུང་བ་རླུང་། ལུས་བསྐྱེད་བྱེད། ཉོན་མོངས་ཕྲག་དོག ལྷ་དོན་གྲུབ་ཡབ་ཡུམ། ཡེ་ཤེས་བྱ་གྲུབ་བོ། །དེའི་སྟེང་དུ་རྃ་ལས་རཀྟའི་རྒྱ་མཚོ་ཟླུམ་པོ་ཚད་གོང་དང་མཉམ་པར་བསྒོམ་པ་ནི། འབྱུང་བ་ཆུ་ནང་གི་ཁྲག ཉོན་མོངས་འདོད་ཆགས། ལྷ་སྣང་མཐའ་ཡབ་ཡུམ། ཡེ་ཤེས་སོར་རྟོག་གོ །དེའི་སྟེང་དུ་སུྃ་ལས་ཤ་ཆེན་གྱི་ས་གཞི་སེར་ནག་དབྱིབས་གྲུབ་བཞི་རྒྱ་ཁྱོན་གོང་མཉམ་དང་། དེའི་སྟེང་དུ་ཀེཾ་ལས་རུས་པའི་རི་ར བ་དཀར་པོ་བང་རིམ་བཞི་པར་བསྒོམ་པ་ནི། འབྱུང་བ་ས། ནང་ཤ་རུས། ཉོན་མོངས་ཞེ་སྡང་། ལྷ་རྡོར་སེམས་ཡབ་ཡུམ། ཡེ་ཤེས་མེ་ལོང་ངོ་། །དེའི་སྟེང་དུ་རྃ་ལས་ཡེ་ཤེས་ཀྱི་མེ་དཔུང་དམར་ནག་གྲུ་གསུམ་དུ་འབར་བ་ནི། ཕྱི་འབྱུང་བ་མེ། ནང་དྲོད། གསང་བ་ཉོན་མོངས་ང་རྒྱལ། ལྷ་རིན་འབྱུང་ཡབ་ཡུམ། ཡེ་ཤེས་མཉམ་པ་ཉིད་དེ། དེ་ཐམས་ཅད་ཀྱང་ཆོས་ཉིད་སྟོང་པའི་དབྱིངས་སུ་འདུ་བ་ཡིན་ནོ། །གསུམ་པ་གཞལ་ཡས་ཁང་བསྐྱེད་པ་ནི། སྤྱིར་འཁོར་ལོ་རྩིབས་བརྒྱད་སྐུ་ཡི་དཀྱིལ་འཁོར་དུ་བསྙེན་པ་བྱ་བ་ལྷ་དང་དམ་ཅན་འཁོར་བའི་གནད། པདྨ་འདབ་བརྒྱད་གསུང་གི་དཀྱིལ་འཁོར་དུ་དབང་བསྐུར་བ་ཆོས་ལ་དབང་བསྐུར་བའི་གནད། རིན་ཆེན་ཟུར་བརྒྱད་ཐུགས་ཀྱི་དཀྱིལ་འཁོར་དུ་བསྙེན་སྒྲུབ་སྦགས་ཏེ་བྱ་བ་ལྷ་དང་ཐུགས་མི་གཉིས་ཤིང་དངོས་གྲུབ་ཡོན་ཏན་ཕུན་སུམ་ཚོགས་པའི་གནད། ཟླ་གམ་ཨེ་ཁྲོཾ་ཉེར་གཅིག་པ་ཕྲིན་ལས་ཀྱི་དཀྱིལ་འཁོར་དུ་སྒྲུབ་ཆེན་ལས་སྦྱོར་སྦགས་པ་ལྷ་དང་དམ་ཅན་གནད་ལ་དབབ་ཅིང་ལས་ལ་གཟུད་དེ་ལྷ་དང་དམ་ཅན་གྱི་སྟོབས་དང་དངོས་གྲུབ་བདག་ལ་རྫོགས་པའི་གནད་སོགས་སུ་གསུངས་པ་ལས་འདིར་བསྙེན་སྒྲུབ་སྦགས་པའི་ལུགས་སུ་བྱས་ཏེ། སླར་ཡང་ཧཱུྃ་ལས་རི་རབ་ཀྱི་སྟེང་མེ་དཔུང་འབར་བའི་ཀློང་དུ་བྷྲཱུྃ་ཁ་དོག་ལྔ་ལྡན་ཆད། སྔགས་བརྗོད་པའི་རྐྱེན་གྱིས་བྷྲཱུྃ་ཡོངས་སུ་གྱུར་པ་ལས་ཡེ་ཤེས་ལྔ་ཡི་རང་བཞིན་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་གྲུ་བཞི་སྒོ་བཞི་པ། སྒོ་ཁྱུད་གློ་འབུར་གྱི་ཚུལ་ཅན་ཕོ་བྲང་ནང་མ་ཐོད་པ་སྐམ་རློན་རྙིང་པའི་རྩིག་པ་སུམ་རིམ་གནམ་ལྕགས་ཀྱི་གཟེར་གྱིས་བཏབ་ཅིང་སྒོ་ཁྱུད་སྤངས་པའི་སྒོ་བཞི་པ། གཞལ་ཡས་ཁང་ཕྱི་མ་ལ་ཕ་གུ་སེར་པོ་ཐོད་པས་དཀྲིགས་པ། ཐོད་ཚལ་གྱིས་བརྒྱན་པའི་རྒྱུ་མ་གསང་བའི་དྲྭ་བ་དང་དྲྭ་བ་ཕྱེད་པ་འཕྱང་བ། མཆོད་རྟེན་གྱི་རྣམ་པའི་པུ་ཤུས་བསྐོར་ཞིང་ཌ་{ ད}རུ་ཀ་མི་ཡི་ལག་ངར་རིས་སུ་བྲིས་པ། རྩིག་པའི་རྩ་བར་འདོད་ཡོན་གྱི་སྣམ་བུ་ལ་མཆོད་པའི་ལྷ་མོའི་ཚོགས་ཀྱིས་སྤྲས་པ། སྒོ་རྒྱན་རྟ་བབས་བཞི་ལ་རུས་པའི་དྲྭ་བ་དང་ཆུ་སྲིན་གྱིས་བརྒྱན་པ། སྟེང་འོག་ཐམས་ཅད་ཕྱོགས་ཀྱི་དེ་བཞིན་གཤེགས་པ་བཞིའི་ཁ་དོག་ཅན། དབུས་མཐིང་ནག་གྲུ་གསུམ་ཟླ་གམ་དམར་པོ་ཐོད་སྐམ་གྱི་ཕྲེང་བས་ཟླུམ་པོར་བསྐོར་བ། དེའི་ཕྱི་རོལ་དུ་རིན་པོ་ཆེ་ཆ་བརྒྱད་པའི་མུ་ཁྱུད་སེར་པོ་ལ་རིན་པོ་ཆེའི་ཕྲ་ཚོམ་བཀྲ་བ། གཞལ་ཡས་ཁང་གི་ཕྱི་དབྱིབས་མཆོད་རྟེན་གྱི་རྣམ་པར་གསལ་བ། ཕྱི་རོལ་དུ་དུར་ཁྲོད་ཆེན་པོ་བརྒྱད་དུར་ཁྲོད་ཀྱི་ཆོས་རྣམས་ཀྱིས་འཇིགས་པར་བྱས་པ་ཏེ། དེ་ཡང་ལྷ་ཆེན་པོ་བརྒྱད་ཀྱི་ཀ་བ། ཀླུ་ཆེན་པོ་བརྒྱད་ཀྱི་གདུང་མ། གཟའ་བརྒྱད་ཀྱི་དྲལ་ཕྱམ། རྒྱུ་སྐར་ཉེར་བརྒྱད་ཀྱི་དྲལ་བུ། མི་ལྤགས་ཀྱི་ཐོག་ཕུབ། ཞིང་ཆུང་གི་ཟར་ཚག ཙིཏྟའི་ཏོག ཟླ་བའི་ཀ་གདན། ཉི་མའི་ཀ་ཞུ་སོགས་རབ་ཏུ་འཇིགས་པ་དུར་ཁྲོད་འབར་བའི་གཞལ་ཡས་ཁང་ཆེན་པོའི་དབུས་ཀྱི་ལྟེ་བ་དྲག་པོའི་ཕྲིན་ལས་ལྷུན་གྱིས་གྲུབ་པའི་བརྡར་དབྱིབས་གྲུ་གསུམ་ཆོས་ཉིད་འགྱུར་བ་མེད་པས་མཐིང་ནག དབང་གི་ལས་གྲུབ་པས་ཟླ་གམ་འགྲོ་དོན་མཛད་བཞིན་དུ་མ་ཆགས་པས་དམར་པོ། ཞི་བའི་ལས་གྲུབ་པས་ཟླུམ་པོ། འཁོར་བའི་ཉེས་པས་མ་གོས་པས་ཐོད་རྩིག་དཀར་པོ། རིག་པའི་རང་རྩལ་གནམ་ལྕགས་ཀྱི་གཟེར་གྱིས་བཏབ་པ། ཆེ་བའི་ཡོན་ཏན་ལྷུན་གྱིས་གྲུབ་པས་རིན་ཆེན་ཟུར་བརྒྱད་འབར་བ། རྒྱས་པའི་ལས་གྲུབ་པས་གྲུ་ཆད་བཞི། ཡོན་ཏན་སྣ་ཚོགས་ལྷུན་གྱིས་གྲུབ་པས་ལྗང་གུ། མཉམ་ཉིད་བླང་དོར་མེད་པའི་བར་ཁྱམས་ཀྱིས་བསྐོར་བ། སྒོ་བཞིར་མུ་ཁྱུད་སོགས་ཡོངས་སུ་རྫོགས་བའི་ངོ་མཚར་རྨད་དུ་བྱུང་བའི་བཀོད་པ་ཅན་དཔལ་ཆེན་པོ་སྤྲུལ་འཁོར་དང་བཅས་པའི་བཞུགས་གནས་སུ་གྱུར་པའི་ཕོ་བྲང་ཡེ་ཤེས་ཀྱི་མེ་འོད་རབ་ཏུ་གསལ་བ་ཅན་གྱི་དོན་རྟགས་ཀྱང་། གསང་རྒྱུད་ལས། གཞལ་ཡས་རྣམ་པར་དག་པ་ནི། །ཡང་དག་ཉིད་དུ་ངས་བཤད་བྱ། །རྡོ་རྗེའི་གུར་དུ་གྱུར་པ་ནི། །ཕྱི་ཡི་བགེགས་ཀྱིས་མི་ཚུགས་རྟགས། །བཀའ་ཡི་འཁོར་ལོས་བརྒྱན་པ་ནི། །ནང་གི་བདུད་ཀྱིས་མི་ཚུགས་རྟགས། །ཆོས་འབྱུང་ནང་དུ་གསལ་བ་ནི། །ཆོས་ཀྱི་དབྱིངས་ལས་བྱུང་བའི་རྟགས། །འབྱུང་བ་བཞི་ཡི་བསྐྱེད་པ་ནི། །ཡུམ་བཞིའི་མཁའ་ལ་གནས་པའི་རྟགས། །གཞལ་ཡས་གྲུ་བཞིར་བྱུང་བ་ནི། །སངས་རྒྱས་སེམས་ཅན་མཉམ་པའི་རྟགས། །སྒོ་བཞི་བར་ཡང་བྱུང་བ་ནི། །དྲན་པ་ཉེར་བཞག་བཞི་ཡི་རྟགས། །སྒོ་བ་བཞི་ནི་སྟོབས་ལྔའོ། །རྟ་བབས་བཞི་རུ་བྱུང་བ་ནི། །ཡང་དག་སྤོང་བ་བཞི་ཡི་རྟགས། །ཆོས་ཀྱི་འཁོར་ལོ་བཞི་པོ་ནི། །རྫུ་འཕྲུལ་རྐང་པ་བཞི་ཡི་རྟགས། །འདོད་ཡོན་ལྔ་ཡི་ལྷ་མོ་ནི། །དབང་པོ་ལྔ་པོ་གསོས་འདེབས་རྟགས། །དྲྭ་བ་དྲྭ་བ་ཕྱེད་པ་ནི། །བྱང་ཆུབ་ཡན་ལག་བདུན་དུ་བཤད། །ཀ་བ་བརྒྱད་ཀྱིས་བརྒྱན་པ་ནི། །འཕགས་ལམ་ཡན་ལག་བརྒྱད་དུ་བཤད། །པཉྩ་རེ་ཁ་{ ཁཱ}་ཡེ་ཤེས་ལྔ། །གྲུ་གསུམ་རྣམ་ཐར་གསུམ་ཡིན་ནོ། །རྒྱུ་དང་འབྲས་བུའི་ཆོས་རྣམས་རྫོགས། །ཞེས་གསུངས། ནང་ལྟར་ན་དེ་ཉིད་ལུས་ལ་ཚང་སྟེ། རྒྱུད་དེ་ཉིད་ལས། རྐང་པ་རླུང་གི་དཀྱིལ་འཁོར་ཏེ། །འདོམ་ནི་མེ་ཡི་དཀྱིལ་འཁོར་ཡིན། །གསུས་པ་ཆུ་ཡི་ད་ལ་ཏེ། །ཕོ་བ་ས་ཡི་ད་ལ་ཡིན། །བྲང་ནི་ཀེང་རུས་རི་རབ་སྟེ། །མགོ་བོ་ཀླད་པའི་གཞལ་ཡས་ཁང་། །རྩ་གནས་དབུས་ན་ལྷ་ཚོགས་བཞུགས། །ཞེས་ཏེ། ལུས་འདོམ་གང་གྲུ་བཞི་ནི། དཀྱིལ་འཁོར་གྲུ་བཞི་པའོ། །འཁོར་ལོ་ལྔ་ནི་དབུས་ཀྱི་ཕོ་བྲང་། རྐང་ལག་བཞི་སྒོ་བཞི། ཚིགས་བཞི་རྟ་བབས་བཞི། རྐང་བརྒྱད་ཀ་བ་བརྒྱད། མཐིལ་བཞི་ཆོས་འཁོར་གདུགས། སོ་དང་སེན་མོ་ཏོག་དང་རྡོ་རྗེ་རིན་པོ་ཆེའི་རྒྱལ་མཚན། དབང་པོ་ལྔ་རྒྱ་སྐར། ཡུལ་ལྔ་འདོད་ཡོན་ལྔ། རྩ་རྒྱུས་རིན་པོ་ཆེའི་ཕ་གུ། རུས་ཚིགས་དྲྭ་བ་དང་དྲྭ་ཕྱེད། སོར་མོ་རྣམས་མདའ་ཡབ། པགས་པ་རྡོ་རྗེའི་གུར། སྐྲ་དང་ཁ་སྤུ་མེ་རི། ཁྲག་འཐུང་རྩ་བའི་དཀྱིལ་འཁོར་ལྟར་རྩ་གནས་ལ་ཕུར་པའི་ལྷ་ཚོགས་ཚང་བར་གསུངས། གསང་བ་ལྟར་ན། རང་གི་སེམས་ལ་ཚང་སྟེ། འབྱུང་བ་རིམ་བརྩེགས་ནི། སེམས་ལ་མཐའ་དབུས་མེད་པས་ནམ་མཁའ། ཡངས་ཤིང་གཡོ་བས་རླུང་། བརླན་ཞིང་མཉེན་པས་ཆུ། བརྟན་ཞིང་མི་འགྱུར་བས་ས། རྒྱ་ཆེ་ཞིང་དཔངས་མཐོ་བས་རི་རབ། གསལ་ཞིང་རྣོ་བས་མེ་ཡི་དཀྱིལ་འཁོར་ཏེ། དེ་བཞིན་དུ་སེམས་ལ་ཐམས་ཅད་འདུས་པས་གཞལ་ཡས་ཁང་། ཀུན་གཞིའི་རྣམ་ཤེས་ལྟེ་བ། ཉོན་ཡིད་ལྷ་སྣམ། སྒོ་ལྔའི་རྣམ་ཤེས་སྒོ་བཞི། ཡིད་ཤེས་རྟ་བབས། རང་སེམས་རྡོ་རྗེ་གཞོན་ནུ། སེམས་ལ་སྣ་ཚོགས་སྐྱེ་བས་འཁོར་གྱི་ལྷ་ཚོགས་ཏེ། ལྷ་དང་དཀྱིལ་འཁོར་ཐམས་ཅད་སེམས་ལ་ཚང་བར་གསུངས་སོ། །བཞི་པ་གདན་བསྐྱེད་པ་ནི། བཛྲ་ཏ་ཏཾ་ཞེས་པས་ལྷ་གནས་ཐམས་ཅད་དུ་རྡོ་རྗེ་བྲག་ཆེན་གཏམ་པའི་ས་གཞི། སླར་ཡང་རྒྱུའི་ཧཱུྃ་ལས་འོད་ཟེར་ཕྱོགས་བཅུར་འཕྲོས། ལྷ་ཆེན་པོ་ཕྱོགས་སྐྱོང་བཅུ་ཆུང་མ་དང་བཅས་པ་བཀུག་སོ་སོའི་གནས་སུ་འཁོད་པ་ནི། རུ་ཏྲ་ཀྲོ་ངྷཱི་ཏི་ར་བམ། ཞེས་པས་དབུས་སུ་ལྷ་ཆེན་པོ་ཕོ་མོ། སྟེང་དུ་ཉི་ཟླ་སྟེ་ཚངས་པ་ཕོ་མོ། དེ་བཞིན་དུ་ཤར་དུ་དྲི་ཟ། ལྷོར་གཤིན་རྗེ། ནུབ་ཏུ་ཆུ་ལྷ། བྱང་དུ་གནོད་སྦྱིན། ཤར་ལྷོར་མེ་ལྷ། ལྷོ་ནུབ་ཏུ་སྲིན་པོ། ནུབ་བྱང་དུ་རླུང་ལྷ། བྱང་ཤར་དུ་དབང་ལྡན། འོག་ཏུ་ས་བདག་རྣམས་རང་རང་གི་ཆུང་མ་དང་བཅས་མོ་གན་རྐྱལ། ཕོ་ཁ་སྦུབ་སྟེ་བྱི་ཆིངས་སུ་བསྣོལ་བའི་གདན་བསམ་སྟེ། དེ་ལྟར་བསྒོམ་དགོས་པའི་རྒྱུ་མཚན་ནི། སྔོན་དཔལ་ཆེན་པོས་རུ་ཏྲ་བརྟུལ་བའི་ཚེ་ཐོག་མར་རྡོ་རྗེ་རྟ་ཡི་ཚོགས་སོགས་ཁྲོ་བོ་ཆེན་པོ་རྣམས་རིམ་པར་སྤྲོས་ཀྱང་དེ་དག་གིས་འདུལ་བར་མ་ནུས་ནས། སླར་རུ་ཏྲའི་ཆུང་མ་ཀྲོ་ངྷཱི་ཤྭ་རི་མ་ལ་མ་ཆགས་ཐབས་ཀྱི་སྦྱོར་བ་མཛད་ནས་སྲས་དཔལ་ཆེན་པོ་རྡོ་རྗེ་གཞོན་ནུ་བསྐྲུན་པས་རུ་ཏྲ་འཁོར་དང་བཅས་པ་བརྟུལ་བའི་སྐབས་སུ་རུ་ཏྲའི་སྙིང་ཁྲག་ཐེབས་ལུང་{ལོང} ཙམ་གཉིས་ཡར་བ་ལས་རུ་ཏྲའི་སྲས་དྲག་བྱེད་མ་ཧཱ་དེ་ཝ་དང་། ཡུམ་དྲག་མོ་རལ་གཅིག་མ་ཞེས་བྱ་བ་དང་། དྲག་མོ་སྲིད་པ་འཁོར་བྱེད་མ་ཞེས་བྱ་བ་གཉིས་དང་ལྡན་ཏེ། དེ་གཉིས་ལས་ཕྱོགས་བཅུར་དམ་སྲི་ཆེན་པོ་བཅུ་བྱུང་སྟེ། སྟེང་གི་ཕྱོགས་སུ་ཡབ་ཉི་མ་འབར་གསལ། ཡུམ་ཟླ་བ་སྒྲ་འབྱིན་མ། བུ་ཕོ་ཉི་མ་ཕག་གི་མགོ་ཅན་དང་། བུ་མོ་ཟླ་བ་རྨིགས་བུའམ་རྩངས་པའི་མགོ་ཅན་ནས། འོག་ཏུ་ས་བདག་གཞན་སྟོབས་འཇོམས་དང་། ས་བདག་མོ་རླུང་གི་གཟུགས་འཛིན་མ། བུ་དྲེད་དམ་དོམ་གྱི་མགོ་ཅན། བུ་མོ་བྱི་ལའམ་བྱི་བའི་མགོ་ཅན་གྱི་བར་བྱུང་སྟེ་ཁམས་གསུམ་གྱི་སྲོག་ལ་རྔམས་པའི་མ་རུངས་གདུག་པའི་ཚོགས་དེ་དག་གི་གཉེན་པོར་དཔལ་ཆེན་རྡོ་རྗེ་སྲིན་པོ་ཡབ་ཡུམ་གྱི་གང་ལ་གང་འདུལ་ཐུགས་རྗེ་ཆེན་པོའི་ཆོ་འཕྲུལ་ལས་རང་ཤར་བའི་ཚུལ་གྱིས་མཁའ་གསང་ནས་འོད་ཀྱི་གོང་བུ་བཅུ་སྟེང་འོག་ཕྱོགས་མཚམས་སུ་སྤྲོས་པ་ལས་ཁྲོ་བོ་བཅུ་ཡབ་ཡུམ་ཁྲ་ཐབས་དང་བཅས་པ་ཕྱོགས་བཅུར་སྤྲོས་ནས་གདུག་པའི་དམ་སྲི་བཅུ་གདན་དུ་བྱས། དེའི་ཚེ་སེམས་ཅན་ཐམས་ཅད་སྡུག་བསྔལ་དང་བྲལ་ཞིང་བདུད་བཞི་རང་སར་ཞི་བར་མཛད་པར་གསུངས་པས། འདིར་ཡང་རྣལ་འབྱོར་པས་དེ་ལྟར་བསྒོམས་པས་བར་ཆད་བགེགས་ཀྱི་མཚན་མ་རང་སར་ཞི་བར་བྱེད་དོ། །མ་སཱུཪྱ་མཎྜ་ལ་ཞེས་པས། གདན་དེ་རྣམས་ཀྱི་སྟེང་དུ་མ་བཅུ་གཅིག་ལས་ཉི་མའི་དཀྱིལ་འཁོར་རེ་རེ། ཨ་ཙཎྜ་མཎྜ་ལས། ཉི་མ་རྣམས་ཀྱི་སྟེང་དུ་ཨ་ཡིག་ལས་བྱུང་བའི་ཟླ་བའི་དཀྱིལ་འཁོར་རེ། པྃ་པདྨ་མཎྜ་ལས་ཟླ་བ་རྣམས་ཀྱི་སྟེང་དུ་པྃ་ལས་བྱུང་བའི་པདྨ་དང་བཅས་པ་སྟེ། འཁོར་གཞན་རྣམས་ལ་དགྲ་བགེགས་བཀུག་ནས་བསྣོལ་བའི་སྟེང་དུ་ཉི་ཟླ་པདྨ་བསྒོམ་པ་སྟེ། དེ་དག་ཀྱང་ཐུགས་སྤྲོས་མེད་མཉམ་པ་ཉིད་ཀྱི་རྡོ་རྗེ་སྤྲོས་མཚན་རྐྱེན་གྱིས་མི་ཤིགས་པའི་བྲག་ཆེན་གཏམས་པའི་ས་གཞི་ལ། རྒྱལ་བྱེད་དཔའ་རྟགས་ཀྱི་ཆེ་བ་བསྟན་པའི་ཕྱིར་དྲེགས་པ་ལྷ་ཆེན་པོ་དང་ཕྱོགས་སྐྱོང་ཕོ་མོ་བསྣོལ་བའི་སྟེང་དུ། ཐབས་མ་འགགས་པ་ཉི་མ་དང་ཤེས་རབ་རང་གསལ་བའི་ཟླ་བ་མ་རིག་པའི་མུན་པ་སེལ་བའི་འོད་འབར་བའི་དབུས་སུ། གང་ལ་གང་འདུལ་དུ་འགྲོ་བའི་དོན་མཛད་ཀྱང་ཉེས་པའི་སྐྱོན་གྱིས་མ་གོས་པས་མ་ཆགས་པདྨ་འབར་བའི་གདན་དུ་བསམ་ཞིང་གསལ་གདབ་པའོ། །ལྔ་པ་བདག་རྩ་བའི་དཀྱིལ་འཁོར་བསྐྱེད་པ་ནི། སྤྱིར་བསྐྱེད་པའི་རིམ་པ་ལ་སྐྱེ་གནས་བཞིའི་བག་ཆགས་སྦྱང་བའི་ཕྱིར་བསྐྱེད་ཚུལ་གྱི་རིམ་པ་མང་དུ་འབྱུང་ནའང་འདིར་རྡོ་རྗེའི་ཆོ་ག་སུམ་བསྐྱེད་ཀྱི་དབང་དུ་བྱས་ཏེ། ནམ་མཁའི་ཧཱུྃ་དེ་དབུས་ཀྱི་གདན་ལ་སྐར་མདའ་ལྷུང་བ་ལྟར་བབས། ཧཱུྃ་ཞེས་རྒྱུ་མ་ནོར་བ་རྩ་བའི་སྔགས་དང་། སྥ་ར་ཎ་ཕཊ་ཀྱིས་དེ་ལས་འོད་འཕྲོས་རྒྱལ་བ་ཐམས་ཅད་ཀྱི་ཐུགས་དམ་བསྐུལ། སེམས་ཅན་གྱི་དོན་བྱས། སཾ་ཧ་ར་ཎ་ཧཱུྃ་གིས་སླར་འདུས་ཏེ་ཧཱུྃ་ལ་ཐིམ་པ་ནི་གསུང་ཡིག་འབྲུའི་ཆོ་གའོ། །བཛྲ་ཧཱུྃ་ཞེས་བརྗོད་པས་དེ་ཉིད་རྡོ་རྗེ་རྩེ་དགུ་པར་གྱུར་པ་ནི་ཐུགས་ཕྱག་མཚན་གྱི་ཆོ་གའོ། །དེ་ལས་འོད་ཟེར་འཕྲོ་འདུས་གཅིག་ཏུ་གྱུར་པ་ལས་ཚོགས་གཉིས་ཡོངས་སུ་རྫོགས་པའི་དཔལ་ཆེན་པོའི་སྐུར་གྱུར་པ་ནི་སྐུ་ཡོངས་སུ་རྫོགས་པའི་ཆོ་ག་སྟེ། འདི་དག་གི་སྐབས་སུ་སྦྱང་བྱ་སྦྱོང་བྱེད་སྦྱངས་འབྲས་དང་ལམ་གོང་མའི་སྨིན་བྱེད་དུ་འགྱུར་ཚུལ་སོགས་བསྐྱེད་རིམ་སྤྱིའི་རྣམ་བཞག་བཞིན་ཤེས་པར་བྱའོ། །དེ་ཡང་ཨོཾ་བཛྲ་ཀཱི་ལི་ཀཱི་ལ་ཡ་སོགས་བསྐྱེད་པ་རྐྱེན་གྱི་སྔགས་ཉིད་བརྗོད་པས། བདག་ཉིད་སྐད་ཅིག་གིས་བཅོམ་ལྡན་འདས་དཔལ་ཆེན་པོ་རྡོ་རྗེ་གཞོན་ནུའི་སྐུར་བསྐྱེད་པ་ནི། སྐུ་གསུམ་དང་རྣམ་ཐར་གསུམ་གྱི་ངོ་བོ་དབུ་གསུམ་པ། ཡེ་ཤེས་དྲུག་གམ་ཕར་ཕྱིན་དྲུག་གི་རང་བཞིན་ཕྱག་དྲུག རྫུ་འཕྲུལ་གྱི་རྐང་པ་བཞི་མཚོན་བྱེད་ཞབས་བཞི་གཡས་བསྐུམ་གཡོན་བརྐྱང་བའི་གྱད་ཀྱི་དོར་སྟབས་ཀྱི་ཚུལ་དུ་བཞུགས་པ། དེ་ཡང་ཉེས་པའི་སྐྱོན་གྱིས་མ་གོས་པས་ཞལ་གཡས་དཀར་པོ་བཞད་པ། འགྲོ་ལ་རྗེས་སུ་ཆགས་པས་གཡོན་ཞལ་དམར་པོ་གཤེ་བ། ཆོས་ཉིད་འགྱུར་བ་མེད་པས་དབུས་ཞལ་མཐིང་ནག་དྲག་ཏུ་རྔམས་ཤིང་འབར་བ། དུས་གསུམ་མམ་དབྱིངས་ཡེ་གཉིས་སུ་མེད་པར་གཟིགས་པའི་ཞལ་རེ་རེ་ལ་སྤྱན་གསུམ་གསུམ་སྟེ་སྤྱན་དགུ་སྡང་མིག་བསྒྲད་ཅིང་ཁྲོ་གཉེར་གློག་སྟོང་འཁྱུག་པ། ཤངས་ནས་ཧཱུྃ་འབྱིན་ཞིང་ཞལ་ནས་ཕཊ་སྒྲ་སྒྲོགས་པ། སྐྱེ་བཞི་རྩད་ནས་གཅོད་པའི་རྣོ་དབལ་དྲག་པོའི་མཆེ་བ་བཞི་ཟུར་གསུམ་དུ་གཙིགས་པ། དབུ་སྐྲ་ཉི་ཁྲི་ཆིག་སྟོང་ཁམ་ནག་ཟུར་གསུམ་གྱེན་དུ་འཁྱིལ་ཞིང་། བ་སྤུ་བྱེ་བ་ཐེར་འབུམ་རྡོ་རྗེ་ཕྲ་མོས་གཏམས་པ། ཕྱག་གཡས་ཀྱི་དང་པོ་ན་ཐེག་པ་རིམ་དགུ་རྫོགས་པའི་བརྡར་རྡོ་རྗེ་རྩེ་དགུ་པ་གདེངས་པ། གཡོན་གྱི་དང་པོ་ན་ཉོན་མོངས་པ་བསྲེགས་པའི་ཡེ་ཤེས་ཀྱི་མེ་དཔུང་འབར་བ་བསྣམས་པ། གཡས་ཀྱི་གཉིས་པ་ན་ཡེ་ཤེས་ལྔ་མཚོན་བྱེད་རྡོ་རྗེ་རྩེ་ལྔ་པ་འཕྱར་སྟབས་སུ་འཛིན་པ། གཡོན་གྱི་གཉིས་པ་ན་དུག་གསུམ་རྩད་ནས་གཅོད་པའི་ཁ་ཊྭཱྃ་རྩེ་གསུམ་པ་འཁྲོལ་བ། ཐ་མའི་ཕྱག་གཉིས་ཀྱིས་གདུག་པ་ཅན་རྣམས་འདུལ་བའི་ཕྱིར་རི་རབ་ལྟ་བུའི་ཕུར་བུ་འདྲིལ་བ། དུག་ལྔ་ཡེ་ཤེས་ལྔར་དག་པའི་རྟགས་སུ་རིགས་ལྔའི་རྩེ་བྲན་ཅན་གྱི་ཐོད་སྐམ་ལྔའི་ཅོད་པན་དང་ཐོད་ཚལ་གྱི་དཔུང་རྒྱན་ཅན། སྐུ་གསུམ་མཚོན་བྱེད་ཐོད་པ་ཚར་གསུམ་གྱི་ཕྲེང་བའི་ག་ཤལ་དང་། ཞེ་སྡང་འཇོམས་པའི་རྟགས་སུ་སྦྲུལ་ཆེན་རིགས་བཞི་སྟེ། རྒྱལ་རིགས་དཀར་ཁྲས་དབུ་སྐྲ་བཅིངས་པ། རྗེ་རིགས་སེར་ཁྲས་རྣ་ཆ་བརྒྱན་པ། བྲམ་ཟེའི་རིགས་དམར་ཁྲས་མགུལ་ཆིངས་{ཆུ} མཛད་པ། དམངས་རིགས་སྔོ་ཁྲས་དོ་ཤལ་དང་། གདོལ་པའི་རིགས་ནག་ཁྲས་གདུ་བུ་མཛད་པ་སྟེ་དེ་དག་ཀྱང་རང་སྐད་ཕུར་སྒྲ་སྒྲོགས་པ་སྟེ་གདགས་པའི་རྒྱན་གཉིས་དང་། ཐལ་ཆེན་གྱི་ཚོམ་བུ་ཆོས་སྐུ། རཀྟའི་ཐིག་ལེ་ལོངས་སྐུ། ཞག་གི་ཟོ་རིས་སྤྲུལ་སྐུ་སྟེ་བྱུག་པའི་རྩི་གསུམ་གྱིས་བརྗིད་པ། ཐེག་ཆེན་དོན་རྟོགས་གླང་ཆེན་གྱི་ཀོ་རློན་གྱི་ཕྱི་གོས། མཐའ་གཉིས་སྤངས་པའི་ཞིང་ལྤགས་ཀྱི་གཡང་གཞིའི་ནང་གོས། ཕྲིན་ལས་ཡོངས་སུ་རྫོགས་པའི་བརྡར་སྟག་ལྤགས་ཀྱི་ཤམ་ཐབས་ཏེ་བགོ་བའི་གོས་གསུམ་མནབས་པ། སྲིད་གསུམ་ཟིལ་གྱིས་གནོན་པའི་རྡོ་རྗེ་དང་རིན་པོ་ཆེའི་གཤོག་པ་གདེངས་པས་བར་སྣང་ཁྱབ་པར་འགེངས་བ། དར་མཐིང་ནག་གི་ཅོད་པན་དང་རྡོ་རྗེའི་གོ་ཁྲབ་གསོལ་བ་སྟེ་དཔལ་གྱི་ཆས་བཅུས་བརྒྱན་པ། སྐུ་སྒེག་པ་དཔའ་བ་འཇིགས་སུ་རུང་བ། གསུང་རྒོད་པ་གཤེ་བ་རྔམ་པ། ཐུགས་སྙིང་རྗེ་ཞི་བ་མ་རུངས་པ་སྟེ་རྡོ་རྗེ་ཁྲོ་བོའི་ཉམས་སམ་འབར་བའི་གར་དགུས་རོལ་པ། ཐབས་དང་ཤེས་རབ་འབྲེལ་བའི་བརྡར་ཡུམ་འཁོར་ལོ་རྒྱས་འདེབས་མ་མཐིང་ག་ཞལ་གཅིག་ཕྱག་གཉིས་མ་ཕྱག་གཡས་པས་ཉེས་པའི་སྐྱོན་གྱིས་མ་གོས་པའི་བརྡར་ཨུཏྤལ་འཛིན་པས་ཡབ་ལ་འཁྱུད་པ། གཡོན་པས་སྲིད་རྩ་ཉོན་མོངས་བསྒྲལ་ཞིང་དབྱིངས་སུ་སྦྱོར་བའི་བརྡར་བྷནྡྷ་དམར་གྱིས་བཀང་བ་སྟོབ་པ། རིགས་ལྔའི་དབུ་རྒྱན་དང་རུས་པའི་རྒྱན་དྲུག་སོགས་ཁྲོ་མོའི་རྒྱན་དང་གཟིག་གི་ལྤགས་པའི་ཤམ་ཐབས་ཅན། ཡབ་ཡུམ་བདེ་སྟོང་མཉམ་པར་སྦྱོར་བ་ཡེ་ཤེས་ཀྱི་མེ་དཔུང་རབ་ཏུ་འབར་བའི་ཀློང་ན་བཞུགས་པའོ། །དེ་ལྟར་སྐུ་འབར་ཁྲོ་རྔམ་པའི་ཆ་ལུགས་སུ་བཞུགས་ཀྱང་ཐུགས་ཞི་བ་ཆོས་ཀྱི་དབྱིངས་ལས་མ་གཡོས་པའི་རྟགས་སུ། ཡབ་ཀྱི་ཐུགས་ཀར་རིན་པོ་ཆེ་ཟུར་བརྒྱད་ཁ་དོག་རིན་པོ་ཆེ་མར་གད་ཀྱི་མདོག་ཅན་ནམ་སྨུག་པོ་དབྱིབས་གུར་ཕུབ་པ་ལྟ་བུའི་ནང་གི་སྲོག་གི་གོར། པདྨ་དཀར་པོ་འདབ་མ་བརྒྱད་པའི་སྟེང་དུ་ཡེ་ཤེས་སེམས་དཔའ་ཞི་བ་རྡོ་རྗེ་སེམས་དཔའ་སྐུའི་ཚད་ཆེ་ཆུང་ཚོན་གང་བ། སྐུ་མདོག་དཀར་གསལ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ་རིན་པོ་ཆེའི་རྒྱན་ཅན་ནམ་ཡང་ན་འོད་ཀྱི་སྐུ་རྒྱན་མེད་དུའང་བསྒོམ་པར་གསུངས་ཏེ་ཞབས་ཅུང་ཟད་བརྐྱང་བསྐུམ་དུ་བཞུགས་པའོ། །དེ་ཡི་ཐུགས་ཀར་རིན་ཆེན་ཆ་བརྒྱད་དེ་ཟུར་བརྒྱད་པ་ཁ་དོག་སྨུག་པོ་མཆོང་གུར་ཕུབ་པ་ལྟ་བུའི་དབུས་སུ། ཆེ་ཆུང་གི་ཚད་སྲན་མ་བཀས་པ་ཙམ་གྱི་ཉི་མའི་གདན་ལ། གསེར་གྱི་རྡོ་རྗེ་ནས་འབྲས་ཙམ་གྱི་ལྟེ་བར་ཏིང་འཛིན་སེམས་དཔའ་ཧཱུྃ་མཐིང་ག་ཡུངས་འབྲུ་ཙམ་དུ་ཤིན་ཏུ་ཕྲ་ཞིང་འོད་འབར་བའི་མཐའ་བསྐོར་དུ། ༀ་བཛྲ་ཀཱི་ལི་ཀཱི་ལ་ཡ་ཧཱུྃ་ཕཊ། ཞེས་བཛྲ་གཅིག་ཏུ་བརྩིས་པའི་སྲོག་ཡིག་འབྲུ་དགུ་པོ་ལྗང་གུ་སྤུས་བྲིས་པ་ལྟ་བུ་ཞལ་ནང་བསྟན་ཀློག་ཕྱོགས་སུ་བསྐོར་བའི་སྒོར། རྟ་མགྲིན་དམར་པོ་ཁྲོ་ཚུལ་གར་དགུའི་ཉམས་ལྡན་པདྨ་དང་བྷནྡྷ་འཛིན་པ། རང་འོད་ཀྱི་ཡུམ་རྡོ་རྗེ་ཕག་མོ་དང་གཉིས་མེད་དུ་འཁྲིལ་བ་ཁྲོ་བོའི་ཆས་ལྡན་ཞལ་ནང་བསྟན་གྱིས་བསྲུང་བའི་ལས་མཛད་པར་བསྒོམ་པའོ། །དེ་ཉིད་གསལ་གདབ་ཀྱི་རྒྱུད་ཚིག་གི་དགོངས་པ་ནི། དུས་གསུམ་གྱི་སངས་རྒྱས་མ་ལུས་ཤིང་ལུས་པ་མེད་པ་ཀུན་གྱི་ཐུགས་ཇི་ལྟ་བ་དང་ཇི་སྙེད་པའམ་མེ་ལོང་ལྟ་བུ་ལ་སོགས་པའི་ཡེ་ཤེས་མ་ལུས་པ་ཐམས་ཅད་ཀྱི་རྟེན་དུ་གྱུར་པས་སྐུ་སྟེ། ཆོས་དབྱིངས་སྐྱེ་བ་མེད་པའི་ངང་ཉིད་རྡོ་རྗེ་ལྟར་འཕོ་འགྱུར་དང་བྲལ་བའི་གནས་ལུགས་ཟབ་མོ་རང་བཞིན་འདུས་མ་བྱས་པ་ཉིད་འདུས་བྱས་མཚན་མའི་རྟོག་པ་ལ་ངང་གིས་ཡེ་ནས་ཁྲོས་པ་ནི་ཆོས་ཉིད་ཀྱི་ཁྲོ་བོའམ་ཆོས་ཀྱི་སྐུ་ཡིན་ལ། ཆོས་ཀྱི་དབྱིངས་དེ་ཉིད་ཀྱི་རྩལ་ལས་རང་ཤར་བའི་རང་གསལ་འགག་པ་མེད་པའི་ཞིང་དང་སྐུའི་བཀོད་པ་བསམ་གྱིས་མི་ཁྱབ་པ་རང་སྣང་གི་དབྱིངས་དང་འདུ་འབྲལ་མེད་པར་བཞུགས་པ་ནི་ལོངས་སྤྱོད་རྫོགས་སྐུའི་ཁྲོ་བོ་དང་། དེ་ལས་ཤར་བ་བདུད་དང་རུ་ཏྲ་ལ་སོགས་པ་གདུལ་བྱ་མ་རུངས་པའི་ཚོགས་རྣམས་འདུལ་བ་ལ་ཐུགས་རྗེ་ཞི་བའི་དབྱིངས་ལས་མ་གཡོས་ཀྱང་རྣམ་པ་འཇིགས་རུང་སྲིན་པོའི་གཟུགས་ཅན་གར་དགུའི་ཉམས་ལྡན་འབར་བའི་ཁྲོ་བོ་ཆེན་པོ་ཤིན་ཏུ་མི་བཟད་པར་སྟོན་པ་ནི་རྟགས་ཀྱི་ཁྲོ་བོ་སྤྲུལ་པའི་སྐུ་ཡིན་ཏེ། །ཐབས་ཞགས་ལས། ཆོས་ཉིད་ངང་གིས་ཁྲོ་ལ་ཕྱག་འཚལ་ལོ། །ཁྲོས་པས་ལོངས་སྤྱོད་རྫོགས་ལ་ཕྱག་འཚལ་ལོ། །རྡོ་རྗེའི་འདུ་འཕྲོ་མཛད་ལ་ཕྱག་འཚལ་ལོ། །ཞེས་གསུངས། དེ་ལྟ་བུའི་སྐུ་གསུམ་གྱི་ཁྲོ་བོ་མ་ལུས་པ་འདུས་པའི་བདག་ཉིད་སྤྱི་ད པལ་ཆེན་པོ་ནི་རྡོ་རྗེ་གཞོན་ནུ་ཡིན་ལ། དེ་ཉིད་ཀྱི་སྐུ་ཡི་དབྱིག་ཏུ་ཞེས་མགོ་སྨོས་པ་སྟེ་དོན་ལ་སྐུ་གསུང་ཐུགས་ཡོན་ཏན་ཕྲིན་ལས་འཛད་པ་མེད་པའི་གཏེར་ཆེན་པོར་བདག་ཉིད་བསྐྱེད་པ་སྟེ། ཡེ་ནས་ལྷ་བདག་དབྱེར་མེད་པའི་དོན་ཡིན་པ་ལ་ཡིན་པར་ཤེས་པའི་ངེས་ཤེས་ཀྱིས་གསལ་གདབ་ཅིང་། དེ་ཡང་འཁོར་འདས་ཀྱི་སྟོང་སྲོག་མ་ལུས་ཆོས་སྐུ་སྐྱེ་མེད་ཀྱི་ཀློང་དུ་འཕྲོག་པར་བྱེད་པའི་གོ་རུ་ཤར་བ་ཡེ་ཤེས་སེམས་དཔའི་ངོ་བོ་ཐུགས་སྲོག་ས་བོན་ཙིཏྟའི་སྒོ་སྲུང་དང་བཅས་པ། ཙིཏྟ་་སྙིང་གི་དཀྱིལ་དུ་རང་བྱུང་དྭངས་མའི་ཐིག་ལེ་བདེ་ཆེན་གཉུག་མའི་ངོ་བོར་དབྱེར་མེད་རོ་མཉམ་དུ་བསྒོམས་པས་མ་དག་རླུང་སེམས་ཀྱི་འགྱུ་ཆ་གནས་སུ་དག་ནས་དག་པ་ཡེ་ཤེས་ཀྱི་འཁོར་ལོ་རང་བྱུང་གདོད་མའི་མགོན་པོའི་རང་ཞལ་མངོན་དུ་གྱུར་ནས་འཁོར་བའི་སྲོག་མྱ་ངན་ལས་འདས་པའི་དབྱིངས་སུ་སྐྱེལ་བར་བྱེད་པའི་ཐབས་མཁས་ཀྱི་སྒོ་རྨད་དུ་བྱུང་བ་སྟེ། དེ་ལྟར་སྒོམ་པའི་སྐབས་ཀྱང་། རྒྱུད་ལས། ཆད་པ་མ་ཡིན་རིག་ཅིང་གསལ། །རྟག་པ་མ་ཡིན་ངོས་བཟུང་མེད། །སྣང་སྟོང་དབྱེར་མེད་གཏན་ལ་དབབ། །མ་བསྐྱེད་རྫོགས་པའི་ཚུལ་དུ་བསྒོམ། །ཞེས་གསུངས་པ་ལྟར། སྣང་རིག་གསལ་བ་དེ་སྟོང་པའི་ངོ་བོ་གདོད་ནས་དབྱེར་མེད་ཟུང་དུ་འཇུག་པ་བསྐྱེད་རྫོགས་ཟུང་འབྲེལ་གྱི་ལམ་ལ་གོམས་པར་བྱ་བ་ནི་རིག་འཛིན་བརྒྱུད་པའི་མན་ངག་ཟབ་གནད་མཐར་ཐུག་སྣོད་མིན་ལ་གསང་བའི་ཆོས་ཏེ། འདིར་ཕན་སེམས་ཀྱིས་ཅུང་ཟད་བཤད་པ་ཡིན་པས་སྐལ་བ་དང་ལྡན་པ་རྣམས་ཀྱིས་སྙིང་གི་ཡང་མཛོད་དུ་སྦ་བར་རིགས་སོ། །དྲུག་པ་ཕྱོགས་བཅུའི་ཁྲོ་བོའི་དཀྱིལ་འཁོར་བསྐྱེད་པ་ནི། སྤྱིར་ཁྲོ་བོ་ཞེས་པ་གོང་དུ་བསྟན་པ་ལྟར་ཐུགས་ཆོས་ཉིད་ལས་གཡོ་བ་མེད་པའི་ངང་ནས་ཐུགས་རྗེའི་རྩལ་རབ་ཏུ་ཕྱུང་བ་ལ་ངང་ཁྲོ་དང་། སྙིང་རྗེས་སེམས་ཅན་གྱི་དོན་མཛད་པས་ཤུགས་ཀྱིས་ཁྲོ་བས་ཤུགས་ཁྲོ་དང་། ཉོན་མོངས་རྣམ་རྟོག་དང་ལྷན་ཅིག་མི་གནས་པས་རང་བཞིན་ཁྲོ་བ་དང་བཅས་པ་དང་། ཞི་བས་མི་ཐུལ་བ་རྣམས་གདུལ་བའི་ཕྱིར་གདུལ་བྱའི་དབང་གིས་སྐུ་གསུང་ཐུགས་ཀྱི་རྣམ་པར་ཁྲོ་བར་བཅོས་པས་ན་ཁྲོ་བོ་སྟེ། ཀཱི་ལ་ཡ་ཏནྟྲ་བཅུ་གཉིས་པའི་རྒྱུད་ལས། ངང་ཁྲོ་ཤུགས་ཁྲོ་ཁྲོ་བར་བཅས་དང་བཅོས། །ཞེས་གསུངས། དེ་ལས་འདིར་ཕྱི་མ་སྟེ། དེ་ཡང་བཅུར་ངེས་པའི་རྒྱུ་མཚན་ནི། སྤང་བྱ་མི་དགེ་བ་བཅུ་དག་པ་དང་། གདུལ་བྱ་ཕྱོགས་སྐྱོང་བཅུ་འདུལ་བའི་གཉེན་པོ་དང་། འབྲས་བུ་ཕར་ཕྱིན་བཅུ་དང་དབང་བཅུའམ་སྟོབས་བཅུ་རྫོགས་པའི་ངོ་བོ་སྟེ་དེ་ལས་མང་མི་དགོས་ཤིང་ཉུང་ན་མི་འདུས་ལ་སྟེང་འོག་སོགས་འཆོལ་བར་བསྒོམ་ཡང་དོན་དུ་མི་འགྱུར་རོ། །ཕྲ་ཕྱག་ཉི་ཤུའང་། སྤྱིར་ཕྲ་མེན་ཞེས་པ། དཔེ་ཡི་ཕྲ་མེན་གསེར་སྐྱོགས་ལ་དངུལ་གྱི་ཕྲ་བཅུག་པ་ལ་ཕྲ་མེན་གྱི་ཡོལ་གོ་ཟེར་བ་ལྟ་བུ་དང་། དོན་གྱི་ཕྲ་མེན་དབྱིངས་དང་ཡེ་ཤེས་གཉིས་མེད་དུ་འདྲེས་པ་ལ་འཇོག་པར་གསུངས་པ་དང་། རྟགས་ཀྱི་ཕྲ་མེན་མགོ་ལུས་མི་གཅིག་པ་ལ་ཕྲ་མེན་ཞེས་བྱ་སྟེ། འདིར་རྣམ་པ་ལྷའི་གཟུགས་ལ་སྲོག་ཆགས་སྣ་ཚོགས་ཀྱི་མགོ་ཅན་དུ་ཡོད་པས་ཕྲ་མེན་ཞེས་སྤྱི་མིང་ཡིན་མོད་ཀྱང་། ལྕམ་དྲལ་ཉི་ཤུ་པོ་ཕྲ་ཕྱག་གི་རྣམ་དབྱེ་སོ་སོར་ཕྱེ་ན། གཡས་ཀྱི་མཆེ་བ་ཅན་བཅུ་ལ་ཡབ་ཀྱི་ཕྱག་བརྙན་དང་། གཡོན་གྱི་གཤོག་པ་ཅན་བཅུ་ལ་ཡུམ་གྱི་ཕྲ་མེན་གྱི་ཐ་སྙད་མཛད་ཅིང་། དེའང་སྲིན་པོ་ལྷ་ཆེན་བཅུ་བཏུལ་བའི་ཕྱི་རོལ་ན། ཞེ་སྡང་རུས་པ་ལས་བསྐྱེད་པའི་གདུག་པའི་གཅན་གཟན་དྲུག འདོད་ཆགས་ཁྲག་ལས་བསྐྱེད་པའི་འདབ་ཆགས་དྲུག གཏི་མུག་ཤ་ལས་བསྐྱེད་པའི་ཟ་གསོད་མཆེ་གཤོག་ཅན་དྲུག དུག་གསུམ་ཆ་སྙོམས་ཀྱིས་བསྐྱེད་པའི་དྲེད་དང་ཕ་ཝང་གཉིས་བཅས་ཉི་ཤུ་པོ་འདུལ་བའི་གཉེན་པོར་ཁྲོ་རྒྱལ་ཡབ་ཡུམ་གྱི་ཐབས་ཤེས་ཀྱི་ཆ་ལས་རྣམ་པར་སྤྲུལ་པ་སྟེ། དེ་ལ་དུག་གསུམ་མམ་ཉོན་མོངས་ཉི་ཤུ་འདུལ་བའི་གཉེན་པོ་ཡིན་པས་ཚུལ་དེ་ལྟར་ངེས་པར་བྱས་ནས་ཇི་ལྟར་བསྒོམ་པའི་ཚུལ་དངོས་ནི། གཙོ་བོ་ཡབ་ཡུམ་གཉིས་ཀྱི་མཁའ་གསང་བྱིན་གྱིས་བརླབས་ཤིང་། སྦྱོར་བའི་བརྡ་བཞིས་བསྐུལ་ཏེ། ཡབ་ཡུམ་སྙོམས་པར་ཞུགས་པའི་བྱང་སེམས་འོད་ཀྱི་གོང་བུ་ལས་རྒྱུ་མ་ནོར་བ་རྩ་བའི་སྔགས་ཧཱུྃ་ཡིག་ཟུང་རེ་སྤྲོས་ཏེ། དེ་ཡང་སྟེང་དུ་སྔོ་སྐྱ། ཤར་དུ་དཀར་པོ། ཤར་ལྷོར་མཐིང་ག ལྷོར་སྔོ་ནག ལྷོ་ནུབ་ཏུ་ལྗང་སྔོན། ནུབ་ཏུ་དམར་པོ། ནུབ་བྱང་དུ་དམར་སྐྱ། བྱང་དུ་ལྗང་ནག བྱང་ཤར་དུ་སེར་ནག འོག་ཏུ་དུད་ཁ་བཅས་ཟུང་བཅུ་པོ་ཉི་ཟླ་ཕོ་མོ་ལ་སོགས་པ་རང་རང་གི་གདན་གྱི་སྟེང་དུ་ཆད་དེ་འཕྲོ་འདུས་ཡོངས་སུ་གྱུར་པ་ལས་ཁྲོ་བོ་བཅུར་བསྐྱེད་དེ། དེ་ཡང་ཁྲོ་བོ་ཡབ་རྣམས་ཞལ་གསུམ་ཕྱག་དྲུག་རྩ་ཞལ་སྐུ་མདོག་དང་མཚུངས་པ། ཕྱག་མཚན་ཡང་། ཟ་བྱེད་ཡཀྴ་འབར་བའི་རྒྱུད་ལས། རྡོ་རྗེ་བྷནྡྷ་དམར་གྱིས་བཀང་བ་ནི། །སྐྱེ་མེད་འདུས་མ་བྱས་པའི་རྡོ་རྗེ་སྟེ། །སྲིད་རྩ་སྡུག་བསྔལ་རཀྟ་ཞལ་དུ་གསོལ། །གཉིས་མེད་བདེ་ཆེན་སྦྱོར་བའི་ལམ་ལ་བཀོད། །ཕྱོགས་སྐྱོང་བཅུ་བཏུལ་ཕྱག་མཚན་བར་མར་བསྣམས། །རྒྱལ་བྱེད་དཔའ་རྟགས་ཞེས་སུ་དེ་ལ་གྲགས། །རི་རབ་ཕུར་པ་ཐ་མར་འདྲིལ་བ་ནི། །ཕྲིན་ལས་དོན་རྟགས་འབྱིན་པའི་ཕྱག་མཚན་ནོ། །ཞེས་གསུངས་པ་ལྟར་ཀུན་ཀྱང་ཕྱག་དང་པོ་རྡོ་རྗེ་དང་བྷན་དམར་ཐོགས་པ་རིག་པ་རང་རྟགས་དང་། བར་པས་ཕྱོགས་སྐྱོང་བཅུའི་ཕྱག་མཚན་རྣམས་སོ་སོར་འཛིན་པ་ནི་རྒྱལ་བྱེད་དཔའ་རྟགས་དང་། ཐམས་ཅད་ཀྱིས་ཐ་མས་རི་རབ་ཕུར་བུ་འདྲིལ་བ་ཕྲིན་ལས་དོན་རྟགས་འབྱིན་པའི་ཕྱག་མཚན་ཡིན་ཞིང་། དྲག་པོ་ལྷ་སྲིན་སྡེ་བརྒྱད་འདུལ་བའི་ཕྱིར་རྡོ་རྗེའི་གཤོག་པ་སོགས་འཇིགས་བྱེད་དཔལ་གྱི་ཆས་ཀྱིས་བརྒྱན་པ། ཞབས་བཞི་བརྐྱང་བསྐུམ་མདོར་སྟབས་སུ་བསྒྲད་པའམ་ཡང་ན་ཁྲོ་བོ་ཀུན་སྐུ་སྨད་གནམ་ལྕགས་ཀྱི་ཕུར་བུ་འབར་བ་ལོག་འདྲེན་བགེགས་ཀྱི་སྙིང་ལ་ཟུག་པ་སྙིང་གར་ཡེ་ཤེས་སེམས་དཔའ་སོགས་རྒྱན་ཆ་ལུགས་ཐམས་ཅད་དཔལ་ཆེན་གཙོ་བོ་བཞིན་གསལ་བའི་སྐུ་ལ། ལུས་དང་གྲིབ་མའི་ཚུལ་དུ་རང་འོད་ཀྱི་ཡུམ་ལ་འཁྱུད་པ། ཡུམ་རྣམས་ཀྱང་རུས་རྒྱན་དང་གཟིག་ཤམ་སོགས་རྒྱན་ཆས་གཙོ་མོ་དང་མཚུངས་ཤིང་ཐམས་ཅད་ཀྱིས་གཡས་དྲིལ་བུ་འཛིན་པས་ཡབ་ལ་འཁྱུད་ཅིང་གཡོན་པས་དུང་དམར་ཡབ་ལ་སྟོབས་པ་སྐུ་མདོག་རང་རང་གི་ཡབ་དང་མཐུན་ཅིང་། ཟ་གསོད་རྣམས་ཀྱང་རང་རང་གཙོ་བོའི་མདོག་ཅན་གཡས་ཕུར་བུ་དང་གཡོན་ལྕགས་ཀྱུ་འཛིན་པ་གཅེར་བུ་དུར་ཁྲོད་ཀྱི་ཆས་ཅན་ཏེ། དེ་ལྟར་སྤྱིར་འགྲེ་ཤེས་པར་བྱས་ནས། བྱེ་བྲག་ཏུ་དག་སྦྱོར་གྱི་སྐབས་འདིར། རྒྱུད་གླང་པོ་རབ་འབོག་དང་། འཁོན་ཕུར་སོགས་སུ་འདྲ་མིན་ཅུང་ཟད་འབྱུང་བ་གང་ལྟར་མི་འགལ་ཡང་། འདིར་ཕུར་པ་གསང་རྒྱུད་ཀྱི་འགྲེལ་པ་གུ་རུ་རིན་པོ་ཆེས་མཛད་པ་ལྟར་སྦྱོར་ན། ཧཱུྃ་ཀ་ར་སོགས་སོ་སོའི་བསྐྱེད་སྔགས་བརྗོད་པའི་རྐྱེན་གྱིས། རིམ་པ་བཞིན། སྟེང་ཕྱོགས་ཉི་ཟླ་བསྣོལ་བའི་གདན་གྱི་སྟེང་དུ། བརྣབ་སེམས་སྐྱོན་སྤངས་མོས་པ་ལ་དབང་མཛད་པ་སྟོང་ཉིད་ཡེ་ཤེས་ཀྱི་ངོ་བོ་ཁྲོ་ཆེན་ཧཱུྃ་ཀ་ར་སྐུ་མདོག་སྔོ་སྐྱ་རྩ་ཞལ་སྐུ་མདོག་དང་མཐུན་ཞིང་། གཡས་སེར་གཡོན་དམར་བའི་ཞལ་ཅན། ཕྱག་བར་བ་གཉིས་ཀྱིས་རང་རྟགས་རྒྱལ་བྱེད་མདའ་གཞུ་འགེང་བ། ཡེ་ཤེས་ཕར་ཕྱིན་གྱི་རང་བཞིན་ཡུམ་རྡོ་རྗེ་སྒྲ་འབྱིན་མ་དང་འཁྲིལ་བ། ག རྫ་ག རྫས་གཡས་སུ་ཟ་བྱེད་ཕག་གི་མགོ་ཅན་དང་། གཡོན་དུ་གསོད་བྱེད་སྨིག་བུ་སྟེ་རྩངས་པའི་མགོ་ཅན། དེ་བཞིན་དུ། ཤར་ཕྱོགས་དྲི་ཟ་བསྣོལ་བའི་སྟེང་དུ། མ་བྱིན་ལེན་སྤངས་སེམས་ལ་དབང་མཛད་མེ་ལོང་ཡེ་ཤེས་རྣམ་པར་རྒྱལ་བ་སྐུ་མདོག་དཀར་པོ་ཞལ་གཡས་སྔོ་གཡོན་ལྗང་བ། ཕྱག་ན་འཁོར་ལོ་དང་ཏྲི་ཤུལ་འདི་ལ་གསང་རྒྱུད་དུ་རྡོ་རྗེར་གསུངས། མཆན། འཛིན་པ། ཡུམ་སྦྱིན་པའི་ཕར་ཕྱིན་རྡོ་རྗེ་རྣམ་སྙེམ་མ་དང་འཁྲིལ་བ། གཡས་སུ་ཟ་བྱེད་སྟག་དང་། གཡོན་དུ་གསོད་བྱེད་བྱ་རྒོད་ཀྱི་མགོ་ཅན། ཤར་ལྷོ་མེ་ལྷ་བསྣོལ་བའི་སྟེང་དུ་ལོག་ལྟའི་སྐྱོན་སྤངས་ཡེ་ཤེས་ལ་དབང་མཛད་འགྱུར་བ་མེད་པའི་ཡེ་ཤེས་དབྱུག་པ་སྔོན་པོ་མཐིང་ནག་ཞལ་གཡས་དཀར་གཡོན་དམར་བ། ཕྱག་ན་མེ་དབལ་དང་དབྱུག་ཏོ་འཕྱར་བ། བསམ་གཏན་ཕར་ཕྱིན་ཡུམ་རྡོ་རྗེ་སྡེར་མོ་དང་འཁྲིལ་བ། གཡས་སུ་ཟ་བྱེད་གཡག་གི་མགོ་ཅན་དང་། གཡོན་དུ་གསོད་བྱེད་བྱ་རོག་གི་མགོ་ཅན་། ལྷོ་ཕྱོགས་གཤིན་རྗེ་བསྣོལ་བའི་སྟེང་དུ་སྲོག་གཅོད་སྐྱོན་སྤངས་ཚེ་ལ་དབང་མཛད་མཉམ་ཉིད་ཡེ་ཤེས་གཤིན་རྗེ་གཤེད་སྔོ་ནག་ཞལ་གཡས་སྔོ་གཡོན་ལྗང་བ། ཕྱག་ན་བེ་ཅོན་དང་དགྲ་སྟྭ་འཛིན་པ། ཚུལ་ཁྲིམས་ཕར་ཕྱིན་ཡུམ་དུར་ཁྲོད་མ་དང་སྦྱོར་བ། གཡས་སུ་ཟ་བྱེད་ཤ་བ་དང་། གཡོན་དུ་གསོད་བྱེད་འུག་པའི་མགོ་ཅན། ལྷོ་ནུབ་སྲིན་པོ་བསྣོལ་བའི་སྟེང་དུ། ཕྲ་མའི་སྐྱོན་སྤངས་སྐྱེ་ལ་དབང་མཛད་ཀློང་གྱུར་ཡེ་ཤེས་མི་གཡོ་བ་ལྗང་སྔོན་ཞལ་གཡས་སྔོ་གཡོན་སྨུག་པ། ཕྱག་ན་རལ་གྲི་དང་ཞགས་པ་འཛིན་པ། བཟོད་པའི་ཕར་ཕྱིན་ཡུམ་གཏུན་ཁུང་མ་དང་འཁྲིལ་བ། གཡས་སུ་ཟ་བྱེད་གཟིག་དང་། གཡོན་དུ་གསོད་བྱེད་ཁྭ་ཏའི་མགོ་ཅན། ནུབ་ཕྱོགས་ཆུ་ལྷ་བསྣོལ་བའི་སྟེང་དུ་འདོད་ལོག་སྐྱོན་སྤངས་ཆོས་ལ་དབང་མཛད་སོར་རྟོག་ཡེ་ཤེས་རྟ་མགྲིན་དམར་པོ་གཡས་དཀར་གཡོན་སྔོ་བ། ཕྱག་ན་སྤུ་གྲི་དང་ཞགས་པ་འཛིན་པ། བརྩོན་འགྲུས་ཕར་ཕྱིན་ཡུམ་རབ་གཏུམ་མ་དང་འཁྲིལ་བ། གཡས་སུ་ཟ་བྱེད་བྱི་ལ་དང་། གཡོན་དུ་གསོད་བྱེད་པུ་ཤུད་ཀྱི་མགོ་ཅན། ནུབ་བྱང་རླུང་ལྷ་བསྣོལ་བའི་སྟེང་དུ་ངག་འཁྱལ་སྐྱོན་སྤངས་ཡོ་བྱད་ལ་དབང་མཛད་འདའ་དཀའ་མཐའ་གྲོལ་ཡེ་ཤེས་འདོད་རྒྱལ་དམར་སྐྱ་ཞལ་གཡས་སེར་གཡོན་ལྗང་བ། ཕྱག་ན་བྷཉྫ་དང་རྔ་ཡབ་འདི་ལ་ལས་བྱང་འགྲེལ་པ་དང་རྒྱུད་འགྲེལ་གཉིས་མཐུན་པར་བ་དན་དང་རྔ་ཡབ་ཅེས་འབྱུང་། མཆན། འཛིན་པ། ཤེས་རབ་ཕར་ཕྱིན་ཡུམ་མདའ་སྙེམ་མ་དང་འཁྲིལ་བ། གཡས་སུ་ཟ་བྱེད་སྤྱང་ཀི་དང་། གཡོན་དུ་གསོད་བྱེད་ཁྲ་ཡི་མགོ་ཅན། བྱང་ཕྱོགས་གནོད་སྦྱིན་བསྣོལ་བའི་སྟེང་དུ་ངག་རྩུབ་སྐྱོན་སྤངས་ལས་ལ་དབང་མཛད་བྱ་གྲུབ་ཡེ་ཤེས་བདུད་རྩི་འཁྱིལ་བ་ལྗང་ནག་ཞལ་གཡས་སེར་གཡོན་དུད་ཁ། ཕྱག་ན་རྒྱ་གྲམ་དང་དབྱུག་ཏོ་འཛིན་པ། ཐབས་ཀྱི་ཕར་ཕྱིན་ཡུམ་རླུང་འབྱིན་མ་དང་འཁྲིལ་བ། གཡས་སུ་ཟ་བྱེད་སེང་གེ་དང་། གཡོན་དུ་གསོད་བྱེད་ཕ་ཝང་མགོ་ཅན། བྱང་ཤར་དབང་ལྡན་བསྣོལ་བའི་སྟེང་དུ་གནོད་སེམས་སྐྱོན་སྤངས་སྨོན་ལམ་ལ་དབང་མཛད་སྒྲོལ་མཛད་དོན་ཡོད་ཡེ་ཤེས་ཁམས་གསུམ་རྣམ་རྒྱལ་སེར་ནག་ཞལ་གཡས་དཀར་གཡོན་ལྗང་བ། ཕྱག་ན་མདའ་གཞུ་འདི་ལ་གསང་རྒྱུད་དུ་ཁ་ཊྭཱྃ་གསུངས། མཆན། འགེང་བ། སྟོབས་ཀྱི་ཕར་ཕྱིན་ཡུམ་གསོད་བྱེད་མ་དང་འཁྲིལ་བ། གཡས་སུ་ཟ་བྱེད་དོམ་དང་། གཡོན་དུ་གསོད་བྱེད་སྲེ་མང་གི་མགོ་ཅན། འོག་ཕྱོགས་ས་བདག་བསྣོལ་བའི་གདན་གྱི་སྟེང་དུ། ཚིག་བརླང་སྐྱོན་སྤངས་རྫུ་འཕྲུལ་ལ་དབང་མཛད་པ་ཆོས་དབྱིངས་ཡེ་ཤེས་ཀྱི་ངོ་བོ་ཁྲོ་ཆེན་སྟོབས་པོ་ཆེ་སྐུ་མདོག་དུད་ཁ་ཞལ་གཡས་ནག་གཡོན་སེར་བ། ཕྱག་བར་པ་གཉིས་ན་ཐོ་བ་དང་ཞགས་པ་བསྣམས་པ། སྨོན་ལམ་ཕར་ཕྱིན་གྱི་རང་བཞིན་ཡུམ་རྡོ་རྗེ་བསྐྱོད་བྱེད་མ་དང་མཉམ་པར་སྦྱོར་བ། གཡས་སུ་ཟ་བྱེད་དྲེད་ཀྱི་མགོ་ཅན་དང་། གཡོན་དུ་གསོད་བྱེད་བྱི་བའི་མགོ་ཅན་ཏེ། ཁྲོ་བོ་འདི་དག་གི་སྐུ་མདོག་དང་ཕྱག་མཚན་གྱི་ཁྱད་པར་གཞན་ཡང་། རྩ་རྒྱུད་ལས། ཐམས་ཅད་གཙོ་བོའི་སྐུ་མདོག་དང་མཐུན་པར་མཐིང་ནག་དང་། ཕྱག་མཚན་ཐམས་ཅད་ལྕགས་ཀྱུ་དང་ཕུར་བུ་འཛིན་པར་གསུངས་པ་སོགས་རྒྱུད་རྣམས་ནས་སྣ་ཚོགས་སུ་གསུངས་པ་ཐམས་ཅད་མི་འགལ་ཡང་འདིར་བསྟན་པ་ནི་ཕུར་པ་གསང་རྒྱུད་ཀྱི་དགོངས་པ་ལྟར་གྲུབ་པའི་སློབ་དཔོན་ཆེན་པོ་པདྨ་སཾ་བྷ་ཝའི་དགོངས་པ་སྟེ། དེ་ཡང་གདན་རེ་རེའི་སྟེང་དུ་ཁྲོ་རྒྱལ་ཡབ་ཡུམ་ཟུང་དང་། གཡས་སུ་ཡབ་ཀྱི་སྤྲུལ་པ་ཟ་བྱེད་ཕ་རེ་དང་གཡོན་དུ་ཡུམ་གྱི་སྤྲུལ་པ་གསོད་བྱེད་མ་རེ་བཅས་བཞི་རེ་འབྱུང་བ་ནི་ཚད་མེད་པ་བཞིས་བདུད་བཞི་འདུལ་བའི་རྟགས་སུ་གསུངས། དེ་ཉིད་སླར་ཡང་སྔགས་ཀྱིས་གསལ་གདབ་པ་ནི། ༀ་བཛྲ་མ་ཧཱ་ཀྲོ་ངྷ་ཞེས་པས་ཁྲོ་བཅུ་གསལ་གདབ། དེ་བཞིན་དུ་ཀྲོ་ངྷི་ཤྭ་རིས་ཡུམ་བཅུ། མ་ཐ་མ་ཐ་བཛྲ་གྱིས་ཟ་བྱེད་ཕ་བཅུ། ཛྭ་ལ་ཛྭ་ལ་བཛྲ་གྱིས་གསོད་བྱེད་མ་བཅུ་པོ་སྔ་མ་བས་ཀྱང་ཆེས་གསལ་བར་མོས་ཏེ། དེ་ཡང་སྟེང་འོག་ཕྱོགས་མཚམས་ཀྱི་དྲེགས་པའི་གཙོ་བོ་ཆེན་པོ་བཅུ་པོ་བསྣོལ་བའི་གདན་གྱི་སྟེང་དུ། ཡེ་ཤེས་ཀྱི་མེ་འབར་བའི་དབུས་ན་གར་དགུའི་ཉམས་ཀྱིས་སྒེག་ཅིང་ཞལ་ནས་ཧཱུྃ་དང་ཕཊ་ཀྱི་སྒྲ་དྲག་པོ་འབྲུག་ལྟར་སྒྲོག་པ། སྲིད་གསུམ་འཁོར་བའི་སེམས་ཀྱི་རྣམ་རྟོག་ངན་པའི་བག་ཆགས་ཐམས་ཅད་གཞིག་པར་མཛད་ཅིང་། སྟོབས་བཅུས་བདུད་ཚོགས་འདུལ་བའི་ཁྲོ་རྒྱལ་ཡབ་ཡུམ་ཟུང་བཅུ་དང་། ཟ་བྱེད་གཏུམ་པོའི་ཚོགས་དང་གསོད་བྱེད་རྔམ་པའི་ཚོགས་བཅས་སྤྲུལ་པ་ཡང་སྤྲུལ་ཉིས་སྤྲུལ་སུམ་སྤྲུལ་བས མ་གྱིས་མི་ཁྱབ་པའི་ཚོགས་ཀྱིས་ཕྱོགས་མཚམས་སྟེང་འོག་ཐམས་ཅད་གཏམས་པས་བསྐལ་པའི་རླུང་ཡང་མི་ཐར་བར་བསམ་མོ། །བདུན་པ་ཕུར་པ་སྲས་ཀྱི་དཀྱིལ་འཁོར་བསྐྱེད་པ་ནི། སྤྱིར་སྲས་མཆོག་ཅེས་པ། སྲས་ཡིན་ལ་མཆོག་མ་ཡིན་པ། མཆོག་ཡིན་ལ་སྲས་མ་ཡིན་པ། སྲས་ཀྱང་ཡིན་ལ་མཆོག་ཀྱང་ཡིན་པ་དང་། དེ་གཉིས་ཀ་མ་ཡིན་པའི་མུ་བཞི་ལས། འདིར་སྲས་ཀྱང་ཡིན་ལ་མཆོག་ཀྱང་ཡིན་པ་སྟེ། གཙོ་བོ་དཔལ་ཆེན་པོའི་སྐུ་གསུང་ཐུགས་ལས་སྐྱེས་པའི་སྲས་ཡིན་པ་དང་། ཕྲིན་ལས་མ་ལུས་པ་མཐའ་དག་ཡོངས་སུ་རྫོགས་པར་བྱེད་པས་ན་མཆོག་སྟེ། ཇི་སྐད་དུ། རྩ་བའི་ཐུགས་ལས་བསྐྱེད་པའི་ཕྱིར། །སྒྲོལ་བྱེད་སྲས་སུ་བཤད་པ་ཡིན། །གདུག་པ་ཅན་རྣམས་འདུལ་བ་ལ། །མངགས་པས་མཆོག་ཏུ་བཤད་པ་ཡིན། །ཕྲིན་ལས་ཀུན་རྫོགས་རྒྱལ་པོས་ཏེ། །སྲས་མཆོག་ཆེན་པོ་ཞེས་བྱར་བརྗོད། །ཅེས་གསུངས། འདི་ལྟར་བསྐྱེད་པ་ལ་དགོས་པ་ཅི་ཡོད་ན། གཙོ་བོའི་ཕྱག་ཆ་སྲས་ཕུར་ཉེར་གཅིག་གིས། གདུལ་བྱ་ཁམས་གསུམ་པོ་སྙིང་རྗེས་བསྒྲལ་བའི་ཕྱིར་རོ། །བསྐྱེད་ཚུལ་དངོས་ནི། སླར་ཡང་གཙོ་བོ་ཡབ་ཡུམ་མཉམ་པར་སྦྱོར་བའི་བྱང་སེམས་འོད་ཀྱི་གོང་བུ་ལས་ཧཱུྃ་མཐིང་ནག་བདུན་མདུན་གྱི་ཟླ་གམ། ལྗང་ནག་བདུན་གཡས་ཀྱི་ཟླ་གམ། དམར་ནག་བདུན་གཡོན་གྱི་ཟླ་གམ་གྱི་སྟེང་དུ་འཕྲོས་ཏེ་དགྲ་བགེགས་བཀུག་པའི་གདན་གྱི་སྟེང་དུ་འཁོད་པ་ལས་བྱུང་བའི་འོད་ཟེར་གྱི་རྩེ་ལས་ཧཱུྃ་ཡིག་དང་ཕུར་བུ་ཕྲ་མོ་གྲངས་མེད་དཔག་ཏུ་མེད་པ་འཕྲོས། ཐུགས་རྗེའི་ཡུལ་དུ་གྱུར་པའི་ཁམས་གསུམ་གྱི་སེམས་ཅན་མ་ལུས་པའི་ལུས་ངག་ཡིད་གསུམ་དང་འགྲོ་བ་རིགས་དྲུག་ཏུ་སྐྱེ་བའི་ས་བོན་བག་ཆགས་སྣང་ཞེན་དང་བཅས་པ་ཐམས་ཅད་བསྲེགས་ཤིང་སྦྱངས་ནས་ཀུན་ཀྱང་དཔལ་ཆེན་པོ་རྡོ་རྗེ་གཞོན་ནུའི་རང་བཞིན་དུ་གྱུར། དེ་རྣམས་སླར་འདུས་ནས་ཧཱུྃ་ཡིག་རྣམས་ལ་ཐིམ་སྟེ་སྔགས་བརྗོད་པའི་རྐྱེན་གྱིས་ཡོངས་སུ་གྱུར་པ་ལས་སྲས་མཆོག་ཉེར་གཅིག་ཏུ་གྱུར་པ་ནི། ཀུན་ཀྱང་སྐུ་སྟོད་སྲིན་པོ་ཁྲོས་པའི་ཉམས་ཅན་ཞལ་གསུམ་ཕྱག་དྲུག་པ་རྡོ་རྗེའི་གཤོག་པ་གདེངས་ཤིང་དུར་ཁྲོད་དྲག་པོའི་ཆས་ཀྱིས་བརྒྱན་པ། མདུན་གྱི་ཐུགས་ཀྱི་སྲས་བདུན་སྐུ་མདོག་མཐིང་ནག་མཐིང་དཀར་དམར་བའི་ཞལ་ཅན། གཡས་ཀྱི་སྐུ་ཡི་སྲས་བདུན་སྐུ་མདོག་ལྗང་ནག་ལྗང་དཀར་དམར་བའི་ཞལ་ཅན། གཡོན་གྱི་གསུང་གི་སྲས་བདུན་སྐུ་མདོག་དམར་ནག་དམར་དཀར་ལྗང་བའི་ཞལ་དང་ལྡན་པ་སྟེ། ཀུན་ཀྱང་ཕྱག་དང་པོ་གཉིས་ཀྱི་རྡོ་རྗེ་རྩེ་དགུ་པ་དང་མེ་དཔུང་འབར་བ། བར་པ་གཉིས་ན་རྒྱ་གྲམ་དང་ཁ་ཊྭཱྃ་རྩེ་གསུམ་པ། ཐ་མ་གཉིས་ཀྱི་གནམ་ལྕགས་ཀྱི་ཕུར་བུ་འདྲིལ་ཞིང་དགྲ་དང་བགེགས་ཀྱི་སྙིང་ལ་འདེབས་པ་སྟེ་དོན་རྟགས་སོགས་སྔར་བཤད་པ་ལྟར་ལ། སྐུ་སྨད་ཆུ་སྲིན་གྱི་ཁ་ནས་ཐོན་པའི་གནམ་ལྕགས་ཀྱི་ཕུར་པ་ཟུར་གསུམ་པ་རྣོ་དབལ་གཅོད་པའི་ངར་དང་ལྡན་པ་མགར་གྱི་ཞུན་མར་ལས་ཕྱུང་བ་ལྟ་བུ་མེ་སྟག་གི་ཚྭ་ཚྭ་འཕྲོ་བ་ལོག་འདྲེན་བགེགས་ཀྱི་སྙིང་དཀར་ནག་གི་མཚམས་སུ་ཟུག་པས་ཐུགས་སྙིང་རྗེ་ཆེན་པོས་སྒྲོལ་བའི་དམ་ཚིག་ལ་དགྱེས་བཞིན་དུ་བཞུགས་པར་བསྒོམ་པ་སྟེ། ཐུགས་ཀའི་ཡེ་ཤེས་སེམས་དཔའ་སོགས་ཀྱང་དཀྱིལ་འཁོར་གསུམ་འདྲ་བར་གོང་བཞིན་དུ་གསལ་གདབ། དེ་ཡང་སྐུ་གསུང་ཐུགས་ཀྱི་སྲས་སུ་སྟོན་པ་ནི། ཁམས་གསུམ་མམ་སེམས་ཅན་གྱི་ལུས་ངག་ཡིད་གསུམ་སྐུ་གསུང་ཐུགས་རྡོ་རྗེ་གསུམ་དུ་སྒྲོལ་བར་བྱེད་པ་དང་། དེ་རེ་རེ་ལ་བདུན་བདུན་དུ་བྱུང་བ་ནི། གཙོ་བོ་དཔལ་ཆེན་པོའི་སྐུ་གསུང་ཐུགས་ཡོན་ཏན་ཕྲིན་ལས་དབྱིངས་ཡེ་ཤེས་ཀྱི་ཆ་ལས་སྣང་བ་སྟེ། གདུལ་བྱ་སེམས་ཅན་གྱི་རྣམ་ཤེས་ཚོགས་བདུན་གྱི་རྟོག་པ་དབྱིངས་སུ་དག་པར་བྱེད་པའོ། །དེ་ཉིད་གསལ་གདབ་པར་བྱེད་པའི་རྒྱུད་ཀྱི་རྡོ་རྗེའི་ཚིག་ནི་ཤིན་ཏུ་ཟབ་ཅིང་བརླིང་བ་སྟེ། གྲུབ་པ་བརྙེས་པའི་སློབ་དཔོན་རྣམས་ཀྱི་མན་ངག་གི་གནད་ཀྱིས་འགྲེལ་ཚུལ་མང་དུ་བྱུང་བ་ལས། འདིར་རྟོགས་པས་བདག་བསྒྲལ་བ་དང་། ཐུགས་རྗེས་གཞན་སྒྲོལ་བ་གཉིས་དང་སྦྱར་ན། དང་པོ་ལ་བསྐྱེད་རྫོགས་གཉིས་ཀྱི། བསྐྱེད་རིམ་ལྟར་ན་སྟོང་པ་ཉིད་དང་སྙིང་རྗེ་ཟུང་དུ་འཇུག་པའི་རྒྱུའི་ཏིང་ངེ་འཛིན་ལས་འབྲས་བུ་རྟེན་དང་བརྟེན་པར་བཅས་པའི་དཀྱིལ་འཁོར་གསལ་བཏབ་ཅིང་གོམས་པར་བྱས་པས། མ་དག་པ་འཁོར་བའི་མཚན་རྟོག་རྣམས་དག་པ་ལྷ་ཡི་འཁོར་ལོར་བསྒྲལ་བའམ་དག་པར་བྱེད་པའི་ཏིང་ངེ་འཛིན་ཟབ་མོ་ལས་མི་འདའ་བའི་དམ་ཚིག་ནི་ཐབས་བསྐྱེད་པ་སྟེ། དེས་ཐ་མལ་གྱི་ཞེན་རྟོགས་གསོད་པའམ་འཇོམས་པར་བྱེད་པ་དེའང་ཞེ་སྡང་གིས་བསད་ཅིང་གཏི་མུག་སོགས་ཀྱིས་མནན་པ་ལྟ་བུ་མ་ཡིན་ཏེ། ཕུང་པོ་ཁམས་དང་སྐྱེ་མཆེད་ཀྱིས་བསྡུས་པའི་ཆོས་རྣམས་དཔལ་ཆེན་པོ་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་སུ་གཏམ་པའམ་གསལ་བར་བྱས་ནས། ཀུན་གཞི་གཙོ་བོར་གྱུར་པའི་རྣམ་པར་ཤེས་པ་ཀུན་ཐུགས་རྡོ་རྗེའི་ངོ་བོ་ཡེ་ཤེས་སེམས་དཔར་བསྒོམ་ཞིང་གོམས་པར་བྱས་པས་རིམ་གྱིས་མཐར་འབྲས་ལ་སྦྱོར་ངེས་པའོ། །རྫོགས་རིམ་ལྟར་ན། དམིགས་པ་མེད་པའི་སྙིང་རྗེ་ཆེན་པོ་སྲིད་ཞི་མཉམ་ཉིད་དུ་རྟོགས་པས། གཉིས་མཛིན་མཚན་མའི་སྤྲོས་པ་ཐམས་ཅད་གཉིས་མེད་མཉམ་པའི་ཀློང་དུ་བསྒྲལ་བར་བྱེད་པའི་དམ་ཚིག་ལས་མི་འདའ་བ་ནི་ཤེས་རབ་རྫོགས་པའི་རིམ་པ་སྟེ། དེས་དངོས་འཛིན་མཚན་མའི་རྟོག་པ་མེད་པར་བྱས་པ་དེའང་ཉོན་མོངས་པ་རང་ག་མས་བསད་ཅིང་མནན་པ་ལྟ་བུ་མ་ཡིན་ཏེ། ཕུང་པོ་ལྷར་གསལ་བའི་བསྐྱེད་པའི་རིམ་པ་དེའང་རང་སེམས་སྟོང་པ་ཉིད་དང་དབྱེར་མི་ཕྱེད་པའི་རྡོ་རྗེའི་བདག་ཉིད་དུ་གཏམ་པར་བྱས་ནས། སྟོང་ཉིད་དུ་འཛིན་པའི་རྣམ་པར་ཤེས་པ་དེའང་རང་བཞིན་གྱིས་མ་གྲུབ་པར་ཤེས་པའི་མཐའ་བྲལ་ཟབ་མོའི་ལྟ་བ་བདེ་སྟོང་ཐབས་ཤེས་དབྱེར་མེད་སྣང་སྟོང་མཉམ་པ་ཆེན་པོ་ཟུང་འཇུག་རྡོ་རྗེ་ལྟ་བུའི་ཡེ་ཤེས་གནས་ལུགས་ཟབ་མོའི་ངང་ལ་མཉམ་པར་འཇོག་སྟེ་བསྒོམ་པའོ། །ཐུགས་རྗེས་གཞན་སྒྲོལ་བའི་དབང་དུ་བྱས་ན། ཀུན་སློང་སྙིང་རྗེ་ཆེན་པོས་སྤྱིར་ཁམས་གསུམ་གྱི་སེམས་ཅན་རྒྱུ་ལས་ཉོན་དང་འབྲས་བུ་སྡུག་བསྔལ་གསུམ་ལ་ལོངས་སུ་སྤྱོད་པ་རྣམས་དང་། བྱེ་བྲག་བསྒྲལ་ཞིང་བཅུ་སོགས་ཐབས་ཀྱིས་སྒྲོལ་བའི་སྐལ་དང་མི་ལྡན་ཞིང་ཤུགས་ཀྱིས་སྒྲོལ་བའི་ཕྲིན་ལས་ཟབ་མོའི་ཡུལ་དུ་གྱུར་པ་རྣམས་རྣམ་སྨིན་ལས་ངན་གྱི་སྐྱེ་བརྒྱུད་བཅད་ནས་འབྲས་བུ་སངས་རྒྱས་ཀྱི་སར་བསྒྲལ་བར་བྱེད་པའི་དམ་ཚིག་ཆེན་པོ་ནི། རང་ག་མར་བསད་ཅིང་མནན་པ་ལྟ་བུ་མ་ཡིན་ཏེ། བསྒྲལ་བྱའི་ཕུང་པོ་དང་ཁམས་ལ་སོགས་པ་རྡོ་རྗེ་རིགས་ཀྱི་ལྷ་ཚོགས་སུ་གནས་བསྒྱུར་བའམ་གཏམ་པར་བྱས་ནས། རྣམ་པར་ཤེས་པ་ཡི་གེ་ཧཱུྃ་གི་རྣམ་པས་དཔལ་རྡོ་རྗེ་གཞོན་ནུའི་སྲས་སུ་བྱས་ཏེ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་རྡོ་རྗེ་དང་དབྱེར་མེད་པར་བྱས་པའོ། །བརྒྱད་པ་སྒོ་སྐྱོང་སྲུང་མར་བཅས་པ་བསྐྱེད་པ་ནི། སླར་ཡང་གཙོ་བོ་ཡབ་ཡུམ་སྙོམས་པར་ཞུགས་པའི་བྱང་སེམས་འོད་ཀྱི་གོང་བུ་ལས་ཛཿཧཱུྃ་བྃ་ཧོཿབཞི་སྤྲོས་ཏེ་དཀྱིལ་འཁོར་གྱི་སྒོ་བཞིར་འཁོད་པ་ལས། ཤར་སྒོར་ཛཿལས་བྱམས་པ་ཚད་མེད་ཀྱི་རང་བཞིན་རྟ་གདོང་དཀར་མོ་གཡས་ཕུར་བུ་དང་གཡོན་ལྕགས་ཀྱུ་འཛིན་པ། ལྷོ་སྒོར་ཧཱུྃ་ལས་སྙིང་རྗེ་ཚད་མེད་ཀྱི་རང་བཞིན་ཕག་གདོང་ནག་མོ་གཡས་ཕུར་བུ་གཡོན་ཞགས་པ་བསྣམས་པ། ནུབ་སྒོར་བྃ་ལས་དགའ་བ་ཚད་མེད་ཀྱི་རང་བཞིན་ཉི་ཟླ་དམར་མོ་དྲེད་ཀྱི་གདོང་ཅན་གཡས་ཕུར་བུ་དང་གཡོན་ལྕགས་སྒྲོག་འཛིན་པ། བྱང་སྒོར་ཧོཿལས་བཏང་སྙོམས་ཚད་མེད་ཀྱི་ངོ་བོ་སྤྱང་གདོང་ཐལ་བྱེད་མ་ལྗང་གུ་གཡས་ཕུར་བུ་དང་གཡོན་དྲིལ་བུ་འཁྲོལ་བ་དྲག་མོ་དུར་ཁྲོད་ཀྱི་རྒྱན་ཆ་ཅན་དུ་གསལ། ༀ་བཛྲ་ཀཱི་ལ་ཡ་སོགས་ཀྱི་སྔགས་བརྗོད་པས་དཀྱིལ་འཁོར་ཆེན་པོའི་བར་ཁྱམས་རྣམས་སུ་རྟེན་འབྲེལ་བཅུ་གཉིས་གནས་སུ་དག་པའི་ཕུར་སྲུང་བཅུ་གཉིས་མིང་པོར་བཅས་དང་། ཕྱིའི་དུར་ཁྲོད་དང་འཁོར་ཡུག་ལྕགས་རི་རྣམས་སུ་མཁའ་འགྲོ་སུམ་ཅུ་རྩ་གཉིས། མ་མོ་བདུན། སྲིང་མོ་བཞི། དབང་ཕྱུག་ཉེར་བརྒྱད་སོགས་དམ་ཅན་བཀའ་སྡོད་ཀྱི་ཚོགས་རྣམས་རྗེ་ལས་འབངས་དང་ཉི་མ་ལས་འོད་ཟེར་གྱི་ཚུལ་གྱིས་མགྲོན་ཐབས་སུ་མོས་པས་བསྐྱེད་དོ། །དེས་བསྐྱེད་རིམ་གྱི་སྒོམ་དོན་གཙོ་ཆེ་བ་རྣམས་ཅུང་ཟད་བཤད་ཟིན་ནས། གཉིས་པ་རང་བཞིན་ཡེ་ཤེས་ཀྱི་དཀྱིལ་འཁོར་དགུག་པ་ལ། རང་བཞིན་དགོངས་གསོལ་སྤྱན་དྲངས་ལ། །ཕྱག་བྱ་དབང་ཞུ་གཉིས་མེད་བསྟིམ། །སྨན་གཏོར་རཀྟ་དུག་གསུམ་དང་། །སྦྱོར་སྒྲོལ་གྱིས་མཆོད་བསྙེན་པ་བྱ། །ཞེས་བཅུ་གཉིས་སུ་གསུངས་པའི་གནད་འགག་རགས་པ་ཙམ་བརྗོད་ན། དང་པོ་དགོངས་གསོལ་གྱི་ཚིག་གི་དོན་ནི། བི་ཏོ་ལས། དབྱིངས་དང་ཡེ་ཤེས་དབྱེར་མེད་པའོ། །རྡོ་རྗེ་འདུས་མ་བྱས་པའི་དོན། །ཉོན་མོངས་སྤང་ཕྱིར་གཞོན་ནུ་སྟེ། །དོན་རྟགས་གཉིས་སུ་འབྲེལ་བའོ། །ཞེས་གསུངས་པ་ལྟར། དབྱིངས་དང་ཡེ་ཤེས་གཉིས་སུ་མེད་པའི་རང་བཞིན་ཆོས་དབྱིངས་འདུས་མ་བྱས་པ་ཉིད། འདུས་བྱས་གློ་བུར་གྱི་ལས་ཉོན་དྲི་མ་མཐའ་དག་དང་བྲལ་བའི་དག་པ་གཉིས་ལྡན་དཔལ་རྡོ་རྗེ་གཞོན་ནུ་དང་། དེའི་རིགས་འཛིན་པའི་ཁྲོ་བཅུ་སྲས་མཆོག་སྤྲུལ་འཁོར་བཅས་དང་། གཞན་ཡང་རིགས་ལྔའི་གདུང་འཚོབ་པའི་རྣམ་སྨིན་དང་ཚེ་དབང་ཕྱག་ཆེན་ལྷུན་གྱིས་གྲུབ་པའི་ས་ལ་བཞུགས་པའི་བླ་མ་རིག་འཛིན་རྣམས་ཀྱིས། ཕྱིའི་སྲིད་པ་ཁམས་གསུམ་དང་། ནང་གི་སྲིད་པ་ལུས་ངག་ཡིད་གསུམ་སྟེ། ཀུན་རྫོབ་ཀྱི་སྣང་བ་ཐམས་ཅད་དོན་དམ་སྐྱེ་བ་མེད་པའི་རྡོ་རྗེར་སྒྲུབ་པར་མཛོད་ཅིག སྲིད་པ་གསུམ་པོ་དེ་དག་གནས་ཚུལ་དུ་ཡེ་ནས་རྡོ་རྗེ་ཕུར་པའི་ལྷར་གནས་པ་དེ་བཞིན་དུ། སྣང་ཚུལ་དུའང་ཡེ་ཤེས་ཀྱི་ཁྲོ་བོའི་དཀྱིལ་འཁོར་དུ་མངོན་སུམ་གྱིས་གྲུབ་པར་མཛོད་ཅིག་ཅེས་པ་སྟེ། དེ་ལྟར་བསྐུལ་བས་ཆོས་ཀྱི་སྐུ་ལས་གཟུགས་ཀྱི་སྐུར་བཞེངས་པར་བསམ་མོ། །གཉིས་པ་སྤྱན་འདྲེན་པ་ནི། སྲིད་པ་རྡོ་རྗེ་ཕུར་བུའི་དོན་དེ་ཉིད་སྒྲུབ་པ་དང་། ཀུན་རྫོབ་ཏུ་ལྷ་ཡེ་ཤེས་སེམས་དཔའ་ལས་བདག་དམ་ཚིག་པས་དབང་དང་དངོས་གྲུབ་མ་ལུས་པ་བླང་བའི་ཕྱིར། དབྱིངས་ནས་ཡེ་ཤེས་ཀྱི་ཁྲོ་བོའི་ཚོགས་གཤེགས་པར་མཛོད་ལ། སྒོམ་པའི་ཏིང་ངེ་འཛིན་གྱི་དཀྱིལ་འཁོར་འདི་ལ་དགོངས་པར་མཛོད་ཅིག ཅེས་གསོལ་བས་ཡེ་ཤེས་ཀྱི་དཀྱིལ་འཁོར་ཏིང་ངེ་འཛིན་གྱི་དཀྱིལ་འཁོར་ལ་མེ་རི་འདབ་འབྱོར་གྱི་ཚུལ་དུ་བཞུགས་པར་མོས། །གསུམ་པ་ཕྱག་བྱ་བ་ནི། དགོས་པ་གང་གི་ཕྱིར་ན། ཞི་བས་མི་ཐུལ་བའི་སྲིད་པ་གསུམ་གྱི་གདུག་པ་ཅན་རྣམས་འདུལ་བ་དང་། ཡེ་ཤེས་ལྷའི་སྐུ་གསུང་ཐུགས་དང་གཉིས་སུ་མེད་པའི་ང་རྒྱལ་ཆེན་པོ་བརྟན་པའི་ཕྱིར། ཐུགས་ཞི་ལས་མ་གཡོས་ཀྱང་གཟུགས་སྐུ་འབར་བ་ཁྲོ་བོའི་ཚུལ་ཅན་རྡོ་རྗེ་སྲིན་པོའི་ལྷ་ཚོགས་རྣམས་ལ་རང་བཞིན་གཉིས་སུ་མེད་པར་རྟོགས་པའི་རྩེ་གཅིག་ཡིད་ཀྱིས་ཕྱག་འཚལ་བ་སྟེ། དེ་ཡང་ཨ་ཏི་པུ་ཧོཿས་ཕྱག་འཚལ་བ་ལ། ཡེ་ཤེས་པས་པྲ་ཏི་ཛ་ཧོཿ ཞེས་ལན་དུ་དངོས་གྲུབ་ཀྱི་བཅུད་སྩོལ་བར་མོས་པའོ། །བཞི་པ་དབང་ཞུ་བ་ནི། ཐབས་མཁས་ཀྱི་སྤྱོད་པ་བསམ་མི་ཁྱབ་པས་འགྲོ་བའི་དོན་དུ་ཀུན་སློང་བྱམས་པ་དང་སྙིང་རྗེ་ཆེན་པོ་གང་ལ་གང་འདུལ་དུ་སྣང་བའི་སངས་རྒྱས་ཀྱི་ཕྲིན་ལས་མ་ལུས་པ་དུས་གཅིག་ཏུ་སྒྲུབ་ནུས་པའི་མཐུ་སྟོབས་ཟབ་མོ་རྫོགས་པར་མཛད་ནས། བདག་དམ་ཚིག་པ་ལ་ཡེ་ཤེས་པས་ཕྱི་དབང་སྣང་བ་ལྷར་ཤེས་པ། ནང་དབང་སྣང་སྲིད་སེམས་སུ་ཤེས་པ། གསང་དབང་སེམས་ཉིད་སྟོང་པར་རྟོགས་པའི་ཆོས་ཉིད་བདེ་བ་ཆེན་པོའི་དབང་དང་བྱིན་རླབས་མ་ལུས་པ་སྩོལ་ཅིག ཅེས་གསོལ་བ་བཏབ་པས་ཡེ་ཤེས་པའི་གནས་གསུམ་ནས་ༀ་ཨཱཿཧཱུྃ་དཀར་དམར་མཐིང་གསུམ་འཕྲོས་རང་དམ་ཚིག་པའི་གནས་གསུམ་དུ་བབས་ཏེ་སྐུ་གསུང་ཐུགས་ཀྱི་བྱིན་གྱིས་བརླབས་པས། སྤྱི་གཙུག་ཏུ་སྐུ་ཡི་ལྷ་འཁོར་ལོ་ཅན་རྣམ་སྣང་། མགྲིན་པར་གསུང་གི་ལྷ་པདྨ་ཅན་སྣང་མཐའ། སྙིང་གར་ཐུགས་ཀྱི་ལྷ་རྡོ་རྗེ་ཅན་མི་བསྐྱོད་པས་རྒྱས་བཏབ། སླར་ཡང་ཡེ་ཤེས་ལྔའི་རང་བཞིན་ༀ་ཧཱུྃ་སྭཱ་ཨཱཾ་ཧཱ་སྟེ་རིགས་ལྔའི་ས་བོན་བྱུང་བ་སྤྱི་བོར་གནས་པ་ཡོངས་སུ་གྱུར་པ་ལས། ཆོས་དབྱིངས་ཡེ་ཤེས་ཀྱི་ངོ་བོ་བུངྔྷ་ཧེ་རུ་ཀ་གཙོ་བོར་གྱུར་པའི་ཁྲག་འཐུང་རིགས་ལྔས་དབང་བསྐུར། སྐུ་གསུང་ཐུགས་ཡོན་ཏན་ཕྲིན་ལས་ལྔའི་བདག་ཉིད་རིགས་ལྔའི་ཅོད་པཎ་གྱིས་དབུ་བརྒྱན་པར་བསམ་མོ། །ལྔ་པ་བསྟིམས་པ་ནི། སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཡོངས་སུ་རྫོགས་པའི་བདག་ཉིད་དཀྱིལ་འཁོར་གསུམ་གྱི་ལྷ་ཚོགས་ཡེ་ཤེས་པ་རྣམས་བདག་དམ་ཚིག་པ་བསྐྱེད་པའི་འཁོར་ལོ་དང་དབྱེར་མེད་དུ་ཐིམ་ནས་རབ་ཏུ་དགྱེས་པས་ཇི་སྲིད་བྱང་ཆུབ་ཀྱི་བར་དུ་བརྟན་པར་བཞུགས་ཤིག ཅེས་སྔགས་ཀྱིས་བསྟིམས་པས་ཆུ་ལ་ཆུ་བཞག་པ་ལྟར་དབྱེར་མེད་དུ་གྱུར་པར་མོས་པའོ། །དྲུག་པ་སྨན་མཆོད་འབུལ་བ་ནི། སྐབས་འདིར་རྩ་བར་དངོས་སུ་མ་གསུངས་ཀྱང་སྒྲུབ་ཁོག་ཏུ་ཁ་སྐོང་བ་ལྟར། ཕྱི་མཆོད་རྣམས་ཀྱང་རང་ལས་སྤྲུལ་པའི་ལྷ་མོ་ཕྱི་ནང་གི་ཉེར་སྤྱོད་འདོད་ཡོན་ལྔ་བཀྲ་ཤིས་རྫས་རྟགས་སོགས་མཆོད་རྫས་དཔག་ཏུ་མེད་པ་ཐོགས་པས་འཕྲུལ་དགའི་ལོངས་སྤྱོད་ཀྱི་ཚུལ་དུ་མཆོད་པས་ལྷ་རྣམས་མཉེས་པར་བསམ་མོ། །སྨན་མཆོད་དངོས་ནི། རང་བྱུང་གདོད་ནས་རྣམ་པར་དག་པ་རྩ་བརྒྱད་ཡན་ལག་སྟོང་སྦྱར་གྱི་སྨན་མཆོག་བདེ་གཤེགས་ལྔ་སྒྲུབ་པའི་དམ་ཚིག་གི་རྫས་ཡེ་ཤེས་ལྔ་ཡི་རང་བཞིན་འབྲས་བུ་རྒྱུད་དྲུག་འཁོར་བའི་དུག་ལྔའི་ནད་སེལ་བའི་རྩི་ཆེན་པོ་ཡབ་ཡུམ་ཐབས་ཤེས་མཉམ་པར་སྦྱོར་བ་ལས་བྱུང་བའི་བྱང་ཆུབ་སེམས་ཀྱི་ངོ་བོ་རང་བྱུང་བྷཉྫའི་སྣོད་དུ་བསྐྱིལ་བ་མཐེབ་སྲིན་ཉི་ཟླའི་གའུས་བཅུས་ཏེ། རྩ་བ་དང་བརྒྱུད་པའི་བླ་མ་རྣམས་དང་། དཔལ་ཆེན་པོ་རྡོ་རྗེ་གཞོན་ནུ་ཁྲོ་བཅུ་ཁྲ་ཐབས་སྲས་མཆོག་སྒོ་སྐྱོང་བཀའ་སྡོད་སྲུང་མའི་ཚོགས་དང་བཅས་དཀྱིལ་འཁོར་གསུམ་གྱི་ལྷ་ཚོགས་ཞིང་སྐྱོང་གཞི་བདག རིགས་དྲུག་གི་སེམས་ཅན་རྡོ་རྗེ་ཕུར་པའི་ངོ་བོར་དག་པ་ཀུན་ལ་ཕུལ་བས་ཐམས་ཅད་བདེ་བ་ཆེན་པོའི་རོས་མཉེས་པར་མོས་པ་སྨན་མཆོད་དངོས་དང་། དངོས་གྲུབ་སྩོལ་བར་གསོལ་བས་ལྷ་ཚོགས་རྣམས་ཀྱི་གནས་གསུམ་ནས་སྐུ་གསུང་ཐུགས་ཀྱི་དངོས་གྲུབ་འབྲུ་གསུམ་གྱི་རྣམ་པར་བདུད་རྩིའི་སྟེང་དུ་འཕྲོས་པ་རིམ་བཞིན་བླངས་ནས་ལྕེར་མྱོང་བས་སྐུ་སྐྱེ་ཤི་མེད་པ་གསུང་འགགས་པ་མེད་པ་ཐུགས་གཟུང་འཛིན་འཁྲུལ་རྟོག་གི་མཚན་མ་དང་བྲལ་བའི་དངོས་གྲུབ་དམ་པ་ཐོབ་པར་བསམ་པ་ནི་དངོས་གྲུབ་བླང་བའོ། །བདུན་པ་གཏོར་མའི་མཆོད་པ་ནི། དམ་རྫས་རྨད་བྱུང་གི་གཏོར་ཆེན་ཆོས་ཉིད་སྐྱེ་མེད་ཀྱི་ཀློང་ནས་སྤྲུལ་པ་ཟག་མེད་འདོད་ཡོན་ལྔ་ལྡན་གྱི་ཕུང་པོ་ལོངས་སྤྱོད་ཟད་མི་ཤེས་པར་སྤྲུལ་ནས་ཕུལ་བས་ལྷ་རྣམས་ཀྱི་ཐུགས་དམ་བསྐང་བར་བསམ། བརྒྱད་པ་རཀྟའི་མཆོད་པ་ནི། དགོས་པ་ཁམས་གསུམ་གྱི་འཁོར་བ་སྟོང་པའི་ཕྱིར་དུ། ངོ་བོ་སྲིད་རྩ་ཉོན་མོངས་པ་དབྱིངས་སུ་བསྒྲལ་བའི་རང་བཞིན། རྣམ་པ་དུང་ཆེན་གྱི་སྣོད་དུ་རཀྟ་དམར་གྱི་རྒྱ་མཚོར་བསྐྱིལ་བ། བྱེད་ལས་དཀྱིལ་འཁོར་གྱི་ལྷ་ཚོགས་རྣམས་ལ་ཕུལ་བས། འབྲས་བུ་འཁོར་བ་གནས་ནས་སྟོང་པར་མོས་པའོ། །དགུ་པ་དུག་གསུམ་གྱི་མཆོད་པ་ནི། གཏི་མུག་ཤ་ཡི་ཕུང་པོ། འདོད་ཆགས་ཁྲག་གི་རྒྱ་མཚོ། ཞེ་སྡང་རུས་པའི་གྲམ་ཁྲོད་དུ་དམིགས་ནས་དཔལ་ཆེན་པོ་ཡབ་ཡུམ་མཁའ་འགྲོའི་ཚོགས་དང་བཅས་པའི་དཀྱིལ་འཁོར་གྱི་ལྷ་ཚོགས་རྣམས་ལ་ཕུལ་བས་དུག་གསུམ་རང་གནས་སུ་དག་པར་བསམ་པའོ། །བཅུ་པ་སྦྱོར་སྒྲོལ་གྱི་མཆོད་པ་ནི། ངོ་བོ་ཆོས་དབྱིངས་སྐྱེ་བ་མེད་པའི་གཏུན་ཁུང་དུ། རིག་པ་ཡེ་ཤེས་ཀྱི་རྡོ་རྗེའི་ཐོ་བས། གཟུང་འཛིན་མཚན་མའི་རྟོག་པ་མཐའ་དག་རྡུལ་ཕྲན་བཞིན་དུ་བརླགས་ནས་རིག་སྟོང་མཉམ་ཉིད་ཀྱི་ཀློང་དུ་སྦྱོར་བ་སྟེ། རྣམ་པ་ཡབ་ཡུམ་ཐབས་ཤེས་རོལ་པའི་མཁའ་གསང་ནས་བདེ་སྟོང་ཟག་མེད་ཀྱི་མཆོད་སྤྲིན་དཔག་ཏུ་མེད་པར་སྤྲོས་ཏེ་ཕུལ་བའམ། ཡང་ན་མཁའ་གསང་དུ་དགྲ་བགེགས་བཀུག་ཅིང་རོལ་པའི་སྟབས་ཀྱིས་བརྡུང་། བྱང་སེམས་ཀྱི་མེ་ལྕེས་སྲེག དུག་གསུམ་གྱི་ངོ་བོ་ཤ་ཁྲག་རུས་གསུམ་ལྷག་མེད་དུ་ཕུལ་བས་ལོག་ལྟའི་དགྲ་བགེགས་བསྒྲལ་ཞིང་རྟོག་ཚོགས་དབྱིངས་སུ་དག་པར་མོས་པའོ། །བཅུ་གཅིག་པ་བསྟོད་པ་ནི། དུས་གསུམ་གྱི་སངས་རྒྱས་མ་ལུས་པའི་སྐུ་གསུང་ཐུགས་ཡོན་ཏན་ཕྲིན་ལས་གཅིག་ཏུ་འདུས་པའི་སྤྱི་དཔལ་ཆེན་པོ་རྡོ་རྗེ་གཞོན་ནུ། སྐྱེ་མེད་རྣམ་དག་ཡུམ་འཁོར་ལོ་རྒྱས་འདེབས། ས་བཅུའི་མངའ་བདག་ཁྲོ་བོ་ཆེན་པོ་བཅུ། ཕ་རོལ་ཕྱིན་བཅུའི་རང་བཞིན་ཁྲོ་མོ་བཅུ། ཉོན་མོངས་ཉི་ཤུ་སྒྲོལ་མཛད་ཁྲ་ཐབས་ཉི་ཤུ། ཐུགས་རྗེའི་ཤུགས་ཀྱིས་གནོད་གདུག་སྒྲོལ་མཛད་སྲས་མཆོག་ཉེར་གཅིག ཕྱི་ནང་བར་ཆད་སྲུང་མཛད་སྒོ་མ་བཞི་དང་། རྒྱལ་བའི་སྤྱན་སྔར་ཁས་བླངས་པའི་ཕུར་སྐྱོང་བཀའ་སྡོད་སྲུང་མའི་ཚོགས་དང་བཅས་པ་ལ་ཆེ་བའི་ཡོན་ཏན་རྗེས་སུ་དྲན་པའི་གླུ་ཡི་བསྟོད་པས་དཀྱིལ་འཁོར་གྱི་ལྷ་རྣམས་མཉེས་པར་བསམ་མོ། །བཅུ་གཉིས་པ་བཟླས་པ་བྱ་བ་ལ། སྤྱིར་སྔགས་ཀྱི་མཚན་ཉིད། ངོ་བོ་བདེ་བར་གཤེགས་པའི་ཐུགས་ཡིག་འབྲུར་སྣང་བ། ངེས་ཚིག་བྱིན་རླབས་མངོན་དུ་འབྱིན་པས་ན་སྔགས། དབྱེ་ན་རྒྱུ་མ་ནོར་བ་རྩ་བའི་སྔགས། བསྐྱེད་པ་རྐྱེན་གྱི་སྔགས། བཟླས་པ་ལས་ཀྱི་སྔགས་དང་གསུམ་ལས་འདིར་ཕྱི་མ་སྟེ། ཞིབ་པར་སྔགས་བཏུ་དང་རྒྱུད་དང་སློབ་དཔོན་སོ་སོའི་དགོངས་པ་སོགས་ཕུར་འགྲེལ་འབུམ་ནག་ཆེན་མོ་ལས་ཤེས་པར་བྱ་ལ། འདིར་སྔགས་དོན་ནི། ༀ་ནི་ཡེ་ཤེས་ལྷ་དང་སྦྱར་ན་རིགས་ལྔ་ཁྲག་འཐུང་ལྔ། ཟབ་དོན་ལྟ་སྒོམ་དང་སྦྱར་ན་ཀུན་ཏུ་བཟང་པོའི་ཐུགས་ཡང་དག་པའི་ཡེ་ཤེས་ལྔ། སྐུ་དང་སྦྱར་ན་ཆོས་ཀྱི་སྐུའོ། །དེ་བཞིན་དུ། བཛྲ་ནི་རྡོ་རྗེ་གཞོན་ནུ་ཡབ་ཡུམ་མཉམ་པར་སྦྱོར་བ་དང་དབྱིངས་ཡེ་ཤེས་གཉིས་མེད་དུ་རིག་པ་ལ་ལོངས་སྤྱོད་པ་སྤྲོས་བྲལ་གསལ་སྟོང་དབྱེར་མེད་དོན་གྱི་རྡོ་རྗེ་སྟེ་ལོངས་སྤྱོད་རྫོགས་པའི་སྐུའོ། །ཀཱི་ནི་གཙོ་མ ཆོག་རྡོ་རྗེ་གཞོན་ནུའི་སྤྲུལ་པ་ཁྲོ་ཆེན་ཡབ་བཅུ། ལི་ནི་ཁྲོ་མོ་ཡུམ་བཅུ་སྟེ། དེ་གཉིས་ཐབས་ཤེས་དབྱེར་མེད་ཟུང་འབྲེལ་བདེ་བའི་ངང་ནས་སྐུ་འབར་བའི་ཆ་ལུགས་སུ་སྤྲུལ་པས་འགྲོ་དོན་མི་དགེ་བཅུ་ཚར་གཅོད། དགེ་བཅུ་མཐར་ཕྱིན་ཅིང་དབྱིངས་རིག་དབྱེར་མེད་དུ་སྦྱོར་བས་སྤྲུལ་པའི་སྐུའོ། །ཀཱི་ནི་ཡང་སྤྲུལ་ཟ་བྱེད་མཆེ་བ་ཅན་ཏེ་འཁོར་བའི་ལས་ཉོན་ཟ་ཞིང་སྟོང་པར་བྱེད་ལ། ལ་ནི་ཡང་སྤྲུལ་གསོད་བྱེད་མ་བཅུ་སྟེ་སྲིད་གསུམ་ཡོངས་སྒྲོལ་དབྱིངས་སུ་སྦྱོར་ཞིང་གང་འདུལ་གྱིས་འགྲོ་བའི་དོན་མཛད་པས་འདི་གཉིས་ནི་ཡང་སྤྲུལ་ལོ། །ཡ་ནི་སྲས་མཆོག་ཉེར་གཅིག་སྟེ་དཔལ་ཆེན་སྐུ་གསུང་ཐུགས་ལས་སྐྱེས་པའི་སྲས། དངོས་སྣང་སྐུ། གྲགས་པ་གསུང་། དྲན་རྟོག་ཐུགས། དབྱེར་མེད་ངོ་བོ་ཉིད་དུ་སྒྲོལ་བར་བྱེད་པའོ། །སརྦ་ནི་ཁྲོ་ཆུང་སུམ་སྤྲུལ་སྒོ་མ་དང་བཅས་པ་སྟེ། དཀྱིལ་འཁོར་གསུམ་གྱི་ལྷ་ཚོགས་ཐམས་ཅད་འདུས། བིགྷ་ནི་བཀའ་སྡོད་ཤོ་ན་མ་མཆེད་བཞི་དང་མིང་པོ་སྲོག་བདག ནཱན་ནི་རེ་ཏི་མཆེད་བཞི་དང་རེ་ལྡེ་མགོ་ཉགས། བྃ་ནི་ས་བདག་མཆེད་བཞི་དང་བསེ་ཡི་སྐྱེས་བུ་སྟེ་དམ་ཅན་སྲུང་མའི་ཚོགས་སོ། །ཧཱུྃ་ནི་ཁྲོ་འདུས་རིག་འཛིན་ཏེ་དངོས་གྲུབ་ཐམས་ཅད་སྡུད་པར་བྱེད་པ། སངས་རྒྱས་ཀུན་འདུས་དཔལ་གྱི་ཐུགས་ཡང་དག་པའི་ཡེ་ཤེས་འགྱུར་མེད་ཐིག་ལེ་ཉག་གཅིག་གོ །ཕཊ་ནི་དགྲ་བ གེགས་དམ་སྲི་བར་དུ་གཅོད་པའི་འབྱུང་པོ་གདུག་པ་ཅན་ཚར་གཅོད་པར་བྱེད་པ་ཁྲོ་བོ་འདུས་པའི་གསུང་རྡོ་རྗེའི་ཚིག་སྟེ་འཁྲུལ་པ་རྩད་ནས་གཅོད་ཅིང་བདག་ཕུར་འབེན་གསུམ་དབྱེར་མེད་ཆོས་སྐུར་སྒྲོལ་བས་ཕུར་པ་ཐལ་འབྱིན་གྱི་དགོངས་པའོ། །ཛཿནི་བསྒྲུབ་བྱ་གང་ཡོད་ཐམས་ཅད་འགུག་པར་བྱེད་པ། ཧཱུྃ་ནི་བསྒྲུབ་བྱ་ཐམས་ཅད་དབང་དུ་སྡུད་ཅིང་ཟིལ་གྱིས་གནོན་པ། ཨ་ནི་དངོས་གྲུབ་ཐམས་ཅད་མྱུར་དུ་འགུག་ཅིང་བདག་ལ་བསྟིམས་པ་སྟེ་ཡིག་འབྲུ་ཕྱི་མ་གསུམ་པོ་འདི་མཁའ་འགྲོས་ལུང་བསྟན་འཕྱོངས་སུ་བཏགས་པའི་སྙིང་པོ་ཟབ་དོན་ཡིན་ཞེས་གསེར་མཆན་ལས་གསུངས། དེ་ལྟར་ཡང་། ༀ་ནི་རིགས་ལྔ་ཁྲག་འཐུང་ཡེ་ཤེས་ལྔ། །བཛྲ་དཔལ་ཆེན་ཡབ་ཡུམ་གཉིས་སུ་མེད། །ཀཱི་ནི་སྤྲུལ་པ་ཕོ་བཅུ་སྟོབས་བཅུའི་བདག །ལི་ནི་སྤྲུལ་པ་མོ་བཅུ་ཕར་ཕྱིན་བཅུ། །ཀཱི་ནི་ཡང་སྤྲུལ་ཟ་བྱེད་ཕ་བཅུ་སྟེ། །ལ་ནི་གསོད་བྱེད་མ་བཅུ་སྲིད་གསུམ་སྒྲོལ། །ཡ་ནི་སྲས་མཆོག་ཉེར་གཅིག་སྐུ་གསུང་ཐུགས། །སརྦ་ཡང་སྤྲུལ་ཕུར་སྲུང་ཐམས་ཅད་འདུས། །བིག་ནི་ཤྭ་ན་སྲོག་བདག་ལྕམ་དྲལ་ཏེ། །ནཱན་ནི་རེ་ཏི་མཆེད་བཞི་མགོ་ཉགས་སྲས། །བྃ་ནི་ས་བདག་བསེ་མོ་སྐྱེས་བུར་བཅས། །ཧཱུྃ་ནི་ཁྲོ་འདུས་དཔལ་གྱི་ཡེ་ཤེས་ཐུགས། །ཕཊ་ཀྱིས་དགྲ་བགེག་དམ་སྲི་ཐལ་བར་བརློག །ཛཿཡིས་བསྒྲུབ་བྱ་གང་ཡིན་དངོས་གྲུབ་འགུགས། །ཧཱུྃ་གིས་བསྒྲུབ་བྱ་དབང་སྡུད་ཟིལ་གྱིས་གནོན། །ཨཱཿཡིས་དངོས་གྲུབ་མྱུར་འབེབས་བདག་ལ་བསྟིམ། །ཁྲོ་མཆོག་ཁྱོད་ཀྱི་དངོས་གྲུབ་སྩལ་དུ་གསོལ། །ཞེས་གསུངས་སོ། །ཡང་ན་གོང་འོག་གི་འབྲུ་དགུ་པོ་ནི་ཕུར་པའི་ཡང་སྙིང་སྲོག་སྔགས་ཡིན་ལ། སརྦ་བིགྷ་ནཱན་བྃ་ཞེས་པ་ལས་སྔགས་འབྲུ་ལྔ་སྟེ། སརྦ་ནི་རྟོག་ཚོགས་མ་ལུས་པ་དབྱིངས་སུ་སྒྲོལ་བ། བིགྷ་ནཱན་ཡབ་ཡུམ་གྱི་མཁའ་གསང་སྟེ་འཁོར་འདས་དབྱེར་མེད་དབྱིངས་སུ་སྒྲོལ་བ། བྃ་ནི་འཛིན་ཤེས་གཏོང་མི་ཤེས་པའི་སྒྲ་སྟེ། སྣང་སྲིད་ཀྱི་རྟོག་ཚོགས་ཐམས་ཅད་མི་རྟོག་ཆོས་དབྱིངས་ཡེ་ཤེས་ཀྱི་ཕུར་པས་ཐེབས་པ་སྟེ། ལྟ་བ་ཆོས་ཉིད་ཀྱིས་ཟིན་ཏེ་ཕྱིར་མི་ལྡོག་པའི་དོན་དུ་གཏེར་གཞུང་སྒྲུབ་ཐབས་རྩ་བའི་གསེར་མཆན་དུ་གསུངས་སོ། །དེ་ལྟར་ངེས་པར་བྱས་ནས། བསྙེན་དམིགས་དངོས་ལ་ལྔ་ལས། དང་པོ་སྐུ་ཕྱག་རྒྱ་ལ་དམིགས་པའི་ཛབ྄་དགོངས་ནི། བདག་རྩ་བ། ཕྱོགས་བཅུ་ཁྲོ་བོ། ཕུར་པ་སྲས་ཀྱི་དཀྱིལ་འཁོར་སྟེ་དཀྱིལ་འཁོར་རྣམ་པ་གསུམ་སྤྱི་དང་། ཁྱད་པར་བདག་རྩ་བའི་དཀྱིལ་འཁོར་རྡོ་རྗེ་གཞོན་ནུ་ཡབ་ཡུམ་ཞལ་ཕྱག་རྒྱན་ཕྲ་མོའི་བར་གསལ་བའི་ངང་ནས་མ་ཡེངས་རྩེ་གཅིག་ཏུ་བཟླ་བ་སྟེ། དེ་ཡང་རྣམ་པ་གསལ་བ་ཆུ་ཟླ་ལྟ་བུ་སྣང་ལ་མ་འདྲེས་པ་སྤྱན་དཀར་ནག་ཚུན་ཆད་གསལ་བ། ང་རྒྱལ་བརྟན་པ་རང་སེམས་གཉུག་མའི་ངོ་བོ་དཔལ་རྡོ་རྗེ་གཞོན་ནུ་ཡིན་པ་ལ་ཡིན་པར་ཤེས་པའི་ངེས་ཤེས་རྐྱེན་གཞན་གྱིས་མི་འཕྲོག་པ་དང་། རྣམ་དག་དྲན་པ་གོང་དུ་བསྐྱེད་རིམ་གྱི་སྐབས་སུ་བཤད་པ་ལྟར་སངས་རྒྱས་ཀྱི་ཡེ་ཤེས་རྣམ་པ་ཐམས་ཅད་པར་འཆར་བའི་ཚུལ་དྲན་པར་བྱ་བ་སྟེ་གསལ་བརྟན་དག་གསུམ་ཚང་བའི་བསྐྱེད་རིམ་ལ་གོམས་པར་བྱེད་པ། འདི་ནི་སྲོག་སྡོམ་གཟེར་བཞི་དང་སྦྱར་ན་བསྐྱེད་པ་ལྷ་ཡི་གཟེར་རོ། །གཉིས་པ་གསུང་ཡིག་འབྲུ་ལ་དམིགས་པ་ནི། སྔར་བཞིན་དཀྱིལ་འཁོར་གསུམ་གྱི་གསལ་སྣང་བརྟན་པ་གཞིར་བྱས་ནས། དེ་དག་གི་ཐུགས་ཀའི་ཡེ་ཤེས་སེམས་དཔའ་སྐུ། ཡིག་འབྲུ་གསུང་། རྡོ་རྗེ་ཐུགས། འོད་ཡོན་ཏན། ཟེར་འཕྲོ་འདུ་ཕྲིན་ལས་ཏེ་སྐུ་གསུང་ཐུགས་ཡོན་ཏན་ཕྲིན་ལས་ལྷུན་གྱིས་གྲུབ་པའི་བདག་ཉིད་དུ་ངེས་པར་བྱས་ནས། བདག་རྩ་བའི་དཀྱིལ་འཁོར་སེམས་དཔའ་སུམ་བརྩེགས་ཀྱི་ཏིང་ངེ་འཛིན་སེམས་དཔའ་ཧཱུྃ་ཡིག་གི་མཐར་ཀཱི་ལ་ཡ་འབྲུ་དགུ་ལྗང་ཁུ་སྤུས་བྲིས་པ་ཙམ་གཡས་བསྐོར་དུ་འཁོད། ཧཱུྃ་ལས་འོད་ཉི་ཟེར་ལྟ་བུ་འཕྲོས། ཁྲོ་བཅུ་སྲས་མཆོག་སོགས་ཕྱོགས་དུས་ཀྱི་རྒྱལ་བ་སྲས་དང་བཅས་པ་ལ་ཕོགསྐུ་གསུང་ཐུགས་མཉེས་པའི་མཆོད་པ་ཕུལ། ཐུགས་དམ་གྱི་རྒྱུད་བསྐུལ། ཁམས་གསུམ་རིགས་དྲུག་གི་སེམས་ཅན་ཐམས་ཅད་ལ་ཕོག ལས་དང་ཉོན་མོངས་རྣམ་སྨིན་གྱི་སྒྲིབ་པ་སྦྱངས། བདེ་ཆེན་གྱི་ཞིང་ལ་བཀོད། དམ་ཅན་སྲུང་མའི་ཆོགས་ལ་ཕོག་ལས་ལ་བཙུད། རིག་འཛིན་བླ་མ་མཆེད་ལྕམ་ལ་ཕོག་ཐུགས་དམ་བསྐང་། དགྲ་བགེགས་ཐམས་ཅད་ལ་ཕོག་གནོད་འཚེ་གདུག་རྩུབ་ཚར་བཅད་ནས་སླར་འདུས་ཏེ་དཀྱིལ་འཁོར་གསུམ་ལ་ཐིམ་པས་བདག་གི་སྒྲིབ་པ་སྦྱངས། དཀྱིལ་འཁོར་གསུམ་གྱི་ལྷ་ཚོགས་ཀྱི་མཐུ་བསྐྱེད་དབང་ཐོབ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དངོས་གྲུབ་ཐམས་ཅད་ཐོབ་པར་མོས་ལ་གྲགས་སྟོང་རྡོ་རྗེ་སྲིན་པོའི་ངུར་སྒྲས་བཟླ་བར་བྱ་སྟེ། འདི་ནི་གཙོ་བོར་བཟླས་པ་སྔགས་ཀྱི་ཟེར་རོ། །གསུམ་པ་ཐུགས་ཆོས་ཉིད་ལ་དམིགས་པའི་ཛབ྄་དགོངས་ནི། ཐུགས་དམིགས་མེད་ནམ་མཁའི་དཀྱིལ་ལྟར་དག་པ་རང་བཞིན་གྱིས་སྟོང་པའི་ངང་ལས་རིག་རྩལ་འགག་མེད་དཀྱིལ་འཁོར་རྣམ་པ་གསུམ་དུ་གསལ་ལ་རྟོག་པ་མེད་པར་ཤར། ཤར་བའི་དུས་ཉིད་ནས་རང་བཞིན་མེད་པར་དག་པ། སྐྱེ་མེད་ཀྱི་ངང་ལས་རིག་པ་འཛིན་མེད་ཚོགས་དྲུག་ལྷུག་པར་བཞག་སྟེ་བསམ་མེད་མཐའ་བྲལ་དྭངས་སང་ངེ་བའི་ངང་ནས་གྲགས་སྟོང་འཛིན་མེད་དུ་བཟླ་བ་ནི་ཆོས་ཉིད་རང་གྲོལ་གྱི་དགོངས་པ་སྟེ། འདི་ནི་དགོངས་པ་མི་འགྱུར་བའི་གཟེར་ཡིན་ནོ། །དེ་གསུམ་ནི་གཙོ་བོར་བསྙེན་པའི་སྐབས་ཀྱི་དངོས་གཞིའི་དམིགས་པ་ཡིན་ལ་དེ་ཡང་ཐུན་གྱི་ཆ་གསུམ་དུ་བཅད་པའི་དང་པོ་ལ་སྐུ་ཕྱག་རྒྱ། གཉིས་པར་གསུང་ཡིག་འབྲུ། གསུམ་པར་ཐུགས་ཆོས་ཉིད་ལ་དམིགས་པའི་ཛབ྄་དགོངས་ལ་གཙོ་བོར་བྱ་བར་གསུངས་སོ། །བཞི་པ་ཡོན་ཏན་ལ་དམིགས་པ་དབང་དང་དངོས་གྲུབ་ལེན་པའི་ཛབ྄་དགོངས་ནི། སྒྲུབ་པ་ཆེན་པོའི་སྐབས་སུ་སྟེ། དེ་ཡང་ཛབ྄་ཁང་ཕྱེས་ཏེ་དམིགས་པ་གོང་ལྟར་གསལ་བའི་ཐུགས་སྲོག་ས་བོན་སྔགས་ཕྲེང་དང་བཅས་པ་ལས་འོད་ཟེར་དང་སྲོག་སྔགས་འབྲུ་དགུ་སྔགས་ཕྲེང་མང་པོ་འཕྲོས། རང་གི་ཐུགས་ཀ་ནས་ཐོན་ཕྱོགས་བཅུའི་བདེ་གཤེགས་ཐམས་ཅད་དང་དལ་གསུམ་སྲུང་མར་བཅས་པའི་ཐུགས་ཀར་སྤྲོས་ཤིང་ཐིམ། ཐུགས་མཉེས་པའི་མཆོད་པ་ཕུལ། ཐུགས་དམ་གྱི་རྒྱུད་བསྐུལ། སྐུ་གསུང་ཐུགས་ཀྱི་བྱིན་རླབས་དངོས་གྲུབ་ཐམས་ཅད་སྔགས་ཕྲེང་དམར་པོའི་རྣམ་པས་ལྷ་སོ་སོའི་ལྟེ་བ་ནས་ཐོན། བདག་ལྷར་གསལ་བའི་ལྟེ་བ་ནས་ཞུགས་ཐུགས་ཀའི་སྔགས་འཁོར་ལ་ཐིམ་པས། ལྷ་ཚོགས་རྣམས་དང་གཉིས་སུ་མེད་པའི་དངོས་གྲུབ་ཐོབ། ཡང་འཕྲོས་པས་ཕྱི་སྣོད་ཀྱི་འཇིག་རྟེན་ཁྱབ། འབྱུང་བཞི་རིན་ཆེན་སྨན་རྫས་ཚེ་རིང་ནད་གདོན་ཞི་བྱེད་ཀྱི་བཅུད་ཐམས་ཅད་བསྡུས། བདག་ལ་ཐིམ་པས་གཟི་བརྗིད་བཀྲག་མདངས་ཆེར་རྒྱས། ཡང་སྤྲོས་བཅུད་ཀྱི་སེམས་ཅན་ཐམས་ཅད་ལ་ཕོགལས་ཉོན་རྣམ་སྨིན་གྱི་སྒྲིབ་པ་སྦྱངས་ནས་ཐམས་ཅད་དཔལ་རྡོ་རྗེ་གཞོན་ནུའི་རང་བཞིན་དུ་གྱུར། ཡང་འཕྲོས་པས་ཕྱོགས་དུས་ཀྱི་རྒྱལ་བ་སྲས་དང་བཅས་པའི་སྐུ་གསུང་ཐུགས་ཀྱི་དངོས་གྲུབ་ཐམས་ཅད་ཡི་གེ་འབྲུ་གསུམ་གྱི་རྣམ་པར་བསྡུས་པས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་དང་བྱིན་རླབས་མ་ལུས་པ་ཐོབ་པར་མོས་ལ་བཟླས་པ་བྱའོ། །ལྔ་པ་དྲག་པོ་ཕྲིན་ལས་སྒྲོལ་བ་ལ་དམིགས་པའི་ཛབ྄་དགོངས་ནི། སྤྱི་ཙམ་དུ་ཐུགས་ཀ་ནས་སྔགས་ཀྱི་འོད་ཟེར་ལྗང་ནག་འཕྲོས་པས་བདེ་གཤེགས་རྒྱལ་བ་ཞི་ཁྲོའི་ཐུགས་རྒྱུད་བསྐུལ། མཐུ་སྟོབས་བྱིན་རླབས་ནུས་པ་ཐམས་ཅད་བསྡུས་ནས་བདག་ལ་ཐིམ་པས་བདག་ཉིད་ནུས་ལྡན་དུ་བྱས། དམ་ཅན་སྲུང་མ་རྣམས་ལ་ཕོག་པས་ལས་ལ་བསྐུལ། གཟས་པོ་རང་དབང་མེད་པར་བཀུག་ནས་ལིངྒ་ལ་བསྟིམ། ཁོའི་ཚེ་དང་ནུས་པ་ཐམས་ཅད་བདག་ལ་ཐིམ། སྲུང་མ་དམ་ཅན་གྱི་ཚོགས་རྣམས་བྱ་གཅན་ཤ་ལ་རུབ་པ་བཞིན་དུ་འདུས་ནས་བསྒྲལ་བར་བསམ་པ་སྟེ་ཞིབ་པར་སྤུ་གྲིའི་སྔགས་དྲུག་བཟླ་ཚུལ་སྨད་ལས་ཀྱི་སྒྲུབ་ཡིག་ལས་འབྱུང་བ་ལྟར་བྱ་བ་ཡིན་ལ། འདི་གཉིས་ནི་གཙོ་བོར་འཕྲོ་འདུ་ཕྲིན་ལས་ཀྱི་གཟེར་དུ་འདུ་བ་ཡིན་ཞིང་། གཞན་ཡང་ལས་ཚོགས་ཀྱི་གནད་ནི་དཔེར་ན་གསེར་ཞུན་མ་ལ་བཟོ་ཅི་བྱས་ཉན་པ་ལྟར། བསྙེན་སྒྲུབ་ཀྱི་མཚན་མ་ཐོན་ཕན་ཆད་ཤམ་བུ་ཅི་འདོད་དུ་བསྒྱུར་བས་འགྲུབ་སྟེ་ཞི་རྒྱས་དབང་དྲག གསོ་གསད་དབབ་བཅད། མནན་གཟིར་ཇག་ཆིང་། ཆོ་འཕྲུལ་སྲོག་ཐུན་སོགས་གང་འདོད་པའི་ཕྲིན་ལས་ཐུགས་ཀའི་འོད་ཟེར་གྱིས་སྒྲུབ་ཅིང་སྙིང་པོ་ལ་འདོད་གསོལ་སྦྱར་བས་འགྲུབ་པ་ཡིན་ལ། དམིགས་པ་ཕྱོགས་གཅིག་བྱས་པས་འགྲུབ་པའི་ངེས་པ་མེད་པས་འདོད་དགུར་བསྒྱུར་ཤེས་རིག་པས་འཕྲུལ་བ་གནད་དོ་གསུངས། བཟླ་བྱའི་སྔགས་ནི་སྲོག་སྔགས་འབྲུ་དགུ། ལས་སྔགས་འབྲུ་ལྔ། མཁའ་འགྲོའི་འཕྱོང་སྔགས་འབྲུ་གསུམ་བཅས་ཡི་གེ་བཅུ་བདུན་མ་ཡིན་ལ། བསྙེན་སྒྲུབ་ཆིག་ཆོད་ལ་དྲག་སྔགས་འདུས་པ་ཡི་གེ་བདུན་ཅུ་རྩ་དྲུག་པ་ཉིད་བསྙེན་སྔགས་དང་སྦྲེལ་ནས་བཟླ་བར་གསུངས་སོ། །དེ་ལྟར་བཟླ་བའི་ཚེ་སྐྱོན་དྲུག་སྤོང་དགོས་ཏེ། སྒྲ་མྱུར་ཆེས་ན་འབྲུ་འདྲེས་པའི་སྐྱོན། བུལ་ཆེས་ན་བྱེར་བའི་སྐྱོན། སྒྲ་དྲག་ཆེས་ན་ཕོག་ཐུག་འོང་ཞིང་བྱིན་རླབས་འགྱང་། སྒྲ་ཞན་ཆེས་ན་ནུས་པ་མི་ཐོན། བྱིང་རྨུགས་སུ་སོང་ན་སྒྲ་མི་དག རྒོད་ན་གཡེངས་ཤིང་སེམས་འཕྲོས་པས་ཏིང་ངེ་འཛིན་མི་གསལ་བའི་སྐྱོན་འབྱུང་། གཞན་ཡང་མི་ཚིག་གིས་བར་མ་ཆོད་པར་བྱ། ཇི་ལྟར་བཟླ་ན། གསལ་བར་བཟླ་སྟེ་སྒྲ་མ་འདྲེས་མ་ཕྲལ་བར་མ་ཆད་པར་བཟླ། དག་པར་བཟླ་སྟེ་སྔགས་ཆད་ལྷག་མེད་པར་ཟུར་ཕྱིན་པར་བཟླ། བརྩོན་པར་བཟླ་སྟེ་རྒྱུན་མི་ཆད་པར་ཆུ་བོའི་གཞུང་བཞིན་དུ་བཟླའོ། །གྲངས་ཀྱི་ཚད་ནི་སྤྱིར་བདུན་འབུ མ་ཉི་ཁྲི་ཞེས་འབྱུང་ལ། བྱེ་བྲག་ཏུ་ཕུར་པའི་སྤྱི་སྡོམ་ཇོ་མོའི་ཞུས་ལེན་དུ། སྙིང་པོ་ཡིག་འབྲུ་བཅོ་ལྔ་མན་ཆད་ལ་འབྲུ་འབུམ་དང་། སུམ་ཅུ་ཚུར་བཅད་ལ་སུམ་འབུམ། དེ་ཕར་བཅད་ལ་ཁྲི་གཅིག་གིས་རྫོགས་པ་དང་། དབང་པོ་དང་སྦྱར་ན། རབ་བདུན་འབུམ་ཉི་ཁྲི། འབྲིང་བྱེ་བ་ཆིག་འབུམ། ཐ་མ་བྱེ་བ་ལྔ་དང་འབུམ་དང་། བསྟན་པའི་དུས་དང་སྦྱར་ན་རྩོད་པའི་དུས་འདིར་བྱེ་བ་ཕྲག་གསུམ་འབུམ་ཕྲག་བཞིའི་བསྙེན་པ་རྫོགས་པའོ། །མཚན་མའི་བསྙེན་པ་ནི་མཚན་མ་ནམ་ཐོན་པ་ན་དུས་གྲངས་ཚད་དུ་མ་འཁྱོལ་ཡང་སྐྱོན་མེད་དེ། ཞག་གཅིག་ལ་མཚན་མ་མཐོང་ཡང་བསྙེན་པ་རྫོགས་པའོ། །མཚན་རྟགས་ནི་སྐུ་གསུང་ཐུགས་ཀྱི་རྟགས་བདུན་ཚན་གསུམ་སྟེ། སྐུའི་གྲུབ་རྟགས་སུ། ཕུར་པ་འགུལ་བ། འཕར་བ། ལྡིང་བ། མེ་སྟག་འབྱུང་བ། འོད་འབྱུང་བ། དུ་བ་འབྱུང་བ། བཞད་པ་དང་བདུན་ནོ། །གསུང་གི་གྲུབ་རྟགས་སུ་ཕུར་པ་ལ་སྒྲ་སྙན་པ། སྔགས་ཀྱི་སྒྲ། གནམ་ལྕགས་ཀྱི་སྒྲ། འབྲུག་གི་སྒྲ། རྔ་ཡི་སྒྲ། ལྕེ་སྤྱང་གི་སྒྲ། སྲིན་པོའི་ངུར་སྒྲ་དང་བདུན་ནོ། །ཐུགས་ཀྱི་གྲུབ་རྟགས་སུ་ཏིང་ངེ་འཛིན་ལས་སུ་རུང་བ། ལས་བཞི་གྲུབ་པ། ཚེ་ལ་དབང་བ། རིགས་ལྔ་མངོན་དུ་གྱུར་པ། ལྷ་རྣམས་གསལ་བ། སྲུང་མ་རྣམས་བྲན་བཞིན་ལས་བྱེད་པ། རྟོགས་པ་འཆར་བའོ། །མ་གྲུབ་ན་སྤོག་པའི་ཆོ་ག་ནི། སྔོན་དུ་དམ་ཚིག་ཉམས་ཆག་བཤགས། བསྐང་བ་རྒྱ་ཆེན་པོ་བྱ། བསོད་ནམས་ཀྱི་དཔུང་བསྐྱེད། སྔར་གྱི་རྟེན་རྫས་རྣམས་ལ་ཁྲུས་དང་བླ་མ་མཚན་ལྡན་གྱི་རབ་གནས་བྱ། བརྩོན་འགྲུས་དྲག་པོས་སྒྲུབ་པ་ལན་གསུམ་མམ་བདུན་བར་དུ་སྤོག་པས་འགྲུབ། ཡང་བསྙེན་སྒྲུབ་མཚན་མ་ཐོན་ཡང་ལས་སྦྱོར་དགྲ་རྟགས་མ་ཐོན་ན་དམ་ཅན་དགོས་སྒྲུབ་མཚོན་ཐུང་གིས་སྤོག་པར་བྱའོ། །གསུངས་པ་རྣམས་ཀྱི་དོན་ཡང་ཡིད་ལ་ངེས་པར་བྱ་ཞིང་བདག་དོན་སྒྲུབ་གཞུང་ལས་གསུངས་པའི་སྤང་བླང་གི་གནད་རྣམས་ནི་བསྙེན་ཡིག་ལས་གསལ་བ་བཞིན་ནོ། །གསུམ་པ་རྗེས་ནི། རྗེས་ཚོགས་བསྐུལ་ལྷག་སྨོན་ལམ་གསོལ། །གཏོར་བཏང་དལ་བསྡུ་རྒྱུན་ཏིང་བྱའོ། །ཞེས་པ་ལྟར་བརྒྱད་ལས། དང་པོ་ཚོགས་མཆོད་ལ། སྤྱིར་ཚོགས་ལ་ཚོགས་པ་གསུམ། བསགས་པ་གསུམ། བསང་བ་གསུམ། སྦྱང་བ་གསུམ། བརླབ་པ་གསུམ། བསྐྱེད་པ་གསུམ། ཡུལ་གསུམ། དམ་ཚིག་གསུམ་རྣམས་སུ་ཕུར་པ་བཀའ་མའི་འགྲེལ་ཆེན་ལས་གསུངས་ཏེ། ཚོགས་པ་གསུམ་ནི། དགའ་ལྡན་ལྷ་ཡི་ཚོགས་གསང་སྔགས་ནང་གི་ལྷ་མཐུན་པ། དགྱེས་ལྡན་མི་ཡི་ཚོགས་དམ་ཚིག་རྩ་བ་གཅིག་པ། འབྱོར་ལྡན་ཡོ་བྱད་ཀྱི་ཚོགས་བཟང་ལ་གྱ་ནོམ་པའོ། །གསོག་པ་གསུམ་ནི་གནས་དུར་ཁྲོད་ལྟ་བུའི་ཚོགས་ཁང་དུ། གྲུབ་པ་ཐོབ་པའི་བླ་མ། ལྷ་གྲངས་དང་མཉམ་པའི་རྣལ་འབྱོར་ཕོ་མོ། འདོད་ཡོན་ལྔའི་ལོངས་སྤྱོད་ཚང་བར་གསོག་པའོ། །བསང་བ་གསུམ་ནི། བདག་ཉིད་ཀྱི་ཉེས་སྐྱོན། མཆེད་ལྕམ་གྱི་ཉམས་གྲིབ། ཚོགས་ཀྱི་མ་དག་པ་བསང་བའོ། །སྦྱང་བ་གསུམ་ནི། རཾ་ཡཾ་ཁཾ་ལས་མེ་ཆུ་རླུང་བྱུང་སྟེ་དམེ་བཙོག་སྦྱང་བའོ། །བརླབ་པ་གསུམ་ནི། འབྲུ་གསུམ་གྱིས་བདུད་རྩིའི་རང་བཞིན་དུ་བརླབ་པའོ། བསྐྱེད་པ་གསུམ་ནི། མཆོད་པའི་དུས་སུ་འདོད་ཡོན་ལྔ། བཤགས་པའི་དུས་སུ་ཡེ་ཤེས་ལྔ། བསྟབ་པའི་དུས་སུ་དགྲ་བགེགས་ཀྱི་ཤ་ཁྲག་ཏུ་བསྐྱེད་པའོ། །ཡུལ་གསུམ་ནི། བླ་མ་ཡི་དམ་མཁའ་འགྲོ་ལ་འབུལ་བའོ། །དམ་ཚིག་གསུམ་ལ་གསུམ་ཚན་བཞི་ལས། མི་བྱ་བ་གསུམ་ནི། རང་སེམས་འཁྲུགས་པའི་རྩོད་པ། གཟུང་འཛིན་སྐྱེ་བའི་འཁྲུལ་གཏམ། ཐེག་པ་འོག་མའི་འབགས་བརྩོག་གི་རྟོག་པ་མི་བྱ་བའོ། །མི་སྨྲ་བ་གསུམ་ནི། ཚོགས་རྫས་གཞན་ལ་ཆེ་སྟེ་བདག་ལ་ཆུང་། ན་ནིང་བཟང་སྟེ་ད་ལོ་ངན། ཁ་སང་མང་སྟེ་དེ་རིང་ཉུང་ཞེས་མི་སྨྲའོ། །མི་བསམ་པ་གསུམ་ནི། ཚོགས་རྫས་ཀྱི་དངོས་པོ་མཐོང་བའི་ཚེ། བཟའ་སྙམ་བཏུང་སྙམ་ཞིམ་སྙམ་དུ་མི་བསམ་པའོ། །མི་འབྲལ་བ་གསུམ་ནི། ལུས་ལྷ་ངག་སྔགས་སེམས་ཏིང་ངེ་འཛིན་དང་མི་འབྲལ་བར་བྱའོ། །དེ་ལྟར་ངེས་པར་བྱས་ནས་ལག་ལེན་དངོས་ལ་བྱིན་རླབས་སྤྱན་འདྲེན་མཆོད་པ་གསུམ་ལས། དང་པོ་བྱིན་གྱིས་བརླབ་པ་ནི། དམ་རྫས་སུ་འོས་པའི་ཡོ་བྱད་ཅི་འབྱོར་བཤམས་པ་བདུད་རྩིས་བྲན་ལ་སྔགས་ཀྱིས་སྤྱིར་བསང་། བྱེ་བྲག་ཏུ་བྷྲུྃ་ལས་ཚོགས་གཞོང་རིན་པོ་ཆེའི་མཆོད་སྡོང་འདབ་མ་སྟོང་ལྡན་གྱི་སྙིང་པོར། ཚོགས་རྫས་རྣམས་མ་ལས་ཉི་མ་ཨ་ལས་ཟླ་བ་པྃ་ལས་པདྨའི་དཀྱིལ་འཁོར་ལ་གནས་བའི་སྒྱུ་མ་ལྟ་བུའི་ཏིང་ངེ་འཛིན་གྱི་ངོ་བོ་ཧཱུྃ་མཐིང་ནག དེ་ལས་རྃ་ཡྃཁྃ་བྱུང་ཡེ་ཤེས་ཀྱི་མེ་རླུང་ཆུས་མ་དག་པའི་དངོས་པོ་ཐམས་ཅད་བསྲེགས་གཏོར་བཀྲུས། སླར་ཡང་ས་བོན་ལྔ་འཕྲོས་པས་རིགས་ལྔ་ཡབ་ཡུམ་གྱི་དམ་ཚིག་ཆེན་པོའི་རང་བཞིན་འདོད་ཡོན་གྱི་རྣམ་པ་ཅིར་ཡང་འཆར་བར་མོས་པའོ། །གཉིས་པ་ཚོགས་ཞིང་སྤྱན་འདྲེན་པ་ནི། དགོས་པ་གང་གི་ཕྱིར་ན། སྲིད་གསུམ་གྱི་སེམས་ཅན་ཐམས་ཅད་རྡོ་རྗེ་ཕུར་བུར་སྒྲུབ་པ་དང་དབང་དང་དངོས་གྲུབ་བླང་བའི་ཕྱིར་ཏེ། དབང་གང་ལེན་ན་རིག་པ་རྩལ་གྱི་དབང་། ཁམས་གསུམ་སྒྲོལ་བའི་དབང་། དྲག་པོ་ལས་ཀྱི་དབང་རྣམས་དང་། དངོས་གྲུབ་གང་ལེན་ན་རབ་སངས་རྒྱས། འབྲིང་རིག་འཛིན། ཐ་མ་མིག་སྨན་སོགས་ཏེ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་དོ། །གང་དུ་སྤྱན་འདྲེན་ན་ཞལ་ཟས་ཚོགས་ཀྱི་དགའ་སྟོན་ལ། གང་སྤྱན་འདྲེན་ན་སྤྱིར་ཁྲོ་བོ་ལ་མུ་བཞི་ཡོད་པ་ལས་འདིར་ཡེ་ཤེས་ཀྱང་ཡིན་ལ་ཁྲོ་བོ་ཡང་ཡིན་པའི་དཔལ་ཆེན་རྡོ་རྗེ་གཞོན་ནུའི་ཚོགས་སོ། །དེ་ལྟར་སྤྱན་དྲངས་པས་རྩ་བ་གསུམ་གྱི་ལྷ་ཚོགས་རྣམས་ནམ་མཁར་བྱོན་པར་བསམ་མོ། །གསུམ་པ་མཆོད་པ་ལ། སྤྱིར་མཆོད་པ་ནི། འབྱུང་བ་ཆེན་པོ་ནམ་མཁའ་ལས་ཐམས་ཅད་འབྱུང་བ་ལྟར། ཏིང་ངེ་འཛིན་ནམ་མཁའི་མཛོད་ལས་འདོད་ཡོན་ལོངས་སྤྱོད་འཛད་པ་མེད་པའི་སྤྲིན་བཀོད་པ་སྟེ། དེ་ཡང་གཟུགས་རྡོ་རྗེ་མ་མེ་ལོང་འཛིན་པ། སྒྲ་རྡོ་རྗེ་མ་པི་ཝཾ་ལེན་པ། དྲི་རྡོ་རྗེ་མ་སྤོས་སྤྲིན་སྤྲོ་བ། རོ་རྡོ་རྗེ་མ་ཞལ་ཟས་ཐོགས་པ། རེག་རྡོ་རྗེ་མ་ན་བཟའ་འཛིན་པ། ཆོས་རྡོ་རྗེ་མ་རྡོ་རྗེ་འཛིན་པའམ་ཆོས་འབྱུང་གི་ཕྱག་རྒྱ་ཅན་དཔག་ཏུ་མེད་པར་སྤྲུལ་ནས་འབུལ་བའོ། །དེ་ནས་ཚོགས་རྫས་ཐུན་མོང་དུ་བཏེགས་ཏེ། བླ་ན་མེད་པའི་མཆོད་པ་དམ་རྫས་ཡེ་ཤེས་ལྔ་ཡི་དངོས་པོ་འདོད་པའི་ཡོན་ཏན་ལྔ་དང་ལྡན་པར་སྤྲུལ་ཏེ་རྩ་བ་གསུམ་གྱི་ལྷ་ཚོགས་ལ་འབུལ་ཞིང་། སྤྲོ་ན་བསྐང་བའི་ལས་རིམ་གསུམ་ཡང་བྱ་སྟེ། མཆེད་ལྕ མ་རྣམས་ཀྱིས། བདུད་རྩི་གཏོར་མ། རཀྟ་མར་མེ། ཛ་གད་མཾ་ས། ཚེ་ཟླ་རྒྱས། བམ་གཙང་མའི་རྫས། གསུར་ཆེན། བཟའ་བཅའ་སྣ་ཚོགས་པ་ཐོགས་ནས་རོལ་མོ་དང་སྙན་པའི་དབྱངས་ཀྱིས་མཚན་དོན་ནས་བསྐང་བ་དང་བསྐང་རྫས་བསྔོ་བ་བཟློག་པའི་ཕྲིན་ལས་གསོལ་བ་རྣམས་གཞུང་བཞིན་དུ་བྱའོ། །དེ་ནས་བྱེ་བྲག་ཏུ་མཆོད་པ་ལ། མཆོད་བཤགས་བསྒྲལ་སྟོབ་གསུམ་སྟེ། ཚོགས་ཕུད་རིམ་པ་གསུམ་དུ་སྤྲོས་ལ། དང་པོ་མཆོད་པ་ནི། དམ་ཚིག་ཆེན་པོས་གཙོ་བོ་དང་། སྤྲུལ་པ་ཆེན་པོས་ཁྲོ་བཅུ་ཡབ་ཡུམ། ཕྱག་བརྙན་ཆེན་པོས་ཁྲ་ཐབས་ཉི་ཤུ་དང་སྒོ་སྐྱོང་། ཤྭ་ན་མུ་ཁས་གདོང་ཅན་བཞི། བདག་ཉིད་ཆེན་མོས་རེ་མ་ཏི་མཆེད་བཞི། ས་བདག་ཆེན་མོས་བསེ་མོ་མཆེད་བཞི་མིང་པོར་བཅས་གཙོ་འཁོར་བཀའ་སྡོད་བཅས་ཀྱི་ཐུགས་དམ་གྱི་རྒྱུད་བསྐུལ་ནས་ཚོགས་རྫས་འདོད་ཡོན་ལྔ་ཡི་རང་བཞིན་དུ་དམིགས་ནས་ཕུལ་བས་ཐུགས་མཉེས་པར་བསམ་ལ་ཕུལ་ལོ། །བར་པ་བཤགས་པ་ནི། ཡེ་ཤེས་ཀྱི་ལྷ་ལ་བཟང་ངན་གྱི་མཚན་རྟོག་མི་མངའ་ནའང་། དེའི་བཀའ་འཁོར་ན་གནས་པའི་ལྷ་མ་སྲིན་སྡེ་བརྒྱད་དང་མཁའ་འགྲོའི་ཚོགས་རྣམས་ཀྱིས་བཀའ་ཡི་གཉེར་འཛིན་ཅིང་དམ་ཚིག་གི་རྗེས་གཅོད་པས་སྒྲུབ་པ་པོ་རྣམས་ཀྱི་གསང་མཚམས་འདྲལ་བ་དང་། སེམས་ཀྱི་ཀུན་རྟོག་ཕྲ་མོ་ཙམ་གྱི་སྐྱོན་མཐོང་ཡང་བཀའ་ཡི་ཆད་པ་འབེབ་ཅིང་དངོས་གྲུབ་གྱི་བར་ཆད་དུ་འགྱུར་བས་ན། བདག་ཅག་མ་རིག་པ་དང་མ་གུས་པ་དང་སྒོ་གསུམ་བག་མེད་པར་གྱུར་པ་དང་། འདོད་ཁྲོ་གཏི་མུག་སྟེ་ཉོན་མོངས་པ་མང་བའི་སྐྱོན་གྱི་དབང་གིས། རྩ་བ་དང་ཡན་ལག་གི་དམ་ཚིག་དང་འགལ་བའི་ནོངས་པ་མ་ལུས་པ་སྙིང་ནས་འགྱོད་པས་བཤགས་ཤིང་། ཚོགས་རྫས་ཟག་མེད་ཡེ་ཤེས་ལྔ་ཡི་རང་བཞིན་དུ་སྤྲུལ་ནས་མཆོད་ཅིང་ཐུགས་དམ་གཉེན་པོ་བསྐང་ལགས་ན་ཉེས་ལྟུང་བ སྒྲིབ་པའི་ཚོགས་བྱང་ཞིང་དག་ནས་དབང་དང་དངོས་གྲུབ་མ་ལུས་པ་སྩོལ་བར་མཛོད་ཅིག ཅེས་ཕུལ་བས་ཉམས་ཆག་བྱང་བར་མོས་པའོ། །ཐ་མ་བསྒྲལ་བ་ནི། སྤྱིར་སྒྲོལ་བ་ལ། གང་བསྒྲལ་བའི་ཡུལ། གང་གིས་སྒྲོལ་བྱེད་སློབ་དཔོན། ཚུལ་ཇི་ལྟར་བསྒྲལ་བའི་ཐབས། མ་བསྒྲལ་པའི་ཉེས་དམིགས། བསྒྲལ་པའི་ཕན་ཡོན། དེ་ལྟར་བསྒྲལ་པའི་དགོས་པའམ་འབྲས་བུ་བཅས་ཞིབ་པར་ཤེས་པ་གལ་ཆེ་མོད། འདིར་ཡི་གེས་འཇིགས་ལ་ཞིབ་པར་ཕུར་འགྲེལ་འབུམ་ནག་ཆེན་མོ་དང་། བདག་གི་བླ་མས་མཛད་པའི་ཕུར་པ་རྩ་དུམ་གྱི་འགྲེལ་པ་དཔལ་ཆེན་དགྱེས་པའི་ཞལ་ལུང་སོགས་ལས་ཤེས་པར་བྱ་དགོས་ཤིང་། ཐུན་མིན་གབ་པའི་སྔགས་དྲུག་སྤུ་གྲིའི་དགོངས་པས་བསྒྲལ་ཚུལ་ནི་རྩ་བའི་ཡི་གེ་དང་རྗེ་གཏེར་ཆེན་བླ་མས་མཛད་པའི་མན་ངག་རྡོ་རྗེའི་མེ་ཆར་ལ་གོམས་ཤིང་འདྲིས་པར་བྱ་བ་གལ་ཆེ་སྟེ་གསང་སྔགས་ཀྱི་སྤྱོད་པ་རྨད་དུ་བྱུང་བའི་ཕྱིར་རོ། །དེ་ལྟར་ངེས་པར་བྱས་ནས། འདིར་ལས་བྱང་གཞུང་གི་ཚིག་དོན་ཙམ་ཞིག་འགྲེལ་ན། བྲུབ་ཁུང་དུ་ལིངྒ་བཅས་ལ། སྔགས་བརྗོད་པའི་རྐྱེན་གྱིས། རང་ཉིད་དཔལ་ཆེན་པོ་དངོས་སུ་གསལ་བའི་ཐུགས་ཀའི་ཧཱུྃ་ལས་འོད་ཟེར་ལྗང་ནག་བ་ཐག་གཟིང་བ་ལྟ་བུ་ཕྱོགས་བཅུར་སྤྲོས་པའི་རྩེ་ལས་སྲས་མཆོག་ལྟ་བུ་ཁྲོ་བོའི་སྤྲུལ་པ་དཔག་ཏུ་མེད་པ་འཕྲོས་པས་སྟོང་གསུམ་ཐམས་ཅད་གང་། དངོས་སྣང་སྐུ། སྒྲ་གྲགས་གསུང་། རྟོག་ཚོགས་ཐུགས་སྒྲོལ་བྱེད་དུ་གསལ་བས་བདེ་གཤེགས་རྣམས་ཀྱི་ཐུགས་དམ་བསྐང་། སྲུང་མ་དམ་ཅན་རྣམས་ཀྱི་སྲོག་བཅུད་ལ་དབབ་ནས་སྒྲོལ་བའི་ལས་ལ་བཙུད། རིག་འཛིན་རྣལ་འབྱོར་གྱི་དབང་ཕྱུག་རྣམས་ཀྱི་ཚད་མེད་སྙིང་རྗེ་ཆེན་པོས་གདུལ་བྱ་དབྱིངས་སུ་སྒྲོལ་བར་མཛད་པའི་གཡར་དམ་གཉེན་པོ་རྗེས་སུ་བསྐུལ་ནས། རིགས་དྲུག་བླ་མེད་ཀྱི་གནས་སུ་བསྒྲལ། ཁྱད་པར་བསྒྲལ་བྱའི་གནས་སུ་འཕྲོས། རང་དབང་མེད་པར་བཀུག་སྟེ་གཟུགས་ལིངྒ་ལ་བསྟིམ། འོད་ཟེར་ཚུར་འདུས་རང་དང་གདབ་ཕུར་ལ་ཐིམ་པས་ཕུར་པའི་སྟོད་ནས་བྱིན་རླབས་ཀྱི་འབྲུག་ལྡིར། སྐེད་པ་ནས་ཡེ་ཤེས་ཀྱི་གློག་འཁྱུག དབལ་རྩེ་ནས་ནུས་མཐུའི་ཐོག་ཆེན་འཕྲོ་བ་གཟི་བརྗིད་དང་ནུས་སྟོབས་དཔག་ཏུ་མེད་པར་བསམ་ལ་བདེན་སྟོབས་བརྗོད་ཅིང་དགུག་གཞུག་སྤྱི་ལྟར་བྱས་ནས། ཕོ་ཉ་བསྐུལ་བ་ནི། གདུག་པ་ཅན་གྱི་ཚོགས་རྣམས་དྲག་ཤུལ་སྙིང་རྗེ་ཆེན་པོས་དབྱིངས་སུ་སྒྲོལ་བར་མཛད་པའི་དམ་ཚིག་སྟོང་ཉིད་སྙིང་རྗེ་དབྱེར་མེད་མི་ཕྱེད་པའི་དཔལ་ཆེན་པོ་རྡོ་རྗེ་གཞོན་ནུ་ཉིད། སྔོན་རུ་ཏྲ་བསྒྲལ་པའི་དུས་སུ་སངས་རྒྱས་ཐམས་ཅད་ཀྱི་མཐུ་སྟོབས་གཅིག་ཏུ་བསྡུས་ནས་ཕྲིན་ལས་ཀྱི་སྲས་སུ་དབང་བསྐུར་ཞིང་གདུག་པ་ཅན་གྱི་ཚོགས་རྣམས་དྲག་པོ་མངོན་སྤྱོད་ཀྱིས་གདུལ་བར་མཛད་པའི་ཐུགས་དམ་ཟབ་མོ་རྗེས་སུ་དགོངས་ཏེ་དེང་འདིར་བདག་ཅག་རྣལ་འབྱོར་པ་སྒྲུབ་པ་པོ་རྣམས་ཀྱི་བྱང་ཆུབ་སྒྲུབ་པ་ལ་བར་དུ་གཅོད་པའི་ཕྱི་ནང་གི་རྐྱེན་དགྲ་བགེགས་དམ་སྲིའི་ཚོགས་རྣམས་མངོན་སྤྱོད་དྲག་པོའི་ཕྲིན་ལས་ཀྱིས་སྒྲོལ་བའི་དུས་ལ་བབ་པོ་ཞེས་གཙོ་བོའི་ཐུགས་དམ་བསྐུལ་བ་སྟེ། ཚིག་ཕྱི་མ་དེ་ལྟར་ཤེས་པར་བྱས་ནས། གཙོ་བོའི་ཐུགས་ལས་སྤྲུལ་པ་དབང་བཅུ་དང་སྟོབས་བཅུའི་བདག་ཉིད་ཁྲོ་རྒྱལ་ཆེན་པོ་ཡབ་ཡུམ་བཅུའི། སྔོན་གྱི་དུས་དེར་ཕྱོགས་བཅུའི་དམ་སྲི་ཆེན་པོ་བཅུ་ཇི་ལྟར་འདུལ་བར་མཛད་པའི་དམ་ཚིག་གི་གནས་ལ་བསྐུལ་བ་དང་། གཙོ་བོ་ཡབ་ཡུམ་གྱི་ཐུགས་རྗེའི་ཆོ་འཕྲུལ་ཁྲོ་རྒྱལ་ཡབ་ཡུམ་བཅུའི་ཡང་སྤྲུལ་ཕྱག་བརྙན་ཏེ་ལས་ལ་མངགས་པའི་ཕོ་ཉ་ཆེན་པོ་ཁྲ་ཐབས་ཉི་ཤུ་སྒོ་མར་བཅས་པས་སྔོན་དམ་སྲིའི་ཡང་སྤྲུལ་གདུག་པ་ཅན་རྣམས་ཇི་ལྟར་བཏུལ་བའི་ཐ་ཚིག་གཉེན་པོ་བསྐུལ་བ་དང་། ཤྭ་ན་སྤྱང་ཀི་དང་མུ་ཁ་གདོང་ལ་འཇུག་པས་གཙོ་མོའི་ཞལ་དང་བཞོན་པའི་མིང་གིས་བསྟན་པའི་ཕུར་སྲུང་གདོང་མོ་བཞི་དང་། ཁམས་གསུམ་གྱི་སྲོག་གི་བདག་མོ་ཡིན་པས་བདག་ཉིད་ཆེན་མོ་སྟེ་རེ་མ་ཏི་མཆེད་བཞི་དང་། ཡུལ་སོ་སོ་ན་མཐུ་དང་དབང་ཆེ་བས་ས་བདག་ཆེན་མོ་སྟེ་བསེ་མོ་བཞི་བཅས་ཕུར་སྲུང་དབང་མོ་རྣམས་ཀྱིས་དཔལ་ཆེན་པོ་དང་རིག་འཛིན་བརྒྱུད་པའི་སྤྱན་སྔར་ཇི་ལྟར་ཞལ་གྱིས་བཞེས་ཤིང་དམ་བཅས་པ་རྗེས་སུ་དགོངས་ཤིང་ལས་སྒྲུབ་པའི་དུས་ལ་བབ་པ་ཡིན་ལ། གཞན་ཡང་དེ་དག་གི་མིང་པོའི་ཚོགས་དང་མ་སྲིང་དབང་ཕྱུག་སོགས་བཀའ་སྡོད་སྤྲུལ་པར་བཅས་པ་ཁྱེད་རྣམས་ཀྱིས་ཇི་ལྟར་ཁས་བླངས་པ་བཞིན་དུ་དྲག་པོ་མངོན་སྤྱོད་ཀྱི་ཕྲིན་ལས་མྱུར་དུ་སྒྲུབ་པའི་དུས་ལ་བབ་ཅིང་། རང་རང་གི་མཐུ་རྩལ་རྨད་དུ་བྱུང་བ་གནམ་ལྕགས་ཀྱི་ཐོག་རྒོད་ལྟ་བུ་དེ་མངོན་སུམ་དུ་འབྱུང་བའི་དུས་ལ་བབ་བོ། །ཞེས་བསྐུལ་བས་ཀུན་ཀྱང་སྒྲོལ་བའི་ལས་མཛད་པར་བསམ་མོ། །དེ་ལྟར་བསྐུལ་ནས་གང་ཞིག་སྒྲོལ་ན། ཀུན་རྫོབ་དང་དོན་དམ་པས་བསྡུས་པའི་བླ་ན་མེད་པའི་བྱང་ཆུབ་ཀྱི་སེམས་སྟོང་ཉིད་སྙིང་རྗེའི་རང་བཞིན་མཆོག་ཏུ་བསྐྱེད་ཅིང་། དུས་གསུམ་གྱི་རྒྱལ་བའི་གདུང་འཚོབ་པར་དམ་དུ་བཅས་པའི་རིག་པ་འཛིན་པ་བདག་ཅག་དཔོན་སློབ་རྣམས་ལ་ནི་དངོས་སུ་བར་དུ་གཅོད་པར་བྱེད་པ་དང་། ཁྱད་པར་ཉམས་པ་བདུན་དང་ལྡན་པ་དང་། ཞིང་བཅུ་ཚང་བ་སྟེ་ཉམས་པ་བདུན་ནི། ཕུར་པ་མྱང་འདས་ཀྱི་རྒྱུད་ལས། སྲོག་དོན་བཀའ་དམ་ལས་ཀྱིས་ཉམས། །མཚན་མས་ཉམས་པར་གྱུར་པ་དང་། །འདོད་པར་གྱུར་པས་ཉམས་དང་བདུན། །བསྒྲལ་བའི་དམིགས་ཀྱི་དམ་པར་བཤད། །ཅེས་མདོར་བསྟན་དང་རྒྱས་བཤད་ཀྱིས་གསུངས་པ་ལྟར་ཕ་མ་མཁན་སློབ་གསོད་ཅིང་རྡོ་རྗེའི་ནང་དམེ་བྱེད་པ་སོགས་མཚམས་མེད་ཀྱི་སྒོར་ཞུགས་པ་སྲོག་ལས་ཉམས་པ་དང་། སློབ་དཔོན་གྱི་བཀའ་བསླུ་ཞིང་ངན་སེམས་དཔྱ་སེམས་ཀྱི་གསང་བའི་མན་ངག་སྤེལ་ཞིང་སྔགས་དང་ཕྱག་རྒྱ་རྒྱུན་གཅོད་པ་དོན་ལས་ཉམས་པ་དང་། མན་ངག་ཟབ་མོ་རྐུ་ཞིང་སྔགས་སྤྱོད་རྣལ་འབྱོར་པ་རྣམས་ལ་འཁུ་ཞིང་མཚང་འབྲུ་ཡ་ག་སྒྲོགས་པ་དང་། བཀའ་ལ་སྐུར་བ་འདེབས་ཤིང་འཁོར་རྣམས་ལོག་པར་འཁྲིད་ཅིང་ཕྱིན་ཅི་ལོག་ཏུ་འཛིན་པ་བཀའ་ལས་ཉམས་པ་དང་། རྡོ་རྗེ་སློབ་དཔོན་གྱི་དམ་ལས་འགལ་ཞིང་ལྟ་སྤྱོད་ཕྱིན་ཅི་ལོག་ཏུ་ཞེན་པས་མི་རུང་བའི་སྤྱོད་ངན་འབའ་ཞིག་དང་དུ་ལེན་པ་སོགས། དམ་ཚིག་ཉམས་པའི་སྐྱོན་ཆགས་པ་དམ་ལས་ཉམས་པ། སྔོན་ཆད་འཁོན་གཞི་མེད་ཅིང་རང་གིས་ཉེས་པར་མ་བྱས་ཀྱང་བདག་ལ་བརྒོལ་ཞིང་མཐུ་རྩལ་གྱིས་འདེབས་པར་བྱེད་པ་ལས་ཉམས་པ། གཉིས་མེད་ཀྱི་དོན་ལ་ཕྱོགས་ཆ། སྒྲོ་སྐུར་གཉིས་ཀྱིས་རས་ཆོད། སྐྱེ་མེད་ཀྱི་ཆོས་ལ་མཚན་མར་འཛིན་པ་སོགས་མཚན་མ་ལས་ཉམས་པ་དང་། མཐུ་རྩལ་ཆེ་བར་འདོད་པས་འཇིག་རྟེན་ལས་མ་འདས་པའི་ལྷ་འདྲེ་འབྱུང་པོ་གདུག་པ་ཅན་རྣམས་སྒྲུབ་ཅིང་སྤྱོད་ངན་དང་དུ་ལེན་པ་དང་། ཟས་ནོར་སོགས་ཀྱི་ཕྱིར་བཀའ་དང་གཞུང་ལུགས་སྨད་ནས་མི་འཚམ་པའི་ཐོ་ཅོའི་བརླང་སྤྱོད་ལ་ཞུགས་པ་སོགས་འདོད་པས་ཉམས་པ་སྟེ་བདུན་ནོ། །བསྒྲལ་བའི་ཞིང་བཅུ་ནི། ཁྲག་འཐུང་རྩ་བའི་རྒྱུད་ལས། སངས་རྒྱས་བསྟན་པ་བཤིག་པ་དང་། །དཀོན་མཆོག་དབུ་འཕང་སྨད་པ་དང་། །དགེ་འདུན་འདུ་བའི་སྒོ་འཕྲོག་དང་། །ཐེག་ཆེན་ཆོས་ལ་སྨོད་པ་དང་། །བླ་མའི་སྐུ་ལ་བསྡོ་བ་དང་། །རྡོ་རྗེའི་ནང་དབྱེན་བྱེད་པ་དང་། །སྒྲུབ་ལ་བར་ཆད་བྱེད་པ་དང་། །གང་ཞིག་དམ་ལས་ལོག་པ་དང་། །སྙིང་རྗེ་མེད་པའི་སྲིན་པོ་དང་། །མུ་སྟེགས་ལོག་ལྟར་གཏོང་བ་དང་། །སྒྲུབ་པ་པོ་ལ་དོ་བསྡོ་བ། །འདི་རྣམས་བསྒྲལ་བའི་ཞིང་བཅུ་ཡིན། །ཞེས་གསུངས་པ་དང་། གཞན་ཡང་དམ་ཚིག་གསལ་བཀྲ་སོགས་ནས་གསུངས་པ་ལྟ་བུ་སྟེ། མདོར་ན་བསྟན་པ་དང་སེམས་ཅན་ཡོངས་ལ་གནོད་ཅིང་གདུག་པ་ཅན་དུ་གྱུར་པའི་གཟུགས་ཅན་གྱི་དགྲ་དང་གཟུགས་མེད་ཀྱི་བགེགས་བདུད་དང་དམ་སྲི་བར་དུ་གཅོད་པའི་འབྱུང་པོའི་རིགས་སུ་གྱུར་པའི་ཚོགས་རྣམས། ཁྲོ་བོ་ཆེན་པོ་དཔལ་རྡོ་རྗེ་གཞོན་ནུ་སྲས་འཁོར་སྤྲུལ་པའི་བྱིན་རླབས་དང་བདེན་པའི་མཐུ་སྟོབས་ཀྱིས། ལས་བྱེད་ཕོ་ཉའི་ཚོགས་རྣམས་ཀྱིས་དམིགས་བྱ་དེ་དག་རང་དབང་མེད་པར་ཤ་ཁྱིས་རི་དྭགས་དེད་པ་བཞིན་དུ་སྐད་ཅིག་ཡུད་ཙམ་གྱིས་ནི་དམིགས་པའི་རྟེན་གཟུགས་ལིང་ག་འདི་ལ་བཀུག་ནས་མངོན་སྤྱོད་དྲག་པོའི་ཚུལ་གྱིས་བསྒྲལ་བ་དང་། རྣམ་ཤེས་དབྱིངས་སུ་སྤར་ཞིང་ལུས་ངག་རྡུལ་ཕྲན་བཞིན་དུ་བཤིག་ནས་ཀྱང་། ལས་ཉོན་རྣམ་སྨིན་གྱི་སྒྲིབ་པ་སྦྱང་བའི་ཕྱིར་དུ་ད་ལྟའི་རྟེན་འདི་ལ་སྡུག་བསྔལ་ཉམས་སུ་མྱོང་བས་སླན་ཆད་ཀྱི་སྡུག་བསྔལ་རྩ་བ་ཆད་ནས་ཞི་བའི་དབྱིངས་སུ་འགོད་པར་མཛོད་ཅིག་ཅེས་པ་ཏེ། དེ་ཡང་མཉམ་ཉིད་ཕྱོགས་ལྷུང་མེད་པའི་གནས་ལུགས་ཀྱི་ལྟ་བ་ཟབ་མོ་རྟོགས་ཤིང་ཡེངས་མེད་ཀྱི་སྒོམ་པའི་རྣལ་འབྱོར་མཐར་ཕྱིན་ནས་འཁོར་འདས་ཀྱི་སྟོང་སྲོག་ལ་དབང་བསྒྱུར་སྟེ། རྟོགས་པས་བདག་བསྒྲལ་ཞིང་། ཐུགས་རྗེས་གཞན་སྒྲོལ་བར་ནུས་པའི་གདེང་ཚད་དང་ལྡན་པའི་རྣལ་འབྱོར་པས། སྤྱིར་རང་འདོད་ཀྱི་འཁྲི་བ་དང་བྲལ་བས་བསྟན་པ་དང་སེམས་ཅན་ལ་ཕན་འདོད་ཀྱི་ལྷག་བསམ་དང་། ཁྱད་པར་གང་ལ་བྱ་བའི་ཡུལ་ལས་ངན་པའི་སེམས་ཅན་ཐབས་ཞི་བས་འདུལ་བར་མི་ནུས་པའི་རིགས་ཅན་ཤུགས་ཀྱིས་སྒྲོལ་བའི་ཕྲིན་ལས་ཀྱི་ཡུལ་དུ་གྱུར་པ་དེ་ཉིད་ལ། བུ་གཅིག་པའི་མ་ལྟར་ཤིན་ཏུ་བརྩེ་བས་རྣམ་སྨིན་ལས་ངན་གྱི་སྐྱེ་རྒྱུན་བཅད་ནས་འབྲས་བུ་ཁམས་གསུམ་འཁོར་བའི་གནས་ནས་གདོན་པའི་བསམ་པ་ཤས་མི་བཟོད་པ་ཉིད་རྣམ་པ་ཞེ་སྡང་གི་ཚུལ་དུ་ཤར་བས་དེ་ལྟར་དུ་ཕྲིན་ལས་བསྐུལ་ཞིང་ལས་སྦྱོར་གྱི་རིམ་པ་ལ་འཇུག་པ་ནི་ཐེག་པ་ཆེན་པོའི་ལམ་སྲོག་ཐབས་ལ་མཁས་པའི་སྒོ་རྨད་དུ་བྱུང་བ་མེད་ཀ་མེད་ཡིན་པས་དེ་ལྟར་དུ་ངེས་པར་བྱས་ནས་བསྒྲལ་བ་དངོས་ལ་འཇུག་པ་ལ། ཐོག་མར་ལོག་རྡུགས་འབྱམས་གསུམ་གྱིས་ཉེས་པ་མི་འབྱུང་བའི་ཕྱིར་དུ། བདག་དཔལ་ཆེན་པོ། ཕུར་པ་སྲས་མཆོག་ཡཀྴ་ཀྲོ་ངྷ། ལིང་ག་གནོད་བྱེད་ཀུན་འདུས་སམ་གཟས་པོ་དངོས་སུ་གསལ་བ་སྟེ། གསལ་བ་གསུམ་གྱི་དགོངས་པ་དང་ལྡན་པའི་ངང་ནས་སྔགས་བཟླ་བཞིན་དུ་ལུང་གསུམ་གྱི་དགོངས་པས་བསྒྲལ་བར་བྱ་བ་ཡིན་ཏེ། དེ་ཡང་སྔགས་ཀྱི་དོན་ནི། ༀ་ལྃ་ནི་ཐབས་ཀྱི་རང་བཞིན་ཡིད་དང་རྣམ་ཤེས་ཀྱི་སྒོ་ད གག་ཅིང་མ་རིག་པ་གནས་སུ་སྒྲོལ་བར་བྱེད་པ། ཧཱུྃ་ལྃ་ཤེས་རབ་ཀྱི་རང་བཞིན་ཉོན་མོངས་པ་ཅན་གྱི་ཡིད་དང་བག་ཆགས་རྩད་ནས་གཅོད་པར་བྱེད་པ། སྟྭྃ་བྷཱ་ཡ་ནཱན་ཐབས་ཤེས་གཉིས་ཀྱི་རང་བཞིན་ཀུན་གཞི་དང་བག་ཆགས་རྩད་ནས་གཅོད་པར་བྱེད་པ། མོ་ཧཱ་གྷ་ཏ་ཡ་ཉོན་མོངས་པ་ཡིད་ལུས་བཅས་པའི་ཕུང་པོ་རྡུལ་དུ་བཤིག་པས་འཁོར་བ་རྩད་བཅད་ནས་ཆོས་དབྱིངས་མཉམ་པ་ཉིད་ལ་འགོད་པའོ། །བྷ་ག་ཝཱན་བཅོམ་ལྡན་འདས་བདུད་ལས་རྒྱལ་བ། ཧྲཱིཿཥྚིཿཐབས་ཏེ་ཡབ། བི་ཀྲི་ཏ་ཤེས་རབ་སྟེ་ཡུམ། ཤྲཱི་བཛྲ་རྡོ་རྗེ་གཞོན་ནུ་ཡབ་ཡུམ་དང་། ཧཱུྃ་ཀ་ར་སྟེང་གི་ཁྲོ་བོས་ཐོག་དྲངས་པའི་ཁྲོ་རྒྱལ་ཡབ་ཡུམ་ཟ་གསོད་བཅས་བསྐུལ་བ། ཧཱུྃ་ཧཱུྃ་ལྷ་ཚོགས་ཁྱེད་རྣམས་ཀྱི་དགྲ་བགེགས་དབང་དུ་སྡུས་ཤིག་ཕཊ་ཕཊ་སྒྲོལ་ཅིག་སྒྲོལ་ཅིག བཛྲ་ཀཱི་ལི་ཀཱི་ལ་ཡ་ཕུར་པ་རྣམས་གསོ་ཞིང་གཟི་བྱིན་བསྐྱེད་པ། ཛཿལྕགས་ཀྱུས་ཟུངས། ཧཱུྃ་ཞགས་པས་ཆིངས། བྃ་ལྕགས་སྒྲོག་གིས་སྡོམ། ཧོཿ དྲིལ་བུས་རྡུལ་དུ་རློག སརྦ་བིགྷྣཱན་བག་ཆགས་ཐམས་ཅད་ཆོས་ཀྱི་དབྱིངས་སུ་སྦྱངས་ཤིག བཛྲ་ཀཱི་ལི་ཀཱི་ལ་ཡ་རྡོ་རྗེ་ཕུར་པས་སྲིད་པ་ཐམས་ཅད་སྒྲོལ་ཞིང་ཚར་ཆོད་ཅིག ཧཱུྃ་ཐམས་ཅད་དབང་དུ་སྡུས་ཤིག ཕཊ་རྡུལ་དུ་རློག་ཅིག བཛྲ་ཧཱུྃ་ཀཱ་ར་ཧཱུྃ་ཕཊ་ཚེ་ལུང་། ཧཱུྃ་ཀཱ་ར་ཧཱུྃ་ཨ་ཕཊ་ཁྲུས་ལུང་སྟ། ཨ་དཀར་བྱ་དཀར་གྱི་དགོངས་པར་གཏེར་གཞུང་རྩ་བའི་གསེར་མཆན་ལས་གསུངས་པ་བཞིན་འདིར་བཀོད་པ་ཡིན་ལ། རྒྱུད་འགྲེལ་སོགས་སུ་སྔགས་འདི་ལའང་མང་ཉུང་འདྲ་མིན་དང་ཚེ་ཁྲུས་ཀྱི་ལུང་སོ་སོར་སྦྱོར་ཚུལ་སོགས་མང་དུ་མཆིས་པས་བློ་ལྡན་རྣམས་ཀྱིས་དེ་དང་དེར་གཟིགས་ཤིག ལུང་གསུམ་ནི། ཁྲུས་ལུང་། ཚེ་ལུང་། གསོ་ལུང་སྟེ། དང་པོ་དག་བྱེད་ཁྲུས་ཀྱི་ལུང་ལ། བདག་རྩ་བ། ཕྱོགས་བཅུར་ཁྲོ་བོ། ཕུར་པ་རྫས་ཏེ་དཀྱིལ་འཁོར་གསུམ་གྱི་སྐུ་གསུང་ཐུགས་ཀྱི་གནས་ཐམས་ཅད་དུ་ཨ་དཀར་པོ་རེ་རེ་བྱ་དཀར་ལྡང་ལ་བརྒྱུས་པ་ལྟར་བསྒོམ་པ་ནི་ཨ་དཀར་བྱ་དཀར་གྱི་དགོངས་པའོ། །ཨ་དེ་ལས་འོད་འཕྲོས་པས་ཕྱོགས་བཅུའི་སངས་རྒྱས་ཐམས་ཅད་སྤྱན་དྲངས། ཐམས་ཅད་ཨ་དཀར་པོར་གྱུར་དཀྱིལ་འཁོར་གསུམ་ལ་ཐིམ་པས་སྒོ་གསུམ་དང་ཤེས་བྱའི་སྒྲིབ་པ་སྦྱངས། གཟུང་འཛིན་གྱི་མཚན་མ་གྲོལ་བདེ་ཆེན་བྱང་ཆུབ་སེམས་ཀྱི་ངང་ནས་སྐུ་གསུང་ཐུགས་གསལ་བར་བྱ་བ་ནི་བདག་གི་ཁྲུས་ལུང་ངོ་། །ཡང་དཀྱིལ་འཁོར་གསུམ་གྱི་ཐུགས་ཀའི་ཨ་ལས་འོད་འཕྲོས། འཕགས་པ་མཆོད་སེམས་ཅན་གྱི་དོན་བྱས། སྒྲིབ་པ་ཐམས་ཅད་སྦྱངས། གཟས་པོའི་ལུས་ངག་ཡིད་གསུམ་ལ་ཐིམ་པས། ཨའི་འོད་ཟེར་གྱིས་གཟས་པོའི་སྒྲིབ་པ་སྦྱངས། བསྒྲལ་བའི་སྐལ་བ་དང་ལྡན་པར་བྱས། སྙིང་ནང་ཀུན་གཞི་ཨར་གནས་པ་ནི་གཟས་པོའི་ཁྲུས་ལུང་སྟེ། དེ་ལྟར་བདག་དང་གཟས་པོ་ཕུར་པ་གསུམ་དགོངས་པ་གཅིག་གིས་འབྲེལ། དམ་ཚིག་གཅིག་གིས་འབྲེལ། ཆོས་ཉིད་གཅིག་གིས་འབྲེལ་བ་ནི་ཐུགས་རྗེ་འབྲེལ་ཐག་གི་དགོངས་པའོ། །སྤྱིར་སེམས་ཅན་ཐམས་ཅད་བློས་མི་བཏང་ཞིང་བྱེ་བྲག་གཟས་པ་པོ་འཁོར་བར་མི་གཏོང་བའི་སྙིང་རྗེ་དྲག་ཏུ་བསྐྱེད་པ་ནི་གདུང་བ་ལུ་གུ་རྒྱུད་ཀྱི་དགོངས་པ་སྟེ་དེ་གསུམ་ནི་དག་བྱེད་ཁྲུས་ཀྱི་ལུང་ངོ་། །ནང་སྲོག་འཕྲོག་པ་ཚེ་ཡི་ལུང་ནི། བསྒྲལ་བྱའི་སྙིང་དཀར་ནག་གི་མཚམས་ན་ཁོའི་སྲོག་གི་ངོ་བོ་དེ་ཁྲག་གི་སྦལ་པ་མཐེ་བོང་ཙམ་གྱི་དབུས་ན་ཁོའི་ཚེ་རྟེན་ཨ་ཡིག་འོད་ཀྱི་ཐིག་ལེའི་དབུས་སུ་ཀུན་གཞི་ནི་དུད་ཁའི་གཟུགས་སུ་གནས་པ་ལ་ཕུར་རྩེ་ཧཱུྃ་ལྡན་འདྲིལ་ཞིང་གདབ་སྔགས་བཟླས་ནས་གདབ་པས་ཁོའི་མིག་སོགས་སྒོ་ལྔའི་རྣམ་ཤེས་སྦྲའི་ཆོན་ཐག་བསྡུས་པ་ལྟར་སྙིང་ནང་གི་ཐིག་ལེ་ལ་འུབ་ཀྱིས་འདུས་པ་ནི་བྱུང་ཚོར་གྱི་སྒོ་དགག་པའོ། །ཡང་འདྲིལ་ཞིང་སྔགས་བཟླས་པས་འོད་ཚོན་གང་བ་ཐལ་གྱིས་བྱུང་། ཁོའི་ཉོན་མོངས་པ་རྡོ་ཚན་ལ་ཁ་བ་བབ་པ་བཞིན་སངས་ཤིང་། མ་རིག་པ་དང་སྒྲིབ་པ་ཐམས་ཅད་མ་བྱུང་མ་སྐྱེས་ཆོས་ཉིད་སྟོང་པར་གྱུར་པ་ནི་ཀུན་གཞི་རྩད་བཅད་པའོ། །དེ་ནས་སྔགས་བཟླ་བཞིན་དུ་བཏབ་པས་སྙིང་དཀར་ནག་གི་འབྲེལ་མཚམས་ཕྲལ་ནས་ནྲྀ་ཡིག་ཐིག་ལེ་ཨར་བཅས་ཧཱུྃ་ལ་བསྡུ་བ་ནི་སེམས་ཀྱི་དབྱིངས་ཕྱུང་བའོ། །དེ་ནས་ཕུར་རྩེའི་ཨ་དཀར་ཡེ་རེ་བ་དེ་རང་ལ་བསྟན་པས་བདག་གི་རྡོ་རྗེའི་ཚེ་སྲོག་ཡེ་ཤེས་སེམས་དཔའི་ཐུགས་ཀའི་ཧཱུྃ་ཡིག་ལ་ཐིམ་སྟེ་གཉིས་སུ་མེད་པའི་བྱང་ཆུབ་སེམས་སུ་གྱུར་ཏེ། བདག་བཀྲག་དང་གཟི་མདངས་སྔར་བས་རྒྱས་ཤིང་བྱིན་ཆེ་བར་བསམ་པ་ནི་བདག་གི་ཚེ་ལུང་སྟེ། དེས་ནི་ཡུལ་གྱི་ཚེ་བསོད་རང་ལ་ཐོབ་པས་བདག་མི་ཕམ་ལ། བདག་གིས་ཡུལ་གྱི་སྒྲིབ་པ་སྦྱངས་ཤིང་བདག་དང་དབྱེར་མེད་དུ་འཁོར་བ་ལས་གྲོལ་བས་དགྲ་མི་ཕམ་སྟེ་གཉིས་ཀ་འཚེང་ཞིང་རྒྱལ་བ་ཡིན་ནོ། །གསུམ་པ་གནས་སྤར་བའི་ལུང་ལ་གསོ་བ་གསུམ་ལས། ཕྱག་རྒྱའི་ལྷ་རྣམས་གཟིར་མནན་གྱིས་དམེ་བའི་ལས་ལ་སྦྱར་བའི་ནོངས་པ་བསལ་བའི་ཕྱིར། ཕུར་པ་གསོ་བ་ནི་ཀཱི་ལ་ཡ་ཉེར་གཅིག་བཟླ་ཞིང་ཕུར་བུའི་དབལ་ནས་བཟུང་སྟེ་ཀླད་ལ་བསྐོར་བས་ཁམས་གསུམ་ཕུར་བུས་གང་ཞིང་དེ་ལས་འོད་འཕྲོས་པ་ཕུར་བུ་ལ་འདུས་པས་གཟི་བྱིན་དང་ལྡན་པར་བསྒོམ་མོ། །དྲག་པོའི་ལས་གྱི་རྣམ་སྨིན་རྒྱུད་ལ་མི་གོས་པར་བྱ་བའི་ཆེད་དུ་བདག་གསོ་བ་ནི། ཀཱི་ལ་ཡ་བརྒྱ་རྩ་བརྒྱད་བཟླས་པས། བདག་གི་ཐུགས་ཀའི་ཧཱུྃ་ལས་འོད་འཕྲོས་པས་ཁམས་གསུམ་ཕུར་བུས་གང་བ་ལ་ཕོག མཉེས་མཆོད་ཕུལ། སྐུ་གསུང་ཐུགས་ཀྱི་བྱིན་རླབས་འོད་ཟེར་གྱི་རྣམ་པས་སླར་འདུས་བདག་ལ་ཐིམ་པར་བསམ་པའོ། །སྙིང་རྗེ་བྱང་ཆུབ་ཀྱི་སེམས་ཀྱིས་ཟིན་པར་བསྒྲལ་བྱ་རྣམས་ལ་ཕན་གདགས་ཤིང་བསྐྱབ་པར་བྱ་བའི་ཕྱིར་གཟས་པོ་གསོ་བ་ནི། ཧཱུྃ་གསུམ་བརྗོད་པས་བདག་ཡེ་ཤེས་སེམས་དཔའི་ཐུགས་ཀའི་ཧཱུྃ་ལས་འཕྲོས་པའི་འོད་ཟེར་གྱི་རྩེ་ལས་དམིགས་བྱའི་རྣམ་ཤེས་ཨ་ཡིག་གི་གཟུགས་ཀྱི་འོག་མིན་དུ་སྤར། ཕཊ་གསུམ་གྱིས་རྡོར་སེམས་ཡབ་ཡུམ་གྱི་སྦྱོར་མཚམས་སུ་བསྟིམ། ཀཱི་ལ་ཡ་བརྒྱ་རྩ་བརྒྱད་བཟླས་པས་རྡོ་རྗེ་སེམས་དཔའི་སྲས་སུ་སྐྱེས་པར་བསམ་པ་སྟེ། དོན་དམ་པར་སྲོག་མེད་སྲོག་ཀྱང་བཅད་དུ་མེད་དེ་སྐྱེ་མེད་ཆོས་སྐུའི་རང་བཞིན་ལ། ཀུན་རྫོབ་ཏུ་རྟོག་ཚོགས་ཐམས་ཅད་ལྷ་དང་ལྷ་མོའི་རང་བཞིན་བདེན་པ་དབྱེར་མེད་ཆོས་ཉིད་ལ་ཆོས་ཉིད་ཐིམ་པའི་ཚུལ་དུ་བསམ་པ་སྟེ། འདི་ལས་བྱེ་བྲག་པའི་སྐབས་སུ་དགྲ་མ་ཤི་བར་མི་བྱ་སྟེ། གནས་སྤར་སྔ་ན་དགྲ་བོ་མཐུ་རྡུགས་སུ་འགྲོ་བར་གསུངས་སོ། །དེ་ལྟ་བུའི་དགོངས་པ་དང་ལྡན་ན་ནུབ་གཅིག་ལ་གཟས་པོ་བརྒྱ་བསྒྲལ་ཡང་རྣམ་སྨིན་གྱི་སྒྲིབ་པར་མི་འགྱུར་གྱི་སྟེང་དུ་ཚོགས་ཆེན་རྫོགས་པར་འགྱུར་ལ། ལུང་གསུམ་གྱི་དགོངས་པ་མ་ཤེས་ན་ཤན་པ་དང་ཁྱད་མེད་པར་ཨོ་རྒྱན་དུས་གསུམ་མཁྱེན་པའི་ཞལ་སྔ་ནས་འདོམས་པར་མཛད་པ་ཡིན་པས། འདིར་གཏེར་གཞུང་རྩ་བའི་དགོངས་པ་མ་བུ་གུང་སྡེབ་ཀྱི་ཚུལ་དུ་མདོ་ཙམ་བཤད་པ་ཡིན་ཞིང་། རྒྱུད་འགྲེལ་དང་ཅུང་འདྲ་མིན་བྱུང་བ་ནི་བཀའ་གཏེར་གྱི་མན་ངག་གི་ཁྱད་དུ་ཤེས་པར་བྱའོ། །དེ་ནས་ཕྱིར་མི་ལྡོག་པར་བྱ་བའི་ཕྱིར་སླར་ཡང་བག་ཆགས་ཀྱི་རྟེན་གཞི་བསྒྲལ་བ་ལ། ཐོག་མར་བསྐུལ་བ་ནི། མཆོག་ཐུན་གྱི་དངོས་གྲུབ་སྒྲུབ་པ་ལ་བར་ཆད་བྱེད་པའི་གཟུགས་ཅན་གྱི་དགྲ། གཟུགས་མེད་ཀྱི་བགེགས་གདུག་ཅིང་སྡང་སེམས་དང་ལྡན་པ་གོང་དུ་སྨོས་པའི་མཚན་ཉིད་དང་ལྡན་པ་བསྒྲལ་བའི་ཞིང་དུ་གྱུར་པ་རྣམས། འཁོར་བའི་གནས་རིས་ནས་དྲངས་པའི་ཕྱིར་ཕོ་ཉ་ལྕགས་ཀྱུ་ཅན་གྱིས་སྙིང་ནས་ཟུངས་ཤིག བདེ་བའི་གནས་སུ་བསྐུལ་བའི་ཕྱིར་ཐོ་བ་ཅན་གྱིས་རྒྱབ་ནས་རྡུངས་ཤིག་རྒྱོབ་ཅིག ཉོན་མོངས་པའི་དབང་པོ་རང་ཡན་དུ་མི་གཏོང་བའི་ཕྱིར་ཞགས་པ་ཅན་གྱིས་ཡན་ལག་རྣམ་པར་ཆིངས་ཤིག །བག་ཆགས་ཀྱི་ཕུང་པོ་བརླག་པར་བྱ་བའི་ཕྱིར་གཟུགས་ཀྱི་ཕུང་པོ་ལ་གཏོགས་ཤིག་གམ་སྡིགས་ཤིག སྡིག་པའི་གྲོགས་དང་བྲལ་བའི་ཕྱིར་རམ་ནག་པོའི་ཕྱོགས་ཀྱི་དཔུང་གཉེན་དང་སྡོང་གྲོགས་བྱེད་པ་རྣམས་དང་ཁ་ཕྲལ་ཏེ་སོ་སོར་དབྱེ་བར་གྱིས་ཤིག མྱུར་དུ་གནས་ངན་ལས་བསྒྲལ་ཏེ་རྟེན་དང་བརྟེན་པ་རྡུལ་དུ་རློག་པའི་ཕྱིར་མ གྱོགས་བྱེད་ཀྱི་ཕོ་ཉས་མྱུར་བའམ་རིངས་པའི་ཚུལ་གྱིས་ས་འོག་ས་སྟེང་ས་བླའི་སྲིད་པ་གང་ན་ཡོད་ཀྱང་རང་དབང་མེད་པར་ཁུག་ལ། གནོང་ཞིང་འགྱོད་པའི་སེམས་ཀྱིས་ཉེས་བྱས་མཐོལ་ཞིང་བཤགས་པའི་སྨྲེ་སྔགས་ཀྱི་འོ་དོད་སྨྲ་རུ་ཆུག་ཅིག ཐུགས་རྗེས་ངེས་པར་བཟུང་བའི་ཕྱིར་འབེབས་བྱེད་ཀྱིས་གཟུགས་ལ་ཕོབ་ཅིག ཉོན་མོངས་པའི་སྒྲིབ་པ་སྦྱང་བའི་ཕྱིར་གཟིར་བྱེད་ཀྱིས་ལུས་ངག་ཡིད་གསུམ་རྣམ་པར་གཟིར་བར་གྱིས་ཤིག དཀྱིལ་འཁོར་དུ་ངེས་པར་ཆུད་པར་བྱ་བའི་ཕྱིར་དབང་བྱེད་ཀྱིས་ཡིད་བསྒྱུར་ལ་རྣལ་འབྱོར་པ་ང་ཡི་དབང་དུ་གྱུར་ནས་ཀྱང་། དམ་ལས་མི་འདའ་བའི་ཕྱིར་བཀའ་ཉན་ལས་བྱེད་ཀྱིས་བསྒོ་བའི་བཀའ་ལ་ཉན་ཞིང་མ་དད་པའི་བློ་ཁ་ལྡོག་སྟེ་ཤིན་ཏུ་གུས་པ་དང་ལྡན་པར་བྱོས་ཤིག ཅེས་བསྐུལ་ནས། གདབ་པ་དངོས་ལ། སྤྱིར་རྒྱུད་ལས། གཙོ་བོའི་ཕུར་པ་བླངས་ནས་ནི། །ཡི་གེ་གསུམ་གྱིས་བྱིན་གྱིས་རླབས། །བདག་ཉིད་སྲུང་བའི་ཚེ་ཕུར་བྱ། །ཞེས་པས་གཙོ་བོའི་ཕུར་པ་ནི་བདག་ཉིད་ཀྱི་སྲོག་ལྟ་བུ་ཡིན་པས་བྱིན་རླབས་དང་མཆོད་བསྟོད་བྱས་ལ་བཞུགས་སུ་གསོལ་བ་ལས་ནམ་ཡང་གདབ་པ་སོགས་ཀྱི་ལས་ལ་བཀོལ་བར་བྱ་མི་རུང་ལ། གདབ་ཕུར་དངོས་ནི། རྒྱུད་ལས། དེ་ལྟར་བདག་ལུས་ཚགས་ཚུད་ནས། །གཞན་གྱི་ལུས་སེམས་དབྲལ་བའི་ཕྱིར། །ཁྲོ་བོ་བཅུ་ཡི་ཕུར་པ་ཡིས། །ལུས་ཀྱི་གནས་བཅུ་དག་ཏུ་གདབ། །སྒོ་མ་བཞི་ཡི་ཕུར་པ་ཡིས། །ལུས་ཀྱི་མཚོ་བཞི་དག་ཏུ་གདབ། །མི་བཟད་ཕུར་པ་དྲུག་པོ་ནི། །གནད་དྲུག་སྲོག་ལ་གདབ་པར་བྱ། །ཞེས་གསུངས་ཤིང་། དེ་ཡང་འགྲེལ་པར་རྣམ་པར་རྒྱལ་བའི་ཕུར་པ་མ་བྱིན་པར་ལེན་པའི་གནས་མིག་གཉིས་ལ་གདབ་པ་ནས་སྟོབས་ཆེན་བརྣབ་སེམས་སྤོང་བའི་གནད་ཀྱིས་རྐང་མཐིལ་དུ་གདབ་པའི་བར་མི་དགེ་བཅུ་རྩད་ནས་གཅོད་པའི་ཕྱིར་ཁྲོ་བཅུའི་ཕུར་པ་ལུས་ཀྱི་གནས་བཅུར་གདབ་པ་དང་། ལྕགས་ཀྱུ་མ་གློ་བ་དབུགས་མཚོར་གདབ་པ་ནས། དྲིལ་བུ་མ་ཀླད་པ་བྱང་སེམས་ཀྱི་མཚོ་ལ་གདབ་པའི་བར་ཚད་མེད་བཞིའི་ཕུར་པ་མཚོ་བཞིར་གདབ་པ་དང་། ཁྲག་གནད་གཅོད་པ་སེང་ལྡེང་གི་ཕུར་པ་སྤྱི་གཙུག་ཏུ་གདབ་པ་ནས། སྲིད་པའི་གནད་གཅོད་པ་སྐྱེར་ཕུར་ལྟེ་བར་གདབ་པའི་བར་ཕར་ཕྱིན་དྲུག་དང་ལྡན་པར་བྱ་བའི་ཕྱིར་མི་བཟད་པའི་ཕུར་པ་དྲུག་གདབ་པ་དང་། སྲས་མཆོག་ཉིད་བཅས་གདབ་ཕུར་ཉེར་གཅིག་ཏུ་གསུངས་པ་དང་། གཞན་ཡང་སྒྲུབ་ཕུར་བརྒྱ་རྩ་བརྒྱད། ལྷ་ཕུར་ལྔ་བཅུ་རྩ་གཅིག གདབ་ཕུར་ཉེར་གཅིག མགྱོགས་ཕུར་བརྒྱད་ཅུ་ཐམ་པ། ཕུར་པ་སིལ་བུ་གྲངས་མེད། བཟློག་ཕུར་བཅུ་གཉིས་རྣམས་ཀྱི་གདབ་པར་གསུངས་པ་སོགས་ཡོད་ཀྱང་། འདིར་གཞན་དོན་ཚོམ་བུ་འབུམ་སྡེའི་སྒྲུབ་གཞུང་དུ། གདབ་ཡུམ་ནི། སྒོ་ལྔའི་རྟེན་སྤྱི་བོར་ཧཱུྃ་ཀ་རས་གདབ། ཚེ་རྟེན་དཔྲལ་བར་རྣམ་པར་རྒྱལ་བ། གཏི་མུག་རྟེན་ལྟེ་བར་གཤིན་རྗེ་གཤེད། འདོད་ཆགས་རྟེན་མགྲིན་པར་རྟ་མགྲིན། ཀུན་གཞིའི་རྣམ་ཤེས་རྟེན་སྙིང་ལ་བདུད་རྩི་འཁྱིལ་བ། ང་རྒྱལ་རྟེན་དཔུང་གཡོན་དབྱུག་སྔོན། ཕྲག་དོག་རྟེན་དཔྱི་གཡོན་དུ་མི་གཡོ་བ། སེར་སྣའི་རྟེན་དཔྱི་གཡས་པར་འདོད་རྒྱལ། ཞེ་སྡང་རྟེན་དཔུང་པ་གཡས་པར་ཁམས་གསུམ་རྣམ་རྒྱལ། སྐྱེ་རྒྱུའི་རྟེན་གསང་བར་སྟོབས་པོ་ཆེ་གདབ་བོ། དེ་བཅུའི་བར་དུ་ཟ་གསོད་གདབ་བོ། །སྲས་མཆོག་ཉེར་གཅིག་གིས་དབང་པོ་ལྔ་ལ་ཁྱབ་པར་གདབ་བོ། །ཕྲིན་ལས་བཞིས་ཚིགས་བཞིར་གདབ་བོ། །སྲུང་མའི་ཚོགས་ཀྱིས་ལྷུ་བཅུ་གཉིས་སུ་གདབ་བོ། །དབང་ཕྱུག་ཉེར་བརྒྱད་ཀྱིས་མཐིལ་བཞིར་གདབ་བོ། །སྔགས་ནི་སྤུ་གྲི་ཁོ་ནས་གདབ་བོ། །ཞེས་གསུངས་པ་བཞིན་ཤེས་པར་བྱ་ལ། དཀྱུས་ཙམ་དུ་ལས་གཞུང་དུ་གསལ་བ་ལྟར། དེ་ཡང་འདི་ཕྱིན་ཆད་ཀྱི་ཕུར་གདབ་ཐམས་ཅད་མི་ལྡོག་པའི་ཕྲིན་ལས་མཐར་འབྱིན་པའི་དོན་དུ་གཙོ་བོའི་གྲོགས་སུ་འདེབས་པ་སྟེ། ཡོད་ན་ཕུར་པ་སོ་སོ་དང་གཅིག་ལས་མེད་ན་དེ་དང་དེར་མོས་པས་རང་སྔགས་ཀྱིས་གདབ་པར་བྱ་ཞིང་། དེ་དག་གི་བར་དུ་ཐུན་གྱིས་རྡེག་པ་སོགས་ཁོང་ཁྲོའི་ལས་གསུམ་པོ་ཡང་བཏང་བ་ཡིན་པས། ཁྲོ་མོ་བཅུའི་ཕུར་པ་གདབ་ཟིན་པའི་རྗེས་སུ་ལས་ཐུན་རྡེག་པའི་ཕྱིར་ཕོ་ཉ་བསྐུལ་བ་ནི། གཙོ་བོའི་བྲན་ནམ་འཁོར་གྱི་ཚུལ་དུ་སྟོན་པ་དང་དཔལ་གྱི་བཀའ་ཉན་ཞིང་ལས་ལ་མངགས་པའི་ཕོ་ཉ་བའི་ཚོགས་ཏེ། དོན་དུ་ཁྲོ་བཅུ་ཁྲ་ཕྱག་སྒོ་མ་ཕུར་སྐྱོང་བཀའ་སྡོད་སྤྲུལ་པ་ཡང་སྤྲུལ་ཉིང་སྤྲུལ་དང་བཅས་པ་ཁྱེད་རྣམས་ཀྱི་སྐུ་གསུང་ཐུགས་ཀྱི་དམ་ཚིག་གཉེན་པོ་དེའི་དུས་ལ་བབས་པས། སྔོན་ཆད་དཔལ་ཆེན་པོའི་སྤྱན་སྔར་ཇི་ལྟར་ཁས་བླངས་ཤིང་དམ་བཅས་པ་དེ་བཞིན་དུ། དེང་འདིར་མངོན་སྤྱོད་དྲག་པོའི་ཕྲིན་ལས་འགྲུབ་པར་མཛོད་ཅིག ཅེས་བསྐུལ་ནས་རང་སྔགས་ཀྱིས་ཁྲོ་བཅུའི་ཕུར་པ་གོང་གསལ་གྱི་གནས་སོ་སོར་གདབ་རྗེས་སྤུ་གྲིའི་སྔགས་ཀྱིས་ཐུན་རྫས་སྣ་ཚོགས་ཀྱིས་བྲབ། དེ་ནས་མཚོན་ཆས་གཏུབ་པ་ནི། རྡོ་རྗེ་ནི་དབྱིངས་དང་ཡེ་ཤེས་གཉིས་སུ་མེད་པའི་དོན་སྐྱེ་འཇིག་མེད་པ་ཡིན་ལ། དོན་དེ་རྟོགས་པར་དཀའ་ཞིང་ཕལ་གྱི་སྤྱོད་ཡུལ་མ་ཡིན་པས་གསང་བའི་སྟེ་ཐེག་པ་ཆེན་པོའི་བཀའ་འམ་ལུང་ཕྱིན་ཅི་མ་ལོག་པ་མཆོག་གི་ཡུལ་དམ་པ་འདི་ལས་ནི། མཚམས་མེད་ལྔ་ལ་བདོ་བའི་སྡིག་ཅན་གནོད་བྱེད་གང་ཞིག་རྒྱལ་བའི་བཀའ་ལས་འདའ་བར་བྱེད་པ་བསྒྲལ་བའི་ཡུལ་དུ་གྱུར་པ་རྣམས། ཡེ་ཤེས་ཀྱི་ལྷ་ཚོགས་ཁམས་གསུམ་དབང་དུ་སྡུད་ཅིང་སྲིད་གསུམ་ཟིལ་གྱིས་གནོན་པའི་སྟོབས་ཆེན་པོ་དང་ལྡན་པའི་ཁྲོ་བོ་ཆེན་པོ་བཅུ་ལ་སོགས་པ་ཡིས། མགོ་བོ་ཀླད་པ་ཚལ་པ་བརྒྱ་རུ་ཁོས་ཤིག དེ་བས་ན་བདག་ལ་ཉོན་ཅིག་ཅེས་གནོད་ཅིང་བར་དུ་གཅོད་པའི་བགེགས་དང་ཡང་དག་པའི་ལམ་ལོག་པར་འདྲེན་པའི་ཚོགས་རྣམས་ལ་བོས་ནས། ང་ཡི་བཀའ་ལས་ནམ་ཡང་འདའ་བར་མ་བྱེད་ཅིག་འདས་ན་བརླག་པར་འགྱུར་ཏ་རེ། ཞེས་བསྒོ་ཞིང་མཚོན་ཆ་སྣ་ཚོགས་ཀྱི་ཆར་བབས་པར་བསམ་ལ་རལ་གྲིས་གཏུབ། རྡུལ་དུ་བརླག་པ་ལ། བསྐུལ་བ་ནི། གང་བསྒྲལ་བར་བྱ་བའི་ཡུལ་དུ་གྱུར་པ་ལུས་ངག་གདུག་ཅིང་ཞེ་སྡང་གི་སེམས་དང་ལྡན་པ་ཡི། གཟུགས་ཅན་གྱི་མི་དང་། དེ་ཉིད་སྐྱོབ་པར་བྱེད་པའི་ལྷའམ་འོན་ཏེ་བདུད་དང་འབྱུང་པོ་ལྷ་མ་ཡིན་གྱི་རིགས་སུ་གྱུར་པ་གང་ཡིན་ཀྱང་རུང་སྟེ། མདོར་ན་སྒྲུབ་པ་པོ་ང་ལ་བར་དུ་གཅོད་པར་བྱེད་པ་ཡི་གཟུགས་ཅན་གཟུགས་མེད་དམ་སྲི་བགེགས་ཀྱི་རིགས་སུ་གྱུར་པ་དེ་རྣམས་ཀྱི་སྒོ་གསུམ་གྱི་མཐུ་དང་ཅིར་ཡང་སྟོན་པའི་རྫུ་འཕྲུལ་ཐམས་ཅད་མེད་པར་བྱོས་ཤིག ཅེས་བསྐུལ་ཞིང་སྟེང་འོག་གི་ཕུར་པ་སྤྱི་གཙུག་དང་རྐང་མཐིལ་དུ་བཏབ་པས་འཁོར་འདས་ཀྱི་མཐའ་བསལ། དེ་ནས་བརྡུང་བ་དངོས་ལ། ཐུན་མོང་དུ་གང་བརྡུང་ན་དགྲ་བགེགས་དེ་ཉིད་ཀྱི་གཟུགས་ཕུང་མཚོན་གྱིས་གཏུབ་པ་དེ་ཉིད་བརྡུངས་ཤིག ཇི་ལྟར་བརྡུང་ན། རྡོ་རྗེ་འབར་བའི་གཏུན་ཞེས་པ་ནི་ཐོ་བ་སྟེ། དེས་སྒྲུབ་པའི་རིག་འཛིན་དང་རྡོ་རྗེ་གཞོན་ནུའི་བཀའ་ལས་འདའ་བར་བྱེད་པའི་སྡིག་ཅན་མཚམས་མེད་སྤྱོད་པ་སོགས་བསྒྲལ་བའི་ཞིང་དུ་གྱུར་པ་འདི་བརྡུང་བས། རྡོ་རྗེ་ཐོ་བ་དེ་ལས་བྱུང་བའི་མཐུ་སྟོབས་རྗུ་འཕྲུལ་གྱི་མེ་ཆར་ཚ་དབལ་དྲག་པོས་སྡིག་ཅན་གང་ཞིག་གི་རྣམ་ཤེས་ཀྱི་སྙིང་པོའི་དྲི་མ་རྟེན་གཞི་ཕུང་པོའི་ལྷག་མ་དང་བཅས་པ་བསྲེགས་ནས། ལུས་ངག་རྡུལ་ཕྲན་བཞིན་དུ་རློག་ལ། དྲི་མ་མེད་པའི་སེམས་ཉིད་མཉམ་ཡངས་བརྡལ་བ་ཆེན་པོར་སྒྲོལ་ཅིག {ཞི་ཅག} ཐུན་མིན་ལྟར་ན། ལྷ་ཚོགས་རྣམས་ཡབ་ཡུམ་ཐབས་ཤེས་སྦྱོར་བའི་སྒོ་ནས་ཡུམ་ཁྲོ་མོ་འབར་བའི་བྷ་ག་ཆོས་ཀྱི་དབྱིངས་ཀྱི་གཏུན་ཁུང་དུ། ཡབ་ཁྲོ་བོ་འབར་བའི་གསང་བ་རིག་པ་ཡེ་ཤེས་ཀྱི་རྡོ་རྗེའི་ཐོ་བས་མཁའ་གསང་ཐབས་དང་ཤེས་རབ་མཉམ་པར་རོལ་པའི་ཀློང་དུ་དག་མཉམ་དགོངས་པ་དབྱེར་མེད་ལྷག་པའི་ཆོས་སྐུ་ཆེན་པོའི་དབྱིངས་སུ་བརྡུངས་བར་བྱས་ནས། བར་གཅོད་བྱེད་པོ་ལྷ་ཡིན་ཀྱང་རུང་སྟེ་རྡུལ་ཕྲན་ཕྱེ་མར་བྱས། རྣམ་ཤེས་སངས་རྒྱས་ཀྱི་སར་བསྒྲལ་བར་བྱ་བ་ཡིན་པས་ན། རྨད་དུ་བྱུང་བའི་གསང་བ་ཟབ་མོ་གང་བཅོལ་ཞིང་གསོལ་བའི་ཕྲིན་ལས་མ་ལུས་པ་འགྲུབ་པར་མཛོད་ཅིག ཅེས་ཐོ་གཏུན་ཡབ་ཡུམ་གྱི་མཁའ་གསང་དབྱིངས་རིག་གི་སྦྱོར་བས་གཟུགས་ཕུང་ཟག་མེད་ཀྱི་དབྱིངས་སུ་བཅོམ་པར་བསམ་ལ་ཐོ་བས་བརྡུང་ངོ་། །འདིའི་བར་གྱི་རྒྱུད་ཚིག་གོ་དཀའ་བ་རྣམས་རྒྱུད་འགྲེལ་ལྟར་ཅུང་ཟད་འབྲུ་གནོན་གྱི་ཚུལ་དུ་བཤད་པ་ཡིན་ནོ། །དེ་ནས་སྙིགས་མའི་ལུས་དེ་ཉིད་བདུད་རྩིར་སྤར་བ་གཏོར་མར་བསྟབས་ལ། ཁྲག་འཐུང་ཡོངས་ཀྱི་སྤྱི་དཔལ་ཆེན་པོ་རྡོ་རྗེ་གཞོན་ནུའི་ལྷ་ཚོགས་འཁོར་དང་བཅས་པས་གདུག་པ་ཅན་གྱི་ཤ་ཁྲག་དོན་སྙིང་གི་ཚོགས་རྣམས་བཞེས་པའི་སླད་དུ་གནམ་ས་ཙམ་གྱི་ཞལ་རབ་ཏུ་གདངས་ཤིང་ཕྱེ་བར་མཛོད་ཅིག དགྲ་བགེགས་འབྱུང་པོའི་ཚོགས་རྣམས་ཐམས་མཁས་ཀྱི་སྤྱོད་པ་རྨད་དུ་བྱུང་བས། རྣམ་ཤེས་ཟག་མེད་ཀྱི་དབྱིངས་སུ་བསྒྲལ་བའི་ལྔ་ཕུང་གི་སྙིགས་མ་འདོད་ཡོན་བདུད་རྩིའི་སྤྲིན་འཕྲོ་བ་འདི་ཉིད། དཔལ་ཆེན་ཡབ་ཡུམ་ཁྲོ་བཅུ་སྲས་མཆོག་ཟ་གསོད་སྒོ་སྐྱོང་མཁའ་འགྲོ་གིང་ལང་དབང་ཕྱུག་སོགས་དཀྱིལ་འཁོར་གྱི་ལྷ་ཚོགས་རྣམས་ཀྱི་ཞལ་དུ་འབུལ་ཞིང་སྟོབས་པས། སྡང་དགྲ་གདོན་བགེགས་འཁོར་དང་བཅས་པ་རྣམས་རྡུལ་ཕྲན་ཙམ་ཡང་མེད་པར་རོལ་ཅིག ཅེས་ཕུལ་བས་ལྷ་ཚོགས་རྣམས་ཀྱིས་དགྱེས་པར་རོལ་ཏེ་ཧ་ཧ་ཧ་ཞེས་བཞད། ཧཱུྃ་གསུམ་གྱིས་དངོས་གྲུབ་བསྩལ་ནས་འོད་གསལ་དུ་ཞུ། ཕཊ་གསུམ་གྱིས་དེ་ལས་སད་པའི་སྣང་ཆ་ཆོས་ཉིད་བདེན་པའི་ངང་བསྐྱངས་ཏེ་རྟག་ཆད་ཀྱི་མཐའ་བསལ་ལོ། །དེ་ནས་བཅོལ་བསྐུལ་བྱ་བ་ནི། ཕོ་ཉ་འདུས་པའི་གཙོ་བོའི་ཕུར་བུ་འདྲིལ། བཤུགས་པས་འབོད་ཅིང་རྔ་ཐབས་དང་བསྟུན་གོང་གི་བབ་བརྒྱད་ཀྱི་ཕོ་ཉའི་བསྐུལ་དང་བཅོལ་པའི་ལས་རིམ་བདུན་པོ་རྣམས་དྲག་ཏུ་བརྗོད་པས་བསྐུལ་བར་བྱ་སྟེ། དེ་ཡང་ཚོགས་ཐ་མར་ཕུར་གདབ་ཀྱིས་བརྟེན་པ་བསྒྲལ་བ་ཙམ་གྱི་མཐར་བབ་པ་སྦྱར་ན་བཅོལ་བསྐུལ་འདིར་ངེས་པར་བྱ་དགོས་ཤིང་། གདབ་ཁ་རྫོགས་པར་བྱས་ན་མ་བྱས་ཀྱང་ཆོག་པར་གསུངས་སོ། །དེ་ནས་ཐབས་ཤེས་ཀྱི་རྫས་རྣམས་བརྡ་དང་བརྡ་ཡི་འབུལ་ལེན་གྱིས་བླངས་ནས། བདག་རྩ་བའི་དཀྱིལ་འཁོར་རྩ་བ་གསུམ་འདུས་སུ་གསལ་བཏབ་སྟེ། ཚོགས་རྫས་ཀྱི་དངོས་པོ་འདོད་ཡོན་བདུད་རྩིའི་ལོངས་སྤྱོད་ཐ་མལ་གྱི་ཞེན་འཛིན་དང་བྲལ་བས་བདེ་བ་ཆེན་པོར་རོལ་ཞིང་ནང་གི་སྦྱིན་སྲེག་གི་ཚུལ་གྱིས་སྤྱད་པར་བྱའོ། །གསུམ་པ་ལྷག་མའི་ཆོ་ག་ནི། ལྷག་མ་རྣམས་གསོག་འཇོག་མེད་པར་ཕྱོགས་གཅིག་ཏུ་བསྡུས་ཏེ། ཕུད་ལྷག་མཆོད་པའི་རས་མ་བཅས་སོ་སོར་བཤམས་པ་སྨན་རག་གིས་བྲན་ཞིང་སྤྱི་ལྟར་དམ་བསྒྲགས་ནས་གཅིག་ཏུ་བསྲེས་པ་ལ་སློབ་དཔོན་གྱི་ལྕེ་རྟ་མགྲིན་ཡབ་ཡུམ་རོལ་པ་མཛད་པའི་བྱང་སེམས་བདུད་རྩིར་བབ་པར་མོས་པས་ཁ་ཕྲུ་གདབ་ཅིང་། བདུད་རྩིས་བྲན་ལ་དཀྱིལ་འཁོར་གྱི་བྱང་ཤར་དུ་བཤམས་ལ། དཔལ་ཆེན་པོའི་བྲན་དང་བཀའ་ཉན་མངགས་གཞུག་གི་ཕོ་ཉའི་ཚོགས་སུ་གྱུར་པ། དབང་ཕྱུག་ཉི་ཤུ་རྩ་བརྒྱད། མཁའ་འགྲོ་སུམ་ཅུ་གཉིས། གིང་དང་ལང་ཀ་མ་སྲིང་{སྲིན }འབར་བའི་ཚོགས་དང་གཞན་ཡང་ཕྲ་མེན་ཤུགས་འགྲོ་གནོད་སྦྱིན་གྱི་རིགས་སུ་གྱུར་པ་ལྷག་མའི་དམ་ཚིག་ལ་གཏོགས་པ་ཁྱེད་རྣམས་ཀྱི་དམ་ཚིག་གཉན་པོའི་དུས་ལ་བབ་སྟེ། ཇི་སྐད་དུ། འབངས་སུ་མཆིའོ་གཙིགས་མ་ཆུང་། །བཀའ་ལས་འདས་ན་འཚིག་པར་འགྱུར། །མ་དང་སྲིང་མོ་བྲན་མོ་རྣམས། །འབངས་སུ་འབུལ་ལོ་བཀའ་ལ་ཐོགས། །དབུས་སུ་མཆིས་སྐལ་མི་ལྡན་གྱི། །འབར་བའི་དཀྱིལ་འཁོར་མཐའ་ལ་ཞོག །ཕུད་ལ་འཚལ་སྐལ་མི་ལྡན་གྱི། །ལྷག་མ་ཁ་ཆུས་བྲོན་ལ་སྩོལ། །ཞེས་པ་ལྟར་སྔོན་དཔལ་ཆེན་པོའི་སྤྱན་སྔར་རྡོ་རྗེའི་བྲོ་བོར་ཞིང་ཇི་ལྟར་དམ་དུ་བཅས་པའི་ཞི་རྒྱས་དབང་དང་མངོན་སྤྱོད་དྲག་པོའི་ཕྲིན་ལས་མ་ལུས་པ་འགྲུབ་པར་མཛོད་ཅིག ཁྱད་པར་དུའང་དཔལ་གྱི་ལྷག་རྣལ་འབྱོར་པའི་ཕུད་འདོད་ཡོན་རྒྱན་གྱི་མཆོད་པ་བཟང་པོ་འདི་བཞེས་ལ་སངས་རྒྱས་ཀྱི་བསྟན་པ་གཉེན་པོ་སྲུང་བར་མཛོད་ཅིག ཅེས་དམ་བསྒྲགས་ཤིང་ཕྲིན་ལས་བཅོལ་ནས་ལྷག་གཏོར་སྒྲུབ་ཁང་གི་ཕྱི་རོལ་གོམ་པ་བདུན་ཅུའི་སར་བསྐྱལ་ལོ། །བཞི་པ་སྨོན་ལམ་གདབ་པ་ནི། དཀྱིལ་འཁོར་གྱི་ལྷ་ཚོགས་རྣམས་ལ་དགོངས་གསོལ་བརྗོད་པ་སྔོན་དུ་འགྲོ་བས་རྒྱུད་ཚིག་ཉིད་བརྗོད་པ་སྟེ། འདིའི་དོན་ནི་སྙིང་པོའི་རྒྱུད་ལས། བཅིང་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་གསུངས་པ་ལྟར་གཞི་འཆིང་གྲོལ་མེད་པའི་གནས་ལུགས་རིག་པ་བྱང་ཆུབ་ཀྱི་སེམས་བདེན་པ་དབྱེར་མེད་སྤྱོད་ཡུལ་དང་བྲལ་བར་ཡེ་ནས་གནས་པ་ཉིད། ལམ་ཤེས་རབ་གསུམ་གྱི་གོམས་པ་མཐར་ཕྱིན་པ་ལས། ཟག་མེད་འབྲས་ཆོས་ལྔ་ཡི་བདག་ཉིད་དཔལ་ཆེན་པོ་རྡོ་རྗེ་གཞོན་ནུའི་དཀྱིལ་འཁོར་གྱི་འཁོར་ལོར་རང་སྣང་བ་སྟེ། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་འབྱུང་། །ཞེས་གསུངས། དེས་ན་གཞི་ལམ་འབྲས་བུའི་ཆོས་ཐམས་ཅད་ངོ་བོ་དབྱེར་མེད་པར་རང་རིག་པའི་ངང་དུ་རྫོགས་པ་ནི་ཆོས་ཉིད་ཀྱི་གཤིས་ལུགས་སམ་ངོ་བོའི་བཞུགས་ཚུལ་ཡིན་པས་ནམ་ཡང་མི་བསླུ་བའི་ཕྱིར་ཆོས་ཉིད་ཀྱི་བདེན་པའོ། །དེ་ལྟ་བུའི་དག་མཉམ་ཆེན་པོའི་དགོངས་པ་ནི་ཐེག་པ་འོག་མ་པ་དང་གང་ཟག་བློ་ཆུང་བའི་རིགས་ལ་སྒྲ་ཇི་བཞིན་པར་མ་བསྟན་པའི་གསང་བ་ཟབ་མོ་སྟེ། ཇི་བཞིན་པར་རྟོགས་པ་ནི་སྔགས་བླ་མེད་ཀྱི་རྒྱུད་སྡེ་ལ་རག་ལས་པས་ན་གསང་སྔགས་ཀྱི་བྱིན་གྱིས་བརླབ་བོ། །དེ་ཡང་བླ་མ་དང་ལྷག་པའི་ལྷ་ཡི་བྱིན་རླབས་དང་མན་ངག་གི་མཐུ་ལས་རྟོགས་པར་བྱེད་དགོས་པས་ན་སངས་རྒྱས་ཀྱི་མཐུའོ། །འདི་ཉིད་ཀྱང་སྨིན་བྱེད་ཀྱི་དབང་དང་ལམ་ཟབ་མོ་རིམ་པ་གཉིས་ཀྱི་རྣལ་འབྱོར་ལ་བརྟེན་ནས་མངོན་དུ་འབྱིན་པས་ན་ཨ་བྷི་ཙཱཪྱའི་སྟེ་མངོན་དུ་སྤྱོད་པའི་དུས་ལ་བབ་བོ། །ཡང་ན་དྲག་པོ་མངོན་སྤྱོད་དང་སྦྱར་ཡང་ཆོག་གོ །དེ་ནི་འཁོར་བའི་སྡུག་བསྔལ་དང་ཐེག་པ་དམན་པའི་འབྲས་བུ་ལས་ངེས་པར་འབྱིན་པའི་ཐབས་ཟབ་མོ་ཡིན་པས་ན་བརྣག་པ་དེ་ཁོ་ནའོ། །ཞེས་པ་སྟེ། དེ་ལྟར་གསང་སྔགས་ཀྱི་སྤྱོད་པ་རྨད་དུ་བྱུང་བ་སྤྱད་པའི་མཐུ་བྱིན་གྱིས། བཅོམ་ལྡན་འདས་དཔལ་རྡོ་རྗེ་གཞོན་ནུའི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ལ་ལོངས་སྤྱོད་ཅིང་སྐལ་བ་མཉམ་པར་གྱུར་ཅིག ཅེས་སྨོན་ལམ་གདབ། ལྔ་པ་བཟོད་པར་གསོལ་བ་ནི། དཔལ་ཆེན་པོའི་ལྷ་ཚོགས་ཐམས་ཅད་བདག་ལ་དགོངས་སུ་གསོལ། བདག་སྒྲུབ་པ་པོ་ཉམ་ཆུང་ཞིང་དགོངས་སྤྱོད་རྒྱ་མཚོ་གདེང་དུ་མ་གྱུར་པས། ཏ་ན་སྒྲོལ་བ་གནས་སུ་མ་སྟོབས་པ་དང་། ག་ཎ་སྦྱོར་བ་བྱིན་གྱིས་མ་རློབ་པ་དང་། གཉིད་དང་སྙོམ་ལས་སོགས་ཀྱི་སྐྱོན་ཆགས་པས་མཆོད་སྔགས་ཏིང་ངེ་འཛིན་མ་དག་ཅིང་ཉམས་པ་དང་། དགེ་བ་བཅུ་དང་དུ་མ་ལོངས་ཤིང་མི་དགེ་བ་བཅུ་རྩད་ནས་མ་ཆོད་པ་དང་། རང་བཟོའི་ཉེས་པས་རྒྱལ་བའི་བཀའ་ལུང་བཞིན་གཞུང་མ་བསྲངས་པ་དང་དམ་ཚིག་གི་རྩ་བ་སྐུ་གསུང་ཐུགས་དང་ཡན་ལག་གི་དམ་ཚིག་ཉི་ཤུ་རྩ་ལྔ་སྟེ་ཐུན་མོང་སྤྱི་ཡི་དམ་ཚིག་དང་། སྒྲུབ་པ་ཁྱད་པར་གྱི་དམ་ཚིག་ཉི་ཤུ། སྤྱོད་པ་རྒྱུན་གྱི་དམ་ཚིག་བཞི། གལ་མདོ་ངེས་པའི་དམ་ཚིག་གསུམ་སོགས་ལ་བག་མེད་པ་དང་ཉོན་མོངས་པའི་དབང་གིས་ཉམས་ཆག་ཏུ་གྱུར་པ་ཅི་མཆིས་པ་ཐམས་ཅད་མི་གསང་མི་སྦེད་པར་གནོང་འགྱོད་ཀྱི་བསམ་པས་ངག་ཏུ་མཐོལ་ཞིང་བཤགས་ན་བཟོད་པ་དམ་པ་མཛད་དུ་གསོལ། དེ་ལྟར་མཐོལ་ཞིང་བཤགས་པས་ཚེ་འདི་ཡི་རྐྱེན་དང་ཕྱི་མའི་སྒྲིབ་པར་མི་འགྱུར་བར་དག་ཅིང་ཚངས་པའི་དངོས་གྲུབ་སྩལ་ཏུ་གསོལ་སྙམ་དུ་གནོང་འགྱོད་ཀྱི་བསམ་པས་བཤགས་ཤིང་ཡིག་བརྒྱ་མང་དུ་བརྗོད་དོ། །དྲུག་པ་གཏོར་མ་གཏོང་བ་ལ་གསུམ་ལས། དང་པོ་བརྟན་མ་བསྐྱང་བ་ནི། གཏོར་མ་ཕྱིར་བསྣུར་ལ་སྨན་རཀ་སྦྲེང་ཞིང་། བརྟན་ཞིང་ཆགས་པས་བརྟན་མ་སྟེ་བོད་ཁམས་སྐྱོང་བའི་གཙོ་མོ་ཆེན་མོ་བཅུ་གཉིས་ནི་བདུད་མོ་བཞི་དང་གནོད་སྦྱིན་མ་བཞི་དང་སྨན་མོ་བཞི་བཅས་ཏེ་རང་རང་གི་འཁོར་སྨན་ཕྲན་འབུམ་ཕྲག་དང་བཅས་པ་ཕྱི་ལྟར་ན་ཞིང་སྐྱོང་གི་ཌཱ་ཀི། ནང་ལྟར་ན་རྩ་རླུང་ཐིག་ལེའི་རང་བཞིན། གསང་བ་ལྟར་ན་རྟེན་འབྲེལ་བཅུ་གཉིས་གནས་སུ་དག་པའི་བདེན་དོན་བཅུ་གཉིས་ཀྱི་ངོ་བོ་སྟེ། ཁྱེད་ཅག་སྔོན་གྱི་ཐ་ཚིག་ལ་གནས་པའི་ཡལ་གམ་ཅན་ཏེ། སློབ་དཔོན་པདྨ་ཐོད་ཕྲེང་དང་སློབ་མ་རླང་ཆེན་དཔལ་གྱི་སེང་གེས་མོན་ཁ་ནེ་རིང་རྫོང་གསུམ་དུ་ཞིང་ཆེན་བསྒྲལ་པའི་པགས་པ་གདན་དུ་འདིང་ཞིང་དབང་བསྐུར་ཏེ་རྣལ་འབྱོར་གྱི་གྲལ་དུ་བཞག་ནས། མ་འོངས་ཐར་པ་ཐོབ་པར་ལུང་བསྟན་སོ་སོར་གསང་བའི་མཚན་ཡང་བཏགས། ཕྱི་རབས་ཀྱི་རྣལ་འབྱོར་སྒྲུབ་པ་པོ་རྣམས་ལ་ཕན་གདགས་པའི་ཕྱིར་བྲན་དང་མངག་གཞུག་གི་ཚུལ་དུ་ཁས་བླངས་པ་ཡིན་ན། སྔོན་གྱི་དམ་ལས་མ་འདའ་བར་འདིར་སྤྱོན་ཏེ་བཀའ་ཡི་གཏོར་མ་ལོངས་ལ། བོད་ཁམས་མཐའ་དམག་གདུག་པའི་རྒྱུ་འགྲུལ་གཅོད་པ་སོགས་ཇི་ལྟར་བཅོལ་པའི་ཕྲིན་ལས་འགྲུབ་པར་མཛོད་ཅིག ཅེས་བསྐུལ་ལ་གཏོར་མ་གཟའ་རྒྱུ་ཕྱོགས་དང་བསྟུན་ཏེ་གཏོང་། གཉིས་པ་ཟོར་དུ་བསྐུལ་བ་ནི། དཔེར་ན་ཕ་རོལ་གྱི་གཡུལ་ལས་རྒྱལ་བའི་ཕྱིར་དུ། དམག་བསྡུ། གོ་བསག མཚོན་བདར་བའི་སྒོ་ནས་འཐབ་པའི་སྦྱོར་ཆོག་ཐམས་ཅད་ཟིན་པའི་འོག་ཏུ། གང་གཡུལ་བཀྱེ་བའི་ས་ཕྱོགས་སུ་ཕྱིན་ནས་དགྲ་དང་གཡུལ་སྤྲད་པ་ལྟ་བུ་སྟེ། དགྲ་བགེགས་བྱད་མའི་མཐུ་སྟོབས་གཞོམ་པའི་ཕྱིར་དུ་རྫས་སྔགས་དམིགས་པའི་འཁྲུལ་འཁོར་ཐམས་ཅད་ཚོགས་པར་བྱས་ནས་ལས་ལ་སྦྱར་དགོས་པ་ཡིན་ཡང་། དཀྱུས་ཙམ་དུ་གཏོར་མ་དེ་ཉིད་ནད་དུག་མཚོན་ཆའི་ཕུང་པོར་དམིགས་ཏེ། དཔལ་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་སྤྲུལ་པའི་དམག་དཔུང་དང་བཅས་པས་བཏེགས་ནས་གང་ལ་དམིགས་པའི་དགྲ་དང་བགེགས་ཀྱི་ཕྱོགས་སུ་འཕང་བར་མོས་ལ་ཟོར་བསྐུལ་དང་སྔགས་བཟླས་ཏེ་དགྲ་ཕྱོགས་སུ་འཕང་ལ་ཐལ་{དུལ} མོ་བརྡབས་པས་དམ་ཅན་ཕོ་མོའི་དམག་ཚོགས་ཀྱིས་ནད་མཚོན་དུག་གི་ཆར་ཕབ་པས་གང་ལ་དམིགས་པའི་དགྲ་བགེགས་དམ་སྲི་རྒྱབ་རྟེན་{བརྟེན}ལྷ་སྲུང་དང་བཅས་པའི་ལྔ་ཕུང་རྡུལ་དུ་བརླགས་ནས་རྣམ་ཤེས་བདེ་བ་ཆེན་པོར་སྦྱང་བར་མོས་པའོ། །གསུམ་པ་བྲོ་བརྡུང་བ་ནི། གཏོར་གཞོང་རི་རབ་གསལ་བའི་འོག་ཏུ་གནོད་བྱེད་དམ་སྲི་རྒབ་འདྲེ་ལོག་པར་འདྲེན་པའི་ཚོགས་རྣམས་བཀུག་ནས། རྣལ་འབྱོར་པ་རྣམས་དཀྱིལ་འཁོར་གསུམ་གྱི་ལྷར་གསལ་བས་ལག་པ་ལུ་གུ་རྒྱུད་དུ་སྦྲེལ་ལ་རྡོ་རྗེ་རྒྱ་མདུད་ཀྱི་བྲོ་དངོས་སུ་འཁྲབ་པའམ་ཡིད་ཀྱིས་དེ་ལྟར་མོས་པས། དཔལ་ཆེན་པོ་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་སྟོང་གསུམ་གང་བ་བྱོན་ནས། ཞལ་ནས་ཕུར་པའི་ཛབ྄་དབྱངས་དང་བཅས་ཐབས་ཤེས་གཉིས་སུ་མེད་པར་བྲོ་བརྡུངས་པས་དགྲ་བགེགས་དམ་སྲིའི་ཚོགས་རྣམས་ཕྱེ་མར་བརླགས་ཏེ་བྱང་ཆུབ་མཆོག་སེམས་མ་སྐྱེས་ཀྱི་བར་དེ་སྲིད་དུ་ནམ་ཡང་ལྡང་བ་མེད་པར་བྱས་པར་མོས་ལ་མཐར་གནས་ལུགས་རྟོགས་པའི་ལྟ་བ་ཟབ་མོས་རྒྱས་བཏབ་པས་སྣང་སྲིད་གཡོ་འགུལ་མེད་པར་བསམ་མོ། །བདུན་པ་དཀྱིལ་འཁོར་བསྡུ་བ་ནི། ཧཱུྃ་གསུམ་བརྗོད་པས་སྣང་སྲིད་ཐམས་ཅད་འོད་དུ་ཞུ་ནས་གཞལ་ཡས་ཁང་ལ་ཐིམ། གཞལ་ཡས་ཁང་འཁོར་གྱི་ལྷ་ཚོགས་ལ་ཐིམ། འཁོར་རྣམས་རིམ་གྱིས་གཙོ་བོ་ལ། གཙོ་བོ་ཡེ་ཤེས་སེམས་དཔའ་ལ། ཡེ་ཤེས་སེམས་དཔའ་ཐུགས་སྲོག་ཧཱུྃ་ལ། ཧཱུྃ་གྱེན་རྫོགས་ཐིག་ལེར་ཡལ་བའི་ངང་དུ་མི་དམིགས་པར་བཞག་པས་རྟག་མཐའ་བསལ་ཏེ། དེ་ཡང་ཕྱི་གཟུང་བའི་ཡུལ་ལ་ཕར་བལྟས་པས་སྣང་གྲགས་ཀྱི་ཆོས་ཀུན་གཟོད་མ་ནས་རང་བཞིན་གྱིས་མ་གྲུབ་པས་སྟོང་པ། ནང་འཛིན་པའི་སེམས་ལ་ཚུར་བལྟས་ཀྱང་འདི་ཞེས་ངོས་བཟུང་གི་མཚན་མ་དང་བྲལ་བའི་གཞི་མེད་རྩ་བྲལ། བར་རྟོགས་མཁན་གྱི་རིག་པ་ལ་བརྟགས་ཀྱང་ཡེ་སྟོང་རང་སངས། ངོ་བོ་རྟག་ཆད་ལས་འདས་པས་མཐའ་གྲོལ། རང་བཞིན་མཚན་མ་དང་བྲལ་བས་རང་གྲོལ། གང་ཤར་སྤང་བླང་དང་བྲལ་བས་ཤར་གྲོལ། མཚན་ཉིད་བསམ་བརྗོད་དང་བྲལ་བས་ཡེ་གྲོལ་ཆེན་པོ། ངོ་བོ་མཐོང་བྱ་མཐོང་བྱེད་ལས་འདས་པའི་གཤིས་ལུགས་དམིགས་མེད་བསམ་བྲལ་བརྗོད་མེད་ཀྱི་ངང་འདི་ཉིད། སོ་སོ་རང་གིས་རིག་པར་བྱ་བ་ལས་གཞན་ལོགས་ཤིག་ན་བཙལ་ཞིང་སྒྲུབ་ཏུ་མེད་པ་ནི་ལྟ་བ་རང་བྱུང་ཡེ་ཤེས་ཡིན་ལ། དེའི་ངང་ལ་གནས་པ་ནི་སྒོམ་པ། དེ་དང་མི་འབྲལ་བ་སྤྱོད་པ། མངོན་དུ་གྱུར་པ་ནི་འབྲས་བུ་སྟེ། ལྟ་སྒོམ་སྤྱོད་འབྲས་དབྱེར་མེད་པའི་ཆོས་ཉིད་མཉམ་པ་ཆེན་པོའི་ཀློང་དུ་མཉམ་པར་བཞག་པས་གཟུང་འཛིན་གྱི་མཚན་མ་ཐམས་ཅད་རང་སར་གྲོལ་བར་འགྱུར་རོ། །བརྒྱད་པ་རྒྱུན་གྱི་ཏིང་ངེ་འཛིན་ནི། ཕཊ་གསུམ་བརྗོད་པས། སྟོང་གསལ་གྱི་ངང་ལས་ཆུ་ལས་ཉ་ལྡངས་པའི་ཚུལ་དུ་དཔལ་རྡོ་རྗེ་གཞོན་ནུ་ཡབ་ཡུམ་ཐུགས་སྲོག་ཡེ་ཤེས་སེམས་དཔའ་ས་བོན་དང་བཅས་པ་ལམ་གྱིས་གསལ་བཏབ་པས་ཆད་པའི་མཐའ་བསལ་ཞིང་། ཕྱི་ནང་གིས་བསྡུས་པའི་སྣོད་བཅུད་ཕུང་ཁམས་སྐྱེ་མཆེད་ཀྱི་ཆོས་ཀུན། དོན་དམ་པར་སྐྱེ་མེད་ཆོས་སྐུའི་རང་བཞིན་ལ། ཀུན་རྫོབ་ཏུ་གཞལ་ཡས་ཁང་དང་ལྷ་དང་ལྷ་མོའི་རང་བཞིན་བདེན་པ་དབྱེར་མེད་ཆོས་ཉིད་ལ་ཆོས་ཉིད་དམ་ལྷ་ལ་ལྷ་རོལ་པའི་ཚུལ་གྱིས་ཟ་ཉལ་འགྲོ་འདུག་སོགས་སྤྱོད་ལམ་རྒྱུན་གྱི་ཏིང་ངེ་འཛིན་རྣམས་གཏེར་གཞུང་རྩ་བ་ནས་ཇི་ལྟར་གསུངས་པ་བཞིན་དུ་ལག་ལེན་ལ་ཐེབས་པར་བྱས་ནས་ཀུན་ཏུ་དོན་ཡོད་པར་བྱ་ཞིང་། གཞན་བསྙེན་སྒྲུབ་སོགས་ཀྱི་སྐབས་ཀྱི་སྤང་བླང་གི་གནད་དང་སྦྱོར་རྗེས་ཀྱི་ཆོ་གའི་ཡན་ལག་རྣམས་ནི་རིག་འཛིན་སྔ་མ་རྣམས་ཀྱི་གསུངས་ལས་ཤེས་པར་བྱའོ། །དེ་ལྟར་བརྩོན་པས་གནས་སྐབས་སུ་བྱང་ཆུབ་སྒྲུབ་པའི་ལམ་གྱི་བར་ཆད་ཐམས་ཅད་ཞི་ཞིང་ལས་བཞི་དང་གྲུབ་པ་བརྒྱད་སོགས་ཐུན་མོང་དང་། མཆོག་གི་དངོས་གྲུབ་གཞི་འབྲས་དབྱེར་མེད་སྐུ་ལྔ་ཡེ་ཤེས་དགུ་ལྡ ན་དཔལ་ཆེན་པོ་རྡོ་རྗེ་གཞོན་ནུའི་གོ་འཕང་མངོན་དུ་བྱེད་པར་འགྱུར་ཏེ། སྐུ་ལྔ་ཡེ་ཤེས་དགུ་ནི། རང་སེམས་གཞི་ཡི་རྡོ་རྗེ་གཞོན་ནུ་ཉིད། བགྲོད་པ་ལམ་གྱི་རྡོ་རྗེ་གཞོན་ནུ་ཐབས་དང་ཤེས་རབ་གཉིས་སུ་མེད་པར་གོམས་པས། མཐར་ཕྱིན་འབྲས་བུའི་རྡོ་རྗེ་གཞོན་ནུ་དག་པ་གཉིས་ལྡན་གྱི་ངོ་བོར་གྱུར་པའི་ཚེ། དེ་ལ་སྐུ་ལྔ་ལྷུན་གྱིས་གྲུབ་སྟེ། སེམས་ཉིད་སྤྲོས་པ་དང་བྲལ་བ་དེ་ཆོས་སྐུ། དེའི་རྒྱན་ནམ་རོལ་པ་འགགས་མེད་དུ་ཤར་བ་ལོངས་སྐུ། དེ་ལས་གདུལ་བྱ་གཞན་སྣང་དུ་སྟོན་པ་སྤྲུལ་སྐུ། དེ་ལ་སྡུག་བསྔལ་མེད་པ་བདེ་བ་ཆེན་པོའི་སྐུ། དེ་རྣམས་དབྱེར་མེད་པ་ངོ་བོ་ཉིད་སྐུའོ། །ཡེ་ཤེས་དགུ་ནི། གསལ་ལ་རྟོག་པ་མེད་པ་མེ་ལོང་ལྟ་བུའི་ཡེ་ཤེས། མ་འདྲེས་སོ་སོར་གསལ་བ་སོར་རྟོག་ཡེ་ཤེས། ཐམས་ཅད་མཉམ་པར་ཤེས་པ་མཉམ་ཉིད་ཡེ་ཤེས། དེའི་དོན་ལས་མི་གཡོ་བ་ཆོས་དབྱིངས་ཡེ་ཤེས། དེའང་ལྷུན་གྲུབ་ཏུ་འདུག་པ་བྱ་གྲུབ་ཡེ་ཤེས། དེ་ལྟར་སྣང་ཚད་ཡེ་ཤེས་སུ་འདུག་པ་བརྡལ་པ་རང་བྱུང་གི་ཡེ་ཤེས། རང་གིས་རིག་ཅིང་རྟོགས་པས་རིག་པ་རང་བྱུང་གི་ཡེ་ཤེས། ཅིར་སྣང་ཡེ་ཤེས་སུ་རྒྱས་ཐེབས་པས་སྣ་ཚོགས་གཉིས་མེད་རྒྱས་འདེབས་ཀྱི་ཡེ་ཤེས། དེ་ཐམས་ཅད་དོན་ལ་ཐ་སྙད་དང་བྲལ་བས་སྤྲོས་བྲལ་བསམ་མི་ཁྱབ་པའི་ཡེ་ཤེས་རྣམས་སུ་འགྲེལ་ཆེན་འབུམ་ནག་ཏུ་གསུངས་སོ། །དེ་ལྟར་སྤྱི་དོན་གྱི་རྣམ་བཞག་དང་ལས་བྱང་གི་སྒོམ་དོན་ཅུང་ཟད་བཤད་པ་འདི་ནི་གཙོ་བོ་གཏེར་གཞུང་རྩ་བ་དང་། དེའི་གསལ་བྱེད་ཀྱི་རིམ་པ་བླ་མ་ཨཱ་ཡུ་བཛྲས་མཛད་པའི་ལས་བྱང་གི་འགྲེལ་པ་དང་། རྗེ་གཏེར་ཆེན་བླ་མ་སྐུ་མཆེད་ཀྱིས་མཛད་པའི་ལས་བྱང་སྒྲུབ་དཀྱིལ་བསྙེན་ཡིག་རྣམས་ཀྱི་དགོངས་པ་རྩ་བར་བཟུང་། བཀའ་མའི་འགྲེལ་ཆེན་འབུམ་ནག་དང་། བདག་གི་བླ་མས་མཛད་པའི་ཕུར་པ་རྩ་རྒྱུད་ཀྱི་འགྲེལ་པ་སོགས་དང་ཡང་སྒོ་བསྟུན་ནས། གནད་ཀྱིས་མི་འགལ་བར་ཅུང་ཟད་ཁ་བསྐངས་ཏེ་མདོར་བསྡུས་སུ་བརྗོད་པ་ཡིན་པས། ལས་དང་པོ་པ་རྣམས་ཀྱིས་ཐོག་མར་འདི་ཙམ་ངེས་པར་བྱས་ནས། སླད་ནས་རྒྱུད་གཞུང་མན་ངག་རྣམས་ལ་འདྲིས་པར་བྱ་བ་གལ་ཆེའོ། །སླར་སྨྲས་པ། རྒྱུད་རྒྱལ་རིག་མཆོག་འབུམ་སྡེའི་སྙིང་པོའི་བཅུད། །པདྨའི་ཐུགས་དམ་ཟབ་དོན་མན་ངག་གཏེར། །མཚན་ཐོས་ཙམ་གྱིས་བདུད་བཞིའི་དཔུང་འཇོམས་པའི། །གསེར་ཆོས་མཆོག་འདི་ཁོ་བོའི་སྐལ་བར་ཐོབ། །སྔོན་ཆད་སྒྲུབ་དཀྱིལ་གསལ་བྱེད་ཆེས་མང་ཡང་། །སྤྱི་འགྲེལ་སྙིང་པོར་དྲིལ་བ་མ་མཐོང་བས། །ཚུལ་འདི་ཁོ་བོའི་སྐལ་བར་བཞག་གམ་སྙམ། །རྡོ་རྗེའི་མཆེད་རྣམས་དགྱེས་པའི་གསོས་སུ་འབུལ། །འདི་ན་གཏེར་གཞུང་རྩ་བའི་དགོངས་པ་དང་། །གྲུབ་པའི་རིག་འཛིན་སྔ་མའི་བཞེད་གཞུང་བཅུད། །བསྡུས་ལས་རང་བཟོའི་ཉེས་པས་མ་བསླད་སྙམ། །འོན་ཀྱང་རྨོངས་བློས་ནོངས་གྱུར་མཆིས་ན་བཤགས། །དེ་ལས་བྱུང་བའི་རབ་དགེ་དྲི་མ་མེད། །ལྷག་བསམ་སྟོན་ཀའི་ཟླ་ལྟར་ཆེས་དཀར་བས། །བསྟན་འགྲོའི་རྒུད་པའི་ཚ་དབལ་ཀུན་ཞི་ནས། །ཕན་བདེའི་སྣང་བས་ས་གསུམ་ཁྱབ་གྱུར་ཅིག །བདག་ཀྱང་སྐྱེ་ཀུན་ལྷག་པའི་ལྷ་འདི་དང་། །མི་འབྲལ་ཐལ་འབྱིན་རྣམ་བཞིའི་གསེང་ལམ་ནས། །རང་རིག་རྡོ་རྗེ་གཞོན་ནུ་མངོན་གྱུར་ཏེ། །མཁའ་ཁྱབ་འགྲོ་བའི་དེད་དཔོན་བྱེད་པར་ཤོག །བཀྲ་ཤིས་གང་ཞིག་རྩ་གསུམ་ལྷ་རྣམས་ཀྱི། །དགྱེས་པའི་ཞལ་རས་མངོན་སུམ་སྟོན་བཞིན་དུ། །བདེན་ཚིག་གྲུབ་པའི་མེ་ཏོག་མན་ད་རས། །ཕྱོགས་དུས་འཇིག་རྟེན་ཀུན་ན་བདེ་ལེགས་མཛོད། །དཔལ་རྡོ་རྗེ་ཕུར་པ་ཡང་གསང་སྤུ་གྲི་འབར་བའི་སྤྱི་དོན་རྣམ་བཤད་སྙིང་པོར་དྲིལ་བ་འདི་ནི། ཤྲཱི་ཧེ་རུ་ཀ་དང་གཉིས་སུ་མ་དམིགས་པའི་གངས་ཅན་མཁས་གྲུབ་ཡོངས་ཀྱི་གཙུག་ནོར་དམ་པ་བཀའ་བབ་བདུན་ལྡན་པདྨ་འོད་གསལ་མདོ་སྔགས་གླིང་པ་དང་། རྒྱལ་བས་ལུང་བསྟན་པདྨ་གར་དབང་བློ་གྲོས་མཐའ་ཡས་ཟུང་གི་བཀའ་དྲིན་ལས། རྡོ་རྗེ་ཕུར་པའི་ཆོས་སྐོར་མང་དུ་ཐོས་ཤིང་ཅུང་ཟད་འདྲིས་པར་རློམ་པའི་རྙིང་བན་རྒན་པོ་རྡོ་རྗེ་དབང་མཆོག་ཕྲིན་ལས་འདུས་པ་རྩལ་གྱིས་རང་ལོ་ཞེ་བརྒྱད་པ་དུས་ཀྱི་ཕོ་ཉ་ཞེས་པ་ས་ཕོ་རྟ་ཡི་ལོ་ཆུ་ཤེལ་དབང་པོ་སྨིན་དྲུག་གི་ཉ་བའི་དམར་ཕྱོགས་ཀྱི་སྦྱོར་བ་བཟང་པོ་ལ། རང་གནས་བསྟན་གཉིས་དར་རྒྱས་གླིང་གི་སྒོམ་ཁང་བདུད་ལས་རྣམ་པར་རྒྱལ་བའི་ཕོ་བྲང་བཀྲ་ཤིས་འཆི་མེད་འོད་སྣང་དུ་གྲུབ་པར་སྦྱར་བ་སྟེ། འདི་འཛིན་རྣམས་ཀྱི་རྒྱུད་ལ་དཔལ་རྡོ་རྗེ་གཞོན་ནུ འི་བྱིན་རླབས་མྱུར་དུ་འཇུག་པའི་རྒྱུར་གྱུར་ཅིག སརྦ་མངྒལཾ། དགེའོ། །དགེའོ། །དགེའོ།། །།
སྙན་བརྒྱུད་ཡང་ཕུར་སྦྲགས་མའི་ཟབ་ཏིག་གི་རྣམ་བཤད་སྙིང་པོར་དྲིལ་བ་གྲུབ་གཉིས་འདོད་འཇོའི་དགའ་ཚལ།
༄༅། །སིདྡྷི་དྭཱིཥྚལཱསྱཏུཥྚཔནནཱམསཱནྟཔརཾབརྱཙབཛྲསྲྀཥྚགམྦྷཱིརབྱཱཥྱཱནཾཀརྞྞིཀེཏྶདནབིཧརཏིསྨ།
༄༅། །སྙན་བརྒྱུད་ཡང་ཕུར་སྦྲགས་མའི་ཟབ་ཏིག་གི་རྣམ་བཤད་སྙིང་པོར་དྲིལ་བ་གྲུབ་གཉིས་འདོད་འཇོའི་དགའ་ཚལ་ཞེས་བྱ་བ་བཞུགས་སོ། །
ༀ་སྭསྟི་སིདྡྷཾ། ངོ་བོ་ཀ་དག་སྤྲོས་པ་བྲལ་དབྱིངས་སུ། །རང་བཞིན་ལྷུན་གྲུབ་འོད་གསལ་ཆེན་པོའི་མདངས། །གང་འདུལ་སྒྱུ་འཕྲུལ་དྲྭ་བའི་ཕྱག་རྒྱའི་གར། །སྤྲོ་མཛད་བླ་མ་ཧེ་རུ་ཀ་དེས་སྐྱོངས། །མཁས་གྲུབ་རིག་འཛིན་བྱེ་བའི་དགོངས་ཉམས་ཕུལ། །རྒྱུད་ལུང་མན་ངག་ཟབ་དགུའི་སྙིང་པོའི་བཅུད། །ཌཱ་ཀིའི་ཞལ་གྱི་དྲོད་རླངས་མ་ཡལ་བ། །ཟབ་གསང་སྙན་བརྒྱུད་གདམས་པའི་གསེར་ཆོས་རྨད། །དེ་སླད་བླ་མའི་བཀའ་དང་རང་ཉིད་ཀྱི། །མོས་པའི་དབང་གིས་རྣམ་པར་བཤད་བགྱི་ན། །བརྒྱུད་གསུམ་བླ་མས་དབྱིངས་ནས་བྱིན་རློབས་ལ། །ཡི་དམ་མཁའ་འགྲོའི་ཚོགས་ཀྱིས་གནང་བ་སྩོལ། །དེ་ལ་འདིར་ཆོས་རྒྱལ་ཁྲི་ལྡེའི་ཡང་སྲིད་རྒྱལ་སྲས་ལྷ་རྗེ་མཆོག་གྲུབ་རྒྱལ་པོ་ཉིད་གཏེར་སྟོན་རྐྱང་པའི་སྐྱེ་བ་བཅུ་གསུམ་བཞེས་པར་ལུང་བསྟན་པ་ལྟར་རིམ་པར་བྱོན་པ་ཀུན་གྱི་ཕྱི་མ་བཅུ་གསུམ་པ། གངས་ཅན་མཁས་གྲུབ་ཡོངས་ཀྱི་འཁོར་ལོས་བསྒྱུར་བ། ངོ་མཚར་བཀའ་བབས་བདུན་གྱི་མངའ་བདག་པདྨ་འོད་གསལ་མདོ་སྔགས་གླིང་པ་ལ། ཡེ་ཤེས་ཀྱི་མཁའ་འགྲོ་མཚོ་རྒྱལ་མས་མངོན་སུམ་དུ་རྗེས་སུ་བཟུང་ཞིང་སྙན་བརྒྱུད་དུ་སྩལ་པས་བར་ཆད་ཀྱི་གཡུལ་ལས་རྣམ་པར་རྒྱལ་བའི་བྱིན་རླབས་ཀྱི་ཚན་ཁ་གཞན་ལས་ཁྱད་པར་དུ་འཕགས་པའི་ཆོས་སྡེ། རྒྱུད་ལུང་མན་ངག་ཐམས་ཅད་ཀྱི་སྙིང་པོའི་བཅུད་ཕྱུང་བ། མཆོག་དང་ཐུན་མོང་གི་དངོས་གྲུབ་མཐའ་དག་བདེ་བླག་ཏུ་འགྲུབ་པར་བྱེད་པའི་མྱུར་ལམ། ཡང་ཕུར་སྦྲགས་མའི་ཟབ་ཏིག་གི་སྒྲུབ་ཐབས་ཀྱི་རྣམ་བཤད་སྙིང་པོར་དྲིལ་ཏེ་སྔ་འགྱུར་རིག་འཛིན་བརྒྱུད་པའི་མན་ངག་བཞིན་མདོ་ཙམ་བཤད་པ་ལ་གསུམ། གང་བསྒྲུབ་པའི་གཞི། གང་གིས་སྒྲུབ་པའི་ཐབས། དེ་ལྟར་གྲུབ་པའི་འབྲས་བུ་བསྟན་པའོ། །དང་པོ་ནི། སྙན་བརྒྱུད་ཡང་དག་ཟབ་ཏིག་ལས། ཡང་དག་གྲུབ་པ་གཅིག་པུ་ནི༔ སེམས་ཉིད་ལྷན་སྐྱེས་ཡེ་ཤེས་ཏེ༔ དེ་ཉིད་མངོན་དུ་བྱ་བའི་ཕྱིར༔ ཐབས་གྲོལ་ལམ་གྱི་རིམ་པར་འཇུག༔ ཅེས་གསུངས་པས། དེ་ལ་གང་དམིགས་པའི་ཡུལ་ཡང་དག་གྲུབ་པ་ནི། གཞི་ལམ་འབྲས་གསུམ་དབྱེར་མེད་པའི་ཆོས་ཉིད་བྱང་ཆུབ་ཀྱི་སེམས་ལ་བྱ་སྟེ། རྒྱུད་ལས། ཡང་དག་གྲུབ་པ་གཅིག་པུ་ཉིད། །སངས་རྒྱས་བདེ་ཆེན་ཀུན་འདུས་པ། །རྣལ་འབྱོར་ཟབ་མོ་སྐུ་གསུམ་རྫོགས། །མཁའ་འགྲོ་སྒྱུ་མ་བདེ་མཆོག་བདེ། །ཞེས་གསུངས་ཏེ། དེ་ཡང་ཆོས་ཀྱི་དབྱིངས་གློ་བུར་གྱི་དྲི་མས་རྣམ་པར་དག་པ་ནམ་མཁའ་ལྟ་བུ་ཡུལ་ཡང་དག་པ་ཉིད། ཡུལ་ཅན་ཡེ་ཤེས་ཀྱིས་རྟོགས་པའི་སྒོ་ནས་མངོན་དུ་གྲུབ་པ་གང་ཞིག དབྱིངས་དང་ཡེ་ཤེས་གཉིས་སུ་མེད་པའི་རང་བཞིན་ཆ་མེད་གཅིག་པུ་ཉིད་དེ་ནི་སངས་རྒྱས་ཐམས་ཅད་ཀྱི་ཟག་པ་མེད་པའི་ཆོས་ཀྱི་ལོངས་སྤྱོད་དང་སྐྱིད་པའི་བདེ་བ་ཆེན་པོ་ཀུན་འདུས་པའི་རང་བཞིན་ཡིན་ལ། ཆོས་ཀུན་གྱི་དེ་བཞིན་ཉིད་མཉམ་པ་ཆེན་པོར་སྙོམས་པར་ཞུགས་ཤིང་དེ་ལས་མི་གཡོ་བའི་རྣལ་འབྱོར་ཟབ་མོ་དེ་ལྟ་བུ་ལ་འབྲས་བུ་སྐུ་གསུམ་རྫོགས་པར་གནས་པ་ནི་རང་དོན་ཕུན་ཚོགས་དང་། ཡེ་ཤེས་དང་ཐུགས་རྗེ་སྐུ་གསུང་ཐུགས་ཀྱི་སྒྱུ་འཕྲུལ་ནམ་མཁའ་རབ་འབྱམས་ཀྱི་ཁམས་ཁྱབ་པར་འགྲོ་ཞིང་རྟག་ཏུ་གདུལ་བྱའི་དོན་མཛད་པ་སྒྱུ་མ་ལྟ་བུའི་རྣམ་པར་རོལ་པར་སྟོན་པ་སྟེ། དེ་ཡང་རྒྱུ་ལས་སྐྱེས། མཐུན་པར་སྣང་། དོན་བྱེད་ནུས། བརྟགས་ན་དབེན་པའི་རྒྱུ་མཚན་བཞིས་སྒྱུ་མ་དང་མཛད་པ་ཆོས་མཐུན་ཏེ། ཆོས་དབྱིངས་སྐྱེ་བ་མེད་པ་ལས་ཐུགས་རྗེ་ཆེན་པོའི་རྐྱེན་གྱི་རྒྱུ་ལས་སྐྱེས། ཇི་ལྟར་འདུལ་བ་དེ་ལྟར་སྣང་། གདུལ་བྱ་ཐབས་ཀྱི་སྤྱོད་པས་རེ་འདོད་སྐོང་བའི་དོན་བྱེད་ནུས། བཏགས་པ་ཙམ་དུ་སྣང་གིས་ཡང་དག་པར་སྐུ་གསུང་ཐུགས་ཀྱི་ངོ་བོ་ལ་བརྗོད་དུ་མེད་པས་བརྟགས་ན་དབེན་པའི་ཕྱིར་རོ། །བླང་དོར་མེད་པའི་ཆོས་ཉིད་ལ་དབང་འབྱོར་བས་འདོད་ཡོན་མ་སྤངས་གྲོགས་སུ་ཁྱེར་བས་ཉན་ཐོས་སོགས་ལམ་དམན་པ་ལ་ལྟོས་ནས་བདེ་ཞིང་། ཇི་ལྟར་སྤྱོད་ཀྱང་ཉོན་མོངས་པས་མི་གོས་པར་དེ་ཉིད་ལམ་དུ་གྱུར་པས་ལྷ་ཆེན་པོ་སོགས་ལས་མཆོག་དུ་གྱུར་ལ། ཀློང་དུ་{ཀློངས་སུ} སུ་གྱུར་ནས་མཐར་ཕྱིན་འགྱུར་མེད་མཆོག་གི་བདེ་བ་ལ་འགྲོ་ཀུན་འགོད་པའི་དཔལ་མངའ་བ་ནི་གཞན་དོན་ཕུན་སུམ་ཚོགས་པའི་བདག་ཉིད་དེ། དེ་ལྟར་དོན་གཉིས་ལྷུན་གྱིས་གྲུབ་པས་གང་འདུལ་སྒྱུ་འཕྲུལ་དྲྭ་བའི་རོལ་གར་བསམ་མི་ཁྱབ་པར་སྟོན་པའི་སྤྱི་དཔལ་ཆེན་པོ་ཧེ་རུ་ཀ་ཉིད་ཡིན་ཏེ། འདི་ལ་དབྱེ་ན་ལྷ་དང་། དཀྱིལ་འཁོར་དང་། སྒྲུབ་པ་པོ་ཡང་དག་གྲུབ་པ་གཅིག་པུ་གསུམ་ལས། དང་པོ་ལྷ་ཡང་དག་གྲུབ་པ་གཅིག་པུ་ཉིད་ནི། ངོ་བོ་དུས་གསུམ་གྱི་བདེ་བར་གཤེགས་པའི་ཐུགས་ཡང་དག་པའི་ཡེ་ཤེས་སོ། །ངེས་ཚིག་ཆོས་ཀྱི་དབྱིངས་དང་ཐ་མི་དད་པ་ལ་བྱ་སྟེ། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཀུན་གཞི་ཆོས་ཀྱི་དབྱིངས་སུ་འདུས། ཀུན་གཞི་ཡེ་ནས་སྤྲོས་པ་དང་བྲལ་ཏེ་མ་སྐྱེས་པས་ཆོས་ཐམས་ཅད་སྐྱེ་བ་མེད་པར་ངེས་ལ། དེ་ལྟར་ངེས་པ་དང་མི་ནོར་བས་ཡང་དག་པར་ཆོས་ཉིད་ཀྱི་དོན་དེ་གྲུབ་པ་དེ་ཁོ་ན་ཐིག་ལེ་ཉག་གཅིག་པུ་ཉིད་ཡིན་པས་དེ་སྐད་ཅེས་བྱའོ། །གཉིས་པ་དཀྱིལ་འཁོར་ཡང་དག་པར་གྲུབ་པ་གཅིག་པུ་ཉིད་ནི། ངོ་བོ་ཕྱོགས་བཅུའི་སངས་རྒྱས་ཀྱི་དཀྱིལ་འཁོར་མ་ལུས་པའི་ཐུགས་འདི་ལ་འདུས་པའོ། །ངེས་ཚིག་བདེ་བར་གཤེགས་པའི་ཐུགས་ཡང་དག་པའི་ཡེ་ཤེས་ལ་དཔལ་ཁྲག་འཐུང་ཆེན་པོའི་དཀྱིལ་འཁོར་གྱི་འཁོར་ལོ་ཡོངས་སུ་གྲུབ་པ་དེ་ཡང་། རང་བྱུང་གི་ཡེ་ཤེས་གཅིག་པུ་ཉིད་ལ་འདུས་པས་དེ་སྐད་ཅེས་བྱའོ། །གསུམ་པ་སྒྲུབ་པ་པོ་ཡང་དག་པར་གྲུབ་པ་གཅིག་པུ་ཉིད་ནི། ངོ་བོ་རྣལ་འབྱོར་པའི་ལུས་ངག་ཡིད་གསུམ་པོ་ཡེ་ནས་དཔལ་ཆེན་པོའི་སྐུ་གསུང་ཐུགས་སུ་གྲུབ་པའོ། །ངེས་ཚིག་བདག་གི་བྱང་ཆུབ་ཀྱི་སེམས་དུས་གསུམ་དུ་མ་སྐྱེས་ཤིང་མི་འགག་པ་ནི་ཡང་དག དེ་རིག་ཅིང་རྟོགས་པ་ནི་གྲུབ་པ། དེ་གཉིས་རང་བཞིན་གཉིས་སུ་མེད་པ་ནི་གཅིག་པུ་ཉིད་དོ། །ཞེས་སྒྲུབ་པ་བཀའ་བརྒྱད་ཀྱི་གཞུང་ནས་གསུངས་ཏེ། དེའི་དོན་ཅུང་ཟད་བཤད་ན། དཔལ་མགོན་འཕགས་པ་ཀླུ་སྒྲུབ་ཀྱིས་དབུ་མ་ཆོས་དབྱིངས་བསྟོད་པ་ལས། གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱངས་པ་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་དེ་ཡིན་ནོ། །ཞེས་དང་། དོ་ཧ་ལས། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་སྟེར་བར་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་གསུངས་པ་ལྟར། རང་གི་སེམས་ཀྱི་ཆོས་ཉིད་གཉུག་མ་ལྷན་ཅིག་སྐྱེས་པའི་ཡེ་ཤེས་སྟོང་ཆ་ནས་ཆོས་སྐུ་དང་སྣང་ཆ་ནས་གཟུགས་སྐུའི་ཡོན་ཏན་ཐམས་ཅད་མེ་དང་ཚ་བ་དང་ཆུ་དང་རླན་གཤེར་གྱི་ཚུལ་དུ་ཡེ་ནས་འདུ་འབྲལ་མེད་པར་བཞུགས་པ་ལ་བདེ་གཤེགས་སྙིང་པོའམ་ཟབ་གསལ་གཉིས་མེད་བདེ་བ་ཆེན་པོའི་ཡེ་ཤེས་མཁའ་ཁྱབ་མཁའ་ཡི་རྡོ་རྗེ་ཅན་སོགས་སུ་ངེས་དོན་གྱི་མདོ་རྒྱུད་ཟབ་མོ་རྣམས་ནས་ཇི་སྐད་བསྟན་པ་སྟེ། རིག་འཛིན་འཇིགས་མེད་གླིང་པས་ཡོན་ཏན་རིན་པོ་ཆེའི་མཛོད་ལས། ཤེས་བྱ་སྣང་བས་མ་བཅིངས་སྟོང་པའི་དངོས། །སྟོང་པའི་རང་བཞིན་གསལ་བའི་སྙིང་པོ་ནི། །རིག་པར་བཞུགས་པས་སྐུ་དང་ཡེ་ཤེས་ཁམས། །འདུ་འབྲལ་མེད་པ་ཉི་མའི་སྙིང་པོ་བཞིན། །ཞེས་དང་། རྗེ་དེ་ཉིད་ཀྱི་རིགས་ཀྱི་བདག་པོ་ཤནྟ་པུ་རི་བས། ཁམས་ཀྱི་རང་བཞིན་བདེ་གཤེགས་སྙིང་པོ་ཉིད། །ཐོག་མའི་མགོན་པོ་ཡེ་ཤེས་སྐུར་བཞུགས་ཀྱང་། །ཕྲ་རགས་རྡུལ་གྱི་ཆོས་ཉིད་ལས་འདས་ཤིང་། །ས་བཅུའི་དབང་ཕྱུག་གིས་ཀྱང་མཐོང་མི་ནུས། །དུས་གསུམ་རྒྱལ་བ་ཁོ་ནའི་རང་བཞིན་ནོ། །དེ་དོན་འདས་དང་མ་འོངས་ད་ལྟར་གྱི། །སངས་རྒྱས་ཐམས་ཅད་དགོངས་པ་གཅིག་ཚུལ་ཡང་། །མཁའ་ཁྱབ་རྡོ་རྗེ་ཆོས་ཀྱི་སྐུར་གྲགས་པས། །ཆོས་ཉིད་དེ་བཞིན་ཉིད་སྐུར་རོ་གཅིག་སྟེ། །ནམ་མཁའི་ཁམས་ཀུན་དབྱིངས་སུ་གཅིག་དང་མཚུངས། །ཞེས་གསུངས། འདི་ལ་མཚན་གྱི་རྣམ་གྲངས་ཀྱང་། ཀུན་མཁྱེན་ཆེན་པོས་ཡིད་བཞིན་རིན་པོ་ཆེའི་མཛོད་ལས། འཁོར་འདས་འབྱུང་བས་དབྱིངས་ཞེས་རབ་བརྗོད་ཅིང་། །ཡེ་ནས་ཡོད་པས་རང་བཞིན་ལྷུན་གྲུབ་ཅེས། །དྲི་མས་སྒྲིབ་ཕྱིར་སྙིང་པོའི་ཁམས་དང་ནི། །གནས་ལུགས་ཡིན་ཕྱིར་དོན་དམ་བདེན་པ་དང་། །གདོད་ནས་དག་ཕྱིར་འོད་གསལ་དྲི་མེད་ཉིད། །མཐའ་གཉིས་གནས་བསལ་དབུ་མའི་རང་བཞིན་དང་། །སྤྲོས་ལས་འདས་ཕྱིར་ཤེས་རབ་ཕ་རོལ་ཕྱིན། །སྟོང་གསལ་རྣམ་དག་བདེན་པ་དབྱེར་མེད་དང་། །འཕོ་འགྱུར་མེད་པས་ཆོས་ཉིད་དེ་བཞིན་ཉིད། །ལ་སོགས་མིག་ལྡན་མཁས་པ་རྣམས་བཞེད་དོ། །ཞེས་གསུངས་ཏེ། དེ་ཡང་རྟོགས་ན་མྱང་འདས་དང་མ་རྟོགས་ན་འཁོར་བ་འབྱུང་བའི་ཆ་ནས་དབྱིངས། ཡེ་ནས་འདུས་མ་བྱས་པར་རང་ཆས་སུ་ཡོད་པའི་ཆ་ནས་རང་བཞིན་ལྷུན་གྲུབ་ཀྱི་སངས་རྒྱས། སངས་རྒྱས་ཀྱི་ཆོས་ཀུན་ཚང་བར་ཡོད་པས་བདེ་གཤེགས་སྙིང་པོ། དྲི་མས་སྒྲིབ་པའི་ཆ་ནས་ཁམས། གནས་ལུགས་ཡིན་པས་དོན་དམ་པའི་བདེན་པ། གདོད་ནས་དག་པས་འོད་གསལ་བའི་ཡེ་ཤེས། ཡེ་ནས་སྒྲོ་སྐུར་གྱི་མཐའ་ལས་འདས་པས་ཟབ་མོ་སྟོང་པ་ཉིད་དམ་དབུ་མའི་རང་བཞིན། སྤྲོས་པ་ཐམས་ཅད་ཀྱི་མཐའ་ལས་གྲོལ་བས་ཤེས་རབ་ཀྱི་ཕ་རོལ་དུ་ཕྱིན་པ། སྟོང་གསལ་གཉིས་སུ་མེད་པས་བདེན་པ་དབྱེར་མེད། འཕོ་འགྱུར་མེད་པས་དེ་བཞིན་ཉིད་དང་སོགས་སྒྲས། སྐྱོན་རྣམས་སྦྱང་དུ་ཡོད་པས་བྲལ་ཤེས་པས་སྟོང་ལ། ཡོན་ཏན་དབྱེར་མེད་པས་མི་སྟོང་པས་ན་བླ་ན་མེད་པའི་ཆོས་ཉིད་དེ། རྒྱུད་བླ་མ་ལས། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གིས། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་དང་། གཞན་ཡང་། སྔགས་ཕྱི་རྒྱུད་རྣམས་སུ་བདག་གི་དེ་ཁོ་ན་ཉིད་དང་། ཐོག་མཐའ་མེད་པའི་བྱང་ཆུབ་ཀྱི་སེམས་སོགས་དང་། ནང་རྒྱུད་དུ། མ་ཧཱ་ཡོ་གས་རང་རིག་པ་བྱང་ཆུབ་སེམས་ལྷག་པའི་བདེན་པ་དབྱེར་མེད་སྤྱོད་ཡུལ་དང་བྲལ་བའམ་བདེན་པ་དབྱེར་མེད་ལྷག་པའི་ཆོས་སྐུ། ཨ་ནུ་ཡོ་གས་དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར། ཨ་ཏི་ཡོ་གས་འོད་གསལ་བྱང་ཆུབ་ཀྱི་སེམས་སྟོང་གསལ་འགག་མེད་ཀྱི་གནས་ལུགས་ཡེ་ཤེས་གསུམ་ལྡན་ཏེ། དེ་ལྟ་བུའི་ཐ་སྙད་གང་ལ་འཇུག་པའི་གཞི་གནས་ལུགས་ཟབ་མོ་འཆིང་གྲོལ་ལས་འདས་པ་དེ་ནི་གང་བ སྒྲུབ་བྱའི་ལྷ་དཔལ་ཆེན་པོ་ཧེ་རུ་ཀཿཉིད་ཡིན་ཏེ། རྒྱུད་གལ་པོ་ལས། བདེ་དང་སྟོང་པ་ཟུང་འཇུག་སྐུ། །ཧེ་རུ་ཀ་ཡི་རང་བཞིན་ཡིན། །ཞེས་དང་། སྒྱུ་འཕྲུལ་རྩ་རྒྱུད་ལས། དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་ཚོལ་ཅིག །ཅེས་དང་། བརྟག་གཉིས་ལས། འཇིག་རྟེན་ཁམས་ནི་གང་དུ་ཡང་། །སངས་རྒྱས་གཞན་དུ་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་བསྟན་པ་མེད། །ཅེས་དང་། ཐུན་མོང་གི་ཐེག་པར་ཡང་། འཕགས་པ་འདའ་ཀ་ཡེ་ཤེས་ལས། སེམས་རྟོགས་ན་སངས་རྒྱས་ཡིན་པས་སངས་རྒྱས་གཞན་དུ་མི་འཚོལ་བའི་འདུ་ཤེས་རབ་ཏུ་བསྐྱེད་པར་བྱའོ། །ཞེས་དང་། སྙིང་པོ་རབ་ཏུ་བསྟན་པའི་མདོ་ལས། ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །འདི་ཡོད་པས་ན་འགྲོ་ཀུན་དང་། །མྱ་ངན་འདས་པ་ཐོབ་པ་ཡིན། །ཞེས་དང་། དཔལ་ཕྲེང་ལས། བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། །ཅེས་དང་། རྒྱུད་བླ་མར། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་དང་། དབུ་མ་ཆོས་དབྱིངས་བསྟོད་པ་ལས། ཇི་ལྟར་སོ་གའི་དུས་སུ་ཆུ། །དྲོའོ་ཞེས་ནི་བརྗོད་པར་བྱེད། །དེ་ཉིད་གྲང་བའི་དུས་སུ་ནི། །གྲང་ངོ་ཞེས་ནི་བརྗོད་པ་ཡིན། །ཉོན་མོངས་དྲྭ་བས་གཡོགས་པ་ལ། །སེམས་ཅན་ཞེས་ནི་བརྗོད་པ་སྟེ། །དེ་ཉིད་ཉོན་མོངས་བྲལ་གྱུར་ན། །སངས་རྒྱས་ཞེས་ནི་བརྗོད་པར་བྱེད། །ཅེས་གསུངས། དེ་ལྟ་བུའི་ཆོས་ཉིད་བྱང་ཆུབ་སེམས་ཀྱི་དབྱིངས་ཡེ་ནས་སྤྲོས་པ་དང་བྲལ་བའི་རང་བཞིན་མཉམ་པ་ཆེན་པོ་ལས་ཤར་བའི་རྩལ་སྣང་ཕུང་ཁམས་སྐྱེ་མཆེད་ཀྱིས་བསྡུས་པའི་རྟོག་ཚོགས་ཀྱི་ཆོས་ཐམས་ཅད་ཀྱང་ཡེ་ནས་དག་པ་ལྷ་ཡི་ཕྱག་རྒྱ་ལས་མི་འདའ་སྟེ། གསང་སྙིང་ལས། རྡོ་རྗེ་ཕུང་པོའི་ཡན་ལག་ནི། །རྫོགས་པའི་སངས་རྒྱས་ལྔ་རུ་གྲགས། །སྐྱེ་མཆེད་ཁམས་རྣམས་མང་པོ་ཀུན། །བྱང་ཆུབ་སེམས་དཔའི་བདག་ཉིད་ཆེ། །ས་ཆུ་སྤྱན་དང་མཱ་མ་ཀཱི། །མེ་རླུང་གོས་དཀར་སྒྲོལ་མ་ཉིད། །ནམ་མཁའ་དབྱིངས་ཀྱི་དབང་ཕྱུག་མ། །སྲིད་གསུམ་ཡེ་ནས་སངས་རྒྱས་ཞིང་། །ཞེས་གསུངས། དེར་མ་ཟད་ཐུན་མོང་གི་ཐེག་པ་ཆེན་པོའི་སྡེ་སྣོད་དུའང་། སྡོང་པོ་བཀོད་པ་ལས། གང་ཞིག་བདག་དང་སངས་རྒྱས་རྣམས། །རང་བཞིན་མཉམ་པར་རབ་གནས་ཤིང་། །མི་གནས་ལེན་པ་མེད་པ་དེ། །དེ་དག་བདེ་བར་གཤེགས་པར་གསུངས། །གཟུགས་དང་ཚོར་བ་འདུ་ཤེས་དང་། །རྣམ་པར་ཤེས་དང་སེམས་པ་དག །གྲངས་མེད་དེ་བཞིན་གཤེགས་པ་རྣམས། །དེ་དག་ཐུབ་པ་ཆེན་པོར་འགྱུར། །ཞེས་གསུངས། ཁྱད་པར་རྣལ་འབྱོར་ཆེན་པོ་སྔགས་བླ་མེད་ཀྱི་སྐབས་སུ་ནི། འཁོར་འདས་ཀྱི་ཆོས་ཐམས་ཅད་དག་མཉམ་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བར་ལེགས་པར་གཏན་ལ་ཕབ་ནས་སྒོམ་སྤྱོད་འབྲས་བུའི་ཆོས་ཀུན་དེར་ལ་བཟླ་དགོས་ཏེ། ཡིད་བཞིན་རིན་པོ་ཆེའི་མཛོད་ལས། རྣལ་འབྱོར་ཆེན་པོ་ཆོས་ཀུན་མཉམ་པའི་ངང་། །དབུ་མ་ཆེན་པོ་རོ་མཉམ་དག་པ་ལས། །ཁྱད་པར་ཕུང་པོ་ཁམས་དང་སྐྱེ་མཆེད་ཀུན། །དཀྱིལ་འཁོར་གཅིག་ཏུ་ཤེས་པས་རྣམ་བསྒོམས་ཏེ། །གང་ཡང་ཐབས་མཆོག་རྒྱལ་པོའི་གྲོགས་སུ་བསྒྱུར། །བསྐྱེད་རྫོགས་ཟུང་འཇུག་བདེན་པ་དབྱེར་མེད་ཉིད། །བསྒོམས་པས་ཚེ་འདིར་དངོས་གྲུབ་ཐོབ་པར་བཞེད། །ཅེས་དང་། དཔལ་རོང་ཟོམ་པ་ཆེན་པོས་དཀོན་མཆོག་འགྲེལ་ལས་ཀྱང་། དེ་ལ་དཀྱིལ་འཁོར་ལྡན་པའི་ཞེས་བྱ་བ་ནི། ཐུན་མོང་དུ་གྲགས་པའི་ཕུང་པོ་དང་ཁམས་དང་སྐྱེ་མཆེད་ཀྱིས་བསྡུས་པ། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་དབྱེར་མེད་པར་སྐུ་གསུང་ཐུགས་ཀྱི་དཀྱིལ་འཁོར་གྱི་རང་བཞིན་དུ་ཡེ་ནས་མངོན་པར་རྫོགས་པར་སངས་རྒྱས་པ་ཡིན་གྱི་ལམ་གྱིས་བསྒྲུབ་པ་ནི་མ་ཡིན་ནོ། །ཆོས་ཀྱི་རང་བཞིན་དེ་ལྟ་བུ་ཡིན་ཀྱང་། ཡིན་པ་ཙམ་གྱིས་གང་ཟག་རྣམས་ལ་ཕན་ཐོགས་པར་སྣང་བར་མི་འགྱུར་ཏེ། དེ་ཡང་རྟོགས་པ་རྣམ་བཞིའི་ལམ་གྱིས་ཡིད་ཆེས་པར་བྱས། དེ་ཉིད་ལ་མཚན་ཉིད་གསུམ་གྱིས་དོན་མཐར་དབྱུང་། བསྙེན་སྒྲུབ་ཡན་ལག་བཞིས་དོན་ལྷུན་གྱིས་གྲུབ་པར་བྱས་ན། དེ་ལྟ་བུར་སྣང་བར་གྱུར་པས། དེའི་ཕྱིར། དཀྱིལ་འཁོར་ལྡན་པའི་དཀྱིལ་འཁོར་གྱིས། །དཀྱིལ་འཁོར་ལ་ནི་དཀྱིལ་འཁོར་བསྒོམས། །ཞེས་གསུངས་པ་ཡིན་ཏེ། དཀྱིལ་འཁོར་ལྡན་པ་དེ་ཉིད་ཀྱིས། ཡེ་ནས་ཡིན་པའི་དོན་ལ་ཡེ་ནས་ཡིན་པའི་རིགས་པས་རྣལ་འབྱོར་དུ་བསྒོམ་པར་བྱའོ། །དེས་ཅིར་འགྱུར་ཞེ་ན། དཀྱིལ་འཁོར་དཀྱིལ་འཁོར་ལས་བྱུང་བ། །ཐུགས་ཀྱི་དཀྱིལ་འཁོར་དཀྱིལ་འཁོར་མཆོག །ཅེས་གསུངས་ཏེ། ཡེ་ཡིན་པའི་དཀྱིལ་འཁོར་དང་། དེ་བཞིན་དུ་མཉམ་པར་སྦྱོར་བའི་དཀྱིལ་འཁོར་ལས་འབྱུང་བ་ནི་དོན་མ་ནོར་བར་རྟོགས་པ་རིག་པ་བྱང་ཆུབ་སེམས་ཀྱི་དཀྱིལ་འཁོར་ཡིན་ཏེ། དེ་ཉིད་དཀྱིལ་འཁོར་ཐམས་ཅད་ཀྱི་མཆོག་ཏུ་བཤད་དོ། །དེ་ལྟར་གཞི་དང་ལམ་དང་འབྲས་བུ་གསུམ་དུ་བཤད་ཀྱང་བྱང་ཆུབ་སེམས་ཀྱི་རང་བཞིན་ཡེ་ནས་སངས་རྒྱས་པའི་དོན་ལས་ནི་གཡོས་པ་དང་གཞན་དུ་གྱུར་པ་ཅུང་ཟད་ཀྱང་མེད་དེ། ཐམས་ཅད་སེམས་ཀྱི་དབྱིངས་སུ་ཟད་པས། གསང་བའི་ཐིག་ལེ་དཀྱིལ་འཁོར་དབྱིངས། །ཞེས་གསུངས་པ་ཡིན་ནོ་ཞེས་གསུངས། དེས་ན་རྒྱུ་གཅིག་པ་དང་། ཡིག་འབྲུའི་ཚུལ་དང་། བྱིན་གྱིས་བརླབས་པ་དང་། མངོན་སུམ་པའི་གཏན་ཚིགས་ཆེན་པོ་བཞིས། ཆོས་ཐམས་ཅད་རང་བཞིན་སྐྱེ་མེད། རོལ་པ་འགག་མེད། ངོ་བོ་དབྱེར་མེད། མཚན་ཉིད་བློ་བྲལ་དུ་གཏན་ལ་འབེབས་པའི་ཚུལ་སོགས་ནི་ཞིབ་པར་སྒྱུ་འཕྲུལ་རྩ་བཤད་ཀྱི་གཞུང་སོགས་ལས་ཤེས་པར་བྱ་ལ། དེ་ཡང་ཕྱི་འགྱུར་པའི་མཁས་པ་ཕལ་ཆེ་བ་ཞིག བརྟག་གཉིས་ལས། རང་བཞིན་གདོད་ནས་མ་སྐྱེས་པ། །རྫུན་མིན་བདེན་མིན་དེ་བཞིན་དུ། །ཐམས་ཅད་ཆུ་ཡི་ཟླ་བ་ལྟར། །འདོད་པས་རྣལ་འབྱོར་མ་ཤེས་གྱིས། །ཞེས་པའི་དགོངས་པ་འགྲེལ་ཚུལ་ལས་སྔགས་ཀྱི་གྲུབ་མཐའ་ནི་ལྟ་བ་དབུ་མ་ལས་ཐབས་ཁྱད་པར་དུ་འཕགས་པས་དབྱེ་བའོ་ཞེས་བཞེད་མོད། འདིར་སྔ་འགྱུར་གྱི་རང་སྐད་དུ་ཐབས་བཞིན་དུ་ལྟ་བའང་ལྷག་སྟེ། དོན་དམ་པར་སྐྱེ་འགག་མེད་པ་དང་། ཀུན་རྫོབ་ཏུ་ཆོས་ཐམས་ཅད་སྒྱུ་མ་ཙམ་དུ་ལྟ་བ་དབུ་མ་དང་མཐུན་ནའང་། སྔགས་ཀྱི་ཁྱད་པར་དོན་དམ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་དང་། ཀུན་རྫོབ་སྒྱུ་མ་ལྟ་བུ་དེ་ཡང་ཡོངས་སུ་དག་པའི་ལྷ་ཡི་མཚན་ཉིད་དུ་ལྟ་བ་དང་། བདེན་པ་གཉིས་ཀྱང་དབྱེར་མེད་པར་ལྟ་བས་ཁྱད་པར་དུ་བྱས་པའོ། །དེ་ལྟར་ཡང་ཀུན་མཁྱེན་ཆེན་པོས་ཡིད་བཞིན་མཛོད་དུ། དེ་ལ་དང་པོ་གནས་ལུགས་ཤེས་པ་གཅེས། །ཐེག་པའི་དབང་གིས་རྣམ་པ་མང་ན་ཡང་། །ངེས་པའི་སྙིང་པོ་བདེན་པ་དབྱེར་མེད་དེ། །སངས་རྒྱས་ཀུན་གྱི་གསང་བའི་མཛོད་ཁང་ཡིན། །ཞེས་གསུངས། ཀུན་རྫོབ་ཏུ་ལྷར་ལྟ་བའང་། བྱ་རྒྱུད་པས་དག་པ་ཆོས་ཉིད་ཀྱི་ལྷ་དང་། ཡོ་ག་པས་དེའི་སྟེང་དུ་མི་གནས་པའི་ཡེ་ཤེས་ཆེན་པོས་བྱིན་གྱིས་བརླབས་པའི་ལྷ་དང་། རྣལ་འབྱོར་བླ་མེད་པས་དེ་གཉིས་ཀའི་སྟེང་དུ་ལྷུན་གྱིས་གྲུབ་པའི་དཀྱིལ་འཁོར་དུ་ལྟ་བའི་ཕྱིར་ན་བདེན་པ་ཐ་དད་དུ་འཛིན་པ་དོར་ནས། དོན་དམ་བདེན་ངོར་མ་ཟད་ཀུན་རྫོབ་ཏུ་ཡང་སྣོད་བཅུད་དག་མཉམ་ཆེན་པོར་གཏན་ལ་འབེབས་པས་འཁོར་འདས་དབྱེར་མེད་ཀྱི་ལྟ་བ་ཞེས་རྒྱུའི་བླ་མེད་ཀྱི་ཐེག་པ་དབུ་མ་ལས་ཐབས་ཀྱི་ཐེག་པ་སྔགས་ཀྱི་ལྟ་བ་འདི་ཉིད་ཆེས་འཕགས་པ་ཡིན་ཏེ། སྒྱུ་འཕྲུལ་རྒྱས་པའི་རྒྱུད་ཚིག་སངས་རྒྱས་གསང་བའི་ལམ་རིམ་དུ་དྲངས་པ་ལས། བླ་མེད་ཐེག་པའི་ནང་ནས་ནི། །དོན་དམ་དུ་ནི་དབྱེར་མེད་ལ། །ཀུན་རྫོབ་ཏུ་ནི་ཐམས་ཅད་ལ། །དག་དང་མ་དག་གཉིས་ཀར་འཛིན། །ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་བསྔལ་དག །ཀུན་རྫོབ་ཏུ་ཡང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་གསུངས་པའི་ཕྱིར་རོ། །ཞེས་ཀུན་མཁྱེན་ངྷ་རྨ་ཤྲཱིས་གསུངས། འདིར་ལྷ་དང་རྟོག་པ་སྦྱར་བའི་དབང་དུ་བྱས་ན། གུ་རུ་ཆོས་ཀྱི་དབང་ཕྱུག་གི་ཟབ་གཏེར་ཡང་དག་སྙིང་པོའི་གཏེར་གཞུང་ཨོ་རྒྱན་དུས་གསུམ་མཁྱེན་པའི་ཞལ་ལུང་ལས། མན་ངག་རྫོགས་པ་ཆེན་པོའི་གཞུང་གིས། རྒྱུད་ལུང་གཉིས་ཀྱི་དགོངས་པ་དེ་ཉིད་ཀྱང་སོ་སོ་ན་ཡོད་པ་མ་ཡིན་ཏེ། ཆོས་ཐམས་ཅད་གྲུབ་པའི་གྲུབ་ལུགས་ཀྱི་བདེན་པ་གཉིས་དབྱེར་མེད་པས། ཐམས་ཅད་སྐུ་གསུང་ཐུགས་ཀྱི་ཕྱག་རྒྱ་ཆེན་པོ། ལྷ་བཞི་ཅུ་རྩ་གཉིས་སུ་ཡེ་གདོད་མ་ནས་གནས་པ་ཡིན་ཏེ། དེ་ཡང་ཇི་ལྟར་བསྒོམ་ཞེ་ན། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཡེ་གདོད་མ་ནས་མ་སྐྱེས་པའི་ཆོས་ཉིད་ཀྱི་རང་བཞིན་ལ། བྱ་བྱེད་ནུས་པའི་སྒྱུ་མ་བདེ་བར་གཤེགས་པ་ཡབ་ཡུམ་བཅུའི་རང་བཞིན་ཡེ་ནས་ཡིན་པའི་ཕྱིར། ཆོས་ཐམས་ཅད་ཡེ་ནས་མྱ་ངན་ལས་འདས་ཏེ། དེ་ཡང་ཇི་ལྟར་འདས་ཞེ་ན། ཕུང་པོ་རིགས་ལྔའི་སངས་རྒྱས། འབྱུང་ལྔ་ཡུམ་ལྔའི་རང་བཞིན། རྣམ་པར་ཤེས་པ་བཞི་ནི་བྱང་ཆུབ་སེམས་དཔའི་རང་བཞིན། དེའི་ཡུལ་བཞི་ནི་ལྷ་མོ་བཞིའི་རང་བཞིན། དབང་པོ་བཞི་ནི་བྱང་ཆུབ་སེམས་དཔའི་རང་བཞིན། དུས་བཞི་ནི་མཆོད་པའི་ལྷ་མོ་བཞིའི་རང་བཞིན། ལུས་ཀྱི་དབང་པོ་དང་། རྣམ་པར་ཤེས་པ་དང་། རྣམ་པར་ཤེས་པའི་ཡུལ་དང་། དེ་ལས་བྱུང་བའི་རེག་པ་བཞི་ནི་ཁྲོ་བོ་བཞིའི་རང་བཞིན། རྟག་ཆད་མུ་བཞི་སྒོ་མ་བཞི། ཡིད་ཀྱི་རྣམ་པར་ཤེས་པ་ཀུན་ཏུ་བཟང་པོ། དེའི་ཡུལ་ནི་ཀུན་ཏུ་བཟང་མོ། ཕྱིན་ཅི་ལོག་དྲུག་ཐུབ་པ་དྲུག་གི་རང་བཞིན། དེ་དག་ཀྱང་ཡེ་ནས་མངོན་པར་རྫོགས་པར་སངས་རྒྱས་པའི་རང་བཞིན་ཡིན་པས། ད་ལམ་གྱིས་སྒྲུབ་པའི་གནས་གཞན་མ་ཡིན་བྱ་བའི་དོན་ནོ། །ཞེས་དང་། དེ་ཉིད་ཀྱི་དབང་གཞུང་ལས། སེམས་ཉིད་རང་བྱུང་གི་ཡེ་ཤེས་མ་སྐྱེས་མ་འགགས་པར་ཤར་བའི་རྟགས། བཅོམ་ལྡན་འདས་དཔལ་ཀུན་བཟང་ཧེ་རུ་ཀ་ཡེ་ཤེས་ཀྱི་སྐུ་ཞལ་གསུམ་ཕྱག་དྲུག་ཞབས་བཞི་པ་གཅིག་ཏུ་གསལ་ཏེ། དེ་ལྟར་གསལ་བའི་སྐུ་དེ་ཡང་ལོགས་ན་ཡོད་པ་མ་ཡིན་ཏེ། རང་གི་སེམས་ཀྱི་གཟུགས་བརྙན་ལྷར་གསལ་བ་ཡིན་ནོ། །དེ་ཡང་གཡས་གཡོན་གྱི་ཞལ་དང་ཕྱག་དྲུག་ནི་ཀ་རཱི་སོགས་ལྷ་མོ་བརྒྱད། གདན་ཟླ་བའི་དཀྱིལ་འཁོར་ནི་སེངྷ་སོགས་ཕྲ་མེན་མ་བརྒྱད། ཞབས་བཞི་སྒོ་མ་བཞིའོ། །དེ་རྣམས་ཀྱང་ལོགས་ན་ཡོད་པ་མ་ཡིན་ཏེ། རྣམ་པར་ཤེས་པ་ཚོགས་བརྒྱད་ཀ་རཱི་མ་བརྒྱད། ཡུལ་བརྒྱད་ཕྲ་མེན་མ་བརྒྱད། རྟག་ཆད་ཡོད་མེད་མཐའ་བཞི་སྒོ་མ་བཞི། དེ་ལྟ་བུ་དེ་རྟག་པ་ཐེར་ཟུག་མ་ཡིན་ཏེ། མ་སྐྱེས་པའི་དབྱིངས་སུ་གསལ་བས་ཡབ་ཡུམ་དབྱིངས་ཡེ་ཤེས་གཉིས་མེད་ཐིག་ལེ་ཆེན་པོའི་ངང་དུ་གཅིག་པས། ཡང་དག་གྲུབ་པ་གཅིག་པུ་ཉིད། །ཅེས་བྱའོ། །རང་གི་སེམས་ཉིད་དཔལ་ཆེན་པོའི་སྐུར་གསལ་བ་དེ་ལ་ལྷ་ཚོགས་ཐམས་ཅད་འདུས་པས། སངས་རྒྱས་བདེ་ཆེན་ཀུན་འདུས་པ། །ཞེས་བྱ། དེ་ཁོ་ན་དཔལ་ཆེན་པོའི་ཐུགས་རྣམ་པར་མི་རྟོག་པས་ཆོས་སྐུ། རང་བྱུང་ཡེ་ཤེས་རང་ལ་གསལ་བས་ལོངས་སྐུ། ལྷའི་དཀྱིལ་འཁོར་རྣལ་འབྱོར་པའི་ལུས་ལ་རྫོགས་པས་སྤྲུལ་སྐུ་སྟེ། རྣལ་འབྱོར་ཟབ་མོ་སྐུ་གསུམ་རྫོགས། །ཞེས་བྱ་བར་ངོ་སྤྲད་དོ། །ཞེས་གསུངས་ཤིང་། གཞུང་འདི་ཉིད་ལས་ཀྱང་། མཚོན་བྱ་བདག་ཉིད་རྩ་བའི་ལྷ༔ རྡོ་རྗེའི་རང་བཞིན་སྟོང་པ་སྟེ༔ གཞོན་ནུ་ཡེ་ཤེས་སྒྱུ་མའི་སྐུ༔ ཟུང་འཇུག་ཤིན་ཏུ་རྣམ་དག་པ༔ ཆོས་སྐུའི་ཡོན་ཏན་ཐམས་ཅད་ཉིད༔ གཟུགས་ཀྱི་རྣམ་པར་ཤར་བ་ནི༔ ཞེས་དང་། ཕུང་པོ་སྲས་མཆོག་རིགས་ལྔ་སྟེ༔ འབྱུང་བ་དེ་ཡི་ཡུམ་དང་རོལ༔ དགེ་དང་མི་དགེའི་ཆོས་རྣམས་ཀུན༔ ཁྲོ་བོ་ཆེན་པོ་ཡབ་ཡུམ་བཅུ༔ དེ་ལས་ཉོན་མོངས་རྟོག་པའི་རྩལ༔ ཁྲ་ཐབས་སྒོ་སྐྱོང་ཕུར་སྲུང་ཚོགས༔ མ་འདྲེས་ཉི་དང་འོད་བཞིན་དུ༔ ཅིར་ཡང་སྣང་ཞིང་ཅིར་ཡང་འགྱུར༔ ཞེས་གསུང་། སྐབས་འདིར་རོང་ཟོམ་པ་ཆེན་པོས་དཀོན་མཆོག་འགྲེལ་དུ། ཁ་ཅིག་ན་རེ། དོན་དམ་པར་རང་བཞིན་མེད་པས་སངས་རྒྱས་ཡིན་པ་དང་། ཀུན་རྫོབ་ཏུ་སངས་རྒྱས་སུ་འགྱུར་དུ་རུང་བའི་རྒྱུ་ཡིན་པས་སངས་རྒྱས་སུ་བཞག་གི། དངོས་པོའི་མཚན་ཉིད་ནི་མ་དག་པའི་སྣང་བ་ལྟར་བདེན་ནོ་ཞེས་ཟེར་ཏེ། དེ་ལྟར་བསྒྲུབ་པར་མི་བྱ་ཡི་ཀུན་རྫོབ་ཙམ་དུ་ཡང་ཕུང་པོ་ལྟ་བུར་སྣང་ཙམ་ཉིད་ནས་སངས་རྒྱས་གྲངས་མེད་པ་ཡོངས་སུ་དག་པའི་ཞིང་ཁམས་དང་བཅས་པའི་རང་བཞིན་ཉིད་ཀྱང་ཡིན་ལ། སྣང་བ་དེ་གཉིས་ཀྱང་ཕན་ཚུན་ལྟོས་ནས་དག་པའི་སྣང་བ་ལྟར་བདེན་པར་གྲུབ་བོ་ཞེས་བཞག་པར་བྱའོ། །དེ་ལྟ་བས་ན་ཕུང་པོའི་བྱེ་བྲག་ཏུ་གྱུར་པ་མིག་གི་ཡུལ་ཁ་དོག་ལྟ་བུ་གཅིག་ཀྱང་སངས་རྒྱས་གྲངས་མེད་པའི་རང་བཞིན་ནོ། །ཞེས་གསུངས། མདོར་ན་སྙིང་འགྲེལ་གསང་བདག་དགོངས་རྒྱན་ལས། གལ་ཏེ་དེ་ཉིད་རྟོགས་ཤིང་གོམས་ན་སངས་རྒྱས་ཡིན་མོད། གནས་པ་ཙམ་གྱིས་སངས་རྒྱས་སུ་ཇི་ལྟར་འགྱུར་སྙམ་ན། རྟོགས་རུང་མ་རྟོགས་རུང་རང་བཞིན་རྣམ་དག་གི་སངས་རྒྱས་ཡིན་ཏེ། འདུས་བྱས་རྣམས་རྟོགས་རུང་མ་རྟོགས་རུང་མི་རྟག་པ་ཡིན་པ་བཞིན་ནོ། །ཞེས་དང་། རོང་ཟོམ་པའི་སྣང་བ་ལྷར་སྒྲུབ་ལས་ཀྱང་། བླུན་པོས་ཡིད་བཞིན་གྱི་ནོར་བུ་རྙེད་པ་ངོ་མ་ཤེས་ཏེ་རང་གར་བཞག་པས་ཡོན་ཏན་གྱི་ཁྱད་པར་མ་མཐོང་བ་ལ། དེད་དཔོན་མཁས་པས་ངོ་སྤྲད་ནས། དེས་བྱི་དོར་བྱས་ཤིང་མཆོད་པས། ཡོན་ཏན་གྱི་ཁྱད་པར་མཐོང་ནས་ནོར་བུ་རིན་པོ་ཆེར་ངེས་པ་དཔེར་མཛད་ནས། ཐ་མལ་པའི་ལུས་ངག་ཡིད་ཀྱང་ལྷར་མ་ཤེས་ཤིང་མ་བཀུར་ན། ཡོན་ཏན་མི་དམིགས་ཏེ། ཤེས་ཤིང་བཀུར་བས་གཞི་དེ་ཉིད་ལས་ཡོན་ཏན་དམིགས་པའི་ཕྱིར་རོ། །ཞེས་སོགས་རིགས་པའི་སྒོ་དུ་མས་སྒྲུབ་པར་མཛད་པ་ལྟར་གནས་ཚུལ་ལ་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་དུ་ལྟ་བས་ཐག་ཆོད་པར་བྱ་བ་ཤིན་དུ་གཅེས་སོ། །དེར་མ་ཟད་བླ་མེད་ཀྱི་རྒྱུད་རྣམས་སུ་ལུས་ཅན་རྣམས་ཀྱི་སྙིང་ག་ཆོས་ཀྱི་ཕོ་བྲང་དུ་རྒྱུ་རྒྱུད་ཀྱི་རྟེན་དྭངས་མ་ལྔ་འདུས་ཀུན་རྫོབ་རྒྱུ་ཡི་ཐིག་ལེ་ལ་དོན་དམ་ཡེ་ཤེས་ཀྱི་ཐིག་ལེ་ངོ་བོ་རང་བཞིན་ཐུགས་རྗེ་གསུམ་དབྱེར་མེད་པའི་བདག་ཉིད་བདེ་བར་གཤེགས་པའི་སྙིང་པོའམ་སེམས་ཉིད་འོད་གསལ་བའི་ཆོས་སྐུ་བྱང་ཆུབ་ཀྱི་སེམས་ཏིལ་ལ་མར་གྱིས་ཁྱབ་པ་བཞིན་བཞུགས་པར་གསུངས་ཤིང་། འབྱུང་ལྔ་སེམས་དང་བཅས་པའི་དྭངས་མ་དྲུག་ཀྱང་གཉིས་གཉིས་རོ་གཅིག་ཏུ་འཇུག་པའི་དོན་གྱིས་ཤིན་ཏུ་ཕྲ་བའི་སྒོ་གསུམ་གདོད་མ་ནས་རྡོ་རྗེ་མི་ཤིགས་པ་གསུམ་ལྷའི་བདག་ཉིད་དུ་གནས་པ་སྟེ། སྒྱུ་འཕྲུལ་རྡོ་རྗེ་ལས། ལུས་ཅན་སྙིང་ལ་གང་གནས་པ། །རང་བྱུང་ཡེ་ཤེས་ཟག་མེད་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུའི་རང་བཞིན་ཡིན། །ཞེས་དང་། དཔེ་ཆུང་རང་གནས་ལས། མི་ཤིགས་ཐིག་ལེ་ཡེ་ཤེས་ནི། །སྐུ་གསུང་ཐུགས་ཀྱི་རྡོ་རྗེའི་བདག །གཅིག་དང་དུ་མ་རྣམ་སྤངས་པ། །སྣ་ཚོགས་སྣང་ལ་མཚོན་དུ་མེད། །ཅེས་དང་། རང་ཤར་ལས། ལུས་ལ་ཡེ་ཤེས་ཆེན་པོས་ཁྱབ། །ཏིལ་འབྲུ་ལ་ནི་མར་བཞིན་དུ། །ལུས་ཀྱི་བཀྲག་དང་གཟི་མདངས་ནི། །ཡེ་ཤེས་རླན་གྱིས་ཁྱབ་པར་བྱེད། །ཅེས་དང་། ཡང་དག་སངས་རྒྱས་དགོངས་པ་ནི། །སེམས་ཅན་ཀུན་གྱི་རང་རྒྱུད་ལ། །སྐུ་དང་ཡེ་ཤེས་ཚུལ་དུ་གནས། །དེ་ཡང་ཙིཏྟའི་དཀྱིལ་དུ་གནས། །ཡུངས་འབྲུའམ་ནི་ཏིལ་འབྲུ་ཙམ། །མ་བསྐྱེད་རྫོགས་པའི་ཚུལ་དུ་གནས། །ཞེས་དང་། དཔལ་དུས་ཀྱི་འཁོར་ལོ་ལས། སྲིད་གསུམ་ཕྲ་རགས་གཟུགས་མིན་འདིར་ནི་རྣམ་པར་ཤེས་པའོ་དེ་བཞིན་གཤེགས་པ་ཉིད་མེད་དེ། །སངས་རྒྱས་ཤེས་རབ་གང་དུའང་གནས་པ་མ་ཡིན་ཞེས་པའི་ཚིག་ནི་སངས་རྒྱས་པ་རྣམས་སྟོན་པར་འགྱུར། །གང་ཞིག་འགྱུར་མེད་དང་བྲལ་མི་རྣམས་ཀྱིས་ནི་སྟོང་པ་ཉིད་དེ་བཟུང་ནས་སྟོང་པར་ལྟ་བྱེད་པ། །དེས་ན་གཙོ་བོས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་དག་ནི་སྔགས་ཀྱི་ཐེག་པར་བསྟན། །ཞེས་དང་། བརྟག་གཉིས་ལས། ལུས་ལ་ཡེ་ཤེས་ཆེན་པོ་གནས། །རྟོག་པ་ཐམས་ཅད་ཡང་དག་སྤངས། །དངོས་པོ་ཀུན་ལ་ཁྱབ་པ་པོ། །ལུས་གནས་ལུས་ལས་མ་སྐྱེས་པའོ། །ཞེས་དང་། རིམ་ལྔ་ལས། རྟག་ཏུ་སྙིང་ལ་གནས་པ་ཡི། །ཐིག་ལེ་གཅིག་ལ་འགྱུར་བ་མེད། །དེ་སྒོམ་བྱེད་པའི་སྐྱེ་བོ་ལ། །ངེས་པར་ཡེ་ཤེས་སྐྱེ་བར་འགྱུར། །ཞེས་དང་། དོ་ཧ་ལས། མཁས་པ་རྣམས་ཀྱིས་བསྟན་བཅོས་འཆད་པའི་ཚེ། །ལུས་ལ་ཡེ་ཤེས་ཡོད་པར་མ་རྟོགས་སོ། །ཞེས་གསུངས། འདི་ལ་གསར་རྙིང་གི་རྒྱུད་དང་མན་ངག་གི་དབྱེ་བ་སོགས་ཀྱིས་རྩ་རླུང་ཐིག་ལེ་སྐུ་དང་ཡིག་འབྲུ་སོགས་ཀྱི་ཁྱད་པར་འདོད་ཚུལ་མང་ཡང་། དོན་ལ་དེ་ཐམས་ཅད་ཟབ་གསལ་གཉིས་མེད་བདེ་བ་ཆེན་པོ་བསམ་གྱིས་མི་ཁྱབ་པའི་ཡེ་ཤེས་ཀྱི་རང་གདངས་འབའ་ཞིག་ཡིན་དགོས་པའི་ཕྱིར་དོན་གྱི་གནད་གཅིག་པས། རྩ་ཐིག་སོགས་ཡིན་པས་རུང་རྒྱུ་དང་། སྐུ་སོགས་ཡིན་པས་མི་རུང་བའི་ཤེས་བྱེད་ཅིའང་མེད་དོ། །དེས་ན་སྐབས་འདིར་ཨོ་རྒྱན་དུས་གསུམ་མཁྱེན་པའི་ཞལ་ལུང་། གཏེར་ཆེན་ཆོས་ཀྱི་རྒྱལ་པོ་གུ་རུ་ཆོས་ཀྱི་དབང་ཕྱུག་གི་ཟབ་གཏེར་ལས་བྱོན་པའི་ཡང་དག་སྙིང་པོ་ལྟར་བཤད་ན་འབྲེལ་ཆེ་བས། དེ་ལྟ་ན་རང་ལུས་ཀྱི་སྙིང་ཁ་ཆོས་ཀྱི་འཁོར་ལོའི་རྩ་འདབ་བརྒྱད་ཀྱི་གསུམ་ཆོས་ཉིད་ཀྱི་རྩ། གཅིག་ཡེ་ཤེས་ཀྱི་རྩ། གསུམ་རང་རྒྱུད་ཀྱི་རྩ། གཅིག་ཡོན་ཏན་གྱི་རྩ་སྟེ། དེ་རྣམས་སུ་མ་དག་པ་རྣམ་ཤེས་ཚོགས་བརྒྱད་ཀྱི་རྟེན་དང་དག་པ་སྐུ་དང་ཡེ་ཤེས་སུ་འཆར་བའི་རྟེན་བྱེད་དེ། དེ་ཡང་རྩའི་དྭངས་མ་དར་དཀར་གྱི་སྐུད་པ་ལྟ་བུ། དེའི་ནང་ན་ཁྲག་གི་དྭངས་མ་མཚལ་ཁུ་ལྟ་བུ། དེའི་ནང་ན་དྲོད་ཀྱི་དྭངས་མ་མེ་ལོང་ཉི་མ་ལ་བཞག་པའི་ངད་ཙམ། དེའི་ནང་དུ་དབུགས་ཀྱི་དྭངས་མ་གསེར་ས་འོག་ཏུ་བཅུག་པའི་རླངས་པ་ཙམ། དེའི་ནང་ན་ནམ་མཁའི་དྭངས་མ་རྩ་སྦུབས་སྟོང་པ་བར་སྣང་སང་སེང་གོ་འབྱེད་པའི་ཚུལ་དུ་གནས་ཏེ། དེ་ཐམས་ཅད་ཀྱི་དབུས་ན་ཆོས་ཉིད་བྱང་ཆུབ་ཀྱི་སེམས་རང་བྱུང་གི་ཧེ་རུ་ཀ་ཚོན་གང་བ་ཞིག་རང་བྱུང་འོད་ཀྱི་གཞལ་ཡས་ཁང་ན་ཡེ་ནས་ལྷུན་གྲུབ་དུ་གནས་ཏེ། འཇའ་ཚོན་ལྟ་བུར་སྣང་ལ་རང་བཞིན་མེད་པར་འོད་གསལ་བར་བཞུགས་སོ། །དེའི་ཐུགས་ཀར་རིན་པོ་ཆེ་ཟུར་བརྒྱད་པའི་ལྟེ་བར་རྡོ་རྗེ་ནས་ཙམ་པ། དེའི་བུམ་པར་བདེ་བར་གཤེགས་པ་ཐམས་ཅད་ཀྱི་ཐུགས་རང་བྱུང་གི་ཡེ་ཤེས་ཧཱུྃ་ལྗང་དམར། རིན་པོ་ཆེའི་རྩིབས་ལ་ཧ་བརྒྱད། དེའི་མཐའ་ནི་རུ་ལུ་འབྲུ་བརྒྱད་ཀྱིས་བསྐོར་ནས་བཞུགས་པར་གསུངས་ཏེ། དྭངས་མ་ལྔ་ལྡན་འབྱུང་བ་འོད་ཀྱི་དཀྱིལ༔ ཁ་དོག་ལྔ་ལྡན་ཡེ་ཤེས་རིགས་ལྔའི་སྐུ༔ དུག་ལྔ་རྣམ་དག་འགྲོ་དྲུག་དབྱིངས་སུ་གསལ༔ ཡེ་ཤེས་རྣམ་དག་ཐིག་ལེ་ཆོས་ཀྱི་སྐུ༔ རྒྱུ་རྐྱེན་མི་མང འ་ཚོན་གང་རིག་པའི་སྐུ༔ རྟག་པ་མ་ཡིན་དངོས་མེད་ཆོས་ཀྱི་སྐུ༔ ཆད་པ་མ་ཡིན་འོད་གསལ་རིག་པའི་སྐུ༔ གཅིག་པུ་མ་ཡིན་ལྷུན་གྱིས་རྫོགས་པའི་སྐུ༔ དུ་མར་མ་ཡིན་བདག་ཉིད་ཆེན་པོའི་ངང་༔ བག་ཆགས་རྟོག་སྒྲིབ་དྲི་མ་མི་མངའ་སྟེ༔ གསལ་ལ་དག་པ་ཉི་མའི་སྙིང་པོ་འདྲ༔ གཞན་ན་མེད་དེ་ཀུན་གཞིའི་དབྱིངས་སུ་གསལ༔ རང་བྱུང་ཆོས་ཀྱི་སྐུ་ལ་ཕྱག་འཚལ་ལོ། །ཞེས་དང་། གཞུང་འདི་ཉིད་ལས་ཀྱང་། དེ་ལས་ཡེ་ཤེས་ཏི་ལ་ཀ༔དྭངས་མ་ལྔ་འདུས་སྙིང་པོའི་སྲོག༔ བླ་མ་རྡོ་རྗེ་འཆང་ཆེན་པོ༔ དཔལ་ཆེན་ཡང་དག་ཧེ་རུ་ཀ༔ ཞེས་གསུངས། འདི་ནི་ཕྲ་ཐིག་སོགས་སྔགས་གསར་རྙིང་གི་རྫོགས་རིམ་མཚན་བཅས་མཚན་མེད་བསྒོམ་པ་རྣམས་ཀྱི་གནད་མཐར་ཐུག་པ་སྟེ། དེ་ལ་འཛིན་པ་བརྟས་པའི་དབང་གིས་རགས་པའི་ལུས་མངོན་པར་གྲུབ་པའི་ཚེ། སྙིང་ག་ན་བཅུད་ཀྱི་ཚུལ་དུ་གནས་པར་སྣང་བའང་ཡོད་མོད་ཀྱི་དེ་ནི་ལུས་ལས་མ་སྐྱེས་ཤིང་ལུས་ལ་གནས་ཀྱི་གཞན་ལ་མ་ཁྱབ་པའང་མིན་ལ། དབྱིབས་དང་ཁ་དོག་ཆེ་ཆུང་ལྟ་བུར་སྣང་ཡང་ངོ་བོ་ཕྲ་རབ་རྡུལ་གྱི་ཆོས་ལས་འདས་པའི་རྣམ་ཀུན་མཆོག་ལྡན་གྱི་སྟོང་ཉིད་པྲ་ཕབ་ཀྱི་རྣམ་པ་ལྟ་བུ་ཡིན་པས། དོན་ལ་ཆེ་ཆུང་དང་ཕྱོགས་ཆར་ཡང་མ་གྲུབ་ཅིང་འདི་ལ་གནད་དུ་བསྣུན་པས་འོད་གསལ་གྱི་རྟགས་སྣང་མུ་མེད་པར་འཆར་བས་མཚོན་ལམ་གྱི་ཡོན་ཏན་གསར་དུ་སྐྱེ་བ་ལྟ་བུར་སྣང་ཡང་། ཡེ་ཤེས་རང་གི་ངོ་བོ་ནི་འཇིག་འབྲལ་མེད་པའི་རྡོ་རྗེ་ལྟ་བུ་དུས་གསུམ་མཉམ་པ་ཉིད་ཡིན་ཏེ། དཔལ་དུས་ཀྱི་འཁོར་ལོ་ལས། བུམ་པའི་ཆུ་ནི་ལེན་པར་བྱེད་པ་ན་ཡང་ནམ་མཁའ་འགྲོ་བ་མིན་པ་ཇི་ལྟ་བར། །མཁའ་ཁྱབ་མཁའ་ཡི་རྡོ་རྗེ་ཅན་ནི་ཡུལ་དང་རྣམ་པར་བྲལ་བ་ལུས་ཀྱི་དབུས་ན་དེ་བཞིན་ནོ། །ཞེས་དང་། རྡོ་རྗེ་སྙིང་འགྲེལ་ལས། ཇི་ལྟར་བུམ་པ་ཞིག་གྱུར་ཀྱང་། །ནམ་མཁའ་ལ་ནི་འཇིག་པ་མེད། །དེ་བཞིན་སེམས་ནི་ཞིག་གྱུར་ཀྱང་། །ཡེ་ཤེས་ལ་ནི་འཇིག་པ་མེད། །ཅེས་དང་། དུས་འཁོར་དབང་མདོར་བསྟན་དུ་གསེར་འགྱུར་གྱི་རྩི་ལ་དཔེ་མཛད་དེ། ཇི་ལྟར་ཟངས་ཀྱི་དྲི་མ་ནི། །བཅུད་ཀྱི་སྦྱོར་བས་ཉམས་པར་འགྱུར། །དེ་ཡི་ཡོད་ཉིད་ཉམས་པ་མེད། །དྲི་མེད་ཉིད་ཀྱིས་ཡང་དག་གནས། །དེ་བཞིན་སེམས་ཀྱི་དྲི་མ་ནི། །སྟོང་ཉིད་སྦྱོར་བས་རྣམ་ཉམས་འགྱུར། །དེ་ཡི་ཡེ་ཤེས་ཉིད་ཉམས་མེད། དྲི་མེད་ཉིད་ཀྱི་ཡང་དག་གནས། །ཞེས་དང་། བརྟག་གཉིས་ལས། ལྷ་དང་ལྷ་མིན་མི་རྣམས་དང་། །བཤང་བའི་སྲིན་བུ་སོགས་ཀྱིས་ཀྱང་། །བདེ་བ་གང་ཕྱིར་མི་ཤེས་པ། །རྟག་ཏུ་རང་བཞིན་བདེ་བ་ཅན། །ཞེས་དང་། ཨིནྡྲ་བྷོ་ངྷིས། བདེ་ཆེན་མི་རྟག་མ་ཡིན་ཏེ། །བདེ་བ་ཆེན་པོ་རྟག་ཏུ་རྟག །ཅེས་གསུངས་ཤིང་། དེར་མ་ཟད་ཐུན་མོང་གི་ཐེག་པ་ཆེན་པོའི་མདོ་སྡེ་རྣམས་ནས་ཀྱང་ཆོས་ཐམས་ཅད་དེ་བཞིན་གཤེགས་པ་ཡིན་པ་དང་། ཆོས་ཀྱི་དབྱིངས་མཉམ་པ་ཉིད་དང་རང་བྱུང་གི་ཡེ་ཤེས་འདུས་མ་བྱས་ཆེན་པོ་ཉིད་སོགས་སུ་སྟོན་པར་མཛད་དེ། ཡེ་ཤེས་སྣང་བ་རྒྱན་གྱི་མདོ་ལས། རྟག་ཏུ་སྐྱེ་མེད་ཆོས་ནི་དེ་བཞིན་གཤེགས། །ཆོས་རྣམས་ཐམས་ཅད་བདེ་བར་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པ་དག །འཇིག་རྟེན་དག་ན་མེད་པའི་ཆོས་ལ་སྤྱོད། །ཅེས་རྐང་པ་དང་པོ་གཏན་ཚིགས། ཆོས་རྣམས་ཐམས་ཅད་ཅེས་པ་ཆོས་ཅན། བདེ་བར་གཤེགས་པ་དང་འདྲ་ཞེས་པ་མཐུན་དཔེ། བསྒྲུབ་བྱ་ཆོས་ཐམས་ཅད་དེ་བཞིན་གཤེགས་པ་ཡིན་པར་བསྒྲུབས་ནས། ཚིག་ཕྱི་མ་གཉིས་ཀྱིས་དེ་ལ་འཇིག་རྟེན་པའི་མངོན་སུམ་ཚད་མས་མི་གནོད་པར་བསྟན་པ་དང་། ཤེར་ཕྱིན་ལས། འདས་པའི་དེ་བཞིན་ཉིད་གང་མ་བྱོན་དེ་བཞིན་ཉིད། །ད་ལྟར་དེ་བཞིན་ཉིད་གང་དགྲ་བཅོམ་དེ་བཞིན་ཉིད། །ཆོས་ཀུན་དེ་བཞིན་ཉིད་གང་རྒྱལ་བའི་དེ་བཞིན་ཉིད། །ཆོས་ཀྱི་དེ་བཞིན་ཉིད་འདི་ཐམས་ཅད་བྱེ་བྲག་མེད། །ཅེས་དང་། སྡོང་པོ་བཀོད་པ་ལས། འཇིག་རྟེན་ཁམས་མང་ལ་ལ་དག །བསམ་གྱིས་མི་ཁྱབ་ཚིག་གྱུར་ཀྱང་། །ནམ་མཁའ་འཇིག་པར་མི་འགྱུར་པ། །རང་བྱུང་ཡེ་ཤེས་དེ་བཞིན་ནོ། །ཞེས་དང་། འཕགས་པ་ཀླུས། ཇི་ལྟར་མེ་ཡིས་དག་པའི་གོས། །སྣ་ཚོགས་དྲི་མས་དྲི་མ་ཅན། །ཇི་ལྟར་མེ་ཡི་ནང་བཅུག་ན། །དྲི་མ་ཚིག་འགྱུར་གོས་མིན་ལྟར། །དེ་བཞིན་འོད་གསལ་བ་ཡི་སེམས། །འདོད་ཆགས་ལ་སོགས་དྲི་མ་ཅན། །ཡེ་ཤེས་མེ་ཡིས་དྲི་མ་བསྲེག །དེ་ཉིད་འོད་གསལ་མ་ཡིན་ནོ། །སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྙེད་གསུངས་པ་གང་། །དེ་དག་ཀུན་གྱིས་ཉོན་མོངས་ལྡོག །ཁམས་དེ་ཉམས་པར་བྱེད་མ་ཡིན། །ས་ཡི་དཀྱིལ་ན་ཡོད་པའི་ཆུ། །དྲི་མ་མེད་པར་གནས་པ་ལྟར། །ཉོན་མོངས་ནང་ན་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་དང་། ཇི་ལྟར་རང་ལུས་བུམ་པ་ཉིད། །དེ་ཉིད་མར་མེ་ལྟ་བུ་སྟེ། །བླ་མའི་ཞལ་གྱིས་ལེགས་བཅག་ན། །སངས་རྒྱས་ཡེ་ཤེས་གསལ་བར་འགྱུར། །ཞེས་དང་། མདོ་རྒྱན་ལས། དེ་བཞིན་ཉིད་ནི་ཐམས་ཅད་ལ། །ཁྱད་པར་མེད་ཀྱང་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་དང་། རྒྱུད་བླ་མ་ལས། ཉེས་པ་གློ་བུར་དང་ལྡན་དང་། །ཡོན་ཏན་རང་བཞིན་ཉིད་ལྡན་ཕྱིར། །ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པ་ཆོས་ཉིད་དོ། །ཞེས་སོ། །མདོར་ན། ཆོས་ཀྱི་རྒྱལ་པོ་རིགས་ལྡན་འཇམ་དཔལ་གྲགས་པས། ཕུང་པོ་རྣམ་དཔྱད་སྟོང་ཉིད་ནི། །ཆུ་ཤིང་བཞིན་དུ་སྙིང་པོ་མེད། །རྣམ་པ་ཀུན་གྱི་མཆོག་ལྡན་པའི། །སྟོང་ཉིད་དེ་དང་འདྲ་མ་ཡིན། །ཞེས་གསུངས་པ་བཞིན་ཤེས་པར་བྱ་དགོས་ལ། དེ་ལྟ་བུའི་སྙིང་པོ་དེ་ཉིད་ཀྱང་རྟེན་པའི་བྱེ་བྲག་གིས་སྣང་ཚུལ་དུ་དྲི་མ་མ་དག་པའི་སྐབས་སུ་སེམས་ཅན་དང་། དག་མ་དག་གཉིས་ལྡན་གྱི་སྐབས་སུ་ལམ་ལ་གནས་པའི་བྱང་ཆུབ་སེམས་དཔའ་དང་། ཤིན་ཏུ་རྣམ་དག་གི་སྐབས་སུ་དེ་བཞིན་གཤེགས་པ་ཞེས་གནས་སྐབས་གསུམ་དུ་རྣམ་པར་གཞག་སྟེ། རྒྱུད་བླ་མར། མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང་། །དེ་བཞིན་གཤེགས་པ་ཞེས་བརྗོད་དོ། །ཞེས་གསུངས། འདི་ལ་གཞི་ལམ་འབྲས་གསུམ་དང་རྒྱུད་གསུམ་གྱི་ཐ་སྙད་ཀྱང་མཛད་དེ། གཞི་ཡེ་ནས་དག་པའི་ཤྲཱི་ཧེ་རུ་ཀ་ནི་འཆིང་གྲོལ་མེད་པའི་གནས་ལུགས་རིག་པ་བྱང་ཆུབ་ཀྱི་སེམས་བདེན་པ་དབྱེར་མེད་སྤྱོད་ཡུལ་དང་བྲལ་བར་ཡེ་ནས་གནས་པའི་དོན་ཏེ་གསང་སྙིང་ལས། བཅིང་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་སོ། །འདི་ལ་ཀུན་གཞི་རྒྱུ་ཡི་རྒྱུད་ཅེས་བྱའོ། །ལམ་མངོན་པར་སྒྲུབ་པའི་ཧེ་རུ་ཀ་ནི། དེ་ཉིད་གློ་བུར་གྱི་དྲི་མ་དང་བྲལ་བའི་ཐབས་ཤེས་ཟུང་འཇུག་གི་བྱེད་རྩོལ་དང་བཅས་པའི་ལམ་བསྒོམ་པ་སྟེ་འདི་ལ་ཐབས་སམ་ལམ་གྱི་རྒྱུད་ཅེས་བྱ་སྟེ། རྒྱུད་དེ་ཉིད་ལས། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །ཞེས་དང་། ཤེས་འཇུག་མཚན་ཉིད་འབྱོར་བའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་གསུངས། འབྲས་བུ་ལྷུན་གྱིས་གྲུབ་པའི་ཧེ་རུ་ཀ་ནི། ཐབས་དེ་ལ་བརྟེན་ནས་གཞི་རྒྱུད་ལ་རྟེན་པའི་སྦྱང་བྱ་གློ་བུར་གྱི་དྲི་མ་སྣང་གསུམ་འཕོ་བའི་སྒྲིབ་པ་ཤིན་ཏུ་ཕྲ་བ་དང་བཅས་ལེགས་པར་སྦྱངས་པས་གཞི་ཇི་ལྟ་བ་བཞིན་མངོན་དུ་གྱུར་པ་མཐར་ཐུག་པ་སྟེ་འདི་ལ་མཐར་ཕྱིན་འབྲས་བུའི་རྒྱུད་ཅེས་བྱ་སྟེ། ཁོག་གཞུང་ལས། གྲུབ་པ་མཐར་ཕྱིན་འབྲས་བུར་བརྗོད། །ཅེས་གསུངས། དེ་ལྟར་ཐ་སྙད་ཙམ་དུ་གསུམ་དུ་དབྱེ་ནའང་། དོན་ལ་གཞི་འབྲས་གཉིས་སུ་མེད་པའི་ཆོས་ཉིད་བྱང་ཆུབ་སེམས་ལས་གཡོས་པ་མེད་དེ། ཉང་གཏེར་བདེ་གཤེགས་འདུས་ཆེན་ལས། མདོར་ན་རྒྱུད་ཅེས་བྱ་བའི་དོན༔ དངོས་པོའི་གནས་ལུགས་གཞི་ཡིན་ཏེ༔ གཞི་ལས་གཞན་པའི་འབྲས་བུ་མེད༔ འབྲས་བུའི་ཚུལ་ལས་འདས་པ་ཡི༔ ལམ་གྱི་དགོས་པ་ག་ལ་མཆིས༔ དེ་བས་རྒྱུ་དང་འབྲས་བུ་དང༔ ལམ་ཞེས་གྲགས་པ་གདགས་པ་ཙམ༔ ཞེས་གསུངས། དེ་ལྟར་གཞི་ལ་མེད་ན་ལམ་དུ་དེ་སྒྲུབ་པར་ཡང་མི་རིགས་པ་དང་། གསར་རྙིང་ཀུན་ལ་གྲགས་པའི་ལུས་དཀྱིལ་སོགས་དེ་ཐམས་ཅད་དོན་མེད་པར་འགྱུར་བ་དང་། སྒྲུབ་ཀྱང་དེ་གྲུབ་མི་སྲིད་པའི་སྐྱོན་སོགས་ཉེས་པ་མང་པོ་དང་ལྡན་ཏེ། དབུ་མ་ཆོས་དབྱིངས་བསྟོད་པར། ཁམས་ཡོད་ན་ནི་ལས་བྱས་པས། །ས་ལེ་སྦྲམ་དག་མཐོང་བར་འགྱུར། །ཁམས་མེད་ན་ནི་ལས་བྱས་ཀྱང་། །ཉོན་མོངས་འབའ་ཞིག་སྐྱེད་པར་བྱེད། །ཅེས་དང་། ཡིད་བཞིན་རིན་པོ་ཆེའི་མཛོད་ལས་ཀྱང་། ཚུལ་འདི་མི་ཤེས་སྟོང་པ་ཕྱང་ཆད་པ། །ཚིག་ཏུ་ཡོད་མེད་མཐའ་བྲལ་ཞེས་བརྗོད་ཀྱང་། །བྲལ་གཞི་མི་ཤེས་སྲིད་རྩེའི་ལྟ་བ་ཅན། །བསྟན་པ་འདི་ལས་ཕྱི་རོལ་གྱུར་པས་ན། །ནམ་མཁའི་ཡིད་ཅན་ཐལ་བས་བྱུག་ཀྱང་རུང་། །ཞེས་གསུངས། ཚུལ་འདི་ལྟར་ངེས་དོན་འཁོར་ལོ་ཐ་མ་ནས་རིགས་གཉིས་ལ་སྐུ་གསུམ་ཚང་ཚུལ་སོགས་དང་སྔགས་ཀྱི་ལྟ་གྲུབ་སྦྱོར་ཚུལ་འདི་གསར་དུ་བློ་བཟོར་བྱས་པ་མིན་ཏེ། ཀུན་མཁྱེན་ཆེན་པོས། ངེས་དོན་ཤིང་རྟ་ཆེན་མོར། འདི་ལྟར་བཀའ་ཐ་མ་ལས་ཁམས་རང་བཞིན་གྱིས་དག་པ་ཡོན་ཏན་ཡེ་ལྡན་དུ་ཡོད་ལ། ལམ་ཉམས་སུ་བླང་དུས་ཡོན་ཏན་སྐྱེ་བ་ལྟར་སྣང་བར་ཁས་ལེན་པ་དང་། སྔགས་ལས་རང་བཞིན་གྱི་དཀྱིལ་འཁོར་འགྲོ་བ་ཀུན་ལ་གནས་པར་འོག་ཏུ་འཆད་པ་གཉིས་ཁྱད་མེད་པས་གཞི་ག ཅིག་ལ། ལམ་ཡང་ཐབས་ཤེས་ཚོགས་གཉིས་སུ་གཅིག་ལ། འབྲས་བུ་ཡང་སྐུ་དང་ཡེ་ཤེས་སུ་གཅིག་པས་སྔོན་གྱི་སློབ་དཔོན་ཆེན་པོ་པདྨ་འབྱུང་གནས་ལ་སོགས་པས་ཕྱི་ནང་དུ་བཤད་པ་མཛད་པ་ཡིན་ནོ། །ཞེས་གསུངས་པ་འདི་སྔ་འགྱུར་གྱི་བརྒྱུད་པ་འཛིན་པ་རྣམས་ཀྱིས་གོ་དགོས་པའི་གནད་གལ་པོ་ཆེ་ཡིན་ཞིང་། རིག་འཛིན་འཇིགས་མེད་གླིང་པས་བདེན་གཉིས་ཤིང་རྟར་ཡང་འདི་བཞིན་དུ་འགོད་པར་མཛད་དོ། །དེ་ལྟར་ལེགས་པར་ཤེས་པའི་དགོས་པ་དང་ཕན་ཡོན་ཀྱང་ཡིད་བཞིན་མཛོད་ལས། ཡང་ཟབ་ལྟ་བའི་མཐར་ཐུག་འདི་ཤེས་པས། །གོལ་སྒྲིབ་ལས་གྲོལ་རྟག་ཆད་ཀུན་དང་བྲལ། །སྒྲུབ་པ་དོན་ཡོད་མྱུར་དུ་འཚང་རྒྱ་ཞིང་། །མདོ་རྒྱུད་ཀུན་ལ་ལྟ་བའི་མིག་དང་ལྡན། །དེ་ཕྱིར་གནས་ལུགས་འོད་གསལ་མཁྱེན་པར་མཛོད། །ཅེས་སོ། །མདོར་ན་ཕྱི་ཕུང་ཁམས་སྐྱེ་མཆེད། ནང་རྩ་རླུང་ཐིག་ལེ། གསང་བ་ངོ་བོ་རང་བཞིན་ཐུགས་རྗེ་གསུམ་ཡེ་ནས་རྡོ་རྗེ་གསུམ་མམ་སྐུ་གསུམ་གྱི་ངོ་བོར་གནས་པ་སྟེ། དེ་ཡང་རྟོག་ཚོགས་ལྷར་དག་ལ། ལྷ་ཡེ་ཤེས་སུ་དག་པས། ཡེ་ཤེས་ནི་གཟུང་འཛིན་གྱི་སྤྲོས་པ་དང་བྲལ་བའི་ཕྱིར་གང་བསྒོམས་ཤིང་བསྒྲུབ་བྱའི་ལྷ་ནི་རང་གི་སེམས་ཀྱི་ཆོས་ཉིད་སྤྲོས་བྲལ་བདེ་བ་ཆེན་པོར་ཤེས་པར་བྱ་སྟེ། ཀུན་བྱེད་ལས། སངས་རྒྱས་སྐུ་དང་ཡེ་ཤེས་ཡོན་ཏན་དང་། །སེམས་ཅན་ལུས་དང་བག་ཆགས་ལ་སོགས་པ། །སྣང་སྲིད་སྣོད་བཅུད་བསྡུས་པ་ཐམས་ཅད་ཀུན། །བྱང་ཆུབ་སེམས་ཀྱི་ངོ་བོ་ཡེ་ནས་ཡིན། །ཞེས་གསུངས་པ་བཞིན་ཤེས་པར་བྱའོ། །དེས་ན་འཁོར་བའི་ཆོས་ཐམས་ཅད་ཐག་ཁྲའི་སྦྲུལ་ལྟར་མེད་པ་གསལ་སྣང་ཙམ་ལས་རང་བཞིན་མེད་པའི་ཆོས་ཉིད་དུ་མཉམ་པར་ཤེས་ན་ལྟ་བ་འཁོར་འདས་དབྱེར་མེད་ཀྱི་དོན་ལ་ངེས་པ་རྙེད་པ་ཞེས་བྱ་སྟེ། སྒྱུ་འཕྲུལ་ལེ་ལག་ལས། འཁོར་བ་དང་ནི་མྱ་ངན་འདས། །གཉིས་ཀ་ཡོད་པ་མ་ཡིན་ཏེ། །འཁོར་བ་ཡོངས་སུ་ཤེས་པ་ན། །མྱ་ངན་འདས་ཞེས་དེ་ལ་བྱ། །ཞེས་དང་། དགྱེས་རྡོར་ལས། དེ་ཉིད་འཁོར་བ་ཞེས་བྱ་སྟེ། །འདི་ཉིད་མྱ་ངན་འདས་པ་ཉིད། །འཁོར་བ་སྤངས་ནས་གཞན་དུ་ནི། །མྱ་ངན་འདས་པ་རྟོགས་མི་འགྱུར། །ཞེས་དང་། བདག་ཉིད་ཆེན་པོ་ས་སྐྱ་པས་ཀྱང་། རང་སེམས་གདོད་ནས་སྤྲོས་བྲལ་རྒྱུ་རྒྱུད་དང་། །དབང་གི་ཡེ་ཤེས་ལས་ཀྱི་ལྟ་བ་དང་། །ཉམས་མྱོང་སངས་རྒྱས་ས་ལ་ངོ་བོ་གཅིག །རྟོགས་པའི་ཁྱད་པར་ཟླ་བའི་དཔེ་ཡིས་བསྟན། །ཞེས་དང་། རང་བཞིན་རྒྱུ་ལ་བསམ་ན་ལྷུན་གྲུབ་སྟེ། །མཐའ་ཡས་ཡོན་ཏན་ཚོགས་ནི་གནས་གྱུར་ཡིན། །དེས་ན་ལྷུན་གྲུབ་གནས་གྱུར་མི་འགལ་བ། །མཐར་ཕྱིན་འབྲས་བུའི་འཁོར་འདས་དབྱེར་མེད་ཡིན། །ཞེས་གསུངས། དེ་ལྟ་བུའི་འཁོར་འདས་དབྱེར་མེད་ཀྱི་ལྟ་བ་ལ་ངེས་པ་མ་རྙེད་ན། སྔགས་ལམ་དུ་ཞུགས་པའི་ཚེ་རང་བཞིན་དག་པའི་ཆོས་ལ་ངེས་པར་ཐེ་ཚོམ་ཟ་བར་འགྱུར་བས། རྩ་ལྟུང་དགུ་པ་ཕོག་པར་གདོན་མི་ཟ་བའི་ཕྱིར། ཅི་ནས་ཀྱང་འཁོར་འདས་དབྱེར་མེད་ཀྱི་ལྟ་བ་རྙེད་པའི་ཐབས་ལ་འབད་པར་བྱའོ་ཞེས་ཆོས་ཀྱི་རྒྱལ་པོ་སྨིན་གླིང་པ་སྐུ་མཆེད་ཀྱིས་རྗེས་སུ་གདམས་པར་མཛད་པ་ཡིན་ནོ། །དེ་ལྟར་ངེས་པར་བྱས་ནས་ལམ་ལྟ་སྒོམ་སྤྱོད་འབྲས་བཞིས་ཇི་ལྟར་ཉམས་སུ་ལེན་པའི་ཚུལ་ཡང་། ཡང་དག་སྙིང་པོའི་གཞུང་ལས། ལྟ་བ་སྟོང་གསལ་ཀུན་གྱི་དངོས་གཞི་འགྱུར༔ སྒོམ་པ་རང་གྲོལ་རྒྱུན་ཆད་མེད་པར་གནས༔ སྤྱོད་པ་རང་བྱུང་རེ་དོགས་མེད་པར་ཤར༔ སྐྱེ་མེད་འགག་མེད་རྩོལ་བ་མེད་པར་འབྱུང༔ འབྲས་བུ་འགྱུར་མེད་ཡོན་ཏན་ལྷུན་གྱིས་གྲུབ༔ དབུ་མཇུག་དོན་རྣམས་དེ་ལྟར་ཤེས་པར་བྱ༔ བྱར་མེད་དོན་དེ་ཉམས་སུ་བླངས་ཐབས་ཀྱང༔ བདག་ཉིད་ཀུན་བཟང་ཧེ་རུ་ཀ་ཡི་སྐུ༔ སྣང་ལ་རང་བཞིན་མེད་པ་ཡེ་ཤེས་སྒྱུ་མའི་སྐུ༔ རུ་ལུ་མ་འགགས་སྒྲ་གྲགས་རང་བྱུང་ཡེ་ཤེས་གསུང༔ སེམས་ཉིད་རང་བྱུང་ཡེ་ཤེས་སྟོང་གསལ་ཡེ་ཤེས་ཐུགས༔ སྐུ་གསུང་ཐུགས་སུ་དབྱེར་མེད་ཡང་དག་གྲུབ་པ་ཡིན༔ སེམས་ཉིད་ཐིག་ལེ་ཉག་གཅིག་མི་འགྱུར་རང་གནས་གཅིག་པུ་ཉིད༔ དུས་གསུམ་སངས་རྒྱས་དགོངས་པ་བདེ་ཆེན་འགྱུར་མེད་ཀུན་འདུས་པ༔ རྣལ་འབྱོར་ཡང་རབ་བློ་ལ་སྐུ་གསུམ་མ་བསྒྲུབས་ཡེ་ནས་རྫོགས༔གཉིས་མེད་ཡེ་ཤེས་རང་བྱུང་མཁའ་འགྲོ་སྒྱུ་མ་ལྟ་བུར་རང་བཞིན་བདེ༔ ཞེས་གསུངས་པ་དང་གཞན་ཡང་བྱང་ཆུབ་སེམས་དཔའ་རྡོ་རྗེ་ཆོས་ཀྱིས། འདི་ལྟར་སེམས་ཉིད་སྣ་ཚོགས་སུཿ སྣང་ཞིང་སྲིད་པའི་དངོས་པོ་ཀུན༔ རང་བཞིན་རྣམ་དག་ལྷ་ཡི་དབྱིངས༔ ལྷ་ཡི་རོལ་པ་ལྷ་ཡི་སྐུ༔ དེ་བཞིན་དངོས་གཞན་མ་ལུས་པ༔ ཡེ་ནས་ལྷ་ཡི་རང་བཞིན་ལས༔ ལྷ་ཡི་གཞི་ཞེས་རབ་ཏུ་བརྗོད༔ ཅེས་དང་། ཀུན་བྱེད་ལས། ཀྱཻ། སྟོན་པའི་སྟོན་པ་ཀུན་བྱེད་རྒྱལ་པོ་ཡི། །སྙིང་པོ་སྐུ་ཡི་དཀྱིལ་འཁོར་བཀོད་པ་ནི། །ཇི་ལྟར་སྣང་ཞིང་གནས་པའི་ཆོས་རྣམས་ཀུན། །སྐྱེ་བ་མེད་པ་ཆོས་དབྱིངས་ངང་ལ་བཀོད། །ཇི་ལྟར་གྲགས་ཤིང་གནས་པའི་ཆོས་རྣམས་ཀུན། །སྐྱེ་མེད་དབྱིངས་ལ་ཚིག་གི་གསུང་དུ་བཀོད། །སྙིང་པོ་བརྗོད་དུ་མེད་པའི་གསུང་ལ་འདུས། །དེ་ཡང་ཀུན་བྱེད་རྒྱལ་པོས་བཀོད་པ་ཡིན། །ཀྱཻ། སྟོན་པའི་སྟོན་པ་ཀུན་བྱེད་རྒྱལ་པོ་ཡིས། །སྙིང་པོ་རིག་པའི་དཀྱིལ་འཁོར་བཀོད་པ་ནི། །ཇི་ལྟར་དྲན་རིག་རྟོག་པ་ཐམས་ཅད་ཀུན། །མ་སྐྱེས་ཀུན་བྱེད་ཉིད་ཀྱི་དོན་དུ་རིག །ཀུན་བྱེད་ང་ཡི་སྐུ་གསུང་ཐུགས་ཉིད་ནི། །མ་བཅོས་རྣལ་དུ་བཞག་པའི་དཀྱིལ་འཁོར་གསུམ། །མ་བཀོད་དུས་གཅིག་རྫོགས་པའི་དོན་སྟོན་པས། །ལྷུན་གྲུབ་སྙིང་པོའི་དོན་ལ་འཇུག་པར་བྱེད། །ཅེས་གསུངས་པས། སེམས་ཉིད་རང་བཞིན་གྱིས་རྣམ་པར་དག་པ་ལྷའི་ངོ་བོར་གནས་པས། དེའི་རྩལ་ལས་ཤར་བའི་རོལ་པ་སྣང་སྲིད་འཁོར་འདས་ཀྱི་ཆོས་ཐམས་ཅད་ཀྱང་ཡེ་ནས་ལྷའི་ཕྱག་རྒྱ་ལས་མི་འདའ་བས་ན། གཟུགས་སུ་སྣང་བ་ཐམས་ཅད་ལྷའི་སྐུ། སྒྲ་རུ་གྲགས་པ་ཐམས་ཅད་སྙིང་པོ་སྔགས་ཀྱི་དབྱངས། སེམས་ཀྱི་འགྱུ་འཕྲོའི་དྲན་རྟོག་ཐམས་ཅད་ཐུགས་རང་བྱུང་གི་ཡེ་ཤེས་བདེ་བ་ཆེན་པོར་ཤེས་པར་བྱས་ནས་གཉུག་མ་རྡོ་རྗེའི་སྲོག་སྒྲུབ་པ་ནི་ལམ་གྱི་ནང་ནས་ཉེ་ལམ་ཟབ་པའི་མཐར་ཐུག་ཏུ་ཤེས་པར་བྱ་སྟེ་ཞིབ་པར་འོག་ཏུ་སྟོན་ནོ། །མདོར་ན་འདི་ལྟར་སྣང་ཞིང་ཞེན་པའི་ཕྱི་ནང་སྣོད་བཅུད་ཀྱིས་བསྡུས་པའི་ཆོས་ཐམས་ཅད་ཡེ་ནས་དག་པ་ལྷ་ཡི་འཁོར་ལོར་གནས་པ་ནི་སྒྲུབ་གཞི་དམ་ཚིག་སེམས་དཔའ། དག་པ་མཐར་ཕྱིན་པ་བདེ་བར་གཤེགས་པ་རྣམས་ཀྱི་ཐུགས་རང་བྱུང་གི་ཡེ་ཤེས་ཆོས་ཀྱི་སྐུ་མཉམ་པ་ཉིད་སྤྲོས་བྲལ་ཐིག་ལེ་ཉག་གཅིག་ཏུ་གནས་པ་ནི་ཡེ་ཤེས་སེམས་དཔའ། དེ་གཉིས་ཀའང་གནས་ཚུལ་དུ་ངོ་བོ་གདོད་མ་ནས། དབྱེར་མི་ཕྱེད་པའི་རང་བཞིན་དག་མཉམ་བདེན་པ་དབྱེར་མེད་སྣང་སྟོང་ཟུང་འཇུག་བརྗོད་བྲལ་ལྷན་ཅིག་སྐྱེས་པའི་ངོ་བོར་གནས་པ་ནི་དམ་ཚིག་ཡེ་ཤེས་གཉིས་སུ་མེད་པའམ་གཞི་འབྲས་དབྱེར་མེད་པའི་དོན་དེ་དྲི་མ་སྦྱང་བའི་གཞི། དེ་ལྟར་མ་རྟོགས་པའི་དབང་གིས་རང་བཞིན་ཐ་དད་དུ་བཟུང་བའི་ཞེན་རྟོག་མེད་སྣང་འཁྲུལ་པའི་བག་ཆགས་སྣང་གསུམ་འཕོ་བའི་སྒྲིབ་པ་ཕྲ་བ་དང་བཅས་དྲི་མ་གློ་བུར་བའི་ཆོས་རྣམས་ནི་སྦྱང་བྱ། དེ་སྦྱོང་བྱེད་ཀྱི་ཐབས་སམ་ལམ་ནི་འཁྲུལ་པ་ཀུན་བཏགས་ཀྱི་ཆ་རྣམས་བསྐྱེད་རིམ་གྱིས་དང་། ས་བོན་གྱི་ཆ་ནི་རྫོགས་རིམ་གྱིས་སྦྱོང་བར་བྱེད་པ་ཡིན་ཞིང་། ཇི་ལྟར་སྦྱང་ན་འཁྲུལ་པའི་ཆོས་ལས་ཉོན་སྡུག་བསྔལ་གྱི་རྣམ་པར་ཤར་བའི་རིགས་རྒྱུན་དེ་ཉིད་ལམ་བདེ་བ་ཆེན་པོར་སྒྱུར་བ་བྱེད་པ་ཡིན་ལ། བསྒྱུར་ཚུལ་ཡང་དེའི་རང་ངོ་ལ་བསལ་བཞག་མེད་པར་བཞག་པས་གང་ཤར་གྱི་རང་བཞིན་དག་སྣང་དུ་འཆར་བའི་གནད་ཀྱིས་ཏེ་རྒྱུ་མཚན་དེས་གསང་སྔགས་ཀྱི་ཐེག་པ་འདིར་ཀུན་འབྱུང་བདེན་པའི་རང་བཞིན་ལམ་བདེན་དང་། སྡུག་བསྔལ་བདེན་པའི་རང་བཞིན་འགོག་བདེན་དུ་སྣང་བས་འབྲས་བུ་ལམ་བྱེད་ཀྱི་དོན་ཡང་དེ་ཡིན་པའི་ཕྱིར་ན་མཚན་ཉིད་ཀྱི་ཐེག་པས་གཞི་སྤང་འགེགས་སྦྱོང་བའི་ལམ་ལས་ཁྱད་པར་དུ་འཕགས་པའི་གནད་ཤེས་པར་བྱའོ། །གཉིས་པ་གང་གིས་སྒྲུབ་པའི་ཐབས་སྒོམ་དོན་སྙིང་པོར་དྲིལ་ཏེ་རྣམ་པར་བཤད་པ་ལ་གསུམ། སྦྱོར་བ་སྔོན་དུ་འགྲོ་བའི་ཆོས། དངོས་གཞི་བསྐྱེད་བཟླས་བསྙེན་སྒྲུབ་སྐྱི་རྣལ་འབྱོར། རྗེས་ཆོ་གའི་ཡན་ལག་གཞན་བཤད་པའོ། །དང་པོ་ལ། སྦྱོར་བ་ཡོ་བྱད་ཀྱི་ཤོམ་དང་། སྔོན་འགྲོ་དངོས་གཉིས་ལས། དང་པོ་ནི། སྤྱིར་མངའ་བདག་ཉང་གི་གཏེར་བྱོན་པདྨའི་ལམ་རིམ་ཆེན་མོ་ལས། ཕུན་སུམ་ཚོགས་ལྔས་སྒྲུབ་གཞི་བཟུང་བ་ནི། །བྲག་ནག་དུར་ཁྲོད་ཕུག་སོགས་སྐྱོན་ཡོན་རྩི། །ཚེས་སྐར་གཟའ་བཟང་ཡར་ངོའི་སྔ་གོང་འཇུག །དད་གུས་དབང་ངམ་ཤེས་རབ་གདེང་དང་ལྡན། །ཟས་སྨན་མཆོད་བསྐང་སྒྲུབ་པའི་རྫས་རྣམས་བསགས། །མ་དྲེད་རྩེ་གཅིག་དཀའ་ཐུབ་མཐར་འདོན་ནོ། །ཞེས་གསུངས་པས། གང་དུ་སྒྲུབ་པའི་གནས་བྲག་དང་ནགས་ཚལ་དང་ས་ཕུག་དང་དུར་ཁྲོད་སོགས་གནམ་ས་བར་གྱི་དཔྱད་ལེགས་ཤིང་ཁྱད་པར་ཡིད་དུ་འོང་བས་ཉམས་དགའ་བ། སྔོན་བསྒྲུབས་པས་བཀྲ་ཤིས་པ། འཕགས་པའི་ཞབས་ཀྱིས་བཅགས་པས་བྱིན་ཆེ་བ། རང་རང་གི་རིགས་དང་མཐུན་པས་སྒྲུབ་ཐག་ཉེ་བ་སྟེ་མཚན་ཉིད་བཞི་དང་ལྡན་པར། ནམ་སྒྲུབ་པའི་དུས་ཚེས་གྲངས་གཅིག་གསུམ་བརྒྱད་དམ་བཅོ་ལྔ་སོགས་ཟླ་བ་ཡར་གྱི་ངོ་། སྐར་མ་རྒྱལ་དང་གཟའ་ཕུར་བུ་དར་བ་སོགས་འཕྲོད་སྦྱོར་དགེ་ཞིང་ཤིས་པའི་དུས་ཚོད་སྔ་དྲོའི་ཆ་ལའོ། །གང་སྒྲུབ་པ་པོ་དད་པ་ཆེ་བས་དཀར་པོའི་ཆོས་ལ་འཇུག་ནུས་པ། མོས་གུས་ཆེན་པོས་བླ་མ་སངས་རྒྱས་སུ་མཐོང་བས་བྱིན་རླབས་འཇུག་པའི་རྒྱུ་ཚང་བ། དབང་བཞི་ཐོབ་པས་མན་ངག་ཟབ་མོ་སྒོམ་སྒྲུབ་ཀྱི་སྣོད་དུ་རུང་བ། དམ་ཚིག་གཙང་བས་སྒྲུབ་པའི་གཞི་ཐེངས་པ། ཤེས་རབ་ཆེ་བས་ངེས་པའི་དོན་གོ་ནུས་པ། ལྟ་བའི་གདེང་དང་ལྡན་པས་ཉམས་ང་དང་འཁུ་འཕྲིག་མེད་པ་སྟེ་ཆོས་དྲུག་དང་ལྡན་པས། མཁོ་བའི་ཡོ་བྱད། འཚོ་བའི་ཟས། ནད་བཟློག་སྨན། དགྲ་བཟློག་མཚོན་ཆ། བགེགས་བཟློག་ཡུངས་ཀར། མཆོད་པ་བསྐང་རྫས་ཚོགས་ཀྱི་ཡོ་བྱད། སྒྲུབ་པའི་རྟེན་སོགས་གཞུང་ནས་ཇི་སྐད་བསྟན་པ་བཞིན་ཚོགས་པར་བྱས་ནས། སྒྲུབ་པའི་ཐབས་ཐོག་མ་ནས་བློ་མ་དྲེད་པར་དཀའ་ཐུབ་ཀྱིས་སྡེ་བཙུགས་ནས་གང་བསྒྲུབ་བྱའི་ལྷ་སྔགས་ཆོས་ཉིད་ཟབ་མོ་ལ་དམིགས་པ་རྩེ་གཅིག་པས་དངོས་གྲུབ་ཆེན་པོ་མ་ཐོབ་ཀྱི་བར་དུ་སྙིང་རུས་ཆེན་པོས་སྒྲུབ་པར་མཐར་འདོན་པར་བྱའོ། །དེ་ལྟར་ངེས་པར་བྱས་ནས་མཚམས་སོགས་ཀྱི་སྐབས་སུ་ཇི་ལྟར་བྱ་བའི་རིམ་པ་རྣམས་ནི་རིག་འཛིན་སྔ་མ་རྣམས་ཀྱི་གསུང་། གསང་བ་སྤྱི་འགྲེལ་ལྟར་ཤེས་པར་བྱ་ཞིང་། འདིར་དགོས་ཆོས་བྱེ་བྲག་པའི་ཆོས་རྣམས་བཤད་ན། གནས་ཁང་ཕྱག་དར་དང་རྒྱན་གྱིས་བརྒྱན་པའི། རང་མདུན་དུ་མཚན་ཉིད་དང་ལྡན་པའི་ཐོད་སྐུའམ་དམ་ཚིག་གི་བྲིས་སྐུ་རབ་གནས་ཅན་དགྲམ། དེའི་མདུན་དུ་སྟེགས་བུ་ལ་འཛོམས་ན་རས་བྲིས་ཀྱི་ལྟེ་བར་འབྲུ་ནག་གི་ཚོམ་བུ་བཀོད་པའི་ཁར་སྒྲུབ་ཕུར་ཚད་ལྡན་དར་མཐིང་ནག་གི་ཅོད་པཎ་ཅན་བདུག་བྲབ་བྱུག་གསུམ་གྱིས་གཟི་བྱིན་བསྐྱེད་པ་ཨེ་ཁྲོམ་ལ་གཟུག་པའི་སྟེང་དུ། དཔལ་གཏོར་རཀྟའི་ཐིག་ལེ་དགུས་མཚན་པ་སྐུ་རྟེན་དར་གདུགས་དང་བཅས་པ་བཀོད། མདུན་དུ་སྨན་གཏོར་རཀྟ་དང་། ཆུ་གཉིས་ཉེར་སྤྱོད་སོགས་ཀྱི་མཆོད་པའི་ཡོ་བྱད་ཅི་འཛོམས་དང་། ཚེ་སྒྲུབ་དང་འབྲེལ་ན། སྒྲུབ་རྟེན་གྱི་མདུན་དུ་ཚེ་འབྲང་། གཡས་སུ་ཚེ་རིལ། གཡོན་དུ་ཚེ་ཆང་། རྒྱབ་ཏུ་ཚེ་མདའ་རྣམས་ཀྱང་བཀོད། རང་དོན་སྤྲོས་མེད་རྒྱུན་གྱི་ཉམས་ལེན་དང་ཕྲིན་ལས་དཀྱུས་ཙམ་ལ་སྨན་གཏོར་རཀྟ། ཆུ་གཉིས་ཉེར་སྤྱོད་ཙམ་བཤམས་པས་ཆོག གང་ལྟར་ཡང་སྔོན་གཏོར་ཚོགས་ཀྱི་ཡོ་བྱད། ཆད་བརྟན་གཏོར་འབུལ་སོགས་འོག་ཏུ་དགོས་པའི་ཡོ་བྱད་ཐམས་ཅད་ཚོགས་པར་བྱའོ། །གཉིས་པ་སྔོན་འགྲོ་དངོས་ལ། ཐུན་མོང་དང་ཁྱད་པར་གཉིས་ལས། དང་པོ་ལ་གཉིས། ལམ་གྱི་རྟེན་གཞི་སྐྱབས་སེམས། བསགས་སྦྱང་གི་སྙིང་པོ་བླ་མའི་རྣལ་འབྱོར་རོ། །དང་པོ་ནི། སྙན་བརྒྱུད་ཡང་དག་ཟབ་ཏིག་ལས། དལ་འབྱོར་རྙེད་དཀའ་དོན་ཆེ་དང༔ མི་རྟག་མྱུར་དུ་འཇིག་པར་བསམ༔ ལས་འབྲས་བླང་དོར་ཚུལ་བཞིན་བྱ༔ འཁོར་བར་ཡིད་འབྱུང་དྲག་ཏུ་བསྐྱེད༔ རང་གཞན་སྡུག་བསྔལ་ལས་སྒྲོལ་ཕྱིར༔ སྐྱབས་སོང་བྱང་ཆུབ་སེམས་མཆོག་བཟུང༔ ཞེས་གསུངས་པ་ལྟར་ཞིབ་ཏུ་འཆད་འོས་ཀྱང་འདིར་ཡི་གེས་འཇིགས་ལ། ས་ཁོངས་ཙམ་དུ་འདི་ལྟར་ངོ་བོ་རྒྱུ་རྐྱེན་དཔེ་གྲངས་ཚུལ་གང་ལ་བསམས་ཀྱང་ཡང་ཡང་རྙེད་དཀའ་ཞིང་། རྙེད་ན་དོན་ཆེན་པོ་དང་ལྡན་པ། ཡིད་བཞིན་གྱི་ནོར་བུ་རིན་པོ་ཆེ་ལས་ཀྱང་ཆེས་ལྷག་པའི་དལ་འབྱོར་གྱི་རྟེན་ཕུན་སུམ་ཚོགས་པ། ད་རེས་ལན་གཅིག་སྔོན་བསགས་བཟང་པོའི་མཐུས་རྙེད་པ་འདི་ཆུད་ཟོས་སུ་མ་སོང་བར་གཏན་དུ་ཕན་པའི་ཆོས་གཤའ་མ་ཞིག་བསྒྲུབས་ནས་སྙིང་པོ་ལེན་པར་བྱ་དགོས་ཏེ། ཨོ་རྒྱན་ཆེན་པོས། དལ་འབྱོར་རྙེད་དཀའ་ཨུ་དུམ་བཱ་ར་འདྲ། །རྙེད་པ་དོན་ཆེ་ཡིད་བཞིན་ནོར་ལས་ལྷག །ད་རེས་ཕུན་ཚོགས་རྐྱེན་ཀུན་འཛོམས་དུས་འདིར། །བརྩོན་འགྲུས་དྲག་པོས་སྲིད་ལས་སྒྲོལ་བར་མཛོད། །ཅེས་གསུངས་སོ། །དེ་ཡང་མྱུར་དུ་བརྩོན་པས་མ་འབད་ན། སྔར་སྐྱེས་པ་རྣམས་ལུས་པ་མེད་པའི་ཕྱིར་དང་། ཚེ་ལ་སྣོན་མ་མེད་ཅིང་འབྲིད་པ་ཡོད་པའི་ཕྱིར་དང་། ལུས་སེམས་འདུས་བྱས་ཀྱི་ཚོགས་པ་ཡིན་པའི་ཕྱིར་ཏེ། རྒྱུ་མཚན་གསུམ་གྱིས་ངེས་པར་འཆི། དེ་བཞིན་དུ་ཚེ་ལ་དུས་བཏབ་མེད་པའི་ཕྱིར་དང་། འཚོ་བའི་རྐྱེན་ཉུང་ཞིང་འཆི་རྐྱེན་མང་བའི་ཕྱིར་དང་། ལུས་འདུས་བྱས་ཆུ་བུར་བཞིན་དུ་སྐད་ཅིག་གིས་གཡོ་ཞིང་མི་བརྟན་པའི་ཕྱིར་ནམ་འཆི་ཆ་མེད། འཆི་བའི་ཚེ། བསགས་པའི་ནོར། འབྲེལ་བའི་གཉེན། བརྩིགས་པའི་མཁར། གང་གིས་ཀྱང་མི་ཕན་པར། ཐ་ན་གཅེས་པར་བསྐྱངས་པའི་ལུས་ཀྱང་བཞག་ནས་འགྲོ་དགོས་ཏེ། སྤྱོད་འཇུག་ལས། དེ་རིང་ཁོ་ནར་མི་འཆི་ཞེས། །བདེ་བར་འདུག་པ་རིགས་མ་ཡིན། །ཞེས་སོ། །དེ་ལྟར་ཤི་ནས་ཀྱང་ཅང་མེད་དུ་མི་འགྲོ་སྟེ། སྐྱེ་བ་ལེན་དགོས། དེའི་ཚེ་ནའང་ལས་དགེ་སྡིག་གཉིས་པོ་ནི་ལུས་དང་གྲིབ་མ་བཞིན་དུ་མི་འབྲལ་བར་ལྷན་ཅིག་ཏུ་འགྲོགས་པ་ཡིན་ཏེ། རྒྱལ་པོ་ལ་གདམས་པའི་མདོ་ལས། དུས་ཀྱིས་ཉེན་ཏེ་རྒྱལ་པོ་འགྲོ་གྱུར་ན། །ལོངས་སྤྱོད་མཛའ་དང་མངའ་ཐང་རྗེས་མི་འབྲང་། །སྐྱེས་བུ་དག་ནི་གང་ནས་གར་འགྲོ་ཡང་། །ལས་ནི་གྲིབ་མ་བཞིན་དུ་རྗེས་སུ་འབྲང་། །ཞེས་གསུངས། དེས་ན་ཀུན་སློང་དུག་གསུམ་གྱིས་བསྐྱེད་པའི་ལས་སྦྱོོར་བ་གཞན་གནོད་རང་འབྲས་སྡུག་བསྔལ་སྐྱེད་བྱེད་མི་དགེ་བའི་ལས་རྣམས་སྲོག་ལ་བབས་ཀྱང་སྤངས་ཤིང་། ཀུན་སློང་དུག་གསུམ་མེད་པ། སྦྱོར་བ་གཞན་ཕན། རང་འབྲས་བདེ་བ་སྐྱེད་བྱེད་དགེ་བའི་ལས་ལ་ཅི་ནུས་སུ་བརྩོན་ཞིང་དེ་ཡང་དམ་པ་གསུམ་གྱིས་རྩིས་ཟིན་པ་གལ་ཆེའོ། །གལ་ཏེ་མི་དགེ་བའི་ལས་ཀྱིས་འབྲས་བུ་ངན་སོང་གསུམ་དུ་སྐྱེས་ན་ནི་ཚ་གྲང་བཀྲེས་སྐོམ་བཀོལ་སྤྱོད་སོགས་སྡུག་བསྔལ་བཟོད་གླགས་མེད། ཟག་བཅས་དགེ་བའི་ལས་ཀྱིས་མཐོ་རིས་རྣམས་སུ་སྐྱེས་ཀྱང་འགྱུར་དང་འདུ་བྱེད་ཀྱི་སྡུག་བསྔལ་ལས་མ་འདས་པས། ཁམས་གསུམ་གྱི་འཁོར་བའི་གནས་འདི་ནི་མེ་ཡི་འོབས་སམ་སྲིན་མོའི་གླིང་ལྟ་བུར་ཤེས་པའི་ངེས་འབྱུང་གི་བློ་ཡང་དག་པ་རྒྱུད་ལ་བསྐྱེད་པར་བྱ་སྟེ་མདོ་ལས། འདོད་པའི་ཁམས་ནི་སྐྱོན་དང་བཅས་པ་སྟེ། །དེ་བཞིན་གཟུགས་ཀྱི་ཁམས་ཀྱང་སྐྱོན་དང་བཅས། །གཟུགས་མེད་ཁམས་ཀྱང་སྐྱོན་དང་བཅས་པ་སྟེ། །མྱ་ངན་འདས་པ་འབའ་ཞིག་སྐྱོན་མེད་མཐོང་། །ཞེས་གསུངས། དེ་ལྟ་བུའི་འཇིགས་པ་ལས་སྐྱོབ་ནུས་པ་ནི་དཀོན་མཆོག་གསུམ་མ་གཏོགས་གཞན་གང་ཡང་མེད་དེ། འཇམ་དཔལ་རྣམ་པར་རོལ་པའི་མདོ་ལས། ཕ་མ་ཁྱེད་ཀྱི་སྐྱབས་མ་ཡིན། །མཛའ་བཤེས་རྩ་ལག་རྣམས་ཀྱང་མིན། །དེ་དག་གིས་ནི་ཁྱོད་བོར་ནས། །ཇི་ལྟར་འདོད་པ་བཞིན་དུ་འགྲོ། །འཇིགས་གྱུར་འཇིགས་པ་སེལ་མཛད་ཅིང་། །སྐྱབས་མེད་སྐྱོབ་པའི་སངས་རྒྱས་དང་། །ཆོས་དང་ཚོགས་དང་དགེ་འདུན་ལ། །དེ་རིང་སྐྱབས་སུ་འགྲོ་བར་གྱིས། །ལྷ་དང་དྲི་ཟ་མི་རྣམས་ལས། །གང་དག་དེ་ལ་སྐྱབས་སོང་བ། །འཇིགས་པ་ཀུན་ལས་ཐར་བར་འགྱུར། །བདེ་བ་རྙེད་པ་དཀའ་བ་མིན། །ཞེས་སོ། །དེས་ན་གང་ལ་སྐྱབས་སུ་འགྲོ་བའི་ཡུལ་ནི། ཕྱི་ལྟར་ན། སངས་རྒྱས་ཆོས་དང་དགེ་འདུན་གསུམ། ནང་ལྟར་ན། བླ་མ་ཡི་དམ་མཁའ་འགྲོ་གསུམ། གསང་བ་ལྟར་ན། ཆོས་སྐུ་ལོངས་སྐུ་སྤྲུལ་སྐུ་གསུམ་སྟེ་སློབ་དཔོན་བཱི་མ་ལས་མཛད་པའི་སྐྱབས་འགྲོ་ཡན་ལག་དྲུག་པ་ལས། གནས་གསུམ་བསྟན་པའི་ཡུལ་དེ་ལ། །ཞེས་སོ། །དེ་ཐམས་ཅད་ཀྱང་རང་གི་རྩ་བའི་བླ་མར་འདུ་སྟེ། སྡོམ་འབྱུང་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཔལ་ལྡན་རྡོ་རྗེ་འཆང་། །ཞེས་སོ། །དེ་ལ་སྐྱབས་སུ་འགྲོ་བའི་རྒྱུའམ་ཐབས་ནི། དཀོན་མཆོག་གི་ཡོན་ཏན་དང་། འཁོར་བའི་འཇིགས་པ་དང་། སེམས་ཅན་ལ་དམིགས་པའི་སྙིང་རྗེ་གསུམ་གྱིས་འགྲོ་སྟེ། འཇིགས་དང་ཡོན་ཏན་དྲན་པས་འགྲོ། །ཞེས་དང་། མདོ་རྒྱན་ལས། དེ་ནི་དེ་དངོས་འདོད་པས་ཁས་ལེན་དེ་ཡང་སྙིང་རྗེ་ལས་རིགས་བྱ། །ཞེས་སོ། །དུས་ཇི་ཙམ་དུ་འགྲོ་བ་ནི། འདི་ནས་བྱང་ཆུབ་མ་ཐོབ་ཀྱི་བར་དུ་སྟེ། འདི་ནས་བྱང་ཆུབ་ཐོབ་བར་རོ། །ཞེས་སོ། །ཚུལ་ཇི་ལྟ་བུས་འགྲོ་བ་ནི་གནས་སྐབས་སུ་སྟོན་པ་ལམ་གྲོགས་ཀྱི་ཚུལ་དང་མཐར་ཐུག་སངས་རྒྱས་ཆོས་ཀྱི་སྐུ་རང་རྒྱུད་ལ་ཐོབ་པར་འདོད་པ་མཚན་ཉིད་རྒྱུའི་སྐྱབས་འགྲོ་དང་། ད་ལྟ་ནས་རང་སེམས་དཀོན་མཆོག་གསུམ་གྱི་རང་བཞིན་དུ་གྲུབ་པར་ཤེས་པས་སྐྱབས་སུ་འགྲོ་བ་ནི་རྡོ་རྗེ་ཐེག་པའི་ལུགས་ཏེ། ཡེ་ཤེས་གྲུབ་པ་ལས། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་རྫོགས་དགེ་འདུན་ཉིད། །ཡིན་ཕྱིར་རང་གི་སེམས་ཉིད་མཆོག །ཅེས་སོ། །དེ་ལྟར་སྐྱབས་སུ་སོང་བའི་བསླབ་བྱ་ནི། ཐུན་མོང་དུ་དགག་སྒྲུབ་ཆ་མཐུན་གྱི་བསླབ་བྱ་གསུམ་ལས། དང་པོ་དགག་པའི་བསླབ་བྱ་གསུམ་ནི། པཎ་ཆེན་བི་མ་ལས། སྐྱབས་གསུམ་དང་པོའི་བསླབ་བྱ་ནི། །གནོད་སྦྱིན་མི་བསྟེན་ཕྱག་མི་འཚལ། །གཉིས་པ་སེམས་ཅན་ཐམས་ཅད་ལ། །འཚེ་བ་སྤངས་ཤིང་བརྩེ་བར་བྱ། །གསུམ་པ་བདག་དང་གཞན་གྱི་ཡུལ། །སྡིག་པ་ཅན་དང་འགྲོགས་པ་མིན། །ཞེས་སོ། །གཉིས་པ་སྒྲུབ་པའི་བསླབ་བྱ་གསུམ་ཡང་། སྐུ་གཟུགས་ཚིགས་སུ་བཅད་པ་དང་། །ལྷན་པ་སེར་པོ་བཏབ་པ་ལའང་། །དད་མོས་སྒོ་ནས་སྟོན་པར་བརྟག །ཞལ་ནས་གསུངས་པ་མཐའ་དག་ལ། །སྐུར་བ་མི་གདབ་སྤྱི་བོར་བླང་། །གང་ཟག་དག་དང་མ་དག་ལ། དམ་པར་བལྟ་བར་བྱ་བ་ཡིན། །ཞེས་སོ། །གསུམ་པ་ཆ་མཐུན་གྱི་བསླབ་བྱ་ཡང་། ལུས་སྲོག་ཕྱིར་ཡང་གསུམ་མི་སྤོང་། །དུས་འདིར་རྐྱེན་རྣམས་ཅི་བྱུང་ཡང་། །མགོན་སྐྱབས་གཞན་དུ་བཙལ་བ་མིན། །ཆེ་བའི་ཡོན་ཏན་ཟས་དག་གིས། །རྟག་ཏུ་དྲན་ཅིང་མཆོད་པ་ཡིན། །རྒྱུན་གྱི་སྐྱབས་འགྲོ་བརྗོད་བྱ་བ། །དུས་དྲུག་རྒྱུན་གྱི་བསྐུལ་མ་ཡིན། །ཞེས་སོ། །འབྲས་བུའི་བསླབ་བྱ་དེའི་སྟེང་དུ་མཆོད་འོས་མི་བསླུ་ཞིང་དམ་པ་རྣམས་ལ་སྐུར་འདེབས་སྤངས་པ་དང་། ཆོས་མཉམ་པ་ཉིད་ཀྱི་ཚུལ་ལ་ནན་ཏན་བྱ་བ་སྟེ། རྫོགས་པ་ཆེན་པོ་སེམས་ཉིད་ངལ་གསོ་ལས། བླ་མར་སྐྱབས་སོང་མཆོད་འོས་མི་བསླུ་ཞིང་། །དམ་པ་རྣམས་ལ་སྐུར་འདེབས་མི་སྙན་སྤངས། །ཞེས་དང་། འབྲས་བུའི་བསླབ་བྱ་མཉམ་ཉིད་ནན་ཏན་བྱ། །བཟང་ངན་མི་རྟོག་མཆོག་དམན་བླང་དོར་མིན། །སྤྲོས་ལ་མི་བརྟེན་ཆོས་ཉིད་གཉུག་མར་སྦྱང་། །ཐམས་ཅད་ལྷུན་རྫོགས་དཀྱིལ་འཁོར་གཅིག་ཏུ་སྤྱད། །ཅེས་སོ། །དེ་ལྟར་སྐྱབས་སུ་སོང་བའི་དགོས་པ་དང་ཕན་ཡོན་གྱི་ཁྱད་པར་ཡང་། བི་མ་ལས། མུ་སྟེགས་སྤྱོད་པ་ལས་ལོག་ཡིན། །གསུམ་དུ་མི་སྐྱེ་རྟེན་དུ་འགྱུར། །བར་ཆད་མེད་དང་ནད་ཉུང་རིང་། །བྱང་ཞིང་སོག་པའི་ཕན་ཡོན་ནོ། །ཞེས་རྣམ་གྲངས་བརྒྱད་དུ་གསུངས་པས་མཚོན་མཐའ་ཡས་ཏེ། མདོར་ན་དྲི་མ་མེད་པའི་མདོ་ལས། སྐྱབས་སུ་སོང་བའི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་ནས། །དེ་ནི་དེ་བས་ལྷག་པར་འགྱུར། །ཞེས་སོ། དེ་ལྟར་ལམ་ལོག་པ་ལས་ཁྱད་པར་དུ་བྱེད་པ་སྐྱབས་སུ་སོང་བའི་རྗེས། །ལམ་དམན་པ་ལས་ཁྱད་པར་དུ་བྱེད་པ་བྱང་ཆུབ་མཆོག་ཏུ་སེམས་བསྐྱེད་པར་བྱ་དགོས་ཏེ། ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་ལས། བྱང་ཆུབ་སེམས་ནི་མ་བསྐྱེད་པར། །སངས་རྒྱས་ནམ་ཡང་མི་འཐོབ་ཅིང་། །འཁོར་བར་རང་གཞན་དོན་སྒྲུབ་པའི། །ཐབས་གཞན་ཡོད་པ་མ་ཡིན་ནོ། །ཞེས་སོ། །དེ་ལ་བྱང་ཆུབ་སེམས་ཀྱི་ངོ་བོ་ནི། མངོན་པར་རྟོགས་པའི་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་གསུངས་པས། སྙིང་རྗེས་སེམས་ཅན་ལ་དམིགས་པ་དང་། ཤེས་རབ་ཀྱིས་རྫོགས་བྱང་ལ་དམིགས་པ་སྟེ་ཟུར་གཉིས་དང་ལྡན་པ་ནི་བྱང་ཆུབ་ཀྱི་སེམས་ཏེ། ཇི་ལྟར་བསྐྱེད་ཅིང་སྒོམ་པའི་ཚུལ་ནི། དོན་དམ་པར་ཆོས་ཐམས་ཅད་རང་བཞིན་མཉམ་པ་ཉིད་ཡིན་ཀྱང་། དེ་ལྟར་མ་རྟོགས་པའི་དབང་གིས་གཟུང་འཛིན་གྱི་འཁྲུལ་པ་ལུ་གུ་རྒྱུད་དུ་འཕྱན་ནས་འདུ་བྱེད་ཟག་བཅས་ཀྱི་ལས་བསགས་པའི་དབང་གིས། མེད་སྣང་སྲིད་པའི་གནས་སུ་འཕྱན་ཞིང་སྡུག་བསྔལ་མུ་མཐའ་མེད་པ་ལ་ལོངས་སྤྱོད་པ་འདི་ཐམས་ཅད་ཚེ་རབས་ཐོག་མ་མེད་པའི་དུས་ནས་འཁོར་བ་ན་འཁོར་བའི་ཚེ་རང་གི་ཕ་མ་བྱས་པའི་དྲིན་ཆེན་ཤ་སྟག་ཡིན་པས། འདི་ཐམས་ཅད་བདེ་བ་དང་ལྡན། སྡུག་བསྔལ་དང་བྲལ། སྡུག་བསྔལ་མེད་པའི་བདེ་བ་ལ་གནས། ཉེ་རིང་ཆགས་སྡང་སོགས་ཀྱི་བློ་དང་བྲལ་ནས་མྱུར་དུ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེད་ཐོབ་ན་ཅི་མ་རུང་དེ་ལ་བདག་གིས་ཅི་ནས་ཀྱང་འགོད་པར་བྱ། དེའི་ཆེད་དུ་བདག་གིས་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེ་དེ་ཐོག་མར་ཅི་ནས་ཀྱང་ཐོབ་པར་བྱའོ་སྙམ་དུ་དམ་བཅའ་བ་སྨོན་པ་སེམས་བསྐྱེད་དང་། དེའི་ཆེད་དུ་དཔལ་ཧེ་རུ་ཀའི་བསྙེན་སྒྲུབ་ཟབ་མོ་ལ་ཚུལ་བཞིན་དུ་འཇུག་པར་བགྱིའོ་སྙམ་དུ་དམ་བཅས་ཤིང་སྦྱོར་བ་ལག་ལེན་གྱིས་ཁྱབ་པ་ནི་འཇུག་པ་སེམས་བསྐྱེད་དེ། བྱང་ཆུབ་ཀྱི་སེམས་འདི་ལ་དབྱེ་སྒོ་མང་ཡང་བསྡུ་ན་འདི་གཉིས་ཀྱི་ནང་དུ་མ་འདུས་པ་གང་ཡང་མེད་དེ། སྤྱོད་འཇུག་ལས། བྱང་ཆུབ་སེམས་དེ་མདོར་བསྡུ་ན། །རྣམ་པ་གཉིས་སུ་ཤེས་བྱ་སྟེ། །བྱང་ཆུབ་སྨོན་པའི་སེམས་དང་ནི། །བྱང་ཆུབ་འཇུག་པ་གཉིས་ཡིན་ནོ། །འགྲོ་བར་འདོད་དང་འགྲོ་བ་ཡི། །བྱེ་བྲག་ཇི་ལྟར་ཤེས་པ་ལྟར། །དེ་བཞིན་མཁས་པས་འདི་གཉིས་ཀྱི། །བྱེ་བྲག་རིམ་པར་ཤེས་པར་བྱ། །ཞེས་དཔེ་དང་བཅས་སྟེ་གསུངས་པ་བཞིན་ནོ། །དེའི་བསླབ་བྱ་ལ་དབྱེ་ན་དཔག་ཏུ་མེད་ཀྱང་བསྡུ་ན་སྨོན་འཇུག་གི་བསླབ་བྱ་གཉིས་སུ་འདུ་སྟེ། སྨོན་པའི་བསླབ་བྱ་ནི་ཚད་མེད་བཞི་ལ་བློ་སྦྱོང་བ་དང་། དཀར་ནག་ཆོས་བཞིར་བླང་དོར་བྱ་བ་ཡིན་ཏེ། སེམས་ཉིད་ངལ་གསོ་ལས། སྨོན་པའི་བསླབ་བྱ་ཚད་མེད་བཞི་པོ་བསྒོམ། །དེ་ཡི་མི་མཐུན་ཕྱོགས་སྤང་སེམས་བསྲུང་བྱ། །ཞེས་དང་། མདོར་ན་ནག་པོའི་ཆོས་བཞི་སྤང་བྱ་ཞིང་། །དཀར་པོའི་ཆོས་བཞི་དག་ལ་ནན་ཏན་བྱ། །ཞེས་སོ། །འཇུག་པའི་བསླབ་བྱ་ནི། མོས་བསྔོ་ཡི་རང་སོགས་ཐབས་ལ་མཁས་པས་ཕ་རོལ་དུ་ཕྱིན་པ་དྲུག་ལ་ཚུལ་བཞིན་དུ་བསླབས་ཤིང་དེའི་མི་མཐུན་ཕྱོགས་རྣམས་སྤངས་པ་ཡིན་ཏེ། དེ་ཉིད་ལས། འཇུག་པའི་བསླབ་བྱ་ཕ་རོལ་ཕྱིན་དྲུག་སྤྱད། །དེ་ཡི་མི་མཐུན་ཕྱོགས་སྤངས་བརྩོན་པར་བྱ། །ཞེས་སོ། །དེ་ལྟར་སེམས་བསྐྱེད་པའི་ཕན་ཡོན་ཡང་། བྱམས་སྨོན་ལས། ངན་འགྲོ་ལས་ནི་ཟློག་བྱེད་ཅིང་། །མཐོ་རིས་ལམ་ནི་རབ་སྟོན་ལ། །རྒ་ཤི་མེད་པར་འདྲེན་བགྱིད་པའི། །བྱང་ཆུབ་སེམས་ལ་ཕྱག་འཚལ་ལོ། །ཞེས་གསུངས་པ་ལྟར། གནས་སྐབས་སུ་ངན་འགྲོའི་འཇིགས་པ་མཐའ་དག་ལས་གྲོལ་བ་དང་། མཐོ་རིས་ཀྱི་བདེ་བའི་ཁྱད་པར་མཐའ་དག་འཐོབ་པ་དང་། མཐར་ཐུག་རྒ་ཤི་མེད་པ་ཐར་པ་བྱང་ཆུབ་ཆེན་པོའི་གོ་འཕང་ཐོབ་པ་སོགས་ཕན་ཡོན་གྱི་ཁྱད་པར་ཚད་མེད་པ་དང་ལྡན་ཏེ། མདོར་ན་དཔལ་བྱིན་གྱིས་ཞུས་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་སྟེ། །དེ་བས་ཀྱང་ནི་ལྷག་པར་འགྱུར། །ཞེས་གསུངས་པ་བཞིན་ནོ། །དེ་ལྟར་གོ་དོན་རྣམ་པར་བཞག་པ་བློ་ལ་ངེས་པར་བྱས་ནས་སྐབས་ཀྱི་བསྒོམ་དོན་དངོས་ནི། གནས་ཁང་ཡེ་ཤེས་རོལ་པའི་གཞལ་མེད་ཁང་དག་པའི་ཞིང་གི་འབྱོར་པ་ཚད་མེད་པས་མངོན་པར་འཕགས་པའི་ནང་ཁོངས་སུ། རང་ཉིད་གཉུག་མའི་ཧེ་རུ་ཀར་གསལ་བའི་ཐུགས་ཀ་ནས་འོད་ཟེར་འཕྲོས་པས་བླ་མ་རིག་འཛིན་དཔལ་ཆེན་ཁྲག་འཐུང་རོལ་པའི་དཀྱིལ་འཁོར་གྱི་འཁོར་ལོ་སྐྱབས་གནས་དཀོན་མཆོག་རྒྱ་མཚོ་མ་ཚང་བ་མེད་པ་བསམ་གྱིས་མི་ཁྱབ་པ་ཏིལ་གྱི་གོང་བུ་ཁ་ཕྱེས་པ་བཞིན་དུ་མཁའ་ཁྱབ་ཀྱི་འཁོར་ལོར་སད་པར་མོས་ལ། ཚོགས་ཞིང་ཁྱད་པར་ཅན་དེ་དག་གི་སྤྱན་སྔར་རང་གཞན་སེམས་ཅན་ཐམས་ཅད་འཁོད་དེ་སྒོ་གསུམ་འཇུག་པ་གཅིག་པས་བྱང་ཆུབ་བར་དུ་སྐྱབས་འགྲོ་བ་དང་། འགྲོ་རྣམས་བསྒྲལ་འདོད་ཀྱི་བསམ་པས་བྱང་ཆུབ་ཏུ་སེམས་བསྐྱེད་པ་བཅས་ཚིག་རྗེས་སུ་དོན་དྲན་བཞིན་པའི་ངང་ནས། ན་མོ༔ བླ་མ་དཔལ་ཆེན་ཞི་ཁྲོའི་ལྷ༔ ཞེས་སོགས་བརྒྱ་སྟོང་ཁྲི་འབུམ་ཅི་འགྲུབ་བྱ་ཞིང་དོན་བློ་ཡུལ་དུ་འདྲེས་ངེས་བྱའོ། །མཐར་ཚོགས་ཞིང་སྐྱབས་ཡུལ་རྣམས་འོད་དུ་ཞུ་ནས་རང་གཞན་སེམས་ཅན་ཐམས་ཅད་ལ་ཐིམ་པས་སྒྲིབ་གཉིས་བྱང་ཚོགས་གཉིས་རྫོགས། སྐྱབས་ཡུལ་རྣམས་ཀྱི་ཐུགས་རྒྱུད་ལ་བཞུགས་པའི་ཡོན་ཏན་ཐམས་ཅད་ཐོབ་པར་མོས་ལ། མཐར་འཁོར་གསུམ་མི་དམིགས་པའི་དབྱིངས་སུ་མཉམ་པར་བ ཞག་གོ །གཉིས་པ་ལ། ཐུན་མོང་དུ་རྟེན་བསྐྱེད་པ། འགལ་རྐྱེན་སྡིག་སྒྲིབ་སྦྱང་བ་དང་། མཐུན་རྐྱེན་ཚོགས་བསགས་པ་དང་། བྱིན་རླབས་བླ་མའི་རྣལ་འབྱོར་ཏེ་བཞི་ལས། དང་པོ་ནི། ཨཱཿ རང་གི་མདུན་གྱི་ནམ་མཁའ་རུ༔ ཞེས་སོགས་ཏེ། དེ་ཡང་། ཨ་ནི་སྐྱེ་བ་མེད་པའི་དོན་ཏེ། འཁོར་འདས་ཀྱི་ཆོས་ཐམས་ཅད་འོད་གསལ་གཉུག་མའི་ངོ་བོར་དག་པའི་རང་མདངས། ཡེ་ཤེས་རང་སྣང་ལས་གྲུབ་པའི་གཞལ་མེད་ཁང་དག་པའི་ཞིང་གི་འབྱོར་པ་ཚད་མེད་པས་བརྒྱན་པ། ཡེ་ཤེས་ལྔ་ཡི་རང་བཞིན་འོད་ལྔའི་ཟེར་ཕྲེང་འཕྲོ་བའི་ཀློང་དུ། མདུན་གྱི་ནམ་མཁར་སེང་གེ་ཆེན་པོ་བརྒྱད་ཀྱིས་བཏེགས་པའི་རིན་པོ་ཆེའི་ཁྲི་སྣ་ཚོགས་པདྨ་དང་ཉི་ཟླའི་སྟེང་དུ། ངོ་བོ་རང་ལ་དབང་བསྐུར་རྒྱུད་བཤད་མན་ངག་སྟོན་པའི་རྩ་བའི་བླ་མ་ཉིད། རྣམ་པ་རིགས་རྣམས་ཀུན་གྱི་ཁྱབ་བདག་བཅོམ་ལྡན་འདས་དཔལ་རྡོ་རྗེ་སེམས་དཔའ། ཉེས་པའི་སྐྱོན་གྱིས་མ་གོས་པའི་བརྡར་སྐུ་མདོག་དཀར་པོ། ཆོས་སྐུ་ཐིག་ལེ་ཉག་གཅིག་མཚོན་པའི་ཞལ་གཅིག་པ། ཐབས་ཤེས་ཟུང་དུ་འབྲེལ་བའི་ཕྱག་གཉིས་ཀྱི། གཡས་པས་ཐབས་བདེ་བ་ཆེན་པོའི་རང་བཞིན་མཐའི་རྟོག་པས་མི་ཕྱེད་པའི་བརྡར་རྡོ་རྗེ་རྩེ་ལྔ་པ་དང་། གཡོན་པས་ཤེས་རབ་སྐྱེ་བ་མེད་པ་དབྱིངས་སྟོང་པ་ཉིད་མཚོན་བྱེད་དྲིལ་བུ་དཀུར་བརྟེན་པས་ཡུམ་ལ་འཁྱུད་པ། རང་འོད་ཀྱི་ཡུམ་རྡོ་རྗེ་སྙེམས་མ་དཀར་མོ་གྲི་ཐོད་འཛིན་པ་དང་བདེ་སྟོང་གཉིས་སུ་མེད་པར་སྦྱོར་ཞིང་། སྲིད་ཞིའི་མཐའ་ལ་མི་གནས་པའི་ཞབས་གཉིས་ཡབ་རྡོ་རྗེ་དང་ཡུམ་པདྨའི་སྐྱིལ་ཀྲུང་གིས་བཞུགས་པ། གཉིས་ཀའང་ཞི་བའི་ཚུལ་དགུ་དང་ལྡན་པ་སྟེ། དེ་ཡང་ང་རྒྱལ་མ་སྤངས་གནས་སུ་དག་པས་སྐུ་ཤ་དང་ཕྱག་ཞབས་མཉེན་པ། དེ་བཞིན་དུ་ཞེ་སྡང་དག་པས་ཡན་ལག་ལྕུག་པའམ་དཀུ་སྐབས་ཕྱེད་ཅིང་འཚམ་པ། འདོད་ཆགས་དག་པས་ཐབས་ཤེས་ཕན་ཚུན་འཁྲིལ་བའམ་འཁྲིལ་བག་ཆགས་པས་ལྷོད་པོར་མ་གྱུར་པ། ཕྲག་དོག་དག་པས་སྐུ་དྲངས་ཤིང་ཚིགས་མཚམས་སོགས་འཕྲུལ་ལྡེམ་ཆགས་པ། གཏི་མུག་དག་པས་སྐུ་ལ་གཞོན་ཤ་ཆགས་པ། མ་རིག་པ་སྤངས་པས་སྐུ་གཙང་ཞིང་ཁ་དོག་མ་འདྲེས་པར་གསལ་བ་ཡེ་ཤེས་རྒྱས་པས་བཀྲག་ཅིང་མུ་མེད་པའི་འོད་ཟེར་འཕྲོས་པས་འཚེར་བ། མཚན་དང་དཔེ་བྱད་རྫོགས་པས་བརྗིད་ཅིང་ཡིད་དུ་འོང་བས་ལྷུན་སྡུག་པ། ཆེ་བའི་ཡོན་ཏན་གྱིས་ཐམས་ཅད་ཟིལ་གྱིས་གནོན་པས་གཟི་བྱིན་ཆེན་པོ་དང་ལྡན་པ་སྟེ། རྒྱུད་ལས། མཉེན་ལྕུག་འཁྲིལ་ལྡེམ་གཞོན་ཚུལ་ཅན། །གསལ་འཚེར་ལྷུན་སྡུག་གཟི་བྱིན་ལྡན། །ཞེས་གསུངས་པས་སྔ་མ་ལྔ་ངོ་བོའི་ཡོན་ཏན་དང་། ཕྱི་མ་བཞི་རྣམ་པའི་ཡོན་ཏན་ནོ། །ཡབ་ཀྱི་སྐུ་ལ་དུག་ལྔ་དང་ཕུང་ལྔ་དག་པ་མཚོན་བྱེད་དར་གྱི་ཆས་གོས་ལྔ་སྟེ། དར་མཐིང་ཁྲིའི་ཟི་ལྡིར་ཏེ་རྒྱབ་འཕན། དར་སྣ་ལྔ་ཡི་ཅོད་པཎ། གར་གྱི་ཕུ་དུང་། དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས། ཚི་གུ་ནི་ཁྲ་བོའི་མིང་ཡིན་པས་ཁ་དོག་སྣ་ཚོགས་པའི་སྨད་དཀྲིས་རྣམས་སོ། །རྣམ་ཤེས་ཚོགས་བརྒྱད་གནས་སུ་དག་པའམ་ཆེ་བའི་ཡོན་ཏན་རྫོགས་པའི་བརྡར་རིན་པོ་ཆེའི་རྒྱན་བརྒྱད་ནི། རིན་པོ་ཆེའི་དབུ་རྒྱན་ནོར་བུའི་རྩེ་ཕྲན་ཅན། དེ་བཞིན་དུ་རིན་པོ་ཆེའི་སྙན་རྒྱན། མགུལ་རྒྱན། དཔུང་རྒྱན། དོ་ཤལ་ཏེ་རིན་པོ་ཆེ་སྣ་ཚོགས་སྤེལ་བའི་ཕྲེང་བ་ལྟེ་འོག་ཏུ་སླེབ་པ། སེན་མོ་དོ་སྟེ་དེ་ལས་ཐུང་བ་ནུ་སྟེང་དུ་སླེབ་པ། ཕྱག་གདུབ། ཞབས་གདུབ། སྐ་རགས་རིན་པོ་ཆེའི་ཕྲ་ཚོམ་གྱིས་མཛེས་པ་སྟེ། རྒྱན་ཆས་འདི་རྣམས་ལ་ངོས་འཛིན་ཅུང་མི་འདྲ་བ་འགའ་སྣང་མོད་འདིར་ནི་སྨིན་ལུགས་ལྟར་བཀོད་པའོ། དེ་ལྟར་རྒྱན་ཆས་བཅུ་གསུམ་རྫོགས་པ། ཡུམ་ལ་རུས་པའི་འཁོར་ལོ་ཆོས་དབྱིངས་ཡེ་ཤེས། དེ་བཞིན་དུ། རྣ་ཆ་སོར་རྟོགས། མགུལ་རྒྱན་མཉམ་ཉིད། གདུ་བུ་མེ་ལོང་། སྐ་རགས་བྱ་གྲུབ་སྟེ་ཡེ་ཤེས་ལྔ་མཚོན་པའི་རུས་པའི་ཕྱག་རྒྱ་ལྔ་སྟེ། འདི་ལ་ཕར་ཕྱིན་དང་སྦྱར་བའི་དག་སྦྱོར་ཡང་ཡོད་དོ། །གཞན་ཡང་དར་དང་རིན་པོ་ཆེའི་རྒྱན་རྣམས་ཀྱིས་འཛེས་པར་སྤྲས་པ། ཡབ་ཡུམ་བདེ་བ་ཆེན་པོ་མཆོག་ཏུ་རྒྱས་པའི་རང་རྩལ། ཕུང་ཁམས་གཤེགས་པ་གཤེགས་མ། དབང་ཡུལ་སེམས་དཔའ་སེམས་མ། ཡན་ལག་གམ་རྟོག་ཚོགས་ཁྲོ་བོ་ཁྲོ་མོ་སྟེ་གདན་གསུམ་ཡོངས་རྫོགས། སྐུ་དགེ་འདུན། གསུང་དམ་ཆོས། ཐུགས་སངས་རྒྱས་ཏེ་ཡི་དམ་ཞི་བ་དང་ཁྲོ་བོ། ཡོན་ཏན་དཔའ་བོ་དང་རྣལ་འབྱོར་མ། ཕྲིན་ལས་ཆོས་སྐྱོང་སྲུང་མ་སྟེ། ཕྱི་ལྟར་དཀོན་མཆོག་གསུམ། ནང་ལྟར་རྩ་བ་གསུམ། གསང་བ་སྐུ་གསུམ་སྟེ་སྐྱབས་ཀུན་འདུས་པའི་ངོ་བོ། དྲན་པ་ཙམ་གྱིས་སྲིད་ཞིའི་རྒུད་པ་སེལ་ཞིང་ལྷན་སྐྱེས་བདེ་བ་ཆེན་པོའི་ཡེ་ཤེས་རྩོལ་མེད་དུ་བསྐྱེད་ནུས་པའི་བདག་ཉིད་ཅན་དུ་བཞུགས་པར་བསམ་པའོ། །གཉིས་པ་དངོས་གཞིའི་ལམ་གྱི་ཡོན་ཏན་རྒྱུད་ལ་སྐྱེ་བའི་གེགས་འགལ་རྐྱེན་སྡིག་སྒྲིབ་སྦྱོང་བྱེད་རྡོ་རྗེ་སེམས་དཔའི་བཟླས་སྒོམ་ནི། བླ་མ་རྡོ་རྗེ་སེམས་དཔའ་ལ༔ ཞེས་སོགས་ཏེ། དེ་ཡང་ཆོས་བཞི་བསྟན་པའི་མདོ་ལས། བྱམས་པ་ཆོས་བཞི་དང་ལྡན་ན་སྡིག་པ་བྱས་ཤིང་བསགས་པ་ཐམས་ཅད་ཟིལ་གྱིས་གནོན་པར་འགྱུར་རོ། །བཞི་གང་ཞེ་ན། འདི་ལྟ་སྟེ། རྣམ་པར་སུན་འབྱིན་པ་ཀུན་ཏུ་སྤྱོད་པ་དང་། གཉེན་པོ་ཀུན་ཏུ་སྤྱོད་པ་དང་། སོར་ཆུད་པའི་སྟོབས་དང་། རྟེན་གྱི་སྟོབས་སོ། །ཞེས་གསུངས་པ་ལྟར་སྡིག་པ་བཤགས་པ་ལ་གཉེན་པོ་སྟོབས་བཞི་ཚང་དགོས་པས། སྨོས་མ་ཐག་པ་ལྟར་མདུན་མཁར་བླ་མ་རྡོ་རྗེ་སེམས་དཔའ་སྐྱབས་ཀུན་འདུས་པའི་བདག་ཉིད་དུ་གསལ་བའི་སྐུ་ཡི་གནས་གསུམ་དུ། པད་ཟླའི་གདན་ལ་ༀ་ཨཱཿཧཱུྃ་དཀར་དམར་མཐིང་གསུམ་རང་མདོག་དང་མཚུངས་པའི་ཡི་གེ་བརྒྱ་པའི་སྔགས་ཕྲེང་གིས་གཡས་སུ་བསྐོར་བར་གསལ་བ་ནི་རྟེན་གྱི་སྟོབས། སྔར་བྱས་ཀྱི་ལས་སྤྱི་དང་ཁྱད་པར་རྩ་བ་དང་ཡན་ལག་གི་དམ་ཚིག་ཉམས་ཆག་འགལ་འཁྲུལ་བྱུང་བ་ལ་གནང་འགྱོད་ཀྱི་བསམ་པ་དྲག་པོས་བླ་མ་རྡོ་རྗེ་སེམས་དཔའ་ཁྱེད་མཁྱེན། ཁྱེད་ལ་སྐྱབས་མཆིའོ། །ཐུགས་རྗེས་དགོངས་ཏེ་བདག་གཞན་གྱི་རྒྱུད་ཀྱི་སྒྲིབ་གཉིས་བག་ཆགས་དང་བཅས་པ་རྩད་ནས་བྱང་ཞིང་དག་པར་མཛད་དུ་གསོལ་སྙམ་པ་སུན་འབྱིན་པའི་སྟོབས། ཕྱིན་ཆད་སྲོག་ལ་བབས་ཀྱང་སྡིག་པའི་ལས་དངོས་སུ་ལྟ་ཅི། རྨི་ལམ་དུའང་མི་བགྱིད་དོ་སྙམ་པ་སྡིག་པ་ལས་ལྡོག་པའམ་སོར་ཆུད་པའི་སྟོབས། སྔར་བྱས་ཀྱི་གཉེན་པོར་རྡོ་རྗེ་སེམས་དཔའི་སྒོམ་བཟླས་ལ་སྤྱོད་པ་གཉེན་པོ་ཀུན་ཏུ་སྤྱོད་པའི་སྟོབས་ཏེ། སྟོབས་བཞིའི་དམིགས་གནད་དང་ལྡན་པའི་ངང་ནས་ཡི་གེ་བརྒྱ་པ་བརྒྱ་སྟོང་ཁྲི་འབུམ་སོགས་ཅི་ནུས་སུ་བཟླ་ཞིང་། དེ་ལྟར་སྔགས་ཟླ་བའི་ཚེ་བླ་མ་རྡོ་རྗེ་སེམས་དཔའི་སྐུ་ཡི་གནས་གསུམ་ལས་འོད་ཟེར་བདུད་རྩིའི་རྒྱུན་དཀར་དམར་མཐིང་གསུམ་གྱི་རྣམ་པར་ཆར་བབས་པ་ལྟར་བྱུང་བ་རང་གཞན་སེམས་ཅན་ཐམས་ཅད་ཀྱི་སྒོ་གསུམ་ལ་ཐིམ་པས། ཚེ་རབས་ཐོག་མ་མེད་པ་ནས་ལུས་ངག་ཡིད་གསུམ་གྱིས་བསགས་པའི་ལས་དང་རྣམ་སྨིན་གྱི་སྒྲིབ་པ་བྱང་། རྩ་བ་དང་ཡན་ལག་གི་དམ་ཚིག་ཉམས་པ་སོར་ཆུད་སྐུ་གསུང་ཐུགས་ཀྱི་བྱིན་རླབས་ཞུགས། དངོས་གཞིའི་ཉམས་རྟོགས་ཡོན་ཏན་ཁྱད་པར་ཅན་རྣམས་རྒྱུད་ལ་སྐྱེ་རུང་དུ་བྱས་པར་མོས་ལ། མཐར་སྡིག་ལྟུང་རང་བཞིན་མེད་པར་ཤེས་པའི་ངང་ནས་འཁོར་གསུམ་མི་དམིགས་པའི་དབྱིངས་སུ་ཅི་གནས་སུ་མཉམ་པར་བཞག་སྟེ། ཐར་པ་ཆེན་པོ་ཕྱོགས་བཅུ་རྒྱས་པའི་མདོ་ལས། དྲང་{དྲག} པོར་འདུག་ལ་ཡང་དག་ལྟོས། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །འདི་ནི་འགྱོད་ཚངས་མཆོག་ཡིན་ནོ། །ཞེས་སོ། །དེས་སྡིག་སྒྲིབ་དག་པའི་ཤེས་བྱེད་ཀྱང་བཤེས་སྤྲིང་ལས། གང་ཞིག་སྔོན་ཆད་བག་མེད་གྱུར་པ་ལས། །ཕྱིས་ནས་བག་དང་ལྡན་པར་གྱུར་དེ་ཡང་། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཞེས་དང་། མདོ་ལས། གང་གིས་བསྐལ་པ་དུ་མ་རུ། །སྡིག་པ་ཤིན་དུ་མི་བཟད་བགྱིས། །ལན་གཅིག་རབ་ཏུ་བཤགས་པ་ཡིས། །དེ་དག་ཐམས་ཅད་བྱང་བར་འགྱུར། །ཞེས་སོ། །དེ་ལྟར་རྡོར་སེམས་བསྒོམས་བཟླས་བགྱིས་པའི་ཕན་ཡོན་ཡང་། དགོངས་པ་ཚིག་གསུམ་པའི་རྒྱུད་ལས། རྡོ་རྗེ་སེམས་དཔའ་བསྒོམས་ནས་ནི། །སྔགས་ཀྱང་རབ་ཏུ་བཟླ་བྱེད་པ། །དེ་ཡི་སྡིག་ཀུན་བྱང་ནས་ནི། །རྡོ་རྗེ་སེམས་དཔའ་འདྲ་བར་འགྱུར། །ཞེས་སོ། །གསུམ་པ་ལམ་གྱི་ཡོན་ཏན་རྒྱུད་ལ་བསྐྱེད་པའི་ཐབས་སམ་མཐུན་པའི་རྐྱེན་ཚོགས་བསགས་པ་ལ། རྒྱུན་བཤགས་དང་། མཎྜལ་འབུལ་བ་གཉིས་ལས། དང་པོ་ནི། རྡོ་རྗེ་སློབ་དཔོན་སངས་རྒྱས་དཔལ། །ཞེས་སོགས་ཡན་ལག་བརྒྱད་པ་སྟེ། དེ་ཡང་། མཆོག་ཏུ་མི་འགྱུར་བའི་ཡེ་ཤེས་རྡོ་རྗེ་ལྟ་བུའི་དོན་མངོན་དུ་མཛད་ཅིང་གཞན་དག་ཀྱང་ཚུལ་དེ་ལ་བཀྲི་བར་མཛད་པའི་རྡོ་རྗེ་སློབ་དཔོན་ནི། དུས་གསུམ་གྱི་སངས་རྒྱས་ཐམས་ཅད་འདུས་པའི་སྤྱི་དཔལ་ཡིན་པས་ཐོག་མར་རང་གཞན་སེམས་ཅན་ཐམས་ཅད་ལུས་ཞིང་རྡུལ་དུ་སྤྲུལ་ནས་སྒོ་གསུམ་འཇུག་པ་གཅིག་པས་ཕྱག་འཚལ་བ་དང་། དཀོན་མཆོག་གསུམ་ནི་ལམ་གྱི་གནས་སྐབས་ན་དད་པས་བསྟེན་ཞིང་བསྙེན་པར་བྱ་བའི་ཞིང་གི་དམ་པར་གྱུར་ལ། མཐར་ཐུག་རང་བཞིན་གཉིས་སུ་མེད་པར་ཤེས་པའི་ཡིད་ཀྱིས་དོན་དམ་པའི་སྐྱབས་སུ་འགྲོ་བ་དང་། དངོས་སུ་འབྱོར་པའི་མཆོད་པ་བླ་ན་ཡོད་པ་དང་། ཡིད་སྤྲུལ་ཀུན་ཏུ་བཟང་པོའི་མཆོད་སྤྲིན་དང་མཚུངས་པར་ཏིང་ངེ་འཛིན་གྱིས་རྣམ་པར་སྤྲུལ་པ་བླ་ན་མེད་པའི་མཆོད་པ་སྟེ་ཞིང་བསམ་སྦྱོར་བ་དག་པའི་མཆོད་པ་འབུལ་བ་དང་། མཆོག་ཐུན་མོང་གི་དངོས་གྲུབ་ཀྱི་ཆུ་བོའི་རྒྱུན་གཅོད་པར་བྱེད་པ་སྟེ་གེགས་སུ་གྱུར་པའི་རྩ་བ་དང་ཡན་ལག་གི་དམ་ཚིག་ཉམས་པ་སོགས་སྒོ་གསུམ་གྱི་ཉེས་བྱས་མ་ལུས་པ་བཤགས་པ་དང་། ཕྱོགས་བཅུའི་ཞིང་ཁམས་རབ་འབྱམས་ན་འཁོར་འདས་ལམ་གསུམ་གྱིས་བསྡུས་པའི་དགེ་བའི་རྩ་བ་རྣམ་པར་དག་པའི་ཆོས་ཏེ། མ་ཆགས་པར་སྤྱོད། མ་ཞེན་པར་གོམས་པ་ཀུན་ལ་རྗེས་སུ་ཡི་རང་བ་དང་། ཀུན་རྫོབ་ཏུ་ཚངས་པའི་གནས་པ་བཞིའི་དྲི་མ་དག་པ་ཚད་མེད་བཞིའི་སྒོ་ནས་སེམས་བསྐྱེད་པའམ་དོན་དམ་པར་ཡོད་མེད་རྟག་ཆད་ཀྱི་མཐའ་བཞིའི་དྲི་མ་དང་བྲལ་བའི་རྫོགས་པའི་བྱང་ཆུབ་ཆེན་པོར་སེམས་བསྐྱེད་པ་དང་། འདས་པའི་བདེ་བར་གཤེགས་པ་སངས་རྒྱས་རྣམས་ལ་ལུས་ཕུལ་བས་དེ་དག་གི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་ཡོན་ཏན་མངོན་དུ་འགྱུར་བའི་དགོས་པ་དང་། ད་ལྟའི་དབང་ཕྱུག་སྟེ་དཀྱིལ་འཁོར་གྱི་བདག་པོ་བླ་མ་སངས་རྒྱས་ཉིད་ལ་ལུས་ཕུལ་བས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་དམ་པའི་སྣོད་དུ་རུང་ཞིང་དབང་དང་བྱིན་རླབས་ལ་བརྟེན་ནས་འབྲས་བུ་ཐོབ་པའི་དགོས་པ་དང་། མ་འོངས་པ་ན་འཚང་རྒྱ་འགྱུར་གྱི་སེམས་ཅན་ཐམས་ཅད་བདེ་གཤེགས་སྙིང་པོའི་རང་བཞིན་ཅན་ཡིན་པས་དེ་ལ་ལུས་ཕུལ་བས་གཞན་དོན་མཐར་ཕྱིན་པའི་རྟེན་འབྲེལ་སྒྲིག་པ་སྟེ་དགོས་པ་གསུམ་གྱིས་ལུས་འབུལ་བར་རྡོ་རྗེ་ལས་རིམ་ལས་གསུངས་པ་ལྟར་རམ། ཡང་ན། ཞིང་དག་པ་བདེ་བར་གཤེགས་པ་དང་བྱང་ཆུབ་སེམས་དཔའི་ཚོགས་ལ། དངོས་པོ་དག་པ་བདག་ལུས་ཕུང་ཁམས་སྐྱེ་མཆེད་དང་བཅས་པ། བསམ་སྦྱོར་དག་པ་འཁོར་གསུམ་ཞེན་པ་དང་བྲལ་བའི་ཚུལ་གྱིས་ཏེ། དག་པ་གསུམ་གྱིས་ལུས་འབུལ་བ་སྟེ། འདི་ལ་ཚིག་འདྲ་མིན་གཉིས་འབྱུང་བ་གང་ལྟར་ཡང་ཁྱད་པར་མེད་དོ། །ཚེ་རབས་ཐོག་མ་མེད་པ་ནས་བཟུང་། ད་ལྟའི་བར་དུ་བགྲངས་པའི་བསམ་པ་ཡིད་ཀྱི་ལས་དང་། དེས་བསྐྱེད་ལུས་ངག་གི་ལས་ལ་བརྟེན་ནས་དཀར་པོ་རྣམ་པར་འཕེལ་བའི་ལས་ཇི་སྙེད་པ་དེ་ཐམས་ཅད་ཐབས་ལ་མཁས་པའི་ཤེས་རབ་ཀྱིས་བསྡུས་ཏེ་སེམས་ཅན་ཐམས་ཅད་རྫོགས་པའི་བྱང་ཆུབ་ཐོབ་པའི་རྒྱུར་བསྔོ་བ་སྟེ། ཕན་ཡོན་གྱི་ཁྱད་པར་ཡང་དཔལ་སྦས་ཀྱིས་ཞུས་པའི་མདོ་ལས། གང་ཞིག་ཕྱོགས་བཅུའི་སངས་རྒྱས་ལ། །དམིགས་ནས་ཐལ་མོ་སྦྱར་བྱས་ཏེ། །ཕྱག་འཚལ་དེ་བཞིན་མཆོད་བྱེད་དམ། །བསོད་ནམས་དག་ལ་ཡི་རང་ཞིང་། །བསྐུལ་ཞིང་གསོལ་བ་འདེབས་གྱུར་པ། །དེ་ཡི་བསོད་ནམས་ཕུང་པོ་ནི། །ནམ་མཁའ་གང་བར་རྟག་ཏུ་འབྱུང་། །ཞེས་སོ། །སྐབས་འདིར་མྱ་ངན་ལས་མི་འདའ་བར་གསོལ་བ་འདེབས་པ་དང་། ཆོས་འཁོར་བསྐོར་བར་བསྐུལ་བར་གཉིས་མི་འབྱུང་བ་ནི། སྔགས་ཀྱི་སྟོན་པ་ངེས་པ་ལྔ་ལྡན་ཡིན་པའི་ཕྱིར་མྱ་ངན་ལས་མི་འདའ་བ་དང་། ཆོས་དུས་གསུམ་དུས་མེད་རྟག་པ་རྒྱུན་གྱི་འཁོར་ལོར་སྟོན་པས་བསྐུལ་བ་སོགས་ལ་མི་ལྟོས་པའི་ཕྱིར་རོ། །གཉིས་པ་མཎྜལ་འབུལ་བ་ནི། ༀ་ཨཱཿཧཱུྃ༔ ཕྱི་ནང་སྣོད་བཅུད་རབ་འབྱམས་དང༔ ཞེས་སོགས་ཏེ། འདི་ལ་སྤྲོ་ན་སྒྲུབ་པའི་མཎྜལ་དང་། མཆོད་པའི་མཎྜལ་སོགས་སྤྱི་ལྟར་འདུ་བྱ་སྟེ། གང་ལྟར་ཡང་། རྒྱུ་རིན་པོ་ཆེ་སོགས་ལས་བྱས་པའི་དངོས་སུ་འབྱོར་པའི་མཎྜལ་ཉིད་དམིགས་རྟེན་དུ་བྱས་ཏེ། ཕྱི་ལྟར་ན། དབང་ཆེན་གསེར་གྱི་ས་གཞི་ལ་རྟེན་པའི་རི་རབ་གླིང་བཞི་གླིང་ཕྲན་ཉི་ཟླ་བྱེ་བ་ཕྲག་བརྒྱ་སོགས་ཕྱི་སྣོད་ཀྱི་འཇིག་རྟེན་དང་། ནང་བཅུད་ཀྱི་སེམས་ཅན་ལྷ་མིའི་འབྱོར་པ་རབ་འབྱམས་རྒྱ་མཚོ་མ་ཚང་བ་མེད་པས་ཡོངས་སུ་གང་བ་དང་། ནང་ལྟར་ན་བདག་གིས་ཡོངས་སུ་བཟུང་བའི་ལོངས་སྤྱོད་དཔལ་འབྱོར་དང་བཅས་པ་སྟེ། དེ་ཡང་ཡུལ་སྣང་གསེར་གྱི་ས་གཞི། དེར་ཞེན་དྲིས་བྱུག་པ། ཁང་པ་དང་ཁང་ཕྲན་སོགས་རི་རབ་གླིང་བཞི་གླིང་ཕྲན། སྐར་ཁུང་ཉི་མ་དང་ཟླ་བ། བུ་དང་ཆུང་མ་བྲན་གཡོག་སོགས་གཅེས་དགུའི་ལོངས་སྤྱོད་མཐའ་ཡས་པས་བརྒྱན་པ་དང་། གསང་བ་ལྟར་ན་བདག་གི་ལུས། པགས་པ་གསེར་གྱི་ས་གཞི། ཁྲག་སོགས་དྲིའི་བྱུག་པ། སྒལ་ཚིག་ལྕགས་རི་འཁོར་ཡུག མགོ་བོ་རི་རབ། ཡན་ལག་དང་ཉིང་ལག་གླིང་བཞི་གླིང་ཕྲན། རྩ་རོ་རྐྱང་ངམ་མིག་གཉིས་ཉི་མ་དང་ཟླ་བ། བྱང་ཆུབ་ཀྱི་སེམས་སོགས་ལྷ་མིའི་འབྱོར་ཚོགས་སུ་དམིགས་པ་དང་། དེ་ཁོ་ན་ཉིད་ལྟར་ན། ཀུན་གཞི་གསེར་གྱི་ས་གཞི། སྙིང་རྗེ་དྲིའི་བྱུག་པ། རྒྱ་མ་ཆད་པ་ལྕགས་རི་མུ་ཁྱུད། རང་བྱུང་གི་ཡེ་ཤེས་རི་རབ། ཡེ་ཤེས་བཞི་གླིང་ཆེན་བཞི་དེ་ལས་ཚད་མེད་བཞི་སོགས་འཆར་བར་གླིང་ཕྲན། ཐབས་ཤེས་ཟུང་དུ་འབྲེལ་བ་ཉི་ཟླ། ཚོགས་བརྒྱད་ཡུལ་དང་བཅས་པ་འདོད་ཡོན་གྱི་བཀོད་པ་ལ་སོགས་པར་ལྷུན་གྱིས་གྲུབ་པའམ། གཟུང་འཛིན་རྣམ་པར་དག་པ་དེ་ཉིད་འོད་གསལ་གྱི་ཞིང་ཁམས་སྐུ་དང་ཡེ་ཤེས་ཀྱི་འབྱོར་པ་ཚད་མེད་པས་མངོན་པར་བརྒྱན་པ་འདི་ཉིད། བླ་མ་དཀྱིལ་འཁོར་གྱི་དབང་ཕྱུག་རྩ་གསུམ་འདུས་པའི་བདག་ཉིད་ཆེན་པོར་གུས་པས་འབུལ་ན་ཐུགས་བརྩེ་བ་ཆེན་པོས་དགྱེས་པར་བཞེས་ནས། བདག་སོགས་སེམས་ཅན་ཐམས་ཅད་ཀྱི་བསོད་ནམས་དང་ཡེ་ཤེས་ཀྱི་ཚོགས་གཉིས་རྫོགས་ཏེ། འབྲས་བུ་སྐུ་གཉིས་ཀྱི་དཔལ་ལ་ལོངས་སྤྱོད་པར་བྱིན་གྱིས་བརླབས་ཏུ་གསོལ་སྙམ་པས་སྔགས་ཚིག་དང་བཅས་ཏེ་བརྒྱ་སྟོང་ཁྲི་འབུམ་ཅི་ནུས་སུ་འབུལ་ལ། མཐར་འཁོར་གསུམ་ཡང་དག་དམིགས་མེད་འཛིན་བྲལ་གྱི་ངང་དུ་མཉམ་པར་བཞག་ལ་ཡེ་ཤེས་ཀྱི་ཚོགས་ཀྱང་རྫོགས་པར་བྱའོ། །དེ་ལྟར་ཕུལ་བའི་ཕན་ཡོན་ཡང་། ཀ་མ་ལ་ཤཱི་ལས། གླིང་བཞི་ཕུལ་བའི་བསོད་ནམས་ཀྱིས། །བདུད་བཞི་མ་ལུས་ཞི་བར་འགྱུར། །གླིང་ཕྲན་ཕུལ་བའི་བསོད་ནམས་ཀྱིས། །ཚད་མེད་བཞི་དང་ལྡན་པར་འགྱུར། །རིན་ཆེན་སྣ་བདུན་ཕུལ་བ་ཡིས། །འཕགས་པའི་ནོར་བདུན་འཐོབ་པར་འགྱུར། །གཏེར་ཆེན་ཕུལ་བའི་བསོད་ནམས་ཀྱིས། །མི་ཟད་ལོངས་སྤྱོད་འཕེལ་བར་འགྱུར། །ཉི་ཟླ་ཕུལ་བའི་བསོད་ནམས་ཀྱིས། །ལྟ་སྒོམ་སེམས་ལ་གསལ་བར་འགྱུར། །རིན་ཆེན་ཕུལ་བའི་བསོད་ནམས་ཀྱིས། །རང་བྱུང་ཡེ་ཤེས་འཐོབ་པར་འགྱུར། །མཎྜལ་གཅིག་ཕུལ་དྲུག་དང་ལྡན། །བསོད་ནམས་ཚོགས་ཆེན་བསམ་མི་ཁྱབ། །དེས་ནི་དེ་ལ་བརྩོན་པར་བྱ། །ཞེས་སོ། །བཞི་པ་ལམ་གྱི་རྩ་བ་བྱིན་རླབས་ཁྱད་པར་ཅན་རྒྱུད་ལ་འཇུག་པར་བྱེད་པ་བླ་མའི་རྣལ་འབྱོར་ལའང་། ཐུགས་དམ་གནད་བསྐུལ་གྱི་གསོལ་འདེབས་དང་། དངོས་གཞི་དབང་བླང་བ་གཉིས་ལས། དང་པོ་ནི། ཐེག་པ་ཆེན་པོའི་ལམ་སྤྱི་དང་ཁྱད་པར་རྡོ་རྗེ་ཐེག་པའི་ལམ་དང་འབྲས་བུའི་ཡོན་ཏན་མཐའ་དག་བདག་རྐྱེན་བླ་མ་དགེ་བའི་བཤེས་གཉེན་ཁོ་ན་ལ་རག་ལས་ཏེ། ཕལ་པོ་ཆེ་ལས། བྱང་ཆུབ་སེམས་དཔའི་ཡོན་ཏན་ཐམས་ཅད་དགེ་བའི་བཤེས་གཉེན་ལས་འབྱུང་ངོ་། །ཞེས་དང་། དགོངས་འདུས་ལས། སློབ་དཔོན་དག་ལ་མ་བསྟེན་པར། །སངས་རྒྱས་ནམ་ཡང་མི་འབྱུང་སྟེ། །འབྱུང་བར་ཡང་དག་ངས་མ་མཐོང་། །བྱུང་ན་དམ་པའི་ལུང་དང་འགལ། །ཞེས་དང་། ཀླུ་སྒྲུབ་ཀྱིས་རིམ་ལྔ་ལས། རི་དབང་རྩེ་ནས་འགའ་ཞིག་ལྷུང་གྱུར་ན། །ལྷུང་བར་མི་བྱ་སྙམ་ཡང་ལྷུང་བར་འགྱུར། །བླ་མའི་དྲིན་གྱིས་ཕན་པའི་ལུང་ཐོབ་ན། །གྲོལ་བར་མི་འདོད་ཀྱང་ནི་གྲོལ་བར་འགྱུར། །ཞེས་སོ། །དེ་ཉིད་སངས་རྒྱས་ཆོས་ཀྱི་སྐུར་བལྟ་དགོས་པའི་ཚུལ་མདོ་རྒྱུད་མན་ངག་ཀུན་ནས་རྒྱ་ཆེར་གསུངས་པའི་དོན་སྙིང་པོར་དྲིལ་ན། ཆོས་དབྱིངས་དག་པ་གཉིས་ལྡན་སངས་རྒྱས་ཆོས་ཀྱི་སྐུའི་རང་རྩལ་འགགས་པ་མེད་པ་ལས། འོག་མིན་ཆེན་པོ་རང་སྣང་ལོངས་སྤྱོད་རྫོགས་པའི་སྐུའི་དཀྱིལ་འཁོར་རྟག་པ་རྒྱུན་གྱི་འཁོར་ལོར་འཕེལ་འབྲི་མེད་པར་བཞུགས་པ་ལས། གདུལ་བྱ་གཞན་སྣང་དུ་གང་ལ་གང་འདུལ་གྱི་སྤྲུལ་པའི་རོལ་གར་ཚད་མེད་པར་སྣང་བར་མཛད་པ་ཡིན་ཏེ། ཡེ་ཤེས་སྣང་བ་རྒྱན་གྱི་མདོ་ལས། དེ་བཞིན་གཤེགས་པ་ཟག་མེད་དགེ་བ་ཡི། །ཆོས་ཀྱི་གཟུགས་བརྙན་ཡིན་ཏེ་འདི་ལ་ནི། །དེ་བཞིན་ཉིད་མེད་དེ་བཞིན་གཤེགས་པའང་མེད། །འཇིག་རྟེན་དག་ན་གཟུགས་བརྙན་ཀུན་དུ་སྣང་། །ཞེས་དང་། གསང་སྙིང་ལས། དེ་བཞིན་ཉིད་ལས་མ་གཡོས་ཀྱང་། །ཡང་དག་ཐར་པའི་གཟུགས་སྐུ་དང་། །འགྲོ་བ་མ་ལུས་འདུལ་བའི་ཕྱིར། །མཐུན་བྱས་སྐུ་ནི་སྣ་ཚོགས་སྟོན། །སྟོང་ཉིད་སྒྱུ་མ་མིག་ཡོར་ཚུལ། །ཚུལ་ཉིད་དབྱིངས་ལས་གཡོས་པ་མེད། །ཅེས་དང་། སྤྱོད་འཇུག་ལས། ཡིད་བཞིན་ནོར་བུ་དཔག་བསམ་ཤིང་། །ཇི་ལྟར་རེ་བ་ཡོངས་སྐོང་བ། །དེ་བཞིན་གདུལ་བྱར་སྨོན་ལམ་གྱི། །དབང་གིས་རྒྱལ་བའི་སྐུར་སྣང་ངོ་། །ཞེས་སོ། །དེ་ལས་ད་ལྟའི་དུས་སུ་རང་རེ་རྣམས་ཀྱི་ངོར་སྣང་བ་ནི་བླ་མ་རྡོ་རྗེ་འཛིན་པ་ཉིད་ཡིན་ཏེ། ཏིང་འཛིན་མཆོག་དམ་པའི་མདོ་ལས། རིགས་ཀྱི་བུ། དེ་ཡང་ཕྱི་མའི་ཚེ་ཕྱི་མའི་དུས་ན་ང་ཉིད་དགེ་བའི་བཤེས་གཉེན་དུ་སྤྲུལ་ནས་ཏིང་ངེ་འཛིན་འདི་སྟོན་པར་འགྱུར་རོ། །དེའི་ཕྱིར་དགེ་བའི་བཤེས་གཉེན་ནི་ཁྱོད་ཀྱི་སྟོན་པ་ཡིན་པས་ནམ་བྱང་ཆུབ་སྙིང་པོ་ལ་འདུག་གི་བར་དུ་བསྟེན་ཅིང་རིམ་གྲོ་དང་བཀུར་སྟི་གྱིས་ཤིག ཅེས་དང་། རྡོ་རྗེ་གུར་ལས། རྡོ་རྗེ་སེམས་དཔའ་ཇི་ལྟ་བུས། །དེ་ལྟར་སློབ་དཔོན་གཟུགས་འཛིན་ཏེ། །སེམས་ཅན་རྗེས་སུ་གཟུང་དམིགས་ནས། །ཕལ་པའི་གཟུགས་ཀྱིས་གནས་པའོ། །ཞེས་དང་། གསང་སྙིང་ལས། དེ་བཞིན་གཤེགས་པ་ཐམས་ཅད་ཀྱི། །ཕྱག་རྒྱ་གསང་ཆེན་སྙིང་པོ་འདི། །རྟོགས་ནས་སྨྲ་བར་གང་བྱེད་པ། །དེ་ནི་ང་ཡིན་དབང་ཡང་རྫོགས། །ཞེས་སོ། །དེས་ན་དོན་གྱི་དགོངས་པ་དུས་གསུམ་གྱི་སངས་རྒྱས་རྣམས་དང་ཁྱད་པར་ཅུང་ཟད་མ་མཆིས་ཏེ། རྡོ་རྗེ་མེ་ལོང་ལས། རྡོ་རྗེ་སེམས་དཔའི་དཀྱིལ་འཁོར་གཙོ། །བླ་མ་སངས་རྒྱས་ཀུན་དང་མཉམ། །ཞེས་སོ། །རང་རེ་ལ་བཀའ་དྲིན་གྱི་ངོས་ནས་སངས་རྒྱས་¡eལས་ཞུ་མཆན། ¡fཀྱང་ལྷག་པར་མངོན་སུམ་གྱིས་གྲུབ་སྟེ། ནམ་མཁའ་དྲི་མ་མེད་པའི་མདོ་ལས། ཀུན་དགའ་བོ། དེ་བཞིན་གཤེགས་པ་ནི་སེམས་ཅན་ཐམས་ཅད་ལ་སྣང་བ་མ་ཡིན་གྱི་དགེ་བའི་བཤེས་གཉེན་ནི་སྣང་བས་ཆོས་སྟོན་ཅིང་ཐར་པའི་ས་བོན་འདེབས་པའི་ཕྱིར་དེ་བཞིན་གཤེགས་པ་རྣམས་ལས་དགེ་བའི་བཤེས་གཉེན་ལྷག་པར་ཡང་ཟུངས་ཤིག ཅེས་དང་། གསང་འདུས་ལས། ཁམས་རྣམས་དང་ནི་ཕྲིན་ལས་དག །རང་བཞིན་མཉམ་པ་ཉིད་ཀྱི་ཕྱིར། །བླ་མ་སངས་རྒྱས་ཀུན་དང་མཉམ། །འགྲོ་བ་གང་ལ་ལམ་སྟོན་ཕྱིར། །སངས་རྒྱས་ཉིད་ལས་མཆོག་ཏུ་འཕགས། །ཞེས་དང་། ལམ་ཟབ་ལས། ཉི་མའི་དཀྱིལ་འཁོར་རབ་ཚ་ཡང་། །མེ་ཤེལ་མེད་པར་མེ་མི་འབྱུང་། །དེ་བཞིན་སངས་རྒྱས་བྱིན་རླབས་ཀྱང་། །བླ་མ་མེད་པར་འབྱུང་མི་སྲིད། །ཅེས་སོ། །དེར་མ་ཟད་གསང་སྔགས་རྡོ་རྗེ་ཐེག་པའི་སྐབས་འདིར་རྡོ་རྗེ་སློབ་དཔོན་གྱི་སྐུ་གསུང་ཐུགས་ལ་དཀྱིལ་འཁོར་གྱི་ལྷ་ཚོགས་རྗེས་སུ་ཞུགས་པའི་ཚུལ་གྱིས་འགྲོ་བའི་དོན་མཛད་པར་ཡང་། འཇམ་དཔལ་ཞལ་ལུང་ལས། འདི་ཡི་དོན་ལྡན་འགའ་ཞིག་ལ། །ང་ནི་དེ་ཡི་ལུས་གནས་ཏེ། །སྒྲུབ་པོ་གཞན་ལས་མཆོད་པ་ལེན། །དེ་མཉེས་དེ་ཡི་རང་གི་རྒྱུད། །ལས་ཀྱི་སྒྲིབ་པ་དག་བྱེད་དོ། །ཞེས་དང་། ཀུན་དུ་ཁ་སྦྱོར་གྱི་རྒྱུད་ལས། ཡེ་ཤེས་ཀུན་སེམས་ཞེས་བྱ་བའི། །རྒྱལ་བ་ཀུན་གྱི་སློབ་དཔོན་མཆོག །དངོས་གྲུབ་མ་ལུས་སྟེར་བས་ན། །བློ་དང་ལྡན་པས་རྟག་མཆོད་བྱ། །གང་ཕྱིར་ཕྱོགས་བཅུའི་སངས་རྒྱས་དང་། །བྱང་ཆུབ་སེམས་མཆོད་བསོད་ནམས་ལས། །བླ་མའི་བ་སྤུའི་ཁུང་གཅིག་མཆོག །དེ་ཕྱིར་སློབ་དཔོན་མཆོད་བྱེད་པ། །སངས་རྒྱས་བྱང་ཆུབ་སེམས་དཔས་གཟིགས། །ཞེས་དང་། གསང་སྙིང་ལས། དབང་ཕྱུག་ལོངས་སྤྱོད་ལྔས་མཆོད་ན། །དཀྱིལ་འཁོར་ཐམས་ཅད་མཆོད་པ་ཡིན། །ཉེ་བའི་དཀྱིལ་འཁོར་སྨོས་ཅི་དགོས། །ཉེས་པ་ཐམས་ཅད་དག་པར་འགྱུར། །ཞེས་དང་། དགོངས་འདུས་ལས། ཆོས་ཀུན་མི་ཤེས་མ་རྟོགས་ཀྱང་། །དམ་པར་གྱུར་པའི་བླ་མ་ལ། །བཀུར་ནས་རིམ་གྲོ་ཆེར་བྱས་པས། །འཁོར་བའི་རྒྱ་མཚོ་བརྒལ་བར་འགྱུར། །ཞེས་སོ། །གཞན་ཡང་ཕྱི་ལྟར་ན་རྡོ་རྗེ་སློབ་དཔོན་གྱི་ཕུང་ཁམས་སྐྱེ་མཆེད་དག་པ་ལྷ་ཡི་རང་བཞིན་དང་། ནང་ལྟར་ན་རྩ་རླུང་ཐིག་ལེ་བྱང་ཆུབ་སེམས་ཀྱི་རང་བཞིན་ལྷན་སྐྱེས་བདེ་བ་ཆེན་པོ་གཉུག་མའི་རྡོ་རྗེ་གསུམ་གྱི་དཀྱིལ་འཁོར། གསང་བ་ལྟར་ན་རང་བྱུང་གི་ཡེ་ཤེས་བདེ་བར་གཤེགས་པའི་སྙིང་པོ་ངོ་བོ་རང་བཞིན་ཐུགས་རྗེ་གསུམ་སྐུ་གསུམ་འདུ་འབྲལ་མེད་པའི་ངོ་བོར་ཡེ་ནས་གནས་ཏེ། གསང་རྒྱུད་ལས། རྡོ་རྗེ་སློབ་དཔོན་སྐུ་ཉིད་ལ། །བདེ་གཤེགས་རྒྱལ་བའི་སྐུ་རྣམས་རྫོགས། །བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཔལ་ཆེན་ཧེ་རུ་ཀཿ། །ཀུན་གྱི་རྒྱལ་པོ་བླ་མ་ཡིན། །ཞེས་གསུངས་པས། རྩ་བའི་བླ་མ་ཉིད་སྐྱབས་གནས་ཀུན་འདུས་ཀྱི་ངོ་བོར་ཐག་ཆོད་པས། ཅི་མཛད་འགྲོ་བ་འདུལ་བའི་ཕྲིན་ལས་སུ་མཐོང་བ། ཚེ་གཅིག་སངས་རྒྱས་ལག་ཏུ་གཏོད་པ་ལ་བྱས་པ་གཟོ་བའི་བཀའ་དྲིན་རྗེས་སུ་དྲན་པ་དང་། བློ་སྣ་མོས་གུས་ཀྱིས་འཕྲོག་པས་གདུང་ཤུགས་ཀྱིས་རིག་པ་སྒྱུར་ནུས་པ། ཡང་ཡང་མ་བརྗེད་པར་དྲན་པས་ཐ་མལ་གྱི་སྣང་བ་འགོག་ནུས་པ་སྟེ་ཁྱད་པར་བཞི་ལྡན་གྱི་མོས་གུས་གདུང་ཤུགས་དྲག་པོས་དཀོན་མཆོག་རྩ་གསུམ་འདུས་པའི་བདག་ཉིད་བླ་མ་རིན་པོ་ཆེ་ལ་སྙིང་ཁུང་རུས་བའི་གཏིང་ནས་གསོལ་བ་འདེབས་སོ། །བདག་ལ་བུམ་གསང་ཤེས་རབ་ཡེ་ཤེས་དེ་ཁོ་ན་ཉིད་ཀྱི་དབང་མཆོག་སྟན་ཐོག་འདི་ཉིད་དུ་བསྐུར་བ་མཛད་དུ་གསོལ། ལུས་ངག་ཡིད་གསུམ་ཆ་སྙོམས་དང་བཅས་པའི་སྒྲིབ་པ་བྱང་ནས་སྐུ་གསུང་ཐུགས་ཡེ་ཤེས་རྡོ་རྗེར་བྱིན་གྱིས་རློབས་པ་དང་། ཕྱག་རྒྱ་ཆེན་པོ་མཆོག་གི་དངོས་གྲུབ་ཚེ་འདི་ཉིད་དུ་ཐོབ་པར་མཛད་དུ་གསོལ་སྙམ་པས། བླ་མ་དཀོན་མཆོག་གསུམ་གྱི་དངོས༔ ཞེས་སོགས། གསོལ་འདེབས་ཀྱི་ཚིག་བརྒྱ་སྟོང་ཁྲི་འབུམ་སོགས་ཇི་ནུས་དང་། སྤྲོ་ན་བརྒྱུད་པའི་གསོལ་འདེབས་ཀྱང་ཡང་ཡང་བྱའོ། །གཉིས་པ་ནི། བླ་མའི་གནས་གསུམ་འབྲུ་གསུམ་ལས༔ ཞེས་སོགས་ཏེ། དེ་ཡང་བླ་མའི་སྐུ་ཡི་གནས་གསུམ་གྱི་ཡིག་འབྲུ་གསུམ་ལས་དཀར་དམར་སྔོ་བའི་འོད་ཟེར་གསུམ་རིམ་དང་ཅིག་ཆར་དུ་འཕྲོས་ཏེ་བདག་གི་གནས་དེ་དང་དེར་ཐིམ་པས་བུམ་དབང་ལ་སོགས་པའི་དབང་བཞི་ཐོབ་ནས་སྒོ་གསུམ་ཆ་མཉམ་དང་བཅས་པའི་སྒྲིབ་པ་བཞི་སྦྱངས། སྐུ་གསུང་ཐུགས་ཡེ་ཤེས་རྡོ་རྗེའི་ངོ་བོ་སྐུ་གཞིའི་གོ་འཕང་མངོན་དུ་གྱུར་པར་བསམ། སླར་ཡང་མོས་གུས་ཀྱིས་གསོལ་བ་བཏབ་པས་བླ་མ་རྡོ་རྗེ་སེམས་དཔའ་ཡབ་ཡུམ་རང་གི་སྤྱི་བོར་བྱོན། ཡབ་ཡུམ་སྙོམས་པར་ཞུགས་པའི་མཁའ་གསང་ནས་བདུད་རྩི་བྱང་ཆུབ་སེམས་ཀྱི་རྒྱུན་དཀར་དམར་གྱི་རྣམ་པར་བྱུང་། རང་གི་སྤྱི་བོ་ནས་ཞུགས། ལུས་ཐམས་ཅད་གང་། བདེ་སྟོང་དགའ་བཞིས་དྲངས་པའི་དཔེ་དོན་གྱི་ཡེ་ཤེས་ཁྱད་པར་ཅན་རྒྱུད་ལ་སྐྱེས། མཐར་བླ་མ་ཡབ་ཡུམ་བདེ་སྟོང་གི་ངོ་བོར་འོད་དུ་ཞུ་ནས་རང་ལ་ཐིམ་པས་བླ་མའི་ཐུགས་དང་རང་སེམས་དབྱེར་མེད་དུ་གྱུར་པ་མོས་ལ། དུས་གསུམ་གྱི་སྤྲོས་པ་བཅད་པའི་ཤེས་རིག་མ་བཅོས་ཀ་དག་གི་ངང་དུ་ཅི་གནས་སུ་མཉམ་པར་བཞག དེ་ནི་རང་རིག་དོན་གྱི་བླ་མའི་རྣལ་འབྱོར་ཏེ། དེ་ལྟར་སྒོམ་པའི་ཕན་ཡོན་ཀྱང་། ཀུན་འདུས་རིན་པོ་ཆེའི་རྒྱུད་ལས། གང་གིས་བསྐལ་པ་འབུམ་ཕྲག་ཏུ། །ལྷ་སྐུ་འབུམ་ཕྲག་བསྒོམ་པ་བས། །བླ་མ་ཅུང་ཟད་དྲན་པ་མཆོག །བསོད་ནམས་འདི་ནི་ཕ་མཐའ་ཡས། །ཞེས་གསུངས་སོ། །གཉིས་པ་ཁྱད་པར་ཅན་གྱི་སྔོན་འགྲོ་ལ། འགལ་རྐྱེན་བསལ་བ་དང་། མཐུན་རྐྱེན་སྒྲུབ་པ་གཉིས་ཀྱི། དང་པོ་ནི། གལ་ཕྲེང་ལས། ངོ་བོ་བདག་གཞན་གཉིས་མེད་ཀྱང་། །དང་པོའི་ལས་ཅན་རྣལ་འབྱོར་པའི། །ཏིང་འཛིན་ཉམས་ལེན་བར་གཅོད་དག །ངེས་པར་བསལ་ཕྱིར་མཚམས་གཅོད་བྱ། །ཞེས་གསུངས་པས། འདི་ལ་གཉིས། བགེགས་བསྐྲད་པ་དང་། མཚམས་བཅད་པའོ། དང་པོ་ལ་བགེགས་གཏོར་བསྔོ་བ་དང་། བཀའ་བསྒོ་བ་གཉིས་ལས། དང་པོ་ནི། བགེགས་གཏོར་བཤམས་ལ། རྃ་ཡྃ་ཁྃ་ཡིད་མཐུན་སྣོད་དུ་ཞེས་སོགས་ཏེ། དེ་ཡང་ཆོས་ཐམས་ཅད་རང་སེམས་ཀྱི་སྣང་བ་ཙམ་ལས་གཞན་དུ་མ་གྲུབ་ཀྱང་། དེ་ལྟར་མ་རྟོགས་པའི་དབང་གིས་དུག་ལྔའི་རང་གཟུགས་ཕྱི་རོལ་དུ་ཤར་བའི་ལན་ཆགས་འབྱུང་པོའི་ཚོགས་ལ་ཚད་མེད་པའི་སྙིང་རྗེ་དང་གནས་ལུགས་རྟོགས་པའི་ལྟ་བ་ཟུང་དུ་འཇུག་པའི་རང་རྩལ་ཆུ་ལས་ཉ་འཕར་བའི་ཚུལ་གྱིས་སྐད་ཅིག་གིས་དཔལ་ཆེན་པོ་རྡོ་རྗེ་གཞོན་ནུའི་སྐུར་གསལ་བའི་ཐུགས་ཀ་ནས་རྃ་ཡྃ་ཁྃ་འཕྲོས་པས་དངོས་འཛིན་གྱི་དྲི་མ་སྦྱངས། སྟོང་པའི་དང་ལས་བྷཱུྃལས་རིན་པོ་ཆེ་ལ་སོགས་པ་ཡིད་དང་མཐུན་པའི་སྣོད་དུ་ༀ་ཨཱཿཧཱུྃ་འོད་དུ་ཞུ་བ་ལས་བྱུང་བའི་ལན་ཆགས་བགེགས་ཀྱི་གཏོར་མ་འདོད་དགུའི་ལོངས་སྤྱོད་ཟད་མི་ཤེས་པའི་རྒྱ་མཚོ་ཆེན་པོར་དམིགས་ལ། ནང་གི་རྩ་ཁམས་ཀྱི་རྟེན་འབྲེལ་དང་ནམ་མཁའ་ལྡིང་གིས་ཀླུའི་དུག་བདུད་རྩིར་བྱེད་པའི་རྟེན་འབྲེལ་གྱིས་ལག་གཉིས་མཁའ་ལྡིང་གི་ཕྱག་རྒྱ་དང་བཅས་འབྲུ་གསུམ་གྱི་སྔགས་བརྗོད་པས། ༀ་གྱིས་དྲི་མ་སྦྱངས། ཨཱཿས་མང་པོར་སྤེལ། ཧཱུྃ་གིས་གང་འདོད་དུ་འཆར་བའི་ཟག་མེད་ཀྱི་བདུད་རྩིའི་ངོ་བོར་བསྒྱུར་བ་སྟེ། ཇི་སྐད་དུ། དོན་དམ་གསལ་འདེབས་བརྗོད་པ་ཚིག་གི་སྒོ། །ཐུགས་དམ་གནད་བསྐུལ་གསང་བ་སྔགས་ཀྱི་སྒོ། །དམིགས་པ་རྩེ་གཅིག་ཏིང་འཛིན་ཡིད་ཀྱི་སྒོ། །མཚོན་པ་བརྡར་བཏགས་ཕྱག་རྒྱ་གར་གྱི་སྒོ། །ཞེས་གསང་སྔགས་ལུང་གི་སྒོ་བཞིར་གྲགས་པ་བཞིན་འོག་མ་རྣམས་ལའང་ཅི་རིགས་པར་སྦྱོར་ཤེས་པར་བྱའོ། །དེ་ནས་ལྕགས་ཀྱུའི་ཕྱག་རྒྱ་དང་བཅས་སྔགས་བརྗོད་པས། ཐུགས་ཀ་ནས་སྤྲོས་པའི་འོད་ཟེར་ལྕགས་ཀྱུ་ལྟ་བུས་བགེགས་རྣམས་བཀུག་ནས་མདུན་དུ་འཁོད་པ་ལ། ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་ཅི་འདོད་པའི་དངོས་པོར་སྤྲུལ་ནས་བསྔོའོ། །གཉིས་པ་ནི། ཧཱུྃ༔ ཉོན་ཅིག་བགེགས་དང་ལོག་འདྲེན་ཚོགས༔ ཞེས་སོགས་ཏེ། དེ་ཡང་རྡོ་རྗེ་རྩེ་མོ་ལས། ཡི་གེ་ཧཱུྃ་ནི་ཅི་ཞིག་བརྗོད། །སྡུག་བསྔལ་འཆོས་ཤིང་འཇོམས་བྱེད་དང་། །སྲིད་པའི་འཇིགས་པ་འཇོམས་པར་བྱེད། །གདུག་པ་སྔངས་ཤིང་གསོད་བྱེད་དཔལ། །ཧཱུྃ་ནི་མཆོག་ཏུ་དྲན་པར་བྱ། །ཞེས་པ་ལྟར། ཧཱུྃ་ནི་གདུག་ཅན་སྔངས་བར་བྱེད་པའི་ཡི་གེ་ཡིན་པས་དེ་ཉིད་ཀྱིས་མགོ་དྲངས་ནས། ཉོན་ཅིག་བགེགས་དང་ལོག་འདྲེན་གྱི་ཚོགས་གསང་སྤྱོད་ལྟ་བར་མི་དབང་ཞིང་དངོས་གྲུབ་སྒྲུབ་པ་ལ་བར་དུ་གཅོད་ཅིང་གདུག་པའི་བསམ་སྦྱོར་དང་ལྡན་པ་རྣམས། རྡོ་རྗེ་གསང་བ་སྟེ་བདེ་བར་གཤེགས་པ་རྣམས་ཀྱི་ཐུགས་རྡོ་རྗེ་དང་གཉིས་སུ་མེད་པའི་ཁྲོ་བོའི་རྒྱལ་པོ་བདག་གི་བཀའ་ལས་མ་འདའ་བར། ལན་ཆགས་གླུད་གཏོར་བཟང་པོ་འདི་ཡིས་མགུ་ཞིང་ཚིམས་པར་བྱོས་ལ་འདིར་མ་གནས་པ་གཞན་དུ་དེངས་ཤིག གལ་ཏེ་བདེན་པའི་ཚིག་ལ་མི་ཉན་ཞིང་བསྒོ་བའི་བཀའ་ལས་འདའ་བར་བྱེད་ན། སྔོན་གྱི་དམ་ཚིག་ཆེན་པོར་ཕྱོགས་བཅུའི་བགེགས་ཚོགས་འདུལ་བར་མཛད་པའི་སྟོབས་ཆེན་ཁྲོ་བོ་ཆེན་པོ་བཅུས་སྡིག་ཅན་ཁྱེད་རྣམས་ཀྱི་མགོ་བོ་ཀླད་པ་ཚལ་བ་བརྒྱར་འགེམས་ཤིང་ལུས་སེམས་རྡུལ་དུ་བརླག་པར་གདོན་མི་ཟའོ། །ཞེས་བཀའ་བསྒོས་ལ་དྲག་སྔགས་བཟླ། གུ་གུལ་བདུག་ལ་ཡུངས་ཐུན་གྱིས་བྲབ། རོལ་མོའི་སྒྲ་དྲག་པོ་དང་བཅས། ཐུགས་ཀ་ནས་སྤྲུལ་པའི་ཁྲོ་མཚོན་མེ་དཔུང་དང་བཅས་པས་བགེགས་རྣམས་རྒྱ་མཚོའི་མཐར་བསྐྲད་པར་བསམ་མོ། །གཉིས་པ་ནི། ཧཱུྃ། སྟེང་འོག་ཕྱོགས་མཚམས་ཞེས་སོགས་ཏེ། དེ་ཡང་རྐུན་པོ་ཕྱིར་ཕྱུང་ནས་སྒོ་བཅད་པ་དང་མཚུངས་པར། མཚོན་ཆ་རྣམས་ཚུར་འདུས་ཤིང་བཞུ་ལུགས་སུ་འདྲེས་པ་ལས། འོག་གཞི་ཐམས་ཅད་རྡོ་རྗེའི་ས་གཞིར་བརྡལ་ཞིང་། ཕྱོགས་མཚམས་ཐམས་ཅད་རྡོ་རྗེ་གྱེན་ལངས་ཀྱི་བརྩིགས་པའི་ར་བ་ཟླུམ་པོ་མཐོ་ཞིང་ཡངས་པ་ལྕགས་རི་ལྟ་བུས་གཏམས་པ། དེའི་སྟེང་དུ་དབུས་མཐོ་ཞིང་མཐའ་བགས་ཀྱིས་གཞོལ་བ་ཕྱིར་འཕྱར་བའི་རྣམ་པ་ཅན་གྱི་རྡོ་རྗེའི་གུར་ཕུབ་ཅིང་། རྭ་གུར་སྦྲེལ་མཚམས་ནས་ནང་དུ་རྡོ་རྗེའི་དྲྭ་བས་སྟེང་ཁེབ་པར་བྲེས་པ་བླ་རེ་དང་། རྭ་གུར་གྱི་ཕྱི་རོལ་དུ་རྡོ་རྗེའི་ཕྲེང་བ་ཁོ་ན་བསྣོལ་ཞིང་སྦྲེལ་བ་རྡོ་རྗེའི་དྲྭ་བ། གུར་གྱི་རྩེར་རྡོ་རྗེ་ཕྱེད་པའི་ཏོག་དང་ར་བའི་ཕྱི་རོལ་གྱི་སྐེད་པར་རྡོ་རྗེའི་ཕྲེང་བས་བཅིང་བ། རྡོ་རྗེ་ཐམས་ཅད་ཁ་དོག་སྔོན་པོ་ཤ་སྟག་ལ་རྡོ་རྗེ་ཆེ་བ་རྣམས་ཀྱི་བར་མཚམས་རྡོ་རྗེ་ཕྲ་མོས་གང་བ་ཞུན་ཐེབས་པའི་རྣམ་པ་ཅན། དེ་དག་གི་ཕྱི་རོལ་སྟེང་འོག་ཕྱོགས་མཚམས་ཀུན་ཏུ། འཁོར་ལོ་དང་རལ་གྲི་ཕུར་བུ་ལ་སོགས་པའི་མཚོན་ཆ་སྣ་ཚོགས་པའི་གུར་དང་། དེ་ལས་ཡེ་ཤེས་ཀྱི་མེ་འབར་ཞིང་རྡོ་རྗེ་ཁྲོ་བོའི་སྤྲིན་རབ་འབྱམས་འཕྲོ་བས་གནོད་བྱེད་བགེགས་ཀྱི་སྦྱོར་བ་མཚམས་བཅད་དེ་བསྐལ་པའི་རླུང་ཡང་མི་ཐར་བར་བསྒོམ་པ་སྟེ། དེ་ཡང་ཆོས་དབང་གཏེར་བྱོན་ཡང་དག་སྙིང་པོར། ཕྱི་ལྟར་ན་ལོག་འདྲེན་སྔགས་གྱི་འོད་ཟེར་གྱིས་བསྲེག་པར་བསམ། ནང་ལྟར་ན་བགེགས་དང་ལྷ་གཉིས་སུ་མེད་པར་བསམ། གསང་བ་ལྟར་ན་བགེགས་རྣམ་རྟོག རྣམ་རྟོག་སེམས། སེམས་སྐྱེ་མེད་དུ་ལྷང་ངེར་བསམ་མོ་ཞེས་གསུངས་པས། ཕྱི་མ་འདི་གཉིས་ནི་དོན་དམ་དེ་ཁོ་ན་ཉིད་ཀྱི་སྲུང་འཁོར་བསྲུང་བ་རྣམས་ཀྱི་མཆོག་ཏུ་འགྱུར་ཏེ། བཀའ་བརྒྱད་བདེར་འདུས་ལས། ཐམས་ཅད་སྐུ་དང་ཡེ་ཤེས་དང་། །བགེགས་སུ་རྟོག་པ་གང་ཡང་མེད། །བསྲུང་བར་བྱ་དང་སྲུང་བྱེད་མེད། །ཅེས་དང་། གསང་འགྲེལ་ལས། མཚམས་ཀྱི་རྒྱལ་པོ་མི་རྟོག་ཡེ་ཤེས་ཀྱིས། །བགེགས་ཀྱི་རྒྱལ་པོ་རྣམ་རྟོག་མནན་པར་བྱ། །ཞེས་གསུངས་པའི་དོན་ནོ། །གཉིས་པ་མཐུན་རྐྱེན་སྒྲུབ་པ་ལ་གསུམ། བྱིན་དབབ་པ། མཆོད་རྫས་བརླབ་པ། བླ་ན་མེད་པའི་དམ་ཚིག་བཟུང་བའོ། །དང་པོ་ནི། ཧཱུྃ། ཆོས་སྐུའི་དབྱིངས་ལས་ཞེས་སོགས་ཏེ། དེ་ལ་དབབ་བྱ་ཡེ་ཤེས་ལྷའི་འབྲས་ཆོས་ཉེར་ལྔའི་གཟི་བརྗིད་བྱིན་རླབས་ཆེན་པོ། དབབ་པའི་ཡུལ་བདག་སྒྲུབ་པ་པོ་དང་གནས་ཁང་སྒྲུབ་པའི་ཡོ་བྱད་དང་བཅས་པ་ལ། འབེབས་པའི་ཚུལ་དད་མོས་གདུང་ཤུགས་དྲག་པོས་སྔགས་དང་ཏིང་ངེ་འཛིན་དང་ཁྱད་པར་གྱི་སྦྱར་སྤོས་ཡི་དྭགས་ཀྱི་མེར་བསྲེག་པ་དང་ཅང་ཏེའུ་དྲིལ་བུ་སོགས་ཀྱི་སྒྲས་བསྐུལ་ཏེ། ཏིལ་གྱི་གོང་བུ་ཁ་ཕྱེ་བ་ལྟར་མཁའ་ཁྱབ་ཏུ་སད་པའི་ལྷ་ཚོགས་ཐམས་ཅད་བདག་གནས་ཡོ་བྱད་ལ་ཐིམ་པས་བྱིན་གྱིས་བརླབ་པར་མོས་པ་སྟེ། དེ་ཡང་། རྡོ་རྗེ་རྩེ་མོ་ལས། ཧཱུྃ་ནི་སྐུ་གསུང་ཐུགས་ཡིན་ཏེ། རྡོ་རྗེ་ཐུགས་ནི་ཐོབ་བྱེད་པའོ། །ཞེས་པ་ལྟར་སྐུ་གསུང་ཐུགས་ཀྱི་བདག་ཉིད་ཅན་གྱི་ཡི་གེས་མགོ་དྲངས་ཏེ། རང་བྱུང་གདོད་མའི་གནས་ལུགས་ཟབ་གསལ་གཉིས་མེད་བདེ་བ་ཆེན་པོ་ངོ་བོ་ཀ་ནས་དག་པ་ཉིད་གློ་བུར་དྲི་མའི་སྦུབས་ལས་གྲོལ་བའི་དག་པ་གཉིས་ལྡན་སྤྲོས་པ་དང་བྲལ་བ་ཆོས་སྐུའི་དབྱིངས་ནང་གསལ་ཆེན་པོ་ལས། རང་བཞིན་ལྷུན་གྱིས་གྲུབ་པའི་ཡེ་ཤེས་རང་སྣང་བ་ལོངས་སྤྱོད་རྫོགས་པའི་སྐུ་ཞི་བ་དང་ཁྲོ་བོའི་དཀྱིལ་འཁོར་འབྱམས་སུ་ཀླས་པའི་རང་རྩལ་ཐུགས་རྗེའི་རོལ་རྩེད་འགག་པ་མེད་པས་གདུལ་བྱ་གཞན་སྣང་དུ་གང་ལ་གང་འདུལ་གྱི་སྤྲུལ་པའི་རྣམ་འཕྲུལ་ཚད་མེད་པར་ཅིར་ཡང་སྟོན་པའི་ཞི་ཁྲོ་རབ་འབྱམས་རྩ་བ་གསུམ་གྱི་དཀྱིལ་འཁོར་གྱི་ལྷ་ཚོགས་རྣམས་ཀྱིས་བདག་སྒྲུབ་པ་པོ་ལ་སྐུ་གསུང་ཐུགས་ཡེ་ཤེས་རྡོ་རྗེའི་དབང་མཆོག་དམ་པ་བསྐུར་བ་དང་། སྒོ་གསུམ་ལ་རྡོ་རྗེའི་ཡེ་ཤེས་ཆེན་པོའི་བྱིན་ཆེན་ཕོབ་ལ་སྒྲུབ་པའི་རྟགས་དང་མཚན་མ་བཟང་པོ་དུས་ད་ལྟ་ཉིད་དུ་སྟོན་པར་མཛོད་ཅིག་པ་སྟེ། ཕྱི་ལྟར་ན་བདེ་བར་གཤེགས་པ་རྣམས་མདུན་གྱི་ནམ་མཁར་བྱོན་ནས་བདག་ལ་བྱིན་གྱིས་བརླབ་པར་བསམ་པ་དང་། ནང་ལྟར་ན་བདག་ལྷ་དང་གཉིས་སུ་མེད་པར་བསམ། གསང་བ་ལྟར་ན་ཆོས་ཉིད་སྐྱེ་མེད་ཀྱི་དོན་བདེ་བར་གཤེགས་པའི་དགོངས་པ་ལྷང་ངེར་རྟོགས་པར་བསམ་པའོ། །གཉིས་པ་ནི། རྃ་ཡྃ་ཁྃ། སྟོང་པའི་ངང་ལས་སྐད་ཅིག་གིས༔ ཞེས་སོགས། དེ་ཡང་རྒྱུད་ཧེ་རུ་ཀ་གལ་པོ་ལས། མི་དམིགས་ཆོས་ལ་བློ་བརྟན་ཅིང་། །ཡེ་ཤེས་ཅན་གྱི་བྱིན་སྟོབས་ཀྱིས། །ཐམས་ཅད་ཚུལ་བཞིན་བྱིན་གྱིས་བརླབ། །ཅེས་གསུངས་པའི་དོན་ཐོག་མར་མཉམ་པར་ཉིད་ཀྱི་ཏིང་ངེ་འཛིན་གྱིས་ཆོས་ཐམས་ཅད་གཉིས་སུ་མེད་པར་བྱིན་གྱིས་རློབས་པ་ཉིད་གཞིར་བྱ་དགོས་ཏེ། དེའང་འཁོར་འདས་ཀྱི་ཆོས་ཐམས་ཅད་རང་སེམས་ཀྱི་སྣང་བ། སེམས་ཉིད་ཅིར་ཡང་མ་གྲུབ་པ་ནམ་མཁའ་ལྟ་བུར་རྟོགས་པའི་དགོངས་པ་ལས་མ་གཡོས་ཤིང་། འཛིན་རྟོག་ཕྲ་རགས་ཀྱིིས་མ་བསླད་པར་གསལ་ལ་རྟོག་པ་མེད་པའི་ངང་ལས་ཚོགས་ཆེན་རྫོགས་པའི་ཏིང་ངེ་འཛིན་གྱིས་མཆོད་རྫས་རྣམས་བྱིན་གྱིས་བརླབ་པར་བྱ་སྟེ། རང་ཉིད་ལྷར་གསལ་བའི་ཐུགས་ཀ་ནས་ཡི་གེ་རྃ་ཡྃ་ཁྃ་གསུམ་འཕྲོས་པས། རྃ་ལས་མེ་བྱུང་མཆོད་རྫས་ཀྱི་མ་དག་པའི་ཉེས་སྐྱོན་བསྲེགས། ཡྃ་ལས་རླུང་གཡོས་མཚན་འཛིན་གྱི་ཞེན་རྟོག་གཏོར། ཁྃ་ལས་ཆུ་བྱུང་བག་ཆགས་ངན་པའི་དྲི་མ་བསྐྲུས་ཏེ་སྣོད་བཅུད་ཐམས་ཅད་སྟོང་པར་སྦྱངས། སྟོང་པའི་ངང་ལས་ཕྱི་རོལ་གྱི་གནས་ཁང་དང་ཡུལ་དུ་སྣང་བ་ཐམས་ཅད་རང་བྱུང་དུར་ཁྲོད་དྲག་པོའི་ཞིང་ཁམས། ནང་བཅུད་ཀྱི་འབྱོར་ཚོགས་མཐའ་དག་ཕྱི་ནང་གསང་བའི་མཆོད་རྫས་ཐམས་ཅད་ཀྱང་བདེ་ཆེན་བྱང་ཆུབ་སེམས་ཀྱི་རང་བཞིན་གཙང་དམེ་གཉིས་འཛིན་གྱི་རྟོག་པས་མ་བསླད་པའི་བླ་ན་མེད་པའི་མཆོད་སྤྲིན་ནམ་མཁའི་མཐའ་དང་ཆོས་ཀྱི་དབྱིངས་ཁྱབ་པར་སྔགས་རྒྱ་ཏིང་ངེ་འཛིན་གྱིས་སྤེལ་བསྒྱུར་བྱ་བ་སྟེ། དེ་ཡང་ཉེར་སྤྱོད་སོགས་ཕྱིའི་མཆོད་པ་རྣམས་ཕྱི་ལྟར་ན་བྷྲཱུྃ་ལས་རིན་པོ་ཆེའི་སྣོད་དུ་ༀ་འོད་དུ་ཞུ་བ་ལས་བྱུང་བའི་མཆོད་ཡོན་ཞབས་བསིལ་ལྷ་རྫས་ཀྱི་མེ་ཏོག་སོགས་ཕྱིའི་ཉེར་སྤྱོད་དང་། དབང་ལྔའི་མེ་ཏོག་སོགས་རང་བྱུང་ནང་གི་མཆོད་རྫས། གཞན་ཡང་འདོད་ཡོན་ལྔ་བཀྲ་ཤིས་རྫས་རྟགས་རྒྱལ་སྲིད་བདུན་སོགས་འདོད་དགུའི་ལོངས་སྤྱོད་ཟད་མི་ཤེས་པའི་གཏེར་ཆེན་པོ། ནང་ལྟར་ན་མཆོད་རྫས་དེ་རྣམས་ཀྱང་སྒེག་སོགས་ལྷ་མོའི་རོལ་བས་ལྷ་དང་གཉིས་སུ་མེད་པར་ཐུགས་དམ་བསྐང་བ། གསང་བ་ལྟར་ན་ཐམས་ཅད་ཆོས་ཉིད་སྐྱེ་མེད་ཀྱི་ངང་དུ་རང་གསལ་བར་བསམ་པའོ། །དེ་བཞིན་དུ་ནང་མཆོད་རྣམས་ཀྱང་། བདུད་རྩི་ཕྱི་རང་བྱུང་བྷཉྫའི་སྣོད་དུ་དམ་རྫས་རྩ་བརྒྱད་ཡན་ལག་སྟོང་སྦྱར་བདེ་གཤེགས་རིག་ལྔ་མཉམ་པར་སྦྱོར་བའི་བྱང་སེམས་ཀྱི་རྒྱུན། ནང་རང་ལུས་རྩ་རླུང་ཐིག་ལེ་བདེ་ཆེན་བྱང་ཆུབ་སེམས་ཀྱི་ངོ་བོར་ཡེ་ནས་གནས་པ། གསང་བ་རང་གཞན་གྱི་རྒྱུད་ཀྱི་ཕུང་པོ་ལྔ་དང་དུག་ལྔ་དག་པ་ཡེ་ཤེས་ལྔའི་རང་བཞིན་དུ་བསམ། རཀྟ་ཕྱི་ལྟར་ན་དུང་ཆེན་གྱི་སྣོད་དུ་རཀྟའི་རྒྱ་མཚོ་འཁྱིལ་བ། ནང་རཀྟའི་ཟེགས་མ་ལས་ཡེ་ཤེས་ཀྱི་འོད་ཟེར་འཕྲོ་བས་ལྷ་རྣམས་མཉེས་པར་བྱེད་པ། གསང་བ་རཀྟའི་ཆོས་ཉིད་སྐྱེ་བ་མེད་པ་ལས་འཁོར་བའི་གནས་སྟོང་པར་བསམ། གཏོར་མ་ཕྱི་ལྟར་ན་སྣོད་ས་གཞི་དང་མཉམ་པར་བཅུད་ཀྱི་གཏོར་མ་རི་རབ་ཙམ། ནང་ཡེ་ཤེས་ཀྱི་བདུད་རྩིའི་ཟེགས་མ་ལས་འདོད་ཡོན་གྱི་རོལ་པ་འཕྲོ་བས་ལྷ་རྣམས་མཉེས་པར་བྱེད་པ། གསང་བ་གཏོར་མའི་ཆོས་ཉིད་སྐྱེ་བ་མེད་པ་ལ་འདོད་པའི་ཞེན་པ་མེད་པས་གཏོར་མ་ཐེངས་བར་ལྷང་གིས་བསྒོམ་པའོ། །དེ་ལྟར་ཡང་། རྒྱུད་ལས། སངས་རྒྱས་ཀུན་གྱི་ཏིང་ངེ་འཛིན། །སྟོང་པ་ཉིད་ཅེས་རྒྱལ་བས་གསུངས། །དེ་བས་རྣམ་པ་ཐམས་ཅད་ཀུན། །སྟོང་པ་ཉིད་དུ་དྲན་པར་བྱ། །ཞེས་གསུངས་སོ། །གསུམ་པ་ནི། ༀ། ཀུན་བཟང་བླ་ན་མེད་པ་ཡི། །ཞེས་སོགས་ཏེ། དེ་ཡང་རྒྱུད་རྡོ་རྗེ་རྩེ་མོ་ལས། ༀ་ནི་ཅི་ཞིག་ཡིན་པར་བཤད། །མཆོག་དང་ནོར་སྟེར་དཔལ་དང་གཡང་། །སྐལ་བཟང་རྣམ་པ་དང་ལྡན་ཅིང་། །དམ་བཅའ་བ་དང་བཀྲ་ཤིས་དོན། །ཞེས་དོན་དུ་མ་ལ་འཇུག་པ་ལས་འདིར་དམ་བཅའ་བའི་དབང་དུ་བྱས་ཏེ། དེ་ཉིད་ཀྱིས་མགོ་དྲངས་ནས་ཆོས་ཐམས་ཅད་ཀྱི་གནས་ལུགས་མཐར་ཐུག་པ་དག་མཉམ་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོ་ནི་ཀུན་ཏུ་བཟང་པོའི་ཕྱག་རྒྱས་བཏབ་པའི་ཡོན་ཏན་བཙལ་བ་མེད་པར་ལྷུན་གྱིས་གྲུབ་པའི་དམ་ཚིག་དང་སྡོམ་པའི་ཆིངས་བླ་ན་མེད་པ་སྟེ། དེ་གང་སྙམ་ན། གོང་དུ་སྨོས་པ་བཞིན་རིག་པ་སྤྲོས་བྲལ་ལ་སྣང་བ་ངོ་བོ་ཉིད་རྒྱུར་ལྷུན་གྱིས་གྲུབ་པ་དོན་དམ་བདེན་པ་དང་། དེའི་རྩལ་རྟོག་ཚོགས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བ་ཀུན་རྫོབ་བདེན་པ་སྟེ། དེ་གཉིས་ཀྱང་ཕྱོགས་རེ་བ་མ་ཡིན་པར་ངོ་བོ་དབྱེར་མི་ཕྱེད་པར་མཉམ་པ་ཉིད་དུ་གནས་པ་ནི་ལྷག་པའི་བདེན་པ་དབྱེར་མེད་ཅེས་བྱ། དེ་ཡང་ཐ་སྙད་ཙམ་དུ་དབྱེར་མེད་ཅེས་བརྗོད་ཀྱང་དེར་འཛིན་གྱི་བསམ་བརྗོད་ཐམས་ཅད་ཀྱི་ཡུལ་ལས་འདས་པས་སྤྱོད་ཡུལ་དང་བྲལ་བ་ཞེས་གདགས་སོ། །དེ་ལྟ་བུའི་སེམས་ཀྱི་ཆོས་ཉིད་རང་བཞིན་གྱིས་རྣམ་པར་དག་པ་དེ་ནི་སངས་རྒྱས་རྣམས་ཀྱི་ཐུགས་གཉིས་སུ་མེད་པའི་ཡེ་ཤེས་ཆོས་ཀྱི་སྐུ་བདེ་བར་གཤེགས་པའི་སྙིང་པོ་སྟེ་སེམས་ཅན་ནས་སངས་རྒྱས་ཀྱི་བར་གསེར་བཟང་པོའི་ཁམས་ལྟར་རང་བཞིན་འགྱུར་བ་མེད་པར་བཞུགས་པ་ནི་གནས་ལུགས་ཡང་དག་པའི་དཀོན་མཆོག་གསུམ་གྱི་རང་བཞིན་ཡིན་ལ་གང་བསྒྲུབ་བྱའི་ལྷ་ཡང་དེ་ལས་མི་འདའ་སྟེ། དཀོན་མཆོག་འགྲེལ་ལས། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། །ཞེས་གསུངས། དེ་ཉིད་རྟོགས་པ་དང་ཐོབ་པ་ལས་གོང་དུ་གྱུར་པའི་ལམ་དང་འབྲས་བུའི་ཆོས་གཞན་མི་སྲིད་པའི་ཕྱིར་བླ་ན་མེད་པའི་སྒྲས་བསྟན་ཏེ། དེ་ལྟ་བུའི་བདེན་གཉིས་དབྱེར་མེད་བྱང་ཆུབ་ཀྱི་སེམས་དེ་ཤེས་འཇུག་གི་སྦྱོར་བས་རང་རྒྱུད་ལ་བཟུང་ཞིང་མི་སྤོང་བར་དམ་བཅའ་བ་ནི་འབྲས་བུ་རྡོ་རྗེ་ཐེག་པ་སྔགས་བླ་མེད་ལུགས་ཀྱི་སེམས་བསྐྱེད་ཚུལ་ཏེ། རིན་ཆེན་དྲྭ་བ་ལས། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །ཞེས་གསུངས། གནས་ལུགས་ལྟ་བའི་སེམས་བསྐྱེད་ཚུལ་འདི་ལྟ་བུ་ལ་ཡིད་ཆེས་རྙེད་ནས་དེ་ལྟར་ཡེ་ནས་ཡིན་པའི་ཕྱིར་ད་སྤང་དུ་མེད་པར་ཐག་ཆོད་ན་གཞི་ལམ་འབྲས་བུའི་དཀོན་མཆོག་གསུམ་དང་བསྒྲུབ་བྱའི་ལྷ་དང་བླ་མ་སྔགས་དང་ཕྱག་རྒྱ་སོགས་ཀྱང་ངོ་བོ་ཉིད་ཀྱིས་སྤོང་བར་མི་འགྱུར་ཏེ་ཐམས་ཅད་གནས་ལུགས་དེའི་རང་བཞིན་ལས་མ་འདས་པའི་ཕྱིར། དེས་ན་ཚུལ་དེས་དོན་དམ་དང་ནི་ཀུན་རྫོབ་ཀྱི་བྱང་ཆུབ་སེམས་གཉིས་པོའང་ཚུལ་བཞིན་དུ་བསྐྱེད་ཅིང་གཟུང་བར་འགྱུར་ཏེ། དོན་དམ་མཐར་ཐུག་གནས་ལུགས་དག་མཉམ་བདེན་པ་དབྱེར་མེད་དུ་བཟུང་བའི་ཕྱིར་དང་། སེམས་ཅན་ཐམས་ཅད་རྒུད་པ་ལས་སྐྱོབ་པའི་དོན་དུ་བདག་ཉིད་སངས་རྒྱས་སུ་བསྒྲུབ་པའི་བསམ་སྦྱོར་མི་གཏོང་བ་ནི་ཀུན་རྫོབ་སེམས་བསྐྱེད་ཡིན་ལ། འདིར་མཐའ་ཡས་པའི་སེམས་ཅན་གྱི་དོན་རྟག་ཁྱབ་ཏུ་མཛད་པའི་སངས་རྒྱས་ཉིད་དུ་འགྲུབ་ངེས་པར་མཐོང་ནས། དེ་ལས་བློ་ཕྱིར་ཕྱོགས་པ་དང་སེམས་ཞུམ་པ་དང་འཁོར་བར་སྐྱོ་བ་སོགས་དམ ན་ལམ་ཡིད་བྱེད་ཀྱི་དྲི་མ་གཏན་ཁེགས་སུ་གྱུར་པས་རྒྱུ་མཚན་ཉིད་ཀྱི་ཐེག་པའི་སེམས་བསྐྱེད་སོགས་ལས་ཁྱད་པར་དུ་འཕགས་པ་ཡིན་ལ། དེ་ལྟ་བུའི་ཚུལ་གྱིས་དམ་བཅའ་བ་ནི་དམ་ཚིག་དང་སྡོམ་པ་ཀུན་གྱི་ཆིངས་དངོས་གཞིའི་ཡོན་ཏན་ཐམས་ཅད་ཀྱི་རྟེན་ནམ་རྩ་བར་གྱུར་པ་སྟེ། གསང་སྙིང་ལས། བླ་མེད་མཆོག་གི་དམ་ཚིག་ཏུ། །འདུལ་བའི་དབང་གིས་ཚུལ་ཁྲིམས་དང་། །ཇི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཅེས་དང་། སྤྱི་མདོ་ལས། ཇི་ལྟར་ས་གཞི་གཤིན་པ་ལ། །བརྟེན་ནས་ས་བོན་བཏབ་པ་ལས། །འབྲས་བུ་སྨིན་པར་གྱུར་པ་ཡིས། །གང་དག་འཚོ་བའི་སྲོག་འཛིན་ལྟར། །ཆོས་རྣམས་ཀུན་གྱི་གཞིར་གྱུར་པ། །དམ་ཚིག་འདི་ལ་གནས་པ་ན། །བླ་མེད་བྱང་ཆུབ་རྣམ་སྨིན་པས། །དགེ་བའི་སྲོག་འཛིན་དམ་པའོ། །ཞེས་གསུངས། དེའི་ཕྱིར་ལྟ་བ་དེ་ལྟ་བུ་དང་ལྡན་པ་ལ་རྡོ་རྗེ་འཛིན་པ་ཞེས་བྱ་སྟེ་སྔགས་ཀྱི་དེ་ཁོ་ན་ཉིད་རྡོ་རྗེ་ལྟ་བུ་རང་རྒྱུད་ལ་བཟུང་ནས་སྲིད་ཞིའི་རྒུད་པ་ཀུན་གྱི་ཕྱོགས་འཇོམས་པའི་ནུས་པ་དང་ལྡན་པའི་ཕྱིར། སྔགས་ཀྱི་དེ་ཁོ་ན་ཉིད་ལ་ཞུགས་པའི་གང་ཟག་ལས་དང་པོ་པའང་ཕྱིར་མི་ལྡོག་པའི་བྱང་ཆུབ་སེམས་དཔའ་དང་སྐལ་བ་མཉམ་པར་གསུངས་ཏེ། རྡོ་རྗེ་རྩེ་མོ་ལས། ཇི་སྲིད་ས་བརྒྱད་མ་ཐོབ་པར། །དེ་སྲིད་ཐེག་པ་དམན་པས་འཇིག །གསང་ཆེན་ཐེག་པ་འདི་རུ་ནི། །གཞུག་པ་གང་དང་གང་ཡིན་པ། །དེ་ནི་རྒྱལ་སྲས་ས་པའོ། །ཞེས་དང་། སྒྱུ་འཕྲུལ་རྡོ་རྗེ་ལས། རང་རིག་ཡེ་ཤེས་རྒྱུད་དོན་ཕྱིར། །རང་སྣང་རིག་པ་མངོན་བྱས་པས། །རིག་འཛིན་མཆོག་དེ་ལྷུན་གྲུབ་པའོ། །ཏིང་འཛིན་ནུས་པའི་མཐུ་མེད་ཀྱང་། །ས་སྦྱོང་སེམས་དཔའ་བསྐྱེད་དུ་མེད། །བདེ་གཤེགས་ཉིད་དང་སྤྱོད་ཡུལ་གཅིག །རིག་པའི་སྐྱེས་བུས་ལུང་ཐོབ་པའོ། །ཞེས་སོ། །དེ་ལྟར་འགལ་སྤོང་མཐུན་སྒྲུབ་ཀྱི་སྔོན་འགྲོ་དེ་རྣམས་ཀྱིས་སྦྱང་བྱ་འཁོར་བའི་དུས་སུ་ཇི་ལྟར་འདོད་པའི་སྲིད་པར་འཇུག་པ་ལ་སྐྱེ་གནས་ཀྱི་སྐྱོན་དང་ཕྱི་མའི་གནས་ལུས་ལོངས་སྤྱོད་ཀྱི་འགལ་རྐྱེན་རྣམས་སྦྱོང་ཞིང་བསྲུང་བ་དང་། མཐུན་རྐྱེན་བསོད་ནམས་ཆ་མཐུན་གྱི་ལས་བསོག་པ་རྣམས་དག་པར་བྱེད། སྦྱངས་འབྲས་དངོས་གཞི་སངས་རྒྱས་ཀྱི་མཛད་པ་ལ་བར་དུ་གཅོད་པའི་བདུད་བཞི་བཅོམ་པ་དང་། ཚོགས་གཉིས་གསོག་ཅིང་། འོད་ཟེར་ཆེན་པོས་དབང་བསྐུར་བ་དང་སངས་རྒྱས་ཀྱི་ཞིང་ཡོངས་སུ་སྦྱོང་བའི་ཏིང་ངེ་འཛིན་མངོན་དུ་བྱེད་པ་སོགས་དང་མཐུན་པས་འབྲས་བུ་གཞི་ལ་རྫོགས་པར་བྱེད། སྦྱོང་བྱེད་སྔོན་འགྲོ་འདི་དག་གིས་རྩ་རླུང་ཐིག་ལེའི་གེགས་དང་གོལ་ས་ཆོད་ཅིང་ཉམས་རྟོགས་ཀྱི་རྩལ་ཁ་བསྐྱེད་པའི་ཐབས་རྨད་བྱུང་དུ་འགྱུར་བས་རྫོགས་རིམ་གྱི་སྨིན་བྱེད་དུ་འགྲོ་བ་ཡིན་ནོ། །གཉིས་པ་དངོས་གཞི་བསྐྱེད་བཟླས་ཀྱི་རྣལ་འབྱོར་ལ་གཉིས། སྐུ་བསྐྱེད་རིམ་ཕྱག་རྒྱའི་རྣལ་འབྱོར་དང་། གསུང་བཟླས་པ་སྔགས་ཀྱི་རྣལ་འབྱོར་རོ། །དང་པོ་ནི། སྤྱིར་རྒྱུད་སྡེ་ཆེན་པོ་རྣམས་སུ་སྐྱེ་གནས་བཞིའི་བག་ཆགས་སྦྱོང་ཚུལ་དང་གང་ཟག་གི་བློ་རིམ་དང་བསྟུན་པའི་བསྐྱེད་ཆོག་རྒྱས་བསྡུས་ཇི་སྙེད་གསུངས་ནའང་། དེ་ཐམས་ཅད་ཀྱི་དགོངས་པའི་སྐྱེལ་སོ་མཐར་ཐུག་པ་ནི། གོང་དུ་སྨོས་པ་བཞིན་རང་གི་སེམས་ཉིད་རྡོ་རྗེ་མི་ཤིགས་པའི་དཀྱིལ་འཁོར་ཆེན་པོར་ཡེ་གདོད་མ་ནས་གྲུབ་པ་ཉིད་མཚན་གཞིར་བྱས་ནས། རྟོག་ཚོགས་ཐམས་ཅད་དཀྱིལ་འཁོར་འཁོར་ལོའི་རང་བཞིན་དུ་ཤེས་རབ་ཀྱིས་ངེས་པར་བྱས་ཏེ་གནས་ཚུལ་དང་མཐུན་པར་སྒྱུ་མ་ལྟ་བུའི་བསྐྱེད་རིམ་བསྒོམས་པས་ཐ་མལ་གྱི་སྣང་ཞེན་སྦྱོང་བ་ནི་བསྐྱེད་རྫོགས་ཟུང་འབྲེལ་གྱི་ལམ་སྟེ། དེ་ཡང་རྟོག་ཚོགས་ལས་གཞན་པའི་ལྷ་གུད་ན་བཙལ་དུ་མེད་དེ། ཆོས་ཐམས་ཅད་ཡེ་ཇི་བཞིན་པའི་ལྷར་རྣམ་པར་དག་པས་ན་དེ་ལས་གཞན་མ་དག་པའི་ཆོས་མཚན་མར་གྲུབ་པ་རྡུལ་ཙམ་ཡང་མ་དམིགས་པའི་ཕྱིར་ཏེ། སྒྱུ་འཕྲུལ་རྩ་རྒྱུད་ལས། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་གསུངས། དེ་བས་ན་རྟོག་ཚོགས་དེ་དག་གདོད་མ་ནས་ལྷར་དག་པས་ལམ་རྐྱེན་དང་འཕྲད་ན་དེར་སྣང་ལ། མ་ཕྲད་ན་མི་སྣང་བ་ནི། དཔེར་ན་དངུལ་ཆུ་བསྡུས་པའི་གསེར་ཕྱེ་ཉིད་མར་གསར་གྱི་གོང་བུ་ལྟ་བུ་དང་། མིག་སྐྱོན་ཅན་ལ་དུང་སེར་པོར་སྣང་བ་གཉིས། རྐྱེན་མེ་དང་། མིག་ནད་སྦྱོང་བའི་སྨན་དང་འཕྲད་ན་གསེར་དང་དུང་གི་རང་མདོག་སེར་པོ་དང་དཀར་པོ་སྣང་དུ་རུང་ལ། མ་འཕྲད་ན་དེ་དང་དེར་མི་སྣང་བ་བཞིན་དང་། སྣང་བ་གཉིས་པོ་དེ་གང་བདེན་པར་འཇོག་ཅེ་ན། མར་གསར་གྱི་གོང་བུ་དང་དུང་མདོག་སེར་པོ་སྣང་བ་འཁྲུལ་པ་ཡིན་པས་མེད་སྣང་ཙམ་སྟེ་མི་བདེན་ལ། གསེར་གྱི་ཁ་དོག་སེར་པོ་དང་དུང་གི་ཁ་དོག་དཀར་པོར་སྣང་བ་ནི་མ་འཁྲུལ་པས་བདེན་པར་འཇོག་པ་ལྟར། རྟོག་ཚོགས་མ་དག་པའི་ཆོས་སུ་སྣང་བ་འདི་དག་མེད་པ་གསལ་སྣང་ཙམ་སྟེ་བདེན་པར་མ་གྲུབ་ཅིང་། རྟོག་ཚོགས་ཀྱི་རང་བཞིན་ལྷར་ཡེ་ནས་དག་པ་ནི་མ་འཁྲུལ་ཞིང་མི་བསླུ་བས་གནས་ལུགས་ཏེ་མཐར་ཐུག་སངས་རྒྱས་ཀྱི་སྤྱན་སྒྲིབ་པ་ཐམས་ཅད་དང་བྲལ་བས་དེ་ལྟར་དུ་གཟིགས་པའི་ཕྱིར། དཔེར་ན་ཤཱ་རིའི་བུས་སངས་རྒྱས་ཀྱི་ཞིང་འདི་མ་དག་པར་མཐོང་ཞིང་ཚངས་པ་རལ་པ་ཅན་གྱིས་དག་པར་མཐོང་ནས་བརྩད་པ་ན། སངས་རྒྱས་ཀྱིས་ཞིང་དག་པར་ཐམས་ཅད་ཀྱིས་མཐོང་བར་མཛད་ནས་ངའི་ཞིང་ནི་རྟག་ཏུ་འདི་ལྟར་དག་ཀྱང་ཁྱེད་རྣམས་ཀྱིས་མ་མཐོང་ངོ་ཞེས་གསུངས་པས་མཚོན་ཏེ། མདོ་དགོངས་འདུས་ལས། འཁོར་བར་འཁྲུལ་པའི་སྒྱུ་མ་དང་། །རྣམ་དག་རྣམ་བྱང་སྒྱུ་མ་གཉིས། །སེམས་ཅན་སངས་རྒྱས་ཐ་དད་ཀྱང་། །དེ་བཞིན་ཉིད་ལ་ཡོང་ཡེ་མེད། །ཅེས་དང་། འཁོར་བའི་སྡུག་བསྔལ་རྨི་འདྲ་བས། །དབུགས་ཆེན་འབྱིན་ནས་རྨི་སངས་ལྟར། །ཐམས་ཅད་བདེ་ཆེན་བྱང་ཆུབ་སེམས། །མཁའ་ལྟར་ཁྱབ་བདག་ཉིད་དུ་སྣང་། །ཞེས་དང་། འདི་ལྟར་སྣང་བའི་ཆོས་ཐམས་ཅད། །ཡེའམ་ངང་གིས་སངས་རྒྱས་ལ། །མིན་ལ་ཡིན་པར་འགྱུར་མ་ཡིན། །ངོ་བོ་ཉིད་ཀྱིས་དེ་ཉིད་ལ། །ཡིན་དང་མིན་ཞེས་ཅི་བྱར་ཡོད། །ཅེས་དང་། ཡེ་ཤེས་སྣང་བ་རྒྱན་གྱི་མདོ་ལས། རྟག་ཏུ་སྐྱེ་མེད་ཆོས་ནི་དེ་བཞིན་གཤེགས། །ཆོས་རྣམས་ཐམས་ཅད་བདེ་བར་གཤེགས་པ་འདྲ། །བྱིས་པའི་བློ་ཅན་མཚན་མར་འཛིན་པ་དག །འཇིག་རྟེན་དག་ན་མེད་པའི་ཆོས་ལ་སྤྱོད། །ཅེས་གསུངས། དེས་ན་པདྨའི་ལམ་རིམ་ཆེན་མོར། ཕྱི་ནང་སྣོད་བཅུད་གཞལ་ཡས་ལྷ་རུ་བསྐྱེད། །ཅེས་པ་འདི་ལ་ལྔ་སྟེ། སྦྱང་གཞི། སྦྱང་བྱ། སྦྱོང་བྱེད། འབྲས་བུ། སྦྱོང་ཚུལ་ལོ། །དང་པོ་ནི། སྣོད་བཅུད་བརྟན་གཡོའི་དངོས་པོ་ཐམས་ཅད་གཞལ་ཡས་ཁང་དང་ལྷའི་རང་བཞིན་དུ་གནས་པའོ། །གཉིས་པ་ནི། དེ་ལྟར་ངོ་མ་ཤེས་པར་སྣོད་བཅུད་རང་རྒྱུད་དུ་འཛིན་པ་ཀུན་བརྟགས་གློ་བུར་གྱི་དྲི་མ་འདིའོ། །གསུམ་པ་ནི་སྣོད་བཅུད་ཐམས་ཅད་གཞལ་ཡས་ཁང་དང་ལྷ་རུ་བསྒོམས་པའོ། །བཞི་པ་ནི་ཀུན་བརྟགས་གློ་བུར་གྱི་དྲི་མ་དག་ནས་དོན་རང་མཚན་མངོན་དུ་གྱུར་པའོ། །ལྔ་པ་སྦྱོང་ཚུལ་ནི། སྟོང་པའི་ངང་ལས་འགགས་མེད་ཀྱི་སྙིང་རྗེ་གཉིས་མེད་ཡི་གེའི་རང་བཞིན་ལས་སྣོད་གཞལ་ཡས་ཁང་བཅུད་རང་གཞན་ཐམས་ཅད་ལྷའི་དཀྱིལ་འཁོར་དུ་བསྒོམས། དེ་ལ་དམ་ཚིག་ཡེ་ཤེས་གཉིས་ལས། རང་གཞན་གྱི་ལུས་ངག་ཡིད་གསུམ་ལྷའི་སྐུ་གསུང་ཐུགས་སུ་གནས་པ་སྟེ། དེ་ལས་མི་འདའ་བའི་དམ་ཚིག་གི་ལྷར་གསལ་ཞིང་ཐ་མལ་གྱི་ལོག་རྟོག་མེད་པས་སེམས་པའོ། །དེ་ལྟར་གདོད་ནས་གནས་ཤིང་ཡེ་ནས་ཡོད་པ་དེ་ཉིད་ཤེས་པས་ན་ཡེ་ཤེས། གཉིས་འཛིན་གྱི་དྲི་མ་མེད་པས་ན་སེམས་དཔའ་སྟེ་དམ་ཚིག་ཡེ་ཤེས་དབྱེར་མེད་པའོ། །དེས་ན་ཡེ་ནས་ཡོད་པ་ལ་ངོ་ཤེས་བྱས་པ་ཙམ་ལས། རང་བཞིན་གྱི་གནས་ནས་སྤྱན་དྲངས་བསྟིམ་ཞེས་བྱ་བ། ཡུལ་ཡུལ་ཅན་གཞན་དུ་གྲུབ་པ་ནི་མེད་དོ། །རང་བཞིན་དབྱེར་མེད་དཀྱིལ་འཁོར་ལ། །ཞེས་སོ། །ཞེས་རང་འགྲེལ་དུ་གསུངས་སོ། །ཚུལ་དེ་ལྟར་ཤེས་ན་བསྐྱེད་ཆོག་གི་རིམ་པ་རྒྱས་བསྡུས་གང་དང་ཅི་བསྒོམས་ཀྱང་གྱ་ནོམ་ལྷར་ཞེན་གྱི་གོལ་ས་མི་འབྱུང་ཞིང་། དོན་ལ་བསྐྱེད་རྫོགས་ཟུང་འབྲེལ་ཡང་དག་པའི་ཉེ་ལམ་དུ་འགྱུར་ཏེ། དེ་ཉིད་ལས། བསྐྱེད་རྫོགས་གཉིས་མེད་ཀྱི་དོན་ནི། ཀུན་རྫོབ་ལམ་དུ་བྱེད་པ་བསྐྱེད་རིམ། དོན་དམ་མངོན་དུ་བྱེད་པ་རྫོགས་རིམ། དེ་གཉིས་ཐ་དད་གཉིས་སུ་མེད་པས་བསྐྱེད་རྫོགས་དབྱེར་མེད་ཟུང་འཇུག་ཡིན་ནོ། །དེ་ཡང་སྣོད་བཅུད་ཐམས་ཅད་གདངས་མ་འགགས་པར་གསལ་བ་ནི་གཟུགས་སྐུ། གཤིས་སྟོང་པར་གནས་པ་ནི་ཆོས་སྐུ། ངོ་བོ་ཅིར་ཡང་མི་རྟོག་པ་ནི་གཉིས་མེད་ཡིན་ཏེ། གདངས་གཟུགས་སྐུ་ཡིན་ཙ་ན་གཤིས་ཆོས་སྐུ་ལས་འོས་མེད། གཤིས་ཆོས་སྐུར་གནས་པ་ལས་གདངས་གཟུགས་སྐུ་ལས་འོས་མེད། དེའི་གནད་ཀྱིས་དབྱེར་མེད་ལས་འདས་པ་མེད་དོ། །ཞེས་དང་། གྲོལ་ཏིག་ཡང་དག་གཏེར་གཞུང་ལས། རང་ཉིད་སྟོང་པར་བསྒོམས་པ་ནི༔ སྣང་བཞིན་སྟོང་པ་ཆུ་ཟླ་འདྲ༔ བརྗོད་ཅིང་སྟོང་པ་བྲག་ཆ་འདྲ༔ གསལ་ཞིང་སྟོང་པ་འཇའ་ཚོན་འདྲཿ མེད་བཞིན་སྟོང་པ་ནམ་མཁའ་འདྲཿ མྱོང་བཞིན་སྟོང་པ་རྨི་ལམ་འདྲ༔ དེ་ལྟར་གསལ་ཞིང་གོམས་པའི་ཚེ༔ བསྐྱེད་པའི་རིམ་པ་བརྟན་པ་ཡིན༔ སྣང་སྲིད་རྣམ་དག་རང་གི་སེམས༔ སྟོང་གསལ་འཛིན་མེད་ངང་དུ་བཞག༔ རང་བྱུང་རིག་པ་ཟང་ཐལ་བསྐྱང༔ སྣང་ལ་རང་བཞིན་མེད་པ་ཡིན༔ རྫོགས་པའི་རིམ་པ་ཨེ་མ་ཧོ༔ བསྐྱེད་རྫོགས་ཟུང་འཇུག་ལམ་དུ་ཁྱེར༔ བསྐྱེད་རྫོགས་གོམས་པས་སངས་རྒྱས་ཡིན༔ སྒྱུ་ལུས་བརྟན་པར་གྱུར་ནས་ནི༔ བར་དོར་ཡི་དམ་བཞད་ཅིང་བྱོན༔འདི་ལ་ཐེ་ཚོམ་ཅུང་ཟད་མེདཿ རྡོ་རྗེ་འཆང་གི་ས་ཐོབ་ནས༔ གཟུགས་སྐུ་གཉིས་ཀྱི་འགྲོ་དོན་མཛད༔ ཆོས་སྐུ་ལོངས་སྐུ་སྤྲུལ་སྐུ་གསུམ༔ རྟོག་མེད་ངང་ལ་ཐུགས་ཀྱིས་འཆང༔ ཞེས་དང་། སྣང་བའི་དངོས་པོ་འདི་རྣམས་ཀུན༔ གཟུགས་སུ་སྣང་བ་ལྷ་ཡི་སྐུ༔ རྩི་ཤིང་ནགས་ཚལ་བཅས་པ་དང༔ ས་རྡོ་རི་བྲག་ལ་སོགས་ཀུན༔ དཔལ་ཆེན་སྐུ་ཡི་ཆོ་འཕྲུལ་ལོ༔ འགྲོ་བའི་སྒྲ་སྐད་ཐམས་ཅད་ནི༔ རུ་ལུའི་སྒྲ་རུ་ཤེས་པར་བྱ༔ ས་སྒྲ་མེ་སྒྲ་ཆུ་སྒྲ་དང༔ རླུང་སྒྲ་ལ་སོགས་འབྱུང་བའི་སྒྲཿ རུ་ལུའི་སྒྲ་རུ་ཤེས་པར་བྱ༔ འགྲོ་འཆག་ཉལ་འདུག་ཐམས་ཅད་ནི༔ རུ་ལུའི་ངང་དུ་ཤེས་པར་བྱ༔ འདས་དང་མ་འདས་ད་ལྟར་གྱི༔ རྣམ་རྟོག་རི་དྭགས་རྒྱུ་བ་འདི༔ རུ་ལུའི་རྒྱ་རུ་འཛུད་པར་བྱ༔ ཡིད་ཀྱིས་ཅི་བསམ་ཅི་མནོ་བའི༔ དུག་ལྔ་གང་སྐྱེས་ངོ་བོ་ཀུན༔ རུ་ལུའི་ངོ་བོ་ཤེས་པར་བྱ༔ མིག་གིས་གཟུང་ཡུལ་ཐམས་ཅད་ཀུན༔ རུ་ལུར་ཀྲོང་གིས་ཤེས་པར་བྱ༔ སྣང་སྲིད་རུ་ལུར་འཛིན་པ་ཡིན༔ ཞེས་དང་། སྒྱུ་འཕྲུལ་དྲྭ་བ་ལས། རྡོ་རྗེ་སེམས་དཔའ་སྒྲུབ་འདོད་པས། །རྟག་ཏུ་མཉམ་པའི་དོན་རྟོགས་ལ། །སྐུ་ནི་འཇའ་ཚོན་ཚུལ་འདྲ་བར། །སྣང་ལ་རང་བཞིན་མེད་པར་བསྒོམས། །འཁོར་རྣམས་ཆུ་ཟླའི་ཚུལ་ཤེས་པར། །གསལ་ལ་རང་བཞིན་མེད་པར་བསྒོམས། །ལྷ་ཡི་སྐུ་ནི་གསལ་བསྒོམ་ན། །བསོད་ནམས་ཚོགས་ཆེན་འཐོབ་པར་འགྱུར། །དེ་ཉིད་གཟུགས་བརྙན་ཚུལ་ཤེས་ན། །ཡེ་ཤེས་ཚོགས་ཆེན་འཐོབ་པར་འགྱུར། །ཞེས་གསུངས། མདོར་ན་བཅོས་མའི་བློ་ངོར་སྣང་སྲིད་དག་པ་རབ་འབྱམས་སྒྱུ་འཕྲུལ་དྲྭ་བའི་འཁོར་ལོར་འཆར་བའི་བར་དུ་བསླབས་པས་བསྐྱེད་རིམ་མཐར་ཕྱིན་ཏེ་སྣང་སྲིད་གཞིར་བཞེངས་ཀྱི་བསྐྱེད་རིམ་ཞེས་བྱའོ། །དེ་ལ་སྤྱིར་བསྐྱེད་རིམ་རྐྱང་པས་འོག་མིན་བར་གྱི་འཇིག་རྟེན་པའི་དངོས་གྲུབ་ཀུན་སྒྲུབ་ནུས་ཀྱི་འདས་ལམ་མངོན་དུ་བྱེད་མི་ནུས་ནའང་། བསྐྱེད་རྫོགས་ཟུང་འཇུག་གི་ཚུལ་ཟབ་མོ་འདི་ལྟ་བུས་རྫོགས་རིམ་ངང་གིས་དྲངས་ནས་བདེན་དོན་མཐོང་བ་ཡང་ཡོད་པ་ལ་རིགས་པས་གནོད་པ་མེད་དེ་མདོ་ལམ་གྱིས་ཀྱང་རིང་མོ་ཞིག་ན་བདེན་དོན་མཐོང་བ་འདྲེན་ཐུབ་པ་བཞིན་ནོ་ཞེས་སྤྱི་དོན་འོད་གསལ་སྙིང་པོར་གསུངས་ལ། དེ་ལྟ་བུའི་མཉམ་པ་ཉིད་ཀྱི་ལྟ་དགོངས་ཀྱིས་ཟིན་ན། བསྐྱེད་རིམ་གྱི་ཆོ་གའི་ཡན་ལག་གཞན་ཕྲ་མོ་རྣམས་ཉམས་ཀྱང་དེས་ཉེས་སྐྱོན་དུ་མི་འགྱུར་བར་མཆོག་ཐུན་གྱི་དངོས་གྲུབ་ཆེན་པོ་རྣམས་བདེ་བླག་ཏུ་འབྱིན་ནུས་པར་གསུངས་ཏེ། གསང་སྙིང་ལས། དཀྱིལ་འཁོར་ཀུན་ཏུ་རབ་སྦྱོར་བས། །དཀྱིལ་འཁོར་ཐམས་ཅད་འགྲུབ་པར་འགྱུར། །ཆོ་ག་ལྷག་གམ་མ་ཚང་ནའང་། །སྐྱོན་ཉིད་དག་སྟེ་ཉེས་པ་མེད། །ཅེས་དང་། སྒྱུ་འཕྲུལ་རྡོ་རྗེ་ལས། ཆོས་ཉིད་དག་པའི་རྣལ་འབྱོར་པས། །བསྐྱེད་པའི་ཆོ་ག་ལས་རབ་དག །ལྷག་དང་མ་ཚང་ཉེས་བྲལ་ཞིང་། །དངོས་གྲུབ་ཡ་མཚན་ཆེན་པོ་འབྱུང་། །ཞེས་སོ། །དེ་ལྟར་གོ་དོན་གྱི་རྣམ་གཞག་སྤྱིར་ངེས་པར་བྱས་ནས། བྱེ་བྲག་སྒོམ་དོན་དམིགས་རིམ་རྒྱས་པར་བཤད་པ་ལ་བཞི། རྣམ་པ་ཏིང་ངེ་འཛིན་གྱི་དཀྱིལ་འཁོར་བསྐྱེད་པ། རང་བཞིན་ཡེ་ཤེས་ཀྱི་དཀྱིལ་འཁོར་སྒྲུབ་པ། གཉིས་མེད་ཀྱི་དཀྱིལ་འཁོར་ལ་མཆོད་བསྟོད་བྱ་བ། དམིགས་པའི་གཙོ་བོ་ལྷའི་སྣང་ཞེན་ལ་བསླབ་པའོ། །དང་པོ་ལ་གསུམ། རྒྱུ་ཏིང་ངེ་འཛིན་གསུམ་གྱི་ཁོག་ཕུབ་པ། འབྲས་བུ་རྟེན་དང་བརྟེན་པའི་དཀྱིལ་འཁོར་བསྐྱེད་པ། བྱིན་གྱིས་བརླབས་ཤིང་དབང་བསྐུར་བའོ། །དང་པོ་ནི། ཨཱཿགདོད་ནས་ཀ་དག་སོགས་ནས། འཇའ་ལྟར་ཤར༔ ཞེས་པའི་བར་གྱིས་བསྟན་ཏེ། འདི་ལ་གསུམ། དང་པོ་དེ་བཞིན་ཉིད་ཀྱི་ཏིང་ངེ་འཛིན་ནི་ཧེ་རུ་ཀ་འདུས་པའི་རྒྱུད་ལས། མ་བཅོས་མི་གནས་དམིགས་དང་བྲལ། །བསམ་དཔྱོད་ཡོད་འཛིན་རྟོག་ལས་འདས། །ཅི་ཡང་འདུ་ཤེས་མི་འཇུག་པ། །དེ་བཞིན་ཉིད་ཀྱི་ཏིང་འཛིན་བསྒོམས། །ཞེས་གསུངས་པ་ལྟར། འཁོར་འདས་ཀྱི་ཆོས་ཐམས་ཅད་རང་བཞིན་སྐྱེ་བ་མེད་པ་ལས་སྐྱེ་སོགས་ཀྱི་རོལ་པ་འགག་པ་མེད་པར་སྣང་ཡང་སྣང་བའི་དུས་ཉིད་ནས་སྐྱེ་འགག་གནས་དམིགས་འགྲོ་འོང་གི་སྤྲོས་པའི་མཚན་མ་རྡུལ་ཆ་ཕྲ་བ་ཙམ་ཡང་དོན་ལ་གྲུབ་མ་མྱོང་བའི་ཆོས་ཉིད་དེ་བཞིན་ཉིད་གདོད་ནས་དག་པའི་རང་སེམས་ཀ་དག་བསམ་བརྗོད་དང་བྲལ་བའི་དབྱིངས་སུ་མ་བཅོས་པར་མཉམ་པར་འཇོག་པ་སྟེ། དེ་ཡང་ཕྱི་ལྟར་ན། ཆོས་ཐམས་ཅད་མ་བྱུང་མ་སྐྱེས་སྐྱེ་བ་མེད་པར་བསམ། ནང་ལྟར་ན། ཆོས་ཉིད་བྱང་ཆུབ་ཀྱི་སེམས་སྤྲོས་པ་མེད་པ་རང་རྒྱུད་ལ་སྐྱེས་པར་བསམ། གསང་བ་ལྟར་ན། ཆོས་ཉིད་སྐྱེ་བ་མེད་པ་འོད་གསལ་དུ་ལྷང་གིས་རྟོགས་པར་བསམས་ལ། འཆི་བ་དག་པ་ཆོས་སྐུའོ་སྙམ་པའི་གཞི་འབྲས་སྦྲེལ་བའི་ང་རྒྱལ་བཟུང་། འདིས་མར་འཁོར་བའི་དྲི་མ་འཆི་སྲིད་དང་རྟག་ལྟ་གཟུགས་མེད་ཀྱི་ཁམས་སྦྱང་ཞིང་དག་པར་བྱེད། ཡར་ཆོས་སྐུ་མངོན་དུ་བྱེད་པའི་ས་བོན་གསོས་ཐེབས་པས་འབྲས་བུ་རྫོགས་པར་བྱེད་པའི་རྟེན་འབྲེལ་སྒྲིག ལམ་གོང་མ་རྫོགས་རིམ་དོན་གྱི་འོད་གསལ་རྒྱུད་ལ་སྐྱེ་བའི་གཞི་འདིང་བས་སྨིན་བྱེད་དུ་འགྲོ་བ་ཡིན་ནོ། །གཉིས་པ་ཀུན་ཏུ་སྣང་བའི་ཏིང་ངེ་འཛིན་ནི། ལུང་སྔ་མའི་འཕྲོར། སྟོང་ཉིད་ཡེ་ཤེས་རང་གསལ་བའི། །ཕྱོགས་མེད་ནམ་མཁའི་རང་བཞིན་ལྟར། །སྙིང་རྗེ་ཆེན་པོས་ཁྱབ་པ་ལ། །ཀུན་ཏུ་སྣང་བ་བསྒོམ་པར་བྱ། ཞེས་པས། སྟོང་ཉིད་དེའི་ངང་ལས་ཡེ་ཤེས་ཀྱི་རིག་པའི་རྩལ་མ་འགགས་པར། དེ་ལྟར་མ་རྟོགས་པའི་དབང་གིས་མེད་སྣང་སྒྱུ་མ་ལྟ་བུའི་སྲིད་པར་འཁྲུལ་སྣང་མུ་མེད་དུ་འཕྱན་ཞིང་སྡུག་བསྔལ་གསུམ་ལ་ལོངས་སྤྱོད་པའི་མཁའ་ཁྱབ་ཀྱི་སེམས་ཅན་ཐམས་ཅད་རང་གནས་གདོད་མའི་གཤིས་ལུགས་ཆོས་ཉིད་མཉམ་པ་ཆེན་པོའི་ཚུལ་ལ་འགོད་པར་བགྱིའོ་སྙམ་པའི་དམིགས་མེད་ཀྱི་སྙིང་རྗེ་ཆེན་པོ་རྩོལ་བ་མེད་པར་ཀུན་ལ་ཁྱབ་པར་རང་སྣང་བའི་ཚུལ་དུ་བསྒོམ་པ་སྟེ། ཕྱི་ལྟར་ན་ཁམས་གསུམ་གྱི་སེམས་ཅན་ཆོས་ཉིད་ཀྱི་དོན་མ་རྟོགས་པ་ལ་སྙིང་རྗེ་ཆེན་པོས་ཁྱབ་པར་བསྒོམ། ནང་ལྟར་ན་རང་གི་སེམས་རང་ལ་གསལ་བ་ལ་སྙིང་རྗེ་རང་བྱུང་དུ་ཤར་བར་བསྒོམ། གསང་བ་ལྟར་ན་ཆོས་ཉིད་སྐྱེ་བ་མེད་པའི་ངང་ལས་འཁོར་འདས་གཉིས་མེད་དུ་ལྷང་གིས་རྟོགས་པར་བསམ་པའོ། །བར་དོ་དག་པ་ལོངས་སྐུའོ་སྙམ་དུ་ང་རྒྱལ་འཛིན། འདིས་བར་སྲིད་དང་ཆད་ལྟ་གཟུགས་ཁམས་དག་པར་བྱེད། འབྲས་བུ་ལོངས་སྐུར་རྫོགས་པའི་རྟེན་འབྲེལ་སྒྲིག འོད་གསལ་ལས་ཟུང་འཇུག་གི་ལྷར་ལྡང་བའི་རྒྱུ་སྙིང་རྗེ་ཆེན་པོའི་གཞི་འདིང་བའི་སྨིན་བྱེད་དུ་འགྲོའོ། །གསུམ་པ་རྒྱུའི་ཏིང་ངེ་འཛིན་ནི། རྒྱུད་སྔ་མའི་འཕྲོར། གཉིས་མེད་རིག་པ་རང་སྣང་བའི། །མ་ལུས་སྐྱེ་རྒྱུ་ཧཱུྃ་བསྒོམ་བྱ། །ཞེས་པས། རང་སེམས་སྟོང་པ་ཉིད་དང་སྙིང་རྗེ་ཟུང་དུ་འཇུག་པའི་རང་རྩལ་ལས། མཚོན་བྱ་དབྱིངས་དང་ཡེ་ཤེས་གཉིས་མེད་དཔལ་ཆེན་པོ་ཉིད། མཚོན་བྱེད་ཐབས་ཆེན་ཡི་གེའི་རྣམ་པར་ཤར་བ་ཧཱུྃ་ཡིག་སྔོན་པོ་འོད་འབར་བ་ཞིག་ནམ་མཁའི་དཀྱིལ་ནས་འཇའ་ཚོན་ཤར་བ་ལྟར་སྣང་ལ་རང་བཞིན་མེད་པར་བསྒོམ་པ་ནི་འབྲས་བུ་རྟེན་དང་བརྟེན་པའི་དཀྱིལ་འཁོར་མ་ལུས་པ་བསྐྱེད་པའི་རྒྱུ་ཡིན་པས་རྒྱུ་ཡི་ཏིང་ངེ་འཛིན་ཏེ། ཕྱི་ལྟར་ན་སེམས་ཉིད་ཧཱུྃ་ཡིག་ཐམས་ཅད་བསྐྱེད་པའི་རྒྱུ་རུ་བསྒོམ། ནང་ལྟར་ན་རང་གི་སེམས་བྱུང་རང་ཤར་དུ་འདུག་པ་འདི་ཐམས་ཅད་བསྐྱེད་པའི་རྒྱུ་ཡིན་པར་བསྒོམ། གསང་བ་ལྟར་ན་སྐྱེ་བ་མེད་པའི་དོན་ལྷང་ངེར་རྟོགས་པ་དེ་ཐམས་ཅད་སངས་རྒྱས་ཀྱི་རྒྱུ་རུ་བསྒོམ་པའོ། །དེས་སྐྱེ་གནས་དག་པ་སྤྲུལ་སྐུའོ་སྙམ་པའི་ང་རྒྱལ་བསྐྱེད། འདིས་སྐྱེ་གནས་སུ་འཇུག་ཀ་མའི་སྲེད་བཅས་ཀྱི་ཤེས་པ་དང་འདོད་ཁམས་སྦྱོང་། འབྲས་བུ་ལོངས་སྐུ་ལས་གང་འདུལ་གྱི་སྤྲུལ་སྐུར་བཞེངས་པའི་རྟེན་འབྲེལ་སྒྲིག རྫོགས་རིམ་བདེ་ལུང་ལས་བྱུང་བའི་ལྷ་སྐུར་ལྡང་བའི་སྨིན་བྱེད་དུ་འགྱུར་རོ། །གཉིས་པ་ནི། དེ་ལས་རོལ་པའི་ཆོ་འཕྲུལ་གྱི༔ ཞེས་པ་ནས། རྡོ་རྗེ་ཁྲོ་བོའི་ཕྱག་རྒྱར་རྫོགས༔ ཞེས་པའི་བར་གྱིས་བསྟན་ཏེ། དེ་ཡང་རྣལ་འབྱོར་པའི་བློ་ཡི་རྩལ་འཕང་དང་སྦྱར་ཏེ། ལས་དང་པོ་པས་བསྐྱེད་པ་མ་ཧཱ་ཡོ་ག་ལྟར་རྟེན་དང་བརྟེན་པའི་དཀྱིལ་འཁོར་རིམ་གྱིས་བསྐྱེད་པ་དང་། རིམ་གྱིས་གོམས་པ་ནི། རྫོགས་པ་ཨ་ནུ་ཡོ་ག་ལྟར་དོན་དམ་པར་དབྱིངས་སྐྱེ་བ་མེད་པ་ལས་མ་གཡོས་པར་ཀུན་རྫོབ་དུ་སྣང་ཞིང་སྲིད་པས་བསྡུས་པའི་ཆོས་ཐམས་ཅད་སྙིང་པོ་བརྗོད་པ་ཙམ་གྱིས་ལྷའི་དཀྱིལ་འཁོར་དུ་སད་པར་མོས་པ་དང་། མན་ངག་རྫོགས་པ་ཆེན་པོའི་ལུགས་ཀྱིས་ཐམས་ཅད་རང་བཞིན་བདེན་པ་དབྱེར་མེད་དུ་གྲུབ་བསལ་མེད་པར་གནས་པའི་ཕྱིར་རྟོག་ཚོགས་ཐམས་ཅད་ལྷའི་དཀྱིལ་འཁོར་དུ་ཡེ་ནས་ཡིན་པ་ལ་ད་ལམ་གྱིས་བསྒྲུབ་མི་དགོས་པར་རང་བཞིན་ལྷུན་གྱིས་གྲུབ་པའི་ལྷ་ཡི་དཀྱིལ་འཁོར་དུ་རྫོགས་པའི་ཚུལ་གྱིས་བསྒོམ་པ་དང་བསྒོམ་པ་ཚུལ་གསུམ་ཨོ་རྒྱན་དུས་གསུམ་མཁྱེན་པས་ཡང་དག་གསང་བའི་འགྲེལ་ཆེན་དུ་གསུངས་པ་ལས། འདིར་ལྟ་བའི་གནད་དང་གོ་དོན་ཕྱི་མ་ལྟར་གཙོ་བོར་བཟུང་ནས། བསྒོམ་ཚུལ་གྱི་རིམ་པ་ཐུན་མོང་སྤྱི་དང་མཐུན་པར་འཆད་པ་ལ། ཐོག་མར་རྟེན་གཞི་འབྱུང་བ་རིམ་བརྩེགས་སོགས་བསྒོམ་པ་ནི། ནམ་མཁར་གནས་པའི་རྒྱུའི་ཧཱུྃ་ཡིག་དེ་ལས་རོལ་པའི་ཆོ་འཕྲུལ་ཡེ་ཤེས་ཆེན་པོའི་འོད་ཟེར་ཀུན་ཏུ་འཕྲོས་པས་སྣོད་བཅུད་ཀྱི་དངོས་འཛིན་དབྱིངས་སུ་སྦྱངས་ནས་སྟོང་པར་བྱས། སྟོང་པའི་ངང་ལས་སངས་རྒྱས་ཀྱི་ཞིང་ཁམས་ཡོངས་སུ་སྦྱོང་བའི་བཀོད་པ་ཆེན་པོའི་རོལ་པ་ནི། གདོད་མ་ནས་ཡུམ་ལྔའི་མཁའ་ཀློང་རྣམ་པར་དག་པ་མཚོན་བྱེད་ཡི་གེ་ཨེ་ཡྃ་རྃ་སུྃ་ཀེཾ་རྃ་རྣམས་ཆད་པ་ཡོངས་སུ་གྱུར་པ་ལས། ཨེ་ལས་ནམ་མཁའ་མཐིང་ནག་ཆོས་ཀྱི་འབྱུང་གནས་འབྱམས་ཀླས་པའི་དབྱིངས་སུ། ཡྃ་ལས་རླུང་གི་དཀྱིལ་འཁོར་ལྗང་ནག་རྒྱ་གྲམ་གཞུ་ཡི་དབྱིབས་ཅན། ར་ལས་རཀྟའི་རྒྱ་མཚོ་དམར་ཟླུམ་རྦ་ཀློང་འཁྲུགས་པ། སུྃ་ལས་ཞིང་ཆེན་གྱི་ས་གཞི་སེར་ནག་གྲུ་བཞི་པ། ཀེཾ་ལས་ཀེང་རུས་ཀྱི་རི་རབ་དཀར་སྔོ་བང་རིམ་བཞི་པ་འཛིང་ཐབས་སུ་བརྩེགས་པ་སྟེ། དེ་ལྟར་འབྱུང་བ་རིམ་བརྩེགས་རི་རབ་དང་བཅས་པའི་སྟེང་དུ་རྃ་ལས་ཡེ་ཤེས་ཀྱི་མེ་དཔུང་དམར་ནག་ཏུ་འབར་ཞིང་འཁྲུགས་པའི་ཀློང་དུ་རྡོ་རྗེ་སྲུང་བའི་འཁོར་ལོ་ཡངས་ཤིང་རྒྱ་ཆེ་བའི་ནང་ཁོང་དུར་ཁྲོད་ཆེན་པོ་བརྒྱད་ཀྱིས་བསྐོར་བའི་ལྟེ་བར་སྣ་ཚོགས་པདྨ་ཉི་མ་རྡོ་རྗེ་རྒྱ་གྲམ་གྱི་གདན་དང་བཅས་པ་བསྒོམས་པ་སྟེ། དེ་ཡང་ཕྱི་ལྟར་ན་འབྱུང་བ་རིམ་བརྩེགས་ཀྱི་དལ། ནང་ལྟར་ན་རང་གི་ལུས་ཀྱི་འབྱུང་ཁམས། གསང་བ་ལྟར་ན་འབྱུང་བ་རང་ཤར་རང་གྲོལ་དུ་ལྷང་གིས་རྟོགས་པར་སྒོམ། ཕྱི་ནང་གི་འབྱུང་ལྔའི་དག་སྦྱོར་ཡང་། སྒྱུ་འཕྲུལ་བཤད་རྒྱུད་ལས། ཕྱི་རོལ་འབྱུང་སོགས་ཡུམ་རྣམས་ཀུན། །ཐབས་དང་ཤེས་རབ་གཉིས་མེད་པའི། །སྲ་བརྟན་རྡོ་རྗེ་སྤྱན་མ་སྟེ། །གཤེར་བ་ལྷ་མོ་མཱ་མ་ཀཱི། །སྨིན་བྱེད་སྲེག་མཛད་གོས་དཀར་མོ། །ཡང་ཞིང་གཡོ་བ་སྒྲོལ་མའི་མཁའ། །སྟོང་གསལ་ནམ་མཁའ་ཀུན་བཟང་མོ། །ཞེས་སོ། །དེ་ལྟར་འབྱུང་ལྔ་རྣམ་པར་དག་པ་རིགས་ཀྱི་ཡུམ་ལྔའོ་ཞེས་ང་རྒྱལ་བསྐྱེད། འདིས་སེམས་ཅན་རྣམས་གང་དུ་སྐྱེ་བའི་སྣོད་ཀྱི་འཇིག་རྟེན་ཆགས་པའི་གཞི་འབྱུང་ལྔ་རི་རབ་དང་བཅས་དྲུག་པོ་དེ་སྦྱོང་། འབྲས་དུས་སུ་སངས་རྒྱས་རྣམས་གང་དུ་འཚང་རྒྱ་བའི་ཡུམ་ལྔའི་མཁའ་མཚོན་པ་ཆོས་ཀྱི་དབྱིངས་སུ་རྫོགས་པའི་རྟེན་འབྲེལ་སྒྲིག རྫོགས་རིམ་གྱི་ཚེ་འབྱུང་ལྔ་རི་རབ་དང་བཅས་པ་རྩ་འཁོར་ལྔ་དང་དབུ་མ། པད་ཉི་དང་རྒྱ་གྲམ་ནི་རྩ་འཁོར་དང་རླུང་ཐིག་སྟེ། དེ་རྣམས་མཉེན་ཅིང་དུལ་བའི་གཞི་འདིང་བའོ། །དེའི་སྟེང་དུ་རྟེན་གཞལ་ཡས་ཁང་གདན་དང་བཅས་པ་བསྐྱེད་པ་ནི། སླར་ཡང་རྒྱུའི་ཧཱུྃ་ལས་ཅིར་ཡང་འགྱུར་བའི་ཡི་གེ་བྷྲཱུྃ་ཁ་དོག་ལྔ་ལྡན་འཕྲོས་པ་ཡོངས་སུ་གྱུར་པ་ལས། སྣ་ཚོགས་རྡོ་རྗེའི་ལྟེ་བར་ཐར་པ་ཆེན་པོའི་གཞལ་མེད་ཁང་གྲུ་བཞི་སྒོ་བཞི་སྒོ་ཁྱུད་གློ་འབུར་སོགས་ཚད་དང་མཚན་ཉིད་ཡོངས་སུ་རྫོགས་པ། རྒྱུ་ཡེ་ཤེས་རིན་པོ་ཆེའི་རང་བཞིན་ཐོད་པ་སྐམ་རློན་རྙིང་གསུམ་གྱི་རྩིག་པ་རིམ་པ་ལྔ་པ་ཁ་ནས་མེ་འབར་ཞིང་སྣ་ནས་དུད་པ་འཐུལ་བ། མིག་ནས་ཁྲག་འཛག་པ། ཐམས་ཅད་ཀྱང་རཀྟས་སྤྱིན་ཐབས་སུ་སྦྱར་ཞིང་གནམ་ལྕགས་ཀྱི་གཟེར་བུས་བཏབ་པ། རྩིག་པའི་རྩ་བར་འདོད་ཡོན་གྱི་སྣམ་བུ་ལ་མཆོད་པའི་ལྷ་མོ་རྣམས་ཀྱིས་མཆོད་པའི་སྤྲིན་སྤྲོ་བ། རྩིག་པའི་སྟེང་དུ་ཐོད་པ་སྣ་ཚོགས་ཀྱི་ཕ་གུ་འཕྱར་སྟབས་སུ་བཀོད་པའི་མཐར་རྒྱུ་མ་དང་སྙིང་གི་འགུལ་འཁོར་འཕྱང་བ། དེ་ཡི་སྟེང་དུ་བྲེ་ཕུལ་གྱི་སྣམ་བུར་སྦྲུལ་སྦྲམ་དང་ཐོད་ཕྲེང་གི་དྲྭ་བ་དང་དྲྭ་བ་ཕྱེད་པས་བརྒྱན་པ། དེ་དག་གི་བར་མཚམས་སུ་ཉི་ཟླའི་འོད་ཟེར་འཕྲོ་བས་བརྗིད་པ། བྱ་འདབ་ལས་འཕྱང་བའི་རྐང་ལག་གི་ཤར་བུ། སྟེང་ངོས་སུ་རྒལ་ཚིགས་ཀྱི་མདའ་ཡབ། བར་བར་དུ་ཞིང་ཆེན་གྱི་གདུགས་དང་རྒྱལ་མཚན། ལག་པའི་འཕན། ལྕང་ལོའི་རྔ་ཡབ་རྣམས་ཀྱི་སྤྲས་པ། ནང་ཚངས་པའི་གདུང་བཞི་ལྷ་ཆེན་བརྒྱད་ཀྱི་ཀ་བས་བཏེག་པ། རུས་སྦལ་གྱི་ཀ་གདན། གཟའ་བརྒྱད་ཀྱི་ཀ་ཞུ། ཀླུ་ཆེན་བརྒྱད་ཀྱི་ཕྱམ། རྒྱུ་སྐར་ཉེར་བརྒྱད་ཀྱི་དྲལ་མ། སྟེང་ཞིང་ལྤགས་ཀྱི་ཐོག་ཕུབ་ཉི་མ་དང་ཟླ་བའི་མཐོང་དཀར་དང་བཅས་པའི་དབུས་ཕྱུར་བུར་ལྷ་ཆེན་གྱི་ཐོད་པས་ཕུབ་པའི་རྩེ་མོར་ཅིཏྟའི་ཏོག་གིས་བརྗིད་པ། སྒོ་བཞིར་དྲག་པོའི་ཀ་བ་བཞི་བཞིའི་བཏེག་པའི་རྟ་བབས་སྣམ་བུ་བརྒྱད་མའམ་བཞི་པ། དེའི་སྟེང་དུ་ཆོས་ཀྱི་འཁོར་ལོ་གདུགས་ཀྱིས་ཕུབ་པའི་གཡས་གཡོན་དུ་རི་དྭགས་ཕོ་མོ་དང་བཅས་པ། གཞན་ཡང་རྔམ་བརྗིད་དུར་ཁྲོད་དྲག་པོའི་རྒྱན་གྱི་བཀོད་པ་ཡོངས་སུ་རྫོགས་པར་གསལ་གདབ་སྟེ། དེའི་དོན་རྟགས་ཀྱི་ཁྱད་པར་ཡང་། ཧེ་རུ་ཀ་གལ་པོ་ལས། གཞལ་མེད་ཁང་ཆེན་ཡེ་ཤེས་ཏེ། །འཁོར་འདས་མཉམ་པ་གྲུ་བཞི་པ། །སྒོ་བཞི་དྲན་པ་ཉེར་བཞག་བཞི། །རྣམ་ཐར་བརྒྱད་ལྡན་རྟ་བབས་སོ། །རིན་ཆེན་སྒོ་སྟེང་ཐུགས་རྗེའི་ངང་། །རྫུ་འཕྲུལ་རྐང་བཞི་སྒོ་ཁྱམས་དང་། །ཕྲེང་བ་བྱང་ཆུབ་ཡན་ལག་བདུན། །འཕགས་ལམ་བརྒྱད་ཀྱི་ཀ་བས་མཛེས། །ལམ་གྱི་ཡེ་ཤེས་རྔ་ཡབ་དང་། །ཉོན་མོངས་འཆིང་གཅོད་གྲི་གུག་ཕྲེང་། །དྲིལ་བུ་བ་དན་རླུང་བསྐྱོད་པ། །ཤེས་རབ་ཆོས་ཀྱི་སྒྲ་སྒྲོགས་དང་། །ཆེ་བའི་ཡོན་ཏན་འདུས་པའི་རྟགས། །བདུད་བཞི་འཇོམས་པའི་རྒྱལ་མཚན་དང་། །ཐོད་ཕྲེང་སྐུ་གསུམ་ཐོབ་པའི་རྟགས། །ཞེས་སོ། །དེ་ཡང་ཕྱི་ལྟར་ན། ཕྱི་རིན་པོ་ཆེ་ལ་ནང་དུར་ཁྲོད་འབར་བའི་གཞལ་ཡས་ཁང་། ནང་ལྟར་ན་བདག་གི་ཁོག་པ་དུར་ཁྲོད་དམ་གཞལ་ཡང་ཁང་དུ་ཡེ་ནས་གནས་པ། གསང་བ་ལྟར་ན་ཆོས་ཉིད་སྐྱེ་བ་མེད་པ་རང་བྱུང་གི་གཞལ་ཡས་ཁང་དུ་ལྷང་གིས་རྟོགས་པར་མོས་པའོ། །དེ་ནས་གདན་བསྐྱེད་པ་ནི། འོག་ཏུ་ཁྲོ་བཅུ་སོགས་བསྐྱེད་ཆོག་རྒྱས་པར་སྤྲོ་ན། གནམ་ལྕགས་ཀྱི་འཁོར་ལོ་རྩིབས་བཅུའི་ལྟེ་བར་གཙོ་བོ་དང་། རྩིབས་ལ་ཁྲོ་བཅུའི་གདན་སོགས་སྤྱི་ལྟར་བསྒོམ་པ་ཡིན་ལ། དེ་ལྟར་མི་སྤྲོ་ན་རྩ་བའི་དངོས་བསྟན། དཀྱིལ་འཁོར་གྱི་དབུས་སུ་པདྨ་ཟླ་ཉི་ལྷ་ཆེན་ཕོ་མོ་བསྣོལ་བའི་གདན་བཅས་གསལ་བ་སྟེ། གང་ལྟར་ཡང་། ཕྱི་ལྟར་ན་དྲེགས་པ་ཉི་ཟླ་པདྨའི་གདན་རང་བྱུང་དུ་གྲུབ་པར། ནང་ལྟར་ན་མ་རིག་པ་དང་བདུད་བགེགས་ཡེ་ཤེས་ཀྱི་ཉི་ཟླ་དང་བཅས་པར། གསང་བ་ལྟར་ན་ཆོས་ཉིད་སྐྱེ་མེད་ཀྱི་དོན་དེས་ཉོན་མོངས་རྣམ་རྟོག་ཟིལ་གྱིས་གནོན་པར་བསྒོམ་པ་སྟེ། ཡུལ་དང་ཁང་ཁྱིམ་སོགས་རྣམ་པར་དག་པ་སངས་རྒྱས་རང་སྣང་གི་ཞིང་དང་གཞལ་ཡས་ཁང་ངོ་སྙམ་དུ་ང་རྒྱལ་བཟུང་། འདིས་སེམས་ཅན་རྣམས་གང་དུ་རྒྱུ་ཞིང་སྤྱོད་པའི་ཁང་ཁྱིམ་དང་། གདན་པདྨ་ཉི་ཟླས་མའི་མངའ་ཁུ་ཁྲག་དང་བཅས་པ་དང་། གནས་ལུས་ལ་སྲེད་ལེན་གྱི་བར་ཆད་སྦྱོང་། འབྲས་དུས་སུ་ཡེ་ཤེས་རང་སྣང་གི་གཞལ་ཡས་ཁང་མངོན་དུ་གྲུབ་པའི་རྟེན་འབྲེལ་སྒྲིག རྫོགས་རིམ་གྱི་ཚེ་གཞལ་ཡས་ཁང་གིས་རྩ་ཐིག་རླུང་གསུམ་རོ་གཅིག་ཏུ་འདྲེས་པའི་སེམས་གསལ་སྟོང་གི་བདེ་བའི་ཆ་དང་། གདན་པདྨ་ནི་རྩ་འཁོར། ཟླ་བ་ནི་སྤྱི་བོའི་ཧྃ་ཡིག ཉི་མ་ནི་གཏུམ་མོའི་མེ་སྟེ། འབར་འཛག་གི་ཞུ་བདེས་མི་འགྱུར་བའི་བདེ་ཆེན་ཐོབ་པའི་གཞི་འདིང་བའོ། །དེ་ནས་བརྟེན་པ་ལྷའི་དཀྱིལ་འཁོར་བསྒོམ་པ་ནི། ནམ་མཁར་གནས་པའི་མཚོན་བྱེད་རྒྱུའི་ཡི་གེ་ཧཱུྃ་མཐིང་ག་ཉིད། དཀྱིལ་འཁོར་དབུས་ཀྱི་གདན་སྟེང་དུ་བབས་པ་ལས་འོད་ཟེར་འཕྲོས། འཕགས་པ་རྣམས་མཆོད། སེམས་ཅན་གྱི་དོན་བྱས། ཚུར་འདུས་ཡོངས་སུ་གྱུར་པ་ལས། མཚོན་བྱ་བདག་ཉིད་རྩ་བའི་ལྷ་རྡོ་རྗེའི་རང་བཞིན་དབྱིངས་སྟོང་པ་ཉིད་དང་། གཞོན་ནུ་ཡེ་ཤེས་སྙིང་རྗེ་ཆེན་པོ་ཟུང་དུ་འཇུག་ཅིང་སྒྲིབ་པ་མཐའ་དག་དང་བྲལ་བས་ཤིན་ཏུ་རྣམ་པར་དག་པ། ཆོས་ཀྱི་སྐུའི་ཡོན་ཏན་ཐམས་ཅད་རྣམ་པ་རྟགས་ཀྱི་ཕྱག་རྒྱ་གཟུགས་ཀྱི་སྐུའི་རྣམ་པར་ཤར་བ་ནི། རྣམ་ཐར་གསུམ་མཚོན་པའི་དབུ་གསུམ་ལས། ཐུགས་ཆོས་ཉིད་འགྱུར་བ་མེད་པའི་བརྡར་སྐུ་དང་རྩ་ཞལ་སྟོན་གནམ་དྭངས་པ་བཞིན་དུ་མཐིང་ལ་རྔམས་པ། སྐུ་ཉེས་པའི་སྐྱོན་གྱིས་མ་གོས་པའི་བརྡར་གཡས་ཞལ་དཀར་པོ་བཞད་པ། གསུང་འགྲོ་ལ་རྗེས་སུ་ཆགས་པའི་བརྡར་གཡོན་ཞལ་དམར་པོ་གཤེ་བ། སྲིད་གསུམ་ཟིལ་གྱིས་གནོན་པའི་རྟགས་སུ་དབུ་སྐྲ་རལ་པ་གྱེན་དུ་འབར་བ། ས་དགུའི་རྟོག་པ་འཇོམས་པའི་རྟགས་སུ་སྤྱན་དགུས་ལྡང་མིག་གཟིར་ཞིང་། བདུད་བཞི་རྩད་ནས་གཅོད་པའི་མཆེ་བ་བཞི་བཞི་གཙིགས་པ། ཡེ་ཤེས་དྲུག་གིས་འགྲོ་དོན་མཛད་པའི་ཕྱིར་ཕྱག་དྲུག་གིས། གཡས་དང་པོས་ཐེག་པ་རིམ་དགུ་རྫོགས་པའི་རྡོ་རྗེ་རྩེ་དགུ་པ་དང་། བར་པས་ཡེ་ཤེས་ལྔ་མཚོན་པའི་རྡོ་རྗེ་རྩེ་ལྔ་པ་ལས་མཚོན་ཆའི་ཆར་འབེབས་པ། གཡོན་དང་པོས་ཉོན་མོངས་པའི་བུད་ཤིང་སྲེག་པའི་ཡེ་ཤེས་ཀྱི་མེ་ཕུང་སྡིགས་པའི་མཛུབ་མོའི་རྩེ་ནས་སྤྲོ་བ། གཉིས་པས་དུག་གསུམ་རྩད་ནས་གཅོད་པའི་ཁ་ཊྭཱྃ་རྩེ་གསུམ་པ་ཐབས་ཤེས་གཉིས་སུ་མེད་པའི་ཅང་ཏེའུ་དང་དྲིལ་བུའི་སྒྲ་སྙན་པར་འཁྲོལ་བ། ཕྱག་ཐ་མ་གཉིས་ཀྱི་དབྱིངས་དང་ཡེ་ཤེས་དབྱེར་མེད་པས་ཁམས་གསུམ་པོའི་ཉོན་མོངས་པའི་དུག་ཆེན་སྦྱང་བའི་ཕྱིར་རི་རབ་ལྟ་བུའི་ཕུར་བུ་འདྲིལ་བ། ཆེ་བཙན་འགྲན་ཟླ་དང་བྲལ་བའི་རྟགས་སུ་དཔལ་དང་དུར་ཁྲོད་དྲག་པོའི་ཆས་ཀྱིས་བརྗིད་པ་སྟེ། དེ་ཡང་དཔལ་གྱི་ཆས་བརྒྱད་ནི། དཔལ་ཆེན་པོའི་སྐུ་ལ་ཡེ་ནས་རང་ཆས་སུ་གནས་པའི་ཕྱིར་དཔལ་གྱི་ཆས་ཏེ། རྟོག་པ་ལྷ་རྒྱུད་ལས། དབུ་སྐྲ་གྱེན་བརྫེས་འཁོར་བ་རུ་ཟློག་ཆས། །རྡོ་རྗེའི་ཁྱུང་གཤོག་ཐབས་དང་ཤེས་རབ་ཆས། །མཐིང་དམར་ཅོད་པཎ་རྟག་ཆད་ཟིལ་གནོན་ཆས། །སྤྱི་གཙུག་རྡོ་རྗེ་ལྷག་པར་རིག་པའི་ཆས། །དབང་གི་བསེ་ཁྲབ་གཟི་འབར་བགྲོད་པའི་ཆས། །གཉིས་མེད་སྦྱོར་བ་ཤེས་རབ་ཡུམ་གྱི་ཆས། །གནོད་གདུག་ཟློག་བྱེད་དཔའ་བོ་ལྗགས་ཀྱི་ཆས། །ཉོན་མོངས་སྲེག་བྱེད་རྡོ་རྗེ་མེ་ཡི་ཆས། །ཞེས་དོན་རྟགས་བཅས་གསལ་བར་གསུངས་པ་བཞིན་ལ། གཞན་ཡང་འདི་ལ་ངོས་འཛིན་འདྲ་མིན་གྱི་བཞེད་པ་ཅི་རིགས་སྣང་ངོ་། །དུར་ཁྲོད་ཀྱི་ཆས་བརྒྱད་ནི། རྒྱལ་བྱེད་དཔའ་རྟགས་ཀྱི་རྒྱན་ཏེ། སྔོན་བྱུང་རུ་ཏྲ་བསྒྲལ་པའི་ལོངས་སྤྱོད་ཀྱི་ཆས་རྣམས་དཔལ་ཆེན་པོའི་སྐུའི་རྒྱན་དུ་བཞེས་པས། དུར་ཁྲོད་ན་གནས་པའི་མ་སྲིང་མཁའ་འགྲོ་འབུམ་གྱིས་ཚོགས་རྣམས་དང་དགྱེས་དགུར་རོལ་བའི་ཡ་མཚན་ཆེན་པོ་དང་ལྡན་པ་རྡོ་རྗེའི་སྐུ་ཡི་དབྱིངས་སུ་རྫོགས་པ་སྟེ། དེ་ཡང་སྟོབས་བཅུས་གཏི་མུག་བཅོམ་པའི་བརྡར་གླང་ཆེན་གྱི་ཀོ་རློན་དང་། བྱང་ཆུབ་སེམས་ཀྱིས་འདོད་ཆགས་བཅོམ་པའི་བརྡར་ཞིང་ལྤགས་ཀྱིས་སྟོད་གཡོགས་ཤིང་། དཔའ་བརྟུལ་དྲག་པོའི་ལས་ཀྱིས་ཞེ་སྡང་བཅོམ་པའི་བརྡར་སྟག་ལྤགས་ཀྱི་ཤམ་ཐབས་གྲོལ་བ་སྟེ་བགོ་བའི་གོས་གསུམ་མོ། །ཡེ་ཤེས་ལྔས་དུག་ལྔ་བཅོམ་པའི་རྟགས་སུ། ཀླུ་རྒྱལ་རིགས་དཀར་པོས་སྐྲ་འཆིང་། རྗེ་རིགས་སེར་པོས་སྙན་ཆ། བྲམ་ཟེའི་རིགས་དམར་པོས་སེ་མོ་དོ་དང་མགུར་ཆུ་{ཆིངས}། དམངས་རིགས་ལྗང་གུས་སྐ་རགས་དང་དོ་ཤལ། གདོལ་པ་ནག་པོས་གདུ་བུ་སྟེ་ཐམས་ཅད་ཀྱང་གདུག་པ་སྦྲུལ་གྱི་རྣམ་པ་ཅན་གྱི་སྦྲུལ་རྒྱན་དང་། སྐུ་གསུམ་མཚོན་བྱེད་ཐོད་རྒྱན་ཏེ། སྐམ་པོ་ལྔ་ཡི་དབུ་རྒྱན། ཁྲག་འཛག་པའི་མགོ་རློན་ལྔ་བཅུའི་དོ་ཤལ། ཚལ་བུའི་དཔུང་རྒྱན་ཏེ་གདགས་པའི་རྒྱན་གཉིས་སོ། །དུག་གསུམ་མ་སྤངས་གནས་སུ་དག་པའི་བརྡར། དཔྲལ་བར་ཐལ་ཆེན་གྱི་ཚོམ་བུ། སྨིན་མཚམས་སུ་རཀྟའི་ཐིག་ལེ། མགྲིན་པར་ཞག་གི་ཟོ་རིས་ཏེ་བྱུག་པའི་རྩི་གསུམ་གྱིས་བརྒྱན་པའོ། །རྫུ་འཕྲུལ་གྱི་རྐང་པ་བཞི་དང་ལྡན་པའི་ཕྱིར་ཞབས་བཞི་གྱད་ཆེན་པོའི་དོར་སྟབས་ཀྱི་མ་ཧཱ་རུ་ཏྲའི་སྤྱི་བོ་ནས་བརྫིས་པ། སྟོང་པ་ཉིད་ཀྱི་རང་བཞིན་ཡུམ་འཁོར་ལོ་རྒྱས་འདེབས་མ་མཐིང་སྐྱ་ཞལ་གཅིག་ཕྱག་གཉིས་མ། གཡས་ཉེས་པའི་སྐྱོན་གྱིས་མ་གོས་པའི་བརྡར་ཨུཏྤལ་དང་། གཡོན་རྒྱུད་དྲུག་ཉོན་མོངས་དབྱིངས་སུ་བསྒྲལ་ཞིང་སྟོབས་པའི་བརྡར་དུང་ཆེན་དམར་གྱིས་གང་བ་འཛིན་པ་དང་ཡབ་ཡུམ་ཐབས་ཤེས་གཉིས་སུ་མེད་པར་སྦྱོར་ཞིང་འཁྱུད་པ། གཟིག་ཤམ་དང་རུས་རྒྱན་སོགས་སྣ་ཚོགས་པའི་ཁྲོ་མོའི་རྒྱན་གྱིས་སྒེག་པ། གཉིས་ཀའང་གདུལ་བྱ་མ་རུངས་པ་རྣམས་རྗེས་སུ་འཛིན་པའི་ཕྱིར་ཆགས་ཁྲོ་རྔམས་པའི་ཉམས་འགྱུར་ཐམས་ཅད་རྫོགས་པ་སྟེ། དེ་ལྟར་མཐར་ཕྱིན་འབྲས་བུའི་ཆོས་རྣམས་རྟགས་ཀྱི་ཕྱག་རྒྱར་གསལ་བའི་ཡེ་ཤེས་ཀྱི་སྐུ། ཟུང་འཇུག་སྒྱུ་འཕྲུལ་དྲྭ་བའི་གར་མཁན། སྤྲོས་པའི་སྤྱོད་ཡུལ་ལས་འདས་པས་རང་བཞིན་ཅིར་ཡང་མ་དམིགས་བཞིན་དུ། ཐབས་ལ་མཁས་པའི་སྤྱོད་པ་རྨད་དུ་བྱུང་བས་འགྲོ་བ་མ་ལུས་པ་གདུལ་བར་བྱ་བའི་ཕྱིར། རྒྱུ་དམིགས་པ་མེད་པའི་བྱམས་པ་དང་སྙིང་རྗེ་ཆེན་པོས། གང་ལ་གང་འདུལ་གྱི་རྣམ་འཕྲུལ་ཚད་མེད་པས་སངས་རྒྱས་ཐམས་ཅད་ཀྱི་ཕྲིན་ལས་དུས་གཅིག་ལ་རྫོགས་པར་བྱ་བའི་ཕྱིར། ཟག་བཅས་ཀྱི་ཕུང་པོ་ལྔ་གནས་སུ་དག་པ་སྲས་མཆོག་རིགས་ལྔ་སྟེ། གཟུགས་ཕུང་དང་གཏི་མུག་རྣམ་པར་དག་པ་ཆོས་དབྱིངས་ཡེ་ཤེས་ཀྱི་ངོ་བོ་བུངྔྷ་ཀཱི་ལ་ཡ། དེ་བཞིན་དུ་རྣམ་ཤེས་དང་ཞེ་སྡང་དག་པ་མེ་ལོང་ཡེ་ཤེས་བཛྲ་ཀཱི་ལ་ཡ། ཚོར་ཕུང་དང་ང་རྒྱལ་དག་པ་མཉམ་ཉིད་ཡེ་ཤེས་རཏྣ་ཀཱི་ལ་ཡ། འདུ་ཤེས་དང་འདོད་ཆགས་དག་པ་སོར་རྟོགས་ཡེ་ཤེས་པདྨ་ཀཱི་ལ་ཡ། འདུ་བྱེད་དང་ཕྲག་དོག་དག་པ་བྱ་གྲུབ་ཡེ་ཤེས་ཀརྨ་ཀཱི་ལ་ཡ་རྣམས། ནམ་མཁའ་རྣམ་པར་དག་པ་བུངྔྷ་ཀྲོ་ཏི་ཤྭ་རི་མ་སོགས་འབྱུང་བ་ལྔ་པོ་རྣམ་པར་དག་པ་ཡུམ་ལྔ་དང་རང་བཞིན་གཉིས་སུ་མེད་པར་རོལ་ཞིང་། དེ་བཞིན་དུ་མི་དགེ་བ་བཅུ་གནས་སུ་དག་ཅིང་དགེ་བཅུ་ཕར་ཕྱིན་བཅུ་སོགས་ཀྱི་ངོ་བོ་ཁྲོ་ཆེན་ཡབ་ཡུམ་བཅུ་དང་། ཉེ་ཉོན་ཉི་ཤུའི་རྟོག་པ་གནས་སུ་དག་པ་ཕྲ་ཕྱག་ཉི་ཤུ། ཕྱིན་ཅི་ལོག་བཞིའི་རྟོག་པ་གནས་སུ་དག་པ་སྒོ་སྐྱོང་གདོང་ཅན་བཞི། ཕྱི་ནང་གི་རྟེན་འབྲེལ་བཅུ་གཉིས་གནས་སུ་དག་པ་ཕུར་སྲུང་བཅུ་གཉིས་སོགས་དཀྱིལ་འཁོར་གསུམ་གྱི་ལྷ་ཚོགས་སྤྲུལ་པ་ཡང་སྤྲུལ་ཕྱག་བརྙན་དང་བཅས་པ་ཉི་མ་དང་འོད་ཟེར་གྱི་ཚུལ་དུ་རང་བྱུང་ཡེ་ཤེས་གཅིག་གི་རོལ་རྩལ་དུ་ཅིར་ཡང་སྣང་ཞིང་ཅིར་ཡང་འཕྲུལ་བ་སྟེ། དོན་ལ་དབྱིངས་དང་ཡེ་ཤེས་གཉིས་སུ་མེད་པ་བདག་རྩ་བའི་དཀྱིལ་འཁོར་ཡབ་ཡུམ་བསྐྱེད་ཙམ་གྱིས་དེ་ལས་ཤར་བའི་རྟོག་ཚོགས་ཀྱི་ཆོས་ཐམས་ཅད་ཀྱང་སྲས་བདེ་བ་ཆེན་པོ་བྱང་ཆུབ་སེམས་ཀྱི་དཀྱིལ་འཁོར་དུ་ཡེ་ནས་གནས་པས་ན། ཐ མས་ཅད་བྱང་ཆུབ་སེམས་ཀྱི་རང་རྩལ་དུ་ཤེས་པའི་དག་དྲན་ལ་བསླབས་པས་དོན་གྱི་གནད་ཚང་བ་ཡིན་ཏེ། གསང་སྙིང་ལས། མཁའ་དཀྱིལ་དྭངས་པའི་དབྱིངས་ཉི་ཟླ། །ཡེ་ཤེས་རྒྱལ་པོ་སྟོངས་དཔྱལ་བསྒོམས། །རྒྱལ་བའི་དཀྱིལ་འཁོར་ཐམས་ཅད་ཀུན། །མ་ལུས་པར་ནི་བསྒོམ་པར་འགྱུར། །ཞེས་དང་། སྤྱི་མདོ་ལས། ཐམས་ཅད་བདག་ཉིད་དེར་གཅིག་པས། །ཡེ་ནས་སངས་རྒྱས་བདེ་ཆེན་ཉིད། །སྐྱེ་འགག་མེད་པའི་སྙིང་པོ་ཡིན། །བྱ་བྱེད་མེད་པའི་དཀྱིལ་འཁོར་གསུམ། །ཡེ་ནས་གྲུབ་ཟིན་ལྷུན་གྱིས་གྲུབ། །ཅེས་དང་། ཧེ་རུ་ཀ་འདུས་པའི་རྒྱུད་ལས། མ་སྐྱེས་གྲངས་ལས་འདས་པའི་རང་བཞིན་ལ། །རྣམ་རྟོག་གྲངས་ལས་འདས་པའི་ཕྱག་རྒྱ་ཤར། །མཁའ་ལ་གཟའ་སྐར་ཆུ་ཡི་ཆུ་བུར་ལྟར། །ཇི་ལྟར་སྣང་ཡང་སྐྱེ་བ་མེད་པར་གཅིག །ཅེས་དང་། སྐུ་གསུང་ཐུགས་ཀྱི་མཚན་མ་ཇི་སྙེད་པ། །སེམས་ཅན་མོས་པའི་ཁྱད་པར་སྣང་བ་ཡིས། །ནུས་མཐུ་བྱིན་རླབས་སོ་སོར་སྣང་བ་ཡང་། །མ་སྐྱེས་སེམས་ཀྱི་ངང་ལས་གཞན་མ་མཐོང་། །ཞེས་སོ། །གལ་ཏེ་སྤྲོས་པ་ལ་དགའ་ན། བདག་རྩ་བའི་དཀྱིལ་འཁོར་གྱི་སྐུའི་གནས་ལྔ་ལ། ཕུར་པ་སྲས་ཀྱི་དཀྱིལ་འཁོར་ཀཱི་ལ་ཡ་རིགས་ལྔ་དང་། ཕྱོགས་བཅུ་ཁྲོ་བོའི་དཀྱིལ་འཁོར་འཁོར་ལོའི་རྩིབས་བཅུ། སྒོ་བཞིར་སྒོ་སྐྱོང་། མུ་རན་ལ་ཕུར་སྲུང་སོགས་སྤྱི་ལྟར་བསྒོམ་པར་བྱ་སྟེ། དེ་ལྟ་ན་དེ་རྣམས་ཀྱི་སྐུ་མདོག་ཕྱག་མཚན་རྒྱན་ཆ་ལུགས་དོན་རྟགས་དགོས་ཆེད་སོགས་ཞིབ་པར་ཁོ་བོས་བྱས་པའི་ཕུར་པ་ཡང་གསང་སྤུ་གྲིའི་རྣམ་བཤད་དུ་བལྟ་བར་བྱའོ། །གང་ལྟར་ཡང་འཁོར་འདས་ཀྱི་ཆོས་ཐམས་ཅད་སེམས་དང་ཡེ་ཤེས་ཀྱི་རང་སྣང་ཙམ་དུ་ཟད་པས། ཆོས་ཀུན་གྱི་དྭངས་མའི་སྲོག་གམ་སྙིང་པོའམ་བཅུད་ལྟ་བུར་གྱུར་པ་རང་བྱུང་གི་ཡེ་ཤེས་ཟག་མེད་བདེ་བ་ཆེན་པོ་དོན་གྱི་ཨེ་ཝཾ་ཟུང་འཇུག་སྤྲོས་བྲལ་ཐིག་ལེ་ཉག་གཅིག་ཏུ་རྫོགས་པའི་རང་གི་སེམས་ཉིད་ཀ་དག་རིག་སྟོང་རྗེན་པ་འདི་རིགས་དང་དཀྱིལ་འཁོར་ཀུན་གྱི་བདག་ཉིད་བླ་མ་རྡོ་རྗེ་འཆང་ཆེན་པོ་དངོས་ཉིད་ཡིན་ཏེ། བདེ་འདུས་རྩ་སྒྲུབ་ལས། སེམས་ཉིད་སྐྱེ་བ་མེད་པ་འདི༔ རིགས་ཀྱི་བདག་པོ་བླ་མ་ཡིན༔ ཞེས་དང་། ཀུན་བྱེད་ལས། སེམས་ལས་མ་གཏོགས་པ་ཡི་སངས་རྒྱས་ནི། །ཀུན་བྱེད་རྒྱལ་པོས་སྔོན་ཡང་ལུང་མ་བསྟན། །ཕྱིས་ནས་མི་སྟོན་ད་ལྟ་སྟོན་མི་མཛད། །དེ་བས་སངས་རྒྱས་སེམས་སུ་ཤེས་པར་བྱ། །ཞེས་དང་། གསང་འདུས་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །ཅེས་སོ། །དེ་ལྟ་བུའི་བདེ་བ་དང་སྟོང་པ་ཟུང་དུ་འཇུག་པའི་གནས་ལུགས་ཡང་དག་པའི་ཡེ་ཤེས་ཉིད་རྣམ་པ་རྟགས་ཀྱི་ཕྱག་རྒྱའི་རོལ་པར་ཤར་བ་ནི་དཔལ་ཆེན་པོ་ཡང་དག་ཧེ་རུ་ཀ་ཉིད་ཡིན་ཏེ། གལ་པོ་ལས། བདེ་དང་སྟོང་པ་ཟུང་འཇུག་སྐུ། །ཧེ་རུ་ཀ་ཡི་རང་བཞིན་ཡིན། །ཞེས་དང་། ཧེ་རུ་ཀ་འདུས་པའི་རྒྱུད་ལས། ཧེ་ནི་བརྡལ་ཁྱབ་སྟོང་པའི་ངང་། །རུ་ནི་གཉིས་མེད་བདེ་བ་ཆེ། །ཀ་ནི་ཅིར་ཡང་རོལ་པ་ཉིད། །ཅེས་སོ། །དེ་ལྟར་ངེས་པར་བྱས་ནས། བདག་ཉིད་རྩ་བའི་ལྷ་རྡོ་རྗེ་གཞོན་ནུ་ཡབ་ཡུམ་དུ་གསལ་བའི་སྤྱི་བོར་པདྨ་ཟླ་ཉི་དྲེགས་པ་ཁྱོ་ཤུག་བསྣོལ་བའི་གདན་གྱི་སྟེང་དུ། ཤྲཱི་ཧེ་རུ་ཀ་སྐུ་མདོག་མཐིང་ནག་འབར་བ་ཆེན་པོའི་འོད་ཟེར་ཅན། ཞལ་གསུམ་ཕྱག་དྲུག་ཞབས་བཞི་པ། གཡས་ཞལ་དཀར་པོ་འཛུམ་པ། གཡོན་ཞལ་དམར་པོ་གཤེ་བ། དབུས་ཞལ་མཐིང་ནག་ཁྲོས་པའི་ཉམས་ཅན། ཉི་ཟླ་འབར་བའི་སྤྱན་གསུམ་གསུམ་དང་ལྡན་པ། ཞལ་གདངས་ཤིང་མཆེ་བ་གཙིགས་པ། ལྗགས་འདྲིལ་བ། ཕཊ་ཀྱིས་རྐན་སྒྲ་རྡེབ་ཅིང་ཤངས་ནས་ཧཱུྃ་གི་སྒྲ་འབྱིན་པ། སྨིན་མཚམས་ནས་ཁྲོ་གཉེར་གཡོ་བ། སྨ་ར་དང་སྨིན་མའི་གློག་འོད་འཁྱུག་ཅིང་། རལ་བ་ཁམས་ནག་གྱེན་དུ་འབར་བ། ཉི་མ་བྱེ་བའི་གཟི་མདངས་ཅན། ཡེ་ཤེས་ཆེན་པོའི་ཕྱག་དྲུག་གི་གཡས་དང་པོས་རྡོ་རྗེ་རྩེ་དགུ། བར་བས་ཁ་ཊྭཱྃ། ཐ་མས་གསང་བའི་རྔེའུ་ཆུང་འཛིན་པ། གཡོན་དང་པོས་དྲིལ་བུ། བར་བས་བྷནྡྷ་ཁྲག་བཀང་། ཐ་མས་རྒྱུ་ཞགས་འཕེན་པ། ཞབས་བཞི་གཡོན་བརྐྱང་བའི་སྟབས་ཀྱིས། ཡུམ་དབྱིངས་ཕྱུག་ཀྲོ་ངྷི་ཤྭ་རི་མ་སྔོ་སྐྱ་གཡས་རྡོ་རྗེ་དང་གཡོན་དུང་ཁྲག་སྟོབས་པ་དང་མཉམ་པར་སྦྱོར་བ་སྟེ་གཉིས་ཀའང་། ཆགས་ཉམས་ཀྱིས་སྒེག་པ། ཁྲོ་ཉམས་ཀྱིས་དཔའ་བ། རྨོངས་ཉམས་ཀྱིས་མི་སྡུག་པ་སྟེ་སྐུ་ཡི་གར་གསུམ། བཞད་པའི་གད་མོ་འབྱིན་པས་དགོད་པ། བསྡིག་པའི་ང་རོ་སྒྲོགས་པས་གཤེ་བ། སྒྲ་གདངས་ཆེ་ཞིང་བཟོད་པར་དཀའ་བས་དྲག་ཤུལ་ཏེ་གསུང་གི་ཉམས་གསུམ། རྨོངས་པའི་འགྲོ་ཁམས་རྗེས་སུ་འཛིན་པའི་སྙིང་རྗེ། མ་རུངས་པའི་སེམས་ཅན་ཁྲོ་བས་འདུལ་བའི་རྔམས་པ། ཐམས་ཅད་ཆོས་ཉིད་དུ་རོ་མཉམ་པའི་ཞི་བ་སྟེ་ཐུགས་ཀྱི་ཉམས་གསུམ་བཅས་གར་དགུའི་ཉམས་དང་ལྡན་ཞིང་། དཔལ་དང་དུར་ཁྲོད་དྲག་པོའི་ཆས་ཀྱིས་བརྒྱན་པ་སྟེ། དེ་ཉིད་ཀྱི་དོན་རྟགས་ཀྱི་ཁྱད་པར་ཐུན་མོང་བ་ལྟར་ན་གཏེར་གསར་ཡང་དག་ཐུགས་ཀྱི་སྙིང་པོ་ལས། སྐུ་གསུམ་མཚོན་པའི་ཞལ་གསུམ་བསྟན༔ ཕྱག་དྲུག་རྣམ་པར་འགྱུར་བ་ཅན༔ རྡོ་རྗེ་སྙིང་པོའི་དོན་རྟོགས་ཏེ༔ ཁ་ཊྭཱྃ་དུག་གསུམ་དབྱིངས་སུ་བསྒྲལ༔ ཐོད་རྔ་རྣལ་འབྱོར་ཡེ་ཤེས་སྐྱེད༔ དྲིལ་བུའི་སེམས་ཅན་སད་པར་བྱེད༔ ཐོད་ཁྲག་འཁོར་བ་གནས་ནས་སྤོར༔ རྒྱུ་ཞགས་ཐུགས་རྗེའི་དཔྱང་ཐག་ཅན༔ ཚད་མེད་བཞི་ཡི་ཞབས་བཞི་བགྲད༔ བདེ་སྟོང་གཉིས་མེད་ཡུམ་དང་སྦྱོར༔ ཞེས་སོ། །ཐུན་མོང་མ་ཡིན་པ་ལྷ་རྟོག་སྦྱར་བའི་དབང་དུ་བྱས་ན། གཡས་ཞལ་དཀར་བ་སྐུའི་རང་བཞིན་དང་མིག་ཤེས་དག་པ་ཀ་རི་མ། གཡོན་ཞལ་དམར་བ་གསུང་གི་རང་བཞིན་དང་ལྕེ་ཤེས་དག་པ་པྲ་མོ་ཧཱ། དབུས་མཐིང་ག་ཐུགས་ཀྱི་རང་བཞིན་དང་དཔལ་ཆེན་པོ་ཉིད་ཡིན་ལ། ཕྱག་དྲུག་གི་གཡས་དང་པོ་རྣ་ཤེས་དག་པ་ཙ་རི་མཱ། གཉིས་པ་སྣ་ཤེས་དག་པ་བཻ་ཏཱ་ལི། ཐ་མ་ཉོན་ཡིད་དག་པ་པུཀྐ་སཱི། གཡོན་གྱི་དང་པོ་ཀུན་གཞི་དག་པ་གྷསྨཱ་རི། བར་པ་ཡིད་ཤེས་དག་པ་སྨ་ཤ་ནི། ཐ་མ་ལུས་ཤེས་དག་པ་ཙནྡ་ལཱི། ཞབས་བཞི་སྒོ་མ་བཞི། ཡབ་ཡུམ་དབྱིངས་ཡེ་ཟུང་འཇུག གདན་སེང་ཧ་མ་བརྒྱད། རྒྱན་རྣམས་མཆོད་པའི་ཡོ་བྱད་དང་སྦྱར་བ་སྟེ། ཚུལ་འདི་ནི་ཡང་དག་སྙིང་པོའི་དགོངས་པ་ལྟར་ཡིན་གྱི། གཞན་བཀའ་བརྒྱད་སོགས་ལས། ཚོགས་བརྒྱད་ཀྱི་དག་པ་སྦྱོར་ཚུལ་འདི་ལ་ཁྱད་པར་ཅུང་ཟད་སྣང་ཡང་གང་ལྟར་ཡང་གནད་ཀྱིས་མི་འགལ་ལོ། །དེ་ལྟར་ཡབ་ཡུམ་མཁའ་གསང་མཉམ་པར་སྦྱོར་བའི་བདེ་བ་ཆེན་པོའི་གཟི་བྱིན་བཟོད་མེད་དུ་འབར་བའི་རང་རྩལ། འཇའ་ཟེར་ཐིག་ལེ་འོད་ཕུང་འབར་ཞིང་འཁྲུགས་པའི་ཀློང་དུ། རྩ་བརྒྱུད་ཀྱི་བླ་མ་ཡི་དམ་དཔའ་བོ་མཁའ་འགྲོ་ཆོས་སྲུང་ནོར་ལྷ་གཏེར་བདག་གི་ཚོགས་དང་བཅས་པ་ཏིལ་གྱི་གོང་བུ་ཁ་ཕྱེ་བ་བཞིན་དུ་ཡོངས་སུ་སད་པ་ཀུན་ཀྱང་། ཤིན་ཏུ་བཟོད་པར་དཀའ་བའི་བདེ་སྟོང་ཟག་པ་མེད་པའི་ཡེ་ཤེས་ཀྱི་ཉམས་འབར་བས། ཨ་ཧྃ་དང་ཧཱུྃ་ཕཊ་སོགས་ཀྱི་སྔགས་སྒྲ་འབྲུག་སྟོང་ལྟ་བུར་སྒྲོག་པ། མདོར་ན་གཟུགས་སུ་སྣང་བ་ཐམས་ཅད་སྣང་སྟོང་སྒྱུ་མ་ལྷ་སྐུའི་ཕྱག་རྒྱ། སྒྲ་རུ་གྲགས་པ་ཐམས་ཅད་གྲགས་སྟོང་སྐྱེ་མེད་སྙིང་པོའི་ཛབ྄་དབྱངས། སེམས་ཀྱི་དྲན་རྟོག་ཐམས་ཅད་རིག་སྟོང་ཀ་དག་ཆོས་སྐུའི་རོལ་པ། གང་ཤར་ཚོགས་དྲུག་གི་སྣང་བ་ཐམས་ཅད་གསལ་སྟོང་འཛིན་མེད་རྒྱ་ཡན། ཉམས་མྱོང་གི་ཚོར་བ་ཐམས་ཅད་བདེ་སྟོང་ཟག་མེད་དེ་ཡོ་ལང་། སྣང་བའི་དུས་ན་ཅིར་ཡང་སྣང་། རིག་པའི་དུས་ན་ཅིར་ཡང་རིག བདེ་བའི་དུས་ན་ཅིར་ཡང་བདེ། སྟོང་པའི་དུས་ནི་ཅིར་ཡང་སྟོང་། ཀུན་ཀྱང་གདོད་མའི་གཤིས་ལུགས་ཟབ་གསལ་གཉིས་མེད་བདེ་བ་ཆེན་པོའི་རང་རྩལ། གདུག་པ་ཅན་རྣམས་རྗེས་སུ་འཛིན་པའི་ཕྱིར་དུ་སྣང་སྲིད་གཞིར་བཞེངས་རང་བྱུང་གི་དཀྱིལ་འཁོར་རྡོ་རྗེ་ཁྲོ་བོའི་ཕྱག་རྒྱར་རྫོགས་པ་སྟེ། རྒྱུད་ལས། སྟོང་དང་སྟོང་མིན་ཧེ་རུ་ཀ །བདེ་ཆེན་ཆོ་འཕྲུལ་སྣ་ཚོགས་གཟུགས། །ཞི་ལ་ཞི་དང་ཁྲོ་ལ་ཁྲོ། །ཆགས་ལ་ཆགས་དང་རྨོངས་ལ་རྨོངས། །ཞེས་དང་། སྐུ་ནི་སྣང་བ་ཐམས་ཅད་དེ། །གསུང་ནི་བརྗོད་པ་ཀུན་ཉིད་དོ། །དྲན་རྟོག་ཐུགས་ལ་དབྱེར་མེད་པའི། །མ་ལུས་སྐུ་གསུང་ཐུགས་སུ་རྫོགས། །ཆོས་རྣམས་མ་ལུས་སེམས་ཀྱི་རང་བཞིན་ཏེ། །དེ་ཉིད་རྟོག་དང་དཔྱོད་པ་ལས་འདས་ཤིང་། །ཀུན་གྱི་ཡུལ་ལས་འདས་ཤིང་བརྗོད་དཀའ་བས། །གང་དུ་མ་མཐོང་མཚོན་པའི་ཡུལ་ལས་འདས། །ཞེས་དང་། རྡོ་རྗེ་ལས། ཡང་དག་ཤེས་རབ་ཆེན་པོ་ནི། །མཚན་མ་འཇོམས་ཕྱིར་ཁྲོ་བོའི་མཆོག །ཅེས་སོ། །མདོར་ན་ཧེ་རུ་ཀ་གལ་པོ་ལས། རྒྱུ་ནི་ཁམས་གསུམ་སེམས་ཅན་ལ། །ཉོན་མོངས་པ་ཡི་སྣང་བ་དང་། །ལམ་དུས་རྣལ་འབྱོར་པ་རྣམས་ལ། །ཉམས་ཀྱི་སྣང་བ་འཆར་བ་དང་། །འབྲས་བུ་བདེ་གཤེགས་སྐུ་གསུང་ཐུགས། །མི་ཟད་རྒྱན་གྱི་འཁོར་ལོར་སྣང་། །སྣང་བ་གསུམ་གྱི་བདག་ཉིད་དུ། །ཆོས་རྣམས་ཐམས་ཅད་སྣང་བ་ཡིན། །ཞེས་གསུངས་པ་ལྟར། རྒྱུ་སེམས་ཅན་གྱི་དུས་ན་ལས་ཉོན་གྱི་རྟོག་ཚོགས། ལམ་རྣལ་འབྱོར་པའི་དུས་ན་ཉམས་དང་འཆར་སྒོའི་བྱེ་བྲག འབྲས་བུ་སངས་རྒྱས་ཀྱི་དུས་སུ་སྐུ་གསུང་ཐུགས་ཀྱི་དཀྱིལ་འཁོར་ཏེ། སྣང་གསུམ་གྱིས་བསྡུས་པའི་ཆོས་ཐམས་ཅད་རང་སེམས་ཀྱི་སྣང་ཆ་ཙམ་ལས་གཞན་དུ་མ་གྲུབ་པས། རང་བཞིན་སྟོང་པ་ཉིད་ཀྱི་ངང་དུ་འཁོར་འདས་ཀྱི་ཆོས་ཀུན་དབྱེར་མེད་རོ་མཉམ་པས་ན་རྟེན་དང་བརྟེན་པའི་དཀྱིལ་འཁོར་ཐམས་ཅད་རང་སེམས་ཀྱི་སྣང་ཆར་ཤར་བ་མ་གཏོགས་གཞན་གུད་ན་ལྷ་ཞེས་རང་མཚན་པར་གྲུབ་པ་མེད་པར་ཐག་བཅད་ནས་གསལ་སྟོང་འཛིན་མེད་དུ་བསྒོམ་པར་བྱ་བ་ནི་གནད་གལ་པོ་ཆེ་སྟེ། བདེ་འདུས་རྩ་སྒྲུབ་ལས། མ་རྟོགས་འཁྲུལ་པ་འཁོར་བ་ཡིན༔ དེ་ཤེས་རྟོགས་པ་མྱ་ངན་འདས༔ ལྷ་སྐུ་སེམས་ཀྱི་རང་རྩལ་ཏེ༔ དངོས་པོར་བཟུང་ན་འཁྲུལ་པའི་ཕྱིར༔ ལྷ་ཡང་སེམས་ཉིད་ཆོས་སྐུར་གསལ༔ ཞེས་དང་། ཀུན་བྱེད་ལས། ཇི་ལྟར་སྣང་བ་དེ་བཞིན་ཉིད་དུ་གཅིག །འདི་ལ་སུས་ཀྱང་བཅོས་པར་མ་བྱེད་ཅིག །མ་བཅོས་མཉམ་པའི་རྒྱལ་པོ་དེ་ལ་ནི། །མི་རྟོག་ཆོས་སྐུའི་དགོངས་པ་ཡེ་ནས་གནས། །ཞེས་སོ། །དེས་ན་ཕྱི་ལྟར་ན་ལྷ་སྐུ་རང་བྱུང་དུ་ལྷང་ངེར་ཤར་བ། ནང་ལྟར་ན་ཕུང་པོ་ཁམས་དང་སྐྱེ་མཆེད་ཐམས་ཅད་ལྷར་ཤར་བ། གསང་བ་ལྟར་ན་ཆོས་ཉིད་སྐྱེ་མེད་ཀྱི་ངང་ལས་རིག་པ་རང་བྱུང་དུ་ལྷང་གིས་ཤར་བར་བསྒོམ། ཕུང་ཁམས་སྐྱེ་མཆེད་དག་པ་ལྷའི་རང་བཞིན་ནོ་སྙམ་དུ་ང་རྒྱལ་བཟུང་། འདིས་བྱིས་པ་དེ་མ་ཡི་མངལ་སོགས་སུ་ལུས་རིམ་གྱིས་གྲུབ་པས་དབང་པོ་རྣམས་རྫོགས་ནས་བཙས་པ་སྦྱོང་། འབྲས་བུ་སངས་རྒྱས་རྣམས་གང་འདུལ་གྱི་སྤྲུལ་སྐུར་བཞེངས་པ་ན་ལྷུམས་སུ་བཞུགས་པ་དང་བལྟམས་པའི་མཛད་པ་སྟོན་པའི་རྟེན་འབྲེལ་སྒྲིག རྫོགས་རིམ་གྱི་ཚེ་རླུང་སེམས་ངྷཱུ་ཏཱིར་ཐིམ་ནས་ཞུ་བདེས་དྲངས་པའི་མི་འགྱུར་བའི་བདེ་སྟོང་ལྷན་སྐྱེས་ཡེ་ཤེས་ཀྱི་སྐུ་འགྲུབ་པའི་གཞི་འདིང་བའོ། །གསུམ་པ་བྱིན་གྱིས་རློབ་ཅིང་དབང་བསྐུར་བ་ནི། རྡོ་རྗེའི་སྐུ་དང་ནཱ་དའི་གསུང༔ ཞེས་སོགས་ཏེ། འདི་ལ་གཉིས། གནས་གསུམ་བྱིན་གྱིས་རློབ་པ་དང་། དབང་བསྐུར་བའོ། །དང་པོ་ནི། གོང་དུ་སྨོས་པ་ལྟར་དྭངས་མ་ལྔ་སེམས་དང་བཅས་པ་གཉིས་གཉིས་ཟུང་དུ་སྡེབ་པ་རྣམ་པར་དག་པའི་ངོ་བོ་ནི་འབྲས་བུ་རྡོ་རྗེ་གསུམ་གྱི་རང་བཞིན་ཏེ། ཇི་སྐད་དུ། ས་ཆུའི་ཁམས་དག་ལུས་ཀྱི་སྡུག་བསྔལ་ལས། །རྣམ་གྲོལ་བདེ་བ་སྐྱེ་འཆི་བྲལ་བ་ནི། །ཆེན་པོའི་སྐུ་སྟེ་སྐུ་ཡི་རྡོ་རྗེའོ། །རླུང་མེའི་ཁམས་དག་ངག་གི་སྡུག་བསྔལ་ལས། །རྣམ་གྲོལ་བདེ་བ་འགྲོ་འོང་རྩོལ་བྲལ་བ། །གཞོམ་མེད་གསང་སྔགས་སྒྲ་ཆེན་གསུང་རྡོ་རྗེ། །ནམ་མཁའི་ཁམས་དག་ཡིད་ཀྱི་སྡུག་བསྔལ་ལས། །རྣམ་གྲོལ་བདེ་བ་གཟུང་འཛིན་བྲལ་བ་ཡི། །གཉུག་མ་རང་རིག་རང་བཞིན་སྤྲོས་བྲལ་གྱི། །ཡེ་ཤེས་དེ་ལས་འབྲས་བུའི་ཡོན་ཏན་རྣམས། །རང་སྣང་དག་པ་རབ་འབྱམས་འཆར་བ་ནི། །ཐུགས་ཀྱི་རྡོ་རྗེ་མངོན་དུ་འགྱུར་བའོ། །ཞེས་གསུངས་པ་ལྟར། རྡོ་རྗེའི་སྐུ་སྐྱེ་འཆི་མེད་པ། གསུང་གཞོམ་མེད་ནཱ་དའི་སྒྲ་དབྱངས། ཐུགས་སྤྲོས་བྲལ་ཐིག་ལེ་ཆེན་པོ་སྟེ་སངས་རྒྱས་རྣམས་ཀྱི་རྡོ་རྗེ་གསུམ་གྱིས། རང་གི་གཉུག་མའི་སྒོ་གསུམ་ལ་ཇི་ལྟར་གནས་པའི་དོན་བཞིན་རྒྱས་གདབ་པ་སྟེ། གདབ་ཚུལ་ཡང་། བདག་དམ་ཚིག་འཁོར་ལོའི་སྤྱི་བོར་ༀ་དཀར་པོ། མགྲིན་པ་ཨཱཿ དམར་པོ། སྙིང་གར་ཧཱུྃ་མཐིང་ག་རྣམས་བསྒོམ་པ་སྟེ། འདི་དག་ལྷའི་གཟུགས་སུ་མི་བྱེད་པ་ནི་ཡི་གེ་ཉིད་ཡེ་ཤེས་ཀྱི་ཕྱག་རྒྱ་ཡིན་ལ། རྡོ་རྗེ་གསུམ་ཡང་ཡེ་ཤེས་དྲུག་གི་བདག་ཉིད་ཡིན་པས་ན་ཞལ་ཕྱག་སོགས་ལྷའི་གཟུགས་སུ་མ་བྱས་ཀྱང་དེ་དང་དེའི་ཕྱག་རྒྱར་འགྱུར་བ་ཡིན་ཞིང་། རྡོ་རྗེ་གསུམ་ཞེས་པའང་རིགས་ལྔའི་ནང་མཚན་གྱི་རྣམ་སྣང་སོགས་གསུམ་ཁོ་ན་མ་ཡིན་ཏེ། འདིར་སྐུ་རྡོ་རྗེ་ནི་ཡབ་ལ་སྣང་མཛད་དང་རིན་འབྱུང་འདྲེས་མ་དང་། ཡུམ་ལ་སྤྱན་མ་དང་མཱ་ཀི་འདྲེས་པའི་བདག་ཉིད་ཡིན་ཞིང་། དེ་བཞིན་དུ་དཔག་མེད་དོན་གྲུབ་གཉིས་དང་། གོས་དཀར་སྒྲོལ་མ་གཉིས་འདྲེས་པ་ནི་གསུང་རྡོ་རྗེ། མི་བསྐྱོད་རྡོར་སེམས་གཉིས་དང་། དབྱིངས་ཕྱུག་བཟང་མོ་གཉིས་འདྲེས་རོ་གཅིག་པའི་བདག་ཉིད་ཅན་གྱི་ཐུགས་རྡོ་རྗེའོ། །དེས་ན་ལྷའི་སྐུ་གསུང་ཐུགས་ཉིད་རྡོ་རྗེ་གསུམ་གྱི་རང་བཞིན་དུ་རྒྱས་འདེབས་པས་བྱིན་གྱིས་རླབས་པ་སྟེ། ཕྱི་ལྟར་ན་བདེ་བར་གཤེགས་པ་རྣམས་ཀྱི་སྐུ་གསུང་ཐུགས་སུ་བྱིན་གྱིས་བརླབ་པར། ནང་ལྟར་ན་བདེ་བར་གཤེགས་པའི་སྐུ་གསུང་ཐུགས་དང་བདག་གི་ལུས་ངག་ཡིད་གསུམ་དབྱེར་མེད་པར། གསང་བ་ལྟར་ན་ཆོས་ཉིད་སྐྱེ་བ་མེད་པའི་ངང་ལས། སངས་རྒྱས་ཀྱི་སྐུ་གསུང་ཐུགས་ཀྱི་ཕྱག་རྒྱར་ལྷང་གིས་རྟོགས་པར་བསྒོམ་པའོ། །ལུས་ངག་ཡིད་གསུམ་རྣམ་པར་དག་པ་རྡོ་རྗེ་གསུམ་གྱི་རང་བཞིན་ནོ་སྙམ་དུ་ང་རྒྱལ་བཟུང་། འདིས་བྱིས་པ་དེ་སྒོ་གསུམ་གྱི་ནུས་རྩལ་ནར་སོན་པ་སྦྱོང་། འབྲས་བུ་སངས་རྒྱས་ཐམས་ཅད་ཀྱི་རྡོ་རྗེ་གསུམ་དང་། དབྱེར་མི་ཕྱེད་པ་བརྙེས་པའི་རྟེན་འབྲེལ་སྒྲིག རྫོགས་རིམ་གྱི་ཚེ་ཁུ་རྡུལ་རླུང་གསུམ་འགགས་པའི་དྭངས་མ་ཡེ་ཤེས་རྒྱུད་ལ་སྐྱེ་བའི་གཞི་འདིང་བའོ། །གཉིས་པ་ནི། གསང་སྙིང་ལས། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་དང་། སྒྱུ་འཕྲུལ་ལམ་རིམ་ལས། ཕུང་པོ་ཁམས་དང་སྐྱེ་མཆེད་རྣམས། །གཞི་རྫོགས་ཕྱག་རྒྱ་མ་འདྲེས་གསལ། །ཅིར་ཡང་འགྱུར་ཞིང་ཅིར་ཡང་འཕྲུལ། །ཞེས་གསུངས་པ་ལྟར། སྣོད་ཀྱི་འབྱུང་བ་ལྔ། བཅུད་ཀྱི་ཕུང་པོ་ལྔ། རྒྱུད་ཀྱི་ཉོན་མོངས་པ་དུག་ལྔ་དང་བཅས་ཡེ་ནས་སྐུ་ལྔ་དང་ཡེ་ཤེས་ལྔ་ཡི་ངོ་བོར་གནས་པའི་དོན། དཔེ་རྒྱལ་བུ་དམངས་འཁྱམས་ཉིད་བློན་པོ་རྒྱུས་ཅན་དང་འཕྲད་པས་རང་རིགས་ཀྱི་རྒྱལ་སར་དབང་བསྐུར་བ་ལྟར་རྟོག་ཚོགས་རྣམས་སྐུ་དང་ཡེ་ཤེས་སུ་ངོ་འཕྲོད་པས་འཁོར་འདས་གཉིས་སུ་མེད་པའི་རྒྱལ་སྲིད་ཆེན་པོ་ལ་དབང་བསྐུར་བ་སྟེ། བསྐུར་ཚུལ་བདག་དམ་ཚིག་པའི་སྤྱི་བོ་སོགས་མགོ་བོའི་གནས་ལྔར། མི་བསྐྱོད་པ་ཡབ་ཡུམ་གཙོ་བོར་གྱུར་པའི་བདེ་གཤེགས་རིགས་ལྔ་ཡབ་ཡུམ་གཉིས་སུ་མེད་པར་སྦྱོར་བའི་རྗེས་ཆགས་ཀྱི་མེས་བྱང་ཆུབ་སེམས་ཡེ་ཤེས་ལྔའི་རང་བཞིན་ཅན་གྱི་བདུད་རྩི་ལྔ་ཡི་ཆུ་རྒྱུན་བབ་པས་དབང་བསྐུར་བས་ལུས་ཐམས་ཅད་གང་། ཕུང་ཁམས་སྐྱེ་མཆེད་དུ་འཛིན་པའི་དྲི་མ་དག རྟོག་ཚོགས་སྐུ་དང་ཡེ་ཤེས་སུ་གནས་གྱུར། ཆུ་ཡི་ལྷག་མ་ཡར་ལུད་པ། སྤྱི་བོར་རིགས་ཀྱི་བདག་པོ་རང་ཆས་སུ་བཞུགས་པ་ལ་ཐིམ་པར་མོས་ལ་སོ་སོར་སྔགས་དང་ཕྱག་རྒྱས་ཀྱང་བརྟན་པར་བྱ་བ་སྟེ། དེ་ཡང་ཕྱི་ལྟར་ན་དབུ་ལ་རིགས་ལྔའི་སངས་རྒྱས་ཀྱི་དབང་བསྐུར་བར། ནང་ལྟར་ན་རང་གི་ཕུང་པོ་ལྔ་རིགས་ལྔ་ཡེ་ཤེས་ལྔར་ཡེ་ནས་དབང་བསྐུར་བར། གསང་བ་ལྟར་ན་ཆོས་ཉིད་སྐྱེ་བ་མེད་པ་ལས་རིག་པའི་རྩལ་མ་འགགས་པར་ཤར་བ་ལྷང་གིས་རྟོགས་པར་བསྒོམས། ཐོབ་བྱ་རང་གནས་ཀྱི་ཡེ་ཤེས་མངོན་དུ་གྱུར་པའི་ང་རྒྱལ་འཛིན། འདིས་བྱིས་པ་དེ་རྩ་ཁམས་འཕེལ་བས་ཉོན་མོངས་པ་ལྔ་ཡི་རྣམ་རྟོག་རགས་པར་གྱུར་བ་དེ་སྦྱོང་། འབྲས་བུ་སངས་རྒྱས་པ་ན་དེ་བཞིན་གཤེགས་པ་ཐམས་ཅད་ཀྱི་བདག་ཉིད་ཁམས་གསུམ་ཆོས་ཀྱི་རྒྱལ་པོར་དབང་བསྐུར་བའི་རྟེན་འབྲེལ་སྒྲིག རྫོགས་རིམ་གྱི་ཚེ་དགའ་བཞི་ལུགས་འབྱུང་ལྡོག་གི་རིམ་པས་དུག་ལྔ་ཡེ་ཤེས་ལྔར་དབང་ཞིང་རླུང་སེམས་གཙུག་ཏོར་དུ་ཐིམ་པའི་རྒྱུ་བྱེད་པས་ལམ་གོང་མའི་སྨིན་བྱེད་དུ་འགྲོའོ། །གཉིས་པ་རང་བཞིན་ཡེ་ཤེས་ཀྱི་དཀྱིལ་འཁོར་བ སྒྲུབ་པ་ལ་གཉིས། སྤྱན་འདྲེན་པ་དང་། བཞུགས་སུ་གསོལ་བའོ། །དང་པོ་ནི། གོང་དུ་པདྨའི་ལམ་རིམ་གྱི་ལུང་དྲངས་པ་ལྟར་གདོད་ནས་དམ་ཡེ་དབྱེར་མེད་ཀྱི་དོན་དེ་ཉིད་ལེགས་པར་རྟོགས་ན་སྤྲོས་བཅས་ཀྱི་ཆོ་ག་གཞན་ལ་ལྟོས་མི་དགོས་པར་དེ་ཉིད་སྤྱན་འདྲེན་པ་སོགས་ཀྱི་མཆོག་ཏུ་འགྱུར་ཏེ། ཀུན་མཁྱེན་བླ་མས་སེམས་ཉིད་ངལ་གསོར། རང་སེམས་ཡེ་ནས་ལྷ་ཡི་རང་བཞིན་ལ། །ལུས་ནི་དཀྱིལ་འཁོར་སྒྲ་ཚིག་གསང་སྔགས་ཉིད། །ཐམས་ཅད་ལྷུན་རྫོགས་ཡེ་ཤེས་ཆེན་པོའི་ངང་། །དམ་ཚིག་ཡེ་ཤེས་གཉིས་མེད་དགུག་གཞུག་མེད། །གཤེགས་གསོལ་མི་དགོས་བཟང་ངན་བླང་དོར་མེད། །ཡེ་ནས་དཀྱིལ་འཁོར་ཡིན་པའི་བདག་ཉིད་ལ། །ཡིན་པར་ཤེས་པའི་ཚུལ་གྱིས་གསལ་འདེབས་ལས། །མ་གྲུབ་པ་ལ་ཡང་གྲུབ་བྱེད་པ་མིན། །ཞེས་དང་། རྫོགས་པ་ཆེན་པོ་ནམ་མཁའ་ཀློང་ཡངས་ཀྱི་རྒྱུད་ལས། ལྟ་བ་ངེས་པའི་གདེང་ཟིན་ནས། །མི་རྟོག་ཡེ་ཤེས་བགེགས་གསལ་བས། །རྣམ་པར་རྟོག་པའི་གེགས་མེད་ཕྱིར། །ཕྱི་ནང་མཚམས་གཅོད་དེ་ལ་རྫོགས། །ཡེ་ནས་ངོ་བོ་ཉིད་སྐུའི་དབྱིངས། །བསྒྲུབ་ཏུ་མེད་པའི་ཆོས་ཉིད་ལ། །མ་རིག་རྣམ་རྟོག་སྒྲིབ་པ་མེད། །དོན་གྱི་བཤགས་པ་དེ་ལ་རྫོགས། །སངས་རྒྱས་སེམས་ཅན་གཉིས་མེད་ཕྱིར། །ཡུལ་དང་དབང་པོ་མི་འབྱེད་པ། །གཉིས་མེད་དོན་གྱི་ཀློང་ཁྱབ་པས། །བྱིན་ཆེན་དབབ་པ་དེ་ལ་རྫོགས། །ཞེས་དང་། ངོ་བོ་ཉིད་ཀྱི་སྙིང་པོ་ལ། །སངས་རྒྱས་སེམས་ཅན་རྒྱུ་གཅིག་ཕྱིར། །ཆེད་དུ་བྱ་མེད་རང་རིག་པ། །སྤྱན་དྲངས་རིམ་པ་དེ་ལ་རྫོགས། །ཞེས་དང་། ཐམས་ཅད་འདྲེས་པ་ཆེན་པོ་ལ། །རྣམ་པར་གྲོལ་བ་མཚོན་པའི་ཕྱིར། །རིག་པའི་དོན་འདི་གསལ་ཐེབས་པས། །ནན་ཏན་ཕྱག་རྒྱ་དེ་ལ་རྫོགས། །ལུས་ངག་ལས་ཀྱི་རྣམ་པ་ལས། །དྲན་པའི་དོན་གྱིས་ཟིན་པའི་ཕྱིར། །བསྒུལ་སྐྱོད་ཐམས་ཅད་ཡེ་ཤེས་ལ། །ཕྱག་རྒྱའི་མཆོད་པ་དེ་ལ་རྫོགས། །ཞེས་དང་། འཁོར་དང་མྱ་ངན་འདས་པའི་ཆོས། །ཐིག་ལེ་གཅིག་ཏུ་འདུས་པའི་ཕྱིར། །ཅི་སྤྱོད་རང་གི་ལུས་ངག་ལ། །དཀྱིལ་འཁོར་བསྡུ་བ་དེ་ལ་རྫོགས། །ཞེས་དང་། རྨད་བྱུང་ལས། ཡེ་ནས་ལྷུན་མཉམ་དཀྱིལ་འཁོར་ལ། །ཡིན་པར་ཤེས་ནས་བསྒོམ་པ་ལ། །ཐ་དད་བློ་ཡི་རིམ་པ་ཡིས། །སྤྱན་འདྲེན་གཤེགས་གསོལ་འདིར་མི་དགོས། །ཞེས་དང་། བརྟག་གཉིས་ལས། ལྷ་ཉིད་རང་ལ་རང་ཉིད་ལྷ། །རང་དང་ལྷན་ཅིག་སྐྱེས་པ་ལ། །སྤྱན་འདྲེན་བཞུགས་གསོལ་འདིར་མི་དགོས། །རང་སེམས་བླ་མ་ལྷ་རུ་གནས། །ཞེས་དང་། སྤྲོས་པ་མེད་པའི་རང་བཞིན་ལ། །ལྷ་དང་སྔགས་ནི་ཡང་དག་གནས། །ཞེས་གསུངས། འོན་ཀྱང་དེ་ལྟར་མ་རྟོགས་པའི་གཉིས་འཛིན་ཅན་གྱི་ངོར། དམ་ཡེ་ལ་མཆོག་དམན་ཐ་དད་དུ་འཛིན་པའི་ཞེན་རྟོག་སྤང་བ་དང་། ཡེ་ཤེས་ཀྱི་འཁོར་ལོ་དེ་ཉིད་རང་གི་སེམས་དང་དབྱེར་མེད་དུ་ཤེས་པ་དང་། སངས་རྒྱས་ཐམས་ཅད་ཀྱི་བྱིན་རླབས་བདག་ཉིད་ལ་འཇུག་པ་སོགས་ཀྱི་ཆེད་དུ་སྤྱན་འདྲེན་བཞུགས་གསོལ་བྱ་བ་སྟེ། དེ་ཡང་རང་དམ་ཚིག་པའི་ཐུགས་ཀའི་ཧཱུྃ་ལས་འོད་ཟེར་ལྕགས་ཀྱུ་ལྟ་བུ་རང་བཞིན་ལྷུན་གྱིས་གྲུབ་པའི་ཞིང་ཁམས་ཐམས་ཅད་དུ་ཁྱབ་པར་འཕྲོས་པས་ཕྱོགས་བཅུ་དུས་བཞིའི་དེ་བཞིན་གཤེགས་པ་ཐམས་ཅད་རང་བཞིན་ཆོས་ཀྱི་སྐུ་ལས་མ་གཡོས་པར་གཟུགས་སྐུ་ཤྲཱི་ཧེ་རུ་ཀའི་དཀྱིལ་འཁོར་གྱི་ལྷ་ཚོགས་བསྒོམས་པ་དང་འདྲ་བའི་སྐུར་བཞེངས་ནས་མདུན་གྱི་ནམ་མཁར་མངོན་སུམ་བཞིན་དུ་སྤྱན་དྲངས་པར་མོས་པ་སྟེ། ཧཱུྃ། སྲིད་པའི་ཁྲག་འཐུང་ཞེས་སོགས་ཏེ། དེ་ཡང་རྒྱུ་ཅིའི་སླད་དུ་སྤྱན་འདྲེན་ན། ཕྱི་འདོད་གཟུགས་གཟུགས་མེད་ཀྱི་སྲིད་པ་གསུམ་མམ་ནང་སྒྲུབ་པ་པོའི་ལུས་སྣང་བ་འདོད་ཁམས་ངག་ཕྱེད་སྣང་གཟུགས་ཁམས་སེམས་མི་སྣང་བ་གཟུགས་མེད་ཁམས་ཏེ་སྒོ་གསུམ་གྱི་སྲིད་པ་གསུམ་པོ། དཔལ་ཁྲག་འཐུང་ཆེན་པོ་ཤྲི་ཧེ་རུ་ཀའི་སྐུ་གསུང་ཐུགས་ཀྱི་ངོ་བོར་ཡེ་ནས་གནས་པའི་དོན་བཞིན་བསྒྲུབ་པ་དང་། ཕྱི་ནང་གསང་བ་དེ་ཁོ་ན་ཉིད་ཀྱི་དབང་དང་། དངོས་གྲུབ་ཀྱི་ཁྱད་པར་ཤེས་བྱ་ཐམས་ཅད་ལ་ཐོགས་པ་མེད་པའི་ཤེས་རབ། མི་བརྗེད་པའི་གཟུངས། མངོན་པར་ཤེས་པ་དྲུག རྒྱུན་གྱི་ཏིང་ངེ་འཛིན། རྡོ་རྗེ་ལྟ་བུའི་ཚེ། གཡུང་དྲུང་ལྟ་བུའི་ལུས། བཅོམ་ལྡན་འདས་དཔལ་ཆེན་པོའི་སྐུ་གསུང་ཐུགས་ཀྱི་བླ་མན་ཆད་ནས་དངོས་གྲུབ་ཀྱི་སྐལ་བ་ཅི་དང་ཅི་འཚལ་བ་ཐམས་ཅད་བླང་བའི་ཕྱིར་དུ། གང་སྤྱན་འདྲེན་ན། ཞི་བ་ཆོས་ཉིད་ཀྱི་ཁྲོ་བོ་དངོས་པོ་དང་མཚན་མ་མེད་པས་ཆོས་སྐུ་སྤྲོས་པའི་མཐའ་དང་བྲལ་བ། དེའི་ངང་ལས་འོག་མིན་དུ་ཧེ་རུ་ཀའི་དཀྱིལ་འཁོར་དུ་སྣང་བ་ལོངས་སྤྱོད་རྫོགས་པ་རང་བཞིན་དོན་གྱི་གནས་ལུགས། དེའི་ཐུགས་རྗེ་ལྷུན་གྱིས་གྲུབ་པའི་གང་འདུལ་གྱི་ཁྲོ་བོར་སྣང་བ་མཛད་པ་ཕྲིན་ལས་ཀྱི་རང་བཞིན་སྤྲུལ་པའི་སྐུ་སྟེ་སྐུ་གསུམ་གྱིས་བསྡུས་པའི་ཡེ་ཤེས་ཀྱི་ཁྲོ་བོའི་ཚོགས་རྣམས། གང་དུ་སྤྱན་འདྲེན་ན་གནས་ཚུལ་དང་མཐུན་པར་ཇི་ལྟར་བསྒོམ་པའི་ཏིང་ངེ་འཛིན་གྱི་དཀྱིལ་འཁོར་དུ། དེ་ལྟར་སྤྱན་དྲངས་པ་བཞིན་གཤེགས་ནས་ཅི་ཞིག་མཛད་ན། སྐུ་གསུང་ཐུགས་ཀྱིས་བྱིན་གྱིས་བརླབས་པའི་རྟགས་དང་སྒྲུབ་པའི་མཚན་མ་བཟང་པོ་མྱུར་དུ་བསྟན་པ་དང་། ཁྲག་འཐུང་ཆེན་པོའི་དངོས་གྲུབ་ནི། ཧེ་རུ་ཀ་ཞེས་པའི་འབྲུ་གསུམ་རྒྱུ་འབྲས་ངོ་བོས་སྟོང་པའི་རྣམ་ཐར་སྒོ་གསུམ་གྱི་རང་བཞིན་སྟོང་པ་ཉིད་དང་དབྱེར་མེད་པའི་ཡེ་ཤེས་རྡོ་རྗེ་ལྟ་བུ་སྟེ་ཐུགས་མཁྱེན་པའི་ཡེ་ཤེས་དང་། ཡང་ན་ཁྲག་ནི་དམར་བ་དང་བརླན་པར་གྱུར་པ་སོགས་ཀྱིས་མཚོན་པ་གདུལ་བྱའི་འགྲོ་ལ་ལྷག་པར་རྗེས་སུ་ཆགས་ཤིང་བརྩེ་བའི་རང་བཞིན་དང་། ཡང་ན་ཐུགས་མཁྱེན་བརྩེའི་ཡེ་ཤེས་ཉིད་རྣམ་པ་རྟགས་ཀྱི་ཕྱག་རྒྱར་ཤར་བས་ཤིན་ཏུ་འདུལ་བར་དཀའ་བའི་བདུད་དང་ལོག་འདྲེན་ཀུན་གྱི་སྙིང་ཁྲག་འཐུང་བར་མཛད་པ་ནུས་པའི་མཐུ་ཕུན་སུམ་ཚོགས་པ་སྟེ། མདོར་ན་རྒྱལ་བ་ཀུན་གྱི་མཁྱེན་བརྩེ་ནུས་གསུམ་གྱི་དངོས་གྲུབ་ཟབ་མོ་སྩོལ་ཅིག་པ་སྟེ། དེ་ཡང་ཕྱི་ལྟར་ན། ཆོས་ཀྱི་སྐུ་ལས་ལོངས་སྤྱོད་རྫོགས་པའི་སྐུར་བཞེངས་ནས་མདུན་གྱི་ནམ་མཁར་མེ་རི་འདབ་འབྱོར་གྱི་ཚུལ་དུ་བཞུགས་པར། ནང་ལྟར་ན་རང་གི་རྟོག་ཚོགས་ཐམས་ཅད་ལྷའི་དཀྱིལ་འཁོར་དུ་ཤར་བ། གསང་བ་ལྟར་ན་ཆོས་ཉིད་སྐྱེ་བ་མེད་པ་ལ་རང་བྱུང་གི་ཡེ་ཤེས་ལྷང་ངེར་ཤར་བར་བསྒོམ་པའོ། །གཉིས་པ་ནི། ཧཱུྃ། ཆགས་སྡང་འདུལ་བའི་སོགས་ཏེ། གདུལ་བྱ་མ་རུངས་པའི་སེམས་ཅན་རྩ་བ་ཆོས་དང་གང་ཟག་ལ་བདག་ཏུ་ལྟ་བའི་དབང་གིས་ཆགས་སྡང་རྨོངས་གསུམ་སོགས་ཉོན་མོངས་པ་ལྷག་པར་རྒྱས་པའི་རང་གཟུགས་ཤིན་ཏུ་གདུལ་དཀའ་བའི་བདུད་དང་རུ་ཏྲ་ལ་སོགས་པ་ལོག་པར་འདྲེན་པའི་ཚོགས་རྣམས་འདུལ་བའི་ཕྱིར། ཇི་སྐད་དུ། ཤིན་ཏུ་གདུག་ཅིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་རྣམ་འབྱོར་ལས། །ཁྲོ་བོར་དེ་བཞིན་གཤེགས་ཀུན་མཛད། །ཅེས་གསུངས་པ་བཞིན། ཐུགས་དམིགས་མེད་ཞི་བ་ཆོས་ཀྱི་སྐུ་ལས་མ་གཡོས་ཀྱང་། རྣམ་པ་འཇིགས་རུང་སྲིན་པོའི་གཟུགས་ཅན་རྔམས་བརྗིད་གར་དགུའི་ཉམས་ཀྱིས་རོལ་བའི་དཔལ་ཆེན་པོ་ཡང་དག་ཧེ་རུ་ཀ་དང་། དུས་གསུམ་གྱི་རྒྱལ་བ་མ་ལུས་པའི་ཕྲིན་ལས་འདུས་པའི་སྤྱི་གཟུགས་ཤྲཱི་བཛྲ་ཀུ་མཱ་རིའི་སྐུ་གསུང་ཐུགས་མཆོག་བདག་དམ་ཚིག་སེམས་དཔའི་སྒོ་གསུམ་ལ་རང་བཞིན་གཉིས་སུ་མེད་པར་བརྟན་པར་བཞུགས་ནས། ཆེ་བའི་ཡོན་ཏན་དང་གང་ལ་གང་འདུལ་གྱི་ཕྲིན་ལས་མ་ལུས་པ་རྫོགས་པར་མཛོད་ཅིག་པ་སྟེ། ཕྱི་ལྟར་ན་དམ་ཚིག་པ་དང་ཡེ་ཤེས་གཉིས་སུ་མེད་པར་བསྟིམ། ནང་ལྟར་ན་བདག་དང་ཡེ་ཤེས་གཉིས་སུ་མེད་པར། གསང་བ་ལྟར་ན་ཆོས་ཉིད་སྐྱེ་བ་མེད་པ་ལས་རང་བྱུང་ཡེ་ཤེས་འདུ་འབྲལ་མེད་པར་བསྒོམ་པའོ། །འདི་རྣམས་ཀྱིས་བྱིས་པ་དེ་རང་དང་རིགས་མཐུན་གྱི་འགྲོ་བ་སྔ་མ་རྣམས་དང་བློ་གྲོས་ཀྱི་ནུས་པ་མཉམ་པར་གྱུར་པའི་ཞེན་པ་སྦྱོང་། འབྲས་བུ་འཚང་རྒྱ་བའི་ཚེ་སངས་རྒྱས་ཐམས་ཅད་ཡེ་ཤེས་མཉམ་པ་ཉིད་དུ་འགྱུར་བའི་རྟེན་འབྲེལ་སྒྲིག རྫོགས་རིམ་གྱི་ཚེ་དཔེའི་འོད་གསལ་གྱིས་དོན་གྱི་ཡེ་ཤེས་མཚོན་པ་དང་། འཁོར་འདས་གཉིས་མེད་ཀྱི་ཡེ་ཤེས་རྒྱུད་ལ་སྐྱེ་བའི་གཞི་འདིང་བའོ། །གསུམ་པ་གཉིས་མེད་ཀྱི་དཀྱིལ་འཁོར་ལ་མཆོད་བསྟོད་བྱ་བ་ལ་གསུམ། ཕྱག་འཚལ་བ། མཆོད་པ་འབུལ་བ། བསྟོད་པ་བྱ་བའོ། དང་པོ་ནི། ཧཱུྃ། སྟོང་པ་ཉིད་ཀྱི་ཞེས་སོགས་ཏེ། དེ་ཡང་ཆོས་ཐམས་ཅད་ཀྱི་གནས་ལུགས་སྟོང་པ་ཉིད་ཀྱི་ངོ་བོ་རྡོ་རྗེ་ལྟར་བརྟན་པ་ཉིད་འདུས་བྱས་མཚན་མའི་སྤྲོས་པ་དང་ངང་གིས་མི་མཛའ་བས་ཆོས་ཉིད་ཀྱི་ཁྲོ་བོ་དང་། དེ་རྟོགས་པའི་རང་བཞིན་འཕོ་འགྱུར་བགྲེས་རྒུད་མེད་པའི་གཞོན་ནུ་ཡེ་ཤེས་ཆེན་པོར་ཤར་བའམ་རྒྱས་ནས་མ་རིག་པ་དང་ཕྱིན་ཅི་ལོག་གི་གནས་མེད་པས་སྤང་བྱ་ལ་ལྟོས་ནས་ངང་གིས་ཁྲོ་བ་དང་། ཐུགས་རྗེས་འགྲོ་བ་སྐྱོབ་པ་ན། འབད་རྩོལ་མེད་པར་མི་མཐུན་པའི་ཕྱོགས་ཐམས་ཅད་འཇོམས་པས་ན་ཤུགས་ཀྱིས་ཁྲོ་བ་དང་། གདུལ་བྱའི་དབང་གིས་ཁྲོ་བོར་བཅོས་པ་ལྟར་སྣང་བ་སྟེ་མཁའ་མཉམ་ཁྲོ་བོ་རོལ་པའི་དཀྱིལ་འཁོར་ལ། རང་བཞིན་གཉིས་སུ་མེད་པར་ཆུ་ལ་ཆུ་བཞག་པའི་ཚུལ་དུ་རྟོགས་པའི་བརྡ་ཡིས་འཚལ་བ་སྟེ། དེ་ཡང་ཕྱི་ལྟར་ན་ལྷ་ཡེ་ཤེས་སེམས་དཔའ་དང་བདག་དམ་ཚིག་སེམས་དཔའ་ཐ་དད་དུ་མི་དམིགས་པའི་ཚུལ་གྱིས་ཕྱག་འཚལ། ནང་ལྟར་ན་ཆོས་ཉིད་སྐྱེ་མེད་ཀྱི་དབྱིངས་སུ་རང་གི་རྟོག་ཚོགས་ལྷ་དང་དབྱེར་མེད་པར་བསྒོམ། གསང་བ་ལྟར་ན་ཆོས་ཉིད་སྐྱེ་མེད་ཀྱི་དབྱིངས་སུ་རིགས་པ་ཡེ་ཤེས་ཐིམ་པའི་ཚུལ་གྱིས་ཕྱག་འཚལ་ཏེ། ཀླུ་སྒྲུབ་ཀྱིས། ཇི་ལྟར་ཆུ་ལ་ཆུ་བཞག་དང་། །ཇི་ལྟར་མར་ལ་མར་བཞག་བཞིན། །རང་གིས་རང་གི་ཡེ་ཤེས་གང་། །ལེགས་མཐོང་གང་ཡིན་འདིར་ཕྱག་ཡིན། །ཞེས་དང་། གནུབས་ནམ་མཁའི་སྙིང་པོས། ལྷ་དང་བདག་ཏུ་མི་གཉིས་པའོ། །དོན་ཉིད་རྟོགས་པར་བྱ་བའི་ཕྱིར། །ཇི་ལྟར་མར་ལ་མར་བཞིན་དུ། །གཉིས་མེད་རིག་པས་ཕྱག་འཚལ་ལོ། །ཞེས་གསུངས། གཉིས་པ་ནི། ༀ་ཨཱཿཧཱུྃ༔ བླ་ན་མེད་པའི་ཞེས་སོགས་ཏེ། དེ་ཡང་མཆོད་པ་ནི་པཱུ་ཛའི་སྒྲ་ལས་སྔོན་དུ་བསྐྱེད་པར་བྱ་བའམ། ཡང་ཡང་དགྱེས་པར་བསྐྱེད་པའམ། བཀུར་བའི་དོན་ཅན་ཏེ། སྤྱིར་འཇིག་རྟེན་ལས་འདས་མ་འདས་དང་བླ་ན་ཡོད་མེད་སོགས་ཀྱི་དབྱེ་སྒོ་མང་དུ་ཡོད་ཀྱང་། །སྐབས་འདིར་ནི་སྣོད་བཅུད་དག་པ་དང་མ་དག་པའི་དངོས་པོ་ཐམས་ཅད་ཡེ་ནས་དག་མཉམ་བདེ་བ་ཆེན་པོར་གནས་པའི་ཕྱིར་སྣང་སྲིད་ཐམས་ཅད་བདེ་སྟོང་མཆོད་པའི་ཕྱག་རྒྱར་འབུལ་བ་སྟེ། འདི་ལ་སྣང་སྲིད་གཞིར་བཞེངས་ཀྱི་མཆོད་པའམ་ཀུན་ཏུ་བཟང་པོ་དབྱེ་བ་མེད་པའི་མཆོད་པ་ཞེས་བྱ་སྟེ། ཐེག་པ་འོག་མ་ཀུན་ལས་འཕགས་པས་བླ་ན་མེད་པའི་མཆོད་པ་དམ་པར་སྦྱར་བ་ཡིན་ཏེ། དེ་ལ་བྱེ་བྲག་ཏུ་དབྱེ་ན་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་བཞི་ལས། དང་པོ་ནི། ཕྱི་ཉེར་སྤྱོད་ཀྱི་མཆོད་པ་སྟེ། དེ་ལ་ཡང་ཡང་དག་གསང་བའི་འགྲེལ་ཆེན་དུ་ཕྱི་ནང་གསང་གསུམ་གྱིས་བསྟན་ཏེ། ཨརྒྷཾ་ཕྱི་ལྟར་དབྱིངས་མཐའ་དབུས་མེད་པར་བདུད་རྩིའི་རྒྱུན་དཀར་པོར་འཁྱིལ་བ་དང་། ནང་ལྟར་སྣང་སྲིད་རཀྟས་དམར་ཚོམ་གྱིས་གང་བ་དང་། གསང་བར་ཡུམ་གྱི་བྱང་སེམས་དཀར་དམར་དུ་བསམ་ལ་མཆོད། དེ་བཞིན་དུ་མེ་ཏོག་ཕྱི་ལྟར་ན་མདོག་སྣ་ཚོགས་ཀྱི་མེ་ཏོག་མཛེས་པས་སྟོང་གསུམ་གང་བ། ནང་ལྟར་མཛེས་པའི་ལྷ་མོ་མང་པོ། གསང་བ་བདག་གི་ཚོགས་བརྒྱད་ཡེ་ཤེས་སུ་དག་པ་དང་། བདུག་སྤོས་ཕྱི་ལྟར་དྲི་ཡེ་ལྷ་མོ་སྤོས་ཕོར་ཐོགས་པས་དུད་སྤྲིན་སྤྲོ་བ་ནང་དུ་ཚིལ་ཆེན་གྱི་དུད་པ་དང་ཞིང་ཆེན་གྱི་ངད་ལྡང་བ་གསང་བ་བྱང་སེམས་དཀར་དམར་གྱི་དྲི་བསུང་འཐུལ་བ་དང་། མར་མེ་ཕྱི་ལྟར་སྣོད་སྟོང་གསུམ་ཙམ་ལ་མར་ཁུ་རྒྱ་མཚོ་ཙམ་གྱིས་མེ་ལྕེའི་འོད་ཀྱིས་སྲིད་གསུམ་ཁྱབ་པ་ནང་ལྟར་སྣོད་དུར་ཁྲོད་ཀྱི་གཞལ་ཡས་མར་ཁུ་ངོ་བོ་ཞི་གནས་ཏེ་རྣམ་པ་ཚིལ་ཆེན་རྒྱ་མཚོ་ཙམ་ལ་མེ་ལྕེ་ལྷག་མཐོང་ཡེ་ཤེས་ལྔ་ཡི་འོད་ཟེར་འཕྲོ་བ་དང་གསང་བར་བདག་གི་བྱང་ཆུབ་སེམས་ཡེ་ཤེས་ཀྱི་མར་མེ་སྟོང་ཕྲག་དུ་མར་འཆར་བའི་གཞིར་བསམ་པ་དང་། དྲི་ཆབ་ཕྱི་ལྟར་ལྷ་མོ་དུང་ཕོར་ཐོགས་པ་མང་པོས་ཙན་དན་གྱི་འདེ་གུས་བྱུག་པ་དང་ནང་ལྟར་བྱང་ཆུབ་སེམས་ཀྱི་རླན་གྱིས་ཉོན་མོངས་པའི་ལྗན་ལྗིན་གནས་སུ་དག་པ་གསང་བ་ཞི་གནས་ཀྱི་རླན་དང་བཅས་པའི་ལྷག་པའི་བྱང་ཆུབ་སེམས་ཀྱི་རང་བཞིན་དུ་བསམ་པ་དང་། ལྷ་བཤོས་ཕྱི་ལྟར་རོ་བརྒྱ་ལྡན་རི་རབ་ལས་ཆེ་བ་ནང་ལྟར་འདོད་ཡོན་ལྔའི་ལྷ་མོ་གསང་བར་བྱང་ཆུབ་སེམས་འོད་ཀྱི་ཐིག་ལེ་རིན་པོ་ཆེ་འབར་བ་ཞིག་ཏུ་བསམ་པ་དང་། རོལ་མོ་ནི་ཕྱི་ལྟར་ན་བརྡབ་བརྡུང་འབུད་དཀྲོལ་སོགས་སྒྲ་དབྱངས་སྣ་ཚོགས་ནང་དུ་ལྷ་མོ་པི་ཝཾ་མ་མང་པོས་ཆོས་སྒྲ་སྒྲོགས་པ་གསང་བར་གཉིས་སུ་མེད་པའི་བྱང་ཆུབ་སེམས་ཀྱི་རང་སྒྲ་སེ་གོལ་དང་ཧ་སིད་སོགས་ཀྱིས་མཆོད་པར་བསམ་མོ། །གཉིས་པ་ནི། ནང་སྨན་རག་གཏོར་གསུམ་གྱི་མཆོད་པ། ཕྱི་ལྟར་དམ་རྫས་རྣམས་ཞལ་དུ་སིབ་སིབ་གསོལ་བ་ནང་ལྟར་རང་གི་དུག་གསུམ་ཤ་རུས་གནས་སྦྱང་བ་གསང་བ་ཆོས་ཉིད་སྐྱེ་མེད་ལས་རིག་པའི་ཡེ་ཤེས་རྟོགས་ཏེ་ཉོན་མོངས་དང་རྣམ་རྟོག་སྟོང་ཞིང་ཟད་པར་བསྒོམ་པའམ་ཡང་ན་གོང་དུ་བྱིན་གྱིས་བརླབ་པ་བཞིན་དབུལ་ལོ། །གསུམ་པ་ནི། གསང་བ་སྦྱོར་སྒྲོལ་གྱི་མཆོད་པ་སྟེ་དོན་དབྱིངས་ཡེ་རྟགས་ཡབ་ཡུམ་མཁའ་གསང་ཐབས་ཤེས་མཉམ་པར་སྦྱོར་བའི་བྱང་ཆུབ་སེམས་ཀྱི་འོད་ཟེར་གྱི་སྤྲིན་ཆེན་པོ་འཕྲོ་བས་འདོད་པའི་ཡོན་ཏན་ལྔ་ཡི་རོལ་མོ་བསམ་ཡས་པ་སྤྲོ་བས་རྩ་ཁམས་སོགས་ཀྱི་ལྷ་རྣམས་མཉེས་པར་བྱེད་པ་དང་། དེ་ལས་དགའ་བཞི་ལུགས་འབྱུང་ལྡོག་གི་སྦྱོར་བས་རང་བཞིན་བརྒྱད་ཅུའི་ཀུན་རྟོག་མཐའ་དག་འཕོ་མེད་སྒྲ་གཅན་གྱི་དབྱིངས་སུ་གསོད་པར་བྱེད་པ་རྟོགས་པས་བདག་དང་ཐུགས་རྗེས་གཞན་སྒྲོལ་བ་སྟེ། ཐབས་ཆེན་གསང་བའི་མཆོད་པ་རྨད་དུ་བྱུང་བའོ། །བཞི་པ་དེ་ཁོ་ན་ཉིད་ཀྱི་མཆོད་པ་ནི། སྣང་སྲིད་དག་མཉམ་བདེ་བ་ཆེན་པོ་ཆོས་སྐུ་ཐིག་ལེ་ཉག་གཅིག་ལ་མཆོད་བྱ་མཆོད་ཡུལ་མཆོད་བྱེད་མ་དམིགས་པར་རང་བཞིན་མཉམ་པ་ཉིད་དུ་ཤེས་པ་ནི་ཡུལ་དང་བདེ་ཆེན་ཟུང་འཇུག་རྒྱན་གྱི་མཆོད་པ་དེ་བཞིན་གཤེགས་པ་ཐམས་ཅད་མཉེས་པར་བྱེད་པའི་མཆོད་པའི་རྒྱལ་པོ་སྟེ། སྒྱུ་འཕྲུལ་རྒྱ་མཚོ་ལས། མཆོད་པའི་ཕྱག་རྒྱ་ཆེ་མཆོག་ནི། །སེམས་ཀྱི་རྟོག་ཚོགས་ཀུན་བསྒྲལ་ཏེ། །མཆོད་དང་མཆོད་བྱ་མི་དམིགས་པའི། །རང་བཞིན་ནམ་མཁའི་ངང་དུ་བསྒོམ། །ཞེས་དང་། མདོ་ལས། གང་ལ་མཆོད་པ་ནམ་མཁའ་འདྲ་ཤེས་ཤིང་། །གང་གིས་མི་དམིགས་གང་དུའང་འཛིན་པ་མེད། །དེ་ནི་མཆོད་པ་ཀུན་གྱི་དམ་པ་སྟེ། །ཡེ་ཤེས་གཞལ་མེད་བསམ་ཡས་འཐོབ་པར་འགྱུར། །ཞེས་གསུངས། དེས་ན་མཆོད་ཚོགས་དེ་ཐམས་ཅད་ཀྱང་དབང་བཞི་དང་རྗེས་སུ་འབྲེལ་བར་ལྟ་སྒོམ་དམ་ཚིག་དང་མཐུན་པར་འཇུག་པ་ཡིན་ནོ། །གསུམ་པ་ནི། ཧཱུྃ། སྒེག་དཔའ་འཇིགས་རུང་སོགས་ཏེ། དེ་ཡང་། ཇི་སྐད་དུ། བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་རྗེས་དགྲ་ཟུན་མི་མངའ་ཡང་། །གདུག་པ་འདུལ་ཕྱིར་དུས་ལས་མི་འདའ་བའི། །འཇིགས་བྱེད་ཧེ་རུ་ཀ་ལ་ཕྱག་འཚལ་བསྟོད། །ཅེས་གསུངས་པ་ལྟར། གནས་ལུགས་ཡང་དག་པའི་ཡེ་ཤེས་མཉམ་པ་ཉིད་མངོན་དུ་གྱུར་པས། ཐུགས་དམིགས་མེད་ཀྱི་བྱམས་པ་དང་སྙིང་རྗེ་ཆེན་པོས་འགྲོ་བ་ཀུན་ལ་བུ་གཅིག་པའི་མ་ལྟར་བརྩེ་བའི་རང་བཞིན་ལས་དགྲ་ཟུན་གྱི་རྟོག་པ་ཆ་ཙམ་ཡང་མི་མངའ་མོད། གདུལ་དཀའ་བའི་གདུལ་བྱ་གདུག་པ་ཅན་བདུད་དང་རུ་ཏྲ་ལ་སོགས་པ་རྣམ་སྨིན་རྩུབ་མོས་འཕང་བ་རྣམས་ལ་ལྷག་པར་ཡང་ཐུགས་བརྩེ་བ་ནི་ཆོས་ཉིད་ཀྱིས་ཡིན་པས། གདུག་པ་ཅན་དེ་དག་འདུལ་བའི་ཕྱིར་དུས་ལས་ཡོལ་བ་མེད་པའི་ཐུགས་རྗེའི་ཤུགས་ཆེན་པོ་དང་ལྡན་པ་འཇིགས་བྱེད་ཆེན་པོ་དཔལ་ཧེ་རུ་ཀའི་སྐུ་ནི་རྣམ་པར་སྣང་མཛད་ཀྱི་ངོ་བོ་སྐུ་ལུས་མཐོང་ན་མི་མཐུན་པ་མེད་པ་མཛེས་ཤིང་རྒྱན་གྱིས་བརྒྱན་ཏེ་ཡུམ་དང་འཁྲིལ་བ་སོགས་འཆོར་སྒེག་གི་རྣམ་པས་སྒེག་པ། རིན་འབྱུང་གི་ངོ་བོ་སྐུ་སྟོབས་དང་ལྡན་ཞིང་ཐུབ་པར་དཀའ་ལ་བདུད་བཞི་གདན་དུ་བཏིང་བས་དཔའ་བ། མི་བསྐྱོད་པའི་ངོ་བོ་སྐུ་ཆེ་ཞིང་ཡན་ལག་རགས་པ་མཐོང་བ་ཙམ་གྱིས་འཇིགས་པའི་ཁྲོ་ཉམས་ཀྱི་མི་སྡུག་པ་སྟེ་ཤིན་ཏུ་བཟོད་པར་དཀའ་བའི་གཟི་བྱིན་ཉི་མ་འབུམ་ལས་ཀྱང་ཆེས་ལྷག་པར་འབར་བ། གསུང་ནི་འོད་དཔག་མེད་ཀྱི་ངོ་བོ་ཆགས་དགྱེས་དྲེགས་པའི་རྒྱུ་ལས་བྱུང་བའི་ཧ་ཧ་དང་ཧི་ཧི་ལ་སོགས་པའི་བཞད་མོ་རྒོད་པ། དོན་གྲུབ་ཀྱི་ངོ་བོ་གདུག་པ་ཅན་རྣམས་ཟུངས་ཤིག་དང་རྒྱོབ་ཅིག་ལ་སོགས་པ་ཚིག་རྩུབ་མོས་གཤེ་བ། ཡུམ་མཱ་མ་ཀཱིའི་ངོ་བོ་འབྲུག་སྟོང་དུས་གཅིག་ལ་ལྡིར་བའམ་ཐོག་སྟོང་དུས་གཅིག་ལ་ལྷུང་བ་ལྟ་བུས་ང་རོ་དྲག་པོ་སྒྲོགས་པ་དྲག་ཤུལ་ལམ་འཇིགས་རུང་གི་ཉམས་དང་ལྡན་ཞིང་གཞན་ཡང་ཧཱུྃ་ཧཱུྃ་ཕཊ་ཕཊ་ལ་སོགས་པ་མཐའ་ཡས་པའི་སྔགས་ཚིག་ཀྱི་སྒྲ་སྒྲོགས་པ། ཐུགས་ནི་དམ་ཚིག་སྒྲོལ་མའི་ངོ་བོ་དམིགས་པ་མེད་པའི་ཐུགས་རྗེས་འགྲོ་བ་དྲུག་གི་སེམས་ཅན་རྣམས་རྗེས་སུ་འཛིན་ཅིང་སྲིད་ལས་སྒྲོལ་བར་མཛད་པའི་བརྩེ་བའི་སྙིང་རྗེ་དང་། གོས་དཀར་མོའི་ངོ་བོ་རྔམས་པའམ་ངམ་པ་ནི་ཨུརྦྷུ་ཏའི་སྒྲ་ལས་ངོ་མཚར་བ་ཡ་མ་ཟུང་གི་དོན་ཡིན་པས་ཁྲོ་ཆགས་ཀྱི་ཐུགས་ཚོམ་པ་ལྟ་བུས་ཅི་ཡང་ནུས་པ་དང་། སྤྱན་མའི་ངོ་བོ་ཆོས་ཀྱི་སྐུ་སྤྲོས་པ་དང་མཚན་མའི་སྤྱོད་ཡུལ་ལས་འདས་པ་རྣམ་པར་མི་རྟོག་པའི་རང་བཞིན་ཐུགས་ཞི་བ་ཆེན་པོ་དང་ལྡན་ཞིང་ཇི་ལྟ་ཇི་སྙེད་སོགས་མཁྱེན་པའི་ཡེ་ཤེས་ཆེན་པོའི་སྲོག་དང་ལྡན་པ་སྟེ། གར་དགུའི་ཉམས་ལྡན་ཁྲག་འཐུང་ཁྲོ་བོ་རོལ་པའི་དཀྱིལ་འཁོར་གྱི་ལྷ་ཚོགས་ཡོངས་སུ་རྫོགས་པ་ལ་ཆེ་བའི་ཡོན་ཏན་རྗེས་སུ་དྲན་པའི་སྒོ་ནས་རྡོ་རྗེའི་གླུས་བསྟོད་པ་སྟེ། གློག་གི་ཕྲེང་བ་ལས། སྒེག་པ་དཔའ་བ་མི་སྡུག་པ། །རྒོད་དང་དྲག་ཤུལ་འཇིགས་སུ་རུང་། །སྙིང་རྗེ་རྔམས་དང་ཞི་བ་སྟེ། །གར་དགུའི་ཉམས་དང་ལྡན་པའོ། །ཞེས་དང་། རཏ་གླིང་གཏེར་བྱོན་ཕུར་པ་ཡང་གསང་བླ་མེད་ཀྱི་གཞུང་ལས། བདུད་བཞི་གདན་དུ་བཏིང་བས་དཔའ་དཔའ་འདྲ༔ རྒྱན་དང་ཆ་ལུགས་རྫོགས་པས་སྒེག་སྒེག་འདྲ༔ སྐུ་ཆེ་ཡན་ལག་རགས་པས་འཇིགས་འཇིགས་འདྲ༔ མཚན་དང་དཔེ་བྱད་ལྡན་པས་བརྗིད་བརྗིད་འདྲ༔ཞལ་གཡས་དཀར་ལ་འཛུམ་པས་བཞད་བཞད་འདྲ༔ གཡོན་ཞལ་དམར་ལ་གདངས་བས་གཤེ་གཤེ་འདྲཿ དབུས་ཞལ་མཐིང་ལ་རྔམས་པས་ཁྲོ་ཁྲོ་འདྲ༔ དུག་གསུམ་ཞལ་དུ་གསོལ་བས་རྔམས་རྔམས་འདྲ༔ རྒྱུད་དྲུག་ཐུགས་རྗེས་སྒྲོལ་བས་བརྩེ་བརྩེ་འདྲ༔ ཆོས་སྐུ་མཚན་མ་མེད་པས་ཞི་ཞི་འདྲ༔ འབར་བའི་གར་དགུ་ལྡན་ལ་ཕྱག་འཚལ་བསྟོད༔ ཅེས་གསུངས། དེ་ཡང་ཕྱི་ལྟར་ན་ལྷ་རྣམས་ཀྱི་སྐུ་གསལ་གདབ་པ། ནང་ལྟར་ལྷ་དང་གཉིས་སུ་མེད་པར་བསྟོད་པ། གསང་བ་ཆོས་ཀྱི་སྐུ་སྐྱེ་བ་མེད་པར་ཆོས་ཉིད་ཀྱི་སྐུ་ལྷང་ངེར་རྟོགས་པར་བསྒོམ་པའོ། །དེ་རྣམས་ཀྱིས་བྱིས་པ་དེ་བཟའ་བཏུང་གོས་རྒྱན་གནས་ཁང་སོགས་ལ་ཅི་དགར་སྤྱོད་ཅིང་ཡུལ་ནོར་གྱི་བཅད་རིས་དང་ཁེ་གྲགས་སྒྲུབ་པ་རྣམས་སྦྱོང་། འབྲས་བུ་སངས་རྒྱས་པའི་ཚེ་དེ་ཉིད་དུ་མཆོད་པའི་བཀོད་པ་མཐའ་ཡས་པའི་སྤྲིན་རྟག་ཏུ་འབྱུང་བ་དང་ཕྱག་གི་གནས་མཆོད་པའི་ཞིང་བླ་ན་མེད་པར་འགྱུར་བའི་རྟེན་འབྲེལ་སྒྲིག རྫོགས་རིམ་གྱི་ཚེ་རིག་པ་བརྟུལ་ཞུགས་ཀྱི་རོལ་རྩེད་ལ་ཅི་དགར་སྤྱོད་པའི་གཞི་འདིང་བས་སྨིན་བྱེད་དུ་འགྲོ་བ་ཡིན་ནོ། །བཞི་པ་དམིགས་པའི་གཙོ་བོ་ལྷའི་སྣང་ཞེན་ལ་བསླབ་པ་ནི། གཏེར་གཞུང་རྩ་བར། དེ་ལྟར་ལས་ཀྱི་རིམ་པ་ཡིས༔ དཔལ་ཆེན་འཁོར་བཅས་གསལ་བཏབ་ནས༔ གྱད་དུ་གྱུར་པའི་ཏིང་འཛིན་བརྟན༔ ང་རྒྱལ་གཅིག་པུ་ཟླ་མེད་པ༔ ཡེ་ཤེས་མཆོག་གི་གཟི་བསྐྱེད་ནས༔ གཅིག་པུ་གཉིས་སུ་མ་ཡིན་པའི༔ གོམས་པ་མི་འཕྲོག་གྱུར་པ་ན༔ གཞི་ལམ་འབྲས་གསུམ་དབྱེར་མེད་པའི༔ དག་པ་དྲན་པས་མཚམས་སྦྱར་ཏེ༔ བསྐྱེད་རིམ་རབ་ཏུ་བརྟན་པར་བྱ༔ ཞེས་གསུངས་པས། འདི་ལ་དབྱེ་ན་བཞི། རྣམ་པ་གསལ་བ། ང་རྒྱལ་བརྟན་པ། རྣམ་དག་དྲན་པ། ཞར་བྱུང་སྲོག་སྡོམ་གཟེར་བཞིའི་གནད་བསྟན་པའོ། །དང་པོ་ནི། པདྨའི་ལམ་རིམ་ཆེན་མོ་ལས། ཐ་མལ་གྱི་ཞེན་པ་སྦྱང་བ་ལ། རྣམ་པ་གསལ་བར་བསྒོམས་པས་ཐུན་མོང་གི་ཡོན་ཏན་ཐམས་ཅད་འབྱུང་སྟེ། གདན་ཆེ་ལ་བརྟན་པས་ཚེ་རིང་། ཞབས་བགྲད་ཁམ་ཆེ་བས་སྡོད་ཚུགས། སྐུ་ལང་ཚོ་རྒྱས་ཤིང་ཡིད་དུ་འོང་བ་བསྒོམས་པས་ནད་ཉུང་ཁམས་བཟང་། ཕྱག་མཚན་གསལ་བས་བསམ་པ་འགྲུབ། རྒྱན་ཚང་བས་འབྱོར་པ་ལྡན། ཞལ་དང་མཆེ་བ་སྐུ་མདོག་གསལ་བར་བསྒོམས་པས་ཐམས་ཅད་བཀའ་ཉན་ཅིང་སྣང་བ་དབང་དུ་འདུས་པའི་རྟེན་འབྲེལ་ལོ། །དེས་ན་གཙོ་འཁོར་སྐུ་མདོག་ཞལ་ཕྱག་ཐམས་ཅད་མ་ལུས་ཤིང་གསལ་བར་བསྒོམས་པས་བར་ཆད་གང་གིས་ཀྱང་མི་ཚུགས་ཤིང་ཐུན་མོང་གི་ཡོན་ཏན་ཐམས་ཅད་འབྱུང་། གསལ་བ་གང་ཡང་མེད་ན་ཡོན་ཏན་གང་ཡང་མི་འབྱུང་ངོ་། །ཞེས་གསུངས་པས། ཐ་མལ་སྣང་ཞེན་རགས་པ་སྦྱོང་བའི་ཕྱིར། གོང་དུ་སྨོས་པ་ལྟར་གྱི་ལས་ཀྱི་རིམ་པས་དཔལ་ཆེན་པོ་རྟེན་དང་བརྟེན་པའི་དཀྱིལ་འཁོར་གྱི་འཁོར་ལོ་རྣམ་པ་སྤྱི་ལ་སེམས་འཛིན། དེ་གོམས་པ་ན་ཐ་མལ་གྱི་རྣམ་རྟོག་ཕྲ་བ་འཇོམས་པའི་ཕྱིར་སྐུ་ཡི་ཆ་ཤས་ནས་རྒྱན་ཆ་ཕྲ་མོའི་བར་དུ་སེམས་བཟུང་ནས་རིམ་ཅན་དུ་གསལ་བཏབ། བྱིང་རྒོད་ཀྱི་སྐྱོན་བསལ་བ་སོགས་ཏིང་ངེ་འཛིན་གྱི་ཡན་ལག་རྣམས་ཚོགས་པའི་སྒོ་ནས་རིམ་གྱིས་གསལ་བརྟན་གྱི་ཚད་བརྒྱད་དང་ལྡན་པའི་བར་བསྒོམས་ཏེ། དེ་ལ་གསལ་བའི་ཚད་བཞི་ནི། སྤྱན་ཀྱི་དཀར་ནག་ཚུན་ཆད་མ་འདྲེས་པར་གསལ་བས་ས་{སལ}ལེ། རིག་པའི་གསལ་ངར་དང་བྲལ་བའི་བྱིང་ཉམས་ཅན་མ་ཡིན་པ་གསལ་སྟོང་སིང་བག་དང་བཅས་པའི་རིག་པའི་ངར་དང་ལྡན་པས་སིང་ངེ་། སེམས་མེད་བེམ་པོའི་རྣམ་པ་ལྟ་བུ་མ་ཡིན་པར་བ་སྤུའི་ཁུང་བུ་དང་དབུ་སྐྲའི་ཉག་མ་ཚུན་ཆད་རྣམ་པར་ཐམས་ཅད་མཁྱེན་པའི་ཡེ་ཤེས་ཀྱིས་ཟིན་པའི་དབང་ཤེས་དྭངས་པའི་ཡོན་ཏན་བརྒྱ་ཕྲག་ཏུ་འཆར་ཞིང་བཀྲ་ཧྲིག་གེར་བཞུགས་པས་ལྷག་གེ། དེ་ལྟ་བུའི་སྐུ་དེ་ཡང་ཡིན་ནོ་དང་ཡོད་དོ་ཙམ་གྱི་རྗེས་དཔག་གི་བློ་རྟོག་མ་ཡིན་པར་ཡིད་ངོར་མངོན་སུམ་ལྟ་བུར་འཆར་བས་ལྷང་ངེ་བ་སྟེ་བཞིའོ། །བརྟན་པའི་ཚད་བཞི་ནི། ལེ་ལོ་དང་བརྗེད་ངེས་སོགས་ཀྱིས་མི་གཡོ། རབ་རིབ་དང་མོག་མོག་པོར་གྱུར་པ་སོགས་ཀྱིས་མི་འགྱུར། ཡུན་རིང་དུ་མཉམ་པར་བཞག་ཀྱང་རྣམ་རྟོག་ཕྲ་མོས་ཀྱང་མི་བརྫི་པས་མངོན་པར་མི་འགྱུར། སྐུ་མདོག་དང་ཞལ་ཕྱག་བྱོན་བཞུགས་འོད་ཟེར་སྤྲོ་བསྡུ་སོགས་ཇི་ལྟར་བསྒོམ་ཡང་དེ་ལྟར་འགྱུར་བ་ཅི་ཡང་བསྒྱུར་དུ་བཏུབ་པ་སྟེ་བཞིའོ། །དེ་ལྟར་ཡང་ཡང་གོམས་པས་གཡོ་ཐོབ་གོམས་བརྟན་མཐར་ཕྱིན་གྱི་ཉམས་ལྔ་རྫོགས་ནས་ཡུལ་གསུམ་གྱད་དུ་གྱུར་ཏེ་ལུས་ཐ་མལ་དུ་འཛིན་པའི་མངོན་ཞེན་ལྷའི་སྐུར་རྫོགས་པར་འགྱུར་ཏེ། དང་པོ་ཡིད་ཀྱི་ཡུལ་དུ་གང་བསྒོམ་པའི་ལྷ་སྐུ་ཕྱག་མཚན་རྒྱན་ཆ་ལུགས་དང་བཅས་པ་གསལ་ལ་མ་འདྲེས་པར་མེ་ལོང་གི་གཟུགས་བརྙན་ལྟར་འཆར་བའི་གསལ་སྣང་རྫོགས། གཉིས་པ་སེམས་ཤིན་ཏུ་སྦྱངས་པའི་མཐུ་ལས་ཡིད་དཔྱོད་མ་ཡིན་པར་མིག་སོགས་དབང་པོའི་སྤྱོད་ཡུལ་དུ་ལྷའི་ཕྱག་རྒྱ་མངོན་སུམ་དུ་ཤར། གསུམ་པ་སེམས་ཀྱིས་ལུས་འབྱོངས་ཏེ་ལྷ་ཉིད་རགས་པ་ལུས་ཀྱི་ཡུལ་དུ་གསལ་བས་ལུས་ཤིན་ཏུ་སྦྱངས་པ་ཐོབ་པའི་ལྟས་རེས་གཞན་ངོར་ལྷ་སྐུར་སྣང་བ་དང་། གཞན་སྣང་ཟིལ་གྱིས་གནོན་ཅིང་རང་སྣང་དབང་དུ་བསྒྱུར་བས་ལས་དང་དངོས་གྲུབ་ཐོགས་མེད་དུ་སྒྲུབ་ནུས་པ་སོགས་ཏིང་ངེ་འཛིན་གྱི་སྤྱོད་ཡུལ་བསམ་གྱིས་མི་ཁྱབ་པའི་ཆོ་འཕྲུལ་ཆེན་པོ་ཅིར་ཡང་འཆར་ཞིང་སྐུ་ཡི་སྲོག་འཕྲོག་པས་མཐར་ཐུག་དཔལ་ཆེན་པོའི་སྐུ་མི་ཟད་པ་རྒྱན་གྱི་འཁོར་ལོ་དང་དབྱེར་མེད་པའི་དངོས་གྲུབ་ཐོབ་པར་འགྱུར་ཏེ། དཔལ་ཆེན་ཞལ་ལུང་ལས། ཡེ་ཤེས་ལྷ་ཡི་ཕྱག་རྒྱ་ཀུན། །དང་པོ་ཡིད་ཀྱི་ཡུལ་དུ་གསལ། །སེམས་ཉིད་ཤིན་ཏུ་སྦྱངས་པའི་མཐར། །རང་བཞིན་དབང་པོའི་ཡུལ་དུ་གསལ། །མཐར་ནི་བདེན་གཉིས་དབྱེར་མེད་ཀྱིས། །ལུས་སེམས་ཤིན་སྦྱངས་ཐོབ་པའི་ལྷ། །ལུས་ཀྱི་ཡུལ་དུ་མངོན་སུམ་གསལ། །ཞེས་དང་། ལམ་རིམ་ཡེ་ཤེས་སྙིང་པོ་ལས། དེ་ལྟར་ཏིང་འཛིན་གཟེར་ལ་བརྟེན་ནས་ཀྱང་༔ ཡིད་ཀྱི་ཡུལ་དུ་མ་འདྲེས་གསལ་སྣང་རྫོགས༔ དབང་པོའི་ཡུལ་དུ་ཕྱག་རྒྱ་མངོན་སུམ་ཤར༔ ལུས་ཀྱི་ཡུལ་དུ་ཤིན་སྦྱངས་ཐོབ་པའི་ལྟས༔ གཞན་སྣང་དབང་བསྒྱུར་ཆོ་འཕྲུལ་ཅིར་ཡང་འཆར༔ ཧེ་རུ་ཀ་དཔལ་སྐུ་ཡི་དངོས་གྲུབ་ཐོབ༔ ཅེས་གསུངས་སོ། །གཉིས་པ་ནི། པདྨའི་ལམ་རིམ་ལས། གསལ་རུང་མི་གསལ་རུང་ལྷ་རང་ཡིན་ནོ་སྙམ་པའི་བསམ་པ་བྱ་ཞིང་། ཐ་མལ་གྱི་སྣང་བ་མེད་པར་བྱའོ། །ཞེས་གསུངས་པས། ཐ་མལ་གྱི་འཛིན་ཞེན་ལྡོག་པའི་དོན་དུ་ང་རྒྱལ་ལ་བསླབ་པར་བྱ་སྟེ། བདག་ལྷ་དངོས་མིན་གྱི་བདག་གིས་ལྷ་དེ་བསྒོམ་པ་ཡིན་སྙམ་པ་དང་། ལྷ་དེ་དངོས་མ་ཡིན་གྱི་དེའི་རྣམ་པ་ཙམ་ཞིག་བདག་གི་ཡིད་ཡུལ་དུ་བྱས་པ་ཡིན་ནོ་སྙམ་པ་ལྟ་བུ་མ་ཡིན་པ། རང་གི་སེམས་ཉིད་གདོད་མ་ནས་དབྱིངས་ཡེ་སྣང་སྟོང་ཟུང་འཇུག་དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཏེ་ཟག་མེད་འབྲས་ཆོས་ལྔ་དང་འདུ་འབྲལ་སྤང་བ་ལྷག་པ་དོན་དམ་པའི་བ དེན་པ་ཉིད་ཡེ་ནས་ཆོས་ཉིད་དོན་གྱི་ལྷ་ཡིན་ཞིང་། དེའི་རང་རྩལ་འགག་པ་མེད་པར་རྟེན་དང་བརྟེན་པའི་འཁོར་ལོ་ཤར་བ་ཡིན་པས་ན། སེམས་ཉིད་སྤངས་པའི་ཕ་རོལ་ན་ལྷ་མེད། ལྷ་སྤངས་པའི་ཕ་རོལ་ན་སེམས་ཉིད་མེད། སེམས་ཉིད་དང་ལྷ་སྐུ་གཉིས་མེད་གཞི་དུས་ཀྱི་དཔལ་ཆེན་པོ་ཉིད་ལམ་བསྐྱེད་རྫོགས་ཟབ་མོས་མངོན་དུ་བྱས་ཏེ། འབྲས་དུས་ཀྱི་སྐྱོན་ཀུན་ཟད། ཡོན་ཏན་ཀུན་རྫོགས། སྲིད་ཞིའི་རྒུད་པ་མཐའ་དག་འཇོམས་པའི་མཁྱེན་བརྩེ་ནུས་གསུམ་གྱི་མངའ་བདག་ཤྲཱི་ཧེ་རུ་ཀ་དངོས་ཉིད་ངའོ་སྙམ་པའི་ངེས་ཤེས་བརྟན་པོས་ང་རྒྱལ་བཟུང་བ་སྟེ། གོང་འོག་ཏུ་བསྟན་པའི་གཞི་འབྲས་སྦྲེལ་བའི་ང་རྒྱལ་འཛིན་ཚུལ་རྣམས་ཀྱི་དོན་ཡང་འདིར་ཚང་ལ། དེ་ཉིད་གཉུག་མར་ཁྱེར་ཤེས་ན་ཡང་དག་པའི་ཉེ་ལམ་དུ་འགྱུར་བ་ཡིན་ནོ། །གསུམ་པ་ནི། པདྨའི་ལམ་རིམ་ཆེན་མོར་རྟགས་དང་དོན་གྱི་རྣམ་དག་གཉིས་གསུང་པའི་དང་པོ་ནི་གཞུང་དེ་ཉིད་ལས། དབུ་གསུམ་ཕྱག་དྲུག་ཞབས་བཞི་ལ་སོགས་པར་བསྒོམས་པ་ན། དབུ་གསུམ་ནི་སྐུ་གསུམ། ཕྱག་དྲུག་ནི་ཡེ་ཤེས་དྲུག ཞབས་བཞི་ནི་རྫུ་འཕྲུལ་གྱི་རྐང་པ་བཞི་དྲན་པར་བྱའོ། །སྐུ་མདོག་ནི་དཀར་པོ་སྐྱོན་གྱིས་མ་གོས་པ། སེར་པོ་ཡོན་ཏན་རྒྱས་པ། དམར་པོ་ཐུགས་རྗེས་ཆགས་པ། ལྗང་གུ་ཕྲིན་ལས་ཐོགས་མེད། མཐིང་གའམ་ནག་པོ་ཆོས་ཉིད་མི་འགྱུར་བའོ། །ཕྱག་མཚན་ནི། རྡོ་རྗེ་འདུས་མ་བྱས། འཁོར་ལོ་ཉོན་མོངས་གཅོད་པ། རིན་པོ་ཆེ་ཡོན་ཏན་འབྱུང་བ། པདྨ་སྐྱོན་གྱིས་མ་གོས་པ། རྒྱ་གྲམ་མམ་རལ་གྲི་ཕྲིན་ལས་ཐོགས་པ་མེད་པའོ། །དེ་བཞིན་དུ་རང་རང་གི་སྒྲུབ་ཐབས་གང་ཡིན་པའི་གཞུང་བཞིན་བྱས་པས་ཡོན་ཏན་འབྱུང་ངོ་། །ཞེས་གསུངས་པས། དོན་དམ་པར་སངས་རྒྱས་རྣམས་ནི་ཆོས་ཀྱི་སྐུ་སྤྲོས་བྲལ་ཐིག་ལེ་ཉག་གཅིག་གཟུང་འཛིན་མཚན་མའི་སྤྱོད་ཡུལ་ལས་འདས་པ་ཡིན་པས། དེ་ལ་ཞལ་ཕྱག་སོགས་རང་མཚན་པར་གྲུབ་པ་རྡུལ་ཙམ་མི་མངའ་མོད་ཀྱི་ཤེས་རབ་དང་སྙིང་རྗེ་ཆེན་པོ། ཐབས་མཁས་ཀྱི་སྤྱོད་པས་འགྲོ་བ་འདུལ་བའི་ཕྱིར་གོང་དུ་སྨོས་པ་ལྟར་ཡེ་ཤེས་ཉིད་རྣམ་པ་ཐམས་ཅད་པར་འཆར་བའི་ཚུལ་གྱིས་རྟེན་དང་བརྟེན་པའི་དཀྱིལ་འཁོར་གྱི་རྣམ་པ་དེ་དང་དེར་ཤར་བ་སྟེ། དེ་ཡང་གཉུག་མ་ཆོས་ཉིད་ཀྱི་སྟེང་དུ་གདོད་ནས་སངས་རྒྱས་ཀྱི་ཡོན་ཏན་དེ་རྣམས་གཞི་ལམ་འབྲས་བུའི་ཚུལ་དུ་རང་བཞིན་ལྷུན་གྲུབ་ཏུ་བཞུགས་པའོ་སྙམ་དུ་དག་པ་དྲན་པར་བྱའོ། །གཉིས་པ་དོན་གྱི་རྣམ་དག་ཀྱང་། དེ་ཉིད་ལས། དེ་དག་ཀྱང་བདེན་དངོས་སུ་གྲུབ་པ་མེད་པས། རང་བཞིན་སྟོང་པ་ཉིད་དུ་ཤེས་པར་བྱའོ། །དེས་ན་གདངས་མ་འགགས་པ་ལྷ་རུ་ལམ་མེ། གཤིས་མ་གྲུབ་པར་སྟོང་པར་ཆམ་མེ། ངོ་བོ་གསལ་སྟོང་གཉིས་མེད་དུ་ལྷང་ངེ་། དེ་ལྟར་གཉིས་མེད་དུ་བསྒོམས་པས་ཚོགས་གཉིས་རྫོགས་ནས་འབྲས་བུ་སངས་རྒྱས་ཐོབ་པ་ཡིན་ནོ། །ཞེས་གསུངས། བཞི་པ་ནི། སྤྱིར་གསང་བ་ཡོངས་རྫོགས་འདུས་པའི་རྒྱུད་ལས། ཡེ་ཤེས་འཇིག་རྟེན་གང་ལ་ཡང་། །སྲོག་སྡོམ་གཟེར་བཞིས་མ་ཐེབ་ན། །ནམ་ཡང་དོན་མེད་ཡུག་པ་རྐྱང་། །ཡོངས་རྫོགས་དཔལ་གྱི་སྲོག་འཕྲོག་ཐབས། །གཅིག་ཤེས་པ་ཡིས་ཀུན་སྲོག་ཐོབ། །ཅེས་སོགས་གསུངས་པ་ལྟར། བསྐྱེད་རིམ་སྤྱིའི་ཆིངས་སུ་སྲོག་སྡོམ་གཟེར་བཞིས་གདབ་པ་གལ་ཆེ་སྟེ། དེའང་སྐུ་ཕྱག་རྒྱའི་གསལ་སྣང་གིས་ཡུལ་གསུམ་གྱད་དུ་གྱུར་པ་ཏིང་ངེ་འཛིན་དམིགས་པའི་གཟེར། གསུང་ཐུགས་སྲོག་སྔགས་འཁོར་ལ་སེམས་རྩེ་གཅིག་ཏུ་གཏད་པ་སྙིང་པོ་སྔགས་ཀྱི་གཟེར། ཐུགས་སྟོང་གསལ་འགགས་པ་མེད་པའི་ཆོས་ཉིད་རང་སེམས་དང་གཉིས་སུ་མེད་པ་དེ་ཉིད་ལྷའི་རྣམ་པར་ཤར་བ་ལས་བསྒྲུབ་བྱའི་ལྷ་རྟག་རྟག་པོ་གུད་ན་མེད་པར་ཤེས་པར་ཤེས་པ་དགོངས་པ་མི་འགྱུར་བའི་གཟེར། ཕྲིན་ལས་རྣམ་བཞི་སོགས་དམིགས་པའི་མདེ་ཁའམ་རྣོ་སོ་གང་ལ་གང་དགོས་སུ་སྒྱུར་བ་འཕྲོ་འདུ་སྣ་ཚོགས་པའི་གཟེར་དང་བཞིའི་མན་ངག་གནད་ཐོག་ཏུ་ཁེལ་ན་སྐུ་དངོས་སུ་མཐོང་། ངག་ལ་བདེན་པ་འགྲུབ། ཆོས་ཉིད་ལ་རང་དབང་ཐོབ་སྟེ་གསང་བ་གསུམ་གྱི་སྲོག་འཕྲོག རིག་པའི་རྩལ་འབྱུང་། ཕྲིན་ལས་རྣམ་བཞིར་རང་དབང་བསྒྱུར་བར་གསུངས་པས། མོས་སྒོམ་གྱི་སྐབས་འདིར་གསལ་སྣང་ཇི་བཞིན་པ་འགྲུབ་དཀའ་ཡང་། ཐོག་མ་ནས་བློ་མ་དྲེད་པ་གལ་ཆེ་བས་བརྩོན་འགྲུས་བསྐྱེད་ལ་ནན་ཏན་དུ་གོམས་འདྲིས་བྱ། རྩལ་སྦྱང་བའི་ཕྱིར་སྣང་སྲིད་དག་པ་རབ་འབྱམས་ཀྱི་བསྐྱེད་རིམ་གང་སྣང་ལྷ་སྐུ་ཕྱག་རྒྱ་ཆེན་པོ་ངོ་བོ་སྟོང་པ། རང་བཞིན་བདེ་བ། རྣམ་པ་གསལ་བ་ལ་ཡང་ཡང་བསླབ། ཁྱད་པར་དུའང་ལྟ་དགོངས་ཀྱི་གཟེར་ནི་ཤིན་ཏུ་གཅེས་ཏེ། རྩ་རྒྱུད་པད་སྡོང་བརྩེགས་པ་ལས། དེ་ཉིད་ལྡན་པའི་རྣལ་འབྱོར་གྱིས༔ དུར་ཁྲོད་འདྲེ་ངན་བསྒྲུབ་གྱུར་ཀྱང་༔ མཆོག་དང་ཐུན་མོང་འབྲས་བུ་གང་༔ ཅི་འདོད་རང་བྱུང་ལྷུན་གྲུབ་འབྱུང་༔ དེ་ཉིད་མ་རྟོག་ཨ་འཐས་བློས༔ ཡེ་ཤེས་སེམས་དཔའ་བསྒྲུབ་གྱུར་ཀྱང་༔ གནས་སྐབས་བདེན་འབྲས་ཕྲའུ་ལས༔ ཡང་དག་འབྲས་བུ་སྲིད་མཐའ་ཙམ༔ ཞེས་གསུངས་པས་བསྐྱེད་རིམ་ཙམ་དུ་མ་ཟད་འཁོར་འདས་ཀྱི་སྣང་ཆ་ཐམས་ཅད་རྟོག་པས་བརྟགས་པ་ཁོ་ན་ཡིན། དེ་ཡང་ཉི་མ་དང་འོད་ཆུ་དང་རླན་བཞིན་རིག་པའི་རང་རྩལ་ལས་གཞན་དུ་གྲུབ་པ་རྡུལ་ཙམ་མེད། རང་རིག་ཐིག་ལེ་ཉག་གཅིག་གི་ངང་དུ་ཆོས་ཐམས་ཅད་ཡེ་རྫོགས་ཆེན་པོར་གྲུབ་པས་སླར་སྟོང་པས་རྒྱས་འདེབས་མི་དགོས། རིག་པའི་ངོ་བོ་ལ་སྐྱེ་འགག་གནས་གསུམ་གྱི་མཐའ་ཐམས་ཅད་དང་བྲལ་བས་ཅིར་ཡང་མ་ཡིན་པ་ལ་ཅིར་ཡང་འཆར་བ། ཤར་ཙམ་ནས་དངོས་པོ་མཚན་མར་མ་གྲུབ་ཀྱང་སྣང་ངོ་ལ་དོན་བྱེད་ནུས་པས་མ་བསྐྱེད་ལྷུན་རྫོགས་ཀྱི་དཀྱིལ་འཁོར། ཟང་ཐལ་གྱི་ཡེ་ཤེས་རང་གནས་པ་ལ་ནམ་ཡང་འཕོ་འགྱུར་མེད་པས་འཛིན་མེད་ཅོག་བཞག་གི་ཆོས་སྐུ་འདི་ལྟར་སྣང་བའི་ཆོས་ཐམས་ཅད་བསྐྱེད་རྫོགས་ཟུང་འཇུག་འབའ་ཞིག་ལས་མི་འདའ་བ་གཤིས་ལུགས་ཀྱི་སྣང་སྟོང་ཟུང་འཇུག་ལ་རིག་ཐོག་ཏུ་མྱོང་བ་ཐོན་ནས་གཅིག་ཤེས་པས་འཁོར་འདས་ཀུན་གྱི་སྟོང་སྲོག་ཐོབ་པ་ཉིད་བསྐྱེད་རྫོགས་གང་གིའང་སྙིང་པོ་སྟེ། རྩེ་ལེ་སྣ་ཚོགས་རང་གྲོལ་གྱི་གསུངས་ལས། སྣང་གྲགས་གསལ་ཆའི་གདངས་ཀུན་བསྐྱེད་རིམ་སྟེ། །ཨ་འཐས་འཛིན་ཞེན་སྤངས་པ་རྫོགས་རིམ་ཉིད། །ཡེ་ནས་དབྱེར་མེད་ཡིན་ལ་ཡིན་བཞིན་ཀློང་། །བསྐྱེད་རྫོགས་ཟུང་འཇུག་ཉམས་ལེན་ཡེངས་མེད་འབུངས། །ཞེས་གསུངས་པ་ལྟ་བུའི་གནད་གསང་མ་རྟོགས་ན་ནམ་དུ་ཡང་བསྐྱེད་རྫོགས་ལ་མཚན་རྟོག་གི་གོལ་ས་ཆོད་པའི་དུས་མེད་པས་རབ་རྟོགས་པ། འབྲིང་ཉམས་མྱོང་། ཐ་མ་གོ་བ་ཕྱིན་ཅི་མ་ལོག་པས་ངེས་ཤེས་རྙེད་པ་ཙམ་ཅི་ནས་གལ་ཆེའོ། །ཞེས་རྗེ་བླ་མ་རྡོ་རྗེ་འཆང་ཡོངས་རྫོགས་བསྟན་པའི་ཉི་མ་གཅིག་པུར་གྱུར་པ་དེས་བསྙེན་སྒྲུབ་སྤྱིར་གཅེས་སུ་འདོམས་པར་མཛད་པ་ཡིན་ལ། ཨོ་རྒྱན་དུས་གསུམ་མཁྱེན་པས་ཀྱང་བདེ་འདུས་རྩ་སྒྲུབ་ལས། དེ་ལྟར་སེམས་ཀྱི་ངོ་བོ་དེ༔ མ་རྟོགས་འཁྲུལ་པ་འཁོར་བ་ཡིན༔ དེ་ཤེས་རྟོགས་པ་མྱ་ངན་འདས༔ ལྷ་སྐུ་སེམས་ཀྱི་རང་རྩལ་ཏེ༔ དངོས་པོར་བཟུང་ན་འཁྲུལ་བའི་ཕྱིར༔ ལྷ་ཡང་སེམས་ཉིད་ཆོས་སྐུར་གསལ༔ སྔགས་ནི་སྨྲ་བརྗོད་བྲལ་བའི་ཕྱིར༔ ཕྱི་ནང་རླུང་གི་རྒྱུ་བ་ཡང༔ སྨྲས་ཚད་གྲགས་སྟོང་བརྗོད་མེད་ཡིན༔ གདོད་ནས་དག་པའི་རིག་པ་འདི༔ ཡེ་ནས་ཆོས་སྐུར་གནས་པ་ལ༔ དབུལ་པོའི་ཁྱིམ་གྱི་ས་འོག་ན༔ གནས་པའི་ནོར་བུ་རིན་ཆེན་བཞིན༔ ངོ་མ་ཤེས་པར་འཁོར་བར་འཁྲུལ༔ ངོ་སྤྲོད་དེ་ངོ་ཤེས་པ་ནི༔ ཆོས་དབྱིངས་ཡེ་ཤེས་རྟོགས་པ་སྟེ༔ སངས་རྒྱས་ཞེས་སུ་གྲགས་པའོ༔ ཞེས་གསུངས་པ་བཞིན་ཤེས་པར་བྱའོ། །གཉིས་པ་གསུང་བཟླས་པ་སྔགས་གྱི་རྣལ་འབྱོར་ལ་གསུམ། རིགས་བདག་བླ་མ་ཧེ་རུ་ཀ་ལ་བརྟེན་ནས་བསྙེན་པ། ཡི་དམ་ཁྲོ་བོ་ལ་བརྟེན་ནས་སྒྲུབ་པ། གཉིས་ཀ་ལ་བརྟེན་ནས་ཚེ་སྒྲུབ་པའི་ལས་སྦྱོར་རོ། དང་པོ་ལ་གཉིས། བསལ་བའི་སྔོན་དུ་ལམ་དབང་བླང་བ་དང་། ཇི་ལྟར་བསྙེན་པའི་ཚུལ་ལོ། །དང་པོ་ནི། སྤྱིར་དབང་གི་ངོ་བོ་ཐོབ་བྱ་རང་གནས་ཀྱི་ཡེ་ཤེས་མངོན་དུ་སྐྱེས་པའམ་སྐྱེ་ངེས་ཀྱི་ནུས་རུང་དུ་སྨིན་པར་བྱེད་པ་སྟེ། ཧེ་རུ་ཀ་འདུས་པའི་རྒྱུད་ལས། གང་གིས་གང་ལ་དབང་བསྐུར་བས། །རྒྱུད་དག་ནུས་པ་ཐོབ་ཕྱིར་དབང་། །ཞེས་གསུངས། ངེས་ཚིག་ཨ་བྷི་ཥིཉྩའི་སྒྲ་ལས་མངོན་པར་གཏོར་བའམ་བླུགས་པས་ན་དབང་སྟེ། སྦྱང་བྱའི་དྲི་མ་འཁྲུད་པའམ་གཏོར་ཞིང་ལམ་སྒོམ་རུང་དང་། འབྲས་བུ་ཐོབ་རུང་གི་ནུས་པ་ཁྱད་པར་ཅན་རྒྱུད་ལ་འཇོག་པའི་ཕྱིར་ཏེ་དགྱེས་རྡོར་ལས། གཏོར་དང་བླུགས་པ་ཞེས་བྱ་བ། །དེས་ན་དབང་ཞེས་བརྗོད་པར་བྱ། །ཞེས་གསུངས། དབྱེ་ན་རྒྱུ་དང་ལམ་དང་འབྲས་བུའི་དབང་གསུམ་སྟེ། དང་པོ་སློབ་མ་གང་ཞིག་སྔོན་ཆད་རྡོ་རྗེ་ཐེག་པའི་དཀྱིལ་འཁོར་དུ་ཞུགས་མ་མྱོང་བ་ཞིག རྡོ་རྗེ་སློབ་དཔོན་མཚན་ལྡན་གྱིས་དང་པོར་དཀྱིལ་འཁོར་དུ་བཅུག་ནས་དེའི་རྒྱུད་སྨིན་པར་བྱས་པའོ། །གཉིས་པ་དེ་ལྟར་ཞུགས་ཤིང་ཐོབ་ནས་བཟུང་ས་བཅུའི་རྒྱུན་མཐའ་ལ་ཐུག་གི་བར་དུ་རྡོ་རྗེ་སློབ་དཔོན་ལས་སམ་བདག་འཇུག་སོགས་ལ་བརྟེན་པ་གང་ཡིན་ཡང་འདྲ་སྟེ་བར་སྐབས་དེ་དག་ཏུ་དབང་ནོད་པ་ཐམས་ཅད་དོ། །གསུམ་པ་རྒྱུན་མཐའི་གནས་སྐབས་སུ་འོག་མིན་ཆེན་པོར་སྟོན་པ་ལོངས་སྤྱོད་རྫོགས་པའི་སྐུ་ལས་གསང་བ་ཟབ་མོའི་དབང་གསུམ་ནོད་པ་ལ་བརྟེན་ནས་སྐབས་དེར་སྟོན་འཁོར་དགོངས་པ་དབྱེར་མེད་དུ་བྱེད་པའོ། །དེ་ལ་སྐབས་འདིར་ནི་ལམ་དབང་ཟབ་མོ་ཏིང་ངེ་འཛིན་གྱིས་ལེན་པ་སྟེ། དེ་ལ་རྒྱུད་སྡེ་སོ་སོའི་དགོངས་པས་དབང་བསྐུར་གྱི་བབས་མི་འདྲ་བ་དུ་མ་འབྱུང་ཡང་སྔགས་བླ་མེད་ཀྱི་སྐབས་འདིར་གནས་སྐབས་བཞིའི་དྲི་མ་སྦྱོང་ཞིང་། ལམ་བཞི་ཉམས་སུ་ལེན་པ་དང་། སྐུ་བཞིའམ་རྡོ་རྗེ་བཞིའི་འབྲས་བུ་ཐོབ་པར་བྱ་བའི་ཕྱིར་ངོ་བོ་ནི་དབང་བཞིར་འདུ་བ་ཡིན་ཞིང་། དེ་ལའང་གཞི་རང་བཞིན་ལྷུན་གྲུབ་ཀྱི་དཀྱིལ་འཁོར་ཆེན་པོ་ཕུང་ཁམས་སྐྱེ་མཆེད་ཀྱི་འཆར་གཞི་བདེ་གཤེགས་སྙིང་པོའི་རང་བཞིན་གཉུག་མའི་སྒོ་གསུམ་ཡེ་ཤེས་དང་བཞི་བུམ་དབང་སོགས་བཞིའི་ངོ་བོར་ཡེ་ནས་གནས་པ་ཉིད་སྔར་རྒྱུ་དབང་ཟབ་མོས་སྨིན་པར་བྱས་པ་གང་ཞིག སྐབས་འདིར་ལམ་དབང་ཏིང་ངེ་འཛིན་གྱིས་གསོས་བཏབ་ནས་བསྙེན་སྒྲུབ་ཡན་ལག་བ ཞི་སོགས་ལ་བརྩོན་པས་ཡེ་ཤེས་གོང་དུ་འཕེལ་ཏེ་མཐར་འབྲས་སྐུ་བཞིར་སྦྱོར་བར་བྱེད་པས་གཞི་ལམ་འབྲས་བུའི་དབང་ཞེས་གནས་སྐབས་སུ་བཏགས་པ་ཙམ་ལས་རང་བཞིན་ཆོས་ཉིད་གཅིག་གི་ངོ་བོར་དབྱེར་མེད་པར་གདོད་ནས་གྲུབ་པ་ཡིན་ཏེ་དབང་མཆོག་རྒྱལ་པོའི་རྒྱུད་ལས། དབང་མཆོག་རང་ལ་མེད་གྱུར་ན། །བསྐུར་བས་འཐོབ་པར་ག་ལ་འགྱུར། །བྲ་སྲན་འབྲས་སུ་དབང་བསྐུར་ཡང་། །དེ་ལ་འབྲས་ཀྱི་དངོས་སྣང་མེད། །ཅེས་གསུངས། དེ་ལྟར་སྤྱིར་ངེས་པར་བྱས་ནས། ལེན་ཚུལ་དངོས་ནི། གཞུང་རྩ་བར། ཁྱད་པར་ལམ་དབང་བླང་བ་ནི༔ བཟླས་པས་རྒྱུད་བསྐུལ་དབང་བླང་སྟེ༔ སྤྱི་བོའི་གཙུག་ན་བཞུགས་པ་ཡི༔ བླ་མ་ཧེ་རུ་ཀ་དཔལ་ལ༔ རྩེ་གཅིག་གདུང་བས་འདི་སྐད་གསོལ༔ ཞེས་གསུངས་ཏེ། དེ་ཡང་སྤྱི་བོའི་བླ་མ་ཧེ་རུ་ཀ་ཉིད་དབང་ལེན་པའི་ཡུལ་དང་། བདག་གི་རྟོག་ཚོགས་རྣམ་འགྱུར་གློ་བུར་བའི་རང་བཞིན་དབང་ཞུས་པོར་བྱས་ཏེ་རྩེ་གཅིག་གདུང་བའི་དབྱངས་ཀྱིས། ༀ། སྒྲིབ་པའི་གདུང་བ་ཞེས་སོགས་ཏེ། སད་རྨི་གཉིད་དང་སྙོམས་འཇུག་གི་གནས་སྐབས་བཞི འམ་སྒོ་གསུམ་ཆ་སྙོམས་དང་བཅས་པའི་སྒྲིབ་པའི་གདུང་བ་ཀུན་བཅོམ་པར་མཛད་པའི་བླ་མ་དཀྱིལ་འཁོར་གྱི་དབང་ཕྱུག་དཔལ་ཁྲག་འཐུང་ཆེན་པོ་བདག་ལ་དགོངས་སུ་གསོལ། སྐུ་གསུང་ཐུགས་ཡེ་ཤེས་རྡོ་རྗེའི་དཀྱིལ་འཁོར་དུ། བུམ་གསང་ཤེས་རབ་ཡེ་ཤེས་དེ་ཁོ་ན་ཉིད་ཀྱི་དབང་གིས་སྐལ་ལྡན་བདག་ཡོངས་སུ་སྨིན་པར་མཛད་དུ་གསོལ། ཞེས་གསོལ་བ་བཏབ། དེ་ནས། རྒྱུད་སྦྱང་བྱང་ཆུབ་སེམས་གསུམ་བསྐྱེད༔ སྨིན་པའི་འོས་སུ་གྱུར་པ་ན༔ ཞེས་པས། གོང་དུ་བསྟན་པ་ལྟར་གྱི་དམིགས་རྣམ་དང་ལྡན་པས། རྡོ་རྗེ་སློབ་དཔོན་སོགས་རྒྱུན་བཤགས་ཡན་ལག་བརྒྱད་པས་རྒྱུད་སྦྱང་། ༀ། ཀུན་བཟང་སོགས་ཀྱི་སྨོན་འཇུག་དོན་དམ་པའི་སེམས་གསུམ་བསྐྱེད་ནས། དབང་བཞི་ཏིང་ངེ་འཛིན་གྱིས་རིམ་པར་ལེན་པ་ལས། དང་པོ་བུམ་དབང་ནི། བླ་མ་ཧེ་རུ་ཀ་དཔལ་གྱིས༔ སོགས་ཀྱིས་བསྟན་ཏེ་དེ་ཡང་སྐུ་བཞིའི་དབང་ཕྱུག་སྤྱི་བོའི་བླ་མ་ཧེ་རུ་ཀའི་ཐུགས་ཀ་ནས་ལྕགས་ཀྱུ་ལྟ་བུའི་འོད་ཟེར་འཕྲོས་པས་ཕྱོགས་བཅུ་དུས་བཞིའི་དེ་བཞིན་གཤེགས་པ་རྣམས་ཏིལ་གྱི་གོང་བུ་ཁ་ཕྱེས་པ་བཞིན་དུ་མདུན་གྱི་ནམ་མཁར་མངོན་སུམ་དུ་སད་པ་ཐབས་ཤེས་སྙོམས་པར་ཞུགས་པའི་བྱང་ཆུབ་སེམས་ཀྱི་ཆུ་རྒྱུན་གྱིས་རང་གི་སྤྱི་བོ་ནས་དབང་བསྐུར་བར་མོས་ལ། ༀ། ནམ་མཁའ་གང་བའི་སོགས་བརྗོད་ཅིང་། དབང་དོན་གྱི་ཡེ་ཤེས་ཡུལ་སྣང་སྟོང་ཆུ་ཟླ་ལྟ་བུའི་ཉམས་བསྐྱངས་ལ་རུ་ལུའི་ཛབ྄་དབྱངས་བྱ། གཉིས་པ་ནི། སླར་ཡང་སོགས་ཏེ་ནམ་མཁར་བཞུགས་པའི་དེ་བཞིན་གཤེགས་པ་རྣམས་སླར་ཡང་སྙོམས་པར་ཞུགས་པའི་བྱང་སེམས་ཀྱི་རྒྱུན་བླ་མ་ཧེ་རུ་ཀའི་སྐུའི་སྤྱི་བོ་ནས་ཞུགས། ཡབ་ཡུམ་ཆགས་པ་ཆེན་པོས་སྙོམས་པར་ཞུགས་པའི་བྱང་སེམས་དཀར་དམར་དང་རོ་གཅིག་ཏུ་འདྲེས་པ་མཁའ་གསང་ནས་བྱུང་བ་རྡོ་རྗེའི་ལྕེར་བཞག་པར་མོས་ལ། ཨཱཿདཀར་དམར་སོགས་དང་། ཡུལ་ཅན་སེམས་ཉིད་གསལ་སྟོང་རྣམ་པར་མི་རྟོག་པའི་ཉམས་བསྐྱངས་ལ། ཛབ྄་དབྱངས་བྱ། གསུམ་པ་ནི། ཡུམ་ལས་སོགས་ཏེ་བླ་མ་རྒྱལ་བའི་འཁོར་ལོའི་ཡུམ་ལས་རིགས་མ་གཟུགས་དང་ལང་ཚོས་བརྒྱན་པ་སྤྲོས་འཛུམ་པ་ལ་སོགས་པའི་འདོད་པའི་སྒྱུ་རྩལ་སྣ་ཚོགས་ཀྱིས་བདེ་བ་བསྐུལ་ཏེ། རང་ཡབ་ཡུམ་ལྷར་གསལ་བ་ལྷའི་འདུ་ཤེས། མཁའ་གསང་བྱིན་གྱིས་བརླབ་པ་སྔགས་ཀྱི་འདུ་ཤེས། ལམ་འདི་ལ་བརྟེན་ནས་བདེ་སྟོང་ཕྱག་རྒྱ་ཆེན་པོའི་ཡེ་ཤེས་མངོན་དུ་བྱའོ་སྙམ་པ་ཆོས་ཀྱི་འདུ་ཤེས་ཏེ། འདུ་ཤེས་གསུམ་ལྡན་གྱིས་མཉམ་པར་སྦྱར་བས་རྗེས་ཆགས་ཀྱི་མེས་སྤྱི་བོའི་ཧཾ་བཞུ་བའི་བྱང་སེམས་ཀྱི་རྒྱུན་སྤྱི་བོ་ནས་མགྲིན་པར་བབས་པ་དགའ་བ། སྙིང་གར་བབས་པ་མཆོག་དགའ། ལྟེ་པའི་དགའ་བ་རྣམས་མྱོང་། དེར་ཐིག་ལེ་འཛག་མེད་དུ་བཅིངས་ནས་སླར་ཡང་གྱེན་དུ་བཟློག་པའི་སྦྱོར་བས་ལྟེ་བ་ལ་སོགས་པའི་འཁོར་ལོ་བཞིར་དགའ་བཞིའི་འགྲོས་ཀྱིས་སྤྱི་བོར་ལྷན་ཅིག་སྐྱེས་དགའི་ཡེ་ཤེས་རྣམ་པ་ཐམས་ཅད་པ་ཉམས་སུ་མྱོང་བར་མོས་ལ། ཧཱུྃ་དགའ་མཆོག་སོགས་དང་། ཞུ་བདེའི་རྐྱེན་གྱིས་རང་རིག་བདེ་སྟོང་བརྗོད་བྲལ་དུ་རྟོགས་པའི་ཉམས་བསྐྱངས་ལ་ཛབ྄་དབྱངས་བྱ། བཞི་པ་ནི། དེ་ཡི་དོན་ལ་ངོ་སྤྲད་བྱ༔ ཞེས་པས། གསུམ་པའི་དུས་སུ་དཔེ་ལས་སྐྱེས་པའི་ཡེ་ཤེས་ཉིད་མཚོན་བྱེད་དུ་བྱས་ཏེ། མཚོན་བྱ་དོན་གྱི་ཡེ་ཤེས་རྣམ་མཆོག་གི་སྟོང་ཉིད་དང་མི་འགྱུར་བའི་བདེ་བ་ཟུང་དུ་འཇུག་པའི་རང་བཞིན་འདུས་མ་བྱས་ཆེན་བསམ་བརྗོད་བློ་འདས་ཀ་དག་ཟང་ཐལ་ཆེན་པོར་རྡོ་རྗེའི་ཚིག་གི་ངོ་སྤྲད་པར་མོས་ལ། ཧོཿ གདོད་ནས་སོགས་དང་། རིག་སྟོང་ཟུང་འཇུག་བློ་བྲལ་ཆེན་པོའི་དགོངས་པའི་ཉམས་བསྐྱང་ཞིང་ཛབ྄་དབྱངས་བྱའོ། །དེ་རྣམས་ཀྱིས་རིམ་པ་བཞིན་བུམ་གསང་ཤེས་རབ་ཡེ་ཤེས་དེ་ཁོ་ན་ཉིད་ཀྱི་དབང་བཞི་ཐོབ། སྒོ་གསུམ་ཆ་སྙོམས་དང་བཅས་པའི་སྒྲིབ་པ་བཞི་དག ལམ་བསྐྱེད་རིམ་གཏུམ་མོ་གཞན་ལུས་རྫོགས་ཆེན་བསྒོམ་པ་ལ་དབང་། འབྲས་བུ་སྤྲུལ་སྐུ་ལོངས་སྐུ་ཆོས་སྐུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་པ་སྟེ། གནས་སྐབས་སུ་ཡང་སྔགས་སྡོམ་ཉམས་པ་གསོ་ཞིང་ཡེ་ཤེས་གོང་དུ་འཕེལ་བས་བྱིན་རླབས་ཀྱི་དྲོད་ཚད་གསུམ་འབྱུང་ཞིང་དངོས་གྲུབ་རྣམ་པ་གཉིས་མྱུར་དུ་ཐོབ་པར་བྱེད་པའི་ཐབས་མཆོག་ཡང་ཟབ་བླ་ན་མེད་པ་སྟེ། སྨིན་གཏེར་བདེ་འདུས་དབང་ཆོག་ལས། དེ་ལྟར་དབང་བསྐུར་ཡོན་ཏན་གྱི༔ བྱིན་རླབས་མཚན་མ་དང་པོ་ནི༔ རྩོལ་མེད་མོས་གུས་རྒྱུད་ལ་སྐྱེ༔ བྱིན་རླབས་ཡ་མཚན་གཉིས་པ་ནི༔ གང་གཏད་དམིགས་པ་གསལ་ཞིང་བརྟན༔ བྱིན་རླབས་མཚན་མ་གསུམ་པ་ནི༔ རང་བྱུང་ཡེ་ཤེས་རྟོགས་པ་འཆར༔ ཞེས་དང་། ཧེ་རུ་ཀ་མངོན་འབྱུང་ལས། དཀྱིལ་འཁོར་བདག་པོ་མཐོང་ནས་ནི། །ཅུང་ཟད་དེ་ནི་མི་འགྲུབ་མེད། །སྡིག་པ་ཀུན་ལས་རྣམ་པར་གྲོལ། །དངོས་གྲུབ་མྱུར་དུ་འཐོབ་པར་འགྱུར། །ཞེས་སོ། །གཉིས་པ་ལ་གཉིས། ལྷ་སྔགས་དབྱེར་མེད་ཀྱི་ཚུལ་ལ་ངེས་ཤེས་བསྐྱེད་པ་དང་། ཇི་ལྟར་བཟླ་ཚུལ་དངོས་སོ། །དང་པོ་ནི། མ་དག་རྣམ་ཤེས་ཚོགས་བརྒྱད་སོགས་ཀྱིས་བསྟན་ཏེ། དེ་ཡང་སྤྱིར་སྣང་གྲགས་ཀྱི་ཆོས་ཐམས་ཅད་ཡེ་ནས་དག་མཉམ་དུ་གནས་པའི་ཕྱིར། གནས་ཚུལ་ལ་སྒྲར་གྲགས་པ་མཐའ་དག་གྲགས་སྟོང་བརྗོད་མེད་གསུང་གི་དཀྱིལ་འཁོར་ལས་མ་འདས་ཏེ། ཀུན་བྱེད་ལས། ཇི་ལྟར་གྲགས་ཤིང་གནས་པའི་ཆོས་རྣམས་ཀུན། །སྐྱེ་མེད་དབྱིངས་ལ་ཚིག་གི་གསུང་དུ་བཀོད། །སྙིང་པོ་བརྗོད་དུ་མེད་པའི་གསུང་ལ་འདུས། །དེ་ཡང་ཀུན་བྱེད་རྒྱལ་པོས་བཀོད་པ་ཡིན། །ཞེས་དང་། ནམ་མཁའ་ཆེ་ལས། མི་གསུང་མཉམ་བཞག་སྔགས་ཀྱི་ཚིག །ཅེས་གསུངས། དེའི་ཕྱིར་ཆོས་ཐམས་ཅད་བརྗོད་བྲལ་ཐིག་ལེ་ཉག་གཅིག་གི་ཀློང་དུ་རྫོགས་པར་རྟོགས་ན་ངག་ཏུ་བརྗོད་པ་ཐམས་ཅད་སྔགས་སུ་མི་འགྱུར་བ་གང་ཡང་མེད་དེ། ལག་ན་རྡོ་རྗེ་དབང་བསྐུར་བའི་རྒྱུད་ལས། མཉམ་ཉིད་ངང་ལ་གནས་པ་ཡི། །ཡན་ལག་བསྐྱོད་པ་ཇི་སྙེད་དང་། །ཚིག་ཏུ་བརྗོད་པ་ཇི་སྙེད་པ། །དེ་སྙེད་གསང་སྔགས་ཕྱག་རྒྱ་ཡིན། །ཞེས་སོ། །ཁྱད་པར་བཟླ་བྱའི་སྔགས་རྣམས་ནི་ཐབས་ཤེས་ཀྱི་ཡི་གེ་རྣམས་འདུས་པ་ལས་འཁོར་འདས་ཀྱི་ཆོས་ཐམས་ཅད་བརྗོད་བྱར་གཏན་ལ་འབེབས་ཀྱང་། དོན་དམ་པར་བརྗོད་བྱེད་ལས་འདས་པའི་རང་བཞིན་མཉམ་པ་ཆེན་པོ་བདེན་གཉིས་ཟུང་འཇུག་སྔགས་ཀྱི་དེ་ཁོ་ན་ཉིད་ཐབས་ཆེན་སྤྲུལ་སྐུ་བཟླ་བྱའི་སྔགས་ཀྱི་རྣམ་པར་འཕྲུལ་བ་ཡེ་ནས་གྲུབ་པ་བཞི་ལྡན་གྱི་ངོ་བོ་སྟེ། གྲུབ་པ་བཞི་ནི། ཆོས་ཉིད་ངོ་བོ་ཉིད་ཀྱིས་གྲུབ་པ་ཡི་གེ་ཐམས་ཅད་སྟོང་ཆེན་མཉམ་པ་ཉིད་ཀྱི་ངོ་བོ་ཅན་དུ་ཡེ་ནས་གྲུབ་པ། ཆོས་ཅན་རང་བཞིན་གྱིས་གྲུབ་པ་རང་རང་གི་ངོ་བོ་ཐུན་མོང་མིན་པར་སྣང་བའི་རང་བཞིན་བསླུ་མེད་དུ་གྲུབ་པ། བྱིན་གྱིས་བརླབས་ཀྱིས་གྲུབ་པ་ཆོས་ཀུན་ལ་མངའ་དབང་འབྱོར་པ་སངས་རྒྱས་རྣམས་ཀྱིས་ཡི་གེ་གཅིག་ནས་མང་པོའི་བར་གྱི་སྔགས་རྣམས་སུ་ཡེ་ཤེས་ཉིད་རྣམ་པར་འཕྲུལ་བ་བསྟན་པས་སངས་རྒྱས་ཀྱི་བྱིན་གྱིས་བརླབས་ཀྱིས་གྲུབ་པ། ནུས་པའི་མཐུས་གྲུབ་པ་སྨན་དང་ནོར་བུ་བཞིན་དུ་སྔགས་དེ་དག་ལ་དངོས་གྲུབ་སྒྲུབ་པའི་ནུས་པ་ཐོགས་མེད་མི་བསླུ་བར་ཡོད་པའོ། །འདི་ལ་འཆད་ཚུལ་གཞན་ཡང་། ཆོས་ཉིད་གཉུག་མའི་ཡེ་ཤེས་གཞོམ་དུ་མེད་པའི་སྔགས་ཀྱི་དེ་ཁོ་ན་ཉིད་རང་ལ་གདོད་ནས་རང་ཆས་སུ་གནས་པ་ནི་ཆོས་ཉིད་རང་བཞིན་གྱིས་གྲུབ་པ། རྩ་རླུང་ཐིག་ལེའི་རྟོག་ཚོགས་ཀྱི་རྣམ་པ་ཐམས་ཅད་ཡི་གེ་དང་སྔགས་དང་ཕྱག་རྒྱའི་དཀྱིལ་འཁོར་ཆེན་པོར་རང་ཆས་སུ་ཤར་བ་ནི་ཆོས་ཅན་རང་གི་ངོ་བོས་གྲུབ་པ། དེ་གཉིས་སྐྱེ་འགག་མེད་པའི་ཡེ་ཤེས་སུ་རང་སྣང་བས་སྒྲུབ་པ་པོའི་རྒྱུད་བྱིན་གྱིས་བརླབས་པ་བྱིན་གྱིས་བརླབས་ཀྱིས་གྲུབ་པ། སྔགས་ཀྱི་དེ་ཁོ་ན་ཉིད་རྟོགས་ཤིང་གོམས་པའི་སྦྱོར་བས་མཆོག་ཐུན་མོང་གི་དངོས་གྲུབ་མཐའ་དག་ལ་དབང་འབྱོར་པ་ནུས་པའི་མཐུས་གྲུབ་པ་དང་བཞིར་ཡང་གསུངས་སོ། །དེ་ལྟར་གྲུབ་པའི་སྔགས་དེ་གནས་སྐབས་དང་མཐར་ཐུག་གི་དོན་སྒྲུབ་པར་མི་ནུས་པ་མེད་དེ་སྔགས་རྣམས་ལྷ་ཡི་ངོ་བོ་ཡིན་པའི་ཕྱིར། བྱེ་བྲག་ཏུ་སྐབས་འདིར་བསྟན་གྱི་བཟླ་བྱའི་སྔགས་རུ་ལུ་འབྲུ་བརྒྱད་ནི། དཔལ་ཆེན་པོའི་ཐུགས་ཡང་དག་པའི་ཡེ་ཤེས་ཉིད་རྣམ་པ་ཐབས་ཆེན་སྔགས་ཀྱི་ཚུལ་དུ་འཕྲུལ་བ་སྟེ། འདིས་གཞི་དུས་སུ་ཡེ་ཤེས་ཀློང་བརྒྱད་དང་དེ་ཐམས་ཅད་དབྱེར་མེད་པ་རང་བྱུང་གི་ཡེ་ཤེས་ཉག་གཅིག་དང་། འཁྲུལ་པ་བརྟག་པའི་གཞི་ཚོགས་བརྒྱད་ཀུན་གཞི་དང་བཅས་པ། ལམ་གྱི་སྐབས་སུ་གང་བསྒོམ་ཞིང་བསྒྲུབ་བྱའི་ལྷ་དགུ་ཐུགས་སྲོག་དང་བཅས་པ་དང་། བསྐྱེད་རིམ་གྱི་བསྙེན་སྒྲུབ་ཡན་ལག་བཞི་དང་རྫོགས་རིམ་གྱི་དགའ་བཞི་དང་སྟོང་བཞི་སྦྱར་བའི་ཡེ་ཤེས་བཞི་སྟེ་བརྒྱད། འབྲས་དུས་སུ་ཡེ་ཤེས་ཀློང་བརྒྱད་དེ་དེ་ཀུན་གཅིག་ཏུ་འཁྱིལ་བའི་ཐུགས་ཡང་དག་པའི་ཡེ་ཤེས་འབྲས་བུའི་དཔལ་ཆེན་པོ་རྟེན་དང་བརྟེན་པར་བཅས་པའི་དཀྱིལ་འཁོར་མཐའ་དག་མཚོན་པར་བྱེད་པ་ཡིན་ལ། གཞན་ཡང་གདུལ་བྱ་འདུལ་བྱེད་ཀྱི་དབང་དུ་བྱས་ན། སྔོན་དཔལ་ཆེན་པོས་རུ་ཏྲ་བསྒྲལ་བའི་ཚེ་དེའི་སྙིང་པོ་ཕྲོགས་ཏེ་ཡེ་ཤེས་ཀྱི་སྙིང་པོར་བྱིན་གྱིས་བརླབས་ཅིང་གཞན་ཡང་དེའི་ལུས་སེམས་དང་ཡོ་བྱད་འཁོར་རྣམས་ཐམས་ཅད་ཕྲོགས་ཏེ་བྱིན་གྱིས་བརླབས་པའི་སྟོབས་དང་རྫུ་འཕྲུལ་རྨད་དུ་བྱུང་བ་དག་ཀྱང་རུ་ལུ་འབྲུ་བརྒྱད་ཀྱིས་གྲུབ་པ་སྟེ། ཐུགས་ཞི་ལས་མ་གཡོས་པར་སྐུ་འབར་བའི་ཆ་ལུགས་སུ་བྱུང་ནས་འཁོར་བ་ཉིད་མྱང་འདས་དུག་ཉིད་བདུད་རྩིར་བསྒྱུར་པའི་དོན་གྲུབ་ཅིང་ཡེ་ཤེས་གྱི་སྒྱུ་འཕྲུལ་སྔགས་ཀྱི་གཟུགས་སུ་རོལ་བས་ལས་ཐམས་ཅད་བྱེད་པ་འདི་ལྟ་བུ་ནི་ཡ་མཚན་ཆེ་བ་སྔགས་ཀྱི་མཐུ་ཡིན་པས། རྒྱུད་ལས། རུ་ལུ་འདི་ནི་ཡ་མཚན་ཆེ། །ཞེས་དང་། མཚན་མ་ཅན་གྱི་སྐུར་བསྒོམས་ནས་མཚན་མའི་སྔགས་བཟླས་པའི་མཐུས་མཚན་མ་ཐམས་ཅད་དང་བྲལ་བའི་དོན་དམ་ཆོས་ཉིད་སྐྱེ་བ་མེད་པའི་དོན་གྱི་རྟོགས་པ་རྒྱུད་ལ་སྐྱེ་བར་བྱེད་པས། རུ་ལུ་འདི་ནི་རྟོགས་པ་བསྐྱེད། །ཅེས་དང་། ལྷ་བསྒོམས་ཤིང་སྔགས་བཟླས་པའི་མཐུས་ཉོན་ཤེས་ཀྱི་སྒྲིབ་ཚོགས་ཚེ་འདི་ཉིད་ལ་སྦྱོང་བར་བྱེད་པས། རུ་ལུ་འདི་ནི་སྒྲིབ་པ་སྦྱོང་། །ཞེས་དང་། ལུང་བཞིན་དུ་བཟླས་པས་རབ་ཕྱག་རྒྱ་ཆེན་པོ། འབྲིང་མངོན་ཤེས་ལྔ། ཐ་མས་ཀྱང་ཌཱ་ཀི་རྣམས་དབང་དུ་འདུ་ཞིང་ལས་བཞི་འགྲུབ་པའི་དངོས་གྲུབ་མྱུར་དུ་ཐོབ་པར་བྱེད་པས་ན། རུ་ལུ་འདི་ནི་དངོས་གྲུབ་ཐོབ། །ཅེས་ཡོན་ཏན་བཞིར་གསུངས་པ་དང་། བྱེ་བྲག་ཤེས་པ་བརྒྱད་ཀྱི་སྒོ་ནས་ཕྲིན་ལས་ལག་ལེན་དུ་བསྟན་པའི་ཚུལ་སོགས་ནི་ཡང་དག་གསང་བའི་འགྲེལ་ཆེན་དང་བཀའ་བརྒྱད་རྣམ་བཤད་སོགས་ལས་ཤེས་པར་བྱ་ལ། འདིར་ལྷ་དང་སྙིང་པོ་སྦྱོར་ཚུལ་ཙམ་སྨོས་ན། རྒྱུད་ལས། ༀ་ནི་གནས་ལུགས་ཆོས་ཀྱི་དབྱིངས། །རུ་ལུ་སྣང་ལུགས་ལོངས་སྤྱོད་རྫོགས། །རུ་ལུ་འོག་མ་སྤྲུལ་པའི་སྐུ། །ཧཱུྃ་བྷྱོ་ཧཱུྃ་ནི་དབྱེར་མེད་དོ། །ཞེས་སྤྱིར་བསྟན་ནས་བྱེ་བྲག་ཏུ་ཡི་དམ་ཞི་བའི་དབང་དུ་བྱས་ཏེ། ཡང་དག་སྙིང་པོར། ཞི་བ་སངས་རྒྱས་བཞི་བཅུ་གཉིས༔ རུ་ལུ་འབྲུ་བརྒྱད་ཉིད་དུ་འདུས༔ ༀ་ནི་རིགས་ལྔ་ཡབ་ཡུམ་བཅུ༔ རུ་ལུ་གོང་མ་སེམས་དཔའ་བརྒྱད༔ རུ་ལུ་འོག་མ་སེམས་མ་བརྒྱད༔ ཧཱུྃ་ནི་སྒོ་བ་ཁྲོ་བོ་བཞི༔ བྷྱོ་ནི་སྒོ་མ་ཁྲོ་མོ་ཉིད༔ ཧཱུྃ་ནི་སྤྲུལ་སྐུ་ཐུབ་པ་དྲུག༔ ཡིད་དང་ཆོས་གཉིས་རང་བྱུང་གནས༔ ༀ་ནས་ཧཱུྃ་ལ་རྣམ་བསྐུལ་བས༔ ཞི་བ་བཞི་བཅུ་རྩ་གཉིས་སྨིན༔ ཞེས་དང་། དེ་ཉིད་གནས་གྱུར་ཁྲོ་བོ་ལྟར་ན། རྒྱུད་ཧེ་རུ་ཀ་མངོན་འབྱུང་ལས། ༀ་ནི་རྒྱལ་བ་ཡབ་ཡུམ་བཅུ། །རུ་ལུ་གོང་མ་ཁྲོ་མོ་བརྒྱད། །རུ་ལུ་འོག་མ་ཕྲ་མེན་བརྒྱད། །ཧཱུྃ་ནི་ཕྱག་རྒྱ་སྒོ་མ་བཞི། །བྷྱོ་ནི་བྲན་མོ་ཉི་ཤུ་བརྒྱད། །ཧཱུྃ་ནི་བྱང་ཆུབ་སེམས་ཀྱི་ངང་། །འབར་བའི་དཀྱིལ་འཁོར་མ་ལུས་པའི། །བཟླས་པ་མཆོག་ནི་འདི་ལས་མེད། །ཅེས་ཟླ་གམ་ལྔ་བཅུ་རྩ་བརྒྱད་པ་དང་། ཡང་ཧཱུྃ་ཕྱི་མ་ཁྲོ་བཅུའི་ས་བོན་བྱས་ཏེ་ཟླ་གམ་རེ་བརྒྱད་པའི་ལྷར་སྦྱར་བ་རྒྱས་པ་དང་། བསྡུས་པ་ཟླ་གམ་དགུ་མའི་དབང་དུ་བྱས་ཏེ། ཡང་དག་གསང་འགྲེལ་ལས། ༀ་ནི་དཀར་མོ་ཀོའུ་རཱི་མ། །རུ་ནི་རྐུན་མོ་ཙོའུ་རཱི་མ། །ལུ་ནི་སྦོས་མོ་པྲ་མོ་ཧཱ། །རུ་ནི་ཐལ་བྱེད་བཻ་ཏཱ་ལཱི། །ལུ་ནི་རྒན་བྱེད་པུཥྐ་སཱི། ཧཱུྃ་ནི་གཏུམ་མོ་གྷསྨ་རཱི། །བྷྱོ་ནི་སྨེ་ཤ་སྨ་ཤ་ནི། །ཧཱུྃ་ནི་མ་ཚོགས་ཙནྡྷ་ལཱི། །ཀུན་འདུས་དཔལ་ཆེན་སྙིང་པོ་སྟེ། །ཡང་དག་དོན་གྱི་ལྷ་དགུར་གསལ། །ཞེས་དང་། བཀའ་སྡོད་དང་སྦྱར་ནི། ཡང་དག་སྙིང་པོར། ༀ་ནི་བཛྲ་ཧེ་རུ་ཀ༔ མགོན་པོ་ནག་པོའི་ངོ་བོར་གནས༔ རུ་ལུ་གོང་མ་ཀོའུ་རཱི་བརྒྱད༔ སྲིན་མོ་བརྒྱད་ཀྱི་ངོ་བོར་གནས༔ རུ་ལུ་འོག་མ་ཕྲ་མེན་བརྒྱད༔ ལྷ་སྲིན་སྡེ་བརྒྱད་ངོ་བོར་གནས༔ ཧཱུྃ་ནི་རྟ་གདོང་སྒོ་མ་བཞི༔ རོ་ཀ་ནམ་གྲུ་ཙནྜི་ཀ༔ རེ་མ་ཏི་ཡི་ངོ་བོར་གནས༔ བྷྱོ་ནི་དབང་ཕྱུག་ཉི་ཤུ་བརྒྱད༔ ཧཱུྃ་ནི་ལྷ་ཆེན་ཉི་ཤུ་བརྒྱད༔ དྲེགས་པ་རུ་ཏྲ་འཁོར་བཅས་གསལ༔ ལྷ་སྲིན་ཟིལ་གྱིས་མ་ནོན་པར༔ སངས་རྒྱས་ཐོབ་པར་མ་བཤད་དོ༔ མ་རིག་གཟུང་འཛིན་རུ་ཏྲ་ལ༔ ཚོགས་བརྒྱད་མ་དག་སྡེ་བརྒྱད་ཡིན༔ དབང་སྡུད་ཟིལ་གནོན་བྱ་བའི་ཕྱིར༔ རྡོ་རྗེ་སྲིན་པོའི་ངུར་སྒྲ་ཡིས༔ རུ་ལུ་བཟླ་ཞིང་སྐུ་ལ་བསྟིམ༔ ཞེས་སོགས་གསུངས་པ་བཞིན་དང་། དེ་བཞིན་དུ་ཀཱི་ལ་ཡ་འབྲུ་བཅུ་བཞི་པའང་། ༀ་ནི་རིགས་ལྔ་ཁྲག་འཐུང་ཡེ་ཤེས་ལྔ། བཛྲ་དཔལ་ཆེན་ཡབ་ཡུམ་གཉིས་སུ་མེད། །ཀཱི་ནི་སྤྲུལ་པ་ཕོ་བཅུ་སྟོབས་བཅུའི་བདག །ལི་ནི་སྤྲུལ་པ་མོ་བཅུ་ཕར་ཕྱིན་བཅུ། །ཀཱི་ནི་ཡང་སྤྲུལ་ཟ་བྱེད་ཕ་བཅུ་སྟེ། ལ་ནི་གསོད་བྱེད་མ་བཅུ་སྲིད་གསུམ་སྒྲོལ། །ཡ་ནི་སྲས་མཆོག་ཉེར་གཅིག་སྐུ་གསུང་ཐུགས། སྐབས་འདིར་སྐུ་གསུང་ཐུགས་ཡོན་ཕྲིན་ལས་ཀྱི་སྲས་མཆོག་རིགས་ལྔའོ། །མཆན། སརྦ་ཡང་སྤྲུལ་ཕུར་སྲུང་ཐམས་ཅད་འདུས། །བིག་ནི་ཤྭ་ན་སྲོག་བདག་ལྕམ་དྲལ་ཏེ། །ནན་ནི་རེ་ཏི་མཆེད་བཞི་མགོ་ཉགས་སྲས། །བྃ་ནི་ས་བདག་བསེ་མོ་སྐྱེས་བུར་བཅས། །ཧཱུྃ་ནི་ཁྲོ་འདུས་དཔལ་གྱི་ཡེ་ཤེས་ཐུགས། །ཕཊ་ཀྱིས་དགྲ་འགེགས་དམ་སྲི་ཐལ་བར་བརློག །ཅེས་གསུངས། དེས་ན་ཤེས་རབ་ཟབ་མོས་སྔགས་ལ་ཡིད་ཆེས་བསྐྱེད་པ་གལ་ཆེ་སྟེ། དོན་དམ་པར་ཆོས་ཐམས་ཅད་དག་མཉམ་ཆོས་སྐུ་ཆེན་པོའི་ཀློང་ན་རིས་སུ་མ་ཆད་པ་དང་། ཀུན་རྫོབ་ཏུ་ལྷ་ཡི་སྐུ་དངོས་དང་སྔགས་གཉིས་ཀ་གདུལ་བྱའི་དོན་དུ་ཡེ་ཤེས་རྣམ་པར་འཕྲུལ་བ་ཙམ་ལ་ཁྱད་མེད་པར་རྟོགས་པས་སྔགས་ཉིད་ལྷར་འཛིན་པར་བྱ་སྟེ། བདེ་མཆོག་འབྱུང་བའི་རྒྱུད་ལས། སྔགས་ཉིད་རྣལ་འབྱོར་མ་ཡི་གཟུགས། །རྣལ་འབྱོར་མ་ཉིད་སྔགས་ཀྱི་གཟུགས། །ཅི་སྟེ་གོ་འཕང་མཆོག་འདོད་ན། །དེ་གཉིས་དབྱེ་བར་མི་བྱའོ། །ཞེས་གསུངས། དེ་ལྟ་བུའི་ལྷ་སྔགས་དབྱེར་མེད་དུ་རྟོགས་པའི་ངེས་ཤེས་ཟབ་མོ་ཐེ་ཚོམ་གྱི་སྨག་དང་བྲལ་བ་ལ་སྔགས་ཀྱི་དངོས་གྲུབ་མྱུར་དུ་འབྱུང་སྟེ། གཤིན་རྗེ་གཤེད་ཀྱི་རྟོག་པ་གསུམ་པ་ལས། ཆོས་ཉིད་བསམ་གྱིས་མི་ཁྱབ་པའི། །དོན་ལ་ཐེ་ཚོམ་མེད་པ་ཡི། །མཁས་པ་ལ་ནི་དངོས་གྲུབ་ཉེ། །ཞེས་གསུངས། དེ་ལྟར་མ་ཤེས་ཀྱང་ལུང་ལས་གསུང་པ་བཞིན་སངས་རྒྱས་རྣམས་རང་ངོར་སྔགས་ཀྱི་རྣམ་པར་བྱོན་ནས་གནས་སྐབས་མཐར་ཐུག་གི་དོན་སྒྲུབ་པར་མཛད་པ་ཡིན་ནོ། །སྙམ་དུ་སོམ་ཉི་མེད་པ་དད་པ་རྩེ་གཅིག་གིས་བཟླས་ན་ཡང་འགྲུབ་སྟེ། ཡང་ན་བླུན་པོ་དད་པ་ཅན། །དེ་ལ་སྦྱོར་བའི་དངོས་གྲུབ་ཉེ། །ཞེས་གསུངས། དེ་གཉིས་གང་ཡང་མེད་པའི་ཐེ་ཚོམ་དང་རྟོག་དཔྱོད་མཁན་རྣམས་ལ་དངོས་གྲུབ་མི་འབྱུང་སྟེ། རྟོག་ཅིང་དཔྱོད་པའི་རྟོག་གེ་བ། །དེ་ལ་སྦྱོར་བའི་དངོས་གྲུབ་རིང་། །བླ་མས་མན་ངག་བསྟན་བྱས་ཀྱང་། །སློབ་མ་ཡིད་གཉིས་ཡོད་པ་ན། །དེ་ལ་དངོས་གྲུབ་རིང་བར་བཤད། །བླ་མས་མན་ངག་སྦས་བྱས་ཀྱང་། །སློབ་མ་ཡིད་གཉིས་མི་ཟ་ཞིང་། །བླ་མའི་མན་ངག་དམ་པ་ཞེས། །གཅེས་སྤྲས་བྱས་ན་འགྲུབ་པར་ངེས། །ཞེས་དང་། སྔགས་དང་རྫས་ཀྱི་སྦྱོར་བ་ལ། །དཔྱད་ན་དངོས་གྲུབ་མི་འབྱུང་སྟེ། །གལ་ཏེ་ཡིད་གཉིས་ཟ་འགྱུར་རམ། །བསམ་པ་འགྱུར་རམ་དད་པ་ཉམས། །དེ་ཚེ་དངོས་གྲུབ་ཉེ་བ་ཡང་། །ཕྱིར་ལྡོག་འགྱུར་བར་གདོན་མི་ཟ། །ཞེས་གསུངས། དེས་ན་སྔགས་བཟླ་བ་ལ་དད་པ་ཤིན་ཏུ་གལ་ཆེ་སྟེ། དད་པ་བརྟན་པོས་བསྒྲུབ་པ་ན། །ནམ་མཁའ་མེད་པར་གྱུར་ན་ཡང་། །སྔགས་ཀྱི་དངོས་གྲུབ་མེད་མི་སྲིད། །ལྷ་དང་དྲང་སྲོང་གིས་བཤད་པའི། །རིག་སྔགས་བསླུ་བ་མི་སྲིད་ན། །འདོད་ཆགས་བྲལ་བས་བཤད་པ་ཡི། །གསང་སྔགས་སྦྱོར་བས་བསླུ་བ་ནི། །མ་བྱུང་འབྱུང་བར་མི་འགྱུར་རོ། །ཞེས་གསུངས། མདོར་ན། སངས་རྒྱས་ཀྱི་ཡེ་ཤེས་ནི་གདུལ་བྱའི་བློ་ངོར་རྣམ་པ་ཐམས་ཅད་པར་འཆར་རུང་བ་ཡིན་ལ། དེའང་སངས་རྒྱས་ཀྱིས་འདུལ་བ་ལ་སངས་རྒྱས་དངོས་སུ་སྣང་བ་དང་། ཕལ་པས་འདུལ་བ་ལ་ཕལ་པར་སྣང་བ་གཉིས་སངས་རྒྱས་གཅིག་གི་ཡེ་ཤེས་ཀྱི་རོལ་པར་ཁྱད་མེད་པས་དོན་ལ་བཟང་ངན་མེད་པ་ལྟར། འདི་ཡང་སངས་རྒྱས་ཉིད་ཕལ་པའི་ངོར་སྔགས་ཀྱི་རྣམ་པར་བསྟན་པ་ཡིན་ལ། སྔགས་གྲུབ་པས་ལྷ་མངོན་སུམ་དུ་བྱོན་པ་ཡང་ལྷ་ཉིད་སྔགས་སུ་འཕྲུལ་བ་བསྒྲུབས་པས་སྔགས་ཉིད་ལྷར་འཕྲུལ་བའི་ཚུལ་གྱིས་གདུལ་བྱ་ལ་དངོས་གྲུབ་སྩོལ་བ་ཙམ་དུ་ཟད་པར་ཤེས་པར་བྱ་ལ། དངོས་གཞི་ཏིང་ངེ་འཛིན་གྱི་སྐབས་སུའང་། སྐུ་དང་ཐུགས་སྲོག་སྔགས་ཕྲེང་འཕྲོ་འདུའི་ཚུལ་རྣམས་ཏིང་ངེ་འཛིན་གྱི་སྤྱོད་ཡུལ་དུ་རྣམ་པ་ཤིན་ཏུ་གསལ་བ་དང་། དེ་ཡང་རང་གི་ཡིད་ངོར་ཤར་བ་ཙམ་དུ་མི་རྟོག་པར་ལྷ་དང་གཉིས་སུ་མེད་པར་བདག་ཉིད་ལྷ་ཡི་ང་རྒྱལ་དུ་བྱ་བ་དང་། ལྷ་དེ་ཡང་རང་རྒྱུད་པ་མིང་གཟུགས་མཚན་མའི་རྣམ་པ་ཉི་ཚེ་བ་ཅན་དུ་མི་བཟུང་བར་སྤངས་རྟོགས་མཐར་ཐུག་པ་འབྲས་བུའི་ཡེ་ཤེས་རྣམ་པ་ཐམས་ཅད་པ་ཉིད་ལྷ་སྔགས་ཀྱི་རྣམ་པར་ཤར་བའི་དག་པ་དྲན་པ་དང་། དེ་ཐམས་ཅད་ཀྱང་ཡེ་ནས་དག་མཉམ་བདེན་པ་དབྱེར་མེད་ཆོས་སྐུ་ཐིག་ལེ་ཉག་གཅིག་གི་ངང་ཚུལ་ལས་མ་འདས་པར་ཤེས་པར་བྱས་ནས་དམིགས་པ་གཞན་གྱིས་བར་མ་ཆོད་པར་རྩེ་གཅིག་ཏུ་གནས་པར་བྱའོ། །ཞེས་ཀུན་མཁྱེན་བླ་མ་འཇམ་དཔལ་དགྱེས་པས་གསང་སྙིང་སྤྱི་དོན་འོད་གསལ་སྙིང་པོར་གསུངས་ལ། གཞན་ཡང་རྗེ་དེ་ཉིད་ཀྱིས་ཕྱི་ནང་གསང་བའི་བསྙེན་སྒྲུབ་ཀྱི་གོ་དོན། བསྒྲུབ་བྱའི་ལྷ་ནི་ཆོས་ཉིད་དོན་གྱི་ལྷ་རང་བྱུང་ཡེ་ཤེས་བྱང་ཆུབ་སེམས་ཀྱི་དཀྱིལ་འཁོར་ཏེ། དེའི་ངང་ན་སྣང་སྲིད་ཀྱི་ཆོས་ཐམས་ཅད་ཡེ་ནས་འདུ་འབྲལ་མེད་ཀྱང་དེ་ལྟར་མ་རྟོགས་པའི་འགྲོ་བ་ལ། རང་དང་ལྷ་རྒྱུད་ཐ་དད་པའི་ཚུལ་ཅན་དུ་སྣང་བའི་ཚེ་བདག་འཆིང་བ་ཀུན་ལྡན་ལས་ཉོན་གྱི་སྦུབས་སུ་འཐུམ་པ། ལྷ་ནི་རྣམ་གྲོལ་ཡེ་ཤེས་ཀྱི་སྐུ་ཅན། ཆོས་ཉིད་ཀྱི་དོན་མངོན་དུ་མཛད་ནས་རང་དོན་མཐར་ཕྱིན་ལ། གཞན་དོན་དུ་མཁྱེན་བརྩེ་ནུས་པ་ཚད་མེད་པའི་སྒོ་ནས་སྨོན་ལམ་དང་ཡེ་ཤེས་ཐུགས་རྗེ་ཆེན་པོས་རྣམ་པ་རྟགས་ཀྱི་ཕྱག་རྒྱར་སྣང་བ་བསྒྲུབ་བྱའི་ལྷ་ཞི་ཁྲོ་གང་ཞིག་སྤྲུལ་པའི་འཁོར་ལོ་དང་བཅས་པ་དེ་ཉིད། སྐུའི་མཚན་མ་དང་། གསུང་རིག་སྔགས་དང་། ཐུགས་ཏིང་ངེ་འཛིན་གྱི་འཇུག་པའི་སྒོ་ནས་དངོས་གྲུབ་ཡིད་བཞིན་སྩོལ་ཞིང་རྣམ་གྲོལ་གཏན་དུ་བའི་གོ་འཕང་ལ་ངེས་པར་འགོད་པའི་ཕྲིན་ལས་བསླུ་མེད་མཛད་པ་སྟེ། རྣམ་པ་རྟགས་ཀྱི་ལྷ་དེ་ཉིད་བསྐྱེད་བཟླས་མཆོད་སྒྲུབ་བྱེད་པ་ནི་ཕྱི་ལྟར་སྒྲུབ་པའི་ཚུལ་ལོ། །དེ་ལྟར་སྒྲུབ་ན་ཐུགས་རྗེ་ཆེན་པོས་འབྲེལ་བའི་ཕྱིར་དང་། སྨོན་ལམ་དང་ཡེ་ཤེས་ཀྱི་དབང་གིས་ངེས་པར་རྗེས་སུ་འཛིན་ཅིང་བྱིན་གྱིས་རློབ་པར་འགྱུར་རོ། །ནང་ལྟར་སྒྲུབ་པ་ནི་ལྷ་དེ་དག་རང་གི་དབུ་མའི་གྲོང་ཁྱེར་དུ། སྙིང་པོ་ཡེ་ཤེས་ཀྱི་རླུང་དང་ཐིག་ལེའི་དྭངས་མ་ཡིན་ལ། རང་གི་མ་དག་པའི་སྒོ་གསུམ་སྤྱོད་ཡུལ་དང་བཅས་པ་ནི། གཡོ་བྱེད་ལས་རླུང་གི་ཆོ་འཕྲུལ་ཙམ་ཡིན་པས། རྩ་གནས་སུ་རང་བཞིན་གྱིས་བཞུགས་པའི་ལྷའི་འཁོར་ལོ་གསལ་བཏབ་སྟེ། རླུང་སྔགས་དབྱེར་མེད་ཀྱིས་བསྒྲུབ་ལ། དེ་ཐམས་ཅད་ཀྱི་རྩ་བ་ཙིཏྟ་འོད་ཀྱི་གུར་ཁང་བྱང་ཆུབ་སེམས་ཀྱི་ཐིག་ལེ་བདེ་ཆེན་འགྱུར་བ་མེད་པ་འདུས་མ་བྱས་པའི་རང་སྣང་ལ་དམིགས་ཏེ་སྒྲུབ་པས་མྱུར་དུ་འགྲུབ་བོ། །གསང་བ་ལྟར་ན། འཁོར་འདས་ཐམས་ཅད་ཡེ་ནས་མཉམ་པའི་དབྱིངས་རང་སེམས་གདོད་ནས་མ་སྐྱེས་པ་རང་བྱུང་ཡེ་ཤེས་ཀྱི་དོན་རྟོགས་ན། བསྒྲུབ་བྱའི་ལྷ་ལོགས་སུ་ཅུང་ཟད་ཀྱང་མེད་དེ། རྩོལ་མེད་ལྷུན་གྲུབ་ཏུ་གྲུབ་པ་ཡིན་ལ། འཁོར་འདས་གཉིས་དབྱིངས་དེ་ལས་སྣང་བའི་ཆོ་འཕྲུལ་ཙམ་དུ་ཟད་དོ། །དེས་ན་རང་རིག་པ་ཡེ་ནས་རྩོལ་སྒྲུབ་མེད་པའི་དོན་ལ་མཉམ་པར་བཞག་པས་སྒྲུབ་པ་ནི་ཆེས་ཟབ་མོའི་མཐར་ཐུག་སྟེ། དེ་དག་གདམས་པ་ཐེབས་ཚུལ་གྱི་རྣལ་འབྱོར་པའི་ཉམས་དང་བསྟུན་ཏེ་བསྒྲུབས་པས་ཀུན་གྱི་མཐར་རང་སེམས་གདོད་ནས་དབྱེར་མེད་ཆེན་པོའི་གྲུབ་མཐའ་བསྙེགས་ནས་གྲུབ་པ་ཆེན་པོར་འགྱུར་རོ། །ཞེས་གསུངས་པས་བསྙེན་བསྒྲུབ་སྤྱིའི་གཅེས་གནད་གལ་པོ་ཆེར་མཐོང་ནས་མ་སྦས་པར་བྲིས་པ་ལ་བླ་མ་དང་མཁའ་འགྲོའི་ཚོགས་ཀྱིས་བཟོད་པར་མཛོད་ཅིག །གཉིས་པ་ནི། ཐོག་མར་ཛབ྄་བསྐུལ། ༀ། སྔོན་གྱི་ཐུགས་དམ་སོགས་ཏེ། དེ་ཡང་སྔོན་གྱི་དུས་སུ་དགེ་སློང་ཐར་པ་ནག་པོ་སྔགས་ཀྱི་ལྟ་སྤྱོད་ལོག་པའི་དབང་གིས་དབང་ཕྱུག་དང་ཨུ་མ་གཉིས་ཀྱི་བུ་བདུད་རུ་ཏྲ་ཞེས་བྱ་བར་སྐྱེས་ནས་འབྲས་བུ་ཆེ་མན་ཆོད་མཐུ་དང་རྫུ་འཕྲུལ་གྱིས་དབང་དུ་བསྡུས་ནས་གནས་པ་ལ། སྔོན་རྟེན་ཅིང་འབྲེལ་བའི་སྟོབས་ཀྱིས་བཅོམ་ལྡན་འདས་རྡོ་རྗེ་སེམས་དཔའ་ཉིད་དཔལ་ཧེ་རུ་ཀར་བསྟན་ནས་རུ་ཏྲ་འཁོར་དང་བཅས་པ་བརྟུལ་ཅིང་འབྲས་བུ་གསང་སྔགས་ཀྱི་བསྟན་པ་སྣང་བར་མཛད་པ་སོགས་སྔོན་གྱི་ཐུགས་དམ་ཆེན་པོ་རྗེས་སུ་དགོངས་པར་མཛོད་ལ། དེང་འདིར་ཡང་ཆོས་དང་གང་ཟག་བདག་རྟག་པར་འཛིན་པའི་རྒྱུ་ལས་ཕྱི་ཡུལ་ལམ་ལུས་ལ་མངོན་པར་བཟུང་བ་མ་ཏྲྃ་ཀ་རུ་ཏྲ། ནང་སེམས་ལ་དངོས་པོར་ཞེན་པ་ཁ་ཊྃ་ཀ་རུ་ཏྲ། ལས་འབྲས་མེད་ཅིང་དངོས་པོ་ཀུན་མཐར་ཆད་པར་སྨྲ་བའི་ངག་ནི་ཨ་ཀར་ཤ་རུ་ཏྲ་སྟེ། ཕྱིན་ཅི་ལོག་གི་རྟོག་པ་དེ་གསུམ་ལ་བརྟེན་ནས་དུག་ལྔ་ལྷག་པར་རྒྱས་པའི་རང་གཟུགས་ཕྱི་ནང་དུ་ཤར་བ་བདུད་མ་ཏྲྃ་རུ་ཏྲ་འཁོར་སྲིན་པོ་གཤིན་རྗེ་བདུད་དང་གནོད་སྦྱིན་གྱི་རུ་ཏྲ་བཞི་ཕྱག་བརྙན་དམ་སྲིའི་ཚོགས་བགེགས་རིགས་སྟོང་ཕྲག་བརྒྱད་ཅུ་སོགས་ནང་གི་རྟོགས་ཚོགས་དང་མཐུན་པར་དཔག་ཏུ་མེད་པར་འཕྲུལ་བས། གནས་སྐབས་སུ་དངོས་གྲུབ་སྒྲུབ་པ་དང་མཐར་ཐུག་ཐར་པ་ལ་བར་དུ་གཅོད་པས་དེ་མ་བརྟུལ་ན་གཞན་དོན་དུ་བྱང་ཆུབ་ཆེན་པོའི་འབྲས་བུ་མི་ཐོབ་པས། ཕྱི་ནང་གི་ཆོས་ཐམས་ཅད་བདེན་མེད་དུ་ཤེས་ཤིང་ཀུན་རྫོབ་སྒྱུ་མ་ཙམ་དུ་སྣང་བ་མི་འགོག་ལ་དེ་ཉིད་ལྷར་སྣང་སྒྱུ་མ་ལྟ་བུའི་ཆོ་འཕྲུལ་རྒྱུན་མི་འཆད་པར་ཤེས་པའི་སྔགས་ཀྱི་ལྟ་སྤྱོད་ཟབ་མོས་ཉོན་མོངས་པ་ཡེ་ཤེས་སུ་བསྒྱུར་བའི་ཐབས་མཁས་ཀྱི་སྤྱོད་པས་རྩ་བའི་རུ་ཏྲ་གསུམ་པོ་དེ་ཐུལ་ན། དེས་བསྐྱེད་པའི་བདུད་རུ་ཏྲ་འཁོར་ཕྱག་བརྙན་དང་བཅས་པ་ཀུན་ཀྱང་ཐུལ་བར་འགྱུར་བའི་ཕྱིར། དེ་ལྟ་བུའི་ལྟ་སྤྱོད་རྨད་དུ་བྱུང་བས་བདུད་དང་རུ་ཏྲ་འཁོར་དང་བཅས་པ་བསྒྲལ་བ་དང་། སྐལ་བ་དང་ལྡན་པའི་གདུལ་བྱ་ཡོངས་སུ་སྨིན་པར་བྱ་བའི་ཕྱིར་དུ། ཐབས་མཁས་གསང་སྔགས་ཀྱི་སྤྱོད་པ་རླབས་པོ་ཆེའི་ཕྲིན་ལས་ཟབ་མོ་དེང་འདིར་རྗེས་སུ་བསྐུལ་བ་ལགས་ན། སྲིད་པ་ཇི་སྲིད་བར་དུ་གང་འདུལ་སྒྱུ་འཕྲུལ་དྲྭ་བའི་རོལ་གར་ཅིར་ཡང་སྟོན་པར་མཛད་པའི་འབར་བ་ཆེན་པོ་རྡོ་རྗེ་སྐུ་ཡི་གཟི་བྱིན་མཆོག་ཏུ་བསྐྱེད་པ་དང་། གྲགས་སྟོང་གཞོམ་མེད་ནཱ་དའི་སྒྲ་དབྱངས་གང་འདུལ་གདུལ་བྱའི་བསམ་པ་དང་མཐུན་པར་ཆོས་སྒོ་བསམ་ལས་འདས་པར་སྟོན་པའི་རྡོ་རྗེའི་གསུང་གིས་ཟབ་མོ་སྔགས་ཀྱི་སྒྲ་གདངས་སྒྲོགས་པ་དང་། རྣམ་ཀུན་མཆོག་ལྡན་གྱི་སྟོང་པ་ཉིད་དང་མཆོག་ཏུ་མི་འགྱུར་བའི་བདེ་བ་ཆེན་པོ་ཟུང་དུ་འཇུག་པའི་ཡེ་ཤེས་ཆེན་པོ་སྲོག་དང་ལྡན་པའི་རྡོ་རྗེའི་ཐུགས་མཁྱེན་བརྩེའི་རང་བཞིན་གྱིས་ལྷག་པར་རྗེས་སུ་དགོངས་ནས་བདག་སྒྲུབ་པ་པོ་ལ་ཕྱག་རྒྱ་ཆེན་པོ་མཆོག་དང་ཐུན་མོང་གི་དངོས་གྲུབ་རྣམ་པ་གཉིས་པོ་སླད་མའི་དུས་ལ་མི་ལྟོས་པར་མྱུར་བ་ད་ལྟ་ཉིད་དུ་སྩལ་བར་མཛོད་ཅིག ཅེས་དེ་སྐད་དད་མོས་གདུང་བ་དྲག་པོས་བསྐུལ་ཞིང་གསོལ་བ་བཏབ་པས་དེ་མ་ཐག་པར། སྤྱི་བོའི་བླ་མ་ཧེ་རུ་ཀ་ཉིད་སྐུ་དགྱེས་པའི་གར་དགུར་ཤིག་ཤིག་ཏུ་གཡོས་ཤིང་ཁྱད་པར་རྡོ་རྗེ་དང་པདྨ་མཉམ་པར་སྦྱོར་བ་མཛད། གསུང་སྔགས་ཀྱི་སྒྲ་ཆེན་པོ་དང་ཁྱད་པར་ཨ་ཧྃ་ལ་སོགས་པ་སྙོམས་འཇུག་བདེ་བའི་སྒྲ་གདངས་ཀུན་དུ་ཁྱབ་པར་སྒྲོག་པ་དང་། ཐུགས་དམིགས་མེད་ནམ་མཁའ་ལྟ་བུའི་ངང་ལས་མ་གཡོས་བཞིན་དུ་བཟོད་དུ་མེད་པའི་བདེ་སྟོང་གི་ཡེ་ཤེས་ཆེན་པོར་མཉམ་པར་ཞུགས་ཤིང་། ཆེ་བའི་ཡོན་ཏན་དང་ཕྲིན་ལས་བསམ་གྱིས་མི་ཁྱབ་པས་གང་ལ་གང་གིས་འདུལ་བར་དེ་དང་དེར་སྟོན་པའི་རྣམ་འཕྲུལ་ཚད་མེད་པས། ཐུན་མོང་དུ་སྐུ་ཡི་གནས་གསུམ་རྡོ་རྗེའི་འབྲུ་གསུམ་ལས་དཀར་དམར་མཐིང་བའི་སྔགས་འབྲུ་འོད་ཟེར་དང་བཅས་པ་ཆར་བབས་པ་བཞིན་དུ་བྱུང་ནས་རང་ལྷར་གསལ་བའི་སྒོ་གསུམ་ལ་གཉིས་མེད་དུ་ཐིམ་པས། བདག་དང་བདག་གིར་འཛིན་པའི་རྣམ་རྟོག་གི་རྒྱུད་དང་སྒོ་གསུམ་འཁྲུལ་རྟོག་བག་ཆགས་དང་བཅས་པ་ཀུན་སྦྱངས་ནས་སྐུ་གསུང་ཐུགས་རྡོ་རྗེ་གསུམ་གྱི་དབྱིངས་སུ་ཡེ་ཤེས་ཆེན་པོར་རོ་གཅིག་ཏུ་གྱུར་པར་མོས་པ་དང་། ཐུན་མོང་མིན་པའི་དབང་དུ་བྱས་ན། ཡབ་ཡུམ་སྙོམས་པར་ཞུགས་པའི་བདེ་བའི་སྒྲ་དང་འོད་ཟེར་གྱིས་བླ་མ་རྩ་གསུམ་རྒྱལ་བའི་དཀྱིལ་འཁོར་མ་ལུས་ཤིང་ལུས་པ་མེད་པ་སྤྱན་དྲངས། དེ་ཐམས་ཅད་རྗེས་ཆགས་ཀྱི་སྙོམས་པར་ཞུགས་པ་བདེ་སྟོང་ཟུང་འཇུག་གི་ངོ་བོར་འོད་དུ་ཞུ་བ་བླ་མ་ཡབ་ཡུམ་གྱི་སྤྱི་བོ་ནས་ཞུགས་སྐུ་ཡི་དབྱིབས་བརྒྱུད་མཁའ་གསང་ནས་བདུད་རྩི་བྱང་ཆུབ་སེམས་ཀྱི་རྒྱུན་དཀར་དམར་མཐིང་གསུམ་གྱི་རྣམ་པས་བྱུང་། རང་རྡོ་རྗེ་གཞོན་ནུར་གསལ་བའི་སྤྱི་བོ་ནས་ཞུགས། རིམ་གྱིས་རྩ་འཁོར་ཐམས་ཅད་གང་བས་དབང་བཞི་ཐོབ། སྒྲིབ་བཞི་བྱང་། ལམ་བཞིའི་རྟོགས་པ་མངོན་དུ་གྱུར་ནས། སྐུ་གསུང་ཐུགས་ཡེ་ཤེས་རྡོ་རྗེ་དང་རང་གི་སྒོ་གསུམ་གཉིས་སུ་མེད་པར་གྱུར་པར་མོས་ལ། རིག་སྟོང་ཀ་དག་བསམ་བརྗོད་དང་བྲལ་བའི་དབྱིངས་སུ་མཉམ་པར་བཞག་ནས། བཟླ་བྱའི་སྔགས་རུ་ལུ་འབྲུ་བརྒྱད་པ་ཉིད་གྲགས་སྟོང་སྐྱེ་མེད་ཀྱི་ངང་དུ་བཟླས་པས་ཡེ་ཤེས་ཆེན་པོའི་བྱིན་རླབས་མྱུར་དུ་ཞུགས་པ་ཏེ་མཆོག་ཐུན་གྱི་གྲུབ་པ་མཐའ་དག་ཚེ་འདི་ཉིད་ལ་མངོན་དུ་བྱེད་པར་འགྱུར་ཏེ། གཏེར་གཞུང་རྩ་བར། བར་མེད་ཆུ་བོའི་རྒྱུན་བཞིན་དུ༔ བསྙེན་དང་སྒྲུབ་པ་འདི་ཉིད་ལ༔ བདུན་ཕྲག་བདུན་དུ་སུས་བརྩོན་པ༔ ཐུན་མོང་དངོས་གྲུབ་ལྟ་ཅི་སྨོས༔ དཔྱིད་ཀྱི་ས་རློན་དྲོས་པ་ན༔ རྩ་བ་མྱུ་གུ་མེ་ཏོག་སོགས༔ རྩོལ་མེད་ངང་གིས་འབྱུང་བ་བཞིན༔ སངས་རྒྱས་རྣམས་ཀྱི་བྱང་ཆུབ་སེམས༔ བདག་དང་ཕུང་པོ་རྣམ་རིག་གི༔ གཟུང་འཛིན་རྟོག་པས་མ་གོས་པ༔ བདེ་བས་ཐབས་བྱས་སྟོང་པ་ཉིད༔ ནམ་མཁའ་གང་བ་འཕེལ་བ་ཡིས༔ རྣམ་པ་ཀུན་ཏུ་ཟུང་འཇུག་པ༔ འཇིག་རྟེན་ཀུན་ན་སྒྲ་ཆེ་བ༔ ནམ་མཁའི་མཐའ་ལ་ལོངས་སྤྱོད་པའི༔ ཡང་དག་ཟླ་མེད་དེ་བཞིན་ཉིད༔ མཆོག་གི་གོ་འཕང་ཚེ་འདི་རུ༔ དཀའ་བ་མེད་པར་མངོན་བགྱིད་པའི༔ ལམ་གྱི་མཆོག་ནི་འདི་ཉིད་དོ༔ ཞེས་གསུངས་སོ། །དེ་ལྟར་བཟླས་པའི་གྲངས་ཀྱི་ཚད་ནི་བདུན་འབུམ་ཁ་སྐོང་བཅས་དང་། དུས་ཀྱི་ཚད་ནི་ཞག་བདུན་ཕྲག་བདུན་དང་། རྟགས་ཀྱི་ཚད་ནི་བྱིན་རླབས་ཀྱི་མཚན་མ་མངོན་སུམ་དུ་མཐོང་བའི་བར་རོ། །གཉིས་པ་ཡི་དམ་ཁྲོ་བོའི་བཟླས་པ་ལ་གཉིས། ཛབ྄་ཁང་དབྱེ་བ་དང་། དངོས་སོ། །དང་པོ་ནི། དབྱེ་གཞི་རྟེན་དང་བརྟེན་པར་བཅས་པའི་དཀྱིལ་འཁོར་ལ་སླར་ཡང་གསལ་སྣང་འདོན་སྐྱོར་ཞིག་བྱས་ནས། བསྙེན་སྔགས་ལ་ཕཊ་ཛཿབཏགས་པ་བརྗོད་པའི་རྐྱེན་གྱིས་བདག་དམ་ཚིག་གི་འཁོར་ལོ་ལས་ཡེ་ཤེས་ཀྱི་འཁོར་ལོ་རྟེན་དང་བརྟེན་པར་བཅས་པ་ལོགས་སུ་ཕྱེས་ནས་མདུན་གྱི་ནམ་མཁར་མེ་རི་འདབ་འབྱོར་གྱི་ཚུལ་དུ་བཞུགས་པར་མོས་པའོ། །གཉིས་པ་ཛབ྄་དགོངས་དངོས་ནི། བདག་མདུན་རྡོ་རྗེ་གཞོན་ནུ་སོགས་ཏེ། འདི་ལ་གསུམ། སྐུ་ཕྱག་རྒྱ། གསུང་སྔགས་ཕྲེང་། ཐུགས་ཡེ་ཤེས་ཆེན་པོར་དམིགས་པའོ། །དང་པོ་ནི། བདག་དམ་ཚིག་པ་དང་མདུན་གྱི་ཛབ྄་ཁང་གི་ལྷ་རྡོ་རྗེ་གཞོན་ནུར་གསལ་བ་དེ་གཉིས་ཀའི་ཐུགས་ཀར། ཡེ་ཤེས་སེམས་དཔའ་རྡོར་སེམས་ཞི་བ་ཡབ་རྐྱང་གི་རྣམ་པ་ཚོན་གང་བ། སྐུ་མདོག་དཀར་པོ་གསལ་ཞིང་འཚེར་བ་འོད་ཀྱི་རང་བཞིན་ཅན། ཞལ་གཅིག་ཕྱག་གཉིས་པ། རྡོ་རྗེ་དང་དྲིལ་བུ་འཛིན་པ་ལོངས་སྤྱོད་རྫོགས་སྐུའི་རྒྱན་ཆ་ཅན། ཞབས་གཉིས་ཕྱེད་སྐྱིལ་གྱིས་པདྨ་དང་ཟླ་བའི་གདན་ལ་བཞུགས་པ། དེའི་ཐུགས་རིན་པོ་ཆེ་ཟུར་བརྒྱད་པ་མཆོང་གུར་ཕུབ་པ་ལྟ་བུའི་ནང་དབུས་སུ། པདྨ་དང་ཉི་མའི་ལྟེ་བར་ཏིང་འཛིན་སེམས་དཔའ་ཧཱུྃ་མཐིང་གའི་མཐའ་བསྐོར་དུ་མདུན་ནས་བརྩམས་ཏེ། གཡས་བསྐོར་དུ་ཡིག་ངོ་ནང་བསྟན་གྱིས། འབར་བའི་སྔགས་ཀྱི་ཕྲེང་བ་ཀཱི་ལ་ཡ་འབྲུ་དགུས་བསྐོར་བ་བསམ་ལ། གོང་དུ་བསྟན་པ་ལྟར་རྟེན་དང་བརྟེན་པའི་དཀྱིལ་འཁོར་གསལ་བརྟན་དག་གསུམ་རྫོགས་པའི་བསྐྱེད་པ་ལྷའི་གཟེར་ལ་དམིགས་པ་རྩེ་གཅིག་པས་མ་ཡེངས་པར་གསལ་སྟོང་འཛིན་མེད་ཀྱི་ངང་དུ་བཟླ་བ་ནི་ཡི་དམ་གྱི་སྐུའི་སྲོག་ལ་དབང་བྱེད་པའི་ཐབས་སོ། །གཉིས་པ་ནི། གོང་གི་གསལ་སྣང་ལ་གནས་བཞིན་པར། སྔགས་བཟླས་པའི་རྐྱེན་གྱིས་ཐུགས་སྲོག་སྔགས་ཕྲེང་ལས་འོད་མཐིང་ནག་གམ་ལས་མཐུན་ཉི་མའི་ཟེར་ལྟ་བུ་བསམ་གྱིས་མི་ཁྱབ་པ་ནམ་མཁའི་དབྱིངས་ཁྱབ་པར་འཕྲོས། སྤྱི་བོའི་རིགས་བདག་བླ་མ་ཧེ་རུ་ཀ་དང་། རྩ་གསུམ་རྒྱལ་བ་རབ་འབྱམས་ཀྱི་ཚོགས་ལ་ཐུགས་མཉེས་པའི་མཆོད་པ་ཕུལ། ཁམས་གསུམ་གྱི་སེམས་ཅན་ཐམས་ཅད་ལ་ཕོག་པས་ལས་ཉོན་རྣམས་སྨིན་གྱི་སྒྲིབ་པའི་ཚོགས་མ་ལུས་པ་སྦྱངས། ཡེ་ཤེས་ཆེན་པོར་བྱིན་གྱིས་བརླབས། འོད་ཟེར་ཚུར་འདུས་བདག་ལ་ཐིམ་པས་མཆོག་དང་ཐུན་མོང་གི་དངོས་གྲུབ་མ་ལུས་པ་ཐོབ། སླར་ཡང་སྔ གས་ཀྱི་འོད་ཟེར་སྐུ་དང་སྔགས་འབྲུ་ཕྱག་མཚན་འབར་བའི་མེ་དཔུང་རྡོ་རྗེའི་ཚྭ་ཚྭ་འཕྲོ་བཞིན་པ་དཔག་ཏུ་མེད་པ་འཕྲོས། སྣང་སྲིད་ཐམས་ཅད་ལ་ཁྱབ་པས། དམ་ཅན་སྲུང་མའི་ཚོགས་ལས་ལ་བསྐུལ། སྡེ་བརྒྱད་གདུག་པ་ཅན་ཐམས་ཅད་ཚར་བཅད། བར་ཆད་བྱད་ཕུར་ཐམས་ཅད་རྡུལ་དུ་བརླག གཞན་ཡང་ཞི་སོགས་ལས་གང་འདོད་ཀྱི་དམིགས་པའི་ཁ་བསྒྱུར་དང་བཅས། ཕྱི་སྣོད་ཀྱི་འཇིག་རྟེན་གཞལ་ཡས་ཁང་། ནང་བཅུད་ཀྱི་སེམས་ཅན་ཐམས་ཅད་རྡོ་རྗེ་གཞོན་ནུའི་སྐུ་ཞལ་ཕྱག་རྫོགས་པ། སྒྲ་རུ་གྲགས་པ་ཐམས་ཅད་སྙིང་པོ་ཀཱི་ལ་ཡ་ཡི་སྔགས་ཀྱི་སྒྲ་འབྲུག་སྟོང་དུས་གཅིག་ལ་ལྡིར་བ་ལྟ་བུ། སེམས་ཀྱི་འགྱུ་དྲན་གྱི་རྟོག་ཚོགས་ཐམས་ཅད་ཐུགས་འོད་གསལ་ཆོས་ཉིད་སྐྱེ་མེད་ཀྱི་དབྱིངས་སུ་ཐིམ་པར་མོས་ལ་གྲགས་སྟོང་གཞོམ་མེད་ཀྱི་ངང་དུ་བཟླ་བ་ནི་བཟླས་པ་སྔགས་དང་འཕྲོ་འདུ་ཕྲིན་ལས་ཀྱི་གཟེར་གཉིས་ཀྱི་དགོངས་པ་སྟེ་གསུང་གི་སྲོག་དབང་དུ་བྱེད་པའི་གནད་དོ། །གསུམ་པ་ནི། འཁོར་འདས་ཀྱི་ཆོས་ཐམས་ཅད་གདོད་མ་ནས་དག་མཉམ་ཆོས་སྐུའི་རང་བཞིན་སྣང་སྲིད་གཞིར་བཞེངས་དཔལ་ཆེན་པོའི་སྐུ་གསུང་ཐུགས་ཀྱི་དཀྱིལ་འཁོར་དུ་ཡེ་ནས་ལྷུན་གྱིས་གྲུབ་པའི་ཕྱིར། གང་ཤར་གྱི་སྣང་བ་ཐམས་ཅད་མེ་ལོང་ནང་གི་གཟུགས་བརྙན་བཞིན་དུ་ལྷའི་སྐུ་གསལ་སྟོང་འཛིན་མེད་དུ་ཤར་བ་མེ་ལོང་ཡེ་ཤེས། སྒྲར་གྲགས་པ་ཐམས་ཅད་གྲགས་སྟོང་གཞོམ་མེད་ནཱ་དའི་སྒྲ་དབྱངས་སྙིང་པོ་སྔགས་ཀྱི་རང་སྒྲར་གྲགས་པ་སོར་རྟོག་ཡེ་ཤེས། སྒྱུ་མ་ལྟ་བུའི་ཏིང་ངེ་འཛིན་གྱི་དམིགས་པའི་འཕྲོ་འདུ་ལ་བརྟེན་ནས་རང་གཞན་གྱི་དོན་གཉིས་སྒྲུབ་པ་བྱ་གྲུབ་ཡེ་ཤེས། དེ་ཐམས་ཅད་རང་གི་རིག་པའི་ངང་དུ་དབྱེར་མེད་རོ་གཅིག་པ་མཉམ་ཉིད་ཡེ་ཤེས། རིག་པ་དཔལ་ཆེན་པོའི་ཐུགས་སྤྲོས་བྲལ་རང་བྱུང་གི་ཡེ་ཤེས་བརྗོད་བྲལ་ཐིག་ལེ་ཉག་གཅིག་ཏུ་རྫོགས་པ་ཆོས་དབྱིངས་ཡེ་ཤེས་ཏེ། ཅིར་སྣང་ཡེ་ཤེས་ཆེན་པོའི་དགོངས་པའི་གཟེར་གྱིས་འཁོར་འདས་ཀྱི་ཆོས་ཀུན་གྱི་སྲོག་ལ་དབང་བསྒྱུར་པས་དཔལ་ཆེན་པོའི་ཐུགས་རང་བྱུང་གི་ཡེ་ཤེས་མངོན་དུ་བྱེད་པའི་ཐབས་སྔ་འགྱུར་རིག་འཛིན་བརྒྱུད་པའི་དགོངས་པ་ཟབ་མོའོ། །དེ་ལྟར་ཛབ྄་དགོངས་གསུམ་པོ་རེ་རེ་ལ་ཐུན་གྱི་སུམ་ཆ་རེ་ཙམ་ཆ་བརྩིས་ཏེ་གསལ་བཏབ་ལ། སེམས་རྩེ་གཅིག་པའི་ཏིང་ངེ་འཛིན་གྱིས་བཟླ་བར་གསུངས། བཟླ་བྱའི་སྔགས་ནི་ཀཱི་ལ་ཡ་འབྲུ་བཅུ་བཞི་པ་སྟེ་སྔགས་དོན་ནི་གོང་དུ་སྨོས་པ་བཞིན་ནོ། །ཇི་ལྟར་བཟླ་ན་ཧ་ཅང་སྔགས་མྱུར་བ་དང་། བུལ་བ་དང་། སྒྲ་དྲག་པ་དང་། ཞན་པ་དང་། གཉིད་རྨུགས་སོགས་བྱིང་བ་དང་། སེམས་འཕྲོ་རྒོད་སོགས་སྔགས་དང་ཏིང་ངེ་འཛིན་གྱི་སྐྱོན་རྣམས་སྤངས་ཏེ། ཏིང་ངེ་འཛིན་གྱི་གསལ་སྣང་དང་ང་རྒྱལ་བརྟན་པོས་སྔགས་སྒྲ་གསལ་ཞིང་དག་པར་བཟླ་སྟེ། རྔམ་གློག་ལས། སྒྲ་ཆེན་མ་ཡིན་ཆུང་བ་མིན། །མགྱོགས་པར་མ་ཡིན་བུལ་བར་མིན། །དྲག་པོར་མ་ཡིན་ཞན་པར་མིན། །ཡིག་འབྲུ་ཡན་ལག་ཉམས་པས་མིན། །ཡེངས་པས་མ་ཡིན་སྨྲ་བཞིན་མིན། །གླལ་སོགས་བར་དུ་ཆོད་པས་མིན། །ཞེས་སྐྱོན་བཅུ་སྤང་བར་བཤད་ཅིང་། ཁྱད་པར་ཐུན་སྒང་སོགས་སུ་སྨྲ་བ་བཅད་པ་དང་ཏིང་འཛིན་གསལ་བ་གལ་ཆེ་སྟེ། དགེ་སློང་སོ་ཁྱ་དེ་བའི་ཞལ་ནས། སྨྲ་བ་ཐམས་ཅད་སྤངས་ནས་སུ། །གསང་སྔགས་སྨྲ་བར་བརྩམ་པར་བྱ། །བདེ་བའི་ལྷ་ཡང་བསྒྲུབ་པས་ན། །སྔགས་ཀྱི་མཐུ་ནི་ཤིན་ཏུ་ཆེ། །ཞེས་དང་། སྨིན་གཏེར་དྲག་དམར་གཏེར་གཞུང་ལས། མ་ཡེངས་ཏིང་འཛིན་ལྡན་པས་བཟླ༔ གཞན་དུ་ཡེངས་པར་གྱུར་ན་ནི༔ བསྐལ་པར་བཟླས་ཀྱང་འབྲས་མི་འབྱིན༔ ཞེས་གསུངས། དེས་ན། ཏིང་འཛིན་མེ་དང་འདྲ་བ་ལ། །བཟླས་བརྗོད་རླུང་དང་འདྲ་བས་བསྐུལ། །ཞེས་གསུངས་པ་ལྟར་བཟླས་གྲངས་ཙམ་ལ་གཙོ་བོར་མི་བྱ་བར་ལྷ་སྔགས་ཀྱི་དམིགས་པ་ལ་ཡིད་རྩེ་གཅིག་ཏུ་གཏད་པ་གནད་དོ། །ཚད་སྤྱི་དང་མཐུན་པར་གསུངས་པས། དུས་ནི་དགོངས་རྒྱུད་ལས། ཡུན་ནི་ལོ་ཟླ་ཙམ་དུ་བསྲིངས། །ཞེས་པས་རང་གི་ནུས་པ་དང་སྦྱར་ཏེ་ལོའམ་ཟླ་བའི་གྲངས་འདི་ཙམ་ཞེས་ཇི་ལྟར་དམ་བཅས་པ་ལས་མི་འདའ་བ་སྟེ་ཟླ་བ་དྲུག་ལ་སོགས་པའོ། །གྲངས་ནི། སྔ་མ་ལས། བསྙེན་སྒྲུབ་ཆོ་ག་ཚར་བྱས་ནས། །ཛབ྄་གྲངས་བདུན་འབུམ་ཉི་ཁྲི་འདོན། །ཞེས་གསུངས་པས་བདུན་འབུམ་ཉི་ཁྲི་ཡན་ཆོད་དེ། སྤྱི་ལྟར་འབྲུ་འབུམ་ཁ་སྐོང་དང་བཅས་པ་ཉིད་ལེགས་སོ། །མཚན་མའི་བསྙེན་པ་ནི། ནང་གི་ཏིང་ངེ་འཛིན་གྱི་མཚན་མའམ་ཕྱི་རོལ་གྱི་རྟགས་མ་མཐོང་གི་བར་ཏེ། དེ་ཡང་ཆོས་དབང་གཏེར་བྱོན་སྤུ་གྲིའི་གཏེར་གཞུང་ལས། དེ་ལྟར་བསྙེན་པའི་དྲོད་དམ་རྟགས་ཚད་ནི། ཉམས་རྟོགས་འབར་བ། སེམས་རྩེ་གཅིག་པའི་ཏིང་འཛིན་ཐོབ་པ། རྨི་ལམ་དུ་མཆོད་རྟེན་གྱི་རྩེ་དང་། རི་བོའི་རྩེར་འདུག་ཅིང་དར་ཕྱར་བ་ཉི་ཟླའི་སྟེང་ན་འདུག་གམ་ཉི་ཟླ་ལུས་ལ་ཤར་བ་དང་། དངོས་སུ་ལྷ་ཉིད་གྱད་དུ་གྱུར་པ་དང་ཞལ་མཇལ་ལམ་བཞད་པ་དང་། རྨི་ལམ་དུ་རྔ་ཆེན་བརྡུང་བ། དུང་འབུད་པ། འོད་དང་ལྷ་མོས་གཟུགས་སྟོན་པ། འགྲོ་བའི་དེད་དཔོན་བྱེད་པ་རྨི་བ་སོགས་མཚན་མ་བཟང་པོ་རང་ཉམས་ཀྱི་རིག་པ་ཕྱོགས་མེད་དུ་འབྱུང་ངོ་། །ཞེས་གསུངས། དེ་ལྟར་བསྙེན་པ་རྫོགས་ནས་གཞི་སྙིང་གཅིག་དྲིལ་ཡང་བཟླ་བར་གསུངས་པས། བཟླས་དམིགས་བསྙེན་རྐྱང་ཙམ་ལ་གོང་དུ་བསྟན་པས་འཐུས་ཤིང་། ཐུན་མིན་སྨད་ལས་དང་སྦྲེལ་ན། ཕྲིན་ལས་ལ་དམིགས་པ་དྲག་པོའི་བཟླས་པ་བྱེ་བྲག་ཏུ་བྱ་བའི་ཚུལ་སོགས་ནི་ལམ་འདིའི་སྙན་བརྒྱུད་ཀྱི་བཀའ་བབ་སྤྲུལ་པའི་གཏེར་ཆེན་ཉིད་ཀྱི་ཕྲིན་ལས་ཀྱི་རྣམ་འཕྲུལ་མཚུངས་བྲལ་མཆོག་སྤྲུལ་རིན་པོ་ཆེའི་ཞལ་སྔ་ནས་བསྩལ་པའི་གཏོར་བཟློག་བདུད་ལས་རྣམ་རྒྱལ་ལས་ཤེས་པར་བྱའོ། །གསུམ་པ་གཉིས་ཀ་ལ་བརྟེན་ནས་རྡོ་རྗེའི་ཚེ་སྒྲུབ་པའི་ལས་ཀྱི་སྦྱོར་བ་ལ་བཞི། ཛབ྄་བཟླ་བ། ཚེ་འགུགས་པ། ཚེ་སྦ་ཞིང་རྒྱས་གདབ་པ། ཐུན་མོང་དུ་སྟོང་ཚིག་བྱ་བའོ། །དང་པོ་ནི། བདག་མདུན་དཔལ་ཆེན་སོགས་ཏེ། དེ་ཡང་བདག་མདུན་རྡོ་རྗེ་གཞོན་ནུ་དང་སྤྱི་བོའི་བླ་མ་ཡང་དག་ཧེ་རུ་ཀ་གཉིས་ཀའི་ཐུགས་ཀར་ཉི་ཟླའི་གའུ་ཁ་སྦྱོར་གྱི་དབུས་སུ་ཧཱུྃ་མཐིང་ནག་གི་མཐའ་སྐོར་དུ། རང་སྔགས་ཚེའི་རིག་པས་བསྐོར་བ་གསལ་བཏབ། སྔགས་བཟླས་ཤིང་ཐུགས་དམ་བསྐུལ་བའི་ཚེ། དངོས་གཅིག་དུ་མར་འཆར་བའི་ཚུལ་གྱིས་བླ་མ་ཡང་དག་ཧེ་རུ་ཀའི་སྐུ་ལས་ཀ་རཱི་ལ་སོགས་གནས་ཡུལ་གྱི་མ་མོ་རྣམས་དང་། རྡོ་རྗེ་གཞོན་ནུའི་སྐུ་ལས་ཕུར་སྲུང་བཅུ་གཉིས་ལ་སོགས་པ་ཡེ་ཤེས་ཆེན་པོའི་རོལ་པ་ཚད་མེད་པར་འཕྲུལ་བ་ལ་ཐུགས་སྲོག་འོད་ཟེར་གྱིས་བསྐུལ་བས་སྤྲུལ་པ་དང་ཡང་སྤྲུལ་འཇིག་རྟེན་གྱི་ཁམས་གང་བར་སྤྲོས་ནས་རང་དང་བསྒྲུབ་བྱའི་བླ་ཚེ་ཆད་ཉམས་ཡར་བ་དང་། སྡེ་བརྒྱད་གདུག་པ་ཅན་རྣམས་ཀྱིས་བརྐུས་དང་འཕྲོག་པ། བརྟན་གཡོ་འཁོར་འདས་སྲིད་ཞིའི་ཚེ་ཡི་དྭངས་བཅུད་མ་ལུས་པ་འཆི་མེད་ཡེ་ཤེས་ཀྱི་བདུད་རྩིའི་རྣམ་པར་བསྡུས་ཤིང་སྤྱན་དྲངས་ནས། བདག་དང་བསྒྲུབ་བྱ་རྟེན་རྫས་རྣམས་ལ་ཐིམ་པས་འཆི་བ་མེད་པ་ཚེ་ཡི་རིག་འཛིན་འགྲུབ་པར་མོས་ལ། སྔགས་ཚན་གཉིས་པོ་ཅི་འགྲུབ་བཟླ་ཞིང་ཚེ་བཅུད་བསྡུ་སྟིམ་གྱི་དམིགས་པ་ཡང་ཡང་བྱའོ། །གནས་སྐབས་འདི་དག་ཏུ་དོན་དམ་པར་ཆོས་ཐམས་ཅད་རང་བཞིན་ཅི་ཡང་མ་གྲུབ་པས་ཅིར་ཡང་འཆར་དུ་རུང་བ་དང་། ཀུན་རྫོབ་རྟེན་འབྱུང་གི་ཆོས་ཉིད་མི་བསླུ་བའི་གནད་ཀྱིས་རྡོ་རྗེའི་ཚེ་ཡི་སྲོག་སྒྲུབ་པར་ནུས་པའི་སྔགས་ཀྱི་ཐབས་མཁས་ཀྱི་ཚུལ་ལ་ཡིད་ཆེས་པ་གལ་ཆེ་སྟེ། འཕགས་པ་དཀོན་མཆོག་བརྩེགས་པ་ལས། རིག་སྔགས་དང་། སྨན་དང་། འཁྱུད་དཔྱད་དང་། རྟེན་ཅིང་འབྲེལ་བར་འབྱུང་བའི་མཐུ་ནི་བསམ་གྱིས་མི་ཁྱབ་བོ། །སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐབས་དང་ཏིང་ངེ་འཛིན་དང་རྫུ་འཕྲུལ་གྱི་སྤྱོད་ཡུལ་ནི་བསམ་གྱིས་མི་ཁྱབ་བོ། །ཞེས་དང་། འཕགས་པ་ཀླུས། གང་ལ་སྟོང་པ་ཉིད་རུང་བ། །དེ་ལ་ཅིར་ཡང་རུང་བ་ཡིན། །ཞེས་དང་། རྟེན་ཅིང་འབྲེལ་འབྱུང་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་སོ། །གཉིས་པ་ནི། ཐུན་མཐར་གོང་སྨོས་ཀྱི་དམིགས་པ་གསལ་བཞིན་དུ་མདའ་དར་གཡབ་ལ་ཚེ་འགུགས་པ་ནི། ཨོཾ། འཆི་མེད་རྟག་པ་སོགས་ཏེ། དེ་ཡང་འདུས་བྱས་ཀྱི་མཚན་ཉིད་སྐྱེ་རྒ་ན་འཆི་སོགས་འགྱུར་བཅས་ཀྱི་ཟུག་རྔུ་མཐའ་དག་སྤངས་པའི་རང་བཞིན་འདུས་མ་བྱས་པའི་ཡེ་ཤེས་མངོན་དུ་མཛད་པས་འཆི་མེད་རྡོ་རྗེ་ལྟ་བུར་རྟག་པ་དམ་པའི་སྐུ་བརྙེས་པའི་དཔལ་ཆེན་པོ་ཡང་དག་ཧེ་རུ་ཀ་དང་། རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་ཁྱེད་རྣམས་སྔོན་གྱི་ཚེ་སྐྱེ་བ་མང་པོའི་གོང་རོལ་ནས་རྟེན་ཅིང་འབྲེལ་བའི་ཡི་དམ་གྱི་ལྷ་ལགས་པས། དེང་གི་དུས་འདིར་ཡང་རྩེ་གཅིག་ཏུ་བསྙེན་ཅིང་སྒྲུབ་པ་ཟབ་མོ་ལ་བརྩོན་ལགས་ན་རང་དོན་ཉི་ཚེ་ཙམ་གྱི་ཆེད་དུ་མ་ཡིན་པར་ཐེག་ཆེན་བླ་ན་མེད་པའི་བྱང་ཆུབ་མཆོག་ཏུ་སེམས་བསྐྱེད་ནས། དུས་གསུམ་གྱི་རྒྱལ་བ་རིག་པ་འཛིན་པ་རྣམས་ཀྱི་གདུང་འཚོབ་པར་འདོད་པའི་རིག་འཛིན་རྣལ་འབྱོར་པ་བདག་ཅག་འཁོར་དང་བཅས་པ་རྣམས་ལ་ལྷག་པའི་ལྷ་མཆོག་ཁྱེད་རྣམས་ཀྱིས་སྔོན་གྱི་ཐུགས་དམ་ཆེན་པོ་རྗེས་སུ་དགོངས་ནས་མཆོག་ཐུན་མོང་གི་དངོས་གྲུབ་སྤྱི་དང་ཁྱད་པར་སྐྱེ་འཆི་མེད་པ་རྡོ་རྗེ་ཚེ་ཡི་དངོས་གྲུབ་དམ་པ་དེང་འདིར་སྩོལ་བའི་དུས་ལ་བབས་པས། གནས་ཡུལ་གྱི་མ་མོ་ཕུར་སྲུང་དམ་ཅན་ལྕམ་དྲལ་ལ་སོགས་པའི་སྤྲུལ་པའི་ཕོ་ཉ་མང་པོའི་འདུ་འཕྲོ་ཡིས། བདག་དང་སྒྲུབ་བྱའི་བླ་ཚེ་ཆད་ཉམས་ཡར་བ་དང་། བརྟན་གཡོ་སྲིད་ཞིའི་དྭངས་བཅུད་དགེ་མཚན་ཅི་དང་ཅི་མཆིས་པ་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་སྡུད་པའམ་བུང་བས་པདྨའི་ཚལ་ནས་སྦྲང་རྩི་ལེན་པ་བཞིན་ཏུ་ལྷ་སྔགས་རྟེན་འབྲེལ་ཟབ་མོའི་སྦྱོར་བས་གཅིག་ཏུ་བསྡུས་ནས་བདག་དང་བསྒྲུབ་བྱ་རྟེན་རྫས་རྣམས་ལ་བསྟིམས་པས། རྒས་པ་མེད་པ་རྡོ་རྗེ་ལྟ་བུའི་ལུས། ནད་མེད་བདེ་བའི་གཟི་བྱིན། འཆི་བ་མེད་པ་རྟག་པའི་ཚེ། གཞོམ་གཞིག་དང་བྲལ་པའི་ཡེ་ཤེས་མཆོག་གི་དངོས་གྲུབ་མ་ལུས་སྩོལ་བར་མཛོད་ཅིག ཅེས་ཐུགས་དམ་བསྐུལ་ལ་ཚེའི་རིག་པ་བཟླ་ཞིང་ལུས་ཐམས་ཅད་འཆི་མེད་ཡེ་ཤེས་ཀྱི་བདུད་རྩི་དཀར་དམར་གྱི་རྣམ་པས་མེར་གྱིས་གང་ནས་འཆི་མེད་ཚེ་ཡི་དངོས་གྲུབ་ཐོབ་པར་མོས་ལ། སྤྲོ་ན་ཚེ་རིལ་ཆང་སོགས་ཀྱང་ལོངས་སྤྱོད་པར་བྱའོ། །གསུམ་པ་ནི། ཨཱཿ འཁོར་འདས་དྭངས་བཅུད་སོགས་ཏེ། སྨོས་མ་ཐག་པ་ལྟར་གྱི་འཁོར་འདས་བརྟན་གཡོའི་དྭངས་མས་ལུས་ཀྱི་ནང་ཐམས་ཅད་གང་བའི་སྙིང་པོ་ཚེ་ཡི་བཅུད་མཐའ་དག་གཅིག་ཏུ་འདྲིལ་བ་ཉི་ཟླའི་གའུ་ཁ་ཅུང་ཟད་བྱེ་བའི་བར་ནས་ཡེ་ཤེས་ཀྱི་རླུང་བྱུང་ནས་འུབ་ཀྱིས་བསྡུས་ཏེ་ཐུགས་སྲོག་མི་ཤིགས་པའི་ཐིག་ལེ་ཧཱུྃ་ཡིག་ལ་ཐིམ་པས་བཀྲག་མདངས་དང་གཟི་བརྗིད་འབར་ཉི་ཟླའི་གའུ་ཁ་སྒྲིག་ཞུན་ལུགས་སུ་སོང་བས་སྐྱེ་འཆི་གཞོམ་གཞིག་དང་བྲལ་བ་རྟག་པ་དམ་པའི་ཚེ་ལ་དབང་འབྱོར་བར་མོས་ལ་སེམས་འཛིན། མཐར་དེ་ཡང་བརྗོད་བྲལ་ཀ་དག་གི་ཀློང་དུ་ཐིམ་ནས་འཆི་མེད་གཉུག་མའི་ངོ་བོར་རྒྱས་བཏབ་སྟེ་མཉམ་པར་འཇོག་པ་ནི་སྟོང་ཉིད་ཀྱི་གོ་ཆ་ཆོས་ཉིད་ཀྱི་སྲུང་བ་སྟེ་རྒྱས་གདབ་དང་སྲུང་བ་ཀུན་གྱི་མཆོག་བླ་ན་མེད་པ་ཡིན་ཏེ། གསང་འགྲེལ་ལས། ཅིས་ཀྱང་མི་ཕྱེད་མི་ཤིགས་པའི། །སྟོང་པའི་གོ་ཆ་བླ་ན་མེད། །མཚན་མའི་ཡུལ་ཀུན་བཅོམ་ནས་ཀྱང་། །ཐམས་ཅད་མྱུར་དུ་རྒྱལ་བར་འགྱུར། །ཞེས་དང་། མིང་དང་མཚན་མར་མ་གྲུབ་པའི། །མི་གནས་མ་བྲལ་འདུས་མ་བྱས། །ཆོས་ཀྱི་དབྱིངས་ཀྱིས་བསྲུང་བས་ན། །སངས་རྒྱས་ཀྱིས་ཀྱང་མི་གཟིགས་སོ། །ཞེས་སོ། །བཞི་པ་ནི། རྒྱུད་ལས། བསྙེན་པ་མ་ཐོན་པར་དག་ཏུ། །མ་ཡེངས་ཛབ྄་ནི་ཤིབ་ཤིབ་བཟླས། །བར་བར་བསྟོད་དང་མཆོད་པ་བྱ། །ཞེས་གསང་འགྲེལ་དུ་ལུང་དྲངས་པ་ལྟར། སྤྱིར་སྟོང་ཚིག་ཞེས་པ་བསྙེན་པ་སྟོང་ཕྲག་རེ་སོང་མཚམས་མཆོད་བསྟོད་འབུལ་བ་ཡིན་ཡང་། དེ་ཙམ་མི་ལྕོགས་ན་སྔགས་བཟླས་པའི་ཐུན་མཐར་དབྱངས་གསལ་ཡིག་བརྒྱ་རྟེན་སྙིང་རྣམས་གསུམ་གསུམ་བརྗོད་པས་སྔགས་ཀྱི་ནུས་པ་ཉམས་པ་གསོ་ཞིང་བརྟན་པར་བྱས་ནས། སྐབས་འདིར་མཆོད་བསྟོད་བྱ་བ་སྟེ་གོ་དོན་སོགས་ནི་སྔར་བསྟན་ཟིན་ཏོ། །དེ་རྣམས་ཀྱིས་འཁོར་བར་མིང་ཚིག་གི་ཡི་གེའི་རྣམ་རྟོག་དང་ངག་གི་ཞེན་པ་སྦྱོང་། འབྲས་བུ་གསུང་གཞོམ་མེད་ནཱ་དའི་སྒྲ་དབྱངས་སུ་རྫོགས་པས་གདུལ་བྱ་ལ་ཆོས་འཁོར་བསྐོར་བའི་རྟེན་འབྲེལ་སྒྲིག རྫོགས་རིམ་གྱི་གནས་སྐབས་སུ་རླུང་དག་པར་བྱེད་པའི་གཞི་འདིང་བའོ། །གསུམ་པ་རྗེས་ཆོ་གའི་ཡན་ལག་གཞན་བཤད་པ་ལ་བཞི། ཚོགས་མཆོད་འབུལ་བ། གཏོར་སྐྱོང་བྱ་བ། དངོས་གྲུབ་བླང་བ། དཀྱིལ་འཁོར་བསྡུ་ཞིང་བསྔོ་སྨོན་ཤིས་བརྗོད་བྱ་བའོ། །དང་པོ་ནི། སྤྱིར་ཚོགས་ཀྱི་ངོ་བོ་ཐབས་ཤེས་དབྱེར་མེད་ཀྱི་ཀུན་སྤྱོད་ཁྱད་པར་ཅན། ངེས་ཚིག་ག་ཎ་ཙཀྲའི་སྒྲ་ལས་བདེ་བ་ཆེན་པོའི་ཚོགས་ཆེན་འདུས་པའི་འཁོར་ལོས་ཉོན་མོངས་པའི་དྲྭ་བ་གཅོད་པའོ། །དབྱེ་ན། སྐལ་ལྡན་མི་ཡི་ཚོགས་ཐབས་ཤེས་ཟུང་དུ་འབྲེལ་བའི་སྐྱེ་བོ་འདུས་པ། འབྱོར་ལྡན་ཡོ་བྱད་ཀྱི་ཚོགས་ཕྱི་ནང་གསང་བའི་མཆོད་རྫས་དང་ཤ་ལྔ་བདུད་རྩི་ལྔ་སོགས་བཟའ་བཅའ་ལྡག་མྱོང་གི་རིགས་དམ་རྫས་སུ་འོས་པ་རྣམས་ཚོགས་པ། དགྱེས་ལྡན་ལྷའི་ཚོགས་སྒྲུབ་རྟེན་གཟུག་ཅིང་ཡེ་ཤེས་ཀྱི་འཁོར་ལོ་རྟེན་དང་བརྟེན་པ་བཀའ་སྡོད་སྲུང་མའི་ཚོགས་བཅས་བསྒོམས་ཤིང་སྤྱན་དྲངས་པ། དེ་གསུམ་འདུས་ནས་མཉམ་པ་ཉིད་ཀྱི་ལྟ་དགོངས་ལ་གནས་པས་ཚུལ་བཞིན་ལོངས་སྤྱོད་པ་ལས་ཐོབ་པ་བསོད་ནམས་དང་ཡེ་ཤེས་ཀྱི་ཚོགས་ཏེ་བཞིར། སྒྱུ་འཕྲུལ་བཤད་རྒྱུད་རྡོ་རྗེ་ལས། སྐྱེ་བོ་མཛའ་བ་ཀུན་ཚོགས་པ། །རྣལ་འབྱོར་འདུས་པའི་ཚོགས་ཞེས་བྱ། །འབྱོར་བའི་ལོངས་སྤྱོད་ཚང་བ་ནི། །བདེ་བའི་ལོངས་སྤྱོད་ཚོགས་སུ་བཤད། །ལྷ་དང་དམ་ཅན་ཀུན་འདུས་པ། །འདུས་པ་ཆེན་པོའི་ཚོགས་སུ་བཤད། །ཐམས་ཅད་སྤྱོད་ལ་མི་འཛིན་པས། །ཚོགས་གཉིས་རྒྱུན་དུ་རྫོགས་བྱེད་པ། །ཚོགས་ཆེན་པོ་རུ་ངེས་པར་བཤད། །ཅེས་གསུངས། ཇི་ལྟར་བྱ་བའི་རིམ་པ་ནི། གཞུར་རྩ་བར། དང་པོ་ཕྱི་ཡི་ཚོགས་འཁོར་ནི༔ ཐབས་ཀྱི་ཤ་དང་ཟན་ཡིན་ཏེ༔ ཤེས་རབ་ཉིད་ནི་མ་དཱ་ཱན༔ ཟུང་འཇུག་ཀུན་ཏུ་རུ་ཉིད་ཀྱིས༔ ཡེ་ཤེས་རྒྱས་པར་སྤེལ་བའི་སླད༔ ཡིད་དུ་འོང་བའི་བུ་མོ་ནི༔ གཟུགས་དང་ལང་ཚོས་བརྒྱན་པ་བཞག༔ ཅེས་སོགས་ཀྱིས་བསྟན་ཏེ། དེ་ཡང་། མཉམ་སྦྱོར་ལས། ཤ་ནི་སྨན་གྱི་མཆོག་ཡིན་ཏེ། །ཆང་ནི་རཱ་ས་ཡཱ་ནར་བཤད། །ཟན་ནི་ཚེ་ཞེས་བྱ་བར་བཤད། །བཟའ་བ་སྣ་ཚོགས་གྲུབ་པ་ནི། །ཤ་དང་ཆང་དུ་ལྡན་པ་དག །དགའ་བའི་ལོངས་སྤྱོད་སྐལ་བཟང་པོ། །ཚེ་ཡི་དམ་པ་ཡིན་པར་བཤད། །ཅེས་དང་། ཀུན་ཏུ་སྣ་ཚོགས་ཕྱག་རྒྱ་ནི། །ཐམས་ཅད་ནམ་མཁར་འགྲོ་བ་སྟེ། །སངས་རྒྱས་ཀུན་དང་མཉམ་སྦྱོར་བ། །མཁའ་འགྲོ་མ་ཞེས་རབ་ཏུ་གྲགས། །ཞེས་གསུངས། འོན་ཀྱང་གཏེར་གཞུང་རྩ་བ་དུམ་བུ་ཙམ་ལས་རྫོགས་པར་གཏན་ལ་འབེབས་མ་གནང་བས་ནང་གསང་གི་ཚོགས་དང་ཐབས་ལ མ་གྱི་སྐོར་བཞུགས་པར་སྣང་མོད་ད་ལྟ་དངོས་སུ་མི་བཞུགས་ལ། དེར་མ་ཟད་ལས་རྒྱ་ལ་བརྟེན་པའི་ཚོགས་འཁོར་མཚན་ཉིད་པ་ལ་དངོས་སུ་སྤྱོད་ནུས་པའི་གང་ཟག་ཀྱང་དཀོན་པས་འདིར་ཡེ་རྒྱ་ཙམ་ལ་བརྟེན་པས་དོན་ཚང་ལ། ཤ་ལ་སོགས་པའང་། རྒྱུད་ལས། མཁའ་འགྲོ་ལ་སོགས་སེམས་ཅན་ལྔ། །སྒྲུབ་པའི་རྫས་སུ་གསུངས་པའང་། །སྡིག་པའི་ཉེན་དང་མ་འབྲེལ་བའི། །སྲོག་མེད་ཤ་ཁྲག་མཆོད་སྟོན་བྱ། །ཞེས་གསང་འགྲེལ་དུ་འདྲེན་པར་མཛད་ལ། དེ་བཞིན་དུ་གསང་འདུས་ལས། ཤ་ལ་སོགས་པ་མེད་ནའང་། །ཐམས་ཅད་བསམ་པས་རྣམ་པར་བརྟག །ཅེས་གསུངས་ཤིང་། བྱང་གཏེར་ལས་ཀྱང་། དུས་མཐའ་མར་སེམས་ཅན་ཤ་ཁྲག་ལ་གཅན་གཟན་ལྟ་བུར་རྔམས། སྲོག་སྲིན་པོ་ལྟར་འཕྲོག ཆོས་བྱེད་དུ་མིང་བཏགས་པ་རྣམས་ཀྱང་། ཤ་ཁྲག་དཔག་མེད་ཟ་བའི་དུས་འོངས། གསང་སྔགས་པ་རྣམས་ཀྱང་གསང་སྔགས་ཀྱི་དམ་རྫས་ཤ་མེད་པར་མི་འོང་ཟེར། ཐ་སྙད་བཏགས་ཏེ་ཤ་ཁྲག་དམར་པོ་སྐྱིལ་ནས་སྲིན་པོའི་ཆ་བྱད་བྱེད། ཤ་ཁྲག་དམར་ལ་བག་མེད་དུ་སྤྱོད་ནས་མཐར་ལས་ཀྱི་ཤ་ཟ་ནག་པོར་སྐྱེ་བར་འགྱུར་རོ། །དེའི་དུས་སུ་གསང་སྔགས་སྤྱོད་པའི་རྣལ་འབྱོར་པ་ལམ་ལ་གནས་པ་རྣམས་འདི་ལྟ་བུར་གྱིས་ཤིག གསང་སྔགས་དམ་རྫས་ཤ་ལྔ་དང་། བདུད་རྩི་ལྔ་ནི་སྒྲུབ་ཆེན་གྱི་སྨན་ལ་འདུས། ནང་རང་གི་ལུས་ལ་ཚང་བའོ། །བསད་པ་དང་མི་གཙང་བའི་ལག་ནས་བྱུང་བ་ནི་ཉམས་པ་ཡིན་པས་རྫས་སུ་མི་རུང་སྟེ། སོ་སོའི་སྐྱེ་བོས་མཐོང་བའམ་ཚོར་བའི་གནས་སུ་ཤ་ཁྲག་གིས་མ་མོ་མཁའ་འགྲོ་མཆོད་ན། ཡ་ག་ངན་པ་ཕོག་ནས་གསང་བའི་དམ་ཚིག་ཉམས་པར་འགྱུར་རོ། །དེའི་ཕྱིར་ཤ་ཁྲག་དྲི་ཚོར་ཙམ་བྱིན་གྱིས་བརླབས་ཏེ་སྤྱད་དུ་རུང་། མངོན་པར་ཚོལ་བའི་ཤ་ཁྲག་མ་བརྟེན་ཅིག༔ ཅེས་གུ་རུ་བཀའ་དྲིན་ཅན་གྱིས་རྗེས་སུ་འདོམས་པར་མཛད་པ་བཞིན་སྡིག་དང་མ་འདྲེས་པའི་གཙང་མ་ཉིད་སྦྱར་བ་གལ་ཆེ་སྟེ། རྡོ་རྗེ་རྩེ་མོ་ལས། བརྟན་པ་མ་ཐོབ་བར་དུ་ནི། །ཁ་ན་མ་ཐོ་རྡུལ་མེད་ཅིང་། །སྡོམ་པ་གསུམ་ལ་གནས་པར་བྱ། །ཞེས་གསུངས། སྤྱིར་ཡང་གཞན་ལ་འཚེ་བའི་བདག་ཉིད་ཅན་གྱི་མཆོད་སྦྱིན་སོགས་ཇི་ལྟར་རྒྱ་ཆེ་ཡང་རྒྱལ་བ་དགྱེས་པའི་ཐབས་སུ་ནི་མི་འགྱུར་ཏེ། མདོ་ལས། གང་གིས་ཡིད་ལ་དགའ་བ་བསྐྱེད་ན་མཆོད་པ་ཡིན་པས་ན། །སེམས་ཅན་དག་ལ་ཕན་ན་དེ་ནི་ཆུང་ཡང་མཆོད་པ་ཡིན། །འཚེ་བའི་བདག་ཉིད་ཅན་དང་གཞན་ལ་གནོད་པ་འགྱུར་བ་ཡིན། །མཆོད་པ་ལེགས་པར་སྦྱར་བ་ཡིན་ཡང་མཆོད་པར་འགྱུར་བ་མིན། །ཞེས་དང་། སེམས་ཅན་རྣམས་ལ་མཆོག་ཏུ་ཕན་ན་ང་ལ་མཆོད་མཆོག་ཡིན། །སེམས་ཅན་རྣམས་ལ་གནོད་པའི་མཆོག་ནི་ང་ལ་གནོད་མཆོག་ཡིན། །ང་དང་སེམས་ཅན་དག་ནི་བདེ་དང་སྡུག་བསྔལ་མཚུངས་འདོད་པས། །གང་ཞིག་སེམས་ཅན་གནོད་བྱེད་དེ་ནི་ང་ལ་ཇི་ལྟར་མོས། །ཞེས་དང་། རྒྱལ་སྲས་ཞི་བ་ལྷས། གང་དག་བདེ་བས་ཐུབ་རྣམས་དགྱེས་འགྱུར་ཞིང་། །གང་དག་གནོད་ན་མི་དགྱེས་འབྱུང་འགྱུར་བ། །དེ་དག་དགའ་བས་ཐུབ་པ་ཀུན་དགྱེས་ཤིང་། །དེ་ལ་གནོད་བྱས་ཐུབ་ལ་གནོད་པ་བྱས། །ཇི་ལྟར་ལུས་ལ་ཀུན་ནས་མེ་འབར་བ། །འདོད་པ་ཀུན་གྱིས་ཡིད་བདེར་མི་འགྱུར་བ། །དེ་བཞིན་སེམས་ཅད་གནོད་པ་བྱས་ན་ཡང་། །ཐུགས་རྗེ་ཆེ་རྣམས་དགྱེས་པའི་ཐབས་མེད་དོ། །ཞེས་གསུངས་པའི་ཚུལ་འདི་ལ་ནམ་ཡང་དྲན་པ་ཉེ་བར་བཞག་པར་བྱ་ཞིང་། ཆང་ཡང་དམ་ཚིག་གི་རྫས་སུ་རན་ཙམ་ལས་སྲེད་ཞེན་གྱིས་མྱོས་པར་མི་བཏུང་སྟེ། རྒྱུད་ལས། སྔགས་པ་ཆང་གིས་མྱོས་གྱུར་ན། །ངུ་འབོད་གནས་སུ་འཚེད་པར་འགྱུར། །ཞེས་སོ། །དེ་ལྟར་སྤྱིར་ངེས་པར་བྱས་ནས། བྱེ་བྲག་ཏུ། ཀུན་མཁྱེན་ཆོས་རྗེས། ཉ་དང་གནམ་སྟོང་ཚེས་བརྒྱད་ཉི་ཤུ་དགུ། །ཚེས་བཅུ་ཡར་ངོ་མར་ངོའི་ཉིན་དང་མཚན། །བསྙེན་སྒྲུབ་ཚོགས་མཆོད་བསྐང་བཤགས་འབད་པར་བྱ། །ཞེས་གསུངས་པ་ལྟ་བུའི་དུས་གཉན་ཁྱད་པར་དུ་འཕགས་པར། དུར་ཁྲོད་དམ་ཚོགས་ཁང་སོགས་གནས་དབེན་པར། ཁ་ན་མ་ཐོ་བ་མེད་པའི་དམ་ཚིག་གི་རྫས་རྣམས་ཇི་ལྟར་འོས་པ་ཚོགས་པར་བྱས་ནས་ཡེ་རྒྱ་ཙམ་ལ་བརྟེན་པའི་སྒྲུབ་པ་པོ་ཐབས་ཤེས་གྲངས་མཉམ་པ་ཚོགས་ནས་ལས་ཀྱི་གཞུང་བསྲངས་ཏེ་སྐབས་འདིར་ཚོགས་མཆོད་དངོས་བྱ་བ་ལ། ཐོག་མར་བྱིན་གྱིས་བརླབས་པ་ནི། ལས་ཀྱི་རྡོ་རྗེས་ཕྱག་དང་གསོལ་གདབ་སྔོན་དུ་འགྲོ་བས། རྫས་རྣམས་ལ་ཆུ་ཆང་ནང་གསུམ་གྱིས་བྲན་ལ། རྃ་ཡྃ་ཁྃ༔ ཡེ་ཤེས་རླུང་དང་ཞེས་སོགས་ཏེ། འདི་ལ་རྣལ་འབྱོར་པའི་ཉམས་དང་སྦྱར་ཏེ་སྤྱི་སྦས་ཇི་ལྟར་སྦྱོར་ཀྱང་ཆོག་མོད། སྐབས་འདིར་ཐུན་མོང་ཙམ་དུ། རང་གི་ཐུགས་ཀ་ནས་རྃ་ཡྃ་ཁྃ་གསུམ་འཕྲོས་པས་ཡེ་ཤེས་ཀྱི་མེ་རླུང་ཆུར་གྱུར་པས་སྣོད་བཅུད་ཀྱི་དངོས་འཛིན་དྲི་མ་ཐམས་ཅད་བསྲེགས་གཏོར་བཀྲུས་ནས་སྟོང་པར་སྦྱང་། སྟོང་པའི་ངང་ལས་སྣོད་རང་བྱུང་བྷནྫ་འབར་བའི་ནང་དུ་བཅུད་བྱང་ཆུབ་སེམས་ཀྱི་ངོ་བོ་ཤ་ལྔ་བདུད་རྩི་ལྔ་ཡེ་ཤེས་ལྔ་ཡི་རང་བཞིན་དུ་ཡེ་ནས་དག་མཉམ་ཆེན་པོར་གནས་པའི་དགོངས་པས། གཙང་དམེ་གཉིས་འཛིན་གྱི་ཀུན་རྟོག་དང་བླང་དོར་སྤངས་ཏེ་འཕེལ་འགྲིབ་དང་བྲལ་བའི་རྡོ་རྗེའི་དམ་ཚིག་ཆེན་པོར་ལྷུན་གྱིས་གྲུབ་པའི་ཚུལ་དུ་བྱིན་གྱིས་བརླབས་པའོ། །དེ་ནས་ཚོགས་ཞིང་སྤྱན་འདྲེན་པ་ནི། བདུད་རྩི་ལྔ་ཡི་སྤོས་བསྲེག་ཅིང་། ཅང་ཏེའུ་ལ་སོགས་རོལ་མོའི་སྒྲ་དང་བཅས། ཧཱུྃ་ཧཱུྃ། པདྨར་རྡོ་རྗེ་སོགས་ཏེ། རང་ཉིད་རྩ་བའི་ལྷ་རྡོ་རྗེ་གཞོན་ནུ་ཡབ་ཡུམ་དུ་གསལ་བའི་མཁའ་གསང་མཉམ་པར་སྦྱོར་བའི་བདེ་བའི་སྒྲ་དང་འོད་ཟེར་གྱིས་དཔལ་ཆེན་པོ་ཡང་དག་ཧེ་རུ་ཀ་དང་རྡོ་རྗེ་གཞོན་ནུའི་དཀྱིལ་འཁོར་བཀའ་སྡོད་སྤྲུལ་པ་དང་བཅས་པ་རབ་འབྱམས་རྩ་གསུམ་སྒྱུ་འཕྲུལ་དྲྭ་བའི་རོལ་མོ་བསམ་གྱིས་མི་ཁྱབ་པ་ནམ་མཁའ་གང་བར་སྤྱན་དྲངས་པར་མོས་པའོ། །མཆོད་པ་དངོས་ལ་ཧེ་རུ་ཀ་གལ་པོ་ལས། དང་པོ་འདོད་ཡོན་དྲུག་གིས་མཆོད། །གཉིས་པ་དམ་རྫས་བདུད་རྩིས་བཤགས། །གསུམ་པ་དགྲ་བགེགས་གཟུགས་ཕུང་སྟོབས། །ཞེས་པས་མཆོད་བཤགས་སྟོབས་གསུམ་སྟེ། ཕུད་ཆ་གསུམ་དུ་སྤྲོས་ལ། དང་པོ་འདོད་ཡོན་དུ་དམིགས་ཏེ་མཆོད་པ་ནི། ཧཱུྃ། བྱང་ཆུབ་སེམས་ནི་སོགས་ཏེ། ལྷག་པའི་བདེན་པ་དབྱེར་མེད་བྱང་ཆུབ་སེམས་ཀྱི་བཀོད་པ་བླ་ན་མེད་པའི་མཆོད་ཚོགས་སུ་ལྷུན་གྱིས་གྲུབ་པ་ནི། ཕྱི་ལྟར་ན་དབང་པོའི་ཡུལ་དུ་སྣང་བའི་ཕྱི་རོལ་གྱི་གཟུགས་སྒྲ་དྲི་རོ་རེག་ཆོས་ཀྱི་ཁམས་རྣམས་གཟུགས་རྡོ་རྗེ་མ་ནས་ཆོས་རྡོ་རྗེ་མའི་བར་གྱི་འདོད་ཡོན་གྱི་ལྷ་མོའི་རོལ་བར་རང་ཤར་བ་དང་། ནང་ཡབ་ཡུམ་སྙོམས་པར་ཞུགས་པ་ན། ཕན་ཚུན་དགྱེས་པས་ལྟ་བ་གཟུགས་དང་། སྦྱོར་བ་ཧ་སིའི་སྒྲ་དང་། བདེ་བས་ཚིམ་པའི་དྲི་དང་། ཞུ་བདེ་མྱོང་བའི་རོ་དང་། མཁའ་གསང་དང་ཁམས་དཀར་དམར་རྣམས་ཕན་ཚུན་རེག་པའི་རེག་བྱ་དང་། དེས་ཕྱི་ནང་གི་ཆོས་ཐམས་ཅད་བདེ་སྟོང་དུ་འཆར་བའི་ཆོས་ཀྱི་མཆོད་པ་རྣམས་དང་། གསང་བ་དེ་ལྟར་རོལ་བ་ལས་བྱུང་བའི་དགའ་བ་བཅུ་དྲུག་གི་བདེ་བ་ཆེན་པོའི་རོས་རང་བྱུང་གདོད་ནས་གྲུབ་པའི་ལུས་དཀྱིལ་གྱི་ལྷ་རྣམས་མཉེས་པར་བྱེད་པ་དང་། ཡང་གསང་དེ་ཁོ་ན་ཉིད་ཡུལ་ཡུལ་ཅན་མཆོད་བྱ་མཆོད་བྱེད་སོགས་གཉིས་ཆོས་ཀྱི་སྤྲོས་པ་མཐའ་དག་གཉིས་མེད་མཉམ་པ་ཆེན་པོའི་ཀློང་དུ་རོ་གཅིག་པའི་ཟུང་འཇུག་བདེ་བ་ཆེན་པོ་བསམ་གྱིས་མི་ཁྱབ་པའི་གནས་ལུགས་ཟབ་མོའི་ངང་དུ་མཆོད་པའོ། །བར་བ་བཤགས་པ་ནི། ཆ་གཉིས་པ་བདུད་རྩི་ལྟར་དམིགས་ཏེ་ཕུལ་ལ། ཧོ༔ རྩ་བ་ཡན་ལག་སོགས་ཏེ། དེ་ཡང་། ཀུན་འདུས་ལས། སྤྱི་དང་ཁྱད་པར་ལྷག་པའི་དམ་ཚིག་རྣམས། །ཞེ་གསུངས་པས། ཐུན་མོང་སྤྱི་ཡི་དམ་ཚིག་ནི་བདེ་འདུས་ཞི་རྒྱུད་ལས། སོ་སོར་ཐར་དང་བྱང་ཆུབ་སེམས། །བྱ་སྤྱོད་རྣལ་འབྱོར་རྒྱུད་རྣམས་ལས། །བསྲུང་བར་བྱ་བ་གང་གསུངས་པ། །ཐུན་མོང་སྤྱི་ཡི་དམ་ཚིག་ཡིན། །ཞེས་སོ། །ཁྱད་པར་གྱི་དམ་ཚིག་ལ་རྩ་བ་དང་ཡན་ལག་གི་དམ་ཚིག་གཉིས་ལས། དང་པོ་ནི། སྐུ་གསུང་ཐུགས་ཀྱི་དམ་ཚིག་གསུམ་སྟེ། བླ་མ་མཆེད་ལ་བཀུར་བ་སྐུ། སྔགས་དང་ཕྱག་རྒྱ་རྒྱུན་མི་བཅད་པ་གསུང་། བྱང་ཆུབ་ཀྱི་སེམས་མི་སྤང་བ་དང་གསང་བཅུ་མི་བསྟན་པ་ཐུགས་ཀྱི་དམ་ཚིག་སྟེ། སྒྱུ་འཕྲུལ་རྩ་རྒྱུད་ལས། བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་ནི་རྩ་བ་ལྔ་རྣམས་ཏེ། །སྒྲུབ་དང་བསྲུང་བའི་དམ་ཚིག་མཆོག །ཅེས་དང་། དེ་དག་གི་ནང་ཚན་དབྱེ་ན། བྱང་སེམས་རྣམ་གཉིས་སློབ་དཔོན་དྲུག །མཆེད་བཞི་སྔགས་གསུམ་ཕྱག་རྒྱ་བཞི། །གསང་བཅུ་རྩ་བར་ཤེས་པར་བྱ། །ཞེས་སོ། །གཉིས་པ་ཡན་ལག་གི་དམ་ཚིག་ནི་ལྔ་ཚན་ལྔ་སྟེ། འདུས་མདོ་ལས། སྤྱད་དང་མི་སྤང་དང་དུ་བླང་། །ཤེས་དང་བསྒྲུབ་བྱ་རྩ་ལྔར་བསྲུང་། །ཞེས་པས། སྤྱད་བྱ་ལྔ་ནི། སྲོག་གཅོད་མ་བྱིན་ལེན་མི་ཚང་སྤྱོད་རྫུན་དང་བརླང་ཚིག་སྨྲ་བ་རྣམས་ཞིང་བཅུ་སྒྲོལ་བ་སོགས་གཞན་དོན་དུ་འགྱུར་ན་སྤྱད་པར་བྱ་བ་དང་། སྦས་དོན་དུ། གཟུང་འཛིན་གྱི་རྟོག་པའི་སྲོག་རང་རིག་པའི་ཡེ་ཤེས་ཀྱིས་གཅོད་པ། བཙུན་མོའི་ཤུ་དྲ་མ་བྱིན་པར་ལེན་པ། ཞུ་བདེའི་ཡེ་ཤེས་སྒྲུབ་པ་འདོད་སྤྱོད། འཁོར་བ་མེད་སྣང་ལས་སྒྲོལ་བའི་རྫུན་ཚིག བརྗོད་མེད་ཀྱི་དོན་རྟོགས་པས་གབ་སྦས་མེད་པར་སྨྲ་བའི་བརླང་ཚིག་རྣམས་སོ། །མི་སྤང་བ་ལྔ་ནི་དུག་ལྔ་ཐབས་ཀྱིས་ཟིན་ན་ལམ་གྱི་གྲོགས་སུ་འགྱུར་བས་མི་སྤང་ཞིང་། སྦས་དོན་གཉིས་མེད་ཀྱི་ལྟ་སྤྱོད་ལ་འབྱེད་པ་མེད་པའི་གཏི་མུག དམིགས་མེད་ཀྱི་སྙིང་རྗེ་རྗེས་སུ་ཆགས་པའི་འདོད་ཆགས། རང་རིག་པའི་ཡེ་ཤེས་ཀྱིས་ལོག་རྟོག་འཇོམས་པའི་ཞེ་སྡང་། མཉམ་ཉིད་གྱི་ལྟ་བ་རྟོགས་པའི་ང་རྒྱལ། གཉིས་འཛིན་གྱི་ལྟ་སྤྱོད་མཉམ་ཉིད་ཀྱི་ཀློང་དུ་མི་ཤོང་བའི་ཕྲག་དོག་རྣམས་སོ། །དང་དུ་བླང་བ་ལྔ་ནི། བྱང་སེམས། རཀྟ། དྲི་ཆེན། དྲི་ཆུ། ཤ་ཆེན་གྱི་དྭངས་མ་རྣམས་གཙང་དམེའི་ཞེན་རྟོག་སྦྱང་ཕྱིར་དང་དུ་བླང་བྱ་ཡིན་ལ། སྦས་དོན་ཕུང་ལྔའི་དྭངས་མ་འཛག་མེད་དུ་བཅིང་བའོ། །ཤེས་བྱ་ལྔ་ནི། ཕུང་ཁམས་རྣམ་ཤེས་དང་བཅས་པ་སྐུ་ལྔ་ཡེ་ཤེས་ལྔར་ཤེས་རབ་ཀྱིས་གཏན་ལ་འབེབས་པའོ། །བསྒྲུབ་པར་བྱ་བ་ལྔ་ནི། ཤེས་བྱའི་དམ་ཚིག་ལྔ་པོ་དེ་རྟོགས་གོམས་ཀྱིས་སྒྲུབ་པར་བྱེད་པ་རྣམས་སོ། །ལྷག་པའི་དམ་ཚིག་ནི་སྤྱི་དང་ཁྱད་པར་གྱི་དམ་ཚིག་ལ་གནས་པ་གཞིར་བཞག་ནས། དེའི་སྟེང་དུ་སྒྲུབ་པ་ལ་སོགས་པའི་སྐབས་སུ་བསྲུང་བྱ་ལྷག་པར་སྟོན་པ་སྟེ། གཅན་གཟན་རྒྱལ་པོའི་ཁྲི་མི་བཤིག་པ་སོགས་བརྡའི་སྒོ་ནས་བསྟན་པ་ཉི་ཤུའོ། །དེ་ལྟར་སྤྱི་དང་ཁྱད་པར་ལྷག་པས་བསྡུས་པའི་རྩ་བ་ཡན་ལག་དང་བཅས་པ་སྤྱིའི་དམ་ཚིག་ལས་ཉམས་པ་དང་། རང་ལུས་ཐབས་ལྡན་དང་གཞན་ལུས་ཕོ་ཉའི་ལམ་གང་རུང་ལ་བརྟེན་ནས་བདེ་བ་ཆེན་པོའི་ཡེ་ཤེས་ལམ་དུ་མ་བསླངས་པ་སོགས་ནང་གི་ཉམས་ཆག་དང་འགལ་འཁྲུལ་གྱི་ནོངས་པ་ཅི་མཆིས་པ་ཐམས་ཅད་ཀུན་རྫོབ་སྒྱུ་མ་ཙམ་དུ་བཤགས་པས་བྱང་ཞིང་དག་པ་དང་། གསང་བ་གསང་མཆོག་རྒྱལ་པོའི་དམ་ཚིག་བཞི་ལས། ཀ་དག་ཁྲེགས་ཆོད་ཀྱི་དམ་ཚིག་མེད་པ་དང་ཕྱལ་བ་གཉིས་ནི། འཁྲུལ་སྣང་རྨི་ལམ་དང་འདྲ་བའི་སྣོད་བཅུད་ཕྱི་ནང་གི་ཆོས་ཐམས་ཅད་གཞི་མེད་པར་རྟོགས་པས་དགག་སྒྲུབ་ཀྱི་མཚན་མ་རང་སར་གྲོལ་བ་དང་། ཡུལ་དབང་ཤེས་གསུམ་གྱིས་བསྡུས་པའི་རྟོགས་ཚོགས་ཀྱི་ཆོས་ལ་བླང་དོར་དང་འཛིན་ཞེན་མེད་པར་ཆོས་ཉིད་བྱ་བ་དང་བྲལ་བའི་ངང་དུ་ཕྱལ་བར་བཞག་པའོ། །ལྷུན་གྲུབ་ཐོད་རྒལ་གྱི་དམ་ཚིག་ལྷུན་གྲུབ་དང་གཅིག་པུ་གཉིས་ནི། རང་བྱུང་གི་ཡེ་ཤེས་འོད་གསལ་གྱི་སྣང་བ་དང་བཅས་པ་རྩོལ་བྲལ་ལྷུན་གྱིས་གྲུབ་པར་རྟོགས་པ་དང་། འཁོར་འདས་ཀྱི་ཆོས་སོ་ཅོག་རྩ་བ་རིག་པའི་ཡེ་ཤེས་གཅིག་པུའི་ངང་ལས་བྱུང་། ངང་ལ་གནས། ངང་དུ་གྲོལ་བ་ལས་གཞན་མེད་པར་ཐག་བཅད་པའོ། །དེ་བཞིའི་ངང་ལས་མི་འདའ་བ་ནི་དམ་ཚིག་སྟེ་དེའི་ངང་ལ་མཉམ་པར་བཞག་པས་འགལ་ཉམས་འདས་རལ་སོགས་ཉེས་པའི་སྐྱོན་ཐམས་ཅད་ཡེ་ནས་མ་བྱུང་མ་སྐྱེས་པར་རྟོགས་པས་ངོ་བོ་བཤགས་བྱ་བཤགས་བྱེད་དང་བྲལ་བས་ཀུན་ནས་ཀུན་ཏུ་མི་ཕྱེད་པའི་རྡོ་རྗེའི་དམ་ཚིག་ཆེན་པོ་རྣམ་པར་དག་པར་གྱུར་ཅིག་པར་སྨོན་པའོ། །ཐ་མར་བསྒྲལ་སྟོ བ་ནི། སྒྱུ་འཕྲུལ་དྲྭ་བ་ལས། ཐོག་མར་བདག་ཉིད་རྟོག་གོམས་བསྒྲལ། །དེ་ནས་གཉིས་མེད་བློ་ཡིས་ནི། །བློ་ངན་འཇིག་རྟེན་སྙིང་རེ་རྗེ། །གཉིས་སུ་མེད་པར་བསྒྲལ་བར་བྱ། །ཞེས་གསུངས་པ་ལྟར་མཉམ་པ་ཉིད་ཀྱི་དགོངས་སྤྱོད་རྒྱ་མཚོ་གདེང་དུ་གྱུར་པས་རྟོགས་པས་བདག་བསྒྲལ་ཟིན་པའི་གང་ཟག་ཁྱད་པར་ཅན་གྱིས་ཐུགས་རྗེས་གཞན་སྒྲོལ་བ་ལ། ཀུན་སློང་བདག་མེད་རྟོགས་པའི་ལྟ་བ་དང་ཚད་མེད་པའི་སྙིང་རྗེ་ཆེན་པོ་ཟུང་དུ་འཇུག་པའི་རང་རྩལ་རྣམ་པ་ཞེ་སྡང་ལྟར་སྣང་བས། གང་ལ་བྱ་བའི་ཡུལ་གདུལ་བྱ་མ་རུངས་པ་ཞི་བས་མི་ཐུལ་བའི་རིགས་ཅན་སྤྱི་དང་བྱེ་བྲག་གཞུང་འདིར་དམིགས་སུ་བསྟན་པ་བསྟན་དང་འགྲོ་ལ་འཚེ་བའི་དགྲ་བགེགས་ཀླ་ཀློ་སོགས་གཟུགས་ཅན་གྱི་མི་དང་། ཐེ་ཚོམ་རྟོག་པའི་བྱུར་འདྲེ་གཟུགས་མེད་བགེགས་རིགས། སྒོ་གསུམ་ལ་གཟུང་འཛིན་གྱི་མངོན་པར་ཞེན་པའི་བདུད་རུ་ཏྲ་ནག་པོ་འཁོར་ཕྱག་བརྙན་དང་བཅས་པ་རྣམས། ཐབས་ཆེན་སྔགས་ཀྱི་ལྟ་སྤྱོད་ཟབ་མོས་རྣམ་སྨིན་ལས་ཉོན་གྱི་སྐྱེ་རྒྱུན་བཅད་ནས། རྣམ་ཤེས་བདེ་བ་ཆེན་པོར་སྦྱར་བས། གནས་སྐབས་སུ་བར་ཆད་ཞི་ཞིང་བསྟན་འགྲོའི་དོན་འགྲུབ། མཐར་ཐུག་ཚོགས་གཉིས་རྫོགས་ནས་རྣམ་མཁྱེན་གྱི་ཉེ་རྒྱུ་བླ་ན་མེད་པར་འགྱུར་ཏེ། དུད་ཁྲོད་ཁུ་བྱུག་རོལ་པའི་རྒྱུད་ལས། སྙིང་ནས་སློབ་དཔོན་དམོད་པ་དང་། །སངས་རྒྱས་བསྟན་ལ་གནོད་པ་དང་། །ཐེག་པ་ཆེན་པོར་དམོད་པ་དང་། །སེམས་ཅན་ཡོངས་ལ་གནོད་བྱེད་དང་། །རྣལ་འབྱོར་སྤྱི་དགྲར་གྱུར་པ་ནི། །མྱུར་དུ་བསྒྲིམས་ཏེ་མ་བསྒྲལ་ན། །རྡོ་རྗེའི་དམ་ཚིག་ཉམས་པས་ན། །བསྒྲིམས་ཏེ་ཤུགས་ཀྱིས་བསྒྲལ་བར་བྱའོ། །དམ་ཚིག་འདི་ནི་རྨད་པོ་ཆེ། །སངས་རྒྱས་འགྲུབ་པའི་རྒྱུ་དང་གཞི། །ཡིད་བཞིན་ནོར་བུ་རིན་པོ་ཆེ། །དམ་ཚིག་གནས་རྣམས་མི་གཏོང་བར། །ལེགས་པའི་ཡོན་ཏན་བརྗོད་མི་ལང་། །སངས་རྒྱས་རྨི་དང་འདྲ་བས་ན། །དངོས་གྲུབ་གཞན་ལྟ་སྨོས་ཅི་དགོས། །དེ་བས་ནན་ཏན་བསྐྱེད་དེ་སྲུངས། །ཞེས་དང་། སྒེག་རྡོར་གྱི་དམ་ཚིག་གསལ་བཀྲ་ལས། ལྟ་སྤྱོད་ཏིང་འཛིན་འབྲེལ་བསྒོམས་པས། །དཀོན་མཆོག་སློབ་དཔོན་སྐུ་དགྲ་གཉིས། །དམ་ཉམས་ལོག་དང་འཁུ་བ་དང་། །འདུ་བར་འོངས་དང་ཡོངས་ལ་གནོད། །དམ་དགྲ་ངན་པའི་ངང་ཚུལ་ཅན། །ངན་སོང་གསུམ་དང་བཅུ་པོ་ནི། །རྣམ་འབྱོར་ཀུན་གྱི་དང་དུ་བླངས། །གྲངས་ནི་རྩ་བ་བཅུ་གཉིས་སོ། །ཏིང་འཛིན་སྔགས་དང་ཕྱག་རྒྱ་རྣམས། །ཤིན་ཏུ་གོམས་པས་དབང་བསྐུར་ཏེ། །བྱང་ཆུབ་ཞིང་དུ་བསྒྲལ་བར་བྱ། །སྔགས་དང་ཕྱག་རྒྱས་བག་ཆགས་སྦྱངས། །རྣམ་ཤེས་ལྷར་བསྐྱེད་དབང་བསྐུར་འཕང་། །ཡེ་ཤེས་ཚོགས་ཀྱང་རྫོགས་པར་འགྱུར། །ཕུང་པོ་བྱིན་རླབས་མཆོད་པར་བསྔོ། །བསོད་ནམས་ཚོགས་སུ་འདི་འགྱུར་རོ། །དེ་ལྟར་བསྒྲལ་བའི་དགོས་ཆེད་ཀྱང་། །བྱང་ཆུབ་སྤྱོད་འཕེལ་སེམས་ཅན་བདེ། །ལྷ་མཉེས་བདག་ལ་དམ་བསྐོང་ཞིང་། །ལས་ངན་བག་ཆགས་སྡུག་ཡུན་བསྟུངས། །རང་གིས་བསགས་མེད་ངན་སོང་ལས། །བདེ་ལམ་འདི་ལས་གཞན་མེད་དོ། །ཞེས་གསུངས། ཐབས་ཤེས་དེ་ལྟ་བུས་ཟིན་ན་ཉེས་པས་གོས་པར་མི་འགྱུར་ཏེ། །གསང་སྙིང་ལས། ཡེ་ནས་སྐྱེ་མེད་དེ་བཞིན་ཉིད། །སྒྱུ་མར་སྣང་བ་མིག་ཡོར་ཚུལ། །སྦྱོར་སྒྲོལ་བྱ་བ་ཀུན་བྱས་ཀྱང་། །རྡུལ་ཆ་ཙམ་ཡང་བྱས་པ་མེད། །ཅེས་དང་། ཡེ་ཤེས་རྒྱས་པ་ལས། ཇི་ལྟར་སྒྱུ་མའི་མཁན་པོ་དག །རང་གིས་སྤྲུལ་བའི་སྒྱུ་མ་ལ། །དགེ་དང་མི་དགེ་འདུ་བྱེད་པ། །ཉེས་པ་གང་གིས་མི་གོས་ལྟར། །ཐབས་ལ་མཁས་པས་རྣམ་པར་སྤྱོད། །ཅེས་གསུངས་སོ། །དེ་ལྟར་ངེས་པར་བྱས་ནས། སྐབས་འདིར་དགྲ་བགེགས་ཀྱི་ལིངྒ་ཟུར་དུ་བཅས་པའམ་བྱིན་རླབས་མ་གྲུབ་པའི་སྔོན་དུ་ཚོགས་ཟན་ལས་ཟུར་དུ་བཅད་པ་ཡོད་ན་དེ་དང་། མེད་ན་ཧཱུྃ་ཞེས་བརྗོད་པས། ཚོགས་ཕུད་ཐ་མ་དེའི་འདོད་ཡོན་གྱི་ལྷ་མོ་ཧཱུྃ་གི་རྣམ་པས་རང་ལ་བསྡུས་ནས། རང་ཉིད་དཔལ་ཆེན་པོ་རྡོ་རྗེ་གཞོན་ནུར་གསལ་བའི་ཐུགས་ཡེ་ཤེས་ཀྱི་རོལ་པ་ལས་སྤྲུལ་པའི་ཕོ་ཉ་ལྕགས་ཀྱུ། ཞགས་པ། ལྕགས་སྒྲོག དྲིལ་བུ་ལ་སོགས་པ་ཐོགས་པའི་ལས་བྱེད་ཀྱི་དམག་ཚོགས་སྐར་མདའ་འཁྲུགས་པ་བཞིན་ཐོགས་མེད་དུ་འཕྲོས། བདུད་དང་ལོག་པར་འདྲེན་པ་ཐམས་ཅད་རང་དབང་མེད་པར་བཀུག གཟུགས་རྟེན་ལ་དབྱེར་མེད་དུ་བསྟིམ་པའི་ཏིང་ངེ་འཛིན་གྱི་ངར་དང་ལྡན་པས། ན་མོ། དཀོན་མཆོག་གསུམ་ལ་སོགས། སྔགས་དང་ཕྱག་རྒྱས་དགུག་གཞུག་{བཞུགས}བཅིངས་ཏེ་མྱོས་པར་བྱས་ལ། དེ་ནས་ཐལ་མོའི་བར་དུ་ཕུར་པ་བཟུང་སྟེ། རང་གི་ལག་སོར་རིགས་ལྔ་ཡབ་ཡུམ་ཏུ་གསལ་བ་མཉམ་པར་སྦྱོར་བའི་སྦྱོར་མཚམས་ནས་ཕུར་བུ་སྲས་མཆོག་ཀཱི་ལ་ཡ་སྐུ་སྟོད་སྲིན་པོ་ཁྲོས་པའི་ཉམས་ཅན་ཞལ་གསུམ་ཕྱག་དྲུག་པ། སྐུ་སྨད་ཆུ་སྲིན་གྱི་ཁ་ནས་ཐོན་པའི་གནམ་ལྕགས་ཀྱི་ཕུར་པ་མགར་གྱི་སོལ་མལ་ནས་དྲངས་པ་ལྟ་བུར་བསྐྱེད་པ་དམིགས་བྱའི་སྙིང་གར་བཏབ་པས། ཁོའི་ཚེ་བསོད་དཔལ་འབྱོར་མངའ་ཐང་བཀྲག་དང་གཟི་མདངས་སྟོབས་ནུས་ཐམས་ཅད་ཨ་དཀར་པོའམ་ཐིག་ལེའི་རྣམ་པས་བསྡུས་ནས་རང་ལ་བསྟིམ། རང་གི་ཚེ་སྲོག་དང་གཉིས་སུ་མེད་པར་བྱས་པས་ཞི་བ་བྱང་ཆུབ་སེམས་ཀྱི་ངོ་བོར་གྱུར་པར་བསམ་པ་ཚེ་ལུང་དང་། ཁོའི་ཀུན་གཞིའི་བག་ཆགས་ཀྱི་རྟེན་ནྲི་ཡིག་གི་རྣམ་པ་ཅན་དེ་ཉིད་ཕུར་རྩེའི་ཧཱུྃ་གིས་རྡོ་ཁབ་ལེན་གྱིས་ལྕགས་བསྡུས་པ་ལྟར་བླངས་ནས་ཕུར་བུའི་ཁོང་གསེང་བརྒྱུད། རྒྱ་མདུད་ཀྱི་རྩེར་ཐོན་པས་གློ་བུར་གྱི་དྲི་མ་མ་ལུས་པ་སྦྱངས། རྣམ་ཤེས་ཀྱི་དྭངས་མ་ཧཱུྃ་ཡིག་གི་རྣམ་པར་གྱུར་པ། ཕཊ་ཅེས་བརྗོད་པས་དེ་ཉིད་སྐར་མདའ་འཕངས་པ་ལྟར་འོག་མིན་གྱི་ཞིང་དུ་སོང་། དཔལ་ཆེན་པོའི་ཐུགས་ཀར་ཐིམ་པར་བསམ་པ་ནི་ཁྲུས་ལུང་སྟེ། ཐབས་ཞགས་ལས། འོག་མིན་བླ་མེད་གནས་མཆོག་ཏུ། །གཙོ་བོ་དང་ནི་གཙོ་མོ་དང་། །སེམས་དཔའ་དང་ནི་སེམས་མ་རྣམས། །སྦྱོར་བའི་ལྷུམས་སུ་ཕཊ་ཀྱིས་འཕང་། །ཞེས་གསུངས། དེ་ལྟ་བུའི་ཚེ་ཁྲུས་ཀྱི་དགོངས་པ་དང་ལྡན་པས། ཧཱུྃ་བྷྱོཿ བསྟན་དང་འགྲོ་ལ་སོགས་ཀྱིས་ཕུར་བུས་གདབ་སྟེ་རྣམ་ཤེས་ཆོས་ཀྱི་དབྱིངས་སུ་བསྒྲལ་རྗེས། རྣམ་སྣང་སྒྱུ་དྲྭ་ལས། མཁས་པས་རྐང་པ་ནས་བརྩམས་ཏེ། །མཚོན་ཆ་རྣོན་པོས་བཅད་ནས་ནི། །ཞེས་དང་། རྔམ་གློག་ལས། ཕོ་ནི་རྐང་པ་གཡས་ནས་གཏུབ། །མོ་ནི་རྐང་པ་གཡོན་ནས་གཏུབ། །ཞེས་པས། རིམ་པ་ལྟར་མཚོན་ཆས་གཏུབས་ཅིང་ཐོ་བས་བརྡུང་སྟེ་ཕུང་པོ་དུར་ཁྲོད་དུ་བསྒྲལ་བར་བྱའོ། །དེ་ནས་དགྲ་བགེགས་ཀྱི་ཤ་ཁྲག་རུས་པ་རྣམས་ངོ་བོ་ཟག་མེད་ཀྱི་བདུད་རྩིའི་རང་བཞིན་དུ་སྦར་ཏེ་ཕུལ་བས། དཀྱིལ་འཁོར་གྱི་ལྷ་རྣམས་ཀྱི་ཞལ་གནམ་ས་ཙམ་དུ་གདངས་ནས། སྲོག་དོན་བཀའ་དམ་ལས་ཀྱིས་ཉམས། །མཚན་མས་ཉམས་པར་གྱུར་པ་དང་། །འདོད་པར་གྱུར་པས་ཉམས་པ་བདུན། །བསྒྲལ་བའི་དམིགས་ཀྱི་དམ་པར་བཤད། །ཅེས་རྒྱུད་ལས་བསྒྲལ་ཞིང་དམིགས་སུ་བསྟན་པའི་ཉམས་པ་བདུན་ལྡན་དགྲ་བགེགས་དམ་སྲིའི་ཚོགས་རྣམས་དགྱེས་པའི་སྐན་སྒྲ་དང་བཅས་ཏེ་ལྷག་མེད་དུ་གསོལ་བས་ཡེ་ཤེས་ཆེན་པོའི་གཟི་བྱིན་མཆོག་ཏུ་བསྐྱེད་པར་མོས་ལ། བྷྱོཿ གནམ་ས་ཙམ་གྱི་སོགས་ཀྱིས་དབུལ་ལ། ཟུང་འཇུག་བདེ་བ་ཆེན་བོའི་རྩལ་དང་བཅས་པའི་དབྱིངས་རིགས་གཉིས་སུ་མེད་པའི་ངང་དུ་གཟུང་འཛིན་མཚན་མའི་རྟོག་ཚོགས་སྒྲོལ་བ་དྲག་པོ་མངོན་སྤྱོད་ཀྱི་ཕྲིན་ལས་མཐར་ཕྱིན་པར་མཛོད་ཅིག་ཅེས་ཕྲིན་ལས་གསོལ་ལོ། །དེ་ནས་ཚོགས་ལ་རོལ་བ་ནི། ལས་ཀྱི་རྡོ་རྗེས་འདུས་པའི་གཙོ་བོ་ལ་ཕྱག་བྱས་ནས་ཐབས་ཤེས་ཀྱི་རྫས་རྣམས་བརྡ་དང་བརྡ་ཡི་འབུལ་ལེན་བྱས་རྗེས་འདུས་པ་གཞན་རྣམས་ལའང་རྒན་གཞོན་གྱི་རིམ་པ་བཞིན་བྲིམས་ལ། ཚོགས་གྲལ་དུ་རྩོད་པ་དང་། ཀུ་ཅོ་དང་། ཐ་མལ་གྱི་སྣང་བའི་བདེན་ཞེན་སོགས་སྤངས་ཏེ། ཚིམ་པ་དང་། དགའ་བ་དང་། འཛིན་ཞེན་མེད་པའི་སྒོ་ནས། རང་ལུས་ཀྱི་རྩ་ཁམས་ཐམས་ཅད་དཔའ་བོ་དང་རྣལ་འབྱོར་མའི་ཚོགས་ཏིལ་གྱི་གོང་བུ་ཁ་བྱེ་བ་ལྟར་བཞུགས་པ་རྣམས་ནང་གི་བསྲེག་བླུགས་ཀྱིས་མཉེས་པར་བསམས་ལ་ལོངས་སྤྱོད་དོ། །དེ་ནས་རྡོ་རྗེའི་གླུ་དང་གར་དང་བདེ་སྟོང་སྦྱོར་བའི་མཆོད་པ་ལ་སོགས་པ་ཉམས་དང་སྦྱར་ལ་ཅི་རིགས་པར་བྱ་སྟེ་མདོར་ན་ཕྱི་ནང་གསང་བ་དེ་ཁོ་ན་ཉིད་ཀྱི་མཆོད་པ་རྣམས་ཡོངས་སུ་རྫོགས་པར་བྱ་བ་ཡིན་ནོ། །དེ་ནས་ལྷག་མ་སྦྱིན་པ་ནི། ལྷག་མ་རྣམས་གསོག་འཇོག་མེད་པར་བསྡུས་པའི་དམེ་གཏོར་མཆོད་པའི་རས་མ་དང་བཅས་པའི་སྟེང་དུ་ཕུད་ཆ་གསུམ་པའང་བསྣན་ཏེ། ལས་ཀྱི་རྡོ་རྗེས་ཕྱག་བྱས་ནས་བྱིན་གྱིས་རློབས་པར་བསྐུལ། སློབ་དཔོན་གྱིས་ལྕེ་རྟ་མགྲིན་ཡབ་ཡུམ་རོལ་པ་མཛད་པའི་བྱང་སེམས་ཀྱི་བདུད་རྩི་ཕབ་པར་བསམས་ལ། མཁའ་དབྱིངས་ཀྱི་རྒྱས་ཁ་བཀབ་ནས། ༀ་ཨཱཿཧཱུྃ་ཧ་ཧོ་ཧྲཱིཿས་ཛ་གད་ཀྱི་ཁ་ཕྲུ་བཏབ་པས། ལྷག་མའི་དམ་ཚིག་འདོད་ཡོན་གྱི་ཕུང་པོ་ཟད་མི་ཤེས་པས་ནམ་མཁའ་གང་བར་སྤེལ་ཏེ་དཀྱིལ་འཁོར་གྱི་བྱང་ཤར་རམ་ཤར་ལྷོར། ཞིང་ལྤགས་ལ་དྲི་དང་རཀྟས་ཆོས་འབྱུང་ཟླ་གམ་གསུམ་དང་བཅས་པ་བྲིས་པའི་སྟེང་དུ་བཀོད་ཅིང་མར་མེ་བཙུགས་ལ། ཨ་ར་ལའི་སྔགས་དང་འབར་བའི་ཕྱག་རྒྱས་ལྷག་བསྡུད་ཀྱི་ཕོ་ཉའི་ཚོགས་རྣམས་དམ་ཚིག་གི་གནས་སུ་སྤྲིན་གཏིབས་པ་བཞིན་བྱོན་པར་མོས་ལ། མེ་ཏོག་ལ་སོགས་པས་མཆོད་ནས། ཧཱུྃ་བྷྱོཿ གནས་དང་ཡུལ་དང་སོགས་ཏེ་གནས་ནི། ཧེ་རུ་ཀ་གལ་པོ་ལས། ཧེ་རུ་ཀ་ཡི་གནས་བཅུ་ནི། །གནས་དང་ཉེ་བའི་གནས་གཉིས་དང་། །ཡུལ་ནི་རོལ་བ་ཉེ་ཡུལ་རོལ། །ཞིང་དང་ཉེ་བའི་ཞིང་དང་ནི། །འདུ་བ་ཉེ་བའི་འདུ་བ་དང་། །ཚནྡྷོ་ཉེ་བའི་ཚནྡྷོ་ཡིན། །ཞེས་གསུངས། ཡུལ་ནི་དེའི་བྱེ་བྲག་སྟེ། པུལླི་ར་དང་། ཛ་ལནྡྷ་ར། ཨུ་རྒྱན་སོགས་ཉེར་བཞི་སྟེ། གཞན་ཡང་དུར་ཁྲོད་ཆེན་པོ་བརྒྱད་ལ་སོགས་པའི་ཞིང་རྣམས་སྐྱོང་བའི་མ་མོ་བདུན། སྲིང་མོ་བཞི། འབར་མ་བརྒྱད། དབང་ཕྱུག་ཉི་ཤུ་རྩ་བརྒྱད་མཁའ་འགྲོ་སུམ་ཅུ་རྩ་གཉིས། ཕོ་ཉ་སུམ་བརྒྱ་དྲུག་ཅུ་སོགས་ཏེ། ཇི་སྐད་དུ། ཕུད་ལ་འཚལ་སྐལ་མི་ལྡན་གྱི། །ལྷག་མ་ཞལ་ཆབ་སྦྲོན་ལ་སྩོལ། །ཞེས་པ་ལྟར་གིང་ལང་ཕྲ་མེན་ཤུགས་འགྲོ་གནོད་སྦྱིན་གྱི་རིགས་ལྷག་མའི་དམ་ཚིག་ལ་གཏོགས་པ་ཀུན་ལ་འབུལ་ཞིང་རྣལ་འབྱོར་པའི་ཕྱི་ནང་གསང་བའི་བར་ཆད་ཞི་བ་དང་རྩ་རླུང་ཐིག་ལེའི་ཁམས་རྣམས་ཡེ་ཤེས་ཆེན་པོར་སྨིན་པའི་གྲོགས་བཅོལ་ལ། སྒྲུབ་ཁང་ནས་ཕྱི་རོལ་དུ་གོམས་པ་བདུན་ཅུ་བོར་བ་ནི་སྲིན་མོའི་ཟ་ལམ་ཡིན་པས་དེར་བསྐྱལ་ལོ། །དེ་ནས་སྨོན་ལམ་གདབ་པ་ནི། མཆེད་ལྕམ་རྣམས་དཀྱིལ་འཁོར་གྱི་མཐའ་ནས་བསྐོར་ཏེ་གདུང་བ་རྩེ་གཅིག་པ། ཧོ༔ ཆོས་དབྱིངས་རྣམ་པར་དག་པའི་སོགས་ཏེ། དེ་ཡང་མཎྜལ་ནི་སྙིང་པོའམ་བཅུད་དང་། ལ་ནི་ལེན་ཅིང་འཛིན་པ་སྟེ་སྙིང་པོའི་ཡོན་ཏན་འཛིན་པའི་གཞིར་གྱུར་པས་དཀྱིལ་འཁོར་ཏེ། ཆོས་ཐམས་ཅད་ཀྱི་གནས་ལུགས་ཡེ་ནས་རྣམ་པར་དག་པ་གནས་ལུགས་གཞི་ཡི་དཀྱིལ་འཁོར་དང་། གློ་བུར་གྱི་དྲི་མ་བྲལ་ནས་གཞི་ཇི་བཞིན་པ་མངོན་དུ་གྱུར་པ་མཐར་ཕྱིན་འབྲས་བུའི་དཀྱིལ་འཁོར་རོ། །དེ་གཉིས་དོན་ལ་དབྱེར་མེད་སྣོད་བཅུད་རྒྱུད་གསུམ་གྱིས་བསྡུས་པའི་ཆོས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་གདོད་ནས་དག་མཉམ་ཆེན་པོར་གནས་པ་ནི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཏེ། རྒྱུད་གསང་སྙིང་ལས། ཡེ་ཤེས་ཕྱོགས་བཞི་དབུས་བརྟགས་ཏེ། །དཀྱིལ་འཁོར་བསམ་ཡས་ལྷུན་གྲུབ་ནི། །རྫོགས་ཆེན་རྟོགས་པའི་རྣལ་འབྱོར་པས། །ཀུན་འབྱུང་དཀྱིལ་འཁོར་ཆེན་པོར་སྦྱོང་། །ཞེས་སོ། །དེ་ལྟར་རྟོགས་ཤིང་གོམས་པ་ནི་ཆོས་དབྱིངས་རྣམ་པར་དག་པའི་དཀྱིལ་འཁོར་ཏེ། དེར་བཅུག་ཅིང་སྨིན་གྲོལ་ཟབ་མོའི་ལམ་གྱིས་འབྲེལ་བའི་རྡོ་རྗེ་སློབ་དཔོན་མཆོག་ནི་ཡུལ་ཆེས་གཉན་པ་སྟེ། དགོངས་འདུས་ལས། བསྐལ་པ་སྟོང་གི་སངས་རྒྱས་པས། །བླ་མ་གཉན་པར་ཤེས་པར་བྱ། །ཅི་ཕྱིར་བསྐལ་པའི་སངས་རྒྱས་རྣམས། །བླ་མ་དག་ལ་བསྟེན་ནས་འབྱུང་། །ཞེས་དང་། འཇམ་དཔལ་ཞལ་ལུང་ལས། མ་འོངས་རྡོ་རྗེ་འཆང་བ་སྟེ། །དེ་ལ་བརྙས་བྱེད་སེམས་ཅན་གང་། །དེ་ནི་ང་ལ་བརྙས་བྱེད་པས། །ངས་ནི་དེ་ཀུན་རྣམ་པར་སྤོང་། །ཞེས་སོ། །དེས་ན་དཔྲལ་བའི་མིག་དང་ཁོང་པའི་སྙིང་ལྟར་རྟག་ཏུ་བསྟེན་པར་བྱ་བ་ཡིན་ལ། དེ་བཞིན་དུ་རྡོ་རྗེའི་གཟུངས་མ་དང་། དམ་ཚིག་གི་སྲོག་གིས་སྦྲེལ་བའི་མཆེད་དང་ལྕམ་དྲལ་འདུས་པ་རྒྱ་མཚོ་རྣམས་ཀྱང་། དུས་འདི་ནས་བཟུང་ཏེ་ནམ་བྱང་ཆུབ་སྙིང་པོར་ཚོམ་བུ་གཅིག་ཏུ་མ་གྲོལ་བར་དེ་སྲིད་དུ་ནམ་ཡང་མི་འབྲལ་བར་གདུང་སེམས་རྩེ་གཅིག་པས་འགྲོགས་ཤིང་། ཚེ་རབས་ཀུན་ཏུ་ངན་འགྲོ་ལོག་པར་ལྟུང་བ་དང་མི་ཁོམ་སོགས་ཀྱི་སྒྲ་ཙམ་ཡང་མི་གྲགས་ཤིང་། གང་དང་གང་དུ་སྐྱེས་པ་དེར། སྤྱིར་ཐེག་པ་ཆེན་པོ་དང་སྒོས་རྡོ་རྗེ་ཐེག་པ་ལ་སྤྱོད་པའི་རིགས་སུ་སྐྱེ་བ་དང་། རྟེན་དེར་མཚན་ཉིད་དང་ལྡན་པའི་བླ་མ་དམ་པ་ལས། སད་རྨི་གཉིད་དང་སྙོམས་འཇུག་གི་སྒྲིབ་པ་བཞི་སྦྱང་ཞིང་རང་གནས་སྐུ་བཞིར་སྨིན་བྱེད་བུམ་གསང་ཤེས་རབ་ཡེ་ཤེས་དང་དབང་བཞི་པ་ཚིག་དབང་རིན་པོ་ཆེས་ཡོངས་སུ་སྨིན་པའི་སྐལ་བ་མཆོག་དང་ལྡན་པར་གྱུར་ཏེ། རྩ་བ་དང་ཡན་ལག་གི་དམ་ཚིག་སྤྱི་དང་། བྱེ་བྲག་ཏུ་སྣོད་བཅུད་ལྷར་ལྟ་བ། སྒྲ་གྲགས་སྔགས་སུ་ཤེས་པ། དྲན་རྟོག་བདེ་བ་ཆེན་པོར་སྡོམ་པ། ཅིར་སྣང་ཆོས་ཉིད་དུ་ཁྱེར་བ་སོགས་དབང་བཞི་སོ་སོའི་དམ་ཚིག་དང་སྡོམ་པ་རྣམས་རྣམ་པར་དག་པ་དང་། བུམ་དབང་གི་ལམ་ཁྱེར་སྐུ་རྡོ་རྗེ་བསྐྱེད་པའི་རིམ་པས་ཐ་མལ་གྱི་སྣང་ཞེན་དག་ནས་ལུས་ལྷ་སྐུར་གྲོལ་བ་དང་། གསང་ཤེར་གྱི་ལམ་བདག་བྱིན་གྱིས་བརླབ་པ་དང་། གཞན་ལུས་ཕོ་ཉའི་ལམ་ལ་བརྟེན་པའི་རྫོགས་པའི་རིམ་པས་རྩ་རླུང་ཐིག་ལེའི་ཁམས་རྣམས་དབུ་མར་དག་ནས་ངག་གསུང་རྡོ་རྗེར་རྫོགས་པ་དང་། བཞི་པའི་ལམ་རྫོགས་པ་ཆེན་པོ་ཀ་དག་ཁྲེགས་ཆོད་དང་ལྷུན་གྲུབ་ཐོད་རྒལ་གཉིས་ལ་བརྟེན་ནས་ཡིད་ཡེ་ཤེས་ཆེན་པོར་སྨིན་ནས་སྤངས་ཐོབ་དང་བྲལ་བའི་འབྲས་བུ་གཞི་ལ་རྫོགས་ཏེ། མཐར་ཐུག་གཞོན་ནུ་བུམ་པ་སྐུ་ཡི་ཞིང་ཁམས་སུ་སྐུ་དང་ཡེ་ཤེས་ལྷུན་གྱིས་གྲུབ་པའི་རྒྱལ་ཐབས་ཆེན་པོ་ལ་ལོངས་སྤྱོད་པར་ཤོག་ཅིག་ཅེས་སྨོན་པའོ། །དེ་ལྟར་བགྱིས་པའི་ཕན་ཡོན་ཀྱང་། རྡོ་རྗེ་དྲྭ་བ་ལས། བསོད་ནམས་ནང་ནས་ཚོགས་འཁོར་མཆོག །ཚེ་འདིར་བསམ་པ་ཀུན་འགྲུབ་ཅིང་། །གེགས་དང་བར་ཆད་ཞི་བ་དང་། །ཕྱི་མར་རིག་འཛིན་རྒྱལ་བའི་ཞིང་། །ཀུན་ཏུ་བཟང་པོ་ཐོབ་པར་འགྱུར། །ཞེས་གསུངས་པ་ཡིན་ནོ། །གཉིས་པ་གཏོར་སྐྱོང་བྱ་བ་ལ། སྤྱིར་གཏོར་མའི་ངོ་བོ་ནི། དབྱིངས་དང་ཡེ་ཤེས་གཉིས་སུ་མེད་པ་སྟེ་ཆོས་ཉིད་སྟོང་པའི་རྩལ་ཆོས་ཅན་གཏོར་མར་ཤར་བའོ། །ངེས་ཚིག་ནི། འཛིན་པ་མེད་པས་གཏོར། ཀུན་ལ་ཁྱབ་པས་མ་སྟེ་རྟོག་མེད་ཡེ་ཤེས་ཀྱི་རོལ་པས་མགྲོན་རྣམས་ཚིམ་པར་བྱེད་པའོ། །དབྱེ་ན་ལྔ་སྟེ། འཁོར་འདས་ཀྱི་ཆོས་ཐམས་ཅད་རང་སྣང་འཛིན་མེད་དུ་རྟོགས་ནས་ཉོན་མོངས་པ་ཡེ་ཤེས་སུ་ཤར་བ་ནི་འགྱུར་མེད་ཡེ་ཤེས་ཀྱི་གཏོར་མ། ཆོས་ཐམས་ཅད་རང་སྣང་གཉིས་མེད་དུ་རྟོགས་ནས་སྡུག་བསྔལ་བདེ་བར་ཤར་བ་ནི་བདེ་ཆེན་བྱང་ཆུབ་སེམས་ཀྱི་གཏོར་མ། ཕྱི་ནང་སྣོད་བཅུད་སེམས་ཀྱིས་ཁྱབ་ཚད་ཆོས་ཉིད་ཀྱིས་ཁྱབ་པ་ནི་ཡོངས་སུ་ཁྱབ་པའི་གཏོར་མ། ཆོས་ཉིད་བྱང་ཆུབ་ཀྱི་སེམས་མ་བྱུང་མ་སྐྱེས་པ་ནི་དག་པ་ཆོས་ཉིད་ཀྱི་གཏོར་མ། ཐམས་ཅད་ཡང་དག་གཉིས་མེད་གྱི་ལམ་དུ་འགྲོ་བ་ནི་སྣ་ཚོགས་ལམ་ཁྱེར་གྱི་གཏོར་མ་རྣམས་སོ། །གཞན་ཡང་། དོན་དང་རྟགས། དགོངས་པ་དང་སྤྱོད་ལམ། ལས་དང་རིམ་པ། སྐྱོན་དང་ཡོན་ཏན་གཏོང་ཐབས་སོགས་རྒྱ་ཆེར་གསུངས་པ་ནི་པདྨའི་ལམ་རིམ་ཆེན་མོ་སོགས་ལས་ཤེས་པར་བྱ་ལ། འདིར་ཐུན་མཚམས་ཀྱི་བྱ་བ་དང་འབྲེལ་བར་འཕྲལ་གཏོར་གཏོང་ཞིང་ཆད་ཐོ་བསྒྲགས་པ་ནི། སྲུང་མའི་གཏོར་མ་རྣམས་གཏོར་གྲལ་ནས་བཏེགས་ལ་སྨན་རཀ་སྦྲན། གཏོར་རྫས་རྣམས་ངོ་བོ་དགྲ་བགེགས་གྱི་ཤ་ཁྲག་རུས་གསུམ་ལ་རྣམ་པ་ཟག་མེད་ཀྱི་བདུད་རྩིར་བྱིན་གྱིས་བརླབས་ཏེ། ཡང་དག་སྙིང་པོའི་གཏེར་གཞུང་ལས། ལྷ་སྲིན་དྲེགས་པ་འདི་དག་ཀྱང༔ བདེ་གཤེགས་ལྷ་ཡི་ཞལ་མཐོང་ནས༔ དགོངས་པ་མྱ་ངན་འདས་མོད་ཀྱང༔ སྤྱོད་པ་འཇིག་རྟེན་དྲེགས་པའི་ཚུལ༔དམ་ལ་བཏགས་པའི་ཚུལ་གྱིས་ནི༔ སངས་རྒྱས་བསྟན་པ་སྲུང་བར་བྱེད༔ ལེགས་ཉེས་སྟངས་འཛིན་བྱ་ར་བྱེད༔ ཅེས་གསུངས་པ་ལྟར། སྐྱེ་མེད་ཀྱི་དབྱིངས་ལས་འགགས་མེད་ཀྱི་རོལ་པར་ཤར་པའི་རྡོ་རྗེ་སྲིན་པོའི་གཟུགས་ཅན། ཡེ་ཤེས་དང་འཇིག་རྟེན་པའི་ཚུལ་སྣ་ཚོགས་སུ་འཕྲུལ་ཞིང་ཅིར་ཡང་སྟོན་པའི་དཔལ་མགོན་ཕོ་རྒྱུད། སྔགས་སྲུང་མོ་རྒྱུད། མ་ནིང་གཉིས་མེད་ཀྱི་རྒྱུད་དེ། རྒྱུད་གསུམ་དམ་ཅན་རྒྱ་མཚོ་སྣང་སྲིད་དྲེགས་པའི་དཔུང་ཚོགས་སྡེ་དང་བཅས་པ་ལ་ཕུལ་བས། རང་རང་གི་སྔོན་གྱི་དམ་ཚིག་གཉན་པོ་ཉེ་བར་དགོངས་ནས་ལས་བཞི་སྤྱི་དང་། བྱེ་བྲག་སངས་རྒྱས་བསྟན་པ་དང་རྣལ་འབྱོར་པའི་འཁོར་སྲུང་ཞིང་བར་ཆད་ཀྱི་འཚེ་བ་བཟློག་པ་དང་། བསྟན་འཛིན་གྱི་སྐྱེས་བུའི་སྐུ་ཚེ་དང་མཛད་ཕྲིན་འཕེལ་ཞིང་རྒྱས་ལ་གཞན་དོན་རླབས་པོ་ཆེ་འགྲུབ་པའི་སྡོང་{གདོང } གྲོགས་གཡེལ་བ་མེད་པར་མཛད་པར་མོས་ལ། ཧཱུྃ་ཨེ༔ སྐྱེ་བ་མེད་པ་སོགས་ཀྱི་འབུལ་ཞིང་ཕྲིན་ལས་བཅོལ་ལོ། །དེ་ནས་བརྟན་མ་སྐྱོང་བ་ནི། ཆད་ཐོའི་གཏོར་གཞོང་བཤལ་བའི་ཆུ་དང་སྨན་རཀ་གཏོར་མར་སྦྲན་ལ་བྱིན་གྱིས་བརླབས་ཏེ། རྟེན་འབྲེལ་བཅུ་གཉིས་བདེན་དོན་བཅུ་གཉིས་སུ་དག་པའི་རང་རྩལ། འཇིག་རྟེན་སྤྱི་དང་བྱེ་བྲག་བོད་ཁ་བ་ཅན་གྱི་ལྗོངས་སུ་བརྟན་ཞིང་ཆགས་པའི་བརྟན་མ་ཆེན་མོ་ནག་མོ་སྨུག་མོ་དཀར་མོ་སྟེ་བདུད་དང་གནོད་སྦྱིན་སྨན་གྱི་རིགས་ཀྱི་མ་མོ་བཞི་བཞི་སོ་སོའི་འཁོར་གཡོག་འབུམ་ཕྲག་དུ་མ་དང་བཅས་པ་ལ་རང་རང་གི་ཐུགས་ལ་དགྱེས་དགུའི་ལོངས་སྤྱོད་ཀྱི་གཏེར་དུ་གྱུར་པའི་གཏོར་མ་བདུད་རྩིའི་རང་བཞིན་དུ་ཕུལ་བས་དགྱེས་ཤིང་ཚིམ་ནས། སྔོན་ཨོ་རྒྱན་ཆེན་པོའི་སྤྱན་སྔར་ཇི་ལྟར་ཁས་བླངས་པ་བཞིན་དུ་བོད་ཁམས་མཐའ་དབུས་སྲུང་ཞིང་མཐའ་དམག་གདུག་པའི་གཡོ་འཁྲུག་བཟློག་པའི་ཕྲིན་ལས་མཛད་པར་མོས་ལ། ཧཱུྃ་བྷྱོ༔ འཇིག་རྟེན་སྤྱི་དང་སོགས་ཀྱི་གཏོར་མ་ཕྱི་རོལ་གྱི་གཙང་སར་འབུལ་ལོ། །དེ་ནས་རྟ་བྲོ་ནི། གཏོར་གཞོང་ཁ་སྦུབ་པ་རྡོ་རྗེས་རྒྱས་གདབ་ཅིང་། རྣམ་ཐར་གསུམ་ལྡན་གྱི་ཨེ་ཁང་གྲུ་གསུམ་པར་དུག་གསུམ་གྱི་རང་གཟུགས་དགྲ་བགེགས་དམ་སྲི་རུ་ཏྲ་ཀླ་ཀློའི་དཔུང་ཚོགས་སྡེ་དང་བཅས་པ་བཀུག་ནས་སྟེང་དུ་དཔལ་ཆེན་པོ་སྐུ་གསུམ་རོལ་བའི་ཁྲོ་བོའི་ཚོགས་ཀྱིས་ཐབས་ཤེས་གཉིས་སུ་མེད་པར་རྡོ་རྗེའི་བྲོ་བརྡུང་བས་རྣམ་རྟོག་དུག་ལྔའི་དགྲ་བོ་མཐའ་དག་ལྡང་མེད་དུ་མནན་པར་མོས་ལ། ཨེ་ཧཱུྃ༔ རྣམ་པར་ཐར་པ་སོགས་ཀྱི་བྲོ་བརྡུང་བྱའོ། །གསུམ་པ་དངོས་གྲུབ་བླང་བ་ནི། སྨིན་སློབ་ཀྱི་ཚེ་དངོས་གྲུབ་ཀྱི་མཚན་མ་ཇི་ལྟར་རིག་པ་མཐོང་བའམ། གཞན་དུ་དུས་གྲངས་ཙམ་གྱི་བསྙེན་པ་གང་ཡིན་ཀྱང་རུང་སྟེ་མཐར་འབྲས་བུ་ཐོབ་པར་བྱ་བའི་ཕྱིར་དངོས་གྲུབ་ལེན་པ་སྟེ། ཡང་དག་གྲུབ་པ་ལས། སྟོན་པས་བསྟན་པའི་ལུང་བཞིན་དུ། །ཞག་གྲངས་དུས་ནི་བརྟག་པའམ། །མཚན་མ་བརྟན་པོར་བྱུང་བ་ན། །བསྒྲུབ་པ་ཆེན་པོ་བརྩམ་པར་བྱ། །རྡོ་རྗེ་ཉི་མ་ནུབ་ནས་ནི། །སྐྱ་རེངས་འཆར་བའི་བར་དུ་བསྒྲུབ། །རྫས་ལ་ཧཱུྃ་དབྱངས་མཆོད་བསྟོད་ཀྱིས། །དངོས་གྲུབ་བསྡུས་ཏེ་སྐུ་གསུང་ཐུགས། །ཐོབ་དང་བྱིན་རླབས་དབང་བསྐུར་བྱ། །ཞེས་དང་། གཞུང་རྩ་བར་ཡང་། དེ་ལྟ་བུ་ཡི་ཐབས་མཁས་ལ༔ བརྟེན་ནས་དངོས་སྒྲུབ་ལྷུར་བླང་ཕྱིར༔ མཆོད་བསྟོད་དམ་ཚིག་ཉམས་ཆག་བཤགས༔ དེ་ནས་དངོས་གྲུབ་བསྐུལ་བའི་ཕྱིར༔ རྩེ་གཅིག་གདུང་བས་འདི་སྐད་གསོལ༔ ཞེས་པས་བསྟན་ཏེ། སྤྱིར་སྨིན་སློབ་ཀྱི་ཚེ་ཉི་མ་ནུབ་ནས་སྐྱ་རེངས་མ་ཤར་བའི་བར་གྱི་མཚན་གཅིག་ལ། སྲོད་ལ་འཕྲོ་འདུ་ལམ་དུ་བྱས་ཏེ་ལྷ་ལས་དངོས་གྲུབ་ལེན་པ་དང་། ནམ་གུང་སྒྲོལ་བ་ལམ་དུ་བྱས་ཏེ་དགྲ་ལས་དངོས་གྲུབ་ལེན་པ་དང་། ཐོ་རེངས་སྦྱོར་བ་ལམ་དུ་བྱས་ཏེ་ཡུམ་ལས་དངོས་གྲུབ་ལེན་པ་དང་གསུམ་གྱི་ཚུལ་དུ་དཀྱིལ་འཁོར་པའི་སྐུ་གསུང་ཐུགས་ཀྱི་དངོས་གྲུབ་ཐོབ་པར་བྱ་བར་གསུངས་ཀྱང་། འདིར་མོས་སློབ་ཙམ་གྱི་དབང་དུ་བྱས་ཏེ། ནམ་དུས་ལ་བབས་པ་ན་མཆོད་གཏོར་སོགས་བཟང་དུ་བཤམས། ལས་གཞུང་གི་དབུ་ནས་བརྩམས་མཐར་ཆགས་ཀྱིས་གཏོང་བའི་བསྙེན་པའི་སྐབས་སུ་བདག་དང་སྒྲུབ་རྫས་ལ་དངོས་གྲུབ་བསྡུ་སྟིམ་གྱི་དམིགས་པ་ཡང་ཡང་བྱ། ཚོགས་མཆོད་ཀྱི་སྐབས་སུ་གྲུབ་ན་སྨད་ལས་ལས་འབྱུང་བ་ལྟར་གྱི་གདབ་ཁ་རྒྱས་པ་བྱ། ཚོགས་ལྷག་གཏོར་སྐྱོང་རྟ་བྲོ་བར་སོང་རྗེས་མཆོད་བསྟོད་བྱ། སླར་ཡང་བགེགས་སྐྲད། སྲུང་འཁོར་སྒོམ། འཁོན་བཅུག་སྦྱོང་བའི་བཤགས་པ་དང་ཡིག་བརྒྱ་བཟླ། འགྲོ་དོན་མཐར་དབྱུང་ཕྱིར་དམ་བཅའ། གཟི་བྱིན་བསྐྱེད་ཕྱིར་བྱིན་དབབ། སྨན་གཏོར་རཀྟ་སོགས་ཀྱིས་མཆོད། དེ་ནས་སྔར་གྱི་ཛབ྄་ཁང་གི་དལ་མ་བསྡུས་པར་ཡོད་ན་དེ་ཉིད་གསལ་འདོན་སྐྱོར་དང་། བཟླས་པའི་མཇུག་ཛབ྄་ཁང་རང་ལ་བསྡུ་ཟིན་ན་སྐབས་འདིར། བདག་དམ་ཚིག་པ་ལས་མདུན་རྟེན་ཡེ་ཤེས་སེམས་དཔའི་ངོ་བོར་ལོགས་སུ་ཕྱེ་ནས་མདུན་གྱི་ནམ་མཁར་བཞུགས་པ་ལ་རང་གི་ཐུགས་ཀ་ནས་སྔགས་ཀྱི་འོད་ཟེར་མཆོད་པའི་ཚུལ་དུ་སྤྲོས་པས་སྐུ་གསུང་ཐུགས་ལ་དགྱེས་པ་བསྐྱེད། བདེ་བར་གཤེགས་པའི་སྐུ་གསུང་ཐུགས་ཀྱི་དངོས་གྲུབ་ཐམས་ཅད་འོད་ཟེར་གྱི་རྣམ་པར་བསྡུས་ནས་མཚོ་ལ་ཁ་བ་བབས་པ་ལྟར་རང་གི་གནས་གསུམ་དུ་ཐིམ་པས་དངོས་གྲུབ་ཐོབ་པར་བསམ་ཞིང་། སྔགས་ཚན་གཉིས་ཀྱི་མཐར་སརྦ་སིངྔྷི་ཕ་ལ་ཧཱུྃ་ཞེས་བཏགས་པ་ཟླ། རྒྱུན་གྱི་ཚོགས་མཆོད་སོགས་དཀྱུས་མ་ལ་གོང་གི་མཆོད་བསྟོད་ཟིན་རྗེས་སྒྲུབ་གཏོར་ལྷར་ལམ་གྱིས་གསལ་བའི་གནས་གསུམ་གྱི་ཡི་གེ་འབྲུ་གསུམ་ལས་བྱིན་རླབས་དབང་དང་དངོས་གྲུབ་ཐམས་ཅད་འོད་ཟེར་དཀར་དམར་མཐིང་གསུམ་གྱི་རྣམ་པས་བདག་གིས་གནས་གསུམ་དུ་སིབ་སིབ་ཐིམ་པས་མཆོག་དང་ཐུན་མོང་གི་དངོས་གྲུབ་ལུས་པ་མེད་པར་སྩལ་ཞིང་ཐོབ་པར་མོས་ཏེ། གང་ལྟར་ཡང་དངོས་གྲུབ་བསྐུལ་བ་ནི། མཆོག་ཏུ་གུས་པའི་གདུང་ཤུགས་དྲག་པོས་ཐལ་མོ་སྦྱར་བས་བཏུད་དེ། ༀ་ཨཱཿ ཧཱུྃ་ཧོཿ བླ་མ་ཡང་དག་སོགས་ཏེ། རྡོ་རྗེ་གསུམ་གྱི་བྱིན་རླབས་བསྐུལ་བའི་སྔགས་ཚིག་གིས་མགོ་དྲངས་ནས། དཀྱིལ་འཁོར་ཀུན་གྱི་དབང་ཕྱུག་བླ་མ་ཡང་དག་ཧེ་རུ་ཀ་དང་ཚེ་རབས་སྔོན་ནས་འབྲེལ་བའི་ཡི་དམ་ལྷག་པའི་ལྷ་མཆོག་དཔལ་རྡོ་རྗེ་གཞོན་ནུ་རབ་འབྱམས་རྩ་བ་གསུམ་གྱི་དཀྱིལ་འཁོར་གྱི་ལྷ་ཚོགས་རྣམས་ལ་གསོལ་བ་ནི། བདག་ཅག་སྒྲུབ་པ་པོས་དད་མོས་རྩེ་གཅིག་པས་བསྙེན་ཅིང་སྒྲུབ་ནས་ཐུགས་དམ་གཉེན་པོ་བསྐུལ་བའི་ཐབས་ལ་བརྟེན་ནས། དེང་གི་དུས་འདིར་ཡིད་ལ་བརྣག་པའི་དོན་དངོས་གྲུབ་རྣམ་པ་གཉིས་སྩོལ་བའི་དུས་ལ་བབས་པ་ལགས་ན། གནས་སྐབས་སུ་མེ་དང་ཆུ་དང་དུག་དང་མཚོན་དང་དམག་དང་དགྲ་དང་མུ་གེ་དང་དུས་མིན་འཆི་བ་སྟེ་འཇིགས་པ་ཆེན་པོ་བརྒྱད་ཞི་བ་དང་། ཚེ་རིང་བ་དང་དབང་ཆེ་བ་དང་བཀྲ་ཤིས་པ་དང་གཟི་མདངས་ཆེ་བ་དང་འཁོར་མང་བ་དང་ལོངས་སྤྱོད་ཆེ་བ་སྟེ་འབྱོར་པ་དྲུག་རྒྱས་པ་དང་། ཕ་མ་དང་རྗེ་རྒྱལ་དང་གཙོ་བོ་དང་སློབ་དཔོན་ལྟར་མོས་པ་སྟེ་མོས་པ་རྣམ་བཞིའི་དབང་དུ་འདུ་བ་དང་། དགུག་པ་དང་བསྐྲད་པ་དང་དབྱེ་བ་དང་ལྐུག་པ་དང་སྨྱོ་འབོག་དང་བསད་པ་དང་མནན་པ་སྟེ་དྲག་པོའི་ལས་བདུན་སོགས་ཕྲིན་ལས་རྣམ་པ་བཞི་དང་། གུར་ལས། མིག་སྨན་དང་ནི་རྐང་མགྱོགས་དང་། །རལ་གྲི་དང་ནི་ས་འོག་གྲུབ། །རིལ་བུ་དང་ནི་མཁའ་སྤྱོད་ཉིད། །མི་སྣང་བ་དང་བཅུད་ཀྱིས་ལེན། །གང་ཕྱིར་དེས་ནི་རྡོ་རྗེ་འཛིན། །མཉེས་པར་བྱས་ལ་མྱུར་དུ་ཐོབ། །ཅེས་གསུངས་པའི་གྲུབ་པ་བརྒྱད་དང་གཞན་ཡང་། ཕྲ་ཞིང་ཡང་ལ་ཕྲ་བར་ནུས་པ་དང་། །སྤྱོད་པར་ནུས་དང་བདག་ཉིད་ཆེན་པོ་དང་། །དགའ་མགུར་བྱེད་དང་ཐམས་ཅད་དབང་དུ་འགྱུར། །ཅི་འདོད་བྱེད་དང་དབང་ཕྱུག་དོན་བརྒྱད་དོ། །ཞེས་པ་ལྟར་གྱི་དབང་ཕྱུག་གི་ཡོན་ཏན་བརྒྱད་དང་། ཚེ་དང་སེམས་དང་ཡོ་བྱད་དང་། །ལས་དང་སྐྱེ་བ་མོས་པ་དང་། །སྨོན་ལམ་རྫུ་འཕྲུལ་ཡེ་ཤེས་དང་། །ཆོས་ལ་དབང་བ་དབང་བཅུའོ། །ཞེས་པ་ལྟར་དབང་བཅུ་དང་དེ་ཡང་སའི་ཁྱད་པར་གྱི་ཕྱི་ནང་གཉིས་སུ་དབྱེ་བ་སོགས་ཐུན་མོང་གི་དངོས་གྲུབ་ཐམས་ཅད་དཀའ་བ་མེད་པར་གྲུབ་པ་དང་། མཐར་ཐུག་གི་འབྲས་བུ་འགྱུར་བཅས་ཀྱི་མཚན་མ་མཐའ་དག་འགྱུར་མེད་ཀྱི་དབྱིངས་སུ་བསྡོམས་པའི་མཆོག་ཏུ་མི་འགྱུར་བའི་བདེ་བ་ཆེན་པོ་དང་རྣམ་ཀུན་མཆོག་ལྡན་གྱི་སྟོང་པ་ཉིད་ཟུང་དུ་འཇུག་པའི་ཡེ་ཤེས་བདེ་སྟོང་ཕྱག་རྒྱ་ཆེན་པོ་མཆོག་གི་དངོས་གྲུབ་ཁ་སྦྱོར་བདུན་ལྡན་དཔལ་ཆེན་པོའི་གོ་འཕང་ཆེན་པོ་ཚེ་འདི་ཉིད་དུ་སྩལ་བར་མཛད་དུ་གསོལ། ཞེས་དང་། དངོས་གྲུབ་བསྐུལ་བའི་ཛབ྄་དབྱངས་དང་བཅས་ཏེ་སྒྲུབ་རྟེན་གཏོར་མ་སོགས་གནས་གསུམ་དུ་བཞག་ལ་དབང་ནོད་ཅིང་། མཐར་མདུན་བསྐྱེད་ཛབ྄་ཁང་གི་ལྷ་དང་བཅས་པ་འོད་དུ་ལྟེམ་གྱིས་ཞུ་སྟེ་རང་གི་སྒོ་གསུམ་ལ་ཐིམ་པས་གཉིས་སུ་མེད་པར་གྱུར་ཏེ་རྡོ་རྗེ་གསུམ་གྱི་དངོས་གྲུབ་ཐོབ་པར་མོས་ཏེ། གཏོར་རྫས་སོགས་དངོས་གྲུབ་ཀྱི་བདུད་རྩིར་མོས་ལ་རེ་དོགས་མེད་པའི་སེམས་ཀྱིས་མྱོང་བས་ཟག་མེད་ཀྱི་བདུད་རྩིས་རྩ་ཁམས་ཐམས་ཅད་ཁྱབ་པས་བདེ་བ་ཆེན་པོའི་ཡེ་ཤེས་འབར་བར་བསམ་ཞིང་མཉམ་པར་བཞག་ལ་རྗེས་དངོས་གྲུབ་ཀྱི་མཚན་མའང་བརྟག་པར་བྱ་སྟེ། ཧེ་རུ་ཀ་འདུས་པའི་རྒྱུད་ལས། མཚན་མ་བརྟན་པོ་བྱུང་བ་ན། །འཇིགས་དང་དགའ་བྲོད་ཀུན་སྤངས་ཏེ། །གླུ་དང་གར་དང་རོལ་མོ་དང་། །གཡབ་མོ་གདུང་བའི་དབྱངས་དང་བཅས། །བཤགས་དང་མཆོད་ཅིང་བསྐུལ་བ་སྟེ། །དངོས་གྲུབ་འདོད་པར་གསོལ་གདབ་ཅིང་། །དམ་ཚིག་ཏིང་འཛིན་དྲག་བསྐུལ་བ། །ཐ་མའི་དུས་སུ་ཤེས་བྱ་སྟེ། །རྫས་ནི་སྐུ་ཡི་དངོས་གྲུབ་སྟེ། །རུ་ལུ་འོད་བཅས་གསུང་གི་དོན། །དཔལ་བེའུ་སེམས་དཔའ་ཐུགས་ཀྱི་མཆོག །ཁ་ཟས་ལོངས་སྤྱོད་བདུད་རྩི་ཆེ། །ཞེས་སོ། །དེ་ཡང་ཕྱི་ལྟར་ན་བདེ་བར་གཤེགས་པའི་སྐུ་གསུང་ཐུགས་ཀྱི་དངོས་གྲུབ་ཀྱི་དབྱིག་བསྡུས་པར་བསྒོམ། ནང་ལྟར་ན་རང་གི་ལུས་ངག་ཡིད་གསུམ་དཔལ་ཆེན་པོའི་སྐུ་གསུང་ཐུགས་སུ་གྲུབ་པར་བསམ། གསང་བ་ལྟར་ན་ཆོས་ཉིད་སྐྱེ་བ་མེད་པ་ལས་རིག་པར་རང་བྱུང་གི་ཡེ་ཤེས་ལྷང་ངེར་རྟོགས་པར་བསྒོམ་པའོ། །དེ་ནས་ནོངས་པ་བཤགས་པ་ནི། རྣལ་འབྱོར་པ་རྣམས་ནུས་པ་དབེན་པས་དགོངས་སྤྱོད་རྒྱ་མཚོ་གདེང་དུ་མ་གྱུར་པ་དང་། ཏིང་ངེ་འཛིན་མ་གསལ་ཞིང་ཛབ྄་བཟླས་མ་དག་པ་དང་། ཆོ་གའི་ཡན་ལག་ལྷག་ཆད་དུ་གྱུར་པ་དང་། རྫས་དང་ཡོ་བྱད་མ་འབྱོར་ཞིང་མ་ཚང་བ་སོགས་རྩ་བ་དང་ཡན་ལག་གི་དམ་ཚིག་དང་འགལ་ཞིང་ཉམས་པའི་ཉེས་སྐྱོན་གྱི་ནོངས་པ་ཅི་དང་ཅི་མཆིས་པ་དེ་ཐམས་ཅད་བླ་མ་དཀྱིལ་འཁོར་གྱི་དབང་ཕྱུག་དང་དཀྱིལ་འཁོར་གྱི་ལྷ་ཚོགས་མཆེད་ལྕམ་འདུས་པ་རྒྱ་མཚོའི་སྤྱན་སྔར་མཐོལ་བཤགས་བཟོད་པར་གསོལ་ན་འཕྲལ་ཡུན་གྱི་སྒྲིབ་པར་མི་འགྱུར་བར་བྱང་ཞིང་དག་པར་མཛད་དུ་གསོལ་སྙམ་པས། མ་རྙེད་ཡོངས་སུ་སོགས་དང་། ཨ་བྷི་ངྷ་ན་ལས། ཡི་གེ་བརྒྱ་པས་ཐམས་ཅད་དུ། །གསང་སྔགས་བརྟན་པར་བསྒོམས་ནས་སུ། །རང་གི་མིང་དང་ལྡན་པར་ནི། །གཅིག་ཏུ་སྤེལ་ནས་བཟླས་པར་བྱ། །ཞེས་པས་ཧེ་རུ་ཀའི་ཡིག་བརྒྱའམ། ཡང་ན་རྣལ་འབྱོར་རྒྱུད་ལས། རྡོ་རྗེ་སེམས་དཔའ་རིགས་རྣམས་ཀུན་གྱི་བདག །ཅེས་གསུངས་པས་རྡོར་སེམས་ཀྱི་ཡིག་བརྒྱ་ཉིད་བཟླ་བར་བྱའོ། །དེ་ཡང་ཕྱི་ལྟར་ན་བདག་གི་དམ་ཚིག་ཉམས་པ་ཐམས་ཅད་ལྷ་ལ་བཤགས་པར་བསམ། ནང་ལྟར་ན་དམ་ཚིག་ཉམས་ཆག་སྐྱོན་གྱིས་མ་གོས་པར་དག་པར་བསམ། གསང་བ་ལྟར་ན་ཆོས་ཉིད་སྐྱེ་བ་མེད་པ་སྐྱོན་དང་བག་ཆགས་ཀྱིས་མ་གོས་པར་ལྷང་ངེར་རྟོགས་པར་བསམ་མོ། །བཞི་པ་དཀྱིལ་འཁོར་བསྡུ་ཞིང་བསྔོ་སྨོན་ཤིས་བརྗོད་བྱ་བ་ནི། ཚོགས་མགྲོན་དང་མདུན་བསྐྱེད་ཡོད་ན་ཡེ་ཤེས་པ་རྟེན་ལ་བསྟིམ་པའམ་དམ་ཡེ་དབྱེར་མེད་དུ་བསྡུ་བར་བྱ་བ་ནི་སྔགས་བླ་མེད་ཀྱི་ཁྱད་ཆོས་ཐུན་མིན་ཏེ། གང་ལྟར་ཡང་། ཨ་ཨ་ཨ༔ འཁོར་འདས་ཆོས་ཀུན་སོགས་ཀྱིས་བསྟན་ཏེ། དེ་ཡང་རྫོགས་པ་ཆེན་པོ་སེམས་ཉིད་ངལ་གསོ་ལས། རྗེས་ལ་ཞེན་པ་ཡོད་ན་རིམ་གྱིས་བསྡུ། །གང་དུའང་མི་དམིགས་སྤྲོས་དང་བྲལ་བར་བཞག །མེད་ན་སྒྱུ་མ་ཆུ་ཟླའི་ངང་ཉིད་ནས། །དགེ་བ་སེམས་ཅན་དོན་དུ་བསྔོ་བར་བྱ། །ཞེས་གསུངས་པས་གོང་དུ་བསྐྱེད་རིམ་གྱི་དུས་སུ་གྱ་ནོམ་ལྷར་ཞེན་གྱི་རྟོག་པ་མེད་ན། སྐབས་འདིར་ཡང་རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་ནམ་མཁའ་ལ་འཇའ་ཡལ་བ་ལྟར་སྐད་ཅིག་གིས་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོའི་དབྱིངས་སུ་ཐིམ་པར་མོས་ལ་དམིགས་མེད་ཀ་དག་གི་ཀློང་དུ་འཇོག་པ་རིལ་འཛིན་དང་། ཡོད་ན་རྗེས་གཞིག་གིས་བྱ་བར་གསུངས་པས། རིམ་གྱིས་སྣོད་བཅུད་ཐམས་ཅད་འོད་དུ་ཞུ་ནས་གཞལ་ཡས་ཁང་། དེ་འཁོར་རྣམས་ལ། འཁོར་རྣམས་གཙོ་བོ། ཡུམ་ཡབ་ལ། དེ་ཡེ་ཤེས་སེམས་དཔའ། དེ་ཏིང་འཛིན་སེམས་དཔའ་ཧཱུྃ་ཡིག ཧཱུྃ་ནཱ་དར་ཡལ་བའི་ངང་དུ་མཉམ་པར་བཞག་སྟེ། དེ་གཉིས་གང་ལྟར་རུང་། སེམས་སྔར་འདས་པའི་རྗེས་མི་གཅོད། ཕྱིས་མ་འོངས་པའི་སྔོན་མི་བསུ། ད་ལྟའི་ཤེས་པ་ལ་བཟོ་བཅོས་གང་ཡང་མི་བྱེད་པར་རང་བབས་སོ་མར་བཞག་པས་རིག་པ་གསལ་ལ་དེར་འཛིན་མེད་པ་ཞིག་འཆར་བས་དེའི་ངང་ལ་རང་བབས་སུ་བཞག་སྟེ། དེའི་ཚེ་ཕྱི་ཚོགས་དྲུག་གི་ཡུལ་སྣང་ཡང་འཛིན་པ་མེད་པར་རང་གསལ་རྗེན་པར་ལྷག་གེ། ནང་རང་སེམས་ལ་རྟོག་དཔྱོད་ཀྱི་སྤྲོ་སྡུ་མེད་པར་རང་བབས་སུ་རྗེན་ནེ། བར་རང་སར་གནས་ཀྱང་གཉེན་པོས་མ་བཅིངས་པར་བར་མེད་དུ་ཧ་རེ་བ་སྟེ། ཕྱི་གཟུང་བའི་ཡུལ་གྱིས་མ་གོས་ཤིང་། ནང་འཛིན་པའི་སེམས་གྱི་མ་བསླད། བར་སྤང་གཉེན་གྱི་བློ་མ་ཞུགས་པའི་ཆོས་ཉིད་རིག་སྟོང་རྗེན་པར་བསྐྱང་བ་ནི་དུས་གསུམ་གྱི་རྒྱལ་བའི་དགོངས་པ་ཐུགས་རྡོ་རྗེ་རྫོགས་རིམ་གྱི་ལམ་ཁྱེར་མཐར་ཐུག་པ་སྟེ། ཨོ་རྒྱན་དུས་གསུམ་མཁྱེན་པས། གཟུང་བའི་ཡུལ་གྱིས་མ་གོས་ཤིང་། །འཛིན་པས་རྟོག་པས་མ་བསླད་པར། །རིག་སྟོང་རྗེན་པར་བསྐྱང་བ་ནི། །སངས་རྒྱས་ཀུན་གྱི་དགོངས་པའོ། །ཞེས་རྡོ་རྗེའི་ཚིག་གིས་ངོ་སྤྲོད་སྙིང་པོར་གདམས་པ་བཞིན་ནོ། །དེ་ཡང་ཕྱི་ལྟར་ན་ལྷ་ཐམས་ཅད་འོད་དུ་ཞུ་ནས་ཐུགས་ཀའི་ཡེ་ཤེས་སེམས་དཔའ་དང་ཧཱུྃ་ལ་ཐིམ་ནས་སྟོང་པར་བསྒོམ། ནང་ལྟར་ན་ལྷ་སེམས་ཀྱི་ངང་དུ་ཐིམ་པར་བསྒོམ། གསང་བ་ལྟར་ན་སྐྱེ་བ་མེད་པ་སྟོང་གསལ་མ་འགགས་རང་བྱུང་དུ་འདུག་པ་དེ་ལ་རྒྱུན་དུ་གནས་པར་བསྒོམ་མོ། །དེས་རྟག་མཐའ་སེལ། ཆད་མཐའ་བསལ་བ་ནི། དེ་ལས་ལྡང་བ་ན། སླར་ཡང་ཆུ་ལས་ཉ་འཕར་བའི་ཚུལ་གྱིས་སྣང་སྟོང་ཟུང་འཇུག་སྒྱུ་མ་དང་ཆུ་ཟླ་ལྟ་བུའི་ལྷན་སྐྱེས་ཀྱི་སྐུར་ལྡང་སྟེ། ལྷན་སྐྱེས་ཀྱི་དོན་ནི་རང་གི་གཉུག་མའི་སྒོ་གསུམ་རྡོ་རྗེ་གསུམ་གྱི་ངོ་བོར་ཡེ་ནས་ལྷན་སྐྱེས་སུ་གནས་པའི་དོན་བཞིན་ལམ་དུ་ཁྱེར་བ་སྟེ། སྔ་འགྱུར་བསྟན་པའི་ཉི་མ་གཅིག་པུ་རྗེ་རིག་འཛིན་གཏེར་བདག་གླིང་པས། སྣང་གྲགས་རིག་གསུམ་ལྷ་སྔགས་ཆོས་སྐུའི་ངང་། །སྐུ་དང་ཡེ་ཤེས་རོལ་པར་འབྱམས་ཀླས་པའི། །ཟབ་གསང་རྣལ་འབྱོར་ཆེན་པོའི་ཉམས་ལེན་ལ། །དབྱེར་མེད་ཐུགས་ཀྱི་ཐིག་ལེར་རོ་གཅིག་ཤོག །ཅེས་འདའ་ཁ་ཞལ་ཆེམས་སུ་སྩལ་བ་བཞིན། སྣང་གྲགས་རིགས་གསུམ་ལྷ་སྔགས་ཆོས་ཉིད་ཀྱི་རོལ་བར་ཤེས་པའི་ངང་ནས་རྒྱུན་སྤྱོད་དུ་འཇུག་པར་བྱ་སྟེ། དེ་ཡང་ཕྱི་ལྟར་ན། སྣང་བ་སྐུ། གྲགས་པ་གསུང་། དྲན་རྟོག་ཐུགས། བཟའ་བཏུང་བདུད་རྩིར་རོལ་པར་བསྒོམ། ནང་ལྟར་ན་ཕུང་པོ་འབྱུང་བ་རྟོག་ཚོགས་ལྷའི་རང་བཞིན་དུ་བསྒོམ། གསང་བར་ལྟར་ན། ཆོས་ཉིད་སྐྱེ་བ་མེད་པ་ཆོས་སྐུ། མ་འགགས་གསལ་བར་ཤར་བ་ལོངས་སྐུ། སྣ་ཚོགས་རིས་མེད་དུ་ཤར་བར་སྤྲུལ་སྐུར་ལྷང་གིས་རྟོགས་ཏེ། དེའི་ངང་ལ་གནས་པར་བྱའོ་ཞེས་ཨོ་རྒྱན་དུས་གསུམ་མཁྱེན་པས་ཡང་དག་དྲིལ་སྒྲུབ་རྒྱུན་ཁྱེར་ལས་གསུངས་སོ། །འདིས་འདུ་བྱེད་ཀྱི་ཐ་མ་འཇིག་སྟེ་འཆི་བ་དང་དེ་ལས་བར་སྲིད་དུ་ལྡང་བ་སྦྱང་སྟེ། སྣོད་བཅུད་སྲུང་འཁོར་གཞལ་ཡས་ཁང་རྣམས་ལྷ་དམ་ཚིག་སེམས་དཔའ་ལ་བསྡུ་བ་ནི་ས་ཆུ་སོགས་འབྱུང་བ་རགས་པ་ཐིམ་པ། སེམས་དཔའ་སུམ་བརྩེགས་ས་བོན་ལ་བསྡུ་བའི་བར་སྣང་མཆེད་ཐོབ་གསུམ། དེ་ཡང་བསྡུ་བ་ཉེར་ཐོབ་སྟེ་འཆི་བའི་འོད་གསལ་དང་དེ་ལས་ལྡང་བས་བར་དེ་སྦྱང་ཞིང་དག འབྲས་དུས་སུ་གཟུགས་སྐུ་ཆོས་སྐུའི་དབྱིངས་སུ་བསྡུ་ཞིང་སླར་ཡང་སྲིད་པ་ཇི་སྲིད་པར་རྒྱུན་མི་ཆད་པར་འཆར་བའི་རྟེན་འབྲེལ་སྒྲིག རྫོགས་རིམ་གྱི་དུས་སུ་དོན་གྱི་འོད་གསལ་བསྒྲུབས་ནས་ཟུང་འཇུག་གི་ལྷ་སྐུར་ལྡང་བའི་གཞི་འདིང་བར་བྱེད་པར་ཡིན་ནོ། །དེ་ནས་བསྔོ་སྨོན་བྱ་བ་ནི། ཧོཿ དགེ་བ་འདིས་མཚོན་སོགས་ཏེ། དེ་ལྟར་བསྙེན་སྒྲུབ་ཟབ་མོའི་ཚུལ་ལ་རྩེ་ག ཅིག་ཏུ་བརྩོན་པའི་དགེ་བ་འདི་ཉིད་ཀྱིས་མཚོན་ཏེ་དུས་གསུམ་དུ་བསགས་པའི་དགེ་བའི་རྩ་བ་གང་ཇི་སྙེད་གཅིག་མཆིས་པ་དེ་ཐམས་ཅད་གཅིག་ཏུ་བསྡུས་ནས། ཤིན་ཏུ་རྣམ་པར་དག་པའི་ཆོས་ཀྱི་དབྱིངས་རང་བཞིན་གྱིས་འོད་གསལ་བའི་གནས་ལུགས་ཟབ་མོ་འདུས་བྱས་མཚན་མའི་སྤྲོས་པ་མཐའ་དག་དང་བྲལ་བའི་ཀློང་ཆེན་པོར། བསྔོ་བྱ་སྔོ་བྱེད་བསྔོ་བ་གསུམ་ཀ་རང་བཞིན་མེད་པར་ཤེས་པའི་ཤེས་རབ་ཀྱིས་ཟིན་པར་བྱས་ནས་སྔོན་གྱི་རྒྱལ་བ་སྲས་དང་བཅས་པས་ཇི་ལྟར་བསྔོ་བར་མཛད་པ་དེ་བཞིན་དུ་ཡོངས་སུ་བསྔོ་བ་དང་། དེའི་མཐུ་ལ་བརྟེན་ནས་བདག་དང་མཐའ་ཡས་པའི་སེམས་ཅན་ཐམས་ཅད་དཔལ་ཁྲག་འཐུང་ཆེན་པོའི་གོ་འཕང་དཀའ་བ་མེད་པར་མྱུར་དུ་ཐོབ་པར་ཤོག་ཅིག་སྙམ་དུ་སྨོན་པ་སྟེ། དགོས་པའང་བློ་གྲོས་རྒྱ་མཚོས་ཞུས་པའི་མདོ་ལས། ཇི་ལྟར་ཆུ་ཐིགས་རྒྱ་མཚོ་ཆེ་ནང་ལྷུང་། །རྒྱ་མཚོ་མ་སྐམ་བར་དུ་དེ་མི་ཟད། །དེ་བཞིན་བྱང་ཆུབ་ཡོངས་བསྔོའི་དགེ་བ་ཡང་། །བྱང་ཆུབ་མ་ཐོབ་བར་དུ་དེ་མི་ཟད། །ཅེས་སོ། །དེ་ནས་ཤིས་པ་བརྗོད་པ་ནི། ལམ་རིམ་ཡེ་ཤེས་སྙིང་པོ་ལས། ཤིས་བརྗོད་གླུ་དང་མེ་ཏོག་ཆར་འབེབས་པས༔ ཕྱོགས་དུས་གནས་སྐབས་ཀུན་ཏུ་དགེ་ལེགས་སྤེལ༔ ཞེས་གསུངས་པས། མདུན་གྱི་ནམ་མཁར་ཕྱོགས་དུས་ཀྱི་རྒྱལ་བ་སྲས་དང་བཅས་པ་རྣམས་དང་། ཁྱད་པར་དཀྱིལ་འཁོར་གྱི་ལྷ་ཆོས་སྐུ་ཡང་དག ལོངས་སྐུ་བཛྲ་ཀུ་མ་རཱ། སྤྲུལ་སྐུ་གང་ལ་གང་འདུལ་དུ་སྟོན་པའི་རབ་འབྱམས་རྩ་བ་གསུམ་གྱི་ལྷ་ཚོགས་རྣམས་ཀྱིས་གནས་སྐབས་སུ་མི་ཤིས་པའི་མཚན་མའི་མིང་ཡང་མི་གྲགས་ཤིང་བདེ་ལེགས་ཀྱི་དཔལ་ཕུན་ཚོགས་པས་ཕྱོགས་དུས་ཀུན་ཏུ་ཁྱབ་པ་དང་། མཐར་ཐུགས་སྐུ་གསུམ་དབྱེར་མེད་ལྷུན་གྱིས་གྲུབ་པའི་དོན་གཉིས་ཀྱི་དཔལ་ཟད་པ་མེད་པ་ལ་ལོངས་སྤྱོད་པའི་བདེན་ཚིག་ཤིས་པའི་གླུ་དབྱངས་དང་བཅས་ཏེ་མེ་ཏོག་མནྡ་རའི་ཆར་ཆེན་པོ་འབེབས་པར་མོས་ལ། ༀ་ཆོས་སྐུ་ཡང་དག་སོགས་ཇི་ལྟར་རིགས་པའི་ཤིས་པ་བརྗོད་པས་མཐའ་བརྒྱན་ཏེ་དགེ་ལེགས་སུ་བྱའོ། །རྩ་བའི་གསུམ་པ་དེ་ལྟར་གྲུབ་པའི་འབྲས་བུ་བསྟན་པ་ནི། གཞུང་རྩ་བར། དེ་ལྟ་བུ་ཡི་གདམས་པ་ནི༔ རྒྱུད་དང་ལུང་དང་མན་ངག་དོན༔ གྲུབ་པའི་སློབ་དཔོན་ཆེན་པོ་ཡི༔དགོངས་ཉམས་གཅིག་ནས་གཅིག་དྲིལ་བ༔ མ་འོངས་ང་ལ་མོས་པ་ཡི༔ སློབ་དཔོན་དང་ནི་སློབ་མ་དང་༔ དེ་ཡི་རྗེས་འབྲང་དང་བཅས་པར༔ ཤིན་ཏུ་བརྩེ་བའི་བསམ་པ་ཡི༔ སྙན་བརྒྱུད་ངེས་པའི་བརྡ་སྦྱར་ཏེ༔ སྣོད་ལྡན་དང་ནི་སྐལ་ལྡན་ལ༔ བསྣན་དང་ཕྲི་བ་མེད་པ་རུ༔ བྱིན་གྱིས་བརླབས་པའི་གཟི་བྱིན་གྱིས༔ པདྨ་བདག་གི་བཀའ་བརྒྱུད་དང༔ དེ་ལས་གཞན་པའི་སྒྲུབ་བརྒྱུད་སྲོག༔ ནམ་ཡང་ནུབ་པ་མེད་པ་རུ༔ འཕེལ་ཞིང་རྒྱས་པར་འགྱུར་བ་ཡིན༔ ཞེས་རྡོ་རྗེའི་གསུང་གིས་བསྔགས་པའི་ཟབ་ཆོས་མཁའ་འགྲོའི་ཁ་རླངས་མ་ཡལ་ཞིང་དམ་ཉམས་དང་འདྲེས་ཁྱེར་གྱི་བསླད་མ་ཞུགས་པའི་སྙན་རྒྱུད་ཟབ་མོ་འདི་ལྟ་བུ་ལ་ཚུལ་བཞིན་དུ་བསྙེན་སྒྲུབ་ཡན་ལག་བཞི་དང་། བསྐྱེད་རྫོགས་ཟུང་འབྲེལ་གྱིས་གོམས་པར་བྱས་ན། གནས་སྐབས་སུ་ཞི་རྒྱས་ལ་སོགས་པའི་ཕྲིན་ལས་བཞི་དང་། རལ་གྲི་ལ་སོགས་པའི་གྲུབ་པ་བརྒྱད་དེ་ཐུན་མོང་གི་དངོས་གྲུབ་རྣམས་དང་། མཆོག་གི་གྲུབ་པ། གསང་བའི་དགྲ་གསུམ་སོད་དེ། ང་བདག་གི་ཞེན་པ་ལོག་པས་གསང་དགྲ་བསད། དེས་ཕུང་པོའི་ཞེན་པ་བཅོམ་སྟེ་ནང་དགྲ་བསད། དེ་ཙ་ན་རྩོལ་བ་མེད་པའི་ཕྲིན་ལས་དྲག་པོས་ཕྱི་དགྲ་གསོད་པའོ། །དེ་ལྟར་དགྲ་གསུམ་སོད་པས་བདུད་བཞི་ཡང་ཆོམ་སྟེ། ཕུང་ལྔ་ལྷར་དག་པས་ཕུང་པོའི་བདུད་བཅོམ། རང་རིག་པའི་རྩལ་གྱིས་ཉོན་མོངས་པ་ཡེ་ཤེས་ལྔར་དག་པས་ཉོན་མོངས་པའི་བདུད་བཅོམ། དེ་ལ་འདོད་ལྷའི་བར་ཆོད་ཀྱིས་མི་ཚུགས་པས་ལྷའི་བུའི་བདུད་བཅོམ། དེའི་ཚེ་སེམས་ཉིད་སྐྱེ་ཤི་ལས་གྲོལ་བས་འཆི་བདག་གི་བདུད་བཅོམ། དུས་དེར་འགྲོ་དྲུག་གི་སྡུག་བསྔལ་ཡང་རང་སེམས་ཀྱི་ཆོ་འཕྲུལ་དུ་རྟོགས་པས་འགྲོ་དྲུག་གི་གཡང་ས་ཆོད་ཅིང་རིག་རྩལ་འབྱོངས་པས་མཚན་མ་ཐམས་ཅད་ཟིལ་གྱིས་ནོན་ཏེ་རྣམ་པར་མི་རྟོག་པའི་ཡེ་ཤེས་འཆར་ཞིང་། མཐར་ཐུག་གི་འབྲས་བུ་ཆོས་ཐམས་ཅད་ཀྱི་རང་བཞིན་ཡེ་ནས་ཡང་དག་པའི་དབྱིངས་ཉིད། གློ་བུར་གྱི་སྒྲིབ་པའི་སྦུབས་ལས་གྲོལ་ནས། དབྱིངས་དང་ཡེ་ཤེས་གཉིས་མེད་སངས་རྒྱས་ཐམས་ཅད་ཀྱི་ཉམས་སུ་མྱོང་བྱའི་བདེ་བ་ཆེན་པོ་མཆོག་ཏུ་མི་འགྱུར་སྐུ་གསུམ་གྱི་ངོ་བོར་རྫོགས་པ་དེ་ལས། དམིགས་པ་མེད་པའི་རྩལ་སྣང་ཡེ་ཤེས་ཀྱི་སྒྱུ་མ་རྣམ་པ་ཐམས་ཅད་པར་འཆར་བའི་གཞི་འབྲས་གཉིས་སུ་མེད་པའི་དེ་ཁོ་ན་ཉིད་ཟག་མེད་འབྲས་ཆོས་ཉེར་ལྔའི་བདག་ཉིད་དཔལ་ཆེན་པོའི་གོ་འཕང་རབ་ཚེ་འདི་ཉིད། འབྲིང་བར་དོ། ཐ་མ་སྐྱེ་བ་བརྒྱུད་ནས་ཐོབ་པར་འགྱུར་ཏེ། རྒྱུད་ལས། ཡང་དག་གྲུབ་པ་གཅིག་པུ་ཉིད། །སངས་རྒྱས་བདེ་ཆེན་ཀུན་འདུས་པ། །རྣལ་འབྱོར་ཟབ་མོ་སྐུ་གསུམ་རྫོགས། །མཁའ་འགྲོ་སྒྱུ་མ་བདེ་མཆོག་བདེ། །ཞེས་དང་། ཡང་དག་གསང་བའི་ཐུགས་མཆོག་ལ། །སྒྲུབ་པའི་རྣལ་འབྱོར་དབང་ཕྱུག་རྣམས། །མི་ཚེ་གཅིག་ལ་མངོན་འཚང་རྒྱ། །ལུས་མ་བོར་བར་ལྷ་སྐུར་འགྱུར། །ཞེས་གསུངས། འབྲས་ཆོས་ཉེར་ལྔར་ནི། ཞི་བ་ལྷ་རྒྱུད་ཆེན་པོར། ཆོས་སྐུ་དྲི་མ་མེད་པ་དང་། །ལོངས་སྐུ་འཁོར་ལོས་སྒྱུར་རྒྱལ་འདྲ། །སྤྲུལ་པས་རོལ་པ་མཐར་ཕྱིན་ཅིང་། །སྐྱེ་འཇིག་བྲལ་བ་རྡོ་རྗེའི་སྐུ། །ཡུལ་མེད་རབ་གསལ་མངོན་བྱང་ཉིད། །སྐུ་ལྔ་ལྷུན་གྱིས་གྲུབ་པའོ། །ཆོས་སྐུ་སྐྱེ་མེད་དོན་གྱི་གསུང་། །ལོངས་སྤྱོད་དགོངས་པ་བརྡ་ཡིས་སྟོན། །སྤྲུལ་པ་ཚངས་པའི་གསུང་དབྱངས་སྙན། །མངོན་བྱང་རིག་པ་བྱིན་གྱིས་རློབས། །འཇིགས་མེད་དབྱེར་མེད་རྡོ་རྗེའི་གསུང་། །གསུང་ལྔ་ཉིད་དུ་ལྷུན་གྱིས་གྲུབ། །སོ་སོར་སྣང་བ་གདུལ་བྱའི་བློ། །ཐ་དད་བྱ་བ་ག་ལ་ཡོད། །བདེ་བ་ཆེན་པོའི་ཐུགས་དང་ནི། །རྣམ་པར་མི་རྟོག་ཐུགས་ཉིད་དང་། །འགྲོ་བ་ཐམས་ཅད་སྒྲོལ་བ་དང་། །མཉམ་པ་ཆེན་པོ་མཆོག་གནས་དང་། །དབྱེར་མེད་རྡོ་རྗེའི་ཐུགས་ལྔར་ཤར། །ཐ་དད་འདོད་ན་ཐ་དད་སྣང་། །དབྱེར་མེད་འདོད་ན་དབྱེར་མེད་སྣང་། །ཞིང་ཁམས་དང་ནི་གཞལ་ཡས་ཁང་། །འོད་ཟེར་དང་ནི་གདན་ཁྲི་རྒྱན། །ལོངས་སྤྱོད་ལྔ་ནི་ཡོན་ཏན་ཏེ། །བདེ་བར་གཤེགས་པ་རྩོལ་མེད་སྣང་། །ཞི་རྒྱས་དབང་དང་མངོན་སྤྱོད་དང་། །ལྷུན་གྱིས་གྲུབ་པའི་ཕྲིན་ལས་ཡིན། །ཞེས་གསུངས། དེ་དག་བསྡུ་ན་རྟེན་སྐུ། བརྟེན་པ་ཡེ་ཤེས། མཛད་པ་ཕྲིན་ལས་ཏེ་གསུམ་དུ་འདུ་ལ། རྒྱས་པར་ཕྱེ་ན་ཆོས་ཀྱི་དབྱིངས་ཀུན་ནས་འགེང་བའི་ཤེས་བྱའི་རྣམ་པ་ཐམས་ཅད་དང་མཚུངས་པར་ཡོན་ཏན་གྱི་ཁྱད་པར་ཚད་དཔག་ཏུ་མེད་པའི་སྒོ་ནས་མཐའ་ཡས་པའི་སེམས་ཅན་ཐམས་ཅད་ལ་གནས་སྐབས་དང་མཐར་ཐུག་གི་ཕན་བདེའི་མཛད་པ་ནམ་མཁའ་ཇི་སྲིད་དུ་རྟག་ཁྱབ་ལྟུན་གྱིས་གྲུབ་པར་འཇུག་པ་སྟེ། མདོར་ན་རིགས་ཁམས་ལ་ཡོད་པའི་ཟག་མེད་ཀྱི་ཡོན་ཏན་མཐའ་དག་མངོན་གྱུར་དུ་སྣང་བ་ཡིན་ནོ། །སླར་སྨྲས་པ། དགེ་ལེགས་བྱེ་བའི་དཔལ་གྱིས་མངོན་མཐོ་གྲུབ་པ་ཡོངས་ཀྱིས་ཕྱག་བྱས་ཤིང་། །བདུད་དང་མུ་སྟེགས་ཕས་ཀྱི་རྒོལ་ཀུན་སྙིང་ཁྲག་ཐང་ལ་གཟག་བྱེད་པའི། །ཡེ་ཤེས་སྐུ་ཅན་དྲན་པས་གདུང་སེལ་ཕན་བདེའི་དངོས་ཀུན་འཇོ་བའི་གཏེར། །ལྷག་པའི་ལྷ་མཆོག་ཁྱོད་དང་མི་འབྲལ་བྱང་ཆུབ་བར་དུ་མགོན་མཛོད་ཅིག །འཁོར་འདས་ཆོས་ཀུན་གདོད་ནས་རྣམ་དག་མཉམ་ཉིད་བྱང་ཆུབ་སེམས་ཀྱི་ཀློང་། །བདེན་གཉིས་དབྱེར་མེད་གྲུབ་བསལ་འཕོ་འགྱུར་མཚན་མའི་གཟེབ་བྲལ་རྡོ་རྗེའི་སེམས། །བརྟན་གཡོ་དངོས་པོ་ཀུན་གྱི་སྲོག་གྱུར་རང་བཞིན་འདུས་མ་བྱས་པའི་བདག །དམིགས་མེད་སྙིང་རྗེས་འགྲོ་ལ་རྗེས་ཆགས་ཧེ་རུ་ཀ་དེ་ཅིས་མི་བསྟེན། །རྒྱུད་ལུང་མན་ངག་ཤིན་ཏུ་རྒྱ་ཆེ་ཟབ་མོ་ཕལ་གྱིས་བརྒལ་དཀའི་མཚོ། །གྲུབ་པའི་རིག་འཛིན་དེད་དཔོན་རྐྱལ་གྱིས་ལེགས་པར་བ གྲོད་ལས་རྙེད་པའི་ནོར། །ས་གསུམ་སྐྱེ་དགུའི་དབུལ་བ་འཕྲོག་བྱེད་སྙན་བརྒྱུད་འཇོག་པོའི་གཙུག་གི་རྒྱན། །དད་བསོད་རྒྱལ་མཚན་རྩེ་མོར་ཐོབ་ཚེ་བློ་དང་ལྡན་རྣམས་ཅིས་མི་མཆོད། །བཀའ་བབས་རིན་ཆེན་བདུན་གྱིས་མདུན་བརྡར་ཡོངས་རྫོགས་ཐུབ་བསྟན་གླིང་བཞིའི་མཁར། །བསྐྱེད་ལ་བསྙིང་བྲལ་ཐེག་མཆོག་སྙིང་པོའི་རྒྱལ་ཐབས་ལ་རོལ་མཁྱེན་བརྩེའི་གཏེར། །གང་གི་གསང་བའི་མཛོད་འཛིན་གསང་བདག་དངོས་སྣང་རྒྱལ་བས་ལུང་བསྟན་ཞབས། །མགོན་དེའི་བཀའ་དྲིན་གཟུགས་སུ་གྲུབ་ན་ནམ་མཁའ་འདི་ཡང་སྣོད་དུ་ཆུང་། །དེ་སླད་མགོན་པོ་ཟུང་གི་ཐུགས་ཀྱི་དགོངས་པ་ཡོངས་སུ་རྫོགས་ཕྱིར་དང་། །མཚུངས་བྲལ་སྤྲུལ་པའི་ཟློས་གར་མཆོག་གི་ཐུགས་ཀྱི་དགྱེས་པ་སྐོང་ཕྱིར་དུ། །ཚུལ་འདིར་བརྩོན་པར་བྱས་ཀྱི་གཞན་དུ་སྔོན་བྱོན་འཕགས་དང་མཁས་པའི་གཞུང་། །ཕལ་ཆེར་དེང་དུས་རྩྭ་བཞིན་འདོར་ན་བདག་ལྟའི་བརྗོད་པས་སུ་ལ་ཅི། །ཚུལ་འདིར་ལེགས་པར་བཤད་གང་སྔོན་བྱོན་དམ་པའི་ཞལ་ལུང་བཅུད་ཡིན་གྱི། །རང་གི་མཐུས་མིན་མ་རྟོགས་ལོག་རྟོགས་ཉེས་བཤད་དྲི་མའི་ཆ་གང་མཆིས། །བདག་གི་ནོངས་པ་ལགས་པས་འཕགས་དང་མཁས་པའི་སྤྱན་སྔར་མི་འཆབ་མཐོལ། །འཕྲལ་ཡུན་སྒྲིབ་པར་མི་འགྱུར་དག་ཚངས་མཆོག་གི་དངོས་གྲུབ་སྩལ་བར་མཛོད། །དེ་ལས་བྱུང་བའི་རབ་དགེ་དྲི་མེད་སྟོན་ཀའི་ཟླ་ལྟར་ཆེས་དཀར་བ། །གང་ཞིག་ཐོབ་པ་དེ་ཡང་འཁོར་ལོའི་མགོན་གྱི་ཐུགས་དགོངས་རྫོགས་ཕྱིར་དང་། །མཆོག་གི་ཟློས་གར་ཆེ་རྣམས་ཞབས་བརྟན་བཤད་སྒྲུབ་ཕྲིན་ལས་ཕྱོགས་མཐར་རྒྱས། །མ་ལུས་འགྲོ་རྣམས་སྒྲིབ་གསུམ་ལས་གྲོལ་རྣམ་མཁྱེན་གོ་འཕང་ཐོབ་ཕྱིར་བསྔོ། །གྲོགས་དག་སྲིད་པའི་ཕུན་ཚོགས་ཐམས་ཅད་མི་བརྟན་སྟོན་ཀའི་སྤྲིན་བཞིན་གཡོ། །འཚོ་བ་ཆུ་ཡི་ཆུ་བུར་འདྲ་སྟེ་འདི་ལ་ཡིད་བརྟན་རུང་བ་ཅི། །གཏན་དུ་ཕན་པ་དམ་པའི་ཆོས་ལས་སྐྱབས་དང་གཉེན་གྱུར་གཞན་མ་མཆིས། །དེ་ཕྱིར་སྙིང་ནས་བརྩོན་པས་སྒྲུབས་ལ་ཐར་མཆོག་ཞི་བའི་གླིང་བགྲོད་འཚལ། །རྒྱལ་བསྟན་ཉིན་བྱེད་ནུབ་རིའི་རྩེར་གཞོལ་ལྷ་མིན་འབྱུང་བྱའི་གད་མོ་སྒྲོགས། །མི་རྣམས་ཕལ་ཆེར་ཆོས་མིན་ལ་གཞོལ་ཆོས་ལྟར་སྤྱོད་རྣམས་ཐབས་ཀྱིས་སྨོད། །འདི་འདྲའི་དུས་སུ་བདེ་བའི་སྐབས་ཅི་གཅིག་པུར་ནགས་ཀྱི་ནང་འདུག་སྟེ། །རྩེ་གཅིག་སྒྲུབ་ལ་གཞོལ་རྣམས་སྐལ་བཟང་འདུན་མ་ལེགས་པའི་རྩེ་མོ་ལགས། །བདག་ཀྱང་སྐྱེ་ཀུན་རྣམ་གཡེང་འདུ་འཛིའི་དགྲ་ཡི་དབང་དུ་འགྱུར་མིན་པར། །ནགས་མཐོང་རི་དྭགས་རྒྱུ་བའི་སྨན་ལྗོངས་དམ་པ་རྣམས་ཀྱིས་སྨོན་གནས་དེར། །རང་དབང་དམ་པའི་ཆོས་སྤྱོད་ངེས་དོན་སྙིང་པོའི་ཆོས་མཛོད་ཀུན་འཛིན་ཅིང་། །མཁའ་ཁྱབ་ཞིང་དུ་སྲས་བཅས་རྒྱལ་བའི་ཕྲིན་ལས་སྒྲུབ་པའི་བྲན་གྱུར་ཅིག །བཀྲ་ཤིས་གང་ཞིག་གཞི་རྒྱུད་གདོད་ནས་དག་པའི་ཆོས་ཉིད་བཻཌཱུཪྱ། །བཀྲ་ཤིས་གང་ཞིག་ལམ་རྐྱེན་སྨིན་གྲོལ་ཐབས་མཁས་ཁྲུས་རས་ཀྱིས་སྦྱོང་བས། །བཀྲ་ཤིས་གང་ཞིག་འབྲས་རྒྱུད་སྐུ་དང་ཡེ་ཤེས་སྣང་བ་འབྱམས་ཀླས་པའི། །བཀྲ་ཤིས་གང་ཞིག་མི་འགྱུར་རྟག་པ་དམ་པའི་དཔལ་གྱིས་མཛེས་གྱུར་ཅིག །ཅེས་སྙན་བརྒྱུད་ཡང་ཕུར་སྦྲགས་མའི་ཟབ་ཏིག་གི་སྒྲུབ་ཐབས་རྣམ་པར་བཤད་པ་སྙིང་པོར་དྲིལ་བ་འདི་ནི། ཀུན་མཁྱེན་བླ་མ་རྡོ་རྗེ་གཟི་བརྗིད་རྩལ་གྱི་ཕྲིན་ལས་གྱི་རྣམ་པར་འཕྲུལ་བ་རིས་མེད་བསྟན་འགྲོ་ཡོངས་ཀྱི་དཔུང་གཉེན་འཇམ་དབྱངས་དགའ་བའི་གོ་ཆའམ་འཇམ་དབྱངས་ཆོས་ཀྱི་བློ་གྲོས་རིས་མེད་བསྟན་པའི་རྒྱལ་མཚན་ཞེས་སྙན་པའི་བ་དན་སྲིད་ན་གསལ་བ་གང་གིས་ལྷ་རྫས་གསེར་གྱི་མེ་ཏོག་དང་བཅས་བཀའ་སྩལ་སྤྱི་བོར་ཕེབས་པ་དང་། རང་གམ་ན་གནས་པའི་མཆོག་སྤྲུལ་རིན་པོ་ཆེ་རྒྱལ་སྲས་པདྨ་དྲི་མེད་ལེགས་པའི་བློ་གྲོས་དང་། གཅུང་ཐུབ་བསྟན་དགེ་ལེགས་རྒྱ་མཚོ་གཉིས་ནས་ཀྱང་མྱུར་དུ་གྲུབ་ན་ལེགས་པའི་བསྐུལ་མ་གནང་བ་ལ་བརྟེན། འཇམ་མགོན་རྡོ་རྗེ་འཆང་རྣམ་གཉིས་ཀྱིས་ཚད་མེད་པའི་བཀའ་དྲིན་ཆེན་པོས་རྗེས་སུ་བསྐྱངས་ཤིང་། ཁྱད་པར་རྡོ་རྗེ་འཆང་བློ་གྲོས་མཐའ་ཡས་ཀྱིས་ལམ་འདི་ཉིད་ཀྱི་སྨིན་གྲོལ་ཟབ་མོས་རྗེས་སུ་བཟུང་ཞིང་། སྔར་བགྲང་བྱ་དྲུག་པའི་གུང་དུ་སོན་པ་ན་སྒྲུབ་ཆེན་བཀའ་བརྒྱད་ཀྱི་དཀྱིལ་འཁོར་ཆེན་པོར་གཏུག་པའི་ཚེ་མེ་ཏོག་ཤར་ཐུགས་རིགས་ལ་བབས་པའི་ཚེ་གསང་བའི་མིང་རྡོ་རྗེ་དབང་མཆོག་དགྱེས་པ་རྩལ་དུ་གནང་ནས་དབུགས་དབྱུང་ཐོབ་པའི་ཀུ་སཱ་ལི་མིང་གཞན་རྒྱལ་སྲས་འཇམ་དབྱངས་བློ་གྲོས་རྒྱ་མཚོའི་སྒྲ་དབྱངས་སུ་འབོད་པའི་སྙོམ་ལས་པ་རྒན་པོས། རང་ལོ་ལྔ་བཅུ་པ་དྲག་པོ་ལྕགས་སྤྲེལ་གྱི་ལོ་མཇུག་ཏུ། རང་གནས་དཔལ་ཟེ་ཆེན་བསྟན་གཉིས་དར་རྒྱས་གླིང་གི་དབེན་སྤྱིིལ་བཀྲ་ཤིས་འཆི་མེད་འོད་སྣང་དུ་ལམ་འདིའི་བསྙེན་སྒྲུབ་ལ་གནས་པའི་ཐུན་གསེང་རྣམས་སུ་བྲིས་ནས་གྲུབ་པར་བགྱིས་བ་སྟེ་འདི་ལ་གསང་བ་བསྒྲགས་པ་སོགས་ཀྱི་ནོངས་པ་གང་མཆིས་བླ་མ་དཀྱིལ་འཁོར་གྱི་དབང་ཕྱུག་འཁའ་འགྲོའི་ཚོགས་དང་བཅས་པའི་སྤྱན་སྔར་བཤགས་ཤིང་དགེ་བས་བདག་དང་འགྲོ་ཀུན་ཤྲཱི་ཧེ་རུ་ཀའི་གོ་འཕང་དཀའ་བ་མེད་པར་མངོན་དུ་བྱེད་པར་གྱུར་ཅིག བླ་མ་མཆོག་དང་དཔལ་ཆེན་ཧེ་རུ་ཀ༔ གྲུབ་པའི་རིག་འཛིན་མཁའ་འགྲོའི་ཚོགས་བཅས་ཀྱིས། །འདི་འཛིན་རྣམས་ཀྱི་སྒོ་གསུམ་བྱིན་རློབས་ལ། །རང་གཞན་དོན་གཉིས་བསམ་ཀུན་འགྲུབ་པར་མཛོད། །ཅེས་ཀྱང་སྨྲས་སོ།། །།
གྲོ་ལོད་གསང་སྒྲུབ་གདུག་པ་ཀུན་འདུལ་གྱི་དམིགས་རིམ་ཟིན་བྲིས་གྲུབ་པ་མཆོག་གི་ཞལ་ལུང་།
༄༅། །གྲོ་ལོད་གསང་སྒྲུབ་གདུག་པ་ཀུན་འདུལ་གྱི་དམིགས་རིམ་ཟིན་བྲིས་གྲུབ་པ་མཆོག་གི་ཞལ་ལུང་ཞེས་བྱ་བ་བཞུགས་སོ། །ན་མོ་གུ་རུ་བཛྲ་ངྷཱ་ར་ཡ། རྒྱལ་བ་ཀུན་གྱི་ཡེ་ཤེས་སྐུ། །གང་འདུལ་སྒྱུ་འཕྲུལ་དྲྭ་བའི་གར། །སྟོན་མཛད་རྡོ་རྗེ་གྲོ་ལོད་དང་། །དབྱེར་མེད་བླ་མ་མཆོག་གིས་སྐྱོངས། །ཟབ་དང་རྒྱ་ཆེའི་གདམས་པའི་སྲོལ། །ཇི་བཞིན་འགྲོ་ལ་དབང་མིན་ཡང་། །རང་སྐལ་མཉམ་ལ་སྨན་འདོད་བློས། །ཕྱོགས་ཙམ་འབྲི་ལ་གནང་བ་སྩོལ། །དེ་ཡང་གཏེར་གཞུང་རྩ་བར། རྣལ་འབྱོར་སྒྲུབ་པའི་སྲོག་གི་གོ༔ བར་ཆད་ལོག་འདྲེན་སྐྱོབ་པའི་རྫོང༔ སྙིགས་དུས་དམ་འགོང་གདུག་པ་ཅན༔ འདུལ་བའི་གཉེན་པོ་ཟླ་མེད་པ༔ དྲག་པོ་འཆོལ་བའི་གསང་སྒྲུབ་བསྟན༔ ཏིང་འཛིན་འདིས་ཟབ་འཇིག་རྟེན་དུ༔ མ་བྱུང་འབྱུང་བར་མི་འགྱུར་རོ༔ ཞེས་དང་། བདག་ཉིད་རྡོ་རྗེ་གྲོ་ལོད་ཀྱིས༔ རང་གི་སྒྲུབ་ཐབས་གྲངས་མེད་བརྩམས༔ཀུན་གྱི་ཡང་ཟབ་སྙིང་ཁྲག་ཐིགས༔ བརྩེ་བས་བཻ་རོ་ཉིད་ལ་གདམས༔ གསང་འཛིན་མཁའ་འགྲོས་གཏེར་དུ་སྦོས༔ མ་འོངས་དྲག་སྤྱོད་རྩུབ་འགྱུར་དུས༔ ལྷ་མིན་ཀླ་ཀློ་འཇུག་པའི་ལྟས༔ ནག་ཕྱོགས་བདུད་རིགས་ཤུགས་བརྡོལ་ཚེ༔ འཕྲད་ཆོག་གཉེན་པོ་བླ་ན་མེད༔ རྡོ་རྗེ་ཕ་ལམ་གོ་དང་མཚུངས༔ ལོ་ཙཱ་ཆེན་པོའི་སྨོན་ལམ་མཐུས༔ སྤྲུལ་པ་ཞིག་གིས་སྣང་བར་བྱེད༔ རང་གཞན་མང་པོའི་དོན་དུ་འགྱུར༔ ས་མ་ཡ༔ ཞེས་བསླུ་མེད་རྡོ་རྗེའི་ལུང་གིས་བསྟན་པ་ལྟར། ཕྱིས་དུས་ལ་བབས་པའི་ཚེ། བོད་ཁམས་བཀྲ་ཤིས་འབྱུང་བའི་གནས་མཆོག་རོང་མེ་དཀར་མོ་སྟག་ཚང་ནས། སྤྲུལ་པའི་ལོ་ཆེན་བཻ་རོ་ཙ་ནའི་རྣམ་པར་འཕྲུལ་བ་མཚན་བརྗོད་པར་དཀའ་ཡང་དོན་གྱི་སླད་དུ་མཚན་ནས་སྨོས་ན། ཨོ་རྒྱན་འཆི་མེད་བསྟན་གཉིས་གཡུང་དྲུང་གླིང་པས་གསང་བའི་གཏེར་དུ་སྤྱན་འདྲེན་པར་མཛད་པའི་ཆོས་སྡེ་ཟབ་གཉན་ཁྱད་པར་དུ་འཕགས་པའི་རྣལ་འབྱོར་ཟབ་མོ་ཉམས་སུ་ལེན་པར་འདོད་པས། ལམ་འདིའི་སྨིན་བྱེད་ཀྱིས་རྒྱུད་སྨིན་པར་བྱས་ཏེ་དམ་ཚིག་ལ་གནས་པ་གཞིར་བཞག་ནས། དབེན་པའི་གནས་སུ་བསམ་གཏན་གྱི་སྤྱོད་ལམ་དང་མཐུན་པར་སྟན་བདེ་བར་འཁོད་ལ། ཐོག་མར་ཁ་ནང་དུ་ཕྱོགས་ཏེ་འདི་ལྟར། བདག་ད་རེ་དལ་འབྱོར་གྱི་མི་ལུས་རིན་པོ་ཆེ་ཐོབ། ཡང་དག་པའི་དགེ་བའི་བཤེས་གཉེན་དང་མཇལ། རྒྱལ་བསྟན་སྤྱི་དང་ཁྱད་པར་གསང་ཆེན་རྡོ་རྗེ་ཐེག་པའི་ལམ་ཟབ་མོ་འདི་ལྟ་བུ་དང་མཇལ་ཞིང་ལམ་ཉམས་སུ་ལེན་དུ་ཡོད་པ་འདི་ནི་སྔོན་བསྐལ་པར་གོམས་པའི་ལེགས་བྱས་ཀྱི་འབྲས་བུ་ཡིན་པས་ཕྱིས་ཡང་ཡང་རྙེད་པར་དཀའ། ད་རེས་ལན་གཅིག་ཐོབ་པ་དོན་མེད་དུ་མ་སོང་བར་སྙིང་པོ་ལེན་པའི་ཕྱིར་དམ་པའི་ཆོས་གཤའ་མ་ཞིག་ཅིས་ཀྱང་བྱ། དེ་ཡང་མྱུར་དུ་བརྩོན་པས་མ་འབད་ན་སྣོད་བཅུད་གང་ལ་བསམས་ཀྱང་རྟག་ཐུབ་པ་ནི་གཅིག་ཀྱང་མི་འདུག ཁྱད་པར་སྐྱེས་བུའི་ཚེ་སྲོག་ནི་རླུང་གསེབ་ཀྱི་མར་མེ་དང་འདྲ་སྟེ་ནམ་འཆི་དང་འདིས་འཆིའི་ངེས་པ་མེད། ཐ་ན་དོ་ནུབ་ཙམ་དུའང་མི་འཆི་བའི་ངེས་བཟུང་བྱར་མེད་པ་ལ་སྔར་ཕན་མ་དྲན་པས་རེ་བསླུས། འཆི་བ་དེ་ཐོག་བབས་སུ་བྱུང་བའི་ཚེ་མཛའ་བཤེས་གཉེན་འདུན་ནོར་རྫས་སོགས་གང་གིས་ཀྱང་མི་ཕན་པར་རང་ཉིད་གཅིག་པུ་མར་གྱི་དཀྱིལ་ནས་སྤུ་བཏོན་པ་བཞིན་དུ་ཆ་མེད་ཀྱི་ཡུལ་དུ་རྒྱུས་མེད་དུ་འཁྱམས་དགོས་པར་འདུག དེ་དུས་ཕན་པ་དམ་པའི་ཆོས་ཉག་གཅིག་ཀྱང་རང་གིས་མ་བསྒྲུབས་ན་གཞན་ནས་ཁྱེར་རྒྱུ་ནི་མེད། སྡིག་པས་གནོད་ཀྱང་བྱས་ཟིན་སྐྱུར་དབང་ནི་མེད། ལས་ཀྱི་དབང་གིས་འགྲོ་བ་རིགས་དྲུག་གི་སྐྱེ་གནས་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས། དེས་ན་ད་རེས་ནམ་བཞག་གཏན་གྱི་འདུན་མ་རྫོགས་པའི་སངས་རྒྱས་ཀྱི་གོ་འཕང་རིན་པོ་ཆེན་དེ་རང་གཞན་སེམས་ཅན་ཐམས་ཅད་ཀྱི་དོན་དུ་ཐོབ་པར་བྱ། དེའི་ཆེད་དུ་རྣལ་འབྱོར་ཟབ་མོ་ལ་བརྩོན་པར་བྱའོ་སྙམ་དུ་བཅོས་མིན་གྱི་ངེས་འབྱུང་དྲག་པོ་རྒྱུད་ལ་བསྐྱེད་ནས་ཇི་ལྟར་ཉམས་སུ་ལེན་པའི་རིམ་པ་དངོས་ལ། གཞུང་རྩ་བར། དེ་ལ་སྔོན་འགྲོ་དངོས་གཞི་རྗེས༔ ཞེས་གསུངས་པ་ལྟར། སྔོན་དངོས་རྗེས་གསུམ་ལས། དང་པོ་ལ། ཐོག་མར་མི་ཕྱེད་དད་པ་ཡིས༔ སྐྱབས་སུ་འགྲོ་ཞིང་སེམས་མཆོག་བསྐྱེད༔ ཅེས་པས། སྐྱབས་སུ་འགྲོ་བ། སེམས་བསྐྱེད་པ། ཞར་བྱུང་ཚོགས་བསགས་པས་རྒྱུད་སྦྱང་བ་དང་གསུམ་ལས། དང་པོ་ནི། གང་ལ་སྐྱབས་སུ་འགྲོ་བའི་ཡུལ། ས་ཕྱོགས་འདི་ཉིད་འོག་མིན་གསང་ཆེན་རོལ་པའི་གཞལ་ཡས་ཁང་ཆེན་པོར་གྱུར་པའི་མདུན་གྱི་ནམ་མཁའི་གནས་སུ་སྣ་ཚོགས་པདྨ་དང་ཉི་མའི་སྟེང་དུ་རང་གི་རྩ་བའི་བླ་མ་ཉིད་རྣམ་པ་གུ་རུ་རྡོ་རྗེ་གྲོ་བོ་ལོད་དུ་གསལ་བའི་སྟེང་གི་ཆར་རྩ་བརྒྱུད་བླ་མ་རྣམས་དང་། མཐའ་བསྐོར་དུ་ཡི་དམ་སངས་རྒྱས་དམ་ཆོས་དགེ་འདུན་མཁའ་འགྲོ་ཆོས་སྐྱོང་རྣམས་སྤྲིན་ཕུང་གཏིབས་པ་བཞིན་མངོན་སུམ་དུ་བཞུགས་པར་མོས་པའི་སྤྱན་སྔར། གང་སྐྱབས་སུ་འགྲོ་བ་པོ་རང་གཞན་སེམས་ཅན་ཐམས་ཅད་ས་ཆེན་པོའི་དྲེག་པ་ལྟར་འཁོར་བའི་བྱང་རང་ཉིད་ཀྱིས་དྲངས་ཏེ། ཚུལ་ཇི་ལྟར་འགྲོ་ན། སྐྱིད་སྡུག་ལེགས་ཉེས་ཅི་བྱུང་ཡང་རེ་ལྟོས་ཁྱེད་རྣམས་ལས་མེད་པས། དུས་འདི་ནས་བྱང་ཆུབ་མ་ཐོབ་ཀྱི་བར་དུ་ཅི་མཛད་ཁྱེད་ཤེས་ཀྱི་བློས་སྐྱབས་སུ་འགྲོ་བར་མོས་ལ། ན་མོ༔ ཕྱོགས་དུས་རྒྱལ་བ་སོགས་ཀྱི་ཚིག་ཅི་ནུས་བརྗོད་ཅིང་མཐར་སྐྱབས་ཡུལ་རྣམས་ཀྱི་སྐུ་ལས་འོད་ཟེར་འཕྲོས། བདག་གཞན་སེམས་ཅན་ལ་ཕོག་པས་ལས་ཉོན་སྡིག་སྒྲིབ་ཐམས་ཅད་སྦྱངས། སེམས་ཅན་ཐམས་ཅད་བྱེའུ་ཁྱུ་འུར་རྡོས་དེད་པ་ལྟར་དག་པའི་ཞིང་དུ་སོང་། སྐྱབས་ཡུལ་རྣམས་འོད་དུ་ཞུ་ནས་རང་ལ་ཐིམ། སྐྱབས་སུ་འགྲོ་བྱ་འགྲོ་བྱེད་མི་དམིགས་པའི་ངང་ལ་དལ་ཅིག་བཞག་རྗེས་དགེ་བ་བསྔོ་བར་བྱའོ། །གཉིས་པ་ནི། འདི་ལྟར་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་དོན་དམ་པར་ཡེ་ནས་སངས་རྒྱས་པའི་རང་བཞིན་མཉམ་པ་ཉིད་ཡིན་ནའང་དེ་ལྟར་མ་རྟོགས་པའི་དབང་གིས་གཟུང་འཛིན་གྱི་འཁྲུལ་པ་ལུ་གུ་བརྒྱུད་དུ་འཕྱན་པས་ཕྱིན་ཅི་ལོག་ཏུ་ཞེན་པའི་གནོད་བྱེད་བདུད་བགེགས་ལོག་པར་འདྲེན་པ་འདི་རྣམས་ཀྱི་གཙོས་མཁའ་ཁྱབ་ཀྱི་སེམས་ཅན་མུ་མེད་པ་འདི་རྣམས་ཀྱི་སྔོན་ཆད་བདག་གི་ཕ་མ་ལན་གྲངས་དཔག་ཏུ་མེད་པར་བྱས་ཤིང་། ཕན་ཚད་མེད་པ་བཏགས། གནོད་པ་དུ་མ་ལས་བསྐྱབས་པའི་དྲིན་ཅན་ཤ་སྟག་ཡིན། འདི་རྣམས་འདོད་པ་བདེ་བ་འདོད་ཀྱང་སྒྲུབ་པ་སྡུག་བསྔལ་གྱི་རྒྱུ་ཁོ་ན་སྒྲུབ་པས་ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་པ་འདི་རྣམས་སྙིང་རེ་རྗེ། འོ་ན་སྙིང་རྗེ་བའི་སར་བཞག་པས་ཅི་ཕན། བདག་གིས་ལམ་ཟབ་མོ་འདི་ལ་བརྟེན་ནས་སངས་རྒྱས་ཀྱི་གོ་འཕང་ཐོབ་པར་བྱས་ཏེ་ཕ་མ་སེམས་ཅན་འདི་རྣམས་རྣམ་གྲོལ་གཏན་གྱི་བདེ་བ་ལ་འགོད་པར་བྱ། དེ་ལྟར་ནུས་པར་བྱིན་གྱིས་བརླབ་ཏུ་གསོལ་སྙམ་པས་ཚོགས་ཞིང་དཔང་པོའི་ཚུལ་དུ་བྱས་ཏེ་སྙིང་རྗེ་ཚུགས་ཐབས་མེད་པའི་སྒོ་ནས། གཟུང་འཛིན་བདུད་བགེགས་སོགས་ཅི་ནུས་སེམས་རྒྱུད་དང་འདྲེས་ངེས་སུ་བརྗོད་ཅིང་། དབུགས་འབྱུང་འཇུག་དང་སྦྱར་བའི་བདེ་སྡུག་གཏོང་ལེན་བྱས་རྗེས། སེམས་བསྐྱེད་བྱ་སྐྱེད་བྱེད་མི་དམིགས་པར་བསམ་ལ་མཉམ་པར་བཞག་ཅིང་བསྔོ་བ་བྱའོ། །གསུམ་པ་ནི། ཚོགས་ཞིང་སྐྱབས་ཡུལ་ལྟར་གསལ་བཏབ་པའི་སྤྱན་སྔར་རང་གཞན་སེམས་ཅན་ཐམས་ཅད་ལུས་ཞིང་གི་རྡུལ་སྙེད་དུ་སྤྲུལ་ནས་ཕྱག་འཚལ་ཞིང་རང་བཞིན་གཉིས་སུ་མེད་པར་རྟོགས་པས་སྐྱབས་སུ་འགྲོ་བ། དངོས་འབྱོར་ཡིད་སྤྲུལ་གྱི་དག་པའི་མཆོད་པ་འབུལ་ཞིང་མཆོག་ཐུན་གྱི་དངོས་གྲུབ་སྒྲུབ་པའི་གེ གས་ཉེས་བྱས་བཤགས་པ། ཕྱོགས་བཅུ་དུས་གསུམ་གྱི་དགེ་བ་ལ་རྗེས་སུ་ཡི་རངས་ཤིང་གནས་ལུགས་མཐའ་བྲལ་མཉམ་པ་ཆེན་པོར་སེམས་བསྐྱེད་པ་དང་། རང་གི་ལུས་འབུལ་ཞིང་དགེ་རྩ་བྱང་ཆུབ་ཏུ་བསྔོ་བ་བཅས་ཀྱི་དོན་ཡིད་ལ་བསམ་བཞིན་དུ། རྡོ་རྗེ་སློབ་དཔོན་སངས་རྒྱས་དཔལ། །སོགས་རྒྱུན་བཤགས་ཅི་ནུས་བརྗོད། ཚོགས་ཞིང་རྣམས་འོད་དུ་ཞུ་བ་ཚངས་བུག་ནས་སྙིང་དབུས་སུ་ཐིམ་པར་བསམ་སྟེ། འཁོར་གསུམ་ཡོངས་དག་བརྗོད་བྲལ་མི་རྟོག་པའི་ངང་དུ་མཉམ་པར་བཞག་རྗེས་དགེ་བ་བསྔོ། ཆོ་གའི་དཀྱུས་སུ་གོང་གི་ཚོགས་ཞིང་ཉིད་མ་བསྡུས་པར་སེམས་བསྐྱེད་དང་ཚོགས་བསགས་ཀྱི་རྟེན་དུ་བྱས་པས་གྲུབ་བོ། །གཉིས་པ་དངོས་གཞི་ལ། དངོས་གཞི་བསྐྱེད་བཟླས་རྫོགས་གསུམ་ལས༔ ཞེས་པས། སྐུ་བསྐྱེད་པ་ལྷ་ཡི་རྣལ་འབྱོར། གསུང་བཟླས་པ་སྔགས་ཀྱི་རྣལ་འབྱོར། ཐུགས་རྫོགས་རིམ་དེ་ཁོ་ན་ཉིད་ཀྱི་རྣལ་འབྱོར་དང་གསུམ་ལས། དང་པོ་ནི། ལྷ་བསྐྱེད་དམ་ཡེ་གཉིས་མེད་པར༔ གདོད་ནས་རང་བྱུང་རང་གསལ་གདབ༔ ཅེས་པས་དམ་ཡེ་གཉིས་མེད་ཀྱི་དཀྱིལ་འཁོར་གསལ་གདབ་པ་སྟེ། དེ་ཡང་། ཧཱུྃ་ཧཱུྃ་ཧཱུྃ༔ གཉིས་སྣང་ཆོས་རྣམས་ཀ་ནས་དག༔ སོགས་ཏེ། དེ་ཡང་གཟུང་འཛིན་གཉིས་སུ་སྣང་ཞིང་ཞེན་པའི་ཕྱི་ནང་གི་ཆོས་འདི་ཐམས་ཅད་དོན་དམ་པར་ཡེ་གདོད་མ་ནས་རང་བཞིན་གྱིས་གྲུབ་པ་མེད་པའི་དབྱིངས་སྤྲོས་བྲལ་ཀ་དག་འདུས་མ་བྱས་རང་བཞིན་རྫོགས་པ་ཆེན་པོའི་ཀློང་དུ་འཁོར་འདས་ཀྱི་ཆོས་ཀུན་དབྱེར་མེད་རོ་མཉམ་པའི་རང་བྱུང་གདོད་མའི་གཤིས་ལུགས་འཆིང་གྲོལ་ལས་འདས་པའི་ངང་དུ་མཉམ་པར་བཞག་པ་དེ་བཞིན་ཉིད་ཀྱི་ཏིང་ངེ་འཛིན། སྟོང་ཉིད་དེའི་ངང་ལས་མ་གཡོས་བཞིན་དུ་འོད་གསལ་ལྷུན་གྲུབ་ཀྱི་སྣང་ཆ་ཀུན་ཁྱབ་སྒྱུ་མ་ལྟ་བུའི་རང་རྩལ་འགགས་པ་མེད་པ་ལས། དེ་ལྟར་མ་རྟོགས་པའི་འགྲོ་བ་ཀུན་ལ་ཁྱབ་པའི་དམིགས་མེད་ཀྱི་སྙིང་རྗེ་ཆེན་པོ་མཁའ་ལ་ཉི་མ་ཤར་བ་བཞིན་དུ་གསལ་སྟོང་འཛིན་བྲལ་དུ་བསྒོམ་པ་ཀུན་ཏུ་སྣང་བའི་ཏིང་ངེ་འཛིན། དེ་ལྟ་བུའི་སྟོང་ཉིད་སྙིང་རྗེའམ་དབྱིངས་རིག་ཟུང་དུ་འཇུག་པའི་རང་བྱུང་གདོད་མའི་གཤིས་ལུགས་མ་བཅོས་གཞིར་གནས་ཀྱི་ཡེ་ཤེས་སྤྲོས་བྲལ་ཐིག་ལེ་ཉག་གཅིག་འཁོར་འདས་ཀྱི་ཆོས་ཐམས་ཅད་ཀྱི་འཕྲོ་གཞིའམ་རྩ་བ་ལྟ་བུར་གྱུར་པ་ནི་རྒྱུ་ཡི་ཏིང་ངེ་འཛིན་ཏེ། དེའི་ངང་ལས་བློ་སྟོབས་ཆེ་ཞིང་སྔར་བསྐྱེད་རིམ་ལ་གོམས་པ་བསྟན་པ་ཡིན་ན། འདིར་སྤྲོས་མེད་ཨ་ཏི་ཡོ་ག་ལྟར་ཆུ་ལས་ཉ་འཕར་བའི་ཚུལ་གྱིས་སྐད་ཅིག་གིས་རྟེན་དང་བརྟེན་པར་བཅས་པའི་དཀྱིལ་འཁོར་གསལ་འདེབས་པ་ཡིན་ལ། དེ་ལྟར་མི་ནུས་པའི་ལས་དང་པོ་པ་དག་གིས་རྒྱུའི་ཏིང་ངེ་འཛིན་རང་སེམས་ཧཱུྃ་ཡིག་དམར་པོར་གསལ་བ་གདན་གྱི་སྟེང་དུ་བབས་པ་གསུང་ཡིག་འབྲུ། དེ་ལས་ཕྱག་མཚན་རྡོ་རྗེར་གྱུར་པ་ཐུགས་ཕྱག་མཚན། དེ་ཉིད་འཕྲོས་འདུས་ཡོངས་སུ་གྱུར་པ་ལས་སྐུ་ཡོངས་རྫོགས་སུ་བསྐྱེད་པ་སྟེ་རྡོ་རྗེའི་ཆོ་ག་སུམ་བསྐྱེད་ལྟར་བྱས་ཀྱང་མི་འགལ་སྙམ། གང་ལྟར་ཡང་སྤྲོས་པ་ལ་དགའ་ན་སྲུང་གུར་གྱི་ནང་འབྱུང་བ་རིམ་བརྩེགས་རི་རབ་དང་བཅས་པའི་སྟེང་དུ་པད་ཉི་སྣ་ཚོགས་རྡོ་རྗེའི་ལྟེ་བར་རང་བྱུང་དྲག་པོའི་གཞལ་མེད་ཁང་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པར་གསལ་འདེབས་པའམ། བསྡུ་ན་སྲུང་གུར་ཙམ་བསྒོམ་པའི་ལྟེ་བར་དྲེགས་པ་སྡེ་བརྒྱད་བསྣོལ་བའི་སྟེང་དུ་པདྨ་འདབ་མ་བརྒྱད་པ་གེ་སར་ཟི་ཕོལ་དང་བཅས་པ། དེའི་སྟེང་དུ་ཉི་དཀྱིལ་ཁ་དོག་དམར་པོ་འོད་འབར་བ། དེའི་ཁར་གསར་བྱུང་གི་རྒྱལ་བསེན་དམ་སྲིའི་ཚོགས་གན་རྐྱལ་དུ་བསྒྱེལ་བའི་སྙིང་གར་སྡེར་མོས་བཟུང་ཞིང་གཟིར་བའི་ཡེ་ཤེས་ཀྱི་སྟག་མོ་དྲུས་མའི་སྟེང་དུ། ཐོག་མར་རྒྱུ་ཡིས་མ་བསྐྱེད། ཐ་མ་རྐྱེན་གྱིས་མི་འཇིག་པའི་མཐའ་གྲོལ་རང་བྱུང་གི་ཡེ་ཤེས་ཧེ་རུ་ཀ་རྩོལ་བྲལ་ལྷུན་གྱིས་གྲུབ་པའི་རྡོ་རྗེའི་སྐུ་འཆོལ་བའི་ཆས་ཅན་ཁྲོ་རྒྱལ་རྡོ་རྗེ་གྲོ་བོ་ལོད། སྐུ་མདོག་སྨུག་ནག་བསྐལ་པའི་མེ་ལྟར་འབར་བ་ཁྲོ་གཏུམ་གར་དགུའི་ཉམས་ལྡན། དུར་ཁྲོད་ཀྱི་ཆས་རྣམས་ཀྱིས་བརྒྱན་ཅིང་ཆོས་གོས་གསོལ་བ། ཞལ་གཅིག ཕྱག་གཉིས། སྤྱན་གསུམ་པ། ཕྱག་གཡས་ཀྱིས་གནམ་ལྕགས་ཀྱི་རྡོ་རྗེ་རྩེ་དགུ་པ་ནམ་མཁའི་དབྱིངས་སུ་འཕྱར་བའི་ཡར་མར་གྱི་རྩེ་ལས་ཧཱུྃ་དགུ་དང་རྃ་དགུའི་ཚྭ་ཚྭ་འཕྲོ་བས་སྟེང་གདོན་རྣམས་འཇོམས་པ། ཕྱག་གཡོན་གནམ་ལྕགས་ཀྱི་ཕུར་བུ་ཟུར་གསུམ་རྣོ་དབལ་དང་ལྡན་པ་ལོག་འདྲེན་བགེགས་ཀྱི་སྙིང་ལ་གཟིར་ཞིང་། སྡིགས་མཛུབ་ཀྱི་རྩེ་ལས་ལྕགས་སྡིག་མགོ་དགུ་རྭ་བཅོ་བརྒྱད་པ། དེ་ལས་ལྕགས་སྡིག་གི་ཕོ་ཉ་གྲངས་མེད་པ་འགྱེད་པས་གསར་བྱུང་གི་རྒྱལ་འགོང་མ་རུངས་པ་རྣམས་ཆེམ་ཆེམ་ཟ་བ། ཞབས་གཡས་བསྐུམ་ཞིང་གཡོན་བརྐྱང་བའི་སྟབས་ཀྱིས་འགྱིངས་ཤིང་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པ། དེའི་སྤྱི་བོར་སྤྲུལ་པའི་བྱ་ཁྱུང་དམར་ནག་གནམ་ལྕགས་ཀྱི་མཆུ་སྡེར་ཅན་མེ་ཡི་གཤོག་པ་གཡོབ་པ། དེ་ལས་སྤྲུལ་པའི་བྱ་ཁྱུང་རིགས་ལྔ་གྲངས་མེད་པ་སྤྲོ་བས་འོག་གདོན་ཀླུ་དང་ས་བདག་གི་ཚོགས་འཇོམས་པ། ཐུགས་དབུས་སུ་པད་ཟླའི་སྟེང་དུ་ཡེ་ཤེས་སེམས་དཔའ་གུ་རུ་ཞི་བ་ཟ་ཧོར་གྱི་ཆ་བྱད་ཅན་ཚོན་གང་བ་དཀར་ལ་དམར་བའི་མདངས་དང་ལྡན་པ། དེའི་ཐུགས་ཀར་ཉི་མའི་སྟེང་དུ་ཏིང་འཛིན་སེམས་དཔའ་ཧཱུྃ་ཡིག་དམར་པོ་ཡུངས་འབྲུ་ཙམ་འོད་འབར་བ། སྐུ་ཡི་གནས་ལྔ་ན། སྤྱི་བོར་འཇམ་དཔལ་གཤིན་རྗེ་གཤེད་སྐུ་མདོག་སེར་ནག་གཡས་ཐོད་དབྱུག་དང་གཡོན་འཁོར་ལོ་འཛིན་པ། མགྲིན་པར་རྟ་མགྲིན་དམར་ནག་གཡས་བེ་ཅོན་དང་གཡོན་ཞགས་པ་འཛིན་པ། ཐུགས་ཀར་གསང་བདག་ཕྱག་ན་རྡོ་རྗེ་མཐིང་ནག་གཡས་རྡོ་རྗེ་དང་གཡོན་དྲིལ་བུ་འཛིན་པ། ལྟེ་བར་པདྨ་འདབ་བཞིའི་ལྟེ་བར་དབྱིངས་ཕྱུག་རྡོ་རྗེ་རྣལ་འབྱོར་མ་སྐུ་མདོག་མཐིང་ནག པད་འདབ་བཞི་ལ་ཤར་ནས་རིམ་པ་བཞིན་རྡོ་རྗེ་མཁའ་འགྲོ་དཀར་མོ། རིན་ཆེན་མཁའ་འགྲོ་སེར་མོ། པདྨ་མཁའ་འགྲོ་དམར་མོ། ལས་ཀྱི་མཁའ་འགྲོ་ལྗང་ཀུ་རྣམས་གཅེར་མོ་ལང་ཚོ་རྒྱས་པའི་ཉམས་ཅན། ཕྱག་གཉིས་ཀྱིས་གྲི་གུག་དང་ཐོད་ཁྲག་འཛིན་པ། ཐོད་སྐམ་གྱི་དབུ་རྒྱན་དང་རིན་པོ་ཆེ་དང་རུས་པའི་ཕྱག་རྒྱ་ཅན། ཞབས་བརྐྱང་བསྐུམ་གྱི་གར་སྟབས་ཀྱིས་རོལ་བ། གསང་བར་ཡཀྴ་མེ་དབལ་སྐུ་མདོག་སྨུག་ནག་གཡས་ཐོ་བ་དང་གཡོན་ལྕགས་ཀྱུ་འཛིན་པ། ཁྲོ་བོ་བཞི་ཀའང་ཁྲོ་ཚུལ་གར་དགུའི་ཉམས་ཀྱིས་སྒེག་ཅིང་དུར་ཁྲོད་དྲག་པོའི་ཆས་ཀྱིས་བརྒྱན་པ་ཞབས་གཡོན་བརྐྱང་བའི་དོར་སྟབས་ཀྱིས་པད་ཉིའི་གདན་ལ་རོལ་བ། གཞན་ཡང་སྐུའི་གནས་རྣམས་སུ་གོ་ཆའི་ལྷ། དཔྲལ་བར་ཧཱུྃ་ཀཱར་ཡབ་ཡུམ་སྔོན་པོ། དེ་བཞིན་དུ་མགྲིན་པར་རྟ་མགྲིན་དམར་པོ། ཐུགས་ཀར་གཤིན་རྗེ་སྔོན་པོ། ལྟེ་གོང་དུ་བདུད་རྩི་འཁྱིལ་བ་ལྗང་སེར། ལྟེ་བར་མི་གཡོ་བ་ལྗང་ནག གསང་གནས་སུ་སྟོབས་ཆེན་སྔོན་པོ། དཔུང་གཡས་སུ་རྣམ་རྒྱལ་དཀར་པོ། དཔུང་གཡོན་དབྱུག་སྔོན་སྔོན་པོ། བརླ་གཡས་འདོད་རྒྱལ་དམར་སྐྱ། བརླ་གཡོན་ཁམས་གསུམ་རྣམ་རྒྱལ་སེར་ནག་སྟེ་ཁྲོ་བཅུ་ཡབ་ཡུམ་རྒྱན་ཆ་ལུགས་ཡོངས་སུ་རྫོགས་པ་ཕྱག་མཚན་སོགས་སྤྱི་ལྟར་དང་། ཟ་གསོད་ཁྲ་ཐབས་ཕྱག་བརྙན་དང་བཅས་པས་བ་སྤུའི་བུ་གའི་མཐར་ཐུག་གི་བར་དུ་ཁྱབ་པར་གཏམས་པ། སྐུའི་ཕྱི་རོལ་དུ་སྤྲུལ་པའི་ཁྲོ་བོས་གནམ་ས་གང་ཞིང་། ཡང་སྤྲུལ་ཁྱུང་སྡིག་གི་ཚོགས་ཀྱིས་འཇིག་རྟེན་གྱི་ཁམས་ཀུན་གཡོ་བ། མེ་མཚོན་རྡོ་རྗེའི་ཚྭ་ཚྭ་འུར་འུར་ཆེམ་ཆེམ་འབར་བའི་ཀློང་དུ་གཟི་བརྗིད་བཟོད་པར་དཀའ་བའི་ཉམས་ཅན་འཁོར་འདས་ཀྱི་ཞིང་ཀུན་ལ་མངའ་དབང་མཛད་པའི་ཆེ་བཙན་འགྲན་ཟླ་དང་བྲལ་བའི་སྐུར་གསལ་བའི་ལྷ་ཚོགས་རྣམས་ཀྱི་སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པ་སྟེ། དེ་ཡང་རང་གི་གཉུག་མའི་སྒོ་གསུམ་གདོད་མ་ནས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེ་གསུམ་གྱི་ངོ་བོར་ལྷུན་གྱིས་གྲུབ་པས་དམ་ཡེ་ཐ་དད་དུ་འཛིན་པའི་ཞེན་རྟོག་མཐའ་དག་ཕྲལ་ཏེ་གསལ་སྟོང་འཛིན་བྲལ་གྱི་ཚུལ་དུ་བསྒོམས། དེ་ཡང་ཐ་མལ་གྱི་སྣང་ཞེན་རགས་པ་ཟློག་པའི་ཕྱིར་རང་ལྷ་སྐུའི་རྣམ་པ་ཆ་བྱད་ཡོངས་རྫོགས་མེ་ལོང་ནང་དུ་གཟུགས་བརྙན་ཤར་བ་ལྟར་ལམ་གྱིས་གསལ་བཏབ་སྟེ་སྐུའི་རྣམ་པ་སྤྱི་ལ་སེམས་འཛིན། དེ་ལ་སེམས་ཟིན་པ་ན་ཕྲ་བ་སྦྱོང་བའི་ཕྱིར་སྐུའི་ཆ་ཤས་སྤྱན་སོགས་རེ་རེ་ནས་དང་། དེ་བཞིན་དུ་ཕྱག་མཚན་དང་རྒྱན་ཆས་ལུས་དཀྱིལ་དང་གོ་ཆའི་ལྷ་སོགས་རེ་རེ་ནས་གསལ་འདེབས། དེ་གསལ་བ་དང་ཡང་གཅིག་ཅར་དུ་གསལ་འདེབས་ཤིང་བྱིང་རྒོད་སོགས་ཀྱི་སྐྱོན་བསལ། སྐབས་འགར་རང་འོད་ཀྱི་ཡུམ་དང་མཉམ་པར་སྦྱོར་བའི་ཞུ་བདེས་དྲངས་པའི་ལྷ་སྐུ་བཅོས་མིན་བདེ་གསལ་སྟོང་པ་ཉིད་ཀྱི་ངང་དུ་བསླབ་ལ་བོགས་དབྱུང་། དེ་ཡང་སྐྱོན་ཀུན་ཟད། ཡོན་ཏན་ཀུན་རྫོགས། ཕྱོགས་དུས་ཀྱི་རྒྱལ་བ་མ་ལུས་པ་འདུས་པའི་བདག་ཉིད་གུ་རུ་རྡོ་རྗེ་གྲོ་བོ་ལོད་ནི་ཡེ་གདོད་མ་ཉིད་ནས་ངའོ་སྙམ་དུ་ང་རྒྱལ་བཟུང་ཞིང་ལྷ་སྐུ་རང་གི་རིག་རྩལ་དུ་ངེས་ཤེས་ཁྱད་པར་ཅན་མ་སྐྱེས་ཀྱི་བར་དུ་བསྒོམ། དེ་ནས་དག་དྲན་ལ་བསླབ་པའང་། དོན་དམ་པར་ན་རྫོགས་པའི་སངས་རྒྱས་ཀྱི་ཡེ་ཤེས་ལ་གཟུང་འཛིན་གྱིས་སྤྲོས་པའི་ཞལ་ཕྱག་སོགས་རང་མཚན་པ་མེད་ཀྱང་མཐའ་ཀླས་པའི་གདུལ་བྱའི་འགྲོ་བ་རྣམས་འདུལ་བའི་ཕྱིར་བསམ་གྱིས་མི་ཁྱབ་པའི་ཡེ་ཤེས་ཉིད་མཚན་མ་རྟགས་ཀྱི་ཕྱག་རྒྱར་བཞེངས་པར་མོས་པ་སྟེ། དེ་ཡང་ཆོས་ཉིད་འགྱུར་བ་མེད་པའི་བདེ་བ་ཆེན་པོའི་རང་མདངས་སྐུ་མདོག་སྨུག་ནག་བསྐལ་པའི་མེ་ལྟར་འབར་བ་ནི་གདུལ་བྱ་ལ་རྗེས་སུ་ཆགས་ཤིང་དབང་དྲག་སོགས་ལས་རབ་འབྱམས་ལ་མངའ་དབང་འབྱོར་བའི་བརྡའོ། །དེ་བཞིན་དུ་ཞལ་གཅིག་པ་ནི་ཆོས་ཉིད་དེ་བཞིན་ཉིད་ཀྱི་ཀློང་དུ་སྐུ་དང་ཡེ་ཤེས་དབྱེར་མེད་རོ་གཅིག་པའོ། །ཕྱག་གཉིས་ནི་ཇི་ལྟ་ཇི་སྙེད་ཀྱི་མཁྱེན་པ་གཉིས་ཀྱིས་འགྲོ་བའི་དོན་མཛད་པའོ། །སྤྱན་གསུམ་སྡང་མིག་ཏུ་གཡོ་བ་ནི་གནས་ལུགས་རྣམ་ཐར་སྒོ་གསུམ་དུ་མཚོན་པའོ། །ཕྱག་གཡས་ན་ཡེ་ཤེས་ཀྱི་རྡོ་རྗེ་རྩེ་དགུ་བསྣམས་པ་ནི་ཆོས་ཉིད་འགྱུར་བ་མེད་པའི་ཡེ་ཤེས་ཀྱིས་ཁམས་གསུམ་ས་དགུའི་རྟོག་པ་འཇོམས་པའོ། །རྩེ་མོ་ནས་སྔགས་ཀྱི་ཚྭ་ཚྭ་འཕྲོ་བ་ནི་ལོག་འདྲེན་རྣམས་སྐྱེ་མེད་ཀྱི་དབྱིངས་སུ་སྒྲོལ་བར་བྱེད་པའོ། །ཕྱག་གཡོན་ན་གནམ་ལྕགས་ཀྱི་ཕུར་པ་ཟུར་གསུམ་དབལ་དང་ལྡན་པ་འཛིན་པ་ནི་དུག་གསུམ་སྐུ་གསུམ་གྱི་ཀློང་དུ་སྒྲོལ་ཞིང་སྲིད་གསུམ་ཐལ་བར་འབྱིན་པའོ། །རྩེ་ལས་གནམ་ལྕགས་སྡིག་པའི་ཕོ་ཉ་འགྱེད་པ་ནི་བདག་ལྟའི་ཉོན་མོངས་ཀྱི་སྲོག་དབུགས་བདག་མེད་རྟོགས་པས་རྔམས་ཟས་སུ་བྱེད་པའོ། །ཞབས་གཉིས་གྱད་ཆེན་པོའི་སྟབས་ཀྱི་སྤྲུལ་པའི་སྟག་མོ་དྲུས་མའི་སྟེང་ན་འགྱིང་བ་ནི་ཐབས་ཤེས་ཟུང་དུ་འཇུག་ཅིང་འགྲོ་བའི་དོན་ལ་བཞེངས་པའོ། །སྟག་གི་སྦར་མོས་རྒྱལ་བསེན་གཟིར་བ་ནི་བདུད་བཞི་ཟིལ་གྱིས་གནོན་པའོ། །སྐུ་ལ་དུར་ཁྲོད་ཀྱི་ཆས་བརྒྱད་དང་ཆོས་གོས་གསོལ་བ་ནི་ཚོགས་བརྒྱད་རྣམ་པར་དག་ཅིང་ཐེག་གསུམ་ཡོངས་སུ་རྫོགས་པའོ། །ཡེ་ཤེས་མེ་དཔུང་འབར་བའི་ཀློང་ན་བཞུགས་པ་ནི་ཉོན་མོངས་པའི་བུད་ཤིང་བསྲེགས་པའོ། །གཞན་ཡང་སྤྱི་བོར་སྤྲུལ་པའི་བྱ་ཁྱུང་རིགས་ལྔ་དང་། སྐུ་མཆོག་འཇམ་དཔལ་གཤིན་རྗེ་སོགས་གནས་ལྔའི་ལྷ་དང་མཁའ་འགྲོ་རྣམས་ནི། ཕུང་ཁམས་ཉོན་མོངས་རྟོགས་ཚོགས་ཐམས་ཅད་ཡེ་ནས་སྐུ་དང་ཡེ་ཤེས་ཀྱི་ངོ་བོར་དག་ཅིང་སྐུ་གསུང་ཐུགས་ཡོན་ཏན་ཕྲིན་ལས་བསམ་མི་ཁྱབ་པའི་གསང་བ་ལ་མངའ་དབང་འབྱོར་པ་དང་ཤེས་རབ་སྟོང་ཉིད་ཀྱི་ཕྱག་རྒྱའོ། །ཁྲོ་བཅུ་ཕྲ་ཕྱག་སོགས་གོ་ཆའི་ལྷ་རྣམས་ཀྱང་མི་དགེ་བཅུ་དང་ཉེ་ཉོན་ཉི་ཤུའི་རྟོག་པ་རྣམ་པར་དག་ཅིང་དགེ་བཅུ་ཕར་ཕྱིན་བཅུ་དང་སྟོབས་བཅུ་དབང་བཅུ་སོགས་ཡང་དག་པའི་དོན་དང་ལྡན་པས་མཚོན། སྤྲུལ་པ་དང་ཡང་སྤྲུལ་རྟེན་དང་བརྟེན་པའི་དཀྱིལ་འཁོར་དེ་ཐམས་ཅད་ཀྱང་ཡེ་ཤེས་ཆེན་པོ་གཅིག་གི་རང་རྩལ་དུ་ཤེས་པར་བྱ་བ་སྟེ། རིན་ཆེན་དྲྭ་བའི་མཛོད་ལས། སྣང་སྲིད་རྣམ་དག་རང་བཞིན་དཀྱིལ་འཁོར་ན། །རང་བྱུང་མ་བཅོས་རྡོ་རྗེ་སྙིང་པོའི་སྐུ། །དུས་གསུམ་འགྱུར་བ་མེད་པར་རྟག་པར་བཞུགས། །བདེ་བ་ཆེན་པོ་བདེ་བ་རྟག་སྤྱོད་པ། །ཞེས་དང་། ཀྱེ་རྡོ་རྗེ་ལས། རྟག་ཏུ་རང་བཞིན་བདེ་བ་ཅན། །འཇིག་རྟེན་ཁམས་ནི་གང་དུའང་། །སངས་རྒྱས་གཞན་དུ་རྙེདམི་འགྱུར། །སེམས་ནི་རྫོགས་པའི་སངས་རྒྱས་ཉིད། །ཅེས་དང་། མེ་ལྕེ་ཕྲེང་བའི་རྒྱུད་ལས། དབྱིངས་དང་ཡེ་ཤེས་གཉིས་སུ་མེད། །དངོས་པོ་རོ་མཉམ་མཐའ་ཡས་པའི། །སེམས་ཀྱི་དེ་ཉིད་ལ་གནས་པའི། །བཞི་པའི་དཔལ་ལྡན་ཧེ་རུ་ཀ །ཞེས་གསུངས་པ་ལྟར་དོན་གྱི་མདོ་འགག་ནི། རང་སེམས་གཉུག་མ་ལྷན་ཅིག་སྐྱེས་པའི་ཡེ་ཤེས་ཆོས་ཉིད་འགྱུར་བ་མེད་པའི་སྟེང་དུ་སངས་རྒྱས་ཀྱི་ཆོས་རྣམས་ཡེ་ནས་རང་བཞིན་ལྷུན་གྱིས་གྲུབ་པའི་དཀྱིལ་འཁོར་ཆེན་པོར་གནས་པ་ཉིད་དེ་དང་དེར་སྣང་བར་ཤེས་པར་བྱ་བ་སྟེ། རྩ་གསུམ་དགོངས་འདུས་ལས། གཞི་དུས་ཕུང་ཁམས་སྐྱེ་མཆེད་ཀུན༔ མ་འགག་ལམ་གྱི་ལྷ་སྐུར་ཤར༔ འབྲས་བུ་རང་བཞིན་ཆོས་ཀྱི་སྐུ༔ གཟུགས་སུ་བཞེངས་པའི་དཀྱིལ་འཁོར་དང༔ མི་ཕྱེད་དག་པ་དྲན་པ་ཡིས༔ བསྐྱེད་རིམ་མཆོག་གི་ཉེ་རྒྱུར་བསྒྱུར༔ ཞེས་གསུངས། དོན་ལ་སེམས་སྤངས་པའི་ཕ་རོལ་ན་ལྷ་མེད། ལྷ་སྤངས་པའི་ཕ་རོལ་ན་སེམས་མེད། སེམས་དང་ལྷ་སྐུ་དབྱེར་མེད་དུ་ཐག་བཅད་ལ་གསལ་སྟོང་འཛིན་མེད་ཀྱི་ངང་དུ་ཇི་སྲིད་མི་སྐྱོའི་བར་དེ་སྲིད་དུ་སྒོམ་པར་བྱའོ། །སྐྱོན་བཟླས་པ་ལ་འཇུག་པའམ། ཡང་ན་ངལ་གསོས་ཏེ་ཡུན་ཐུང་གྲངས་མང་བའི་ཚུལ་གྱིས་རྩེ་གཅིག་ཏུ་གོམས་པར་བྱས་པས། རིམ་གྱིས་ཉམས་ལྔ་མཐར་ཕྱིན་ནས་རྣམ་སྨིན་རིག་འཛིན་གྱི་ས་ལ་སྦྱོར་བར་བྱེད་དེ། དེ་ཉིད་ལས། རང་སེམས་ལྷ་སྐུར་ཤར་བ་ན༔ གསལ་དྭངས་རྙོགས་པ་མེད་པའི་ངང༔ ཡུན་ཐུང་གྲངས་མང་རྩེ་གཅིག་བསྒོམ༔ གོམས་ནས་བསྒོམ་ཡུན་ཇེ་རིང་བྱ༔ དེ་ལྟར་བརྩོན་པས་ཡིད་ཀྱི་ཡུལ༔ མ་འདྲེས་ཡོངས་རྫོགས་གསལ་སྣང་འཆར༔ བར་དུ་རླུང་སེམས་ཟིན་པ་ལས༔སྟོང་གཟུགས་ལྷ་སྐུ་དབང་པོར་གསལ༔ ཐ་མ་རླུང་སེམས་ལྷ་ཡི་སྐུ༔ རྣམ་སྨིན་རིག་འཛིན་གྲུབ་པའི་རྟགས༔ ལུས་ཉིད་ལྷ་སྐུར་རང་ཤར་འབྱུང༔ ལྷ་དང་སེམས་འབྱུང་ཆོས་ཉིད་གསུམ༔ དབྱེར་མེད་དགོངས་པའི་གདེང་ཐོབ་ནས༔ བསྐྱེད་རིམ་མཐའ་རུ་ཕྱིན་པར་འགྱུར༔ཞེས་གསུངས་པ་བཞིན་ནོ། །གཉིས་པ་གསུང་བཟླས་པ་སྔགས་ཀྱི་རྣལ་འབྱོར་ནི། བཟླས་པ་ཡང་གསང་འབྲུ་གཅིག་གིས༔ བསྙེན་ཅིང་སྒྲུབ་སྟེ་ལས་ལ་སྦྱར༔ ཞེས་གསུངས་པ་ལྟར། བསྙེན་སྒྲུབ་ལས་གསུམ་ལས། དང་པོ་ནི། བསྙེན་པས་བླ་མའི་བྱིན་རླབས་བསྐུལ༔ ཞེས་པས། ཁ་ཙམ་ཚིག་ཙམ་མིན་པར་སྙིང་ཁུང་རུས་པའི་གཏིང་ནས། རྗེ་བཙུན་ཨོ་རྒྱན་ཆེན་པོ་བདུད་འདུལ་དྲག་པོ་རྩལ་གྱི་གསང་བ་གསུམ་གྱི་རྣམ་ཐར་ཆེ་བའི་ཡོན་ཏན། མཛད་པའི་འཕྲིན་ལས། ནུས་པའི་མཐུ་སྟོབས། སྔོན་གྱི་ཞལ་བཞེས་ཐུགས་དམ་དང་བཀའ་དྲིན་ཆེན་པོ་རྗེས་སུ་དྲན་པའི་སྒོ་ནས་ཉིད་ལས་སྐྱབས་དང་རེ་ས་གཞན་ན་མེད་པའི་གདུང་ཡུས་མཆི་མ་འཁྲུགས་པའི་སྒོ་ནས། ཧཱུྃ་ཧཱུྃ་ཧཱུྃ༔ བདག་གི་བླ་མ་བདུད་འདུལ་དྲག་པོ་རྩལ༔ སོགས་ཀྱིས་འདོད་པའི་དོན་ལ་རྩེ་གཅིག་ཏུ་གསོལ་བ་བཏབ་ཅིང་། སྙིང་པོ་ཧཱུྃ་བུམ་སྦྲེལ་དུ་བཟླས་པས། ཕྱོགས་བཅུ་དུས་བཞིའི་ཞིང་རབ་འབྱམས་དང་། ཁྱད་པར་རྔ་ཡབ་པདྨ་འོད་ཀྱི་ཞིང་ཁམས་ནས་རབ་འབྱམས་རྩ་བ་གསུམ་གྱི་དཀྱིལ་འཁོར་གྱི་འཁོར་ལོ་ཐམས་ཅད་བླ་མ་རྡོ་རྗེ་གྲོ་བོ་ལོད་ཀྱི་རྣམ་པས་སྐུ་ཕྱག་རྒྱ། གསུང་ཡིག་འབྲུ། ཐུགས་ཕྱག་མཚན་འོད་དང་འོད་ཟེར་གྱི་རྣམ་པར་ཆར་བབས་པ་ལྟར་བྱོན་ནས་རང་གི་ལུས་ངག་ཡིད་གསུམ་ལ་ཐིམ་པས། སྒོ་གསུམ་ཆ་སྙོམས་དང་བཅས་པའི་སྒྲིབ་པ་དག དབང་བཞི་ཐོབ། ལམ་བཞིའི་ཡེ་ཤེས་བསྐྱེད། སྐུ་བཞི་གོ་འཕང་རྒྱུད་ལ་བཞག འཁྲུལ་རྟོག་ཉོན་མོངས་ཞི། ཚེ་དབང་ཡེ་ཤེས་རྒྱས། ལུས་ལ་བདེ་བ་འབར། ངག་ལ་བདེན་ཚིག་གྲུབ། སེམས་ལ་རྟོགས་པ་འཆར། རང་སྣང་དབང་དུ་འདུ། གཞན་སྣང་ཟིལ་གྱིས་ནོན། མཆོག་དང་ཐུན་མོང་གི་དངོས་གྲུབ་མཐའ་དག་སྟན་ཐོག་འདི་ཉིད་དུ་ཐོབ་སྟེ། མདོར་ན་ཁྲོ་རྒྱལ་ཆེན་པོའི་གསང་བ་གསུམ་དང་དབྱེར་མེད་པའི་དངོས་གྲུབ་ཐམས་ཅད་ཐོབ་པར་མོས་ལ་ལྷ་དང་བླ་མ་རང་སེམས་གསུམ་དབྱེར་མེད་པའི་ངང་དུ་མཉམ་པར་བཞག་ཅིང་བྱིན་རླབས་ཀྱི་མཚན་མ་མ་མཐོང་གི་བར་དུ་བཟླ་བར་བྱའོ། །གཉིས་པ་ནི། སྒྲུབ་པས་མཆོག་ཐུན་དངོས་གྲུབ་བསྡུ༔ ཞེས་གསུངས་ཏེ། འདི་ལ་བཟླས་པའི་གཞི་འགོད་པ། དོན་གྱི་དགོངས་པ་གསལ་འདེབས་པ། བཟླས་དམིགས་དངོས་སོ། །དང་པོ་ནི། རང་བྱུང་ཁྲོ་རྒྱལ་ཆེན་པོ་ཡི༔ སོགས་ཏེ། དེ་ཡང་རང་དམ་ཚིག་སེམས་དཔའི་ཐུགས་དབུས་ཡེ་ཤེས་སེམས་དཔའི་ཐུགས་ཀར་ཉི་མའི་སྟེང་དུ་ཏིང་འཛིན་སེམས་དཔའ་ཧཱུྃ་དམར་པོ་གསལ་བ་དེ་ལས། ཧཱུྃ་གིས་སྔགས་ཕྲེང་དང་འོད་ཟེར་གྱི་ཚོགས་དཔག་ཏུ་མེད་པ་འཕྲོས། རང་གི་ལུས་ཐམས་ཅད་གང་། ལས་ཉོན་བག་ཆགས་རྟོག་སྒྲིབ་ནད་གདོན་ཐམས་ཅད་བསྲེགས་ཤིང་སྦྱངས། ཐུགས་ཀ་དང་བ་སྤུའི་བུ་ག་ཐམས་ཅད་ནས་སྔགས་ཕྲེང་འོད་ཟེར་དང་བཅས་པ་ཕྱིར་འཕྲོས། སྣོད་བཅུད་བརྟན་གཡོ་འཁོར་འདས་ཐམས་ཅད་ལ་ཁྱབ་པས། ཕྱི་སྣོད་གཞལ་ཡས་ཁང་ནང་བཅུད་ཐམས་ཅད་གཟུགས་སྣང་སྐུ། སྒྲ་གྲགས་གསུང་། དྲན་རྟོག་ཐུགས་འོད་གསལ་བདེ་བ་ཆེན་པོར་གྱུར་ཏེ། མཆོག་གི་དངོས་གྲུབ་མ་ལུས་པ་ཚེ་འདིར་འགྲུབ་པའི་སྐལ་བ་ཅན་དུ་བྱས་པར་མོས་པའོ། །གཉིས་པ་ནི། ཧཱུྃ་ཧཱུྃ་ཧཱུྃ༔ ཡེ་སངས་རྒྱས་པའི་ཧེ་རུ་ཀ༔ སོགས་ཏེ་འདི་ལྟར་འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་དག་མཉམ་བདེན་པ་དབྱེར་མེད་ལྷག་པའི་ཆོས་སྐུ་ཆེན་པོར་ཡེ་ནས་སངས་རྒྱས་པའི་རང་བཞིན་མཉམ་པ་ཉིད་མ་འཁྲུལ་དོན་གྱི་ཧེ་རུ་ཀ་འཆོལ་བའི་ཁྲོ་རྒྱལ་ཆེན་པོ་བླ་མ་རྡོ་རྗེ་གྲོ་ལོད་ཉིད་དོན་དམ་འདུས་མ་བྱས་པའི་དབྱིངས་སུ་གཤེགས་བཞུགས་འཕོ་འགྱུར་སོགས་ཀྱི་སྤྲོས་པའི་མཚན་མ་མཐའ་དག་ལས་ཡེ་གདོད་མ་ནས་གྲོལ་ནའང་། ཀུན་རྫོབ་ཙམ་དུ་ལྷ་སྐུ་ཐིག་ལེ་ཞལ་ཕྱག་མཚན་མ་རྟགས་ཀྱི་སྐུར་བཞེངས་ཤིང་། ཆོས་ཉིད་ཀྱི་རང་སྒྲ་གཞོམ་དུ་མེད་པ་ཧཱུྃ་གི་ཛབ྄་དབྱངས་འབྲུག་སྟོང་དུས་གཅིག་ཏུ་ལྡིར་བ་བཞིན་དུ་གཤེགས་ནས། དབྱིངས་རིག་འདུ་འབྲལ་མེད་པ་རང་སེམས་གཉུག་མའི་ངོ་བོར་བརྟན་པར་བཞུགས་སུ་གསོལ་བ་དང་། ཡིད་དཔྱོད་མཚན་འཛིན་དང་བྲལ་བར་རང་བབ་མཉམ་པ་ཆེན་པོའི་ཕྱག་འཚལ་བ་དང་། ཅིར་སྣང་འདོད་ཡོན་མ་སྤངས་ཆོས་ཉིད་ཀྱི་རྒྱན་དུ་ཁྱེར་ཞིང་དུག་ལྔ་ཡེ་ཤེས་ཆེན་པོའི་རང་མདངས་སྣང་སྲིད་བདེ་བ་ཆེན་པོར་རང་བཞིན་ལྷུན་གྱིས་གྲུབ་པའི་མཆོད་པ་དང་། ཆོས་དབྱིངས་འོད་གསལ་མཉམ་པ་ཆེན་པོའི་ཀློང་དུ་རང་གསལ་ལྷུན་གྱིས་རྫོགས་པའི་སྐུ་དང་ཞིང་ཁམས་སོགས་དབྱི བས་དང་རྒྱན་བཀོད་ཚད་མེད་པའི་ཡེ་ཤེས་ཀྱི་རང་སྣང་བསམ་གྱིས་མི་ཁྱབ་པའི་ཆེ་བའི་ཡོན་ཏན་ལ་བསྟོད་པ་དང་། འཁྲུལ་རྟོག་ཉོན་མོངས་སྒྲིབ་པའི་ཚོགས་རྣམས་གདོད་མ་ནས་མ་བྱུང་མ་སྐྱེས་པས་ངོ་བོ་བཤགས་བྱ་བཤགས་བྱེད་ལས་འདས་པའི་རང་སེམས་ཆོས་ཟད་ཟང་ཐལ་རྗེན་པའི་ངང་དུ་བཤགས་པ་དང་། རང་བྱུང་འདུས་མ་བྱས་པའི་ཡེ་ཤེས་ཆེན་པོའི་རིག་རྩལ་སོ་སོར་རྟོགས་པའི་ཤེས་རབ་ཀྱིས་གནས་ཚུལ་ལ་ཕྱིན་ཅི་ལོག་ཏུ་ཞེན་པའི་འཁོར་བའི་འཁྲུལ་འཁོར་རྩ་བ་གཟུང་འཛིན་གྱི་ས་བོན་གཏིང་ནས་ཟློག་ཅིང་། གཞི་སྣང་འཁོར་བའི་འཁྲུལ་རྟོག་སེམས་དང་སེམས་བྱུང་རྣམ་ཤེས་རླུང་གི་བཞོན་པ་བཅས་པ་ཐོག་མར་གང་ནས་བྱུང་བའི་གཞི་གདོད་མའི་འོད་གསལ་ཆེན་པོར་རྩལ་གཞི་ཐིམ་དུ་སོང་ནས་འགྱུར་མེད་བདེ་བ་ཆེན་པོའི་ཡེ་ཤེས་བསམ་གྱིས་མི་ཁྱབ་པའི་རང་ས་ཟིན་ནས་དབྱིངས་རིག་འདུ་འབྲལ་མེད་པའི་དགོངས་པ་ཚེ་འདི་ཉིད་ལ་མངོན་དུ་འགྱུར་བར་མཛོད་ཅིག ཅེས་ཧཱུྃ་ལྔ་སྦྲེལ་དབྱངས་སུ་ལེན་ཞིང་དོན་གྱི་དགོངས་པ་གསལ་གདབ་པར་བྱའོ། །གསུམ་པ་ལ་གསུམ། སྤྱི་དང་། བདེ་ཆེན། ཁྱད་པར་རོ། །དང་པོ། རིགས་གསུམ་ཁྲོས་པའི་ཐུགས་ཀར་ཧཱུྃ༔ སོགས་ཀྱིས་བསྟན་པ་སྟེ། དེ་ཡང་སྤྱི་བོར་འཇམ་དཔལ་ཁྲོས་པ་སོགས་གནས་གསུམ་གྱི་རིགས་གསུམ་ཁྲོ་བོའི་ཐུགས་ཀར་རིམ་པ་བཞིན། ཧཱུྃ་ཡིག་དཀར་དམར་མཐིང་གསུམ་གསལ་བ་ལས་རང་མདོག་དང་མཐུན་པའི་འོད་ཟེར་འཕྲོས། རང་གི་ལུས་ནང་ཐམས་ཅད་གང་། སྡིག་སྒྲིབ་ཉོན་མོངས་ཐམས་ཅད་སྦྱངས། ཕྱིར་འཕྲོས་ཞིང་ཁམས་ཐམས་ཅད་ཁྱབ། ཕྱོགས་དུས་ཀྱི་བླ་མ་རྩ་གསུམ་རྒྱལ་བ་སྲས་དང་བཅས་པ་ལ་ཐུགས་མཉེས་པའི་མཆོད་པ་འབུལ། གསང་བ་གསུམ་གྱི་བྱིན་རླབས་དང་དངོས་གྲུབ་ཐམས་ཅད་འབྲུ་གསུམ་འོད་ཟེར་གྱི་རྣམ་པར་བསྡུས་ནས་རང་གི་གནས་གསུམ་ལ་ཐིམ་པས་མཆོག་ཐུན་མོང་གི་དངོས་གྲུབ་མཐའ་དག་ཐོབ་པར་མོས་ལ་ཧཱུྃ་ལྔ་སྒྲིལ་ཉིད་དབྱངས་སུ་ལེན་ཞིང་བཟླའོ། གཉིས་པ་ནི། ལྟེ་བའི་དབྱིངས་ཕྱུག་གཙོ་འཁོར་གྱི་ཐུགས་ཀར་རང་མདོག་དང་མཐུན་པའི་ཧཱུྃ་ཡིག་གསལ་བ་ལས་སྔགས་ཕྲེང་འོད་ལྔའི་མདངས་ལྡན་འཕྲོས་ཞལ་ནས་ཐོན་གུ་རུ་རྡོ་རྗེ་གྲོ་ལོད་ཀྱི་ཞལ་ནས་བརྒྱུད་གསང་བ་རྡོ་རྗེའི་ལམ་ནས་ཚུར་འཁོར་ཏེ་མཁའ་གསང་ནས་ཞུགས་ས་བོན་ལ་ཐིམ་པས་སྙོམས་འཇུག་གི་སྒྲིབ་པ་སྦྱོང་། ཟག་མེད་བདེ་བ་ཆེན་པོའི་ཡེ་ཤེས་མཐར་ཐུག་པ་འཕོ་མེད་ལྷན་ཅིག་སྐྱེས་པ་དོན་གྱི་འོད་གསལ་ཉིད་རྒྱུད་ལ་སྐྱེས་པར་མོས་ལ་བཟླས་པ་བྱའོ། །གསུམ་པ་ཁྱད་པར་གྱི་སྒྲུབ་པའི་དམིགས་པ་ལ། སྐུ་མཆོག་གཤེད་པོའི་དཔྲལ་བར་ཟླ་བའི་སྟེང་ཧཱུྃ་དཀར་པོ་བདུད་རྩིའི་རང་བཞིན་ཅན་གྱི་འོད་ཟེར་འཕྲོ་བར་གསལ་བཏབ་ལ། དེ་ལས་ཧཱུྃ་ཡིག་དང་འོད་ཟེར་དཀར་པོའི་ཚོགས་བསམ་གྱིས་མི་ཁྱབ་པ་འཕྲོས། ཕྱོགས་དུས་ཀྱི་བདེ་གཤེགས་རྩ་བ་གསུམ་ལ་སྐུ་མཉེས་པའི་མཆོད་པ་འབུལ། རང་གཞན་སེམས་ཅན་ཐམས་ཅད་ཀྱི་ཚེ་སྲོག་ལ་བར་དུ་གཅོད་ཅིང་འཚེ་བའི་བདུད་བགེགས་ལོག་འདྲེན་སོགས་དུས་མིན་འཆི་བའི་རྐྱེན་དང་བར་ཆད་ཐམས་ཅད་བསལ། རང་གི་བླ་ཚེ་ཆད་ཉམས་ཡར་བ་དང་། ཕྱོགས་སྐྱོང་སྡེ་བརྒྱད་གདུག་པ་ཅན་རྣམས་ཀྱིས་བརྐུས་འཕྲོག་ཁྱེར་བ་དང་། གཞན་ཡང་ཕྱི་འབྱུང་བ་ས་ཆུ་མེ་རླུང་ནམ་མཁའ་དང་བཅས་པའི་དྭངས་བཅུད། ནང་ཚེ་ལ་དབང་བའི་རིག་འཛིན་དྲང་སྲོང་ལྷ་ཀླུ་མཐུ་བོ་ཆེ་རྣམས་ཀྱི་ཐུགས་རྗེ་བྱིན་རླབས་ནུས་མཐུ་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་བསྡུས་པ་ལྟར་འཆི་མེད་ཡེ་ཤེས་ཀྱི་བདུད་རྩི་འོད་དང་འོད་ཟེར་གྱི་རྣམ་པས་ཚུར་བསྡུས་རང་གི་སྤྱི་བོ་ནས་ཞུགས་ལུས་ཐམས་ཅད་གང་། དྭངས་མའི་དྭང ས་མ་ཐམས་ཅད་ཧཱུྃ་ཡིག་ལ་ཐིམ་པས་སྐྱེ་འཆི་མེད་པ་རྡོ་རྗེའི་སྐུ་འགྲུབ་པར་མོས་ལ་བཟླས་པ་བྱ། ཡང་རྟ་མགྲིན་གྱི་ལྗགས་སྟེང་དུ་པདྨ་དམར་པོའི་ལྟེ་བར་ཧཱུྃ་ཡིག་དམར་པོ་འོད་འབར་བ་གསལ་བ་ལས། ཧཱུྃ་ཡིག་དམར་པོ་རང་སྒྲ་སྒྲོགས་བཞིན་པའི་ཚོགས་བསམ་གྱིས་མི་ཁྱབ་པ་འཕྲོས། ངག་མནན་ངག་སྐྱོན་ཐམས་ཅད་དག བདེ་བར་གཤེགས་པ་ཐམས་ཅད་ལ་གསུང་མཉེས་པའི་མཆོད་པ་ཕུལ། གསུང་གི་བྱིན་རླབས་བསྡུས་གསང་སྔགས་རིག་སྔགས་དྲང་སྲོང་བདེན་ཚིག་སྨྲ་བ་རྣམས་ཀྱི་བདེན་མཐུ་ནུས་སྟོབས་དང་། བརྟན་གཡོའི་སྒྲ་དབྱངས་དྭངས་མ་ཐམས་ཅད་སྔགས་ཕྲེང་དང་དབྱང་གསལ་འོད་ཟེར་གྱི་རྣམ་པས་བསྡུས་ནས་ཧཱུྃ་ཡིག་ལ་ཐིམ་པས་ངག་ལ་བདེན་ཚིག་གྲུབ། མཐུ་སྟོབས་དང་ནུས་པ་མེ་ལྟར་འབར། གསུང་གསང་བ་བས མ་མི་ཁྱབ་པ་ལ་དབང་འབྱོར། སྨྲ་བའི་དབང་ཕྱུག་ཆེན་པོ་འགྲུབ་པར་བསམས་ལ་བཟླ། ཡང་གསང་བདག་གི་ཐུགས་ཀར་རྡོ་རྗེའི་ལྟེ་བར་ཧཱུྃ་མཐིང་ག་གསལ་བ་ལས། འོད་ཟེར་སྔགས་ཕྲེང་དང་བཅས་པ་འཕྲོས་པས་ཆགས་སོགས་ཉོན་མོངས་པ་སྦྱངས། མ་དག་གཟུང་འཛིན་སྒོ་ལྔའི་བག་ཆགས་ཀྱི་རྒྱུ་ལམ་བཅད། དག་པ་ཡེ་ཤེས་ཀྱི་རྩ་སྒོ་ཕྱེས། བདེ་བར་གཤེགས་པ་རྣམས་ལ་ཐུགས་མཉེས་པའི་མཆོད་པ་ཕུལ། ཐུགས་མཁྱེན་བརྩེའི་ཡེ་ཤེས་ཐམས་ཅད་བསྡུས་ནས་ཧཱུྃ་ལ་ཐིམ་པས། མི་བརྗེད་པའི་གཟུངས་དང་། ཐོགས་པ་མེད་པའི་ཤེས་རབ། མི་འཇིགས་པའི་སྤོབས་པ། མངོན་པར་ཤེས་པ་དང་། རྡོ་རྗེ་ལྟ་བུའི་ཏིང་ངེ་འཛིན་སོགས་བདེ་བར་གཤེགས་པའི་ཐུགས་ཀྱི་གསང་བ་བསམ་མི་ཁྱབ་པ་ལ་དབང་འབྱོར་བར་མོས་ལ་བཟླས་པ་བྱ་སྟེ། དེ་དག་རྣམས་ཀྱི་བར་མཚམས་སུ༔ བཟླས་པ་ལྔ་སྒྲིལ་དབྱངས་སུ་ལེན༔ ཡི་དམ་དངོས་གྲུབ་སྒྲུབ་པའོ༔ཞེས་གསུངས་སོ། །གསུམ་པ་ནི། ལས་སྦྱོར་གང་འདོད་ལྡེ་ཁ་བསྒྱུར༔ ཞེས་གསུངས་ཏེ། དེ་ལའང་ལས་བཞི་སྤྱིར་སྒྲུབ་པ་དང་། བྱེ་བྲག་དྲག་པོའི་ཁ་བསྒྱུར་གཉིས་ལས། དང་པོ་ནི། ལྷ་ཚོགས་རྣམས་ཀྱི་གནས་ལྔ་ནས༔ ཞེས་སོགས་ཏེ། དེ་ཡང་ལྷ་ཚོགས་ཐམས་ཅད་ཀྱི་སྤྱི་མགྲིན་སྙིང་ལྟེ་གསང་བ་ལྔར། ཧཱུྃ་ཡིག་དཀར་དམར་མཐིང་སེར་ལྗང་གུའི་ཚོགས་འོད་ཟེར་འཕྲོ་བར་གསལ་བཏབ་སྟེ། དེ་ལས་འཕྲོས་པའི་འོད་ཟེར་གྱི་རྩེ་ལས་སྔགས་ཕྲེང་དང་ཁྲོ་བོ་འཆོལ་བའི་ཚོགས་བསམ་གྱིས་མི་ཁྱབ་པ་འཇིག་རྟེན་གྱི་ཁམས་ཐམས་ཅད་ཁྱབ་པར་འཕྲོས། སྐྱེ་འགྲོ་རྩི་ཤིང་ནགས་ཚལ་སོགས་སྣོད་བཅུད་ཐམས་ཅད་ཀྱང་རྡོ་རྗེ་ཁྲོ་བོའི་སྐུར་གྱུར་ཏེ། ཞལ་དང་སྔགས་ཕྲེང་ལས། ཧཱུྃ་ཡིག་གི་སྒྲ་གདངས་ཀྱིས་སྟོང་གསུམ་གཡོ་བར་བྱེད་ཅིང་། བྱེ་བྲག་ཏུ་ཞི་བ་ལ་སྐུ་དང་སྔགས་ཕྲེང་དཀར་པོ་རང་སྒྲ་སྙན་ལ་འཇེབས་པའི་སྤྲོ་བསྡུས་སྦྱོར་བས་རང་གཞན་གྱི་སྒྲིབ་གཉིས་བག་ཆགས་ནད་གདོན་ཐམས་ཅད་ཞི་བ་དང་། རྒྱས་པ་ལ་སྐུ་དང་སྔགས་ཕྲེང་སེར་པོ་རང་སྒྲ་བརྗིད་ཅིང་ཡིད་དུ་འོང་བས་བདག་གཞན་ཀྱི་ཚེ་བསོད་དཔལ་འབྱོར་རིག་རྩལ་གྱི་ཡོན་ཏན་ཐམས་ཅད་རྒྱས་པར་མོས་པ་དང་། དབང་ལ་སྔགས་ཕྲེང་ཁ་དོག་དམར་པོ་དང་རྔམས་པའི་སྒྲ་ཡིས་ཕྱི་ནང་སྣོད་བཅུད་རླུང་སེམས་སྣང་བ་ཐམས་ཅད་དབང་དུ་འདུས་པ་དང་། དྲག་པོ་ལ་སྔགས་ཕྲེང་སོགས་མཐིང་ཁ་ཚ་ཞིང་རྩུབ་པ་དང་མེ་མཚོན་སོགས་ཀྱི་ཆར་དང་གཏུམ་དྲག་རི་རབ་འབུམ་ཉིལ་བ་ལྟ་བུའི་སྐད་ཀྱིས། དགྲ་བགེགས་འབྱུང་པོ་ལོག་པར་འདྲེན་པའི་ཚོགས་རྣམས་བཅོམ་ཞིང་རྣམ་ཤེས་བདེ་བ་ཆེན་པོར་སྦྱར་བ་དང་། ཐུན་མོང་དུ་འོད་ཟེར་སོགས་ཁ་དོག་སྣ་ཚོགས་པ་དང་སྔགས་ཀྱི་སྒྲ་གདངས་ཀྱིས་སྒྲིབ་གཉིས་བྱང་། ཡེ་ཤེས་རྒྱས། འགྲོ་ཀུན་རྣམ་གྲོལ་གྱི་དཔལ་ལ་སྦྱོར་ཞིང་སྣོད་བཅུད་ཡེ་ཤེས་ཀྱི་འཁོར་ལོ་སྦྱང་བར་མོས་ཏེ། དེ་ཡང་བློ་ཆེན་ཅིག་ཅར་རམ་གསལ་དཀའ་ན་རིམ་གྱིས་དམིགས་པ་དང་བྱེ་བྲག་ལས་གང་འདོད་སྐབས་དང་སྦྱར་ཏེ། ཧཱུྃ་བདུན་སྒྲིལ་ཉིད་བཟླ་བར་བྱ་བ་སྟེ། བཟླས་པ་བདུན་བསྒྲིལ་ལས་མཐུན་དབྱངས༔ སྙན་བརྗིད་རྔམས་གཏུམ་སྐབས་བཞིན་སྦྱར༔ ཕྲིན་ལས་སོ་སོར་གཙོར་སྒྲུབ་ན༔ དེ་དང་དེ་ཡི་དམིགས་བཟླས་དབྱེ༔ ཞེས་གསུངས། གཉིས་པ་ནི། མེ་དབལ་ཐུགས་ལས་འབར་བའི་ཧཱུྃ༔ སོགས་ཏེ། དེ་ཡང་། གསང་བའི་ཁྲོ་རྒྱལ་ཡཀྴ་མེ་དབལ་གྱི་ཐུགས་སྲོག་ཧཱུྃ་ལས། ཧཱུྃ་ཡིག་ཐོག་ལྟ་བུ་རྣོ་ངར་གཅོད་པའི་ངར་དང་ལྡན་པ་དཔག་ཏུ་མེད་པ་འཕྲོས། གསར་བྱུང་གི་མི་བསྲུན་སྡེ་བརྒྱད་གདུག་པ་ཅན་ཐམས་ཅད་ཚར་བཅད། སྲོག་གི་སྙིང་པོ་འཕྲོག ཀུན་ཀྱང་བཀའ་ཉན་གསུང་སྡོད་དུ་བྱེད་པར་བསམ་ལ་ཧཱུྃ་བདུན་སྦྲེལ་བཟླ། ཡང་ཡེ་ཤེས་ཁྲོ་བཅུ་ཡབ་ཡུམ་གྱི་ཐུགས་ཀ་ནས་ཧཱུྃ་གི་ཚོགས་བསམ་གྱིས་མི་ཁྱབ་པ་ཕྱོགས་བཅུར་འཕྲོས། ཕྱོགས་སྐྱོང་ལྷ་ཀླུ་གདོན་བགེགས་ཀྱི་ཚོགས་རྣམས་གཟིར་ཞིང་ཚར་བཅད། སྟོབས་བཅུའི་ཡེ་ཤེས་རྫོགས་ཤིང་། དབང་བཅུའི་དངོས་གྲུབ་བརྙེས་པར་བསམས་ལ་བཟླ། ཡང་གྲོ་ལོད་ཀྱི་ཕྱག་མཚན་རྡོ་རྗེ་རྩེ་དགུ་པ་ལས། ཧཱུྃ་ཡིག་མེ་འབར་བ་དཔག་ཏུ་མེད་པ་མཁའ་དབྱིངས་ཁྱབ་པར་འཕྲོས། སྟེང་གདོན་གཟའ་གདོང་རྒྱུ་སྐར་གྱི་ཚོགས་ཐམས་ཅད་བཏུལ་ཞིང་། ནད་དང་གནོད་པ་ཀུན་ཞི་བར་བསམས་ལ་བཟླ། ཡང་སྤྱི་བོའི་ཡེ་ཤེས་ཁྱུང་ཆེན་གྱི་ཐུགས་ལས་སྤྲོས་པའི་ཧཱུྃ་གི་ཚོགས་ཀྱིས་ས་འོག་ཀུན་གང་། འོག་གདོན་ཀླུ་དང་ས་བདག་གི་ཚོགས་བཅོམ། ཕ་རོལ་གྱི་བྱད་གཏད་དང་ངན་སྔགས་ཀྱི་སྦྱོར་བ་ཐམས་ཅད་བཤིག ཀླུ་གཉན་ས་བདག་གི་ནད་རིགས་ཐམས་ཅད་བསལ་བར་བསམས་ལ་བཟླ། ཡང་ཕྱག་མཚན་ཕུར་བུའི་དབལ་ལས་ཧཱུྃ་གི་སེར་ཐུན་ཆར་ལྟར་བབས་པས། དམ་སྲིའི་སྡེ་རིགས་དཔུང་དང་བཅས་པ་ལྷག་མེད་དུ་བཅོམ་ནས་རྣམ་ཤེས་ཆོས་དབྱིངས་སུ་བསྟིམ་པར་མོས་ལ་བཟླ། ཡང་ལྕགས་སྡིག་ལས་སྤྲོས་པའི་ཧཱུྃ་གི་ཐོག་གནམ་ས་གང་བས་རྒྱལ་བསེན་ཚོགས་རྣམས་གནད་ནས་གཟིར་ཞིང་རང་རང་གི་གནས་རྟེན་བཤིག་པས། ཐམས་ཅད་འཁུ་མི་ནུས་ཤིང་བཀའ་དང་དམ་ལས་ནམ་ཡང་འདའ་བ་མེད་པར་བསམས་ལ་བཟླ། ཡང་ཞབས་ཀྱི་རྒྱ་སྟག་ཁྲོས་པའི་སྐུ་ལས་ཧཱུྃ་ཡིག་གྲངས་མེད་པ་སྤྲོས་པས་གསར་བྱུང་གི་འབྱུང་པོའི་ཚོགས་ཐམས་ཅད་རང་དབང་མེད་པར་བཀུག་ནས་ཞབས་ཀྱི་གདན་དུ་བྱས་ཏེ་གནམ་ལྕགས་ཀྱི་སྡེར་མོས་གཅུན་{གཅུམ}པས་བཀའ་ཉན་གསུང་སྡོད་དུ་དམ་ལ་བཏགས་པར་མོས་ཏེ། ཐམས་ཅད་ལ་རྟགས་མ་མཐོང་གི་བར་དུ་ཀུན་ལ་གཏུམ་ཆོད་དུ་ཧཱུྃ་བདུན་སྦྲེལ་ཉིད་བཟླ་བར་བྱ་ཞིང་གཞན་ཡང་ཇི་ལྟར་འདོད་པའི་ལས་རབ་འབྱམས་ལ་དེ་དང་མཐུན་པའི་དམིགས་པའི་ཁ་བསྒྱུར་གྱི་གནད་ལ་མཁས་པར་བྱ་སྟེ། ཀུན་ལ་བདུན་སྦྲེལ་གཏུམ་ཆོད་དུ༔ ངེས་པའི་རྟགས་མཐོང་བར་དུ་འབད༔ གཞན་ཡང་ཇི་ལྟར་འདོད་པའི་ལས༔ འདུན་སྟངས་ཏིང་འཛིན་ཁ་བསྒྱུར་བས༔ སྣ་ཚོགས་ནོར་བུའི་རྒྱལ་པོ་བཞིན༔ ཐམས་ཅད་འབྲུ་གཅིག་བཟླས་པས་འགྲུབ༔ ལས་ཀྱི་སྦྱོར་བ་མཐར་ཐུག་གོ༔ ཞེས་གསུངས། དེ་ཐམས་ཅད་ཀྱང་དབྱིངས་སུ་སྐྱེལ་ཞིང་དགོངས་པ་མི་འགྱུར་བའི་གཟེར་གྱིས་རྒྱས་ཐེབས་པ་གལ་ཆེ་སྟེ། རྩ་གསུམ་དགོངས་འདུས་ལས། མདོར་ན་གསལ་བ་རྣམ་གསུམ་ལ༔ བརྟེན་ནས་སྐུ་ཡི་ཏིང་འཛིན་སྒྲུབ༔ སྙིང་པོ་སྔགས་ཀྱི་གཟེར་གདབ་པས༔ གསུང་གི་ནུས་པ་རྒྱུད་ལ་ཞུགས༔ འཕྲོ་འདུས་དགོངས་པ་སྣ་ཚོགས་ཀྱིས༔ཡོན་ཏན་ཕྲིན་ལས་འདོད་རྒུར་འཆར༔ མཐར་ཐུག་ལྷ་ནི་སེམས་ཀྱི་གཤིས༔ སེམས་ཉིད་རོལ་རྩལ་ལྷ་སྐུར་སྣང༔ ལྷ་དང་རང་སེམས་དབྱེར་མེད་པ༔ དགོངས་པ་མི་འགྱུར་གདེང་བསྐྱེད་ལ༔ དུས་གསུམ་རྟོག་པས་མ་བསླད་པའི༔ ཐུགས་དགོངས་མ་བཅོས་ངང་དུ་བཞག༔རྩ་གསུམ་ཡེ་ཤེས་ཚེ་འདིར་འགྲུབ༔ ཅེས་གསུངས་པ་གཞིན་ཤེས་པར་བྱ་བ་ནི་ཅིས་ཀྱང་གལ་ཆེའོ། །གསུམ་པ་ཐུགས་རྫོགས་རིམ་དེ་ཁོ་ན་ཉིད་ཀྱི་རྣལ་འབྱོར་ནི། སྣང་བ་ལྷ་ལ་གྲགས་པ་སྔགས༔ དྲན་རྟོག་ཡེ་ཤེས་སོགས་ཀྱིས་བསྟན་སྟེ། དེ་ལྟར་བསྒོམ་པའི་སྣོད་བཅུད་རྟེན་དང་བརྟེན་པའི་བསྐྱེད་རིམ་གྱི་སྣང་ཆ་ཐམས་ཅད་མེ་ལོང་གི་རླངས་ཡལ་བ་ལྟར་སྐད་ཅིག་གིས་ཡལ་ནས་འོད་གསལ་གཉུག་མའི་ཀློང་དུ་གསལ་སྟོང་འཛིན་མེད་དུ་མཉམ་པར་བཞག དེ་ལས་ལྡང་བ་ན་ནམ་མཁའ་ལ་སྤྲིན་འབྱུང་བ་བཞིན་དུ་སྐད་ཅིག་གིས་ལྷ་སྐུར་ལམ་གྱིས་གསལ་ཏེ། སྣང་བ་ཐམས་ཅད་ལྷ། གྲགས་པ་གསུང་། དྲན་རྟོག་ཡེ་ཤེས་ཆེན་པོ་སྟེ། དེ་ཐམས་ཅད་ཀྱང་ཡེ་གྲོལ་ཀུན་བཟང་གི་དགོངས་པ་རང་བྱུང་གདོད་མའི་ཀློང་དུ་རོ་གཅིག་པའི་ཡེ་སྟོང་འོད་གསལ་ཆེན་པོར་ལ་ཟློ་བ་སྟེ། འདི་ལ་གསུམ། ལྟ་བས་ཐག་བཅད་པ། སྒོམ་པས་ཉམས་སུ་ལེན་པ། འབྲས་བུ་དབྱིངས་སུ་སྐྱེལ་བའོ། །དང་པོ་ནི། འཁོར་འདས་ཐམས་ཅད་རིག་པའི་རྩལ༔ རང་རིག་དུས་གསུམ་འགྱུར་བ་མེད༔ མ་བྱས་མ་བཅོས་བབས་ལས་བྱུང༔ སངས་རྒྱས་སྐུ་གསུམ་གཤིས་ལ་རྫོགས༔ ཞེས་པ་སྟེ། འདི་ལྟར་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཡེ་གདོད་མ་ནས་རང་སེམས་རིག་པའི་རྩལ་ལས་ཤར་ཞིང་སྣང་བ་མ་གཏོགས་གཞན་གང་དུའང་གྲུབ་པ་མེད་པར་ཐག་གཅད་པར་བྱ་སྟེ། རྡོ་རྗེ་གུར་ལས། རིན་ཆེན་སེམས་ལས་ཕྱིར་གྱུར་པའི། །སངས་རྒྱས་མེད་ཅིང་སེམས་ཅན་མེད། །ཅེས་སོ། །དེ་ཡང་ཕྱི་རོལ་གྱི་སྣང་བ་སྣ་ཚོགས་སུ་སྣང་ཞིང་ཞེན་པའི་ཀུན་རྟོག་འདི་ཐམས་ཅད། རང་སེམས་འཁྲུལ་པའི་སྣང་བ་ཙམ་ལས་གཞན་ཕྱི་རོལ་ན་དོན་བདེན་པར་གྲུབ་པ་རྡུལ་ཙམ་ཡང་མེད་དེ། དཔེར་ན་ཆུ་ལྟ་བུའི་ཕྱི་རོལ་གྱི་དངོས་པོ་གཅིག་ལའང་རིགས་དྲུག་གི་སེམས་ཅན་སོགས་ལས་མི་མཐུན་པའི་འགྲོ་བ་སོ་སོར་བག་ཆགས་སད་པའི་དབང་གིས་རིས་སུ་མ་ཆད་པར་སྣང་བ་སྣ་ཚོགས་སུ་སྣང་བའི་ཕྱིར། ཐེག་བསྡུས་ལས། དངོས་གཅིག་ཡིད་ནི་ཐ་དད་ཕྱིར། །དོན་མ་གྲུབ་པར་སྣང་བ་ཡིན། །ཞེས་གསུངས། དེའི་ཕྱིར་དཔེར་ན་གཉིད་ཀྱི་སྐབས་སུ་རྟ་གླང་སོགས་རྨི་ལམ་གྱི་སྣང་བ་སྣ་ཚོགས་སུ་སྣང་ཡང་སེམས་དང་སེམས་ལས་གཞན་དུ་གྲུབ་པ་རྡུལ་ཙམ་ཡང་མི་དམིགས་པ་དེ་བཞིན་དུ། འདི་ལྟར་སྣ་ཚོགས་སུ་སྣང་བའི་ཆོས་ཐམས་ཅད་ཀྱང་རང་བྱུང་གདོད་མའི་གཤིས་ལ་སྔོན་མེད་ཕྱིས་མེད་པར་འདིར་མེད་སྣང་སྟོང་གཟུགས་འཁྲུལ་སྣང་སྐྲ་ཤད་འཛག་པ་ལྟ་བུ་སྟེ། སེམས་ཉིད་རང་བཞིན་གྱིས་འོད་གསལ་བའི་བདེ་གཤེགས་སྙིང་པོ་ལ་ནི་ནམ་ཡང་འཁྲུལ་པའི་རྐྱེན་གྱིས་བསླད་པ་མེད་དེ། རྒྱུད་བླ་མ་ལས། སེམས་ཀྱི་རང་བཞིན་འོད་གསལ་གང་ཡིན་པ། །དེ་ནི་ནམ་མཁའ་བཞིན་དུ་འགྱུར་མེད་དེ། །ཡང་དག་མི་རྟོག་ལས་བྱུང་འདོད་ཆགས་སོགས། །གློ་བུར་དྲི་མས་དེ་ཉོན་མོངས་མི་འགྱུར། །ཞེས་གསུངས། དེས་ན་སེམས་ཉིད་འོད་གསལ་བའི་གཤིས་ལུགས་སྤྲོས་པ་ཐམས་ཅད་དང་བྲལ་བ་ནི་གཞི། དེ་ཉིད་ལམ་དུ་བྱེད་པ་ནི་ལམ། དེ་མངོན་དུ་གྱུར་པ་ནི་མཐར་ཕྱིན་འབྲས་བུ་སྟེ། ཀུན་རྫོབ་སྣང་ཚུལ་ཙམ་ལ་གསུམ་དུ་དབྱེ་ནའང་། དོན་དམ་པར་རང་བཞིན་གཉིས་སུ་མེད་པས་དུས་གསུམ་འཕོ་འགྱུར་དང་བྲལ་བའི་ཆོས་ཉིད་དེ། ཉེས་པ་གློ་བུར་དང་ལྡན་དང་། །ཡོན་ཏན་རང་བཞིན་གྱིས་ལྡན་ཕྱིར། །ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པ་ཆོས་ཉིད་དོ། །ཞེས་སོ། །དེའི་ཕྱིར་ནང་རང་གི་སེམས་ལ་བརྟགས་ཤིང་དཔྱད་ན། གང་ནས་ཀྱང་མ་འོངས། གང་དུ འང་མི་འགྲོ། ཅི་ལའང་མི་གནས། དངོས་པོ་དང་མཚན་མའི་ཆོས་སུ་མ་གྲུབ་པའི་རང་བཞིན་སྟོང་པ་ཉིད། འཁོར་འདས་ཐམས་ཅད་ཀྱི་འཆར་གཞིར་མ་འགགས་པ། རྡོ་རྗེ་ནམ་མཁའ་དྭངས་པའི་དཀྱིལ་ལྟ་བུ། སྣང་རིག་ངོས་བཟུང་དང་བྲལ་བའི་གསལ་སྟོང་རྗེན་པར་འཆར་བ་འདི་ནི་གཉུག་མ་ཆོས་ཉིད་ཀྱི་བབས་བློ་འདས་རང་བྱུང་གི་ཡེ་ཤེས། རང་བབས་གདོད་མའི་གནས་ལུགས་ཏེ། བདེ་བ་རབ་འབྱམས་ལས། རྩ་བ་མེད་པའི་སེམས་ཉིད་ནི། །བཙལ་བས་མི་རྙེད་ངོས་བཟུང་མེད། །ཇི་བཞིན་ཡེ་བཞིན་སྟོང་པའི་ངང་། །བརྗོད་བྲལ་རང་བྱུང་ཡེ་ཤེས་སོ། །ཞེས་དང་། སློབ་དཔོན་དགའ་རབ་རྡོ་རྗེས། སེམས་ཀྱི་རང་བཞིན་ཡེ་ནས་བུངྔྷ་སྟེ། །སེམས་ལ་སྐྱེ་འགག་མེད་པས་ནམ་མཁའ་འདྲ། །ཞེས་སོ། །འདི་ཉིད་གསར་དུ་རྒྱུ་ཡིས་མ་བསྐྱེད། རྐྱེན་གྱིས་མ་བཅོས། རྩོལ་བས་མ་བསྒྲུབས་པར་རང་བྱུང་གདོད་མའི་གཤིས་ལུགས་སྐུ་གསུམ་འདུ་འབྲལ་མེད་པའི་དགོངས་པར་ཡེ་ནས་གནས་པའི་ཚུལ། ཀུན་བྱེད་ལས། ཀྱེ་སེམས་དཔའ་ཆེན་པོ་ཉོན་ཅིག ཀུན་བྱེད་བྱང་ཆུབ་ང་ཡི་རང་བཞིན་ལ། །མ་བཙལ་རང་བཞིན་ལྷུན་གྱིས་གྲུབ་པ་ནི། །རྒྱལ་བ་ཀུན་གྱི་སྙིང་པོ་སྐུ་གསུམ་སྟེ། །ང་ཡི་ངོ་བོ་མ་བཅོས་ཆོས་སྐུར་གྲུབ། །ང་ཡི་རང་བཞིན་མ་བཅོས་ལོངས་སྤྱོད་རྫོགས། །ང་ཡི་ཐུགས་རྗེ་མངོན་བྱུང་སྤྲུལ་སྐུ་གསུམ། །བཙལ་ནས་གྲུབ་པའི་འབྲས་བུར་བསྟན་པ་མིན། །མ་བཙལ་ཡེ་ནས་ལྷུན་གྱིས་གྲུབ་པ་ཡིན། །ཞེས་གསུངས། དེ་ཡང་རང་བྱུང་རིག་པའི་ངོ་བོ་དུས་གསུམ་འཕོ་འགྱུར་དང་བྲལ་ཞིང་ངོ་བོ་གང་དུ་འང་མ་གྲུབ་པའི་སྐྱེ་མེད་སྟོང་ཉིད་སྤྲོས་པ་ཐམས་ཅད་དང་བྲལ་བའི་ཆ་ནི་ཆོས་སྐུ། དེའི་རང་བཞིན་ནམ་རང་མདངས་འགགས་མེད་ཀུན་ཁྱབ་ཏུ་འཆར་བའི་གཞི་གསལ་ལ་དེར་འཛིན་གྱིས་བསླད་མ་ཞུགས་པ་ནི་ལོངས་སྐུ། དེ་གཉིས་ཐ་དད་ཀྱི་ཕྱོགས་སུ་མ་གྱུར་པར་གསལ་བཞིན་དུ་སྟོང་། སྟོང་བཞིན་དུ་གསལ། གསལ་སྟོང་རང་བཞིན་དབྱེར་མེད་པ་ཟུང་འཇུག་གི་རྩལ་རང་ཤར་རང་གྲོལ་དུ་འཆར་བའི་ཆ་ནི་སྤྲུལ་སྐུ། དེ་གསུམ་ཀའང་རང་བཞིན་དབྱེར་མི་ཕྱེད་པ་རང་བྱུང་གཞིར་གནས་ཀྱི་ཡེ་ཤེས་གསལ་སྟོང་མཐའ་བྲལ་ཆེན་པོར་དབྱེར་མེད་རོ་མཉམ་པར་གནས་པ་ནི་མཐར་ཐུག་སྐུ་གསུམ་དབྱེར་མེད་ངོ་བོ་ཉིད་སྐུ་སྟེ། སྨིན་གཏེར་རིག་འཛིན་ཐུགས་ཐིག་ལས། སྐྱེ་མེད་སྟོང་ཆའི་ངོ་བོ་ཆོས་ཀྱི་སྐུ༔ རང་མདངས་འགགས་མེད་འཆར་བ་ལོངས་སྤྱོད་རྫོགས༔ གཉིས་སུ་མེད་པའི་རྩལ་ལས་སྤྲུལ་པའི་སྐུ༔ དེ་ལྟར་རྣམ་པ་གསུམ་དུ་ཐ་དད་ཀྱང༔ ངོ་བོ་གཅིག་འདུས་ངོ་བོ་ཉིད་ཀྱི་སྐུ༔ སྐུ་བཞི་ལྷུན་གྱིས་གྲུབ་པའི་བདག་ཉིད་དོ༔ ཞེས་གསུངས། དེ་ལྟ་བུའི་གཉུག་མ་ཆོས་ཉིད་ཀྱི་ངོ་བོ་ལ་སྐུ་གསུམ་རང་ཆས་ལྷུན་གྲུབ་ཏུ་གནས་པའི་ཕྱིར། དེའི་རྩལ་ལས་ཤར་བའི་རོལ་པ་སྣ་ཚོགས་ཀྱང་ཡེ་ནས་སྐུ་དང་ཡེ་ཤེས་ཀྱི་རང་བཞིན་ལས་མ་འདས་ཏེ། ངོ་བོ་གསེར་དུ་གྲུབ་ཕན་ཆད་དེའི་རྣམ་འགྱུར་སྣ་ཚོགས་ཀྱང་གསེར་གྱི་རང་བཞིན་ལས་མི་འདའ་བ་བཞིན་ཏེ། གསང་སྙིང་ལས། སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་གསུངས། དེས་ན་འོད་གསལ་སེམས་ཀྱི་ཆོས་ཉིད་རིག་སྟོང་ཟུང་འཇུག་རྫོགས་པ་ཆེན་པོའི་དོན་རྟོགས་ན་ཆོས་ཅན་སེམས་ཀྱི་འཁྲུལ་རྟོག་མཐའ་དག་ཀྱང་ཆོས་ཉིད་དེའི་ཀློང་ལས་མ་འདས་པས་མི་རྟོག་ཆོས་སྐུའི་དགོངས་པར་ཡེ་ནས་གནས་པའི་ཚུལ་ཡང་། ཀུན་བྱེད་ལས། ཇི་ལྟར་སྣང་བ་དེ་བཞིན་ཉིད་དུ་གཅིག །འདི་ལ་སུས་ཀྱང་བཅོས་པར་མ་བྱེད་ཅིང་། །མ་བཅོས་མཉམ་པའི་རྒྱལ་པོ་དེ་ལ་ནི། །མི་རྟོག་ཆོས་སྐུའི་དགོངས་པ་ལྷུན་གྱིས་གྲུབ། །ཞེས་གསུངས། དེའི་ཕྱིར་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་རྫོགས་པ་ཆེན་པོའི་དཀྱིལ་འཁོར་དུ་ལྷུན་གྱིས་གྲུབ་པས་སྤང་གཉེན་རྩོལ་སྒྲུབ་ལས་འདས་པར་ཤེས་པར་བྱ་བ་ནི། དུས་གསུམ་གྱི་རྒྱལ་བ་རིག་འཛིན་བརྒྱུད་པའི་ཐུགས་བཅུད། ཐེག་པ་དང་གྲུབ་མཐའ་ཐམས་ཅད་ཀྱི་མཐར་ཐུག་གི་དགོངས་པའི་སྐྱེལ་སོ་བླ་ན་མེད་པ་ཡིན་པས་དེ་ལྟར་དོན་གྱིས་ལ་བཟླ་བ་གཅེས་སོ། །གཉིས་པ་ནི། ཡེ་གྲོལ་དབྱིངས་སུ་བསྐྱར་གཞི་མེད༔ ཞེས་སོགས་ཀྱིས་བསྟན་ཏེ། དེ་ཡང་སྨོས་མ་ཐག་པ་ལྟར། གཞི་ཡེ་ནས་འཆིང་གྲོལ་ལས་འདས་པའི་སྤྲོས་བྲལ་ཀ་དག་གདོད་མའི་དབྱིངས་སུ་ཆོས་ཐམས་ཅད་མངོན་པར་བྱང་ཆུབ་པས། ཐེག་པ་འོག་མ་པ་ལྟར་སྤང་གཉེན་རྩོལ་སྒྲུབ་ཀྱི་ལམ་གྱིས་གསར་དུ་བསྐྱར་ཏེ་གྲོལ་དུ་མེད་པར་ཐག་བཅད་ནས། རང་བྱུང་གདོད་མའི་གནས་ལུགས་དེའི་ངང་དུ་ཅེར་གྲོལ་ཅོག་བཞག་ཆེན་པོར་འགག་བསྡོམས་ཏེ། གཟུང་འཛིན་གྱི་རྟོག་ཚོགས་ཐམས་ཅད་སྦྲུལ་མདུད་རང་སར་གྲོལ་བ་བཞིན། ངོ་བོ་བློ་འདས་ཀྱི་ཡེ་ཤེས་གང་ཤར་སྤང་བླང་དང་བྲལ་བ་གཏད་མེད་ཡོངས་གྲོལ་གྱི་ཀློང་དུ་བྱས་ཆོས་གྲུབ་མཐའི་འཛིན་རྟོག་ཐམས་ཅད་གདོད་ནས་དག་པའི་བྱར་མེད་ཡེ་ཟིན་ཆེན་པོ་ཆོས་ཟད་ཟང་ཐལ་རྗེན་པར་ལམ་དུ་ཁྱེར་བ་སྟེ། དོན་གྱི་མདོ་འགག་ནི། ཀུན་མཁྱེན་བླ་མ་མཆོག་གི་རྡོ་རྗེའི་གསུང་གསང་ཞིག་བླ་མ་སྐུ་བཞིའི་ཁྲིད་ཡིག་ལས། རྟག་ཏུ་ཉམས་ལེན་བྱ་རྒྱུའི་སྙིང་པོ་ཧྲིལ་དྲིལ་ན། རྣམ་རྟོག་རང་གི་ངོ་བོ་ལ་ཁྱབ་ཀྱང་སྔ་ཕྱིའི་དྲན་རྟོག་བསམ་མནོས་བཅོས་བསླད་མ་བྱས་པའི་ད་ལྟར་གྱི་རིག་པ་ངོ་བོ་ངོས་བཟུང་ལས་འདས་པ། རང་གསལ་རང་བྱུང་གདོད་ནས་མི་འགྱུར་བའི་ཡེ་ཤེས། བློ་འདས་ཀྱི་གནས་ལུགས་ཝ་ལེ་སང་ངེ་ཕྱམས་གདལ་ཆེན་པོ་ཉིད་ཀ་དག་རང་བྱུང་གི་ཡེ་ཤེས་སུ་ཤེས་པ་ནི་ངོ་རང་ཐོག་ཏུ་འཕྲོད་པ། དྲན་བསམ་སྔ་མ་འགག ཕྱི་མ་མ་སྐྱེས། ད་ལྟའི་རིག་པ་སྐད་ཅིག་སོ་མ་ཧྲིག་གེ་སང་ངེར་གནས་པ་དེ་ལ་བཞི་ཆ་སུམ་བྲལ་ཅེས་བྱ་སྟེ། དེ་ཉིད་ཁོ་ན་ལས་རྒྱལ་བའི་དགོངས་པ་གཞན་ཏུ་མེད་པར་རྟོགས་པ་ནི་ཐག་གཅིག་ཐོག་ཏུ་བཅད་པ། དེ་ལྟར་ངོ་འཕྲོད་ཅིང་ཐག་ཆོད་ཀྱི་ངེས་ཤེས་སྐྱེས་ཕྱིན་ཆད། བསྒོམ་མ་མྱོང་དང་འབྲལ་མ་མྱོང་། །མི་བསྒོམ་དོན་དང་མི་འབྲལ་བ། །ཞེས་པའི་དོན་བཞིན་ཅིར་ཡང་མི་སྒོམ་ཞིང་གནས་ལུགས་ཀྱི་དོན་དང་ནམ་ཡང་མི་འབྲལ་བས་གཟུང་འཛིན་རྣམ་རྟོག་གི་མཚན་མ་ཇི་ལྟར་ཤར་ཡང་གཤིས་ལ་སྐྱེ་འགག་མེད་པས་སྦྲུལ་མདུད་རང་བཞིན་གྲོལ་བ་ལྟར། རིག་པའི་ནམ་མཁར་སེམས་ཀྱི་སྤྲིན་ཚོགས་ཤར་ཡང་ཕན་གནོད་མི་བྱེད་པར་རང་ཤར་རང་གྲོལ་གྱི་གནད་རིག་ནས་འཛིན་རྩོལ་སྤང་བླང་གཉེན་པོ་མེད་པར་དྲན་རྟོག་རྗེས་མེད་བྱུང་ཚོར་གཞིར་ཐིམ་ལ་སོང་བ་ནི་གདིང་གྲོལ་ཐོག་བཅའ་བ་ཞེས་བྱ་སྟེ། དེ་ལྟ་བུའི་རྫོགས་པ་ཆེན་པོ་རང་སྣང་རིས་མེད་ཀྱི་དགོངས་པ་བླ་ན་མེད་པའི་གདེང་བཟུང་བ་ལམ་གྱི་གནད་ཡོངས་སུ་རྫོགས་པ་སྒྲ་ཐལ་འགྱུར་རྩ་བའི་རྒྱུད་སོགས་ལས་རྒྱས་པར་བསྟན་པ་ཡིན་ནོ། །གནད་མདོར་བསྡུ་ན། ཀུན་མཁྱེན་ཆོས་རྗེས། ལྟ་བ་ཡེ་གྲོལ་དུ་རྟོགས་ཀྱང་། སྒོམ་པ་ཡིན་ཐོག་ཏུ་མ་བཞག་ན་འཁོར་བའི་འཁྲུལ་སྣང་ལྡོག་མི་སྲིད་པས། རིག་པ་གཤིས་ཐོག་ཏུ་གོམས་པ་གནད་དུ་ཆེའོ། །ཞེས་གདམས་པ་ལྟར་རོ། །ཞེས་གསུངས་པ་བཞིན་ཉམས་ཁྲིད་དུ་བསྐྱར་ཏེ་ཉམས་སུ་ལེན་པར་བྱའོ། །གསུམ་པ་ནི། ཀ་དག་ཀུན་གཞི་སྤྲོས་ལས་འདས༔ ཞེས་སོགས་ཀྱིས་བསྟན་ཏེ། ཀ་དག་ལྷུན་གྲུབ་ཟུང་དུ་འཇུག་པའི་གདོད་མའི་གྲོལ་གཞི་སྤྲོས་བྲལ་མཉམ་པ་ཉིད་རིག་སྟོང་ཟུང་འཇུག་དབང་བཞི་པའི་ཡེ་ཤེས་ཉིད་མངོན་སུམ་ལམ་དུ་བྱེད་པ་རྩོལ་བྲལ་ཐེག་པའི་རྒྱལ་པོ་རང་བཞིན་རྫོགས་པ་ཆེན་པོའི་ལམ་ལས། གཞི་ཀ་དག་ཁྲེགས་ཆོད་ཀྱི་ལྟ་སྒོམ་མ་འཁྲུལ་པར་ཉམས་སུ་བླངས་པས། ཤེས་ཉམས་ཡིད་དཔྱོད་ལས་འདས་པའི་རང་བྱུང་གདོད་མའི་གཤིས་ལུགས་མ་འཁྲུལ་པ་སྤྲོས་བྲལ་རིག་སྟོང་རྗེན་པའི་ཆོས་སྐུ་ཉིད་དང་པོར་གོ བར་དུ་མྱོང་། མཐར་རྟོགས་པ་མངོན་དུ་གྱུར་ཏེ། གདོད་ནས་ཆོས་ཐམས་ཅད་ཀྱི་གཤིས་ལུགས་ཆོས་ཉིད་ཀྱི་དབྱིངས་དང་འདུ་འབྲལ་མེད་པར་གནས་པའི་རིག་པའི་ཡེ་ཤེས་རྗེན་ཅེར་དུ་རྟོགས་པ་ནི་ཆོས་ཉིད་མངོན་སུམ། དེའི་ངང་དུ་ཆོས་ཉིད་ཀྱི་དྲན་པ་བསྟེན་ཏེ་མཉམ་པར་བཞག་པས་ཚོགས་དྲུག་གི་བྱུང་ཚོར་ཐམས་ཅད་གཞི་མེད་རང་གྲོལ་དུ་སོང་བ་ནི་ཉམས་གོང་འཕེལ། ཕྱིའི་སྣང་ཡུལ་དང་། ནང་གི་སེམས་ཉིད་མེ་ལོང་དང་གཟུགས་བརྙན་ལྟར་གཉིས་སུ་སྣང་ཡང་གཉིས་མེད་རོ་གཅིག་ཏུ་འདྲེས་ནས་ཐམས་ཅད་རིག་པའི་རང་རྩལ་འབའ་ཞིག་ཏུ་ཤར་བས་ཅིར་སྣང་ཆོས་ཉིད་ལས་མ་གཡོས་པ་ནི་རིག་པ་ཚད་ཕེབས། གདོད་མའི་གཤིས་ལུགས་རང་རིག་འགྱུར་བ་མེད་པ་ལ་བརྟན་པ་ཐོབ་པས་བསྒོམ་བྱ་སྒོམ་བྱེད་ཀྱི་མཚན་རྟོག་དབྱིངས་སུ་དག ཆོས་ཅན་འཁྲུལ་པའི་སྣང་བ་ཐམས་ཅད་ཆོས་ཉིད་ཀྱི་ཀློང་དུ་ཐིམ་པས་ཀ་དག་ཆོས་ཟད་དུ་གྲོལ་བའམ་ཆོས་ཉིད་ཟད་སར་འཁྱོལ་བ་ཞེས་བྱ་སྟེ། མཐར་འབྲས་སྐུ་བཞི་ཡེ་ཤེས་ལྔ་ཡི་བདག་ཉིད་གདོད་མའི་མགོན་པོ་ཀུན་བཟང་པདྨ་རྒྱལ་པོ་ཉིད་རང་བྱུང་གདོད་མའི་གཞི་ལ་ཡེ་ནས་རྫོགས་པའི་དོན་སྤྲོས་བྲལ་ཐིག་ལེ་ཆེན་པོར་མངོན་པར་བྱང་ཆུབ་པ་ནི་ལྷུན་གྱིས་གྲུབ་པའི་འབྲས་བུ་གཞི་ལ་རྫོགས་པ་ཞེས་བྱ་སྟེ། དེ་ལྟ་བུའི་དགོངས་པ་ལས་མི་གཡོ་བཞིན་དུ་རིག་རྩལ་ཧཱུྃ་གི་ངར་འདོན་དང་བཅས་ཏེ། ཕྱི་ནང་གི་འཁྲུལ་རྟོག་ཐམས་ཅད་རང་གྲོལ་གདོད་མའི་དབྱིངས་སུ་སྐྱེལ་ཞིང་ལ་བཟླ་བར་བྱ་སྟེ། རྩ་བར། ཆོས་ཉིད་སྟོང་པར་གཏིང་བཅས་ཏེ༔ རིག་རྩལ་ཧཱུྃ་གི་གསལ་ངར་འདོན༔ ཕྱི་ནང་འཁྲུལ་རྟོག་ཇི་སྙེད་པ༔ རང་གྲོལ་ཆེན་པོའི་དབྱིངས་སུ་བསྐྱལ༔ ས་མ་ཡ༔ ཞེས་གསུངས་སོ། གསུམ་པ་རྗེས་ནི། རྗེས་སུ་བསྔོ་སྨོན་རྒྱས་གདབ་ཅིང༔ ཤིས་བརྗོད་དགེ་ལེགས་གང་འཕེལ་བྱ༔ ཞེས་གསུངས་ཏེ། དེ་ལ་བསྔོ་སྨོན་ནི། ཧོ༔ བསྐྱེད་པས་ལུས་སྣང་ལྷ་སྐུར་དག༔ ཅེས་སོགས་ཏེ། དེ་ཡང་གནས་ཚུལ་ཡང་དག་དང་མཐུན་པར་ལྷ་སྐུ་ཕྱག་རྒྱའི་རྣལ་འབྱོར་བསྐྱེད་རིམ་མཐར་ཕྱིན་ནས་ནང་རང་གི་ལུས་དང་ཕྱི་ཡུལ་གྱི་སྣང་བ་ཐམས་ཅད་སྒྲིབ་བྲལ་ཟུང་འཇུག་གི་ལྷ་སྐུ་དག་པ་རབ་འབྱམས་སུ་ཤར་ཏེ་སྣང་སྟོང་སྐུ་རྡོ་རྗེ་སྤྲུལ་པའི་སྐུ་འགྲུབ་པ་དང་། ཏིང་འཛིན་དམིགས་པའི་འཕྲོ་འདུ་ལ་བརྟེན་ཏེ་བཟླས་པ་སྔགས་ཀྱི་རྣལ་འབྱོར་གྱིས་འགྲོ་འོང་སྲོག་རྩོལ་སྒྲ་སྐད་བརྗོད་པ་ཐམས་ཅད་གྲགས་སྟོང་གཞོམ་མེད་སྔགས་ཀྱི་ངོ་བོར་གྲོལ་ཞིང་ངག་གསུང་རྡོ་རྗེ་ལོངས་སྤྱོད་རྫོགས་པའི་སྐུར་སྨིན་པ་དང་། ཡིད་ཀྱི་འགྱུ་དྲན་རྟོག་ཚོགས་ཐམས་ཅད་ཐུགས་རྡོ་རྗེའི་ལམ་ཁྱེར་ལ་བརྟེན་ནས་རིག་སྟོང་ཟུང་འཇུག་རྒྱལ་བའི་ཐུགས་རྡོ་རྗེ་ཆོས་ཀྱི་སྐུའི་དགོངས་པར་རྫོགས་ཤིང་སྐུ་གསུམ་འདུ་འབྲལ་མེད་པའི་དཀྱིལ་འཁོར་ཆེན་པོར་བདག་དང་འགྲོ་ཀུན་ཚོམ་བུ་གཅིག་ཏུ་བྱང་ཆུབ་པར་སྨོན་པའོ། །གཉིས་པ་ནི། ཧོ། རྩ་བརྒྱུད་བླ་མས་བྱིན་གྱིས་རློབས༔ ཞེས་སོགས་ཏེ། དེ་ཡང་ནམ་མཁའ་གང་བའི་རྩ་བརྒྱུད་བླ་མ་ཡི་དམ་མཁའ་འགྲོ་ཆོས་སྐྱོང་གི་ཚོགས་དང་བཅས་པས་བྱིན་གྱིས་རླབས་ཤིང་མཆོག་ཐུན་གྱི་དངོས་གྲུབ་མ་ལུས་པ་སྩོལ་བ་དང་། ཕྱི་ནང་གི་བར་ཆད་སེལ་ཞིང་གང་བསམ་ཡིད་བཞིན་དུ་འགྲུབ་པའི་བདེན་ཚིག་རྡོ་རྗེའི་གླུ་དང་ཤིས་བརྗོད་ཀྱི་མེ་ཏོག་མནྡ་{ནྡྷ}ར འི་ཆར་ཆེན་པོ་བབས་པས་ཕྱོགས་དུས་འཇིག་རྟེན་ཀུན་ཏུ་དགེ་ལེགས་ཀྱི་སྣང་བ་ཆེན་པོས་ཁྱབ་པར་མོས་པའོ། །དེ་ལྟར་བརྩོན་པས་གནས་སྐབས་དང་མཐར་ཐུག་གི་ཕན་ཡོན་དང་དགོས་པའང་། གཞུང་ལས། དེ་ལྟར་ཟབ་གཉན་བྱིན་ཆེ་བའི༔ གུ་རུའི་ཐུགས་ཏིག་མཐར་ཐུག་འདི༔ ཚིག་གི་བརྗོད་པས་གསལ་འདེབས་ཤིང༔ དོན་གྱི་དགོངས་པ་ཡེངས་མེད་ངང༔ རིག་རྩལ་ངར་ལྡན་ཐོག་ལྟ་བུའི༔ རྣལ་འབྱོར་འབྲལ་མེད་རྒྱུན་དུ་བསྐྱངསཿ བར་ཆད་བགེགས་ཚོགས་འཕྲལ་དུ་ཞི༔ ཐུན་མོང་གང་འདོད་བདེ་བླག་འགྲུབ༔འཁྲུལ་རྟོག་དབྱིངས་སུ་རང་གྲོལ་ནས༔ ཁྲོ་རྒྱལ་ཆེ་དང་དབྱེར་མེད་འགྱུར༔ ས་མ་ཡ༔ ཞེས་རྡོ་རྗེའི་གསུང་གིས་བསྟན་པ་བཞིན་ལགས་པས་སྐལ་བཟང་རྣམས་ཀྱིས་བརྩོན་པས་ཉམས་སུ་ལེན་པར་རིགས་སོ། །ཤིན་ཏུ་ཡང་ཟབ་ཌཱ་ཀིའི་སྙིང་ཁྲག་བཅུད། །དམ་ཉམས་འདྲེས་ཁྱེར་དུག་ཆུས་བསླད་མིན་པར། །མངོན་དུ་སྤྱོད་ཡོད་སྔོན་གོམས་དགེ་བའི་མཐུར། །ལེགས་པར་ཤེས་ནས་བརྩོན་པའི་དཔུང་བསྐྱེད་འཚལ། །ཚུལ་འདིར་བདག་བློ་རྨོངས་པས་ཉེས་པའི་ཆ། །གང་མཆིས་སྙིང་ནས་རྩ་གསུམ་སྤྱན་སྔར་བཤགས། །འཕྲལ་དང་ཡུན་གྱི་སྒྲིབ་པར་མི་འགྱུར་ཞིང་། །འདི་འཛིན་རྣམས་ལ་བྱིན་གྱིས་རློབས་པར་མཛོད། །དེ་ལས་བྱུང་བའི་རབ་དགེ་དྲི་མེད་ཀྱིས། བདག་གཞན་འགྲོ་ཀུན་སྒྲིབ་རྒྱ་ལས་གྲོལ་ནས། །འཕོ་མེད་ཟུང་འཇུག་རྟག་པ་དམ་པའི་དཔལ། །རིག་བདག་བླ་མའི་གོ་འཕང་མངོན་བྱེད་ཤོག །ཅེས་པའང་མཆོག་སྤྲུལ་ཀུན་བཟང་བློ་གྲོས་གཞན་ཕན་མཐའ་ཡས་ཀྱི་ཐུགས་དམ་ཉམས་བཞེས་ཀྱི་ཆེད་དུ་གསུང་གིས་བསྐུལ་བ་ལྟར། ༧ གཏེར་ཆེན་བླ་མ་རིན་པོ་ཆེ་ཉིད་ལས་ལམ་འདིའི་སྨིན་གྲོལ་ཐོབ་པ་ཙམ་རྒྱུ་མཚན་དུ་བྱས་ཏེ་ཨ་གྲོ་སྔགས་དཀར། པདྨ་བདེ་བ་རྩལ་གྱིས་སྦྱར་བའི་ཡི་གེ་པ་ནི་བསྐུལ་བ་པོ་ཉིད་ཀྱིས་མཛད་པའོ། །འདིས་ཀྱང་འགྲོ་ཀུན་བདུད་བཞིའི་གཡུལ་ལས་རྣམ་པར་རྒྱལ་བའི་རྒྱུར་གྱུར་ཅིག། །།
| 