ཞེ་ཆེན་རྒྱལ་ཚབ་གསུང་འབུམ་པོད་བཅུ་པ།གླེགས་བམ། ཐ༽ཞེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ།
ཞེ་ཆེན་མཁན་པོ་པདྨ་ཀུན་བཟང་ནས་པར་དུ་བསྐྲུན།
མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།
དཔེ་སྐྲུན་གསལ་བཤད།
བསྐལ་བཟང་སངས་རྒྱས་སྟོང་གི་གདུལ་ཞིང་། སྟོང་གསུམ་མི་མཇེད་ཀྱི་ཆ་ཤས་འཛམ་གླིང་གི་བྱང་ཕྱོགས། བོད་གངས་ཅན་གྱི་བསྟན་པ་རྒྱ་མཚོའི་ཕྱི་མོ། གསང་སྔགས་སྔ་འགྱུར་བའི་བསྟན་པའི་འབྱུང་གནས། སྟོད་ན་རྡོར་སྨིན་གཉིས། སྨད་ན་ཀཿདཔལ་གཉིས། བར་ན་ཞེ་རྫོགས་གཉིས་ཞེས་གྲགས་པའི་བྱེ་བྲག་གསང་སྔགས་རྙིང་མའི་གདན་ས་ཆེ་རྒུའི་ཡ་རྒྱལ། ཞེ་ཆེན་བསྟན་གཉིས་དར་རྒྱས་གླིང་ཞེས་སྔ་འགྱུར་བཀའ་གཏེར་ཆོས་ཀྱི་རྒྱ་མཚོ་ཆེན་པོ་འཛིན་སྐྱོང་སྤེལ་གསུམ་གྱི་ཕྱག་རྗེས་བཀྲ་ཤིས་རེ་ཁ་ཆེས་ཆེར་བཀྲ་བར། མཁས་གྲུབ་གཉིས་ལྡན་གྱི་སྐྱེས་མཆོག་བགྲང་ལས་འདས་པ་བྱོན་པའི་དབུས་སུ་མངོན་པར་འཕགས་པ། གངས་ལྗོངས་རྒྱལ་བསྟན་ཡོངས་རྫོགས་ཀྱི་ཤིང་རྟ་བཀའ་བབས་བདུན་ལྡན་༧འཇམ་དབྱངས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པ་དང་། མཁས་གྲུབ་དབང་པོ་མ་ཧཱ་པཎྜི་ཏ་འཇམ་དབྱངས་མི་ཕམ་ཕྱོགས་ལས་རྣམ་རྒྱལ་རྣམ་གཉིས་ཀྱི་ཐུགས་སྲས་ཐུ་བོ། ཞེ་ཆེན་རྒྱལ་ཚབ་རིན་པོ་ཆེ་འགྱུར་མེད་པདྨ་རྣམ་རྒྱལ་དཔལ་བཟང་པོ་གང་གི་གསུང་འབུམ་མདོ་སྔགས་རིག་གནས་ཀྱི་མཛོད་ཆེན་འདི་ཉིད། སྔོན་ཆད་རྗེ་དེའི་སྲས་ཀྱི་ཐུ་བོ་ཞེ་ཆེན་ཀོང་སྤྲུལ་རིན་པོ་ཆེས་གདན་སར་ཤིང་པར་དུ་བཀོད་པ་སྙིགས་དུས་ཀྱི་སྐྱེ་འགྲོ་བསོད་ནམས་དམན་རྐྱེན་ཉམས་རྒུད་རྩ་བརླག་ཏུ་སོང་ཡང་། ཕྱིས་རྒྱ་གར་འཕགས་ཡུལ་དུ་མགོན་པོ་གང་དེའི་དགོངས་བརྒྱུད་ཀྱི་བྱིན་རླབས་ཐོབ་ཅིང་བསྟན་པ་ཡོངས་རྫོགས་ཀྱི་མངའ་བདག ༧སྐྱབས་རྗེ་དིལ་མཁྱེན་རྡོ་རྗེ་འཆང་འགྱུར་མེད་ཐེག་མཆོག་བསྟན་པའི་རྒྱལ་མཚན་མཆོག་གིས་མ་དཔེ་འཚོལ་བསྡུས་ཀྱི་སླར་ཡང་པར་བསྐྲུན་མཛད་ཅིང་བཤད་ལུང་གི་རྒྱུན་ཡང་སྤེལ་བར་མཛད་དེ་རྒྱལ་བསྟན་སྤྱི་བྱེ་ལ་སྨན་པའི་སྐུ་དྲིན་བླ་མེད་བསྐྱངས་པ་དེ་ལྟར་ཡང་། ད་ཆ་མདོ་དབུས་ཁམས་གྱི་མཚོན་པའི་འཛམ་གླིང་མཐའ་གྲུ་ཀུན་ཏུ་རྒྱལ་བསྟན་སྤྱི་དང་། ཡང་སྒོས་སྔ་འགྱུར་བའི་ལྟ་གྲུབ་དྲི་མ་མེད་པ་ཐོས་བསམ་སྒོམ་པས་འཛིན་སྐྱོང་སྤེལ་བའི་བསྟི་གནས་དགོན་སྡེ་ཁག་གི་ནང་སློབ་གཉེར་བ་ལོ་རེ་བཞིན་ཇེ་མང་དུ་འགྲོ་བ་ཚོར། འཁྲུལ་མེད་རྒྱལ་བ་དགྱེས་པའི་ལམ་གནད་གསལ་བོར་སྟོན་པའི་ལེགས་བཤད་རྨད་དུ་བྱུང་བ་རྣམས་གཟིགས་ཆོག་ཡོང་བ་དང་། དེང་གི་ཆར་སྔོན་མེད་འཕྲུལ་ཡིག་ལེགས་ཐོན་གྱིས་དཔེ་དེབ་སྤུས་དག་ཡོང་ངེས་དང་། འཇམ་མགོན་རྒྱལ་བ་ཡབ་སྲས་ཀྱི་རྡོ་རྗེའི་གསུང་གི་ཕྲིན་ལས་འཛམ་གླིང་ཕྱི་ནང་ཀུན་ཏུ་ཁྱབ་བརྡལ་ཡོང་བའི་རེ་འདུན་ཆེན་པོས། རྒྱལ་བསྟན་སྤྱི་དང་རང་བསྟན་ལ་ལྷག་བསམ་རྣམ་པར་དཀར་བ་ཞེ་ཆེན་དགོན་གྱི་མཁན་པོ་པདྨ་ཀུན་བཟང་མཆོག་ནས་དེང་རབས་ཀྱི་གློག་ཀླད་འཕྲུལ་འཁོར་ལ་བརྟེན་ནས་པར་བསྐྲུན་གནང་བཞིན་ཡོད་པར་ཡི་རང་བསྔགས་བརྗོད་བྱེད་པ་དང་ཆབས་ཅིག གསུང་རབ་འདིས་རྒྱལ་བའི་དགོངས་པ་དྲི་མ་མེད་པ་གསང་ཆེན་སྔ་འགྱུར་བའི་ལྟ་གྲུབ་ཀྱི་གནད་གསང་གསལ་བར་སྟོན་པ་ཀུན་གྱིས་མཁྱེན་རྟོགས་ཐུབ་པས་རང་གཞན་གྱི་འདི་ཕྱིའི་དོན་འབྲས་རླབས་ཆེན་ཡོང་རྒྱུའི་རེ་སྨོན་བཅས། ཞེ་ཆེན་རབ་འབྱམས་བདུན་པར་འབོད་པ། དགེ་སྦྱོང་ངག་དབང་ཆོས་དཔལ་རྒྱ་མཚོས་ཕྱི་ལོ་ ༢༠༡༠ ཟླ་ ༢ ཚེས་ ༢༤ བཟང་པོ་ལ།
གསལ་བཤད་ཉུང་ངུ་།
༈ དེ་ཡང་མི་རིང་བའི་འདས་པའི་ལོ་རབས་འགའི་ཡུན་ལ་བོད་གངས་ཅན་གྱི་ཆོས་དང་རིག་གཞུང་ལ་ཉམས་རྒུད་ཚབས་ཆེན་ཐེབས་ནས། དེང་གི་དུས་འདིར་བོད་ཀྱི་རིག་གཞུང་ཟེར་བ་དེ་སྒྲ་གཅན་གྱི་ཁ་ནས་ཕྱེད་ཙམ་ཐར་པའི་ཟླ་བ་ལྟ་བུ་ཞིག་ཡིན་ལ། འདི་ཉིད་ཉམས་པ་སླར་གསོ་དང་མི་ཉམས་ཡུན་རིང་དུ་གནས་པའི་ཆེད་དུ་མཁས་པ་དང་ལྷག་བསམ་ཅན་གྱི་སྐྱེས་བུ་དམ་པ་དག་གིས་སྔ་རབས་ཀྱི་མཁས་པའི་གསུང་རབ་རྣམས་སྤུས་ལེགས་ཀྱི་ཡིག་གཟུགས་སུ་སྤེལ་ནས་འགྲེམ་སྤེལ་གནང་བཞིན་པ་འདི་དག་ནི་འཆི་ཁ་མ་ལ་སྲོག་བསྩལ་པ་ལྟ་བུའི་བསྟན་པའི་སྲོག་སྙིང་གསོ་བའི་བྱ་བ་གལ་ཆེན་ཞིག་ཡིན་ལ། འདིར་ཡང་ཁམས་ཞེ་ཆེན་བསྟན་གཉིས་དར་རྒྱས་གླིང་གི་མཁན་རིན་པོ་ཆེ་པདྨ་ཀུན་བཟང་ལགས་ཀྱིས་མཁས་པའི་དབང་ཕྱུག་ཞེ་ཆེན་རྒྱལ་ཚབ་སྐུ་ཕྲེང་བཞི་པ་འགྱུར་མེད་པདྨ་རྣམ་རྒྱལ་གྱི་གསུང་རབ་འདི་དག་དེབ་ཏུ་བསྐྲུན་པ་འདི་བསྔགས་འོས་ཀྱི་མཛད་པ་བླ་ན་མེད་པ་ཞིག་ཏུ་ཤེས་ཏེ། དེ་ཡང་ཞེ་ཆེན་རྒྱལ་ཚབ་རིན་པོ་ཆེ་ནི་བོད་གངས་ཅན་གྱི་ཆོས་དང་རིག་གཞུང་སྤྱི་དང་ཁྱད་པར་གསང་སྔགས་སྔ་འགྱུར་གྱི་མདོ་རྒྱུད་རྒྱ་མཚོའི་གནས་ལ་ཐུགས་སྤྱན་ནམ་མཁའ་ལྟར་ཡངས་པའི་མཁས་གྲུབ་གཉིས་ལྡན་གྱི་སྐྱེས་ཆེན་དམ་པ་ཞིག་ཡིན་པར་མ་ཟད་འཇམ་མགོན་མི་ཕམ་རིན་པོ་ཆེས་བསྟན་པ་ཡོངས་རྫོགས་ཀྱི་བདག་པོར་མངའ་གསོལ་བའི་གསང་སྔགས་སྔ་འགྱུར་གྱི་བསྟན་པ་ལ་མཛད་རྗེས་བླ་ན་མེད་པའི་མཁས་པའི་དབང་ཕྱུག་ཆེན་པོ་ཞིག་སྟེ། རྗེ་འདི་ཉིད་ཀྱིས་འཇམ་མགོན་བླ་མའི་གསུང་གི་མཛད་པ་ལ་ཆེད་དུ་དམིགས་ཏེ་མཆན་འགྲེལ་དང་ཁ་སྐོང་། གཞན་ཡང་དེ་དག་གི་ཟབ་དོན་རྗེན་པར་ཕྱུང་བའི་ཡིག་ཆ་ངེས་དོན་བདེ་གཤེགས་སྙིང་པོའི་དོན་གཏན་ལ་ཕབ་པའི་ལེགས་བཤད་སོགས་བསྟན་བཅོས་མང་དུ་བཞག་ཡོད་པ་ཡིན་ལ། བཤད་སྲོལ་ལ་ཡང་ངེས་ཤེས་རིན་པོ་ཆེའི་སྒྲོན་མེ་དང་རྗེ་འདི་ཉིད་ཀྱི་བདེན་གཉིས་གློག་གི་སྒྲོན་མ་འདི་གཉིས་ཀྱི་དོན་ཤེས་ན་གསང་སྔགས་སྔ་འགྱུར་གྱི་མདོ་སྔགས་ཀྱི་ལྟ་གྲུབ་ཡོངས་རྫོགས་ཀྱི་གནད་ཟིན་པ་ཡིན་ཞེས་ཟེར་བ་ལྟ་བུ་ཡིན་ནོ། །དེས་ན་འཇམ་མགོན་བླ་མ་ཡབ་སྲས་གཉིས་ཀྱི་གསུང་དག་ནི་གསང་སྔགས་སྔ་འགྱུར་པའི་བསྟན་པའི་ཟབ་གནད་ཀྱི་ཉི་མ་རང་རྒྱུད་ལ་འདྲེན་པའི་སྐྱ་རེངས་དཀར་པོའི་འོད་སྣང་ལྟ་བུ་ཞིག་ཡིན་པས་འཇམ་པའི་དབྱངས་དངོས་ཀུན་མཁྱེན་མི་ཕམ་རྒྱ་མཚོའི་ཡིག་ཆ་དག་ལ་སྦྱང་བརྩོན་བྱེད་པའི་བློ་གསར་དག་གིས་ཀྱང་རྗེ་ཉིད་ཀྱི་མདོ་སྔགས་ཀྱི་གསུང་རབ་དག་ལ་ལྟ་ཀློག་ཡང་ཡང་བྱེད་པ་ཤིན་ཏུ་གལ་ཆེ་བའི་གནས་སུ་སེམས་སོ། །
གསེར་ལྗོངས་བླ་མ་རུང་དུ་འཆི་མེད་རིག་འཛིན་གྱིས་བྲིས།
ཐོག་མའི་སྙན་སྒྲོན།
དེ་ཡང་ཀུན་མཁྱེན་མི་ཕམ་རིན་པོ་ཆེས་བསྟན་བཅོས་བརྩམ་པ་བཀས་སྐུལ་ཞིང་། གསུང་རྩོམ་རིགས་བསྟན་པའི་གཙིགས་སུ་ཆེ་བས་འཐོར་ཟགས་སུ་མ་སོང་བར་ཕྱོགས་གཅིག་ཏུ་བསྡུ་དགོས་པར་ཡང་བཀའ་གནང་ལས་གྲུབ་པའི་བཀའ་འབུམ་འདི་ཉིད་འགྲེམས་སྤེལ་ཞུས་པའི་ཐོག་མའི་སྙན་སྒྲོན་ནི།
ལྷ་མོ་དྲི་མ་མེད་པའི་མདོ་ལས་ལུང་བསྟན་པ་ལྟར་ཆོས་རྒྱལ་ཡབ་མེས་རིམ་བྱོན་དང་འགྱུར་སྔ་ཕྱིའི་ལོ་པཎ་མཁས་གྲུབ་གོང་མ་རྣམས་ཀྱི་ཐུགས་རྗེ་དང་ཕྲིན་ལས་ཚད་མེད་པ་ལས་བྱུང་བའི་དེང་སང་བོད་བརྒྱུད་ནང་བསྟན་རིག་གཞུང་ཞེས་མི་རིགས་གཞན་དང་གཞན་གྱི་མི་སྣ་གཟུར་གནས་ཤེས་ཡོན་ཅན་རྣམས་འགྲམ་ཆུ་ལྡངས་ཏེ་ངོ་མཚར་བའི་གནས། སྔོན་བྱོན་དམ་པ་ཚོའི་མཁྱེན་ནུས་རྩལ་དགུ་ཡོད་ཚད་བོད་བརྒྱུད་ནང་བསྟན་ཆོས་དང་རིག་གཞུང་ནོར་བུ་མཐོན་ཀ་ལྟ་བུ་འདི་ཁོ་ནའི་ཆེད་དུ་འབད་འབད་དུང་དུང་གི་མཛད་འཕྲིན་ལ་གཞིགས་ན་བསམ་ཡུལ་ལས་འདས།
འོན་ཀྱང་འདོད་བྲལ་སྡུག་འཕྲད་ཀྱི་འཕོ་འགྱུར་ནི་སུ་ལའང་བྱུང་དང་འབྱུང་བཞིན་པ་ལྡོག་མེད་ཅིག་ཡིན་སྟབས། གཅིག་དགུ་ལྔ་དགུའི་ཛ་དྲག་ལས་འགུལ་གྱི་འཛིན་ཁྲིས་བདེ་ལྡན་ཁ་བའི་ལྗོངས་ཀྱི་ཆོས་དང་རིག་གཞུང་{སྔ་འགྱུར་པའི་གདན་ས་ཆེན་མོ་འདི་གའི་རིག་གཞུང་ལ་བསམས་ན་ཀུན་གཟིགས་རབ་འབྱམས་གཉིས་པའི་གསུང་འབུམ་པོད་དགུ་ལོངས་པ་དང་། ཀོང་སྤྲུལ་ཡོན་ཏན་རྒྱ་མཚོའི་སྐུ་སྐྱེ་གོང་མ་གྲུབ་ཐོབ་ཆེན་པོ་ཤེས་རབ་ཡར་འཕེལ་གྱི་གསུང་འབུམ་པོད་ལྔ་ཙམ་དང་། རྒྱལ་དབང་བཅུ་བཞི་པས་མ་ཧཱ་པཎྜི་ཏ་ཞེས་མཚན་གྱི་ཅོད་པན་དཔྱངས་པ་མ་ཧཱ་པཎྜི་ཏ་དབོན་སྤྲུལ་མཐུ་སྟོབས་རྣམ་རྒྱལ་གྱི་གསུང་འབུམ་པོད་དྲུག་ལྷག་དང་། རྒྱལ་ཚབ་རིན་པོ་ཆེའི་གསུང་འབུམ་སྤར་ཤིང་སོགས་ནི་ད་ལྟ་མིང་ཙམ་ལས་མེད། གསུང་འབུམ་འདིའི་མ་ཕྱི་ཙམ་ཞིག་ཆོས་བརྒྱུད་འདི་ལ་ལྷག་བསམ་སྟོན་ཟླ་ལྟར་དཀར་བའི་སངས་རྒྱས་བསྟན་འཛིན་ལགས་ཀྱིས་རང་ཉིད་ཀྱི་ལུས་སྲོག་དཀའ་ངལ་གང་ལའང་ལྟོས་མེད་དུ་ཧུར་འབུངས་ཞེ་བསྐྱེད་ཀྱི་དཀའ་དྲིན་ལས་རྣམ་པ་ཚོའི་སྤྱན་ལམ་དུ་འབུལ་ཆོག་ཆོག་བྱུང་འདུག}ཤིན་ཏུ་ཕངས་པ་མི་ཉུང་བ་ཞིག་གྱུར་མིད་གཏོང་བའི་ན་ཟུག་ཟློས་ན་སེམས་བློང་བློང་པོ་ལས་ཅི་ཡོད།
དེ་བས་བོད་བརྒྱུད་ནང་བསྟན་རིག་གཞུང་མྱུར་སྐྱོབ་དང་རྒྱུན་འཛིན་སླར་གསོའི་བྱ་གཞག་འུར་བཤད་ཙམ་དུ་མ་ལུས་པ། མིག་རྒྱང་རིང་པོས་དཔེ་སྐྲུན་འགྲེམས་སྤེལ་སོགས་ཞུས་ཏེ་རྒྱ་ཆེ་བའི་སློབ་གཉེར་བ། ཉམས་ལེན་པ། ཞིབ་འཇུག་པ་དག་གི་སྤྱན་ལམ་དུ་འབུལ་ཐུབ་ན་དོན་དམ་པ་བོད་མི་རིགས་ཀྱི་ཆོས་དང་རིག་གཞུང་རྒྱུན་འཛིན་ནམ་བསྟན་འགྲོའི་དོན་ཕན་འབྲས་མངོན་དུ་འགྱུར་བ་སོགས་ཀྱི་དགེ་མཚན་ལ་སུ་མི་རངས།
ད་ལམ་འདིར་རྙེད་གྲགས་ཀྱི་འདུ་ཤེས་རིང་དུ་དོར་ནས་ལྷག་པའི་བསམ་པ་ཁོ་ནས་མཁན་རིན་པོ་ཆེ་པདྨ་ཀུན་བཟང་མཆོག་གིས༧འཇམ་མགོན་མཁྱེན་ཀོང་ཟུང་དང་ཀུན་མཁྱེན་མི་ཕམ་རིན་པོ་ཆེ་རྣམ་གསུམ་གྱི་སྲས་ཀྱི་ཐུ་བོ་མཁས་གྲུབ་གཉིས་ལྡན༧རྒྱལ་ཚབ་རིན་པོ་ཆེ་འགྱུར་མེད་པདྨ་རྣམ་རྒྱལ་མཆོག་གི་གསུང་འབུམ༼ཆོས་ཚན་ཅི་ཡོད་ཨ་དུམ་ནང་བཞུགས་དཀར་ཆག་ནོར་བུའི་ཕྲེང་བར་གཟིགས། ༽འདི་ཉིད། བོད་བརྒྱུད་ནང་བསྟན་རིག་གཞུང་སྤྱི་དང་། ཁྱད་པར་དུ་སྔ་འགྱུར་པའི་ལྟ་གྲུབ་བམ་ཀུན་མཁྱེན་མི་ཕམ་རིན་པོ་ཆེའི་ཡིག་ཆ་འཛིན་པ་དག་ལ་མེད་དུ་མི་རུང་བ་ཞིག་ཏུ་དགོངས་ཏེ་རྒྱ་ཆེའི་དོན་གཉེར་ཅན་རྣམ་པའི་སྤྱན་ལམ་དུ་འགྲེམས་སྤེལ་གནང་བ་སྟེ། ཞུ་དག་ལག་བསྟར་བྱས་ཚུལ་ནི། དེ་ཡང་ཡིག་ནོར་ངེས་ཅན་རྣམས་ཐད་ཀར་བསྒྱུར་པ་དང་། ལ་ལ་{}གུག་རྟགས་ནང་ལ་དཔེར་ན་་་་་འཆུགས་{འཁྱུགས}འདི་ལྟ་བུ་བསྒྱུར་པའི་དེ་མ་ཐག་གུག་རྟགས་ནང་དུ་བསྒྱུར་ཡིག་དེ་ཁོལ་ཕྱུང་དང་། ཚིག་གཅིག་ཐེངས་མང་ནོར་རིགས་གུག་རྟགས་ནང་དུ་་་སྒེག་{སྒེགས་འདིའི་རིགས་འདི་ལྟར་ཞུས། }འདི་ལྟ་བུ་དང་། གསར་བཏགས་རིགས་[]གུག་རྟགས་ནང་དུ་[གྱིས་ཞུ་མཆན། ]འདི་ལྟ་བུ་དང་། ལྷག་རིགས་{}གུག་རྟགས་ནང་དུ་{ལ་ལྷག}འདི་ལྟ་བུ་དང་། མ་ཕྱི་ནང་མི་གསལ་བའི་རིགས་གུག་རྟགས་ནང་དུ་[ཡང་མ་དཔེ་མི་གསལ། ]འདི་ལྟ་བུ་དང་། ཞེས་མཆན་བླུགས་ཡོད། གཞན་ཡང་མ་ཕྱི་ནང་མི་གསལ་བ་དང་དོགས་ཅན་ཁ་ཤས་སྣང་ཡང་རང་སར་བཞག་པ་ལས་ཕྲི་བསྣན་རྔོ་མི་ཐོགས། དེ་མིན་དཔེར་ན་དགའ་བའི་ཞེ་ས་ལ་དགྱེས་པ་དང་དགེས་པ། ཆུ་བོ་ཆུང་ངུ་ལ་ཆུ་ཕྲན་དང་ཆུ་བྲན་ལྟ་བུ་དང་། བྱ་ཚིག་དང་བྱེད་ཚིག་གང་ལྟར་རུང་རིགས་མ་ཕྱི་ལྟར་རང་སར་བཞག་དགོས་པ་ལ་ཕན་ཚུན་བསྒྱུར་པ་དང་ཆད་ལྷག་གི་ནོངས་པ་སོགས་ནི་བཤགས་ཡུལ་རྣམས་ཀྱི་མདུན་དུ་མཐོལ་བཤགས་བཟོད་གསོལ་ཞུ།
འདི་ལ་ཐེངས་དང་པོ་མཁན་ཀུན་བཟང་བསོད་ནམས་དང་ཕྲན་གཉིས་ཀྱིས་མ་ཕྱི་དང་ལན་གཉིས་བསྡུར་པ་དང་། འཕྲུལ་པར་རྐྱང་ཐོག་ལན་གཅིགཐེངས་གཉིས་པར་དཔལ་ཡུལ་བཤད་གྲྭའི་དགེ་སློབ་རྣམས་ཀྱིས་མ་ཕྱི་དང་འཕྲུལ་པར་གཉིས་སྦྲགས་ཚར་གཅིག་དང་འཕྲུལ་པར་རྐྱང་ཐོག་ལན་གཅིགཐེངས་གསུམ་པ་ཞེ་ཆེན་བཤད་གྲྭའི་དགེ་སློབ་རྣམས་ཀྱིས་མ་དཔེ་དང་ཚར་གཅིག་གཏུགས་པ་དང་འཕྲུལ་པར་རྐྱང་ཐོག་ལན་གཅིགཐེངས་བཞི་པར་ཕྲན་པས་འཕྲུལ་པར་རྐྱང་ཐོག་ཚར་གསུམ་དང་ཞུས་མཐར་མ་ཕྱི་དང་འཕྲུལ་པར་གཉིས་སྦྲགས་ཚར་གཅིག་ཡང་འཕྲུལ་པར་རྐྱང་ཐོག་ཐེངས་གཉིས་བཅས་བསྡོམས་༡༤ལྷག་བསྐྱར་ཞིབ་ཞུས་པ་ཡིན། སྔར་ཤིང་པར་དུ་མ་འཁོད་པའི་ཕྲན་ཚེགས་དང་མ་དཔེ་ནང་མི་གསལ་བ་དང་ལྡེབ་ཆད་རིགས་མཁོ་འདོན་རྒྱབ་སྐྱོར་གནང་མཁན་དག་ལ་སྙིང་ཐག་པ་ནས་ཐུགས་རྗེ་ཆེ་ཞུ། ཕྲན་ནས་ལོ་གཅིག་ལྷག་རིང་ལ་རང་གི་སློབ་སྦྱོང་དང་དཀའ་ཚེགས་ལ་མ་ལྟོས་པ། ཡིད་བཞིན་གྱི་ནོར་བུ་འདི་ལྟ་བུ་ལ་ཞབས་ཕྱི་ཞུ་བའི་གོ་སྐབས་འཕྲད་པ་འདི་སྐལ་བ་རེ་བཟང་སྙམ་པའི་དགའ་སྤྲོ་དང་འགན་འཁྲི་ཞིག་ཏུ་བརྩིས་ཏེ། གཟབ་ཁུལ་གྱིས་སྙམ་འཇོག་དང་ཕོ་ཚོད་ཧམ་ཤེད་དུ་མ་སོང་བ་ཞིག་ཏུ་བསམས་ནས། ཚིག་གསར་གཉིས་སོགས་ལ་ཁུངས་བཅོལ་ཏེ་བརྡ་སྤྲོད་མཁས་དབང་དང་། ཞུ་དག་ཉམས་མྱོང་པ། ཆོས་གྲོགས་རྣམས་ལ་བཀའ་འདྲི་ཞུས་ཏེ་རང་ནུས་ཅི་ཡོད་ཀྱིས་ཞབས་ཕྱི་སེམས་གཏིང་ནས་ཞུས་ཀྱང་། སྐྱེས་སྦྱོང་གི་ཤེས་ཡོན་དང་ཉམས་མྱོང་ཞན་པ་བཅས་ཀྱི་དབང་གིས་སྐྱོན་ཆ་དང་ནོར་འཁྲུལ་རིགས་ཅི་ཡང་ཡོད་ངེས་པས་རྒྱ་ཆེའི་གཟིགས་པ་པོ་རྣམས་ནས་བཀའ་བཀྱོན་དང་བཅས་ལེགས་བཅོས་ཡོ་བསྲང་གི་དགོངས་འཆར་ལྷུག་སྩོལ་ཡོད་པ་ཞུ་རྒྱུ་བཅས།
བསོད་ནམས་ཆོས་འཕེལ་གྱིས་ཁྲིན་ཏུའི་གྲོང་ཁྱེར་ནས། ༢༠༡༡ལོའི་ཟླ་བ་༥ཚེས་༣ལ།
བཤེས་སྤྲིང་གི་མཆན་འགྲེལ་པདྨ་དཀར་པོའི་ཕྲེང་བ།
༄༅། །བཤེས་སྤྲིང་གི་མཆན་འགྲེལ་པདྨ་དཀར་པོའི་ཕྲེང་བ་ཞེས་བྱ་བ་བཞུགས་སོ། །ༀ་སྭསྟི། མཁྱེན་རབ་རལ་གྲི་འབར་བའི་གཟི་འོད་ཀྱིས། །ཀུན་རྨོངས་མུན་པའི་འཁྲི་ཤིང་དྲུང་ཕྱུང་ནས། །མཁྱེན་གཉིས་ཡེ་ཤེས་སྣང་བ་སྦྱིན་མཛད་པ། །བླ་མ་འཇམ་མགོན་སྨྲ་བའི་སེང་གེས་སྐྱོངས། །ཐུབ་གསུང་ཟབ་དང་རྒྱ་ཆེའི་དགོངས་པའི་དོན། །ཇི་བཞིན་འགྲེལ་མཁས་དཔལ་མགོན་འཕགས་པ་ཀླུའི། །ལེགས་བཤད་བཤེས་སྤྲིང་མཆན་འགྲེལ་པད་དཀར་ཕྲེང་། །བླ་མའི་གསུང་བཞིན་སྤེལ་འདི་དགའ་བས་ལོངས། །དེ་ཡང་འཕགས་པ་ཀླུ་སྒྲུབ་ཀྱིས་མཛད་པའི་བཤེས་པའི་སྤྲིང་ཡིག་འདི་ཉིད་འཆད་པ་ལ། མཚན་གྱི་དོན། འགྱུར་ཕྱག གཞུང་དོན། མཇུག་དོན་དང་བཞི་ལས། དང་པོ་ནི། རྒྱ་གར་སྐད་དུ། སུ་ཧྲི་ད་ལེ་ཁ། བོད་སྐད་དུ། བཤེས་པའི་སྟེ་མཛའ་བོ་རྒྱལ་བུ་བདེ་སྤྱོད་ཅེས་བྱ་བ་དང་དངོས་སུ་མ་ཕྲད་པར་སྤྲིང་བས་ན་སྤྲིང་ཡིག་གོ །གཉིས་པ་ནི། ཉེས་པའི་ཟུག་རྔུ་{ངུ}ཀུན་དང་བྲལ་བས་འཇམ་ཞིང་དོན་གཉིས་ཀྱི་དཔལ་དང་ལྡན་པ་སྐུ་བགྲེས་རྒུད་མེད་པས་གཞོན་ནུར་གྱུར་པ་དེ་ལ་ཕྱག་འཚལ་ལོ་ཞེས་ལོ་ཙཱ་བས་བཀོད་པའོ། །གསུམ་པ་ལ། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་མཇུག་གི་དོན་དང་གསུམ་ལས། དང་པོ་ལ། བརྩམ་པར་དམ་བཅའ་བའི་སྒོ་ནས་ཉན་པར་བསྐུལ་བ། ཁེངས་སྐྱུང་བའི་ཚུལ་གྱིས་ཉན་རིགས་པར་གདམས་པ་གཉིས། དང་པོ་ནི། ཕུན་སུམ་ཚོགས་པའི་ཡོན་ཏན་གྱི་རང་བཞིན་དགེ་བ་དམ་པའི་ཆོས་ཉན་པའི་སྣོད་དུ་འོས་པ་ཞེས་བོས་ནས་གཞུང་མཛད་པ་པོ་ཀླུ་སྒྲུབ་བདག་གིས་ནི། དབྱངས་ཀྱི་ཡན་ལག་དྲུག་ཅུ་དང་ལྡན་པའི་བདེ་བར་གཤེགས་པའི་གསུང་གིས་བསྙད་པའི་སྡེ་སྣོད་རིན་པོ་ཆེ་རྣམས་ལས་བྱུང་བའི་དོན། ཁྱོད་ཀྱི་ཐུགས་བསོད་ནམས་ལ་འདུན་པའི་སླད་དུ་སྡེབ་སྦྱོར་འཕགས་པའི་དབྱངས་དང་ལྡན་པའི་ཚིགས་སུ་བཅད་པ་འདི་དག ཅུང་ཟད་ཅིག་སྡེབ་པ་ཁྱོད་ཀྱིས་གསན་པའི་རིགས་སོ། །ཕྱི་མ་ལ་ཚིག་གི་སྒོ་ནས་ཁེངས་སྐྱུང་བ་དང་། དོན་གྱི་སྒོ་ནས་ཁེངས་སྐྱུང་བ་གཉིས། དང་པོ་ནི། དཔེ་ཇི་ལྟར་བདེ་གཤེགས་ཀྱི་སྐུ་གཟུགས་རྒྱུ་དམན་པ་ཤིང་ལས་ཀྱང་། བགྱིས་པ་རྣམ་པ་སྒྲོས་གཙང་མིན་ཅི་འདྲ འང་རུང་སྟེ་མཁས་པས་སྤྱི་བོར་མཆོད་པ། དེ་བཞིན་དུ་བདག་གི་སྙན་ངག་འདི་ཚིག་གི་སྦྱོར་བ་སོགས་ངན་ན་ཡང་། ཟབ་མོའི་དམ་ཆོས་བརྗོད་པ་ལ་བརྟེན་སླད་སྨད་པར་མི་བགྱི་སྟེ་བླང་བར་བྱའོ་ཞེས་གདམས་པའོ། །གཉིས་པ་ནི། སྒོ་གསུམ་གྱི་ཉེས་པ་ངང་གིས་བསྡམས་པའི་ཐུབ་པ་ཆེན་པོའི་བཀའ་ནི་ཐོག་ཐ་བར་གསུམ་དུ་དགེ་བ་སྙན་དགུ་སྟེ་མང་པོ་ཞིག་གི་དོན། ཁྱོད་རང་ཉིད་ཀྱི་ཐུགས་སུ་ལྟ་ཡང་སྟེ་སྔར་ནས་ཆུད་མོད་ཀྱི། འོན་ཀྱང་དཔེར་ན་རང་བཞིན་གྱིས་དཀར་བ་རྡོ་ཐལ་ལས་བགྱིས་པའི་དཀར་རྩི་སོགས་ལ་རྐྱེན་དགུང་ཟླའི་འོད་ཀྱིས་ནི། སྔར་ལས་ཀྱང་ཆེས་དཀར་ཉིད་དུ་ཅི་སྟེ་མི་བགྱིད་དེ་བགྱིད་པ་དེ་བཞིན་དུ་ལགས་སོ། །གཉིས་པ་གཞུང་དོན་ལ། མངོན་མཐོ་དང་ངེས་པར་ལེགས་པའི་ལམ་གྱི་རྟེན་དད་པ་བཤད་པ་དང་། ལམ་གྱི་ངོ་བོ་གཉིས། དང་པོ་ལ། གང་ལ་དད་པར་བྱ་བའི་གཞི་སངས་རྒྱས་སོགས་རྗེས་དྲན་དྲུག་མདོར་བསྟན་པ་དང་། རྗེས་དྲན་ཕྱི་མ་གསུམ་རྒྱས་པར་བཤད་པའོ། །དང་པོ། བདུད་བཞི་ལས་རྒྱལ་བའི་རྒྱལ་བས་སངས་རྒྱས་དང་ཆོས་དང་དགེ་འདུན་དང་། གཏོང་བ་དང་ཚུལ་ཁྲིམས་དང་ལྷ་རྗེས་སུ་དྲན་པ་སྟེ་རྣམ་པ་དྲུག རབ་ཏུ་བཀའ་སྩལ་པ་དེ་དག་སོ་སོ་ཡི་སྟེ། སངས་རྒྱས་དོན་གཉིས་ལྷུན་གྲུབ། ཆོས་བདེན་གཉིས་མ་ནོར་བ། དགེ་འདུན་རིག་གྲོལ་གཉིས་ལྡན། གཏོང་བ་འབྱོར་པ་ཕུན་སུམ་ཚོགས་པའི་རྒྱུ། ཚུལ་ཁྲིམས་རྣམ་པར་དག་པ་ཡོན་ཏན་གྱི་གཞི། ལྷ་ནི་རང་གི་དཔང་པོའམ་མངོན་མཐོའི་ཆོས་ཉམས་སུ་བླངས་པས་འབྲས་བུ་ཁྱད་པར་ཅན་ཐོབ་པ་སྟེ། ཡོན་ཏན་གྱི་ཚོགས་ཀྱི་རྗེས་སུ་དྲན་པར་བགྱིའོ། །གཉིས་པ་ལ། ལྷ་རྗེས་དྲན། གཏོང་བ། ཚུལ་ཁྲིམས་རྗེས་དྲན་གསུམ། དང་པོ། དགེ་བའི་ལས་བདུན་དང་ལམ་གསུམ་སྟེ་བཅུ་པོ་ཡང་ནི་ལུས་ཀྱིས་སྲོག་གཅོད་མ་བྱིན་ལེན་འདོད་ལོག་སྤོང་བ་གསུམ་དང་ནི། ངག་གིས་རྫུན་ཕྲ་མ་ཚིག་རྩུབ་ངག་འཁྱལ་སྤོང་བ་སྟེ་བཞི་དང་ཡིད་ཀྱིས་བརྣབ་སེམས་གནོད་སེམས་ལོག་ལྟ་སྤོང་ཞིང་ཡང་དག་པའི་ལྟ་བ་ལ་རྟག་ཏུ་བསྟེན་པར་བགྱི་ཞིང་། རང་བཞིན་གྱི་ཁ་ན་མ་ཐོ་བ་མིན་ཡང་དཔང་པོའི་མཐུ་ཉམས་པར་བྱེད་པ་ཆང་གི་བྱེ་བྲག་རྣམས་ལས་ལྡོག་པར་མཛད་པ་དང་དེ་བཞིན་དུ་གཞན་ལ་མི་གནོད་ཅིང་བག་མེད་ཀྱི་རྒྱུར་མི་འགྱུར་བའི་དགེ་བ་ཡི། འཚོ་བ་ལ་ཡང་མངོན་པར་དགྱེས་པར་མཛོད་ཅིག དེས་འབྲས་བུ་ཁྱད་པར་ཅན་ལྷ་ཡི་གནས་འཐོབ་བོ་ཞེས་སོ། །གཉིས་པ་ནི། ལོངས་སྤྱོད་རྣམས་ནི་མི་རྟག་པས་གཡོ་བ་ཡིད་བརྟན་གྱི་སྙིང་པོ་མེད་ཅིང་ཇི་ཙམ་འབྱོར་ཡང་ངོམས་མི་ཤེས་པར་མཁྱེན་ནས། ཡུལ་ཡོན་ཏན་ཅན་དགེ་སློང་དང་བྲམ་ཟེ་སྡུག་བསྔལ་ཅན་བཀྲེན་པ་སོགས་དང་ཕན་འདོགས་པའི་བཤེས་རྣམས་ལ། མ་དག་པའི་སྦྱིན་པ་སྤངས་ཏེ་བསམ་པ་དང་དངོས་པོ་དག་པའི་སྦྱིན་པ་ཚུལ་བཞིན་དུ་སྩལ་བར་བགྱིའོ་དེའི་དགོས་པ་ནི་འཇིག་རྟེན་ཕ་རོལ་ཏུ། སྦྱིན་ལས་གཞན་པའི་གཉེན་མཆོག་ཏུ་གྱུར་པ་མ་མཆིས་སོ། །གསུམ་པ། ཁྱོད་ཀྱི་ཚུལ་ཁྲིམས་ལ་འཆལ་ཁྲིམས་ཀྱི་སྐྱོན་དང་བྲལ་བས་མ་ཉམས་པ་དང་འཆལ་ཁྲིམས་ཀྱི་གཉེན་པོར་གྱུར་པའི་ཡན་ལག་རྫོགས་པས་མོད་མི་དམའ་སྟེ་ཕུན་སུམ་ཚོགས་པའམ་རྒྱ་ཆེ་བ་དང་། འབྲས་བུ་ཞི་བར་གཞོལ་བ་ལས་འཇིག་རྟེན་པའི་ལམ་དང་མ་འདྲེས་པ་དང་འཆལ་ཁྲིམས་ཀྱི་རྒྱུ་ཉོན་མོངས་པའི་ཀུན་སློང་ངན་པ་སོགས་ཀྱིས་མ་སྦགས་པ་སྟེ་ཚུལ་ཁྲིམས་རྣམ་པར་དག་པའི་ཡོན་ཏན་བཞི་དང་ལྡན་པ་དག་བསྟེན་པར་མཛོད་ཅིག ཁྲིམས་ནི་རྒྱུ་བ་མི་སོགས་དང་མི་རྒྱུ་བ་རི་དང་ཁང་ཁྱིམ་ལ་སོགས་པའི་རྟེན་གཞི་ས་ཡིན་པ་བཞིན་དུ། མངོན་མཐོ་དང་ངེས་ལེགས་ཀྱི་ཡོན་ཏན་ཀུན་གྱི་གཞི་རྟེན་ལགས་པར་ཏེ་ཡིན་པར་གསུངས་སོ། །གཉིས་པ་ལམ་གྱི་ངོ་བོ་ལ། མདོར་བསྟན། རྒྱས་བཤད། དེ་དག་གི་དོན་ཉམས་སུ་ལེན་པ་ལ་དབུགས་དབྱུང་བ་གསུམ། དང་པོ། ཐབས་མཁས་པས་སྦྱིན་པ་དང་ཚུལ་ཁྲིམས་དང་བཟོད་པ་དང་བརྩོན་འགྲུས་དང་བསམ་གཏན་དང་། དེ་བཞིན་དུ་ཤེས་རབ་རྣམས་རྒྱ་ཆེ་བ་གཞལ་དུ་མེད་པ་དང་འཁོར་གསུམ་དུ་མི་རྟོག་པའི་ཤེས་རབ་ཀྱིས་ཟིན་པས་ཕ་རོལ་ཕྱིན་པ་སྟེ། འདི་དག་རང་རྒྱུད་དུ་རྒྱས་པར་མཛོད་ལ་སྲིད་པའི་རྒྱ་མཚོ་ཡི། ཕ་རོལ་དུ་ཕྱིན་པ་རྒྱལ་བའི་དབང་པོར་མཛོད་ཅིག གཉིས་པ་ལ། སྦྱིན་པ། ཚུལ་ཁྲིམས། བཟོད་པ། བརྩོན་འགྲུས། བསམ་གཏན། ཤེས་རབ་དྲུག་ལས། དང་པོ་ནི། གང་ལ་ཕ་དང་མ་དག་བཀུར་སྟིས་མཆོད་པར་བྱེད་པའི། རིགས་དེ་ཚངས་པ་དང་བཅས་སློབ་དཔོན་དང་བཅས་པའང་སྟེ་འཇིག་རྟེན་ན་མཆོད་འོས་སུ་གྱུར་པ་དེ་གཉིས་དང་མ་བྲལ་པ་ལགས་པས། དེ་དག་ལ་མཆོད་པས་ཚེ་འདིར་བྱས་པ་ཤེས་ཤིང་དྲིན་གཟོ་སོགས་ཀྱི་ཡོན་ཏན་གྱིས་གྲགས་པར་འགྱུར་བ་དང་། སླད་མ་སྟེ་སྐྱེ་བ་གཞན་ལ་ཡང་མཐོ་རིས་སུ་སྐྱེ་བར་འགྱུར་བ་ལགས། གཉིས་པ་ལ་བཞི། བསྲུང་བྱ་ཚུལ་ཁྲིམས། དེའི་མི་མཐུན་ཕྱོགས་སྤང་བ། མཐུན་ཕྱོགས་བག་ཡོད་བསྒྲུབ་པ། བག་ཡོད་པའི་ཕན་ཡོན་དཔེས་བཤད་པའོ། །དང་པོ་ནི། གཞན་ལ་འཚེ་བ་སྟེ་རྒྱུ་མིང་གིས་སྨྲོས་པ་སྲོག་གཅོད་པ་དང་ཆོམ་རྐུན་ཏེ་མ་བྱིན་པ་ལེན་པ་དང་འཁྲིག་པ་སྟེ་གཡེམ་དང་བརྫུན་སྤང་བ་སྟེ་ཚུལ་ཁྲིམས་ཀྱི་ཡན་ལག་བཞི་དང་ནི། བག་ཡོད་ཀྱི་ཡན་ལག་ཆང་སྤང་བ་དང་བརྟུལ་ཞུགས་ཀྱི་ཡན་ལག་གསུམ་ནི་དུས་མིན་པར་ཕྱི་དྲོའི་ཁ་ཟས་ལ་ཆགས་པ་སྟེ་ཟ་བ་དང་། མལ་སྟན་མཐོ་ལ་དགའ་བ་དང་ངག་གི་གླུ་དག་དང་། ལུས་ཀྱི་གར་དང་ཕྲེང་བའི་ཁྱད་པར་རྒྱན་དུ་མ་རྣམས་རྣམ་པར་སྤོང་ཞིང་། སྔོན་གྱི་འཕགས་པ་དགྲ་བཅོམ་པ་རྣམས་ཀྱིས་ཚུལ་ཁྲིམས་ཇི་ལྟར་བསྲུང་བའི་རྗེས་སུ་བྱེད་པ་ཡི། ཡན་ལག་བརྒྱད་པོ་འདི་དག་དང་ལྡན་ན། གསོ་སྦྱོང་ཞེས་བྱ་ལ་དེས་འདོད་པ་ན་སྤྱོད་པའི་ལྷ་ཡི་ལུས་ཡིད་དུ་འོང་བ་དེ། རྟེན་མ་ནིང་སོགས་ལ་མི་སྐྱེ་བས་སྐྱེས་པ་དང་བུད་མེད་དག་ལ་སྩོལ་བའམ་སྦྱིན་པར་བགྱིད་དོ། །གཉིས་པ། དངོས་པོ་གཏོང་མི་འདོད་པའི་སེར་སྣ་རང་གི་ཉེས་པ་བཅབ་པའི་གཡོ་ཡོན་ཏན་ཡོད་པའི་ཟོབ་སྟོན་པ་སྒྱུ་བདག་དང་ལོངས་སྤྱོད་དམ་བུད་མེད་ལ་འཁྲིག་པའི་བདེ་བ་ལ་ཆགས་པ་དང་བླང་དོར་ཅི་ལའང་མི་འཇུག་པའི་སྙོམ་ལས་དང་། ཡོན་ཏན་གྱི་ཁྱད་པར་མི་ལྡན་པ་ལ་ལྡན་ནོ་སྙམ་པ་མངོན་པའི་ང་རྒྱལ་ཟག་བཅས་ཀྱི་ཡུལ་ཡིད་དུ་འོང་བ་ལ་འདོད་ཆགས་མི་འོང་བ་ལ་ཞེ་སྡང་དང་། རྒྱལ་རིགས་དང་བྲམ་ཟེ་སོགས་རིགས་དང་གཟུགས་མཛེས་པ་དང་ཕྱི་ནང་གི་རིག་པ་མང་དུ་ཐོས་པ་དང་ལང་ཚོ་གཞོན་པ་དང་། དབང་ཐང་ངམ་མངའ་ཐང་ཆེ་བས་རྒྱགས་པ་སྟེ་རང་གི་ཆོས་དེ་དག་ལ་བསམ་སྟེ་ཆགས་ཤིང་རོ་མྱོང་བའི་རྣམ་པ་ཅན་དེ་ཉིད་དགྲ་བཞིན་དུ་གཟིགས་ཤིག གསུམ་པ། དགེ་ཆོས་སྒོམ་ཞིང་ཟག་བཅས་ལས་སེམས་སྲུང་བའི་བག་ཡོད་པ་ནི་བདུད་རྩིའི་གནས་མི་འཆི་བ་ཏེ་མྱང་འདས་དང་བག་མེད་པ་ནི། འཁོར་བ་འཆི་བའི་གནས་སུ་ཐུབ་པས་བཀའ་སྩལ་ཏེ། མདོ་ལས། བག་ཡོད་བདུདརྩིའི་གནས་ཡིན་ཏེ། །བག་མེད་པ་ནི་འཆི་བའི་གནས། །བག་ཡོད་འཆི་བར་མི་འགྱུར་ཏེ། །བག་མེད་པ་ནི་རྟག་ཏུ་འཆི། །ཞེས་སོ། །དེ་བས་ཁྱོད་ཀྱིས་དགེ་བའི་ཆོས་གོང་ནས་གོང་དུ་སྤེལ་བའི་སླད་དུ། དགེ་བ་ལ་གུས་པས་རྟག་ཏུ་བག་དང་བཅས་པར་མཛོད་ཅིག བཞི་པ། གང་ཟག་གང་ཞིག་སྔོན་ཆད་བག་མེད་པར་གྱུར་པ་ལ། ཕྱིས་ནས་བག་དང་ལྡན་པར་གྱུར་པ་དེ་ཡང་ནི། དཔེར་ན་ཟླ་བ་སྤྲིན་དང་བྲལ་བ་ལྟ་བུར་རྣམ་པར་མཛེས་པ་ཡིན་ཏེ། ཆགས་ཅན་གཅུང་དགའ་བོ་དང་གཏི་མུག་ཅན་ལོག་པའི་བཤེས་ཀྱིས་བསླུས་པ་སོར་ཕྲེང་ཅན་གྱིས་མི་དགུ་བརྒྱ་གོ་དགུ་བསད་པ་དང་ཞེ་སྡང་ཅན་མཐོང་ལྡན་ཏེ་རྒྱལ་པོ་མ་སྐྱེས་དགྲ་སྡིག་གྲོགས་ཀྱི་དབང་དུ་གྱུར་ཏེ་རང་གི་ཕ་བསད་པ་དང་ཆགས་སྡང་གཉིས་ཀ་ཅན་བདེ་བྱེད་ཀྱིས་གཞན་ལ་གཡེམ་པའི་ཕྱིར་རང་གི་མ་བསད་པ་དག་ཀྱང་ཕྱིས་གཉེན་པོའི་ཆོས་རྒྱུད་ལ་བསྟེན་པས་སྔ་མ་གཉིས་དགྲ་བཅོམ་དང་བར་མ་བྱང་སེམས་ཐ་མ་ལྷར་སྐྱེས་ནས་བདེན་པ་མཐོང་བ་བཞིན་ནོ། །གསུམ་པ་བཟོད་པ་ལའང་བཞི། རྒྱུ་ཁོང་ཁྲོ་སྤང་བར་གདམས་པ། འབྲས་བུ་འཁོན་འཛིན་སྤང་བ། ཞར་ལ་གཞི་སེམས་ཀྱི་ཁྱད་པར། ཁྲོ་བའི་རྐྱེན་ཚིག་རྩུབ་སྤང་བའོ། །དང་པོ། འདི་ལྟར་བཟོད་པ་དང་མཚུངས་པའི་དཀའ་ཐུབ་གཞན་མ་མཆིས་པས། ཁྱོད་ཀྱིས་དང་པོ་ནས་ཁྲོ་བའི་གོ་སྐབས་དབྱེ་བར་མི་བགྱི་སྟེ། ཁྲོ་བ་སྤངས་པས་འབྲས་བུ་ཕྱིར་མི་ལྡོག་པ་ཉིད། འཐོབ་པར་འགྱུར་བར་སངས་རྒྱས་ཀྱིས་ཞལ་གྱིས་བཞེས་པ་སྟེ། དགེ་སློང་དག་འདི་ལྟ་སྟེ། ཁྲོ་བ་སྤོངས་ཤིག་དང་། ཁྱོད་ཕྱིར་མི་ལྡོག་པའི་གཉའ་བོར་གྱུར་པ་ང་ཡིན་ནོ། །ཞེས་སོ། །གཉིས་པ། བདག་ནི་ཕ་རོལ་པོ་འདིས་དངོས་སུ་ཚིག་ངན་པས་སྤྱོས་ལྐོག་ཏུ་འདིས་གཏག་སྟེ་སྐྱོན་གྱིས་ངན་བྱས་སྟོབས་ཀྱིས་ཕམ་པར་བྱས་སོ། །འདི་ཡིས་བདག་གི་ནོར་ཕྲོགས་པར་གྱུར་ཏོ་ཞེས། སྔར་གྱི་ཁོན་དུ་འཛིན་པའི་སེམས་ཀྱིས་ལུས་ངག་གི་འཁྲུགས་ལོང་རྣམས་སྐྱེད་དེ། ཁོན་འཛིན་དེ་རྣམ་པར་སྤངས་ན་སེམས་ལ་ཟུག་རྔུ་དང་བྲལ་བས་བདེ་བར་གཉིད་ཀྱིས་ལོག་པ་ཞེས་བྱའོ། །གསུམ་པ། འགྲོ་བའི་སེམས་ཀྱི་ཚུལ་ནི་ཆུ་དང་ས་དང་རྡོ་བ་ལ། རི་མོར་བྲིས་པ་དེ་འདྲར་མི་བརྟན་པ་དང་བརྟན་པ་དང་ཤིན་ཏུ་བརྟན་པའི་ཁྱད་པར་རིག་པར་བགྱིའོ། །དེའི་ནང་ནས་ཉོན་མོངས་ཅན་གྱི་སེམས་ལ་དང་པོ་ཆུ་ལ་རི་མོ་ལྟ་བུ་ནི། མཆོག་སྟེ་ཆོས་ལ་འཇུག་པར་འདོད་པའི་དགེ་སེམས་རྣམས་ལ་ནི་ཐ་མ་སྟེ་རྡོ་ལ་རི་མོ་བྲིས་པ་བཞིན་དུ་འགྱུར་བ་མེད་པ་ཉིད་མཆོག་ལགས་སོ། །བཞི་པ། རྒྱལ་བས་མཐུན་པར་སྨྲས་པས་སྙིང་ལ་འབབ་པ་དང་དོན་ཇི་བཞིན་སྨྲ་བ་བདེན་པ་དང་། མི་མཐུན་པའམ་མི་ཤིས་པས་ལོག་པར་སྨྲ་བ་དང་ལྡན་པ་སྟེ་སྐྱེ་བུ་རྣམས་ཀྱི་ཚིག་ནི་གོ་རིམ་བཞིན་དུ། སྦྲང་རྩི་ལྟ་བུ་དང་མེ་ཏོག་ལྟ་བུ་དང་མི་གཙང་ལྟ་བུའི་ཚིག་ཅེས། རྣམ་པ་གསུམ་དུ་ཕྱེ་སྟེ་བཀའ་སྩལ་བ་དེ་ལས། ཐ་མ་ནི་སྤང་བར་བྱ་བ་ཁོ་ནའོ། །བཞི་པ་བརྩོན་འགྲུས་ལ། གང་ལ་བརྩོན་པར་བྱ་བའི་གཞི་དང་། བསམ་སྦྱོར་དག་པར་མཚུངས་པའི་བརྩོན་འགྲུས་ལ་གདམས་པ་གཉིས། དང་པོ། སྣང་ནས་སྣང་བའི་མཐར་ཐུག་སྟེ་འགྲོ་བ་འདིར་ཡང་བདེ་ལ་ཕྱི་མར་ཡང་བདེ་བ་དང་མུན་པ་ནས། མུན་པའི་མཐར་དང་ཐུག་སྟེ་འདིར་སྡུག་བསྔལ་ལ་ཕྱི་མར་ཡང་སྡུག་བསྔལ་གྱི་གནས་སུ་འགྲོ་བ་དང་སྣང་ནས་མུན་མཐར་ཐུག་སྟེ་འདིར་བདེ་བ་ཕྱི་མར་སྡུག་བསྔལ་བ་དང་། མུན་ནས་སྣང་བའི་མཐར་ཐུག་འདིར་སྡུག་ཀྱང་ཕྱི་མར་བདེ་བར་འགྲོ་བའི་གང་ཟག་ནི། བཞི་སྟེ་དེ་ད ག་རྣམས་ཀྱི་ནང་ནས་དང་པོར་ཏེ་བདེ་ནས་བདེ་བར་བགྲོད་པར་མཛོད་ཅིག གཉིས་པ། མི་ནི་ཨ་མྲའི་འབྲས་བུ་བཞིན་དུ་ཕྱི་ནང་སྨིན་མ་སྨིན་གྱི་མི་བཞི་ཡོད་པ་སྟེ་དེ་ཡང་ནང་མ་སྨིན་ལ། ཕྱི་ནས་ལྟས་ན་སྨིན་པ་དང་འདྲ་བ་དང་ནང་སྨིན་ལ་ཕྱི་མ་སྨིན་པ་འདྲ་བ་དང་། ནང་མ་སྨིན་ལ་ཕྱི་ཡང་མ་སྨིན་པར་སྣང་བ་དང་ནང་སྨིན་པ་ལ་ནི། ཕྱི་ཡང་སྨིན་པར་སྣང་ཞེས་བ གྱི་བ་དང་འདྲར་ཤེས་པའམ་རྟོགས་པར་མཛོད་ཅིག ལྔ་པ་བསམ་གཏན་ལ། སྦྱོར་བ། དངོས་གཞི། རྗེས་ཀྱི་བྱ་བ་གསུམ་ལས། དང་པོ་ལ་གཉིས། མི་མཐུན་ཕྱོགས་རྣམ་གཡེང་སྤང་བ་དང་། མཐུན་ཕྱོགས་ཚད་མེད་བཞི་སྒྲུབ་པའོ། །དང་པོ་ལ། ཡུལ་གྱིས་གཡེངས་པ། །ཆོས་བརྒྱད་ཀྱིས་གཡེངས་པ། ནོར་གྱིས་གཡེངས་པ། ལོངས་སྤྱོད་ཀྱིས་གཡེངས་པ་བཞི་ལས། དང་པོ་ལ། ནང་གི་འདུ་ཤེས་སྒྱུར་བའི་སྒོ་ནས་དབང་པོ་ཡོངས་སུ་བསྡམས་པ་དང་། ཡུལ་གྱི་མཚན་ཉིད་ཤེས་པའི་སྒོ་ནས་ཆགས་པ་སྤང་བ་གཉིས། དེའི་དང་པོ་ལའང་བཞི་སྟེ། གཞན་གྱི་བུད་མེད་ལས་དབང་པོ་བསྲུང་བར་གདམས་པ། འདོད་པ་གཞན་ལས་དབང་པོ་བསྲུང་བར་གདམས་པ། དབང་པོ་མ་བསྡམས་པའི་སྐྱོན། དབང་པོ་བསྡམས་ཐུབ་པ་ལ་བསྔགས་པའོ། །དང་པོ་ནི། གཞན་གྱི་ཆུང་མ་ལ་ཆེད་དུ་མི་ལྟ་རང་བཞིན་གྱིས་མཐོང་ན་ཡང་། ན་ཚོད་མཐུན་པར་རང་ལས་ཆེ་ན་མ་དང་ཆུང་ན་བུ་མོ་དང་། མཉམ་ན་སྲིང་མོའི་འདུ་ཤེས་བསྐྱེད་པར་བགྱི་ཡི་ཆགས་པར་མི་བྱ་ཞིང་གལ་ཏེ་ཆགས་པར་གྱུར་ན། དེ་དག་གི་ལུས་མི་གཙང་བ་ཉིད་དུ་ཡང་དག་པར་བསམ་པར་བགྱིའོ། །གཉིས་པ། སྐད་ཅིག་ཀྱང་མི་སྡོད་པར་གཡོ་བའི་སེམས་ནི་ཐོས་པ་དང་མཚུངས་པར་བསྲུང་བ་དང་དེ་བཞིན་དུ་བུ་ལྟ་བུར་དང་། གཏེར་བཞིན་དུ་དང་སྲོག་དང་འདྲ་བར་བསྲུང་བར་བགྱི་སྟེ། དེ་ལ་ཐོས་པའི་དུས་སུ་ཐོས་པའི་དོན་བསྒྲིམས་ཏེ་མ་ཉན་ན། གཡེང་བ་དེའི་ཐད་ཀྱི་ཚིག་ཇི་ཙམ་པ་མི་ཐོས་པས་སྒྲའི་ཕྲེང་བ་ཇི་ཙམ་པ་ལ་ཡིད་མ་ཡེངས་པར་བརྒྱུད་མར་བཞག་དགོས་པ་དང་བུ་ཆུང་སྙིང་དུ་སྡུག་པ་དེ་མེ་དང་གཡང་ས་སོགས་སུ་འགྲོ་དོགས་ཀྱིས་དེ་ལ་དྲན་པས་རྟག་ཏུ་བྱ་ར་བྱེད་པ་དང་། གཏེར་ཆེན་པོ་ཆོམ་རྐུན་སོགས་ཀྱིས་ཁྱེར་བར་དོགས་ནས་ཉིན་མཚན་དུ་བསྲུང་བ་དང་། ནམ་ཡང་རང་གི་སྲོག་འདི་ཕངས་ནས་བསྲུང་བའི་དཔེ་དེ་ཐམས་ཅད་དང་འདྲ་བར་ཤེས་པར་བྱའོ། །སེམས་དེ་ལ་དྲན་པས་བྱ་ར་བཅུག་ནས་གང་ལ་སྲུང་ཞེ་ན། གདུག་པ་སྦྲུལ་ལྟ་བུ་དང་དུག་དང་མཚོན་རྩེ་གཟིང་བ་དང་དགྲ་བོ་དང་། མེ་འབར་བའི་ཀློང་བཞིན་དུ་འདོད་པའི་བདེ་བ་ལ་ཡིད་འབྱུང་བར་མཛོད་ཅིག གསུམ་པ། ཡིད་མ་འབྱུང་ན་ཅིར་འགྱུར་སྙམ་ན། འདོད་པ་རྣམས་ནི་ཕུང་ཁྲོལ་ཏེ་ཉེས་པ་ཆེན་པོ་སྐྱེད་པ་སྟེ། རྒྱལ་བའི་དབང་པོས་ཀིམྦའི་འབྲས་འདྲར་གསུངས་ཏེ། ཀིམྦའི་འབྲས་བུ་ནི་དྲན་ཉེ་ལས་ནུབ་ཕྱོགས་རྒྱ་མཚོའི་གླིང་ན་ཡོད་པའི་ཤིང་ཞིག་སྟེ་འབྲས་བུ་རོ་མངར་ཡང་སྔ་དྲོ་ཟོས་ན་ཕྱི་དྲོ་ཤི་འགྲོ་བ་ཞིག་ཡོད་པར་གསུངས་པ་དེའོ། །དེས་ན་དེ་དག་སྤང་བར་བགྱི་སྟེ་འདོད་པ་དེ་ཡི་ལྕགས་སྒྲོག་གིས། འཁོར་བའི་བཙོན་རར་འཇིག་རྟེན་འདི་དག་དབང་མེད་དུ་བཅིངས་པ་ཡིན་ནོ། །བཞི་པ། གང་དག་མིག་སོགས་དབང་པོ་དྲུག་རང་རང་གི་ཡུལ་གཟུགས་སོགས་རྣམས་ལ་ནི། རྟག་ཏུ་མི་བརྟན་པར་གཡོ་ཞིང་འཇུག་པ་ལས་རྒྱལ་ཏེ་མི་གཡོ་བ་དང་གང་དག་གཞན་གཅིག་གཡུལ་ངོར་དགྲ་ཡི་དཔུང་གི་ཚོགས་ལས་རྒྱལ་བ་དེ་གཉིས་དག་ལས། མཁས་པ་རྣམས་དང་པོ་དེ་སྐྱེས་བུ་དཔའ་བོ་རབ་ལགས་ཏེ་ཡིན་པར་ཤེས་འཚལ་ཏེ། དེའི་རྒྱུ་མཚན་དཔའ་བོ་ནི་བརྟན་པའི་མིང་སྟེ་གཞན་གྱི་དབང་དུ་མ་གྱུར་པའི་དོན་ཡིན་ལ། གཡུལ་ངོར་དགྲ་ལས་རྒྱལ་བ་ཙམ་བྱ་མི་དཀའ་ཞིང་། ཐོག་མེད་ནས་གོམས་པའི་བག་ཆགས་ཀྱིས་དབང་པོའི་རྗེས་འབྲང་གི་ཡིད་ཡུལ་གྱི་དབང་དུ་མ་གྱུར་པའི་སོ་སྐྱེ་སུ་ཡང་མེད་པས། དེ་དག་ལས་རྒྱལ་བ་འདི་གཡུལ་ལས་རྒྱལ་བ་ལས་སྟོང་འགྱུར་གྱིས་དཀའ་བས་སོ། །མདོར་ན་གཡུལ་ལས་རྒྱལ་བ་དུད་འགྲོ་ལའང་ཡོད་ལ། དབང་པོ་ཡུལ་ལས་རྒྱལ་བ་དབང་པོས་ཀྱང་དཀའོ། །གཉིས་པ་ལ་འདོད་ཁམས་ཀྱི་འདོད་པའི་གཙོ་བོ་བུད་མེད་ཀྱི་ལུས་ཡོངས་སུ་ཤེས་པས་ཆགས་པ་སྤང་བ་དང་། འདོད་པ་སྤྱིའི་ཚུལ་ཤེས་ནས་ཆགས་པ་སྤང་བ་གཉིས་ལས། དང་པོ། བུད་མེད་གཞོན་ནུའི་ལུས་ནི་ལོགས་ཤིག་ཏུ་བློས་གཞལ་ན། དྲི་ང་བ་དང་བུ་གའི་སྒོ་དགུ་དོད་པ་དང་། མི་གཙང་བ་འདྲེས་ཙམ་མ་ཡིན་པར་བཤང་གཅི་ཁྲག་སོགས་རྫས་སོ་གཉིས་པོ་ཀུན་གྱི་སྣོད་དང་འདྲ་བ་བཟའ་བཏུང་སོགས་ཇི་ཙམ་སྤྱད་ཀྱང་དགང་དཀའ་བ་དང་། དེ་ལྟ་བུའི་མི་གཙང་བའི་སྣོད་པགས་པས་གཡོགས་པ་དང་དེ་དག་གི་རྒྱན་གསེར་དངུལ་དང་གོས་ལ་སོགས་པ་ཡང་ལོགས་ཤིག་ཏུ་གཟིགས་ཞེས་ལུས་དང་རྒྱན་སོ་སོར་ཕྱེས་ཏེ་རྟོགས་ཤིག་ཅེས་པའོ། །གཉིས་པ། ཇི་ལྟར་མཛེ་ཅན་པགས་པའི་འོག་ནི་རྒྱུ་བའི་སྲིན་བུས་ཉེན་པ་ནི། ཚོར་བ་བདེ་བའི་དོན་དུ་མེ་ལ་ཀུན་བསྟེན་ཀྱང་སྐབས་དེ་ན་སྲིན་རྣམས་ཅུང་མི་རྒྱུ་བར་ཕན་འདྲ་ཡང་། དེས་ནད་ཞི་བར་མི་འགྱུར་བར་སླར་ཡང་ཆེས་ཟུག་རྔུ་སྡང་བ་དེ་དང་འདྲ་བར་ནི། འདོད་པ་རྣམས་ལ་ཆགས་པའང་མི་ཞི་བར་སླར་ཡང་ཆེར་འཕེལ་བར་མཁྱེན་པར་མཛོད་ཅིག གཉིས་པ་ནང་ཆོས་བརྒྱད་ཀྱིས་གཡེང་བ་ལ། གཉེན་པོ་དང་། སྤང་བྱ་གཉིས། དང་པོ་ལ་གཉེན་པོ་དངོས་དང་། གཉེན་པོ་དེ་དང་ལྡན་མི་ལྡན་གྱི་སྐྱོན་ཡོན་བཤད་པ་གཉིས། དང་པོ། དོན་དམ་གྱི་གནས་ཚུལ་མི་རྟག་སྡུག་བསྔལ་སྟོང་བདག་མེད་པའི་དོན་གཟིགས་པར་བགྱི་སླད་དངོས་པོ་རྣམས་ལ། དངོས་པོའི་གནས་ཚུལ་ཇི་ལྟ་བ་བཞིན་དུ་ཡིད་ལ་བགྱིད་པ་དེ་ལ་གོམས་པར་མཛོད་ཅིག དེ་དང་འདྲ་བར་བསྔགས་འོས་ཡོན་ཏན་དང་ལྡན་པ་ཡི། ཆོས་གཞན་འགའ་ཡང་མཆིས་པ་མ་ལགས་སོ་སྟེ་ནང་སེམས་ཀྱི་དགྲ་ཆོམ་པས་སོ། །གཉིས་པ། སྐྱེས་བུ་གང་དག་རིགས་དང་གཟུགས་དང་མང་དུ་ཐོས་པ་དང་ལྡན་པ་རྣམས་ཀྱང་། དོན་ཚུལ་བཞིན་སེམས་པའི་ཤེས་རབ་དང་ཚུལ་བཞིན་བགྱི་བའི་ཚུལ་ཁྲིམས་དང་བྲལ་བ་ནི་བཀུར་བར་བྱ་བའི་འོས་མ་ལགས་སོ། །དེ་ལྟ་བས་ན་གང་ཟག་གང་ལ་ཚུལ་བཞིན་བསམ་ཞིང་སྤྱོད་པའི་ཤེར་ཚུལ་གྱི་ཡོན་ཏན་འདི་གཉིས་དང་ལྡན་པ། དེ་ནི་རིགས་སོགས་ཡོན་ཏན་གཞན་རྣམས་དང་བྲལ་ཡང་མཆོད་པར་འོས་སོ། །གཉིས་པ་སྤང་བྱ་ལ། ཆོས་བརྒྱད་དངོས་དང་། དེའི་འབྲས་བུ་སྡིག་པ་སྤང་བར་གདམས་པ་གཉིས། དང་པོ། འཇིག་རྟེན་པའི་ཚུལ་མཁྱེན་པ་ཞེས་བོས་ནས་ལོངས་སྤྱོད་རྙེད་པ་དང་མ་རྙེད་པ་དང་། ལུས་སེམས་བདེ་བ་དང་མི་བདེ་བ་དང་རྣ་བར་ཚིག་སྙན་པ་དང་མི་སྙན་པ་དང་། ངོར་བསྟོད་པ་དང་ལྐོག་ཏུ་སྨད་པ་ཅེས་བགྱི་བའི་འཇིག་རྟེན་གྱི་ཆོས་ནི་བརྒྱད་པོ་སྟེ། འཇིག་རྟེན་པ་རྣམས། འདི་ལ་གནས། འདི་ལ་བརྟེན། འདི་ལ་སྤྱོད་འདི་ལས་འདའ་མི་ནུས་པས་སོ། །དེ་རྣམས་ནི་བདག་དམ་པའི་ངང་ཚུལ་ཅན་དག་གི་ཡིད་ཀྱི་ཡུལ་དུ་བྱས་ཤིང་ཞེན་རུང་བ་མིན་པར་བསྟོད་སྨད་སོགས་ཐམས་ཅད་མགོ་སྙོམས་པར་མཛོད་ཅིག གཉིས་པ་ལ། དངོས་དང་། དེ་སྤང་དགོས་ཚུལ་གཉིས། དང་པོ། ཁྱོད་ཀྱིས་རང་དོན་དུ་མ་ཟད་མཆོད་གནས་བྲམ་ཟེ་དང་དགེ་སློང་དང་ལྷ་དང་ནི། བཤེས་སུ་གྱུར་པའི་མགྲོན་དང་ཡབ་ཡུམ་སྟེ་ཕ་མ་དག་དང་དེ་བཞིན་བཙུན་མོ་དང་། འཁོར་གྱི་སླད་དུའང་སྡིག་པ་མི་བགྱི་སྟེ། འབྲས་བུ་དམྱལ་བའི་རྣམ་སྨིན་རང་གིས་མྱོང་བའི་ཚེ་རྣམ་སྨིན་གྱི་སྐལ་བ་ནོད་པའམ་ལེན་པ་གཞན་འགའ་ཡང་མ་མཆིས་སོ། །གཉིས་པ། སྡིག་པའི་ལས་རྣམས་སྤྱོད་པ་སུ་འགའ་ཡང་ནི། དེ་ཡི་མོད་ལ་མཚོན་གྱིས་བཏབ་པ་བཞིན་དུ་མི་གཅོད་ཀྱང་། ནམ་འཆི་བའི་དུས་ལ་བབ་པ་ན་ཉེས་སྤྱོད་སྡིག་པ་ཡི། ལས་ཀྱི་འབྲས་བུ་སྡུག་བསྔལ་བ་གང་ལགས་པ་མངོན་པར་འགྱུར་ཏེ་བྱ་ནམ་མཁའ་ལ་འཕུར་བའི་གྲིབ་མ་བཞིན་ནོ། །གསུམ་པ་ནོར་གྱིས་གཡེང་བ་ལ། ནོར་ལ་སྤང་བླང་གི་དབྱེ་བ་སྤྱིར་བཤད། བྱེ་བྲག་མནོག་ཆུང་གི་བྱ་བ་སྤང་བ། སྤོང་བྱེད་ཀྱི་གཉེན་པོ་གསུམ་ལས། དང་པོ། དད་པ་དང་ཚུལ་ཁྲིམས་དང་ཐོས་པ་དང་གཏོང་བ་ལ་གོམས་པ་དང་། རང་ལ་ལྟོས་ཏེ་དྲི་མ་མེད་པའི་ངོ་ཚ་ཤེས་པ་དང་གཞན་རྒྱུ་མཚན་དུ་བྱས་ཏེ་ཁྲེལ་ཡོད་པ་དག་དང་། ཤེས་རབ་ནི་འཕགས་པའི་ནོར་བདུན་ལགས་པར་ཐུབ་པས་གསུངས་ཏེ། ནོར་འདིས་རང་གཞན་གྱི་གནས་སྐབས་དང་མཐར་ཐུག་གི་དབུལ་བ་སེལ་ཞིང་དོན་ཆེ་ལ། ནོར་གཞན་ཕལ་བ་ནི་མི་རྟག་པ་བསླུ་ཞིང་འབྲི ད་པ་འཆིང་བའི་རྒྱུར་གྱུར་བས་དོན་མ་མཆིས་པར་རྟོགས་པར་མཛོད་ཅིག གཉིས་པ། ཁྱད་པར་དུའང་ཆོ་ལོ་སོགས་རྒྱན་པོ་འགྱེད་དང་ཁྲོམ་སོགས་འདུས་པ་ལ་ལྟ་ཞིང་གཡེང་བ་དང་། བརྩོན་པ་དོར་བའི་ལེ་ལོ་དང་སྡིག་པའི་གྲོགས་པོ་ལ་བརྟེན་པ་དང་། ཆང་འཐུང་བ་དང་མཚན་མོ་གནས་གཞན་དུ་རྒྱུ་བ་རྣམས་ནི་འབྲས་བུ་ངན་སོང་དུ་འགྲོ་བའི་རྒྱུར་ཉེ་བ། ཚེ་འདིར་གྲགས་པ་ཉམས་པར་འགྱུར་བ་ཡི་རྒྱུ་ཡིན་པས་དེ་དྲུག་སྤང་བར་མཛོད་ཅིག གསུམ་པ་ལ། གཉེན་པོའི་ཕན་ཡོན། དེ་དང་བྲལ་བའི་ཉེས་དམིགས་གཉིས། དང་པོ། ནོར་རྣམས་ཀུན་གྱི་ནང་ན་འདོད་པ་ཆུང་ཞིང་ཆོག་ཤེས་པ་ནི། རབ་དང་མཆོག་ཏུ་གྱུར་པ་ལགས་པར་ལྷ་མིའི་སྟོན་པས་གསུངས་སོ། །དེས་ན་དུས་ཀུན་ཏུ་ཆོག་ཤེས་པར་མཛོད་ཅིག་ཆོག་ཤེས་པའམ་མཁྱེན་ན། གསེར་སོགས་ནོར་མི་བདོག་ཀྱང་ཡང་དག་འབྱོར་པ་ཡི་འབྲས་བུ་མྱོང་བ་ལགས་ཏེ་འབྱོར་པའི་དགོས་པ་ནི་ཆོག་ཤེས་ཡིན་པའི་ཕྱིར་རོ། །གཉིས་པ། དེས་པ་ཞེས་རྒྱུད་ཞི་ཞིང་དུ ལ་བ་ལ་བོས་ནས་བདོག་པ་མང་པོ་རྣམས་བསོག་བསྲུང་བརླག་པས་ཇི་ལྟར་སྡུག་བསྔལ་བ་དེ་ལྟར། འདོད་པ་ཆུང་བ་རྣམས་ནི་དེ་ལྟ་བུ་སྡུག་བསྔལ་བ་མ་ལགས་ཏེ། དཔེར་ན་ཀླུ་ཇི་ལྟར་འབྱོར་པ་ཆེ་བ་ལྟར་སྦྲུལ་མགོའི་གདེངས་ཀའང་མང་བས་ཀླུ་མཆོག་དེ་རྣམས་ལ་མགོ་བོ་ཇི་སྙེད་པ། དེ་ལས་བྱུང་བའི་བྱེ་ཚན་སོགས་ཀྱིས་གནོད་པའི་ན་ཚ་སྡུག་བསྔལ་ཡང་དེ་སྙེད་ཡོད་དོ། །བཞི་པ་ལོངས་སྤྱོད་ལ་ཁྱིམ་ཐབ། ཟས། གཉིད་ལ་ཆགས་པ་སྤང་བ་གསུམ། དང་པོ་ལ། སྤང་བྱ་དང་། བླང་བྱ་གཉིས། དང་པོ། རང་བཞིན་གྱིས་དགྲར་འབྲེལ་གསོད་པའི་གཤེད་མ་ལྟ་བུ་དང་། ཁྱིམ་ཐབ་དེ་ཉིད་བརྙས་པར་བགྱིད་པ་རྗེ་མོ་ལྟ་བུ་དང་། དངོས་པོ་ཆུང་ངུའང་ཆེད་དུ་མི་སློང་བར་ཕག་ཏུ་རྐུ་བ་ཆོམ་རྐུན་ལྟ་བུ་ཡི། ཆུང་མ་གསུམ་པོ་དེ་དག་རྣམ་པར་སྤང་བར་བྱའོ། །གཉིས་པ། སྲིང་མོ་ལྟ་བུར་རང་དང་རྗེས་སུ་མཐུན་པ་གང་ཡིན་པ་དང་། མཛའ་མོ་བཞིན་དུ་སྙིང་ལ་འབབ་པ་དང་། མ་བཞིན་དུ་རང་ལ་ཕན་པར་འདོད་པ་དང་། བྲན་མོ་བཞིན་དུ་རང་གི་དབང་དུ་གྱུར་པ་གང་ཡིན་པ་དེ་ནི་སོ་སོའི་རིགས་མི་ཉམས་པའི་རྒྱུ་ཡིན་པས་རིགས་ཀྱི་ལྷ་བཞིན་དུ་བཀུར་བར་བྱའོ། །གཉིས་པ་ཟས་ནི། ཁ་ཟས་ནི་དཔེར་ན་སྨན་དང་འདྲ་བར་རིག་པའམ་ཤེས་པ་ཡིན་ཏེ་སྨན་ནད་གཞི་ལ་ཚོད་ཙམ་ལས་ཆེ་ཆུང་དུ་སོང་ན་མི་ལེགས་པ་ལྟར་ཚོད་རིག་པས། དེ་ཡང་ཀུན་སློང་འདོད་ཆགས་དང་ཞེ་སྡང་མེད་པར་བསྟེན་པར་བགྱི་སྟེ་ཞེས་སྤྱིར་བསྟན་ནས། བྱེ་བྲག་ཏུ། རྒྱགས་ཕྱིར་མ་ལགས་བསྙེམ་པའི་ཕྱིར་མ་ལགས། ཞེས་ཟས་ཀྱིས་ལུས་རྒྱས་ནས་གཞུ་འགེངས་པ་སོགས་སྟོབས་སྐྱེ་བའི་ཆེད་དུ་ཟ་བ་སྟོབས་ཀྱི་རྒྱགས་པའི་ཕྱིར་ཟ་བ། ལང་ཚོ་ཡུན་རིང་དུ་གནས་ཕྱིར་ཟ་བ་ལང་ཚོའི་རྒྱགས་པའི་ཕྱིར་ཟ་བ། དེ་བཞིན་བཞིན་ལ་སེམས་པ། ནད་མེད་པ་ཡུན་རིང་གནས་པ་སོགས་ཀྱི་ཕྱིར་ཟ་བ་དེ་དང་དེའི་རྒྱགས་པའི་ཕྱིར་ཟ་བའོ། །ཡང་ཟས་བཅུད་ཆེན་གྱིས་ལུས་ཀྱི་ཤེད་བསྐྱེད་ནས་སྟོབས་རྙེད་པ་ན་གཞན་གྱི་བུད་མེད་ལ་སྤྱོད་པའམ་དགྲ་ལ་གནོད་པར་བྱ་བ་སོགས་ཕྱིན་ཅི་ལོག་གི་དོན་འདི་ལ་འཇུག་པར་བྱའོ་སྙམ་པ་སྙེམ་པའི་ཕྱིར་ཟ་བ་དང་། ཡང་འཚག་པ་སྟེ་ཟས་བཅུད་ཅན་སོགས་ཀྱིས་ལུས་ཀྱི་ཤ་རྒྱས་པའི་ཕྱིར་ཡང་མ་ལགས་ཏེ་རྒྱགས་འཚག་གཉིས་ཆགས་པ་དང་སྙེམས་པ་གཞན་ལ་གནོད་པ་ཡིན་པས་ཞེ་སྡང་གིས་ཟ་བ་སྟེ་དེས་ན་དེ་ལྟ་བུའི་ཆེད་མ་ཡིན་པར་དམ་ཆོས་སྤྱོད་པའི་རྟེན་ལུས་གནས་པ་འབའ་ཞིག་གིས་ཕྱིར་ཟ་བར་བྱའོ། །གསུམ་པ་གཉིད་ནི། དོན་རིག་པའི་བདག་ཉིད་ཅེས་བོས་ནས་ཉིན་པར་མཐའ་དག་སྟེ་ཐམས་ཅད་དུ་མི་གཉིད་པ་དང་། མཚན་མོའང་ཆ་གསུམ་དུ་ཕྱེ་བའི་ཐུན་གྱི་སྟོད་སྨད་གཉིད་མེད་པའི་དུས་ཀྱིས་འདའ་བའམ་བཟླས་པར་བྱས་ནས་ནི། མཚན་ཐུན་བར་བར་མནལ་ཚེའང་གཉིད་དེ་དག་ལ་འབྲས་བུ་མེད་པར་བཏང་སྙོམས་ལུང་མ་བསྟན་དུ་མི་འགྱུར་བར། ཆོས་སྤྱོད་ཀྱི་རྟེན་ལུས་གནས་པའི་ཕྱིར་གཉིད་པར་བྱའོ་སྙམ་དུ་ཤེས་བཞིན་དུ་དྲན་པ་དང་ལྡན་པར་མཚན་ཐུན་སྟོད་སྨད་དེ་དག་གི་བར་དུ་མནོལ་ཅིག དེའི་ཚེ་གཉིད་ལུང་མ་བསྟན་དགེ་བ་ལ་བསྒྱུར་བའི་ཐབས་སུ། ཉིན་པར་ཡང་ཡིད་ཀྱིས་དགེ་ཆོས་རྣམས་དྲན་བཞིན་པ་དང་། སྣང་བའི་འདུ་ཤེས་མུན་པ་སེལ་བའི་འོད་ཀྱི་མཚན་མ་ལ་སེམས་གཏད་ནས་མྱུར་དུ་ལྡང་བའི་འདུན་པ་དང་བཅས་ཏེ་གཉིད་པར་བྱས་ན་ཀུན་སློང་གི་དགེ་བར་འགྱུར་གྱི། གཉིད་ཀྱི་དུས་རང་ལ་འདུན་པ་མེད་ཀྱང་རུང་ངོ་། །གཉིས་པ་མཐུན་ཕྱོགས་ཚད་མེད་བཞི་བསྒྲུབ་པ་ནི། སེམས་ཅན་ཐམས་ཅད་བདེ་འདོད་ཀྱི་བྱམས་པ་དང་སྡུག་བསྔལ་དང་བྲལ་འདོད་ཀྱི་སྙིང་རྗེ་དག་དང་བདེ་བ་དང་ལྡན་པ་ལ་དགའ་བ་དང་། དེ་ལྟ་བུའང་ཉེ་རིང་མེད་པར་བརྡལ་བའི་བཏང་སྙོམས་ཏེ་འདི་བཞི་རྟག་ཏུ་ཡང་དག་པར་སྒོམ་མཛོད་ཅིག་དང་། དེས་གོང་མ་སངས་རྒྱས་ཀྱི་ས་བརྙེས་པར་མ་གྱུར་པ་དེ་ལྟ་ནའང་། ཚངས་པའི་འཇིག་རྟེན་གྱི་བདེ་བ་ཚད་མེད་པ་ཐོབ་པར་འགྱུར་རོ། །གཉིས་པ་དངོས་གཞི་བསམ་གཏན་བཞི་བསྒོམ་པར་གདམས་པ་ནི། ཞི་གནས་ཁྱད་པར་ཅན་གྱི་བསམ་གཏན་སྒོམ་ཚུལ། གཉེན་པོའི་ཡན་ལག་རྟོག་དཔྱོད་ཀྱིས་འདོད་པ་ན་སྤྱོད་པ་འདོད་འདུན་རྣམ་འཚེ་སོགས་སྤངས་ཤིང་། ཕན་ཡོན་གྱི་ཡན་ལག་དབེན་པ་ལས་སྐྱེས་པའི་དགའ་བདེ་ཐོབ། གནས་ཀྱི་ཡན་ལག་སེམས་རྩེ་གཅིག་པ་སྟེ་བསམ་གཏན་དང་པོ་དང་། དེ་བཞིན་དུ་རབ་དང་གིས་རྟོག་དཔྱོད་སྤངས་ཤིང་དགའ་བདེ་དང་ལྡན་པའི་སེམས་ནི་གཉིས་པ་དང་། འདུ་བྱེད་བཏང་སྙོམས་དང་དྲན་ཤེས་ཀྱིས་དགའ་བ་སྤངས་ཤིང་བདེ་བ་དང་ལྡན་པའི་སེམས་གསུམ་པ་དང་། དྲན་པ་དང་བཏང་སྙོམས་ཡང་དག་གིས་བདེ་བ་སྤངས་ཤིང་ཚོར་བ་བཏང་སྙོམས་དང་ལྡན་པའི་སེམས་རྩེ་གཅིག་པ་བསམ་གཏན་བཞི་པ་ཐོབ་ཅིང་གཞན་ཡང་སྡུག་བསྔལ་དང་ཡིད་མི་བདེ་བ་དག་ནི་ཐམས་ཅད་ཀྱི་སྤང་བའོ། །དེ་ལྟར་སྤང་བྱ་དེ་དག་རྣམ་པར་སྤང་བའི་རྒྱུ་སྙོམས་འཇུག་གི་བསམ་གཏན་བཞི་པོ་དེ་ཡིས། རིམ་པར་འབྲས་བུ་ཚངས་རིས་དང་འོད་གསལ་དག་དང་དགེ་རྒྱས་དང་། འབྲས་བུ་ཆེ་ཡི་ལྷ་རྣམས་དང་སྐལ་མཉམ་ཐོབ་པ་སྟེ་དོན་དུ་དེར་སྐྱེ་བ་ཡིན་ནོ། །གསུམ་པ་རྗེས་ཀྱི་བྱ་བ་ལ་གཉིས། དགེ་སྡིག་བླང་དོར་སྤྱིར་བཤད་པ་དང་། ཁྱད་པར་ཏིང་ངེ་འཛིན་གྱི་སྒྲིབ་པ་སྤང་ཚུལ་ལོ། །དང་པོ་དགེ་སྡིག་གི་ལྕི་ཡང་བཤད་པ་དང་། མི་དགེ་བའི་གཉེན་པོར་དགེ་བ་སྟོབས་ཆེན་བསྐྱེད་པར་གདམས་པ་གཉིས། དང་པོ། དགེ་སྡིག་གང་ཡིན་ཀྱང་དུས་རྟག་པར་བྱེད་པ་དང་༡དེ་ལ་མངོན་པར་ཞེན་པ་དྲག་པོ་བྱེད་པ་དང་༢ལས་དེ་ལ་རང་འཇོམ་པའི་གཉེན་པོ་མེད་པ་དང་། ༣ ཡོན་ཏན་གྱི་གཞིའམ་ཞིང་དཀོན་མཆོག་སོགས་དང་གཙོ་ལྡན་ཏེ་ཞིང་སྤྱི་ལས་གཙོ་བོར་ཕན་འདོགས་དང་སྡུག་བསྔལ་གྱི་ཞིང་གི་གཞི་ལས་བྱུང་བའི་ལས། དགེ་དང་མི་དགེ་རྣམ་ལྔ་ནི་ལས་གཞན་ལས་ཁྱད་པར་འཕགས་པའི་ཆེན་པོ་སྟེ། དེ་བས་མི་དགེ་བ་ཆེན་པོ་སྤང་ཞིང་དགེ་བ་ཆེན་པོ་སྤྱོད་པ་ལ་བརྩོན་པར་བགྱིའོ། །གཉིས་པ། དགེ་བ་སྟོབས་ཆེ་བས་དཔེར་ན་ལན་ཚྭ་སྲང་འགས་ཆུ་ནི་ཉུང་ངུ་ཞིག རོ་བསྒྱུར་བར་བགྱིད་ནུས་ཀྱི་གངྒའི་ཀླུང་ཆེན་པོར་རོ་སྒྱུར་ནུས་པ་མིན་པ་ལྟར། དེ་བཞིན་དུ་སྡིག་པའི་ལས་ནི་ཆུང་ངུ་བྱས་ན་ཡང་། དགེ་བའི་རྩ་བ་ཡངས་ཤིང་རྒྱ་ཆེ་བ་ལ་གནོད་མི་ནུས་པ་མཁྱེན་པར་བགྱིའོ། །གཉིས་པ་ཏིང་ངེ་འཛིན་གྱི་སྒྲིབ་པ་སྤང་ཚུལ། སེམས་ཡུལ་ལ་འཕྲོ་བའི་རྒོད་པ་དང་སྔར་བྱས་སོགས་ལ་འགྱོད་པ་དང་གཞན་ལ་གནོད་པའི་སེམས་དང་སེམས་ནང་དུ་རྨུགས་པ་དང་། འཇུག་ཤེས་ནང་དུ་སྡུད་པའི་གཉིད་དང་ཟག་བཅས་ཡིད་འོང་གི་འདོད་ཡོན་ལ་འདུན་པ་དང་ལམ་དང་འབྲས་བུ་སོགས་ལ་ཐེ་ཚོམ་པ་སྟེ། སྒྲིབ་པ་ལྔ་པོ་འདི་དག་ནི་དགེ་བའི་ནོར། འཕྲོག་པར་བྱེད་པའི་ཆོམ་རྐུན་ལགས་པར་མཁྱེན་པར་མཛོད་ཅེས་གདམས་སོ། །འདིར་རྒོད་འགྱོད་གཉིས་གཅིག་ཏུ་བྱས་པ་ནི་གཡོ་བར་ཆོས་མཐུན་པའི་ཕྱིར་དང་། རྨུགས་གཉིད་གཉིས་གཅིག་ཏུ་བྱས་པ་ནི་མི་གསལ་བར་ཆོས་མཐུན་པའི་ཕྱིར་རོ། །དྲུག་པ་ཤེས་རབ་ལ་གཉིས། དད་སོགས་ལྔའི་ལམ་གྱི་ངོ་བོ་མདོར་བསྟན་པ་དང་། དྲན་པ་ཉེར་བཞག་སོགས་ཀྱིས་ཤེས་རབ་རྒྱས་པར་བཤད་པའོ། །དང་པོ་ལ། བླང་བྱ་དང་སོགས་བསྟན་པ་དང་། སྤང་བྱ་གཉེན་པོའི་སྒོ་ནས་རྒྱགས་པ་སེལ་ཚུལ་གཉིས། དང་པོ། དགེ་ལ་འདུན་པའི་དད་པ་དང་དེ་ལ་སྤྲོ་བའི་བརྩོན་འགྲུས་དག་དང་སྔར་གྱི་དམིགས་རྣམ་མི་བརྗེད་པའི་དྲན་པ་དང་། དམིགས་པའི་དོན་ལ་རྩེ་གཅིག་པའི་ཏིང་ངེ་འཛིན་དང་ཆོས་རབ་ཏུ་རྣམ་པར་འབྱེད་པའི་ཤེས་རབ་ནི་སྦྱོར་ལམ་ཆོས་མཆོག་གི་ངོ་བོར་གྱུར་པའང་འདི་ལྔ་ཉིད་དེ། འདི་ལ་མངོན་པར་བརྩོན་མཛོད་ཅིག་འདི་དག་ནི། བཟོད་པའི་སྐབས་ན་སྟོབས་ལྔ་དང་དྲོད་ཀྱི་སྐབས་དབང་པོ་ལྔ་ཞེས་བགྱི་སྦྱོར་ལམ་རྩེ་མོར་གྱུར་པའང་འདི་ལྔ་ལས་གཞན་ཡོད་པ་མིན་པ་ལགས་སོ། །གཉིས་པ། ན་བ་དང་རྒ་བ་དང་སྐྱེ་བ་དང་འཆི་བ་དང་སྡུག་པ་དང་བྲལ་བ་དང་དེ་བཞིན་དུ། སྡུག་བསྔལ་དེ་དག་གི་རྒྱུ་ལས་ནི་བདག་གིར་བྱ་བ་ལས་མ་འདས་པས་བདག་སྡུག་བསྔལ་གྱི་རྒྱུ་འབྲས་ལ་གནས་སོ་ཞེས། དེ་ལྟར་ཡང་དང་ཡང་དུ་སེམས་པ་དེ་ནི། སྤང་བྱ་དེ་ཡི་གཉེན་པོའི་སྒོ་ནས་བདག་ནི་ཏིང་འཛིན་དང་ཤེས་རབ་ལྡན་ནོ་ལ་སོགས་པའི་རྒྱགས་པ་སྐྱེ་བར་མི་འགྱུར་རོ། །ཡང་ན་རིགས་སོགས་ཀྱི་རྒྱགས་པ་དེ་ཡི་གཉེན་པོ་བྱས་པའི་སྒོ་ནས་རྒྱགས་པར་མི་འགྱུར་ཏེ་རྒྱགས་པ་སེལ་ལོ་ཞེས་ཀྱང་གསུངས། གཉིས་པ་ལ། སྲིད་ཞིའི་ལེགས་ཚོགས་ཐམས་ཅད་ཀྱི་རྩ་བ་ཤེས་རབ་ཡིན་པར་བསྟན་པ་དང་། ཤེས་རབ་དེ་ལྡན་གྱི་ལམ་དངོས་བཤད་པ་གཉིས། དང་པོ་ལ། མངོན་མཐོ་དང་ངེས་ལེགས་གཉིས་ཀའི་རྩ་བ་འཇིག་རྟེན་པའི་ཡང་དག་པའི་ལྟ་བ་དང་། ངེས་ལེགས་ཀྱི་རྩ་བ་འཇིག་རྟེན་ལས་ཡང་དག་པར་འདས་པའི་ལྟ་བ་གཉིས། དང་པོ། གལ་ཏེ་མཐོ་རིས་དང་ཐར་པ་གཉིས་མི་འདོད་ན་ཕར་བཞག་མངོན་དུ་བཞེད་པའམ་འདོད་པ་ཞིག་ན་ནི། ལས་འབྲས་སོགས་མི་བསླུ་བར་རྟོགས་པའི་འཇིག་རྟེན་པའི་ཡང་དག་པའི་ལྟ་བ་ལ་གོམས་པ་ཉིད་དུ་མཛོད་ཅིག གང་ཟག་གང་ཞིག་ལས་འབྲས་མེད་ཅེས་ལོག་པར་ལྟ་བས་ནི་ལྟར་སྣང་ལེགས་སྤྱད་དེ་དགེ་བ་སྤྱད་ཀྱང་། དེས་མི་ཕན་པར་ཐམས་ཅད་དུ་རྣམ་པར་སྨིན་པ་མི་བཟད་པ་མནར་མེད་པའི་སྡུག་བསྔལ་དང་ལྡན་ནོ། །འདིར་སྒྲོལ་ཊཱིཀ་ཏུ། ལོག་ལྟས་སྦྱིན་སོགས་བཏང་ཡང་རྣམ་སྨིན་མི་བཟད་མི་འཐད་ཅེ་ན། ལོག་ལྟའི་འབྲས་བུ་ཆེན་པོས་དགེ་འབྲས་ཆུང་ངུ་ཟིལ་གྱིས་མནན་ནས་མྱོང་མི་ནུས་པའི་དོན་ཏོ་གསུངས། རོང་ཊཱིཀ་ཏུ་སྔར་སྦྱིན་པ་སོགས་ལ་ལེགས་པར་སྤྱད་པ་ཐམས་ཅད་ཀྱང་། རྣམ་སྨིན་མི་བཟད་པ་ཤིན་ཏུ་ངན་པ་དང་ལྡན་པར་འགྱུར་ཏེ། ལོག་ལྟས་དགེ་བའི་རྩ་བ་རྣམས་དྲུང་ནས་ཕྱུང་བའི་ཕྱིར་རོ་གསུངས། གཉིས་པ། གདུལ་བྱའི་དབང་གིས་སྨོས་པ་མི་ནི་ཡང་དག་ཉིད་དུ་མི་བདེ་ཞིང་སྡུག་བསྔལ་བ་དང་། དུས་གཉིས་པར་མི་སྡོད་པས་མི་རྟག་པ་དང་བྱེད་པ་པོའི་བདག་མེད་པ་དང་ལུས་མི་གཙང་བའི་རང་བཞིན་དུ་རིག་པར་བགྱིའོ། །དེ་ལྟ་བུའི་དོན་ལ་དྲན་པ་ཉེ་བར་མ་བཞག་པ་རྣམས་ཀྱིས་ནི། གཙང་བདེ་རྟག་བདག་སྟེ་ཕྱིན་ཅི་ལོག་བཞིར་ལྟ་བ་ནི་ཕུང་ཁྲོལ་བ་ཅན་ཡིན་ནོ། །གཉིས་པ་ལ་གཙོ་ཆེ་བ་ལྟ་བ་བྱེ་བྲག་ཏུ་བཤད་པ་དང་། ལམ་དངོས་གཉིས། དང་པོ་ལ། གང་ཟག་གི་བདག་མེད་གཏན་ལ་དབབ་པ་དང་། བདག་གི་རྟེན་ཕུང་པོ་ལ་དཔྱད་པ་གཉིས། དང་པོ། འདི་ལྟར་གཟུགས་ཀྱི་ཕུང་པོའི་ངོ་བོ་ནི་བདག་མ་ཡིན་ཞེས་མདོ་ལས་གསུངས་ཏེ་ངོ་བོ་གཅིག་པ་མ་ཡིན་ལ་དེ་བཞིན་དུ་བདག་གཟུགས་དང་ལྷས་སྦྱིན་ལ་རིལ་བ་ལྟར་ཕན་ཚུན་འབྲེལ་བར་ལྡན་པའང་མིན་ཞིང་གཟུགས་ལ་བདག་ཕར་རྟེན་ཏེ་གནས་པ་ཡང་མིན། བདག་ལ་གཟུགས་ཚུར་བརྟེན་པའི་ཚུལ་གྱིས་ཐ་དད་པར་ཡང་མི་གནས་ཏེ་དེ་བཞིན་དུ། ཕུང་པོ་ལྷག་མ་གཞན་ཚོར་བ་འདུ་ཤེས་འདུ་བྱེད་རྣམ་ཤེས་ཏེ་བཞི་པོ་ལ་ཡང་བདག་གིས་སྟོང་པར་རྟོགས་པར་བགྱིའོ། །གཉིས་པ་ནི། བདག་གིས་སྟོང་པའི་གཞི་ཕུང་པོ་དེ་ཡང་གནམ་བབ་སྟེ་རེས་འགའ་བདག་ལས་སྐྱེ་རེས་གཞན་ལས་རེས་རྒྱུ་ཡོད་རེས་རྒྱུ་མེད་ལྟ་བུ་འདོད་རྒྱལ་ལས་སྐྱེ་བ་མིན་ཞིང་དུས་ཀྱི་དབང་ལས་ཀྱང་མིན། གཙོ་བོའམ་རང་བཞིན་གྱི་རྒྱུ་ལས་མིན་ཞིང་རང་གི་ངོ་བོ་ཉིད་ཀྱིས་ཏེ་བདག་སྐྱེ་ལས་ཀྱང་མིན་ལ། དབང་ཕྱུག་སོགས་བྱེད་པ་པོ་རྟག་པ་ལས་མིན་ཞིང་རྒྱུ་མེད་པ་ཅན་ཆད་པ་ཡང་མིན་ཏེ། གང་ཞེ་ན་རྒྱུ་མི་ཤེས་པ་སྟེ་མ་རིག་པ་དང་རྐྱེན་ལས་དང་སྲིད་པས་མཚམས་སྦྱར་བ་ལས་བྱུང་བར་རིག་པའམ་ཤེས་པར་མཛོད་ཅིག གཉིས་པ་ལམ་དངོས་ལ། ལམ་གྱི་མི་མཐུན་ཕྱོགས་ཀུན་སྦྱོར་གསུམ་བཤད་པ། མཐུན་རྐྱེན་བརྩོན་འགྲུས། ལམ་གྱི་ངོ་བོ་ལ་བསླབ་པ་གསུམ་ལས། དང་པོ། ཕྱིན་ཅི་ལོག་གི་ཚུལ་ཁྲིམས་དང་བརྟུལ་ཞུགས་ལ་མཆོག་ཏུ་འཛིན་པ་དང་རང་ལུས་ཕུང་པོ་ལྔ་ལ། ཕྱིན་ཅི་ལོག་པར་བདག་ཡོད་པར་ལྟ་བ་འཇིགས་ལྟ་དང་ལམ་དང་འབྲས་བུའི་ཆོས་ལ་ཐེ་ཚོམ་ཟ་བ་སྟེ། སྲིད་པར་ཀུན་ཏུ་སྦྱོར་བར་བྱེད་པ་འདི་གསུམ་ཐར་པ་ཡི། གྲོང་ཁྱེར་གྱི་སྒོ་འགེགས་པར་བྱེད་པ་ལགས་པར་མཁྱེན་པར་གྱིས་ཤིག གཉིས་པ། ཐར་པ་ནི་བདག་རང་ལ་རག་ལས་ཀྱི་དོན་འདི་ལ་ནི། རང་གིས་ལམ་རྒྱུད་ལ་མ་བརྟེན་ན་གཞན་གྱིས་མགོན་བྱེད་པ་དང་ལམ་གཡར་བ་སོགས་གྲོགས་བགྱིར་ཅི་ཡང་མ་མཆིས་པས། དང་པོར་གཞུང་ལུགས་ལ་ཐོས་པ་ཤེས་རབ་དང་དེ་ནས་ཚུལ་ཁྲིམས་བསྲུང་ཞིང་རྩེ་གཅིག་པའི་བསམ་གཏན་དང་ལྡན་པ་ཡིས། ཐར་ལམ་གྱི་ངོ་བོ་སྡུག་བསྔལ་ཤེས་ཀུན་འབྱུང་སྤང་འགོག་པ་མངོན་དུ་བྱེད་ལམ་རྒྱུད་ལ་བརྟེན་པ་སྟེ་འཕགས་པའི་བདེན་པ་རྣམ་པ་བཞི་ལ་འབད་པར་མཛོད་ཅིག གསུམ་པ་ལ། བསླབ་གསུམ་སྤྱིར་བཤད་པ་དང་། ཤེས་རབ་ཀྱི་བསླབ་པ་བྱེ་བྲག་ཏུ་བཤད་པ་གཉིས། དང་པོ། ཕྱི་རོལ་པ་སོགས་ལས་འཕགས་པས་ན་ལྷག་པའི་ཚུལ་ཁྲིམས་དང་ལྷག་པའི་ཤེས་རབ་དང་། ལྷག་པའི་སེམས་ཏེ་ཏིང་ངེ་འཛིན་གྱི་བསླབ་པ་གསུམ་ལ་རྟག་ཏུ་བསླབ་པར་བགྱིའོ། །དེ་ལྟར་ན་གཞན་དུ་བསླབ་པ་བརྒྱ་རྩ་ལྔ་བཅུ་ལྷག་ཅིག་སྟེ་འདུལ་ཁྲིམས་ཉིས་བརྒྱ་ལྔ་བཅུ་སོགས་ཐེག་པ་ཆེ་ཆུང་ལས་གསུངས་པ་རྣམས་ནི། གསུམ་པོ་འདི་ཡི་ནང་དུ་ཡང་དག་པར་འདུ་བར་འགྱུར་རོ། །གཉིས་པ་ལ། ཀུན་ནས་ཉོན་མོངས་ཕྱོགས་ལ་ངེས་པར་འབྱུང་བའི་ཚུལ་དང་། རྣམ་བྱང་ཕྱོགས་ལ་ལེགས་པར་འཇུག་པའི་ཚུལ་ལ་གདམས་པ་གཉིས། དང་པོ་ལའང་། ཚེ་འདི་ལ་བློ་ལྡོག་པའི་ཐབས་དང་། འཁོར་བ་མཐའ་དག་ལས་བློ་ལྡོག་ཐབས་གཉིས་ལས། དང་པོ་ལ། མདོར་བསྟན། རྒྱས་བཤད་གཉིས། དང་པོ། དབང་ཕྱུག་ཅེས་བོས་ནས་ལུས་སུ་གཏོགས་པའི་དྲན་པ་ནི་བདེ་བར་གཤེགས་ཀྱིས། ཐར་ལམ་འདོད་པ་ཐམས་ཅད་འདི་ནས་ཞུགས་དགོས་པའི་ཕྱིར་བགྲོད་པ་གཅིག་པའི་ལམ་དུ་ཉེ་བར་བསྟན་ཏེ། དགེ་སློང་དག སེམས་ཅན་རྣམས་རྣམ་པར་དག་པར་བྱེད་པ་དང་། སྡུག་བསྔལ་བ་དང་ཡིད་མི་བདེ་བ་ལས་ཡང་དག་པར་འདའ་བར་བྱེད་པ་དང་། རིགས་པའི་ཆོས་རྟོག་པར་བྱེད་པ་དང་། མྱ་ངན་ལས་འདས་པ་མངོན་དུ་བྱེད་པའི་བགྲོད་པ་གཅིག་པའི་ལམ་ནི་འདི་ལྟ་སྟེ། ལུས་སུ་གཏོགས་པའི་དྲན་པ་ཡིན་ནོ། །ཞེས་སོ། །དེ་ལྟར་ལུས་སུ་གཏོགས་པའི་དྲན་པ་དེ་ནི་བསྒྲིམས་ནས་མངོན་པར་བསྲུང་བར་བགྱི་སྟེ། དྲན་པ་ཉམས་པས་ནི་ཆོས་ཀུན་འཇིག་པར་འགྱུར་བའི་ཕྱིར་ནའོ། །གཉིས་པ་ལ་ཚེ་མི་རྟག་པ་ལ་བསམ་པ་དང་། དལ་འབྱོར་རྙེད་དཀའ་ལ་བསམ་པ་གཉིས། དང་པོ་ལ། ནམ་འཆི་ཆ་མེད་ལ་བསམ་སྟེ་མི་རྟག་པ་བསྒོམ་པ། འཆི་བར་ངེས་པ་ལ་བསམ་སྟེ་མི་རྟག་པ་བསྒོམ་པ། རྣམ་པ་གཞན་ལ་བསམ་སྟེ་མི་རྟག་པ་བསྒོམ་ཚུལ། དེ་དག་གི་མཇུག་བསྡུ་བ་དང་བཞི་ལས། དང་པོ་ནི། ཚེ་ནི་ཕྱི་ནང་གི་གནོད་པའི་རྐྱེན་མང་བས་དཔེར་ན་རླུང་གིས་བཏབ་པ་ཡི། ཆུ་ཡི་ཆུ་བུར་བས་ཀྱང་མི་རྟག་པ་དེའི་ཕྱིར་ན། འདི་ལྟར་དབུགས་ནང་དུ་རྔུབ་པ་ལས་དབུགས་ཕྱིར་འབྱུང་ཁོམ་པའམ་ལོང་བྱུང་བ་དང་གཉིད་ཀྱིས་ལོག་པ་ལས། སད་ཁོམ་སྟེ་དེའི་བར་དུ་མ་ཤི་བ་གང་ལགས་པ་དེ་ནི་ངོ་མཚར་ཆེ་བ་ཡིན་ནོ། །གཉིས་པ། ལུས་ཀྱི་མཐའ་ནི་མེས་བསྲེགས་ཏེ་ཐལ་བའམ། མཐར་སྐམ་པའམ་མཐར་འདྲུལ་ཞིང་། ཐ་མར་མི་གཙང་རུལ་བའི་རོ་སྙིང་པོ་མ་མཆིས་པ། ཉིང་ལག་དང་ཡན་ལག་སོགས་སོ་སོར་རྣམ་པར་འཇིག་ཅིང་རྡུལ་ཕྲན་དུ་དེངས་ལ་མྱགས་ཤིང་རུལ་བར་འགྱུར་བ་སྟེ། ད་ལྟ་ནས་དེ་ལྟ་བུར་སོ་སོར་འགྱེས་རུང་བའི་ཆོས་ཅན་དུ་མཁྱེན་པར་མཛོད་ཅིག གསུམ་པ། འདི་ལྟར་སྲ་ཞིང་བརྟན་པར་སྣང་བ་ས་གཞི་དང་ལྷུན་པོ་དང་རྒྱ་མཚོ་ཆེན་པོ་རྣམས་ཀྱང་ནམ་ཞིག་བསྐལ་པའི་ཐ་མར་ཉི་མ་བདུན། འབར་བས་བསྲེགས་པའི་རི་མཚོ་ས་གཞིའི་ལུས་ཅན་ནམ་གཟུགས་ཅན་འདི་དག་ཀྱང་། ཐལ་བ་ཙམ་དུ་ཡང་ནི་ལུས་པར་མི་འགྱུར་ན། ཤིན་ཏུ་ཉམ་ཆུང་བའི་མི་ཡི་ལུས་འཇིག་པ་ལྟ་སྨོས་ཀྱང་ཅི་འཚལ་ཏེ་ངེས་པར་འཇིག་པར་འགྱུར་རོ། །བཞི་པ། དེ་ལྟར་ཕྱི་ནང་གི་དངོས་པོ་འདི་ཀུན་མི་རྟག་ཅིང་བདག་པོ་མེད་དེ། སྡུག་བསྔལ་ལས་སྐྱོབ་པའི་སྐྱབས་མེད་ཕན་འདོགས་པའི་མགོན་མེད་རྟེན་འཆའ་བའི་གནས་མེད་དེ་དེ་ཡི་སླད་དུ། འཁོར་བ་ཆུ་ཤིང་སྙིང་པོ་མེད་པ་ལྟ་བུ་འདི་ལས། མི་མཆོག་ཁྱོད་ཀྱིས་ཐུགས་ནི་སྐྱོ་སྟེ་འཁོར་བ་ལས་དབྱུང་བར་མཛོད་ཅིག གཉིས་པ་དལ་འབྱོར་རྙེད་དཀའ་ལ། སྤྱིར་མི་ཙམ་དུ་སྐྱེ་བ་དཀོན་ཚུལ། ཁྱད་པར་མཐུན་རྐྱེན་འཁོར་ལོ་བཞི་དང་ལྡན་པའི་རྟེན་བསྟན་པ། འགལ་རྐྱེན་མི་ཁོམ་བརྒྱད་དང་བྲལ་བའི་ཚུལ་ལ་བསམ་པ་གསུམ། དང་པོ་ལ། མིར་སྐྱེ་བ་དཀོན་ཚུལ་དང་། རྟེན་དེ་ལ་སྡིག་པ་སྤྱོད་པ་སྨད་པར་བསྟན་པ་གཉིས། དང་པོ། རྒྱ་མཚོ་ཆེན་པོ་གཅིག་ལ་གནས་པའི་གཉའ་ཤིང་རླུང་གིས་བསྐྱོད་པའི་བུ་ག་དང་། མཚོ་ནང་གི་རུས་སྦལ་གྱི་མགྲིན་པ་ཕྲད་པ་བས་ཀྱང་དུད་འགྲོ་ལས་ཐར་ཏེ། མི་ཉིད་ཆེས་ཐོབ་པར་དཀའ་བས་མི་དབང་གིས། དམ་པའི་ཆོས་སྤྱོད་པས་མི་ལུས་དེ་ཉིད་འབྲས་བུ་མཆིས་པར་མཛོད་ཅིག གཉིས་པ། གང་ཞིག་གསེར་གྱི་སྣོད་རིན་ཆེན་གཡུ་སོགས་ཀྱི་ཕྲས་སྤྲས་པ་ཡིས། འོས་པ་མིན་པ་ངན་སྐྱུགས་འཕྱག་པར་བགྱིད་པ་ལ་ཀུན་གྱིས་མི་བླུན་པོ་ཞེས་སྨོད་པ་དེ་བས་ནི། གང་ཞིག་མི་རུ་སྐྱེས་ནས་སྡིག་པ་མི་དགེ་བ་དག བགྱིད་པ་དེ་ནི་ཆེས་རབ་ཏུ་བླུན་པ་ལགས་སོ། །གཉིས་པ་ལ་མཐུན་རྐྱེན་འཁོར་ལོ་བཞི་སྤྱིར་བསྟན་པ་དང་། དགེ་བའི་བཤེས་གཉེན་བྱེ་བྲག་ཏུ་བཤད་པ་གཉིས། དང་པོ། འཕགས་ལམ་སྐྱེ་བ་དང་མཐུན་པར་གྱུར་པའི་ཡུལ་ལྷ་མིའི་འགྲོ་བ་དག་ཏུ་གནས་པ་དང་། རྐྱེན་སྐྱེས་བུ་དམ་པ་ལ་ནི་བསྟེན་པ་དང་། བདག་ཉིད་ཐར་པའི་ལམ་ལ་ལེགས་པར་སྨོན་པ་དང་དེ་འགྲུབ་པའི་རྒྱུ་སྐྱེ་བ་སྔོན་མ་ལ་ཡང་བསོད་ནམས་བགྱིས་པ་སྟེ། ཆོས་སྒྲུབ་པ་ལ་དབང་བས་སམ་འཕགས་ལམ་གྱི་ཤིང་རྟའི་འགྲོ་བྱེད་ཡིན་པས་འཁོར་ལོ་ཆེན་པོ་སྟེ་དེ་བཞི་ནི་ཁྱོད་ལ་མངའ་འོ་ཞེས་སོ། །གཉིས་པ། དེ་ལས་ཀྱང་དགེ་བའི་བཤེས་གཉེན་བསྟེན་པ་ནི་ཚངས་པར་སྤྱོད་པ་སྟེ་ཚངས་པ་མྱང་འདས་དང་སྤྱོད་པ་ལམ་ཞེས་བཤད་དོ། །དེ་ཉིད་ཡོངས་སུ་རྫོགས་པར་ཐུབ་པས་གསུངས་པ་དེའི་ཕྱིར་ཏེ། འཕགས་པ་ཀུན་དགའ་བོས། བཅོམ་ལྡན་འདས། འདི་ལྟ་སྟེ། དགེ་བའི་བཤེས་གཉེན་དང་དགེ་བའི་གྲོགས་པོ་འདི་ནི། ཚངས་པར་སྤྱོད་པའི་ཕྱེད་ལགས་སོ་ཞེས་གསོལ་བ་དང་། བཅོམ་ལྡན་འདས་ཀྱིས་ཁྱོད་དེ་སྐད་མ་སྨྲ་ཞིག འདི་ནི་ཚངས་པར་སྤྱོད་པ་ཡོངས་སུ་རྫོགས་པར་བྱེད་པ་ཡིན་ནོ། །ཞེས་སོ། །དེས་ན་སྐྱེས་བུ་དམ་པ་བསྟེན པར་བགྱིའོ་དེའི་དགོས་པ་རྒྱལ་བ་རྫོགས་པའི་སངས་རྒྱས་ལ། བརྟེན་ནས་སྐྱེ་བོ་རབ་ཏུ་མང་པོས་ཞི་བ་ཐོབ་པ་དེ་བཞིན་ནོ། །གསུམ་པ་འགལ་རྐྱེན་མི་ཁོམ་བརྒྱད་དང་བྲལ་ཚུལ་ནི། རྒྱུ་འབྲས་ལ་སྐུར་བ་འདེབས་པའི་ལོག་པར་ལྟ་བ་འཛིན་པ་དང་དུད་འགྲོ་དང་། ཡི་དྭགས་ཉིད་དང་དམྱལ་བར་སྐྱེ་བ་དང་། རྒྱལ་བའི་བཀའ་མེད་པ་སྟེ་སངས་རྒྱས་མ་བྱོན་པ་དང་བྱོན་ཡང་དེའི་བཀའ་མི་ཐོས་པ་ཡུལ་མཐའ་འཁོབ་ཏུ། ཀླ་ཀློར་སྐྱེ་བ་དང་ཡུལ་དབུས་སུ་སྐྱེས་ཀྱང་ཡིད་དབང་ལ་སྐྱོན་ཞུགས་པ་གླེན་ཞིང་ལྐུགས་པ་ཉིད་དང་། འདུ་ཤེས་མེད་པ་དང་གཟུགས་མེད་པ་ནི་ཚེ་རིང་ལྷ་ཉིད་དེ་དེ་བརྒྱད་པོ་གང་ཡང་རུང་བར་ནི། སྐྱེ་བ་ཞེས་བགྱི་ཆོས་བྱེད་མི་ཁོམ་པས་སྐྱོན་བརྒྱད་པོ། དེ་དག་དང་བྲལ་ཏེ་ཁོམ་པའམ་དལ་བའི་རྟེན་རྙེད་ནས་ནི། ད་ཕན་ཆད་འཁོར་བར་སྐྱེ་བ་བཟློག་པའི་སྟེ་སླར་མི་སྐྱེ་བའི་སླད་དུ་འབད་པར་མཛོད་ཅིག གཉིས་པ་འཁོར་བ་མཐའ་དག་ལས་བློ་ལྡོག་པའི་ཐབས་འཁོར་བའི་ཉེས་དམིགས་བསམ་པ་ལ། མདོར་བསྟན། རྒྱས་བཤད་གཉིས། དང་པོ། ཅིའི་ཕྱིར་སྐྱེ་བ་བཟློག་དགོས་སྙམ་ན། དེས་པ་ཞེས་བོས་ནས་ཟས་གོས་སོགས་འདོད་པས་ཕོངས་པ་དང་མཐར་འཆི་བ་དང་། གནས་སྐབས་སུ་ན་པ་དང་རྒ་བ་ལ་སོགས་པའི་སྡུག་བསྔལ་དུ་མ་ཡི། འབྱུང་གནས་ཡིན་པས་འཁོར་བ་ལ་ནི་སྐྱོ་བར་མཛད་ཅིང་། འདི་ཡི་ཉེས་པའི་ཆ་ཤས་ཀྱང་བརྗོད་པས་གསན་པར་མཛོད་ཅིག རྒྱས་བཤད་ལ། བདེ་བ་ལྟར་སྣང་ཡང་ཡིད་བརྟན་མེད་པའི་ཚུལ་དང་། སྡུག་བསྔལ་རྒྱ་ཆེ་བའི་ཚུལ་བསྟན་པ་གཉིས། དང་པོ་ལ། ཡིད་བརྟན་མེད་པའི་ཚུལ་དང་། དེ་ལྟར་ཤེས་ནས་དགེ་བ་ལ་སྤྱོད་པར་གདམས་པ་གཉིས། དང་པོ་ལ། དགྲ་གཉེན་ངེས་པ་མེད་པས་ཡིད་བརྟན་མེད་པའི་ཚུལ་དང་། ཚིམས་པ་མེད་པས་ཡིད་བརྟན་མེད་པའི་ཚུལ། ཕྱི་མཐའ་མ་ངེས་པས་ཡིད་བརྟན་མེད་པའི་ཚུལ། མཐོ་དམན་མ་ངེས་པས་ཡིད་བརྟན་མེད་པའི་ཚུལ་དང་བཞི། དང་པོ། ཕ་ནི་བུ་ཉིད་དུ་འགྱུར་བ་དང་དེ་བཞིན་མ་ནི་ཆུང་མ་ཉིད་དང་། སྐྱེ་བོ་དགྲར་གྱུར་པ་དག་ཀྱང་བཤེས་ཉིད་དང་། དེ་ལས་བཟློག་པ་བཤེས་ཉིད་ཀྱང་དགྲ་ཉིད་དུ་མཆི་བས་དེ་ཡིས་སླད་དུ། འཁོར་བ་དག་ན་ཡིད་བརྟན་པའི་ངེས་པ་འགའ་ཡང་མ་མཆིས་སོ། །གཉིས་པ། གང་ཟག་རེ་རེས་ཕྱོགས་ཀྱི་རྒྱ་མཚོ་ཆེན་པོ་བཞི་བས་ལྷག་པ་སྟེ་མང་བ་ཡི། འོ་མ་མཐུངས་ཏེ་དེས་ཀྱང་ངོམས་པར་མ་གྱུར་ཅིང་ད་དུང་ཡང་འཕགས་ལམ་མ་ཐོབ་བར་དུ་སོ་སོ་ཡི། སྐྱེ་བོའི་ལམ་གྱི་རྗེས་སུ་འབྲང་བའི་འཁོར་བ་པས་ནི། སྔར་གྱི་དེ་བས་ཀྱང་ཆེས་མང་བ་ཉིད་ཅིག་བཏུང་བར་ཤེས་འཚལ་ལོ་སྟེ་འཁོར་བ་ལ་ཐོག་ཐ་མི་མངོན་པའི་ཕྱིར་རོ། །གསུམ་པ། སེམས་ཅན་རེ་རེའི་བདག་ཉིད་གཅིག་པུའི་ལུས་སྔར་བོར་བའི་རུས་པའི་ཕུང་པོ་ནི། ལྷུན་པོ་དང་མཉམ་པ་སྙེད་ཅིག་འདས་པར་གྱུར་ཏེ་ད་དུང་ལམ་ལ་མ་འབད་ན་དེ་བས་ཆེས་མང་བ་འདོར་དགོས་ཤིང་། དེ་བཞིན་དུ་མ་ཡི་ཐུག་མཐའ་རྒྱ་ཤུག་གི་ཚི་གུ་ཙམ་གྱི། རི་ལུར་བྱས་ཏེ་བགྲངས་ཀྱང་ས་ཡིས་ལང་མི་འགྱུར་རོ་སྟེ་མངལ་སྐྱེས་ཀྱི་ལུས་ཁོ་ན་ལ་དཔེར་བྱས་ཏེ། བཅོམ་ལྡན་འདས་ཀྱིས། དགེ་སློང་དག དཔེར་ན་སྐྱེས་བུ་འགའ་ཞིག་གིས་ས་ཆེན་པོ་འདི་རྒྱ་ཤུགས་གི་ཚི་གུ་ཙམ་གྱི་རིལ་བུ་ཐོགས་ཏེ། འདི་ནི་བདག་གི་མའོ། །འདི་ནི་བདག་གི་མ་དེའི་ཡང་མའོ། །ཞེས་འདོར་བར་བྱེད་ན། དགེ་སློང་དག་ས་ཆེན་པོ་འདིའི་འཇིམ་པ་ནི་ཆེས་སྔར་ཟད་པར་འགྱུར་གྱི། མི་རྣམས་ཀྱི་མ་བརྒྱུད་པ་ནི་དེ་ལྟ་མ་ཡིན་ནོ་ཞེས་ང་སྨྲའོ། །ཞེས་གསུངས་ཏེ་ཡང་ཡང་ཉིང་མཚམས་སྦྱོར་བའི་དབང་དུ་བྱས་སོ། །བཞི་པ་ལ། སྲིད་རྒྱས་པ་ལ་ཡིད་བརྟན་མེད་པའི་ཚུལ། གྲོགས་ཡིད་འོང་ལ། གནས་བཟང་བ་ལ། སྤྱོད་ཡུལ་བདེ་བ་ལ། ལོངས་སྤྱོད་ཆེ་བ་ལ། གཟི་བརྗིད་ཆེ་བ་ལ་ཡིད་བརྟན་མེད་པའི་ཚུལ་དང་དྲུག་ལས། དང་པོ། ལྷའི་དབང་པོ་བརྒྱ་བྱིན་འཇིག་རྟེན་གྱི་མཆོད་འོས་སུ་གྱུར་ནས་ནི། སླར་ཡང་ལས་ཀྱི་དབང་གིས་ཕྱིར་ཡང་ས་སྟེང་མི་དང་དུད་འགྲོ་སོགས་ཀྱི་གནས་སུ་ལྟུང་བར་འགྱུར་ཞིང་། མིའི་རྒྱལ་པོ་འཁོར་ལོས་སྒྱུར་བ་ཉིད་དུ་གྱུར་ནས་ཀྱང་། སྔོན་གྱི་དགེ་བའི་ལྷག་མ་མེད་ན་འཁོར་བ་དག་ཏུ་ཡང་བྲན་ཏེ་བྲན་གྱི་བྲན་ལྟ་བུ་ཉིད་དུ་འགྱུར་རོ། །གཉིས་པ། མཐོ་རིས་ཀྱི་ལྷ་ཡི་བུ་མོའི་ནུ་མ་དང་རྐེད་པ་ལ། ལག་པས་འཁྱུད་ཅིང་རེག་པའི་བདེ་བ་དུས་ཡུན་རིང་དུ་མྱངས་ནས་སླར་ཡང་། དམྱལ་བར་རིའི་བར་དུ་འཐག་པ་དང་མཚོན་གྱིས་གཅོད་པ་དང་ལྕགས་ཀྱི་ཁྱི་སོགས་ཀྱི་མཆེ་སྡེར་གྱིས་དབད་པའི་འཁྲུལ་འཁོར་གྱི། རེག་པ་ཤིན་ཏུ་མི་བཟད་པ་བརྟེན་པར་འཚལ་ལོ། །གསུམ་པ། རིན་པོ་ཆེའི་ས་གཞི་ལ་རྐང་པའི་རེག་པས་མནན་ན་ནེམ་པར་བྱེད་ཅིང་བདེ་བ་སྐྱེད་པར་བཟོད་པའམ་ནུས་པ། ལྷུན་པོའི་སྤོ་ལ་ཡུན་རིང་དུ་ལྷའི་ལོ་སྟོང་ཙམ་དུ་གནས་ནས་ནི། སླར་ཡང་ལས་དབང་གིས་མེ་མུར་དང་རོ་མྱགས་ཀྱི་འདམ་ན་རྒྱུ་བ་ཡི། སྡུག་བསྔལ་མི་བཟད་པ་ཕོག་པ་ཡིན་ནོ་སྙམ་དུ་ཡིད་ལ་བགྱིད་པར་འཚལ་ལོ། །བཞི་པ། མཐོ་རིས་བུ་མོས་མཛེས་པར་བརྟེན་པའམ་འབྲོངས་ཤིང་སྟེ་རྒྱ་འགྲེལ་ལས་འབྲོངས་པ་ནི་ཉེ་བར་བརྟེན་པ་ཞེས་བྱ་བའི་ཐ་ཚིག་གོ་ཞེས་འབྱུང་དེས་ཡིད་དགའ་བ་དང་ལྡན་པ། རྣམ་པར་མཛེས་པའི་ཚལ་དུ་སོན་པར་རྩེས་ནས་སླར། འདབ་མ་རལ་གྲི་འདྲ་བའི་ཚལ་གྱི་ནགས་རྣམས་ཀྱིས། རྐང་ལག་དང་རྣ་བ་སྣ་གཅོད་པ་དག་འཐོབ་པར་འགྱུར་རོ། །ལྷའི་ཆུ་བོ་དལ་གྱིས་འབབ་པ་ན་ལྷ་ཡི་བུ་མོ་ནི་གདོང་མཛེས་པ་དང་གསེར་གྱི་པདྨའི་སྟན་ལ་ལྷན་ཅིག་ཏུ་ཞུགས་ནས། སླར་ཡང་ངན་སོང་དམྱལ་བའི་ཆུ་བོ་རབ་མེད་པར། རུལ་བ་བ་ཚྭའི་རྣམ་པ་ཅན་ནམ་ཚ་སྒོ་ཅན་བཟོད་གླགས་གམ་བཟོད་མེད་ཀྱི་ཆུ་ཚན་ནང་དུ་འཇུག་འཚལ་ལོ། །ལྔ་པ། ལྷ་ཡུལ་གྱི་འདོད་པའི་བདེ་བ་ཤིན་ཏུ་ཆེན་པོ་དང་། ཚངས་པ་ཉིད་ཀྱི་འདོད་པའི་ཆགས་བྲལ་གྱི་བདེ་བ་ཐོབ་ནས་སླར་ཡང་། མནར་མེད་པའི་དམྱལ་བའི་མེ་ཡི་བུད་ཤིང་གི་ཚུལ་དུ་གྱུར་པ་ཡི། སྡུག་བསྔལ་རྒྱུན་མི་འཆད་ཅིང་བར་མཚམས་མེད་པ་བརྟེན་འཚལ་ལོ། །དྲུག་པ། ལྷའི་བུ་ཉི་མ་དང་ཟླ་བ་ཉིད་ཀྱི་སྐྱེ་བ་ཐོབ་སྟེ་རང་ལུས་དང་གཞལ་ཡས་ཁང་པ་ཉིད་ཀྱི། འོད་ཀྱིས་འཇིག་རྟེན་མཐའ་དག་སྣང་བར་བྱས་ཏེ་སླར་ཡང་གླིང་བར་སོགས་མུན་ནག་སྨག་རུམ་ཕྱིན་པར་གྱུར་ནས། རང་གི་ལག་པ་བརྐྱང་བའང་མི་མཐོང་བར་འགྱུར་རོ། །དེ་ལྟ་བུའི་གནས་བཟང་པོ་ཐོབ་པ་དེ་རྣམས་ཀྱང་རྟག་ཏུ་འདུག་པའི་དབང་མེད་པར་སྡུག་བསྔལ་ལ་སྤྱོད་པའི་དུས་དེ་འདྲ་འོང་བར་བསྟན་གྱི། གནས་དེ་དང་དེ་ནས་འཕོས་ན། གནས་ངན་དེ་དང་དེ་འདྲར་སྐྱེས་ངེས་པ་ཉིད་དུ་བཟུང་བར་མི་བྱའོ། །འཕགས་ལམ་མ་ཐོབ་པར་དེ་དག་ཏུ་སྐྱེ་བ་རྣམས། ལས་སྔ་མའི་འཕེན་པ་ཟད་ནས་ཕྱི་མའི་ལས་ཀྱིས་གནས་ངན་དེ་དག་ཏུ་འགྲོར་བ་ལ་བསམ་པར་བྱའོ། །གཉིས་པར་དེ་ལྟར་ཤེས་ནས་དགེ་བ་ལ་སྤྱོད་པར་གདམས་པ། དེ་ལྟར་འཁོར་བ་འདི་ཉེས་པའམ་ནོངས་པར་འགྱུར་བ་ཤེས་པའམ་འཚལ་ནས་བསོད་ནམས་ནི། སྦྱིན་པ་དང་ཚུལ་ཁྲིམས་དང་བསྒོམ་པ་ལས་བྱུང་བའི་རྣམ་པ་གསུམ་མར་མེའི་སྣང་བ་སྟེ་ངན་སོང་གི་མུན་པ་སེལ་བར་བྱེད་པ་རབ་ཏུ་བཞེས་ཤིག ཅིའི་ཕྱིར་ན། རང་ཉིད་གཅིག་པུ་ཉི་མ་ཟླ་བས་མི་བརྫི་སྟེ་འོད་ཀྱིས་གཞོམ་མི་ནུས་པའི། འཁོར་བའི་མུན་ནག་མཐའ་ཡས་པའི་ནང་དུ་འཇུག་པ་དེ་ཡི་ཚེ་ན་བསོད་ནམས་ཀྱི་སྣང་བ་དང་བྲལ་ན་སྡུག་བསྔལ་མི་བཟོད་པའི་ཐིབ་བོ་བརྣག་དཀའ་བ་ཤེས་འཚལ་ལོ། །གཉིས་པ་སྡུག་བསྔལ་རྒྱ་ཆེ་བའི་ཚུལ་ལ། འཁོར་བ་སྡུག་བསྔལ་གྱི་རང་བཞིན་དུ་ཤེས་པར་བྱ་བ་དང་། ཤེས་ནས་སྐྱེ་བ་བཟློག་ཕྱིར་འབད་དགོས་པར་གདམས་པ་གཉིས། དང་པོ་ལ། དམྱལ་བ། དུད་འགྲོ། ཡི་དྭགས། ལྷ། ལྷ་མིན་གྱི་སྡུག་བསྔལ་དང་ལྔ་ལས། དང་པོ་ལ་བསྟན་བཤད་གཉིས། དང་པོ། སེམས་ཅན་སྒོ་གསུམ་གྱི་ཉེས་པར་སྤྱད་པ་སྤྱོད་པ་རྣམས་ལ། ཡང་སོས་དང་ཐིག་ནག་དང་རབ་ཏུ་ཚ་བ་དང་། བསྡུས་འཇོམས་དང་ངུ་འབོད་དང་མནར་མེད་པ་ལ་སོགས་པའི། ཚ་གྲང་གི་དམྱལ་བ་རྣམས་སུ་རྟག་ཏུ་སྡུག་བསྔལ་བར་འགྱུར་རོ། །གཉིས་པ་ལ་སྡུག་བསྔལ་ཤེས་པར་བྱ་བ་དང་། དེའི་རྒྱུ་སྤང་བར་གདམས་པ་གཉིས། དང་པོ་ལ། སྡུག་བསྔལ་དངོས་དང་། དེ་གང་ལ་ཅི་ལྟར་འབྱུང་ཚུལ་ལ་བསམ་པ་གཉིས། དང་པོ། སེམས་ཅན་བསྡུས་འཇོམས་སུ་སྐྱེས་པ་ཁ་ཅིག་ལྕགས་ཀྱི་གཏུན་བུས་ཏིལ་བཞིན་འཚིར་ཏེ་དེ་བཞིན་དུ་གཞན་ཁ་ཅིག་ནི། ལྕགས་ཀྱི་མཆིག་འབར་བ་དག་གི་སྟེང་དུ་མཆི་གུ་དེས་བཏགས་པས་ཕྱེ་མ་ཞིབ་མོ་བཞིན་དུ་ཕྱེ་མར་རློག་པར་བྱེད་དོ། །ཐིག་ནག་པ་ཁ་ཅིག་སོག་ལེས་འདྲ་སྟེ་དེ་བཞིན་གཞན། སྟྭ་རེ་མི་བཟད་སོ་རྣོ ན་པོ་ཅན་རྣམས་ཀྱིས་གཤགས་པར་བྱེད་དོ། །དེ་བཞིན་གཞན་དག་ཆུ་བོ་རབ་མེད་ཀྱི་འགྲམ་སོགས་སུ་ཁྲོ་ཆུ་བཞུས་པ་ཡི། ཁུ་བ་འབར་བ་རླབས་འཁྲིགས་པ་ཁ་ནང་དུ་སྡུད་པར་བགྱིད་དོ། །ཁ་ཅིག་ཚ་དམྱལ་ན་ལྕགས་ཀྱི་གསལ་ཤིང་མེ་རབ་ཏུ་འབར་བ། ཚེར་མ་ཅན་ལ་ཕྲེང་བ་བཞིན་དུ་ཀུན་དུ་རྒྱུད་པར་བགྱིད་དོ། །ཁ་ཅིག་རལ་གྲིའི་ཚལ་ན་ལྕགས་ཀྱི་མཆེ་བ་དང་ལྡན་པའི་ཁྱི། གཏུམ་པོས་དབད་ཅིང་སྐྲག་ནས་ལག་པ་གནམ་དུ་བསྒྲེངས་ཤིང་བྲེད་དོ། །དེར་ལས་ཀྱི་དབང་གིས་རང་དབང་མེད་པར་གཞན་དག་བྱ་ལྕགས་མཆུ་རྣོན་པོ་དང་། སེན་མོ་མི་བཟད་པ་དང་ལྡན་པའི་ཁྭ་རྣམས་ཀྱིས་གཏོགས་པའམ་འཐོག་པར་བྱེད་དོ། །ཁ་ཅིག་ཉེ་འཁོར་གྱི་གནས་དེར་ལུས་ལས་བྱུང་བའི་སྲིན་བུ་དང་སྦུར་བ་ཕྱི་རོལ་ནས་བྱུང་བ་མདོག་དབྱིབས་རིགས་ཐ་དད་པ་སྣ་ཚོགས་དང་། ཤ་སྦྲང་དང་སྦྲང་མ་མཆུ་རིང་ཁྲི་ཕྲག་མང་པོ་དག མཆུ་རེག་པ་ཙམ་ན་མི་བཟད་པའི་རྨ་སྲོལ་ཆེར་འབྱིན་པས། ཟ་བར་བགྱིད་ཅིང་སྡུག་བསྔལ་གྱི་ཚོར་བས་ལུས་འགྲེ་ལྡོག་དང་ངག་སྨྲེ་སྔགས་འདོན་པར་བྱེད་དོ། །ཁ་ཅིག་ཚ་དམྱལ་ན་མདག་མེ་འབར་བའི་ཚོགས་སུ་ནི། དུས་རྒྱུན་མི་འཆད་པར་རབ་ཏུ་བསྲེགས་པས་ཁ་ཡང་བགྲད་དེ། དེ་ཙམ་ལས་གཞན་པའི་མཐུ་མེད་དོ། །ཁ་ཅིག་རབ་ཏུ་ཚ་བར་ལྕགས་ལས་བྱས་ཤིང་མེ་འབར་བའི་ཟངས་ཆེན་དུ། ལུས་སྤྱིའུ་ཚུགས་སུ་འབྲས་ཀྱི་ཅུད་འཕེད་སྟེ་འབྲས་ཟན་བཙོ་བ་བཞིན་དུ་འཚོད་པར་བྱེད་པས་ཤིན་ཏུ་སྡུག་བསྔལ་བ་ཡིན་ནོ། །གཉིས་པ་ལ། ནམ་འབྱུང་བའི་དུས་ལ་བསམ་པ། འབྱུང་ན་མི་བཟོད་པའི་ཚུལ་ལ་བསམ་པ། མྱོང་བའི་ཡུན་རིང་ཐུང་ལ་བསམ་པ་གསུམ་ལས། དང་པོ། སྡིག་ཅན་རྣམས་ནི་ཁ་ནས་དབུགས་འབྱུང་བ་འདི་འགགས་པའམ་ཆད་པ་ཙམ་ཞིག་གི། དུས་ཀྱིས་བར་དུ་ཆོད་པ་ལས་གཞན་མེད་པ་དེ་རྣམས་ཀྱིས་དམྱལ་བ་ཡི། སྡུག་བསྔལ་གཞལ་ཡས་པའམ་བསམ་ཡས་པ་དེ་ཐོས་ནས་ཀྱང་རྣམ་པ་སྟོང་དུ་མི་སྐྲག་པའམ་མི་འཇིགས་པ་གང་ལགས་པ་དེ་ཡི་སྙིང་ནི་རྡོ་རྗེའི་རང་བཞིན་ཏེ་ཤིན་ཏུ་སྲ་བ་ཡིན་ནོ། །གཉིས་པ་ལ། སྤྱིར། བྱེ་བྲགདཔེ་བསམ་པ་གསུམ་ལས། དང་པོ། དམྱལ་བ་ཡི་ཚུལ་ཡི་གེར་རམ་གཟུགས་བརྙན་དུ་རི་མོར་བྲིས་པ་མཐོང་བ་དང་གཏམ་རྒྱུད་རྣ་བས་ཐོས་པ་དང་། རང་གིས་དེའི་ཚུལ་ཡིད་ལ་དྲན་པ་དང་རང་གིས་ཁ་ཏོན་དུ་བཀླགས་པ་དང་དབྱིབས་ཀྱི་ཚུལ་འཇིམ་པ་ལས་ལྡེར་ཚོའི་གཟུགས་སུ་བགྱིས་པ་རྣམས་ཀྱིས་ཀྱང་། འཇིགས་པ་སྐྱེད་པར་འགྱུར་ན་ཤིན་ཏུ་མི་བཟད་པའི། རྣམ་སྨིན་དངོས་རང་གིས་ཉམས་སུ་མྱོང་ན་སྨོས་ཅི་འཚལ། གཉིས་པ། བདེ་བ་ཀུན་གྱི་ནང་ནས་ཁམས་གསུམ་གྱི་སྲིད་པ་མ་ལུས་པ་ཟད་པ་རྣམ་གྲོལ་གྱི་འབྲས་བུ་ནི། བདེ་བའི་དབང་པོའམ་བདག་པོར་བགྱིད་པ་ཇི་ལྟ་བར། དེ་བཞིན་དུ་སྡུག་བསྔལ་ཀུན་གྱི་ནང་ན་ནི། མནར་མེད་པའི་དམྱལ་བའི་སྡུག་བསྔལ་རབ་ཏུ་མི་བཟད་པ་སྟེ་ཆེའོ། །གསུམ་པ། མིའི་འཇིག་རྟེན་འདི་ན་ཉིན་གཅིག་ལ་མདུང་ཐུང་སུམ་བརྒྱ་ཡིས། རབ་ཏུ་ཤུགས་དྲག་པོར་བར་མ་ཆད་དུ་བཏབ་པའི་སྡུག་བསྔལ་གང་ལགས་པ། དེས་ནི་སེམས་ཅན་དམྱལ་བའི་སྡུག་བསྔལ་ཆུང་ངུ་ལའང་། དཔེ་ཡི་ཕྱོགས་ཙམ་མམ་འོལ་ཡང་མཚོན་པར་མི་བགྱི་དེ་ཡི་ཆ་ཤས་ཙམ་མམ་ཆར་ཡང་འགྲན་མི་ཕོད་དོ། །གསུམ་པ་ཡུན་ནི། བཤད་མ་ཐག་པ་དེ་ལྟར་སྡུག་བསྔལ་ཤིན་ཏུ་མི་བཟད་པ་དག་ལོ་གྲངས། བྱེ་བ་ཕྲག་བརྒྱར་ཉམས་སུ་མྱོང་ཡང་ནི། ཇི་སྲིད་རྒྱུ་མི་དགེ་བའི་ལས་དེ་ཟད་པར་མ་གྱུར་པ། དེ་སྲིད་དུ་འཚོ་བའི་སྲོག་དང་འབྲལ་བར་མི་འགྱུར་དེ་སྲིད་དུ་མྱོང་པར་འགྱུར་རོ། །གཉིས་པ་དེའི་རྒྱུ་སྤང་བ་ནི། གོང་བཤད་མི་དགེའི་འབྲས་བུ་འདི་རྣམས་ཀྱི་ས་བོན་ནི། སྲོག་གཅོད་སོགས་ལུས་དང་རྫུན་སོགས་ངག་དང་བརྣབ་སེམས་སོགས་ཡིད་ཀྱི་ཉེས་སྤྱད་ཆེན་པོ་རྣམས་ཡིན་པས་རྒྱལ་པོ་ཁྱོད་ཀྱིས་ནི། ཅི་ནས་ཉེས་པ་དེ་ཡི་རྡུལ་ཙམ་ཡང་མ་མཆིས་པ། དེ་ལྟར་ཉིད་ཀྱི་རྩལ་ཅི་ཡོད་གྱིས་འབད་པར་མཛོད་ཅེས་གདམས་པའོ། །གཉིས་པ་དུད་འགྲོ་ལ་སྤྱི་ཡི་སྡུག་བསྔལ་དང་། བྱེ་བྲག་ཁ་འཐོར་གྱི་སྡུག་བསྔལ་གཉིས། དང་པོ། དུད་འགྲོའི་སྐྱེ་གནས་སུ་གཏོགས་པ་ན་ཡང་གཞན་གྱིས་གསོད་པ་དང་། ཞགས་པ་སོགས་ཀྱིས་བཅིངས་པ་དང་ལྕགས་སོགས་ཀྱིས་བརྡེག་པ་སོགས་མི་དང་མི་མིན་གྱི་གནོད་པ་བྱས་པའི་སྡུག་བསྔལ་སྣ་ཚོགས་པ། ཞི་བ་མྱང་འདས་འཐོབ་འགྱུར་ཐར་ལམ་གྱི་དགེ་བ་སྤངས་པ་རྣམས་ལ་ནི། བྱིང་གནས་སོགས་གཅིག་ལ་གཅིག་ཟ་རྣམ་སྨིན་ནམ་སྡུག་བསྔལ་ཤིན་ཏུ་མི་བཟད་པ་དང་ལྡན་ནོ། །གཉིས་པ། ཆུ་གནས་སོགས་དུད་འགྲོ་ཁ་ཅིག་ནི་མུ་ཏིག་དང་ལུག་སོགས་བལ་དང་གླང་ཆེན་སོགས་རུས་པ་དང་ཁྲག་དང་། ཤ་ཡི་ཆེད་དུ་རི་དྭགས་སོགས་དང་སྟག་གཟིག་སོགས་པགས་པའི་ཆེད་དུ་འཆི་{གསོད་འདི་རྩ་བར་སྣང་ཞུ་མཆན། }པར་འགྱུར། རང་དབང་མེད་པར་གཞན་དག་རྟ་སོགས་རྡོག་པ་སྟེ་རྐང་པ་དང་མ་ཧེ་སོགས་ལག་པ་དང་། བོང་བུ་སོགས་ལྕག་ཚན་དང་གླང་པོ་ཆེ་ལྕགས་ཀྱུ་དང་དབྱུག་པ་སོགས་གདབ་པས་གླང་སོགས་བཏབ་སྟེ་བྲན་དུ་བཀོལ་བས་སྡུག་བསྔལ་བར་འགྱུར་རོ། །གསུམ་པ་ཡི་དྭགས་ལ་བསྟན་བཤད་གཉིས། དང་པོ། ཡི་དྭགས་སུ་སྐྱེས་ན་ཡང་འདོད་པས་ཕོངས་པ་ཡིས། བསྐྱེད་པའི་སྡུག་བསྔལ་བར་མེད་པའམ་རྒྱུན་ཆགས་པ་བཅོས་སུ་མེད་པའམ་མི་འཆོས་པ། བཀྲེས་པ་དང་སྐོམ་པ་དང་དགུན་གྲང་བ་དང་སོས་ཀ་དྲོ་བ་དང་ཟས་ཕྱིར་རྒྱུ་བས་ངལ་བ་དང་སྐྱེས་བུ་མཚོན་ཐོགས་པ་མཐོང་བ་སོགས་ཀྱིས་འཇིགས་པ་ཡིས་བསྐྱེད་པ་ཡི་སྡུག་བསྔལ་ཤིན་ཏུ་མི་བཟད་པ་བརྟེན་འཚལ་ལོ། །གཉིས་པ་རྒྱས་བཤད་ལ། སྡུག་བསྔལ་དང་། དེའི་རྒྱུ་གཉིས། དང་པོ་སྡུག་བསྔལ་དངོས་དང་། དེ་ཇི་ཙམ་མྱོང་བའི་ཡུན་གཉིས། དང་པོ། ཡི་དྭགས་ཁ་ཅིག་གིས་ཁ་ནི་ཁབ་ཀྱི་མིག་ཙམ་དུ་ཆུང་ལ། ལྟོ་བ་ནི་རི་ཡིས་གཏོས་ཙམ་དུ་ཆེ་བས་དགང་དཀའ་བས་བཀྲེས་པས་ཉེན་པར་གྱུར་ཏེ། སྣབ་སོགས་མི་གཙང་གྱི་ནར་ཏེ་དགོས་མེད་དུ་བོར་བ་ཅུང་ཟད་ཀྱང་། ཟ་བའམ་འཚལ་བའི་མཐུ་དང་ལྡན་པ་མ་ལགས་སོ། །ཁ་ཅིག་ཕྱིའི་པགས་པ་དང་ནང་གི་རུས་པ་ནི་ལྷག་མར་ལུས་ཤིང་ཤ་སྐམ་པ་གོས་མེད་པའི་གཅེར་བུ་སྟེ། དཔེར་ན་ཤིང་ཏ་ལའི་ཡང་ཏོག་ཅེས་མགོའི་རྩེ་མོ་བསྐམས་པ་ལྟ་བུ་ལགས་སོ། །ཁ་ཅིག་མཚན་རེ་རེ་ཞིང་ཞེས་མཚན་མོ་ཐམས་ཅད་དུ་ཁ་ནས་མེ་འབར་བ་སྟེ། ཟས་སུ་ཟ་ན་ཡང་མེ་འབར་བཞིན་པའི་ཁར་བབས་པའི་བྱེ་མ་འཚལ་ཏེ་ཟའོ། །སྨད་པའི་རིགས་སུ་གནས་པ་འགའ་ཞིག་ནི་རྣག་དང་ཕྱི་ས་སྟེ་དྲི་ཆེན་དང་། ཁྲག་སོགས་མི་གཙང་བ་ཡང་མི་རྙེད་དེ། སྡང་སེམས་ཀྱིས་ཐོ་བ་སོགས་ཐོགས་ནས་ཕན་ཚུན་གདོང་དུ་འཚོག་པའམ་བརྡེག་ཅིང་མགྲིན་པ་ནས། ལྦ་བ་བྱུང་བ་སྨིན་པའི་རྣག་ཟ་བའམ་འཚལ་ལོ་ཏེ་དེས་སྲོག་འཚོ་བའོ། །ཡི་དྭགས་རྣམས་ལ་ཚ་བ་དང་ལྡན་པ་སོས་ཀའི་དུས་སུ་ནི། ཟླ་བའང་ཚ་བར་གྱུར་ནས་གདུང་བ་བསྐྱེད་ལ་དགུན་གྲང་དུས་སུ་ནི་ཉི་མའང་གྲང་བར་སྣང་ཞིང་། ལྗོན་ཤིང་བཟང་པོའང་འདིས་མཐོང་ཚེ་འབྲས་བུ་མེད་པར་འགྱུར་ཞིང་འདི་དག་གིས། བལྟས་པ་ཙམ་གྱིས་ཆུ་ཀླུང་ཡང་བསྐམ་པར་འགྱུར་རོ། །གཉིས་པ། དེ་ལྟར་བར་ཆད་པ་མེད་པར་སྡུག་བསྔལ་ལ་བརྟེན་པར་གྱུར་པ། ཉེས་པར་སྤྱོད་པའི་ལས་ཀྱི་ཞགས་པ་ནི། ཤིན་ཏུ་སྲ་བས་བཅིངས་པའི་ལུས་ཅན་ཁ་ཅིག་ནི་ལོ་ཡི་གྲངས། ལྔ་སྟོང་དག་དང་ཁྲིར་ཡང་འཆི་བར་མི་འགྱུར་ཏེ་སྡུག་བསྔལ་ཉམས་སུ་མྱོང་ངོ་། །གཉིས་པ་དེའི་རྒྱུ་ནི། དེ་ལྟར་ཡི་དྭགས་རྣམས་ཀྱིས་བཀྲེས་སྐོམ་སོགས་སྣ་ཚོགས་པའི། སྡུག་བསྔལ་དོན་མཐུན་དུའམ་རོ་གཅིག་ཐོབ་པ་གང་ལགས་པ། དེ་ཡི་རྒྱུ་ནི་སྐྱེ་བོ་འཇུངས་པ་ལ་དགའ་བ་སྟེ་བདག་ལ་ཅི་ཡང་མེད་དོ་སྙམ་པ་ཅན། སེར་སྣ་འཕགས་པ་རྣམས་ཀྱི་ཆོས་མིན་པ་དེ་ཉིད་ལགས་པར་སངས་རྒྱས་ཀྱིས་གསུངས་ཏེ། སྡུད་པ་ལས། སེར་སྣ་ཅན་ནི་ཡི་དྭགས་གནས་སུ་སྐྱེ་བར་འགྱུར། །ཅི་སྟེ་མིར་སྐྱེ་ན་ཡང་དེ་ཚེ་དབུལ་པོར་འགྱུར། །ཞེས་སོ། །བཞི་པ་ལྷ་ལ། བསྟན་བཤད་གཉིས། དང་པོ། མཐོ་རིས་འདོད་པའི་ལྷའི་སྐྱེ་ཐོ ོབ་ན་ཡང་ལོངས་སྤྱོད་ཕུན་སུམ་ཚོགས་པ་ཐམས་ཅད་ལ་སྤྱོད་པའི་བདེ་བ་ཆེན་པོ་ཡོད་མོད་ཀྱི་དེ་དག་གི་སྟོབས་ལས། འཆི་འཕོ་བའི་དུས་ཀྱི་སྡུག་བསྔལ་ཉིད་ནི་སྔར་གྱི་བདེ་བའི་ཚད་དེ་བས་སྟོབས་ཆེའོ། །དེ་ལྟར་བསམས་ནས་ཡ་རབས་དམ་པ་རྣམས་ཀྱིས་ནི། བདེ་བ་མི་བརྟན་པས་ཟད་པར་འགྱུར་བའི་མཐོ་རིས་ཀྱི་སླད་དུ་སྲེད་པར་མི་བགྱིའོ། །གཉིས་པ། ལྷ་རྣམས་འཆི་བར་གྱུར་བ་དེའི་ཚེ་ལུས་ཀྱི་ཁ་དོག་མི་སྡུག་པར་འགྱུར་བ་དང་། རང་གི་སྟན་ལ་སྔར་ཇི་ཙམ་བསྡད་ཀྱང་མི་སྐྱོ་བ་ལ་དེའི་དུས་སུ་མི་དགའ་ཞིང་རྒྱན་གྱི་མེ་ཏོག་གི་ཕྲེང་བ་རྙིང་པར་གྱུར་པ་དང་། གོས་ལ་དྲི་མ་ཆགས་པ་དང་ལུས་མཆན་ཁུང་སོགས་ལས་ནི། སྔོན་ཆད་མེད་པའི་རྡུལ་འབྱུང་བ་ཞེས་བགྱི་བ། མཐོ་རིས་ཀྱི་ལྷ་རྣམས་ལ་འཆི་འཕོ་སྦྲོན་པར་བགྱིད་པའི་འཆི་བའི་ལྟས་ལྔ། ལྷ་ཡུལ་ན་གནས་པའི་ལྷ་རྣམས་ལ་འབྱུང་སྟེ། དཔེར་ན་ས་སྟེང་གི་མི་རྣམས་འཆི་བར་གྱུར་པ་དག་གི་ཚེ། སྦྲོན་པར་བྱེད་པའི་འཆི་ལྟས་རྣམས་དང་འདྲའོ། །དེར་མ་ཟད་ལྷ་ཡི་འཇིག་རྟེན་དག་ནས་ཤི་འཕོས་པ་རྣམས་ལ། གལ་ཏེ་མཐོ་རིས་སུ་སྐྱེ་བའི་རྒྱུ་དགེ་བའི་ལྷག་མ་འགའ་མེད་པ་ན། དེ་ནས་རང་དབང་མེད་པར་དུད་འགྲོ་དང་ཡི་དྭགས་དང་། དམྱལ་བར་གནས་པ་ལས་གང་ཡང་རུང་བར་སྐྱེ་ཞིང་སྡུག་བསྔལ་མྱོང་བར་འགྱུར་རོ། །ལྔ་པ་ལྷ་མིན་གྱི་སྡུག་བསྔལ་ནི། ལྷ་མིན་གྱི་སྐྱེ་གནས་དག་ན་ཡང་ཕྲག་དོག་གི་རྒྱུ་མཐུན་གྱི་ལས་ཀྱིས་རང་བཞིན་གྱིས་ལྷ་ཡི། དཔལ་ལ་སྡང་ཕྱིར་ཡིད་ཀྱི་སྡུག་བསྔལ་ཆེ་སྟེ་ཕྲག་དོག་གིས་ཡིད་མི་བདེ་བ་སྐྱེད་པའི་ཕྱིར་རོ། །ལྷ་མིན་གྱི་འགྲོ་བ་དེ་དག་བློ་དང་ལྡན་ཡང་རྣམ་སྨིན་ནམ་འགྲོ་བ་ཡི། སྒྲིབ་པས་རྟེན་དེ་ལ་བདེན་པ་མཐོང་བ་མ་མཆིས་སོ། །ག ཉིས་པ་དེ་ལྟར་ཤེས་ནས་སྐྱེ་བ་བཟློག་པར་གདམས་པ་ལ། སྐྱེ་བ་བཟློག་དགོས་པའི་རྒྱུ་མཚན། རྒྱུ་མཚན་དེས་ན་སྐྱེ་བ་བཟློག་པ་ལ་དྲག་ཏུ་འབད་པར་གདམས་པ་གཉིས། དང་པོ། འཁོར་བ་ཡི་རང་བཞིན་ནམ་སྐྱོན་བཤད་མ་ཐག་པ་དེ་འདྲ་བ་ལགས་པས་ལྷ་མི་དང་། དམྱལ་བ་ཡི་དྭགས་དུད་འགྲོ་རྣམས་ཀྱི་གནས་རིས་དེ་དག་ཏུ། སྐྱེ་བ་འདི་ནི་བཟང་པོ་མ་ལགས་ཀྱི་དེར་སྐྱེ་བ་ནི། འཇིགས་དང་སྡུག་བསྔལ་སོགས་གནོད་པ་དུ་མའི་སྣོད་དུ་འགྱུར་བ་ལགས་པས་དེ་ལྟར་མཁྱེན་པར་མཛོད་ཅིག གཉིས་པ། དེའི་ཕྱིར་རང་གི་མགོའམ་གོས་ལ་གློ་བུར་དུ་མེ་ཤོར་ན་མྱུར་དུ་བཟློག་པ་ལ་འབད་དགོས་པ་ཡིན་ཡང་། འཁོར་བའི་ཉེས་དམིགས་ཤེས་པའི་མཁས་པས་ནི་མེ་དེ་དག་བཟློག་ཕྱིར་རྩོལ་བའི་བགྱི་བ་དེའང་བཏང་ནས་ཀྱང་། ལུས་སྲོག་ལ་མི་ལྟ་བའི་བརྩོན་འགྲུས་ཀྱིས་ཡང་སྲིད་མེད་པར་བགྱི་བ་སྟེ་སྐྱེ་བ་བཟློག་པའི་སླད་དུ་རྩོལ་བའི་ཐབས་འདི་ལ་འབད་འཚལ་ཏེ། ཡང་སྲིད་མེད་པར་བགྱི་བ་དེ་བས་ཆེས་མཆོག་ཏུ་གྱུར་པའི་དགོས་པ་གཞན་མ་མཆིས་པས་སོ། །གཉིས་པ་རྣམ་བྱང་ཕྱོགས་ལ་འཇུག་པའི་ཚུལ་ལ། འབྲས་བུ་ཐར་པ་ལ་ཡིད་ཆེས་པར་བྱ་བ་དང་། རྒྱུ་ལམ་བདེན་ཉམས་སུ་ལེན་པ་གཉིས། དང་པོ། རྒྱུ་ཚུལ་ཁྲིམས་དག་དང་བསམ་གཏན་ཤེས་རབ་ཀྱིས་ཏེ་བསླབ་པ་རིན་པོ་ཆེ་གསུམ་གྱིས། འབྲས་བུ་མྱ་ངན་ལས་འདས་པ་ཞེས་སྡུག་བསྔལ་ཞི་ཞིང་སྲིད་པར་ཀུན་སྦྱོར་ཀྱི་ལས་མེད་པས་དུལ་བ་ཉོན་མོངས་པའི་དྲི་མ་མེད་པའི། གོ་འཕང་མི་རྒ་མི་འཆི་བ་སྟེ་རྒ་ཤི་མེད་པས་ནམ་ཡང་ཟད་མི་ཤེས་པའམ་མི་འཚལ་བ། ཕྱི་རོལ་པས་བཏགས་པའི་ཐར་པ་གཟུགས་ཅན་ས་ཆུ་མེ་རླུང་ཉི་ཟླ་ལྟ་བུའི་བེམ་པོ་དང་བྲལ་བ་དེ་ཐོབ་པར་མཛོད་ཅིག འདི་ལ་ཞི་བ་ལྷག་མེད་མྱང་འདས་ཟག་བཅས་ཀྱི་ཕུང་པོ་འགག་པ་དང་། དུལ་བ་ལྷག་བཅས་མྱང་འདས་དབང་པོ་དུལ་བ་དང་། གཉ ིས་ཀ་ཡང་ཉོན་མོངས་པ་མེད་པས་དྲི་མ་མེད་པ་སོགས་ཀྱི་དོན་དུ་བཤད་ཀྱང་རུང་ངོ་། །གཉིས་པ་ལ། མཐོང་ལམ་དང་། སྒོམ་ལམ་བཤད་པ་གཉིས། དང་པོ་ལ། ལམ་གྱི་ངོ་བོ་བྱང་ཆུབ་ཡན་ལག་བདུན་བཤད་པ། དེ་ལས་བྱེ་བྲག་ཞི་གནས་དང་འབྲེལ་བར་ཤེས་རབ་ཟབ་མོའི་རྣལ་འབྱོར་བཤད་པ་གཉིས། དང་པོ། མཐོང་ལམ་གྱི་སྐབས་སུ་དམིགས་པ་མི་བརྗེད་པའི་དྲན་པ་དང་ཆོས་རབ་ཏུ་རྣམ་པར་འབྱེད་པའི་ཤེས་རབ་དང་བླང་དོར་ལ་འབད་པའི་བརྩོན་འགྲུས་དང་། ཡིད་བདེ་བའི་དགའ་བ་དང་ལུས་སེམས་ལས་རུང་གི་ཤིན་ཏུ་སྦྱངས་པ་དང་སེམས་རྩེ་གཅིག་པའི་ཏིང་ངེ་འཛིན་དང་། བྱིང་རྒོད་དང་བྲལ་བའི་བཏང་སྙོམས་ཏེ་འདི་བདུན་ནི་བྱང་ཆུབ་ཀྱི་ཡན་ལག་ཅེས་བྱ་སྟེ། དེ་ཡང་བྱང་ཆུབ་ནི་མྱང་འདས་དང་ཡན་ལག་ནི་དེའི་རྗེས་སུ་མཐུན་པ་སྟེ་དེ་སྒྲུབ་པའི་ཐབས་སུ་གྱུར་པའམ་ཡང་ན་བདག་མེད་རྟོགས་པའི་ཤེས་རབ་ནི་བྱང་ཆུབ་ཀྱི་ངོ་བོ་ཡིན་པས་རང་བཞིན་གྱི་དང་དྲན་པ་ནི་དེའི་གནས་ཀྱི་དང་བརྩོན་འགྲུས་ནི་ངེས་པར་འབྱུང་བའི་དང་དགའ་བ་ཕན་ཡོན་གྱི་དང་། ལྷག་མ་གསུམ་ཉོན་མོངས་མེད་པའི་ཡན་ལག་གོ །དེས་ན་དེ་བདུན་པོ། མྱ་ངན་ལས་འདས་པ་ཐོབ་པར་བགྱིད་པའི་དགེ་བའི་ཚོགས་ལགས་སོ། །གཉིས་པ་ལ་བསྟན་བཤད་གཉིས། དང་པོ། ཆོས་རབ་རྣམ་འབྱེད་ཀྱི་ཤེས་རབ་མེད་པར་ཐར་པ་མཆོག་གི་རྒྱུར་གྱུར་པའི་བསམ་གཏན་ཡོད་པ་མིན་ཏེ་ཤེས་རབ་ཀྱི་རྟོགས་པའི་དོན་ལ་མཉམ་པར་འཇོག་དགོས་པའི་ཕྱིར། བསམ་གཏན་མེད་པར་ཡང་ནི་རྣམ་གྲོལ་གྱི་ལམ་ཡང་དག་པའི་ཤེས་རབ་མེད་དེ་སེམས་མཉམ་པར་བཞག་པ་ལས་ཡང་དག་པ་ཇི་ལྟ་བ་བཞིན་ཤེས་པ་འབྱུང་བའི་ཕྱིར་རོ། །དེས་ན་གང་ཟག་གང་ལ་ཤེར་ཏིང་ངམ་ཞི་ལྷག་དེ་གཉིས་ཟུང་འབྲེལ་དུ་ཡོད་པས་ནི་སྲིད་པ་ཡི། རྒྱ་མཚོ་ཆེན་པོ་ཐ་གྲུ་མི་མངོན་པ་འདི་ཡང་ཆུང་ངུ་བསྐམ་པར་སླ་བ་གནག་རྗེས་ཀྱི་ཆུ་ལྟ་བུར་ཤེས་པའམ་འཚལ་བར་བགྱི་སྟེ་ཞི་ལྷག་ལྡན་པའི་གང་ཟག་དེ་སྟོབས་དང་ལྡན་པའི་ཕྱིར་དེ་ལ་འཁོར་བའི་རྒྱ་མཚོ་སྐེམ་པར་བྱ་མི་དཀའ་བས་སོ། །གཉིས་པ་ལ། སྤང་བྱ་གནས་ཚུལ་ལ་ཕྱིན་ཅི་ལོག་ཏུ་ཞུགས་པའི་ལུང་མ་བསྟན་པའི་ལྟ་བ་བཤད་པ། གཉེན་པོ་ཡང་དག་པའི་གནས་ལུགས་རྟེན་འབྲེལ་གྱི་དོན་བཤད་པ་གཉིས། དང་པོ། བདག་དང་འཇིག་རྟེན་རྟག་མི་རྟག་གཉིས་ཡིན་གཉིས་མིན་ཏེ་སྔོན་མཐའ་ལ་བརྟེན་པ་བཞི། དེ་གཉིས་མཐའ་ལྡན་མིན་གྱི་མུ་བཞི་ཕྱི་མཐའ་ལ་བརྟེན་པ་དང་། དེ་བཞིན་གཤེགས་པ་གྲོངས་ཕན་ཆད་འབྱུང་མི་འབྱུང་གི་མུ་བཞི་མྱང་འདས་ལ་བརྟེན་པ་དང་ལུས་སྲོག་གཅིག་ཐ་དད་གཉིས་བཅས་ལུང་མ་བསྟན་པ་བཅུ་བཞི་ཞེས་འཇིག་རྟེན་ན། སྟོན་མཆོག་ཉི་མའི་གཉེན་གྱིས་རབ་ཏུ་གསུངས་པ་གང་ལགས་པ། དེ་དག་རྣམས་ལ་དེ་དང་དེའི་ཚུལ་བསམ་པར་མི་བགྱི་སྟེ། དེ་ཡིས་བློ་ནི་ཞི་བར་བགྱིད་པ་མ་ལགས་ཏེ་མགོ་རྨོངས་ཤིང་ཡིད་ཤ་ཐང་ཆད་པར་འགྱུར་རོ། །འདིར་ལུང་མ་བསྟན་ཞེས་པ། དོན་འདི་དག་ཕྱི་རོལ་པས་བདག་རྟག་པ་ལས་བརྩམས་ཏེ་དྲི་བ་བྱས་པས་ན་ཁྱད་གཞི་བདག་མེད་པ་ལ་ཁྱད་ཆོས་ལུང་བསྟན་དུ་མེད་པ་དང་། བདག་བཀག་ན་ཡང་དོན་དུ་མི་འགྱུར་བ་ལ་དགོངས་ནས་དྲི་བ་དེ་དག་གི་ལན་ལུང་དུ་མ་བསྟན་པས་དེ་སྐད་དུ་བཤད་དོ། །གཉིས་པ་ལ་རྟེན་འབྲེལ་དངོས་དང་། དེའི་ཆེ་བ་བ རྗོད་པ་གཉིས། དང་པོ། འོ་ན་ཇི་ལྟར་བསམ་པར་བྱ་ཞེན། བདག་མེད་པའི་དོན་མ་རྟོགས་པའི་མ་རིག་པ་ལས་ལས་འདུ་བྱེད་པ་འབྱུང་སྟེ་དེ་ལས་ནི། ས་བོན་དང་འཕེན་པའི་རྣམ་ཤེས་འབྱུང་ཞིང་དེ་ལས་ཚོར་འདུ་སོགས་མིང་བཞི་དང་ནུར་ནུར་པོ་སོགས་གཟུགས་རབ་ཏུ་འབྱུང་ཞིང་། དེ་ལས་མིག་སོགས་ནང་གི་སྐྱེ་མཆེད་དྲུག་སྟེ་དེ་ལས་ནི། ཡུལ་དབང་ཤེས་གསུམ་འདུས་ཏེ་རེག་པ་དྲུག་ཀུན་ཏུ་འབྱུང་བར་ཐུབ་པས་གསུངས་སོ། །རེག་པ་ལས་ནི་ཚོར་བ་བདེ་སྡུག་སོགས་ཀུན་འབྱུང་སྟེ། ཚོར་བའི་གཞི་ལས་འཇུག་ལྡོག་གི་སྲེད་པ་འབྱུང་བར་འགྱུར། སྲེད་པ་ལས་ནི་དོན་དེའི་ཕྱིར་རྒྱུག་པ་ལེན་པ་སྐྱེ་བར་འགྱུར་བ་སྟེ། དེ་ལས་ལས་འདུ་བྱེད་པའི་སྲིད་པ་འབྱུང་ཞིང་སྲིད་པ་ལས་ཕྱི་མའི་སྐྱེ་བ་འབྱུང་བ་ལགས་སོ། །སྐྱེ་བ་ཡོད་ན་མྱ་ངན་དང་ན་བ་དང་རྒ་བ་དང་། འདོད་པས་ཕོངས་པ་དང་འཆི་བ་དང་འཇིགས་པ་དང་སྨྲེ་སྔགས་དང་ཡིད་མི་བདེ་བ་སོགས་ཀྱི། སྡུག་བསྔལ་གྱི་ཕུང་པོ་ཤིན་ཏུ་ཆེ་བ་འབྱུང་སྟེ། མ་རིག་པ་འགགས་པས་འདུ་བྱེད་འགགས་པ་ནས་སྐྱེ་བ་འགགས་པའི་བར་དུ་འགྱུར་ལ། སྐྱེ་བ་འགགས་པས་མྱ་ངན་སོགས་སྡུག་བསྔལ་འདི་ཀུན་འགག་པར་འགྱུར་བ་ཡིན་ནོ། །གཉིས་པ། ཇི་སྐད་བཤད་པའི་རྟེན་ཅིང་འབྲེལ་བར་འབྱུང་བ་འདི་ནི་རྒྱལ་བ་ཡི། གསུང་གི་མཛོད་རྒྱ་ཆེ་ཞིང་དངོས་པོ་མང་པོ་རྣམས་ཀྱི་ནང་ན་གཅེས་པའི་དོན་ཟབ་མོ་ནོར་བུ་དབང་གི་རྒྱལ་པོ་ལྟ་བུ་སྟེ། གང་གིས་རྟེན་འབྲེལ་གྱི་ཚུལ་འདི་ནི་ཡང་དག་པར་མཐོང་བ་དེས། ཤེས་རབ་ཀྱི་མིག་གིས་སངས་རྒྱས་ཆོས་ཀྱི་སྐུ་དེ་ཁོ་ན་ཉིད་རིག་པ་རྣམ་པ་མཆོག་གི་བདག་ཉིད་མཐོང་བ་ཡིན་ནོ། །གཉིས་པ་སྒོམ་ལམ་ལ། ལམ་གྱི་ངོ་བོ་འཕགས་ལམ་ཡན་ལག་བརྒྱད་བཤད་པ། དེ་ལམ་ཡིན་ཚུལ་བཤད་པ། ལམ་དེ་ཡི་གཙོ་བོ་བདེན་བཞི་མཐོང་བའི་ཤེས་རབ་ལ་གདམས་པ་གསུམ། དང་པོ། སྔར་མཐོང་ལམ་དུ་རྟོགས་ཟིན་ཡོངས་སུ་གཅོད་པ་ཡང་དག་པའི་ལྟ་བ་དང་དེ་བཞིན་དུ་ལོག་འཚོ་སྤང་བའི་འཚོ་བ་དང་ལམ་བསྒོམ་པ་ལ་རྩོལ་བ་དང་། བརྗེད་པ་མེད་པའི་དྲན་པ་དང་སེམས་རྩེ་གཅིག་པའི་ཏིང་འཛིན་དང་རྟོགས་དོན་གཞན་ལ་འདོམས་པའི་ངག་དང་འཕགས་པས་སྲོག་གཅོད་སྤང་བ་སོགས་རྣམ་པར་དག་པའི་ལས་ཀྱི་མཐའ་དང་། ཆོས་སྟོན་པ་སོགས་ཀྱི་ངག་དེ་ཉིད་ཀུན་ནས་སློང་བྱེད་ཡང་དག་པའི་རྟོག་པ་ཉིད་བཅས་འཕགས་པའི་ལམ་གྱི་ཡན་ལག་བརྒྱད་དེ། འདིས་སྤང་བྱ་སྤངས་ཤིང་རྣམ་གྲོལ་མངོན་དུ་བྱེད་པས་འཕགས་པའི་ལམ་དང་དེ་ལས་ལྟ་བ་ནི་ཡོངས་སུ་གཅོད་པ་དང་། རྟོག་པ་ནི་གཞན་ལ་གོ་བར་བྱེད་པ་དང་། ངག་ལས་མཐའ་འཚོ་བ་གསུམ་ནི་གཞན་ཡིད་ཆེས་པར་བྱེད་པ་དང་། ལྷག་མ་གསུམ་ནི་སྒྲིིབ་པ་སྦྱོང་བའི་ཡན་ལག་ཡིན་པས་ཡན་ལག་ཅེས་བྱ། འདི་བརྒྱད་པོ་ནི་ཞི་བར་ཏེ་མྱང་འདས་ཐོབ་པར་བགྱི་བའི་སླད་དུ་བསྒོམ་པར་བགྱིའོ། །གཉིས་པ། སྐྱེ་བ་འདི་ནི་སྡུག་བསྔལ་བདེན་པའི་མཚན་གཞི་ཡིན་ཞིང་སྲིད་པ་ལ་སྲེད་པ་ཞེས་བགྱི་བ། དེ་ནི་སྐྱེ་བ་དེ་ཡི་འགྲུབ་བྱེད་ཀྱི་རྒྱུ་ཀུན་འབྱུང་ཡིན་ལ་དེ་ནི་རྒྱ་ཆེན་ཏེ་ཞེས་སྲིད་པ་སྣ་ཚོགས་རྒྱུན་ཆད་མེད་པར་འབྱུང་བའོ། །སྡུག་ཀུན་འདི་གཉིས་པོ་གཏན་དུ་འགོག་པ་ནི་ཐར་པ་ལགས་ཏེ་ཐར་པ་དེ་ཉིད། འཐོབ་པར་བགྱིད་པའི་ལམ་ནི་འཕགས་ལམ་ཡན་ལག་དེ་བརྒྱད་པོ་ལགས་སོ། །གསུམ་པ། བཤད་མ་ཐག་པ་དེ་ལྟར་འཕགས་པའི་བདེན་པ་བཞི་པོ་དག་གི་དེ་ཁོ་ན་ཉིད། མཐོང་བར་བགྱི་བའི་སླད་དུ་རྟག་ཏུ་ལམ་སྒོམ་པ་ལ་བརྩོན་པར་བགྱིའོ། །གསུམ་པ་དེ་དག་ཉམས་སུ་ལེན་ཚུལ་ལ་དབུགས་དབྱུང་བ་ལ། རྟེན་དམན་ཡང་འགྲུབ་པའི་སྒོ་ནས་དབུགས་དབྱུང་བ། ཉམས་ལེན་ཉུང་ངུར་དྲིལ་བའི་སྒོ་ནས་དབྱུགས་དབྱུང་བ། དེ་ལས་ནུས་ཚོད་ཉམས་སུ་བླང་ཆོག་པའི་དབུགས་དབྱུང་བ་གསུམ། དང་པོ། བདག་ཁྱིམ་པས་འཕགས་པའི་བདེན་པ་མཐོང་མི་ནུས་སྙམ་ན། པང་ན་དཔལ་གནས་ཞེས་བུ་དང་ཆུང་མ་ནོར་དབྱིག་སོགས་མ་སྤངས་པར་མདུན་ན་གནས་བཞིན་དུ་ཁྱིམ་པ་རྣམས་ཀྱིས་ཀྱང་། བླང་དོར་ཤེས་པས་ཉོན་མོངས་པའི་ཆུ་བོ་ལས་བརྒལ་བ་ཡིན་གྱི་གཞན་དུ་མིན་ནོ། །གང་སུ་དག་དམ་པའི་གོ་འཕང་གི་ཆོས་མངོན་དུ་བགྱིས་པ་རྒྱལ་བ་དང་དགྲ་བཅོམ་པ་ཆེན་པོ་དེ་དག་ཀྱང་། ཇི་ཞིག་ན་ཆར་བཞིན་དུ་གནམ་ལས་བབས་པ་མ་ལགས་ལོ་ཏོག་བཞིན་དུ། ས་རུམ་ནས་འཐོན་པ་མ་ལགས་ཏེ་འཕགས་པ་དེ་དག་ཀྱང་སྔོན་གྱི་དུས། ཉོན་མོངས་ལ་རག་ལས་པའམ་ཉོན་མོངས་པའི་དབང་དུ་གྱུར་པའི་སོ་སོའི་སྐྱེ་བོར་པས་ཏེ་སོ་སྐྱེར་ངེས་ལ། དེས་ན་བདག་ཉིད་ཀྱིས་ཀྱང་ལམ་བསྒོམས་ན་ཉོན་མོངས་པའི་འཆིང་བ་དེ་ཀུན་གྲོལ་ནས་འཕགས་པ་རྣམས་ཇི་ལྟ་བ་བཞིན་དུ་འབྲས་བུ་མངོན་སུམ་དུ་བྱེད་པ་ཡོད་དོ་ཞེས་སོ། །གཉིས་པ། གཞན་གྱིས་བསྙེངས་པ་དང་བྲལ་བ་ཞེས་ཕས་རྒོལ་གྱིས་བག་ཚ་བ་མེད་པ་ལ་མང་དུ་གསོལ་ཅི་འཚལ་ཏེ་ཅི་ཞིག་དགོས། ཕན་པའི་གདམས་ངག་དོན་གྱི་སྙིང་པོ་ནི་འདི་ལགས་ཏེ། ཁྱོད་ཀྱིས་ཐུགས་དུལ་བར་མཛོད་ཅིག་བཅོམ་ལྡན་འདས་ཀྱིས་ཀྱང་། སེམས་ནི་ཆོས་ཀྱི་རྩ་བ་ལགས་པར་གསུངས་ཏེ། སེམས་དུལ་བ་ནི་ལེགས་པ་སྟེ། །སེམས་དུལ་བས་ནི་བདེ་བར་འདྲེན། །ཞེས་སོ། །གསུམ་པ་ནི། རྒྱལ་པོ་ཁྱོད་ལ་གོང་དུ་དེ་སྐད་གདམས་པ་གང་ལགས་པ་དེ་བས་ཕར་ཏེ་མཐའ་དག་ཁྱིམ་སྤང་བ་དགེ་སློང་གིས་ཀྱང་བགྱི་བར་དཀའ་ན། རྒྱལ་སྲིད་ལ་ག ཡེང་བ་ཁྱོད་ཀྱིས་ལྟ་ཅི་སྨྲོས་ཏེ་འོན་ཀྱང་ནུས་ཚོད་བྱས་ཏེ་འདི་ལས་གང་ཞིག་སྤྱོད་པའི་ངོ་བོ་དེའི། ཡོན་ཏན་བསྟེན་པས་སྐུ་ཚེ་དོན་ཡོད་པར་མཛོད་ཅིག གསུམ་པ་ཐ་མར་དགེ་བ་མཇུག་གི་དོན་ལ། རྗེས་སུ་ཡི་རང་དང་བསྔོ་བའི་ཚུལ་ལ་གདམས་པ་དང་། གོང་གི་ལམ་དང་འབྲས་བུའི་དོན་ཐམས་ཅད་བསྡུ་བའི་སྒོ་ནས་གདམས་པ་གཉིས། དང་པོ་ལ། བསྔོ་བ། དེའི་འབྲས་བུ་གཉིས། དང་པོ། གཞན་སྐྱེ་འཕགས་ཀུན་གྱི་ཟག་བཅས་ཟག་མེད་ཀྱི་དགེ་བ་ཀུན་ལ་རྗེས་སུ་ཡི་རང་བར་བྱ་ཞིང་། ཉིད་ཀྱིས་སྒོ་གསུམ་གྱི་ལེགས་པར་སྤྱོད་པ་རྣམ་པ་གསུམ་པོ་ཡང་། གཞན་དོན་དུ་སངས་རྒྱས་ཀྱི་གོ་འཕང་ཉིད་ཐོབ་པར་བགྱི་བའི་སླད་དུ་ཡོངས་སུ་བསྔོས་ནས་ཐེག་ཆེན་གྱི་སྒྲུབ་ལ་བླ་ན་མེད་པས་ཀུན་ཏུ་དོན་ཡོད་པར་མཛོད་ཅིག གཉིས་པ་ལ། གནས་སྐབས་ལམ་གྱི་འབྲས་བུ་དང་། མཐར་ཐུག་སངས་རྒྱས་ཀྱི་འབྲས་བུ་གཉིས། དང་པོ། དེ་ལྟར་འཁོར་གསུམ་ཡང་དག་གིས་དགེ་བ་བསྔོས་ནས་དགེ་བའི་ཕུང་པོ་རྒྱ་ཆེན་པོ་འདི་ཡིས་ཁྱོད། ལམ་སྒྲུབ་པའི་གནས་སྐབས་སུ་སྐྱེ་བ་དཔག་ཏུ་མེད་པར་ལྷ་དང་མི་ཡི། འཇིག་རྟེན་རྣམས་སུ་སྐྱེས་ཏེ་ཀུན་གྱི་ལམ་བསྒོམ་པའི་རྣལ་འབྱོར་ཉིད་མི་ཡི་དབང་པོས་མངོན་དུ་མཛད་ནས་ཀྱང་། ལམ་སློབ་པའི་སྐབས་སུ་ཇི་ལྟར་འཕགས་པ་སྤྱན་རས་གཟིགས་དབང་གི་སྤྱོད་པ་ཡིས། འགྲོ་བ་ཉམ་ཐག་མང་པོ་མཐའ་ཡས་པ་རྗེས་སུ་བཟུང་སྟེ། སྙིང་རྗེའི་དབང་གིས་འཇིག་རྟེན་དུ་ཡང་དང་ཡང་དུ་འཁྲུངས་ནས་འགྲོ་བའི་ན་བ་དང་རྒ་བ་དང་འདོད་ཆགས་དང་ཞེ་སྡང་སོགས་ཉེས་པའི་སྐྱོན་རྣམས་བསལ་བར་མཛད་དེ་ཞེས་སོ། །གཉིས་པ། མཐར་ཕྱིན་མི་སློབ་པའི་དུས་སུ་རང་ཉིད་ཀྱིས་བཟུང་བའི་སངས་རྒྱས་ཀྱི་ཞིང་དུ་དཔེར་ན་བཅོམ་ལྡན་འདས། འོད་དཔག་ཏུ་མེད་པ་དང་འདྲ་བར་འཇིག་རྟེན་གྱི། མགོན་པོ་འཁོར་བ་ཇི་སྲིད་བར་གནས་ནས་སྐུ་ཚེ་དཔག་ཏུ་མེད་པར་མཛོད་ཅིག གཉིས་པ་གོང་གི་ལམ་འབྲས་བུའི་དོན་བསྡུས་ཏེ་གདམས་པ་ནི། ཤེས་རབ་དང་ཚུལ་ཁྲིམས་དང་གཏོང་བ་ལས་འབྱུང་བའི་གྲགས་པ་ཆེན་པོ་ཉེས་པའི་དྲི་མ་མེད་པ་ཡིས། ལྷ་ཡུལ་ནམ་མཁའ་དང་ནི་ས་སྟེང་མིའི་ཡུལ་ཀུན་ཏུ་ཁྱབ་པའམ་རྒྱས་པར་མཛད་ནས། ས་ལ་གནས་པའི་མི་དང་མཐོ་རིས་ཀྱི་ལྷ་རྣམས་ནི་ལྷའི་ན་ཆུང་མཆོག་བསྟེན་ནས། ལུས་སེམས་བདེ་དགས་རབ་ཏུ་དགའ་བ་རྣམས་ཆགས་པ་ལས་སེམས་ངེས་པར་རབ་ཏུ་ཞི་བར་མཛད་དེ། ཉོན་མོངས་སྡུག་བསྔལ་གྱིས་ཉམ་ཐག་པའི་སེམས་ཅན་ཚོགས་ཀྱི་འཇིག་པ་དང་སྐྱེ་བ་དང་། འཆི་བ་རྣམས་ཞི་བར་མཛད་པ་རྒྱལ་བའི་དབང་པོ་སངས་རྒྱས་བཅོམ་ལྡན་འདས་མཚན་དཔེའི་བདག་ཉིད་ཀྱི་གཟུགས་སྐུ་ཉིད་གཞན་དོན་དུ་བརྙེས་ནས། རང་དོན་ཞི་བ་ཆོས་ཀྱི་སྐུ་འཇིག་རྟེན་ཀུན་རྟོག་གི་ཡུལ་ལས་འདས་པའི་སྐྱེ་སོགས་ཀྱི་མིང་ཙམ་ཡང་ཞི་ལ་འཆི་སོགས་ཀྱི་གནོད་པས་ཟིལ་གྱིས་མི་ནོན་པས་མི་བསྙེངས་པ། རྒ་བའི་གནོད་པ་མེད་པས་མི་བགྲེས་ཤིང་ནད་སོགས་ཀུན་གྱི་ནོངས་པ་མི་མངའི་གོ་འཕང་མཆོག་བརྙེས་པར་མཛོད་ཅིག་ཅེས་གདམས་པའོ། །བཞི་པ་མཇུག་གི་དོན་ལ་མཛད་བྱང་དང་། འགྱུར་བྱང་གཉིས། དང་པོ། བཤེས་པའི་སྤྲིང་ཡིག་སློབ་དཔོན་འཕགས་པ་ཀླུ་སྒྲུབ་ཀྱིས་མཛའ་བོ་རྒྱལ་པོ་བདེ་སྤྱོད་ལ་བསྐུར་བ་རྫོགས་སོ། །གཉིས་པ། རྒྱ་གར་གྱི་མཁན་པོ་སརྦ་ཛྙ་དེ་ཝ་སྟེ་ཐམས་ཅད་མཁྱེན་པའི་ལྷ་དང་། ཞུ་ཆེན་གྱི་ལོ་ཙ་བ་ཆེན་པོ་བན་དེ་ཀ་བ་དཔལ་བརྩེགས་ཀྱིས་བསྟན་པ་སྔ་དར་གྱི་དུས་སུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །ས་བཅད་ཀྱི་མཇུག་གི་མཛད་བྱང་ནི། གང་ལ་མཉམ་པར་བཞག་པའི་སྙིང་དབུས་སུ། །མཚུངས་མེད་ཞི་བའི་རོ་མཆོག་རབ་མྱོང་བ། །སྲིད་པའི་རིམས་ནད་སེལ་བའི་བདུད་རྩི་ཆེ། །འཕགས་མཆོག་མགུལ་གྱི་བུམ་པ་ལས་ཐོན་པ། །འདི་ལ་རང་དང་གཞན་གྱི་ཤེས་རྒྱུད་ལ། །རྣམ་དཀར་དགེ་བའི་ས་བོན་འཇོག་སླད་དུ། །འདི་ལ་བསྡུས་དོན་རང་བློས་གསར་བཀོད་པ། །འདི་ཡི་དགེ་བ་བྱང་ཆུབ་མཆོག་ཏུ་བསྔོ། །ཞེས་པའང་བསླབ་གསུམ་རྣམ་པར་དག་པའི་དགེ་བའི་བཤེས་གཉེན་ཆེན་པོ་གྲགས་པ་རྒྱལ་མཚན་དཔལ་བཟང་པོ་ལ་སོགས་པའི་དམ་པ་འགའ་ལ་བཤད་པ་བྱས་པའི་སྐབས་སུ་མ་ཏི་བི་མ་ལས་སྤེལ་བ་རྒྱལ་བསྟན་རིན་པོ་ཆེ་རྒྱས་པར་གྱུར་ཅིག ཅེས་པའོ། །སླར་སྨྲས་པ། ཟབ་ཡངས་མཁྱེན་སྤྲིན་བརྩེ་བའི་འབྲུག་སྒྲ་ཅན། །ནུས་མཐུའི་ཆར་གྱིས་ས་གསུམ་དགའ་བསྐྱེད་པའི། །ཐུབ་གསུང་ཟབ་དང་རྒྱ་ཆེའི་ཆུ་ཀླུང་འབུམ། །གཅིག་ཏུ་བསྐྱིལ་མཁས་དཔལ་ལྡན་ཀླུའི་དབང་པོའི། །ལེགས་བཤད་ངོ་མཚར་ཨུ་དུམ་ཝ་རའི་ཚལ། །འཇམ་མགོན་བླ་མའི་རྣམ་དཔྱོད་ཉི་གཞོན་གྱིས། །གསར་དུ་བཞད་པའི་མཆན་འགྲེལ་པད་དཀར་ཕྲེང་། །བློ་གསལ་རྐང་དྲུག་དགའ་བའི་གསོས་སུ་འབུལ། །དེ་ལས་བྱུང་བའི་རབ་དགེ་དྲི་མེད་ཀྱིས། །འགྲོ་ཀུན་ཡང་དག་ལྟ་བའི་མིག་རྙེད་ནས། །བདེན་བཞིའི་འཇུག་ལྡོག་གྲུ་ཡིས་སྲིད་མཚོ་ལས། །རབ་བརྒལ་རྣམ་གྲོལ་རིན་གླིང་ངལ་འཚོར་ཤོག །ཕན་བདེའི་གཞིར་གྱུར་ཐུབ་བསྟན་རིན་པོ་ཆེ། །སྲིད་མཐའི་བར་དུ་མི་ཉམས་རྟག་གནས་ཤིང་། །དེར་འཛིན་ཞབས་བརྟན་བཤད་སྒྲུབ་མངའ་ཐང་རྒྱས། །དོན་གཉིས་ལྷུན་གྲུབ་བཀྲ་ཤིས་འཕེལ་གྱུར་ཅིག །ཅེས་པའང་གངས་ཁྲོད་སྨྲ་བའི་སེང་གེ་གཅིག་པུར་གྱུར་པ་མི་ཕམ་འཇམ་དབྱངས་རྣམ་རྒྱལ་རྒྱ་མཚོས་མཛད་པའི་ས་བཅད་དང་རྩ་བའི་ཕྱག་མཆན་དཀྱུས་གཅིག་ཏུ་ཀུ་སཱ་ལི་འཇམ་དབྱངས་བློ་གྲོས་རྒྱ་མཚོས་ཞེ་ཆེན་ཡང་དབེན་བདེ་མཆོག་བཀྲ་ཤིས་དགེ་འཕེལ་དུ་ཞལ་བཤུས་བགྱིས་པ་དགེ། །།
བྱང་ཆུབ་སེམས་དཔའི་སྤྱོད་པ་ལ་འཇུག་པའི་ཤེས་རབ་ལེའུའི་མཆན་འགྲེལ་དོན་གསལ་མེ་ལོང་།
༄༅། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་ཤེས་རབ་ལེའུའི་མཆན་འགྲེལ་དོན་གསལ་མེ་ལོང་ཞེས་བྱ་བ་བཞུགས་སོ། །ༀ་སྭསྟི། ཕུལ་བྱུང་མཁྱེན་བརྩེའི་འོད་ཟེར་གྱིས། །བློ་མཆོག་པད་ཚལ་བཞད་མཛད་པ། །འཇམ་མགོན་སྨྲ་བའི་ཉི་མ་ནི། །ཡིད་མཁར་འབྲལ་བ་མེད་པར་མཛོད། །འདིར་རྒྱལ་སྲས་ཞི་བ་ལྷས་མཛད་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་ཤེས་རབ་ཀྱི་ལེའུའི་ཚིག་དོན་རྣམས་གོ་སླ་བར་རྣམ་པར་བཤད་པ་ལ། ལམ་གྱི་གཙོ་བོ་ཤེས་རབ་བསྐྱེད་དགོས་ཚུལ་བསྟན་པ། གོང་དུ་སྨོས་པའི་སེམས་བསྐྱེད་ནས་བསམ་གཏན་གྱི་བར་གྱི་ཐབས་ཀྱི་ཡན་ལག་འདི་དག་ཐམས་ཅད་ནི། ཐུབ་པས་འབྲས་ཡུམ་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་དངོས་རྒྱུ་ཐུན་མིན་ལམ་གྱི་གཙོ་བོ་ཤེས་རབ་བསྐྱེད་པའི་རྒྱུའམ་དེའི་གྲོགས་སམ་འཁོར་གྱི་དོན་ཙམ་དུ་གསུངས་པ་ཡིན་ཏེ། འདིས་སྒྲིབ་གཉིས་སྤོང་ཞིང་མཁྱེན་གཉིས་ཀྱི་ཡེ་ཤེས་མཐར་ཐུག་པར་བྱེད་པ་ཡིན་གྱི། ཕར་ཕྱིན་གཞན་གྱིས་དེ་མི་ནུས་པར་མ་ཟད་ཕར་ཕྱིན་ལྔ་པོ་དེ་དག་ཤེས་རབ་ཀྱིས་བཟུང་ནས་གདོད་ཕར་ཕྱིན་གྱི་མིང་ཐོབ་ཅིང་སངས་རྒྱས་སུ་བགྲོད་པ་ཡིན་ཏེ། ཤེར་ཕྱིན་སྡུད་པ་ལས། དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་རྣམས། །ལམ་ཡང་མི་ཤེས་གྲོང་ཁྱེར་འཇུག་པར་ག་ལ་འགྱུར། །ཤེས་རབ་མེད་ན་མིག་མེད་ཕ་རོལ་ཕྱིན་ལྔ་འདི། །དམིགས་བུ་མེད་པས་བྱང་ཆུབ་རེག་པ་ནུས་མ་ཡིན། །གང་ཚེ་ཤེས་རབ་ཀྱིས་ནི་རབ་ཏུ་ཟིན་གྱུར་པ། །དེ་ཚེ་མིག་རྙེད་གྱུར་ཅིང་འདི་ཡི་མིང་འཐོབ་བོ། །ཞེས་གསུངས། མདོར་ན་ལམ་གྱི་གཙོ་བོ་ཤེས་རབ་ལ་བརྟེན་ནས་སྤངས་རྟོགས་མཐར་ཕྱིན་པར་བྱེད་པ་ལ་དེའི་གྲོགས་སུ་སྦྱིན་སོགས་ཐབས་ཀྱི་རྣམ་པ་འདི་དག་གསུངས་པས་ན་གཙོ་བོ་ཤེས་རབ་ནི་མེད་དུ་མི་རུང་བ་ཡིན་ནོ་ཞེས་དོན་ཆེན་པོར་བསྟན་པ་ཡིན་ནོ། །རྒྱུ་མཚན་དེ་ཡི་ཕྱིར་ན་རང་གཞན་གྱི་འཁོར་བའི་སྡུག་བསྔལ་དག རྩ་བ་ནས་ཞི་བར་འདོད་པས་གནས་ལུགས་ཟབ་མོ་དེ་ཁོ་ན་ཉིད་རྟོགས་པའི་ཤེས་རབ་བསྐྱེད་པར་བྱ་དགོས་ཏེ་འཁོར་བའི་སྡུག་བསྔལ་ཐམས་ཅད་ནི་ཟག་བཅས་ལས་དང་ཉོན་མོངས་པ་ལས་བྱུང་ཞིང་། དེ་དག་ཀྱང་དངོས་པོར་འཛིན་པ་ལས་བྱུང་བས་ན། གནས་ལུགས་རྟོགས་པའི་ཤེས་རབ་ཀྱིས་དེ་སྤངས་པས་སྡུག་བསྔལ་ཐམས་ཅད་ཞི་བར་འགྱུར་བའི་ཕྱིར་རོ། །དགོས་པ་དེ་ལྡན་གྱི་ཤེས་རབ་ཕར་ཕྱིན་ཉིད་བཤད་པ་ལ། ཐོག་མར་གཞི་བདེན་སྟོང་དུ་རྣམ་པར་བཞག་པ་ལས། གཞལ་བྱ་བདེན་པ་གཉིས་ངོས་བཟུང་བ། ཀུན་ཉོན་འཁོར་བ་དང་རྣམ་བྱང་མྱང་འདས་ཀྱིས་བསྡུས་པའི་ཆོས་ཀུན་ལ་ཆོས་ཅན་ཇི་སྙེད་པ་སྣང་ཙམ་ཀུན་རྫོབ་དང་ནི་ཆོས་ཉིད་ཇི་ལྟ་བ་དོན་དམ་པ་སྟེ་གཉིས་སུ་གནས་པས། འདི་གཉིས་ལ་ནི་སྣང་ཚུལ་དང་གནས་ཚུལ་གྱི་དབང་དུ་བྱས་ཏེ་མི་བསླུ་བས་ན་བདེན་པ་ཞེས་རྣམ་པ་གཉིས་སུ་བརྗོོད་དོ། །དེ་ལ་ཀུན་རྫོབ་ནི་སྐྱེ་སོགས་ཀྱི་རང་བཞིན་དུ་མེད་བཞིན་དེར་སྣང་བ་སྒྱུ་མ་དང་རྨི་ལམ་སྐྲ་ཤད་ལྟ་བུའི་སྣང་ཚུལ་འདི་ཡིན་ལ། སྣང་བ་དེའི་རང་བཞིན་བརྟགས་ན་སྐྱེ་སོགས་ཀྱིས་རྣམ་པར་དབེན་པའི་གནས་ཚུལ་སྟོང་པ་ཉིད་ནི་དོན་དམ་པ་ཡིན་པས། འདི་གཉིས་དོན་དམ་པར་ཐ་དད་ན། བདེན་པ་གཉིས་པོ་ཆོས་ཅན་དང་ཆོས་ཉིད་མ་ཡིན་པ་དང་། དོན་དམ་གྱིས་ཀུན་རྫོབ་ཟིལ་གྱིས་མི་ནོན་པ་དང་། ཀུན་རྫོབ་རང་བཞིན་གྱིས་མ་གྲུབ་པ་དེ་དོན་དམ་མ་ཡིན་པ་དང་། ཀུན་བྱང་གཉིས་དུས་ཅིག་ཆར་དུ་དམིགས་པར་ཐལ་བའི་སྐྱོན་བཞི་དང་། ཐ་སྙད་དུའང་གཅིག་ན། ཀུན་རྫོབ་མཐོང་བས་དོན་དམ་མཐོང་བར་འགྱུར་བ་དང་། དོན་དམ་ལྟར་ཀུན་རྫོབ་ཀྱང་དབྱེར་མེད་པར་འགྱུར་བ་དང་། ཀུན་རྫོབ་སྒྲིབ་པའི་དམིགས་རྣམ་ཡིན་པ་ལྟར་དོན་དམ་ཀྱང་དེར་ཐལ་བ་དང་། ཀུན་རྫོབ་ལས་དོན་དམ་གཞན་དུ་བཙལ་བྱ་མ་ཡིན་པ་སྟེ་སྐྱོན་བཞི་ཡོད་པར་དགོངས་འགྲེལ་ལས་གསུངས། དེས་ན། འདུ་བྱེད་ཁམས་དང་དོན་དམ་མཚན་ཉིད་ནི། །གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་རྟོགས་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་སོ། །དོན་དམ་དེ་ལའང་སྐྱེ་སོགས་བཀག་པའི་མེད་དགག་ཙམ་ནི་སྟོང་ཉིད་མཐའ་བྲལ་ལ་འཇུག་པའི་སྒོ་ཙམ་ཡིན་པས་རྣམ་གྲངས་པའམ་མཐུན་པའི་དོན་དམ་ཞེས་བྱ་སྟེ། དེ་ནི་ཐོག་མར་འཇུག་པའི་སྒོ་ཙམ་ལས་གནས་ལུགས་མཐར་ཐུག་གི་དོན་དུ་མི་བཞེད་ལ། གནས་ལུགས་མཐར་ཐུག་པ་ནི། ཀུན་རྫོབ་ཏུ་ཡོད་པ་དང་། དོན་དམ་པར་མེད་པ་ཞེས་གཉིས་སུ་སོ་སོར་ཆད་པ་མེད་དེ། གང་སྣང་བའི་གཟུགས་སོགས་འདི་ཉིད་སྟོང་ཞིང་། གང་སྟོང་བཞིན་པ་དེ་གཟུགས་སོགས་སུ་སྣང་བ་ཡིན་པས། སྣང་སྟོང་ཟུང་དུ་འཇུག་པའི་ཆོས་ཀྱི་དབྱིངས་སྒྲོོ་འདོགས་སོ་གཉིས་དང་བྲལ་བ་རྣམ་གྲངས་མ་ཡིན་པའི་དོན་དམ་ནི་ཤེས་རབ་ཀྱི་ཕ་རོལ་དུ་ཕྱིན་པའམ་ཟུང་འཇུག་དབུ་མ་ཆེན་པོ་ཞེས་བྱ་སྟེ། འདིས་ནི་དོན་དམ་པའི་གནས་ཚུལ་ལ་རྗེས་སུ་སོན་པའི་ལྟ་བ་ཁས་ལེན་ཀུན་བྲལ་དུ་སོང་བའི་གནད་ཀྱིས་ཡོད་མེད་ཀྱི་ཕྱོགས་ཐམས་ཅད་ཐལ་འགྱུར་གྱིས་འཇིལ་བར་མཛད་པ་དེའི་ཕྱིར་ཐལ་འགྱུར་པ་ཞེས་མཚན་དུ་ཆགས་སོ། །རྒྱུ་མཚན་དེའི་ཕྱིར་གནས་ཚུལ་དོན་དམ་པ་ནི་ཡོད་པ་དང་མེད་པ་དང་གཉིས་ཀ་དང་གཉིས་མིན་གྱི་མཐའ་ཀུན་དང་བྲལ་བའི་ཕྱིར་བློ་ཡི་སྤྱོད་ཡུལ་དུ་འདི་ཞེས་གྲུབ་པ་མིན་ཏེ། བློ་དང་སྒྲ་ནི་ཀུན་རྫོབ་ཡིན་གྱི་དོན་དམ་པ་མིན་པར་བརྗོད་དེ། དེ་ཡང་བློས་འདི་དང་འདིའོ་ཞེས་དམིགས་པ་དང་། སྒྲས་འདི་དང་འདིའོ་ཞེས་བརྗོད་པ་སེམས་དང་ངག་གི་སྤྱོད་ཡུལ་དུ་གྱུར་པའི་ཆོས་དེ་ནི་བརྟགས་ན་རྣམ་པར་དབེན་པས་སྒྱུ་མ་བཞིན་དུ་སྟོང་པ་ཡིན་གྱི་དཔྱད་བཟོད་པ་མི་སྲིད་དོ། །དེས་ན་མདོ་ལས། ལྷའི་བུ་གལ་ཏེ་དོན་དམ་པའི་བདེན་པ་ལུས་དང་ངག་དང་ཡིད་ཀྱི་སྤྱོད་ཡུལ་དུ་གྱུར་ན་དེ་དོན་དམ་པའི་གྲངས་སུ་མི་འགྲོ་ཞིང་། ཀུན་རྫོབ་ཀྱི་བདེན་པ་ཉིད་དུ་འགྱུར་རོ། །ལྷའི་བུ་འོན་ཀྱང་དོན་དམ་པའི་བདེན་པ་ནི་ཐ་སྙད་ཐམས་ཅད་ལས་འདས་པ་དང་། ཡང་དག་པར་མ་སྐྱེས་པ་དང་། མ་འགགས་པ་དང་། བརྗོད་པར་བྱ་བ་དང་། རྗོད་པར་བྱེད་པ་དང་། ཤེས་བྱ་དང་། ཤེས་པ་དང་བྲལ་བ་ཡིན་ཏེ། ཇི་སྲིད་དུ་རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལས་འདས་པ་ནི་དོན་དམ་པའི་བདེན་པ་ཡིན་ནོ། །ཞེས་སོགས་རྒྱ་ཆེར་གསུངས་པ་བཞིན་ནོ། །དེ་ལྟ་བུའི་ཡུལ་བདེན་པ་གཉིས་པོ་དེར་རྟོག་པ་པོ་གང་ཟག་གི་རིམ་པ་བསྟན་པ་ནི། བདེན་པ་གཉིས་པོ་དེ་ལ་རྟོགས་པར་བྱེད་པའི་ཕྱོགས་སམ་སྡེར་གྱུར་པའི་འཇིག་རྟེན་རྣམ་པ་གཉིས་སུ་མཐོང་སྟེ། ཞི་ལྷག་གི་ཡོན་ཏན་དང་ལྡན་པ་རྣལ་འབྱོར་འཇིག་རྟེན་པ་དང་མི་ལྡན་པ་འཇིག་རྟེན་ཕལ་པའོ། །དེ་ལ་འཇིག་རྟེན་ཕལ་པ་རྣམས་ནི། ལུས་གཅིག་པུ་དང་སེམས་རྟག་པ་ལ་སོགས་པར་བལྟ་སྟེ། དེ་ལ་ནི་རྣལ་འབྱོར་འཇིག་རྟེན་གྱིས་ལུས་གཅིག་པུ་མ་ཡིན་ཏེ་ཆ་དང་ལྡན་པའི་ཕྱིར་དང་། སེམས་མི་རྟག་སྟེ་གཞན་དུ་འགྱུར་བའི་ཕྱིར། ཞེས་པ་ལ་སོགས་པའི་རིགས་པས་གནོད་ཅིང་། དེར་མ་ཟད་རྣལ་འབྱོར་པ་ལའང་ཕྱི་རོལ་གྱི་དོན་སྨྲ་བ་དང་། སེམས་ཙམ་པ་དང་། དབུ་མ་པ་གསུམ་པོ་ཡང་བློ་ཤེས་བྱའི་གནས་ལུགས་དང་མི་མཐུན་པ་དང་མཐུན་པའི་ཁྱད་པར་གྱིས། གོང་མ་གོང་མ་རྣམས་ཀྱིས་འོག་མ་འོག་མའི་མཐོང་དོན་ལ་གནོད་དེ། འདི་ལྟར་དོན་སྨྲ་བ་བྱེ་མདོ་གཉིས་ཀྱིས་གཟུང་བ་རྡུལ་ཕྲན་ཆ་མེད་དོན་དམ་དུ་འདོད་པ་སོགས་ལ། སེམས་ཙམ་པས་རྡུལ་ཕྲན་བརྟག་འགོག་གི་རིགས་པ་སོགས་ཀྱིས་གནོད་པ་དང་། དེས་གཟུང་འཛིན་གཉིས་མེད་ཀྱི་རྣམ་ཤེས་རང་རིག་རང་གསལ་བདེན་གྲུབ་ཏུ་འདོད་པ་ལ། དབུ་མ་པས་འདིར་བཤད་རང་རིག་འགོག་པ་དང་གཅིག་དུ་བྲལ་སོགས་ཀྱིས་གནོད་པ་བཞིན་ཏེ། གནས་ལུགས་མཐོང་བའི་བློ་ཇེ་བཟང་དུ་གྱུར་པས་ན་གང་ལ་ཚད་མ་དང་ལྡན་པ་དེས་འོག་མ་སུན་འབྱིན་ནུས་ཀྱི་གཞན་དུ་མ་ཡིན་ཏེ། མིག་ནི་རབ་རིབ་ཅན་གྱི་དམིགས་པ་ཡིས། །རབ་རིབ་མེད་ཤེས་ལ་གནོད་མིན་ཇི་ལྟར། །དེ་བཞིན་དྲི་མེད་ཡེ་ཤེས་སྤངས་པའི་བློས། །དྲི་མེད་བློ་ལ་གནོད་པ་ཡོད་མ་ཡིན། །ཞེས་སོ། །གཞན་ཡང་བསམ་གཏན་དང་སྙོམས་འཇུག་ལ་སོགས་པའི་ཡོན་ཏན་གོང་མ་ཐོབ་པས་འོག་མས་མཐོང་དོན་རྣམས་ཟིལ་གྱིས་གནོན་ཞིང་གནོད་པ་ཡིན་ནོ། །དེས་ཇི་ལྟར་རྟོགས་པར་བྱ་བའི་ཚུལ་བཤད་པ། དེ་ཡང་རྣལ་འབྱོར་པས་ཕལ་བའི་བློ་ལ་ཇི་ལྟར་གནོད་ནུས་སྙམ་ན། དངོས་པོ་བདེན་འཛིན་ཅན་ཕལ་པ་དང་། བདེན་མེད་དུ་འཛིན་པ་རྣལ་འབྱོར་པ་དེ་གཉིས་ཀ་ལ་ཡང་ནི་འདོད་པ་མཐུན་པར་སྣང་ཡང་མི་བདེན་པར་འདོད་པའི་སྒྱུ་མ་ལ་སོགས་པའི་དཔེས་དེ་དག་གི་ངོར་སྣང་བ་ཐམས་ཅད་བདེན་མེད་དུ་སྒྲུབ་ནུས་པ་ཡིན་ནོ། །ཡང་དེ་དག་ན་རེ། ཆོས་ཐམས་ཅད་མི་བདེན་པ་སྒྱུ་མ་ལྟ་བུ་ཡིན་ན་ལམ་ལ་སློབ་པས་ཅི་ཞིག་བྱ་སྙམ་ན། དེ་ནི་རྫོགས་པའི་བྱང་ཆུབ་ཀྱི་འབྲས་བུའི་དོན་དུ་དོན་དམ་པར་མེད་ཀྱང་དེ་ལྟར་མ་དཔྱད་པ་ཀུན་རྫོབ་སྣང་ཙམ་པོ་འདིའི་ངོར་རྒྱུ་འབྲས་རྟེན་འབྱུང་གི་སྣང་ཆ་བསླུ་མེད་དུ་ཡོད་པའི་ཕྱིར་ཏེ་ཇི་སྲིད་གཟུང་འཛིན་གྱི་འཇུག་པ་དབྱིངས་སུ་མ་ནུབ་ཀྱི་བར་དེ་སྲིད་དུ་བག་ཆགས་འཁྲུལ་པའི་སྣང་བ་འདི་རྒྱུན་མི་ཆད་པའི་ཕྱིར་ཕན་གནོད་བསླུ་མེད་དུ་ཡོད་པས་འཇུག་ལྡོག་གི་ལག་ལེན་ལ་བརྩོན་པ་ཡིན་གྱི་ལམ་དང་འབྲས་བུའི་ཆོས་ལ་བདེན་པར་ཞེན་པས་ནི་མ་ཡིན་ཏེ་དཔེར་ན་སྒྱུ་མ་མཁན་གྱིས་ལམ་གྱི་འཇིགས་པ་སེལ་བའི་སླད་དུ་སྒྱུ་མའི་དམག་སྤྲུལ་པ་བཞིན་ནོ། །འོ་ན་རྣལ་འབྱོར་པ་དང་འཇིགས་རྟེན་པ་གཉིས་མཐུན་པར་སྣང་བའི་དངོས་པོ་འདི་ལ་ཅིའི་ཕྱིར་རྩོད་སྙམ་ན། འཇིག་རྟེན་པ་ཡིས་གཟུགས་སོགས་དངོས་པོར་མཐོང་ཞིང་། མཐོང་བ་ལྟར་ཡང་དག་པའམ་བདེན་པར་གྲུབ་པ་ཉིད་དུའང་ཡོད་པར་རྟོག་པར་བྱེད་ཀྱི། རྣལ་འབྱོར་པས་མཐོང་བ་ལྟར་སྣང་ཡང་མི་བདེན་པ་སྒྱུ་མ་ལྟ་བུར་རྟོགས་པ་མིན་པས་ན། འདིར་རྣལ་འབྱོར་པ་དང་འཇིག་རྟེན་ཕལ་པ་གཉིས་རྩོད་པར་བྱེད་པ་ཡིན་ནོ། །དེ་ལ་རྩོད་པ་སྤོང་བ་ལ། བརྗོད་བྱ་སྟོང་ཉིད་ལ་རྩོད་པ་སྤོང་བ་ལས། ཐོག་མར་གཞི་སྟོང་ཉིད་ལ་རྩོད་པ་སྤོང་བ། དེ་ལ་འཇིག་རྟེན་ཕལ་པ་རྣམས་ཀྱིས། གཟུགས་སོགས་དབང་པོའི་ཡུལ་དུ་མངོན་སུམ་གྱིས་གྲུབ་ན་ཅིའི་ཕྱིར་མི་བདེན་སྙམ་ན། གཟུགས་སོགས་མངོན་སུམ་དུ་གྱུར་ཏོ་ཞེས་པ་འདི་ཉིད་ཀྱང་ནི། མ་བརྟགས་པར་འཇིག་རྟེན་ན་ཡོངས་སུ་གྲགས་པ་ཙམ་གྱིས་ཡིན་གྱི་རིགས་པའམ་ཚད་མས་བརྟགས་ཤིང་དཔྱད་པའི་ངོར་དེ་ལྟར་གྲུབ་པ་མིན་ཏེ་འཆད་པར་འགྱུར་ལ་དེ་ནི་དཔེར་ན་བུད་མེད་ཀྱི་ལུས་མི་གཙང་བ་དང་མི་རྟག་པ་ལ་སོགས་པ་ཡིན་པ་ལ། འཇིག་རྟེན་གཙང་བ་དང་རྟག་པ་སོགས་སུ་གྲགས་པ་བཞིན་དུ་རྫུན་པ་ཉིད་དོ། །ཡང་དོན་སྨྲ་བ་རྣམས་ཀྱིས་ལུང་གི་དབང་དུ་བྱས་ཏེ། དངོས་པོ་ནི་བདེན་པར་ཡོད་དེ། སངས་རྒྱས་ཀྱིས་ཀྱང་གཞི་ཕུང་ཁམས་སྐྱེ་མཆེད་ཀྱི་ཆོས་རྣམས་ཡོད་པར་གསུངས་ཤིང་། ཕུང་སོགས་ཀྱི་མཚན་ཉིད་ཀྱང་སྐད་ཅིག་མར་གསུངས་པའི་ཕྱིར་སྙམ་ན། དེ་ནི་དགོངས་པ་ཅན་ཏེ་དགོངས་གཞི་སྣང་ཙམ་དུ་ཡོད་པར་དགོངས་ཤིང་། དགོས་པ་ནི་སྟོང་ཉིད་རྟོགས་མི་ནུས་པའི་འཇིག་རྟེན་པ་རྣམས་ལ་དངོས་པོར་ཞེན་པའི་དབང་གིས་ཐོག་མ་ནས་ཡང་དག་པའི་དོན་བསྟན་ན་སྐྲག་པར་འགྱུར་བས་དེ་དག་རིམ་གྱིས་གཞུག་པའི་དོན་དུ་ནི། མགོན་པོ་རྫོགས་པའི་སངས་རྒྱས་ཀྱིས་དངོས་པོ་རྣམས་ཡོད་པར་བསྟན་པ་ཡིན་གྱི་དངོས་ལ་གནོད་བྱེད་ནི་དེ་ཁོ་ན་ཉིད་དམ་ཡང་དག་པའི་དོན་དུ། ཕུང་སོགས་དེ་དག་སྐད་ཅིག་མ་ཉིད་ཙམ་དུའང་གྲུབ་པ་མིན་ཏེ། གཅིག་དང་དུ་མ་གང་དུའང་མ་གྲུབ་ཅིང་སྐྱེ་འགག་མེད་པ་དེ་ལ་སྐད་ཅིག་ཏུ་གྲུབ་པ་ག་ལ་ཡོད་དེ་མེད་དོ། །ཡང་དེ་དག་ན་རེ། སྐད་ཅིག་མ་དེ་དོན་དམ་མིན་ན། འཇིག་རྟེན་ཕལ་པ་ལ་ཚུལ་དེ་ལྟར་མི་སྣང་བའི་ཕྱིར་དང་། ལུང་ལས་ཀྱང་སྐད་ཅིག་མར་མཐོང་བས་དངོས་པོའི་གནས་ཚུལ་གྱི་བདེན་པ་མཐོང་བར་གསུངས་པའི་ཕྱིར་ཀུན་རྫོབ་ཏུ་ཡང་རྣམ་པར་བཞག་པ་འགལ་བས་བདེན་པ་གཉིས་སུ་མ་འདུས་པར་འགྱུར་རོ་ཞེ་ན། དེ་ནི་འཇིག་རྟེན་པ་རྣམས་འདྲ་བ་གཞན་འབྱུང་གི་འཁྲུལ་རྒྱུས་བསླད་པས་སྐད་ཅིག་མར་མ་ཤེས་ཀྱང་ཐ་སྙད་ཀྱི་གནས་ཚུལ་སེམས་པའི་རྣལ་འབྱོར་པ་རྣམས་ཀྱིས་དེ་ལྟར་མཐོང་བ་དེ་མཐོང་བ་ཡང་དག་ཡིན་པའི་ཕྱིར་ཀུན་རྫོབ་སྣང་ཚུལ་གྱི་དབང་དུ་བྱས་པ་ཡིན་པས་བདེན་གཉིས་གང་དུའང་མ་འདུས་པའི་ཉེས་པ་མེད་དེ། འཇིག་རྟེན་ཕལ་པའི་བློ་རྟག་འཛིན་ཅན་ལ་ལྟོས་ན་སྐད་ཅིག་མར་མཐོང་བ་དེ་ཐ་སྙད་ཀྱི་གནས་ཚུལ་ལམ་དེ་ཁོ་ན་ཉིད་མཐོང་བ་ཡིན་པའི་ཕྱིར་རོ། །གལ་ཏེ་དེ་ལས་གཞན་དུ་འཇིག་རྟེན་ལ་ལྟོས་ནས་དེ་ཉིད་མཐོང་མ་མཐོང་གི་ཁྱད་པར་མེད་ན་མི་སྡུག་པ་གོམས་པའི་དབང་གིས་བུད་མེད་ཀྱི་ལུས་མི་གཙང་བར། ངེས་པར་རྟོགས་ཟིན་པའི་རྣལ་འབྱོར་པ་ལ་འཇིག་རྟེན་ཕལ་གྱིས་གཙང་བར་བཟུང་བ་འདིས་གནོད་པར་འགྱུར་རིགས་ནའང་དེ་ལྟར་མི་སྲིད་པའི་ཕྱིར་རོ། །ཡང་རིགས་པའི་དབང་དུ་བྱས་ཏེ་དེ་དག་ན་རེ། ཆོས་ཐམས་ཅད་བདེན་པ་མེད་ན་སངས་རྒྱས་ཀྱང་བརྫུན་པ་སྒྱུ་མ་ལྟ་བུར་འགྱུར་བས། དེ་མཆོད་པས་བསོད་ནམས་ཇི་ལྟར་འབྱུང་ཞེ་ན། ལན་དུ་སྒྱུ་མ་དང་འདྲ་བའི་རྒྱལ་བ་མཆོད་པ་སོགས་ལས་བསོད་ནམས་སྒྱུ་མ་ལྟ་བུར་འབྱུང་བ་ནི། དཔེ་ཇི་ལྟར་ན་ཁྱོད་སངས་རྒྱས་དངོས་པོར་ཡོད་པ་ལ་བརྟེན་ནས་བསོད་ནམས་དངོས་ཡོད་གཅིག་ཐོབ་པར་འདོད་པ་ཇི་ལྟ་བ་བཞིན་ཡིན་ཏེ། བསོད་ནམས་དང་སངས་རྒྱས་དངོས་པོར་གྲུབ་མ་གྲུབ་ཙམ་གྱི་ཁྱད་པར་ལས་བསོད་ནམས་འབྱུང་མི་འབྱུང་ལ་ཁྱད་པར་ཡོད་པ་མིན་ནོ། །ཡང་དེ་དག་ན་རེ། གལ་ཏེ་སེམས་ཅན་རྣམས་ཀྱང་སྒྱུ་མ་དང་འདྲ་ན། སྒྱུ་མའི་རྟ་གླང་འགགས་པ་སླར་མི་སྐྱེ་བ་བཞིན་དུ་མི་ལ་སོགས་པ་འདིར་ཤི་ནས་སྲིད་པ་གཞན་དུ་ཇི་ལྟར་དུ་སྐྱེ་བ་འཐད་ཞེ་ན། ལན་དུ། དུས་ཇི་སྲིད་རང་རང་སྣང་བའི་རྒྱུ་དང་རྐྱེན་རྣམས་ཚོགས་པར་གྱུར་པ། དེ་སྲིད་དུ་ནི་སེམས་ཅན་དུ་མ་ཟད་སྒྱུ་མའང་མི་ལྡོག་ཅིང་འབྱུང་བར་འགྱུར་ན། ལས་ཉོན་སོགས་སྐྱེ་བའི་རྒྱུ་ཚོགས་ལྡོག་པ་དེ་སྲིད་དུ་སེམས་ཅན་ཅི་སྟེ་མི་སྐྱེ། དེས་ན་སྐྱེ་བ་རྐྱེན་ཚོགས་མ་ཚོགས་ཀྱིས་ཡིན་གྱིས་བདེན་རྫུན་གྱིས་མིན་ནོ། །ཡང་དེ་དག་གིས། དེ་ལྟ་ནའང་སེམས་ཅན་འཁོར་བ་ཐོག་ཐ་མེད་པས་ཡུན་རིང་ལ། སྒྱུ་མ་དེ་འདྲ་གཅིག་ཀྱང་མ་མཐོང་བས་དེ་གཉིས་མི་མཚུངས་སྙམ་ན། འདི་གཉིས་རྒྱུན་རིང་ཐུང་སོགས་ཀྱིས་འདྲ་བར་བཞག་པ་མིན་ཏེ། སྣང་ཡང་བདེན་པས་སྟོང་པའི་སྒོ་ནས་ཏེ། དེའི་ཕྱིར་རྒྱུན་རིང་བ་ཙམ་གྱིས་ཇི་ལྟར་ན། སེམས་ཅན་བདེན་པར་ཡོད་པ་ཡིན་ཏེ་རྒྱུན་རིང་ཡང་རྒྱུའི་ཚོགས་པ་མ་ལོག་པས་ཡིན་གྱི་སྔ་ཕྱིའི་སྲིད་པ་སོ་སོ་གཞན་དང་གཞན་འབྱུང་བ་དག་ལ་རང་བཞིན་མ་གྲུབ་པར་ཁྱད་མེད་དེ་སྒྱུ་མའི་རྟ་གླང་སོགས་སྣང་བ་ལ་ཡུན་རིང་ཐུང་བཞིན་ནོ། །ཡང་དེ་དག སེམས་ཅན་རྣམས་སྒྱུ་མ་དང་འདྲ་ན་དེ་ལ་སྲོག་བཅད་པ་དང་ཟས་སྦྱིན་པ་སོགས་ཀྱིས་ཕན་གནོད་དུ་མི་འགྱུར་བས་གཞི་དེ་ལས་དགེ་སྡིག་འབྱུང་བ་མི་འཐད་སྙམ་ན། སྒྱུ་མའི་སྐྱེས་བུ་བསད་པ་དང་ཟས་སྦྱིན་པར་སྣང་བ་སོགས་ལ་ནི། དེ་ལ་ཕན་གནོད་ཀྱི་རྟེན་དུ་གྱུར་པའི་སེམས་མེད་པའི་ཕྱིར་ན་རང་གི་ངན་སེམས་ཀྱིས་སྦྱོར་བའི་ཉེས་པ་ཙམ་ལས་སྲོག་བཅད་དངོས་གཞིའི་སྡིག་པ་སོགས་འབྱུང་བ་མེད་དེ། ཁྱེད་ཅག་དངོས་སྨྲ་བ་དག་མི་བསད་པ་དང་ཐོ་ཡོར་བཤིག་པ་གཉིས་ལ་སྡིག་པ་ཡོད་མེད་སེམས་ཡོད་མེད་ཀྱི་དབང་གིས་བཞག་པ་བཞིན་ནོ། །དེས་ན་གང་སྒྱུ་མའི་སེམས་དང་ལྡན་པ་སེམས་ཅན་ལ་ནི། གཞི་དེ་ལས་བསོད་ནམས་དང་ནི་སྡིག་པ་གཉིས་ཀ་འབྱུང་བ་ཡིན་ནོ། །འོ་ན་སེམས་ཡོད་མེད་ཀྱི་ཁྱད་པར་ཡོད་བཞིན་དེ་གཉིས་ཇི་ལྟར་མཚུངས་སྙམ་ན། སྒྱུ་མའི་སྔགས་དང་རྫས་ལ་སོགས་པ་རྣམས་ལ་སེམས་བསྐྱེད་པའི་ནུས་པ་མེད་པའི་ཕྱིར། སྒྱུ་མའི་སྐྱེས་བུ་སོགས་ལ་སེམས་ནི་འབྱུང་བ་མེད་མོད་གང་སེམས་ཅན་གྱི་རྒྱུ་ལ་ཡོད་པས་དེ་ལ་སེམས་བྱུང་ཡང་སེམས་དེ་ཉིད་སྒྱུ་མ་ལྟ་བུ་ཡིན་པས་དེས་དེ་བདེན་པར་ག་ལ་འགྱུར། རྫུན་ཡང་འབྲས་བུ་མི་འདྲ་བ་ནི་རྒྱུ་ཐ་དད་པ་ལ་ལྟོས་པ་སྟེ། འདི་ལྟར་སྣ་ཚོགས་ཤིང་མི་འདྲ་བའི་རྐྱེན་སོ་སོ་ལས་བྱུང་བ་ཡི། སྒྱུ་མ་དེ་ཡང་ཚུལ་གཅིག་མིན་པར་སྣ་ཚོགས་སུ་སྣང་ཞིང་མི་འདྲ་བ་ཉིད་འབྱུང་གི རྐྱེན་གཅིག་གིས་ནི་འབྲས་བུ་ཡིན་ནོ་ཅོག་ཀུན་བསྐྱེད་ནུས་པ་ནི་ཡུལ་དུས་གང་ན་ཡང་ནི་ཡོད་པ་མ་ཡིན་ནོ། །དེས་ན་སེམས་ཅན་གྱི་ལུས་སེམས་གཉིས་ཆར་རྒྱུ་རྐྱེན་ཚོགས་པས་སྤྲུལ་ཞིང་རང་གི་ངོ་བོས་གྲུབ་པ་མེད་པས་སྒྱུ་མ་དང་ཁྱད་ཅི་ཞིག་ཡོད་དེ་སྒྱུ་མའི་རྟ་དང་བ་ལང་ལ་རྭ་ཡོད་མེད་ཀྱི་ཁྱད་པར་སྣང་ཡང་དེས་བདེན་རྫུན་དུ་འཇོག་མི་ནུས་པ་བཞིན་ནོ། །ཡང་མྱང་འདས་དངོས་པོར་འཛིན་པ་རྣམས་ན་རེ། གལ་ཏེ་འཁོར་བའི་ཆོས་ཐམས་ཅད་དོན་དམ་པར་གཟོད་མ་ནས་ཞི་བ་རང་བཞིན་གྱིས་མྱ་ངན་ལས་འདས་པ་ཡིན་ལ། སྐྱེ་སོགས་ཀྱི་མཚན་ཉིད་ཅན། འཁོར་བ་ནི་ཀུན་རྫོབ་ཡིན་པར་ཁྱེད་ངོ་བོ་ཉིད་མེད་པར་སྨྲ་བ་རྣམས་འདོད་པ་དེ་ལྟ་ན། འཁོར་བ་ཟད་ནས་མྱང་འདས་ཐོབ་པ་མིན་པར་འཁོར་བ་ཉིད་མྱང་འདས་ཡིན་པའི་ཕྱིར་དེ་གཉིས་གཞི་མཐུན་ཡོད་པར་འགྱུར་བས་སངས་རྒྱས་ཐོབ་ནས་ཀྱང་ནི་སླར་འཁོར་བར་འགྱུར་བས། བྱང་ཆུབ་ཐོབ་པའི་ཆེད་དུ་ཕྱིན་དྲུག་གི་སྤྱོད་པས་ཅི་ཞིག་བྱ་སྟེ་དོན་མེད་པའི་ངལ་བར་འགྱུར་རོ། །ཞེ་ན། ལན་དུ། རང་བཞིན་རྣམ་དག་དང་གློ་བུར་བྲལ་དག་གི་མྱང་འདས་གཉིས་ལ་ཁྱད་ཡོད་པའི་ཕྱིར་སྐྱོན་དེ་མི་འཇུག་སྟེ། འདི་ལྟར་འབྲས་བུ་སོ་སོར་སྣང་བའི་རྒྱུ་རྐྱེན་རྣམས་ཀྱི་རྒྱུན་ནི་མ་ཆད་ན། འཁོར་བར་མ་ཟད་སྒྱུ་མའང་ལྡོག་པར་མི་འགྱུར་མོད་ཀྱི། ལས་དངཉོན་མོངས་སོགས་ཀྱི་རྐྱེན་རྣམས་གཉེན་པོས་བཅོམ་སྟེ་རྒྱུན་ནི་ཡོངས་སུ་ཆད་པ་ན། འཁོར་བའི་རྒྱུ་མེད་པའི་ཕྱིར་དོན་དམ་པར་ལྟ་ཅི་ཀུན་རྫོབ་ཙམ་དུ་ཡང་མི་འབྱུང་ངོ་། །སངས་རྒྱས་འཇིག་རྟེན་དུ་བལྟམས་པ་སོགས་ནི་འཁོར་བས་བསྡུས་པ་མ་ཡིན་ཏེ། སྨོན་ལམ་དང་ཏིང་ངེ་འཛིན་སོགས་ལྷན་ཅིག་བྱེད་རྐྱེན་དུ་གྱུར་པའི་ཡེ་ཤེས་རྣམ་པ་ཐམས་ཅད་པའི་སྟོབས་ལས་མིག་འཕྲུལ་ལྟ་བུའི་མཛད་པ་སྟོན་ཀྱང་ཆོས་ཀྱི་དབྱིངས་ལས་གཡོ་བ་མི་སྲིད་དོ། །ཡང་སེམས་ཙམ་པ་ལས། རྣམ་བདེན་དུ་སྨྲ་བ་རྣམས་ཀྱིས་འདི་ལྟར་ཕྱི་ནང་གི་དངོས་པོར་སྣང་བ་འདི་དག་ནི་སྐྲ་ཤད་ཀྱི་སྣང་བ་བཞིན་དུ་ཕྱི་དོན་དུ་བདེན་པར་མེད་ཀྱང་། ནང་གི་བག་ཆགས་ཀྱི་ཁྱད་པར་ལས་གནས་དོན་ལུས་ཀྱི་སྣང་བ་སྣ་ཚོགས་པར་སྨིན་པ་ཞིག་སྟེ་དེའི་ཕྱིར་ཕྱི་རོལ་གྱི་དོན་ནི་མེད་ཀྱང་སེམས་ནི་ཡོད་དེ། རྨི་ལམ་ན་སྔོ་སོགས་ཀྱི་ཉམས་མྱོང་འཛིན་པར་གྲུབ་པས་སོ་སྙམ་དུ་བསམས་ནས་རྒོལ་བ། ཁྱོད་དབུ་མ་པ་ལྟར། གང་གི་ཚེ་འཁྲུལ་ཡུལ་ཕྱི་དོན་མེད་པར་མ་ཟད་ནང་འཁྲུལ་པའི་བློའམ་ཤེས་པའང་ཡོད་པ་མིན་ན། ཡུལ་སྣང་བ་སྒྱུ་མ་ལྟ་བུ་དེ་གང་གིས་དམིགས་པར་འགྱུར་ཏེ། ཡུལ་ཅན་ནམ་དམིགས་བྱེད་མེད་པས་སོ་ཞེ་ན། ལན་དུ་མགོ་བསྒྲེ་བ། གང་ཚེ་སེམས་ཙམ་པ་ཁྱོད་ལའང་གཟུང་ཆ་སྒྱུ་མ་ལྟ་བུ་དེ་ཉིད་ཕྱི་དོན་དུ་གྲུབ་པ་མེད་ན་བློ་ཡོད་དུ་ཆུག་ཀྱང་དེ་ཚེ་ཡུལ་ལམ་གཟུང་ཆ་ཅི་ཞིག་དམིགས་ཏེ་དམིགས་བྱ་མེད་པས་དེ་གཉིས་མཚུངས་སོ། །ཡང་དེ་དག་ན་རེ། གལ་ཏེ་བདག་ཅག་གི་ལུགས་ལ་ཡུལ་གཏན་མེད་མིན་ཏེ། རྨི་ལམ་གྱི་རྟ་གླང་བཞིན་དུ་ཡུལ་དོན་གྱི་གོ་ས་དེ་ཉིད་དུ་བེམ་པོ་ལས་གཞན་དུ་གྱུར་པའི་དམིགས་བྱ་ཞིག་ཡོད་དེ། གང་ཞེ་ན་གཟུང་བའི་རྣམ་པ་དེ་ནི་སེམས་ཉིད་ཡིན་ནོ་ཞེ་ན། གང་ཚེ་སེམས་དེ་ཉིད་དམིགས་བྱ་སྒྱུ་མ་ལྟ་བུའི་དོན་ཡིན་ན། དེ་ཚེ་ཡུལ་གང་ཞིག་ཡུལ་ཅན་གང་གིས་མཐོང་སྟེ་དེ་གཉིས་གཅིག་ཡིན་པས་མཐོང་མི་ཤེས་སོ། །ཇི་ལྟར་མི་མཐོང་སྙམ་ན་འཇིག་རྟེན་གྱི་ནི་མགོན་པོ་སངས་རྒྱས་ཀྱིས་ཀྱང་། སེམས་ཀྱིས་སེམས་མི་མཐོང་ཞེས་ལང་ཀར་གཤེགས་ལས་གསུངས་ཏེ། ཇི་ལྟར་རལ་གྲི་རང་སོ་དང་། །ཇི་ལྟར་སོར་མོ་རང་རྩེ་ལ། །མི་གཅོད་རེག་པར་མི་འགྱུར་བར། །དེ་བཞིན་སེམས་ཀྱིས་སེམས་མི་མཐོང་། །ཞེས་སོ། །དེ་ཡང་ཇི་ལྟར་ན་རལ་གྲིའི་སོ་ནི་གཅིག་པོ་དེས་སོ་རང་ལ་རང་གིས་ཇི་ལྟར་མི་གཅོད་པ་དང་སོར་མོའི་རྩེ་མོས་རང་ལ་རང་མི་རེག་པ་དེ་བཞིན་དུ་ཡིད་ཀྱང་རང་གིས་རང་མཐོང་བར་མི་ནུས་ཏེ། གང་སེམས་བདེན་པར་གྲུབ་ཕན་ཆོད་བདེན་གྲུབ་ཀྱི་སེམས་ཆ་མེད་གཅིག་ལ་བལྟ་བྱ་ལྟ་བྱེད་ཀྱི་ཆ་གཉིས་སུ་གྲུབ་པ་ཉམས་པས་དོན་དམ་པར་ཤེས་པས་རང་རིག་པ་ཞེས་པའང་བཏགས་པ་ཙམ་སྟེ་ཡང་དག་པར་མིན་ནོ། །ཁོ་ན་རེ་ཇི་ལྟར་བུམ་སོགས་གཞན་གསལ་བར་བྱེད་པའི་མར་མེས་མར་མེ་རང་གི་རང་གི་དངོས་པོ་ཡང་གཞན་ལ་ལྟོས་པ་མེད་པར་ཡང་དག་པར་གསལ་བར་བྱེད་པ་དེ་བཞིན་དུ་ཤེས་པ་རང་གིས་རང་རིག་པ་ཡིན་ནོ་ཞེ་ན། ལན་དུ། མར་མེ་རང་གིས་རང་གསལ་བར་བྱ་དགོས་པ་མིན་ཏེ། རྒྱུ་མཚན་གང་གི་ཕྱིར་ན་མར་མེ་རང་སྐྱེས་ཙམ་ཉིད་ནས་མུན་གྱིས་བསྒྲིབས་ཏེ་མི་གསལ་པ་མེད་པའི་ཕྱིར་རོ། །གཞན་ཡང་མར་མེས་རང་གིས་རང་ལ་བྱ་བ་འཇུག་ན་མུན་པས་ཀྱང་རང་གིས་རང་བསྒྲིབས་ཏེ་བུམ་སོགས་གཞན་སྣང་བར་ཐལ་ལོ། །ཡང་ཁོ་ན་རེ། ཤེལ་དཀར་པོ་སྔོན་པོར་འགྱུར་བ་བཞིན་འོག་གཞིའི་རས་སོགས་སྔོན་པོ་གཞན་ལ་ལྟོས་དགོས་པ་དང་། བཻཌཱུཪྱ་ལྟ་བུ་རང་བཞིན་གྱིས་སྔོ་བ་ཉིད་ལ་ནི་རྐྱེན་གཞན་ལ་ལྟོས་པ་ཡོད་པ་མ་ཡིན་པ་སྟེ་གཉིས་ཡོད་པ། དཔེ་དེ་བཞིན་དུ་གཟུགས་དང་མིག་ཤེས་ལྟ་བུ་འགའ་ཞིག་གསལ་བྱ་གསལ་བྱེད་གཞན་ལ་ནི། ཕན་ཚུན་ལྟོས་དགོས་པ་དང་གསལ་བྱ་གསལ་བྱེད་ཕན་ཚུལ་ཐ་དད་དུ་ལྟོས་པ་མེད་པ་ངོ་བོ་ཉིད་ཀྱིས་གསལ་བ་རང་རིག་པ་ཡང་མཐོང་ངོ་ཞེ་ན། ལན་དུ། དཔེ་མ་གྲུབ་སྟེ། བཻཌཱུཪྱ་དེ་སྔར་རང་བསྐྱེད་བྱེད་ཀྱི་རྒྱུ་ལས་སྔོ་བ་ཉིད་དུ་གྲུབ་པ་མིན་པ་ལ་སྔོན་པོར་སྣང་བ་དེ། ཕྱིས་རྒྱུ་རྐྱེན་གཞན་ལ་ལྟོས་པ་མེད་པར་བདག་གིས་བདག་ཉིད་སྔོན་པོར་བྱས་པ་ནི་མེད་དོ། །དོན་ཡང་མ་གྲུབ་སྟེ། ཐ་སྙད་དུ་མར་མེ་ནི་རང་གིས་རང་གསལ་བར་བྱེད་དོ་ཞེས། མར་མེ་ལས་གཞན་དོན་རིག་གི་ཤེས་པས་ཤེས་ཏེ་བརྗོད་པར་བྱེད་ན། དོན་དམ་པར་བློ་ནི་རང་ལ་རང་གསལ་བ་ཉིད་ཡིན་ནོ་ཞེས། ཤེས་པ་གང་གིས་ཤེས་ནས་དེ་སྐད་དུ་བརྗོད་པར་བྱེད་དེ། ཤེས་མཁན་དེ་ཤེས་པ་རང་ཡིན་ན་སྐབས་ཀྱི་དཔྱད་བྱ་ཡིན་པས་མ་གྲུབ་ལ། གཞན་ཡིན་ན་ཐུག་མེད་དུ་འགྱུར་ཞིང་སྔ་ཕྱི་དུས་གསུམ་དུ་དཔྱད་ན་ཤེས་པར་ཡང་མི་སྲིད་དོ། །དེས་ན་གང་ཚེ་ཁྱད་གཞི་གཞན་དབང་གི་རྣམ་ཤེས་དེ་ནི་རང་ངམ་གཞན་པ་འགས་ཀྱང་མཐོང་བ་མིན་ན། དེའི་ཁྱད་པར་གྱི་ཆོས་གསལ་བའམ་ནི་མི་གསལ་བ་ཞེས་དཔྱོད་པ་དོན་མེད་དེ། དཔེར་ན་མོ་གཤམ་གྱི་བུ་མོའི་ལུས་ཀྱི་འགྱིང་བག་ནི་འདི་འདྲའོ་ཞེས་བརྗོད་པ་བཞིན་དུ། བློ་ནི་གསལ་བའོ་ཞེས་པ་དེ་ནི་བརྗོད་ཀྱང་དོན་མེད་དེ་སྒྲུབ་བྱེད་དང་བྲལ་བ་ཉིད་དོ། །ཡང་དེ་དག་གིས་མངོན་སུམ་གྱིས་སྒྲུབ་མ་ནུས་པར་རྗེས་དཔག་གིས་སྒྲུབ་པར་འདོད་ནས། གལ་ཏེ་ཤེས་པ་རང་གིས་རང་མྱོང་བའམ་རང་རིག་པ་དེ་ཡོད་པ་མིན་ན། སྔར་ཡུལ་སྔོ་སོགས་ཉམས་སུ་མྱོང་བ་དྲན་པ་བཞིན་དུ་ཡུལ་ཅན་སྔོ་འཛིན་གྱི་རྣམ་ཤེས་འདི་ཕྱིས་དྲན་པར་ཇི་ལྟར་འགྱུར་ཏེ་རྒྱུ་མེད་པའི་འབྲས་བུར་འགྱུར་བའི་ཕྱིར་དེས་ན་དྲན་པའི་རྟགས་ཀྱིས་རང་རིག་འགྲུབ་བོ་ཞེ་ན། ལན་དུ། དེ་མ་ངེས་ཏེ། ཤེས་པ་རང་མ་མྱོང་ཡང་གཞན་གཟུགས་སོགས་མྱོང་བ་དེ་དང་ཡུལ་ཡུལ་ཅན་གྱི་འབྲེལ་བ་ལས། ད་ལྟ་ཡུལ་ཅན་གྱི་རྣམ་ཤེས་དེ་ཡང་དྲན་པར་འགྱུར་ཏེ། དཔེར་ན་དགུན་གྱི་དུས་སུ་བྱི་བ་དུག་ཅན་གྱིས་རྨུགས་པ་ན་རྨུགས་པ་ཙམ་མྱོང་གི་བྱི་བའི་དུག་བགོས་པ་མ་མྱོང་ཡང་སླར་དཔྱིད་ཀྱི་འབྲུག་སྒྲའི་རྐྱེན་དང་འཕྲད་པ་ལས་ནད་མྱོང་བ་ན་དེ་ལས་དཔགས་ནས་གདོད་སྔར་རྨ་དང་མཉམ་དུ་དུག་ཞུགས་སོ་སྙམ་པའི་ཤེས་པ་སྐྱེ་བ་བཞིན་ནོ། །ཡང་དེ་དག་ན་རེ། ཏིང་ངེ་འཛིན་ལ་སོགས་པའི་རྐྱེན་གཞན་དག་དང་ལྡན་པ་ནི། རིང་བ་གཞན་གྱི་ཤེས་པའང་མཐོང་བའི་ཕྱིར་ཉེ་བ་རང་གི་ཤེས་པ་རང་ཉིད་རང་ལ་གསལ་བར་རིགས་སོ་ཞེ་ན། ལན་དུ། མ་ངེས་ཏེ། དཔེར་ན་རིགས་སྔགས་གྲུབ་པའི་མིག་སྨན་མིག་ལ་བསྐུས་པའི་སྦྱོར་བ་ལས། རིང་བ་ས་འོག་གི་བུམ་པ་སོགས་མཐོང་ཡང་ཤིན་ཏུ་ཉེ་བ་མིག་སྨན་དེ་ཉིད་མཐོང་བར་འགྱུར་བ་མིན་པ་བཞིན་ནོ། །ཡང་ན་བུམ་པ་དང་མིག་སྨན་ངོ་བོ་གཅིག་ཏུ་འགྱུར་བ་མིན་པས་ན་རྐྱེན་གཞན་ལྡན་པ་གཞན་མཐོང་གི་དཔེར་སོང་བས་རང་མཐོང་གི་དཔེར་མི་རུང་བར་མ་ཟད་གནོད་དོ་ཞེས་འཆད་པ་དག་ཀྱང་སྣང་ངོ་། །ཡང་དེ་དག་གིས། རང་རིག་མེད་ན་གཞན་རིག་ཀྱང་མེད་པས་མཐོང་ཐོས་ལ་སོགས་པའི་ཐ་སྙད་ཐམས་ཅད་རྒྱུན་ཆད་པར་ཐལ་ལོ་ཞེ་ན། ལན་དུ། ཇི་ལྟར་མངོན་སུམ་གྱིས་མཐོང་བ་དང་ལུང་ལས་ཐོས་པ་དང་རྗེས་སུ་དཔག་སྟེ་ཤེས་པ་དག་{དང}། མ་བརྟགས་པར་སྣང་ཙམ་པོ་འདིར་ནི་དགག་པར་བྱ་བ་མིན་ཏེ། དེ་དག་དགག་པར་མི་ནུས་ཤིང་དགག་ཀྱང་མི་དགོས་པའི་ཕྱིར་རོ། །འོ་ན་ཅི་འགོག་ཞེ་ན། འདིར་ནི་འཁོར་བའི་སྡུག་བསྔལ་ཐམས་ཅད་ཀྱི་རྒྱུར་གྱུར་པ། དངོས་པོ་ཀུན་ལ་བདེན་པར་འཛིན་ཅིང་ཞེན་པའི་རྟོག་པ་དེ་ཉིད་བཟློག་པར་བྱ་བ་ཡིན་ནོ། །མདོར་ན་རྣམ་བཤད་དུ། དོན་དམ་པར་མེད་ཀྱང་རང་རིག་པ་ཀུན་རྫོབ་ཏུ་ཡོད་པའི་དབང་གིས་དྲན་པའི་ཤེས་པ་སྐྱེ་བའི་ཕྱིར། ཞེས་གསུངས་པ་བཞིན་རང་རིག་འགོག་པ་ནི་དོན་དམ་པར་འགོག་པ་ཡིན་གྱི་བེམ་པོ་ལས་ལོག་ཙམ་ལ་ཐ་སྙད་དུ་རང་རིག་པར་འདོགས་པའི་ཚུལ་དེ་འགོག་པ་མ་ཡིན་ཏེ། དེ་བཀག་ན་རང་བློར་རང་ལ་ལྐོག་གྱུར་དུ་ཁས་ལེན་དགོས་པས་རང་གཞན་གྱི་བློ་ཤེས་པས་གཅོད་ཚུལ་ལ་ཁྱད་མེད་དུ་ཐལ་བ་དང་། རང་རྒྱུད་ལ་བློ་ཡོད་པའི་སྒྲུབ་བྱེད་མི་རིགས་པ་དང་། མཐར་དོན་རིག་གི་ཐ་སྙད་ཀྱང་རྒྱུན་ཆད་པར་འགྱུར་བ་སོགས་ཀྱི་གནོད་པ་མང་ངོ་། །དེས་ན་ཀུན་གཞི་སོགས་ཀྱང་དེ་དང་འདྲ་བས་ཚུལ་འདི་ཤན་ཕྱེད་པ་གལ་ཆེའོ། །ཡང་རྣམ་རྫུན་པ་རྣམས་ཀྱིས། སེམས་ལས་གཟུང་ཆ་ཡུལ་སྒྱུ་མ་ལྟ་བུ་འདི་གཞན་ཐ་དད་དུ་ཕྱི་དོན་གྱི་ངོ་བོར་གྲུབ་པ་མིན་ཞིང་། སེམས་ལས་གཞན་མིན་པར་ཏེ་དེ་གཉིས་གཅིག་པར་ཡང་མི་རྟག་{བརྟག}སྟེ་མཁའ་ལ་སྐྲ་ཤད་ཀྱི་སྣང་བ་ལྟར་གཞི་མེད་ཀྱི་སྣང་བ་ཙམ་དུ་འདོད་དེ་སེམས་ནི་རྣམ་པ་ཐམས་ཅད་དང་བྲལ་བའི་ཤེལ་སྒོང་དག་པ་བཞིན་དུ་གནས་སོ་ཞེ་ན། དེ་དགག་པ། ཁྱོད་སེམས་དངོས་པོར་འདོད་ན་ནི་ཇི་ལྟར་རྣམ་པ་དེ་གཞན་མིན་ཏེ། རྣམ་པ་དངོས་མེད་དུ་འདོད་པའི་ཕྱིར། དེ་གཉིས་གཞི་མཐུན་མི་སྲིད་དོ། །གནོད་པ་དེར་དོགས་ནས། སེམས་ལས་གཞན་མིན་ནོ་ཞེ་ན་སེམས་ཀྱང་དངོས་པོར་མེད་པར་ཐལ་ཏེ་རྣམ་པ་དངོས་མེད་དང་གཅིག་ཡིན་པའི་ཕྱིར་རོ། །ཡང་དེ་དག་སེམས་དངོས་པོར་མེད་ན་ལྟ་བྱེད་དུ་མི་རུང་སྙམ་ན། ཇི་ལྟར་ཁྱེད་ཅག་གིས་སྒྱུ་མ་ལྟ་བུའི་ཕྱི་དོན་བདེན་པ་མིན་ཡང་། བལྟ་བྱ་ཡིན་པར་འདོད་པ་དེ་བཞིན་དུ་ལྟ་བྱེད་ཀྱི་ཡིད་ཀྱང་སྒྱུ་མ་ལྟ་བུར་འཐད་དོ། །གོང་དུ་དགག་པ་དང་འདིར་སྒྲུབ་པའི་ཚུལ་གྱིས་སོ། །ཡང་དེ་དག་ན་རེ། གལ་ཏེ་གཉིས་སྣང་འཁོར་བ་ནི་འཁྲུལ་གཞི་གཉིས་མེད་ཀྱི་ཤེས་པ་སེམས་དངོས་པོར་གྲུབ་པའི་རྟེན་ཅན་ཡིན་གྱི། དེ་ནི་རྟེན་སེམས་དངོས་པོ་ཡོད་པ་ལས་གཞན་དུ་གྱུར་ན་ནམ་མཁའ་དང་འདྲ་བར་ཅི་ཡང་མེད་པར་འགྱུར་ཏེ་གཟུང་འཛིན་གྱི་དངོས་པོར་སྣང་བ་གང་ཡང་འབྱུང་མི་རིགས་ཏེ་རྟེན་གཞི་མེད་པས་འཇིམ་པ་མེད་པའི་བུམ་པ་བཞིན་ནོ་ཞེ་ན། དེ་དགག་པ། དེ་འདྲའི་འཁོར་བ་དངོས་མེད་ལ་དོན་བྱེད་པས་སྟོང་པའི་ཕྱིར། དེ་ཉིད་སེམས་དངོས་པོར་གྲུབ་པ་ལ་བརྟེན་པར་གྱུར་པས་ཀྱང་ནི། འཆིང་གྲོལ་གྱི་དོན་བྱེད་པ་དང་ལྡན་པར་ཇི་ལྟར་འགྱུར་ཏེ་རི་བོང་གི་རྭ་ལག་པ་ལ་བརྟེན་ནས་ཀྱང་ས་རྐོ་བ་མི་སྲིད་པ་བཞིན་ནོ། །འདིར་དངོས་མེད་ཅེས་པ་བདེན་དངོས་མེད་ཀྱང་སྣང་བར་ཤིན་ཏུ་འཐད་པ་མ་རྟོགས་ནས་དངོས་སྨྲ་བ་རྣམས་ཀྱིས་གཏན་མེད་ལྟ་བུར་བཟུང་བ་ལ་ལན་འདེབས་པའི་ཚུལ་ལོ། །དེ་ལྟར་འཁོར་བ་དངོས་མེད་དང་སེམས་དངོས་པོ་གཉིས་ནམ་ཡང་མི་འབྲེལ་བས་ན་སེམས་ཙམ་པ་ཁྱོད་ཀྱི་སེམས་ནི་གྲོགས་གཟུང་བ་མེད་པར། རང་རིག་རང་གསལ་གཅིག་པུ་ཉིད་དུ་འགྱུར་བ་ཡིན་ལ། གང་གི་ཚེ་དེ་ལྟར་སེམས་དེ་ནི་གཟུང་བ་དང་བྲལ་བ། དེ་ཡི་ཚེ་འཛིན་པས་ཀྱང་སྟོང་པས་གཉིས་སྟོང་གི་དེ་ཁོ་ན་ཉིད་མངོན་དུ་གྱུར་པས་ན། སེམས་ཅན་ཐམས་ཅད་ཐོག་མ་ནས་དེ་བཞིན་གཤེགས་པར་འགྱུར་བས་ལམ་ལ་ལྟོས་པར་མེད་པར་ཐལ་ལོ། །དེ་ལྟ་བུ་ཡིན་ན་ཡང་ཆོས་ཐམས་ཅད་སེམས་ཙམ་དུ་བརྟགས་ཤིང་གྲུབ་མཐའ་བཞག་པ་ལ་ཡོན་ཏན་ཅི་ཞིག་ཡོད་དེ་གཉིས་སྣང་དགག་མི་དགོས་ཤིང་གཉིས་སྟོང་སྒྲུབ་མི་དགོས་པའི་ཕྱིར་རོ། །ལམ་སྟོང་ཉིད་ལ་རྩོད་པ་སྤོང་བ་ནི། ཡང་ཁ་ཅིག་གིས། ཕྱི་ནང་གི་དངོས་པོ་འདི་དག་སྒྱུ་མ་ལྟ་བུར་ཤེས་ན་ཡང་། དེས་ཇི་ལྟར་ཉོན་མོངས་པ་ཆགས་སོགས་ལྡོག་པར་འགྱུར་ཏེ། གང་གི་ཚེ་སྒྱུ་མ་མཁན་རང་གིས་སྤྲུལ་པའི་སྒྱུ་མའི་བུད་མེད་ལ། སྒྱུ་མའི་སྣང་བར་ཤེས་ཀྱང་དེ་བྱེད་པ་པོ་སྒྱུ་མ་མཁན་རང་ཉིད་ཀྱང་ཆགས་པ་སྐྱེ་བར་འགྱུར་བའི་ཕྱིར་ཞེ་ན། ལན་དུ། དེ་ཉིད་བྱེད་པ་པོ་སྒྱུ་མ་མཁན་ནི་ཡུལ་བུད་མེད་སོགས་ཤེས་བྱ་གང་ལ་ཡང་། ཆགས་སོགས་ཉོན་མོངས་པའི་ས་བོན་ནམ་བག་ཆགས་མ་སྤངས་པ་སྟེ། དེས་བདག་གཉིས་སུ་འཛིན་པའི་ཀུན་རྟོག་ལ་གཉེན་པོ་ཡེ་ཤེས་ཀྱིས་ཉམས་སྨད་པར་མ་བྱས་པའི་ཕྱིར། དེས་ན་ཡུལ་སྒྱུ་མའི་བུད་མེད་དེ་མཐོང་བ་ན་སྒྱུ་མ་མཁན་དེ། སྟོང་པ་ཉིད་ཀྱི་བག་ཆགས་ཉམ་ཆུང་བ་ཉིད་ཀྱིས་ཏེ། དེའི་རྒྱུད་ལ་བདེན་འཛིན་དང་དངོས་སུ་འཛིན་སྟངས་འགལ་བའི་སྟོང་ཉིད་མེད་པས་ཡིན་ལ། ཕྱི་རོལ་གྱི་བུད་མེད་དངོས་ཀྱིས་སྟོང་པར་མཐོང་བ་དེས་ཀྱང་དོན་གཉེར་གྱི་བློ་མི་སྐྱེ་བ་ཡིན་ནོ། །དེས་ན་འདོད་པའི་རྩ་བ་ནི་ཀུན་རྟོག་གི་སྤྲོས་པ་ཡིན་པས། དེ་སྟོང་ཉིད་ཀྱིས་འགོག་པར་འགྱུར་ཏེ། ཀུན་བཏགས་རྣམས་བདེན་པ་མཐོང་ཙམ་དང་། ལྷན་སྐྱེས་ཀྱི་ཆ་རྣམས་གཉེན་པོ་རྒྱུད་ལ་གོམས་པ་ལས་རིམ་གྱིས་སྤོང་ཞིང་མཐར་བློ་གཉེན་པོའི་ངང་ཚུལ་ཅན་དུ་གྱུར་པ་ན་ས་བོན་གཏན་ནས་སྤང་བར་འགྱུར་ཏེ། ཉི་མའི་དཀྱིལ་འཁོར་ལ་མུན་པ་གཏན་མི་གནས་པ་བཞིན་ནོ། །འོ་ན་དངོས་པོར་མངོན་ཞེན་དང་། སྟོང་ཉིད་དུ་མངོན་པར་ཞེན་པ་གཉིས་ཀའང་ཀུན་རྟོག་གི་སྤྲོས་པ་ལས་མ་འདས་ན་ཁྱོད་ཀྱིས་ཀུན་རྟོག་ཇི་ལྟར་འགོག་ཅེ་ན། དངོས་ཀུན་རང་བཞིན་མེད་པའི་སྟོང་ཉིད་ཀྱི་བག་ཆགས་གོམས་པས་ནི། དེ་དང་འཛིན་སྟངས་འགལ་བའི་དངོས་པོའི་བག་ཆགས་སམ་མངོན་ཞེན་ཡོངས་སུ་སྤོང་བར་འགྱུར་ཞིང་། དེའི་ཚེ་དངོས་མེད་དུ་འཛིན་པ་དེའང་གཞན་བསལ་བའི་རྟོག་པ་ཙམ་ལས་དངོས་པོའི་གནས་ཚུལ་ཡང་དག་ཏུ་གྲུབ་པ་མེད་པར་རྟེན་འབྱུང་གི་རིགས་པས་གཏན་ལ་ཕབ་ནས། དངོས་དངོས་མེད་ཅི་ཡི་ངོ་བོར་ཡང་བདེན་པར་གྲུབ་པ་མེད་ཅེས་གོམས་པས་ནི། མེད་པར་ཞེན་པ་དེ་ཡང་ཕྱིས་ནས་སྤོང་བར་འགྱུར་ཏེ། ཡོད་དང་མེད་པ་འདི་གཉིས་མེད་པའི་ཆོས་ཡིན་ཏེ། །བྱང་ཆུབ་སེམས་དཔའ་གང་གིས་འདི་ཤེས་ངེས་པར་འབྱུང་། །ཞེས་དང་། ཀུན་རྟོག་ཐམས་ཅད་སྤང་བའི་ཕྱིར། །སྟོང་ཉིད་བདུད་རྩི་བསྟན་མཛད་དེ། །གང་ཞིག་དེ་ལ་ཞེན་གྱུར་པ། །དེ་ཡང་ཁྱོད་ཀྱིས་སྤངས་པ་ལགས། །ཞེས་གསུངས། དེས་ན་མེད་པ་ཙམ་གནས་ལུགས་མཐར་ཐུག་མ་ཡིན་ཏེ། གང་ཚེ་གཟུགས་སོགས་དངོས་པོ་གང་ཞིག་མེད་དོ་ཞེས། བརྟག་བྱའི་དངོས་པོ་དེ་ཐ་སྙད་དུ་རང་གི་ངོ་བོས་སྐྱེ་བ་སོགས་སུ་མི་དམིགས་པ། དེ་ཡི་ཚེ་དེ་ལ་བརྟེན་པའི་དངོས་མེད་ཀྱང་རྟེན་དངོས་པོ་དང་བྲལ་བས་ན། བློ་ཡི་མདུན་ན་དམིགས་གཏད་ཀྱི་ཡུལ་དུ་ཇི་ལྟར་གནས་ཏེ། མོ་གཤམ་གྱི་བུ་སྐྱེ་བ་མེད་ན་ཤི་བའང་མི་དམིགས་པ་བཞིན་ནོ། །དེས་ན་མེད་པ་ནི་ཡོད་པ་ལ་བརྟེན་ནས་བཞག་པ་ཙམ་སྟེ། ལྟོས་མེད་དུ་ངོ་བོས་གྲུབ་པ་མེད་དོ། །མདོར་ན་ཡོད་མེད་སོགས་མཐའ་གང་རུང་རེ་བཀག་ནས་ཅིག་ཤོས་སྒྲུབ་པ་མ་ཡིན་ཏེ་མཐའ་ཐམས་ཅད་བཀག་ནས་མཐར་དགག་སྒྲུབ་དང་བྲལ་བའི་ཆོས་ཉིད་དེ་བཞིན་ཉིད་ལ་འཇུག་པའི་ཕྱིར། གདོད་ནས་སྐྱེ་བ་མེད་བཞིན་དུ་སྣང་བའི་སྟོང་པ་དང་རྟེན་འབྱུང་ཡེ་ནས་འདུ་འབྲལ་མེད་པའི་ཆོས་ཉིད་མཉམ་པ་ཆེན་པོ་ལ་ངེས་ཤེས་གཏིང་ནས་རྙེད་པའི་ཐབས་ལ་བརྩོན་པར་བྱའོ། །དེས་ན་དུས་གང་གི་ཚེ་དངོས་པོ་དང་དངོས་པོ་མེད་པ་དག གང་ཡང་བློ་ཡི་མདུན་ན་མི་གནས་པ། དེ་ཡི་ཚེ་དེ་ལས་གཞན་བདེན་པར་གྲུབ་པའི་རྣམ་པ་གཞན་གཉིས་ཡིན་དང་གཉིས་མིན་གྱི་ཕུང་གསུམ་པ་མེད་པས་ན། བདེན་འཛིན་གྱི་དམིགས་པ་ཡི་གཏད་སོ་མཐའ་དག་མེད་པར་སྤྲོས་པ་མ་ལུས་པ་རབ་ཏུ་ཞི་བ་ཡིན་ཏེ་སོ་སོ་རང་རིག་པའི་ཡེ་ཤེས་ཙམ་གྱིས་རབ་ཏུ་ཕྱེ་བ་སྨྲ་བསམ་བརྗོད་དུ་མེད་པ་ནམ་མཁའི་དཀྱིལ་ལྟ་བུའི་མཉམ་པ་ཉིད་དོ། །དེ་ལྟར་ཡང་ལང་ཀར་གཤེགས་པ་ལས། ཡོད་མིན་མེད་མིན་ཡོད་མེད་མིན། །དེ་ལྟར་འཇིག་རྟེན་ནམ་མཐོང་ན། །དེ་ཚེ་སེམས་ཀྱང་རྣམ་ལྡོག་སྟེ། །བདག་མེད་པར་ཡང་རྟོགས་པར་འགྱུར། །ཞེས་གསུངས། དེས་ན་གནས་ལུགས་མཐར་ཐུག་པ་དེ་ལྟ་བུ་ཡིན་པའི་ཕྱིར། །ཕུང་འདི་སྟོང་ཞེས་རྟོག་ནའང་བྱང་ཆུབ་སེམས་དཔའ་ནི། །མཚན་མ་ལ་སྤྱོད་སྐྱེ་མེད་གནས་ལ་དད་མ་ཡིན། །ཞེས་དང་། རྒྱལ་བ་རྣམས་ཀྱིས་སྟོང་པ་ཉིད། །ལྟ་ཀུན་ངེས་པར་འབྱིན་པར་གསུངས། །གང་དག་སྟོང་པ་ཉིད་ལྟ་བ། །དེ་དག་བསྒྲུབ་ཏུ་མེད་པར་གསུངས། །ཞེས་གསུངས་ཏེ་དངོས་དང་དངོས་མེད་དུ་ཞེན་པའི་ཚུལ་ཀུན་བཟློག་པའི་ཕྱིར་སྟོང་ཉིད་བཅུ་དྲུག་ཏུ་གསུངས་པ་ལྟ་བུ་སྟེ་སྤྲོས་པ་མཐའ་དག་ཁེགས་པའི་ཟུང་འཇུག་ཆོས་ཀྱི་དབྱིངས་དེ་ནི་ཐེག་པ་ཆེན་པོའི་རྟོགས་རིགས་ཁྱད་པར་ཅན་ཡིན་པར་ཤེས་པར་བྱའོ། །དེས་ན་དེ་ལྟ་བུའི་སྟོང་པ་ཉིད་ཀྱིས་ནི་སྤྲོས་པ་མཐའ་དག་ཆོས་དབྱིངས་སུ་ནུབ་ནས་སྒྲིབ་གཉིས་ཡོངས་སུ་སྤངས་ཤིང་མི་གནས་པའི་མྱང་འདས་ཐོབ་པར་བྱེད་དེ། ལས་དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས་སོ། །འབྲས་བུ་གཞན་དོན་ལ་རྩོད་སྤོང་ནི། དེ་ལྟར་རྣམ་རྟོག་ཐམས་ཅད་དབྱིངས་སུ་ནུབ་པའི་སངས་རྒྱས་ཀྱི་ས་ན་འབད་རྩོལ་གྱི་སྤྲོས་པ་མི་མངའ་བས་དེས་སེམས་ཅན་གྱི་དོན་ཇི་ལྟར་མཛད་སྙམ་ན། དཔེར་ན་ཡིད་བཞིན་གྱི་ནོར་བུ་དང་དཔག་བསམ་གྱི་ཤིང་སོགས་ལ་འབད་རྩོལ་གྱི་རྣམ་རྟོག་མེད་ཀྱང་། ཇི་ལྟར་སེམས་ཅན་གྱི་འདོད་པའི་རེ་བ་ཡོངས་སུ་སྐོང་བ་དེ་བཞིན་དུ་གདུལ་བྱར་སྔོན་གྱི་སྨོན་ལམ་གྱི། དབང་གིས་རྒྱལ་བའི་སྐུར་སྣང་ངོ་། །འདིར་སྨོན་ལམ་གཙོ་བོར་སྟོན་པ་ནི། དེ་བཞིན་གཤེགས་པའི་སྐུ་དང་འཁོར་དང་ཞིང་ལ་སོགས་པ་སྣ་ཚོགས་པར་སྣང་བའི་རྒྱུའི་གཙོ་བོ་ནི་སྔོན་སློབ་ལམ་དུ་སྨོན་ལམ་གང་བཏབ་པའི་ལྷན་ཅིག་བྱེད་རྐྱེན་ལས་སྣང་བའི་དབང་གིས་ཡིན་ཏེ། དོན་དུ་བདེ་གཤེགས་སྙིང་པོ་ཡང་དག་པའི་མཐའ་ཆོས་ཀྱི་དབྱིངས་སྣང་སྟོང་ཟུང་འཇུག་དེ་བཞིན་ཉིད་དེ་རྫོགས་སྨིན་སྦྱངས་གསུམ་མཐར་ཕྱིན་པའི་དབང་གིས་དག་པ་མངོན་དུ་གྱུར་པའི་བསམ་གྱིས་མི་ཁྱབ་པའི་ཡེ་ཤེས་ཀྱི་སྐུ་ཡིན། སྐུ་དེ་ཉིད་གདུལ་བྱའི་སྐལ་བ་དང་འཚམ་པར་སྔོན་གྱི་སྨོན་ལམ་གྱི་དབང་གིས་སྣང་བ་སྟེ། དེ་ཡང་འབད་རྩོལ་དང་རྣམ་རྟོག་གི་གཡོ་བ་མེད་པར་འབྱུང་བ་ནི། ཡེ་ཤེས་སྣང་བ་རྒྱན་གྱི་མདོ་དང་རྒྱུད་བླ་མ་ནས་གསུངས་པའི་དཔེ་ལྷག་མ་རྣམས་ཀྱིས་ཀྱང་མཚོན་ཏེ་ཤེས་པར་བྱའོ། །ཡང་བྱང་སེམས་ཀྱི་སྨོན་ལམ་སངས་རྒྱས་ཀྱི་ས་ན་འགགས་པས་དེའི་ཚེ་དོན་བྱེད་པར་མི་རིགས་སོ་ཞེ་ན། སྐྱོན་མེད་དེ། དཔེར་ན་རིགས་སྔགས་མཁན་གྱིས་ནམ་མཁའ་ལྡིང་གི་ནི། མཆོད་སྡོང་ས་རྡོ་སོགས་ལས་བསྒྲུབས་ནས་བྱིན་གྱིས་བརླབས་ཏེ་བྱེད་པོ་དེ་ཉིད་འདས་པར་གྱུར་པ་ན། དེ་འདས་ནས་ཀྱང་དུས་ཡུན་རིང་ལོན་ཡང་མཆོད་སྡོང་དེ་ཡིས། ཀླུ་ཡི་དུག་དང་གདོན་ལ་སོགས་པ་ཞི་བར་བྱེད་པ་བཞིན་དུ། སྔོན་སློབ་ལམ་དུ་རྫོགས་པའི་བྱང་ཆུབ་ཀྱི་དོན་དུ་ཚོགས་གཉིས་ཀྱི་སྤྱོད་པའི་རྗེས་སུ་མཐུན་པར། རྒྱལ་བའི་མཆོད་སྡོང་བསྒྲུབས་པ་ཡང་། སྒྲུབ་མཁན་བྱང་ཆུབ་སེམས་དཔའ་དེ་མི་གནས་པའི་དབྱིངས་སུ་མྱ་ངན་ལས་འདས་ཏེ་ད་ལྟར་འབད་རྩོལ་གྱི་སྤྲོས་པ་མེད་ཀྱང་གདུལ་བྱའི་དོན་རྣམས་ཐམས་ཅད་མཛད་པ་ཡིན་ནོ། །ཡང་། ཕན་ཚུན་མཆོད་པ་དང་ལེན་པའི་བསམ་པས་མཆོད་ན་བསོད་ནམས་འབྱུང་ཡང་། སངས་རྒྱས་ལ་རྣམ་པར་རྟོག་པའམ་སེམས་མེད་པ་ཡིན་ན་དེ་ལ་མཆོད་པ་བྱས་པས། ཇི་ལྟར་ན་བསོད་ནམས་ཀྱི་འབྲས་བུ་དང་ལྡན་པར་འགྱུར་ཞེ་ན། སེམས་མེད་པ་ལ་མཆོད་པའི་འབྲས་བུ་མེད་ན་རིང་བསྲེལ་ཅན་གྱི་མཆོད་རྟེན་ལའང་མཚུངས་མོད་གང་གི་ཕྱིར་སངས་རྒྱས་དངོས་སུ་བཞུགས་པའམ་དེ་མྱ་ངན་ལས་འདས་པའི་རིང་བསྲེལ་མཆོད་ན་བསོད་ནམས་མཚུངས་པ་ཉིད་དུ་བྱང་ཆུབ་སེམས་དཔའི་སྡེ་སྣོད་ལས། གང་ཞིག་བཞུགས་ལ་མཆོད་པ་དང་། །གང་ཡང་མྱ་ངན་འདས་པ་ཡིས། །རིང་བསྲེལ་ཡུངས་འབྲུ་ཙམ་མཆོད་པ། །སེམས་ཀྱང་མཚུངས་ལ་འབྲས་བུ་མཚུངས། །ཞེས་བཤད་པའི་ཕྱིར་རོ། །དེས་ན་སངས་རྒྱས་དང་མཆོད་པའི་བསོད་ནམས་གཉིས་ངེད་ཀུན་རྫོབ་སྒྱུ་མ་ཙམ་དུ་འདོད་པའམ་ནི་ཁྱེད་དེ་ཁོ་ན་ཉིད་དོན་དམ་དུ་འདོད་པའང་རུང་སྟེ་སངས་རྒྱས་དེ་ལ་མཆོད་པའི་འབྲས་བུ་ལུང་ཚད་མ་ལས་ཡིད་ཆེས་པར་བྱ་བ་ཡིན་ཏེ། དཔེར་ན་ཁྱོད་བདེན་པའི་སངས་རྒྱས་མཆོད་པ་ལ། ཇི་ལྟར་འབྲས་བུར་བཅས་པར་ཁས་ལེན་པའང་ལུང་ལས་ཡིན་པ་བཞིན་ནོ། །རྗོད་བྱེད་ཐེག་ཆེན་ལ་རྩོད་པ་སྤོང་བ་ནི། ཉན་ཐོས་མངོན་པའི་ང་རྒྱལ་ཅན་དག་ན་རེ། བདེན་བཞིའི་རྣམ་པ་མི་རྟག་སོགས་བཅུ་དྲུག་མངོན་དུ་མཐོང་བ་དེ་ཁོ་ན་གོམས་པས་རྣམ་པར་གྲོལ་བ་དགྲ་བཅོམ་གྱི་འབྲས་བུ་ཐོབ་པར་འགྱུར་གྱི། ཆོས་ཐམས་ཅད་རང་བཞིན་མེད་པའི་སྟོང་པ་ཉིད་མཐོང་བས་ཅི་ཞིག་བྱ་སྟེ་དགོས་པ་མེད་དོ་ཞེ་ན། ལན་དུ་སྟོང་ཉིད་རྟོགས་དགོས་པའི་རྒྱུ་མཚན་གང་གི་ཕྱིར་ན་བཅོམ་ལྡན་འདས་ཀྱི་ལུང་ལས། འཇམ་དཔལ་སྟོང་པ་ཉིད་ཡིད་ལ་བྱེད་པས་བྱང་ཆུབ་གསུམ་པོ་འཐོབ་པ་འདི་ནི་གནས་ཡོད་ཅིང་སྐབས་ཡོད་དེ། འཇམ་དཔལ་དངོས་པོའི་འདུ་ཤེས་ཅན་གྱིས་ནི་བྱང་ཆུབ་གསུམ་ཐོབ་པའི་གནས་མེད་སྐབས་མེད་དོ། །ཞེས་སྟོང་ཉིད་མཐོང་ཞིང་སྒོམ་པའི་ལམ་འདི་ནི་མེད་པར་དངོས་པོའི་འདུ་ཤེས་ཅན་ལ་ཐར་པ་བྱང་ཆུབ་གསུམ་གང་ཡང་རུང་བ་མེད་པར་གསུངས་པའི་ཕྱིར་རོ། །དེ་དག་ན་རེ། ཐེག་ཆེན་སངས་རྒྱས་ཀྱི་བཀའ་མ་ཡིན་ཏེ་བདུད་ཀྱི་མཐུ་ལས་རྟོག་གེ་པས་བྱས་པའི་ཚིག་ཡིན་པས་ལུང་ཚད་མར་མ་གྲུབ་ཅེ་ན། ལན་དུ། གལ་ཏེ་ཐེག་པ་ཆེན་པོ་སངས་རྒྱས་ཀྱི་བཀའ་ཡིན་པར་མ་གྲུབ་ན། ཉན་ཐོས་པ་ཁྱོད་ཀྱི་ལུང་རྣམས་ནི་བཀར་ཇི་ལྟར་གྲུབ། ཅེས་དྲིའོ། །དེ་དག་ན་རེ། དེ་གང་གི་ཕྱིར་ན་ཁྱེད་ཐེག་ཆེན་པ་དང་ངེད་ཉན་ཐོས་པ་གཉིས་ཀ་ལ་ངེད་ཀྱི་ལུང་འདི་ཚད་མར་གྲུབ་པའི་ཕྱིར་རོ་ཞེ་ན། ལན་དུ་འོ་ན་དང་པོ་ཁྱོད་ལ་སྐྱེས་མ་ཐག་པ་སོགས་སུ་ཐེག་དམན་གྱི་ལུང་འདི་ཚད་མར་མ་གྲུབ་སྟེ་ལུང་དང་སྐྱེས་བུ་རང་བཞིན་གྱིས་འབྲེལ་བ་མེད་པའི་ཕྱིར། དེ་དག་ན་རེ། ཁོ་བོ་ལ་དང་པོ་ནས་མ་གྲུབ་ཀྱང་ཡིད་ཆེས་སུ་རུང་བའི་བླ་མ་བརྒྱུད་པ་ལས་ཐོས་ཤིང་། འདུལ་བ་ལ་སྣང་། མདོ་སྡེ་ལ་འཇུག མངོན་པའི་ཆོས་ཉིད་དང་མི་འགལ་བར་ཡང་དག་པའི་ལམ་སྟོན་པའི་ལུང་དུ་རིགས་པས་གྲུབ་པའི་རྐྱེན་གང་གིས་ནི་ཐེག་དམན་དེར་སངས་རྒྱས་ཀྱི་བཀའ་ཡིན་པར་ཡིད་ཆེས་སོ་ཞེ་ན། དེ་འདྲ་བའི་ཡིད་ཆེས་སུ་རུང་བའི་རྐྱེན་དེ་ནི་ཐེག་ཆེན་ལ་ཡང་ཐེག་དམན་ལས་གོང་འཕེལ་གྱི་ཚུལ་དུ་ཡོད་པས་མཚུངས་ཏེ། མདོ་སྡེ་རྒྱན་ལས། རང་གི་ཉིད་ལ་འཇུག་པ་དང་། །རང་གི་གདུལ་ལའང་སྣང་ཕྱིར་དང་། །ཟབ་པ་དང་ནི་རྒྱ་ཆེའི་ཕྱིར། །ཆོས་ཉིད་དང་ནི་འགལ་བ་མེད། །ཅེས་གསུངས་པ་བཞིན་ནོ། །གལ་ཏེ་གང་ཟག་གཞན་གང་ཡང་རུང་བ་གཉིས་ཀྱི་ཚད་མར་འདོད་པས་ལུང་དེ་བདེན་པ་ཡིན་པར་འདོད་ན་ནི། ཕྱི་རོལ་པའི་རིག་བྱེད་སོགས་ཀྱང་བདེན་པར་འགྱུར་ཏེ། དེ་ཉིད་ཁས་ལེན་པ་དུ་མ་ཡོད་པའི་ཕྱིར་རོ། །ཡང་དེ་དག་ན་རེ། ཐེག་དམན་ལ་བཀའ་ཡིན་མིན་དུ་རྩོད་པ་མེད་ལ་ཐེག་ཆེན་ནི་རྩོད་པ་དང་བཅས་པའི་ཕྱིར་བཀའ་མ་ཡིན་ནོ་ཞེ་ན། ལན་དུ་འོ་ན་སངས་རྒྱས་པའི་ལུང་སྤྱི་ལ་མུ་སྟེགས་པ་རྣམས་ཀྱིས་རྩོད་པ་དང་། ཉན་ཐོས་རྩ་བའི་སྡེ་བ་ལས་གྱེས་པའི་ལུང་གཞན་དག་ལ་ཡང་རང་སྡེ་དང་གཞན་སྡེ་དག ཕན་ཚུན་རྩོད་པ་དང་བཅས་པ་ཡིན་པའི་ཕྱིར་ཐེག་དམན་རང་ཡང་ཁྱོད་ཀྱིས་དོར་བྱར་འགྱུར་རོ། །གཞན་ཡང་སངས་རྒྱས་ཀྱི་བསྟན་པ་གནས་པའི་རྩ་བ་ཡང་དག་པའི་དགེ་སློང་ཉིད་ཡིན་ན་ཡང་། སེམས་དམིགས་པ་དང་བཅས་ཏེ་སྟོང་ཉིད་མ་རྟོགས་ན་དོན་དམ་པའི་དགེ་སློང་མཆོག་དགྲ་བཅོམ་པ་ཉིད་ཀྱང་ཡོད་དཀའ་བར་གནས་ཏེ། དེས་ཉོན་མོངས་རྩད་ནས་མི་སྤོང་བས་སོ། །གཞན་བསྙེན་པར་རྫོགས་པའི་དགེ་སློང་ལའང་སྡེ་བ་སོ་སོའི་འདོད་པ་མི་མཐུན་པ་སོགས་ཀྱིས་རྩོད་པ་དང་བཅས་པའི་ཕྱིར་ཞེས་སྔར་བསྟན་པའི་ཤུགས་ལས་སོ། །དེ་དག་ན་རེ། ཅིའི་ཕྱིར་ཉོན་མོངས་སྤོང་བའི་དགེ་སློང་མེད་དེ་སྟོང་པ་ཉིད་མེད་ཀྱང་བདེན་པ་མཐོང་བ་ཡོད་པས་སོ་ཞེ་ན། དེ་ལ་བདེན་བཞིའི་མི་རྟག་སོགས་གཙོ་བོ་མ་ཡིན་ལ། ལམ་གྱི་གཙོ་བོ་ཉོན་མོངས་རྩ་བ་ནས་སྤོང་བའི་དངོས་གཉེན་ནི་བདག་མེད་རྟོགས་པའི་ཤེས་རབ་ཡིན་པས། དེ་ཉིད་སྤངས་ནས། སེམས་ནི་དམིགས་པ་དང་བཅས་པ་རྣམས་ཀྱིས་ནི་མྱ་ངན་ལས་འདས་པའང་ཐོབ་དཀའ་བར་གནས་ཏེ་བདག་ཏུ་འཛིན་པ་དྲུང་ནས་མ་ཕྱུང་བར་ཉོན་མོངས་སྤོང་པའི་ཐབས་མེད་ལ། དེ་དྲུང་ནས་འབྱིན་པ་ལ་ཡུལ་སྟོང་པར་མཐོང་བ་ཁོ་ན་ལས་གཞན་རྩད་ནས་ལྡོག་ཐབས་མི་སྲིད་དེ། ཡུལ་ཡོད་པར་ཞེན་པའི་བག་ཆགས་མ་སྤངས་པར་རེ་ཞིག་བསམ་གཏན་ལྟ་བུས་མགོ་མནན་ཀྱང་སླར་སྐྱེ་བ་འདུ་ཤེས་མེད་པའི་སྙོམས་འཇུག་བཞིན་ནོ། །དེས་ན་ངར་འཛིན་ལྷན་སྐྱེས་ཀྱི་ཞེན་ཡུལ་དུ་གྱུར་པའི་བདག་རང་བཞིན་གྱིས་གྲུབ་པ་མེད་པའི་སྟོང་པ་ཉིད་ཁོང་དུ་ཆུད་པའི་བདེན་པ་མཐོང་བ་ལས་ཉོན་མོངས་སྤོང་གི་གཞན་དུ་ན་དེ་མི་འཐད་དོ། །དེ་ལ་ཆོས་དང་གང་ཟག་གི་བདག་མེད་པ་གཉིས་པོ་ཡང་སྟོང་གཞི་ཆོས་ཅན་གྱི་སྒོ་ནས་དབྱེ་བ་ཙམ་ལས་སྟོང་ཚུལ་ལ་ཁྱད་པར་མེད་དེ། གང་ཟག་གི་བདག་ཕུང་པོ་ལ་བརྟེན་ནས་བཏགས་པ་ཙམ་འདི་ལ་རང་གི་ངོ་བོས་གྲུབ་པ་མེད་པ་ནི་གང་ཟག་གི་བདག་མེད་ཡིན་ལ། ཡན་ལག་ལ་སོགས་པའི་ཚོགས་པ་ལ་བརྟེན་ནས་བཏགས་པའི་ལུས་དང་བུམ་པ་སོགས་ཕུང་པོ་རྣམས་ཀྱང་རང་རང་གི་ངོ་བོས་སྟོང་པ་ནི་ཆོས་ཀྱི་བདག་མེད་དེ། ཆོས་ཀྱི་བདག་འཛིན་ནི་རྨོངས་པ་སྤྱི་དང་། གང་ཟག་གི་བདག་འཛིན་ནི་དེའི་བྱེ་བྲག་དང་། ཆོས་ཀྱི་བདག་མེད་རྟོགས་པའི་ཡེ་ཤེས་ནི་སྤྱི་ཡིན་ལ། གང་ཟག་གི་བདག་མེད་རྟོགས་པའི་མཁྱེན་པ་ནི་དེའི་བྱེ་བྲག་ཏེ་འཁོར་བའི་རྒྱུའི་གཉེན་པོ་ལོགས་སུ་ཕྱེ་བ་ཙམ་ཡིན་པས་སྟོང་ཚུལ་ལ་ཁྱད་པར་མེད་དོ། །དེས་ན་བདག་ཕུང་པོ་ལ་བརྟེན་ནས་བཏགས་པ་ཙམ་གྱི་སྟོང་པར་ཁོང་དུ་མ་ཆུད་པར། ཕུང་པོ་ཉིད་ནི་ངེས་པར་ཡོད་ཀྱི་ཕུང་པོ་འདི་ལ་དབང་བྱེད་པའམ། བདག་པོར་གྱུར་པའི་བདག་རྟག་གཅིག་རང་དབང་བ་དེ་འདྲ་མེད་པར་ཤེས་ཀྱང་དེས་ངར་འཛིན་ཕྲ་བ་མི་སྤོང་སྟེ། དེའི་ཕྱིར་བདག་དངོས་པོར་གྲུབ་པ་མེད་པའི་སྟོང་པ་ཉིད་མ་མཐོང་བར་དུ་རྟག་བདག་སྤངས་ཀྱང་རུང་ཇི་སྲིད་རང་རྒྱུད་ཀྱི་ཕུང་པོར་དེར་འཛིན་ཡོད་པ་དེ་སྲིད་དུ་ངར་འཛིན་ལྡོག་པར་མི་འགྱུར་ཏེ། རིན་ཆེན་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཡང་ནི་སྐྱེ་བ་ཡིན། །ཞེས་སོ། །འདི་ལ་གང་ཟག་གི་བདག་རང་མཚན་གྱིས་གྲུབ་པ་མེད་པའི་སྟོང་པ་ཉིད་མ་གཏོགས་རྟག་བདག་སོགས་མེད་པར་བལྟས་ཀྱང་། ཇི་སྲིད་ཕུང་པོར་འཛིན་པ་དེས་བདག་འཛིན་ལྡོག་ཏུ་མི་བཏུབ་ཅེས་པའི་དོན་ཡིན་གྱི་གཞན་དུ་བཤད་པ་ཇི་སྙེད་ཀླུ་སྒྲུབ་དང་ཟླ་བའི་དགོངས་པ་ནི་མིན་ནོ། །འཇུག་པར་ཡང་། བདག་མེད་རྟོགས་ཚེ་རྟག་པའི་བདག་སྤངས་ཤིང་། །འདི་ནི་ངར་འཛིན་རྟེན་དུའང་མི་འདོད་པ། །དེ་ཕྱིར་བདག་མེད་ཤེས་པས་བདག་ལྟ་བ། །དཔྱིས་ཀྱང་འབྱིན་ཞེས་སྨྲ་བ་ཤིན་ཏུ་མཚར། །རང་ཁྱིམ་རྩིག་ཕུག་སྦྲུལ་གནས་མཐོང་བཞིན་དུ། །འདི་ན་གླང་ཆེན་མེད་ཅེས་དོགས་བསལ་ཏེ། །སྦྲུལ་གྱི་འཇིགས་པའང་སྤོང་བར་བྱེད་པ་ནི། །ཀྱེ་མ་གཞན་གྱི་གནམ་པོར་གྱུར་ཉིད་དོ། །ཞེས་བཞད་གད་ཀྱི་གནས་སུ་གསུངས། དེས་ན་འདིར་ཆོས་དང་གང་ཟག་གི་བདག་མེད་ལ་ཁྱད་པར་ཆེན་པོ་ཡོད་པར་བརླམས་ནས་ཆོས་བདག་མེད་སྟོང་པ་ཉིད་ནི་མི་དགོས་པར་གང་ཟག་གི་བདག་མེད་ཁོ་ནས་གྲོལ་བར་འདོད་པ་རྣམས་ཀྱི་ཞེ་འདོད་ནི། གང་ཡོད་པར་གྱུར་པའི་དངོས་པོ་ནི་སྟོང་པ་མ་ཡིན་ལ། གང་གཏན་ནས་ཡོད་མ་མྱོང་བ་བདག་ནི་རི་བོང་གི་རྭ་བཞིན་དུ་དོན་ལ་མེད་པ་ཞིག་སྟེ་དེའི་ཕྱིར་ཆོས་བདག་མེད་འདིས་ཅི་བྱ་སྙམ་དུ་གང་ཟག་གི་བདག་བརྟེན་ནས་བཏགས་པའི་ངོ་བོ་ཉིད་དུ་མ་ཤེས་པར་རྩོད་པའོ། །ལེགས་པར་བརྟགས་ན་དེ་གཉིས་ཀའང་བརྟེན་ནས་བཏགས་པའི་སྟོང་ཉིད་ཙམ་དུ་གཅིག་པས་ན་དེ་ལ་དགོངས་ནས་ཉན་རང་ལ་ཆོས་ཀྱི་བདག་མེད་དམ་སྟོང་ཉིད་རྟོགས་པ་ཡོད་པར་གསུངས་པ་སྟེ། དེ་མེད་ན་ཉོན་མོངས་ཀྱང་སྤོང་མི་ནུས་པར་རིགས་པས་བསྒྲུབས་པའོ། །འོན་ཀྱང་དེས་ཕུང་སོགས་ཤེས་བྱ་མཐའ་དག་ནི་སྟོང་པར་རྟོགས་པ་མ་ཡིན་ཏེ། རྟོགས་ན་གྲུབ་མཐའ་འོག་མ་ལས་གོང་མ་འཕགས་པའི་ཁྱད་པར་མི་འཐད་པ་དང་། ཉན་རང་གི་སྟོང་པར་མཐོང་བ་དེ་ལས་བོགས་དབྱུང་དུ་མེད་པའི་ཕྱིར་ཐེག་པ་ཆེན་པོ་ལས་ཆུང་ངུ་དང་། གྲུབ་མཐའ་གོང་མ་ལས་འོག་མ་ལམ་མྱུར་ཞིང་ཟབ་པ་དང་། རྟོགས་པའི་ཡེ་ཤེས་ཡོད་ཀྱང་དེས་སྤང་བྱ་མི་སྤོང་བ་སོགས་ཀྱི་སྐྱོན་དུ་འགྱུར་ཞིང་། མདོ་ལས་ཀྱང་། ཆོས་ལ་བདག་མེད་མཁས་པ་ཡིས། །སངས་རྒྱས་རྣམས་དང་སངས་རྒྱས་སྲས། །བདེ་བར་གཤེགས་པའི་གནས་ཐོབ་སྟེ། །མངོན་སངས་རྒྱས་ཤིང་ཆོས་སྟོན་ཏོ། །ཕུང་པོ་གང་ཟག་བདག་མེད་པར། །རབ་ཏུ་རྣམ་ཕྱེ་མཐོང་གྱུར་ཅིང་། །ཆོས་ཀྱི་དངོས་ཡོད་མ་བཤིག་པར། །ཉན་ཐོས་དེ་དག་མངོན་རྟོག་འགྱུར། །ཞེས་དང་། འཇུག་པ་རང་འགྲེལ་ལས། བདག་མེད་པ་གཉིས་པོ་འདི་ནི་བཅོམ་ལྡན་འདས་ཀྱིས་འགྲོ་བ་རྣམ་པར་དགྲོལ་བར་བྱ་བའི་ཕྱིར་དུ་ཉེ་བར་བསྟན་ཏོ། །དེ་ལ་གང་ཟག་གི་བདག་མེད་པ་ནི། རང་སངས་རྒྱས་རྣམས་དང་། ཉན་ཐོས་རྣམ་པར་དགྲོལ་བར་བྱ་བའི་ཕྱིར་བསྟན་ལ། བྱང་ཆུབ་སེམས་དཔའ་རྣམས་རྣམ་པ་ཐམས་ཅད་མཁྱེན་པ་ཉིད་ཐོབ་པས་རྣམ་པར་དགྲོལ་བར་བྱ་བའི་ཕྱིར་ནི་གཉིས་ཀ་བསྟན་ཏོ། །ཉན་ཐོས་དང་རང་སངས་རྒྱས་རྣམས་ཀྱིས་ཀྱང་རྟེན་ཅིང་འབྲེལ་བར་འབྱུང་བ་རྐྱེན་ཉིད་འདི་པ་ཙམ་མཐོང་མོད་ཀྱི། དེ་ལྟ་ན་ཡང་དེ་དག་ལ་ཆོས་ཀྱི་བདག་མེད་པ་ཡོངས་སུ་རྫོགས་པར་བསྒོམ་པ་མེད་དེ། ཁམས་གསུམ་ན་སྤྱོད་པའི་ཉོན་མོངས་པ་སྤོང་བའི་ཐབས་ཙམ་ཞིག་ནི་ཡོད་དོ། །དེ་དག་ལ་གང་ཟག་གི་བདག་མེད་པ་མ་ལུས་པར་བསྒོམ་པ་ནི་ཡོད་པར་རྣམ་པར་བཞག་གོ །ཞེས་སོགས་ཀྱིས་གསལ་བར་བསྟན་པ་བཞིན་ཆོས་བདག་མེད་རྫོགས་པར་མ་རྟོགས་པའི་ཆ་ནས་དམན་པ་ལ་དགག་སྒྲ་སྦྱར་ཏེ་གཞུང་གཞན་དུ་ཉན་རང་གི་ཆོས་ཀྱི་བདག་མེད་མ་རྟོགས་པར་གསུངས་ཤིང་ཉན་རང་གི་ཡེ་ཤེས་ཡུངས་འབྲུ་སྲིན་གྱིས་ཟོས་པའི་ནང་གི་ནམ་མཁའ་བཞིན་ཆུང་བར་མདོ་ལས་ཀྱང་གསུངས་སོ། །དེས་ན་འདི་གཉིས་མི་འགལ་བའི་གནད་ཤེས་པ་གལ་ཆེ། གང་ཟག་གི་བདག་འཛིན་ལས་སེར་སྣ་སོགས་ཉོན་སྒྲིབ་དང་། ཆོས་བདག་ལས་འཁོར་གསུམ་དུ་རྟོག་པ་ཤེས་སྒྲིབ་སྐྱེ། བདག་མེད་གཉིས་རྟོགས་ཀྱི་བྱང་སེམས་ཀྱི་མཁྱེན་པས་སྒྲིབ་པ་གཉིས་ཀ་སྤོང་ལ། ཉན་རང་གི་ལམ་གྱི་ཉོན་མོངས་རྐྱང་པ་སྤོང་། སྤོང་ཚུལ་ཡང་ཐེག་ཆེན་མཐོང་ལམ་དུ་སྒྲིབ་པ་གཉིས་པོ་ཀུན་བཏགས་ཀྱི་ཆ་སྤོང་། དེ་ནས་རིམ་བཞིན་སྒྲིབ་པ་གཉིས་ཀ་མཉམ་པོར་སྤངས་ནས་ས་བརྒྱད་པར་ངར་འཛིན་གྱི་རྒྱུ་བ་ལོག་པའི་སྟོབས་ཀྱིས་དག་ས་པ་ལ་ཉོན་མོངས་མེད་ཀྱང་ཤེས་སྒྲིབ་འབའ་ཞིག་སྤོང་། ས་བཅུ་པའི་ཐ་མར་གཉིས་སྣང་འཁྲུལ་པའི་བག་ཆགས་ཤིན་ཏུ་ཕྲ་བའང་རྡོ་རྗེ་ལྟ་བུའི་ཏིང་ངེ་འཛིན་གྱིས་བཅོམ་པའི་དེ་མ་ཐག་ཏུ་ཆོས་ཀྱི་དབྱིངས་དེ་བཞིན་ཉིད་དུ་མངོན་སུམ་པར་གཤེགས་པ་སངས་རྒྱས་བཅོམ་ལྡན་འདས་ཀྱི་ཡེ་ཤེས་རྡོ་རྗེའི་སྐུ་བརྙེས་པ་ཡིན་ནོ། །དེ་ལྟར་ཤེས་ན་གཞུང་ལུགས་དུ་མའི་འགག་རང་གྲོལ་ཏེ་དགོངས་པའི་ཆུ་བོ་ཡེ་ཤེས་ཀྱི་ཀློང་དུ་འདྲེས་པར་འགྱུར་རོ། །དེ་ལྟར་སྟོང་ཉིད་མ་རྟོགས་བཞིན་བདེན་པ་མཐོང་མི་སྲིད་པར་ཞི་སྒོ་དབྱེར་མེད་དུ་བ སྒྲུབས་ནས། སླར་ཡང་མཐར་ཐུག་ཐེག་པ་གཅིག་ཏུ་བསྒྲུབ་པའི་ཕྱིར། སྐྱོན་གཞན་ཡང་གང་ཟག་གི་བདག་མེད་ཕྲ་བ་མཐོང་བས་ཉོན་མོངས་ཙམ་སྤངས་ཀྱང་དེ་གྲོལ་བ་མཐར་ཐུག་པ་ནི་མ་ཡིན་ཏེ། ཉོན་མོངས་པ་ཙམ་སྤངས་པ་ཁོ་ནས་གྲོལ་ན་ཉོན་མོངས་མཐའ་དག་སྤངས་པ་དེའི། དེ་མ་ཐག་ཏུ་གྲོལ་བ་དེར་འགྱུར་བར་རིགས་ཏེ་འཆིང་བ་མེད་པར་འདོད་པའི་ཕྱིར་རོ། །འདོད་ཟེར་ན། ཉོན་མོངས་པ་མེད་ཀྱང་འཕགས་པ་དགྲ་བཅོམ་པ་མའུ་འགལ་གྱི་བུ་ལྟ་བུ་དེ་དག་ལ། སྔོན་གྱི་ལས་ཀྱི་ནུས་པ་སྨིན་པ་ད་དུང་མཐོང་བ་ཡིན་པས་གནོད་དོ། །དེ་དག་ན་རེ། སྐྱོན་མེད་དེ། སྔར་གྱི་ལས་ཉོན་གྱིས་འཕངས་པའི་སྐུ་ཚེ་འདི་ལ་ལས་ཀྱི་ནུས་པ་འབྱིན་པར་མཐོང་ཡང་། རེ་ཞིག་ཡང་སྲིད་ཉེ་བར་ལེན་པའི་རྒྱུ་སྲེད་པ་ཡིན་པས་དེ་ནི་མེད་ཅིང་། དེའི་ཕྱིར་སྲིད་པ་གཞན་དུ་ཉིང་མཚམས་སྦྱོར་བ་མེད་ཅེས་ངེས་པ་ཉིད་དུ་སྨྲའོ་ཅེ་ན། ཉན་རང་དགྲ་བཅོམ་འདི་ལས་ཉོན་གྱིས་འཕངས་པའི་སྲིད་པ་རྣམས་སུ་ཉིང་མཚམས་མི་སྦྱོར་དུ་ཆུག་ཀྱང་། ཁྱོད་རང་གི་འདོད་པར་ལྟར་མར་མེ་རྒྱུན་ཆད་པ་བཞིན་དུ་ཞི་བར་འགྱུར་བ་མིན་ཏེ་འདི་ལ་ཡིད་ཀྱི་རང་བཞིན་གྱི་ལུས་འགྲུབ་པའི་རྒྱུ་ཚོགས་ཚང་ཞིང་གེགས་མེད་པ་ཡོད་པའི་ཕྱིར། གང་ཞེ་ན། དགྲ་བཅོམ་པའི་རྒྱུད་ཀྱི་སྲེད་པ་འདི་ངར་འཛིན་གྱིས་བསྐྱེད་པའི་ཉོན་མོངས་ཅན་མིན་ཡང་། དཔེར་ན་ཉོན་མོངས་ཅན་མིན་པའི་ཀུན་རྨོངས་ཏེ་ཡུལ་དུས་རྣམ་པས་བསྐལ་པའི་དངོས་པོ་མི་ཤེས་པའི་རྨོངས་པ་ཡོད་པར་འདོད་པ་བཞིན་དུ་སྲེད་པ་ཉོན་མོངས་ཅན་མིན་པའང་ཅི་སྟེ་མེད། དེའི་ཕྱིར་རྒྱུ་ཀུན་རྨོངས་མ་ལོག་པས། དེའི་འབྲས་བུའི་ཆ་ཡང་མི་ལྡོག་སྟེ། འདི་ལྟར་ཚོར་བའི་རྐྱེན་གྱིས་སྲེད་པ་སྐྱེ་བ་ཡིན་ན། ཚོར་བ་ནི་དགྲ་བཅོམ་པ་དེ་དག་ལ་ཡང་ཡོད་པས་སོ། །ཞེས་རྒྱུ་ཚོགས་གྲངས་ཚང་གི་གཏན་ཚིགས་ཀྱིས་བསྒྲུབས་ཏེ། མ་རིག་བག་ཆགས་ཀྱི་ས་དང་། དེའི་དབང་གི་ཟག་པ་མེད་པའི་ལས་དང་། ཡིད་ཀྱི་ལུས། བསམ་མི་ཁྱབ་འགྱུར་གྱི་འཆི་འཕོ་བ་རྣམས་མ་སྤངས་པས་གྲོལ་བ་གཏན་དུ་བ་མིན་ལ། ཕུང་པོ་ཕྲ་བ་རྒྱུན་ཡང་མི་ཆད་པར་ཐེག་ཆེན་ལ་གདོད་འཇུག་དགོས་ཏེ། སྤང་བྱ་ཤིན་ཏུ་ཕྲ་བ་མི་སྤོང་བའང་ཆོས་བདག་མེད་རྫོགས་པར་མ་རྟོགས་ཤིང་བསྒོམ་པ་མེད་པ་དེས་ནའོ། །འོ་ན་སངས་རྒྱས་ལའང་སེང་ལྡེང་གི་ཚལ་བ་ཟུག་པ་སོགས་ལས་ཀྱི་ནུས་པ་མ་མཐོང་ངམ་ཞེ་ན། དེ་ཚུལ་རོལ་མཐོང་བའི་བྱིས་པ་རྣམས་ཀྱི་ངོར་དགོས་པའི་དབང་གིས་ཚུལ་བསྟན་པ་ཙམ་དུ་ཟད་དེ། ཀུན་རྟོག་ཆོས་ཀྱི་དབྱིངས་སུ་ནུབ་ཅིང་སྤྲུལ་པའི་གཟུགས་བརྙན་སྒྱུ་མ་ལྟ་བུ་ལ་ལས་དངོས་སུ་སྨིན་པ་དང་སྡུག་བསྔལ་གྱི་ཚོར་བ་ག་ལ་ཡོད་དེ། ཉན་ཐོས་དགྲ་བཅོམ་པ་རྣམས་ཀྱི་སྐུ་ནི་སྡུག་བདེན་གྱི་ལྷག་མར་ཁྱོད་འདོད་ཅིང་སེམས་མ་འགགས་ལ་སྤྲོས་པ་མཐའ་དག་འགོག་པའི་རྒྱུ་མེད་པ་བཤད་མ་ཐག་པའི་ཕྱིར་རོ། །དེ་དག་ན་རེ། དགྲ་བཅོམ་པ་རྣམས་སྐུ་ཚེའི་འདུ་བྱེད་གཏོང་བའི་ཚེ་ཕུང་ལྔ་རྒྱུན་ཆད་ཅིང་ཞི་བར་ཅིའི་ཕྱིར་མི་འགྱུར་ཏེ། སླར་སྐྱེ་བའི་རྒྱུ་མ་ཚང་བས་སྣུམ་ཟད་ཀྱི་མར་མེ་བཞིན་ནོ་སྙམ་ན། དེ་དག་འཁོར་བར་སྐྱེ་བའི་རྒྱུ་ཉོན་མོངས་པ་མེད་པས་སྲིད་པར་མི་སྐྱེ་ཡང་། ཆོས་ཐམས་ཅད་རང་བཞིན་མེད་པའི་སྟོང་ཉིད་རྫོགས་པར་མ་རྟོགས་པས། དམིགས་པ་དང་ནི་བཅས་པའི་སེམས་དེ་ནི། འཁོར་འདས་སྤང་གཉེན་དུ་འཛིན་པ་ལྟ་བུའི་ཕྱོགས་སམ་སྤྲོས་པ་འགའ་ཞིག་ལ་ནི་གནས་པར་འགྱུར་གྱི་དམིགས་པ་མེད་པར་རབ་ཏུ་ཞི་བ་ནི་མ་ཡིན་ནོ། །དེའི་ཕྱིར་སྤྲོས་པ་དང་བཅས་པའི་སེམས་གང་ཞིག མཐའ་ཐམས་ཅད་སྤངས་པའི་ཟབ་མོ་སྟོང་པ་ཉིད་དང་ནི་བྲལ་བའི་ཕྱིར་སེམས་དེ་རེ་ཞིག་འགོག་པའི་དབྱིངས་སུ་འགགས་པར་གྱུར་པ་དག་སླར་ཡང་སྐྱེ་བར་འགྱུར་ཏེ། དཔེར་ན་འདུ་ཤེས་མེད་པའི་སྙོམས་འཇུག་གམ་དེའི་འབྲས་བུ་འདུ་ཤེས་མེད་པའི་ལྷར་སྐྱེ་བ་བཞིན་ཏེ། དམ་པའི་ཆོས་པདྨ་དཀར་པོ་ལས། འདི་ལྟར་མྱ་ངན་འདས་པར་གང་བརྗོད་པ། །འཁོར་བའི་སྡུག་བསྔལ་འདི་ལས་ཁྱེད་ཐར་ཡང་། །ཁྱེད་ནི་ད་དུང་མྱ་ངན་ཡོངས་མི་འདའ། །སངས་རྒྱས་ཐེག་པ་འདི་ནི་བཙལ་བར་གྱིས། །འདྲེན་པ་རྣམས་ཀྱི་རྣམ་འཕྲུལ་འདི་འདྲ་སྟེ། །ངལ་གསོའི་ཕྱིར་ན་མྱ་ངན་འདས་པར་སྟོན། །ངལ་སོས་ནས་ནི་མྱ་ངན་ཀུན་འདའ་ཕྱིར། །ཐམས་ཅད་མཁྱེན་པའི་ས་ལ་དཀྲི་བར་བྱོས། །ཞེས་དང་། མྱང་འདས་ཆེན་པོའི་མདོ་ལས། དགྲ་བཅོམ་པ་ཡང་ཡོངས་སུ་མྱ་ངན་ལས་འདས་ནས་འགོག་པར་ཞུགས་ཏེ། བསྐལ་པ་སྟོང་ཕྲག་བཅུ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ཡིན་ནོ། །ཞེས་དང་། བྱང་ཆུབ་སེམས་འགྲེལ་ལས། ཉན་ཐོས་དེ་དག་ཇི་སྲིད་དུ། །སངས་རྒྱས་རྣམས་ཀྱིས་མ་བསྐུལ་བ། །དེ་སྲིད་ཡེ་ཤེས་ལུས་གཅིག་གིས། །ཏིང་འཛིན་མྱོས་པས་བརྒྱལ་ཏེ་གནས། །བསྐུལ་ནས་སྣ་ཚོགས་གཟུགས་ཀྱིས་ནི། །སེམས་ཅན་དོན་ལ་དགའ་བྱེད་ཅིང་། །བསོད་ནམས་ཡེ་ཤེས་ཚོགས་བསགས་ནས། །སངས་རྒྱས་བྱང་ཆུབ་ཐོབ་པར་འགྱུར། །ཞེས་གསུངས་ཏེ། ཡིད་ལུས་འཕེན་པའི་རྒྱུ་ཟག་མེད་ཀྱི་ལས་དང་མ་རིག་བག་ཆགས་ཀྱི་ས་རྒྱུད་ལ་ལྡན་ཞིང་དེའི་གཉེན་པོ་སྤྲོས་པ་མཐའ་དག་འགག་པའི་སྟོང་ཉིད་མ་ཐོབ་པའི་ཕྱིར་རོ། །དེས་ན་མྱ་ངན་ལས་འདས་པར་འདོད་པ་རྣམས་ཀྱིས་ཟབ་མོ་སྟོང་པ་ཉིད་བསྒོམ་པར་བྱ་སྟེ། དེ་སྤངས་ནས་གནས་སྐབས་དང་མཐར་ཐུག་གི་མྱང་འདས་གང་ཡང་མི་ཐོབ་བོ། །གཞན་ཡང་ངག་གང་ཞིག་མདོ་སྡེ་ལ་འཇུག འདུལ་བ་ལ་སྣང་། མངོན་པ་དང་མི་འགལ་བ་སྟེ། བརྗོད་བྱ་བསླབ་པ་གསུམ་སྟོན་པ་དེ་ནི། གལ་ཏེ་སངས་རྒྱས་ཀྱི་གསུང་དུ་འདོད་ན་ཡང་དམན་པའི་སྡེ་སྣོད་གསུམ་དང་མི་མཐུན་པས་ཐེག་ཆེན་བཀའ་མིན་ནོ་ཞེ་ན། དགོངས་འགྲེལ་སོགས་ཐེག་ཆེན་གྱི་མདོ་སྡེ་ཕལ་ཆེར་ལས་ཀྱང་བསླབ་པ་གསུམ་པོ་དེ་སྟོན་པས་ན། དེ་དག་ཁྱེད་ཅག་གི་མདོ་དང་མཚུངས་པར་འདོད་པ་མིན་ནམ་ཅི་སྟེ་འདོད་པར་རིགས་སོ། །གལ་ཏེ་གཟུགས་སོགས་མེད་པར་བསྟན་པ་སོགས་དམན་པའི་སྡེ་སྣོད་དུ་མ་གཏོགས་པའི་ཐེག་ཆེན་ཐུན་མིན་གྱི་བརྗོད་བྱ་སྟོན་པའི་མདོ་ཡུམ་ལྟ་བུ་གཅིག་གིས་ནི། ཐེག་ཆེན་གྱི་མདོ་ཐམས་ཅད་སངས་རྒྱས་ཀྱི་བཀའ་མ་ཡིན་པའི་སྐྱོན་དང་བཅས་པར་འགྱུར་ན། དགོངས་འགྲེལ་སོགས་ཁྱེད་ཀྱི་མདོ་དང་བཀའ་ཡི་མཚན་ཉིད་ཚང་བར་མཚུངས་པ་གཅིག་གིས་ཀྱང་ཐེག་ཆེན་གྱི་མདོ་ཐམས་ཅད་ནི། རྒྱལ་བས་གསུངས་པ་ཅིས་མ་ཡིན་ཏེ། རྒྱུ་མཚན་མཚུངས་པས་སོ། །ཡུམ་རྒྱས་པ་སོགས་བཀའ་ཡིན་ན་འོད་སྲུང་ཆེན་པོ་སོགས་ཀྱིས་བརྗོད་བྱ་དེ་རྟོགས་རིགས་ཤིང་། དེ་ལས་བླ་མ་བརྒྱུད་པ་བར་མ་ཆད་པ་ལས་གཟུང་བར་རིགས་ནའང་། དེ་མིན་པའི་ཕྱིར་བཀའ་མ་ཡིན་ནོ་ཞེ་ན། ཐེག་ཆེན་གྱི་ངག་གང་ཞིག་འོད་སྲུང་ཆེན་པོ་ལ་སོགས་པས་ཀྱང་གཏིང་དཔོག་པར་མ་གྱུར་པའི་ཟབ་པ། དེ་ནི་ཁྱོད་ཉིད་ཀྱིས་མ་རྟོགས་པས། སངས་རྒྱས་ཀྱི་བཀའ་མ་ཡིན་ཞེས་སྤོང་བའི་རྒྱུ་མཚན་དེས་འདི་གཟུང་བྱ་མིན་པར་སུ་ཞིག་གིས་བྱེད་དེ། ཐེག་ཆེན་ཉིད་ཟབ་པས་རྟོགས་དཀའ་བའི་ཡོན་ཏན་དུ་ཤེས་ཏེ། མདོ་རྒྱན་ལས། བདག་གིས་མི་ཤེས་སངས་རྒྱས་ཟབ་མོ་མཁྱེན་མ་ཡིན། །ཟབ་མོ་ཅི་ཡི་ཕྱིར་དུ་རྟོག་གེའི་ཡུལ་མ་ཡིན། །ཅི་ཕྱིར་ཟབ་མོའི་དོན་རིག་པ་དག་ཐར་འགྱུར་ཞེས། །བྱ་བ་དེ་ནི་སྐྲག་པའི་གནས་སུ་རིགས་མ་ཡིན། །དམན་པར་མོས་ཤིང་ཁམས་ཀྱང་ཤིན་ཏུ་དམན། །གྲོགས་པོ་དམན་པ་དག་གིས་ཡོངས་བསྐོར་བ། །ཟབ་ཅིང་རྒྱ་ཆེ་ལེགས་པར་བཤད་པའི་ཆོས། །འདི་ལ་གལ་ཏེ་མོས་མེད་གྲུབ་པ་ཡིན། །ཞེས་གསུང་། ཡང་ན་འོད་སྲུང་ལ་སོགས་པས་ཐེག་ཆེན་གྱི་མདོའི་དོན་གཏིང་མ་དཔོག་པ་ཁྱོད་ཀྱིས་མ་རྟོགས་ཏེ་མ་གྲུབ་པས་དེ་རྒྱུ་མཚན་དུ་བྱས་ནས་ཐེག་ཆེན་བཀའ་གཟུང་བྱ་མིན་པར་སུ་ཞིག་གིས་བྱེད་དེ་རྒྱུ་མཚན་མ་གྲུབ་པས་རྒྱུ་མཚན་ཅན་དེ་མི་འགྲུབ་ཅེའོ། །ཡང་དེ་དག་ན་རེ། གལ་ཏེ་སྟོང་ཉིད་མཐོང་ན་འཁོར་བར་གནས་པར་མི་འགྱུར་ཞིང་ལམ་དང་འབྲས་བུ་ལ་མི་བརྩོན་པར་འགྱུར་རོ་ཞེ་ན། མ་ཡིན་ཏེ། དོན་དམ་པར་སྡུག་བསྔལ་མི་སྲིད་ཀྱང་། རང་སེམས་རྨོངས་པ་ཡི་དབང་གིས་སྡུག་བསྔལ་བ་ཅན་སེམས་ཅན་གཞན་གྱི་དོན་དུ་སྒྱུ་མ་ལྟ་བུར་མཐོང་བའི་བློས་སྲིད་པ་ལ་ཆགས་པ་དང་དེ་ལ་སྐྲག་ཅིང་འཇིགས་པའི་དབང་གིས་ཞི་མཐར་ཞེན་པའི་མཐའ་གཉིས་ཀ་ལས་གྲོལ་བ་ཡིན་ཏེ། སྲིད་པར་གནས་ཀྱང་སྲིད་པའི་སྐྱོན་གྱིས་མ་གོས་པར་འདམ་གྱི་པདྨ་བཞིན་དུ་འཁོར་བར་གནས་ཏེ་གཞན་དོན་དཔག་ཏུ་མེད་པ་འགྲུབ་པར་འགྱུར་བ། འདི་ནི་སྟོང་ཉིད་རྟོགས་པའི་འབྲས་བུ་ཡིན་ཏེ། གཞན་དུ་སྲིད་ཞི་མཉམ་ཉིད་མ་རྟོགས་ན་སྲིད་པ་ལ་སྐྱོན་དང་ཞི་བ་ལ་ཡོན་ཏན་གྱི་བློ་ཞི་བ་ཕྱོགས་གཅིག་པར་འགྱུར་རོ། །དོན་བསྡུ་བ་ནི། དེ་ལྟར་ཟབ་མོ་སྟོང་པ་ཉིད་ཀྱི་ཕྱོགས་ལ། གཞུང་བཀའ་མ་ཡིན་ཞིང་དོན་ལམ་མ་ཡིན་ནོ་ཞེས་སུན་འབྱིན་བརྗོད་པ་འདི་ནི་འཐད་པ་མ་ཡིན་ཏེ་ཐེག་གསུམ་གྱི་བྱང་ཆུབ་འདི་ལ་རག་ལས་པའི་ཕྱིར་རོ། །དེས་ན་ལམ་ཟབ་མོ་འདི་ལ་ཐེ་ཚོམ་ཙམ་ཡང་མི་ཟ་བར། གནས་ལུགས་སྟོང་པ་ཉིད་ནི་བསྒོམ་པར་བྱའོ། །དེ་ཡང་ཐར་པ་ལ་བར་དུ་གཅོད་པ་ཆགས་སོགས་ཉོན་མོངས་པའི་སྒྲིབ་པ་དང་། ཐམས་ཅད་མཁྱེན་པ་ལ་གེགས་སུ་གྱུར་པའི་ཤེས་བྱའི་སྒྲིབ་པ་གཉིས་པོ་ཡི། མུན་པའི་ཚོགས་ཀྱི་གཉེན་པོ་ནི་སྟོང་པ་ཉིད་ཡིན་པས། མྱུར་དུ་རྣམ་པ་ཐམས་ཅད་མཁྱེན་པའི་གོ་འཕང་ཐོབ་པར་འདོད་པས། ཟབ་མོ་སྟོང་པ་ཉིད་དེ་ནི་ཇི་ལྟར་དུ་སྒོམ་པར་མི་བྱེད་དེ་ཅིས་ཀྱང་སྒོམ་པར་རིགས་སོ། །དངོས་པོ་གང་ཞིག་སྡུག་བསྔལ་བསྐྱེད་པར་བྱེད་པ། དེ་ལ་ནི་སྐྲག་པ་སྐྱེ་བར་འགྱུར་རིགས་ན་ཡང་། སྟོང་པ་ཉིད་ནི་སྡུག་བསྔལ་ཐམས་ཅད་རྩད་ནས་ཞི་བར་བྱེད་པ་ཡིན་པས། དེ་ལ་འཇིགས་པ་ཇི་ལྟར་སྐྱེ་སྟེ་སྐྲག་པའི་གནས་མིན་པས་སོ། །གཞན་ཡང་། གལ་ཏེ་འཇིགས་པ་པོ་བདག་འགའ་ཞིག་ཡོད་པར་གྱུར་ན་ནི། ཡུལ་ཅི་ཡང་རུང་བ་ལ་འཇིགས་པ་སྐྱེ་བར་འགྱུར་ནའང་། འཇིགས་པ་པོའམ་འཇིགས་མཁན་གྱི་བདག་དེ་ཉིད་བརྟགས་ན་རང་བཞིན་གྱིས་གྲུབ་པ་འགའ་ཡང་ཡོད་པ་མིན་པས། འཇིགས་པར་འགྱུར་བ་པོ་དེ་སུ་ཞིག་ཡིན། འཇིགས་མཁན་མ་གྲུབ་པས་འཇིགས་པར་མི་རིགས་སོ། །དེས་ན་སྟོང་པ་ཉིད་ལ་ཞུམ་པ་སྤངས་ཏེ་མྱུར་དུ་བསྒོམ་པར་གྱིས་ཤིག་ཅེས་མཚམས་སྦྱར་ནས། ལམ་བདག་མེད་དུ་གཏན་ལ་དབབ་པ་ལ། གང་ཟག་གི་བདག་མེད་རིགས་པས་གཏན་ལ་དབབ་པ་ལས། ལྷན་སྐྱེས་ཀྱི་བདག་དགག་པ་ནི། བདག་རྒྱུད་ཀྱི་ཕུང་པོ་ལྔ་པོ་འདི་ལ་བརྟེན་ནས་ངའོ་སྙམ་དུ་མ་བརྟགས་མ་དཔྱད་པར་འཛིན་པའི་འཇིག་ལྟ་འདིའི་ཡུལ་དུ་གྱུར་པའི་བདག་དེ་ཡོད་ན་ནི་ཕུང་པོ་ལྔ་པོ་འདི་ལ་ཡོད་དགོས་ཀྱི། འདི་ལས་གཞན་ཞིག་ཏུ་བདག་ཡོད་པར་མི་འདོད་པས། འདིར་བདག་དེ་ཇི་ལྟར་གྲུབ་པའི་ཚུལ་དཔྱད་ན། རང་གི་ལུས་ཀྱི་སོ་དང་སྐྲ་དང་སེན་མོ་རྣམས་ནི་བདག་མ་ཡིན་ཏེ་བདག་གི་མཚན་ཉིད་དང་མི་ལྡན་པའི་ཕྱིར་རོ། །དེ་བཞིན་དུ་བདག་ནི་རུས་པ་དང་ཁྲག་ཀྱང་མ་ཡིན། སྣབ་མིན་བད་ཀན་ཡང་མ་ཡིན་ཏེ། ཆུ་སེར་དང་ནི་རྣག་ཀྱང་བདག་མིན་ཞིང་། བདག་ནི་ལུས་ཀྱི་ཕྱི་ནང་སྣུམ་བག་གི་རྣམ་པའི་ཞག་དང་ལུས་ཀྱི་རྔུལ་ཡང་མིན་ཏེ། གློ་བ་དང་མཆིན་པ་དག་ཀྱང་བདག་མ་ཡིན། སྙིང་དང་རྒྱུ་མ་ལ་སོགས་པའི་ནང་ཁྲོལ་གཞན་ཡང་བདག་མིན་ཏེ། བདག་ནི་ཕྱི་ས་སྟེ་དྲི་ཆེན་དང་དྲི་ཆུ་སྟེ་གཅིན་ལ་སོགས་པའི་མི་གཙང་བ་རྣམས་ཀྱང་མ་ཡིན་ལ། ཤ་དང་པགས་པ་བདག་མིན་ཏེ། ལུས་ཀྱི་དྲོད་དང་དབུགས་འབྱིན་རྔུབ་སོགས་ལུས་ཕྱི་ནང་གི་རླུང་ཡང་བདག་མ་ཡིན། རྣ་བ་དང་སྣ་སོགས་ཀྱི་བུ་ག་རྣམས་ཀྱང་བདག་མིན་ཏེ། དེ་དག་རྣམས་ནི་ཆ་དུ་མ་སིལ་བུ་བ་རྡུལ་ཕྲན་མང་པོ་ལས་བྱུང་བ་མི་རྟག་པ་ཡིན་པས་དེའི་ཚོགས་པའམ་ཡ་གྱལ་གང་ཡང་བདག་མིན་ནོ། །དེ་བཞིན་ཏུ་རྣམ་པ་ཀུན་ཏུ། མིག་རྣ་བ་སྣ་ལྕེ་ལུས་ཡིད་ཀྱི་རྣམ་པར་ཤེས་པ་དྲུག་པོ་དག་ཀྱང་བདག་མ་ཡིན་ཏེ། དུ་མ་དང་མི་རྟག་པའི་ཕྱིར་རོ། །དེས་ན་སོ་ནས་པགས་པའི་བར་གྱི་ས་དང་ཆུ་ཡི་ཁམས་རྣམས་དང་། དྲོད་མེ་ཡི་ཁམས་དང་། དབུགས་རླུང་གི་ཁམས་དང་། བུ་ག་ནམ་མཁའི་ཁམས་དང་། སེམས་རྣམ་ཤེས་ཀྱི་ཁམས་ཏེ་ཁམས་དྲུག་པོ་འདུས་པ་ལ་གང་ཟག་ཅེས་བཏགས་ཤིང་ཞེན་པར་གྱུར་གྱི། ང་ཞེས་རྫས་སུ་ཡོད་པ་མིན་ཏེ་དཔེར་ན་ཐག་ཁྲ་ལ་སྦྲུལ་དུ་འཁྲུལ་པ་བཞིན་ནོ། །དེས་ན་ལེགས་པར་བརྟགས་ཏེ་ཇི་སྲིད་ཐག་པ་དངོས་སུ་མཐོང་བས་སྦྲུལ་འཛིན་གྱི་བློ་དེ་རང་བཞིན་གྱིས་ཞི་བ་བཞིན་དུ་ཕུང་པོ་ལྔ་པོ་འདི་ལ་བདག་ཏུ་བཟུང་བའི་བདག་ནི་བཏགས་པ་ཙམ་ལས་མེད་དོ་ཞེས་ངེས་པར་ཐེ་ཚོམ་གྱི་དཔྱང་ཐག་ཆོད་པའི་ཉམས་མྱོང་ཁོང་ནས་མ་ཤར་བར་ཡང་ཡང་དཔྱད་པ་གལ་ཆེ་ཞིང་། དེ་ལྟར་བྱུང་ན་དེ་གའི་རྒྱུན་གོམས་པས་བདག་མེད་མངོན་དུ་མཐོང་བར་འགྱུར་རོ། །ཀུན་ཏུ་བཏགས་པའི་བདག་དགག་པ་ལས། བདག་ཤེས་པར་འདོད་པ་དགག་པ་ནི། གྲངས་ཅན་པ་རྣམས་ཀྱིས་ཤེས་བྱ་ཐམས་ཅད་དེ་ཉིད་ཉེར་ལྔར་འདོད་དེ། དེ་ལ་བདག་ནི་ཤེས་རིག་གི་སྐྱེས་བུ་རྣམ་འགྱུར་ཀུན་ཟ་བ་པོ་ཡིན་པ། བྱེད་པ་པོ་མིན་པ། རྟག་པའི་དངོས་པོ། ཡོན་ཏན་གསུམ་དང་བྲལ་བ། བྱ་བ་མེད་པ་སྟེ་ཆོས་ལྔ་ལྡན་དུ་འདོད། དེའི་སྤྱོད་ཡུལ་ཐམས་ཅད་ནི་གཙོ་བོ་ལས་བྱུང་སྟེ། རྡུལ་སྡུག་བསྔལ། སྙིང་སྟོབས་བདེ་བ། མུན་པ་བཏང་སྙོམས་ཀྱི་ཡོན་ཏན་གསུམ་ཆ་མཉམ་པ་ན་གཙོ་བོ་ཞེས་བརྗོད་དེ་རྣམ་འགྱུར་ཉེར་གསུམ་འབྱུང་བའི་རྒྱུ་བུམ་པའི་རྒྱུ་འཇིམ་པ་ལྟ་བུའོ། །དེ་ལས་བློ འམ་ཆེན་པོ་ཞེས་བྱ་བ་མེ་ལོང་ངོས་གཉིས་པ་ལྟ་བུ་དེར་ཕྱི་ནས་དེ་ཙམ་ལྔ་དང་། ནང་ནས་སྐྱེས་བུ་གཉིས་ཀ་སྣང་སྟེ་དེ་གཉིས་འདྲེས་པ་ལྟ་བུའི་མཚམས་སྦྱོར་བར་བྱེད་དོ། །ཡུལ་ལ་ལོངས་སྤྱོད་པ་དེའི་དབང་ལས་ང་རྒྱལ་འབྱུང་སྟེ། དེའང་རྣམ་པར་འགྱུར་བ་ཅན། སྙིང་སྟོབས་ཅན། མུན་པ་ཅན་གྱི་ང་རྒྱལ་ཏེ། དེ་གསུམ་ཡོན་ཏན་གསུམ་གྱི་དབང་གིས་སོ། །དེ་དག་གི་ནང་ནས་ང་རྒྱལ་དང་པོ་ལས། སྒྲ། རེག གཟུགས། རོ། དྲི་སྟེ་དེ་ཙམ་ལྔ་འབྱུང་སྟེ་དེ་དག་གི་དབང་གིས་རིམ་པ་བཞིན། ནམ་མཁའ། རླུང་། མེ། ཆུ། ས་སྟེ་འབྱུང་བ་ལྔ་འབྱུང་ངོ་། །སྙིང་སྟོབས་ཅན་ལས། མིག རྣ་བ། སྣ། ལྕེ། ལུས་ཏེ་ལུས་ཀྱི་དབང་པོ་ལྔ། ངག ལག་པ། རྐང་པ། རྐུབ། མདོམས་ཏེ་ལས་ཀྱི་དབང་པོ་ལྔ་དང་། ཐུན་མོང་དུ་ཡིད་ཀྱི་དབང་པོ་དང་བཅུ་གཅིག་འབྱུང་། མུན་པ་ཅན་གྱིས་དེ་གཉིས་གྲོགས་བྱེད་དོ། །དེ་ལ་གཙོ་བོ་ནི་རྒྱུ་ཡིན་ལ་འབྲས་བུ་མ་ཡིན་པའི་ཕྱིར་རང་བཞིན་ཁོ་ན་ཡིན་པའི་མུ། ཆེན་པོ། ང་རྒྱལ། དེ་ཙམ་ལྔ་སྟེ་བདུན་ནི་འབྲས་བུའང་ཡིན་ལ་རྒྱུ་ཡང་ཡིན་པའི་ཕྱིར་རང་བཞིན་དང་རྣམ་འགྱུར་གཉིས་ཀ་ཡིན་པའི་མུ། དབང་པོ་བཅུ་གཅིག་སོགས་ལྷག་མ་བཅུ་དྲུག་ནི་འབྲས་བུ་ཡིན་ལ་རྒྱུ་མ་ཡིན་པའི་ཕྱིར་རྣམ་འགྱུར་ཁོ་ན་ཡིན་པའི་མུ། སྐྱེས་བུ་ནི་རྒྱུ་འབྲས་གཉིས་ཀ་མ་ཡིན་པས་རང་བཞིན་དང་རྣམ་འགྱུར་གཉིས་ཀ་མ་ཡིན་པའི་མུ་སྟེ་མུ་བཞིའོ། །སྐྱེས་བུ་ནི་ཤེས་པ་ཡིན་ལ། གཞན་ཉེར་བཞི་བེམ་པོ་དང་། གཙོ་བོ་དང་སྐྱེས་བུ་ནི་རྟག་པའོ། །དེ་ལ་དེ་ལྟར་བདེ་སོགས་ནི་ཕྱི་རོལ་གྱི་བེམ་པོའི་རང་བཞིན་ཡིན་གྱི་ནང་ཤེས་པའི་རྫས་སུ་མེད་ཀྱང་། བློའམ་ཆེན་པོ་ལ་སྣང་ནས་ཡོད་པ་བདག་གིས་ལོངས་སྤྱོད་པའི་ཚེ་བདག་ཤེས་པ་དང་དབྱེ་མ་ནུས་པ་བདག་གི་བར་རློམ་པ་ཙམ་དུ་འདོད་དོ། །དེ་ལྟར་འདི་པས་བདག་ཤེས་པར་འདོད་ལ། བྱེ་བྲག་པ་སོགས་ཀྱིས་བེམ་པོར་འདོད་པས་དེ་གཉིས་བཀག་པས་གཞན་ཀུན་ཁེགས་པར་འགྱུར་རོ། །དེ་དགག་པ་ལ། གྲངས་ཅན་གྱི་འདོད་པ་ལྟར་བདག་ཤེས་པའི་རང་བཞིན་རྟག་པ་ནི་མེད་དེ། གལ་ཏེ་སྒྲ་འཛིན་པ་ཡི་ཤེས་པ་དེ་རྟག་པ་ཞིག་ཡིན་ན་ནི། ཡུལ་ཡོད་པ་དང་མེད་པའི་དུས་ཐམས་ཅད་ཀྱི་ཚེ་ན་སྒྲ་འཛིན་པར་འགྱུར་ཏེ། ཇི་ལྟར་སྒྲ་འཛིན་བཞིན་པའི་སྐབས་དེ་ཉིད་ཀྱི་ཤེས་པ་དེ་དེ་བཞིན་དུ་རྟག་པར་འདོད་པའི་ཕྱིར་རོ། །ཁོ་ན་རེ། དུས་ཐམས་ཅད་དུ་སྒྲ་མི་འཛིན་པ་ནི་ཤེས་པ་མི་རྟག་པས་མ་ཡིན་ཀྱང་། ཡུལ་སྒྲ་དེ་ད་ལྟ་ཡུལ་ན་མེད་པས་སོ་ཞེ་ན། ལན་དུ། ཡུལ་ཤེས་བྱ་སྒྲ་ལྟ་བུ་དེ་མེད་ན་ཡུལ་ཅན་དེས་ཅི་ཞིག་རིག་པའམ་ཤེས་ནས། རྒྱུ་མཚན་གང་གིས་ན་ཡུལ་དེ་དང་དེ་ཡི་ཤེས་པ་ཞེས་རྗོད་པར་བྱེད། གལ་ཏེ་ཡུལ་དེ་བཟུང་བའམ་ཤེས་པ་མེད་ཀྱང་དེ་ཤེས་པ་ཡིན་ཞེས་རྣམ་པར་འཇོག་ན་ནི། ཤིང་ཡང་སྒྲ་སོགས་ཤེས་པའི་ཤེས་པ་ཡིན་པར་ཐལ་བར་འགྱུར་ཏེ། ཡུལ་མ་ཤེས་ཀྱང་ཤེས་པ་ཡིན་པའི་ཕྱིར་རོ། །དེས་ན་ཡུལ་ཤེས་བྱ་ཉིད་ཡུལ་དུ་ཉེ་བར་གནས་པ། མེད་པར་དེའི་ཡུལ་ཅན་གྱི་ཤེས་པ་དེ་ཡང་མེད་ཅེས་སུ་ངེས་ཏེ། ཤེས་པ་ནི། ཡུལ་གང་དང་གང་ཤེས་པ་དེ་ལ་ལྟོས་པ་ཅན་ཡིན་གྱི། ཡུལ་མ་ཤེས་ཀྱང་ཤེས་པ་ཡིན་པ་ནི་མི་སྲིད་དོ། །དེའི་ཕྱིར་ཡུལ་སྒྲ་མེད་པ་བཞིན་དུ་སྒྲ་དེ་ལས་སྐྱེས་པའི་ཡུལ་ཅན་སྒྲའི་ཤེས་པའང་རྒྱུ་ལོག་པས་ད་ལྟ་ག་ལ་ཡོད། དེ་བཞིན་དུ་སྒྲའི་སྐད་ཅིག་གི་ཡུལ་ཅན་ཡང་སོ་སོ་ཡིན་པས་ཤེས་པ་སྐད་ཅིག་གཉིས་པར་སྡོད་མི་སྲིད་དོ། །ཁོ་ན་རེ། སྐྱོན་མེད་དེ། སྔར་སྒྲ་ཤེས་པ་དེ་ཉིད་ཀྱིས་ནི་ཕྱིས་གཟུགས་སོགས་གཞན་དག་ཤེས་པས་ན། ཤེས་པ་རྟག་ཀྱང་ཤེས་བྱ་སོ་སོར་དམིགས་པའི་ཁྱད་ཙམ་མོ་ཞེ་ན། ལན་དུ། སྔར་གྱི་སྒྲ་ཤེས་ཉིད་རྟག་པས་ན་གཟུགས་སོགས་གཞན་མཐོང་བ་དེ་ཡི་ཚེ་སྒྲ་ཐོས་པའང་ཅི་སྟེ་མིན་ཏེ་སྔར་གྱི་སྒྲ་འཛིན་རང་གི་ངོ་བོ་མ་དོར་བའི་ཕྱིར་རོ། །གལ་ཏེ་དེ་ཚེ་མི་ཐོས་པ་ནི་ཡུལ་སྒྲ་མི་ཉེ་བའི་ཕྱིར་སྙམ་ན། ཡུལ་མི་ཉེ་བ། དེས་ན་ཡུལ་དེ་ཡི་ཤེས་པའང་མེད་དེ་རིགས་པ་སྔར་བཞིན་ནོ། །གཞན་ཡང་ཁྱོད་བདག་ཤེས་རིག་གི་སྐྱེས་བུ་ཐམས་ཅད་ལ་ཁྱབ་པར་འདོད་ན། རྣམ་འགྱུར་མཐའ་དག་ལ་ཉེ་བ་དང་མི་ཉེ་བའང་ག་ལ་འཐད། གཞན་ཡང་སྒྲ་འཛིན་གྱི་རང་བཞིན་གང་ཡིན་པ་དེ་གཟུགས་འཛིན་པར་ཇི་ལྟར་འགྱུར་ཏེ། དེ་གཉིས་ངོ་བོ་ཐ་དད་པའི་ཕྱིར། ཡུལ་སྒྲ་གཟུགས་ལྟ་བུ་ཐ་དད་པ་ཡིན་ན་དེའི་ཡུལ་ཅན་ཡང་སྔ་མའི་རང་བཞིན་མ་དོར་བར་ཕྱི་མ་འགྱུར་བའི་སྐབས་ག་ལ་ཡོད་དེ། ཤེལ་ཚོན་དཀར་པོས་བསྒྱུར་བ་མ་བཏང་བཞིན་ནག་པོར་འགྱུར་མི་ཤེས་པ་བཞིན་ནོ། །རྣམ་འགྲེལ་ལས། གཅིག་གིས་གཉིས་ཤེས་མ་ཡིན་ཏེ། །དབང་པོའི་སེམས་ནི་ངེས་ཕྱིར་དང་། །ཞེས་པ་བཞིན། འདིས་ཤེས་པ་རྟག་པ་དང་གཅིག་བདེན་འགོག་པ་སྟེ། གཞན་དུ་ཤེས་པའི་རྒྱུད་གཅིག་ལ་སྒྲ་ཤེས་ན་གཟུགས་མི་ཤེས་བསམ་པར་མི་བྱ་སྟེ་རྟོག་མེད་ཀྱི་ཤེས་པ་རིགས་མི་མཐུན་པ་དུ་མ་དུས་གཅིག་ཏུ་འབྱུང་རུང་བའི་ཕྱིར་འོན་ཀྱང་རིགས་མི་མཐུན་པའི་ཤེས་པ་དག་ནང་ཕན་ཚུན་གཅིག་མིན་ཏེ། ཡིན་ན་ཁ་དོག་ལྔ་ལྡན་གྱི་ཁྲ་འཛིན་དང་སྔོ་འཛིན་ཁྱད་མེད་པར་ཐལ་ལོ། །ཡང་དེ་དག་ན་རེ། དཔེར་ན་སྐྱེས་བུ་གཅིག་ཕ་ཡང་ཡིན་ལ་བུ་ཡང་ཡིན་པ་བཞིན་ཡུལ་སྒྲ་དང་གཟུགས་ལྟ་བུ་ནི་མི་འགལ་ཏེ། རྣམ་འགྱུར་གྱི་ངོས་ནས་གཟུགས་གང་ཡིན་པ་དེ། རང་བཞིན་གྱི་ངོས་ནས་སྒྲ་ཡང་ཡིན་ཏེ། དེ་གཉིས་ཀ་རང་བཞིན་གཅིག་པའི་ཕྱིར། དེས་ན་གཟུགས་འཛིན་གྱི་ཚེ་ན་སྒྲའི་རྣམ་འགྱུར་འཛིན་པའི་ཤེས་པ་མེད་ཀྱང་། སྒྲའི་རང་བཞིན་འཛིན་པའི་ཤེས་པ་ཡོད་པས་སྒྲ་ཤེས་མི་རྟག་པར་ཐལ་བའི་སྐྱོན་མེད་དོ་ཟེར་ན། དེའི་དཔེ་མ་གྲུབ་སྟེ་སྐྱེས་བུ་གཅིག་ཉིད་¡eནི་རྩ་བར་སྣང་ཞུ་མཆན། ¡fཕ་དང་བུ་ཉིད་དུ་བཞག་པ་ནི། ལྟོས་ས་ཐ་དད་ལ་ལྟོས་ནས་བཏགས་པ་ཙམ་ཡིན་ཏེ་དོན་དམ་པར་རང་གི་ངོ་བོས་ཕ་བུ་གཉིས་ཀར་ཡང་དག་པར་གྲུབ་པ་ཉིད་ནི་མིན་ཏེ། དེ་གཉིས་རང་རང་གི་ངོ་བོས་བདེན་པར་གྲུབ་ན་གཅིག་ཅིག་ཤོས་ཀྱི་གནས་སྐབས་སུ་འགྱུར་མི་སྲིད་དོ། །གལ་ཏེ་དོན་དམ་པར་ཕ་ཡང་ཡིན་ལ་བུ་ཡང་ཡིན་པ་ཞིག་ཡོད་ན་ཡོན་ཏན་གསུམ་གྱི་སྟེང་དུ་ཡོད་དགོས་ཏེ། འདི་ལྟར་ཁྱོད་ཀྱི་དོན་དམ་པ་ནི་ཡོན་ཏན་གསུམ་ལས་གཞན་དུ་ཁས་མ་བླངས་པས། ཡོན་ཏན་གསུམ་གྱི་རང་བཞིན་མཆོག །མཐོང་བའི་ལམ་དུ་འགྲོ་མ་ཡིན། །མཐོང་བའི་ལམ་དུ་གང་གྱུར་པ། །སྒྱུ་མ་ལྟ་བུར་ཤིན་ཏུ་གསོག །ཅེས་འདོད་པའི་ཕྱིར། དེ་ལྟ་ནའང་སྙིང་སྟོབས་དང་རྡུལ་དང་ནི། མུན་པ་ཡི་ངོ་བོ་ནི་བུ་མིན་ལ་ཕ་ཡང་མིན་ཏེ་རྣམ་འགྱུར་ཐམས་ཅད་དེའི་རང་བཞིན་གཅིག་ཡིན་ན་ལྟོས་ས་དང་ལྟོས་ཆོས་ཐ་དད་དུ་མ་གྲུབ་པའི་ཕྱིར་རོ། །དེས་ན་ཁྱོད་དོན་དམ་པའི་ཡོན་ཏན་གསུམ་གྱི་རང་བཞིན་ལ་བསམས་ཏེ་གཟུགས་འཛིན་གྱི་ཚེ་ནའང་སྒྲ་འཛིན་ཡོད་དོ་བསམ་ན་ཐམས་ཅད་ཀྱི་ཚེ་ན་ཐམས་ཅད་འཛིན་པའམ། ཡང་ན་སྒྲའི་དུས་ནའང་སྒྲ་འཛིན་པར་མི་འགྱུར་ཏེ། རྣམ་འགྱུར་ཐམས་ཅད་རང་བཞིན་གཅིག་པས་ཁ་ཅིག་གི་ཚེ་ན་འཛིན་པ་དང་ཁ་ཅིག་གི་ཚེ་མི་འཛིན་པ་མི་སྲིད་དོ། །དོན་ཡང་མ་གྲུབ་སྟེ་གཟུགས་འཛིན་པ་དེ་སྒྲ་ཤེས་ཀྱི་རང་བཞིན་དུའང་ཡོད་ན་སྣང་དུ་རུང་བས་དམིགས་དགོས་ན། གཟུགས་འཛིན་དེ་ནི་སྒྲ་འཛིན་དང་ལྡན་པའི། རང་བཞིན་དུ་ནི་ནམ་ཡང་མཐོང་བ་མ་ཡིན་ལ། དེ་བཞིན་དུ་ཡུལ་གཟུགས་ལ་སྒྲའི་ཤེས་ཡོད་པར་ཡང་མི་མཐོང་ངོ་། །ཡང་ཁོ་ན་རེ། གཟུགས་འཛིན་དེ་སྒྲ་འཛིན་གྱི་རང་བཞིན་དུ་མ་མཐོང་ཡང་ཤེས་པའི་ངོ་བོ་གཅིག་ཡིན་ཏེ། དཔེར་ན་གར་མཁན་གཅིག་ཉིད་སྔ་དྲོ་ལྷ་དང་ཕྱི་དྲོ་གནོད་སྦྱིན་གྱི་ཆ་ལུགས་བྱས་པ་ལྟ་བུར་སྔར་གྱི་སྒྲ་ཤེས་དེ་ཉིད་ཚུལ་གཞན་གཟུགས་ཤེས་ཀྱི་རྣམ་པར་སྣང་བ་ཉིད་གྱིས། གཟུགས་དེ་ཉིད་མཐོང་ངོ་ཞེ་ན། སྔར་གྱི་ཤེས་པ་དེ་རྟག་པ་མིན་ཏེ། སྔ་མ་ལས་གནས་སྐབས་གཞན་ཐོབ་པའི་ཕྱིར། གལ་ཏེ་ཚུལ་སྔ་མ་ལས་གཞན་པའི་ཚུལ་ཐོབ་ནས་དེ་གཉིས་སོ་སོར་སྣང་བར་གྱུར་ཀྱང་ད་དུང་སྔར་གྱི་དེ་ཉིད་ཡིན་གྱི་གཞན་མིན་ན། དེ་འདྲའི་གཅིག་ཉིད་དེ་ནི་སྔོན་མེད་པའི་གཅིག་སྟེ། སྔར་འཇིག་རྟེན་ཤེས་བརྗོད་ཀྱི་ཡུལ་དུ་མ་བྱུང་བ་ཞིག་གོ །གལ་ཏེ་སོ་སོར་མཐོང་ཡང་གཅིག་ཡིན་ན་ཐམས་ཅད་རིལ་བོ་གཅིག་ཏུ་ཐལ་ལོ། །དེས་ན་གར་མཁན་ཡང་རྣམ་པ་གཞན་དང་གཞན་ཐོབ་པའི་སྐབས་སོ་སོ་ཐ་དད་པའི་སྐད་ཅིག་གཞན་ཡིན་གྱི་དོན་དམ་པར་གཅིག་པུ་ནི་མ་ཡིན་ནོ། །གལ་ཏེ་རྣམ་འགྱུར་སྒྲ་ལ་སོགས་པས་ཁྱད་པར་དུ་བྱས་པའི་ཤེས་པའི་ཚུལ་གཞན་དང་གཞན་དུ་སྣང་བ་དེ་ནི་གནས་སྐབས་ལ་ལྟོས་པའི་ལྟར་སྣང་ཙམ་ཡིན་གྱི་བདེན་པ་མིན་ཏེ་ཤེལ་ཚོན་གྱི་བསྒྱུར་བ་གཤིས་ལ་མི་བདེན་པ་བཞིན་ནོ་ཞེ་ན། ཡུལ་གྱིས་ཁྱད་པར་དུ་བྱས་པའི་ཆ་དེ་གཤིས་ངོར་མི་བདེན་དུ་ཆུག་ཀྱང་། རང་གི་ངོ་བོ་བདེན་པ་དེ་ཡི་རང་གི་རང་བཞིན་གང་ཡིན་པ་སྨྲོས་ཤིག དེ་དག་ན་རེ། ཡུལ་གྱིས་ཁྱད་པར་དུ་མ་བྱས་པའི་ཤེས་པ་ཙམ་ཞིག་ནི་ཤེས་པ་སྔ་ཕྱི་ཐམས་ཅད་ལ་རྗེས་སུ་འགྲོ་བས་ཤེས་པ་ཙམ་གྱི་གཅིག་ཉིད་དེ་ཡིན་ནོ་ཅེ་ན་དེ་ལྟ་ན། སྐྱེས་བུ་ཀུན་ཀྱང་གཅིིག་ཉིད་དུ་ཐལ་བར་འགྱུར་ཏེ་ཤེས་རྒྱུད་ཐམས་ཅད་ལ་ཤེས་པ་ཡིན་པ་ཙམ་རྗེས་སུ་མི་འགྲོ་བ་མི་སྲིད་པས་སོ། །གཞན་ཡང་སེམས་པ་ཅན་བདག་དང་སེམས་མེད་གཙོ་བོ་སོགས་ཉེར་བཞི་བོ་དེ་དག་ཀྱང་། གཅིག་ཉིད་དུ་འགྱུར་ཏེ་གང་གི་ཕྱིར་ན་དེ་ཐམས་ཅད་ཡོད་པ་ཙམ་ཉིད་དུ་མཚུངས་ཤིང་ཁྱད་པར་མེད་པས་སོ། །གལ་ཏེ་གང་གི་ཚེ་བྱེ་བྲག་ཏུ་གྱུར་པའི་སྒྲ་འཛིན་སོགས་གནས་སྐབས་ཐ་དད་པ་དག་མི་བདེན་པའམ་ཕྱིན་ཅི་ལོག་ཡིན་ཀྱང་། བྱེ་བྲག་ཐམས་ཅད་ཁྱད་མེད་དུ་འདྲ་བའི་རང་བཞིན་གཅིག་པུ་བ་ཞིག་ཅི་སྟེ་མེད་སྙམ་ན། དེ་ནི་ཁྱད་པར་རྣམས་གཅིག་ཏུ་འཁྲུལ་པའི་སྤྱི་ཡོད་འཛིན་གྱི་ལོག་རྟོག་སྟེ། འདི་ལྟར་བྱེ་བྲག་ཐམས་ཅད་བསལ་བ་དེ་ཡི་ཚེ་དེའི་ཕ་རོལ་ན་ཐུན་མོང་དུ་འདྲ་བའི་རྟེན་ནམ་སྤྱི་གཅིག་པུ་ཞིག་གང་ཡིན་ཏེ་ཅི་ཡང་མེད་དོ། །བདག་བེམ་པོར་འདོད་པ་དགག་པ་ནི། རིགས་པ་ཅན་སོགས་ཤེས་བྱ་ཚིག་གི་དོན་དྲུག་ཏུ་འདོད་དེ། རྫས་དང་ཡོན་ཏན་ལས་དང་སྤྱི། །བྱེ་བྲག་འདུ་བ་རྣམ་པ་དྲུག །ཅེས་པ་ལྟར་རྫས་ལ་དགུ་སྟེ། བདག དུས། རྡུལ། ཕྱོགས། ནམ་མཁའ་སྟེ་རྟག་པའི་རྫས་ལྔ། ས། ཆུ། མེ། རླུང་སྟེ་མི་རྟག་པའི་རྫས་བཞི་རྣམས་ཏེ་ལས་དང་ཡོན་ཏན་གྱི་རྟེན་བྱེད་པ་ཞིག་ཏུ་འདོད། ཡོན་ཏན་ལ་ཉེར་བཞི་སྟེ། གྲངས། ཚད། ཕྲད་པ། ཕྱེ་བ། ཐ་དད། ཐ་མི་དད་དེ་ཐུན་མོང་སྤྱིའི་ཡོན་ཏན་དྲུག་དང་། སྒྲ་ནམ་མཁའ། རེག་རླུང་། གཟུགས་མེ། རེག་ཆུ། དྲིི་ས་སྟེ་འབྱུང་བའི་ཡོན་ཏན་ལྔ་དང་བཅུ་གཅིག་ནི་རྫས་གཞན་གྱི་ཡོན་ཏན། བདེ། སྡུག འདོད། སྡང་། ཆོས། ཆོས་མིན། འབད་རྩོལ། འདུ་བྱེད་པའི་ཤུགས། མིག་སོགས་དབང་པོ་ལྔ་བཅས་བཅུ་གསུམ་ནི་བདག་ལ་བརྟེན་པའི་ཡོན་ཏན་ནོ། །ལས་ནི། བརྐྱང་བསྐུམ་འདེགས་འཇོག་འགྲོ་བ་ལྔ། སྤྱི་ལ་ཁྱབ་པ་དང་། ཉི་ཚེ་གཉིས། བྱེ་བྲག་ནི་ཁྱད་པར་དུ་བྱེད་པའི་རང་བཞིན། འདུ་བ་ནི་ཕན་ཚུན་འབྲེལ་བ་ལྟ་བུ་སྟེ་ཐ་དད་དང་ཐ་མི་དད་དུ་འདུ་བ་སོགས་ལས་བརྩམས་ཏེ་དབྱེ་བ་མང་ངོ་། །བདག་ནི་ནམ་མཁའ་ལྟ་བུར་ཁྱབ་པ་དང་རྟག་པ་ཉིད་དུ་འདོད་པས་ཤེས་པ་མིན་ཏེ། ཤེས་པ་ཡིན་ན་མི་རྟག་ཅིང་མ་ཁྱབ་པར་འགྱུར་བས་ན་བདག་ལ་ཤེས་པ་མེད་ཀྱང་། ཤེས་པ་དང་འདུ་བས་ན་བདེ་བ་སོགས་བདག་གི་ཡིན་པར་ཞེན་གྱི། དོན་ལ་བདེ་སོགས་ནང་གི་བེམ་པོ་ཡིན་པར་འདོད་དོ། །བདག་ཐམས་ཅད་ལ་ཁྱབ་པར་ཡོད་དེ་བདག་གི་ཡོན་ཏན་མཐོང་བས་སོ་ཞེས་སྒྲུབ་པར་བྱེད་དོ། །དེ་ལ་སེམས་མེད་པ་ཡང་བདག་མིན་ཏེ། སེམས་མེད་པ་ཉིད་ཀྱི་ཕྱིར་བུམ་པ་དང་སྣམ་བུ་ལ་སོགས་པ་བཞིན། བདག་ནི་ལས་བྱེད་པ་པོ་དང་བདེ་སྡུག་གི་རྟེན་དུ་འདོད་ན་སེམས་མེད་པ་ནི་ནམ་ཡང་བདེ་སོགས་ཀྱི་རྟེན་དུ་མི་རིགས་པའི་ཕྱིར་རོ། །འོན་ཏེ་བདག་རང་ཉིད་སེམས་ཀྱི་ངོ་བོར་མེད་ཀྱང་སེམས་རྫས་གཞན་དང་མཚུངས་པར་ལྡན་པའི་ཕྱིར་ན། དེའི་བྱིན་གྱིས་བརླབས་ནས་ཡུལ་ཤེས་པ་འགྱུར་རོ་ཞེ་ན་མི་རིགས་ཏེ། བདག་གིས་ཡུལ་མི་ཤེས་པའམ་ཤེས་པ་མེད་པར་ཁས་བླངས་ཀྱི་དམ་བཅའ་ཉིད་འཇིག་པར་ཐལ་ཏེ། དེ་ཡུལ་ཤེས་པའི་རང་བཞིན་དུ་གྱུར་པའི་ཕྱིར། མི་རྟག་པར་ཐལ་ལོ། །ཅི་སྟེ་བདག་དེ་ལ་ནམ་ཡང་འགྱུར་བ་མེད་པར་རྟག་ན་ནི། སེམས་པས་ཀྱང་བདག་དེ་ལ་ཡུལ་ཤེས་པའི་བྱ་བ་ཅི་ཞིག་བྱས་ཏེ། ཅི་ཡང་བྱེད་མི་ནུས་ཏེ། ནམ་མཁའ་ཚོན་གྱིས་བསྒྱུར་མི་ནུས་པ་བཞིན་ནོ། །དེ་ལྟར་བེམ་པོ་ཡིན་པས་ཡུལ་ཤེས་པ་མེད་ཅིང་རྟག་པས་ན་འབྲས་བུ་བསྐྱེད་པའི་བྱ་བ་དང་བྲལ་བ་དེ། བདག་ཏུ་འདོད་པ་ནི། ནམ་མཁའ་འདི་བདག་ཡིན་ནོ་ཞེས་རློམ་སྟེ་བདག་ཏུ་བྱས་པར་འགྱུར་ཏེ། ཀྱེ་མ་རིགས་པ་ཅན་གྱི་བློ་གྲོས་ལ་ལྟོས་ཤིག དེ་ལྟར་བཀག་པ་ལ་རྩོད་པ་སྤོང་བ་ལས། ལས་འབྲས་མི་འཐད་པར་རྩོད་པ་སྤོང་བ། བདག་ཡོད་དུ་སྨྲ་བ་རྣམས་ན་རེ། གལ་ཏེ་ཁྱོད་ཀྱི་འདོད་པ་ལྟར་བདག་དེ་ནི་ཡོད་པ་མིན་ན། ལས་འབྲས་ཀྱི་འབྲེལ་བ་སྟེ་ལས་བྱེད་པ་པོ་ཉིད་ཀྱིས་འབྲས་བུ་མྱོང་བའི་རྣམ་བཞག་འདི་རིགས་པ་མིན་པར་འགྱུར་ཏེ། ལས་བྱེད་པའི་བདག་ནི་འཇིག་རྟེན་ཕ་རོལ་དུ་འགྲོ་མི་སྲིད་པས་འབྲས་བུའི་དུས་མེད་ཅིང་། ཕུང་པོ་ནི་སྐད་ཅིག་གིས་སྐྱེ་འགག་བྱེད་པས་ན་ལས་བྱས་པའི་སྐད་ཅིག་དེ་ནས་ནི་བྱེད་པ་པོ་འགག་ཅིང་ཞིག་པས་ན། ལས་དེ་བྱེད་པ་པོ་ཉིད་ལ་ནི་སྨིན་མི་སྲིད་ལ། དེ་ལ་མ་སྨིན་ན་གཞན་གྱི་ལས་གཞན་ལ་སྨིན་པ་མི་འཐད་པས་སུ་ཡི་མྱོང་བར་བྱ་བའི་ལས་སུ་འགྱུར་ཞེ་ན། ལན་དུ་རེ་ཞིག་མགོ་བསྒྲེ་བ། བྱ་བ་བྱེད་པའི་གནས་སྐབས་དང་འབྲས་བུ་མྱོང་བའི་གནས་སྐབས་ཀྱི་རྟེན་ནམ་གཞི་རུ་གྱུར་པའི་ཕུང་པོ་དག་ནི་ཐ་དད་པ་ནི་རང་རེ་གཉིས་ཀས་འདོད་པའི་ཕྱིར་དང་། ཕུང་པོ་ལས་གཞན་པའི་བདག་རྟག་པར་འདོད་པའི་ལུས་དེར་ཡང་བདག་དེ་ནི་སེམས་མེད་པའམ་རྟག་པ་ཡིན་པས་ན། བྱ་བ་ཐམས་ཅད་དང་བྲལ་བས་བྱེད་པ་མེད་པར་ཡང་ཚད་མས་གྲུབ་པའི་ཕྱིར། རྩོད་པ་འདི་ཡུ་བུ་གཉིས་ཀ་ལ་གྲུབ་པས། གཉིས་ཀས་སྤང་དགོས་ན། འདིར་ཁོ་བོ་ལ་བརྩད་པ་དོན་མེད་པ་མ་ཡིན་ནམ། འོན་ཀྱང་ཁོ་བོའི་ལུགས་ལ་ནི་སྤང་བར་ནུས་ཀྱི་ཁྱོད་ཀྱིས་མ་ཡིན་ནོ་ཞེས་སྟོན་པ། ལས་བྱེད་པ་པོ་ཉིད་ལ་སྨིན་ཞེས་པ་འདིའང་རྒྱུད་གཅིག་གི་དབང་དུ་བྱས་པའི་རྣམ་གཞག་སྟེ། རྒྱུ་མ་འགག་པར་ལྡན་བཞིན་དུ་དེའི་འབྲས་བུ་དང་བཅས་པ་ཞེས། རྒྱུ་འབྲས་གཉིས་ཀ་དུས་མཉམ་དུ་མཐོང་བ་དེ་ནི་སྲིད་པ་མ་ཡིན་ཏེ་རྒྱུ་ལས་འབྲས་བུ་འབྱུང་དགོས་པའི་ཕྱིར་རོ། །དེས་ན་འབྲས་བུ་འབྱུང་བའི་དུས་རྒྱུ་འགགས་པས་ཁྱབ་ཀྱང་། རྟེན་འབྲེལ་བསླུ་མེད་ཀྱི་དབང་གིས་འབྲས་བུ་འབྱུང་བར་ནི་ངེས་ལ། དེའང་རྒྱུའི་ཚོགས་པ་གང་དུ་ཚང་བ་གང་ཟག་དེ་ཉིད་ཀྱི་རྒྱུད་དུ་སྨིན་གྱི་གཞན་ལ་ནི་མ་ཡིན་ནོ། །དེས་ན་ཕུང་ལྔའི་རྒྱུན་རིགས་འདྲ་བར་མ་ཆད་པའི་རྒྱུད་གཅིག་ལ་ནི་བརྟེན་ནས་སུ། ལས་བྱེད་པ་པོ་དང་། འབྲས་བུ་ལ་ལོངས་སྤྱོད་པ་པོ་ཞེས་བྱ་བར་རྒྱུད་གཅིག་པའི་རྣམ་བཞག་མཛད་ནས་བསྟན་ཏེ་འཇིག་རྟེན་པའི་བློའི་ཚུལ་ལུགས་ཐམས་ཅད་དེ་ལྟར་གནས་པ་ཡིན་ནོ། །དེ་ལྟར་ན་རྒྱུད་གཅིག་ཡིན་པ་དེ་ཉིད་ཀྱིས་བདག་གཅིག་ཏུ་ཡོད་པ་མིན་ནམ་ཞེ་ན་མིན་ཏེ། རྒྱུད་ནི་ཕྲེང་སོགས་བཞིན་ཏུ་བཏགས་པ་སྟེ་དོན་ལ་མི་སྲིད་དོ། །དེའང་གཟུགས་རྒན་གཞོན་སྐྱེ་བ་སྔ་ཕྱི་མི་གཅིག་པར་རྟོགས་པར་སླ་མོད། སེམས་ཀྱི་དབང་དུ་བྱས་ཏེ་གསུངས་པ། འདས་པའི་སེམས་འགགས་ཟིན་པ་དང་མ་འོངས་པ་ཡི་སེམས་མ་སྐྱེས་པས་ན་བདག་མིན་ཏེ་དེ་གཉིས་ནི་ད་ལྟ་མེད་པའི་ཕྱིར། བདག་ཡོད་པར་འདོད་པ་དང་འགལ་བས་སོ། །འོན་ཏེ་སྐྱེས་ནས་མ་འགགས་པ་ད་ལྟ་བའི་སེམས་འདི་བདག་ཡིན་ནོ་སྙམ་ན། ད་ལྟའི་སྐྱེས་སེམས་དེ་འགག་སྟེ་ཞིག་པ་ན་ཡང་བདག་མེད་པར་འགྱུར་ན། ཁྱོད་ཀྱི་བདག་ནི་སྔ་མ་ནས་འདིར་འོང་། འདི་ནས་ཕ་རོལ་དུ་འགྲོ་བར་འདོད་པས་ན་སྐྱེས་སེམས་ཀྱང་བདག་མིན་ཏེ། དེས་ན་རྒྱུད་བདག་མ་ཡིན་ནོ། །དེས་ན་དཔེར་ན་ཆུ་ཤིང་གི་སྡོང་པོ་ཁོང་སྟོང་གསོབ་ཅན་དེ་དག ཆ་ཤས་ཕྱེ་ན་སྙིང་པོ་སྲ་མཁྲེགས་ཀྱི་ཆ་འགའ་ཡང་རྙེད་རྒྱུ་མེད་པ། དེ་བཞིན་དུ་རྣམ་པར་དཔྱད་པ་ཡིས། བཙལ་ན་བདག་ཀྱང་དེ་ཁོ་ན་ཉིད་དམ་ཡང་དག་པར་གྲུབ་པ་མིན་ནོ། །སྙིང་རྗེ་མི་འཐད་པར་རྩོད་པ་སྤོང་བ། དེ་དག་ན་རེ། གལ་ཏེ་བདག་གམ་སེམས་ཅན་ཡོད་པ་མིན་ན། བྱང་ཆུབ་སེམས་དཔས་སུ་ལ་དམིགས་ནས་སྙིང་རྗེ་བསྐྱེད་པར་བྱ་སྟེ་ཡུལ་མེད་པའི་ཕྱིར་ཞེ་ན། ལན་དུ་གནས་ཚུལ་དོན་དམ་གྱི་ངོར་སྙིང་རྗེའི་ཡུལ་དང་བྱེད་པོ་མི་དམིགས་ཀྱང་། སྣང་ཚུལ་ཀུན་རྫོབ་ཏུ་དེ་ལྟར་སྣང་བ་བསྙོན་མི་ནུས་པས། རྨི་ལམ་ལྟ་བུའི་སྡུག་བསྔལ་གྱི་སྣང་བ་རྒྱུན་ཆད་པའི་མི་གནས་པའི་མྱང་འདས་ཀྱི་ས ར་སེམས་ཅན་རྣམས་གྲོལ་བར་བྱེད་པའི་དགོས་པའམ་འབྲས་བུའི་དོན་དུ་བདག་གིས་སེམས་ཅན་རྣམས་དགྲོལ་བར་བྱའོ་ཞེས་ཁས་བླངས་པའི། སེམས་ཅན་ནི་དོན་དམ་པར་ཡོད་པས་མིན་ཏེ་རྨོངས་པས་བདག་ཏུ་བརྟགས་པ་གང་ཡིན་པ་དེའི་དབང་གིས་ཡིན་ནོ། །དེས་ན་བྱང་ཆུབ་སེམས་དཔས་བདག་མེད་མཐོང་ཡང་སྙིང་རྗེའི་ཡུལ་སེམས་ཅན་གྱིས་དེ་ལྟར་མ་རྟོགས་པས་བདག་ཡོད་པ་ལྟ་བུར་དོན་མེད་པར་སྡུག་བསྔལ་གྱི་སྣང་བ་འཁོར་ཡུག་ཏུ་མྱོང་བ་ཡོད་པས་ན། དེ་ལ་དམིགས་ནས་སྙིང་རྗེ་འཇུག་སྟེ། འཕགས་པ་རྣམས་བདག་དོན་ལ་མི་ཆགས་ཤིང་གཞན་དོན་ལ་སྤྲོ་བའི་བློ་ཤུགས་ཀྱིས་འབྱུང་བ་དང་། གཞན་གྱི་སྡུག་བསྔལ་ཡང་གཉིད་འཐིབ་པོ་བཞིན་ཏུ་སེལ་ནུས་པར་མཐོང་བའི་ཕྱིར་རོ། །ཡང་དེ་དག་ན་རེ། སེམས་ཅན་མེད་ན་གང་གི་དོན་དུ་འབད་པའི་འབྲས་བུ་སངས་རྒྱས་དེ་སུ་ཡིས་ཐོབ་པ་ཡིན་ཏེ། དེས་ན་འབྲས་བུའི་དོན་དུ་ཁས་བླངས་པ་ཞེས་པའང་མི་རིགས་སོ་ཞེ་ན། ལན་དུ། དོན་དམ་པར་བདེན་ཏེ་ཐོབ་པོ་སེམས་ཅན་དང་ཐོབ་བྱའི་འབྲས་བུ་བདེན་གྲུབ་ཏུ་མེད་པར་མྱ་ངན་ལས་འདས་པ་དང་མ་འདས་པའང་དེ་ཉིད་དུ་ན་ཁྱད་པར་མེད་ཅེས་འདོད་དོ། །འོན་ཀྱང་སེམས་ཅན་རང་རང་གི་སྣང་ཚུལ་གྱི་ངོར་ཡོད་དེ་བཤད་མ་ཐག་པ་ལྟར་རྨོངས་པས་བདག་ཏུ་ཞེན་པ་ལས་ཀུན་ཉོན་འཁོར་བའི་ཕྱོགས་དང་། དེ་ལྡོག་པའི་རྣམ་བྱང་གི་ཚུལ་གཉིས་ཀ་གྲུབ་ཅིང་། མྱང་འདས་ཞེས་གཞན་ན་མེད་ཀྱི་ཕྱིན་ཅི་ལོག་ཏུ་བློ་ནོར་བའི་རྣམ་རྟོག་ཟད་པ་ཙམ་ལ་བཏགས་པར་འདོད་པ་ཡིན་ནོ། །དེས་ན་དོན་དམ་པར་སྲིད་དང་ཞི་བར་བདེན་པར་མ་གྲུབ་པའི་ཕྱིར་འཆིང་གྲོལ་འཐད་ཀྱི་གཞན་དུ་ན་ནམ་ཡང་མ་ཡིན་ནོ། །འོ་ན་ཐོབ་མེད་ལ་ཐོབ་པར་རེ་ནས་ལམ་སོགས་ལ་སློབ་པས་ཅི་བྱེད་དེ་རྨོངས་པ་ནི་རྣམ་པ་ཀུན་ཏུ་བཟློག་བྱ་མ་ཡིན་ནམ་ཞེ་ན། མཐར་ཐུག་སངས་རྒྱས་ཀྱི་ས་ན་གཟུང་འཛིན་གྱི་སྤྲོས་པ་མཐའ་དག་ཞི་བས་སྲིད་ཞིར་མངོན་ཞེན་གྱི་ཤེས་སྒྲིབ་ཕྲ་མོ་འདི་ཡང་ལྡོག་པར་འགྱུར་མོད། དེ་ལྟར་མ་གྱུར་གྱི་བར་ལ་གནས་སྣང་རྣམ་པ་ཀུན་ཏུ་མཐུན་པ་མིན་པའི་ཕྱིར། དོན་དམ་པར་ཐོབ་ཏུ་མེད་ཀྱང་ཀུན་རྫོབ་ཏུ་འཐོབ་བྱར་མི་འགལ་བས་ན། སེམས་ཅན་གྱི་སྡུག་བསྔལ་ཉེ་བར་ཞི་བའི་དོན་དུ། འབྲས་བུ་མི་གནས་པའི་མྱང་འདས་ལ་ཀུན་རྫོབ་ཙམ་དུ་ཐོབ་བྱར་ལྟ་བའི་རྨོངས་པ་ནི་བཟློག་པར་མི་བྱ་སྟེ་འདི་ལ་བརྟེན་དགོས་པའི་ཕྱིར་རོ། །འོ་ན་བདག་ཏུ་རྨོངས་པའང་དགག་པས་ཅི་བྱ་ཞེ་ན། དེ་གཉིས་མི་མཚུངས་ཏེ་འབྲས་བུ་དོན་དུ་གཉེར་བའི་བློ་དེས་ནི་སྡུག་བསྔལ་ཟད་པར་བྱས་ནས་རང་ཡང་འགག་པར་བྱེད་དེ་ཤིང་ལས་བྱུང་བའི་མེས་ཤིང་རང་ཉིད་བསྲེགས་པ་བཞིན་ནོ། །འཁོར་བའི་སྡུག་བསྔལ་ཐམས་ཅད་ཀྱི་རྒྱུ་རུ་གྱུར་པ་ཡི་བདག་ཏུ་འཛིན་པའམ་ངའོ་སྙམ་པའི་ང་རྒྱལ་ནི། བདག་ཏུ་བཟུང་བའི་རྨོངས་པས་འཕེལ་བར་འགྱུར་བས་དེ་ནི་བཟློག་པར་བྱ་བ་ཁོ་ནའོ། །ཡང་ཁོ་ན་རེ། ཁྱོད་བཏགས་པའི་བདག་ལས་བློ་ལྡོག་མི་ནུས་པ་དེ་བཞིན་དུ་རང་བཞིན་གྱིས་གྲུབ་པའི་བདག་དེ་ལས་ཀྱང་ཡུལ་ཅན་བློ་གཏན་དུ་བཟློག་པ་མེད་དེ་ཐོག་མེད་ནས་གཤིས་ལ་ཞུགས་པའི་ཕྱིར་ཅེ་ན། དེ་གཉིས་མི་མཚུངས་ཏེ་བཏགས་པ་ཙམ་རྟེན་ནས་འབྱུང་བའི་དབང་གིས་སྣང་བ་ལ་སོ་སྐྱེའི་ངོར་མི་སྣང་བར་སྒྲུབ་བྱེད་ཀྱི་རིགས་པ་མེད་ལ་བཟློག་ཀྱང་མི་དགོས་མོད། རང་བཞིན་གྱིས་གྲུབ་པར་འཛིན་པ་ནི་ཕྱིན་ཅི་ལོག་ཏུ་བློ་འཁྲུལ་པ་སྟེ། དེ་ནི་དངོས་པོའི་གནས་ཚུལ་རྟོགས་པའི་བློ་བདག་མེད་སྒོམ་པ་ཡིས་སྤང་ནུས་ཏེ། རྣམ་འགྲེལ་ལས། སེམས་ཀྱི་རང་བཞིན་འོད་གསལ་ཏེ། །དྲི་མ་རྣམས་ནི་གློ་བུར་པ། །ཞེས་གསུངས། དེས་ན་སྣང་བས་མུན་པ་བཞིན་གཉེན་པོ་མཆོག་ཡིན་ནོ་སྟེ་ཡང་དག་པའི་ཚད་མ་དང་ལྡན་པ་དེ་ཉིད་སྟོབས་དང་ལྡན་པའི་ཕྱིར་རོ། །ཆོས་ཀྱི་བདག་མེད་རིག་པས་གཏན་ལ་དབབ་པ་ལ། དྲན་པ་ཉེ་བར་བཞག་པ་བཞི་ལས། ལུས་དྲན་པར་ཉེ་བར་བཞག་པ་ལ། ཡན་ལག་ཅན་མེད་པར་བསྟན་པ་ནི། ལུས་ཞེས་པའང་བརྟགས་པ་ཙམ་སྟེ་རང་བཞིན་གྱིས་གྲུབ་པ་མེད་དེ། འདི་ལྟར་སྐྱེ་མཆེད་རྫོགས་པའི་ལུས་ཞེས་རིལ་པོ་གཅིག་པུའི་རྣམ་པར་བཟུང་བ་དེ་ནི་ཡོད་ན་ལག་པ་སོགས་ལ་ཡོད་དགོས་ནའང་། བོལ་གོང་སོགས་རྐང་པ་དང་བྱིན་པ་སྟེ་རྗེ་ངར་ཡང་ལུས་མིན་ལ། དེ་བཞིན་དུ་བརླ་དང་རྐེད་པའང་ལུས་མ་ཡིན་ཞིང་། ལྟོ་བ་དང་རྒྱབ་ཀྱང་ལུས་མིན་ཏེ། བྲང་དང་དཔུང་པའང་ལུས་མ་ཡིན། རྩིབ་ལོགས་དང་ལག་པའང་ལུས་མིན་ཏེ། མཆན་ཁུང་དང་ཕྲག་པའང་ལུས་མ་ཡིན། རྒྱུ་མ་ལ་སོགས་པའི་ནང་ཁྲོལ་རྣམས་ཀྱང་ལུས་དེ་ཡི་ངོ་བོ་མིན་ལ། མགོ་དང་མགྲིན་པའང་ལུས་མིན་ཏེ་དེ་དག་རེ་རེ་ནས་ལུས་ཀྱི་མཚན་ཉིད་དང་མི་མཐུན་པའི་ཕྱིར། དུར་ཁྲོད་དུ་འཐོར་བའི་ལུས་ཀྱི་དུམ་བུ་བཞིན་ད་ལྟ་འབྲེལ་བར་སྣང་ཡང་རུང་ཕན་ཚུན་འདྲེས་པ་མེད་པར་རང་ས་ན་ཡོད་ན་དེ་རེ་རེ་ལུས་སུ་ག་ལ་འགྱུར་ཏེ་ལག་པ་སོགས་བཅད་ཀྱང་ལུས་གནས་པར་འདོད་པས་སོ། །དེས་ན་ལག་སོགས་ཆ་ཤས་དུ་མའི་ཚོགས་པ་ཅན་འདི་ལ་ལུས་ཞེས་པ་དེ་ནི་གང་ཞིག་ཡིན། དེ་དག་རེ་རེ་ལུས་མིན་ཡང་ལུས་ནི་དེ་དག་ལ་ཁྱབ་ནས་ཡོད་དོ་སྙམ་ན། ལུས་གཅིག་གི་ཆ་ཤས་ཀྱིས་འདི་ཀུན་ལ་ཁྱབ་པ་ཡིན་ནམ། ཆ་ཤས་ཅན་ལུས་དུ་མས་རེ་རེ་བཞིན་དུ་ཁྱབ་པ་ཡིན། གལ་ཏེ་ལུས་ཞེས་པ་འདི་ལག་སོགས་ཡན་ལག་ཐམས་ཅད་ལ། ཆ་ཤས་སམ་ཕྱོགས་རེ་ཡིས་ནི་གནས་པར་གྱུར་པར་འདོད་ན། ལུས་དེའི་ཆ་ཤས་རྣམས་ལག་སོགས་ཆ་སོ་སོ་ལ་གནས་པར་འགྱུར་དུ་ཆུག་མོད། ཆ་ཤས་ཅན་ལུས་དེ་རང་ཉིད་ནི་གང་ལ་གནས་ཏེ་ལག་སོགས་རེ་རེ་ནས་བསལ་བའི་ཤུལ་ན་ཁྱབ་བྱེད་ཀྱི་ལུས་མ་དམིགས་པས་སོ། །གལ་ཏེ་བདག་ཉིད་ཀུན་ལྡན་གྱི་ལུས། རིལ་བོའམ་ཆ་ཚང་བ་རེ་ལག་པ་སོགས་ཡན་ལག་རྣམས་ལ་གནས་ན་ནི། ལག་སོགས་ཡན་ལག་དེ་དག་གི་གྲངས་ཇི་སྙེད་པ། དེ་སྙེད་ཀྱི་ནི་གྲངས་དང་མཉམ་པའི་ལུས་དུ་མ་རྣམས་སུ་ཡོད་པར་འགྱུར་ནའང་ལུས་རིལ་པོ་གཅིག་པུ་ཞིག་ཏུ་འཛིན་པས་དེ་ལྟ་བུ་ནི་མི་སྲིད་དོ། །དེས་ན་སྐྱེ་མཆེད་དྲུག་གི་ཕྱི་དང་དེ་དག་གི་ནང་ཀུན་ཏུ་རིགས་པས་བཙལ་ན་ལུས་མ་དམིགས་པའི་ཕྱིར་མེད་ན། ཇི་ལྟར་ན་ལག་པ་སོགས་ལ་ལུས་ཡོད་པར་འགྱུར་ཏེ་མེད་དོ། །ལག་སོགས་རྣམས་ལས་ལུས་ཀྱི་གདགས་གཞི་གཞན་ནི་མེད་ན། ལུས་དེ་ནི་ཇི་ལྟར་དུ་ཡོད་པ་ཡིན་ཏེ་མེད་དོ། །དེ་ལ་རྐང་པ་ལུས་མིན་སོགས་ཀྱིས་ཡན་ལག་དང་གཅིག་མིན་པར་བསྟན། གལ་ཏེ་ལུས་འདི་སོགས་ཀྱིས་ཡན་ལག་དང་འབྲེལ་བ་ཅན་ཐ་དད་དུ་མེད་པར་བསྟན་ཏོ། །དེས་ན་ལུས་ཞེས་གྲུབ་པ་མེད་ཀྱང་ལག་པ་སོགས་ཡན་ལག་གི་ཚོགས་པ་ལ་བརྟེན་ནས་རྨོངས་ཤིང་འཁྲུལ་པ་ཡིས་ནི་ལུས་སུ་འཛིན་པའི་བློ་འབྱུང་བར་འགྱུར་ཏེ། དཔེར་ན་མི་དང་འདྲ་བའི་དབྱིབས་སུ་བཀོད་པའི་ཁྱད་པར་གྱིས། ཐོ་ཡོར་ལ་ནི་མི་རུ་འཁྲུལ་པའི་བློ་འབྱུང་བ་བཞིན་ནོ། །འདི་ན་ཇི་སྲིད་དབང་པོ་སོགས་དབྱིབས་ཀྱི་ཁྱད་པར་རྐྱེན་ཚོགས་པ་དེ་སྲིད་དུ། ལུས་འདི་ནི་སྐྱེས་བུ་ལྟར་སྣང་བ་ཡིན་གྱི་རྐྱེན་མ་ཚང་ན་སྐྱེས་པའི་ལུས་སུ་མི་འཇོག་སྟེ་མཚན་འགྱུར་བའམ། མེར་མེར་པོ་དང་། བསྲེགས་ཏེ་ཐལ་བ་བྱས་པའི་སྐབས་བཞིན། དེ་དང་འདྲ་བར་བུད་མེད་ཀྱང་ཡིན་ནོ། །དེ་བཞིན་དུ་ཇི་སྲིད་ལག་པ་སོགས་ཡན་ལག་ལ། ལུས་སུ་གདགས་པའི་རྐྱེན་ཕན་ཚུན་འབྲེལ་བར་གྱུར་པ་སོགས་དེ་དག་ཡོད་པ་དེ་སྲིད་དུ་ལག་པ་སོགས་དེར་ལུས་སུ་སྣང་གི་རང་གི་ངོ་བོ་ཉིད་ཀྱིས་ལུས་སུ་ཡོད་པ་མིན་ཏེ་ཤ་དང་རུས་པའི་དུམ་བུ་བཞིན་ནོ། །ཡན་ལག་མེད་པར་བསྟན་པ། ལུས་མེད་ཀྱང་ལག་སོགས་ཡན་ལག་ནི་མངོན་སུམ་དུ་མཐོང་བས་ཡོད་དོ་ཞེ་ན། ལུས་བདེན་པར་མ་གྲུབ་པ་དེ་བཞིན་སོར་མོའི་ཚོགས་སོ་སོ་བའི་ཡན་ལག་ཙམ་གྱི་ཚོགས་པ་ཡིན་པའི་ཕྱིར། དེ་ལ་ཡན་ལག་ཅན་ལག་པ་ཞེས་བཏགས་ནའང་རྫས་གཅིག་ཏུ་བདེན་པ་གང་ཞིག་ཡིན་པར་འགྱུར་ཏེ་མི་འགྱུར་ལ། སོར་མོ་དེ་ཡང་ཚིགས་ཀྱི་ཚོགས་ཡིན་པའི་ཕྱིར་བདེན་པར་མེད་ཅིང་། ཚིགས་ཀྱང་རང་གི་ཕྱོགས་སོ་སོའི་ཆ་རུ་ཕྱེ་བས་དུ་མར་འགྱུར་ཏེ། སྟེང་གི་ཆ་འོག་མིན་ལ། འོག་གི་ཆ་སྟེང་མིན་པ་སོགས་མ་འདྲེས་པར་གནས་སོ། །ཆ་དེ་ཡང་རགས་པའི་རྡུལ་ཕྲན་གྱི་བར་དུ་ཕྱེ་བ་བྱས་ཏེ། རྡུལ་ཕྲ་རབ་དེ་ལ་ཡང་ཕྱོགས་སོ་སོའི་ཆ་རུ་སྣང་བའི་དབྱེ་བ་ཡིས། དུ་མར་འགྱུར་ཞིང་མཐར་གཏུགས་ན་ཕྱོགས་ཀྱི་དབྱེ་བ་གང་དུའང་ཆ་གཅིག་བདེན་པར་གྲུབ་པ་མི་རྙེད་དེ་ཆ་ཤས་དང་བྲལ་བར་འགྱུར་བའི་ཕྱིར་ཏེ། དྲུག་གིས་གཅིག་ཅར་སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་ནི་གོ་གཅིག་ན། །གོང་བུའང་རྡུལ་ཕྲན་ཙམ་དུ་འགྱུར། །ཞེས་པ་བཞིན། དེས་ན་ལག་པ་སོགས་ལུས་ཀྱི་ཡན་ལག་ཐམས་ཅད་དང་གཞན་བུམ་པ་སོགས་ཀྱི་གཟུགས་སྣང་ཐམས་ཅད་ཀྱང་རགས་པ་ཕྲ་བ་དང་། ཕྲ་མོ་རྡུལ་དང་། རྡུལ་རྡུལ་ཕྲ་རབ་དང་། དེ་ཕྱོགས་ཆའི་དབྱེ་བས་གཞལ་ན་ནམ་མཁའ་བཞིན་སྟོང་པར་འགྱུར་གྱི་གཟུགས་སུ་གྲུབ་པ་མེད་པ་དེས་ན་རྡུལ་ཕྲ་རབ་ཏུ་ཡང་གྲུབ་པ་མེད་དོ། །དེ་ལྟར་བདེན་པར་མ་གྲུབ་པ་རྨི་ལམ་ལྟ་བུ་ཡི། གཟུགས་ལ་དེ་ཁོ་ན་ཉིད་ཀྱི་དཔྱོད་པ་དང་ལྡན་པའི་གང་ཟག་སུ་ཞིག་ཆགས་རིགས་ཏེ་མི་རིགས་སོ། །གང་གི་ཚེ་དེ་ལྟར་ལུས་རང་བཞིན་མེད་པ་རུ་ངེས་པ་དེ་ཡི་ཚེ་དེའི་བྱེ་བྲག་སྐྱེས་པ་གང་ཡིན་ལ་བུད་མེད་གང་ཡིན་ཏེ་བདེན་པར་མེད་དོ། །ཚོར་བ་དྲན་པ་ཉེ་བར་བཞག་པ་ལས། ཚོར་བའི་ངོ་བོ་ལ་དཔྱད་པ། ཚོར་བ་སྡུག་བསྔལ་འདི་དེ་ཁོ་ན་ཉིད་དུ་རང་གི་ངོ་བོ་སེམས་ཀྱི་རྒྱུད་ལ་ཡོད་ན་ནི། དེས་ཅི་སྟེ་རྒྱུད་ལ་རབ་ཏུ་དགའ་བ་སྐྱེ་བ་ལ་མི་གནོད་དེ་དགའ་བ་སྐྱེ་བར་མི་འགྱུར་ནའང་དེ་ལྟར་མ་ངེས་པའི་ཕྱིར། བདེ་བའང་དེས་མཚོན་ཏེ་ཤེས་ནུས་པས་ལོགས་སུ་སྨོས་མི་དགོས་སོ། །དེས་ན་དེ་གཉིས་ཕན་ཚུན་འགལ་བས་གང་གི་རང་བཞིན་དུ་གྲུབ་པ་དེ་ཅིག་ཤོས་སུ་མི་རུང་ངོ་། །དེས་ན་བློ་ཡི་སྟེང་ན་ཚོར་བ་བདེན་གྲུབ་མེད་པར་བསྟན་ནས། ད་ནི་ཕྱི་ཡུལ་གྱི་དབང་དུ་བྱས་ཏེ། གྲངས་ཅན་པ་སོགས་འདོད་པ་ལྟར་ཕྱི་ཡུལ་གྱི་སྟེང་ནའང་བདེན་པར་མ་གྲུབ་སྟེ་ཡུལ་གཟུགས་བཟང་བ་དང་རོ་མངར་བ་སོགས་བདེ་བའི་རང་བཞིན་ཡིན་ན་བུ་ཤི་བའི་མྱ་ངན་གྱིས་གདུང་བ་དང་འཇིགས་པས་མྱོས་པ་སོགས་ལ། ཟས་ཞིམ་པ་དང་ལྟད་མོ་སོགས་ཀྱིས་ཅི་སྟེ་དགའ་བར་མི་བྱེད་དེ་དེ་ཉིད་ལ་བདེ་བ་ཡོད་པའ་ིཕྱིར། མེའི་ཚ་བ་བཞིན་ནོ། །དེ་དག་ན་རེ། སྡུག་བསྔལ་དེ་ཁོ་ན་ཉིད་དུ་བློ་ལ་མེད་པ་མིན་ཀྱང་ནང་གི་རབ་ཏུ་དགའ་བ་ཁྱད་པར་ཅན་སྟོབས་དང་ལྡན་པས་ཟིལ་གྱིས་མནན་པའི་ཕྱིར། གལ་ཏེ་སྡུག་བསྔལ་དེ་མྱོང་བ་མ་ཡིན་ཏེ། དཔེར་ན་ཉི་མས་རྒྱུ་སྐར་བཞིན་ནོ་ཞེ་ན། གང་ཞིག་ཉམས་སུ་མྱོང་བའི་བདག་ཉིད་མིན་པ། དེ་ནི་ཚོར་བ་ཇི་ལྟར་ཡིན་ཏེ། ཚོར་བའི་མཚན་ཉིད་མེད་པའི་ཕྱིར་རོ། །རིགས་པ་འདིས་གདུང་ལྡན་ཞིམ་སོགས་མི་དགའ་བའང་གདུང་བ་སྟོབས་ཆེན་པོས་ཟིལ་གྱིས་མནན་ནས་མི་མྱོང་བའོ་ཟེར་ནའང་འདི་བཞིན་དཔྱད་པར་བྱའོ། །དེ་དག་ན་རེ། དགའ་བ་སྟོབས་ལྡན་མྱོང་བཞིན་པའི་སྐབས་སུ་སྡུག་བསྔལ་གཏན་མ་མྱོང་བ་མིན་ཀྱང་སྡུག་བསྔལ་ཕྲ་མོ་ཉིད་དུ་ཡོད་པས་དེ་མྱོང་བ་མི་ཤེས་པ་ཡིན་ཏེ། བུ་རམ་གྱི་ཁུ་བ་མང་པོའི་ནང་ཚྭ་ཆུའི་ཐིགས་པ་ཕྲ་མོ་ལྷུང་བ་བཞིན་ནོ་ཞེ་ན། རྒྱུད་གཅིག་ལ་དེ་གཉིས་ནུས་མཚུངས་སུ་འགྲོགས་པ་མེད་དེ་གལ་ཏེ་ཡོད་ན་བདེ་སྡུག་གཉིས་དུས་མཉམ་པར་རྒྱུད་གཅིག་ལ་སྣང་དུ་རུང་བ་ལ་དེ་མ་དམིགས་པ་དང་། ཁྱོད་ཀྱི་སྡུག་བསྔལ་འདི་ཡི་རགས་པ་སྟོབས་ཆེན་པོའི་ཆ་ནི་བདེ་བས་བསལ་བར་འདོད་པ་མིན་ནམ། དེས་ན་ཕྲ་བའང་ཅིས་མི་སེལ། ཡང་ཁོ་ན་རེ། སྡུག་བསྔལ་ཕྲ་མོར་ཡོད་ཀྱང་དེ་ནི་རང་གི་ནུས་པ་འབྱིན་མ་ནུས་པར་བདེ་བ་སྟོབས་ཆེན་པོས་ཁ་བསྒྱུར་ཏེ་སོང་བས། བདེ་བ་ཆེན་པོ་དེ་ལས་གཞན་དགའ་བ་ཙམ་སྟེ་དགའ་བ་ཕྲ་མོའི་རྣམ་པར་མྱོང་བ་ཡིན་ནོ་ཞེ་ན། དགའ་བ་ཙམ་དུ་གཏོགས་པའི་ཕྲ་མོ་ཉིད་དེ་ཡང་དགའ་བ་དེའི་རིགས་ཡིན་གྱི་སྡུག་བསྔལ་ནམ་ཡང་མ་ཡིན་ན་དེ་ལྟར་བརྟགས་པས་ཅི་ཞིག་བྱ། གལ་ཏེ་འགལ་རྐྱེན་བདེ་བ་སྟོབས་ལྡན་སྐྱེས་པས་ན། རྒྱུ་མ་ཚང་བའི་དབང་གིས་སྡུག་བསྔལ་ནི་དེའི་ཚེ་སྐྱེས་པ་མིན་ནོ་ཞེ་ན་ནི། ཚོར་བ་དེ་ནི་དངོས་པོ་ལ་གྲུབ་པ་མེད་པར་ནང་གི་རྟོག་པ་ཡིས་བདེ་སོགས་སུ་མངོན་པར་ཞེན་པའམ་བཏགས་ཉིད་ཡིན་ཞེས་བྱ་བར་དངོས་པོའི་སྟོབས་ལས་གྲུབ་པ་མིན་ནམ་སྟེ་ཡིན་ནོ། །དེས་ན་བདེ་སྡུག་ཞེས་གྲུབ་གྲུབ་མོ་ཞིག་ཏུ་བལྟས་ནས་དེ་ལ་འདོར་ལེན་གྱི་ཆེད་དུ་འབད་པ་ནི་འཁྲུལ་པ་སྟེ། རང་གི་བློས་དེ་ལྟར་མ་བརྟགས་ཀྱི་བར་དུ་བདེ་སྡུག་རང་མཚན་པ་ཕྱི་ནང་ཀུན་ཏུ་མི་གནས་ཏེ། དཔེར་ན་སྐྱུག་ནད་ཅན་དང་བཀྲེས་པ་ལ་མར་ཁུ་སོགས་ཀྱི་དཔེས་མཚོན་པ་བཞིན་དུ་རང་གི་རྟོག་པའི་དབང་གིས་དེར་འགྱུར་བ་སྟེ་བདེ་སོགས་ཀྱི་དངོས་པོ་རང་མཚན་པ་མེད་དོ། །རྒྱུ་མཚན་དེ་ཉིད་ཀྱི་ཕྱིར་ན་ཚོར་བ་ལ་མངོན་པར་ཞེན་ནས་འདོར་ལེན་གྱི་རྣམ་པར་རྟོག་པ་འདི་ཡི་ནི། གཉེན་པོར་བཤད་མ་ཐག་པའི་རྣམ་པར་དཔྱོད་པ་འདི་ལྟ་བུ་བསྒོམ་པར་བྱ་སྟེ། དེའི་གཉེན་པོ་ནི་འདི་ལས་གཞན་མེད་པའི་ཕྱིར་རོ། །དེ་འདྲའི་རྣམ་པ་ལ་བརྟགས་ཤིང་དཔྱད་པའི་ཞིང་ས་བཟང་པོ་ལྟ་བུ་ལས་བྱུང་བ་ཡི། ཚོར་བ་རང་བཞིན་མེད་པའི་དོན་ལ་མཉམ་པར་བཞག་པའི་བསམ་གཏན་དེ་ནི་རྣལ་འབྱོར་པ་ཡི་ལོངས་སྤྱོད་པའི་ཟས་ཡིན་ཏེ། རྣལ་འབྱོར་པ་རྣམས་ཀྱིས་ཆགས་བྲལ་གྱི་དགའ་བ་ཉམས་སུ་མྱོང་ཞིང་རྟོགས་པའི་ལུས་རྒྱས་པར་བྱེད་པའི་ཕྱིར་རོ། །ཚོར་བའི་རྒྱུ་ལ་བརྟག་པ། འདི་ལྟར་ཡུལ་དབང་ཤེས་གསུམ་འདུས་ཏེ་རེག་པ་དང་། དེ་ལས་ཚོར་བ་འབྱུང་བས་ན། དབང་དོན་དེ་དང་འཕྲད་པའམ་རེག་པའི་སྐབས་བར་དང་བཅས་པའམ་བར་མེད་པ་གང་ཞིག་ཡིན་ཏེ། གལ་ཏེ་ཡུལ་ཅན་མིག་སོགས་དབང་པོ་དང་ཡུལ་གཟུགས་སོགས་དོན་རྣམས་བར་དང་བཅས་པ་ཡིན་ན། དེ་དག་གང་དུ་འཕྲད་པར་འགྱུར་ཏེ་བར་ཆོད་པའི་ཕྱིར་ཤར་ནུབ་ཀྱི་རི་བཞིན་ནོ། །བར་མེད་པར་འདོད་ན་ཡང་དེ་གཉིས་གཅིག་ཉིད་དུ་འགྱུར་བའི་ཕྱིར་དེ་ལ་ནི་ཡུལ་ཅན་གང་ཞིག་ཡུལ་གང་དང་འཕྲད་པར་འགྱུར་ཏེ། འཕྲད་བྱ་ཕྲད་བྱེད་གཉིས་མེད་པས་སོ། །གལ་ཏེ་ཐལ་མོ་ཕན་ཚུན་སྦྱར་བ་བཞིན་དུ་ཕྲད་པ་ཅི་སྟེ་མེད་སྙམ་ན། དེ་ནི་རྟོག་པས་ཞེན་པ་ཙམ་ལས་ཡང་དག་པར་མིན་ཏེ། དབང་དོན་རགས་པ་ནི་ཕྱོགས་ཐམས་ཅད་ཀྱིས་ཕྲད་པ་མེད་དེ། གང་མདུན་ཕྲད་ན་རྒྱབ་མ་ཕྲད་པ་ལྟ་བུའོ། །དེའི་ཚུལ་གྱིས་དཔྱད་ན། རྡུལ་གཞན་གྱིས་བར་དུ་ཆོད་པའི་རྡུལ་རྣམས་ནི་མ་ཕྲད་ལ། མཐར་བར་མ་ཆོད་པའི་དབང་དོན་གྱི་རྡུལ་ཕྲ་རབ་ཕྲད་དགོས་ཀྱང་། དེ་ལ་རྡུལ་ཕྲན་རྣམས་རྡུལ་ཕྲན་གཞན་ལ་འཇུག་པ་སྟེ་གཅིག་གི་ནང་དུ་གཅིག་ཐིམ་པ་མེད་དེ། དེ་ཡི་རྒྱུ་མཚན་ནི་རྡུལ་དེ་ལ་ཁོང་སྟོང་གི་སྐབས་མེད་པ་དང་བོངས་ཚད་མཉམ་པ་ཡིན་པའི་ཕྱིར། མ་ཞུགས་པ་ལ་ཕན་ཚུན་འདྲེས་པ་མེད་ཅིང་། མ་འདྲེས་པ་ལ་ཕྱོགས་ཀུན་གྱི་ཕྲད་པ་མེད་དོ། །དེས་ན་རྡུལ་ཕྲན་ཆ་མེད་པ་དེ་ལའང་ཕྲད་པ་ཡོད་དོ་ཞེས་བྱ་བ་འདི་ཇི་ལྟར་འཐད་པར་འགྱུར་ཏེ་ཕྱོགས་གཅིག་དང་ཕྱོགས་ཐམས་ཅད་ཀྱིས་ཕྲད་པ་གཉིས་ཀ་དེ་ལ་མི་སྲིད་དོ། །དེས་ན་འཕྲད་པ་ཡིན་པ་དང་ནི་ཆ་མེད་པ་ཡིན་པར། གལ་ཏེ་མཐོང་ན་ཁྱོད་ཀྱིས་བསྟན་པར་གྱིས་ཤིག་ཅེས་བསྟན་མི་ནུས་པའི་ཚད་དུ་དགོངས་སོ། །དེས་ཡུལ་དབང་ཤེས་གསུམ་འདུས་ཞེས་པའི་དབང་དོན་འདུས་པ་མེད་པར་བསྟན་ནས། ཡང་ན་རྣམ་ཤེས་ནི་རྡུལ་ཚོགས་པའི་ལུས་མེད་པ་ཡིན་ན་དེ་ལ་ནི། ཡུལ་དང་ཕྲད་པ་འཐད་པ་མ་ཡིན་པ་ཉིད་དེ་ནམ་མཁའ་དང་ལག་པ་ཕྲད་མི་སྲིད་པ་བཞིན་ནོ། །གལ་ཏེ་ཕྲད་ཅིང་རེག་པ་མེད་ཀྱང་ཡུལ་དབང་ཤེས་གསུམ་ཚོགས་པ་ཡོད་དོ་སྙམ་ན། ཐམས་ཅད་ཚོགས་པ་ཞེས་བྱ་བ་འདིའང་དཔྱད་ན་དངོས་པོར་བདེན་པར་མེད་པའི་ཕྱིར་ཏེ། དེ་བཞིན་སོར་མོའི་ཚོགས་ཡིན་ཕྱིར་སོགས་ཀྱིས་སྔར་ནི་ཇི་ལྟར་རིགས་པས་རྣམ་པར་དཔྱད་ཟིན་པ་བཞིན་ནོ། །དེ་ལྟར་དཔྱད་པས་རྒྱུ་རེག་པ་ཡོད་པ་མིན་ན། འབྲས་བུ་ཚོར་བ་བདེ་སྡུག་སོགས་འདི་གང་ལས་འབྱུང་བར་འགྱུར་ཏེ་དོན་དམ་པར་མེད་ན་བདེ་བ་ཐོབ་པ་དང་སྡུག་བསྔལ་སྤང་བའི་ཆེད་དུ་ངལ་བ་མང་པོ་འདི་ཅི་ཡི་དོན་དུ་ཡིན་ཏེ། ཚོར་བ་གང་གིས་གང་ཟག་གང་ལ་ཕན་པ་དང་གནོད་པར་འགྱུར་ཏེ་མི་འགྱུར་རོ། །འབྲས་བུ་སྲེད་པ་ལ་དཔྱད་པ། འདི་ལྟར་སྲེད་པ་ལྡོག་མེད་དུ་སེམས་ཅན་ཐམས་ཅད་ལ་སྐྱེ་བས་དེའི་རྒྱུ་ཚོར་བ་ཅི་སྟེ་མེད་སྙམ་ན། འདི་ཡང་རྨོངས་པ་ཙམ་སྟེ་ཡང་དག་པར་མིན་ནོ། །དེ་ཡང་གང་གི་ཚེ་ཚོར་བ་པོ་བདག་དང་ཤེས་པ་རང་བཞིན་གྱིས་གྲུབ་པ་འགའ་ཡང་མེད་ཅིང་། དེས་མྱོང་བྱ་ཚོར་བའང་ཡོད་པ་མ་ཡིན་པ། དེ་ཡི་ཚེ་ཚོར་བྱ་དང་ཚོར་བྱེད་དོན་ལ་མེད་པའི་གནས་སྐབས་འདི་ལྟ་བུ་མཐོང་ནས། ཚོར་བའི་རྒྱུ་ལས་བྱུང་བའི་འབྲས་བུ་སྲེད་པ་ཅི་ཡི་ཕྱིར་ལྡོག་པར་མི་འགྱུར་ཏེ་རྒྱུ་མེད་པའི་ཕྱིར་རོ། །ཚོར་བ་པོ་ལ་དཔྱད་པ། གལ་ཏེ་ཚོར་བ་དང་ཚོར་བ་པོ་མེད་ན་མཐོང་སོགས་འདི་མི་འཐད་སྙམ་ན། མིག་གིས་གཟུགས་མཐོང་བའམ་ནི་ལུས་ཀྱིས་རེག་པ་སྟེ་ཐོག་ཐ་གཉིས་ཀྱིས་བར་ཀུན་མཚོན་པར་བྱས་པའི་ཐོས་སྣོམ་མྱོང་ཚོར་འདི་ཡང་། རྨི་ལམ་དང་སྒྱུ་མ་འདྲ་བའི་བདག་ཉིད་ཀྱིས་ཡིན་གྱིས་དོན་དམ་པར་ཡོད་པ་མ་ཡིན་ནོ། །དེ་ཡང་འདི་ལྟར་ཚོར་བ་དང་དེ་མྱོང་བའི་སེམས་དུས་མཉམ་མམ་མི་མཉམ་ཞེས་དཔྱད་ཚེ་དུས་མཉམ་པར་གྱུར་ན། མྱོང་བྱེད་སེམས་དང་མྱང་བྱ་ཚོར་བ་གཉིས་དུས་སྔ་ཕྱི་མེད་པར་ལྷན་ཅིག་ཏུ་སྐྱེས་པའི་ཕྱིར། ཚོར་བ་དེ་སེམས་དེ་ཡིས་མྱོང་བའམ་མཐོང་བ་མ་ཡིན་ཏེ། རྫས་ཐ་དད་དུས་མཉམ་པ་ནི་གང་གང་གི་སྔོན་དུ་མེད་པས་ཕན་ཚུན་མི་ལྟོས་ཤིང་འབྲེལ་མེད་སོ་སོ་བའི་ཕྱིར་མི་མྱོང་ངོ་། །གལ་ཏེ་དུས་མི་མཉམ་ན་ཚོར་བ་སྔར་སྐྱེས་པ་དང་སེམས་ཕྱི་མར་སྐྱེས་པས་ཀྱང་། དེའི་དུས་སུ་ཚོར་བ་དེ་འགགས་ཟིན་པའི་ཕྱིར། དྲན་པར་འགྱུར་བ་ཡིན་གྱི་དེས་དངོས་སུ་མྱོང་བ་མ་ཡིན་ནོ། །དེ་ལྟར་ཚོར་བྱེད་ཀྱི་སེམས་འདས་པ་ནི་འགགས་ཟིན་པས་དེས་མྱོང་མི་སྲིད་ལ། ད་ལྟ་དང་མ་འོངས་ཀྱིས་མི་མྱོང་བར་རིགས་པས་བསྒྲུབ་པའོ། །དེ་བཞིན་དུ་ཡུལ་ཚོར་བ་འདས་པ་ནི་དྲན་པ་ལས་མི་མྱོང་། ད་ལྟ་བ་ནི་མྱོང་མི་ཤེས། མ་འོངས་པ་ནི་མེད་པས་ད་ལྟའི་ཤེས་པས་མྱོང་མི་སྲིད་དོ། །འདི་ལྟར་ཚོར་བ་རང་གིས་བདག་རང་ཉིད་མྱོང་བ་སྲིད་པ་མིན་ཏེ་རང་ལ་རང་བྱེད་པ་འགལ་བའི་ཕྱིར་རང་རིག་བཀག་པ་བཞིན་ལ། ཚོར་བ་དེ་ལས་གཞན་དུ་གྱུར་པའི་ཤེས་པ་དག་གིས་ཀྱང་མྱོང་བ་མ་ཡིན་ཏེ་བཤད་མ་ཐག་པ་ཉིད་ཀྱི་ཕྱིར་ན། ཚོར་བ་དེ་ཚོར་བ་པོ་འགའ་ཡང་ཡང་དག་པར་ཡོད་པ་མིན་ཏེ། རྒྱུ་མཚན་དེས་ན་ཚོར་བ་འདི་དེ་ཁོ་ན་ཉིད་དུ་ཡོད་པ་མིན་ནོ། །དེ་ལྟར་མྱོང་བ་པོའི་བདག་མེད་པར་ཕུང་པོའི་ཚོགས་པ་རྨི་ལམ་སྒྱུ་མ་ལྟ་བུ་འདི་ལ། ཚོར་བ་སྡུག་བསྔལ་བ་ཞེས་རང་བཞིན་མ་གྲུབ་པ་འདི་ཡིས་ཇི་སྟེ་གནོད་པར་བྱ་བ་ཡིན་ཏེ་དོན་ལ་ཕན་གནོད་གང་ཡང་མེད་དོ། །སེམས་དྲན་པ་ཉེ་བར་བཞག་པ་ལས། ཡིད་ཤེས་རང་བཞིན་མེད་པར་བསྟན་པ། ཡིད་ཀྱི་རྣམ་པར་ཤེས་པ་ནི་མིག་ལ་སོགས་པའི་ནང་གི་དབང་པོ་རྣམས་ལ་མི་གནས་ཤིང་། གཟུགས་སོགས་ཕྱིའི་ཡུལ་རྣམས་ལ་ཡང་གནས་པ་མིན་ཏེ་དབང་ཡུལ་དེ་དག་ཡོད་ཀྱང་རེས་མི་སྐྱེ་བས་སོ། །དེ་གཉིས་ཀྱི་བར་ནའང་གནས་པ་མིན་ཏེ་མ་དམིགས་པས་སོ། །ནང་ལུས་ཀྱི་དབུས་ན་ཡང་སེམས་ཡོད་པ་མིན་ལ་ཕྱི་ལུས་ཀྱི་ཡན་ལག་རྣམས་ལའང་མིན་ཞིང་། དེ་རྣམས་ལས་གཞན་དུ་ཡང་ནི་རྙེད་པ་མ་ཡིན་ལ། གང་ཞིག་ལུས་ཉིད་ཀྱང་ཡིད་མིན་ལ་དེ་ལས་གཞན་དུའང་བདེན་པ་མིན་ཞིང་། ལུས་ལ་འདྲེས་ཤིང་ཞུགས་པར་གྱུར་པའང་མིན། ལུས་ལས་ལོགས་སུ་གྲུབ་པ་འགའ་ཡང་མེད་པའི། ཡིད་དེ་ནི་ཅུང་ཟད་ཀྱང་བདེན་པར་ཡོད་པ་མིན་ཏེ། དཀོན་མཆོག་བརྩེགས་པ་ལས། འོད་སྲུང་སེམས་ནི་ནང་ན་ཡང་མེད། ཕྱི་རོལ་ན་ཡང་མེད། གཉིས་ཀ་ན་ཡང་མེད་ཅིང་མི་དམིགས་སོ། །འོད་སྲུང་སེམས་དེ་ནི་གཟུགས་མེད་པ། བསྟན་དུ་མེད་པ། ཐོགས་པ་མེད་པ། རྟེན་མ་ཡིན་པ། སྣང་བ་མེད་པ། རྣམ་པར་རིག་པ་མེད་པ། གནས་མེད་པའོ། །འོད་སྲུང་སེམས་ནི་སངས་རྒྱས་ཐམས་ཅད་ཀྱིས་ཀྱང་མ་གཟིགས་མི་གཟིགས། གཟིགས་པར་མི་འགྱུར་རོ། །ཞེས་གསུངས་སོ། །དེའི་ཕྱིར། སེམས་ཅན་ཐམས་ཅད་གདོད་མ་ནས་རང་བཞིན་གྱིས་མྱ་ངན་ལས་འདས་པ་ཡིན་ནོ། །རྣམ་ཤེས་ལྔ་རང་བཞིན་མེད་པར་བསྟན་པ། ཡིད་ཤེས་དེ་ལྟ་ནའང་སྒོ་ལྔའི་རྣམ་ཤེས་ལ་ཡུལ་ལྔ་འཛིན་བྱེད་དུ་བདེན་ནོ་སྙམ་ན། དེ་ཉིད་ཡུལ་ལྔའི་སྔར་རམ་དུས་མཉམ་མམ་ཕྱིས་ཡོད་བརྟགས་ཏེ་ཤེས་བྱ་གཟུགས་སོགས་ཡུལ་ལྔ་པོ་དེ་ལས་སྔར་མིག་སོགས་སྒོ་ལྔའི་ཤེས་པ་དེ་ཡོད་ན། ཤེས་པ་དེ་ནི་ཡུལ་ཅི་ལ་དམིགས་ནས་སྐྱེ་སྟེ། དེའི་ཚེ་ཡུལ་མེད་པས་ཡུལ་ཅན་སྐྱེ་བ་མེད་དོ། །འོན་ཏེ་ཤེས་པ་དང་ཤེས་བྱ་ལྷན་ཅིག་སྟེ་དུས་མཉམ་ན་ཡང་། ཤེས་པ་དེ་ནི་ཅི་ལ་དམིགས་ནས་སྐྱེ་སྟེ། ཤེས་པ་མ་སྐྱེས་པ་ན་ཡུལ་ཡང་མ་སྐྱེས་ཤིང་ཡུལ་སྐྱེས་པ་ན་ཤེས་པའང་སྐྱེས་ཟིན་པས་ཡུལ་གྱིས་བསྐྱེད་མི་དགོས་ཏེ་འབྲེལ་མེད་དུ་འགྱུར་རོ། །འོ ན་ཏེ་ཤེས་བྱའི་ཕྱིས་ཤེས་པ་དེ་སྤྱིར་ཡོད་ན། དེ་ཚེ་ཤེས་པ་དེ་ཤེས་བྱའམ་ཡུལ་གང་ལས་སྐྱེ་སྟེ་དེའི་དམིགས་ཡུལ་འགགས་ནས་མེད་པའི་ཕྱིར་རོ། །མེད་ཀྱང་སྐྱེད་ན་ས་བོན་ཚིག་པས་མྱུ་གུ་དང་། རི་བོང་རས་ཀྱང་མིག་ཤེས་སོགས་སྐྱེད་པར་ཐལ་ཏེ་ཞིག་མ་ཞིག་ཀྱང་དེ་དང་དོན་གཅིག་གོ །ཆོས་དྲན་པ་ཉེ་བར་བཞག་པ་ལས། ཆོས་ཐམས་ཅད་སྐྱེ་མེད་དུ་སྤྱིར་བསྟན་པ། སྔར་བཤད་པ་དེ་ལྟར་སྔ་ཕྱི་དུས་མཉམ་གང་ལས་ཀྱང་མི་སྐྱེས་པའི་རིགས་པ་འདིས་འདུས་བྱས་དང་འདུས་མ་བྱས་ཀྱི་ཆོས་རྣམས་ཐམས་ཅད་ཀྱི། སྐྱེ་བ་རྟོགས་པར་འགྱུར་བ་མ་ཡིན་ཏེ་སྐྱེ་བ་མེད་དོ། །གང་སྐྱེ་བ་མེད་པ་དེ་ལ་གནས་པ་སོགས་ཀྱང་མེད་དེ། འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །ཞེས་གསུངས་པ་བཞིན་ནོ། །དེ་ལ་རྩོད་པ་སྤང་བ་ལས་བསྒྲུབ་བྱ་མི་འཐད་པ་སྤོང་བ། །གལ་ཏེ་དེ་ལྟར་ན་ཤེས་བྱའི་ཆོས་ཀུན་ལ་སྐྱེ་སོགས་ཀྱི་བདག་ཉིད་ཅན་ཀུན་རྫོབ་འདི་མེད་པར་འགྱུར་ལ། ཀུན་རྫོབ་མི་འདོད་པ་དེ་ལ་དོན་དམ་ཀྱང་མེད་པས་བ དེན་པ་གཉིས་ཀའང་ག་ལ་ཡོད་དེ་བདེན་པ་གཅིག་ཏུ་འགྱུར་རོ་སྙམ་ན། བདེན་གཉིས་སུ་བཞག་པ་ནི་གདུལ་བྱ་ལམ་དུ་འཇུག་པའི་སྒོ་ཙམ་སྟེ། དོན་དམ་པར་བདེན་པ་གཉིས་སུ་ཆད་པའང་མེད་དེ་བསམ་གྱིས་མི་ཁྱབ་པའི་ཆོས་དབྱིངས་དེ་བཞིན་ཉིད་ཙམ་གནས་ལུགས་མཐར་ཐུག་གོ །དེ་སྐད་དུའང་མདོ་ལས། སྐྱེ་བ་མེད་པ་བདེན་པ་གཅིག་ཡིན་ན། །དེ་ལ་ཁ་ཅིག་བདེན་པ་བཞི་ཞེས་འཛེར། །བྱང་ཆུབ་སྙིང་པོར་འདུག་ན་བདེན་གཅིག་ཀྱང་། །གྲུབ་པ་མ་མཐོང་བཞི་ལྟ་ག་ལ་ཞིག །ཅེས་གསུངས་པ་བཞིན་ནོ། །དོན་དམ་པར་བདེན་པ་གཉིས་སུ་བཞག་ཏུ་མེད་ཀྱང་ཐ་སྙད་དུ་ཡོད་དེ། སྣང་ཚུལ་དང་གནས་ཚུལ་གཉིས་སུ་ངེས་པའི་ཕྱིར། སྔར་འདི་ནི་བདེན་པ་གཉིས་སུ་འདོད་ཅེས་བརྗོད་པ་བཞིན་ནོ། །ཡང་ཁོ་ན་རེ། དེ་ལྟར་བདེན་གཉིས་སུ་བཞག་པའི་ཡ་གྱལ་ཀུན་རྫོབ་དེ་ཡང་སྐྱེ་སོགས་ཀྱི་དངོས་པོར་རང་མཚན་པ་ཞིག་མེད་པར་ཀུན་རྫོབ་ཅེས་པ་གཞན་གྱི་བློས་འཇོག་དགོས་ཤིང་དེས་བཞག་པས་དེར་འགྱུར་ན། སེམས་ཅན་རྣམས་མྱ་ངན་ལས་ག་ལ་འདའ་སྟེ། སེམས་ཅན་གྱི་མཐའ་མ་ཟད་པ་དེ་སྲིད་དུ་བློ་མི་འཛད། བློ་མ་ཟད་པ་དེ་སྲིད་དུ་དེས་བཞག་པའི་ཀུན་རྫོབ་མི་འཛད་པས་གཟུང་འཛིན་གྱི་སྤྲོས་པ་ཐམས་ཅད་ཟད་པའི་མྱང་འདས་ཞེས་པ་འདི་མི་སྲིད་དོ་ཞེ་ན། ལན་དུ། ནམ་ཡང་རྒྱུན་མི་ལྡོག་པའི་ཀུན་རྫོབ་ཀྱི་སྣང་བ་འདི་ནི་གཞན་སེམས་ཅན་རྣམས་ཀྱི་རང་རང་གི་རྣམ་པར་རྟོག་པའི་སྤྲོས་པའི་དབང་གིས་སྣང་བ་སྐྲ་ཤད་དང་རྨི་ལམ་ལྟ་བུ་སྟེ། དེ་ནི་མྱ་ངན་ལས་འདས་པ་པོ་རང་གི་ངོར་སྣང་བའི་ཀུན་རྫོབ་མིན་ཏེ། སེམས་ཅན་གཞན་གྱི་གཉིས་སྣང་སྤྲོས་པ་ཡོད་པས་གཅིག་མྱ་ང ན་ལས་མི་འདའ་བ་མ་ཡིན་ལ། གཅིག་གི་གཟུང་འཛིན་དབྱིངས་སུ་ནུབ་པས་ཐམས་ཅད་ཀྱི་གཟུང་འཛིན་མེད་པར་འགྱུར་བ་ག་ལ་ཡིན་ཏེ། སྐྱེས་བུ་གཞན་གཉིད་དུ་སོང་བ་ལ་རྨི་ལམ་གྱི་སྣང་བ་སྣ་ཚོགས་ཡོད་ཀྱང་དེས་གང་གཉིད་སད་པ་དེ་ལ་མི་གནོད་པ་བཞིན་ནོ། །དེས་ན་གཟུང་འཛིན་གཉིས་སྣང་གི་བག་ཆགས་ཕྲ་བའང་ལྡོག་པའི་མྱ་ངན་ལས་འདས་པའི་དབྱིངས་སུ་སངས་རྒྱས་པའི་ཕྱིས་ནའང་སྐྱེ་སོགས་ཀུན་རྫོབ་ཀྱི་སྤྲོས་པ་དེ་ངེས་པར་ཡོད་ན་རང་ལ་ལྟོས་པའི་ཀུན་རྫོབ་བམ་སྤྲོས་པ་དེ་ཡོད་ཀྱང་དེ་ལྟ་བུ་མེད་ན་ཀུན་རྫོབ་ཀྱི་སྤྲོས་པ་མཐའ་དག་མེད་པ་ཉིད་དུ་ངེས་པས་མྱ་ངན་ལས་འདས་པ་ཡིན་ཏེ། འཇུག་པ་ལས། ཤེས་བྱའི་བུད་ཤིང་སྐམ་པོ་མ་ལུས་པ། །བསྲེགས་པས་ཞི་དེ་རྒྱལ་རྣམས་ཆོས་སྐུ་སྟེ། །དེ་ཚེ་སྐྱེ་བ་མེད་ཅིང་འགག་པ་མེད། །སེམས་འགགས་པ་དེ་སྐུ་ཡིས་མངོན་སུམ་མཛད། །ཅེས་གསུངས་པ་བཞིན་དུ་སྐྱེ་སོགས་སྤྲོས་པའི་དྲྭ་བ་མ་ལུས་པ་ཞི་བའི་བུད་ཤིང་ཟད་པའི་མེ་བཞིན་སེམས་སེམས་བྱུང་གི་རྒྱུ་བ་ལྷག་མ་མ་ལུས་པ་ལོག་སྟེ་ཆོས་ཀྱི་དབྱིངས་སྣང་སྟོང་ཟུང་འཇུག་བརྗོད་དུ་མེད་པའི་ངང་དུ་ཆུ་ལ་ཆུ་བཞག་པ་བཞིན་དུ་གྱུར་པའི་རང་བྱུང་གི་ཡེ་ཤེས་མཐའ་ཐམས་ཅད་དང་བྲལ་བ་ཤེས་བྱ་ཀུན་ཏུ་གཟིགས་ཀྱང་སྤྲོས་པའི་རང་བཞིན་ཉེ་བར་ཞི་བ་ཁོ་ནའོ། །འདིའི་སྐབས་སུ་སེམས་སེམས་བྱུང་གི་སྤྲོས་པ་ལྷག་མེད་དུ་ལོག་པས་ན་ཡེ་ཤེས་མཐར་ཐུག་པ་མངོན་དུ་གྱུར་པ་དང་། རང་བྱུང་གི་ཡེ་ཤེས་ཉིད་བརྙེས་པས་སེམས་འགགས་པར་གོ་བར་བྱ་སྟེ། སོ་སྐྱེའི་ཀུན་རྟོག་གིས་སྦགས་ནས་སྤྲོས་པའི་སེམས་མ་འགགས་སམ་སྙམ་པ་དང་། འགགས་པའི་རྗེས་སུ་ཡེ་ཤེས་མེད་པར་མར་མེ་ཤི་བ་ལྟར་བསམ་ན་ནི་སངས་རྒྱས་ལ་སྐུར་འདེབས་ཆེན་པོ་ཡིན་པས་དེ་སྤང་བའི་ཕྱིར་ཟབ་མོའི་དོན་ལ་ངེས་ཤེས་བསྐྱེད་པར་བྱའོ། །སྒྲུབ་བྱེད་མི་འཐད་པ་སྤོང་བ་ལས། བདེན་པ་མེད་ཀྱང་རྣམ་དཔྱོད་འཐད་ཚུལ་ནི། ཁོ་ན་རེ། ཁྱོད་དབུ་མ་ལྟར་ན་ཤེས་བྱ་ཤེས་བྱེད་རང་བཞིན་མེད་པས་ན་རྣམ་པར་དཔྱོད་པའང་མི་འཐད་པར་འགྱུར་རོ་ཞེ་ན། །ཡུལ་ཅན་རྟོག་བྱེད་ཀྱི་བློ་དང་བརྟག་པར་བྱ་བ་ཡི་ཡུལ་དག་ནི། དེ་གཉིས་པོ་ངོ་བོས་མ་གྲུབ་ཀྱང་ཕན་ཚུན་གཅིག་ལ་གཅིག་བརྟེན་གྱི་ལྟོས་ནས་བཞག་པ་ཙམ་ཡིན་ཏེ། དེས་ན་ཇི་ལྟར་འཇིག་རྟེན་ན་མ་བརྟགས་ཉམས་དགའ་ཙམ་གྱི་གྲགས་པ་ཡི་ཐ་སྙད་ལ་བརྟེན་ནས། དགག་སྒྲུབ་ཀྱི་རྣམ་པར་དཔྱོད་པ་ཐམས་ཅད་བརྗོད་པ་ཡིན་པས་ཆེས་འཐད་པ་ཡིན་ནོ། །དེ་དག་ན་རེ། རྣམ་པར་བརྟག་ཅིང་སྤྲོས་པའི་ཆོས་ཀུན་མི་བདེན་པར་རྟོགས་པའི་སླད་དུ། གང་གི་ཚེ་ཡུལ་ཐམས་ཅད་རང་བཞིན་གྱིས་མ་གྲུབ་པར་རྣམ་པར་དཔྱོད་པ་ཡི། ཤེས་པའམ་རྣམ་དཔྱོད་ཀྱིས་ནི་དཔྱོད་པར་བྱེད་ན། རྣམ་དཔྱོད་དེས་རང་ཡུལ་དུ་བྱས་ནས་དཔྱད་མི་ནུས་པས། དེ་ཡི་ཚེ་རྣམ་དཔྱོད་དང་པོ་དེ་ཡང་ནི། རྣམ་དཔྱོད་གཉིས་པས་རྣམ་པར་དཔྱོད་དགོས་པ་ལ་སོགས་པའི་ཕྱིར་ན་ཁྱོད་ཀྱི་རྣམ་དཔྱོད་ཐུག་པ་མེད་པར་འགྱུར་རོ་ཞེ་ན། ལན་དུ། དཔྱད་བྱ་ཆོས་ཀུན་བདེན་མེད་དུ་རྣམ་པར་དཔྱད་པར་བྱས་ནས། སྐྱེ་བ་དང་སྐྱེ་མེད་ལ་སོགས་པའི་མཐའ་གང་དུ་མི་གནས་པར་ངེས་པ་དེ་ཡི་ཚེ། རྣམ་དཔྱོད་ལ་ནི་འདིའོ་ཞེས་གཟུང་བའི་རྟེན་ནམ་ཡུལ་ཡོད་པ་མིན་ལ། ནམ་ཞིག་དམིགས་གཏད་ཀྱི་ཡུལ་ལམ་རྟེན་མེད་པ་དེའི་ཕྱིར་ན་ཡུལ་ཅན་དེ་མི་སྐྱེ་སྟེ། སྤྲོས་པ་ཐམས་ཅད་ཞི་བས་ན་རྣམ་དཔྱོད་དེ་ཡང་ཆུ་ལ་རླབས་བཞིན་དུ་ཆོས་ཉིད་ཀྱི་ངང་དུ་རང་བཞིན་གྱིས་མྱ་ངན་ལས་འདས་པར་བརྗོད་དོ། །བདེན་པར་གྲུབ་པ་ལ་རྣམ་དཔྱོད་མི་འཐད་པའི་ཚུལ་བསྟན་པ། དངོས་པོར་སྨྲ་བ་གང་གི་ལུགས་ལྟར་ན་དོན་ཤེས་འདི་གཉིས་བ དེན་པར་འདོད་པ་དེ་ཉིད་ཤིན་ཏུ་སྒྲུབ་དཀའ་བར་གནས་ཏེ་སྒྲུབ་བྱེད་ཀྱི་ཚད་མ་མེད་པའི་ཕྱིར། དེ་ཡང་། གལ་ཏེ་ཤེས་པ་ཉིད་ཚད་མར་གྲུབ་པའི་དབང་ལས་དོན་གཞལ་བྱ་ཉིད་ཡོད་པར་གྲུབ་སྟེ་ཤེས་པ་ཚད་མ་འདི་ཉིད་ཀྱིས་ཡོད་པར་མཐོང་བས་སོ་ཞེ་ན། ཤེས་པ་བདེན་པར་ཡོད་པ་ཉིད་ལ་རྒྱུ་མཚན་ནམ་རྟེན་ཅི་ཞིག་ཡོད་ཅེས་དྲིའོ། །དེ་ལ་ཤེས་པ་རང་གིས་དོན་དམ་པར་མི་གྲུབ་པ་ལ་ཤེས་པ་གཞན་གྱིས་བསྒྲུབས་ན་ཐུག་མེད་དུ་འགྱུར་བས་སྒྲུབ་བྱེད་གཞན་མེད་ལ། འོན་ཏེ་ཤེས་བྱའམ་ཡུལ་གཞལ་བྱ་བདེན་པ་མངོན་སུམ་པ་འདི་འཛིན་པ་ལས་ཡུལ་ཅན་གྱི་ཤེས་པ་ཉིད་བདེན་པར་གྲུབ་བོ་ཞེ་ན། ཤེས་བྱ་ཡོད་པ་ལ་རྟེན་ཅི་ཡོད་ཅེས་དྲི། དེའི་རྟེན་ནི་ཤེས་པ་ཡིན་ཏེ། དོན་ཤེས་ཕན་ཚུན་གཅིག་གིས་གཅིག་སྒྲུབ་ཅེ་ན། དེ་འདྲའི་ཡོད་པ་དེ་ནི་རང་གི་ངོ་བོས་མ་གྲུབ་པར་ཕན་ཚུན་གཅིག་ལ་གཅིག་ལྟོས་པའི་དབང་གིས་ཡོད་པ་སྟེ་རིང་ཐུང་བཞིན། དེའི་ཕྱིར་གང་རུང་གཅིག་སྒྲུབ་པ་ན་གཅིག་ཤོས་དཔེ་མི་རུང་སྟེ་དེ་མ་གྲུབ་པའི་ཕྱིར། དེས་ན་དོན་དམ་པར་གཉིས་ཀ་ཡང་ནི་མེད་པར་འགྱུར་ཏེ། དཔེར་ན་གལ་ཏེ་བུ་མེད་ན་ཕ་ཡོད་པ་མིན་ཏེ་ཕར་འཇོག་བྱེད་མེད་པས་སོ། །དེ་ལྟར་ཕ་མིན་ན། བུ་ཉིད་གང་ལས་བྱུང་བ་ཡིན་ཏེ། རྒྱུ་མེད་པའི་ཕྱིར་གཉིས་ཀ་མི་འཐད་དོ། །ཇི་ལྟར་འཇོག་བྱེད་བུ་མེད་པར་ནི་དེའི་སྔོན་དུ་ཕ་མེད་པ། དེ་བཞིན་འདིར་དོན་ཤེས་གཉིས་ལས་གང་བསྒྲུབ་བྱར་བྱས་པ། དེ་སྔ་མ་གྲུབ་པ་བུ་ལྟ་བུ་དེའི་སྔོན་དུ་དེའི་སྒྲུབ་བྱེད་ཅིག་ཤོས་ཕ་ལྟ་བུ་དེ་ཡོད་མི་སྲིད་པས་མཐར་དེ་གཉིས་ཀ་མེད་པ་ཉིད་དོ། །ཡང་དེ་དག་འདི་སྙམ་དུ། འདི་ལྟར་ཕན་ཚུན་གྱི་དབང་གིས་གྲུབ་བོ་ཞེས་མི་སྨྲ་སྟེ། དཔེར་ན་མྱུ་གུ་ས་བོན་ལས་སྐྱེ་བར་འགྱུར་ཞིང་། ས་བོན་ཡོད་པའང་མྱུ་གུ་ཡོད་པའི་རྟགས་དེ་ཉིད་ཀྱིས་རྟོགས་པ་བཞིན། རྒྱུ་ཤེས་བྱ་ལས་སྐྱེས་པའི་འབྲས་བུ་ཤེས་པ་དེ་ཡིས། ཤེས་བྱ་དེ་ཡོད་པར་ནི་ཅིས་མི་རྟོགས་སྙམ་ན། དཔེ་མི་མཚུངས་ཏེ། མྱུ་གུས་ས་བོན་རྟོགས་པ་ནི་མྱུ་གུ་རང་ཉིད་འབའ་ཞིག་གིས་རྟོགས་པ་མ་ཡིན་ལ། མྱུ་གུ་ལས་གཞན་པའི་ཤེས་པ་ཡིས། འབྲས་བུ་མྱུ་གུ་ལ་རྗེས་སུ་དཔགས་ནས་འདི་ལ་རྒྱུ་སྔོན་སོང་ས་བོན་ཡོད་ཅེས་རྟོགས་པར་འགྱུར་ཏེ། དེའང་ས་མྱུག་གཉིས་སོ་སོར་དམིགས་ནས་རྒྱུ་འབྲས་སུ་ངེས་པའི་ཚད་མས་དེ་ལྟར་རྟོགས་ཀྱི། རྒྱུ་འབྲས་ངེས་པའི་ཚད་མ་སྔོན་དུ་མ་སོང་བར་མྱུ་གུ་མཐོང་བ་ཙམ་གྱིས་ནི་མ་ཡིན་ན། གང་གི་ཕྱིར་ཤེས་བྱ་དེ་རྟོགས་པར་བྱེད་པ་ལ། རྟག་ཤེས་པ་དེ་ཡོད་པ་ཉིད་རྒྱུ་མཚན་གང་ལས་རྟོགས་ཏེ། དོན་དམ་པར་རང་རིག་གཞན་རིག་གང་གིས་ཀྱང་མི་འགྲུབ་པའི་ཕྱིར་རོ། །དེས་ན་དངོས་པོ་ཁས་ལེན་པའི་ཕྱོགས་ལ་ཐ་སྙད་འཐད་དཀའ་ཞིང་བཏགས་པར་ཁས་ལེན་པ་ལ་ཆེས་འཐད་དོ། །བྱེ་བྲག་ཏུ་རྒྱུ་འབྲས་ངོ་བོ་ཉིད་གསུམ་ལ་དཔྱད་པ་ལས། རྒྱུ་མཚན་མ་མེད་པ་གཏན་ལ་དབབ་པ་ལ། ཕྱིན་ཅི་ལོག་དགག་པ་ལས། རྒྱུ་མེད་པར་འདོད་པ་དགག་པ། རྒྱང་འཕེན་པ་སོགས་ན་རེ། ཇི་ལྟར་ཚེར་མ་རྣོ་བ་དང་། རྨ་བྱའི་མདོངས་བཀྲ་བ་ལ་སོགས་པ་བཞིན་དུ་སུས་ཀྱང་མ་བྱས་པར་སྲིད་པ་ངོ་བོས་བྱུང་ངོ་ཞེས་ཟེར་རོ། །དེ་ལ་རེ་ཞིག་འཇིག་རྟེན་གྱི་སྐྱེ་བོ་རྣམས་ཀྱིས་ཀྱང་མངོན་སུམ་གྱིས། འབྲས་བུ་ཀུན་ལ་རང་སྐྱེད་བྱེད་ཀྱི་རྒྱུ་རྣམས་ཐམས་ཅད་མཐོང་བ་ཡིན་གྱི་རྒྱུ་མེད་བཞིན་སྐྱེ་བ་ནི་མཐོང་མི་སྲིད་པས་སོ། །འདིར་མངོན་སུམ་ནི་མཚོན་པ་ཙམ་སྟེ་རྗེས་དཔག་ཀྱང་སྡུད་དོ། །གལ་ཏེ་པདྨའི་སྡོང་བུ་དང་འདབ་མ་སོགས་སྣ་ཚོགས་པ་དག་རྒྱུ་ལ་མ་མཐོང་བས་དབྱེ་བ་སྣ་ཚོགས་ཀྱི་རྒྱུ་ཡོད་པ་དེ་མི་འཐད་སྙམ་ན། རྒྱུ་ལ་འབྲས་བུ་དངོས་སུ་གྲུབ་ན་རྒྱུ་འབྲས་སུ་ཅིར་འགྱུར་ཏེ་འོན་ཀྱང་པདྨའི་སྡོང་བུ་ལ་སོགས་པ་རང་གི་ས་བོན་ཁོ་ན་ལ་བརྟེན་ནས་འབྱུང་བར་མཐོང་བས་ན་འབྲས་བུའི་དབྱེ་བ་ནི། རྒྱུ་ཡི་དབྱེ་བས་བསྐྱེད་པ་ཡིན་པའི་ཕྱིར། འབྲས་བུ་སྣ་ཚོགས་པ་བཞིན་དུ་རྒྱུའི་ནུས་པའི་དབྱེ་བའང་སྣ་ཚོགས་པར་གྲུབ་བོ། །དེ་འདྲ་བའི་རྒྱུ་ཡི་དབྱེ་བ་སྣ་ཚོགས་པ་ཡོད་པར་གང་གིས་བྱས་ཞེ་ན། གཞན་སུས་ཀྱང་མ་བྱས་ཏེ་ས་བོན་དེའང་རང་གི་རྒྱུ་མེད་པར་འབྱུང་མི་སྲིད་པའི་ཕྱིར་རོ། །སྔར་གྱི་རྒྱུ་ཡི་དབྱེ་བ་ཉིད་ལས་སོ། །དེ་ལྟར་རིམ་པར་བརྟགས་ན་རྒྱུའི་ཐོག་མར་འདི་ཙམ་ཞེས་མི་དམིགས་ཏེ་འཁོར་བ་ལ་ཐོག་མ་མ་གྲུབ་པའི་ཕྱིར་རོ། །ཅིའི་ཕྱིར་རྒྱུ་འདི་ལ་ནུས་པ་སྣ་ཚོགས་ཡོད་ཅིང་དེ་ཡིས་འབྲས་བུ་སྐྱེད་ནུས་ན་ད་ལྟའི་ནས་ཀྱི་ས་བོན་འདིས་ནས་ཀྱི་མྱུ་གུ་སྐྱེད་ཀྱི་ས་ལུའི་ས་བོན་མི་སྐྱེད་ཟེར་ན། ད་ལྟའི་ནས་ཀྱི་ས་བོན་འདིས་རང་དབང་བའི་ཚུལ་དུ་ནུས་པ་སྣ་ཚོགས་གང་རུང་བཟུང་བ་ནི་མ་ཡིན་ཏེ། འདི་སྔར་གྱི་རྒྱུ་ཡི་མཐུ་ཉིད་ལས་རང་གི་རིགས་འདྲ་བསྐྱེད་པའི་བདག་ཉིད་དུ་འཕང་བ འི་ཕྱིར། འདི་ནི་དངོས་པོའི་ཆོས་ཉིད་དེ་སུས་ཀྱང་འཁྲུགས་པར་མི་ནུས་སོ། །དེས་ན་རྒྱུ་མེད་པར་གྱུར་ན། །རྒྱུ་མེད་རྐྱེན་ལ་མི་ལྟོས་ཕྱིར། །རྟག་དུ་ཡོད་པའམ་མེད་པར་འགྱུར། །ཞེས་པ་ལྟར་རིགས་ནའང་། དངོས་པོ་རྣམས་ནི་ཡུལ་དུས་རེས་འགའ་བར་དམིགས་པའི་ཕྱིར་རྒྱུ་ལྡན་དུ་གྲུབ་བོ། །རྒྱུ་མིན་པ་རྒྱུར་འདོད་པ་དགག་པ་ལས། ཤེས་ལྡན་དབང་ཕྱུག་རྒྱུ་ཡིན་པར་འདོད་པ་དགག་པ་ལ། རྒྱུ་དབང་ཕྱུག་ལ་དཔྱད་པ། དབང་ཕྱུག་པ་སོགས་ན་རེ། རྟག་པ་རང་བྱུང་གི་ཐམས་ཅད་མཁྱེན་པ་དབང་ཕྱུག་གིས་བློ་གཡོ་བ་སྔོན་དུ་བཏང་ནས་འཇིག་རྟེན་ཐམས་ཅད་བྱེད་དོ་ཟེར་རོ། །དེ་ལ་དབང་ཕྱུག་ཅེས་པ་དེ་འགྲོ་བའི་རྒྱུ་ཡིན་ན། རེ་ཞིག་དང་པོར་དབང་ཕྱུག་གི་ངོ་བོ་གང་ཡིན་སྨོས་ཤིག་ཅེས་དྲིས་པས། ས་སོགས་འབྱུང་བ་ཆེན་པོ་རྣམས་ཡིན་ནོ་ཤེ་ན། དེ་ལ་འབྱུང་བ་ལས་འབྱུང་གྱུར་གྱི་འབྲས་བུ་རྣམས་སྐྱེ་བས་དེ་རྒྱུ་ཡིན་པ་ཁོ་བོའང་འདོད་པས་དེ་ལྟ་མོད། ཁྱོད་ཀྱིས་དེ་ལ་དབང་ཕྱུག་དང་། བདག་ཅག་གིས་འབྱུང་བ་ཞེས་བཏགས་པའི་ཁྱད་པར་གྱིས་མིང་ཐ་དད་པ་ཙམ་སྟེ་འདི་ལ་ཡང་དགག་སྒྲུབ་ཀྱིས་ཅི་ཞིག་ངལ་ཏེ་མིང་ནི་སྐྱེ་བས་གང་འདོད་དུ་སྦྱར་བཏུབ་པའི་ཕྱིར། དབང་ཕྱུག་སྒྲུབ་པའི་ཚེགས་ཆེན་པོ་འདི་བྱ་མི་རིགས་སོ། །འོན་ཀྱང་ཁྱོད་ཀྱི་དབང་ཕྱུག་ནི། ལྷར་གཏོགས་པ། གཙང་ཞིང་མཆོད་པར་འོས་པ། རྟག་པ། གཅིག་པུ། ཀུན་གྱི་བྱེད་པོ་ཡིན་པ་སྟེ་ཆོས་ལྔ་དང་ལྡན་པར་འདོད་ན་ས་ལ་སོགས་པ་འདི་རྣམས་ནི་དུ་མ་དང་། མི་རྟག་པ་དང་། བློ་ཡི་གཡོ་བ་མེད་པ་དང་། མཆོད་བྱའི་ལྷ་མིན་ཞིང་། རྐང་པ་སོགས་ཀྱིས་འགོམ་པར་བྱ་བ་ཡིན་གྱི་གུས་པའི་ཡུལ་མིན་པ་ཉིད་དང་མི་གཙང་བ་དང་ལྡན་པའང་ཡིན་པས། འབྱུང་བ་དེ་ནི་ཁྱོད་འདོད་པའི་དབང་ཕྱུག་ཉིད་མ་ཡིན་ཏེ། དེ་ལས་བཟློག་པའི་མཚན་ཉིད་ཅན་དུ་འདོད་པས་སོ། །ཡང་དབང་ཕྱུག་ནམ་མཁའ་ཡིན་ནོ་ཞེ་ན་མིན་ཏེ། འབྲས་བུ་སྐྱེད་པའི་བྱེད་རྩོལ་གྱི་གཡོ་བ་མེད་པའི་ཕྱིར། བདག་ཀྱང་དབང་ཕྱུག་མིན་ཏེ་སྔར་ནས་བཀག་ཟིན་པའི་ཕྱིར་རོ། །ཁོ་ན་རེ། དབང་ཕྱུག་དེའི་ངོ་བོ་ནི་ཚུལ་རོལ་མཐོང་བས་བསམ་པར་མི་ནུས་པས་སྐྱོན་དེ་དག་མེད་ཅེ་ན། དབང་ཕྱུག་བསམ་པར་བྱ་བ་མིན་པ་ཡི་བྱེད་པོ་ཡང་མིན་ཏེ། དེ་བསམ་པར་བྱ་བ་མིན་ན་དེ་བྱེད་པོ་ཡིན་ཞེས་བརྗོད་པས་ཅི་ཞིག་བྱ་སྟེ། བརྗོད་པ་ནི་བསམ་ཞིང་ཤེས་ནས་བརྗོད་དགོས་ཀྱི། ཇི་ལྟ་བུ་ཡིན་པ་ཅིའང་མ་ཤེས་པར་དེ་བྱེད་པོར་སུ་ཞིག་གིས་བརྗོད། རྒྱུ་བྱེད་པ་པོ་མ་ཤེས་ན་འབྲས་བུ་འདི་རྣམས། དེས་བསྐྱེད་པར་འདོད་པའང་གང་ཞིག་ཡིན་ཏེ། བསྐྱེད་བྱ་སྐྱེད་བྱེད་སོ་སོར་ཤེས་ཤིང་རྒྱུ་འབྲས་སུ་ངེས་ནས་བརྗོད་དགོས་ཀྱི། གཞན་དུ་མོ་གཤམ་གྱི་བུ་སོགས་ཀྱང་བྱེད་པོར་ཐལ་ལོ། །དེས་བསྐྱེད་པའི་འབྲས་བུ་ལ་དཔྱད་པ། དབང་ཕྱུག་དེས་བསྐྱེད་པའི་འབྲས་བུའི་ཆ་དེ་རྟག་པ་བདག་ལ་སོགས་པའམ་མི་རྟག་པ་ཤེས་པ་སོགས་གང་ཞིག་ཡིན། དང་པོ་ལྟར་བདག་ལ་སོགས་པ་ཡིན་ནོ་ཞེ་ན། འབྲས་བུའི་ཆ་བདག་དེ་དང་ས་སོགས་ཀྱི་རྡུལ་ཕྲན་དང་ནམ་མཁའ་དང་དུས་དང་ཕྱོགས་ལ་སོགས་པ་དང་། རྒྱུ་དབང་ཕྱུག་རང་གི་ངོ་བོའང་རྟག་པར་འདོད་པ་མིན་ནམ། རྒྱུ་འབྲས་གཉིས་ཆར་རྟག་པ་དེ་བསྐྱེད་བྱ་སྐྱེད་བྱེད་དུ་ཇི་ལྟར་རུང་སྟེ་རྒྱུ་བསྐྱེད་པའི་བྱ་བ་དང་བྲལ་ཞིང་། འབྲས་བུ་སྐྱེ་བའི་ཁྱད་པར་དང་བྲལ་བའི་ཕྱིར་རོ། །གཉིས་པ་ལྟར་ན། མིག་ལ་སོགས་པའི་ཤེས་པ་ཡུལ་ཤེས་བྱ་ལ་དམིགས་པ་ལས་སྐྱེ་བ་དང་། ཐོག་མེད་ནས་རྒྱུད་ལ་ཡང་ཡང་བྱུང་བའི་ཚོར་བ་བདེ་སྡུག་ནི་སྔོན་གྱི་ལས་ལས་ཡིན་པ། དེ་བས་ན་དབང་ཕྱུག་དེས་འབྲས་བུ་གང་ཞིག་བསྐྱེད་པ་སྨྲོས་ཤིག ཅེས་དེས་བསྐྱེད་པའི་འབྲས་བུ་མི་སྲིད་པའི་ཕྱིར། མདོར་ན་རྟག་པ་ལ་རྒྱུ་མེད་ལ། མི་རྟག་པ་རང་གི་རྒྱུ་ལས་བྱུང་བས་དབང་ཕྱུག་དེས་ཅིའང་མ་བྱས་སོ། །འབྲས་བུ་སྐྱེད་ཚུལ་ལ་དཔྱད་པ་ལ། རྒྱུ་དབང་ཕྱུག་ཉིད་ལ་ཐོག་མ་ཡོད་པ་མིན་ན། དངོས་རྒྱུ་ནུས་པ་ཐོགས་མེད་ཡོད་པའི་ཕྱིར་འབྲས་བུའི་ཐོག་མ་ག་ལ་ཡོད་དེ། དེ་ལྟར་ན་འབྲས་བུ་འདི་ནི་དུས་འདི་ཙམ་ན་ཡོད་ཀྱི་འདིའི་སྔོན་དུ་མ་བྱུང་ཞེས་བཞག་མི་ནུས་པར་ཐོག་མེད་ནས་ཡོད་དགོས་ཀྱི་རེས་འགའ་བར་དམིགས་པ་མི་འཐད་དོ། །དེས་ན་ད་ལྟའི་སྐྱེས་པ་དང་བུད་མེད་འདི་དག་ཀྱང་སྔོན་ཐོག་མེད་ནས་ཡོད་པར་ཐལ་ལོ། །ཁོ་ན་རེ། དབང་ཕྱུག་གིས་སྣོད་བཅུད་འདི་དག་རིམ་ཅན་དུ་བྱས་པས་ན་འབྲས་བུ་ཁ་ཅིག་བྱེད་ལ་ཁ་ཅིག་མི་བྱེད་པའི་སྐབས་ཡོད་པས་སྐྱོན་མེད་སྙམ་ན། དེས་འབྲས་བུ་གྱུར་ཏོ་ཅོག་དུས་རྟག་ཏུ་ཅིའི་ཕྱིར་བྱེད་པ་མིན་ཏེ། འབྲས་བུ་ཐམས་ཅད་ཀྱི་རྒྱུ་དབང་ཕྱུག་ཁོ་ན་ཡིན་པ་གང་ཞིག དབང་ཕྱུག་དེ་ནི་རྐྱེན་གཞན་ཅི་ལ་ཡང་ལྟོས་པ་མིན་ན་འབྲས་བུ་ཐམས་ཅད་སྐྱེ་བའི་རྒྱུ་དེ་དུས་རྟག་ཏུ་ཚང་བས་འབྲས་བུ་ཅིའི་ཕྱིར་མི་སྐྱེ་སྟེ། རྣམ་འགྲེལ་ལས། མ་ཚང་མེད་པའི་རྒྱུ་ལས་ནི། །འབྲས་བུ་གང་གིས་ལྡོག་པར་འགྱུར། །ཞེས་པ་བཞིན་ནོ། །ལྷན་ཅིག་བྱེད་རྐྱེན་སོ་སོ་ལ་ལྟོས་སོ་ཞེ་ན། ལྷན་ཅིག་བྱེད་རྐྱེན་ཡང་དུས་ཀུན་ཏུ་མི་ཚང་བ་ག་ལ་སྲིད་དེ། དབང་ཕྱུག་དེས་བྱས་པ་མིན་པའི་དངོས་པོ་གཞན་ཡོད་པ་མིན་ན། དབང་ཕྱུག་དེས་འབྲས་བུ་བསྐྱེད་པ་འདི་རྒྱུ་གཞན་གང་ལ་ལྟོས་པར་འགྱུར་ཏེ། དེ་ནི་མི་འཐད་དོ། །གལ་ཏེ་རྐྱེན་གཞན་ལ་ངེས་པར་ལྟོས་ན་རྒྱུ་རྐྱེན་ཚོགས་པ་དེ་ཉིད། རྒྱུ་ཡིན་པར་འགྱུར་གྱི་དབང་ཕྱུག་རྒྱུ་མིན་ཏེ། དེའི་རྒྱུ་མཚན་རྒྱུ་རྐྱེན་ཚོགས་པ་ན་འབྲས་བུ་མི་སྐྱེ་བའི་དབང་མེད་ཅིང་། རྒྱུ་རྐྱེན་དེ་མེད་པར་ནི་དབང་ཕྱུག་ལའང་སྐྱེད་དབང་མེད་པས་སོ། །དེས་ན་རྒྱུ་རྐྱེན་ལས་སྐྱེ་བར་མཐོང་བཞིན་དོན་མེད་དབང་ཕྱུག་ཀྱང་རྒྱུར་རྟོག་ན་རྒྱུ་ཐུག་མེད་དུ་འགྱུར་རོ། །གཞན་ཡང་གལ་ཏེ་དབང་ཕྱུག་འདིས་འབྲས་བུ་བྱེད་པའི་ཚེ་ཚོགས་པ་ལ་ལྟོས་སུ་ཆུག་ཀྱང་ཚོགས་པའི་དབང་གིས་གཞན་ལ་སྡུག་བསྔལ་སོགས་རང་གིས་མི་འདོད་བཞིན་དུ་བྱེད་ན་གཞན་གྱི་དབང་ཅན་དུ་ཐལ་ལ། འབྲས་བུ་རྣམས་ཇི་ལྟར་འདོད་པ་བཞིན་དུ་འདོད་པའི་དབང་གིས་བྱེད་ནའང་འདོད་པ་ལ་རག་ལས་ཤིང་འདོད་པའི་ལྕགས་ཀྱུས་ཟིན་པའི་གཞན་དབང་ཅན་དུ་འགྱུར་རོ། །གཞན་ཡང་འདི་སྣོད་བཅུད་ཀྱི་བྱེད་པོ་ཡིན་དུ་ཆུག་ན འང་ཁྱོད་འདོད་པའི་དབང་ཕྱུག་ག་ལ་ཡིན་ཏེ། འབྲས་བུ་བྱེད་པ་དང་ལྡན་ན་མི་རྟག་པས་ཁྱབ་པའི་ཕྱིར། རྟག་པ་ནི་དོན་བྱེད་པས་སྟོང་པ་ཁོ་ནའོ། །ཤེས་མེད་བེམ་པོ་རྒྱུ་ཡིན་པ་དགག་པ་ལ། མུ་སྟེགས་དཔྱོད་པ་པ་སོགས། གང་དག་རྡུལ་ཕྲན་རྟག་པ་འཇིག་རྟེན་གྱི་རྒྱུར་སྨྲ་བ། དེ་དག་ཀྱང་ནི་སྔར། རྡུལ་དེའང་ཕྱོགས་ཆའི་དབྱེ་བ་ཡིས། །སོགས་ཀྱིས་རྡུལ་ཕྲན་བཀག་པའི་སྐབས་སུ་བཟློགས་ཟིན་པ་འདིར་འཆད་མི་དགོས་སོ། །ཡང་གྲངས་ཅན་པའི་ལུགས་ཀྱིས་ཤེས་བྱ་ཐམས་ཅད་དེ་ཉིད་ཉེར་ལྔར་འདོད་པ་སྔར་གོང་དུ་བརྗོད་པ་ལྟར། གཙོ་བོ་བེམ་པོ་རྟག་པ་གཅིག་བདེན་ནི་འགྲོ་བ་བརྟན་གཡོ་མ་ལུས་པ་ཡི་རྒྱུ་ཡིན་པར་ནི་གྲངས་ཅན་པ་རྣམས་འདོད་ཅིང་། དེ་ཡང་སྙིང་སྟོབས་དང་རྡུལ་དང་མུན་པ་ཞེས་བྱ་བའི་མིང་ཅན་བདེ་སྡུག་བཏང་སྙོམས་ཀྱི་ཡོན་ཏན་གསུམ་པོ་ཀུན་ཏུ་ཆ་མཉམ་གནས་པ་ནི། རྣམ་འགྱུར་ཉེར་གསུམ་གྱི་རྒྱུ་གཙོ་བོ་ཞེས་བྱ་བར་རབ་ཏུ་བརྗོད་དེ། དེ་དག་ཆ་མི་མཉམ་པར་གྱུར་པ་ན་འགྲོ་བ་སྣ་ཚོགས་པའི་རྣམ་འགྱུར་རྣམས་བྱུང་བ་ཡིན་པར་བརྗོད་དོ། །དེ་དགག་པ་ལ། གཙོ་བོ་གཅིག་བདེན་ལ་ཡོན་ཏན་གྱི་རང་བཞིན་གསུམ་ཡོད་པ་ཉིད་ནི་འགལ་བས། རིགས་པ་མིན་ཏེ་གསུམ་ཡོད་ན་གཅིག་མིན་པའི་ཕྱིར། དེས་ན་རྟག་གཅིག་ཏུ་གྱུར་པའི་རང་བཞིན་ནམ་གཙོ་བོ་དེ་ཡོད་པ་མིན་ནོ། །དེ་བཞིན་དུ་རྡུལ་མུན་སྙིང་སྟོབས་ཀྱི་ཡོན་ཏན་གསུམ་པོ་དག་ཀྱང་ཡོད་པ་མིན་ཏེ། དེ་རེ་རེ་ལ་ཡང་རྡུལ་གྱི་རྡུལ་རྡུལ་གྱི་མུན་པ་སོགས་སོ་སོར་རྣམ་པ་གསུམ་གའི་ཆ་རེ་ཡོད་པའི་ཕྱིར་ཏེ། གལ་ཏེ་མེད་ན་རང་བཞིན་གྱི་ངང་ཚུལ་ལས་འདས་པར་འགྱུར་རོ། །དེ་ལྟར་རྒྱུ་ཡོན་ཏན་གསུམ་པོ་མེད་ན་དེ་ལས་བྱུང་བའི་རྣམ་འགྱུར་སྒྲ་སོགས་ཀྱང་། ཡོད་པར་འདོད་པ་ཉིད་ཤིན་ཏུ་རྒྱང་རིང་སྟེ་མི་སྲིད་པར་འགྱུར་ཏེ། འཇིམ་པ་མེད་པའི་བུམ་པ་བཞིན་ནོ། །གཞན་ཐ་སྙད་ཙམ་དུ་བདེ་སོགས་ཀྱི་ཚོར་བ་ནི་སེམས་ཉིད་དུ་ཚད་མས་གྲུབ་ན་སེམས་མེད་པ་ཕྱི་རོལ་གྱི་གོས་ལ་སོགས་པ་ལ། སེམས་ཀྱི་བདག་ཉིད་བདེ་བ་ལ་སོགས་པའི་ཚོར་བ་ཡོད་པ་སྲིད་པའང་མིན་ནོ། །གལ་ཏེ་དངོས་པོ་གོས་ལ་སོགས་པ་རྣམས་བདེ་སོགས་དེ་ཡི་རྒྱུའི་རང་བཞིན་ཡིན་པས་མི་སྐྱོན་ནོ་ཞེ་ན། དོན་དམ་པར་གོས་སོགས་ཕྱི་རོལ་གྱི་དངོས་པོ་རྣམས་རང་བཞིན་མེད་པར་སྔར་ལུས་དྲན་པ་ཉེ་བར་བཞག་པའི་སྐབས་སུ་རྣམ་པར་དཔྱད་ཟིན་པ་མིན་ནམ་ཏེ་ཡིན་ནོ། །ཐ་སྙད་དུ་རང་གི་ཁས་བླངས་དང་ཡང་འགལ་ཏེ་ཁྱོད་ཀྱིས་སྣམ་བུ་སོགས་ཀྱི་རྒྱུ་ཡང་བདེ་བ་ལ་སོགས་པ་ཉིད་དུ་འདོད་ལ། སྣམ་སོགས་ཀྱི་འབྲས་བུའང་བདེ་སོགས་སུ་འདོད་པ་ནི་བཞད་གད་ཀྱི་གནས་ཏེ་མི་འདི་འདིའི་ཕ་ཡང་ཡིན་ལ་བུ་ཡང་ཡིན་ཞེས་བརྗོད་པ་བཞིན་ནོ། །བདེ་སོགས་དུ་མ་ཡོད་ན་ནི་རང་བཞིན་གཅིག་ཡིན་པ་ཉམས་སོ། །མངོན་སུམ་དང་ཡང་འགལ་ཏེ། བདེ་སོགས་དེ་ལས་སྣམ་བུ་ལ་སོགས་པའི་དངོས་པོ་འབྱུང་བར་ནམ་ཡང་མཐོང་བའང་མེད་ལ་སྣམ་བུ་དང་ཙན་དན་གྱི་ཕྲེང་བ་སོགས་ལས་ནི་བདེ་སོགས་འབྱུང་བ་ཡིན་པར་ནི་དམིགས་པའི་ཕྱིར། དེས་ན་སྣམ་སོགས་དེ་རྡུལ་ཕྲ་བའི་ཆ་ཤས་སུའང་གྲུབ་པ་མེད་པའི་ཕྱིར་ན་དེ་ལས་བྱུང་བའི་བདེ་སོགས་ནི་གཞན་དུ་ཡན་གར་པར་གནས་པ་མེད་དོ། །ཁོ་ན་རེ། བདེ་སོགས་ནི་སྣམ་སོགས་ལ་ལྟོས་མི་དགོས་ཏེ་གཙོ་བོའི་རང་བཞིན་རྟག་པ་ཉིད་དོ་ཞེ་ན། བདེ་སོགས་རྟག་པ་ཉིད་དེ་དུས་ནམ་དུ་ཡང་མི་ལྡོག་པར་དམིགས་པར་ཐལ་ཏེ། དམིགས་སུ་རུང་བ་གང་ཞིག སྔར་གྱི་རང་བཞིན་ལས་གཡོ་མི་སྲིད་པའི་ཕྱིར་རོ། །དེ་ལྟ་ནའང་བདེ་སོགས་དུས་ནམ་དུ་ཡང་མི་ལྡོག་པར་རྟག་ཏུ་དམིགས་པ་ཞིག་ཡོད་པ་མ་ཡིན་པས་མི་འཐད་དོ། །གལ་ཏེ་བདེ་སོགས་རྟག་ཏུ་ཡོད་ཀྱང་གསལ་བ་དང་མི་གསལ་བའི་ཁྱད་པར་ཡོད་པས་ན་རྟག་ཏུ་དམིགས་པ་མ་ངེས་ཞེ་ན། བདེ་སོགས་གཏན་མི་གསལ་བ་ནི་སུས་ཀྱང་མི་ཤེས་པས་ཡོད་པར་ཡང་མི་རུང་ལ་དེ་ལྟར་ཁྱོད་ཀྱིས་ཁས་ཀྱང་མི་ལེན་མོད། སྐབས་འགའ་ཞིག་ཏུ་བདེ་སོགས་དངོས་སུ་བསལ་བ་ཞིག་ཡོད་པ་ཉིད་ན་ནི། དུས་རྟག་ཏུའང་མྱོང་བ་ཅི་ཡི་ཕྱིར་འཛིན་པ་མ་ཡིན་ཏེ་དམིགས་སུ་རུང་ཞིང་དམིགས་པའི་ཡུལ་དུ་ཁྱབ་ཅིང་རྟག་པར་གནས་པའི་ཕྱིར་མིག་ལྡན་གྱི་མདུན་ན་མར་མེ་བཞིན་ནོ། །གལ་ཏེ་བདེ་སོགས་གསལ་བ་རགས་པ་དེ་ཉིད་ཕྲ་མོར་གྱུར་ནས་མི་གསལ་བ་ནུས་པའི་ངོ་བོར་ཡོད་པ་དེ་མྱོང་མི་ནུས་ཞེ་ན་བདེ་སོགས་རྟག་གཅིག་སྟེ། རགས་པ་དང་ཕྲ་བ་ཡི་གནས་སྐབས་མི་འདྲ་བའི་འགལ་བ་གཉིས་ཀ་ཇི་ལྟར་ཡིན་པར་འགྱུར། གལ་ཏེ་སྔར་གྱི་རགས་པ་ཡི་མཚན་ཉིད་དོར་ནས་གཞན་ཕྲ་བར་གྱུར་པས་སྐྱོན་མེད་ཅེ་ན། ཕྲ་རགས་ཀྱི་ངོ་བོར་གྱུར་པའི་བདེ་སོགས་དེ་དག་མི་རྟག་པ་ཉིད་དུ་གྲུབ་བོ། །བདེ་སོགས་གསལ་བ་དག་སྔ་མའི་གནས་སྐབས་དོར་ནས་གཞན་དུ་འགྱུར་བར་ཁས་ལེན་ན། དེ་བཞིན་དུ་དངོས་པོ་དེ་ཉིད་ཉེར་ལྔ་པོ་ཐམས་ཅད་ཀྱང་ནི། མི་རྟག་པ་ཉིད་དུ་ཅིས་མི་འདོད་དེ། གང་ཡང་རྟག་ཏུ་སྣང་ཚུལ་གཅིག་ཁོ་ནར་དམིགས་པ་ནི་མི་སྲིད་པའི་ཕྱིར་རོ། །གལ་ཏེ་ཕྲ་རགས་སུ་གྱུར་ཀྱང་བདེ་བའི་རང་བཞིན་མ་དོར་བས་རྟག་པ་ལས་མི་ཉམས་ཞེ་ན་རགས་པ་དང་བདེ་བ་དེ་གཉིས་ཐ་དད་དམ་གཅིག་ཡིན། དང་པོ་ལྟར་ན་རགས་པ་འགགས་ཀྱང་བདེ་བ་གསལ་བ་མི་འགག་པར་རྟག་པར་མྱོང་དགོས་ལ། ཕྱི་མ་ལྟར་རགས་པ་དེ་ཉིད་བདེ་བ་ལས་གཞན་མིན་པར་གཅིག་ཏུ་འདོད་ན། བདེ་བ་དེ་ཉིད་གསལ་བར་ཏེ་ངེས་པར་མི་རྟག་པ་ཉིད་དུ་གྲུབ་བོ། །དེ་ལ་ཁོ་ན་རེ། བདེ་བ་མི་གསལ་བར་གྱུར་ཀྱང་གཙོ་བོའི་ཀློང་དུ་ནུས་པའི་ངོ་བོར་བག་ལ་ཞ་བ་ཡིན་ཅིང་སླར་གསལ་བ་ན་སྔར་ཡོད་དེ་མངོན་དུ་གྱུར་པ་ཙམ་ཡིན་ཏེ། གལ་ཏེ་སྔར་གཏན་མེད་པ་འགའ་ཡང་ནི། སྐྱེ་བར་རིགས་པ་མིན་ཏེ་མེད་པའི་ཕྱིར་དཔེར་ན་འཇིམ་པ་ལས་རི་བོང་གི་རྭ་བཞིན་ནོ། །དེས་ན་གང་སྣང་བའི་ལམ་དུ་གྱུར་ཕན་ཆད། དེ་རང་གི་གཙོ་བོའི་ཀློང་ན་ཡོད་པས་ཁྱབ་ཞེས་འདོད་ན། འབྲས་བུ་ཐམས་ཅད་རྒྱུ་དུས་ཡོད་ན་བརྟག་ཏུ་མི་དམིགས་པ་ཅིའི་ཕྱིར་ཡིན་ཞེས་དྲིའོ། །དེ་ལ་བློའི་ཡུལ་དུ་སྔར་མི་གསལ་བ་ཕྱིས་གསལ་བ་ཙམ་ཡིན་ཏེ་མུན་ཁང་གི་བུམ་པ་མར་མེ་ལས་གསལ་བ་བཞིན་ནོ་ཞེ་ན། ཁྱོད་ཀྱི་རྩ་བའི་རིགས་པ་ཉམས་ཏེ་གསལ་བ་ནི་སྔར་རྒྱུ་དུས་ན་མེད་པར་ཕྱིས་གསར་དུ་སྐྱེ་བར་ནི། ཁྱོད་མི་འདོད་པའམ་ཁས་མ་བླངས་ཀྱང་དོན་ལ་དེ་ལྟར་གནས་པ་ཉིད་དེ། འབྲས་བུ་གསལ་བ་དེ་རྒྱུ་དུས་སུ་ཡོད་ན་གསལ་མི་གསལ་གྱི་ཁྱད་པར་ཡང་བཞག་ཏུ་མེད་དེ་དང་པོ་ནས་གསལ་བར་ཐལ་ལོ། །དེས་ན་རང་གི་ཁས་བླངས་ནང་འགལ་ལོ། །ཡང་རིགས་པ་དང་འགལ་ཏེ་གལ་ཏེ་རྒྱུ་ལ་འབྲས་བུ་དངོས་སུ་གནས་ན། ཟན་ཟ་བ་ན་ཁྱོད་མི་གཙང་བ་ཟ་བར་འགྱུར་ལ། གཞན་ཡང་ཁྱོད་ཉོ་བའི་རས་ཀྱི་རིན་གྱིས་རས་བལ་གྱི། ས་བོན་ཉོས་ལ་དེའི་ནང་ནས་རས་ཕྱུང་སྟེ་གོས་སུ་བགོ་བར་གྱིས་ཤིག་དང་ཁྱོད་ཀྱི་གྲུབ་མཐའ་གྲུབ་བོ། དེ་ལ་ཁོ་ན་རེ། དོན་དུ་རྒྱུ་ལ་འབྲས་བུ་ཡོད་ཀྱང་འཇིག་རྟེན་རྣམས་རྨོངས་པའི་རབ་རིབ་ཀྱིས་མིག་བསླད་པས་མ་མཐོང་ངོ་ཞེ་ན། རྒྱུ་ལ་འབྲས་བུ་གནས་པའི་དེ་ཁོ་ན་ཉིད་ཤེས་པ་གྲངས་ཅན་པའི་སྟོན་པ་རྣམས་ཀྱིས་བཞག་པ་དེ་ཉིད་ཤེས་པ་དེ་འཇིག་རྟེན་པ་ལ་ཡང་ནི། ཡོད་པ་ཡིན་ན་རྒྱུ་ཚང་བས་ཅི་སྟེ་མཐོང་བ་མ་ཡིན་ཏེ། ཁྱོད་ལྟར་ན་སྤྱིར་དེ་ཉིད་ཤེས་པའི་ཤེས་པ་འབྲས་བུར་གྱུར་པ་དེ་སེམས་ཅན་ཀུན་ལ་ཡོད་དགོས་ཤིང་། རྒྱུ་ལ་འབྲས་གནས་དངོས་སུ་འདོད་པ་གྲངས་ཅན་གྱི་རྣམ་བཞག་ཁས་ལེན་པའང་ཡོད་པ་ཡིན་ན་དེ་དག་གིས་ཀྱང་ཟན་ཟ་ཞིང་མི་གཙང་བ་མི་ཟ་ལ། གོས་འདོད་པས་རས་ཉོ་ཞིང་རས་བལ་གྱི་ས་བོན་དོན་དུ་མི་གཉེར་བ་མ་མཐོང་ངམ། ཡུལ་དུས་གང་ནའང་དེ་ཁོ་ན་ཉིད་ཀྱི་རྣམ་བཞག་ཁྱེད་ཀྱིས་བྱས་པ་དེ་བཞིན་ལོངས་སྤྱོད་པ་མ་མཐོང་བས་གནོད་དོ། །ཁོ་ན་རེ། འཇིག་རྟེན་པའི་མཐོང་བ་ཚད་མ་ཉིད་མིན་པས་དེས་གནོད་པ་མེད་དོ་ཞེ་ན། འོ་ན་འཇིག་རྟེན་པས་འབྲས་བུའི་རང་བཞིན་གསལ་བ་མངོན་སུམ་དུ་མཐོང་བའང་བདེན་པ་མ་ཡིན་པར་འགྱུར་ལ། དེ་རྫུན་ན་རྒྱུ་འདི་ལ་འབྲས་བུ་འདི་ཡོད་དེ་ཕྱིས་མངོན་དུ་གསལ་བའི་ཕྱིར། ཞེས་པ་དོན་མེད་པར་འགྱུར་རོ། །དེ་དག་ན་རེ། གལ་ཏེ་འཇལ་བྱེད་ཚད་མ་རྫུན་པ་ཡིན་པས་གཞལ་བྱ་བདེན་པར་མི་གྲུབ་ན་དབུ་མ་པ་ཁྱོད་ཀྱི་ཚད་མ་འཇལ་བྱེད་ཀྱི་ཤེས་པའང་དོན་དམ་པར་ཚད་མར་གྲུབ་པ་མིན་ན། དེས་གཞལ་བའི་གྲུབ་མཐའ་རྣམ་པར་བཞག་པའང་རྫུན་པར་མི་འགྱུར་རམ། དེ་ལྟ་ན་རྣམ་དཔྱོད་ཀྱི་ཚད་མ་རྫུན་པ་དེས། དོན་དམ་པའང་དེ་ཁོ་ན་ཉིད་དུ་ན་ཆོས་ཐམས་ཅད་སྟོང་པ་ཉིད་དོ་ཞེས་གཞལ་ཞིང་བཅད་ནས་སྟོང་ཉིད་དུ་བསྒོམ་པའང་གཏན་ཚིགས་དེའི་ཕྱིར་ན་མི་འཐད་པར་འགྱུར་རོ་ཞེ་ན། ལན་དུ། འདིར་བདག་ཅག་གིས་ཚད་མས་གྲུབ་དོན་སྟོང་ཉིད་ཅེས་དམིགས་གཏད་ཀྱི་ཡུལ་བདེན་གྲུབ་གཅིག་ལ་གྲུབ་མཐའ་འཆའ་བ་ནི་མེད་དེ། གང་གི་ཕྱིར་ན་བརྟག་པར་བྱ་བའི་དངོས་པོ་བུམ་སོགས་ལྟ་བུ་དེ་ལ་མ་རེག་པའམ་མ་བརྟེན་པར་ནི། བུམ་མེད་ལྟ་བུའི་དངོས་པོ་དེ་ཡི་དངོས་མེད་ཡན་གར་དུ་ནམ་ཡང་འཛིན་པ་མ་ཡིན་ཏེ། དེ་ཕྱིར་བུམ་མེད་དང་བུམ་པའི་སྟོང་པ་ལྟ་བུའི་རྣམ་གྲངས་པའམ་ཉི་ཚེ་བའི་སྟོང་པ་དེའང་གཞན་དངོས་པོ་དེ་བཀག་པའམ་བསལ་བའི་ཆ་ཡིན་པས། འདི་ལྟར་རང་བཞིན་གྱིས་རྫུན་པའི་དངོས་པོ་གང་ཡིན་པ། དེ་ཡི་དངོས་མེད་ཀྱང་གསལ་བར་ཏེ་ངེས་པར་རྫུན་ཡིན་པར་འདོད་དོ། །འོ་ན་དངོས་པོ་ཀུན་མེད་ཅེས་བསྒོམ་པས་ཅི་བྱ་སྟེ། དངོས་ཡོད་དང་དངོས་མེད་གཉིས་ཀ་རྫུན་པར་མགོ་མཉམ་ཞིང་ཡང་དག་པ་མིན་པའི་ཕྱིར་ཞེ་ན། རེ་ཞིག་ཐོག་མེད་ནས་གོམས་པའི་དངོས་ཞེན་གྱིས་སྲིད་པར་འཆིང་བར་བྱེད་པ་དེའི་གཉེན་པོར་དངོས་པོ་རང་བཞིན་མེད་པར་གོམས་པ་ཙམ་སྟེ། དངོས་དངོས་མེད་གཉིས་ཆར་རྫུན་པ་དེས་ན་ཇི་ལྟར་རྨི་ལམ་དུ་བུ་བྱུང་ནས་ཤི་བ་རྨིས་ཏེ་སྡུག་བསྔལ་བ་ལ། བུ་དེ་མེད་དོ་སྙམ་པའི་རྣམ་རྟོག་དེ་ནི། ཐོག་མར་བུ་དེ་ཡོད་སྙམ་པའི་རྣམ་པར་རྟོག་པ་དེ་ཡི། གེགས་ཡིན་པ་དེ་ཡང་རྫུན་པ་ཡིན་པ་བཞིན་ནོ། །དེས་ན་ཤིང་གཉིས་ཟུང་དུ་བདར་བའི་མེས་ཤིང་གཉིས་བསྲེགས་པ་བཞིན་དུ་དངོས་ཀུན་བདེན་མེད་དུ་རྣམ་པར་དཔྱད་པའི་ཤེས་རབ་ཀྱི་མེས་དངོས་དངོས་མེད་དུ་བཞག་པའི་དམིགས་པའི་གཏད་སོ་ཐམས་ཅད་ཀྱི་ནགས་འཐིབ་པོ་མ་ལུས་པ་བསྲེགས་ནས་སྤྲོས་པ་ཐམས་ཅད་ཞི་བའི་ཡེ་ཤེས་ལ་གནས་པའི་ཚེ་ན་ཁས་ལེན་ཐམས་ཅད་དང་བྲལ་བའི་དབུ་མ་ཆེན་པོ་ཡིན་ནོ། །དེ་ལྟར་ཡང་མདོ་ལས། དེ་ལྟར་སྤྱོད་པའི་བྱང་ཆུབ་སེམས་དཔའ་མཁས་གསལ་བ། །ཆགས་པ་བཅད་ནས་འགྲོ་ལ་ཆགས་པ་མེད་པར་འགྲོ། །ཉི་མ་སྒྲ་གཅན་གཟའ་བྲལ་ལྷང་ངེར་འདུག་པ་དང་། །མེ་བཏང་རྩྭ་དང་ཤིང་དང་ནགས་ཚལ་བསྲེགས་པ་བཞིན། །ཆོས་རྣམས་ཐམས་ཅད་རང་བཞིན་དག་ཅིང་ཡོངས་དག་པར། །བྱང་ཆུབ་སེམས་དཔའ་ཤེས་རབ་ཕ་རོལ་ཕྱིན་ལྟ་ན། །བྱེད་པ་པོ་ཡང་མི་དམིགས་ཆོས་ཀུན་མི་དམིགས་ཏེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་དང་། བསྟན་བཅོས་ལས་ཀྱང་། ཡོད་ཅེས་བྱ་བ་རྟག་པར་འཛིན། །མེད་ཅེས་བྱ་བ་ཆད་པར་ལྟ། །དེ་ཕྱིར་ཡོད་དང་མེད་པ་ལ། །མཁས་པས་གནས་པར་མི་བྱའོ། །ཞེས་གསུངས་སོ། །ཡང་དག་པའི་དོན་བསྟན་པ། རྒྱུ་མཚན་དེ་བས་ན་སྔར་བཤད་པ་དེ་ལྟར་རྣམ་པར་དཔྱད་པས། དངོས་པོ་འགའ་ཡང་རྒྱུ་མེད་པ་ཡོད་པ་མ་ཡིན་ལ། རྒྱུ་རྟག་པ་ལས་ཀྱང་མི་སྐྱེ་སྟེ། ཕྱིའི་ཆོས་ཐམས་ཅད་ས་བོན་ལས་མྱུ་གུ་ལ་སོགས་པ་བཞིན་དུ་རང་རང་གི་རྒྱུ་རྐྱེན་ལ་བརྟེན་ཏེ་འབྱུང་ལ། ནང་གི་སྐྱེ་མཆེད་ནི་མ་རིག་པ་ནས་རྒ་ཤིའི་བར་ལུ་གུ་རྒྱུད་དུ་བརྟེན་ནས་སྐྱེའོ། །དེ་འདྲའི་དངོས་པོ་ཐམས་ཅད་རང་རང་གི་རྒྱུ་རྐྱེན་དེ་དག་སོ་སོ་བ་རེ་རེའམ་ཐམས་ཅད་འདུས་པ་ཡི། རྐྱེན་རྣམས་ལ་ཡང་འབྲས་བུ་གནས་པ་མ་ཡིན་ཏེ་རེ་རེ་བས་བསྐྱེད་པར་མི་ནུས་ལ། འདུས་པ་ལའང་རྒྱུ་རྣམས་ལས་གཞན་དུ་གྱུར་པ་ཅུང་ཟད་མེད་དོ། །འབྲས་བུ་སྣང་བའི་ཚེ་རྒྱུ་རྐྱེན་དེ་དག་ལས་གཞན་ཞིག་ནས་འབྲས་བུ་ཉིད་དེར་འོང་བའང་མ་ཡིན་ལ། རྒྱུ་ལས་ངོ་བོ་ཉིད་ཀྱིས་ཐ་དད་པའི་འབྲས་བུ་ཞིག་རྒྱུ་ལ་བརྟེན་ནས་གྲུབ་ཟིན་འདིར་གནས་པའང་མ་ཡིན་ཞིང་འགག་པའི་ཚེ་དེ་ལས་གཞན་ཞིག་ཏུ་འགྲོ་བའང་མ་ཡིན་ཏེ། དེའི་ཕྱིར་ཆོས་ཐམས་ཅད་ནི་རང་བཞིན་གྱི་རྒྱུས་སྟོང་པའོ། །འདི་ལ་སོ་སོ་བ་ཞེས་པས་བདག་སྐྱེ་དང་གཞན་སྐྱེ་དགག་པ་དང་འདུས་པ་ཞེས་གཉིས་ཀ་ལས་སྐྱེ་བ་སྟེ་མུ་བཞི་པོ་བཀག་པར་ཡང་བཤད་དོ། །ངོ་བོ་སྟོང་པ་ཉིད་བསྟན་པ། དེ་ལྟར་མ་རྟོགས་པའི་རྨོངས་པས་བདེན་པར་གང་བཟུང་བར་བྱས་པའི་ཕྱི་ནང་གི་དངོས་པོ་འདི་ཀུན་སྒྱུ་མ་ལས་ནི་ཁྱད་པར་ཅི་ཞིག་ཡོད་དེ། སྒྱུ་མས་སྤྲུལ་པའི་རྟ་གླང་ལ་སོགས་པ་གང་ཡིན་པ་དང་། རྒྱུ་རྣམས་ཀྱིས་ནི་གང་སྤྲུལ་པ་ཡི་དངོས་པོ་དེ་དག་ནི་ཐོག་མར་གང་ནས་འོངས་པ་གྱུར་ཅིང་། མཐར་གང་དུ་འགྲོ་བའང་བརྟག་པར་གྱིས་ཤིག་དང་དེ་གཉིས་མཚུངས་པ་ངེས་པར་མཐོང་བར་འགྱུར་ཏེ། འདི་ལ་བདེན་པ་ཞིག་ཡོད་ན་འདི་སྣང་བའི་ཚེ་གཞན་ཞིག་ནས་འདིར་འོང་ཞིང་། འགག་པའི་ཚེ་འདི་ནས་གཞན་ཞིག་ཏུ་འགྲོ་དགོས་ནའང་སྔ་ཕྱིའི་མཐར་ཅི་ཡང་མེད་པ་ལ། འབྲས་བུ་གང་ཞིག་རང་སྐྱེད་བྱེད་ཀྱི་རྒྱུ་གང་དག་ནི་ཚོགས་པའམ་ཉེ་བ་ཡིས་ནི། རང་གི་བདག་ཉིད་མཐོང་བར་འགྱུར་གྱིས་དེ་མེད་ན་རང་གི་རང་བཞིན་དུ་འགྲུབ་པའི་ཚུལ་སྲིད་པ་མིན་པ། དེས་ན་རྒྱུ་རྐྱེན་གྱིས་བཅོས་བུ་མེ་ལོང་ནང་གི་གཟུགས་བརྙན་དང་མཚུངས་པ་དེ་ལ་རང་གི་ངོ་བོས་གྲུབ་པའི་བདེན་པ་ཉིད་ཇི་ལྟར་ཡོད་དེ་མེད་དོ། །དེས་ན་རྟེན་ཅིང་འབྲེལ་བར་འབྱུང་བ་རྟག་ཆད་འགྲོ་འོང་ཡོད་མེད་ཀྱི་མཐའ་དང་བྲལ་བ་སྒྱུ་མའི་དཔེ་བརྒྱད་ལ་སོགས་པའི་ཚུལ་གྱིས་ཤེས་པར་བྱ་སྟེ། བྱང་ཆུབ་སེམས་དཔའ་གང་ཞིག་རྟེན་ཅིང འབྲེལ་འབྱུང་ལ། སྐྱེ་མེད་ཟད་པ་མེད་པར་ཤེས་རབ་འདི་ཤེས་ཏེ། །ཉི་མ་སྤྲིན་མེད་འོད་ཟེར་འཕྲོ་བས་མུན་བསལ་ལྟར། །མ་རིག་འཐིབས་པོ་བཅོམ་ནས་རང་བྱུང་ཐོབ་པར་འགྱུར། །ཞེས་གསུངས་པ་བཞིན། མདོར་ན་སྒྱུ་མ་སོགས་སྤྲུལ་པ་མང་པོ་སྤྲུལ་ཡང་འཕེལ་འབྲི་འགྲོ་འོང་མེད་པ་ལྟར། སེམས་ཅན་གྱི་ཁམས་དང་། བྱང་ཆུབ་ལའང་འཕེལ་འབྲི་མེད་པ་ཆོས་ཉིད་མཉམ་པ་ཆེན་པོའི་དོན་རྟོགས་པ་འདི་ཅིས་ཀྱང་གལ་ཆེའོ། །འབྲས་བུ་སྨོན་པ་མེད་པར་བསྟན་པ། བསྐྱེད་བྱའི་འབྲས་བུ་དེ་ཡོད་པའམ་མེད་པ་གང་ཞིག་སྐྱེད་བརྟགས་ན་བསྐྱེད་བྱའི་དངོས་པོའམ་འབྲས་བུ་དེ་རང་བཞིན་གྱི་ཡོད་པར་གྱུར་པ་ལ་ནི། འབྲས་བུ་གྲུབ་ཟིན་པས་རྒྱུ་ཡི་དགོས་པ་ཅི་ཞིག་ཡོད་དེ། དེ་གཉིས་ཕན་ཚུན་རྒྱུ་འབྲས་སུ་མི་རུང་ངོ་། །འོན་ཏེ་འབྲས་བུ་དེ་ནི་མེད་པ་ཞིག་རྒྱུས་བསྐྱེད་དོ་ཞེ་ན་ཡང་། འབྲས་བུ་རང་གི་ངོ་བོ་མེད་པ་ཙམ་ཞིག་ཡིན་ན་དེ་ལ་རྒྱུ་ཡི་དགོས་པ་ཅི་ཞིག་ཡོད་དེ། མེད་པ་ལ་སྤྱིར་རྒྱུ་མེད་ཅིང་རང་ཉིད་མེད་པའི་དངོས་པོར་གནས་ཟིན་པས་སོ། །གལ་ཏེ་མེད་པ་ཙམ་པོ་དེ་རྒྱུས་བསྐྱེད་པ་མིན་ཡང་རྒྱུ་འདིས་འབྲས་བུ་མེད་པ་ཉིད་ཡོད་པའི་དངོས་པོར་བྱེད་དོ་སྙམ་ན་དེ་མི་ནུས་ཏེ། བྱེ་བ་བརྒྱ་ཕྲག་ཚོགས་པའི་རྒྱུ་ཡིས་འབད་ཀྱང་། ཆོས་གང་ཞིག་རང་གི་དངོས་པོའམ་ངོ་བོ་མེད་པ་དེ་དངོས་པོ་ཡོད་པ་ཉིད་དུ་བསྒྱུར་དུ་མེད་དེ་རྒྱུ་ཅི་ཚོགས་ཀྱང་རི་བོང་གི་རྭ་ཡོད་པར་བསྒྱུར་མི་ནུས་པ་བཞིན་ཏེ། མེད་པ་གང་གིའང་ལྟོས་བྱར་མི་འགྱུར་རོ། །དངོས་མེད་དངོས་པོར་བསྒྱུར་དུ་མེད་པའི་རྒྱུ་མཚན་ཡང་། དངོས་མེད་ཀྱི་དངོས་པོ་མ་དོར་བཞིན་དུ་འགྱུར་བ་དང་། དོར་ནས་འགྱུར་བ་གཉིས་ཀ་མི་འཐད་པའི་ཕྱིར་ཏེ། འདི་ལྟར་མེད་བཞིན་པའི་གནས་སྐབས་དེ་ནི་དངོས་པོ་ཇི་ལྟར་ཡིན་ཏེ། དེ་གཉིས་ཕན་ཚུན་སྤངས་ཏེ་གནས་པའི་ཕྱིར། དངོས་མེད་དོར་ནས་དངོས་པོ་གསར་དུ་འགྱུར་བ་གཞན་ཡང་གང་ཞིག་ཡིན་ཏེ་དེ་མི་སྲིད་པ་ནི། འདི་ལྟར་རང་གི་ངོ་བོ་མེད་པར་གནས་པ་དེ་ནི་མེད་བཞིན་པའི་ཚེ་ན་དངོས་པོ་ཡོད་པ་སྲིད་པ་མིན་ན། དེ་ལ་དངོས་པོ་ཡོད་པར་དུས་ནམ་ཞིག་འགྱུར་ཏེ་འགྱུར་བའི་སྐབས་མེད་ལ། དངོས་པོར་སྐྱེས་པར་མ་གྱུར་པར་དེ་སྲིད་དུ་ནི། དངོས་མེད་དང་ནི་འ བྲལ་བར་མི་འགྱུར་ཞིང་། དངོས་མེད་རང་གི་མཚན་ཉིད་དང་ནི་མ་བྲལ་ན། དེ་ལ་དངོས་པོ་ཡོད་པའི་སྐབས་ནམ་ཡང་མི་སྲིད་པས་དངོས་མེད་དངོས་པོར་ཇི་ལྟར་འགྱུར་ཏེ་འགྱུར་མི་རིགས་སོ། །དེས་ན་དངོས་མེད་ཉིད་ཡིན་བཞིན་དུ་དངོས་པོར་འགྱུར་བ་མི་སྲིད་ན། དངོས་མེད་དངོས་པོར་འགྱུར་བ་ཞེས་པ་ཚིག་ཙམ་མོ། དངོས་མེད་དངོས་པོར་མི་འགྱུར་བ་དེ་བཞིན་དུ་དངོས་པོ་ཡོད་པའང་དངོས་པོ་མེད་པར་འགྱུར་བ་མིན་ཏེ། དེ་གཉིས་ཕན་ཚུན་སྤངས་པས་ན་རིག་པ་དངོས་མེད་ཀྱི་སྐབས་སུ་བཤད་པ་བཞིན་ནོ། །གལ་ཏེ་དངོས་པོ་ཡོད་པ་གང་གི་ཚེ་དངོས་པོ་མེད་པའི་རང་བཞིན་དུ་འགྱུར་ན། དེའི་ཚེ་དངོས་པོ་གཅིག་ཉིད་ལ་དངོས་དངོས་མེད་ཀྱི་རང་བཞིན་གཉིས་སུ་གྲུབ་པར་ཐལ་བར་འགྱུར་བའི་ཕྱིར་རོ། །དེ་ལྟར་ན་དེ་ཁོ་ན་ཉིད་དུ་འགག་པ་ཡོད་པ་མིན་ཞིང་། དངོས་པོའང་བདེན་པར་ཡོད་པ་མིན་པ་དེ་ཡི་ཕྱིར། འགྲོ་བ་འདི་དག་ཐམས་ཅད་ནི། དུས་གསུམ་པོ་རྟག་ཏུ་འང་མ་སྐྱེས་ཤིང་མ་འགགས་པ་ཉིད་དོ། །དེས་ན་འགྲོ་བ་འདི་ཀུན་སྣང་ཡང་མི་བདེན་པ་རྨི་ལམ་ལྟ་བུ་སྟེ། རིགས་པས་རྣམ་པར་དཔྱད་ན་ཚུགས་ཐུབ་པའི་སྙིང་པོ་མེད་པས་ཆུ་ཤིང་དང་འདྲ་བ་ཡིན་ནོ། །དེའི་ཕྱིར་མྱ་ངན་ལས་འདས་པ་དང་མ་འདས་པའང་། དེ་ཁོ་ན་ཉིད་དུ་ནི་ཁྱད་པར་མེད་དེ། གང་བཅིངས་པ་མེད་པ་གྲོལ་བ་མེད་པར་རྟག་ཏུ་མཉམ་པ་ཉིད་ཁོ་ནར་གནས་པའི་ཕྱིར་རོ། །དེ་ལྟར་སྟོང་ཉིད་རྟོགས་པའི་བྱེད་ལས་ལ། རང་གིས་ཆོས་བརྒྱད་མགོ་སྙོམས་པར་བསྟན་པ། དེ་ལྟར་རང་བཞིན་གྱིས་སྟོང་པའི་དངོས་པོ་རྣམས་ལ། རྙེད་སོགས་ཐོབ་པ་ཅི་ཞིག་ཡོད་ཅིང་ཤོར་བའང་ཅི་ཞིག་ཡོད། དེ་བཞིན་དུ་སེམས་ཅན་གང་གིས་དངོས་སུ་བསྟོད་ཅིང་རིམ་གྲོ་བྱས་པའམ། སྨད་དེ་ཡོངས་སུ་བརྙས་པར་བྱས་པའང་ཅི་ཞིག་ཡོད། ཕན་འདོགས་པའི་རང་བཞིན་གྱིས་བདེ་བའམ་གནོད་པ་བྱེད་པའི་བདག་ཉིད་ཀྱི་སྡུག་བསྔལ་ཡང་གང་ལས་ཡིན། ལྐོག་ཏུ་མི་སྙན་པར་བརྗོད་པས་མི་དགར་ཅི་ཞིག་ཡོད་ཅིང་སྙན་པར་སྨྲས་པས་དགར་འགྱུར་བ་ཅི་ཞིག་ཡོད། དེ་ཁོ་ན་ཉིད་དུ་ནི་རིགས་པས་བཙལ་བར་བྱས་ན། གང་ཟག་གམ་ཡུལ་ཅན་གང་ཞིག་སྲེད་ཅིང་སྲེད་ཡུལ་གང་ལ་སྲེད། ལེགས་པར་དཔྱད་ན་གསོན་པའི་འཇིག་རྟེན་འདི་མ་གྲུབ་པས། གང་ཞིག་སྲིད་པ་འདིར་ནི་ཇི་ལྟར་འཆི་བར་འགྱུར་ཏེ། ཚེ་ཕྱི་མ་འབྱུང་བར་འགྱུར་བ་གང་ཞིག་ཡིན་ཞིང་སྔ་མ་བྱུང་བར་གྱུར་པ་དེ་ཡང་གང་ཞིག་ཡིན། སྣག་གི་གཉེན་དང་ཕན་འདོགས་ཀྱི་མཛའ་བཤེས་རྣམས་ཀྱང་གང་ཞིག་ཡིན་ཏེ། ཆོས་ཐམས་ཅད་ནམ་མཁའ་དང་འདྲ་བར་སྐྱེ་བ་མེད་ཅིང་འགག་པ་མེད་པ་ནི། གནས་ལུགས་དཔྱོད་པའི་བློ་ཅན་རྒྱལ་སྲས་ཞི་བ་ལྷ་བདག་དང་འདྲ་བའི་དེ་ཁོ་ན་ཉིད་ཚོལ་བ་རྣམས་ཀྱིས་ཡོངས་སུ་བཟུང་བར་བྱས་ནས་ཆོས་བརྒྱད་མགོ་སྙོམས་པར་གྱིས་ཤིག ཅེས་གདམས་པའོ། །རང་གིས་སྟོང་ཉིད་རྟོགས་པས་གཞན་ལ་བརྩེ་བ་རྩོལ་མེད་དུ་འབྱུང་བའི་ཚུལ་ཡང་། འདི་ལྟར་རྨོངས་པའི་གཞན་དབང་དུ་གྱུར་པའི་འགྲོ་བ་བདག་རང་ཉིད་བདེ་བར་འདོད་པ་རྣམས་ནི། དགྲ་ལ་འཐབས་པ་དང་། གཉེན་ལ་སྤྲོ་བའི་རྒྱུ་དག་གིས། ཡིད་རབ་ཏུ་འཁྲུགས་པ་དང་དགའ་བར་བྱེད་ཅིང་། འདོད་པ་མ་གྲུབ་པའི་མྱ་{རྒྱུ} ངན་དང་འདོད་པའི་དོན་དུ་འབད་རྩོལ་དང་དེའི་ཕྱིར་གཞན་ལ་རྩོད་པ་དང་། བདག་གཞན་ཕན་ཚུན་ལུས་མཚོན་གྱིས་གཅོད་པ་དང་མདུང་སོགས་ཀྱིས་འབིགས་པ་དང་། གཞན་ཡང་སྒོ་གསུམ་ཀྱི་སྡིག་པ་མང་པོ་དག་གིས་ནི་ཉེ་བར་བསྒྲུབས་པའི་འབྱོར་པ་ཚེགས་ཆེན་པོ་ཅན་དག་གིས་འཚོ་བར་བྱེད་པ་དོན་ཆུང་ཚེ་འདིའི་ཕུན་ཚོགས་ཀྱིས་ཡིད་བསླུ་ཞིང་དུས་འདའ་བར་གནས་སོ། །འགྲོ་བ་འདི་རྣམས་རེས་བསོད་ནམས་ཀྱི་སྟོབས་ལས་བདེ་འགྲོ་མཐོ་རིས་ཀྱི་འཇིག་རྟེན་རྣམ་པ་མང་པོ་དག་ཏུ་ཡང་དང་ཡང་དུ་འོངས་ཏེ། མཐོ་རིས་ཀྱི་དགའ་བའི་བདེ་བ་མང་པོ་ལ་སྤྱད་སྤྱད་ནས། དེ་ནས་ཚེ་འཕོས་ཏེ་ཤི་ནས་སྡིག་པའི་འབྲས་བུས་ངན་སོང་གསུམ་གྱི་སྡུག་བསྔལ་ནི། ཤིན་ཏུ་ཡུན་རིང་ཞིང་བཟོད་པར་དཀའ་བ་མི་བཟད་པ་རྣམས་སུ་ལྟུང་བར་འགྱུར་ཞིང་། མཐོ་དམན་བདེ་སྡུག་ངེས་པ་མེད་པའི་སྲིད་པའི་སྐྱེ་བ་བརྒྱུད་མར་གཡོ་ཞིང་འཕྱན་པར་འགྱུར་བ་ཡིན་ལ། དེ་འདྲའི་སྲིད་པ་ན་ནི་ཕྱིན་ཅི་ལོག་ཏུ་ཞེན་པའི་དབང་གིས་འདོད་རྨོངས་སྲིད་པའི་གཡང་ས་ཤིན་ཏུ་མང་ཞིང་། སྲིད་པ་དེར་ནི་བདག་ལྟའི་ངང་ཚུལ་ཅན་ཕྱིན་ཅི་ལོག་གི་ཆོས་དངོས་པོ་བདེན་པར་ཞེན་པ་དེ་ཁོ་ན་ཉིད་མིན་པའི་རང་བཞིན་འདི་འདྲ་བ་ཡིན་པས། དེར་ཡང་སྟོང་ཉིད་རྟོགས་པ་དང་དངོས་པོར་འཛིན་པ་ཕན་ཚུན་འགལ་བས་ན། སྲིད་ན་དེ་ཁོ་ན་ཉིད་མཐོང་བ་འདི་འདྲ་བ་མེད་དེ་མུན་པའི་ཀློང་དུ་སྣང་བ་བཞིན་ནོ། །སྲིད་པ་དེར་ཡང་དཔེ་ཡིས་ཚད་བཟུང་དུ་མེད་ཅིང་ཤིན་ཏུ་བཟོད་དཀའ་བས་མི་བཟད་པའི། སྡུག་བསྔལ་གྱི་རྒྱ་མཚོ་ཆེན་པོ་མཐའ་ལས་འདས་པ་མྱོང་བར་འགྱུར་ཞིང་། དེར་ནི་དེ་ལྟར་ལས་དང་ཉོན་མོངས་དྲག་པོས་ཟིལ་གྱིས་མནན་ནས་དགེ་བ་སྒྲུབ་པ་ལ་སྟོབས་ཆུང་ཞིང་། དེར་ནི་དགེ་བ་སྒྲུབ་པའི་རྟེན་དལ་འབྱོར་གྱི་ཚེ་ཡང་ཡུན་ཐུང་བ་ཉིད་ཡིན་ལ། དེར་ཅུང་ཟད་གནས་པའི་སྐབས་སུ་ཡང་ཡུན་རིང་པོར་གསོན་པའི་བྱ་བ་ལུས་ཀྱི་རིམ་གྲོ་སྣ་ཚོགས་དང་ནད་མེད་པ་ཉིད་ཀྱི་ཕྱིར་སྨན་སོགས་བསྟེན་པར་བྱེད་པ་དང་བཀྲེས་པ་དང་ངལ་བ་དང་། གཉིད་དང་ཕྱི་ནང་གི་ཉེར་འཚེ་སྣ་ཚོགས་པ་དང་དེ་བཞིན་དུ། བྱིས་པའི་སྐྱེ་བོ་དང་འགྲོགས་པ་སོགས་དོན་མེད་ཀྱི་བྱ་བས། ཚེ་ནི་དོན་མེད་པར་མྱུར་དུ་འདའ་ཡི། སྲིད་པ་ལས་གྲོལ་བའི་རྒྱུ་དེ་ཁོ་ན་ཉིད་ཀྱི་དོན་ལ་བློས་རྣམ་པར་དཔྱོད་པ་ཤིན་ཏུ་རྙེད་པར་དཀའ་ཞིང་། འཁོར་བའི་གནས་དེར་ཡང་ཐོག་མ་མེད་པ་ནས་རྣམ་པར་གཡེང་བ་ལ་གོམས་པ་ཤུགས་དྲག་པོ་ནི། ཆུ་ཀླུང་བཞིན་དུ་བབས་པས་གློ་བུར་དུ་བཟློག་པའི་ཐབས་ནི་ག་ལ་ཡོད་དེ་མེད་ཅིང་། དེར་མ་ཟད་དེར་ཡང་དམྱལ་བ་ལ་སོགས་པའི་ངན་སོང་ཆེན་པོར་ནི། ལྟུང་བར་བྱ་བའི་ཕྱིར་ལྷའི་བུའི་བདུད་ལ་སོགས་པ་ནག་པོའི་རྩ་ལག་རྣམས་ཀྱིས་ནི་ཐར་པའི་ལམ་ལ་བར་དུ་གཅོད་པ་ལ་བརྩོན་པར་བྱེད་ཅིང་། དེར་ནི་རྟག་ཆད་ཀྱི་ལྟ་བ་སོགས་ལོག་པའི་ལམ་མང་ཞིང་། ཡང་དག་པའི་ལམ་མ་ནོར་བ་འདིའོ་ཞེས་དམིགས་རྣམ་ཕྱེད་པའི་ངེས་པ་མི་སྐྱེ་བར་ཐེ་ཚོམ་ལས་ཀྱང་བརྒལ་བར་དཀའ་སྟེ། ཐེ་ཚོམ་གཅོད་པའི་རྐྱེན་ཕྱི་ཡི་ཡོངས་འཛིན་ཐེག་ཆེན་ཚུལ་བཞིན་སྟོན་པའི་དགེ་བའི་བཤེས་གཉེན་དང་། ནང་གི་ཡོངས་འཛིན་ངེས་དོན་ཟབ་མོའི་སྡེ་སྣོད་ལ་ཤེས་རབ་རྣམ་པ་གསུམ་གྱིས་ཕྱིན་ཅི་མ་ལོག་པར་སྒྲུབ་པ་ལ་ནན་ཏན་དུ་བྱ་བ་ཡིན་ན་དེ་ལྟ་བུ་ཤིན་ཏུ་རྙེད་པ་དཀའ་བའི་ཕྱིར་དང་། དེ་ལྟར་ཆོས་ཀྱི་སྣང་བ་མ་རྙེད་པར་ཤི་ན་སླར་ཡང་མི་ཁོམ་པའི་གནས་ལས་ཐར་པའི་དལ་བ་ཕུན་སུམ་ཚོགས་པ་རྙེད་པར་དཀའ་ཞིང་། སངས་རྒྱས་འཇིག་རྟེན་དུ་འབྱུང་བ་སོགས་འབྱོར་བ་ཕུན་སུམ་ཚོགས་པའང་རྙེད་པར་ཤིན་ཏུ་དཀའ་ལ། སངས་རྒྱས་ཀྱི་བསྟན་པ་ལ་ནན་ཏན་དུ་བྱས་ནས་རང་རྒྱུད་ཀྱི་ཉོན་མོངས་པའི་ཆུ་བོ་བརྒལ་{སྤང}བའི་དུས་ཐོབ་པར་དཀའ་སྟེ། དེའི་ཕྱིར་སེམས་ཅན་དམན་པ་རྣམས་ནི་ཨེ་མ་ཞེས་སྨྲེ་སྔགས་ཀྱི་སྒྲ་དང་བཅས་ཏེ་སྡུག་བསྔལ་གཅིག་ནས་གཅིག་ཏུ་བརྒྱུད་པར་འགྱུར་རོ། །དེ་ལྟར་སྲིད་པ་ན་ཤིན་ཏུ་སྡུག་བསྔལ་ན་ཡང་། རང་ཉིད་སྡུག་བསྔལ་གྱི་ནང་དུ་བྱིང་བ་མི་མཐོང་བར་སྲིད་པ་ལ་ཞེན་པ་གང་ཡིན་པ་དང་། སྡུག་བསྔལ་གསུམ་གྱི་ཆུ་བོར་གནས་པའི་སེམས་ཅན་འདི་དག་ལ་དམིགས་ནས། ཀྱེ་ཧུད་ཅེས་རྒྱལ་བའི་སྲས་པོ་རྣམས་ཀྱིས་མྱ་ངན་བྱ་བར་འོས་ཏེ། དཔེར་ན་སྐྱེ་བོ་མྱོས་པ་འགའ་ཞིག་བསིལ་བའི་རེག་བྱ་འདོད་པས་ཡང་ཡང་ཆུར་ཞུགས་ནས་ཁྲུས་བྱས་ཏེ་ཡང་ཚ་བར་འདོད་པས་ཡང་ཡང་མེ་ནང་དུ་འཇུག་པ་སྤེལ་མར་བྱས་ཏེ། དེའི་དབང་གིས་དེ་ལྟར་ཚ་གྲང་གིས་ཤིན་ཏུ་སྡུག་བསྔལ་བར་གནས་ཀྱང་ད་དུང་བདག་ཉིད་བདེ་བར་རློམ་པ་བཞིན་དུ་ཕྱིན་ཅི་ལོག་ཏུ་ཞེན་པའི་དབང་གིས་སྡུག་བསྔལ་ལ་བདེ་བར་རློམ་པ་ཡིན་པས་སོ། །དེ་ལྟར་ཤིན་ཏུ་སྡུག་བསྔལ་ཡང་རྒ་བ་དང་ན་བ་འཆི་བ་སོགས་འོང་རྒྱུ་མེད་པ་བཞིན་དུ་བག་ཡངས་སུ་རོལ་ཞིང་སྤྱོད་པས་གནས་པ་རྣམས་ལ། དང་པོ་ཉིད་དུ་འཆི་བདག་བཟློག་ཏུ་མེད་ཅིང་བརྩེ་བ་མེད་པར་དེ་འོངས་ནས་རང་དབང་མེད་པར་བསད་པར་བྱས་ནས། དེའི་འོག་ཏུ་འདོད་པས་ཡང་ཡང་མེ་ནང་དུ་འཇུག་པ་སྤེལ་མར་བྱས་ཏེ། དེའི་འོག་ཏུ་ལས་དབང་གིས་ངན་སོང་དུ་ལྟུང་བ་ཡི་སྡུག་བསྔལ་མི་བཟད་པ་འོང་བར་འགྱུར་རོ། །དེ་ལྟར་དེ་ཁོ་ན་ཉིད་དོན་མཐོང་བ་དང་བྲལ་བས་ན། སྲིད་པའི་སྡུག་བསྔལ་གྱི་མེས་གདུངས་པ་རྣམས་ལ། བདག་གི་བསོད་ནམས་ཚད་མེད་པའི་སྤྲིན་ཆེན་པོ་ལས་ལེགས་པར་བྱུང་བའི། རང་གི་བདེ་བའི་འཚོགས་ཆས་སམ་ཡོ་བྱད་ཟས་གོས་གནས་མལ་ལ་སོགས་པ་ཅི་འདོད་པའི་ཚོགས་ཀྱི་ཆར་ཀྱིས། སེམས་ཅན་དེ་དག་གི་སྡུག་བསྔལ་ཞི་བར་བྱེད་པར་བདག་དུས་ནམ་ཞིག་ཏུ་འགྱུར་སྙམ་དུ་བསམ་པ་ནི་གནས་སྐབས་ཀྱི་བདེ་བ་དང་། ཡང་ངེས་ལེགས་ཀྱི་དབང་དུ་བྱས་ཏེ་ནམ་ཞིག་འཁོར་གསུམ་གྱི་དམིགས་པ་མེད་པའི་ཚུལ་དུ། སེམས་ཅན་རྣམས་ཀྱི་དོན་ལ་གུས་ཤིང་སྤྲོ་བས་བསོད་ནམས་དང་ཡེ་ཤེས་ཀྱི་ཚོགས་མཐའ་ཡས་པ་བསགས་ཏེ། རང་ཉིད་ཀྱིས་ཆོས་ཐམས་ཅད་ཀྱི་དེ་ཁོ་ན་ཉིད་མངོན་དུ་བྱས་ན ས། བདེན་ཞེན་གྱི་དམིགས་པ་ཁོ་ནའི་དབང་གིས་འཁོར་བའི་གནས་སུ་ཕུང་བར་གྱུར་པའི་སེམས་ཅན་རྣམས་ལ། དེའི་གཉེན་པོར་ཆོས་ཐམས་ཅད་དམིགས་པ་མེད་པར་སྟོན་པའི་སྟོང་པ་ཉིད་ནི་སྟོན་པར་འགྱུར་ན་ཅི་མ་རུང་ཞིང་། དེ་ལྟར་འགྱུར་བར་བྱའོ་ཞེས་སྙིང་རྗེ་ཆེན་པོ་བསྐྱེད་དོ། །རང་ཉིད་ཀྱིས་ཆོས་ཐམས་ཅད་བདེན་མེད་དུ་མཐོང་ན་གཞན་བདེན་འཛིན་གྱི་དབང་གིས་འཁོར་བ་རྣམས་ལ་ནམ་ཡང་མི་གཏོང་བའི་སྙིང་རྗེ་ཆེན་པོ་ཤུགས་ཀྱིས་འབྱུང་ཞིང་འདི་ནས་ཇི་སྐད་གསུངས་པ་ལྟ་བུའི་སེམས་སྐྱེ་བའང་ཆོས་ཉིད་དེ། སེམས་འགྲེལ་ལས། དེ་ལྟར་རྣལ་འབྱོར་པ་རྣམས་ཀྱིས། །སྟོང་པ་ཉིད་ནི་གོམས་བྱས་ན། །བློ་ནི་གཞན་དོན་ལ་དགའ་བར། །འགྱུར་བ་ཉིད་དུ་དཀའ་བ་མེད། །ཅེས་གསུངས་པ་བཞིན་ནོ། །སྲས་བཅས་རྒྱལ་བའི་བགྲོད་པ་གཅིག་པུའི་ལམ། །སྟོང་དང་རྟེན་འབྱུང་ཟུང་དུ་འཇུག་པ་ཡི། །མཐའ་བྲལ་དབུ་མའི་དེ་ཉིད་ལེགས་རྟོགས་ནས། །རྒྱལ་བའི་ཆོས་མཛོད་རྒྱ་མཚོ་འཛིན་གྱུར་ཅིག །བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། ཤེས་རབ་ཀྱི་ཕ་རོལ་ཏུ་ཕྱིན་པའི་ལེའུ་སྟེ་དགུ་པ་ཡི་མཆན་འགྲེལ་འདི་ཡང་རང་འདྲའི་བློ་གྲོས་གསར་བུ་པ་རྣམས་ལ་ཕན་པའི་ཕྱིར། སྔ་འགྱུར་རིག་འཛིན་བརྒྱུད་པའི་མན་ངག་ཇི་ལྟ་བར། ༧ ཀུན་མཁྱེན་བླ་མའི་ཤེར་ཊཱིཀ་ལས་སྙིང་པོར་བསྡུས་ཏེ་ཀུ་སཱ་ལི་གཞན་ཕན་ཆོས་ཀྱི་བློ་གྲོས་སམ་འཇམ་དབྱངས་བློ་གྲོས་རྒྱ་མཚོས་བྲིས་པ་སྟེ། འདི་ངེས་ནས་རྩ་བ་ཤེར་ཊཱིཀ་ཆེན་མོ་ཡན་ལག་དང་བཅས་པ་ལ་གོམས་ཤིང་འདྲིས་པར་བྱ་བ་ཅིས་ཀྱང་གལ་ཆེའོ། །མངྒལཾ། དགེ་ལེགས་འཕེལ། དགེའོ། །དགེའོ། །དགེའོ། །། །
སྤྱོད་འཇུག་ཤེར་ལེའི་འབྲུ་འགྲེལ་ཀུན་མཁྱེན་བླ་མའི་གསུང་ལས་བཏུས་པ་རབ་གསལ་ནོར་བུའི་སྒྲོན་མེ།
༄༅། །སྤྱོད་འཇུག་ཤེར་ལེའི་འབྲུ་འགྲེལ་ཀུན་མཁྱེན་བླ་མའི་གསུང་ལས་བཏུས་པ་རབ་གསལ་ནོར་བུའི་སྒྲོན་མེ་ཞེས་བྱ་བ་བཞུགས་སོ། །ན་མོ་གུ་རུ་མཉྫུ་ཤྲཱི་ཡེ། ཕུལ་བྱུང་མཁྱེན་རབ་མཚུངས་མེད་འཇམ་པའི་དབྱངས། །བརྩེ་ཆེན་ཐུགས་རྗེའི་དབང་ཕྱུག་པད་དཀར་འཆང་། །ནུས་མཐུ་དཔག་ཡས་གསང་བདག་རྡོ་རྗེ་འཛིན། །རིགས་གསུམ་དབྱེར་མེད་ཀུན་མཁྱེན་བླ་མར་འདུད། །ཟབ་ཅིང་རྒྱ་ཆེའི་ཐེག་མཆོག་དབུ་མའི་སྲོལ། །ལེགས་པར་གསལ་མཛད་རྒྱལ་སྲས་ཞི་བ་ལྷའི། །ཟབ་དགོངས་མ་ཀྱོག་སྔོན་རབས་མཁས་པའི་ལུགས། །སྐལ་བཟང་སྐྱེ་བོའི་སྙིང་གི་གདུང་སེལ་རྨད། །འདིར་རྨད་དུ་བྱུང་བའི་སློབ་དཔོན་ཆེན་པོ་རྒྱལ་སྲས་ཞི་བ་ལྷའི་ཞལ་སྔ་ནས་བསྩལ་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་ཤེར་ལེའི་རྣམ་བཤད་ཀུན་མཁྱེན་བླ་མའི་གསུང་ལས་ཚིག་དོན་གྱི་ཆ་ཅུང་ཟད་བསྡུས་ཏེ་འབྲུ་འགྲེལ་བལྟ་བདེར་འགོད་པ་ལ་གཉིས། ལམ་གྱི་གཙོ་བོ་ཤེས་རབ་བསྐྱེད་དགོས་ཚུལ་དང་། ཤེས་རབ་ཀྱི་ཕར་ཕྱིན་ཉིད་བཤད་པའོ། །དང་པོ་ནི། གོང་དུ་ཇི་སྐད་བཤད་པའི་སྦྱིན་པ་ལ་སོགས་པའི་རྒྱུ་བསོད་ནམས་ཀྱི་ཚོགས་ཀྱིས་བསྡུས་པའི་ཐབས་ཀྱི་ཡན་ལག་འདི་དག་ཐམས་ཅད་ནི། ཐུབ་པས་འབྲས་ཡུམ་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་དངོས་རྒྱུ་ཐུན་མོང་མ་ཡིན་པ་ལམ་གྱི་གཙོ་བོ་དེ་ཁོ་ན་ཉིད་རྟོགས་པའི་ཤེས་རབ་ཀྱི་གྲོགས་སམ་འཁོར་ཙམ་གྱི་དོན་དུ་གསུངས་ཏེ། ཤེས་རབ་ཀྱིས་ནི་སྒྲིབ་གཉིས་སྤོང་ཞིང་མཁྱེན་གཉིས་ཡེ་ཤེས་ཀྱི་མཐར་ཐུག་པར་བྱེད་པ་ཡིན་གྱི། ཕར་ཕྱིན་གཞན་གྱིས་དེ་མི་ནུས་པར་མ་ཟད་ཕར་ཕྱིན་ལྔ་པོ་དེ་དག་ཤེས་རབ་ཀྱིས་བཟུང་ན་གདོད་ཕར་ཕྱིན་གྱི་མིང་ཐོབ་ཅིང་སངས་རྒྱས་སུ་བགྲོད་པ་ཡིན་ཏེ། ཤེར་ཕྱིན་སྟོང་ཕྲག་བརྒྱ་པ་ལས། རབ་འབྱོར་འདི་ལྟ་སྟེ། དཔེར་ན། ཆུ་ཀླུང་ཇིི་སྙེད་ཅིག་ཡོད་པ་དེ་དག་ཐམས་ཅད་ཆུ་ཀླུང་ཆེན་པོ་གངྒཱ་ག་ལ་བ་དེར་འདོང་ངོ་། །དེ་དག་ཆུ་ཀླུང་གངྒཱ་དང་འགྲོགས་ཤིང་རྒྱ་མཚོ་ཆེན་པོའི་ནང་དུ་འདོང་ངོ་། །རབ་འབྱོར་དེ་བཞིན་དུ་ཕ་རོལ་ཏུ་ཕྱིན་པ་ལྔ་ཡང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་ཟིན་ན་རྣམ་པ་ཐམས་ཅད་མཁྱེན་པ་ཉིད་ག་ལ་བ་དེར་འདོང་ངོ་། །ཞེས་སོགས་དང་། སྡུད་པ་ལས་ཀྱང་། དམུས་ལོང་དམིགས་བུ་མེད་པ་བྱེ་བ་ཁྲག་ཁྲིག་རྣམས། །ལམ་ཡང་མི་ཤེས་གྲོང་ཁྱེར་འཇུག་པར་ག་ལ་འགྱུར། །ཤེས་རབ་མེད་ན་མིག་མེད་ཕ་རོལ་ཕྱིན་ལྔ་འདི། །དམིགས་བུ་མེད་པས་བྱང་ཆུབ་རེག་པར་ནུས་མ་ཡིན། །གང་ཚེ་ཤེས་རབ་ཀྱིས་ནི་རབ་ཏུ་ཟིན་གྱུར་པ། །དེ་ཚེ་མིག་རྙེད་གྱུར་ཅིང་འདི་ཡི་མིང་འཐོབ་བོ། །ཞེས་གསུངས། དེས་ན་ལམ་གྱི་གཙོ་བོ་ཤེས་རབ་ནི་མེད་དུ་མི་རུང་བ་ཡིན་ནོ། །ཞེས་དོན་ཆེ་བར་བསྟན་པ་ཡིན་ཏེ། འདི་ལ་ཡན་ལག་སྔ་ཕྱི་རྣམས་རྒྱུ་འབྲས་སུ་བཤད་པའང་ཡོད་དེ་གང་ལྟར་མི་འགལ་ཡང་། རང་ལམ་གྱི་སྤངས་རྟོགས་མཐར་ཕྱིན་པར་བྱེད་པ་ནི་ཤེས་རབ་འབའ་ཞིག་ལ་རག་ལས་པ་ཡིན་ནོ། །རྒྱུ་མཚན་དེ་ཡི་ཕྱིར་ན་རང་དང་གཞན་གྱི་སྡུག་བསྔལ་མཐའ་དག་རྩ་བ་ནས་ཞི་བར་འདོད་པས་དེ་ཁོ་ན་ཉིད་དམ་བདག་མེད་རྟོགས་པའི་ཤེས་རབ་དེ་འབད་པས་བསྐྱེད་དགོས་ཏེ། འཁོར་བའི་སྡུག་བསྔལ་ཐམས་ཅད་ནི་ཟག་བཅས་ལས་ཉོན་གྱི་རྒྱུ་ལས་བྱུང་ཞིང་། དེ་དག་ཀྱང་དངོས་པོར་འཛིན་པ་ལས་བྱུང་བས་ན། དེ་ཉིད་བདག་མེད་རྟོགས་པའི་ཤེས་རབ་ཀྱིས་སྤངས་པས་སྡུག་བསྔལ་ཐམས་ཅད་ཞི་བར་འགྱུར་ཞིང་། རང་གིས་སྟོང་ཉིད་རྟོགས་པ་ན་དེ་ལྟར་མ་རྟོགས་པ་རྣམས་ལ་སྙིང་རྗེ་ཆེན་པོའང་རྩོལ་མེད་དུ་འབྱུང་བས། ཇི་ལྟར་རྟོགས་པའི་དོན་དེ་ཉིད་བསྟན་པས། གཞན་རྒྱུད་ཀྱི་སྡུག་བསྔལ་ཡང་སེལ་ནུས་པའི་ཕྱིར་རོ། །གཉིས་པ་ཤེར་ཕྱིན་དངོས་ཉིད་བཤད་པ་ལ། གཞི་བདེན་སྟོང་དུ་རྣམ་པར་གཞག་པ་དང་། ལམ་བདག་མེད་དུ་གཏན་ལ་དབབ་པ་གཉིས། དང་པོ་ལ། དངོས་དང་རྩོད་སྤོང་གཉིས། དེའི་དང་པོ་ལ་རྟོགས་བྱ་བདེན་གཉིས་ངོས་བཟུང་། རྟོགས་པ་པོ་གང་ཟག་གི་རིམ་པ་བསྟན། ཇི་ལྟར་རྟོགས་པར་བྱ་བའི་ཚུལ་བཤད་པ་གསུམ་ལས། དང་པོ་བདེན་གཉིས་ངོས་བཟུང་བ་ནི། འདི་ལྟར་ཀུན་ནས་ཉོན་མོངས་པ་འཁོར་བའི་ཕྱོགས་དང་། རྣམ་པར་བྱང་བ་མྱ་ངན་ལས་འདས་པའི་མཚན་ཉིད་ཅན་གྱིས་བསྡུས་པའི་ཤེས་བྱའི་ཆོས་འདི་དག་ཐམས་ཅད་ལ། ཆོས་ཅན་ཇི་སྙེད་པ་སྣང་ཙམ་མ་འགགས་ཀྱང་དེ་ལ་རང་བཞིན་མེད་པས་ཀུན་རྫོབ་དང་ནི། ཆོས་ཉིད་ཇི་ལྟ་བ་སྤྲོས་པའི་མཚན་མ་ཐམས་ཅད་ཀྱིས་ཡེ་ནས་དབེན་པའི་སྟོང་པ་ཉིད་དེ་གཉེར་བྱའི་དོན་མཆོག་གམ་དམ་པ་ཡིན་པས་དོན་དམ་ཞེས་བྱ་སྟེ། འདི་གཉིས་པོ་ནི་དོན་དམ་པར་རང་བཞིན་མེད་པའམ། མཚན་ཉིད་དང་བྲལ་བའི་དབྱིངས་སུ་ཚུལ་གཅིག་ཀྱང་། ཐ་སྙད་དུ་འཇིག་རྟེན་པའི་བློ་ངོ་ན་བདེན་པ་མ་ཡིན་པ་ལས་ལོག་ཙམ་གྱི་དབང་དུ་བྱས་ཏེ་གནས་སྣང་ངམ་རྣམ་ཤེས་འཁྲུལ་པ་དང་ཡེ་ཤེས་མ་འཁྲུལ་པའི་ངོར་མི་བསླུ་བས་ན་བདེན་པ་ཞེས་བྱ་སྟེ་དེ་ལྟར་རྣམ་པ་གཉིས་སུ་གནས་པར་འདོད་དེ། རིགས་པ་དྲུག་ཅུ་པའི་འགྲེལ་པར། བདེན་པ་གཉིས་སུ་འཇིག་རྟེན་པའི་བློ་ལ་ལྟོས་ནས་འཇོག་གོ་ཞེས་དང་། ཡབ་སྲས་མཇལ་བའི་མདོ་ལས། འཇིག་རྟེན་མཁྱེན་པའི་བདེན་པ་འདི་གཉིས་ཏེ། །ཁྱེད་ཀྱིས་གཞན་ལས་མ་གསན་རང་གིས་རིག །དེ་ནི་ཀུན་རྫོབ་བདེན་དང་དོན་དམ་སྟེ། །བདེན་པ་གསུམ་པ་གང་ཡང་མ་མཆིས་སོ། །ཞེས་གསུངས། འཕགས་པའི་བདེན་པ་བཞི་སོགས་ཇི་སྙེད་བཤད་པ་རྣམས་ཀྱང་འདི་གཉིས་སུ་འདུ་བ་ཡིན་ཞིང་། དེ་ལ་ཀུན་རྫོབ་ནི་སྣང་ཞིང་སྲིད་པའི་ཆོས་སོ་ཅོག་ཐམས་ཅད་རྟེན་ཅིང་འབྲེལ་བར་འབྱུང་བའི་དབང་གིས་དོན་ལ་སྐྱེ་སོགས་ཀྱི་སྤྲོས་པའི་རང་བཞིན་དུ་མེད་བཞིན་དེར་སྣང་བ་སྒྱུ་མ་དང་རྨི་ལམ་སྐྲ་ཤད་ལྟ་བུའི་སྣང་ཚུལ་མ་བརྟགས་ཉམས་དགའ་ཙམ་དུ་འཇིག་རྟེན་ན་ཇི་ལྟར་གྲགས་པ་འདི་ཡིན་ཏེ། སློབ་དཔོན་ཞི་བ་འཚོས། མ་བརྟགས་གཅིག་པུ་ཉམས་དགའ་ཞིང་། །སྐྱེ་དང་འཇིག་པའི་ཆོས་ཅན་པ། །དོན་བྱེད་པ་དག་ནུས་རྣམས་ཀྱི། །རང་བཞིན་ཀུན་རྫོབ་ཡིན་པར་རྟོགས། །ཞེས་དང་། འཇུག་འགྲེལ་དུ། ཀུན་རྫོབ་ཀྱི་བདེན་པ་གང་ཡིན་པ་དེ་ནི་དོན་དམ་པ་ལ་འཇུག་པར་བྱ་བའི་ཐབས་ཡིན་པའི་ཕྱིར་བདག་དང་གཞན་ལས་སྐྱེ་བ་སོགས་མ་དཔྱད་པར་འཇིག་རྟེན་ལུགས་ཀྱིས་ཁས་ལེན་པར་བྱེད་པ་ཡིན་ནོ། །ཞེས་དང་། མདོ་ལས། བཅོམ་ལྡན་འདས་ཀྱིས་འཇིག་རྟེན་ང་དང་ལྷན་ཅིག་རྩོད་ཀྱི། ང་ནི་འཇིག་རྟེན་དང་ལྷན་ཅིག་མི་རྩོད་དེ། གང་འཇིག་རྟེན་ན་ཡོད་པར་འདོད་པ་དེ་ནི་ང་ཡང་ཡོད་པར་བཞེད་དོ། །གང་འཇིག་རྟེན་ན་མེད་པར་འདོད་པ་དེ་ནི་ངས་ཀྱང་མེད་པར་བཞེད་དོ། །ཞེས་པ་ལྟར་རོ། །དེ་ཡང་འཇིག་རྟེན་པའི་ལུགས་ཞེས་བྱ་བ་གཞན་ངོ་ཙམ་དུ་སྟོན་པ་ཁོ་ན་མ་ཡིན་ཏེ་བརྟེན་ནས་འབྱུང་བའི་སྣང་བ་གང་ཞིག་རང་གཞན་ཐམས་ཅད་ལ་བསླུ་མེད་དུ་སྣང་བ་ཀུན་ཏུ་ཐ་སྙད་པའི་ཚད་མ་དང་མི་འགལ་བ་དེ་ཇི་ལྟར་སྣང་ཙམ་པ་དེ་བཞིན་དུ་དོན་དམ་པར་ཡོད་མེད་དུ་མ་དཔྱད་པར་ཁས་ལེན་པ་ཡིན་ནོ། །ཆོས་ཅན་སྣང་བ་དེའི་རང་བཞིན་ལ་ཕྱིན་ཅི་མ་ལོག་པའི་ཤེས་རབ་ཀྱིས་ལེགས་པར་བརྟགས་ན་སྐྱེ་འགག་རྟག་ཆད་གཅིག་ཐ་དད་སོགས་གཉིས་ཆོས་ཀྱི་སྤྲོས་པའི་མཚན་མ་མཐའ་དག་གིས་ཡེ་གདོད་མ་ནས་སྟོང་པའི་གནས་ཚུལ་ཆོས་ཉིད་ཀྱི་གཤིས་ལུགས་ཟབ་མོ་སྨྲ་བརྗོད་ཀྱི་ཡུལ་ལས་འདས་པ་ནི་དོན་དམ་པ་ཉིད་ཡིན་ཏེ། བདེན་གཉིས་ལས། སྐྱེ་ལ་སོགས་པ་བཀག་པ་ཡང་། །ཡང་དག་པ་དང་མཐུན་ཉིད་བཞེད། །སྐྱེ་མེད་སྤྲོས་ཀུན་ཞི་བ་ལ། །དོན་དམ་ཞེས་ནི་བརྡར་མཛད་དོ། །ཞེས་དང་། ཨ་ཏི་ཤས། ཀུན་རྫོབ་ཇི་ལྟར་གནས་པ་འདི། །རིགས་པས་དཔྱད་ན་འགའ་མི་རྙེད། །མ་རྙེད་པ་དེ་དོན་དམ་སྟེ། །ཡེ་ནས་གནས་པའི་ཆོས་ཉིད་དོ། །ཞེས་གསུངས། དེ་ལྟ་བུའི་བདེན་པ་གཉིས་པོ་དེ་ཡང་། ཀུན་རྫོབ་ཏུ་གཅིག་པ་དང་། དོན་དམ་པར་ཐ་དད་ན་སྐྱོན་བཞི་བཞིས་གནོད་པར་དགོངས་འགྲེལ་ལས་གསུངས་ཏེ། ཀུན་རྫོབ་ཏུ་གཅིག་ཡིན་ན། ཀུན་རྫོབ་མཐོང་བ་ན་དོན་དམ་པའི་བདེན་པའང་མཐོང་བར་འགྱུར་བ་དང་། དོན་དམ་ལྟར་ཀུན་རྫོབ་ཀྱང་དབྱེ་བ་བྱར་མེད་པར་འགྱུར་བ་དང་། ཀུན་རྫོབ་སྒྲིབ་པའི་དམིགས་པ་ཡིན་པ་ལྟར་དོན་དམ་པའང་སྒྲིབ་པའི་དམིགས་པར་ཐལ་བ་དང་། ཀུན་རྫོབ་མཐོང་བ་དང་ཐོས་པ་ལས་གཞན་དུ་བཙལ་བར་བྱ་བ་མ་ཡིན་པ་ལྟར་དོན་དམ་པའང་བཙལ་བར་བྱ་བ་མ་ཡིན་པར་ཐལ་བའོ། །དོན་དམ་པར་ཐ་དད་ན་བདེན་པ་གཉིས་ཆོས་ཅན་དང་ཆོས་ཉིད་མ་ཡིན་པར་ཐལ་བ་དང་། དོན་དམ་སྟོང་པ་ཉིད་རྟོགས་པས་དམིགས་པའི་མཚན་མ་ཟིལ་གྱིས་མི་གནོན་པར་ཐལ་བ་དང་། ཀུན་རྫོབ་ཡང་དག་པར་མ་གྲུབ་པ་ཙམ་དོན་དམ་པ་མ་ཡིན་པར་ཐལ་བ་དང་། ཀུན་ནས་ཉོན་མོངས་པ་དང་རྣམ་བྱང་དུས་གཅིག་པར་གང་ཟག་གཅིག་གི་རྒྱུད་དུ་དམིགས་པར་ཐལ་བའོ། །དེས་ན་ཆོས་ཐམས་ཅད་ཀྱི་རང་བཞིན་གཅིག་ཐ་དད་དང་བྲལ་བས་རང་གི་ངོ་བོའི་དབྱེ་བ་མེད་དེ། མདོ་དེ་ཉིད་ལས་ཀུན་རྫོབ་ཁམས་དང་དོན་དམ་མཚན་ཉིད་ནི། གཅིག་དང་ཐ་དད་བྲལ་བའི་མཚན་ཉིད་དེ། །གཅིག་དང་ཐ་དད་ཉིད་དུ་གང་རྟོག་པ། །དེ་དག་ཚུལ་མིན་ལྟ་ལ་ཞུགས་པ་ཡིན། །ཞེས་གསུངས། ཐ་སྙད་ཙམ་དུ་དབྱེ་ན། ཀུན་རྫོབ་ལས་ངོ་བོ་ཐ་དད་དུ་གྱུར་པའི་དོན་དམ་བདེན་པ་རིགས་པས་དཔྱད་ན་མི་རྙེད་པའི་ཕྱིར་དང་། བློས་མཐོང་ཚུལ་ཐ་མི་དད་པས་དེ་གཉིས་གཞི་གཅིག་ལས་དབྱེ་དགོས་པའི་ཕྱིར་ངོ་བོ་གཅིག་ལ་ལྡོག་པ་ཐ་དད་དུ་གསུངས་ཏེ། བྱང་ཆུབ་སེམས་འགྲེལ་ལས། ཀུན་རྫོབ་ལ་ནི་ཐ་དད་པར། །དེ་ཉིད་དམིགས་པ་མ་ཡིན་ཏེ། །ཀུན་རྫོབ་སྟོང་པ་ཉིད་དུ་བཤད། །སྟོང་ཉིད་ཁོ་ན་ཀུན་རྫོབ་ཡིན། །མེད་ན་མི་འབྱུང་ངེས་པའི་ཕྱིར། །བྱས་དང་མི་རྟག་པ་བཞིན་ནོ། །ཞེས་སོ། །དེ་ལ་སྤྱིར་མདོ་དང་བསྟན་བཅོས་ཆེན་པོ་རྣམས་ལས་བདེན་གཉིས་འཇོག་ཚུལ་མི་འདྲ་བ་གཉིས་གསུངས་ཏེ། གནས་ཚུལ་སྐྱེ་མེད་ལ་དོན་དམ་དང་། སྣང་ཚུལ་ཐ་སྙད་ལ་ཀུན་རྫོབ་ཀྱི་མིང་གིས་བསྟན་ཏེ་གཞི་ལམ་འབྲས་བུའི་ཆོས་ཐམས་ཅད་སྣང་སྟོང་ཟུང་འཇུག་གི་ངོ་བོར་ཚུལ་གཅིག་པར་དགོངས་ཏེ་ངེས་དོན་ཤིང་རྟ་ཆེན་མོར་ཡང་དེ་བཞིན་དུ་ཞལ་བཞེས་མཛད་ལ། ཡང་གནས་སྣང་མཐུན་པར་གྱུར་པའི་ཡུལ་ཡུལ་ཅན་གཉིས་ཀ་ལ་དོན་དམ་དང་། མི་མཐུན་པར་གྱུར་པའི་ཡུལ་ཡུལ་ཅན་གཉིས་ཀ་ལ་ཀུན་རྫོབ་ཀྱི་མིང་གིས་བསྟན་ཏེ། འཇུག་པར། གཏི་མུག་རང་བཞིན་སྒྲིབ་ཕྱིར་ཀུན་རྫོབ་སྟེ། །དེས་གང་བཅོས་མ་བདེན་པར་སྣང་དེ་ནི། །ཀུན་རྫོབ་བདེན་ཞེས་ཐུབ་པ་དེས་གསུངས་ཏེ། །བཅོས་མར་གྱུར་པའི་བློ་ནི་ཀུན་རྫོབ་ཏུའོ། །ཞེས་པ་ལྟར་མེད་སྣང་འཁོར་བའི་ཆོས་སྦྱང་བྱ་གློ་བུར་གྱི་འཁྲུལ་པའི་དྲི་མ་རྣམས་ཀུན་རྫོབ་དང་། དག་པ་མྱང་འདས་ཀྱི་ཆོས་རྣམས་དོན་དམ་དུ་བྱས་ཏེ་མཛོད་འགྲེལ་པད་དཀར་ལས་གསུངས་པ་ལྟ་བུ་སྟེ། དེ་གཉིས་སོ་སོའི་ལུགས་ཀྱི་དགོངས་པ་མ་འདྲེས་པར་སྐབས་ཀྱི་ཤན་འབྱེད་དགོས་པས། གོང་དུ་བཤད་པའི་ཐ་སྙད་ཀྱི་ཁས་ལེན་ནི་བདེན་གཉིས་འཇོག་ཚུལ་སྔ་མའི་དབང་དུ་བྱས་པ་སྟེ། འདིའི་ལུགས་ལ་ཐ་སྙད་ཀྱི་བདེན་པ་ལ་བརྟེན་ནས་དོན་དམ་གཏན་ལ་དབབ་པའི་ཕྱིར། དེ་གཉིས་ཐབས་དང་ཐབས་བྱུང་གི་ངོ་བོར་འགྱུར་ཏེ། སྔ་མ་ལས། ཐ་སྙད་བདེན་པ་ཐབས་སུ་གྱུར་པ་དང་། །དོན་དམ་བདེན་པ་ཐབས་བྱུང་གྱུར་པ་སྟེ། །ཞེས་གསུངས། ཕྱི་མའི་དབང་དུ་བྱས་ན་མཐོང་བ་ཡང་དག་འཕགས་པའི་ཡེ་ཤེས་དང་། མཐོང་བ་རྫུན་པ་སོ་སྐྱེའི་བློ་གཉིས་སྣང་ཅན་གྱི་རྣམ་ཤེས་ཀྱི་ཡུལ་དུ་གྱུར་མ་གྱུར་གྱི་སྒོ་ནས་བཞག་སྟེ། དེ་ཉིད་ལས། དངོས་ཀུན་ཡང་དག་རྫུན་པ་མཐོང་བ་ཡིས། །དངོས་རྙེད་ངོ་བོ་གཉིས་ནི་འཛིན་པར་འགྱུར། །ཡང་དག་མཐོང་ཡུལ་གང་ཡིན་དེ་ཉིད་དེ། །མཐོང་བ་རྫུན་པ་ཀུན་རྫོབ་བདེན་པར་གསུངས། །ཞེས་གསུངས། འདིའི་ལུགས་ལ་དེ་གཉིས་གཅིག་པ་བཀག་པའི་ཐ་དད་ཙམ་དུ་བཞེད་དེ། རྗེ་བཙུན་བསོད་ནམས་རྩེ་མོ་སོགས་དཔལ་ས་སྐྱ་བའི་བསྟན་འཛིན་ཆེན་པོ་རྣམས་ཀྱང་དེ་བཞིན་བཞེད་ལ། རྗེ་བཙུན་བྱམས་མགོན་ཞབས་ཀྱིས་ཀྱང་། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་གསུངས་པའང་རིགས་པ་འདི་དང་མཐུན་ནོ། །དེ་ལས་རེ་ཞིག་བདེན་གཉིས་འཇོག་ཚུལ་སྔ་མའི་དབང་དུ་བྱས་ཏེ། ཀུན་རྫོབ་ལའང་། དབུ་མ་རང་རྒྱུད་པ་རྣམས་ཀྱིས། སྣང་ཡང་དོན་བྱེད་ནུས་པ་དང་མི་ནུས་པའི་དབང་གིས་ཡང་དག་པ་དང་ལོག་པའི་ཀུན་རྫོབ་གཉིས་སུ་དབྱེ་བར་མཛད་དེ། བདེན་གཉིས་ལས། སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པའི། །ཀུན་རྫོབ་ཀྱི་ནི་དབྱེ་བ་བྱས། །ཞེས་གསུངས་ཤིང་། ཐལ་འགྱུར་པས་ནི་རང་གི་མཚན་ཉིད་ཀྱིས་གྲུབ་པ་དང་བདེན་པར་གྲུབ་པ་དོན་གཅིག་པས་ཐ་སྙད་དུའང་མ་གྲུབ་པར་དེ་གཉིས་འདྲ་ན་ཡང་། འཇིག་རྟེན་པ་བདེན་བརྫུན་བྱེད་པ་དང་བསྟུན་ནས་ཕྱེ་བ་ཙམ་དུ་ཟད་དེ། འཇུག་པར། སྐྱོན་ལྡན་དབང་ཅན་རྣམས་ཀྱི་ཤེས་པ་ནི། །དབང་པོ་ལེགས་གྱུར་ཤེས་ལྟོས་ལོག་པར་འདོད། །གནོད་པ་མེད་པའི་དབང་པོ་དྲུག་རྣམས་ཀྱིས། །བཟུང་བ་གང་ཡིན་འཇིག་རྟེན་གྱིས་རྟོགས་ཏེ། །འཇིག་རྟེན་ཉིད་ལས་བདེན་ཡིན་ལྷག་མ་ནི། །འཇིག་རྟེན་ཉིད་ལས་ལོག་པར་རྣམ་པར་བཞག །ཅེས་ཚིག་རྐང་སྔ་མ་གཉིས་ཤེས་པའི་དབང་དུ་བྱས་པ་དང་། ཕྱི་མ་བཞི་ཡུལ་གྱི་དབང་དུ་བྱས་ཏེ་གསུངས་སོ། །དབྱེ་སྒོ་གཞན་ཡང་བློ་འཁྲུལ་པ་དང་མ་འཁྲུལ་པའི་དབང་གིས་གཉིས་སུ་བཞག་པ་ཡོད་དེ། སོ་སོའི་སྐྱེ་བོའི་བློ་གཉིས་སྣང་ཅན་གྱི་ངོར་སྣང་ཞིང་བདེན་ཞེན་དང་བཅས་པའི་སེམས་རྟོག་དང་སྣང་བ་རྣམས་ནི། ཡུལ་འཁྲུལ་སྣང་བློ་རྫུན་པའི་ངོ་བོ་ལ་སྣང་ཞིང་གནས་ཚུལ་ལ་སྒྲིབ་པའི་ཕྱིར་ལོག་པའི་ཀུན་རྫོབ་དང་། འཕགས་པའི་ཡེ་ཤེས་ཐོབ་ནས་བདེན་ཞེན་མེད་པའི་འཆར་སྒོ་དང་སྣང་བ་ཐམས་ཅད་ལ་ཡང་དག་པའི་ཀུན་རྫོབ་ཀྱི་སྒྲས་བསྟན་པ་ཡོད་དེ། དེ་ལའང་འབྲས་བུ་ཐོབ་བྱེད་ཀྱི་ལམ་ལ་མ་འཁྲུལ་པ་དང་། འབྲས་བུ་ཐོབ་ནས་མ་འཁྲུལ་པ་གཉིས་ཀྱི། དང་པོ་ནི། འཕགས་པ་སློབ་པའི་རྒྱུད་ཀྱི་ལམ་བདེན་གྱིས་བསྡུས་པ་སྟེ་དེ་དག་འགྱུར་ཞིང་གོང་དུ་བགྲོད་པས་མི་རྟག་ཀྱང་གཤིས་ཀྱི་སར་བགྲོད་པ་དང་བདེན་ཞེན་མེད་པའི་ཕྱིར་དེ་སྐད་དུ་བརྗོད་དེ། རྒྱུད་བླ་མའི་འགྲེལ་པར། ལམ་བདེན་ཐམས་ཅད་ནི་འདུས་བྱས་འདུས་བྱས་ཐམས་ཅད་ཀུན་རྫོབ་སྟེ་ཞེས་གསུངས། གཉིས་པ་ནི། སངས་རྒྱས་ཀྱི་གཟུགས་སྐུ་གཉིས་དང་། ཇི་སྙེད་མཁྱེན་པའི་ཡེ་ཤེས་དང་བཅས་པ་སྟེ། རྒྱུད་བླ་མར། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པའི་ཀུན་རྫོབ་སྐུ་ཉིད་དོ། །ཞེས་གསུངས་ཏེ། འདི་ནི་གདུལ་བྱ་གཞན་ངོར་སྣང་བའི་ཆ་ཙམ་ནས་བཏགས་ཏེ། ཀུན་རྫོབ་མཚན་ཉིད་པ་མ་ཡིན་ཞིང་དོན་དམ་ཉག་གཅིག་གི་དགོངས་པ་མཐར་ཕྱིན་པའི་གནས་སྐབས་ཡིན་པའི་ཕྱིར་རོ། །དེ་བཞིན་དུ་དོན་དམ་པ་དེ་ལའང་སྐྱེ་བ་དང་གནས་པ་སོགས་བཀག་པའི་སྐྱེ་མེད་དང་གནས་མེད་སོགས་མེད་དགག་ཙམ་གྱི་སྟོང་པ་ནི་སྟོང་ཉིད་ཆེན་པོ་མཐའ་བཞི་དང་བྲལ་བ་ལ་འཇུག་པའི་སྒོ་ཙམ་ཡིན་པས་རྣམ་གྲངས་པའི་དོན་དམ་མམ་མཐུན་པའི་དོན་དམ་ཞེས་བརྡ་མཛད་དེ། རྒྱན་ལས། དམ་པའི་དོན་དམ་མཐུན་པའི་ཕྱིར། །འདི་ནི་དམ་པའི་དོན་ཞེས་བྱ། །ཞེས་གསུངས་ཏེ། རེ་ཞིག་ཐོག་མ་མེད་པ་ནས་དངོས་པོར་ཞེན་པ་གོམས་པ་རྣམས་ལ་མཐའ་བཞི་དང་བྲལ་བའི་ཡེ་ཤེས་སྐྱེ་བའི་སྐབས་མེད་པས། དངོས་ཀུན་དོན་དམ་པར་མེད་པ་ཙམ་གྱིས་རབ་ཏུ་ཕྱེ་བའི་སེམས་བྱུང་ཤེས་རབ་བསྐྱེད་དགོས་པས་ན། རང་རྒྱུད་པའི་གཞུང་ཐམས་ཅད་དུ་ནི། མདོ་དང་བསྟན་བཅོས་རྣམས་སུ་གཟུགས་སོགས་མེད་པར་བཀག་པའི་རྣམ་པ་ཐམས་ཅད། བདེན་ཡོད་ཙམ་འགོག་པའི་མེད་རྐྱང་རྣམ་གྲངས་པའི་དོན་དམ་དུ་བཤད་པ་མཛད་ནས། དེ་ལས་སླར་མེད་པ་ཉིད་ཀྱང་གནས་ལུགས་མཐར་ཐུག་གི་དོན་དུ་མི་བཞེད་དེ། རྒྱན་ལས། སྐྱེ་ལ་སོགས་པ་མེད་པའི་ཕྱིར། །སྐྱེ་བ་མེད་པ་སོགས་མི་སྲིད། །ཅེས་དང་། བདེན་གཉིས་ལས། ཡང་དག་ཏུ་ན་བཀག་མེད་གསལ། །ཞེས་པ་བཞིན་ནོ། །དེ་ལྟ་ནའང་གནས་སྐབས་ལམ་གཏན་ལ་འབེབས་པའི་སྐབས་སུ་དོན་དམ་པར་སྐྱེ་བ་མེད་ཀྱང་ཀུན་རྫོབ་ཏུ་སྐྱེ་བ་ལྟར་སྣང་བ་འགོག་མི་ནུས་པས་ཆོས་རྣམས་ནི་ཀུན་རྫོབ་ཏུ་རང་གི་མཚན་ཉིད་འཛིན་པར་ཐ་སྙད་དཔྱོད་པའི་ཚད་མས་གྲུབ་ཅིང་དེ་སྣང་བ་ལྟར་དོན་དམ་པར་མ་གྲུབ་པས་དགག་བྱ་ལ་དོན་དམ་གྱི་ཁྱད་པར་སྦྱར་ཏེ་དོན་དམ་པར་མེད་ལ་ཀུན་རྫོབ་པར་བསླུ་མེད་དུ་ཡོད་དོ་ཞེས་འཕགས་པའི་རྗེས་ཐོབ་ཀྱི་གཟིགས་པ་དང་མཐུན་པར་འཆད་པར་བྱེད་དེ། དེ་ལྟར་བདེན་གཉིས་སོ་སོར་རང་ས་ན་མ་ཉམས་པར་བཞག་པ་འདི་ལས་དང་པོ་བའི་བློ་ངོར་ཅིས་ཀྱང་བདེ་བ་ཡིན་ཏེ། སློབ་དཔོན་ལེགས་ལྡན་འབྱེད་ཀྱིས། ཡང་དག་ཀུན་རྫོབ་རྣམས་ཀྱི་སྐས། །མེད་པར་ཡང་དག་ཁང་ཆེན་ཀྱི། །སྟེང་དུ་འགྲོ་བར་བྱ་བ་ནི། །མཁས་ལ་རུང་བ་མ་ཡིན་ནོ། །ཞེས་གསུངས་སོ། །འོན་ཀྱང་གནས་ལུགས་མཐར་ཐུག་པ་འཕགས་པའི་མཉམ་བཞག་གི་གཟིགས་པ་དང་རྗེས་སུ་མཐུན་པ་རྣམ་གྲངས་མ་ཡིན་པའི་དོན་དམ་གྱི་དབང་དུ་བྱས་ན་ཀུན་རྫོབ་ཏུ་ཡོད་པ་དང་། དོན་དམ་པར་མེད་པ་ཞེས་ཡོད་པ་དང་མེད་པའི་མཚན་ཉིད་གཉིས་སོ་སོར་ཕྱོགས་སུ་ཆད་དེ་གནས་པ་མ་ཡིན་ཏེ། གང་སྣང་བའི་གཟུགས་ལ་སོགས་པ་འདི་ཉིད་རང་བཞིན་གྱིས་སྟོང་པས་གཟུགས་སྟོང་པ་དང་། གནས་སྐབས་རྟེན་འབྲེལ་གྱི་སྣང་བ་མ་འགགས་པར་ཤར་བས་སྟོང་པ་ཉིད་གཟུགས་དང་། སྣང་ཙམ་ཉིད་ན་ངོ་བོ་སྟོང་ཉིད་ལས་མ་གཡོས་པས་གཟུགས་ལས་ཀྱང་སྟོང་པ་ཉིད་གཞན་མ་ཡིན་པ་དང་། ངོ་བོ་སྟོང་ཉིད་ལས་མ་གཡོས་བཞིན་དུ་གཟུགས་སོགས་སུ་སྣང་བས་སྟོང་པ་ཉིད་ལས་ཀྱང་གཟུགས་གཞན་མ་ཡིན་པ་སྟེ། ཤེར་མདོ་ལས་གསུངས་པའི་སྟོང་ཉིད་བཞི་སྦྱོར་གྱི་དགོངས་པ་སྣང་སྟོང་ཟུང་དུ་འཇུག་པའི་ཆོས་ཀྱི་དབྱིངས་སྒྲོ་འདོགས་སོ་གཉིས་དང་བྲལ་བ་མངོན་དུ་མ་བྱས་པ་དེ་སྲིད་དུ་ཤེར་ཕྱིན་མཚན་ཉིད་པ་མ་ཡིན་པས། དཔལ་ལྡན་ཟླ་བ་དང་ཞི་བ་ལྷ་ལ་སོགས་པ་ནི། དང་པོ་ནས་མཐའ་བཞི་དང་བྲལ་བའི་ཡེ་ཤེས་སོ་སོ་རང་རིག་པ་ཉིད་རྩལ་དུ་འདོན་པར་མཛད་དེ། འཇུག་པ་ལས། དེ་ཉིད་སྐབས་སུ་རིགས་པ་གང་ཞིག་གིས། །བདག་དང་གཞན་ལས་སྐྱེ་བ་རིགས་མིན་པ། །རིགས་དེས་ཐ་སྙད་དུ་ཡང་རིགས་མིན་པས། །ཁྱོད་ཀྱི་སྐྱེ་བ་གང་ཞིག་ཡིན་པར་འགྱུར། །དངོས་པོ་སྟོང་པ་གཟུགས་བརྙན་ལ་སོགས་པ། །ཚོགས་ལ་ལྟོས་ནས་མ་གྲགས་པ་ཡང་མིན། །ཇི་ལྟར་དེ་ནི་གཟུགས་བརྙན་སོགས་སྟོང་ལས། །ཤེས་པ་དེ་ཡི་རྣམ་པར་སྐྱེ་འགྱུར་ལྟར། །དེ་བཞིན་དངོས་པོ་ཐམས་ཅད་སྟོང་ན་ཡང་། །སྟོང་ཉིད་དག་ལས་རབ་ཏུ་སྐྱེ་བར་འགྱུར། །བདེན་པ་གཉིས་སུའང་རང་བཞིན་མེད་པའི་ཕྱིར། །དེ་དག་རྟག་པ་མ་ཡིན་ཆད་པའང་མིན། །ཞེས་གསུངས་པ་ལྟར། ཀུན་རྫོབ་རང་མཚན་གྱིས་གྲུབ་པ་དེ་ཡང་བཀག་པས་བདེན་གཉིས་སོ་སོར་འཛིན་པ་ཁེགས་ཏེ་སྣང་སྟོང་ཟུང་དུ་འཇུག་པར་འགྱུར་བས་དོན་དམ་པའི་གནས་ཚུལ་ལ་རྗེས་སུ་སོན་པའི་ལྟ་བ་ཁས་ལེན་ཀུན་བྲལ་དུ་སོང་བའི་གནད་ཀྱིས་ཡོད་པ་དང་མེད་པའི་ཕྱོགས་ཐམས་ཅད་ཐལ་འགྱུར་གྱིས་འཇིལ་བར་མཛད་པའི་ཕྱིར་ཐལ་འགྱུར་པ་ཞེས་མཚན་དུ་ཆགས་སོ། །འདིར་ཁས་ལེན་མི་ལེན་གྱི་རྣམ་བཞག་ནི། དབུ་མ་པ་སྤྱིས་དོན་དམ་སྤྲོས་བྲལ་དུ་འདོད་པའི་ཕྱིར་ཁས་ལེན་མི་ལེན་གྱི་དཔྱད་ར་མེད་ཀྱང་རེ་ཞིག་ཀུན་རྫོབ་ཐ་སྙད་ཙམ་དུ་སྐབས་ཀྱི་དབྱེ་བས་ཐལ་འགྱུར་པ་ལ་ཁས་ལེན་པ་དང་མི་ལེན་པའི་རྣམ་བཞག་གཉིས་གསུངས་པ་ལས། རང་ལུགས་ཀུན་མཁྱེན་ཆེན་པོའི་བཞེད་པ་ནི། རྩོད་པ་དང་དོན་དམ་ཡུལ་དུ་བྱེད་པའི་ཚེ་སྣང་བ་གང་ཡང་རང་བཞིན་མེད་པས་གཤིས་ལ་ཁས་ལེན་མེད་པའི་ཕྱིར་གང་ཡང་ཁས་བླང་བར་མི་བྱ་སྟེ། རྩོད་བཟློག་ལས། གལ་ཏེ་ངས་དམ་བཅས་འགའ་ཡོད། །དེ་ཚེ་ང་ལ་སྐྱོན་འདི་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་དང་། འཇུག་པར། ཇི་ལྟར་ཁྱེད་ཀྱིས་གཞན་དབང་དངོས་འདོད་ལྟར། །ཀུན་རྫོབ་ཀྱང་ནི་བདག་གིས་ཁས་མ་བླངས། །འབྲས་ཕྱིར་འདི་དག་མེད་ཀྱང་ཡོད་དོ་ཞེས། །འཇིག་རྟེན་ངོར་བྱས་བདག་ནི་སྨྲ་བར་བྱེད། །ཅེས་གསུངས། ལམ་རྗེས་ཐོབ་པ་ཐ་སྙད་ཡུལ་དུ་བྱེད་དུས་གསུང་རབ་ལས་བཤད་པ་ལྟར་རྣམ་དབྱེ་དང་བཅས་པ་རྨི་ལམ་སྒྱུ་མའི་གྲུབ་མཐའ་ཙམ་དུ་ཤེས་ནས་རང་གིས་ཀྱང་དཔྱད་དེ་བསམ་ཞིང་གཞན་ལའང་བསྟན་པས་བླང་དོར་གྱི་དམིགས་ཕྱེད་ནས་ལམ་དབུ་མ་ཚོགས་གཉིས་ལ་ཞུགས་ཏེ། འབྲས་བུ་སྐུ་གཉིས་ཐོབ་པའི་དགོས་པ་ཡོད་དེ། ཚིག་གསལ་ལས། ཆུ་འདོད་པས་སྣོད་ལྟར་ཐོག་མར་ཀུན་རྫོབ་ཀྱི་བདེན་པ་ནི་གདོན་མི་ཟ་བར་ཁས་བླང་བར་བྱའོ། །ཞེས་དང་། འཇུག་འགྲེལ་ལས། ཕྱོགས་འདི་ནི་མཁས་པ་དག་གིས་སྐྱོན་མེད་ཅིང་ཡོན་ཏན་དང་ལྡན་པའོ་སྙམ་དུ་བསམས་ཏེ་གདོན་མི་ཟ་བར་ཁས་བླང་བར་བྱའོ། །ཞེས་གསུངས་པ་བཞིན་ནོ། །དེ་བས་ན་ཐལ་རང་གི་ཤིང་རྟ་ཆེན་པོ་དེ་དག་མཐར་ཐུག་གི་དགོངས་པའི་གནད་ལ་ཁྱད་པར་ཅི་ཡང་མེད་ཀྱང་གནས་སྐབས་རྣམ་གྲངས་དང་རྣམ་གྲངས་མ་ཡིན་པའི་དོན་དམ་རྩལ་དུ་བཏོན་དེ་འཆད་ཚུལ་ཙམ་མོ། །དེའི་ཕྱིར་ཐལ་འགྱུར་བའི་སྐབས་འདིར་ཟུང་འཇུག་སྤྲོས་པ་དང་བྲལ་བའི་དབུ་མ་ཆེན་པོ་ཉིད་རྩལ་དུ་བཏོན་པས་འདིིའི་ལུགས་ལ་རྣམ་གྲངས་དང་རྣམ་གྲངས་མིན་པའི་དོན་དམ་གཉིས་སུ་དབྱེ་བ་མེད་པར་ཤེས་པར་བྱའོ། །དེས་ན་སྟོང་དང་རྟེན་འབྱུང་གི་སྣང་བ་ཟུང་དུ་འཇུག་པའི་གཤིས་ལུགས་སྨྲ་བསམ་བརྫོད་བྲལ་བདེན་གཉིས་དབྱེར་མེད་པའི་མཚན་ཉིད་དེ་ཐོས་བསམ་གྱིས་ལེགས་པར་གཏན་ལ་ཕབ་ནས་མཐར་དགག་སྒྲུབ་ཀྱི་འཛིན་སྟངས་ཞིག་པ་ཞིག་དགོས་ཏེ། ཇི་སྐད་དུ། ཆོས་རྣམས་སྟོང་པ་འདི་ཤེས་ནས། །ལས་དང་འབྲས་བུ་རྟེན་པ་གང་། །ངོ་མཚར་བས་ཀྱང་འདི་ངོ་མཚར། རྨད་བྱུང་བས་ཀྱང་འདི་རྨད་བྱུང་། །ཞེས་དང་། ཤེར་ཕྱིན་སྟོང་ཕྲག་བརྒྱ་པ་ལས། རབ་འབྱོར་གལ་ཏེ་ཆུང་ངུ་ནས་སྐྲའི་རྩེ་མོའི་ཆ་ཤས་བཞག་པ་ཙམ་གྱི་ཁྱོན་གཅིག་མཚན་མ་ཡོད་ན་ཡང་བླ་ན་མེད་པའི་བྱང་ཆུབ་ཏུ་འཚང་རྒྱ་བར་མི་ནུས་སོ། །ཞེས་དང་། ཁྲི་བརྒྱད་སྟོང་པ་ལས། ཀ་ཤི་ཀ་གང་དེ་ལྟར་སོ་སོར་རྟོག་ཀྱང་། ཆོས་གང་ལ་ཡང་མངོན་པར་ཞེན་པ་མེད་ཅིང་མི་དམིགས་པ་དེ་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ། །ཞེས་དང་། ཡུམ་གྱི་དགོངས་པ་མཐར་ཐུག་ཤེར་ཕྱིན་མངོན་རྟོགས་རྒྱན་ལས། ཚུལ་རོལ་ཕ་རོལ་མཐའ་ལ་མིན། །དེ་དག་བར་ན་མི་གནས་པ། །དུས་གསུམ་མཉམ་པ་ཉིད་ཤེས་ཕྱིར། །ཤེས་རབ་ཕ་རོལ་ཕྱིན་པར་འདོད། །ཅེས་དང་། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་གྲོལ་བར་འགྱུར། །ཞེས་དང་། འཕགས་པ་ཀླུ་སྒྲུབ་ཀྱིས། གང་གིས་རྟེན་ཅིང་འབྲེལ་བར་འབྱུང་། །འགགས་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞི་བསྟན་པ། །ཞེས་དང་། སློབ་དཔོན་འཕགས་པ་ལྷས། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་ཀྱང་མིན་པ། །མཐའ་བཞི་ལས་གྲོལ་དབུ་མ་པ། །མཁས་པ་རྣམས་ཀྱི་དེ་ཁོ་ན། །ཞེས་དང་། འཇུག་པར་ཡང་། གང་ཕྱིར་དངོས་པོ་བརྟེན་ནས་རབ་འབྱུང་བས། །རྟོག་པ་འདི་དག་བརྟག་པར་མི་ནུས་པ། །དེ་ཕྱིར་རྟེན་འབྱུང་རིགས་པ་འདི་ཡིས་ནི། །ལྟ་ངན་དྲྭ་བ་མཐའ་དག་གཅོད་པར་བྱེད། །ཅེས་དང་། སོ་སོའི་སྐྱེ་བོ་རྣམས་ནི་རྟོག་པས་བཅིངས། །མི་རྟོག་རྣལ་འབྱོར་པ་ནི་གྲོལ་གྱུར་པས། །རྟོག་རྣམས་ལོག་པར་གྱུར་པ་གང་ཡིན་པ། །རྣམ་པར་དཔྱོད་པའི་འབྲས་བུ་མཁས་རྣམས་གསུངས། །ཞེས་དང་། དེའི་འགྲེལ་པར། རྟོག་པ་མ་ལུས་པ་བཀག་པ་ཉིད་སློབ་དཔོན་གྱིས་དབུ་མའི་བསྟན་བཅོས་ལས་བཤད་པའི་རྣམ་པར་དཔྱོད་པའི་འབྲས་བུར་རྣམ་པར་བཞག་གོ །ཞེས་གསུངས་ཤིང་། གཞན་ཡང་ཏིང་འཛིན་རྒྱལ་པོ་ལས། རྟོག་ཅན་དག་གིས་ཡོད་དང་མེད་ཅེས་བརྟགས། །དེ་ལྟར་དཔྱོད་པས་སྡུག་བསྔལ་ཞི་མི་འགྱུར། །ཞེས་དང་། རྟག་དང་མི་རྟག་འདི་ཡང་མཐའ་ཡིན་ཏེ། །ཡོད་དང་མེད་ཅེས་བྱ་བ་འདི་ཡང་མཐའ། །དེ་ཕྱིར་གཉིས་ཀའི་མཐའ་ནི་རྣམ་སྤངས་ནས། །མཁས་པ་དབུས་ལའང་གནས་པར་མི་བྱེད་དོ། །ཞེས་དང་། དཀོན་མཆོག་ཏ་ལ་ལས། དེ་བཞིན་གཤེགས་པ་རྟག་ཏུ་སྐྱེ་མེད་ཆོས། །ཆོས་རྣམས་ཐམས་ཅད་བདེ་བར་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པས་ན། །འཇིག་རྟེན་དག་ན་མེད་པའི་ཆོས་ལ་སྤྱོད། །ཅེས་དང་། རྒྱ་ཆེར་རོལ་པ་ལས། ཚིག་བྲལ་ངག་གི་ལམ་གྱིས་མ་གོས་པའི། །དེ་བཞིན་ཉིད་ཆོས་རང་བཞིན་ནམ་མཁའ་འདྲ། །སེམས་དང་ཡིད་ཀྱི་རྒྱུ་བ་རབ་གྲོལ་བ། །མཆོག་རབ་ངོ་མཚར་ཆེ་བ་དམ་པ་ཤེས། །ཞེས་དང་། དགོངས་པ་ངེས་འགྲེལ་ལས། སོ་སོ་རང་རིག་མཚན་ཉིད་སྤྱོད་ཡུལ་དེ། །བརྗོད་དུ་མེད་ཅིང་ཐ་སྙད་ཡོང་ཆད་པ། །རྩོད་དང་བྲལ་བ་དོན་དམ་ཆོས་ཡིན་ཏེ། །དེ་ནི་རྟོག་གེ་ཀུན་ལས་འདས་མཚན་ཉིད། །ཅེས་སོགས་ངེས་དོན་གྱི་མདོ་སྡེ་ཟབ་མོ་རྣམས་ནས་རྒྱ་ཆེར་གསུངས་ཏེ་ཞིབ་པར་རབ་ལན་ཆེན་མོ་སོགས་ལས་ཤེས་པར་བྱ་ཞིང་། འཕགས་པ་འཇམ་དཔལ་གྱིས་རྗེ་བཙུན་ས་སྐྱ་པ་ཆེན་པོ་ལ་གདམས་པ་ལས་ཀྱང་། འཛིན་པ་བྱུང་ན་ལྟ་བ་མིན། །ཞེས་གསུངས། མདོར་ན་འཕགས་པ་ཀླུས་རིམ་ལྔ་ལས། སྣང་བ་དང་ནི་སྟོང་པ་དག །སོ་སོའི་ཆར་ནི་ཤེས་གྱུར་ནས། །གང་དུ་ཡང་དག་འདྲེས་གྱུར་པ། །ཟུང་དུ་འཇུག་པར་དེ་བཤད་དོ། །ཞེས་དང་། སྐྱེ་མེད་རིན་པོ་ཆེའི་མཛོད་ལས། གར་ཡང་མ་རྟོག་ཅིར་ཡང་མ་སེམས་ཤིག །བཅས་བཅོས་མ་བྱེད་རང་བཞིན་ལྷུག་པར་ཞོག །མ་བཅོས་པ་ནི་སྐྱེ་མེད་རིན་ཆེན་མཛོད། །དུས་གསུམ་རྒྱལ་བ་ཀུན་གྱི་གཤེགས་ཤུལ་ཡིན། །ཞེས་གསུངས། ཁ་ཅིག་འདི་སྔགས་ལམ་གྱི་སྒོམ་ཡིན་གྱི། མདོའི་མིན་ནོ་ཟེར་ཡང་། མཐའ་བཞི་དང་བྲལ་བའི་ཟུང་འཇུག་དེ་ཡིད་དཔྱོད་ཀྱིས་བསྒོམ་པ་དང་། ཐབས་ཀྱིས་བཙན་ཐབས་སུ་ཤར་བའི་ཁྱད་པར་ཙམ་ལས་ཆོས་ཀྱི་དབྱིངས་མི་འདྲ་བ་རེ་ཡོད་པ་མིན་ཏེ། མདོ་ལས། ཆོས་ཀྱི་དབྱིངས་ལས་མ་གཏོགས་པར། །ཆོས་འགའ་ཡོད་པ་མ་ཡིན་ནོ། །ཞེས་དང་། ཀླུས་བསྟོད་པར། ཆོས་ཀྱི་དབྱིངས་ལ་དབྱེར་མེད་ཕྱིར། །གཙོ་བོར་ཐེག་དབྱེར་མ་མཆིས་ན། །ཁྱོད་ཀྱིས་ཐེག་པ་གསུམ་བསྟན་པ། །སེམས་ཅན་འཇུག་པར་བྱ་ཕྱིར་ཡིན། །ཞེས་དང་། དགོངས་འགྲེལ་ལས། ཐེག་པ་ཆེ་དང་ཐེག་པ་དམན་པ་ལ། །རང་བཞིན་སྣ་ཚོགས་ཆོས་ནི་གང་བསྟན་པ། །དེ་དག་ཉིད་ནི་ཚུལ་གཅིག་ཡང་བསྟན་ཏེ། །དེ་ཕྱིར་ཐེག་པ་ཐ་དད་ང་མི་སྨྲ། །དོན་ལ་སྨྲ་བཞིན་རྣམ་པར་རྟོག་བྱེད་ན། །སྒྲོ་བཏགས་བྱས་ཤིང་སྐུར་བ་བཏབ་བྱས་ནས། །དེ་དག་འགལ་བ་སྙམ་དུ་སེམས་པ་ན། །རྣམ་པར་རྨོངས་པས་བློ་གྲོས་སྣ་ཚོགས་འབྱུང་། །ཞེས་དང་། དམ་ཆོས་པད་དཀར་ལས། ཐེག་པ་གཅིག་སྟེ་ཐེག་པ་གསུམ་དུ་མེད། །དེ་དག་དྲང་བའི་ཐབས་སུ་བསྟན་པ་ཡིན། །ཞེས་དང་། འཇམ་དཔལ་སྒྱུ་དྲྭ་ལས། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་དང་། སྤྱི་མདོ་ལས། གསང་ཉིད་སྙིང་པོར་ངེས་པ་ནི། །ཐེག་པའི་སྒོ་ཡང་གཅིག་ལས་མེད། །ཅེས་ངེས་དོན་གྱི་མདོ་རྒྱུད་ཐམས་ཅད་ནས་རྟོགས་བྱ་མཐར་ཐུག་ཆོས་ཀྱི་དབྱིངས་སུ་རིགས་གཅིག་ཅིང་ཐེག་པ་གཅིག་ལས་མེད་པར་གསུངས་པའི་ཕྱིར་དང་། མདོ་ལམ་གྱི་ཆོས་ཉིད་བདེན་པ་མངོན་དུ་གཟིགས་པ་དང་། སྔགས་ལམ་གྱི་དོན་གྱི་འོད་གསལ་མངོན་དུ་བྱས་པ་གཉིས་ཆོས་ཉིད་ཇི་ལྟ་བ་བཞིན་དུ་རྟོགས་པ་ལ་ཁྱད་མེད་པར་འདོད་དགོས་པས་སོ། །དེས་ན་གནས་ལུགས་ལ་དཔྱོད་པའི་སོ་སོ་སྐྱེ་བོའི་དཔྱད་སྒོམ་གྱིས་མཐའ་བཞི་ཅིག་ཆར་ཁེགས་པ་མིན་ཀྱང་། རེས་འཇོག་གི་ཚུལ་དུ་བཞི་ཆར་བཀག་ནས་དམིགས་མེད་ཀྱི་དོན་ཟུང་འཇུག་གི་དབྱིངས་ལ་གོ་མྱོང་སྐྱེ་བར་མ་བྱས་ན། ནས་ཀྱི་ས་བོན་ལས་འབྲས་ཀྱི་མྱུ་གུ་བཞིན་དུ་འཕགས་པའི་ཡེ་ཤེས་ཀྱང་རྒྱུ་མེད་དུ་སྐྱེ་བར་མི་འགྱུར་ཏེ། རྡོ་རྗེ་སྙིང་འགྲེལ་ལས། ཀོ་ཊ་པ་ཡི་ས་བོན་ལས། །ས་ལུའི་འབྲས་བུ་འབྱུང་བ་མེད། །རྣམ་རྟོག་ས་བོན་ལས་བྱུང་བའི། །འབྲས་བུ་རྣམ་རྟོག་བཅས་པ་འབྱུང་། །རྣམ་པར་མི་རྟོག་ལས་སྐྱེས་པའི། །འབྲས་བུ་རྣམ་པར་མི་རྟོག་འགྱུར། །ཞེས་དང་། རྣམ་པར་མི་རྟོག་པ་ལ་འཇུག་པའི་གཟུངས་ཀྱི་མདོ་ལས། དེ་ལྟར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་རྣམ་པར་རྟོག་པའི་མཚན་མ་རྣམ་པ་ཐམས་ཅད་ཡིད་ལ་མི་བྱེད་པས་ཡོངས་སུ་སྤོང་བ་ན། དེ་ལྟར་རྣམ་པར་མི་རྟོག་པའི་དབྱིངས་ལ་ཤིན་ཏུ་བརྩོན་པ་ཡིན་ཏེ་རེ་ཞིག་རྣམ་པར་མི་རྟོག་པའི་དབྱིངས་ལ་ནི་མ་རེག་མོད་ཀྱི། རྣམ་པར་མི་རྟོག་པའི་དབྱིངས་ལ་རེག་པར་འགྱུར་བའི་ཚུལ་བཞིན་པའི་ཏིང་ངེ་འཛིན་ནི་ཡོད་དོ། །ཞེས་སོགས་རྒྱ་ཆེར་གསུངས་པ་བཞིན་ནོ། །གང་དག་སོ་སྐྱེས་ལས་དང་པོ་བ་དག་གིས་ཀྱང་ཚོགས་སྦྱོར་གྱི་སྐབས་འདིར་མོས་སྤྱོད་དོན་དམ་སྤྱི་རྗེས་དཔག་གི་ཚུལ་གྱིས་ཅི་ནུས་སུ་འབད་པས་བསྒོམ་པ་གལ་ཆེ་སྟེ། ཕལ་པོ་ཆེ་ལས། དཔེར་ན་རྐྱལ་མཁན་ཆུ་ཡིས་ཁྱེར་བ་བཞིན། །རྐྱལ་བའི་ལོ་རྒྱུས་སེམས་ལ་ཡོད་གྱུར་ཀྱང་། །མ་རྐྱལ་བར་དུ་ཐར་བར་མི་འགྱུར་བས། །ཤེས་ནས་མ་བསྒོམས་ཆོས་ཀྱང་དེ་དང་མཚུངས། །དཔེར་ན་ཡུལ་བ་སོ་ནམ་མཁན་གྱི་མིས། །རང་གི་ཞིང་བསྐྱུར་རོགས་ལ་ལེགས་བསླབས་ཀྱང་། །སྟོན་ཐོག་སྨིན་ནས་རང་ལ་མེད་པ་བཞིན། །ཤེས་ནས་མ་བསྒོམས་ཆོས་ཀྱང་དེ་དང་མཚུངས། །ཞེས་སོགས་དང་། ས་སྙིང་འཁོར་ལོ་བཅུ་པ་ལས། ཏིང་འཛིན་བསྒོམས་པས་ཐེ་ཚོམ་གཅོད་འགྱུར་གྱིས། །དེ་མ་གཏོགས་པར་གཞན་གྱིས་ནུས་མ་ཡིན། །དེ་བས་ཏིང་འཛིན་བསྒོམ་པ་མཆོག་ཡིན་ཏེ། །མཁས་པ་དག་གིས་དེ་ལ་ནན་ཏན་བྱ། །ཞེས་དང་། ཨ་ཏི་ཤས། འཇིག་རྟེན་བྱ་བ་དག་ལ་ཕར་བལྟས་པས། །བྱས་པ་ཐམས་ཅད་དོན་མེད་སྡུག་བསྔལ་རྒྱུ། །ཅི་ལ་བསམས་ཀྱང་སྙིང་པོ་མི་འདུག་གི། །རང་གི་སེམས་ལ་ལྟ་བ་གོམས་པར་གྱིས། །ཞེས་གདམས་པར་མཛད་པ་ཡིན་ནོ། །དེའི་ཕྱིར་དངོས་པོའི་གནས་ཚུལ་མཐར་ཐུག་རྣམ་གྲངས་མིན་པའི་དོན་དམ་པ་ནི་ཡོད་པ་དང་། མེད་པ་དང་། གཉིས་ཀ་དང་གཉིས་མིན་གྱི་མཐའ་ཀུན་དང་བྲལ་བས་ན་བློ་ཡི་སྤྱོད་ཡུལ་མིན་ཏེ། བློ་དང་སྒྲ་ནི། དོན་དམ་མ་ཡིན་པའི་ཕྱིར་ཀུན་རྫོབ་ཡིན་པར་འདོད་དོ། །དེ་ཡང་བློས་འདི་དང་འདིའོ་ཞེས་དམིགས་ཤིང་འདུ་བྱེད་པ་དང་། སྒྲས་འདི་དང་འདིའོ་ཞེས་གང་བརྗོད་པ་སེམས་དང་ངག་གི་སྤྱོད་ཡུལ་དུ་གྱུར་པའི་ཆོས་དེ་ནི་བརྟགས་ན་རྣམ་པར་དབེན་པས་སྒྱུ་མ་བཞིན་དུ་སྟོང་པ་ཡིན་གྱི་དཔྱད་བཟོད་དམ་བདེན་པར་གྲུབ་པ་ནམ་ཡང་མི་སྲིད་དེ། མདོ་ལས། ལྷའི་བུ་གལ་ཏེ་དོན་དམ་པའི་བདེན་པ་ལུས་དང་ངག་དང་ཡིད་ཀྱི་སྤྱོད་ཡུལ་དུ་གྱུར་ན་དེ་དོན་དམ་པའི་གྲངས་སུ་མི་འགྲོ་ཞིང་ཀུན་རྫོབ་ཀྱི་བདེན་པ་ཉིད་དུ་འགྱུར་རོ། །ལྷའི་བུ་འོན་ཀྱང་དོན་དམ་པའི་བདེན་པ་ནི་ཐ་སྙད་ཐམས་ཅད་ལས་འདས་པ་དང་། ཡང་དག་པར་མ་སྐྱེས་པ་དང་། མ་འགགས་པ་དང་། བརྗོད་པར་བྱ་བ་དང་། རྗོད་པར་བྱེད་པ་དང་། ཤེས་བྱ་དང་། ཤེས་པ་དང་བྲལ་བ་ཡིན་ཏེ། ཇི་སྲིད་དུ་རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལས་འདས་པ་ནི་དོན་དམ་པའི་བདེན་པ་ཡིན་ཏེ། ཞེས་དང་། རྒྱན་ལས་ཀྱང་། ཡང་དག་ཏུ་ན་སྤྲོས་པ་ཡི། །ཚོགས་རྣམས་ཀུན་ལས་དེ་གྲོལ་ཡིན། །རྣམ་པར་རྟོག་ལ་བརྟེན་ན་ཡང་། །ཀུན་རྫོབ་ཏུ་འགྱུར་ཡང་དག་མིན། །ཞེས་སོ། །དེ་ལ་འདིར་ཆོས་ཉིད་ཤེས་བྱ་མིན་པར་བརྗོད་པ་ནི། ཆོས་ཉིད་སྤྲོས་པ་ཐམས་ཅད་ལས་འདས་པས་ན། དེ་ནི་བློས་དམིགས་པར་བྱར་མེད་པ་ཡིན་ཏེ། གང་ཡུལ་དང་ཡུལ་ཅན་དུ་མ་གྱུར་ཅིང་གང་དུའང་མ་གྲུབ་པ་དེ་ལ་ཡང་དག་པར་ན་ཇི་ལྟར་ཤེས་བྱ་ཞེས་བརྗོད་དེ། སྡུད་པ་ལས། ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་པ། །ནམ་མཁའ་ཇི་ལྟར་མཐོང་ཞེས་དོན་འདི་བརྟག་པར་གྱིས། །དེ་ལྟར་ཆོས་མཐོང་བ་ཡང་དེ་བཞིན་གཤེགས་པས་བསྟན། །མཐོང་བ་དཔེ་གཞན་གྱིས་ནི་བསྙད་པར་ནུས་མ་ཡིན། །ཞེས་དང་། འཇུག་པ་ལས། གང་ཚེ་སྐྱེ་མེད་དེ་ཉིད་ཡིན་ཞིང་བློ་ཡང་སྐྱེ་བ་དང་བྲལ་བ། །དེ་ཚེ་དེ་རྣམས་རྟེན་ལས་དེ་ཡིས་དེ་ཉིད་རྟོགས་པ་ལྟ་བུ་སྟེ། །ཇི་ལྟར་སེམས་ནི་གང་གི་རྣམ་པ་ཅན་དུ་གྱུར་བ་དེ་ཡི་ཡུལ། །དེ་ཡོངས་ཤེས་པ་དེ་བཞིན་ཐ་སྙད་ཉེ་བར་བརྟེན་ནས་རིག་པ་ཡིན། །ཞེས་གསུངས། དེས་ན་ཐ་སྙད་དུ་ནི་འཕགས་པའི་མཉམ་བཞག་ཡུལ་ཅན་དང་། ཆོས་ཀྱི་དབྱིངས་ཡུལ་དུ་བྱས་པ་ལ་བརྟེན་ནས་ཤེས་བྱ་ཡིན་ནོ་ཞེས་བརྗོད་དུ་རུང་གི་དོན་དམ་པར་གཟུང་འཛིན་མེད་པའི་མཉམ་བཞག་གིས་འདི་གཟུང་བྱའམ་ཤེས་བྱ་ཡིན་ཞེས་མི་བྱ་སྟེ་ཚིག་དེ་ཉིད་དངོས་ཤུགས་ཀྱིས་འགལ་བའི་ཕྱིར་རོ། །ཡང་བདེན་གཉིས་ཀྱི་དབྱེ་གཞི་ཤེས་བྱ་ཡིན་པས་དོན་དམ་ཤེས་བྱར་ཁས་བླངས་པ་དེ་ཡང་རྣམ་གཅོད་དུ་ཡིན་ལ། འདིར་ཤེས་བྱ་མིན་པ་ནི་ཡོངས་གཅོད་དུ་ཡིན་པས་མི་འགལ་ཏེ། ཡོངས་གཅོད་དུའང་ཤེས་བྱར་ཁས་ལེན་ན་སྟོང་ཉིད་དངོས་པོར་ཞལ་གྱིས་བཞེས་པར་འགྱུར་བས། ཕྱོགས་སྨྲ་བ་གཉིས་སོ་སོ་ནས་ཀྱང་མིང་ལ་ངལ་བས་ཅི་བྱ་སྟེ་དོན་ལ་རྟོན་པར་བྱའོ། །མདོར་ན་ཡུལ་ཡུལ་ཅན་གཉིས་སུ་སྣང་བ་གཟུང་འཛིན་ཅན་གྱི་རྣམ་ཤེས་ཀྱི་སྤྱོད་ཡུལ་དུ་གྱུར་པའི་ཡུལ་དང་ཡུལ་ཅན་ཐམས་ཅད་ནི་ཀུན་རྫོབ་ཀྱི་བདེན་པ་དང་། འཕགས་པའི་ཡེ་ཤེས་ཀྱིས་གཉིས་སྣང་ནུབ་པའི་ཚུལ་དུ་ཉམས་སུ་མྱོང་བའི་སྤྲོས་བྲལ་དེ་བཞིན་ཉིད་ནི་དོན་དམ་བདེན་པ་ཡིན་པས་ན། གང་འཆད་པ་པོས་སྒྲས་བསྟན་པ་དང་། ཉན་པ་པོས་ཐོས་བསམ་གྱི་ཡུལ་དུ་བྱས་པའི་བདེན་པ་གཉིས་ནི། ཡུལ་ཅན་གྱི་བློ་ལ་ལྟོས་ནས་བདེན་གཉིས་སོ་སོར་བཞག་ཏུ་རུང་མོད། འཕགས་པའི་མཉམ་བཞག་དོན་དམ་མཚན་ཉིད་པ་ལ་ལྟོས་ན་གཉིས་ཀ་ཀུན་རྫོབ་ཏུ་འགྱུར་རོ། །དེས་ན་དོན་དམ་བློ་ཡི་སྤྱོད་ཡུལ་མིན་པར་གསུངས་པ་འདི་གནས་སྣང་མཐུན་མི་མཐུན་ལ་བདེན་གཉིས་འཇོག་པའི་ལུགས་ལྟར་དོན་གྱིས་སོང་བར་ཤེས་དགོས་ཤིང་། སྐབས་འདིར་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལས་ཀྱང་འདས་པར་གསུངས་པ་ནི་དོན་དམ་མཐར་ཐུག་འཕགས་པའི་མཉམ་བཞག་གི་ངོར་གཟུང་འཛིན་གྱི་སྤྲོས་པ་མཐའ་དག་ཞི་བའི་དོན་ཡིན་ཏེ། བྱང་ཆུབ་སེམས་དཔའི་སྡེ་སྣོད་ལས། དོན་དམ་པར་འཕགས་པའི་ཤེས་རབ་དང་ཡེ་ཤེས་ཀྱི་མདུན་ན་ཆོས་གང་ཡང་ཡོངས་སུ་ཤེས་པ་དང་། སྤང་པའམ། བསྒོམ་པའམ། མངོན་དུ་བྱ་བར་གྱུར་བའི་ཆོས་གང་ཡང་མི་འདུག་གོ །ཞེས་གསུངས་པ་བཞིན་ནོ། །ཡང་ལང་གཤེགས་ལས། བློ་གྲོས་ཆེན་པོ། དོན་དམ་པ་ནི་འཕགས་པས་སོ་སོ་རང་གི་རིག་པའི་ཡེ་ཤེས་ཀྱིས་རྟོགས་པར་བྱ་བ་ཡིན་ཏེ། ཚིག་གི་རྣམ་པར་རྟོག་པའི་སྤྱོད་ཡུལ་ནི་མ་ཡིན་ནོ། །ཞེས་འཕགས་པས་སོ་སོ་རང་རིག་པའི་ཡེ་ཤེས་ཀྱི་ཡུལ་དུ་གསུངས་པ་ནི། རྗེས་ཐོབ་བམ་ཀུན་རྫོབ་ཐ་སྙད་ཙམ་གྱི་ངོས་ནས་བཞག་པ་སྟེ། མདོ་ལས། འགའ་ཡང་མཐོང་བ་མེད་པ་དེ་ནི་དེ་ཁོ་ན་ཉིད་མཐོང་བའོ། །ཞེས་བློས་མཐོང་ཚུལ་དང་། ཆོས་རྣམས་སྟོང་པ་ཡི་གེ་མེད་པ་ལ། །ཡི་གེ་མེད་པ་ཉིད་ཅེས་ཡི་གེས་བསྟན། །ཞེས་སྒྲས་བརྗོད་ཚུལ་དང་། དཔེ་ལས་འདས་པའི་ཆོས་དེ་ཡང་། །དཔེ་དག་གིས་ནི་ཉེ་བར་བསྟན། །ཞེས་དཔེས་མཚོན་ཚུལ་གསུངས་པ་ལྟ་བུ་སྟེ་དེས་ན་འདི་གཉིས་གནད་ཀྱིས་མི་འགལ་བར་ཤེས་པར་བྱའོ། །གཉིས་པ་རྟོགས་པ་པོ་གང་ཟག་གི་རིམ་པ་བསྟན་པ་ནི། དེ་འདྲའི་ཡུལ་བདེན་པ་གཉིས་པོ་དེ་ལ་རྟོག་པར་བྱེད་པ་པོ་འཇིག་རྟེན་རྣམ་པ་གཉིས་སུ་མཐོང་སྟེ། ཞི་ལྷག་གི་རྣལ་འབྱོར་དང་ལྡན་པ་རྣལ་འབྱོར་འཇིག་རྟེན་པ་དང་། མི་ལྡན་པ་འཇིག་རྟེན་ཕལ་པའོ། །དེ་ལ་འཇིག་རྟེན་ཕལ་པ་རྣམས་ཀྱིས་ལུས་གཅིག་པུ་སེམས་རྟག་པ་ལ་སོགས་པར་མཐོང་བ་ལ་ནི་ལུས་གཅིག་པུ་མ་ཡིན་ཏེ་ཆ་དང་ལྡན་པའི་ཕྱིར་དང་། སེམས་མི་རྟག་སྟེ་གཞན་དུ་འགྱུར་བའི་ཕྱིར་ཞེས་པ་ལ་སོགས་པའི་རྣལ་འབྱོར་འཇིག་རྟེན་གྱིས་རིགས་པས་གནོད་ཅིང་དེར་མ་ཟད་རྣལ་འབྱོར་པ་ནང་གསེས་ལ་ཡང་གནས་ཚུལ་མཐོང་བའི་བློ་ཡི་ཁྱད་པར་ཀྱིས། ཉན་ཐོས་བྱེ་མདོ་རྣམས་ཀྱི་གཟུང་བ་རྡུལ་ཕྲན་ཆ་མེད་དོན་དམ་དུ་འདོད་པ་སོགས་ཕྱི་དོན་སྨྲ་བ་རྣམས་ལ་སེམས་ཙམ་པས། དྲུག་གིས་ཅིག་ཆར་སྦྱར་བ་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་ཀྱང་གོ་གཅིག་ན། །གོང་བུའང་རྡུལ་ཕྲན་ཙམ་དུ་འགྱུར། །ཞེས་རྡུལ་ཕྲན་བརྟག་འགོག་དང་། བུད་མེད་གཅིག་གི་ལུས་གཅིག་ལ། །ཀུན་ཏུ་འདོད་ལྡན་ཁྱི་རྣམས་ཀྱིས། །འོ་དང་འདོད་བྱ་བཟའ་བ་ཞེས། །རྣམ་པ་གསུམ་དུ་རྟོག་པར་བྱེད། །ཅེས་དང་། དངོས་གཅིག་ཡིན་ནི་ཐ་དད་ཕྱིར། །དོན་མ་གྲུབ་པར་འདོད་པ་ཡིན། །ཞེས་སོགས་ཕྱི་དོན་འགོག་པའི་རིགས་པ་རྣམས་ཀྱིས་གནོད་པ་དང་། དེ་ཉིད་ཀྱིས་གཉིས་སྟོང་གི་རྣམ་ཤེས་བདེན་གྲུབ་ཏུ་འདོད་པ་ལ། དབུ་མ་པས། རྣམ་ཤེས་དམ་པའི་དོན་ལྡན་པ། །དེ་ཡང་བརྟན་རྣམ་མི་འདོད་དེ། །གཅིག་དང་དུ་མའི་རང་བཞིན་དང་། །བྲལ་བས་ནམ་མཁའི་པདྨོ་བཞིན། །ཞེས་གཅིག་དུ་བྲལ་གྱི་རིགས་པ་སོགས་ཀྱིས་འགོག་པ་ལྟ་བུ། གོང་མ་གོང་མ་རྣམས་ཀྱིས་འོག་མ་འོག་མའི་མཐོང་དོན་གྱི་གྲུབ་མཐའ་ལ་གནོད་ཅིང་ཟིལ་གྱིས་གནོན་ཏེ། གནས་ལུགས་མཐོང་བའི་བློ་ཇེ་བཟང་དུ་གྱུར་པས་ན་གང་ལ་ཚད་མ་དང་ལྡན་པ་དེས་འོག་མ་སུན་འབྱིན་ནུས་ཀྱི་གཞན་དུ་མ་ཡིན་ཏེ། མིག་ནི་རབ་རིབ་ཅན་གྱིས་དམིགས་པ་ཡིས། །རབ་རིབ་མེད་ཤེས་ལ་གནོད་མིན་ཇིི་ལྟར། །དེ་བཞིན་དྲི་མེད་ཡེ་ཤེས་སྤངས་པའི་བློོས། །དྲི་མེད་བློ་ལ་གནོད་པ་ཡོད་མ་ཡིན། །ཞེས་གསུངས། དེས་ན་ཇི་སྲིད་ཡོད་མེད་ལ་སོགས་པའི་ཁས་ལེན་པ་དེ་སྲིད་དུ་གནོད་པ་དང་བཅས་ཤིང་། གང་མཐར་འཛིན་ཞིག་པ་དེ་ལ་སྐྱོན་མེད་པས་ཇི་ལྟར་གནོད་དེ་ནམ་མཁའ་མཚོན་གྱིས་མི་ཕྱེད་པ་བཞིན་ཏེ། སློབ་དཔོན་འཕགས་པ་ལྷས། ཡོད་དང་མེད་དང་ཡོད་མེད་ཅེས། །གང་ལ་ཕྱོགས་ནི་ཡོད་མིན་པ། །དེ་ལ་ཡུན་ནི་རིང་པོར་ཡང་། །ཀླན་ཀ་བརྗོད་པར་ནུས་མ་ཡིན། །ཞེས་གསུངས། དེས་ན་དབུ་མ་པ་ནི་ཆོས་ཀུན་གྱི་གནས་ལུགས་དེ་བཞིན་ཉིད་གཏན་ལ་ཕེབས་པས་ན་སུས་ཀྱང་ཟིལ་གྱིས་མི་ནོན་ཞིང་ཕྱོགས་ཀུན་གྱི་བླ་མར་གྱུར་པ་ཡིན་ནོ། །གསུམ་པ་ཇིི་ལྟར་རྟོགས་པར་བྱ་བའི་ཚུལ་ནི། རྣལ་འབྱོར་པས་ཕལ་པའི་བློ་ལ་ཇི་ལྟར་གནོད་ནུས་སྙམ་ན། དངོས་པོ་མི་བདེན་པར་འདོད་པ་རྣལ་འབྱོར་པ་དང་། བདེན་པར་འདོད་པ་ཕལ་པ་གཉིས་ཀ་ལ་ཡང་ནི་སྣང་ཡང་མི་བདེན་པ་རྫུན་པར་འདོད་པ་མཐུན་པའི་སྒྱུ་མ་དང་རྨི་ལམ་ལ་སོགས་པའི་དཔེས། དེ་དག་གི་ངོར་བདེན་མེད་དུ་སྒྲུབ་ནུས་ལ། དེ་དག་ལ་བདེན་གྲུབ་ཀྱི་དཔེ་མཐུན་སྣང་དུ་གྲུབ་པ་མེད་པས་ནམ་ཡང་བསྒྲུབ་མི་ནུས་སོ། །ཆོས་ཐམས་ཅད་མི་བདེན་པ་སྒྱུ་མ་ལྟ་བུ་ཡིན་ན་སྦྱིན་སོགས་ལམ་ལ་སློབ་པས་ཅི་བྱ་སྙམ་ན། རྫོགས་པའི་བྱང་ཆུབ་སོགས་ཀྱི་འབྲས་བུའི་དོན་དུ་དོན་དམ་པར་མེད་ཀྱང་མ་བརྟགས་ཤིང་མ་དཔྱད་པའི་ཀུན་རྫོབ་སྣང་ཙམ་པོ་འདིའི་ངོར་རྒྱུ་འབྲས་རྟེན་འབྱུང་གི་སྣང་ཆ་བསླུ་མེད་དུ་ཡོད་པའི་ཕྱིར་འཇུག་པ་ཡིན་གྱི་ལམ་དང་འབྲས་བུའི་ཆོས་ལ་བདེན་པར་ཞེན་པས་ནི་མ་ཡིན་ཏེ་སྒྱུ་མ་མཁན་གྱིས་ལམ་དུ་དགྲ་ཡི་འཇིགས་པ་སེལ་ཕྱིར་སྒྱུ་མའི་དམག་དཔུང་སྤྲུལ་པ་བཞིན་ནོ། །འོ་ན་གཉིས་ཀ་ལ་མཐུན་པར་སྣང་བའི་དངོས་པོ་འདི་ལ་ཅི་ཞིག་རྩོད་སྙམ་ན། སྣང་བའི་དངོས་པོ་ཙམ་ལ་ཡོད་མེད་དུ་རྩོད་པ་མ་ཡིན་ཏེ། འཇིག་རྟེན་པ་ཡིས་གཟུགས་སོགས་དངོས་པོར་མཐོང་ཞིང་། མཐོང་བ་དེ་ལྟར་དུ་ཡང་དག་པ་སྟེ་དོན་དམ་པ་ཉིད་དུའང་གྲུབ་པར་རྟོག་པར་བྱེད་ཀྱི། རྣལ་འབྱོར་པས་མཐོང་བ་ལྟར་སྣང་ཡང་མི་བདེན་པ་སྒྱུ་མ་ལྟ་བུར་འདོད་པ་མིན་པས་ན། གནས་ཚུལ་དོན་དམ་ལ་དཔྱོད་པའི་སྐབས་འདིར་རྣལ་འབྱོར་པ་དང་འཇིག་རྟེན་ཕལ་པ་གཉིས་རྩོད་པར་བྱེད་དོ། །གཉིས་པ་རྩོད་སྤོང་ལ། བརྗོད་བྱ་སྟོང་ཉིད་ལ་རྩོད་སྤོང་དང་། རྗོད་བྱེད་ཐེག་ཆེན་ལ་རྩོད་སྤོང་དང་། དེ་དག་གི་དོན་བསྡུ་བ་གསུམ། དང་པོ་ལ། གཞི་དང་ལམ་དང་འབྲས་བུའི་རྩོད་སྤོང་གསུམ། དང་པོ་གཞིའི་རྩོད་སྤོང་ལ། འཇིག་རྟེན་པ་དང་། དོན་སྨྲ་བ་དང་། སེམས་ཙམ་པའི་རྩོད་སྤོང་གསུམ་ལས། དང་པོ་ནི། འཇིག་རྟེན་ཕལ་པ་རྣམས་ཀྱིས། གཟུགས་སོགས་མངོན་སུམ་དུ་འགྲུབ་པ་འདི་ལྟ་ན་ཅིའི་ཕྱིར་མི་བདེན་ཞེ་ན་གཟུགས་སོགས་ནི་མངོན་སུམ་དུ་གྱུར་ཏོ། །ཞེས་པ་འདི་ཉིད་ཀྱང་ནི་མ་བརྟགས་པར་འཇིག་རྟེན་ན་གྲགས་པ་ཙམ་ཡིན་གྱི། བརྟགས་ཤིང་དཔྱད་ན་ཚད་མས་དེ་ལྟར་གྲུབ་པ་མིན་ཏེ་འོག་ཏུ་དབང་དོན་ཕྲད་མ་ཕྲད་བརྟགས་པའི་སྐབས་སུ་འཆད་པར་འགྱུར་རོ། །དེས་ན་གཟུགས་སོགས་སུ་གྲུབ་པར་བཞག་པ་དེ་ནི། དཔེར་ན་བུད་མེད་ཀྱི་ལུས་མི་གཙང་བ་དང་མི་རྟག་པ་ལ་སོགས་པ་ཡིན་པ་ལ། འཇིག་རྟེན་ན་གཙང་བ་དང་རྟག་པ་སོགས་སུ་གྲགས་པ་བཞིན་དུ་བརྫུན་པ་ཉིད་ཡིན་ནོ། །གཉིས་པ་དོན་སྨྲ་བ་ལ་ལུང་རིགས་ཀྱི་རྩོད་སྤོང་གཉིས་ལས། དང་པོ་ལུང་གི་རྩོད་སྤོང་ནི། དོན་སྨྲ་བ་རྣམས་ཀྱིས་དངོས་པོ་ནི་བདེན་པར་ཡོད་དེ་སངས་རྒྱས་ཀྱིས་ལང་ཀར་གཤེགས་པ་ལས། བྲམ་ཟེ་ཐམས་ཅད་ཅེས་བྱ་བ་ནི་ཕུང་པོ་ལྔ་དང་སྐྱེ་མཆེད་བཅུ་གཉིས་དང་ཁམས་བཅོ་བརྒྱད་དོ། །ཞེས་ཕུང་ཁམས་སྐྱེ་མཆེད་ཡོད་པར་གསུངས་ཤིང་། དེའི་མཚན་ཉིད་ཀྱང་དགོངས་འགྲེལ་ལས། འདུས་བྱས་ཐམས་ཅད་སྐད་ཅིག་མ། །མི་གནས་བྱ་བ་ག་ལ་ཡོད། །ཅེས་སྐད་ཅིག་མར་གསུངས་པའི་ཕྱིར་སྙམ་ན། དེ་ནི་དགོངས་པ་ཅན་གྱི་གསུངས་ཏེ། དགོངས་གཞི་སྣང་ཙམ་དུ་ཡོད་པ་ལ་དགོངས་ཤིང་། དགོས་པ་སྟོང་ཉིད་རྟོགས་མི་ནུས་པའི་འཇིག་རྟེན་དམན་པ་དག་རིམ་གྱིས་ཡང་དག་པའི་ལམ་ལ་གཞུག་པའི་དོན་དུ་ནི་མགོན་པོ་རྫོགས་པའི་སངས་རྒྱས་ཀྱིས་དངོས་པོ་རྣམས་ཡོད་པར་བསྟན་པ་ཡིན་ཏེ། རྒྱལ་བས་བདག་དང་བདག་གི་ཞེས། །དགོས་པའི་དབང་གིས་གསུངས་པ་ལྟར། དེ་བཞིན་ཕུང་པོ་སྐྱེ་མཆེད་ཁམས། །དགོས་པའི་དབང་གིས་གསུངས་པ་ཡིན། །ཞེས་པ་ལྟར་རོ། །ཡང་དག་པའི་དོན་དེ་ཁོ་ན་ཉིད་དུ་ནི་ཕུང་སོགས་དེ་དག་སྐད་ཅིག་མ་ཉིད་དུའང་གྲུབ་པ་མིན་ཏེ་གཅིག་དང་དུ་མ་གང་དུའང་མ་གྲུབ་ཅིང་སྐྱེ་འགག་མེད་པ་དེ་ལ་སྐད་ཅིག་ཏུ་གྲུབ་པ་ག་ལ་ཡོད། ཡང་ཁོ་ན་རེ། སྐད་ཅིག་མ་དེ་དོན་དམ་མིན་ན་འཇིག་རྟེན་ཕལ་པ་རྣམས་ལ་དེ་ལྟར་མི་སྣང་བའི་ཕྱིར་དང་། ལུང་ལས་ཀྱང་སྐད་ཅིག་མར་མཐོང་བས་དངོས་པོའི་གནས་ཚུལ་གྱི་བདེན་པ་མཐོང་བར་གསུངས་པའི་ཕྱིར་ཀུན་རྫོབ་ཏུ་བཞག་པ་ལ་ཡང་འགལ་བས་བདེན་པ་གཉིས་སུ་མ་འདུས་པར་འགྱུར་རོ་ཞེ་ན། འཇིག་རྟེན་པས་དེ་ལྟར་མ་མཐོང་བས་ཐ་སྙད་ཀྱི་གནས་ཚུལ་སེམས་པའི་རྣལ་འབྱོར་པས་དེ་ལྟར་མཐོང་ཞིང་ངེས་པ་ན་སྐད་ཅིག་མ་དེ་ནི་ཀུན་རྫོབ་སྣང་ཚུལ་གྱི་དབང་དུ་བྱས་པ་ཡིན་པས་བདེན་གཉིས་གང་དུ འང་མ་འདུས་པའི་ཉེས་པ་མེད་དེ། འཇིག་རྟེན་ཕལ་པའི་བློ་རྟག་འཛིན་ཅན་ལ་ལྟོས་ན་སྐད་ཅིག་མར་མཐོང་བ་དེ་དེ་ཉིད་མཐོང་བ་ཡིན་ཏེ་ཐ་སྙད་ཀྱི་དེ་ཁོ་ན་ཉིད་མཐོང་བས་སོ། །དེ་ལྟ་མ་ཡིན་པར་གཞན་དུ་འཇིག་རྟེན་ལ་ལྟོས་ནས་དེ་ཉིད་མཐོང་མ་མཐོང་གི་ཁྱད་པར་མེད་ན། རྣལ་འབྱོར་པས་མི་སྡུག་པ་གོམས་པའི་དབང་གིས་བུད་མེད་ཀྱི་ལུས་མི་གཙང་བར་ངེས་པར་རྟོགས་ཟིན་པའི་བློ་ལ་འཇིག་རྟེན་པ་ཕལ་གྱིས་གཙང་སོགས་སུ་འཛིན་པ་འདིས་གནོད་པར་འགྱུར་རིགས་ནའང་མི་གཙང་བར་མཐོང་བས་གཙང་འཛིན་ལ་གནོད་ཀྱི་ཚུར་ནམ་ཡང་མི་གནོད་པའི་ཕྱིར་རོ། གཉིས་པ་རིགས་པའི་རྩོད་སྤོང་ནི། དེ་དག་ན་རེ། སྒྱུ་མ་ལྟ་བུ་མི་བདེན་པའི་སངས་རྒྱས་ལ་མཆོད་པས་བསོད་ནམས་ཆེན་པོ་ཇི་ལྟར་འབྱུང་ཞེ་ན། སྒྱུ་མ་དང་འདྲ་བའི་རྒྱལ་བར་མཆོད་པ་སོགས་ལས་བསོད་ནམས་སྒྱུ་མ་ལྟ་བུ་འབྱུང་བ་ནི། དཔེ་ཇི་ལྟར་ན་ཁྱོད་སངས་རྒྱས་དངོས་པོར་ཡོད་པ་ལ་བརྟེན་ནས་བསོད་ནམས་དངོས་ཡོད་ཅིག་ཐོབ་པར་འདོད་པའི་ཇི་ལྟ་བ་བཞིན་ཏེ་བསོད་ནམས་དང་སངས་རྒྱས་དངོས་པོར་གྲུབ་མ་གྲུབ་ཙམ་ལས་བསོད་ནམས་འབྱུང་མི་འབྱུང་གི་ཁྱད་པར་ཡོད་པ་མིན་ནོ། །ཡང་གལ་ཏེ་སེམས་ཅན་སྒྱུ་མ་དང་འདྲ་ན་སྒྱུ་མའི་རྟ་གླང་འགགས་པ་སླར་མི་སྐྱེ་བ་བཞིན་དུ་མི་སོགས་འཇིག་རྟེན་འདི་ནས་ཤི་འཕོས་ནས་སྲིད་པ་གཞན་དུ་ཇི་ལྟར་སྐྱེ་བ་འཐད་ཞེ་ན། དུས་ཇི་སྲིད་དུ་རང་རང་སྣང་བའི་རྐྱེན་རྣམས་ཚོགས་པར་གྱུར་པ་དེ་སྲིད་དུ་སྒྱུ་མའང་མི་ལྡོག་ཅིང་འབྱུང་བར་འགྱུར་བ་ཡིན་ན། ལས་ཉོན་སོགས་སེམས་ཅན་སྐྱེ་བའི་རྒྱུ་ཚོགས་པ་མ་ལོག་པ་དེ་སྲིད་དུ་སེམས་ཅན་ཡང་ཅི་སྟེ་མི་སྐྱེ། དེས་ན་དེ་གཉིས་སྐྱེ་བའི་རྐྱེན་ཚོགས་མ་ཚོགས་ཀྱི་དབང་གིས་ཡིན་གྱི་བདེན་རྫུན་གྱིས་མ་ཡིན་ནོ། །དེ་ལྟ་ནའང་སེམས་ཅན་ནི་འཁོར་བ་ཐོག་མཐའ་མེད་པས་ཡུན་རིང་ལ་སྒྱུ་མ་དེ་འདྲ་བ་གཅིག་ཀྱང་མ་མཐོང་བས་དེ་གཉིས་མི་མཚུངས་སོ་སྙམ་ན། འདི་གཉིས་རྒྱུན་རིང་ཐུང་སོགས་སྒོ་ཀུན་ནས་འདྲ་བར་བཞག་པ་མིན་ཏེ་སྣང་ཡང་བདེན་པས་སྟོང་པའི་སྒོ་ནས་ཡིན་པས། རྒྱུན་རིང་བ་ཙམ་གྱིས་ཇི་ལྟར་ན་སེམས་ཅན་བདེན་པར་ཡོད་པ་ཡིན་ཏེ། རྒྱུན་རིང་ཡང་རྒྱུའི་ཚོགས་པ་མ་ལོག་པ་ཡིན་གྱི་སྔ་ཕྱིའི་སྲིད་པ་སོ་སོ་གཞན་དང་གཞན་འབྱུང་བ་དག་ལ་རང་བཞིན་གྱིས་མ་གྲུབ་པར་ཁྱད་མེད་དེ། འདི་ལྟར་སྒྱུ་མའི་རྟ་གླང་སོགས་ཡུན་རིང་ཐུང་ཇི་ལྟར་སྣང་ཡང་མི་བདེན་པར་ཁྱད་མེད་པ་བཞིན་ནོ། །ཡང་འདི་སྙམ་དུ་སེམས་ཅན་རྣམས་ཀྱང་སྒྱུ་མའི་སྐྱེས་བུ་དང་འདྲ་ན་ཇི་ལྟར་སྒྱུ་མའི་སྐྱེས་བུ་ལ་ཟས་བྱིན་པ་དང་སྲོག་བཅད་པ་སོགས་ཀྱི་ཕན་གནོད་དུ་མི་འགྱུར་བས་གཞི་དེ་ལས་དགེ་སྡིག་འབྱུང་བ་མི་འཐད་སྙམ་ན། སྒྱུ་མའི་སྐྱེས་བུ་གསོད་སེམས་ཀྱིས་བསད་པར་སྣང་བ་སོགས་ལ་ཕན་གནོད་ཀྱི་རྟེན་དུ་གྱུར་པའི་སེམས་སྒྱུ་མ་ལྟ་བུ་དེ་དེ་ལ་མེད་པའི་ཕྱིར་ན་རང་གི་ངན་སེམས་ཀྱི་སྦྱོར་བའི་ཉེས་པ་ཙམ་ལས་སྲོག་གཅོད་པ་སོགས་དངོས་གཞིའི་སྡིག་པ་མེད་དེ་ཐོ་ཡོར་བཞིན་ནོ། །གང་སྒྱུ་མའི་སེམས་དང་ལྡན་པ་སེམས་ཅན་ལ་ནི་ཕན་གནོད་བྱས་པ་ལས་བསོད་ནམས་དང་ནི་སྡིག་པ་འབྱུང་བ་ཡིན་ནོ། །དེས་ན་དེ་གཉིས་བདེན་རྫུན་གྱི་ཁྱད་པར་ཡོད་པས་མིན་ཏེ་སེམས་ཡོད་མེད་ཀྱི་ཁྱད་པར་ཡོད་པས་ཡིན་ནོ། །འོ་ན་སེམས་ཡོད་མེད་ཀྱི་ཁྱད་པར་ཡོད་པ་དེའི་ཕྱིར་དེ་གཉིས་འདྲ་བ་མིན་ནོ་སྙམ་ན། དེ་ནི་རྒྱུ་ཐ་དད་པ་ལ་ལྟོས་པ་སྟེ། སྒྱུ་མའི་སྔགས་དང་རྫས་ལ་སོགས་པ་རྣམས་ལ་ནི་སེམས་བསྐྱེད་པའི་ནུས་པ་མེད་པའི་ཕྱིར་སྒྱུ་མ་ལ་སྒྱུ་མའི་སེམས་ནི་འབྱུང་བ་མེད་པ་ཡིན་ལ། གང་སེམས་ཅན་འབྱུང་བའི་རྒྱུ་ལ་སེམས་བསྐྱེད་པའི་ནུས་པ་ཡོད་པ་དེ་ལས་སེམས་བྱུང་ཡང་སེམས་དེ་ཉིད་སྒྱུ་མ་ལྟ་བུ་ཡིན་པ་དེས་ན་བདེན་པར་མི་འགྱུར་ཏེ། འདི་ལྟར་སྣ་ཚོགས་ཤིང་མི་འདྲ་བའི་རྐྱེན་ལས་བྱུང་བ་ཡི་སྒྱུ་མ་དེ་ཡང་སྣ་ཚོགས་ཤིང་མི་འདྲ་བ་ཉིད་འབྱུང་གི། རྐྱེན་གཅིག་གིས་ནི་འབྲས་བུ་ཡིན་ནོ་ཅོག་ཀུན་བསྐྱེད་ནུས་པ་ནི་ཡུལ་དུས་གང་ན་ཡང་ནི་ཡོད་པ་མ་ཡིན་ནོ། །དེས་ན་སེམས་ཅན་གྱི་ལུས་སེམས་གཉིས་ཆར་ཡང་རྒྱུ་རྐྱེན་ཚོགས་པས་སྤྲུལ་གྱི་རང་གི་ངོ་བོས་གྲུབ་པ་མེད་པས་སྒྱུ་མ་དང་ཁྱད་ཅི་ཡོད་དེ་སྒྱུ་མའི་རྟ་དང་བ་ལང་ལ་རྭ་ཡོད་མེད་གྱི་ཁྱད་པར་སྣང་ཡང་དེས་བདེན་རྫུན་འཇོག་མི་ནུས་པ་བཞིན་ནོ། །ཡང་མྱང་འདས་དངོས་པོར་འཛིན་པ་རྣམས་ན་རེ། གལ་ཏེ་ཁྱེད་ངོ་བོ་མེད་པར་སྨྲ་བ་ལྟར་ན། འཁོར་བའི་ཆོས་ཐམས་ཅད་དོན་དམ་པར་རང་བཞིན་གྱིས་མྱ་ངན་ལས་འདས་པ་ཡིན་ལ། སྐྱེ་སོགས་ཀྱི་མཚན་ཉིད་ཅན་འཁོར་བ་ནི་ཀུན་རྫོབ་ཡིན་པ་དེ་ལྟ་ན། འཁོར་བ་ཟད་ནས་མྱང་འདས་ཐོབ་པ་མིན་པར་འཁོར་བ་ཉིད་མྱང་འདས་ཡིན་པའི་ཕྱིར་འཁོར་འདས་གཞི་མཐུན་དུ་གྲུབ་པས། སངས་རྒྱས་ཐོབ་ཀྱང་ནི་སླར་འཁོར་བར་འགྱུར་བས་ན། དེའི་ཆེད་དུ་བྱང་ཆུབ་ཀྱི་སྤྱད་པ་སྤྱོད་པས་ཅི་ཞིག་བྱ་སྟེ་ངལ་བ་དོན་མེད་དུ་འགྱུར་རོ་ཞེ་ན། དེ་མ་ཡིན་ཏེ། རང་བཞིན་རྣམ་དག་གི་མྱང་འདས་དང་། གློ་བུར་བྲལ་དག་གི་མྱང་འདས་གཉིས་ལ་གནས་ཚུལ་ཆོས་ཉིད་རང་གི་ངོས་ནས་ཁྱད་པར་མེད་ཀྱང་ཀུན་རྫོབ་སྣང་ཚུལ་གྱི་དབང་དུ་གློ་བུར་ལས་དང་ཉོན་མོངས་པའི་དྲི་མས་བསྒྲིབས་མ་བསྒྲིབས་དང་དེའི་དབང་གིས་ཟག་མེད་ཀྱི་ཡོན་ཏན་གྱི་ཚོགས་མི་སྣང་བ་དང་། སྣང་བའི་ཁྱད་པར་སོགས་ཡོད་པའི་ཕྱིར་ཏེ། འདི་ལྟར་འབྲས་བུ་སོ་སོར་སྣང་བའི་རྐྱེན་རྣམས་ཀྱི་རྒྱུན་ནི་མ་ཆད་ན་འཁོར་བར་མ་ཟད་སྒྱུ་མའི་སྣང་བའང་ལྡོག་པར་མི་འགྱུར་མོད་གྱི་འཁོར་བར་སྐྱེ་བའི་རྐྱེན་མ་རིག་པ་ས་བོན་དང་བཅས་པ་རྣམས་གཉེན་པོ་བདག་མེད་རྟོགས་པའི་ཤེས་རབ་ཀྱིས་བཅོམ་ནས་རྒྱུན་ནི་ཡོངས་སུ་ཆད་པ་ན། འཁོར་བའི་རྒྱུ་ཟད་པའི་ཕྱིར་དོན་དམ་པར་ལྟ་ཅི་ཀུན་རྫོབ་ཙམ་ཏུ་ཡང་མི་འབྱུང་ངོ་། །དེའི་ཕྱིར་སངས་རྒྱས་འཇིག་རྟེན་དུ་བལྟམས་པ་སོགས་ནི་འཁོར་བས་བསྡུས་པ་མ་ཡིན་ཏེ། སྨོན་ལམ་དང་ཏིང་ངེ་འཛིན་ལ་སོགས་པ་ལྷན་ཅིག་བྱེད་རྐྱེན་དུ་གྱུར་པའི་ཡེ་ཤེས་རྣམ་པ་ཐམས་ཅད་པའི་སྟོབས་ལས་མིག་འཕྲུལ་ལྟ་བུའི་མཛད་པ་སྟོན་ཀྱང་ཆོས་ཀྱི་དབྱིངས་ལས་ནམ་ཡང་གཡོ་བ་མི་སྲིད་དོ། །གསུམ་པ་སེམས་ཙམ་པའི་རྩོད་སྤོང་ལ། རྣམ་བདེན་རྫུན་གྱིས་རྩོད་པ་གཉིས་ལས། དང་པོ་རྣམ་བདེན་པའི་རྩོད་སྤོང་ནི། དེ་དག་ན་རེ། འདི་ལྟར་ཕྱི་ནང་དངོས་པོ་སྣང་བ་འདི་དག་ནི་སྐྲ་ཤད་དང་རྨི་ལམ་གྱི་སྣང་བ་བཞིན་ཕྱི་དོན་དུ་བདེན་པར་མེད་ཀྱང་ནང་གི་བག་ཆགས་ཀྱི་ཁྱད་པར་ལས་གནས་དོན་ལུས་ཀྱི་སྣང་བ་སྣ་ཚོགས་པར་སྨིན་པ་ཞིག་སྟེ། དེའི་ཕྱིར་ཕྱི་དོན་ནི་མེད་ཀྱང་སེམས་ནི་ཡོད་དེ། རྨི་ལམ་ན་སྔོ་སོགས་ཀྱི་ཉམས་མྱོང་འཛིན་པར་གྲུབ་པས་སོ་སྙམ་དུ་བསམས་ཏེ། ཁྱོད་དབུ་མ་པ་ལྟར་ན། གང་ཚེ་འཁྲུལ་པའི་ཡུལ་ཕྱི་དོན་མེད་པར་མ་ཟད་འཁྲུལ་པའི་བློའམ་རྣམ་པར་ཤེས་པའང་ཡོད་པ་མིན་ན། ཡུལ་སྒྱུ་མ་ལྟ་བུ་དེ་གང་གིས་དམིགས་པར་འགྱུར་ཏེ་ཡུལ་ཅན་ཤེས་པ་དེ་ཉིད་མེད་པས་སོ་ཞེ་ན། རེ་ཞིག་མགོ་བསྒྲེ་བའི་དབང་དུ་བྱས་ཏེ། གང་ཚེ་སེམས་ཙམ་པ་ཁྱོད་ལ་སྒྱུ་མ་ལྟ་བུའི་ཡུལ་ཉིད་དོན་དུ་གྲུབ་པ་མེད་ན། དེ་ཚེ་བློ་ཡོད་དུ་ཆུག་ཀྱང་ཡུལ་ལམ་དམིགས་བྱ་ཅི་ཞིག་དམིགས་ཏེ་ཡུལ་ཡུལ་ཅན་གཉིས་གང་རུང་གཅིག་མེད་ན་དམིགས་པར་མི་སྲིད་དོ། །གལ་ཏེ་དེ་དག་གིས་བདག་ཅག་གི་ལུགས་ལ་ཡུལ་གཏན་མེད་མིན་ཏེ། རྨི་ལམ་གྱི་རྟ་གླང་བཞིན་དུ་ཡུལ་དོན་གྱི་གོ་ས་དེ་ཉིད་དུ་བེམ་པོ་ལས་གཞན་དུ་གྱུར་པའི་དམིགས་བྱ་ཞིག་ཡོད་དེ། ཡུལ་གྱི་རང་བཞིན་དུ་སྣང་བའི་གཟུང་བའི་རྣམ་པ་དེ་ནི་སེམས་ཉིད་ཡིན་ནོ་ཞེ་ན། གང་གི་ཚེ་སེམས་དེ་ཉིད་དམིགས་བྱ་ཡུལ་སྒྱུ་མ་ལྟ་བུ་ཡིན་ན་དེ་ཡི་ཚེ་ཡུལ་གང་ཞིག་ཡུལ་ཅན་གང་གིས་མཐོང་སྟེ་དེ་གཉིས་གཅིག་ཡིན་པས་མཐོང་མི་ཤེས་སོ། །ཇི་ལྟར་མི་མཐོང་སྙམ་ན། འཇིག་རྟེན་གསུམ་པོ་ཀུན་གྱི་ནི་མགོན་པོ་རྫོགས་པའི་སངས་རྒྱས་ཀྱིས་ཀྱང་སེམས་ཀྱིས་སེམས་ནི་མི་མཐོང་ཞེས་གསུངས་ཏེ། ལང་ཀར་གཤེགས་པ་ལས། ཇི་ལྟར་རལ་གྲི་རང་སོ་དང་། །ཇི་ལྟར་སོར་མོ་རང་གི་རྩེ། །མི་གཅོད་རེག་པར་མི་འགྱུར་བ། །དེ་བཞིན་སེམས་ཀྱིས་སེམས་མི་མཐོང་། །ཞེས་སོ། །དེ་ཡང་རལ་གྲིའི་སོ་གཅིག་པོ་དེས་ནི་རང་ལ་རང་གིས་ཇི་ལྟར་བརྩོན་ཀྱང་མི་གཅོད་པ་དང་། སོར་མོའི་རྩེ་མོ་དེ་ཉིད་ཀྱིས་དེ་ཉིད་རང་ལ་རེག་པར་མི་ནུས་པ་དེ་བཞིན་དུ། ཡིད་དམ་སེམས་བདེན་གྲུབ་ཀྱི་གཅིག་པུ་དེས་རང་གིས་རང་མཐོང་མི་སྲིད་དེ། གང་སེམས་བདེན་པར་གྲུབ་ཕན་ཆོད་བདེན་གྲུབ་ཀྱི་སེམས་ཆ་མེད་གཅིག་ལ་བལྟ་བྱ་ལྟ་བྱེད་གཉིས་སུ་གྲུབ་པ་ཉམས་པའི་ཕྱིར་དོན་དམ་པར་ཤེས་པས་རང་རིག་པ་ཞེས་པའང་བཏགས་པ་ཙམ་སྟེ་ཡང་དག་པ་ནི་མིན་ནོ། །སེམས་ཙམ་པ་ན་རེ། རང་གིས་རང་རིག་པ་ཡོད་དེ། དཔེ་ཇི་ལྟར་ན་བུམ་སོགས་དངོས་པོ་གཞན་གསལ་བར་བྱེད་པའི་མར་མེ་དེ་ནི་གསལ་བྱེད་ཀྱི་རྐྱེན་གཞན་ལ་མི་ལྟོས་པར་རང་གིས་རང་གི་དངོས་པོ་ཡང་དག་པར་གསལ་བར་བྱེད་པ་བཞིན་ནོ་ཞེ་ན། དེ་ཡང་ཐ་སྙད་ཙམ་སྟེ་དོན་དམ་པ་མར་མེ་རང་གིས་རང་གསལ་བར་བྱ་དགོས་པ་མིན་ཏེ། རྒྱུ་མཚན་གང་གི་ཕྱིར་ན་མར་མེ་ལ་མུན་གྱིས་བསྒྲིབས་པ་མེད་ན་དེ་མར་མེས་ཇི་ལྟར་གསལ་བར་བྱ་སྟེ། གསལ་བྱ་མེད་ཀྱང་གསལ་བྱེད་དུ་འགྱུར་ན་མར་མེ་འདི་ཉི་ཟླ་ལ་སོགས་པའི་གསལ་བྱེད་དུ་འགྱུར་ནའང་དེ་མི་སྲིད་པའི་ཕྱིར་རོ། །གཞན་ཡང་མར་མེས་རང་ལ་བྱ་བ་འཇུག་ན་མུན་པས་ཀྱང་རང་གིས་རང་ཉིད་བསྒྲིབས་ཏེ་གཞན་མི་སྒྲིབ་པར་ཐལ་ལོ། །ཡང་དེ་དག་འདི་སྙམ་དུ་གསལ་བྱ་གསལ་བྱེད་གཞན་དུ་མེད་ཀྱང་རང་གི་ངོ་བོས་གསལ་བ་ནི་ཡོད་དེ། དཔེར་ན་ཤེལ་དཀར་པོ་སྔོན་པོར་འགྱུར་བ་བཞིན་འོག་གཞིའི་རས་སོགས་སྔོན་པོ་གཞན་ལ་ལྟོས་དགོས་པ་དང་། བཻཌཱུཪྱ་ལྟ་བུ་རང་བཞིན་གྱིས་སྔོ་བ་ཉིད་ལ་ནི་རྐྱེན་གཞན་ལ་ལྟོས་དགོས་པ་ཡོད་པ་མ་ཡིན་པ་སྟེ་གཉིས་ཡོད་པ་དེ་བཞིན་དུ་གཟུགས་དང་མིག་ཤེས་ལྟ་བུ་འགའ་ཞིག་གསལ་བྱ་གསལ་བྱེད་གཞན་ལ་ནི་ཕན་ཚུན་ལྟོས་དགོས་པ་དང་། གསལ་བྱ་གསལ་བྱེད་ཐ་དད་དུ་ལྟོས་པ་མེད་པ་རང་རིག་པའང་མཐོང་ངོ་ཞེ་ན། དཔེ་མ་གྲུབ་སྟེ། བཻཌཱུཪྱ་སྔོ་བ་དེ་གཞན་ལ་ལྟོས་མེད་དུ་སྔོ་བ་མིན་ཏེ། རང་སྐྱེད་བྱེད་ཀྱི་རྒྱུ་ལས་སྔོ་བ་ཉིད་དུ་གྲུབ་པ་མིན་པ་ལ་སླར་གཞན་ལ་ལྟོས་མེད་དུ་སྔོན་པོར་དེ་བདག་གིས་བདག་ཉིད་བྱས་པ་མེད་པས་ན་སྔོ་བ་དེའི་རྒྱུ་སྔོན་དུ་སོང་བས་ཁྱབ་བོ། །དོན་ཡང་མ་གྲུབ་སྟེ། ཐ་སྙད་ཙམ་དུ་མར་མེ་ནི་རང་གིས་རང་གསལ་བར་བྱེད་དོ་ཞེས་མར་མེ་ལས་གཞན་ཤེས་པས་ཤེས་ཏེ་རྗོད་པར་བྱེད་ན། དོན་དམ་པར་བློ་ནི་རང་ལ་རང་གསལ་བ་ཉིད་ཡིན་ཞེས་ཤེས་པ་གང་གིས་ཤེས་ནས་དེ་སྐད་དུ་རྗོད པར་བྱེད་དེ། ཤེས་མཁན་དེ་ཤེས་པ་རང་ཡིན་ན་སྐབས་ཀྱི་དཔྱད་བྱ་ཡིན་པས་མ་གྲུབ་ལ། གཞན་ཡིན་ན་ཤེས་པ་ཐུག་མེད་དུ་འགྱུར་ཞིང་ཤེས་པར་ཡང་མི་སྲིད་དེ། དུས་མི་མཉམ་ན་ནི་འགགས་པ་དང་མ་སྐྱེས་པའི་ཡུལ་མི་ཤེས་ཤིང་། དུས་མཉམ་ན་ཕན་ཚུན་ལྟོས་པ་མེད་པས་ཤེས་མི་སྲིད་དོ། །དེས་ན་གང་ཚེ་ཁྱད་གཞི་གཞན་དབང་གི་རྣམ་ཤེས་དེ་རང་ངམ་གཞན་པ་འགས་ཀྱང་མཐོང་བ་མིན་ན་དེའི་ཁྱད་པར་གྱི་ཆོས་གསལ་བའམ་ནི་མི་གསལ་བ་ཞེས་དཔྱོད་པ་དོན་མེད་དེ། དཔེར་ན་མོ་གཤམ་གྱི་བུ་མོའི་ལུས་ཀྱི་འགྱིང་བག་ནི་འདི་འདྲའོ་ཞེས་བརྗོད་པ་བཞིན་དུ་བློ་ནི་གསལ་བའོ་ཞེས་པ་དེ་ནི་བརྗོད་ཀྱང་དོན་མེད་དེ་སྒྲུབ་བྱེད་དང་བྲལ་བ་ཉིད་དོ། །ཡང་རྣམ་རིག་པས་དེ་ལྟར་མངོན་སུམ་ཚད་མས་བདེན་པར་སྒྲུབ་མ་ནུས་ནས། སླར་རྗེས་དཔག་གིས་རང་རིག་ཡོད་པར་སྒྲུབ་པ། གལ་ཏེ་ཤེས་པ་རང་གིས་རང་ཉམས་སུ་མྱོང་བའམ་རང་རིག་པ་དེ་ཡོད་པ་མིན་ན་སྔར་ཡུལ་སྔོ་སོགས་ཉམས་སུ་མྱོང་བའི་ཡུལ་ཅན་གྱི་རྣམ་ཤེས་འདི་རྒྱུ་མེད་པའི་འབྲས་བུ་བཞིན་ཡིན་པས་ཕྱིས་དྲན་པར་ཇི་ལྟར་འགྱུར་ཏེ་མི་རིགས་ནའང་ད་ལྟར་མངོན་སུམ་དུ་དྲན་པའི་རྟགས་ཀྱིས་རང་རིག་གྲུབ་བོ་ཞེ་ན། ད་ལྟ་སྔོ་འཛིན་རྣམ་ཤེས་དྲན་པ་ནི་སྔར་སྔོ་འཛིན་རང་གིས་མྱོང་བའི་འབྲས་རྟགས་མིན་ཏེ་གཞན་སྔོ་སོགས་ཡུལ་མྱོང་བ་དེ་དང་ཡུལ་ཡུལ་ཅན་གྱི་འབྲེལ་བ་ལས་ད་ལྟ་ཡུལ་ཅན་སྔོ་འཛིན་ཀྱང་དྲན་པར་འགྱུར་ཏེ། འདིར་སྔོན་པོ་དང་བྲལ་བའི་སྔོ་འཛིན་ཡན་གར་བ་ནི་ནམ་ཡང་དམིགས་པ་མིན་པས་ན། ནམ་སྔར་ཉམས་སུ་མྱོང་བའི་སྔོན་པོ་དྲན་པ་ན་དེ་འཛིན་བྱེད་ཡུལ་ཅན་རྣམ་པ་དྲན་པའི་རྟོག་པའང་སྐྱེ་བ་ཡིན་གྱི་སྔོན་པོ་ལས་ལོགས་སུ་ཆད་པའི་སྔོོ་འཛིན་ཞིག་སྔར་ཉམས་སུ་མྱོང་བ་མ་ཡིན་ནོ། །དེ་དཔེར་ན་དགུན་དུས་དུག་ཅན་གྱི་བྱི་བས་རྨུགས་པ་ན་རྨུགས་པ་ཙམ་མྱོང་གི་དེ་དུས་དུག་ཉམས་སུ་མ་མྱངས་ཀྱང་། སླར་དཔྱིད་ཀྱི་འབྲུག་གི་སྒྲས་དུག་བསླངས་པར་གྱུར་པ་ན་སྔར་རྨ་དང་མཉམ་དུ་བདག་ལ་བྱི་བའི་དུག་ཞུགས་སོ། །ཞེས་སྔར་གྱི་དུག་ལ་དམིགས་པའི་ཤེས་པ་གདོད་སྐྱེ་བ་བཞིན་ནོ། །ཡང་དེ་དག་ན་རེ། ཞི་གནས་བསྒྲུབས་ནས་རྣམ་གནས་སྦྱོང་བ་སོགས་རྐྱེན་གཞན་དག་དང་ལྡན་པ་ནི་རིང་བ་གཞན་གྱི་སེམས་ཀྱང་མཐོང་བའི་ཕྱིར་ཤིན་ཏུ་ཉེ་བ་རང་ཉིད་རང་ལ་ཅི་ཕྱིར་མི་གསལ་ཏེ། རིང་བའི་སྤུ་མཐོང་ན་ཉེ་བའི་ཐག་པ་མཐོང་ངེས་པ་བཞིན་ནོ་ཞེ་ན། དེར་མ་ངེས་ཏེ། དཔེར་ན་གསང་སྔགས་ལ་སོགས་པས་གྲུབ་པའི་མིག་སྨན་གྱི་སྦྱོར་བ་མིག་ལ་བསྐུས་པ་ལས། རིང་བ་ས་འོག་གི་གཏེར་གྱི་བུམ་པ་སོགས་མཐོང་ཡང་ཤིན་ཏུ་ཉེ་བ་མིག་སྨན་ཉིད་མཐོང་བར་འགྱུར་བ་མིན་པ་བཞིན་ནོ། །ཡང་ན་བུམ་པ་དང་མིག་སྨན་ངོ་བོ་གཅིག་ཏུ་འགྱུར་བ་མིན་པས་རྐྱེན་གཞན་ལྡན་པ་གཞན་མཐོང་གི་དཔེར་སོང་བས་རང་མཐོང་གི་དཔེར་མི་རུང་བར་མ་ཟད་གནོད་དོ་ཞེས་འཆད་པ་དག་ཀྱང་སྣང་ངོ་། །དེ་ལ་རྣམ་རིག་སྨྲ་བ་ན་རེ། ཤེས་པ་ཉིད་གསལ་ཞིང་རིག་པ་མིན་ན་རང་མི་གསལ་བས་གཞན་ཡང་གསལ་མི་ནུས་ལ། དེ་ལྟར་ན། མཐོང་ཐོས་སོགས་ཀྱི་ཐ་སྙད་ཐམས་ཅད་རྒྱུན་ཆད་པར་འགྱུར་རོ་ཞེ་ན། ཇི་ལྟར་མིག་སོགས་ཀྱི་མངོན་སུམ་དུ་མཐོང་བ་དང་། གང་ཟག་གཞན་ནམ་ལུང་ལས་རྣ་བས་ཐོས་པ་དང་རང་གི་ཡིད་ཀྱི་རྗེས་སུ་དཔག་སྟེ་ཤེས་པ་འདི་དག་མ་བརྟགས་ཉམས་དགའ་ཙམ་གྱི་དབང་དུ་བྱས་ཏེ་བརྗོད་ན་ནི། འདིར་ནི་དགག་པར་བྱ་བ་མིན་ཏེ་དེ་དགག་མི་ནུས་ལ་དགག་ཀྱང་མི་དགོས་པའི་ཕྱིར། འོ་ན་ཅི་ཞིག་འགོག་ཅེ་ན། འདིར་ནི་འཁོར་བའི་སྡུག་བསྔལ་ཐམས་ཅད་ཀྱི་རྒྱུར་གྱུར་པ་དངོས་པོ་ཀུན་ལ་བདེན་པར་འཛིན་ཅིང་ཞེན་པའི་རྟོག་པ་དེ་ཉིད་བཟློག་པར་བྱ་བ་ཡིན་ནོ། །མདོར་ན་རང་རིག་པ་འགོག་པ་ནི་དོན་དམ་པར་འགོག་པ་ཡིན་གྱི་བེམ་པོ་ལས་ལོག་ཙམ་ལ་ཐ་སྙད་དུ་རང་རིག་པར་འདོགས་པའི་ཚུལ་དེ་འགོག་པ་མ་ཡིན་ཏེ། དེ་བཀག་ན་རང་བློ་རང་ལ་ལྐོག་ཏུ་གྱུར་པར་ཁས་ལེན་དགོས་པས་རང་གཞན་གྱི་བློ་ཤེས་པས་གཅོད་ཚུལ་ལ་ཁྱད་མེད་དུ་ཐལ་བ་དང་། རང་རྒྱུད་ལ་བློ་ཡོད་པའི་སྒྲུབ་བྱེེད་མི་རིགས་པ་དང་། མཐར་དོན་རིག་གི་ཐ་སྙད་ཀྱང་རྒྱུན་ཆད་པར་འགྱུར་བ་སོགས་རིགས་པའི་དབང་ཕྱུག་གིས་ཇི་སྐད་གསུངས་པས་གནོད་ཅིང་རང་རིག་འགོག་པའི་རིགས་པ་ཇི་སྙེད་པ་ཐམས་ཅད་ཕུང་སོགས་འགོག་པའི་རིགས་པ་བཞིན་དུ་དོན་དམ་པར་འགོག་གི་ཐ་སྙད་དུ་བཀག་པའི་གཏན་མེད་མ་ཡིན་པར་ཤེས་དགོས་ཤིང་། དེ་བཞིན་དུ་ཀུན་གཞིའང་བདེན་གྲུབ་ཏུ་ཁས་མ་བླངས་ན་ཐ་སྙད་དུ་ཁས་བླངས་པ་ཙམ་གྱིས་དབུ་མའི་ཚུལ་ལས་ཉམས་པར་མི་འགྱུར་བ་སོགས་ཀྱི་གནད་ཤེར་ཊཱིཀ་ཆེན་མོ་ཡན་ལག་དང་བཅས་པ་ལས་ཤེས་པར་བྱ་ཞིང་། ཀུན་མཁྱེན་བསོད་ནམས་སེང་གེས་མཛད་པའི་འཇུག་འགྲེལ་ལས་ཀྱང་ཤིན་ཏུ་གསལ་བར་བསྟན་ཏོ། །དེས་ན་སེམས་བདེན་གྲུབ་ཏུ་འདོད་པ་ལ་རང་རིག་མི་འཐད་ཀྱང་བདེན་མེད་དུ་འདོད་པ་ལ་རང་རིག་པའི་ཐ་སྙད་ཤིན་ཏུ་འཐད་པ་ཡང་ཤེས་པར་བྱའོ། །གཉིས་པ་སེམས་ཙམ་རྣམ་རྫུན་པའི་རྩོད་སྤོང་ནི་དེ་དག་འདི་སྙམ་དུ། སེམས་ལས་གཟུང་ཆ་ཡུལ་སྒྱུ་མ་ལྟ་བུ་འདི་གཞན་ཐ་དད་དུ་གྲུབ་པ་མིན་ཏེ་ཕྱི་དོན་མི་འགྲུབ་ཞིང་། སེམས་ལས་གཞན་མིན་པར་ཏེ་དེ་གཉིས་གཅིག་ཡིན་ནའང་སེམས་གཅིག་པ་ཆ་མེད་དུ་གྲུབ་པ་ཉམས་པས་དེ་ལྟར་ཡང་མི་རྟག་{བརྟགས} སྟེ་མཁའ་ལ་སྐྲ་ཤད་ཀྱི་སྣང་བ་ལྟར་གཞི་མེད་ཀྱི་སྣང་བ་ཙམ་དུ་འདོད་དེ། སེམས་ནི་རྣམ་པ་ཐམས་ཅད་དང་བྲལ་བའི་རང་བཞིན་ཤེལ་གོང་དག་པ་བཞིན་དུ་གནས་སོ་སྙམ་ན། ཁྱོད་སེམས་དངོས་པོར་འདོད་ན་ནི་ཇི་ལྟར་ན་རྣམ་པ་དེ་གཞན་མིན་ཏེ་རྣམ་པར་དངོས་པོ་མེད་པར་འདོད་པས་དངོས་དངོས་མེད་གཞི་མཐུན་མི་སྲིད་དོ། །གནོད་པ་དེར་དོགས་ནས་སེམས་ལས་གཞན་དུའང་མིན་ནོ་ཞེ་ན་སེམས་ཀྱང་དངོས་པོ་མེད་པར་ཐལ་ཏེ་དངོས་མེད་ཀྱི་རྣམ་པ་དང་གཅིག་ཡིན་པས་སོ། །གཉིས་ཀ་མིན་པར་ཁས་བླངས་པས་སྐྱོན་མེད་དོ་སྙམ་ན་ཤིན་ཏུ་རྨོངས་ཏེ་གཞན་མིན་ཞེས་གཅིག་ཏུ་ཁས་བླངས། གཞན་མིན་པའང་མིན་ནོ་ཞེས་དགག་པ་གཉིས་ཀྱི་རྣལ་མར་གོ་བས་གཞན་ཡིན་པར་ཁས་བླངས་པའི་འགལ་བ་གཞི་གཅིག་ལ་འདུ་བས་མི་འཐད་ཅིང་དངོས་པོ་ལ་དེ་གང་རུང་ལས་འོས་མེད་པ་ཡིན་ནོ། །ཡང་སེམས་དངོས་པོར་མེད་ན་ལྟ་བྱེད་དུ་མི་རུང་སྙམ་ན། ཇི་ལྟར་ཁྱོད་སྒྱུ་མ་ལྟ་བུའི་ཕྱི་དོན་བདེན་པ་མིན་ཡང་བལྟ་བྱ་ཡིན་པར་འདོད་པ་དེ་བཞིན་དུ་ལྟ་བྱེད་ཀྱི་ཡིད་ཀྱང་སྒྱུ་མ་ལྟ་བུར་ལྟ་བྱེད་དུ་འཐད་དོ། །གོང་དུ་དགག་པ་དང་འདིར་སྒྲུབ་པའི་དབང་དུ་བྱས་སོ། །ཡང་དེ་དག་གིས་གལ་ཏེ་འཁོར་བ་འདི་ནི་གཞན་དབང་གི་སེམས་དངོས་པོར་གྲུབ་པའི་རྟེན་ཅན་ཡིན་གྱི། དེ་ནི་དེ་ལས་གཞན་དུ་གྱུར་ན་ནམ་མཁའ་དང་འདྲ་བར་ཅི་ཡང་མེད་པར་འགྱུར་གྱི་འཁོར་བའི་སྣང་བ་འདི་འབྱུང་མི་རིགས་ཏེ། རྟེན་གཞི་མེད་པས་འཇིམ་པ་མེད་པའི་བུམ་པ་དང་སྣལ་མ་མེད་པའི་སྣམ་བུ་བཞིན་ནོ་སྙམ་ན། འཁོར་བ་འདི་དངོས་པོ་ཡིན་ན་སེམས་དང་གཅིག་གམ་ཐ་དད་གཅིག་ན་དེ་གཉིས་ནམ་ཡང་འབྲལ་མི་རུང་ལ་གཞན་ན་སེམས་ཙམ་གྱི་གྲུབ་མཐའ་ཉམས་པས་དངོས་མེད་དུ་འདོད་མོད། དེ་འདྲའི་འཁོར་བ་དངོས་མེད་ལ་དོན་བྱེད་པ་མེད་པས་དེ་དངོས་པོར་གྲུབ་པའི་སེམས་ལ་བརྟེན་པར་གྱུར་པས་ནི་འཆིང་གྲོལ་གྱི་དོན་བྱེད་པ་དང་ལྡན་པར་ཇི་ལྟར་འགྱུར་ཏེ་རི་བོང་གི་རྭ་ལག་པ་ལ་བརྟེན་ནས་ཀྱང་ས་རྐོ་བ་མི་སྲིད་པ་བཞིན་དངོས་མེད་ནི་གང་ལའང་བརྟེན་པ་མིན་ཏེ། གལ་ཏེ་བརྟེན་ན་རྒྱུ་འབྲས་ཀྱི་དངོས་པོར་འགྱུར་རོ། །དེ་ནི་གཞན་དུ་མཁའ་འདྲ་ཞེས་པ་ཕ་རོལ་ལ་གནོད་པ་སྟོན་པའི་ཚིག་ཏུ་སྦྱར་བ་ཡོད་ཀྱང་འདི་ལྟར་བདེའོ། །འདིར་དངོས་མེད་ཅེས་པ་བདེན་དངོས་མེད་ཀྱང་སྣང་བ་སྒྱུ་མ་ལྟ་བུར་འཆར་བའི་གནད་མ་རྟོགས་ནས་དངོས་སྨྲ་བ་རྣམས་ཀྱིས་ཐ་སྙད་དུའང་མེད་པའི་གཏན་མེད་ལྟ་བུར་བཟུང་བ་ལ་ལན་འདེབས་ཚུལ་ཡིན་ནོ། །དེ་ལྟར་འཁོར་བ་དངོས་མེད་དང་སེམས་དངོས་པོ་གཉིས་ནམ་ཡང་མ་འབྲེལ་བས་ན་སེམས་ཙམ་པ་ཁྱོད་ཀྱི་སེམས་ནི་གྲོགས་གཟུང་བ་མེད་པར་རང་རིག་རང་གསལ་གཅིག་པུ་ཉིད་དུ་འགྱུར་བ་ཡིན་ལ། གང་ཚེ་དེ་ལྟར་སེམས་དེ་ནི་གཟུང་བ་དང་བྲལ་བ་དེ་ཡི་ཚེ་འཛིན་པས་ཀྱང་སྟོང་ཞིང་གཉིས་སྟོང་གི་དེ་ཁོ་ན་ཉིད་མངོན་དུ་གྱུར་པས་ན། སེམས་ཅན་ཐམས་ཅད་ཐོག་མ་ནས་དེ་བཞིན་གཤེགས་པར་འགྱུར་ཏེ་ལམ་འབད་རྩོལ་ལ་ལྟོས་པར་མི་འགྱུར་རོ། །དེ་ལྟ་བུ་ཡིན་ན་ཡང་ཆོས་ཐམས་ཅད་སེམས་ཙམ་མོ་ཞེས་རྣམ་རིག་ཙམ་དུ་བརྟགས་ཤིང་གྲུབ་མཐའ་བཞག་པ་ལ་ཡོན་ཏན་ཅི་ཞིག་ཡོད་དེ་གཉིས་སྣང་དགག་མི་དགོས་ཤིང་གཉིས་སྟོང་གི་དེ་ཁོ་ན་ཉིད་སྒྲུབ་མི་དགོས་པའི་ཕྱིར། དེས་ན་རྣམ་པ་མེད་པར་ཁས་བླངས་ན་འཁོར་བའི་སྣང་བ་གཞི་མེད་དུ་འགྱུར་བས་མྱོང་བ་རྒྱུན་ཆད་པར་འགྱུར་རོ། །གཉིས་པ་ལམ་ལ་རྩོད་སྤོང་ནི། ཕྱི་ནང་གི་དངོས་པོ་འདི་དག་སྒྱུ་མ་ལྟ་བུར་ཤེས་ན་ཡང་དེས་ཇི་ལྟར་ཉོན་མོངས་ལྡོག་པར་འགྱུར་ཏེ། གང་གི་ཚེ་སྒྱུ་མ་མཁན་རང་གིས་སྤྲུལ་པའི་སྒྱུ་མའི་བུད་མེད་ལ་སྒྱུ་མར་ཤེས་ཀྱང་དེ་བྱེད་པ་པོ་སྒྱུ་མ་མཁན་རང་ཉིད་ཀྱང་ཆགས་པ་སྐྱེ་བར་འགྱུར་བས་སོ་སྙམ་ན། སྒྱུ་མའི་བུད་མེད་དེ་བྱེད་པ་པོ་ནི་ཤེས་བྱ་གང་ལའང་ཉོན་མོངས་པའི་བག་ཆགས་མ་སྤངས་ཏེ་བདག་གཉིས་སུ་འཛིན་པའི་ཀུན་རྟོག་ལ་གཉེན་པོ་ཡེ་ཤེས་ཀྱིས་ཉམས་སྨད་པར་མ་བྱས་པ། དེས་ན་ཡུལ་སྒྱུ་མའི་བུད་མེད་མཛེས་མ་དེ་མཐོང་བ་ན་བྱེད་པ་པོ་དེའི་རྒྱུད་ལ་གཉེན་པོ་སྟོང་ཉིད་ཀྱི་བག་ཆགས་ཤིན་ཏུ་ཉམ་ཆུང་བ་ཉིད་ཀྱིས་ཆགས་པ་གཏན་ནས་ལྡོག་ག་ལ་ནུས་ཏེ། དེའི་རྒྱུད་ལ་བདེན་འཛིན་དང་དངོས་སུ་འགལ་བའི་སྟོང་ཉིད་ནི་མེད་ལ་ཕྱི་རོལ་གྱི་བུད་མེད་དངོས་ཀྱིས་སྟོངས་པར་མཐོང་བ་དེས་ཀྱང་དོན་གཉེར་གྱི་བློ་མི་སྐྱེ་བ་བཞིན་ནོ། །དེས་ན་འདོད་པའི་རྩ་བ་ནི་ཀུན་ཏུ་རྟོག་པ་ཡིན་ལ། དེ་སྤྲོས་པ་ལས་སྐྱེ་ཞིང་ཀུན་རྟོག་གི་སྤྲོས་པ་དེ་དག་ནི་སྟོང་པ་ཉིད་ཀྱིས་འགོག་པར་འགྱུར་ཏེ། དེ་ཡང་ཀུན་བརྟགས་རྣམས་བདེན་པ་མཐོང་ཙམ་གྱིས་ཐག་པར་སྦྲུལ་མེད་ཤེས་པ་བཞིན་དུ་ལྡོག་ཅིང་ལྷན་སྐྱེས་རྣམས་གཉེན་པོ་རྒྱུད་ལ་གོམས་པས་རིམ་གྱིས་སྤང་ཞིང་མཐར་བློ་གཉེན་པོའི་ངང་དུ་གྱུར་པ་ན་ས་བོན་ཕྲ་བའང་སླར་མི་སྐྱེ་བའི་ཚུལ་དུ་ལྡོག་སྟེ་ཉི་མའི་དཀྱིལ་འཁོར་ལ་མུན་པ་གཏན་མི་གནས་པ་བཞིན་ནོ། །འོ་ན་དངོས་པོར་མངོན་ཞེན་དང་། སྟོང་ཉིད་དུ་མངོན་པར་ཞེན་པ་གཉིས་ཀའང་ཀུན་རྟོག་གི་སྤྲོས་པ་ལས་མ་འདས་ན་གླང་ཆེན་གྱི་ཁྲུས་བཞིན་དུ་སླར་ཡང་རྟོག་པའི་དྲྭ་བར་ཆུད་པ་ཁྱོད་ཀྱིས་ཀུན་རྟོག་ཇི་ལྟར་འགོག་སྟེ་འགོག་པར་མི་འགྱུར་རོ་ཞེ་ན། གང་དངོས་པོ་ཐམས་ཅད་རང་བཞིན་མེད་པའི་སྟོང་ཉིད་ཀྱི་བག་ཆགས་གོམས་པས་ནི། དེ་དང་འཛིན་སྟངས་འགལ་བ་དངོས་པོར་ཞེན་པའི་བག་ཆགས་སྤོང་བར་འགྱུར་ཞིང་། དེའི་ཚེ་དངོས་མེད་དུ་འཛིན་པ་དེའང་གཞན་བསལ་བའི་རྟོག་པ་ཙམ་སྟེ་དངོས་པོའི་གནས་ཚུལ་ཡང་དག་ཏུ་གྲུབ་པ་མེད་པར་རྟེན་འབྱུང་གི་རིགས་པས་གཏན་ལ་ཕབ་ནས། དངོས་དང་དངོས་མེད་ཅི་ཡང་བདེན་པར་གྲུབ་པ་མེད་ཅེས་གོམས་པས་ནི་མེད་པར་ཞེན་པ་དེ་ཡང་ཕྱིས་ནས་སྤོང་བར་འགྱུར་ཏེ། ཡོད་དང་མེད་པ་འདི་གཉིས་མེད་པའི་ཆོས་ཡིན་ཏེ། །བྱང་ཆུབ་སེམས་དཔའ་གང་གིས་འདི་ཤེས་ངེས་པར་འབྱུང་། །ཞེས་དང་། ཀུན་རྟོག་ཐམས་ཅད་སྤང་བའི་ཕྱིར། །སྟོང་ཉིད་བདུད་རྩི་བསྟན་མཛད་དེ། །གང་ཞིག་དེ་ལ་ཞེན་གྱུར་པ། །དེ་ཡང་ཁྱོད་ཀྱིས་སྤངས་པ་ལགས། །ཞེས་གསུངས་པ་བཞིན་ནོ། །དེ་ལ་དངོས་པོ་ནི་མེད་པར་བཀག་ཀྱང་། དེ་བཀག་པའི་མེད་པ་ཇི་ལྟར་དགག་པར་བྱ་སྟེ། དེ་བཀག་ན་སླར་ཡོད་པ་ཉིད་དུ་ལྡོག་སྟེ་མེད་པ་འགོག་པ་སྒྲུབ་པ་ཡིན་པའི་ཕྱིར་དང་། དངོས་པོ་མེད་པ་ནི་གཉེན་པོ་ཡིན་པ་ལ་སོགས་པའི་ཕྱིར་རོ་སྙམ་ན། རེ་ཞིག་ཐོག་མེད་ནས་གོམས་པའི་དངོས་པོ་ཡོད་པ་ཉིད་དུ་ཞེན་པ་དེའི་ངོར་བྱས་ནས་མེད་པ་ཉིད་དུ་སྒྲུབ་ཅིང་གོམས་པར་བྱེད་དེ་དངོས་པོ་རང་བཞིན་མེད་པར་མ་ཤེས་ན་གནས་ལུགས་མཐའ་བྲལ་ལ་ངེས་པ་སྐྱེ་བའི་སྐབས་གཏན་མེད་པས་སོ། །དེས་ན་ལས་དང་པོ་པས་ཐོག་མར་རང་བཞིན་མེད་པ་ཉིད་གཏན་ལ་དབབ་ནས་གོམས་པ་གལ་ཆེ་ཞིང་། དེ་ལྟར་སྒོམ་པའི་སྐབས་སུ་གཉེན་པོ་རང་བཞིན་མེད་པ་ལ་ཞེན་པ་ལས་མ་འདས་པས། དེའི་འོག་ཏུ་མེད་པར་ཞེན་པ་དེ་ཉིད་ཀྱང་ངེས་པར་དགག་དགོས་ཏེ་སྡུད་པ་ལས། ཕུང་འདི་སྟོང་ཞེས་རྟོག་ནའང་བྱང་ཆུབ་སེམས་དཔའ་ནི། །མཚན་མ་ལ་སྤྱོད་སྐྱེ་མེད་གནས་ལ་དད་མ་ཡིན། །ཞེས་དང་། ཕྱིར་མི་ལྡོག་པ་འཁོར་ལོའི་མདོ་ལས། ཡོད་ཅེས་བྱ་བ་མཐའ་གཅིག་སྟེ། །མེད་ཅེས་བྱ་བ་གཉིས་པ་ཡིན། །དེ་བཞིན་བདག་དང་བདག་མེད་མཚུངས། །རྟག་པ་དང་ནི་ཆད་པ་མཚུངས། །ཞེས་དང་། ཡེ་ཤེས་ཕྱག་རྒྱའི་མདོ་ལས། མེད་པའི་ཆོས་ལ་ཡོངས་སུ་རྟོག་པ་ན། །བྱིས་པ་གང་ཡིན་གཡོ་བ་དེ་ཡིས་བཅིངས། །ཞེས་དང་། སྟོང་ཉིད་མ་སྐྱེས་སུས་ཀྱང་བྱས་མ་ཡིན། །མ་མཐོང་འོང་བ་མ་ཡིན་འཕོ་མིན་ན། །དམིགས་གནས་བདག་ཅག་སྟོང་ཉིད་ལེགས་བསླབ་ཅེས། །འཛེར་བ་དེ་དག་ཆོས་ཀྱི་ཆོམ་རྐུན་ཡིན། །ཞེས་དང་། ལང་གཤེགས་ལས། གང་ཟག་ཏུ་ལྟ་བ་རི་རབ་ཙམ་ཡང་བླའི། ཡོད་པ་དང་མེད་པའི་ང་རྒྱལ་ཅན་གྱིས་སྟོང་པ་ཉིད་དུ་ལྟ་བ་ནི་མ་ཡིན་ནོ། །ཞེས་དང་། ཁྲི་བརྒྱད་སྟོང་པ་ལས། དངོས་པོ་མེད་པའི་འདུ་ཤེས་ཅན་ལ་མཐུན་པའི་བཟོད་པའང་མེད་དོ། །ཞེས་དང་། ཤེས་ཕྱིན་རྒྱན་ལས། གཟུགས་སོགས་ཕུང་པོའི་སྟོང་ཉིད་ལ། །སྤྱོད་པའི་འདུ་ཤེས་མི་མཐུན་ཕྱོགས། །ཞེས་དང་། འཕགས་པ་ཀླུས། རྒྱལ་བ་ཀུན་གྱིས་སྟོང་པ་ཉིད། །ལྟ་ཀུན་ངེས་པར་འབྱིན་པར་གསུངས། །གང་དག་སྟོང་པ་ཉིད་ལྟ་བ། །དེ་དག་བསྒྲུབ་ཏུ་མེད་པར་གསུངས། །ཞེས་གསུངས། དེས་ན་སྤྱིར་བདེན་མེད་དང་རང་བཞིན་མེད་པ་སོགས་གནས་ལུགས་མིན་ཞེས་ནམ་ཡང་མི་བརྗོད་མོད་ཀྱི་བདེན་མེད་མེད་དགག་དང་། བདེན་མེད་སྤྲོས་བྲལ་ལྟ་བུའི་གོ་ཚུལ་གཉིས་ཡོད་པ་ལས། གནས་ལུགས་དམིགས་མེད་དུ་མ་གོ་བར་དམིགས་པ་ཅན་དུ་བཟུང་བའི་མེད་པ་ཉིད་དེ་ཙམ་ཁོ་ན་གནས་ལུགས་མཐར་ཐུག་མ་ཡིན་ཏེ། གང་ཚེ་གཟུགས་སོགས་དངོས་པོ་གང་ཞིག་མེད་དོ་ཞེས་བརྟག་བྱའི་དངོས་པོ་དེ་ཐ་སྙད་དུ་རང་གི་ངོ་བོས་སྐྱེ་བ་སོགས་སུ་མི་དམིགས་པ་ན། དེ་ཚེ་དེ་ལ་བརྟེན་པའི་དངོས་མེད་ཀྱང་རྟེན་དངོས་པོ་དང་བྲལ་བས་ན་བློ་ཡི་མདུན་ན་དམིགས་གཏད་ཀྱི་ཡུལ་དུ་ཇི་ལྟར་གནས་ཏེ་མོ་གཤམ་གྱི་བུ་སྐྱེ་བ་མེད་ན་དེ་ཤི་བའང་མི་དམིགས་པ་བཞིན་ནོ། །དེས་ན་མེད་པ་ནི་ཡོད་པ་ལ་བརྟེན་ནས་བཞག་པ་ཙམ་སྟེ་ལྟོས་མེད་དུ་ངོ་བོས་གྲུབ་པ་ནི་མེད་དོ། །འོ་ན་ཡོད་པ་བཀག་ནས་མེད་པ་སྒྲུབ། སླར་ཡང་མེད་པའང་བཀག་ནས་ཡོད་པ་སྒྲུབ། དེ་གཉིས་རེས་མོས་སྤེལ་བས་ཅི་ཞིག་བྱ་ཟེར་ན། རྣམ་ཤེས་ལ་རྟོན་ཅིང་ཚུར་མཐོང་གི་རྟོག་གེའི་དབང་དུ་བྱས་པ་དག་ལ་གླང་ཆེན་གྱི་ཁྲུས་དང་འདྲ་བའི་ཀུན་རྟོག་འདི་ལྟ་བུ་འབྱུང་བ་ནི་ཤིན་ཏུ་བདེན་ཏེ་བསམ་གྱིས་མི་ཁྱབ་པའི་ཆོས་ཉིད་ནི་སྐལ་དམན་རྣམས་སྐྲག་པའི་གནས་ཆེ་བའི་རབ་ཡིན་པས་དེའི་ཚུལ་ནི་མི་ཤེས་ཤིང་། དངོས་མེད་དུ་བསྟན་ན་ཆད་སྟོང་དུ་བཟུང་། སྣང་བཅས་སུ་བསྟན་ན་བདེན་གྲུབ་ཏུ་བཟུང་། ཟུང་འཇུག་ཅེས་བརྗོད་ན་ཐ་གུ་དཀར་ནག་བསྒྲིལ་བ་ལྟ་བུའི་དོན་དུ་བཟུང་། བསམ་གྱིས་མི་ཁྱབ་ཅེས་བརྗོད་ན་ཅང་མེད་ཅི་མེད་ཧ་ཤྭང་གི་ལྟ་བ་ལྟ་བུ་ཞིག་ལས་མི་འཆར་བ་ཡིན་ཏེ། ཟབ་མོའི་མཐར་ཐུག་པའི་ཆོས་འདི་ཀུན་གྱིས་བདེ་བླག་ཏུ་ཤེས་ནུས་ན། དེ་དག་འཇིག་རྟེན་མཐའ་དག་ལས་འདས་ཤིང་འཕགས་པའི་སྤྱོད་ཡུལ་ལྟ་དཀའ་ཞིང་ཤེས་པར་དཀའ་བ་བསམ་གྱིས་མི་ཁྱབ་པ་ཞེས་ཇི་སྟེ་གསུངས། དེའི་ཕྱིར་ན། བཅོམ་ལྡན་འདས་ཀྱིས། འདྲེན་པ་རྣམས་ཀྱི་ཆོས་འདི་ཟབ་སྟེ་མཐོང་བར་དཀའ། །སུས་ཀྱང་རྟོགས་པ་མེད་ཅིང་ཐོབ་པར་འགྱུར་མེད་པ། །དེ་ཕྱིར་ཕན་མཛད་བརྩེ་ལྡན་བྱང་ཆུབ་བརྙེས་ནས་འདི། །སེམས་ཅན་ཚོགས་སུས་ཤེས་སྙམ་ཐུགས་ཁྲལ་ཆུང་བར་མཛད། །སེམས་ཅན་རྣམས་ནི་གནས་ལ་དགའ་ཞིང་ཡུལ་རྣམས་འདོད། །འཛིན་ལ་གནས་ཤིང་མི་མཁས་བླུན་རྨོངས་མུན་པ་བཞིན། །ཐོབ་པར་བྱ་བའི་ཆོས་ནི་གནས་མེད་འཛིན་མེད་དེ། །དེས་ན་འཇིག་རྟེན་དག་དང་རྩོད་པ་འབྱུང་བ་ཡིན། །ཞེས་དང་། སློབ་དཔོན་ཀླུས། སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །ཇི་ལྟར་སྦྲུལ་ལ་བཟུང་ཉེས་དང་། །རིགས་སྔགས་ཉེས་པར་བསྒྲུབ་པ་བཞིན། །དེ་ཕྱིར་ཞེན་པས་ཆོས་འདི་ཡི། །གཏིང་རྟོགས་དཀའ་བར་མཁྱེན་གྱུར་ནས། །ཐུབ་པའི་ཐུགས་ནི་ཆོས་བསྟན་ལས། །རབ་ཏུ་ལོག་པར་འགྱུར་བ་ཡིན། །ཞེས་གསུངས་སོ། །དེས་ན་གང་རུང་རེ་བཀག་ནས་ཅིག་ཤོས་སྒྲུབ་པ་མ་ཡིན་ཏེ་མཐའ་ཐམས་ཅད་བཀག་ནས་མཐར་དགག་སྒྲུབ་དང་བྲལ་བའི་ཆོས་ཉིད་དེ་བཞིན་ཉིད་ལ་འཇུག་པར་འགྱུར་བའི་ཕྱིར་གདོད་ནས་སྐྱེ་བ་མེད་བཞིན་དུ་སྣང་བའི་སྟོང་དང་རྟེན་འབྱུང་ཡེ་ནས་འདུ་འབྲལ་མེད་པའི་ཆོས་ཉིད་མཉམ་པ་ཆེན་པོ་ལ་ངེས་ཤེས་གཏིང་ནས་མ་རྙེད་པ་དེ་སྲིད་དུ་ཚོགས་བསགས་ཤིང་། མཚན་ཉིད་ལྡན་པའི་དགེ་བའི་བཤེས་གཉེན་ཁྱད་པར་ཅན་གྱི་ཞབས་ལ་གཏུགས་པར་བྱས་ནས་ཡང་དག་པའི་གནད་དང་ལྡན་པའི་གོམས་པ་ཡུན་བསྲིང་བར་བྱ་སྟེ། ཐོས་པས་དྲེགས་ཤིང་ཚུར་མཐོང་གི་དཔྱོད་པ་ཕལ་ཆེ་བས་བསྐལ་པ་བརྒྱར་འབད་ཀྱང་ཕྱོགས་ཙམ་ཤེས་པར་མི་འགྱུར་ཞེས་དམ་པའི་ཞལ་ནས་གདམས་པ་འདི་ཁོ་ན་ལམ་དོན་གཉེར་རྣམས་ཀྱི་སྙིང་ནོར་དུ་བྱ་བར་རིགས་སོ། །དེ་ལྟར་ན་གང་གི་ཚེ་དངོས་པོ་དང་དངོས་པོོ་མེད་པ་དག་གང་ཡང་བློ་ཡི་མདུན་ན་མི་གནས་པ་དེའི་ཚེ། དེ་ལས་བདེན་པར་གྲུབ་པའི་རྣམ་པ་གཞན་མེད་པས་ན། བདེན་འཛིན་གྱི་དམིགས་པའི་གཏད་སོ་མཐའ་དག་མེད་པར་སྤྲོས་པ་མ་ལུས་པ་རབ་ཏུ་ཞི་བ་ཡིན་ཏེ་སོ་སོ་རང་རིག་པའི་ཡེ་ཤེས་ཙམ་གྱིས་རབ་ཏུ་ཕྱེ་བ་སྨྲ་བསམ་བརྗོད་དུ་མེད་པ་ནམ་མཁའི་དཀྱིལ་ལྟ་བུའི་མཉམ་པ་ཉིད་དོ། །གནས་ལུགས་མཐར་ཐུག་པ་དེ་ལྟ་བུ་ཡིན་པའི་ཕྱིར་དངོས་དང་དངོས་མེད་དུ་ཞེན་པ་སྣ་ཚོགས་པའི་ཚུལ་བཟློག་པའི་སྟོང་ཉིད་བཅུ་དྲུག་ཏུ་བཤད་པ་དང་། རྗེ་བཙུན་བྱམས་མགོན་གྱིས་ཐེག་ཆེན་སྦྱོར་ལམ་གྱི་སྐབས་སུ། རྟག་མི་རྟག་སོགས་ཀྱི་སྒྲོ་འདོགས་སོ་གཉིས་ལ་ཞེན་སྤྱོད་བཀག་ནས་མཐོང་ལམ་གྱི་གནས་སྐབས་སུ་སྒྲོ་འདོགས་སོ་གཉིས་དང་བྲལ་བ་མངོན་དུ་འགྱུར་བར་གསུངས་པ་ལྟ་བུ་སྟེ། སྤྲོས་པ་མཐའ་དག་ཁེགས་པའི་ཟུང་འཇུག་ཆོས་ཀྱི་དབྱིངས་དེ་ནི་ཐེག་པ་ཆེན་པོའི་རྟོགས་རིགས་ཁྱད་པར་ཅན་ཡིན་ལ། དེ་ལ་དབུ་མ་ཆེན་པོ་ཞེས་ཐ་སྙད་བྱེད་པ་ཡིན་ཏེ། རྒྱལ་བའི་ཡུམ་ལས། ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པ་འདི་ནི་ནམ་མཁའ་བསྒོམ་པ་སྟེ། ནམ་མཁའ་ལ་ནི་གཟུགས་མ་མཆིས། ཚོར་བ་མ་མཆིས། འདུ་ཤེས་མ་མཆིས། འདུ་བྱེད་མ་མཆིས་རྣམ་པར་ཤེས་པ་མ་མཆིས་ཞེས་པ་ནས། སངས་རྒྱས་མ་མཆིས་སོ། །ཞེས་པའི་བར་གྱིས་གསུངས་པ་དང་། སྡུད་པ་ལས། གཟུགས་རྣམས་མི་མཐོང་ཚོར་བ་དག་ཀྱང་མི་མཐོང་ཞིང་། །འདུ་ཤེས་མཐོང་བ་མེད་ལ་སེམས་པ་མི་མཐོང་ཞིང་། །གང་ལ་རྣམ་པར་ཤེས་དང་སེམས་ཡིད་མཐོང་མེད་པ། །འདི་ནི་ཆོས་མཐོང་ཡིན་ཞེས་དེ་བཞིན་གཤེགས་པས་གསུངས། །ཞེས་དང་། འོད་སྲུང་གིས་ཞུས་པ་ལས། དབུས་གང་ཡིན་པ་དེ་ནི་དཔྱད་དུ་མེད་པ་བསྟན་དུ་མེད་པ། རྟེན་མེད་པ་སྣང་བ་མ་ཡིན་པ། རྣམ་པར་རིག་པ་མེད་པ། གནས་མེད་པ་སྟེ་འོད་སྲུང་འདི་ནི་དབུ་མའི་ལམ་ཆོས་རྣམས་ལ་སོ་སོར་རྟོག་པའོ། །ཞེས་དང་། ཡེ་ཤེས་སྣང་བ་རྒྱན་གྱི་མདོ་ལས། ཀུན་ཏུ་རྟོག་པས་མ་བརྟགས་པ། །རབ་ཏུ་མི་གནས་པ་ཡི་ཡིད། །དྲན་པ་མེད་ཅིང་ཡིད་བྱེད་མེད། །དམིགས་པ་མེད་ལ་ཕྱག་འཚལ་འདུད། །ཅེས་དང་། ཏིང་འཛིན་རྒྱལ་པོ་ལས། དམིགས་པ་མེད་ཅིང་མཚན་མ་མེད། །རྣམ་རྟོག་མེད་ཅིང་སྤྲོས་པ་མེད། །སྐྱེ་མེད་དེ་ནི་དེ་བཞིན་ཉིད། །ཅེས་དང་། ལང་ཀར་གཤེགས་པ་ལས། ཅི་ཙམ་སེམས་ཀྱི་སྤྱོད་ཡུལ་བ། །ཡོད་དང་མེད་པ་མཐའ་གཉིས་ཏེ། །སྤྱོད་ཡུལ་རྣམ་པར་སྤང་བ་ནས། །སེམས་ཀྱང་ཡང་དག་འགག་པར་འགྱུར། །ཞེས་དང་། ཡོད་མིན་མེད་མིན་ཡོད་མེད་མིན། །དེ་ལྟར་འཇིག་རྟེན་ནམ་མཐོང་ན། །དེ་ཚེ་སེམས་ཀྱང་རྣམ་ལྡོག་སྟེ། །བདག་མེད་པ་ཡང་རྟོགས་པར་འགྱུར། །ཞེས་དང་། དབུ་མ་རྩ་བར། གང་དག་རང་དངོས་གཞན་དངོས་དང་། །དངོས་དང་དངོས་མེད་ཉིད་ལྟ་བ། །དེ་དག་སངས་རྒྱས་བསྟན་པ་ལ། །དེ་ཉིད་མཐོང་བ་མ་ཡིན་ནོ། །བཅོམ་ལྡན་དངོས་དང་དངོས་མེད་པ། །མཁྱེན་པས་ཀ་ཏ་ཡ་ན་ཡི། །གདམས་ངག་ལས་ནི་ཡོད་པ་དང་། །མེད་པ་གཉིས་ཀ་དགག་པར་མཛད། །ཅེས་དང་། ཡོད་ཅེས་བྱ་བ་རྟག་པར་འཛིན། །མེད་ཅེས་བྱ་བ་ཆད་པར་ལྟ། །དེ་ཕྱིར་ཡོད་དང་མེད་པ་ལ། །མཁས་པས་གནས་པར་མི་བྱའོ། །ཞེས་དང་། བརྗོད་པར་བྱ་བ་ལྡོག་པ་སྟེ། །སེམས་ཀྱི་སྤྱོད་ཡུལ་ལྡོག་པས་སོ། །མ་སྐྱེས་པ་དང་མ་འགགས་པ། །ཆོས་ཉིད་མྱ་ངན་འདས་དང་མཚུངས། །ཐམས་ཅད་ཡང་དག་ཡང་དག་མིན། །ཡང་དག་ཡང་དག་མ་ཡིན་ཉིད། །ཡང་དག་མིན་མིན་ཡང་དག་མིན། །དེ་ནི་སངས་རྒྱས་རྗེས་བསྟན་པའོ། །གཞན་ལས་ཤེས་མིན་ཞི་བ་དང་། །སྤྲོས་པ་རྣམས་ཀྱིས་མ་སྤྲོས་པ། །རྣམ་རྟོག་མེད་དོན་ཐ་དད་མེད། །དེ་ནི་དེ་ཡི་མཚན་ཉིད་དོ། །ཞེས་དང་། སྟོང་ངོ་ཞེས་ཀྱང་མི་བརྗོད་དེ། །མི་སྟོང་ཞེས་ཀྱང་མི་བྱ་ཞིང་། །གཉིས་དང་གཉིས་མིན་མི་བྱ་སྟེ། །གདགས་པའི་དོན་དུ་བརྗོད་པར་བྱ། །རྟག་དང་མི་རྟག་ལ་སོགས་བཞི། །ཞི་བ་འདི་ལ་ག་ལ་ཡོད། །མཐའ་དང་མཐའ་མེད་ལ་སོགས་བཞི། །ཞི་བ་འདི་ལ་ག་ལ་ཡོད། །གང་གི་ཐུགས་བརྩེས་ཉེར་བཟུང་ནས། །ལྟ་བ་ཐམས་ཅད་སྤངས་པའི་ཕྱིར། །དམ་པའི་ཆོས་ནི་སྟོན་མཛད་པ། །གོ་ཏམ་དེ་ལ་ཕྱག་འཚལ་ལོ། །ཞེས་དང་། སློབ་དཔོན་ཨཱཪྱ་དེ་ཝས། དེ་ཕྱིར་དངོས་ཡོད་མི་བྱ་ཞིང་། །དངོས་པོ་མེད་པའི་ཡིད་ཀྱང་སྤངས། །ཀུན་མཁྱེན་གོ་འཕང་འདོད་རྣམས་ཀྱིས། །དེ་གཉིས་བར་དུའང་གནས་པ་མིན། །ཞེས་དང་། བདེན་གཉིས་ལས། ཡོད་མེད་དངོས་པོ་མཁྱེན་པ་པོ། །ཀུན་མཁྱེན་བས་ཀྱང་གང་མ་གཟིགས། །དེ་ཡིས་དངོས་པོ་ཅི་འདྲ་ཞིག །ཤིན་ཏུ་ཞིབ་པའི་ལྟ་བས་དཔྱོད། །ཅེས་དང་། ཨ་ཏི་ཤས། བསྟན་པའི་ཚིག་གི་སྦྱོར་བ་ཡིས། །སྐྱེ་མེད་འགག་མེད་སོགས་པས་མཚོན། །དོན་དམ་ཐ་དད་མེད་ཚུལ་གྱིས། །ཆོས་ཅན་མེད་ཅིང་ཆོས་ཉིད་མེད། །སྟོང་པ་ཉིད་ལ་ཐ་དད་ནི། །ཅུང་ཟད་ཡོད་པ་མ་ཡིན་ཏེ། །རྟོགས་མེད་ཚུལ་གྱིས་རྟོགས་པ་ལ། །སྟོང་ཉིད་མཐོང་ཞེས་ཐ་སྙད་བཏགས། །ཞེས་དང་། ཆོས་ཉིད་སྤྲོོས་དང་བྲལ་བ་ལ། །ཤེས་པའང་སྤྲོས་དང་བྲལ་བར་བཞག །ཞེས་དང་། དེ་ཉིད་ཀྱིས་དབུ་མའི་མན་ངག་བཀྲལ་བ་ལས། ཅིར་ཡང་མི་འཛིན་པ་ནི་གཟུང་བ་དང་འཛིན་པའི་རྟོག་པ་དང་བྲལ་བས་སོ། །དྲན་པ་དང་ཡིད་ལ་བྱེད་པ་ཐམས་ཅད་སྤངས་པ་ནི་འདས་པ་དང་མ་འོངས་པ་ལ་དམིགས་པའི་རྟོག་པ་སྤངས་པའོ། །ཞེས་དང་། སློབ་དཔོན་བྷ་བྱའི་དབུ་མ་རིན་པོ་ཆེའི་སྒྲོན་མེར། སྐབས་དེར་ཤེས་པ་ཅི་ལ་ཡང་མི་གནས། ཅིར་ཡང་མི་རྟོག་ཅིར་ཡང་སེམས་པ་མེད་པ། མཐའ་ཐམས་ཅད་ལ་མི་གནས་པ། ཤེས་པ་ཅིའི་ངོ་བོར་ཡང་མ་སྐྱེས་པ་ཅི་ཡང་མ་ཡིན་པར་བསྒོམ་པར་བྱའོ། །ཞེས་གསུངས་པས་མཚོན་དབུ་མའི་གཞུང་ལུགས་ཆེན་པོ་ཐམས་ཅད་དུ་སྤྲོས་བྲལ་རྣམ་པར་མི་རྟོག་པའི་ཡེ་ཤེས་ཟབ་མོ་ཉིད་རྩལ་དུ་བཏོན་ནས་གསུངས་པར་མཛད་པ་ཡིན་ལ། འདི་ལ་ཁ་ཅིག་གིས་ཧྭ་ཤང་གི་ལྟ་བར་འདོད་པ་ནི། ཁྱད་པར་མ་དཔྱད་པར་རང་གར་སྨྲས་པར་ཟད་དེ། ཧྭ་ཤང་གིས་ནི་གནས་ལུགས་ཀྱི་དོན་ལ་བརྟག་དཔྱད་མ་བྱས་པར་རྟོག་པ་རང་གར་བཀག་ནས་ཅི་ཡང་ཡིད་ལ་མི་བྱེད་པ་ཙམ་ལ་ལྟ་བ་མཐར་ཐུག་རྟོགས་པར་འདོད་པ་ཡིན་ཞིང་། དེ་ཉིད་མཁས་པ་ཀཱ་མ་ལ་ཤཱི་ལས་ལུང་དང་རིགས་པས་སུན་ཕྱུང་བར་བཤད་ལ། འདི་ནི་དབུ་མའི་གཞུང་ལུགས་ལས་བཤད་པའི་རིགས་པ་རྣམས་ཀྱིས་ཡུལ་གྱི་གནས་ལུགས་གཏན་ལ་དབབ་པ་ན། མཐར་འཛིན་རྣམས་ཀྱི་ཞེན་ཡུལ་རེ་རེ་ནས་སུན་ཕྱུང་སྟེ། མཐར་ཡོད་མེད་ལ་སོགས་སྤྲོས་པའི་མཐའ་གང་ཡང་མ་རྙེད་པ་ཙམ་ལ་དབུ་མའི་ལྟ་བ་རྟོགས་ཞེས་པའི་ཐ་སྙད་མཛད་པས་འདི་གཉིས་ལ་ཁྱད་པར་གནམ་ས་ཙམ་ཡོད་པ་ཡིན་ལ། མདོར་ན་གཅིག་དུ་བྲལ་སོགས་ཀྱི་རིགས་པས་དངོས་པོ་གང་ཡང་དཔྱད་བཟོད་དུ་གྲུབ་པ་རྡུལ་ཙམ་མ་མཐོང་བ་དེའི་ཚེ། དཔྱད་བཟོད་མེད་པ་དེ་ཉིད་བདེན་སྟོང་དུ་གོ་ནས། དེ་འདྲའི་སྟོང་པ་དང་སྣང་བ་གཉིས་ཐ་དད་དམ་ཡ་བྲལ་དུ་མ་སོང་བར། སྣང་བ་ཉིད་སྟོང་པ། སྟོང་པ་ཉིད་སྣང་བ་སྟེ། སྣང་སྟོང་ཟུང་འཇུག་ཏུ་གོ་བ་དེའི་ཚེ་སྟོང་ཉིད་རྟེན་འབྱུང་དུ་ཤར་བ་སོགས་ཐ་སྙད་ཅི་བཏགས་ཀྱང་དོན་ལ་སྟོང་ཉིད་བཞི་སྦྱོར་གྱི་དགོངས་པར་གོ་ཞིང་། དེ་འདྲའི་ཟུང་འཇུག་དེ་དངོས་པོའི་གནས་ལུགས་སུ་བྱས་ནས། དེའི་དོན་ལ་གོམས་པའི་ཚེ་ན། སྣང་ཞེས་དེར་འཛིན་པའི་བློ་གཅིག་དང་སྟོང་ཞེས་དེར་འཛིན་པའི་བློ་རེས་འཇོག་གཉིས་ཀྱིས་སོ་སོར་འཛིན་མ་དགོས་པར་སྣང་སྟོང་དབྱེར་མེད་ཀྱི་དོན་ལ་ངེས་པ་སྐྱེས་ཏེ། དེའི་ངང་དུ་གོམས་པའི་མཐུས། སྣང་བ་དང་སྟོང་པ་སོགས་ཕྱོགས་རེ་བའི་དམིགས་པ་དང་ཁས་ལེན་ཐམས་ཅད་དང་བྲལ་ཏེ་ཁས་ལེན་མེད་ཀྱང་དངོས་པོའི་གནས་ཚུལ་ལ་དེ་ལས་མི་འདུག་གོ་སྙམ་པའི་ངེས་ཤེས་ཁྱད་པར་ཅན་སྐྱེ་རྒྱུ་ཡོད་པ་འདི་གའི་རྒྱུན་ཞེན་མེད་འཛིན་མེད་ཀྱིས་བསལ་བཞག་སྤང་བླང་བྲལ་བར་བསྐྱངས་པས་དག་བྱེད་གཉེན་པོ་ལ་ཞེན་པ་སོགས་ཤེས་སྒྲིབ་ཀྱི་ཆར་གཏོགས་གཟུང་འཛིན་ཤིན་ཏུ་ཕྲ་བའི་ཆ་རྣམས་ཀྱང་རིམ་བཞིན་འགགས་ནས་རྣམ་པར་མི་རྟོག་པའི་ཡེ་ཤེས་ཟབ་མོ་ལ་འཇུག་པར་བྱེད་པ་སྟེ། འདི་ནི་སྒྲུབ་བརྒྱུད་པ་ཀུན་གྱི་ལྟ་སྒོམ་གྱི་སྙིང་པོ་ཡིན་ཏེ། རིག་འཛིན་དགའ་རབ་རྡོ་རྗེས། ཡིན་པར་གྲུབ་པ་མེད་པའི་རིག་པ་འདི། །སྣ་ཚོགས་འཆར་ཚུལ་ཅིར་ཡང་མ་འགག་པས། །སྣང་སྲིད་ཀུན་ཀྱང་ཆོས་སྐུའི་ཞིང་དུ་ཤར། །ཤར་བ་དེ་ཉིད་རང་གི་ཀློང་དུ་གྲོལ། །ཞེས་དང་། མདའ་བསྣུན་ཞབས་ཀྱིས། ཀྱེ་ལགས་གང་སྨྲས་བརྫུན་ཞིང་ལོག་པ་དེ་བོར་ལ། །གང་ལ་ཞེན་པ་ཡོད་པ་དེ་ཡང་ཐོང་། །རྟོགས་པར་འགྱུར་ན་ཐམས་ཅད་དེ་ཡིན་ཏེ། །དེ་ལས་གཞན་པ་སུས་ཀྱང་ཤེས་མི་འགྱུར། །ཀློག་པ་དེ་ཡིན་འཛིན་དང་སྒོམ་པ་དེ་ཡིན་ཏེ། །བསྟན་བཅོས་སྙིང་ལ་འཆང་བའང་དེ་ཡིན་ནོ། །ཞེས་དང་། དངོས་དང་དངོས་མེད་བདེ་བར་གཤེགས་པའི་འཆིང་བ་སྟེ། །སྲིད་དང་མཉམ་ཉིད་ཐ་དད་མ་འབྱེད་པར། །གཉུག་མའི་ཡིད་ནི་གཅིག་ཏུ་གཏོང་དང་རྣལ་འབྱོར་པ། །ཆུ་ལ་ཆུ་བཞག་བཞིན་དུ་ཤེས་པར་བྱོས། །བསམ་གཏན་རྫུན་པས་ཐར་པ་རྙེད་མིན་ནོ། །ཞེས་དང་། སེམས་ནི་མཁའ་དང་འདྲ་བར་བཟུང་བྱ་སྟེ། །ནམ་མཁའི་རང་བཞིན་ཉིད་དུ་སེམས་བཟུང་བྱ། །ཞེས་དང་། ཆོས་ཀྱི་རྒྱལ་པོ་སྲོང་བཙན་སྒམ་པོས། མཐའ་བྲལ་སྤྲོོས་པ་ཆོད་པ་ལ། །ལྟ་བ་མིང་དུ་བཏགས་པ་ཡིན། །རང་གསལ་འཛིན་པ་སྟོར་བ་ལ། །སྒོམ་པ་མིང་དུ་བཏགས་པ་ཡིན། །ཞེས་དང་། ཟུར་ཆེན་ཤཱཀྱ་འབྱུང་གནས་ཀྱིས། ལྟ་བ་ཞེས་མིང་དུ་བཏགས་པ་དེ། །བལྟ་རྒྱུ་བྱུང་ན་ལྟ་བ་མིན། །བལྟ་རྒྱུ་མེད་པའི་དོན་ལ་ལྟོས། །ཆོས་ཉིད་བརྗོད་མེད་ལམ་དུ་ཁྱེར། །སྒོམ་པ་ཞེས་མིང་དུ་བཏགས་པ་དེ། །བསྒོམ་རྒྱུ་བྱུང་ན་སྒོམ་པ་མིན། །བསྒོམ་རྒྱུ་མེད་པའི་དོན་ལ་སྒོམ། །སེམས་ཡེངས་རྒྱུ་མེད་པར་ལམ་དུ་ཁྱེར། །སྤྱོད་པ་ཞེས་མིང་དུ་བཏགས་པ་དེ། །སྤྱད་རྒྱུ་བྱུང་ན་སྤྱོད་པ་མིན། །སྤྱད་རྒྱུ་མེད་པའི་དོན་ལ་སྤྱོད། །མ་བཅོས་ཤུགས་འབྱུང་ལམ་དུ་ཁྱེར། །རྣལ་འབྱོར་བདག་གི་ཉམས་ལེན་ལགས། །ཞེས་དང་། ཀུན་མཁྱེན་ཀློང་ཆེན་པས། མ་བརྟགས་ཉམས་དགའ་བརྟགས་ན་ངོས་བཟུང་མེད། །ཤིན་ཏུ་བརྟགས་ན་སྨྲ་བསམ་བརྗོད་ལས་འདས། །ཡོད་མེད་མི་དམིགས་མཐའ་བྲལ་མ་བྲལ་མེད། །སྒྱུ་མའི་ཚུལ་དུ་སྐྱེ་སོགས་སྣང་ན་ཡང་། །སྣང་དུས་ཉིད་ནས་སྐྱེ་སོགས་རང་བཞིན་མེད། །སྨིག་རྒྱུའི་ཆུ་དང་རྫིང་བུའི་ཟླ་གཟུགས་བཞིན། །ཞེས་དང་། འཁོར་བའི་བག་ཆགས་སྟོང་པར་ལ་བཟླ་ཞིང་། །སྟོང་པའི་རང་བཞིན་སྣང་བར་ཐག་བཅད་དེ། །སྣང་སྟོང་གཉིས་མེད་བདེན་པ་གཉིས་དོན་ཤེས། །མཐའ་གཉིས་གནས་བསལ་དབུ་མར་བསླབ་པ་ཡིས། །སྲིད་ཞིར་མི་གནས་ནམ་མཁའི་ངང་དུ་གྲོལ། །འདི་ནི་ངེས་དོན་སྙིང་པོའི་དམ་པ་སྟེ། །རང་བཞིན་རྫོགས་པ་ཆེན་པོའི་གནས་ལུགས་ཡིན། །ཞེས་དང་། སྣང་དང་སྟོང་པ་དབྱེར་མེད་གདོད་མའི་ངང་། །གཅིག་དང་དུ་མར་མི་དམིགས་སྤྲོས་དང་བྲལ། །ཕྱོགས་དང་རིས་མེད་ཐམས་ཅད་མཉམ་པ་ཉིད། །སྣང་མཉམ་སྟོང་མཉམ་བདེན་མཉམ་བརྫུན་པར་མཉམ། །ཡོད་མཉམ་མེད་མཉམ་མཐའ་ལས་འདས་པར་མཉམ། །དབྱིངས་གཅིག་གདོད་ནས་དག་པའི་ངང་ཉིད་དོ། །ཞེས་གསུངས་སོ། །འགྲོ་བའི་མགོན་པོ་ཨ་ཏི་ཤས་རྣམ་དག་གཙུག་གི་ནོར་བུ་ལ་གནང་བའི་བློ་སྦྱོང་ལས། སྙིང་རྗེ་སྟོང་པར་འདུག་གམ་མཁས་པའི་བུ། །སྟོང་པ་སྙིང་རྗེར་ཤར་རམ་རྟོག་དཔྱོད་ཅན། །སྟོང་དང་སྙིང་རྗེ་རྣམ་དབྱེར་འདུག་གམ་ཨང་། །ཁོ་བོས་ཞེ་སྡང་རླུང་དམར་འཚུབས་ན་ཡང་། །སྟོང་པ་ཉིད་ལ་ཐ་དད་མེད་པར་མཐོང་། །དེ་བཞིན་རྣམ་པར་རྟོག་པ་མཐའ་ཡས་པ། །སྟོང་ཉིད་ངང་ལས་ངེས་པར་འབྱུང་བ་མཐོང་། །རྣམ་རྟོག་རྣམས་ལ་ཅེར་ཏེ་བལྟས་ཙ་ན། །བདེན་ནམ་རྫུན་ནམ་གྲུབ་པར་ངས་མ་མཐོང་། །སྟོང་ཉིད་ངང་ལས་ལྷོད་ཀྱིས་གློད་ཙམ་ན། །རྟོག་པ་ཙམ་ཡང་འཆར་བར་ངས་མ་མཐོང་། །དེས་ན་སྟོང་ཉིད་སྙིང་རྗེའི་འགལ་ཟླ་ཡང་། །དབྱེ་བ་རྡུལ་ཙམ་ཡོད་པར་མ་མཐོང་གི། །སྟོང་ཉིད་སྙིང་རྗེ་དབྱེར་མེད་སྨོས་ཅི་འཚལ། །ཞེས་དང་། འབྲོམ་སྟོན་པ་རྒྱལ་བའི་འབྱུང་གནས་ཀྱིས། དུས་གསུམ་གྱིས་སྟོང་པའི་ཆོས་ལུགས་ལ། །ཕར་བལྟར་མེད་ཡུལ་གྱིས་བསླུས་པར་འགྱུར། །ཚུར་བལྟར་མེད་རང་གིས་བ སླུས་པར་འགྱུར། །ང་གཉིས་མེད་ཤེས་པ་བལྟར་མེད་པ། །ཞེས་གསུངས། རྣལ་འབྱོར་གྱི་དབང་ཕྱུག་དམ་པ་སངས་རྒྱས་ཀྱིས། དངོས་པོར་སྣང་བ་ཐམས་ཅད་རང་གི་སེམས། །ཆུ་རྣམས་ཐམས་ཅད་རྒྱ་མཚོར་ལན་ཚྭའི་རོ། །དངོས་དང་དངོས་མེད་ཡངས་པ་གདོད་མའི་སེམས། །ནམ་མཁའི་བྱ་རྗེས་བཞིན་དུ་དམིགས་སུ་མེད། །ཕྱོགས་དང་ཆ་མེད་མཐའ་རྣམས་ཀུན་དང་བྲལ། །གཞོན་ནུའི་བདེ་བ་བཞིན་དུ་སྨྲར་མི་བཏུབ། །དུས་གསུམ་རྒྱུན་ཆད་མེད་པ་ཆུ་བོ་ལྟ་བུའི་སེམས། །རང་བཞིན་གཉུག་མར་ཞོག་ཅིག་རྣལ་འབྱོར་པ། །ཞེས་དང་། མ་བཅོས་གཉུག་མའི་སེམས་དེ་སྙིང་པོ་ཡིན། །འདི་ལ་ཅིས་ཀྱང་བཅོས་པར་མ་བྱེད་ཅིག །བཅོས་པའི་སེམས་ཀྱིས་འཕགས་ལམ་མཐོང་མི་འགྱུར། །དེ་ཕྱིར་སེམས་ཀྱི་གླང་པོ་ཡན་དུ་ཆུག །སྣང་སྲིད་ཐམས་ཅད་ཡེ་ནས་གྲོལ་བ་སྟེ། །འདི་ལ་དགག་ཅིང་སྒྲུབ་པ་ཅི་ཡང་མེད། །ཅེས་དང་། སྟོང་པའི་དབྱིངས་སུ་རིག་པའི་མདུང་སྐོར་གྱིས། །ལྟ་བ་ཐོགས་རྡུགས་མེད་དོ་དིང་རི་པ། །ཞེས་དང་། མ་ལབ་སྒྲོན་གྱིས། གང་ཡང་ཡིད་ལ་མ་བྱས་ན། །བག་ཆགས་མི་འབྱུང་ས་ལམ་རྫོགས། །ཞེས་གསུངས། རྗེ་ལྷོ་བྲག་པ་ཆེན་པོས། ཤར་ཆུ་བོ་གང་གཱའི་འགྲམ་དུ་ཕྱིན། །རྗེ་མཻ་ཏྲི་ཆེན་པོའི་བཀའ་དྲིན་གྱིས། །གཞི་ཆོས་ཉིད་སྐྱེ་བ་མེད་པར་རྟོགས། །སེམས་སྟོང་པ་ཉིད་ལ་སྤར་ཟིན་བྱས། །དོན་སྤྲོས་བྲལ་གཉུག་མའི་ངོ་བོ་མཐོང་། །སྐུ་གསུམ་མ་དང་མངོན་སུམ་མཇལ། །མི་ཁོ་བོའི་སྤྲོས་པ་དེ་ནས་ཆོད། །ཅེས་དང་། དབང་ཕྱུག་བཞད་པ་རྡོ་རྗེས། དོན་དམ་བདེན་པའི་དབང་དུ་ན། །བགེགས་ལས་སངས་རྒྱས་ཉིད་ཀྱང་མེད། །སྒོམ་པ་པོ་དང་བསྒོམ་བྱ་དང་། །བགྲོད་བྱ་ལམ་དང་ལམ་རྟགས་མེད། །འབྲས་བུ་སྐུ་དང་ཡེ་མེད། །གཞི་མེད་ལྷན་ཅིག་སྐྱེས་པ་མེད། །ལས་དང་ལས་ཀྱི་རྣམ་སྨིན་མེད། །དེ་ཕྱིར་འཁོར་བ་མིང་ཡང་མེད། །མཐར་ཐུག་དོན་ལ་དེ་ལྟར་སྣང་། །ཞེས་དང་། ཨེ་མ་སེམས་ཅན་མེད་གྱུར་ན། །དུས་གསུམ་སངས་རྒྱས་ཅི་ལས་བྱུང་། །རྒྱུ་མེད་འབྲས་བུ་མི་སྲིད་པས། །ཀུན་རྫོབ་བདེན་པའི་དབང་དུ་ནི། །འཁོར་བ་དང་ནི་མྱ་ངན་འདས། །ཐམས་ཅད་ཡོད་ཅེས་ཐུབ་པས་གསུངས། །ཡོད་པ་དངོས་པོར་སྣང་བ་དང་། །མེད་པ་སྟོང་པའི་ཆོས་ཉིད་གཉིས། །ངོ་བོ་དབྱེར་མེད་རོ་གཅིག་པས། །རང་རིག་གཞན་རིག་ཡོད་མིན་ཏེ། །ཐམས་ཅད་ཟུང་འཇུག་ཡངས་པ་ཡིན། །ཞེས་དང་། ཕྱི་སྣང་བ་ཇི་ལྟར་སྣང་ལགས་ཀྱང་། །མ་རྟོགས་དུས་ན་འཁྲུལ་སྣང་སྟེ། །ཡུལ་གྱི་ཞེན་པས་འཆིང་བར་བྱེད། །རྟོགས་པ་རྣམས་ལ་སྒྱུ་མར་སྣང་། །ཡུལ་སྣང་སེམས་ཀྱི་གྲོགས་སུ་འཆར། །མཐར་ཐུག་དོན་ལ་སྣང་མ་མྱོང་། །སྐྱེ་མེད་ཆོས་སྐུར་དག་གོ་གསུངས། །ནང་འགྱུ་བ་ཡིད་ཀྱི་རྣམ་ཤེས་འདི། །མ་རྟོགས་དུས་ན་མ་རིག་པ། །ལས་ཉོན་མོངས་ཀུན་གྱི་གཞི་རྩ་ཡིན། །རྟོགས་ན་རང་རིག་ཡེ་ཤེས་ཏེ། །དཀར་པོའི་ཡོན་ཏན་རྫོགས་པར་འབྱུང་། །མཐར་ཐུག་དོན་ལ་ཡེ་ཤེས་མེད། །ཆོས་རྣམས་ཟད་སར་སྐྱོལ་ལོ་གསུངས། །ཞེས་དང་། མཁས་གྲུབ་ཁྱུང་པོས། སྣང་སྲིད་རང་གྲོལ་སྒྱུ་མ་རྨི་ལམ་བཞིན། །ཞེས་དང་། ཆོས་རྣམས་སྒྱུ་མ་ལྟ་བུ་ལ། །སྒྱུ་མ་ལྟ་བུར་ཉམས་བླངས་པས། །སྒྱུ་མ་ལྟ་བུར་མངོན་སངས་རྒྱས། །སྣང་ཡང་བདེན་མེད་ཆོས་རྣམས་ལ། །བྱིས་པས་བདེན་པར་བཟུང་བས་འཁྲུལ། །མེད་བཞིན་སྣང་བ་ཨེ་མ་ཧོ། །ཞེས་དང་། འགྲོ་མགོན་ཕག་གྲུས། འཁོར་འདས་གཉིས་ཀྱི་རྩ་བ་སེམས། །སེམས་གདོད་ནས་དག་པ་དེ་བཞིན་ཉིད། །ཡེ་གདོད་ནས་ཞི་ཞིང་མ་སྐྱེས་པས། །སེམས་ཡེ་ནས་སྤྲོས་པའི་མཐའ་དང་བྲལ། །ཞེས་དང་། སྐྱེ་མེད་ཞང་གིས། ཇི་སྲིད་སེམས་ཀྱི་དཔྱད་བཟོད་དེ་སྲིད་དུ། །ཇི་ལྟར་ཟབ་པར་རྟོགས་ཀྱང་གནས་ལུགས་མིན། །ཅི་ཙམ་ཚིག་ཏུ་བརྗོད་ནུས་དེ་སྲིད་དུ། །མིང་འདོགས་ཇི་ཙམ་ལེགས་ཀྱང་གནས་ལུགས་མིན། །ཞེས་དང་། ཐམས་ཅད་མཁྱེན་པ་རང་བྱུང་ཞབས་ཀྱིས། ཐམས་ཅད་བདེན་མིན་བརྫུན་མིན་ཏེ། །ཆུ་ཟླ་བཞིན་དུ་མཁས་རྣམས་འདོད། །ཅེས་དང་། གནས་ལུགས་སྤྲོས་བྲལ་ཕྱག་རྒྱ་ཆེན་པོ་ནི། །རྣམ་རྟོག་སྤྲོས་པའི་མཚན་མ་ཀུན་གྱིས་སྟོང་། །གསལ་ལ་འཛིན་མེད་དག་པའི་རང་བཞིན་ཏེ། །དེ་བཞིན་གཤེགས་པའི་སྙིང་པོ་ཞེས་ཀྱང་བྱ། །ཞེས་དང་། དཔལ་མཁའ་སྤྱོད་དབང་པོས། དུས་ད་ལྟའི་སྣང་རིག་གསལ་ཙམ་འདི། །ཆོས་ཀུན་རྫོབ་བདེན་པའི་རང་ངོ་ཡིན། །འདི་མ་བཅོས་རང་གི་གནད་ཤེས་ན། །དོན་དམ་པའི་བདེན་པའང་འདི་ཁོ་ན། །གཞུང་ཐ་སྙད་མཁན་གྱི་བདེན་གཉིས་དེ། །ལུང་རིགས་པ་མང་ཡང་གནད་མ་གོ །གཉིས་ཐ་དད་བཟུང་བས་གཉིས་མེད་ཉམས། །ཞེས་གསུངས། རྫེ་བཙུན་ས་སྐྱ་པ་ཆེན་པོའི་ཞེན་པ་བཞི་བྲལ་གྱི་གཞུང་ལས། ཡོད་པར་འཛིན་ལ་ཐར་པ་མེད། །མེད་པར་འཛིན་ལ་མཐོ་རིས་མེད། །གཉིས་ཀར་འཛིན་པ་མི་ཤེས་པས། །གཉིས་མེད་ངང་དུ་གང་དགར་ཞོག །ཆོས་ཀུན་སེམས་ཀྱི་སྤྱོད་ཡུལ་མིན། །ཕྱྭ་དང་དབང་ཕྱུག་ལ་སོགས་པ། །འབྱུང་བཞི་བྱེད་མཁན་མ་ཚོལ་བར། །སེམས་ཉིད་ངང་ལས་གང་དགར་ཞོག །སྣང་བ་སྒྱུ་མའི་རང་བཞིན་དང་། །རྟེན་ཅིང་འབྲེལ་བར་འབྱུང་བ་ཡིན། །གནས་ལུགས་བརྗོད་པར་མི་ཤེས་ཀྱིས། །བརྗོད་བྲལ་གྱི་ངང་དུ་གང་དགར་ཞོག །ཅེས་དང་། ལམ་འབྲས་གཞུང་ཁྲིད་ཚིགས་བཅད་མ་ལས། སེམས་ལས་མ་གཏོགས་འདི་ན་གཞན་འགའ་མེད། །རང་སེམས་འཁྲུལ་པའི་བག་ཆགས་ཀྱིས་བསླད་དེ། །རྨི་ལམ་རྟ་གླང་མིག་གི་རབ་རིབ་བཞིན། །སེམས་དེ་ངོ་བོ་ཉིད་མིན་སྒྱུ་མ་སྟེ། །སྨིག་རྒྱུ་ཆུ་ཟླ་གཙུབ་པའི་མེ་བཞིན་དུ། །སྣ་ཚོགས་རྐྱེན་རྣམས་ཚོགས་ནས་སྣང་བ་ཙམ། །འདི་ཡི་སེམས་ཀྱི་རང་བཞིན་གང་ཡིན་སྨྲོས། །སྒྱུ་མ་ཞེས་བྱ་ངོ་བོ་ཉིད་ཀྱང་ནི། །འདི་ན་མེད་ཅིང་རྟེན་ཅིང་འབྲེལ་འབྱུང་ཞིང་། །སྐྱེ་དང་འགག་དང་གནས་པ་ཡོད་མིན་ན། །བརྗོད་བྲལ་འདི་ལ་ཅི་ཞིག་བསམ་པར་བྱ། །རྗོད་བྲལ་བརྗོད་པ་འདི་ལ་དོན་མེད་ཅིང་། །བསམ་མིན་བསམ་པར་བྱ་བའི་གནས་མིན་ལ། །བསྒོམ་དུ་མེད་པ་འདི་ལ་ཅི་ཞིག་བསྒོམ། །དེ་ལྟར་ཤེས་ན་འཛིན་པ་མེད་པར་འགྱུར། །ཞེས་དང་། །རང་སེམས་གདོད་ནས་རྣམ་དག་རྒྱུ་རྒྱུད་དང་། །དབང་གི་ཡེ་ཤེས་ལམ་གྱི་ལྟ་བ་དང་། །ཉམས་མྱོང་སངས་རྒྱས་ལ་སོགས་ངོ་བོ་གཅིག །རྟོགས་པའི་སངས་རྒྱས་ཟླ་བའི་དཔེ་ཡིས་བསྟན། །ཞེས་དང་། རྗེ་ས་པཎ་གྱིས། འཁོར་བ་ནི་བློ་འཁྲུལ་པ་ལ་སྣང་ཡང་ཤེས་རབ་ཀྱིས་བརྟགས་ན་ངོ་བོ་གྲུབ་པ་ཅི་ཡང་མེད། དེས་ན་འདས་པ་ལ་སེམས་མི་འཇུག མ་འོངས་པ་ལ་སེམས་མི་གཞུག ད་ལྟར་བ་ལ་རྣམ་པར་ཤེས་པ་མི་འཇུག་པ་ཞིག་གོ་བར་བྱས་ནས། ཆོས་ཐམས་ཅད་སྤྲོས་བྲལ་དུ་ཤེས་པར་བྱའོ་ཞེས་ཞེན་པ་བཞི་བྲལ་གྱི་ཁྲིད་གཞུང་དུ་གསུངས་ཤིང་། ཁྱད་པར་རོང་སྟོན་ཆེན་པོའི་ཤེར་ཕྱིན་སྒོམ་རིམ་དང་། རྗེ་དེ་ཉིད་ཀྱི་ཐུགས་སྲས་ཤེར་ཕྱིན་ཐེག་པ་ཆེན་པོའི་རྣལ་འབྱོར་གཞུང་བརྒྱ་པ་དངོས་གྲུབ་དཔལ་འབར་གྱིས་མཛད་པའི་རྒྱལ་ཡུམ་སྙིང་པོའི་རྣམ་བཤད་སོགས་སུ་སྣང་བཅས་སྣང་མེད་ཟུང་འཇུག་བགྲོད་པ་གཅིག་པར་སྟོན་པ་དངོས་སྦས་ཀྱི་ཚུལ་གྱིས་ཟབ་མོ་ཉམས་མྱོང་དང་འབྲེལ་བའི་འཆད་ཚུལ་རྨད་དུ་བྱུང་བ་བཞུགས་པ་དང་། ཐམས་ཅད་མཁྱེན་པ་ཤར་ཙོང་ཁ་བ་ཆེན་པོས་ཀྱང་། སྣང་བ་རྟེན་འབྱུང་བསླུ་བ་མེད་པ་དང་། །སྟོང་པ་ཁས་ལེན་བྲལ་བའི་གོ་བ་གཉིས། །ཇི་སྲིད་སོ་སོར་སྣང་བ་དེ་སྲིད་དུ། །ད་དུས་ཐུབ་པའི་དགོངས་པ་རྟོགས་པ་མེད། །ནམ་ཞིག་རེས་འཇོག་མེད་པར་ཅིག་ཅར་དུ། །རྟེན་འབྲེལ་མི་བསླུ་མཐོང་བ་ཙམ་ཉིད་ནས། །ངེས་ཤེས་ཡུལ་གྱི་འཛིན་སྟངས་ཀུན་ཞིག་ན། །དེ་ཚེ་ལྟ་བའི་དཔྱད་པ་རྫོགས་པ་ལགས། །ཞེས་དང་། མཉམ་བཞག་ནམ་མཁའ་ལྟ་བུའི་སྟོང་ཉིད་དང་། །རྗེས་ཐོབ་སྒྱུ་མ་ལྟ་བུའི་སྟོང་པ་གཉིས། །སྒོམ་ནས་ཐབས་ཤེས་ཟུང་དུ་འབྲེལ་བ་ཡིས། །རྒྱལ་སྲས་སྤྱོད་པའི་ཕ་རོལ་འགྲོ་བ་བསྔགས། །དེ་ལྟར་རྟོགས་ན་ཕྱོགས་རེའི་ལམ་གྱིས་ནི། །ཚིམ་པ་མེད་པ་སྐལ་བཟང་རྣམས་ཀྱི་ལུགས། །རྣལ་འབྱོར་ངས་ཀྱང་ཉམས་ལེན་དེ་ལྟར་བགྱིས། །ཐར་འདོད་ཁྱེད་ཀྱང་དེ་བཞིན་སྐྱོང་འཚལ་ལོ། །ཞེས་དང་། དེའི་ཁྲིད་ཡིག་རྒྱལ་མཆོག་བསོད་ནམས་རྒྱ་མཚོས་མཛད་པའི་གསེར་ཞུན་ལས་ཀྱང་། མཉམ་བཞག་ནམ་མཁའ་ལྟ་བུ་སྤྲོས་པའི་མཐའ་ཐམས་ཅད་དང་བྲལ་བའི་སྟོང་ཉིད་ལ་མཉམ་པར་བཞག་ནས། རྗེས་ཐོབ་རང་བཞིན་གྱིས་མ་གྲུབ་ཀྱང་། དེ་ལྟར་སྣང་བའི་སྒྱུ་མ་ལྟ་བུའི་སྟོང་ཉིད་དང་། འབྲེལ་བར་ཐབས་ཤེས་ཟུང་འཇུག་གི་ལམ་ལ་སློབ་པར་གསུངས་པ་དང་། མཁས་གྲུབ་ནོར་བཟང་རྒྱ་མཚོས། འོན་ཀྱང་བློ་བཟང་ཉིན་བྱེད་དབང་པོ་ཡི། །རྗེས་འབྲངས་མཁས་རློམ་རྒྱུ་སྐར་དུ་མའི་ཚོགས། །རང་མཚན་རང་བཞིན་གྲུབ་དང་བདེན་དངོས་ཞེས། །ཐ་སྙད་ཚིག་གིས་བཅིངས་པའི་དགག་བྱ་དག །རང་བློས་བཞག་པ་རིགས་པས་བཀག་པའི་དོན། །མཐའ་བྲལ་དབུ་མ་ཆེན་པོར་འདོད་པ་མཐོང་། །རྨི་ལམ་གཟུགས་དང་སྒྱུ་མའི་རྟ་གླང་གང་། །རང་སྣང་བློ་ལ་སྣང་ཙམ་མ་གཏོགས་པར། །དེ་ལས་ལོགས་སུ་ཅུང་ཟད་ཡོད་མིན་ལྟར། །སྲིད་པའི་རྩེ་མོ་ནས་བཟུང་དམྱལ་བའི་བར། །སེམས་ཅན་ཇི་སྙེད་རང་རང་སོ་སོ་ཡི། །རྟོག་པས་བཏགས་པ་ཙམ་ཞིག་མ་གཏོགས་པར། །ཡོད་པའི་དགག་བྱ་ཕྲ་མོ་མ་ཁེགས་ན། །ཇི་ཙམ་དཔྱད་ཀྱང་ཉི་ཚེའི་ལྟ་བ་ལས། །ཅུང་ཟད་འཕགས་པ་མིན་པར་བདག་གིས་འཁུམས། །ཞེས་དང་། པཎ་ཆེན་བློ་བཟང་ཆོས་རྒྱལ་གྱིས། ཕྱག་ཆེན་རྒྱལ་བའི་གཞུང་ལམ་དུ། ལྷན་ཅིག་སྐྱེས་སྦྱོར་གྭའུ་མ། །ལྔ་ལྡན་རོ་སྙོམས་ཡི་གེ་བཞི། །ཞི་བྱེད་གཅོད་ཡུལ་རྫོགས་ཆེན་དང་། །དབུ་མའི་ལྟ་ཁྲིད་ལ་སོགས་པ། །སོ་སོར་མིང་འདོགས་མང་ན་ཡང་། །ངེས་དོན་ལུང་རིགས་ལ་མཁས་ཤིང་། །ཉམས་མྱོང་ཅན་གྱི་རྣལ་འབྱོར་པས། །དཔྱད་ན་དགོངས་པ་གཅིག་ཏུ་འབབ། །ཅེས་དང་། ཚུལ་བཞིན་མཉམ་པར་བཞག་པའི་ངོར། །ཡོད་མེད་ལ་སོགས་འཁོར་འདས་ཀྱི། །སྤྲོས་པའི་མཐའ་དང་བྲལ་མོད་ཀྱིས། །དེ་ལས་ལངས་ནས་བརྟགས་པའི་ཚེ། །མིང་རྐྱང་བཏགས་ཡོད་ཙམ་ཞིག་གིས། །བྱ་བྱེད་རྟེན་འབྲེལ་བསྙོན་མེད་པར། །རྨི་ལམ་སྨིག་རྒྱུ་ཆུ་ཟླ་དང་། །སྒྱུ་མ་ལྟ་བུར་ངང་གིས་འཆར། །སྣང་བས་སྟོང་པ་མི་སྒྲིབ་ཅིང་། །སྟོང་པས་སྣང་བ་མི་འགོག་པ། །སྟོང་དང་རྟེན་འབྱུང་དོན་གཅིག་པའི། །ལམ་བཟང་དེ་ཚེ་མངོན་དུ་འགྱུར། །ཞེས་དང་། ད་ལྟའི་སྣང་ཚུལ་འདི་ལས་གཞན་པའི་དགག་བྱའི་སྣང་ཚུལ་བདེན་གྲུབ་རྭ་རེང་ངེ་བ་ཞིག་འཛིན་པར་འདོད་པ་ནི། རང་ཅག་སོ་སྐྱེའི་བློ་ལ་སྣང་བ་འདི་སྣང་བ་ལྟར་མ་གྲུབ་ཟེར་མ་ནུས་པས་ནོངས་པར་འདུག་ལ། དེ་ལྟར་ན་རང་རྒྱུད་པའི་མཁས་པ་རྣམས་ཀྱིས་གཟུགས་སོགས་བློ་གནོད་མེད་ལ་སྣང་བའི་དབང་གིས་ཡོད་པར་བཞག་པ་ལ། དཔལ་ལྡན་ཟླ་བས་དགག་པ་ཇི་ལྟར་མཛད་པའི་ཚུལ་ལེགས་པར་སོམས་ཤིག ཅེས་དང་། ཡང་མང་པོ་ཞིག་གང་ཟག་མི་འགོག གང་ཟག་བདེན་གྲུབ་དགག་པར་གསུངས་སྙམ་དུ་མཉམ་བཞག་ཏུ་གང་ཟག་ལིང་ལིང་པོ་ཞིག་བཞག་ནས། བློས་བྱས་ཀྱི་གང་ཟག་བདེན་གྲུབ་ཞིག་འགོག་པའི་ངལ་བ་བྱེད་པ་ནི་ཆེས་མི་འཐད་དེ། རྟག་མཐར་འགྱུར་བའི་ཕྱིར་རོ། །ཞེས་གསུངས་ཤིང་། ལྕང་སྐྱ་རོལ་པའི་རྡོ་རྗེའི་ལྟ་མགུར་ལས། ད་ལྟ་རང་རེ་ཡི་བློ་གསལ་འགའ་ཞིག །སྣང་བ་ལིང་ལིང་འདི་རང་སར་བཞག་ནས། །དགག་རྒྱུ་རྭ་ཅན་ཞིག་ཚོལ་བར་འདུག་ཀྱང་། །ཨ་མ་རྒན་མོ་དེ་འབྲོས་དོགས་འདུག་གོ །ཞེས་སྣང་སྟོང་ཟུང་འཇུག་ཉིད་རྩལ་འདོན་དུ་སྒྲུབ་པར་མཛད་པས་མཚོན་སྔ་ཕྱིའི་སྐྱེས་ཆེན་རྣམས་ཀྱི་དགོངས་པའི་གསང་མཛོད་ཡེ་ཤེས་ཀྱི་ཀློང་དུ་གཅིག་པས་གང་ཡང་འགལ་མེད་གནད་གཅིག་པར་ཤེས་པ་གལ་ཆེ་སྟེ། ཀུན་མཁྱེན་པྲཛྙཱ་རསྨིས། གང་ཤར་སེམས་དང་སེམས་ཉིད་རང་ལུས་སོགས། །ཕྱི་ནང་ཀུན་ཏུ་རྣམ་པར་བཙལ་བ་ན། །བཙལ་བས་མ་རྙེད་ཡུལ་ཅན་ཤེས་རབ་སོགས། །གནས་སྐབས་ཤིག་ཏུ་ལྟ་བར་འདོད་ན་ཡང་། །བློས་བྱས་གཟུང་འཛིན་སྤྲོས་པ་ཀུན་བྲལ་བའི། །གཉུག་མའི་ཡེ་ཤེས་རང་ངོ་འཕྲོད་པ་ཡི། །ཤེས་པ་གསལ་དྭངས་རྟོག་མེད་ཡེ་ཤེས་དེ། །སྒྲུབ་བརྒྱུད་ཀུན་གྱི་ལྟ་བའི་གཙོ་བོ་ཡིན། །ཞེས་དང་། སྦྱོར་བའི་དུས་སུ་མཚན་མ་འབྱུང་བའི་གཞི། །དེ་ཉིད་དཔྱད་པའི་རྟེན་དུ་ངེས་བྱས་ནས། །མཐའ་བཞི་རྣམ་གྲོལ་དངོས་གཞིའི་དུས་སུ་ནི། །གསལ་སྟོང་འཛིན་མེད་སྔོན་རབས་མཁས་པའི་ལུགས། །ཞེས་དང་། དཔྱད་དང་འཇོག་པའི་སྒོམ་ཚུལ་ཅི་ཡང་རུང་། །རང་གི་མཚན་ཉིད་རང་བཞིན་འོད་གསལ་བ། །གསལ་དྭངས་ཤར་ལ་སྒོམ་མེད་མ་ཡེངས་པ། །སྒྲུབ་བརྒྱུད་ཀུན་གྱི་སྒོམ་པའི་གཙོ་བོ་ཡིན། །ཞེས་གསུངས། དེས་ན་རྒྱལ་ཡུམ་སྙིང་པོའི་རྣམ་བཤད་ནས་གསུངས་པ་ལྟ་བུའི་ཚུལ་གྱིས་མྱོང་བ་མཚན་ཉིད་བཞི་ལྡན་དུ་ཤར། རྟོགས་པ་ཟབ་མོ་བརྒྱད་ལྡན་དུ་ཐོབ། འཁོར་འདས་ཡུལ་གྱི་འཛིན་པ་ལས་གྲོལ་ནས། གནས་ལུགས་རྣམ་ཐར་གསུམ་ལྡན་གྱི་ཀློང་དུ་གཟུང་འཛིན་གྱི་མཚན་མའི་སྤྲོས་པ་མཐའ་དག་ཞི་བའི་མཉམ་བཞག་ནམ་མཁའ་ལྟ་བུ་དང་། རྗེས་ཐོབ་སྒྱུ་མ་ལྟ་བུའི་ལམ་ཁྱེར་དང་མ་བྲལ་བའི་ངང་ནས། ཡུམ་ཤེས་རབ་ཕ་རོལ་ཏུ་ཕྱིན་མའམ་ཟུང་འཇུག་རབ་ཏུ་མི་གནས་པའི་སྤྲོས་བྲལ་དབུ་མ་ཆེན་པོའི་དོན་ལ་ཡུན་རིང་དུ་གོམས་པར་བྱས་པས་གནས་སྐབས་གཟུངས་དང་སྤོབས་པ་དང་ཏིང་ངེ་འཛིན་སོགས་ཀྱི་ཡོན་ཏན་གྱི་ཁྱད་པར་རྣམས་གོང་དུ་བསྐྱེད་པ་དང་། རྒྱལ་བའི་དམ་ཆོས་འཛིན་པར་འགྱུར་ཞིང་། མཐར་ཐུག་ཟུང་འཇུག་འཕགས་པའི་ཡེ་ཤེས་མངོན་དུ་གྱུར་ཏེ་སྤྲོས་པ་མཐའ་དག་ཆོས་ཀྱི་དབྱིངས་སུ་ནུབ་ནས། སྒྲིབ་པ་གཉིས་པོ་ཡོངས་སུ་སྤངས་ཤིང་མི་གནས་པའི་མྱང་འདས་ཐོབ་པར་བྱེད་པ་ཡིན་ཏེ། གླང་པོའི་རྩལ་གྱི་མདོ་ལས། ཐམས་ཅད་མཁྱེན་པ་བླ་མེད་པའི། །སངས་རྒྱས་ཡེ་ཤེས་ཐོབ་འདོད་པས། །ཆོས་རྣམས་གང་ཡང་མི་གཟུང་ཞིང་། །ཆོས་རྣམས་གང་ཡང་མི་འདོར་རོ། །ཞེས་དང་། གང་གིས་ཆོས་རྣམས་བསམ་ཡས་པ། །ནམ་མཁའ་འདྲ་བར་མཐོང་བ་དང་། །མ་བཅིངས་པ་དང་མ་གྲོལ་བ། །དེ་ཡི་ཤེས་རབ་བླ་ན་མེད། །ཅེས་དང་། ཏིང་འཛིན་རྒྱལ་པོ་ལས། སྒྲ་དང་ཚིག་གི་ལམ་བྲལ་བརྗོད་དུ་མེད། །ནམ་མཁའ་ཇི་བཞིན་ཆོས་ཀྱི་རང་བཞིན་ཏེ། །འདི་ལྟ་བུ་ཡི་ཚུལ་མཆོག་རྣམ་རིག་ན། །དེ་ཡི་སྤོབས་པ་དག་ཀྱང་མི་ཟད་འགྱུར། །ཞེས་དང་། ལང་ཀར་གཤེགས་པ་ལས། ཡོད་དང་མེད་པ་མཐའ་གཉིས་ཏེ། །ཅི་ཙམ་སེམས་ཀྱི་སྤྱོད་ཡུལ་རྣམས། །སྤྱོད་ཡུལ་དེ་དག་རབ་སྤངས་ནས། །སེམས་མཉམ་རབ་དབེན་ཞི་བར་འགྱུར། །ཞེས་དང་། ཚངས་པ་ཁྱད་པར་སེམས་ཀྱིས་ཞུས་པའི་མདོ་ལས། ཆོས་ཀྱི་ཆོས་ཉིད་ཇི་ལྟ་བར། །དེ་དག་ཆོས་རྣམས་སྒོམ་མོད་ཀྱི། །དྲན་པ་ཡིད་ལ་བྱེད་པ་མིན། །དེ་ཕྱིར་མཉམ་པར་བཞག་ཅེས་གསུངས། །ཞེས་དང་། ཡེ་ཤེས་ཕྱག་རྒྱའི་མདོ་ལས། རྟོག་དང་རྣམ་པར་རྟོག་པའི་སྤྲོས་པ་དེ། །གཉིས་ཀ་ཡོངས་སུ་སྤངས་ན་ཆོས་འཛིན་ཡིན། །ཞེས་དང་། དབུ་མ་རྩ་བར། ལས་དང་ཉོན་མོངས་ཟད་པས་ཐར། །ལས་དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །ཞེས་དང་། གཞུང་འདིར་ཡང་། ཉོན་མོངས་ཤེས་བྱའི་སྒྲིབ་པ་ཡི། །མུན་པའི་གཉེན་པོ་སྟོང་པ་ཉིད། །ཅེས་གསུངས་པ་བཞིན་ནོ། །གསུམ་པ་འབྲས་བུ་གཞན་དོན་ལ་རྩོད་སྤོང་ནི། དེ་ལྟར་རྣམ་པར་རྟོག་པ་ཐམས་ཅད་དབྱིངས་སུ་ནུབ་པའི་སངས་རྒྱས་ཀྱི་ས་ན་གདུལ་བྱའི་དོན་དུ་འབད་རྩོལ་གྱི་སྤྲོས་པ་མི་མངའ་བ་དེས་སེམས་ཅན་གྱི་དོན་ཇི་ལྟར་མཛད་སྙམ་ན། དཔེར་ན་ཡིད་བཞིན་གྱི་ནོར་བུ་དང་དཔག་བསམ་གྱི་ཤིང་དག་ལ་འབད་རྩོལ་གྱི་རྣམ་རྟོག་མེད་ཀྱང་ཇི་ལྟར་གསོལ་བ་འདེབས་པ་རྣམས་ཀྱི་རེ་བ་ཡོངས་སུ་སྐོང་བ་དེ་བཞིན་དུ་གདུལ་བྱར་རང་རང་གི་སྐལ་བ་དང་འཚམ་པར་སྔོན་གྱི་སྨོན་ལམ་གྱི་དབང་གིས་རྒྱལ་བའི་སྐུར་སྣང་ངོ་། །འདིར་སྨོན་ལམ་གཙོ་བོར་སྟོན་པ་ནི་དེ་བཞིན་གཤེགས་པའི་སྐུ་དང་འཁོར་དང་ཞིང་ལ་སོགས་པ་སྣ་ཚོགས་པ་སྣང་བའི་རྒྱུའི་གཙོ་བོ་ནི་སློབ་ལམ་ན་སྨོན་ལམ་བཏབ་པའི་ལྷན་ཅིག་བྱེད་པའི་རྐྱེན་ལས་སྣང་བའི་དབང་གིས་ཡིན་ཏེ། དོན་དུ་ན་ཁམས་བདེ་གཤེགས་སྙིང་པོའམ་ཡང་དག་པའི་མཐའ་ཆོས་ཀྱི་དབྱིངས་སྣང་སྟོང་ཟུང་དུ་འཇུག་པའི་དེ་བཞིན་ཉིད་དེ་རྫོགས་སྨིན་སྦྱངས་གསུམ་མཐར་ཕྱིན་པའི་སྟོབས་ཀྱིས་དག་པ་མངོན་དུ་གྱུར་པ་ན་བསམ་གྱིས་མི་ཁྱབ་པའི་ཡེ་ཤེས་ཀྱི་སྐུ་ཞེས་བྱ་སྟེ་སྐུ་དེ་ཉིད་གདུལ་བྱའི་སྐལ་བ་དང་སྔོན་གྱི་སྨོན་ལམ་གྱི་དབང་གིས་སྣང་ཞིང་རྟོག་མེད་ལྷུན་གྱིས་གྲུབ་པའི་ཕྲིན་ལས་བསམ་མི་ཁྱབ་པས་གཞན་དོན་མཛད་པ་ནི་བརྒྱ་བྱིན་གྱིས་གཟུགས་བརྙན་སོགས་ཀྱིས་མཚོན་ཡེ་ཤེས་སྣང་བ་རྒྱན་གྱི་མདོ་དང་རྒྱུད་བླ་མ་ནས་གསུངས་པའི་དཔེ་ལྷག་མ་རྣམས་ཀྱིས་ཀྱང་མཚོན་ཏེ་ཤེས་པར་བྱའོ། །ཡང་ཕ་རོལ་པོ་དག གནས་སྐབས་དེར་འབད་རྩོལ་གྱི་སྤྲོས་པ་མེད་ན་སྔོན་གྱི་སྨོན་ལམ་གྱིས་དེ་ལྟར་ག་ལ་ནུས་སྙམ་ན། དེ་ཅིའི་ཕྱིར་མི་ནུས་ཏེ་དཔེར་ན་རིགས་སྔགས་གྲུབ་པ་འགའ་ཞིག་གིས་ནམ་མཁའ་ལྡིང་གི་ནི་སྐུ་བརྙན་ལ་སོགས་པའི་མཆོད་སྡོང་ས་རྡོ་སོགས་ལས་བསྒྲུབས་ནས་སྔགས་དང་ཏིང་ངེ་འཛིན་གྱིས་བྱིན་གྱིས་བརླབས་ཏེ་བྱེད་པོ་ཉིད་འདས་པར་གྱུར་པ་ནའང་། དེ་འདས་ནས་ཀྱང་དུས་ཡུན་རིང་ལོན་ཡང་མཆོད་སྡོང་དེ་ཡིས། ཀླུ་ཡི་དུག་ལ་སོགས་པ་ཞི་བར་བྱེད་པ་དེ་བཞིན་དུ་སྔོན་སློབ་ལམ་དུ་རྫོགས་པའི་བྱང་ཆུབ་ཀྱི་དོན་དུ་ཚོགས་གཉིས་ཀྱི་སྤྱོད་པ་རླབས་པོ་ཆེའི་རྗེས་སུ་མཐུན་པར་རྒྱལ་བའི་མཆོད་སྡོང་བསྒྲུབས་པ་ཡང་། སྒྲུབ་མཁན་བྱང་ཆུབ་སེམས་དཔའ་དེ་མི་གནས་པའི་དབྱིངས་སུ་མྱ་ངན་ལས་འདས་ཏེ་ད་ལྟ་འབད་རྩོལ་དང་གཟུང་འཛིན་གྱི་སྤྲོས་པ་མེད་ཀྱང་གདུལ་བྱའི་དོན་རྣམས་ཐམས་ཅད་འབད་མེད་ལྷུན་གྲུབ་ཏུ་མཛད་པ་ཡིན་ནོ། །ཡང་འདི་སྙམ་དུ། གང་ཕན་ཚུན་མཆོད་པ་དང་ལེན་པའི་བསམ་པས་མཆོད་ན་བསོད་ནམས་འབྱུང་ཡང་། སངས་རྒྱས་ལ་རྣམ་པར་རྟོག་པའམ་སེམས་མེད་པ་ཡིན་ན། དེ་ལ་མཆོད་པ་བྱས་པས་ཇི་ལྟར་བསོད་ནམས་ཀྱི་འབྲས་བུ་དང་ལྡན་པར་འགྱུར་ཞེ་ན། སེམས་མེད་ལ་མཆོད་པའི་འབྲས་བུ་མེད་ན་དེ་བཞིན་གཤེགས་པའི་རིང་བསྲེལ་དང་མཆོད་རྟེན་སོགས་མཆོད་པ་ལ་འབྲས་བུ་མེད་དགོས་ནའང་། གང་གི་ཕྱིར་སངས་རྒྱས་དངོས་སུ་བཞུགས་པའམ་མྱ་ངན་ལས་འདས་པའི་རིང་བསྲེལ་སོགས་མཆོད་པ་གཉིས་བསོད་ནམས་མཚུངས་པ་ཉིད་དུ། མཆོད་རྟེན་བསྐོར་བའི་ཕན་ཡོན་ལས། གང་ཞིག་བཞུགས་ལ་མཆོད་པ་དང་། །མྱ་ངན་འདས་པའི་སྐུ་གདུང་ལ། །སེམས་ནི་མཉམ་པར་དང་བ་ཡིས། །བསོད་ནམས་ལ་ནི་ཁྱད་པར་མེད། །ཅེས་དང་། བྱང་ཆུབ་སེམས་དཔའི་སྡེ་སྣོད་ལས། གང་ཞིག་བཞུགས་ལ་མཆོད་པ་དང་། །གང་ཡང་མྱ་ངན་འདས་པ་ཡི། །རིང་བསྲེལ་ཡུངས་འབྲུ་ཙམ་མཆོད་པ། །སེམས་ཀྱང་མཚུངས་ལ་འབྲས་བུ་མཚུངས། །ཞེས་སོགས་ལུང་ལས་བཤད་པའི་ཕྱིར་རོ། །དེས་ན་བདག་ཅག་སངས་རྒྱས་དང་མཆོད་པའི་བསོད་ནམས་གཉིས་པོ་ཀུན་རྫོབ་སྒྱུ་མ་ཙམ་དུ་འདོད་པའམ་ནི། ཁྱོད་དོན་དམ་པར་རམ་དེ་ཁོ་ན་ཉིད་དུ་འདོད་པའང་རུང་སྟེ་སངས་རྒྱས་དེ་ལ་མཆོད་པའི་འབྲས་བུ་རྒྱ་ཆེན་པོ་ཡོད་པ་ནི་ལུང་ཚད་མ་ལས་ཡིད་ཆེས་པར་བྱ་བ་ཡིན་ཏེ། དཔེར་ན་ཁྱོད་བདེན་པའི་སངས་རྒྱས་མཆོད་པ་ལ་ཇི་ལྟར་འབྲས་བུར་བཅས་པ་ཁས་ལེན་པའང་ལུང་ལས་ཡིན་པ་བཞིན་དུ། ངེད་ཀྱིས་ཀྱང་བདེན་པར་མ་གྲུབ་པའི་སངས་རྒྱས་ལ་མཆོད་པའི་འབྲས་བུའང་མི་བདེན་སྒྱུ་མ་ལྟ་བུར་ཁས་ལེན་པ་ཡིན་ན། ཡུལ་དང་དངོས་པོ་བསམ་པ་རྣམས་བདེན་པར་མེད་ཕན་ཆོད་མཆོད་པའི་འབྲས་བུ་མེད་པར་རྩོད་པ་འདིས་བདག་ཅག་ལ་གནོད་པར་མི་འགྱུར་རོ། །འདིར་སེམས་མེད་ཅེས་པ་ནི་གཟུང་འཛིན་གྱི་རྟོག་པ་མེད་པའི་དོན་ཏེ། འགྲེལ་ཆེན་ལས། ཀུན་རྫོགས་ཀྱི་སེམས་དང་བྲལ་བའི་བཅོམ་ལྡན་འདས་ལ་ཞེས་འབྱུང་བས་སངས་རྒྱས་ལ་ཡེ་ཤེས་མེད་པའི་དོན་དུ་འཁྲུལ་པར་མི་བྱའོ། །གཉིས་པ། རྗོད་བྱེད་ཐེག་ཆེན་ལ་རྩོད་སྤོང་ནི། ཉན་ཐོས་སྡེ་པ་དག་ན་རེ། སྡུག་ཀུན་འགོག་ལམ་གྱི་བདེན་བཞིའི་རྣམ་པ་མི་རྟག་པ་སོགས་བཅུ་དྲུག་མངོན་དུ་མཐོང་བ་དེ་ཁོ་ན་གོམས་པས་ལས་ཉོན་ལས་རྣམ་པར་གྲོལ་བ་དགྲ་བཅོམ་པའི་འབྲས་བུ་ཐོབ་པར་འགྱུར་གྱི་ཆོས་ཐམས་ཅད་རང་བཞིན་མེད་པའི་སྟོང་པ་ཉིད་མཐོང་བས་ཅི་ཞིག་བྱ་སྟེ་དགོས་པ་མེད་དོ་ཞེས་ཐེག་པ་ཆེན་པོ་ནས་ཆོས་ཐམས་ཅད་སྟོང་པ་ཉིད་དུ་བཤད་པ་ལ་སྐྲག་ཅིང་སྤངས་ནས་དེ་འདྲའི་སྟོང་ཉིད་དེ་མ་རྟོགས་ཀྱང་བདག་མེད་རྟོགས་པ་ཡོད་པར་བརླམས་ནས་བདེན་པ་མ་མཐོང་བའི་གང་ཟག་མངོན་པའི་ང་རྒྱལ་ཅན་དག་གིས་རྩོད་པའོ། །དེ་འདྲའི་རྩོད་པ་ནི་གྱི་ན་སྟེ། སྟོང་ཉིད་རྟོགས་དགོས་པའི་རྒྱུ་མཚན་གང་གི་ཕྱིར་ན། ལུང་ཤེས་རབ་ཀྱི་ཕ་རོལ་ཏུ་ཕྱིན་པ་ལས་ལམ་སྟོང་ཉིད་རྟོགས་པའི་ཤེས་རབ་འདི་ནི་མེད་པར་དངོས་པོའི་འདུ་ཤེས་ཅན་ལ་ཐར་པ་བྱང་ཆུབ་གསུམ་གང་ཡང་མེད་པར་གསུངས་ཏེ། བཀའ་གང་དག་བདེ་གཤེགས་ཉན་ཐོས་འགྱུར་བར་བྱ་སྙམ་དང་། །རང་སངས་རྒྱས་དང་དེ་བཞིན་ཆོས་རྒྱལ་འགྱུར་འདོད་པ། །བཟོད་པ་འདི་ལ་མ་བརྟེན་ཐོབ་པར་མི་འགྱུར་ཏེ། །ཞེས་སོ། །དེས་ན་ཉན་ཐོས་དང་རང་སངས་རྒྱས་ཀྱི་འབྲས་བུ་དག་ཀྱང་ཤེར་ཕྱིན་སྟོང་པ་ཉིད་འདི་ལ་མ་བརྟེན་པར་ཐོབ་པར་མི་ནུས་པས་འདི་ནི་འཕགས་བཞི་བསྐྱེད་པའི་ཡུམ་དུ་གསུངས་པའི་ཕྱིར། རིགས་པ་ནི་ཕྱིས་འཆད་པར་འགྱུར་རོ། །དེ་དག་ན་རེ་ཐེག་ཆེན་ནི་སངས་རྒྱས་ཀྱི་བཀའ་མ་ཡིན་ཏེ་ཕྱིས་བདུད་ཀྱི་མཐུ་ལས་རྟོག་གེ་པ་རྣམས་ཀྱིས་བྱས་པའི་ཚིག་ཡིན་པས་བདག་ཅག་ལ་ལུང་ཚད་མར་མ་གྲུབ་བོ་ཞེ་ན། གལ་ཏེ་ཐེག་ཆེན་སངས་རྒྱས་ཀྱི་བཀར་མ་གྲུབ་ན་ཉན་ཐོས་པ་ཁྱོད་ཀྱི་ལུང་རྣམས་ནི་བཀའ་ཡིན་པར་ཇི་ལྟར་གྲུབ་ཅེས་དྲིའོ། །ཁོ་ན་རེ་དེ་ནི་གང་གི་ཕྱིར་ན་ཁྱེད་ཐེག་ཆེན་སྨྲ་བ་དང་ངེད་ཅག་ཉན་ཐོས་པ་གཉིས་ཀ་ལ་ངེད་ཀྱི་ལུང་འདི་རྣམས་ནི་བཀའ་ཡིན་པར་ཚད་མས་གྲུབ་ཟིན་པའི་ཕྱིར་འདི་ལ་རྩོད་པ་མེད་དོ་ཞེ་ན། འོ་ན་དང་པོ་ཁྱོད་ལ་སྐྱེས་མ་ཐག་པ་སོགས་སུ་ཐེག་དམན་གྱི་སྡེ་སྣོད་འདི་རྣམས་ནི་བཀའ་ཡིན་པར་ཚད་མར་མ་གྲུབ་པས་དེའི་ཚེ་གཉིས་ཀ་ལ་གྲུབ་བོ་ཞེས་པའི་གཏན་ཚིགས་དེ་མེད་པས་བཀའ་ཇི་ལྟར་ཡིན། ལུང་དང་སྐྱེས་བུ་ལ་རང་བཞིན་གྱིས་འབྲེལ་བ་མེད་པས་ན་ཁྱོད་ལ་དང་པོ་ནས། འདི་ལུང་ཚད་མར་གྲུབ་པ་ནི་མི་སྲིད་དོ། །ཁོ་ན་རེ་ངེད་ཅག་ལ་དང་པོ་ནས་མ་གྲུབ་ཀྱང་ཡིད་ཆེས་སུ་རུང་བའི་བླ་མ་བརྒྱུད་པའི་རིམ་པ་ལས་ཐོས་ཤིང་། འདུལ་བ་ལ་སྣང་། མདོ་སྡེ་ལ་འཇུག མངོན་པའི་ཆོས་ཉིད་དང་མི་འགལ་བར་ཡང་དག་པའི་ལམ་སྟོན་པའི་ལུང་དུ་རིགས་པས་གྲུབ་པའི་རྐྱེན་གང་གིས་ནི་ཐེག་དམན་དེར་སངས་རྒྱས་ཀྱི་གསུང་དུ་ཡིད་ཆེས་པས་གྲུབ་བོ་ཞེ་ན། དེ་འདྲའི་ཡིད་ཆེས་སུ་རུང་བའི་རྐྱེན་དེ་ནི་ཐེག་ཆེན་ལའང་ཡོད་པར་མཚུངས་པས་ཁྱོད་བློ་དང་ལྡན་ཞིང་གཟུ་བོར་གནས་ན་གྲུབ་ཏུ་ཉེ་བ་ཡིན་པས། འདིའང་འུ་བུ་གཉིས་ཀ་ལ་གྲུབ་པར་རུང་གིས་མི་འགྲུབ་པ་མིན་ནོ། །དེ་ལས་གཞན་དུ་ན། གང་ཟག་གང་ཡང་རུང་བ་གཉིས་ཀྱིས་ཚད་མར་འདོད་པས་སམ་དེའི་ངོར་གྲུབ་ཟིན་ནས་ཁས་བླངས་ཕན་ཆོད་ལུང་དེ་བདེན་པ་ཡིན་ན་ནི། ཕྱི་རོལ་པའི་གཞུང་རིག་བྱེད་སོགས་ཀྱང་བདེན་པར་འགྱུར་ཏེ། དེ་ཁས་ལེན་མཁན་གང་ཟག་གཅིག་ཁོ་ན་མིན་པར་དུ་མས་ལུང་ཡང་དག་ཏུ་འདོད་པའི་ཕྱིར། གལ་ཏེ་ཐེག་དམན་ནི་བཀའ་ཡིན་པར་རྩོད་པ་མེད་ལ། ཐེག་ཆེན་གྱི་སྡེ་སྣོད་རྣམས་ནི་རྩོད་པ་དང་བཅས་པའི་ཕྱིར་བཀའ་མ་ཡིན་ནོ་ཞེ་ན། འོ་ན་སངས་རྒྱས་ཀྱི་ལུང་སྤྱི་ལ་མུ་སྟེགས་པ་རྣམས་ཀྱིས་རྩོད་པ་དང་། ཉན་ཐོས་རྩ་བའི་སྡེ་པ་ལས་གྱེས་པའི་ལུང་གཞན་དག་ལ་ཡང་རང་སྡེ་དང་གཞན་སྡེ་དག་ཕན་ཚུན་རྩོད་པ་དང་བཅས་པ་ཡིན་པའི་ཕྱིར་ཐེག་དམན་རང་ཡང་དོར་བྱར་འགྱུར་ཏེ་རྒྱུ་མཚན་མཚུངས་པས་སོ། །གཞན་ཡང་སངས་རྒྱས་བསྟན་པའི་རྩ་བ་སྟེ་བསྟན་པ་གནས་པ་གང་ལ་རག་ལས་པ་ནི་ཡང་དག་པའི་དགེ་སློང་ཉིད་ཡིན་ནའང་དགེ་སློང་ཉིད་ཀྱང་དཀའ་བར་གནས་ཏེ་ཡོད་པར་དཀའོ། །དེ་ལ་དགེ་སློང་ལ་སྒྲས་བརྗོད་ཀྱི་དབྱེ་བ་ལྔ་གསུངས་ཏེ། མིང་གི་དགེ་སློང་དང་། ཁས་འཆེ་བའི་དང་། སློང་བའི་ངང་ཚུལ་ཅན་གྱི་དང་། བསྙེན་པར་རྫོགས་པའི་དང་། ཉོན་མོངས་སྤོང་བའི་དགེ་སློང་རྣམས་ལས་དང་པོ་གསུམ་མིང་ཙམ་སྟེ། ཐ་མ་གཉིས་མཆོག་ཡིན་པས། དེ་གཉིས་བསྟན་རྩ་ཡིན་ལ། དེ་ལས་ཀྱང་དོན་དམ་པའི་དགེ་སློང་མཆོག་ནི་ཉོན་མོངས་སྤངས་པ་ཡིན་ན་དེ་དཀའ་བར་གནས་ཏེ། ཉོན་མོངས་སྤོང་བའི་རྒྱུ་བདེན་པ་མཐོང་མི་སྲིད་དེ་ཆོས་ཀྱི་གནས་ལུགས་སྟོང་པ་ཉིད་དང་མི་ལྡན་པར་འདོད་པས་ནའོ། །གཞན་ཡང་བསྙེན་པར་རྫོགས་པའི་དགེ་སློང་ལའང་། སྡེ་པ་སོ་སོའི་འདོད་པ་ནང་མི་མཐུན་པ་སོགས་རྩོད་བཅས་ཕྱིར་ཞེས་པ་སྔར་བསྟན་པའི་ཤུགས་ལས་སོ། །ཁོ་ན་རེ། ཅིའི་ཕྱིར་ཉོན་མོངས་སྤངས་པའི་དགེ་སློང་མེད་དེ་སྟོང་ཉིད་མེད་ཀྱང་བདེན་བཞི་མཐོང་བ་ཡོད་པས་སོ་སྙམ་ན་དེ་ལ་བདེན་བཞིའི་མི་རྟག་སོགས་ནི་གཙོ་བོ་མ་ཡིན་ལ། ལམ་གྱི་གཙོ་བོ་ཉོན་མོངས་པའི་ས་བོན་རྩ་བ་ནས་སྤོང་བའི་དངོས་གཉེན་ནི་བདག་མེད་རྟོགས་པའི་ཤེས་རབ་ཡིན་པས་དེ་ཉིད་སྤངས་ནས་སེམས་ནི་དམིགས་པ་དང་བཅས་པ་རྣམས་ཀྱི་མྱ་ངན་ལས་འདས་པའང་ཐོབ་དཀའ་བར་གནས་ཏེ་རྒྱུ་མཚན་བདག་ཏུ་འཛིན་པ་དྲུང་ནས་མ་ཕྱུང་བར་ཉོན་མོངས་སྤོང་བའི་ཐབས་གཞན་མེད་པའི་ཕྱིར། རེ་ཞིག་བསམ་གཏན་ལྟ་བུས་མགོ་མནན་ཀྱང་སླར་སྐྱེ་བར་འགྱུར་བ་འདུ་ཤེས་མེད་པའི་སྙོམས་འཇུག་བཞིན་ནོ། །དེས་ན་ངར་འཛིན་ལྷན་སྐྱེས་ཀྱི་ཞེན་ཡུལ་དུ་གྱུར་པའི་བདག་རང་བཞིན་གྱིས་གྲུབ་པ་མེད་པའི་སྟོང་པ་ཉིད་ཁོང་དུ་ཆུད་པའི་བདེན་པ་མཐོང་བ་ལས་ཉོན་མོངས་སྤོང་གི་གཞན་དུ་ན་དེ་མི་འཐད་དོ། །དེ་ལ་དེ་དག་ན་རེ་བདག་མེད་པར་མཐོང་དགོས་པར་ཁོ་བོ་འདོད་ཀྱང་དེ་དང་སྟོང་ཉིད་དོན་མི་གཅིག་སྟེ་སྟོང་པ་ཉིད་ནི་གཟུགས་སོགས་དངོས་སུ་ཡོད་པའི་ཆོས་ལ་མེད་ཅེས་སྐུར་བ་འདེབས་པའི་ལྟ་བ་འཇིགས་སུ་རུང་བ་ཡིན་ལ། གང་ཟག་གི་བདག་ནི་ཡེ་ནས་མེད་པར་ཤེས་པའི་གནས་ཚུལ་དང་མཐུན་པའི་ལྟ་བ་ཡང་དག་པ་ཡིན་པས་སོ་ཟེར་ན། དེ་གཉིས་ལ་སྟོང་པ་ཉིད་དུ་ཁྱད་པར་གང་ཡང་མེད་དེ། གང་ཟག་གི་བདག་ཕུང་པོ་ལ་བརྟེན་ནས་བརྟགས་པ་ཙམ་འདི་ལ་རང་གི་ངོ་བོས་གྲུབ་པ་མེད་པ་ནི་གང་ཟག་གི་བདག་མེད་ཡིན་ལ་ཡན་ལག་ལ་སོགས་པའི་ཚོགས་པ་ལ་བརྟེན་ནས་བཏགས་པའི་ལུས་དང་བུམ་པ་སོགས་ཕུང་པོ་རྣམས་ཀྱང་རང་རང་གི་ངོ་བོས་སྟོང་པ་ནི་ཆོས་ཀྱི་བདག་མེད་པ་སྟེ། དེས་ན་འདི་གཉིས་སྟོང་གཞི་ཆོས་ཅན་གྱི་ཁྱད་པར་ཙམ་སྟེ། ཆོས་བདག་མེད་ནི་ཆོས་སྤྱིི་དང་། གང་ཟག་གི་བདག་མེད་ནི་འཁོར་བའི་རྒྱུའི་གཉེན་པོ་ཡིན་པས་ལོགས་སུ་ཕྱེ་བ་ཙམ་ལས་སྟོང་ཚུལ་ལ་ཁྱད་པར་ཅི་ཡང་མེད་དོ། །དེས་ན་བདག་ཕུང་པོ་ལ་བརྟེན་ནས་བཏགས་པ་ཙམ་གྱི་སྟོང་པར་ཁོང་དུ་མ་ཆུད་པར། ཕུང་པོ་ཉིད་ནི་ངེས་པར་ཡོད་ཀྱི་ཕུང་པོ་འདི་ལ་དབང་བྱེད་པའམ་བདག་པོར་གྱུར་པའི་བདག་རྟག་གཅིག་རང་དབང་བ་དེ་འདྲ་མེད་པར་ཤེས་ཀྱང་། དེས་ངར་འཛིན་ཕྲ་བ་མི་སྤོང་སྟེ། དེའི་ཕྱིར་བདག་ངོ་བོས་གྲུབ་པ་མེད་པའི་སྟོང་པ་ཉིད་མ་མཐོང་བར་དུ། རྟག་བདག་སྤངས་ཀྱང་རུང་ཇི་སྲིད་རང་རྒྱུད་ཀྱི་ཕུང་པོར་དེར་འཛིན་ཡོད་པ་དེ་སྲིད་དུ་ངར་འཛིན་ལྡོག་པར་མི་འགྱུར་ཏེ། རིན་ཆེན་ཕྲེང་བ་ལས། ཇི་སྲིད་ཕུང་པོར་འཛིན་ཡོད་པ། །དེ་སྲིད་དེ་ལ་ངར་འཛིན་ཡོད། །ངར་འཛིན་ཡོད་ན་ཡང་ལས་ཏེ། །དེ་ལས་ཀྱང་ནི་སྐྱེ་བ་ཡིན། །ཞེས་སོ། །འདི་ལ་གང་ཟག་གི་བདག་རང་མཚན་གྱིས་སྟོང་པ་ཉིད་མ་གཏོགས་རྟག་བདག་སོགས་མེད་པར་བལྟས་ཀྱང་ཇི་སྲིད་ཕུང་པོར་འཛིན་པ་དེས་བདག་འཛིན་ལྡོག་ཏུ་མི་བཏུབ་ཅེས་པའི་དོན་ཡིན་གྱི་གཞན་དུ་བཤད་པ་ཇི་སྙེད་པ་ཀླུ་སྒྲུབ་དང་ཟླ་བའི་དགོངས་པ་ནི་མིན་ཏེ། འཇུག་པ་ལས་ཀྱང་། བདག་མེད་རྟོགས་ཚེ་རྟག་པའི་བདག་སྤངས་ཤིང་། །འདི་ནི་ངར་འཛིན་རྟེན་དུའང་མི་འདོད་པ། །དེ་ཕྱིར་བདག་མེད་ཤེས་པས་བདག་ལྟ་བ། །དཔྱིས་ཀྱང་འབྱིན་ཞེས་སྨྲ་བ་ཤིན་ཏུ་མཚར། །རང་ཁྱིམ་རྩིག་ཕུག་སྦྲུལ་གནས་མཐོང་བཞིན་དུ། །འདི་ན་གླང་ཆེན་མེད་ཅེས་དོགས་བསལ་ཏེ། །སྦྲུལ་གྱི་འཇིགས་པའང་སྤོང་བར་བྱེད་པ་ན། །ཀྱེ་མ་གཞན་གྱི་གནམ་པོར་གྱུར་ཉིད་དོ། །ཞེས་གསུངས། དེས་ན་ཕུང་པོ་རགས་པ་ལ་རིལ་པོ་གཅིག་འཛིན་གྱི་བློ་ཡོད་པ་དེ་སྲིད་དུ་ངར་འཛིན་གྱི་རྒྱུན་མི་འཆད་པས། དེ་འདྲ་བའི་འཛིན་པ་ངེས་པར་ལྡོག་དགོས་ཤིང་། འདུ་བྱེད་ཐམས་ཅད་མི་རྟག་པ་དུ་མ་སིལ་བུའི་རྣམ་པར་མངོན་སུམ་དུ་མཐོང་བའི་དགྲ་བཅོམ་པ་རྣམས་ལ་རང་རྒྱུད་ཀྱི་ཕུང་པོར་སྣང་བ་ཡང་ཆར་དང་འབབ་ཆུ་བཞིན་དུ་དུ་མ་ཚོགས་པ་སྐད་ཅིག་ཀྱང་མི་རྟག་པར་གཡོ་ཞིང་འགྱུར་བ་འགུལ་ལ་རྡེག་པའི་རྣམ་པ་ཅན་དུ་གཟིགས་པར་གསུངས་པས། དེ་ལྟར་གཟིགས་པའི་ཚེ་གང་ཟག་ཏུ་གདགས་གཞིའི་ཕུང་པོའང་རིལ་པོ་གཅིག་པུ་དང་རྟག་པ་ནི་དུ་མ་ཚོགས་པ་དང་། སྐད་ཅིག་མའི་རྒྱུན་ལ་བརྟེན་ནས་བཏགས་པ་ཙམ་ལས། ངོ་བོས་མ་གྲུབ་པའི་སྟོང་པའི་རང་བཞིན་ཁོང་དུ་ཆུད་ཅིང་། དེའི་སྟོབས་ཀྱིས་ང་ཞེས་གཅིག་ཏུ་འཛིན་པའང་ནོར་བའི་བློ་ཡིན་པར་ཤེས་ཏེ། ཚོགས་པའང་རྒྱུན་དེ་ཙམ་ལ་བརྟེན་ནས་བཏགས་པ་ཙམ་ལས་རང་གི་རང་བཞིན་གྱིས་གྲུབ་པ་མེད་པའི་ཚུལ་ཤེས་པས་སྟོང་ཉིད་རྟོགས་ཞེས་ཐ་སྙད་བཏགས་པ་སྟེ། དེ་ལྟར་རགས་པའི་ཕུང་པོ་ལ་རིལ་པོ་བ་གཅིག་མེད་པར་དུ་མ་ཚོགས་པ་ལ་བཏགས་པ་ཙམ་དུ་ཤེས་པའི་ཚུལ་ལ་བརྟེན་ནས་གང་ཟག་གི་བདག་ངོ་བོ་ཉིད་ཀྱིས་མ་གྲུབ་པར་རྟོགས་པའི་བདག་མེད་ཕྲ་བ་ཡོངས་སུ་རྫོགས་པ་ཡོད་དེ། ངར་འཛིན་ལྷན་སྐྱེས་ཀྱི་ཞེན་ཡུལ་དེ་ནི་བརྟེན་ནས་བཏགས་པ་ཙམ་ལས་རང་གི་ངོ་བོས་གྲུབ་པ་ཅུང་ཟད་ཀྱང་མེད་པར་ཁོང་དུ་ཆུད་ནུས་པར་རྣམ་བདུན་ཤིང་རྟའི་རིགས་པས་གཏན་ལ་ཕབ་པ་བཞིན་དུ་ཤེས་པར་བྱ་སྟེ། འདི་ལྟར་རྣམ་བདུན་ཤིང་རྟའི་རིགས་པ་ཁོ་ན་ལ་བརྟེན་ནས་དུ་མ་དང་མི་རྟག་པའི་རང་བཞིན་ཅན་གྱི་ཕུང་པོ་འདི་ལ་ངར་བཏགས་པ་ཙམ་ལས་ང་ངོ་བོས་མེད་པར་ཁོང་དུ་ཆུད་ནུས་པ་ནི་ད་ལྟ་ནས་རང་གི་མྱོང་བས་ཤེས་ནུས་ལ། དེ་ལྟར་རིགས་པས་རྟོགས་ནས་གོམས་པར་བྱས་ན་དེ་ལ་གསལ་སྣང་རབ་ཀྱི་མཐར་ཐུག་པ་ཡང་འབྱུང་རིགས་ཏེ་རྟོགས་བྱ་ཡང་དག་པའི་དོན་ཡིན་པའི་ཕྱིར་མི་རྟག་སོགས་བདེན་པའི་རྣམ་པ་མངོན་སུམ་མཐོང་བ་བཞིན་ནོ། །གལ་ཏེ་ཕུང་པོར་ཡང་བཟུང་རང་གི་རྒྱུད་དུ་ཡང་བཟུང་བ་ཙམ་གྱིས་ངར་འཛིན་པ་སྐྱེ་བ་མིན་ནམ་སྙམ་དུ་ཁ་ཅིག་སེམས་ན་དེ་ལྟར་མ་ཡིན་ཏེ་དུ་མ་ཚོགས་པའི་རང་བཞིན་ཅན་གྱི་ཕུང་པོ་རྣམས་ལ་གཅིག་པུའི་ངོ་བོ་མེད་པ་དང་དེ་མི་རྟག་པའི་རང་བཞིན་དུ་ངེས་པའི་ཚེ། དེ་ཙམ་ལ་བདག་ཏུ་བློས་ཕར་བཏགས་པ་ཙམ་ལས་བདག་དོན་དུ་མེད་པར་རྟོགས་པ་ན་རང་རྒྱུད་ཀྱི་ཕུང་པོ་ཆ་དུ་མ་ཡོད་པ་བཞིན་དུ་ང་མང་པོ་ཡོད་སྙམ་པའི་བློ་ལྷན་སྐྱེས་འབྱུང་མི་སྲིད་ལ། གཅིག་པུའི་ང་ཞེས་འཛིན་པའི་གཞི་ཞིག་ནི་གདགས་གཞི་ཕུང་པོ་འདི་ལ་མེད་ངེས་སུ་མཐོང་བའི་ཚེ། ཇི་ལྟར་ན་རང་རྒྱུད་ཀྱི་ཕུང་པོ་ལ་བདག་ཏུ་འཛིན་ཏེ་ཐག་པ་ཡོད་པར་བཟུང་ཡང་སྦྲུལ་དུ་མི་འཛིན་པ་དང་འདྲ་སྟེ་ཞིབ་པར་བརྒལ་ལན་ཉིན་སྣང་སོགས་ལས་ཤེས་པར་བྱའོ། །སྤྱིར་ཉན་ཐོས་ལའང་གྲུབ་མཐའ་དང་དབང་པོ་རྣོ་རྟུལ་གྱི་ཁྱད་ཀྱིས་རྟོགས་པ་བཟང་ངན་ཡོད་དེ། རྟུལ་པོས་ཕུང་པོ་སྐད་ཅིག་མའི་རང་བཞིན་དུ་མཐོང་བས་ང་དང་ང་ཡི་བའི་འཛིན་པ་ལྡོག་པ་ཙམ་ལས་རང་རྒྱུད་ཀྱི་ཕུང་པོ་ཐམས་ཅད་གཞི་མེད་པར་ཤེས་པའི་སྟོང་ཉིད་མ་རྟོགས་ལ། རྣོན་པོས་རྟེན་འབྲེལ་ཙམ་དུ་ཤེས་ཀྱང་རྨི་ལམ་གྱི་བདེ་སྡུག་ཙམ་ལའང་སྐྲག་ནས་ཞི་བར་མོས་པ་ཡིན་པར་གསུངས་ཏེ། དེ་ལྟ་ནའང་ཐེག་ཆེན་ལྟར་ཕྱི་ནང་གི་ཆོས་ཐམས་ཅད་གཞི་རྩ་དང་བྲལ་བའི་ནམ་མཁའ་ལྟ་བུའི་སྟོང་ཉིད་ཀྱི་དོན་རྟོགས་པ་ནི་མེད་དེ། དཔེར་ན་རྨི་ལམ་རྨི་ལམ་དུ་མ་ཤེས་པའི་དབང་གིས་འཇིགས་སྐྲག་སྐྱེ་ཡི་རྨི་ལམ་དུ་ཤེས་ཤིང་བདེན་མེད་དུ་རྟོགས་ཟིན་པ་ལ་འཇིགས་སྐྲག་སོགས་འབྱུང་དོན་མེད་པ་བཞིན་སྲིད་ཞིར་མངོན་ཞེན་སྐྱེ་མི་རིགས་ཏེ། མཛོད་འགྲེལ་པདྨ་དཀར་པོར་ཡང་། དངོས་པོ་འདི་དག་བདག་མེད་པའི་སྟོང་པར་མ་རྟོགས་པ་ཡིན་ཏེ། རགས་པ་རྡུལ་ཕྲན་ལ་སོགས་པར་རྟོགས་པས་ཀྱང་བདག་མེད་དེ་རགས་པར་འཛིན་པའི་བློ་ཞིག་པས་སོ། །འོན་ཀྱང་སངས་རྒྱས་ཀྱི་ཆོས་གངྒཱའི་ཀླུང་གི་བྱེ་ཆོས་དང་། བྱང་ཆུབ་སེམས་དཔའི་སྤྱོད་པ་རླབས་པོ་ཆེའི་ཐབས་ལ་ཞུམ་ཞིང་འཁོར་བའི་ཉེས་པ་བསྐྱེད་པའི་ཕྱིར་རོ། །ཞེས་དང་། བདག་མེད་དུ་རྟོགས་པའི་ཤེས་རབ་བདག་མེད་པ་ཙམ་དུ་མཚུངས་ཀྱང་། ཐབས་དང་ཤེས་རབ་དང་རྣམ་པར་གྲོལ་བ་ལ་མི་མཚུངས་པར་གསུངས་པ་འདིས་ཤེས་པར་ནུས་ལ། དེས་ན་གོང་དུ་རྣོན་པོས་རྟེན་འབྲེལ་ཙམ་དུ་རྟོགས་པར་གསུངས་པའི་དོན་ནི། ཉན་ཐོས་དབང་པོ་རྣོན་པོ་མདོ་སྡེ་པའི་གྲུབ་མཐའ་ལ་ཞུགས་པ་ཁ་ཅིག་རང་སངས་རྒྱས་ལྟར་གཟུང་བ་རང་བཞིན་མེད་པར་རྟོགས་པའི་ཆོས་བདག་མེད་ཕྱོགས་གཅིག་རྟོགས་པའམ་ཡོད་པ་ལ་དགོངས་ཀྱི་ཐེག་ཆེན་ལྟར་བདག་མེད་གཉིས་རྟོགས་སུ་ནམ་ཡང་འཁྲུལ་བར་མི་བྱ་སྟེ། ཞིབ་པར་འོག་ཏུ་འཆད་པར་འགྱུར་ལ། ཉན་རང་གཉིས་ཀྱི་རྟོགས་པའི་ཁྱད་པར་ཡང་། ཉན་ཐོས་ཀྱི་ཆོས་ཀྱི་བདག་མེད་རྟོགས་པའི་གཞི་དེ་རང་རྒྱུད་ཀྱིས་བསྡུས་པའི་ཕུང་པོ་ཙམ་ཡིན་ལ། རང་སངས་རྒྱས་ཀྱི་འཛིན་པ་རང་བཞིན་མེད་པར་མ་རྟོགས་ཀྱང་། གཟུང་ཡུལ་ཕྱི་ནང་གིས་བསྡུས་པ་ཐམས་ཅད་སེམས་ཀྱི་བག་ཆགས་ཀྱི་དབང་གིས་སྣང་བ་ལས་དོན་ལ་མིག་ཡོར་ལྟར་མ་གྲུབ་པར་རྟོགས་པ་སྟེ། མངོན་རྟོགས་རྒྱན་ལས། གཟུང་དོན་རྟོག་པ་སྤོང་ཕྱིར་དང་། །འཛིན་པ་མི་སྤོང་ཕྱིར་དང་ནི། །ཞེས་སོགས་གསུངས་པ་ལྟར་ལ། འོན་ཀྱང་བྱང་ཆུབ་སེམས་དཔའ་རྣམས་ཀྱི་རྟོགས་པའི་ཁྱད་པར་ནི་གསལ་བ་དང་། རྒྱས་པ་དང་། རྫོགས་པ་གསུམ་གྱིས་འཕགས་པར་གསུངས་སོ། །དེས་ན་འདིར་ཆོས་དང་གང་ཟག་གི་བདག་མེད་ལ་ཁྱད་ཆེན་པོ་ཡོད་པར་རློམ་ནས་ཆོས་བདག་མེད་སྟོང་པ་ཉིད་ནི་མི་དགོས་པར་གང་ཟག་གི་བདག་མེད་ཁོ་ནས་གྲོལ་བར་འདོད་པ་རྣམས་ཀྱི་ཞེ་འདོད་ནི་གང་ཡོད་པར་གྱུར་པའི་དངོས་པོ་ནི་སྟོང་པ་མ་ཡིན་ལ། གང་གཏན་ནས་ཡོད་མ་མྱོང་བ་བདག་ནི་རི་བོང་གི་རྭ་བཞིན་དུ་དོན་ལ་མེད་པ་ཞིག་སྟེ། དེ་ཕྱིར་ཆོས་བདག་མེད་པ་འདིས་ཅི་བྱ་སྙམ་དུ་གང་ཟག་གི་བདག་བརྟེན་ནས་བཏགས་པའི་དེ་ཁོ་ན་ཉིད་དུ་མ་ཤེས་པ་རྩོད་པའོ། །ལེགས་པར་བརྟགས་ན་བདག་མེད་གཉིས་ཀའང་བརྟེན་ནས་བཏགས་པའི་སྟོང་པ་ཉིད་ཙམ་དུ་རོ་གཅིག་ཅིང་ཁྱད་པར་ཅི་ཡང་མེད་པ་ལ་དགོངས་ནས་ཉན་རང་ལ་ཆོས་ཀྱི་བདག་མེད་དམ་སྟོང་ཉིད་རྟོགས་པ་ཡོད་དེ་དེ་མེད་ན་ཉོན་མོངས་ཀྱང་སྤོང་མི་ནུས་པར་དངོས་སྟོབས་ཀྱི་རིགས་པས་བསྒྲུབས་པའོ། །དེ་ལ་འདིར་ཉན་རང་དགྲ་བཅོམ་པས་གང་ཟག་རང་བཞིན་མེད་པར་སྟོང་པ་ཉིད་དུ་རྟོགས་པ་དེ་ཆོས་བདག་མེད་ཀྱི་བྱེ་བྲག་ཀྱང་ཡིན་སྟོང་ཉིད་ཀྱང་ཡིན་པ་གོ་དགོས་ཀྱི་ཕུང་སོགས་ཤེས་བྱ་མཐའ་དག་སྟོང་པར་རྟོགས་པ་ཡིན་པར་ནི་རྣམ་པ་ཀུན་ཏུ་མི་རུང་བར་འགྱུར་ཏེ། ཤེར་ཕྱིན་སྡུད་པ་ལས། ཐབས་མེད་ཤེས་རབ་བྲལ་བ་ཉན་ཐོས་ཉིད་དུ་འགྱུར། །ཞེས་ཐབས་ཤེས་གཉིས་ཀས་དམན་པར་བསྟན་པ་དང་། ལང་ཀར་གཤེགས་པ་ལས། གཞན་ཡང་བློ་གྲོས་ཆེན་པོ་ཉན་ཐོས་དང་རང་སངས་རྒྱས་ཐམས་ཅད་ནི་ཤེས་བྱའི་སྒྲིབ་པ་དང་། ལས་ཀྱི་བག་ཆགས་མ་སྤངས་པའི་ཕྱིར། ཆོས་བདག་མེད་པ་རྟོགས་ཤིང་བསམ་གྱིས་མི་ཁྱབ་པར་འགྱུར་བའི་ཤི་འཕོ་བ་ཐོབ་པས་ཉན་ཐོས་པ་རྣམས་ལ་ཐེག་པ་གསུམ་དུ་བསྟན་ཏེ་ཐེག་པ་གཅིག་ཏུ་མ་ཡིན་ནོ། །བློ་གྲོས་ཆེན་པོ་དེ་དག་ནམ་ཉེས་པའི་བག་ཆགས་ཐམས་ཅད་སྤངས་ཤིང་ཆོས་ལ་བདག་མེད་པར་རྟོགས་པ་དེས་ནི་དེ་དག་བག་ཆགས་ཀྱི་ཉེས་པ་དང་། ཏིང་ངེ་འཛིན་གྱིས་མྱོས་པ་མེད་པར་གྱུར་ནས་ཟག་པ་མེད་པའི་དབྱིངས་ནས་སླར་སད་དེ། ཡང་འཇིག་རྟེན་དང་འཇིག་རྟེན་ལས་འདས་པ་ཟག་པ་མེད་པའི་དབྱིངས་སུ་གཏོགས་པའི་ཆོས་རྣམས་ཡོངས་སུ་བསྐྱེད་ནས། ཆོས་ཀྱི་སྐུ་བསམ་གྱིས་མི་ཁྱབ་པ་ལ་དབང་བྱེད་པར་འགྱུར་རོ། །ཞེས་དང་། ཆོས་དང་གང་ཟག་ལ་བདག་མེད་པར་རྟོགས་པ་དང་། སྒྲིབ་པ་གཉིས་ཡོངས་སུ་ཤེས་ཤིང་ཁོང་དུ་ཆུད་པ་དང་། ཤི་འཕོ་བ་རྣམ་པ་གཉིས་དང་བྲལ་བ་དང་ཉོན་མོངས་པ་གཉིས་སྤངས་པའི་ཕྱིར་བློ་གྲོས་ཆེན་པོ་སངས་རྒྱས་བཅོམ་ལྡན་འདས་རྣམས་ཀྱི་སངས་རྒྱས་པ་ཉིད་དོ། །བློ་གྲོས་ཆེན་པོ་ཆོས་དེ་དག་ནི་ཁོང་དུ་ཆུད་པས་ཉན་ཐོས་དང་རང་སངས་རྒྱས་ཀྱང་སངས་རྒྱས་པ་ཉིད་ཡིན་ཏེ། དེས་ན་དེའི་ཕྱིར་བློ་གྲོས་ཆེན་པོ་ཐེག་པ་གཅིག་ཏུ་བཤད་དོ། །ཞེས་དང་། རྒྱན་སྟུག་པོ་བཀོད་པའི་མདོ་ལས། ཆོས་ལ་བདག་མེད་མཁས་པ་ཡིས། །སངས་རྒྱས་རྣམས་དང་སངས་རྒྱས་སྲས། །བདེ་བར་གཤེགས་པའི་གནས་ཐོས་སྟེ། །མངོན་སངས་རྒྱས་ཤིང་ཆོས་སྟོན་ཏོ། །ཕུང་པོ་གང་ཟག་བདག་མེད་པར། །རབ་ཏུ་རྣམ་དབྱེ་མཐོང་གྱུར་ཅིང་། །ཆོས་ཀྱི་དངོས་པོ་མ་བཤིག་པར། །ཉན་ཐོས་དེ་དག་མངོན་རྟོགས་འགྱུར། །ཞེས་གསུངས་ཤིང་། འཇུག་པ་ལས། བདག་མེད་འདི་ནི་འགྲོ་བ་རྣམ་དགྲོལ་ཕྱིར། །ཆོས་དང་གང་ཟག་དབྱེ་བས་རྣམ་གཉིས་གསུངས། །ཞེས་པའི་ཐད་ཀྱི་རང་འགྲེལ་ལས། དེ་ལ་གང་ཟག་གི་བདག་མེད་པ་ནི་རང་སངས་རྒྱས་རྣམས་དང་། ཉན་ཐོས་རྣམས་རྣམ་པར་དགྲོལ་བར་བྱ་བའི་ཕྱིར་བསྟན་ལ། བྱང་ཆུབ་སེམས་དཔའ་རྣམས་རྣམ་པ་ཐམས་ཅད་མཁྱེན་པ་ཉིད་ཐོབ་པས་རྣམ་པར་དགྲོལ་བར་བྱ་བའི་ཕྱིར་ནི་གཉིས་ཀ་བསྟན་ཏོ། །ཉན་ཐོས་དང་རང་སངས་རྒྱས་རྣམས་ཀྱིས་ཀྱང་རྟེན་ཅིང་འབྲེལ་བར་འབྱུང་བ་རྐྱེན་ཉིད་འདི་པ་ཙམ་མཐོང་མོད་ཀྱི། དེ་ལྟ་ནའང་དེ་དག་ལ་ཆོས་ཀྱི་བདག་མེད་པ་ཡོངས་སུ་རྫོགས་པར་སྒོམ་པ་མེད་དེ། ཁམས་གསུམ་ན་སྤྱོད་པའི་ཉོན་མོངས་པ་སྤོང་བའི་ཐབས་ཙམ་ཞིག་ནི་ཡོད་དོ། །དེ་དག་ལ་གང་ཟག་གི་བདག་མེད་པ་མ་ལུས་པར་སྒོམ་པ་ནི་ཡོད་པར་རྣམ་པར་བཞག་གོ །ཞེས་ཉན་རང་ལ་ཉོན་སྒྲིབ་སྤོང་ཕྱིར་གང་ཟག་གི་བདག་མེད་དང་། བྱང་སེམས་ལ་སྒྲིབ་པ་གཉིས་ཀ་ལས་གྲོལ་བའི་རྣམ་མཁྱེན་ཐོབ་ཕྱིར་བདག་མེད་གཉིས་ཀ་བསྟན་པར་གསུངས་པ་དེས་ཉན་རང་ལ་ཆོས་མཐའ་དག་བདག་མེད་དུ་རྟོགས་པ་མེད་པ་དང་། ཆོས་བདག་མེད་ཡོངས་སུ་རྫོགས་པར་རྟོགས་ན་ཤེས་སྒྲིབ་སྤོང་བར་ཡང་བསྟན་པ་ཡིན་ཞིང་། སྔར་ཉན་རང་ལ་སྟོང་ཉིད་རྟོགས་པ་ཡོད་པར་བཤད་པ་ཅི་ཞེས་དོགས་པ་བཅད་པ་སྔོན་དུ་འགྲོ་བས། སྐབས་འདིར་རང་བཞེད་དངོས་ལ། ཉན་རང་ལ་བདག་མེད་རྫོགས་པར་བསྒོམ་པ་མེད་ཅེས་གསལ་བོར་གསུངས་པ་དང་། གཞན་ཡང་སྟོང་ཉིད་བཅུ་དྲུག་པོ་ཐེག་ཆེན་ཐུན་མོང་མིན་པར་བཤད་པའི་ཕྱིར་རོ། །དེས་ན་ཉན་རང་གི་ཆོས་བདག་མེད་རྫོགས་པར་མ་རྟོགས་པའི་ཆ་ནས་ཆོས་བདག་མེད་མ་རྟོགས་ཞེས་དམན་ལ་དགག་པའི་སྒྲར་གསུངས་ཏེ། ཉན་རང་གི་ཡེ་ཤེས་ནི་ཡུངས་འབྲུ་སྲིན་གྱིས་ཟོས་པའི་ནང་གི་ནམ་མཁའ་ལྟར་ཆུང་བར་འོད་སྲུང་གི་ཞུས་པའི་མདོ་ལས་གསུངས་ཤིང་། དྲི་མ་མེད་པའི་མདོ་ལས་ཀྱང་། སྟོང་པ་ཉིད་ལ་མོས་པའི་ཉོན་མོངས་ཅན་ཉིད་བླའི། ཉན་ཐོས་དང་རང་སངས་རྒྱས་དམིགས་པ་དང་བཅས་པའི་ཉོན་མོངས་པ་མེད་པ་ནི་དེ་ལྟ་མ་ཡིན་ནོ། །དེ་དག་གིས་འདུས་མ་བྱས་མངོན་སུམ་དུ་བྱས་ནས་དམིགས་པ་དང་བཅས་པ་ཇི་ལྟར་ལགས། བཀའ་སྩལ་པ། དེའི་འདུས་མ་བྱས་ནི་རྒྱ་མཚོ་ལས་སྐྲའི་རྩེ་མོས་བླངས་པ་ལྟར་ཤིན་ཏུ་ཆུང་ངོ་། །ཞེས་གསུངས་པ་སོགས་དང་། ཡང་སྟོང་ཉིད་སྤངས་ནས། ཐར་ལམ་གཞན་དུ་ཡོད་པ་དག་ཅིང་ཞི་སྒོ་གཉིས་སུ་མེད་པར་སྒྲུབ་པའི་སླད་དུ་ཉན་རང་དགྲ་བཅོམ་པས་བདག་བརྟེན་ནས་འབྱུང་བའི་དེ་ཁོ་ན་ཉིད་དུ་ཤེས་པའི་སྟོང་ཉིད་ཉི་ཚེ་བ་ཡོད་པར་གསུངས་པ་འདི་གཉིས་འགལ་མེད་དུ་འཛིན་པ་གལ་ཆེ་སྟེ། གཞན་དུ་རྒྱལ་བའི་ཡུམ་ཉིད་ན་དངོས་པོའི་འདུ་ཤེས་ཅན་ལ་ཐར་པ་མེད་པ་དང་། བྱང་ཆུབ་གསུམ་པོ་སྟོང་པ་ཉིད་ལ་བརྟེན་ནས་ཐོབ་པར་གསུངས་ཤིང་། དེར་ཡང་གཞི་ཤེས་ལ་སོགས་པ་རྣམ་པ་གསུམ་སོ་སོར་ཕྱེས་ནས། དེ་ནི་མཚན་མར་དམིགས་སྒོ་ནས། །ཐབས་མ་ཡིན་པས་རིང་བ་སྟེ། །དེ་ནི་ཐབས་ལ་མཁས་པ་ཡིས། །དེ་ཡང་ཉེ་བ་ཉིད་དུ་བཤད། །ཅེས་མགོན་པོ་བྱམས་པས་གསུངས་ཏེ་ཐེག་ཆེན་སྟོན་པའི་དགེ་བའི་བཤེས་གཉེན་གྱིས་ཟིན་མ་ཟིན་དང་བདེན་གཉིས་ཕྱིན་ཅི་མ་ལོག་པར་རྟོགས་པའི་ཤེས་རབ་སོགས་ཐབས་མཁས་ཡོད་མེད་ཀྱི་དབང་གིས་ཆོས་ཐམས་ཅད་མཉམ་པ་ཉིད་དམ་མཚན་མ་མེད་པར་རྟོགས་མ་རྟོགས་ཀྱི་ཁྱད་པར་གྱིས་གཞི་ཤེས་འབྲས་ཡུམ་ལ་ཉེ་རིང་གི་ཁྱད་པར་བཤད་པ་སོགས་འདི་ཇི་ལྟར་རྟོགས་པར་བྱ། དེས་ན་སྤྱིར་སྟོང་ཉིད་ནི་ཞི་བའི་སྒོ་གཅིག་པུ་ཡིན་པས་བྱང་ཆུབ་གསུམ་པོ་གང་ཡང་རུང་སྟེ་འདི་ལ་བརྟེན་ནས་ཐོབ་དགོས་པས་ཁྱབ་ཀྱང་། ལས་དང་པོ་བ་དག་གིས་སྟོང་ཉིད་ཅེས་པ་ལ་རིལ་པོ་གཅིག་བདེན་དུ་ཞེན་པའི་བློས་རྟོགས་ན་ཐམས་ཅད་ཅིག་ཅར་རྟོགས་མ་རྟོགས་ན་གཅིག་ཀྱང་མི་རྟོགས་སྙམ་པའི་དམ་བཅའ་ལ་བློ་རྩེ་གཅིག་ཏུ་གཏོད་པར་མི་བྱ་སྟེ། དེ་ལྟ་ན་བཀའ་དང་དགོངས་འགྲེལ་ཐམས་ཅད་རྨང་འཁྲུགས་པར་འགྱུར་ཏེ་དངོས་པོ་གཅིག་སྟོང་ཉིད་དུ་མཐོང་ན་དངོས་པོ་ཐམས་ཅད་སྟོང་པའི་སྟོང་ཉིད་དེ་མཐོང་བས་ཁྱབ་ན། ཐེག་པ་ཆེན་པོ་ན་རིགས་པའི་རྣམ་གྲངས་དུ་མས་སྟོང་ཉིད་བཅུ་དྲུག་སོགས་སུ་སྒྲུབ་པ་དང་། གྲངས་མེད་གསུམ་ལ་སོགས་པའི་དཀའ་སྤྱད་དང་། ས་ནས་སར་འཕ ར་བ་ན་ཆོས་དབྱིངས་གློ་བུར་བྲལ་དག་གིས་ཁྱད་པར་དུ་བྱས་པའི་མཐོང་བ་ཇེ་བཟང་དུ་འགྱུར་བ་དང་། གྲུབ་མཐའ་འོག་མ་བས་གོང་མ་འཕགས་པའི་ཁྱད་པར་འཐད་པར་མི་འགྱུར་ཏེ། འདི་ལྟར་ཉན་རང་གིས་སྟོང་པར་མཐོང་བ་དེ་ལས་རྟོགས་པ་བོགས་དབྱུང་དུ་མེད་པའི་ཕྱིར། ཐེག་པ་ཆེན་པོ་ལས་ཆུང་ངུ་དང་གྲུབ་མཐའ་གོང་མ་བས་འོག་མ་ལམ་མྱུར་ཞིང་ཟབ་པར་འགྱུར་རོ། །གནོད་པ་འདི་མ་ངེས་ཏེ་ཐེག་པ་ཆེ་ཆུང་དག་ཐབས་ལ་ལྟོས་ནས་སྤང་བྱ་སྤོང་བ་ལ་ཁྱད་ཡོད་དོ་སྙམ་ན། རྟོགས་བྱ་མ་རྟོགས་པའི་ཆ་ཡོད་པ་དེ་དང་བྲལ་བའི་རྟོགས་བྱ་རྟོགས་པའི་ཡེ་ཤེས་ཀྱིས་སྤང་བྱ་སྤོང་བ་མིན་ན་སྤང་བྱ་ནམ་ཡང་མི་སྤོང་བར་འགྱུར་ཏེ། རྟོགས་པའི་ཡེ་ཤེས་ཡོད་ཀྱང་དེ་ཉིད་ཀྱིས་སྤང་བྱ་སྤོང་མི་ནུས་པའི་ཕྱིར་དཔེར་ན་ཉི་མ་ཤར་ཡང་མུན་པ་མི་སེལ་བར་ཁས་བླངས་པ་བཞིན་ནོ། །དེས་ན་རྟོགས་པའི་ཡེ་ཤེས་ཁྱད་པར་ཅན་བསྐྱེད་པ་ལ་ཐབས་ཁྱད་པར་ཅན་དང་མ་འབྲེལ་བར་བསྐྱེད་མི་ནུས་ལ། དེ་མ་སྐྱེས་ན་སྤང་བྱ་མི་འགག་ཅེས་ཁས་བླང་བར་བྱ་ཡི། རྟོགས་པའི་ཡེ་ཤེས་དང་པོ་ནས་ཡོད་ཀྱང་དེས་སྤང་བྱ་སྤོང་བ་གཞན་ལ་ལྟོས་སོ་ཞེས་ཁས་བླང་བར་མི་བྱ་སྟེ་མཁས་པའི་བཞད་གད་ཀྱི་གནས་སུ་འོས་པའི་ཕྱིར། གཞན་ཡང་། རོང་སྟོན་ཆེན་པོ་ཤེས་བྱ་ཀུན་རིག་གི་ཕར་ཕྱིན་ཊཱིཀ་ཆེན་ལས། མཁས་པ་དུ་མ་ཉན་རང་ལ་ཆོས་ཀྱི་བདག་མེད་རྟོགས་པར་ཡོད་པར་འདོད་ཅིང་ས་བདུན་པ་མ་ཐོབ་བར་ཉན་རང་བློ་ཡི་སྟོབས་ཀྱིས་གནོན་པར་མི་ནུས་སོ། །འོན་ཀྱང་བྱང་སེམས་ཀྱི་མཐོང་ལམ་ཐོབ་པའི་དུས་སུ་ཤེས་སྒྲིབ་གཟུང་རྟོག་བརྒྱ་རྩ་བརྒྱད་སྤངས་པས་ཉན་རང་གིས་ཀྱང་རང་རང་གི་མཐོང་ལམ་ཐོབ་པའི་དུས་སུ་དེ་དག་སྤང་ནུས་པར་ཐལ་ལོ། །དུས་གསུམ་མཉམ་པ་ཉིད་དུ་ཤེས་པས་སྲིད་ཞིའི་མཐའ་ལ་མི་གནས་པར་ཐལ་བར་འགྱུར་བས། སྲིད་དང་ཞི་བར་ལྷུང་བའི་ཕྱིར། །ཞེས་པ་དང་འགལ་ལོ། །འཁོར་འདས་ལ་བླང་དོར་ཐ་དད་དུ་འཛིན་པ་མ་ཡིན་པར་ཡང་ཐལ་ལོ། །ཉན་རང་རྣམས་ཕུང་པོ་ལ་གཤེད་མ་རལ་གྲི་གདེངས་པ་ལྟར་ཤིན་ཏུ་འཇིགས་པར་གསུངས་པའང་མི་འཐད་པ་ཐལ་བར་འགྱུར་ཏེ། ཕུང་པོ་རང་བཞིན་མེད་པར་རྟོགས་པའི་ཕྱིར། ཀླུ་སྒྲུབ་ཀྱིས་ཀྱང་། བྱང་ཆུབ་དམ་པ་གཉིས་ཐོབ་ནས། །སྲིད་པས་སྐྲག་ཡིད་དེ་དག་ནི། །ཞེས་གསུངས་སོ། །འོ་ན་མདོ་སྡེ་ས་བཅུ་པ་ལས། ས་བདུན་པ་ཐོབ་ནས་ཉན་ཐོས་དང་རང་སངས་རྒྱས་ཀྱི་སྤྱོད་ཡུལ་ལས་ཤིན་ཏུ་འདས་པར་བསྟན་པས། སྔ་རོལ་དུ་བློ་གྲོས་ཀྱིས་ཟིལ་གྱིས་གནོན་མི་ནུས་པར་མངོན་པས། ཉན་རང་ལ་ཆོས་ཀྱི་བདག་མེད་རྟོགས་པ་ཡོད་དོ་ཞེ་ན། དཀོན་མཆོག་སྤྲིན་ལས། མོས་པས་སྤྱོད་པའི་སར་ཉན་ཐོས་དང་རང་སངས་རྒྱས་ཀྱི་ས་ཐམས་ཅད་ལས་འདས་པར་འགྱུར་རོ། །ཞེས་གསུངས་པས་སོ་སྐྱེའི་གནས་སྐབས་སུའང་འདའ་བར་བསྟན་ན་འཕགས་པའི་གནས་སྐབས་སུ་ལྟ་ཡང་ཅི་སྨོས། ས་བཅུ་པའི་ལུང་དོན་ནི། ས་བདུན་པའི་སྔ་རོལ་དུའང་བློ་གྲོས་ཀྱི་མཐུས་ཉན་རང་གི་ས་ལས་འདའ་ནུས་མོད། ས་བདུན་པ་ཐོབ་ནས། ཉན་རང་ལས་ཤིན་ཏུ་འདས་ཞེས་པ་ཡིན་པས་ཤིན་ཏུ་ཞེས་པའི་ཚིག་གི་ཟུར་ཁོང་དུ་མ་ཆུད་དོ། །བྱང་སེམས་ཀྱིས་མཐོང་ལམ་ཐོབ་ནས་མཐོང་སྤང་ཤེས་སྒྲིབ་བརྒྱ་རྩ་བརྒྱད་སྤངས་པས། སྔ་རོལ་དུ་བློ་གྲོས་ཀྱི་མཐུས་ཟིལ་གྱིས་གནོན་ནུས་པ་གསལ་བར་བྱས་སོ་གསུངས། འ་ོན་ཆོས་གཅིག་གི་སྟོང་ཉིད་ཆོས་ཀུན་གྱི་སྟོང་ཉིད་དུ་བཤད་པ་མིན་ནམ་གཅིག་སྟོང་ཉིད་དུ་ཤེས་ན་དེས་འགྲེས་སྦྱར་ཏེ་ཀུན་ལ་མཐོང་ནུས་པར་ཡང་སུས་དགག་ནུས་སྙམ་ན། ཆོས་ཐམས་ཅད་དེ་བཞིན་ཉིད་དུ་གཅིག་པའང་ཁོ་བོ་འདོད། ཆོས་གཅིག་དེ་བཞིན་ཉིད་དུ་ངེས་པའི་རིགས་པ་དེ་གཞན་ཀུན་ལ་བློས་སྦྱར་ནས་གོམས་ན་ཆོས་ཀུན་སྟོང་ཉིད་དུ་མཐོང་བར་ཁོ་བོ་འདོད་མོད་དེ། འོན་ཀྱང་གདུལ་བྱའི་གང་ཟག་རྣམས་ལས་དང་དབང་པོའི་བྱེ་བྲག་དང་། བཤེས་གཉེན་དང་ལམ་གྱི་འཇུག་སྒོའི་ཁྱད་པར་ལས་ལམ་མངོན་པར་རྟོགས་པའི་རིམ་པ་ཇི་སྙེད་ཅིག་ཡོད་པ་འདི་སུ་ཞིག་གིས་དགག་པར་ནུས་ཏེ་མི་ནུས་སོ། །དེ་ལྟར་ན་གནས་སྐབས་ཁམས་སྣ་ཚོགས་པ་འདུལ་བའི་ལམ་སྣ་ཚོགས་པ་ཡོད་ཀྱང་། ཆོས་ཀུན་གྱི་གནས་ལུགས་མཐར་ཐུག་པ་ནི་དེ་བཞིན་ཉིད་གཅིག་ལས་མེད་པས་ན། དེ་རྟོགས་པའི་ཡེ་ཤེས་རྣམ་པ་ཐམས་ཅད་མཁྱེན་པ་ཉིད་དུ་ལམ་ཐམས་ཅད་འབབ་ཅིང་གཞོལ་བས་ན་མཐར་ཐུག་ཐེག་པ་གཅིག་ཡིན་ནོ་ཞེས་ཆོས་ཉིད་ཀྱི་རིགས་པས་བསྒྲུབས་པ་འདི་ཀླུ་སྒྲུབ་ཡབ་སྲས་ཀྱི་སེང་གེའི་སྒྲ་སྟེ་ཚུལ་འདིས་ཇི་སྐད་བཤད་པའི་དོན་དེ་དག་གཏན་ལ་དབབ་པར་བྱའོ། །དེས་ན་ཉན་རང་ལ་ཆོས་བདག་མེད་རྟོགས་པ་མེད་པ་དང་། རྫོགས་པར་རྟོགས་པ་ཡོད་པ་གཉིས་ཀ་ཤིང་རྟ་ཆེན་པོའི་དགོངས་པ་མིན་པར་ནི་ཚུལ་འདི་ལྟར་གཟུང་བར་བྱ་སྟེ། ཀློང་ཆེན་ཆོས་ཀྱི་རྒྱལ་པོའི་ཡིད་བཞིན་རིན་པོ་ཆེའི་མཛོད་ཀྱི་ལེགས་པར་བཤད་པའི་ཆ་ཤས་བློའི་དབུལ་བ་སེལ་བའི་ནོར་བུའོ། །དེས་ན་ཆོས་བདག་མེད་རྟོགས་པའི་ཡེ་ཤེས་སྤྱི་ཡིན་ལ། གང་ཟག་གི་བདག་མེད་རྟོགས་པའི་མཁྱེན་པ་ནི་དེའི་བྱེ་བྲག་སྟེ་ཉི་ཚེ་བའོ། །ཆོས་བདག་འཛིན་ནི་རྨོངས་པ་སྤྱིི་དང་། གང་ཟག་གི་བདག་འཛིན་ནི་དེའི་བྱེ་བྲག་སྟེ་ཤིང་དང་པ་ལ་ཤ་བཞིན་ནོ། །གང་ཟག་གི་བདག་ཏུ་འཛིན་པ་ལས་ནི་ཉོན་མོངས་པའི་སྒྲིབ་པ་སྐྱེ་ཞིང་། ཆོས་བདག་ལས་འཁོར་གསུམ་དུ་རྟོག་པ་ཤེས་བྱའི་སྒྲིབ་པ་སྐྱེའོ། །དེས་ན་བདག་མེད་གཉིས་རྟོགས་ཀྱི་བྱང་ཆུབ་སེམས་དཔའི་མཁྱེན་པས་སྒྲིབ་པ་གཉིས་ཀ་སྤོང་ལ། ཉན་རང་གི་ལམ་གྱིས་ཉོན་མོངས་རྐྱང་པ་སྤོང་བར་བྱེད་དེ། ལང་ཀར་གཤེགས་པ་ལས། བློ་གྲོས་ཆེན་པོ་ཤེས་བྱའི་སྒྲིབ་པ་ནི་ཆོས་ལ་བདག་མེད་པ་མཐོང་བའི་བྱེ་བྲག་གིས་རྣམ་པར་དག་པར་འགྱུར་རོ། །ཉོན་མོངས་པའི་སྒྲིབ་པ་ནི་གང་ཟག་གི་བདག་མེད་པར་མཐོང་བའི་བྱེ་བྲག་གིས་རྣམ་པར་དག་པར་འགྱུར་རོ། །ཞེས་གསུངས། སྤོང་ཚུལ་ཡང་ཐེག་ཆེན་མཐོང་ལམ་དུ་སྒྲིབ་པ་གཉིས་པོ་ཀུན་བཏགས་ཀྱི་ཆ་སྤོང་། དེ་ནས་རིམ་བཞིན་སྒྲིབ་པ་གཉིས་ཀ་མཉམ་པར་སྤངས་ནས་ས་བརྒྱད་པ་ངར་འཛིན་གྱི་རྒྱུ་བ་ལོག་པའི་སྟོབས་ཀྱིས་དག་ས་ལ་ཉོན་མོངས་པ་མེད་ཀྱང་དེ་ཕན་ཆད་ཤེས་སྒྲིབ་འབའ་ཞིག་སྤོང་། ས་བཅུ་པའི་ཐ་མར་གཉིས་སྣང་འཁྲུལ་པའི་བག་ཆགས་ཤིན་ཏུ་ཕྲ་བའང་རྡོ་རྗེ་ལྟ་བུའི་ཏིང་ངེ་འཛིན་གྱིས་བཅོམ་པའི་དེ་མ་ཐག་ཏུ་ཆོས་ཀྱི་དབྱིངས་དེ་བཞིན་ཉིད་དུ་མངོན་པར་གཤེགས་པ་སངས་རྒྱས་བཅོམ་ལྡན་འདས་ཀྱིས་ཡེ་ཤེས་རྡོ་རྗེའི་སྐུ་བརྙེས་པ་ཡིན་ཏེ་ཚུལ་འདིར་འཕགས་ཡུལ་གྱི་ཤིང་རྟ་ཆེན་པོ་ཐམས་ཅད་དགོངས་པ་གཅིག་པ་ཡིན་གྱི་བོད་ཀྱི་ཞེ་འདོད་དང་བསྲེ་བར་མི་བྱ་ལ། གནད་འདི་ཤེས་ན་གཞུང་ལུགས་དུ་མའི་འགག་རང་གྲོལ་ཏེ་དགོངས་པའི་ཆུ་བོ་ཡེ་ཤེས་ཀྱི་ཀློང་དུ་འདྲེས་པར་འགྱུར་བའི་ཕྱིར་རོ། །དེ་ལྟར་བདེན་བཞི་མཐོང་བས་ཉོན་མོངས་སྤངས་པའི་བུད་ཤིང་ཟད་པའི་མེ་བཞིན་མྱ་ངན་ལས་འདས་པར་འགྱུར་རོ་ཞེས་སྙམ་པ་ལ། སྟོང་ཉིད་མ་མཐོང་བཞིན་བདེན་པ་མཐོང་བར་མི་སྲིད་པར་བསྒྲུབས་ནས་སྐྱོན་གཞན་ཡང་པདྨ་དཀར་པོ་ལས། འདི་ལྟར་མྱ་ངན་འདས་པར་གང་བརྗོད་པ། །འཁོར་བའི་སྡུག་བསྔལ་དག་ལས་ཁྱེད་ཐར་ཡང་། །ཁྱེད་ནི་ད་དུང་མྱ་ངན་ཡོང་མ་འདས། །སངས་རྒྱས་ཐེག་པ་འདི་ནི་བཙལ་བར་གྱིས། །ཞེས་དང་། ལང་ཀར་གཤེགས་པ་ལས། གཞན་དག་ནི་ཆོས་ཐམས་ཅད་རྐྱེན་ལ་རག་པར་མཐོང་ནས་མྱ་ངན་ལས་འདས་པའི་བློར་གྱུར་ཏེ། ཆོས་བདག་མེད་པར་མཐོང་བ་མེད་པའི་ཕྱིར་བློ་གྲོས་ཆེན་པོ་དེ་དག་ལ་ཐར་པ་མེད་དོ། །བློ་གྲོས་ཆེན་པོ་ཉན་ཐོས་ཀྱི་ཐེག་པ་མངོན་པར་རྟོགས་པའི་རིགས་ཅན་ནི་ངེས་པར་འབྱུང་བ་མ་ཡིན་པ་ལ་ངེས་པར་འབྱུང་བའི་བློར་འགྱུར་ཏེ། བློ་གྲོས་ཆེན་པོ་འདི་ལ་ལྟ་བ་ངན་པ་ལས་བཟློག་པའི་ཕྱིར་བརྩོན་པར་བྱའོ། །ཞེས་འབྱུང་ངོ་། །དེ་ཉིད་ཀྱི་ཕྱིར་ལམ་གཞན་གྱིས་ཐར་པར་འགྱུར་བ་མེད་པས་ཐེག་པ་གཅིག་ཁོ་ནའོ། །ཞེས་བཅོམ་ལྡན་འདས་ཀྱིས་བཀའ་བསྩལ་ཏོ། །ཞེས་སྒོམ་རིམ་དང་པོར་དྲངས་པ་དང་། བྱང་ཆུབ་སེམས་འགྲེལ་ལས། ཉན་ཐོས་དེ་དག་ཇི་སྲིད་དུ། །སངས་རྒྱས་རྣམས་ཀྱིས་མ་བསྐུལ་བ། །དེ་སྲིད་ཡེ་ཤེས་ལུས་གཅིག་གིས། །ཏིང་འཛིན་མྱོས་པས་བརྒྱལ་ཏེ་གནས། །བསྐུལ་ནས་སྣ་ཚོགས་གཟུགས་ཀྱིས་ནི། །སེམས་ཅན་དོན་ལ་དགའ་བྱེད་ཅིང་། །བསོད་ནམས་ཡེ་ཤེས་ཚོགས་བསགས་ནས། །སངས་རྒྱས་བྱང་ཆུབ་ཐོབ་པར་འགྱུར། །ཞེས་དང་། དཔལ་ལྡན་ཟླ་བས། འདི་དག་སྲིད་པས་སྐྲག་པ་ཡིས། །ཡིད་ཀྱིས་བྱང་ཆུབ་གཉིས་ཐོབ་པ། །ཚེ་ཟད་པར་ནི་དགར་འགྱུར་ཞིང་། །མྱ་ངན་འདས་ཐོབ་འདུ་ཤེས་ཅན། །དེ་དག་མྱ་ངན་འདས་ཡོད་མིན། །ཞེས་དང་། མི་ཤེས་ཉོན་མོངས་མིན་སྤངས་ཕྱིར། །ཕྱིས་ནས་སངས་རྒྱས་ཀྱིས་བསྐུལ་བས། །བྱང་ཆུབ་ཀྱི་ནི་ཚོགས་བསགས་ནས། །དེ་དག་འཇིག་རྟེན་འདྲེན་པར་འགྱུར། །ཞེས་གསུངས་པ་ལྟར་དམན་པའི་མྱང་འདས་གཉིས་པོ་ཐོབ་ཀྱང་ད་དུང་གྲོལ་བ་གཏན་དུ་བ་མ་ཡིན་པས་གདོད་ཐེག་ཆེན་ལ་འཇུག་དགོས་པས་ན་མཐར་ཐུག་ཐེག་གཅིག་ཏུ་སྒྲུབ་པའི་ཕྱིར་ཡང་གསུངས་པ། གང་ཟག་གི་བདག་མེད་ཕྲ་བ་མཐོང་བས་ཉོན་མོངས་ཙམ་སྤངས་ཀྱང་དེ་གྲོལ་བ་མཐར་ཐུག་པ་མ་ཡིན་ཏེ། གལ་ཏེ་ཉོན་མོངས་སྤངས་པ་ཁོ་ན་གྲོལ་ན་ཉོན་མོངས་མཐའ་དག་སྤངས་པ་དེའི་དེ་མ་ཐག་ཏུ་གྲོལ་བ་དེར་འགྱུར་རིགས་ཏེ་འཆིང་བ་མེད་པར་འདོད་པས་སོ། །འདོད་ཟེར་ན། ཉོན་མོངས་པ་མེད་ཀྱང་འཕགས་པ་དགྲ་བཅོམ་པ་མོའུ་འགལ་བུ་ལྟ་བུ་དེ་དག་ལ། སྔོན་གྱི་ལས་ཀྱི་ནུས་པ་སྨིན་པར་ད་དུང་མཐོང་བ་ཡིན་པས་གནོད་དོ། །དེ་དག་ན་རེ། སྐྱོན་མེད་དེ་སྔར་གྱི་ལས་ཉོན་གྱིས་འཕངས་པའི་སྐུ་ཚེ་འདི་ལ་ལས་ཀྱི་ནུས་པ་འབྱིན་པར་མཐོང་ཡང་། རེ་ཞིག་ཡང་སྲིད་ཉེ་བར་ལེན་པའི་རྒྱུ་སྲེད་པ་ཡིན་པས་དེ་མེད་ཅིང་དེའི་ཕྱིར་སྲིད་པ་གཞན་དུ་མཚམས་སྦྱོར་བ་ནི་མེད་ཅེས་ངེས་པ་ཉིད་དུ་སྨྲའོ་ཅེ་ན། ཉན་རང་དགྲ་བཅོམ་པ་འདི་ལས་ཉོན་གྱིས་འཕངས་པའི་སྲིད་པ་རྣམས་སུ་མཚམས་མི་སྦྱོར་དུ་ཆུག་མོད། འོན་ཀྱང་ཁྱོད་རང་གི་འདོད་པ་ལྟར་མར་མེ་རྒྱུན་ཆད་པ་བཞིན་དུ་ཞི་བར་འགྱུར་བ་མིན་ཏེ་འདི་ལ་ཡིད་ཀྱི་རང་བཞིན་གྱི་ལུས་འགྲུབ་པའི་རྒྱུ་ཚོགས་པ་ཚང་ཞིང་གེགས་མེད་པ་ཡོད་པའི་ཕྱིར། གང་ཞེ་ན། དགྲ་བཅོམ་པའི་རྒྱུད་ཀྱི་སྲེད་པ་འདི་ངར་འཛིན་གྱིས་བསྐྱེད་པའི་ཉོན་མོངས་ཅན་དེ་མིན་ཡང་། དཔེར་ན་ཉོན་མོངས་ཅན་མིན་པའི་ཀུན་རྨོངས་ཏེ་ཡུལ་དུས་བསྐལ་པའི་དངོས་པོ་མི་ཤེས་པའི་རྨོངས་པ་ཡོད་པར་ཁྱོད་ཀྱང་འདོད་པ་དེ་བཞིན་དུ་སྲེད་པ་ལའང་ཉོན་མོངས་ཅན་མིན་པ་ཞིག་ཅི་སྟེ་མེད། དེའི་ཕྱིར་རྒྱུ་ཀུན་རྨོངས་མ་ལོག་པས་དེའི་འབྲས་བུའི་ཆ་ཡང་མི་ལྡོག་སྟེ། འདི་ལྟར་ཚོར་བའི་རྐྱེན་གྱིས་སྲེད་པ་སྐྱེ་བ་ཡིན་ན། ཚོར་བ་ནི་དགྲ་བཅོམ་པ་དེ་དག་ལའང་ཡོད་པས་སོ་ཞེས་རྒྱུ་ཚོགས་གྲངས་ཚང་གི་གཏན་ཚིགས་ཀྱིས་བསྒྲུབས་ཏེ། མ་རིག་བག་ཆགས་ཀྱི་ས་དང་། དེའི་དབང་གིས་ཟག་མེད་ཀྱིས་ལས་དང་། ཡིད་ཀྱི་ལས་དང་། བསམ་མི་ཁྱབ་འགྱུར་གྱི་འཆི་འཕོ་བ་རྣམས་མ་སྤངས་པས་གྲོལ་བ་གཏན་དུ་བ་མིན་ལ་ཕུང་པོ་ཕྲ་བ་རྒྱུན་ཀྱང་མི་འཆད་པས་གདོད་ཐེག་ཆེན་དུ་འཇུག་དགོས་ཏེ། སྤང་བྱ་ཤིན་ཏུ་ཕྲ་བ་མི་སྤོང་བའང་ཆོས་བདག་མེད་རྫོགས་པར་རྟོགས་ཤིང་བསྒོམ་པ་མེད་པ་དེས་ནའོ། །དེ་ལྟར་ཡང་དཔལ་ཕྲེང་སེང་གེ་སྒྲའི་མདོ་ལས། བཅོམ་ལྡན་འདས་དེ་ལྟ་ལགས་པས་དགྲ་བཅོམ་པ་རྣམས་དང་རང་སངས་རྒྱས་རྣམས་ཀྱང་སྐྱེ་བའི་ཆོས་ཀྱི་ལྷག་མ་དང་བཅས་པ་ལགས་ཏེ་ཞེས་དང་། བཅོམ་ལྡན་འདས་འཆི་འཕོ་ནི་འདི་གཉིས་ལགས་ཏེ། གཉིས་གང་ཞེ་ན་རྒྱུན་ཆད་པའི་འཆི་འཕོ་དང་། ཡོངས་སུ་བསྔོས་པ་བསམ་གྱིས་མི་ཁྱབ་པའི་འཆི་འཕོ་བ་ལགས་སོ། །བཅོམ་ལྡན་འདས་དེ་ལ་རྒྱུན་ཆད་པའི་འཆི་འཕོ་ནི་ཉིང་མཚམས་སྦྱོར་བ་དང་བཅས་པའི་སེམས་ཅན་རྣམས་ཀྱི་ལགས་སོ། །བཅོམ་ལྡན་འདས་ཡོངས་སུ་བསྔོ་བ་བསམ་གྱིས་མི་ཁྱབ་པའི་འཆི་འཕོ་ནི་དགྲ་བཅོམ་པ་རྣམས་དང་རང་སངས་རྒྱས་རྣམས་དང་བྱང་ཆུབ་སེམས་དཔའ་ཆེན་པོ་དབང་ཐོབ་པ་དང་ཡིད་ཀྱི་ལུས་རྣམས་ལགས་ཏེ་བྱང་ཆུབ་སྙིང་པོ་ལ་ཐུག་གི་བར་དུ་ལགས་པས་སོ། །ཞེས་དང་། དེ་ལ་འཆི་འཕོ་བ་དང་པོའི་དབང་དུ་བྱས་ནས་བདག་གི་སྐྱེ་བ་ཟད་དོ་སྙམ་དུ་དགྲ་བཅོམ་པ་དང་རང་སངས་རྒྱས་ཀྱི་ཤེས་པ་འབྱུང་བ་ཞེས་སོགས་དང་མ་རིག་པའི་གནས་ཀྱི་ས་ནི་སྟོབས་ཆེ་སྟེ། དེ་ཉན་རང་གི་ཤེས་པས་མི་བརྫི་ལ་དེ་བཞིན་གཤེགས་པའི་བྱང་ཆུབ་ཀྱི་ཡེ་ཤེས་ཀྱིས་གཞོམ་པར་བྱ་བ་ཞེས་དང་། བཅོམ་ལྡན་འདས་དཔེར་ན་ལེན་པའི་རྐྱེན་གྱིས་ཟག་པ་དང་བཅས་པའི་ལས་ཀྱི་རྒྱུ་ལས་སྲིད་པ་གསུམ་འབྱུང་བ་བཞིན་དུ། བཅོམ་ལྡན་འདས་མ་རིག་པའི་གནས་ཀྱི་སའི་རྐྱེན་གྱིས་ཟག་པ་མ་མཆིས་པའི་ལས་ཀྱི་རྒྱུ་ལས་བྱུང་བའི་དགྲ་བཅོམ་པ་རྣམས་དང་རང་སངས་རྒྱས་རྣམས་དང་བྱང་ཆུབ་སེམས་དཔའ་དབང་ཐོབ་པ་རྣམས་ཀྱི་ཡིད་ཀྱི་ལས་གསུམ་འབྱུང་སྟེ། ཞེས་སོགས་དང་། བཅོམ་ལྡན་འདས་བཟང་ངན་རབ་ཏུ་འབྱེད་པའི་ཆོས་ཅན་དག་ནི་མྱ་ངན་ལས་འདས་པ་ཐོབ་པ་མ་ལགས་ཀྱི་བཅོམ་ལྡན་འདས་ཡེ་ཤེས་མཉམ་པ་དག་གིས་མྱ་ངན་ལས་འདས་པ་ཐོབ་པ་ལགས་སོ། །ཞེས་སོགས་དང་། གཞན་ཡང་གྲོལ་བ་དང་ཡེ་ཤེས་མཉམ་པ་གཅིག་པུ་མྱང་འདས་ཡིན་ལ་དེ་ལྟ་བུའི་སྤངས་རྟོགས་མཐར་ཕྱིན་ཉན་རང་ལ་མེད་པས་མཐར་ཐུག་གི་གྲོལ་བ་མིན་པ་དང་། སྟོབས་དང་མི་འཇིགས་པ་སོགས་ལ་སྒྲིབ་པའི་ཉེ་བའི་ཉོན་མོངས་པ་གང་གཱའི་ཀླུང་གི་བྱེ་མ་སྙེད་དག་མ་རིག་བག་ཆགས་ཀྱི་ས་ལས་བྱུང་བ་ཡིན་པས་དེ་སྤངས་ན་ཐམས་ཅད་མཁྱེན་པའི་སེང་གེའི་སྒྲ་སྒྲོགས་པར་གསུངས་ཤིང་། མཐར་ཐུག་ཐེག་གཅིག་ཆོས་ཀྱི་སྐུར་གྲོལ་བ་རིགས་གཅིག་ལས་མེད་པ་དང་། འཕགས་པའི་བདེན་དོན་ཟབ་མོ་བདེ་གཤེགས་སྙིང་པོ་རྟོགས་པ་ལས་མཐར་ཐུག་གི་གྲོལ་བ་འབྱུང་ཡང་དེ་ཉན་རང་གི་སྤྱོད་ཡུལ་མིན་ཞིང་། སྡུག་བསྔལ་འགོག་པའི་བདེན་པ་བསམ་གྱིས་མི་ཁྱབ་པ་དེ་ལྟ་བུ་ཉན་རང་གི་ཤེས་པའི་སྤྱོད་ཡུལ་མིན་པ་དམུས་ལོང་གིས་ཉི་མ་བལྟ་མི་ནུས་པའི་དཔེས་གསུངས་པ་བཞིན་ཏེ། རྒྱུད་བླ་མར། སངས་རྒྱས་མྱ་ངན་འདས་པ་ནི། །དམ་པའི་དོན་དུ་གཉིས་མེད་ཉིད། །ཅེས་དང་། དེས་ན་སངས་རྒྱས་མ་ཐོབ་བར། །མྱ་ངན་འདས་པ་མི་ཐོབ་སྟེ། །འོད་དང་འོད་ཟེར་སྤངས་ནས་ནི། །ཉི་མ་བལྟ་བར་མི་ནུས་བཞིན། །ཞེས་སོ། །སྐབས་འདིར་བོད་སྔ་ཕྱིའི་བཞེད་པ་འདྲ་མིན་དང་དགག་སྒྲུབ་རྣམ་བཞག་མང་ཡང་རེ་ཞིག་བཞག་ལ་ཤེས་པར་འདོད་ན་ཤེར་ཊཱིཀ་ཆེན་མོ་ཡན་ལག་དང་བཅས་པ་ལས་ཤེས་པར་བྱའོ། །འོ་ན་སངས་རྒྱས་ལའང་སེང་ལྡེང་གི་ཚལ་པ་ཟུག་པ་སོགས་ལས་ཀྱི་ནུས་པ་མ་མཐོང་ངམ་ཞེ་ན་དེ་ནི་ཚུར་མཐོང་བའི་བྱིས་པ་རྣམས་ཀྱི་ངོར་དགོས་པའི་དབང་གིས་བསྟན་པ་ཙམ་དུ་ཟད་དེ་ཀུན་རྟོག་ཆོས་ཀྱི་དབྱིངས་སུ་ནུབ་ཅིང་སྤྲུལ་པའི་གཟུགས་བརྙན་སྒྱུ་མ་ལྟ་བུ་ལ་ལས་དངོས་སུ་སྨིན་པ་དང་དུཿཁའི་ཚོར་བ་ག་ལ་ཡོད་དེ། ཉན་ཐོས་དགྲ་བཅོམ་པ་རྣམས་ཀྱི་སྐུ་ནི་སྡུག་བདེན་གྱི་ལྷག་མར་ཁྱོད་འདོད་ཅིང་སེམས་མ་འགགས་ལ་སྤྲོས་པ་མཐའ་དག་འགོག་པའི་རྒྱུ་མེད་པ་བཤད་མ་ཐག་པ་ཉིད་ཀྱི་ཕྱིར་རོ། །དེ་དག་ན་རེ། ལུས་ཞིག་ཚོར་བ་གསིལ་བར་འགྱུར། །འདུ་ཤེས་ཟད་ཅིང་འདུ་བྱེད་འགགས། །རྣམ་པར་ཤེས་པ་ནུབ་གྱུར་པ། །དེ་འདྲ་འདི་ནི་སྡུག་བསྔལ་མཐའ། །ཞེས་པ་བཞིན་དུ་གང་དགྲ་བཅོམ་པ་དེ་དག་སྐུ་ཚེའི་འདུ་བྱེད་གཏོང་བའི་ཚེ་ཕུང་ལྔ་རྒྱུན་ཆད་ཅིང་ཞི་བར་ཅི་སྟེ་མི་འགྱུར་ཏེ་སླར་ཡང་སྐྱེ་བའི་རྒྱུ་མ་ཚང་བས་སྣུམ་ཟད་པའི་མར་མེ་བཞིན་ནོ་སྙམ་ན། དེ་དག་འཁོར་བར་སྐྱེ་བའི་རྒྱུ་ཉོན་མོངས་པ་མེད་པས་སྲིད་པར་མི་སྐྱེ་ཡང་། ཆོས་ཐམས་ཅད་རང་བཞིན་མེད་པའི་སྟོང་ཉིད་རྫོགས་པར་མ་རྟོགས་པས་དམིགས་པ་དང་ནི་བཅས་པའི་སེམས་དེ་ནི་འཁོར་འདས་སྤང་གཉེན་དུ་འཛིན་པ་ལྟ་བུ་སོགས་ཀྱི་ཕྱོགས་སམ་སྤྲོས་པ་འགའ་ཞིག་ལ་ནི་གནས་པར་འགྱུར་གྱི་དམིགས་པ་མེད་པར་རབ་ཏུ་ཞི་བ་ནི་མ་ཡིན་ནོ། །དེའི་ཕྱིར་མཐའ་ཐམས་ཅད་སྤངས་པའི་སྟོང་པ་ཉིད་དང་བྲལ་བའི་སེམས་ཡོད་མེད་སོགས་སུ་ཞེན་པའི་སྤྲོས་པ་ཅན་དེ་ནི་རེ་ཞིག་འགོག་པའི་དབྱིངས་སུ་འགགས་པར་གྱུར་པ་དག་སླར་ཡང་སྐྱེ་བར་འགྱུར་ཏེ། ཡིད་ལུས་འཕེན་པའི་རྒྱུ་ཟག་མེད་ཀྱི་ལས་དང་མ་རིག་བག་ཆགས་ཀྱི་ས་རྒྱུད་ལ་ལྡན་པའི་ཕྱིར་ཏེ། དེའི་གཉེན་པོ་སྤྲོས་པ་མཐའ་དག་འགག་པའི་སྟོང་ཉིད་མ་ཐོབ་པའི་ཕྱིར། དཔེར་ན་འདུ་ཤེས་མེད་པའི་སྙོམས་འཇུག་གམ་དེའི་འབྲས་བུ་འདུ་ཤེས་མེད་པའི་ལྷར་སྐྱེས་པ་བཞིན་ནོ། །དེ་ལྟར་ཡང་མྱང་འདས་ཆེན་པོའི་མདོ་ལས། དགྲ་བཅོམ་པ་ཡང་ཡོངས་སུ་མྱ་ངན་ལས་འདས་ནས་འགོག་པར་ཞུགས་ཏེ། བསྐལ་པ་སྟོང་ཕྲག་བཅུ་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ཡིན་ནོ། །ཞེས་དང་། དམ་ཆོས་པད་དཀར་སོགས་ཀྱི་ལུང་སྔར་དྲངས་པ་བཞིན་ནོ། །རྒྱུ་མཚན་དེས་ན་མྱ་ངན་ལས་འདས་པར་འདོད་པ་རྣམས་ཀྱིས་ཟབ་མོ་སྟོང་པ་ཉིད་བསྒོམ་པར་བྱ་སྟེ་དེ་སྤངས་ན་གནས་སྐབས་དང་མཐར་ཐུག་གི་མྱང་འདས་གང་ཡང་མི་འཐོབ་བོ། །གཞན་ཡང་ངག་གང་ཞིག་ལྷག་པ་སེམས་ཀྱི་བསླབ་པ་སྟོན་པས་མདོ་སྡེ་ལ་འཇུག ཚུལ་ཁྲིམས་ཀྱི་བསླབ་པ་སྟོན་པས་འདུལ་བ་ལ་སྣང་། ཤེས་རབ་ཀྱི་བསླབ་པ་སྟོན་པས་མངོན་པ་དང་མི་འགལ་བ་དེ་ནི་གལ་ཏེ་སངས་རྒྱས་ཀྱི་གསུང་དུ་འདོད་ན་ཡང་དམན་པའི་སྡེ་སྣོད་གསུམ་དང་མི་མཐུན་པས་ཐེག་ཆེན་བཀའ་མིན་ནོ་ཞེ་ན། དགོངས་འགྲེལ་སོགས་ཐེག་ཆེན་གྱི་མདོ་སྡེ་ཕལ་ཆེར་ལས་ཀྱང་བསླབ་པ་གསུམ་པོ་དེ་སྟོན་པས་ན་དེ་དག་ཁྱེད་ཅག་གི་མདོ་དང་མཚུངས་པར་འདོད་པ་མིན་ནམ་ཅི་སྟེ་འདོད་པར་རིགས་སོ། །གལ་ཏེ་གཟུགས་སོགས་མེད་པར་བསྟན་པ་སོགས་དམན་པའི་སྡེ་སྣོད་དུ་མ་གཏོགས་པའི་ཐེག་ཆེན་ཐུན་མིན་གྱི་བརྗོད་བྱ་སྟོན་པའི་ཡུམ་ལྟ་བུ་གཅིག་གིས་ནི་ཐེག་ཆེན་གྱི་མདོ་ཐམས་ཅད་སངས་རྒྱས་ཀྱི་བཀའ་མ་ཡིན་པའི་སྐྱོན་དང་བཅས་པར་འགྱུར་ན། དགོངས་འགྲེལ་སོགས་ཐེག་དམན་གྱི་མདོ་དང་བཀའི་མཚན་ཉིད་ཚང་བར་མཚུངས་པ་གཅིག་གིས་ཀྱང་ཐེག་ཆེན་གྱི་མདོ་ཐམས་ཅད་ནི། རྒྱལ་བས་གསུངས་པ་ཅིས་མ་ཡིན་ཏེ། དེ་གཉིས་རྒྱུ་མཚན་མཚུངས་པས་སོ། །དེས་ན་ཕྱོགས་རེ་བའི་དབང་དུ་བྱས་ཏེ་ཐེག་དམན་གྱི་སྡེ་སྣོད་ཁ་ོན་དང་འདྲ་དགོས་པ་མིན་ཏེ། བརྗོད་བྱ་བསླབ་པ་གསུམ་དང་མི་འགལ་བ་ལ་དགོངས་ནས་དེ་སྐད་དུ་བཤད་ན། དེ་ནི་ཐེག་ཆེན་ལའང་ཐེག་དམན་ལས་གོང་འཕེལ་གྱི་ཚུལ་དུ་ཡོད་དེ། མདོ་སྡེ་རྒྱན་ལས། རང་གི་ཉིད་ལ་འཇུག་པ་དང་། །རང་གི་འདུལ་ལའང་སྣང་ཕྱིར་དང་། །ཟབ་པའི་ཕྱིར་དང་རྒྱ་ཆེའི་ཕྱིར། །ཆོས་ཉིད་དང་ནི་འགལ་བ་མེད། །ཅེས་པ་བཞིན་ནོ། །ཡུམ་རྒྱས་པ་སོགས་བཀའ་ཡིན་ན་འོད་སྲུང་ཆེན་པོ་སོགས་ཀྱིས་བརྗོད་བྱ་དེ་རྟོགས་རིགས་ཤིང་། དེ་ལས་བླ་མ་བརྒྱུད་པ་བར་མ་ཆད་པ་ལས་བཟུང་བར་རིགས་ནའང་། དེ་མིན་པའི་ཕྱིར་བཀའ་མིན་ནོ་ཞ ེ་ན། ཐེག་ཆེན་གྱི་ངག་གང་ཞིག་འོད་སྲུང་ཆེན་པོ་ལ་སོགས་པས་ཀྱང་གཏིང་དཔོག་པར་མ་གྱུར་པའི་ཟབ་པ་དེ་ནི་ཁྱོད་ཉིད་ཀྱིས་མ་རྟོགས་པས་སངས་རྒྱས་ཀྱི་བཀའ་མ་ཡིན་ཞེས་སྤོང་བའི་རྒྱུ་མཚན་དེས་གཟུང་བྱ་མིན་པར་སུ་ཞིག་གིས་བྱེད་དེ། ཐེག་ཆེན་ཉིད་ཟབ་པའི་རྟོགས་དཀའ་བའི་ཡོན་ཏན་དུ་ཤེས་ཏེ། མདོ་རྒྱན་ལས། བདག་གིས་མི་ཤེས་སངས་རྒྱས་ཟབ་མོ་མཁྱེན་མ་ཡིན། །ཟབ་མོ་ཅི་ཡི་ཕྱིར་ན་རྟོག་གེའི་ཡུལ་མ་ཡིན། །ཅི་ཕྱིར་ཟབ་མོའི་དོན་རིག་པ་དག་ཐར་འགྱུར་ཞེས། །བྱ་བ་དེ་ནི་སྐྲག་པའི་གནས་སུ་རིགས་མ་ཡིན། །དམན་པར་མོས་ཤིང་ཁམས་ཀྱང་ཤིན་ཏུ་དམན། །གྲོགས་པོ་དམན་པ་དག་གིས་ཡོངས་བསྐོར་བ། །ཟབ་ཅིང་རྒྱ་ཆེ་ལེགས་པར་བཤད་པའི་ཆོས། །འདི་ལ་གལ་ཏེ་མོས་མེད་གྲུབ་པ་ཡིན། །ཞེས་གསུངས། ཡང་ན་འོད་སྲུང་ལ་སོགས་པས་ཐེག་ཆེན་གྱི་མདོའི་དོན་གཏིང་མ་དཔོག་པ་ཁྱོད་ཀྱིས་མ་རྟོགས་ཏེ་མ་གྲུབ་པས་དེ་རྒྱུ་མཚན་དུ་བྱས་ནས་ཐེག་ཆེན་གཟུང་བྱ་མིན་པར་སུ་ཞིག་གིས་བྱེད་དེ་རྒྱུ་མཚན་མ་གྲུབ་པས་རྒྱུ་མཚན་ཅན་དེ་མི་འགྲུབ་ཅེའོ། །ཤོ་ལོ་ཀ་འདི་གསུམ་སྐབས་འཆོལ་བས་གཞུང་གི་ཚིག་མིན་ཏེ་གཞན་གྱིས་བསྣན་པའོ། །ཞེས་འགྲེལ་པར་བཤད་མོད། གང་ལྟར་ཡང་རུང་ཚིག་གི་དོན་ནི་དེ་ལྟར་རོ། །ཡང་དེ་དག་ན་རེ། གལ་ཏེ་སྟོང་པ་ཉིད་མཐོང་ན་འཁོར་བར་གནས་པར་མི་འགྱུར་ཞིང་ལམ་དང་འབྲས་བུ་ལ་མི་བརྩོན་པར་འགྱུར་རོ་ཞེ་ན། མ་ཡིན་ཏེ། དོན་དམ་པར་སྡུག་བསྔལ་མི་སྲིད་ཀྱང་། རང་སེམས་རྨོངས་པ་ཡི་དབང་གིས་སྡུག་བསྔལ་བ་ཅན་སེམས་ཅན་གཞན་གྱི་དོན་དུ་སྒྱུ་མ་ལྟ་བུར་མཐོང་བའི་བློས་སྲིད་པ་ལ་ཆགས་པ་དང་། དེ་ལ་སྐྲག་ཅིང་འཇིགས་པའི་དབང་གིས་ཞི་མཐར་ཞེན་པའི་མཐའ་གཉིས་ཀ་ལས་གྲོལ་བ་ཡིན་ཏེ། སྲིད་པར་གནས་ཀྱང་སྲིད་པའི་སྐྱོན་གྱིས་མ་གོས་པར་འདམ་གྱི་པདྨ་བཞིན་དུ་འཁོར་བར་གནས་ཏེ་གཞན་དོན་དཔག་ཏུ་མེད་པ་འགྲུབ་པར་འགྱུར་བ་འདི་ནི་སྟོང་ཉིད་རྟོགས་པའི་འབྲས་བུ་ཡིན་གྱི། གཞན་དུ་སྲིད་ཞི་མཉམ་ཉིད་མ་རྟོགས་ན་སྲིད་ལ་སྐྱོན་དང་ཞི་ལ་ཡོན་ཏན་གྱི་བློས་ཞི་བ་ཕྱོགས་གཅིག་པར་འགྱུར་རོ། །གསུམ་པ་དོན་བསྡུ་བ་ནི། དེ་ལྟར་ཟབ་མོ་སྟོང་པ་ཉིད་ཀྱི་ཕྱོགས་ལ་སུན་འབྱིན་བརྗོད་པ་འདི་དག་ནི་འཐད་པ་མ་ཡིན་ཏེ་ཐེག་གསུམ་གྱི་བྱང་ཆུབ་འདི་ལ་རག་ལས་པའི་ཕྱིར་རོ། །དེས་ན་ཐེ་ཚོམ་ཙམ་ཡང་མི་ཟ་བར་གནས་ལུགས་ཟབ་མོ་སྟོང་པ་ཉིད་ནི་འབད་པས་བསྒོམ་པར་བྱའོ། །ཐར་པ་དང་ཐམས་ཅད་མཁྱེན་པ་ལ་གེགས་སུ་གྱུར་པའི་ཆགས་སོགས་ཉོན་མོངས་པ་དང་འཁོར་གསུམ་དུ་རྟོག་པ་ཤེས་བྱའི་སྒྲིབ་པ་ཡི་མུན་པའི་གཉེན་པོ་ནི་སྟོང་པ་ཉིད་ཀྱི་སྒྲོན་མེ་ལས་གཞན་དུ་མེད་ན་མྱུར་དུ་སྒྲིབ་གཉིས་དང་བྲལ་བའི་རྣམ་པ་ཐམས་ཅད་མཁྱེན་པ་ཉིད་ཐོབ་པར་འདོད་པས་ཟབ་མོ་སྟོང་པ་ཉིད་དེ་ནི་ཇི་ལྟར་དུ་སྒོམ་པར་མི་བྱེད། དངོས་པོ་གང་ཞིག་སྡུག་བསྔལ་སྐྱེད་པར་བྱེད་པ་དེ་ལ་ནི་སྐྲག་པ་སྐྱེ་བར་འགྱུར་རིགས་ན་ཡང་། སྟོང་ཉིད་ནི་སྡུག་བསྔལ་ཐམས་ཅད་རྩད་ནས་ཞི་བར་བྱེད་པ་ཡིན་པས་དེ་ལ་འཇིགས་པ་ཇི་ལྟར་སྐྱེ་སྟེ་དགའ་བའི་གནས་ལ་སྐྲག་པར་མི་རིགས་སོ། །གཞན་ཡང་གལ་ཏེ་འཇིགས་པ་པོ་བདག་འགའ་ཡོད་པར་གྱུར་ན་ནི་ཡུལ་ཅི་ཡང་རུང་བ་ལ་འཇིགས་པ་སྐྱེ་བར་འགྱུར་ནའང་། འཇིགས་པ་པོའམ་འཇིགས་མཁན་གྱི་བདག་དེ་ཉིད་བཙལ་ན་འགའ་ཡང་ཡོད་པ་མིན་པས་འཇིགས་པར་འགྱུར་བ་པོ་དེ་སུ་ཞིག་ཡིན། དེས་ན་སྟོང་པ་ཉིད་ལ་ཞུམ་པ་སྤངས་ཏེ་མྱུར་དུ་སྒོམ་པར་གྱིས་ཤིག ཅེས་མཚམས་སྦྱར་ནས། གཉིས་པ་ལམ་བདག་མེད་དུ་རིགས་པས་གཏན་ལ་དབབ་པ་ལ། དངོས་དང་། སྟོང་ཉིད་རྟོགས་པའི་བྱེད་ལས་གཉིས། དང་པོ་ལ། གང་ཟག་གི་བདག་མེད་དང་། ཆོས་ཀྱི་བདག་མེད་གཉིས། དང་པོ་ལ་ལྷན་སྐྱེས་ཀྱི་བདག་དགག ཀུན་བརྟགས་ཀྱི་བདག་དགག དེ་ལྟར་བཀག་པ་ལ་རྩོད་པ་སྤོང་བའོ། །དང་པོ་ལྷན་སྐྱེས་ཀྱི་བདག་དགག་པ་ནི། བདག་རྒྱུད་ཀྱི་ཕུང་པོ་ལྔ་པོ་འདི་ལ་བརྟེན་ནས་ངའོ་སྙམ་དུ་མ་བརྟགས་མ་དཔྱད་པར་འཛིན་པའི་འཇིག་ལྟ་འདིའི་ཡུལ་དུ་གྱུར་པའི་བདག་དེ་ཡོད་ན་ནི་ཕུང་པོ་ལྔ་པོ་འདི་ལ་ཡོད་དགོས་ཀྱི་འདི་ལས་གཞན་ཞིག་ཏུ་བདག་ཡོད་པར་མི་འདོད་པས་འདི་ལྟར་བདག་དེ་ཇི་ལྟར་གྲུབ་པའི་ཚུལ་ཤེས་རབ་ཀྱིས་དཔྱད་ན། རང་གི་ལུས་ཀྱི་སོ་དང་སྐྲ་དང་སེན་མོ་རྣམས་ནི་བདག་མ་ཡིན་ལ། དེ་བཞིན་དུ་བདག་ནི་རུས་པ་དང་ཁྲག་ཀྱང་མ་ཡིན་སྣབས་མིན་ལ་བད་ཀན་ཡང་མ་ཡིན་ཏེ། ཆུ་སེར་དང་ནི་རྣག་ཀྱང་བདག་མིན་ཞིང་བདག་ནི་ལུས་ཕྱི་ནང་གི་ཞག་དང་ལུས་ཀྱི་རྔུལ་བ་ཡང་མིན་ཏེ་གློ་བ་དང་མཆིན་པ་དག་ཀྱང་བདག་མ་ཡིན། སྙིང་དང་རྒྱུ་མ་སོགས་ནང་ཁྲོལ་གཞན་ཡང་བདག་མིན་ཏེ། བདག་ནི་ཕྱི་ས་སྟེ་དྲི་ཆེན་དང་གཅིན་སོགས་ཀྱང་མ་ཡིན་ལ། ཤ་དང་པགས་པ་ཡང་བདག་མིན་ཏེ་གཞན་ཡང་ལུས་ཀྱི་དྲོད་དང་དབུགས་འབྱིན་རྔུབ་སོགས་ལུས་ཕྱི་ནང་གི་རླུང་ཡང་བདག་མ་ཡིན། རྣ་བ་སྣ་སོགས་ཀྱི་བུ་ག་རྣམས་ཀྱང་བདག་མིན་ཏེ། དེ་དག་རྣམས་ནི་ཆ་དུ་མ་སིལ་བུ་བ་རྡུལ་ཕྲན་མང་པོ་ལས་བྱུང་བ་མི་རྟག་པ་ཡིན་པས། དེའི་ཚོགས་པའམ་ཡ་གྱལ་གང་ཡང་བདག་མིན་ནོ། །དེ་བཞིན་དུ་རྣམ་པ་ཀུན་ཏུ་མིག་རྣ་སྣ་ལྕེ་ལུས་དང་ཡིད་ཀྱི་རྣམ་པར་ཤེས་པའི་ཁམས་དྲུག་པོ་དག་ཀྱང་བདག་མ་ཡིན་ཏེ་དུ་མ་དང་མི་རྟག་པའི་ཕྱིར་རོ། །དེས་ན་སོ་ནས་པགས་པའི་བར་གྱི་ས་ཆུའི་ཁམས་གཉིས་དང་། དྲོད་མེ་ཁམས། དབུགས་རླུང་ཁམས། བུ་ག་ནམ་མཁའི་ཁམས། སེམས་ཅན་རྣམ་ཤེས་ཀྱི་ཁམས་ཏེ་ཁམས་དྲུག་པོ་འདུས་པ་ལ་གང་ཟག་ཅེས་བཏགས་ཤིང་ཞེན་པར་གྱུར་གྱི། ཞེས་རྫས་སུ་ཡོད་པ་མིན་ཏེ་དཔེར་ན་ཐག་ཁྲ་ལ་སྦྲུལ་དུ་མཐོང་བ་བཞིན་ཕྱིན་ཅི་ལོག་ཏུ་ཞེན་ཞིང་འཁྲུལ་པ་འབའ་ཞིག་གོ །དེའི་ཕྱིར་འོལ་སྤྱི་ཙམ་དུ་མ་སོང་བར་དེ་ལྟར་ཡང་ནས་ཡང་དུ་བརྟགས་ཤིང་དཔྱད་པས། ཇི་ཞིག་ན་ཐག་པ་དངོས་སུ་མཐོང་བས་སྦྲུལ་འཛིན་གྱི་བློ་ཞི་བ་བཞིན་དུ་ཕུང་པོ་ལྔ་པོ་འདི་ལ་བདག་ཏུ་བཟུང་བའི་བདག་ནི་བཏགས་པ་ཙམ་ལས་ངེས་པར་མེད་དོ་ཞེས་ཐེ་ཚོམ་གྱི་དཔྱང་ཐག་ཆོད་པའི་ཉམས་མྱོང་ཁོང་ནས་ཤར་བ་ཞིག་བྱུང་ན། དེ་གའི་རྒྱུན་ཡུན་རིང་དུ་གོམས་པས་བདག་མེད་མངོན་སུམ་དུ་མཐོང་བར་འགྱུར་རོ། །གཉིས་པ་ཀུན་བརྟགས་ཀྱི་བདག་དགག་པ་ལ་གཉིས། བདག་ཤེས་པར་འདོད་པ་དགག་པ། བདག་བེམ་པོར་འདོད་པ་དགག་པའོ། །དང་པོ་བདག་ཤེས་པར་འདོད་པ་དགག་པ་ནི། དེ་ཡང་སྟོན་པ་དྲང་སྲོང་སེར་སྐྱའི་རྗེས་འབྲང་ཤེས་བྱ་རྣམས་རྣམ་གྲངས་ཉེར་ལྔར་གྲངས་ངེས་པར་འདོད་པ་མུ་སྟེགས་གྲངས་ཅན་པ་རྣམས་ན་རེ། ཤེས་བྱ་ཐམས་ཅད་དེ་ཉིད་ཉི་ཤུ་རྩ་ལྔར་གནས་ཏེ། དེ་ལ་བདག་ཤེས་རིག་གི་སྐྱེས་བུ་རྣམ་འགྱུར་ཀུན་ཟ་བ་པོ་ཡིན་པ། ལས་བྱེད་པ་པོ་མིན་པ། རྟག་པའི་དངོས་པོ། བདེ་སོགས་ཡོན་ཏན་གསུམ་དང་བྲལ་བ། བརྐྱང་བསྐུམ་ལ་སོགས་པའི་བྱ་བ་མེད་པ་ཞིག་ཏུ་འདོད། དེའི་སྤྱོད་ཡུལ་ཐམས་ཅད་ནི་གཙོ་བོ་ལས་བྱུང་སྟེ། རྡུལ་སྡུག་བསྔལ་དང་། སྙིང་སྟོབས་བདེ་བ་དང་། མུན་པ་བཏང་སྙོམས་ཀྱི་ཡོན་ཏན་རྣམ་པ་གསུམ་ཆ་མཉམ་པ་ན་གཙོ་བོ་ཞེས་བརྗོད་དེ་རྣམ་འགྱུར་ཉེར་གསུམ་འབྱུང་བའི་རྒྱུ་སྟེ་བུམ་པའི་རྒྱུ་འཇིམ་པ་ལྟ་བུའོ། །དེ་ལས་བློའམ་ཆེན་པོ་ཞེས་པ་མེ་ལོང་ངོས་གཉིས་པ་ལྟ་བུ་དེར་ཕྱི་ནས་དེ་ཙམ་ལྔ་དང་ནང་ནས་སྐྱེས་བུ་གཉིས་ཀ་སྣང་སྟེ་དེ་གཉིས་འདྲེས་པ་ལྟ་བུར་མཚམས་སྦྱོར་བར་བྱེད་དོ། །ཡུལ་ལ་ལོངས་སྤྱོད་པ་དེའི་དབང་ལས་ང་རྒྱལ་འབྱུང་སྟེ། དེའང་རྣམ་པར་འགྱུར་བ་ཅན། སྙིང་སྟོབས་ཅན། མུན་པ་ཅན་གྱི་ང་རྒྱལ་ཏེ་ཡོན་ཏན་གསུམ་གྱིས་དབང་གིས་སོ། །དེ་དག་གི་ནང་ནས་ང་རྒྱལ་དང་པོ་རྣམ་པར་འགྱུར་བ་ཅན་ལས་སྒྲ་དང་རེག་དང་གཟུགས་དང་རོ་དང་དྲི་སྟེ་དེ་ཙམ་ལྔ་འབྱུང་ཞིང་། དེ་དག་ལས་ཀྱང་། སྒྲ་ལས་ནམ་མཁའ། རེག་ལས་རླུང་། གཟུགས་ལས་མེ། རོ་ལས་ཆུ། དྲི་ལས་ས་སྟེ་འབྱུང་བ་ལྔ་འབྱུང་ངོ་། །སྙིང་སྟོབས་ཅན་གྱི་ང་རྒྱལ་ལས། མིག རྣ་བ། སྣ། ལྕེ། པགས་པའམ་ལུས་ཀྱི་དབང་པོ་སྟེ་བློའི་དབང་པོ་ལྔ་དང་། ཁ། རྐང་པ། ལག་པ། རྐུབ། མདོམས་ཏེ་རིམ་པར་སྨྲ་བ་དང་། འགྲོ་བ་དང་། སྟེར་བ་དང་། བཤང་བ་དང་། འཁྲིག་པ་རྣམས་ལ་དབང་བྱེད་པས་ལས་ཀྱི་དབང་པོ་ལྔ་དང་། ཐུན་མོང་དུ་ཐམས་ཅད་ལ་ཁྱབ་པ་ཡིད་ཀྱི་དབང་པོ་དང་བཅས་བཅུ་གཅིག་འབྱུང་། མུན་པ་ཅན་གྱིས་དེ་གཉིས་ཀྱི་གྲོགས་བྱེད་པ་ལས་གཞན་མི་བསྐྱེད་དོ། །དེ་ལ་གཙོ་བོ་ནི་རྒྱུ་ཡིན་ལ་འབྲས་བུ་མ་ཡིན་པའི་ཕྱིར་རང་བཞིན་ཁོ་ན་ཡིན་པའི་མུ། ཆེན་པོ། ང་རྒྱལ། དེ་ཙམ་ལྔ་སྟེ་བདུན་ནི་འབྲས་བུའང་ཡིན་ལ་རྒྱུ་ཡང་ཡིན་པའི་ཕྱིར་རང་བཞིན་དང་རྣམ་འགྱུར་གཉིས་ཀ་ཡིན་པའི་མུ། དབང་པོ་བཅུ་གཅིག་སོགས་ལྷག་མ་བཅུ་དྲུག་ནི་འབྲས་བུ་ཡིན་ལ་རྒྱུ་མ་ཡིན་པའི་ཕྱིར་རྣམ་འགྱུར་ཁོ་ན་ཡིན་པའི་མུ། སྐྱེས་བུ་ནི་རྒྱུ་འབྲས་གཉིས་ཀ་མ་ཡིན་པས་རང་བཞིན་དང་རྣམ་འགྱུར་གཉིས་ཀ་མ་ཡིན་པའི་མུ་སྟེ་མུ་བཞིའོ། །རྩ་བའི་རང་བཞིན་དང་སྤྱི་དང་གཙོ་བོ་རྣམས་དོན་གཅིགབློ་དང་ཆེན་པོ་གཉིས་དོན་གཅིག བདག་དང་གང་ཟག་དང་ཤེས་རིག་གི་སྐྱེས་བུ་རྣམས་དོན་གཅིག སྐྱེས་བུ་ནི་ཤེས་པ་ཡིན་ལ་གཞན་ཉེར་བཞི་བེམ་པོ་དང་། གཙོ་བོ་དང་སྐྱེས་བུ་ནི་རྟག་པའོ། །དེ་ལ་དེ་ལྟར་བདེ་སོགས་ནི་ཕྱི་རོལ་གྱི་བེམ་པོའི་རང་བཞིན་ཡིན་གྱི་ནང་ཤེས་པའི་རྫས་སུ་མེད་ཀྱང་། བློའམ་ཆེན་པོ་ལ་སྣང་ནས་ཡོད་པ་བདག་གིས་ལོངས་སྤྱོད་པའི་ཚེ་བདག་ཤེས་པ་དང་ཐ་དད་དུ་དབྱེ་མ་ནུས་པས་བདག་གི་བར་རློམ་པ་ཙམ་དུ་འདོད་དོ། །དེ་ལྟར་འདི་པས་བདག་ཤེས་པར་འདོད་ལ། བྱེ་བྲག་པ་སོགས་ཀྱིས་བེམ་པོར་འདོད་པས་དེ་གཉིས་བཀག་པས་གཞན་ཀུན་ཁེགས་པར་འགྱུར་རོ། །དེ་དགག་པ་ལ། གྲངས་ཅན་པའི་འདོད་པ་ལྟར་བདག་ཤེས་པའི་རང་བཞིན་རྟག་པ་ནི་མེད་དེ། གལ་ཏེ་སྒྲ་འཛིན་པ་ཡི་ཤེས་པ་དེ་རྟག་པ་ཞིག་ཡིན་ན་ནི། ཡུལ་ཡོད་པ་དང་མེད་པའི་དུས་ཐམས་ཅད་ཀྱི་ཚེ་ན་སྒྲ་འཛིན་པར་འགྱུར་ཏེ་ཇི་ལྟར་སྒྲ་འཛིན་བཞིན་པའི་སྐབས་དེ་ཉིད་ཀྱི་ཤེས་པ་དེ། དེ་བཞིན་དུ་རྟག་པར་འདོད་པའི་ཕྱིར། ཁོ་ན་རེ། དུས་ཐམས་ཅད་དུ་སྒྲ་མི་འཛིན་པ་ནི་ཤེས་པ་མི་རྟག་པ་མ་ཡིན་ཀྱང་། ཡུལ་སྒྲ་དེ་ད་ལྟ་ཡུལ་ན་མེད་པས་སོ་ཞེ་ན། ཡུལ་སྒྲ་ལྟ་བུའི་ཤེས་བྱ་དེ་མེད་ན་ཡུལ་ཅན་དེས་ཅི་ཞིག་རིག་ནས་རྒྱུ་མཚན་གང་གིས་ཡུལ་དེ་དང་དེ་ཡི་ཤེས་པ་ཞེས་རྗོད་པར་བྱེད། གལ་ཏེ་ཡུལ་དེ་བཟུང་བའམ་ཤེས་པ་མེད་ཀྱང་དེ་ཤེས་པ་ཡིན་ནོ་ཞེས་རྣམ་པར་འཇོག་ན། ཤིང་ཡང་སྒྲ་སོགས་ཤེས་པའི་ཤེས་པ་ཡིན་པར་ཐལ་བར་འགྱུར་ཏེ། ཡུལ་མ་ཤེས་ཀྱང་ཤེས་པ་ཡིན་པའི་ཕྱིར་རོ། །དེས་ན་ཡུལ་ཤེས་བྱ་ཉིད་ཡུལ་དུ་ཉེ་བར་གནས་པ་མེད་པར་དེ་ཡི་ཡུལ་ཅན་གྱི་ཤེས་པ་དེ་ཡང་མེད་ཅེས་སུ་ངེས་ཏེ། ཤེས་པ་ནི་ཡུལ་གང་དང་གང་ཤེས་པ་དེ་ལ་ལྟོས་པ་ཅན་ཡིན་གྱི་ཡུལ་མ་ཤེས་ཀྱང་ཤེས་པ་ཡིན་པ་ནི་མི་སྲིད་དོ། །དེའི་ཕྱིར་ཡུལ་སྒྲ་མེད་པ་བཞིན་དུ་སྒྲ་དེ་ལས་སྐྱེས་པའི་ཡུལ་ཅན་སྒྲའི་ཤེས་པའང་རྒྱུ་ལོག་པས་ད་ལྟ་ག་ལ་ཡོད། དེ་བཞིན་དུ་སྒྲའི་སྐད་ཅིག་གི་ཡུལ་ཅན་ཀྱང་སོ་སོ་ཡིན་པས་ཤེས་པ་སྐད་ཅིག་གཉིས་པར་སྡོད་མི་སྲིད་དོ། །ཁོ་ན་རེ། སྐྱོན་དེ་ནི་མེད་དེ། སྔར་སྒྲ་ཤེས་པ་དེ་ཉིད་ཀྱིས་ནི་ཕྱིས་གཟུགས་སོགས་གཞན་དག་ཤེས་པས་ན། ཤེས་པ་རྟག་ཀྱང་ཤེས་བྱ་སོ་སོར་དམིགས་པའི་ཁྱད་པར་ཙམ་མོ་ཞེ་ན། ཁྱོད་སྔར་གྱི་སྒྲ་ཤེས་ཉིད་རྟག་པར་འདོད་པས་ན་གཟུགས་སོགས་མཐོང་བ་དེ་ཡི་ཚེ་སྒྲ་ཐོས་པའང་ཅི་སྟེ་མིན་ཏེ་སྔར་གྱི་སྒྲ་འཛིན་རང་གི་ངོ་བོ་མ་དོར་བའི་ཕྱིར་རོ། །གལ་ཏེ་དེའི་ཚེ་མི་ཐོས་པ་ནི་ཡུལ་སྒྲ་མི་ཉེ་བའི་ཕྱིར་སྙམ་ན། ཡུལ་མེད་པ་དེས་ན་ཡུལ་དེ་ཡི་ཤེས་པའང་མེད་དེ། རིགས་པ་སྔར་བཞིན། གཞན་ཡང་ཁྱོད་བདག་ཤེས་རིག་གི་སྐྱེས་བུ་ཐམས་ཅད་ལ་ཁྱབ་པར་འདོད་ན། རྣམ་འགྱུར་མཐའ་དག་ལ་ཉེ་བ་དང་མི་ཉེ་བའང་ག་ལ་འཐད། གཞན་ཡང་སྒྲ་འཛིན་གྱི་རང་བཞིན་གང་ཡིན་པ་དེ་གཟུགས་འཛིན་པར་ཇི་ལྟར་འགྱུར་ཏེ་དེ་གཉིས་ངོ་བོ་ཐ་དད་པས་སོ། །ཡང་འདི་ལྟར་ཡུལ་སྒྲ་དང་གཟུགས་ལྟ་བུ་ནི་ཐ་དད་པ་ཡིན་ན་དེའི་ཡུལ་ཅན་ཀྱང་སྔ་མའི་རང་བཞིན་མ་དོར་བཞིན་དུ་ཕྱི་མར་འགྱུར་བའི་སྐབས་ག་ལ་ཡོད་དེ། ཤེལ་ཚོན་དཀར་པོས་བསྒྱུར་བ་མ་བཏང་བཞིན་ནག་པོར་འགྱུར་མི་ཤེས་པ་བཞིན་ནོ། །རྣམ་འགྲེལ་ལས་ཀྱང་། གཅིག་གི་གཉིས་ཤེས་མ་ཡིན་ཏེ། །དབང་པོའི་སེམས་ནི་ངེས་ཕྱིར་དང་། །ཞེས་པ་བཞིན་ནོ། །འདིས་ཤེས་པ་རྟག་པ་དང་གཅིག་བདེན་འགོག་པ་སྟེ། གཞན་དུ་ཤེས་པའི་རྒྱུད་གཅིག་ལ་སྒྲ་ཤེས་ན་གཟུགས་མི་ཤེས་ཞེས་བསམ་པར་མི་བྱ་སྟེ། རྟོག་མེད་ཀྱི་ཤེས་པ་རིགས་མི་མཐུན་དུ་མ་དུས་གཅིག་ཏུ་འབྱུང་རུང་བའི་ཕྱིར། དེ་ལྟ་ནའང་རིགས་མི་མཐུན་པའི་ཤེས་པ་དག་ནང་ཕན་ཚུན་གཅིག་མིན་ལ། ཡིན་ན་ཁ་དོག་ལྔ་ལྡན་གྱི་ཁྲ་འཛིན་དང་སྔོ་འཛིན་ཁྱད་མེད་པར་ཐལ་ལོ། །དེ་དག་ན་རེ། སྐྱེས་བུ་གཅིག་ཕ་ཡང་ཡིན་ལ་བུ་ཡང་ཡིན་པ་བཞིན་དུ་ཡུལ་སྒྲ་དང་གཟུགས་ལྟ་བུ་ནི་མི་འགལ་ཏེ། རྣམ་འགྱུར་གྱི་ངོས་ནས་གཟུགས་གང་ཡིན་པ་དེ་རང་བཞིན་གྱི་ངོས་ནས་སྒྲ་ཡང་ཡིན་ཏེ། དེ་གཉིས་ཀ་རང་བཞིན་གཅིག་པའི་ཕྱིར། དེས་ན་གཟུགས་འཛིན་གྱི་ཚེ་ན་སྒྲའི་རྣམ་འགྱུར་འཛིན་པའི་ཤེས་པ་མེད་ཀྱང་སྒྲའི་རང་བཞིན་འཛིན་པའི་ཤེས་པ་ཡོད་པས་ན་སྒྲ་ཤེས་མི་རྟག་པར་ཐལ་བའི་སྐྱོན་མེད་ཟེར་ན་དེའི་དཔེ་མ་གྲུབ་སྟེ་སྐྱེས་བུ་གཅིག་ཉིད་ཕ་དང་བུ་ཉིད་དུ་བཞག་པ་ནི་ལྟོས་ས་ཐ་དད་ལ་ལྟོས་ནས་བཏགས་པ་ཙམ་ཡིན་ཏེ། དོན་དམ་པར་རང་གི་ངོ་བོས་ཕ་བུ་གཉིས་ཀར་ཡང་དག་པར་གྲུབ་པ་ཉིད་མིན་ཏེ། དེ་གཉིས་རང་རང་གི་ངོ་བོར་བདེན་པར་གྲུབ་ན་གཅིག་ཅིག་ཤོས་ཀྱི་གནས་སྐབས་སུ་འགྱུར་མི་སྲིད་དོ། །དེས་ན་བཏགས་པ་ཙམ་སྟེ་དེས་ཁྱོད་ཀྱི་ཞེ་འདོད་འགྲུབ་པར་མི་འགྱུར་རོ། །གལ་ཏེ་དོན་དམ་པར་ན་ཕ་ཡང་ཡིན་ལ་བུ་ཡང་ཡིན་པ་ཞིག་ཡོད་ན་ཡོན་ཏན་གསུམ་གྱི་སྟེང་ན་ཡོད་དགོས་ཏེ། འདི་ལྟར་ཁྱོད་ཀྱི་དོན་དམ་པ་ནི་ཡོན་ཏན་གསུམ་ལས་གཞན་དུ་ཁས་མ་བླངས་པས། ཡོན་ཏན་རྣམས་ཀྱི་རང་བཞིན་མཆོག །མཐོང་བའི་ལམ་དུ་འགྲོ་མ་ཡིན། །མཐོང་བའི་ལམ་དུ་གང་གྱུར་པ། །སྒྱུ་མ་ལྟ་བུར་ཤིན་ཏུ་གསོག །ཅེས་འདོད་པའི་ཕྱིར། དེ་ལྟ་ནའང་སྙིང་སྟོབས་དང་རྡུལ་དང་ནི་མུན་པ་ཡི་ངོ་བོ་ནི་བུ་མིན་ལ་ཕ་ཡང་མིན་ཏེ། རྣམ་འགྱུར་ཐམས་ཅད་ནི་དེའི་རང་བཞིན་ཡིན་ན་དེ་དོན་དམ་པར་སུ་ལ་ལྟོས་ནས་བུར་འཇོག་ཅིང་སུ་ལ་ལྟོས་ནས་ཕར་བཞག་སྟེ་གང་དུའང་བཞག་མི་རུང་ངོ་། །དེས་ན་ཁྱོད་དོན་དམ་པ་ཡོན་ཏན་གསུམ་གྱི་རང་བཞིན་ལ་བསམས་ཏེ་གཟུགས་འཛིན་གྱི་ཚེ་ནའང་སྒྲ་འཛིན་ཡོད་དོ་བསམ་ན། རྣམ་འགྱུར་ཐམས་ཅད་ཀྱི་ཚེ་ཐམས་ཅད་འཛིན་པའམ། ཡང་ན་སྒྲའི་དུས་ནའང་སྒྲ་མི་འཛིན་པར་འགྱུར་ཏེ། རྣམ་འགྱུར་ཐམས་ཅད་ལ་རང་བཞིན་གཅིག་ཡིན་པས་ཁ་ཅིག་གི་ཚེ་ན་འཛིན་པ་དང་ཁ་ཅིག་གི་ཚེ་ན་མི་འཛིན་པ་མི་སྲིད་དོ། །དོན་ཡང་མ་གྲུབ་སྟེ་གཟུགས་འཛིན་པ་དེ་སྒྲ་ཤེས་ཀྱི་རང་བཞིན་དུའང་ཡོད་ན་སྣང་དུ་རུང་བས་དམིགས་དགོས་ན། གཟུགས་འཛིན་དེ་ནི་སྒྲ་འཛིན་དང་ལྡན་པའི་རང་བཞིན་ཅན་དུ་ནི་ནམ་ཡང་མཐོང་བ་མ་ཡིན་ལ། དེ་བཞིན་དུ་ཡུལ་གཟུགས་ལ་སྒྲའི་ཤས་ཡོད་པར་ཡང་མི་མཐོང་ངོ་། །ཡང་ཁོ་ན་རེ། གཟུགས་འཛིན་དེ་སྒྲ་འཛིན་གྱི་རང་བཞིན་དུ་མ་མཐོང་ཡང་ཤེས་པའི་ངོ་བོ་ནི་གཅིག་ཡིན་ཏེ། དཔེར་ན་གར་མཁན་གཅིག་ཉིད་སྔ་དྲོ་ལྷ་དང་། ཕྱི་དྲོ་གནོད་སྦྱིན་གྱི་ཆ་ལུགས་བྱས་པ་ལྟ་བུར་སྔར་གྱི་སྒྲ་ཤེས་དེ་ཉིད་ཚུལ་གཞན་གཟུགས་ཤེས་ཀྱི་རྣམ་པར་སྣང་བ་ཉིད་གྱིས་གཟུགས་དེ་ཉིད་མཐོང་ངོ་ཞེ་ན། སྔར་གྱི་ཤེས་པ་དེ་རྟག་པ་མིན་ཏེ་སྔ་མ་ལས་གནས་སྐབས་གཞན་ཐོབ་པའི་ཕྱིར། གལ་ཏེ་ཚུལ་སྔ་མ་ལས་གཞན་པའི་ཚུལ་ཐོབ་ནས་དེ་གཉིས་སོ་སོར་སྣང་བར་གྱུར་ཀྱང་ད་རུང་སྔར་གྱི་དེ་ཉིད་ཡིན་གྱི་གཞན་མིན་ན། དེ་འདྲའི་གཅིག་ཉིད་དེ་ནི་སྔོན་མེད་པའི་གཅིག་སྟེ་སྔར་འཇིག་རྟེན་ན་ཤེས་བརྗོད་ཀྱི་ཡུལ་དུ་མ་བྱུང་བ་ཞིག་གོ །གལ་ཏེ་སོ་སོར་མཐོང་ཡང་གཅིག་ཡིན་ན་ཐམས་ཅད་རིལ་པོ་གཅིག་ཏུ་ཐལ་ལོ། །དེས་ན་གར་མཁན་ཡང་རྣམ་པ་གཞན་དང་གཞན་ཐོབ་པའི་སྐབས་སོ་སོ་ཐ་དད་པའི་སྐད་ཅིག་གཞན་ཡིན་གྱི་དོན་དམ་པར་གཅིག་པུ་ནི་མ་ཡིན་ཏེ་ཡིན་ན་དེར་ཡང་དཔྱད་པ་མཚུངས་སོ། །གལ་ཏེ་རྣམ་འགྱུར་སྒྲ་ལ་སོགས་པས་ཁྱད་པར་དུ་བྱས་པའི་ཤེས་པའི་ཚུལ་གཞན་དང་གཞན་དུ་སྣང་བ་དེ་ནི་གནས་སྐབས་ལ་ལྟོས་པའི་ལྟར་སྣང་ཙམ་ཡིན་གྱི་བདེན་པ་མིན་ཏེ། ཤེལ་སྒོོང་དཀར་པོ་ཚོན་གྱིས་བསྒྱུར་པ་ཤེལ་གྱི་གཤིས་ལ་མི་བདེན་པ་བཞིན་ནོ་ཞེ་ན། སྒྲ་སོགས་ཡུལ་གྱིས་ཁྱད་པར་དུ་བྱས་པའི་ཆ་དེ་མི་བདེན་དུ་ཆུག་ཀྱང་། ངོ་བོ་བདེན་པ་དེ་ཡི་རང་གི་རང་བཞིན་ཇི་འདྲ་བ་ཡིན་སྨྲོས་ཤིག་ཁོ་ན་རེ་ཡུལ་གྱིས་ཁྱད་པར་དུ་མ་བྱས་པའི་ཤེས་པ་ཙམ་ཞིག་ནི་ཤེས་པ་སྔ་ཕྱི་ཐམས་ཅད་ལ་ཁྱད་མེད་པར་རྗེས་སུ་འགྲོ་བས་ཤེས་པ་ཙམ་གྱི་གཅིག་ཉིད་དེ་ཡིན་ནོ་ཅེ་ན། དེ་ལྟ་ན་སྐྱེས་བུ་ཀུན་ཀྱང་གཅིག་ཉིད་ཏུ་ཐལ་བར་འགྱུར་ཏེ་ཤེས་རྒྱུད་ཐམས་ཅད་ལ་ཤེས་པ་ཡིན་པ་ཙམ་རྗེས་སུ་མི་འགྲོ་མི་སྲིད་པས་སོ། །གཞན་ཡང་སེམས་པ་ཅན་བདག་དང་སེམས་མེད་གཙོ་བོ་སོགས་ཉེར་བཞི་པོ་དེ་དག་ཀྱང་གཅིག་ཉིད་དུ་འགྱུར་ཏེ་གང་གི་ཕྱིར་ན་དེ་ཐམས་ཅད་ཡོད་པ་ཙམ་ཉིད་དུ་མཚུངས་ཤིང་ཁྱད་པར་མེད་པས་སོ། །དེ་ལྟར་ཤེས་པ་ཐམས་ཅད་ལ་ཤེས་པ་མིན་པ་གཞན་བསལ་བའམ། གཞན་ལས་ལོག་པའི་ཆ་ནས་ཤེས་པ་ཙམ་ལྡོག་ཡོད་ཀྱང་དེ་ནི་བཏགས་པ་ཡིན་གྱི་དོན་ལ་ཡུལ་དང་བྲལ་བའི་ཤེས་པ་རྐྱང་རྐྱང་པོ་གཅིག་ནི་མི་སྲིད་དེ་གཟུགས་མེད་པའི་གཟུགས་བརྙན་བཞིན་ནོ། །དེས་ན་ཤེས་བྱ་དངོས་པོ་ཐམས་ཅད་ལ་རིགས་མི་མཐུན་པ་བསལ་བའི་ལྡོག་པ་རྗེས་སུ་འགྲོ་བ་ལ་སྤྱི་ཞེས་ཐ་སྙད་བྱེད་པ་ནི་རང་སྡེ་ནང་པའི་ཐ་སྙད་ཀྱི་ཚུལ་བླ་ན་མེད་པ་སྟེ་འདིར་ཡང་ཤུགས་ཀྱིས་དོན་དེ་བསྟན་པའོ། །གལ་ཏེ་གང་གི་ཚེ་བྱེ་བྲག་ཏུ་གྱུར་པའི་གནས་སྐབས་ཐ་དད་པ་དག་མི་བདེན་པའམ་ཕྱིན་ཅི་ལོག་ཡིན་ཀྱང་། བྱེ་བྲག་ཐམས་ཅད་ཁྱད་མེད་དུ་འདྲ་བའི་རང་བཞིན་གཅིག་པུ་པ་ཞིག་ཅི་སྟེ་མེད་སྙམ་ན། དེ་ནི་ཁྱད་པར་རྣམས་ལ་གཅིག་ཏུ་འཁྲུལ་པའི་སྤྱི་ཡོད་འཛིན་གྱི་ལོག་རྟོག་སྟེ། འདི་ལྟར་བྱེ་བྲག་ཐམས་ཅད་བསལ་བ་དེ་ཡི་ཚེ་དེ་ཡི་ཕ་རོལ་ན་ཐུན་མོང་དུ་འདྲ་བའི་རྟེན་ནམ་སྤྱི་གཅིག་པུ་ཞིག་གང་ཡིན་ཏེ་ཅི་ཡང་མེད་དོ། །གཉིས་པ་བདག་བེམ་པོར་འདོད་པ་དགག་པ་ནི། རིགས་པ་ཅན་ལ་སོགས་པ་ན་རེ། འདི་ལྟར་ཤེས་བྱ་ནི་ཚིག་གི་དོན་དྲུག་ཏུ་འདུ་སྟེ། རྫས་དང་ཡོན་ཏན་ལས་སྤྱི་བྱེ་བྲག་འདུ་བ་རྣམ་པ་དྲུག་ཅེས་པ་ལྟར་གྱི་རྫས་ལ་དགུ་སྟེ། བདག དུས། རྡུལ། ཕྱོགས། ནམ་མཁའ་སྟེ་རྟག་པའི་རྫས་ལྔ་དང་། ས་ཆུ་མེ་རླུང་རྣམས་ཀྱི་རགས་པའི་ཆ་སྟེ་མི་རྟག་པའི་རྫས་བཞི་བཅས་དེ་རྣམས་ཀྱི་མཚན་ཉིད་ཀྱང་ལས་དང་ཡོན་ཏན་གྱི་རྟེན་བྱེད་པ་ཞིག་ཏུ་འདོད། ཡོན་ཏན་ལ་ཉེར་བཞི་སྟེ། གྲངས། ཚད། འཕྲད་པ། ཕྱེ་བ། ཐ་དད། ཐ་མི་དད་དེ་ཐུན་མོང་སྤྱིའི་ཡོན་ཏན་དྲུག་དང་། སྒྲ་ནམ་མཁའ། རེག་རླུང་། གཟུགས་མེ། རོ་ཆུ། དྲི་ས་སྟེ་འབྱུང་བའི་ཡོན་ཏན་ལྔ་བཅས་བཅུ་གཅིག་ནི་རྫས་གཞན་གྱི་ཡོན་ཏན། བདེ། སྡུག འདོད། སྡང་། ཆོས། ཆོས་མིན། འབད་རྩོལ། འདུ་བྱེད་པའི་ཤུགས། མིག་སོགས་དབང་པོ་ལྔ་བཅས་བཅུ་གསུམ་ནི་བདག་ལ་བརྟེན་པའི་ཡོན་ཏན་ནོ། །ལས་ནི་བརྐྱང་བསྐུམ། འདེགས། འཇོག འགྲོ་བ་ལྔ། སྤྱི་ལ་ཁྱབ་པ་དང་ཉི་ཚེ་བ་གཉིས། བྱེ་བྲག་ནི་ཁྱད་པར་བྱེད་པའི་རང་བཞིན། འདུ་བ་ནི་ཕན་ཚུན་འབྲེལ་བ་ལྟ་བུ། དེ་ཡང་ཐ་དད་དང་ཐ་མི་དད་དུ་འདུ་བ་སོགས་ལས་བརྩམས་ཏེ་དབྱེ་བ་མང་ངོ་། །བདག་ནི་ནམ་མཁའ་ལྟ་བུར་ཁྱབ་པ་དང་རྟག་པ་ཉིད་དུ་འདོད་པས་ཤེས་པ་མིན་ཏེ། ཤེས་པ་ཡིན་ན་མི་རྟག་ཅིང་མ་ཁྱབ་པར་འགྱུར་བས་ན་བདག་ལ་ཤེས་པ་མེད་ཀྱང་། ཤེས་པ་དང་འདུ་བས་ན་བདེ་སོགས་བདག་གི་ཡིན་པར་ཞེན་གྱི། དོན་ལ་བདེ་སོགས་ནང་གི་བེམ་བོ་ཉིད་དུ་འདོད་དོ། །བདག་ཐམས་ཅད་ལ་ཁྱབ་པར་ཡོད་དེ་བདག་གི་ཡོན་ཏན་མཐོང་བས་སོ་ཞེས་སྒྲུབ་པར་བྱེད་དོ། །དེ་ལ་སེམས་མེད་པ་ཡང་བདག་མིན་ཏེ་སེམས་མེད་པ་ཉིད་ཡིན་ཕྱིར་བུམ་པ་དང་སྣམ་བུ་ལ་སོགས་པ་བཞིན། བདག་ནི་ལས་བྱེད་པ་པོ་དང་བདེ་སྡུག་གི་རྟེན་དུ་འདོད་ན་སེམས་མེད་པ་དག་ནི་ནམ་ཡང་བདེ་སོགས་ཀྱི་རྟེན་དུ་མི་རིགས་པའི་ཕྱིར་རོ། །འོན་ཏེ་བདག་རང་ཉིད་སེམས་ཀྱི་ངོ་བོར་མེད་ཀྱང་སེམས་རྫས་གཞན་དང་མཚུངས་པར་ལྡན་པའི་ཕྱིར། དེའི་བྱིན་གྱིས་བརླབས་ནས་ཡུལ་ཤེས་པར་འགྱུར་རོ་ཞེ་ན། དེ་ལྟར་ན་བདག་གིས་ཡུལ་མི་ཤེས་པར་འདོད་པའམ་ཤེས་པ་མེད་པར་ཁས་བླངས་པ་འཇིག་པར་ཐལ་ཏེ། དེ་ཡུལ་ཤེས་པའི་རང་བཞིན་ཅན་དུ་གྱུར་པའི་ཕྱིར། མི་རྟག་པར་ཐལ་ལོ། །ཅི་སྟེ་བདག་དེ་ལ་ནམ་ཡང་འགྱུར་བ་མེད་པར་རྟག་ན་ནི་སེམས་པས་ཀྱང་བདག་དེ་ལ་ཡུལ་ཤེས་པའི་བྱ་བ་ཅི་ཞིག་བྱས་ཏེ་གང་ཡང་མ་བྱས་པས་ཁྱབ་བོ། །དེ་ལྟར་ཤེས་པ་མེད་པའི་བེམ་པོ་བྱ་བ་བྱེད་པ་ཐམས་ཅད་དང་བྲལ་བ་ནམ་མཁའ་འདི་བདག་ཡིན་ནོ། །ཞེས་རློམ་སྟེ་བདག་ཏུ་བྱས་པར་འགྱུར་ཏེ། ཀྱེ་མ་རིགས་པ་ཅན་གྱི་བློ་གྲོས་ལ་ལྟོས་ཞེས་སོ། །གསུམ་པ་རྩོད་སྤོང་ལ། ལས་འབྲས་མི་འཐད་པ་དང་། སྙིང་རྗེ་མི་འཐད་པར་རྩོད་པ་གཉིས། དང་པོ་ལས་འབྲས་མི་འཐད་པར་རྩོད་པ་ནི། བདག་ཡོད་དུ་སྨྲ་བ་རྣམས་ན་རེ། གལ་ཏེེ་ཁྱོད་ཀྱིས་འདོད་པ་ལྟར་བདག་དེ་ནི་ཡོད་པ་མིན་ན། ལས་འབྲས་ཀྱི་འབྲེལ་བ་མ་འཆོལ་བའི་རྣམ་བཞག་འདི་རིགས་པར་འགྱུར་བའམ་འཐད་པ་མིན་ཏེ་ལས་བྱེད་པ་པོའི་བདག་ནི་མེད་པའི་ཕྱིར་འཇིག་རྟེན་ཕ་རོལ་ཏུ་འགྲོ་བ་མི་སྲིད་པས་འབྲས་བུའི་དུས་སུ་མེད་ཅིང་། ཕུང་པོ་སྐད་ཅིག་གིས་སྐྱེ་འགག་བྱེད་པས་ན་ལས་བྱས་པའི་སྐད་ཅིག་དེ་ནས་བྱེད་པ་པོ་ནི་འགག་ཅིང་ཞིག་པས་ན་ལས་དེ་བྱེད་པ་པོ་ཉིད་ལ་ནི་སྨིན་མི་སྲིད་ལ། དེ་ལ་མ་སྨིན་ན་གཞན་གྱི་ལས་གཞན་ལ་སྨིན་པ་མི་འཐད་པས་སུ་ཡི་མྱོང་བར་བྱ་བའི་ལས་སུ་འགྱུར་ཞེ་ན། རེ་ཞིག་མགོ་བསྒྲེ་བ། བྱ་བ་བྱེད་པའི་གནས་སྐབས་དང་འབྲས་བུ་ཉམས་སུ་མྱོང་བའི་གནས་སྐབས་ཀྱི་རྟེན་ནམ་གཞི་རུ་གྱུར་པའི་ཕུང་པོ་དག་ནི་ཐ་དད་པར་རང་རེ་གཉིས་ཀས་འདོད་པའི་ཕྱིར་དང་། ཕུང་པོ་ལས་གཞན་པའི་བདག་རྟག་པར་འདོད་པའི་ལུགས་དེར་ཡང་བདག་དེ་ནི་སེམས་མེད་པའམ་རྟག་པ་ཡིན་པས་ན་རྟག་པ་ལ་ནི་བྱ་བ་བྱེད་པ་དང་འབྲས་བུ་མྱོང་བ་ཐམས་ཅད་མེད་པར་ཡང་ཚད་མས་གྲུབ་པའི་ཕྱིར་རྩོད་པ་འདི་འུ་བུ་གཉིས་ཀ་ལ་གྲུབ་པས་གཉིས་ཀས་སྤངས་དགོས་ན། འདིར་ཁོ་བོ་ལ་བརྩད་པ་དོན་མེད་ཀྱི་ངལ་བ་མ་ཡིན་ནམ། དེ་ལྟ་ན་ཡང་ཁོ་བོའི་ལུགས་ལ་ནི་སྤང་བར་ནུས་ཀྱི། ཁྱོད་ཀྱིས་ནམ་ཡང་མི་ནུས་སོ། །ཞེས་སྟོན་པ། ལས་བྱེད་པ་པོ་ཉིད་ལ་སྨིན་ཞེས་པ་འདིའང་རྒྱུད་གཅིག་གི་དབང་དུ་བྱས་པའི་རྣམ་བཞག་སྟེ། རྒྱུ་མ་འགགས་པར་ལྡན་བཞིན་དུ་དེའི་འབྲས་བུ་དང་བཅས་པ་འདིའོ་ཞེས་རྒྱུ་འབྲས་གཉིས་ཀ་དུས་མཉམ་དུ་མཐོང་བ་དེ་ནི་སྲིད་པ་མ་ཡིན་ཏེ་རྒྱུ་ལས་འབྲས་བུ་འབྱུང་དགོས་པས་སོ། །དེས་ན་འབྲས་བུ་འབྱུང་བའི་དུས་རྒྱུ་འགགས་པས་ཁྱབ་ཀྱང་། རྟེན་འབྲེལ་བསླུ་བ་མེད་པའི་དབང་གིས་འབྲས་བུ་འབྱིན་པར་ནི་ངེས་ལ། དེ་འདྲའི་འབྲས་བུ་དེའང་རྒྱུའི་ཚོགས་པ་གང་དུ་ཚང་བ་གང་ཟག་གི་རྒྱུད་དེ་ཉིད་དུ་སྨིན་གྱི་གཞན་དུ་མ་ཡིན་ཏེ་ས་བོན་ས་ལ་བཏབ་པ་བྲག་ལ་མི་སྐྱེ་བ་བཞིན་ནོ། །དེས་ན་ཕུང་ལྔའི་རྒྱུན་རིགས་འདྲ་བར་མ་ཆད་པའི་རྒྱུད་གཅིག་ལ་ནི་བརྟེན་ནས་སུ་ལས་བྱེད་པ་པོ་དང་། འབྲས་བུ་ལ་ལོངས་སྤྱོད་པ་པོ་ཞེས་བྱ་བར་བསྟན་ཏེ། འཇིག་རྟེན་པའི་བློའི་ཚུལ་ལུགས་ཐམས་ཅད་དེ་ལྟར་གནས་པ་ཡིན་ནོ། །དེ་ལྟར་ན་རྒྱུད་གཅིག་ཡིན་པ་དེ་ཉིད་ཀྱིས་བདག་གཅིག་ཏུ་ཡོད་པ་མིན་ནམ་ཞེ་ན་མིན་ཏེ། རྒྱུད་ནི་ཕྲེང་བ་བཞིན་དུ་བཏགས་པ་སྟེ་དོན་ལ་མི་སྲིད་དོ། །དེའང་གཟུགས་རྒན་གཞོན་དང་སྐྱེ་བ་སྔ་ཕྱི་མི་གཅིག་པར་རྟོགས་པར་སླ་མོད་སེམས་ཀྱི་དབང་དུ་བྱས་ཏེ་གསུངས་པ། འདས་པའི་སེམས་འགགས་པ་དང་མ་འོངས་པ་ཡི་སེམས་མ་སྐྱེས་པས་བདག་མིན་ཏེ་དེ་གཉིས་ནི་ད་ལྟ་མེད་པའི་ཕྱིར་བདག་ཡོད་པར་འདོད་པ་དང་འགལ་བས་སོ། །འོན་ཏེ་སྐྱེས་ནས་མ་འགགས་པ་ད་ལྟ་བའི་སེམས་འདི་བདག་ཡིན་ནོ་སྙམ་ན། ད་ལྟའི་སེམས་དེ་འགགས་པའམ་ཞིག་པ་ན་ཡང་བདག་དེ་མེད་པར་འགྱུར་ན། ཁྱོད་ཀྱི་བདག་ནི་སྔ་མ་ནས་འདིར་འོང་འདི་ནས་ཕ་རོལ་ཏུ་འགྲོ་བར་འདོད་པས་ན་སྐྱེས་སེམས་ཀྱང་བདག་མིན་ནོ། །དེའི་ཕྱིར་འཇུག་པ་ལས། བྱམས་པ་ཉེར་སྦས་ལ་བརྟེན་ཆོས་རྣམས་ནི། །གཞན་ཉིད་ཕྱིར་ན་རྒྱུད་གཅིག་གཏོགས་མིན་ཏེ། །གང་དག་རང་མཚན་ཉིད་ཀྱིས་སོ་སོ་བ། །དེ་དག་རྒྱུད་གཅིག་གཏོགས་པར་རིགས་མ་ཡིན། །ཞེས་པ་བཞིན་རྒྱུད་བདག་ཡིན་པ་འགོག་པའི་དོན་ཏོ། །དཔེར་ན་ཆུ་ཤིང་གི་སྡོང་པོ་ཁོང་སྟོང་གསོབ་ཅན་དེ་དག་ཆ་ཤས་ཕྱེ་ན་སྙིང་པོ་སྲ་མཁྲེགས་ཀྱི་ཆ་ཤས་འགའ་ཡང་རྙེད་རྒྱུ་མེད་པ་དེ་བཞིན་དུ། རྣམ་པར་དཔྱད་པ་ཡིས་བཙལ་ན་བདག་ཀྱང་དེ་ཁོ་ན་ཉིད་དམ་ཡང་དག་པར་གྲུབ་པ་མིན་ནོ། །གཉིས་པ་སྙིང་རྗེ་མི་འཐད་པར་རྩོད་པ་ནི། གལ་ཏེ་བདག་གམ་སེམས་ཅན་ཡོད་པ་མིན་ན་བྱང་ཆུབ་སེམས་དཔས་སུ་ལ་དམིགས་ནས་སྙིང་རྗེ་བསྐྱེད་པར་བྱ་སྟེ་ཡུལ་མེད་པས་སོ་ཞེ་ན། དོན་དམ་པར་སྙིང་རྗེའི་ཡུལ་དེར་བྱེད་པོ་མི་དམིགས་ཀྱང་། ཀུན་རྫོབ་ཏུ་དེ་ལྟར་མ་རྟོགས་པའི་འགྲོ་ངོར་བདེ་སྡུག་བསླུ་མེད་དུ་ཡོད་པས་རྨི་ལམ་ལྟ་བུའི་སྡུག་བསྔལ་གྱི་སྣང་བ་རྒྱུན་ཆད་པའི་མི་གནས་པའི་མྱང་འདས་ཀྱི་སར་སྒྲོལ་བར་བྱེད་པའི་དགོས་པའམ་འབྲས་བུའི་དོན་དུ་བདག་གིས་སེམས་ཅན་རྣམས་དགྲོལ་བར་བྱའོ་ཞེས་ཁས་བླངས་པའི་སེམས་ཅན་ནི་དོན་དམ་པར་ཡོད་པས་མིན་ཏེ། རྨོངས་པས་བདག་ཏུ་བརྟགས་པ་གང་ཡིན་པ་དེའི་དབང་གིས་ཡིན་ནོ། །དེས་ན་བྱང་ཆུབ་སེམས་དཔས་བདག་མེད་མཐོང་ཡང་སྙིང་རྗེའི་ཡུལ་སེམས་ཅན་གྱིས་དེ་ལྟར་མ་རྟོགས་པས་བདག་ཡོད་པ་ལྟ་བུར་དོན་མེད་པར་སྡུག་བསྔལ་གྱི་སྣང་བ་འཁོར་ཡུག་ཏུ་མྱོང་བ་ཡོད་པ་དེས་ན་དེ་ལ་དམིགས་ནས་སྙིང་རྗེ་འཇུག་སྟེ། འཕགས་པ་རྣམས་བདག་དོན་ལ་མི་ཆགས་ཤིང་གཞན་སྡུག་བསྔལ་བ་མཐོང་བས་གཞན་དོན་ལ་སྤྲོ་བའི་བློ་ཤུགས་ཀྱིས་འབྱུང་བ་དང་། གཞན་གྱི་སྡུག་བསྔལ་ཡང་གཉིད་འཐིབས་པོ་བཞིན་དུ་སེལ་ནུས་པར་མཐོང་བའི་ཕྱིར་རོ། །ཡང་དེ་དག་ན་རེ། སེམས་ཅན་མེད་ན་གང་གི་དོན་དུ་འབད་པའི་འབྲས་བུ་སངས་རྒྱས་དེ་སུ་ཡིས་ཐོབ་པ་ཡིན་ཏེ། དེས་ན་འབྲས་བུའི་དོན་དུ་ཁས་བླངས་པ་ཞེས་པའང་མི་རིགས་སོ་ཞེ་ན། དོན་དམ་པར་བདེན་ཏེ། ཐོབ་པོ་སེམས་ཅན་དང་། ཐོབ་བྱའི་འབྲས་བུ་བདེན་པར་གྲུབ་པ་མེད་མོད། འོན་ཀྱང་སེམས་ཅན་རང་རང་གི་སྣང་ཚུལ་གྱི་ངོར་ཡོད་དེ་བཤད་མ་ཐག་པ་ལྟར་རྨོངས་པས་བདག་ཏུ་ཞེན་པ་ལས་ཀུན་ཉོན་འཁོར་བའི་ཕྱོགས་དང་། དེ་ལྡོག་པའི་རྣམ་བྱང་གི་ཚུལ་གཉིས་ཀ་གྲུབ་ཅིང་། མྱང་འདས་ཞེས་པའང་གཞན་ན་མེད་ཀྱི་བློ་ནོར་བའི་རྣམ་རྟོག་ཟད་པ་ཙམ་ལ་བཏགས་པ་སྟེ། མདོ་རྒྱན་ལས། དེ་ཕྱིར་ཐར་པ་ནོར་ཙམ་ཟད་པ་ཡིན། །ཞེས་གསུངས། དེས་ན་དོན་དམ་པར་སྲིད་ཞི་བདེན་གྲུབ་ཏུ་མེད་པའི་གནད་ཀྱིས་འཆིང་གྲོལ་སོགས་འདི་འཐད་ཀྱི་གཞན་དུ་མ་ཡིན་ཏེ། གལ་ཏེ་རང་བཞིན་གྱིས་ཡོད་ན། །དེ་ནི་མེད་ཉིད་མི་འགྱུར་རོ། །རང་བཞིན་གཞན་དུ་འགྱུར་བ་ནི། །ནམ་ཡང་འཐད་པར་མི་འགྱུར་རོ། །ཞེས་པ་བཞིན་འདོད་དོ། །འོ་ན་ཐོབ་མེད་ལ་ཐོབ་པར་རེ་ནས་ལམ་སོགས་ལ་ཁྱོད་སློབ་པས་ཅི་བྱ་སྟེ། རྨོངས་པ་ནི་རྣམ་པ་ཀུན་ཏུ་བཟློག་བྱ་མ་ཡིན་ནམ་ཞེ་ན། མཐར་ཐུག་སངས་རྒྱས་ཀྱི་ས་ན་གཟུང་འཛིན་གྱི་སྤྲོས་པ་མཐའ་དག་དབྱིངས་སུ་ཞི་བས་སྲིད་ཞིར་མངོན་ཞེན་གྱི་ཤེས་སྒྲིབ་ཕྲ་བ་འདི་ཡང་ལྡོག་པར་འགྱུར་མོད། དེ་ལྟར་མ་གྱུར་གྱི་བར་འདིར་གནས་སྣང་རྣམ་པ་ཀུན་ཏུ་མཐུན་པ་མ་ཡིན་པའི་ཕྱིར་དོན་དམ་པར་ཐོབ་ཏུ་མེད་ཀྱང་ཀུན་རྫོབ་ཏུ་ཐོབ་བྱར་མི་འགལ་བས་ན། རང་གཞན་གྱི་སྡུག་བསྔལ་ཉེ་བར་ཞི་བའི་དོན་དུ་འབྲས་བུ་མི་གནས་པའི་མྱང་འདས་ལ་ཀུན་རྫོབ་ཙམ་དུ་ཐོབ་བྱར་ལྟ་བའི་རྨོངས་པ་ནི་བཟློག་པར་མི་བྱ་སྟེ་འདི་ལ་བརྟེན་དགོས་པའི་ཕྱིར་། སྣང་ཚུལ་གྱི་དབང་དུ་བྱས་ཏེ་འབྲས་བུ་ལ་སློབ་པ་ཡིན་ནོ། །འོ་ན་བདག་ཏུ་རྨོངས་པའང་དགག་པས་ཅི་བྱ་ཞེ་ན། དེ་གཉིས་མི་འཚུངས་ཏེ་འབྲས་བུ་དོན་དུ་གཉེར་བའི་བློ་དེས་ནི་སྡུག་བསྔལ་ཟད་པར་བྱས་ནས་རང་ཡང་འགོག་པར་བྱེད་དེ་ཤིང་ལས་བྱུང་བའི་མེས་ཤིང་ཉིད་སྲེག་པ་བཞིན་ནོ། །འཁོར་བའི་སྡུག་བསྔལ་ཐམས་ཅད་ཀྱི་རྒྱུ་རུ་གྱུར་པ་ཡི་བདག་ཏུ་འཛིན་པའམ་ངའོ་སྙམ་པའི་ང་རྒྱལ་ནི་བདག་ཡོད་དུ་བཟུང་བའི་རྨོངས་པས་འཕེལ་བར་འགྱུར་བར་འགྱུར་བས་ན་བདག་མེད་པ་ལ་ཡོད་པར་རྨོངས་པ་དེ་ནི་བཟློག་པར་བྱ་སྟེ། རྨོངས་པ་དེ་མེད་ན་བདག་ཏུ་མི་འཛིན་ལ། བདག་འཛིན་དེ་མེད་ན་འཁོར་བར་འཁོར་ཞིང་སྐྱེ་བར་མི་འགྱུར་ཏེ། ནང་དང་ཕྱི་རོལ་ཉིད་དག་ལ། །བདག་དང་བདག་གི་སྙམ་ཟད་ན། །ཉེ་བར་ལེན་པ་ཟད་འགྱུར་ཞིང་། །དེ་ཟད་པས་ན་སྐྱེ་བ་ཟད། །ཅེས་པ་བཞིན་ནོ། །ཁོ་ན་རེ། ཇི་ལྟར་ཁྱོད་བཏགས་པའི་བདག་ལས་བློ་ལྡོག་པར་མི་ནུས་པ་དེ་བཞིན་དུ་རང་བཞིན་གྱིས་གྲུབ་པའི་བདག་དེ་ལས་ཀྱང་ཡུལ་ཅན་བློ་གཏན་དུ་བཟློག་པ་མེད་དེ་ཐོག་མེད་ནས་གཤིས་ལ་ཞུགས་པའི་ཕྱིར་རོ་ཅེ་ན། དེ་གཉིས་མི་མཚུངས་ཏེ་བཏགས་པ་ཙམ་རྟེན་ནས་འབྱུང་བའི་དབང་གིས་སྣང་བ་ལ་སོ་སྐྱེའི་ངོར་མི་སྣང་བར་སྒྲུབ་བྱེད་ཀྱི་རིགས་པ་མེད་ལ་བཟློག་ཀྱང་མི་དགོས་མོད། རང་བཞིན་གྱིས་གྲུབ་པར་འཛིན་པ་ནི་དངོས་པོའི་གནས་ཚུལ་རྟོགས་པའི་བློ་བདག་མེད་པ་སྒོམ་པ་ཡིས་སྤོང་ནུས་ཏེ། སྣང་བས་མུན་པ་བཞིན་དེ་ཡི་གཉེན་པོ་མཆོག་ཡིན་ཏེ་ཡང་དག་པའི་ཚད་མ་དང་ལྡན་པ་དེ་ཉིད་སྟོབས་དང་ལྡན་པའི་ཕྱིར་ནའོ། །དེས་ན་བདག་ཏུ་ལྟ་བ་ནི་དངོས་པོའི་གནས་ཚུལ་ལས་གཞན་དུ་རྐྱེན་གྱིས་རེ་ཞིག་སེམས་གོལ་བ་ཡིན་ལ། དེ་ལུང་དང་རིགས་པའི་ལམ་ལས་བཟློག་སྟེ་དངོས་པོའི་གནས་ཚུལ་ལ་བློ་ཞུགས་པར་བྱས་ན་དེ་སེམས་ཀྱི་གཤིས་ཡིན་པར་དེ་དང་སེམས་བྲལ་དུ་མི་རུང་སྟེ། རྣམ་འགྲེལ་ལས། སེམས་ཀྱི་རང་བཞིན་འོད་གསལ་ཏེ། །དྲི་མ་རྣམས་ནི་གློ་བུར་བ། །ཞེས་གསུངས་པ་བཞིན་ནོ། །གཉིས་པ་ཆོས་བདག་མེད་ལ། ལུས་དྲན་པ་ཉེ་བར་བཞག་པ། ཚོར་བ་དྲན་པ་ཉེ་བར་བཞག་པ། སེམས་དྲན་པ་ཉེ་བར་བཞག་པ། ཆོས་དྲན་པ་ཉེ་བར་བཞག་པ་སྟེ་བཞི་ལས། དང་པོ་ལ། ཡན་ལག་ཅན་མེད་པར་བསྟན་པ་དང་། ཡན་ལག་མེད་པར་བསྟན་པའོ། །དང་པོ་ཡན་ལག་ཅན་ལུས་ཉིད་མེད་པར་བསྟན་པ་ནི། ལུས་ཞེས་པའང་བཏགས་པ་ཙམ་ལས་རང་བཞིན་གྱིས་གྲུབ་པ་མེད་དེ། འདི་ལྟར་སྐྱེ་མཆེད་རྫོགས་པའི་ལུས་ཞེས་རིལ་པོ་གཅིག་པུའི་རྣམ་པར་བཟུང་བ་དེ་ནི་ལག་པ་སོགས་ལ་ཡོད་དགོས་ནའང་། རྐང་པ་ཞེས་པ་པུས་མོ་མན་ཆད་ཀྱི་སྤྱི་མིང་ཡིན་ཀྱང་། འདིར་འདོགས་ཡུལ་གཙོ་བོ་ས་གཞིའི་ངོས་ལ་བརྟེན་པའི་མཐིལ་དང་བྱིན་པ་སྟེ་རྗེ་ངར་ཡང་ལུས་མིན་ལ། དེ་བཞིན་དུ་བརླ་དང་རྐེད་པའང་ལུས་མ་ཡིན་ཞིང་ལྟ་ོབ་དང་རྒྱབ་ཀྱང་ལུས་མིན་ཏེ་བྲང་དང་དཔུང་པའང་ལུས་མ་ཡིན། རྩིབ་ལོག་དང་ལག་པའང་ལུས་མིན་ཏེ་མཆན་ཁུང་དང་ཕྲག་པའང་ལུས་མ་ཡིན། རྒྱུ་མ་ལ་སོགས་པའི་ནང་ཁྲོལ་རྣམས་ཀྱང་ལུས་དེ་མིན་ལ་མགོ་དང་མགྲིན་པའང་ལུས་མིན་ཏེ་དེ་དག་རེ་རེ་ནས་ལུས་ཀྱི་མཚན་ཉིད་དང་མི་མཐུན་པའི་ཕྱིར། དུར་ཁྲོད་དུ་འཐོར་བའི་ལུས་ཀྱི་དུམ་བུ་བཞིན་ད་ལྟ་འབྲེལ་བར་སྣང་ཡང་རུང་ཕན་ཚུན་འདྲེས་པ་མེད་པར་རང་ས་ན་ཡོད་ན་དེ་རེ་རེ་ལུས་སུ་ག་ལ་འགྱུར་ཏེ་ལག་པ་སོགས་བཅད་ཀྱང་ལུས་གནས་པར་འདོད་པས་སོ། །དེས་ན་ལག་སོགས་ཆ་ཤས་དུ་མའི་ཚོགས་པ་ཅན་འདི་ལ་ལུས་ཞེས་པ་དེ་ནི་གང་ཞིག་ཡིན། །དེ་ལ་འདི་སྙམ་དུ་དེ་དག་རེ་རེ་ལུས་མིན་ཡང་ལུས་ནི་དེ་དག་ལ་ཁྱབ་ནས་ཡོད་དོ་སྙམ་ན། ལུས་གཅིག་གི་ཆ་ཤས་ཀྱིས་འདི་ཀུན་ལ་ཁྱབ་པ་ཡིན་ནམ། ཆ་ཤས་ཅན་ལུས་དུ་མས་རེ་རེ་བཞིན་དུ་ཁྱབ་པ་ཡིན། གལ་ཏེ་ལུས་ཞེས་པ་འདི་ལག་སོགས་ཡན་ལག་ཐམས་ཅད་ལ་ཆ་ཤས་སམ་ཕྱོགས་རེ་ཡིས་ནི་གནས་པར་འགྱུར་བར་འདོད་ན། ལུས་དེའི་ཆ་ཤས་རྣམས་ལག་སོགས་ཆ་སོ་སོ་ལ་གནས་པར་འགྱུར་དུ་ཆུག་མོད། ཆ་ཤས་ཅན་ལུས་དེ་རང་ཉིད་ནི་གང་ལ་གནས་ཏེ་ལག་སོགས་རེ་རེ་ནས་བསལ་བའི་ཤུལ་ན་ཁྱབ་བྱེད་ལུས་མ་དམིགས་པས་སོ། །གལ་ཏེ་བདག་ཉིད་ཀུན་ལྡན་གྱི་ལུས་རིལ་པོའི་ཆ་ཚང་བ་རེ་ལག་པ་སོགས་ཡན་ལག་རྣམས་ལ་གནས་ན་ནི། ལག་སོགས་ཡན་ལག་དེ་དག་གི་གྲངས་ཇི་སྙེད་པ་དེ་སྙེད་ཀྱི་ནི་གྲངས་དང་མཉམ་པའི་ལུས་དུ་མ་རྣམས་སུ་ཡོད་པར་འགྱུར་ནའང་ལུས་རིལ་པོ་གཅིག་པ་ཞིག་ཏུ་འཛིན་པས་དེ་ལྟ་བུ་ནི་མི་སྲིད་དོ། །དེས་ན་སྐྱེ་མཆེད་དྲུག་གི་ཕྱི་དང་དེ་དག་གི་ནང་ཀུན་ཏུ་རིགས་པས་བཙལ་ན་ལུས་མ་དམིགས་པའི་ཕྱིར་མེད་པ་ཡིན་ན་ཇི་ལྟར་ལག་པ་སོགས་ལ་ལུས་ཡོད་པར་འགྱུར། ལག་སོགས་རྣམས་ལས་ལུས་ཀྱི་གདགས་གཞི་གཞན་ནི་མེད་ན་ལུས་དེ་ནི་ཇི་ལྟར་ཡོད་པ་ཡིན་ཏེ་མེད་དོ། །དེ་ལ་རྐང་པ་ལུས་མིན་སོགས་ཀྱི་ཡན་ལག་དང་གཅིག་མིན་པར་བསྟན། གལ་ཏེ་ལུས་འདི་སོགས་ཀྱིས་ཡན་ལག་དང་འབྲེལ་བ་ཅན་ཐ་དད་དུ་མེད་པར་བསྟན་ཏོ། །དེས་ན་ལུས་མེད་ཀྱང་ལག་པ་སོགས་ཡན་ལག་གི་ཚོགས་པ་ལ་བརྟེན་ནས་རྨོངས་ཤིང་འཁྲུལ་པ་ཡིས་ནི་ལུས་སུ་འཛིན་པའི་བློ་འབྱུང་བར་འགྱུར་ཏེ་དཔེར་ན་མི་དང་འདྲ་བའི་དབྱིབས་སུ་བཀོད་པའི་ཁྱད་པར་གྱིས་ཐོ་ཡོར་ལ་ནི་མི་རུ་འཁྲུལ་པའི་བློ་འབྱུང་བ་བཞིན་བཏགས་པ་ཙམ་ལས་དོན་ལ་གྲུབ་པ་མེད་དོ། །འདི་ན་ཇི་སྲིད་དབང་པོ་སོགས་དབྱིབས་ཀྱི་ཁྱད་པར་གྱི་རྐྱེན་ཚོགས་པ་དེ་སྲིད་དུ་ལུས་འདི་ནི་སྐྱེས་བུ་ལྟར་སྣང་བ་ཡིན་གྱི། རྐྱེན་མ་ཚང་ན་སྐྱེས་པའི་ལུས་སུ་མི་འཇོག་སྟེ་མཚན་འགྱུར་བའམ། མེར་མེར་པོ་དང་། བསྲེགས་ཏེ་ཐལ་བར་བྱས་པའི་སྐབས་བཞིན་དུའོ། །དེ་འདྲ་བར་བུད་མེད་ཀྱང་ཡིན་ནོ། །དེ་བཞིན་དུ་ཇི་སྲིད་ལག་པ་སོགས་ཡན་ལག་ལ་ལུས་སུ་སྣང་བའི་རྐྱེན་ཕན་ཚུན་འབྲེལ་བར་གྱུར་པ་སོགས། དེ་དག་ཡོད་པ་དེ་སྲིད་དུ་ལག་པ་སོགས་དེར་ལུས་སུ་སྣང་གི་རང་གི་ངོ་བོ་ཉིད་ཀྱིས་ལུས་སུ་ཡོད་པ་མིན་ཏེ་ཤ་དང་རུས་པའི་དུམ་བུ་བཞིན་ནོ། །འདིར་རྒྱ་དཔེ་ལ་ལར། ཇི་སྲིད་རྐྱེན་ཚོགས་དེ་སྲིད་དུ། །ཤིང་ནི་སྐྱེས་བུ་ལྟར་སྣང་བ། །ཞེས་འབྱུང་བའི་དོན་ལྟར་ན་ཤིང་ངམ་ཐོ་ཡོར་ལ་འགྲེང་བ་སོགས་དབྱིབས་ཀྱི་ཁྱད་པར་དང་། སྣང་བ་མི་གསལ་བ་སོགས་རྐྱེན་ཚོགས་པ་སྲིད་དུ་སྐྱེས་པའམ་བུད་མེད་དུ་སྣང་བ་བཞིན་དུ་ཞེས་སྦྱར་རོ། །གཉིས་པ་ཡན་ལག་རྣམས་མེད་པར་བསྟན་པ་ནི། ལུས་མེད་ཀྱང་ལག་སོགས་ཡན་ལག་ནི་མངོན་སུམ་མཐོང་བས་ཡོད་དོ་ཞེ་ན་ལུས་བདེན་པར་མ་གྲུབ་པ་དེ་བཞིན་སོར་མོའི་ཚོགས་སོ་སོ་བའི་ཡན་ལག་ཙམ་གྱི་ཚོགས་པ་ཡིན་པའི་ཕྱིར་ད་ེལ་ཡན་ལག་ཅན་ལག་པ་ཞེས་བཏགས་ནའང་རྫས་གཅིག་ཏུ་བདེན་པར་གྲུབ་པ་གང་ཞིག་ཡིན་པར་འགྱུར་ཏེ་མི་འགྱུར་ལ། སོར་མོ་དེ་ཡང་ཚིགས་ཀྱི་ཚོགས་ཡིན་པའི་ཕྱིར་བདེན་པར་མེད་ཅིང་། ཚིགས་ཀྱང་རང་གི་ཕྱོགས་སོ་སོའི་ཆ་རུ་ཕྱེ་བས་དུ་མར་འགྱུར་ཏེ་སྟེང་གི་ཆ་འོག་མིན་ལ། འོག་གི་ཆ་སྟེང་མིན་པ་སོགས་མ་འདྲེས་པར་གནས་སོ། །ཆ་དེ་ཡང་རགས་པའི་རྡུལ་ནས་རྡུལ་ཕྲན་གྱི་བར་དུ་ཕྱེ་བར་བྱས་ཏེ་རྡུལ་ཕྲ་རབ་དེ་ལའང་ཕྱོགས་སོ་སོའི་ཆ་རུ་སྣང་བའི་དབྱེ་བ་ཡིས་དུ་མར་འགྱུར་ཞིང་མཐར་གཏུགས་ན་ཕྱོགས་ཀྱི་དབྱེ་བ་གང་དུའང་ཆ་གཅིག་བདེན་པར་གྲུབ་པ་མི་རྙེད་དེ་ཆ་ཤས་དང་བྲལ་བར་འགྱུར་ཏེ། དེའི་རྒྱུ་མཚན་རྡུལ་ཕྲ་རབ་ཀྱི་རགས་པ་བརྩམས་ཚེ་ཕྱོགས་བཞི་སྟེང་འོག་གི་རྡུལ་དྲུག་གིས་བསྐོར་བ་ན་དབུས་རྡུལ་དེ་ལ་རྡུལ་གཞན་དྲུག་པོ་དང་རེག་པའི་ཆ་རེ་ཡོད་ན་ཆ་དྲུག་ཏུ་འགྱུར་ལ། མེད་ན་རྡུལ་དྲུག་པོས་གོ་ས་གཅིག་ལས་མ་ནོན་པས་གོང་བུའི་རྡུལ་ཚོགས་ཀྱང་རྡུལ་ཕྲན་ལས་ཆེར་མི་འགྱུར་བའི་ཕྱིར་རོ། །དེས་ན་ལག་པ་སོགས་ཡན་ལག་ཐམས་ཅད་དང་གཟུགས་སྣང་ཐམས་ཅད་རགས་པ་ཕྲ་བ་དང་། ཕྲ་མོ་རྡུལ་དང་རྡུལ་ཕྲ་རབ་ཀྱི་བར་དུ་ཕྱེ་སྟེ། དེ་ཡང་ཉི་ཟེར་གྱི་རྡུལ་གཅིག་ཆ་བདུན་དུ་བསྒོས་པ་ལ་གླང་རྡུལ་དང་དེས་བསྒྲེས་ཏེ། ལུག རི་བོང་། ཆུ་ལྕགས། རྡུལ་ཕྲན། རྡུལ་ཕྲ་རབ་ཀྱི་བར་རིམ་པར་བདུན་བདུན་དུ་གསིལ་ཏེ། མདོར་ན། ཉི་ཟེར་གྱི་ནི་རྡུལ་གཅིག་ལ། །ཕྲ་རབ་རྡུལ་ནི་འབུམ་ཕྲག་བརྒྱད། །ཁྲི་ཕྲག་གཉིས་དང་སྟོང་ཕྲག་གསུམ། །བརྒྱ་ཕྲག་ལྔ་དང་བཞི་བཅུ་གསུམ། །ཞེས་པ་ལྟར་གྱི་རྡུལ་ཕྲ་རབ་དེ་ཡང་ཕྱོགས་ཆའི་དབྱེ་བས་གཞལ་ན་ནམ་མཁའ་བཞིན་དུ་སྟོང་པར་འགྱུར་གྱི། གཟུགས་སུ་གྲུབ་པ་མེད་པ་དེས་ན་རྡུལ་ཕྲ་རབ་ཏུ་ཡང་གྲུབ་པ་མེད་དོ། །དེ་ལྟར་བདེན་པར་མ་གྲུབ་པའི་རྨི་ལམ་ལྟ་བུ་ཡི་གཟུགས་ལ་དེ་ཁོ་ན་ཉིད་ཀྱི་དཔྱོད་པ་དང་ལྡན་པ་སུ་ཞིག་ཆགས་རིགས་ཏེ་མི་རིགས་སོ། །གང་ཚེ་དེ་ལྟར་ལུས་རང་བཞིན་མེད་པ་དེ་ཡི་ཚེ་དེའི་བྱེ་བྲག་སྐྱེས་པ་གང་ཡིན་ལ་བུད་མེད་གང་ཡིན་ཏེ་བདེན་པར་མེད་དོ། །གཉིས་པ་ཚོར་བ་དྲན་པ་ཉེ་བར་བཞག་པ་ལ། ཚོར་བའི་ངོ་བོ་དང་། རྒྱུ་དང་། འབྲས་བུ་དང་། ཚོར་བ་པོ་ལ་དཔྱད་པ་བཞི་ལས། དང་པོ་ངོ་བོ་ལ་དཔྱད་པ་ནི། ཚོར་བ་སྡུག་བསྔལ་འདི་དེ་ཁོ་ན་ཉིད་དུ་རང་གི་ངོ་བོས་སེམས་ཀྱི་རྒྱུད་ལ་ཡོད་པ་ཞིག་ཡིན་ན། ཅི་སྟེ་རྒྱུད་ལ་རབ་ཏུ་དགའ་བ་སྐྱེ་བ་ལ་མི་གནོད་དེ། གནོད་ཅིང་དགའ་བ་སྐྱེ་བར་མི་འགྱུར་ནའང་དེ་ལྟར་མ་ངེས་པའི་ཕྱིར། བདེ་བའང་དེས་མཚོན་ཏེ་ཤེས་ནུས་པས་ལོགས་སུ་སྨོས་མི་དགོས་སོ། །དེས་ན་དེ་གཉིས་ཕན་ཚུན་འགལ་བས་གང་གི་རང་བཞིན་དུ་གྲུབ་པ་དེ་གཅིག་ཤོས་སུ་མི་རུང་སྟེ། དངོས་པོས་རང་གི་ཆོས་འདོར་བ་མི་སྲིད་པས་སོ། །དེས་ནི་ནང་བློ་ཡི་སྟེང་ན་ཚོར་བ་བདེན་གྲུབ་མེད་པར་བསྟན་ནས། ད་ནི་ཕྱིའི་དབང་དུ་བྱས་ཏེ་གསུངས་པ། གྲངས་ཅན་པ་སོགས་འདོད་པ་ལྟར་བདེ་བ་ཕྱི་ཡུལ་གྱི་སྟེང་ནའང་བདེན་པར་མ་གྲུབ་སྟེ། ཡུལ་གཟུགས་བཟང་བ་དང་རོ་མངར་བ་སོགས་བདེ་བའི་རང་བཞིན་ཡིན་ན། བུ་ཤི་བའི་མྱ་ངན་གྱིས་གདུངས་པ་དང་འཇིགས་པས་མྱོས་པ་སོགས་ལ་ཟས་ཞིམ་པོ་དང་ལྟད་མོ་སོགས་ཀྱིས་ཅི་སྟེ་དགའ་བར་མི་བྱེད་དེ་ཞིམ་སོགས་དངོས་པོ་དེ་ཉིད་ལ་བདེ་བ་ཡོད་པའི་ཕྱིར་མེའི་ཚ་བ་བཞིན་ནོ། །དེ་ལ་སྡུག་བསྔལ་དེ་ཁོ་ན་ཉིད་དུ་ནང་བློ་ལ་མེད་པ་ནི་མ་ཡིན་ཀྱང་ནང་གི་རབ་ཏུ་དགའ་བ་ཁྱད་པར་ཅན་སྟོབས་དང་ལྡན་པས་ཟིལ་གྱིས་མནན་པའི་ཕྱིར་གལ་ཏེ་དེ་མྱོང་བ་མ་ཡིན་ཏེ་དཔེར་ན་ཉི་མས་རྒྱུ་སྐར་བཞིན་ནོ་ཞེ་ན། གང་ཞིག་ཉམས་སུ་མྱོང་བའི་བདག་ཉིད་མིན་པ་དེ་ནི་ཚོར་བ་ཇི་ལྟར་ཡིན་ཏེ་ཚོར་བའི་མཚན་ཉིད་མེད་པའི་ཕྱིར། ཉམས་སུ་མ་མྱོང་ཡང་ཚོར་བར་འཇོག་ན་ནམ་མཁའི་མེ་ཏོག་གི་དྲི་ཡང་ཚོར་བར་ཐལ་ལོ། །རིགས་པ་འདིས་གདུང་ལྡན་ཞིམ་སོགས་མི་དགའ་བའང་གདུངས་པ་སྟོབས་ཆེན་པོས་ཟིལ་གྱིས་མནན་ནས་མི་མྱོང་ཟེར་ན་ཡང་འདི་བཞིན་དུ་དཔྱད་པར་བྱའོ། །དེ་ལ་དེ་དག་འདི་སྙམ་དུ། གཏན་ནས་མ་མྱོང་ན་ཚོར་བར་མི་རུང་བས་ན་དགའ་བ་སྟོབས་ལྡན་མྱོང་བཞིན་པའི་སྐབས་སུ་སྡུག་བསྔལ་གཏན་མ་མྱོང་བ་ནི་མིན་ཡང་སྡུག་བསྔལ་ཕྲ་མོ་ཉིད་དུ་ཡོད་པས་དེ་མྱོང་བ་མི་ཤེས་པ་ཡིན་ཏེ། དཔེར་ན་བུ་རམ་གྱི་ཁུ་བ་མང་པོའི་ནང་ན་ཚྭ་ཆུའི་ཐིགས་པ་ཕྲ་མོ་ལྷུང་བ་བཞིན་ན་ཞེ་ན། རྒྱུད་གཅིག་ལ་སྡུག་བསྔལ་ཕྲ་མོ་དང་བདེ་བ་ནུས་མཚུངས་སུ་འགྲོགས་པ་ནི་མེད་དེ། ཡོད་ན་བདེ་སྡུག་གཉིས་དུས་མཉམ་པར་རྒྱུད་གཅིག་ལ་སྣང་དུ་རུང་བ་ལ་དེ་མ་དམིགས་པ་དང་། ཁྱོད་ཀྱི་སྡུག་བསྔལ་འདི་ཡི་རགས་པ་སྟོབས་ཆེན་པོའི་ཆ་ནི་བདེ་བས་བསལ་བར་འདོད་པ་མིན་ནམ། དེ་ལྟ་ན་འདིའི་ཕྲ་བའང་ཅིས་མི་སེལ་ཏེ། དེའི་གཉེན་པོ་སྟོབས་ལྡན་གནས་བཞིན་པ་ཡིན་པའི་ཕྱིར་མེ་སྟོབས་ཆེན་པོས་ཁྱབ་པར་ནོན་པའི་གཞིར་གྲང་རེག་བཞིན་ནོ། །དེའི་ཕྱིར་བདེ་བ་སྟོབས་ཆེན་མྱོང་བཞིན་པ་ན་དེའི་འགལ་ཟླར་གྱུར་པའི་སྡུག་བསྔལ་ཕྲ་བའང་མྱོང་བ་མེད་དོ། །ཡང་ཁོ་ན་རེ། སྡུག་བསྔལ་ཕྲ་མོ་ཡོད་ཀྱང་དེ་ནི་རང་གི་ནུས་པ་འབྱིན་མ་ནུས་པར་བདེ་བ་སྟོབས་ཆེན་པོས་ཁ་བསྒྱུར་ཏེ་སོང་བས། བདེ་བ་ཆེན་པོ་དེ་ལས་གཞན་དགའ་བ་ཙམ་སྟེ་དགའ་བ་ཕྲ་མོའི་རྣམ་པར་མྱོང་ངོ་ཞེ་ན། དགའ་བ་ཙམ་དུ་གཏོགས་པའི་ཕྲ་མོ་ཉིད་དེ་ཡང་དགའ་བ་དེའི་རིགས་ཡིན་གྱི་སྡུག་བསྔལ་ནམ་ཡང་མ་ཡིན་ན་དེ་ལྟར་བརྟགས་པས་ཅི་ཞིག་བྱ། གལ་ཏེ་འགལ་རྐྱེན་བདེ་བ་སྟོབས་ལྡན་སྐྱེས་པས་ན། རྒྱུ་མ་ཚང་བའི་སྡུག་བསྔལ་ནི་དེ་ཚེ་སྐྱེས་པ་མིན་ནོ་ཞེ་ན་ནི། ཚོར་བ་ཞེས་བྱ་བ་དེ་ནི་དངོས་པོ་ལ་གྲུབ་པ་མེད་པར་ནང་གི་རྟོག་པ་ཡིས་བདེ་སོགས་སུ་མངོན་པར་ཞེན་པའམ་བཏགས་པ་ཙམ་ཉིད་ཡིན་ཞེས་བྱ་བར་དངོས་པོའི་སྟོབས་ལས་གསལ་བོར་འོངས་ཤིང་གྲུབ་པ་མིན་ནམ་སྟེ་འདི་ལྟར་རྐྱེན་གྱི་དབང་གིས་བདེ་སྡུག་རེས་འགའ་བར་དམིགས་པའི་ཕྱིར་རོ། །དེས་ན་བདེ་སྡུག་ཞེས་གྲུབ་གྲུབ་མོ་ཞིག་ཏུ་བལྟས་ནས་དེ་ལ་འདོར་ལེན་གྱི་ཆེད་དུ་འབད་པ་ནི་འཁྲུལ་པ་སྟེ། རང་གི་བློས་མངོན་པར་མ་བརྟགས་ཀྱི་བར་དུ་བདེ་སྡུག་རང་མཚན་པ་ཕྱི་ནང་ཀུན་ཏུའང་མི་གནས་ཏེ། དཔེར་ན་སྐྱུག་ནད་ཅན་དང་བཀྲེས་པ་ལ་མར་ཁུ་དང་། གཙང་སྦྲ་ཅན་དང་ཕག་པ་ལ་ལུད་ཕུང་དང་། མི་སྡུག་པ་གོམས་པ་དང་ཆགས་ཅན་ལ་བུད་མེད་ཀྱི་དངོས་པོ་བཞིན་དུ་རང་གི་རྟོག་པའི་དབང་གིས་དེར་འགྱུར་བ་སྟེ་བདེ་སྡུག་སོགས་ཀྱི་དངོས་པོ་རང་མཚན་པ་མེད་དོ། །རྒྱུ་མཚན་དེ་ལྟ་བུ་ཉིད་ཀྱི་ཕྱིར་ན་ཚོར་བ་ལ་མངོན་པར་ཞེན་ནས་འདོར་ལེན་གྱི་རྣམ་པར་རྟོག་པ་འདི་ཡི་ནི་གཉེན་པོར་བཤད་མ་ཐག་པའི་རྣམ་པར་དཔྱོད་པ་འདི་ལྟ་བུ་བསྒོམ་པར་བྱ་སྟེ། དེའི་གཉེན་པོ་ནི་འདི་ལས་གཞན་མེད་པའི་ཕྱིར་རོ། །དེ་འདྲའི་རྣམ་པ་བརྟག་ཅིང་དཔྱད་པའི་ཞིང་ས་བཟང་པོ་ལྟ་བུ་ལས་བྱུང་བ་ཡི་ཚོར་བ་རང་བཞིན་མེད་པའི་དོན་ལ་མཉམ་པར་བཞག་པའི་བསམ་གཏན་དེ་ནི་རྣལ་འབྱོར་པ་ཡི་ལོངས་སྤྱད་པའི་ཟས་ཡིན་ཏེ། རྣལ་འབྱོར་པ་རྣམས་ཀྱིས་ཆགས་བྲལ་གྱི་དགའ་བ་ཉམས་སུ་མྱོང་ཞིང་རྟོགས་པའི་ལུས་རྒྱས་པའི་ཕྱིར་རོ། །གཉིས་པ་ཚོར་བའི་རྒྱུ་ལ་བརྟག་པ་ནི། གལ་ཏེ་ཡུལ་དབང་ཤེས་གསུམ་འདུས་ཏེ་རེག་པའི་རྒྱུ་ལས་ཚོར་བ་འབྱུང་བར་འགྱུར་རོ་སྙམ་ན། འདི་ལྟར་ཡུལ་ཅན་དབང་པོ་དང་གཟུགས་སོགས་ཡུལ་ཏེ་དབང་དོན་གཉིས་པོ་འདི་དང་བར་དང་བཅས་པའམ་བར་མེད་པ་གང་ཡིན། དང་པོ་ལྟར་ན། དེ་དག་གང་དུ་འཕྲད་པར་འགྱུར་ཏེ་བར་ཆོད་པ་ལ་ཕྲད་མི་སྲིད་དེ་ཤར་ནུབ་ཀྱི་རི་བཞིན་ནོ། །གཉིས་པ་ལྟར་བར་མེད་ན་ཡང་དེ་གཉིས་གཅིག་པ་ཉིད་དུ་ཐལ་ཏེ། དེ་ལྟར་ན་ཡུལ་ཅན་གང་ཞིག་ཡུལ་གང་དང་འཕྲད་པར་འགྱུར་ཏེ་མིག་རང་ཉིད་རང་ཉིད་ལ་ཕྲད་པ་མི་སྲིད་པ་བཞིན་ནོ། །དེར་ཁོ་ན་རེ། ཐལ་མོ་ཕན་ཚུན་སྦྱར་བ་ལ་སོགས་པ་བཞིན་དུ་ཅི་སྟེ་མེད་སྙམ་ན་དེ་ནི་རྟོག་པས་ཞེན་པ་ཙམ་ལས་ཡང་དག་པར་མིན་ཏེ། དབང་དོན་རགས་པ་རྣམས་ཕྱོགས་ཐམས་ཅད་ཀྱིས་ཕྲད་པ་མེད་དེ་གང་མདུན་ཕྲད་ན་རྒྱབ་མ་ཕྲད་པ་ལྟ་བུའོ། །དེའི་ཚུལ་གྱིས་དཔྱད་ན་རྡུལ་གཞན་གྱིས་བར་དུ་ཆོད་པའི་རྡུལ་རྣམས་ནི་མ་ཕྲད་ལ། མཐར་བར་མ་ཆོད་པའི་དབང་དོན་ཀྱི་རྡུལ་ཕྲ་རབ་ཕྲད་དགོས་ཀྱང་། ཕྲ་རྡུལ་ལམ་རྡུལ་ཕྲན་ནི་རྡུལ་ཕྲན་གཞན་ལ་འཇུག་པ་སྟེ་གཅིག་གི་ནང་དུ་གཅིག་ཞུགས་ཤིང་འདྲེས་པའམ་ཐིམ་པ་ལྟ་བུ་ནི་མེད་དེ། ཆ་མེད་ཀྱི་རྡུལ་དེ་ལ་ནི་ཁོང་སྟོང་གི་སྐབས་མེད་པ་དང་གཉིས་ཀ་བོངས་ཚད་མཉམ་པ་ཡིན་ལ། དེ་ལྟར་མ་ཞུགས་པ་ལ་ཕན་ཚུན་འདྲེས་པ་མེད་ཅིང་མ་འདྲེས་པ་ལ་ནམ་ཡང་ཕྱོགས་ཐམས་ཅད་ཀྱིས་ཕྲད་པ་མེད་དོ། །དེས་ན་རྡུལ་ཕྲན་ཆ་མེད་པ་དེ་ལའང་ཕྲད་པ་ཡོད་དོ་ཞེས་བྱ་བ་འདི་ཇི་ལྟར་འཐད་པར་འགྱུར་ཏེ་ཕྱོགས་གཅིག་དང་ཕྱོགས་ཐམས་ཅད་ཀྱིས་ཕྲད་པ་གཉིས་ཀ་དེ་ལ་མི་སྲིད་པའི་ཕྱིར་རོ། །དེས་ན་ཕྲད་པ་ཡིན་པ་དང་ནི་ཆ་མེད་པའང་ཡིན་པར་གལ་ཏེ་ཁྱོད་ཀྱིས་མཐོང་ན་ཁོ་བོ་ལ་བསྟན་པར་གྱིས་ཤིག་དང་ཕྲད་པ་གྲུབ་པར་འགྱུར་རོ་ཞེས་བསྟན་མི་ནུས་པའི་ཚད་དུ་དགོངས་པའོ། །དེས་ཡུལ་དབང་ཤེས་གསུམ་འདུས་པ་ཞེས་པའི་དབང་དོན་འདུས་པ་མེད་པར་བསྟན་ནས། ཡང་རྣམ་ཤེས་ནི་རྡུལ་ཚོགས་པའི་ལུས་མེད་པ་ལ་ནི་ཡུལ་དང་ཕྲད་པ་འཐད་པ་མ་ཡིན་པ་ཉིད་དེ། གལ་ཏེ་ལུས་མེད་ཀྱང་ཕྲད་པ་ཡོད་ན་ནམ་མཁའ་དང་ལག་པ་ཕྲད་པ་དང་། མོ་གཤམ་གྱི་བུ་དང་ཡང་ཕྲད་པར་འགྱུར་རོ། །གལ་ཏེ་ཕྲད་ཅིང་རེག་པ་མེད་ཀྱང་ཡུལ་དབང་ཤེས་གསུམ་ཚོགས་པ་ཡོད་དོ་སྙམ་ན་ཚོགས་པ་ཞེས་པའང་བརྟགས་ཤིང་དཔྱད་ན་དངོས་པོར་གྲུབ་པ་མེད་པའི་ཕྱིར་བདེན་པ་མིན་ཏེ། དེ་བཞིན་སོར་མོའི་ཚོགས་ཡིན་ཕྱིར། །ཞེས་སོགས་ཀྱིས་སྔར་ནི་ཇི་ལྟར་རིགས་པས་རྣམ་པར་དཔྱད་ཟིན་པ་བཞིན་ནོ། །དེ་ལྟར་བརྟགས་ན་རྒྱུ་རེག་པ་ཡོད་པ་མིན་ན། འབྲས་བུ་ཚོར་བ་གང་ལས་འབྱུང་བར་འགྱུར་ཏེ་འབྱུང་མི་སྲིད་དོ། །དེས་ན་དོན་མེད་ཀྱི་ངལ་བ་སྣ་ཚོགས་པ་འདི་ཅི་ཡི་དོན་དུ་ཡིན་ཏེ། གང་དོན་དུ་གཉེར་ཞིང་བསྒྲུབ་པར་བྱ་བའི་བདེ་བ་མེད་ལ། སྡུག་བསྔལ་གང་གིས་གང་ཟག་གང་ལ་གནོད་པར་འགྱུར་ཏེ་སྒྱུ་མའི་སེམས་འཁྲུལ་པའི་སྣང་བ་ཙམ་མོ། །གསུམ་པ་འབྲས་བུ་སྲེད་པ་ལ་དཔྱད་པ་ནི། འདི་ལྟར་སྲེད་པ་ལྡོག་མེད་དུ་སེམས་ཅན་ཐམས་ཅད་ལ་སྐྱེ་བས་ན་དེའི་རྒྱུ་ཚོར་བ་ཅི་སྟེ་མེད་ཅེ་ན། འདི་ཡང་ཡང་དག་པར་མ་ཡིན་ཏེ། གང་གི་ཚེ་ཚོར་བ་པོ་བདག་དང་ཤེས་པ་རང་བཞིན་གྱིས་གྲུབ་པ་འགའ་ཡང་མེད་ཅིང་དེས་མྱང་བྱ་ཚོར་བའང་ཡོད་པ་མ་ཡིན་པ། དེ་ཚེ་ཚོར་བྱ་དང་ཚོར་བྱེད་དོན་ལ་མེད་པའི་གནས་སྐབས་འདི་ལྟ་བུ་མཐོང་ནས་ཚོར་བའི་རྒྱུ་ལས་བྱུང་བའི་འབྲས་བུ་སྲེད་པ་ཅི་ཡི་ཕྱིར་ལྡོག་པར་མི་འགྱུར་ཏེ་རྒྱུ་མེད་པའི་ཕྱིར་རོ། །བཞི་པ་ཚོར་བ་པོ་ལ་དཔྱད་པ་ནི། གལ་ཏེ་ཚོར་བ་དང་ཚོར་བ་པོ་མེད་ན་མཐོང་བ་སོགས་འདི་མི་འཐད་དོ་སྙམ་ན། མིག་གིས་གཟུགས་མཐོང་བའམ་ནི་ལུས་ཀྱིས་རེག་པ་སྟེ་ཐོག་མཐའ་གཉིས་ཀྱི་བར་ཀུན་མཚོན་པར་བྱས་པའི་ཐོས་སྣོམ་པ་ལ་སོགས་པ་འདི་དག་དོན་ལ་མེད་ན་ཡང་རྨི་ལམ་དང་སྒྱུ་མ་འདྲ་བའི་བདག་ཉིད་ཀྱིས་ཡིན་ཏེ། སློབ་དཔོན་གྱིས། རྨི་ལམ་ཇི་བཞིན་སྒྱུ་མ་བཞིན། །དྲི་ཟའི་གྲོང་ཁྱེར་ཇི་བཞིན་དུ། །དེ་བཞིན་སྐྱེ་དང་དེ་བཞིན་གནས། །དེ་བཞིན་དུ་ནི་འཇིག་པར་གསུངས། །ཞེས་སོ། །དེས་ན་མི་བདེན་བཞིན་དུ་སྣང་ཙམ་ལས་ཡང་དག་པར་མི་མཐོང་སྟེ། འདི་ལྟར་ཚོར་བ་དང་དེ་མྱོང་བའི་སེམས་དུས་མཉམ་མམ་མི་མཉམ་ཞེས་དཔྱད་ཚེ་དུས་མཉམ་པར་གྱུར་ན་ནི་མྱོང་བྱེད་སེམས་དང་མྱང་བྱ་ཚོར་བ་གཉིས་དུས་སྔ་ཕྱི་མེད་པར་ལྷན་ཅིག་ཏུ་སྐྱེས་པའི་ཕྱིར། ཚོར་བ་དེ་སེམས་དེ་ཡིས་མྱོང་བའམ་མཐོང་བ་མ་ཡིན་ཏེ། རྫས་ཐ་དད་དུས་མཉམ་པ་ནི་གང་གང་གི་སྔོན་དུ་མེད་པས་ཕན་ཚུན་མི་ལྟོས་ཤིང་འབྲེལ་མེད་སོ་སོ་བའི་ཕྱིར་མི་མྱོང་ངོ་། །གལ་ཏེ་དུས་མི་མཉམ་པར་ཚོར་བ་སྔར་སྐྱེས་པ་དང་སེམས་ཕྱི་མར་སྐྱེས་པས་ཀྱང་དེ་ཉིད་དྲན་པར་འགྱུར་བ་ཡིན་གྱི་དངོས་སུ་མྱོང་བ་མ་ཡིན་ཏེ་ཚོར་བ་དེ་འགགས་ཟིན་པས་སེམས་ཀྱི་རང་དུས་ན་མེད་པའི་ཕྱིར་རོ། །དེ་ལྟར་ཚོར་བྱེད་ཀྱི་སེམས་འདས་པ་ནི་འགགས་ཟིན་པས་དེས་མྱོང་མི་སྲིད་ལ། ད་ལྟ་དང་མ་འོངས་པའི་སེམས་ཀྱིས་མི་མྱོང་བར་རིགས་པས་བསྒྲུབས་པའོ། །དེ་བཞིན་དུ་ཡུལ་ཚོར་བ་འདས་པ་ནི་དྲན་པ་ལས་མི་མྱོང་ལ། ད་ལྟ་ནི་མྱོང་མི་ཤེས་མ་འོངས་པ་ནི་མེད་པས་ད་ལྟའི་ཤེས་པས་མྱོང་མི་སྲིད་དོ། །འདི་ལྟར་ཚོར་བ་རང་གིས་བདག་རང་ཉིད་མྱོང་བ་སྲིད་པ་མིན་ཏེ་རང་ལ་རང་བྱེད་པ་འགལ་བའི་ཕྱིར་རང་རིག་བཀག་པ་བཞིན་ཡིན་ལ་ཚོར་བ་དེ་ལས་གཞན་དུ་གྱུར་པའི་ཤེས་པ་དག་གིས་ཀྱང་མྱོང་བ་མ་ཡིན་པར་བཤད་མ་ཐག་པ་ཉིད་ཀྱི་ཕྱིར་ན། ཚོར་བ་དེ་ཚོར་བ་པོ་འགའ་ཡང་ཡང་དག་པར་ཡོད་པ་མིན་ཏེ། རྒྱུ་མཚན་དེས་ན་ཚོར་བ་འདི་དེ་ཁོ་ན་ཉིད་དུ་ཡོད་པ་མིན་ནོ། །དེ་ལྟར་མྱོང་བ་པོའི་བདག་མེད་པར་ཕུང་པོའི་ཚོགས་པ་རྨི་ལམ་སྒྱུ་མ་ལྟ་བུ་འདི་ལ་ཚོར་བ་སྡུག་བསྔལ་བ་ཞེས་རང་བཞིན་མ་གྲུབ་པ་འདི་ཡིས་ཇི་སྟེ་གནོད་པར་བྱ་བ་ཡིན་ཏེ། དོན་ལ་ཕན་གནོད་གང་ཡང་མེད་དོ། །གསུམ་པ་སེམས་དྲན་པ་ཉེ་བར་བཞག་པ་ལ། ཡིད་ཤེས་རང་བཞིན་མེད་པར་བསྟན་པ་དང་། རྣམ་ཤེས་ལྔ་རང་བཞིན་མེད་པར་བསྟན་པའོ། །དང་པོ་ནི། ཡིད་ཀྱི་རྣམ་པར་ཤེས་པ་ནི་མིག་སོགས་ནང་གི་དབང་པོ་རྣམས་ལ་མི་གནས་ཤིང་། གཟུགས་སོགས་ཕྱིའི་ཡུལ་རྣམས་ལ་ཡང་གནས་པ་མིན་ཏེ་ཡུལ་དབང་དེ་དག་ཡོད་ཀྱང་རེས་མི་སྐྱེ་བས་སོ། །དེ་གཉིས་ཀྱི་བར་ནའང་གནས་པ་མིན་ཏེ་མ་དམིགས་པས་སོ། །ནང་ལུས་ཀྱི་དབུས་ན་ཡང་སེམས་ཡོད་པ་མིན་ལ་ཕྱི་ལུས་ཀྱི་ཡན་ལག་རྣམས་ལའང་མིན་ཞིང་། དེ་ལས་གཞན་དུ་ཡང་ནི་བཙལ་བས་རྙེད་པ་མ་ཡིན་ནོ། །གང་ཞིག་ལུས་ཉིད་ཀྱང་ཡིད་མིན་ལ་དེ་ལས་གཞན་དུའང་བདེན་པ་མིན་ཞིང་ལུས་ལ་འདྲེས་ཤིང་ཞུགས་པར་གྱུར་པའང་མིན་ཏེ། ལུས་ལས་ལོགས་སུ་གྲུབ་པ་འགའ་ཡང་མེད་པའི་ཡིད་དེ་ནི་ཅུང་ཟད་ཀྱང་བདེན་པར་ཡོད་པ་མིན་ཏེ། དཀོན་མཆོག་བརྩེགས་པ་ལས། འོད་སྲུང་སེམས་ནི་ནང་ན་ཡང་མེད་ཕྱི་རོལ་ན་ཡང་མེད། གཉིས་ཀ་ན་ཡང་མེད་ཅིང་མི་དམིགས་སོ། །འོད་སྲུང་སེམས་དེ་ནི་གཟུགས་མེད་པ། བསྟན་དུ་མེད་པ། ཐོགས་པ་མེད་པ། རྟེན་མ་ཡིན་པ། སྣང་བ་མེད་པ། རྣམ་པར་རིག་པ་མེད་པ། གནས་མེད་པའོ། །འོད་སྲུང་སེམས་ནི་སངས་རྒྱས་ཐམས་ཅད་ཀྱིས་ཀྱང་མ་གཟིགས། མི་གཟིགས། གཟིགས་པར་མི་འགྱུར་རོ། །ཞེས་གསུངས། རྒྱུ་མཚན་དེའི་ཕྱིར་སེམས་ཅན་རང་ཉིད་གདོད་མ་ནས་རང་བཞིན་གྱིས་མྱ་ངན་ལས་འདས་པ་ཡིན་ནོ། །གཉིས་པ་རྣམ་ཤེས་རང་བཞིན་མེད་པར་བསྟན་པ་ནི། སེམས་དེ་ལྟ་ནའང་སྒོ་ལྔའི་རྣམ་ཤེས་ཡུལ་ལྔ་འཛིན་བྱེད་དུ་བདེན་ནོ་སྙམ་ན། ཤེས་བྱ་གཟུགས་ལ་སོགས་པ་ལས་སྔར་མིག་ཤེས་སོགས་ཡོད་ན་ཤེས་པ་དེ་ནི་ཡུལ་ཅི་ལ་དམིགས་ནས་སྐྱེ་སྟེ། དེའི་ཚེ་ཡུལ་མེད་པས་ཡུལ་ཅན་སྐྱེ་བ་མེད་དོ། །ཤེས་པ་དང་ཤེས་བྱ་ལྷན་ཅིག་ཏུ་སྐྱེ་ན་ཡང་ཤེས་པ་དེ་ནི་ཅི་ལ་དམིགས་ནས་སྐྱེ། ཤེས་པ་མ་སྐྱེས་པར་ཡུལ་དམིགས་རྐྱེན་མི་སྐྱེ་བས་མི་ནུས་ཤིང་། དམིགས་རྐྱེན་སྐྱེས་པ་ན་ཤེས་པའང་སྐྱེས་ཟིན་པར་སྐྱེད་བྱེད་དུ་མི་འོས་པས་འབྲེལ་མེད་དུ་འགྱུར་བའི་ཕྱིར་རོ། །འོན་ཏེ་ཤེས་བྱའི་ཕྱིས་ཤེས་པ་དེ་སྐྱེར་ཡོད་ན། དེ་ཚེ་ཤེས་པ་དེ་ཤེས་བྱ་གང་ལས་སྐྱེ་སྟེ། དེའི་དམིགས་ཡུལ་འགགས་པའི་ཕྱིར། དེ་ལས་སྔར་འགགས་པའི་དངོས་པོ་དེ་ད་ལྟར་ཡོད་དམ་མེད། ཡོད་ན་འགགས་པ་མིན་ཏེ་དུས་མཉམ་དུ་འགྱུར་ལ། མེད་ཀྱང་སྐྱེད་ན་ས་བོན་ཚིག་པས་མྱུ་གུ་དང་། རི་བོང་རྭས་ཀྱང་མིག་ཤེས་སོགས་སྐྱེད་པར་ཐལ་ལོ། །ཞིག་མ་ཞིག་ཀྱང་དེ་དང་དོན་གཅིག་གོ །བཞི་པ་ཆོས་དྲན་པ་ཉེར་བཞག་ལ། ཆོས་ཐམས་ཅད་སྐྱེ་མེད་དུ་སྤྱིར་བསྟན་པ་དང་། རྒྱུ་འབྲས་ངོ་བོ་ཉིད་གསུམ་ལ་བྱེ་བྲག་ཏུ་དཔྱད་པའོ། །དང་པོ་སྤྱིར་དཔྱད་པ་ལ་དངོས་དང་། རྩོད་སྤོང་གཉིས། དང་པོ་ནི། སྔར་བཤད་པ་དེ་ལྟར་སྔ་ཕྱི་དུས་མཉམ་གང་ལས་ཀྱང་མི་སྐྱེ་བའི་རིགས་པ་འདིས་འདུས་བྱས་དང་འདུས་མ་བྱས་ཀྱི་ཆོས་རྣམས་ཐམས་ཅད་ཀྱི་སྐྱེ་བ་རྟོགས་པར་འགྱུར་མ་ཡིན་ཏེ་སྐྱེ་བ་མེད་དོ། །གང་སྐྱེ་བ་མེད་པ་དེ་ལ་གནས་པ་སོགས་ཀྱང་མེད་དེ་དོན་དུ་ན། འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །ཞེས་པ་བཞིན་ནོ། །གཉིས་པ་རྩོད་སྤོང་ལ། བསྒྲུབ་བྱ་མི་འཐད་པ་སྤོང་བ། སྒྲུབ་བྱེད་མི་འཐད་པ་སྤོང་བའོ། །དང་པོ་བསྒྲུབ་བྱ་མི་འཐད་པ་སྤོང་བ་ནི། གལ་ཏེ་ཁྱོད་འདོད་པ་དེ་ལྟར་ཤེས་བྱའི་ཆོས་རྣམས་ལ་སྐྱེ་སོགས་ཅུང་ཟད་ཀྱང་མེད་ན་སྐྱེ་འགག་དང་འགྲོ་འོང་ལ་སོགས་པའི་བདག་ཉིད་ཅན་ཀུན་རྫོབ་པ་མེད་པར་འགྱུར་ལ། གང་ཀུན་རྫོབ་མི་འདོད་པ་དེ་ལ་དོན་དམ་ཡང་མེད་པས་བདེན་པ་གཉིས་ཀའང་ག་ལ་ཡོད་དེ་བདེན་པ་གཅིག་ཏུ་འགྱུར་རོ་སྙམ་ན། བདེན་པ་གཉིས་སུ་བཞག་པ་ནི་གདུལ་བྱ་ལམ་ལ་འཇུག་པའི་སྒོ་ཙམ་སྟེ། དོན་དམ་པར་བདེན་པ་གཉིས་སུ་ཆད་པའང་མེད་དེ་བསམ་གྱིས་མི་ཁྱབ་པའི་ཆོས་དབྱིངས་དེ་བཞིན་ཉིད་ཙམ་གནས་ལུགས་མཐར་ཐུག་གོ །དེ་སྐད་དུའང་མདོ་ལས། དེ་ལ་མཚན་ཉིད་ཀྱི་བདེན་པ་གང་ཞེ་ན། འདི་ལྟ་སྟེ། མཚན་ཉིད་ཐམས་ཅད་མཚན་ཉིད་གཅིག་ལ། མཚན་ཉིད་གཅིག་པ་ནི་མཚན་ཉིད་མེད་པའོ། །དེ་ལ་བྱང་ཆུབ་སེམས་དཔའི་ཀུན་རྫོབ་ཀྱི་བདེན་པ་འཆད་པས་མི་སྐྱོ། དོན་དམ་པའི་བདེན་པ་མངོན་དུ་བྱེད་པར་མི་ལྟུང་། མཚན་ཉིད་ཀྱི་བདེན་པ་མཚན་ཉིད་མེད་པར་རྟོགས་པར་བྱེད་པ་དེ་ནི་བྱང་ཆུབ་སེམས་དཔའི་བདེན་པ་ལ་མཁས་པ་ཞེས་བྱའོ། །གཞན་ཡང་བདེན་པ་ནི་གཅིག་པུ་གཉིས་པ་མ་ཡིན་པ་སྟེ། འདི་ལྟ་སྟེ་འགོག་པའི་བདེན་པའོ། །དེ་ལ་བདེན་པ་གཅིག་པུ་ལའང་སྒྲོ་མི་འདོགས་པ་དང་། སེམས་ཅན་སྒྲོ་འདོགས་པར་ལྟུང་བ་རྣམས་བདེན་པར་སྦྱོར་བར་བྱེད་པ་དེ་ནི་བྱང་ཆུབ་སེམས་དཔའི་བདེན་པ་ལ་མཁས་པ་ཞེས་བྱའོ། །ཞེས་དང་། སྐྱེ་བ་མེད་པ་བདེན་པ་གཅིག་ཡིན་ན། །དེ་ལ་ཁ་ཅིག་བདེན་པ་བཞི་ཞེས་འཛེར། །བྱང་ཆུབ་སྙིང་པོར་འདུག་ན་བདེན་གཅིག་ཀྱང་། །གྲུབ་པར་མ་མཐོང་བཞི་ལྟ་ག་ལ་ཞིག །ཅེས་དང་། ཀླུ་སྒྲུབ་ཀྱིས། མྱ་ངན་འདས་པ་བདེན་གཅིག་པུ། །རྒྱལ་བ་རྣམས་ཀྱིས་གང་གསུངས་པ། །དེ་ཚེ་ལྷག་མ་ལོག་པ་ཞེས། །མཁས་པ་ཅི་ཕྱིར་འདོད་མི་བྱེད། །ཅེས་དང་། འཇུག་འགྲེལ་ལས། དོན་དམ་པར་བདེན་པ་གཉིས་ཡོད་པ་མ་ཡིན་ཏེ། དགེ་སློང་དག་བདེན་པ་དམ་པ་འདི་ནི་གཅིག་སྟེ། འདི་ལྟ་སྟེ་མི་བསླུ་བའི་ཆོས་མྱ་ངན་ལས་འདས་པའོ། །འདུ་བྱེད་ཐམས་ཅད་ནི་བརྫུན་པ་བསླུ་བའི་ཆོས་ཅན་ནོ། །ཞེས་འབྱུང་བའི་ཕྱིར་རོ། །ཞེས་གསུངས་པ་བཞིན་ནོ། །དོན་དམ་པར་བདེན་པ་གཉིས་སུ་བཞག་པ་མེད་ཀྱང་ཐ་སྙད་དུ་ཡོད་དེ། སྣང་ཚུལ་དང་གནས་ཚུལ་གཉིས་སུ་ངེས་པའི་ཕྱིར། གོང་དུ། འདི་ནི་བདེན་པ་གཉིས་སུ་འདོད། །ཅེས་པའི་སྐབས་སུ་གསལ་བར་བཤད་པ་བཞིན་ནོ། །ཡང་ཁོ་ན་རེ། དེ་ལྟར་བདེན་པ་གཉིས་སུ་བཞག་པའི་ཡ་གྱལ་ཀུན་རྫོབ་དེ་ཡང་དངོས་པོ་རང་མཚན་པ་ཞིག་མེད་པར་ཀུན་རྫོབ་ཅེས་པ་གཞན་གྱིས་བློས་འཇོག་དགོས་ཤིང་། དེས་བཞག་པས་དེར་འགྱུར་ན་སེམས་ཅན་རྣམས་མྱ་ངན་ལས་ག་ལ་འདའ་སྟེ། སེམས་ཅན་གྱི་མཐའ་མ་ཟད་པ་སྲིད་དུ་བློ་མི་འཛད་ལ། བློ་མ་ཟད་པ་སྲིད་དུ་བློས་བཞག་པའི་ཀུན་རྫོབ་མི་འཛད་པས་གཟུང་འཛིན་གྱི་སྤྲོས་པ་ཐམས་ཅད་ཟད་པའི་མྱང་འདས་ཞེས་པ་འདི་ནམ་ཡང་མི་སྲིད་དོ་ཞེ་ན། ནམ་ཡང་རྒྱུན་མི་ལྡོག་པའི་ཀུན་རྫོབ་ཀྱི་སྣང་བ་འདི་ནི་གཞན་སེམས་ཅན་རྣམས་ཀྱི་རང་རང་གི་རྣམ་པར་རྟོག་པའི་སྤྲོས་པའི་དབང་གིས་སྣང་བ་སྐྲ་ཤད་དང་རྨི་ལམ་ལྟ་བུ་སྟེ། དེ་ནི་མྱ་ངན་ལས་འདས་པ་པོ་རང་གི་ངོར་སྣང་བའི་ཀུན་རྫོབ་མིན་ཏེ། དེས་ན་གཞན་གྱི་གཉིས་སྣང་སྤྲོས་པ་ཡོད་པས་གཅིག་མྱ་ངན་ལས་མི་འདའ་བ་མ་ཡིན་ལ། གཅིག་གི་གཟུང་འཛིན་དབྱིངས་སུ་ནུབ་པས་ཐམས་ཅད་ཀྱི་གཟུང་འཛིན་མེད་པར་འགྱུར་བ་ག་ལ་ཡིན། གཉིད་ན་གཅན་གཟན་དང་ཆུ་བོ་སོགས་རྟོག་པའི་དབང་གིས་བཞག་པ་མིན་པའི་ཡུལ་རང་མཚན་པ་མེད་ཀྱང་གཉིད་སད་པའི་གང་ཟག་སོ་སོའི་གཉིད་ཀྱི་སྣང་བ་འགགས་ཀྱི་གཞན་ལ་གཉིད་ཀྱི་སྣང་བ་ཡོད་ཀྱང་སད་པ་དེ་ལ་མི་གནོད་པ་བཞིན་ནོ། །དེས་ན་གཟུང་འཛིན་གཉིས་སྣང་གི་བག་ཆགས་ཕྲ་བའང་ལྡོག་པའི་མྱ་ངན་ལས་འདས་པའི་དབྱིངས་སུ་སངས་རྒྱས་པའི་ཕྱིས་ན་ཡང་སྐྱེས་སོགས་ཀུན་རྫོབ་ཀྱི་སྤྲོས་པ་དེ་ངེས་པར་ཡོད་ན་རང་ལ་ལྟོས་པའི་ཀུན་རྫོབ་བམ་སྤྲོས་པ་དེ་ཡོད་ཀྱང་། དེ་ལྟ་བུ་མིན་ན་ཀུན་རྫོབ་ཀྱི་སྤྲོས་པ་མཐའ་དག་མེད་པ་ཡིན་པས་མྱ་ངན་ལས་འདས་པ་ཉིད་ཡིན་ཏེ། འཇུག་པ་ལས། ཤེས་བྱའི་བུད་ཤིང་སྐམ་པོ་མ་ལུས་པ། །བསྲེགས་པས་ཞི་དེ་རྒྱལ་རྣམས་ཆོས་སྐུ་སྟེ། །དེ་ཚེ་སྐྱེ་བ་མེད་ཅིང་འགག་པ་མེད། །སེམས་འགག་པ་དེ་སྐུ་ཡིས་མངོན་སུམ་མཛད། །ཅེས་འཁྲུལ་སེམས་གཟུང་འཛིན་གྱི་རྟོག་པ་འགགས་པའི་ཡེ་ཤེས་ཀྱི་སྐུ་བསམ་གྱིས་མི་ཁྱབ་པ་མངོན་དུ་མཛད་པར་གསུངས་པ་བཞིན་དུ་སྐྱེ་སོགས་སྤྲོས་པའི་དྲྭ་བ་མ་ལུས་པ་ཞི་བའི་བུད་ཤིང་ཟད་པའི་མེ་བཞིན་སེམས་སེམས་བྱུང་གི་རྒྱུ་བ་ལྷག་མ་མ་ལུས་པར་ལོག་སྟེ་ཆོས་ཀྱི་དབྱིངས་སྣང་སྟོང་ཟུང་འཇུག་བརྗོད་དུ་མེད་པའི་ངང་དུ་ཆུ་ལ་ཆུ་བཞག་པ་བཞིན་དུ་གྱུར་པའི་རང་བྱུང་གི་ཡེ་ཤེས་མཐའ་ཐམས་ཅད་དང་བྲལ་བ་ཞེས་བྱ་ཀུན་ཏུ་གཟིགས་ཀྱང་སྤྲོས་པའི་རང་བཞིན་ཉེ་བར་ཞི་བ་ཁོ་ནའོ། །འདི་ཡི་སྐབས་སུ་སེམས་སེམས་བྱུང་གི་སྤྲོས་པ་ལྷག་མེད་དུ་ལོག་པས་ན་ཡེ་ཤེས་མཐར་ཐུག་པ་མངོན་དུ་གྱུར་པ་དང་རང་བྱུང་གི་ཡེ་ཤེས་ཉིད་བརྙེས་པས་སེམས་འགགས་པ་གོ་བར་བྱ་སྟེ། སོ་སྐྱེའི་ཀུན་རྟོག་གིས་སྦགས་ནས་སྤྲོས་པའི་སེམས་མ་འགགས་སམ་སྙམ་པ་དང་། འགགས་པའི་རྗེས་སུ་ཡེ་ཤེས་མེད་པར་མར་མེ་ཤི་བ་ལྟར་བསམ་ན་ནི་སངས་རྒྱས་ལ་སྐུར་འདེབས་ཆེན་པོ་ཡིན་པས། དེ་སྤང་བའི་ཕྱིར་ཟབ་མོའི་དོན་ལ་ངེས་པའི་ཤེས་པ་བསྐྱེད་པར་བྱའོ། །འོ་ན་གོང་དུ། མཐར་ཐུག་དོན་ལ་ཡེ་ཤེས་མེད། །སོགས་ཀྱི་ལུང་དྲངས་པ་ཅི་སྙམ་ན། དེ་ནི་མཉམ་བཞག་ཏུ་ལ་བཟླ་བ་སྟེ་དོན་དཔྱོད་ཀྱི་ངོར་ཡིན་ལ། འདིར་སྐུ་དང་ཡེ་ཤེས་ཡོད་པར་བཤད་པ་ནི་རྗེས་ཐོབ་ཤན་འབྱེད་དེ་ཀུན་ཏུ་ཐ་སྙད་པའི་ཚད་མའི་ངོར་བྱས་པས་མི་འགལ་ཏེ། སྡུད་པ་ལས། ཡེ་ཤེས་མེད་ན་ཡོན་ཏན་འཕེལ་མེད་བྱང་ཆུབ་མེད། །རྒྱ་མཚོ་འདྲ་བའི་སངས་རྒྱས་ཆོས་ཀྱང་མེད་པར་འགྱུར། །ཞེས་གསུངས་པ་བཞིན་ཤེས་པར་བྱའོ། །གཉིས་པ་སྒྲུབ་བྱེད་མི་འཐད་པ་སྤོང་བ་ལ། བདེན་པ་མེད་ཀྱང་རྣམ་དཔྱོད་འཐད་པའི་ཚུལ། བདེན་པར་གྲུབ་པའི་རྣམ་དཔྱོད་མི་འཐད་པའོ། །དང་པོ་བདེན་མེད་ལ་འཐད་ཚུལ་ནི། ཁྱོད་དབུ་མ་པ་ལྟར་ན་ཤེས་བྱ་ཤེས་བྱེད་རང་བཞིན་མེད་པས་རྣམ་པར་དཔྱོད་པའང་མི་འཐད་པར་འགྱུར་རོ་ཞེ་ན། ཡུལ་ཅན་རྟོག་པའི་བློ་དང་ཡུལ་བརྟག་པར་བྱ་བ་དག་སྟེ་དེ་གཉིས་པོ་ངོ་བོས་མ་གྲུབ་ཀྱང་། ཕན་ཚུན་རྟེན་ཅིང་ལྟོས་ནས་བཞག་པ་ཙམ་ཡིན་ཏེ། དེས་ན་ཇི་ལྟར་འཇིག་རྟེན་ན་མ་བརྟགས་ཉམས་དགའ་ཙམ་གྱི་གྲགས་པ་ཡི་ཐ་སྙད་ལ་བརྟེན་ནས་རྣམ་པར་དཔྱོད་པ་ཐམས་ཅད་བརྗོད་པ་ཡིན་པས་ཆེས་འཐད་པ་ཉིད་དོ། །དེ་ལ་དེ་དག་ན་རེ་རྣམ་པར་བརྟགས་ཤིང་སྤྲོས་པའི་ཆོས་ཀུན་མི་བདེན་པར་རྟོགས་པའི་ཆེད་དུ་གང་ཚེ་ཡུལ་ཐམས་ཅད་རང་བཞིན་གྱིས་མ་གྲུབ་པར་རྣམ་པར་དཔྱད་པ་ཡི་ཤེས་པའམ་རྣམ་དཔྱོད་ཀྱིས་ནི་དཔྱོད་པར་བྱེད་ན། རྣམ་དཔྱོད་དེས་རང་ཡུལ་དུ་བྱས་ནས་དཔྱད་མི་ནུས་པས། དེ་ཚེ་རྣམ་དཔྱོད་དང་པོ་དེ་ཡང་ནི་རྣམ་དཔྱོད་གཉིས་པས་རྣམ་པར་དཔྱད་དགོས་པ་སོགས་ཀྱི་ཕྱིར་ན་ཁྱོད་ཀྱི་རྣམ་དཔྱོད་ཐུག་པ་མེད་པར་འགྱུར་རོ་ཞེ་ན། དཔྱད་བྱ་ཆོས་ཐམས་ཅད་བདེན་མེད་དུ་རྣམ་པར་དཔྱད་པར་བྱས་ནས་སྐྱེ་བ་དང་སྐྱེ་མེད་ལ་སོགས་པའི་མཐའ་གང་དུ་མི་གནས་པར་ངེས་པ་དེའི་ཚེ། རྣམ་དཔྱོད་ལ་ནི་འདིའོ་ཞེས་གཟུང་བའི་རྟེན་ནམ་ཡུལ་ཡོད་པ་མིན་ལ། ནམ་ཞིག་དམིགས་གཏད་ཀྱི་ཡུལ་ལམ་རྟེན་མེད་པ་དེའི་ཕྱིར་ན་ཡུལ་ཅན་དེ་མི་སྐྱེ་སྟེ་སྤྲོས་པ་ཐམས་ཅད་ཞི་བས་ན་རྣམ་དཔྱོད་དེ་ཡང་ཆུ་ལ་རླབས་བཞིན་དུ་ཆོས་ཉིད་ཀྱི་ངང་དུ་རང་བཞིན་གྱིས་མྱ་ངན་ལས་འདས་པར་བརྗོད་དོ། །གཉིས་པ་བདེན་གྲུབ་ལ་རྣམ་དཔྱོད་མི་འཐད་པའི་ཚུལ་ནི། དངོས་པོར་སྨྲ་བ་གང་གི་ལུགས་ལྟར་ན་དོན་ཤེས་འདི་གཉ ིས བདེན་པར་སྒྲུབ་འདོད་པ་དེ་ཉིད་ཤིན་ཏུ་དཀའ་བར་གནས་ཏེ་སྒྲུབ་བྱེད་ཀྱི་ཚད་མ་མེད་པའི་ཕྱིར་རོ། །དེ་ཡང་གལ་ཏེ་ཤེས་པ་ཉིད་ཚད་མར་གྲུབ་པའི་དབང་ངམ་མཐུ་ལས་གཞལ་བྱ་དོན་ཉིད་ཡོད་པར་གྲུབ་སྟེ་ཤེས་པ་ཚད་མ་འདི་ཉིད་ཀྱིས་ཡོད་པར་མཐོང་བས་སོ་ཞེ་ན། ཤེས་པ་བདེན་པར་ཡོད་པ་ཉིད་ལ་རྒྱུ་མཚན་ནམ་རྟེན་ཅི་ཞིག་ཡོད་ཅེས་དྲིའོ། །དེ་ལ་ཤེས་པ་རང་གིས་དོན་དམ་པར་མི་གྲུབ་ལ་ཤེས་པ་གཞན་གྱིས་བསྒྲུབས་ན་ཐུག་མེད་དུ་འགྱུར་བས་སྒྲུབ་བྱེད་གཞན་མེད་ལ། འོན་ཏེ་ཤེས་བྱའམ་ཡུལ་གཞལ་བྱ་བདེན་པ་མངོན་སུམ་པ་འདི་འཛིན་པ་ལས། ཡུལ་ཅན་གྱི་ཤེས་པ་ཉིད་བདེན་པར་གྲུབ་བོ་ཞེ་ན། ཤེས་བྱ་ཡོད་པ་ལ་རྟེན་ཅི་ཡོད་ཅེས་དྲི། དེའི་རྟེན་ནི་ཤེས་པ་ཡིན་ཏེ། དོན་ཤེས་ཕན་ཚུན་གཅིག་གིས་གཅིག་བསྒྲུབ་ཅེ་ན། དེ་འདྲའི་ཡོད་པ་དེ་ནི་རང་གི་ངོ་བོས་མ་གྲུབ་པར་ཕན་ཚུན་གཅིག་ལ་གཅིག་ལྟོས་པའི་དབང་གིས་ཡོད་པ་སྟེ་རིང་ཐུང་བཞིན། དེའི་ཕྱིར་གང་གཅིག་སྒྲུབ་པ་ན་གཅིག་ཤོས་དཔེར་མི་རུང་སྟེ་དེ་མ་གྲུབ་པའི་ཕྱིར། དེས་ན་དོན་དམ་པར་གཉིས་ཀ་ཡང་ནི་མེད་པར་འགྱུར་ཏེ། དཔེར་ན་གལ་ཏེ་བུ་མེད་ན་ཕ་ཡོད་པ་མིན་ཏེ་ཕར་འཇོག་བྱེད་མེད་པས་སོ། །དེ་ལྟར་ཕ་མེད་ན་བུ་ཉིད་གང་ལས་བྱུང་བ་ཡིན་ཏེ། རྒྱུ་མེད་པའི་ཕྱིར་གཉིས་ཀ་མི་འཐད་དོ། །ཇི་ལྟར་འཇོག་བྱེད་བུ་མེད་པར་ནི་དེའི་སྔོན་དུ་ཕ་མེད་པ་དེ་བཞིན་འདིར་དོན་ཤེས་གཉིས་ལས་གང་བསྒྲུབ་བྱར་བྱས་པ་དེ་སྔ་མ་གྲུབ་པ་བུ་ལྟ་བུ་དེའི་སྔོན་དུ་སྒྲུབ་བྱེད་གཅིག་ཤོས་ཕ་ལྟ་བུ་དེ་ཡོད་མི་སྲིད་པས་མཐར་དེ་གཉིས་ཀ་མེད་པ་ཉིད་དོ། །ཡང་དེ་དག་འདི་སྙམ་དུ། འདི་ལྟར་ཕན་ཚུན་གྱི་དབང་གིས་གྲུབ་བོ་ཞེས་མི་སྨྲ་སྟེ། དཔེར་ན་མྱུ་གུ་ས་བོན་ལས་སྐྱེ་ཞིང་ས་བོན་ཡོད་པའང་མྱུ་གུ་ཡོད་པའི་རྟགས་དེ་ཉིད་ཀྱིས་རྟོགས་པ་བཞིན་རྟགས་ཤེས་བྱ་ལས་སྐྱེས་པའི་འབྲས་བུ་ཤེས་པ་དེ་ཡིས་རྒྱུ་ཤེས་བྱ་དེ་ཉིད་ཡོད་པར་ནི་ཅིས་མི་རྟོགས་ཏེ་རྟོགས་སོ་སྙམ་ན་དཔེ་མི་མཚུངས་ཏེ། མྱུ་གུས་ས་བོན་རྟོགས་པ་ནི་མྱུ་གུ་རང་ཉིད་འབའ་ཞིག་གིས་རྟོགས་པ་མ་ཡིན་ལ། མྱུ་གུ་ལས་གཞན་པའི་ཤེས་པ་ཡིས་འབྲས་བུ་མྱུ་གུ་ལ་རྗེས་སུ་དཔགས་ནས་འདི་ལ་རྒྱུ་སྔོན་སོང་ས་བོན་ཡོད་ཅེས་རྟོགས་པར་འགྱུར་ཏེ། དེ་ཡང་ས་མྱུག་གཉིས་སོ་སོར་དམིགས་ནས་རྒྱུ་འབྲས་བུ་ངེས་པའི་ཚད་མས་དེ་ལྟར་རྟོགས་ཀྱི། རྒྱུ་འབྲས་བུ་ངེས་པའི་ཚད་མ་སྔོན་དུ་མ་སོང་བར་མྱུ་གུ་མཐོང་བ་ཙམ་གྱིས་ནི་མ་ཡིན་ན། གང་གི་ཕྱིར་ཤེས་བྱ་དེ་རྟོགས་པར་བྱེད་པ་ལ། རྟགས་ཤེས་པ་དེ་ཡོད་པ་ཉིད་རྒྱུ་མཚན་གང་ལས་རྟོགས་ཏེ། དོན་དམ་པར་རང་རིག་དང་གཞན་རིག་གང་གིས་ཀྱང་མི་འགྲུབ་པའི་ཕྱིར་རོ། །དེས་ན་དངོས་པོ་ཁས་ལེན་པའི་ཕྱོགས་ལ་ཐ་སྙད་འཐད་དཀའ་ཞིང་། བཏགས་པར་ཁས་ལེན་པ་ལ་ཆེས་འཐད་དོ་ཞེས་བསྟན་པའོ། །གཉིས་པ་རྒྱུ་འབྲས་ངོ་བོ་ཉིད་གསུམ་ལ་བྱེ་བྲག་ཏུ་དཔྱད་པ་ལ་རྒྱུ་མཚན་མ་མེད་པ། ངོ་བོ་སྟོང་པ་ཉིད། འབྲས་བུ་སྨོན་པ་མེད་པར་གཏན་ལ་དབབ་པ་གསུམ། དང་པོ་རྒྱུ་མཚན་མ་མེད་པ་ལ། ཕྱིན་ཅི་ལོག་དགག་པ་དང་། ཡང་དག་པའི་དོན་བསྟན་པ་གཉིས། དང་པོ་ལ། རྒྱུ་མེད་པར་དགག་པ། རྒྱུ་མིན་པ་རྒྱུར་འདོད་པ་དགག་པ་གཉིས། དང་པོ་རྒྱུ་མེད་པ་དགག་པ་ནི། རྒྱང་འཕེན་པ་སོགས་ཇི་ལྟར་ཚེར་མའི་རྣོ་བ་དང་། རྨ་བྱའི་མདོངས་བཀྲ་བ་ལ་སོགས་པ་བཞིན་དུ་སུས་ཀྱང་མ་བྱས་པར་སྲིད་པ་ངོ་བོས་བྱུང་ངོ་ཞེས་ཟེར་རོ། །དེ་ལ་རེ་ཞིག་འཇིག་རྟེན་པའི་མངོན་སུམ་གྱིས་འབྲས་བུ་ཀུན་ལ་རང་སྐྱེད་བྱེད་ཀྱི་རྒྱུ་རྣམས་ཐམས་ཅད་མཐོང་བ་ཡིན་གྱི་རྒྱུ་མེད་བཞིན་སྐྱེ་བ་ནི་མཐོང་མི་སྲིད་དེ་རྣམ་འགྲེལ་ལས། གང་ཡོད་ཉིད་ན་གང་སྐྱེ་བའམ། །གང་འགྱུར་བ་ཡང་རྣམ་འགྱུར་བ། །དེ་ནི་དེ་རྒྱུ་རབ་ཏུ་བརྗོད། །དེ་ནི་དེ་རྣམས་ལ་ཡང་ཡོད། །ཅེས་པ་བཞིན་ནོ། །འདིར་མངོན་སུམ་ནི་མཚོན་པ་ཙམ་སྟེ་རྗེས་དཔག་ཀྱང་སྡུད་དོ། །གལ་ཏེ་པདྨའི་སྡོང་བུ་དང་འདབ་མ་སོགས་སྣ་ཚོགས་པ་དག་རྒྱུ་ལ་མ་མཐོང་བས་དབྱེ་བ་སྣ་ཚོགས་པའི་རྒྱུ་ཡོད་པ་དེ་མི་འཐད་སྙམ་ན། རྒྱུ་ལ་འབྲས་བུ་དངོས་སུ་མ་གྲུབ་ན་རྒྱུ་འབྲས་སུ་ཅི་ལ་འགྱུར་ཏེ་འོན་ཀྱང་པདྨའི་སྡོང་བུ་ལ་སོགས་པ་རང་གི་ས་བོན་ལ་མ་བརྟེན་པར་མི་འབྱུང་ཞིང་། ས་བོན་ལས་འབྱུང་བར་མཐོང་བས་ན་འབྲས་བུའི་དབྱེ་བ་ནི་རྒྱུ་ཡི་དབྱེ་བས་བསྐྱེད་པ་ཡིན་པའི་ཕྱིར། འབྲས་བུ་སྣ་ཚོགས་པ་བཞིན་དུ་རྒྱུའི་ནུས་པའི་དབྱེ་བའང་སྣ་ཚོགས་པར་གྲུབ་བོ། །དེ་འདྲ་བའི་རྒྱུ་ཡི་དབྱེ་བ་སྣ་ཚོགས་ཡོད་པར་གང་གིས་བྱས་ཤེ་ན། གཞན་སུས་ཀྱང་མ་བྱས་ཏེ་འདི་ལྟར་ས་བོན་དེའང་རང་གི་རྒྱུ་མེད་པར་འབྱུང་མི་སྲིད་པའི་ཕྱིར། སྔར་གྱི་རྒྱུ་ཡི་དབྱེ་བ་ཉིད་ལས་སོ། །དེ་ལྟར་རིམ་པར་བརྟགས་ན་རྒྱུའི་ཐོག་མ་འདི་ཙམ་ཞེས་མི་དམིགས་ཏེ། འཁོར་བ་ལ་ཐོག་མ་མ་གྲུབ་པའི་གནད་ཀྱིས་སོ། །ཅིའི་ཕྱིར་རྒྱུ་འདི་ལ་ནུས་པ་སྣ་ཚོགས་ཡོད་ཅིང་དེ་ཡིས་འབྲས་བུ་སྐྱེད་ནུས་ན་ད་ལྟའི་ནས་ཀྱི་ས་བོན་འདིས་ནས་ཀྱི་མྱུ་གུ་སྐྱེད་ཀྱི། ས་ལུའི་ས་བོན་མི་སྐྱེད་ཟེར་ན། ད་ལྟའི་ནས་ཀྱི་ས་བོན་འདིས་རང་དབང་བའི་ཚུལ་དུ་ནུས་པ་སྣ་ཚོགས་གང་རུང་བཟུང་བ་ནི་མ་ཡིན་ཏེ། འདི་སྔར་གྱི་རྒྱུ་ཡི་མཐུ་ཉིད་ལས་རང་གི་རིགས་འདྲ་བསྐྱེད་པའི་བདག་ཉིད་དུ་འཕང་བའི་ཕྱིར། འདི་ནི་དངོས་པོའི་ཆོས་ཉིད་དེ་སུས་ཀྱང་འཁྲུགས་པར་ནུས་པ་མིན་ནོ། །དེས་ན། རྒྱུ་མེད་རྐྱེན་ལ་མི་ལྟོས་ཕྱིར། །རྟག་ཏུ་ཡོད་པའམ་མེད་པར་འགྱུར། །ཞེས་པ་ལྟར་རྒྱུ་མེད་པར་གྱུར་ན་རྟག་ཏུ་ཡོད་པའམ་མེད་པར་ཐལ་བར་འགྱུར་ནའང་དངོས་པོ་རྣམས་ནི་ཡུལ་དུས་རེས་འགའ་བར་དམིགས་པའི་ཕྱིར་རྒྱུ་ལྡན་དུ་གྲུབ་བོ། །གཉིས་པ་རྒྱུ་མིན་པ་རྒྱུར་འདོད་པ་དགག་པ་ལ། ཤེས་ལྡན་དབང་ཕྱུག་རྒྱུ་ཡིན་པ་དགག་པ་དང་། ཤེས་མེད་བེམ་པོ་རྒྱུ་ཡིན་པ་དགག་པ་གཉིས། དང་པོ་ལ། རྒྱུ་དབང་ཕྱུག་ལ་དཔྱད་པ། དེས་བསྐྱེད་པའི་འབྲས་བུ་ལ་དཔྱད་པ། འབྲས་བུ་སྐྱེ་ཚུལ་ལ་དཔྱད་པ་གསུམ། དང་པོ་རྒྱུ་དབང་ཕྱུག་ལ་དཔྱད་པ་ནི། དབང་ཕྱུག་པ་སོགས་ན་རེ། རྟག་པ་རང་བྱུང་གི་ཐམས་ཅད་མཁྱེན་པ་དབང་ཕྱུག་གིས་བློ་སྔོན་དུ་བཏང་ནས་འཇིག་རྟེན་ཐམས་ཅད་བྱེད་དོ་ཞེས་ཟེར་རོ། །དེ་ལ་དབང་ཕྱུག་ཅེས་པ་འགྲོ་བའི་རྒྱུ་ཡིན་ན་རེ་ཞིག་དབང་ཕྱུག་གི་ངོ་བོ་གང་ཡིན་སྨྲོས་ཤིག་ཅེས་དྲིས་པས། ས་ལ་སོགས་པའི་འབྱུང་བ་ཆེན་པོ་རྣམས་ཡིན་ནོ་ཤེ་ན། དེ་ལྟ་མོད་འབྱུང་བ་ལས་འབྱུང་འགྱུར་གྱི་འབྲས་བུ་རྣམས་སྐྱེ་བས་དེ་རྒྱུ་ཡིན་པར་ཁོ་བོའང་འདོད་པས་ཁྱོད་ཀྱིས་དེ་ལ་དབང་ཕྱུག་ཅེས་བཏགས་ཤིང་། བདག་ཅག་འབྱུང་བ་ཞེས་བཏགས་པའི་མིང་གི་ཁྱད་པར་ཙམ་སྟེ་མིང་ནི་སྐྱེ་བོོ་འདོད་པས་གང་འདོད་དུ་སྦྱར་བཏུབ་པའི་ཕྱིར་འདི་ལ་ཡང་དབང་ཕྱུག་ཅེས་སྒྲུབ་པའི་ཚེགས་ཆེན་པོ་འདིས་ཅི་ཞིག་ངལ་ཏེ་ངལ་བར་བྱ་མི་རིགས་སོ། །འོན་ཀྱང་ཁྱོད་ཀྱིས་དབང་ཕྱུག་ནི། ལྷར་གཏོགས་པ། གཙང་ཞིང་མཆོད་པར་འོས་པ། རྟག་པ། གཅིག་པུ། ཀུན་གྱི་བྱེད་པ་པོ་ཡིན་པར་འདོད་ན། ས་སོགས་འདི་རྣམས་ནི་དུ་མ་དང་། མི་རྟག་པ་དང་། བློ་ཡི་གཡོ་བ་མེད་པ་དང་། མཆོད་བྱའི་ལྷ་མིན་ཞིང་། རྐང་པ་སོགས་ཀྱིས་འགོམ་པར་བྱ་བ་ཡིན་གྱི། གུས་པའི་ཡུལ་མིན་པ་ཉིད་དང་། མི་གཙང་བ་དང་ལྡན་པའང་ཡིན་པས་འབྱུང་བ་དེ་ནི་དབང་ཕྱུག་ཉིད་མ་ཡིན་ཏེ། དབང་ཕྱུག་དེ་ལས་ལྡོག་{བཟློག} པའི་མཚན་ཉིད་ཅན་དུ་འདོད་པས་སོ། །དབང་ཕྱུག་ནམ་མཁའ་ཡིན་ནོ་ཞེ་ན་མིན་ཏེ། འབྲས་བུ་སྐྱེད་པའི་བྱེད་རྩོལ་གྱི་གཡོ་བ་མེད་པའི་ཕྱིར། བདག་ཀྱང་དབང་ཕྱུག་མིན་ཏེ་སྔར་ནས་བཀག་ཟིན་པའི་ཕྱིར་རོ། །དབང་ཕྱུག་ངོ་བོ་ནི་ཚུར་རོལ་མཐོང་བས་བསམ་པར་མི་ནུས་པས་སྐྱོན་དེ་དག་མེད་ཅེ་ན། དབང་ཕྱུག་བསམ་པར་བྱ་བ་མིན་པ་ཡི་བྱེད་པོ་ཡང་མིན་ཏེ། དེ་བསམ་པར་བྱ་བ་མིན་ན་དེ་བྱེད་པོ་ཡིན་ཞེས་བརྗོད་པས་ཅི་ཞིག་བྱ་སྟེ་བརྗོད་པ་ནི་བསམས་ཤིང་ཤེས་ནས་བརྗོད་དགོས་ཀྱི། ཇི་ལྟ་བུ་ཡིན་པ་ཅིའང་མ་ཤེས་པས་དེ་བྱེད་པོར་སུ་ཞིག་གིས་བརྗོད། རྒྱུ་བྱེད་པོ་མ་ཤེས་ན་འབྲས་བུ་འདི་རྣམས་དེས་བསྐྱེད་པར་འདོད་པའང་གང་ཞིག་ཡིན་ཏེ། བསྐྱེད་བྱ་དང་སྐྱེད་བྱེད་སོ་སོར་ཤེས་ཤིང་རྒྱུ་འབྲས་སུ་ངེས་ནས་བརྗོད་དགོས་ཀྱི་གཞན་དུ་མོ་གཤམ་གྱི་བུ་སོགས་ཀྱང་བྱེད་པོར་ཐལ་ལོ། །གཉིས་པ་དེས་བསྐྱེད་པའི་འབྲས་བུ་ལ་དཔྱད་པ་ནི། དབང་ཕྱུག་དེས་བསྐྱེད་པའི་འབྲས་བུའི་ཆ་དེ་རྟག་པ་བདག་ལ་སོགས་པ་ཡིན་ནམ། མི་རྟག་པ་ཤེས་པ་སོགས་ཡིན། དང་པོ་ལྟར་བདག་སོགས་ཡིན་ན། འབྲས་བུའི་ཆ་བདག་དེ་དང་ས་སོགས་ཀྱི་རྡུལ་ཕྲན་དང་། རྒྱུ་དབང་ཕྱུག་རང་གི་ངོ་བོའང་རྟག་པར་འདོད་པ་མིན་ནམ། རྒྱུ་འབྲས་གཉིས་ཆར་རྟག་པ་དེ་བསྐྱེད་བྱ་སྐྱེད་བྱེད་དུ་ཇི་ལྟར་རུང་སྟེ་རྒྱུ་བསྐྱེད་པའི་བྱ་བ་དང་བྲལ། འབྲས་བུ་སྐྱེ་བའི་ཁྱད་པར་དང་བྲལ་བའི་ཕྱིར། གཉིས་པ་ལྟར་ཤེས་པ་སོགས་ཡིན་ན། མིག་སོགས་ཀྱི་ཤེས་པ་ནི་ཡུལ་ཤེས་བྱ་གཟུགས་སོགས་ལས་དམིགས་ལས་སྐྱེ་བ་དང་། ཐོག་མེད་ནས་རྒྱུད་ལ་ཡང་ཡང་བྱུང་བའི་ཚོར་བ་བདེ་སྡུག་ནི་སྔོན་གྱི་ལས་ལས་ཡིན་པ་དེ་བས་ན་དབང་ཕྱུག་དེས་འབྲས་བུ་གང་ཞིག་བསྐྱེད་པ་སྨྲོས་ཤིག །ཅེས་དེས་བསྐྱེད་པའི་འབྲས་བུ་མི་སྲིད་པའི་ཕྱིར། མདོར་ན་རྟག་པ་ལ་རྒྱུ་མེད་ལ། མི་རྟག་པ་རང་གི་རྒྱུ་ལས་བྱུང་བས་དབང་ཕྱུག་གིས་ཅིའང་མ་བྱས་ཏེ། རྣམ་འགྲེལ་ལས། མཚོན་དང་སྨན་སོགས་འབྲེལ་བ་ལས། །ནག་པའི་རྨ་དང་འདྲུབ་ཡིན་ན། །འབྲེལ་མེད་སྡོང་དུམ་ཅི་ཡི་ཕྱིར། །རྒྱུ་ཉིད་དུ་ནི་རྟོགས་མི་བྱེད། །ཅེས་པ་བཞིན་ནོ། །གསུམ་པ་འབྲས་བུ་སྐྱེད་ཚུལ་ལ་དཔྱད་པ་ནི། རྒྱུ་དབང་ཕྱུག་ཉིད་ལ་ཐོག་མ་ཡོད་པ་མིན་ན། དངོས་རྒྱུ་ནུས་པ་ཐོགས་མེད་ཡོད་པའི་ཕྱིར། འབྲས་བུ་ཀུན་ལ་ཐོག་མ་ག་ལ་ཡོད་དེ། དེ་ལྟར་ན་འབྲས་བུ་འདི་ནི་འདི་ཙམ་ན་ཡོད་ཀྱི་འདིའི་སྔོན་དུ་མ་བྱུང་ཞེས་བཞག་པར་མི་ནུས་པར་ཐོག་མེད་ནས་ཡོད་དགོས་ཀྱི། རེས་འགའ་བར་དམིགས་པ་མི་འཐད་དོ། །དེས་ན་ད་ལྟའི་སྐྱེས་པ་དང་བུད་མེད་འདི་དག་ཀྱང་སྔོན་ཐོག་མེད་ནས་ཡོད་པར་ཐལ་ལོ། །དེ་ལ་དབང་ཕྱུག་གིས་སྣོད་བཅུད་འདི་དག་རིམ་ཅན་དུ་བྱས་པས་ན་འབྲས་བུ་ཁ་ཅིག་བྱེད་ལ་ཁ་ཅིག་མི་བྱེད་པའི་སྐབས་ཡོད་པས་སྐྱོན་མེད་སྙམ་ན། དབང་ཕྱུག་གིས་འབྲས་བུ་གྱུར་ཏོ་ཅོག་ཀུན་དུས་རྟག་ཏུ་ཅིའི་ཕྱིར་བྱེད་པ་མིན་ཏེ། འབྲས་བུ་ཐམས་ཅད་ཀྱི་རྒྱུ་དབང་ཕྱུག་ཁོ་ན་ཡིན་པ་གང་ཞིག དབང་ཕྱུག་དེ་ནི་རྐྱེན་གཞན་ཅི་ལའང་ལྟོས་པ་མིན་ན་འབྲས་བུ་ཐམས་ཅད་སྐྱེ་བའི་རྒྱུ་དུས་རྟག་ཏུ་ཚང་བས་འབྲས་བུ་ཅིའི་ཕྱིར་མི་སྐྱེ་སྟེ། རྣམ་འགྲེལ་ལས། མ་ཚང་མེད་རྒྱུ་དེ་ལ་ནི། །འབྲས་བུ་གང་གིས་ལྡོག་པར་འགྱུར། །ཞེས་པ་བཞིན་ནོ། །ལྷན་ཅིག་བྱེད་རྐྱེན་སོ་སོ་ལ་ལྟོས་སོ་ཞེ་ན། ལྷན་ཅིག་བྱེད་རྐྱེན་ཡང་དུས་ཀུན་ཏུ་མི་ཚང་བ་ག་ལ་སྲིད་དེ། དབང་ཕྱུག་དེས་བྱས་པ་མིན་པའི་དངོས་པོ་གཞན་ཡོད་པ་མིན་ན། དབང་ཕྱུག་དེས་འབྲས་བུ་བསྐྱེད་པ་འདི་རུ་གཞན་གང་ལ་ལྟོས་པར་འགྱུར་ཏེ་དེ་ནི་མི་འཐད་དོ། །གལ་ཏེ་རྐྱེེན་གཞན་ལ་ངེས་པར་ལྟོས་ན་རྒྱུ་རྐྱེན་ཚོགས་པ་དེ་ཉིད་རྒྱུ་ཡིན་པར་འགྱུར་གྱི་དབང་ཕྱུག་རྒྱུ་མིན་ཏེ། དེའི་རྒྱུ་མཚན་རྒྱུ་རྐྱེན་ཚོགས་པ་ན་འབྲས་བུ་མི་སྐྱེ་བའི་དབང་མེད་ཅིང་། རྒྱུ་རྐྱེན་དེ་མེད་པར་ནི་དབང་ཕྱུག་ལའང་སྐྱེད་དབང་མེད་པས་སོ། །དེས་ན་རྒྱུ་རྐྱེན་ལས་སྐྱེ་བར་མཐོང་བཞིན་དོན་མེད་དབང་ཕྱུག་ཀྱང་རྒྱུར་རྟོག་ན་རྒྱུ་ཐུག་མེད་དུ་འགྱུར་རོ། །གལ་ཏེ་དབང་ཕྱུག་འདིས་འབྲས་བུ་བྱེད་པའི་ཚེ་ཚོགས་པ་ལ་ལྟོས་སུ་ཆུག་ཀྱང་ཚོགས་པའི་དབང་གིས་གཞན་ལ་སྡུག་བསྔལ་བ་སོགས་རང་གིས་མི་འདོད་བཞིན་དུ་བྱེད་ན་གཞན་གྱི་དབང་ཅན་དུ་ཐལ་ལ། འབྲས་བུ་རྣམས་ཇི་ལྟར་འདོད་པ་བཞིན་དུ་འདོད་པའི་དབང་གིས་བྱེད་ནའང་འདོད་པ་ལ་རག་ལས་ཤིང་འདོད་པའི་ལྕགས་ཀྱུས་ཟིན་པའི་གཞན་དབང་ཅན་དུ་འགྱུར་རོ། །གཞན་ཡང་འདི་སྣོད་བཅུད་ཀྱི་བྱེད་པོ་ཡིན་དུ་ཆུག་ནའང་ཁྱོད་འདོད་པའི་དབང་ཕྱུག་ག་ལ་ཡིན་ཏེ་འབྲས་བུ་བྱེད་པ་དང་ལྡན་ན་མི་རྟག་པས་ཁྱབ་པའི་ཕྱིར། རྟག་པ་ནི་དོན་བྱེད་པས་སྟོང་པ་ཁོ་ན་ཡིན་ནོ། །གཉིས་པ་ཤེས་མེད་བེམ་པོ་རྒྱུ་ཡིན་པ་དགག་པ་ལ། གང་དག་མུ་སྟེགས་དཔྱོད་པ་བ་སོགས་རྡུལ་ཕྲན་རྟག་པ་འཇིག་རྟེན་གྱི་རྒྱུར་སྨྲ་བ་དེ་དག་ཀྱང་ནི་སྔར་རྡུལ་ཕྲན་བཀག་པའི་སྐབས་སུ། རྡུལ་དེའང་ཕྱོགས་ཆའི་དབྱེ་བ་ཡིས། །སོགས་ཀྱིས་ངེས་པར་བཟློག་ཟིན་པས་འདིར་འཆད་མི་དགོས་སོ། །ཡང་གཙོ་བོ་རྟག་པ་འགྲོ་བ་ཡི་རྒྱུ་ཡིན་པར་ནི་གྲངས་ཅན་པ་རྣམས་འདོད་ཅིང་། དེའང་སྙིང་སྟོབས་དང་རྡུལ་དང་མུན་པ་ཞེས་བྱ་བའི་བདེ་སྡུག་བཏང་སྙོམས་ཀྱི་ཡོན་ཏན་གསུམ་པོ་ཀུན་ཏུ་ཆ་མཉམ་པར་གནས་པ་ནི་རྣམ་འགྱུར་གྱི་རྒྱུ་གཙོ་བོ་ཞེས་བྱ་བར་རབ་ཏུ་བརྗོད་དེ། དེ་གསུམ་ཆ་མི་མཉམ་པར་གྱུར་པ་ན་འགྲོ་བ་སྣ་ཚོགས་པའི་རྣམ་འགྱུར་རྣམས་བྱུང་བ་ཡིན་པར་བརྗོད་དེ་ཞིབ་པར་གོང་དུ་སྨོས་པ་བཞིན་ནོ། །དེ་དགག་པ་ལ། གཙོ་བོ་གཅིག་བདེན་ལ་ཡོན་ཏན་གྱི་རང་བཞིན་གསུམ་ཡོད་པ་ཉིད་ནི་འགལ་བ་རིགས་པ་མིན་ཏེ་གསུམ་ཡོད་ན་གཅིག་མིན་པའི་ཕྱིར། དེས་ན་རྟག་གཅིག་ཏུ་གྱུར་པའི་རང་བཞིན་ནམ་གཙོ་བོ་དེ་ཡོད་པ་མིན་ནོ། །དེ་བཞིན་རྡུལ་མུན་སྙིང་སྟོབས་ཀྱི་ཡོན་ཏན་གསུམ་པོ་དག་ཀྱང་ཡོད་པ་མིན་ཏེ། དེ་རེ་རེ་ལ་ཡང་རྡུལ་གྱི་རྡུལ་རྡུལ་གྱི་མུན་པ་སོགས་སོ་སོར་རྣམ་པ་གསུམ་གའི་ཆ་རེ་ཡོད་པའི་ཕྱིར་ཏེ། གལ་ཏེ་མེད་ན་རང་བཞིན་གྱི་ངང་ཚུལ་ལས་འདས་པར་འགྱུར་རོ། །དེ་ལྟར་རྒྱུ་ཡོན་ཏན་གསུམ་པོ་མེད་ན་དེ་ལས་བྱུང་བའི་རྣམ་འགྱུར་སྒྲ་སོགས་ཀྱང་ཡོད་པར་འདོད་པ་ཉིད་ཤིན་ཏུ་རྒྱང་རིང་སྟེ་མི་སྲིད་པར་འགྱུར་ཏེ་འཇིམ་པ་མེད་པའི་བུམ་པ་བཞིན་ནོ། །གཞན་ཡང་ཐ་སྙད་ཙམ་དུ་བདེ་སོགས་ཀྱི་ཚོར་བ་ནི་སེམས་ཉིད་དུ་ཚད་མས་གྲུབ་ན་སེམས་མེད་པ་ཕྱི་རོལ་གྱི་གོས་ལ་སོགས་པ་ལ་སེམས་ཀྱི་བདག་ཉིད་བདེ་སོགས་ཀྱི་ཚོར་བ་ཡོད་པ་སྲིད་པའང་མིན་ནོ། །གལ་ཏེ་དངོས་པོ་གོས་ལ་སོགས་པ་རྣམས་བདེ་སོགས་དེ་ཡི་རྒྱུའི་རང་བཞིན་ཡིན་པས་མི་སྐྱོན་ནོ་ཞེ་ན། དོན་དམ་པར་དངོས་པོ་རྣམས་རང་བཞིན་མེད་པར་སྔར་ལུས་དྲན་པ་ཉེར་བཞག་གི་སྐབས་སུ་རྣམ་པར་དཔྱད་ཟིན་པ་མིན་ནམ་ཅི། ཐ་སྙད་དུ་རང་གི་ཁས་བླངས་དང་འགལ་ཏེ་ཁྱོད་གྱིས་སྣམ་བུ་སོགས་ཀྱི་རྒྱུ་ཡང་བདེ་སོགས་ཉིད་དུ་འདོད་ལ། སྣམ་སོགས་ཀྱི་འབྲས་བུའང་བདེ་སོགས་སུ་འདོད་པ་ནི་བཞད་གད་ཀྱི་གནས་ཏེ་མི་འདི་འདིའི་ཕ་ཡང་ཡིན་ལ་བུ་ཡང་ཡིན་ཞེས་བརྗོད་པ་བཞིན་ནོ། །བདེ་སོགས་དུ་མ་ཡོད་ན་ནི་རང་བཞིན་གཅིག་ཡིན་པ་ཉམས་སོ། །མངོན་སུམ་དང་ཡང་འགལ་ཏེ། བདེ་སོགས་དེ་ལས་སྣམ་བུ་སོགས་འབྱུང་བར་ནམ་ཡང་མཐོང་བའང་མེད་ལ་སྣམ་བུ་དང་ཙན་དན་གྱི་ཕྲེང་བ་སོགས་ལས་ནི་བདེ་སོགས་འབྱུང་བ་ཡིན་པར་དམིགས་པའི་ཕྱིར། དེས་ན་སྣམ་སོགས་དེ་རྡུལ་ཕྲ་བའི་ཆ་ཤས་སུའང་གྲུབ་པ་མེད་པའི་ཕྱིར་ན་དེ་ལས་བྱུང་བའི་བདེ་སོགས་ནི་གཞན་དུ་ཡན་གར་བར་གནས་པ་མེད་དེ། ཁོ་ན་རེ། བདེ་སོགས་ནི་སྣམ་སོགས་ལ་ལྟོས་མི་དགོས་ཏེ། གཙོ་བོའི་རང་བཞིན་རྟག་པ་ཉིད་ཡིན་ནོ་ཞེ་ན། བདེ་སོགས་རྟག་པ་ཉིད་དུ་དུས་ནམ་ཡང་མི་ལྡོག་པར་དམིགས་པར་ཐལ་ཏེ། བདེ་སོགས་དམིགས་སུ་རུང་བ་གང་ཞིག དེ་སྔར་གྱི་རང་བཞིན་ལས་གཡོ་མི་སྲིད་པའི་ཕྱིར་དེ་ལྟ་ནའང་ནམ་ཡང་མི་ལྡོག་པར་རྟག་པར་དམིགས་པ་ཞིག་ཡོད་པ་མ་ཡིན་པས་མི་འཐད་དོ། །གལ་ཏེ་བདེ་སོགས་རྟག་ཏུ་ཡོད་ཀྱང་གསལ་བ་དང་མི་གསལ་བའི་ཁྱད་པར་ཡོད་པས་རྟག་ཏུ་དམིགས་པར་མ་ངེས་ཤེ་ན། བདེ་སོགས་གཏན་མི་གསལ་བ་ནི་སུས་ཀྱང་མི་ཤེས་པས་ཡོད་པར་ཡང་མི་རུང་ལ་དེ་ལྟར་ཁྱོད་ཁས་ཀྱང་མི་ལེན་མོད། སྐབས་འགའ་ཞིག་ཏུ་བདེ་སོགས་དངོས་སུ་གསལ་བ་ཞིག་ཡོད་པ་ཉིད་ན་ནི། དུས་རྟག་ཏུའང་མྱོང་བ་ཅི་ཡི་ཕྱིར་འཛིན་པ་མ་ཡིན་ཏེ་བདེ་སོགས་དམིགས་སུ་རུང་ཞིང་དམིགས་པའི་ཡུལ་དུ་ཁྱབ་ཅིང་རྟག་པར་གནས་པའི་ཕྱིར་མིག་ལྡན་གྱི་མདུན་ན་མར་མེ་བཞིན། གལ་ཏེ་བདེ་སོགས་གསལ་བ་རགས་པ་དེ་ཉིད་ཕྲ་མོར་གྱུར་ནས་མི་གསལ་བ་ནུས་པའི་ངོ་བོར་ཡོད་པ་དེ་མྱོང་མ་ནུས་ཞེ་ན། བདེ་སོགས་རྟག་གཅིག་དེ་རགས་པ་དང་ཕྲ་བ་ཡི་གནས་སྐབས་མི་འདྲ་བའི་འགལ་བ་གཉིས་ཀ་ཇི་ལྟར་ཡིན་པར་འགྱུར། གལ་ཏེ་སྔར་གྱི་རགས་པ་དེ་ཡི་མཚན་ཉིད་དོར་ནས་གཞན་ཕྲ་བར་གྱུར་པས་སྐྱོན་མེད་ཅེ་ན། ཕྲ་རགས་ཀྱི་ངོ་བོར་གྱུར་པའི་བདེ་སོགས་དེ་དག་མི་རྟག་པ་ཉིད་དུ་གྲུབ་བོ། །བདེ་སོགས་གསལ་བ་དག་སྔ་མའི་གནས་སྐབས་དོར་ནས་གཞན་དུ་གྱུར་པར་ཁས་ལེན་ན། དེ་བཞིན་དངོས་པོ་དེ་ཉིད་ཉེར་ལྔ་པོ་ཐམས་ཅད་ཀྱང་ནི་མི་རྟག་པ་ཉིད་དུ་ཅིས་མི་འདོད་དེ་གང་ཡང་རྟག་ཏུ་སྣང་ཚུལ་གཅིག་ཁོ་ནར་དམིགས་པ་ནི་མི་སྲིད་པའི་ཕྱིར་རོ། །གལ་ཏེ་ཕྲ་རགས་སུ་གྱུར་ཀྱང་བདེ་བའི་རང་བཞིན་མ་དོར་བས་རྟག་པ་ལས་མི་ཉམས་ཞེ་ན། རགས་པ་དང་བདེ་བ་དེ་གཉིས་ཐ་དད་དམ་གཅིག་ཡིན། དང་པོ་ལྟར་ན་རགས་པ་འགགས་ཀྱང་བདེ་བ་གསལ་བ་མི་འགག་པར་རྟག་ཏུ་མྱོང་དགོས་ལ། ཕྱི་མ་ལྟར་རགས་པ་དེ་ཉིད་བདེ་བ་ལས་གཞན་མིན་པར་གཅིག་ཏུ་འདོད་ན་བདེ་བ་དེ་ཉིད་གསལ་བར་ཏེ་ངེས་པར་མི་རྟག་པ་ཉིད་དུ་གྲུབ་བོ། །དེ་ལ་ཁོ་ན་རེ་བདེ་བ་མི་གསལ་བར་གྱུར་ཀྱང་གཙོ་བོའི་ཀློང་དུ་ནུས་པའི་ངོ་བོར་བག་ལ་ཞ་བ་ཡིན་ཅིང་སླར་གསལ་བ་ན་སྔར་ཡོད་དེ་མངོན་དུ་གྱུར་པ་ཙམ་ཡིན་ཏེ། གལ་ཏེ་སྔར་གཏན་མེད་པ་འགའ་ཡང་ནི་སྐྱེ་བར་རིགས་པ་མིན་ཏེ་མེད་པའི་ཕྱིར། དཔེར་ན་འཇིམ་པ་ལས་རི་བོང་གི་རྭ་བཞིན། དེས་ན་གང་སྣང་བའི་ལམ་དུ་གྱུར་ཕན་ཆད་དེ་རང་གི་གཙོ་བོའི་ཀློང་དུ་ཡོད་པས་ཁྱབ་ཞེས་འདོད་ན་འབྲས་བུ་ཐམས་ཅད་རྒྱུ་དུས་ན་རྟག་ཏུ་མི་དམིགས་པ་ཅིའི་ཕྱིར་ཡིན་ཞེས་དྲིའོ། །དེ་ལ་བློའི་ཡུལ་དུ་སྔར་མི་གསལ་བ་ཕྱིས་གསལ་བ་ཙམ་ཡིན་ཏེ། མུན་ཁུང་གི་བུམ་པ་མར་མེ་ལས་གསལ་བ་བཞིན་ནོ་ཞེ་ན། ཁྱོད་ཀྱི་རྩ་བའི་རིགས་པ་ཉམས་ཏེ། གསལ་བ་ནི་རྒྱུ་དུས་ན་མེད་པར་གསར་དུ་སྐྱེ་བ་ནི་ཁྱོད་མི་འདོད་པའམ་ཁས་མ་བླངས་ཀྱང་དོན་ལ་དེ་ལྟར་གནས་པ་ཉིད་དེ་འབྲས་བུ་གསལ་བ་དེ་རྒྱུ་དུས་སུ་ཡོད་ན་གསལ་མི་གསལ་གྱི་ཁྱད་པར་ཡང་བཞག་ཏུ་མེད་དེ་དང་པོ་ནས་གསལ་བར་ཐལ་ལོ། །དེས་ན་རང་གི་ཁས་བླངས་ནང་འགལ་ལོ། །ཡང་རིགས་པ་དང་འགལ་ཏེ། གལ་ཏེ་རྒྱུ་ལ་འབྲས་བུ་དངོས་སུ་གནས་ན། ཟན་ཟ་བ་ན་ཁྱོད་མི་གཙང་བ་ཟ་བར་འགྱུར་ལ། གཞན་ཡང་ཁྱོད་ཉོ་བའི་རས་ཀྱི་རིན་གྱིས་རས་བལ་གྱི་ས་བོན་ཉོས་ལ་དེའི་ནང་ནས་རས་ཕྱུང་སྟེ་གོས་སུ་བགོ་བར་གྱིས་ཤིག་དང་ཁྱོད་ཀྱི་གྲུབ་མཐའ་གྲུབ་བོ། །དེ་ལ་ཁོ་ན་རེ། དོན་དུ་རྒྱུ་ལ་འབྲས་བུ་ཡོད་ཀྱང་། འཇིག་རྟེན་རྣམས་རྨོངས་པའི་རབ་རིབ་ཀྱིས་མིག་བསླད་པས་མ་མཐོང་ངོ་ཞེ་ན། རྒྱུ་ལ་འབྲས་བུ་གནས་པའི་དེ་ཁོ་ན་ཉིད་ཤེས་པ་གྲངས་ཅན་པའི་སྟོན་པ་རྣམས་ཀྱིས་བཞག་པ་དེ་ཉིད་ཤེས་པ་དེ་འཇིག་རྟེན་པ་ལ་ཡང་ནི་ཡོད་པ་ཡིན་ན་རྒྱུ་ཚང་བས་ཅི་སྟེ་མཐོང་བ་མ་ཡིན། ཁྱོད་ལྟར་ན་སྤྱིར་དེ་ཉིད་ཤེས་པའི་ཤེས་པ་འབྲས་བུར་གྱུར་པ་དེ་སེམས་ཅན་ཀུན་ལ་ཡོད་དགོས་ཤིང་། རྒྱུ་ལ་འབྲས་གནས་དངོས་སུ་འདོད་པ་གྲངས་ཅན་གྱི་རྣམ་བཞག་ཁས་ལེན་པའང་ཡོད་པ་ཡིན་ན་དེ་དག་གིས་ཀྱང་ཟན་ཟ་ཞིང་མི་གཙང་བ་མི་ཟ་ལ། གོས་འདོད་པས་རས་ཉོ་ཞིང་རས་བལ་གྱི་ས་བོན་དོན་དུ་མི་གཉེར་བར་མ་མཐོང་ངམ། ཡུལ་དུས་གང་ནའང་དེ་ཁོ་ན་ཉིད་ཀྱི་རྣམ་བཞག་ཁྱེད་ཀྱིས་བྱས་པ་དེ་བཞིན་ལོངས་སྤྱོད་པ་མ་མཐོང་བས་གནོད་དོ། །ཁོ་ན་རེ། འཇིག་རྟེན་པའི་མཐོང་བ་ཚད་མ་ཉིད་མིན་པས་དེས་གནོད་པ་མེད་དོ་ཞེ་ན། འོ་ན་འཇིག་རྟེན་པས་འབྲས་བུའི་རང་བཞིན་གསལ་བ་མངོན་སུམ་དུ་མཐོང་བའང་བདེན་པ་མ་ཡིན་པར་རྫུན་པར་འགྱུར་ལ། དེ་ཡིན་ན་རྒྱུ་འདི་ལ་འབྲས་བུ་འདི་ཡོད་དེ་ཕྱིས་མངོན་དུ་གསལ་བའི་ཕྱིར། ཞེས་པ་དོན་མེད་པར་འགྱུར་རོ། །དེ་དག་ན་རེ་གལ་ཏེ་འཇལ་བྱེད་ཚད་མ་རྫུན་པ་ཡིན་པས་གཞལ་བྱ་མི་འགྲུབ་ན་དབུ་མ་པ་ཁྱོད་འཇལ་བྱེད་ཀྱི་ཤེས་པའང་དོན་དམ་པར་ཚད་མར་གྲུབ་པ་མིན་ན། དེས་གཞལ་བའི་གྲུབ་མཐའི་རྣམ་བཞག་ཀྱང་རྫུན་པར་མི་འགྱུར་རམ། དེ་ལྟར་ན་རྣམ་དཔྱོད་ཀྱི་ཚད་མ་རྫུན་པ་དེས། དེ་ཁོ་ན་ཉིད་དུ་ན་ཆོས་ཐམས་ཅད་སྟོང་པ་ཉིད་དོ་ཞེས་གཞལ་ཞིང་བཅད་ནས་སྟོང་ཉིད་དུ་བསྒོམ་པའང་གཏན་ཚིགས་དེའི་ཕྱིར་མི་འཐད་པར་འགྱུར་རོ་ཞེ་ན། འདིར་བདག་ཅག་གིས་ཚད་མས་གྲུབ་དོན་སྟོང་ཉིད་ཅེས་དམིགས་གཏད་ཀྱི་ཡུལ་བདེན་གྲུབ་ཅིག་ལ་གྲུབ་མཐའ་འཆའ་བ་ནི་མེད་དེ། གང་གི་ཕྱིར་ན། བརྟག་བྱའི་དངོས་པོ་བུམ་སོགས་ལྟ་བུ་དེ་ལ་མ་རེག་པའམ་མ་བརྟེན་པར་ནི་བུམ་མེད་ལྟ་བུ་དངོས་པོ་དེ་ཡི་དངོས་མེད་ཡན་གར་དུ་ནམ་ཡང་འཛིན་པ་མ་ཡིན་ཏེ། དེ་ཕྱིར་བུམ་མེད་དང་བུམ་པའི་སྟོང་པ་ལྟ་བུའི་རྣམ་གྲངས་པའམ་ཉི་ཚེ་བའི་སྟོང་པ་དེའང་གཞན་དངོས་པོ་དེ་བཀག་པའམ་བསལ་པའི་ཆ་ཡིན་པས། འདི་ལྟར་རང་བཞིན་གྱིས་རྫུན་པའི་དངོས་པོ་གང་ཡིན་པ་དེ་ཡི་དངོས་མེད་ཀྱང་གསལ་བར་ཏེ་ངེས་པར་རྫུན་ཡིན་པར་འདོད་དོ། །འོ་ན་དངོས་པོ་ཀུན་མེད་ཅེས་བསྒོམས་པས་ཅི་བྱ་སྟེ་ཡོད་མེད་གཉིས་ཀ་རྫུན་པར་མགོ་མཉམ་ཞིང་གཉིས་ཀ་ཡང་དག་པར་མིན་པའི་ཕྱིར་ཞེ་ན། རེ་ཞིག་ཐོག་མེད་ནས་གོམས་པའི་དངོས་ཞེན་གྱིས་སྲིད་པར་འཆིང་བར་བྱེད་པ་དེའི་གཉེན་པོར་དངོས་པོ་རང་བཞིན་མེད་པར་གོམས་པ་ཙམ་སྟེ། དངོས་དངོས་མེད་གཉིས་ཆར་རྫུན་པ་དེས་ན་ཇི་ལྟར་རྨི་ལམ་དུ་བུ་བྱུང་ནས་ཤི་བ་རྨིས་ཏེ་སྡུག་བསྔལ་བ་ལ། བུ་དེ་མེད་དོ་སྙམ་པའི་རྣམ་རྟོག་དེ་ནི། བུ་དེ་ཡོད་སྙམ་པའི་རྣམ་པར་རྟོག་པ་དེ་ཡི་གེགས་ཡིན་ལ་དེ་ཡང་རྫུན་པ་ཡིན་པ་བཞིན་ནོ། །དེས་ན་ཤིང་གཉིས་ཟུང་དུ་བདར་བའི་མེས་ཤིང་གཉིས་ཀ་བསྲེགས་པ་བཞིན་དུ་དངོས་ཀུན་བདེན་མེད་དུ་རྣམ་པར་དཔྱད་པའི་ཤེས་རབ་ཀྱི་མེས་དངོས་དངོས་མེད་དུ་བཞག་པའི་དམིགས་པའི་གཏད་སོ་ཐམས་ཅད་ཀྱི་ནགས་ཐིབས་པོ་མ་ལུས་པ་བསྲེགས་ནས་སྤྲོས་པ་ཐམས་ཅད་ཞི་བའི་ཡེ་ཤེས་ལ་གནས་པའི་ཚེ་ན་ཁས་ལེན་ཐམས་ཅད་དང་བྲལ་བའི་དབུ་མ་ཆེན་པོ་ཡིན་ནོ། །དེ་སྐད་དུའང་མདོ་ལས། དེ་ལྟར་སྤྱོད་པའི་བྱང་ཆུབ་སེམས་དཔའ་མཁས་གསལ་བ། །ཆགས་པ་བཅད་ནས་འགྲོ་ལ་ཆགས་པ་མེད་པར་འགྲོ། །ཉི་མ་སྒྲ་གཅན་གཟའ་བྲལ་ལྷང་ངེར་འདུག་པ་དང་། །མེ་བཏང་རྩྭ་དང་ཤིང་དང་ནགས་ཚལ་བསྲེགས་པ་བཞིན། །ཆོས་རྣམས་ཐམས་ཅད་རང་བཞིན་དག་ཅིང་ཡོངས་གནས་པར། །བྱང་ཆུབ་སེམས་དཔའ་ཤེས་རབ་ཕ་རོལ་ཕྱིན་ལྟ་ན། །བྱེད་པ་པོ་ཡང་མི་དམིགས་ཆོས་ཀུན་མི་དམིགས་ཏེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཞེས་དང་། དབུ་མའི་བསྟན་བཅོས་རྣམས་ལས་ཀྱང་རྒྱ་ཆེར་གསུངས་ཏེ་མདོ་ཙམ་གོང་དུ་དྲངས་པ་བཞིན་ནོ། །གཉིས་པ་ཡང་དག་པའི་དོན་བསྟན་པ་ནི། རྒྱུ་མཚན་དེ་བས་སྔར་བཤད་པ་དེ་ལྟར་རྣམ་པར་དཔྱད་པས་དངོས་པོ་འགའ་ཡང་རྒྱུ་མེད་པ་ཡོད་པ་མ་ཡིན་ལ། རྒྱུ་རྟག་པ་ལས་ཀྱང་མི་སྐྱེ་སྟེ། ཕྱིའི་ཆོས་ཐམས་ཅད་ནི་ས་བོན་ལས་མྱུ་གུ་ལ་སོགས་པ་བཞིན་དུ་རང་རང་གི་རྒྱུ་རྐྱེན་ལ་བརྟེན་ཏེ་འབྱུང་ལ། ནང་གི་སྐྱེ་མཆེད་ནི་མ་རིག་པ་ནས་རྒ་ཤིའི་བར་ལུ་གུ་རྒྱུད་དུ་བརྟེན་ནས་སྐྱེའོ། །དེ་འདྲའི་དངོས་པོ་རང་རང་གི་རྒྱུ་རྐྱེན་དེ་དག་སོ་སོ་བ་རེ་རེའམ་ཐམས་ཅད་འདུས་པ་ཡི་རྐྱེན་རྣམས་ལ་ཡང་འབྲས་བུ་གནས་པ་མ་ཡིན་ཏེ། རེ་རེ་བས་སྐྱེད་པར་མི་ནུས་ལ། འདུས་པ་ལའང་རྒྱུ་རྣམས་ལས་གཞན་དུ་གྱུར་པ་ཅུང་ཟད་མེད་དོ། །འབྲས་བུ་སྣང་བའི་ཚེ་རྒྱུ་རྐྱེན་དེ་དག་ལས་གཞན་ཞིག་ནས་འབྲས་བུ་ཉིད་དེར་འོང་བའང་མ་ཡིན་ལ། རྒྱུ་ལས་ངོ་བོ་ཉིད་ཀྱིས་ཐ་དད་པའི་འབྲས་བུ་ཞིག་རྒྱུ་ལ་བརྟེན་ནས་གྲུབ་ཟིན་འདིར་གནས་པའང་མ་ཡིན་ཞིང་། འགག་པའི་ཚེ་འདི་ནས་གཞན་ཞིག་ཏུ་འགྲོ་བའང་མ་ཡིན་ཏེ་དེ་ཕྱིར་ཆོས་ཐམས་ཅད་ནི་རང་བཞིན་གྱི་རྒྱུས་སྟོང་པའོ། །འདི་ལ་སོ་སོར་ཞེས་པས་བདག་སྐྱེ་དང་གཞན་སྐྱེ་དགག་པ་དང་། འདུས་པ་ཞེས་པས་གཉིས་ཀ་ལས་སྐྱེ་བ་བཀག་པ་སྟེ་མུ་བཞི་པོ་བཀག་པར་ཡང་བཤད་དོ། །གཉིས་པ་ངོ་བོ་སྟོང་པ་ཉིད་དུ་བསྟན་པ་ནི། དེ་ལྟར་མ་རྟོགས་པའི་རྨོངས་པས་བདེན་པར་གང་བཟུང་བར་བྱས་པའི་ཕྱི་ནང་གི་དངོས་པོ་འདི་ཀུན་སྒྱུ་མ་ལས་ནི་ཁྱད་པར་ཅི་ཞིག་ཡོད་དེ། སྒྱུ་མས་སྤྲུལ་པའི་རྟ་གླང་ལ་སོགས་པ་གང་ཡིན་པ་དང་། རྒྱུ་རྣམས་ཀྱིས་ནི་གང་སྤྲུལ་པ་ཡི་དངོས་པོ་དེ་དག་ནི་ཐོག་མར་གང་ལས་འོང་བར་གྱུར་ཅིང་། མཐར་གང་དུ་འགྲོ་བའང་བརྟག་པར་གྱིས་ཤིག་དང་དེ་གཉིས་མཚུངས་པ་ངེས་པར་མཐོང་བར་འགྱུར་ཏེ། འདི་ལ་བདེན་པ་ཞིག་ཡོད་ན་འདི་སྣང་བའི་ཚེ་གཞན་ཞིག་ནས་འདིར་འོང་ཞིང་། འགག་པའི་ཚེ་འདི་ནས་གཞན་ཞིག་ཏུ་འགྲོ་དགོས་ནའང་སྔ་ཕྱིའི་མཐའ་ཅི་ཡང་མེད་པ་ལ། འབྲས་བུ་གང་ཞིག་རང་སྐྱེད་བྱེད་ཀྱི་རྒྱུ་གང་དག་ནི་ཚོགས་པའམ་ཉེ་བ་ཡིས་ནི་རྒྱུ་དེ་ཁོ་ནའི་སྟོབས་ཀྱིས་རང་གི་བདག་ཉིད་མཐོང་བར་འགྱུར་གྱིས། རྒྱུ་དེ་མེད་ན་རང་གི་རང་བཞིན་དུ་འགྲུབ་པ་སྲིད་པ་མིན་པ་དེས་ན་གཞན་རྒྱུ་རྐྱེན་གྱིས་བཅོས་བུ་མེ་ལོང་ནང་གི་གཟུགས་བརྙན་དང་མཚུངས་པ་དེ་ལ་རང་གི་ངོ་བོས་གྲུབ་པའི་བདེན་པ་ཉིད་ཇི་ལྟར་ཡོད་དེ་མེད་དོ། །དེ་ལྟར་ན་རྟེན་ཅིང་འབྲེལ་བར་འབྱུང་བ་རྟག་ཆད་འགྲོ་འོང་ཡོད་མེད་ཀྱི་མཐའ་དང་བྲལ་བའི་རང་བཞིན་སྒྱུ་མའི་དཔེ་བརྒྱད་ལ་སོགས་པའི་ཚུལ་དུ་ཤེས་པར་བྱ་སྟེ། སྡུད་པ་ལས། བྱང་ཆུབ་སེམས་དཔའ་གང་ཞིག་རྟེན་ཅིང་འབྲེལ་འབྱུང་ལ། །སྐྱེ་མེད་ཟད་པ་མེད་པར་ཤེས་རབ་འདི་ཤེས་ཏེ། །ཉི་མ་སྤྲིན་མེད་འོད་ཟེར་འཕྲོ་བས་མུན་བསལ་ལྟར། །མ་རིག་ཐིབས་པོ་བཅོམ་ནས་རང་བྱུང་ཐོབ་པར་འགྱུར། །ཞེས་གསུངས་པ་བཞིན་ནོ། །གསུམ་པ་འབྲས་བུ་སྨོན་པ་མེད་པར་བསྟན་པ་ནི། བསྐྱེད་བྱའི་འབྲས་བུ་དེ་ཡོད་པ་ཞིག་གམ་མེད་པ་ཞིག་ཡིན། འབྲས་བུའམ་དངོས་པོ་དེ་རང་བཞིན་གྱིས་ཡོད་པར་གྱུར་པ་ལ་དེ་གྲུབ་ཟིན་པས་རྒྱུ་ཡི་དགོས་པ་ཅི་ཞིག་ཡོད་དེ། དེ་གཉིས་ཕན་ཚུན་རྒྱུ་འབྲས་སུ་མི་རུང་ངོ་། །འོན་ཏེ་འབྲས་བུ་དེ་ནི་མེད་པ་ཞིག་རྒྱུས་བསྐྱེད་དོ་ཞེ་ནའང་འབྲས་བུ་རང་གི་ངོ་བོ་མེད་པ་ཙམ་ཡིན་ན་དེ་ལ་རྒྱུ་ཡི་དགོས་པ་ཅི་ཞིག་ཡོད་དེ། མེད་པ་ལ་སྤྱིར་རྒྱུ་མེད་ཅིང་རང་ཉིད་མེད་པའི་ངོ་བོར་གནས་ཟིན་པས་སོ། །གལ་ཏེ་མེད་པ་ཙམ་པོ་དེ་རྒྱུས་བསྐྱེད་པ་མིན་ཀྱང་རྒྱུ་འདིས་འབྲས་བུ་མེད་པ་ཉིད་ཡོད་པའི་དངོས་པོར་བྱེད་དོ་སྙམ་ན་དེ་མི་ནུས་ཏེ། བྱེ་བ་བརྒྱ་ཕྲག་གཅིག་ཚོགས་པའི་རྒྱུ་ཡིས་འབད་ཀྱང་། ཆོས་གང་ཞིག་རང་གི་ངོ་བོའམ་དངོས་པོ་མེད་པ་དེ་དངོས་པོར་བསྒྱུར་དུ་མེད་དེ། རྒྱུ་ཅི་ཚོགས་ཀྱང་རི་བོང་གི་རྭ་ཡོད་པར་བསྒྱུར་མི་ནུས་པ་བཞིན་ཏེ་མེད་པ་གང་གི་ཡང་ལྟོས་བྱར་མི་འགྱུར་རོ། །དངོས་མེད་དངོས་པོར་བསྒྱུར་དུ་མེད་པའི་རྒྱུ་མཚན་ཀྱང་། དངོས་མེད་ཀྱི་དངོས་པོ་མ་དོར་བཞིན་དུ་འགྱུར་བ་དང་། དོར་ནས་འགྱུར་བ་གཉིས་ཀ་མི་འཐད་པའི་ཕྱིར་ཏེ། འདི་ལྟར་མེད་བཞིན་པའི་གནས་སྐབས་དེ་ནི་དངོས་པོ་ཇི་ལྟར་ཡིན་ཏེ་དེ་གཉིས་ཕན་ཚུན་སྤངས་ཏེ་གནས་པའི་ཕྱིར། དངོས་མེད་དོར་ནས་དངོས་པོར་གསར་དུ་འགྱུར་བ་གཞན་ཡང་གང་ཞིག་ཡིན་ཏེ་དེ་མི་སྲིད་པ་ནི། འདི་ལྟར་རང་གི་ངོ་བོ་མེད་པར་གནས་པ་དེ་ནི། མེད་བཞིན་པའི་ཚེ་ན་དངོས་ཡོད་སྲིད་པ་མིན་ན་དེ་ལ་དངོས་པོ་ཡོད་པར་དུས་ནམ་ཞིག་འགྱུར་ཏེ་སྐབས་མེད་ལ་དངོས་པོར་སྐྱེས་པར་མ་གྱུར་པ་དེ་སྲིད་དུ་ནི་དངོས་མེད་དང་ནི་འབྲལ་བར་མི་འགྱུར་ཞིང་། དངོས་མེད་རང་གི་མཚན་ཉིད་དང་ནི་མ་བྲལ་ན་དེ་ལ་དངོས་པོ་ཡོད་པའི་སྐབས་ནམ་ཡང་མི་སྲིད་པས་དངོས་མེད་དངོས་པོར་ཇི་ལྟར་འགྱུར་ཏེ་འགྱུར་མི་རིགས་སོ། །དེས་ན་དངོས་མེད་ཉིད་ཡིན་བཞིན་དུ་དངོས་པོར་འགྱུར་བ་མི་སྲིད་ན། དངོས་མེད་དངོས་པོར་འགྱུར་བ་ཞེས་པ་ཚིག་ཙམ་སྟེ། གང་དངོས་མེད་ཡིན་པ་ཙམ་གྱིས་དངོས་པོ་ཡོངས་སུ་སྤངས་པར་གྱུར་པའི་ཕྱིར། དེ་དེར་གྱུར་པ་ནི་མེད་དོ། །དེ་བཞིན་དུ་དངོས་པོ་ཡོད་པའང་དངོས་པོ་མེད་པར་འགྱུར་བ་མིན་ཏེ། དེ་གཉིས་ཕན་ཚུན་སྤངས་པས་ན་རིགས་པ་དངོས་མེད་ཀྱི་སྐབས་སུ་བཤད་པ་བཞིན་ལ། གལ་ཏེ་དངོས་པོ་ཡོད་པ་གང་གི་ཚེ་དངོས་པོ་མེད་པའི་རང་བཞིན་དུ་འགྱུར་ན་དེའི་ཚེ་དངོས་པོ་གཅིག་ཉིད་དངོས་དངོས་མེད་ཀྱི་རང་བཞིན་གཉིས་སུ་གྲུབ་པར་ཐལ་བར་འགྱུར་བའི་ཕྱིར་རོ། །དེ་ལྟར་ན་དེ་ཁོ་ན་ཉིད་དུ་འགག་པ་ཡོད་པ་མིན་ཞིང་། དངོས་པོའང་བདེན་པར་ཡོད་པ་མིན་པ་དེ་ཡི་ཕྱིར་འགྲོ་བ་འདི་དག་ཐམས་ཅད་ནི་དུས་གསུམ་པོ་རྟག་ཏུའང་མ་སྐྱེས་ཤིང་མ་འགགས་པ་ཉིད་དོ། །དེས་ན་འགྲོ་བ་འདི་ཀུན་སྣང་ཡང་མི་བདེན་པ་རྨི་ལམ་ལྟ་བུ་སྟེ། རིགས་པས་རྣམ་པར་དཔྱད་ན་ཚུགས་ཐུབ་པའི་སྙིང་པོ་མེད་པས་ཆུ་ཤིང་དང་འདྲ་བ་ཡིན་ནོ། །དེའི་ཕྱིར་མྱ་ངན་ལས་འདས་པ་དང་མ་འདས་པའང་དེ་ཁོ་ན་ཉིད་དུ་ནི་ཁྱད་པར་མེད་དེ་གང་བཅིངས་པ་མེད་ལ་གྲོལ་བ་མེད་པར་རྟག་ཏུ་མཉམ་པ་ཉིད་ཁོ་ནར་གནས་པའི་ཕྱིར་རོ། །གཉིས་པ་སྟོང་ཉིད་རྟོགས་པའི་བྱེད་ལས་ལ། རང་གི་ཆོས་བརྒྱད་མགོ་སྙོམས་པ་དང་། གཞན་ལ་བརྩེ་བ་རྩོལ་མེད་དུ་འབྱུང་བའོ། །དང་པོ་ནི། དེ་ལྟར་རང་བཞིན་གྱིས་སྟོང་པའི་དངོས་པོ་རྣམས་ལ་རྙེད་སོགས་ཐོབ་པ་ཅི་ཡོད་ཅིང་ཤོར་བའང་ཅི་ཞིག་ཡོད། དེ་བཞིན་དུ་སེམས་ཅན་གང་གིས་དངོས་སུ་བསྟོད་ཅིང་རིམ་གྲོ་བྱས་པའམ་སྨད་དེ་ཡོངས་སུ་བརྙས་པར་བྱས་པའང་ཅི་ཞིག་ཡོད། ཕན་འདོགས་པའི་རང་བཞིན་གྱིས་བདེ་བའམ་གནོད་པས་སྡུག་བསྔལ་བའང་གང་ལས་ཡིན། ལྐོག་ཏུ་མི་སྙན་པར་བརྗོད་པས་མི་དགར་ཅི་ཡོད་ཅིང་སྙན་པར་སྨྲས་པས་དགར་འགྱུར་བ་ཅི་ཞིག་ཡོད། དེ་ཁོ་ན་ཉིད་དུ་ནི་རིགས་པས་བཙལ་བར་བྱས་ན། གང་ཟག་གམ་ཡུལ་ཅན་གང་ཞིག་སྲེད་ཅིང་ཡུལ་གང་ལ་སྲེད། ལེགས་པར་དཔྱད་ན་གསོན་པའི་འཇིག་རྟེན་འདི་མ་གྲུབ་པས་གང་ཞིག་སྲིད་པ་འདིར་ནི་འཆི་བར་འགྱུར་ཏེ། ཚེ་ཕྱི་མ་འབྱུང་བར་འགྱུར་བ་གང་ཞིག་ཡིན་ལ་སྔ་མ་བྱུང་བར་གྱུར་པ་དེ་ཡང་གང་ཞིག་ཡིན། གཉེན་དང་མཛའ་བཤེས་རྣམས་ཀྱང་གང་ཞིག་ཡིན་ཏེ་ཆོས་ཐམས་ཅད་ནམ་མཁའ་དང་འདྲ་བར་སྐྱེ་བ་མེད་ཅིང་འགག་པ་མེད་པ་ནི། གནས་ལུགས་དཔྱོད་པའི་བློ་ཅན་རྒྱལ་སྲས་ཞི་བ་ལྷ་བདག་དང་འདྲ་བ་རྣམས་ཀྱིས་ཡོངས་སུ་བཟུང་བར་བྱས་ནས་ཆོས་བརྒྱད་མགོ་སྙོམས་པར་གྱིས་ཤིག་ཅེས་གདམས་པའོ། །གཉིས་པ་གཞན་ལ་བརྩེ་བ་རྩོལ་མེད་དུ་འབྱུང་བ་ནི། འདི་ལྟར་འགྲོ་བ་རྨོངས་པ་བདག་ཉིད་བདེ་བར་འདོད་པ་རྣམས་ནི་དགྲ་ལ་འཐབ་པ་དང་། གཉེན་ལ་སྤྲོ་བའི་རྒྱུ་དག་གིས་ཡིད་རབ་ཏུ་འཁྲུགས་པ་དང་དགའ་བར་བྱེད་ཅིང་། འདོད་པ་མ་གྲུབ་པའི་མྱ་ངན་དང་། འདོད་པའི་དོན་དུ་འབད་རྩོལ་དང་། དེའི་ཕྱིར་གཞན་ལ་རྩོད་པ་དང་། བདག་གཞན་ཕན་ཚུན་ལུས་མཚོན་གྱིས་གཅོད་པ་དང་མདུང་སོགས་ཀྱིས་འབིགས་པ་དང་གཞན་ཡང་སྒོ་གསུམ་གྱི་སྡིག་པ་མང་པོ་དག་གིས་ནི་ཉེ་བར་སྒྲུབ་པའི་འབྱོར་པ་ཚེགས་ཆེན་པོ་ཅན་དག་གིས་འཚོ་བར་བྱེད་ལ་དོན་ཆུང་ཚེ་འདིའི་ཕུན་ཚོགས་ཀྱིས་ཡིད་བསླུ་ཞིང་དུས་འདའ་བར་གནས་སོ། །འགྲོ་བ་འདི་རྣམས་རེས་བསོད་ནམས་ཀྱི་སྟོབས་ལས་བདེ་འགྲོ་མཐོ་རིས་ཀྱི་འཇིག་རྟེན་རྣམ་པ་མང་པོ་དག་ཏུ་ཡང་དང་ཡང་དུ་འོངས་ཏེ། མཐོ་རིས་ཀྱི་དགའ་བའི་བདེ་བ་མང་པོ་ལ་སྤྱད་སྤྱད་ནས། སླར་ཡང་སྡིག་པའི་འབྲས་བུས་ཤི་ནས་ངན་སོང་གསུམ་གྱི་སྡུག་བསྔལ་ནི་ཤིན་ཏུ་ཡུན་རིང་ཞིང་བཟོད་པར་དཀའ་བ་མི་བཟད་པ་རྣམས་སུ་ལྷུང་བར་འགྱུར་ཞིང་མཐོ་དམན་བདེ་སྡུག་ངེས་པ་མེད་པའི་སྲིད་པའི་སྐྱེ་བ་བརྒྱུད་མར་གཡོ་ཞིང་འཕྱན་པར་འགྱུར་བ་ཡིན་ལ། དེ་འདྲའི་སྲིད་པ་ན་ནི་ཕྱིན་ཅི་ལོག་ཏུ་ཞེན་པའི་དབང་གིས་འདོད་རྨོངས་སྲེད་པའི་གཡང་ས་ཤིན་ཏུ་མང་ཞིང་། སྲིད་པ་དེར་ནི་བདག་ལྟའི་ངང་ཚུལ་ཅན་ཕྱིན་ཅི་ལོག་གི་ཆོས་དངོས་པོ་བདེན་པར་ཞེན་པ་དེ་ཁོ་ན་ཉིད་མིན་པའི་རང་བཞིན་འདི་འདྲ་བ་ཡིན་པས། དེར་ཡང་སྟོང་ཉིད་རྟོགས་པ་དང་དངོས་པོར་འཛིན་པ་ཕན་ཚུན་འགལ་བས་ན་སྲེད་ན་དེ་ཁོ་ན་ཉིད་མཐོང་བ་འདི་འདྲ་བ་མེད་དེ་མུན་པའི་ཀློང་དུ་སྣང་བ་བཞིན་ནོ། །སྲིད་པ་དེར་ཡང་དཔེ་ཡིས་ཚད་བཟུང་དུ་མེད་ཅིང་ཤིན་ཏུ་བཟོད་དཀའ་བས་མི་བཟད་པའི་སྡུག་བསྔལ་གྱི་རྒྱ་མཚོ་ཆེན་པོ་མཐའ་ལས་འདས་པ་མྱོང་བར་འགྱུར་ཞིང་། དེར་ནི་དེ་ལྟར་ལས་དང་ཉོན་མོངས་པའི་དབང་གིས་དགེ་བ་སྒྲུབ་པ་ལ་སྟོབས་ཆུང་ཞིང་། དེར་ནི་དགེ་བ་སྒྲུབ་པའི་རྟེན་དལ་འབྱོར་གྱི་ཚེ་ཡང་ཡུན་ཐུང་བ་ཉིད་ཡིན་ལ། དེར་ཅུང་ཟད་གནས་པའི་སྐབས་སུ་ཡང་ཡུན་རིང་པོར་གསོན་པའི་བྱ་བ་ལུས་ཀྱི་རིམ་གྲོ་སྣ་ཚོགས་དང་ནད་མེད་པ་ཉིད་ཀྱི་ཕྱིར་སྨན་སོགས་བསྟེན་པར་བྱེད་པ་དང་། བཀྲེས་པ་དང་ངལ་བ་དང་གཉིད་དང་ཕྱི་ནང་གི་ཉེར་འཚེེ་སྣ་ཚོགས་པ་དང་། དེ་བཞིན་དུ་བྱིས་པའི་སྐྱེ་བོ་དང་འགྲོགས་པ་སོགས་དོན་མེད་ཀྱི་བྱ་བས་ཚེ་ནི་དོན་མེད་པར་མྱུར་དུ་འདའ་ཡི། སྲིད་པ་ལས་གྲོལ་བའི་རྒྱུ་དེ་ཁོ་ན་ཉིད་ཀྱི་དོན་ལ་བློས་རྣམ་པར་དཔྱོད་པ་ཤིན་ཏུ་རྙེད་པར་དཀའ་ཞིང་འཁོར་བའི་གནས་དེར་ཡང་ཐོག་མ་མེད་ནས་རྣམ་པར་གཡེང་བ་ལ་གོམས་པ་ཤུགས་དྲག་པོ་ནི་ཆུ་ཀླུང་བཞིན་དུ་བབས་པས་གློ་བུར་དུ་ཟློག་པའི་ཐབས་ནི་ག་ལ་ཡོད་ཅིང་། དེར་མ་ཟད་དེར་ཡང་དམྱལ་བ་ལ་སོགས་པའི་ངན་སོང་ཆེན་པོར་ནི་ལྟུང་བར་བྱ་བའི་ཕྱིར་ལྷའི་བུའི་བདུད་སོགས་ནག་པོའི་རྩ་ལག་རྣམས་ཀྱིས་ནི་ཐར་པའི་ལམ་ལ་བར་དུ་གཅོད་པ་ལ་བརྩོན་པར་བྱེད་ཅིང་། དེར་ནི་རྟག་ཆད་ཀྱི་ལྟ་བ་སོགས་ལོག་པའི་ལམ་མང་ཞིང་། ཡང་དག་པའི་ལམ་མ་ནོར་བ་འདིའོ་ཞེས་དམིགས་ཕྱེད་པའི་ངེས་པ་མི་སྐྱེ་བར་ཐེ་ཚོམ་ལས་ཀྱང་བརྒལ་བར་དཀའ་སྟེ་ཐེ་ཚོམ་གཅོད་པའི་རྐྱེན་ཕྱི་ཡི་ཡོངས་འཛིན་ཐེག་ཆེན་ཚུལ་བཞིན་སྟོན་པའི་དགེ་བའི་བཤེས་གཉེན་དང་། ནང་གི་ཡོངས་འཛིན་ངེས་དོན་ཟབ་མོའི་སྡེ་སྣོད་ལ་ཤེས་རབ་གསུམ་གྱིས་ཕྱིན་ཅི་མ་ལོག་པར་སྒྲུབ་པ་ལ་ནན་ཏན་དུ་བྱ་བ་ཡིན་ན་དེ་ལྟ་བུ་ཤིན་ཏུ་རྙེད་དཀའ་བའི་ཕྱིར་དང་། དེ་ལྟར་ཆོས་ཀྱི་སྣང་བ་མ་རྙེད་པར་ཤི་ན་སླར་ཡང་མི་ཁོམ་པའི་གནས་ལས་ཐར་པའི་དལ་བ་ཕུན་སུམ་ཚོགས་པ་རྙེད་པར་དཀའ་ཞིང་། སངས་རྒྱས་འཇིག་རྟེན་དུ་འབྱུང་བ་སོགས་འབྱོར་པ་ཕུན་སུམ་ཚོགས་པའང་རྙེད་པར་ཤིན་ཏུ་དཀའ་ལ། སངས་རྒྱས་ཀྱི་བསྟན་པ་ལ་ནན་ཏན་དུ་བྱས་ནས་རང་རྒྱུད་ཀྱི་ཉོན་མོངས་པའི་ཆུ་བོ་བརྒལ་པའི་དུས་ཐོབ་པར་དཀའ་སྟེ། དེའི་ཕྱིར་སེམས་ཅན་དམན་པ་རྣམས་ནི་ཨེ་མ་ཞེས་སྨྲེ་སྔགས་ཀྱི་སྒྲ་དང་བཅས་ཏེ་སྡུག་བསྔལ་གཅིག་ནས་གཅིག་ཏུ་བརྒྱུད་པར་འགྱུར་རོ། །དེ་ལྟར་སྲིད་པ་ན་ཤིན་ཏུ་སྡུག་བསྔལ་ན་ཡང་རང་ཉིད་སྡུག་བསྔལ་གྱི་ནང་དུ་བྱིང་བ་མི་མཐོང་བར་སྲིད་པ་ལ་ཞེན་པ་གང་ཡིན་པ་དང་སྡུག་བསྔལ་གསུམ་གྱི་ཆུ་བོར་གནས་པའི་སེམས་ཅན་འདི་དག་ལ་དམིགས་ནས་ཀྱི་ཧུད་ཅེས་རྒྱལ་བའི་སྲས་རྣམས་ཀྱིས་མྱ་ངན་བྱ་བར་འོས་སོ། །དཔེར་ན་སྐྱེ་བོ་མྱོས་པ་འགའ་ཞིག་བསིལ་བའི་རེག་བྱ་འདོད་པས་ཡང་ཡང་ཆུར་ཞུགས་ནས་ཁྲུས་བྱས་ཏེ་ཡང་ཚ་བར་འདོད་པས་ཡང་ཡང་མེ་ནང་དུ་འཇུག་པ་སྤེལ་མར་བྱས་ཏེ། དེའི་དབང་གིས་དེ་ལྟར་ཚ་གྲང་གིས་ཤིན་ཏུ་སྡུག་བསྔལ་བར་གནས་ཀྱང་ད་དུང་བདག་ཉིད་བདེ་བར་རློམ་པ་བཞིན་དུ་ཕྱིན་ཅི་ལོག་ཏུ་ཞེན་པའི་དབང་གིས་སྡུག་བསྔལ་ལ་བདེ་བར་རློམ་པ་ཡིན་པས་སོ། །དེ་ལྟར་སྡུག་བསྔལ་ཡང་རྒ་བ་དང་ན་བ་དང་འཆི་བ་སོགས་འོང་རྒྱུ་མེད་པ་བཞིན་དུ་བག་ཡངས་སུ་རོལ་ཞིང་སྤྱོད་པས་གནས་པ་རྣམས་ལ། དང་པོ་ཉིད་དུ་འཆི་བདག་བཟློག་ཏུ་མེད་ཅིང་བརྩེ་བ་མེད་པ་དེ་འོངས་ནས་རང་དབང་མེད་པར་བསད་པར་བྱས་ནས། དེའི་འོག་ཏུ་ངན་སོང་དུ་ལྟུང་བ་ཡི་སྡུག་བསྔལ་མི་བཟད་པ་འོང་བར་འགྱུར་རོ། །དེ་ལྟར་དེ་ཁོ་ན་ཉིད་ཀྱི་དོན་མཐོང་བ་དང་བྲལ་བས་ན་སྲིད་པའི་སྡུག་བསྔལ་གྱི་མེས་གདུང་བ་རྣམས་ལ་བདག་གི་བསོད་ནམས་ཚད་མེད་པའི་སྤྲིན་ཆེན་པོ་ལས་ལེགས་པར་བྱུང་བའི་རང་གི་བདེ་བའི་ཚོགས་ཆས་སམ་ཡོ་བྱད་ཟས་གོས་གནས་མལ་སོགས་ཅི་འདོད་པའི་ཚོགས་ཀྱི་ཆར་གྱིས། སེམས་ཅན་དེ་དག་གི་སྡུག་བསྔལ་ཞི་བར་བྱེད་པར་བདག དུས་ནམ་ཞིག་ཏུ་འགྱུར་སྙམ་དུ་བསམ་པ་ནི་གནས་སྐབས་ཀྱི་བདེ་བ་དང་། ཡང་ངེས་ལེགས་ཀྱི་དབང་དུ་བྱས་ཏེ་ནམ་ཞིག་འཁོར་གསུམ་གྱི་དམིགས་པ་མེད་པའི་ཚུལ་དུ་སེམས་ཅན་རྣམས་ཀྱི་དོན་ལ་གུས་ཤིང་སྤྲོ་བས་བསོད་ནམས་དང་ཡེ་ཤེས་ཀྱི་ཚོགས་མཐའ་ཡས་པ་བསགས་ཏེ། རང་ཉིད་ཀྱིས་ཆོས་ཐམས་ཅད་ཀྱི་དེ་ཁོ་ན་ཉིད་མངོན་དུ་བྱས་ནས། བདེན་ཞེན་གྱི་དམིགས་པས་འཁོར་བའི་གནས་སུ་ཕུང་བར་གྱུར་པའི་སེམས་ཅན་རྣམས་ལ་དེའི་གཉེན་པོར་ཆོས་ཐམས་ཅད་དམིགས་པ་མེད་པར་སྟོན་པའི་སྟོང་པ་ཉིད་ནི་སྟོན་པར་འགྱུར་ན་ཅི་མ་རུང་ཞིང་། དེ་ལྟར་བྱའོ་ཞེས་སྙིང་རྗེ་ཆེན་པོ་སྐྱེད་དོ། །རང་ཉིད་ཀྱིས་ཆོས་ཐམས་ཅད་བདེན་མེད་དུ་མཐོང་ན་གཞན་བདེན་འཛིན་གྱི་དབང་གིས་འཁོར་བ་རྣམས་ལ་ནམ་ཡང་མི་གཏོང་བའི་སྙིང་རྗེ་ཆེན་པོ་ཤུགས་ཀྱིས་འབྱུང་ཞིང་འདི་ནས་ཇི་སྐད་གསུངས་པ་ལྟ་བུའི་སེམས་སྐྱེ་བའང་ཆོས་ཉིད་དེ་སེམས་འགྲེལ་ལས། དེ་ལྟར་རྣལ་འབྱོར་པ་རྣམས་ཀྱིས། །སྟོང་པ་ཉིད་ནི་གོམས་བྱས་ན། །བློ་ནི་གཞན་དོན་ལ་དགའ་བར། །འགྱུར་བ་ཉིད་དུ་དཀའ་བ་མེད། །ཅེས་གསུངས་པ་བཞིན་ནོ། །སླར་སྨྲས་པ། ཆོས་དབྱིངས་མཁའ་ལ་སྙན་པའི་འབྲུག་སྒྲ་རྟག་སྒྲོགས་ཤིང་། །མཁྱེན་བརྩེའི་སྤྲིན་ལས་འཕགས་ལམ་ཡན་ལག་བརྒྱད་ལྡན་ཆར། །མཐའ་ཀླས་གདུལ་བྱའི་ཞིང་སར་ཅི་དགར་འབེབས་མཛད་པའི། །ཐུབ་ཆེན་ཀླུ་ཡི་དབང་པོར་གུས་པས་ཕྱག་བགྱིའོ། །ཟབ་དང་རྒྱ་ཆེའི་ཆོས་མཆོག་འོ་མའི་རྒྱ་མཚོ་ཆེ། །ལེགས་པར་བསྲུབས་པའི་སྙིང་པོའི་ཡང་བཅུད་ཟླ་མེད་པ། །སྣང་སྟོང་ཟུང་འཇུག་སྤྲོས་པ་ཀུན་བྲལ་དབུ་མ་ཆེ། །སྲས་བཅས་རྒྱལ་བའི་བགྲོད་གཅིག་ལམ་བཟང་འདི་རྨད་བྱུང་། །ས་བཅུའི་དབང་ཕྱུག་འཇམ་དཔལ་དབྱངས་དང་མ་ཕམ་པའི། །དགོངས་པའི་གསང་མཛོད་ཡེ་ཤེས་ཀློང་དུ་ཐ་དད་མིན། །དེ་དགོངས་འགྲེལ་མཁས་འཕགས་ཡུལ་ཤིང་རྟ་ཆེ་རྣམས་ཀྱང་། །གནས་སྐབས་ཁས་ལེན་ཕྲ་མོ་ཙམ་ལས་དོན་གནད་གཅིག །དེ་ཚུལ་གངས་ཁྲོད་རིགས་སྨྲ་རྒྱུ་སྐར་ཕྲེང་བའི་དབུས། །མཁྱེན་རྟོགས་དཀྱིལ་འཁོར་ཡོངས་གང་སྨྲ་བའི་ཟླ་བ་མཆོག །ཀུན་མཁྱེན་ཆོས་རྗེ་བརྒྱུད་པར་བཅས་པས་སེང་གེའི་སྒྲ། །ལུང་རིགས་མན་ངག་ཟབ་མོའི་དབྱངས་ཀྱིས་སྒྲོགས་པར་མཛད། །དེ་ལྟ་ན་ཡང་སྐལ་དམན་སྙིགས་མའི་སྐྱེ་བོ་ཕལ། །ཟབ་མོའི་གནད་ལ་ལྟ་བའི་མིག་ཟུམ་བློ་མཐུ་ཟད། །གཞན་ཟེར་བྲག་ཆའི་ལད་མོ་ཟློ་བས་ཡིད་ཚིམས་ནས། །རང་ལུགས་ཁྱད་འཕགས་མུན་ཁང་རྫས་བཞིན་སྟོར་ཉེའི་ཚེ། །སྔོན་སྨོན་ཐུགས་བསྐྱེད་བརྩོན་པའི་བྱ་ཁྱུང་ཕུང་པོ་ཡིས། །ཉེར་དྲངས་འཇམ་དཔལ་དགྱེས་པའི་རྡོ་རྗེ་ཉིན་མོར་བྱེད། །བསྟན་འགྲོའི་བསོད་ནམས་མཁའ་ལ་ལེགས་ཤར་རྒུད་པའི་མུན། །རབ་བསལ་ངེས་གསང་སྙིང་པོའི་པད་ཚལ་ཅིར་ཡང་བཞད། །དཔལ་ལྡན་ལྷག་པའི་ལྷ་ཡིས་བྱིན་གྱིས་བརླབས་པའི་མཐུས། །གཟུངས་སྤོབས་བློ་གྲོས་བྱེ་བའི་གཏེར་ཁ་བཞད་པ་ལས། །ཉེར་འོངས་སྔོན་མེད་ལེགས་བཤད་ནོར་བུ་ཀེ་ཏ་ཀ །དྲི་བྲལ་ཐུབ་བསྟན་མཚོ་ཆེན་མཛེས་པའི་རྒྱན་དུ་གྲུབ། །འཕགས་བོད་མཁས་གྲུབ་བརྒྱུད་པའི་མན་ངག་གསེར་སྦྱངས་ཁམས། །རྣམ་དག་རིགས་ལམ་བཟང་པོའི་རྩིབས་སྟོང་རྣམ་བཀྲ་ཞིང་། །ཡིད་ཆེས་ལུང་གི་མུ་ཁྱུད་མཛེས་འབར་སྲིད་ཞིའི་བླར། །མངོན་པར་འཕགས་གང་སྔ་འགྱུར་བརྒྱུད་པའི་ཁྱད་ནོར་ཡིན། །དེ་སླད་བདག་བློ་དམན་ཞིང་སྦྱོང་བའི་མཐུ་ཆུང་ཡང་། །ཟབ་མོའི་གནས་ལ་གུས་པ་འབའ་ཞིག་དབང་བྱས་ནས། །རང་འདྲའི་སྐལ་མཉམ་གཞན་ལའང་སྨན་ངེས་བལྟ་བདེའི་ཕྱིར། །ཅུང་ཟད་བསྡུས་འདིར་ནོངས་གང་འཕགས་པའི་སྤྱན་སྔར་བཤགས། །འདི་ལས་ཚིག་འབྲུ་གཅིག་གི་དོན་ཙམ་གོ་བ་ཡིས། །བློ་ལྡན་བློ་ཡི་རེ་བ་ཡོངས་སུ་རྫོགས་བྱེད་པར། །ལྷ་དབང་ལྷ་ཡི་དཔལ་གྱིས་འབྱོར་བས་དེ་ལྟར་མིན། །དེ་ཕྱིར་སྐལ་བཟང་གྲོགས་དག་ཚུལ་འདིར་བརྩོན་པར་རིགས། །ལེགས་བྱས་མཐོ་རིས་ཀླུང་གིས་ཉེས་ཚོགས་དུག་ཅན་བུའི། །དྲི་མ་ཡོངས་བཅིལ་ཕན་བདེའི་ཆུ་གཏེར་རབ་འབབ་ཞིང་། །སྟོང་དང་རྟེན་འབྱུང་ཟུང་འཇུག་དབུ་མའི་བདེན་དོན་མཆོག །ལེགས་རྟོགས་རྒྱལ་བའི་ཆོས་མཛོད་རྒྱ་མཚོ་འཛིན་གྱུར་ཅིག །བཀྲ་ཤིས་གང་ཞིག་རིགས་ཁམས་དགེ་བའི་མྱུ་གུ་སྨིན། །བཀྲ་ཤིས་ངོ་མཚར་བདེན་གཉིས་ཟབ་མོའི་གནས་ལུགས་རྟོགས། །བཀྲ་ཤིས་རྨད་བྱུང་ཚོགས་གཉིས་ཟུང་འབྲེལ་ལྗོན་བཟང་རྩེར། །བཀྲ་ཤིས་དཔག་ཡས་སྐུ་གཉིས་མེ་འབྲས་རྒྱས་གྱུར་ཅིག །ཅེས་པའང་རང་ཉིད་ཀྱི་དད་པའི་གསོས་དང་ཆོས་གྲྭ་ཆེན་པོ་འདིར་བསླབ་གྲྭ་གསར་འཛུགས་སྐབས་གཞུང་འཆད་ཉན་བདེ་བའི་སླད་དུ་༧ཀུན་མཁྱེན་བླ་མ་མཆོག་གི་ཞབས་རྡུལ་ལ་སྤྱི་བོས་རེག་པའི་ཀུ་སཱ་ལི་གཞན་ཕན་ཆོས་ཀྱི་བློ་གྲོས་སམ་འཇམ་དབྱངས་བློ་གྲོས་རྒྱ་མཚོར་འབོད་པས་ཤེར་ཊཱིཀ་ཆེན་མོ་ཡན་ལག་དང་བཅས་པ་ལས་ཅུང་ཟད་བསྡུས་ཤིང་སྐབས་བབས་ཀྱི་གསལ་བྱེད་ཕྲན་བུ་དང་བཅས་ཏེ་རང་གནས་ཞེ་ཆེན་བསྟན་གཉིས་དར་རྒྱས་གླིང་གི་ཆོས་གྲྭར་བྲིས་པ་ལ་སླར་ཡང་ཕྲི་བསྣན་ཅུང་ཟད་བགྱིས་པ་སྟེ། འདིས་ཀྱང་ལུང་རྟོགས་ཀྱི་བསྟན་པ་རིན་པོ་ཆེ་ཡུན་དུ་གནས་པའི་རྒྱུར་གྱུར་ཅིག དགེའོ། །དགེའོ། །དགེའོ། ༈ ༀ་སྭསྟི་བི་ཛ་ཡནྟུ། གཉིས་སུ་མི་གསུང་རྒྱལ་བས་ཟབ་རྒྱས་ཀྱི། །ཆོས་ཚུལ་རྒྱ་མཚོ་བསྟན་པའི་སྙིང་པོ་ནི། །རྨད་བྱུང་བྱང་ཆུབ་སེམས་མཆོག་དབྱིག་གི་རྒྱལ། །འཕགས་ཆེན་ཀླུ་དབང་གཙུག་ཏུ་མཛེས་པ་གང་། །གཞན་ཕན་ཁུར་གྱིས་མི་ངལ་སྙིང་སྟོབས་ལ། །འཇམ་མགོན་དགྱེས་པས་མཆོག་བྱིན་དེད་དཔོན་ཆེ། །ཞི་བ་ལྷ་ཡི་མཁྱེན་བརྩེའི་འཕྲུལ་ཐབས་ཀྱིས། །ཕན་བདེའི་འབྱུང་གནས་སྐལ་བཟང་ལག་རྩེར་གནང་། །ཐབས་མཁས་འདོད་པ་འཇོ་དང་ཆབས་ཅིག་ཏུ། །སྒྲིབ་ཀུན་སེལ་བའི་ཤེས་རབ་འོད་འབྱིན་ཕྱིར། །འཕགས་བོད་མཁས་པ་མང་པོས་རྩིང་ཞིབ་ཀྱིས། །རྣམ་དཔྱོད་བྱི་དོར་ཆོ་གས་གཙང་བ གྱིས་མོད། །མི་ཕམ་འཇམ་དཔལ་དགྱེས་པའི་བློ་གྲོས་ཀྱིས། །རྒྱལ་མཚན་མངོན་པར་མཐོ་བའི་རྩེ་མོ་རུ། །མ་བཀོད་དེ་སྲིད་རྒྱལ་སྲས་མཆོག་དེའི་བཞེད། །ཇི་བཞིན་གསལ་ལ་རྫོགས་པར་མཚོན་པ་མེད། །དེ་ཕྱིར་མགོན་དེའི་ཞལ་ལུང་དྲི་མ་མེད། །གཞུང་དོན་རབ་གསལ་ནོར་བུའི་སྒྲོན་མེ་འདི། །དུས་མཐར་རྒྱལ་བསྟན་རིན་ཆེན་གསལ་བ་དང་། །མཐའ་ཡས་འགྲོ་ལ་ཕན་བདེའི་མིག་སྦྱིན་སླད། །སྲིད་འབྱོར་མངོན་མཐོའི་དཔལ་གྱིས་མི་དྲེགས་པར། །ངེས་ལེགས་ཐར་པར་འདུན་པའི་བློ་གྲོས་ནི། །རབ་དཀར་སྟོན་ཟླ་བྱེ་བའི་དཔལ་འཛིན་པ། །བཀྲས་མཐོང་མི་ཡི་དབང་པོ་སྟངས་དཔྱལ་གྱིས། །མ་སྨད་ཐུགས་བསྐྱེད་རིན་ཆེན་ལྡེའུ་མིག་གིས། །རྣམ་མང་རིན་ཆེན་མཛོད་ཀྱི་སྒོ་ཕྱེས་ནས། །མི་ཟད་ཆོས་སྦྱིན་སྤར་གྱི་འདུ་འགོད་ཀྱིས། །ཆོས་འདོད་བློ་ཡི་དབུལ་བ་སེལ་བར་བྱས། །དགེ་བས་ལེགས་བྱས་འདིར་འབྲེལ་གྱིས་མཚོན་པའི། །མཁའ་ཁྱབ་འགྲོ་ཀུན་བྱང་ཆུབ་མཆོག་གི་སེམས། །རིན་ཆེན་དྲི་མ་མེད་པའི་སྣོད་གྱུར་ནས། །དགེ་ལེགས་དུས་སྟོན་ཕྱོགས་དུས་ཀུན་ཁྱབ་ཤོག །ཅེས་པའང་འཇམ་དབྱངས་མཁྱེན་བརྩེའི་དབང་པོའི་མཚན་གྱི་བྱིན་རླབས་ཙམ་ཐོབ་པ་འཇམ་དབྱངས་ཆོས་ཀྱི་བློ་གྲོས་པས་བྲིས་པའོ། །སརྦ་མངྒལཾ་བྷ་ཝནྟུ།
དཀོན་མཆོག་གསུམ་གྱི་དོན་རྣམ་པར་བཞག་པ་མདོར་བསྡུས་སུ་བརྗོད་པ་དད་པའི་རླབས་ཕྲེང་རྣམ་པར་གཡོ་བའི་ཆུ་གཏེར།
༄༅། །པྲསཱདབིཙིམཱལྱབིཤཱངྷསམུདྲནཱམརཏྣཏྲཱིརྠབིབེཀསཾཀྵེཔབིཎྜབཱཙྱསྠཱིསྟི།
༄༅། །དཀོན་མཆོག་གསུམ་གྱི་དོན་རྣམ་པར་བཞག་པ་མདོར་བསྡུས་སུ་བརྗོད་པ་དད་པའི་རླབས་ཕྲེང་རྣམ་པར་གཡོ་བའི་ཆུ་གཏེར་ཞེས་བྱ་བ་བཞུགས་སོ། །
ན་མོ་གུ་རུ་མཉྫུ་ཤྲཱིི་ཡཻ། དྲི་མེད་འོད་གསལ་མཁའ་དང་ཉི་བཞིན་དུ། །ཡེ་ནས་ལྷུན་གྲུབ་སྣང་སྟོང་ཟུང་འཇུག་ཕུལ། །སྲིད་ཞི་ཀུན་ཁྱབ་སོ་སོ་རང་རིག་ཡུལ། །དོན་དམ་བདེ་གཤེགས་སྙིང་པོར་ཕྱག་བ གྱིའོ། །འབྲས་རྒྱུད་དཀོན་མཆོག་གསུམ་པོ་འབྱུང་བའི་རིགས། །དོན་དམ་བདེ་གཤེགས་སྙིང་པོ་འདུས་མ་བྱས། །མངོན་བྱེད་བྱང་ཆུབ་ཡོན་ཏན་ཕྲིན་ལས་ཐབས། །སྟོན་མཛད་རྒྱལ་དང་དེ་སྲས་ཡོངས་ལ་འདུད། །རྒྱལ་དགོངས་མཐར་ཐུག་རྒྱལ་ཚབ་ས་བཅུ་པས། །ལེགས་བཀྲལ་ས་གསུམ་བརྙེས་པས་འཛམ་གླིང་འདིར། །གསལ་བྱས་ཐེག་མཆོག་བླ་མའི་དགོངས་དོན་བཞིན། །དཀོན་མཆོག་གསུམ་གྱི་རྣམ་བཞག་མདོ་ཙམ་བརྗོད། །དེ་ལ་འདིར་ཆོས་ཐམས་ཅད་མཉམ་པ་ཉིད་དུ་མངོན་པར་བྱང་ཆུབ་པའི་དབང་གིས་དབྱིངས་དག་པ་གཉིས་ལྡན་བྲལ་འབྲས་ཟག་པ་མེད་པའི་ཆོས་སྡེ་ཚན་ཉེར་གཅིག་གིས་ཁྱད་པར་དུ་བྱས་པའི་སྤྲོས་བྲལ་ངོ་བོ་ཉིད་སྐུའི་ཀློང་ནས་མ་གཡོས་བཞིན་དུ། དག་དང་མ་དག་པའི་ཞིང་རབ་འབྱམས་རྣམས་སུ་གང་འདུལ་གཟུགས་སྐུའི་བཀོད་པ་འབྱམས་སུ་ཀླས་པས། རིགས་ཅན་གསུམ་གྱི་གདུལ་བྱ་མཐའ་ཡས་པ་རྗེས་སུ་འཛིན་པའི་སླད་དུ། ཟབ་པ་དང་རྒྱ་ཆེ་བའི་ཆོས་ཀྱི་འཁོར་ལོ་ལེགས་པར་བསྐོར་བ་ལས། སློབ་མ་འཕགས་པའི་ཚོགས་ཤིན་ཏུ་དུལ་བ་མཐའ་ཡས་པ་འབྱུང་། དེ་རྣམས་ཀྱི་སྙིང་པོ་ཡེ་ཤེས་ཀྱི་ཁམས་སྒྲིབ་པ་ཅི་རིགས་པས་དག་པའི་རྐྱེན་དང་ལྡན་པ་ཐོབ། དེ་ལས་མཐར་ཆོས་དབྱིངས་སྒྲིབ་བྱེད་ཀྱི་དྲི་མ་མཐའ་དག་གིས་སྟོང་པའི་བྱང་ཆུབ་མངོན་དུ་བྱེད། དེ་ལ་སྟོབས་ལ་སོགས་པའི་ཡོན་ཏན་མཐའ་ཡས་པ་དང་ལྡན། དེའི་ནུས་པས་སེམས་ཅན་ཀུན་གྱི་དོན་བྱེད་པའི་ཕྲིན་ལས་ཀྱི་ཆོས་རྣམས་འབྱུང་བས་ན། འཇིག་རྟེན་དུ་དཀོན་མཆོག་གསུམ་གྱི་གདུང་གི་རྒྱུན་མི་ཆད་པར་འབྱུང་བ་ཡིན་པས། དེའི་ཚུལ་ཐེག་པ་ཆེན་པོ་རྒྱུད་བླ་མའི་དགོངས་པ་བཞིན་མདོར་བ སྡུས་སུ་བརྗོད་པ་ལ་གཉིས་ཏེ། ཐོབ་བྱ་དཀོན་མཆོག་གསུམ་གྱི་རང་བཞིན་ངོས་བཟུང་བ་དང་། ཐོབ་ཚུལ་གནས་བཞིའི་ཡན་ལག་རྒྱས་པར་བཤད་པའོ། །དང་པོ་ནི། ལྷག་བསམ་བསྟན་པའི་མདོ་ལས། ཀུན་དགའ་བོ་དེ་བཞིན་གཤེགས་པ་ནི་བསྟན་དུ་མེད་པ་སྟེ། དེ་ནི་མིག་གིས་བལྟ་བར་མི་ནུས་སོ། །ཀུན་དགའ་བོ་ཆོས་ནི་བརྗོད་དུ་མེད་པ་སྟེ། དེ་ནི་རྣ་བས་མཉན་པར་མི་ནུས་སོ། །ཀུན་དགའ་བོ་དགེ་འདུན་ནི་འདུས་མ་བྱས་ཏེ། དེ་ནི་ལུས་དང་སེམས་ཀྱིས་བསྙེན་བཀུར་བར་མི་ནུས་སོ། །ཞེས་གསུངས་པའི་རྗེས་སུ་འབྲངས་ཏེ་འཆད་པ་ལ་དོན་བཞི་ལས། དང་པོ་ཐོབ་པར་བྱ་བ་རང་གཞན་གྱི་དོན་གཉིས་མཐར་ཕྱིན་པ་སངས་རྒྱས་ཀྱི་དོན་ནི། རྒྱུད་བླ་མ་ལས། འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོགས་མིན་པ། །མཁྱེན་དང་བརྩེ་དང་ནུས་པར་ལྡན། །དོན་གཉིས་ལྡན་པ་སངས་རྒྱས་ཉིད། །ཅེས་གསུངས་པ་ལྟར། རྒྱུ་རྐྱེན་གྱིས་གསར་དུ་མ་བསྐྱེད་ཅིང་རང་གི་ངོ་བོ་སྐྱེ་འགག་གནས་གསུམ་དང་བྲལ་བའི་འདུས་མ་བྱས་ཆེན་པོ། སྤྲོས་པ་དང་རྣམ་རྟོག་ལ་སོགས་པའི་འབད་རྩོལ་མཐའ་དག་ཉེ་བར་ཞི་བས་ལྷུན་གྱིས་གྲུབ་པ། སངས་རྒྱས་ཉིད་ཀྱི་རང་བྱུང་གི་ཡེ་ཤེས་ཀྱིས་མངོན་སུམ་པར་གཟིགས་པས་གཞན་རྐྱེན་གྱིས་རྟོགས་པ་མིན་པ་སྟེ་རང་དོན་ཆོས་སྐུའི་ཡོན་ཏན་གསུམ་དང་། སྔ་མ་གསུམ་གྱི་དོན་ཕྱིན་ཅི་མ་ལོག་པར་ཐུགས་སུ་ཆུད་པའི་མཁྱེན་པ་དང་། རང་གིས་ཇི་ལྟར་རྟོགས་པའི་དོན་དེ་ལ་སེམས་ཅན་ཐམས་ཅད་འགོད་པར་བཞེད་པའི་བརྩེ་བ་དང་། དེ་གཉིས་ཀྱི་མཐུ་ལས་གདུལ་བྱ་རྣམས་ཀྱི་རྒྱུད་ཀྱི་སྡུག་བསྔལ་གྱི་རྩ་བ་མིང་གཟུགས་ཀྱི་མྱུ་གུ་གཅོད་ཅིང་། ལྟ་བ་ངན་པའི་ནགས་འཐིབ་པོས་བསྐོར་བའི་ཐེ་ཚོམ་གྱི་རྩིག་པ་རྨང་ནས་འཇིག་པར་མཛད་པས་དཔེ་རལ་གྲི་དང་རྡོ་རྗེ་ལྟ་བུར་གྱུར་པ་ནི་ནུས་པ་སྟེ་གཞན་དོན་གཟུགས་སྐུའི་ཡོན་ཏན་གསུམ་སྟེ་དྲུག་དང་། དབྱེ་གཞི་གཉིས་སོ་སོར་བགྲངས་པས་ཡོན་ཏན་བརྒྱད་དང་ལྡན་པ་ནི་སངས་རྒྱས་དཀོན་མཆོག་གི་མཚན་ཉིད་དོ། །གཉིས་པ་འདོད་ཆགས་དང་བྲལ་བ་བདེན་པ་གཉིས་ཀྱི་མཚན་ཉིད་ཅན་གྱི་དམ་པའི་ཆོས་ཀྱི་དོན་ནི། བསམ་མེད་གཉིས་མེད་རྟོག་མེད་པ། །དག་གསལ་གཉེན་པོའི་ཕྱོགས་ཉིད་ཀྱིས། །གང་ཞིག་གང་གིས་ཆགས་བྲལ་བ། །བདེན་གཉིས་མཚན་ཉིད་ཅན་ཏེ་ཆོས། །ཆགས་བྲལ་ཉིད་ནི་འགོག་པ་དང་། །ལམ་གྱི་བདེན་པ་དག་གིས་བསྡུས། །ཞེས་གསུངས་པ་ལྟར། འགོག་བདེན་མཐར་ཐུག་ཆོས་དབྱིངས་དེ་ཉིད་ཡོད་མེད་སོགས་མུ་བཞིའི་འཛིན་རྟོག་གིས་བརྟག་ཡུལ་མིན་པའི་ཕྱིར་དང་། བརྡ་དང་ཐ་སྙད་དང་དཔེ་དང་གཏན་ཚིགས་ལ་སོགས་པས་བསྟན་པར་མི་ནུས་པའི་ཕྱིར་དང་། འཕགས་པའི་མཉམ་བཞག་ཏུ་སོ་སོ་རང་གིས་རིག་པར་བྱ་བ་ལས་གཞན་རིག་གི་སྤྱོད་ཡུལ་མིན་པའི་ཕྱིར་ཏེ། རྒྱུ་མཚན་གསུམ་གྱིས་བསམ་གྱིས་མི་ཁྱབ་པའི་ཡོན་ཏན་དང་། ཟག་བཅས་ལས་དང་ཉོན་མོངས་པ་མེད་པའམ་ཞི་བ་ཉིད་ཀྱི་ཕྱིར་གཉིས་སུ་མེད་པའི་ཡོན་ཏན་དང་། དེ་དག་གི་རྒྱུ་ཚུལ་མིན་ཡིད་བྱེད་ཀྱི་རྟོག་པ་དང་བྲལ་བས་རྟོག་པ་མེད་པའི་ཡོན་ཏན་ཏེ། གང་ཞིག་ཆགས་པ་དང་བྲལ་བ་འགོག་བདེན་གྱི་ཡོན་ཏན་གསུམ་དང་། ཉོན་མོངས་པའི་དྲི་མ་བག་ཆགས་དང་བཅས་པ་བྲལ་བས་རྣམ་པར་དག་པ་དང་། ཤེས་སྒྲིབ་དང་བྲལ་བས་ཤེས་བྱའི་རྣམ་པ་ཐམས་ཅད་མངོན་སུམ་དུ་གསལ་བའི་འོད་ཟེར་གྱི་སྣང་བ་དང་ལྡན་པ་དང་། ཡུལ་ཡིད་དུ་འོང་མི་འོང་བར་མ་གསུམ་ལ་ལྟོས་པའི་ཆགས་སྡང་རྨོངས་གསུམ་གྱི་མུན་པ་དྲུང་ནས་འབྱིན་པས་གཉེན་པོའི་ཕྱོགས་སུ་གྱུར་པ་སྟེ། གང་གིས་ཆགས་པ་དང་བྲལ་བར་བྱེད་པ་ལམ་བདེན་གྱི་ཡོན་ཏན་དཔེ་ཉི་མ་དང་ཆོས་མཚུངས་པ་གསུམ་སྟེ་དྲུག་དང་། དབྱེ་གཞི་གཉིས་སོ་སོར་བགྲངས་པས་ཡོན་ཏན་བརྒྱད་དང་ལྡན་པ་སྟེ། དེ་ལྟར་བདེན་པ་གཉིས་ཀྱིས་བསྡུས་པའི་རྣམ་བྱང་གི་མཚན་ཉིད་ཅན་ནི་ཆོས་དཀོན་མཆོག་གི་ངོ་བོའོ། །གསུམ་པ་ཇི་ལྟ་ཇི་སྙེད་ཀྱི་ཡེ་ཤེས་ཀྱི་གཟིགས་པ་རྣམ་པར་དག་པས་ཕྱིར་མི་ལྡོག་པའི་ཚོགས་འཕགས་པའི་དགེ་འདུན་གྱི་དོན་ནི། ཇི་ལྟ་ཇི་སྙེད་ནང་གི་ནི། །ཡེ་ཤེས་གཟིགས་པ་དག་པའི་ཕྱིར། །བློ་ལྡན་ཕྱིར་མི་ལྡོག་པའི་ཚོགས། །བླ་མེད་ཡོན་ཏན་དང་ལྡན་ཉིད། །ཅེས་གསུངས་པ་ལྟར། མཉམ་བཞག་ཏུ་ཆོས་ཉིད་དེ་བཞིན་ཉིད་རང་བཞིན་གྱིས་འོད་གསལ་བའི་དོན་ཕྱིན་ཅི་མ་ལོག་པར་གཟིགས་པ་ཇི་ལྟ་བ་དང་། རྗེས་ཐོབ་ཏུ་ཆོས་དབྱིངས་ཀུན་ཏུ་འགྲོ་བའི་དོན་རྟོགས་པས་ཆོས་ཀྱི་དབྱིངས་དེས་སེམས་ཅན་ཐམས་ཅད་ལ་ཁྱད་མེད་པར་ཁྱབ་པར་གཟིགས་པ་ཇི་སྙེད་པ་དང་། གཉིས་ཀའང་ནང་སོ་སོར་རྟོག་པའི་ཡེ་ཤེས་ཀྱི་གཟིགས་པ་མཐོང་སྒོམ་གྱི་སྤང་བྱ་ཅི་རིགས་པས་རྣམ་པར་དག་པ་སྟེ་རིག་པའི་ཡོན་ཏན་གསུམ་དང་། ཁམས་གསུམ་གྱི་གནས་སུ་ཆགས་པར་བྱེད་པ་ཉོན་མོངས་པའི་སྒྲིབ་པ་དང་། ཐམས་ཅད་མཁྱེན་པ་ལ་གེགས་སུ་གྱུར་པའི་ཐོགས་པ་ཤེས་བྱའི་སྒྲིབ་པ་དང་། ཐེག་ཆེན་ལ་བར་དུ་གཅོད་པ་དམན་པ་ཉན་རང་གི་སྒྲིབ་པ་སྟེ། དེ་གསུམ་ལས་གྲོལ་བ་གྲོལ་བའི་ཡོན་ཏན་གསུམ་སྟེ་དྲུག་དང་དབྱེ་གཞི་གཉིས་སོ་སོར་བགྲངས་པས་ཡོན་ཏན་བརྒྱད་དང་ལྡན་པ་ནི་ཐེག་ཆེན་ཕྱིར་མི་ལྡོག་པའི་དགེ་འདུན་དཀོན་མཆོག་གི་མཚན་ཉིད་དོ། །བཞི་པ་གནས་སྐབས་དང་མཐར་ཐུག་གི་སྐྱབས་གསུམ་གྱི་རྣམ་དབྱེ་བསྟན་པ་ནི། སྟོན་པ་བསྟན་པ་སློབ་དོན་གྱིས། །ཐེག་པ་གསུམ་དང་བྱེད་གསུམ་ལ། །མོས་པ་རྣམས་ཀྱི་དབང་བྱས་ནས། །སྐྱབས་གསུམ་རྣམ་པར་བཞག་པ་ཡིན། །ཞེས་པ་ལ་སོགས་པས་བསྟན་པ་བཞིན། གནས་སྐབས་ཐེག་པ་གསུམ་དང་བྱེད་པ་གསུམ་གྱི་དབང་གིས་སྐྱབས་གསུམ་དུ་འཇོག་པར་མཛད་དེ། ཐེག་པ་གསུམ་ལས་ཐེག་པ་ཆེན་པོ་པ་རྫོགས་བྱང་ཉིད་དོན་དུ་གཉེར་བ་དང་། བྱེད་པ་གསུམ་ལས་སངས་རྒྱས་ནི་རྐང་གཉིས་རྣམས་ཀྱི་མཆོག་ཏུ་བྱ་བ་བྱེད་པར་མོས་པ་རྣམས་ཀྱི་ངོར་སྟོན་པ་སངས་རྒྱས་ཉིད་སྐྱབས་ཀྱི་དང་པོར་བཞག་པ་དང་། དེ་བཞིན་དུ་རང་རྒྱལ་གྱི་ཐེག་པ་རང་གི་རྟེན་འབྲེལ་གྱི་ཆོས་ཟབ་མོ་རྟོགས་ཤིང་ཐོབ་པར་འདོད་པ་དང་། ཆོས་ནི་ཆགས་པ་དང་བྲལ་བའི་མཆོག་ཏུ་བྱ་བ་བྱེད་པར་མོས་པ་རྣམས་ཀྱི་ངོར་ཆོས་དཀོན་མཆོག་ཉིད་སྐྱབས་གནས་གཉིས་པར་བཞག་པ་དང་། ཉན་ཐོས་ཀྱི་ཐེག་པ་གཞན་གྱིས་བསྟན་པའི་རྗེས་སུ་འབྲངས་ནས་ཟུང་བཞི་ཡ་བརྒྱད་ཀྱི་གོ་འཕང་དེ་ཉིད་ཐོབ་པར་འདོད་པ་དང་། དགེ་འདུན་ནི་ཚོགས་རྣམས་ཀྱི་མཆོག་ཏུ་བྱ་བ་བྱེད་པར་མོས་པ་རྣམས་ཀྱི་ངོར་དགེ་འདུན་ཉིད་སྐྱབས་གནས་གསུམ་པར་རྣམ་པར་བཞག་སྟེ་དེ་ཡང་སྟོན་པ་ལམ་གྲོགས་ཀྱི་ཚུལ་གྱིས་དང་། མཐར་ཐུག་ལུང་གི་ཆོས་ནི་ཆུ་བརྒལ་པའི་གཟིངས་བཞིན་དུ་དོན་རྟོགས་ནས་ཚིག་གི་དགོས་པ་དེ་ཙམ་དུ་ཟད་པས་སྤང་བའམ་འདོར་བའི་ཕྱིར་དང་། རྟོགས་པའི་ཆོས་ལས་སློབ་ལམ་གྱི་རྟོགས་པ་རྣམས་ནི་གོང་ནས་གོང་དུ་འཕོ་བའི་ཚེ་འོག་མ་འོག་མ་རྣམས་འདོར་བས་མི་བརྟན་ཏེ་བསླུ་བའི་ཕྱིར་དང་། ཐེག་དམན་གྱི་འགོག་པ་ནི་མར་མེ་རྒྱུན་ཆད་པ་བཞིན་དུ་སྡུག་ཀུན་དང་བྲལ་བའི་མེད་པ་ཙམ་སྟེ་མེད་པ་ཙམ་ནི་སྐྱབས་དང་སྐྱབས་མིན་གང་དུའང་མི་འགྱུར་བའི་ཕྱིར་དང་། བྱང་སེམས་འཕགས་པ་སློབ་པ་རྣམས་ཀྱང་ད་དུང་འཇིགས་མེད་རྟག་པའི་གོ་འཕང་མ་ཐོབ་པས་འདུ་བྱེད་ལ་སེམས་བསྲུང་བ་དང་། སངས་རྒྱས་ལ་སྐྱབས་སུ་འགྲོ་དགོས་པའི་ཕྱིར། ལམ་གྱི་ཆོས་གཉིས་དང་། འཕགས་པ་སློབ་པ་རྣམས་གཏན་གྱི་སྐྱབས་ནི་མ་ཡིན་ནོ། །མཐར་ཐུག་དོན་དམ་པའི་སྐྱབས་ནི། སངས་རྒྱས་ཆོས་ཀྱི་སྐུ་འབའ་ཞིག་སྟེ། དེ་ནི་གོང་སྨོས་ཀྱི་སྐྱོན་རྣམས་དང་བྲལ་བས་གཏན་དུ་བ་ཡིན་པའི་ཕྱིར་དང་། རྟོགས་པའི་ཆོས་འགོག་བདེན་མཐར་ཐུག་པ་དང་། ཚོགས་རྣམས་ཀྱི་ཡོན་ཏན་མཐར་ཐུག་པ་ཡང་དེ་ཡིན་པའི་ཕྱིར་རོ། །ཞར་བྱུང་དཀོན་མཆོག་གི་སྒྲ་བཤད་ནི། རཏྣ་ཞེས་པའི་སྒྲ་ལས་དྲངས་ན་རིན་པོ་ཆེ་དང་དཀོན་མཆོག་གཉིས་ཀ་ལ་འཇུག་པས། དེ་ཡང་ནོར་བུ་ནི། རྙེད་དཀའ་བ་དང་། དྲི་མ་མེད་པ་དང་། མཐུ་དང་ལྡན་པ་དང་། རྒྱན་དུ་འོས་པ་དང་། བཅོས་མ་ལས་མཆོག་ཏུ་གྱུར་པ་དང་། བསྟོད་སྨད་ཀྱིས་མི་འགྱུར་བ་སྟེ་ཆོས་དྲུག་དང་ལྡན་པ་བཞིན་དུ། དཀོན་མཆོག་གསུམ་ཡང་དགེ་རྩ་མ་བསྐྲུན་པ་རྣམས་ཀྱིས་ནི་བསྐལ་པ་མང་པོར་མཚན་ཙམ་ཡང་རྙེད་པར་དཀའ་བས་འབྱུང་བ་དཀོན་པའི་ཕྱིར་དང་། སྒྲིབ་གཉིས་ལ་སོགས་པའི་ཉེས་པའི་དྲི་མ་མེད་པའི་ཕྱིར་དང་། མངོན་ཤེས་ལ་སོགས་པའི་ཡོན་ཏན་གྱི་མཐུ་བསམ་གྱིས་མི་ཁྱབ་པ་དང་ལྡན་པའི་ཕྱིར་དང་། འཇིག་རྟེན་ན་བསམ་པ་དགེ་བ་ཐམས་ཅད་ཀྱི་རྒྱུ་ཡིན་པས་རྒྱན་དུ་གྱུར་པའི་ཕྱིར་དང་། འཇིག་རྟེན་ལས་འདས་པས་མཆོག་ཉིད་ཡིན་པའི་ཕྱིར་དང་། དད་པ་དང་མ་དད་པའི་རྐྱེན་གྱིས་འགྱུར་བ་མེད་པའམ་ངོ་བོ་འདུས་མ་བྱས་པའི་ཕྱིར་ཏེ་ཡོན་ཏན་གྱི་ཁྱད་པར་དྲུག་གིས་དེ་སྐད་ཅེས་བརྗོད་པ་ཡིན་ནོ། །གཉིས་པ་ཐོབ་ཚུལ་གནས་བཞིའི་ཡན་ལག་རྒྱས་པར་བཤད་པ་ལའང་གཉིས་ཏེ། གནས་བཞི་དམ་པའི་ཡུལ་དུ་གྱུར་པས་བསམ་གྱིས་མི་ཁྱབ་པའི་ཚུལ་གྱིས་མདོར་བསྟན། དེའི་ཡན་ལག་ཕྱེ་སྟེ་རྒྱས་པར་བཤད་པའོ། །དང་པོ་ནི། དྲི་བཅས་དེ་བཞིན་ཉིད་དང་དྲི་མ་མེད། །དྲི་མེད་སངས་རྒྱས་ཡོན་ཏན་རྒྱལ་བའི་མཛད། །གང་ལས་དཀོན་མཆོག་དགེ་བ་གསུམ་འབྱུང་བ། །དོན་དམ་གཟིགས་པ་རྣམས་ཀྱི་ཡུལ་ཡིན་ནོ། །ཞེས་གསུངས་པ་ལྟར། ཆོས་དབྱིངས་རང་བཞིན་གྱིས་རྣམ་པར་དག་ཀྱང་གློ་བུར་དྲི་མའི་སྦུབས་ལས་མ་གྲོལ་བ་ད་ལྟ་སེམས་ཅན་གྱི་རྒྱུད་ཀྱི་ཁམས་དྲི་བཅས་དེ་བཞིན་ཉིད་ནི་རྟོགས་པར་བྱ་བའི་གནས་ཏེ། ཤཱ་རིའི་བུ་དོན་འདི་ནི་དེ་བཞིན་གཤེགས་པའི་ཡུལ་ཏེ་དེ་བཞིན་གཤེགས་པའི་སྤྱོད་ཡུལ་ལོ། །ཤཱ་རིའི་བུ་དོན་འདི་ནི་རེ་ཞིག་ཉན་ཐོས་དང་། རང་སངས་རྒྱས་ཐམས་ཅད་ཀྱིས་ཀྱང་རང་གི་ཤེས་རབ་ཀྱིས་ཡང་དག་པར་ཤེས་པའམ་བལྟ་བའམ། བརྟག་པར་མི་ནུས་ན། བྱིས་པ་སོ་སོའི་སྐྱེ་བོ་དག་གིས་ལྟ་ཅི་སྨོས་ཏེ། དེ་བཞིན་གཤེགས་པ་ལ་དད་པས་རྟོགས་པ་ནི་མ་གཏོགས་སོ། །ཤཱ་རིའི་བུ་དོན་དམ་པ་ནི་དད་པས་རྟོགས་པར་བྱ་བ་ཡིན་ནོ། །ཤཱ་རིའི་བུ་དོན་དམ་པ་ཞེས་བྱ་བ་འདི་ནི་སེམས་ཅན་གྱི་ཁམས་ཀྱི་ཚིག་བླ་དྭགས་སོ། །ཤཱ་རིའི་བུ། སེམས་ཅན་གྱི་ཁམས་ཞེས་བྱ་བ་ནི་དེ་བཞིན་གཤེགས་པའི་སྙིང་པོའི་ཚིག་བླ་དྭགས་སོ། །ཤཱ་རིའི་བུ་དེ་བཞིན་གཤེགས་པའི་སྙིང་པོ་ཞེས་བྱ་བ་འདི་ནི་ཆོས་སྐུའི་ཚིག་བླ་དྭགས་སོ། །ཞེས་འགྲིབ་པ་མེད་པ་དང་འཕེལ་བ་མེད་པ་ཉིད་བསྟན་པ་ལས་གསུངས་པ་དང་། ཁམས་དེ་ཉིད་ལམ་གྱི་སྟོབས་ལས་གློ་བུར་གྱི་དྲི་མ་དང་བྲལ་བས་དག་པ་གཉིས་ལྡན་མཐར་ཐུག་དྲི་མ་མེད་པའི་དེ་བཞིན་ཉིད་དུ་གནས་གྱུར་པ་སངས་རྒྱས་ཆོས་སྐུ་ནི་རྟོགས་པ་རང་གི་ངོ་བོ་བྱང་ཆུབ་སྟེ། བཅོམ་ལྡན་འདས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཅེས་བྱ་བ་འདི་ནི་མྱ་ངན་ལས་འདས་པའི་དབྱིངས་ཀྱི་ཚིག་བླ་དྭགས་སོ། །བཅོམ་ལྡན་འདས་མྱ་ངན་ལས་འདས་པའི་དབྱིངས་ཞེས་བགྱི་བ་འདི་ནི་དེ་བཞིན་གཤེགས་པའི་ཆོས་ཀྱི་སྐུའི་ཚིག་བླ་དྭགས་སོ། །ཞེས་དཔལ་ཕྲེང་གི་མདོ་ལས་བསྟན་པ་དང་། བྱང་ཆུབ་དེ་དང་འབྲེལ་བའི་བྲལ་སྨིན་གྱི་ཡོན་ཏན་རྣམས་ནི་རྟོགས་པ་དེའི་ཡན་ལག་སྟེ། ཤཱ་རིའི་བུ་དེ་བཞིན་གཤེགས་པས་བསྟན་པའི་ཆོས་ཀྱི་སྐུ་གང་ཡིན་པ་དེ་ནི། འདི་ལྟ་སྟེ། གངྒཱའི་ཀླུང་གི་བྱེ་མ་སྙེད་ལས་འདས་པའི་དེ་བཞིན་གཤེགས་པའི་ཆོས་དག་དང་རྣམ་དབྱེར་མེད་པའི་ཆོས་དང་ལྡན་པ་མ་བྲལ་བའི་ཡེ་ཤེས་ཀྱི་ཡོན་ཏན་ཅན་ནོ། །ཞེས་འགྲིབ་པ་མེད་ཅིང་འཕེལ་བ་མེད་པ་ཉིད་བསྟན་པ་ལས་གསུངས་པ་དང་། ཡོན་ཏན་དེའི་ནུས་པ་རྟོག་མེད་ལྷུན་གྲུབ་ཀྱི་ཚུལ་གྱིས་གཞན་དོན་མཛད་པ་རྒྱུན་མི་ཆད་པའི་ཕྲིན་ལས་ནི་གཞན་གྱིས་རྟོགས་པར་བྱ་བའི་གནས་ཏེ། འཇམ་དཔལ་དེ་བཞིན་གཤེགས་པ་ནི་རྟོག་པར་མི་མཛད། རྣམ་པར་རྟོག་པ་མི་མཛད་མོད་ཀྱི། དེ་ལྟ་ན་ཡང་དེའི་འདི་ལྟ་བུའི་རང་བཞིན་ཅན་གྱི་མཛད་པ་འདི་ནི་མི་རྟོག་རྣམ་པར་མི་རྟོག་བཞིན་དུ་ལྷུན་གྱིས་གྲུབ་ཅིང་རྒྱུན་མི་ཆད་པར་འཇུག་གོ །ཞེས་དེ་བཞིན་གཤེགས་པའི་ཡོན་ཏན་དང་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པར་བསྟན་པ་ལས་གསུངས་པ་སྟེ། དེ་ལྟར་རྡོ་རྗེའི་གནས་རྣམ་པ་བཞི་པོ་ལས་སྔ་མ་རྟོགས་བྱ་ཁམས་ཉིད་ནི་དག་བྱ་རྒྱུ་དང་། ཕྱི་མ་གསུམ་ནི་དག་བྱེད་རྐྱེན་ཏེ། རྒྱུ་རྐྱེན་གྱི་གནས་བཞི་པོོ་འདི་ལས་འབྲས་བུ་དཀོན་མཆོག་དགེ་བ་གསུམ་འབྱུང་བའི་ཚུལ་འདི་ནི་བླ་ན་མེད་པ་སངས་རྒྱས་ཀྱི་མཁྱེན་པའི་སྤྱོད་ཡུལ་ཁོ་ན་ལས་ཉན་རང་ལ་སོགས་པ་ཕལ་གྱིས་བསམ་གྱིས་མི་ཁྱབ་བོ། །དེ་ཡང་ཁམས་སམ་དྲི་བཅས་དེ་བཞིན་ཉིད་དེ་ཐོག་མ་ནས་རང་བཞིན་གྱིས་རྣམ་པར་དག་པའང་ཡིན་ལ་གློ་བུར་གྱི་དྲི་མའི་སྦུབས་ལས་མ་གྲོལ་བའང་ཡིན་པས་གཞི་གཅིག་ལ་འགལ་བའི་ཆོས་གཉིས་འཚོགས་པ་ལྟ་བུར་སེམས་ཏེ་ཕལ་གྱིས་བསམ་པར་མི་ནུས་ཀྱང་། དོན་ལ་མི་འགལ་ཏེ། དག་པ་ནི་གནས་ཚུལ་ལམ་ཆོས་ཉིད་དོན་དམ་གྱི་གཤིས་ལ་དྲི་མ་ཡེ་ནས་མ་ཞུགས་པ་དང་། དྲི་མས་སྒྲིབ་པ་ནི་སྣང་ཚུལ་ལམ་ཆོས་ཅན་ཀུན་རྫོབ་ཙམ་དུ་བཅོས་མ་གློ་བུར་གྱི་འཁྲུལ་པའི་དྲི་མས་བསྒྲིབས་སྟེ་གནས་ཚུལ་མངོན་དུ་མ་གྱུར་པ་སྟེ། དེས་ན་གནས་སྣང་མི་མཐུན་པ་ཡོད་པའི་གནད་ཀྱིས་འཁྲུལ་གྲོལ་ལམ་གྱི་རྣམ་བཞག་འདི་ཐམས་ཅད་འཐད་ཀྱི། གཞན་དུ་ན་སུ་ཡང་འཁྲུལ་མི་སྲིད་པ་སོགས་ཀྱི་སྐྱོན་དུ་མ་དང་ལྡན་པར་འགྱུར་རོ། །མཐར་འབྲས་བྱང་ཆུབ་ཀྱང་རང་གི་ངོ་བོ་ཡེ་ནས་རང་བཞིན་གྱིས་རྣམ་པར་དག་པའང་ཡིན་ལ། ལམ་སྒོམ་སྟོབས་ཀྱིས་གློ་བུར་གྱི་དྲི་མ་དང་བྲལ་བས་ཁྱད་པར་དུ་བྱས་པའི་དག་པའང་ཡིན་པའི་ཕྱིར་གཞི་གཅིག་ལ་འགལ་བར་བཟུང་ནས་བསམ་པར་མི་ནུས་ཀྱང་། དོན་ལ་མི་འགལ་ཏེ་ཆོས་ཉིད་དམ་བྱང་ཆུབ་རང་གི་ངོ་བོ་ཡེ་ནས་རང་བཞིན་གྱིས་རྣམ་པར་དག་པའི་དབང་གིས་ལམ་ལ་འབད་པས་གློ་བུར་གཟུང་འཛིན་གཉིས་སྣང་གི་དྲི་མ་མཐའ་དག་འདག་པར་རུང་བ་ཡིན་ལ། རང་བཞིན་གྱིས་རྣམ་པར་མ་དག་ན་ནི་དེ་ནམ་ཡང་དག་པར་བསྒྱུར་དུ་མི་གཏུབ་པས་གཉེན་པོའི་ལམ་ལ་བརྩོན་པ་ཐམས་ཅད་དོན་མེད་པར་འགྱུར་བའི་ཕྱིར་རོ། །དོན་དམ་པའི་སངས་རྒྱས་ཀྱི་ཡོན་ཏན་རྣམས་ནི་ཐ་མལ་པའི་སྐྱེ་བོ་འཆིང་བ་ཀུན་ལྡན་གྱི་གནས་སྐབས་སུའང་རིགས་ཁམས་དང་རྣམ་དབྱེར་མེད་པའི་ཆོས་ཉིད་དུ་གནས་པའང་ཡིན་ལ། དེ་མངོན་དུ་གྱུར་པའང་མ་ཡིན་པའི་ཕྱིར་ཕལ་གྱིས་བསམ་པར་མི་ནུས་ཀྱང་། དོན་ལ་མི་འགལ་ཏེ། དོན་དམ་འདུས་མ་བྱས་ཆེན་པོ་རྣམ་ཀུན་མཆོག་ལྡན་གྱི་སྟོང་པ་ཉིད་ཀྱི་དབྱིངས་ལ། གདོད་མ་ནས་ཟག་མེད་ཀྱི་ཆོས་རྣམས་དབྱིངས་ཀྱི་ཡོན་ཏན་གྱི་ཚུལ་དུ་རང་ཆས་སུ་ཡོད་པའི་གནད་ཀྱིས། དེ་ཉིད་སྒྲིབ་བྱེད་གློ་བུར་གྱི་དྲི་མ་དང་བྲལ་བ་ལས། སངས་རྒྱས་ཆོས་ཀྱི་སྐུའི་ཡོན་ཏན་ནམ་མཁའ་དང་མཉམ་པར་འབྱུང་བ་ཡིན་གྱི། གཞན་དུ་ན་བེམ་སྟོང་ཕྱོགས་གཅིག་པའི་འདུས་མ་བྱས་ནམ་མཁའ་རང་གི་ངོ་བོ་ལ་རྒྱུ་རྐྱེན་གྱི་རྣམ་པ་བརྒྱ་ཕྲག་འཚོགས་ཀྱང་འདུས་བྱས་ཡོད་པའི་ངོ་བོར་སྒྲུབ་མི་ནུས་པ་བཞིན་དུ། སངས་རྒྱས་ཆོས་ཀྱི་སྐུ་ལ་ཟག་པ་མེད་པའི་ཡོན་ཏན་འབྲས་ཆོས་ཀྱི་ཁྱད་པར་ཅུང་ཟད་ཀྱང་སྒྲུབ་ཏུ་མེད་པར་འགྱུར་བས་མཐར་ཆད་པར་འགྱུར་ལ། གལ་ཏེ་སྔར་མེད་རྒྱུ་རྐྱེན་གྱིས་གསར་དུ་སྒྲུབ་སྙམ་ནའང་། གང་བྱས་པ་ལ་མི་རྟག་པ་རྗེས་སུ་འགྲོ་བའི་ཕྱིར། སངས་རྒྱས་ཆོས་ཀྱི་སྐུ་ཡང་མི་རྟག་པར་འགྱུར་ལ། དེ་ལྟ་ན་རང་བྱུང་ཡེ་ཤེས་ཀྱི་སྐུ་ཅན་མ་ཡིན་པ་དང་འགྱུར་བཅས་ཀྱི་ཟུག་རྔུ་མ་སྤངས་པ་དང་མཐར་ཐུག་དོན་དམ་པའི་སྐྱབས་ཀྱང་མི་རྙེད་པ་སོགས་སྐྱོན་དུ་མ་དང་ལྡན་པ་ཡིན་ནོ། །ལྷུན་གྱིས་གྲུབ་པའི་ཕྲིན་ལས་ཀྱིས་རྟག་པར་འགྲོ་བ་རྣམས་ཀྱི་ཁམས་དབང་བསམ་པའམ་སྐལ་བ་དང་འཚམ་པར་གང་ལ་གང་འདུལ་གྱིས་རེ་བ་ཡོངས་སུ་སྐོང་བར་མཛད་པའང་ཡིན་ལ། འདི་ལ་འདི་ལྟ་བུ་བྱའོ་སྙམ་པའི་ཀུན་སློང་གི་རྣམ་པར་རྟོག་པ་དང་། འབད་རྩོལ་གྱིས་གཡོ་བ་མི་མངའ་བའང་ཡིན་པས་ཕལ་གྱིས་བསམ་གྱིས་མི་ཁྱབ་ཀྱང་། དོན་ལ་མི་འགལ་ཏེ། འབད་རྩོལ་དང་རྣམ་རྟོག་མེད་པའི་དབང་གིས་ལྷུན་གྲུབ་རྒྱུན་མི་འཆད་པའི་ཕྲིན་ལས་རྟག་ཁྱབ་ཏུ་འབྱུང་བ་ཡིན་གྱི། གང་འབད་རྩོལ་དང་རྣམ་རྟོག་བཅས་པས་ནི་དེ་ལྟར་མི་ནུས་ཏེ། ཡུལ་དུས་རེས་འགའ་བས་བསྡུས་པའི་འབྲས་བུ་ཉི་ཚེ་བར་འགྱུར་བའི་ཕྱིར་རོ། །དེ་དག་གི་ཚུལ་རྒྱལ་དབང་རང་བྱུང་ཞབས་ཀྱིས་ཟབ་མོ་ནང་དོན་གྱི་རང་འགྲེལ་དུ་དཔེའི་སྒོ་ནས་གསུངས་པ། ནོར་བུ་རིན་པོ་ཆེ་བཻཌཱུཪྱ་ཆེན་པོ་ཤུན་པ་དང་བཅས་པའི་ཚེ་ཤུན་པ་དང་བཅས་ཀྱང་ནང་དུ་ནོར་བུ་ལ་ཤུན་པ་འདྲེས་པ་མེད་པ་ལྟར་སེམས་ཅན་གྱི་དུས་ན་སངས་རྒྱས་ཀྱི་སྙིང་པོ་དྲི་མ་རྣམས་ཀྱིས་བསྒྲིབས་ཀྱང་མ་འདྲེས་པས་ན་དག་པ་ཉོན་མོངས་དང་ལྡན་པ་ཡིན་ནོ། །ཡང་ཐོག་མ་ནས་ཤུན་པ་དང་བཅས་པའི་ནོར་བུ་ཡིན་ཀྱང་ཤུན་པ་དེ་ནི་ནོར་བུ་ལས་བྱུང་བའང་མ་ཡིན། ནོར་བུ་ལས་གཞན་ལས་ཀྱང་བྱུང་བ་མ་ཡིན་ཏེ་གང་ནས་ཀྱང་མ་བྱུང་བའི་ཤུན་པ་དེ་རྣམ་པར་དག་པར་བྱས་པས་དག་པ་ལྟར་སེམས་སངས་རྒྱས་ཀྱི་སྙིང་པོའི་སྒྲིབ་པ་དག་པའི་སངས་རྒྱས་ཀྱང་དེ་ཁོ་ན་བཞིན་དུ་ཡིན་ནོ། །ཡང་ནོར་བུའི་ཡོན་ཏན་དེ་རྣམས་དང་པོ་དང་ཐ་མ་ཁྱད་པར་མེད་ཀྱང་། སྔ་མ་ལ་ནི་ཡོན་ཏན་མི་སྣང་ལ་ཕྱི་མ་དྲི་མ་མེད་པ་དེ་རྒྱལ་མཚན་གྱི་རྩེར་བཏགས་ཏེ་གསོལ་བ་བཏབ་ན་ཡོན་ཏན་འབྱིན་པ་བཞིན་དུ་སངས་རྒྱས་ཀྱི་ཡོན་ཏན་ཐམས་ཅད་ད་ལྟ་ནས་ཡོད་ཀྱང་སྐྱོན་མེད་པའི་རྣམ་པར་དཀར་བས་མ་བསྐྱེད་ན་ནུས་པ་མི་འབྱིན་པས་ཡོན་ཏན་རྣམ་པར་དབྱེ་བ་མེད་པའི་ཆོས་ཉིད་ཡིན་ནོ། །དེ་ལྟ་བུའི་ནོར་བུ་ང་ནི་ཤུན་པ་ཅན་ནོ། །ང་ནི་ཤུན་པ་མེད་པའོ། །གསོལ་བ་འདེབས་པ་ལ་ཡོན་ཏན་སྦྱིན་ནོ། །མི་སྦྱིན་ནོ་ཞེས་རྣམ་པར་མི་རྟོག་ཅིང་ལྷུན་གྱིས་གྲུབ་པ་བཞིན་ཕྲིན་ལས་འཇུག་པ་སྟེ། དེས་ན་སངས་རྒྱས་ཀྱི་སྙིང་པོ་ཡང་ལྷུན་གྱིས་གྲུབ་ཅིང་རྣམ་པར་མི་རྟོག་སྟེ་ཚུལ་དེ་ལྟར་རྟོགས་པར་བྱའོ། །ཞེས་གསལ་བར་མཛད་དོ། །དེ་བས་ན་བསམ་གྱིས་མི་ཁྱབ་པའི་གནས་འདི་ལ་ཡིད་ཆེས་ཀྱི་དད་པ་བླ་ལྷག་ཏུ་བསྐྱེད་པར་རིགས་སོ། །གཉིས་པ་ཡན་ལག་ཕྱེ་སྟེ་རྒྱས་པར་བཤད་པ་ལ་བཞི། རྟོགས་བྱ་ཁམས། རྟོགས་པ་བྱང་ཆུབ། ཡན་ལག་ཡོན་ཏན། བྱེད་པ་ཕྲིན་ལས་ཀྱི་དོན་བཤད་པའོ། །དང་པོ་རྟོགས་པར་བྱ་བའི་གནས་དྲི་མ་དང་བཅས་པའི་ཁམས་རང་བཞིན་གྱིས་རྣམ་པར་དག་པའི་དོན་སྟོན་པ་དེ་ལའང་བཞི་ལས། དང་པོ་ཁམས་ཀྱི་དོན་སྤྱིར་བསྟན་པ་ནི། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་གསུངས་པ་ལྟར། ཆོས་དབྱིངས་གང་ལ་གདགས་པའི་གཞི་བདེན་གཉིས་ཟུང་འཇུག་རྣམ་གྲངས་མ་ཡིན་པའི་དོན་དམ་གྱི་དབང་དུ་བྱས་ཏེ། མཐར་ཐུག་བྲལ་འབྲས་སངས་རྒྱས་ཀྱི་ཡེ་ཤེས་སམ་ཆོས་སྐུའི་ཡོན་ཏན་ནམ་མཁའ་དང་མཉམ་པ་དེ། སྔོན་ཐ་མལ་འཆིང་བ་ཀུན་ལྡན་དུ་གྱུར་པའི་གང་ཟག་གི་རྒྱུད་ལས་ཕྱིས་མངོན་དུ་གྱུར་པ་ཡོད་པའི་ཕྱིར་དང་། རིགས་མེད་ན་སོལ་བ་ལས་གསེར་དང་། བྱེ་མ་ལས་མར་མི་འབྱུང་བ་བཞིན་དུ་བརྩོན་ཀྱང་དེ་ལྟར་མི་འཐད་པའི་ཕྱིར་དང་། གཉིས་མེད་ཡེ་ཤེས་ཀྱི་སྐུ་ཅན་སངས་རྒྱས་ཆོས་སྐུའི་ཡོན་ཏན་དེ་རྣམས་རང་བཞིན་འདུས་མ་བྱས་ཀྱིས་རབ་ཏུ་དབྱེ་བ་ལས་འདུས་བྱས་མི་རྟག་པའི་ངོ་བོ་མིན་པར་མདོ་རྒྱུད་བསྟན་བཅོས་ཀུན་ནས་གསུངས་པའི་ཕྱིར་ཏེ་རྒྱུ་མཚན་གསུམ་གྱིས་སེམས་ཅན་གྱི་རྒྱུད་ལ་སངས་རྒྱས་ཀྱི་སྙིང་པོ་ཡོད་པར་ལྟོས་པའི་རིགས་པས་གྲུབ་པ་དང་། འཁོར་འདས་ཀྱི་ཆོས་ཐམ་ཅད་གནས་ལུགས་སྟོང་ཆེན་གདོད་མའི་འོད་གསལ་ཆེན་པོར་དབྱེར་མེད་རོ་གཅིག་པའི་ཕྱིར། འཁྲུལ་པ་གློ་བུར་བས་སྤྲུལ་པའི་སེམས་ཅན་རྣམས་ཀྱང་གནས་ལུགས་དོན་དམ་པའི་ཆོས་ཉིད་ལས་གཞན་དུ་མ་གཡོས་པར་ཆོས་ཉིད་ཀྱི་རིགས་པས་གྲུབ་པ་དང་། དྲི་མ་གློ་བུར་བ་སྤང་རུང་དང་། ཡོན་ཏན་ཡེ་ལྡན་གྱི་ཆོས་སྐུ་ཀུན་ལ་ཁྱད་མེད་དུ་ཡོད་པའི་ཕྱིར་རིགས་ཡོད་པར་གྲུབ་ལ། རིགས་ཡོད་ན་ལུས་ཅན་དེ་རྟག་ཏུ་སངས་རྒྱས་ཀྱི་སྙིང་པོ་ཅན་དུ་ངེས་པ་བྱ་བ་བྱེད་པའི་རིགས་པས་གྲུབ་པ་སྟེ། དེ་ལྟར་རྒྱུ་རིགས་ཡོད་པ་དེ་འབྲས་དུས་ཀྱི་ཆོས་སྐུ་དང་ངོ་བོ་ཁྱད་མེད་པ་དང་། འབྲས་དུས་ཀྱི་ཆོས་སྐུ་ཡོད་ན་དེ་སེམས་ཅན་གྱི་དུས་ནའང་འཕེལ་འབྲི་མེད་པར་ཡོད་དགོས་པ་དང་། རྒྱུ་འབྲས་དང་སྔ་ཕྱིར་བཏགས་ཀྱང་དོན་ལ་ཆོས་དབྱིངས་འགྱུར་བ་མེད་པའི་ངོ་བོར་དབྱེར་མེད་རོ་གཅིག་པའི་ཕྱིར་དངོས་པོ་སྟོབས་ཞུགས་ཀྱི་རིགས་པ་ཡང་དག་གི་ལམ་ལས་གྲུབ་པ་ཡིན་ནོ། །དེ་ལྟ་བུའི་ཁམས་བདེ་བར་གཤེགས་པའི་སྙིང་པོ་དེ་ནི་གདུལ་བྱ་ཡོངས་སུ་མ་སྨིན་པ་རྣམས་ཀྱིས་ཐོག་མ་ནས་ཐོས་ན་སྐྲག་པར་འགྱུར་བའི་ཕྱིར་འཁོར་ལོ་དང་པོར་དངོས་སུ་མ་བསྟན་ཅིང་། བར་པར་བདག་ཏུ་ལྟ་བའི་གཉེན་པོར་ངོ་བོ་སྟོང་པ་ཉིད་ཀྱི་ཕྱོགས་ནས་བསྟན་པ་དང་། ཐ་མར་ཡོངས་སུ་སྦྱངས་པར་བྱས་པའི་བྱང་སེམས་སྐལ་བ་ཆེན་པོ་རྣམས་ཀྱི་ངོར་རང་བཞིན་སྐུ་དང་ཡེ་ཤེས་སྣང་ཕྱོགས་ཀྱི་ཆ་ནས་ངེས་དོན་དྲང་ཐད་དུ་སྟོན་པར་མཛད་པ་ནི་རིགས་ཁམས་ནོར་བུ་སྦྱོང་བའི་དཔེས་བསྟན་པ་ཡིན་ལ། ཕྱི་མ་གཉིས་ཀའང་འགལ་མེད་སྣང་སྟོང་ཟུང་དུ་འཇུག་པའི་ཡེ་ཤེས་གཅིག་གི་ཐོག་ཏུ་འདུམ་པ་རྒྱལ་བའི་དབང་པོ་ཀློང་ཆེན་རབ་འབྱམས་བཟང་པོའི་བཞེད་པ་ནི། རྒྱལ་དགོངས་མཐར་ཐུག་རྒྱལ་ཚབ་ས་བཅུའི་དབང་ཕྱུག་དང་། འཕགས་ཡུལ་གྱི་ཤིང་རྟ་ཆེན་པོ་གཉིས་ཀྱི་ཟབ་དགོངས་མ་ཀྱོག་པ་སྣང་སྟོང་གང་གིའང་ཕྱོགས་སུ་མ་ལྷུང་ཞིང་ངེས་དོན་གྱི་མདོ་རྒྱུད་མན་ངག་ཀུན་གྱི་དགོངས་པའི་ཟབ་གནད་མཐའ་དག་ཡེ་ཤེས་ཀྱི་ཀློང་དུ་རོ་གཅིག་པར་གྱུར་པས་མཐར་འཛིན་གྱི་ལྟ་བའི་རབ་རིབ་མཐའ་དག་ཅིག་ཅར་དུ་གཞིལ་ནུས་པའི་ངེས་དོན་དབུ་མ་ཆེན་པོ་སྟེ། ངོ་བོ་གདོད་མ་ནས་སྐུ་དང་ཡེ་ཤེས་སོགས་བྲལ་སྨིན་གྱི་ཡོན་ཏན་བསམ་གྱིས་མི་ཁྱབ་པ་དང་རྣམ་དབྱེར་མེད་པའི་ཆོས་ཀྱི་དབྱིངས་རིག་སྟོང་ཟུང་དུ་འཇུག་པ་རང་བྱུང་གི་ཡེ་ཤེས་འདུས་མ་བྱས། རང་བཞིན་གྱིས་རྣམ་པར་དག་ཅིང་ཆོས་ཐམས་ཅད་ལ་ཁྱ བ་ཅིང་རྗེས་སུ་སོང་བའི་དེ་བཞིན་ཉིད་ནམ་མཁའ་ལྟར་འཕོ་འགྱུར་མེད་པ་སྟེ། རྒྱས་པར་ནི་ངེས་དོན་ཤིང་རྟ་ཆེན་མོ་དང་གྲུབ་མཐའ་རིན་པོ་ཆེའི་མཛོད་སོགས་ཀུན་མཁྱེན་ཆོས་ཀྱི་རྒྱལ་པོའི་གསུང་རབ་དྲི་མ་མེད་པ་རྣམས་དང་། གཞན་ཡང་ཆོས་ཀྱི་རྒྱལ་པོ་སྨིན་གླིང་པ་སྐུ་མཆེད། རིག་འཛིན་འཇིགས་མེད་གླིང་པ་སོགས་སྔ་འགྱུར་རིག་འཛིན་བརྒྱུད་པའི་ཞལ་ལུང་སྤྱི་དང་། ཁྱད་པར་གངས་རིའི་ཁྲོད་ཀྱི་སྨྲ་བའི་སེང་གེ་གཅིག་པུར་གྱུར་པ་ཀུན་མཁྱེན་བླ་མ་འཇམ་དཔལ་དགྱེས་པའི་ཞལ་སྔ་ནས་སྩལ་པའི་བདེ་གཤེགས་སྙིང་པོའི་སྟོང་ཐུན་སེངྒེའི་ང་རོ་སོགས་ལས་ཤེས་པར་བྱ་ལ། འདིར་ཡིད་ཆེས་སྐྱེད་བྱེད་ཡང་དག་པའི་ལུང་གིས་ཕྱོགས་ཙམ་མཚོན་ན། འཕགས་པ་སྡོང་པོ་བཀོད་པའི་མདོ་ལས། ཀྱེ་རྒྱལ་བའི་སྲས་དག་བྱང་ཆུབ་སེམས་དཔའི་རིགས་ཞེས་བྱ་བ་འདི་ནི་ཆོས་ཀྱི་དབྱིངས་ལྷུར་ལེན་པ་ནམ་མཁའ་ལྟར་ཡངས་པ་རང་བཞིན་གྱིས་འོད་གསལ་བ་སྟེ། དེ་ལ་གནས་པའི་བྱང་ཆུབ་སེམས་དཔའ་རྣམས་ནི་འདས་པ་དང་། མ་འོངས་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ཀྱི་རིགས་སུ་སྐྱེ་བ་ཡིན་ནོ། །ཞེས་དང་། དེ་བཞིན་གཤེགས་པའི་སྙིང་པོ་བསྟན་པའི་མདོ་ལས། རིགས་ཀྱི་བུ་དག་གཞན་ཡང་འདི་ལྟ་སྟེ། དཔེར་ན་དབུལ་པོ་ཞིག་གི་ཁྱིམ་གྱི་ནང་གི་མཛོད་ཀྱི་འོག་གི་ས་ལ་གཏེར་ཆེན་པོ་དབྱིག་དང་གསེར་གྱིས་གང་བ་མཛོད་ཀྱི་ཚད་ཙམ་ཞིག་མི་བདུན་སྲིད་ཀྱི་སས་གཡོགས་པའི་འོག་ན་ཡོད་ལ། གཏེར་ཆེན་པོ་དེས་མི་དབུལ་པོ་དེ་ལ་འདི་སྐད་དུ། ཀྱེ་མིང་ནི་གཏེར་ཆེན་པོ་སྟེ་སས་གཡོགས་ཤིང་འདུག་གོ་ཞེས་མི་སྨྲ་སྟེ། འདི་ལྟ་སྟེ། གཏེར་ཆེན་པོ་ནི་ངོ་བོ་ཉིད་ཀྱིས་སེམས་ཅན་མ་ཡིན་པའོ། །མི་དབུལ་པོ་ཁྱིམ་གྱི་བདག་པོ་དེ་ནི་དབུལ་བའི་སེམས་ཀྱིས་རྗེས་སུ་སེམས་ཤིང་དེ་ཉིད་ཀྱིི་སྟེང་ན་རྣམ་པར་རྒྱུ་ཡང་སའི་འོག་ན་གཏེར་ཆེན་པོ་ཡོད་པ་དེ་མ་ཐོས་ཤིང་མི་ཤེས་མ་མཐོང་ངོ་། །རིགས་ཀྱི་བུ་དེ་བཞིན་དུ། སེམས་ཅན་ཐམས་ཅད་ཀྱི་མངོན་པར་ཞེན་པའི་ཡིད་ལ་བྱེད་པ་ཁྱིམ་ལྟ་བུར་གྱུར་པའི་འོག་ན། དེ་བཞིན་གཤེགས་པའི་སྙིང་པོ་སྟོབས་དང་། མི་འཇིགས་པ་དང་། མ་འདྲེས་པ་དང་། སངས་རྒྱས་ཀྱི་ཆོས་ཐམས་ཅད་ཀྱི་མཛོད་ཀྱི་གཏེར་ཆེན་པོ་ཡོད་ཀྱང་། སེམས་ཅན་དེ་དག་གཟུགས་དང་། སྒྲ་དང་། དྲི་དང་། རོ་དང་། རེག་པ་ལ་ཆགས་པས་སྡུག་བསྔལ་བས་འཁོར་བ་ན་འཁོར་ཏེ། ཆོས་ཀྱི་གཏེར་ཆེན་པོ་དེ་མ་ཐོབ་པས་ཐོབ་པར་མ་གྱུར་ཅིང་། ཡོངས་སུ་སྦྱང་བའི་ཕྱིར་བརྩོན་པར་ཡང་མི་བྱེད་དོ། །རིགས་ཀྱི་བུ་དག་དེ་ནས་དེ་བཞིན་གཤེགས་པ་འཇིག་རྟེན་དུ་བྱུང་སྟེ། བྱང་ཆུབ་སེམས་དཔའི་ནང་དུ་འདི་ལྟར་ཆོས་ཀྱི་གཏེར་ཆེན་པོ་ཡང་དག་པར་རབ་ཏུ་སྟོན་ཏོ། །དེ་དག་ཀྱང་ཆོས་ཀྱི་གཏེར་ཆེན་པོ་དེ་ལ་མོས་ནས་རྐོ་སྟེ། དེའི་ཕྱིར་འཇིག་རྟེན་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཞེས་བྱ་སྟེ་ཆོས་ཀྱི་གཏེར་ཆེན་པོ་ལྟ་བུར་གྱུར་ནས། སེམས་ཅན་རྣམས་ལ་སྔོན་མ་བྱུང་བ། སྔོན་མ་བྱུང་བའི་གཏན་ཚིགས་ཀྱི་རྣམ་པ་དང་། དཔེ་དང་བྱེད་པའི་གཏན་ཚིགས་དང་བྱ་བ་རྣམས་སྟོན་པ། གཏེར་ཆེན་པོའི་མཛོད་ཀྱི་སྦྱིན་བདག་ཆགས་པ་མེད་པའི་སྤོབས་པ་དང་ལྡན་ཞིང་། སྟོབས་བཅུ་དང་། མི་འཇིགས་པ་དང་། སངས་རྒྱས་ཀྱི་ཆོས་མང་པོའི་མཛོད་དུ་གྱུར་པ་ཡིན་ནོ། །རིགས་ཀྱི་བུ་དག དེ་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱང་། དེ་བཞིན་གཤེགས་པའི་མིག་ཡོངས་སུ་དག་པས་སེམས་ཅན་ཐམས་ཅད་དེ་ལྟ་བུར་མཐོང་ནས་དེ་བཞིན་གཤེགས་པའི་ཡེ་ཤེས་དང་སྟོབས་དང་། མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པའི་མཛོད་ཡོངས་སུ་སྦྱང་བའི་ཕྱིར་བྱང་ཆུབ་སེམས་དཔའ་རྣམས་ལ་ཆོས་སྟོན་ཏོ། །ཞེས་དང་། སེམས་ཅན་གྱི་ཁམས་གཞན་ལ། ཆོས་ཀྱི་སྐུ་ཡང་གཞན་མ་ཡིན་ཏེ། སེམས་ཅན་གྱི་ཁམས་ཉིད་ཆོས་ཀྱི་སྐུ། ཆོས་ཀྱི་སྐུ་ཉིད་སེམས་ཅན་གྱི་ཁམས་ཏེ། འདི་ནི་དོན་གྱིས་གཉིས་སུ་མེད་དེ་ཡི་གེ་ཙམ་ཐ་དད་པ་ཡིན་ནོ། །ཞེས་དང་། རིགས་ཀྱི་བུ་འདི་ནི་ཆོས་ཐམས་ཅད་ཀྱི་ཆོས་ཉིད་དེ། དེ་བཞིན་གཤེགས་པ་རྣམས་བྱུང་ཡང་རུང་མ་བྱུང་ཡང་རུང་སྟེ་སེམས་ཅན་འདི་དག་ནི་རྟག་ཏུ་དེ་བཞིན་གཤེགས་པའི་སྙིང་པོ་ཅན་ནོ། །ཞེས་གསུངས་པ་དང་། འཕགས་པ་དཔལ་ཕྲེང་གི་མདོར་ཡང་། བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ། །ཅེས་དང་། རྣམ་པར་དབྱེར་མེད་པ་བསམ་གྱིས་མི་ཁྱབ་པའི་སངས་རྒྱས་ཀྱི་ཆོས་གངྒཱའི་ཀླུང་གི་བྱེ་མ་སྙེད་ལས་འདས་པ་དང་ལྡན་པ་དེ་བཞིན་གཤེགས་པའི་ཆོས་ཀྱི་སྐུར་བསྟན་པ་དེ། བཅོམ་ལྡན་འདས་དེ་བཞིན་གཤེགས་པའི་ཆོས་ཀྱི་སྐུ་འདི་ཉིད་ཉོན་མོངས་པའི་སྦུབས་ལས་མ་གྲོལ་བ་ནི་དེ་བཞིན་གཤེགས་པའི་སྙིང་པོ་ཞེས་བགྱིའོ། །ཞེས་གསུངས་པ་དང་། སངས་རྒྱས་ཕལ་པོ་ཆེ་ལས་རྒྱ་ཆེར་གསུངས་པའི་དོན་སློབ་དཔོན་འཕགས་པ་ཐོགས་མེད་ཀྱིས་མདོར་བསྡུས་པ། དེ་ལ་དྲི་མ་མེད་པའི་སངས་རྒྱས་ཀྱི་ཡོན་ཏན་ནི། གཅིག་ཏུ་ཀུན་ནས་ཉོན་མོངས་པའི་སོ་སོ་སྐྱེ་བོའི་ས་ལ་ཡང་རྣམ་པར་དབྱེར་མེད་པར་ཆོས་ཉིད་སྔ་ཕྱི་ཁྱད་མེད་པར་ཡོད་པའི་ཕྱིར་གནས་འདི་བསམ་གྱིས་མི་ཁྱབ་སྟེ། གང་གི་ཕྱིར་གང་ལ་དེ་བཞིན་གཤེགས་པའི་ཡེ་ཤེས་མཐའ་དག་རྗེས་སུ་མ་ཞུགས་པའི་སེམས་ཅན་དེ་ནི་སེམས་ཅན་གྱི་རིས་ན་འགའ་ཡང་མེད་དོ། །འོན་ཀྱང་འདུ་ཤེས་ཀྱི་འཛིན་པས་དེ་བཞིན་གཤེགས་པའི་ཡེ་ཤེས་མི་མངོན་ནོ། །འདུ་ཤེས་ཀྱི་འཛིན་པ་དང་བྲལ་བ་ལས་ནི་ཐམས་ཅད་མཁྱེན་པའི་ཡེ་ཤེས་རང་བྱུང་གི་ཡེ་ཤེས་ཐོགས་པ་མེད་པར་རབ་ཏུ་འབྱུང་ངོ་། །ཞེས་པ་ནས་སྟོང་གསུམ་གྱི་ཚད་དང་མཉམ་པར་རིས་སུ་བྲིས་པའི་དར་ཡུག་ཆེན་པོ་རྡུལ་ཕྲ་རབ་ཀྱི་ནང་དུ་གནས་པའི་དཔེ་སྔོན་དུ་བཏང་ནས། ཀྱེ་རྒྱལ་བའི་སྲས་དག་དེ་བཞིན་དུ་དེ་བཞིན་གཤེགས་པའི་ཡེ་ཤེས་ཚད་མེད་པའི་ཡེ་ཤེས་སེམས་ཅན་ཐམས་ཅད་ཉེ་བར་འཚོ་བའི་ཡེ་ཤེས་ཀྱང་སེམས་ཅན་ཐམས་ཅད་ཀྱི་སེམས་ཀྱི་རྒྱུད་ལ་མ་ཚང་བ་མེད་པར་རྗེས་སུ་ཞུགས་ཏེ། སེམས་ཅན་གྱི་སེམས་ཀྱི་རྒྱུད་དེ་དག་ཀྱང་དེ་བཞིན་གཤེགས་པའི་ཡེ་ཤེས་དང་འདྲ་བར་ཚད་མེད་དོ། །ཞེས་དང་། མྱང་འདས་ཆེན་པོར་ཡང་གྱད་ཀྱི་དཔྲལ་བའི་ནོར་བུའི་དཔེ་སྔོན་དུ་བཏང་ནས། རིགས་ཀྱི་བུ་སེམས་ཅན་ཐམས་ཅད་ཀྱང་དེ་དང་འདྲ་སྟེ། དགེ་བའི་བཤེས་གཉེན་ལ་བསྙེན་བཀུར་མ་བྱས་པས་སངས་རྒྱས་ཀྱི་རང་བཞིན་ཡོད་ཀྱང་མཐོང་བར་མི་ནུས་སོ། །འདོད་ཆགས་དང་། ཞེ་སྡང་དང་། གཏི་མུག་གིས་བསྒྲིབས་ཏེ་ཟིལ་གྱིས་ནོན་པ་འགྲོ་བ་མང་པོར་འཁོར་ཞིང་སྡུག་བ སྔལ་བར་གྱུར་ཏོ། །ཞེས་པ་ནས། རིགས་ཀྱི་བུ་སེམས་ཅན་ཐམས་ཅད་ཀྱི་ལུས་ཀྱི་ནང་ན་སྟོབས་བཅུ་དང་། མཚན་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་ཡང་ཡོད་དོ། །ཞེས་དང་། རིགས་ཀྱི་བུ། དཔེར་ན། ཟླ་བ་ཚེས་པ་ནི་མི་མཐོང་མོད་ཀྱི། མེད་ཅེས་བྱར་མི་རུང་ངོ་། །སངས་རྒྱས་ཀྱི་རང་བཞིན་ཡང་དེ་དང་འདྲ་སྟེ། བུས་པ་མ་ར བས་ཐམས་ཅད་ཀྱིས་མི་མཐོང་མོད་ཀྱི། དེ་ལ་སངས་རྒྱས་ཀྱི་རང་བཞིན་མེད་ཅེས་བྱར་མི་རུང་ངོ་། །རིགས་ཀྱི་བུ། སངས་རྒྱས་ཀྱི་རང་བཞིན་ནི་འདི་ལྟ་སྟེ། སྟོབས་བཅུ་དང་། མི་འཇིགས་པ་བཞི་དང་། སྙིང་རྗེ་ཆེན་པོ་དང་། དྲན་པ་ཉེ་བར་བཞག་པ་གསུམ་སྟེ། སེམས་ཅན་ཐམས་ཅད་ལ་རྣམ་པ་གསུམ་པོ་ཡོད་པ་ཡང་། ཉོན་མོངས་པ་ཡོངས་སུ་བཅོམ་ན་གདོད་མཐོང་བར་འགྱུར་རོ། །ལོག་སྲེད་ཅན་དག་ནི། ལོག་སྲེད་ཡོངས་སུ་བཅོམ་ན་གདོད་སྟོབས་བཅུ་དང་མི་འཇིགས་པ་བཞི་དང་། སྙིང་རྗེ་ཆེན་པོ་དང་། དྲན་པ་ཉེ་བར་བཞག་པ་གསུམ་ཐོབ་པར་འགྱུར་རོ། །དོན་དེ་ལྟ་བས་ན། ངས་རྟག་ཏུ་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་དོ་ཞེས་གསུངས་སོ། །ཞེས་དང་། འཕགས་པ་སོར་མོའི་ཕྲེང་བ་ལ་ཕན་པའི་མདོ་ལས། སངས་རྒྱས་ཐམས་ཅད་ཀྱིས་ཤིན་ཏུ་ནན་ཏན་དུ་བཙལ་ཡང་། དེ་བཞིན་གཤེགས་པའི་སྙིང་པོ་ལ་དྲི་མ་མ་བརྙེས་ཏེ། སེམས་ཅན་ཐམས་ཅད་ལ་དྲི་མ་མེད་པའི་དབྱིངས། སངས་རྒྱས་ཀྱི་དབྱིངས། མཚན་དང་དཔེ་བྱད་བཟང་པོ་མཐའ་ཡས་པས་བརྒྱན་པའི་དབྱིངས་ཡོད་དེ། དཔེར་ན་ཆུ་དང་འབྲུ་མར་བསྲེས་པ་མི་དམིགས་པ་དེ་བཞིན་དུ། སངས་རྒྱས་ཀྱི་དབྱིངས་ཀྱང་ཉོན་མོངས་པ་བྱེ་བས་གཡོགས་མོད་ཀྱི་ཉོན་མོངས་པ་དང་སངས་རྒྱས་ཀྱི་དབྱིངས་འདྲེས་པར་གྱུར་པའི་གནས་མེད་དོ། །དབྱིངས་ཀྱང་ཉོན་མོངས་པ་བྱེ་བའི་ནང་ན་འདུག་མོད་ཀྱི། བུམ་པའི་ནང་ན་མར་མེ་འདུག་པ་བཞིན་དུ་བུམ་པ་བཅག་ན་མར་མེ་རབ་ཏུ་འབར་ཞིང་མཛེས་ཏེ། དེ་བཞིན་གཤེགས་པའི་སྙིང་པོ་སྟོན་པར་བྱེད་པ་ནི་རྫོགས་པའི་སངས་རྒྱས་སོ། །ཞེས་སོགས་རྒྱ་ཆེར་གསུངས་པ་དང་། ལངྐར་གཤེགས་པ་ལས། བློ་གྲོས་ཆེན་པོ། དེ་ལ་ཡོངས་སུ་གྲུབ་པའི་རང་བཞིན་གང་ཞེ་ན་འདི་ལྟ་སྟེ། མཚན་མ་དང་། མིང་དང་། དངོས་པོའི་མཚན་ཉིད་རྣམ་པར་རྟོག་པ་དང་བྲལ་བའི་དེ་བཞིན་ཉིད་འཕགས་པའི་ཡེ་ཤེས་རྟོགས་པ་ཐོབ་པས་འཕགས་པ་སོ་སོ་རང་གི་རིག་པའི་ཡེ་ཤེས་ཀྱི་སྤྱོད་ཡུལ་ཏེ། བློ་གྲོས་ཆེན་པོ། ཡོངས་སུ་གྲུབ་པའི་རང་བཞིན་འདི་ནི་དེ་བཞིན་གཤེགས་པ་རྣམས་ཀྱི་སྙིང་པོ་སྟེ་ཐུགས་སོ། །ཞེས་དང་། ཤེར་ཕྱིན་ལས་ཀྱང་། འདས་པའི་དེ་བཞིན་ཉིད་གང་མ་བྱོན་དེ་བཞིན་ཉིད། །ད་ལྟར་དེ་བཞིན་ཉིད་གང་དགྲ་བཅོམ་དེ་བཞིན་ཉིད། །ཆོས་ཀུན་དེ་བཞིན་ཉིད་གང་རྒྱལ་བའི་དེ་བཞིན་ཉིད། །ཆོས་ཀྱི་དེ་བཞིན་ཉིད་འདི་ཐམས་ཅད་བྱེ་བྲག་མེད། །ཅེས་སོགས་རྒྱ་ཆེར་གསུངས་པ་དང་ཤིང་རྟ་ཆེན་པོ་འཕགས་པ་ཀླུ་སྒྲུབ་ཀྱིས་ཀྱང་། གང་ཞིག་འཁོར་བའི་རྒྱུར་གྱུར་པ། །དེ་ཉིད་སྦྱངས་པ་བྱས་པ་ལས། །དག་པ་དེ་ཉིད་མྱ་ངན་འདས། །ཆོས་ཀྱི་སྐུ་ཡང་དེ་ཡིན་ནོ། །ཇི་ལྟར་འོ་མ་དང་འདྲེས་པས། །མར་གྱི་སྙིང་པོ་མི་སྣང་བ། །དེ་བཞིན་ཉོན་མོངས་དང་འདྲེས་པས། །ཆོས་ཀྱི་དབྱིངས་ཀྱང་མི་མཐོང་ངོ་། །ཇི་ལྟར་འོ་མ་རྣམ་སྦྱངས་པས། །མར་གྱི་སྙིང་པོ་དྲི་མེད་འགྱུར། །དེ་བཞིན་ཉོན་མོངས་རྣམ་སྦྱངས་པས། །ཆོས་དབྱིངས་ཤིན་ཏུ་དྲི་མེད་འགྱུར། །ཇི་ལྟར་མར་མེ་བུམ་ནང་ན། །ཅུང་ཞིག་སྣང་བར་མི་འགྱུར་བ། །དེ་བཞིན་ཉོན་མོངས་བུམ་ནང་ན། །ཆོས་ཀྱི་དབྱིངས་ཀྱང་མི་མཐོང་ངོ་། །ཕྱོགས་ནི་གང་དང་གང་དག་ནས། །བུམ་པར་བུ་ག་བཏོད་གྱུར་པའི། །དེ་དང་དེ་ཡི་ཕྱོགས་ཉིད་ནས། །འོད་ཀྱི་རང་བཞིན་འབྱུང་བར་འགྱུར། །གང་ཚེ་ཏིང་འཛིན་རྡོ་རྗེ་ཡིས། །བུམ་པ་དེ་ཉིད་བཅག་གྱུར་པ། །དེ་ཚེ་དེ་ནི་ནམ་མཁའ་ཡི། །མཐར་ཐུག་བར་དུ་སྣང་བར་བྱེད། །ཆོས་ཀྱི་དབྱིངས་ནི་སྐྱེ་མ་ཡིན། །ནམ་ཡང་འགག་པར་འགྱུར་བ་མེད། །དུས་རྣམས་ཀུན་ཏུ་ཉོན་མོངས་མེད། །ཐོག་མ་བར་མཐའ་དྲི་མ་བྲལ། །ཇི་ལྟར་རིན་ཆེན་བཻཌཱུཪྱ། །དུས་རྣམས་ཀུན་ཏུ་འོད་གསལ་ཡང་། །རྡོ་ཡི་ནང་ན་གནས་གྱུར་པ། །དེ་ཡི་འོད་ནི་གསལ་མ་ཡིན། །དེ་བཞིན་ཉོན་མོངས་ཀྱིས་བསྒྲིབས་པའི། །ཆོས་དབྱིངས་ཤིན་ཏུ་དྲི་མེད་པའང་། །འཁོར་བར་འོད་ནི་གསལ་མ་ཡིན། །མྱ་ངན་འདས་ན་འོད་གསལ་འགྱུར། །ཁམས་ཡོད་ན་ནི་ལས་བྱས་པས། །ས་ལེ་སྦྲམ་དག་མཐོང་བར་འགྱུར། །ཁམས་མེད་ན་ནི་ལས་བྱས་ཀྱང་། །ཉོན་མོངས་འབའ་ཞིག་སྐྱེ་བར་ཟད། །ཇི་ལྟར་སྦུན་པས་གཡོགས་གྱུར་པ། །སོལ་བ་འབྲས་བུར་མི་འདོད་ལྟར། །དེ་བཞིན་ཉོན་མོངས་ཀྱིས་གཡོགས་པ། །དེ་ནི་སངས་རྒྱས་ཞེས་མི་བཏགས། །ཇི་ལྟར་སྤུན་པ་ལས་གྲོལ་ནས། །འབྲས་བུ་སྣང་བར་འགྱུར་བ་ལྟར། །དེ་བཞིན་ཉོན་མོངས་ལས་གྲོལ་ན། །ཆོས་ཀྱི་སྐུ་ཉིད་རབ་ཏུ་གསལ། །ཆུ་ཤིང་སྙིང་པོ་མེད་དོ་ཞེས། །འཇིག་རྟེན་ན་ནི་དཔེར་བྱེད་ཀྱང་། །དེ་ཡི་འབྲས་བུ་སྙིང་པོ་ཉིད། །མངར་པོ་ཟ་བར་བྱེད་པ་ལྟར། །སྙིང་པོ་མེད་པའི་འཁོར་བ་ལས། །ཉོན་མོངས་གཟེབ་དང་བྲལ་གྱུར་ན། །དེ་ཡི་འབྲས་བུ་སངས་རྒྱས་ཉིད། །ལུས་ཅན་ཀུན་ལ་བདུད་རྩིར་འགྱུར། །ཞེས་དང་། དྲི་མེད་ཉི་མ་ཟླ་བ་ཡང་། །སྤྲིན་དང་ཁུག་རྣ་དུ་བ་དང་། །སྒྲ་གཅན་གདོང་དང་རྡུལ་ལ་སོགས། །སྒྲིབ་པ་ལྔ་ཡིས་བསྒྲིབ་པར་འགྱུར། །དེ་བཞིན་འོད་གསལ་བ་ཡི་སེམས། །འདོད་དང་གནོད་སེམས་ལེ་ལོ་དང་། །རྒོད་པ་དང་ནི་ཐེ་ཚོམ་སྟེ། །སྒྲིབ་པ་ལྔ་ཡིས་བསྒྲིབ་པར་འགྱུར། །ཇི་ལྟར་མེ་ཡིས་དག་པའི་གོས། །སྣ་ཚོགས་དྲི་མས་དྲི་མ་ཅན། །ཇི་ལྟར་མེ་ཡི་ནང་བཅུག་ན། །དྲི་མ་ཚིག་འགྱུར་གོས་མིན་ལྟར། །དེ་བཞིན་འོད་གསལ་བ་ཡི་སེམས། །འདོད་ཆགས་ལ་སོགས་དྲི་མ་ཅན། །ཡེ་ཤེས་མེ་ཡིས་དྲི་མ་བསྲེགས། །དེ་ཉིད་འོད་གསལ་ལམ་ཡིན་ནོ། །སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྙེད་གསུངས་པ་གང་། །དེ་དག་ཀུན་གྱིས་ཉོན་མོངས་ལྡོག །ཁམས་དེ་ཉམས་པར་བྱེད་མ་ཡིན། །ས་ཡི་དཀྱིལ་ན་ཡོད་པའི་ཆུ། །དྲི་མ་མེད་པར་གནས་པ་ལྟར། །ཉོན་མོངས་ནང་ན་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་དང་། ཇི་ལྟར་སོ་གའི་དུས་སུ་ཆུ། །དྲོའོ་ཞེས་ནི་བརྗོད་པར་བྱེད། །དེ་ཉིད་གྲང་བའི་དུས་སུ་ནི། །གྲང་ངོ་ཞེས་ནི་བརྗོད་པ་ཡིན། །ཉོན་མོངས་དྲྭ་བས་གཡོགས་པ་ལ། །སེམས་ཅན་ཞེས་ནི་བརྗོད་པ་སྟེ། །དེ་ཉིད་ཉོན་མོངས་བྲལ་གྱུར་ན། །སངས་རྒྱས་ཞེས་ནི་བརྗོད་པར་བྱེད། །ཅེས་སོགས་རྒྱ་ཆེར་གསུངས་པ་དང་། འཇམ་དཔལ་གྱི་ལྟ་འདོད་མདོར་བསྟན་ལས་ཀྱང་། ཕུང་པོ་རྣམ་དཔྱད་སྟོང་པ་ཉིད། །ཆུ་ཤིང་བཞིན་དུ་སྙིང་པོ་མེད། །རྣམ་པ་ཀུན་གྱི་མཆོག་ལྡན་པའི། །སྟོང་ཉིད་དེ་དང་འདྲ་མ་ཡིན། །ཞེས་དང་། ཤིང་རྟ་ཆེན་པོ་སློབ་དཔོན་འཕགས་པ་ཐོགས་མེད་ཀྱིས་མཛད་པའི་རྒྱུད་བླ་མའི་འགྲེལ་བ་ལས། དེ་ལ་སྟོང་པ་ཉིད་ཀྱི་ཚུལ་དུ་བརྗོད་པའི་དེ་བཞིན་གཤེགས་པའི་སྙིང་པོ་གང་ཞེ་ན། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །འདིས་ཅི་བསྟན་ཞེ་ན། གང་གི་ཕྱིར་རང་བཞིན་གྱིས་ཡོངས་སུ་དག་པའི་དེ་བཞིན་གཤེགས་པའི་ཁམས་འདི་ལས་བསལ་བར་བྱ་བ་ཀུན་ནས་ཉོན་མོངས་པའི་མཚན་ཉིད་ནི་འགའ་ཡང་མེད་ལ། གློ་བུར་གྱི་དྲི་མ་དང་བྲལ་བ་ནི་འདིའི་རང་བཞིན་ཡིན་པའི་ཕྱིར་རོ། །འདི་ལ་རྣམ་པར་བྱང་བའི་རྒྱུ་མཚན་ཅན་བཞག་པར་བྱ་བ་ཅུང་ཟད་ཀྱང་ཡོད་པ་མ་ཡིན་ཏེ། རྣམ་པར་དབྱེ་བ་མེད་པའི་ཆོས་དག་པའི་ཆོས་ཉིད་ནི་རང་བཞིན་ཡིན་པའི་ཕྱིར་རོ། །དེས་ན་དེ་བཞིན་གཤེགས་པའི་སྙིང་པོ་ནི། རྣམ་པར་དབྱེ་བ་ཡོད་པ། བྲལ་ཤེས་པ། ཉོན་མོངས་པའི་སྦུབས་ཐམས་ཅད་ཀྱིས་སྟོང་པ་ཡིན་ལ། རྣམ་པར་དབྱེ་བ་མེད་པ། བྲལ་མི་ཤེས་པ། བསམ་གྱིས་མི་ཁྱབ་པའི་སངས་རྒྱས་ཀྱི་ཆོས་གངྒཱའི་ཀླུང་གི་བྱེ་མ་ལས་འདས་པ་ནི་མི་སྟོང་ངོ་ཞེས་གསུངས་སོ། །དེ་ལྟར་ན་གང་ཞིག་གང་ན་མེད་པ་དེ་ནི་དེས་སྟོང་ངོ་ཞེས་ཡང་དག་པར་རྗེས་སུ་མཐོང་ལ། གང་ཞིག་ལྷག་པར་ཡོད་པ་དེ་ནི་དེ་ལ་རྟག་པར་ཡོད་དོ་ཞེས་ཡང་དག་པ་ཇི་ལྟ་བ་བཞིན་དུ་ཤེས་སོ། །ཚིགས་སུ་བཅད་པ་འདི་གཉིས་ཀྱིས་ནི་སྒྲོ་འདོགས་པ་དང་སྐུར་བ་འདེབས་པའི་མཐའ་དང་བྲལ་བའི་ཕྱིར། ཕྱིན་ཅི་མ་ལོག་པའི་སྟོང་པ་ཉིད་ཀྱི་མཚན་ཉིད་བསྟན་ཏོ། །དེ་ལ་གང་ཞིག་སྟོང་པ་ཉིད་ཀྱི་ཚུལ་འདི་ལས་སེམས་ཕྱི་རོལ་དུ་རྣམ་པར་གཡེང་ཞིང་རྣམ་པར་འཕྲོ་ལ་མཉམ་པར་མི་འཇོག་ཅིང་རྩེ་གཅིག་ཏུ་མི་འགྱུར་བ་དེས་ནི་དེ་དག་སྟོང་པ་ཉིད་ལས་སེམས་རྣམ་པར་གཡེང་བ་ཞེས་བརྗོད་དོ། །དེ་ལ་དོན་དམ་སྟོང་པ་ཉིད་ཀྱི་ཡེ་ཤེས་མེད་པར་ནི་རྣམ་པར་རྟོག་པ་མེད་པའི་དག་པའི་དབྱིངས་རྟོགས་ཤིང་མངོན་པར་འདུ་བྱ་བར་མི་ནུས་སོ། །དེ་ལ་དགོངས་ནས་གསུངས་པ་ནི། དེ་བཞིན་གཤེགས་པའི་སྙིང་པོའི་ཡེ་ཤེས་ཉིད་ནི་དེ་བཞིན་གཤེགས་པ་རྣམས་ཀྱི་སྟོང་པ་ཉིད་ཀྱི་ཡེ་ཤེས་ཡིན་ལ། དེ་བཞིན་གཤེགས་པའི་སྙིང་པོ་དེ་ཡང་ཉན་ཐོས་དང་རང་སངས་རྒྱས་ཐམས་ཅད་ཀྱིས་སྔར་མ་མཐོང་མ་རྟོགས་པའོ། །ཞེས་རྒྱས་པར་གསུངས་སོ། །དེ་བཞིན་གཤེགས་པའི་སྙིང་པོ་ཇི་ལྟར་ཆོས་སྐུའི་སྙིང་པོ་ཡིན་པ་དེ་ལྟར་ནི་འཇིག་ཚོགས་ལ་ལྟ་བར་ལྟུང་བ་རྣམས་ཀྱི་སྤྱོད་ཡུལ་མ་ཡིན་པར་བརྗོད་དོ། །ཆོས་ཀྱི་དབྱིངས་ནི་ལྟ་བའི་གཉེན་པོ་ཡིན་པའི་ཕྱིར་རོ། །ཇི་ལྟར་ཆོས་ཀྱི་སྐུ་འཇིག་རྟེན་ལས་འདས་པའི་སྙིང་པོ་ཡིན་པ་དེ་ལྟར་ནི་ཕྱིན་ཅི་ལོག་ལ་མངོན་པར་དགའ་བ་རྣམས་ཀྱི་སྤྱོད་ཡུལ་མ་ཡིན་ནོ་ཞེས་བརྗོད་དེ། འཇིག་རྟེན་ལས་འདས་པའི་ཆོས་ཀྱི་སྐུ་ནི་མི་རྟག་པ་ལ་སོགས་པ་འཇིག་རྟེན་པའི་ཆོས་ཀྱི་གཉེན་པོར་བསྟན་པའི་ཕྱིར་རོ། །ཇི་ལྟར་ཆོས་ཀྱི་སྐུ་ཡོངས་སུ་དག་པའི་ཆོས་ཀྱི་སྙིང་པོ་ཡིན་པ་དེ་ལྟར་ནི་སྟོང་པ་ཉིད་ལས་སེམས་རྣམ་པར་གཡེངས་པ་རྣམས་ཀྱི་སྤྱོད་ཡུལ་མ་ཡིན་ནོ་ཞེས་བརྗོད་དོ། །དེ་རྣམ་པར་དག་པའི་ཡོན་ཏན་གྱིས་ཆོས་རྣམ་པར་དབྱེ་བ་མེད་པ་འཇིག་རྟེན་ལས་འདས་པའི་ཆོས་ཀྱི་སྐུས་རབ་ཏུ་ཕྱེ་བ་རྣམས་ནི་གློ་བུར་གྱི་དྲི་མས་སྟོང་པའི་རང་བཞིན་ཡིན་པའི་ཕྱིར་རོ། །དེ་ལ་ཚུལ་གཅིག་པོ་ཆོས་ཀྱི་དབྱིངས་དང་ཐ་མི་དད་པའི་ཡེ་ཤེས་ཀྱི་སྒོ་རྟོགས་ནས་འཇིག་རྟེན་ལས་འདས་པའི་ཆོས་ཀྱི་སྐུའི་རང་བཞིན་གྱིས་ཡོངས་སུ་དག་པ་ལ་ལྟ་བ་གང་ཡིན་པ་འདི་ནི་འདིར་གང་གིས་ས་བཅུ་པ་ལ་གནས་པའི་བྱང་ཆུབ་སེམས་དཔས་དེ་བཞིན་གཤེགས་པའི་སྙིང་པོ་ཅུང་ཟད་མཐོང་ངོ་ཞེས་གསུངས་པས་ཡང་དག་པ་ཇི་ལྟ་བ་བཞིན་གྱི་ཡེ་ཤེས་ཀྱིས་ཀུན་མཐོང་བར་འདོད་དོ། །དེ་སྐད་དུ། སྤྲིན་མཐོང་མཁའ་ལ་ཉི་བཞིན་འདིར་ཁྱོད་ཕྱོགས་གཅིག་བློ་གྲོས་ཅན། །བློ་མིག་དག་པའི་འཕགས་རྣམས་ཀྱིས་ཀྱང་ཐམས་ཅད་མཐོང་མ་ལགས། །བཅོམ་ལྡན་འདས་ཁྱོད་ཆོས་སྐུ་གང་དག་བློ་གྲོས་མཐའ་ཡས་པ། །ཤེས་བྱ་མཐའ་མེད་མཁའ་དབྱིངས་ཁྱབ་པ་དེ་དག་གིས་ཀུན་མཐོང་། །ཞེས་གསུངས་སོ། །དེ་ཡང་ཤིན་ཏུ་ཟབ་པའི་ཚུལ་འདི་ལ་བོད་གངས་ཅན་གྱི་ལྗོངས་འདིར་སྣང་སྟོང་ཕྱོགས་རེར་ཞེན་པའི་དབང་གིས་དྲང་ངེས་སོགས་འདོད་ཚུལ་མང་ཞིག་སྔོན་ཡང་བྱུང་ལ་དེང་སང་ཡང་སྣང་མོད། རང་རེ་སྔ་འགྱུར་པ་རྣམས་ནི་སྔོན་གྱི་རིག་འཛིན་གོང་མ་རྣམས་ཀྱི་བཞེད་པའི་རྗེས་སུ་འབྲང་དགོས་པས། དེའི་ཚུལ་ནི་ཨོ་རྒྱན་དུས་གསུམ་མཁྱེན་པའི་ཞལ་ལུང་ཉང་གཏེར་ལམ་རིམ་ཆེན་པོའི་རང་འགྲེལ་ལས། གཤིས་ལ་འཁྲུལ་པ་མེད་པས་སྤངས་པ་ཕུན་ཚོགས། ངོ་བོ་གཉིས་མེད་དུ་ཡོད་པས་རྟོགས་པ་ཕུན་ཚོགས། དེ་ལྟར་ཡེ་ནས་སངས་རྒྱས་མ་ཡིན་ན་བསྒོམས་ཀྱང་སངས་རྒྱས་སུ་མི་འགྱུར་ཏེ། ས་ལེ་སྦྲམ་ཡེ་ནས་གསེར་མ་ཡིན་ན་བྱས་ཀྱང་གསེར་དུ་མི་འགྲོ་བ་བཞིན་ནོ། །ཞེས་དང་། སྨིན་གཏེར་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་རྩ་སྒྲུབ་པདྨས་མཛད་པ་ལས། གདོད་ནས་དག་པའི་རིག་པ་ནི། །ཡེ་ནས་ཆོས་སྐུར་གནས་པ་ལ། །དབུལ་པོའི་ཁྱིམ་གྱི་ས་འོག་ན། །གནས་པའི་ནོར་བུ་རིན་ཆེན་བཞིན། །ངོ་མ་ཤེས་པས་འཁོར་བར་འཁྲུལ། །ངོ་སྤྲོད་དེ་ངོ་ཤེས་པ་ནི། །ཆོས་དབྱིངས་ཡེ་ཤེས་རྟོགས་པ་སྟེ། །སངས་རྒྱས་ཞེས་སུ་གྲགས་པའོ། །ཞེས་དང་། ལམ་རིམ་ཡེ་ཤེས་སྙིང་པོ་ལས། ཤེས་བྱའི་གཞི་ནི་ཀུན་ཁྱབ་བ དེ་གཤེགས་སྙིང་། །འདུས་མ་བྱས་པ་གསལ་སྟོང་རིག་པའི་བབས། །འཁྲུལ་གྲོལ་ལས་འདས་མཁའ་ལྟར་རབ་ཏུ་ཞི། །འཁོར་འདས་དབྱེ་བསྲི་མེད་པར་གནས་གྱུར་ཀྱང་། །ལྷན་སྐྱེས་ཀུན་བརྟགས་མ་རིག་གདོན་ཆེན་གྱིས། །གཟུང་དང་འཛིན་པའི་བག་ཆགས་བརྟས་པ་ལས། །སྣོད་དང་བཅུད་དུ་འཛིན་པ་ཐ་དད་པའི། །འགྲོ་བ་རིགས་དྲུག་རྨི་ལམ་བཞིན་དུ་སྣང་། །དེ་ལྟ་ན་ཡང་ངོ་བོའི་བཞུགས་ཚུལ་ལས། །རྣམ་པར་མ་གཡོས་གཡོ་བར་མི་འགྱུར་ཕྱིར། །གློ་བུར་དྲི་མ་སྦྱང་ལ་འབད་པར་བྱ། །ཞེས་དང་། དཔལ་བསམ་ཡས་པ་ཀུན་མཁྱེན་ངག་གི་དབང་པོས་ཡིད་བཞིན་རིན་པོ་ཆེའི་མཛོད་ལས། འགྱུར་མེད་དོན་དམ་བདེན་པའི་རང་བཞིན་ནི། །འོད་གསལ་བདེ་གཤེགས་སྙིང་པོ་ལྷུན་གྲུབ་སྟེ། །སྟོང་གསལ་རིག་པ་དབྱེར་མེད་ཆོས་ཉིད་དོ། །འདི་ཉིད་རང་བཞིན་ལྷུན་གྲུབ་དཀྱིལ་འཁོར་ཏེ། །ཡེ་ནས་ལྷུན་རྫོགས་བྱང་ཆུབ་སྙིང་པོ་ཅན། །རྣམ་དག་སྤྲོས་བྲལ་ཕྱོགས་ལྷུང་ཀུན་དང་བྲལ། །ཟབ་ཞི་སྐུ་དང་ཡེ་ཤེས་འདུ་འབྲལ་མེད། །འདི་ཉིད་འགྲོ་བ་ཀུན་ལ་ཡོད་པའི་དཔེ། །ས་འོག་གཏེར་དང་བུམ་ནང་མར་མེ་དང་། །པད་ནང་སྐུ་འདྲར་མཁས་པས་ཤེས་པར་བྱ། །ཇི་ལྟར་དབུལ་པོའི་ས་འོག་རིན་ཆེན་གཏེར། །རང་ལ་ཡོད་ཀྱང་མ་ཤེས་ཕོངས་པ་ལྟར། །ལྷུན་གྲུ བ་སངས་རྒྱས་རང་ལ་ཡོད་གྱུར་ཀྱང་། །ལུས་ངག་སེམས་ཏེ་ཚོགས་བརྒྱད་སས་བསྒྲིབས་པས། །སྲིད་པའི་ཉེས་ཚོགས་དབུལ་བས་རྒྱུན་དུ་ཕོངས། །དེ་ལས་ལྷ་ཡི་མིག་ལྡན་མིས་མཐོང་ནས། །གཏེར་དེ་འབྱིན་པའི་ཐབས་བསྟན་དེས་ཕྱུང་བས། །རང་གཞན་འབྱོར་པ་ཕུན་སུམ་ཚོགས་པ་ལྟར། །དམ་པ་རྣམས་ཀྱིས་གནས་ལུགས་དེ་བསྟན་པས། །ཇི་བཞིན་བསྒྲུབས་པས་སངས་རྒྱས་རང་ལས་རྙེད། །དོན་གཉིས་ཕུན་ཚོགས་ཡིད་བཞིན་ནོར་བུར་གྱུར། །ཇི་ལྟར་བུམ་ནང་སྒྲོན་མེ་འོད་གསལ་ཡང་། །བུམ་པས་བསྒྲིབས་ཏེ་ཕྱི་རོལ་མི་མངོན་ལྟར། །སྙིང་པོའི་ཆོས་སྐུ་རང་ལ་གནས་ན་ཡང་། །སྒྲིབ་པའི་བུམ་པས་བསྒྲིབས་ཕྱིར་ཡོངས་མི་སྣང་། །དེ་ལས་བུམ་པ་བཅག་ན་སྣང་བ་ལྟར། །ས་རྣམས་སྒྲིབ་པ་གང་ཡིན་བྲལ་བ་ན། །འཇིག་རྟེན་སྒྲོན་མེ་ཀུན་ཏུ་སྣང་བར་བྱེད། །ཇི་ལྟར་པད་ནང་བདེ་གཤེགས་སྐུ་ཡོད་ཀྱང་། །པདྨས་གཏུམས་ཕྱིར་ཕྱི་རོལ་སྣང་བ་མེད། །དེ་བཞིན་གཟུང་འཛིན་འདབ་སྟོང་གིས་བསྒྲིབས་པས། །རང་གསལ་རྒྱལ་བའི་དབང་པོ་མཐོང་མི་ནུས། །ནམ་ཞིག་འདབ་མ་ཁ་ཕྱེ་གསལ་བ་ལྟར། །གཟུང་འཛིན་འཁྲུལ་སྣང་འདབ་མ་ལས་གྲོལ་ཚེ། །བྱང་ཆུབ་སྐུ་གསུམ་རང་ལ་སྣང་བར་འགྱུར། །དེ་ཕྱིར་ཆོས་དབྱིངས་དོན་དམ་འོད་གསལ་ནི། །རང་ལ་ཡོད་པའི་གནས་ལུགས་ཤེས་པར་མཛོད། །ཅེས་དང་། དེ་ཉིད་ཀྱི་འགྲེལ་ཆེན་ལས་ཀྱང་། འདུས་མ་བྱས་ལྷུན་གྲུབ་ཆེན་པོར་ཡེ་ནས་གནས་པའི་རང་བཞིན་རྣམ་དག་སྣང་སྟོང་ཆེན་པོར་གནས་པ་ཉིད། མཚན་བརྗོད་ལས། རང་བཞིན་གྱིས་ནི་དག་པའི་བདག །ཐོག་མ་མེད་ནས་སྤྲོས་མེད་བདག །ཅེས་པ་དང་། དྲི་མ་མེད་པས་གཙང་བ་དང་། །ཀུན་ལ་ཁྱབ་པར་བདག་དམ་པ། །སྡུག་བསྔལ་མེད་པས་བདེ་བ་དང་། །འཕོ་འགྱུར་མེད་པས་རྟག་པ་སྟེ། །ཚུ་རོལ་མཐོང་བའི་བློ་ལས་བསྐལ་དོན་ཕ་རོལ་དུ་གྱུར་པའི་དབང་དུ་བྱས་ནས། མདོ་སྡེ་རྒྱན་ལས། གཙང་བདག་བདེ་དང་རྟག་ཉིད་ཀྱི། །ཡོན་ཏན་ཕ་རོལ་ཕྱིན་པ་འབྲས། །ཞེས་སོ། །དེའང་སྔར་མེད་པའི་ཡོན་ཏན་སོ་མ་དེའི་སྟེང་དུ་གྲུབ་པའམ་བཞག་ཏུ་མེད་ལ། གློ་བུར་པ་ཙམ་ལས་རང་བཞིན་པའི་སྐྱོན་ནམ་དྲི་མ་ཕྱིར་བསལ་དུ་མེད་པས། སྐྱོན་སྤངས་པ་ཕྱིར་འགྲོ་བ་དང་། ཡོན་ཏན་ནང་དུ་འོང་བ་མེད་པ་ཉིད་ནི་གནས་ལུགས་ཡང་དག་པའི་དོན་ཏེ། ཞེས་དང་། ཤིང་རྟ་ཆེན་མོར། དེའང་སེམས་ཅན་པའི་དུས་ན་སེམས་ཀྱི་ཆོས་ཉིད་ལ་སྣང་ཆ་ནས་གཟུགས་སྐུའི་ཡོན་ཏན་དང་། སྟོང་ཆ་ནས་ཆོས་སྐུའི་ཡོན་ཏན་རྫོགས་པར་ལྡན་ཡང་། དྲི་མས་བསྒྲིབས་པས་མངོན་སུམ་དུ་མི་གསལ་བའི་ཕྱིར་ཁམས་སམ་རིགས་ཞེས་བཏགས་ཤིང་། སངས་རྒྱས་པའི་ཚེ་དྲི་མ་མཐའ་དག་དང་བྲལ་བས་བྱང་ཆུབ་ཅེས་བརྗོད་ཀྱང་། ངོ་བོ་སེམས་ཉིད་ཀྱི་ནུས་པ་རྫོགས་པར་སྣང་མི་སྣང་ཙམ་ལས་དང་པོ་སེམས་ཅན་གྱི་དུས་ན་མེད་པའི་ཡོན་ཏན་ཕྱིས་གསར་དུ་སྐྱེད་པར་ནི་འདོད་པ་མ་ཡིན་ཏེ་འཕོ་འགྱུར་མེད་པའི་ཕྱིར་རོ། །དེ་སྐད་དུའང་སྙིང་པོ་རབ་ཏུ་བསྟན་པའི་མདོ་ལས། ཐོག་མ་མེད་པའི་དུས་ཀྱི་དབྱིངས། །ཆོས་རྣམས་ཀུན་གྱི་གནས་ཡིན་ཏེ། །འདི་ཡོད་པས་ན་འགྲོ་ཀུན་དང་། །མྱ་ངན་འདས་པ་ཐོབ་པ་ཡིན། །ཇི་ལྟར་སྔོན་དེ་ཕྱིས་དེ་བཞིན། །འགྱུར་བ་མེད་པ་ཆོས་ཉིད་དོ། །ཞེས་སོ། །ཞེས་དང་། མ་ལུས་འགྲོ་ཀུན་བདེ་གཤེགས་སྙིང་པོ་ཅན། །གློ་བུར་དྲི་མས་གཡོགས་པའི་སྦུབས་ནང་ན། །འོད་གསལ་ཆོས་ཁམས་ཉི་མ་ཡེ་ནས་གནས། །སྐུ་དང་ཡེ་ཤེས་འདུ་འབྲལ་མེད་པའི་ཆོས། །རང་ལ་ཡོད་དེ་དེ་ཉིད་ལྷུན་གྱིས་གྲུབ། །སྟོང་དང་སྙིང་རྗེའི་སྙིང་པོ་ལྷུར་ལེན་པས། །ཁམས་དེ་བྱང་ཆུབ་ཅེས་བྱའི་མིང་ཐོབ་ནས། །མ་ལུས་སྐྱེ་དགུའི་ཚོགས་ལ་ཕན་བདེ་བྱེད། །ཉི་མཁའ་བཞིན་དུ་གདོད་ནས་རང་བྱུང་ཡང་། །གློ་བུར་ཉོན་མོངས་ཆུ་འཛིན་གྱིས་སྒྲིབ་པས། །རྨི་ལམ་འདྲ་བའི་སྲིད་པའི་སྡུག་བསྔལ་མྱོང་། །དེ་བསལ་བྱ་ཕྱིར་བརྩོན་པའི་སྟོབས་བསྐྱེད་ཅིག །གློ་བུར་འཁྲུལ་སྣང་འགྲོ་དྲུག་སྣང་བ་འདི། །ལས་དང་བག་ཆགས་ཀྱིས་སྤྲུལ་རྨི་ལམ་འདྲ། །སྔོན་མེད་ཕྱིས་མེད་བར་འདིར་མེད་བཞིན་སྣང་། །ཡེ་ཤེས་འོད་གསལ་ལྷུན་གྲུབ་ཡེ་ནས་ཡོད། །དུས་ཀུན་ཡོད་ཀྱང་ད་ལྟ་མ་མཐོང་བ། །གཉིད་དུས་རང་གནས་མངོན་སུམ་མ་མཐོང་བཞིན། །དོན་མེད་ཀུན་བརྟགས་དྲི་མའི་ཆོས་རྣམས་ལ། །ཆེད་ཀར་མ་འཛིན་སེམས་ཉིད་འོད་གསལ་སྦྱོངས། །རང་གཞན་ཀུན་གྱི་དོན་གཉིས་འབྱོར་པ་འཛིན། །ཞེས་གསུངས་ཤིང་། ཀུན་མཁྱེན་པྲཉྫ་རསྨིས། གཟུང་བའི་ཆོས་ཀུན་ནམ་ཡང་ཡོད་མིན་ཞིང་། །འཛིན་པའི་ཤེས་པའང་འཁྲུལ་པར་གདོན་མི་ཟ། །གཉིས་མེད་ཡེ་ཤེས་སྦྱང་གཞིར་བཞག་པ་སྟེ། །འཁོར་ལོ་ཐ་མའི་ལམ་གྱི་རིམ་པའོ། །མི་ཕམ་མགོན་དང་ཀླུ་སྒྲུབ་སྙིང་པོ་ཡིས། །བྱམས་པའི་ཆོས་བཞི་བསྟོད་ཚོགས་གཞུང་གིས་བཀྲལ། །ཐོགས་མེད་མཆེད་ཀྱི་གསུང་རབ་ཉི་འོད་ཀྱིས། །གངས་རིའི་ཁྲོད་འདིར་མི་ཕམ་རྒྱལ་བ་དང་། །ཐོགས་མེད་མཆེད་ཀྱི་གཞུང་བཟང་ངོ་མཚར་ཅན། །དབུ་སེམས་སོ་སོར་འགྲེལ་བྱེད་མང་ན་ཡང་། །གང་དེ་དབུ་མའི་གཞུང་དུ་གདོན་མི་ཟ། །ཞེས་དང་། ཁམས་ཀྱི་རང་བཞིན་བདེ་གཤེགས་སྙིང་པོ་ཉིད། །ཐོག་མའི་མགོན་པོ་ཡེ་ཤེས་སྐུར་བཞུགས་ཀྱང་། །ཕྲ་རགས་རྡུལ་གྱི་ཆོས་ཉིད་ལས་འདས་ཤིང་། །ས་བཅུའི་དབང་ཕྱུག་གིས་ཀྱང་མཐོང་མི་ནུས། །དུས་གསུམ་རྒྱལ་བ་ཁོ་ནའི་རང་སྣང་ངོ་། །ཞེས་དང་། རྗེ་གཏེར་ཆེན་བླ་མས། ཀུན་ཁྱབ་འགྱུར་མེད་རྟག་བརྟན་རྡོ་རྗེ་སེམས། །མཐའ་ཡས་དངོས་པོ་ཀུན་གྱི་ངོ་བོ་ཉིད། །རང་བཞིན་འོད་གསལ་སྙིང་རྗེའི་སྒྱུ་འཕྲུལ་གར། །ཅིར་ཡང་འཆར་བ་དཔལ་ལྡན་བླ་མར་འདུད། །ཅེས་གསུངས་པ་དང་། རིག་འཛིན་འཇིགས་མེད་གླིང་པས། གང་ཕྱིར་བདེ་གཤེགས་སྙིང་པོ་ནི། །སེམས་ཅན་ཀུན་གྱི་ཤེས་རྒྱུད་ལ། །ཉི་མ་སྤྲིན་སྦུབས་གཏུམ་པ་ལྟར། །གློ་བུར་དྲི་མའི་དག་བྱ་ཡིས། །བསྒྲིབས་པ་ཙམ་ལས་སེམས་ཅན་གྱི། །དུས་ན་ངན་དུ་སོང་བ་དང་། །སངས་རྒྱས་དུས་ན་བཟང་དུ་མེད། །ཚོགས་བརྒྱད་སྒྲིབ་གཡོགས་བསལ་ཙམ་ནས། །རང་བཞིན་རྣམ་དག་ཡིན་པའི་ཕྱིར། །ཀ་དག་ཅེས་སུ་སྒྲ་དོན་འབྲེལ། །ཞེས་དང་། ཤེས་བྱ་སྣང་བས་མ་བཅིངས་སྟོང་པའི་དངོས། །སྟོང་པའི་རང་བཞིན་གསལ་བའི་སྙིང་པོ་ནི། །རིག་པར་བཞུགས་པས་སྐུ་དང་ཡེ་ཤེས་ཁམས། །འདུ་འབྲལ་མེད་པ་ཉི་མའི་སྙིང་པོ་ཅན། །ཞེས་དང་། ཁྱད་པར་འཁོར་ལོ་ཐ་མའི་དོན་ཁམས་རང་བཞིན་གྱིས་དག་པའི་ཡོན་ཏན་ཡེ་ལྡན་ཡིན་པའི་ཕྱིར། ལམ་དུས་ཀྱི་ཡོན་ཏན་ལྟར་སྣང་བ་ཡིན་པས་གསར་བྱུང་མི་འདོད་ལ། དེ་དང་སྔགས་ཀྱི་སྡེ་སྣོད་ལས་འགྲོ་བ་ཀུན་ཀྱང་རང་བཞིན་གྱི་དཀྱིལ་འཁོར་དམ་པའི་ཆོས་ཉིད་དུ་གནས་པ་གཉིས་གཞིའི་ངང་དུ་གཅིག་ཅིང་ལམ་ཡང་ཚོགས་གཉིས་དང་ཐབས་ཤེས་ངོ་བོ་གཅིག་ལ། འབྲས་བུ་ཡང་སྐུ་དང་ཡེ་ཤེས་སུ་ཐ་མི་དད་པས་ན་སྔོན་གྱི་དུས་ན་བྱོན་པའི་མཆོག་གཟིགས་དམ་པ་རྣམས་ཀྱི་བཤད་པ་ཕྱི་ནང་དུ་མཛད་པ་ཡིན་ནོ། །ཞེས་གསུངས་པ་དང་། རྡོ་རྗེ་འཆང་མཁྱེན་བརྩེའི་ཞབས་ཀྱིས། དེ་ཡང་ཀུན་རྫོབ་ཆོས་རྣམས་ཀུན། །རང་གི་ངོ་བོས་སྟོང་པ་དང་། །དོན་དམ་བདེ་གཤེགས་སྙིང་པོ་ནི། །ཉོན་མོངས་གཞན་གྱིས་སྟོང་ཞེས་གསུངས། །ངོ་བོ་རྟག་བརྟན་འགྱུར་མེད་ཕྱིར། །རང་བཞིན་གནས་པའི་རིགས་ཞེས་བྱ། །སེམས་ཅན་ཁམས་ལ་ལྷུན་གྲུབ་ཏུ། །དབུལ་པོའི་ཁྱིམ་གྱི་གཏེར་བཞིན་བཞུགས། །དེ་ལྟ་ནའང་གཉིས་འཛིན་གྱི། །དྲི་མ་བསལ་ཏེ་ཡོན་ཏན་ཚོགས། །འབྲས་བུའི་ཤིང་བཞིན་གོང་དུ་འཕེལ། །མཐར་ཐུག་དག་པ་གཉིས་ལྡན་གྱི། །ཆོས་ཉིད་འདུས་མ་བྱས་པ་ཡི། །སྦྱང་གཞི་མངོན་དུ་གྱུར་པའི་ཕྱིར། །གཞི་ལམ་འབྲས་རྣམས་དབྱེར་མེད་པའོ། །འདི་ནི་སྔགས་ཀྱི་སྡེ་སྣོད་དུའང་། །རྒྱུ་ཡི་རྒྱུད་དང་དག་པའི་བདག །སེམས་ཀྱི་རྡོ་རྗེ་འོད་གསལ་སེམས། །རྣམ་པ་ཀུན་གྱི་མཆོག་ལྡན་སོགས། །རྡོ་རྗེའི་མིང་གིས་རབ་ཕྱེ་ཞིང་། །ཁྱད་པར་ངེས་དོན་ཕྱག་རྒྱ་ཆེ། །ཁམས་གསུམ་ཀུན་ལ་རྒྱས་གདབ་པ། །བླ་ན་མེད་པའི་ཡེ་ཤེས་ནི། །འདི་ཁོ་ན་ལས་འདའ་ས་མེད། །ཅེས་གསུངས་ཤིང་། གཞན་ཡང་། ཀུན་མཁྱེན་ངྷརྨ་ཤྲཱི། ཀཿཐོག་མ་ཧཱ་པཎྜི་ཏ་ཡབ་སྲས། འཁོར་ལོའི་དབང་ཕྱུག་བློ་གྲོས་མཐའ་ཡས་སོགས་ཀྱི་དོན་གྱི་དགོངས་པ་དེ་ལྟར་གནས་ཚུལ་ཡོངས་ལ་གྲགས་ཕྱིར་འདིར་མ་སྨོས་ལ། རྒྱལ་བའི་སྲས་པོ་དཔལ་སྤྲུལ་རིན་པོ་ཆེས་ཀྱང་། ཤིན་ཏུ་རྣམ་དག་དྲི་མེད་ཆོས་ཀྱི་དབྱིངས། །ཐུབ་པའི་ཆོས་སྐུ་མཐའ་ཡས་འགྲོ་ཁམས་ལ། །པདྨའི་སྦུབས་བཞུགས་སྤྲུལ་པའི་སངས་རྒྱས་བཞིན། །ཡོད་པར་ཤེས་པ་མདོ་སྡེ་མཐོང་ལ་ཡོད། །གཞི་ལམ་འབྲས་བུའི་ཁམས་ཀྱི་དེ་བཞིན་ཉིད། །རིན་ཆེན་གསེར་ལྟར་འགྱུར་བ་མེད་པའི་ཆོས། །ཉོན་མོངས་རྟོག་པའི་སྐྱོན་གྱིས་གོས་མིན་ཞེས། །ཡང་དག་ཤེས་པ་མདོ་སྡེ་མཐོང་ལ་ཡོད། །སྙིང་རྗེ་ཆེན་པོ་རྒྱལ་བ་ཀུན་གྱི་རིགས། །རིན་ཆེན་གཏེར་དང་འབྲས་བུ་ཅན་ཤིང་བཞིན། །མངོན་བྱས་ཡོན་ཏན་གོང་ནས་གོང་འཕེལ་བའི། །རིགས་དེ་སད་པ་མདོ་སྡེ་མཐོང་ལ་ཡོད། །ཅེས་སོགས་རྒྱ་ཆེར་གསུངས་པས་མཚོན་ཆོས་ཉིད་ཀྱི་བདེན་པ་ལེགས་པར་གཟིགས་པ་རྣམས་ཀྱིས་མགྲིན་གཅིག་དབྱངས་གཅིག་གིས་བསྙད་པ་ཡིན་ཞིང་། ཁྱད་པར་དུ་ཡང་སྔགས་བླ་མེད་ཀྱི་རྒྱུད་སྡེ་སྤྱི་དང་བྱེ་བྲག་སྔ་འགྱུར་ཡོ་ག་རྣམ་གསུམ་གྱི་དགོངས་པའི་མཐིལ་ནི་རང་བྱུང་གི་ཡེ་ཤེས་འདུས་མ་བྱས་དབྱིངས་ཀ་དག་འཆིང་གྲོལ་ལས་འདས་པའི་གཤིས་ལུགས་རིག་པ་བྱང་ཆུབ་སེམས་ཀྱི་དཀྱིལ་འཁོར་དུ་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་སྣང་སྲིད་དག་མཉམ་ཆེན་པོར་བཞེད་པ་འདི་ཉིད་ཡིན་ཏེ། སྒྱུ་འཕྲུལ་གསང་སྙིང་ལས། དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་ཚོལ་ཅིག །ཅེས་དང་། ཐམས་ཅད་མ་ལུས་ཆོས་སོ་ཅོག །སངས་རྒྱས་ཉིད་ལས་གཞན་མ་ཡིན། །སངས་རྒྱས་ཉིད་ལས་གཞན་པའི་ཆོས། །སངས་རྒྱས་ཉིད་ཀྱིས་མི་བརྙེས་སོ། །ཞེས་དང་། མདོ་དགོངས་འདུས་ལས། འཁོར་བ་འཁྲུལ་པའི་སྒྱུ་མ་དང་། །རྣམ་དག་རྣམ་བྱང་སྒྱུ་མ་གཉིས། །སེམས་ཅན་སངས་རྒྱས་ཐ་དད་ཀྱང་། །དེ་བཞིན་ཉིད་ལ་ཡོང་ཡེ་མེད། །ཅེས་དང་། འདི་ལྟར་སྣང་བའི་ཆོས་ཐམས་ཅད། །ཡེའམ་ངང་གིས་སངས་རྒྱས་པས། །མིན་ལ་ཡིན་པར་འགྱུར་བ་མིན། །ངོ་བོ་ཉིད་ཀྱིས་དེ་ཉིད་ལ། །ཡིན་དང་མིན་ཞེས་ཅི་བྱར་ཡོད། །ཅེས་དང་། ཀུན་བྱེད་ལས། ཀུན་བྱེད་ང་ཡི་སྐུ་གསུང་ཐུགས་ཉིད་ནི། །མ་བཅོས་རྣལ་དུ་བཞག་པའི་དཀྱིལ་འཁོར་གསུམ། །མ་བཀོད་དུས་གཅིག་རྫོགས་པའི་དོན་སྟོན་པས། །ལྷུན་གྲུབ་སྙིང་པོའི་དོན་ལ་འཇུག་པར་བྱེད། །ཅེས་གསུངས། དེ་ཡང་རྫོགས་ཆེན་ཐུན་མིན་གྱི་གཞི་བཤད་པའི་སྐབས་སུ་ཀ་དག་ལྷུན་གྲུབ་ཟུང་འཇུག་ཏུ་བཤད་པ་དང་། འདིར་ཆོས་དབྱིངས་སྣང་སྟོང་ཟུང་འཇུག་ཏུ་བཤད་པ་གཉིས་དོན་གྱི་གནད་གཅིག་སྟེ། རྡོ་རྗེ་སེམས་དཔའ་སྙིང་གི་མེ་ལོང་ལས། འཇིག་རྟེན་ཁམས་ཀྱི་སེམས་ཅན་ཐམས་ཅད་ལ་དེ་བཞིན་གཤེགས་པའི་སྙིང་པོ་ཏིལ་འབྲུ་ལ་མར་གྱིས་ཁྱབ་པ་བཞིན་དུ་གནས་སོ། །ཞེས་དང་། བཤད་རྒྱུད་ཀུན་གསལ་ལས། ཐོག་མའི་མགོན་པོ་འོད་མི་འགྱུར། །རང་བཞིན་ལྷུན་གྲུབ་སངས་རྒྱས་ཏེ། །ཆད་པ་མ་ཡིན་འོད་གསལ་སྐུ། །རྟག་པ་མ་ཡིན་དངོས་པོ་མེད། །ནམ་མཁའ་འཇའ་ཚོན་ཚུལ་དུ་གནས། །ཞེས་སོགས་གསང་བ་སྙིང་ཐིག་གི་རྩ་བཤད་ཀྱི་རྒྱུད་དང་ལུང་གི་དགོངས་པ་ཀུན་མཁྱེན་ཆོས་ཀྱི་རྒྱལ་པོས་ཡང་ཏིག་རྣམ་པ་གསུམ་གྱི་རྒྱབ་ཆོས་དང་མཛོད་ཆེན་བདུན་སོགས་ལས་ཞིབ་པར་བཀྲལ་ཞིང་། དེ་དང་ངེས་དོན་ཕྱིར་མི་ལྡོག་པའི་མདོའི་དགོངས་པ་རྒྱུད་བླ་མ་སོགས་དང་དོན་གཅིག་པར་ཕན་ཚུན་ལྟོ་སྦྱོར་གྱི་ཚུལ་དུ་ལུང་དང་རིགས་པས་ཡང་ཡང་སྒྲུབ་པར་མཛད་པ་ལ་སུས་ཀྱང་བསྙོན་དུ་མེད་ལ། ཆོས་ཀྱི་རྒྱལ་པོ་སྨིན་གླིང་པ་ཡབ་སྲས་སོགས་ཕྱིས་བྱོན་གྱི་སྔ་འགྱུར་པ་མཐའ་དག་ཀྱང་དེའི་རྗེས་སུ་འབྲངས་ནས་སྨྲ་བ་འབའ་ཞིག་ཡིན་ལ། དེར་མ་ཟད་སྔགས་གསར་རྙིང་གི་རྒྱུད་སྡེའི་དགོངས་པ་གྲུབ་པའི་སློབ་དཔོན་ཆེན་པོ་རྣམས་ཀྱིས་རྒྱུད་གསུམ་དང་སྣང་གསུམ་སོགས་ཀྱིས་ཇི་སྙེད་བཀྲལ་བའི་རྣམ་བཞག་དེ་ཐམས་ཅད་ཀྱང་། འདིར་བདེ་གཤེགས་སྙིང་པོའི་རང་བཞིན་མ་དག་དག་པ་སོགས་ཀྱི་གནས་སྐབས་གསུམ་ལ་ལྟོས་ནས་སེམས་ཅན་སངས་རྒྱས་སོགས་སུ་ཐ་སྙད་འདོགས་ཚུལ་དང་དོན་གཅིག་ལ། དེ་ཡང་རྒྱུ་རྒྱུད་ཀྱི་སྐབས་སུ། རྟེན་རྩ་རླུང་ཐིག་ལེ། བརྟེན་པ་རང་བྱུང་གི་ཡེ་ཤེས་ཟག་མེད་བདེ་བ་ཆེན་པོ། རྣམ་པ་སྐུ་དང་ཐིག་ལེ་ཡིག་འབྲུ་སོགས་ཇི་སྙེད་པའི་རྣམ་པར་བཞག་པ་དེ་ཐམས་ཅད་ཀྱང་ཆ་མེད་ཀུན་འགྲོ་ཁྱབ་པའི་བདག་ཉིད་ཅན། ངོ་བོ་འདུས་མ་བྱས་པ། རང་བཞིན་འོད་གསལ་བའི་ཡེ་ཤེས་བདེ་བར་གཤེགས་པའི་སྙིང་པོ་ཉིད་རྣམ་པ་ཐམས་ཅད་པར་འཆར་བ་ཡིན་པའི་ཕྱིར་དེ་ཐམས་ཅད་གནད་ཀྱིས་མི་འགལ་བར་དོན་གཅིག་ཏུ་གཞོལ་བ་ཡིན་ཏེ། སྡོང་པོ་བཀོད་པ་ལས། འཇིག་རྟེན་ཁམས་མང་ལ་ལ་དག །བསམ་གྱིས་མི་ཁྱབ་ཚིག་གྱུར་ཀྱང་། །ནམ་མཁའ་འཇིག་པར་མི་འགྱུར་བ། །རང་བྱུང་ཡེ་ཤེས་དེ་བཞིན་ནོ། །ཞེས་དང་། བློ་གྲོས་རྒྱ་མཚོས་ཞུས་པའི་མདོ་ལས། ཆོས་འདི་དྲི་མེད་དག་དགེ་རང་བཞིན་འོད་གསལ་ཏེ། །ནམ་མཁའ་མཚུངས་ཤིང་མཉམ་ལ་གདོད་ནས་བྱུང་བ་མེད། །མ་སྐྱེས་མ་བྱུང་གནས་པ་མེད་ཅིང་འགག་པ་མེད། །འདི་ནི་རྒྱལ་བའི་ཕྱག་རྒྱ་དྲི་མེད་གཡོ་བ་མེད། །ཅི་སྟེ་ནམ་མཁའ་ཉོན་མོངས་བྱ་བར་ནུས། །དེ་ལ་རྗེས་ཀྱང་བསྟན་པར་ནུས་སྲིད་ཀྱི། །རང་བཞིན་འོད་གསལ་རྫོགས་པའི་བྱང་ཆུབ་སེམས། །དེ་ནི་ནམ་ཡང་ཉོན་མོངས་བྱ་མི་ནུས། །ཞེས་དང་། རྡོ་རྗེ་སྙིང་འགྲེལ་ལས། ཇི་ལྟར་བུམ་པ་ཞིག་གྱུར་ཀྱང་། །ནམ་མཁའ་ལ་ནི་འཇིག་པ་མེད། །དེ་བཞིན་སེམས་ནི་ཞིག་གྱུར་ཀྱང་། །ཡེ་ཤེས་ལ་ནི་འཇིག་པ་མེད། །ཅེས་དང་། དུས་འཁོར་ལས། བུམ་པའི་ཆུ་ནི་ལེན་པར་བྱེད་པ་ན་ཡང་ནམ་མཁའ་འགྲོ་བ་མིན་པ་ཇི་ལྟ་བུར། མཁའ་ཁྱབ་མཁའ་ཡི་རྡོ་རྗེ་ཅན་ནི་ཡུལ་དང་རྣམ་པར་བྲལ་བ་ལུས་ཀྱི་དབུས་ན་དེ་བཞིན་ནོ། །ཞེས་དང་། བརྟག་གཉིས་ལས། ལྷ་དང་ལྷ་མིན་མི་རྣམས་དང་། །བཤང་བའི་སྲིན་བུ་སོགས་ཀྱིས་ཀྱང་། །བདེ་བ་གང་ཕྱིར་མི་ཤེས་པས། །རྟག་ཏུ་རང་བཞིན་བདེ་བ་ཅན། །ཞེས་དང་། ཨིནྡྲ་བྷོ་ངྷིས། བདེ་ཆེན་མི་རྟག་མ་ཡིན་ཏེ། །བདེ་བ་ཆེན་པོ་རྟག་ཏུ་རྟག །ཅེས་གསུངས། དེ་ལྟར་ཤེས་ཤིང་གོམས་ནུས་ན་གང་ལྟར་དམིགས་པ་དེ་ལྟར་སྣང་ཞིང་དཔེ་དོན་གྱི་ཡེ་ཤེས་སོགས་བཙན་ཐས་སུ་འདྲེན་ནུས་པའི་གནད་ཀྱང་འདི་ཡིན་པས་ནམ་ཡང་པྲ་ཡས་པར་མི་བྱ་ལ། དེ་ཡང་ཀུན་རྫོབ་སྒྱུ་ལུས། དོན་དམ་འོད་གསལ། གཉིས་མེད་ཟུང་འཇུག་གི་དོན་རྣམས་ལ། ཕར་ཕྱིན་དང་མཐུན་པའི་ཚིག་དོན། བསྐྱེད་རིམ་དང་མཐུན་པའི་སྤྱི་དོན། རྫོགས་རིམ་ཐུན་མོང་བ་དང་མཐུན་པའི་སྦས་དོན། ཐུན་མིན་རྫོགས་པ་ཆེན་པོ་དབང་བཞི་པའི་ལམ་རིམ་པ་གཉིས་པའི་གཉིས་པ་དང་མཐུན་པར་མཐར་ཐུག་གི་དོན་དང་བཞིར་དབྱེར་ཡོད་པ་ལས། སྔ་མ་སྔ་མར་སྦས་ཏེ་མི་གསལ་བ་རྣམས་ཕྱི་མ་ཕྱི་མར་དབང་པོའི་རིམ་པ་དང་བསྟུན་ནས་གསལ་རྫོགས་སུ་བསྟན་པ་སྟེ། དཔེར་ན་རྡོ་རྗེ་སྙིང་འགྲེལ་ལས། རྒྱུད་ནི་རྒྱུད་གཞན་གྱིས་བཤད་བྱ། །ཞེས་སོགས་གསུངས་པས། དུས་ཀྱི་འཁོར་ལོའི་རྒྱུད་ཀྱིས་རྒྱུད་གཞན་གྱིས་སྦས་པ་མངོན་དུ་སྟོན་པས་སངས་རྒྱས་རིན་ཆེན་ཟ་མ་ཏོག་ཁ་འབྱེད་པ་ཞེས་གསུངས་པ་བཞིན། རིམ་དགུའི་ཐེག་པ་ཀུན་གྱི་དགོངས་པའི་སྐྱེལ་སོ་རང་བཞིན་རྫོགས་པ་ཆེན་པོས་མཐར་ཕྱིན་པར་འགྱུར་བ་ཡིན་པས། ཀུན་རྫོབ་རྣམ་ཤེས་ཀྱི་ཡུལ་དུ་གྱུར་པའི་དྲང་དོན་ཙམ་ལ་ཡིད་མི་རྟོན་པར། དོན་དམ་ཡེ་ཤེས་ཀྱི་སྤྱོད་ཡུལ་ཟབ་མོ་མཉམ་རྫོགས་བརྡལ་བ་ཆེན་པོའི་དགོངས་པའི་གནད་འཚོལ་བ་ལ་མཁས་པར་བྱ་བ་ནི་སྔ་ཕྱིར་བྱོན་པའི་དམ་པའི་སྐྱེས་བུ་རྣམས་ཀྱིས་མགྲིན་གཅིག་ཏུ་བསྔགས་ཤིང་རྗེས་སུ་འདོམས་པར་མཛད་པ་ཡིན་ལ། དེ་ལྟར་མ་ཤེས་པར་ཕྱོགས་རེར་ཞེན་པའི་ཀུན་རྟོག་གིས་སྦགས་པའི་མདོ་སྔགས་ཀྱི་གཞུང་བཤད་པ་དང་། བསྐྱེད་རྫོགས་ཀྱི་ལམ་བསྒོམ་པ་ཐམས་ཅད་བཅོས་མ་གཟུགས་བརྙན་ཙམ་ལས་ཡང་དག་པའི་ལམ་དུ་འགྱུར་མི་སྲིད་པས་གནད་འདི་ལྟ་བུ་ཤེས་པ་ནི་ཅིས་ཀྱང་གལ་ཆེ་བས་འཕྲོས་དོན་དུ་སྨོས་པ་སྟེ། མདོར་ན་ཀུན་མཁྱེན་བླ་མས། སེམས་ཅན་དང་སངས་རྒྱས་ཀུན་ལ་ཁྱད་མེད་པར། སངས་རྒྱས་ཀྱི་སྙིང་པོས། དབྲི་བསྣན་མེད་པར་ཁྱབ་པས་གྲོལ་གཞི་ལྷུན་གྱིས་གྲུབ་པའི་ཆོས་ཉིད་འདི་ཡོད་པར་ཤེས་པར་བྱའོ། །འདི་ལྟ་བུའི་དགོངས་པ་དྲང་དོན་དུ་བྱེད་པས་སྟོང་པ་སྤྲོས་བྲལ་དོན་དམ་དུ་འདོད་པ་དག་ཆད་པའི་མཐར་ལྷུང་ངོ་། །བྲལ་གཞི་མེད་ན་གང་གི་སྟེང་དུ་སངས་པ་དང་རྒྱས་པ་དང་། གྲོལ་བ་དང་འདས་པའི་ཐ་སྙད་གདགས། གཞི་མེད་ནི་གང་གིའང་གཞིར་མི་རུང་བས། སྤྲོས་པ་དང་བྲལ་བའི་དོན་དམ་ཀྱི་ཆ་བྲལ་གཞིར་མེད་དོ། །དེས་ན་དོན་འདི་ནི་ངེས་པའི་སྙིང་པོ་ཡིན་པས་ཐར་པ་འདོད་པ་དག་གིས་རྟོགས་བྱའི་གཞི་དང་ལྟ་བའི་རྩེ་མོར་ཟུངས་ཤིག ཅེས་རྗེས་འཇུག་རྣམས་ལ་ཐུགས་བརྩེ་བ་ཆེན་པོས་ལེགས་པར་གདམས་པ་བཞིན་ནོ། །སྣང་སྟོང་ཟུང་འཇུག་མཉམ་པ་ཆེན་པོའི་ཚུལ། །རྟག་ཆད་དྲྭ་བ་འཇོམས་པའི་བཅུད་ལེན་སྨན། །ལེགས་པར་རྟོགས་རྣམས་སྲིད་པ་ཐ་མ་སྟེ། །མོས་པ་ཙམ་ཡང་བསོད་ནམས་དཔག་མེད་གསུངས། །དེ་སླད་ཟབ་མོའི་ཚུལ་འདིར་ཡིད་ཆེས་ཤིང་། །ཕྱོགས་ཙམ་སྨྲ་བའི་སྐལ་བཟང་ཐོབ་འདི་ཡང་། །ཀུན་མཁྱེན་ཡབ་སྲས་བརྒྱུད་པའི་བྱིན་རླབས་དང་། །དཔལ་མགོན་བླ་མའི་དྲིན་ལས་གཞན་གྱིས་མིན། །དེས་ན་འདི་ནས་བྱང་ཆུབ་སྙིང་པོའི་བར། །ཟབ་མོའི་ཚུལ་འདི་འཛིན་སྐྱོང་སྤེལ་བ་ཡི། །གཡར་དམ་སྙིང་གི་དྭངས་མར་རྟག་ཏུ་བསྟེན། །འགྲུབ་པའི་མཐུན་འགྱུར་སྲས་བཅས་རྒྱལ་རྣམས་དགོངས། །ཞེས་ཀྱང་སྨྲས་སོ། །གཉིས་པ་རྣམ་བཞག་རྣམ་པ་བཅུས་དགོངས་དོན་བྱེ་བྲག་ཏུ་རྒྱས་པར་བཤད་པ་ནི། ངོ་བོ་རྒྱུ་འབྲས་ལས་ལྡན་འཇུག་པ་དང་། །གནས་སྐབས་དེ་བཞིན་ཀུན་ཏུ་འགྲོ་བའི་དོན། །རྟག་ཏུ་མི་འགྱུར་ཡོན་ཏན་དབྱེར་མེད་ནི། །དོན་དམ་དབྱིངས་ཀྱི་དགོངས་དོན་ཡིན་ཞེས་བྱ། །ཞེས་གསུངས་པ་ལྟར། གཞིའི་ཆོས་སྐུ་དེ་བཞིན་ཉིད་རིགས་སྤྱི་མཚན་དུ་རང་བཞིན་གྱིས་རྣམ་པར་དག་པ་དང་། བྱེ་བྲག་རང་མཚན་དུ་ཆོས་སྐུ་ནི་བསམ་པའི་དོན་ཐམས་ཅད་ཡིད་བཞིན་དུ་འགྲུབ་པ་ལ་སོགས་པའི་མཐུ་དང་ལྡན་པའི་ཕྱིར་ནོར་བུ་རིན་པོ་ཆེ་དང་། དེ་བཞིན་ཉིད་ནི་གནས་སྐབས་ཐམས་ཅད་ལ་རང་བཞིན་འགྱུར་བ་མེད་པའི་ཕྱིར་ནམ་མཁའ་དང་། རིགས་ནི་སེམས་ཅན་ཐམས་ཅད་ལ་ཁྱབ་པའི་སྙིང་རྗེའི་བརླན་དང་བཅས་པའི་ཕྱིར་ཆུ་དག་པའི་དཔེས་མཚོན་པ་ནི་དག་བྱ་ངོ་བོའི་དོན་ནོ། །རིགས་ཁམས་ལ་ཡོད་པའི་ཆོས་སྐུ་གཙང་བདག་བདེ་རྟག་བཞིའི་ངོ་བོ་ལ་སྒྲིབ་པའི་དྲི་མ་ཐེག་པ་ཆེན་པོའི་ཆོས་ལ་ཁོང་ཁྲོ་བ་འདོད་ཆེན་པ་དང་། གང་ཟག་ལ་སོགས་པར་བདག་ཏུ་ལྟ་བ་མུ་སྟེགས་པ་དང་། འཁོར་བའི་སྡུག་བསྔལ་གྱིས་འཇིགས་ནས་རང་ཉིད་ཞི་བདེ་འདོད་པ་ཉན་ཐོས་པ་དང་། སེམས་ཅན་གྱི་དོན་སྒྲུབ་པ་ལ་ལྟོས་པ་མེད་པ་རང་རྒྱལ་ཏེ་བཞིའི་གཉེན་པོར་གོ་རིམ་བཞིན་དུ། ཐེག་པ་ཆེན་པོའི་ཆོས་ལ་མོས་པ། གནས་ལུགས་རྟོགས་པའི་ཤེས་རབ། བདེ་བ་དང་ལྡན་པའི་བསམ་གཏན། སེམས་ཅན་ལ་བརྩེ་བའི་སྙིང་རྗེ་སྟེ་ཆོས་བཞི་དང་ལྡན་ན་འཁོར་ལོས་སྒྱུར་བའི་སྲས་ཀྱི་ཐུ་བོ་བཞིན་དུ། སངས་རྒྱས་ཀྱི་སྲས་ཀྱི་དམ་པར་དགོངས་ཤིང་རྒྱལ་བའི་གདུང་འཚོབ་པར་འགྱུར་བ་ནི་དག་བྱེད་རྒྱུ་ཡི་དོན་ནོ། །དབྱིངས་དེ་ཉིད་གློ་བུར་གྱི་དྲི་མ་བཞི་པོ་དེ་དང་བྲལ་བས། ཆོས་ཀྱི་སྐུ་རང་བཞིན་གྱིས་རྣམ་པར་དག་པ་ལ་གློ་བུར་བྲལ་དག་གིས་ཁྱད་པར་དུ་བྱས་པས་གཙང་བ་དང་། མུ་སྟེགས་དང་ཉན་ཐོས་ལ་སོགས་པས་བཏགས་པའི་བདག་བདག་མེད་ཀྱི་སྤྲོས་པ་ཞི་བས་དམ་པའི་བདག་དང་། སྡུག་ཀུན་རག་པ་ལྟ་ཅི། ཡིད་ཀྱི་རང་བཞིན་གྱི་ཕུང་པོ་དང་མ་རིག་བག་ཆགས་ཀྱི་ས་དང་བསམ་མི་ཁྱབ་འགྱུར་གྱི་འཆི་འཕོ་དང་ཟག་པ་མེད་པའི་ལས་ཐམས་ཅད་ཀྱང་ལོག་པས་བདེ་བ་དང་། སྲིད་ཞི་མཉམ་ཉིད་དུ་རྟོགས་པས་དོན་གཉིས་ཀྱི་མཛད་པ་རྒྱུན་མི་ཆད་པས་རྟག་པ་སྟེ་ཡོན་ཏན་གྱི་ཁྱད་པར་ཕ་རོལ་ཏུ་ཕྱིན་པ་བཞི་དང་ལྡན་ཞིང་། བདག་མེད་རྟོགས་པའི་བློ་དང་། སེམས་ཅན་ལ་དམིགས་པའི་བརྩེ་བས་སྲིད་ཞི་གཉིས་ཀའི་མཐའ་ལ་མི་གནས་པ་ནི་ཐོབ་བྱ་འབྲས་བུའི་དོན་ནོ། །རང་བཞིན་གནས་རིགས་སེམས་ཅན་ཐམས་ཅད་ལ་མེད་པ་མི་སྲིད་ཀྱང་། རིགས་ཀྱི་སྒྲིབ་པས་བསྒྲིབས་ཏེ་རིགས་མ་སད་པ་རྣམས་ལ་རིགས་ཀྱི་བྱ་བ་བྱེད་པ་དངོས་སུ་མི་སྣང་ཡང་། རིགས་ཀྱི་མཐུན་རྐྱེན་འཁོར་ལོ་ཆེན་པོ་བཞི་དང་ལྡན་པའི་གང་ཟག་རྣམས་ལ་རིགས་སད་པའི་དབང་གིས་སྲིད་ཞིའི་སྐྱོན་ཡོན་མཐོང་ནས། འཁོར་བ་སྤང་འདོད་དང་། མྱང་འདས་སྒྲུབ་འདོད་ཀྱི་བློ་བརྟན་པོར་འབྱུང་བ་ནི་ཐོབ་བྱེད་ལས་ཀྱི་དོན་ནོ། །ཁམས་དེ་ལ་རྒྱུ་ཡི་ཡོན་ཏན་གོང་དུ་བསྟན་པ་བཞིན། ཆོས་སྐུ་རྣམ་པར་དག་པའི་རྒྱུ་མོས་པའི་སྣོད་ཡངས་པར། རྒྱལ་བའི་ཡེ་ཤེས་ཐོབ་པའི་རྒྱུ་ཤེས་རབ་དང་ཏིང་ངེ་འཛིན་གྱི་ནོར་བུ་རིན་པོ་ཆེ་དུ་མ་དང་ལྡན་ཞིང་། ཐུགས་རྗེ་ཆེན་པོ་འཇུག་པའི་རྒྱུ་སྙིང་རྗེའི་ཆུད་མི་ཟད་པས་རྒྱ་མཚོ་ཆེན་པོ་དང་ཆོས་མཚུངས་པ་དང་། འབྲས་བུའི་ཡོན་ཏན་མངོན་པར་ཤེས་པ་ལྔ་ཡིས་མི་མཐུན་པའི་མུན་པ་འཇོམས་པ་དང་། ཟག་པ་མེད་པའི་ཡེ་ཤེས་ཀྱིས་སྒྲིབ་པའི་བུད་ཤིང་བསྲེགས་པ་དང་། གནས་མ་ལུས་པ་ཡོངས་སུ་གྱུར་པའི་སྤངས་པའི་ཁྱད་པར་དྲི་མ་མེད་པ་འོད་གསལ་བ་སྟེ་མི་སློབ་པའི་ཆོས་བདུན་པོ་ཡང་རིགས་ཁམས་དང་རྣམ་དབྱེར་མེད་པ་མར་མེའི་དཔེས་བསྟན་པ་ནི་ལྡན་པའི་དོན་ནོ། །བྱིས་པ་སོ་སོ་སྐྱེ་བོ་འདུ་ཤེས་དང་སེམས་དང་ལྟ་བ་ཕྱིན་ཅི་ལོག་ཏུ་གྱུར་པ་དང་། བདེན་མཐོང་གི་འཕགས་པ་དེ་ལས་ཟློག་པ་སྟེ་ཕྱིན་ཅི་མ་ལོག་པ་དང་། དེ་བཞིན་གཤེགས་པ་ནི་ཇི་ལྟ་བ་བཞིན་གཟིགས་པ་མཐར་ཕྱིན་ཏེ་ཕྱིན་ཅི་ལོག་མཐའ་དག་ཟད་པ་སྟེ། རྟེན་གྱི་གང་ཟག་གསུམ་གྱིས་འཇུག་ཚུལ་གྱིས་དེ་བཞིན་ཉིད་ཀྱང་གནས་སྐབས་གསུམ་དུ་དབྱེ་བ་ནི་འཇུག་པའི་དོན་ནོ། །གོང་དུ་ངོ་བོ་ཉིད་ལ་སོགས་པའི་དོན་དྲུག་གིས་བསྟན་པའི་སྙིང་པོའི་ཁམས་ཀྱི་རང་བཞིན་ལ་ཁྱད་པར་མེད་ཀྱང་གློ་བུར་གྱི་དྲི་མ་ཅུང་ཟད་ཙམ་ཡང་མ་དག་པའི་གནས་སྐབས་ལ་སེམས་ཅན་དང་། མཐོང་སྒོམ་གྱི་སྤང་བྱ་ཐམས་ཅད་ཀྱིས་མ་དག་ལ་ཅི་རིགས་པས་དག་པའི་གནས་སྐབས་ལ་བྱང་ཆུབ་སེམས་དཔའ་དང་། སྒྲིབ་གཉིས་མཐའ་དག་དང་བྲལ་བས་ཤིན་ཏུ་རྣམ་པར་དག་པའི་གནས་སྐབས་ལ་སངས་རྒྱས་ཞེས་མིང་ཙམ་ཐ་དད་དུ་སྟོན་པ་ནི་གནས་སྐབས་ཀྱི་དོན་ནོ། །དེ་ལྟ་བུའི་རང་བཞིན་རྣམ་པར་དག་པའི་ཆོས་ཀྱི་དབྱིངས་དེ་ནི་ཆོས་ཐམས་ཅད་ཀྱི་སྤྱི་མཚན་ནམ་ཆོས་ཉིད་ཡིན་པའི་ཕྱིར། དཔེར་ན་གཟུགས་ཀྱི་རྣམ་པ་དམན་པ་ས་དང་། བར་མ་ཟངས་དང་། མཆོག་གསེར་གྱི་སྣོད་ཐམས་ཅད་ལ་ནམ་མཁའ་རྗེས་སུ་སོང་བ་བཞིན་དུ། ཉེས་པ་དང་བཅས་པ་སོ་སྐྱེ། ཡོན་ཏན་ཅི་རིགས་པ་དང་ལྡན་པ་བྱང་སེམས། ཡོན་ཏན་མཐར་ཐུག་པ་སངས་རྒྱས་ཀྱི་གནས་སྐབས་ཐམས་ཅད་ལ་མཚུངས་པར་ཁྱབ་ཅིང་རྗེས་སུ་སོང་བ་ནི་ཀུན་ཏུ་འགྲོ་བའི་དོན་ནོ། །ཉེས་པ་གློ་བུར་འབྲལ་རུང་དང་། ཡོན་ཏན་རང་བཞིན་གྱིས་འབྲལ་མི་ཤེས་པའི་ཆོས་ཉིད་དུ་ལྡན་པའི་ཕྱིར། འཁྲུལ་སྣང་གི་གཞི་རྩ་སྟོང་ཞིང་། རང་བཞིན་དག་པའི་ཆོས་ཉིད་དུས་གསུམ་འཕོ་འགྱུར་དང་བྲལ་བར་བཞུགས་པ་ནི། ཇི་ལྟར་མཁའ་ལ་སྣོད་བཅུད་ཀྱི་སྐྱེ་འཇིག་ཇི་ཙམ་དུ་བྱས་ཀྱང་ནམ་མཁའ་རང་གི་ངོ་བོ་ཕྲ་བའི་ཕྱིར་དེ་ལ་སྐྱེ་འབྲི་སོགས་ཀྱི་ཉེས་པས་འགྱུར་བ་མེད་པ་བཞིན་ཏེ། དེ་ཡང་ཆོས་ཉིད་དེ་བཞིན་ཉིད་ཀྱི་ཀློང་དུ་ཆོས་ཅན་ཀུན་རྫོབ་ཀྱི་སྣང་ཆ། མ་དག་པ་འཁོར་བའི་ཕུང་ཁམས་སྐྱེ་མཆེད་ཀྱི་ཆོས་རྣམས། ཚུལ་མིན་ཡིད་བྱེད་ཀྱི་རྒྱུ་ལས་བྱུང་བའི་ཟག་བཅས་ལས་དང་ཉོན་མོངས་པའི་དབང་གིས་རང་དབང་མེད་པར་སྐྱེ་ཞིང་འཇིག་ལ། དག་པ་རྒྱལ་སྲས་ཀྱི་ས་ལ་གནས་པ་རྣམས། ཆོས་ཉིད་ཀྱི་བདེན་པ་གཟིགས་པའི་དབང་གིས་རང་དབང་མེ ད་པར་སྐྱེ་འཆིའི་འཇིགས་པ་ལས་གྲོལ་ཡང་། སྙིང་རྗེ་ཆེན་པོས་སྐྱེ་སོགས་ཀྱི་ཆོ་འཕྲུལ་འགག་པ་མེད་པར་སྟོན་པ་ལས། མ་དག་ས་བདུན་གྱི་སྐབས་སུ་འབད་རྩོལ་དང་བཅས་པས། ཇི་ལྟར་ཆུ་ལས་སྐྱེས་པའི་པདྨ་བཞིན་དུ་སྲིད་པར་གནས་ཀྱང་སྲིད་པའི་སྐྱོན་གྱིས་མ་གོས་པར་གདུལ་བྱའི་དོན་མཛད་ཅིང་། དག་སར་རྣམ་པར་མི་རྟོག་པའི་ཡེ་ཤེས་སྟོབས་སུ་གྱུར་པས། བུད་ཤིང་སྐམ་པོ་ལ་མེ་སྟོབས་ལྡ ན་རང་ཤུགས་ཀྱིས་འབར་བ་བཞིན་དུ་འབད་རྩོལ་མེད་པར་ངམ་ངམ་ཤུགས་ཀྱིས་འཇུག་པ་དང་། ས་བཅུ་པར་མཉམ་བཞག་ཏུ་རང་དོན་སྤངས་རྟོགས་ཀྱི་ངོས་ནས་ད་དུང་ཤེས་སྒྲིབ་ཕྲ་བ་མ་སྤངས་པས་རྒྱ་མཚོ་དང་གནག་རྗེས་ཀྱི་ཆུའི་ཁྱད་པར་ཙམ་ཡོད་མོད་ཀྱི། རྗེས་ཐོབ་ཏུ་གཞན་དོན་སྒྲུབ་པ་ལ་ནི་མངོན་ཤེས་དྲུག་དང་དབང་བཅུ་སོགས་ཡོན་ཏན་ཁྱད་པར་བ་ཐོབ་པས་མཛད་པ་བཅུ་གཉིས་སོགས་སྟོན་པ་ལ་སངས་རྒྱས་དང་མཉམ། ཤིན་ཏུ་རྣམ་པར་དག་པ་སངས་རྒྱས་ཀྱི་ས་ན་གཉིས་སྣང་གི་འཇུག་པ་མཐའ་དག་དབྱིངས་སུ་ཞི་བས་རྟག་པར་ཆོས་ཀྱི་དབྱིངས་ལ་སྙོམས་པར་ཞུགས་བཞིན་དུ་རྟག་བརྟན་ཞི་བ་གཡུང་དྲུང་གི་གོ་འཕང་མཆོག་གིས་ཕྱི་མའི་མུ་མཐར་ཐུག་གི་བར་དུ་འགྲོ་བ་སྐྱབས་མེད་པ་རྣམས་ཀྱི་སྐྱབས་མཛད་པ་སྟེ། དེ་ལྟར་མ་དག་པ་དང་དག་པའི་གནས་སྐབས་ཐམས་ཅད་དུ་བྲི་གང་བསལ་བཞག་དང་བྲལ་བའི་ཆོས་ཉིད་རང་གི་ངོ་བོ་ལ་ཁྱད་པར་རྡུལ་ཙམ་ཡང་འགྱུར་བ་མི་དམིགས་པ་ནི་མི་འགྱུར་བའི་དོན་ནོ། །ཆོས་ཀྱི་སྐུ་དང་། དེ་བཞིན་གཤེགས་པ་དང་། འཕགས་པའི་བདེན་པ་དང་། དོན་དམ་པའི་མྱ་ངན་ལས་འདས་པ་ཞེས་སྤངས་རྟོགས་ཀྱི་ཆ་ལས་གང་ལ་འདོགས་པའི་གཞི། ཐབས་ཀྱི་རྣམ་པ་ཀུན་དང་ལྡན་པའི་སྟོང་པ་ཉིད་ཤིན་ཏུ་རྣམ་པར་དག་པ་དེ་ལ་ནི། ཡོན་ཏན་གྱི་རིགས་མ་ཚང་བ་མེད་པས་རྣམ་པ་ཐམས་ཅད་པ་དང་། དབྱེ་བ་མཐའ་ཡས་པས་གྲངས་མེད་པ་དང་། ཟབ་ཅིང་གཏིང་དཔག་དཀའ་བས་བསམ་དུ་མེད་པ་དང་། སྒྲིབ་གཉིས་བག་ཆགས་དང་བཅས་པ་སྤངས་པས་དྲི་མ་མེད་པ་སྟེ་ཡོན་ཏན་འདི་བཞི་དང་། གཞན་ཡང་ཇི་ལྟ་མཁྱེན་པའི་ཤེས་རབ། ཇི་སྙེད་གཟིགས་པའི་ཡེ་ཤེས། སྤང་བྱ་ལས་རྣམ་པར་གྲོལ་བའི་འབྲས་བུ་སོགས་མདོར་ན་སྤངས་རྟོགས་ཀྱི་ཆ་ལས་བཏགས་པའི་ཡོན་ཏན་གྱི་ཆོས་རྣམས་དང་ཉི་མ་དང་འོད་ཟེར་བཞིན་དུ་ངོ་བོ་དབྱེར་མེད་པའམ་འབྲལ་མི་ཤེས་པའི་ཆོས་ཉིད་དུ་གནས་པས་སངས་རྒྱས་ཉིད་ལས་མ་གཏོགས་པའི་མྱང་འདས་མཚན་ཉིད་པ་མེད་ལ། དེ་དག་ཀྱང་ཆོས་ཀྱི་དབྱིངས་དང་རྣམ་དབྱེར་མེད་པར་གཞི་ལམ་འབྲས་བུའི་གནས་སྐབས་ཐམས་ཅད་དུ་གནས་པ་ནི་དབྱེར་མེད་པའི་དོན་ཏེ་རྣམ་བཞག་རྣམ་པ་བཅུའོ། །གསུམ་པ་ངོ་བོ་མི་འགྱུར་ཡང་དྲི་མ་སྦྱང་བའི་དཔེ་བསྟན་པ་ནི། སངས་རྒྱས་པད་ངན་སྦྲང་རྩི་སྦྲང་མ་དང་། །སྦུན་ལ་སྙིང་པོ་མི་གཙང་ནང་ན་གསེར། །ས་ལ་གཏེར་དང་སྨྱུག་སོགས་འབྲས་ཆུང་དང་། །གོས་ཧྲུལ་ནང་ན་རྒྱལ་བའི་སྐུ་དང་ནི། །བུད་མེད་ངན་མའི་ལྟོ་ན་མི་བདག་དང་། །ས་ལ་རིན་ཆེན་གཟུགས་ཡོད་ཇི་ལྟ་བར། །གློ་བུར་ཉོན་མོངས་དྲི་མས་བསྒྲིབས་པ་ཡི། །སེམས་ཅན་རྣམས་ལ་དེ་བཞིན་ཁམས་འདི་གནས། །ཞེས་གསུངས་པ་ལྟར། སེམས་ཅན་ཐམས་ཅད་ཀྱི་རྒྱུད་ལ་དབྱེ་བསལ་མེད་པར། དུས་ཐོག་མ་མེད་པ་ནས་གནས་ཀྱང་རང་བཞིན་གྱིས་མ་འབྲེལ་བ། རྣམ་པར་དབྱེར་ཡོད་པ། བྲལ་ཤེས་པ། གློ་བུར་གྱི་དྲི་མ་ཉོན་མོངས་པའི་སྦུབས་བྱེ་བའི་ནང་ན་གནས་པའི་ཆོས་ཉིད་རང་བཞིན་གྱིས་རྣམ་པར་དག་པ། རྣམ་པར་དབྱེ་བ་མེད་པ། བྲལ་མི་ཤེས་པ། བསམ་གྱིས་མི་ཁྱབ་པའི་སངས་རྒྱས་ཀྱི་ཆོས་གངྒཱའི་ཀླུང་གི་བྱེ་མ་སྙེད་ལས་འདས་པའི་ཁམས་བདེ་བར་གཤེགས་པའི་སྙིང་པོ་དེ་ཇི་ལྟར་བཞུགས་པའི་ཚུལ་དཔེ་རྣམ་པ་དགུས་སྟོན་ཏེ། དེ་ཡང་སངས་རྒྱས་རྣམས་ཀྱི་ཡེ་ཤེས་ཀྱི་སྤྱན་སྒྲིབ་པ་ཐམས་ཅད་དང་བྲལ་བས་སེམས་ཅན་ཉོན་མོངས་པ་ཅན་རྣམས་ཀྱི་རྒྱུད་ལ་རང་བཞིན་དག་པའི་ཆོས་ཉིད་རིགས་ཁམས་བདེ་བར་གཤེགས་པའི་སྙིང་པོ་འདི་ལྟར་དུ་བཞུགས་ཀྱང་། དེ་ཉིད་གློ་བུར་གྱི་དྲི་མས་བསྒྲིབས་ཏེ་རང་གི་ཡོན་ཏན་གྱི་ནུས་པ་མངོན་དུ་མ་གྱུར་པས་ཤིན་ཏུ་ཉམ་ཐག་པར་གཟིགས་ནས། དྲི་མ་དེ་སེལ་བྱེད་དམ་པའི་ཆོས་སྟོན་པ་སོགས་ཐབས་ཚུལ་དུ་མའི་སྒོ་ནས་གདུལ་བྱའི་ཡུལ་ལ་ཕྲིན་ལས་མཉམ་པར་འཇུག་པས་འཇིག་རྟེན་ན་སངས་རྒྱས་འབྱུང་བ་དོན་ཡོད་པ་ཉིད་ཡིན་ཏེ། དེའི་ཚུལ་དཔེ་དགུ་བོའི་སྒོ་ནས་རྒྱས་པར་སྤྱིར་བསྟན་ནས། བྱེ་བྲག་ཏུ་གསུངས་པའི་དྲི་མ་དང་། སྙིང་པོ་རྣམས་ཀྱི་དཔེ་དོན་ཕན་ཚུན་ཆོས་མཐུན་སོ་སོར་སྦྱར་ཏེ་གོ་བདེ་བར་བརྗོད་ན། ཁམས་གོང་མའི་བྱིས་པའི་རྒྱུད་ལ་ཡོད་པའི་འདོད་ཆགས་བག་ལ་ཉལ་ལ་སོགས་པའི་སྒྲིབ་པ་མེ་ཏོག་པདྨ་མདོག་ངན་ལྟ་བུའི་ནང་ན། རང་བཞིན་གྱིས་འོད་གསལ་བའི་ཆོས་ཀྱི་དབྱིངས་སངས་རྒྱས་རྣམས་ཀྱི་སོ་སོ་རང་གིས་རིག་པའི་ཡེ་ཤེས་ཀྱི་སྤྱོད་ཡུལ་མཚན་ཉིད་པ་རྟོགས་པ་ཆོས་སྐུ་འཇིག་རྟེན་ན་དཔེ་ལས་འདས་པའི་ཕྱིར་སངས་རྒྱས་ཀྱི་སྐུ་མཚན་དཔེས་བརྒྱན་པ་ལྟ་བུ་གནས་པ་དང་། དེ་བཞིན་དུ་ཞེ་སྡང་བག་ལ་ཉལ་ལ་སོགས་པའི་སྒྲིབ་པ་སྲོག་ཆགས་སྦྲང་མའི་ཚོགས་ཀྱིས་བསྐོར་བ་ལྟ་བུའི་ནང་ན། ཆོས་ཀྱི་སྐུའི་རྒྱུ་མཐུན་པ་དོན་དམ་པའི་བདེན་པའི་དབང་དུ་བྱས་ཏེ་ཆོས་ཐམས་ཅད་དེ་བཞིན་ཉིད་དུ་རོ་གཅིག་པར་སྟོན་པ་ཟབ་ཅིང་གཏིང་དཔག་དཀའ་བའི་བསྟན་པ་ཆོས་སྐུ་སྦྲང་རྩི་ལྟ་བུ་གནས་པ་དང་། གཏི་མུག་བག་ལ་ཉལ་སོགས་ཀྱི་སྒྲིབ་པ་སྦུན་པ་ལྟ་བུའི་ནང་ན། རྒྱ་ཆེ་བ་ཀུན་རྫོབ་ཀྱི་བདེན་པའི་དབང་དུ་བྱས་ཏེ་རྣམ་པ་སྣ་ཚོགས་པ་སྟོན་པའི་བསྟན་པ་ཆོས་སྐུ་ས་ལུ་དང་ནས་ལ་སོགས་པ་འབྲུའི་སྙིང་པོ་ལྟ་བུ་གནས་པ་སྟེ་དེ་ལྟར་ཆོས་སྐུ་མཚོན་པའི་དཔེ་གསུམ་དང་། འདོད་ཁམས་ཀྱི་བྱིས་པའི་རྒྱུད་ལ་མངོན་གྱུར་དུ་ཡོད་པའི་དུག་གསུམ་གྱི་ཀུན་སློང་དྲག་པོ་ལ་སོགས་པའི་སྒྲིབ་པ་མི་གཙང་ལྗན་ལྗིན་རུལ་བ་ལྟ་བུའི་ནང་ན། ཆོས་ཉིད་དེ་བཞིན་ཉིད་ངོ་བོ་ནམ་དུའང་འགྱུར་བ་མེད་པ་གསེར་སྦྲམ་བཟང་པོ་ལྟ་བུ་གནས་པ་སྟེ་དེ་བཞིན་ཉིད་མཚོན་པར་བྱེད་པའི་དཔེ་གཅིག་དང་། ཉན་རང་དགྲ་བཅོམ་པ་རྣམས་ཀྱི་རྒྱུད་ལ་ཡོད་པའི་མ་རིག་བག་ཆགས་ཀྱི་ས་ལ་སོགས་པའི་སྒྲིབ་པ་མི་དབུལ་པོའི་ཁྱིམ་གྱི་ས་ལྟ་བུའི་ནང་ན། འབད་རྩོལ་གྱིས་གསར་དུ་སྒྲུབ་པ་མ་ཡིན་པར་རང་བཞིན་གྱིས་གནས་པའི་རིགས་བྲལ་འབྲས་ཆོས་སྐུའི་ཡོན་ཏན་ཟད་མི་ཤེས་པའི་རྟེན་གྱུར་པ་གཏེར་ལྟ་བུ་གནས་པ་དང་། ཐེག་པ་ཐུན་མོང་གི་སོ་སྐྱེ་སློབ་པའི་རྒྱུད་ལ་ཡོད་པའི་སྒྲིབ་པ་བདེན་པ་མཐོང་བ་ཙམ་གྱིས་སྤང་བར་བྱ་བ་ལ་སོགས་པའི་སྒྲིབ་པ་ཤིང་གི་འབྲས་ཤུན་གྱི་པགས་སྦུབས་དང་འདྲ་བའི་ནང་ན། ཡང་དག་པར་བླང་བ་རྒྱས་འགྱུར་གྱི་རིགས་ཀྱི་ཁམས་རྐྱེན་གྱིས་གསོས་པ་ལས་སྨིན་འབྲས་གཟུགས་སྐུའི་ཡོན་ཏན་གསལ་ཞིང་རྫོགས་པར་བྱེད་པའི་རྟེན་དུ་གྱུར་པ་འབྲས་བུ་དང་བཅས་པའི་ལྗོན་ཤིང་འབད་རྩོལ་གྱིས་སྐྱེ་བ་ལྟ་བུ་གནས་པ་དང་། འཕགས་པ་སློབ་པའི་རྒྱུད་ལ་ཡོད་པའི་དྲི་མ་མཐོང་ཟིན་གོམས་པར་བྱེད་པ་སྒོམ་པའི་ལམ་གྱིས་སྤང་བྱ་སོགས་ཀྱི་སྒྲིབ་པ་རགས་པ་ཟད་པའི་ལྷག་མ་གོས་ཧྲུལ་{རུལ} དྲི་མ་ཅན་ལྟ་བུའི་ནང་ན། ཟག་པ་མེད་པའི་ཡོན་ཏན་གྱི་དཔལ་གྱིས་མཛེས་པའི་དོན་དམ་ངོ་བོ་ཉིད་སྐུ་རིན་པོ་ཆེ་ལས་གྲུབ་པའི་སངས་རྒྱས་ཀྱི་སྐུ་གཟུགས་ལྟ་བུ་གནས་པ་དང་། ཁྱད་པར་གྱི་ཐེག་པ་བ་མ་དག་ས་བདུན་ལ་གནས་པའི་རྒྱལ་སྲས་ཀྱི་རྒྱུད་ཀྱི་དྲི་མ་སོགས་སྒྲིབ་བྱེད་བུད་མེད་ངན་མའི་མངལ་སྦུབས་ལྟ་བུའི་ནང་ན། ཐེག་པ་ཆེན་པོའི་ཆོས་ཀྱི་རྒྱལ་སྲིད་ལ་རྫོགས་པར་ལོངས་སྤྱོད་པའི་སྐུ་འཁོར་ལོས་སྒྱུར་བའི་རྒྱལ་པོ་ལྟ་བུ་གནས་པ་དང་། དག་པ་ས་གསུམ་ལ་བརྟེན་པའི་དྲི་མ་སོགས་སྒྲིབ་བྱེད་ལུགས་གཏོང་བའི་ས་འདམ་ནག་པོ་ལྟ་བུའི་ནང་ན། གང་འདུལ་གདུལ་བྱའི་བློ་ངོར་རྣམ་འཕྲུལ་སྣ་ཚོགས་པ་སྟོན་པ་སྤྲུལ་པའི་སྐུ་གསེར་གྱི་གཟུགས་བརྙན་ལྟ་བུ་གནས་པ་སྟེ་སྐུ་གསུམ་འགྲུབ་པའི་རིགས་ཀྱི་དཔེ་ལྔ་སྟེ་དགུའོ། །འདི་རྣམས་སོ་སོར་ཆོས་མཐུན་ཡོད་པའི་དབང་གིས་དཔེ་དོན་སྦྱར་བ་ཡིན་གྱི། དོན་གང་གི་སྒྲིབ་བྱེད་དུ་བཤད་པ་དེ་ཁོ་ན་ལས་གཞན་ལ་མི་སྒྲིབ་པ་ནི་མ་ཡིན་ནོ། །དེ་ལྟར་གདོད་མ་ནས་ལྷུན་གྱིས་གྲུབ་པའི་རང་བྱུང་འདུས་མ་བྱས་པའི་ཁམས་འདི། ཐ་ན་མནར་མེད་དུ་སྐྱེས་པ་ཡན་ཆོད་ཀྱི་སེམས་ཅན་ཐམས་ཅད་ལ་ཆོས་ཉིད་ཀྱི་ཚུལ་དུ་ཡེ་ནས་འདུ་འབྲལ་མེད་པར་ཡོད་ཀྱང་སྒྲིབ་པས་བསྒྲིབས་ཏེ་གང་ཟག་སོ་སོའི་སྐྱེ་བོ་དང་། ཉན་རང་དང་། བྱང་སེམས་གསར་ཞུགས་རྣམས་ཀྱིས་ནི་ཡིད་ཆེས་པའི་ལུང་ཙམ་ལ་བརྟེན་ནས་དད་ཅིང་མོས་ལ་ཡིད་ཆེས་པས་དོན་སྤྱིའི་ཚུལ་གྱིས་རྟོགས་པར་བྱས་ནས་བསལ་བཞག་དང་བྲལ་བའི་དོན་ལ་མཉམ་པར་བཞག་པས་གདོད་ཟག་མེད་འཕགས་པའི་ཡེ་ཤེས་རྒྱུད་ལ་སྐྱེ་བར་འགྱུར་གྱི་ད་ལྟ་ནི་མངོན་དུ་བྱར་ཡོད་པ་མ་ཡིན་ཏེ། རང་བྱུང་རྣམས་ཀྱི་དོན་དམ་དེ། །དད་པ་ཉིད་ཀྱིས་རྟོགས་བྱ་ཡིན། །ཉི་མའི་དཀྱིལ་འཁོར་འོད་འབར་བ། །མིག་མེད་པས་ནི་མཐོང་བ་མེད། །ཅེས་གསུངས་པའི་ཕྱིར་རོ། །བཞི་པ་ཁམས་ཀྱི་རང་བཞིན་རྟོགས་དཀའ་བ་དེ་བྱིས་པ་སོ་སོའི་སྐྱེ་བོ་རྣམས་ལ་བསྟན་པའི་དགོས་པ་ནི། སེམས་ཞུམ་སེམས་ཅན་དམན་ལ་བརྙས་པ་དང་། །ཡང་དག་མིན་འཛིན་ཡང་དག་ཆོས་ལ་སྐུར། །བདག་ཆགས་ལྷག་པའི་སྐྱོན་ལྔ་གང་དག་ལ། །ཡོད་པ་དེ་དག་དེ་སྤང་དོན་དུ་གསུངས། །ཞེས་གསུངས་པ་ལྟར། སེམས་ཀྱི་རང་བཞིན་ནམ་མཁའ་ལྟ་བུ་ལ་སྒྲིབ་བྱེད་གློ་བུར་བ་ཉོན་མོངས་པའི་ཀུན་ནས་ཉོན་མོངས་པ་དང་། ལས་ཀྱི་ཀུན་ནས་ཉོན་མོངས་པ་དང་། སྐྱེ་བའི་ཀུན་ནས་ཉོན་མོངས་པ་སྟེ་ཉོན་མོངས་པ་གསུམ་གྱིས་བསྡུས་པའི་ཆོས་ཐམས་ཅད་རང་བཞིན་གྱིས་བདེན་པ་མེད་པ་སྤྲིན་དང་རྨི་ལམ་དང་སྒྱུ་མ་ལྟ་བུར་བསྟན་པས་བདེན་འཛིན་གྱི་ཞེན་པ་ལྡོག་ཀྱང་། དེ་བཞིན་གཤེགས་པའི་སྙིང་པོ་ཡོད་པར་མ་བསྟན་ན། རང་ཉིད་བྱང་ཆུབ་ཏུ་བརྩོན་པའི་གེགས་སེམས་ཞུམ་པ་དང་། གཞན་ལ་བརྩེ་བའི་གེགས་སེམས་ཅན་དམན་པ་ལ་བརྙས་པ་དང་། ཡང་དག་པའི་ཤེས་པ་སྐྱེ་བའི་གེགས་སྤང་བྱ་གློ་བུར་བ་གཤིས་ལ་མེད་པ་ལ་ཡོད་པར་སྒྲོ་འདོགས་པ་དང་། རྣམ་དབྱེར་མེད་པའི་ཡོན་ཏན་གྱི་ཚོགས་དང་ལྡན་པའི་སྙིང་པོའི་ཁམས་ཡོད་པ་ལ་མེད་པར་སྐུར་བ་འདེབས་པ་དང་། མཉམ་པ་ཉིད་ཀྱི་དོན་རྟོགས་པའི་གེགས་བདག་ལ་ལྷག་པར་ཆགས་པ་སྟེ། དེ་ལྟ་བུའི་སྐྱོན་ལྔ་འབྱུང་བས་དེ་ཉིད་སྤང་བའི་ཕྱིར་ཆོས་དབྱིངས་གསལ་བོར་སྟོན་པར་མཛད་པ་སྟེ། དེ་ལྟར་བསྟན་ཅིང་ཐོས་ན། རང་གི་རང་བཞིན་མངོན་དུ་གྱུར་པ་ན་བྱང་ཆུབ་ཆེན་པོའོ་སྙམ་དུ་ལམ་གྱི་དཀའ་སྤྱད་ལ་སྤྲོ་བ་དང་། གཞན་གྱི་རང་བཞིན་ཡང་སངས་རྒྱས་སུ་ཤེས་པས་སྟོན་པ་བཞིན་དུ་གུས་པ་དང་། ཀུན་རྫོབ་གློ་བུར་གྱི་དྲི་མ་བདག་གཉིས་མེད་པ་ལ་མེད་པར་ཤེས་པའི་ཤེས་རབ། དོན་དམ་སྙིང་པོའི་ཁམས་ཡོད་པ་ལ་ཡོད་པར་ཤེས་པའི་ཡེ་ཤེས། བདག་གཞན་མཉམ་ཉིད་དུ་རྟོགས་པས་བྱམས་པ་ཆེན་པོ་རྒྱུད་ལ་སྐྱེ་བར་འགྱུར་ཞིང་། དེ་ལས་ལམ་རིམ་གྱིས་བསྒྲུབས་པས་དོན་གཉིས་མཐར་ཕྱིན་པའི་བྱང་ཆུབ་ཆེན་པོ་མངོན་དུ་བྱེད་པར་འགྱུར་བ་ཡིན་ནོ། །འདིར་བཤད་པའི་ཡོད་མེད་ཀྱི་སྒྲ་འཇུག་ཡུལ་ནི། གང་གནས་སྣང་མཐུན་མི་མཐུན་ལ་བདེན་གཉིས་སུ་བཞག་ནས་གཙོ་བོར་ཐ་སྙད་དཔྱོད་བྱེད་ཀྱི་ཚད་མའི་ངོར་བཞག་པ་ཡིད་བཞིན་མཛོད་སོགས་ལས་བསྟན་པ་ལྟར་ཡིན་ཞིང་། གཞན་ཡང་སྐབས་འདིར་ཤེས་པར་བྱ་བ། གོང་དུ་བསྟན་པ་བཞིན། བཀའ་བར་པར་བསྟན་པའི་དབྱིངས་སྟོང་ཉིད་དང་། འདིར་བསྟན་རང་བཞིན་གྱིས་འོད་གསལ་བའི་རིག་པའི་ཡེ་ཤེས་གཉིས་འགལ་མེད་ཟུང་དུ་ཆུད་པའི་བློ་མཆོག་མངའ་བ་རྣམས་ལ། དེ་གཉིས་ཕན་ཚུན་གཅིག་གྲོགས་སུ་གཅིག་འགྱུར་བས་ནམ་ཡང་དབྱེ་བསལ་མི་དགོས་ཀྱང་། དེ་ལྟར་མ་རྟོགས་པའི་བློ་ཆུང་བ་དག རྫིང་གི་གསེག་མ་དང་གྱོ་མོ་ལ་ནོར་བུར་འཁྲུལ་པའི་དཔེས་མདོ་ནས་གསུངས་པ་ལྟར་སོམ་ཉིའི་དྲྭ་བར་ཚུད་ཉེ་བས། ཚུལ་དེ་ལ་དགོངས་ཏེ་ཀུན་མཁྱེན་བླ་མས་འོད་གསལ་རིན་པོ་ཆེའི་མཛོད་དུ། སྔོན་དགེ་བའི་རྩ་བ་མ་བསྐྲུན། ད་ལྟའང་དགེ་བའི་བཤེས་གཉེན་དང་མ་མཇལ། ངེས་པ་དོན་གྱི་ཆོས་ཟབ་མོ་མ་ཐོས་པ་རྣམས་ན་རེ། སེམས་ཉིད་སྟོང་པ་ཉིད་ལ་སངས་རྒྱས་ཀྱི་རང་བཞིན་ནམ་སྙིང་པོ་ཟེར་གྱི་མཚན་དཔེ་སྟོབས་སོགས་ཀྱི་ཆོས་སུ་ཡོད་པ་ག་ལ་སྲིད། གནས་ལུགས་བདག་མེད་པ་ནམ་མཁའ་ལྟ་བུར་ཡུམ་བར་པ་སོགས་ལས་གསུངས་པའི་ཕྱིར་སྙིང་པོ་བསྟན་པའི་མདོ་རྣམས་དྲང་དོན་ཡིན་ནོ། །གལ་ཏེ་དེ་ལྟར་མ་ཡིན་ན་མུ་སྟེགས་པའི་བདག་རྟག་པ་དང་ཁྱད་མེད་པ་ཁོ་ནའོ་ཞེས་ངེས་པ་དོན་གྱི་ཆོས་ལ་རྒྱབ་ཀྱིས་ཕྱོགས་པར་སྣང་ངོ་། །ཚུལ་དེ་ལྟ་བུ་བཟང་པོ་མ་ཡིན་པས་རེ་ཞིག་ལུང་ཉིད་ཚད་མར་བྱས་ཏེ་སྤང་བ་ནི། ཅི་བཅོམ་ལྡན་འདས་ཀྱིས་བཀའ་འཁོར་ལོ་གསུམ་དུ་གསུངས་པ་ལས་གནས་འདི་ནི་བཀའ་ཐ་མ་དོན་དམ་རྣམ་པར་ངེས་པའི་ཆོས་ཀྱི་འཁོར་ལོ་གསུངས་པའང་ཁྱོད་ཀྱིས་མ་ཤེས། སྟོང་ཉིད་རྐྱང་པ་དོན་དམ་ཡིན་ན། འཁོར་ལོ་གསུམ་ལ་ཐ་དད་དུ་བསྟན་པའང་ཇི་ལྟར་འཐད། སྟོང་ཉིད་དྲང་དོན་དུ་གསུངས་ཀྱི། དེ་ཡང་གནས་ལུགས་ཀྱིས་སྐྲག་པ་དང་། ལས་དང་པོ་པས་བདག་ཏུ་འཛིན་པ་དགག་པ་ཙམ་ལ་དགོངས་ཏེ། འཕགས་པ་ཡོངས་སུ་མྱ་ངན་ལས་འདས་པ་ཆེན་པོའི་ཆོས་ཀྱི་རྣམ་གྲངས་ལས། བུད་མེད་བུ་ཁ་མྱགས་གསོ་བའི་དཔེ་སྔོན་དུ་བཏང་ནས་གསུངས་པ། རིགས་ཀྱི་བུ། དེ་བཞིན་གཤེགས་པ་ཡང་དེ་བཞིན་དུ་སེམས་ཅན་ཐམས་ཅད་བསྒྲལ་བའི་ཕྱིར། སེམས་ཅན་ཐམས་ཅད་ལ་བདག་མེད་པའི་ནན་ཏན་བྱེད་པ་སྟོན་ཏེ། དེ་ལ་ནན་ཏན་བྱས་པས་བདག་ཅེས་བྱ་བའི་སེམས་མེད་དེ་ཡོངས་སུ་མྱ་ངན་ལས་བཟླའོ། །དེ་ལའང་འཇིག་རྟེན་རྒྱང་འཕེན་པའི་ངན་པར་ལྟ་བ་བསལ་བའི་ཕྱིར། འཇིག་རྟེན་རྒྱང་འཕེན་པའི་ཆོས་ལས་འདས་པར་བསྟན་པའི་ཕྱིར། གཞན་ཡང་འཇིག་རྟེན་རྒྱང་འཕེན་པ་དག་བདག་ཏུ་ལྟ་བ་ཡང་དག་པར་མ་ཡིན་པར་བསྟན་པའི་ཕྱིར། བདག་མེད་པའི་ཆོས་བསྒོམས་པས་ཡོངས་སུ་དག་པའི་ལུས་སུ་འགྱུར་བའི་ཕྱིར། ཇི་ལྟར་བུད་མེད་དེས་བུའི་ཕྱིར་མཁྲིས་པ་བསྐུས་པ་བཞིན་དུ། དེ་བཞིན་གཤེགས་པ་ཡང་དེ་དང་འདྲ་སྟེ། སྟོང་པ་ཉིད་བསྒོམ་པའི་ཕྱིར་ཆོས་ཐམས་ཅད་བདག་མེད་ཅེས་གསུངས་སོ། །ཇི་ལྟར་བུད་མེད་དེས་ནུ་མ་ཕྱིར་བཀྲུས་ཏེ་བོས་ནས་ནུ་ཞོ་བླུད་དོ་ཞེས་བྱ་བ་བཞིན་དུ། ངས་དེ་བཞིན་གཤེགས་པའི་སྙིང་པོ་བསྟན་པ་ཡང་དེ་དང་འདྲ་སྟེ། དགེ་སློང་ཁྱོད་ཀྱང་མ་སྐྲག་པར་ཇི་ལྟར་བུ་དེ་ལ་མས་བོས་ཏེ་ནུ་ཞོ་བགས་ཀྱིས་འཐུང་བ་བཞིན་དུ། དགེ་སློང་ཁྱོད་ཀྱང་བྱེ་བྲག་ཤེས་པར་གྱིས་ཤིག དེ་བཞིན་གཤེགས་པའི་སྙིང་པོ་ནི་མེད་པར་བྱ་བ་མ་ཡིན་ནོ། །ཞེས་དང་། སྔོན་ཤེས་རབ་ཀྱི་ཕ་རོལ་དུ་ཕྱིན་པའི་མདོ་བརྗོད་པ་ལས། ངས་ཆོས་ཐམས་ཅད་སྟོང་པ་ཉིད་དུ་བསྟན་པ་གང་ཡིན་པ་དེ་ནི། བྱིས་པ་རྣམས་བདག་ཏུ་མངོན་པར་ཞེན་པ་ལས་ཡོངས་སུ་དྲང་བའི་ཕྱིར་བཤད་ཀྱིས་ཡང་དག་པར་ན་དེ་བཞིན་གཤེགས་པའི་སྙིང་པོ་ཉག་གཅིག་དོན་དམ་པའི་བདེན་པའོ། །ཞེས་གསུངས་སོ། །མུ་སྟེགས་ཀྱི་བདག་རྟག་པ་དང་མི་མཚུངས་ཏེ། སྙིང་པོ་ནི་ཡེ་ནས་འོད་གསལ་ཞིང་ལུས་ལ་གནས་ཀྱང་རྟག་མི་རྟག་ལས་འདས་པས་རྟག་པ་ཁོ་ནར་མི་འདོད་པ་དང་། འོད་གསལ་བ་དེ་བླ་མའི་མན་ངག་གིས་མཐོང་དུ་ཡོད་པའི་ཕྱིར་སུས་ཀྱང་མི་མཐོང་བའི་ལྐོག་གྱུར་དུ་མི་འདོད་པ་དང་། ངོ་བོ་སྟོང་གསལ་མཐའ་བྲལ་ཡིན་པས་མཐེ་བོང་ལ་སོགས་པའི་དངོས་པོ་རང་མཚན་དང་ཆོས་མི་སྦྱོར་བ་དང་། དངོས་པོ་དང་མཚན་མར་མེད་པས་ལུས་ཆེ་ཆུང་ལ་སྙིང་པོ་ཆེ་ཆུང་དང་བཟང་ངན་དུ་མི་འདོད་པ་སོགས་ཁྱད་པར་ཤིན་ཏུ་མང་ངོ་། །མུ་སྟེགས་ཀྱིས་དེ་ལྟར་སྨྲས་པ་དེ་ནི་སངས་རྒྱས་ཀྱི་སྙིང་པོ་དང་ཀུན་ཏུ་མི་མཚུངས་ཀྱང་མིང་ཙམ་མམ་ཚིག་གི་བརྗོད་པ་ལས་འདྲའོ་སྙམ་དུ་འཁྲུལ་པས་ཁྱེད་ཅག་བློ་གྲོས་བླུན་པོར་ཁོ་བོ་ཅག་གིས་མཐོང་བ་ནི། སྔོན་རྒྱལ་པོའི་རལ་གྲི་སྟོར་བ་ལས་དབུལ་པོ་ཞིག་གི་རྨི་ལས་དུ་རལ་གྲི་རྨིས་པ་བླ་རྡོལ་དུ་ཤོར་བ་ལ་རལ་གྲི་བརྩད་པས་མིང་ཙམ་ལས་དོན་མ་མཐོང་བས་རལ་གྲི་མ་མཐོང་བར་རྣམ་པར་བཞག་པ་དང་འདྲ་སྟེ། ཞེས་སོགས་ལུང་དང་བཅས་ཏེ་གསུངས་པ་དང་། སྙན་བརྒྱུད་རྒྱབ་ཆོས་ཟབ་དོན་གནད་ཀྱི་མེ་ལོང་དུ། བཀའ་བར་བས་ཆོས་ཐམས་ཅད་སྟོང་ཉིད་དུ་བསྟན་པ་ནི། ཕྱི་རོལ་པ་གང་ཟག་གི་བདག་ཏུ་ལྟ་བ་དང་། ཉན་ཐོས་དང་རང་སངས་རྒྱས་ཆོས་ཀྱི་བདག་ཏུ་འཛིན་པ་དང་། བྱང་ཆུབ་སེམས་དཔའ་ལས་དང་པོ་པ་དངོས་པོ་ལ་མངོན་པར་ཞེན་ཅིང་། གཉེན་པོ་ལ་མཆོག་ཏུ་འཛིན་པ་རྣམས་དོན་དམ་སྟོང་པ་ཉིད་ཀྱི་ཆོས་ལ་དྲང་བའི་ཕྱིར་སྟོང་པ་ཉིད་ནམ་མཁའ་ལྟ་བུ་གསུངས་ཏེ། དགོངས་གཞི་སེམས་ཉིད་རང་བཞིན་གྱི་འོད་གསལ་བ་དོན་དམ་སྟོང་པ་ཉིད་ལ་དགོངས་པའོ། །དགོས་ཆེད་སོ་སོའི་འཛིན་པ་དང་བྲལ་བར་བྱེད། དངོས་ལ་གནོད་བྱེད་ནི། རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་པ་དང་། རྒྱུད་བླ་མའི་འགྲེལ་པར། དེ་ལ་སྟོང་པ་ཉིད་ལ་སེམས་རྣམ་པར་གཡེངས་པ་ནི། ཐེག་པ་ལ་གསར་དུ་ཡང་དག་པར་ཞུགས་པའི་བྱང་ཆུབ་སེམས་དཔའ་འམ། སྟོང་པ་ཉིད་ཀྱི་ཚུལ་གྱིས་དེ་བཞིན་གཤེགས་པའི་སྙིང་པོ་ལ་ཉམས་པ་དག་ལ་བརྗོད་དོ། །ཞེས་པ་དང་། དགོངས་འགྲེལ་ལས། ངས་ངོ་བོ་ཉིད་མེད་པ་གསུམ་ལ་དགོངས་ནས་ཆོས་ཐམས་ཅད་སྟོང་པ་ཉིད་ཅེས་བསྟན་ཏོ། །ཞེས་པ་དང་། མྱང་འདས་ལས། ངས་ཤེས་རབ་ཀྱི་ཕ་རོལ་དུ་ཕྱིན་པར་ཆོས་ཐམས་ཅད་སྟོང་པ་ཉིད་དུ་བསྟན་པ་ནི། ཉན་ཐོས་དང་རང་སངས་རྒྱས་དང་ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་རྣམས་དང་གཞན་མུ་སྟེགས་ཅན་རྣམས་ཀྱིས་དངོས་པོ་ལ་མངོན་པར་ཞེན་པ། བདག་ཏུ་ལྟ་བ། འདུ་ཤེས་ཀྱི་འཛིན་པས་བཅིངས་པ་རྣམས་ལ་ཕན་གདགས་པའི་ཕྱིར་གསུངས་ཀྱི། དེ་ཁོ་ན་ཉིད་དུ་ན། ཆོས་ཐམས་ཅད་རང་བཞིན་གྱིས་འོད་གསལ་བ་སྟེ། དེ་ཁོ་ན་ཉིད་ཀྱི་དོན་ལྷུན་གྱིས་གྲུབ་པའི་ངོ་བོ་ཉིད་དུ་རིག་པར་བྱའོ། །ཞེས་གསུངས་པས་གནོད་དོ། །ཞེས་པ་ནས། ནམ་མཁའ་འདྲ་བའི་ཆོས་ཀྱི་སྒོ་འདི་ནི། །རང་བཞིན་དག་པའི་སྤྱོད་ཡུལ་ངོ་མཚར་རྨད། །གང་གིས་དེ་རྟོགས་རྒྱལ་བའི་གོ་འཕང་འཛིན། །ཟབ་ཅིང་རྒྱ་ཆེའི་དོན་ལ་མཁས་པ་ཡིན། །ཞེས་པའི་བར་གྱིས་དྲང་ངེས་ཀྱི་དབྱེ་བསལ་དང་། སྐྱོན་ཡོན་དགོས་པ་ཕན་ཡོན་བཅས་རྒྱ་ཆེར་གསུངས་པ་དང་། གཞན་ངེས་དོན་ཤིང་རྟ་ཆེན་མོ་སོགས་ལས་ཀྱང་ཡང་ཡང་གསུངས་པས་ཤེས་ལ། ཀུན་མཁྱེན་རྟོན་པ་བཞི་ལྡན་དང་། རྒྱལ་དབང་རང་བྱུང་རྡོ་རྗེ་བརྒྱུད་པ་དང་བཅས་པ་སོགས་ངེས་དོན་སྙིང་པོའི་སེང་གེའི་སྒྲ་སྒྲོགས་པར་མཛད་པ་པོ་གཞན་རྣམས་ཀྱི་དགོངས་པ་ནི་ཡོངས་སུ་གྲགས་པས་འདིར་མ་སྨོས་ལ། རྗེ་བརྒྱད་པ་མི་བསྐྱོད་ཞབས་ཀྱིས་ཀྱང་། འདི་ལ་གངས་ཅན་གྱི་མཁས་པ་འགའ། རྒྱུད་བླ་མར་དེ་བཞིན་གཤེགས་པའི་སྙིང་པོ་སེམས་ཅན་ལ་ཡོད་ཅེས་གསུངས་པ་དེ་དྲང་བའི་དོན་ཡིན་ལ། ཅིའི་ཕྱིར་ན་དགོས་པ་སྐྱོན་ལྔ་སྤངས་པའི་ཕྱིར་གསུངས་པར་འདོད་ལ། དེ་ལྟར་ན་སྐྱོན་ལྔ་སྤངས་མི་དགོས་པར་འགྱུར་ཏེ། སེམས་ཅན་ལ་བརྙས་ནའང་སྐྱོན་མིན་ཏེ། སེམས་ཅན་ལ་དེ་བཞིན་གཤེགས་པའི་སྙིང་པོ་མེད་པ་དང་། ཡང་དག་པར་བདེ་གཤེགས་སྙིང་པོར་ཆེས་འཛིན་པ་ལའང་དགོས་པ་མེད་དེ། དེ་དྲང་དོན་ཡིན་པ་དང་། ཆོས་སྐུ་བདེ་གཤེགས་སྙིང་པོ་ལ་སྐུར་བ་བཏབ་པ་ལའང་སྐྱོན་མེད་དེ། ཡེ་ནས་མེད་པ་ལ་སྐུར་འདེབས་ཀྱི་མཐར་མི་ལྷུང་བས་གནས་ཚུལ་བརྗོད་པའི་ཕྱིར་དང་། སེམས་ཞུམ་པའང་འོས་པར་འགྱུར་ཏེ། བདེ་གཤེགས་སྙིང་པོ་རང་རྒྱུད་ལ་མེད་པས་སེམས་མི་ཞུམ་པའི་འཛིན་སྟངས་འཆང་བའང་དོན་ལ་མི་གནས་པའི་འཛིན་པ་ཡིན་པས་སོ། །གཞན་ཡང་དེ་ལྟར་བྱས་ན། འཕགས་པ་ཐོགས་མེད་ལ་སོགས་པའང་ཚད་ལྡན་གྱི་སྐྱེས་བུར་མི་འགྱུར་ཏེ། བཅོམ་ལྡན་འདས་དང་། བྱམས་པ་ལ་སོགས་ཀྱི་གསུངས་དགོས་པ་དང་དངོས་ལ་གནོད་བྱེད་ཡོད་པའི་དམ་པའི་ཆོས་རྣམས་ལུགས་འདིར་དགོངས་པ་ཅན་མིན་པར་བཀྲལ་བས་སོ། །དེས་ན་འཕགས་པ་ཐོགས་མེད་སྐྱོབ་ལ་འགོམ་པར་ནུས་པའི་རྗེས་སུ་འབྲང་མི་ནུས་པས། ཁོ་བོ་ཅག་རྣམས་ནི་འཕགས་པ་ཉིད་ཀྱི་རྗེས་སུ་འབྲང་བར་བྱའོ། །ཞེས་གསུངས་པ་ཉིད་དོན་ལ་གནས་པ་ཡིན་ཞིང་། གཞན་ཡང་། མདོ་མྱང་འདས་ལས། རིགས་ཀྱི་བུ་འདི་ལྟ་སྟེ། དཔེར་ན་བ་ལས་འོ་མ་འབྱུང་སྟེ། འོ་མ་ལས་ནི་ཞོ་འབྱུང་། ཞོ་ལས་ནི་མར་འབྱུང་། མར་ལས་ནི་ཞུན་མར་འབྱུང་། ཞུན་མར་ལས་ནི་མར་གྱི་སྙིང་པོ་འབྱུང་། མར་གྱི་སྙིང་པོ་ཞེས་བྱ་བ་ནི་མཆོག་དང་ཕུལ་དུ་གྱུར་པ་སྟེ། གང་ཞིག་གིས་འཐུང་བ་ན་ནད་རྣམ་པ་སྣ་ཚོགས་འབྱང་བར་འགྱུར་ཏེ་སྨན་ཐམས་ཅད་ཀྱི་ནང་དུའང་འགྲོའོ། །རིགས་ཀྱི་བུ་སངས་རྒྱས་བཅོམ་ལྡན་འདས་ཀྱང་དེ་དང་འདྲ་སྟེ། སངས་རྒྱས་ལས་ནི་མདོ་སྡེ་བཅུ་གཉིས་འབྱུང་ངོ་། །མདོ་སྡེ་བཅུ་གཉིས་ལས་ནི་མདོའི་སྡེ་འབྱུང་ངོ་། །མདོའི་སྡེ་ལས་ནི་ཤིན་ཏུ་རྒྱས་པའི་སྡེ་འབྱུང་ངོ་། །ཤིན་ཏུ་རྒྱས་པའི་མདོ་ལས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་ངོ་། །ཤེས་རབ་ཀྱི་ཕ་རོལ་དུ་ཕྱིན་པ་ལས་ནི་མྱ་ངན་ལས་འདས་པ་ཆེན་པོ་མར་གྱི་སྙིང་པོ་ལྟ་བུ་འབྱུང་ངོ་། །མར་གྱི་སྙིང་པོ་ཞེས་བྱ་བ་ནི་སངས་རྒྱས་ཀྱི་རང་བཞིན་གྱི་དཔེའོ། །སངས་རྒྱས་ཀྱི་རང་བཞིན་ཞེས་བྱ་བ་ནི་དེ་བཞིན་གཤེགས་པའོ། །རིགས་ཀྱི་བུ་དེ་བས་ན། དེ་བཞིན་གཤེགས་པའི་ཡོན་ཏན་ནི་ཚད་མེད་མཐའ་ཡས་དཔག་ཏུ་མེད་པ་ཡིན་ནོ། །ཞེས་དང་། སེང་གེའི་སྒྲ་སྒྲོགས་པ་ནི་སེམས་ཅན་ཐམས་ཅད་ལ་སངས་རྒྱས་ཀྱི་རང་བཞིན་ཡོད་པ་དང་། དེ་བཞིན་གཤེགས་པ་རྟག་ཏུ་གནས་ཤིང་མི་འགྱུར་མི་འཕོ་བ་ངེས་པར་བཤད་པའོ། །ཞེས་དང་། རིགས་ཀྱི་བུ། གནས་སྟོང་པར་མང་དུ་བཤད་ཀྱང་སེང་གེའི་སྒྲ་བསྒྲགས་པ་མི་བྱ་སྟེ། མཁས་པ་ཤེས་ར བ་ཅན་གྱི་འཁོར་མང་པོའི་ནང་དུ་བསྒྲགས་པ་ནི་སེང་གེའི་སྒྲ་ཆེན་པོ་སྒྲོགས་པ་ཞེས་བྱའོ། །དེ་ལ་སེང་གེའི་སྒྲ་སྒྲོགས་པ་ནི། ཆོས་ཐམས་ཅད་མི་རྟག་པ། སྡུག་བསྔལ་བ། བདག་མེད་པ། ཡོངས་སུ་མ་དག་པ་ཞེས་མི་འཆད་དེ། དེ་བཞིན་གཤེགས་པ་རྟག་པ། བདེ་བ། བདག་དང་། ཡོངས་སུ་དག་པ་འབའ་ཞིག་འཆད་དོ། །ཞེས་དང་། མདོ་སྡེ་དཀོན་མཆོག་སྤྲིན་ལས། རིགས་ཀྱི་བུ། དོན་དམ་པ་ནི་དེ་བཞིན་གཤེགས་པ་རྣམས་སྐྱེས་ཀྱང་རུང་། མ་སྐྱེས་ཀྱང་རུང་། མི་འཇིགས་པ་སྟེ། རིགས་ཀྱི་བུ་དེའི་ཕྱིར། བྱང་ཆུབ་སེམས་དཔའ་རྣམས་སྐྲ་དང་ཁ་སྤུ་བྲེགས་ཏེ་གོས་ངུར་སྨྲིག་བགོས་ནས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །རབ་ཏུ་བྱུང་ནས་ཀྱང་ཆོས་འདི་ཁོ་ན་ཐོབ་པར་བྱ་བའི་ཕྱིར། མགོའམ་གོས་ལ་མེ་འབར་བ་བཞིན་དུ་བརྩོན་འགྲུས་བརྩམས་ཏེ་གནས་སོ། །རིགས་ཀྱི་བུ། གལ་ཏེ་དོན་དམ་པ་ཉིད་མེད་དུ་ཟིན་ན་ཚངས་པར་སྤྱོད་པ་དོན་མེད་པར་འགྱུར་རོ། །དེ་བཞིན་གཤེགས་པ་རྣམས་འབྱུང་བའང་དོན་མེད་པར་འགྱུར་རོ། །གང་གི་ཕྱིར་དོན་དམ་པ་ཡོད་པས་ན་དེའི་ཕྱིར་བྱང་ཆུབ་སེམས་དཔའ་རྣམས་དོན་དམ་ལ་མཁས་པ་ཞེས་བྱའོ། །ཞེས་དང་། སོར་འཕྲེང་གི་མདོ་ལས། འཇམ་དཔལ་བའི་འོ་མ་ལ་མར་ཡོད་པར་རྟོགས་ནས་མི་རྣམས་བསྲུབ་ལ། ཅིའི་ཕྱིར་ཆུ་ལ་མི་བསྲུབ་ཅེ་ན། རྫས་མེད་པའི་ཕྱིར་ཏེ། དེ་བཞིན་དུ་འཇམ་དཔལ་དེ་བཞིན་གཤེགས་པའི་སྙིང་པོ་ཡོད་པའི་ཕྱིར་མི་རྣམས་ཚུལ་ཁྲིམས་སྲུང་ཞིང་ཚངས་པར་སྤྱོད་དོ། །གཞན་ཡང་འཇམ་དཔལ་མི་གསེར་འདོད་པ་རྟོག་པ་དང་ལྡན་པ་བྲག་ལ་བརྐོ་ལ། ཅིའི་ཕྱིར་ཤིང་ལ་མི་བརྐོ། རྡོ་བ་གསེར་གྱི་ཁམས་ཡོད་པ་ལ་བརྐོ་ཡི་ཤིང་གསེར་མེད་པ་ལ་མི་བརྐོའོ། །དེ་བཞིན་དུ་འཇམ་དཔལ། དབྱིངས་ཡོད་པ་ལ་རྟོག་པའི་མི་རྣམས་བདག་སངས་རྒྱས་སུ་འགྱུར་རོ་སྙམ་སྟེ་ཚུལ་ཁྲིམས་སྲུང་ཞིང་ཚངས་པར་སྤྱོད་དོ། །གཞན་ཡང་འཇམ་དཔལ། དབྱིངས་མེད་ན་ནི་ཚངས་པར་སྤྱོད་པ་དོན་མེད་པར་འགྱུར་རོ། །ལོ་བྱེ་བར་ཆུ་བསྲུབས་ཀྱང་སྣུམ་མི་འབྱུང་བ་བཞིན་དུ། གལ་ཏེ་དབྱིངས་མེད་ན། བདག་ལ་ཆགས་པས་ཚངས་པ་དང་། ཚུལ་ཁྲིམས་སྤྱོད་པ་རྣམས་དོན་མེད་པར་འགྱུར་རོ། །ཞེས་སོགས་རྒྱ་ཆེར་གསུངས་ཤིང་། དེ་ལྟར་ཤེས་པའི་ཕན་ཡོན་དང་དགོས་ཆེད་ཀྱི་ཁྱད་པར་གཞན་ཡང་། དེ་བཞིན་གཤེགས་པའི་སྙིང་པོ་བསྟན་པའི་མདོ་ལས། ང་ཡང་སྔོན་དུས་སྤྱད་པ་སྤྱོད་པའི་ཚེ། །བདེ་བར་གཤེགས་པ་སེང་གེའི་རྒྱལ་མཚན་ལས། །མདོ་སྡེ་འདི་ཡི་མིང་ནི་ཐོས་པར་གྱུར། །གུས་པར་བྱས་ཏེ་ཐོས་ནས་ཐལ་མོ་སྦྱར། །ང་ནི་ལེགས་པར་བྱས་པའི་ལས་དེ་ཡིས། །བྱང་ཆུབ་དམ་པ་མྱུར་དུ་ཐོབ་པར་གྱུར། །དེ་བས་བྱང་ཆུབ་སེམས་དཔའ་མཁས་རྣམས་ཀྱིས། །རྟག་ཏུ་མདོ་མཆོག་འདི་ཉིད་གཟུང་བར་བྱ། །ཞེས་དང་། རྟོགས་པ་ཆེན་པོ་ཡོངས་སུ་རྒྱས་པར་ཡང་། ང་ནི་འདས་ནས་གཤེགས་ཕྱི་ན། །མི་ཡི་ནང་ནས་ལ་ལ་ཞིག །སེམས་ཅན་རྣམ་པ་ཐམས་ཅད་ལ། །བདེ་གཤེགས་སྙིང་པོ་ཉིད་ཡོད་ཅེས། །མོས་པ་རྣམ་དག་བྱེད་ནུས་ན། །སངས་རྒྱས་བཀའ་དྲིན་འཚོབ་པ་ཡིན། །ཞེས་གསུངས་པས་ཟབ་མོའི་གནས་འདི་ལ་ཡིད་རྟོན་པར་བྱའོ། །གཉིས་པ་རྟོགས་པ་རང་གི་ངོ་བོའི་གནས་དྲི་མ་མཐའ་དག་དང་བྲལ་བ་གནས་མ་ལུས་པ་ཡོངས་སུ་གྱུར་པའི་དྲི་མ་མེད་པའི་དེ་བཞིན་ཉིད་བྱང་ཆུབ་ཀྱི་མཚན་ཉིད་བཤད་པ་ནི། དག་ཐོབ་བྲལ་བ་རང་གཞན་དོན། །དེ་རྟེན་ཟབ་དང་རྒྱ་ཆེ་དང་། །བདག་ཉིད་ཆེན་པོ་དེ་ཡང་ནི། །ཇི་སྲིད་དུས་དང་ཇི་ལྟ་ཉིད། །ངོ་བོ་རྒྱུ་དང་འབྲས་བུ་དང་། །ལས་དང་ལྡན་དང་འཇུག་པ་དང་། །དེ་རྟག་བསམ་མི་ཁྱབ་ཉིད་ཀྱིས། །སངས་རྒྱས་ས་ནི་རྣམ་པར་བཞག །ཅེས་གསུངས་པ་ལྟར་བྱང་ཆུབ་དེའི་ཁྱད་པར་གྱི་ཆོས་སམ་དོན་རྣམ་པ་བརྒྱད་ཀྱིས་སྟོན་སྟེ། དེ་ཡང་བསྟན་བཅོས་ཆེན་པོ་མཁས་པའི་ཚུལ་ལ་འཇུག་པའི་སྒོ་ལས། ངོ་བོ་ཉིད་ཀྱི་སྐུ་ནི་གདོད་མ་ནས་རང་བཞིན་གྱིས་རྣམ་པར་དག་པ་ཆོས་ཉིད་ཀྱི་སྐུའོ། །དེ་ཅི་ལྟ་བུ་ཞེ་ན་ཆོས་ཐམས་ཅད་ཀྱི་གནས་ལུགས་སྣང་སྟོང་ཟུང་འཇུག་རྣམ་ཀུན་མཆོག་ལྡན་གྱི་སྟོང་པ་ཉིད་ཆོས་ཀྱི་དབྱིངས་འགྱུར་བ་མེད་པ་ཡིན་ལ། དེ་ཡང་སྣང་བའི་ཆ་ནས་རིས་སུ་མ་ཆད་པའི་སྐུ་དང་ཡེ་ཤེས་ཀྱི་རང་བཞིན། སྟོང་པའི་ཆ་ནས་ཅིར་ཡང་མ་གྲུབ་པའི་དབྱིངས་དང་འདུ་འབྲལ་མེད་པ། ཡེ་ནས་ལྷུན་གྱིས་གྲུབ་པའི་ཆོས་ཉིད་ཀྱི་བབ་སུས་ཀྱང་མ་བྱས་པའི་འདུས་མ་བྱས་ཏེ། དེ་ཡང་དངོས་དངོས་མེད་གཉིས་ཀའི་མཐའ་ལ་མི་གནས་པའི་འདུས་མ་བྱས་ཆེན་པོ་ཡིན་ནོ། །འདི་ནི་གཞིའི་དུས་སུ་ཐེག་ཆེན་ལམ་གྱིས་རྟོག་པ་བྱའི་དམ་པ་དེ་ཁོ་ན་ཉིད་དང་། དོན་དམ་པའི་བདེན་པ་དང་། ཆོས་ཀྱི་དབྱིངས་ཞེས་བྱ་བ་ཡིན་ལ། དེ་བཞིན་གཤེགས་པ་རྣམས་བྱུང་ཡང་རུང་། མ་བྱུང་ཡང་རུང་། བསྟན་ཀྱང་རུང་། མ་བསྟན་ཀྱང་རུང་། རྟོགས་ཀྱང་རུང་། མ་རྟོགས་ཀྱང་རུང་། ཆོས་ཐམས་ཅད་ཀྱི་ཆོས་ཉིད་འདི་ནི་སྔ་ཕྱིའི་ཁྱད་པར་མེད་པར་དེ་ཁོ་ན་བཞིན་དུ་གནས་པ་ཡིན་ཞིང་། འདི་ནི་ཆོས་ཀུན་གྱི་ཆོས་ཉིད་ཡིན་པས། སེམས་ཅན་རྣམས་ཀྱི་སེམས་ཀྱི་ཆོས་ཉིད་ཀྱང་འདི་ལས་གཞན་དུ་མེད་དོ། །འདི་ཡོད་པ་དང་རྟོགས་ཤིང་ལམ་དུ་བྱས་པ་ལས་མཐར་འབྲས་ཐོབ་པ་ཡིན་པས་ན་རང་བཞིན་གྱིས་གནས་པའི་རིགས་དང་། བདེ་གཤེགས་སྙིང་པོ་ཞེས་བྱའོ། །ཆོས་ཀྱི་དབྱིངས་དང་ངོ་བོ་ཐ་དད་དུ་མེད་པས་རང་བྱུང་གི་ཡེ་ཤེས་ཞེས་ཀྱང་བྱའོ། །འདི་ནི་ཆོས་ཀུན་གྱི་གནས་ལུགས་ངོ་བོ་ཉིད་ཀྱི་གཞི། དཀོན་མཆོག་གསུམ་གྱི་འབྱུང་གནས། མཐར་ཐུག་ཐེག་གཅིག་འགྲུབ་པའི་རྟེན། ཆོས་ཉིད་མཉམ་པ་ཉིད་ཉག་གཅིག་གོ །གནས་ལུགས་ཆོས་ཉིད་དེ་རང་བཞིན་གྱིས་རྣམ་པར་དག་ཀྱང་སེམས་ཅན་རྣམས་རང་སྣང་གི་སྒྲིབ་པས་བསྒྲིབས་ནས་མངོན་དུ་མ་གྱུར་པ་ལ། དེ་བཞིན་གཤེགས་པ་ཐབས་ལ་མཁས་པས་ཆོས་ཀྱི་སྒོ་སྣ་ཚོགས་ཀྱིས་གདུལ་བྱའི་བློ་རིམ་པར་སྦྱངས་ནས། མཐར་ཐུག་དབྱིངས་དེའི་རང་བཞིན་ཤེས་ཤིང་མངོན་དུ་བྱེད་པ་འཇིག་མེད་རྟག་པ་ཐེག་པ་མཆོག་གི་ལམ་བསྟན་པ་དེ་ལ་བརྟེན་ནས་གློ་བུར་གྱི་དྲི་མ་ཐམས་ཅད་དང་བྲལ་བ་ན། དག་པ་གཉིས་ལྡན་གྱི་བྲལ་འབྲས་ངོ་བོ་ཉིད་ཀྱི་སྐུ་ཟག་མེད་ཀྱི་ཆོས་ཀུན་གྱི་གཞིར་གྱུར་པ་གཙང་བདེ་རྟག་བདག་གི་མཐར་ཕྱིན་པ་རྡོ་རྗེའི་སྐུ། ཡེ་ཤེས་ཀྱི་སྐུ། མཉམ་པ་ཉིད་ནམ་མཁའ་ལྟ་བུའི་སྐུ་དེ་མངོན་དུ་གྱུར་པ་ནི་སངས་རྒྱས་ཀྱི་སྐུ་མཐར་ཐུག་པའོ། །ཞེས་གསུངས་པ་བཞིན། ཟག་པ་མེད་པའི་དབྱིངས་ངོ་བོ་ཉིད་ཀྱིས་རྣམ་པར་དག་པ་ལ་གློ་བུར་གྱི་དྲི་མས་ཀྱང་དག་པའི་རྟག་བརྟན་གཡུང་དྲུང་གི་གོ་འཕང་མཆོག་ནི་འདིར་རྣམ་པར་དག་པའི་ཁྱད་པར་རམ་ངོ་བོ་ཉིད་ཀྱི་དོན་ནོ། །སེམས་ཀྱི་རང་བཞིན་གདོད་མ་ནས་འོད་གསལ་བ་ཉི་མཁའ་ལྟ་བུ་ལ་སྒྲིབ་བྱེད་ཉོན་མོངས་པ་དང་ཤེས་བྱའི་སྒྲིབ་པ་སྤྲིན་ཚོགས་ལྟ་བུ་དེ་སེལ་བར་བྱེད་པའི་རྒྱུ་སློབ་ལམ་དུ་མཉམ་བཞག་རྣམ་པར་མི་རྟོག་པ་དང་། རྗེས་ཐོབ་ཤེས་བྱ་རྣམ་པར་འབྱེད་པ་སྟེ་ཇི་ལྟ་ཇི་སྙེད་ཀྱི་ཡེ་ཤེས་གཉིས་པོ་ཟུང་འབྲེལ་དུ་བསྒོམ་པ་ནི་ལམ་སྒོམ་སྟོབས་ཀྱིས་ཐོབ་པའི་ཁྱད་པར་རམ་འཐོབ་བྱེད་ཡེ་ཤེས་རྒྱུ་ཡི་དོན་ནོ། །དེ་ལྟ་བུའི་ཡེ་ཤེས་གཉིས་པོ་གོམས་པ་མཐར་ཕྱིན་པ་ལས། ཉོན་མོངས་པ་འདོད་ཆགས་ཀྱི་རྙོག་མ་དང་བྲལ་པའི་པདྨའི་མཚོ་དང་། ཞེ་སྡང་སྒྲ་གཅན་གྱི་ཁ་ནས་ཐར་པའི་ཟླ་བའི་དཀྱིལ་འཁོར་ཡོངས་སུ་རྫོགས་པ་དང་། གཏི་མུག་གི་སྤྲིན་ལས་གྲོལ་བའི་ཉི་མའི་དཀྱིལ་འཁོར་འོད་གསལ་བ་བཞིན་དང་། དེ་བཞིན་དུ་པད་སྦུབས་ལས་གྲོལ་བའི་སངས་རྒྱས་ཀྱི་སྐུ་ལ་སོགས་པ་གོང་དུ་བསྟན་པ་བཞིན་གྱི་གློ་བུར་གྱི་དྲི་མའི་སྦུབས་ལས་ཡོངས་སུ་གྲོལ་བ་སྟེ། མདོར་ན་ཉོན་མོངས་པ་དང་ཤེས་བྱའི་སྒྲིབ་པ་བག་ཆགས་དང་བཅས་པ་གཏན་དུ་བཅོམ་པ་ལས་སྤངས་རྟོགས་ཀྱི་ཡོན་ཏན་མཐར་ཕྱིན་པར་རྫོགས་པ་ནི་སྤང་བྱ་དང་བྲལ་བའི་ཁྱད་པར་རམ་འབྲས་བུའི་དོན་ནོ། །སློབ་ལམ་དུ་མཉམ་རྗེས་ཀྱི་ཡེ་ཤེས་མཐར་ཕྱིན་པའི་འབྲས་བུ་སྤངས་པ་ཕུན་སུམ་ཚོགས་པ་རྣམ་གྲོལ་གྱི་སྐུ་ནི་ཟག་པ་མེད་པ་དང་། རྟོགས་པ་ཕུན་སུམ་ཚོགས་པ་ཡེ་ཤེས་ཆོས་ཀྱིས་སྐུ་ནི་ཤེས་བྱ་ཐམས་ཅད་ལ་ཁྱབ་པ་དང་། ཐུན་མོང་དུ་འདུས་མ་བྱས་ཀྱི་རང་བཞིན་བརྟན་ཞི་རྟག་པ་འཕོ་མེད་ཀྱི་བདག་ཉིད་དེ་ཡོན་ཏན་གྱི་ཁྱད་པར་གསུམ་གྱིས་རང་དོན་མཐར་ཕྱིན་པར་རྫོགས་པའི་དབང་གིས། ཇི་ལྟར་འདུས་མ་བྱས་ཀྱི་ནམ་མཁས་གོ་ཕྱེ་བ་ལ་བརྟེན་ནས་དབང་ལྔ་ཡུལ་ལ་འཇུག་པ་སོགས་ཀྱི་རྒྱུ་བྱེད་པ་བཞིན་དུ། སངས་རྒྱས་ཀྱི་སྐུ་གཉིས་པོ་མཐོང་བ་ལ་སྒྲིབ་པ་མེད་པར་གྱུར་པའི་བློ་གྲོས་ཟབ་ཅིང་བརྟན་པའི་རྒྱལ་སྲས་སྐལ་བ་དང་ལྡན་པ་རྣམས་ཀྱི་དབང་པོ་དྲུག་མཆོག་ཏུ་གྱུར་པའི་སྤྱོད་ཡུལ་གྱི་དོན་ལ་ཀུན་རྫོབ་ཏུ་གཟུགས་ཀྱི་སྐུ་མཐོང་བ་ལ་སོགས་པའི་དབང་གིས་མཚན་དཔེ་སོགས་སྨིན་འབྲས་དང་དོན་དམ་ཆོས་ཀྱི་སྐུ་མཐོང་བ་ལས་སྟོབས་སོགས་བྲལ་འབྲས་ཏེ་ཟག་པ་མེད་པའི་ཡོན་ཏན་མཐའ་དག་སྐྱེ་བའི་རྒྱུ་བྱེད་པ་སྟེ། མདོར་ན་རང་དོན་དུ་རྣམ་གྲོལ་ཆོས་ཀྱི་སྐུ་ཐོབ་པ་ལ་བརྟེན་ནས། གཞན་དོན་དུ་གཟུགས་སྐུ་རྣམ་པ་གཉིས་ཇི་ལྟར་བཞེད་པ་བཞིན་སྟོན་པ་ལ་དབང་འབྱོར་པ་ནི་རང་གཞན་གྱི་དོན་བསྒྲུབ་པའི་ཁྱད་པར་རམ་ལས་ཀྱི་དོན་ནོ། །དོན་གཉིས་འགྲུབ་པའི་རྟེན་རྣམ་པར་གྲོལ་བ་དང་། ཆོས་ཀྱི་སྐུ་གཉིས་ནི་ཐམས་ཅད་མཁྱེན་པ་ཁོ་ནའི་སྤྱོད་ཡུལ་ལས། ས་བཅུ་པ་ལ་གནས་པའི་བྱང་ཆུབ་སེམས་དཔས་ཀྱང་མཐོང་སྐར་གྱི་ཉི་ཞུར་ཙམ་ལས་རྫོགས་པར་རྟོགས་མི་ནུས་ན་ཕལ་གྱི་ཐོས་སོགས་ཀྱི་ཤེས་རབ་ཀྱིས་ལྟ་ཅི་སྨོས་ཏེ་སྒྲ་རྟོག་གི་ཡུལ་ལས་འདས་ཤིང་ཟབ་པའི་ཕྱིར་བསམ་དུ་མེད་པ་ཉིད་དང་། སྐྱེ་བ་མེད་པས་རྟག་པ་དང་། རྒ་བ་མེད་པས་བརྟན་པ་དང་། ན་བ་མེད་པས་ཞི་བ་དང་། འཆི་བ་མེད་པས་གཡུང་དྲུང་ཉིད་དང་། སྡུག་བསྔལ་མེད་པས་རབ་ཏུ་ཞི་བ་སྟེ་འགོག་བདེན་མཐར་ཐུག་པ་དང་། ཇི་སྙེད་པ་མཁྱེན་པས་ཤེས་བྱ་ཐམས་ཅད་ལ་ཁྱབ་པ་དང་། ཇི་ལྟ་བ་མཁྱེན་པས་གཟུང་འཛིན་གྱི་རྟོག་པ་དང་བྲལ་བ་དང་། ཆགས་སོགས་ཉོན་མོངས་པའི་སྒྲིབ་པ་སྤངས་པས་ནམ་མཁའ་བཞིན་དུ་ཆགས་པ་མེད་པ་དང་། འཁོར་གསུམ་དུ་རྣམ་པར་རྟོག་པ་ཤེས་བྱའི་སྒྲིབ་པ་སྤངས་པས་ཡུལ་དུས་ཀུན་ཏུ་ཐོགས་པ་མེད་པ་དང་། བྱིང་རྒོད་སོགས་སྙོམས་འཇུག་གི་སྒྲིབ་པ་སྤངས་པས། རྩུབ་རེག་དང་བྲལ་བ་དང་། འདུས་བྱས་ཀྱི་གཟུགས་དང་བྲལ་བས་ཐ་མལ་པའི་དབང་པོས་བལྟར་མེད་པ་དང་། སྤྲོས་པའི་མཚན་མ་དང་བྲལ་བས་རྣམ་པར་ཤེས་པས་གཟུང་དུ་མེད་པ་དང་། རང་བཞིན་གྱིས་དག་པས་དོན་དམ་པའི་དགེ་བ་དང་། གློ་བུར་གྱི་དྲི་མས་དག་པས་དྲི་མ་མེད་པ་ཉིད་དེ་དོན་དམ་པའི་ཡོན་ཏན་གྱི་རྣམ་གྲངས་བཅོ་ལྔ་དང་ལྡན་པ་ནི་དེའི་རྟེན་ཡོན་ཏན་དང་ལྡན་པའི་ཁྱད་པར་རམ་དོན་ནོ། །སྐྱེ་འགག་གནས་གསུམ་དང་བྲལ་བས་འདུས་མ་བྱས་དང་། དབྱིངས་དང་ཡེ་ཤེས་ཟུང་དུ་འཇུག་པས་ཐ་དད་དམ་རྣམ་དབྱེར་མེད་པ་དང་། སྒྲོ་སྐུར་གྱི་མཐའ་དང་བྲལ་བས་ཕྱིན་ཅི་མ་ལོག་པ་དང་། སྒྲིབ་གསུམ་དང་བྲལ་བས་རྣམ་པར་དག་པ་དང་། རང་བཞིན་གྱིས་དྲི་མ་མེད་ཅིང་གཟུང་འཛིན་རྣམ་རྟོག་གི་ཡུལ་ལས་འདས་པས་འོད་གསལ་བ་སྟེ་མཚན་ཉིད་ལྔ་དང་། རྟགས་ཀྱིས་གཞལ་དུ་མེད་པ་དང་། གྲངས་ཀྱིས་བགྲང་དུ་མེད་པ་དང་། བློས་བསམ་དུ་མེད་པ་དང་། གཞན་དང་མཉམ་པ་མེད་པ་དང་། རྣམ་པར་དག་པ་མཐར་ཐུག་པ་སྟེ་ཡོན་ཏན་ལྔ་སྟེ་བཅུ་པོ་དང་དབྱེར་མེད་པ་སངས་རྒྱས་རང་ཉིད་ལས་གཞན་རིག་གི་སྤྱོད་ཡུལ་མ་ཡིན་པས་ཟབ་ཅིང་གཏིང་དཔག་དཀའ་བ་ངོ་བོ་ཉིད་སྐུའམ་ཆོས་ཀྱི་སྐུ་དང་། གསུང་གིས་གདམས་ངག་བརྗོད་པ་དང་། སྐུའི་སྣང་བ་སྟོན་པ་དང་། ཐུགས་རྗེའི་ཕྲིན་ལས་མཛད་པ་སྟེ་དེ་གསུམ་རྒྱུན་མི་འཆད་པ་དང་། དེ་དག་འབད་རྩོལ་གྱིས་མངོན་པར་འདུ་བྱེད་པ་མེད་པར་ལྷུན་གྱིས་གྲུབ་པ་དང་། སྐལ་བའི་དབང་གིས་སྣ་ཚོགས་སུ་སྣང་ཡང་དེའི་ངོ་བོ་ཉིད་མིན་པ་སྟེ་ཁྱད་པར་གྱི་ཆོས་ལྔ་དང་ལྡན་ཞིང་གདུལ་བྱ་དག་པ་ས་ཐོབ་པ་འབའ་ཞིག་ལ་སྣང་བ་རྒྱ་ཆེ་བ་ལོངས་སྐུ་དང་། མཛད་པ་བཅུ་གཉིས་ལ་སོགས་པ་གང་ལ་གང་འདུལ་གྱི་རྣམ་འཕྲུལ་མཐའ་ཡས་པས། གདུལ་བྱ་འཇིག་རྟེན་པ་རྣམས་དང་པོར་འདུས་བྱས་མི་རྟག་པ་སོགས་ཀྱི་གཏམ་གྱིས་ཞི་བ་མྱང་འདས་ཀྱི་ལམ་ལ་འཇུག་པར་བྱེད་པ་དང་། བར་དུ་དམ་ཆོས་པདྨ་དཀར་པོ་སོགས་ནས་བསྟན་པ་བཞིན་ཐེག་དམན་རྣམས་ཐེག་པ་ཆེན་པོར་སྨིན་པར་བྱེད་པ་དང་། མཐར་བྱང་སེམས་ས་བརྒྱད་པ་ལ་གནས་པ་རྣམས་བྱང་ཆུབ་ཏུ་ལུང་སྟོན་པས་གྲོལ་བར་བྱེད་པའི་རྒྱུར་གྱུར་པའི་ཁྱད་ཆོས་གསུམ་དང་ལྡན་ཞིང་གདུལ་བྱ་ཐུན་མོང་པ་ལ་སྣང་བ་བདག་ཉིད་ཆེན་པོ་སྤྲུལ་པའི་སྐུ་སྟེ་སྐུ་གསུམ་གྱིས་རབ་ཏུ་དབྱེ་བ་ནི་དབྱེ་བའི་ཁྱད་པར་རམ་འཇུག་པའི་དོན་ནོ། །བསྐལ་པ་གྲངས་མེད་དུ་མར་གོམས་པའི་ཚོགས་གཉིས་ཀྱིས་བསྡུས་པའི་རྒྱུ་མཐའ་ཡས་པ་དང་། སྔོན་དམ་བཅས་པའི་གདུལ་བྱ་སེམས་ཅན་གྱི་ཁམས་ལ་ཟད་པ་མེད་པ་དང་། སྒྲིབ་པ་དང་བྲལ་བའི་ཐུགས་བརྩེ་བའི་སྙིང་རྗེ་ཆེན་པོ་རྒྱུན་མི་ཆད་པ་དང་། ཇི་ལྟར་བཞེད་པ་བཞིན་དུ་དབང་འབྱོར་པའི་རྫུ་འཕྲུལ་གྱི་རྐང་པ་དང་ལྡན་པ་དང་། འཁོར་འདས་མཉམ་པ་ཉིད་དུ་མཁྱེན་པས་སྐྱོན་ཡོན་ལ་བླང་དོར་མི་མངའ་བ་དང་། ཟག་མེད་ཀྱི་བདེ་བ་དང་ལྡན་པས་སྡུག་བསྔལ་གྱིས་མི་གོས་པ་དང་། ཡོན་ཏན་གྱི་ཆོས་ཀྱི་དབང་ཕྱུག་ཡིན་པས་འཁོར་བའི་ཉེས་པས་མི་གོས་པ་སྟེ་རྒྱུ་མཚན་བདུན་གྱིས་གཟུགས་སྐུས་གཞན་དོན་གྱི་མཛད་པ་རྒྱུན་མི་འཆད་པ་དང་། འཆི་བདག་གི་བདུད་བཅོམ་ཟིན་པས་དེ་དེ་ལ་རྒྱུ་བ་མེད་པ་དང་། འདུས་བྱས་ཀྱི་ངོ་བོར་མེད་པས་སྐྱེ་འཇིག་གི་མཚན་མས་དབེན་པ་དང་། ཕྱི་མའི་མུ་མཐར་ཡང་འགྲོ་བ་མགོན་མེད་པ་རྣམས་ཀྱི་སྐྱབས་མཛད་པ་སྟེ་རྒྱུ་མཚན་གསུམ་གྱིས་ཆོས་སྐུ་འགྱུར་མེད་ཀྱི་རྟག་པ་སྟེ། མདོར་ན་རྒྱུ་མཚན་རྣམ་པ་བཅུས་ཆོས་སྐུ་རང་བཞིན་གྱི་རྟག་པ་དང་། ལོངས་སྐུ་རྒྱུན་མི་འཆད་པའི་རྟག་པ་དང་། སྤྲུལ་སྐུ་རྒྱུན་གྱི་རྟག་པ་དང་གསུམ་ནི་དུས་ཀྱི་ཁྱད་པར་རམ་རྟག་པའི་དོན་ནོ། །དྲི་མ་མེད་པའི་དེ་བཞིན་ཉིད་བྱང་ཆུབ་ཆེན་པོ་དེ་ཉིད་ངག་གི་བརྗོད་པའི་ཡུལ་མིན་པའི་ཕྱིར་དང་། དོན་དམ་གྱིས་བསྡུས་པའི་ཕྱིར་དང་། རྟོག་པ་འཇུག་པའི་གནས་མིན་པའི་ཕྱིར་དང་། དཔེ་ལས་འདས་པའི་ཕྱིར་དང་། བླ་ན་མེད་པའི་ཕྱིར་དང་། སྲིད་ཞིའི་མ་བསྡུས་པའི་ཕྱིར་ཏེ་རྒྱུ་མཚན་སྔ་མ་ལྔས་ཆོས་སྐུ་དང་། ཕྱི་མ་གཅིག་གིས་གཟུགས་ཀྱི་སྐུའི་གསང་བ་ཟབ་མོ་ནི་ཐམས་ཅད་མཁྱེན་པ་རང་ཉིད་ཀྱི་སྤྱོད་ཡུལ་ལས་གཞན་གྱིས་རྟོགས་པར་མི་ནུས་པ་ནི་ཇི་ལྟ་བའི་རང་བཞིན་ཤེས་པའི་ཁྱད་པར་རམ་བསམ་གྱིས་མི་ཁྱབ་པའི་དོན་ཏེ། དེ་ལྟར་དོན་རྣམ་པ་བརྒྱད་ཀྱིས་བྱང་ཆུབ་ཀྱི་མཚན་ཉིད་བསྟན་པ་ཡིན་ནོ། །གསུམ་པ་རྟོགས་པ་དེའི་ཡན་ལག་གི་གནས་བྱང་ཆུབ་དང་འབྲེལ་བའི་ཡོན་ཏན་གྱི་ཁྱད་པར་བསྟན་པ་ནི། སྤྱིར་གོང་དུ་བཤད་པ་བཞིན་སངས་རྒྱས་ཀྱི་ཡོན་ཏན་བློས་གཞལ་བར་མི་ནུས་ཀྱང་འདིར་མདོར་བསྡུ་བའི་དབང་དུ་བྱས་ཏེ། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པ་ཀུན་རྫོབ་སྐུ་ཉིད་དེ། །བྲལ་དང་རྣམ་པར་སྨིན་པའི་འབྲས་བུ་ནི། །ཡོན་ཏན་དབྱེ་བ་དྲུག་ཅུ་བཞི་འདི་དག །ཅེས་གསུངས་པ་ལྟར་རང་དོན་ཕུན་སུམ་ཚོགས་པའི་རྟེན་དོན་དམ་ཆོས་སྐུ་ལ་ཡོད་པའི་བྲལ་བའི་ཡོན་ཏན་སུམ་ཅུ་རྩ་གཉིས་དང་། གཞན་དོན་ཕུན་སུམ་ཚོགས་པའི་རྟེན་ཀུན་རྫོབ་བརྡ་ཡི་སྐུ་ལ་ཡོད་པའི་རྣམ་སྨིན་གྱི་ཡོན་ཏན་སུམ་ཅུ་རྩ་གཉིས་ཏེ་གཉིས་ཀ་བསྡོམས་པས་ཡོན་ཏན་ཀྱི་དབྱེ་བ་དྲུག་ཅུ་རྩ་བཞི་སྟེ། སྟོབས་ཉིད་མ་རིག་སྒྲིབ་ལ་རྡོ་རྗེ་བཞིན། །མི་འཇིགས་ཉིད་ནི་འཁོར་དུ་སེང་གེ་བཞིན། །དེ་བཞིན་གཤེགས་པ་མ་འདྲེས་མཁའ་བཞིན་ཏེ། །ཐུབ་པའི་བསྟན་པ་རྣམ་གཉིས་ཆུ་ཟླ་བཞིན། །ཞེས་པས་བསྟན་པ་ལྟར། དང་པོ་བྲལ་འབྲས་སུམ་ཅུ་རྩ་གཉིས་ལས་སྟོབས་བཅུ་ནི། གནས་དང་གནས་མིན་མཁྱེན་པའི་སྟོབས་དང་། དེ་བཞིན་དུ། ལས་ཀྱི་རྣམ་པར་སྨིན་པ་དག་དབང་པོ་མཆོག་དང་མཆོག་མ་ཡིན་པ་དང་། ཁམས་རྣམ་པ་སྣ་ཚོགས་དང་། མོས་པ་སྣ་ཚོགས་པ་དང་། ཀུན་དུ་འགྲོ་བའི་ལམ་དང་། བསམ་གཏན་དག་པ་བ་དང་ཉོན་མོངས་ཅན། སྔོན་གནས་རྗེས་སུ་དྲན་པ་དང་། འཆི་འཕོ་དང་སྐྱེ་བ། ཟག་པ་ཟད་པ་སྟེ་དེ་བཅུ་པོ་མཁྱེན་པའི་སྟོབས་རྣམས་པ་བཅུ་སྟེ། འདི་དག་རྫས་ཀྱི་རྡོ་རྗེ་ལྟར་མི་ཕྱེད་པ་སྟེ་དང་པོ་དྲུག་གིས་ཤེས་བྱའི་སྒྲིབ་པ་གོ་ཆ་ལྟ་བུ་འབིགས་པ་དང་། བར་པ་གསུམ་གྱིས་སྙོམས་འཇུག་གི་སྒྲིབ་པ་རྩིག་པ་ལྟ་བུ་བཤིག་པ་དང་། ཐ་མ་གཅིག་གིས་བག་ཆགས་ཀྱི་སྒྲིབ་པ་ཤིང་ལྟ་བུ་གཅོད་པ་ལ་ཐོགས་པ་མེད་པའི་མཐུ་དང་ལྡན་ཞིང་སྟོབས་སུ་གྱུར་པས་དེ་སྐད་ཅེས་བྱའོ། །མི་འཇིགས་པ་བཞི་ནི། རང་དོན་དུ་རྟོགས་པ་ཕུན་སུམ་ཚོགས་པ་དང་། སྤངས་པ་ཕུན་སུམ་ཚོགས་པ་གཉིས། གཞན་དོན་དུ་ངེས་པར་འབྱུང་བའི་ལམ་དང་། ལམ་གྱི་གེགས་སྟོན་པ་གཉིས་ཏེ་བཞི་པོ་ཇི་ལྟར་ཞལ་གྱིས་བཞེས་པའི་དོན་དེ་ལ་དགེ་སྦྱོང་དང་བྲམ་ཟེ་དང་ལྷ་དང་བདུད་དང་ཚངས་པ་ལ་སོགས་པ་འཇིག་རྟེན་ན་ཆེ་བ་སུས་ཀྱང་ཆོས་དང་མཐུན་པའི་རྒོལ་བ་འཇུག་པའི་གནས་མེད་པས། ཐུབ་མཆོག་མི་ཡི་སེང་གེ་ཡང་ཚོགས་སུ་འཇིགས་པ་མེད་པ་དང་། གཞན་ལ་ལྟོས་པ་མེད་པ་དང་། ཏིང་ངེ་འཛིན་བརྟན་པ་དང་། མ་རིག་བག་ཆགས་ཀྱི་ས་ལས་བརྒལ་པས་རྩལ་དང་ལྡན་པ་སྟེ་ཆོས་བཞི་དང་ལྡན་པས་སེང་གེའི་སྒྲ་ཆེན་པོ་སྒྲོགས་པར་མཛད་པས་ན་དེ་སྐད་ཅེས་བྱའོ། །མ་འདྲེས་པའི་ཆོས་བཅོ་བརྒྱད་ནི། སྐུ་ལ་འཁྲུལ་པ་མི་མངའ་བ་དང་། དེ་བཞིན་དུ་གསུང་ལ་ཅ་ཅོ་དང་། ཐུགས་ལ་དྲན་པ་ཉམས་པ་དང་། མཉམ་པར་མ་བཞག་པའི་ཐུགས་དང་། འདུ་ཤེས་སྣ་ཚོགས་དང་། མ་བརྟགས་པའི་བཏང་སྙོམས་ཏེ་དེ་དྲུག་པོ་མི་མངའ་བ་ནི་སྤྱོད་པས་བསྡུས་པ་དྲུག་དང་། གཞན་ཕན་དོན་གཉེར་གྱི་འདུན་པ་དང་། དེ་ལ་སྤྲོ་བའི་བརྩོན་འགྲུས་དང་། དོན་ཐམས་ཅད་གཟིགས་པའི་དྲན་པ་དང་། དྲི་མ་མེད་པའི་ཤེས་རབ་དང་། སྒྲིབ་པ་ལས་རྣམ་པར་གྲོལ་བ་དང་། རྣམ་གྲོལ་ཡེ་ཤེས་གཟིགས་པ་སྟེ་དེ་དྲུག་པོ་ཉམས་པ་མི་མངའ་བ་ནི་རྟོགས་པས་བསྡུས་པ་དྲུག་དང་། སྐུ་གསུང་ཐུགས་ཀྱི་ལས་ཐམས་ཅད་ལ་ཡེ་ཤེས་སྔོན་དུ་འགྲོ་ཞིང་རྗེས་སུ་འཇུག་པ་སྟེ་མཛད་པས་བསྡུས་པ་གསུམ་དང་། འདས་པ་དང་། མ་འོངས་པ་དང་། ད་ལྟ་བའི་དུས་ལ་ཆགས་ཐོགས་མེད་པའི་ཡེ་ཤེས་འཇུག་པ་སྟེ་དུས་གསུམ་མཁྱེན་པས་བསྡུས་པ་གསུམ་སྟེ་བཅོ་བརྒྱད་པོ་སངས་རྒྱས་ཁོ་ན་ལས་གཞན་ས་བཅུའི་སེམས་དཔའ་རྣམས་ལའང་མེད་པས་སངས་རྒྱས་ཁོ་ནའི་མ་འདྲེས་པའི་ཆོས་ཞེས་འབྱུང་བ་བཞི་དང་མ་འདྲེས་པའི་ནམ་མཁའ་རང་གི་ཁམས་ལྟ་བུ་ཡིན་པས་དེ་སྐད་ཅེས་བརྗོད་དོ། །དེ་ལྟ་བུའི་ཡོན་ཏན་སུམ་ཅུ་རྩ་གཉིས་པོ་འདི་དག་ནི་གཙོ་བོར་མཉམ་བཞག་ཏུ་ཡེ་ཤེས་ཀྱི་ཚོགས་གོམས་པ་མཐར་ཕྱིན་པ་ལས་རང་བཞིན་གནས་རིགས་ཀྱི་དྲི་མ་བྲལ་སྟོབས་ལས་སྣང་བ་སྟེ་དོན་དམ་ཆོས་སྐུའི་རབ་ཏུ་ཕྱེ་ཞིང་དེའི་ངང་དུ་དབྱེར་མེད་པར་གནས་པ་སྟེ། དཔེར་ན་ནོར་བུ་རིན་པོ་ཆེ་ལས་འོད་འབྱུང་བ་དང་མདོག་གསལ་བ་དང་དབྱིབས་མཛེས་པ་རྣམས་ནོར་བུ་རང་ལས་དབྱེར་མེད་པ་བཞིན་ནོ། །གཉིས་པ་སྨིན་འབྲས་ཀྱི་ཡོན་ཏན་མཚན་བཟང་སོ་གཉིས་ནི། ཞབས་མཐིལ་རུས་སྦལ་གྱི་ལྟོ་བ་ལྟར་མཉམ་ཞིང་ལེགས་པར་གནས་པ་དང་། ཕྱག་ཞབས་ཀྱི་མཐིལ་ལ་འཁོར་ལོ་རྩིབས་སྟོང་དང་ལྡན་པའི་རི་མོས་མཚན་པ་དང་། ཞབས་ཀྱི་རྟིང་པ་ཡངས་ཤིང་ལོང་བུ་མི་མངོན་པར་བྱིན་གྱིས་ཟླུམ་པ་དང་། ཕྱག་ཞབས་ཀྱི་སོར་མོ་རིང་བ་དང་། སོར་མོ་རྣམས་གསེར་གྱི་དྲྭ་བས་འབྲེལ་བ་དང་། པགས་པ་འཇམ་ཞིང་གཞོན་ཤ་ཅན་དུ་ལེགས་པར་གནས་པ་དང་། ཞབས་ཀྱི་བོལ་གོང་གཉིས། ཕྱག་གི་རྒྱབ་གཉིས། ཕྲག་པའི་སྟེང་གཉིས། ལྟག་པ་སྟེ་བདུན་དག་མཐོ་བ་དང་། བྱིན་པ་ཨེ་ན་ཡ་དང་འདྲ་བར་ཟླུམ་རྒྱས་མཁྲིག་ལ་བྱིན་གྱིས་ཕྲ་བ་དང་། གསང་བའི་གནས་གླང་པོ་ཆེའམ་རྟ་ཅང་ཤེས་ལྟར་སྦུབས་སུ་ནུབ་པ་དང་། སྐུ་སྟོད་སེང་གེ་དང་འདྲ་བར་རྒྱས་པ་དང་། ཐལ་གོང་གཉིས་གཤོང་བུ་མེད་པར་རྒྱས་ཤིང་གང་བ་དང་། དཔུང་མགོ་ལེགས་པར་ཟླུམ་ཞིང་མཛེས་པ་དང་། ཕྱག་རེག་བྱ་འཇམ་ཞིང་དབྱིབས་ཟླུམ་ལ་སྦོམ་ཕྲ་མཐོ་དམན་མེད་པ་དང་། ཕྱག་རིང་པོ་མ་བཏུད་ཀྱང་པུས་མོར་སླེབས་པ་དང་། དྲི་མས་ཡོངས་སུ་དག་པའི་སྐུ་འོད་ཀྱི་དཀྱིལ་འཁོར་དང་ལྡན་པ་དང་། མགྲིན་པ་དྲི་མ་མེད་པའི་དུང་དང་འདྲ་བའི་རི་མོ་གསུམ་པ་དང་། འགྲམ་པ་རི་དྭགས་ཀྱི་རྒྱལ་པོ་སེང་གེ་དང་འདྲ་བར་རྒྱས་པ་དང་། ཚེམས་བཞི་བཅུ་ཐམ་པ་ཚང་ཞིང་སྟེང་འོག་གི་གྲངས་མཉམ་པ་དང་། རབ་ཏུ་དག་ཅིང་བར་མེད་པས་ཚེམས་ཐགས་བཟང་བ་དང་། རྣམ་པར་དག་པའི་ཚེམས་རིང་ཐུང་དང་སྦོམ་ཕྲ་མེད་པས་མཉམ་པ་དང་། མཆེ་བ་རབ་མཆོག་དུང་ལྟར་དཀར་ཞིང་རྣོ་བ་དང་། ལྗགས་རིང་ཞིང་སྲབ་པས་ཞལ་གྱི་དཀྱིལ་འཁོར་ཁེབས་པ་དང་། ལྗགས་ལ་རོ་གང་བླང་བར་རོ་ཞིམ་པའི་མཆོག་ཏུ་འགྱུར་བ་དང་། རང་བྱུང་གི་གསུང་ཀ་ལ་པིང་ཀའི་སྒྲ་དང་ཚངས་དབྱངས་ལྟར་སྙན་ཅིང་རྒྱང་རིང་པོར་ཐོས་པ་དང་། སྤྱན་བཟང་པོ་ཨུཏྤལ་སྔོན་པོ་དང་འདྲ་བ་དང་། རྫི་མ་ནི་ཁྱུ་མཆོག་གི་འདྲ་བར་སྣུམ་ཞིང་མ་འཛིངས་པ་དང་། ཞལ་གྱི་དཀྱིལ་འཁོར་མཛེས་པར་བྱེད་པའི་མཛོད་སྤུ་དཀར་པོ་དྲི་མ་མེད་པ་དང་ལྡན་པ་དང་། གཙུག་ཏོར་བལྟར་མི་མངོན་པ་དབུའི་དབུས་དྲང་པོར་ལྡན་པ་དང་། དག་ཅིང་སྲབ་པའི་པགས་པ་གསེར་གྱི་མདོག་དང་འདྲ་བ་དང་། བ་སྤུ་ཕྲ་འཇམ་རེ་རེ་ནས་སྐྱེས་ཏེ་སྐུའི་གྱེན་དུ་གཡས་ཕྱོགས་སུ་འཁྱིལ་བ་དང་། དབུ་སྐྲ་རིན་པོ་ཆེ་མཐོན་མཐིང་བཞིན་དུ་གནག་པ་དང་། སྐུ་ཤིང་ནྱ་གྲོ་ངྷ་ལྟར་ཆུ་ཞེང་གབ་པ་དང་། སྐུ་སྲེད་མེད་བུའི་སྟོབས་དང་ལྡན་ཞིང་རྡོ་རྗེ་ལྟར་མཁྲེགས་པ་སྟེ་བསམ་གྱིས་མི་ཁྱབ་པའི་ཡོན་ཏན་སུམ་ཅུ་རྩ་གཉིས་པོ་འདི་དག་གང་གིས་མཐོང་བ་ཙམ་གྱིས་འདི་ནི་སྐྱེས་བུ་ཆེན་པོའི་ཞེས་ཤེས་ཤིང་དྭངས་པར་བྱེད་པ་ན་སྐྱེས་བུ་ཆེན་པོར་མཚོན་པར་བྱེད་པའི་མཚན་ཞེས་བྱ་སྟེ་གཟུགས་སྐུ་རྣམ་པ་གཉིས་ལ་བརྟེན་པའི་ཡོན་ཏན་གྱི་ཁྱད་པར་རོ། །འདི་དག་ནི་བུ་མོ་རིན་ཆེན་གྱི་ཞུས་པའི་མདོ་ཡི་རྗེས་སུ་འབྲངས་ནས་གསུངས་པ་སྟེ་མངོན་རྟོགས་རྒྱན་དང་ངོས་འཛིན་ཚུལ་ཅུང་མི་འདྲ་བར་བྱུང་བ་ནི་མདོ་སོ་སོའི་དགོངས་པ་ཡིན་པར་ཤེས་པར་བྱའོ། །མཚན་བཟང་འདི་རྣམས་གཙོ་བོར་རྗེས་ཐོབ་ཏུ་བསོད་ནམས་ཀྱི་ཚོགས་མཐར་ཕྱིན་པའི་གསལ་བྱེད་ཀྱི་རྒྱུ་ལས་སྣང་བ་རྒྱས་འགྱུར་ཡོངས་སུ་སྨིན་པའི་འབྲས་བུ་སྟེ། ཇི་ལྟར་སྤྲིན་མེད་པའི་མཁའ་ལ་ཟླ་བའི་དཀྱིལ་འཁོར་ཡོངས་སུ་རྫོགས་པ་ཉིད་དྭངས་པའི་མཚོ་ལ་འཆར་བ་བཞིན། སངས་རྒྱས་ཆོས་ཀྱི་སྐུ་ལས་མ་གཡོས་བཞིན་དུ་ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུ་གཉིས་པོ་རང་རང་གི་འཁོར་གྱི་དཀྱིལ་འཁོར་དུ་འཚམ་པར་སྣང་བ་ཡིན་ནོ། །སྐབས་འདིར་ཤེས་པར་བྱ་བ། གྲུབ་མཐའ་རིན་པོ་ཆེའི་མཛོད་ལས། སངས་རྒྱས་དེའང་བྲལ་བའི་རྒྱུ་འབྲས་ལས། བསྐྱེད་བྱ་སྐྱེད་བྱེད་ཀྱི་རྒྱུ་འབྲས་ཀྱིས་སྒྲུབ་པ་མ་ཡིན་ཏེ་ཡེ་ནས་ལྷུན་གྱིས་གྲུབ་པའི་ཕྱིར་ན། རིགས་གཉིས་ལ་སངས་རྒྱས་སྐུ་གསུམ་ཡེ་ལྡན་དུ་ཡོད་པའི་ཆ་ཤེས་པར་བྱའོ། །དེའང་སངས་རྒྱས་ཀྱི་སའི་རྒྱས་འགྱུར་སྣང་ཆ་ལོངས་སྐུ་དང་། དེའི་སྟོང་ཆ་ཆོས་སྐུ་རང་བཞིན་གྱི་རིགས་དེ་གཉིས་དབྱེར་མེད་པའི་བྱིན་རླབས་ལས། འགྲོ་བའི་སྣང་ངོར་རང་རང་གི་སྐལ་བ་དང་མཐུན་པའི་སྤྲུལ་སྐུ་སྣང་བ་ཉིད། ནམ་མཁའ་ལ་འཁོར་ལོས་སྒྱུར་བའི་རྒྱལ་པོ་སྣང་བའི་གཟུགས་བརྙན་གསེར་གྱི་རི་ངོགས་ལ་ཤར་བ་བཞིན་ནོ། །ཞེས་དང་། དཔལ་ས་སྐྱ་པ་ཆེན་པོས་ཀྱང་། རང་བཞིན་རྒྱུ་ལ་བསམ་ན་ལྷུན་གྲུབ་སྟེ། །མཐའ་ཡས་ཡོན་ཏན་ཚོགས་ནི་གནས་གྱུར་ཡིན། །དེས་ན་ལྷུན་གྲུབ་གནས་གྱུར་མི་འགལ་ཏེ། །འདི་ནི་འབྲས་བུའི་འཁོར་འདས་དབྱེར་མེད་ཡིན། །ཞེས་གསུངས། དེ་ལྟར་བྲལ་སྨིན་གྱི་ཡོན་ཏན་དྲུག་ཅུ་རྩ་བཞི་པོས་མཚོན་ཏེ་སངས་རྒྱས་སྐུ་གསུམ་གྱི་བདག་ཉིད་ལ་ཡོན་ཏན་གྱི་དབྱེ་བ་ཚད་མེད་པར་ཤེས་པར་བྱའོ། །བཞི་པ་གཞན་དག་ཀྱང་རྟོགས་པར་བྱ་བའི་གནས་ཡོན་ཏན་གྱི་ནུས་པ་ཕྲིན་ལས་བསྟན་པ་ལའང་གཉིས་ལས། དང་པོ་ལྷུན་གྱིས་གྲུབ་པའི་ཕྲིན་ལས་རྒྱུན་མི་ཆད་པའི་ཚུལ་སྤྱིར་བསྟན་པ་ནི། གདུལ་བྱའི་ཁམས་དང་འདུལ་བའི་ཐབས་དང་ནི། །གདུལ་བྱའི་ཁམས་ཀྱི་འདུལ་བའི་བྱ་བ་དང་། །དེ་ཡི་ཡུལ་དང་དུས་སུ་གཤེགས་པ་ལ། །ཁྱབ་བདག་རྟག་ཏུ་ལྷུན་གྱིས་གྲུབ་པར་འཇུག །ཅེས་གསུངས་པ་ལྟར། རིགས་ཅན་གསུམ་གྱི་གདུལ་བྱ་གང་གི་ཆེད་དུ་འཇུག་པ་དང་། དེ་དག་གི་ཁམས་དབང་བསམ་པ་དང་མཐུན་པར་ཐབས་གང་དང་གང་གིས་འདུལ་བ་དང་། གདུལ་བའི་བྱ་བ་གནས་སྐབས་དང་མཐར་ཐུག་གི་འབྲས་བུ་གང་ལ་འགོད་པ་དང་། གདུལ་བྱ་དེ་གནས་སྐབས་ཡུལ་གང་དང་གང་དུ་ཡོད་པའི་ཕྱོགས་དེར་གཤེགས་པ་དང་། སྐབས་སུ་བབས་པའི་དུས་གང་གི་ཚེ་འདུལ་བ་རྣམས་ལ་རྣམ་པར་རྟོག་པའི་འབད་རྩོལ་མེད་པར་ལྷུན་གྱིས་གྲུབ་པའི་ཕྲིན་ལས་དུས་རྒྱུན་མི་འཆད་པར་འབྱུང་བ་ཡིན་ཏེ། དེ་ཡང་རྒྱུ་གང་ལ་བརྟེན་ནས་རྒྱུན་མི་འཆད་ན། མཐར་འབྲས་ལ་ངེས་པར་འབྱིན་པའི་རྒྱུ་གཟུགས་དང་ཏིང་ངེ་འཛིན་ལ་སོགས་པའི་ཡོན་ཏན་རིན་པོ་ཆེའི་ཚོགས་མཐའ་ཡས་པ་དང་ལྡན་ཞིང་དྲི་མ་མེད་པའི་ཡེ་ཤེས་ཀྱི་ཆུས་ཡོངས་སུ་གང་བའི་རྒྱ་མཚོ་ཆེན་པོ་ལྟ་བུ་བྱང་ཆུབ་སེམས་དཔའི་ས་བཅུ་དང་། དེའི་རྐྱེན་ནམ་ཉེ་བར་རྟོན་པའི་རྒྱུ་བསོད་ནམས་དང་ཡེ་ཤེས་ཀྱི་ཚོགས་སེམས་ཅན་རྣམས་སྨིན་པར་བྱེད་པ་ཉི་མའི་འོད་ཟེར་ལྟ་བུ་སྟེ་རྒྱུ་ཕུན་སུམ་ཚོགས་པ་སྔོན་དུ་སོང་བ་ལས་སོ། །འབྲས་བུ་གང་ཐོབ་པས་རྒྱུན་མི་འཆད་ན། མཐའ་དབུས་མེད་ཅིང་རྒྱ་ཆེ་བ་ནམ་མཁའ་ལྟར་འཕོ་འགྱུར་མེད་ཅིང་ཀུན་ལ་ཁྱབ་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཆེན་པོ་ཐོབ་པ་ལས་སོ། །ཡུལ་གང་ཡོད་པས་རྒྱུན་མི་འཆད་ན། སེམས་ཅན་གྱི་ཁམས་གདོད་མ་ནས་རྣམ་པར་དག་ཅིང་སྟོབས་སོགས་ཚད་མེད་པའི་ཡོན་ཏན་གྱིས་འབྱོར་པའི་གཏེར་ལྟ་བུ་དེ་ཐམས་ཅད་ལ་ཁྱད་མེད་པར་ཡོད་པར་གཟིགས་པ་དང་། དེ་སྒྲིབ་བྱེད་ཀྱི་དྲི་མ་གློ་བུར་བ་སྤྲིན་ལྟ་བུས་ཁྱབ་པ་དེ་བསལ་དུ་རུང་བ་དང་། དེ་སེལ་བྱེད་ཀྱི་རྐྱེན་ཆོས་བསྟན་པ་སོགས་རྒྱལ་བ་རྣམས་ཀྱི་ཐུགས་རྗེའི་ཤུགས་རླུང་དྲག་པོ་དང་འདྲ་བས་གཏོར་བར་ནུས་པས་ཏེ། མདོར་ན་སྔོན་སློབ་ལམ་དུ་སེམས་ཅན་མ་ལུས་པ་སྒྲོལ་བར་དམ་བཅས་ཤིང་གཞན་དོན་ཁོ་ནའི་དབང་དུ་བྱས་པའི་ལམ་གྱིས་ངེས་པར་འབྱུང་བར་བྱས་པའི་ཕྱིར་དང་། གཞན་དོན་དུ་བྱང་ཆུབ་ཐོབ་ནས་བདག་ཉིད་དང་སེམས་ཅན་རྣམས་སངས་རྒྱས་ཀྱི་སྙིང་པོ་ཅན་དུ་མཚུངས་པར་གཟིགས་པས་ཕྲིན་ལས་དོན་ཡོད་པར་མཁྱེན་པའི་ཕྱིར་དང་། སེམས་ཅན་གྱི་ཁམས་ལ་མཐའ་མེད་པས་འགྲོ་བ་ཐམས་ཅད་སངས་རྒྱས་ཀྱི་ས་ལ་འགོད་པར་མཛད་པའི་མཛད་པ་ཡོངས་སུ་མ་རྫོགས་པའི་ཕྱིར། འཁོར་བ་ཇི་སྲིད་མ་སྟོང་གི་བར་དུ་སངས་རྒྱས་རྣམས་ཀྱི་མཛད་པ་རྒྱུན་མི་འཆད་པ་ཡིན་ནོ། །གཉིས་པ་དེ་ཉིད་རྟོགས་དཀའ་བ་དཔེ་ཡི་སྒོ་ནས་བྱེ་བྲག་ཏུ་བསྟན་པ་ནི། བརྒྱ་བྱིན་རྔ་སྤྲིན་ཚངས་པ་དང་། །ཉི་མ་ནོར་བུ་རིན་ཆེན་བཞིན། །དེ་བཞིན་གཤེགས་པ་སྒྲ་བརྙན་བཞིན། །ནམ་མཁའ་དང་ནི་ས་བཞིན་ནོ། །ཞེས་གསུངས་པ་བཞིན། དོན་དམ་པའི་སངས་རྒྱས་ནི་རང་བྱུང་གི་ཡེ་ཤེས་འདུས་མ་བྱས་པའི་སྐུ་ནམ་མཁའ་ལྟ་བུ་འབད་རྩོལ་དང་རྣམ་རྟོག་གི་གཡོ་བ་མེད་པ་ཡིན་ན། དེས་རྟག་ཁྱབ་ལྷུན་གྱིས་གྲུབ་པའི་གཞན་དོན་གྱི་མཛད་པ་ལ་ཇི་ལྟར་འཇུག་སྙམ་པའི་ཐེ་ཚོམ་གྱི་དོགས་པ་བསལ་བའི་ཕྱིར། འཇིག་རྟེན་ན་འབད་རྩོལ་དང་རྣམ་རྟོག་མེད་ཀྱང་གཞན་དོན་དུ་འགྱུར་བ་ཡོད་པའི་དཔེ་དགུ་པོ་གོ་རིམ་ཇི་ལྟ་བ་བཞིན་དུ། སྔ་མ་སྔ་མས་སེལ་མ་ནུས་པའི་ཆ་ཕྱི་མ་ཕྱི་མས་བསལ་བའི་ཚུལ་གྱིས་སྟོན་པར་མཛད་པ་སྟེ། དེ་ཡང་། ཆོས་ཀྱི་སྐུ་ལས་མ་གཡོས་པར་སྐལ་བ་དང་ལྡན་པའི་གདུལ་བྱ་རྣམས་ཀྱི་དག་པའི་སེམས་ལ་གཟུགས་སྐུའི་རྣམ་འཕྲུལ་མཐའ་ཡས་པ་བསྟན་ནས་མཐར་འབྲས་ལ་ངེས་པར་སྦྱོར་བར་མཛད་པ་ནི་བརྒྱ་བྱིན་ལྷ་ཡི་གྲོང་ཁྱེར་དང་བཅས་པ་རང་གི་གནས་ནས་མ་གཡོས་པར་གཟུགས་བརྙན་བཻཌཱུཪྱའི་ས་གཞི་ལ་ཤར་བས་གཟུགས་བརྙན་ལ་རྟོག་པ་མེད་ཀྱང་མི་རྣམས་ཀྱི་དོན་བྱེད་པ་བཞིན་དང་། དེ་བཞིན་དུ་སེམས་མཉམ་པར་མ་བཞག་པ་རྣམས་མཉམ་པར་བཞག་པ་དང་། མཉམ་པར་བཞག་པ་རྣམས་རྣམ་པར་གྲོལ་བར་བྱ་བའི་ཆེད་དུ་ཆོ་འཕྲུལ་རྣམ་པ་གསུམ་ལ་བརྟེན་ནས་གསུང་གིས་གདམས་པ་དང་རྗེས་སུ་བསྟན་པ་ལེགས་པར་འདོམས་པས་ཀུན་ལ་ཁྱབ་པར་མཛད་པའི་ཚུལ་ནི་ལྷའི་རྔ་བོ་ཆེ་ལ་འབད་རྩོལ་སོགས་མི་མངའ་ཡང་ཆོས་ཀྱི་སྡོམ་བཞི་སོགས་སྟོན་པས་ལྷ་རྣམས་བག་མེད་པ་དང་འཇིགས་པ་སེལ་བར་བྱེད་པ་བཞིན་དང་། ཐུགས་ཀྱིས་ཤེས་བྱ་ཐམས་ཅད་ལ་ཁྱབ་པའི་བདག་ཉིད་ཇི་ལྟ་ཇི་སྙེད་ཀྱི་མཁྱེན་པའི་ཡེ་ཤེས་དང་། འཁོར་བ་སྡུག་བསྔལ་ལས་བསྒྲལ་བར་བཞེད་པའི་ཐུགས་བརྩེ་བ་ཆེན་པོས་ཐམས་ཅད་ལ་ཁྱབ་ཅིང་ཆོས་ཀྱི་ཆར་འབེབས་པས་རྣམ་གྲོལ་གྱི་མྱུ་གུ་བསྐྱེད་པར་མཛད་པ་ནི་སྤྲིན་གྱིས་ལྷའི་རྒྱལ་པོ་དབང་བསྒྱུར་གྱི་གནས་ནས་ངན་སོང་དམྱལ་བའི་བར་དུ་ལྟོས་པ་མེད་པར་ཁྱབ་པ་བཞིན་དང་། ཟག་པ་མེད་པའི་གནས་ཆོས་ཀྱི་དབྱིངས་ལས་ཅུང་ཟད་ཀྱང་མི་བསྐྱོད་པར་སྔོན་གྱི་སྨོན་ལམ་དང་གདུལ་བྱའི་དགེ་བའི་མཐུས་རང་རང་གི་མོས་པ་དང་མཐུན་པར་དགའ་ལྡན་གྱི་གནས་ནས་གཤེགས་པ་སོགས་སྐུ་དང་གསུང་གི་སྤྲུལ་པ་མི་འདྲ་བ་རྣམ་པ་དུ་མ་སྟོན་པ་ནི་ཚངས་པ་གཟུགས་ཁམས་ཀྱི་གནས་ནས་མ་གཡོས་པར་སྤྲུལ་པ་འདོད་ཁམས་ཀྱི་ལྷ་རྣམས་ཀྱི་ནང་དུ་བསྟན་ནས་དོན་བྱེད་པ་བཞིན་དང་། བསམ་གྱིས་མི་ཁྱབ་པའི་ཡེ་ཤེས་ལ་བརྟེན་ནས་དམ་པའི་ཆོས་ཀྱི་སྣང་བ་མུ་མེད་པར་སྤྲོས་པས་གདུལ་བྱ་རྣམས་རང་རང་གི་སྐལ་བ་དང་འཚམ་པར་ཡོངས་སུ་སྨིན་པར་མཛད་པ་ནི་ཉི་མ་ལ་རྟོག་པ་མེད་པར་འོད་ཟེར་མཐའ་ཡས་པ་སྤྲོ་བས་མུན་པ་སེལ་བ་དང་ལོ་ཐོག་སྨིན་པར་བྱེད་པ་བཞིན་དང་། གཟུང་འཛིན་མཚན་མའི་རྟོག་པ་དང་བྲལ་བའི་ཐུགས་ཀྱི་གསང་བ་ཟབ་མོ་ལ་བརྟེན་ནས་གཞན་དོན་མཛད་པ་ནི་ཡིད་བཞིན་གྱི་ནོར་བུ་རིན་པོ་ཆེ་དབང་གི་རྒྱལ་པོ་ལ་རྣམ་རྟོག་མེད་ཀྱང་དགོས་འདོད་མ་ལུས་པ་སྩོལ་བའི་མཐུ་དང་ལྡན་པ་བཞིན་དང་། རང་རང་གི་ཁམས་དབང་དང་མཐུན་པར་གདུལ་བྱ་རྣམས་ཀྱི་སྣ་ཚོགས་སུ་ཐོས་ཀྱང་མིང་ཚིག་ཡི་གེའི་ངོ་བོར་གྲུབ་པ་མེད་པ་གསུང་གི་གསང་བ་ནི་བྲག་ཆའི་སྒྲ་བརྙན་སྣ་ཚོགས་སུ་གྲགས་ཀྱང་བདེན་པས་སྟོང་པ་བཞིན་དང་། ཐམས་ཅད་ལ་ཁྱབ་ཅིང་སྣ་ཚོགས་སུ་སྣང་ཡང་འདུས་བྱས་མཚན་མའི་གཟུགས་སུ་མེད་ཅིང་རང་བཞིན་སྐྱེ་འགག་དང་བྲལ་བ་སྐུའི་གསང་བ་ནི་ནམ་མཁས་ཀུན་ལ་ཁྱབ་ཀྱང་གཟུགས་རུང་གི་མཚན་ཉིད་དང་བྲལ་བས་ངོ་བོ་མི་འགྱུར་བའི་རྟག་པ་བཞིན་དང་། གནས་མ་ལུས་པ་ཡོངས་སུ་གྱུར་པའི་ཐུགས་རྗེ་ཆེན་པོས་གཞན་དོན་མཛད་པ་ནི་ས་གཞིས་ཐམས་ཅད་ཀྱི་རྟེན་བྱས་ནས་ཕན་འདོགས་པ་བཞིན་ནོ། །འོན་ཀྱང་སྐུ་སྣང་བ་བརྒྱ་བྱིན་གྱི་གཟུགས་དང་ཕྱོགས་གཅིག་ཙམ་མཚུངས་མོད་གཟུགས་བརྙན་ནི་དབྱངས་དང་མི་ལྡན་ལ། སངས་རྒྱས་ནི་ཆོས་གསུངས་པའི་དབྱངས་དང་ལྡན་པས་མི་མཚུངས་ཏེ་ཁྱད་པར་འཕགས་སོ། །དེ་བཞིན་དུ་གསུང་གྲགས་པའི་ཆ་ནས་ལྷའི་རྔ་བོ་ཆེ་དང་འདྲ་ཡང་རྔ་སྒྲ་ནི་ཕྱོགས་རེ་བ་སྟེ་ཐམས་ཅད་དུ་ཁྱབ་པའི་དོན་མི་བྱེད་ལ། སངས་རྒྱས་ནི་གདུལ་བྱའི་འཇིག་རྟེན་ཐམས་ཅད་ལ་ཁྱབ་པར་དོན་མཛད་པས་འཕགས། ཐུགས་མཁྱེན་བརྩེས་ཐམས་ཅད་ལ་ཁྱབ་པའི་ཆ་ནས་སྤྲིན་དང་མཚུངས་མོད་སྤྲིན་ཆར་གྱིས་ནི་དོན་མེད་པའི་ས་བོན་སྤོང་བར་མི་བྱེད་ལ། སངས་རྒྱས་ནི་དོན་མེད་པ་ཆགས་སོགས་ཉོན་མོངས་པའི་ས་བོན་སྤོང་བར་མཛད་པས་འཕགས། ཉོན་མོངས་སྤོང་བའི་ཆ་ནས་སྤྲུལ་པ་ཚངས་པ་དང་འདྲ་ཡང་ཚངས་པ་ནི་ལན་གཅིག་ཙམ་ཕན་འདོགས་ཀྱི་གཏན་དུ་མ་ཡིན་ལ། སངས་རྒྱས་ནི་གཏན་དུ་རྒྱུན་མི་འཆད་པར་གདུལ་བྱའི་རྒྱུད་ཡོངས་སུ་སྨིན་པར་མཛད་པས་འཕགས། གདུལ་བྱ་སྨིན་པར་མཛད་པའི་ཆ་ནས་ཡེ་ཤེས་ཉི་མ་དང་མཚུངས་མོད་ཉི་མས་ནི་རེས་འགའ་སྣང་བ་ཡིན་ཏེ་ཉིན་མཚན་གཏན་དུ་ནི་མུན་པ་འཇོམས་པར་མི་བྱེད་ལ། སངས་རྒྱས་ཀྱིས་ནི་གཏན་དུ་རྒྱུན་མི་འཆད་པར་མི་ཤེས་པའི་མུན་པ་འཇོམས་པར་མཛད་པས་འཕགས། གཏན་དུ་མུན་པ་སེལ་བའི་ཆ་ནས་ཐུགས་ཀྱི་གསང་བ་ནོར་བུ་དང་མཚུངས་ཀྱང་ནོར་བུ་ནི་ཀླུ་སོགས་དུད་འགྲོ་ལ་ཡང་ཡོད་པས་རྙེད་མི་དཀའ་ལ། སངས་རྒྱས་ནི་སྐལ་བ་དང་མི་ལྡན་པ་རྣམས་ལ་འབྱུང་བ་རྙེད་པར་དཀའ་བས་འཕགས། རྙེད་དཀའ་བའི་ཆ་ནས་གསུང་གི་གསང་བ་སྒྲ་བརྙན་དང་འདྲ་ཡང་སྒྲ་བརྙན་ནི་གློ་བུར་དུ་རྐྱེན་ལ་རག་ལས་ལ། སངས་རྒྱས་ནི་རང་བྱུང་འདུས་མ་བྱས་ཡིན་པས་རྐྱེན་ལ་མི་ལྟོས་པས་འཕགས། འདུ ས་མ་བྱས་ཀྱི་ཆ་ནས་སྐུའི་གསང་བ་ནམ་མཁའ་དང་འདྲ་མོད་ནམ་མཁའ་ནི་དགེ་བའི་གཞིའམ་རྟེན་མིན་ལ། སངས་རྒྱས་ནི་དཀར་པོ་དགེ་བའི་ཆོས་རྣམས་ཀྱི་རྟེན་དུ་གྱུར་པས་འཕགས་སོ། །དེ་ལྟར་འཇིག་རྟེན་དང་འཇིག་རྟེན་ལས་འདས་པའི་འགྲོ་བའི་ཕུན་སུམ་ཚོགས་པ་མ་ལུས་པ་དེ་དག་གནས་པའི་རྟེན་ནམ་གཞིར་གྱུར་པ་ཡིན་པའི་ཕྱིར་སའི་དཀྱིལ་འཁོར་ཆེན་པོས་ཐམས་ཅད་ཀྱི་རྟེན་བྱེད་པ་དང་མཚུངས་པར་གསུངས་སོ། །མདོར་ན་གོང་དུ་རྒྱས་པར་བཤད་པའི་སངས་རྒྱས་ཀྱི་ཁམས་རང་བཞིན་གྱིས་རྣམ་པར་དག་པ་གློ་བུར་གྱི་དྲི་མ་དང་བཅས་པའི་སྐབས་དེ་བཞིན་གཤེགས་པའི་སྙིང་པོ་དང་། དེ་ཉིད་གློ་བུར་གྱི་དྲི་མས་ཀྱང་ཤིན་ཏུ་རྣམ་པར་དག་པའི་གནས་སྐབས་སངས་རྒྱས་གྱི་བྱང་ཆུབ་ཆེན་པོ་ཐོབ་པ་དང་། བྱང་ཆུབ་ཆེན་པོ་ལ་དབྱེར་མེད་པར་ལྡན་པའི་སངས་རྒྱས་ཀྱི་ཆོས་སྟོབས་ལ་སོགས་པའི་ཡོན་ཏན་ཁྱད་པར་ཅན་རྣམས་དང་། ཡོན་ཏན་རྣམས་ཐོབ་པའི་ནུས་པས་སངས་རྒྱས་ཀྱི་མཛད་པ་ལྷུན་གྱིས་གྲུབ་ཅིང་རྒྱུན་མི་འཆད་པར་སྒྲུབ་པའི་ཕྲིན་ལས་ཏེ། དཀོན་མཆོག་གསུམ་འགྲུབ་པ་དང་རྗེས་སུ་མཐུན་པའི་རྡོ་རྗེའི་གནས་བཞི་པོ་འདི་ནི་རྫོགས་པའི་སངས་རྒྱས་རྣམས་ཀྱི་ཡེ་ཤེས་ཁོ་ནའི་སྤྱོད་ཡུལ་ལས་དག་པའི་ས་ལ་གནས་པ་རྣམས་ཀྱིས་ཀྱང་ཇི་ལྟ་བ་བཞིན་བསམ་པར་མི་ནུས་ན་ཕལ་གྱིས་ལྟ་ཅི་སྨོས་ཏེ། འོན་ཀྱང་དད་པས་མོས་པར་བྱས་ན་བསོད་ནམས་ཀྱི་ཕུང་པོ་ཚད་མེད་པ་འཐོབ་པར་འགྱུར་ཏེ། བློ་ལྡན་རྒྱལ་བའི་ཡུལ་དེ་ལ་མོས་པ། །སངས་རྒྱས་ཡོན་ཏན་ཚོགས་ཀྱི་སྣོད་འགྱུར་ཏེ། །བསམ་མེད་ཡོན་ཏན་ཚོགས་ལ་མངོན་དགའ་བས། །སེམས་ཅན་ཀུན་གྱི་བསོད་ནམས་ཟིལ་གྱིས་གནོན། །གང་ཞིག་བྱང་ཆུབ་དོན་དུ་གཉེར་བས་གསེར་ཞིང་ནོར་བུས་སྤྲས་པ་ནི། །སངས་རྒྱས་ཞིང་རྡུལ་མཉམ་པ་ཉིན་རེ་ཆོས་རྒྱལ་རྣམས་ལ་རྟག་འབུལ་ན། །གཞན་གང་འདི་ལས་ཚིག་ཙམ་ཐོས་ཤིང་ཐོས་ནས་ཀྱང་ནི་མོས་ན་ནི། །སྦྱིན་པ་ལས་བྱུང་དགེ་བ་དེ་ལས་བསོད་ནམས་ཆེས་མང་ཐོབ་པར་འགྱུར། །བློ་ལྡན་གང་ཞིག་བླ་མེད་བྱང་ཆུབ་འདོད་པས་བསྐལ་པ་དུ་མར་ཡང་། །ལུས་ངག་ཡིད་ཀྱི་འབད་པ་མེད་པར་ཚུལ་ཁྲིམས་དྲི་མེད་སྲུང་བྱེད་ལ། །གཞན་གང་འདི་ལས་ཚིག་ཙམ་ཐོས་ཤིང་ཐོས་ནས་ཀྱང་ནི་མོས་ན་ནི། །ཚུལ་ཁྲིམས་ལས་བྱུང་དགེ་བ་དེ་ལས་བསོད་ནམས་ཆེས་མང་ཐོབ་པར་འགྱུར། །གང་ཞིག་འདི་ན་སྲིད་པ་གསུམ་གྱི་ཉོན་མོངས་མེ་འཇིལ་བསམ་གཏན་ནི། །ལྷ་དང་ཚངས་གནས་མཐར་སོན་རྫོགས་པའི་བྱང་ཆུབ་འཕོ་མེད་ཐབས་སྒོམ་ལ། །གཞན་གང་འདི་ལས་ཚིག་ཙམ་ཐོས་ཤིང་ཐོས་ནས་ཀྱང་ནི་མོས་ན་འདི། །བསམ་གཏན་ལས་བྱུང་དགེ་བ་དེ་ལས་བསོད་ནམས་ཆེས་མང་ཐོབ་པར་འགྱུར། །ཞེས་གསུངས་སོ། །ཕུན་ཚོགས་སྲིད་ཞིའི་དཔལ་འབྱོར་འདོད་དགུའི་ཆར། །འབེབས་མཛད་མཆོག་གསུམ་རྡུལ་བྲལ་མ་ཎི་ཀཿ། །གང་ལས་འབྱུང་བའི་ཟབ་དོན་དག་བྱེད་གཏེར། །ཐུབ་མཆོག་ཀླུ་ཡི་དབང་པོའི་རོལ་གནས་ཡིན། །སྐྱོབ་པ་མཚུངས་མེད་དེ་ཡི་སེང་གེའི་སྒྲས། །མཐར་ཐུག་ངེས་དོན་སྙིང་པོར་སྩལ་བའི་བཅུད། །ས་བཅུའི་དབང་ཕྱུག་མཆོག་གིས་ལེགས་བཀྲལ་ཕུལ། །ས་གསུམ་བརྙེས་པས་འཛམ་གླིང་ཁྱབ་པར་མཛད། །ཟབ་མོ་བྱིས་བློའི་སྤྱོད་ཡུལ་ལས་འདས་ཀྱང་། །མོས་པ་ཙམ་ཡང་མི་ལྡོག་ལུང་བསྟན་མཆོག །ཐོབ་མཚུངས་བསྔགས་པས་ཡིད་དྲང་དད་པའི་རླབས། །རྣམ་པར་བསྐྱོད་པའི་ཟློས་གར་འདི་ཁོ་ན། །མ་སྦྱངས་མུ་ཅོར་སྨྲ་བའི་ངང་ཚུལ་འདི། །མཁས་པའི་སྐྱེ་བོའི་མདུན་སར་འོས་མིན་ཡང་། །རང་ཉིད་དད་པ་འབའ་ཞིག་དབང་བྱས་ནས། །སྨྲ་ལ་ཉེས་པ་མེད་སྙམ་ཚུལ་འདི་བྲིས། །གྲོགས་དག་རང་ལ་ཡོད་པའི་ཆོས་སྐུའི་གཏེར། །ཟག་མེད་ཡོན་ཏན་བགྲེས་རྒུད་བྲལ་བའི་དཔལ། །ཐབས་མཁས་ཚོགས་གཉིས་འཕྲུལ་གྱིས་འབྱིན་མཛོད་དང་། །རང་གཞན་སྲིད་པའི་དབུལ་བ་རྒྱུན་ཆད་ངེས། །དགེ་བ་འདི་ཡིས་མཐའ་ཀླས་འགྲོ་བ་ཀུན། །ངེས་དོན་ཟབ་མོའི་སྣང་བ་ཐོབ་གྱུར་ནས། །གློ་བུར་འཁྲུལ་པའི་མུན་པ་དབྱིངས་སངས་ཏེ། །འཕོ་མེད་རྟག་པ་དམ་པའི་མགོན་གྱུར་ཅིག །བདག་ཀྱང་སྐྱེ་ཀུན་རྒྱལ་བའི་ཆོས་མཛོད་འཛིན། །རང་འདོད་འཁྲིས་ཟད་གཞན་ཕན་སྒོ་བརྒྱ་འབྱེད། །འབྲེལ་ཚད་དོན་ལྡན་ཐེག་མཆོག་སེང་གེའི་སྒྲས། །ས་གསུམ་འཇིག་རྟེན་ཀུན་ནས་དགའ་བྱེད་ཤོག །ཅེས་པའང་དོན་གཉེར་ཅན་གྱིས་བསྐུལ་བའི་རྐྱེན་དང་རང་ཉིད་ཀྱང་ལམ་འདི་ལ་ལྷག་པར་མོས་པའི་རྒྱུ་ལས། གདོད་མའི་མགོན་པོ་བློ་གྲོས་མཐའ་ཡས་སོགས་དམ་པ་དུ་མའི་ཞབས་རྡུལ་སྤྱི་བོས་ལེན་ཞིང་། མཁན་ཆེན་རྡོ་རྗེ་འཛིན་པ་ཚུལ་ཁྲིམས་རྒྱ་མཚོའི་བཀའ་དྲིན་ལས་གཞུང་འདི་ལ་བག་ཆགས་ཙམ་ཐེབས་པ་འཇམ་དབྱངས་བློ་གྲོས་རྒྱ་མཚོར་འབོད་པས་རང་གནས་ཟེ་ཆེན་བསྟན་གཉིས་དར་རྒྱས་གླིང་གི་ཡང་དབེན་བདེ་ཆེན་འོད་གསལ་ཕུག་ཏུ་ཞག་གསུམ་གྱི་ཁོངས་སུ་གྲུབ་པར་ཟིན་ཐུན་དུ་བཏབ་པ་སྟེ། འདིས་ཀྱང་བསྟན་པ་རིན་པོ་ཆེ་ཡུན་དུ་གནས་པའི་རྒྱུར་གྱུར་ཅིག། །།
༄༅། །ན་མོ་མཉྫུ་ཤྲི་ཡེ། སྤྱིར་གྲུབ་མཐའི་དབྱེ་བས་སྟོང་ཉིད་རྟོགས་ཚུལ་ལ་འདོད་པ་མང་ཡང་། བསྡུ་ན། ཉན་ཐོས་དབང་པོ་རྟུལ་པོ་དང་གྲུབ་མཐའ་བྱེ་སྨྲ་ལ་བརྟེན་པ་རྣམས་ནི། གང་ཟག་རང་རྒྱུད་ཀྱི་ཕུང་པོའི་ཚོགས་པ་འདི་རྡུལ་དང་སྐད་ཅིག་མའི་ཆོས་ཙམ་དུ་མཐོང་བས་ཕུང་པོའི་རིལ་འཛིན་ལྡོག་ཅིང་། དེ་ལ་བརྟེན་ནས་གང་ཟག་གི་བདག་ཀྱང་བཏགས་པ་ཙམ་ལས་རང་བཞིན་གྱིས་གྲུབ་པ་མེད་པར་ཁོང་དུ་ཆུད་པའི་སྟོང་པ་ཉིད་དེ་ཙམ་རྟོགས་པ་ཡིན་ལ། ཉན་ཐོས་དབང་པོ་རྣོན་པོ་དང་གྲུབ་མཐའ་མདོ་སྡེ་པ་ལ་བརྟེན་པ་རྣམས་ཀྱིས། སྔར་གྱི་གང་ཟག་གི་བདག་མེད་དེའི་སྟེང་དུ་རང་རྒྱུད་ཀྱི་ཕུང་པོའི་ཚོགས་པ་འདི་ལ་རྡུལ་ཕྲན་ཆ་མེད་པར་རྟོགས་པའི་རྟེན་འབྲེལ་ཉི་ཚེ་བ་རང་རྒྱལ་དང་ཕྱོགས་མཚུངས་སུ་རྟོགས་པའོ། །རང་རྒྱལ་ཡང་དབང་རྟུལ་ཁ་ཅིག་གི་རྟོགས་རིགས་དེ་དང་ཕྱོགས་མཐུན་ལ། དབང་རྣོན་བསེ་རུ་ལྟ་བུ་ནི། འཛིན་སེམས་སྐད་ཅིག་ཆ་མེད་རང་བཞིན་མེད་པར་མ་རྟོགས་ཀྱང་། གཟུང་བའི་རང་བཞིན་ཕྱི་ནང་གི་དངོས་པོ་ཐམས་ཅད་རྟེན་འབྱུང་སེམས་སྣང་སྒྱུ་མ་ཙམ་དུ་རྟོགས་པའོ། །དེས་ན་ཉན་ཐོས་ཀྱིས་གང་ཟག་བདག་མེད་དང་། རང་རྒྱལ་གྱིས་བདག་མེད་ཕྱེད་དང་གཉིས་རྟོགས་པ་གཉིས་ཀའང་སྟོང་གཞི་ཆོས་ཅན་གྱི་དབྱེ་བ་ཐ་དད་པ་ཙམ་ལས་བརྟེན་ནས་བཏགས་པའི་སྟོང་ཉིད་ཙམ་དུ་རིགས་གཅིག་པའི་ཕྱིར་གཉིས་ཀའང་ཆོས་ཀྱི་བདག་མེད་ཀྱི་བྱེ་བྲག་ཏུ་འགྱུར་བ་ཡིན་ནོ། །ཐེག་ཆེན་སེམས་ཙམ་པས། དེའི་སྟེང་འཛིན་སེམས་སྐད་ཅིག་ཆ་མེད་ཀྱང་རང་བཞིན་མེད་པར་ཤེས་པས་བདག་མེད་གཉིས་རྟོགས་པ་ཡིན་ལ། འོན་ཀྱང་བདག་གཉིས་ཀྱིས་སྟོང་པའི་གཞི་རྣམ་ཤེས་རང་རིག་རང་གསལ་ཙམ་ཞིག་དོན་དམ་དུ་ཡོད་པར་བཞེད་དོ། །འདིར་ཡིད་བཞིན་མཛོད་འགྲེལ་དུ། དེ་ལ་གཟུང་འཛིན་གཉིས་མེད་ཀྱི་འཛིན་པ་ཡོད་ལ་གཟུང་བ་མེད་པ་ནི་རང་སངས་རྒྱས་ཀྱང་འདོད་ལ། གཉིས་ཀ་མེད་པ་ནི་སྟོང་པར་སྨྲ་བ་དང་གཅིག་ཏུ་འགྱུར་ན་ཇི་ལྟར་ཡིན་ཞེ་ན། གཟུགས་སོགས་ཡུལ་དང་། དེ་ལ་འཛིན་པའི་སེམས་གཉིས་ཀ་མེད་ཀྱང་། གཉིས་མེད་དུ་མྱོང་བའི་རང་རིག་རང་གསལ་འདོད་པས་སྟོང་པའི་ཕྱོགས་དང་། རང་སངས་རྒྱས་དང་མི་མཚུངས་སོ། །གསུངས། དབུ་མ་པས་ནི་དོན་དམ་པར་གཉིས་སྟོང་གི་ཤེས་པ་རང་རིག་རང་གསལ་ཙམ་དུའང་གྲུབ་པ་མེད་པས་ཕྱི་ནང་གི་ཆོས་ཐམས་ཅད་སྟོང་ཉིད་སྤྲོས་བྲལ་སྒྱུ་མ་ཙམ་དུ་འདོད་པ་སྟེ། དེ་ཡང་རང་རྒྱུད་པས་ཆོས་ཐམས་ཅད་བདེན་པ་གཉིས་སུ་བསྡུས་ཏེ། ཐ་སྙད་དུ། ཀུན་རྫོབ་ལ་ཡང་ལོག་དང་། དོན་དམ་ལ་རྣམ་གྲངས་ཡིན་མིན་གཉིས་སུ་ཕྱེས་ནས་འཕགས་པའི་རྗེས་ཐོབ་ཀྱི་གཟིགས་པ་དང་མཐུན་པར་གནས་སྐབས་སུ་ལམ་གཏན་ལ་དབབ་ནས་རིམ་གྱིས་སྤྲོས་བྲལ་མཉམ་པ་ཆེན་པོ་ལ་སྦྱོར་བར་མཛད་དེ། ད་དུང་རང་ཕྱོགས་སྒྲུབ་པའི་ཁས་ལེན་ལ་ཞེན་པ་ཕྲ་མོ་ཡོད་པས་རབ་ཏུ་མི་དམིགས་པ་དེ་ཁོ་ན་ཉིད་ཀྱི་དབུ་མ་ལས་གཞན་དུ་འགྱུར་བར་བཞེད། ཐལ་འགྱུར་པས་ནི། ཐོག་མ་ནས་འཕགས་པའི་མཉམ་གཞག་གི་གཟིགས་པ་དང་མཐུན་པར་ཀུན་རྫོབ་ཡང་ལོག་དང་དོན་དམ་རྣམ་གྲངས་ཡིན་མིན་སོགས་སུ་འཛིན་པའི་གཉིས་ཆོས་ཀྱི་སྤྲོས་པ་མཐའ་དག་བཀག་ནས་སྣང་སྟོང་ཟུང་འཇུག་བསམ་འདས་བརྗོད་བྲལ་ཆེན་པོར་གཏན་ལ་འབེབས་པས་མདོ་ལམ་གྱི་གྲུབ་མཐའི་རྩེ་མོ་ལྟ་བ་ཁས་ལེན་ཀུན་བྲལ་དུ་སོན་པ་སྟེ། ཐ་སྙད་ཙམ་དུ་དབྱེ་ན་བདེན་གཉིས་ངོ་བོ་གཅིག་ལ་ལྡོག་པ་ཐ་དད་དེ་གཉིས་ཀས་དོན་དམ་སྟོང་ཉིད་དང་། སྣང་བ་ཀུན་རྫོབ་ཏུ་འཇོག་པའི་གནད་ཀྱིས་ཁ་ཅིག་གིས་རང་སྟོང་ཞེས་བཞེད་དོ། །ངེས་དོན་དབུ་མ་ཆེན་པོས་ནི། མཉམ་བཞག་ཏུ་སྤྲོས་པ་འགོག་ཚུལ་དེ་དང་དོན་གཅིག་ཀྱང་། རྗེས་ཐོབ་ཤན་འབྱེད་སྐབས་ཐ་སྙད་དཔྱོད་བྱེད་ཀྱི་ཚད་མའི་ངོར། གང་གནས་སྣང་མཐུན་པའི་ཡུལ་ཡུལ་ཅན་གཉིས་ཀ་ལ་དོན་དམ་དང་། མི་མཐུན་པ་ལ་ཀུན་རྫོབ་ཏུ་བྱས་ཏེ་ཁས་ལེན་པའི་དབང་གིས་འདི་ལ་ཁ་ཅིག་གིས་གཞན་སྟོང་ཞེས་གདགས་ཏེ། དོན་དུ་འཁྲུལ་སྣང་འཁོར་བའི་ཆོས་འདི་ཐམས་ཅད་མི་བདེན་ཞིང་བསླུ་བའི་ཕྱིར་ཀུན་རྫོབ་དང་གནས་སྐབས་ལམ་གྱིས་སྦྱང་དུ་ཡོད་ཅིང་འབྲལ་ཤེས་པས་སྟོང་ལ། ཟབ་ཞི་འོད་གསལ་མྱ་ངན་ལས་འདས་པའི་ཆོས་རྣམས་ནི་ནམ་ཡང་འགྱུར་བ་མེད་པའི་ཕྱིར་དོན་དམ་པ་དང་ཡོན་ཏན་གྱི་ཆོས་རྣམས་རང་གཞིན་དབྱེར་མེད་པས་མི་སྟོང་པ་སྟེ། རྒྱུད་བླ་མར། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གིས། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་གསུངས་པ་ལྟར་གནས་སྐབས་ཀྱི་གྲུབ་མཐའི་ཁས་ལེན་རྣམས་འཁོར་ལོ་ཐ་མའི་བཀའ་དང་དགོངས་འགྲེལ་རྣམས་ལྟར་གཙོ་བོར་མཛད་པའི་ཁྱད་པར་ཙམ་མོ། །ཁྱད་པར་དུ། རང་ལུགས་ཀུན་མཁྱེན་ཆེན་པོ་བརྒྱུད་པ་དང་བཅས་པས་ནི། ཡིད་བཞིན་རིན་པོ་ཆེའི་མཛོད་ལས། ཀུན་རྫོབ་རྣམ་ཆད་རྣམ་དབྱེའི་ཡུལ་འདས་པས། །བཏགས་པའི་བདེན་གཉིས་འདས་ཕྱིར་སྤྲོས་ཀུན་ཞི། །བདེན་པ་དབྱེར་མེད་གྲུབ་དང་མ་གྲུབ་མེད། །དབྱིངས་ལ་སྣང་སྟོང་རང་བཞིན་གཉིས་མེད་པས། །བདེན་པ་དེ་ཡང་དབྱེར་མེད་ཅེས་སུ་བརྗོད། །ཅེས་གསུངས་པས། བློས་གཞལ་བའི་ཀུན་རྫོབ་གྱི་ཆོས་ཡུལ་ཡུལ་ཅན་དང་བཅས་པ་གདོད་ནས་གྲུབ་མ་མྱོང་བའི་ཕྱིར་ཐ་སྙད་ཙམ་དུའང་བདེན་གཉིས་སུ་དབྱེ་བའི་གཞི་ཟད་པས་དབྱེར་མེད་ལ། དོན་དམ་གནས་ཚུལ་མཐར་ཐུག་ཟབ་ཞི་སྤྲོས་བྲལ་འོད་གསལ་མཉམ་པ་ཆེན་པོ་ལ་སྣང་སྟོང་ཐ་དད་དུ་དབྱེ་བའི་གཞིར་མ་གྲུབ་པས་དབྱེར་མེད་ཆེན་པོ་སྟེ། དོན་ལ་བདེན་གཉིས་དབྱེར་མེད་མཉམ་པར་ཆེན་པོར་གཏན་ལ་འབེབས་པ་མདོ་སྔགས་ཟུང་འཇུག་གི་ལྟ་བའི་གནད་གསང་མཐར་ཐུག་པ་སྟེ། འདིའི་ལུགས་ལ་བདེན་གཉིས་ཐ་སྙད་ཙམ་དུ་དབྱེ་ན། འཁྲུལ་སྣང་འཁོར་བའི་ཆོས་ཀུན་མི་བདེན་ཞིང་བསླུ་བའི་ཆོས་ཅན་ཐག་ཁྲའི་སྦྲུལ་ལྟར་དོན་ལ་མེད་ཕྱིར་ཀུན་རྫོབ་དང་། ཟབ་ཞི་འོད་གསལ་མྱ་ངན་ལས་འདས་པའི་ཆོས་སྐུ་དང་ཡེ་ཤེས་སོགས་རང་བཞིན་གྱིས་ལྷུན་གྱིས་གྲུབ་ཅིང་ཡེ་ནས་འཕོ་འགྱུར་དང་བྲལ་བའི་ཕྱིར་དོན་དམ་སྟེ། དེ་ཡང་སྣང་སྟོང་གི་ཟླས་ཕྱེ་བའི་ཐ་སྙད་བློས་བཀོད་ཀྱི་བདེན་གཉིས་རིལ་པོ་སྐབས་འདིར་ཀུན་རྫོབ་ཏུ་བཞག་ནས་མ་གྲུབ་པ་ཉིད་གཏན་ལ་འབེབས་ཏེ། མདོ་སྡེ་རྒྱན་ལས། གཞན་གྱི་མར་ནི་གང་བརྗོད་པ། །དེ་ནི་གཞན་གྱི་ཆུང་མ་ཉིད། །གཞན་གྱི་དོན་དམ་གང་ཡིན་པ། །དེ་ནི་གཞན་གྱི་ཀུན་རྫོབ་ཉིད། །ཅེས་གསུངས་པ་བཞིན། རང་བཞིན་གདོད་ནས་དག་པའི་ཆོས་ཉིད་འོད་གསལ་ལྷུན་གྲུབ་འདུས་མ་བྱས་མཉམ་པ་ཆེན་པོ་ནི་བློ་དང་སྒྲ་རྟོག་སོགས་ཐ་སྙད་ཐམས་ཅད་ལས་འདས་པས་དོན་དམ་པའི་བདེན་པ་སྟེ། རྒྱལ་སྲས་ཞི་བ་ལྷས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་དང་། མགོན་པོ་བྱམས་པས། འདི་ལ་བསལ་བྱ་ཅི་ཡང་མེད། །བཞག་པ་བྱ་བའང་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་དང་། སྒྱུ་འཕྲུལ་བླ་མ་ལས། དོན་དམ་ཀུན་རྫོབ་དབྱེར་མེད་པ། །མཉམ་པའི་དཀྱིལ་འཁོར་ཆེན་པོ་རུ། །ཞེས་གསུངས་པའི་དོན་ཏེ་འདིའི་ལུགས་ལ་གཤིས་ལ་འཁོར་བ་མ་གྲུབ་ལ་སྣང་། དོན་དམ་གྲུབ་ལ་ད་ལྟ་མི་སྣང་། སངས་རྒྱས་དུས་སྣང་ཞེས་བྱ་བར་བཞག་སྟེ། དེས་ན། བདེན་པ་གཉིས་པོ་གཅིག་པ་བཀག་པའི་ཐ་དད་ལྟ་བུར་དོན་གྱིས་སོང་བ་སྟེ། གཙོ་བོར་རྒྱུད་བླ་མ་དང་བསྟོད་ཚོགས་སྒྱུ་འཕྲུལ་སོགས་ངེས་དོན་མདོ་རྒྱུད་ཟབ་མོ་རྣམས་ཀྱི་དགོངས་པ་སྒྲ་ཇི་བཞིན་པར་ཁས་ལེན་པ་ཡིན་ནོ། །ནང་ཉམས་མྱོང་བསྒོམ་པའི་སྐབས་སུའང་། གཞན་སྡེའི་གྲུབ་མཐའ་སྨྲ་བའི་འདོད་པ་བསམ་མི་ཁྱབ་པ་དང་སྟོང་ཉིད་དང་མཐའ་བྲལ་དང་གསལ་ལེ་སེང་ངེ་སོགས་དང་། རང་སྡེའི་ཆོས་དབྱིངས་བསམ་མི་ཁྱབ་པ་དང་སྟོང་ཉིད་མཐའ་བྲལ་སོགས་མི་འདྲ་བའི་ཁྱད་པར། ཐེག་པ་ཐུན་མོང་བ་སྤྱི་སྐད་ཀྱི་དབང་དུ་བྱས་ན། དེ་དག་ཆོས་ཐམས་ཅད་རང་བཞིན་མེད་པར་ཤེས་པའི་ཤེས་རབ་བམ་གང་ཟག་དང་ཆོས་ཀྱི་བདག་མེད་རྟོགས་པ་དང་མ་འབྲེལ་བས་ཡིན་ལ། བྱེ་བྲག་ཐུན་མིན་རྫོགས་པ་ཆེན་པོའི་ལུགས་ལྟར་ན། ཁ་ཕྱིར་བལྟས་ཀྱི་དཔྱད་པ་ཙམ་གྱི་གོ་ཡུལ་ལ་གདེང་བཅས་ནས་རྣམ་ཤེས་ལ་དོན་འཚོལ་བའི་སྐྱོན་གྱིས་ཡིན་པས་ཐེག་བརྒྱད་བློ་ཡི་གོལ་སར་བསྟན་པ་ཡིན་ལ། བློ་བྲལ་རྫོགས་པ་ཆེན་པོའི་རང་ལུགས་ནི། དཔྱད་སྟོང་ཙམ་གྱི་གོ་བ་དང་ཡིད་དཔྱོད་མཚན་མའི་ལྟ་སྒོམ་ལ་གདེང་མི་འཆའ་བར། ཐོག་མ་ནས་རྟོགས་པ་དོན་བརྒྱུད་དང་ལྡན་པའི་བླ་མ་ཞིག་བཙལ་ཞིང་བསྟེན་ནས་མོས་གུས་བླ་མའི་ལམ་ཁྱེར་གྱིས་དགོངས་པའི་གསང་མཛོད་བརྟོལ་བར་བྱེད་པ་འདི་ལམ་གྱི་སྙིང་པོ་ཡིན་ནོ། །དེ་ཡང་པཎྜི་ཏའི་དཔྱད་སྒོམ་གཅིག་དུ་བྲལ་ལམ་རྡུལ་ཕྲན་བརྟག་འགོག་སོགས་ཀྱི་དབུ་མའི་རིགས་པས་དཔྱད་པའམ། ཀུ་སཱ་ལི་འཇོག་སྒོམ་སྔོན་འགྲོ་སེམས་ཀྱི་ཁང་བུ་བཤིག་པའི་མན་ངག་ཙམ་ལ་བརྟེན་པ་གང་ཡིན་ཀྱང་འདྲ་སྟེ། དོན་དུ་གཏན་ལ་དབབ་བྱ་རང་གི་སེམས་ཉིད་ལྷན་ཅིག་སྐྱེས་པའི་ཡེ་ཤེས་སམ་རིག་པ་བྱང་ཆུབ་ཀྱི་སེམས་བདེ་གཤེགས་སྙིང་པོ། ངོ་བོ་རྟག་ཆད་ལས་འདས་ཤིང་རང་བཞིན་མཚན་མར་མ་གྲུབ་པའི་གཤིས་ལུགས་ཟབ་མོ་བསམ་བརྗོད་ལས་འདས་པའི་ཡེ་ཤེས་བློ་བྲལ་ནམ་མཁའ་ལྟ་བུའི་ཆོས་ཉིད་རང་བཞིན་འདུས་མ་བྱས་ཆེན་པོ་འདི་ཡིད་དཔྱོད་དང་ཕོ་ཚོད་ཙམ་དུ་མ་སོང་བར་མངོན་སུམ་དུ་གོལ་འཆུག་མེད་པར་ངོ་འཕྲོད་པར་བྱས་ནས། དེའི་ངང་ལ་བསལ་བཞག་གཉེན་པོ་མེད་པར་རང་བབས་ཆུ་བོའི་རྒྱུན་བཞིན་བསྐྱངས་པས་གེགས་དང་གོལ་ས་མཐའ་དག་གཤིས་ལ་གདོད་ནས་མ་གྲུབ་པར་གདེང་ཆོས་ཏེ། ཡིད་དཔྱོད་མཚན་མའི་ལྟ་སྒོམ་ཐམས་ཅད་ཀྱི་འགག་རང་སར་གྲོལ་ནས་དགོངས་པའི་གསང་མཛོད་ཡེ་ཤེས་ཀྱི་ཀློང་དུ་འདྲེས་པར་འགྱུར་རོ། །ཨ་ཧོ། གདོད་མའི་མགོན་པོ་ཀུན་བཟང་ཀློང་ཆེན་གྱི་བུ་རྒྱུད། །དོན་བརྒྱུད་གཡུ་རལ་ངོམས་པའི་སེང་ཆེན་ཞིག་ལགས་ཀྱི། །ཐ་སྙད་ཚིག་ཆུས་སྦོས་པའི་ཝ་སྐྱེས་དེ་མ་ཡིན། །ངེས་དོན་སྙིང་པོའི་ང་རོ་གསང་མཐོ་རུ་སྒྲོགས་མཛོད། །ཀ་དག་སྟོང་པའི་དབྱིངས་སུ་ཆོས་ཀུན་ནི་མཉམ་ཡང་། །རང་བཞིན་ལྷུན་གྱིས་གྲུབ་པའི་ཡེ་ཤེས་ཀྱི་རང་མདངས། །མ་འགགས་ཉི་མཁའ་བཞིན་དུ་གདོད་མ་ནས་རྣམ་དག །ཟུང་འཇུག་སྤྲོས་པ་བྲལ་བའི་གཤིས་ལུགས་འདི་ཨ་ཧོ། །ཡེ་ནས་དག་མཉམ་ཆོས་སྐུའི་རོལ་པ་རུ་ཤར་བས། །གཟུང་འཛིན་མཚན་མའི་འཁྲུལ་རྟོག་ཤེས་བྱ་ལ་མ་གྲུབ། །གེགས་དང་གོལ་ས་མེད་དེ་ཆོས་ཉིད་ཀྱི་གཤིས་ལུགས། །སྤང་བླང་དགག་སྒྲུབ་བྲལ་བའི་རྣལ་འབྱོར་ཚོ་སྐྱིད་དོ། །ཡིད་དཔྱོད་བཅོས་མའི་ལྟ་སྒོམ་འཇའ་ཚོན་གྱི་རི་མོས། །བློ་བྲལ་མཉམ་ཉིད་མཁའ་ལ་ཕན་གནོད་ནི་ཅི་ཞིག །གང་ཡིན་ཀུན་ཡིན་ཡིན་ཆུག་གང་མིན་ཀུན་མིན་ཆུག །གྲུབ་མཐའི་ཁས་ལེན་ཟད་པའི་ལྟ་བ་འདི་ཡངས་སོ། །འཁོར་འདས་ཆོས་ཀུན་ཡེ་གྲོལ་རྫོགས་ཆེན་གྱི་ངོ་ན། །གང་གིས་གང་བཅིངས་སུ་ཞིག་གང་གིས་ནི་བཀྲོལ་ཨང་། །སེམས་འཛིན་སྨྲིག་རྒྱུའི་ཐག་པས་རང་འཆིང་འདི་བོར་ནས། །གུ་ཡངས་གཏད་མེད་ཉལ་བའི་སྒོམ་པ་འདི་བདེའོ། །གང་སྣང་ཚོགས་དྲུག་སྣང་བ་སྒྱུ་མ་ཡི་རོལ་མོ། །སྤང་བླང་དགག་སྒྲུབ་མི་དགོས་ཆོས་ཉིད་གྱི་རོལ་རྩལ། །འདི་ལ་མཚན་མར་འཛིན་པའི་བྱིས་པ་རྣམས་བླུན་ནོ། །རང་གྲོལ་སྤང་གཉེན་མཉམ་པའི་སྤྱོད་པ་འདི་མཚར་རོ། །ཐོབ་དང་མ་ཐོབ་མེད་དེ་ཆོས་ཉིད་ཀྱི་གཤིས་ལུགས། །རེ་དོགས་མཚན་འཛིན་བྲལ་བ་རྣལ་དོན་གྱི་སྙིང་པོ། །ཡིད་དཔྱོད་སྤྲོས་པའི་ཀུན་རྟོག་དབུ་མ་རུ་འགགས་པའི། །ཟང་ཐལ་ཆོས་ཟད་རྗེན་པའི་མཐར་འབྲས་ལ་སྦྱོར་ཅིག །དེ་སྐད་རང་ལ་མེད་པའི་ཟོབ་གཏམ་འདི། །ཉམས་མཚར་ཙམ་དུ་པདྨ་རྣམ་རྒྱལ་གྱིས། །བདེ་ཆེན་པདྨ་འོད་གླིང་དབེན་སྤྱིལ་ནས། །སྨྲས་སོ་ཆོས་གྲོགས་དམ་པའི་དཔྱད་རྟེན་མཛོད། །མངྒལཾ། དགེའོ། །
༄༅། །ལགས་ཐོག་མར་ལས་དང་པོ་པའི་སྐབས་སུ་འཁོར་ལོ་དང་པོའི་བསྟན་དོན་བདེན་བཞིའི་འཇུག་ལྡོག་ལག་ལེན་གནད་དུ་དྲིལ་ངོས། འཁོར་ལོ་བར་པའི་དངོས་བསྟན་ལྟར་གཤིས་ལུགས་སྟོང་པ་ཉིད་ལ་དོན་དམ་དང་སྣང་བ་རྟེན་འབྱུང་གི་རང་བཞིན་ལ་ཀུན་རྫོ བ་ཏུ་བཞག་སྟེ། དེ་ཡང་དང་པོར་འཕགས་པའི་རྗེས་ཐོབ་ཀྱི་གཟིགས་པ་དང་མཐུན་པར། ཆོས་ཐམས་ཅད་དོན་དམ་པར་གྲུབ་པ་མེད། ཀུན་རྫོབ་ཏུ་ཡོད་ཅེས་བདེན་གཉིས་རང་ས་ནས་མ་འདྲེས་པར་ཤན་ཕྱེས་ཏེ་དབུ་མ་རང་རྒྱུད་པ་ལྟར་རྣམ་གྲངས་པའི་དོན་དམ་ཉིད་བློ་ལ་འཆར་བདེ། དེ་རྗེས་སྟོང་པ་དོན་དམ་དང་སྣང་བ་ཀུན་རྫོབ་ཅེས་པའང་བློས་བཏགས་པ་ཙམ་ལས། དོན་དམ་པར་ཐ་དད་དུ་གྲུབ་པ་ཅུང་ཟད་ཀྱང་མེད་དེ་ཤེར་མདོ་ལས་སྟོང་ཉིད་བཞི་སྦྱོར་དུ་གསུངས་པ་སོགས་ལྟར་སྣང་སྟོང་ངམ་སྟོང་རྟེན་འབྱུང་ཟུང་འཇུག་སྤྲོས་བྲལ་དབུ་མ་ཐལ་འགྱུར་པ་ལྟར། གནས་སྐབས་ལམ་གཏན་ལ་འབེབས་ཚུལ་འཕགས་པའི་མཉམ་བཞག་དང་རྗེས་སུ་མཐུན་པར་རྣམ་གྲངས་མ་ཡིན་པའི་དོན་དམ་ཉིད་རྩལ་དུ་བཏོན་ནས་ཐོས་བསམ་གྱིས་གཏན་ལ་ཕབ་སྟེ་དགག་སྒྲུབ་ཀྱི་འཛིན་སྟངས་ཞིག་དགོས། དེ་མ་ཞིག་ན་རང་སྟོང་གཞན་སྟོང་གང་དུའང་མི་གཏུབ་ཅིང་ལར་དབུ་མར་ཡང་མི་རུང་ངོ་། །དེ་ལྟ་བུའི་སྣང་སྟོང་ཟུང་འཇུག་སྤྲོས་བྲལ་དབུ་མ་ཆེན་པོ་ཉིད་གཏན་ལ་ཕབ་ན་འཁོར་ལོ་ཐ་མ་སོགས་མདོ་རྒྱུད་ནས་གསུངས་པའི་བདེ་གཤེགས་སྙིང་པོའམ་གཉུག་སེམས་སོགས་སྟོང་པའི་དབྱིངས་དང་གཉིས་སུ་མེད་པའི་རང་བྱུང་གི་ཡེ་ཤེས་ཟབ་གསལ་གཉིས་མེད་བདེ་བ་ཆེན་པོ་སོགས་ཀྱང་འགལ་མེད་དོན་གཅིག་ཏུ་བློ་ལ་འཆར་ནུས། དེ་ལྟར་འཆར་ན། གཟོད་འཁོར་ལོ་ཐ་མའི་མདོ་དང་དགོངས་འགྲེལ་དང་། ཐུན་མིན་སྔགས་སོགས་ནས་བསྟན་པ་བཞིན་གོང་བཤད་སོ་སྐྱེའི་བློ་གཉིས་སྣང་ཅན་གྱིས་བཞག་པའི་སྣང་སྟོང་གི་ཟླས་ཕྱེ་བའི་བདེན་པ་གཉིས་པོ་ཡུལ་ཡུལ་ཅན་དང་བཅས་པར་ལ་ཐ་སྙད་ཀུན་རྫོབ་དང་། གཟུང་འཛིན་གཉིས་མེད་འཕགས་པའི་ཡེ་ཤེས་དང་ཐ་སྙད་ཙམ་དུ་དེའི་སྤྱོད་ཡུལ་དུ་བཤད་པའི་ཆོས་དབྱིངས་བདེ་གཤེགས་སྙིང་པོ་རྟག་བརྟན་འགྱུར་མེད་གཉུག་མ་རྡོ་རྗེའི་སེམས་ལྷན་སྐྱེས་བདེ་བ་ཆེན་པོ་ཨེ་ཝཾ་ཟུང་འཇུག་སོགས་ཏེ་ཡེ་ཤེས་ཡུལ་དང་བཅས་པ་ལ་དོན་དམ་པར་བཞག་སྟེ། དེ་ཡང་ཀུན་རྫོ བ་རྣམ་ཤེས་ཀྱི་ཡུལ་དུ་གྱུར་པའི་ཆོས་ཐམས་ཅད་ནི་སྔོན་མེད་ཕྱིས་མེད་པར་འདིར་མེད་བཞིན་སྣང་བའི་ཆོས་ཅན་སྐྲ་ཤད་འཛགས་པ་ལྟ་བུ། བཅོས་མ་གློ་བུར་བ་གློག་དང་སྤྲིན་བཞིན་དུ་མི་བདེན་ཞིང་བསླུ་བའི་ཕྱིར། རང་གི་ངོ་བོས་སྟོང་པ། གསོག་དང་གསོབ་དང་ཡ་མ་བརླ་སྙིང་པོོ་མེད་པ་ཡིན་ལ། དོན་དམ་ཡེ་ཤེས་ཀྱི་སྤྱོད་ཡུལ་བདེ་གཤེགས་སྙིང་པོ་སོགས་ཀྱི་རང་བཞིན་ནི། ནམ་ཡང་དྲི་མ་གློ་བུར་བས་གོས་མ་མྱོང་བས་གཙང་བ། དུས་གསུམ་དུ་འཕོ་འགྱུར་མེད་པས་རྟག་པ། རྒྱུ་རྐྱེན་གྱིས་མ་བསྐྱེད་པའི་ཕྱིར་འགྱུར་བཅས་ཀྱི་ཟུག་རྔུ་མཐའ་དག་དང་བྲལ་བས་བདེ་བ། སྲིད་ཞི་ཀུན་ཁྱབ་བདག་བདག་མེད་སོགས་ཀྱི་སྤྲོས་པ་མ་ལུས་པ་ཞི་བས་དམ་པའི་བདག་སྟེ། ཡོན་ཏན་གྱི་ཕ་རོལ་དུ་ཕྱིན་པ་ཟབ་པའི་ཆོས་བཞི་དང་ལྡན་པ་འགྱུར་མེད་དོན་དམ་བདེན་པའི་རང་བཞིན་ལེགས་པར་གཏན་ལ་འབེབས་དགོས། དེ་ཕེབས་ན་ཀུན་རྫོབ་གློ་བུར་གྱི་སྒྲིབ་པ་སྤྲིན་ལྟ་བུ་དེ་གཉེན་པོས་སེལ་ནུས་པ་དང་། དེ་སེལ་བྱེད་ཀྱི་ལམ་མཉམ་བཞག་ཏུ་བསལ་བཞག་མེད་པའི་ཆོས་ཉིད་ཀྱི་དོན་ལ་གོམས་པ་དང་། རྗེས་ཐོབ་ཚོགས་གཉིས་ཟུང་འབྲེལ་གྱི་ལམ་ལ་སློབ་པར་བྱེད་པ་ལ་དོན་ཡོད་པ་དང་། དེ་ལྟར་གོམས་པས་ཚོགས་སྦྱོར་གྱི་ལམ་བགྲོད་ནས་ཟུང་འཇུག་འཕགས་པའི་ཡེ་ཤེས་མཐོང་ལམ་ཆོས་ཉིད་ཀྱི་བདེན་པ་མངོན་སུམ་དུ་རྟོགས་པར་ནུས་པ་དང་། དེ་ཉིད་ཡང་ཡང་དུ་གོམས་པས་སྒོམ་སྤང་སྐོར་དགུའི་དྲི་མ་རགས་ཕྲ་རྣམས་རིམ་གྱིས་སྦྱང་བ་ལ་བརྟེན་ནས་ཁམས་ལ་གནས་པའི་ཡོན་ཏན་གྱི་ཚོགས་ཇེ་གསལ་ཇེ་མངོན་ལྟ་བུར་སྣང་ཡང་ཆོས་ཉིད་རང་གི་ངོ་བོ་ལ་ནི་ཉི་མཁའ་བཞིན་དུ་གདོད་མ་ནས་འཕེལ་འབྲི་མེད་པར་གནས་པ་དང་། ས་བཅུའི་རྒྱུན་མཐར་སངས་རྒྱས་རྣམས་ཀྱིས་འོད་ཟེར་ཆེན་པོས་དབང་བསྐུར་བ་སོགས་ལ་བརྟེན་ནས་ཁམས་ཀྱི་སྒྲིབ་བྱེད་ཤེས་སྒྲིབ་ཤིན་ཏུ་ཕྲ་བའི་ཆ་ས་བོན་དང་བཅས་པ་མཐའ་དག་ལྷག་མེད་དུ་བཅོམ་སྟེ་གཉིས་མེད་ཡེ་ཤེས་རྡོ་རྗེ་ངོ་བོ་ཉིད་སྐུ་མཐར་ཐུག་པ་ཟག་པ་མེད་པའི་ཡོན་ཏན་སྡེ་ཚན་ཉེར་གཅིག་སོགས་གཞལ་མེད་བསམ་གྱིས་མི་ཁྱབ་པ་ཡེ་ནས་ཆོས་ཉིད་ཀྱི་ཚུལ་དུ་འབྲལ་བ་མེད་པར་ཡོད་པ་ཉིད་མངོན་དུ་གྱུར་ནས་སྲིད་པ་ཇི་སྲིད་གནས་ཀྱི་བར་དུ་མཐའ་ཡས་པའི་གདུལ་བྱ་རྒྱ་མཚོ་ལ་ཕན་བདེ་མཛད་པའི་ཕྲིན་ལས་ཟབ་མོ་རྟག་ཁྱབ་ལྷུན་གྲུབ་ཏུ་འབྱུང་བའི་ཚུལ་སོགས་ལ་ངེས་པའི་ཤེས་པ་ཐེ་ཚོམ་གྱི་སྨག་དང་བྲལ་བ་སྐྱེ་བར་འགྱུར་བས། མདོར་ན་བདེ་གཤེགས་སྙིང་པོའི་སྒྲ་ཐོས་པ་ཚུན་ཆད་བྱང་སེམས་སྲིད་པ་ཐ་མ་པར་བསླུ་མེད་རྡོ་རྗེའི་བདེན་གསུང་གིས་བསྔགས་པའི་ཚུལ་ལ་སྤྲོ་བ་བསྐྱེད་ནས་རྟོན་པ་བཞི་དང་མི་འགལ་བར་བླ་མ་བརྒྱུད་པའི་མན་ངག་གི་སྣང་བ་ལ་བརྟེན་ནས་ངེས་དོན་གྱི་མདོ་རྒྱུད་སྙིང་པོའི་ཟབ་གནད་འཚོལ་ཏེ་བསྟན་པ་ཐམས་ཅད་འགལ་མེད་དུ་གོ་བའི་བློ་གྲོས་ཀྱི་སྣང་བ་གོང་འཕེལ་དུ་བསྐྱེད་པར་བྱའོ། །ཞེས་པའང་བསླབ་གསུམ་སྦྱངས་ཡོན་ལྡན་པ་ཟུར་མང་རྣམ་རྒྱལ་རྩེའི་མཁན་པོ་ཀརྨ་ཚེ་བརྟན་གྱིས་དྲིས་ངོར། བྱ་བྲལ་རྒན་པོ་ཟུང་འཇུག་གྲུབ་པའི་རྡོ་རྗེས་རང་གི་ཡིད་ལ་གང་དྲན་བཅོས་མེད་དུ་སྨྲས་པ་དགེ། །།
སྔ་འགྱུར་ཐེག་པ་རིམ་དགུའི་རྣམ་བཞག་མདོར་བསྡུས་སུ་བརྗོད་པ་རིན་པོ་ཆེའི་ཐེམ་སྐས།
༄༅། །རཏྣསྱསོཔཱནཾནཱམཨིཏིཧཱབཀཾཡཱནནསྣོཿབིནིཀྵེཔསཾཀྵེཔསམསྟཱབྷིལཱཔབིཧརཏིསྨ།
༄༅། །སྔ་འགྱུར་ཐེག་པ་རིམ་དགུའི་རྣམ་བཞག་མདོར་བསྡུས་སུ་བརྗོད་པ་རིན་པོ་ཆེའི་ཐེམ་སྐས་ཞེས་བྱ་བ་བཞུགས་སོ། །
ན་མོ་གུ་རུ་མཉྫུ་ཤྲཱི་ཡེ། བསོད་ནམས་གསེར་གྱི་ཤིང་རྟས་མངོན་མཐོ་གདོང་བཞི་པ་དང་ཤིས་བརྗོད་ཉན། །གྲུབ་པའི་མཆོག་གྱུར་རིག་པ་འཛིན་དང་དྲང་སྲོང་ཚོགས་ཀྱིས་བཏུད་གྱུར་ཅིང་། །སྟོབས་མཆོག་མཐུ་ཡིས་བདུད་སྡེའི་ཀླད་འགེམས་ཐེག་མཆོག་སེང་གེའི་སྒྲ་དབྱངས་ཀྱིས། །ས་གསུམ་ཁྱབ་མཛད་ཀུན་མཁྱེན་མཆོག་དང་དེས་བསྟན་དེར་འཛིན་ཡོངས་ལ་འདུད། །ཁྱད་པར་གངས་ཁྲོད་སྙིགས་ལྔའི་མུན་རུམ་ཐུབ་བསྟན་པདྨའི་གཉེན་དྲངས་ནས། །བཤད་སྒྲུབ་འདབ་སྟོང་ཐོག་མར་བཞད་མཛད་མཁན་སློབ་ཆོས་རྒྱལ་ལོ་པཎ་ཚོགས། །དེ་དག་བཀའ་དྲིན་གཟུགས་སུ་གྲུབ་ན་ནམ་མཁའི་ར་བར་ཤོང་སྲིད་དམ། །དེ་ཚུལ་ཤེས་ནས་བྱས་པ་གཟོ་རྣམས་སྲིད་པ་གསུམ་ན་བསྔགས་འོས་ཉིད། །དོན་གྱི་དགོངས་པ་རྒྱལ་དང་མཉམ་མོད་བཀའ་དྲིན་རྒྱལ་ལས་ཆེས་འཕགས་པར། །ཐུབ་པ་མཆོག་གིས་མདོ་རྒྱུད་ཀུན་ནས་རྗེས་བསྔགས་དམ་པའི་མགོན་རྣམས་ལ། །ལུས་སྲོག་བྱེ་བ་ཕུལ་ཡང་བཀའ་དྲིན་ཤས་ཙམ་རྗེས་སུ་འཚོབ་ནུས་ཅི། །དེ་སླད་བྱང་ཆུབ་ཐོབ་ཀྱང་རིགས་ཀྱི་བདག་པོར་འབྲལ་མེད་བསྙེན་བྱས་ནས། །འགྲོ་ཀུན་སྙིང་པོའི་རང་བཞིན་གཅིག་ཕྱིར་མཐར་ཐུག་ཐེག་པ་གཅིག་ཉིད་ཀྱང་། །གནས་སྐབས་གདུལ་བྱའི་བློ་རིམ་དང་འཚམ་འཇུག་སྒོའི་ཚུལ་འདི་རྒྱལ་བས་བསྟན། །དེ་སླད་བསམ་འདས་ཐེག་སྒོ་ཇི་སྙེད་མདོར་བསྡུས་རྣམ་དགུར་དབྱེ་བའི་ཚུལ། །སྔ་འགྱུར་རིག་འཛིན་བརྒྱུད་པའི་ཞལ་ལུང་མདོ་ཙམ་འདིར་ནི་བརྗོད་པར་བྱ། །དེ་ལ་འདིར་འོ་སྐོལ་གྱི་སྟོན་པ་ཐབས་མཁས་ཤིང་ཐུགས་རྗེ་ཆེན་པོ་དང་ལྡན་པ་འདི་ཉིད་ངེས་དོན་དྲང་ཐད་དུ་སྟོན་པའི་དབང་དུ་བྱས་ན་བསྐལ་པ་དཔག་ཏུ་མེད་པའི་སྔོན་རོལ་དུ་ཡེ་ཐོག་གདོད་མའི་གྲོལ་སར་མངོན་པར་བྱང་ཆུབ་ཏེ། མ་རིག་གཟུང་འཛིན་གྱི་འཁྲུལ་པས་བསླད་པའི་དབང་གིས་མེད་སྣང་སྲིད་པའི་བཙོན་རར་ཤིན་ཏུ་ཉམ་ཐག་པའི་འགྲོ་བ་རྣམས་ལ་ཐོག་མར་ལམ་སྟོན་པ་པོར་བྱུང་བའི་ཕྱིར། མཐའ་ཡས་པའི་གདུལ་བྱ་རྣམས་ཀྱི་སོ་སོའི་མོས་པ་དང་སྐལ་བའི་ཁྱད་པར་དང་རྗེས་སུ་འཚམ་པའི་གང་ལ་གང་འདུལ་གྱི་རྣམ་འཕྲུལ་བསམ་གྱིས་མི་ཁྱབ་པས་འཇིག་རྟེན་གྱི་ཁམས་ཀུན་ཏུ་སྒྲོན་མ་རྣམ་པར་བཀོད་པར་མཛད་པ་ཡིན་ཏེ། ཐེག་པ་ཐུན་མོང་བའི་སྡེ་སྣོད་ཀྱི་ལུང་དམ་པའི་ཆོས་པདྨ་དཀར་པོ་ལས་ཀྱང་། བསྐལ་པ་བྱེ་སྟོང་བསམ་གྱིས་མི་ཁྱབ་པ། །དེ་ཡི་ཚད་ནི་ནམ་ཡང་མེད་པ་ན། །བྱང་ཆུབ་མཆོག་རབ་དེ་ནི་ངས་ཐོབ་སྟེ། །ང་ནི་རྟག་ཏུ་ཆོས་ཀྱང་རབ་འཆད་དོ། །བྱང་ཆུབ་སེམས་དཔའ་མང་འདི་ཡང་དག་གཟུང་། སངས་རྒྱས་ཡེ་ཤེས་ལ་ནི་དེ་དག་དགོད། །སེམས་ཅན་བྱེ་བ་ཁྲག་ཁྲིག་མཐའ་ཡས་པ། །བསྐལ་པ་བྱེ་བ་མང་པོར་སྨིན་པར་བྱས། །མྱ་ངན་འདས་པའི་ས་ཡང་བསྟན་བྱས་ཏེ། །སེམས་ཅན་རྣམ་པར་འདུལ་ཕྱིར་ཐབས་བརྗོད་དོ། །ཞེས་སོགས་རྒྱ་ཆེར་གསུངས་པ་དང་། ཡབ་སྲས་མཇལ་བའི་མདོ་ལས། དཔའ་བོ་ཆེན་པོ་ཐབས་མཁས་ཏེ། །སེམས་ཅན་ཡོངས་སུ་སྨིན་བྱའི་ཕྱིར། །བྱེ་བ་ཕྲག་བརྒྱར་རྒྱལ་བ་ཉིད། །སངས་རྒྱས་ཉིད་དུ་བསྟན་གྱུར་ཀྱང་། །ད་དུང་དུ་ཡང་འདྲེན་པ་ཁྱོད། །སངས་རྒྱས་མཛད་པ་མང་སྟོན་མཛད། །ཅེས་དང་། འཕགས་པ་ཕལ་པོ་ཆེ་ལས། བྱང་ཆུབ་རྒྱ་མཚོ་རབ་བརྙེས་གྱུར་ནས་ཀྱང་། །སེམས་ཅན་རྒྱ་མཚོ་རབ་ཏུ་སྨིན་བྱའི་ཕྱིར། །བྱང་ཆུབ་སེམས་བསྐྱེད་རྒྱ་མཚོ་སྟོན་མཛད་ཅིང་། །མི་འགྲིབ་སྤྱོོད་པ་རྒྱ་མཚོ་ཀུན་ཏུ་སྟོན། །བདེ་གཤེགས་རྣམས་ཀྱི་རྣམ་འཕྲུལ་དེ་འདྲའོ། །ཞེས་དང་། ཡང་དག་སངས་རྒྱས་སྐུ་གཅིག་སྟེ། །འདྲེན་པ་ཐམས་ཅད་དོན་གཅིག་ཀྱང་། །ཚད་མེད་གཞན་དང་གཞན་དག་ཏུ། །ཕྱོགས་བཅུ་ཀུན་ནས་རབ་ཏུ་སྣང་། །ཞེས་གསུངས། ཐུན་མོང་མ་ཡིན་པ་གསང་བ་ཡིད་བཞིན་རིན་པོ་ཆེ་བཀོད་པའི་རྒྱུད་ལས། ཀུན་གྱི་སྔོན་རོལ་སངས་རྒྱས་པ། །རྡོ་རྗེ་འཛིན་རྒྱལ་གསང་བ་ཆེ། །བསམ་ཡས་ཞིང་དུ་རྣམ་པར་རོལ། །གྲངས་མེད་སྔ་ཕྱི་དུས་ཀུན་ཏུ། །ཞི་དང་ཁྲོ་ཚུལ་དཔག་མེད་ཅིང་། །རྔོན་དང་སྨད་འཚོང་ལ་སོགས་གཟུགས། །སྣ་ཚོགས་ཚུལ་གྱིས་དོན་མཛད་ཀྱང་། །ད་དུང་བསྐལ་པ་བཟང་པོ་འདིར། །འདྲེན་པ་སྟོང་དུ་སྒྱུར་མཛད་ཅིང་། །དེ་བཞིན་སྣ་ཚོགས་ཚུལ་འཆང་བས། །མ་ལུས་འགྲོ་བའི་དོན་མཛད་དོ། །ཞེས་དང་། ཡེ་ཤེས་ནམ་མཁའ་དང་མཉམ་པའི་རྒྱུད་ལས། །ཀུན་བཟང་ལོངས་སྤྱོད་རྫོགས་པ་ལས། །འདུལ་བའི་སྤྲུལ་པ་གྲངས་མེད་ཅིང་། ཁྱད་པར་མི་མཇེད་འཇིག་རྟེན་དུ། །སྟོང་རྩ་གཉིས་ཀྱི་སྐུར་སྣང་ངོ་། །ཞེས་གསུངས། འདུལ་བྱེད་ཀྱི་ཆོས་སམ་ཐེག་པའི་སྒོ་ཡང་གདུལ་བྱ་རང་རང་གི་སྐལ་བ་དང་འཚམ་པར་མཐའ་ཡས་པར་སྟོན་པར་མཛད་པ་སྟེ། རྒྱུད་ཀྱི་རྒྱལ་པོ་དཔལ་གསང་བ་སྙིང་པོ་དེ་ཁོ་ན་ཉིད་ངེས་པ་ལས། ཕྱོགས་བཅུ་དུས་བཞི་བསམ་ཡས་སུ། །འདུལ་བའི་དོན་རྣམས་སོ་སོར་སྟོན། །ཐེག་པ་མཐོ་དམན་ཐམས་ཅད་དང་། །ཕྱིན་ཅི་ལོག་རྣམས་བསམ་ཡས་སུ། །ཞི་ཁྲོའི་ཚུལ་ཅན་ཐམས་ཅད་ལ། །སོ་སོར་མཐུན་བྱས་ཀུན་ཏུ་སྣང་། །ཞེས་དང་། འཇམ་དཔལ་སྒྱུ་འཕྲུལ་དྲྭ་བ་ལས། ཐེག་པ་རྣམ་པ་སྣ་ཚོགས་ཀྱིས། །འགྲོ་བའི་དོན་ལ་རྟོག་པ་པོ། །ཞེས་དང་། མདོ་སྡེ་ལངྐར་གཤེགས་པ་ལས། སེམས་ཅན་རྣམས་ནི་ཡོངས་དྲང་ཕྱིར། །ཐེག་པ་མཐའ་དག་ངས་བཤད་དེ། །འདི་ཞེས་དམིགས་སུ་ཡོད་མ་ཡིན། །ཞེས་གསུངས་ཤིང་། དེ་དག་དུས་ནམ་གྱི་ཚེ་ཚུལ་ཇི་ལྟ་བུས་གསུངས་པའང་། མདོ་སྡེ་ཡོན་ཏན་བཀོད་པའི་རྒྱལ་པོ་ལས། ང་ཡིས་ཅི་ཡང་མ་གསུངས་པར། །སེམས་ཅན་རྣམས་ལ་ཁྱབ་བརྡལ་སྣང་། །གང་ཚེ་རིམ་གྱིས་མངོན་འདོད་པ། །དེ་དག་ཀུན་ལ་དེ་བཞིན་ཏེ། །དུས་གཅིག་ཉིད་དུ་འཇུག་པ་ལ། །ཆོས་ཀྱི་རྣམ་གྲངས་རྫོགས་པར་སྣང་། །ཡིད་བཞིན་རེ་བ་རྣམ་སྐོང་བའི། །གསུང་གི་ཆེ་བ་དེ་ཉིད་དོ། །ཞེས་དང་འཕགས་པ་ཏིང་འཛིན་རྒྱལ་པོ་ལས། འཇིག་རྟེན་ཕན་པ་ཁྱོད་ཀྱི་གསུང་གཅིག་ལ། །མོས་པ་ཐ་དད་བཞིན་དུ་སྒྲ་འབྱུང་སྟེ། །རྒྱལ་བས་བདག་ལ་སྟོན་སྙམ་སོ་སོར་སེམས། །གང་གི་སླད་དུ་ཁྱོད་ཀྱིས་འཛུམ་མཛད་སྟོན། །ཞེས་དང་། དགོངས་པ་ལུང་སྟོན་ལས། རྟོག་པ་མེད་ཅིང་འཁྲུག་མེད་པ། །ཡིད་འོང་རྡོ་རྗེའི་གསུང་གཅིག་ལ། །གདུལ་བྱའི་བསམ་པའི་དབང་གིས་ན། །བྱེ་བྲག་མང་པོར་འབྱུང་བ་ཡིན། །ཞེས་གསུངས། དེས་ན་གདུལ་བྱའི་ཞིང་དང་། འདུལ་བྱེད་ཀྱི་སྟོན་པ་དང་། འདུལ་བའི་ཐབས་དང་། གང་གིས་འདུལ་བ་བསྟན་པ་དམ་པའི་ཆོས་སྡེ་སྣོད་དང་ཐེག་པའི་རྣམ་གྲངས་སོགས་ཚུར་མཐོང་གི་བློས་གཞལ་བྱའི་ཡུལ་ལས་འདས་ནའང་། རེ་ཞིག་ད་ལྟའི་འཇིག་རྟེན་གྱི་ཁམས་འདིའི་གདུལ་བྱ་རབ་འབྲིང་ཐ་མའི་བློ་ཅན་རྣམས་ལ་ཇི་ལྟར་སྣང་བའི་ཚུལ། སྔ་འགྱུར་རིག་འཛིན་བརྒྱུད་པའི་ཞལ་ལུང་ཇི་ལྟ་བར་ཐེག་པ་རིམ་དགུའི་རྣམ་བཞག་མདོ་ཙམ་བྲི་བ་ལ་གསུམ། ཐེག་པའི་རང་བཞིན་སྤྱིར་བསྟན་པ། བྱེ་བྲག་སོ་སོའི་རྣམ་དབྱེ་རྒྱས་པར་བཤད་པ། རྗེས་ལུང་གིས་མཐའ་བསྡུ་བའོ། །དང་པོ་ལའང་གསུམ་སྟེ། ཐེག་པའི་ངོ་བོ་དང་། ངེས་ཚིག་དང་། དབྱེ་བསྡུའི་ཁྱད་པར་སྤྱིར་བསྟན་པའོ། །དང་པོ་ནི། གནས་སྐབས་དང་མཐར་ཐུག་ཏུ་ངན་སོང་ངམ་འཁོར་བ་ལས་འཕགས་ཏེ་མངོན་མཐོ་འམ་ངེས་ལེགས་མྱང་འདས་ཀྱི་ཕྱོགས་སུ་འགྲོ་བའི་ལམ་བདེན་གྱིས་བསྡུས་པའི་ཆོས་སོ། །གཉིས་པ་ནི། ཡཱ་ན་ཞེས་པའི་སྒྲ་ལས་ཐེག་པ་སྟེ། དེའང་བགྲོད་བྱའི་ཤུལ་ཉིད་ཀྱི་ཕྱིར་ལམ་དང་། ཁུར་ཁྱེར་བ་པོ་ཉིད་ཀྱི་ཕྱིར་ཤིང་རྟ་ལ་སོགས་པའི་བཞོན་པ་ལ་འཇུག་ལ། འདིར་དེ་དང་འདྲ་བའི་སྒོ་ནས་དགེ་བཅུའི་ལམ་སོགས་ལའང་འཇུག་སྟེ། ལམ་གོང་ནས་གོང་དུ་བགྲོད་པར་བྱེད་པའི་ཕྱིར་རོ། །འདིར་ལམ་ལ་གཙོ་བོར་བརྗོད་མོད། འདིས་འདེགས་པ་ལམ་གྱི་ཐེག་པ་དང་། འདིར་འདེགས་པ་འབྲས་བུའི་ཐེག་པ་ཞེས་རྣམ་གྲངས་གཉིས་སུའང་གསུངས་སོ། །དེའང་སྡུད་པ་ལས། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། །དགའ་སྐྱིད་བདེ་བ་མངོན་པར་འཐོབ་བྱེད་ཐེག་པའི་མཆོག །དེ་གང་ཞོན་ནས་སེམས་ཅན་ཐམས་ཅད་མྱ་ངན་འདའ། །ཞེས་སོ། །གསུམ་པ་ནི། སྤྱིར་ཐེག་པའི་རྣམ་གྲངས་འདི་ཁོ་ནར་ངེས་ཞེས་ཕྱོགས་གཅིག་ཏུ་ཆད་པ་མེད་དེ། འགྲོ་བའི་ཉོན་མོངས་པའི་གཉེན་པོར་སངས་རྒྱས་ཀྱི་ཐུགས་རྗེས་གང་ལ་གང་འདུལ་དུ་བསྟན་པའི་ཕྱིར། གོང་དུ་དྲངས་པའི་ལུང་རྣམས་ཀྱིས་གསལ་བོར་བསྟན་པ་བཞིན་ལ། དེ་ཡང་རེ་ཞིག་བསྡུ་ན་འབྲས་བུ་ལ་དགོངས་ཏེ་ཐེག་པ་གཅིག་ཏུ་གསུངས་པ་ནི། དམ་ཆོས་པད་དཀར་ལས། ཐེག་པ་གཅིག་སྟེ་ཐེག་པ་གསུམ་དུ་མེད། །དེ་དག་དྲང་བའི་ཐབས་སུ་བསྟན་པ་ཡིན། །ཞེས་དང་། སྤྱི་མདོ་ལས། གསང་བའི་སྙིང་པོར་ངེས་པ་ནི། །ཐེག་པའི་སྒོ་ཡང་གཅིག་ལས་མེད། །ཅེས་སོ། །ཡང་རྒྱུ་འབྲས་ཀྱི་ཐེག་པར་མོས་པའི་གདུལ་བྱ་ལ་དགོངས་ནས་གཉིས་སུ་གསུངས་ཏེ། ཀུན་བྱེད་ལས། ཐེག་པ་རྣམ་པ་གཉིས་ཡིན་ཏེ། །མཚན་ཉིད་རྒྱུ་ཡི་ཐེག་པ་དང་། །འབྲས་བུ་རྡོ་རྗེ་ཐེག་པའོ། །ཞེས་དང་། མདོ་སྡེ་གདམས་ངག་འབོག་པའི་རྒྱལ་པོ་ལས། རྒྱུ་ལ་མོས་པ་རྒྱུ་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། །ཞེས་སོ། །ཡང་དམན་པ་དང་རྒྱ་ཆེན་པོ་ལ་མོས་པའི་གདུལ་བྱ་ལ་དགོངས་ནས་ཀྱང་གཉིས་སུ་གསུངས་ཏེ། ཡེ་སྒྲོན་ལས། ཆེ་ཆུང་རིམ་པའི་བློ་ཡོད་ཕྱིར། །ཐེག་པའི་གྲངས་ཀྱང་དེ་བཞིན་ཏེ། །བསྡུ་ན་ཆེ་ཆུང་རྣམ་གཉིས་སོ། །ཞེས་དང་། དཀོན་མཆོག་བརྩེགས་པ་ལས། འོད་སྲུང་ཐེག་པ་ནི་གཉིས་ཏེ་ཆུང་ངུ་དང་ཆེན་པོའོ། །ཞེས་སོ། །ཡང་ཆུང་འབྲིང་གི་ཕྱེ་བས་ཉན་རང་ཐེག་ཆེན་ཏེ་གསུམ་དུ་གསུངས་ཏེ། ཡུམ་སྙིང་པོ་མཆོག་ལས། རབ་འབྱོར་ཉན་ཐོས་ཀྱི་ཐེག་པ་དང་། རང་སངས་རྒྱས་ཀྱི་ཐེག་པ་དང་། བྱང་ཆུབ་སེམས་དཔའི་ཐེག་པ་སྟེ། ཞེས་སོ། །ཕྱི་ནང་གི་རིམ་པས་ཀྱང་གསུམ་དུ་བཤད་དེ། གསང་བ་ཐིག་ལེ་ནོར་བུའི་རྒྱུད་ལས། ཕྱི་ནང་གསང་བའི་ཐེག་པ་གསུམ། །དམ་པའི་ཆོས་ཀྱང་རབ་ཏུ་གཟུང་། །ཞེས་དང་། སྤྱི་མདོ་ལས། དོན་དམ་ངེས་པའི་ཐེག་པ་ནི། །གསུམ་དུ་ངེས་པར་བསྟན་པ་སྟེ། །ཞེས་སོ། །མཚན་ཉིད་ཀྱི་ཐེག་པ་གསུམ་འབྲས་བུ་དང་བཞིར་ཡང་བཤད་དེ། འཇམ་དཔལ་སྒྱུ་དྲྭ་ལས། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་དང་། བམ་བརྒྱད་ལས། ཐེག་པའི་སྒོ་ནི་གསུམ་དུ་གསུངས། །གསང་ཉིད་ཐེག་པར་བསྡུས་དང་བཞི། །ཞེས་སོ། །ཡང་ངེས་ལེགས་ཀྱི་ཐེག་པ་གསུམ་མངོན་མཐོའི་གཉིས་དང་བཅས་ལྔར་ཡང་གསུངས་ཏེ། ལང་གཤེགས་ལས། ལྷ་ཡི་ཐེག་དང་ཚངས་པའི་ཐེག །དེ་བཞིན་དུ་ནི་ཉན་ཐོས་དང་། །དེ་བཞིན་གཤེགས་དང་རང་རྒྱལ་གྱི། །ཐེག་པ་ཐ་དད་པར་བཤད་དོ། །ཞེས་དང་། ངེས་ལེགས་གསུམ་གྱི་སྟེང་དུ་བླ་མེད་ཀྱི་ཐེག་པ་བསྣན་ཅིང་མངོན་མཐོའི་ཐེག་པ་གཅིག་ཏུ་བསྡུས་ནས་ལྔར་ཡང་བཤད་དེ། གསང་སྙིང་ལས། ཐེག་པ་བཞི་ཡི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་སོ། ཡང་རྒྱུ་འབྲས་ཀྱི་གོང་འོག་དབྱེ་བས་དྲུག་ཏུ་བཤད་དེ། ཀུན་བྱེད་ལས། ངེས་པ་ཐོབ་པའི་ཐེག་པ་དྲུག །ཅེས་སོ། །བདུན་དུའང་བཤད་དེ། དཀྱིལ་འཁོར་བསྡུས་པ་ལས། །ལྷ་དང་མི་དང་ཉན་ཐོས་དང་། །རང་སངས་རྒྱས་དང་བྱང་ཆུབ་སེམས། །གསང་བ་ཕྱི་དང་ནང་གཉིས་ཏེ། །དེ་ལྟར་ཐེག་པ་བདུན་དུ་བཤད། །ཅེས་སོ། །བརྒྱད་དུའང་གསུངས་ཏེ། ནམ་མཁའ་ཆེ་ལས། དེ་ལྟར་ཐེག་བརྒྱད་ལས་འདས་པའི། །ཞེས་སོ། །དགུར་ཡང་གསུངས་ཏེ། ཀུན་བྱེད་ལས། བྱུང་ནི་ཐེག་པ་དགུ་རུ་བྱུང་། །ཞེས་སོ། །ཡང་སོར་བཞག་ལྷ་མིའི་ཐེག་པ་གཉིས། ཕྱི་རོལ་པའི་སྡེ་ལྔ། ནང་པའི་རིམ་དགུ། འོད་གསལ་རྡོ་རྗེ་ཐེག་པ་དང་བཅུ་དྲུག་ཏུ་ཡང་བཤད་དེ། སྙིང་པོ་ཉི་མ་སྣང་བྱེད་ཀྱི་རྒྱུད་ལས། ཐེག་པའི་དང་པོ་བཅུ་དྲུག་མགོན། །ཞེས་སོ། །ཡང་བསམ་གྱིས་མི་ཁྱབ་པར་ཡང་གསུངས་ཏེ། སྤྱི་མདོ་ལས། ཇི་སྲིད་འདུ་ཤེས་ཡོད་ཀྱི་བར། ཐེག་པའི་མཐའ་ལ་ཐུག་པ་མེད། །ཅེས་སོ། །དེ་དག་ཀྱང་གདུལ་བྱའི་བློ་རིམ་ལ་སྣང་བ་ཙམ་ལས་གནས་ལུགས་ཡང་དག་པའི་དོན་ལ་གང་དུའང་དམིགས་སུ་མེད་དེ། ལང་གཤེགས་ལས། །ཐེག་པ་རྣམ་པ་མང་བཤད་པ། །སེམས་ཅན་རྣམས་ནི་དྲང་བའི་ཕྱིར། །ཐེག་པ་ཐ་དད་ངས་བཤད་དེ། །ཐེག་པ་གཅིག་ཏུའང་ངས་བསྟན་ཏོ། །ཞེས་དང་། སེམས་ནི་ནམ་ཞིག་གྱུར་པ་ན། །ཐེག་པ་མེད་ཅིང་འགྲོ་བའང་མེད། །ཅེས་གསུངས། དེ་ལ་ཁ་ཅིག་ན་རེ། དེ་མི་འཐད་དེ། རྡོ་རྗེ་སྙིང་འགྲེལ་ལས། སངས་རྒྱས་པ་ལ་བཞི་པ་དང་། །ལྔ་པ་ཐུབ་པའི་དགོངས་པ་མིན། །ཞེས་པས་ཐེག་པ་བཞི་པ་དང་། གྲུབ་མཐའ་ལྔ་པ་མེད་པར་གསུངས་པས་ཐེག་པ་ནི་གསུམ་ཁོ་ནར་ངེས་པའི་ཕྱིར་ཟེར། འོ་ན་མཚན་བརྗོད་དང་། རྡོ་རྗེ་སྙིང་འགྲེལ་ཉིད་ལས་ཀྱང་། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་བཞིར་ཕྱེ་བའང་མི་འཐད་པར་ཐལ། གསུམ་ཁོ་ནར་ངེས་པའི་ཕྱིར། ཁོ་ན་རེ། གསུམ་དུ་ཕྱེ་བ་ནི་ཉན་རང་སངས་རྒྱས་ཀྱི་ཐེག་པ་གསུམ་ཡིན་ལ། དེའི་ཕྱི་མ་ལ་རྒྱུ་འབྲས་གཉིས་སུ་ཕྱེ་ནས་བཞིར་གསུངས་པའི་ཕྱིར། དབྱེ་བསྡུའི་ཁྱད་པར་ཙམ་སྟེ་སྐྱོན་མེད་དོ་ཞེ་ན། དེ་འདྲ་རིམ་དགུ་ལའང་མཚུངས་ཏེ། ཕྱི་ནང་གི་རྒྱུད་སྡེ་དྲུག་པོ་འབྲས་ཐེག་ཏུ་འདུ་ལ། དེའང་སངས་རྒྱས་ཀྱི་ཐེག་པའི་ནང་དུ་འདུ་བས་འདིར་ཡང་དབྱེ་བསྡུའི་ཁྱད་པར་རོ། །གལ་ཏེ་ལྷ་མིའི་ཐེག་པ་མ་འདུས་སོ་ཞེ་ན། སྐྱོན་མེད་དེ། ལྷ་མིའི་ཐེག་པ་ནི་མངོན་མཐོའི་ཐེག་པ་ཡིན་ལ། རྡོ་རྗེ་སྙིང་འགྲེལ་ལས། གསུམ་དུ་བསྡུས་པ་ནི་རྣམ་གྲོལ་གྱི་ཐེག་པ་ལ་དགོངས་པའི་ཕྱིར་རོ། །དེ་བས་ན་ཁྱེད་ཅག་ཐེག་པ་གསུམ་ཁོ་ནར་ཞེན་པ་ནི། ལང་གཤེགས་ཀྱི་མདོར་ཐེག་པ་བསམ་གྱིས་མི་ཁྱབ་པར་གསུངས་པ་སོགས་ཀྱི་དོན་ལ་རྨོངས་པར་ཟད་དོ། །དེས་ན་གནས་སྐབས་སུ་ཐེག་པ་དུ་མའི་རྣམ་བཞག་མཛད་པའང་དེ་དང་དེའི་གནས་སྐབས་དང་གཙོ་ཆེ་ཆུང་གི་དབང་གིས་གདུལ་བྱ་དྲང་བའི་ཐབས་སུ་བསྟན་ནས་དེ་རྣམས་རང་རང་གི་འབྲས་བུ་རྗེས་མཐུན་རེ་ཐོབ་ཏུ་ཟིན་ཀྱང་། ད་དུང་དེའི་གོང་དུ་སངས་རྒྱས་རྣམས་ཀྱིས་བགྲོད་པ་གཅིག་པའི་ལམ་རྡོ་རྗེ་ཐེག་པ་མཆོག་ཏུ་བསྟན་དུ་ཡོད་པ་ལ་དགོངས་པ་སྟེ་གཞན་རྣམས་དེ་ཉིད་ལ་བཀྲི་བའི་ལམ་སྟེགས་ཙམ་དུ་བསྟན་ཅིང་རྫོགས་པའི་བྱང་ཆུབ་ཀྱི་བར་དུ་བགྲོད་བྱའི་ལམ་རྣམས་སྐས་ཀྱི་གདང་བུ་ལྟར་གནས་ཏེ། ཀླུ་སྒྲུབ་ཀྱིས། ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་གདང་བུ་ལྟ་བུར་བསྟན། །ཞེས་དང་། མདོ་པདྨ་དཀར་པོ་ལས། དྲང་སྲོང་རྣམས་ཀྱིས་ཐེག་པ་གསུམ་བསྟན་པ། །རྣམ་འདྲེན་རྣམས་ཀྱིས་ཐབས་ལ་མཁས་པ་སྟེ། །ཐེག་པ་གཅིག་ལས་གཉིས་སུ་ཡོད་མ་ཡིན། །བསྟི་བའི་དོན་དུ་ཐེག་པ་གསུམ་བསྟན་ཏོ། །ཞེས་དང་། ལང་གཤེགས་ལས། སྲིད་པའི་ལམ་གྱིས་དུབ་པ་རྣམས། །ངལ་གསོའི་དོན་དེ་དེ་ཉིད་མིན། །ཞེས་བཤད་པ་བཞིན་ནོ། །དེའི་ཕྱི་རང་ལུགས་འདིར་ཉན་རང་བྱང་སེམས་སྔགས་ཀྱི་ཐེག་པ་སྟེ་བཞིར་གྲངས་ངེས་པའི་ཕྱི་མ་ལ་རྒྱུད་སྡེ་འོག་མ་གསུམ་དང་། བླ་མེད་ལ་བསྐྱེད་རྫོགས་རྫོགས་ཆེན་གསུམ་དུ་དབྱེ་བར་མཛད་ནས། དེ་ཐེག་པའི་རིམ་པར་བཞག་པ་ལ་འགལ་བར་འདུ་བའི་ཆ་ཤས་ཙམ་ཡང་གནས་པའི་སྐབས་མེད་དེ། སངས་རྒྱས་ཀྱི་སས་བསྡུས་པའི་ཆོས་ཐམས་ཅད་ལ་སྤྱིར་ཐེག་པ་གཅིག་གི་སྒྲ་སྦྱར་བའམ། བྱེ་བྲག་ཇི་སྙེད་པ་ལ་ཐེག་པ་སོ་སོའི་སྒྲ་སྦྱར་ཀྱང་རུང་ཏེ་ཐམས་ཅད་མཁྱེན་པའི་བར་དུ་བགྲོད་བྱེད་ཀྱི་ལམ་ཡིན་པས་སོ། །དེའང་དང་པོ་ཕྱི་མཚན་ཉིད་ཀྱི་ཐེག་པ་གསུམ་པོས་རིམ་བཞིན་དགྲ་བཅོམ་པ་དང་། ནེ་ཙོའམ་བསེ་རུ་ལྟ་བུའི་རང་སངས་རྒྱས་དང་བཅུ་གཅིག་ཀུན་ཏུ་འོད་ཀྱི་ས་མཐར་འདེགས་པས་ན་ཐེག་པ་དང་། གཉིས་པ་ཕྱི་བ་རྒྱུད་ཀྱི་ཐེག་པ་གསུམ་པོས་རིམ་བཞིན་རིགས་གསུམ་རྡོ་རྗེ་འཛིན་པའི་ས་དང་། རིགས་བཞི་མཁའ་ལ་སྤྱོད་པའི་ས་དང་། རིགས་ལྔ་སྟུག་པོ་བཀོད་པའི་སར་འདེགས་པར་བྱེད་པས་ན་ཐེག་པ་དང་། གསུམ་པ་ནང་པ་ཐབས་ཀྱི་རྒྱུད་རྣམ་པ་གསུམ་གྱིས་རིམ་པ་བཞིན་ཡི་གེ་འཁོར་ལོ་ཚོགས་ཆེན་གྱི་ས་དང་། བདེ་བ་ཆེན་པོའི་ས་དང་ཡེ་ཤེས་བླ་མའི་སར་འདེགས་པར་བྱེད་པས་ན་ཐེག་པའི་སྒྲ་བཤད་བཞག་ལ། འདི་ལ་དགོངས་ནས་ལང་གཤེགས་སུ། ཇི་སྲིད་སེམས་ནི་འཇུག་པའི་བར། །ཐེག་པའི་མཐའ་ལ་ཐུག་པ་མེད། །ཅེས་གསུངས། དེས་ན་སེམས་ཀྱི་རྣམ་པར་རྟོག་པ་ཇི་སྙེད་པ་དང་རྗེས་སུ་འཚམ་པར་ཐེག་པའི་སྒོ་ཡང་དེ་སྙེད་དུ་ཡོད་པར་གསུངས་པའི་ཕྱིར་སྐབས་འདིར་དབང་པོ་འབྲིང་དང་རྣོན་པོ་དག་ལའང་དབྱེ་བ་གསུམ་གསུམ་དུ་ཕྱེ་བ་གདུལ་བྱའི་བློ་ཚོད་ལ་དགོངས་ནས་སྔགས་ཀྱི་ཐེག་པ་གོང་འོག་རྣམས་དེ་དང་མཚུངས་པར་བསྟན་ནས་རང་རང་གི་གཞུང་ལམ་དུ་ལྟ་སྒོམ་སྤྱོད་འབྲས་ཚར་རེ་ཚང་བར་ལམ་སོ་སོ་རང་རྐྱ་ཐུབ་པའི་དོན་ཙམ་དུ་བཤད་ནས་མཐར་ཕྱིན་བློ་ཟད་ཆོས་ཟད་འཕགས་པའི་ལམ་བདེན་སྒྲ་ཇི་བཞིན་པའི་མཐར་ཐུག་པར་བཞག་པ་ཡིན་ཏེ། དེ་ཡང་གང་ཞིག་སྐྱེ་བ་གཞན་དུ་གོམས་པའི་བག་ཆགས་ཀྱི་སྟོབས་ཀྱིས་ནགས་ཚལ་དང་དབེན་པ་ལ་དགའ་ཞིང་ཁྲུས་དང་མཎྜལ་བྲི་བ་དང་མཆོད་པ་དང་སྦྱིན་སྲེག་དང་དཀའ་ཐུབ་དང་བཟླས་བརྗོད་ལ་སོགས་པའི་བྱ་བ་མེད་པར་ཡིད་མཉམ་པར་འཇོག་མི་ནུས་པ། དེ་ཁོ་ན་ཉིད་བསྒོམ་པའི་ནུས་པ་ཆུང་བ། མཚན་མ་ཅན་གྱི་སྤྱོད་པ་ལ་དགའ་བ་དག་ལ་ཕྱིའི་སྤྱོད་པ་དེ་དག་ཤས་ཆེར་སྟོན་པ་བྱ་བའི་རྒྱུད་ལེགས་གྲུབ་སོགས་གསུངས་པ་དང་། གང་ཞིག་བྱ་བའི་ཁྱད་པར་ལའང་མོས། ཐབས་དང་ཤེས་རབ་ཀྱི་སྤྱོད་པ་རྒྱ་ཆེན་པོ་ལ་སྦྱོར་བའི་ནང་གི་བདག་ཉིད་ཅན་གྱི་ཚུལ་ཡང་མི་འདོར་བར་སྤྲོས་པ་དག་ལ་བྱ་བ་དང་རྣལ་འབྱོར་གྱི་ཆ་གཉིས་ཀ་དང་ལྡན་པ་གཉིས་ཀའི་རྒྱུད་རྣམ་པར་སྣང་མཛད་མངོན་པར་བྱང་ཆུབ་པ་ལ་སོགས་གསུངས་ཏེ། དེ་ཉིད་ནི་གསང་སྔགས་དང་རྗེས་སུ་མཐུན་པའི་སྤྱོད་པ་ཤེས་རབ་དང་ཐབས་གཙོ་བོར་གྱུར་པ་རྒྱ་ཆེར་སྟོན་པས་སྔོན་གྱི་མཁས་པ་དག་གིས་སྤྱོད་པའི་རྒྱུད་ཅེས་བཤད་དོ། །ཡང་གང་ཞིག་དེ་ཁོ་ན་ཉིད་ལ་མངོན་པར་དགའ་བའི་སེམས་དང་ལྡན་པ། རྣལ་འབྱོར་ལ་ལྷག་པར་མོས་པ་ཕྱིའི་བྱ་བ་ལ་མི་དགའ་བར་ཏིང་ངེ་འཛིན་གྱིས་རྒྱུད་དག་པར་བྱེད་པ་རྣམས་ལ་བྱ་བའི་ཡན་ལག་ཉུང་ཞིང་། རྣལ་འབྱོར་གྱི་ཡན་ལག་གཙོ་བོར་སྟོན་པ་རྣལ་འབྱོར་གྱི་རྒྱུད་དེ་ཁོ་ན་ཉིད་བསྡུས་པ་ལ་སོགས་པ་གསུངས་སོ། །རྣལ་འབྱོར་པ་གང་ཞིག་དབང་པོ་རྣོ་བ། དེ་ཁོ་ན་ཉིད་སྒོམ་པ་ལ་རབ་ཏུ་འདུན་པ། སྔོན་གོམས་པའི་སྟོབས་ཀྱིས་བྱ་བ་དང་དངོས་པོ་ཐམས་ཅད་ལ་ཐ་དད་པའི་འདུ་ཤེས་མི་འཇུག་པ། ཐེག་པ་ཆེན་པོ་ལ་སེམས་རྣམ་པར་སྦྱངས་པ་ཤེས་རབ་དང་གཉིས་སུ་མེད་པའི་སྤྱོད་པ་ལ་མངོན་པར་དད་པའི་བདག་ཉིད་ཆེན་པོ་རྣམས་ལ་དེ་ཁོ་ན་ཉིད་ཀྱི་རྣལ་འབྱོར་གཙོ་བོར་མཛད་དེ་གཉིས་སུ་མེད་པའི་ཚུལ་གྱིས་འཇུག་ཅིང་སྤྲོས་པ་མེད་པ་དང་ཤིན་ཏུ་སྤྲོས་པ་མེད་པའི་སྤྱོད་པ་སྟོན་པ། རྣལ་འབྱོར་ཆེན་པོའི་རྒྱུད་དཔལ་གསང་བ་འདུས་པ་དང་གསང་བ་སྙིང་པོ་ལ་སོགས་པ་གསུངས་པ་དང་། ཡང་སྤྲོས་པ་ལས་འདས་པའི་རྣལ་འབྱོར་དབྱིངས་དང་ཡེ་ཤེས་དབྱེར་མེད་པའི་བདག་ཉིད་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་ཆོས་ཐམས་ཅད་ཡེ་ནས་སངས་རྒྱས་པར་རྟོགས་ནས་ནང་གི་རྣལ་འབྱོར་ཟབ་མོ་ལ་མངོན་པར་དགའ་བ་དག་ལ་མདོ་དགོངས་པ་འདུས་པ་སོགས་ཨ་ནུ་ཡོ་གའི་རྒྱུད་སྡེ་རྣམས་གསུངས་སོ། །ཡང་གང་ཟག་དབང་པོ་རབ་རྟོགས་པ་དང་གྲོལ་བ་དུས་མཉམ་པར་གྱུར་པའི་རིགས་ཅན་དག་ལ་སྣང་སྲིད་འཁོར་འདས་ཀྱི་ཆོས་ཐམས་ཅད་སྤྲོས་བྲལ་ཐིག་ལེ་ཉག་གཅིག་རང་བྱུང་གི་ཡེ་ཤེས་ཆེན་པོར་ཡེ་ནས་སངས་རྒྱས་པས་བྱ་རྩོལ་གྱི་སྤྲོས་པ་ལས་འདས་པའི་ཐེག་པ་རྫོགས་པ་ཆེན་པོ་ཨ་ཏི་ཡོ་གའི་རྒྱུད་རྣམས་གསུངས་ཏེ། དེ་ཡང་འོག་མ་འོག་མ་རྣམས་ཀྱི་ལམ་དང་འབྲས་བུའི་ཚུལ་ཐམས་ཅད་གོང་མ་གོང་མར་འདུ་ཞིང་། བླ་མེད་ལའང་བསྐྱེད་རྫོགས་གཉིས་པོ་ལམ་གང་ཞིག་སྒྲུབ་ཚུལ་བློས་བྱས་ལས་མ་འདས་པས་བསྒྲུབ་བྱ་འདུས་བྱས་སུ་འགྱུར་བས་ཡེ་ཤེས་མཐོང་བ་ལ་ཁྱད་པར་ཤིན་ཏུ་ཆེ་སྟེ། རྫོགས་པ་ཆེན་པོ་ནི་བློས་བྱས་ཆོས་ཀྱིས་རེག་པའི་སྐབས་མེད་པས་ཆོས་ཉིད་ཀྱི་བདེན་པ་གནས་ལུགས་རྟོགས་པའི་སྟོབས་ཀྱིས་ཐོབ་པ་འཕགས་རྒྱུད་ཀྱིས་བསྡུས་པའི་ལམ་བདེན་ཟག་པ་མེད་པའི་ཡེ་ཤེས་ཏེ་ལམ་འོག་མས་མངོན་དུ་བྱ་རྒྱུ་རྣམ་གྲངས་མང་པོས་བསྟན་པའི་ཆོས་ཉིད་མ་ནོར་བར་མངོན་སུམ་དུ་མཐོང་བར་འགྱུར་བའི་ཕྱིར་ཐེག་པ་མ་ལུས་པ་ཐེག་པ་ཆེན་པོ་བླ་ན་མེད་པ་འདིར་འདུ་བ་ཡིན་ལ་དེའི་ཕྱིར་འདི་ལ་ཡེ་ཤེས་ཀྱི་ཐེག་པ་ཞེས་བཤད་པའང་ཡིན་ཏེ། སངས་རྒྱས་ཕལ་པོ་ཆེའི་མདོ་ལས། ཡེ་ཤེས་ཀྱི་ཐེག་པ་དང་། ཐེག་པ་ཆེན་པོ་ལ་རབ་ཏུ་གཞོལ་བའི་སེམས་ཀྱི་དགེ་བའི་རྩ་བ་དེ་དག་ཡོངས་སུ་བསྔོའོ། །ཞེས་དང་། དམ་ཆོས་པད་དཀར་ལས། ང་ཡིས་བསྟན་པའི་ཐེག་པ་དགུ་པོ་ཡང་། །སེམས་ཅན་རྣམས་ཀྱིས་མཐུ་དང་མོས་པར་བཤད། །འདི་ལྟར་ཐབས་ཀྱིས་མཆོག་གི་ཡེ་ཤེས་ལ། །རབ་ཏུ་གཟུད་པའི་ཕྱིར་ན་ངས་བཤད་དོ། །ཞེས་དང་། གཞན་ཡང་ལྷའི་བུ་རབ་རྩལ་སེམས་ཀྱིས་ཞུས་པའི་མདོ་ལས། ཐེག་པ་ཆེན་པོའི་ཐེག་པ་འདི། །སངས་རྒྱས་ཐེག་པ་བསམ་མི་ཁྱབ། །སེམས་ཅན་གྱི་ནི་གོ་སྐབས་འབྱེད། །ཐེག་པ་ཆེན་པོ་བླ་ན་མེད། །ཐེག་པ་ཇི་སྙེད་ཅི་ཡོད་པ། །འདི་ནི་དེ་ཡི་མཆོག་ཏུ་དགོངས། །དེ་ཕྱིར་ཐེག་པ་ཆེན་པོ་ལས། །ཐེག་པ་ཐམས་ཅད་རབ་ཏུ་དབྱེ། །ཞེས་དང་། འཕགས་པ་རྟོགས་ཆེན་ཕྱག་རྒྱ་ལས་ཀྱང་། ཐེག་པ་ནི་གཅིག་ཁོ་ནར་བས་ཏེ། གཉིས་དང་གསུམ་དུ་མ་མཆིས་སོ། །ཞེས་དང་། དེའི་འགྲེལ་པར། དེ་ཡང་གདུལ་བྱར་ཐེག་པ་གསུམ་གྱིས་འདུལ་བ་ལ་ཉན་ཐོས་དང་། རང་རྒྱལ་དང་། ཐེག་པ་ཆེན་པོ་བསྟན་ཏོ། །ཡང་དག་པར་ཐེག་པ་གཅིག་སྟེ་འབྲས་བུ་རྡོ་རྗེའི་ཐེག་པའོ། །ཞེས་དང་། ཡུམ་བར་མ་ལས། རབ་འབྱོར་ཐེག་པ་ནི་གཅིག་ཁོ་ན་སྟེ། བླ་ན་མེད་པ་སངས་རྒྱས་ཀྱི་ཐེག་པའོ། །ཞེས་དང་། ལང་ཀར་གཤེགས་པ་ལས། ཐེག་པ་གཅིག་ལས་གཉིས་པ་ཡོད་མ་ཡིན། །གསུམ་པ་ནམ་ཡང་ཡོད་མིན་འཇིག་རྟེན་ན། །སྣ་ཚོགས་འགྲོ་བ་འདུལ་བར་མཛད་མ་གཏོགས། །ཞེས་པ་ལ་སོགས་སྐབས་འགར་ཐེག་པ་གཅིག་ཏུ་གསུངས་པ་དང་། ཁ་ཅིག་ཏུ་གཉིས་དང་གསུམ་དང་ལྔ་སོགས་དང་། གྲངས་མེད་པར་ཡང་གསུངས་པ་དང་། གནས་ལུགས་མ་འཁྲུལ་པ་མཐོང་བའི་གང་ཟག་ལ་དགོངས་ནས་ཐེག་པ་མེད་པར་གསུངས་པ་སོགས་གོང་དུ་དྲངས་པའི་ལང་ཀར་གཤེགས་པའི་ལུང་སོགས་ཀྱིས་གསལ་བ་བཞིན་དགོས་པའི་དབང་གིས་དེ་ལྟ་བུར་བསྟན་པ་རྣམས་ལ་མཐའ་གཅིག་ཏུ་འདི་ཙམ་ཞིག་ཡིན་ལ། འདི་ཙམ་ཞིག་མིན་ནོ་ཞེས་རྣམ་བཞག་འགྲིགས་འགྲིགས་ལྟར་སྨྲ་བ་ཡང་། ཡང་དག་པའི་གནས་ལ་བློ་གྲོས་ཀྱི་འཇུག་པ་མ་ཕྱོགས་པའི་རྟགས་སུ་ཤེས་པར་བྱ་ཞིང་། ཡང་རྫོགས་པ་ཆེན་པོའི་ལུགས་ཀྱིས་ཐེག་བརྒྱད་གོལ་སར་བཤད་པ་ལ། ཁ་ཅིག་གིས། ཆོས་ཟབ་ཁྱད་དུ་གསོད་པ་ཡི། །ཆོས་ལོག་འདི་ལ་བརྟག་པར་འོས། །ཞེས་ཁ་ཟེར་བའང་གྱི་ན་སྟེ། རྫོགས་ཆེན་གྱི་ལུགས་ཀྱིས། ཨ་ནུ་མན་ཆད་གོལ་སྒྲིབ་གྱི་ཐེག་པ་ཡིན་པས། འདིར་རང་གི་ལྟ་བ་མཆོག་ཏུ་རྟོགས་པའི་སླད་དུ། དེ་དག་གི་ཚུལ་ངོས་བཟུང་བ་ཙམ་ཡིན་ལ། ནམ་ཡང་ཁྱད་དུ་གསོད་པར་མི་འདོད། རྫོགས་པ་ཆེན་པོའི་བྱིན་རླབས་ལས་ཤར་བའི་རྩལ་བསྟན་པའི་སྒོ་སྣ་ཚོགས་པ་ཡིན་ཏེ་རོལ་པའམ་རྒྱན་ལྟ་བུ་ཡིན་ནོ། །དེ་ཡང་ཨ་ཏིའི་ལུགས་ཀྱི་རྒྱུའི་ཐེག་པ་ཡང་སྔགས་སུ་འདུས། སྔགས་ཀྱང་ཡོ་ག་རྣམ་པ་བཞིར་འདུས། ཡོ་ག་འོག་མ་གསུམ་ཡང་ཨ་ཏི་ཡོ་ག་ལ་འདུས། ཨ་ཏི་ནི་ཐིག་ལེ་ཉག་གཅིག་བྱ་རྩོལ་དང་བྲལ་བའི་ངང་དུ་ཡེ་ནས་གནས་ཏེ། ནམ་མཁའ་ཆེ་ལས། རྒྱ་མཚོ་ཆེན་པོར་ཆུ་ཀླུང་ཀུན་འབབ་ཅིང་། །རྒྱ་མཚོའི་ངང་དུ་རོ་གཅིག་གནས་པ་ལྟར། །ཆོས་རྣམས་རྫོགས་པ་ཆེན་པོར་འདུས་གསལ་ཞིང་། །མ་བཅོས་ལྷུན་གྱིས་གྲུབ་པའི་ངང་དུ་གནས། །ཞེས་གསུངས་ཤིང་། ཐེག་པ་དེ་ཀུན་ཀྱང་སངས་རྒྱས་ཀྱི་ཐུགས་རྗེ་དང་། གདུལ་བྱའི་ལས་འཕྲོ་འཛོམས་པ་ན། དགོས་ཆེད་གཉིས་ཀྱི་དབང་གིས་འབྱུང་སྟེ། དགོས་པ་གང་ལ་དགོས་ན་རྒྱུ་མཚན་ཉིད་ཀྱི་ཐེག་པ་ལམ་ལྔ་དང་ས་བཅུའི་སྒོ་ནས། ཉོན་མོངས་པ་སྤོང་བ་དང་སྦྱོང་བའི་རྩོལ་བ་བྱས་ནས། དུས་བསྐལ་པ་གྲངས་མེད་པ་གསུམ་ལ་སོགས་པ་ནས་སངས་རྒྱས་ཐོབ་འདོད་རྣམས་ལ་དགོས། ཆེད་ནི་ཨ་ཏིའི་གྲུབ་མཐའ་ས་ལམ་སྦྱང་བགྲོད་མེད་པ་མི་གོ་བ་རྣམས་ཀྱི་ཆེད་དུ་བྱུང་། ཡང་དགོས་ནི། གསང་སྔགས་ཕྱི་ནང་གི་སྒོར་ཞུགས་པ་རྣམས་ལ་དགོས། ཆེད་ནི་བསྙེན་སྒྲུབ་བཞིས་དངོས་གྲུབ་སྒྲུབ་ཏུ་མེད་དེ་ཡེ་གྲོལ་ཆེན་པོའི་དོན་རྟོགས་པའི་ཆེད་དུ་བྱུང་། དེ་ཡང་། ས་དང་ལམ་ལ་སྤོང་ཞིང་སྦྱང་བ་དང་། །བསྙེན་སྒྲུབ་རྣམ་བཞིས་རྩོལ་ཞིང་སྒྲུབ་པ་དང་། །ཕྱི་ནང་སྒོ་ཕུག་བྱེད་པ་ཚི་ཆད་པས། །མ་བཙལ་ལྷུན་གྱིས་གྲུབ་པའི་ངང་དུ་གནས། །ཞེས་གསུངས། དེ་ལ་ཨ་ནུ་མན་ཆད་ཀྱི་གོལ་སྒྲིབ་ནི་སེམས་ཀྱི་རྩལ་ཅིར་ཡང་ཤར་བས་ཏེ། སེམས་སྐྱེ་བ་མེད་པ་ལས་རྩལ་འགག་མེད་དུ་ཤར་བས་རང་སྣང་སྟོང་པ་ཡིན་པར་མ་ཤེས་པས། ད་ལྟའི་སྣང་བ་འདི་ཐམས་ཅད་སེམས་ཅན་སྤྱི་མཐུན་གྱི་ལས་ལས་གྲུབ། བདེ་སྡུག་ཐམས་ཅད་སྔོན་གྱི་ལས་ལས་བྱུང་བར་ལྟ་བས་འཇིག་རྟེན་ལྷ་མིའི་ཐེག་པར་གོལ་ལོ། །འོ་ན་རྫོགས་ཆེན་པས་ལྟ་བ་དེ་སྤོང་ངམ་ཞེ་ན། ཆེད་དུ་མི་སྤོང་སྟེ་སེམས་ཀྱི་རྩལ་མ་འགགས་པ་སོ་སོ་སྐྱེ་བོ་ལྷ་མིའི་ཐེག་པ་ལྟར་ཤར་ཡང་། དེ་ལྟར་མ་གྲུབ་སྟེ། དེ་ལ་སྣང་བ་དང་ལས་རང་རྒྱུད་པ་མེད་དེ་གཉིས་མེད་རང་གྲོལ་བའོ། །དེ་ཡང་ནམ་མཁའ་ཆེ་ལས། ཅི་སྟེ་ལས་ཀྱིས་དབང་གྱུར་ན། །རང་བྱུང་ཡེ་ཤེས་ཡོད་མ་ཡིན། །ཞེས་ལས་ཀྱི་ངོ་བོ་མེད་པར་གསུངས་སོ། །དེ་བཞིན་དུ། སེམས་སྟོང་པ་དེའི་རྩལ་མ་འགགས་པས་མུ་སྟེགས་རྟག་ཆད་ལྟར་ཤར། ཉན་ཐོས་པའི་གང་ཟག་གི་བདག་མེད། རང་རྒྱལ་གྱི་བདག་མེད་ཕྱེད་དང་གཉིས། སེམས་ཙམ་པའི་ཐམས་ཅད་སེམས་སུ་ལྟ་བ། དབུ་མ་པའི་མཐའ་བྲལ། ཀྲྀ་ཡཱ་པའི་ཀུན་རྫོབ་ལྷའི་དཀྱིལ་འཁོར་དོན་དམ་དག་པ་མཐའ་བཞི་དང་བྲལ་བ། ཨུ་པའི་ལྟ་སྤྱོད་ཟུང་འབྲེལ། ཡོ་ག་པའི་དོན་དམ་མཐའ་བྲལ་ཀུན་རྫོབ་རྡོ་རྗེ་དབྱིངས་ཀྱི་ལྷའི་དཀྱིལ་འཁོར། མ་ཧཱ་ཡོ་གའི་བདེན་གཉིས་དབྱེར་མེད། ཨ་ནུའི་དབྱིངས་དང་ཡེ་ཤེས་ཏེ། སེམས་ཀྱི་རྩལ་མ་འགགས་པས་ཐེག་པ་དེ་དག་གི་ལྟ་བ་ལྟར་ཤར་བ་ཡིན་ཀྱང་། ལྟ་བ་དེ་དང་དེ་དག་ཏུ་བལྟ་བའི་མཐའ་དང་བྲལ་ཏེ། མཐའ་བྲལ་ཐིག་ལེ་ཉག་གཅིག་དེའི་ངང་ལས་མ་གཡོས་བཞིན་དུ། རྩལ་འགག་པ་མེད་པ་རང་བྱུང་གི་ཡེ་ཤེས་དེ་ཐེག་པ་འོག་མ་དེ་རྣམས་ཀྱི་ལྟ་སྤྱོད་ལྟར་ཤར་བ་ཡིན་པས། མི་འགོག། མི་སྤོང་། མི་སྒྲུབ་པའི་དོན་ཡིན་ནོ། །དེ་ཡང་རྫོགས་པ་ཆེན་པོའི་དོན་རྟོགས་ན་ཐེག་པ་ལ་མཐོ་དམན་མེད་པས་མཉམ་པ་ཉིད་དུ་རང་གྲོལ་བ་ཞེས་བྱའོ། །ཞེས་མཁས་མཆོག་སོག་བཟློག་པས་གསུངས་ཤིང་ཞིབ་པར་མཁས་མཆོག་འདི་ཉིད་དང་། ཐམས་ཅད་མཁྱེན་པ་ཀཿཐོག་པ་ཚེ་དབང་མཆོག་གྲུབ་སོགས་ཀྱི་གསུངས་ལས་ཤེས་པར་བྱའོ། །གཉིས་པ་བྱེ་བྲག་སོ་སོའི་རྣམ་བཞག་རྒྱས་པར་བཤད་པ་ལ་གཉིས་ཏེ། རྫོགས་པ་ཆེན་པོའི་རྒྱུད་རིག་པ་རང་ཤར་ལས། ཀྱེ་ཧོ་གསང་བདག་རྡོ་རྗེ་འཛིན། །ང་ཡི་ཐེག་པ་བསམ་ཡས་ཀྱང་། །བཤད་ལུགས་རྣམ་པ་གཉིས་སུ་འདུ། །འཁོར་བ་དང་ནི་མྱ་ངན་འདས། །ཞེས་དང་། མདོ་བཅུ་ལས། གཉིས་ནི་རྣམ་པའི་བྱེ་བྲག་སྟེ། །ཐེག་པ་རྣམ་པ་གཉིས་སུ་བསྟན། །འཇིག་རྟེན་པ་ཡི་ཐེག་པ་དང་། །མྱ་ངན་འདས་པའི་ཐེག་པའོ། །ཞེས་དང་། སྒྱུ་འཕྲུལ་རྒྱས་པ་ལས། འཇིག་རྟེན་འདས་དང་འཇིག་རྟེན་པའི། །མཐའ་ཡས་དཀྱིལ་འཁོར་མ་ལུས་ཀུན། །ཞེས་གསུངས་པས། འཇིག་རྟེན་པའི་ཐེག་པ་དང་། འཇིག་རྟེན་ལས་འདས་པའི་ཐེག་པ་དངོས་བཤད་པའོ། །འདི་གཉིས་ཀྱི་ཁྱད་པར་ནི། རྒྱལ་བའི་ཡུམ་ལས། སྦྱིན་པ་ནི་འཇིག་རྟེན་པ་ལའང་ཡོད། འཇིག་རྟེན་ལས་འདས་པ་ལའང་ཡོད་དོ། །དེའང་འཇིག་རྟེན་པའི་སྦྱིན་པ་གང་ཞེ་ན། གང་སྦྱིན་པ་བྱིན་པས་འཇིག་རྟེན་ལས་མི་གཡོ་མི་འཕགས། མི་འདའ་ན་འཇིག་རྟེན་པའི་སྦྱིན་པ་ཞེས་བྱའོ། །གང་སྦྱིན་པ་བྱིན་པས་འཇིག་རྟེན་ལས་གཡོ་འཕགས། འདའ་ན་འཇིག་རྟེན་ལས་འདས་པའི་སྦྱིན་པ་ཞེས་བྱའོ། །ཞེས་སོགས་གསུངས་པ་ལྟར། ཐབས་གང་གིས་མཐར་ཕྱིན་པར་བསྒྲུབས་པས་འབྲས་བུ་འཇིག་རྟེན་ལས་འཕགས་ནུས་མི་ནུས་ཀྱི་ཁྱད་པར་རོ། །དེ་ལ་ཐོག་མར་འཇིག་རྟེན་པའི་ཐེག་པ་ལའང་། སོར་བཞག་ལྷ་མིའི་ཐེག་པ་དང་། འཕྲོས་དོན་མ་རྟོགས་ལོག་རྟོགས་ཀྱི་ལྟ་བ་བཤད་པ་གཉིས་ལས། དང་པོ་ནི། སྤྱིར་ལང་གཤེགས་སོགས་ལས་ལྷ་ཡི་ཐེག་པ་དང་ཚངས་པའི་ཐེག་པ་ཞེས་གཉིས་སུ་གསུངས་ཀྱང་། འདིར་ནི་རྒྱུད་ཀྱི་རྒྱལ་པོ་དཔལ་གསང་བ་སྙིང་པོ་ལས། ལྷ་དང་མི་ཡི་ཐེག་པ་དང་། །ཞེས་གཅིག་ཏུ་བསྡུས་ཏེ་གསུངས་པ་བཞིན་དུ། དེ་གཉིས་མཉམ་པོར་འཆད་པ་ལ། སློབ་དཔོན་སངས་རྒྱས་གསང་བས་མཛད་པའི་སྒྱུ་འཕྲུལ་ལམ་གྱི་རིམ་པ་ལས། གཞི་ཡི་ཐེག་པ་དང་པོར་ཞོག །ཅེས་གསུངས་པས། འདི་ལ་ངེས་འབྱུང་གཞི་ཡི་ཐེག་པ་ཞེས་ཀྱང་བྱ་སྟེ་ཐེག་པ་ཐམས་ཅད་ཀྱི་གཞིའམ་ཕྱི་མོ་ལྟ་བུར་གྱུར་པ་སྟེ། ཡང་དག་པའི་ལྟ་བས་མ་ཟིན་པ་དང་དངོས་གཞི་དགེ་བཅུའི་ལས་ལ་མི་སྤྱོད་པའི་ཐེག་པ་ནི་གང་ཡང་མེད་པའི་ཕྱིར་ཏེ། ས་སྙིང་འཁོར་ལོ་བཅུ་པའི་མདོ་ལས། གང་ལ་མཐོ་རིས་ཐེག་པ་ཡོད་མིན། །དེ་ལ་ཉན་ཐོས་ཐེག་པ་མེད་དེ། གང་ལ་ཉན་ཐོས་ཐེག་པ་ཡོད་མིན། །དེ་ལ་རང་རྒྱལ་ཐེག་པ་མེད་དེ། །གང་ལ་རང་རྒྱལ་ཐེག་པ་ཡོད་མིན། །དེ་ལ་ཐེག་པ་ཆེན་པོ་མེད་དེ། །ཞེས་དང་། དགྱེས་རྡོར་ལས། དགེ་བ་བཅུ་ལས་བརྩམས་ནས་ནི། །དེ་ཡི་ཆོས་ནི་རབ་ཏུ་དབྱེ། །ཞེས་དང་། འཕགས་པ་ཀླུས་རིན་ཆེན་ཕྲེང་བ་ལས། དང་པོར་མངོན་པར་མཐོ་བའི་ཆོས། །ཕྱིས་ནི་ངེས་པར་ལེགས་འབྱུང་བ། །གང་ཕྱིར་མངོན་པར་མཐོ་ཐོབ་ནས། །རིམ་གྱིས་ངེས་པར་ལེགས་པའོ། །ཞེས་གསུངས། དེ་ལ་གསུམ། ངོ་བོ། ངེས་ཚིག དབྱེ་བའོ། །དེ་ལྟར་ཡང་བདེ་གཤེགས་འདུས་པའི་རྒྱུད་ཀྱི་སྤྱི་ཆིངས་ཆེན་མོའི་ལེའུ་དང་པོར། རེ་རེའང་ངོ་བོ་ངེས་ཚིག་དང་། དབྱེ་བ་ཞེས་གསུངས་པའི་ཕྱིར། དེ་ལས། དང་པོ་ངོ་བོ་ནི། སྤྱིར་འདོད་ཁམས་ཀྱི་ལྷ་དང་མི་ཡི་བདེ་བ་ཙམ་དང་བྱེ་བྲག་ཁམས་གོང་མའི་བདེ་བ་མཐར་ཐུག་པའི་བར་དུ་འགོད་པའི་ཐབས་གང་ཞིག་འཁོར་བ་ལས་འཕགས་པར་མི་ནུས་པའོ། །གཉིས་པ་ངེས་ཚིག་ནི། མ་ནུ་ཤ་ཡཱ་ན་ཞེས་པའི་སྒྲ་ལས་མིའི་ཐེག་པ་དང་། དེ་བ་ཡཱ་ན་ལས་ལྷའི་ཐེག་པ་ཞེས་འབྱུང་སྟེ། དེ་ལ་སྒྲ་ཡངས་པའི་དབང་དུ་བྱས་ན། སྤྱིར་ལྷ་མི་དང་བྱེ་བྲག་ཁམས་གོང་མ་གཉིས་ཀྱི་ས ས་བསྡུས་པ་ཐམས་ཅད་ལ་ཚངས་པའི་སྒྲ་འཇུག་པར་འཕགས་པ་རྣམ་གྲོལ་སྡེས་བཤད་པ་ལྟར་དེ་དང་དེ་ཡི་བདེ་འབྲས་ཙམ་ལ་སྦྱོར་ཞིང་འགོད་ནུས་པའི་ཕྱིར་ཐེག་པའོ། །གསུམ་པ་དབྱེ་བ་ལ། འཇུག་སྒོ། ལྟ་བ། ཚུལ་ཁྲིམས། སྒོམ་པ། སྤྱོད་པ། འབྲས་བུ་དང་དྲུག་སྟེ། ལུང་སྔ་མའི་འཕྲོས་ལས། སོ་སོའི་འདོད་པ་ཡི། འཇུག་སྒོ་ལྟ་བ་ཚུལ་ཁྲིམས་དང་། །སྒོམ་པ་ཕྲིན་ལས་འབྲས་བུ་རྣམས། །རིམ་པ་བཞིན་དུ་ཤེས་བྱ་སྟེ། །ཞེས་གསུངས་ཏེ་འོག་མ་རྣམས་ལའང་ཤེས་པར་བྱའོ། །དེ་ལས། དང་པོ་འཇུག་སྒོ་ནི། སྤྱིར་ངན་སོང་གསུམ་སྡུག་བསྔལ་གྱི་རང་བཞིན་ཅན་དུ་མཐོང་ནས། དེར་སྐྱེ་བའི་རྒྱུ་མི་དགེ་བའི་ལས་སྤོང་བའི་སྒོ་ནས་འཇུག་ཅིང་བྱེ་བྲག་ཏུ་ཁམས་གོང་མ་རྣམས་སུ་ནི། འདོད་ཁམས་སོགས་ས་འོག་མའི་སྐྱོན་དང་གོང་མའི་ཡོན་ཏན་རྣམས་མཐོང་བའི་སྒོ་ནས། ས་འོག་མའི་སྐྱོན་ནམ་སྒྲིབ་པ་རྣམས་འཇིག་རྟེན་པའི་ལམ་གྱིས་མགོ་གནོན་གྱི་ཚུལ་གྱིས་སྤོང་བའི་སྒོ་ནས་རིམ་གྱིས་འཇུག་པར་བྱེད་དེ། ཧེ་རུ་ཀ་གལ་པོ་ལས། ལྷ་མིའི་ཐེག་པས་མི་དགེ་སྤང་། །ཞེས་སོ། །དེ་ལ་མི་དགེ་བ་བཅུ་ནི། སློབ་དཔོན་རྟ་དབྱངས་ཀྱིས། བཅུ་པོ་དེ་དག་གང་ཞེ་ན། །ལུས་ཀྱི་དབྱེ་བ་རྣམ་པ་གསུམ། །ངག་གི་དབྱེ་བ་རྣམ་པ་བཞི། །ཡིད་ཀྱི་རབ་ཏུ་དབྱེ་བ་གསུམ། །མི་དགེ་བཅུ་རུ་དེ་དག་འདོད། །དེ་རྣམས་རབ་ཏུ་བཤད་པར་བྱ། །དེ་ལ་རེ་ཞིག་ལུས་ཀྱི་ནི། །སྲོག་གཅོད་མ་བྱིན་ལེན་ལོག་གཡེམ། །ངག་གི་རྫུན་ཚིག་ཕྲ་མ་དང་། །ཚིག་རྩུབ་དང་ནི་འཁྱལ་བ་རྣམས། །ཡིད་ཀྱི་ལོག་ལྟ་བརྣབ་སེམས་གནོད། །དེ་ལ་སྲོག་གཅོད་གང་ཞེ་ན། །སྲོག་དང་ལྡན་པར་གྱུར་པ་ལ། །སྲོག་དང་ལྡན་པར་འདུ་ཤེས་དང་། །གསོད་སེམས་ཉེ་བར་གནས་པ་དང་། །རིམ་པ་བཞིན་དུ་བྱས་ལྡན་དང་། །སྲོག་ནི་བཅད་པར་གྱུར་པ་སྟེ། །ཡན་ལག་ལྔ་པོ་དེ་དག་དང་། །ལྡན་པ་སྲོག་གཅོད་ཡིན་པར་བཤད། །མ་བྱིན་ལེན་པ་གང་ཞེ་ན། །གཞན་དག་གི་ནི་ཡིན་པ་དང་། །གཞན་གྱིས་བདག་གིར་བྱས་པ་དང་། །གཞན་གྱི་ཡིན་པར་འདུ་ཤེས་དང་། །རྐུ་སེམས་ཉེ་བར་གནས་པ་དང་། །རིམ་པ་བཞིན་དུ་བྱས་ལྡན་དང་། །གནས་ནས་སྤགས་པར་གྱུར་པ་སྟེ། །ཡན་ལག་དྲུག་པོ་དེ་དག་དང་། །ལྡན་པ་མ་བྱིན་ལེན་པར་བཤད། །དེ་ལ་ལོག་གཡེམ་གང་ཞེ་ན། །ལོག་པར་གཡེམ་པ་རྣམ་བཞི་སྟེ། །ཡུལ་མིན་པ་དང་དུས་མིན་དང་། །ཡན་ལག་མ་ཡིན་བསྒྲོད་མིན་ཡིན། །དེ་ལའང་ཡུལ་མིན་བྱ་བ་ནི། །དམ་ཆོས་མཆོད་རྟེན་སྐུ་གཟུགས་དང་། །བྱང་ཆུབ་སེམས་དཔའི་བཞུགས་གནས་སོགས། །མཁན་པོ་དང་ནི་སློབ་དཔོན་དང་། །ཕ་མ་དྲུང་ན་གནས་པ་ནི། །ཡུལ་མིན་དེ་རུ་མི་བྱའོ། །དེ་ལ་དུས་མིན་བྱ་བ་ནི། །ཟླ་མཚན་འཛག་དང་སྦྲུམ་མ་དང་། །བུ་ཆུང་དང་བཅས་མི་མོས་དང་། །སྡུག་བསྔལ་ཡིད་མི་བདེ་སོགས་དང་། །ཡན་ལག་བརྒྱད་གནས་དུས་མིན་ཡིན། །ཡན་ལག་མིན་པ་གང་ཞེ་ན། །ཁ་དང་བཤང་ལམ་བྱིན་པ་དང་། །བརླ་བསྡམས་ལག་པར་བསྐྱོད་པ་ཡིན། །བསྒྲོད་པར་བྱ་མིན་ཞེས་བྱ་ནི། །གཞན་བཟུང་ཆོས་ཀྱི་རྒྱལ་མཚན་ལྡན། རིགས་ཀྱིས་བསྲུང་དང་རྒྱལ་མོར་གནས། །གཞན་གྱིས་བླངས་དང་སྨད་འཚོང་དང་། །ཉེ་དུ་དག་དང་འབྲེལ་བ་ནི། །དེ་དག་བསྒྲོད་བྱ་མིན་པ་ཡིན། །རྣམ་པ་དེ་དག་རྣམས་ལ་ནི། །རང་གི་ཆུང་མ་བསྟེན་པ་ཡང་། །འདོད་ལོག་སྤྱད་པར་འགྱུར་བ་ཡིན། །བརྫུན་དུ་སྨྲ་བ་གང་ཞེ་ན། །དངོས་པོ་གནས་པར་འགྱུར་བ་དང་། །དངོས་པོ་ལས་ནི་ཉམས་གྱུར་དང་། །འདུ་ཤེས་གཞན་དུ་བསྒྱུར་བ་དང་། །བརྫུན་དུ་སྨྲ་བར་གྱུར་པ་དང་། །རིམ་པ་བཞིན་དུ་བྱས་ལྡན་དང་། །ཡན་ལག་ལྔ་པོ་དེ་དག་དང་། །ལྡན་པ་བརྫུན་དུ་སྨྲ་བར་འགྱུར། །དེ་ལ་ཕྲ་མ་གང་ཞེ་ན། །གཞན་དག་དབྱེ་ཕྱིར་ཕྲ་མ་ཡིན། །དེ་ལ་ཚིག་རྩུ བ་གང་ཞེ་ན། །གཞན་གྱི་གནད་དུ་བསྣུན་བྱེད་པའི། །ཡིད་དུ་མི་འོང་ཚིག་སྨྲ་ཡིན། །དེ་ལ་འཁྱལ་བ་གང་ཞེ་ན། །འདོད་པས་ཉེ་བར་བླང་བ་དང་། །ཆགས་པ་ཡིས་ནི་ཉེར་བསྐྱེད་ནས། །འབྲེལ་མེད་སྨྲ་བ་འཁྱལ་བ་ཡིན། །དེ་ལ་བརྣབ་སེམས་གང་ཞེ་ན། །གཞན་གྱི་ནོར་དང་ལོངས་སྤྱོད་ལ། །མཆོག་ཏུ་མངོན་པར་ཆགས་པ་ཡིན། །གནོད་སེམས་ཞེས་པ་གང་ཞེ་ན། །སེམས་ཅན་རྣམས་ལ་སྡང་བ་ཡིན། །བརྡེག་དང་འཆིང་དང་གསོད་པ་སྟེ། །དེ་དག་སེམས་ཅན་ལ་བྱེད་པའོ། །ལོག་ལྟ་ཞེས་བྱ་གང་ཞེ་ན། །སྦྱིན་མེད་མཆོད་སྦྱིན་ཡོད་མིན་དང་། །འཇིག་རྟེན་ཕ་རོལ་ཡོད་མིན་ཞིང་། །དགེ་སྦྱོང་བྲམ་ཟེ་ལྷ་རྣམས་མེད། །རྫོགས་སངས་རྒྱས་དང་དགྲ་བཅོམ་དང་། །རང་སངས་རྒྱས་དང་ལེགས་སྤྱོད་དང་། །ཉེས་པར་སྤྱོད་པ་ཡོད་མིན་ཞེས། །བྱ་བ་ལོག་པར་ལྟ་བ་ཡིན། །འཕགས་པ་དྲན་པ་ཉེར་བཞག་དང་། །ཐེག་པ་ཆེན་པོའི་མདོ་རྣམས་ལས། །བཅོམ་ལྡན་འདས་ཀྱིས་རྒྱས་གསུངས་པ། །འདི་ནི་མདོ་རུ་བསྡུས་པ་ཡིན། །མི་དགེ་ལས་ཀྱི་ལམ་བཅུ་ནི། །དམྱལ་བ་ཆེན་པོའི་རྒྱུ་རུ་བཤད། །ཅེས་གསུངས། དེ་དག་རྩ་བའི་ཉོན་མོངས་པ་གང་གིས་རྫོགས་པར་བྱེད་ན། ཆོས་མངོན་པའི་ཚིག་ལེའུར་བྱས་པ་ལས། གསོད་དང་གནོད་སེམས་ཚིག་རྩུབ་དག །ཞེ་སྡང་གིས་ནི་མཐར་ཕྱིན་བྱེད། །ལོག་གཡེམ་བརྣབ་སེམས་མ་བྱིན་ལེན། །ཆགས་པ་ཡིས་ནི་མཐར་ཕྱིན་བྱེད། །ལོག་པར་ལྟ་བ་གཏི་མུག་གིས། །ལྷག་མ་གསུམ་གྱིས་རྫོགས་པར་འདོད། །ཅེས་གསུངས། དེའི་རྣམ་སྨིན་གྱི་འབྲས་བུ་ནི་ངན་སོང་གསུམ་སྟེ། མདོ་ལས། སྲོག་གཅོད་པས་ནི་སེམས་ཅན་དམྱལ་བར་འཁྲིད་དོ། །བྱོལ་སོང་གི་སྐྱེ་གནས་སུ་ཁྲིད་དོ། །གཤིན་རྗེའི་འཇིག་རྟེན་དུ་ཁྲིད་དེ། ཞེས་སོགས་ཐམས་ཅད་ལ་སྦྱར་ཏེ་གསུངས་སོ། །རྒྱུ་མཐུན་ལ་གཉིས་ཀྱི་བྱེད་པ་རྒྱུ་མཐུན་ཀྱི་འབྲས་བུ་ནི། ལས་བརྒྱ་བ་ལས། དེ་མི་དགེ་བ་ཀུན་ཏུ་སྤྱོད་པ་ལ་གོམས་ཤིང་འདྲིས་པར་བྱས་པས། ཕྱིར་ཡང་མི་དགེ་བ་ལ་བརྟེན། མི་དགེ་བ་ལ་སྤྱོད། མི་དགེ་བའི་རྗེས་སུ་འཇུག་པ་ཉིད་དུ་སྐྱེ་སྟེ། ཞེས་གསུངས་པ་ལྟར། མི་དགེ་བ་གང་ལ་གོམས་པ་དེ་ལ་ཚེ་རབས་ཀུན་ཏུ་རང་བཞིན་གྱིས་སྤྲོ་བའོ། །མྱོང་བ་རྒྱུ་མཐུན་ནི། རིན་ཆེན་ཕྲེང་བ་ལས། གསོད་པ་ཡིས་ནི་ཚེ་ཐུང་འགྱུར། །རྣམ་པར་འཚེ་བས་གནོད་པ་མང་། །བརྐུ་བ་ཡིས་ནི་ལོངས་སྤྱོད་ཕོངས། །བྱི་བོ་བྱེད་པས་དགྲ་ཟླར་བཅས། །རྫུན་དུ་སྨྲ་བས་སྐུར་བ་སྟེ། །ཕྲ་མ་ཡིས་ནི་བཤེས་དང་དབྱེ། །རྩུབ་མོ་ཉིད་ཀྱིས་མི་སྙན་ཐོས། །མ་འབྲེལ་བ་ཡིས་ཚིག་མི་བཙུན། །བརྣབ་སེམས་ཡིད་ལ་རེ་བ་འཇོམས། །གནོད་སེམས་འཇིག་པ་སྦྱིན་པ་བཤད། །ལོག་པར་ལྟ་བས་ལྟ་ངན་ཉིད། །ཅེས་འབྱུང་བ་ལྟར་རོ། །བདག་པོའི་འབྲས་བུ་ནི། ཕྱི་རོལ་ཡུལ་ལ་སྨིན་ཏེ། དེ་ཉིད་ལས། ཕྱི་རོལ་གཟི་ཆུང་གནོད་པ་མང་། །རྡུལ་འཁྲིགས་དྲི་ང་མཐོ་དམན་ཅན། །ཚྭ་སྒོ་ཅན་དང་ལོག་པ་དང་། །འབྲས་བུ་ཕྲ་ཁ་ཆུང་ངམ་མེད། །ཅེས་གསུངས་པ་ལྟར་རོ། །ཞར་བྱུང་དགེ་སྡིག་གི་འབྲས་བུ་རྣམས་སྨིན་པའི་སྔ་ཕྱི་ཡང་། མཛོད་འགྲེལ་ལས། ལས་ནི་འཁོར་བར་ལྕི་གང་དང་། །ཉེ་བ་གང་དང་གོམས་པ་གང་། །སྔོན་བྱས་གང་ཡིན་དེ་ལས་ནི། །སྔ་མ་སྔ་མ་རྣམ་སྨིན་འགྱུར། །ཞེས་ལས་གང་སྟོབས་ཆེ་བ་དང་། དེ་མཉམ་ན་འཆི་ཁའི་དགེ་སྡིག་གི་སེམས་གང་གསལ་བ་དང་། དེ་མཉམ་ན་གོམས་ཤས་གང་ཆེ་དང་། དེ་ཡང་མཉམ་ན་སྔར་བྱས་པ་དེའི་འབྲས་བུ་སྔོན་དུ་སྨིན་པར་གསུངས་སོ། །གཉིས་པ་ལྟ་བ་ནི། འཇིག་རྟེན་པའི་ཡང་དག་པའི་ལྟ་བ་ཞེས་བྱ་བ་འཇིག་རྟེན་ཕ་རོལ་ཡོད་པ་དང་། ལས་རྒྱུ་འབྲས་ལ་མི་བསླུ་བར་ཡིད་ཆེས་པ་སྟེ། ཆེད་དུ་བརྗོད་པའི་ཚོམ་ལས། འཇིག་རྟེན་པ་ཡི་ཡང་དག་ལྟ། །ཆེན་པོ་གང་ལ་ཡོད་གྱུར་པ། །དེ་ནི་ཚེ་རབས་སྟོང་དུ་ཡང་། །ངན་འགྲོར་འགྲོ་བར་མི་འགྱུར་རོ། །ཞེས་གསུངས་ཤིང་། དེ་ལྟ་བུའི་ལྟ་བའམ་རྒྱུ་འབྲས་ཡིད་ཆེས་ཀྱི་དད་པ་ནི་ལས་འབྲས་མེད་པར་ལྟ་བ་སོགས་ལོག་པར་ལྟ་བ་རྣམས་ཀྱི་གཉེན་པོ་ཡིན་པས་ཤིན་ཏུ་གལ་ཆེ་ཞིང་། དེ་ལས་ལྡོག་སྟེ་ལོག་པར་ལྟ་བས་སྲོག་གཅོད་སྤངས་པ་སོགས་དགེ་བའི་ལས་གཞན་ལ་སྤྱད་ཀྱང་རྣམ་སྨིན་གྱི་འབྲས་བུ་སྡུག་བསྔལ་དུ་སྨིན་པར་གསུངས་ཏེ། བཤེས་སྤྲིང་ལས། གལ་ཏེ་མཐོ་རིས་ཐར་པ་མངོན་བཞེད་ན། །ཡང་དག་ལྟ་ལ་གོམས་པ་ཉིད་དུ་མཛོད། །གང་ཟག་ལོག་པར་ལྟ་བས་ལེགས་སྤྱད་ཀྱང་། །ཐམས་ཅད་རྣམ་པར་སྨིན་པ་མི་བཟད་ལྡན། །ཞེས་སོ། །གསུམ་པ་ཚུལ་ཁྲིམས་ནི། ཡང་དག་པའི་ལྟ་བ་དེ་ཉིད་ཀྱིས་ཟིན་པའི་མི་དགེ་བཅུ་སྤོང་གི་ཚུལ་ཁྲིམས་སྡོམ་པའི་ངོ་བོ་གྱུར་པ་དང་། བྱེ་བྲག་བསྙེན་གནས་ཡན་ལག་བརྒྱད་པའི་དུས་ཁྲིམས་ཏེ། སྔ་མ་ལས། འཚེ་དང་ཆོམ་རྐུན་འཁྲིག་པ་བརྫུན་དང་ནི། །ཆང་དང་དུས་མིན་ཟས་ལ་ཆགས་པ་དང་། །མལ་སྟན་མཐོ་ལ་དགའ་དང་གླུ་དག་དང་། །གར་དང་ཕྲེང་བའི་ཁྱད་པར་རྣམ་སྤོང་ཞིང་། །དགྲ་བཅོམ་ཚུལ་ཁྲིམས་རྗེས་སུ་བྱེད་པ་ཡི། །ཡན་ལག་བརྒྱད་པོ་འདི་དག་དང་ལྡན་ན། །གསོ་སྦྱོང་འདོད་སྤྱོད་ལྷ་ལུས་ཡིད་འོང་བ། །སྐྱེས་པ་བུད་མེད་དག་ལ་སྩོལ་བར་བགྱི། །ཞེས་དང་། སློབ་དཔོན་རྟ་དབྱངས་ཀྱིས། དགེ་བཅུའི་ལས་ཀྱི་ལམ་བརྟེན་པས། །དམྱལ་ལ་སོགས་པར་ལྟུང་མ་ཡིན། །ཞེས་གསུངས། དེས་ན་བླང་དོར་གྱི་གནས་མ་འཛོལ་བའི་ཚུལ་ཁྲིམས་ལ་གནས་པ་གལ་ཆེ་སྟེ། དབུ་མ་རྩ་བ་ལས། ཚུལ་ཁྲིམས་ཀྱིས་ནི་བདེ་འགྲོ་ཐོབ། །ཅེས་དང་། འཇུག་པ་ལས། མངོན་མཐོའི་རྒྱུ་ནི་ཚུལ་ཁྲིམས་ལས་གཞན་མེད། །ཅེས་གསུངས་པས་སོ། །བཞི་པ་སྒོམ་པ་ནི། སྤྱིར་རང་རང་གི་འབྲས་བུ་འབྱིན་ནུས་ཀྱི་བར་དུ་གོམས་པར་བྱེད་པ་ཡིན་ལ། བྱེ་བྲག་ཁམས་གོང་མ་གཉིས་སུ་སྐྱེ་བ་ལ། རང་རང་གིས་འོག་མ་ལ་ཆགས་པ་བྲལ་བྱེད་ཀྱི་ལམ་བསམ་གཏན་བཞི་དང་། གཟུགས་མེད་པའི་སྙོམས་འཇུག་བཞི་བསྒོམ་པ་སྟེ། ཇི་ལྟར་བསྒོམ་པའི་ཚུལ་ནི། བསམ་གཏན་དང་པོ་ལ་ཉེར་བསྡོགས་དང་དངོས་གཞི་གཉིས་ལས། དང་པོ་བསམ་གཏན་རང་སའི་འབྲས་བུ་འཐོབ་བྱེད་དངོས་གཞིར་སྙོམས་པར་འཇུག་ནུས་པའི་ཐབས་སུ་ཐོག་མར་རྒྱུ་བསྒྲུབ་པ་ཉེར་བསྡོགས་སེམས་ཞི་བར་གནས་པའི་ཐབས་དགུས་ཏིང་ངེ་འཛིན་སྒྲུབ་པར་གསུངས་ཏེ། དེ་ལ་ནང་ཉིད་དུ་སེམས་འཇོག་པ་ཞེས་པ། སེམས་ཕྱི་རོལ་དུ་གཡེང་བ་མིན་པར་གསེར་ལྟར་དྭངས་པའི་སྐུར་སྣང་བ་སོགས་ཏིང་ངེ་འཛིན་གྱི་སྤྱོད་ཡུལ་གྱི་གཟུགས་བརྙན་དམིགས་པ་ལ་ཡིད་གཏད་དེ་འཇོག་པ་དང་། རྒྱུན་དུ་འཇོག་པ་ཞེས་པ་དམིགས་པ་ལ་སེམས་འཇོག་པ་ཙམ་དུ་མ་ཟད་རྒྱུན་བསྲིང་སྟེ། སྐད་ཅིག་མ་སྔ་ཕྱི་བར་མ་ཆད་པར་འཇོག་པ་དང་། བསླན་ཏེ་འཇོག་པ་ཞེས་པ་བརྗོད་དེ་དམིགས་པ་ལས་སེམས་གཞན་དུ་འཕྲོ་ནའང་དེ་མ་ཐག་ཏུ་སླར་ནང་དུ་བཀུག་ནས་དམིགས་པ་ལ་བསླན་ཏེ་འཇོག་པ་དང་། ཉེ་བར་འཇོག་པ་ཞེས་པ་སེམས་ཕྱིར་འཕྲོས་པ་དེ་རིང་དུ་མི་འཇོག་པར་ཉེ་བར་ནང་དུ་དམིགས་པ་ལ་འཇོག་པ་དང་། འདུལ་བར་བྱེད་པ་ཞེས་པ་བརྣབ་སེམས་ལ་སོགས་པའི་ཉོན་མོངས་པས་སེམས་རྒྱུད་རབ་ཏུ་མ་ཞི་བ་ལས་དུལ་བར་བྱེད་པ་དང་། ཞི་བར་བྱེད་པ་ཞེས་པ་རྣམ་པར་རྟོག་པའི་རྦ་རླབས་ཞི་བར་བྱེད་པ་དང་། རྣམ་པར་ཞི་བར་བྱེད་པ་ཞེས་པ་རྣམ་པར་རྟོག་པ་ཕྲ་མོ་ཙམ་ཡང་ཞི་བར་བྱེད་པ་དང་། རྩེ་གཅིག་ཏུ་བྱེད་པ་ཞེས་པ་རྩོལ་བ་ཆུང་ངུས་སེམས་དང་དམིགས་པ་ཐ་དད་མེད་པར་རྩེ་གཅིག་ཏུ་བྱེད་པ་དང་། མཉམ་པར་འཇོག་པ་ཞེས་པ་བྱིང་རྒོད་བསལ་ནས་རྩོལ་བ་མེད་པར་ལྷུན་གྱིས་གྲུབ་པའི་ངང་དུ་མཉམ་པར་འཇོག་པ་དང་དགུས་ཏིང་ངེ་འཛིན་གྲུབ་པ་ན་ལུས་སེམས་ཤིན་ཏུ་སྦྱངས་པའི་བདེ་བ་འདྲེན་པས་ཁྱབ་ཅིང་། ཤིན་སྦྱངས་དང་ལྡན་པའི་ཏིང་ངེ་འཛིན་སྐྱེས་པ་ནི་འཇིག་རྟེན་པའི་ཞི་གནས་མཚན་ཉིད་པར་འཇོག་ལ། དེ་དང་མི་ལྡན་པ་ནི་ཞི་གནས་རྗེས་མཐུན་པའམ། མོས་པས་སྤྱོད་པའི་ས་ཞེས་བྱའོ། །དེ་ལྟ་བུའི་ཞི་གནས་མཚན་ཉིད་པ་གྲུབ་ནས། ཡིད་བྱེད་བདུན་གྱིས་འཇིག་རྟེན་པའི་ལྷག་མཐོང་སྒྲུབ་སྟེ། མཚན་ཉིད་རབ་ཏུ་རིག་པ་ཡིད་ལ་བྱེད་པ་ཞེས་འདོད་ས་པའི་སེམས་ནི་རགས་པ་དང་མ་ཞི་བ་སོགས་སྐྱོན་ཅན་དང་བསམ་གཏན་དང་པོ་ནི་ཞི་བ་དང་བདེ་བ་སོགས་ཡོན་ཏན་ཅན་དུ་ཐོས་བསམ་འདྲེས་མའི་སྒོ་ནས་རྩིང་པོར་རྟོག་ཅིང་ཞིབ་མོར་དཔྱོད་པ་དང་། མོས་པ་ལས་བྱུང་བ་ཡིད་ལ་བྱེད་པ་ཞེས་པ་དེ་ཉིད་སྒོམ་བྱུང་གི་ངོ་བོར་སྐྱེས་པ་དང་། དབེན་པ་ལས་སྐྱེས་པའི་ཡིད་ལ་བྱེད་པ་ཞེས་པ་འདོད་ཉོན་མངོན་གྱུར་པ་ཆེན་པོ་གསུམ་གྱིས་དབེན་པ་དང་། དགའ་བ་སྡུད་པ་ཡིད་ལ་བྱེད་པ་ཞེས་པ་འདོད་ཉོན་མངོན་གྱུར་པ་འབྲིང་པོ་གསུམ་སྤངས་བ་དང་། དཔྱོད་པ་ཡིད་ལ་བྱེད་པ་ཞེས་པ་འདོད་ཉོན་ཕྲ་མོ་གསུམ་གྱིས་ཀྱང་རྒྱུད་ལ་གོས་མ་གོས་རྟོག་ཅིང་དཔྱོད་པ་དང་། སྦྱོར་བའི་མཐའ་ཡིད་ལ་བྱེད་པ་ཞེས་པ་དེ་ལྟར་དཔྱོད་པ་ལས་འདོད་ཉོན་ཕྲ་ཞིང་ཕྲ་བ་ཡང་གཉེན་པོའི་སྟོབས་ཀྱིས་སྤངས་པ་སྟེ། དེ་ལྟར་ཡིད་ལ་བྱེད་པ་དྲུག་གིས་སྦྱོར་བའི་མཐའི་འབྲས་བུ་ཡིད་ལ་བྱེད་པ་ཞེས་འཇིག་རྟེན་པའི་ལྷག་མཐོང་མཐར་ཐུག་འགྲུབ་སྟེ། དེ་ཡང་འདོད་ཉོན་ཆེ་འབྲིང་དྲུག་སྤངས་པའི་བར་ནི་བསམ་གཏན་གྱི་ཉེར་བསྡོགས་དང་། ཆུང་ངུ་གསུམ་སྤངས་པའི་ཚེ་ན་བསམ་གཏན་དངོས་གཞིའི་སེམས་ཐོབ་པའོ། །དེ་དག་ནི་འོག་སའི་ཏིང་འཛིན་སྐྱོན་ཅན་རགས་པར་ལྟ་ཞིང་ས་གོང་མ་སྐྱོན་མེད་ཞི་བར་ལྟ་བ་ཞི་རགས་རྣམ་པ་ཅན་ཉན་རང་དང་འཇིག་རྟེན་པའི་ཐུན་མོང་བའི་ལམ་གྱི་མངོན་རྟོགས་སོ། །གཉིས་པ་དངོས་གཞི་ནི། རྟོག་དཔྱོད་གཉིས་གཉེན་པོའི་ཡན་ལག་ཏེ་འདི་གཉིས་ཀྱིས་འདོད་ཁམས་པའི་སེམས་འདོད་འདུན་གནོད་སེམས་རྣམ་འཚེ་སོགས་སྤོང་བར་བྱེད་དོ། །དགའ་བདེ་གཉིས་ཕན་ཡོན་གྱི་ཡན་ལག སེམས་རྩེ་གཅིག་པ་གནས་ཀྱི་ཡན་ལག་སྟེ། དེ་ལ་བརྟེན་ནས་ཕན་ཡོན་འབྱུང་བས་སོ། །དེ་ལྟར་ཡན་ལག་ལྔ་དང་ལྡན་པ་ནི་བསམ་གཏན་དང་པོའི་མཚན་ཉིད་དོ། །དེ་ལ་རྟོག་དཔྱོད་གཉིས་ཀ་དང་ལྡན་པ་དངོས་གཞི་ཙམ་པོ་བ། རྟོག་པ་མེད་ཅིང་དཔྱོད་པ་དང་བཅས་པ་དངོས་གཞི་ཁྱད་པར་ཅན་ནོ། །བསམ་གཏན་གཉིས་པ་ལ། ཉེར་བསྡོགས་ནི། བསམ་གཏན་དང་པོའི་དངོས་གཞི་ཁྱད་པར་ཅན་གཞིར་བཞག་དེ་ཉིད་སྐྱོན་ཅན་དང་བསམ་གཏན་གཉིས་པ་སྐྱོན་མེད་ཡོན་ཏན་དུ་མཚན་ཉིད་རབ་ཏུ་རིག་པའི་ཡིད་བྱེད་སོགས་ཡིད་བྱེད་བདུན་གྱིས་དངོས་གཞིའི་སེམས་ཐོབ་པར་བྱེད་པ་སྟེ། དེས་མཚོན་ནས་སྲིད་རྩེའི་བར་དུ་ཞི་རགས་རྣམ་ཅན་དུ་བལྟས་ཏེ་ཡིད་བྱེད་བདུན་གྱིས་སྒྲུབ་ཚུལ་དེ་ལྟར་ཤེས་པར་བྱ་དགོས་སོ། །དེ་ལ་ཡིད་བྱེད་དང་པོ་གཉིས་རང་ལམ་དེའི་སྦྱོར་ལམ་དང་། རབ་དབེན་དགའ་སྡུད་སྦྱོར་མཐའ་གསུམ་གྱིས་ཉོན་མོངས་པ་ཆེ་འབྲིང་ཆུང་ངུའི་གཉེན་པོ་བྱེད་པས་བར་ཆད་མེད་ལམ་དང་། དཔྱོད་པ་ཁྱད་པར་གྱི་ལམ། སྦྱོར་འབྲས་ཡིད་བྱེད་རྣམ་གྲོལ་གྱི་ལམ་མོ། །བསམ་གཏན་གཉིས་པའི་དངོས་གཞི་ལ་ཡན་ལག་བཞི་སྟེ། ནང་རབ་ཏུ་དང་བ་ནི་རྟོག་དཔྱོད་སྤོང་བའི་གཉེན་པོའི་ཡན་ལག་སྟེ། འོག་མའི་སྐྱོན་ལས་ངེས་པར་འབྱུང་བའི་རང་ས་ལ་རབ་ཏུ་དད་པའོ། །ཏིང་ངེ་འཛིན་ལས་སྐྱེས་པའི་དགའ་བདེ་གཉིས་ནི་ཕན་ཡོན་གྱི་ཡན་ལག ཏིང་ངེ་འཛིན་ནི་གནས་ཀྱི་ཡན་ལག་གོ །བསམ་གཏན་གསུམ་པའི་དངོས་གཞི་ལ་ཡན་ལག་ལྔ་སྟེ། འདུ་བྱེད་བཏང་སྙོམས་དང་སྒོམ་པ་མི་བརྗེད་པའི་དྲན་པ་དང་། དྲན་བཞིན་དུ་གནས་པའི་ཤེས་བཞིན་གསུམ་ནི་འོག་མའི་དགའ་བ་སྤོང་བའི་གཉེན་པོའི་ཡན་ལག ལུས་ཚོར་དང་ཤིན་སྦྱངས་ལས་བྱུང་བའི་བདེ་བ་ཕན་ཡོན་གྱི་ཡན་ལག ཏིང་ངེ་འཛིན་གནས་ཀྱི་ཡན་ལག་གོ །བསམ་གཏན་བཞི་པའི་དངོས་གཞི་ལ་ཡན་ལག་བཞི་སྟེ། ས་འོག་མའི་སྐྱོན་བརྒྱད་དང་བྲལ་བའི་དྲན་པ་ཡོངས་སུ་དག་པ་དང་། འདུ་བྱེད་བཏང་སྙོམས་ཡོངས་སུ་དག་པ་གཉིས་ནི་བསམ་གཏན་གསུམ་པའི་བདེ་བ་སྤོང་བའི་གཉེན་པོའི་ཡན་ལག ཚོར་བ་བཏང་སྙོམས་པ་ནི་ཕན་ཡོན་གྱི་ཡན་ལག ཏིང་ངེ་འཛིན་ཡོངས་སུ་དག་པ་རྟེན་གྱི་ཡན་ལག་གོ །སྐྱོན་བརྒྱད་ནི་བསམ་གཏན་དང་པོ་ལ་ཡོད་པའི་རྟོག་དཔྱོད་གཉིས། གསུམ་པ་མན་ཆད་ན་ཡོད་པའི་དབུགས་འབྱིན་རྔུབ་གཉིས་འདོད་པ་ན་ཡོད་པའི་སྡུག་བསྔལ་དང་ཡིད་མི་བདེ་པ་གཉིས། གཉིས་པ་མན་ཆད་དུ་ཡོད་པའི་ཡིད་བདེ། གསུམ་པའི་བདེ་བ་སྟེ་དེ་བརྒྱད་དང་བྲལ་བའི་ཕྱིར་རླུང་མེད་པའི་མར་མེ་ལྟར་གཡོ་བ་མེད་ཅིང་ཤིན་ཏུ་རྣམ་པར་དག་པའོ། །གོང་སྨོས་སེམས་གནས་དགུ་པ་འདོད་སེམས་རྩེ་གཅིག་པ་དང་། བསམ་གཏན་དང་པོ་ལ་ཙམ་ཁྱད་གཉིས་སུ་ཕྱེ་བའི་དྲུག་པོ་གང་ལ་བརྟེན་ཀྱང་ཟག་མེད་འཇིག་རྟེན་ལས་འདས་པའི་ལམ་གྱི་དངོས་གཞི་སྒྲུབ་ནུས་པས་བསམ་གཏན་ས་དྲུག་ཅེས་ཀྱང་བཤད་དོ། །གཟུགས་མེད་ཀྱི་སྙོམས་འཇུག་བཞི་ནི། བསམ་གཏན་བཞི་པའི་འདུ་ཤེས་ལའང་ཡིད་འབྱུང་བའི་མཚན་ཉིད་ཅན་ཏེ། བྱེ་བྲག་ཏུ་གཟུགས་ཀྱི་འདུ་ཤེས་མེད་པར་ནམ་མཁའ་ཙམ་མཐའ་ཡས་སོ་ཞེས། དེ་ཙམ་ལ་སྙོམས་པར་འཇུག་པ་གོམས་པ་ཡོངས་སུ་རྫོགས་པ་ནམ་མཁའ་མཐའ་ཡས་སྐྱེ་མཆེད་ཀྱི་སྙོམས་འཇུག དེ་བཞིན་དུ། ནམ་མཁའ་ཙམ་གྱི་འདུ་ཤེས་དེ་ཡང་བཀག་ནས་རྣམ་ཤེས་ཙམ་དུ་འདུ་ཤེས་པ་རྣམ་ཤེས་མཐའ་ཡས། དེ་ཡང་བཀག་སྟེ་ཅི་ཡང་མེད་པའི་འདུ་ཤེས་ལ་གནས་པ་ཅི་ཡང་མེད་པ། དེ་ཡང་བཀག་སྟེ་ཡོད་མིན་མེད་མིན་ཙམ་དུ་གནས་པ་འདུ་ཤེས་མེད་འདུ་ཤེས་མེད་མིན་གྱི་སྙོམས་འཇུག་གམ་སྲིད་རྩེའི་སྙོམས་འཇུག་སྟེ་དེ་བཞིའོ། །དེ་ལྟར་བསམ་གཟུགས་བརྒྱད་པོ་དེ་ཟག་མེད་འཇིག་རྟེན་ལས་འདས་པའི་ཤེས་རབ་ལྷག་མཐོང་དང་མ་འབྲེལ་ན་ཟག་བཅས་འཇིག་རྟེན་པའི་ལམ་སྟེ། བྱིས་པ་ཉེར་སྤྱོད་ཀྱི་བསམ་གཏན་ཞེས་ཀྱང་བྱ་ལ། བསམ་གཏན་བཞིའི་དངོས་གཞི་རྣམས་ལ་བརྟེན་ནས། བྱམས་སོགས་ཚད་མེད་བཞི་དང་། འཇིག་རྟེན་པའི་མངོན་ཤེས་ལྷའི་མིག་དང་ལྷའི་རྣ་བ་དང་གཞན་གྱི་སེམས་ཤེས་པ་དང་སྔོན་གནས་རྗེས་སུ་དྲན་པ་དང་འཆི་འཕོ་སྐྱེ་བ་ཤེས་པ་སྟེ། ལྔ་ནི་ཁམས་གོང་མའི་ཡོན་ཏན་གྱི་ཁྱད་པར་རབ་ཏུ་གྲགས་པ་ཡིན་ལ། ཐེག་པ་ལ་ཞུགས་པ་རྣམས་ཀྱང་ཐོག་མར་ཏིང་ངེ་འཛིན་དེ་དག་དང་ཡོན་ཏན་དེ་དག་བསྐྱེད་ནས། སླར་གོང་མའི་ཁྱད་པར་བསྒྲུབ་དགོས་པས་མངོན་ཤེས་ལ་སོགས་པའི་ཡོན་ཏན་ཀུན་གྱི་གཞིར་གྱུར་པ་དང་། ཁྱད་པར་བསམ་གཏན་བཞི་པའི་དངོས་གཞི་ལ་བརྟེན་ནས་ཟག་མེད་འཕགས་པའི་ལམ་སྒྲུབ་ན་གཟུགས་མེད་ལྟ་བུ་ཧ་ཅང་ཞི་གནས་ཤས་ཆེ་བས་མི་གསལ་བ་ཡང་མིན་ལ། གསུམ་པ་སོགས་འོག་ས་ལྟར་གཡོ་བ་ཕྲ་མོའི་སྐྱོན་ཡང་མེད་པས་རབ་ཀྱི་མཐའ་ཞེས་བྱ་སྟེ་མཆོག་ཏུ་གྱུར་པ་དང་། དེར་མ་ཟད་སྲིད་རྩེའི་དངོས་གཞིའི་སེམས་ལ་བརྟེན་ནས་ཀྱང་འཕགས་པ་རྣམས་འདུ་ཤེས་དང་ཚོར་བ་འགོག་པ་འགོག་པའི་སྙོམས་འཇུག་ཐོབ་པ་སོགས་ཀྱིས། ཕྱི་རོལ་གྱི་དྲང་སྲོང་དང་མུ་སྟེགས་བྱེད། ནང་པའི་ཐེག་དམན་ཉན་ཐོས་དང་རང་རྒྱལ་གྱིས་ཀྱང་དོན་དུ་གཉེར་བྱ་དང་བསྒྲུབ་བྱ་ཡིན་ལ། རྒྱལ་བའི་བསྟན་པ་ལ་རིམ་པར་འཇུག་པ་རྣམས་ཀྱི་སྔོན་འགྲོའི་ཆོས་ཀྱང་ཡིན་པས་ཤེས་ནས་གོམས་པའི་སྦྱོར་བ་ལ་བསླབ་པར་བྱ་བ་ཡིན་ནོ། །ལྔ་པ་སྤྱོད་པ་ནི། ཟག་པ་དང་བཅས་པའི་དགེ་བཅུའི་ལས་ལམ་འཁོར་བཅས་ལ་སྤྱོད་པ་སྟེ། དེ་ནི་མི་དགེ་བ་བཅུ་སྤངས་པའི་ཆ་ནས་བཏགས་ཏེ། རིན་ཆེན་ཕྲེང་བ་ལས། མི་གསོད་པ་དང་རྐུ་སྤོང་དང་། །གཞན་གྱི་ཆུང་མ་སྤོང་བ་དང་། །ལོག་དང་ཕྲ་མ་རྩུབ་ཉིད་དང་། །མ་འབྲེལ་སྨྲ་བ་ཡང་དག་སྡོམ། །ཆགས་དང་གནོད་སེམས་མེད་པ་པ། །ཉིད་ཀྱི་ལྟ་བ་ཡོངས་སྤོང་བ། །འདི་དག་ལས་ལམ་དཀར་བཅུ་སྟེ། །ཞེས་གསུངས། གཞན་ཡང་ལུས་ཀྱི་ཕྱག་བསྐོར་ངག་གི་ཁ་ཏོན་ཡིད་ཀྱི་ཕན་སེམས་སོགས་སྒོ་གསུམ་དགེ་ལ་ཅི་ནུས་སུ་སྦྱོར་བ་དང་། དམ་པའི་རྒྱན་ལས། བཀུར་བར་འོས་པ་ལེགས་ཁུར་ཞིང་། །མགོན་མེད་རྣམས་ལ་ལྷག་པར་བྱམས། །བྱས་ལ་དྲིན་ལན་མི་བརྗེད་པ། །དམ་པ་རྣམས་ཀྱི་མཛད་སྤྱོད་ཡིན། །ཞེས་པའི་ཡ་རབས་དང་མཐུན་པའི་སྤྱོད་པ་གསུམ་དང་། འབྱེད་པའི་ལེ་ཆུང་ལས། དཀོན་མཆོག་གསུམ་ལ་དད་པ་སྐྱོ་ངལ་མེད་པར་བྱེད་པ་དང་། དོན་དམ་པར་དམ་པའི་ཆོས་བཙལ་བ་དང་། གཙུག་ལག་བཟང་པོ་ལ་མཁས་པར་སློབ་པ་དང་། ཅི་ལའང་རན་ཅིང་ཚོད་ཟིན་པར་བྱ་བ་དང་། མ་བཅོལ་བའི་ལས་ལ་གཏོགས་འདོད་མི་བྱེད་པ་དང་། མིག་མཐོ་སར་བལྟ་ཞིང་གོང་མ་རྣམས་ཀྱི་རྗེས་སྙེག་པ་དང་། དུས་གསུམ་གྱི་ཕ་མ་ལ་དྲིན་ལན་བསླན་པ་དང་། ཕུ་ནུ་དང་ཕ་ཚན་ནང་དུ་ཤོང་ཡངས་ཆེ་བ་དང་། རིམ་པས་རྒན་པ་ལ་བཀུར་སྟི་བྱ་བ་དང་། ཁྱིམ་མཚེས་ལ་བྱམས་པར་བྱ་བ་དང་། གཉེན་གྲོགས་ཀྱི་དགེ་བཤེས་ལ་དཀའ་ལས་ཀྱིས་ཕན་འདོགས་པ་དང་། སྲིད་ཀྱིས་འབྲེལ་བའི་ཉེ་རིང་ལ་ཆབ་གང་མཐར་དབྱུང་བ་དང་། རིག་བྱེད་བཟོ་ལ་མཁས་པས་གཞན་ལ་ཕན་པ་དང་། ལྟོས་པའི་མི་དྲིན་གྱིས་སྐྱབས་འོག་ཏུ་གཞུག་པ་དང་། ངན་བྱེད་ཀྱི་གྲོས་བཀག་ནས་རྒྱལ་ཁམས་བདེ་ཡངས་ཀྱི་གྲོས་གཞི་འདིང་བ་དང་། ལས་མཐའ་ཆོས་ལ་གཏད་དེ་ཕྱི་མར་བུ་སྨད་ཀྱིས་བུ་སྨད་ཀྱི་ཞེས་པ་ཕ་མ་སོགས་ཁྱིམ་གཟའ་ཚོང་ཚང་མ་ལ་ཟེར་པ་ཡིན་འདུག་མཆན། བྱང་ཆུབ་ཀྱི་གཞི་ཐོབ་པར་བྱའོ། །ཞེས་བཤད་པ་ལྟར་མི་ཆོས་གཙང་མ་བཅུ་དྲུག་ལ་བསླབ་པ་དང་། བྱེ་བྲག་ཏུ་ཚངས་རིས་སོགས་སུ་སྐྱེ་བ་ལ་བྱམས་སྙིང་རྗེ་དགའ་བ་བཏང་སྙོམས་ཏེ་ཚངས་པའི་གནས་པ་བཞི་ལ་སྤྱོད་པ་དང་། ཡི་གེ་འདྲི་མཆོད་སོགས་ཆོས་སྤྱོད་བཅུ་བསླབ་པར་ཡང་ཧེ་རུ་ཀ་གལ་པོ་ལས་གསུངས་སོ། །དྲུག་པ་འབྲས་བུ་ནི། སྤྱིར་བསམ་གཟུགས་ཀྱི་ཏིང་ངེ་འཛིན་དང་མ་འབྲེལ་བའི་ཟག་བཅས་ཀྱི་དགེ་བའི་ལས་སྟོབས་ཆེ་ཆུང་གིས། གླིང་བཞིའི་མི་དང་། འདོད་ལྷ་རིགས་དྲུག་སྟེ་མཐོ་རིས་ཀྱི་གནས་བཅུར་སྐྱེ་སྟེ། རྒྱས་པ་ལས། དགེ་བཅུ་སྤྱོད་ཅིང་མི་དགེ་སྤོང་བྱེད་པ། །འདོད་ཁམས་ལྷ་དང་མི་རུ་སྐྱེ་བའི་རྒྱུ། །ཞེས་དང་། ལམ་རིམ་ལས། དགེ་བཅུ་དག་ལ་གཙོར་ལེན་ཅིང་། །དགེ་དང་མི་དགེ་མི་མཉམ་པས། །ལྷ་དང་མི་ཡི་སྐྱེ་གནས་ཏེ། །མཉམ་ཉིད་མ་རྟོགས་འདོད་ཁམས་འཁོར། །ཞེས་སོ། །དེའང་འདིས་འདོད་པའི་བདེ་བ་མཐར་ཐུག་པ་མིའི་འཁོར་ལོས་སྒྱུར་རྒྱལ་དང་། ལྷའི་གཞན་འཕྲུལ་དབང་བྱེད་ཀྱི་བདག་པོའི་བར་བགྲོད་པའི་ཕྱིར། ལང་གཤེགས་སུ་བགྲོད་བྱའི་གཙོ་བོའི་སྒྲས་སྨོས་ཏེ་ལྷའི་ཐེག་པ་ཞེས་གསུངས། བྱེ་བྲག་ཏུ་གཟུགས་གཟུགས་མེད་ཀྱི་སྙོམས་འཇུག་ལ་གོམས་པ་ལས་ནི་འབྲས་བུ་སྐྱེ་བའི་བསམ་གཏན་ཞེས་རང་སའི་འབྲས་བུ་སྐྱེད་པ་སྟེ། དེ་ཡང་བསམ་གཏན་བཞི་ལས། བསམ་གཏན་དང་པོའི་སྙོམས་འཇུག་ཆུང་ངུར་གོམས་པས་ཚངས་རིས། འབྲིང་དུ་གོམས་པས་ཚངས་པ་མདུན་ན་འདོན། ཆེར་གོམས་པས་ཚངས་ཆེན་ཏེ་བསམ་གཏན་དང་པོའི་གནས་རིས་གསུམ་དང་། དེ་བཞིན་དུ་བསམ་གཏན་གཉིས་པའི་སྙོམས་འཇུག་ཆུང་འབྲིང་ཆེར་གོམས་པ་གསུམ་གྱིས། འོད་ཆུང་། ཚད་མེད་འོད། འོད་གསལ་ཏེ་གསུམ་དང་། གསུམ་པས། དགེ་ཆུང་། ཚད་མེད་དགེ། དགེ་རྒྱས་ཏེ་གསུམ་དང་། བཞི་པས་སྤྲིན་མེད་འོད། བསོད་ནམས་སྐྱེས། འབྲས་བུ་ཆེ་སྟེ་སོ་སྐྱེའི་གནས་བཅུ་གཉིས་སུ་སྐྱེ་བ་ཡིན་ལ། བསམ་གཏན་བཞི་པ་དང་ཟག་མེད་འཕགས་པའི་ཤེས་རབ་སྤེལ་ཏེ་བསྒོམས་པ་ཆུང་འབྲིང་ཆེ་བ་ཤིན་ཏུ་ཆེ་བ། ཆེས་ཤིན་ཏུ་ཆེ་བ་ལྔ་བསྒོམས་པས། མི་ཆེ་བ། མི་གདུང་བ། ཤིན་ཏུ་མཐོང་བ། གྱ་ནོམ་སྣང་བ། འོག་མིན་ཏེ་གནས་གཙང་ལྔར་སྐྱེ་བ་འཛིན་ཏེ། འདི་ལྔ་ལ་སྤྱིར་གང་ཟག་འཕགས་པ་ལས། སོ་སྐྱེ་མེད་པ་དང་ཟག་བཅས་འཇིག་རྟེན་པའི་ལམ་ཁོ་ནས་བགྲོད་མི་ནུས་པས་གཙང་མའི་གནས་རིས་ཞེས་བཤད་པ་ཡིན་ལ། བྱེ་བྲག་ཡིད་བཞིན་མཛོད་སོགས་ལས། སེམས་ཅན་རྣམས་ཐོག་མར་འཁྲུལ་བའི་ཚེ་ཀུན་གཞི་ལུང་མ་བསྟན་ལས་རང་ངོ་མ་ཤེས་པའི་དབང་གིས་འཛིན་རྟོག་ཇེ་རགས་སུ་གྱུར་པས་གོང་མ་ལས་འོག་མ་རིམ་གྱིས་མཆེད་པའི་ཕྱིར་འདིར་ཡང་སོ་སྐྱེའི་གང་ཟག་ཡོད་པར་བཞེད་དོ། །གང་ལྟར་ཡང་བྱིས་པ་རྣམས་གཟུགས་ལ་ཆགས་བྲལ་མ་ཐོབ་ཅིང་བསམ་གཏན་གྱི་རོ་ལ་ཆགས་པས་འཁོར་ཏེ། ལམ་རིམ་ལས། ཚད་མེད་བཞི་དང་བསམ་གཏན་བཞི། །རིམ་པས་སོ་སོར་བདག་འཛིན་ཅིང་། །གཟུགས་རྣམས་ཀུན་ལ་བདག་ཏུ་རྟོག །འདི་ནི་ཚངས་གནས་རིམ་པར་སྐྱེ། །ཞེས་སོ། །གཟུགས་མེད་བཞི་ནི། ལྷག་མཐོང་གི་ཤེས་རབ་ཀྱི་དབེན་པས་ཚོར་བ་དང་འདུ་ཤེས་དང་། འདུ་བྱེད་དང་། རྣམ་པར་ཤེས་པ་སྟེ། མིང་བཞི་དང་ལྡན་པའི་ཏིང་ངེ་འཛིན་ལ་བདག་ཏུ་བཟུང་བས་གཟུགས་མེད་ཀྱི་ལྷར་སྐྱེ་སྟེ། དེ་ལས། མཉམ་དང་གཟུགས་མེད་མ་རྟོགས་ནས། །མིང་བཞི་མེད་པར་མ་ཤེས་ཏེ། །སྐྱེ་མཆེད་བཞི་ལ་གནས་གྱུར་ན། །སྲིད་པའི་རྩེ་མོའི་ས་རུ་སྐྱེ། །ཞེས་གསུངས་དེ་ཡང་གཟུགས་མེད་ཁམས་ལ་གཟུགས་རགས་པས་ཕྱེ་བའི་གནས་གཞན་ཐ་དད་པ་མེད་ཀྱང་མཆོག་དམན་དང་ཚེ་རིང་ཐུང་དང་གོང་འོག་ལ་སོགས་པའི་སྒོ་ནས་ཐ་དད་དུ་ཡོད་ལ། ཕལ་ཆེན་དང་དུས་འཁོར་རྫོགས་ཆེན་སོགས་ནས་གནས་སོགས་ཀྱང་ཐ་དད་དུ་བཤད་ཅིང་། གང་ལྟར་གོང་ནས་གོང་དུ་ཏིང་ངེ་འཛིན་རྒྱ་ཆེ་ཞིང་ཇེ་བརྟན་དུ་གྱུར་པ་དང་། ཚེ་རིང་བ་སོགས་ཀྱི་སྒོ་ནས་མངོན་མཐོའི་བདེ་འབྲས་ཁྱད་པར་དུ་འཕགས་པ་ཡིན་ཞིང་། འདི་གཉིས་ལ་ལང་གཤེགས་ལས་ཚངས་པའི་ཐེག་པ་ཞེས་ཀྱང་གསུངས་སོ། །གཉིས་པ་ནི། སྙིང་པོའི་རྒྱུད་ལས། མ་རྟོགས་པ་དང་ལོག་པར་རྟོག །ཞེས་གསུངས་ཏེ། འདི་ལ་སྔོན་གྱི་སློབ་དཔོན་རྣམས་དགོངས་པ་མི་མཐུན་པ་འགའ་ཞིག་སྣང་མོད། འདིར་བི་མ་ལའི་འགྲེལ་ཆུང་དང་། གུ་རུ་རིན་པོ་ཆེས་མཛད་པའི་མན་ངག་ལྟ་ཕྲེང་གི་དགོངས་པ་ལྟར་ན། མ་རྟོགས་པ་ལ་ཕྱལ་བ་དང་། རྒྱང་འཕེན་གཉིས། ལོག་པར་རྟོག་པ་ལ། མུར་ཐུག་པ་དང་། མུ་སྟེགས་པའོ། །དེ་ལས་སྔ་མ་གཉིས་ནི་སོ་སོ་སྐྱེ་བོ་གྲུབ་མཐས་བློ་མ་བསྒྱུར་བའི་གང་ཟག་གོ །དེ་ལ་འཇིག་རྟེན་ཕྱལ་བ་ནི། རྟེན་འབྱུང་རྒྱུ་འབྲས་ཀྱི་ཆོས་ཡོད་མེད་གང་དུའང་མི་དཔྱོད་ཅིང་སྤོང་ལེན་མི་བྱེད་པའི་ཕྱིར་ཕྱལ་བ་ཞེས་བྱ་སྟེ། སྤར་ཁབ་ལས། ཅིར་ཡང་མ་རྟོགས་པ་ནི་འཇིག་རྟེན་ཕྱལ་བ་སྟེ། ཞེས་གསུངས་པས། ལས་རྒྱུ་འབྲས་ཡེ་མ་རྟོགས་པའི་ཀུན་ཏུ་རྨོངས་པ་སྟེ། ལྟ་ཕྲེང་ལས། ཕྱལ་བ་ནི་ཆོས་ཐམས་ཅད་རྒྱུ་དང་འབྲས་བུ་ཡོད་མེད་དུ་མ་རྟོགས་ཏེ་ཀུན་ཏུ་རྨོངས་པའོ། །ཞེས་གསུངས། རྒྱང་འཕེན་པ་ནི། ཚེ་ཕྱི་མ་རྒྱང་དུ་བོར་ཏེ་ཚེ་འདིའི་བཙན་ཕྱུག་དང་མཐུ་སྟོབས་སོགས་འཇིག་རྟེན་པའི་གསང་ཚིག་མོ་རྩིས་སོགས་ལ་བརྟེན་ནས་བསྒྲུབ་པའི་ཕྱིར་རྒྱང་འཕེན་པ་ཞེས་བྱ་སྟེ། ཚེ་སྔ་ཕྱི་ཡོད་མེད་དུ་མ་རྟོགས་ཤིང་ཚེ་གཅིག་གི་ཕན་བདེ་བག་ཙམ་སྒྲུབ་པའི་བློ་ཅན་ནོ། །དེ་ལྟར་ཡང་ལྟ་ཕྲེང་ལས། རྒྱང་འཕེན་པ་ནི་ཚེ་སྔ་ཕྱི་ཡོད་མེད་དུ་མ་རྟོགས་ཤིང་ཚེ་གཅིག་གི་བཙན་ཕྱུག་དང་མཐུ་སྟོབས་སྒྲུབ་པ་སྟེ། འཇིག་རྟེན་པའི་གསང་ཚིག་ལ་བརྟེན་པའོ། །ཞེས་གསུངས། ཕྱི་མ་གཉིས་ནི་རྟེན་གྱི་གང་ཟག་གང་ཞིག་ལོག་པའི་གྲུབ་མཐས་བློ་བསྒྱུར་པ་སྟེ། དེ་ལ་ཆད་ལྟ་མུར་ཐུག་པ་ནི། ཆོས་ཉིད་ཅིའི་ངོ་བོར་ཡང་མ་གྲུབ་པས་འཁྲུལ་གཞི་བྱས་ནས། ཚེ་སྔ་ཕྱི་དང་ལས་རྒྱུ་འབྲས་མེད་པར་བལྟ་བ་སྟེ། ཚེ་གཅིག་གི་ཆོས་ཐམས་ཅད་རྒྱུ་མེད་གློ་བུར་དུ་སྐྱེ་ལ་མཐའ་ཆད་པར་བལྟ་བས་ཆད་པའི་མུར་ཐུག་པ་སྟེ། སྔ་མ་ལས། མུར་ཐུག་པ་ནི། ཆོས་ཐམས་ཅད་རྒྱུ་དང་འབྲས་བུ་མེད་པ་སྟེ། ཚེ་གཅིག་ལ་སྐྱེས་པའི་ཆོས་ཐམས་ཅད་གློ་བུར་དུ་སྐྱེས་ལ་མཐའ་ཡང་ཆད་པར་བལྟ་བའོ། །ཞེས་གསུངས། རྟག་ལྟ་མུ་སྟེགས་པ་ནི། ཆོས་ཉིད་འགྱུར་བ་མེད་པས་འཁྲུལ་གཞི་བྱས་ནས་ཆོས་ཐམས་ཅད་ལ་བདག་ཡོད་པར་བལྟ་བ་སྟེ། བདག་རྟག་པ་གཅིག་པུ་པ་ཕུང་པོ་ལྔའི་རྒྱུན་ལ་ཟ་བ་པོ་དང་། བྱེད་པ་པོའི་བདག་ཉིད་ཅན་ཞིག་དོན་དམ་པར་ཡོད་པར་འདོད་པ་སྟེ། དེ་ཡང་རང་ཉིད་སྐྱེད་བྱེད་ཀྱི་རྒྱུ་མེད་པ་ལ་འབྲས་བུ་རྟག་པ་བདག་དང་གཙོ་བོ་སོགས་ཡོད་པར་བལྟ་བ་དང་། སྣོད་བཅུད་ཐམས་ཅད་ཕྱའམ་དབང་ཕྱུག་ལ་སོགས་པ་རྒྱུ་མིན་པ་གཞན་གྱིས་བསྐྱེད་པར་འདོད་པ་དང་། ཕྱུགས་བསད་པའི་མཆོད་སྦྱིན་སོགས་ཀྱིས་མཐོ་རིས་ཐོབ་པར་འདོད་པ་སོགས་རྒྱུ་འབྲས་ལོག་པར་འཛིན་པ་དང་། རྒྱུ་བྱེད་པ་པོ་རྟག་གཅིག་རང་དབང་བར་ཡོད་པ་ལ། དེས་བསྐྱེད་པའི་འབྲས་བུ་མི་རྟག་པའི་ཕྱིར་གཏན་དུ་བའི་ངོ་བོར་མེད་པར་ལྟ་བ་སོགས་ཏེ། འདི་དག་ནི་སྲིད་རྩ་གཅོད་པའི་ལམ་ཡང་དག་དང་མ་འབྲེལ་བར་དེ་ཁོ་ན་ཉིད་ལ་རྨོངས་པའི་མ་རིག་པའི་ལྟ་བ་ངན་པ་སྟེ། སྔ་མ་ལས། མུ་སྟེགས་པ་ནི་ཆོས་ཐམས་ཅད་ལ་ཀུན་ཏུ་བརྟགས་པས་བདག་རྟག་པ་ཞིག་ཡོད་པར་ལྟ་བ་སྟེ། དེ་ཡང་རྒྱུ་མེད་ལ་འབྲས་བུ་ཡོད་པར་ལྟ་བ་དང་། རྒྱུ་འབྲས་ལོག་པར་ལྟ་བ་དང་། རྒྱུ་ཡོད་པ་ལ་འབྲས་བུ་མེད་པར་ལྟ་བ་སྟེ། འདི་དག་ནི་མ་རིག་པའི་ལྟ་བའོ། །ཞེས་གསུངས། དེ་ལ་མ་རྟོགས་པ་གཉིས་ནི་གྲུབ་མཐའི་ལྟ་བ་མ་ཡིན་མོད་ཀྱི། འོན་ཀྱང་སེམས་ཀྱི་གནས་ཚུལ་བསྡུ་བའི་ཕྱིར། དེའི་ཟླ་བ་བཤད་དོ། །ལོག་པར་རྟོག་པའི་ལྟ་བ་གཉིས་ནི་གྲུབ་མཐས་བློ་བསྒྱུར་བའི་ལྟ་བ་ཡིན་ཀྱང་ཆོས་ཉིད་མཐའ་དང་བྲལ་བ་ལ་སྒྲོ་སྐུར་གྱི་མཐའ་ལ་ཞེན་པས་ལོག་པར་བསྒྱུར་བའི་ཕྱིར། འཁོར་བ་ལས་སྒྲོལ་བའི་ཐབས་མ་ཡིན་ཏེ། གྲུབ་མཐའ་སྨྲ་བ་རྣམས་ཀྱི་ནང་ནས་ཐ་ཆད་པ་མུར་ཐུག་པར་མ་ཟད་མུ་སྟེགས་པའང་བདག་འདོད་པས་འཁོར་བའི་རྩ་བ་བདག་འཛིན་གྱིས་བཅིངས་པའི་ཕྱིར་དེ་ལྟར་ཡང་། རྣམ་འགྲེལ་ལས། ཇི་སྲིད་བདག་ལ་མངོན་ཆགས་པ། །དེ་སྲིད་དེ་ནི་འཁོར་བར་འགྱུར། །ཞེས་སོ། །དེ་ལས་དབྱེ་ན། འཇིག་ཚོགས་སུམ་བརྒྱ་དང་དྲུག་ཅུར་གསུངས་ཏེ། རིག་པ་རང་ཤར་ལས། ལོག་པའི་ཐེག་པ་འདི་ལྟ་སྟེ། །འཇིག་ཚོགས་སུམ་བརྒྱ་དྲུག་ཅུར་འདོད། །སུམ་བརྒྱ་དབྱིངས་ལ་བཤད་པའོ། །དྲུག་བཅུའི་ལྟ་བ་འདི་ལྟ་སྟེ། །གྲངས་ཅན་ལོག་པར་སྨྲ་བ་དང་། །བྱེ་བྲག་རང་གི་རྒྱུར་སྨྲ་དང་། །ཀུ་མཱ་ར་ལ་ཆེན་པོ་དང་། །རྣ་མ་ཕུག་པའི་གཞུང་འཛིན་དང་། །གསང་བ་མེ་ལྔ་བརྟེན་པ་དང་། །མེ་རས་ཏིལ་མར་ལུས་བསྲེག་དང་། །མདུང་རྩེའི་དཀའ་ཐུབ་ལོག་སྤྱོད་དང་། །མཆོང་དང་འཚོག་པའི་དཀའ་ཐུབ་དང་། །ཤ་ཀོར་ལུས་ལ་བྱས་འཐོག་དང་། །ཁྱི་ཡི་ཆ་བྱད་སྤྱོད་པ་དང་། །དེ་བཞིན་མངོན་ཤེས་ཕྲ་མོའི་ས། །སངས་རྒྱས་བྱིན་རླབས་སྤྱིར་སྣང་བ། །ལོག་པའི་དཀའ་ཐུབ་སྤྱོད་པའོ། །རྣམ་པའི་ལྟ་བ་འདི་ལྟ་སྟེ། །བྱེད་པར་རྒྱུ་རུ་སྨྲ་བ་དང་། །བྱེད་པ་ལམ་དུ་འཁྱེར་བ་དང་། །རྟག་པ་དོན་མཚོན་ཆེན་པོ་དང་། །ཐེར་ཟུག་འགྱུར་མེད་སྨྲ་བ་དང་། །གནས་སྐབས་རྟག་པར་སྨྲ་བ་དང་། །རྒྱུ་ལ་རྟག་པར་སྨྲ་བ་དང་། །འབྲས་བུ་རྟག་པར་སྨྲ་བ་དང་། །རྟག་པ་ཉིད་ལ་ལམ་ལྟོས་དང་། །སྤྱོད་པ་རྟག་པར་འདོད་པ་དང་། །དོན་ལ་རྟག་མེད་ཆད་ལྟ་དང་། །དེ་བཞིན་རྟག་པའི་རྣམ་པའོ། །ཚད་མེད་ངན་སྔགས་གཙོར་བྱེད་དང་། །མོ་དང་པྲ་ལ་གཙོར་བྱེད་དང་། །རྫུ་འཕྲུལ་ཕྲ་མོ་གཙོར་བྱེད་དང་། །རྩོད་པ་ལྷུ་རུ་ལེན་པ་དང་། །དཀའ་ཐུབ་སྤྱོད་པ་དག་དང་ནི། །འཇིག་རྟེན་འདི་ལ་ཞེན་པ་དང་། རང་གི་བྱ་བ་འཛིན་པ་དང་། །ལྭ་བ་ཅན་དུ་འགྱུར་བ་དང་། །མི་འཕམ་རས་གོས་དག་དང་ནི། །ཕྱག་མཚན་གཙོ་བོར་བྱེད་པའོ། །བྱ་བ་ལྟོས་པར་སྨྲ་བ་དང་། །རིགས་པས་ཕ་རོལ་སུན་འབྱིན་དང་། །རྒྱུ་མེད་ཆད་པར་སྨྲ་བ་དང་། །ཕྱམ་ཆད་སྟོང་པར་སྨྲ་བ་དང་། །རྒྱུ་ཆད་འབྲས་བུ་ཆད་ལྟ་དང་། །ལམ་ཆད་ཡེ་ཤེས་ཆད་ལྟ་དང་། །ཆད་པ་ཐེར་ཟུག་ཆེན་པོ་དང་། །ལམ་ཆད་འབྲས་བུ་གཏན་ཆད་དང་། །ལོག་པའི་སེམས་ཀྱི་ཆད་ལྟ་དང་། །ཆད་པ་སྟོང་པ་ཆེན་པོའོ། །རིག་བྱེད་གསང་བར་སྨྲ་བ་དང་། །ཆ་མཐུན་གོལ་བའི་མུ་སྟེགས་དང་། །མངོན་སྣང་སེམས་ཀྱི་མུ་སྟེགས་དང་། །འཁྲུལ་སྣང་འཛིན་པའི་མུ་སྟེགས་དང་། །ཞེ་སྡང་སྐྱེད་པའི་མུ་སྟེགས་དང་། །བྱ་བྱེད་སེམས་ཀྱི་མུ་སྟེགས་དང་། །འཛིན་པ་དོན་མེད་མུ་སྟེགས་དང་། །ཁ་ཚིག་གོལ་བའི་མུ་སྟེགས་དང་། །རྟག་པ་དོན་མེད་མུ་སྟེགས་དང་། །ཀ་ནི་དང་ནི་སེར་རྣ་དང་། །ངྷ་སི་ར་དང་ཀ་བྷི་ཤ །སིན་ངྷ་ར་དང་ངྷ་སིང་དང་། །ཀ་ཏི་དང་ནི་སང་གྷ་དང་། །ཤང་ཀ་རི་དང་ངྷ་ཤ་ཀའོ། །ཞེས་པས། འབྱུང་བ་དང་ཤེས་པའི་དབྱིངས་ལས་འཁྲུལ་ནས་སོ་སོར་རྟོག་པས་གྲུབ་མཐའ་རེ་བཟུང་བ་དབྱིངས་ཀྱི་ལྟ་ལོག་སུམ་བརྒྱ་སྟེ། དེའང་རྒྱལ་དཔོག་པ་ལ་སོགས་པའི་སྟོན་པ་བརྒྱས་འདས་པ་དང་། མ་འོངས་པ་དང་། ད་ལྟར་གྱི་དུས་གསུམ་ལ་ལོག་པའི་འཛིན་སྟངས་སུ་བྱེད་པས་སུམ་བརྒྱར་བཤད་པ་དང་། དེ་དག་གི་གྱེས་མདོ། གྲངས་ཅན་པ་དང་། བྱེ་བྲག་པ་ལ་སོགས་དྲུག་ཅུ་སྟེ། དེ་ཐམས་ཅད་བསྡུ་ན་མུར་ལྟ་དང་། མུར་ཐུག་དང་། རྒྱང་འཕེན་དང་། ཕྱལ་བ་བཞིར་འདུ་ཞིང་། དེ་ཡང་བསྡུ་ན། རྟག་ཆད་གཉིས་སུ་འདུ་བར་གསུངས་ཏེ། འདི་དག་གི་རྣམ་བཞག་ཞིབ་པར་ཐེག་མཆོག་རིན་པོ་ཆེའི་མཛོད་དང་། །ཆོས་རྗེ་ཀཿ ཐོག་པ་ཆེན་པོས་མཛད་པའི་ཐེག་པ་སྤྱི་ཆིངས་རྩ་འགྲེལ་སོགས་སུ་གསལ་བས་འདིར་ཡི་གེས་འཇིགས་ཏེ་མ་བྲིས་ལ། བསྡུ་ན་རྟག་ཆད་གཉིས་ལས། རྟག་ལྟ་བས་ནི་བདག་གམ་ཚངས་པ་དབང་ཕྱུག་སོགས་ཀྱི་ངོ་བོ་རྟག་ཅིང་ཐམས་ཅད་དེས་བྱེད་པར་འདོད་པ་དང་། ཆད་ལྟ་བས་འབྱུང་བ་བཞི་ལས་ད་ལྟའི་ཕུང་པོ་འདི་གློ་བུར་དུ་སྐྱེ་ཞིང་ཤི་ནས་རྒྱུན་ཆད་པའི་ཕྱིར། སེམས་ཅན་འཁོར་བར་ཡང་ནས་ཡང་དུ་འཁོར་བ་ནི་མེད་པར་འདོད་དོ། །དེ་གཉིས་ཀས་ཀྱང་བདག་ཡོད་པར་སྨྲ་བ་སྟེ་བདག་མེད་མི་འདོད་དོ། །དེ་ལ་རིགས་པས་བརྟགས་ན། གང་ཟག་གི་བདག་ནི་ཕུང་པོ་དང་གཅིག་ཐ་དད་གང་དུའང་མ་གྲུབ་པས་ཁེགས་ལ། ཚངས་དབང་ཁྱབ་འཇུག་སོགས་རྟག་པོའི་སྐྱེས་བུ་འཇིག་རྟེན་ཐམས་ཅད་སྐྱེད་པའི་དོན་བྱེད་པ་དེ་ལྟ་བུ་མེད་དེ། རྟག་པ་ལ་དོན་བྱེད་པས་སྟོང་པ་དང་དོན་བྱེད་པ་ལ་མི་རྟག་པས་ཁྱབ་པ་དང་། གཞན་ཐམས་ཅད་མི་རྟག་ལ་དེ་གཅིག་པུ་རྟག་པའི་སྒྲུབ་བྱེད་མེད་དེ། དངོས་པོར་ཡོད་པ་ལ་རྒྱུ་ལས་མ་སྐྱེས་པའི་ཡེ་ཡོད་མི་སྲིད་པའི་ཕྱིར་རོ། །ཆད་པར་སྨྲ་བའང་མི་རིགས་ཏེ། ཆོས་གང་ཡང་རྒྱུ་མེད་པར་འབྱུང་བ་མི་སྲིད་དོ། །གལ་ཏེ་འབྱུང་ན་དེ་རྟག་ཏུ་ཡོད་པའམ་མེད་པར་ཐལ་བ་དང་། རྟེན་ཅིང་འབྲེལ་འབྱུང་གི་ཆོས་ལ་རྒྱུ་ཚང་བཞིན་དུ་འབྲས་བུ་རྒྱུན་ཆད་པ་མི་སྲིད་པས། སེམས་ཅན་སྐྱེ་བའི་སེམས་ཀྱི་རྒྱུ་སྔ་མའི་སེམས་ཡིན་པ་དང་། འཆི་དུས་ཀྱི་སེམས་ལས་སྲིད་པ་ཕྱི་མའི་སེམས་འབྱུང་བ་ལ་རིགས་པས་གནོད་པ་མེད་ཅིང་སྒྲུབ་བྱེད་ཡོད་པ་དང་། དེ་ལྟར་མིན་ན་ད་ལྟར་སྣང་བའི་དངོས་པོ་འདི་ཀུན་ཀྱང་རྒྱུ་འབྲས་སུ་མི་རྟེན་པས་ཐམས་ཅད་ཡོད་པའམ་མེད་པར་ཐལ་བ་སོགས་ཉེས་པ་མང་པོ་ཡོད་པས་ཁེགས་སོ། །དེ་ལྟར་ཡང་ལམ་རིམ་ལས། རྟག་ཆད་གཉིས་ལ་གང་གི་བློ་ཞེན་པ། །དོན་གྱི་སྙིང་པོ་ཉིད་ལས་གོལ་བར་གསུངས། །ཞེས་སོ། །འདི་དག་ཞར་བྱུང་དུ་སྨོས་པའི་དགོས་པའང་། རང་ཤར་ལས། དེ་བཞིན་དུ་རིགས་ཀྱི་བུ་ཁྱོད་ལོག་པའི་ལམ་དུ་ཞུགས་ཀྱིས་དོགས་པའི་ཕྱིར་ངས་འཇིག་ཚོགས་ཀྱི་ལྟ་བ་མང་པོ་བསྡུས་ཏེ་བསྟན་པའོ། །ཞེས་དང་། ཧེ་རུ་ཀ་གལ་པོ་ལས། མུ་སྟེགས་ཐེག་པ་རབ་ངེས་ན། །མི་སྤྱོད་སྤང་ཕྱིར་ཁྱོད་ལ་བཤད། །ཅེས་དང་། ལམ་རིམ་ལས། ཆ་ཡོད་དུག་ལ་མི་རེག་བཞིན། །གང་གིས་ཤེས་ནས་དེར་མི་གནས། །ཞེས་གསུངས་པ་ལྟར། ལམ་ལོག་པ་ངོ་ཤེས་ནས་དེར་མི་འཇུག་པ་སོགས་ཀྱི་དགོས་པ་དུ་མ་ཡོད་དེ། ཞིབ་པར་སྙིང་པོའི་སྤྱི་དོན་གསང་བདག་ཞལ་ལུང་སོགས་ལས་ཤེས་པར་བྱའོ། །གཉིས་པ་འཇིག་རྟེན་ལས་འདས་པའི་ཐེག་པའི་ངོ་བོ་ནི། ཆོས་ཀྱི་རྣམ་གྲངས་གང་ཞིག་འཁོར་བ་ལས་ངེས་པར་འབྱིན་པའི་ཐབས་དམ་པར་གྱུར་བ་སྟེ། རིན་ཆེན་ཕྲེེང་བ་ལས། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་པ་གམ་དུ་འདུག །ཅེས་པ་ལྟར། མངོན་མཐོའི་སྐས་ལ་འཛེགས་པ་ལས་བགྲོད་བྱའི་གནས་དམ་པ་ཡིན་པས་ངེས་ལེགས་སམ་རྣམ་པར་གྲོལ་བའི་ཐེག་པ་ཞེས་བྱའོ། །དེ་ཕྱི་རོལ་པ་ལས་འཕགས་པའི་ཚུལ་ཡང་། དཀོན་མཆོག་གསུམ་ལ་སྐྱབས་གནས་སུ་བཟུང་ནས། འདུས་བྱས་ཐམས་ཅད་མི་རྟག་པ་དང་། ཟག་པ་དང་བཅས་པ་སྡུག་བསྔལ་བ་དང་། ཆོས་ཐམས་ཅད་སྟོང་ཞིང་བདག་མེད་པ་དང་། མྱ་ངན་ལས་འདས་པ་ཞི་བ་སྟེ། ལྟ་བ་བཀའ་རྟགས་ཀྱི་ཕྱག་རྒྱ་བཞི་ཁས་ལེན་པའམ། དེའི་ཁོངས་སུ་གཏོགས་ཤིང་། ལྷག་པའི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་སྟེ་ཡང་དག་པའི་བསླབ་པ་གསུམ་ལ་སློབ་པས་འབྲས་བུ་སྲིད་རྩེ་ལས་བརྒལ་ནུས་པས་འཕགས་ཏེ། ཕྱི་རོལ་པའི་ལམ་ལ་དེ་དག་མེད་པའི་ཕྱིར་རོ། །དེ་ལྟར་ཡང་སྐྱབས་འགྲོ་བདུན་ཅུ་པ་ལས། དགེ་བསྙེན་གསུམ་ལ་སྐྱབས་འགྲོ་བ། །དེ་ནི་སྡོམ་བརྒྱད་རྩ་བ་ཡིན། །ཞེས་དང་། སྡོམ་པ་ཀུན་ལ་ཡོད་མོད་ཀྱི། །སྐྱབས་སུ་མ་སོང་པ་ལ་མེད། །ཅེས་དང་། འདུལ་བ་འོད་ལྡན་ལས། བསླབ་པ་གསུམ་ནི་རབ་སྟོན་ཅིང་། །ཕྱག་རྒྱ་ཕྱག་རྒྱ་གསུམ་ནི། འདུས་བྱས་མི་རྟག་པ། མྱང་འདས་ཞི་བདེ། ཆོས་བདག་མེད་པའོ། །མཆན། གསུམ་དང་ཡང་དག་ལྡན། །ཐོག་མ་བར་དང་མཐར་དགེ་བ། །སངས་རྒྱས་གསུང་དུ་མཁས་པས་རྟོགས། །ཞེས་དང་། སློབ་དཔོན་དཔའ་བོས། ཁྱོད་ཀྱི་བསྟན་ལ་མི་ཕྱོགས་པའི། །སྐྱེ་བོ་གཏི་མུག་གིས་ལྡོང་བ། །སྲིད་རྩེའི་བར་དུ་སོང་ནས་ཀྱང་། །སྡུག་བསྔལ་ཡང་འབྱུང་སྲིད་པ་སྒྲུབ། །ཁྱོད་ཀྱི་བསྟན་པའི་རྗེས་འགྲོ་བ། །བསམ་གཏན་དངོས་གཞི་མ་ཐོབ་ཀྱང་། །བདུད་ཀྱི་མིག་རས་བཙའ་བཞིན་དུ། །སྲིད་པ་དག་ནི་ལྡོག་པར་བགྱིད། །ཅེས་གསུངས། དེ་ལྟ་བུའི་རྣམ་གྲོལ་གྱི་ཐེག་པ་དེ་ལ་གོང་དུ་སྨོས་པ་བཞིན་དབྱེ་བསྡུའི་ཁྱད་པར་ཚད་མེད་ཀྱང་། འདིར་ནི་གསང་ཆེན་སྔ་འགྱུར་པའི་རང་སྐད་དུ། སྤྱི་མདོ་དགོངས་པ་འདུས་པ་ལས། །དོན་དམ་ངེས་པའི་ཐེག་པ་ནི། །གསུམ་དུ་ངེས་པར་སྣང་བ་སྟེ། །ཀུན་འབྱུང་འདྲེན་དང་དཀའ་ཐུབ་རིག །དབང་བསྒྱུར་ཐབས་ཀྱི་ཐེག་པའོ། །ཞེས་གསུངས་པའི་རེ་རེ་ལའང་གསུམ་གསུམ་དུ་དབྱེ་བས་དགུར་འགྱུར་ཏེ། རང་ཤར་ལས། ཉན་ཐོས་དང་ནི་རང་རྒྱལ་དང་། །དེ་བཞིན་བྱང་ཆུབ་སེམས་དཔའ་འོ། །ཀྲི་ཡཱ་དང་ནི་ཨུ་པ་དང་། །དེ་བཞིན་ཡོ་གའི་ཐེག་པར་བཤད། །མ་ཧཱ་ཨ་ནུ་ཡོ་ག་དང་། །དེ་བཞིན་རྫོགས་ཆེན་ཨ་ཏིའོ། །དེ་ལྟར་རྣམ་པ་དགུར་བཤད་དེ། །ཆོས་ཀྱི་བསྟན་པ་ཆེན་པོ་ཡིན། །ཞེས་གསུངས། དེ་ལྟར་བསྟན་པའི་དགོས་པའང་། ཨ་ཏི་བཀོད་པ་ཆེན་པོ་ལས། ཆུང་བའི་བློ་དང་ཆེན་པོ་དང་། །དེ་བཞིན་འབྲིང་པོའི་བློ་ཅན་ལ། །རིམ་པ་གསུམ་གྱི་ཚུལ་དུ་བསྟན། །ཆུང་བའི་རིམ་པ་རྣམ་གསུམ་སྟེ། །དེ་ཡི་བློ་དང་མཐུན་པའི་ཆོས། །རྟོག་པས་སྦགས་ལ་ཉན་ཐོས་སོ། །འདུ་ཤེས་ཅན་ལ་རང་རྒྱལ་ཏེ། །རྟོག་འཛུད་ཅན་ལ་བྱང་སེམས་སོ། །འབྲིང་པོ་གསུམ་ལ་བསྟན་པ་ནི། །རབ་ཏུ་དམན་ལ་བྱ་བ་སྟེ། །དམན་པ་རྣམས་ལ་སྤྱོད་པའོ། །རྣམ་ཤེས་ཅན་ལ་རྣལ་འབྱོར་ཉིད། །ཆེན་པོ་རིམ་ལྡན་གསུམ་དག་ལ། །སེམས་ཡས་པ་ལ་བསྐྱེད་པ་དང་། །སེམས་བཅུད་ཅན་ལ་རྫོགས་པའོ། །མཆོག་གསང་རབ་ལ་རྫོགས་པ་ཆེ། །ཞེས་གསུངས་པ་ལྟར་གདུལ་བྱ་དབང་པོ་ཐ་མ་དང་། འབྲིང་དང་། རབ་རྣམས་རེ་རེ་ལའང་གསུམ་གསུམ་དུ་ཡོད་པས་དེ་དག་གཞུག་པའི་དོན་དུ་བསྟན་པ་ཡིན་ལ། ཉོན་མོངས་པ་སོ་སོར་འདུལ་བའི་དབང་དུ་བྱས་ན། དེ་ཐམས་ཅད་ཀྱང་སྡེ་སྣོད་བཞིར་འདུ་སྟེ། ཀུན་བྱེད་རྒྱལ་པོའི་རྒྱུད་ལས། འདོད་ཆགས་འདུལ་བའི་གཉེན་པོར་གསུངས་པ་ནི། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཞེ་སྡང་འདུལ་བའི་གཉེན་པོ་གསུངས་པ་ནི། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །གཏི་མུག་འདུལ་བའི་གཉེན་པོར་གསུངས་པ་ནི། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །ཐམས་ཅད་འདུལ་བའི་གཉེན་པོར་གསུངས་པ་ནི། །སྡེ་སྣོད་བཞི་པ་ཉི་ཁྲི་ཆིག་སྟོང་གསུངས། །མདོར་ན་བརྒྱད་ཁྲི་བཞི་སྟོང་གསུངས་པ་ཡང་། །ཉོན་མོངས་འདུལ་བའི་གཉེན་པོར་གསུངས་པར་ཟད། །ཅེས་གསུངས་པ་དང་། གསང་སྙིང་ལས་ཀྱང་། ཉོན་མོངས་པ་སྟོང་ཕྲག་བརྒྱད་ཅུ་རྩ་བཞིའི་གཉེན་པོར་ཆོས་དེ་སྙེད་བསྟན་པར་གསུངས་སོ། །དེ་ལྟ་བུའི་རྣམ་གྲོལ་གྱི་ཐེག་པ་དགུ་པོ་དེ་ཡང་ཆོས་ཐ་དད་པ་རིམ་པ་དགུ་ཡོད་པ་ནི་མ་ཡིན་ཏེ། ཉན་རང་གི་ཐེག་པས་དངོས་སུ་ལམ་དང་འབྲས་བུ་ཐར་པའི་ཆ་ཤས་ཙམ་ལས་རྣམ་གྲོལ་གྱི་ལམ་རྫོགས་པར་མ་བསྟན་ཅིང་། རང་འབྲས་མཐར་ཕྱིན་ནས་ཀྱང་ཐེག་ཆེན་ལ་འཇུག་དགོས་པས་རང་རྐྱ་མ་ཐུབ་པའི་ཕྱིར་ཐེག་ཆེན་དུ་འདུ་ལ། ཐེག་ཆེན་ཕ་རོལ་དུ་ཕྱིན་པ་དང་སྔགས་ཕྱི་རྒྱུད་གསུམ་དུ་མཐར་ཐུག་གི་འབྲས་བུའི་རྣམ་བཞག་བསྟན་ནའང་། དེར་བགྲོོད་བྱེད་ཀྱི་ལམ་རྫོགས་པར་མ་བསྟན་ཅིང་། སྔགས་བླ་མེད་ཀྱི་ཐེག་པས་ནི་ཡོངས་རྫོགས་བསྟན་པས་འཕགས་པར་མ་ཟད། ཡོ་ག་མན་ཆད་ཀྱི་རྒྱུ་དང་འབྲས་བུའི་ཐེག་པའི་ལམ་དང་། འབྲས་བུའི་རྣམ་པ་ཐམས་ཅད་སྔགས་བླ་མེད་དུ་ཚང་ལ། བླ་མེད་ཀྱི་ཐུན་མོང་མ་ཡིན་པའི་ཁྱད་ཆོས་རྣམས་དེ་དག་ལ་མེད་ཅིང་། དེ་དང་དེའི་དོད་ཐུབ་ཀྱང་བཞག་ཏུ་མེད་པའི་དོན་གྱིས་ནང་པ་བསྐྱེད་རྫོགས་གསུམ་གྱི་ནང་དུ་ཐམས་ཅད་འདུ་བ་ཡིན་ཞིང་དེའི་ཡང་སྔ་མ་གཉིས་ཀྱི་ལམ་མཐར་ཐུག་པའི་འབྲས་བུའི་གཏུགས་ས་དབང་བཞི་པའི་ཡེ་ཤེས་ནི་རང་བཞིན་རྫོགས་པ་ཆེན་པོ་ཡིན་པས་ཐམས་ཅད་དེར་འདུ་བ་ཡིན་ཏེ། འཇམ་དཔལ་ཞལ་ལུང་ལས། །རྫོགས་པ་ཆེན་པོ་ཡེ་ཤེས་སྤྱི་ཡི་གཟུགས། །ཞེས་པའི་འགྲེལ་པར་རིམ་པ་གཉིས་པའི་གཉིས་པ་སྟེ། མཚན་མེད་ཀྱི་རྫོགས་རིམ་མཐར་ཐུག་ལ་རྫོགས་པ་ཆེན་པོ་ཞེས་བཤད་པའི་ཕྱིར་དང་། འཇམ་དཔལ་སྒྱུ་འཕྲུལ་དྲྭ་བ་ལས། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་དང་ཀུན་བྱེད་ལས། ཡོད་ནི་གཅིག་ལས་མེད་པ་ལ། །བྱུང་ནི་ཐེག་པ་དགུ་རུ་བྱུང་། །འདུས་ནི་རྫོགས་པ་ཆེན་པོར་འདུས། །ཞེས་གསུངས། དེ་ཡང་ཉན་རང་འཕགས་པ་རྣམས་ཐེག་ཆེན་ལ་གསར་དུ་ཞུགས་པའི་ཚེ་ཐེག་ཆེན་གྱི་ཚོགས་ལམ་ཆུང་ངུ་ནས་ཞུགས་དགོས་ཏེ། འདུན་ལྡན་གྱི་སེམས་བསྐྱེད་ནས་བཟུང་ལམ་ལ་རིམ་གྱིས་སློབ་དགོས་པ་དང་སྔར་ཆོས་བདག་མེད་པ་རྫོགས་པར་མ་རྟོགས་པའི་དབང་གིས་ཤེས་སྒྲིབ་ཕྲ་རགས་ཐམས་ཅད་རྫོགས་པར་གདོད་སྤོང་དགོས་པའི་ཕྱིར་དང་། དེར་མ་ཟད། ཀླུ་བྱང་གི་ལས་མཐའ་རྣམ་འབྱེད་ལས། མགོ་དང་རྐང་ལག་སོགས་བྱིན་ཀྱང་། །སྣང་བ་རྣམ་པར་མ་དག་ཕྱིར། །བྱང་ཆུབ་འབྲས་བུ་ཐོབ་མི་འགྱུར། །ཞེས་གསུངས་པ་བཞིན་མཐར་འབྲས་ལ་དངོས་སུ་སྦྱོར་བ་ལ་སྣང་གསུམ་མམ། འཕོ་བའི་སྒྲིབ་པ་མ་ལུས་པ་སྤང་དགོས་ན། དེ་སྤོང་བྱེད་ཀྱི་ལམ་མདོ་སོགས་ན་མ་བཤད་པའི་ཕྱིར་རོ། །དེ་ཡང་བྱང་ཆུབ་སེམས་དཔའ་ཐོག་མ་ནས་གསང་སྔགས་བླ་མེད་ཀྱི་ཟབ་གནད་ལ་ཞུགས་པ་རྣམས་སྨོས་མ་དགོས། དེ་ལས་གཞན་མདོ་ལམ་གྱི་ཉན་རང་བྱང་སེམས་དང་། སྔགས་ཀྱི་རྒྱུད་སྡེ་འོག་མ་གསུམ་གྱི་སྒོར་བཞུགས་ཏེ། རང་ལམ་མཐར་ཕྱིན་པར་ལོབས་པའི་རང་འབྲས་ཉན་རང་གི་དགྲ་བཅོམ་དང་། བྱང་སེམས་དང་རྒྱུད་སྡེ་འོག་མ་གསུམ་གྱིས་ས་བཅུའི་བྱང་སེམས་སངས་རྒྱས་ཀྱི་རྒྱལ་ཚབ་ཆེན་པོའི་གོ་འཕང་ཙམ་ཞིག་ཐོབ་ནུས་ཀྱང་། དེ་ཐམས་ཅད་མཐར་རྣལ་འབྱོར་བླ་མེད་ཀྱི་རྫོགས་རིམ་ལ་བརྟེན་ནས་བླ་ན་མེད་པའི་བྱང་ཆུབ་སྒྲུབ་དགོས་ཤིང་། དེར་མ་ཟད་བླ་མེད་ལ་ཞུགས་པའི་བསྐྱེད་རིམ་གྱིས་ལམ་མཐར་ཕྱིན་པ་ཞིག་ཀྱང་རྫོགས་རིམ་ལ་མ་ཞུགས་པར་འཚང་རྒྱ་བའི་ཐབས་མེད་དེ། བླ་མེད་བྱང་ཆུབ་ཀྱི་གོ་འཕང་མཐར་ཐུག་ཐོབ་པ་ལ་འཁོར་བར་འཆིང་བྱེད་ཀྱི་ཀུན་རྟོག་ཕྲ་བ་སྤངས་པ་ཙམ་དུ་མ་ཟད་དཀར་དམར་རླུང་སེམས་འགྱུར་བཅས་ཀྱི་ཆ་སྣང་གསུམ་མམ་འཕོ་བའི་སྒྲིབ་པའང་མ་ལུས་པར་སྤང་དགོས་ན། དེ་སྤོང་བྱེད་ཀྱི་གཉེན་པོ་དབང་བཞི་པའི་ལམ་རིག་སྟོང་ཟུང་འཇུག་འགྱུར་མེད་བདེ་བ་ཆེན་པོའི་ཡེ་ཤེས་ཉིད་ཡིན་པས། དེ་ཕར་ཕྱིན་ཐེག་པར་མ་ཟད་སྔགས་ཕྱི་རྒྱུད་གསུམ་ལས་ཀྱང་མ་གསུངས་པའི་ཕྱིར། དེས་ན་ཕར་ཕྱིན་པ་དང་། སྔགས་ཕྱི་རྒྱུད་པ་རྣམས་ཀྱང་མཐར་སྔགས་བླ་མེད་དུ་ཞུགས་དགོས་ཤིང་། དེ་དག་ལམ་དང་འབྲས་བུ་གང་ནས་ཞུགས་ཀྱང་རང་རང་གི་མུ་ཚོད་མཐུན་པའི་ས་ནས་ཞུགས་པས་ཆོག་པར་བཞེད་དོ། །མདོར་ན། དོན་དམ་བསྙེན་པ་ལས། ཉན་ཐོས་ཐེག་པ་ཉིད་ནི་ཐེག་པ་མ་ཡིན་ཏེ། །རང་རྒྱལ་འདི་ལྟར་རྒྱལ་བའི་ས་ནི་མིན་པར་གསུངས། །དཔལ་ལྡན་རྡོ་རྗེ་ཐེག་པ་རྒྱལ་བའི་ཐེག་པ་ཉིད། །དེ་ཡང་གཉིས་ལས་ཐེག་པ་བར་དང་ཐ་མར་བྱེད། །དེ་ཕྱིར་བླ་ན་མེད་པའི་ཐེག་པ་བོར་ནས་ནི། །འདོད་པའི་བླ་མེད་བྱང་ཆུབ་ཐོབ་པར་མི་འགྱུར་རོ། །ཞེས་དང་། འཇམ་དཔལ་སྒྱུ་འཕྲུལ་དྲྭ་བ་ལས། ལག་ན་རྡོ་རྗེ། ངས་སེམས་ཅན་རྣམས་ཀྱི་བློའི་ཁྱད་པར་དང་རིགས་ཀྱི་བྱེ་བྲག་གིས་ཐེག་པའི་ཁྱད་པར་རྣམས་བསྟན་ཏེ་ལ་ལ་ཕྱི་རོལ་པའི་ཚུལ་ལོ། །ལ་ལ་ཉན་ཐོས་ཐེག་པའོ། །ལ་ལ་རང་སངས་རྒྱས་ཀྱི་ཐེག་པ་དང་། གཞན་ཡང་ཕ་རོལ་དུ་ཕྱིན་པའི་ཐེག་པ་དང་། རིག་པ་འཛིན་པའི་རྒྱུད་དཔག་ཏུ་མེད་པ་བསྟན་ཀྱང་། ཐིག་ལེ་ཆེན་པོ་ཡི་གེ་མེད་པར་བརྡ་དང་བྲལ་བས་གཉིས་སུ་མེད་པར་སངས་རྒྱས་པར་རིག་པར་བྱའོ། །ཞེས་དང་། ཨིནྡྲ་བྷུ་ཏིའི་དབང་འཁོར་ལོའི་མན་ངག་ལས། རང་བཞིན་གྱིས་ནི་འོད་གསལ་ཞིང་། །རྫོགས་པ་ཆེན་པོའི་མཐར་ཐུག་པ། །མན་ངག་ཀུན་གྱི་མཆོག་གི་མཆོག །དེ་སྒྲུབ་ཐབས་སུ་གསུངས་པར་ཟད། །ཅེས་གསུངས་པ་བཞིན་ནོ། །དེ་ལྟ་བུའི་ཐེག་པ་རིམ་དགུ་པོ་དེ་ཡང་བསྡུ་ན། ལྟ་ཕྲེང་ལས། འཇིག་རྟེན་ལས་འདས་པ་ལའང་གཉིས་ཏེ། མཚན་ཉིད་ཀྱི་ཐེག་པ་དང་། རྡོ་རྗེ་ཐེག་པའོ། །ཞེས་གསུངས་པས་རྒྱུ་འབྲས་གཉིས་སུ་འདུ་ཞིང་། དེ་ལས་དབྱེ་ན། ཐལ་འགྱུར་ལས། འདས་པ་རྒྱུ་དང་འབྲས་བུ་ལས། །རྒྱུ་ལ་གསུམ་དང་འབྲས་ལ་གཉིས། །གཉིས་པོ་ལས་ཕྱེ་དྲུག་ཏུ་འགྱུར། །འདི་དག་དབང་པོའི་རིམ་པས་སོ། །ཞེས་གསུངས་པ་ལྟར་འཆད་པར་བྱ་བ་ལ་གཉིས། རྒྱུ་མཚན་ཉིད་ཀྱི་ཐེག་པ་དང་། འབྲས་བུ་རྡོ་རྗེ་ཐེག་པ་བཤད་པའོ། །དང་པོ་ནི། སོ་སོའི་ལམ་དེས་མཐར་ཐུག་གི་རང་འབྲས་དེ་མཚོན་པར་བྱེད་པས་མཚན་ཉིད་དང་། དེ་ལ་སྦྱོར་བའི་རྒྱུ་ཙམ་ཡིན་པས་རྒྱུའི་ཐེག་པའམ། ཡང་ན་ཀུན་འབྱུང་ལས་དང་ཉོན་མོངས་པའི་ལམ་ནས་ཐར་པར་འདྲེན་པར་བྱེད་པས་ན་ཀུན་འབྱུང་འདྲེན་པའི་ཐེག་པ་ཞེས་བྱ་སྟེ། གང་ཟག་དགུ་ལས་དབང་པོ་ཐ་མ་གསུམ་གྱི་དོན་དུ་དགོངས་ཏེ་གསུངས་པའོ། །དེ་ལ་དབྱེ་ན་གསུམ། ཉན་ཐོས། རང་རྒྱལ། བྱང་ཆུབ་སེམས་དཔའི་ཐེག་པའོ། །དེའི་དང་པོ་ཉན་ཐོས་ཀྱི་ཐེག་པ་ནི་གང་ཟག་ཐ་མའི་ཐ་མ་ལ་དགོངས་ནས་གསུངས་ཏེ། རྒྱུད་ལས། ཉན་ཐོས་ཀྱི་ཐེག་པ་དང་། །ཞེས་གསུངས་པས། འདི་ལ་གསུམ། ངོ་བོ། ངེས་ཚིག དབྱེ་བའོ། །ངོ་བོ་ནི། འཁོར་བ་ལས་རང་ཉིད་གཅིག་པུ་ཐར་འདོད་ཀྱི་བློས་གང་ཟག་གི་བདག་མེད་ཙམ་རྟོགས་པའི་ཐབས་སུ་གྱུར་པ། ངེས་ཚིག་ནི། ཤྲ་བ་ཀ་ཞེས་པའི་སྒྲ་ཉན་པ་དང་ཐོས་པ་གཉིས་ཀ་ལ་འཇུག་པས་ཉན་ཐོས་ཞེས་བྱ་ལ། རྣམ་པ་གཅིག་ཏུ། གཞན་བསྟེན་ཐོས་སྒྲོག་ཅེས། སྲིད་པ་ཐ་མ་པའི་དུས་སུའང་སློབ་དཔོན་གཞན་ལ་བསྟེན་ཞིང་དེ་ལས་ཐོས་པ་དག་ཡུལ་གཞན་ལ་སྒྲོག་པས་ཐོས་སྒྲོག་གམ་ཉན་ཐོས་ཞེས་བྱའོ། །དབྱེ་བ་ལ་སྔར་ལྟར་དྲུག་ལས། འཇུག་སྒོ་ནི། འཁོར་བའི་སྡུག་བསྔལ་མཐའ་དག་ལ་ཡིད་འབྱུང་བའི་སྒོ་ནས། རང་ཉིད་ཞི་བདེ་དོན་གཉེར་གྱི་བསམ་པས་འཕགས་པའི་བདེན་པ་བཞི་ལ་རྒྱུ་འབྲས་སྤང་བླང་གི་སྒོ་ནས་འཇུག་སྟེ། རང་ཤར་ལས། འཇུག་པའི་སྒོ་ནི་བདེན་པ་བཞི། །ཉན་ཐོས་སྤྱི་ཡི་འཇུག་སྒོ་ཡིན། །ཞེས་གསུང་། དེ་ལ་བདེན་པ་བཞི་ནི། སྡུག་བསྔལ། ཀུན་འབྱུང་། འགོག་པ། ལམ་གྱི་བདེ ན་པ་བཞིའོ། །དེ་བཤད་པ་ལ་བདེན་བཞིའི་ངོ་བོ་ནི། སྐྱེ་བ་སྔ་མའི་ལས་ཉོན་གྱིས་བསྐྱེད་པའི་ཉེར་ལེན་གྱི་ཕུང་པོའི་རྒྱུན་རྣམས་སྡུག་བསྔལ་གྱི་བདེན་པའི་ངོ་བོ། དེ་བཞིན་དུ་འབྱུང་འགྱུར་ཉེར་ལེན་གྱི་ཕུང་པོའི་རྒྱུར་གྱུར་པའི་ལས་ཉོན་རྣམས་ཀུན་འབྱུང་གི་བདེན་པའི། གཉེན་པོ་ལམ་གྱིས་སྤང་བྱ་ཀུན་འབྱུང་བཅོམ་པའི་སྤངས་པ་ནི་འགོག་བ དེན་གྱི། ཀུན་འབྱུང་སྤོང་བར་ནུས་ཤིང་འགོག་པ་ཐོབ་པར་ནུས་པའི་འཕགས་པའི་ཡེ་ཤེས་ནི་ལམ་བདེན་གྱི་ངོ་བོའོ། །བདེན་བཞིའི་ངེས་ཚིག་ནི། ཐུན་མོང་དུ་རང་རང་གི་ངོ་བོ་རྣམ་པ་བཞི་བཞིར་བདེན་ཞིང་མི་བསླུ་བར་གནས་པས་དེ་རྣམས་ཀྱི་རང་བཞིན་ཇི་ལྟ་བར་མཐོང་ན་ཕྱིན་ཅི་མ་ལོག་པའི་བློ་སྐྱེ་བས་ན་འཕགས་པའི་བདེན་པ་ཞེས་བྱ་ལ། བྱེ་བྲག་ཏུ་མཛོད་འགྲེལ་ལས། གནོད་པའི་བདག་ཉིད་ཡིན་པའི་ཕྱིར་སྡུག་བསྔལ་བའོ། །ཀུན་འབྱུང་བའི་ཚུལ་གྱིས་ཀུན་འབྱུང་བའོ། །ཕུང་པོ་ཞིག་པའི་ཕྱིར་འགོག་པའོ། །བགྲོད་པའི་དོན་གྱིས་ལམ་མོ། །ཞེས་སོ། །དེ་ཡང་བདེན་བཞི་རང་གི་མཚན་ཉིད་ཇི་ལྟར་གནས་པ་དེ་འཕགས་པ་རྣམས་ཁོ་ནས་མཁྱེན་པས་ན་འཕགས་པའི་བདེན་པར་བཞག་ལ། སོ་སྐྱེ་རྣམས་སྡུག་བསྔལ་ཀུན་འབྱུང་སོགས་རང་ལ་ཡོད་ཀྱང་དེ་དག་གི་མཚན་ཉིད་ཇི་ལྟ་བ་བཞིན་མི་ཤེས་པས་ཕྱིན་ཅི་ལོག་ཏུ་འཛིན་པས་ན་དེ་དག་གི་བདེན་པར་མ་བཞག་གོ །དབྱེ་ན་བཞི་ལས། སྡུག་བསྔལ་ནི་འབྲས་བུའི་ཕུང་པོ་སྟེ། སེམས་ཅན་སྐྱེ་བ་དང་། སྐྱེ་བའི་གནས་གཉིས་སོ། །སྐྱེ་བ་ནི་འགྲོ་བ་རིགས་དྲུག་པོ་གཅིག་ནས་གཅིག་ཏུ་འཁོར་བའོ། །གནས་ནི་ཕྱི་སྣོད་ཀྱི་འཇིག་རྟེན་རྣམས་སོ། །དེ་ན་སྡུག་བསྔལ་གྱི་རྣམ་གྲངས་ནི་སྐྱེ་བ་ལ་སོགས་པ་མང་པོ་དག་གོ། ཀུན་འབྱུང་ནི། སྡུག་བསྔལ་གྱི་རྒྱུའི་ཆ་སྟེ། ལས་དང་ཉོན་མོངས་པ་གཉིས་སོ། །ཉོན་མོངས་པ་ནི་འདོད་ཆགས་ལ་སོགས་པའོ། །ལས་ནི། སེམས་པ་དང་། བསམ་པ་གཉིས་སམ། དགེ་མི་དགེ་མི་གཡོ་བའི་ལས་གསུམ་མོ། །འགོག་པ་ནི། སྡུག་བསྔལ་རྒྱུ་དང་བཅས་པ་གཏན་ནས་ཞི་བ་སྟེ། ལྷག་བཅས་ལྷག་མེད་དང་། སོ་སོར་བརྟགས་པ་དང་། བརྟགས་མིན་གྱི་འགོག་པའོ། །ལམ་ནི་སྡུག་བསྔལ་ཤེས། ཀུན་འབྱུང་སྤང། འགོག་པ་མངོན་དུ་བྱེད། ལམ་རྒྱུད་ལ་བརྟེན་པའི་ཚུལ་གྱིས། ཚོགས་སྦྱོར་མཐོང་བསྒོམ་མི་སློབ་པའི་ལམ་སྟེ་ལྔའོ། མཚན་ཉིད་ནི། བསྡུ་བ་ལས། བསྟན་པ་དང་མི་མཐུན་པ་མེད་པའི་མཚན་ཉིད་ཀྱི་དོན་ཅན། ཞེས་གསུངས་ཏེ། ཀུན་འབྱུང་གིས་བསྐྱེད་པའི་འབྲས་བུ་ཟག་པ་དང་བཅས་པའི་ཕུང་པོ་བསྟན་པ་དང་མཐུན་པ་སྡུག་བསྔལ་བདེན་པའི་མཚན་ཉིད། དེ་བཞིན་དུ། སྡུག་བསྔལ་ཉེར་ལེན་གྱི་ཕུང་པོ་སྐྱེད་བྱེད་བསྟན་པ་དང་མཐུན་པ་ཀུན་འབྱུང་གི། །དེ་བཞིན་ཉིད་གློ་བུར་གྱི་དྲི་མས་དག་པ་བསྟན་པ་དང་མཐུན་པ་འགོག་བདེན་གྱི། ཐར་པར་བགྲོད་པའི་འཇུག་ངོགས་བསྟན་པ་དང་མཐུན་པ་ལམ་བདེན་གྱི་མཚན་ཉིད་དོ། །འདིར་བསྟན་པ་དང་མཐུན་པ་ནི་བདེན་བཞིའི་མཚན་ཉིད་འདི་ལྟར་ཡིན་ནོ་ཞེས་སངས་རྒྱས་ཀྱིས་བསྟན་པའི་དོན་ཇི་ལྟ་བ་བཞིན་ཡུལ་བདེན་བཞི་རང་རང་གི་ངོས་ནས་མི་མཐུན་པ་མེད་པས་ན་ཡུལ་གྱི་ངོས་ནས་བདེན་པ་དང་། བདེན་བཞིའི་མཚན་ཉིད་ཇི་ལྟར་བསྟན་པ་དེ་ལྟར་ཤེས་ན་ཤེས་པའི་བློ་དེ་ཡང་མ་ནོར་བ་ཡིན་པས་ཡུལ་ཅན་གྱི་ངོས་ནས་ཀྱང་དེ་སྐད་དུ་བྱའོ། །གྲངས་ངེས་ནི། བདེན་པ་བཞིར་བྱས་པ་ལ་ཤེས་བྱའི་ཆོས་ཐམས་ཅད་སྤང་བླང་དུ་བྱ་བའི་ཆ་ནས་འཁོར་འདས་གཉིས་སུ་ངེས་ཤིང་། དེ་རེ་རེར་རྒྱུ་འབྲས་ཕྲུགས་རེར་ཡོད་པས་ཉིས་ཕྲུགས་སུ་ངེས་ཏེ། སྤང་བྱ་འཁོར་བ་ལའང་འབྲས་བུ་སྡུག་བསྔལ་དང་རྒྱུ་ཀུན་འབྱུང་གཉིས། བླང་བྱ་མྱང་འདས་ལའང་འབྲས་བུ་འགོག་པ་དང་རྒྱུ་ལམ་བདེན་གཉིས་སུ་ངེས་པས་བདེན་པ་བཞིར་གྲངས་ངེས་པའོ། །གོ་རིམ་ནི། ཡུལ་ཅན་མངོན་པར་རྟོགས་པའི་རིམ་པ་དང་མཐུན་པར་ཡུལ་བདེན་པ་བཞི་བསྟན་པ་ཡིན་ཏེ། མཛོད་ལས། བདེན་པ་ཇི་ལྟར་མངོན་རྟོགས་རིམ། །ཞེས་སོ། །དེ་ཡང་འཁོར་བ་སྡུག་བསྔལ་གྱི་ཕུང་པོ་ནི་ནད་དང་འདྲ་བར་ཤེས་པར་བྱ་བ་དང་། དེའི་རྒྱུ་ལས་དང་ཉོན་མོངས་པའི་ཀུན་འབྱུང་ནི་ནད་ཀྱི་རྒྱུ་དང་འདྲ་བས་སྤང་བར་བྱ་བ་དང་། སྡུག་བསྔལ་མཐའ་དག་ལས་གྲོལ་བའི་འགོག་པ་ནི་ནད་མེད་པའི་བདེ་བ་དང་འདྲ་བར་ཐོབ་པར་བྱ་བ་དང་། དེའི་ཐབས་སུ་ལམ་ཟག་མེད་སྒོམ་པ་ནི་སྨན་བཟང་པོ་དང་འདྲ་བར་བརྟེན་པར་བྱ་བ་རྟོགས་པའི་ཕྱིར་ཏེ། རྒྱུད་བླ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་བྱ་སྨན་ནི་བརྟེན་པར་བྱ་བ་ལྟར། །སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། །ཤེས་བྱ་སྤང་བྱ་རིག་པར་བྱ་ཞིང་བརྟེན་པར་བྱ། །ཞེས་གསུངས་པ་ལྟར་རོ། །ལྟ་བ་ནི། གཟུང་ཡུལ་དངོས་པོ་རགས་སྣང་འདི་གཉེན་པོ་དང་བློས་གཞིག་ཅིང་གཞོམ་དུ་རུང་བའི་ཕྱིར་དང་། འཛིན་པའི་སེམས་ཀྱི་རྒྱུན་དུས་གསུམ་གྱི་ཆས་གཞིག་ཏུ་རུང་བའི་ཕྱིར། གཟུང་འཛིན་རགས་པ་འདི་ཀུན་རྫོབ་ཏུ་སྣང་ཙམ་ལས་རང་བཞིན་མེད་པས་དེ་ལ་གང་ཟག་གི་བདག་ཕུང་པོ་དང་གཅིག་ཐ་དད་གང་དུའང་གྲུབ་པ་མེད་པར་རྟོགས་ཀྱང་། གཟུང་ཡུལ་དངོས་པོ་རགས་སྣང་རྩོམ་པའི་གཞི་རྡུལ་ཕྲ་རབ་འདི་གཉེན་པོ་དང་བློས་གཞོམ་དུ་མེད་པ་དང་། འཛིན་སེམས་སྐད་ཅིག་མ་དུས་ཀྱི་ཆ་དང་བྲལ་བས་གཟུང་འཛིན་ཕྲ་བ་དོན་དམ་དུ་འདོད་པའི་ཕྱིར་ཆོས་ཀྱི་བདག་མེད་མ་རྟོགས་ཏེ། རྒྱན་སྟུག་པོ་བཀོད་པའི་མདོ་ལས། ཕུང་པོ་གང་ཟག་བདག་མེད་པར། །རབ་ཏུ་རྣམ་ཕྱེ་མཐོང་གྱུར་ཅིང་། །ཆོས་ཀྱི་དངོས་ཡོད་མ་བཤིག་པར། །ཉན་ཐོས་དེ་དག་མངོན་རྟོགས་འགྱུར། །ཞེས་དང་། རྫོགས་པ་ཆེན་པོ་བཤད་རྒྱུད་ཐིག་ལེ་ཀུན་གསལ་ཆེན་པོའི་རྒྱུད་ལས། ཉན་ཐོས་གཡག་རྔ་ནེའུ་སིང་དང་། །གོང་བུ་ཆ་ཤས་མེད་པར་བལྟ། །གཟུང་འཛིན་ཆོས་ཀྱི་བདག་ཏུ་མཐོང་། །ཞེས་དང་། མན་ངག་ལྟ་བའི་ཕྲེང་བ་ལས། ཆོས་ཐམས་ཅད་ལ་མུ་སྟེགས་པ་ལ་སོགས་པས་སྒྲོ་སྐུར་བས་ཀུན་ཏུ་བརྟགས་པ། ཡེ་མེད་པའི་ལྟ་བ་དང་། རྟག་པ་ལ་སོགས་པ་ཡོད་པར་བལྟ་བ་ནི། ཐག་པ་ལ་སྦྲུལ་དུ་མཐོང་བ་བཞིན་དུ་མེད་དེ། ཕུང་པོ་དང་ཁམས་དང་སྐྱེ་མཆེད་ལ་སོགས་པ་འབྱུང་བ་ཆེན་པོ་བཞིའི་རྡུལ་ཕྲ་རབ་དང་། རྣམ་པར་ཤེས་པ་ནི་དོན་དམ་པ་ཡོད་པར་བལྟ་བ། ཞེས་གསུངས། སྐབས་འདིར་གོང་དུ་སྨོས་པ་ལྟར་བེམ་ཤེས་གཉིས་རྡུལ་དང་སྐད་ཅིག་མའི་ཆོས་སུ་མཐོང་བས་ཆོས་བདག་གཟུང་འཛིན་རགས་པ་ཉིད་མེད་པར་རྟོགས་པ་དེས། ཕྱི་རོལ་པས་ཀུན་ཏུ་བརྟགས་པ་དང་། ངར་འཛིན་ལྷན་སྐྱེས་ཀྱི་ཞེན་ཡུལ་དུ་གྱུར་པའི་གང་ཟག་གི་བདག་དེ། ཐག་པ་ལ་སྦྲུལ་དུ་འཁྲུལ་པ་བཞིན་ཕྱིན་ཅི་ལོག་ཏུ་བློ་ཞེན་པ་ཙམ་ལས་རང་བཞིན་གྱིས་གྲུབ་པ་མེད་པའི་སྟོང་པ་ཉིད་དེ་ཁོང་ཆུད་པས་སྲིད་རྩ་གཅོད་པ་ཡིན་པས་ན། ཆོས་དང་གང་ཟག་གི་བདག་མེད་གཉིས་པོ་སྟོང་གཞི་ཆོས་ཅན་གྱི་དབྱེ་བ་ཙམ་ལས་སྟོང་ཚུལ་ལ་ཁྱད་པར་ཅི་ཡང་མེད་དེ་གཉིས་ཀ་བརྟེན་ནས་བརྟགས་པའི་སྟོང་ཉིད་ཙམ་གྱི་ངོ་བོར་གཅིག་པའི་ཕྱིར། ཆོས་ཀྱི་བདག་མེད་སྤྱི་དང་། གང་ཟག་གི་བདག་མེད་དེའི་བྱེ་བྲག་ཡིན་པ་ཙམ་དུ་དགོངས་ནས། ཉན་ཐོས་མ་ངེས་པའི་རིགས་ཅན་ཐེག་ཆེན་ལ་དྲངས་པའི་ཆེད་དང་སྟོང་ཉིད་ཞི་སྒོ་གཅིག་པུར་སྟོན་པའི་ཕྱིར་དབུ་མའི་གཞུང་ཁ་ཅིག་ཏུ་ཉན་རང་ལ་ཆོས་ཀྱི་བདག་མེད་རྟོགས་པ་ཡོད་པར་གསུངས་པ་དང་། ཡང་འོད་སྲུང་གི་ཞུས་པའི་མདོ་ལས་ཡུང་འབྲུ་སྲིན་ཟོས་ཀྱི་ནང་གི་ནམ་མཁའ་ལྟར་ཉན་རང་གི་སྟོང་ཉིད་རྟོགས་པ་རྒྱ་ཆུང་བར་གསུངས་པ་བཞིན་དམན་པ་ལ་དགག་སྒྲ་སྦྱར་ཏེ། གོང་དུ་བསྟན་པའི་མདོ་རྒྱུད་མན་ངག་དང་བཅས་དང་། གཞན་ཡང་ལང་ཀར་གཤེགས་པའི་མདོ་སོགས་དང་། དཔལ་ལྡན་ཟླ་བས་དབུ་མ་འཇུག་པའི་རང་འགྲེལ་རང་བཞེད་དངོས་འཆད་པའི་སྐབས་སུའང་། དེ་ལ་གང་ཟག་གི་བདག་མེད་པ་ནི་རང་སངས་རྒྱས་རྣམས་དང་། ཉན་ཐོས་རྣམས་རྣམ་པར་གྲོལ་བར་བྱ་བའི་ཕྱིར་བསྟན་ལ། བྱང་ཆུབ་སེམས་དཔའ་རྣམས་རྣམ་པ་ཐམས་ཅད་མཁྱེན་པ་ཉིད་ཐོབ་པས་རྣམ་པར་གྲོལ་བར་བྱ་བའི་ཕྱིར་ནི་གཉིས་ཀ་བསྟན་ཏོ། ཉན་ཐོས་དང་རང་སངས་རྒྱས་རྣམས་ཀྱིས་ཀྱང་རྟེན་ཅིང་འབྲེལ་བར་འབྱུང་ལ་རྐྱེན་འདི་པ་ཙམ་མཐོང་མོད་ཀྱི། དེ་ལྟ་ན་ཡང་དེ་དག་ལ་ཆོས་ཀྱི་བདག་མེད་པ་ཡོངས་སུ་རྫོགས་པར་སྒོམ་པ་མེད་དེ་ཁམས་གསུམ་ན་སྤྱོད་པའི་ཉོན་མོངས་པ་སྤོང་བའི་ཐབས་ཙམ་ཞིག་ནི་ཡོད་དོ། །དེ་དག་ལ་གང་ཟག་གི་བདག་མེད་པ་མ་ལུས་པར་སྒོམ་པ་ནི་ཡོད་པར་རྣམ་པར་བཞག་གོ །ཞེས་ཉན་རང་གིས་ཆོས་ཀྱི་བདག་མེད་མ་རྟོགས་པར་དངོས་སུ་གསལ་བོར་གསུངས་པ་ཡིན་ལ། ཁྱད་པར་གསང་ཆེན་སྔ་འགྱུར་གྱི་གྲུབ་མཐའ་འཛིན་པ་རྣམས་ནི། རྫོགས་པ་ཆེན་པོའི་བཤད་རྒྱུད་ལས། ཐེག་པ་སོ་སོའི་ལྟ་བའི་ཤན་འབྱེད་སྐབས་སུ། ཀྱཻ། སེམས་དཔའ་ཆེན་པོ་གཟུང་འཛིན་གཉིས་སུ་སྨྲ་ན་ཉན་ཐོས་ལྟ་བར་བཤད། འཛིན་པ་ཡོད་ལ་གཟུང་བ་མེད་ན་རང་རྒྱལ་ལྟ་བར་བཤད། སེམས་དང་རྣམ་པར་སྨྲ་བ་དང་། དོན་དམ་དང་ཀུན་རྫོབ་ཏུ་སྨྲ་ན་བྱང་ཆུབ་སེམས་དཔའི་ལྟ་བར་བཤད། ཅེས་དང་། འཕགས་ཆོས་ངོས་བཟུང་བའི་སྐབས་སུ། མ་རྟོགས་ལོག་པར་རྟོགས་ལས་ཉན་ཐོས་ཁྱད་འཕགས་པ། །གང་ཟག་བདག་མེད་རྟོགས་པས་ལྟ་བས་ཁྱད་པར་འཕགས། །ཞེས་དང་། ཉན་ཐོས་དག་ལས་རང་རྒྱལ་འཕགས་པ་ཡང་། །གཟུགས་ཀྱི་ཕུང་པོ་ཆོས་ཀྱི་ཁམས་དག་ལ། །ཕྱོགས་གཅིག་བདག་མེད་ལྟ་བས་ལྟ་བ་ཁྱད་པར་འཕགས། །ཞེས་དང་། རང་རྒྱལ་དག་ལས་བྱང་སེམས་འཕགས་པ་ཡང་། །བདག་མེད་རྣམ་གཉིས་རྟོགས་པས་ལྟ་བ་ཁྱད་པར་འཕགས། །ཞེས་སོ་སོར་གསལ་བར་བསྟན་པ་བཞིན། ཀུན་མཁྱེན་བླ་མས་སྙན་བརྒྱུད་ཟབ་དོན་གནད་ཀྱི་མེ་ལོང་དུ། ཉན་ཐོས་ཀྱི་ཐེག་པའི་ངོ་བོ་གང་ཟག་གི་བདག་མེད་རྟོགས་ནས་ལམ་བསྒོམ་པ། རང་སངས་རྒྱས་ཀྱི་ཐེག་པའི་ངོ་བོ་གང་ཟག་དང་ཆོས་ཀྱི་བདག་ཕྱེད་བཟུང་བ་རང་བཞིན་མེད་པར་རྟོགས་ནས་རྟེན་འབྲེལ་གྱི་ལམ་བསྒོམ་པ། བྱང་ཆུབ་སེམས་དཔའི་ཐེག་པའི་ངོ་བོ་བདག་མེད་གཉིས་རྟོགས་ནས་ལམ་བསྒོམ་པ། ཞེས་གསུངས་པ་ལྟར་ཕྱི་ཐུབ་པ་རྒྱུད་ཀྱི་ཐེག་གསུམ་གྱི་ལྟ་བའི་ཁྱད་པར་འདི་ལྟར་བཞེད་པ་འབའ་ཞིག་གོ །དེས་ན་དེ་གཉིས་ཀ་དོན་གྱི་གནད་གཅིག་པར་ཤེས་དགོས་ཏེ། དེ་ལས་གཞན་དུ་གྱུར་ན་ཐེག་པ་ཆེ་ཆུང་དབང་པོ་རྣོ་རྟུལ་སོགས་གསུང་རབ་ཀྱི་རྨང་འཁྲུགས་པར་འགྱུར་བའི་ཕྱིར་ཞིབ་པར་ཀུན་མཁྱེན་བླ་མ་འཇམ་དཔལ་དགྱེས་པའི་ཞལ་སྔ་ནས་སྩལ་པའི་ངེས་ཤེས་རིན་པོ་ཆེའི་སྒྲོན་མེ་དང་། ཤེར་ཊཱིཀ྄་ཆེན་མོ་ཡན་ལག་དང་བཅས་པ་ལས་རྟོགས་པར་བྱའོ། །དབྱེ་ན་ལོ་ཆེན་སྐ་བ་དཔལ་བརྩེགས་ཀྱིས་མཛད་པའི་ལྟ་རིམ་སྣང་བ་བཅུ་བདུན་པ་ལས། ཆོས་ཙམ་བལྟ་བའི་ཉན་ཐོས་པ། །མདོ་སྡེ་པ་དང་བྱེ་བྲག་གཉིས། །ཕྱི་རོལ་རྡུལ་ལ་རྩོད་བྱེད་ཅིང་། །ཤེས་པ་སྐད་ཅིག་སྣང་བྱེད་མཐུན། །ཞེས་པས། བྱེ་སྨྲ་ནི། རགས་པ་ཀུན་རྫོབ་ཀྱི་བདེན་པ་འདི་ནི་གཡག་རྔ་དང་ནེའུ་སིང་ལྟར་ཚོགས་པ་གཅིག་ཏུ་སྣང་ཡང་། དོན་དམ་པར་རྡུལ་ཕྲ་རབ་བསྐོར་བ་བར་དང་བཅས་པ་ཆ་ལྡན་སིལ་བུར་འདོད་ཅིང་། མདོ་སྡེ་པ་ནི། རྡུལ་ཕྲ་རབ་འབྱར་ཡང་མ་འབྱར་བར་ཡང་མེད་པ་འབྲུའི་ཕུང་པོ་ལྟ་བུར་འདོད་དེ། ཕྱི་མ་འདིས་རྡུལ་ཕྲན་ལས་གོང་བུ་བརྩམ་པ་དེའང་ཆ་མེད་དུ་རྟོགས་པས་བྱེ་སྨྲ་ལས་འཕགས་ཏེ་དོན་གྱིས་བལྟར་མེད་པའི་ཕྱིར་རྡུལ་ཕྲན་ཁས་མ་བླངས་པ་དང་འདྲའོ། །མདོར་ན་ཆོས་བདག་འཛིན་དོན་དམ་དུ་བལྟ་ཞིང་འཁོར་འདས་བདེན་བཞིའི་རྒྱུ་འབྲས་ལ་བླང་དོར་དུ་འཛིན་པ་ཉན་ཐོས་པ་སྟེ། སྒྱུ་འཕྲུལ་ལམ་རིམ་ལས། གཉིས་མེད་མ་རྟོགས་ཐམས་ཅད་ལ། །བདེན་བཞིའི་དངོས་པོར་ཡོད་བལྟ་ཞིང་། །སྤོང་དང་མི་སྤོང་བྱེད་གྱུར་ན། །འདི་ནི་ཉན་ཐོས་ས་པ་ཡིན། །ཞེས་གསུངས་སོ། །ཚུལ་ཁྲིམས་ནི། མཛོད་ལས། སོ་སོ་ཐར་པ་ཞེས་རྣམ་བརྒྱད། །རྫས་སུ་རྣམ་པ་བཞི་ཡིན་ནོ། །མཚན་ལས་མིང་ནི་འཕོ་བའི་ཕྱིར། །ཐ་དད་དེ་དག་འགལ་བ་མེད། །སྤང་བྱ་ལྔ་བརྒྱད་བཅུ་དང་ནི། །ཐམས་ཅད་སྤོང་བ་ནོས་པ་ལས། །དགེ་བསྙེན་དང་ནི་བསྙེན་གནས་དང་། །དགེ་ཚུལ་ཆེ་དང་དགེ་སློང་ཉིད། །ཅེས་གསུངས་པ་ལྟར་གྱི། སོ་ཐར་རིགས་བརྒྱད་པོ་གང་རུང་ངམ། ཁྱད་པར་སངས་རྒྱས་ཀྱི་རྗེས་སུ་མཐུན་པར་བསླབ་དགོས་པའི་ཕྱིར། མཆོག་དགེ་སློང་གི་སྡོམ་པ་ལ་བརྟེན་པར་བྱ་སྟེ། དེ་དག་གི་སྲུང་མཚམས་ཞིབ་པར་སྡོམ་གསུམ་འགྲེལ་ཆེན་སོགས་ལས་ཤེས་པར་བྱ་ལ། མདོར་བསྡུས་ཞེ་ཆེན་མ་ཧཱ་པཎྜི་ཏ་འཇམ་མགོན་བསྟན་འཛིན་འཕེལ་རྒྱས་ཀྱིས་མཛད་པའི་ཐེག་དགུའི་རྣམ་བཤད་ལས། སོ་ཐར་རིགས་བརྒྱད་གང་རུང་བའི། །སྡོམ་པ་ལེགས་བསྲུང་ཚུལ་ཁྲིམས་ཏེ། །བསྙེན་གནས་དགེ་བསྙེན་ཕ་མ་དང་། །དགེ་ཚུལ་ཕ་མ་དགེ་སློབ་མ། །དགེ་སློང་ཕ་མ་སོ་ཐར་བརྒྱད། །སྡོམ་པ་གསོད་རྐུ་རྫུན་སྨྲ་བ། །འདོད་ལོག་རྩ་བཞི་སྤྱིའི་སྤང་བྱ། །ཆང་དང་མལ་ཆེ་མཐོ་གར་ཕྲེང་། །ཕྱི་དྲོའི་ཁ་ཟས་བསྙེན་གནས་ཁྲིམས། །རྩ་སྟེང་ཆང་བསྣན་དགེ་བསྙེན་སྡོམ། །བསྙེན་གནས་སྡོམ་སྟེང་གར་ཕྲེང་དབྱེ། །གསེར་དངུལ་སྤངས་པ་དགེ་ཚུལ་བསྲུང་། །དེ་སྟེང་གཅིག་འགྲོ་ཆུར་རྐྱལ་བ། །སྐྱེས་རེག་ལྷན་འདུག་སྨྱན་བྱས་པ། །ཉེས་འཆབ་རྩ་དྲུག་གསེར་བཟུང་དང་། །འདོམས་སྤུ་འདྲེགས་དང་ས་རྐོ་བ། །རྩྭ་སྔོན་སོགས་གཅོད་བྱིན་ལེན་མེད། །གསོག་འཇོག་བྱས་ཟ་རྗེས་མཐུན་དྲུག །དགེ་སློབ་ཁྲིམས་ཡིན་ཕམ་པ་བཞི། །ལྷག་མ་བཅུ་གསུམ་སྤང་ལྟུང་གྲངས། །སུམ་ཅུ་ལྟུང་བྱེད་བཅུ་ཕྲག་དགུ། །སོར་བཤགས་བཞི་དང་ཉེས་བྱས་པ། །བརྒྱ་དང་བཅུ་གཉིས་དགེ་སློང་ཁྲིམས། །ཞེས་གསུངས་པ་བཞིན་ནོ། །བསྒོམ་པ་ནི། མཛོད་ལས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་པས་གཞི་སོ་ཐར་རིས་བདུན་གང་ཡང་རུང་བའི་ཚུལ་ཁྲིམས་རྣམ་པར་དག་པ་ལ་བརྟེན་ནས་དགེ་བའི་བཤེས་གཉེན་ལས་ཉན་ཐོས་ཀྱི་སྡེ་སྣོད་རྣམས་ཚུལ་བཞིན་ཐོས། ཐོས་དོན་བསམ། བསམ་དོན་བསྒོམ་པ་སྟེ། དེའང་དང་པོ་རང་རྒྱུད་ཀྱི་ཉོན་མོངས་པ་ལ་བརྟགས་ཏེ་དེའི་གཉེན་པོར་འདོད་ཆགས་ལ་མི་སྡུག་པ། ཞེ་སྡང་ལ་བྱམས་སྙིང་། གཏི་མུག་ལ་རྟེན་འབྲེལ། རྣམ་རྟོག་གམ་ཕྲག་དོག་ལ་དབུགས་བགྲང་བ། ང་རྒྱལ་ལ་ཁམས་ཀྱི་རབ་དབྱེ་རྣམས་བསྒོམས་པས་ཞི་གནས་ཀྱི་སེམས་ལས་སུ་རུང་བར་བྱས་རྗེས། ལྷག་མཐོང་ནི། བདེན་བཞི་རེ་རེ་ལའང་བཞི་བཞིར་ཕྱེ་བའི་བདེན་ཆུང་བཅུ་དྲུག་བསྒོམས་པ་སྟེ། དེ་ལ་སྡུག་བདེན་གྱི་བཞི་ནི། རགས་པ་རྒྱུན་དང་ཕྲ་བ་སྐད་ཅིག་གིས་སྐྱེ་འཇིག་བྱེད་པས་མི་རྟག་པ་དང་། སྡུག་བསྔལ་གསུམ་གྱི་རང་བཞིན་ཅན་ཡིན་པས་སྡུག་བསྔལ་བ་དང་། ལྔ་ཕུང་ལ་བདག་གིར་བྱེད་པོ་གཞན་མེད་པས་སྟོང་པ་དང་། ལྔ་ཕུང་ལ་བདག་གི་མཚན་ཉིད་མེད་པས། བདག་མེད་པ་དང་བཞི་སྟེ། རྫོགས་པ་ཆེན་པོ་ལམ་གྱི་ཀློང་ལས། རྐྱེན་གྱིས་སྐྱེ་ཞིང་རང་དབང་མེད་མི་རྟག །གསུམ་མམ་བརྒྱད་ཀྱིས་གནོད་པས་སྡུག་བསྔལ་ལོ། །བདག་གི་ལྟ་བའི་མི་མཐུན་ཕྱོགས་སྟོང་པ། །ལྔ་ཕུང་བདག་ཏུ་བལྟར་མེད་སྟོང་པ་ཉིད། །ཅེས་གསུངས། འདི་བཞི་བསྒོམས་པས། རྟག་པ་དང་། བདེ་བ་དང་། བདག་གིར་དང་། བདག་ཏུ་ལྟ་བ་རྣམས་ཀྱི་གཉེན་པོ་བྱེད་དོ། །ཀུན་འབྱུང་གི་བཞི་ནི་སྡུག་བསྔལ་ཐམས་ཅད་བ སྐྱེད་པའི་ས་བོན་ལྟ་བུར་གྱུར་པས་རྒྱུ་དང་། སྲིད་པའི་སྡུག་བསྔལ་ཀུན་འབྱུང་བས་ཀུན་འབྱུང་དང་། བག་ཆགས་ཀྱི་དབང་གིས་མཚམས་སྦྱོར་བས་རྐྱེན་དང་། རྒྱུ་རྐྱེན་འབྲེལ་བའི་དབང་གིས་སྡུག་བསྔལ་འཕྲལ་དུ་བསྐྱེད་པས་རབ་སྐྱེ་བཞི་སྟེ། སྔ་མ་ལས། དེ་རྒྱུ་ལས་ཉོན་ཕུང་པོའི་ས་བོན་ལྟ། །དེ་ལ་རྒྱུད་དྲུག་ཁམས་གསུམ་འབྱུང་བའོ། །བག་ཆགས་བརྟས་ཕྱིར་རྣམ་པར་སྨིན་བྱེད་རྐྱེན། །རྒྱུ་རྐྱེན་འབྲེལ་ནས་ཁམས་གསུམ་རབ་ཏུ་སྐྱེ། །ཞེས་གསུངས། འདི་བཞིས། རྒྱུ་མེད་པ་དང་། རྒྱུ་གཅིག་པུ་དང་། རྒྱུ་འགྱུར་བ་དང་། བློས་གཡོ་བ་སྔོན་དུ་གཏང་བའི་ལོག་ལྟའི་གཉེན་པོ་བྱེད་དོ། །འགོག་བདེན་གྱི་བཞི་ནི། རྒྱུ་ས་བོན་སྤངས་པས་འབྲས་བུ་སྲིད་པ་གཏན་དུ་མི་འབྱུང་བས་འགོག་པ། སྡུག་བསྔལ་མེད་པས་ཞི་བ། ཟག་མེད་ཀྱི་བདེ་བ་དང་ལྡན་པས་གྱ་ནོམ་པ། གཏན་དུ་སྲིད་པ་ལས་ཐར་པས་ངེས་པར་འབྱུང་བ་བཞི་སྟེ། དེ་ཉིད་ལས། རྒྱུ་རྐྱེན་འབྲལ་བས་ཕུང་ཁམས་འཇིག་ཕྱིར་འགོག །སྡུག་བསྔལ་མེད་པས་གསུམ་མི་འབྱུང་ཞི་བ། །ཕྱིས་ཀྱང་ཁམས་གསུམ་སྡུག་བསྔལ་བྲལ་གྱ་ནོམ། །བདེ་བར་ཕྱིན་ཏེ་སྐྱོན་ལས་ངེས་པར་འབྱུང་། །ཞེས་གསུངས། འདི་བཞིས་ནི། ཐར་པ་མེད་དོ། །སྡུག་བསྔལ་ལས་ཐར་པ་ཡིན་ནོ། །བསམ་གཏན་གྱི་བདེ་བ་ནི་གྱ་ནོམ་པའོ། །ཐར་པ་ནི་གཏན་དུ་བ་མ་ཡིན་ནོ་སྙམ་པའི་ལོག་ལྟ་ལས་ངེས་པར་འབྱུང་བར་བྱེད་དོ། །ལམ་གྱི་བཞི་ནི་འཕགས་པའི་སར་བགྲོད་པར་བྱེད་པས་ལམ་དང་། ཟག་བཅས་ལས་ཉོན་གྱི་གཉེན་པོ་བྱེད་པས་རིགས་པ་དང་། ཡང་དག་པའི་གནས་ལ་སེམས་ཕྱིན་ཅི་མ་ལོག་པར་སྒྲུབ་པས་སྒྲུབ་པ་དང་། སྲིད་པ་ལས་གཏན་དུ་ངེས་པར་འབྱིན་པས་ངེས་འབྱིན་བཞི་སྟེ། སྔ་མ་ལས། འཕགས་པའི་སར་ཞུགས་མྱ་ངན་འདས་གྲོལ་ལམ། །འཁྲུལ་པའི་གཉེན་པོར་ཚད་མར་གྱུར་ཕྱིར་རིགས། །ཕྱིན་ཅི་ལོག་སྤང་ཡང་དག་ཐོབ་ཕྱིར་སྒྲུབ། །འཁོར་བར་མི་སྐྱེ་འདས་པར་ངེས་པར་འབྱིན། །ཅེས་གསུངས། འདི་བཞིས་ལམ་མེད་དོ། །ལམ་འདི་ངན་ནོ། །གཞན་ཡང་ལམ་ཡིན་ནོ། །ལམ་འདི་ཡང་ལྡོག་གོ་སྙམ་པའི་ལོག་རྟོག་གི་གཉེན་པོ་བྱེད་པ་ཡིན་ནོ། །དེ་ལྟར་བདེན་ཆུང་བཅུ་དྲུག་པོ་དང་། ཚོགས་ལམ་ཆུང་ངུར་དྲན་པ་ཉེར་བཞག་བཞི་སོགས་རང་ལམ་གྱི་བྱང་ཕྱོགས་སོ་བདུན་པོ་སྒོམ་པར་བྱེད་དོ། །དེའི་སྒོམ་ཚུལ་ཡང་དམིགས་པ་དང་། ཡིད་བྱེད་དང་། འཐོབ་པ་གསུམ་གྱི་སྒོ་ནས་ཐེག་ཆེན་ལས་དམན་ཏེ། དེའང་དྲན་པ་ཉེར་བཞག་ལ་མཚོན་ན། དམིགས་པ་གཙོ་བོར་རང་རྒྱུད་ཀྱིས་བསྡུས་པའི་ལུས་ཚོར་སེམས་ཆོས་ཙམ་ལ་དམིགས་པ་དང་། ཡིད་བྱེད་ཀྱང་མི་རྟག་སྡུག་བསྔལ་བདག་མེད་སོགས་བདེན་རྣམ་བཅུ་དྲུག་པོ་འབའ་ཞིག་སྟེ། གཙོ་བོར་གང་ཟག་གི་བདག་མེད་རྟོགས་པའི་སྒོ་ཙམ་དང་། འཐོབ་པའང་རང་གི་ལུས་སོགས་ཟག་བཅས་དམན་པ་དེ་དང་བྲལ་བའི་ཐར་པ་ཐོབ་པར་འདོད་པ་ཡིན་ལ། དེ་བཞིན་དུ་འབྲས་བུ་དེ་ཙམ་འཐོབ་པ་སྟེ་ཉི་ཚེ་བས་བསྡུས་པ་སྟེ། མདོར་ན་སྲིད་ཞི་མཉམ་ཉིད་རྟོགས་པའི་ཤེར་ཕྱིན་ནི་སྲིད་ཞིའི་མཐའ་ལ་མི་གནས་པའི་མྱང་འདས་སངས་རྒྱས་ཀྱི་རྒྱུ་ཐུན་མིན་ཡིན་ན། དེ་ཉན་རང་ལ་མེད་པའི་ཕྱིར་གནས་སྐབས་ཀྱི་ལམ་སྒོམ་པ་དང་མཐར་འབྲས་གཉིས་ཀ་ཐེག་ཆེན་ལས་གཞན་དུ་གྱུར་པ་ཡིན་ཏེ། ཞིབ་པར་བདེན་རྣམ་བཅུ་དྲུག་དང་བྱང་ཕྱོགས་ཀྱི་སྒོམ་རིམ་ནི་མཛོད་རྩ་འགྲེལ་དང་ཀུན་མཁྱེན་བླ་མའི་གྲུབ་མཐའ་མཛོད་སོགས་ལས་ཤེས་པར་བྱའོ། །དེ་ལྟར་བསྒོམས་པས་གཞི་དེ་ལས་ཁམས་གསུམ་གྱི་ཉོན་མོངས་པ་མཐོང་བས་སྤངས་པ་སོགས། སྤོང་ཚུལ་ཡེ་ཤེས་བཅུ་དྲུག་གིས་རིམ་པར་སྤོང་སྟེ། དེ་ལ་མཐོང་སྤང་ནི། མཛོད་ལས་བརྒྱད་ཅུ་རྩ་བརྒྱད་དུ་གསུངས་ཀྱང་འདིར་ཀུན་བཏུས་ལྟར་ན། ཆགས་ཁྲོ་ང་རྒྱལ་རྨོངས་ཐེ་ཚོམ། །འཇིག་མཐར་ལོག་ལྟ་ལྟ་མཆོག་འཛིན། །ཚུལ་ཁྲིམས་བརྟུལ་ཞུགས་མཆོག་འཛིན་པ། །ལྟ་མིན་ལྔ་དང་ལྟ་བ་ལྔ་། །མཐོང་སྤང་རྩ་བ་བཅུ་ཡིན་ནོ། །དེ་དག་བདེན་པ་བཞི་པོ་ལ། །འཇིག་མཐར་ལོག་རྨོངས་ཐེ་ཚོམ་དངོས། །ཁོང་ཁྲོ་དབང་གིས་ལོག་པར་འཇུག །ལྷག་མ་རྣམས་ནི་བརྒྱུད་ནས་འཇུག །འདོད་པའི་ཁམས་ན་བཅུ་ཁ་སྟེ། །གཟུགས་དང་གཟུགས་མེད་ཁོང་ཁྲོ་མིན། །དེ་ལྟར་བརྒྱ་དང་བཅུ་གཉིས་སོ། །ཞེས་པས་མཐོང་སྤང་རྩ་བ་བཅུ་པོ་བདེན་པ་བཞི་ལ་ལོག་པར་ཞུགས་ཚུལ་གྱི་སྒོ་ནས་བརྒྱ་བཅུ་གཉིས་ཏེ། འདོད་ཁམས་ན་བདེན་པ་བཞི་པོ་རེ་རེ་ལ་ལོག་པ་བཅུ་རེ་འཇུག་པས་བཞི་བཅུ། ཁམས་གོང་མ་གཉིས་ན་ཁོང་ཁྲོ་མ་གཏོགས་གཞན་དགུ་པོ་ཞུགས་པས་སུམ་ཅུ་རྩ་དྲུག་པ་ཚན་གཉིས་ཏེ་བདུན་ཅུ་རྩ་གཉིས་བཅས། ཐམས་ཅད་བསྡོམས་པས་ཁམས་གསུམ་ན་མཐོང་བས་སྤང་བར་བྱ་བ་ཀུན་བརྟགས་ཀྱི་ཆ་བརྒྱ་དང་བཅུ་གཉིས་སོ། །སྒོམ་སྤང་ཡང་མཛོད་ལས། འདོད་ཆགས་ཁོང་ཁྲོ་ང་རྒྱལ་མ་རིག་པ་བཞི་ལ་ཁམས་གསུམ་གྱི་དབྱེ་བས་བཅུར་བཞེད་པ་སོགས་ཡོད་ཀྱང་། འདིར་ཀུན་བཏུས་ལྟར་ན། འདོད་ཆགས་ཁོང་ཁྲོ་ང་རྒྱལ་རྨོངས། །འཇིག་ལྟ་མཐར་ལྟ་སྒོམ་སྤང་དྲུག །འདོད་པར་དྲུག་ཡོད་གཟུགས་གཟུགས་མེད། །ཁོང་ཁྲོ་མ་གཏོགས་ལྔ་རེ་ཡོད། །དེ་ལ་ས་དང་ཆེ་འབྲིང་གིས། །ཕྱེ་བས་བཞི་བརྒྱ་བཅུ་བཞིའོ། །ཞེས་པས་སྒོམ་སྤང་རྩ་བ་དྲུག་པོ་དེ་ལ་ཁམས་དང་། ས་དང་རྣམ་པའི་སྒོ་ནས་རྒྱས་པར་དབྱེ་ན་འདོད་པར་སྒོམ་སྤང་ཆུང་འབྲིང་ཆེན་པོ་གསུམ་ལ་ནང་གསེས་གསུམ་དུ་དབྱེ་བའི་སྐོར་དགུར་རེ་རེ་ལ་སྒོམ་སྤང་རྩ་བ་དྲུག་རེ་ཡོད་པས་ལྔ་བཅུ་ང་བཞི། དེ་བཞིན་དུ་བསམ་གཟུགས་ཀྱི་ས་བརྒྱད་པོ་རེ་རེར་ཡང་སྐོར་དགུར་ཕྱེས་ནས། དེ་རྣམས་སུ་ཁོང་ཁྲོ་མ་གཏོགས་ལྔ་རེ་བརྩིས་པས་སུམ་བརྒྱ་དྲུག་ཅུ། དེ་གཉིས་ཀ་བསྡོམས་པས་ཁམས་གསུམ་ན་སྒོམ་པས་སྤང་བར་བྱ་བ་ལྷན་སྐྱེས་ཀྱི་ཆ་བཞི་བརྒྱ་དང་བཅུ་བཞིའོ། །དེ་དག་སྤོང་ཚུལ་ནི་མཐོང་སྤང་ཀུན་བརྟགས་ཡིན་པས་བདེན་བཞིའི་རང་བཞིན་མཐོང་བ་ཙམ་གྱིས་སྤངས་ལ། སྒོམ་སྤང་རྣམས་ལྷན་སྐྱེས་ཡིན་པས་བདེན་པ་མཐོང་ཙམ་གྱིས་སྤོང་མི་ནུས་པས་མཐོང་ཟིན་གོམས་པར་བྱེད་པའི་སྒོ་ནས་རིམ་གྱིས་སྤོང་དགོས། སྤོང་ཚུལ་དངོས་ལ་ཐེག་པ་གོང་འོག་གི་བཞེད་པ་མི་འདྲ་བ་འགའ་ཞིག་ཡོད་པ་ལས་ཐེག་དམན་ལྟར་ན་མཐོང་སྤོང་སྐབས་ངོ་བོའི་སྒོ་ནས་སྐད་ཅིག་མ་བཅུ་དྲུག་ཡོད་པ་ལས། བཅུ་དྲུག་པ་ལམ་རྗེས་ཤེས་སྒོམ་ལམ་དང་། གཞན་བཅོ་ལྔ་པོ་མཐོང་བའི་ལམ་སྟེ། དཔེར་ན་སྡུག་བདེན་མཐོང་བའི་མཐོང་ལམ་སྐད་ཅིག་བཞིའི་དང་པོ་སྡུག་བསྔལ་ཆོས་བཟོད་ཀྱི་སྐབས་སུ་འདོད་ཁམས་ཀྱི་སྡུག་བསྔལ་མཐོང་སྤང་བཅུ་སྤོང་། ཆོས་ཤེས་ཀྱི་སྐབས་སུ་གཉེན་པོའི་ཡེ་ཤེས་སྐྱེ། རྗེས་བཟོད་ཀྱི་སྐབས་སུ་གཟུགས་དང་གཟུགས་མེད་ཀྱི་སྡུག་བསྔལ་མཐོང་སྤང་བཅོ་བརྒྱད་སྤོང་། རྗེས་ཤེས་ཀྱི་སྐབས་སུ་གཉེན་པོའི་ཡེ་ཤེས་སྐྱེ། དེ་ལྟར་བདེན་པ་གཞན་གསུམ་ལའང་སྦྱར་ཏེ་ཉི་ཤུ་རྩ་བརྒྱད་པ་ཚན་བ ཞི་སྤངས་པས་མཐོང་སྤང་བརྒྱ་དང་བཅུ་གཉིས་པོ་སྤངས་ཏེ་སྐད་ཅིག་བཅུ་དྲུག་པོ་འདི་ལ་ཐེག་དམན་པ་རང་ལའང་ཉན་ཐོས་སྡེ་བ་རྣམས་བཞེད་པ་མི་འདྲ་བ་དུ་མ་ཡོད་པར་གསུངས། སྒོམ་སྤང་ནི། ཐེག་ཆེན་པ་རྣམས་ཀྱིས་འདས་ལམ་ཁོ་ན་ལས། འཇིག་རྟེན་པའི་ལམ་གྱིས་སྤང་བྱ་རྣམས་གནས་སྐབས་མགོ་གནོན་ཙམ་ལས་རྩ་བ་དྲུང་ནས་འབྱིན་མི་ནུས་པར་བཞེད་པ་དོན་ལ་དེ་ལྟར་གནས་ཀྱང་ཐེག་དམན་པ་རྣམས་ཀྱིས་ནི་མཐོང་སྤང་འདས་ལམ་ཁོ་ནས་སྤོང་དགོས་ཀྱང་། སྒོམ་སྤང་ནི་འཇིག་རྟེན་པའི་ལམ་གྱིས་ཀྱང་སྤོང་ནུས་པས་མཐོང་སྤང་གི་སྔོན་དུ་ཡང་འདོད་པའི་སྒོམ་སྤང་སྤོང་བ་སྲིད་པའི་དེ་འདྲ་དེ་ལ་ལམ་ཐོད་རྒལ་བ་ཞེས་ཟེར་ཞིང་ཕྱིར་འོང་ཞུགས་པ་དང་ཕྱིར་མི་འོང་ཞུགས་པ་གཉིས་ཀ་ཡོད་པར་བཞེད། སྤོང་ཚུལ་གཉེན་པོའི་ཡེ་ཤེས་ཆུང་རིམ་ནས་སྐྱེས་པས་སྤང་བྱ་ཆེ་རིམ་ནས་རིམ་གྱིས་སྤོང་བར་འདོད་དེ་འོག་ཏུ་འཆད་དོ། །སྤྱོད་པ་ནི། སྦྱངས་པའི་ཡོན་ཏན་བཅུ་གཉིས་ལ་གནས་ཏེ། རང་དོན་གཙོ་བོར་སྤྱོད་པ་སྟེ། ཀླུ་སྒྲུབ་ཀྱིས་མཛད་པའི་གཡུ་ཐང་ལས། སྤྱོད་པ་རང་དོན་འབའ་ཞིག་སྤྱོད། །ཞེས་གསུངས། སྦྱངས་ཡོན་བཅུ་གཉིས་ནི། ཐེག་དགུ་ལས། བསོད་སྙོམས་སྟན་གཅིག་ཕྱིས་མི་ལེན། །ཕྱག་དར་ཁྲོད་འཕྱིང་ཆོས་གོས་གསུམ། །དགོན་པ་བླ་གབ་མེད་པ་དང་། །ཤིང་དྲུང་དུར་ཁྲོད་ཙོག་པུ་བ། །གཞི་ཇི་བཞིན་ཏེ་སྦྱངས་ཡོན་སྤྱོད། །ཅེས་གསུངས་པ་བཞིན་ནོ། །འབྲས་བུ་ནི། དེ་ལྟར་བསྒོམས་པས། འབྲས་བུ་ཐོབ་པའི་ལམ་གྱི་རྒྱུན་ལ་ཞུགས་པ་རྒྱུན་ཞུགས་དང་། འདོད་པར་སྐྱེ་བ་ལན་གཅིག་ལེན་པ་ལན་གཅིག་ཕྱིར་འོང་བ་དང་། ད་ཕྱིན་འདོད་པའི་ཁམས་འདིར་སྐྱེ་བ་མི་ལེན་པ་ཕྱིར་མི་འོང་བ་སྟེ། གནས་སྐབས་ཀྱི་འབྲས་བུ་དང་། མཐར་ཐུག་ཟད་པ་ཤེས་པ་དང་མི་སྐྱེ་བ་ཤེས་པའི་ཡེ་ཤེས་གཉིས་དང་ལྡན་པའི་ལྷག་བཅས་ལྷག་མེད་ཀྱི་དགྲ་བཅོམ་པ་ཐོབ་ཅིང་། འབྲས་བུ་བཞི་པོ་དེ་རེ་རེ་ལ་ཞུགས་གནས་གཉིས་གཉིས་སུ་ཕྱེ་བས་བརྒྱད་དེ། དེ་དག་གི་ས་མཚམས་ནི་མངོན་པ་འོག་མ་ལྟར་ན་མཐོང་ལམ་སྐད་ཅིག་བཅོ་ལྔ་ལ་གནས་པ་དང་། གོང་མ་ལྟར་ན། སྦྱོར་ལམ་པ་དང་། མཐོང་ལམ་སྐད་ཅིག་བཅོ་ལྔ་ལ་གནས་པ་གཉིས་ཀ་རྒྱུན་དུ་ཞུགས་པ་ཞུགས་པ། སྐད་ཅིག་མ་བཅུ་དྲུག་པ་ལམ་རྗེས་སུ་ཤེས་པ་ཐོབ་ནས་རྒྱུན་དུ་ཞུག་པ་འབྲས་གནས། དེས་འདོད་པའི་སྒོམ་སྤང་གཅིག་ནས་ལྔའི་བར་སྤངས་པ་ཕྱིར་འོང་ཞུགས་པ། འདོད་པའི་སྒོམ་སྤང་དྲུག་པ་སྤངས་ན་ཕྱིར་འོང་འབྲས་གནས། འདོད་པའི་སྒོམ་སྤང་བདུན་པ་དང་བརྒྱད་པ་གང་རུང་སྤངས་ལ་དགུ་པ་མ་སྤངས་ན་ཕྱིར་མི་འོང་ཞུགས་པ། འདོད་པའི་སྒོམ་སྤང་ཐམས་ཅད་རྫོགས་པར་སྤངས་པ་ཕྱིར་མི་འོང་འབྲས་གནས་སོ། །དེས་ཁམས་གོང་མའི་སྒོམ་སྤང་སྤོང་བ་ལ་ཞུགས་པ་ནས་བཟུང་། སྲིད་རྩེའི་སྒོམ་སྤང་བརྒྱད་པ་སྤངས་པའི་བར་འདི་དགྲ་བཅོམ་པ་ལ་ཞུགས་པ། ཁམས་གསུམ་ཀའི་སྒྲིབ་པ་ལྷག་ལུས་མེད་པར་སྤངས་པ་ནི་དགྲ་བཅོམ་པ་འབྲས་གནས་སོ། །དགྲ་བཅོམ་པ་དེ་ལའང་། ཤེས་རབ་ཀྱི་ཆ་ལས་ཉོན་མོངས་པའི་སྒྲིབ་པ་ཙམ་ལས་རྣམ་པར་གྲོལ་ཡང་རྣམ་ཐར་བརྒྱད་ལ་སྙོམས་པར་འཇུག་མི་ནུས་པས་མངོན་ཤེས་དང་རྫུ་འཕྲུལ་དང་མི་ལྡན་པ་དགྲ་བཅོམ་རྒྱན་མེད་དང་། སྙོམས་འཇུག་གི་སྒྲིབ་པ་ལས་ཀྱང་གྲོལ་བས་བསམ་གཟུགས་སོགས་སྙོམས་འཇུག་དགུ་པ་ལ་སྙོམས་པར་འཇུག་ནུས་ཤིང་མངོན་ཤེས་རྫུ་འཕྲུལ་སོགས་དང་ལྡན་པ་རྒྱན་ཅན་ཏེ་གཉིས་དང་། ཡང་ཉོན་མོངས་པ་ཐམས་ཅད་སྤངས་ཀྱང་སྔར་གྱི་རྣམ་སྨིན་ཉེར་ལེན་གྱི་ཕུང་པོ་རྣམས་མ་དོར་བས་སྡུག་བདེན་གྱི་ལྷག་མ་ཅུང་ཟད་ལུས་པ་ལྷག་བཅས་དང་། བུད་ཤིང་ཟད་པའི་མེ་བཞིན་དུ་མྱ་ངན་ལས་འདས་དུས་ལུས་མེད་ལ། སེམས་འགག་པའི་ཡེ་ཤེས་འགོག་པའི་དབྱིངས་སུ་ཞུགས་པ་ལྷག་མེད་ཀྱི་དབྱེ་བ་གཉིས་ཀྱང་ཡོད་དོ། །དེ་ལྟར་དབྱེ་གཞི་ལ་ལྟོས་ནས་སྐྱེས་བུ་ཟུང་བཞི་དང་། དབྱེ་ཆོས་ལ་ལྟོས་ནས་གང་ཟག་ཡ་བརྒྱད་ཅེས་བྱའོ། །དེ་དག་དམན་ལམ་ས་བརྒྱད་དང་སྦྱར་ན། སྦྱོར་ལམ་དུ་ཉན་ཐོས་ཀྱི་རིགས་ངེས་པ་ཐོབ་པ་ནི་རིགས་ཀྱི་ས། རྒྱུན་ཞུགས་ཞུགས་པ་ནི་བརྒྱད་པའི་ས་སྟེ་དགྲ་བཅོམ་འབྲས་གནས་ནས་མར་ལུགས་ལྡོག་ཏུ་བགྲངས་པས་བརྒྱད་པ་ཡིན་པས་སོ། །རྒྱུན་ཞུགས་འབྲས་གནས་ནི་མཐོང་བའི་ས་སྟེ་བདེན་བཞིའི་དོན་དང་པོར་མཐོང་བས་སོ། །ཕྱིར་འོང་འབྲས་གནས་ནི་སྲབ་པའི་ས་སྟེ་འདོད་ཉོན་ཆུང་ངུ་གསུམ་མ་གཏོགས་སྤངས་པས་འདོད་པའི་འདོད་ཆགས་སྲབ་པས་སོ། །ཕྱིར་མི་འོང་འབྲས་གནས་ནི་འདོད་ཆགས་དང་བྲལ་བའི་ས་སྟེ་འདོད་ཉོན་དགུ་པ་སྤངས་པས་འདོད་པའི་འདོད་ཆགས་དང་བྲལ་བས་སོ། །དགྲ་བཅོམ་པ་ནི་བྱས་པ་རྟོགས་པའི་ས་སྟེ་རང་དོན་གྱི་བྱ་བ་ཟད་དང་མི་སྐྱེ་ཤེས་པའི་ཡེ་ཤེས་བརྙེས་པས་སོ། །ཟད་དང་མི་སྐྱེ་ཤེས་པ་ནི། ཁམས་གསུམ་གྱི་ཉོན་མོངས་པ་སྔར་ཡོད་རྣམས་ཟད་པ་དང་། ཕྱིན་ཆད་མི་སྐྱེ་བར་ཤེས་པའོ། །ཕྱིར་འོང་ཞུགས་པ། ཕྱིར་མི་འོང་ཞུགས་པ། དགྲ་བཅོམ་པ་ཞུགས་པ་གསུམ་ནི་ཉན་ཐོས་ཀྱི་ས་ཞེས་དང་། དེའི་སྟེང་དུ་རང་རྒྱལ་གྱི་ཞུགས་གནས་བརྒྱད་ཀ་གཅིག་ཏུ་བརྩིས་ཏེ་རང་སངས་རྒྱས་ཀྱི་ས་ཞེས་བྱ་སྟེ་དེ་ལྟར་བརྒྱད་དོ། །དེ་དག་ཀྱང་སྒྱུ་འཕྲུལ་རྒྱས་པ་ལས། བདེན་བཞིའི་དོན་རྟོགས་རབ་ཏུ་སྤོང་བ་ཡིས། །ཡེ་ཤེས་བཅུ་དྲུག་ཆ་སྦྱངས་རབ་ཞི་བ། །རྒྱུན་ཞུགས་ལ་སོགས་རིམ་པས་སྦྱངས་ནས་ནི། །ཉོན་མོངས་དགྲ་རྣམས་ཞི་བའི་ས་རུ་འགྲོ། །ཞེས་གསུངས་སོ། །གཉིས་པ་གང་ཟག་ཐ་མའི་འབྲིང་གི་དོན་དུ་དགོངས་ནས་བསྟན་པ་རང་རྒྱལ་གྱི་ཐེག་པ་ནི། སྙིང་པོའི་རྒྱུད་ལས། རང་བྱང་ཆུབ་ཀྱི་ཐེག་པ་དང་ཞེས་གསུངས་ཏེ། འདི་ལ་གསུམ། ངོ་བོ། ངེས་ཚིག དབྱེ་བའོ། །དང་པོ་ངོ་བོ་ནི། སློབ་དཔོན་ལ་མ་བསྟེན་པར་སྲིད་པ་ཐ་མའི་ཚེ་བྱང་ཆུབ་མངོན་དུ་བྱེད་པའི་ཐབས་བདག་མེད་ཕྱེད་དང་གཉིས་རྟོགས་ཀྱི་སྒོ་ནས་རྟེན་འབྲེལ་གྱི་ལམ་བསྒོམ་པའོ། །གཉིས་པ་ངེས་ཚིག་ནི། པྲ་ཏྱེ་ཀ་བུདྡྷའི་སྒྲ་ལས། རང་གི་བྱང་ཆུབ་རང་གིས་རྟོགས་པར་བྱེད་པའི་ཕྱིར་རམ། སོ་སོའམ་རང་གཅིག་པུ་བྱང་ཆུབ་སྒྲུབ་པས་རང་རྒྱལ་ལོ། །གསུམ་པ་དབྱེ་བ་ལ་སྔ ར་ལྟར་དྲུག་ལས། འཇུག་སྒོ་ནི། རང་ཤར་ལས། འཇུག་པའི་སྒོ་ནི་རྟེན་འབྲེལ་བཅུ་གཉིས་སོ། །ཞེས་པས། རྟེན་འབྲེལ་བཅུ་གཉིས་ཀྱི་སྒོ་ནས་འཇུག དེའང་རྟེན་འབྲེལ་ནི། ཧེ་རུ་ཀ་གལ་པོ་ལས། རང་རྒྱལ་ཆོས་ལ་བློ་སྦྱོང་ཕྱིར། །ཕྱི་དང་ནང་གི་རྟེན་འབྲེལ་ཆོས། །ཞེས་པས་ཕྱི་ནང་གི་རྟེན་འབྲེལ་བཅུ་གཉིས་ཏེ། དེ་ལ་ཕྱི་ཡི་རྟེན་འབྲེལ་ནི། ས་བོན་ལས་མྱུ་གུ། དེ་ལས་རིམ་པར་སྡོང་བུ། ཡལ་ག ལོ་མ། མེ་ཏོག འབྲས་བུའི་བར་རྒྱུ་དང་འབྲེལ་བ་དྲུག་དང་། སས་རྟེན་བྱས། ཆུས་བསྡུས། མེས་སྨིན། རླུང་གིས་བསྐྱེད། ནམ་མཁས་གོ་ཕྱེ། དུས་ཀྱིས་མི་རྟག་པར་བསྒྱུར་ནས་འབྲས་བུ་རྣམས་སྐྱེད་པར་བྱེད་པས་རྐྱེན་དང་འབྲེལ་བ་དྲུག་སྟེ། དེ་ལྟར་བཅུ་གཉིས་སོ། །ནང་གི་རྟེན་འབྲེལ་ཡན་ལག་བཅུ་གཉིས་ནི། མ་རིག་པ་ནས་རྒ་ཤིའི་བར་ཏེ། སོ་སོའི་ངོ་བོ། མ་རིག་པ་ནི་སྤྱིར་མི་ཤེས་པ་ཙམ་ཡིན་ཡང་། སྐབས་འདིར་སྐྱེ་བ་འདི་འགྲུབ་པའི་ཚེ་སྔ་མའི་ཉོན་མོངས་པ་རྣམས་ཚེ་འདི་ལ་ལྟོས་ནས་མ་རིག་པར་བཞག་གོ །འདུ་བྱེད་ནི་སྤྱིར་རྒྱུས་འབྲས་བུ་བསྐྱེད་པ་ཙམ་ཡིན་ཡང་། འདིར་ཚེ་འདི་གྲུབ་པའི་སྔོན་རོལ་གྱི་ལས་སོ། །རྣམ་ཤེས་ནི་སྤྱིར་ཡུལ་གྱི་དོན་ཙམ་རིག་པ་ཡིན་ཡང་། འདིར་མའི་མངལ་དུ་དང་པོར་འཇུག་པའི་ཕུང་པོ་ལྔའོ། །དེ་བཞིན་དུ་མིང་གཟུགས་ནི་སྤྱིར་མིང་བཞིའི་ཕུང་པོ་དང་གཟུགས། འདིར་མངལ་དུ་ཞུགས་ནས་ཁ་མིག་མ་དོད་ཚུན་ཆད་ཀྱི་ཕུང་པོ་ལྔ། སྐྱེ་མཆེད་དྲུག་ནི་སྤྱིར་མིག་ལ་སོགས་པ་ཙམ། འདིར་ཁ་མིག་དོད་ནས་བཟུང་སྟེ་དྲི་རོ་རེག་བྱ་འཛིན་མི་ནུས་པ་ཚུན་ཆད། རེག་པ་ནི་སྤྱིར་ཡུལ་དབང་ཤེས་པ་གསུམ་འདུས་པ་ཙམ། འདིར་བདེ་སྡུག་གི་རྒྱུ་ཡུལ་འཛིན་ཅིང་བདེ་སྡུག་དངོས་མ་སྐྱེས་པ་ཚུད་ཆད་དེ། འདི་དུས་ཐུང་ངོ་། །ཚོར་བ་ནི་སྤྱིར་ཉམས་སུ་མྱོང་བ་ཙམ། འདིར་མངལ་དུ་བདེ་སྡུག་རགས་པ་མྱོང་བ་ནས་བཟུང་སྟེ་འཁྲིག་པ་སྤྱོད་མི་ནུས་པའི་བར་ཚུན་གྱི་བདེ་སྡུག སྲེད་པ་ནི་སྤྱིར་ཆགས་པ་ཙམ། འདིར་འཁྲིག་པ་སྤྱོད་ནུས་པ་ནས་བཟུང་སྟེ་ནོར་རྫས་སམ་བུད་མེད་དམ་སྐྱེས་པ་བཙལ་བའི་འདུན་པ་མེད་པ་ཚུན་ཆད་དེ་དུས་ཐུང་ངོ་། །ལེན་པ་ནི་སྤྱིར་འདུད་པ་དང་འདོད་ཆགས་ཙམ། འདིར་སྲེད་ཡུལ་འཚོལ་ཅིང་མ་རྙེད་པའི་བར། སྲིད་པ་ནི་སྤྱིར་ལས་ཐམས་ཅད། འདིར་ཡུལ་དེ་རྙེད་ནས་སྤྱད་པས་ཚེ་ཕྱི་མ་འགྲུབ་པའི་ལས་བསོག་པ་སྟེ་འཆི་ཀ་མ་ཚུན་ཆད་དོ། སྐྱེ་བ་ནི་སྤྱིར་རྒྱུ་ལས་སྐྱེ་བ་ཐམས་ཅད། འདིར་ལས་དེའི་ནུས་པས་ཚེ་ཕྱི་མར་མངལ་དུ་ཞུགས་མ་ཐག་པ། རྒ་ཤི་སྤྱིར་འགག་པར་ཕྱོགས་པ་དང་འགག་པ་ཐམས་ཅད་ཡིན་ཡང་འདིར་མངལ་དེར་ཞུགས་ནས་ཕྱི་མའི་མིང་གཟུགས་དང་སྐྱེ་མཆེད་དྲུག་དང་རེག་པ་དང་ཚོར་བ་སྟེ་བཞི་པོ་རྫོགས་པའི་བར་ཐམས་ཅད་དོ། །དེའི་སྲེད་པ་ནས་རྟེན་འབྲེལ་གཞན་གྱི་མགོ་འཛུགས་པ་ཡིན་ནོ། །དེ་ལྟར་ཡང་མཛོད་ལས། མ་རིགས་ལ་སོགས་སྔོན་གནས་སྐབས། །འདུ་བྱེད་དག་ནི་སྔོན་ལས་ཀྱིའོ། །རྣམ་ཤེས་མཚམས་སྦྱོར་ཕུང་པོ་ཡིན། །མིང་དང་གཟུགས་ནི་དེ་ཕན་ཆད། །སྐྱེ་མཆེད་དྲུག་དོད་ཚུན་ཆད་དོ། །དེ་ནི་གསུམ་འདུས་ཚུན་ཆད་དོ། །རེག་པ་བདེ་སྡུག་ལ་སོགས་ཀྱི། །རྒྱུ་ཤེས་ནུས་པ་ཚུན་ཆད་དོ། །ཚོར་འཁྲིག་ཚུན་ཆད་སྲེད་པ་ནི། །ལོངས་སྤྱོད་འཁྲིག་པའི་ཆགས་ཅན་གྱིའོ། །ཉེ་བར་ལེན་པ་ལོངས་སྤྱོད་རྣམས། །ཐོབ་པར་བྱ་ཕྱིར་རྒྱུག་པའོ། །དེ་སྲིད་འབྲས་བུ་འབྱུང་འགྱུར་བའི། །ལས་བྱེད་དེ་ནི་སྲིད་པ་ཡིན། །ཉིང་མཚམས་སྦྱོར་བ་སྐྱེ་བ་ཡིན། །ཚོར་བའི་བར་ནི་རྒ་ཤིའོ། །སྔོན་དང་ཕྱི་མ་བར་དག་ལ། རྨོངས་པ་རྣམ་པར་བཟློག་ཕྱིར་རོ། །ཞེས་སོ། །བཅུ་གཉིས་པོ་དེ་དག་ལས་དང་ཉོན་མོངས་པ་དང་སྡུག་བསྔལ་གསུམ་དུ་འདུས་ཏེ། མ་རིག་པ། སྲེད་པ། ལེན་པ་གསུམ་ནི་ཉོན་མོངས་པའོ། །འདུ་བྱེད་དང་སྲིད་པ་གཉིས་ནི་ལས་སོ། །རྣམ་ཤེས་ལ་སོགས་ལྷག་མ་བདུན་ནི་སྡུག་བསྔལ་ཏེ། ཀླུ་སྒྲུབ་ཀྱིས། དང་པོ་བརྒྱད་པ་དགུ་ཉོན་མོངས། །གཉིས་པ་བཅུ་པ་ལས་ཡིན་ཏེ། །ལྷག་མ་བདུན་ཡང་སྡུག་བསྔལ་ཡིན། །ཞེས་གསུང་། དེ་རྣམས་སྐྱེ་བ་འགྲུབ་པའི་རྒྱུ་འབྲས་ཀྱི་དབང་དུ་བཞག་ན། གོང་བཤད་ལས་ཉོན་ལྔ་དང་རྒྱུ་དུས་ཀྱི་རྣམ་ཤེས་ནི་རྒྱུ་ཡིན་ལ། མིང་གཟུགས་སོགས་སྡུག་བསྔལ་དྲུག་འབྲས་དུས་ཀྱི་རྣམ་ཤེས་དང་བདུན་ནི་འབྲས་བུའོ། །ཡང་ན་རྣམ་ཤེས་རྒྱུར་བ གྲངས་ན་རྒྱུ་དྲུག་འབྲས་དྲུག་ཅེས་ཀྱང་ཟེར་རོ། །ཚེ་དུ་ལ་རྫོགས་ན། མི་ཚེ་གསུམ་ལ་རྫོགས་ཏེ་མཛོད་ལས། སྲིད་པའི་འཁོར་ལོ་ཐོག་མ་མེད། །དེ་ནི་རྟེན་ཅིང་འབྲེལ་འབྱུང་བའི། །ཡན་ལག་བཅུ་གཉིས་ཆ་གསུམ་མོ། །སྔོན་དང་ཕྱི་མཐར་གཉིས་གཉིས་དང་། །བར་དུ་བརྒྱད་ཡོངས་རྫོགས་ལྡན་ལ། །ཞེས་པས། སྔོན་གྱི་མཐར་མ་རིག་འདུ་བྱེད་གཉིས། ཕྱི་མའི་མཐར་སྐྱེ་བ་རྒ་ཤི་གཉིས། བར་དུ་རྣམ་ཤེས་ལ་སོགས་པའི་ལྷག་མ་བརྒྱད་དོ། །དེ་ལྟར་ཕྱི་ནང་གི་རྟེན་འབྲེལ་དེ་རྣམས་ཇི་ལྟར་འཁོར་ན། ཕྱི་ཡི་རྟེན་འབྲེལ་རྣམས་ནི་མང་ཉུང་གི་ཚུལ་དང་། ནང་གི་རྟེན་འབྲེལ་ལུས་མེད་རྣམས་ལ་བག་ཆགས། ལུས་ཅན་རྣམས་ལ་དངོས་སུ་འཁོར་རོ། །དེའི་སྒོ་ནས་ཇི་ལྟར་འཇུག་ན། སྤྱིར་རང་རྒྱལ་གྱི་རིགས་ང་རྒྱལ་དང་སྐྱོ་ཤས་ཆེ་ཞིང་གཞན་དོན་སྙིང་རྗེ་ཆུང་བ་སྟེ་དེ་ལས་དབང་པོ་རྣོན་པོ་རང་གཅིག་པུར་གནས་པ་ལ་དགའ་བ་བསེ་རུ་ལྟ་བུ་ནི་ཚོགས་ལམ་གྱི་ཚོགས་བསྐལ་པ་བརྒྱ་དང་། མང་པོའི་ཚོགས་ལ་དགའ་བ་དབང་འབྲིང་ཚོགས་སྤྱོད་ཆེ་བ་བཟོད་འབྲིང་མན་ཆད་ཀྱིས་བསྡུས་པའི་ཚོགས་མི་ཚེ་བརྒྱ་དང་། དབང་བརྟུལ་ཚོགས་སྤྱོད་ཆུང་བ་མཐོང་ལམ་སྐད་ཅིག་མ་བཅོ་ལྔ་མན་ཆད་ཀྱིས་བསྡུས་པའི་ཚོགས་མི་ཚེ་བཅུ་གསུམ་དུ་བསགས་པ་སྟེ། ཕྱི་མ་འདི་གཉིས་ལ་དབྱེ་ན། ཉན་ཐོས་སྔོན་དུ་མ་སོང་བ་དང་། སོང་བའི་ཚོགས་སྤྱོད་གཉིས། དེའི་ཕྱི་མ་ལ་ཉན་ཐོས་སོ་སྐྱེ་ཙམ་དང་འཕགས་པ་སྔོན་སོང་གཉིས། འཕགས་པ་ལའང་རྒྱུན་ཞུགས་ཙམ་དང་། ཕྱིར་འོང་ཙམ་སྔོན་སོང་གཉིས་ཡོད་ཅིང་། དེ་དག་རང་རྒྱལ་གྱི་ལམ་དུ་ཞུགས་ཚེ་དངོས་སྨྲ་བ་རྣམས་ཀྱིས་སྔར་བགྲོད་ཟིན་གྱི་ལམ་གྱི་ལྷག་མ་ནས་འཇུག་པར་བཤད་ཀྱང་། དབུ་མ་པའི་ལུགས་ལ་རང་རྒྱལ་གྱི་ཚོགས་ལམ་ནས་འཇུག་དགོས་ཏེ་གཟུང་བ་ཆོས་ཀྱི་བདག་མེད་རྟོགས་པ་མཐར་ཐུག་པ་ལ་དེ་རྟོགས་ཟིན་རྒྱུན་དུ་སྒོམ་པའི་སྒོམ་ལམ་སྔོན་དུ་འགྲོ་དགོས་པའི་ཕྱིར་བཞེད། གང་ལྟར་ཡང་གསུམ་གས་རྟེན་དེ་ལ་བྱང་ཆུབ་ཐོབ་པའི་སྐལ་བ་མེད་པར་ཤེས་ནས་སྨོན་ལམ་འགྲུབ་པར་བྱ་བའི་དོན་དུ་ཉན་ཐོས་ཀྱི་སྡེ་སྣོད་ལ་ཐོས་བསམ་བྱས་པའི་སྒོ་ནས་ཕུང་པོ་དང་། ཁམས་དང་། སྐྱེ་མཆེད་དང་། རྟེན་འབྲེལ་དང་། གནས་གནས་མིན་དང་། བདེན་པ་སྟེ། གནས་དྲུག་ལ་མཁས་པར་བྱས་ཏེ། སངས་རྒྱས་མི་བཞུགས་ཤིང་ཉན་ཐོས་ཀྱང་མེད་པའི་ཞིང་ཁམས་སུ་སྐྱེ་བར་གྱུར་ཅིག སྐྱེས་ནས་ཀྱང་རྟེན་དེ་ལས་ལམ་གྱི་རྟོགས་པ་རང་བྱུང་དུ་རྒྱུད་ལ་སྐྱེ་བར་གྱུར་ཅིག གདུལ་བྱ་ལ་ལུས་ཀྱི་བརྡས་ཆོས་སྟོན་ཅིང་སྒྲའི་ནས་སྟོན་པར་མ་གྱུར་ཅིག ཅེས་སྨོན་ལམ་གསུམ་བཏབ་པས་སངས་རྒྱས་དང་ཉན་ཐོས་ཀྱིས་ཡོངས་སུ་མ་བཟུང་བའི་འཇིག་རྟེན་དུ་སྐྱེ་བ་ལེན་ཏེ། དབུ་མ་རྩ་བ་ལས། སངས་རྒྱས་རྣམས་ནི་མ་བྱོན་ཅིང་། །ཉན་ཐོས་རྣམས་ནི་ཟད་པ་ན། །རང་སངས་རྒྱས་ཀྱི་ཡེ་ཤེས་ནི། །རྟེན་པ་མེད་པར་རབ་ཏུ་སྐྱེ། །ཞེས་སོ། །རྟེན་དེ་ལ་མཁན་སློབ་མེད་པར་རང་བྱུང་གི་དགེ་སློང་དུ་གྱུར་ནས། དུར་ཁྲོད་དུ་བོར་བའི་རུས་པ་མཐོང་བ་སོགས་ཀྱི་རྐྱེན་གྱིས་འཁོར་བ་ལས་ཡིད་འབྱུང་ཞིང་ཕྱི་ནང་གི་རྟེན་འབྲེལ་གྱི་དོན་རྟོགས་པའི་སྒོ་ནས་འཇུག་པའོ། །ལྟ་བ་ནི། གང་ཟག་གི་བདག་མེད་རྟོགས་པ་ཉན་ཐོས་དང་འདྲ་ལ། དེའི་སྟེང་དུ་ཆོས་ཀྱི་བདག་གི་ཕྱེད་གཟུང་ཆ་རྡུལ་ཕྲ་རབ་ཆ་བཅས་དང་ཆ་མེད་གཉིས་ཀ་རང་བཞིན་མེད་པར་རྟོགས་ཀྱང་། ད་དུང་འཛིན་སེམས་སྐད་ཅིག་མ་དོན་དམ་དུ་ལྟ་ཞིང་། འཁོར་འདས་རྟེན་འབྲེལ་རྒྱུ་འབྲས་སུ་འདོད་པས་ན། བདག་མེད་ཕྱེད་དང་གཉིས་རྟོགས་པ་ཞེས་བྱ་སྟེ། མངོན་རྟོགས་རྒྱན་ལས། གཟུང་དོན་རྟོག་པ་སྤོང་ཕྱིར་དང་། །འཛིན་པ་མི་སྤོང་ཕྱིར་དང་ནི། །རྟེན་གྱི་བསེ་རུ་ལྟ་བུའི་ལམ། །ཡང་དག་བསྡུས་པར་ཤེས་པར་བྱ། །ཞེས་དང་། ལྟ་རིམ་ལས། དེ་བཞིན་རང་རྒྱལ་ཐེག་པ་ཡང་། །ཕྱི་རོལ་བཅུ་གཉིས་སྒྱུ་མ་ཙམ། །རྡུལ་ཀྱང་ཕྱོགས་ཆས་མ་གྲུབ་འཕགས། །ཤེས་པ་སྐད་ཅིག་རྫས་སུ་མཐུན། །ཞེས་དང་། ལམ་རིམ་ལས། ལས་དང་ཉོན་མོངས་ཐམས་ཅད་ལ། །མཉམ་པ་ཉིད་དུ་མི་ཤེས་ཤིང་། །རྟེན་འབྲེལ་རྒྱུ་འབྲས་ཡོད་འཛིན་ན། །འདི་ནི་རང་སངས་རྒྱས་ཀྱི་ས། །ཞེས་གསུངས། ཚུལ་ཁྲིམས་ནི། ཉན་ཐོས་དང་འདྲ་སྟེ། ཡང་འབྱེད་འཕྲུལ་གྱི་ལྡེ་མིག་ལས། ཉན་ཐོས་རང་རྒྱལ་བསྲུང་མཚམས་ནི། །ཉིས་བརྒྱ་ལྔ་བཅུའི་འདུལ་ཁྲིམས་ཡིན། ཞེས་སོ། །སྒོམ་པ་ནི། ས་སྡེ་ལས་ཉན་ཐོས་ལྟར་སྒོམ་པར་གསུངས་ཀྱང་། མངོན་རྟོགས་རྒྱན་སོགས་ལས། ཁྱད་པར་ཡོད་པར་བཞེད་པ་ལྟར། བདེན་བཞི་མི་རྟག་སོགས་བཅུ་དྲུག་གི་སྟེང་དུ། རྟེན་འབྲེལ་ལུགས་འབྱུང་བཀག་ནས་ལུགས་ལྡོག་སྟོང་པ་བཅུ་གཉིས་ཁྲིགས་ཆགས་སུ་སྒོམ་པར་བྱེད་པའོ། །དེ་ཡང་དུར་ཁྲོད་ཀྱི་རུས་པ་ལ་བལྟས་ཏེ། འདི་ཤི་བ་ལས་བྱུང་ཞིང་། དེ་ཡང་སྐྱེ་བ་ལས་བྱུང་བ་སོགས་མ་རིག་པའི་བར་དུ་ཤེས་ཤིང་མ་རིག་པ་དེ་བདག་མེད་རྟོགས་པའི་ཤེས་རབ་ཀྱིས་སྤང་བར་རིག་ནས་ལམ་རང་རྒྱུད་ལ་བརྟེན་པར་བྱེད་དེ། འདི་ལྟར་རྒ་ཤི་སྡུག་བསྔལ་གྱི་ངོ་བོ་ཡིན་པས། དེ་སྐྱེ་བ་ལས་བྱུང་བ་སོགས་འབྱུང་རིམ་ལ་བསམས་པས་སྡུག་བསྔལ་བདེན་པ་རྟོགས་པ་དང་། སྐྱེ་བ་འགགས་པས་རྒ་ཤི་འགགས་པ་སོགས་འགགས་རིམ་ལ་བསམ་པས་འགོག་པའི་བདེན་པ་ལ་འཇུག མ་རིག་པ་ཀུན་འབྱུང་གི་རྩ་བ་ཡིན་པས། དེ་ལས་འདུ་བྱེད་སོགས་འབྱུང་བའི་རིམ་པ་ལ་བསམས་ནས་ཀུན་འབྱུང་གི་བདེན་པ་རྟོགས། མ་རིག་པ་འགགས་པས་འདུ་བྱེད་འགགས་པ་སོགས་འགགས་རིམ་ལ་བསམས་ནས་ཀུན་འབྱུང་གི་གཉེན་པོ་བདག་མེད་བསྒོམས་པ་སོགས་ལམ་བདེན་གྱི་རང་བཞིན་ཤེས་པ་ཡིན་པས། ཚུལ་དེ་ལྟ་བུའི་སྒོ་ནས་སྒོམ་པར་བྱེད་དོ། །སྤྱོད་པ་ནི། གདུལ་བྱ་ལ་ངག་གི་ཆོས་མི་གསུང་བར་ལུས་ཀྱི་བརྡས་ཆོས་སྟོན་པར་བྱེད་དེ། དེའང་གདུལ་བྱ་དགེ་བ་བཅུ་དང་། བདེན་པ་བཞི་དང་། རྟེན་འབྲེལ་བཅུ་གཉིས་དོན་དུ་གཉེར་བ་ལ་བརྡ་གཅིག་བསྟན་པས་སོ་སོར་གོ་བར་འགྱུར་ཏེ། མངོན་རྟོགས་རྒྱན་ལས། གང་གང་དོན་ནི་གང་གང་ལ། །ཇི་ལྟ་ཇི་ལྟར་ཉན་འདོད་པ། །དེ་དེ་ལ་དོན་དེ་དང་དེ། །སྒྲ་མེད་ཀྱང་དེ་དེ་ལྟར་སྣང་། །ཞེས་དང་། གཡུ་ཐང་ལས། སྤྱོད་པ་ལུས་ཀྱི་རྫུ་འཕྲུལ་གྱིས། །གཞན་དོན་ཤས་འགའ་སྤྱོད་པའོ། །ཞེས་སོ། །འབྲས་བུ་ནི། དབང་རྣོན་བསེ་རུ་ལྟ་བུ་གཅིག་པུར་བཞུགས་པ་ནི་བསམ་གཏན་བཞི་པ་རབ་ཀྱི་མཐའ་ལ་བརྟེན་ཏེ། ལམ་ལྔ་སྟན་ཐོག་གཅིག་ཏུ་རྫོགས་ནས། ཡིད་བཞིན་བདེ་བ་མཆོག་གི་ས་ཟད་པ་དང་མི་སྐྱེ་ཤེས་པས་དགྲ་བཅོམ་མངོན་དུ་མཛད་དེ། མཛོད་ལས། སྟོན་དང་བསེ་རུ་བྱང་ཆུབ་པ། །བསམ་གཏན་མཐར་རྟེན་གཅིག་ལ་ཀུན། །དེ་ཡི་སྔོན་དུ་ཐར་ཆ་མཐུན། །ཞེས་གསུངས། འདིའི་ལུགས་ཀྱི་སྐྱེ་མཐའི་བྱང་ཆུབ་སེམས་དཔའ་ཡང་གང་ཟག་ཚོགས་ལམ་པར་འདོད་དོ། །དབང་བརྟུལ་ནེ་ཙོ་ལྟ་བུ་ཁྱུས་བཞུགས་པ་ཚོགས་སྤྱོད་ཆེ་ཆུང་གཉིས་ནི། རིམ་པར་ལམ་བཞི་དང་གསུམ་སྟན་ཐོག་གཅིག་ཏུ་མངོན་དུ་མཛད་པ་ཡིན་ནོ། །དེ་ཡང་བྱང་ས་སོགས་ལས་ཉན་རང་སྤངས་རྟོགས་ཁྱད་མེད་དུ་བཞེད་ཀྱང་། འདི་མངོན་རྟོགས་རྒྱན་གྱི་དགོངས་པ་ལྟར་ཁྱད་ཡོད་པར་འཐད་དེ། ཉན་ཐོས་དགྲ་བཅོམ་པས་གང་ཟག་གི་བདག་མེད་རྟོགས་པ་མཐར་ཐུག་ཅིང་། རང་རྒྱལ་དགྲ་བཅོམ་པས་བཟུང་བ་ཆོས་ཀྱི་བདག་མེད་རྟོགས་པ་མཐར་ཐུག་པའི་ཁྱད་པར་ཡོད་པའི་ཕྱིར་ཞེས་ཀུན་མཁྱེན་སྨིན་གླིང་པ་ཡབ་སྲས་བཞེད་དོ། །དེ་དག་ཀྱང་། རྒྱས་པ་ལས། ཕྱི་ནང་རྟེན་འབྲེལ་སྒྱུ་མ་མིག་ཡོར་ཚུལ་ཤེས་ཤིང་། །དངོས་པོའི་གཟུགས་ལ་ཐོག་མེད་རབ་ཏུ་འཇུག །དགེ་བཤེས་མི་སློབ་རང་གི་རིག་པས་རྟོགས། །བྱང་ཆུབ་ས་བགྲོད་ཡིད་བཞིན་བདེ་བ་མཆོག །ཞེས་གསུངས་སོ། །གསུམ་པ། གང་ཟག་དབང་པོ་ཐ་མའི་རབ་ཀྱི་ངོ་སྐལ་དུ་གསུངས་པ་བྱང་ཆུབ་སེམས་དཔའི་ཐེག་པ་ནི། དམན་པ་ཉན་རང་གི་ལམ་ལས་ཆེན་པོ་བདུན་གྱིས་ཁྱད་པར་དུ་འཕགས་པས་ཐེག་པ་ཆེན་པོ་ཞེས་བྱ་སྟེ། ཆེན་པོ་བདུན་ནི། དམིགས་པ་ཆེན་པོ་ཆོས་ཉིད་ནམ་མཁའ་དང་འདྲ་བ་ལ་དམིགས་པ། སྒྲུབ་པ་ཆེན་པོ་རང་གཞན་གཉིས་ཀའི་དོན་སྒྲུབ་པ། ཡེ་ཤེས་ཆེན་པོ་བདག་གཉིས་ཀས་སྟོང་པའི་ཆོས་ཉིད་སྙིང་རྗེ་དང་ཟུང་དུ་འཇུག་པའི་ཡེ་ཤེས། བརྩོན་འགྲུས་ཆེན་པོ་བསྐལ་པ་གྲངས་མེད་པར་སེམས་ཅན་གྱི་དོན་ལ་བརྩོན་པ། ཐབས་ལ་མཁས་པ་ཆེན་པོ་སྲིད་ཞིའི་མཐའ་ལ་མི་གནས་པ། གྲུབ་པ་ཆེན་པོ་སྟོབས་སོགས་སངས་རྒྱས་ཀྱི་ཡོན་ཏན་ཚད་མེད་པ། ཕྲིན་ལས་ཆེན་པོ་འཁོར་བ་ཇི་སྲིད་བར་གཞན་དོན་ལྷུན་གྲུབ་ཏུ་འབྱུང་བ་རྣམས་སོ། །དེ་ལྟར་ཡང་། མགོན་པོ་བྱམས་པས་དམིགས་པ་ཆེ་བ་ཉིད་དང་ནི། །དེ་བཞིན་སྒྲུབ་པ་གཉིས་དང་ནི། །ཡེ་ཤེས་བརྩོན་འགྲུས་བརྩམ་པ་དང་། །ཐབས་ལ་མཁས་པ་གང་ཡིན་དང་། །ཡང་དག་གྲུབ་པ་ཆེན་པོ་དང་། སངས་རྒྱས་འཕྲིན་ལས་ཆེན་པོ་སྟེ། །ཆེན་པོ་བདུན་དང་ལྡན་པའི་ཕྱིར། །ཐེག་ཆེན་ཞེས་ནི་ངེས་པར་བརྫོད། །ཅེས་གསུངས། ཐེག་པ་འདི་གཉིས་ཀྱི་ཁྱད་པར་ཡང་། སློབ་དཔོན་ཨ་རོས། ཐེག་པའི་ཁྱད་པར་ཤེས་རབ་སྙིང་རྗེ་ཁོ་ན་སྟེ། །འདི་དག་ཆེ་ཆུང་དབང་གིས་ཐེག་པའི་ཁྱད་པར་བསྟན། །ཞེས་གསུངས་པས། ཤེས་རབ་ཆེན་པོས་བདག་མེད་གཉིས་རྣལ་མར་རྟོགས་ནུས་པ་ཐེག་ཆེན་དང་མི་ནུས་པ་ཐེག་དམན། སྙིང་རྗེ་ཆེན་པོས་གཞན་དོན་འབའ་ཞིག་སྤྱོད་ནུས་པ་ཐེག་ཆེན་དང་། དེ་ལྟར་མི་ནུས་པ་དམན་པའོ། །དེ་ལྟར་ཡང་། ཡེ་ཤེས་རྣམ་པར་བཀོད་པའི་རྒྱུད་ལས། ཐུགས་རྗེས་སེམས་ཅན་ལ་དམིགས་ཤིང་། །ཤེས་རབ་ཆོས་ཀྱི་དབྱིངས་སུ་ཁྱབ། །ཐེག་པ་ཆེན་པོ་ཞེས་བཤད་དེ། །གཞན་དག་དེ་ལས་བཟློག་པའོ། །ཞེས་དང་། སྡུད་པ་ལས། ཐབས་མེད་ཤེས་རབ་བྲལ་བས་ཉན་ཐོས་ཉིད་དུ་ལྷུང་། །ཞེས་སོ། །དེ་ལྟ་བུའི་ཐེག་ཆེན་དེ་ལའང་རྒྱུ་དང་འབྲས་བུའི་ཐེག་པ་གཉིས་ཡོད་པའི་སྔ་མ་སྟེ། རྒྱུད་ལས། བྱང་ཆུབ་སེམས་དཔའི་ཐེག་པ་དང་། །ཞེས་གསུངས་ཏེ། དེ་ལ་ངོ་བོ། ངེས་ཚིག དབྱེ་བ་གསུམ་ལས། ངོ་བོ་ནི། ཆོས་ཐམས་ཅད་བདག་མེད་པར་རྟོགས་ཤིང་། སྙིང་རྗེ་ཆེན་པོས་གཞན་དོན་རླབས་པོ་ཆེ་སྤྱོད་པའི་ཐབས་དམ་པར་གྱུར་པའོ། །ངེས་ཚིག་ནི། བོ་དྷི་ས་ཏྭའི་སྒྲ་ལས། སེམས་སྟོབས་ཆེན་པོས་བླ་མེད་རྫོགས་པའི་བྱང་ཆུབ་སྒྲུབ་པ་ལ་དཔའ་མི་ཞུམ་ཞིང་བརྩོན་པའི་གོ་ཆ་མི་འདོར་བའི་ཕྱིར་བྱང་ཆུབ་སེམས་དཔའ་ཞེས་བྱའོ། །དབྱེ་བ་ལ་སྔར་ལྟར་དྲུག་ལས། འཇུག་སྒོ་ནི། བདེན་པ་གཉིས་གྱི་སྒོ་ནས་ཏེ། རང་ཤར་ལས། བྱང་ཆུབ་སེམས་དཔའི་ཐེག་པ་ནི། །འཇུག་པའི་སྒོ་ནི་བདེན་པ་གཉིས། །ཞེས་སོ། དེ་ཡང་དབུ་མ་པའི་གཞུང་ལྟར་ན། མ་བརྟགས་མ་དཔྱད་པའི་སྣང་བ་འདི་རྣམས་སྣང་ཡང་། ངོ་བོ་བདེན་མེད་སྒྱུ་མ་ལྟ་བུར་ཤེས་པའི་བློས་བྱམས་སྙིང་རྗེ་བྱང་ཆུབ་ཀྱི་སེམས་ཀྱིས་ཟིན་པར་བྱས་ནས། དགེ་མི་དགེའི་འཇུག་ལྡོག་གི་ཚུལ་གྱིས་ཀུན་རྫོབ་བདེན་པར་འཇུག་ལ། དོན་དམ་པར་གཤིས་ཀྱི་གནས་ལུགས་སྤྲོས་བྲལ་དུ་ཤེས་པར་བྱས་ཏེ་ཟུང་འཇུག་གི་སྒོ་ནས་འཇུག་གོ །དེ་ལ་སྤྱིར་བདེན་པ་གཉིས་ཀྱི་རྣམ་བཞག་ཙམ་ནི་གྲུབ་མཐའ་སྨྲ་བ་ཐམས་ཅད་ཀྱིས་ཁས་ལེན་ཏེ། དེའང་ཉན་ཐོས་བྱེ་སྨྲ་བས། རགས་པའི་དངོས་པོ་དང་ཤེས་པའི་རྒྱུན་ནི་ཀུན་རྫོབ་ཡིན་ལ། ཤེས་པའི་སྐད་ཅིག་ཆ་མེད་དང་། དངོས་པོའི་རྡུལ་ཕྲན་ཆ་མེད་དོན་དམ་དུ་འདོད་དེ། མཛོད་ལས། གང་ལ་བཅོམ་དང་བློ་ཡིས་གཞན། །བསལ་ན་དེ་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །ཞེས་སོ། །མདོ་སྡེ་པས་དོན་དམ་པར་དོན་བྱེད་ནུས་པ་བུམ་པའམ་ཀ་བ་ལྟ་བུ་དོན་དམ་དང་། དོན་དམ་པར་དོན་བྱེད་མི་ནུས་པ་ནམ་མཁའ་དང་བུམ་སྤྱི་ལྟ་བུ་ཀུན་རྫོབ་སྟེ། རང་མཚན་དང་སྤྱི་མཚན་དུ་འདོད་དེ། རྣམ་འགྲེལ་ལས། དོན་དམ་དོན་བྱེད་ནུས་པ་གང་། །དེ་འདིར་དོན་དམ་ཡོད་པ་ཡིན། །གཞན་ནི་ཀུན་རྫོབ་ཡོད་པ་སྟེ། །དེ་དག་རང་སྤྱིའི་མཚན་ཉིད་འདོད། །ཅེས་སོ། སེམས་ཙམ་པས་གཟུང་འཛིན་གཉིས་སུ་སྣང་བའི་ཡུལ་དང་ཡུལ་ཅན་ནི་ཀུན་རྫོབ། གཟུང་འཛིན་གཉིས་མེད་ཀྱི་ཤེས་པ་ཙམ་ནི་དོན་དམ་དུ་འདོད་དེ། ཡེ་ཤེས་སྙིང་པོ་ཀུན་བཏུས་ལས། ཆ་ཤས་ཅན་ཞེས་བྱ་བ་མེད། །ཕྲ་རབ་རྡུལ་ཡང་ཡོད་པ་མིན། །སོ་སོར་སྣང་བའང་དམིགས་མེད་ལ། །ཉམས་སུ་མྱོང་བ་རྨི་ལམ་འདྲ། །གཟུང་དང་འཛིན་པ་ལས་གྲོལ་བའི། །རྣམ་ཤེས་དམ་པའི་དོན་དུ་ཡོད། །རྣལ་འབྱོར་སྤྱོད་གཞུང་རྒྱ་མཚོ་ཡིས། །ཕ་རོལ་ཕྱིན་རྣམས་དེ་སྐད་བསྒྲགས། །ཞེས་སོ། །དབུ་མ་རང་རྒྱུད་པ་རྣམས་ཀྱིས། སྣང་བ་ཀུན་རྫོབ་ཏུ་གྲུབ་པ་སྒྱུ་མའི་རྟ་གླང་བཞིན་དང་། དོན་དམ་པར་ཅིའང་མ་གྲུབ་པ་ནམ་མཁའ་ལྟ་བུར་འདོད་དེ། འཁྲུལ་འཇོམས་ལས། དམིགས་བཅས་ཀུན་རྫོབ་དོན་དམ་དུ། དམིགས་བྱ་དམིགས་བྱེད་ཀུན་ལས་གྲོལ། །ཞེས་སོ། །ཐལ་འགྱུར་པས་བློས་སྨྲ་བསམ་བརྗོད་པར་བརྟགས་པ་རྣམས་ནི་ཀུན་རྫོབ་ཀྱི་བདེན་པ་སྟེ། འཇིག་རྟེན་ན་ཇི་ལྟར་གྲགས་པའི་རྗེས་སུ་བརྗོད་ཅིང་། གཤིས་སྤྲོས་བྲལ་བསམ་བརྗོད་ཐམས་ཅད་ལས་འདས་པ་དོན་དམ་བདེན་པ་ཞེས་བྱ་སྟེ། རྣམ་པར་གཞག་བྱ་འཇོག་བྱེད། ངོ་བོ་རྟོགས་བྱ་རྟོགས་བྱེད་ལས་འདས་པས་རྟོགས་པར་གཞག་ཏུ་མེད་ཀྱང་དོན་དམ་དང་མཐུན་པའི་བློ་སྐྱེས་པ་ལ། དེ་སྐད་དུ་བཏགས་ཏེ། སློབ་དཔོན་ཟླ་བ་གྲགས་པས། སྟོང་པ་ཉིད་དང་རྗེས་སུ་མཐུན་པའི་བློ་སྐྱེས་པ་ལ་ནི་སྟོང་པ་ཉིད་རྟོགས་སོ་ཞེས་བརྗོད་ཀྱི། སྟོང་པ་ཉིད་ནི་རྟོགས་པ་མ་ཡིན་ནོ། །ཞེས་གསུངས་པ་སོགས་ཀྱིས་མཚོན་ཞིབ་པར་ཁོ་བོའི་བླ་མ་ཀུན་མཁྱེན་བློ་གྲོས་མཐའ་ཡས་ཀྱི་ཞལ་སྔ་ནས་བ སྩལ་པའི་བསྟན་བཅོས་ཆེན་པོ་ཤེས་བྱ་ཀུན་ཁྱབ་སོགས་ལས་རྟོགས་པར་བྱ་དགོས་ལ། འདིར་ནི་རང་ལུགས་རྒྱུད་ཀྱི་དགོངས་པ་ཀུན་མཁྱེན་དྷརྨ་ཤྲཱིས་འདི་ལྟར་གསུངས་ཏེ། བདེན་པ་གཉིས་ནི། ཧེ་རུ་ཀ་གལ་པོ་ལས། སངས་རྒྱས་རྣམས་ཀྱིས་ཆོས་བསྟན་པ། །བདེན་པ་གཉིས་སུ་ཡང་དག་འདུས། །ཞེས་སོ། །དེ་ཡང་དབྱེ་གཞི་ཤེས་བྱ་ཙམ་ལ། སྣང་ལུགས་ཀུན་རྫོབ་དང་། གནས་ལུགས་དོན་དམ་པའི་བདེན་པ་གཉིས་སུ་དབྱེ་སྟེ། དེ་ལས། ཤེས་བྱ་ཙམ་གྱི་སྣང་བ་ལ། །བདེན་པ་གཉིས་ཀྱི་གཞི་ཡང་གྲུབ། །ཅེས་གསུངས་པའི་ཕྱིར། དེ་ལས་ཀུན་རྫོབ་ནི། བློའི་ཡུལ་དུ་གྱུར་པའི་ཆོས་ཅན་མཚན་མ་ཅན་ཏེ། དེ་ལས། བསླུ་ཞིང་བློ་ཡི་ཡུལ་གྱུར་པ། །ཀུན་རྫོབ་སྤྱི་ཡི་མཚན་ཉིད་དོ། །ཞེས་སོ། །དབྱེ་ན། སྣང་ལ་དོན་བྱེད་ནུས་པ་མི་ལ་མིར་སྣང་བ་ལྟ་བུ་ཡང་དག་ཀུན་རྫོབ། སྣང་ལ་དོན་བྱེད་མི་ནུས་པ་ཐོ་ཡོར་ལ་མིར་སྣང་བ་ལྟ་བུ་ལོག་པའི་ཀུན་རྫོབ་སྟེ། དེ་ལས། ཀུན་རྫོབ་དབྱེ་བ་ཡང་དག་དང་། །ལོག་པའི་ཀུན་རྫོབ་ཅེས་བྱའོ། །སོ་སོའི་མཚན་ཉིད་རབ་བཤད་ན། །སྣང་ལ་དོན་བྱེད་མི་ནུས་ལོག །ཡང་དག་སྣང་ལ་དོན་བྱེད་ནུས། །ཞེས་དང་། བདེན་གཉིས་ལས། སྣང་དུ་འདྲ་ཡང་དོན་བྱེད་དག །ནུས་པའི་ཕྱིར་དང་མི་ནུས་ཕྱིར། །ཡང་དག་ཡང་དག་མ་ཡིན་པའི། །ཀུན་རྫོབ་ཀྱི་ནི་དབྱེ་བ་བྱས། །ཞེས་སོ། །དོན་དམ་བདེན་པ་ནི། སྤྲོས་པའི་མཐར་ཐམས་ཅད་དང་བྲལ་བ་སྟེ། གལ་པོ་ལས། དོན་དམ་པ་ཡི་མཚན་ཉིད་ནི། །སྤྲོས་པ་ཐམས་ཅད་བྲལ་བ་ཡིན། །ཞེས་དང་། ཛེ་ཏ་རིའི་བདེ་བར་གཤེགས་པའི་གཞུང་རྣམ་པར་འབྱེད་པ་ལས། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་དུ་ཡང་མེད། །མཐའ་བཞི་དག་ལས་ངེས་གྲོལ་བ། །ཞེས་སོ། །དབྱེ་ན། སྤྲོས་པ་ཕྱོགས་རེ་དང་བྲལ་བ་རྣམ་གྲངས་པའི་དོན་དམ་དང་། སྤྲོས་པ་མཐའ་དག་དང་བྲལ་བ་རྣམ་གྲངས་མ་ཡིན་པའི་དོན་དམ་སྟེ། གལ་པོ་ལས། དབྱེ་བ་རྣམ་གྲངས་དོན་དམ་དང་། །རྣམ་གྲངས་མ་ཡིན་མཐའ་བརྒྱད་བྲལ། །ཞེས་སོ། །དེ་ལྟར་བདེན་པ་གཉིས་པོ་དེ་གཅིག་གམ་ཐ་དད་ཅེ་ན། ཐ་སྙད་དུ་ཆུ་དང་ཆུ་ཟླ་ལྟར་རང་བཞིན་གཅིག་ལ་ལྡོག་པ་ཐ་དད་དེ། བྱང་ཆུབ་སེམས་འགྲེལ་ལས། བུ་རམ་རང་བཞིན་མངར་བ་དང་། །མེ་ཡི་རང་བཞིན་ཚ་བ་དང་། །དེ་བཞིན་ཆོས་རྣམས་ཐམས་ཅད་ཀྱི། །རང་བཞིན་སྟོང་པ་ཉིད་དུ་གནས། །ཞེས་སོ། །དོན་དམ་པར་གཅིག་ཐ་གང་དུའང་བརྗོད་དུ་མེད་དེ། བྱམས་པས་ཞུས་པ་ལས། འདུ་བྱེད་མཚན་མ་ལས་བརྗོད་དུ་མེད་པའི་དབྱིངས་དེ་ཉིད་ཀྱང་མ་ཡིན་ལ་གཞན་ཡང་མ་ཡིན་ནོ། །ཞེས་པས་སོ་གསུངས། ཀུན་མཁྱེན་ཆེན་པོས་ནི། རྒྱུད་རང་ཤར་གྱི་ལུང་གི་དགོངས་པ་འདི་བཞིན་དུ་འགྲེལ་བར་མཛད་དེ། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་བདེན་པ་གཉིས་ཀྱི་རང་བཞིན་དུ་འདུས་ལ། དེ་ཡང་ཆོས་ཅན་མཚན་མར་སྣང་བ་བློའི་ཡུལ་དུ་སྣང་རུང་རྣམས་ནི་ཀུན་རྫོབ་བདེན་པ་སྟེ། དབྱེ་ན་ལོག་པ་དང་ཡང་དག་པའི་ཀུན་རྫོབ་གཉིས་ལས། དང་པོ་ནི། སྣང་སྲིད་སྣོད་བཅུད་བློས་བཀོད་པའི་ཆོས་སོ་ཅོག་དང་བཅས་པ་ཐམས་ཅད་ལོག་པའི་ཀུན་རྫོབ་ཡིན་ཏེ། ཡུལ་འཁྲུལ་སྣང་བློ་རྫུན་པའི་ངོ་བོ་ལ་སྣང་བའི་ཕྱིར་རོ། །དེ་ཡང་མ་བརྟགས་པར་སྣང་བ་འདི་དག་བློ་འཁྲུལ་ངོ་ན་མཐུན་པར་སྣང་བ། དོན་བྱེད་ནུས་པ། བརྟགས་ན་ངོ་བོ་ཉིད་གྱིས་དབེན་པ། སྒྱུ་མའི་དཔེ་བརྒྱད་ཀྱི་ཚུལ་ཏེ། མེད་པ་གསལ་སྣང་ཙམ་དུ་ཤར་བ་ནི། རྩ་ཤེས་ལས། རྨི་ལམ་ཇི་བཞིན་སྒྱུ་མ་བཞིན། །དྲི་ཟའི་གྲོང་ཁྱེར་ཇི་བཞིན་དུ། །དེ་བཞིན་སྐྱེ་དང་དེ་བཞིན་གནས། །དེ་བཞིན་དུ་ཡང་འཇིགས་པར་གསུངས། །ཞེས་སོ། །ཡང་དག་ཀུན་རྫོབ་ནི། འཁྲུལ་པར་སྣང་ཡང་བདེ་འགྲོ་དང་ཐར་པའི་རྒྱུ་བྱེད་པ། དགེ་བ་བཅུའི་ལས་རྣམ་པར་དཀར་བ་སྦྱིན་པ་ལ་སོགས་པ་བསོད་ནམས་ཀྱི་ཚོགས་དང་། ཚོགས་སྦྱོར་མཐོང་སྒོམ་བཞིའི་སེམས་ཀྱི་ཏིང་ངེ་འཛིན་ཡེ་ཤེས་ཀྱི་རྒྱུར་རུང་བློའི་སྤྱོད་ཡུལ་ལམ་བདེན་གྱིས་བསྡུས་པ་རྣམས་ཏེ། རྒྱུད་བླ་མའི་འགྲེལ་པར། ལམ་བདེན་ཐམས་ཅད་ནི་འདུས་བྱས། འདུས་བྱས་ཐམས་ཅད་ནི་ཀུན་རྫོབ་སྟེ། །ཞེས་སོ། །ཆོས་ཉིད་རང་བཞིན་དུ་གནས་པ་སྟོང་པ་ཉིད་ཀྱི་ངོ་བོ་དང་རྗེས་སུ་འཇལ་བའི་ཤེས་རབ་སྤྲོ་བ་ཞི་བའི་རྣམ་པ་དང་བཅས་པ་ནི་དོན་དམ་བདེན་པ་སྟེ། དབྱེ་ན་རྣམ་གྲངས་པ་མཚན་མ་ཚིག་གི་དོན་དམ་དང་། རྣམ་གྲངས་མ་ཡིན་པ་ཡང་དག་གཤིས་ཀྱི་དོན་དམ་གཉིས་ལས། དང་པོ་ནི། རིགས་པས་ཕྱེ་ཞིང་གཞིགས་ན་གང་དུའང་མ་གྲུབ་པའི་ཆོས་ཉིད་དུ་ཐམས་ཅད་ཡེ་ནས་གནས་པར་རྟོགས་པའི་ཤེས་རབ་གཤིས་དང་མཐུན་པར་སྐྱེ་བ་སྟེ། བདེན་གཉིས་ལས། སྐྱེ་སོགས་བཀག་པ་དོན་དམ་དང་། །མཐུན་པའི་ཕྱིར་ཡང་འདོད་པ་ཡིན། །སྐྱེ་མེད་སྤྲོས་ཀུན་ཞི་བ་ལ། །དོན་དམ་ཞེས་པའི་བརྡ་མཛད་དོ། །ཞེས་སོ། །གཉིས་པ་ནི། ཆོས་རྣམས་གདོད་མ་ཉིད་ནས་ཡོད་མེད་ཀྱི་སྤྲོས་པ་ལས་འདས་པའི་དབྱིངས་རང་བཞིན་གྱིས་དག་པ་སྟེ། རྩ་ཤེས་ལས། གཞན་ལས་ཤེས་མིན་ཞི་བ་དང་། །རྣམ་རྟོག་མེད་དོན་ཐ་དད་མེད། །སྤྲོས་པ་རྣམས་ཀྱིས་མ་སྤྲོས་པ། །དེ་ནི་དེ་ཡི་མཚན་ཉིད་དོ། །ཞེས་སོགས་གསུངས། སྤྱིར་ཡང་བདེན་གཉིས་དབྱེ་བའི་སྐབས་འདིར་གཞུང་ཆེན་པོ་རྣམས་སུ། སྣང་བ་ཀུན་རྫོབ་དང་། སྟོང་པ་དོན་དམ་དུ་བཞག་པའི་ཚུལ་གཅིག་དང་། གང་གནས་སྣང་མཐུན་པའི་ཡུལ་ཡུལ་ཅན་གཉིས་ཀ་དོན་དམ་དང་། མི་མཐུན་པའི་ཡུལ་ཡུལ་ཅན་ལ་ཀུན་རྫོབ་ཏུ་བཞག་པ་སྟེ་འཇོག་ཚུལ་མི་འདྲ་བ་གཉིས་སུ་གནས་པས། དེ་གཉིས་སྐབས་དོན་གང་ཡིན་མ་འདྲེས་པར་སོ་སོར་ཤན་ཕྱེད་དགོས་པ་ནི་གནད་གལ་པོ་ཆེ་སྟེ་འཕྲོས་དོན་ནོ། །ལྟ་བ་ནི། བདག་མེད་པ་གཉིས་ཀ་ཕྱིན་ཅི་མ་ལོག་པར་རྟོགས་པའོ། །དེ་ལ་ཀུན་རྫོབ་ཏུ་ཆོས་ཐམས་ཅད་ཆུ་ཟླ་ལྟར་སྣང་ལ། དོན་དམ་པར་སྤྲོས་པ་ཐམས་ཅད་ཞི་བའི་ཚུལ་དུ་རྟོགས་པས་བདེན་གཉིས་ཀྱི་གནས་ལུགས་རྟོགས་པ་སྟེ། ལྟ་ཕྲེང་ལས། ཀུན་ནས་ཉོན་མོངས་པ་དང་རྣམ་པར་བྱང་བའི་ཆོས་ཐམས་ཅད་དོན་དམ་པར་ན་རང་བཞིན་མེད་པ་ཡིན་ལ། ཀུན་རྫོབ་ཏུ་ནི་སྒྱུ་མ་ཙམ་དུ་སོ་སོའི་མཚན་ཉིད་མ་འདྲེས་པར་ཡོད་དོ། །ཞེས་དང་། ལམ་རིམ་ལས། མཉམ་པའི་དོན་ཉིད་མ་ཤེས་ཤིང་། །ཀུན་རྫོབ་དོན་དམ་གཉིས་འབྱེད་པ། །ཆོས་དང་གང་ཟག་བདག་མེད་ན། །འདི་ནི་བྱང་ཆུབ་ས་པ་ཡིན། །ཞེས་གསུངས། སྐབས་འདིར་ཀུན་མཁྱེན་ཆེན་པོའི་ཐེག་མཆོག་མཛོད་དུ་འདི་ལྟར་གསུངས་ཏེ། ཐེག་ཆེན་དབུ་སེམས་གཉིས་ཀྱི། སེམས་ཙམ་པ་ལའང་དཀར་དམར་སྣ་ཚོགས་སུ་སྣང་བ་ཤེས་པ་དང་བཅས་པ་འདི་ཐམས་ཅད་རང་གི་སེམས་ཀྱི་རྣམ་པར་བདེན་པར་འདོད་པ་སེམས་ཙམ་རྣམ་བདེན་པ་དང་། ཤེས་པ་ནི་རྣམ་པར་བརྫུན་པ་འདོད་པ་སེམས་ཙམ་རྣམ་རྫུན་པ་གཉིས་ལས། དང་པོ་ནི་དོན་དུ་སྣང་བ་རང་གི་ཤེས་པའི་རྣམ་པ་ཕྱིར་ཤར་བ་ཙམ་སྟེ། རྫིང་འགྲམ་གྱི་ནོར་བུའི་ཤིང་གི་ཡལ་ག་ལ་བཏགས་པའི་ནོར་བུ་ཀེ་ཀེ་རུའི་གཟུགས་བརྙན་ཆུ་ནང་དུ་ཤར་བ་ན་ནོར་བུའི་རྣམ་པ་ཕྱི་རོལ་དུ་ཤར་བ་བཞིན་ནོ་ཞེས་འདོད་དོ། །འདི་ལ་དབྱེ་ན། རྣམ་པའི་གྲངས་དེ་སྙེད་ལ་ཤེས་པའི་གྲངས་ཀྱང་དེ་སྙེད་དུ་འདོད་པ་དང་། རྣམ་པ་དང་ཤེས་པ་སྒ་ོང་བཀས་པ་ལྟར་འདོད་པ་དང་། རྣམ་པ་དང་ཤེས་པ་སྣ་ཚོགས་གཉིས་མེད་དུ་འདོད་པ་གསུམ་ལས། དང་པོ་ནི། སྒྲ་ཐོས་པའི་དུས་ན་སྒྲ་འཛིན་གྱི་ཤེས་པ་གཅིག་པུ་སྐྱེ་ཡི། གཟུགས་ལ་སོགས་པའི་འཛིན་པའི་ཤེས་པ་མི་སྐྱེ་བ་ལྟར། ཡུལ་གང་ལ་འཇུག་པ་དེའི་ཤེས་པ་སྐྱེའི་གཞན་མི་སྐྱེ་བས། རྣམ་པའི་གྲངས་ཇི་སྙེད་པའི་ཤེས་པ་འདོད་པའོ། །གཉིས་པ་ནི། ཕྱི་རོལ་སྣ་ཚོགས་སུ་སྣང་བའང་ཤེས་པ་ལས་བྱུང་ལ། དེ་འཛིན་པའི་ཤེས་པའང་སེམས་ལས་བྱུང་བས་སྒོ་ང་བཀས་པ་ལྟར་རྣམ་པ་དང་ཤེས་པ་ཡུལ་ཡུལ་ཅན་སེམས་གཅིག་ལས་ཤར་བ་སྟེ། ད་ལྟ་ཡུལ་འཛིན་པ་ན་ཕྱི་རྣམ་པའི་ཤེས་པ་གཅིག་ལ། ནང་འཛིན་བྱེད་ཀྱི་ཤེས་པ་གཅིག་ཤར་བ་ཡང་། ཐོག་མ་མེད་པའི་བག་ཆགས་ཀྱིས་དེ་ལྟར་གཉིས་སྣང་ཡང་རང་རིག་པ་གཅིག་པུ་ལས་གཞན་དུ་གྲུབ་པ་མེད་པ་སྒོ་ང་བཀས་པ་ལྟ་བུའོ། །འོ་ན་ཕྱི་རྣམ་པའི་ཤེས་པ་གཅིག་ལ་དེའི་ཚེ་འཛིན་པའི་ཤེས་པ་གཅིག་བྱུང་དུས་རྟོག་གཉིས་ཅིག་ཅར་འགྱུར་རོ་ཞེ་ན། མི་འགྱུར་ཏེ། རྣམ་པའི་ཤེས་པ་དེ་རྟོག་མེད་ཡིན་པའི་ཕྱིར་རོ། །ཞེས་འདོད་དོ། །གསུམ་པ་ནི། ཕྱི་ཡུལ་གྱི་རྣམ་པ་སྣ་ཚོགས་སུ་སྣང་ཡང་། ནང་འཛིན་བྱེད་ཀྱི་ཤེས་པ་གཅིག་གིས་ཤེས་ཏེ། མཁར་གྱི་ནང་ན་སྤྲེའུ་གཅིག་འཇུག་པ་མྱུར་བས། གློ་སྐར་བཞིར་སྐེ་རིབ་རིབ་བྱུང་ནས་བལྟ་བ་ལྟར། སྒོ་ལྔ་ལ་ཤེས་པ་གཅིག་གིས་ཞུགས་ནས་ཡུལ་རིག་པའོ། །རིག་དུས་ནའང་རྣམ་པ་དང་ཤེས་པ་གཉིས་ཀ་སེམས་གཅིག་གི་རང་བཞིན་དུ་ཐ་མི་དད་དེ། རྨི་ལམ་གྱི་སྣང་བ་དང་འཛིན་བྱེད་རང་དུ་སྣང་བ་གཉིས་ཀ་ཡང་གཉིད་གཅིག་གི་ཤེས་པར་ཐ་མི་དད་པ་བཞིན་ནོ། །ཞེས་འདོད་དོ། །གཉིས་པ་རྣམ་རྫུན་པ་ནི། ཕྱི་དོན་གྱི་རྣམ་པ་ཤེས་པ་ལ་འཁྲུལ་པར་སྣང་བའི་བག་ཆགས་རྫུན་པ་ཡིན་གྱི་ཤེས་པར་བདེན་པ་མ་ཡིན་ལ། དེ་འཇལ་བྱེད་ཀྱི་ཤེས་པ་ཡང་རྫུན་པས་གཞལ་གྱི། མྱོང་བ་བདེན་པ་བས་གཞལ་བ་ནི་མེད་དེ། ཡུལ་ཤེས་གཉིས་ཀ་ཡང་འཁྲུལ་སྣང་རྫུན་པའི་རང་བཞིན་ཙམ་དུ་འདོད་དོ། །འདི་ལ་དབྱེ་ན་དྲི་བཅས་རྫུན་པར་འདོད་པ་དང་། དྲི་མེད་དག་པ་བར་འདོད་པ་གཉིས་ལས། དང་པོ་ནི། ད་ལྟའི་རྣམ་པ་སྣ་ཚོགས་སུ་སྣང་བ་དང་། དེ་འཇལ་བའི་ཤེས་པ་གཉིས་ཀ་བློའི་དྲི་མ་ཉིད་སྣང་བ་ཙམ་ལས། དོན་དམ་པར་གཉིས་སུ་མེད་པའི་ཡེ་ཤེས་ཁམས་ཀྱི་ཡོན་ཏན་དང་བཅས་པ་ཙམ་ཞིག་ཡོད་ཀྱི། རྣམ་ཤེས་སུ་གྲུབ་པ་ནི་ཅི་ཡང་མེད་དོ། །སངས་རྒྱས་ཀྱི་ཆོས་སྐུ་ལྷག་མ་མེད་པ་ནི། གཉིས་སུ་མེད་པའི་ཡེ་ཤེས་ཉིད་དེ། དྲི་མ་མེད་པའི་དེ་བཞིན་ཉིད་ཡིན་ལ། ལྷག་བཅས་ཀྱི་གནས་སྐབས་ན་བག་ལ་ཉལ་གྱི་དྲི་མ་ཅུང་ཟད་ཡོད་པས་འཁྲུལ་པར་སྣང་བ་གཟིགས་པ་དང་། རོ་རྒྱབ་སྙུང་བ་ལ་སོགས་པ་ཡོད་དོ་ཞེས་པ་དང་། ད་ལྟའི་སེམས་ལ་ཉོན་མོངས་པ་དང་། ཡེ་ཤེས་འདྲེས་པར་གནས་པའི་དྲི་མ་ཉོན་མོངས་པའི་ཆ་རྫུན་པ་བསལ་བས། ལྷག་མ་མེད་པའི་ཡེ་ཤེས་དག་པ་མངོན་དུ་བྱེད་པའོ་ཞེས་འདོད་དོ། །དག་པ་བ་ནི་རྣམ་པ་དང་རྣམ་ཤེས་རྫུན་པ་ཙམ་དུའང་གྲུབ་པ་མེད་དེ། མངོན་པར་ཆགས་པ་དག་གིས་ན་ཆུང་ཡིད་ལ་བྱེད་པ་གོམས་པ་ལས། ཇི་ཞིག་ན་བསམ་མ་དགོས་པར། དེའི་བྱེད་བཞིན་གྱི་སྣང་བ་མེད་པ་གསལ་སྣང་དུ་ཤར་བ་བཞིན་ནོ། །དེས་ན་ཡུལ་གྱི་རྣམ་པ་དཀར་དམར་སྣ་ཚོགས་སུ་སྣང་བ་དང་། འཇལ་བྱེད་ཀྱི་བློ་གཉིས་ཀ་མེད་བཞིན་སྣང་བ་གཟུགས་བརྙན་ལྟ་བུ་སྟེ། དེའི་དོན་ཉམས་སུ་མྱོང་བའི་སོ་སོ་རང་རིག་པའི་ཡེ་ཤེས་ཙམ་ཞིག་ཡོད་དོ་ཞེས་འདོད་དོ། །གཉིས་པ་དབུ་མ་ལ་རང་རྒྱུད་པ་དང་། ཐལ་འགྱུར་བ་གཉིས་ལས་དང་པོ་ནི། འདི་ལྟར་སྣ་ཚོགས་སུ་སྣང་བའི་རྣམ་པ་དང་འཇལ་བྱེད་མེད་པ་གསལ་སྣང་ཙམ་དུ་མ་ཟད་དོན་དམ་པར་སོ་སོ་རང་གི་རིག་པའི་ཡེ་ཤེས་དེ་ཡང་རང་བཞིན་གྱིས་ངོ་བོ་ཉིད་མེད་པའོ་ཞེས་འདོད་དོ། །འདི་ལ་དབྱེ་ན་སྒྱུ་མ་དོན་དམ་དུ་འདོད་པ་དང་། རབ་ཏུ་མི་གནས་པ་གཉིས་ལས། དང་པོ་ནི། ཡུལ་ཡུལ་ཅན་གྲུབ་པ་མེད་ལ། མ་གྲུབ་པ་རིག་པའི་ཡེ་ཤེས་སྨྲ་བརྗོད་མེད་ཙམ་ཞིག་དོན་དམ་པར་སྒྱུ་མའི་ཚུལ་དུ་ཡོད་པས། བསྒོམས་པའི་ཡོན་ཏན་ས་ལམ་དང་། མཐར་ཕྱིན་པའི་འབྲས་བུ་སངས་རྒྱས་ཀྱི་ཡེ་ཤེས་སྒྱུ་མ་ལྟ་བུ་ཐོབ་ནས་ཆོས་ཀྱི་སྐུའི་ངང་ནས་སྒྱུ་མ་ལྟ་བུས་དོན་མཛད་པ་ཡིན་ཏེ། ཡུམ་བར་མ་ལས། ཆོས་ཐམས་ཅད་རྨི་ལམ་ལྟ་བུ། སྒྱུ་མ་ལྟ་བུ། མྱ་ངན་ལས་འདས་པ་ཡང་རྨི་ལམ་ལྟ་བུ་སྒྱུ་མ་ལྟ་བུ། མྱ་ངན་ལས་འདས་པ་བས་ཆེས་ལྷག་པའི་ཆོས་ཤིག་ཡོད་ན། དེ་ཡང་རྨི་ལམ་ལྟ་བུ་སྒྱུ་མ་ལྟ་བུ་ཞེས་སོ། །ཆོས་ཐམས་ཅད་ནི་ཡུལ་ཤེས་སྣ་ཚོགས་པ་ཐམས་ཅད་དོ། །མྱ་ངན་ལས་འདས་པ་ནི་གཟུགས་སྐུ་བརྙེས་ནས་དོན་མཛད་པའོ། །དེ་བས་ལྷག་པའི་ཆོས་ནི་སོ་སོ་རང་རིག་པའི་དེ་བཞིན་ཉིད་དང་ཆོས་སྐུ་དམ་པའོ་ཞེས་འདོད་དོ། །འདི་ལ་སྒྱུ་མ་རིགས་གྲུབ་ཏུ་འདོད་པ་དང་། སྒྱུ་མ་ལྟར་སྣང་དུ་འདོད་པ་དང་། སྒྱུ་མ་ཙམ་པོར་འདོད་པ་ལ་སོགས་པ་རྣམ་གྲངས་རབ་ཏུ་མང་སྟེ། རང་རྒྱུད་འོག་མ་པ་ཞེས་གྲགས་པ་ཡིན་ནོ། །གཉིས་པ་ནི། དོན་དམ་པར་སྒྱུ་མ་ཙམ་དུའང་མི་གནས་ཏེ། ཡུལ་དང་རྣམ་པ་མེད་པས་དེ་མེད་པར་མྱོང་བའི་སོ་སོར་རང་རིག་ཀྱང་མེད་པ་ནི། མོ་གཤམ་གྱི་བུ་མེད་པས་དེ་འཇལ་བྱེད་ཀྱི་ཤེས་པ་མེད་པ་བཞིན་ནོ། །ཀུན་རྫོབ་ལ་བདེན་པར་གྲུབ་པ་མེད་པས་དོན་དམ་ལ་གང་ཡང་མི་གནས་ཏེ། རྨི་ལམ་སད་པའི་དུས་ན་རྟ་གླང་གི་སྣང་བ་འགགས་ཀྱང་། དང་པོ་ནས་མེད་པས་དོན་ལ་འགག་རྒྱུར་མ་གྲུབ་པ་བཞིན་ནོ། །ཡུམ་བར་མ་ལས། དོན་དམ་པར་ནི་འཁོར་བ་ཡང་མེད། མྱ་ངན་ལས་འདས་པ་ཡང་མེད། སྟོང་པ་ཉིད་ཀྱང་མེད་དེ། ཚིག་གི་བླ་དྭགས་ཙམ་དུ་བས་ལགས་སོ། །ཞེས་གསུངས་པ་ལྟ་བུའོ། །ཞེས་འདོད་དོ། །འདི་ལ་ཀུན་རྫོབ་རབ་ཏུ་མི་གནས་པ་དང་། རྒྱུ་མཚན་མི་གནས་པ་དང་། ལྡོག་ཆ་མི་གནས་པ་དང་། ལྡོག་བྱེད་མི་གནས་པ་དང་། གཅིག་མི་གནས་པ་དང་། དུ་མ་མི་གནས་པ་དང་། གཅིག་དང་དུ་མ་དང་བྲལ་བ་མི་གནས་པ་དང་། སྣང་ཙམ་རབ་ཏུ་མི་གནས་པ་ལ་སོགས་པ་རྣམ་གྲངས་དཔག་ཏུ་མེད་པ་ཡོད་དེ། དབུ་མ་རང་རྒྱུད་གོང་མ་པ་ཞེས་གྲགས་སོ། །དབུ་མ་ཐལ་འགྱུར་པ་ནི། དེ་ལྟར་དོན་དམ་པར་མ་གྲུབ་པ་དང་། ཀུན་རྫོབ་ཏུ་སྣང་ཙམ་སྒྱུ་མར་གྲུབ་པ་སོགས་ཐམས་ཅད་བཀག་ནས། ཡོད་མེད་ཀྱི་མཐའ་ལས་འདས་པའི་རང་བཞིན་ཁས་ལེན་ཐམས་ཅད་དང་བྲལ་བར་འདོད་དེ། འཕགས་པ་ཏིང་འཛིན་རྒྱལ་པོ་ལས། རྟག་དང་མི་རྟག་འདི་ཡང་མཐའ་ཡིན་ཏེ། །ཡོད་དང་མེད་ཅེས་བྱ་བ་གཉིས་ཀ་མཐའ། །དེ་ཕྱིར་གཉིས་ཀའི་མཐའ་ནི་རྣམ་སྤངས་ནས། །མཁས་པ་དབུས་ལའང་གནས་པར་མི་བྱེད་དོ། །ཞེས་པ་དང་། །དཀོན་མཆོག་ཏ་ལའི་མདོ་ལས། དེ་བཞིན་གཤེགས་པ་རྟག་ཏུ་སྐྱེ་མེད་ཆོས། །ཆོས་རྣམས་ཐམས་ཅད་བདེ་བར་གཤེགས་དང་འདྲ། །བྱིས་པའི་བློ་ཅན་མཚན་མར་འཛིན་པས་ན། །འཇིག་རྟེན་དག་ན་མེད་པའི་ཆོས་ལ་སྤྱོད། །ཅེས་དང་། རྩ་བ་ཤེས་རབ་ལས། གང་གིས་རྟེན་ཅིང་འབྲེལ་བ་འབྱུང་། །འགག་པ་མེད་པ་སྐྱེ་མེད་པ། །ཆད་པ་མེད་པ་རྟག་མེད་པ། །འོང་བ་མེད་པ་འགྲོ་མེད་པ། །ཐ་དད་དོན་མིན་དོན་གཅིག་མིན། །སྤྲོས་པ་ཉེར་ཞི་ཞིར་བསྟན་པ། །རྫོགས་པའི་སངས་རྒྱས་སྨྲ་རྣམས་ཀྱི། །དམ་པ་དེ་ལ་ཕྱག་འཚལ་ལོ། །ཞེས་པ་དང་། རྩོད་བཟློག་ལས། གལ་ཏེ་ངས་དམ་བཅས་འགའ་ཡོད། །དེ་ཚེ་ང་ལ་སྐྱོན་འདི་ཡོད། །ང་ལ་དམ་བཅའ་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་པ་དང་། དགག་བྱ་ཅི་ཡང་མེད་པས་ན། །ང་ནི་ཅི་ཡང་མི་འགོག་གོ །དེ་ཕྱིར་དགག་པར་བྱེད་དོ་ཞེས། །སྐུར་བ་དེ་ནི་ཁྱོད་ཀྱིས་བཏབ། །ཅེས་སོ། །དེ་ཡང་བློས་བཀོད་པའི་གྲུབ་མཐའ་གང་ཡང་མེད་དེ་སྤྲོས་པ་ཞི་བའི་ཕྱིར་ཞེས་འདོད་ཅིང་། སྣ་ཚོགས་སུ་སྣང་ཙམ་འཇིག་རྟེན་པས་ཇི་ལྟར་འཇོག་པ་ལྟར་བརྡ་ཤེས་པའི་ཡན་ལག་ཏུ་བཞག་ཀྱང་། དེ་ཡང་ཁས་ལེན་པ་མེད་པས། ཆོས་སུ་སྣང་བ་བདེན་རྫུན་ལས་འདས་པས་ཡོད་མེད་ཀྱི་མཐའ་དང་ད་ལྟའི་དུས་ནས་བྲལ་བར་འདོད་དོ། །འདི་ནི་སངས་རྒྱས་པ་རྣམས་ཀྱི་གྲུབ་པའི་མཐའ་སྨྲ་བ་རྣམས་ཀྱི་རྩེ་མོ་ཡིན་ནོ། །ཞེས་གསུངས་སོ། །དེ་ཡང་སྐབས་འདིར་ཤེས་པར་བྱ་བ། རྒྱལ་གསུང་འཁོར་ལོ་བར་ཐའི་བཀའ་དང་དགོངས་འགྲེལ་ཆེན་པོ་རྣམས་དོན་གྱི་ཟབ་དགོངས་འགལ་མེད་གཅིག་ཏུ་འབབ་ཀྱང་། གནས་སྐབས་དགོས་པའི་དབང་གིས་ཞལ་བཞེས་ཀྱི་ཁྱད་པར་ཅུང་ཟད་ཙམ་རེ་ལ་བརྟེན་ནས། དེ་དག་གི་གོ་བ་ལེན་ཚུལ་དང་རང་རང་གི་འདོད་ཞེན་སྦྱར་བའི་གྲུབ་མཐའི་དགག་སྒྲུབ་ཀྱི་སྤྲོས་པ་དུ་མ་འཕགས་བོད་གཉིས་ཀ་ན་བྱུང་མོད། དོན་ལ་དེ་གཉིས་གནད་ཀྱིས་མི་འགལ་བར་ཤེས་དགོས་ཏེ། འཁོར་ལོ་བར་བའི་དངོས་བསྟན་དབུ་མ་རིགས་ཚོགས་དང་དཔལ་ལྡན་ཟླ་བའི་གཞུང་རྣམས་ཀྱི་རྗེས་སུ་འབྲངས་ནས། སྙིང་པོའི་རང་བཞིན་དྲང་དོན་སྟོང་ཉིད་ཙམ་དུ་བཞེད་པ་རྣམས་ཀྱི་དགོངས་པ་ནི། ཆོས་དབྱིངས་ངོ་བོ་སྟོང་ཕྱོགས་ལ་དགོངས་ཤིང་། སྙིང་པོའི་ཡོན་ཏན་རྣམས་ད་ལྟ་སོ་སྐྱེའི་རྒྱུད་ལ་མངོན་གྱུར་དུ་མེད་པས། ཚོགས་གཉིས་གོམས་པའི་རྒྱུ་ལས་ཕྱིས་གསར་དུ་སྒྲུབ་པ་ལྟར་སྣང་བའི་ཕྱིར་བསྐྱེད་བྱ་སྐྱེད་བྱེད་ཀྱི་རྒྱུ་འབྲས་མཚན་ཉིད་པ་ལྟར་སྔ་ཕྱིར་ཁས་ལེན་པ་མཚན་ཉིད་ཐེག་པ་སྤྱིའི་དབང་དུ་མཛད་དེ་སྣང་ཚུལ་ཀུན་རྫོབ་དབང་བཙན་དུ་མཛད་པ་ཡིན་ལ། འཁོར་ལོ་ཐ་མའི་མདོ་དང་དབུ་མ་ཆོས་དབྱིངས་བསྟོད་པ་རྒྱུད་བླ་སོགས་བྱམས་གཞུང་ཕྱི་མ་རྣམས་ཀྱི་རྗེས་སུ་འབྲངས་ནས། སྙིང་པོའི་རང་བཞིན་སྒྲ་ཇི་བཞིན་པར་ཁས་ལེན་པ་རྣམས་ཀྱིས་ནི། འོད་གསལ་བའི་སེམས་ཉིད་བདེ་བར་གཤེགས་པའི་སྙིང་པོ་གདོད་མ་ནས་བྲི་གང་བསལ་བཞག་དང་བྲལ་བར་སེམས་ཅན་ཐམས་ཅད་ཀྱི་སེམས་ཀྱི་ཆོས་ཉིད་ཀྱི་ཚུལ་དུ་གནས་པའི་ཕྱིར། ཟག་པ་མེད་པའི་ཡོན་ཏན་གྱི་ཆོས་ཐམས་ཅད་ཀྱང་ཉི་མཁའ་བཞིན་ཡེ་ནས་འབྲལ་མི་ཤེས་པའི་སེམས་ཀྱི་ཆོས་ཉིད་ཀྱི་ཚུལ་དུ་བཞུགས་པས། རྐྱེན་གྱིས་ཐེག་པ་ཆེན་པོའི་རིགས་སད་ནས་ལམ་གོམས་པའི་སྟོབས་ཀྱིས། མེད་སྣང་གློ་བུར་གྱི་སྒྲིབ་པའི་དྲི་མ་དག་སྟོབས་ཀྱིས་ལམ་དང་འབྲས་བུའི་ཡོན་ཏན་གྱི་ཚོགས་རྣམས་མངོན་གྱུར་ལྟ་བུར་སྣང་ནའང་། བྲལ་རྒྱུ་བྲལ་འབྲས་ཙམ་ལས་བསྐྱེད་བྱ་སྐྱེད་བྱེད་ཀྱི་རྒྱུ་འབྲས་མཚན་ཉིད་པར་མི་བཞེད་དེ། རྗེ་བཙུན་གྱིས། ཉེས་པ་གློ་བུར་དང་ལྡན་དང་། །ཡོན་ཏན་རང་བཞིན་གྱིས་ལྡན་ཕྱིར། །ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པ་ཆོས་ཉིད་དོ། །ཞེས་སོ། །དེས་ན་ཆོས་ཉིད་འགྱུར་བ་མེད་པ་དང་། གནས་ལུགས་དོན་དམ་བདེན་པ་དང་། རང་བྱུང་གི་ཡེ་ཤེས་འདུས་མ་བྱས་སོགས་སྒོ་དུ་མ་ནས་སེམས་འགྲེལ་སྐོར་གསུམ་སོགས་འབྲས་བུ་གསང་སྔགས་དང་སྒོ་མཐུན་པར་མདོ་སྔགས་མཚམས་སྦྱོར་གྱི་ཚུལ་གྱིས་མཐར་ཐུག་ཐེག་གཅིག་ཏུ་སྒྲུབ་པར་མཛད་པ་ནི་གནས་ཚུལ་དོན་དམ་དང་མཐུན་པ་ཡིན་ལ། རང་ལུགས་ཀུན་མཁྱེན་ཆོས་ཀྱི་རྒྱལ་པོས་ནི། དེ་གཉིས་གནད་ཀྱིས་མི་འགལ་བ་ལ་དགོངས་ནས་མདོ་ཕྱོགས་ཀྱི་གྲུབ་མཐའ་འཇོག་པའི་སྐབས་འདིར་འཁོར་ལོ་བར་པའི་དངོས་བསྟན་དབུ་མ་ཐལ་འགྱུར་པ་ཉིད་གྲུབ་མཐའི་རྩེ་མོར་ཞལ་གྱིས་བཞེས་པ་ནི། གཞི་ཀ་དག་གི་གནས་ལུགས་དང་མཐུན་ཞིང་དངོས་སྨྲ་བ་རྣམས་ཀྱི་ལོག་རྟོག་གི་རྒོལ་བ་འཇོམས་པ་ལ་ཆེས་སྟོབས་དང་ལྡན་པ་ཡིན་ཞིང་། སྔགས་ཐུན་མིན་སྤྱི་དང་ཁྱད་པར་རང་བཞིན་རྫོགས་པ་ཆེན་པོའི་གཞིའི་གནས་ལུགས་གཏན་ལ་འབེབས་པའི་སྐབས་རྣམས་སུ། འཁོར་ལོ་ཐ་མའི་མདོ་དང་ཁྱད་པར་རྒྱུད་བླ་མ་སོགས་ཀྱི་ལུང་རྣམས་དྲངས་ནས་ངེས་དོན་གྱིས་མདོ་རྒྱུད་ཟབ་མོ་རྣམས་དགོངས་པའི་གསང་མཛོད་གཅིག་པར་ཡིད་བཞིན་མཛོད་ཀྱི་ལེའུ་བཅོ་བརྒྱད་པ་རྩ་འགྲེལ་དང་། གྲུབ་མཐའ་མཛོད་སོགས་མཛོད་ཆེན་བདུན། ངལ་གསོ་སྐོར་གསུམ། ཡང་ཏིག་རྣམ་གསུམ་གྱིས་མཚོན་གསུང་རབ་མཐའ་དག་ནས་གསལ་བོར་བསྟན་མཛད་པ་ནི། རང་བཞིན་ལྷུན་གྱིས་གྲུབ་པའི་གནས་ལུགས་འོད་གསལ་མཐར་ཐུག་གི་དགོངས་པ་དང་གནད་གཅིག་པའི་ཕྱིར་དེ་ཉིད་ངེས་དོན་མཐར་ཐུག་ཏུ་ལུང་རིགས་ཚད་མ་གསུམ་གྱིས་ཡང་དང་ཡང་དུ་སྒྲུབ་པར་མཛད་པ་བཞིན། ཆོས་ཀྱི་རྒྱལ་པོ་སྨིན་གླིང་པ་སྐུ་མཆེད་གཙོས་གསང་ཆེན་སྔ་འགྱུར་གྱི་བསྟན་པའི་ཤིང་རྟ་བ་ཆེན་པོ་རྣམས་ཀྱིས་ངེས་དོན་སེང་གེའི་སྒྲ་ཆེན་པོ་སྒྲོགས་པར་མཛད་པ་ཡིན་ལ། དེའི་ཚུལ་མདོ་ཙམ་ནི་གཞན་དུ་བཤད་ཟིན་ལ། རྩོད་དུས་ཀྱི་ཐམས་ཅད་མཁྱེན་པ་དཔལ་སྤྲུལ་རིན་པོ་ཆེས་ཀྱང་སྙིང་ཐིག་གི་རྒྱུད་དོན་རྣམ་པར་དབྱེ་བའི་འཕྱོང་མུན་ཁང་སྒྲོན་མེ་སོགས་ལས་གསལ་བར་བསྟན་པས་ཀྱང་ཤེས་པར་ནུས་ལ། དོན་ལ་ཆོས་དབྱིངས་སྣང་སྟོང་ཟུང་འཇུག་སྤྲོས་བྲལ་མཉམ་པ་ཆེན་པོའི་དགོངས་པའི་གཏིང་ཕྱིན་ན་དགག་སྒྲུབ་ཀྱི་སྤྲོས་པའི་འཛིན་སྟངས་ཐམས་ཅད་མཐའ་བྲལ་དབུ་མ་ཆེན་པོའི་ཀློང་དུ་ཞི་ནས་བསམ་གྱིས་མི་ཁྱབ་པའི་ཡེ་ཤེས་ཀྱི་སྣང་བ་རྒྱས་པར་འགྱུར་བས། དེ་ལྟར་གོ་ཞིང་ལེགས་པར་ཁོང་དུ་ཆུད་ན་དབུ་ཕྱག་རྫོགས་གསུམ་སོག་གང་ལྟར་བཤད་ཀྱང་དོན་གྱི་དགོངས་པ་གཅིག་ཏུ་འབབས་པས། ལྟ་སྒོམ་གྲུབ་མཐའི་འགག་རྣམས་རང་སར་གྲོལ་ནས་དགོངས་པའི་གསང་མཛོད་ཡེ་ཤེས་ཀྱི་ཀློང་དུ་འདྲེ་བར་འགྱུར་བ་ནི་གལ་ཆེ་འཕྲོས་དོན་དུ་སྨོས་པ་ཡིན་ནོ། །ཚུལ་ཁྲིམས་ནི། སྡོམ་སྡུད་དོན་བྱེད་ཀྱི་ཚུལ་ཁྲིམས་གསུམ་སྟེ། དེ་ལས་ཉེས་སྤྱོད་སྡོམ་པའི་ཚུལ་ཁྲིམས་ནི། དབུ་མ་ལུགས་ལ་སེམས་བསྐྱེད་ལེན་པའི་རྟེན་དུ་སོ་ཐར་གྱི་སྡོམ་ལྡན་དགོས་པ་མ་ངེས་ཀྱང་། བྱང་སར་ཉེར་སྤྱོད་སྡོམ་པའི་ཚུལ་ཁྲིམས་སོ་ཐར་རིགས་བདུན་ལ་བཤད་པ་ལྟར་དེ་དག་གཞིར་བཞག་གི་སྟེང་དུ། བྱང་ཆུབ་ལ་དམིགས་པའི་སྨོན་སེམས་དང་། དེའི་ཆེད་དུ་ཚོགས་དང་བྱ་བ་ལ་སྦྱོར་བའི་འཇུག་སེམས་ཏེ། དབུ་སེམས་གང་རུང་གི་ཆོ་གས་བླངས་ལ་དེའི་བསླབ་བྱ་ལ་བསླབ་¡eཔར་ཞུ་མཆན། ¡fབྱའོ། །དེ་ཡང་སོ་ཐར་གྱི་དབང་དུ་བྱས་ན་དུས་ཁྲིམས་བསྙེན་གནས་ཡན་ཡག་བརྒྱད་པ་དང་། གཏན་ཁྲིམས་སོ་སོར་ཐར་པ་རིགས་བདུན་ཏེ། དེ་རྣམས་ཀྱང་བསམ་པ་ཚེ་འདིས་རྒྱལ་པོའི་ཆད་པ་དང་དཔྱ་ཁྲལ་སོགས་ལ་འཇིགས་ནས་དེ་ལས་སྐྱོབ་པའི་ཆེད་དུ་བླངས་པ་འཇིགས་སྐྱོབ། ཕྱི་མར་ལྷ་མིའི་གོ་འཕང་དང་། ཚེ་འདིར་ཟས་གོས་སོགས་ཀྱི་བདེ་སྐྱིད་ལ་དམིགས་ནས་བླངས་པ་ལེགས་སྨོན་ཏེ། འདི་གཉིས་མངོན་མཐོ་ཙམ་ལས་ངེས་ལེགས་ཐར་པའི་རྒྱུར་མི་འགྱུར་ཞིང་། འཁོར་བའི་སྡུག་བསྔལ་མཐའ་དག་ལས་རང་ཉིད་གཅིག་པུ་ཐར་འདོད་ཀྱིས་བླངས་པ་ངེས་འབྱུང་གི་ཚུལ་ཁྲིམས་ཏེ་ཐེག་དམན་གྱི་སོ་ཐར་མཚན་ཉིད་པ་དང་། དེ་ལ་བྱང་ཆུབ་སེམས་ཀྱིས་ཟིན་པ་ན་ཐེག་ཆེན་སོ་ཐར་དུ་འགྱུར་ལ། དེ་ཡང་དང་པོར་བླངས་པའི་དུས་འཇིག་སྐྱོབ་དང་ལེགས་སྨོན་གྱི་ཚུལ་ཁྲིམས་ཡིན་ཡང་། ཕྱིས་ངེས་འབྱུང་ནམ་སྐྱེས་པ་ན་ངེས་འབྱུང་དང་། བྱང་སེམས་ནམ་སྐྱེས་པ་ན་ཐེག་པ་ཆེན་པོའི་སོ་ཐར་དུ་འགྲོ་བ་ཡིན་པས་གནད་འདི་ཤེས་པ་གལ་ཆེ་གསུངས། བྱང་སེམས་རང་གི་དབང་དུ་བྱས་ན། དབུ་མ་ལུགས་དང་། སེམས་ཙམ་གྱི་བསླབ་བྱ་གཉིས་ལས། དང་པོ་ནི། རྣམ་ངེས་ལས། དཀོན་མཆོག་དཀོར་འཕྲོག་དང་ནི་ཆོས་སྤོང་ལས། །ཚུལ་ལྡན་ཚུལ་འཆལ་ཁྲིམས་གཅོད་བསླབ་འབེབས་སོགས། །མཚམས་མེད་ལས་བྱེད་ལོག་ལྟ་ལྔ་རྒྱལ་པོ། །གྲོང་ལྗོངས་གྲོང་ཁྱེར་གྲོང་རྡལ་ཡུལ་འཁོར་རྣམས། །འཇོམས་པར་བྱེད་པའང་བློན་པོར་ངེས་པ་ལྔ། །མ་སྦྱངས་སྟོང་ཉིད་བརྗོད་སྔས་ཉན་ཐོས་སྨོན། །རྫོགས་བྱང་ཕྱིར་ལྡོག་ཐེག་དམན་སེམས་བསྐྱེད་དང་། །སོ་ཐར་སྤངས་ནས་ཐེག་ཆེན་སློབ་པ་དང་། །ཉན་ཐོས་ཐེག་པས་ཆགས་སོགས་མི་ཟློག་པས། །དེ་བཟློག་དེ་ཡི་འབྲས་བུ་མེད་པར་བྱས། །ཕྲག་དོག་དབང་གིས་བདག་བསྟོད་གཞན་སྨོད་དང་། །རྙེད་དང་བཀུར་སྟིའི་ཆེད་དུ་བདག་འཚོང་དང་། །དགེ་སློང་ཆད་པ་གཅོད་འཇུག་སུག་འབུལ་དང་། །སྤོང་བའི་ལོངས་སྤྱོད་ཁ་ཏོན་པ་ལ་བྱིན། །ཞི་གནས་འདོར་བཅུག་ཕལ་ལ་འབྱུང་ངེས་བརྒྱད། །དེ་དེར་འབྱུང་ཉེས་བཞག་གིས་ཀུན་ལ་ཀུན། །མིང་དུ་བཅོ་བརྒྱད་རྫས་སུ་བཅུ་བཞི་སྟེ། །སྨོན་འཇུག་སེམས་བཏང་དེ་རྣམས་རྩ་ལྟུང་ཡིན། །ཞེས་རྩ་ལྟུང་ཉི་ཤུ་དང་། གཉིས་པ་ནི། ཐོགས་མེད་ལུགས་ཀྱི་སྨོན་པའི་བསླབ་བྱ་ལ། །སེམས་ཅན་བློས་མི་བཏང་དང་ཕན་ཡོན་དྲན། །ཚོགས་བསགས་བྱང་སེམས་སྦྱང་ལ་བརྩོན་པ་དང་། །དཀར་ནག་ཆོས་བརྒྱད་བླང་དོར་སྨོན་པའི་ཡིན། །མཆོད་འོས་བསླུ་དང་འགྱོད་མེད་འགྱོད་པ་བསྐྱེད། །དམ་པར་སྐུར་འདེབས་འགྲོ་ལ་གཡོ་སྒྱུ་སྤྱོད། །ནག་པོའི་ཆོས་བཞི་སྤོང་ཞིང་ལྡོག་པ་ནི། །དཀར་པོའི་ཆོས་བཞི་ཡིན་པས་ཀུན་ཏུ་སྤྱད། །རྙེད་བཀུར་ལྷག་ཞེན་བདག་བསྟོད་གཞན་སྨོད་དང་། །སེར་སྣས་ཟང་ཟིང་ནོར་དང་ཆོས་མི་སྟེར། །ཁྲོ་བས་གཞན་འཚོག་ཤད་སྦྱངས་ཀྱིས་མི་ལྡོག །གཡོམ་ལས་ཆོས་ལྟར་བཅོས་མོས་སྟོན་པར་བཞི། །རྩ་ལྟུང་བཞི་སྟེ་འཇུག་པའི་བསླབ་བྱའོ། །ཞེས་གསུངས་པ་ལྟར་སྨོན་པའི་བསླབ་བྱ་སེམས་ཅན་བློས་མི་བཏང་བ་སོགས་བཞི། བྱང་ཆུབ་ཀྱི་སེམས་མི་བརྗེད་པའི་ཐབས་དཀར་ནག་ཆོས་བརྒྱད་ལ་བླང་དོར་བྱ་ཞིང་། འཇུག་པའི་བསླབ་བྱ་རྩ་ལྟུང་བཞི་སོགས་དྲན་ཤེས་བཞིན་བག་ཡོད་དང་ལྡན་པའི་སྒོ་ནས་སྲུང་བའོ། །དགེ་བ་ཆོས་སྡུད་ཀྱི་ཚུལ་ཁྲིམས་ནི། ཚོགས་གཉིས་དང་འབྲེལ་བའི་ཕར་ཕྱིན་དྲུག་སོགས་དགེ་བའི་ཆོས་རྒྱ་མཚོ་ལྟ་བུ་སྒྲུབ་ཅིང་། དེའི་མི་མཐུན་ཕྱོགས་སྤང་བ་ལ་བསླབ་པར་བྱ་བའོ། །སེམས་ཅན་དོན་བྱེད་ཀྱི་ཚུལ་ཁྲིམས་ནི། བསམ་པ་དགེ་བའི་རྩ་བ་ཆེ་ཆུང་ཅི་སྒྲུབ་ཀྱང་གཞན་དོན་ལ་དམིགས་པ་དང་། སྦྱོར་བ་བསྡུ་དངོས་བཞིའི་སྒོ་ནས་སེམས་ཅན་གྱི་དོན་སྒྲུབ་ཅིང་། གཞན་དོན་ཡལ་བར་དོར་བའི་བློ་སྤང་བའོ། །བསྡུ་དངོས་བཞི་ནི། པདྨ་སྤུང་པ་ལས། སྦྱིན་པའི་གཡབ་མོས་ལེགས་བོས་ཏེ། །སྙན་པར་སྨྲ་བའི་ཚིག་གིས་བསུ། །དོན་མཐུན་པ་ཡིས་བག་ཕབ་སྟེ། །དོན་སྤྱོད་གྲོས་ཆེན་གདབ་པར་བྱ། །ཞེས་སོ། །སྒོམ་པ་ནི། སྤྱིར་སློབ་ལམ་བཞིའི་བྱང་ཆུབ་ཀྱི་ཆོས་སུམ་ཅུ་རྩ་བདུན་སྒོམ་ཞིང་། བྱེ་བྲག་ཏུ། ཐོག་མ་ནས་ཇི་ལྟར་ཉམས་སུ་ལེན་པའི་ཚུལ་འཁོར་ལོ་ཐ་མ་ངེས་དོན་གྱི་མདོ་སྡེའི་དབང་དུ་བྱས་ནས། དེ་བཞིན་གཤེགས་པའི་སྙིང་པོའི་ཚུལ་ཁོང་དུ་ཆུད་པར་བྱས་ལ། རིགས་ཅན་དེས་བྱང་ཆུབ་མཆོག་ཏུ་སེམས་བསྐྱེད་ནས། ཞི་ལྷག་ཟུང་འཇུག་གི་ཏིང་ངེ་འཛིན་སྒོམ་པར་བྱེད་པའོ། །དེ་ལ་ཁོ་བོའི་བླ་མ་ངེས་པ་དོན་གྱི་ཐམས་ཅད་མཁྱེན་པ་འཇམ་དབྱངས་མཁྱེན་བརྩེའི་དབང་པོས་འདི་ལྟར་བཞེད་དེ། ཚོགས་ལམ་ཆུང་ངུར་དྲན་པ་ཉེ་བར་བཞག་པ་བཞི་སྟེ། དྲན་པ་ནི་ལུས་ལ་སོགས་པ་རང་དང་སྤྱིའི་མཚན་ཉིད་ཚུལ་བཞིན་དུ་ཤེས་པ་དང་། ཉེ་བར་བཞག་པ་ནི་དེའི་ངང་དུ་རྩེ་གཅིག་གིས་མཉམ་པར་བཞག་པ་སྟེ། འདི་ལ་དངོས་པོ་ཡོངས་སུ་རྟོགས་པའི་ལམ་ཞེས་ཀྱང་བྱའོ། །ཇི་ལྟར་བསྒོམ་པའི་ཚུལ་ལ་ལུས་དྲན་པ་ཉེར་བཞག་ནི། མཉམ་བཞག་ཏུ་ཕྱི་ནང་གི་ལུས་རང་བཞིན་གྱིས་མ་གྲུབ་པ་ནམ་མཁའ་ལྟ་བུ་དང་། རྗེས་ཐོབ་ཏུ་དུར་ཁྲོད་ཀྱི་གཟུགས་རྙིང་པ་ལྟར་མི་གཙང་བ་དང་། བདེན་མེད་སྒྱུ་མའི་དཔེ་བརྒྱད་ཀྱི་ཚུལ་དུ་གཏན་ལ་ཕབ་ནས་བསྒོམ་པའོ། །ཚོ ར་བ་དྲན་པ་ཉེར་བཞག་ནི། མཉམ་བཞག་ཏུ་ཕྱི་ནང་གི་ཚོར་བ་བ དེ་སྡུག་བར་མའི་རྣམ་པར་ཤར་བ་ཐམས་ཅད་གདོད་ནས་མ་སྐྱེས་པ་དང་། རྗེས་ཐོབ་ཏུ་ཚོར་བ་སྡུག་བསྔལ་བ་ནི་སྡུག་བསྔལ་དང་། བདེ་བ་ལྟར་སྣང་བ་ནི་འགྱུར་བ་དང་། བཏང་སྙོམས་ནི་ཁྱབ་པ་འདུ་བྱེད་ཀྱི་སྡུག་བསྔལ་ཁོ་ན་ལས་མ་འདས་པར་ཤེས་ཤིང་སྙིང་པོ་མེད་པར་གཏན་ལ་ཕབ་ནས་བ སྒོམ་པའོ། །སེམས་དྲན་པ་ཉེར་བཞག་ནི། མཉམ་བཞག་ཏུ་སེམས་ཀྱི་ཆོས་ཉིད་རང་བཞིན་གྱིས་སྟོང་པ་ཉིད་སྤྲོས་པའི་མཐའ་ཐམས་ཅད་དང་བྲལ་བ་དང་། རྗེས་ཐོབ་ཏུ་ཅིར་ཡང་མ་འགགས་ཤིང་གང་དུའང་མི་གནས་པར་གཏན་ལ་ཕབ་ནས་བསྒོམ་པའོ། །ཆོས་དྲན་པ་ཉེར་བཞག་ནི། མཉམ་བཞག་ཏུ་འཁོར་འདས་ཀྱི་ཆོས་ཐམས་ཅད་སྟོང་ཞིང་བདག་མེད་པར་མཉམ་པ་ཉིད་དང་། རྗེས་ཐོབ་ཏུ་རང་རང་གི་རྒྱུ་རྐྱེན་རྟེན་འབྲེལ་ཚོགས་པ་ལས་བྱུང་བ་སྒྱུ་མ་ལྟ་བུར་གཏན་ལ་ཕབ་ནས་བསྒོམ་པའོ། །དེ་ལྟར་བསྒོམ་པའི་དགོས་པ་ནི། འཕགས་པའི་བདེན་པ་བཞི་ལ་འཇུག་པར་བྱ་བའི་ཕྱིར་ཏེ། ལུས་དྲན་པ་ཉེ་བར་བཞག་པ་ལས་ནི་སྡུག་བསྔལ་ཤེས་པ་ལ་འཇུག་སྟེ། ལུས་འདུ་བྱེད་ཀྱི་སྡུག་བསྔལ་གྱིས་རབ་ཏུ་ཕྱེ་བར་རྟོགས་པའི་ཕྱིར། ཚོར་བ་དྲན་པ་ཉེ་བར་བཞག་པ་ལས་ནི། ཀུན་འབྱུང་སྤོང་བ་ལ་འཇུག་སྟེ། ཀུན་འབྱུང་གི་གཙོ་བོ་སྲེད་པ་ནི་ཚོར་བ་གསུམ་གྱི་རྒྱུ་ཅན་དུ་རྟོགས་པའི་ཕྱིར། སེམས་དྲན་པ་ཉེ་བར་བཞག་པ་ལས་ནི། འགོག་པ་མངོན་དུ་བྱ་བ་ལ་འཇུག་སྟེ། དེ་ལས་བདག་དང་བྲལ་བའི་རྣམ་པར་ཤེས་པ་སྐད་ཅིག་གིས་འཇིག་པར་རྟོགས་པས་མྱ་ངན་ལས་འདས་པའི་ཚེ་བདག་ཆད་ཀྱིས་དོགས་པའི་སྐྲག་པ་མེད་པའི་ཕྱིར། ཆོས་དྲན་པ་ཉེ་བར་བཞག་པ་ལས་ནི། ལམ་གྱི་བདེན་པ་བསྒོམ་པ་ལ་འཇུག་སྟེ། ཉོན་མོངས་པའི་ཆོས་རྣམས་སྤང་བྱ་དང་རྣམ་པར་བྱང་བའི་ཆོས་རྣམས་བླང་བྱར་རྟོགས་པའི་ཕྱིར་རོ། །ཚོགས་ལམ་འབྲིང་དུ་ཡང་དག་པར་སྤོང་བ་བཞི་སྟེ། བརྩོན་འགྲུས་ཀྱིས་དགེ་བ་བསྐྱེད་ཅིང་མི་དགེ་བའི་ཆོས་རྣམས་སྤོང་བས་ན་ཡང་དག་པར་སྤོང་བ་སྟེ་རྩོལ་བ་ལས་བྱུང་བའི་ལམ་ཞེས་བྱའོ། །བསྒོམ་ཚུལ་ནི། མི་དགེ་བའི་ཆོས་སྔར་མ་སྐྱེས་པ་རྣམས་མི་སྐྱེད་ཅིང་། སྐྱེས་པ་རྣམས་ཡང་དག་པར་སྤོང་བ་དང་། དགེ་བའི་ཆོས་སྔར་མ་སྐྱེས་པ་རྣམས་བསྐྱེད་ཅིང་། སྐྱེས་པ་རྣམས་གོང་ནས་གོང་དུ་ཡང་དག་སྤེལ་བ་སྟེ། རེ་རེ་ལའང་། འདུན་པ་བསྐྱེད་པ་དང་། འབད་པ་དང་། བརྩོན་འགྲུས་རྩོམ་པ་དང་། སེམས་རབ་ཏུ་འཛིན་པ་དང་། རབ་ཏུ་འཇོག་པའི་ཚུལ་གྱིས་བསྒོམ་པའོ། །དེ་ལ་འདུན་པ་བསྐྱེད་པ་ནི། དང་པོར་བླང་དོར་ལ་ཡིད་ཆེས་པའི་ཚུལ་གྱིས་སོ། །འབད་པ་ནི་སེམས་དེ་ལས་གཞན་དུ་མི་ཡེངས་པའི་ཚུལ་གྱིས་སོ། །བརྩོན་འགྲུས་རྩོམ་པ་ནི། བྱིང་རྒོད་ལ་སོགས་པ་ཞི་བར་བྱ་བའི་དོན་དུའོ། །སེམས་རབ་ཏུ་འཛིན་པ་ནི་བྱིང་རྨུགས་སུ་གྱུར་ན་རྒྱལ་བའི་སྐུ་དང་ཡོན་ཏན་ལ་སོགས་སེམས་སྤྲོ་བར་གྱུར་པའི་གནས་ལ་དམིགས་ནས་སེམས་རབ་ཏུ་འཛིན་པའོ། །སེམས་རབ་ཏུ་འཇོག་པ་ནི་འཕྲོ་རྒོད་དུ་གྱུར་ན་འཁོར་བའི་སྡུག་བསྔལ་སོགས་སྐྱོ་བར་འགྱུར་བའི་ཡུལ་ལ་དམིགས་ནས་སེམས་རབ་ཏུ་འཇོག་པའོ། །ཚོགས་ལམ་ཆེན་པོར་རྫུ་འཕྲུལ་གྱི་རྐང་པ་བཞི་སྟེ། སྤྱན་དང་མངོན་ཤེས་རྫུ་འཕྲུལ་ལ་སོགས་པ་འགྲུབ་པའི་རྒྱུ་ཞི་ལྷག་ཟུང་འབྲེལ་གྱི་ཏིང་འཛིན་ལས་སུ་རུང་བར་གོམས་པར་བྱེད་པས་ན་རྫུ་འཕྲུལ་གྱི་རྐང་པ་སྟེ། ཏིང་ངེ་འཛིན་ཡོངས་སུ་སྦྱང་བའི་ལམ་ཞེས་བྱའོ། །བསྒོམ་ཚུལ་ནི། ཉེས་པ་ལྔའི་གཉེན་པོར་སྤོང་བའི་འདུ་བྱེད་བརྒྱད་ལྡན་པའི་ཏིང་ངེ་འཛིན་སྒོམ་པར་བྱེད་པ་སྟེ། ཉེས་པ་ལྔ་ནི། དབུས་མཐར། ལེ་ལོ་དང་ནི་༡གདམས་ངག་རྣམས། ༢ །བརྗེད་དང་བྱིང་དང་རྒོད་པ་དང་། ༣ །འདུ་མི་བྱེད་དང་༤ འདུ་བྱེད་དེ། ༥ །འདི་དག་ཉེས་པ་ལྔར་འདོད་དོ། །ཞེས་སོ། གཉེན་པོ་བརྒྱད་ནི། ལེ་ལོའི་གཉེན་པོ་བཞི་སྟེ། དངོས་རྩོལ་བ། ༡ གནས་འདུན་པ།༢ རྒྱུ་དད་པ། ༣ འབྲས་བུ་ཤིན་སྦྱངས་སོ། ༤ །གདམས་ངག་བརྗེད་པའི་གཉེན་པོ་དྲན་པ། ༥ བྱིང་རྒོད་ཀྱི་གཉེན་པོར་ཤེས་བཞིན། ༦ གཉེན་པོ་མངོན་པར་འདུ་མི་བྱེད་པའི་གཉེན་པོར་མངོན་པར་འདུ་བྱེད་པ། ༧ བྱིང་རྒོད་ཞི་ནས་ཀྱང་མངོན་པར་འདུ་བྱེད་པའི་གཉེན་པོར་འདུ་བྱེད་བཏང་སྙོམས་༨ རྣམས་སོ། །དེ་ལ་དབྱེ་ན། བསམ་གཏན་གྱི་འབྲས་བུ་ལ་མངོན་པར་དད་ཅིང་གུས་པའི་འདུན་པས་ཏིང་ངེ་འཛིན་ལ་སྦྱོར་བས་སེམས་ལས་སུ་རུང་བ་ཐོབ་པ་འདུན་པའི་རྫུ་འཕྲུལ་གྱི་རྐང་པ། དེ་བཞིན་དུ་རྒྱུན་དུ་སྦྱོར་བའི་བརྩོན་འགྲུས་ཀྱི་སེམས་ལས་སུ་རུང་བ་ཐོབ་པ་བརྩོན་འགྲུས་ཀྱི། སྔོན་དུ་ཏིང་ངེ་འཛིན་ལ་སེམས་པའི་བག་ཆགས་དང་ལྡན་པས་སེམས་ལས་སུ་རུང་བ་ཐོབ་པའི་སེམས་ཀྱི། དགེ་བའི་བཤེས་གཉེན་ལས་ཐོས་པའི་དམིགས་པ་རྣམས་བསམ་བྱུང་གི་ཤེས་རབ་ཀྱིས་རྣམ་པར་འབྱེད་པ་ལ་བསླབས་པས་སེམས་ལས་སུ་རུང་བ་ཐོབ་པ་དཔྱོད་པའི་རྫུ་འཕྲུལ་གྱི་རྐང་པ་སྟེ་བཞིའོ། །སྦྱོར་ལམ་གྱི་དྲོད་དང་རྩེ་མོར་དབང་པོ་ལྔ་བསྒོམ་སྟེ། འདི་ལྔས་བདེན་པ་མངོན་པར་རྟོགས་པ་ལ་དབང་བྱེད་པས་དབང་པོ་ཞེས་བྱ། བསྒོམ་ཚུལ་ནི། བདེན་བཞིའི་མི་རྟག་པ་ལ་སོགས་པའམ་ཆོས་ཐམས་ཅད་བདེན་པ་གཉིས་སུ་ཤེས་པའི་དོན་ལ་དམིགས་ཏེ། དད་པའི་དབང་པོས་བདེན་པའི་རྣམ་པ་ལ་ཡིད་ཆེས་པ་དང་། བརྩོན་འགྲུས་ཀྱིས་བདེན་པ་རྟོགས་ཕྱིར་སྤྲོ་བ་དང་། དྲན་པས་དམིགས་པ་མི་བརྗེད་པ་དང་། ཏིང་ངེ་འཛིན་གྱིས་དམིགས་པ་ལ་རྩེ་གཅིག་ཏུ་སྦྱོར་བ་དང་། ཤེས་རབ་ཀྱིས་བདེན་པ་རྣམས་ཀྱི་རང་བཞིན་ཤེས་པའི་ཚུལ་གྱིས་བསྒོམ་པའོ། །བཟོད་པ་དང་ཆོས་མཆོག་ཏུ་སྟོབས་ལྔ་སྟེ། དད་པའི་དབང་པོ་སོགས་ཀྱི་རྒྱུན་གོམས་པས་རང་རང་གི་མི་མཐུན་པའི་ཕྱོགས། མ་དད། ལེ་ལོ། བརྗེད་ངས། རྣམ་གཡེང་། ཤེས་རབ་འཆལ་བ་རྣམས་ཀྱིས་ཅུང་ཟད་ཙམ་ཡང་བར་དུ་གཅོད་པར་མི་ནུས་པའི་ཕྱིར། དད་པའི་སྟོབས་སོགས་ལྔ་སྟེ། བསྒོམ་ཚུལ་ནི་སྔ་མ་དང་འདྲའོ། །མཐོང་ལམ་དུ་བྱང་ཆུབ་ཡན་ལག་བདུན་ཏེ། མཐོང་བའི་ལམ་བྱང་ཆུབ་ཟག་པ་མེད་པའི་ཡན་ལག་ཏུ་གྱུར་པས་ན་བྱང་ཆུབ་ཀྱི་ཡན་ལག་ཅེས་བྱ། ཆོས་རབ་ཏུ་རྣམ་པར་འབྱེད་པ་ནི། གཙོ་བོ་ཡང་ཡིན་ལ། ཡན་ལག་ཀྱང་ཡིན་ཞིང་གཞན་དྲུག་པོ་ནི་དེའི་གྲོགས་སུ་གྱུར་པས་ན་ཡན་ལག་སྟེ་བདུན་ནོ། །དེ་ལ་དྲན་པ་ནི་དམིགས་པ་མ་བརྗེད་པ་སྟེ། ཤེས་རབ་ཀྱི་གནས་ཡིན་པས་གནས་ཀྱི་ཡན་ལག་གོ །ཆོས་རབ་ཏུ་རྣམ་པར་འབྱེད་པ་ནི། ཐེག་པ་ཆེན་པོའི་བདེན་པ་བཞི་ལ་དམིགས་པའི་ཆོས་བཟོད་ཆོས་ཤེས་རྗེས་བཟོད་རྗེས་ཤེས་འཁོར་དང་བཅས་པའི་མཚན་ཉིད་སོ་སོར་འབྱེད་པའི་ཤེས་རབ་གང་ཡིན་པ་སྟེ། རང་བཞིན་གྱི་ཡན་ལག་གོ །བརྩོན་འགྲུས་ནི་དེའི་རང་བཞིན་ལ་སྤྲོ་བས་ཞུགས་པ་ལ་བརྟེན་ནས་སོ་སོ་སྐྱེ་བོའི་གནས་ནས་ངེས་པར་འབྱུང་ཞིང་དེ་ལས་འདའ་བར་བྱེད་པའི་ཕྱིར་ངེས་པར་འབྱུང་བའི་ཡན་ལག་གོ །དགའ་བ་ནི། ས་དང་པོ་མཐོང་བའི་དགའ་བ་དེས་ལུས་སེམས་ལ་ཕན་འདོགས་ཤིང་ཚིམ་པར་བྱེད་པ་སྟེ་ཕན་འདོགས་ཀྱི་ཡན་ལག་གོ །ཤིན་ཏུ་སྦྱངས་པ་ནི། ལུས་སེམས་ལས་སུ་རུང་བ་སྟེ། གང་འདོད་དུ་བཀོལ་དུ་བཏུབ་པས་ཉོན་མོངས་པ་མེད་པའི་གཞིའོ། །ཏིང་ངེ་འཛིན་ནི། དམིགས་པ་ལ་སེམས་རྩེ་གཅིག་པ་ལས་གཞན་དུ་མ་གྱུར་པའི་ཕྱིར། ཉོན་མོངས་པ་མེད་པའི་གནས་སོ། །བཏང་སྙོམས་ནི་སེམས་དང་སེམས་བྱུང་གི་རྙོག་མ་བྱིང་རྒོད་ཀྱི་སྐྱོན་དང་བཅས་པ་རང་སར་ཞི་བ་སྟེ། ཉོན་མོངས་མེད་པའི་ངོ་བོ་ཉིད། དེ་ལྟར་འདི་གསུམ་ལ་ཉོན་མོངས་མེད་པའི་ཡན་ལག་ཅེས་བྱའོ། །སྒོམ་ལམ་ས་དགུར་འཕགས་ལམ་ཡན་ལག་བརྒྱད་བསྒོམ་སྟེ། འཕགས་པ་རྣམས་ཀྱིས་བགྲོད་པར་བྱ་བའི་འཇུག་ངོགས་སུ་གྱུར་པའི་ལམ་ལ་འཕགས་པའི་ལམ་གྱི་ཡན་ལག་ཅེས་བྱ་སྟེ། དེ་ལ་ཡང་དག་པའི་ལྟ་བ་ནི། ས་གཉིས་པ་ཡན་ཆད་ཀྱི་ཟག་མེད་ཀྱི་ཤེས་རབ་སྟེ། དེས་ས་དང་པོ་སོགས་སུ་ཆོས་ཀྱི་དབྱིངས་ལ་རྣམ་པར་མི་རྟོག་པའི་ཡེ་ཤེས་ཀྱིས་འདི་ལྟར་མཐོང་ངོ་སྙམ་དུ་གཅོད་པས་ན་ཡོངས་སུ་གཅོད་པའི་ཡན་ལག་གོ །ཡང་དག་པའི་རྟོག་པ་ནི། ཆོས་རྣམས་ཀྱི་རང་དང་སྤྱིའི་མཚན་ཉིད་མ་ནོར་བར་བརྟག་པ་སྟེ་གཞན་ལ་གོ་བར་བྱེད་པའི་ཡན་ལག །ཡང་དག་པའི་ངག་ནི་རང་གིས་ཇི་ལྟར་རྟོགས་པ་དེ་བཞིན་དུ་གཞན་ལ་འཆད་པར་བྱེད་པས་ཇི་ལྟར་དྲིས་པ་དེ་བཞིན་དུ་ལུང་སྟོན་པས་ན་ལྟ་བ་རྣམ་པར་དག་པ་དང་། ཡང་དག་པའི་ལས་ཀྱི་མཐའ་ནི། སྲོག་གཅོད་པ་ལ་སོགས་པའི་མི་དགེ་བ་ཅུང་ཟད་ཀྱང་མི་བྱེད་པས་སྤྱོད་པ་ཕུན་སུམ་ཚོགས་པའི་ཕྱིར་ཚུལ་ཁྲིམས་རྣམ་པར་དག་པ་དང་། ཡང་དག་པའི་འཚོ་བ་ནི། ལོག་འཚོ་སྤངས་ཏེ་དེ་བཞིན་གཤེགས་པས་ཇི་ལྟར་གནང་བ་བཞིན་དུ་ལོངས་སྤྱོད་པས་འཚོ་བ་རྣམ་དག་དུ་ཡིད་ཆེས་པས་ན། འདི་གསུམ་ནི་གཞན་ཡིད་ཆེས་པར་བྱེད་པའི་ཡན་ལག་གོ །ཡང་དག་པའི་རྩོལ་བ་ནི། སྒོམ་ལམ་གྱིས་སྤང་བར་བྱ་བའི་ཉོན་མོངས་པ་རྣམས་སྤོང་བའི་ཆེད་དུ་བརྩོན་འགྲུས་རྩོམ་པ། ཡང་དག་པའི་དྲན་པ་ནི། ཉེ་བའི་ཉོན་མོངས་པ་བྱིང་རྒོད་གྱི་གཉེན་པོའི་དམིགས་པ་མི་བརྗེད་པ། ཡང་དག་པའི་ཏིང་ངེ་འཛིན་ནི། བསམ་གཏན་བཞི་པའི་ས་ལ་བརྟེན་ནས་མངོན་པར་ཤེས་པ་ལ་སོགས་པའི་ཡོན་ཏན་རྒྱ་ཆེན་པོ་སྒྲུབ་པ་སྟེ། འདི་གསུམ་ནི་མི་མཐུན་པའི་གཉེན་པོའི་ཡན་ལག་གོ །དེ་ལྟར་སློབ་ལམ་དུ་བྱང་ཕྱོགས་སོ་བདུན་ལ་གོམས་པ་ལ་བརྟེན་ནས་མཐར་ཕྱིན་མི་སློབ་པའི་ལམ་ལ་སྦྱོར་བར་བྱེད་པ་ཡིན་ནོ། །བྱེ་བྲག་ཏུ་ལམ་སྒོམ་པའི་ཐོག་མར་དེ་བཞིན་གཤེགས་པའི་སྙིང་པོའམ་རང་བཞིན་གནས་པའི་རིགས་ཉིད་རང་ལ་ཡོད་པར་ཤེས་དགོས་ཀྱི་དེ་མ་ཤེས་ན་སངས་རྒྱས་སྒྲུབ་འདོད་ཀྱི་བློ་མི་སྐྱེ་སྟེ། དཔེར་ན་ས་འོག་ན་གསེར་ཡོད་པར་མ་ངེས་ན་གསེར་བརྐོ་འདོད་ཀྱི་བློ་མི་སྐྱེ་བ་བཞིན་ཏེ། དཔལ་མགོན་འཕགས་པ་ཀླུས། ཁམས་ཡོད་ན་ནི་ལས་བྱས་པས། །ས་ལེ་སྦྲམ་དག་མཐོང་བར་འགྱུར། །ཁམས་མེད་ན་ནི་ལས་བྱས་ཀྱང་། །ཉོན་མོངས་འབའ་ཞིག་སྐྱེ་བར་ཟད། །ཅེས་གསུངས། དེ་ལ་མཐར་ཐུག་ཆོས་སྐུའི་ཡོན་ཏན་ནམ་མཁའ་དང་མཉམ་པ་དེ། སྔོན་ཐ་མལ་འཆིང་བ་ཀུན་ལྡན་དུ་གྱུར་པའི་གང་ཟག་གི་རྒྱུད་ལས་ཕྱིས་མངོན་དུ་གྱུར་པ་ཡོད་པའི་ཕྱིར་དང་། རིགས་མེད་ན་བརྩོན་ཀྱང་དེ་ལྟར་མི་འཐད་པའི་ཕྱིར་དང་། ཆོས་སྐུའི་ཡོན་ཏན་དེ་རང་བཞིན་འདུས་མ་བྱས་རྟག་པའི་ངོ་བོ་ཡིན་པའི་ཕྱིར་ཏེ། རྒྱུ་མཚན་གསུམ་གྱིས་སེམས་ཅན་གྱི་རྒྱུད་ལ་སངས་རྒྱས་ཀྱི་སྙིང་པོ་ཡོད་པར་ལྟོས་པའི་རིགས་པས་གྲུབ་པ་དང་། འཁོར་འདས་ཀྱི་ཆོས་ཐམས་ཅད་གནས་ལུགས་སྟོང་ཆེན་གདོད་མའི་འོད་གསལ་ཆེན་པོར་དབྱེར་མེད་རོ་གཅིག་པའི་ཕྱིར། འཁྲུལ་པ་གློ་བུར་བས་སྤྲུལ་པའི་སེམས་ཅན་རྣམས་ཀྱང་གནས་ལུགས་དོན་དམ་པའི་ཆོས་ཉིད་ལས་མ་གཡོས་པར་ཆོས་ཉིད་ཀྱི་རིགས་པས་གྲུབ་པ་དང་། དྲི་མ་གློ་བུར་པ་སྤང་རུང་དང་། ཡོན་ཏན་ཡེ་ལྡན་གྱི་ཆོས་སྐུ་ཀུན་ལ་ཁྱད་མེད་དུ་ཡོད་པའི་ཕྱིར། རིགས་ཡོད་པར་གྲུབ་ལ། དེ་ཡོད་ན་ལུས་ཅན་དེ་སངས་རྒྱས་ཀྱི་སྙིང་པོ་ཅན་དུ་བྱ་བ་བྱེད་པའི་རིགས་པས་གྲུབ་པ་སོགས་རྣམ་དག་རིགས་པའི་སྒོ་དང་། ངེས་དོན་ཕྱིར་མི་ལྡོག་པའི་མདོ་སྡེ་ཟབ་མོ་རྣམས་དང་། རྗེ་བཙུན་བྱམས་པས་མཛད་པའི་རྒྱུད་བླ་མ། འཕགས་པ་ཀླུ་སྒྲུབ་ཀྱིས་མཛད་པའི་ཆོས་དབྱིངས་བསྟོད་པ་སོགས་ཡིད་ཆེས་པའི་ལུང་དང་། དཔལ་དུས་ཀྱི་འཁོར་ལོ་ལ་སོགས་པའི་གསང་རྒྱུད་ཐུན་མོང་མ་ཡིན་པ་རྣམས་ཀྱི་མན་ངག་སྟེ། ཚད་མ་གསུམ་ལ་བརྟེན་ནས་ཡིད་ཆེས་པ་གལ་ཆེ་ཞིང་དོན་གྱི་གནད་འདི་ལ་འཕགས་ཡུལ་གྱི་ཤིང་རྟ་ཆེན་པོ་རྣམས་དགོངས་པ་གཅིག་ཏུ་འབབ་ནའང་། གནས་སྐབས་ཀྱི་གྲུབ་མཐའི་ཁས་ལེན་ཕྲ་མོ་ཙམ་ལ་བརྟེན་ནས། གངས་ཅན་གྱི་ཁྲོད་དུ་དགོངས་པ་ལེན་ཚུལ་ཐ་དད་པའི་དབང་གིས་དགག་སྒྲུབ་ཀྱི་ཆུ་གཏེར་རྣམ་པར་འཁྲུགས་མོད། དོན་དུ་ཁམས་བདེ་བར་གཤེགས་པའི་སྙིང་པོ་ཟབ་གསལ་གཉིས་མེད་ཀྱི་ཡེ་ཤེས་ཟབ་མོ་དེ་ཉིད་གདུལ་བྱ་ཡོངས་སུ་མ་སྨིན་པ་རྣམས་ཀྱིས་ཐོག་མ་ནས་ཐོས་ན་སྐྲག་པར་འགྱུར་བའི་ཕྱིར། རྒྱལ་བས་འཁོར་ལོ་དང་པོར་དངོས་སུ་མ་བསྟན་ཅིང་། བར་པར་བདག་ཏུ་ལྟ་བའི་གཉེན་པོར་ངོ་བོ་སྟོང་ཕྱོགས་ཀྱི་སྒོ་ནས་རྣམ་ཐར་སུམ་ལྡན་དུ་གསུངས་པ་དང་། འཁོར་ལོ་ཐ་མར་ཡོངས་སུ་སྦྱངས་པར་བྱས་པའི་བྱང་སེམས་སྐལ་བ་ཆེན་པོ་རྣམས་ཀྱི་ངོར་རང་བཞིན་སྐུ་དང་ཡེ་ཤེས་སོགས་སྣང་ཕྱོགས་ཀྱི་ཆ་ནས་ངེས་དོན་དྲང་ཐད་དུ་སྟོན་པར་མཛད་པ་ནི། རིགས་ཁམས་ནོར་བུ་སྦྱང་བའི་དཔེ་སོགས་ཀྱིས་གསལ་བར་བསྟན་པ་བཞིན་ལ། མཐར་ཐུག་ཐུན་མོང་མ་ཡིན་པའི་གནད་གསང་རྣམས་ནི་གསང་རྒྱུད་སྤྱི་དང་། ཁྱད་པར་དུས་ཀྱི་འཁོར་ལོ་ལས་གསལ་བར་བསྟན་ཞིང་མཐར་ཐུག་པ་ནི་རང་བཞིན་རྫོགས་པ་ཆེན་པོར་གཏན་ལ་ཕབ་པ་ཡིན་ཏེ། དེ་དག་གི་རྣམ་བཞག་རྒྱས་པ་ནི་ཀུན་མཁྱེན་ཆོས་ཀྱི་རྒྱལ་པོོའི་གསུང་གི་གསང་མཛོད་རྣམས་དང་། ཁོ་བོའི་བླ་མ་འཇམ་དཔལ་དགྱེས་པའི་རྡོ་རྗེའི་ཞལ་སྔ་ནས་བསྩལ་པའི་བདེ་གཤེགས་སྙིང་པོའི་སྟོང་ཐུན་སེང་གེའི་ང་རོ་དང་གཉུག་མ་འོད་གསལ་གྱི་དོན་ལ་དཔྱད་པ་སོགས་ལས་རྟོགས་པར་བྱ་བ་ལས་འདིར་ཡི་གེས་འཇིགས་ནས་མ་སྤྲོས་ལ། དོན་གྱི་གནད་ནི། ཀུན་མཁྱེན་ཆེན་པོས། ཐར་པ་དགེ་བའི་རྟེན་ནི་རིགས་ཡིན་ལ། །དེ་ཡང་སེམས་ཀྱི་རང་བཞིན་འོད་གསལ་བ། །དྲི་མེད་ཁམས་ཏེ་རང་བཞིན་གནས་པའི་རིགས། །དེ་ཡི་སྣང་ཆ་སྐུ་གཉིས་དཔེ་རྣམས་དགུ། །སྙིང་རྗེའི་རང་བཞིན་ཡེ་ནས་གནས་པ་ནི། །རྒྱས་འགྱུར་རིགས་ཞེས་བདེ་བར་གཤེགས་པས་གསུངས། །རྩ་བ་རིག་པའི་ཡེ་ཤེས་འོད་གསལ་བ། །ངོ་བོ་དུག་གསུམ་མེད་པའི་དགེ་བ་ཡིན། །ཞེས་པའི་འགྲེལ་པར། དེའང་རང་བཞིན་གྱིས་དག་ཅིང་ངོ་བོ་ཉིད་དྲི་མ་མེད་པའི་སེམས་ཉིད་སངས་རྒྱས་ཀྱི་ཡེ་ཤེས་དམ་པ་ཡེ་ནས་གནས་པའི་སེམས་ཀྱི་རང་བཞིན་འོད་གསལ་བའི་སྣང་ཆ་ནས་སངས་རྒྱས་ཀྱི་གཟུགས་སྐུའི་ཡོན་ཏན་ལྷུན་གྲུབ་ཏུ་ཡོད་པ་དཔེ་དགུས་བསྟན་ཅིང་། སྟོང་ཆ་ལ་ཆོས་སྐུའི་ཡོན་ཏན་ནམ་མཁའ་ལྟ་བུའི་དཔེ་མདོ་རྒྱུད་ཐམས་ཅད་ནས་བཤད་ལ། དེ་གཉིས་དབྱེར་མི་ཕྱེད་པ་ནི་ཐོག་མ་མེད་པའི་ཆོས་ཁམས་དགེ་བ་སྟེ། འགྱུར་བ་མེད་པས་རང་བཞིན་གནས་པའི་རིགས་དང་། དྲི་མ་སྦྱངས་ནས་ཡོན་ཏན་རྒྱས་པར་མངོན་པས་རྒྱས་འགྱུར་གྱི་རིགས་ཞེས་བཏགས་ཀྱང་། རྩ་བ་རིག་པའི་ཡེ་ཤེས་འོད་གསལ་བ་ཉིད་དོ། །ཞེས་གསུངས་པ་ལྟར། རིགས་གཉིས་སུ་བཤད་པའང་ངོ་བོ་གཅིག་ལ་ལྡོག་པས་ཕྱེ་བ་ཙམ་ལས་དོན་ལ་ནི་རང་གི་སེམས་ཉིད་སྤྲོས་བྲལ་རང་བྱུང་གི་ཡེ་ཤེས། གཤིས་ཅིར་ཡང་མ་གྲུབ་ལ་གདངས་འགག་མེད་དུ་འཆར་བའི་གཉུག་མའི་ཤེས་པ་དྭངས་གསལ་རྗེན་པ་འདི་ཉིད་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་ས་བོན་ནམ་བདེ་གཤེགས་སྙིང་པོ་ཡིན་ཏེ། ཀླུས། ས་ཡི་དཀྱིལ་ན་ཡོད་པའི་ཆུ། །དྲི་མ་མེད་པར་གནས་པ་ལྟར། །ཉོན་མོངས་ནང་ན་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་དང་། དོ་ཧ་ལས། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལས་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་སྟེར་བར་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་སོ། །དེ་ལྟ་བུའི་རིགས་ཅན་དེས་ལམ་གྱི་རྩ་བ་བྱང་ཆུབ་མཆོག་ཏུ་སེམས་བསྐྱེད་ནས་བདག་མེད་པ་གཉིས་ཀྱི་དོན་ཚུལ་བཞིན་དུ་གཏན་ལ་ཕབ་སྟེ་དེ་ཉིད་ཇི་ལྟར་བསྒོམ་པའི་ཚུལ་ནི། རྡོ་རྗེ་འཆང་མཁྱེན་བརྩེའི་དབང་པོས་འདི་ལྟར་གསུངས་ཏེ། བྱང་སེམས་སྨོན་ལམ་གྱི་དཀའ་འགྲེལ་ལས། སྤྱིར་ཐོས་བསམ་གྱི་སྒྲོ་འདོགས་ཆོད་པའི་དོན་རྣམས་བླང་དོར་གྱི་སྒོ་ནས་རྩེ་གཅིག་ཏུ་ཉམས་སུ་ལེན་པ་དང་། ཁྱད་པར་བདག་མེད་ཀྱི་དོན་གཏན་ལ་ཕབ་ནས་རྣམ་པར་མི་རྟོག་པའི་ཡེ་ཤེས་སྒོམ་པ་ལ་འཇུག་པར་བྱའོ། །འདི་ལ་གཉིས་གང་ཟག་གི་བདག་མེད་པ་བསྒོམ་ཚུལ་དང་། ཆོས་ཀྱི་བདག་མེད་བསྒོམ་ཚུལ་ལོ། །དང་པོ་ནི། གང་ཟག་གི་བདག་ཅེས་པ་ཕུང་པོ་ལ་སོགས་པ་ལ་དམིགས་ནས་ང་དང་ང་ཡི་བར་འཛིན་པའི་སེམས་ཏེ། དེ་ལ་སོ་སོའི་སྐྱེ་བོ་རྣམས་ཀྱིས་བདེན་པར་ཞེན་ཅིང་མུ་སྟེགས་པ་རྣམས་ཀྱིས་རྟག་གཅིག་རང་དབང་ཅན་དུ་འདོད་པས་ཉོན་མོངས་པ་དང་ལས་སྣ་ཚོགས་པ་བསྐྱེད་ནས་འཁོར་བར་འཁྱམ་པའི་ཕྱིར། དེ་མེད་པར་སྒྲུབ་པ་ནི། གལ་ཏེ་དེ་ལྟ་བུའི་བདག་དེ་རང་བཞིན་གྱིས་གྲུབ་ན། ཕུང་པོ་ལས་གཅིག་ཏུ་གྲུབ་པའམ་ཐ་དད་དུ་གྲུབ། གཅིག་ཏུ་གྲུབ་ན་ཕུང་སོགས་སྐྱེ་འཇིག་བྱེད་པ་བཞིན་དུ་བདག་ཀྱང་སྐྱེ་འཇིག་བྱེད་པར་འགྱུར་ལ། ཐ་དད་དུ་གྲུབ་ན་ཕུང་པོ་ལས་གཞན་པའི་བདག་མི་རྙེད་པའི་ཕྱིར་དང་། དེ་བཞིན་དུ་བདག་དེ་ཡོད་ན་ལུས་དང་། མིང་དང་། སེམས་གང་རུང་ཡིན་དགོས་ལ། ལུས་ནི་བདག་མ་ཡིན་ཏེ། འབྱུང་བཞི་འདུས་པ་ལས་བྱུང་བའི་ཕྱིར་དང་། མིང་ནི་བདག་མ་ཡིན་ཏེ། གློ་བུར་དུ་བཏགས་པའི་ཕྱིར་དང་། སེམས་ཀྱང་བདག་མ་ཡིན་ཏེ། དུས་གསུམ་གྱི་ངོ་བོར་མ་གྲུབ་པའི་ཕྱིར་རོ། །ཞེས་པ་ལ་སོགས་པའི་རིགས་པའི་ཚུལ་དུ་མས་གང་ཟག་གི་བདག་མེད་གཏན་ལ་ཕབ་སྟེ། འདི་ཙམ་ནི་ཉན་ཐོས་བྱེ་མདོ་གཉིས་ཀྱི་ལྟ་བའི་དངོས་གཞི་ཡིན་ནོ། །གཉིས་པ་ལ། ཆོས་ནི་ཕྱི་གཟུང་བའི་ཡུལ་དང་། ནང་འཛིན་པའི་སེམས་ཏེ་བདག་ནི་དེ་ལ་དངོས་པོ་དང་མཚན་མར་ཞེན་པའོ། །དེ་མེད་པར་སྒྲུབ་པ་ལའང་གཉིས་ཏེ། གཟུང་བ་རང་བཞིན་མེད་པར་སྒྲུབ་པ་དང་། འཛིན་པ་རང་བཞིན་མེད་པར་སྒྲུབ་པའོ། །དང་པོོ་ནི་ནང་པ་སངས་རྒྱས་པའི་གྲུབ་མཐའ་སྨྲ་བ་ལ་ཐེག་དམན་དང་ཐེག་ཆེན་གཉིས་ལས། ཐེག་དམན་ལ་ཉན་ཐོས་བྱེ་བྲག་སྨྲ་བ་དང་། མདོ་སྡེ་པ་གཉིས། ཐེག་ཆེན་ལ་སེམས་ཙམ་པ་དང་། དབུ་མ་པ་གཉིས་སོ། །དེ་ལ་ཐོག་མར་ཉན་ཐོས་བྱེ་བྲག་ཏུ་སྨྲ་བས། ཤེས་བྱ་ཐམས་ཅད་གཞི་ལྔར་གཏན་ལ་ཕབ་སྟེ། སྣང་བ་གཟུགས་དང་གཙོ་བོ་སེམས། །དེ་འཁོར་སེམས་ལས་བྱུང་བ་དང་། །ལྡན་མིན་འདུ་བྱེད་འདུས་མ་བྱས། །ཞེས་སོ། །གཞི་དེ་དག་ཐམས་ཅད་བདེན་གྲུབ་ཏུ་བཞེད་དེ། རྡུལ་ཕྲ་རབ་འདུས་པའི་བདག་ཉིད་ཅན་གྱི་ཕྱི་དོན་རགས་པ་དང་། ཤེས་པའི་རྒྱུན་གྱི་དངོས་པོ་རྣམས་བཏགས་ཡོད་ཀུན་རྫོབ་ཀྱི་ཕུང་པོ་དང་། གཟུང་བ་རྡུལ་ཕྲན་ཆ་མེད་དང་། ཤེས་པ་སྐད་ཅིག་ཆ་མེད་རྫས་ཡོད་དོན་དམ་པར་འདོད་པའི་ཕྱིར། ཆོས་ཀྱི་བདག་གཟུང་འཛིན་གཉིས་ཀ་གཏན་ནས་མ་སྤངས་ལ། མདོ་སྡེ་པས། རིག་མིན་གཟུགས་མ་གཏོགས་སེམས་སེམས་བྱུང་གསུམ་བདེན་པར་འདོད་ནའང་། རིག་མིན་གྱི་གཟུགས་ནི་གཞིག་ཅིང་གཞོམ་དུ་མི་རུང་བ་དང་། ལྡན་མིན་འདུ་བྱེད་ནི་གཟུགས་སེམས་དང་སེམས་བྱུང་གི་གནས་སྐབས་ལ་བཏགས་པ་ཙམ་ལས་རྫས་གཞན་དུ་མེད་པ་དང་། འདུས་མ་བྱས་རྒྱུ་རྐྱེན་གྱིས་མ་བསྐྱེད་པའི་ཕྱིར། དེ་རྣམས་རྫས་སུ་མི་འདོད་པས་ཆོས་ཁམས་ཕྱོགས་གཅིག་བདག་མེད་དུ་རྟོགས་པས་ཁྱད་པར་འཕགས་པ་ཡིན་ནོ། །གང་ལྟར་ཡང་དེ་དག་གིས་བཏགས་པའི་གཟུང་བ་ཕྱི་རོལ་གྱི་དོན་རྡུལ་ཕྲན་ཆ་མེད་དུ་འདོད་པ་དགག་པ་ནི། དེ་གཅིག་ཏུ་ཡོད་དམ་དུ་མར་ཡོད། གཅིག་ཏུ་ཡོད་ན་ཕྱོགས་ཆའི་དབྱེ་བ་ཡོད་དམ་མེད། ཡོད་ན་ཕྱོགས་བཞི་སྟེང་འོག་སྟེ་ཆ་དྲུག་ཏུ་སོང་བས་རྡུལ་ཕྲན་ཆ་མེད་ཀྱི་དམ་བཅའ་ཉམས་ལ། མེད་ན་དངོས་པོ་ཐམས་ཅད་རྡུལ་ཕྲན་གཅིག་ཏུ་འགྱུར་བས་རགས་པ་རྩོམ་མི་ནུས་པའི་ཕྱིར་རོ། །དུ་མ་ཡོད་དོ་ཞེ་ན། རྩོམ་གཞིའི་རྡུལ་ཕྲན་གཅིག་མ་གྲུབ་པས། དེས་རྩོམ་པའི་དུ་མའང་མི་འགྲུབ་བོ། །འོ་ན་གཟུགས་སོགས་མངོན་སུམ་གྱི་སྣང་བ་འདི་རྣམས་ཅི་སྙམ་ན། དེ་ནི་སེམས་འཁྲུལ་པའི་དབང་གིས་བྱུང་བ་རྨི་ལམ་གྱི་སྣང་ཆ་བཞིན་ཏེ་དོན་ལ་བདེན་པར་མ་གྲུབ་པའི་ཚུལ། ཀྱེ་རྒྱལ་བའི་སྲས་དག་ཁམས་གསུམ་པོ་འདི་ནི་སེམས་ཙམ་མོ། །ཞེས་གསུངས་པའི་ཕྱིར་དང་། རིགས་པའང་། དངོས་གཅིག་ཡོད་ནི་ཐ་དད་ཕྱིར། །དོན་མ་གྲུབ་པར་འདོད་པ་ཡིན། །ཞེས་སོགས་རྒྱ་ཆེར་གསུངས་སོ། །གཉིས་པ་འཛིན་པ་རང་བཞིན་མེད་པར་སྒྲུབ་པ་ལ། སྤྱིར་སེམས་ཙམ་པ་རྣམས་ཀྱིས་ཆོས་ཐམས་ཅད་ཡུལ་ཀུན་བརྟགས་དང་། ཡུལ་ཅན་གཞན་དབང་དང་། གཉིས་སུ་མེད་པའི་ཆོས་ཉིད་ཡོངས་གྲུབ་སྟེ་མཚན་ཉིད་གསུམ་དུ་གཏན་ལ་ཕབ་ནས་སྔ་མ་གཉིས་ཀུན་རྫོབ་དང་། ཕྱི་མ་དོན་དམ་པའི་བདེན་པར་འདོད། བྱེ་བྲག་དུ་རྣམ་བདེན་པས། སྔར་སྨོས་པ་ལྟར་ཕྱི་དོན་བདེན་པ་མ་གྲུབ་ཀྱང་། དོན་སྣང་གི་སེམས་བདེན་གྲུབ་ཏུ་འདོད་པ་དགག་པའི་ཚུལ་ནི། གཟུང་བའི་ཡུལ་མ་གྲུབ་ན། དེར་འཛིན་གྱི་ཤེས་པའང་བདེན་པར་མ་གྲུབ་སྟེ། རྨི་ལམ་གྱི་སྣང་བ་དང་། དེ་མྱོང་མཁན་གྱི་ཤེས་པ་གཉིས་ཀ་སད་ནས་ཅིར་ཡང་མ་གྲུབ་པ་བཞིན་ནོ། །ཞེས་པ་ལ་སོགས་པས་ལེགས་པར་དཔྱད་དེ་བདེན་མེད་དུ་གཏན་ལ་ཕབ་ནས། རྣམ་རྫུན་པ་རྣམས་ཀྱིས། གཟུང་འཛིན་གཉིས་ཀྱིས་སྟོང་པའི་ཤེས་པ་རང་རིག་རང་གསལ་ཙམ་བདེན་པར་འདོད་དོ། །དེ་ཡང་མི་འཐད་དེ། དེ་ལྟ་བུའི་གཉིས་སྟོང་གི་ཤེས་པ་དེ་ཡོད་ན་གཅིག་ཏུ་ཡོད་དམ་དུ་མར་ཡོད། གཅིག་ཏུ་ཡོད་ན་དུས་གསུམ་གྱི་ཆ་ཤས་ཡོད་དམ་མེད། ཡོད་ན་གཅིག་ཏུ་མི་འཐད་དེ་དུ་མར་འགྱུར་ལ། མེད་ན་དངོས་མེད་དུ་འགྱུར་བའི་ཕྱིར་དང་། དུ་མར་ཡོད་དོ་ཞེ་ན། རྩོམ་གཞི་གཅིག་མ་གྲུབ་པས། དེས་རྩོམ་པའི་དུ་མའང་མ་གྲུབ་ལ། གཅིག་དང་དུ་མ་གང་རུང་དུ་མེད་ན་མེད་པས་ཁྱབ་པའི་ཕྱིར་རོ། །གཞན་ཡང་འདས་པའི་སེམས་ནི་ཞིག་པས་དངོས་པོར་མི་རུང་། མ་འོངས་པའི་སེམས་ནི་མ་སྐྱེས་པས་དངོས་པོར་མི་རུང་། ད་ལྟ་བའི་སེམས་ནི་ཁ་དོག་དང་དབྱིབས་སུ་མ་གྲུབ། གཅིག་དང་དུ་མ་ལས་འདས། ལུས་ཀྱི་ཕྱི་ནང་གང་དུའང་མི་གནས། བཙལ་ན་གང་ཡང་མི་རྙེད་པའི་ཕྱིར། བདེན་པར་མ་གྲུབ་སྟེ། མདོར་ན་སྐྱེ་འགག་གནས་གསུམ་དང་བྲལ་བ་ནམ་མཁའ་ལྟ་བུའོ། །ཞེས་ལེགས་པར་དཔྱད་པས་རྟག་པའི་མཐའ་ལས་གྲོལ་བ་ན། ཆད་མཐའ་བསལ་བ་ནི། འོ་ན་སེམས་མེད་པ་ཉིད་གནས་ལུགས་ཡིན་ནོ་ཞེ་ན། དེ་ཡང་མ་ཡིན་ཏེ། སེམས་དེ་སྔར་དངོས་པོར་ཡོད་ལ། ཕྱིས་མེད་པར་གྱུར་ན་དངོས་མེད་དུ་རུང་མོད་ཀྱང་གདོད་ནས་ཡོད་མ་མྱོང་བའི་ཕྱིར། དེ་བཀག་པའི་མེད་པའང་མ་གྲུབ་ལ། ཡོད་མེད་གཉིས་ཀ་ལས་འདས་པས་མཐའ་གཉིས་ཀ་མ་གྲུབ། དེ་མ་གྲུབ་པས་གཉིས་ཀ་བཀག་པའི་གཉིས་མིན་དུའང་མི་འགྲུབ་པའི་ཕྱིར། གདོད་ནས་སེམས་ཀྱི་ཆོས་ཉིད་མཐའ་བཞིའི་སྤྲོས་པ་དང་བྲལ་བར་རྟོགས་པ་ནི། དབུ་མ་རང་རྒྱུད་པ་རྣམས་ཀྱི་བཞེད་པ་སྟེ། ཡེ་ཤེས་སྙིང་པོ་ཀུན་ལས་བཏུས་པ་ལས། ཡོད་མིན་མེད་མིན་ཡོད་མེད་མིན། །གཉིས་ཀའི་བདག་ཉིད་མིན་པའང་མིན། །མཐའ་བཞི་རྣམ་པར་གྲོལ་བ་ཡི། །དེ་ཉིད་དབུ་མ་པ་ཡིས་རིག །ཅེས་སོ། །མཐར་ཐུག་སྤྲོས་བྲལ་དུ་འཛིན་པའང་གནས་ལུགས་སུ་འདོད་པ་མ་ཡིན་ཏེ། དགག་བྱ་མཐའ་བཞི་སོ་སོ་ནས་གྲུབ་པ་མེད་པས། དེ་བཀག་པའི་མཐའ་བྲལ་ཞེས་བྱ་བ་ཞིག་ཀྱང་དོན་ལ་གྲུབ་པ་མེད་པའི་ཕྱིར། ཁས་ལེན་ཐམས་ཅད་དང་བྲལ་བ་ནི། ནང་པ་སངས་རྒྱས་པའི་གྲུབ་མཐའ་སྨྲ་བ་རྣམས་ཀྱི་རྩེ་མོར་གྱུར་པ་དབུ་མ་ཐལ་འགྱུར་པའི་དགོངས་པར་གནས་པའི་ཚུལ། འཕགས་པ་ཀླུས། ང་ལ་ཁས་ལེན་མེད་པས་ན། །ང་ནི་སྐྱོན་མེད་ཁོ་ན་ཡིན། །ཞེས་དང་། སྒྲ་གཅན་འཛིན་གྱིས་ཡུམ་ལ་བསྟོད་པར། སྨྲ་བསམ་བརྗོད་མེད་ཤེས་རབ་ཕ་རོལ་ཕྱིན། །ཞེས་སོ། །དེ་ལྟར་ལུང་རིགས་ཀྱིས་དཔྱད་པའི་མཐར་བརྗོད་བྲལ་དུ་གཏན་ལ་དབབ་པ་དང་། སྒོམ་པས་ཉམས་སུ་མྱོང་བས་བརྗོད་བྲལ་དུ་གཏན་ལ་ཕེབས་པ་གཉིས་མཐར་གྱི་རོ་གཅིག་ཏུ་གྱུར་ནས་བློས་བྱས་གཟུང་འཛིན་གྱི་སྤྲོས་པ་ལས་གྲོལ་བ་ན་ལྟ་བའི་དཔྱད་པ་རྫོགས་པའི་ཚུལ། ཀུན་མཁྱེན་པྲ་ཛྙཱ་རསྨིས། གང་ཤར་སེམས་དང་སེམས་ཉིད་རང་ལུས་སོགས། །ཕྱི་ནང་ཀུན་ཏུ་རྣམ་པར་བཙལ་བ་ན། །བཙལ་བས་མ་རྙེད་ཡུལ་ཅན་ཤེས་རབ་སོགས། །གནས་སྐབས་ཤིག་ཏུ་ལྟ་བར་འདོད་ན་ཡང་། །བློས་བྱས་གཟུང་འཛིན་སྤྲོས་པ་ཀུན་བྲལ་བའི། །གཉུག་མའི་ཡེ་ཤེས་རང་ངོ་འཕྲོད་པ་ཡི། །ཤེས་པ་གསལ་དྭངས་རྟོག་མེད་ཡེ་ཤེས་དེ། །སྒྲུབ་བརྒྱུད་ཀུན་གྱི་ལྟ་བའི་གཙོ་བོ་ཡིན། །ཞེས་གསུངས་པ་ལྟར་རོ། །མདོར་ན་བློས་བརྟགས་ཤིང་དཔྱད་པས་དམིགས་པའི་ཡུལ་དུ་སྣང་བ་ནི་ཀུན་རྫོབ་བདེན་པ་སྟེ། དེ་རྣམས་ཐ་སྙད་ཙམ་དུ་ཡང་རང་གི་རྒྱུ་ལ་བརྟེན་ནས་འབྲས་བུར་འབྲེལ་བར་འབྱུང་བའི་ཚུལ་རྫིང་བུར་ཤར་བའི་ཟླ་བའི་གཟུགས་བརྙན་ནམ། སྒྱུ་མ་མཁན་གྱིས་སྤྲུལ་པའི་རྟ་དང་གླང་པོ་ལྟར་ཤེས་ཤིང་། དེ་ལྟར་སྣང་དུས་ཉིད་ནས་དོན་དམ་པར་མཚན་མར་གྲུབ་པ་རྡུལ་ཙམ་ཡང་མ་དམིགས་པའི་སྤྲོས་བྲལ་སྟོང་ཉིད་ནམ་མཁའི་དབྱིངས་ལྟ་བུར་རྟོགས་པ་ལ་བརྟེན་ནས་སྣང་བ་དེ་ཉིད་བདེན་པས་སྟོང་པ་ལ། སྟོང་པའི་དུས་ཉིད་ནས་སྣང་བ་མི་འགག་པ་ཟུང་དུ་འཇུག་པའི་ཚུལ་གྱིས་འཁོར་འདས་སྣང་སྲིད་ཀྱིས་བསྡུས་པའི་ཆོས་ཐམས་ཅད་གཞི་དབུ་མ་བདེན་གཉིས་ཟུང་འཇུག་ཏུ་རྟོགས་པས་རྟག་ཆད་ཀྱི་དྲྭ་བ་མཐའ་དག་གཅིག་ཅར་དུ་འཇིག་པར་བྱེད་པ་ནི། རིགས་པའི་རྒྱལ་པོ་རྟེན་འབྲེལ་གྱི་རིགས་པ་སྟེ། སློབ་དཔོན་ཀླུས། རྟེན་ཅིང་འབྲེལ་བར་འབྱུང་བ་གང་། །དེ་ནི་སྟོང་པ་ཉིད་དུ་བཤད། །དེ་ནི་བརྟེན་ནས་གདགས་པ་སྟེ། །དེ་ཉིད་དབུ་མའི་ལམ་ཡིན་ནོ། །གང་ཕྱིར་རྟེན་འབྱུང་མ་ལགས་པའི། །ཆོས་འགའ་ཡོད་པ་མ་ཡིན་པ། །དེ་ཕྱིར་སྟོང་ཉིད་མ་ཡིན་པའི། །ཆོས་འགའ་ཡོད་པ་མ་ཡིན་ནོ། །ཞེས་དང་། ཀུན་རྫོབ་དང་ནི་དོན་དམ་དག །སོ་སོར་ཆར་ནི་ཤེས་གྱུར་ནས། །གང་དུ་ཡང་དག་འདྲེས་གྱུར་པ། །ཟུང་དུ་འཇུག་པ་ཞེས་བཤད་དོ། །ཞེས་དང་། ཡུམ་ལས། གཟུགས་སྟོང་པའོ། །སྟོང་པ་ཉིད་ཀྱང་གཟུགས་སོ། །གཟུགས་ལས་ཀྱང་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ། །ཞེས་པ་ནས། རྣམ་པ་ཐམས་ཅད་མཁྱེན་པའི་བར་དུ་གསུངས་པ་རྣམས་ལ་ངེས་ཤེས་མཆོག་ཏུ་བསྐྱེད་ནས་ཐོས་བསམ་གྱི་སྒྲོ་འདོགས་གཅོད་པ་དང་། སྒོམ་པས་ཉམས་སུ་ལེན་པ་ལ་ཅི་ནུས་སུ་འབད་པས། དེ་ལྟར་མ་རྟོགས་པའི་སེམས་ཅན་རྣམས་ལ་སྙིང་རྗེ་ཆེན་པོ་རྩོལ་མེད་དུ་སྐྱེ་བས་ཅི་བྱེད་གཞན་དོན་དུ་འགྱུར་པའི་ཐབས་ལ་མཁས་པའང་ངང་གིས་འབྱུང་བས་ན་གནས་ལུགས་ཀྱི་དོན་ལ་ཇི་ཙམ་ངེས་ཤེས་དང་། མྱོང་བ་སྐྱེས་པ་དེ་ཙམ་དུ་སྙིང་རྗེ་སྐྱེ་ལ། དེས་བསོད་ནམས་དང་ཡེ་ཤེས་ཀྱི་ཚོགས་ཟུང་འབྲེལ་དུ་རྫོགས་པ་ནི་ཐེག་པ་ཆེན་པོའི་ལམ་མ་ནོར་བ་ཡིན་ཏེ། སློབ་དཔོན་ཞི་བ་ལྷས། སྟོང་ཉིད་སྙིང་རྗེ་སྙིང་པོ་ཅན། །སྤྱོད་པས་བསོད་ནམས་དག་པར་འགྱུར། །ཞེས་སོ། །དེ་ལྟ་བུའི་ལྷག་མཐོང་རྣམ་པར་མི་རྟོག་པའི་ཡེ་ཤེས་ཉམས་སུ་ལེན་པའི་ཚུལ་ནི། བསྒོམ་བྱའི་དོན་ལ་ཐོས་བསམ་གྱི་སྒྲོ་འདོགས་ཆོད་ནས། དབེན་པའི་གནས་སུ་བདེ་བའི་སྟན་ལ་བསམ་གཏན་གྱི་སྤྱོད་ལམ་དང་ལྡན་པས་འདུག་སྟེ། བསོད་ནམས་ཀྱི་ཚོགས་བསགས་པ་དང་། བྱང་ཆུབ་མཆོག་ཏུ་སེམས་བསྐྱེད་པ་སྔོན་དུ་འགྲོ་བས། གཟུང་འཛིན་གྱི་མཚན་མ་འབྱུང་བའི་གཞི་གང་ཟག་དང་ཆོས་ཀྱི་བདག་གཉིས་པོ་དཔྱད་པའི་ཡུལ་དུ་བྱས་ནས། ཡུལ་ཅན་དོན་དམ་དཔྱོད་པའི་རིག་ཤེས་ཚད་མས་སྔར་སྨོས་པ་ལྟར་དཔྱད་པའི་མཐར་བརྗོད་བྲལ་དུ་གཏན་ལ་ཕེབས་པ་ན། དེའི་ངང་དུ་མཚན་འཛིན་གྱི་རྣམ་པར་རྟོག་པ་གཞན་སྤངས་ཏེ་ཡུལ་ཡུལ་ཅན་རོ་གཅིག་པའི་གསལ་སྟོང་དབྱེར་མེད་ཀྱི་ངང་དུ་མཉམ་པར་བཞག་པ་ནི། དོན་དམ་སྤྲོས་བྲལ་མཁའ་ལྟར་རྟོགས་པའི་ཤེས་རབ་སྟེ། ཀུན་མཁྱེན་པྲཛྙཱ་ར སྨིས། སྦྱོར་བའི་དུས་སུ་མཚན་མ་འབྱུང་བའི་གཞི། །དེ་ཉིད་དཔྱད་པའི་རྟེན་དུ་ངེས་བྱས་ནས། །མཐའ་བཞི་རྣམ་གྲོལ་དངོས་གཞིའི་དུས་སུ་ནི། །གསལ་སྟོང་འཛིན་མེད་སྔོན་རབས་མཁས་པའི་ལུགས། །ཞེས་དང་། དཔྱད་དང་འཇོག་པའི་སྒོམ་ཚུལ་ཅི་ཡང་རུང་། །རང་གི་མཚན་ཉིད་རང་བཞིན་འོད་གསལ་བ། །གསལ་དྭངས་ཤར་ལ་སྒོམ་མེད་མ་ཡེངས་པ། །སྒྲུབ་བརྒྱུད་ཀུན་གྱི་སྒོམ་པའི་གཙོ་བོ་ཡིན། །ཞེས་སོ། །དེ་ལྟར་མཉམ་པར་བཞག་པ་ཉིད་ཞི་ལྷག་ཟུང་འཇུག་ཀྱང་ཡིན་ཏེ། རིགས་པས་དཔྱད་ནས་བརྗོད་བྲལ་དུ་གཏན་ལ་ཕབ་པ་ནི་ལྷག་མཐོང་། དེའི་ངང་དུ་གསལ་སྟོང་རྣམ་པར་མི་རྟོག་པའི་ཚུལ་གྱིས་འཇོག་པ་ནི་ཞི་གནས། དེ་གཉིས་ཀྱང་ངོ་བོ་དབྱེར་མེད་པ་ཟུང་འཇུག་ཏུ་ཤེས་པར་བྱའོ། །ཐུན་ལས་ལྡང་བ་དང་དགེ་བ་བསྔོ་ཞིང་སྨོན་ལམ་གདབ། ཐུན་མཚམས་ཀུན་ཏུ། གང་ཤར་ཀྱི་སྣང་བ་ཐམས་ཅད་རང་རང་གི་རྒྱུ་རྐྱེན་རྟེན་འབྲེལ་ཚོགས་པ་ལས་འབྱུང་བ་རྨི་ལམ་དང་སྒྱུ་མ་ལྟ་བུར་ཤེས་པས་ཆད་མཐའ་ལས་གྲོལ། དེ་ཡང་རྟེན་འབྲེལ་ཡིན་པའི་རྟགས་ཀྱིས་དོན་དམ་པར་རང་བཞིན་མ་གྲུབ་པར་སོང་བས་རྟག་མཐའ་ལས་གྲོལ། སྣང་སྟོང་གཉིས་གདོད་མ་ནས་ཟུང་དུ་འཇུག་པས་བརྗོད་བྲལ་ལ་ངེས་ཤེས་མཆོག་ཏུ་འདྲོངས་པ་ནི་ཀུན་རྫོབ་སྒྱུ་མ་ལྟ་བུར་ཤེས་པའི་ཤེས་རབ་སྟེ། ཀུན་མཁྱེན་བླ་མས། མཉམ་བཞག་དུས་ཀྱི་ཉམས་ལེན་དེ་ལྟ་ནའང་། །རྗེས་ཐོབ་དུས་སུ་གང་ཤར་སྣང་ཆ་ཀུན། །རྨི་ལམ་སྒྱུ་མའི་དྲན་འདུན་དྲག་པོ་ཡིས། །ལེགས་པར་སྒོམ་ན་སྣང་སྟོང་དབྱེར་མེད་འཆར། །ཞེས་གསུངས། དེའི་ངང་ནས་སྣང་ཆ་ཀུན་རྫོབ་ཀྱི་བདེན་པ་ལ་བརྟེན་ནས་གནས་ལུགས་མ་རྟོགས་པའི་འགྲོ་བ་རྣམས་བསྒྲལ་འདོད་ཀྱི་བསམ་པས། ཐབས་བསོད་ནམས་ཀྱི་ཚོགས་རྒྱ་ཆེན་པོ་ལ་འབད་ཅིང་། སྟོང་ཆ་དོན་དམ་གྱི་བདེན་པས་དེ་ཐམས་ཅད་ཀྱང་འཁོར་གསུམ་གྱི་བདེན་འཛིན་ལས་གྲོལ་བ་ནི་ལམ་དབུ་མ་ཐབས་ཤེས་ཟུང་འཇུག་གི་དོན་མ་ནོར་བ་དང་། ཁྱད་པར་གཞན་དོན་སྒྲུབ་ཚུལ་ལ་མཁས་པའི་ཤེས་རབ་ཅེས་ཤེས་རབ་རྣམ་པ་གསུམ་དུ་བཞག་གོ །ལམ་དབུ་མ་དེས་ཚོགས་ལམ་ནས་བརྩམས་ཏེ་ལམ་ལྔ་རིམ་པར་བགྲོད་པའི་འབྲས་བུ་རང་དོན་དུ་ཆོས་ཀྱི་སྐུ་སྤྲོས་པ་ཐབས་དང་བྲལ་བ་ལས་མ་གཡོས་བཞིན་དུ། གཞན་དོན་གཟུགས་སྐུ་རྣམ་པ་གཉིས་ཀྱིས་འཁོར་བ་ཇི་སྲིད་ཀྱི་བར་དུ་སྨོན་ལམ་དང་སྙིང་རྗེའི་རྟེན་འབྲེལ་གྱིས་ཡིད་བཞིན་གྱི་ནོར་བུ་ལྟར་ཕན་བདེའི་ཕྲིན་ལས་འབད་མེད་ལྷུན་གྲུབ་ཏུ་འབྱུང་བ་ནི་འབྲས་བུ་དབུ་མ་སྐུ་གཉིས་ཟུང་འཇུག་གི་ཚུལ་ཏེ། སློབ་དཔོན་ཀླུས། དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་རྫོགས་ཤིང་། །བསོད་ནམས་ཡེ་ཤེས་ལས་བྱུང་བའི། །དམ་པ་སྐུ་གཉིས་ཐོབ་པར་ཤོག །ཅེས་སོ། །ཞེས་གསུངས་པ་རྣམས་དོན་ཆེ་བར་སེམས་ནས་ཡིག་ཚོགས་ལ་མ་འཛེམས་པར་ཞིབ་པར་བྲིས་པའོ། །སྤྱོད་པ་ནི། རྗེས་ཐོབ་ཀྱི་དུས་སུ་བདག་བས་གཞན་གཅེས་ཀྱི་སྒོ་ནས་སེམས་ཅན་གྱི་དོན་བྱེད་པའོ། །དེའང་སྤྱོད་པའི་རང་བཞིན་ཕ་རོལ་དུ་ཕྱིན་པ་དྲུག་གམ་བཅུ་སྟེ། དྲུག་ནི། སྦྱིན་པ་དང་། ཚུལ་ཁྲིམས་དང་། བཟོད་པ་དང། བརྩོན་འགྲུས་དང་། བསམ་གཏན་དང་། ཤེས་རབ་བོ། །བཅུ་ནི་ཐབས། སྟོབས། སྨོན་ལམ། ཡེ་ཤེས་བཞི་བསྣན་པ་སྟེ། ཤེས་རབ་ཀྱི་ཕ་རོལ་དུ་ཕྱིན་པའི་ནང་དུ་འདུའོ། །དེ་ལ་ངོ་བོ་ནི། སྦྱིན་པ་རང་ནོར་ཡོངས་གཏོང་བ། །ཚུལ་ཁྲིམས་གཞན་ཕན་བྱ་བའོ། །བཟོད་པ་ཁྲོ་བ་སྤངས་པ་སྟེ། །བརྩོན་འགྲུས་དགེ་ལ་སྤྲོ་བ་ཉིད། །བསམ་གཏན་རྩེ་གཅིག་ཉོན་མོངས་མེད། །ཤེས་རབ་བདེན་དོན་གཏན་ལ་འབེབས། །ཞེས་རིན་ཆེན་ཕྲེང་བ་ལས་གསུངས། མཚན་ཉིད་ནི། བྱང་སེམས་ཀྱི་སྒྲུབ་པའི་བསླབ་བྱ་གང་ཞིག་ཁྱད་ཆོས་བཞི་ལྡན་གྱི་སྦྱིན་སོགས་ཕར་ཕྱིན་ལ་སློབ་པར་འདོད་པའི་སེམས་པ་མཚུངས་ལྡན་དང་བཅས་པ་སྟེ། ཁྱད་ཆོས་བཞི་ནི། མདོ་སྡེ་རྒྱན་ལས། སྦྱིན་པ་མི་མཐུན་ཕྱོགས་ཉམས་དང་། །རྣམ་པར་མི་རྟོག་ཡེ་ཤེས་ལྡན། །འདོད་པ་ཐམས་ཅད་ཡོངས་རྫོགས་བྱེད། །སེམས་ཅན་རྣམ་སྨིན་བྱེད་རྣམ་གསུམ། །ཞེས་སོ། །སྒྲ་དོན་པ་རཱ་ཱམི་ཏ་ཞེས་པ་ཕ་རོལ་དུ་ཕྱིན་པ་སྟེ། འཇིག་རྟེན་དང་ཉན་རང་གི་དགེ་བ་ཀུན་ལས་ཕུལ་དུ་བྱུང་བའི་ཕ་རོལ་དུ་འགྲོ་བས་སོ། །བྱེ་བྲག་སོ་སོའི་སྒྲ་དོན་ནི། དེ་ཉིད་ལས། དབུལ་བ་འདོར་བར་བྱེད་པ་དང་། །བསིལ་བ་ཐོབ་དང་ཁྲོ་བཟོད་དང་། །མཆོག་སྦྱོར་བ་དང་ཡི ད་འཛིན་དང་། །དོན་ད མ་ཤེས་པའི་ཕྱིར་བཤད་དོ། །ཞེས་སོ། །དབྱེ་ན་སྦྱིན་པ་ལ། ཟང་ཟིང་། ཆོས་དང་། མི་འཇིགས་པ་སྐྱབས་ཀྱི་སྦྱིན་པ་སྟེ་གསུམ། ཚུལ་ཁྲིམས་ལ། ཉེས་སྤྱོད་སྡོམ་པ། དགེ་བ་ཆོས་སྡུད་སེམས་ཅན་དོན་བྱེད་ཀྱི་ཚུལ་ཁྲིམས་ཏེ་གསུམ། བཟོད་པ་ལ་གནོད་བྱེད་ལ་ཇི་མི་སྙམ་པ། སྡུག་བསྔལ་དང་ལེན། ཆོས་ལ་ངེས་རྟོག་གི་བཟོད་པ་སྟེ་གསུམ། བརྩོན་འགྲུས་ལ། བསམ་པ་གོ་ཆ། སྦྱོར་བ་ཆོས་སྡུད། སེམས་ཅན་དོན་བྱེད་ཀྱི་བརྩོན་འགྲུས་གསུམ། བསམ་གཏན་ལ། བྱིས་པ་ཉེར་སྤྱོད། དོན་རབ་འབྱེད་པ། དེ་བཞིན་གཤེགས་དགེའི་བསམ་གཏན་གསུམ་དང་། ཤེས་རབ་ལ། ཐོས་བསམ་སྒོམ་པའི་ཤེས་རབ་གསུམ་མམ། ཀུན་རྫོབ། དོན་དམ། གཞན་དོན་ཤེས་པའི་ཤེས་རབ་གསུམ་མོ། །ཡང་ན་མངོན་རྟོགས་རྒྱན་ལས། དེ་དག་སོ་སོར་སྦྱིན་ལ་སོགས། །རྣམ་པ་དྲུག་ཏུ་བསྡུས་པ་ཡིས། །གོ་ཆའི་སྒྲུབ་པ་གང་ཡིན་དེ། །དྲུག་ཚན་དྲུག་གིས་ཇི་བཞིན་བཤད། །ཅེས་པས་སྦྱིན་སོགས་རེ་རེ་ལའང་སྦྱིན་པའི་སྦྱིན་པ་སོགས་དྲུག་དྲུག་ཏུ་དབྱེ་བའོ། །གྲངས་ངེས་ནི། བསླབ་པ་གསུམ་གྱི་དབང་གིས་ཏེ། མདོ་རྒྱན་ལས། བསླབ་གསུམ་དབང་དུ་མཛད་ནས་ནི། །རྒྱལ་བས་ཕ་རོལ་ཕྱིན་པ་དྲུག །ཡང་དག་བཤད་དེ་དང་པོ་གསུམ། །ཐ་མ་གཉིས་ཀྱིས་རྣམ་པ་གཉིས། །གཅིག་ནི་གསུམ་ཆར་ལ་ཡང་གཏོགས། །ཞེསསོ། །དེ་ཡང་ཚོགས་གཉིས་སུ་བསྡུ་ན། སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཏེ། །གསུམ་ནི་གཉིས་ཆར་ལ་ཡང་གཏོགས། །ལྔ་ཆར་ཡང་ནི་ཡེ་ཤེས་ཚོགས། །ཞེས་སོ། །གོ་རིམ་ནི། སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང་། །རགས་པ་དང་ནི་ཕྲ་བའི་ཕྱིར། །དེ་དག་རིམ་པས་བསྟན་པ་ཡིན། །ཞེས་སོ། །བསྒྲུབ་ཚུལ་ནི། རེ་བ་མེད་པའི་སྦྱིན་པ་དང་། །ཡང་སྲིད་མི་འདོད་ཚུལ་ཁྲིམས་དང་། །ཐམས་ཅད་ལ་ནི་བཟོད་པ་དང་། །ཡོན་ཏན་ཀུན་སྡུད་བརྩོན་འགྲུས་དང་། །དེ་བཞིན་བསམ་གཏན་གཟུགས་མེད་མིན། །ཤེས་རབ་ཐབས་དང་ལྡན་པ་ཡིས། །ཕ་རོལ་ཕྱིན་པ་དྲུག་པོ་ལ། །བརྟན་པ་རྣམས་ཀྱིས་ཡང་དག་སྦྱོར། །ཞེས་སོ། །ཕན་ཡོན་ནི། རྒྱ་ཆེ་བ་དང་ཟང་ཟིང་མེད། །དོན་ཆེ་བ་དང་མི་ཟད་པ། །སྦྱིན་པ་ལ་སོགས་ཐམས་ཅད་ཀྱི། །ཡོན་ཏན་བཞིར་ནི་ཤེས་པར་བྱ། །ཞེས་སོ། །འབྲས་བུ་ལ། གནས་སྐབས་ཀྱི་འབྲས་བུ། རིན་ཆེན་ཕྲེང་བ་ལས། སྦྱིན་པས་ལོངས་སྤྱོད་ཁྲིམས་ཀྱིས་བདེ། །བཟོད་པས་མདངས་ལྡན་བརྩོན་པས་བརྗིད། །བསམ་གཏན་གྱིས་ཞི་བློ་ཡིས་གྲོལ། །ཞེས་དང་། མཐར་ཐུག་གི་འབྲས་བུ། གཟུགས་ཀྱི་སྐུ་ནི་མདོར་བསྡུ་ན། །བསོད་ནམས་ཚོགས་ལས་འཁྲུངས་པ་སྟེ། །ཆོས་ཀྱི་སྐུ་ནི་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འཁྲུངས། །ཞེས་གསུས་པ་ལྟར་ཏེ། རྒྱས་པར་གཞན་དུ་ཤེས་པར་བྱ་སྟེ། འདིར་མ་སྤྲོས་སོ། །འབྲས་བུ་ནི། ས་བཅུ་དང་ལམ་ལྔ་རིམ་གྱིས་བགྲོད་ནས། མི་སློབ་པའི་ལམ་བཅུ་གཅིག་ཀུན་ཏུ་འོད་ཀྱི་ས་ལ། རང་དོན་ཆོས་སྐུར་གྲོལ་ཏེ། གཞན་དོན་གཟུགས་སྐུ་གཉིས་ལ་བརྟེན་ནས་སེམས་ཅན་གྱི་དོན་འཁོར་བ་མ་སྟོང་གི་བར་མཛད་པ་སྟེ། དེ་ལ་ས་བཅུ་ནི། སྤྱིར་ས་ཡི་མཚན་ཉིད། རྟོགས་པའི་ཡོན་ཏན་གྱི་རྟེན་དུ་གྱུར་པ། སྒྲ་དོན་བྷཱུ་མི་ཞེས་པའི་སྒྲ་ལས་གོང་མའི་ཡོན་ཏན་གྱི་རྟེན་དུ་འགྱུར་ཞིང་། ས་དེ་ཉིད་ཀྱི་ཡོན་ཏན་གྱི་གཞི་ཡིན་པས་ས་ཞེས་བྱ། དབྱེ་ན། སྤྱིར་ཐེག་པ་ཆེ་ཆུང་གི་དབྱེ་བ་དང་། ཐེག་ཆེན་ལའང་སྐྱེ་འཕགས་ཀྱི་ས་གཉིས་ལས། འདིར་ཐེག་ཆེན་འཕགས་པའི་ས། དེ་ལ་སློབ་པ་དང་མི་སློབ་པའི་ས་གཉིས་ལས། དང་པོ་རབ་ཏུ་དགའ་བ་སོགས་བཅུ་སྟེ། དེ་དག་གི་མཚན་ཉིད་དང་སྒྲ་དོན་ཟུང་དུ་འབྲེལ་བར་བཤད་ན། སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་ནས་སེར་སྣའི་རྒྱུ་འབྲས་སྤོང་བ་ས་དང་པོའི་མཚན་ཉིད། དེའི་ཚེ་སྔོན་མ་མཐོང་བའི་ཆོས་ཉིད་མཐོང་བས་བྱང་ཆུབ་ཏུ་ཉེ་བ་དང་། སེམས་ཅན་གྱི་དོན་རྒྱ་ཆེན་པོ་འགྲུབ་པར་མཐོང་བས་རབ་ཏུ་དགའ་བ་ཁྱད་པར་ཅན་སྐྱེ་བའི་ཕྱིར། རབ་ཏུ་དགའ་བ་ཞེས་བྱའོ། །དེ་བཞིན་དུ། ཚུལ་ཁྲིམས་ཀྱི་ཕར་ཕྱིན་ཡོངས་སུ་རྫོགས་ནས་འཆལ་ཚུལ་གྱི་རྒྱུ་འབྲས་སྤོང་བ་ས་གཉིས་པ། དེའི་ཚེ་རྨི་ལམ་ཙམ་དུའང་འཆལ་ཚུལ་གྱི་དྲི་མ་མེད་པས་དྲི་མ་མེད་པ། བཟོད་པའི་ཕར་ཕྱིན་ཡོངས་སུ་རྫོགས་ནས་ཁོང་ཁྲོའི་རྒྱུ་འབྲས་སྤོང་བ་ས་གསུམ་པ། དེའི་ཚེ་འཇིག་རྟེན་ལས་འདས་པའི་ཡེ་ཤེས་ཀྱི་སྣང་བ་ཚད་མེད་པས་ན་འོད་བྱེད་པ། བརྩོན་འགྲུས་ཀྱི་ཕར་ཕྱིན་ཡོངས་སུ་རྫོགས་ནས་ལེ་ལོའི་རྒྱུ་འབྲས་སྤོང་བ་ས་བཞི་པ། དེའི་ཚེ་ཉོན་མོངས་པའི་བུད་ཤིང་མ་ལུས་པ་བསྲེག་ནུས་པའི་བྱང་ཆུབ་ཕྱོགས་ཆོས་ཀྱི་འོད་འཕྲོ་བས་འོད་འཕྲོ་བ། བསམ་གཏན་གྱི་ཕར་ཕྱིན་ཡོངས་སུ་རྫོགས་ནས་རྣམ་པར་གཡེང་བའི་རྒྱུ་འབྲས་སྤོང་བ་ས་ལྔ་པ། དེའི་ཚེ་སེམས་ཅན་གྱི་དོན་ཀྱང་རྒྱུན་མི་འཆད་ཅིང་། རང་གི་ངོ་བོ་རྣམ་པར་མི་རྟོག་པའི་ཡེ་ཤེས་ལས་ཀྱང་ཉམས་མེད་པ་སྟེ། འདི་གཉིས་ཟུང་འབྲེལ་དུ་སྤྱོད་པ་དེ་ཤིན་ཏུ་དཀའ་བའི་ཕྱིར་སྦྱང་དཀའ་བ། ཤེས་རབ་ཀྱི་ཕར་ཕྱིན་ཡོངས་སུ་རྫོགས་ནས་ཤེས་འཆལ་གྱི་རྒྱུ་འབྲས་སྤོང་བ་ས་དྲུག་པ། དེའི་ཚེ་སོ་སོར་རྟོག་པའི་ཤེས་རབ་ཀྱིས་འཁོར་འདས་ཀྱི་ཆོས་ཐམས་ཅད་མངོན་སུམ་དུ་མཐོང་བས་མངོན་དུ་གྱུར་པ། ཐབས་ཀྱི་ཕར་ཕྱིན་ཡོངས་སུ་རྫོགས་ནས་ཐབས་ལ་མི་མཁས་པའི་རྒྱུ་འབྲས་སྤོང་བ་ས་བདུན་པ། དེའི་ཚེ་བགྲོད་པ་གཅིག་པའི་ལམ་ས་བརྒྱད་པ་དང་འདབས་འབྲེལ་བས་ཉེ་ཞིང་འཁོར་འདས་ཀྱི་མཐའ་ལས་རིང་དུ་སོང་བས་ན་རིང་དུ་སོང་བ། སྟོབས་ཀྱི་ཕར་ཕྱིན་རྫོགས་ནས་སྟོབས་ལ་སྒྲིབ་པའི་རྒྱུ་འབྲས་སྤོང་བ་ས་བརྒྱད་པ། དེའི་ཚེ་མཉམ་རྗེས་ཀུན་ཏུ་རྣམ་པར་མི་རྟོག་པའི་ཡེ་ཤེས་མཚན་མའི་འདུ་ཤེས་དང་མཚན་མ་མེད་པའི་འདུ་ཤེས་ཀྱི་ཆོས་ལས་འདས་ཤིང་རྩོལ་བས་མི་བསྐྱོད་པས་མི་གཡོ་བ། སྨོན་ལམ་གྱི་ཕར་ཕྱིན་རྫོགས་ནས་སྨོན་པའི་དོན་མི་འགྲུབ་པའི་རྒྱུ་འབྲས་སྤོང་བ་ས་དགུ་པ། དེའི་ཚེ་སོ་སོ་ཡང་དག་པར་རིག་པ་བཞི་ལ་དབང་འབྱོར་པའི་བློ་གྲོས་ཕུན་སུམ་ཚོགས་པ་དང་ལྡན་པས་ལེགས་པའི་བློ་གྲོས། ཡེ་ཤེས་ཀྱི་ཕར་ཕྱིན་ཡོངས་སུ་རྫོགས་ནས་ཤེས་བྱའི་སྒྲིབ་པའི་རྒྱུ་འབྲས་ཡོངས་སུ་སྤོང་བ་ས་བཅུ་པའི་མཚན་ཉིད། དེའི་ཚེ་ཏིང་ངེ་འཛིན་དང་གཟུངས་ཀྱི་སྤྲིན་ལས་འཇིག་རྟེན་གྱི་ཁམས་མཐའ་ཡས་པར་གདུལ་བྱ་སོ་སོའི་སྐལ་བ་དང་འཚམ་པར་ཆོས་ཀྱི་ཆར་འབེབས་པར་ནུས་པའི་ཕྱི ར་ཆོསཀྱི་སྤྲིན་ཞེས་བྱའོ། །དེ་ལའང་ནང་གསེས་སུ་ས་དང་པོ་ནས་བདུན་པའི་བར་ལ་མ་དག་ས་བདུན་ཞེས་བྱ་སྟེ། མཉམ་རྗེས་ཐ་དད་དུ་འཛིན་པའི་དྲི་མ་དང་བཅས་པའི་ཕྱིར། ས་བརྒྱད་པ་ནས་བཅུ་པའི་བར་ལ་དག་པ་ས་གསུམ་ཞེས་བྱ་སྟེ། ཐ་དད་དུ་འཛིན་པའི་དྲི་མ་ལས་འདས་པའི་ཕྱིར་རོ། །ལམ་ལྔ་ནི། ཚོགས་སྦྱོར་མཐོང་སྒོམ་མི་སློབ་པའི་ལམ་ལྔ་སྟེ། དང་པོ་ཚོགས་ལམ་ནི། བདག་མེད་དོན་སྤྱིའི་ཚུལ་གྱིས་རྟོགས་པའི་ལས་དང་པོ་པས་མཁྱེན་པ་དེ་ཚོགས་ལམ་གྱི་མཚན་ཉིད། སྒྲ་དོན་སམ་བྷ་ར་མཱརྒ་ཞེས་པས། གཙོ་བོར་ཐོས་བསམ་དང་བསོད་ནམས་དང་ཡེ་ཤེས་ཀྱི་ཚོགས་གཉིས་ལ་བརྟེན་ཏེ་གོམས་པར་བྱེད་པས་ཚོགས་ལམ་ཞེས་བྱ་ཞིང་། ཐར་པ་ཆ་མཐུན་གྱི་ལམ་དང་། ལས་དང་པོ་པའི་མངོན་རྟོགས་རྣམས་དོན་གཅིག་གོ །དབྱེ་ན་ཆུང་འབྲིང་ཆེ་གསུམ་སྟེ། དང་པོ་ནི། སྦྱོོར་ལམ་དུ་འཇུག་པའི་དུས་མ་ངེས་པའོ། །གཉིས་པ་ནི། ཚེ་ཕྱི་མ་ཕན་ཆད་དུ་སྦྱོར་ལམ་ལ་འཇུག་པའི་དུས་ངེས་པའོ། །གསུམ་པ་ནི། ཚེ་དེ་ཉིད་དུ་སྦྱོར་ལམ་གྱི་དྲོད་སྐྱེ་བར་ངེས་པའོ། །འདི་མཐར་ཕྱིན་ནས་ཆོས་རྒྱུན་ཀྱི་ཏིང་ངེ་འཛིན་ཐོབ། སངས་རྒྱས་སྤྲུལ་སྐུའི་ཞལ་མཐོང་ཞིང་གདམས་ངག་ཉན་པ་སོགས་ལ་དབང་བ་ཡིན་ནོ། །གཉིས་པ་སྦྱོར་ལམ་ནི། ཚོགས་ལམ་གྱི་རྗེས་ལས་བྱུང་བའི་བདག་མེད་དོན་སྤྱིའི་ཚུལ་གྱིས་རྟོགས་པ་དེ་སྦྱོར་ལམ་ན་ཡང་སྦྱོོར་ལམ་ཡིན་མིན་གྱི་ཚད་དཔེ་ཡི་ཡེ་ཤེས་རྒྱུད་ལ་སྐྱེས་མ་སྐྱེས་ཀྱིས་འཛིན་པར་གསུངས། མཆན། གྱི་མཚན་ཉིད། སྒྲ་དོན་པྲ་ཡོ་ག་མཱརྒ་ཞེས་པས་ངེས་པར་འབྱེད་པ་མཐོང་ལམ་ལ་དངོས་སུ་སྦྱོར་བར་བྱེད་པས་སྦྱོར་ལམ་སྟེ་ངེས་འབྱེད་ཆ་མཐུན་ནམ་ངེས་འབྱེད་ཡན་ལག་མངོན་རྟོགས་རྣམས་དོན་གཅིག དབྱེ་ན་ཆུང་འབྲིང་ཆེ་གསུམ་ལས། དང་པོ་ནི་དྲོད་དང་རྩེ་མོ་གཉིས་ཏེ། མཐོང་ལམ་སྐྱེ་བའི་དུས་མ་ངེས་པའོ། །གཉིས་པ་ནི་བཟོད་པ་སྟེ། ཚེ་ཕྱི་མ་ལ་མཐོང་ལམ་སྐྱེ་བར་ངེས་པའོ། །གསུམ་པ་ནི། ཆོས་མཆོག་ཆེན་པོ་སྟེ། ཚེ་དེ་ཉིད་ལ་མཐོང་ལམ་སྐྱེ་བར་ངེས་པའོ། །དེ་ཡང་མཐོང་ལམ་རྣམ་པར་མི་རྟོག་པའི་ཡེ་ཤེས་མེ་ལྟ་བུའི་སྔ་ལྟས་སུ་གྱུར་པས་དྲོད། དགེ་བའི་རྩ་བ་གཡོ་བ་རྣམས་ཀྱི་རྩེ་མོར་གྱུར་པས་རྩེ་མོ། སྟོང་པ་ཉིད་ལ་མི་སྐྲག་པས་བཟོད་པ། འཇིག་རྟེན་པའི་ཆོས་ཀྱི་ནང་ནས་མཆོག་ཏུ་གྱུར་པས་ཆོས་མཆོག་སྟེ། དེ་སོ་སོར་དྲོད་སྣང་བ་ཐོབ་པའི་ཏིང་ངེ་འཛིན། རྩེ་མོར་སྣང་བ་མཆེད་པའི་ཏིང་ངེ་འཛིན། བཟོད་པ་དེ་ཁོ་ན་ཉིད་ལ་ཕྱོགས་གཅིག་ལ་ཞུགས་པའི་ཏིང་ངེ་འཛིན། ཆོས་མཆོག་དེ་མ་ཐག་པའི་ཏིང་ངེ་འཛིན་ཞེས་བྱ་ཞིང་། དེ་རེ་རེའང་ནང་གསེས་སུ་ཆུང་འབྲིང་ཆེ་གསུམ་གྱི་དབྱེ་བས་ངེས་འབྱེད་ཆ་མཐུན་བཅུ་གཉིས་སུ་བཞེད་པ་དང་། གཞན་ཡང་ཀུན་ཉོན་དང་རྣམ་བྱང་གི་གཟུང་བ་རང་བཞིན་མེད་པར་རྟོགས་པ་དྲོད་དང་རྩེ་མོ། གང་ཟག་རྫས་ཡོད་དང་བཏགས་ཡོད་ཀྱི་འཛིན་པ་རང་བཞིན་མེད་པར་རྟོགས་པ་བཟོད་དང་ཆོས་མཆོག་ཅེས་ཀྱང་གསུངས་སོ། །འདི་དག་གི་ཡོན་ཏན། རྩེ་མོ་ཐོབ་པས་དགེ་བའི་རྩ་བ་རྒྱུན་མི་འཆད། བཟོད་པ་ཐོབ་ནས་ངན་སོང་དུ་མི་ལྟུང་བ་སོགས་དང་། ཚོགས་ལམ་ཆེན་པོ་ལས་ཁྱད་པར་དུ་འཕགས་ཚུལ་ནི་མཐོང་ལམ་ལ་ཉེ་བ་དང་། ཡེ་ཤེས་ཀྱི་དྲོད་བརྟན་པར་གྱུར་པ་སོགས་ཀྱིས་ཕྱེ་བར་གསུངས་སོ། །གསུམ་པ་མཐོང་ལམ་ནི། བ དག་མེད་མངོན་སུམ་དུ་གསར་དུ་རྟོགས་པའི་མཁྱེན་པ་དེ་མཐོང་ལམ་གྱི་མཚན་ཉིད། སྒྲ་དོན་དཪྴ་ན་མཱརྒ་ཞེས་པས། སྔ་མ་མཐོང་བའི་ཆོས་ཀྱི་དབྱིངས་དང་པོར་མཐོང་བས་མཐོང་ལམ་སྟེ། བདེན་པ་མངོན་པར་རྟོགས་པ་དང་ངེས་འབྱེད་རྣམས་དོན་གཅིག་གོ །དབྱེ་ན་ངོ་བོའི་སྒོ་ནས་སྐད་ཅིག་མ་བཅུ་དྲུག་སྟེ། བདེན་པ་བཞི་སོ་སོར། ཆོས་བཟོད། ཆོས་ཤེས། རྗེས་བཟོད། རྗེས་ཤེས་ཏེ། བཞི་བཞིར་དབྱེ་བའོ། །དེ་ལ་ཆོས་ཤེས་པའི་བཟོད་པ་ནི། ལམ་རྣམས་ལ་དམིགས་ནས་སོ་སོའི་མཐོང་སྤང་གི་སྒྲིབ་པ་སྤོང་བའོ། །ཆོས་ཤེས་པ་ནི། སྒྲིབ་པ་སྤངས་ནས་ཀྱང་རྣམ་པར་གྲོལ་བ་ཉམས་སུ་མྱོང་བའོ། །རྗེས་སུ་ཤེས་པའི་བཟོད་པ་ནི། སྐད་ཅིག་མ་དང་པོ་གཉིས་འཕགས་པའི་ཆོས་ཀྱི་རྒྱུར་རྟོགས་པའོ། །རྗེས་སུ་ཤེས་པ་ནི། དེ་ཉིད་རང་རིག་ཚུལ་གྱིས་ངེས་པར་འཛིན་ཅིང་མྱོང་བར་བྱེད་པའོ། །འདི་ལ་ཉན་ཐོས་བྱེ་སྨྲ་བས་སྐད་ཅིག་བཅུ་དྲུག་ཏུ་རིམ་ཅན་སྐྱེ་བར་འདོད་པ་སོགས་དང་། ཐེག་ཆེན་ཐུན་མོང་བ་འགའ་ཞིག་ཀྱང་བཅུ་དྲུག་ནས་གཅིག་གི་བར་ཅི་རིགས་སུ་སྐྱེ་བར་འདོད་ལ། ཐེག་ཆེན་ཐུན་མོང་མ་ཡིན་པ་ལྟར་ན། མདོ་ལས། མི་སྐྱེ་བའི་ཆོས་ལ་བཟོད་པ་ཐོབ་པ་ཞེས་གསུངས་པས། དོན་དམ་པར་མཐོང་ལམ་སྐྱེ་བར་མི་བཞེད་ཅིང་། ཀུན་རྫོབ་ཏུ་རྟེན་ཅིང་འབྲེལ་བར་འབྱུང་བ་ཙམ་ལ་དགོངས་ནས་མཐོང་ལམ་སྐྱེ་བའི་རྣམ་བཞག་བྱེད་དོ། །སྤང་བྱའི་ངོས་ནས་དབྱེ་ན། ཉོན་སྒྲིབ་ཀུན་བརྟགས་དང་། ཤེས་སྒྲིབ་གཟུང་འཛིན་རགས་པ་རྣམས་མཐོང་སྤང་སྟེ། ཞིབ་པར་གོང་སྨོས་བརྒྱ་དང་བཅུ་གཉིས་སོ། །དེ་རྣམས་སྤོང་བའི་གཉེན་པོ། ཆོས་བཟོད་བཞི་ནི། བར་ཆད་མེད་པའི་ལམ་དངོས་དང་། ཆོས་ཤེས་བཞི་ནི། རྟེན་གཉེན་པོ་རྣམ་པར་གྲོལ་བའི་ལམ། རྗེས་བཟོད་བཞི་དང་རྗེས་ཤེས་བཞི་ནི་ཐག་བསྲིང་བའི་གཉེན་པོའི་ཁྱད་པར་གྱི་ལམ་སྟེ་རྩ་འདོན་གྱི་ཚུལ་དུ་སྤོང་བར་བྱེད་དོ། །རྟེན་གྱི་ངོས་ནས་དབྱེ་ན། བྱང་ཆུབ་ཀྱི་ཡན་ལག་བདུན། སའི་དབང་དུ་བྱས་ན། འཇིག་རྟེན་ལས་འདས་པའི་ཡེ་ཤེས་ཐོག་མར་བྱས་པ་དེའི་ཚེ་རང་གི་ངོ་སྐལ་གྱི་སྤང་བྱ་སྤོང་བ་དང་། བདག་མེད་གཉིས་མངོན་དུ་རྟོགས་པས་བྱང་ཆུབ་ལ་ཉེ་བ་དང་། གཞན་དོན་འགྲུབ་པར་མཐོང་བའི་རབ་ཏུ་དགའ་བ་རྒྱ་ཆེན་པོ་སྔོན་ཆད་མ་མྱོང་བ་ཐོབ་པས་ས་དང་པོ་རབ་ཏུ་དགའ་བ་སྟེ། སྤང་བའི་ཁྱད་པར་མཐོང་སྤང་བརྒྱ་དང་བཅུ་གཉིས་སྤངས། རྟོགས་པའི་ཁྱད་པར་ཆོས་དབྱིངས་ཀུན་ཏུ་འགྲོ་བའི་དོན་རྟོགས། ཡོན་ཏན་གྱི་ཁྱད་པར་བརྒྱ་ཕྲག་བཅུ་གཉིས་དབང་འབྱོར་ཏེ། བརྒྱ་ཕྲག་བཅུ་གཉིས་ནི། དུས་སྐད་ཅིག་མ་གཅིག་ལ་སངས་རྒྱས་བརྒྱའི་ཞལ་ལྟ་བ་དང་། སངས་རྒྱས་བརྒྱས་བྱིན་གྱིས་བརླབས་པར་ཤེས་པ་དང་། སྤྲུལ་པ་བརྒྱ་འགྱེད་པ་དང་། དུས་སྐད་ཅིག་ལ་བསྐལ་པ་བརྒྱར་སྟོན་པ་དང་། སྔོན་དང་ཕྱི་མའི་མཐའ་བརྒྱ་ལ་ཡེ་ཤེས་ཀྱི་གཟིགས་པ་འཇུག་པ་དང་། ཏིང་ངེ་འཛིན་བརྒྱ་ལ་དུས་སྐད་ཅིག་མར་སྙོམས་པར་འཇུག་ཅིང་ལྡང་བ་དང་། སེམས་ཅན་བརྒྱར་སྨིན་པར་བྱེད་པ་དང་། ཞིང་ཁམས་བརྒྱ་གཡོ་བར་བྱེད་པ་དང་། ཞིང་བརྒྱ་འོད་ཀྱིས་གསལ་བར་བྱེད་པ་དང་། ཆོས་ཀྱི་སྒོ་མོ་བརྒྱ་འབྱེད་པ་དང་། རང་གི་ལུས་བརྒྱར་སྟོན་པ་དང་། ལུས་རེ་རེ་ལ་ཡང་འཁོར་ཕུན་སུམ་ཚོགས་པ་བརྒྱས་བསྐོར་བར་སྟོན་པའོ། །སྐྱེ་བ་འཛིན་པའི་ཁྱད་པར་འཛམ་གླིང་གི་རྒྱལ་པོའི་སྐྱེ་བ་འཛིན་པར་ནུས་པའོ། །གཞན་ཡང་མདོ་ལས། ཆོས་ཐོབ་པ་ཆོས་མཐོང་བ། ཆོས་རིག་པ། ཆོས་རྟོགས་པ། སོམ་ཉི་ལས་བརྒལ་བ། ཐེ་ཚོམ་ལས་བརྒལ་བ། གཞན་གྱི་དྲིང་མི་འཇོག་པ། སྟོན་པའི་བསྟན་པ་ལས་གཞན་གྱིས་མི་བཀྲི་བ་ཆོས་རྣམས་ལ་མི་འཇིགས་པ་ཐོབ་པ་སོགས་ཡོན་ཏན་གྱི་ཁྱད་པར་མང་དུ་གསུངས་སོ། །བཞི་པ་སྒོམ་ལམ་ནི། བདག་མེད་མངོན་སུམ་དུ་རྟོགས་ཟིན་རྒྱུན་ལྡན་དུ་གོམས་པར་བྱེད་པའི་མཁྱེན་པ་དེ་སྒོམ་ལམ་གྱི་མཚན་ཉིད། སྒྲ་དོན་བྷ་ག་ཝན་མཱརྒ་ཞེས་པས་མཐོང་བའི་དོན་སྒོམ་པར་བྱེད་པས་སྒོམ་ལམ་སྟེ། རྣམ་དག་ངེས་འབྱིན་གྱི་ལམ་དང་དོན་གཅིག་གོ །དབྱེ་ན། སྤང་བྱའི་ངོས་ནས་ཉོན་སྒྲིབ་ལྷན་སྐྱེས་དང་། ཤེས་སྒྲིབ་གཟུང་འཛིན་གྱི་རྟོག་པ་ཕྲ་བ་རྣམས་སྒོམ་སྤང་སྟེ། ཞིབ་པར་གོང་སྨོས་བཞི་བརྒྱ་དང་བཅུ་བཞིའོ། །དེའི་གཉེན་པོར་སྒོམ་ལམ་ཆུང་འབྲིང་ཆེ་གསུམ། དེ་རེ་རེ་ལའང་ཆུང་ངུའི་ཆུང་ངུ་སོགས་སུ་དབྱེ་བས་དགུ་སྟེ་ས་གཉིས་པ་ནས་བཅུ་པའི་བར་རོ། །སྤང་ཚུལ། སྦྱོར་བས་མགོ་མནན། བར་ཆད་མེད་པས་དངོས་སུ་སྤངས་ཏེ། ལམ་འདི་གཉིས་ནི་སྤོང་བའི་གཉེན་པོའོ། །རྣམ་གྲོལ་གྱི་ལམ་གྱི་ལམ་ནི་རྟེན་གྱི་གཉེན་པོའོ། །ཁྱད་པར་གྱི་ལམ་ནི་ཐག་བསྲིང་གི་གཉེན་པོའོ། །དེ་ཡང་ཐེག་ཆེན་སྒོམ་ལམ་ཆུང་ངུའི་ཆུང་ངུའི་གནས་སྐབས་ཀྱི་ཡེ་ཤེས་ཁྱད་པར་ཅན་གང་ཞིག སའི་དབང་དུ་བྱས་ན་གཉིས་པ་དྲི་མ་མེད་པ། སྤང་བའི་ཁྱད་པར་ཁམས་གསུམ་གྱི་སྒོམ་སྤང་ཆེན་པོའི་ཆེན་པོ་ཞེ་དྲུག་སྤངས་པ། རྟོགས་པའི་ཁྱད་པར་ཆོས་ཉིད་མཆོག་གི་དོན་དུ་རྟོགས། ཡོན་ཏན་གྱི་ཁྱད་པར་སྟོང་ཕྲག་བཅུ་གཉིས་ཐོབ། སྐྱེ་བ་འཛིན་པའི་ཁྱད་པར་གླིང་བཞི་པའི་འཁོར་ལོས་སྒྱུར་བའི་རྒྱལ་པོའི་སྐྱེ་བ་འཛིན་ནུས་སོ། །དེ་བཞིན་དུ། སྒོམ་ལམ་ཆུང་ངུའི་འབྲིང་པོའི་སྐབས་ཀྱི་ཡེ་ཤེས་གང་ཞིག ས་གསུམ་པ་འོད་བྱེད་པ། ཁམས་གསུམ་གྱི་སྒོམ་སྤང་ཆེན་པོའི་འབྲིང་པོ་ཞེ་དྲུག་སྤངས། ཆོས་ཉིད་རྒྱུ་མཐུན་པའི་དོན་གྱི་མཆོག་ཏུ་རྟོགས། དེའི་དོན་སྔར་ཐོས་པ་བྱས་པ་དེ་ཆོས་ཉིད་ཀྱིས་རྟོགས་པའི་རྒྱུ་མཐུན་པའི་དོན་དུ་རྟོགས་ནས་སྟོང་གསུམ་མེ་འོབས་ཀྱིས་གང་བའང་འབོག་ནས་ཆོས་འཚོལ་བའོ། །ཡོན་ཏན་འབུམ་ཕྲག་བཅུ་གཉིས་ཐོབ། ལྷའི་དབང་པོ་བརྒྱ་བྱིན་གྱི་སྐྱེ་བ་འཛིན་ནུས་སོ། །སྒོམ་ལམ་ཆུང་ངུའི་ཆེན་པོ་སྐབས་ཀྱི་ཡེ་ཤེས་གང་ཞིག ས་བཞི་པ་འོད་འཕྲོ་བ། ཁམས་གསུམ་གྱི་སྒོམ་སྤང་ཆེན་པོའི་ཆུང་ངུ་ཞེ་དྲུག་སྤངས་ཆོས་ཉིད་ཡོངས་སུ་འཛིན་པ་མེད་པའི་དོན་རྟོགས་པ་སྟེ། དེའི་ཚེ་བདག་ཏུ་འཛིན་པ་མེད་པས་ཆོས་དབྱིངས་ལ་བདག་གིར་འཛིན་པ་མེད་པར་རྟོགས་པའོ། །ཡོན་ཏན་བྱེ་བ་ཕྲག་བཅུ་གཉིས་ཐོབ། འཐབ་བྲལ་ལྷའི་རྒྱལ་པོའི་སྐྱེ་བ་འཛིན་ནུས་སོ། །སྒོམ་ལམ་འབྲིང་པོའི་ཆུང་ངུའི་སྐབས་ཀྱི་ཡེ་ཤེས་ཁྱད་པར་ཅན་གང་ཞིག ས་ལྔ་པ་སྦྱང་དཀའ་བ། ཁམས་གསུམ་གྱི་སྒོམ་སྤང་འབྲིང་པོའི་ཆེན་པོ་ཞེ་དྲུག་སྤངས། ཆོས་ཉིད་གཉིས་སུ་མེད་པའི་དོན་རྟོགས། ཡོན་ཏན་བྱེ་བ་སྟོང་ཕྲག་བཅུ་གཉིས་ཐོབ། དགའ་ལྡན་ལྷའི་རྒྱལ་པོའི་སྐྱེ་བ་འཛིན་ནུས་སོ། །སྒོམ་ལམ་འབྲིང་པོའི་འབྲིང་གི་སྐབས་ཀྱི་ཡེ་ཤེས་ཁྱད་པར་ཅན་གང་ཞིག ས་དྲུག་པ་མངོན་དུ་གྱུར་པ། ཁམས་གསུམ་གའི་སྒོམ་སྤང་འབྲིང་པོའི་འབྲིང་པོ་ཞེ་དྲུག་སྤངས། ཆོས་ཉིད་རྣམ་པར་དག་པའི་དོན་དུ་རྟོགས། ཡོན་ཏན་བྱེ་བ་འབུམ་ཕྲག་གཉིས་ཐོབ། འཕྲུལ་དགའི་ལྷའི་རྒྱལ་པོའི་སྐྱེ་བ་འཛིན་ནུས་སོ། །སྒོམ་ལམ་འབྲིང་པོའི་ཆེན་པོའི་སྐབས་ཀྱི་ཡེ་ཤེས་ཁྱད་པར་ཅན་གང་ཞིག ས་བདུན་པ་རིང་དུ་སོང་བ། ཁམས་གསུམ་གྱི་སྒོམ་སྤང་འབྲིང་པོའི་ཆུང་ངུ་ཞེ་དྲུག་སྤངས། ཆོས་ཉིད་ཐ་དད་མེད་པའི་དོན་དུ་རྟོགས་ཏེ། སངས་རྒྱས་ཀྱི་ཆོས་མདོ་དང་རྒྱས་པ་དུ་མར་གསུངས་ཀྱང་། དོན་ཆོས་ཀྱི་དབྱིངས་ལ་ཐ་དད་མེད་པར་རྟོགས་པའོ། །ཡོན་ཏན་བྱེ་བ་ཁྲག་ཁྲིག་འབུམ་ཕྲག་བཅུ་གཉིས་ཐོབ། གཞན་འཕྲུལ་དབང་བྱེད་ཀྱི་རྒྱལ་པོའི་སྐྱེ་བ་འཛིན་ནུས་སོ། །སྒོམ་ལམ་ཆེན་པོའི་ཆུང་ངུའི་སྐབས་ཀྱི་ཡེ་ཤེས་ཁྱད་པར་ཅན་གང་ཞིག ས་བརྒྱད་པ་མི་གཡོ་བ། ཁམས་གསུམ་གྱི་སྒོམ་སྤང་ཆུང་ངུའི་ཆེན་པོ་ཞེ་དྲུག་སྤངས། ཆོས་ཉིད་བྲི་གང་མེད་པ་དང་རྣམ་པར་མི་རྟོག་པ་དང་ཞིང་དག་པ་ལ་དབང་བའི་གནས་སུ་རྟོགས། ཡོན་ཏན་སྟོང་ཆེན་འབུམ་ཕྲག་གཅིག་གི་རྡུལ་དང་མཉམ་པ་ཐོབ། སྟོང་གི་བདག་པོ་ཚངས་པའི་སྐྱེ་བ་འཛིན་ནུས་སོ། །སྒོམ་ལམ་ཆེན་པོའི་འབྲིང་པོའི་སྐབས་ཀྱི་ཡེ་ཤེས་ཁྱད་པར་ཅན་གང་ཞིག ས་དགུ་པ་ལེགས་པའི་བློ་གྲོས། ཁམས་གསུམ་གྱི་སྒོམ་སྤང་ཆུང་ངུའི་འབྲིང་པོ་ཞེ་དྲུག་སྤངས། ཆོས་ཉིད་སོ་སོ་ཡང་དག་པར་རིག་པའི་ཡེ་ཤེས་ལ་དབང་བའི་གནས་སུ་རྟོགས། ཡོན་ཏན་སྟོང་ཆེན་འབུམ་ཕྲག་ཅུའི་རྡུལ་གྱི་གྲངས་དང་མཉམ་པར་ཐོབ། སྟོང་གཉིས་ཀྱི་བདག་པོ་ཚངས་པ་ཆེན་པོའི་སྐྱེ་བ་འཛིན་ནུས་སོ། །ངོ་བོ་ཐེག་ཆེན་སྒོམ་ལམ་ཆེན་པོའི་ཆེན་པོའི་སྐབས་ཀྱི་ཡེ་ཤེས་ཁྱད་པར་ཅན་གང་ཞིག ས་བཅུ་པ་ཆོས་ཀྱི་སྤྲིན་ཏེ། སྤང་བའི་ཁྱད་པར་ཁམས་གསུམ་གྱི་སྒོམ་སྤང་ཆུང་ངུའི་ཆུང་ངུ་ཞེ་དྲུག་སྤངས། རྟོགས་པའི་ཁྱད་པར་ཆོས་ཉིད་ཕྲིན་ལས་ལ་དབང་བའི་གནས་སུ་རྟོགས། ཡོན་ཏན་གྱི་ཁྱད་པར་སངས་རྒྱས་ཀྱི་ཞིང་ཁམས་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་གྱི་གྲངས་དང་མཉམ་པ་ཐོབ། སྐྱེ་བ་འཛིན་པའི་ཁྱད་པར་སྟོང་གསུམ་གྱི་སྟོང་ཆེན་པོའི་བདག་པོ་ལྷའི་བུ་དབང་ཕྱུག་ཆེན་པོའི་སྐྱེ་བ་འཛིན་ནུས་སོ། །དེའང་དེ་དག་གི་རྒྱལ་པོར་སྐྱེ་བ་འཛིན་པའི་ནུས་པ་ཡོད་ཀྱི་སྐྱེ་བ་འཛིན་པས་མ་ཁྱབ་ལ། དེ་དག་གི་རྒྱལ་པོ་ཡིན་ཚད་ཀྱང་བྱང་ཆུབ་སེམས་དཔའི་ས་དེ་དག་ལ་གནས་པས་མ་ཁྱབ་སྟེ། ཁ་ཅིག་སོ་སོའི་སྐྱེ་བོ་བསོད་ནམས་རླབས་ཆེན་བསགས་པ་ཡིན་ལ། ཁ་ཅིག་ཏུ་དེ་བཞིན་གཤེགས་པའི་སྤྲུལ་པ་དེར་སྣང་བས་སེམས་ཅན་གྱི་དོན་མཛད་ཚུལ་གསུངས་པའི་ཕྱིར་རོ། །གཞན་ཡང་དག་ས་གསུམ་པོ་འདིར་དབང་བཞི་ཐོབ་སྟེ། ས་བརྒྱད་པ་ལ་ཉོན་ཡིད་གནས་གྱུར་པས་རྣམ་པར་མི་རྟོག་པ་དང་། སྒོ་ལྔ་གནས་གྱུར་པས་ཞིང་དག་པ་ལ་དབང་། ས་དགུ་པར་རྣམ་པར་རྟོག་པ་ཡིད་ཤེས་གནས་གྱུར་པས་ཡེ་ཤེས་བསམ་མི་ཁྱབ་པ་ལ་དབང་འབྱོར། ས་བཅུ་པར་ཡིད་ཤེས་ཀྱི་འཆར་གཞི་ཀུན་གཞིའི་ཤེས་པ་གནས་གྱུར་པས་ཕྲིན་ལས་ཕུན་སུམ་ཚོགས་པ་ལ་དབང་འབྱོར་ཏེ། གཞན་དོན་དུ་མཛད་པ་བཅུ་གཉིས་སོགས་སྟོན་པར་ནུས་པ་སངས་རྒྱས་དང་ཚུལ་མཚུངས་པའི་ཕྱིར། འོན་ཀྱང་རང་ངོར་སྤངས་རྟོགས་ཀྱི་ངོས་ནས་མཉམ་པ་མ་ཡིན་ཏེ། ས་གཞི་དང་རྡུལ་ཕྲན་གྱི་དཔེས་རྒྱུད་བླ་མ་སོགས་ནས་གསུངས་ཏེ་རྒྱུན་མཐའི་ཡེ་ཤེས་རྡོ་རྗེ་ལྟ་བུས་གཞོམ་བྱ་ཕྲ་མོ་ཡོད་པའི་ཕྱིར་རོ། །འདིས་གཞལ་ན་མདོ་སྔགས་ཀྱི་སངས་རྒྱས་དང་དངོས་བཏགས་ཀྱི་ཁྱད་པར་སོགས་ཀྱང་ཤེས་པར་ནུས་སོ། །དེ་ལྟ་བུའི་ཡོན་ཏན་ཡང་ཁམས་ཀྱིི་སྟེང་གི་སྒྲིབ་པ་བྲལ་སྟོབས་ཀྱིས་གསར་དུ་མཐོང་ཡང་། སྔོན་མེད་པ་ཕྱིས་གསར་དུ་སྐྱེས་པ་ནི་མ་ཡིན་ཏེ་ཡོན་ཏན་དེ་ལྟ་བུ་དང་གཞན་ཡང་ཚད་མེད་པ་ཉིད་ཡེ་ནས་ལྷུན་གྲུབ་ཏུ་ཡོད་པས་སོ་སོར་ཁམས་གསར་དུ་མཐོང་བ་ཇེ་དག་ཏུ་སོང་བས་སྣང་བའི་ཕྱིར་ཞེས་ཀུན་མཁྱེན་ཆེན་པོས་གྲུབ་མཐའ་མཛོད་དུ་གསུངས་སོ། །ལྔ་པ་མི་སློབ་པའི་ལམ་ནི། རང་གི་རྟོགས་པ་མཐར་ཐུག་པ་དེ་མི་སློབ་པའི་ལམ་གྱི་མཚན་ཉིད། སྒྲ་དོན། ནིཥྛ་མཱརྒ་ཞེས་པའི་སྒྲ་ལས། སྤང་བྱ་སྤོང་བ་དང་། ཤེས་བྱ་ཤེས་པ་མཐར་ཕྱིན་པར་བྱེད་པས་ན་མཐར་ཕྱིན་པའམ་མི་སློབ་པའི་ལམ་ཞེས་བྱ། དབྱེ་ན། གནས་སྐབས་ཀྱི་མི་སློབ་པ་དང་། མཐར་ཐུག་གི་མི་སློབ་པ་གཉིས། དང་པོ་ནི། ཉན་རང་གཉིས་ཀྱི་མི་སློབ་པ་སྟེ། དེ་ནི་གོང་དུ་འགྲོ་བ་དང་བཅས་པ་ཕྱིར། ལམ་མཚན་ཉིད་པ་དང་འབྲས་བུ་བཏགས་པ་བའོ། །གཉིས་པ་ནི། ཐེག་པ་ཆེན་པོའི་མི་སློབ་པའི་ས་སྟེ། དེ་ལས་གོང་དུ་སྤངས་རྟོགས་ཀྱི་ཁྱད་པར་གཞན་ཐོབ་ཏུ་མེད་པའི་ཕྱིར་ལམ་བཏགས་པ་བ་དང་། འབྲས་བུ་མཚན་ཉིད་པ་ཡིན་ནོ། །དེའི་ངོ་བོ་ནི་རྡོ་རྗེ་ལྟ་བུའི་ཏིང་ངེ་འཛིན་ལ་བརྟེན་ནས་ཉོན་མོངས་པ་བག་ཆགས་དང་བཅས་པ་གཏན་ནས་སྤངས་ཤིང་ཟད་པ་དང་མི་སྐྱེ་ཤེས་པའི་ཡེ་ཤེས་མཐར་ཐུག་པ་ཐོབ་པ་སྟེ། སྤངས་པ་དང་ཡེ་ཤེས་ཕུན་སུམ་ཚོགས་པའི་རང་བཞིན་མཐར་ཕྱིན་པ་དེ་སངས་རྒྱས་ཀྱི་ས་ཡི་མཚན་ཉིད། མིང་ནི་བཅུ་གཅིག་ཀུན་ཏུ་འོད་ཀྱི་ས་ཞེས་བྱའོ། །འདི་ལ་དབྱེ་ན་རྟེན་སྐུ་གསུམ། བརྟེན་པ་ཡེ་ཤེས་བཞི། ཡོན་ཏན་དང་ཕྲིན་ལས་ཀྱི་ཚོགས་བསམ་གྱིས་མི་ཁྱབ་པ་དང་བཅས་པ་ལ་དབང་འབྱོར་བ་སྟེ། དང་པོ་རྟེན་སྐུ་ལའང་དབྱེ་ན་གཉིས་ཏེ། རང་དོན་མཐར་ཕྱིན་ཆོས་སྐུ་དང་། གཞན་དོན་མཐར་ཕྱིན་གཟུགས་ཀྱི་སྐུའོ། །དང་པོ་ནི། དབྱིངས་རང་བཞིན་གྱིས་རྣམ་པར་དག་པའི་ཡེ་ཤེས་དང་། ལམ་གློ་བུར་གྱི་སྒྲིབ་གཉིས་དག་པའི་ཡེ་ཤེས་གཉིས་དབྱེར་མེད་པར་རང་བཞིན་གྱིས་ཟུང་དུ་འཇུག་ཅིང་དྲི་མ་ཐམས་ཅད་དང་བྲལ་བའི་དག་པ་གཉིས་ལྡན་གྱི་ཡེ་ཤེས་ནམ་མཁའ་ལྟ་བུ་མངོན་དུ་གྱུར་པ་སྟེ། སངས་རྒྱས་འཕགས་པའི་ཐུགས་རྒྱུད་ཀྱི་འགོག་ལམ་བདེན་པ་རྣམས་དང་དོན་གཅིག་གོ །གཉིས་པ་ལ་གཉིས། ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུའོ། །དང་པོ་ནི། དེ་ལྟ་བུའི་ཆོས་སྐུའི་ཡེ་ཤེས་ལས་མ་གཡོས་བཞིན་དུ། གནས་ངེས་པ་འོག་མིན་སྟུག་པོ་བཀོད་པར། སྟོན་པ་ངེས་པ་མཚན་དང་དཔེ་བྱད་ཀྱི་དཔལ་དུ་འབར་བའི་ལོངས་སྤྱོད་རྫོགས་སྐུ་རྣམ་པར་སྣང་མཛད་ཆེན་པོས། འཁོར་ངེས་པ་དག་པའི་གདུལ་བྱ་ས་བཅུའི་སེམས་དཔའ་འབའ་ཞིག་ལ། ཆོས་ངེས་པ་ཐེག་པ་ཆེན་པོའི་ཆོས་ཀྱི་འཁོར་ལོ། དུས་ངེས་པ་རྟག་པ་རྒྱུན་གྱི་འཁོར་ལོ་བསྐོར་བར་མཛད་པའི་ཕྱིར་ངེས་པ་ལྔ་དང་ལྡན་པའོ། །གཉིས་པ་སྤྲུལ་པའི་སྐུ་ནི། ངོ་བོ་གོང་དུ་བཤད་མ་ཐག་པའི་ལོངས་སྐུའི་བདག་རྐྱེན་ལས་བྱུང་བ། དུས་རྒྱུན་མི་མཆད་པ་སྲིད་པ་ཇི་སྲིད་གནས་ཀྱི་བར་དུ། ཡུལ་ནམ་མཁའི་མཐའ་དང་མཉམ་པའི་གདུས་བྱ་གང་དུ་གནས་པ་ན་ཚུལ་གང་ལ་གང་འཚམ་པའི་ཕན་བདེའི་མཛད་པ་བླ་ན་མེད་པས། ཕྲིན་ལས་སེམས་ཅན་གྱི་དོན་འབའ་ཞིག་ལྷུན་གྱིས་གྲུབ་པར་མཛད་པ་སྟེ། དེ་ལའང་དབྱེ་ན། སྐྱེ་བ་སྤྲུལ་པའི་སྐུ་དགའ་ལྡན་ན་བཞུགས་པ་ལྟ་བུ། མཆོག་གི་སྤྲུལ་པའི་སྐུ་ཤཱཀྱ་ཐུབ་པ་ལྟ་བུ། བཟོའི་སྤྲུལ་སྐུ་དྲི་ཟའི་རྒྱལ་པོ་རབ་དགའ་འདུལ་བའི་དོན་དུ་པི་ཝཾ་ལེན་པ་སོགས་དུ་མ་སྟེ། མདོར་ན་ཆོས་ཀྱི་སྐུ་རྣམ་པར་མི་རྟོག་པ་ནམ་མཁའ་ལྟ་བུའི་ངང་ནས། ལོངས་སྤྱོད་རྫོགས་པའི་སྐུ་ཟླ་བ་ལྟ་བུ་ལས། སྤྲུལ་པའི་སྐུ་ཆུ་ཟླ་ཅིར་ཡང་འཆར་བས་གདུལ་བྱའི་འདོད་པ་རྫོགས་པར་མཛད་པ་སྟེ་ངོ་བོའམ་དེ་བྱུང་གིས་འབྲེལ་བའོ། །དེ་ལས་གཙོ་བོར་སྔགས་ཀྱི་སྡེ་སྣོད་རྣམས་སུ་བཞིར་གསུངས་པ་ནི། སྐུ་གསུམ་པོ་རྣམ་པ་ཐ་དད་ཀྱང་། རང་བཞིན་དབྱེར་མི་ཕྱེད་པ་ཟུང་དུ་འཇུག་པ་ལ་ངོ་བོ་ཉིད་སྐུ་ཐ་སྙད་མཛད་ཅིང་། མངོན་རྟོགས་རྒྱན་ལས། འདིར་བཤད་པའི་ཆོས་སྐུ་ལ་ངོ་བོ་ཉིད་སྐུའི་ཐ་སྙད་མཛད་དེ་གཟུགས་སྐུ་གཉིས་ཀྱི་ངོ་བོར་གྱུར་པ་ལ་དགོངས་སོ། །གཉིས་པ་བ རྟེན་པ་ཡེ་ཤེས་ལའང་གཉིས་ཏེ། མཚན་ཉིད་ནི། ཆོས་གང་ལ་སྒྲིབ་བྱེད་ཀྱི་དྲི་མ་དང་བྲལ་ནས་རང་གི་གནས་ལུགས་མངོན་སུམ་དུ་གྱུར་པ་ཡེ་ཤེས་ཀྱི་མཚན་ཉིད། དབྱེ་ན། མདོ་ལས་གསུངས་པའི་ཡེ་ཤེས་བཞི་དང་། སྔགས་ལས་ཐམས་ཅད་ཀྱི་ཁྱབ་བྱེད་ཆོས་ཀྱི་དབྱིངས་ལའང་ཡེ་ཤེས་ཀྱི་སྒྲས་སྨོས་པས་ལྔའོ། །དེ་ལ་ཆོས་ཐམས་ཅད་ཀྱི་ཆོས་ཉིད་ཀུན་གཞི་ཉིད་དབྱིངས་སུ་ནུབ་པ་ཆོས་ཀྱི་ཡེ་ཤེས་ཀྱི་ངོ་བོ། མཚན་ཉིད་ནི། དབྱིངས་རང་བཞིན་རྣམ་པར་དག་པ་ལ་སྤང་བྱ་གློ་བུར་གྱི་དྲི་མ་ཕྲ་མོའང་དག་པའོ། །ཆོས་ཅན་གསལ་བའི་ཆ་ཀུན་གཞིའི་རྣམ་པར་ཤེས་པ་དབྱིངས་སུ་ནུབ་པ་མེ་ལོང་ལྟ་བུའི་ཡེ་ཤེས་ཀྱི་ངོ་བོ། མཚན་ཉིད་ནི། ངོ་བོ་ང་དང་ང་ཡིར་འཛིན་པ་མེད་པ། ༡ ཡུལ་ཡོངས་སུ་རིས་མ་ཆད་པ། ༢ དུས་རྟག་ཏུ་རྒྱུན་མི་ཆད་པ། ༣ ཆོས་ཅན་ཤེས་བྱ་ཀུན་ལ་མ་རྨོངས་པ། ༤ ཡུལ་གྱི་རྣམ་པ་མེད་པས་ཡུལ་ལ་མངོན་དུ་མི་ཕྱོགས་པ་སྟེ་ཆོས་ལྔ་དང་ལྡན་པ་གང་ཞིག༥ ཡེ་ཤེས་གཞན་ཐམས་ཅད་ཀྱི་འཆར་གཞིར་གྱུར་པའོ། །ཡིད་ཀྱི་རྣམ་ཤེས་འདི་སྐུ་གསུམ་ལ་འཇུག་པའི་མདོའི་རྗེས་སུ་འབྲང་བ་སྟེ། གཞན་དུ་ཡིད་ཤེས་གནས་གྱུར་པ་སོར་རྟོག་དང་། ཉོན་ཡིད་གནས་འགྱུར་བ་མཉམ་ཉིད ཡེ་ཤེས་སུའང་བཤད་དོ་གསུངས། མཆན། དབྱིངས་སུ་ནུབ་པ་མཉམ་པ་ཉིད་ཀྱི་ངོ་བོ། མཚན་ཉིད་ནི། ཆོས་ཐམས་ཅད་མཉམ་པ་ཉིད་དུ་ཐུགས་སུ་ཆུད་པས་སྲིད་ཞིའི་མཐའ་གཉིས་ལ་མི་གནས་ཤིང་། བྱམས་པ་དང་སྙིང་རྗེ་ཆེན་པོ་མཚུངས་པར་ལྡན་པས་སེམས་ཅད་གྱི་མོས་པ་དང་མཚམས་པར་སངས་རྒྱས་ཀྱི་སྐུར་སྟོན་པའོ། །ཉོན་མོངས་པ་ཅན་གྱི་ཡིད་དབྱིངས་སུ་ནུབ་པ་སོ་སོར་རྟོགས་པའི་ཡེ་ཤེས་ཀྱི་ངོ་བོ། མཚན་ཉིད་ནི། འཁོར་འདས་ཀྱི་ཆོས་ཐམས་ཅད་མ་འདྲེས་པར་མཁྱེན་ཅིང་གཟུངས་དང་ཏིང་ངེ་འཛིན་གྱི་འབྱུང་གནས་སུ་གྱུར་པས་བྱང་ཆུབ་སེམས་དཔའ་ིའཁོར་རྣམས་ལ་ཟག་མེད་ཀྱི་ཆོས་སྟོན་ཅིང་ཐེ་ཚོམ་གྱི་དྲྭ་བ་གཅོད་པའོ། །སྒོ་ལྔའི་རྣམ་ཤེས་དབྱིངས་སུ་ནུབ་པ་བྱ་བ་གྲུབ་པའི་ཡེ་ཤེས་ཀྱི་ངོ་བོ། མཚན་ཉིད་ནི། འཇིག་རྟེན་གྱི་ཁམས་ཀུན་ཏུ་སྤྲུལ་པ་དཔག་ཏུ་མེད་པས་སེམས་ཅན་གྱིས་དོན་བསམ་གྱིས་མི་ཁྱབ་པ་སྒྲུབ་པར་མཛད་པའོ། །གསུམ་པ་ཡོན་ཏན་དང་འཕྲིན་ལས་བཤད་པ་ལ་གཉིས་ཏེ། དང་པོ་ཡོན་ཏན་ནི། རང་དོན་དོན་དམ་པ་ཆོས་ཀྱི་སྐུའམ་དོན་གྱི་སྐུ་ཞེས་བྱ་བ། སྟོབས་བཅུ། མི་འཇིགས་པ་བཞི། སངས་རྒྱས་ཆོས་མ་འདྲེས་པ་བཅོ་བརྒྱད་དེ་སྤང་བྱའི་ཉོན་མོངས་པ་དང་བྲལ་བའི་འབྲས་བུ་སུམ་ཅུ་རྩ་གཉིས་དང་ལྡན་པ་དང་། གཞན་དོན་ཀུན་རྫོབ་ཀྱི་སྐུའམ། བརྡ་ཡི་སྐུ་ཞེས་བྱ་བ་བསོད་ནམས་ཀྱི་ཚོགས་རྒྱ་མཚོ་ལྟ་བུའི་རྣམ་པར་སྨིན་པའི་འབྲས་བུ་མཚན་བཟང་པོ་སུམ་ཅུ་རྩ་གཉིས་དང་ལྡན་པ་སྟེ། རྣམ་པ་གཉིས་པོ་བསྡོམས་པ་སྐུ་གཉིས་ལ་མངའ་བའི་བྲལ་སྨིན་གྱི་ཡོན་ཏན་དྲུག་ཅུ་རྩ་བཞི་ཞེས་བྱ་སྟེ། རྒྱུད་བླ་མ་ལས། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པའི་ཀུན་རྫོབ་སྐུ་ཉིད་དེ། །བྲལ་དང་རྣམ་པར་སྨིན་པའི་འབྲས་བུ་ནི། །ཡོན་ཏན་དབྱེ་བ་དྲུག་ཅུ་བཞི་འདི་དག །ཅེས་སོགས་རྒྱ་ཆེར་གསུངས་པ་ལྟར་དང་། གཞན་ཡང་། ཟག་པ་མེད་པའི་ཕུང་པོ་ལྔ། སྤྱན་ལྔ། མངོན་པར་ཤེས་པ་དྲུག སོ་སོ་ཡང་དག་པར་རིག་པ་བཞི། གཟུངས་ཀྱི་སྒོ་བཞི། ཟད་པར་བཅུ། ཟིལ་གནོན་བརྒྱད། ཐུགས་རྗེ་ཆེན་པོ། ཉོན་མོངས་མེད་པ། སྨོན་ནས་མཁྱེན་པ། དབང་བཅུ་ལ་སོགས་ཡོན་ཏན་གྱི་རྣམ་གྲངས་མཐའ་ཡས་པ་མངའ་བ་ཡིན་ཏེ། འདི་དག་ཀྱང་སྔོན་སློབ་ལམ་དུ་ཚོགས་གཉིས་རྒྱ་མཚོ་ལྟ་བུ་གོམས་པའི་ལྷན་ཅིག་བྱེད་རྐྱེན་གྱིས་དབྱིངས་ཀྱི་སྒྲིབ་བྱེད་མཐའ་དག་དང་བྲལ་བའི་སྟོབས་ལས་སྣང་བ་སྟེ། ངོ་བོ་ནི་རང་བྱུང་ཟག་པ་མེད་པའི་ཡེ་ཤེས་བསམ་གྱིས་མི་ཁྱབ་པའི་བདག་ཉིད་ཅན་ནོ། །གཉིས་པ་ཕྲིན་ལས་བསམ་གྱིས་མི་ཁྱབ་པ་ནི། དེ་ལྟར་ཡོན་ཏན་མཐའ་ཡས་པ་ལ་བརྟེན་ནས་དེ་བཞིན་གཤེགས་པའི་ཕྲིན་ལས་དུས་འཁོར་བ་ཇི་སྲིད་ཀྱི་བར་དུ་མཛད་པ་རྒྱུན་མི་འཆད་པས་རྟག་པ་དང་། ༡ ཡུལ་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ལ་སྙོམས་པར་འཇུག་པས་ཁྱབ་པ་དང་། ༢ ངོ་བོ་གནས་སྐབས་མངོན་མཐོའི་ལམ་ལ་འགོད་པའི་ཕྱིར་ཕན་པ་དང་། ༣ མཐར་ཐུག་ངེས་པར་ལེགས་པ་བྱང་ཆུབ་ཀྱི་གོ་འཕང་ལ་འགོད་པའི་ཕྱིར་བདེ་བ་སྟེ། དོན་རྣམ་པ་གཉིས་པོ་འབད་རྩོལ་མེད་པར་འབྱུང་བས་ལྷུན་གྱིས་གྱུབ་པའི་ཕྲིན་ལས་བསམ་གྱིས་མི་ཁྱབ་པ་ལ་དབང་འབྱོར་པའི་ཚུལ། རྟག་ཅིང་ཁྱབ་ལ་ལྷུན་གྲུབ་པའི། །ཡོན་ཏན་ཕ་རོལ་ཕྱིན་པ་འབྲས། །ཞེས་སོ། །ཡོན་ཏན་སོགས་འདི་དག་གི་རྣམ་གཞག་རྒྱས་པ་ནི་རྗེ་བླ་མས་མཛད་པའི་བྱང་སེམས་སྨོན་ལམ་གྱི་དཀའ་འགྲེལ་སོགས་ལས་ཤེས་པར་བྱ་དགོས་ཤིང་། མདོ་ཙམ་ནི་དཀོན་མཆོག་གསུམ་གྱི་རྣམ་བཞག་ཏུ་སྨོས་ཟིན་པས་འདིར་མ་བྲིས་སོ། །དེ་དག་ཀྱང་། རྒྱས་པ་ལས། བདག་མེད་གཉིས་རྟོགས་ཕ་རོལ་ཕྱིན་རྫོགས་པའི། །ས་བཅུ་རིམ་གྱིས་བགྲོད་པའི་རྣལ་འབྱོར་པས། །སངས་རྒྱས་སར་བགྲོད་གོ་འཕང་འཐོབ་པའི་ལམ། །བདེན་པ་གཉིས་ཀྱི་རབ་ཏུ་འཐོབ་པར་འགྱུར། །ཞེས་སོ། །དེ་ལྟར་ཉན་རང་བྱང་ཆུབ་སེམས་ཀྱི་ཐེག་པ་གསུམ་པོའི་ལྟ་བ་དང་། ཏིང་ངེ་འཛིན་དང་། སྤོང་ཚད་གསུམ་གྱི་ཁྱད་པར་མདོར་བསྡུ་ན། དཔལ་རོང་ཟོམ་པ་ཆེན་པོས་མཛད་པའི་ལྟ་བའི་བརྗེད་བྱང་ལས། ཉན་ཐོས་ཀྱི་ལྟ་བ་གང་ཟག་ལ་བདག་མེད་པར་རྟོགས་པའོ། །ཏིང་ངེ་འཛིན་དམིགས་པ་དང་བཅས་པའི་ས་ལ་གནས་པའོ། །སྤོང་ཚད་ནི་སྲིད་པ་ཀུན་ཏུ་སྦྱོར་བ་སྤངས་པའོ། །རང་སངས་རྒྱས་ཀྱི་ལྟ་བ་ནི། ཆོས་ལ་གཟུགས་ཀྱི་ཕུང་པོས་བསྡུས་པའི་ཆོས་ཐམས་ཅད་བདག་མེད་པར་རྟོགས་པའོ། །ཏེང་ངེ་འཛིན་ཚིག་གི་དོན་མེད་པར་རྟོགས་ཏེ་བརྗོད་དུ་མེད་པའི་ཚུལ་ལ་གནས་པས། གཟུང་བའི་རྟོག་པ་ཉམས་པར་བྱས་ཏེ་འོན་ཀྱང་བརྗོད་དུ་མེད་དོ་སྙམ་འདུ་ཤེས་འཇུག་པས་འཛིན་པའི་རྟོགས་པ་ནི་མ་སྤངས་སོ། །སྤོང་ཚད་ནི་གང་ཅི་ཡང་རུང་སྟེ། ཀུན་འབྱུང་བའི་ཆོས་དེ་དག་ཐམས་ཅད་འགོག་པའི་ཆོས་སུ་ཤེས་སོ། །ཐེག་པ་ཆེན་པོ་སྤྱིའི་ལྟ་བ་ནི། ཆོས་དང་གང་ཟག་གཉིས་ལ་བདག་མེད་པར་རྟོགས་པའོ། །ཏིང་ངེ་འཛིན་ནི་གཟུང་བ་དང་འཛིན་པའི་རྟོག་པ་དང་ཐམས་ཅད་ལས་འདས་ཏེ་རྣམ་པར་མི་རྟོག་པའི་ཡེ་ཤེས་ཐོབ་ནས། ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ལ་གནས་སོ། །སྤོང་ཚད་ནི་བག་ཆགས་ཀྱི་མཚམས་སྦྱོར་བ་ཐམས་ཅད་ཡོངས་སུ་སྤངས་ཏེ། རྣམ་པ་ཐམས་ཅད་མཆོག་གི་ཡེ་ཤེས་ཐོབ་པའོ། །ཞེས་གསུངས་པ་ལྟར་ཤེས་པར་བྱའོ། །དེས་ཀུན་འབྱུང་འདྲེན་པའི་ཐེག་པ་ཉན་རང་བྱང་སེམས་གསུམ་གྱི་ཐེག་པ་མདོ་ཙམ་བཤད་ཟིན་ཏོ། །། །༈ གཉིས་པ་འབྲས་བུ་སྔགས་ཀྱི་ཐེག་པ་ནི། མཐར་ཐུག་འབྲས་བུའི་དཀྱིར་འཁོར་ཉིད་ལྟ་སྤྱོད་ཁྱད་པར་ཅན་གྱི་སྒོ་ནས་ད་ལྟ་ནས་ཅི་རིགས་པར་ལམ་དུ་བྱེད་པའི་ཐབས་ལ་བརྟེན་ནས་སངས་རྒྱས་ཉིད་མྱུར་དུ་འགྲུབ་པར་བྱེད་པ་སྟེ། དེ་ཉིད་རྒྱུའི་ཐེག་པ་ལས་ཁྱད་པར་འཕགས་པའི་ཚུལ་ཡང་། མཚན་ཉིད་ཀྱི་ཐེག་པ་རྒྱུ་ལ་འབད་པ་ཆེར་བྱས་ནས་ཚེགས་ཆེན་པོས་སྒྲུབ་དགོས་པ་ལས། སྔགས་ནི་རྒྱུ་ལ་ལྟོས་ནས་འབྲས་བུ་སྨིན་ཟིན་པས་འབད་རྩོལ་ཆུང་ངུས་སངས་རྒྱས་ཐོབ་པས་འཕགས་པ་དང་། རྒྱུ་ནས་ལམ་ལྔ་ས་བཅུ་དཀའ་བ་ཆེན་པོས་བསྐལ་པ་གྲངས་མེད་མང་པོ་ན་སངས་རྒྱ་ལ། སྔགས་ནི་རབ་ཚེ་གཅིག འབྲིང་བར་དོ། ཐ་མས་ཀྱང་སྐྱེ་བ་བརྒྱུད་ནས་སངས་རྒྱ་བས་དུས་མྱུར་བས་ཀྱང་འཕགས་པ་དང་། རྒྱུས་ས་དང་པོ་བདེན་པ་མཐོང་བ་ལའང་ཚོགས་དཔག་མེད་གསོག་དགོས་ལ། སྔགས་ཀྱི་དཀྱིལ་འཁོར་ཚོགས་མཆོད་ལ་སོགས་པ་ཕྲ་མོས་འགྲུབ་པས་ཀྱང་འཕགས་པ་དང་། རྒྱུས་ལམ་ཐད་དྲང་དུ་སྟོན་པར་མི་བྱེད་དེ། དྲང་དོན་དང་ངེས་དོན། དགོངས་པ་དང་ལྡེམ་དགོངས་སོགས་སུ་བསྟན་ནས་རྣམ་པར་འཇོག་ལ། སྔགས་ནི་ལམ་ཅིག་ཅར་ཐད་དྲང་དུ་བསྟན་པས་ཉེ་ཞོ་དང་བར་ཆད་མེད་པའི་ཕྱིར་འཕགས་པ་དང་། གཞན་ཡང་རྒྱུའི་ཐེག་པ་བས་སྔགས་ཀྱི་ཐེག་པ་འདོད་པའི་དོན་སྒྲུབ་པ་ལ། ཐབས་མང་བ་དང་། དཀའ་བ་མེད་པ་དང་། མ་རྨོངས་པ་དང་། དབང་པོ་རྣོན་པོས་མྱུར་དུ་འགྲུབ་པའི་ཚུལ་གྱིས་འཕགས་ཏེ། ཚུལ་གསུམ་པའི་སྒྲོན་མེ་ལས། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་ཏེ། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས། ཅིའི་ཕྱིར་འབྲས་བུའི་ཐེག་པ་དང་རྡོ་རྗེ་ཐེག་པ་ཞེས་བྱ་སྙམ་ན། ཧེ་རུ་ཀ་གལ་པོ་ལས། མཚན་ཉིད་རྒྱུ་ཡི་ཐེག་པ་ཡིས། །སེམས་ཉིད་སངས་རྒྱས་རྒྱུ་རུ་གསུངས། །འབྲས་བུ་སྔགས་ཀྱི་ཐེག་པ་ཡིས། །སེམས་ཉིད་སངས་རྒྱས་ཉིད་དུ་སྒོམ། །རྒྱུ་དང་འབྲས་བུ་གང་ཡིན་པའི། །ཕྱོགས་ཀྱང་རབ་ཏུ་ཤེས་རབ་བྱ། །ཞེས་པས་མཚན་ཉིད་ཐེག་པར་སེམས་ཉིད་སངས་རྒྱས་ཀྱི་རྒྱུ་ཙམ་དུ་ཤེས་པ་དེ། རྐྱེན་ཚོགས་གཉིས་ཀྱིས་གོང་དུ་འཕེལ་བས་སངས་རྒྱས་ཐོབ་པར་འདོད་པའི་ཕྱིར་དང་། མྱང་འདས་ཀྱི་རྒྱུ་རྣམ་བྱང་གི་ཆོས་ལམ་དུ་བྱེད་པའི་ཕྱིར། རྒྱུའི་ཐེག་པ་ཞེས་བྱ་སྟེ། རྒྱུ་འབྲས་སྔ་ཕྱིར་ཁས་ལེན་པའི་ཕྱིར་རོ། །སྔགས་ཀྱི་ཐེག་པས་སེམས་ཉིད་འབྲས་བུའི་ངོ་བོ་སྐུ་དང་ཡེ་ཤེས་ཀྱི་བདག་ཉིད་དུ་ཡེ་ནས་རང་ལ་གནས་པས་ཐོབ་བྱ་ད་ལྟ་ཉིད་ནས་ཡོད་པ་ནི་གཞི། དེ་ཤེས་འཇུག་གི་བྱེད་པས་གནས་སྐབས་གློ་བུར་གྱི་དྲི་མ་བསལ་ཏེ། ངོ་ཤེས་པར་བྱེད་པའི་ཆ་ནས་ལམ། གཞི་དེ་ཉིད་མངོན་དུ་གྱུར་པའི་ཆ་ནས་འབྲས་བུར་བཞག་པས། དོན་ལ་རྒྱུ་འབྲས་སྔ་ཕྱི་མེད་པའི་ཕྱིར། འབྲས་བུའི་ཐེག་པ་དང་རྡོ་རྗེ་ཐེག་པ་ཞེས་བྱ་སྟེ། གསང་སྙིང་ལས། དུས་བཞི་ཕྱོགས་བཅུ་གང་ནས་ཀྱང་། །རྫོགས་པའི་སངས་རྒྱས་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་མ་ཚོལ་ཅིག །ཅེས་དང་། འདི་ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །ཞེས་དང་། ངོ་མཚར་ཆོ་འཕྲུལ་རྨད་ཀྱི་ཆོས། །གཞན་ནས་ཡོད་འོང་མ་ཡིན་ཏེ། །ཐབས་ལ་བརྟེན་པའི་ཤེས་རབ་ཉིད། །དེ་ལྟ་བུ་ཡི་ངང་དུ་བྱུང་། །ཞེས་གསུངས། གཞན་ཡང་། ཡེ་ཤེས་གྲུབ་པ་ལས། རྒྱུ་ཡི་ཐེག་པ་ཆེན་པོ་ལས། །སྐུ་གསུང་ཐུགས་ཀྱི་ལམ་རྣམས་ཀྱི། །གསང་བ་ཆེ་ལས་གསང་བ་མཆོག །རབ་ཏུ་འཕགས་པར་རིག་པར་བྱ། །ཞེས་པ་ལྟར། མཚན་ཉིད་དུ་སྐུ་གསུང་ཐུགས་སྒྱུ་མ་དང་བྲག་ཆ་རྨི་ལམ་བཞིན་དུ་རང་བཞིན་དུ་རང་བཞིན་མེད་པར་རྒྱས་འདེབས་པ་ཙམ་དང་། རང་གི་སྒོ་གསུམ་ཐ་མལ་པས་ཕྱག་བསྐོར་ཁ་ཏོན་སོགས་དགེ་ལ་བརྩོན་པ་དང་རྣམ་རྟོག་བཀག་པའི་ཞི་ལྷག་སྒྲུབ་པ་ཙམ་ལ། སྔགས་སུ་སྣང་གྲགས་རིག་གསུམ་དཀྱིལ་འཁོར་གསུམ་དང་སྒོ་གསུམ་རྡོ་རྗེ་གསུམ་དུ་ལེགས་པར་རྟོགས་པས་ཅིར་སྣང་ཅིར་སྤྱོད་ཐམས་ཅད་ཆོས་ཉིད་ཀྱི་རོལ་པ་ལས་ནམ་ཡང་འདའ་བ་མེད་པས་ཏེ། མདོར་ན། སྔགས་ཕྱི་པས་ལྷའི་སྐུ་གསུང་ཐུགས་སུ་བལྟས་ཏེ་བསྒོམ་པ་དང་། ནང་པ་ལྟར་ན་ཆོས་ཐམས་ཅད་སྐུ་གསུང་ཐུགས་ཀྱི་དཀྱིལ་འཁོར་གྱི་རང་བཞིན་དུ་རྟོགས་ནས་གོམས་པར་བྱེད་པའི་ཕྱིར་འབྲས་བུ་ལམ་བྱེད་དང་། རྡོ་རྗེ་ཐེག་པའི་ངེས་ཚིག་གྲུབ་སྟེ། བང་མཛོད་འཕྲུལ་གྱི་ལྡེ་མིག་ལས། འབྲས་བུ་རྡོ་རྗེ་ཐེག་པ་ནི། །ཕྱག་རྒྱའི་དཀྱིལ་འཁོར་ལམ་བྱས་ནས། །འབྲས་བུ་དེ་ཉིད་ལམ་དུ་ཁྱེར། །རང་གི་ལུས་ངག་ཡིད་གསུམ་ནི། །སྐུ་གསུང་ཐུགས་ཀྱི་རྡོ་རྗེར་སྦྱོར། །དེ་རིགས་རྡོ་རྗེ་ཐེག་པར་བཏགས། །ཞེས་གསུངས། དེ་ལྟ་བུའི་ཐེག་པ་དེ་ལ་གསང་བ་སྒྱུ་འཕྲུལ་ལས་བླ་ན་མེད་པའི་ཐེག་པ་ཞེས་ཀྱང་གསུངས་ཏེ། རྒྱས་པ་ལས། མཉམ་ཉིད་དོན་རྟོགས་རང་རིག་རྒྱལ་པོ་ནི། །རྒྱ་མཚོ་ཆེན་པོར་ཆུ་ཀླུང་ཀུན་འབབ་ལྟར། །བླ་མེད་དོན་རྟོགས་ཐབས་ཆེན་འདི་དག་ཏུ། །རྣམ་ཐར་ཐེག་པ་བསམ་ཡས་མ་ལུས་འདུས། །ཞེས་གསུངས། དེ་ལ་དབྱེ་ན། རང་ཤར་ལས་། རྡོ་རྗེ་ཐེག་པ་རྣམ་པ་གཉིས། །ཕྱི་པ་ཐུབ་པ་རྒྱུད་དང་ནི། །ནང་པ་ཐབས་ཀྱི་རྒྱུད་དུ་གསུངས། །ཞེས་པས། ཕྱི་ཐུབ་པ་རྒྱུད་ཀྱི་ཐེག་པའམ་དཀའ་ཐུབ་རིག་བྱེད་ཀྱི་ཐེག་པ་དང་། ནང་པ་ཐབས་ཀྱི་རྒྱུད་དམ་དབང་བསྒྱུར་ཐབས་ཀྱི་ཐེག་པ་སྟེ་གཉིས་སོ། །དེ་གཉིས་ཀྱི་ཁྱད་པར་ལ་བཞེད་པ་མི་འདྲ་བ་འགའ་ཞིག་མཐོང་མོད་གཙོ་བོར་གསང་བདག་དངོས་བྱོན་རྗེ་སྒྲོ་ཕུག་པ་ཆེན་པོས་ནི་འདི་ལྟར་བཞེད་དེ། ལྟ་བའི་ཁྱད་པར། སེམས་ཉིད་བདག་ཉིད་ཆེན་པོར་རྟོགས་པ་ནང་པ་དང་མ་རྟོགས་ཕྱི་པ། དངོས་གྲུབ་ལེན་ཚུལ་གྱི་ཁྱད་པར། ཡེ་ཤེས་ཀྱི་ལྷ་ལ་རེ་ཞིང་བཀའ་ལ་སྡོད་པས་དངོས་གྲུབ་ཞུ་བ་ཕྱི་པ་དང་། བདག་ཉིད་ཆེན་པོར་རྟོགས་པས་སེམས་ཉིད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བའི་ཕྱིར་དངོས་གྲུབ་རང་ལ་ཡོད་པར་མཐོང་བ་ནང་པ། དབང་གི་ཁྱད་པར། མཆོག་དབང་གོང་མ་གསུམ་ལ་བསྐུར་ཐོབ་མི་ནུས་ན་ཕྱི་པ། དེ་གསུམ་ལ་གཙོ་བོར་འཛིན་པ་ནང་པ། སྤྱོད་པའི་ཁྱད་པར། འཁོར་བའི་ཆོས་ཉི་ཤུ་ལ་ཐབས་ཀྱིས་ཟིན་ནས་སྤྱོད་ནུས་པ་ནང་པ། མི་ནུས་པ་ཕྱི་པ། འབྲས་བུའི་ཁྱད་པར། མི་ཚེ་བདུན་དང་ལྔ་དང་གསུམ་སོགས་ནས་སྦྱོར་ནུས་པ་ཕྱི་པ། ཚེ་འདི་ལ་སྦྱོར་ནུས་པ་ནང་པའོ་གསུངས། རྗེ་སྒྲོལ་གཡུང་གཉིས་ནི། ལྟ་སྤྱོད་ཏིང་འཛིན་གསུམ་དབྱེར་མེད་དུ་འདོད་པ་སྔགས་ནང་པ། མི་འདོད་པ་ཕྱི་པ། འདི་དང་མཚན་ཉིད་གཉིས་ཀུན་རྫོབ་ལམ་དུ་བྱེད་ནུས་མི་ནུས་ཀྱིས་འབྱེད་པར་བཞེད། ཀུན་མཁྱེན་ཆེན་པོས་ནི། སྨིན་བྱེད་དབང་གི་ཁྱད་པར་རྒྱུད་སྡེ་གང་དུའང་དབང་བཞི་ཚང་པར་མི་སྟོན་ཞིང་། ཁྱད་པར་རིག་པའི་དབང་ཙམ་ལས་མི་སྟོན་པ་ཕྱི་པ། དབང་བཞི་རྫོགས་པར་བསྐུར་བ་ནང་པ། གྲོལ་བྱེད་ཀྱི་ལམ་ལས་རྟོགས་པ་ལྟ་བའི་ཁྱད་པར། ཆོས་ཐམས་ཅད་ཡེ་ནས་སངས་རྒྱས་པའི་དཀྱིལ་འཁོར་གསུམ་དུ་ཤེས་པས་དག་མཉམ་བླང་དོར་མེད་པར་རྟོགས་པའི་དབྱིངས་གཞིར་བྱེད་ན་ནང་པ་མི་བྱེད་ན་ཕྱི་པ། བསྒོམ་བྱའི་ལྷའི་ཁྱད་པར། ལྷ་ཅི་ཙམ་ཡོད་ཀྱང་ཞལ་སྦྱོར་མེད་ན་ཕྱི་བ། ཡོད་ན་ནང་པ། གནས་ཀྱི་ཁྱད་པར། རྒྱལ་པོའི་ཁང་བཟང་དང་། རི་རབ་ཀྱི་སྟེང་ལ་སོགས་པའི་གནས་གཙང་མར་མོས་པ་བྱེད་ན་ཕྱི་པ། དུར་ཁྲོད་དམ་ཨོ་རྒྱན་ལ་སོགས་པར་མོས་པ་བྱེད་ན་ནང་པ། སྤྱོད་པའི་ཁྱད་པར། ཁྲུས་དང་གཙང་སྦྲ་ལ་སོགས་པ་གཙོ་བོར་བྱེད་ན་ཕྱི་པ། གཙང་སྦྲ་མི་བྱེད་ཅིང་བཟའ་བཏུང་ཅི་དགའ་ལ་སྤྱོད་ནུས་ན་ནང་པ། སྣོད་ཀྱི་ཁྱད་པར། རིན་པོ་ཆེ་ལ་སོགས་པ་གཙང་མར་མོས་པ་ཕྱི་པ། ཀ་པཱ་ལ་གཙོ་བོར་བྱེད་ན་ནང་པ། རྫས་ཀྱི་ཁྱད་པར། དཀར་གསུམ་མངར་གསུམ་སོགས་གཙང་མའི་ཟས་ལ་སྤྱོད་པ་ཕྱི་པ། ཤ་ལྔ་བདུད་རྩི་ལྔ་དངོས་སམ་བདུད་རྩི་རིལ་བུ་ཙམ་གྱིས་བྱིན་གྱིས་བརླབས་ཏེ་མོས་པ་བྱེད་པ་ནང་པར་བཞེད་དོ། །མདོར་ན་བསྒྲུབ་བྱའི་ལྷ་དང་བདག་གཉིས་བཟང་ངན་ཐ་དད་མེད་པར་མཉམ་པའི་ཚུལ་གྱིས་སྒྲུབ་པ་བ སྔགས་ནང་པ་དང་། ཀུན་རྫོབ་ཏུ་བཟང་ངན་ནམ་ཐ་དད་པའི་རྣམ་པར་བདག་གི་རྒྱུད་ལྷའི་བྱིན་གྱིས་རློབ་པའི་ཚུལ་གྱིས་སྒྲུབ་པ་སྔགས་ཕྱི་པའི་ཁྱད་པར་རོ་གསུངས། དེ་ལས་དང་པོ་ཕྱི་ཐུབ་པ་རྒྱུད་ཀྱི་ཐེག་པ་ནི། བླང་དོར་དང་སྤང་གཉེན་ཐམས་ཅད་ཕྱི་མཚན་ཉིད་རྒྱུའི་ཐེག་པ་དང་ཚུལ་མཐུན་པས་ཕྱི་ཐུབ་པ་རྒྱུད་ཀྱི་ཐེག་པའམ། ཕྱིའི་དཀའ་ཐུབ་དང་གཙང་སྦྲ་སོགས་བྲམ་ཟེ་རིག་བྱེད་པ་ལྟར་བརྟེན་པས་དཀའ་ཐུབ་རིག་བྱེད་ཀྱི་ཐེག་པ་ཞེས་བྱ་སྟེ། གང་ཟག་དབང་པོ་འབྲིང་གསུམ་ལ་དགོངས་ཏེ་གསུངས་པའོ། །དེ་ལ་དབྱེ་ན། རང་ཤར་ལས། ཕྱི་པ་རྒྱུད་ལ་རྣམ་གསུམ་སྟེ། ཀྲ་ྀཡཱ་ཨུ་པ་ཡོ་གའོ། །ཞེས་པས། བྱ་བའི་རྒྱུད་དང་། གཉིས་ཀའི་རྒྱུད་དང་། རྣལ་འབྱོར་རྒྱུད་ཀྱི་ཐེག་པའོ། །དང་པོ། གང་ཟག་དབང་པོ་འབྲིང་གི་ཐ་མའི་ངོ་སྐལ་དུ་གསུངས་པའི་བྱ་བའི་རྒྱུད་དེ་ལའང་། ངོ་བོ། ངེས་ཚིགདབྱེ་བ་གསུམ་ལས། ངོ་བོ་དམ་པར་མཐའ་བཞི་དང་བྲལ་བའི་རྟོགས་པས་ཀུན་རྫོབ་ཏུ་དངོས་གྲུབ་གཞན་ལ་རེ་ཞིང་རྩོལ་བའི་ཐབས་སུ་གྱུར་པ་སྟེ། ལམ་རིམ་ལས། གཉིས་མེད་མཉམ་པར་མ་ཤེས་པས། །དོན་དམ་དག་པ་ཆོས་ཉིད་ཙམ། །ཡེ་ཤེས་བཞི་ཡོད་ཀུན་རྫོབ་ལྷ། །རེས་བསྒོམ་བྱ་བ་ལས་ཀྱི་ས། །ཞེས་སོ། ངེས་ཚིག་ནི། ཀྲྀ་ཡཱའི་སྒྲ་བྱ་བ་སྟེ། ཕྱིའི་བྱ་བ་གཙོ་བོར་སྟོན་པའི་ཕྱིར་ཏེ། བསམ་གཏན་ཕྱི་མའི་འགྲེལ་པ་ལས། རྒྱུད་འདི་ནི་ལུས་ངག་གི་བྱ་བ་གཙོ་བོར་སྟོན་པས་ན་བྱ་བའི་རྒྱུད་ཅེས་བྱའོ། །ཞེས་གསུངས། དབྱེ་བ་ལ་སྤྱིར་དཔུང་བཟང་འགྲེལ་པར་སྤྱོད་པའི་སྒོ་བཞིར་གསུངས་ཏེ། འཇུག་པའི་སྤྱོད་པ་དབང་གིས་སྣོད་རུང་དུ་བྱེད་པ། སྦྱོར་བའི་སྤྱོད་པ་རིགས་གསུམ་གང་རུང་གི་ལྷ་བསྙེན་པ། སྒྲུབ་པའི་སྤྱོད་པ་མཚན་མ་མཐོང་ནས་རྫས་དང་སྔགས་གཡོག་འཛོམས་པས་བརྩོན་འགྲུས་བར་མ་ཆད་པར་བཟླས་བརྗོད་བྱེད་པ། གྲུབ་པའི་མཐའ་འབྲས་བུའི་སྤྱོད་པ། དེ་ལྟར་བསྒྲུབས་པས་རྫས་ལུས་ལོངས་སྤྱོད་རྣམས་འདོད་པའི་ལྷ་དང་སྐལ་བ་མཉམ་པའི་རིག་འཛིན་ནམ་མཁའ་སྤྱོད་གྲུབ་ནས། རྟེན་དེ་ལ་བརྟེན་ནས་སྔགས་ཀྱི་ཕྱིན་དྲུག་གི་སྤྱོད་པ་སྤྱད་པས་མཐར་ཐུག་གི་འབྲས་བུ་རྒྱུད་སྡེ་འདིར་བཤད་པའི་སྐུ་གསུང་ཐུགས་ཀྱི་མཚན་ཉིད་ཅན་གྱི་བྱང་ཆུབ་རིག་གསུམ་རྡོ་རྗེ་འཛིན་པའི་ས་མངོན་དུ་བྱེད་པར་འདོད་པ་རྣམས་ཡིན་ཡང་། འདིར་གོང་སྨོས་ལྟར་འཆད་པ་ལ་དྲུག་ལས། ཐོག་མའི་འཇུག་སྒོ། སྨིན་བྱེད་ནི། ཆུ་དང་ཅོད་པཎ་གྱི་དབང་འཁོར་དང་བཅས་པ་བསྐུར་བས་སློབ་མ་སྣོད་རུང་དུ་བྱེད་པ་སྟེ། ཡེ་ཤེས་ཐིག་ལེ་ལས། ཆུ་ཡི་དབང་བསྐུར་དབུ་རྒྱན་དག །བྱ་བའི་རྒྱུད་ལ་རབ་ཏུ་གྲགས། །ཞེས་སོ། །དེ་ཡང་རིགས་གསུམ་གང་རུང་གི་དཀྱིལ་འཁོར་དུ་ཞུགས་ནས། གཟུངས་དང་དབང་སྔགས་བཟླ་བཞིན་པའི་བུམ་པའི་ཆུ་ཡི་དབང་གིས་ཆོས་སྐུ་དང་། རིགས་གང་ཡིན་གྱི་དམ་ཚིག་ཕྱག་རྒྱ་སྤྱི་བོར་བཞག་རིན་པོ་ཆེའི་དར་དཔྱངས་བཅིང་ཅོད་པཎ་གྱི་དབང་གིས་གཟུགས་སྐུའི་ནུས་པ་བཞག་པ་ཡིན་པས་དེ་གཉིས་རྩ་བའི་སྨིན་བྱེད་དངོས་དང་། དེའི་འཁོར་དུ་རིགས་སྔགས་ཀྱི་དངོས་གྲུབ་སྒྲུབ་མེ་ཏོག་གང་ཕོག་གི་ལྷ་ཡི་བཟླས་ལུང་སྦྱིན་པ་རྡོ་རྗེ་སློབ་མའི་དབང་། བར་ཆད་ཞི་ཞིང་བགེགས་གཞོམ་པ་ཁྲུས་བྱ་བ་བསྲུང་བའི་དབང་། འབྱོར་པ་རྒྱས་པར་བྱེད་པ་བཀྲ་ཤིས་རྫས་བརྒྱད་ཀྱི་དབང་རྣམས་སོ། །བྱ་བའི་འཇུག་སྒོ་ནི། ཁྲུས་དང་གཙང་སྦྲ་དང་དག་པ་གསུམ་གྱི་སྒོ་ནས་འཇུག་སྟེ། རང་ཤར་ལས། འཇུག་པའི་སྒོ་ནི་དག་པ་གསུམ། །ཁྲུས་དང་གཙང་སྦྲས་འཇུག་པའོ། །ཞེས་སོ། །དེ་ཡང་དག་པ་གསུམ་ནི། དེ་ལས། དག་པ་རྣམ་གསུམ་གང་ཞེ་ན། །ལྷ་དང་དཀྱིལ་འཁོར་དག་པ་དང་། །རྫས་དང་ལོངས་སྤྱོད་དག་པ་དང་། །སྔགས་དང་ཏིང་འཛིན་དག་པའོ། །ཞེས་གསུང་སྟེ། བདག་དང་ལྷ་ཡི་དེ་ཁོ་ན་ཉིད་བསྒོམ་པ་ལྷ་དང་དཀྱིལ་འཁོར་དག་པ། ཤ་ཆང་སྒོག་བཙོང་སྤངས་ཤིང་ཁྲུས་དང་གཙང་སྦྲ་ལ་གནས་པ་སོགས་རྫས་དང་ཡོ་བྱད་དག་པ། བཟླས་བརྗོད་དང་བསམ་གཏན་གྱི་དེ་ཁོ་ན་ཉིད་སྔགས་དང་ཏིང་འཛིན་དག་པ་སྟེ་ཞིབ་པ ར་འོག་ཏུ་འཆད་དོ། །ཁྲུས་དང་གཙང་སྦྲ་ནི། ཕྱིའི་ཁྲུས་ཡན་ལག་ལྔ་ཁྲུས། ནང་གི་ཁྲུས་རྩ་ལྟུང་དག་པར་བྱེད་པ། གསང་བའི་ཁྲུས་མཚན་རྟོག་དག་པར་བྱེད་པ་སྟེ་ཁྲུས་གསུམ་དང་། ཕྱིའི་གོས་རས་སོགས་གསར་པ་གྱོན་པ། ནང་གི་གོས་སྡོམ་པ་སྲུང་བ། གསང་བའི་གོས་ལྷ་བསྒོམ་པ་སྟེ་གོས་གསུམ་བརྗེ་བ་རྣམས་སོ། །ལྟ་བ་ནི། ལྟ་རིམ་ལས། ཀྲྀ་ཡཱ་དོན་དམ་ཆོས་ཉིད་བལྟ། །ཀུན་རྫོབ་རང་རིག་ཡོན་ཏན་ལྷ། །རིགས་གསུམ་དཀྱིལ་འཁོར་སྣང་བ་ལ། །སྐྱེ་བོ་འཁྲུལ་པ་མེད་པར་འདོད། །ཅེས་པས་བདེན་པ་གཉིས་ཏེ། དོམ་དམ་བདེན་པ་ནི། སེམས་ཉིད་དག་པ་སྟོང་གསལ་གྱི་ཡེ་ཤེས་ཡོད་མེད་སྣང་སྟོང་གི་མཐའ་བཞི་དང་བྲལ་བར་འདོད་དེ། ལ་ཤན་ལས། རང་སེམས་མཐའ་བཞི་ཡོངས་བྲལ་བ། །རིག་ཕྱིར་ཡེ་ཤེས་གཞན་ལས་མིན། །ཞེས་སོ། །ཀུན་རྫོབ་ལ་ཡང་ལོག་གཉིས་ལས། ལོག་པའི་ཀུན་རྫོབ་ནི། དབུ་མ་པ་མན་ཆད་ཀྱིས་ཡང་དག་དང་ལོག་པར་བརྟགས་པའི་ཀུན་རྫོབ་ཐམས་ཅད་ཡིན་ལ། ཡང་དག་པའི་ཀུན་རྫོབ་ནི། ཆོས་ཉིད་དེ་ལྟར་རྟོགས་པའི་ཡོན་ཏན་རིགས་གསུམ་སྟེ། ཀུན་རྫོབ་སྣང་བའི་དངོས་པོ་མཐོ་བ་རྣམས་སྤྱན་རས་གཟིགས་འཇམ་པ་ཐམས་ཅད་འཇམ་དཔལ། རྩུབ་པ་ཐམས་ཅད་ཕྱག་རྡོར་ཏེ། རིགས་དྲུག་གི་ཕྱེད་རིགས་གསུམ་ལྷའི་དཀྱིལ་འཁོར་དུ་སྣང་བར་འདོད་དེ། ལུང་སྔ་མའི་འཕྲོས་ལས། སྐྱེན་བསླང་སྣང་བའི་ཡེ་ཤེས་ཀྱིས། །སྣང་བའི་དངོས་པོ་མཐོ་འཇམ་རྩུབ། །དྲུག་ཕྱེད་རིགས་ཀྱི་དཀྱིལ་འཁོར་དུ། །མཐོང་བ་རྣམ་པར་དག་ཅེས་བྱ། །ཞེས་སོ། དེ་ཡང་ཀུན་རྫོབ་ཏུ་ཡོངས་སུ་དག་པའི་ལྷ་ཡེ་ཤེས་པ་ཉིད་སྒྲུབ་ན། དངོས་གྲུབ་ངེས་པར་སྩོལ་བའི་མཐུ་དང་ལྡན་པ་རྗེ་བོ་ལྟ་བུ་དང་། རང་ཉིད་ལྷ་དེ་མཉེས་པར་བསྒྲུབས་པའི་སྒོ་ནས་དངོས་གྲུབ་ནོད་པ་ཁོལ་བོ་ལྟ་བུར་ལྟ་ཞིང་། དོན་དམ་པར་མཐའ་བཞི་དང་བྲལ་བའི་ཆོས་ཉིད་ལ་བཟང་ངན་མེད་པ་དང་། ཆོས་ཅན་ཐ་སྙད་དུ་རྟེན་ཅིང་འབྲེལ་བར་འབྱུང་བའི་དབང་གིས་ལྷ་སྔགས་ཕྱག་རྒྱས་རང་ལ་རྒྱས་བཏབ་སྟེ་སྒྲུབ་ན་ཇི་ལྟར་དམིགས་པའི་འབྲས་བུ་བསླུ་མེད་དུ་ཐོབ་པའི་ངེས་ཤེས་ཁྱད་པར་ཅན་ནི་འདིའི་ལྟ་བ་སྟེ། དེ་ལ་མཆོག་དམན་དུ་ལྟ་བ་ཙམ་ཞིག་འདི་པའི་ཆོས་མིན་ཡང་། རྗེ་བོས་ཁོལ་པོ་ལ་མཆོག་སྦྱིན་ནུས་པ་ལྟར། ལྷ་དང་སྔགས་ལ་བརྟེན་ནས་བདག་གི་རྒྱུད་ལ་དངོས་གྲུབ་གཉིས་གདོན་མི་ཟ་བར་གྲུབ་པའི་ངེས་ཤེས་ཏེ། དེའི་དོན་ཡང་དངོས་གྲུབ་སྩལ་ནུས་པར་ཤེས་པ་ཙམ་མིན་པར་རང་མཐར་ཐུག་ལྷ་དེ་དང་ངོ་བོ་དབྱེར་མེད་པར་འགྲུབ་པའི་ཚུལ་ལ་ཡིད་ཆེས་པ་ནི་ལྟ་བའི་གནད་དེ། དཔལ་རོང་ཟོམ་པ་ཆེན་པོས་ཀྱང་གསང་སྔགས་པས་དོན་དམ་པ་སྐྱེ་འགགས་མེད་པར་འདོད་པ་ནི་དབུ་མ་དང་མཐུན་ནོ། །ཀུན་རྫོབ་ཏུ་ཕུང་ཁམས་སྐྱེ་མཆེད་སྒྱུ་མ་ཙམ་དུ་ལྟ་བའང་མཐུན་ནོ། །བྱེ་བྲག་ཏུ་སྒྱུ་མའི་མཚན་ཉིད་དེ་དག་ཀྱང་ཡོངས་སུ་དག་པའི་ལྷའི་མཚན་ཉིད་དུ་ལྟ་བ་དང་། བདེན་པ་གཉིས་ཀྱང་དབྱེར་མེད་པར་ལྟ་བས་བྱེ་བྲག་ཏུ་བྱས་པའོ། །དེ་ལས་བྱེ་བྲག་ཏུ་བྱ་རྒྱུད་ཀྱི་ལྷར་བལྟ་བ་ཡང་ཆོས་ཉིད་དག་པའི་སྒོ་ནས་ལྷར་བལྟ་བ་ཞེས་གྲགས་ཏེ་དེ་ཡང་བདེན་གཉིས་དབྱེར་མེད་དུ་ལྟ་བའི་མཐུ ས་གྲུབ་སྟེ། ཆོས་ཉིད་སངས་རྒྱས་ཡིན་ན་ཆོས་ཅན་སངས་རྒྱས་མ་ཡིན་པ་མི་རུང་སྟེ་ཆོས་ཅན་གྱི་ངོ་བོ་ཆོས་ཉིད་ཡིན་པའི་ཕྱིར། གཉིས་ཀ་སངས་རྒྱས་པ་ཡིན་ཏེ། བདག་དང་སངས་རྒྱས་དབྱེར་མེད་རྟོགས་ཤིང་ཅི་ལ་ཡང་མི་གནས་ཅི་ཡང་མི་ལེན་པའི་ཤེས་རབ་དང་ཏིང་ངེ་འཛིན་ནི་སངས་རྒྱས་ཀྱི་ལམ་ཡིན་པ་ངེས་དོན་གྱི་མདོ་སྡེ་ལས་འབྱུང་སྟེ། གང་ཞིག་བདག་དང་སངས་རྒྱས་རྣམས། །རང་བཞིན་མཉམ་པར་རབ་གནས་ཤིང་། །མི་གནས་ལེན་པ་མེད་པ་ནི། །དེ་དག་བདེ་བར་གཤེགས་པར་འགྱུར་། །གཟུགས་དང་ཚོར་བ་འདུ་ཤེས་དང་། །རྣམ་པར་ཤེས་དང་སེམས་པ་རྣམས། །དེ་དག་ཐུབ་པ་ཆེན་པོར་འགྱུར། །ཞེས་གསུངས་པ་ལྟ་བུ་ཡིན་ནོ། །དེ་བས་ན་ཡོངས་སུ་དག་པའི་ལྷའི་རང་བཞིན་ཡིན་པ་ལ། དེ་བཞིན་དུ་བསྒོམས་ཤིང་བསྟེན་པས་དེ་ཉིད་འགྲུབ་པར་འགྱུར་རོ། །བདག་དང་གཞན་གྱི་དོན་སྤྱོད་པར་ནུས་སོ། །ཞེས་གསུངས་ཤིང་ཀཿཐོག་པའི་ཐེག་སྤྱིའི་འགྲེལ་བར། དངོས་པོར་སྣང་བ་འདི་རྣམས་ཀྱང་། རིགས་གསུམ་མགོན་པོའི་སྐུ་མ་ཡིན་ཀྱང་། ལྟ་སྒོམ་སྤྱོད་གསུམ་གྱི་སྒོ་ནས་སེམས་དག་པར་བྱས་ན་མཁར་ཆུ་ལས་ལུགས་སྐུ་སྣང་བ་བཞིན་འཁྲུལ་པ་དག་པ་ཉིད་འབྲས་བུའི་ངོ་བོར་ཡེ་ནས་གནས་པར་འདོད་པའོ། །ཞེས་མཁར་ཆུ་ལུགས་སྐུ་མ་ཡིན་ཡང་མཁར་ཆུ་ལས་གཞན་པའི་སྐུ་མི་འབྱུང་བ་དཔེར་མཛད་ནས་གསུངས་ཏེ། མདོར་ན་རང་སེམས་དག་པ་མཐའ་བཞིར་རྟོགས་པའི་ཀུན་རྫོབ་ཡོངས་སུ་དག་པ་ལྷའི་མཚན་ཉིད་དུ་ལྟ་བ་མ་གཏོགས་མ་དག་པའི་དངོས་པོ་ཉིད་ཀྱི་རང་བཞིན་ཡེ་ནས་དག་པ་ལྷ་ཡིན་པར་མི་བལྟའོ། །ཚུལ་ཁྲིམས་ནི། ཡང་འབྱེད་འཕྲུལ་ལྡེ་ལས། དཀོན་མཆོག་གསུམ་དང་བྱང་ཆུབ་སེམས། །སྔགས་དང་ཕྱག་རྒྱ་མི་སྤང་ཞིང་། །རྡོ་རྗེ་དྲིལ་བུ་སྤང་མི་བྱ། །ལྷ་དང་བླ་མ་དེ་བཞིན་ནོ། །དེ་ནི་ཡན་ལག་དམ་ཚིག་ཡིན། །རྩ་བའི་དམ་ཚིག་ལྔ་པོ་ནི། །ཁྲི་ལ་ཉལ་བར་མི་བྱ་ཞིང། །ཤ་མི་ཟ་ཞིང་ཆང་མི་བཏུང་། །སྒོག་པ་ལ་ཕུད་བཟའ་མི་བྱ། །ཞེས་ཡན་ལག་གི་དམ་ཚིག་དྲུག་དང་རྩ་བའི་ལྔ་སྟེ་བཅུ་གཅིག་ཏུ་གསུངས་པ་དང་། གསང་བ་སྤྱི་རྒྱུད་ལས། དེ་རིང་ཕྱིན་ཆད་ཁྱེད་རྣམས་ཀྱིས། །སངས་རྒྱས་ཆོས་དང་དགེ་འདུན་དང་། །བྱང་ཆུབ་སེམས་དཔའ་རྣམས་དང་ནི། །གསང་སྔགས་རིག་སྔགས་ཚོགས་རྣམས་ལ། །དད་པ་རབ་ཏུ་བརྟན་པར་བྱ། །ཞེས་དཀོན་མཆོག་གསུམ་ལ་སྐྱབས་སུ་འགྲོ་བ། བྱང་ཆུབ་སེམས་དཔའི་ཚུལ་ཁྲིམས་གསུམ་ལ་སློབ་པ། གསང་སྔགས་ཏེ་ལྷ་ཕོ་དང་རིག་སྔགས་ཏེ་ལྷ་མོའི་ཚོགས་ཀྱིས་བསྡུས་པའི་བྱ་རྒྱུད་ཀྱི་ལྷ་ལ་དང་བ་སྟེ་རྩ་བའི་དམ་ཚིག་གསུམ་དང་། རྟག་པར་ཕྱག་རྒྱ་ཆེན་པོ་ལ་སོགས་ཀྱིས་བསྟན་དོན་བྱེ་བྲག་གི་དམ་ཚིག་བཅུ་གསུམ་ནི། རང་གི་ལྷ་ལ་གཞན་ལས་གུས་པར་བྱ་བ། བྱ་རྒྱུད་ཀྱི་སྒོར་ཞུགས་པའི་དམ་ཚིག་ཅན་ལ་གུས་པ། བསྟན་སྒོར་ཞུགས་པའི་གྲོགས་མཛའ་བོ་རྣམས་ལ་གུས་པ། རང་ལ་དབང་དང་མན་ངག་སྦྱིན་པའི་བླ་མ་ལ་གུས་པ་དང་། ལས་མ་གྲུབ་པ་སོགས་ཀྱིས་ལྷ་ལ་ཁྲོ་བས་སྡང་བར་མི་བྱ་བ། ཚེས་བརྒྱད་སོགས་དུས་མཚམས་སུ་རང་གི་ལྷ་མཆོད་པ། ཕྱི་རོལ་པ་སོགས་སྟོན་པ་གཞན་གྱི་གཞུང་མི་མཆོད་པ། གློ་བུར་གྱི་མགྲོན་མཆོད་པ། སེམས་ཅན་ལ་བྱམས་པ་མི་གཏོང་བ། གཞན་དོན་ལ་བརྩོན་པ་མི་འདོར་བ། བཟླས་བརྗོད་ལ་ཚུལ་བཞིན་དུ་བརྩོན་པ། དམ་ཚིག་གསུམ་བཀོད་སོགས་ལས་བསྟན་པའི་དམ་ཚིག་གཞན་ཡང་ཅི་ནུས་བསྲུང་བ། དབང་བསྐུར་མ་ཐོབ་པའང་ཐོབ་ཀྱང་ཉམས་པའི་དམ་ཚིག་མེད་པ་ལ་སྔགས་དང་ཕྱག་རྒྱ་མི་སྦྱིན་ཞིང་རྒྱུད་དང་མན་ངག་སྦ་བར་བྱ་བ་རྣམས་སོ། །དེ་ལྟར་རྩ་བའི་དམ་ཚིག་གསུམ་དང་བྱེ་བྲག་གི་དམ་ཚིག་བཅུ་གསུམ་དུ་དབྱེ་བའི་ཚུལ་འདི་ནི་སྙིང་པོའི་སྤྱི་དོན་གསང་བདག་ཞལ་ལུང་དུ་གསུངས་པ་བཞིན་རིགས་གསུམ་སྤྱིའི་དཀྱིལ་ཆོག་གི་སྡོམ་བཟུང་ལྟར་བཀོད་པ་ཡིན་ལ། གཞན་དུ་སྡོམ་གསུམ་འགྲེལ་ཆེན་དུ་རྩ་ལྟུང་བཅུ་བཞིར་གྲངས་ངེས་མཛད་པ་དང་། རྡོར་བྲག་ཞབས་དྲུང་པད་ཕྲིན་གྱིས་མདོ་དབང་དུ་རྣམ་གྲངས་བཅུ་གསུམ་དུ་བསྡུ་བར་མཛད་དེ་དོན་གྱི་གནད་ལ་གཅིག་གོ །སྒོམ་པ་ལ་མཚན་བཅས་མཚན་མེད་གཉིས་ལས་དང་པོ་མཚན་བཅས་ནི། བླ་མེད་བྱང་ཆུབ་མཆོག་ཏུ་སེམས་བསྐྱེད་ཅིང་དབང་ནོད་ལ་དམ་ཚིག་དང་ལྡན་པའི་སྒྲུབ་པ་པོ་དེས་ལྷ་དང་སྔགས་ལ་སེམས་པ་འབའ་ཞིག་མ་གཏོགས་པའི་བསམ་པ་གཞན་སྤངས་ནས་ལྷ་ཡི་སྐུ་དང་སྔགས་ཀྱི་ཚུལ་ལ་དམིགས་པ་ལས་སུ་རུང་བའི་སྒོ་ནས་སྒོམ་པ་ཡིན་ལ། ཚུལ་ཇི་ལྟར་ན། ལག་ན་རྡོ་རྗེདབང་བསྐུར་བའི་རྒྱུད་ལས། བདག་གི་ལྷ་དང་བདག་གི་གཟུགས་ཐ་མི་དད་པར་བྱས་པས་མཚན་མ་མ་བྱུང་གི་བར་དུ་བཟླས་བརྗོད་བྱའོ། །ཞེས་དང་། ཞི་བའི་བློ་གྲོས་གང་གི་ཚེ་བྱང་ཆུབ་སེམས་དཔའི་སྤྱད་པ་གསང་སྔགས་ཀྱི་སྒོར་སྤྱོད་ལ། བདག་ཉིད་རང་གི་ལྷའི་གཟུགས་སུ་བྱས་ལ་ཐེ་ཚོམ་མེད་པའི་ཡིད་ཀྱིས། ང་རྒྱལ་བསྐྱེད་ཅིང་འགྲོ་ཡང་རུང་། འགྲེང་ཡང་རུང་། འདུག་ཀྱང་རུང་། ཉལ་ཡང་རུང་། རྟག་ཏུ་ཐམས་ཅད་དུ། བསྐྱོད་ཀྱང་མི་གཡོ་བ་དེའི་ཚེ། ཞེས་སོགས་དང་། འཇམ་དཔལ་གང་གི་ཚེ་རང་གི་གཟུགས་ཡོངས་སུ་སྤངས་ཏེ་ལྷའི་ང་རྒྱལ་ལ་ཐེ་ཚོམ་མེད་པ་ཐོབ་པ་དེའི་ཚེ་གསང་སྔགས་ཀྱི་ཆོས་ཉིད་དེས་ཆོས་ཉིད་སྟོན་ཏེ། ཞེས་སོགས་མཚན་བཅས་ཀྱི་རྣལ་འབྱོར་དང་། འཇིག་རྟེན་གསུམ་ལས་རྣམ་པར་རྒྱལ་བའི་རྟོག་པ་ལས། སེམས་ཅན་ཀུན་གྱི་བདག་ཆེ་ནི། །བདག་ཉིད་ལ་ཡང་གནས་སོ་ཞེས། །བྱིན་གྱིས་བརླབས་ནས་སེམས་དཔའ་བདག །ཡིན་ཞེས་ང་རྒྱལ་བསྒོམ་པར་བྱ། །ཞེས་དང་། རང་སེམས་སོ་སོར་བརྟག་པ་ནི། །སངས་རྒྱས་བྱང་ཆུབ་དེ་ཉིད་ཡིན། །ཞེས་དང་། འཇིག་རྟེན་གསུམ་པོ་དེ་ཉིད་དོ། །ཞེས་དང་། འབྱུང་བ་ཆེ་རྣམས་དེ་ཉིད་དོ། །ཞེས་དང་། དེ་ཉིད་ཕྱག་ན་རྡོ་རྗེ་ཡིན། །ཞེས་དང་། སངས་རྒྱས་རིགས་ཀྱང་དེ་ཉིད་དེ། །ཞེས་རྡོ་རྗེ་པདྨ་ནོར་བུའི་རིགས་ཀྱང་དེ་ཉིད་ཡིན་པར་གསུངས། སེམས་དཔར་བྱིན་རླབས་སྦྱོར་བ་ཡི། །རྡོ་རྗེ་སེམས་དཔར་ཡང་འགྱུར་རོ། །བཅོམ་ལྡན་རྡོ་རྗེ་དེ་ཉིད་ནི། །བསྒོམས་པས་སེམས་དཔའ་ཉིད་དུ་འགྱུར། །ཞེས་དང་། ཡང་རྣམས་པ་ཐམས་ཅད་དུ་རྟག་པར་བདག་གི་ལུས་དང་ལྷའི་གཟུགས་སུ། བདག་གི་ངག་དང་ལྷའི་ངག་ཏུ། བདག་གི་ཡིད་དང་ལྷའི་ཡིད་དུ་མཐོང་བ་དེའི་ཚེ་མཉམ་པར་བཞག་པ་ཡིན་ནོ། །ཞེས་གསུངས་པས་མཚོན། བྱ་སྤྱོད་ཀྱི་རྒྱུད་རྣམས་སུ། བདག་ཉིད་ལྷར་སྒོམ་པ་མཚན་བཅས་ཀྱི་རྣལ་འབྱོར་མང་དུ་གསུངས་པས་བྱ་རྒྱུད་ཁྱད་པར་ཅན་གྱི་ལམ་སྒོམ་པ་ལ། བདག་ཉིད་ལྷར་བསྒོམས་ཤིང་ང་རྒྱལ་བྱེད་པ་མེད་དུ་མི་རུང་བ་ཡིན་ནོ། །སྤྱིར་བྱ་རྒྱུད་ལ་ཙམ་པོ་བ་དང་ཁྱད་པར་ཅན་གཉིས་ལས། དང་པོ་དཔུང་བཟང་གིས་ཞུས་པའི་རྒྱུད་ལས། གསང་སྔགས་མདོ་སྡེའི་ཚུལ་དུ་ངས་བཤད་དོ། །ཞེས་གསུངས་པ་ལྟར་ཐུན་མོང་མདོ་སྡེའི་ཚུལ་དུ་ངས་བཤད་དོ། །ཞེས་གསུངས་པ་ལྟར་ཐུན་མོངས་མདོ་སྡེའི་གཟུངས་རྣམས་དང་ཚུལ་འདྲ་བར་གསུངས་པ་དང་། རྟོག་པ་ཕྲ་མོའི་སྔགས་ཕལ་ཆེར་ལ་རང་ལྷར་མི་བསྒོམ་པར་ལྷ་ཡེ་ཤེས་པ་མདུན་དུ་སྤྱན་དྲངས་ལ་མཆོད་ཅིང་བཟླས་པ་བྱེད་པ་དང་། རས་བྲིས་ལ་རྟེན་བྱས་ཏེ་སྒྲུབ་པ་སོགས་ཀྱི་ཚུལ་གསུངས་པ་ཡོད་ལ། དེ་དག་གི་ཆོ་ག་པཎ་གྲུབ་རྣམས་གྱིས་གསང་སྔགས་མདོ་སྡེའི་ཚུལ་དུ་བཀྲལ་བའང་ཡོད་ཅིང་། དེ་དག་བྱ་རྒྱུད་དུ་གཏོགས་པར་ཡང་བཞེད་དོ། །ཡང་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད་ལས། བྱ་རྒྱུད་ལ་ཡེ་ཤེས་སེམས་དཔའི་བདེ་བ་མེད་པ་དང་། བདག་ཉིད་ལྷའི་སྙེམས་པ་མེད་པ་ཞེས་གསུང་པ་ནི། འདི་བས་རྣལ་འབྱོར་རྒྱུད་བཞིན་དུ་རང་ལྷ་དང་ཐ་མི་དད་དུ་བྱས་དེ་རང་ལ་ཡེ་ཤེས་གཞུག་པར་མ་བསྟན་ཅིང་། མདུན་བསྐྱེད་གཙོ་བོར་བྱས་པའི་ཕྱིར། རྣལ་འབྱོར་རྒྱུད་ལྟར་ལྷའི་སྙེམས་པ་མི་བྱ་བའི་དོན་ཡིན་གྱི། བདག་ཉིད་ལྷར་བསྒོམ་པ་གཏན་མེད་པའི་དོན་མ་ཡིན་ཏེ། བྱ་རྒྱུད་པས་ཀུན་རྫོབ་ཏུ་བདག་དང་ལྷ་ལ་བཟང་ངན་དུ་ལྟ་བའི་ཕྱིར་བདག་ཉིད་ལྷའི་ང་རྒྱལ་གྱི་གསལ་སྣང་བསྐྱེད་ཅིང་ལྷ་དངོས་ཡིན་པའི་འདུ་ཤེས་རྒྱུད་སྡེ་གོང་མ་ལྟར་མི་ནུས་པའི་དོན་ཏོ། །དེ་ལྟ་ན་བདག་གི་སྒོ་གསུམ་དང་ལྷའི་གསང་གསུམ་དབྱེར་མེད་དུ་སྣང་བའི་ཚེ་སྔགས་འགྲུབ་པར་གསུངས་པའི་ལུང་རང་གིས་དྲངས་པ་དང་འགལ་ལོ་སྙམ་ན། ཀུན་རྫོབ་ཏུ་ལྷ་དངོས་ཀྱི་རང་བཞིན་མིན་ཡང་ཡིན་པའི་ང་རྒྱལ་བསྒོམས་ནས་གསལ་སྣང་བྱུང་ནས། ལྷའི་གསང་གསུམ་གྱི་དངོས་གྲུབ་ཐོབ་པ་མི་འགལ་ཏེ། དེང་སང་གི་སྔགས་གསར་མ་པ་ཕལ་མོ་ཆེས། སྔགས་བླ་མེད་ཀྱི་བསྐྱེད་རིམ་འཆད་པའི་ཚེ། རང་གདོད་ནས་ལྷའི་རང་བཞིན་དུ་རྣམ་པར་དག་པ་མིན་ཡང་ལྷ་ཡིན་པར་བསྒོམས་པས་གོ་ཆོད་པར་ཁས་ལེན་པ་ཡིན་ན་བྱ་རྒྱུད་ལའང་དེ་ལྟ་བུ་འོང་བ་ཅི་ལ་འགལ། གཞན་ཡང་། རང་ཉིད་ལྷའི་རྣམ་པར་སྒོམ་པ་དང་མ་བྲལ་བའི་སྒོ་ནས་བལྟས་པའི་བདེ་བ་ལམ་དུ་བྱེད་པ་དང་། གཞན་ལ་དབང་བསྐུར་བ་དང་། ཕྱོགས་བཅིངས་པ་སོགས་ཀྱི་ལས་ཕལ་མོ་ཆེ་དང་། རིག་འཛིན་གྱི་འཁོར་ལོས་སྒྱུར་བ་སོགས་དངོས་གྲུབ་ཆེན་པོ་དང་མངག་གཞུག་པ་སྒྲུབ་པ་སོགས་དངོས་གྲུབ་སྣ་ཚོགས་སྒྲུབ་པ་ཡིན་གྱི། ཐ་མལ་རང་ག་མའི་བློ་མ་བོར་པས་དེ་ལྟར་བྱས་ཀྱང་དོན་ཆུང་བར་ཟད་དོ། །གལ་ཏེ་རང་ཐ་མལ་པ་ལྷ་མིན་པའི་གནད་ཀྱིས་ལྷར་སྒོམ་མི་རུང་ན། བུམ་ཆུ་སོགས་དང་། བྲིས་སྐུ་དཀྱིལ་འཁོར་སོགས་ལྷར་བསྐྱེད་མི་རུང་བར་མཚུངས་ཏེ། དེ་དག་ཀྱང་ལྷ་དངོས་མིན་པའི་ཕྱིར་རོ། །མདུན་གྱི་ལྷ་བསྒོམས་པ་དེ་ཡང་རང་སེམས་ཀྱིས་བརྟགས་ཏེ་བྱས་མོད། དེ་ལ་གསལ་སྣང་གྲུབ་རྒྱུ་ཡོད་ན་རང་སེམས་དང་རང་ལུས་ལྷར་གསལ་ཀྱང་གསལ་སྣང་གྲུབ་པ་ཡོད་པར་མཚུངས་སོ། །མདུན་གྱི་ལྷའི་རྣམ་པ་དེ་ཡང་རང་སེམས་ཀྱི་གསལ་ཆ་ཙམ་གྱི་རྣམ་པ་སྣང་བ་ཡིན་ནའང་། དེ་བདག་དང་རྒྱུད་ཐ་དད་པའི་ལྷ་ཡེ་ཤེས་པ་དངོས་སུ་ཞེན་ཅིང་། རང་དངོས་གྲུབ་ནོད་པ་པོའི་ཚུལ་གྱིས་མཆོག་དམན་གྱི་འདུ་ཤེས་ཤས་ཆེ་བའི་གདུལ་བྱ་དག་གི་ངོར། རེ་ཞིག་མདུན་བསྐྱེད་གཙོ་བོར་བྱེད་པའི་བྱ་རྒྱུད་རྣམས་བསྟན་པ་ཡིན་ཀྱང་། རྣམ་པ་ཀུན་ཏུ་ཐ་མལ་པ་དང་ལྷ་ཡེ་ཤེས་པ་འདྲེ་མི་རུང་བར་བཟུང་ན། ཐ་མལ་པའི་སྣང་བ་གང་ཡང་ལྷར་བསྒོམ་མི་རུང་བའི་གཉིས་སྣང་དམ་པོ་དེས་དངོས་གྲུབ་འབྱུང་བ་ལ་གེགས་བྱེད་པ་ཡིན་ཅིང་། བྱ་རྒྱུད་པ་ལའང་ནམ་ཞིག་ལྷ་དང་རང་གཉིས་སུ་མེད་པའི་ངེས་པ་སྐྱེས་པའི་ཚེ་བློ་ན་འཕར་ཏེ། རྒྱུད་སྡེ་གོང་མའི་དགོངས་དོན་ལ་འཇུག་པ་ཡིན་ནོ། །དེས་ན་སྔགས་བླ་མེད་ནས་ཇི་ལྟར་གསུངས་པའི་དགོངས་དོན་ཉམས་སུ་མ་ལོན་བར་དུ་འབྲས་བུ་མཐར་ཐུག་འཐོབ་པ་མིན་ཡང་། གནས་སྐབས་སུ་གདུལ་བྱའི་བློ་དང་མཐུན་པར་འཇུག་པའི་མདོ་དང་རྒྱུད་འོག་མ་རྣམས་ཀྱི་ལམ་ལ་ཞུགས་པའང་རིམ་གྱིས་མཐར་འབྲས་འཐོབ་པ་ཡོད་མོད་ཀྱི་ལམ་ལ་ཉེ་རིང་གི་ཁྱད་པར་གོང་ནས་གོང་དུ་འཕགས་པའང་། ལྟ་བ་ཤེས་རབ་དང་ལམ་སྒོམ་པའི་ཐབས་གཉིས་ཀ་འཕགས་པ་ཡིན་པའི་ཕྱིར་རོ། །རྣམ་སྣང་དང་འཇམ་དཔལ་སོགས་ལྷའི་ངོ་བོ་ལ་རྒྱུད་གོང་འོག་གི་ཁྱད་པར་གྱི་མཆོག་དམན་མེད་པས་འཕགས་ཡུལ་གྱི་སློབ་དཔོན་ཆེན་པོ་ཀུན་དགའ་སྙིང་པོ་སོགས་ཀྱིས་རྒྱུད་སྡེ་འོག་མ་ལའང་གོང་མ་སྦྱོར་རུང་བར་བཞེད་ལ། ས་སྐྱ་པ་དག་གིས་བྱ་རྒྱུད་གཅིག་ལ་རྒྱུད་སྡེ་བཞི་ཀར་བཀྲལ་རུང་བར་བཞེད། འོན་ཀྱང་གདུལ་བྱའི་བསམ་པ་དང་མཐུན་པར་ཐ་མལ་པའི་དངོས་ཞེན་ཆེ་ཆུང་དང་བསྟུན་ཏེ། གཙང་སྦྲ་དགོས་མི་དགོས། བདག་ཉིད་ལྷའི་སྙེམས་པ་དོན་མཐུན་ལམ་དུ་བྱེད་ནུས་མི་ནུས་སོགས་ཀྱི་རྒྱུད་སྡེ་བཞིའི་ཆོ་གའི་སྒྲུབ་ཚུལ་ཐ་དད་དུ་ཕྱེ་བ་བཞིན་དུ། རྒྱུད་གང་ནས་དེ་ལྟར་དངོས་སུ་བསྟན་ལ་དེ་དང་དེའི་རྒྱུད་ཀྱི་རྣམ་བཞག་བྱེད་དགོས་པ་ཡིན་ནོ། །དེ་ལྟར་རིགས་པས་དཔྱད་ན་བྱ་རྒྱུད་ཡིན་ན་བདག་བསྐྱེད་མེད་པའི་ངེས་པ་མི་འགྲུབ་ལ། བདག་བསྐྱེད་ཡོད་ན་འཐད་པ་དུ་མ་ཡང་ཡོད་མོད་མང་དུ་མ་སྨོས་སོ། །ལུང་གི་དབང་དུ་བྱས་ན་ཡང་བྱ་རྒྱུད་ལ་བདག་བསྐྱེད་མི་བཞེད་པ་དེ་དག་གིས་བྱ་རྒྱུད་དངོས་གནས་པར་ཞལ་གྱིས་བཞེས་པའི་ལག་ན་རྡོ་རྗེ་དབང་བསྐུར་བ་སོགས་ཀྱི་ལུང་སྔར་དྲངས་པ་དང་བྱ་རྒྱུད་ཀྱི་སྤྱི་རྒྱུད་བཞིར་བཞེད་པའི་ནང་ཚན་བསམ་གཏན་ཕྱི་མ་ལས། གཞི་གཉིས་གསུངས་པའི་གཞི་གཅིག་ནི་རང་ཉིད་ལྷར་སྒོམ་པ་ཡིན་པ་སོགས་དང་། བྱ་རྒྱུད་འབའ་ཞིག་ཏུ་འདོད་པའི་གར་མཁན་མཆོག་གི་བརྟག་པ་ཕྱི་མ་ལས། བདག་ཉིད་ཕྱག་རྡོར་དུ་བསྐྱེད་པར་གསུངས་པ་སོགས་དེ་འདྲ་འགའ་ཡོད་པ་དང་གལ་ཏེ་བདག་ལྷར་བསྒོམས་པ་གསུངས་པ་མེད་ཀྱང་། དེ་ཙམ་གྱིས་བྱ་རྒྱུད་ཡིན་ངེས་སུ་མི་འགྲུབ་སྟེ། བླ་མེད་རྒྱུད་ཀྱི་སྔགས་ཁོལ་ཕྱུང་དང་། རྟོག་པའི་རྒྱུད་འགའ་ཞིག་ལ་སོགས་པ་བཞིན་ནོ། །གཞན་ཡང་བྱ་རྒྱུད་ལུགས་ཀྱི་ཆུ་ཅོད་པཎ་གྱི་དབང་བསྐུར་བ་དང་། གཙང་སྦྲ་དང་ཁྲུས་སོགས་ཀྱང་བྱ་རྒྱུད་དུ་གཏོགས་ཚད་ལ་དེ་དག་གི་གསལ་ཁ་མ་བྱུང་ཡང་བྱ་རྒྱུད་ཡིན་པར་འདོད་དགོས་པ་བཞིན། བདག་བསྐྱེད་མ་བསྟན་པས་བདག་བསྐྱེད་སྒོམ་མི་རུང་ན་དབང་སོགས་ལའང་མཚུངས་པར་ཁས་ལེན་དགོས་སོ། །བདག་བསྐྱེད་དངོས་སུ་མ་བསྟན་པའི་རྒྱུད་ཕལ་ཆེ་ན། མདུན་བསྐྱེད་ཀྱང་དངོས་སུ་མ་བསྟན་པ་ཡོད་པས་དེ་དག་ཀྱང་བྱ་རྒྱུད་མིན་པར་ཡང་འགྱུར་བའི་ཕྱིར་དང་། རྣམ་འབྱོར་གྱི་རྒྱུད་དང་བླ་མེད་ཀྱི་རྒྱུད་ཡིན་པ་འགའ་ལའང་སྔགས་དང་ཆོ་ག་སོགས་བསྟན་གྱི་བདག་བསྐྱེད་སོགས་ལྷའི་མངོན་རྟོགས་མེད་པའང་ཡོད་པ་ཡིན་ནོ། །སྔགས་བཟླ་རྒྱུ་ཡོད་པ་ཙམ་གྱིས་རྒྱུད་སྡེའི་ཁོངས་སུ་གཏོགས་ངེེས་པའང་མིན་ཏེ། དཔེར་ན་ཆུ་ཅོད་པཎ་གྱི་དབང་ནོད་པ་སོགས་སྔོན་དུ་འགྲོ་བ་དང་། མདུན་བསྐྱེད་སོགས་མི་དགོས་པར། དད་པས་བཟླ་རུང་བ་འདུལ་བ་དང་མདོ་ལས་བྱུང་བའི་སྔགས་དང་དྲང་སྲོང་སོགས་བདེན་ཚིག་གྲུབ་པ་དག ལྷ་མཐུ་བོ་ཆེ་སོགས་ཀྱིས་བྱིན་གྱིས་བརླབས་པས་ནད་ཞི་བ་དང་མིག་འཕྲུལ་སྟོན་པ་སོགས་ཀྱི་སྔགས་མཐའ་ཡས་པ་ཡོད་པ་བཞིན་ནོ། །དེ་ཡང་སངས་རྒྱས་དང་བྱང་ཆུབ་སེམས་དཔའ་རྣམས་ལ་དཀྱིལ་འཁོར་གང་རུང་དུ་ལྷ་སོགས་ཀྱི་རིག་སྔགས་ཕལ་མོ་ཆེ་རྒྱུད་དང་དཀྱིལ་འཁོར་དེ་ལ་བརྟེན་པའི་རིགས་སྔགས་ཀྱི་འཁོར་ཡིན་པས་དེའི་རིགས་སུ་གཏོགས་ལ། དེ་ལྟར་མིན་པ་རྣམས་ནི། དཔུང་བཟང་ལས། གཞན་ཡང་ཁ་ཅིག་གནས་མེད་རྣམ་པར་འཁྱམས། །ཞེས་གསུངས་པ་ལྟ་བུའོ། །དེས་ན་རྒྱུད་ཀྱི་ཚིག་རིས་ལ་བདག་བསྐྱེད་ཡོད་མེད་ཙམ་ཞིག་གིས་བྱ་རྒྱུད་ཡིན་མིན་དཔྱད་དཀའ་བས་སྔགས་ཕལ་མོ་ཆེ་དང་། བླ་མེད་ཀྱི་རྫོགས་རིམ་སོགས་ཕལ་ཆེ་བ་རྒྱུད་དེར་དངོས་སུ་གསལ་བོར་བསྟན་པ་མེད་ཀྱང་། དེ་དག་གི་བཤད་རྒྱུད་དང་རྒྱུད་རྒྱས་པ་སོགས་དང་། རྒྱུད་གཞན་ན་གསལ་བ་དང་། རྒྱུད་ཀྱི་བཀའ་བསྡུ་བ་པོ་གསང་བདག་དང་མཁའ་འགྲོ་མ་སོགས་ཀྱི་མན་ངག་ལ་བརྟེན་ཏེ་བཀྲལ་བའི་ལུང་ཟབ་མོ་ཤིན་ཏུ་མང་བའི་ཕྱིར་ན། ལམ་འདིའི་ཤིང་རྟ་ཆེན་པོ་དངོས་གྲུབ་བརྙེས་ཤིང་མཁས་པའི་དབང་པོར་འཛམ་གླིང་ན་ཡོངས་སུ་གྲགས་པ། སློབ་དཔོན་སངས་རྒྱས་གསང་བ་སོགས་ཀྱི་རྗེས་སུ་འབྲང་བ་ནི་ཤིན་ཏུ་རིགས་པ་དང་ལྡན་ཞིང་དངོས་གྲུབ་ཀྱི་ལམ་པོ་ཆེ་ཡིན་པ་ཉིད་དུ་ཤེས་པར་བྱའོ། །ཞེས་ཀུན་མཁྱེན་བླ་མ་འཇམ་དཔལ་དགྱེས་པས་གསུངས་སོ། །དེ་ལྟར་ངེས་པར་བྱས་ནས་སྒོམ་པ་དངོས་ལ་འཇུག་པ་ལ། སྤྱིར་དེ་ཁོ་ན་ཉིད་བཞིར་གསུངས་ཏེ། དེ་ལ་བདག་གི་དེ་ཁོ་ན་ཉིད་ནི་གཞི་གནས་ལུགས་ལྟ་བས་གཏན་ལ་འབེབས་པ་སྟེ། ཞིབ་པར་གོང་དུ་སོང་ལ། དེ་ཡང་སློབ་དཔོན་སངས་རྒྱས་གསང་བས། བདག་གི་དེ་ཁོ་ན་ཉིད་ནི་རིགས་པས་དཔྱད་པའི་སྟོང་པ་ཙམ་ལ་མི་བྱ་ཡི། བདག་གི་དེ་ཁོ་ན་ཉིད་གཉིས་སུ་མེད་པའི་ཡེ་ཤེས་ཀྱི་མཚན་ཉིད་དེ་ཐོབ་ན་སངས་རྒྱས་སུ་འགྱུར་བས་དེ་འཛིན་ཞེས་གསུངས་ཏེ། མདོར་ན་རྣམ་པར་ཤེས་པའི་མཚན་ཉིད་ཀྱི་ཆོས་ལས་འདས་ཏེ་སྣང་སྟོང་གཉིས་སུ་མེད་པའི་ཡེ་ཤེས་ཀྱི་བཞུགས་ཚུལ་གཏན་ལ་ཕེབས་ན། བདག་གི་དེ་ཁོ་ན་ཉིད་ཀྱང་དེ་ཡིན་ལ། དོན་དམ་པའི་ལྷ་ཡང་དེར་ཚུལ་གཅིག་སྟེ་ཆོས་ཐམས་ཅད་ཀྱི་གནས་ལུགས་དང་དོན་དམ་བྱང་ཆུབ་ཀྱི་སེམས་ཞེས་ཀྱང་བྱའོ། །ལྷའི་དེ་ཁོ་ན་ཉིད་ནི། རྣམ་འཇོམས་ཀྱི་རྒྱུད་རྒྱས་པའི་ཚིག་དྲངས་ཏེ་སངས་རྒྱས་གསང་བས། དང་པོ་ཁྲུས་བྱས་རྣལ་འབྱོར་པས། །རྡོ་རྗེ་གདན་ལ་འདུག་ནས་ནི། །མཆོད་དང་གསོལ་བས་ལྷ་དྲུག་སྒོམ། །སྟོང་པ་ཡི་གེ་སྒྲ་གཟུགས་དང་། །ཕྱག་རྒྱ་མཚན་མ་དྲུག་ཡིན་ནོ། །ཞེས་པས་བདག་གི་དེ་ཁོ་ན་ཉིད་མཐའ་བཞི་དང་བྲལ་བར་བསྒོམ་པ་སྟོང་པའི་ལྷ། དེ་ཉིད་ཀུན་རྫོབ་ཟླ་དཀྱིལ་གྱི་རྣམ་པར་བ སྒོམ་པ་ཡི་གེའི་ལྷ། དེའི་སྟེང་དུ་བཟླ་བྱའི་སྔགས་གཟུངས་རང་སྒྲ་སྒྲོག་པ་སྒྲའི་ལྷ། སྔགས་དེ་ཉིད་ཟླ་དཀྱིལ་ལ་འདྲེས་ནས་སླར་ཡང་སྔགས་ཕྲེང་བཀོད་པ་ལས་འོད་ཟེར་སྤྲོ་བསྡུས་སངས་རྒྱས་ཀྱི་མཛད་པ་བསྒྲུབས་ཏེ་ཟླ་བ་སྔགས་ཕྲེང་དང་བཅས་པ་ཡོངས་སུ་གྱུར་པ་ལས་རིགས་གསུམ་གྱི་ལྷ་དེ་དང་དེའི་གཟུགས་སུ་བསྒོམ་པ་གཟུགས་ཀྱི་ལྷ། དེ་ལ་རིགས་གང་ཡིན་དེ་དང་དེའི་དམ་རྒྱས་རྒྱས་འདེབས་པ་ཕྱག་རྒྱའི་ལྷ། དུས་ཀུན་ཏུ་ཏིང་ངེ་འཛིན་གྱི་ལྷའི་འདུ་ཤེས་དང་མི་འབྲལ་བ་མཚན་མའི་ལྷ་སྟེ། ལྷ་སྒོམ་པའི་རྣལ་འབྱོར་དྲུག་སོགས་འོག་ཏུ་གལ་པོའི་དགོངས་པ་བཤད་པ་དང་དོན་གཅིག་གོ །བཟླས་བརྗོད་ཀྱི་དེ་ཁོ་ན་ཉིད་ལ་ཐུན་མོང་དང་ཁྱད་པར་གཉིས་ཀྱི། ཐུན་མོང་པ་འོག་ཏུ་འཆད་པར་འགྱུར་ལ། ཁྱད་པར་བ་ནི། བསམ་གཏན་ཕྱི་མ་ལས། སྒྲ་དང་སེམས་དང་གཞི་ལ་གཞོལ། །གསང་སྔགས་མི་འགྱུར་གཞི་ལ་གནས། །ཡན་ལག་མ་ཉམས་གསང་སྔགས་བཟླས། །ངལ་ན་བདག་ལ་ངལ་གསོས་ཤིག །ཅེས་པས། སྒྲ་ནི་སྔགས་ཀྱི་ཡི་གེའི་ཕྲེང་བའི་སྒྲའོ། །སེམས་ནི་བྱང་ཆུབ་ཀྱི་སེམས་རྣམ་པར་རྟོག་པ་དང་བྲལ་བ་ཤིན་ཏུ་རྣམ་དག་དྲི་མེད་བརྟན་ཅིང་མི་གཡོ་བ་ཟབ་ཅིང་ཕྲ་བ་མེ་ལོང་ལྟ་བུ་དེ་ཉིད་ཟླ་བའི་དཀྱིལ་འཁོར་གྱི་རྣམ་པར་སྣང་བའོ། །གཞི་ལ་གཞོལ་བ་ནི་མདུན་དུ་བཞུགས་པ་དེ་བཞིན་གཤེགས་པའི་སྐུ་ལ་དམིགས་པ་རྩེ་གཅིག་ཏུ་གཞོལ་བའོ། །གསང་སྔགས་མི་འགྱུར་ཞེས་པ་ནི་གཞི་བཞི་པོ་གསལ་ཞིང་བརྟན་པར་གྱུར་པ་ལ་བྱའོ། །གཞི་ལ་གནས་ཞེས་པའི་གཞི་ཕྱི་མ་ནི་བདག་གི་གཞི་སྟེ་བདག་ལྷར་གསལ་བ་ལ་དམིགས་པ་རྩེ་གཅིག་ཏུ་གནས་པའོ། །དེ་ལྟར་ཡན་ལག་བཞི་པོ་མ་ཉམས་པའི་ཏིང་ངེ་འཛིན་དང་ལྡན་པའི་སྒོ་ནས་གསང་སྔགས་བཟླ་བར་བྱ་བ་སྟེ། དེ་ཡང་མིག་སོགས་དབང་པོ་དང་བ་སྤུའི་མཐར་ཐུག་པར་རྒྱུ་བའི་རླུང་ཐམས་ཅད་ལུས་ཀྱི་ནང་དུ་སླར་སྡུད་པ་ཡིས་བཀུག་ནས། སྲོག་ཅེས་པ་རླུང་དང་རྩོལ་བ་ཞེས་པ་ཡིད་ཀྱི་དྲན་པ་འགྱུ་བ་སྟེ། དེ་གཉིས་ཀ་བསྡོམས་ནས་བཟླ་བར་གསུངས་ཏེ་མདོར་ན། གཞི་བདག་མདུན་ལྷར་བསམ་པ། སེམས་ཐུགས་ཀར་ཟླ་དཀྱིལ་བསམ་པ། སྒྲ་དེའི་སྟེང་སྔགས་ཀྱི་སྒྲ་གདངས་བསམ་པ། སྲོག་རྩོལ་བསྡམས་ནས་མདུན་གྱི་ལྷ་བཟླ་བ་སྔགས་དང་བཅས་ལ་དམིགས་ནས་བཟླ་བ། སྲོག་དབྱུང་བའི་ཚེ་རང་གི་ལྷ་བ ཟླ་བ་སྔགས་ཕྲེང་ལ་དམིགས་པ། སྔགས་བཟླ་བའང་སྐྱོན་དང་བྲལ་བར་མ་ཉམས་པར་བཟླ་ཞིང་། དེས་སྐྱོན་མི་རྟོག་པའི་ངང་ལ་ངལ་གསོ་བ་རྣམས་སོ། །བསམ་གཏན་གྱི་དེ་ཁོ་ན་ཉིད་ནི། དེ་ཉིད་ལས། གསང་སྔགས་མེར་གནས་དངོས་གྲུབ་སྟེར། །སྒྲར་ནས་རྣལ་འབྱོར་སྟེར་བར་དྲན། །སྒྲ་མཐས་ཐར་པ་སྟེར་བར་བྱེད། །འདི་དག་དེ་ཉིད་གསུམ་པོོ་ཡིན། །ཞེས་པས། དེ་ཉིད་གསུམ་གྱི་དང་པོ་གསང་སྔགས་མེར་གནས་ནི། རང་ཉིད་དང་མདུན་གྱི་ལྷའི་ཐུགས་ཀར་རྣམ་པར་མི་རྟོག་པའི་གཟུགས་ཅན་ཐོགས་རེག་དང་བྲལ་བ་དྭངས་ཤིང་འོད་གསལ་ལ་དྲི་མ་མེད་པ་ཟླ་བའི་དཀྱིལ་འཁོར་གྱི་སྟེང་ན། མི་གནོད་ཅིང་ཟུག་རྔུ་མེད་ལ་ཡིད་དུ་འོང་བའི་རང་བཞིན་ཅན། རབ་ཏུ་ཞི་བའི་མེ་ལྕེ་འོད་རབ་ཏུ་བཟང་བར་བསམ་པ་ཡིན། མེ་ལྕེ་དེའི་ནང་ན་གནས་པ། དེ་ཉིད་གཉིས་པ་སྒྲར་གནས་ཞེས་པ་ནི། སྔགས་ཀྱི་ཡི་གེའི་ཕྲེང་བ་བརྒྱུད་མར་གནས་པའི་སྒྲ་གདངས་གསལ་ཞིང་ཟུར་ཕྱིན་པ་དྲིལ་བུའི་སྒྲ་ལྟ་བུའི་བར་མ་ཆད་དུ་ཡིད་ངོར་སྣང་བ་ལ་སེམས་རྩེ་གཅིག་ཏུ་གནས་པ་ལ་གསལ་སྣང་བརྟན་པ་ནི་གསང་སྔགས་མི་འགྱུར་བའི་གཞི་ཞེས་གསུངས་ཏེ། ངག་གི་བཟླས་བརྗོད་མེད་པར་ལྷའི་ངོ་བོ་སྔགས་ཀྱི་སྒྲ་ཡིད་ལ་ཞེན་པར་བསམ་པའོ། །དེ་ཉིད་གསུམ་པ་སྒྲ་མཐའ་ནི། སྒྲར་སྣང་ཡལ་ཞིང་མི་དམིགས་པ་སྟེ། ཡལ་བའི་གནས་ནི་མཐའ་དང་བྲལ་བ་ཆོས་ཀྱི་དབྱིངས་སོ། །ཇི་ལྟར་སྒྲར་སྣང་ཡལ་བར་གཏོང་ན། སྒྲར་སྣང་གི་གནས་ཡིག་འབྲུའི་གཟུགས་ཀྱི་རྣམ་པར་སྣང་བ་དང་། སྒྲ་མངོན་དུ་བྱེད་པ་ཡིད་བཟླས་ངང་ཤུབ་བཟླས་ཀྱང་བཏང་། རང་བཞིན་སྒྲར་སྣང་བ་དེ་ཡང་ཡལ་ཏེ་མི་དམིགས་པ། ཞི་བ་གདོད་ནས་མ་སྐྱེས་པའི་དོན་ལ་བསམ་གཏན་བྱེད་པ་སྟེ། རྩོལ་བ་དང་བཅས་པ་ཐམས་ཅད་སྤངས་པ་ཡིན་ནོ། །དེ་ཡང་དང་པོ་ནི་ལས་ཐམས་ཅད་སྒྲུབ་པའི་གཞི་དང་། གཉིས་པ་ནི་ཞི་གནས་སྐྱེ་བའི་རྟེན་དང་། གསུམ་པ་ནི་ལྷག་མཐོང་གི་ཡེ་ཤེས་འཆར་བའི་ཉེར་ལེན་དུ་གསུངས་པ་སྟེ་ཞིབ་པར་ཀུན་མཁྱེན་བླ་མ་འཇམ་དཔལ་དགྱེས་པས་བསྩལ་པའི་བསམ་གཏན་ཕྱི་མའི་རྒྱུད་དོན་རྣམ་བཤད་སོགས་ལས་ཤེས་པར་བྱ་ལ། འདིར་ནི་སྙིང་པོའི་སྤྱི་དོན་ལས་གསུངས་པ་ལྟར་ན། ཧེ་རུ་ཀ་གལ་པོ་ལས། ཆོས་ཉིད་སྒྲ་དང་ཡིག་གཟུགས་ཐུགས། །ཡེ་ཤེས་ཡོངས་རྫོགས་སྐུར་སྒྲུབ་སྒོམ། །ཞེས་པས་ཀྲྀ་ཡཱ་དོན་གྱི་ལྷ་དྲུག་གི་སྒོ་ནས་དམ་ཚིག་པ་བསྐྱེད་པ་སྟེ། དེ་ཡང་དང་པོ་སྟོང་པའི་ལྷ་ནི་བདག་དང་ལྷའི་དེ་ཁོ་ན་ཉིད་རྣམ་པར་མི་རྟོག་པ་ཆོས་ཀྱི་དབྱིངས་སུ་དབྱེར་མེད་པའི་ངེས་ཤེས་སམ་ང་རྒྱལ་དུ་བྱ་བ་སྣང་བ་མེད་པའི་ཏིང་ངེ་འཛིན་ནོ། ༡ །དེའི་ངང་ལས་ལྷ་གང་ཡིན་གྱི་སྔགས་ཀྱི་ཡི་གེའི་སྒྲ་གདངས་ཙམ་ནམ་མཁའ་ལས་གྲགས་པར་བསམ་པ་སྒྲའི་ལྷའོ། ༢ །གདངས་དེ་ལས་སྔགས་ཀྱི་ཡི་གེའི་གཟུགས་ཀྱི་རྣམ་པར་ནམ་མཁའ་ལ་སྣང་བ་ཡི་གེའི་ལྷའོ། ༣ །དེ་ནས་གཟུགས་ཀྱི་ལྷ་སྐུ་མངོན་དུ་རྫོགས་པའི་ཕྱིར་བདག་གི་དེ་ཁོ་ན་ཉིད་ཟླ་བའི་དཀྱིལ་འཁོར་གྱི་རྣམ་པར་གྱུར་པའི་སྟེང་དུ་ལྷའི་ངོ་བོ་སྔགས་ཀྱི་ཡི་གེ་ནམ་མཁར་གནས་པ་དེ་དག་འདུས་ཏེ་དག་པའི་དངུལ་ཆུ་གསེར་གྱི་བྱེ་མར་ཞེན་པ་ལྟར་འདྲེས་པ་ལས། བདག་དང་ལྷ་གཉིས་སུ་མེད་པ་གཅིག་ཏུ་གྱུར་པའི་རང་བཞིན་ལས་འོད་ཟེར་འཕྲོ་འདུས་དོན་གཉིས་བྱས་ནས་ལྷག་པའི་ལྷ་ཡི་གཟུགས་གང་ཡིན་པ་གསལ་ཞིང་དེ་ཉིད་དུ་ང་རྒྱལ་བྱ་བ་གཟུགས་ཀྱི་ལྷའོ། ༤ །དེ་ནས་མཚོག་མ་དང་སྤྱི་གཙུག་སོགས་སུ་ལྷ་གང་ཡིན་པའི་རིགས་ཀྱི་ཕྱག་རྒྱས་བཏབ་པས་བརྟན་ཅིང་བྱིན་གྱིས་བརླབས་པ་ནི་ཕྱག་རྒྱའི་ལྷའོ། ༥། དེ་ནས་དེ་ལྟ་བུའི་ལྷ་དེའི་སྐུ་དང་ཡན་ལག་གི་ཆ་ཤས་རེ་རེ་ནས་ཀྱང་གསལ་བཏབ་ལ། དེའི་མཚན་མ་ལ་སེམས་བཟུང་ཞིང་འདི་དང་འདི་ལྟ་བུ་ཞེས་བརྟག་ཅིང་རྒྱུན་དུ་ཞེན་པ་ནི་མཚན་མོའི་ལྷའོ། ༦། དེ་ལྟར་རང་དམ་ཚིག་པར་གསལ་བའི་མདུན་དུ་ཡང་དག་པའི་སྨོན་ལམ་གྱི་སྟོབས་ལས་བྱུང་བའི་ཞིང་ཁམས་ཕོ་བྲང་གདན་དང་བཅས་པ་གསལ་བཏབ་པའི་ནང་དུ་ཡེ་ཤེས་ཀྱི་ལྷ་སྤྱན་དྲངས་ནས་བཞུགས་སུ་གསོལ་བ་ལ་མཆོད་བསྟོད་རྒྱུན་བཤགས་སོགས་བྱས་རྗེས། བོ་དྷིི་ཙི་རྒྱལ་བའི་རིགས། པདྨའི་སྙིང་པོ་པདྨའི་རིགས། རུ་རཀྴ་རྡོ་རྗེའི་རིགས་སོགས་ལྷ་སོ་སོར་བསྔགས་པའམ། དུང་སོགས་ལས་བྱེ་བྲག་པར་བསྔགས་པའི་བགྲང་ཕྲེང་ཆོ་ག་བཞིན་དུ་བྱིན་གྱིས་བརླབས་པ་ཞི་བ་ལ་མཐེབ་འཛུབ་སོགས་ལས་སོ་སོར་གསུངས་པའམ། ཐུན་མོང་དུ་མཐེབ་སྲིན་གྱིས་བཟུང་ནས། རིགས་སོ་སོའི་ཐུགས་ཀར་ཀུན་རྫོབ་བྱང་ཆུབ་ཀྱི་སེམས་ཟླ་བའི་དཀྱིལ་འཁོར། དེའི་སྟེང་དུ་བཟླ་བྱའི་སྔགས་སྒྲ་གདངས་དང་བཅས་པ་བཀོད་ནས་གསང་སྔགས་ཀྱི་ལྷ་རྣམས་མངོན་སུམ་འདྲ་བར་བལྟས་ལ་ཡང་དང་ཡང་དུ་བསམ་པའི་དྲན་པ་རྒྱུན་མི་ཆད་པས་ཡུལ་ལ་ཕྱིན་ཅི་ལོག་གི་ངན་རྟོགས་བསལ་བའི་སེམས་རྩེ་གཅིག་པ་བསྒྲུབས་ཏེ་རིགས་སྔགས་བཟླ་བ་སོགས་བྱས་ལ་བསྒྲུབ་བྱའི་ལྷ་དང་རང་ཉིད་རྗེ་ཁོལ་གྱི་ཚུལ་དུ་བལྟས་ཏེ་དངོས་གྲུབ་བླངས་ཏེ། རང་ཤར་ལས། ལྷ་དང་རྣལ་འབྱོར་དག་པ་གཉིས། །རྗེ་དང་འབངས་ཀྱི་ཚུལ་དུ་ལྟ། །ཞེས་དང་། རིགས་ཐམས་ཅད་པའི་དངོས་གྲུབ་ལེན་པའི་རྒྱུད་ལས། རྗེ་དཔོན་རྒྱལ་པོའི་ཚུལ་བལྟས་ལ། །རང་ཉིད་བྲན་གྱི་འདུ་ཤེས་ཀྱིས། །སྔགས་སྒྲུབ་དངོས་གྲུབ་སྙིང་པོ་ནི། །བླ་ན་མེད་པའི་མཆོག་ཏུ་བླངས། །ཞེས་སོ། །གཉིས་པ་མཚན་མེད་ནི། མཚན་བཅས་ལྷ་དང་ཡིག་འབྲུ་ལ་སོགས་པར་བསྒོམ་པའི་སྣང་བ་དེའང་མི་དམིགས་པ་དག་པ་མཐའ་བཞི་དང་བྲལ་བའི་ངང་དུ་འཇོག་པས་བདེན་གཉིས་རེས་འཇོག་ཏུ་བསྒོམ་པ་སྟེ། ལ་ཤན་ལས། སྣང་སྟོང་རིམ་གྱིས་བརྟན་པར་བྱེད། །ཅེས་སོ། སྤྱོད་པ་ནི། བྱ་བ་དྲུག་སྟེ། ༡འཛུགས་པའི་དུས་ནི། དཔུང་བཟང་ལས། ཚེས་གྲངས་ཡར་གྱི་བརྒྱད་ལ་བརྩམ། །ཤིན་ཏུ་སྐར་མ་རྒྱལ་རྣམས་ལ། །གཟའ་སྐར་ཤིས་པས་བླང་བར་བྱ། །བྱང་ཆུབ་སྤྱོད་པ་ཆེར་འཕེལ་འགྱུར། །ཞེས་སོ། ༢། ཟས་ནི། དཀར་གསུམ་མངར་གསུམ་བཟའ་བ་དང་ཆང་ཤ་སྒོག་བཙོང་བསྲུང་བའོ། ༣།གོས་ནི་རས་ཁ་ཚར་མ་ཉམས་པ་གྱོན་པའོ། ༤། གཙང་སྦྲ་ནི། ལུས་དང་ངག་གི་གཙང་སྦྲ་དང་། །གསུམ་པ་ཡིད་ཀྱི་གཙང་སྦྲ་དང་། །བཞི་པ་བདེན་པར་སྨྲ་བ་དང་། །ལྔ་པ་ཕྱི་ཡི་གཙང་སྦྲར་བཞེད། །ཅེས་པའི་གཙང་སྦྲ་ལྔའམ། ཡང་ན་ཁྲུས་ཀྱི་བྱ་བ་བཞི་སྟེ། ཉོན་མོངས་མངོན་རྒྱུ་རགས་པའི་བག་ཆགས་ལྟ་བ་རྟོགས་པས་འདག༡ བག་ལ་ཉལ་གྱི་བག་ཆགས་ཏིང་ངེ་འཛིན་བསྒོམས་པས་འདག༢ སྤྱོད་ལམ་ཉམས་པའི་དྲི་མ་ལྷའི་དཀྱིལ་འཁོར་བསྡུ་ཞིང་ཡེ་ཤེས་པ་གཤེགས་པས་འདག༣ ཐ་མལ་པའི་དྲི་མ་སྔགས་ཀྱིས་བཏབ་པའི་ཆུས་འདག་པའོ། ༤། དམིགས་རྟེན་ནི་མཚན་ཉིད་དང་ལྡན་པའི་བྲིས་སྐུ་སོགས་ཡི་དམ་ལྷའི་སྐུ་གཟུགས་གཙང་སྦྲས་བཞེངས་པའོ། །བཟླས་བརྗོད་སྔགས་ཀྱི་བྱ་བ། དེ་ཉིད་འདུས་པ་ལས། གསང་བ་གསུམ་ལྡན་སྐྱོན་བཅུ་སྤངས་ཏེ་བླངས། །མཚམས་མེད་ལྔ་དང་མི་དགེ་བཅུ་སྤྱོད་དང་། །སྡིག་པ་གང་བྱས་བཟླས་བརྗོད་བྱས་པས་འབྱངས། །ཞེས་ལྷ་དང་བདག་དང་འཕྲོ་འདུའི་དེ་ཉིད་གསུམ་དང་ལྡན་པའི་སྒོ་ནས་སྔགས་ཀྱི་སྐྱོན་བཅུ་སྤངས་ལ་ཇི་ལྟར་དབང་གི་དུས་སུ་དམ་བཅས་པའི་གྲངས་བཞིན་དུ་བཟླ་བར་གསུངས་པ་དང་། དཔུང་བཟང་ལས། བཟླས་བརྗོད་བྱེད་ཚེ་མི་མྱུར་མི་དལ་ཞིང་། །སྒྲ་ཆེར་མི་དབྱུང་ཧ་ཅང་ཆུང་བའང་མིན། །སྨྲ་བཞིན་མ་ཡིན་གཞན་དུ་གཡེང་བཞིན་མིན། །ཞེས་དང་། གུག་སྐྱེད་ཀླད་ཀོར་ཚེག་ཚང་ཟུར་ཕྱིན་ལ། །གསང་སྔགས་དག་ཅིང་ཤིན་ཏུ་ཆོ་གར་བཅས། །ཞེས་གསུངས་པ་རྣམས་ཏེ། གལ་པོ་ལས། གཟའ་སྐར་དུས་ཚིགས་ཟས་གོས་གཙང་། །བརྟུལ་ཞུགས་དཀའ་ཐུབ་སྤྱད་པ་སྤྱོད། །ཅེས་དང་། ལྟ་ཕྲེང་ལས། སྐུའི་གཟུགས་བརྙན་དང་། ཐུགས་མཚན་དང་། བཟླས་བརྗོད་དང་ཞེས་སོགས་གསུངས་སོ། །འབྲས་བུ་ནི། བྱ་རྒྱུད་རང་ལམ་གྱིས་ཚོགས་ལམ་ཆེན་པོའི་བར་བགྲོད་ནས་སངས་རྒྱས་སྤྲུལ་སྐུའི་ཞལ་མཐོང་སྟེ་གནས་སྐབས་སུ་འདོད་པའི་ལྷ་དང་སྐལ་བ་མཉམ་པའི་རིག་འཛིན་ནམ་མཁའ་སྤྱོད་གྲུབ་ནས། རྟེན་དེ་ལ་བརྟེན་ནས་སྔགས་ཀྱི་ཕྱིན་དྲུག་གི་སྤྱོད་པ་སྤྱད་པས་མཐར་ཐུག་གི་འབྲས་བུ། མི་ཚེ་བདུན་ན་སྐུ་རིགས་རྣམ་པར་སྣང་མཛད། གསུང་རིགས་སྣང་བ་མཐའ་ཡས། ཐུགས་རིགས་རྡོ་རྗེ་མི་བསྐྱོད་པ་སྟེ། རིགས་གསུམ་རྡོ་རྗེ་འཛིན་པའི་ས་སྐུ་གསུམ་ཡེ་ཤེས་ལྔ་ཡི་བདག་ཉིད་ཅན་ཐོབ་པར་འདོད་དེ། གལ་པོ་ལས། མི་ཚེ་བདུན་ན་སངས་རྒྱས་པ། །རིགས་གསུམ་མགོན་པོས་འགྲོ་བ་འདུལ། །ཞེས་གསུངས། འདིའི་མི་ཚེ་བདུན་ནི། རིག་འཛིན་གྲུབ་ནས་རིང་པོར་འཚོ་བའི་དབང་དུ་བྱས་པ་སྟེ། བྱ་རྒྱུད་རང་ལམ་གྱིས་བསྐལ་ཆེན་བརྒྱད་ནས་འབྲས་བུ་ལ་སྦྱོར་བར་བཤད་པ་དང་མི་འགལ་བར་ཤེས་པར་བྱའོ། །དེ་ཡང་སྤྱིར་སྔགས་རྒྱུད་ཕྱི་ནང་ཀུན་ནས་རིག་འཛིན་གྱི་རྣམ་བཞག་མང་དུ་གསུངས་ཀྱང་བསྡུ་ན་འཇིག་རྟེན་ལས་འདས་པ་དང་མ་འདས་པ་གཉིས་ལས། སྔ་མ་ནི་མཐོང་ལམ་ནས་བཟུང་མི་སློབ་པའི་བར་གྱིས་བསྡུས་པ་མཆོག་གི་གྲུབ་པ་སྟེ། རྙིང་ལུགས་ཀྱི་རིག་འཛིན་བཞི་ལྟ་བུ་ཡིན་ལ། འདིར་བསྟན་པ་ནི་ཕྱི་མའི་ཁོངས་སུ་གཏོགས་པ་སྟེ། དེ་ལའང་ཐུན་མོང་གི་དངོས་གྲུབ་གྲུབ་པ་བརྒྱད་ཀྱི་ནང་ཚན་རལ་གྲི་དང་རིལ་བུ་ལ་སོགས་པའི་རྫས་ལ་བརྟེན་ནས་གྲུབ་པ་དེས། ལུས་དེ་ཉིད་ཀྱིས་ལྷ་དང་མིའི་གནས་སུ་ཐོགས་མེད་དུ་རྒྱུ་ཞིང་ནམ་མཁའ་ལ་འགྲོ་བ་དང་། རིག་སྔགས་ཀྱིས་སེམས་ཅན་ལ་ཕན་འདོགས་ཤིང་ཚར་གཅོད་པ་སོགས་ནུས་པ་ནི་རྫས་ལ་བརྟེན་པའི་རིག་འཛིན་ཞེས་ཐུན་མོང་གི་གྲུབ་པ་ཆུང་ངུ་དང་། འབྲིང་པོ་འདོད་པའི་རིག་འཛིན་ཞེས། ཚོགས་ལམ་ཆེན་པོ་དེས་དྲོད་ཐོབ་པ་ན་སྤྱོད་པ་སྤྱད་དེ་སྒྲུབ་པས། ལུས་འདོད་ཁམས་ཀྱི་ལྷ་དང་སྐལ་བ་མཉམ་པ། རིག་སྔགས་དང་དངོས་གྲུབ་སྣ་ཚོགས་བྱེད་པ་ཚེ་ལ་དབང་བར་འགྱུར་རོ། །འདི་ནི་ལུས་ཀྱི་རིག་པ་འཛིན་པ་ཞེས་ལུས་ཕྲ་ཡང་སོགས་ཡོན་ཏན་བརྒྱད་དང་ལྡན་པ་ཡིན་ཏེ། དེ་ལ་གཟུགས་ཕྲ་བ་ནི་རྩི་ཤིང་ནགས་ཚལ་ལ་སོགས་པ་སྣོད་ཀྱི་ཆོས་ཇི་སྙེད་སྤྲུལ་ཞིང་བསྡུ་བར་བྱེད་པས་ཕྲ་བ་དང་། སེམས་ཅན་སྣ་ཚོགས་པ་སྤྲུལ་བསྡུ་བྱེད་པས་ཡང་བ་དང་། གཉིས་ཀ་སྤྲུལ་བསྡུ་བྱེད་པས་ཡང་དག་པར་ཐོབ་པའམ་བདག་པོར་གྱུར་པ་དང་། ཡིད་ཀྱིས་བསམ་པ་ཙམ་གྱིིས་གར་ཡང་ཕྱིན་པ་དང་། འབྱུང་པོ་ཀུན་གྱི་མཆོད་པའི་འོས་སུ་རབ་ཏུ་གསལ་བ་དང་། ཇི་ཙམ་འདོད་པ་ཐམས་ཅད་འབྱུང་བས་འདོད་དགུར་སྒྱུར་བ་དང་། གང་ཐོབ་པར་འདོད་པ་དེ་ཐོབ་ནུས་པས་དགའ་མགུར་གནས་པ་སྟེ་དེ་ཉིད་བརྟེན་པ་དང་། ཚར་བཅད་རྗེས་འཛིན་གྱི་དབང་ཡོད་པ་ནི་དབང་དུ་གྱུར་བའོ། །ཡང་ན། ཕྲ་བ་ནི་འཇའ་ལུས་སུ་གྱུར་བ་དང་། ཡང་བ་ནི་རྡུལ་རགས་པའི་ཁམས་མེད་པས་ཐོགས་བཅས་ཀྱི་ལུས་མིན་པས་འབྱུང་བ་ལྔ་ལ་ཅི་དགར་སྤྱོད་པ་སྟེ། གཞན་རྣམས་འདྲའོ། །དེ་ལྟར་འཇིག་རྟེན་གྱི་དབང་ཕྱུག་ཡོན་ཏན་བརྒྱད་དང་ལྡན་པས་འདོད་ཁམས་འོག་མ་འདིར་མིའི་ནང་དུ་འོང་ཡང་ཕལ་པས་མཐོང་བ་མེད་ལ། སྤྲུལ་པ་སྣ་ཚོགས་ཀྱིས་དོན་མཛད་པར་གསུངས། ཆེན་པོ་གཟུགས་ཀྱི་རིག་འཛིན་ཞེས་ལུས་ཚངས་རིས་ནས་འོག་མིན་གྱི་བར་གྱི་གཟུགས་ཁམས་ཀྱི་ལྷ་དང་སྐལ་བ་མཉམ་ཞིང་དབང་ཕྱུག་གི་ཡོན་ཏན་ཤིན་ཏུ་ཕྲ་བས་གོང་དུ་བཤད་པ་ལས་ཁྱད་པར་འཕགས་པ་ཅན་དུ་གྱུར་ཏེ། དེའི་ལུས་འདོད་ཁམས་སུ་མི་འབྱུང་ཡང་སྤྲུལ་པ་སྣ་ཚོགས་པས་འགྲོ་བའི་དོན་མཛད་པ་སྟེ། དེ་ལྟར་ཐུན་མོང་གི་དངོས་གྲུབ་ལ་འདུན་པའི་སྤྱོད་པ་དེས་འཕྲལ་དུ་མཆོག་གི་དངོས་གྲུབ་ཐོབ་པ་མིན་ཡང་ཚེ་ལ་དབང་ཐོབ་པ་ཡིན་པས་རིམ་གྱིས་ལུས་རྟེན་དེ་ལ་བརྟེན་ནས་ལམ་གོང་མར་སྦྱོར་བར་བྱེད་པའོ། །མཁའ་སྤྱོད་ཀྱང་སྤྱིར་སྔགས་ཀྱི་རིག་པ་བཟུང་བ་དང། སྐྱེ་བདུན་གྱི་ཤ་ཟོས་པ་དང་། ལས་སྟོབས་ཀྱི་སྐྱེ་བས་ལུས་ནམ་མཁའ་ལ་འགྲོ་བ་ཙམ་ལའང་འཇུག་པ་ཡིན་ཞིང་། བྱེ་བྲག་བསྐྱེད་རིམ་སོགས་ལ་བརྟེན་པའི་དངོས་གྲུབ་མཆོག་དང་། ཆེན་པོ་སོགས་དང་འབྲེལ་བའི་མཁའ་སྤྱོད་ཅེས་པ་དེ་ལའང་གཉིས་ཀྱི། མཁའ་སྤྱོད་ཆེན་པོ་ནི། ཕྲ་མོའི་གཟུགས་དང་རེག་ཡང་བ། །ཁྱབ་དང་ཡང་དག་ཐོབ་པ་ཉིད། །རབ་ཏུ་གསལ་དང་བརྟན་པ་ཉིད། །དབང་ལྡན་འདོད་དགུར་སྒྱུར་མཐའ་ཅན། །ཞེས་པའི་ཡོན་ཏན་བརྒྱད་དང་ལྡན་པ་སྟེ། འདིའི་ཡོན་ཏན་བརྒྱད་ནི་གོང་སྨོས་འཇིག་རྟེན་པའི་དབང་ཕྱུག་བརྒྱད་དང་མིང་ཐ་དད་པ་ཙམ་ལས་དོན་ལ་གཅིག་པ་ཉིད་དེ། འདི་ནི་བསྐྱེད་རིམ་གྱི་འབྲས་བུ་མཐར་ཕྱིན། རྫོགས་རིམ་གྱི་རྟོགས་པ་མངོན་དུ་གྱུར་པས་རང་སྣང་རྣམ་པར་དག་པའི་ཞིང་དུ་ལམ་གྱི་རྟོགས་པའི་འཕྲོ་སྦྱང་བ་ཡིན་ནོ། །མཁའ་སྤྱོད་ཆུང་ངུ་ལ་རྣམ་གྲངས་ཤིན་ཏུ་མང་ཡང་རིགས་བསྡུ་ན་གཟུགས་ཁམས་བཅུ་བདུན། འདོད་ལྷ་རིགས་དྲུག མི་ཡུལ་གྱི་ནམ་མཁར་སྤྱོད་པ་ཕྱོགས་གཅིག་ཏུ་ངེས་པ་མེད་པ་རྣམས་སོ། །དེ་ལ་མི་ཡུལ་གྱི་མཁའ་སྤྱོད་ནི། མིའི་ནང་དུ་གནས་ཀྱང་ཡང་དག་པའི་གང་ཟག་རེ་རེ་ཙམ་གྱིས་མཐོང་བ་དང་འཕྲད་པ་སྲིད་ཀྱི། གཞན་ཕལ་པ་རྣམས་ཀྱིས་མཐོང་བར་མི་ནུས་སོ། །ལྷ་ཡུལ་གྱི་མཁའ་སྤྱོད་ནི་འདོད་གཟུགས་གང་དང་གང་དུ་སྤྱོད་ནུས་པ་དེར་དེ་དང་དེའི་ལོངས་སྤྱོད་ལ་སྤྱོད་ཅིང་། དེ་དང་དེའི་ཚེ་ཚད་དང་མཉམ་པའམ་ལྷག་པར་སྤྱོད་པའོ། །དེ་དག་ལའང་ལུས་མ་སྤངས་པ་དང་། སྤངས་ནས་མཁའ་སྤྱོད་དུ་སོང་བ་གཉིས་གཉིས་ཡོད་ཅིང་། ལུས་མ་སྤངས་པ་ལའང་ལམ་བསྒོམས་པའི་སྟོབས་ཀྱིས་མཁའ་སྤྱོད་ཐོབ་པ་དང་། གནོད་སྦྱིན་མོ་དང་གྲུབ་པ་སྟེ་རིག་འཛིན་ལ་སོགས་པ་བསྒྲུབས་པའི་སྟོབས་ཀྱིས་བགྲོད་པའི་མཁའ་སྤྱོད་དུ་ཁྲིད་པ་གཉིས་ལས་ཕྱི་མ་ནི་འཕྲལ་སྣང་སྣང་ཙམ་སྟེ་མཐོ་དམན་གང་དུ་སྤྱོད་ཅིང་ཡུན་ཇི་ཙམ་སྤྱོད་ཀྱང་ཕུགས་ཀྱི་བཙན་ས་ཟིན་པ་མེད་དོ། །ལམ་ཟབ་མོ་བསྒོམས་པའི་སྟོབས་ཀྱིས་བགྲོད་པའི་མཁའ་སྤྱོད་ནི། ལུས་སྤངས་མ་སྤངས་གང་ཡིན་ཡང་རུང་སྟེ། ལུས་འཇའ་ལུས་འོད་ཀྱི་རང་བཞིན་དུ་དྭངས་ཤིང་། ཏིང་ངེ་འཛིན་མཆོག་ཏུ་གྱུར་པ་ལ་ལོངས་སྤྱོད་པའི་ཕྱིར་ས་ལམ་གྱི་དམ་པ་གོང་དུ་འཕེལ་ཞིང་བགྲོད་པས་བཙན་ས་ཟིན་པའི་མཁའ་སྤྱོད་ཅེས་བྱའོ། །དེས་ན་ལུས་འོད་དུ་དྭངས་པ་དང་མི་སྣང་བ་ཙམ་ནི་སྤྱིར་བཅུད་ལེན་སོགས་རྫས་ལ་བརྟེན་ནས་ཀྱང་སྒྲུབ་ནུས་ལ། བསྐྱེད་རིམ་མཐར་ཕྱིན་པ་སོགས་ཀྱི་རྒྱུ་ལས་བྱུང་བའང་རགས་ལུས་དྭངས་མར་གྱུར་པ་ཙམ་ཡིན་པས་འདི་ལ་སྔགས་ཀྱི་སྐུ་ཞེས་བརྗོད་རུང་གི། འདི་ཉིད་རྫོགས་རིམ་ཟབ་མོའི་ཐབས་ཀྱིས་མ་ཟིན་ན་རྫོགས་རིམ་གྱི་སྐུ་ཙམ་ཡང་མ་ཡིན་ན་མཐར་ལམ་རྫོགས་ཆེན་གྱི་འཇའ་ལུས་སོགས་སུ་ལྟ་ཅི་སྨོས་ཏེ། ཁ་ཅིག་འདི་ལ་འཁྲུལ་ནས། འཕགས་སྐོར་གྱི་སྒྱུ་ལུས་སྒྲུབ་ཙམ་ཤེས་ན་རྙིང་མའི་འཇའ་ལུས་ཟེར་བ་བྱེ་མའི་འཆིང་བུ་ལྟར་འཇིག་ཟེར་བ་ནི་རང་མཚང་ངོམ་པ་སྟེ། སྔགས་ཕྱི་རྒྱུད་ཀྱི་སྐབས་འདིར་ནི་སྔགས་ཀྱི་ལྷན་ཅིག་བྱས་རྐྱེན་བྱས་པའི་མཐུས། རགས་ལུས་འདི་ཉིད་དྭངས་མར་གནས་འགྱུར་བ་ཡིན་ཏེ། དཔེར་ན་གསེར་འགྱུར་གྱི་རྩིས་ལྕགས་ཉིད་གསེར་དུ་བསྒྱུར་བའམ། བཅུད་ལེན་གྱི་མཐུས་རྒས་ལུས་གཞོན་ནུར་བསྒྱུར་བ་ལྟ་བུ་ཡིན་ལ། དེར་མ་ཟད་གསང་འདུས་ཀྱི་རིམ་ལྔའི་ཕྲ་བའི་རླུང་སེམས་ལས་སྒྱུ་མའི་སྐུ་སྒྲུབ་ཚུལ་དེ་ཡང་། རྣམ་ཤེས་དང་ཡེ་ཤེས་ལས་རླུང་དང་ཡེ་རླུང་བྱེད་པ་འདྲེས་པ་ལས་སྒྲུབ་པ་ཡིན་པས། འདི་ཡང་མ་དག་པ་དག་པ་དང་སློབ་པ་མི་སློབ་པའི་ཟུང་འཇུག་གིས་སྐུར་རིམ་བཞིན་གནས་འགྱུར་དགོས་པ་ཡིན་ལ། རྫོགས་ཆེན་གྱི་སྣང་བཞི་མཐར་ཕྱིན་ཚེ། གདོས་བཅས་རགས་པའི་ལུས་འདི་འོད་དུ་ཡལ་ཏེ། རིག་པའི་ཡེ་ཤེས་འོད་གསལ་ཤིན་ཏུ་རྣམ་དག་གི་སྐུ་མི་སློབ་པའི་ཟུང་འཇུག་ཉིད་མངོན་དུ་བྱེད་པ་ཡིན་ནོ། །དེས་ན་འདི་དག་གི་ཁྱད་པར་བྱེེད་པའང་གལ་ཆེ་བས་ཞར་བྱུང་དུ་སྨོས་པ་སྟེ་ཞིབ་པར་གཞན་དུ་གསལ་ལོ། །གཉིས་པ་གང་ཟག་འབྲིང་གི་འབྲིང་ལ་དགོངས་ཏེ་གསུངས་པ་ཨུ་པ་ཡ་ཡི་ཐེག་པ་ནི། ངོ་བོ། ངེས་ཚིག དབྱེ་བ་གསུམ་ལས། ངོ་བོ་ནི། ལྟ་སྒོམ་ཡོ་ག་དང་། སྤྱོད་པ་བྱ་བ་ལྟར་སྤྱོད་པས་དངོས་གྲུབ་བསྒྲུབ་པའི་ཐབས་སུ་གྱུར་པ་སྟེ། ལྟ་ཕྲེང་ལས། གཉིས་ཀ་ལ་བརྟེན་པས་གྲུབ་པའོ། །ཞེས་སོ། །ངེས་ཚིག་ནི། ཨུ་པ་ཡའི་སྒྲ་ལས། ཕྱི་ལུས་ངག་གི་བྱ་བ་དང་ནང་རྣལ་འབྱོར་གཉིས་ཀ་ཆ་མཉམ་དུ་སྤྱོད་པའི་ཕྱིར་གཉིས་ཀའི་རྒྱུད་ཅེས་བྱ་སྟེ། རང་ཤར་ལས། ཨུ་པ་ཡ་ནི་འདི་ལྟ་སྟེ། །ལྟ་བ་ཡོ་གར་ལྟ་བ་ལ། །སྤྱོད་པ་ཀྲྀ་ཡར་སྤྱོད་པའོ། །དེ་ཕྱིར་གཉིས་ཀའི་རྒྱུད་ཅེས་གྲགས། །ཞེས་སོ། །དབྱེ་བ་ལ་དྲུག་ལས། འཇུག་སྒོའི་དབང་ནི་དཀྱིལ་འཁོར་དུ་བཅུག་ནས་ཆུ་དང་ཅོད་པཎ་གྱི་སྟེང་དུ་སྤྱོད་རྒྱུད་ཀྱི་དགོས་དབང་། རྡོ་རྗེ་དྲིལ་བུ། མིང་དབང་རྣམས་དང་། མེ་ལོང་ཐུར་མ་ཆོས་འཆད་ཀྱི་རྗེས་གནང་སོགས་ཏེ། ཡེ་ཤེས་ཐིག་ལེ་ལས། རྡོ་རྗེ་དྲིལ་བུ་དེ་བཞིན་མིང་། །སྤྱོད་པའི་རྒྱུད་དུ་རབ་ཏུ་གསལ། །ཞེས་སོ། །དེ་ཡང་རྣམ་སྣང་མངོན་བྱང་ལ་དཔེར་མཚོན་ན། བུམ་དབང་དང་པོས་ངན་སོང་གི་དྲི་མ་སྦྱོང་། གཉིས་པས་འཁོར་བའི་ས་བོན་བཀྲུ། གསུམ་པས་ས་དང་པོ་ནས་བཅུ་པའི་བར་གྱི་ཚོགས་གཉིས་ཀྱི་ས་བོན་བསྐྲུན། བཞི་པས་རྒྱལ་ཚབ་ཀྱི་ས་བོན་བཞག དབུ་རྒྱན་གྱིས་སྐུ་མཚན་དཔེ། དྲིལ་བུས་གསུང་ཚངས་དབྱངས། རྡོ་རྗེས་ཐུགས་ཇི་ལྟ་ཇི་སྙེད། མིང་དབང་གིས་མཚན་ཁམས་གསུམ་ཁྱབ་པའི་ས་བོན་བཞག་ཅིང་། མིག་ཐུར་མེ་ལོང་ཆོས་བཤད་རྗེས་གནང་སོགས་ཀྱིས་གཞན་དོན་ཕྲིན་ལས་རྗེས་སུ་གནང་བ་སྟེ་རིགས་དབང་ལྔ་རྒྱུད་སྡེ་གོང་མ་དང་མིང་འདྲ་ཡང་དོན་ཐ་དད་པ་ཡིན་ནོ། །བྱ་བའི་འཇུག་སྒོ་དང་ཚུལ་ཁྲིམས་དང་། སྤྱོད་པ་རྣམས་བྱ་རྒྱུད་དང་། ལྟ་བ་དང་། སྒོམ་པ་ཡོ་ག་དང་ཤས་ཆེར་མཐུན་པ་སྟེ། གཡུ་ཐང་ལས། གཉིས་ཀའི་རྒྱུད་ཀྱི་འདོད་པ་ནི། །སྤྱོད་པ་བྱ་བའི་རྗེས་མཐུན་ཡང་། །ལྟ་བ་རྣལ་འབྱོར་རྗེས་མཐུན་ཕྱིར། །རིགས་དང་ལྟ་བས་ཁྱད་པར་འཕགས། །ཞེས་དང་། ལྟ་རིམ་ལས། གཉིས་ཀའི་རྒྱུད་ཀྱི་འདོད་པ་ནི། །ལྟ་སྤྱོད་གོང་འོག་རྗེས་སུ་མཐུན། །ཞེས་སོ། །འོན་ཀྱང་ལྟ་བ་ཆོས་ཀྱི་དབྱིངས་མཐའ་ཐམས་ཅད་དང་བྲལ་བ་དང་གཉིས་སུ་མེད་པ་རིག་པའི་ཡེ་ཤེས་ཀྱི་བྱིན་རླབས་རྣམ་སྣང་སོགས་རིགས་བཞིར་ལྟ་བ་དང་། བསྒོམ་པའི་ལྷ་ལ། རྣམ་སྣང་མངོན་བྱང་ལས། ཡི་གེ་དང་ནི་ཡི་གེ་སྦྱར། །དེ་བཞིན་གཞི་ལ་གཞི་གྱུར་ཉིད། །ཤིན་ཏུ་བསྡམས་པའིི་ཡིད་ལས་ནི། །བཟླས་བརྗོད་འབུམ་ཕྲག་གཅིག་བྱའོ། །ཞེས་ཡི་གེ་དང་། ཕྱག་རྒྱ་དང་། གཟུགས་ཀྱི་ལྷ་གསུམ་དུ་གསུངས་ཤིང་དེ་རེ་རེ་ལའང་གཉིས་གཉིས་ཏེ། ཡི་གེ་ལ་བྱང་ཆུབ་སེམས་ཀྱི་ལྷ་དང་སྒྲའི་ལྷ་གཉིས། ཕྱག་རྒྱ་ལ་འཁོར་ལོ་སོགས་གཟུགས་དབྱིབས་སུ་བྱས་པ་དང་ཆོས་འབྱུང་སྔོ་སྐྱས་མཚོན་པའི་སྟོང་པ་ཉིད་གཟུགས་དབྱིབས་མེད་པ་གཉིས། གཟུགས་ལ་ཡོངས་སུ་དག་པ་མཚན་མའི་སྤྲོས་པ་མཐའ་དག་ཉེ་བར་ཞི་བར་རྟོགས་པའི་ངོ་བོ་ཉིད་བདེ་གཤེགས་སྙིང་པོ་སོ་སོ་རང་རིག་གིས་མངོན་སུམ་མཐོང་བ་དང་། མ་དག་པ་རྣམ་པར་རྟོག་པས་ཁ་དོག་ཞལ་ཕྱག་སོགས་གཟུགས་སུ་བསྒོམ་པ་སྟེ། མདོར་ན་ཡི་གེ་ཕྱག་རྒྱ་སྐུ་གཟུགས་གསུམ་པོ་སྒྲ་དང་མཚན་མ་དང་གཟུགས་སུ་སྣང་བ་ནི་མཚན་བཅས་ཀྱི་ཕྱོགས་དང་། བྱང་ཆུབ་སེམས་ཀྱི་ཡི་གེ་སྟེ་སྒྲ་མེད་པ་དང་། མཚན་མའི་གཟུགས་མེད་པའི་ཕྱག་རྒྱ། ཡོངས་སུ་དག་པའི་ལྷ་མཚན་མ་མེད་པ་མི་རྟོག་པའི་ངོ་བོ་གསུམ་ནི་མཚན་མེད་ཡིན་པས་ཟུང་འཇུག་ཏུ་བསྟན་ནོ། །དེ་ལྟར་ཤེས་པར་བྱས་ནས་མཚན་བཅས་ཀྱི་རྣལ་འབྱོར་ལ། བདག་དང་གནས་དང་རྣལ་འབྱོར་སྲུང་བ་གསུམ་སྔོན་དུ་འགྲོ་བས་ཡི་གེ་དང་པོ་དོན་དམ་བྱང་ཆུབ་སེམས་སྟོང་པ་ཉིད་ཀྱི་ང ང་ལས་ཀུན་རྫོབ་ཏུ་དེའི་སྣང་ཆ་ཟླ་བའི་དཀྱིལ་འཁོར་དུ་སྒོམ་པ། ཡི་གེ་གཉིས་པ་དེའི་སྟེང་དུ་བཟླ་བྱའི་སྔགས་རང་སྒྲ་གྲགས་པར་བསམ་པ། གཞི་དང་པོ་དེ་ཐམས་ཅད་ཡོངས་སུ་དག་པའི་རང་བཞིན་བདག་ཉིད་ལྷར་བསྒོམ་ལ་སྔགས་རྒྱ་སོ གས་ཀྱིས་བྱིན་གྱིས་རླབས་པ། གཞི་གཉིས་པ་མེ་ལོང་ལ་གཟུགས་བརྙན་གྱི་ཚུལ་དུ་དེ་ལས་ཤར་བའི་གཟུགས་བརྙན་མདུན་དུ་བ སྒོམ་ལ། དེའི་ཐུགས་ཀར་ཟླ་བ་ལ་སྔགས་བལྟས་ཏེ་སྲོག་བསྡམ་ཞིང་རྩེ་གཅིག་པའི་སྦྱོར་བས་གསལ་སྣང་ཐོབ་ཀྱི་བར་དུ་སློབ་ཅིང་ཡིད་བཟླས་བྱེད་པ་སོགས་དང་། མཚན་མེད་ཀྱི་རྣལ་འབྱོར་ཕུང་པོ་ལ་སོགས་པའི་ཆོས་ཐམས་ཅད་ལ་མཐའ་བཞིས་དཔྱད་པས་སྐྱེ་མེད་དུ་རྟོགས་པ་འཇུག་པའི་སེམས། ད ེ་ཉིད་རྣམ་པར་མི་རྟོག་པའི་ངོ་བོར་མངོན་སུམ་དུ་རྟོགས་པ་གནས་པའི་སེམས། དེ་ལྟར་མ་རྟོགས་ཏེ་སྡུག་བསྔལ་བའི་སེམས་རྣམས་ལ་སྙིང་རྗེ་ཆེན་པོ་རྗེས་སུ་འཇུག་པ་ལྡང་བའི་སེམས་ཏེ། ངོ་བོ་བྱང་ཆུབ་ཀྱི་སེམས་ཅན དེ་ཉིད་རྣམ་པ་འཇུག་གནས་ལྡང་བའི་སེམས་གསུམ་དང་སྦྱར་ཏེ། རྣལ་འབྱོར་དུ་བྱ་བ་སོགས་དང་། ཚུལ་ཁྲིམས་ཡང་ཐུན་མོང་བ་མི་དགེ་བཅུའི་སྟེང་དུ་ཐུན་མིན་དམ་པའི་ཆོས་སྤོང་བ། བྱང་ཆུབ་ཀྱི་སེམས་སྤོང་བ། སེར་སྣས་ཆོས་ནོར་མི་སྦྱིན་པ། སེམས་ཅན་ལ་གནོད་པ་སྟེ་བཞི་བསྣན་པས། རྩ་ལྟུང་བཅུ་བཞིར་གསུངས་པས་མཚོན། ཁྱད་པར་ཅུང་ཟད་སྣང་ངོ་། །འབྲས་བུ་ནི། ཕྱི་ནང་གི་རྫས་ལ་བརྟེན་ནས་གནས་སྐབས་སུ་རལ་གྲི་ལ་སོགས་པའི་རིག་འཛིན་གྲུབ་ཅིང་རྟེན་དེ་ལ་བརྟེན་ནས་སྔགས་ཀྱི་སྤྱོད་པ་སྤྱད་པས་མི་ཚེ་ལྔ་ན། རིགས་བཞི་རྡོ་རྗེ་འཛིན་པའི་ས་ཐོབ་པར་འདོད་དེ། རིགས་བཞི་ནི། སྔར་གྱི་རིགས་གསུམ་གྱི་སྟེང་དུ་རིན་པོ་ཆེའི་རིགས་བསྣན་ནས་ལས་ཀྱི་རིགས་རིན་པོ་ཆེའི་རིགས་ལ་བསྡུས་པ་སྟེ། འགྲོ་བའི་བསམ་པ་རྫོགས་པར་བྱེད་པའི་སྒོ་ནས་རིན་པོ་ཆེའི་རིགས་ཡིན་ལ། ལས་སུ་བྱ་བའི་སྒོ་ནས་ལས་ཀྱི་རིགས་ཡིན་པའི་ཕྱིར་ལས་དང་བྱེད་པ་པོ་གཉིས་གཅིག་ཏུ་སྡུད་པའི་ཚུལ་ལོ། །དེའང་གལ་པོ་ལས། རིགས་བཞི་རྡོ་རྗེ་འཆང་སར་གནས། །ཞེས་དང་། ཀུན་བྱེད་ལས། གཉིས་སུ་མེད་ལ་མི་ཚེ་ལྔས་སྒྲིབ་གོལ། །ཞེས་སོ། །འདིའི་མི་ཚེའང་གོང་སྨོས་བཞིན་ཏེ། གཞན་དུ་དབང་བརྟུལ་རིང་མཐའ་བསྐལ་པ་བརྒྱད་དང་། རྣོན་པོ་བསྐལ་ཆེན་གསུམ་སོགས་གསུངས་པ་དང་མི་འགལ་ལོ། །གསུམ་པ་དབང་པོ་འབྲིང་གི་རབ་ལ་དགོངས་པ་ཡོ་གའི་ཐེག་པ་ལ་གསུམ། ངོ་བོོ། ངེས་ཚིག དབྱེ་བའོ། །ངོ་བོ་ནི། དོན་དམ་མཚན་མ་མེད་པའི་ཆོས་ཉིད་རྟོགས་པའི་ཡེ་ཤེས་ཀྱི་བྱིན་རླབས་ཀུན་རྫོབ་རྡོ་རྗེ་དབྱིངས་ཀྱི་ལྷར་བརྟགས་ཏེ་རྟོག་པ་བཟང་ངན་བླང་དོར་གྱི་རྩོལ་བས་འབྲས་བུ་སྒྲུབ་པར་འདོད་པ་སྟེ། ལམ་རིམ་ལས། ལྷུན་གྲུབ་མཉམ་པ་མ་མཐོང་བས། །ཆོས་ཀུན་རྣམ་དག་ཡེ་ཤེས་ཀྱི། །བྱིན་རླབས་རྡོ་རྗེ་དབྱིངས་སྤྲུལ་པ། །བླང་དོར་འབྱེད་པ་རྣལ་འབྱོར་ས། །ཞེས་སོ། །ངེས་ཚིག་ནི། ཡོ་གའི་སྒྲ་ལས་ནང་གི་རྣལ་འབྱོར་གཙོ་བོར་བྱེད་པའམ་སྟོན་པས་ན་རྣལ་འབྱོར་གྱི་རྒྱུད་ཅེས་བྱ་སྟེ། ལྟ་ཕྲེང་ལས། རྣལ་འབྱོར་གཙོ་བོར་བྱས་པས་འགྲུབ་པའོ། །ཞེས་སོ། །དབྱེ་བ་ལ་དྲུག་ལས། འཇུག་སྒོའི་དབང་ནི། རིག་པའི་དབང་ལྔའི་སྟེང་དུ་རྡོ་རྗེ་སློབ་དཔོན་གྱི་དབང་དྲུག་བསྐུར་ཏེ། ཡེ་ཤེས་ཐིག་ལེ་ལས། ཕྱིར་མི་ལྡོག་པ་བུམ་པའི་དབང་། །རྣལ་འབྱོར་རྒྱུད་དུ་གསལ་བར་བྱས། །དེ་ནི་སློབ་དཔོན་དབང་ཞེས་བྱ། །ཞེས་སོ། །དེ་ལ་རིག་དབང་ངམ་སློབ་མའི་དབང་ལྔ་ནི། རྡོ་རྗེ་དབྱིངས་ཀྱི་དཀྱིལ་འཁོར་དུ་ཞུགས་ཤིང་དམ་ཚིག་དང་སྡོམ་པ་བཟུང་། ཡེ་ཤེས་པ་དབབ་ཅིང་མེ་ཏོག་དོར་བས་རང་གི་ལྷ་ངེས་པར་བྱས་ནས། ལས་བུམ་གྱི་ཁྲུས་སྔོན་དུ་འགྲོ་བས་ལྷ་བུམ་རྣམས་ཀྱི་དབང་དང་། རིགས་སོ་སོའི་ཅོད་པཎ་དང་། དེའི་རྡོ་རྗེ་དང་། དེས་ཡུ་བ་བྱས་པའི་དྲིལ་བུ་དང་། རང་རིགས་ཀྱི་མིང་གདགས་པས་དབང་བསྐུར་བ་སྟེ་དེ་ལྔའོ། །སློབ་དཔོན་གྱི་དབང་དྲུག་ནི། ཕྱིར་མི་ལྡོག་པའི་དབང་དམ་ཚིག་གསུམ་བཟུང་བ། གསང་བའི་དབང་། རྗེས་གནང་། ལུང་བསྟན། དབུགས་དབྱུང་། གཟེངས་བསྟོད་རྣམས་ཏེ། བསྡོམས་པས་དབང་བསྐུར་བཅུ་གཅིག་གོ །འདིར་གསང་བའི་དབང་ཡང་བླ་མེད་དང་མི་མཚུངས་ཏེ། དཀྱིལ་འཁོར་དུ་གསང་བའི་འཇུག་པས་ཞུགས་ཤིང་མཐོང་བ་ལ་དཀྱིལ་འཁོར་དང་། ལྷའི་དེ་ཁོ་ན་ཉིད་དང་། དཀྱིལ་འཁོར་གྱི་དེ་ཉིད་བཅུ་དང་ལས་ཀྱི་རིམ་པ་བསྟན་པར་བྱ་བ་ལ་གསང་དབང་དུ་བཏགས་པ་དང་། རྣལ་འབྱོར་རྒྱུད་ཁ་ཅིག་ཏུ་ཤེས་རབ་ཡེ་ཤེས་ཀྱི་དབང་བསྐུར་བ་ཞེས་གསུངས་པའང་སྔགས་སྦྱིན་ནས་ཕྱག་རྒྱ་བཞི་ལ་སློབ་ཏུ་གཞུག་པ་ལ་དེར་བཏགས་པས་མིང་ཙམ་ཁོ་ནར་ཟད་དོ། །བྱ་བའི་འཇུག་སྒོ་ནི། མཚན་བཅས་དང་མཚན་མེད་ཀྱི་ཏིང་ངེ་འཛིན་གྱི་སྒོ་ནས་འཇུག་སྟེ། ཀུན་བྱེད་ལས། ཡོ་ག་སྟུག་པོ་བཀོད་འདོད་པ། །མཚན་མ་ཡོད་མེད་སྒོར་ཞུགས་ནས། །ཞེས་སོ། །ལྟ་བ་ནི། བདེན་པ་གཉིས་ཏེ། དོན་དམ་བདེན་པ་ནི་ཆོས་ཐམས་ཅད་སྤྲོས་པའི་མཚན་མ་དང་བྲལ་བའི་རང་བཞིན་འོད་གསལ་བའི་སྟོང་པ་ཉིད་དེ། སཾ་གྲ་ཧ་ལས། ཆོས་རྣམས་རང་བཞིན་འོད་གསལ་བས། །ངོ་བོ་ཉིད་ཀྱིས་གདོད་ནས་དག །ཅེས་སོ། །ཀུན་རྫོབ་ལ་གཉིས་ཀྱི་ལོག་པའི་ཀུན་རྫོབ་སྔར་དང་འདྲ། ཡང་དག་ཀུན་རྫོབ་ནི། ཅིར་སྣང་ཐམས་ཅད་ཆོས་ཉིད་རྟོགས་པའི་ཡེ་ཤེས་ཀྱི་བྱིན་རླབས་རྡོ་རྗེ་དབྱིངས་ཀྱི་དཀྱིལ་འཁོར་དུ་སྣང་བའི་ཕྱིར། སྐྱེ་བོས་སྣང་བ་རང་རྒྱུད་དུ་བརྟག་པ་འདི་མེད་པར་འདོད་དོ། །དེ་ལྟར་ཡང་། གལ་པོ་ལས། ཡོ་གའི་ཐེག་པར་གནས་འདོད་པས། །འོག་མིན་རྡོ་རྗེ་དབྱིངས་སུ་ལྟ། །ཞེས་དང་ལྟ་རིམ་ལས། ཡོ་ག་དོན་དམ་རྣམ་དག་པའི། །ཆོས་ཀྱི་དབྱིངས་ཀྱི་ཡེ་ཤེས་སུ། །རྟོགས་པའི་བྱིན་རླབས་ལྷར་སྣང་བ། །དེ་ཕྱིར་སྐྱེ་བོ་ལྟར་སྣང་འཁྲུལ། །ཞེས་དང་། གཡུ་ཐང་ལས། །རང་གིས་དངོས་མཐོང་མཚན་མ་གཉིས། །དབྱེར་མེད་དབྱིངས་དང་ཡེ་ཤེས་ལས། །བྱིན་རླབས་རྡོ་རྗེ་དབྱིངས་ཀྱི་ལྷ། །ཤར་ལྟ་གྲོགས་པོའི་ཚུལ་དུ་ལྟ། །ཞེས་སོ། །དེ་ཡང་དོན་དམ་མཉམ་པ་ཉིད་ལ་བྱ་རྒྱུད་པ་ལས་ངེས་པ་ཇེ་བཟང་དུ་སོང་བའི་གནད་ཀྱིས་བདག་དང་ལྷ་ཡང་མཉམ་པ་སྤུན་གྲོགས་ཀྱི་ཚུལ་ཏེ། རྟེན་འབྲེལ་གྱི་སྣང་ཆ་མ་འགགས་པས་ཇི་ལྟར་དམིགས་པ་བཞིན་དུ་གནས་སྐབས་དང་མཐར་ཐུག་གི་དོན་ལྷ་ལ་བརྟེན་ནས་གྲུབ་པ་དང་། བདེན་གཉིས་ཟབ་མོའི་ཚུལ་ལ་ཡིད་ཆེས་ཀྱི་ལྟ་བ་དང་ལྡན་པ་སྟེ། འདིར་བཤད་པ་ནི་སྤྱོད་རྒྱུད་དང་ཐུན་མོང་བ་ཡོ་ག་ཙམ་པོ་པའི་ལུགས་ཡིན་ལ། ཡོ་ག་ཁྱད་པར་བའི་དབང་དུ་བྱས་ན། མཉམ་ཉིད་ཀྱི་ལྟ་བ་བཤད་མ་ཐག་པ་ལས་ཀྱང་ཁྱད་པར་དུ་འཕགས་པའི་དབང་གིས་བདག་དང་ལྷ་དོན་ལ་མཉམ་པར་མཐོང་བའི་ངེས་ཤེས་ཀྱིས་ཀུན་རྫོབ་ཏུ་ཡང་ཆུ་ལ་ཆུ་བཞག་པ་བཞིན་མཉམ་པར་བྱས་ཏེ་བསྒོམས་ན། ཆོས་ཐམས་ཅད་རང་སེམས་ཀྱི་སྣང་བ་ཙམ་ཡིན་པས་ཏིང་ངེ་འཛིན་གྱིས་དབང་བསྒྱུར་ན་ཅི་ལྟར་དམིགས་པའི་ལྷར་མངོན་དུ་གྲུབ་པའི་ཕྱིར། ལྷའི་སྐུ་གསུང་ཐུགས་དང་ཕྲིན་ལས་ཀྱི་བདག་ཉིད་ཕྱག་རྒྱ་བཞི་ཡི་ངོ་བོར་འབད་པས་བསྒྲུབས་པས་དེ་ཡི་ངོ་བོར་འགྲུབ་པའི་ངེས་པ་ཁྱད་པར་ཅན་གྱི་ལྟ་བ་སྟེ་སྔ་མ་ནི་སྒྱུ་འཕྲུལ་ཟུར་ལུགས་པ་རྣམས་བཞེད་ལ། ཕྱི་མ་ནི་ཀུན་མཁྱེན་ཆོས་ཀྱི་རྒྱལ་པོས་བཞེད་དོ། །ཚུལ་ཁྲིམས་ནི། རྩེ་མོར་གསུངས་པའི་རིགས་ལྔ་སྤྱིའི་དམ་ཚིག བྱང་ཆུབ་ཀྱི་སེམས་དང་པོར་བསྐྱེད་ཅིང་། དེའི་རྗེས་སུ་ཚུལ་ཁྲིམས་གསུམ་གྱི་བསླབ་པ་ལ་ནན་ཏན་དུ་བྱ་བ་དང་། བྱེ་བྲག་གི་དམ་ཚིག སྣང་མཛད་ཀྱི་དམ་ཚིག་གསུམ། མི་བསྐྱོད་རིན་འབྱུང་གཉིས་ལ་བཞི་བཞི། མཐའ་ཡས་ཀྱི་གཅིག དོན་གྲུབ་ཀྱི་གཉིས་ཏེ་བཅུ་བཞིར་གསུངས་པ་དང་། ཡང་འབྱེད་འཕྲུལ་སྡེར། སྔར་སྨོས་པའི་བྱ་རྒྱུད་ཀྱི་དམ་ཚིག་བཅུ་གཅིག་པོའི་སྟེང་དུ། ལུང་གཅིག་གི་ཆུ་ལ་མི་བཏུང་བ་དང་། ཉམས་པ་དང་ཁ་མི་བསྲེ་བ་གཉིས་བསྣན་པས་བཅུ་གསུམ་དུ་བཤད་དེ། དེ་དག་ཞིབ་པར་ཐེག་དགུ་ལས། ཚུལ་ཁྲིམས་རིགས་ལྔ་སྤྱིའི་དམ་ཚིག །བྱང་ཆུབ་སེམས་མཆོག་དང་པོར་བསྐྱེད། །དེ་རྗེས་ཚུལ་ཁྲིམས་གསུམ་ལ་བསླབ། །བྱེ་བྲག་སྣང་མཛད་དམ་ཚིག་གསུམ། །སེམས་བསྐྱེེད་ཚུལ་ཁྲིམས་སྐྱབས་འགྲོའོ། །མི་བསྐྱོད་རྡོར་དྲིལ་ཕྱག་རྒྱ་དང་། །སློབ་དཔོན་བཟུང་བཞི་རིན་ཆེན་ལ། །ནོར་ཆོས་མི་འཇིགས་བྱམས་སྦྱིན་བཞི། །པདྨར་ཐེག་པ་ཀུན་འཛིན་གཅིག །ལས་རིགས་ཀུན་འཛིན་མཆོད་བརྩོན་གཉིས། །གཞན་ཡང་བྱ་རྒྱུད་དམ་ཚིག་ལ། ལུང་གཅིག་ཆུ་ལ་མི་བཏུང་ཞིང་། །ཉམས་དང་ཁ་མི་བསྲེ་བ་དང་། །ཡི་དམ་ལྷ་དང་སློབ་དཔོན་མཆེད། །རང་སེམས་མ་ཁྲེལ་སོགས་ཀྱང་བཤད། །ཅེས་པ་ལྟར་རོ། །སྒོམ་པ་ལ་མཚན་བཅས་མཚན་མེད་གཉིས་ལས། དང་པོ་འཇུག་ཏུ་རུང་བའི་གང་ཟག ཐེག་ཆེན་གྱི་འཇུག་སྒོ་སྨོན་འཇུག་གི་བྱང་ཆུབ་ཀྱི་སེམས་གཉིས་ཚུལ་བཞིན་དུ་བསྐྱེད་པ། རྒྱུད་ལ་ཡིད་ཆེས་པས་ཐེ་ཚོམ་དང་ཡིད་གཉིས་མེད་པ། དམ་ཚིག་རྣམས་གཞུང་བཞིན་དུ་སྲུང་ནུས་པས་བཀའ་བཞིན་དུ་སྒྲུབ་པ། ལམ་དང་ལམ་གྱི་སྟོན་པ་ལྷ་དང་བླ་མ་སོགས་ལ་དད་པ་དང་ལྡན་པ་སྟེ། ཡོན་ཏན་བཞི་དང་ལྡན་པ་དེས། ཐོབ་བྱའི་འབྲས་བུ་སྒྲིབ་པ་ཐམས་ཅད་དང་བྲལ་ཞིང་ཡོན་ཏན་མཐར་ཐུག་པའི་སངས་རྒྱས་རྣམ་པར་སྣང་མཛད་ཀྱི་ལོངས་སྐུ་ཆེན་པོ་སྐུ་བཞིའི་བདག་ཉིད་ཅན་དེ་ལ་དམིགས་ནས། དེ་འཐོབ་བྱེད་ཉེར་ལེན་གྱི་རྒྱུ་ཐོག་མ་དང་ཐ་མ་མེད་པའི་བྱང་ཆུབ་ཀྱི་སེམས་ཀུན་ཏུ་བཟང་པོ། རང་བཞིན་གྱིས་འོད་གསལ་ཞིང་སོ་སོ་རང་གིས་རིག་པའི་མཚན་ཉིད་ཅན། ལྷ་དང་སྔགས་དང་ཕྱག་རྒྱ་ཐམས་ཅད་འབྱུང་བའི་གཞིར་གྱུར་པ། རང་སེམས་གདོད་མ་ནས་རྣམ་པར་དག་པའི་དེ་ཁོ་ན་ཉིད་རྒྱུའི་རྒྱུད་ཅེས་བྱ་བ་དེ་ཉིད་ཡིན་ལ། རྒྱུ་དེ་ལས་འབྲས་བུ་མངོན་དུ་བྱ་བའི་ཐབས་སུ་ཕྱག་རྒྱ་བཞི་དང་འབྲེལ་བར་ལྷའི་རྣལ་འབྱོར་བསྒོམ་པ་འཁོར་དང་བཅས་པ་སྟེ། མངོན་བྱང་ལྔ་དང་ཆོ་འཕྲུལ་བཞིའི་སྒོ་ནས་ལྷ་དང་ལྷ་མོའི་རྣལ་འབྱོར་ཕྱག་རྒྱ་བཞི་ལྡན་དུ་བསྒོམ་པ་སྟེ། ལྟ་ཕྲེང་ལས། ཕྱི་ཡོ་བྱད་ལ་གཙོ་བོར་མི་འཛིན་པར་དོན་དམ་པར་སྐྱེ་འགག་མེད་པའི་ལྷ་དང་ལྷ་མོ་དང་། དེ་དང་འདྲ་བའི་རྒྱུད་ཡོངས་སུ་དག་པའི་ཏིང་ངེ་འཛིན་གྱིས་འཕགས་པའི་གཟུགས་ཀྱི་སྐུ་ཕྱག་རྒྱ་བཞི་དང་ལྡན་པར་བསྒོམ་པའི་རྣལ་འབྱོར་གཙོ་བོར་བྱས་པས་འགྲུབ་པའོ། །ཞེས་སོ། །དེ་ལ་མངོན་བྱང་ལྔ་ནི། སྲིད་པ་བསྐྱེེད་པའི་རིམ་པ་ཀུན་ནས་ཉོན་མོངས་པའི་ཕྱོགས་དང་བསྟུན་ནས་བསྒོམ་པ་རྒྱུད་སྡེ་འོག་མ་གསུམ་གྱི་ལུགས་མ་ཡིན་ཀྱང་ཡར་བལྟས་རྣམ་བྱང་གི་འདྲ་འབག་དང་བསྟུན་ནས་སྲིད་པ་ཐ་མའི་བྱང་སེམས་འཚང་རྒྱ་བའི་ཚུལ་ལྟར་སྒྲུབ་པ་ལ། སྐྱབས་སེམས་སོགས་སྔོན་དུ་སོང་ནས་སྟོང་པའི་ངང་ལས། ཞིང་དང་གནས་ཕུན་སུམ་ཚོགས་པ་གྲུབ་པའི་རྒྱུ་གདན་པདྨ་ལས་མངོན་པར་བྱང་ཆུབ་པ། ཆོས་ཕུན་ཚོགས་འབྱུང་བའི་རྒྱུ་གསུང་ཡིག་འབྲུ་ལས་མངོན་པར་བྱང་ཆུབ་པ། དུས་ཕུན་ཚོགས་རྟག་པ་བསམ་མི་ཁྱབ་པར་གནས་པའི་རྒྱུ་ཐུགས་ཕྱག་མཚན་ལས་མངོན་པར་བྱང་ཆུབ་པ། འཁོར་དང་སྟོན་པ་ཕུན་སུམ་ཚོགས་པའི་རྒྱུ་སྐུ་ཡོངས་རྫོགས་དཀྱིལ་འཁོར་གྱི་འཁོར་ལོ་དང་བཅས་པ་ལས་མངོན་པར་བྱང་ཆུབ་པ། སྐུ་ཡི་ངོ་བོའམ་ཡེ་ཤེས་ཕུན་སུམ་ཚོགས་པའི་རྒྱུ་ལྷ་ཡེ་ཤེས་སེམས་དཔའ་ལས་མངོན་པར་བྱང་ཆུབ་པ་སྟེ་མངོན་བྱང་ལྔའི་ཚུལ་གྱིས་བསྐྱེད་ཅིང་། སྐུ་ཡི་རྣམ་པ་ཕྱག་རྒྱ་ཆེན་པོ། གསུང་གི་རྣམ་པ་ཆོས་ཀྱི་ཕྱག་རྒྱ། ཐུགས་ཀྱི་རྣམ་པ་དམ་ཚིག་གི་ཕྱག་རྒྱ། འོད་ཟེར་འཕྲོ་འདུ་ལ་སོགས་པས་ལས་སྒྲུབ་པ་ལས་ཀྱི་ཕྱག་རྒྱ་དང་བཞིས་རང་གི་སྒོ་གསུམ་བྱེད་ལས་དང་བཅས་པ་ལྷའི་སྐུ་གསུང་ཐུགས་ཕྲིན་ལས་ཀྱི་ངོ་བོར་རྒྱས་བཏབ་སྟེ་བསྒོམ་པའི་རིམ་པ་ལའང་དབང་རྣོན་རྣམས་སྨོས་མ་ཐག་པ་ལྟར་སྔོན་བྱུང་སྟོན་པ་སངས་རྒྱས་ནས་དཀྱིལ་འཁོར་སྤྲུལ་བཤད་དང་འཕྲིན་ལས་མངོན་པར་འདུ་མཛད་ཚུལ་ལྟར་རྗེས་སུ་འཇུག་པ་ལ། གཙོ་བསྐྱེད་དང་པོའི་སྦྱོར་བ། དཀྱིལ་འཁོར་རྒྱལ་མཆོག་རྫོགས་པར་བསྐྱེད་པ། ལས་རྒྱལ་མཆོག་ཡེ་ཤེས་གཞུག་པ་སོགས་ལས་རིམ་བཞིན་ཏེ་ཏིང་ངེ་འཛིན་གསུམ་ལ་བརྟེན་ནས་ཉམས་སུ་ལེན་པ་དང་། དབང་བརྟུལ་རྣམས་བདག་ཉིད་རང་རིགས་ཀྱི་ལྷ་དམ་ཚིག་པར་བསྒོམ་པ་རྣལ་འབྱོར། དེ་ལ་ཡེ་ཤེས་པ་བཅུག་སྟེ་རོ་གཅིག་ཏུ་བྱ་བ་རྗེས་སུ་རྣལ་འབྱོར། བརྟན་གཡོ་ཐམས་ཅད་རང་རིགས་ཀྱི་ལྷའི་རྣལ་འབྱོར་དུ་བྱ་བ་ཐམས་ཅད་རྣལ་འབྱོར། དེ་གསུམ་སྔོན་དུ་སོང་བ་ལས་སེམས་རྩེ་གཅིག་པའི་ཏིང་ངེ་འཛིན་མངོན་དུ་གྱུར་པ་ཤིན་ཏུ་རྣལ་འབྱོར་ཏེ་རྣལ་འབྱོར་བཞི་ལ་བརྟེན་ནས་ཉམས་སུ་ལེན་པ་སྟེ། དེ་གཉིས་གང་ལྟར་རུང་གཙོ་བོར་ཏིང་ངེ་འཛིན་ལ་བརྟེན་ནས་འདས་པའི་དངོས་གྲུབ་དང་། བཟླས་བརྗོད་ལ་བརྟེན་ནས་དངོས་གྲུབ་གཉིས་ཀ་སྒྲུབ་པའི་ཚུལ་སོགས་ཞིབ་པར་གཞན་དུ་ཤེས་ལ། འདིར་ཟུར་ལུགས་སྙིང་པོའི་སྤྱི་དོན་ལྟར་ན། ཧེ་རུ་ཀ་གལ་པོ་ལས། མི་རྟོག་ཟླ་བ་གསུང་རྡོ་རྗེ། །སྤྲོ་བསྡུས་བསྒོམ་པའི་སྐུ་རུ་གསལ། །ཏིང་འཛིན་བྱིན་རློབ་དབང་བསྐུར་མཆོད། །མངོན་བྱང་ལྔ་དང་ཆོ་འཕྲུལ་བཞི། །བསྒོམ་ཞིང་མཆོད་པ་བྱ་བ་ཡང་། །བསོད་ནམས་ལྡན་ཕྱིར་བྱ་བ་ཡིན། །ཞེས་གསུངས་པ་བཞིན། མངོན་བྱང་ལྔ་ནི། སྟོང་པ་ཉིད་དང་། ཟླ་གདན་དང་། གསུང་ཡིག་འབྲུ་དང་། ཐུགས་ཕྱག་མཚན་དང་། སྐུ་ཡོངས་སུ་རྫོགས་པ་ལས་བྱང་ཆུབ་པ་སྟེ། དེའི་དོན་ཡང་གལ་པོའི་མཆན་འགྲེལ་ལས། བསྒོམ་པ་ནི་མངོན་བྱང་ལྔ་དང་ཆོ་འཕྲུལ་བཞི་བསྒོམ་པའོ། །དང་པོ་རྣམ་པར་མི་རྟོག་པར་སྒོམ་པ་ནི་གཟུགས་སྐུ་ལ་མངོན་པར་བྱང་ཆུབ་པའོ། །ཟླ་བ་ཚེས་གཅིག་པ་ལྟ་བུའི་རང་སེམས་རིག་པ་མངོན་པར་བྱང་ཆུབ་པ་དང་། ཟླ་བ་ཉ་བ་ལྟ་བུ་སེམས་བསྐྱེད་མངོན་པར་བྱང་ཆུབ་པ་གཉིས་ནི་ཟླ་བ་ལ་མངོན་པར་བྱང་ཆུབ་པའོ། །ཟླ་བའི་སྟེང་དུ་རྡོ་རྗེ་རྩེ་ལྔ་པ་བསྒོམ་པ་ནི་ཆོས་སྐུ་ལ་མངོན་པར་བྱང་ཆུབ་པའོ། །འོད་ཟེར་སྤྲོ་བསྡུས་སྒྲིབ་སྦྱོང་དངོས་གྲུབ་བསྐུལ་བ་ནི་བརྟན་པར་བྱ་བའི་མངོན་བྱང་ངོ་། །དེ་ལྟར་སྐུར་གྱུར་པ་ནི་ཕྱག་རྒྱ་ལ་མངོན་པར་བྱང་ཆུབ་པའོ། །ཞེས་དང་། གུ་རུ་རིན་པོ་ཆེས་མཛད་པའི་དགོངས་འདུས་རྩ་རྒྱུད་པད་སྡོང་བརྩེགས་པའི་འགྲེལ་པ་ལས། མངོན་པར་བྱང་ཆུབ་པ་ལྔ་ཡི་སྒོ་ནས་འཇུག་པ་སྟེ། དེ་ཡང་རྩ་བ་གཞིར་ཤེས་ཀྱི་ངོ་བོ་སྟོང་པ་ཉིད་དེ་སྟོང་པ་ཉིད་ལས་བྱང་ཆུབ་པ་དང་། དེའི་ངང་ལས་ཉི་ཟླ་ལ་སོགས་པ་གསལ་བ་ནི་གདན་ཉི་ཟླ་ལས་བྱང་ཆུབ་པ་དང་། གདན་གྱི་སྟེང་དུ་ལྷ་ཡི་ས་བོན་གསལ་བ་ནི་གསུང་ཡིག་འབྲུ་ལས་བྱང་ཆུབ་པ་དང་། ས་བོན་ཡོངས་སུ་གྱུར་པ་ལས་རྡོ་རྗེའམ་པདྨ་སོགས་སྒོམ་པ་ནི་ཐུགས་ཕྱག་མཚན་ལས་བྱང་ཆུབ་པ་དང་། ཕྱག་མཚན་དེ་ཉིད་སྤྲོ་བསྡུ་ལས་བྱུང་བའི་ལྷ་རང་གི་ངོ་བོ་ཞལ་ཕྱག་སྐུ་མདོག་ཕྱག་མཚན་རྒྱན་ཆ་ལུགས་ཡོངས་རྫོགས་སུ་གསལ་བ་གཟུགས་སྣང་ལས་བྱང་ཆུབ་པའོ། །ཞེས་གསུངས་པ་བཞིན་ནོ། །ཆོ་འཕྲུལ་བཞི་ནི། ཏིང་ངེ་འཛིན་དང་། བྱིན་གྱིས་རློབ་པ་དང་། དབང་བསྐུར་བ་དང་། མཆོད་པའི་ཆོ་འཕྲུལ་ལོ། །དེ་ལ་ཏིང་ངེ་འཛིན་གྱི་ཆོ་འཕྲུལ་ནི། དབུས་སུ་རྣམ་སྣང་། ཤར་དུ་མི་བསྐྱོད་པ། ལྷོར་རིན་འབྱུང་། ནུབ་ཏུ་སྣང་མཐའ། བྱང་དུ་དོན་གྲུབ་རྣམས་ལ་རང་རང་གི་རིགས་ཀྱི་སེམས་དཔའ་བཞི་བཞིས་བསྐོར་བ་སྟེ་གཙོ་འཁོར་ཡོངས་རྫོགས་བསྒོམ་པའོ། །བྱིན་གྱིས་བརླབས་པའི་ཆོ་འཕྲུལ་ནི། བསྒོམ་པའི་ལྷ་དེ་དག་རང་རང་གི་རིགས་ཀྱི་བྱིན་ཅན་དུ་བྱིན་གྱིས་བརླབས་པའོ། །དབང་བསྐུར་བའི་ཆོ་འཕྲུལ་ནི། རང་རིགས་ཀྱི་དབང་གང་ཡིན་གྱིས་སྐུ་དང་ཡེ་ཤེས་དང་གཟུངས་དང་ཏིང་ངེ་འཛིན་དང་ལྡན་པར་དབང་བསྐུར་བའོ། །མཆོད་པའི་ཆོ་འཕྲུལ་ནི། དེ་དག་ལ་ཕྱག་དང་མཆོད་པ་བསྟོད་པ་བྱ་བ་རྣམས་སོ། །ཕྱག་རྒྱ་བཞི་ནི། ལུས་ངག་ཡིད་དང་བྱ་བ་བཞི་ལ་རིམ་པར་སྐུ་ཕྱག་ཆེན། གསུང་ཆོས་རྒྱ། ཐུགས་དམ་རྒྱ། ཕྲིན་ལས་ལས་རྒྱ་རྣམས་ཀྱིས་རྒྱས་བཏབ་ནས་བསྒོམ་པའི་ཕྱིར་ཕྱག་རྒྱ་སྟེ། ཀུན་གཞིའི་རྣམ་པར་ཤེས་པའི་འཁྲུལ་པ་གློ་བུར་པ་བསལ་ནས། རང་བཞིན་མེ་ལོང་ལྟ་བུའི་ཡེ་ཤེས་དེ་མངོན་དུ་བྱ་བ་ལ་སྐུ་ཕྱག་རྒྱ་ཆེན་པོའི་རྣལ་འབྱོར། ཉོན་ཡིད་ཀྱི་གློ་བུར་འཁྲུལ་པ་བསལ་ནས་རང་བཞིན་མཉམ་པ་ཉིད་ཀྱི་ཡེ་ཤེས་དེ་མངོན་དུ་བྱ་བ་ལ་ཐུགས་དམ་ཚིག་གི་ཕྱག་རྒྱའི་རྣལ་འབྱོར། ཡིད་ཀྱི་ཤེས་པའི་གློ་བུར་གྱི་འཁྲུལ་པ་བསལ་ནས་རང་བཞིན་སོ་སོར་རྟོག་པའི་ཡེ་ཤེས་དེ་མངོན་དུ་བྱ་བ་གསུང་ཆོས་ཀྱི་ཕྱག་རྒྱའི་རྣལ་འབྱོར། སྒོ་ལྔའི་རྣམ་ཤེས་འཁྲུལ་པ་བསལ་ནས་རང་བཞིན་བྱ་བ་གྲུབ་པའི་ཡེ་ཤེས་དེ་མ ངོན་དུ་བྱ་བ་ཕྲིན་ལས་ལས་ཀྱི་ཕྱག་རྒྱའི་རྣལ་འབྱོར། ཆོས་ཀྱི་དབྱི ངས་ཀྱི་ཡེ་ཤེས་ནི་དེ་ཐམས་ཅད་ཀྱི་རང་བཞིན་དུ་གནས་པ་སྟེ། མདོར་ན་འཁྲུལ་པ་སྦྱོང་བྱེད་ཀྱི་ཐབས་ཕྱག་རྒྱ་བཞི་དང་འབྲེལ་བའི་ལྷའི་རྣལ་འབྱོར་བ སྒོམ་པ་འཁོར་དང་བཅས་པ་སྟེ། དེ་ཡང་དམ་ཚིག་པ་བསྐྱེད་ལ། ཡེ་ཤེས་པ་སྤྱན་དྲངས་ནས་སྤུན་ནམ་གྲོགས་ཀྱི་ཚུལ་དུ་བཟང་ངན་མེད་པར་བལྟས་ཏེ། མཆོད་བ སྟོད་བཟླས་པ་སོགས་བྱ་བའོ། །དེ་ལྟར་ཡང་རང་ཤར་ལས། ལྷ་དང་རྣལ་འབྱོར་བདག་ཉིད་ཀྱང་། །སྤུན་ནམ་གྲོགས་པོའི་ཚུལ་དུ་འདོད། །ཅེས་སོ། །འདི་ནི་ཡོ་ག་ཙམ་པོ་བའི་ལུགས་ཡིན་ལ། ཡོ་ག་ཁྱད་པར་བའི་དབང་དུ་བྱས་ན་བདག་ཉིད་ལྷ་ཡི་རྣལ་འབྱོར་དུ་བསྒོམས་པ་ལ་ཡེ་ཤེས་པ་དགུག་བསྟིམ་གཉིས་མེ ད་དུ་བྱས་རྗེས་བཟླས་པ་སོགས་བྱས་ཏེ། སྐབས་དེར་དངོས་གྲུབ་ནོད་པར་བྱ་བ་དང་། མཐར་གཤེགས་སུ་གསོལ་བ་ཡིན་ནོ། །གཉིས་པ་མཚན་མེད་ནི། དོན་དམ་མཚན་མ་མེད་པའི་ངོ་བོ་ཉིད་དང་དེའི་བྱིན་རླབས་ལྷར་སྣང་ཡེ་ཤེས་ཀྱི་སྣང་ཆ་གཉིས་གཉིས་སུ་མེད་པའི་ངང་ལ་མཉམ་པར་འཇོག་པ་སྟེ། རྡོ་རྗེ་འབྱུང་བ་ལས། གཉིས་སུ་མེད་པའི་ཆོས་དབྱིངས་དང་། །བླ་མེད་དངོས་གྲུབ་དམ་པ་བླང་། །ཞེས་གསུངས་པ་བཞིན་ནོ། །སྤྱོད་པ་ནི། གཙང་སྦྲ་སོགས་ཕྱིའི་ཀུན་སྤྱོད་ཀྱི་གྲོགས་དང་ལྡན་པའི་སྒོ་ནས་གཙོ་བོ་ལྷའི་རྣལ་འབྱོར་ལ་གནས་པས་རང་གཞན་གྱི་དོན་སྤྱོད་པ་སྟེ། རྩེ་མོ་ལས། ལྷ་ཡི་ཏིང་འཛིན་ལ་གནས་ཏེ། །སེམས་ཅན་ཐམས་ཅད་ཡོངས་མི་གཏོང་། །རྟག་ཏུ་ས ངས་རྒྱས་ཡིད་ལ་བྱེད། །རྟག་ཏུ་སངས་རྒྱས་མཆོད་པ་མཆོག །ཅེས་སོ། །འབྲས་བུ་ནི། འཇིག་རྟེན་པའི་དངོས་གྲུབ་མཁའ་སྤྱོད་ཀྱི་རིག་འཛིན་དང་། འཇིག་རྟེན་ལས་འདས་པའི་དངོས་གྲུབ་མི་ཚེ་གསུམ་ན་སྔར་གྱི་རིགས་བཞིའི་སྟེང་དུ་ལས་རིགས་བསྣན་པས་རིགས་ལྔ་སྟུག་པོ་བཀོད་པའི་ས་ལ་སྐུ་གསུམ་ཡེ་ཤེས་ལྔའི་བདག་ཉིང་དུ་འཚང་རྒྱ་བར་འདོད་དེ། ཀུན་བྱེད་ལས། ཡོ་ག་སྟུག་པོ་བཀོད་འདོད་པས། །མི་ཚེ་གསུམ་ན་གྲོལ་བར་འདོད། །ཅེས་དང་། ཐུགས་ཀྱི་སྒོ་ལྕགས་ལས། གཟུང་འཛིན་བག་ཆགས་ལྔ་བྱང་ནས། །ཡེ་ཤེས་ལྔ་ཡི་རྩལ་དག་གིས། །སྟུག་པོ་བཀོད་པའི་ས་ནོན་ནས། །རིགས་ལྔ་འདུས་པའི་འབྲས་བུ་ཐོབ། །སྐྱེ་མེད་ཆོས་སྐུ་དག་པ་ནི། །སྐྱེ་མེད་སྒོ་ནས་འགྲོ་དོན་མཛད། །ཕྱག་རྒྱ་རིགས་ལྔ་ལོངས་སྤྱོད་རྫོགས། །བྱང་ཆུབ་སེམས་དཔའི་འགྲོ་དོན་རྫོགས། །སྤྲུལ་པ་བྱེ་བ་ས་ཡ་ཡིས། །རིགས་དྲུག་ངོ་བོ་ཅིར་ཡང་སྟོན། །ཞེས་སོ། །དེ་ཡང་སྤྱིར་ཡོ་གའི་རྒྱུད་གཞུང་གཞན་རྣམས་ནས་དབང་པོ་རྣོ་རྟུལ་གྱི་ཁྱད་པར་གྱི་ས་ལམ་བགྲོད་པའི་ཡུན་ལ་མི་ཚེ་མང་ཉུང་གི་ཁྱད་པར་འགའ་ཞིག་གསུངས་ཀྱང་དོན་ལ་སྔ་མ་རྣམས་ལ་ལྟོས་ནས་དུས་ཤིན་ཏུ་མྱུར་བར་བགྲོད་པ་ཡིན་ལ། དེའང་དབང་པོ་རྣོ་བརྟུལ་གང་ཡིན་ཀྱང་ས་བཅུ་པར་འོད་ཟེར་ཆེན་པོའི་དབང་བསྐུར་བ་ཐོབ་ནས་བསམ་གཏན་བཞི་པའི་རབ་མཐའི་ཏིང་ངེ་འཛིན་སྒྲུབ། དེ་ཐོབ་པའི་རྟེན་དེ་ལ་ཡིད་ཀྱི་རང་བཞིན་གྱི་ལུས་ཅན། སྲིད་པ་ཐ་མ་པའི་བྱང་ཆུས་སེམས་དཔའ། བྱ་བ་ཐམས་ཅད་བཞེད་པ་ཙམ་ལ་རགས་ལས་པར་འགྲུབ་པས་བྱང་སེམས་དོན་ཐམས་ཅད་གྲུབ་པ་ཞེས་བྱའོ། །དོན་གྲུབ་ཀྱི་རྟེན་དེས་འོག་མིན་སྟུག་པོ་བཀོད་པའི་ཞིང་ཁམས་སུ་བྱང་ཆུབ་ཀྱི་སྙིང་པོར་བཞུགས་ཏེ། བླ་ན་མེད་པའི་བྱང་ཆུབ་མཆོག་ཏུ་སེམས་བསྐྱེད་པ་མངོན་དུ་བྱས་པའི་མཐུ་ལས་མི་གཡོ་བའི་ཏིང་ངེ་འཛིན་ལ་མཉམ་པར་འཇོགདེའི་ཚེ་ན་ཕྱོགས་བཅུའི་དེ་བཞིན་གཤེགས་པ་ཐམས་ཅད་ཀྱིས་ཏིང་ངེ་འཛིན་ལས་བསླངས་ཏེ། མངོན་པར་བྱང་ཆུབ་པ་ལྔའི་གདམས་ངག་བསྟན། དེས་དེ་བསྒོམས་པས་ཡེ་ཤེས་ལྔའི་ངོ་བོར་མངོན་པར་རྫོགས་པར་འཚང་རྒྱ་བར་འགྱུར་རོ། །སངས་རྒྱས་དེ་ཡང་སྐུ་གསུམ་གྱི་མཚན་ཉིད་ཅན་ཏེ། ཡེ་ཤེས་བཞི་ཆོས་དབྱིངས་ཡེ་ཤེས་ཀྱི་ངོ་བོར་རོ་གཅིག་པ་ཆོས་སྐུ། འོག་མིན་ཆེན་པོར་ངེས་པ་ལྔ་ལྡན་གྱི་སྐུར་སྣང་བ་ལོངས་སྐུ་ཆེན་པོ། རི་རབ་ཀྱི་རྩེ་ལ་སོགས་པར་འཁོར་ལོས་སྒྱུར་བའི་ཆ་བྱད་ཀྱིས་དཀྱིལ་འཁོར་སྤྲུལ་བཤད་མཛད་པ་སོགས་ལོངས་སྐུ་ཆུང་ངུ་། དགའ་ལྡན་གྱི་གནས་ན་གནས་པར་སྟོན་པ་ལ་སོགས་པ་མཛད་པ་བཅུ་གཉིས་ཀྱི་ཚུལ་སྟོན་པ་སྤྲུལ་པའི་སྐུའོ། །དེ་ལྟར་ཤིན་ཏུ་འགོར་ཡང་བསྐལ་པ་ཆུང་ངུ་གཅིག་ལ་མཐར་ཐུག་གིས་སངས་རྒྱས་འགྲུབ་པ་ཡིན་ནོ། །ཞེས་བསྟན་བཅོས་ཆེན་པོ་ཤེས་བྱ་ཀུན་ཁྱབ་ལས་གསུངས་སོ། །དེས་དཀའ་ཐུབ་རིག་བྱེད་ཀྱི་ཐེག་པ་ཀྲྀ་ཡཱ་ཨུ་པ་ཡོ་ག་གསུམ་གྱི་ཐེག་པ་མདོ་ཙམ་བཤད་ཟིན་ཏོ། །། །༈ གཉིས་པ་ནང་པ་ཐབས་ཀྱི་རྒྱུད་དམ་དབང་བསྒྱུར་ཐབས་ཀྱི་ཐེག་པ་ནི། སེམས་ཉིད་སྐུ་དང་ཡེ་ཤེས་ཀྱི་རོལ་པར་སྣང་བས་དངོས་གྲུབ་གཞན་ནས་མི་འཚོལ་བར་རང་བྱུང་གི་ཡེ་ཤེས་སུ་རྟོགས་པས་སྔགས་ནང་པའམ། སྣོད་བཅུད་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་བདེན་གཉིས་དབྱེར་མེད་བློའི་སྤྱོད་ཡུལ་དང་བྲལ་བར་གཏན་ལ་ཕབ་པས་ཆོས་ཐམས་ཅད་མཉམ་པ་ཉིད་དུ་དབང་བསྒྱུར་པའི་ཐབས་ལ་མཁས་པས་ན་དབང་བསྒྱུར་ཐབས་ཀྱི་ཐེག་པ་ཞེས་གསུངས་ཏེ་གང་ཟག་དབང་པོ་རབ་གསུམ་གྱི་ངོ་སྐལ་དུ་གསུངས་པ་ཡིན་ནོ། །དེ་ཡང་འདི་ལྟར་རྒྱུ་ཕ་རོལ་དུ་ཕྱིན་པའི་ཐེག་པ་དང་། དེར་མ་ཟད་སྔགས་ཕྱི་པ་དང་བཅས་པ་ནི་རིང་བའི་ལམ་ཡིན་ལ། སྔགས་བླ་མེད་ནི་ཉེ་ལམ་དང་འབྲས་བུའི་ཐེག་པ་མཚན་ཉིད་པ་ཡིན་ཞིང་འདི་ལས་གོང་དུ་གྱུར་པའི་ཐེག་པ་མེད་དེ། ཐེག་པ་གཞན་རྣམས་གདུལ་བྱའི་བསམ་པ་ལ་ལྟོས་ནས་དྲང་བའི་ཐབས་སུ་བསྟན་ལ། འདི་ནི་སངས་རྒྱས་ཀྱི་ཡེ་ཤེས་ཀྱིས་གཟིགས་པ་ཇི་ལྟ་བ་བཞིན་དུ་ངེས་པའི་དོན་མཐར་ཐུག་པ་བསྟན་པ་ཡིན་པའི་ཕྱིར་རོ། །དེས་ན་ཐེག་པ་འོག་མ་ཀུན་ལས་བླ་ན་མེད་པའི་ཐེག་པ་འདི་ཉིད་ཐབས་དང་ཤེས་རབ་ཀྱི་སྒོ་ནས་ཆེར་འཕགས་པའི་ཚུལ་དེ་དག་འདིའི་མཚན་གྱི་རྣམ་གྲངས་ལྔས་བསྟན་པའི་དོན་བཞིན་དུ་ཤེས་པར་བྱ་སྟེ། གང་ཞེ་ན། གསང་སྔགས་ཀྱི་ཐེག་པ་དང་། ཐབས་ཀྱི་ཐེག་པ་དང་། རྡོ་རྗེའི་ཐེག་པ་དང་། འབྲས་བུའི་ཐེག་པ་དང་། མི་མཉམ་པ་དང་མཉམ་པའི་ཐེག་པ་ཞེས་མིང་ལྔས་བསྟན་ཏོ། །དེ་ལ་གསང་བ་ཞེས་པ་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་དཀྱིལ་འཁོར་ཟབ་མོ་གང་ཞིག་ཡེ་ནས་ཆོས་ཀུན་གྱིརང་བཞིན་དུ་གནས་ཀྱང་འཁྲུལ་པའི་བློ་ཅན་རྣམས་ལ་ཡེ་གསང་ཐབས་ཀྱིས་ཆོད་པའི་གབ་པ་དང་། ཐེག་པ་འོག་མ་རྣམས་སུ་གདུལ་བྱ་དམན་པ་ལ་དེ་ཉིད་ཇི་བཞིན་པར་མ་གསུངས་པས་སྦས་པའི་གསང་བ་ཉིད་དུ་མཛད་པ་དེའི་དབང་གིས་གདུལ་བྱ་ཐུན་མོང་བའི་སྤྱོད་ཡུལ་དུ་མ་གྱུར་པ་ཡིན་ལ། སྔགས་ཞེས་པ་དེ་ལྟ་བུའི་གསང་བ་གསུམ་གྱི་དཀྱིལ་འཁོར་དེ་ཉིད་སྒྲུབ་པར་བྱེད་པ་ལ་གབ་སྦས་མེད་པར་ཡེ་ཇི་བཞིན་པའི་དོན་བསྟན་པས། ཤེས་རབ་མ་རྨོངས་པ་དང་སྒྲུབ་བྱེད་ཀྱི་ཐབས་མཆོག་ཏུ་གྱུར་པ་ཡོད་པའི་ཕྱིར། སྔགས་བླ་མེད་ཀྱི་ལམ་འདིས་ནི་ཡིད་ཤེས་བདེ་མྱུར་དུ་སྐྱོབ་པའི་ཕྱིར་ལམ་གཞན་ཀུན་ལས་ཁྱད་པར་དུ་འཕགས་པའི་ཕྱིར་དེ་སྐད་ཅེས་གསུངས་སོ། །ཐབས་ཀྱི་ཐེག་པ་ཞེས་པ་ནི་ཐབས་ཆེ་བ་དང་། ཐབས་སླ་བ་དང་། ཐབས་མང་བ་དང་། ཐབས་མྱུར་བ་བཞི་དང་ལྡན་པ་སྟེ། དེ་ཡང་ལམ་འདིའི་གནད་དང་ལྡན་ན་ཀུན་བྱང་གི་ཆོས་ཀུན་སྤང་བླང་མེད་པར་སྤྱོད་ཀྱང་སྒྲིབ་པར་མི་འགྱུར་བར་མ་ཟད་ཚོགས་ཆེན་པོ་རྫོགས་པར་འགྱུར་བའི་ཕྱིར་ཐབས་ཆེ་བ་ཞེས་བྱ་སྟེ། ལམ་གཞན་ན་དེ་ལྟ་བུའི་ཐབས་མེད་དོ། །དེ་བཞིན་དུ་དཀའ་ཐུབ་དང་སྡོམ་པ་དྲག་པོས་གཟིར་མི་དགོས་པར་འདོད་པའི་ཡོན་ཏན་ལྔ་ལ་ཇི་བདེ་བར་སྤྱོད་བཞིན་དུ་དེ་ཉིད་ཀྱིས་གྲོལ་བ་ཉིད་དུ་བྱེད་པའི་ཕྱིར། ཐབས་སླ་བ་ཞེས་བྱའོ། །སེམས་ཅན་རྣམས་ཀྱི་རྒྱུད་ཀྱི་ཆགས་སྡང་ལ་སོགས་པའི་ཉོན་མོངས་པ་མཐའ་ཡས་པ་རྣམས་གཉེན་པོ་གཞན་གྱིས་བཀག་མི་དགོས་པར་ཉོན་མོངས་པ་དེ་ཉིད་ཀྱི་སྒོ་ནས་གྲོལ་བ་སྟེར་བའི་ཐབས་དུ་མ་ཡོད་པའི་ཕྱིར་ཐབས་མང་བའོ། །ཐབས་མྱུར་བ་ནི་རྒྱུ་མཚན་བཞིའི་སྒོ་ནས་ཏེ། གང་ཞེ་ན། ཐོག་མ་མེད་པའི་དུས་ཀྱི་སྤྲོས་པའི་བག་ཆགས་མ་ལུས་པ་མྱུར་དུ་ལྡོག་པར་བྱེད་པ་ནི། འདི་ལྟར་སྣང་བ་ལྷར་ཤེས་ཏེ་ཆོས་ཀུན་སྤང་བླང་མེད་པར་སྤྱད་པས་གཟུང་འཛིན་གྱི་རྟོག་པ་རང་སར་ལྡོག་པའི་ཕྱིར་དང་། རྣམ་པར་སྨིན་པ་ལས་ལྡོག་པ་ནི། ལྟ་སྤྱོད་ཕུལ་དུ་བྱུང་བའི་སྒོ་ནས་རྣམ་སྨིན་གྱི་ལུས་འདི་མ་བོར་བར་སངས་རྒྱས་ཀྱི་ས་ལ་སྦྱོར་ནུས་པའི་ཕྱིར་དང་། བསོད་ནམས་ཆེན་པོ་བསྐྱེད་པ་ནི། སྣང་བ་ལྷའི་དཀྱིལ་འཁོར་དུ་ལྟ་ཞིང་མཉམ་པ་བཞིའི་དག་པ་དང་མ་བྲལ་བས། ཇི་ལྟར་སྤྱད་ཀྱང་ཚོགས་ཆེན་རྫོགས་པར་འགྱུར་བའི་ཕྱིར་དང་། ཆོས་རང་བཞིན་མེད་པ་ལ་ངང་གིས་འཇུག་པ་ནི། ཆོས་ཉིད་ཅིར་ཡང་མ་ཡིན་པའི་གནད་ཀྱིས་ཅིར་ཡང་འཆར་དུ་རུང་བས་ནི་ཏིང་ངེ་འཛིན་ཀྱིས་ཇི་ལྟར་དམིགས་པ་བཞིན་དུ་འགྲུབ་པས་ཅི་ཡང་མིན་པའི་ཆོས་ཉིད་མངོན་དུ་རིག་པར་འགྱུར་བའི་ཕྱིར་དེ་ལྟར་རྒྱུ་མཚན་བཞིའོ། །རྡོ་རྗེའི་ཐེག་པ་ཞེས་པའི་དོན་ནི། མཚན་ཉིད་པ་ལྟར་ཀུན་རྫོབ་སྒྱུ་མའི་ཆོས་ལ་བླང་དོར་དུ་སྤྱོད་པ་མ་ཡིན་གྱི། ཀུན་རྫོབ་དོན་དམ་དབྱེར་མེད་པར་སྤྱོད་ཅིང་སྒོ་གསུམ་རྡོ་རྗེ་གསུམ་གྱི་རང་བཞིན་དུ་སྦྱོར་བས་ཡེ་ནས་བླང་དོར་མེད་པར་སངས་རྒྱས་པའི་བདག་ཉིད། རྡོ་རྗེ་ལྟ་བུ་དབྱེར་མི་ཕྱེད་པའི་དོན་དང་ལྡན་པའི་ཐེག་པ་ལ་རྡོ་རྗེའི་ཐེག་པ་ཞེས་བརྗོད་པ་ཡིན་ནོ། །འབྲས་བུའི་ཐེག་པ་ནི། ཐེག་པ་གཞན་ནས་རང་གི་ལམ་དེ་ཉིད་ཉམས་སུ་བླང་བའི་མཐུས་སྐྱེ་བ་གཞན་ན་འབྲས་བུ་ཆོས་སྐུ་སྟོབས་དང་མི་འཇིགས་པ་ལ་སོགས་པའི་བདག་ཉིད་ཅན་དུ་གྲགས་པ་དེ་གདོད་ཐོབ་བྱར་འདོད་ལ། འདིར་གཞི་ཉིད་ནས་འབྲས་བུའི་ངོ་བོར་གནས་ཤིང་འབྲས་བུ་དེ་ཉིད་ད་ལྟ་ནས་ལམ་དུ་བྱེད་པའི་ཕྱིར། དེ་སྐད་དུ་བརྗོད་པའོ། །མི་མཉམ་དང་མཉམ་པའི་ཐེག་པ་གང་ཞེ་ན། གང་ཡང་མི་མཉམ་པ་ནི། མཐར་ཐུག་འབྲས་བུའི་སྐུ་བརྙེས་པ་དུས་གསུམ་གྱི་སངས་རྒྱས་རྣམས་ཏེ། གསང་སྔགས་འཛིན་པ་ནི། དེ་དག་གི་དགོངས་སྤྱོད་དང་མཉམ་པའི་ཕྱིར་དེ་སྐད་ཅེས་བྱའོ། །དེ་ལྟར་ཁྱད་པར་འཕགས་པ་དེ་ཡི་ཕྱིར་ན་ཡེ་ཤེས་འཆར་ལུགས་གསུམ་སྟེ། རྒྱུ་མཚན་ཉིད་ཀྱི་ཐེག་པ་གསུམ་ཀྱི་ཡེ་ཤེས་འཆར་ལུགས་ནི་ཡེ་ཤེས་ཆེན་པོ་རྒྱབ་ནས་འཆར་བ་ཞེས་བྱ་སྟེ། ཇི་ལྟར་ཆུ་བ རྙོགས་པ་དྭངས་པ་ལས་གཟུགས་བརྙན་འཆར་བ་ལྟར་རྣམ་པར་མི་རྟོག་པ་ལ་ཡུན་རིང་དུ་གནས་པར་བྱས་པས་རིམ་གྱིས་ཉོན་མོངས་པའི་རྣམ་རྟོག་སྙིགས་མ་དྭངས་ནས་ས་བཅུའི་མཐར་ཀུན་ཏུ་འོད་ཀྱི་ས་ལ་སངས་རྒྱས་ནས་ཐམས་ཅད་མཁྱེན་པར་འདོད་པ་ནི། ཡེ་ཤེས་དེ་ལྟ་བུ་བསྐལ་པ་གྲངས་མེད་གསུམ་སོགས་ནས་ཕྱིས་འབྱུང་བར་འདོད་པས་ཡེ་ཤེས་རྒྱབ་ནས་འཆར་བ་ཞེས་བྱའོ། །སྔགས་ཕྱི་རྒྱུད་སྡེ་གསུམ་ནི། ཡེ་ཤེས་ཆེན་པོ་མདུན་ནས་འཆར་བ་ཞེས་བྱ་སྟེ། ད་ལྟར་ཉིད་དུ་འོག་མིན་ན་བཞུགས་པའི་རྒྱལ་བ་རིགས་གསུམ་མམ་རིགས་ལྔ་འཁོར་བཅས་སྤྱན་དྲངས་ཏེ། མདུན་མཁའ་སོགས་སུ་བཞུགས་པ་ལ་ཕྱག་འཚལ་ཞིང་མཆོད་པ་ཕུལ་ལ་དངོས་གྲུབ་ནོད་པར་བྱས་པས་ལྷ་དེས་དངོས་གྲུབ་སྟེར་བར་ལྟ་ཞིང་། བདག་དང་ལྷ་དང་རྫས་ཀྱི་རྟེན་འབྲེལ་ཟབ་མོའི་ཐབས་ཀྱིས་བསྒྲུབས་པས། །མི་ཚེ་བདུན་དང་བཅུ་དྲུག་ལ་སོགས་པས་མཐར་ཐུག་གི་འབྲས་བུ་འགྲུབ་པར་འདོད་པ་དེ་དག་གི་ལམ་རྒྱུ་མཚན་ཉིད་ཀྱི་ཐེག་པ་ལས་འབྲས་བུ་ཐོབ་པ་མྱུར་བའི་ཕྱིར། ཡེ་ཤེས་མདུན་ནས་འཆར་བ་ཞེས་བྱའོ། །སྔགས་ནང་པ་ཐབས་ཀྱི་ཐེག་པ་གསུམ་ནི། ཡེ་ཤེས་ཆེན་པོ་ཁོང་ནས་འཆར་བ་ཞེས་བྱ་སྟེ། ཆོས་ཐམས་ཅད་རང་བྱུང་གི་ཡེ་ཤེས་བདག་ཉིད་ཆེན་པོའི་ངང་ལས་མ་འདས་པས་ན། རང་གི་སེམས་ཉིད་བདེ་བ་ཆེན་པོའི་དེ་ཉིད་ལ་གནས་བཞིན་དུ་སངས་རྒྱས་གཞན་དུ་ཚོལ་མི་དགོས་པར་ཚེ་འདི་ཉིད་ལ་མངོན་དུ་འཆར་བས་ན། ཡེ་ཤེས་ཁོང་ནས་འཆར་བ་ཞེས་བྱའོ། །ཞེས་ཀུན་མཁྱེན་བླ་མ་འཇམ་དཔལ་དགྱེས་པས་གསུངས་སོ། །དེ་ལྟ་བུའི་ཁྱད་པར་དུ་འཕགས་པའི་ནང་པ་ཐབས་ཀྱི་ཐེག་པ་དེ་ལ་དབྱེ་ན། རང་ཤར་ལས། ནང་པ་ལ་ནི་གསུམ་དུ་འདོད། །མ་ཧཱ་ཨ་ནུ་ཨ་ཏི་འོ། །ཞེས་པས། རྒྱུད་མ་ཧཱ་ཡོ་ག ལུང་ཨ་ནུ་ཡོ་ག མན་ངག་ཨ་ཏི་ཡོ་གའོ། །དེ་གསུམ་གྱི་ཁྱད་པར་ལ་བཞེད་པ་མི་འདྲ་བ་མང་ཡང་གཙོ་བོར། གསང་བདག་ཟུར་ཆུང་པས། ཆོས་ཐམས་ཅད་སེམས་ཉིད་སྣང་སྟོང་དབྱེར་མེད་ཀྱི་ཆོ་འཕྲུལ་དུ་རྟོགས་པ་མ་ཧཱ་ཡོ་ག ཆོས་ཐམས་ཅད་སེམས་ཉིད་དབྱིངས་ཡེ་གཉིས་སུ་མེད་པའི་རྩལ་དུ་རྟོགས་པ་ཨ་ནུ། ཆོས་ཐམས་ཅད་སེམས་ཉིད་ཡེ་ནས་སྐྱེ་འགག་མེད་པའི་རང་བྱུང་གི་ཡེ་ཤེས་རང་སྣང་བར་རྟོགས་པ་ཨ་ཏི་སྟེ་ལྟ་བའི་སྒོ་ནས་ཕྱེ་བར་བཞེད། ཀུན་མཁྱེན་ཆེན་པོ་ནི། གདུལ་བྱ་ཞེ་སྡང་ཤས་ཆེ་ཞིང་རྟོག་པ་མང་བའི་དོན་དུ་སྣང་བ་ཐབས་ཀྱི་རང་བཞིན་ཕ་རྒྱུད་མ་ཧཱ་ཡོ་ག འདོད་ཆགས་ཤས་ཆེ་ཞིང་སེམས་གནས་པ་ལ་དགའ་བའི་དོན་དུ་སྟོང་པ་དེ་ཁོ་ན་ཉིད་ཀྱི་རྫོགས་རིམ་ཤེས་རབ་མ་ཡི་རྒྱུད་ཨ་ནུ། གཏི་མུག་ཤས་ཆེ་ཞིང་བྱ་རྩོལ་སློད་པ་ཅན་གྱི་དོན་དུ་གཉིས་སུ་མེད་པའི་རང་བཞིན་ཨ་ཏི་ཡོ་ག་བསྟན་ཏེ། བཀོད་པ་ཆེན་པོ་ལས། སེམས་ཡས་པ་ལ་བསྐྱེད་པ་སྟེ། །སེམས་བཅུད་ཅན་ལ་རྫོགས་པའོ། །མཆོག་གསང་རབ་ལ་རྫོགས་པ་ཆེ། །ཞེས་གསུངས་པའི་ཕྱིར་གསུངས་ཤིང་། སེམས་ཉིད་ངལ་གསོ་ལས་ཀྱང་། མ་ཧཱས་རླུང་དང་བསྐྱེད་རིམ་ཐབས་གཙོ་ལ། །ཨ་ནུས་ཁམས་དང་རྫོགས་རིམ་ཤེས་རབ་གཙོ། །ཨ་ཏིས་ཐམས་ཅད་གཉིས་མེད་ཡེ་ཤེས་གཙོ། །ཞེས་གསུངས། དེ་ལས་དང་པོ་གང་ཟག་རབ་ཀྱི་ཐ་མ་ཞེ་སྡང་ཆེ་བ་དང་རྟོག་པ་མང་བ་ལ་དགོངས་ནས་གསུངས་པ་མ་ཧཱ་ཡོ་གའི་ཐེག་པ་ནི། རྒྱུད་སེང་གེ་རྩལ་རྫོགས་ལས། བསྐྱེད་པ་མ་ཧཱ་ཡོ་ག་ནི་ཆོས་ཐམས་ཅད་ཀྱི་གཞི་ལྟ་བུའོ། །ཞེས་གསུངས་པས་རྒྱུད་ཐམས་ཅད་ཀྱི་འཕྲོ་གཞིའམ་རྩ་བ་ལྟ་བུར་གྱུར་པ་སྟེ། དེ་ལ། ངོ་བོ། ངེས་ཚིག དབྱེ་བ་གསུམ་ལས། ངོ་བོ་ནི། ཐབས་བསྐྱེད་པའི་རིམ་པ་གཙོ་བོར་བརྟེན་པའི་སྒོ་ནས། ལྷག་པ་བདེན་པ་དབྱེར་མེད་ཀྱི་དོན་ལ་རྟོགས་གོམས་ཀྱི་སྦྱོར་བས་གྲོལ་བ་ཐོབ་པའི་རང་བཞིན་ནོ། །ངེས་ཚིག་ནི། མ་ཧཱ་ཡོ་གའི་སྒྲ་ལས་རྣལ་འབྱོར་ཆེན་པོ་སྟེ། གཉིས་མེད་ཀྱི་དོན་ལ་བློ་འབྱོར་པས་ཡོ་ག་ཕྱི་པ་ལས་ཆེས་འཕགས་པའི་ཕྱིར་རོ། །དབྱེ་ན་དྲུག་ལས་འཇུག་སྒོའི་དབང་ནི། ཐུན་མོང་བ་བུམ་དབང་གི་སྟེང་དུ་ཐུན་མིན་མཆོག་དབང་གོང་མ་གསུམ་བསྣན་པས་དབང་བཞི་བསྐུར་བ་སྟེ། སྙིང་པོའི་རྒྱུད་ཕྱི་མ་ལས། སློབ་དཔོན་གསང་བ་ཤེས་རབ་དང་། །དེ་མ་ཐག་པ་བཞི་པ་སྟེ། །ཞེས་སོ། །དེ་ལ་རྒྱུད་སྡེའི་ཁྱད་པར་གྱི་དབྱེ་བསྡུ་མང་ཡང་བླ་མེད་ཀྱི་རྒྱུད་སྡེ་ཐམས་ཅད་ཀྱི་རྩ་བར་གྱུར་པ་གསང་བ་སྒྱུ་འཕྲུལ་ལྟར་ན། རྒྱུད་ལས། དད་བརྩོན་བརྟུལ་ཞུགས་རབ་རྟོགས་ན། །ཕན་པའི་དབང་སྦྱིན་ནུས་པའི་དབང་། །རིམ་པ་བཞིན་དུ་སྦྱིན་པར་བྱ། །ཞེས་པས་དད་པ་ཅན་ལ་དབུ་རྒྱན་ཅོད་པཎ་སོགས་ཕྱི་ཕན་པའི་དབང་བཅུ། བརྩོན་འགྲུས་ཅན་ལ་གསུམ་གྱི། བདག་དོན་ནུས་པ་ལ་ཉན་སྒོམ། གཞན་དོན་ནུས་པ་ལ་འཆད་འཕྲིན། གཉིས་ཀའི་དོན་ནུས་པ་ལ་རྡོ་རྗེ་སློབ་དཔོན་བཀའ་རབ་འབྱམས་ཀྱི་དབང་སྟེ་ནུས་དབང་ལྔ། སྤྱོད་རིག་མཉམ་པའི་བརྟུལ་ཞུགས་ཅན་གསུམ་ལ་ཟབ་མོའི་དབང་གསུམ་སྟེ། དེ་ལྟར་བུམ་དབང་ལ་ཕན་ནུས་གཉིས་སུ་ཕྱེ་བས་ལྔར་འགྱུར་སྟེ། རྡོ་རྗེ་ལས་རིམ་ལས། དབྱེ་བ་རྣམ་པ་ལྔ་རུ་འགྱུར། །བདག་ཕན་ནུས་པ་གཉིས་ཀའི་ལས། །ཞེས་སོ། །སྒྲུབ་སྡེ་ཐམས་ཅད་ཀྱི་སྤྱི་བཀའ་བདེ་འདུས་ལྟར་ན། མདོ་བྱང་ཊཱི་ཀ་ལས། ཕྱི་དབང་ནང་དབང་གསང་དབང་དང་། །ཐེག་པ་ལྟ་བ་སྤྱི་འབྱམས་དབང་། །རིམ་གྱིས་དབང་ནི་རྫོགས་པར་བསྐུར། །ཞེས་པ་ལྟར། ཕྱི་ནང་གསང་བ་དེ་ཁོ་ན་ཉིད་ཀྱི་དབང་བཞི་ལས། གདུལ་བྱ་ཞེ་སྡང་ཅན་སྒྲོལ་བ་ལམ་དུ་ཁྱེར་བའི་ཕྱིར་བུམ་པ་སོགས་ཕྱི་ནང་གི་རྫས་བརྒྱ་རྩ་བརྒྱད་ལ་བརྟེན་ནས་ཕྱི་དབང་བསྐུར་བ། ང་རྒྱལ་ཅན་ལྷ་ལམ་དུ་ཁྱེར་བའི་ཕྱིར་ནང་དབང་ལུས་ལ་བརྟེན་ནས་བསྐུར་བ། འདོད་ཆགས་ཅན་སྦྱོར་བ་ལམ་དུ་ཁྱེར་བའི་ཕྱིར་གསང་དབང་ཡུམ་ལ་བརྟེན་ནས་བསྐུར་བ། གཏི་མུག་ཅན་རྣམ་རྟོག་ལམ་དུ་ཁྱེར་བའི་ཕྱིར་དེ་ཁོ་ན་ཉིད་ཀྱི་དབང་སེམས་ལ་བརྟེན་ནས་བསྐུར་བ་དང་བཞིའོ། །སྒྲུབ་སྡེའི་དགོས་བཀའ་ཡང་ཕུར་སོགས་ལ་ཐུན་མོང་བ་བླ་མེད་སྤྱི་བཀའ་ལྟར་དབང་བཞི་བསྐུར་བ་དང་། ཟབ་ཁྱད་སྒྲུབ་དབང་གི་ལུགས་སུ་བསྐུར་བ་སོགས་མང་ཡང་སྤྱི་ལྡོག་ནས་བླ་མེད་ཀྱི་དབང་ཐམས་ཅད་དབང་བཞིར་འདུ་བ་ཡིན་ནོ། །བྱ་བའི་འཇུག་སྒོ་ནི་ཤེས་རབ་སྟོང་པ་ཆེན་པོའི་རྣལ་འབྱོར་དང་། ཐབས་སྙིང་རྗེ་སྒྱུ་མ། ཕྱག་རྒྱ་ཕྲ་རགས་ཏེ་ཏིང་ངེ་འཛིན་གསུམ་གྱི་སྒོ་ནས་འཇུག་སྟེ། བསྐྱེད་རིམ་གཙོ་བོར་སྟོན་པའི་ལམ་ཡིན་པའི་ཕྱིར། རང་ཤར་ལས། འཇུག་པའི་སྒོ་ནི་ཏིང་འཛིན་རྣམ་པ་གསུམ། །ཞེས་དང་། ཡང་འབྱེད་འཕྲུལ་སྡེ་ལས། མ་ཧཱ་ཡོ་གའི་འཇུག་སྒོ་ནི། །ཏིང་ངེ་འཛིན་རྣམ་གསུམ་སྒོ་ནས་འཇུག །ཅེས་སོ། །ལྟ་བ་ནི། ལམ་རིམ་ལས། ཐབས་ཀྱི་ལྟ་སྤྱོད་ཆེན་པོ་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་དཀོར་བདུན་ལ། །ཀུན་རྫོབ་ཏུ་ནི་མཉམ་རྫོགས་སོ། །ཡང་དག་སྐྱེས་མཆོག་དམ་པ་ཡིས། །དོན་དམ་ཀུན་རྫོབ་དབྱེར་མེད་པར། །ཡང་དག་ཉིད་དུ་རབ་ཏུ་རྟོགས། །ཞེས་པས་སྤྲོས་པའི་མཐའ་དང་བྲལ་བའི་ཆ་ནས་དབུ་མ་དང་། ཆོས་ཐམས་ཅད་སེམས་ཀྱི་རང་རྩལ་ཙམ་དུ་འདུ་བའི་ཆ་ནས་སེམས་ཙམ་པ་དང་ཕྱོགས་མཚུངས་ཀྱང་སྔགས་ཀྱི་ལྟ་བ་ནི། དེ་ལས་ཁྱད་པར་དུ་གྱུར་པ་སྟེ། དེ་ཡང་ཡེ་གདོད་མ་ནས་དབྱིངས། ཡེ་ཤེས། སྐུ་གསུང་ཐུགས་ཡོན་ཏན་ཕྲིན་ལས་ཏེ། དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་ལྷག་པ་དོན་དམ་བདེན་པ་དང་། དེ་ཉིད་ཀྱི་རྩལ་སྣང་ཕུང་ཁམས་སྐྱེ་མཆེད་ཀྱིས་བསྡུས་པའི་རྟོག་ཚོགས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བས་འཁོར་འདས་བཟང་ངན་མེད་པར་མཉམ་པ་ཉིད་དུ་རྫོགས་པ་ནི་ལྷག་པ་ཀུན་རྫོབ་ཀྱི་བདེན་པ་སྟེ། དེ་གཉིས་ཀྱང་སྣང་སྟོང་ཕྱོགས་རེ་བ་མ་ཡིན་ཏེ། གསེར་དང་གསེར་གྱི་སེར་པོའམ་གཡུ་དང་གཡུ་ཡི་ཁ་དོག་བཞིན་དུ་ངོ་བོ་དབྱེར་མི་ཕྱེད་པར་མཉམ་པ་ཉིད་དུ་སྣང་བའི་ཕྱིར། ཐ་སྙད་དུ་དབྱེར་མེད་ཅེས་བརྗོད་ནའང་། དེར་འཛིན་པའི་བསམ་བརྗོད་ཀྱི་ཡུལ་ལས་འདས་པའི་ཕྱིར། དབྱེར་མེད་སྤྱོད་ཡུལ་དང་བྲལ་བ་སྟེ། རྣམ་བཀོད་ལས། ལྷག་པའི་མཉམ་ཉིད་དབྱེར་མེད་དོན། །མིང་གྲངས་ཅིར་ཡང་བསྟན་མོད་ཀྱང་། །དོན་དུ་སྨྲ་བསམ་བརྗོད་ལས་འདས། །ཞེས་དང་། ལམ་རིམ་ལས། དེ་མིན་ཞེན་པ་སྒྲོལ་ཕྱིར་ལས། །ཐ་སྙད་གཉིས་པར་བསམ་བརྗོད་འདས། །ཞེས་སོ། །འདིར་ལྷག་པའི་སྒྲས་སྨོས་པ་ནི་ཐེག་པ་འོག་མ་ལས་འཕགས་པའི་དོན་ཏེ། དེ་ཡང་རྒྱུད་ལས། བཅིང་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་པས་གཞི་འཆིང་གྲོལ་མེད་པའི་གནས་ལུགས་རང་རིག་པ་བྱང་ཆུབ་ཀྱི་སེམས་བདེན་པ་དབྱེར་མེད་སྤྱོད་ཡུལ་དང་བྲལ་བར་ཡེ་ནས་གནས་པ་ལ། དེ་ཉིད་སངས་རྒྱས་ཀྱི་ངོ་བོ་ཡིན་པའི་ཆ་ནས་བདེ་གཤེགས་སྙིང་པོ་དང་། སྟོང་ཆས་ཆོས་སྐུའི་ཡོན་ཏན་དང་སྣང་ཆས་གཟུགས་སྐུའི་ཡོན་ཏན་འཆར་རུང་དུ་གནས་པས་རང་བཞིན་གནས་རིགས་དང་། འཁོར་འདས་གཉིས་ཀྱི་འབྱུང་གཞི་ཡིན་པས་ཀུན་གཞིའི་ཡེ་ཤེས་དང་། ཀྲྀ་ཡཱའི་བདག་གི་དེ་ཁོ་ན་ཉིད་དང་། ཨུ་པ་དང་ཡོ་གས་དོན་དམ་མཚན་མ་མེད་པའི་བྱིན་རླབས་ཀྱིས་ཀུན་རྫོབ་རྡོ་རྗེ་དབྱིངས་ཀྱི་ལྷར་ལྟ་བ་དང་། མ་ཧཱ་ཡོ་གའི་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོ་དང་། ཨ་ནུ་ཡོ་གའི་དབྱིངས་དང་ཡེ་ཤེས་གཉིས་སུ་མེད་པའི་སྲས་རྩ་བ་བྱང་ཆུབ་སེམས་ཀྱི་དཀྱིལ་འཁོར་དང་། ཨ་ཏི་ཡོ་གའི་ངོ་བོ་རང་བཞིན་ཐུགས་རྗེ་གསུམ་ལ་སོགས་པའི་ཐ་སྙད་གང་ལ་འཇུག་པ་གཞི་རྒྱུད་ཀྱི་གནས་ལུགས་དེ་ཉིད་རྟོགས་བྱའི་ལྟ་བར་གཏན་ལ་འབེབས་པར་བྱེད་པ་ལ་རྟོག་གེ་དང་རིགས་པ་ལྟར་སྣང་གིས་གཏན་ལ་མི་འབེབས་ཏེ། ཀུན་ཁྱབ་ཚད་མ་གསུམ་གྱིས་གཏན་ལ་ཕབ་ཅིང་རང་རིག་མངོན་སུམ་གྱིས་རྟོགས་དགོས་པའི་ཕྱིར་རོ། །གཏན་ལ་འབེབས་བྱེད་ཀྱི་གཏན་ཚིགས་ཀྱང་། རྟོགས་པ་བཞིའི། དག་པ་གསུམ་གྱི། མཉམ་པ་བཞིའི། བདག་ཉིད་ཆེན་པོའི་གཏན་ཚིགས་དང་བཞི་ལས་དང་པོ་ནི། སྙིང་པོའི་རྒྱུད་ལས། རྒྱུད་གཅིག་པ་དང་ཡིག་འབྲུའི་ཚུལ། །བྱིན་གྱིས་བརླབས་དང་མངོན་སུམ་པ། །རབ་ཏུ་རྟོགས་པ་རྣམ་བཞི་ཡིས། །ཐམས་ཅད་མངོན་རྫོགས་ཆེན་པོར་ཆེ། །ཞེས་པས་འཁོར་འདས་གཉིས་སུ་སྣང་ཞིང་ཞེན་པའི་གཉིས་འཛིན་གྱི་བློ་དེ་ཉིད་གཉིས་མེད་ཡེ་ཤེས་སུ་གཏན་ལ་འབེབས་པའི་ཆེད་དུ་གཉིས་འཛིན་གྱི་ཞེན་པ་དེ་གཞལ་བྱ ར་བྱས་ནས་འཇལ་བྱེད་རྒྱུ་གཅིག་པའི་གཏན་ཚིགས་ཀྱིས་ཆོས་ཐམས་ཅད་རང་བཞིན་སྐྱེ་མེད་དུ་གཏན་ལ་ཕབ། དེ་བཞིན་དུ་སྔ་མ་སྔ་མས་གཏན་ལ་ཕེབས་པའི་གྲུབ་མཐའི་ཞེན་ཆ་དེ་གཏན་ཚིགས་ཕྱི་མ་ཕྱི་མའི་གཞལ་བྱར་བྱས་ནས། ཡིག་འབྲུའི་ཚུལ་གྱི་གཏན་ཚིགས་ཀྱིས་རོལ་པ་འགག་མེད་དུ་གཏན་ལ་ཕབ། བྱིན་གྱིས་བརླབས་ཀྱི་གཏན་ཚིགས་ཀྱིས་ངོ་བོ་དབྱེར་མེད་དུ་གཏན་ལ་ཕབ། མངོན་སུམ་པའི་གཏན་ཚིགས་ཀྱིས་མཚན་ཉིད་བློ་བྲལ་དུ་གཏན་ལ་འབེབས་པ་ཡིན་ཏེ། འཁོར་འདས་གཉིས་ཀྱིས་བསྡུས་པའི་ཆོས་སོ་ཅོག་ཆོས་ཅན། རང་བྱུང་གི་ཡེ་ཤེས་སྐྱེ་བ་མེད་པའི་དབྱིངས་སུ་རྒྱུ་གཅིག་པ་ཡིན་ཏེ། རྟོགས་མ་རྟོགས་ཀྱི་བྱེད་པས་འཁོར་འདས་གཉིས་སུ་སྣང་བ་ཙམ་ལས། གཉིས་སུ་མ་གྲུབ་པའི་ཕྱིར། སེམས་ཉིད་སྐྱེ་མེད་ཀྱི་གདངས་ཆོས་ཅན། རོལ་པ་འགག་མེད་ལྷ་ཡི་སྐུ་གསུང་ཐུགས་སུ་རང་སྣང་བ་ཡིན་ཏེ། མཚོན་དུ་མེད་པའི་ཡི་གེ་ཨ་ཉིད་མཚོན་བྱེད་ཡི་གེ་དུ་མར་མ་འགགས་པར་སྣང་བས་མཚོན་ནས་རྟོགས་པའི་ཕྱིར། རང་བཞིན་སྐྱེ་མེད་དང་རོལ་པ་འགག་མེད་གཉིས་ཆོས་ཅན། དེ་དང་དེ་དངོས་སུ་རྟོགས་པའི་མཐུ་ལས། དེ་གཉིས་ལྡོག་པར་སོ་སོར་སྣང་ཡང་ངོ་བོ་དབྱེར་མེད་དུ་རྟོགས་པའི་བྱིན་རླབས་ཤུགས་ལ་འབྱུང་བ་ཡིན་ཏེ། ལྷག་པ་དོན་དམ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པས་དེའི་སྣང་ལྡོག་ཀུན་རྫོབ་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བའི་ཕྱིར། བདེན་པ་དབྱེར་མེད་ཆོས་ཅན། བློའི་སྤྱོད་ཡུལ་ལས་འདས་པ་ཡིན་ཏེ། གཉིས་སུ་ཡེད་པའི་ཡེ་ཤེས་སོ་སོར་རང་རིག་པའི་མངོན་སུམ་གྱིས་ཡུལ་མེད་རང་གསལ་དུ་བསམ་བརྗོད་བྲལ་བར་རྟོགས་པའི་ཕྱིར་རོ། །གཉིས་པ་ནི། སྣོད་བཅུད་རྒྱུད་རྣམས་དག་རྟོགས་ཤིང་། །ཞེས་པས། དག་པ་གསུམ་གྱི་གཏན་ཚིགས་ཀྱིས་ཕྱི་ནང་སྣོད་བཅུད་ཕུང་ཁམས་སྐྱེ་མཆེད་ཐམས་ཅད་དག་པ་ཆེན་པོར་གཏན་ལ་འབེབས་ཏེ། སྣོད་བཅུད་རྒྱུད་གསུམ་གྱིས་བསྡུས་པའི་ཆོས་ཐམས་ཅད་ཆོས་ཅན། སྐུ་དང་ཡེ་ཤེས་ཀྱི་དཀྱིལ་འཁོར་དུ་སངས་རྒྱས་པ་ཡིན་ཏེ། སྣོད་འབྱུང་བ་ཡུམ་ལྔ། བཅུད་ཕུང་ལྔ་ཡབ་ལྔ། རྒྱུད་རྣམ་ཤེས་ཚོགས་བརྒྱད་ཡེ་ཤེས་ལྔར་དག་པའི་ཕྱིར། གང་ཡེ་ནས་དག་པའི་རང་བཞིན་ལ་སྒྲིབ་པ་མཐའ་དག་གིས་གོས་མ་མྱོང་བས་ཁྱབ་ཅིང་དེ་ཉིད་སྐུ་དང་ཡེ་ཤེས་ཀྱི་ངོ་བོར་སངས་རྒྱས་པས་ཁྱབ་སྟེ། ཆོས་ཀྱི་སྐུ་བཞིན་ནོ། །གསུམ་པ་ནི། མཉམ་གཉིས་ལྷག་པའི་མཉམ་གཉིས་ཀྱི། །དཀྱིལ་འཁོར་ཀུན་ཏུ་བཟང་པོའི་ཞིང་། །ཞེས་པས་མཉམ་པ་བཞིའི་གཏན་ཚིགས་ཀྱིས་ཀུན་རྫོབ་དང་དོན་དམ་གྱིས་བསྡུས་པའི་ཆོས་ཐམས་ཅད་མཉམ་པ་ཆེན་པོར་གཏན་ལ་འབེབས་པར་བྱེད་དེ། ཤེས་བྱ་ཆོས་ཅན། ཡེ་ནས་སངས་རྒྱས་པ་ཡིན་ཏེ། མཉམ་པ་བཞིས་འཁོར་འདས་གཉིས་སུ་མེད་པར་རྟོགས་པའི་ཕྱིར། དེ་ལ་གཉིས་ལས། ཐུན་མོང་གི་མཉམ་གཉིས་ནི། མྱུ་གུ་བདག་ལས་མི་སྐྱེ་བ་ལྟ་བུ་སྤྲོས་པ་ཕྱོགས་རེ་ཙམ་ཆོད་པ་རྣམ་གྲངས་པའི་དོན་དམ་དང་། མཐའ་བཞིའི་སྤྲོས་པ་དང་བྲལ་བ་རྣམ་གྲངས་མ་ཡིན་པའི་དོན་དམ་གཉིས་ཆོས་ཅན། མཉམ་པ་ཡིན་ཏེ། སྤྲོས་པ་བཀག་པའི་སྟོང་ཉིད་ཙམ་དུ་མཉམ་པའི་ཕྱིར། ཆུ་ཟླ་ལྟ་བུ་དོན་བྱེད་མི་ནུས་པ་ལོག་པའི་ཀུན་རྫོབ་དང་མཁའ་ཟླ་ལྟ་བུ་དོན་བྱེད་ནུས་པ་ཡང་དག་པའི་ཀུན་རྫོབ་གཉིས་ཆོས་ཅན། མཉམ་པ་ཡིན་ཏེ། བདེན་པས་སྟོང་པ་ཙམ་དུ་མཉམ་པའི་ཕྱིར། ཐུན་མོང་མ་ཡིན་པའི་ལྷག་པའི་མཉམ་གཉིས་ནི། རྣམ་གྲངས་པ་ཆོས་རྣམས་རང་རང་གི་ངོ་བོས་སྟོང་པ་མེད་དགག་དང་། རྣམ་གྲངས་མིན་པ་སེམས་ཉིད་ཅི་ཡང་མ་ཡིན་པའི་དབྱིངས་ཡེ་ཟུང་འཇུག་མ་ཡིན་དགག་གི་སྟོང་ཉིད་གཉིས་ཆོས་ཅན། མཉམ་པ་ཡིན་ཏེ། ལྷག་པའི་དོན་དམ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པའི་ཕྱིར། མ་དག་པ་ལས་སྣང་ལོག་པའི་ཀུན་རྫོབ་དང་། དག་པ་ལྷར་སྣང་བ་ཡང་དག་པའི་ཀུན་རྫོབ་གཉིས་ཆོས་ཅན། མཉམ་པ་ཡིན་ཏེ། ལྷག་པའི་ཀུན་རྫོབ་སྐུ་དང་ཡེ་ཤེས་སུ་མཉམ་པའི་ཕྱིར། བཞི་པ་ནི། རང་བྱུང་ཡེ་ཤེས་གནས་མེད་སྣང་། །ཞེས་པས་བདག་ཉིད་ཆེན་པོའི་གཏན་ཚིགས་ཀྱིས་ཆོས་ཐམས་ཅད་སེམས་ཉིད་རང་བྱུང་གི་ཡེ་ཤེས་ཆེན་པོ་གཅིག་གི་བདག་ཉིད་དུ་ཡེ་ནས་གནས་པར་གཏན་ལ་འབེབས་ཏེ། འཁོར་འདས་གཉིས་ཆོས་ཅན། སྣང་ལུགས་ནས་དུ་མར་སྣང་ཡང་ཡིན་ལུགས་ནས་གཞལ་ན་དེ་ལྟར་མ་ཡིན་ཏེ། སེམས་ཉིད་སྐྱེ་མེད་རང་བྱུང་གི་ཡེ་ཤེས་ཆེན་པོ་གཅིག་ཉིད་དུ་ཡེ་ནས་གནས་པའི་ཕྱིར་རོ། །དེ་ལྟར་གཏན་ལ་ཕབ་པས་རྟོགས་བྱའི་ལྟ་བར་རང་བཞིན་རྒྱུ་རྒྱུད་གནས་ལུགས་ཀྱི་དོན་དེ་བཞིན་ཉིད་དེ་རང་རིག་མངོན་སུམ་གྱིས་ཡུལ་མེད་རང་གསལ་དུ་རྗེན་པར་རྟོགས་པ་ནི། འདིའི་གྲུབ་པའི་མཐའོ། །དེ་ལྟར་འདིར་བཤད་པ་ནི་བཀའ་སྡེ་ཟུར་པའི་དགོངས་པ་ཀུན་མཁྱེན་སྨིན་གླིང་པ་ཡབ་སྲས་ཀྱི་བཞེད་པ་ལྟར་ཡིན་ལ། སྨྲ་བའི་སེང་ཆེན་རོང་ཀློང་རྣམས་གཉིས་ཀྱི་བཞེད་པ་ཆོས་ཐམས་ཅད་དག་མཉམ་བདེན་པ་དབྱེར་མེད་དུ་སྒྲུབ་པའི་ཚུལ་གྱི་རིགས་པའི་སྒོ་གཞན་རྣམས་ནི་འདིར་མ་སྨོས་ཏེ། ཀུན་མཁྱེན་བླ་མ་འཇམ་དཔལ་དགྱེས་པས་མཛད་པའི་སྙིང་པོའི་སྤྱི་དོན་སོགས་ལས་ཤེས་པར་བྱ་སྟེ། མདོར་ན་ཆོས་ཉིད་ལྟ་བའི་ལྟ་བས་འཁོར་འདས་ཀྱི་ཆོས་ཐམས་ཅད་རང་བཞིན་མཉམ་པ་ཆེན་པོར་གཏན་ལ་དབབ། ཆོས་ཅན་ལྟ་བའི་ལྟ་བས་སྣང་སྤྱོད་ཀྱི་ཆོས་ཐམས་ཅད་སྐུ་དང་ཡེ་ཤེས་ཀྱི་རང་བཞིན་དག་པ་ཆེན་པོར་གཏན་ལ་དབབ། རང་རིག་ལྟ་བའི་ལྟ་བས་དེ་གཉིས་དབྱེར་མེད་མཚན་ཉིད་བསམ་བརྗོད་དང་བྲལ་བར་མངོན་སུམ་རང་ཐོག་ཏུ་གཏན་ལ་ཕབ་ནས་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་དུ་ཤེས་པར་བྱ་བ་ནི་རྡོ་རྗེ་རྩེ་མོའི་གྲུབ་མཐའི་གནད་གསང་བླ་ན་མེད་པའོ། །གཞན་ཡང་ཁ་ཅིག་གིས། གསང་སྔགས་ཀྱི་གྲུབ་མཐའ་ནི་ལྟ་བ་དབུ་མ་ལས་ཐབས་ཁྱད་པར་དུ་འཕགས་པ་ཙམ་དུ་འདོད་པ་ནི་མི་རིགས་ཏེ། དབུ་མ་དང་སྔགས་གཉིས་དོན་དམ་སྤྲོས་བྲལ་དང་། ཀུན་རྫོབ་སྒྱུ་མ་ཙམ་དུ་མཉམ་པར་ལྟ་བ་མཐུན་ན་ཡང་། དེ་ཙམ་གྱིས་སྔགས་ཀྱི་ལྟ་བ་གཏན་ལ་མི་ཕེབས་ཏེ། སྔགས་ཀྱི་ཐུན་མོང་མ་ཡིན་པའི་ལྟ་བ་ནི་བདེན་པ་བྱེར་མེད་སྣོད་བཅུད་དག་མཉམ་ཆེན་པོར་གཏན་ལ་འབེབས་དགོས་པའི་ཕྱིར། དེ་ཡང་ཆོས་ཉིད་ལྟ་བའི་ངོས་ནས་ཆོས་ཐམས་ཅད་སྤྲོས་བྲལ་དམིགས་བསམ་བརྗོད་འདས་ཆེན་པོར་གཏན་ལ་འབེབས་པའི་ཆ་ནས་མདོ་སྔགས་ཀྱི་ལྟ་བ་ལ་ཁྱད་མེད་ཀྱང་། ཆོས་ཅན་ཀུན་རྫོབ་ལྟ་བའི་ངོས་ནས་ཕུང་ཁམས་སྐྱེ་མཆེད་དག་པ་ལྷ་ཡི་འཁོར་ལོར་མདོ་ནས་བཤད་པ་མེད་ཅིང་སྔགས་བླ་མེད་ནས་བསྟན་པས་ཁྱད་པར་དུ་བྱེད་པ་སྟེ། དེ་ལྟར་ཀུན་རྫོབ་ཀྱི་ངོས་ནས་སྔགས་ཀྱི་ལྟ་བ་མདོ་ལས་འཕགས་པའི་རྒྱུ་མཚན་གྱིས། དེ་ཉིད་ཀྱི་སྣང་གཞི་སྟོང་ཉིད་ཀྱང་སྤྲོས་བྲལ་ཡིན་པ་ཙམ་དུ་འདྲ་ཡང་། འདིར་དོན་དམ་དཀོར་བདུན་ངོ་བོ་ཉིད་དུ་ལྷུན་གྱིས་གྲུབ་པའི་རྣམ་ཀུན་མཆོག་ལྡན་གྱི་སྟོང་ཉིད་ལ་འདོད་པས་ཁྱད་པར་ཤིན་ཏུ་ཆེའོ། །གལ་ཏེ་ཁྱེད་ཅག་གི་རྒྱུ་རྒྱུད་དེ་རིག་པ་འགྱུར་མེད་ལ་དེ་བཞིན་ཉིད་དུ་བྱེད་པར་འདུག་པས། དེ་འདྲ་དེ་འཁོར་ལོ་ཐ་མའི་ངེས་དོན་གྱི་མདོ་ཟབ་མོ་རྣམས་དང་། དེའི་དགོངས་འགྲེལ་རྒྱུད་བླ་མ་སོགས་ལས་ཀྱང་འབྱུང་བས་རྟོགས་བྱའི་ཡུལ་ལ་ཁྱད་མེད་དམ་ཞེ་ན། རིག་པ་འགྱུར་མེད་ལ་རྒྱུ་རྒྱུད་བྱེད་པ་འཁོར་ལོ་ཐ་མ་ནས་གསུངས་པ་དང་འདྲ་བ་བདེན་མོད་ཀྱི། ད་དུང་དེས་སྔགས་ཀྱི་ཐུན་མོང་མིན་པའི་ལྟ་བ་གཏན་ལ་ཕེབས་པར་མི་འགྱུར་ཏེ། དེ་བཞིན་ཉིད་དེ་བླ་ན་མེད་པའི་རྒྱུད་འདིར་རྒྱུ་རྒྱུད་དུ་འཇོག་པའི་ཚེ་ན་ལྷན་ཅིག་སྐྱེས་པ་མི་འགྱུར་བའི་བདེ་བ་ཆེན་པོའི་རང་བཞིན་དུ་བྱས་པ་ནི་སྔགས་ཀྱི་ཁྱད་ཆོས་སུ་དེ་བཞིན་གཤེགས་པ་སྲས་བཅས་བཞེད་པའི་ཕྱིར་ཏེ། རྡོ་རྗེ་མེ་ལོང་ལས། ལུས་ཅན་སྙིང་ལ་གང་གནས་པ། །རང་བྱུང་ཟག་མེད་ཡེ་ཤེས་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུའི་རང་བཞིན་ཡིན། །ཞེས་དང་། དུས་འཁོར་ལས། དེས་ན་གཙོ་བོས་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་དག་ནི་སྔགས་ཀྱི་ཐེག་པར་བསྟན། ཞེས་གསུངས། དེ་ཡང་གཉིས་སྣང་འཁོར་བའི་ཆོས་འདི་རྣམས་ཐག་ཁྲའི་སྦྲུལ་ལྟར་མེད་སྣང་གློ་བུར་བ་དང་། དེའི་སྣང་གཞི་གནས་ལུགས་དེ་བཞིན་ཉིད་ཡིན་པའི་གནད་ཀྱིས། རྟོག་ཚོགས་སྐུ་དང་ཡེ་ཤེས་ཀྱི་དཀྱིལ་འཁོར་དུ་དག་པར་གསུངས་པ་ཡང་། ཕུང་སོགས་སྣང་གཞི་དེ་བཞིན་ཉིད་ཀྱི་རྩལ་གཉུག་མ་སྟེ། ཤིན་ཏུ་ཕྲ་བའི་ཡེ་ཤེས་ཀྱི་རྩ་དང་། ཡེ་ཤེས་ཀྱི་རླུང་དང་། ཡེ་ཤེས་ཀྱི་ཁམས་ཞེས་སམ། ཡང་ན་ས་ཆུ་གཉིས། མེ་རླུང་གཉིས་མཁའ་སེམས་གཉིས་ཟུང་དུ་འཇུག་པ་རྣམས་རིམ་པར་ཡེ་ནས་སྐུ་གསུམ་རྡོ་རྗེ་གསུམ་གྱི་ངོ་བོར་གཞན་གྱིས་མ་བཙལ་བར་ལྷུན་གྱིས་གྲུབ་པ་དང་། ཁམས་ལྔའི་དྭངས་མ་ཡེ་ཇི་བཞིན་རིགས་ལྔ་དང་། ཡེ་ཤེས་ཀྱི་ཁམས་རིགས་དྲུག་པའི་བདག་ཉིད་དུ་དག་པས་ལྷའི་བདག་ཉིད་དུ་བཞུགས་པ་གང་ཡིན་པ་སྟེ། ལམ་རིམ་དུ། ཕུང་པོ་ཁམས་དང་སྐྱེ་མཆེད་རྣམས། །གཞི་རྫོགས་ཕྱག་རྒྱ་མ་འདྲེས་གསལ། །ཅིར་ཡང་འགྱུར་ཞིང་ཅི་ཡང་འགྲུབ། །ཅེས་སོ། །ཞེས་རྒྱལ་སྲས་རིན་པོ་ཆེ་པདྨ་འགྱུར་མེད་རྒྱ་མཚོས་གསུངས་སོ། །དེས་ན་བླ་མེད་ཀྱི་རྒྱུད་རྣམས་སུ་སྒོ་གསུམ་རགས་ཕྲ་ཤིན་ཏུ་ཕྲ་བའི་སྒོ་གསུམ་དུ་ཕྱེ་བའི་ཤིན་ཏུ་ཕྲ་བའི་སྒོ་གསུམ་དང་མི་ཤིགས་པའི་ཐིག་ལེ་སོགས་དོན་གཅིག་སྟེ། དེ་ནི་ཁམས་དྲུག་གི་དྭངས་མ་དབྱེར་མེད་ཅིང་འབྲལ་མི་ཤེས་པ་འོད་གསལ་གཉུག་མའི་སེམས་དང་རོ་གཅིག་པ་སྟེ། ཤིན་ཏུ་ཕྲ་བའི་རླུང་དེ་ལ་ཡེ་ཤེས་ལྔའི་ཆ་འཛིན་པ་འོད་ལྔའི་གཏིང་མདངས་ཅན་དུ་ཡོད་པ་ཕྲ་རགས་ཀྱི་རླུང་སེམས་ཐམས་ཅད་གང་ལས་མཆེད་ཅིང་གང་དུ་སྡུད་པའི་གཞི་སྟེ། དེ་ལ་རྩོལ་བཅས་རླུང་གི་རྣལ་འབྱོར་དང་རྩོལ་མེད་རྫོགས་ཆེན་གྱི་རྣལ་འབྱོར་གང་རུང་གིས་གནད་དུ་བསྣུན་པས་སྒྲིབ་བྲལ་དུ་གྱུར་པ་ན་ལམ་དུས་སུ་སྒྱུ་ལུས་དང་སྟོང་གཟུགས་ཀྱི་ལྷ་སྐུ་འཆར་ཞིང་འབྲས་དུས་སུ་རང་སྣང་ལོངས་སྐུ་ཆེན་པོ་དང་གཞན་སྣང་ཕྱེད་སྤྲུལ་སོགས་འ ཆར་གཞི་བྱེད་པ་སྟེ། དེས་ན་ཤིན་ཏུ་ཕྲ་བའི་སྒོ་གསུམ་ནི་སྦྱང་གཞི་དང་། ཕྲ་བའི་ཡིད་ལུས་རླུང་སེམས་ཙམ་དང་རགས་པའི་སྒོ་གསུམ་ནི་སྦྱང་བྱ་ཡིན་པས་གནད་འདི་གོ་ན་འཁོར་ལོ་ཐ་མའི་མདོའི་དགོངས་དོན་རྒྱུད་བླ་སོགས་ནས་གསུངས་པ་དང་འགལ་མེད་དོན་གཅིག་ཏུ་འབབ་པའང་ཡིན་ནོ། །ཚུལ་ཁྲིམས་ནི། གསང་སྔགས་ཕྱི་འགྱུར་པ་རྣམས་བསྲུང་བྱའི་དམ་ཚིག བླ་མ་སྨོད་པ། བདེ་གཤེགས་བཀའ་འདས། མཆེད་ལ་འཁུ་བ། བྱམས་པ་གཏོང་བ། སྨོན་སེམས་གཏོང་བ། གྲུབ་མཐའ་སྨོད་པ། གསང་བ་སྒྲོགས་པ། ཕུང་པོ་ལ་བརྙས་པ། རང་བཞིན་དག་པའི་ཆོས་ལ་སོམ་ཉི་ཟ་བ། ཞིང་བཅུ་མི་སྒྲོལ་བ། དོན་དམ་ལ་རྟོག་དཔྱོད་ཀྱིས་འཇལ་བ། དད་ལྡན་གྱི་སེམས་སུན་འབྱིན་པ། སྐབས་སུ་བབས་པའི་དམ་ཚིག་གི་རྫས་མི་བརྟེན་པ། ཤེས་རབ་མ་ལ་སྨོད་པ་སྟེ་རྩ་ལྟུང་བཅུ་བཞི། མ་སྨིན་པའི་རིགས་མ་བསྟེན་པ། ཚོགས་འཁོར་གྱི་དུས་སུ་ཀྱལ་ཀའི་རྩོད་པ། མཚན་ཉིད་མེད་པའི་ཡུལ་ལས་བདུད་རྩི་ལེན་པ། སྣོད་ལྡན་ལ་གསང་སྔགས་མི་སྟོན་པ། དད་ལྡན་ལ་ཆོས་མི་སྟོན་པ། ཉན་ཐོས་ནང་དུ་ཞག་བདུན་བསྡད་པ། ང་རྒྱལ་གྱིས་སྔགས་པར་རློམ་པ། སྣོད་མིན་ལ་ཆོས་བཤད་པ་སྟེ་ཡན་ལག་གི་ལྟུང་བ་བརྒྱད་རྣམས་དང་། སྤྱོད་བྱའི་དམ་ཚིག་ཤ་ལྔ་བདུད་རྩི་ལྔའི་རང་བཞིན་ཤེས་ནས་སྤྱོད་པ་གཉིས་སུ་བཞེད། སྔ་འགྱུར་རང་སྐད་དུ། རྣལ་འབྱོར་ཆེན་པོའི་དམ་ཚིག་ཉི་ཤུ་རྩ་བརྒྱད་གསུངས་ཏེ། ཡང་འབྱེད་འཕྲུལ་ལྡེ་ལས། རྣལ་འབྱོར་ཆེན་པོའི་བསྲུང་མཚམས་ནི། །རྩ་བའི་དམ་ཚིག་གསུམ་པ་དང་། །ཡན་ལག་ཉི་ཤུ་རྩ་ལྔ་བསྲུང་། །ཞེས་གསུངས་ཏེ། བླ་མ་དང་མཆེད་ལ་གུས་པ་སྐུ། སྔགས་དང་ཕྱག་རྒྱ་ལ་བརྩོན་པ་གསུང་། བླ་མེད་བྱང་ཆུབ་ཀྱི་སེམས་མི་སྤོང་ཞིང་གསང་བ་སྲུང་བ་ཐུགས་ཀྱི་དམ་ཚིག་སྟེ་རྩ་བ་གསུམ། ཏ་ན་ག་ན་མ་བྱིན་ལེན་དང་རྫུན་ཚིག་བརླང་སྟེ་ཐབས་ཀྱིས་ཟིན་པའི་སྒོ་ནས་སྤྱད་བྱ་ལྔ། ཆགས་སྡང་གཏི་མུག་ང་རྒྱལ་ཕྲག་དོག་སྟེ། ཡེ་ཤེས་ལྔའི་རང་བཞིན་ཡིན་པས་མི་སྤོང་བ་ལྔ། དྲི་ཆེན་དྲི་ཆུ་བྱང་སེམས་དཀར་དམར་མཾ་ས་སྟེ། གྲུབ་པ་བཞི་དང་ཡིན་པ་གསུམ་གྱི་གྲུབ་པ་བཞི་ནི། ཆོས་ཉིད་ངོ་བོས་གྲུབ་པ། ཆོས་ཅན་རང་བཞིན་གྱིས་གྲུབ་པ། ནུས་པའི་མཐུས་གྲུབ་པ། བྱིན་གྱིས་བརླབས་ཀྱིས་གྲུབ་པའོ། །ཡིན་པ་གསུམ་ནི། ནད་ལྔ་སེལ་བའི་སྨན་ཡིན་པ། ཐུན་མོང་གི་དངོས་གྲུབ་སྒྲུབ་པའི་དམ་རྫས་ཡིན་པ། རིགས་ལྔ་ཡེ་ཤེས་ལྔ་ཡི་རང་བཞིན་ཡིན་པ་རྣམས་སོ། །མཆན། དབང་གིས་དང་དུ་བླང་བྱ་ལྔ། ཕུང་པོ་འབྱུང་བ་ཡུལ་དབང་པོ་ཁ་དོག་རྣམས་ལྷར་ཤེས་པ་ཤེས་བྱ་ལྔ། དེ་བཞིན་གཤེགས་པ་དང་། རྡོ་རྗེ་དང་། རིན་ཆེན་དང་། པདྨ་དང་། ལས་ཀྱི་རིགས་ཏེ་རིགས་ལྔ་པོ་སྒྲུབ་པ་བསྒྲུབ་བྱ་ལྔ་སྟེ། ཡན་ལག་གི་དམ་ཚིག་ཉེར་ལྔའོ། །ཁྱད་པར་གསང་བ་སྒྱུ་འཕྲུལ་གྱི་ལུགས་ལྟར་ན། བླ་མེད་མི་སྤོང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །ཞེས་རྩ་བའི་དམ་ཚིག་ལྔ་དང་། དུག་ལྔ་མི་སྤོང་བ་དང་། བདུད་རྩི་ལྔ་མི་འདོར་བ་སྟེ། ཡན་ལག་གི་དམ་ཚིག་བཅུ་བཅས་བཅོ་ལྔ། དེ་དག་ལས་ཀྱང་སྤྲོོས་ན་སུམ་བརྒྱ་དྲུག་ཅུ་ལ་སོགས་པའོ། །སྒོམ་པ་ལ་གཉིས། སྒྲུབ་སྡེ་གཙོ་བོར་བྱས་པ་དང་། རྒྱུད་སྡེ་གཙོ་བོར་བྱས་པའི་ལུགས་གཉིས། དང་པོ། འཇམ་དཔལ་སྐུ་འཁོར་ལོ་བཞིའི་དགོངས་པ་ལ་བརྟེན་ནས་སྒྲུབ་པ། པདྨ་གསུང་རྟ་སྐད་ཐེངས་གསུམ་གྱི་དགོངས་པ་ལ་བརྟེན་ནས་སྒྲུབ་པ། ཡང་དག་ཐུགས་རུ་ལུ་འབྲུ་བརྒྱད་ཀྱི་དགོངས་པ་ལ་བརྟེན་ནས་སྒྲུབ་པ། ཆེ་མཆོག་ཡོན་ཏན་བདུད་རྩི་རྣམ་དག་གི་དགོངས་པ་ལ་བརྟེན་ནས་སྒྲུབ་པ། ཕུར་པ་ཕྲིན་ལས་ཐལ་འབྱིན་རྣམ་པ་བཞིའི་དགོངས་པ་ལ་བརྟེན་ནས་སྒྲུབ་པ་སྟེ། ཡེ་ཤེས་ལྷ་ཡི་སྒྲུབ་ལུགས་ལྔ་དང་། མ་མོ་རྦོད་གཏོང་རྩ་རླུང་ཐིག་ལེའི་དགོངས་པ་ལ་བརྟེན་ནས་སྒྲུབ་པ། འཇིག་རྟེན་མཆོད་བསྟོད་མཆོད་བསྟོད་བརྟེན་གསུམ་ཀྱི་དགོངས་པ་ལ་བརྟེན་ནས་སྒྲུབ་པ། དམོད་པ་དྲག་སྔགས་འབོད་རྦད་བསད་གསུམ་གྱི་དགོངས་པ་ལ་བརྟེན་ནས་སྒྲུབ་པ་སྟེ། ཐུན་མོང་གི་སྒྲུབ་ལུགས་གསུམ་བཅས་བརྒྱད་དང་། བླ་མ་རིག་འཛིན་བསྙེན་སྒྲུབ་རྣམ་པ་བཞིའི་དགོངས་པ་ལ་བརྟེན་ནས་སྒྲུབ་པའི་ཚུལ་ཏེ། དེ་རྣམས་ནི་ཞིབ་པར་ཀུན་མཁྱེན་བླ་མ་འཇམ་དཔལ་དགྱེས་པས་མཛད་པའི་བཀའ་བརྒྱད་རྣམ་བཤད་ཆེན་མོ་ལས་ཤེས་པར་བྱའོ། །གཉིས་པ་ནི། སྤྱིར་མ་ཧཱ་ཡོ་ག་ལའང་ཕ་མ་གཉིས་མེད་ཀྱི་རྒྱུད་གསུམ་གྱི་དབྱེ་བས། གསང་འདུས་ལ་སོགས་པ་ཕ་རྒྱུད་དུ་བསྐྱེད་རིམ་ཐབས་ཀྱི་ཆ་དང་། དེའི་རྫོགས་རིམ་ཀྱང་རླུང་གཙོ་བོར་བྱེད་པས། གསལ་སྟོང་རྣམ་པར་མི་རྟོག་པའི་ཚུལ་གྱིས་ཉམས་སུ་ལེན་པར་འདོད། བདེ་དགྱེས་ཡང་དག་སོགས་མ་རྒྱུད་རྣམས་སུ་བསྐྱེད་རིམ་གྱི་སྤྲོས་པ་ཤས་ཆུང་ཞིང་། ཤེས་རབ་རྫོགས་པའི་རིམ་པ་ཁམས་བྱང་ཆུབ་ཀྱི་སེམས་ཐིག་ལེ་གཙོ་བོར་བྱེད་པའི་བདེ་སྟོང་རྣམ་པར་མི་རྟོག་པའི་ཚུལ་གྱིས་ཉམས་སུ་ལེན་པར་འདོད། སྒྱུ་འཕྲུལ་དྲྭ་བ་སོགས་མ་ནིང་གི་རྒྱུད་རྣམས་སུ་བསྐྱེད་རྫོགས་ཟུང་དུ་འཇུག་ཅིང་། དེའང་རྫོགས་རིམ་རྩ་ཐིག་རླུང་གསུམ་ལས་སྐྱེས་པའི་བདེ་གསལ་མི་རྟོག་པའི་ཡེ་ཤེས་དང་། ཁྱད་པར་འོད་གསལ་ཡེ་ཤེས་ཆེན་པོ་ལ་གཙོ་བོར་བྱེད་པའི་ཚུལ་གྱིས་ཉམས་སུ་ལེན་པར་འདོད་དོ། །སྐབས་འདིར་གསང་བ་སྒྱུ་འཕྲུལ་གྱི་ལུགས་ཉིད་མདོ་ཙམ་བཤད་ན། བཤད་རྒྱུད་རྒྱ་མཚོ་ལས། གྲོལ་ལམ་ཐབས་སུ་རྣམ་པར་བསྟན། །ཞེས་པས་སྤྱིར་ཐབས་གྲོལ་གྱི་ལམ་གཉིས་གསུངས་ཤིང་། དེ་ཡང་རིམ་གསུམ་ལས། མཚན་མ་སྒོམ་པའི་རིམ་པ་དང་། །དེ་བཞིན་ཉིད་ནི་སྒོམ་པ་ཡི། །བྱེ་བྲག་རྣམ་པ་གཉིས་སུ་གསུངས། །ཞེས་པས་ཉམས་ལེན་ལ། མཚན་བཅས་དང་། མཚན་མེད་གཉིས་ལས། དང་པོ་ལ་བསྐྱེད་རྫོགས་གཉིས་ཀྱི། དང་པོ་བསྐྱེད་རིམ་ནི། གྲོལ་ལམ་སྟེ། ཡེ་ཤེས་རྫོགས་པའི་དཀྱིལ་འཁོར་ལ། །ཐོས་བསམ་སྒོམ་པའི་མཉམ་སྦྱོར་གྱིས། །རང་བྱུང་ཀུན་ངམ་ལྷུན་གྱིས་གྲུབ། །ཅེས་པས། གཙོ་བོར་ཤེས་རབ་རྣམ་གསུམ་གྱི་སྒོ་ནས་རང་རྒྱུད་ཀྱི་འཆིང་བ་ཆོས་ཉིད་དུ་གྲོལ་བར་བྱེད་པ་སྟེ། རིན་པོ་ཆེ་ཀོ་སྟུ་བྷ་དང་ལྷན་ཅིག་བཞག་པའི་རྡོའི་ཁམས་རིམ་གྱིས་གསེར་དུ་འགྱུར་བ་བཞིན་ཏེ་ཐབས་ལམ་ལ་ལྟོས་ནས་རིང་བའི་ལམ་དུ་བཞག་སྟེ། དབྱེ་ན་ལམ་རིམ་ལས། རིང་བའང་རིམ་དང་ཅིག་ཅར་བ། །ཞེས་པས་དབང་པོ་ཡང་རབ་ཨིནྡྲ་བྷུ་ཏི་ལྟ་བུ་དབང་དུས་སུ་གྲོལ་བ་ཁ་ཅིག་དབྱེར་མེད་ཆིག་ཆོད་དུ་རྟོགས་གོམས་མཐར་ཕྱིན་པར་བྱེད་པ་ཡོད་དེ་ཅིག་ཅར་བ་ཞེས་བྱ་ཞིང་། ཡང་རིམ་གྱིས་རྟོགས་གོམས་མཐར་ཕྱིན་པར་བྱེད་པ་ནི་རིམ་གྱིས་པ་སྟེ། དེའི་ལམ་ནི་རྒྱུད་ལས། ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་པས། རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་ངེ་འཛིན། ལམ་གྱུར་གྱི་འབྲས་བུ་རིག་འཛིན་བཞི་སྟེ་གསུམ་ལས། དང་པོ་ནི་གོང་དུ་སྨོས་ཟིན་ལ། གཉིས་པ་རྐྱེན་འཇུག་པའི་མཚན་ཉིད་ནི། ཏིང་ངེ་འཛིན་གསུམ་ལ་བརྟེན་ནས་དཀྱིལ་འཁོར་རིམ་གྱིས་བསྐྱེད་པ་གཙོ་བོར་བྱེད་པའི་སྒོ་ནས་ལྷ་རྟོག་དབྱེར་མེད་དུ་བསྒོམས་པའི་ཉམས་ལེན། དེ་ལའང་མོས་སྒོམ་དང་། ངེས་རྫོགས་གཉིས་ལས། དང་པོ་ནི་ཏིང་ངེ་འཛིན་ལ་བརྟན་པ་མ་ཐོབ་ཀྱང་དོན་སྤྱིའི་རྣམ་པ་ཙམ་དེ་མོས་པ་ལམ་བྱེད་ཀྱིས་སྒོམ་པ་ནུབ་གཅིག་ལ་ཆོ་གའི་ཡན་ལག་ཚང་བ་ཉམས་སུ་ལེན་པ་ལྟ་བུ་སྟེ། འདི་ལྟར་སྒོམ་པའི་ཚེ་ཡང་། ཏིང་ངེ་འཛིན་གསུམ་གྱིས་བསྐྱེད་རིམ་གྱི་ཁོག་ཕུབ་པ། ཇི་ལྟར་བསྐྱེད་པའི་ངོ་བོར་དག་རྫོགས་སྨིན་གསུམ་ཚང་བ། དེ་ལྟར་བསྐྱེད་པ་དེའང་སྲོག་ལྡོམ་གཟེར་བཞིའི་རྒྱས་ཐེབ་པ་ཞིག་ནི་བསྐྱེད་རིམ་གྱི་གནད་ཡིན་པས་ཅིས་ཀྱང་གལ་ཆེའོ། །འདི་ལ་བསྙེན་སྒྲུབ་བཞིའི་ཐ་སྙད་སྦྱོར་ན། ཕུར་པ་གསང་རྒྱུད་ལས། ཏིང་འཛིན་གསུམ་བསྐྱེད་བསྙེན་པ་ཡིན། །བདག་ཉིད་ལྷར་བསྐྱེད་ཉེ་བསྙེན་ཏེ། །ཡུམ་བསྐྱེད་སྒྲུབ་པར་ཤེས་པར་བྱ། །གཞན་རྣམས་སྒྲུབ་པ་ཆེན་པོ་ཡིན། །ཞེས་གསུངས་པས། ཏིང་འཛིན་གསུམ་བསྒོམས་པ་ཡན་ཆད་བསྙེན་པ། རང་ལྷ་གཙོ་བོར་བསྒོམས་པ་ཉེ་བསྙེན། ཡུམ་བསྒོམས་ཏེ་མཁའ་གསང་བརླབས་པ་དང་འཁོར་གྱི་ལྷ་ཚང་བར་བསྒོམས་པ་སྒྲུབ་པ། དབང་བསྐུར་རྒྱས་གདབ་སོགས་ཆོ་གའི་ཡན་ལག་གཞན་རྣམས་སྒྲུབ་པ་ཆེན་པོའོ། །གཉིས་པ་ནི། རིམ་པ་གཉིས་པོའི་ཏིང་ངེ་འཛིན་ཉམས་ལྔ་མཐར་ཕྱིན་གྱི་བར་དུ་སློབ་པ་སྟེ། བི་མའི་ཕྱག་རྒྱ་བསམ་གཏན་གྱི་འགྲེལ་པ་ལས། གཡོ་ཐོབ་གོམས་བརྟན་མཐར་ཕྱིན་ལྔ། །བསམ་གཏན་ཉམས་ཀྱི་སྐྱེ་ཚུལ་ཡིན། །ཞེས་གསུངས་པས། དང་པོ་གཡོ་བའི་ཉམས་ནི། དཔེ་རི་གཟར་གྱི་འབབ་ཆུ་ལྟར་སེམས་སྐད་ཅིག་ཀྱང་མི་གནས་པར་རྣམ་རྟོག་སྔ་མ་བས་མང་དུ་སོང་བ་ལྟ་བུ་སྟེ་རྣམ་རྟོག་ངོས་ཟིན་པའི་ཉམས་སོ། །གཉིས་པ་ཐོབ་པའི་ཉམས་ནི། དཔེར་རོང་ཁུང་དོག་པོའི་འབབ་ཆུ་ལྟར་རྣམ་རྟོག་འཕྲོ་འདུ་ཞི་ནས་ཡུད་ཙམ་རེ་རྟོག་མེད་དུ་ཞི་མལ་ལེ་གནས་པ་ཞིག་འབྱུང་སྟེ་རྣམ་རྟོག་ངལ་སོས་པའི་ཉམས་སོ། །གསུམ་པ་གོམས་པའི་ཉམས་ནི། དཔེ་གཡོ་འགུལ་མང་པོ་བྱེད་མི་ནུས་པའི་རྒན་པོའི་སྤྱོད་པ་ལྟར། ཕལ་ཆེར་རྟོག་མེད་དུ་གནས་པ་ལས་རེས་འགའ་རྟོག་པ་བན་བུན་ཙམ་རེ་འབྱུང་བ་རྣམ་རྟོག་ཐང་ཆད་པའི་ཉམས་སོ། །བཞི་པ་བརྟན་པའི་ཉམས་ནི། དཔེ་མཚོ་ཆུང་བསིར་བུས་བསྐྱོད་པ་ལྟར། ཕལ་ཆེར་རྟོག་མེད་རྒྱ་འབྱམས་སུ་གནས་པ་ལས་རྐྱེན་དྲག་པོ་རེས་ཅུང་ཟད་གཡོ་བ་འབྱུང་སྟེ་རྣམ་རྟོག་གིས་བསྐྱོད་དུ་མེད་པའི་ཉམས་སོ། །ལྔ་པ་མཐར་ཕྱིན་པའི་ཉམས་ནི། དཔེ་རྒྱ་མཚོ་རླབས་དང་བྲལ་བའམ་རི་བོ་ཆེན་པོ་ལྟར་གནས་པ་ལ་རྐྱེན་གང་གིས་ཀྱང་གནོད་མི་ནུས་པར་མ་ཟད་སླར་ལ་བོགས་འབྱིན་ཞིང་བཏང་འགྲོ་བཞག་སྡོད་རང་དབང་དུ་འབྱོར་པས་མཐར་ཕྱིན་རང་དབང་འབྱོར་བའི་ཉམས་ཞེས་བྱའོ། །དེ་ལྟ་བུའི་ཚུལ་གྱིས་བསྒོམ་བྱ་དངོས་ལ། སྤྱིར་བསྐྱེད་རིམ་ནི། སྦྱང་བྱ་འཁོར་བའི་ཆོས་སྣ་ཚོགས་པར་སྣང་བ་འདི་དག་སྲིད་པར་སྐྱེ་བར་བླང་བ་ལ་བརྟེན་ནས་འཆར་བས་འཁོར་བའི་ཆོས་ཀྱི་གཙོ་བོར་སྐྱེ་གནས་བཞིའི་བག་ཆགས་སྦྱོང་བ་དང་བསྟུན་ནས། བསྐྱེད་རིམ་སྒོམ་ཚུལ་བཞི་སྟེ། སྒྱུ་འཕྲུལ་དྲྭ་བ་ལས། སྐྱེ་གནས་བཞི་པོ་དག་བྱའི་ཕྱིར། །བསྐྱེད་པའང་དེ་བཞིན་རྣམ་པ་བཞི། །སྤྲོས་བཅས་སྤྲོས་པ་མེད་པ་དང་། །ཤིན་ཏུ་སྤྲོས་པ་མེད་བཞིའོ། །ཞེས་པས་སྒོང་སྐྱེས་སྦྱོང་བྱེད་ནི། དབང་བརྟུལ་སྤྲོས་པ་ཅན་གྱི་དབང་དུ་བྱས་ཏེ། དཀྱིལ་འཁོར་གྱི་འཁོར་ལོ་བདེ་ཆེན་བྱང་ཆུབ་སེམས་ཀྱི་ངོ་བོར་ཞུ་བའི་འོད་ཀྱི་ཐིག་ལེ་ལས་ཞུ་བ་གླུས་བསྐུལ་གྱིས་སླར་བཞེངས་ཏེ་དཀྱིལ་འཁོར་གྱི་འཁོར་ལོ་སྤྲོ་བ་བདག་སྲས་གཞན་སྲས་ཀྱི་ཆོ་ག་དང་། ཉི་ཟླའི་གའུ་ཁ་སྦྱོར་གྱི་ནང་དུ་རང་ལྷའི་ཕྱག་མཚན་ས་བོན་དང་བཅས་པ་ཞུ་ཞིང་འདྲེས་པ་ལས་སྤྲོ་བསྡུས་ལྷར་བསྐྱེད་པ་མངོན་བྱང་ལྔའི་ཆོ་ག་ལྟ་བུ་དང་། མངལ་སྐྱེས་སྦྱོང་བྱེད་དབང་པོ་དང་སྤྲོས་པ་འབྲིང་གི་ངོར། འཆི་སྲིད་བར་དོ་དང་བཅས་པ་དང་། དྲི་ཟའི་སེམས་ཁུ་ཁྲག་གི་དབུས་སུ་ཞུགས་པ་དང་། དེ་ལས་ལུས་གྲུབ་པ་དང་། བཙས་ནས་དབང་པོ་ཡུལ་ལ་སད་པ་བཞི་རིམ་པར་སྦྱོང་བྱེད། སྟོང་པ་ཉིད་དང་། ས་བོན་བསྡུས་པ་དང་། སྐུ་ཡོངས་སུ་རྫོགས་པ་དང་། གནས་གསུམ་སོགས་ལ་ཡི་གེ་འགོད་པ་སྟེ་རྡོ་རྗེའི་ཆོ་ག་བཞི་བསྐྱེད་དང་། ས་བོན་ཕྱག་མཚན་སྐུ་ཡོངས་རྫོགས་ཏེ་རྡོ་རྗེའི་ཆོ་ག་གསུམ་བསྐྱེད་དེ། དེ་ལྟར་སྒོང་སྐྱེས་དང་མངལ་སྐྱེས་སྦྱོང་བའི་སྒོམ་ཚུལ་གཉིས་པོ་འདི་མ་ཧཱ་ཡོ་གའི་བསྐྱེད་ཚུལ་ཡིན་ལ། དྲོད་གཤེར་སྦྱོང་བྱེད་སྤྲོས་མེད་ཨ་ནུའི་ལུགས་དང་། བརྫུས་སྐྱེས་སྦྱོང་བྱེད་ཤིན་ཏུ་སྤྲོས་མེད་ཨ་ཏིའི་བསྐྱེད་ཚུལ་གཉིས་ནི་འོག་ཏུ་རང་རང་གི་སྐབས་སུ་འཆད་པར་འགྱུར་ལ། འདི་བཞི་ཡང་རིམ་པར་ལས་དང་པོ་པ་དང་། ཅུང་ཟད་བརྟན་པ་དང་། བརྟན་པ་ཆེན་པོ་ཐོབ་པ་དང་ཤིན་ཏུ་བརྟན་པའི་གནས་སྐབས་ན་རང་རང་གི་བློ་ཚོད་དང་མཐུན་པར་བསྒོམ་པར་བྱ་བ་ཡིན་ནོ། །དེ་ཐམས་ཅད་ཀྱང་ཐ་མལ་གྱི་སྣང་ཞེན་སྦྱོང་བའི་ཕྱིར་སྒོམ་པ་ཡིན་པས། ཐ་མལ་གྱི་སྣང་བ་སྦྱོང་བྱེད་རྣམ་པ་གསལ་བ། བདག་ཏུ་ཞེན་པ་སྦྱོང་བྱེད་ང་རྒྱལ་བརྟན་པ། དངོས་པོར་ཞེན་པ་སྦྱོང་བྱེད་རྣམ་དག་དྲན་པ་གསུམ་དང་མ་བྲལ་བའི་ངང་། མར་འཁོར་བའི་གནས་སྐབས་ན་ལུས་ངག་ཡིད་གསུམ་བྱ་བ་དང་བཅས་པ་ཡར་སངས་རྒྱས་ཀྱི་སྐབས་ན་སྐུ་གསུང་ཐུགས་ཕྲིན་ལས་དང་བཅས་པ་དབྱེར་མེད་དུ་ལྟོ་སྦྱར་ནས་སྲོག་གཟེར་བུས་བསྡམས་པ་ལྟ་བུའི་གནད་དྲིལ་བ། སྐུ་བསྐྱེད་པ་ལྷ་ཡི་གཟེར། གསུང་བཟླས་བ་སྔགས་ཀྱི་གཟེར། ཐུགས་དགོངས་པ་མི་འགྱུར་བའི་གཟེར། བྱ་བྱེད་འཕྲོ་འདུ་ཕྲིན་ལས་ཀྱི་གཟེར་ཏེ་སྲོག་སྡོོམ་གྱི་གཟེར་བཞིས་ལྟ་སྒོམ་སྤྱོད་འབྲས་མཐར་དབྱུང་བ་ཅིས་ཀྱང་གལ་ཆེའོ། །དེ་ལྟར་ཤེས་པར་བྱས་ནས། འདིར་ནི་ལམ་རིམ་ལས། སྲིད་པ་རིམ་པར་སྨིན་ཚུལ་གྱིས། །འཇུག་པའི་ཡན་ལག་ལྔ་རུ་བཞག །གང་དག་དངོས་ཀུན་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེ་བའི་རིམ་གསུམ་གཉིས་མེད་དོན། །ཞེས་པས། འཆི་བར་སྐྱེ་གསུམ་གྱི་སྲིད་པ་ཅིག་ཅར་དུ་སྦྱོང་བའི་ལམ་རྫོགས་པར་སྟོན་པ་ལ། འཆི་བ་འོད་གསལ་དང་རྗེས་སུ་མཐུན་པའི་ལམ་སྟོང་པ་ཆེན་པོ། བར་དོ་དང་རྗེས་སུ་མཐུན་པའི་ལམ་སྙིང་རྗེ་སྒྱུ་མ། སྐྱེ་བའི་རིམ་པ་གསུམ་དང་རྗེས་སུ་མཐུན་པའི་ལམ་ཕྱག་རྒྱ་གཅིག་པ། ཕྱག་རྒྱ་སྤྲོས་བཅས། ཚོམ་བུ་ཚོགས་སྒྲུབ་སྟེ་ཟག་བཅས་ཚོགས་སྦྱོར་གྱི་ལམ་ལྔའོ། །དེ་ལའང་རགས་པ་བསྐྱེད་རིམ་དང་། ཕྲ་བ་རྫོགས་རིམ་གྱི་སྦྱོང་ཚུལ་གཉིས་ལས། དང་པོ་ནི་ལུས་ཅན་རྣམས་འཆི་འཕོ་བའི་ཚེ་ཕྱི་ནང་གི་ཐིམ་རིམ་རྣམས་རྫོགས་པའི་མཐར་འཆི་སྲིད་ཆོས་སྐུའི་འོད་གསལ་འཆར་བ། དེ་ཉིད་ལམ་དུ་ཁྱེར་བའི་ཕྱིར། སྣང་གྲགས་ཀྱིས་བསྡུས་པའི་ཆོས་ཐམས་ཅད་ཆོས་སྐུ་སྤྲོས་བྲལ་དེ་བཞིན་ཉིད་ཀྱི་ཏིང་ངེ་འཛིན་བསྒོམ་པ་དང་འོད་གསལ་དེ་ཉིད་ངོས་མ་ཟིན་པར་བར་དོའི་ཡིད་ལུས་སྒྱུ་མ་ལྟ་བུའི་གནས་སྐབས་གྱི་བག་ཆགས་སྦྱོང་བྱེད་དམིགས་པ་མེད་པའི་ཀུན་སྣང་གི་ཏིང་ངེ་འཛིན་གྱི་ངོ་བོ་སྙིང་རྗེ་ཆེན་པོ་མཁའ་ཁྱབ་ཏུ་བསྒོམ་ཞིང་། གཞི་དེ་ལས་བར་དོར་མ་གྲོལ་བར་མའི་མངལ་དུ་སྐྱེ་བ་བཟུང་བ་ནས་བཙས་པའི་བར་གྱི་བག་ཆགས་སྦྱོང་བྱེད་ཕྱག་རྒྱ་གཅིག་པ་ཕྲ་རགས་གཉིས་ཏེ། གང་དུ་སྐྱེ་བར་འགྱུར་བའི་གནས་ལ་སྲེད་པ་སྐྱེས་པའི་རྐྱེན་གྱིས་དེར་འཇུག་མ་རག་གི་བར་སྲིད་ཀྱི་གནས་སྐབས་སྦྱོང་བྱེད་ཕྲ་བ་རྒྱུའི་ཏིང་ངེ་འཛིན་གྱི་ངོ་བོ་ཡིག་འབྲུ། ས་ལེ། སིང་{སང} ངེ་། ལྷག་གེ། ལྷང་ངེ་བ་སྟེ་གསལ་བའི་ཚད་བཞི་དང་། མི་གཡོ། མི་འགྱུར། མངོན་པར་མི་འགྱུར། ཅིར་ཡང་སྒྱུར་དུ་བཏུབ་པ་སྟེ་བརྟན་པའི་ཚད་བཞི་བཅས་གསལ་བརྟན་གྱི་ཚད་བརྒྱད་དང་ལྡན་པ་ལ་བསླབ་པ་དང་། དེ་ཉིད་ཕ་མའིི་ཁུ་རྡུལ་གྱི་བར་དུ་ཞུགས་ནས་ཕྱི་རོལ་གྱི་དབང་པོ་ཡུལ་ལ་སད་ཀྱི་བར་གྱི་གནས་སྐབས་སྦྱོང་བྱེད་རགས་པ་ལྷ་སྐུ་ལ་བསླབ་པ་མངོན་བྱང་བཞི་དང་། ཆོ་ག་གསུམ་སོགས་ཀྱིས་བསྐྱེད་པ་སྐྱེ་གནས་རིགས་བཞིའི་ཚུལ་དང་མཐུན་པ་ལ་བསླབ་པ་དང་། བཙས་ནས་ནར་སོན་པའི་བར་གྱི་བག་ཆགས་སྦྱོང་བྱེད་ཕྱག་རྒྱ་སྤྲོས་བཅས་ལ་བསླབ་པ་ལའང་བཞི་སྟེ། ལམ་རིམ་ལས། འཁོར་ལོ་ཚོམ་བུ་གྲངས་ཞལ་ཕྱག །ཅེས་བཤད་པ་ལྟར་དཀྱིལ་འཁོར་སྤྲོ་བ། ཚོམ་བུ་སྤྲོ་བ། གྲངས་སྤྲོ་བ། ཞལ་ཕྱག་སྤྲོ་བ་སྟེ་བཞི་ལས། རིམ་བཞིན་ཞི་བ་དང་། ཁྲོ་བོའི་དཀྱིལ་འཁོར་རྒྱས་འབྲིང་བསྡུས་པ་དང་། ཚོམ་བུ་གཅིག་གསུམ་ལྔ་པ་དང་། གྲངས་ལའང་། ཞི་བ་ལ་སྟོང་དང་ཉི་ཁྲི་བཞི་སྟོང་དང་། བསམ་ཡས་ལྷུན་གྲུབ་རྣམས་དང་། ཁྲོ་བོ་ལའང་། སྟོང་བཞི་བརྒྱ་ལྔ་བཅུ་དང་། བདུན་ཁྲི་དྲུག་སྟོང་བརྒྱད་བརྒྱ་ལྔ་བཅུ་དང་། བསམ་ཡས་ལྷུན་གྲུབ་ལ་བསླབ་པ་རྣམས་དང་། ཞལ་ཕྱག་ཡང་རྒྱས་འབྲིང་བསྡུས་གསུམ་གྱི་ཚུལ་ལོ། །ནར་སོན་ནས་རྒན་པོའི་བར་གྱི་བག་ཆགས་སྦྱོང་བྱེད་ཚོམ་བུ་ཚོགས་ཀྱི་སྒྲུབ་ལ། གང་དུ་སྒྲུབ་པའི་གནས། གང་གི་ཚེ་སྒྲུབ་པའི་དུས། གང་ལ་བརྟེན་ནས་སྒྲུབ་པའི་ཡོ་བྱད། གང་གིས་སྒྲུབ་པའི་སྟོན་པ་དང་འཁོར། ཇི་ལྟར་སྒྲུབ་པའི་ཐབས་ཏེ་ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་ཞིང་། སྒྲུབ་པའི་དུས་ཀྱི་བསྙེན་སྒྲུབ་ཡན་ལག་བཞིས་གཞུང་བསྲངས་ཏེ། །ལམ་རིམ་ལས། ཟླ་གཅིག་ཕྱེད་ཞལ་ཉེ་བསྙེན་དང་། །ལྷ་གསལ་འཕྲོ་འདུས་སྣོད་དུ་རུང་། །བཅོ་ལྔ་མར་ཕྱེད་སྒྲུབ་པ་སྟེ། །འཕྲོ་འདུ་བསྣོལ་མས་བསྒྲུབ་པར་བྱ། །ཞག་གྲངས་ཚང་ནས་རྟགས་བྱུང་ན། །དངོས་གྲུབ་བཟླས་བྱ་སྒྲུབ་ཆེན་པོ། །ཞེས་པས་ཆ་རྐྱེན་རྣམས་ཚོགས་ནས་སྒྲུབ་པ་ལ་འཇུག་མ་ཐག་པ་ནི་བསྙེན་པ། ཞུགས་ནས་ཟླ་བ་ཕྱེད་ཡན་ཆད་ནི་ཉེ་བསྙེན་ཏེ། འདི་གཉིས་སུ་འོད་དཀར་པོའི་འཕྲོ་འདུ་བསྣོལ་མས་རྒྱུད་དག་པར་བྱེད་པ་དང་། ཐ་མའི་ཞག་གཅིག་མ་གཏོགས་པའི་ཕྱེད་མན་ཆད་ནི་སྒྲུབ་པ་སྟེ་འོད་དམར་པོའི་འཕྲོ་འདུས་ཀྱིས་དངོས་གྲུབ་བསྡུ་བ་དང་། ནུབ་ཐ་མར་འོད་ཟེར་མཐིང་ག་ཚུར་བསྡུ་བ་སོགས་ཀྱིས་སྲོད་ནམ་གུང་ཐོ་རེངས་གསུམ་གྱི་དུས་གནད་དང་བསྟུན་ཏེ་ལྷ་དང་གཟས་པོ་དང་གཟུངས་མ་གསུམ་ལས་དངོས་གྲུབ་ལེན་པ་ནི་སྒྲུབ་པ་ཆེན་པོ་སྟེ། འདི་ནི་ཟླ་བ་གཅིག་ལ་དཔེར་མཚོན་པའོ། །དེ་ལྟར་སྒྲུབ་པའི་འབྲས་བུ་རིག་འཛིན་འགྲུབ་པའི་དུས་བསྟན་པ་ནི། ལམ་རིམ་ལས། ཞག་ནི་སུམ་ཅུ་ཕྲག་དྲུག་གམ། །བཅུ་གཉིས་བཅུ་བཞི་བཅུ་དྲུག་གིས། །དབང་བསྒྱུར་རིགས་ཀྱི་དམ་པ་འགྲུབ། །ཅེས་གསུངས་པས་ཟླ་བ་དྲུག་སྤོག་ཆོག་དང་བཅས་པ་སོགས་ཀྱིས་དབང་པོའི་ཁྱད་པར་དང་མཐུན་པར་འདོད་གཟུགས་ཀྱི་རིག་འཛིན་གྲུབ་ནས་རིམ་གྱིས་ལམ་གོང་མ་ལ་སྦྱོར་བར་བྱེད་དོ། །དེ་ལྟར་ཟག་བཅས་ཀྱི་ལམ་ལྔ་པོ་དེས་མར་འཁོར་བ་དང་རྣམ་པ་མཐུན་པས་དེའི་བག་ཆགས་སྦྱོང་ཞིང་དག ཡར་སངས་རྒྱུས་སྐུ་གསུམ་དང་དེའི་མཛད་སྤྱོད་ཀྱི་རིགས་ཀྱི་ནུས་པ་གསོས་ཐེབས་པས་འབྲས་བུར་རྫོགས་པར་བྱེད། བར་དུ་ལམ་འོག་མས་གོང་མ་སྒོམ་རུང་གི་གཞི་བཏིང་བས་སྨིན་བྱེད་དུ་འགྲོ་བའི་ཐབས་སོ། །གཉིས་པ་ཕྲ་བ་རྫོགས་རིམ་གྱིས་སྦྱོང་ཚུལ་ཡང་། དེ་དང་རྣམ་པ་མཐུན་པས། བསམ་གཏན་གྱི་སྤྱོད་ལམ་དང་ལྡན་པས་རིག་པ་མ་བཅོས་པའི་ངང་དུ་སོ་མར་འཇོག་པ་རིག་པ་སྤྱི་བླུགས་དང་སྔར་ཐོས་བསམ་གྱི་ལྟ་བ་དྲན་པར་བྱས་ནས་དེའི་ངང་དུ་འཇོག་པ་མཐོང་བའི་རྗེས་ལ་འཇོག་པ་སྟེ། འཇོག་ཐབས་གཉིས་གང་རུང་གི་དོན་དམ་རྣམ་པར་མི་རྟོག་པའི་ཏིང་ངེ་འཛིན་ལ་མཉམ་པར་འཇོག་པ་ཉིན་མོའི་རྣལ་འབྱོར་དང་། མཚན་མོ་གཉིད་འཐུག་གི་འོད་གསལ་འཛིན་པའི་མན་ངག་གཉིས་སྦྲེལ་ཏེ། ཉིན་མཚན་ཁ་སྦྱོར་དུ་ཉམས་སུ་ལེན་པའི་སྒོ་ནས་ཉམས་ལྔ་མཐར་ཕྱིན་པར་བསླབ་པ་སྟོང་པ་ཆེན་པོ། སྟོང་ཆེན་འོད་གསལ་དེའི་ངང་དུ་སེམས་འགགས་པས། དུ་བ་སྨིག་རྒྱུ་མེ་ཁྱེར། མར་མེ་སོགས་སྟོང་གཟུགས་ཀྱི་སྣང་བ་ཤར་བ་ན་ཉིན་གྱི་རྣལ་འབྱོར་སད་པའི་སྣང་བ་དེ་དང་། མཚན་མོ་རྨི་ལམ་གྱི་སྣང་བ་ཐམས་ཅད་སྒྱུ་མ་ཆུ་ཟླ་ལྟར་མཐོང་བ་ལས་དམིགས་མེད་བདེ་ཆེན་གྱི་སྙིང་རྗེ་མ་འགགས་པར་ཤར་བ་ལ་གོམས་པར་བྱེད་པ་སྙིང་རྗེ་སྒྱུ་མ། སྣང་བ་རིས་མེད་ལས་སྙིང་རྗེ་ཆེན་པོའི་འཕེན་པ་དང་ཏིང་ངེ་འཛིན་གྱི་རྐྱེན་གྱིས་ཆུ་དྭངས་པ་ལ་གཟུགས་བརྙན་ཤར་བ་ལྟར་ཞུ་བདེ་དང་མཚུངས་ལྡན་དུ་བྱུང་བའི་ལྷ་སྐུ་ཕྱག་རྒྱ་གཅིག་པས་གང་ཤར་གྱིས་སྣང་བ་ཐམས་ཅད་ལ་རྒྱས་ཐེབས་པ་ཕྱག་རྒྱ་གཅིག་པ། སྔར་གྱི་ལྷ་སྣང་དེ་ལས་ཆེས་ཆེར་འཕེལ་བས་སྣང་བ་ཐམས་ཅད་ཟུང་འཇུག་གི་ལྷ་གཙོ་འཁོར་དང་ཚོམ་བུའི་རྣམ་པར་མངོན་སུམ་དུ་སྤྲོས་ཏེ་མ་འདྲེས་ཡོངས་རྫོགས་སུ་འཆར་བ་ལ་གོམས་པ་ཕྱག་རྒྱ་སྤྲོས་བཅས། ཚོམ་བུ་གཅིག་གསུམ་ལྔ་པ་གང་རུང་གི་སྒོ་ནས་སྤྲོས་བཅས་བསྐྱེད་རིམ་དང་ཕྱོགས་མཐུན་དུ་སྒྲུབ་པའམ། སྤྲོས་མེད་རྣལ་འབྱོར་ཕོ་མོ་གཙོ་བོ་ཡབ་ཡུམ་ཙམ་ཚོགས་པ་ལ་བརྟེན་པའམ། ཤིན་ཏུ་སྤྲོས་མེད་ནི་ཡབ་མི་འགྱུར་བའི་བདེ་ཆེན་ཉིད་ཡུམ་རྣམ་ཀུན་མཆོག་ལྡན་གྱི་སྟོང་པ་ཉིད་ཁ་སྦྱོར་གྱིས་སྒྲུབ་པ་ཚོམ་བུ་ཚོགས་སྒྲུབ་སྟེ། གང་ལྟར་ཡང་དབང་པོ་རབ་འབྲིང་ཐ་གསུམ་གྱི་དབྱེ་བས་ཟླ་བ་དྲུག་གམ་ལོ་གཅིག་དང་ཟླ་བ་གཉིས། ལོ་གཅིག་ཟླ་བ་བཞི་རྣམས་ཀྱིས་ཟག་མེད་ལ་དངོས་སུ་སྦྱོར་བར་བྱེད་དོ། །གསུམ་པ་ལམ་གྱུར་གྱི་འབྲས་བུ་རིག་འཛིན་ནི། དེ་ལྟར་བསྒོམས་པས་ཟག་པ་མེད་པའི་ལམ་མཐོང་སྒོམ་མཐར་ལམ་གསུམ་གྱིས་བསྡུས་པའི་རིག་འཛིན་བཞི་མངོན་དུ་བྱེད་པ་སྟེ། མཐོང་ལམ་ལ་བློའི་ནུས་སྟོབས་ཆེ་ཆུང་གིས་རྣམ་སྨིན་གྱི་ལུས་དྭངས་མའི་ལུས་སུ་མ་གྱུར་པ་རྣམ་སྨིན་རིག་འཛིན་དང་། དྭངས་མའི་ལུས་སུ་གྱུར་པ་ལམ་མཆོག་ཡོངས་རྫོགས་ཚེ་དབང་རིག་འཛིན་གཉིས་ཏེ། ལམ་ཆུང་ལས། ནུས་པ་ཐོབ་དང་མ་ཐོབ་པའི། །མཐོང་ལམ་གཉིས་སུ་འགྱུར་བ་ཡིན། །ཞེས་གསུངས། དེ་ལ་རྣམ་སྨིན་ནི། ལུས་རྣམ་སྨིན་ཤ་ཁྲག་གི་ཕུང་པོ་དང་མ་བྲལ་བ། ཡིད་འོད་གསལ་གྱི་ལྷ་སྐུར་སྨིན་པ། ཇི་ལྟར་འདོད་པ་བཞིན་ལུས་རྒྱ་དང་བྲལ་མ་ཐག་ཕྱག་རྒྱ་ཆེན་པོའི་རིག་འཛིན་ལ་སྦྱོར་ངེས་པ་སྟེ། ཆོས་གསུམ་དང་ལྡན་པའོ། །སྤྱོད་པ་ནི། བདག་དོན་དུ་བཀོད་པ་དཀྱིལ་འཁོར་གྱི་བྱ་བས་ཚོགས་གཉིས་རྫོགས་པར་བྱེད་ཅིང་། ཕྲིན་ལས་བཞིའི་སྒོ་ནས་གཞན་དོན་རྫོགས་པར་བྱེད། ཟག་མེད་ལྷའི་སྤྱན་རྣམ་པར་དག་པ་ལ་སོགས་པའི་ཡོན་ཏན་དང་ལྡན་ལ། གླིང་བཞི་པའི་འཇིག་རྟེན་ཙམ་དུ་སྐུས་དོན་མཛད་ཅིང་སྤྲུལ་གཟུགས་སྟོན་ཚུལ་ཚེ་དབང་དང་ཆ་འདྲ་བས་དོན་མཛད་དོ། །ཚེ་དབང་ནི། སེམས་འོད་གསལ་གྱི་ལྷ་སྐུར་སྨིན་ཅིང་ཕྲ་ཡང་ལ་སོགས་པའི་འཇའ་ལུས་ཀྱི་ཡོན་ཏན་ཁྱད་པར་ཅན་དང་ལྡན་པའི་རྡོ་རྗེའི་ལུས་ཅན་ཏེ། སྤྱིར་ཚེ་དབང་ལ་སྨན་གྱི་བཅུད་ལེན་ལ་བརྟེན་པའི་དང་། ཐིག་ལེ་དབབ་བཟུང་སོགས་ལ་བརྟེན་པའི་དང་། སྒྲོལ་མ་རླུང་ལ་བརྟེན་པའི་དང་། ལམ་མཆོག་ཡོངས་སུ་རྫོགས་པའི་ཚེ་དབང་དང་བཞི་ལས། འདི་ནི་ཕྱི་མ་སྟེ། ཟག་མེད་མཐོང་ལམ་གྱི་ཡེ་ཤེས་ཇི་ལྟ་བ་བཞིན་མངོན་སུམ་དུ་མཐོང་བའི་ཕྱིར། སྤྱོད་པ་ནི། བདག་དོན་དུ་ཀུན་འགྲོའི་དྲི་མ་སྦྱོང་ཞིང་། གཞན་དོན་དུ་ཆོ་འཕྲུལ་བཞི་དང་ཕྲིན་ལས་བཞི་སོགས་ཀྱི་དོན་མཛད། ཆ་ལུགས་མི་དང་འདོད་ལྷའི་གཅོ་བོའི་ཆ་བྱད་དུ་ཡང་སྟོན་མོད་ལྷ་མི་གཞན་ལས་ཁྱད་པར་དུ་འཕགས་པའོ། །མངོན་ཤེས་ཀྱི་ཡུལ་དོན་ཡང་། དབང་ཤེས་ཉི་ཤུ་རྩ་ལྔས་གླིང་བཞི་བྱེ་བ་ཕྲག་བརྒྱར་དུས་གཅིག་ཏུ་དོན་མཛད། ས་ལྷག་མ་དགུ་སྒོམ་ལམ་ཕྱག་རྒྱ་ཆེན་པོའི་རིག་འཛིན་གྱིས་བསྡུས་ཏེ། འདི་ལ་བཤད་ཚུལ་གཉིས་ཏེ། ལམ་རིམ་ལས། ཡེ་ཤེས་སྐུ་ཡི་ཆ་ལུགས་ཅན། །འབྱུང་བ་རྡོ་རྗེའི་ལུས་ལས་གྲོལ། །ཅེས་པས་སྔར་རང་ཉིད་ཀྱིས་གང་བསྒོམས་ཀྱི་ལྷག་པའི་ལྷ་རིགས་ལྔ་གང་ཡིན་གྱི་ཆ་ལུགས་འཛིན་པར་གསུངས་པ་དང་། ཡང་ན། རྡོ་རྗེ་འཁོར་ལོ་རིན་ཆེན་དང་། །པདྨ་རལ་གྲིའི་རིག་འཛིན་འགྱུར། །ཞེས་པས་ས་གཉིས་པ་ནས་ལྔ་པའི་བར་རྡོ་རྗེའི་རིག་འཛིན་ཞེས་བྱ་སྟེ། རྟོགས་པའི་ཡེ་ཤེས་རྡོ་རྗེ་ལྟ་བུས་རང་སའི་སྒྲིབ་པ་འཇོམས་པའི་ཕྱིར། ས་དྲུག་པ་ཤེར་ཕྱིན་ལ་གཙོ་བོར་སྤྱོད་ཅིང་ཆོས་ཀྱི་འཁོར་ལོ་བསྐོར་བའི་ཕྱིར་དང་། ས་བདུན་པའང་ཐབས་ལ་མཁས་པ་འཁོར་ལོ་ལྟར་གྱུར་པས་དེ་གཉིས་ལ་འཁོར་ལོའི་རིག་འཛིན། ས་བརྒྱད་པར་མི་རྟོག་ཡེ་ཤེས་ལ་དབང་བསྒྱུར་བས་རིན་པོ་ཆེའི་རིག་འཛིན། ས་དགུ་པར་ཆགས་པ་མེད་པས་ཞིང་སྦྱོང་ཞིང་འགྲོ་དོན་མཛད་པས་པདྨའི་རིག་འཛིན། ས་བཅུ་པར་ཕྲིན་ལས་ཕུན་སུམ་ཚོགས་པས་སེམས་ཅན་གྱི་དོན་དཔག་མེད་མཛད་པའི་ཕྱིར་རལ་གྲིའི་རིག་འཛིན་ཅེས་བྱའོ། །ཆ་བྱད་ཟུང་འཇུག་གི་ལྷ་སྐུ་མཚན་དཔེ་ཡོངས་སུ་རྫོགས་པའི་བདག་ཉིད་ཅན་བདག་དོན་དུ་ལྷན་ཅིག་གནས་པའི་སྒྲིབ་པ་སྦྱོང་ཞིང་། གཞན་དོན་དུ་རྔོན་པ་དང་སྨད་འཚོང་མ་ལ་སོགས་པ་གང་འདུལ་གྱི་སྤྲུལ་གཟུགས་སུ་སྟོན་པར་བྱེད་ཅིང་། མངོན་ཤེས་ཀྱི་ཡུལ་དོན་ཡང་། དབང་ཤེས་ཉི་ཤུ་རྩ་ལྔའི་ཡོན་ཏན་ཚེ་དབང་དང་འདྲ་ནའང་། འདིར་གསལ་བརྟན་གྱིས་ཁྱད་པར་དུ་བྱས་ཤིང་། ལོངས་སྐུའི་ཞིང་དང་མཉམ་པའི་འགྲོ་དོན་མཛད་དོ། །དེ་ལྟར་ས་གཉིས་པ་ནས་བཅུ་པའི་རྣམ་གྲོལ་ལམ་ཚུན་ཆད་ཕྱག་ཆེན་དུ་བསྡུས་ཤིང་། ས་བཅུའི་ཁྱད་པར་ལམ་མམ་མཐར་ལམ་ནི་ལྷུན་གྲུབ་རིག་འཛིན་ཏེ། ཡན་ལག་བདུན་དང་ལྡན་པའི་ཡེ་ཤེས་གོང་མའི་གཞིར་གྱུར་པའོ། །ཆ་ལུགས་ནི། སྐུ་ལྔ་ལྷུན་གྲུབ་རྡོ་རྗེ་འཆང་གི་ཆ་ལུགས་འཛིན་པ་སྟེ། དྲུག་པའི་རྒྱལ་ཚབ་མཛད་པ་པོ་གསང་བའི་བདག་པོ་བཞིན་ནོ། །སྤྱོད་ཚུལ་ནི། བདག་དོན་དུ་རྡོ་རྗེ་ལྟ་བུའི་ཏིང་ངེ་འཛིན་ཅེས་བྱ་བ་ནང་གི་མངོན་བྱང་གིས་ཤེས་སྒྲིབ་ཕྲ་བ་སྣང་གསུམ་གྱི་དྲི་མ་སྦྱོང་ཞིང་། གཞན་དོན་རྗེས་ཐོབ་ལ་སངས་རྒྱས་དང་ཆ་འདྲ་བར་འགྲོ་བའི་དོན་མཛད། སྤྲུལ་གཟུགས་ཀྱང་མཛད་པ་བཅུ་གཉིས་སོགས་མཆོག་གི་སྤྲུལ་སྐུ་དང་ཕྱོགས་མཐུན་དུ་སྟོན། མངོན་ཤེས་ཀྱི་ཡུལ་དོན་ཇི་སྙེད་མཁྱེན་པའི་ཡུལ་རྒྱལ་བ་ཉིད་དང་ཤས་ཆེར་འདྲ་བའི་ཕྱིར། ནམ་མཁས་ཁྱབ་ཚད་ཀྱི་དོན་ཡང་ཅི་རིགས་པར་མཛད་པའོ། །དེ་ཡང་རྒྱུའི་ཐེག་པའི་འཕགས་པ་རྣམས་དང་། རྣལ་འབྱོར་ཆེན་པོ་འདི་ཉིད་ཀྱི་རིག་པ་འཛིན་པ་རྣམས་མུ་ཚོད་མཚུངས་ཀྱང་དགོངས་པ་ལ་ཁྱད་པར་ཆེ་སྟེ། རྒྱུའི་ཐེག་པའི་ས་དང་པོ་དང་རྣམ་སྨིན་རིག་འཛིན་གཉིས་དགོངས་པ་མཉམ་ལ། རྒྱུའི་ས་བརྒྱད་པ་དང་ཚེ་དབང་། བཅུ་པ་དང་ཕྱག་ཆེན། མི་སློབ་པའི་ས་ཀུན་ཏུ་འོད་དང་ལྷུན་གྲུབ་རིག་འཛིན་གཉིས་དགོངས་པ་མཉམ་པའི་ཕྱིར་ཏེ། ལམ་ཆུང་ལས། དེ་ཡང་དང་པོ་དང་པོ་དང་། །སྐལ་མཉམ་གཉིས་པའི་རིགས་མཆོག་དེ། །བརྒྱད་པའི་སེམས་དཔར་སྐལ་བ་མཉམ། །གསུམ་པ་བཅུ་དང་སྐལ་མཉམ་མོད། །དགོངས་སྤྱོད་རྒྱ་མཚོས་ཁྱད་པར་འཕགས། །ཞེས་གསུངས་ཏེ་ལམ་རང་གི་ངོ་བོ་ཐབས་ཤེས་གཉིས་ཆར་ནས་འོག་མ་ལས་ཁྱད་པར་དུ་གྱུར་པའི་ཕྱིར་རོ། །འདི་ནི་བཀའ་སྡེ་ཟུར་པའི་བཞེད་པ་སྟེ། ཀུན་མཁྱེན་བླ་མ་ནི་ལམ་ལྔ་ཀ་རིག་འཛིན་བཞིས་བསྡུས་པར་བཞེད་དོ། །གཉིས་པ་རྫོགས་རིམ་ནི་ཐབས་ཀྱི་ལམ་སྟེ། རྒྱུད་ལས། ངོ་མཚར་ངན་འགྲོ་ཐར་པའི་ཐབས། །ཞེས་པས། གཙོ་བོར་ཐབས་ཀྱི་ཁྱད་པར་བརྟུལ་ཞུགས་ཀྱི་སྤྱོད་པ་རྨད་དུ་བྱུང་བའི་སྒོ་ནས་འབྲས་བུ་མྱུར་དུ་འགྲུབ་པར་བྱེད་པས་དུག་གསུམ་མ་སྤངས་ཐོག་རྫིས་ཀྱི་སྤྱོད་པའི་བརྟུལ་ཞུགས་གང་ཞིག ལྟ་བའི་གདེང་དང་ལྡན་པས་སྤྱད་ན་མི་འཆིང་བར་མ་ཟད་གྲོལ་བའི་འབྲས་བུ་མྱུར་དུ་ཐོབ་ལ། དེ་ལྟར་མ་ཡིན་པ་ཞིག་གིས་སྤྱད་ན་གྲོལ་བ་མི་ཐོབ་པར་མ་ཟད་ངན་སོང་དུ་ལྟུང་བའི་ཉེན་ཆེན་པོ་དང་ལྡན་པས་མཀྵི་ཀའི་སྦྱོར་བ་བཞིན་ཁེ་ཉེན་ཆེ་ཞིང་། དེ་ལྟ་བུའི་ཐབས་ལམ་དེ་ལའང་དབྱེ་ན། རིམ་གསུམ་ལས། གདམས་ངག་སྟེང་དང་འོག་གི་སྒོ། །ཞེས་པས་སྟེང་སྒོ་དང་འོག་སྒོ་གཉིས་སུ་ཡོད་པ་ལས། དང་པོ་དེ་ལའང་ཐུན་ཁྱད་གཉིས་ཀྱི། ཐུན་མོང་བ་རང་ལུས་ཀྱི་དབུས་སུ་རྩ་རོ་རྐྱང་དབུ་གསུམ་སྲོག་ཤིང་གི་ཚུལ་དུ་གནས་པ་ལ། དེ་ལས་གྱེས་པའི་རྩ་འཁོར་སྤྱི་བོ་བདེ་ཆེན་གྱི་འཁོར་ལོ་རྩ་འདབ་སོ་གཉིས། མགྲིན་པ་ལོངས་སྤྱོད་ཀྱི་འཁོར་ལོ་རྩ་འདབ་བཅུ་དྲུག སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད། ལྟེ་བ་སྤྲུལ་པའི་འཁོར་ལོ་རྩ་འདབ་རེ་བཞི། དེའི་འོག་ཏུ་སྦར་བྱ་མེའི་འཁོར་ལོ་གྲུ་གསུམ་རཾ་གྱིས་མཚན་པ། དེའི་འོག་ཏུ་སྦར་བྱེད་རླུང་གི་འཁོར་ལོ་གཞུའི་དབྱིབས་ཅན་ཡཾ་གྱིས་མཚན་པ་སྟེ་འཁོར་ལོ་དྲུག་ལ་བརྟེན་ནས་སྲོག་རྩོལ་གྱི་རྐྱེན་གྱི་ཨ་ཧཾ་འབར་འཛག་གི་སྦྱོར་བས་སྤྱི་བོ་སོགས་རིམ་བཞིན་འཁོར་ལོ་བཞིར་བདེ་བའི་ཡེ་ཤེས་བསྐྱེད་པ་ལ་བསླབ་པ་རིམ་གྱིས་པ་སྟེ། རྒྱ་མཚོ་ལས། འཁོར་ལོ་གསུམ་གཉིས་སྲོག་ཤིང་གསུམ། །མེ་རླུང་འགྲོ་བས་ནམ་མཁའི་བ། །བཞོ་བས་སྟེང་དུ་རྣམ་པར་གྲགས། །ཞེས་པས་བསྟན་ཁྱད་པར་བ་ནི་སྙིང་པོའི་རྒྱུད་ལེའུ་བཅུ་གསུམ་པ་ལས་གསུངས་པ་ལྟར་སྙིང་གའི་འཁོར་ལོ་དྭངས་མ་ལྔ་འདུས་ལ་བརྟེན་པའི་ཡེ་ཤེས་སྙིང་པོ་ཐིག་ལེ་ཝཾ་གྱི་དབྱིབས་ཅན་ལ་གནད་དུ་བསྣུན་པ་ཀུན་ཏུ་བཟང་པོའི་མན་ངག ལྟེ་བའི་འཁོར་ལོ་དབྱིངས་ཀྱི་ཡུམ་ལྔའི་ཐིག་ལེ་ཨ་ཐུང་གི་རྣམ་པ་ལ་གནད་དུ་བསྣུན་པ་ཀུན་ཏུ་བཟང་མོའི་མན་ངག མགྲིན་པའི་འཁོར་ལོ་མཁའ་འགྲོ་མ་རྔམ་མའི་ཐིག་ལེ་ཨཾ་གི་རྣམ་པ་ལ་གནད་དུ་བསྣུན་པ་སྦྱོར་བ་དག་པའི་མན་ངག སྤྱི་བོའི་འཁོར་ལོ་ཀུན་ཏུ་བཟང་པོ་ཟླ་བའི་ཐིག་ལེ་ཧཾ་གི་རྣམ་པ་ལ་གནད་དུ་བསྣུན་པ་ཁྱབ་བརྡལ་ཆེན་པོའི་མན་ངག་སྟེ། དེ་ཡང་། སྙིང་གའི་འཁོར་ལོ་བསྒོམས་པ་ལས་བྱུང་བའི་ཡེ་ཤེས་སྤྲོས་པ་ཐམས་ཅད་དང་བྲལ་བ་ནི་ཆོས་སྐུ། ལྟེ་འཁོར་བསྒོམས་པའི་ཡེ་ཤེས་རྟོག་ཚོགས་ཞེ་གཉིས་ལྷར་དག་པ་ནི་སྤྲུལ་སྐུ། མགྲིན་པའི་བདེ་གསལ་མི་རྟོག་པའི་ཡེ་ཤེས་ནི་ལོངས་སྐུ། སྤྱི་བོའི་བདེ་གསལ་མི་རྟོག་པའི་ཡེ་ཤེས་ནི་བདེ་བ་ཆེན་པོའི་སྐུ་སྟེ། དེའང་དྭངས་མ་རྣམས་འཁོར་ལོ་བཞིའི་ལྟེ་བའི་དྭངས་མ་གཡོ་བྱེད་དང་བྲལ་བའི་འོད་གསལ་ལ་ཚུར་ཐིམ་པས་བདེ་གསལ་རྣམ་པར་མི་རྟོག་པའི་ཡེ་ཤེས་ཆེན་པོ་གཅིག་དང་དུ་མ་མེད་པའི་ཆོས་ཉིད་མཆོག་ཏུ་མི་འགྱུར་བའི་འོད་གསལ་འཆར་བར་བྱེད་པ་སྟེང་སྒོ་འཇུ་འདུལ་གྱི་མན་ངག་གོ །དེ་ལྟར་བཤད་པའི་རྩ་འཁོར་སོགས་ནི་རྣལ་འབྱོར་པ་ལ་ཉེ་བར་མཁོ་བ་ཙམ་ཞིག་བསྟན་པ་སྟེ། གཞན་དུ་རགས་ལུས་ལ་གནས་པའི་རྩ་ཕྲན་གྱེས་པ་བ་སྤུའི་གྲངས་སྙེད་ཡོད་པས་གསུངས་ཤིང་། དེ་རྣམས་ཀྱི་ཆོས་ཉིད་དོན་དམ་ཡེ་ཤེས་ཀྱི་རྩ་ནི་རང་རིག་པའི་རྣམ་པར་ཤར་བའི་ཕྱིར་ཐ་མལ་གྱི་རྩ་ཐམས་ཅད་ལ་ཁྱབ་བྱེད་དུ་བཞུགས་པས་ཡེ་ཤེས་ཀྱི་དབུ་མ་ཆེན་པོ་ཞེས་ཀྱང་གྲགས་ཏེ། ཡེ་ཤེས་ཀྱི་རྩ་དེ་རྣམ་པ་ཐམས་ཅད་པ་ཡིན་པས་ཀུན་རྫོབ་ཀྱི་རྩ་ཡང་དེའི་རྗེས་སུ་འགྲོ་བའི་ཕྱིར། རྣལ་འབྱོར་པའི་སེམས་ཀྱི་རྣམ་པ་གར་གཏད་དེ་དང་འདྲ་བར་ཐ་མལ་པའི་རྩ་རྣམས་ཀྱིས་ཀྱང་བྱ་བ་བྱེད་པས། གཞན་རྒྱུད་སྡེ་ཐ་དད་ལས་གསུངས་པའི་རྩའི་རྣམ་བཞག་མི་འདྲ་བ་རྣམས་ཀྱང་མི་འགལ་བའི་གནད་ཤེས་པར་བྱའོ། །དེ་བཞིན་དུ་རླུང་གི་རྣམ་བཞག་མི་འདྲ་བ་རྣམས་ཀྱང་། ཡེ་ཤེས་ཀྱི་རླུང་རྣམ་པ་ཐམས་ཅད་པ་ཡིན་པས། དེའི་རྗེས་སུ་འགྲོ་བའི་ཕྱིར་གནད་གཅིག་ཏུ་འདུ་ཞིང་ཐིག་ལེ་ཐམས་ཅད་ཀྱི་རྩ་བ་ཆོས་ཉིད་མི་ཤིགས་པའི་ཐིག་ལེ་ནི་རྣམ་པ་ཐམས་ཅད་པ་ཡིན་པས། ཐིག་ལེའི་རྣལ་འབྱོར་ཇི་སྙེད་པ་ཀུན་ཀྱང་དངོས་བརྒྱུད་གང་རུང་གི་སྒོ་ནས་ཡང་དག་པའི་ལམ་དུ་འགྲོ་བ་ཡིན་ནོ། །གཉིས་པ་ནི། མཁའ་གསང་གཉིས་ལ་བརྟེན་ནས་དབབ་བཟུང་ལྡོག་ཁྱབ་ཀྱི་སྦྱོར་བས་སྐད་ཅིག་ལ་བདེ་སྟོང་གཉིས་མེད་ཀྱི་ཡེ་ཤེས་བསྐྱེད་པ་ཐབས་ལམ་ཅིག་ཅར་བ་སྟེ། དེའང་སྦྱོར་བའི་དུས་ཀྱི་བསྙེན་སྒྲུབ་ཡན་ལག་བཞི་ནི། དང་པོ་མཚན་ཉིད་དང་ལྡན་པའི་ཡུམ་བཙལ་བ་རྩ་བརྟགས་པ་སློང་བ་འདོད་པའི་བསྟན་བཅོས་ཀྱིས་བདེ་བ་རྒྱས་པ་སོགས་ནི་བསྙེན་པའི་ཡན་ལག ཕན་ཚུན་བརྡ་བཞིས་བསྐུལ་ཏེ་འདུ་ཤེས་གསུམ་ལྡན་གྱི་སྒོ་ནས་ཕྱག་རྒྱ་བཞིས་གཉིས་མེད་དུ་རོལ་པ་ཉེ་བསྙེན་གྱི་ཡན་ལགདེ་ལྟར་སྙོམས་པར་ཞུགས་ནས་རྗེས་ཆགས་ཀྱི་རླུང་བསྐྱོད་པས་དམར་ཆ་འབར་བ་དེས་དཀར་ཆ་ཞུ་བ་ཡས་འབབ་ཀྱི་འགྲོས་ཀྱི་ཕྱིན་པ་ལས་འཁོར་ལོ་བཞིར་དགའ་བཞིའི་རིམ་པས་རྡོ་རྗེ་ནོར་བུའི་རྩེར་འཛག་མེད་དུ་བཟུང་བས་དངོས་པོ་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བ་སྒྲུབ་པའི་ཡན་ལག ཉི་ཟླ་རྡོ་རྗེའི་ལྕེས་བླངས་ཏེ་བཟློག་པའི་སྦྱོར་བས་གྱེན་དུ་དྲངས་ཏེ་འཁོར་ལོ་བཞིའི་གནས་སོ་སོར་མས་བརྟན་གྱི་དགའ་བཞི་ཉམས་སུ་མྱོང་མཐར་བྱང་སེམས་རྩ་གནས་ཐམས་ཅད་དུ་དགྲམ་པའི་སྦྱོར་བས་རང་བཞིན་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱོང་བ་ནི། སྒྲུབ་པ་ཆེན་པོའི་ཡན་ལག་སྟེ་འོག་སྒོ་ཁམས་གསུམ་རོལ་པའི་མན་ངག་གོ །གཉིས་པ་མཚན་མེད་ནི། ཆོས་ཉིད་དེ་བཞིན་ཉིད་ཀྱི་ཏིང་ངེ་འཛིན་བསྒོམ་པ་སྟེ། ལུས་རི་རྒྱལ་ལྟར་མི་གཡོ། ངག་ལྐུགས་པ་ལྟར་མི་བརྗོད། སེམས་ནམ་མཁའ་ལྟར་མི་རྟོག་པ་ཆོས་ཉིད་དེ་བཞིན་ཉིད་ཀྱི་ངང་དུ་འཇོག་པས། གང་ཡང་ཡིད་ལ་མི་བྱེད་པའི་སྟོང་པ་ནི་ཀུན་ཏུ་བཟང་མོ་ཆོས་ཉིད་དོན་གྱི་ཡེ་ཤེས་ཡིན་ལ། རང་གསལ་རིག་པ་གསལ་དྭངས་ཕྱེད་པའི་སྣང་ཆ་ནི་ཀུན་ཏུ་བཟང་པོ་ཆོས་སྐུ་གཞི་ཡེ་ཤེས་ཏེ། དེ་གཉིས་དབྱེར་མེད་པ་རིག་པ་ཕྱི་ནང་བར་མེད་དུ་ཕྱམ་གདལ་བ་ནི་དབྱིངས་དང་ཡེ་ཤེས་དབྱེར་མེད་ཀུན་བཟང་ཡབ་ཡུམ་ཟུང་འཇུག་གཉུག་མའི་སེམས་རྫོགས་པ་ཆེན་པོ་ཞེས་བྱའོ། །སྤྱོད་པ་ནི། ཐབས་ལ་མཁས་པའི་གདེང་གིས་ཟིན་པས་འཁོར་བའི་ཆོས་ཅི་ལའང་མ་ཆགས་པར་སྤྱོད་པ་སྟེ། བང་མཛོད་འཕྲུལ་ལྡེ་ལས། བསྐྱེད་པ་མ་ཧཱ་ཡོ་ག་ནི། །ཏ་ན་དང་ནི་ག་ཎ་དང་། །དམ་རྫས་བདུད་རྩི་ལྔ་པོ་ལ། །ཐབས་ཆེན་ལྟ་བའི་སྤྱོད་པས་སྤྱད། །ཅེས་གསུངས། དེ་ལ་དབྱེ་ན། སྤྱིར་ལུས་ངག་ཡིད་གསུམ་ཡོངས་སུ་དག་པར་བྱ་བ་ཡིན་ལ། དེ་ཡང་དུས་ཚོད་དང་འབྲེལ་བར་བསླབས་ཏེ། ལས་དང་པོ་པའི་དུས་སུ་ཏིང་ངེ་འཛིན་ལ་བརྟན་པ་མ་ཐོབ་པས་དགེ་སྦྱོང་གཞོན་ནུའི་སྤྱོད་པ་ལྟར་བག་དང་ལྡན་པས་གཟབ་པ་ལྷུར་ལེན་པ་སྟེ། རྡོ་རྗེ་རྩེེ་མོ་ལས། བརྟན་པ་མ་ཐོབ་བར་དུ་ནི། །ཁ་ན་མ་ཐོ་རྡུལ་མེད་ཅིང་། །སྡོམ་པ་གསུམ་ལ་གནས་པར་བྱ། །ཞེས་སོ། །དེའང་མཉམ་བཞག་གི་རྟོགས་པ་བག་ལྡན་དུ་བསྲིང་ཞིང་ཐུན་མཚམས་སུ་རྗེས་ཐོབ་ཀྱི་བྱ་བ་ཆོས་སྤྱོད་བཅུ་ལ་སོགས་པ་བསྒྲུབ་པའོ། །ཏིང་ངེ་འཛིན་ལ་བརྟན་པ་ཅུང་ཟད་ཐོབ་ནས་མཉམ་རྗེས་བསྲེ་བར་ནུས་པ་ན་རྟོགས་པ་རྐྱེན་ཐུབ་ཏུ་བྱེད་པ་སྨྱོན་པ་བརྟུལ་ཞུགས་ཀྱི་སྤྱོད་པ་དང་། བརྟན་པ་ཆེར་ཐོབ་ནས་རྟོགས་པ་ལ་བྲི་གང་མེད་པ་ན་གཞན་ཕན་ཁོ་ན་ལ་བསླབ་པ་རྒྱལ་པོ་ས་འཛིན་གྱི་སྤྱོད་པ་ལྟ་བུ་སྟེ་སྤྱོད་ཚུལ་གསུམ་མོ། །བྱེ་བྲག་ཏུ་ཐབས་ལམ་བརྟུལ་ཞུགས་ཀྱི་སྤྱོད་པ་དང་། གྲོལ་ལམ་བག་ཡོད་ཀྱི་སྤྱོད་པ་གཉིས་སུ་བཤད་ཅིང་། ཕྱི་མ་ལའང་། དང་པོ་ལྟ་བ་གཏན་འབེབས་པའི་དུས་སུ་དད་བརྩོན་གྱི་སྤྱོད་པ། སྟོང་ཆེན་གྱི་དུས་སུ་ཤེས་རབ་དང་མཐུན་པ། སྙིང་རྗེ་སྒྱུ་མའི་སྐབས་སུ་ཐབས་དང་མཐུན་པ་དང་། ཕྱག་རྒྱ་གཅིག་པའི་སྐབས་སུ་ཕྱོགས་གཅིག་པ་དང་། ཕྱག་རྒྱ་སྤྲོས་བཅས་ཀྱི་སྐབས་སུ་སྤྲོས་པ་དང་བཅས་པ་དང་། ཚོགས་སྒྲུབ་ཀྱི་སྐབས་སུ་ཚོགས་ཀྱི་སྤྱོད་པ་དང་། ཟག་མེད་ལ་བསླབ་པའི་རིག་འཛིན་བཞིའི་སྐབས་སུ་རྫུ་འཕྲུལ་གྱི་སྤྱོད་པ་སྟེ་རིམ་གྱིས་པའི་སྤྱོད་པ་བདུན་དང་། བླང་དོར་མེད་པ་རྨད་དུ་བྱུང་བ་ཅིག་ཅར་བའི་སྤྱོད་པ་དང་བརྒྱད་དོ། །འབྲས་བུ་ནི། ཚེ་འདིའམ་བར་དོར་སྐུ་ལྔ་ལྷུན་གྱིས་གྲུབ་པའི་བདག་ཉིད་མངོན་དུ་བྱེད་པ་སྟེ། གསང་འདུས་ལས། འདི་ནི་བཅོམ་ལྡན་བདག་ཉིད་ཆེ། །སྐུ་གསུམ་མི་ཕྱེད་ལས་བྱུང་བ། །ཡེ་ཤེས་རྒྱ་མཚོ་རྣམ་པར་བརྒྱུན། །ཚེ་འདི་ཉིད་ལ་ཐོབ་པར་འགྱུར། །ཞེས་དང་། ཡེ་ཞེས་ཐིག་ལེ་ལས། ཡང་ན་ལུས་ནི་སྤངས་མ་ཐག །བརྩོན་པ་མི་ལྡན་པས་ཀྱང་འགྲུབ། །ཅེས་གསུངས། དེ་ཡང་རྒྱུ་རྒྱུད་བདེ་གཤེགས་སྙིང་པོ་ཟབ་གསལ་གཉིས་མེད་ཀྱི་ཡེ་ཤེས་ཨེ་ཝཾ་ཟུང་འཇུག་ལྷན་སྐྱེས་བདེ་བ་ཆེན་པོ་གདོད་མ་ནས་རང་ཆས་སུ་བཞུགས་པ་དང་དེ་ལས་ཤར་བའི་སྣང་སྤྱོད་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་ཆེན་པོར་ཡེ་ནས་གནས་པ་ནི་སྦྱང་གཞི་དང་། མེད་སྣང་གློ་བུར་གྱི་དྲི་མ་སྤྱི་དང་ཁྱད་པར་འཕོ་སྒྲིབ་ཕྲ་བ་དང་བཅས་པ་ནི་སྦྱང་བྱ། རིམ་གཉིས་ཀྱིས་བསྡུས་པའི་ལམ་རྣམས་ནི་སྦྱོང་བྱེད། དེ་ལྟར་ལམ་གྱིས་དྲི་མ་མཐའ་དག་སྦྱངས་པ་ལས་གཞི་ལ་ཇི་ལྟར་ཡོད་པའི་ཡོན་ཏན་རྣམས་མངོན་གྱུར་མཐར་ཐུག་པ་ནི་སྦྱངས་འབྲས་ཏེ། ཁོག་གཞུང་ལས། གྲུབ་པ་མཐར་ཕྱིན་འབྲས་བུར་བརྗོད། །ཅེས་གསུངས། དེ་ལ་དབྱེ་ན། དེ་ཉིད་ལས། འབྲས་བུའི་ངོ་བོ་སྐུ་གསུང་ཐུགས། །ཡོན་ཏན་ཕྲིན་ལས་རྣམ་པ་ལྔ། །དེ་ཡང་སྐབས་ཀྱིས་ལྔ་ལྔ་སྟེ། །ཞེས་པས། སྐུ་གསུམ་ཐུགས་ཡོན་ཏན་ཕྲིན་ལས་ལྔ་རེ་རེ་ལའང་ལྔ་ལྔར་ཕྱེ་བས་འབྲས་ཆོས་ཉི་ཤུ་རྩ་ལྔར་འགྱུར་ཏེ། དེ་ལ་སྐུ་ལྔ་ནི། ཆོས་སྐུ། ལོངས་སྐུ། སྤྲུལ་སྐུ། མངོན་བྱང་གི་སྐུ། རྡོ་རྗེའི་སྐུ་དང་ལྔའོ། །གསུང་ལྔ་ནི། ཆོས་སྐུ་བརྗོད་མེད་དོན་གྱི་གསུང་། ལོངས་སྐུ་དགོངས་པ་བརྡའ་ཡི་གསུང་། སྤྲུལ་སྐུ་བརྗོད་པ་ཚིག་གི་གསུང་། མངོན་བྱུང་རིག་པ་བྱིན་བརླབས་ཀྱི་གསུང་། དབྱེར་མེད་རྡོ་རྗེའི་གསུང་དང་ལྔའོ། །ཐུགས་ལྔ་ནི། ཆོས་སྐུའི་ཐུགས་ཆོས་དབྱིངས་ཡེ་ཤེས། ལོངས་སྐུའི་ཐུགས་མཉམ་ཉིད་ཡེ་ཤེས། སྤྲུལ་སྐུའི་ཐུགས་བྱ་གྲུབ་ཡེ་ཤེས། མངོན་བྱང་ཐུགས་མེ་ལོང་ལྟ་བུའི་ཡེ་ཤེས། རྡོ་རྗེའི་ཐུགས་སོ་སོར་རྟོག་པའི་ཡེ་ཤེས་དང་ལྔའོ། །ཡོན་ཏན་ལྔ་ནི། རྣམ་པར་དག་པའི་ཞིང་ཁམས། རྒྱ་ཚད་དང་བྲལ་བའི་གཞལ་ཡས་ཁང་། གསལ་ཞིང་དག་པའི་འོད་ཟེར། ཁྱད་པར་འཕགས་པའི་གདན་ཁྲི། དགྱེས་དགུར་སྤྱོད་པའི་ལོངས་སྤྱོད་ལྔའོ། །ཕྲིན་ལས་ལྔ་ནི་ཞི་བ། རྒྱས་པ། དབང་། དྲག་པོ། ལྷུན་གྱིས་གྲུབ་པ་སྟེ་ལྔའོ། །དེ་དག་ཀྱང་རྟེན་སྐུ། བརྟེན་པ་ཡེ་ཤེས། མཛད་པ་ཕྲིན་ལས་དང་གསུམ་དུ་འདུ་སྟེ། རྟེན་སྐུ་ནི། གསུམ་མམ་ལྔ་སྟེ། དབྱིངས་རྣམ་དག་གི་ཐོག་ཏུ་རིག་པའི་ཡེ་ཤེས་སྒྲིབ་པ་མེད་པར་གྲོལ་བས་ཟུང་འཇུག་སྐུ་གསུམ་ཡེ་རྫོགས་མཚན་འཛིན་གྱི་སྤྲོས་པ་ཐམས་ཅད་དང་བྲལ་བའི་བདག་ཉིད་དུ་བཞུགས་པ་ཆོས་སྐུ། དེ་ལས་མ་གཡོས་བཞིན་དུ་ས་བཅུ་རྒྱུན་མཐའ་ལ་བཞུགས་པའི་བྱང་སེམས་རྣམས་ལ་མཚན་དཔེའི་རྣམ་པར་སྣང་བའི་གཟུགས་བརྙན་ལོངས་སྐུ། སོ་སྐྱེ་རྣམས་ལ་སོ་སོའི་མོས་པ་དང་མཐུན་པར་མཆོག་གི་སྤྲུལ་སྐུ་དང་། བཟོ་དང་སྐྱེ་བ་སོགས་གང་ལ་གང་འཚམ་པར་སངས་རྒྱས་ཀྱི་གཟུགས་བརྙན་ཅི་རིགས་སུ་སྣང་བ་སྤྲུལ་སྐུ་སྟེ་གསུམ་མམ། ཡང་ན། དེའི་སྟེང་དུ་སྐུ་གསུམ་སྣང་ཆ་མ་འདྲེས་པར་སྣང་བའི་ལྡོག་ཆ་ནས་མངོན་བྱང་དང་། སྐུ་གསུམ་ངོ་བོ་དབྱེར་མི་ཕྱེད་པའི་ཆ་ནས་རྡོ་རྗེའི་སྐུ་སྟེ་གཉིས་པོ་བསྣན་པས་སྐུ་ལྔའོ། །བརྟེན་པ་ཡེ་ཤེས་ནི། དེའི་ཚེ་ཚོགས་བརྒྱད་གནས་སུ་དག་པའི་ཡེ་ཤེས་ལྔ་སྟེ། ཀུན་གཞི་འབྱེད་པ་མེད་པའི་ཆ་ནས་དེ་ཉིད་གནས་སུ་དག་པ་ཅིར་ཡང་མི་དམིགས་པས་སྤྲོས་པའི་མཐའ་ཐམས་ཅད་ལས་འདས་པ་ཆོས་དབྱིངས་ཡེ་ཤེས། ཀུན་གཞིའི་རྣམ་ཤེས་གསལ་ལ་མི་རྟོག་པའི་ཆ་ནས་དེ་ཉིད་གནས་སུ་དག་པ་མེ་ལོང་ངོས་གཉིས་པ་ལྟར་རང་གཞན་གྱི་ཆོས་རྣམས་གསལ་ལ་སྤུ་རིས་འབྱེད་པར་མི་མཛད་པ་མེ་ལོང་ལྟ་བུའི་ཡེ་ཤེས། ཉོན་ཡིད་ཀྱིས་ཕྱི་ནང་གི་ཆོས་རྣམས་ལ་བླང་དོར་བྱེད་པའི་ཆ་ནས་དེ་ཉིད་གནས་སུ་དག་པ་འཁོར་འདས་བཟང་ངན་མེད་པར་མཉམ་ཉིད་དུ་གཟིགས་པས་སྲིད་ཞིའི་མཐའ་གཉིས་ལ་མི་གནས་པ་མཉམ་ཉིད་ཡེ་ཤེས། རྣམ་ཤེས་དྲུག་འགག་མ་ཐག་པའི་ཡིད་ཀྱིས་དཔྱོད་པ་མེད་པར་རྟོག་པའི་ཆ་ནས་དེ་ཉིད་གནས་སུ་དག་པ་ཆོས་ཅན་མ་ལུས་པ་མངོན་སུམ་དུ་མ་འདྲེས་པར་ཡོངས་སུ་ས་ལེར་གཟིགས་པ་སོ་སོར་རྟོག་པའི་ཡེ་ཤེས། སྒོོ་ལྔའི་རྣམ་ཤེས་ཀྱི་བྱ་བ་ཐམས་ཅད་སྒྲུབ་པའི་ཆ་ནས་དེ་ཉིད་གནས་སུ་དག་པ་འགྲོ་བའི་དོན་མཛད་པ་ལ་ཐོག་པ་མེད་པའི་ཕྲིན་ལས་འཇུག་པ་བྱ་གྲུབ་ཡེ་ཤེས་ཏེ་ལྔའོ། །དེ་དག་ཀྱང་ཆོས་དབྱིངས་ཡེ་ཤེས་ཇི་ལྟ་བ་མཁྱེན་པའི་ཡེ་ཤེས་དང་། ཕྱི་མ་བཞི་པོ་ཇི་སྙེད་པའི་ཡེ་ཤེས་སུ་འདུ་བས་ན་ཡེ་ཤེས་གཉིས་སོ། །མཛད་པ་ཕྲིན་ལས་ནི། དེ་ལྟར་ཉོན་ཤེས་ཀྱིས་བསྡུས་པའི་མེད་སྣང་གློ་བུར་གྱི་སྒྲིབ་གཉིས་བག་ཆགས་སྣང་གསུམ་གྱི་དྲི་མ་དང་བཅས་པ་མཐའ་དག་སྤངས་ཤིང་། ཇི་ལྟ་ཇི་སྙེད་མཁྱེན་པའི་ཡེ་ཤེས་ཀྱིས་ཤེས་བྱའི་ཆོས་ཐམས་ཅད་མངོན་སུམ་དུ་གཟིགས་པའི་སྒོ་ནས་སྤངས་རྟོགས་ཀྱི་ཡོན་ཏན་ཐམས་ཅད་མཐར་ཕྱིན་ཅིང་། དེའི་མཐུ་ལས་གདུལ་བྱ་སོ་སོའི་སྐལ་བ་དང་འཚམ་པར་ཞི་སོགས་གང་ལ་གང་གིས་ཇི་ལྟར་འདུལ་བའི་ཕྲིན་ལས་ཀྱི་སྒོ་མཐའ་ཡས་པ་དུས་ལས་ཡོལ་བ་མེད་ལ་འབད་རྩོལ་མེད་པར་ལྷུན་གྱིས་གྲུབ་པ་ནི་ནམ་མཁའ་ཇི་སྲིད་པ་དེ་སྲིད་དུ་རྒྱ་ཆེ་ཞིང་རྒྱུན་མི་འཆད་པར་འབྱུང་བ་སྟེ་ཞིབ་པར་གཞན་དུ་ཤེས་པར་བྱ་ལ། ཞར་བྱུང་དུ་མདོ་སྔགས་གཉིས་ཀྱི་སངས་རྒྱས་ལ་ཁྱད་པར་ཡོད་མེད་དཔྱད་ན། ཀུན་མཁྱེན་ཆོས་ཀྱི་རྒྱལ་པོ་སོགས་ནི་མཐར་ཐུག་རིགས་གཅིག་དང་ཐེག་པ་གཅིག་ཏུ་གྲུབ་པའི་ཕྱིར་དེ་གཉིས་ལ་ཁྱད་པར་མི་བཞེད་ལ། རྒྱལ་བ་གཡུང་སྟོན་པ་ནི་རྒྱུ་འབྲས་ཐེག་པའི་ཁྱད་པར་དང་བློ་གྲོས་རྣམ་འབྱེད་ཀྱི་ཆེད་དུ་དེ་གཉིས་ལ་ཁྱད་པར་འདི་ལྟར་མཛད་དེ། ཆོས་སྐུ་ལ། ངོ་བོ། མཚན་ཉིད། བྱིན་རླབས་ཀྱི་ཁྱད་པར་དང་གསུམ་ལས། དང་པོ་ནི། མཚན་ཉིད་ཐེག་པའི་ཆོས་སྐུ་སྤྲོས་པ་དང་བྲལ་བའི་སྟོང་ཉིད་ནམ་མཁའ་ལྟ་བུ་ཡིན་ལ། སྔགས་ཀྱི་ཆོས་སྐུ་ནི་དབྱིངས་དང་ཡེ་ཤེས་ཀྱི་རང་བཞིན་སྣང་སྟོང་ཟུང་དུ་འཇུག་པའོ། །གཉིས་པ་ནི། མཚན་ཉིད་ཐེག་པའི་ཆོས་སྐུ་སྟོང་པའི་མཐར་ལྷུང་ལ། སྔགས་ཀྱི་ཆོས་སྐུ་ནི་སྣང་སྟོང་གཉིས་སུ་མེད་པས་རྟག་ཆད་ཀྱི་མཐར་མ་ལྷུང་བའོ། །གསུམ་པ་ནི། མཚན་ཉིད་ཀྱི་ཆོས་སྐུ་ལས་བྱིན་རླབས་གཟུགས་སྐུ་གཉིས་ལས་མི་འཆར་ལ། སྔགས་ཀྱི་ཆོས་སྐུ་ནི་དབྱིངས་དང་ཡེ་ཤེས་སྣང་སྟོང་ཟུང་དུ་འཇུག་པའི་བྱིན་རླབས་ལས་སྐུ་ལྔ་ལ་སོགས་པ་ཅི་རིགས་པར་འཆར་རོ། །གཟུགས་སྐུ་གཉིས་ཀྱི་ཁྱད་པར་ཡང་འདི་ལྟར་ཡོད་དེ་རྒྱུ་མཚན་ཉིད་ཀྱི་གཟུགས་སྐུ་གཉིས་རྒྱུ་རྐྱེན་གྱིས་བསྐྱེད་པར་འདོད་ལ། སྔགས་ཀྱི་གཟུགས་སྐུ་ནི་རྒྱུ་དང་རྐྱེན་གྱིས་མ་བསྐྱེད་པའོ། །རྒྱུའི་གཟུགས་སྐུ་སྐྱེ་འཇིག་ཅན་ཡིན་ལ། སྔགས་ཀྱི་གཟུགས་སྐུ་སྐྱེ་འཇིག་དང་བྲལ་བའོ། །བྱེ་བྲག་ཏུ་ལོངས་སྐུའི་ཁྱད་པར་ལའང་གཉིས་ཏེ། ལོངས་སུ་སྤྱད་བྱའི་ཁྱད་པར། མཚན་ཉིད་ཐེག་པའི་ལོངས་སྐུས་དཀར་ཕྱོགས་ལ་ལོངས་སྤྱོད་པ་ལས་ནག་པོའི་ཕྱོགས་ལ་མི་སྤྱོད། སྔགས་ཀྱི་ལོངས་སྐུ་ནི། གཉིས་ཀ་ལ་ལོངས་སྤྱོད། སྤྱོད་བྱེད་ཐབས་ཀྱི་ཁྱད་པར་ཡང་། མཚན་ཉིད་ཐེག་པར་ནག་པོའི་ཕྱོགས་ལ་ལོངས་སྤྱོད་པའི་ཐབས་མེད། སྔགས་ལ་དཀར་ནག་གཉིས་ཀར་ལོངས་སྤྱོད་པའི་ཐབས་ཡོད་པའི་ཕྱིར་རོ། །སྤྲུལ་སྐུ་ལའང་ཁྱད་པར་གཉིས་ལས། གདུལ་བྱ་ཡུལ་གྱི་ཁྱད་པར་ནི། མཚན་ཉིད་ཐེག་པའི་སྤྲུལ་སྐུས་དཀར་ཕྱོགས་ཀྱི་གདུལ་བྱ་འདུལ་བ་ལས་ནག་ཕྱོགས་ཀྱི་གདུལ་བྱ་མི་འདུལ། སྔགས་ཀྱི་སྤྲུལ་སྐུའི་གདུལ་བྱ་ལ་ཕྱོགས་རིས་མེད་པའོ། །འདུལ་བྱེད་ཐབས་ཀྱི་ཁྱད་པར་ཡང་། རྒྱུ་མཚན་ཉིད་ཀྱི་སྤྲུལ་སྐུ་ལ་ནག་ཕྱོགས་འདུལ་བའི་ཐབས་མེད། སྔགས་ཀྱི་སྤྲུལ་སྐུ་ནི། གདུལ་བྱ་དཀར་ནག་གི་ཕྱོགས་གཉིས་ཀ་འདུལ་བའི་ཐབས་དང་ལྡན་པ་རྣམས་སུ་བཞེད། གཞན་ཡང་ཆོས་སྐུ་ལ་མཆོག་ཏུ་མི་འགྱུར་བའི་བདེ་བ་ཆེན་པོས་ཁྱད་པར་དུ་བྱས་པ་དང་། ལོངས་སྐུ་ངེས་པ་ལྔ་ལྡན་ཡང་ཞིང་དང་སྟོན་འཁོར་ཐམས་ཅད་རང་སྣང་གཞིའི་འོད་གསལ་ཆེན་པོར་ལྷུན་གྱིས་གྲུབ་པའི་སྣང་ཆ་ལས་གཞན་སྣང་གིས་བསྡུས་པ་མིན་པ་དང་། སྤྲུལ་སྐུ་ཡང་འདུལ་བ་རྣམ་པ་བཞིའི་སྒོ་ནས་ཕྲིན་ལས་རྣམ་པ་བཞི་རབ་འབྱམས་ཅི་ཡང་རུང་བ་ལ་མངའ་དབང་བསྒྱུར་ནས་གདུལ་བྱའི་དོན་མཛད་པ་ལ་དབང་འབྱོར་པ་སོགས་ཁྱད་པར་གཞན་ཡང་ཡོད་པར་ཕྱིས་ཀྱི་མཁས་ཆེན་དག་བཞེད་དོ། །དེར་མ་ཟད་ཀུན་མཁྱེན་དྷརྨ་ཤྲཱིས། དབུ་མའི་ལམ་གྱིས་ཐོབ་པའི་ས་དང་པོས་མཐོང་ལམ་གྱི་གོ་ཆོད་མོད། འོན་ཀྱང་དེ་རྣམ་པར་མི་རྟོག་པའི་ཡེ་ཤེས་ཙམ་ཡིན་པས། སྔགས་བླ་མེད་ཀྱི་རྫོགས་རིམ་གྱིས་ཐོབ་པའི་མཐོང་ལམ་དང་ཁྱད་ཆེ་སྟེ། འདི་ལས་དང་པོ་ནས་ཁ་སྦྱོར་ཡན་ལག་བདུན་ལྡན་རྗེས་མཐུན་པ་ཞིག་ཡོད་པའི་ཕྱིར་རོ། །ཞེས་གསུངས་སོ། །གཉིས་པ་གང་ཟག་དབང་པོ་ར བ་ཀྱི་འབྲིང་། འདོད་ཆགས་ཤས་ཆེ་བ་དང་སེམས་གནས་པ་ལ་དགའ་བ་ལ་དགོངས་ནས་གསུངས་པ་ལུང་ཨ་ནུ་ཡོ་གའི་ཐེག་པ་ནི། རྒྱུད་ལས། ལུང་ཨ་ནུ་ཡོ་ག་ནི་ཆོས་ཐམས་ཅད་ཀྱི་ལམ་ལྟ་བུའོ། །ཞེས་གསུངས་པས་རྣལ་འབྱོར་ཆེན་པོ་དང་ཤིན་ཏུ་རྣལ་འབྱོར་གཉིས་མཚམས་སྦྱོར་བར་བྱེད་པས་ལམ་ལྟ་བུར་གྱུར་པ་སྟེ། དེ་ལ། ངོ་བོ། ངེས་ཚིག དབྱེ་བ་གསུམ་ལས། ངོ་བོ་ནི། ཤེས་རབ་རྫོགས་པའི་རིམ་པ་ལ་གཙོ་བོར་བརྟེན་པའི་སྒོ་ནས་དབྱིངས་དང་ཡེ་ཤེས་གཉིས་སུ་མེད་པའི་དོན་རྟོགས་གོམས་ཀྱི་སྦྱོར་བས་གྲོལ་བ་ཐོབ་པའི་རང་བཞིན་ནོ། །ངེས་ཚིག་ནི། ཨ་ནུ་ཡོ་ག་སྟེ་ཤེས་རབ་རྗེས་ཆགས་ཀྱི་ལམ་གཙོ་བོར་སྟོན་པའི་ཕྱིར་རྗེས་སུ་རྣལ་འབྱོར་རོ། །དབྱེ་བ་ལ་དྲུག་ལས། དབང་གི་འཇུག་སྒོ་ནི། ཨ་ནུའི་དཀྱིལ་འཁོར་དུ་ཕྱི་དབང་རྒྱུད་ཀྱི་ཆུ་བོ་བཅུ། ནང་དབང་འབྱུང་བའི་ཆུ་བོ་བཅུ་གཅིག སྒྲུབ་དབང་གྲགས་པའི་ཆུ་བོ་བཅུ་གསུམ། གསང་དབང་རྫོགས་པའི་ཆུ་བོ་གཉིས་བཅས་ཕྱི་ནང་སྒྲུབ་གསང་བཞིས་བསྡུས་པའི་དབང་ཆོག་སུམ་ཅུ་རྩ་དྲུག་སྟེ། ཀུན་འདུས་ལས། ཕྱི་ཡི་དབང་དང་ནང་གི་དབང་། །སྒྲུབ་པའི་དབང་དང་གསང་བའི་དབང་། །བཅུ་དང་བཅུ་གཅིག་བཅུ་གསུམ་དང་། །རྣམ་པ་གཉིས་ཀྱིས་རྫོགས་པར་འགྱུར། །ཞེས་གསུངས། དེ་ལའང་རྒྱུད་དང་མན་ངག་ལྟར་བསྐུར་ཚུལ་གཉིས་ཏེ། རང་བཞིན་གྱིས་སྣོད་དུ་གྱུར་པ་ཟབ་མོའི་དོན་ལ་མོས་པའི་སློབ་མ་ཁྱད་པར་ཅན་ལ་མདོ་རྩ་བའི་དཀྱིལ་འཁོར་དུ་རྒྱུད་ཀྱི་དངོས་བསྟན་ལྟར་ཆུ་བོ་བཞི་རྫོགས་ཀྱི་དབང་སུམ་ཅུ་རྩ་དྲུག་བསྐུར་བ་དང་། སྦྱངས་པས་སྣོད་དུ་གྱུར་པ་རྒྱ་ཆེ་བ་ལ་མོས་པའི་སློབ་མ་ཐུན་མོང་བ་ལ་མདོ་ཡོངས་རྫོགས་ཀྱི་ལུགས་ཡན་ལག་གི་དཀྱིལ་འཁོར་སོ་སོར་ཕྱེ་ནས་བདེ་བ་གསལ་མཛད་ཀྱི་ལས་ཐོ་ལྟར་ཐེག་པ་ཐམས་ཅད་འདུས་པའི་མདོ་དབང་རྩ་བ་སོ་དྲུག་ལས་ཡན་ལག་རགས་པ་བརྒྱད་བརྒྱ་སོ་གཅིག་ཏུ་ཕྱེ་ནས་བསྐུར་བ་གཉིས་ལས། ཆོས་ཀྱི་རྒྱལ་པོ་སྨིན་གླིང་པ་ཡབ་སྲས་སོགས་ཀྱི་ཕྱག་བཞེས་སུ་རྒྱུད་དམ་མན་ངག་གི་ལུགས་གཉིས་འདོར་ལེན་གྱི་གནད་ཀྱིས་གཅིག་ཏུ་དྲིལ་ནས་བསྐུར་བར་མཛད་ཅིང་། དེ་ལྟར་མཛད་པས་གནས་སྐབས་སུ་བྱ་སླ་ཞིང་། བརྒྱུད་ནས་ལུགས་གཉིས་གཅིག་གིས་གཅིག་མི་ནུབ་པར་ཆབས་ཅིག་ཏུ་འཕེལ་བའི་དགོས་པ་ཁྱད་པར་ཅན་ཡོད་དེ། ལུགས་དེ་གཉིས་ཀས་ཡོ་ག་བཞི་རྫོགས་དང་། ཐེག་དགུའི་དབང་རྫོགས་པ་ལ་འདྲ་བ་ཡིན་ཏེ། དབང་དོན་རྣམ་འབྱེད་ལས། བཅུ་ཡིས་བྱང་ཆུབ་རིགས་ཅན་འགྱུར། །བཅུ་གཅིག་གསང་བ་ནང་བར་འགྱུར། །བཅུ་གསུམ་བླ་མ་ཆེན་པོར་གྲགས། །གཉིས་ཀྱིས་ཐེག་དགུའི་དབང་རྫོགས་པའོ། །ཞེས་གསུངས་ལ་དེས་ན་མདོ་ཡོངས་རྫོགས་ཀྱི་ལུགས་དེ་ཡང་ཐེག་བརྒྱད་དགོས་ཀྱི་ཆོ་ག་སོ་སོ་ནས་བཏུས་ཏེ་སྤྱིའི་ཆོ་གར་བྱས་པ་ནི་མ་ཡིན་གྱི། འདིར་མདོ་རང་ལུགས་ཀྱི་ས་དང་པོ་འགྱུར་བ་མ་ངེས་པ་ནས་ས་བཅུ་པ་རྫོགས་པ་ཅི་ཆིབ་ཀྱི་བར་ནོན་པར་བྱ་བའི་ཆེད་དུ་ལྷ་མི་ནས་བརྩམས་ཏེ་ཨ་ནུ་རང་ལུགས་ཀྱི་རྫོགས་རིམ་མཐར་ཐུག་པ་ཨ་ཏིའི་བར་ལ་བྱ་སྤྱོད་སོ་སོར་བསྒྲངས་པས་དབང་རིམ་བཅུ་བྱུང་བ་དེ་ཉིད་བྱ་སྤྱོད་གཅིག་ཏུ་བསྡུས་ནས་ཐེག་དགུ་དང་ཚུལ་འདྲ་བས་ཐེག་དགུའི་དབང་ཞེས་གྲགས་ཤིང་དེ་ལྟ་བུའི་ལམ་སྟེགས་ཀྱི་ཐེག་པ་རྣམས་སོ་སོའི་ལམ་དང་འདྲ་རུང་དུ་བྱུང་ཡང་། དོན་ལ་སྔགས་ཀྱི་ཐབས་མཁས་ཀྱིས་ཟིན་པས་ཐེག་པར་རང་རང་གི་སྤངས་ཐོབ་དང་རིགས་འདྲའི་ཡོན་ཏན་དེ་དང་དེ་སྐྱེ་བའི་མྱུར་ལམ་དུའང་འགྲོ་བ་ཡིན་ཞེས་གསུངས་སོ། །བྱ་བའི་འཇུག་སྒོ་ནི། དབྱིངས་དང་ཡེ་ཤེས་གཉིས་སུ་མེད་པའི་སྒོ་ནས་འཇུག་སྟེ། ཀུན་བྱེད་ལས། ཨ་ནུ་དབྱེར་མེད་ས་འདོད་པ། །དབྱིངས་དང་ཡེ་ཤེས་སྒོར་ཞུགས་ནས། །ཞེས་སོ། །ཇི་ལྟར་འཇུག་ཅེ་ན། མ་བསྐྱེད་རྫོགས་པའི་ཚུལ་གྱིས་ཏེ། ཐུགས་ཀྱི་སྒོ་ལྕགས་ལས། སྐྱེ་མེད་དབྱིངས་ཉིད་ཡེ་ཤེས་ཏེ། །ཡེ་ཤེས་རིག་པ་དབྱིངས་ཉིད་ཚུལ། །གཉིས་མེད་རོལ་པ་བདེ་བ་ཆེ། །རིམ་པར་འཇུག་པ་མ་ཡིན་ཏེ། །སྣང་སྲིད་ཕྱག་རྒྱ་ཐམས་ཅད་ལ། །ཆུ་ལ་ཉ་ལྡང་ཇི་བཞིན་དུ། །ཐུགས་ཕྲད་སྣང་སྲིད་ཕྱག་རྒྱ་ཆེ། །ཞེས་སོ། །ལྟ་བ་ནི། དབྱིངས་དང་ཡེ་ཤེས་ཟུང་དུ་འཇུག་པའི་མཚན་ཉིད་ཅན་དཀྱིལ་འཁོར་རྣམ་གསུམ་དབྱེར་མེད་པའི་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་ཆོས་ཐམས་ཅད་ཡེ་གདོད་མ་ནས་སངས་རྒྱས་པ་ཉིད་དེ། དེ་ལ་དཀྱིལ་འཁོར་གསུམ་ནི། སྣང་སྲིད་འཁོར་འདས་ཀྱི་ཆོས་ཐམས་ཅད་རང་གི་སེམས་ཀྱི་རྩལ་སྣང་དུ་འདུ་ཞིང་། སེམས་དེ་ཉིད་སྐྱེ་མེད་སྤྲོས་པའི་མཐའ་ཐམས་ཅད་དང་བྲལ་བའི་དབྱིངས་སམ་རང་བཞིན་ཡུམ་ཀུན་ཏུ་བཟང་མོའི་མཁའ་ཀློང་རྣམ་པར་དག་པ་ནི། ཡེ་ཇི་བཞིན་པའི་དཀྱིལ་འཁོར་ཞེས་བྱ་སྟེ། སྤྱི་མདོ་ལས། སེམས་ལས་བྱུང་བ་སྟོང་ཉིད་པས། །དེ་ལས་བྱུང་བ་ཐམས་ཅད་སྟོང་། །ཞེས་སོ། །སྐྱེ་མེད་དེ་ཉིད་ཐམས་ཅད་ནས་ཐམས་ཅད་དུ་མ་འགགས་པར་རང་སྣང་རིས་མེད་ཀུན་ཁྱབ་ཏུ་ཤར་བ་ནི་ཡེ་ཤེས་ཀུན་ཏུ་བཟང་པོའི་རང་བཞིན་ལྷུན་གྲུབ་ཀྱི་དཀྱིལ་འཁོར་ཞེས་བྱ་སྟེ། དེ་ལས། བརྟགས་ན་མ་མཐོང་ཅིར་ཡང་སྣང་བ་ཉིད། །ཅེས་སོ། །དེ་གཉིས་ཀྱང་ངོ་བོ་ཐ་མི་དད་པར་ཟུང་འཇུག་ཏུ་གནས་པ་ནི། དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་སྟེ། རྩ་བ་བྱང་ཆུས་སེམས་ཀྱི་དཀྱིལ་འཁོར་ཞེས་བྱ་སྟེ། སྔ་མ་ལས། གསང་སྔགས་ཞེས་བྱ་བ་ནི། སྣང་བ་དང་མི་སྣང་བ་གཉིས་སུ་མེད་པ། གཉིས་ཀྱི་ངོ་བོ་ལས་གྲོལ་བ། དབུ་མར་མི་དམིགས་པ་གང་ཡིན་པ་དེ་ཁོ་ན་ཉིད་དོ། །ཞེས་སོ། །དེའི་ཕྱིར། ཆོས་ཐམས་ཅད་དཀྱིལ་འཁོར་རྣམ་གསུམ་དབྱེར་མེད་པའི་རང་བཞིན་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་ཡེ་ནས་སངས་རྒྱས་པར་བལྟ་བ་སྟེ། དེལས། ཐམས་ཅད་དེ་ཉིད་རོ་གཅིག་པས། །ཡེ་ནས་སངས་རྒྱས་བདེ་ཆེན་ཉིད། །སྐྱེ་འགག་མེད་པའི་སྙིང་པོ་ཡིན། །བྱ་བྱེད་མེད་པའི་དཀྱིལ་འཁོར་གསུམ། །ཡེ་ནས་གྲུབ་ཟིན་ལྷུན་གྱིས་གྲུབ། །ཅེས་དང་། གཡུ་ཐང་ལས། སྣང་སྲིད་བཟང་མོའི་མཁའ་ཀློང་ལས། །མ་བསྐྱེད་དཀྱིལ་འཁོར་ཀུན་བཟང་ཤར། །ཤར་བ་ཉིད་ན་ཤར་བ་མེད། །ཡབ་ཡུམ་སྲས་བཅས་བདེ་ཆེན་མོ། །ལྷུན་རྫོགས། ཞེས་སོ། །དེའང་ཀུན་ཏུ་བཟང་པོའི་རོལ་པ་མ་འགགས་པའི་རྩལ་ལྷ་སྐུར་འཆར་བར་འདོད་དེ། ཀུན་འདུས་ལས། ཀུན་བཟང་རྫོགས་ཆེན་ཡེ་ནས་བརྡལ་བ་ལ། །ཕྱི་ནང་གསང་བ་བཀོད་པའི་དཀྱིལ་འཁོར་འདིར། །སྣང་སྲིད་རྣམ་དག་ལྷ་དང་ལྷ་མོའི་དབྱིངས། །ཞེས་དང་། བང་མཛོད་འཕྲུལ་སྡེ་ལས། རྫོགས་པ་ཨ་ནུ་ཡོ་ག་ནི། །ཕུང་པོ་ཁམས་དང་སྐྱེ་མཆེད་རྣམས། །ལྷ་དང་ལྷ་མོའི་དཀྱིལ་འཁོར་དུ། །མ་བསྐྱེད་རྫོགས་པའི་ཚུལ་དུ་འདོད། །ཅེས་སོ། །ཚུལ་ཁྲིམས་ནི། དོན་བསྡུས་ལས། གཞི་འཛིན་པ་ནི་དམ་ཚིག་སྟེ། །སྒོ་གསུམ་སྡོམ་པར་གནས་པའི་དོན། །རྩ་བ་ཡན་ལག་ལ་སོགས་པའི། །བསྲུང་དང་སྒྲུབ་པ་དེ་ཉིད་དོ། །ཞེས་པས་སྒོ་གསུམ་གྱིས་རྩ་བ་དང་ཡན་ལག་ལ་སོགས་པའི་དམ་ཚིག་བསྲུང་ཞིང་བསྒྲུབ་པར་བྱ་བ་རྣམས་ཏེ། དེའང་དབྱེ་ན། གལ་མདོ་ངེས་པའི་དམ་ཚིག་བཞི། ཐུན་མོང་གི་ཉི་ཤུ་རྩ་བརྒྱད། ལྷག་པའི་བཞི། བརྟུལ་ཞུགས་ཀྱི་ཉེར་གསུམ། སྒྲུབ་པའི་ཉི་ཤུ། སྤྱོད་ལམ་རྒྱུན་གྱི་བཞི། བདུད་ལྔ་སྤང་བ། དགྲ་བཞི་གཞོམ་པ། ལྟ་བའི་དམ་ཚིག་སྟེ་རྣམ་གྲངས་དགུ་སྤྱི་མདོའི་ལེའུ་རེ་དྲུག་པར་གསུངས་ཏེ། དེ་ལ་དང་པོ་གལ་མདོ་ངེས་པའི་བཞི་ནི། ༡ལུས་དང་༢ངག་དང་༣ཡིད་དང་༤སྤྱོད་ཡུལ་ཡོངས་སུ་དག་པ་སྟེ་བདེ་བར་གཤེགས་པའི་ཐུགས་དང་སེམས་ཅན་གྱི་ཡིད་ཀྱིས་མ་ཁྲེལ་བར་བྱ་བའོ། །གཉིས་པ་ཐུན་མོང་ཉེར་བརྒྱད་ནི། རྩ་བ་སྐུ་གསུང་ཐུགས་རྡོ་རྗེའི་དམ་ཚིག་གསུམ། ཡན་ལག་སྤྱད་བྱ་ལྔ། དང་བླང་ལྔ། མི་འདོར་བ་ལྔ། ཤེས་བྱ་ལྔ། བསྒྲུབ་བྱ་ལྔ་སྟེ། གོང་བཤད་རྣམ་འབྱོར་ཆེན་པོའི་དམ་ཚིག་ཉེར་བརྒྱད་དང་མཐུན་ནོོ། །གསུམ་པ་ལྷག་པའི་བཞི་ནི། ༡དོན་དམ་པར་དམ་ཚིག་གི་ངོ་བོ་ལ་འདའ་ཉམས་དང་བྲལ་བས་བསྲུང་མཚམས་མེད་པ་དང་། ༢ རྣམ་པ་གཟུང་འཛིན་ལས་འདས་པས་ཕྱལ་བ་སྟེ་ཕྱ་ལེར་ཁྱབ་པ་དང་། ༣དེ་དག་སེམས་ཉིད་གཅིག་པུའི་དབྱིངས་སུ་འདུས་པ་དང་། ༤ཆོས་ཉིད་བསམ་གྱིས་མི་ཁྱབ་པའི་ངང་ལས་མ་གཡོས་ན་སྡོམ་པ་དམ་ཚིག་ཐམས་ཅད་རང་བཞིན་གྱིས་རྣམ་པར་དག་ཅིང་ལྷུན་གྱིས་གྲུབ་པ་སྟེ་གནས་ལུགས་རྟོགས་པ་རབ་ཀྱི་དམ་ཚིག་གོ །བཞི་པ་བརྟུལ་ཞུགས་ཉེར་གསུམ་ནི། ཝ་དང་ཅང་ཤེས་གྱི་ལིང་སོགས་ཀྱི་དཔེས་བསྟན་པའི་དོན་གནུབས་ཆེན་སོགས་ཀྱིས་བཀྲལ་བ་ལྟར་ན། ༡ ཝ་གལ་ལ་ཟིན་ན་སྲོག་ལ་མི་ལྟ་བར་ལག་པ་བཅད་ནས་འགྲོ་བ་ལྟར། རྣལ་འབྱོར་པས་སྲོག་ལ་བབས་ཀྱང་དམ་ཚིག་བསྲུང་བ་སྟེ། མི་མཐུན་ཕྱོགས་བརྟུལ་ཞིང་དམ་ཚིག་གི་སྟོབས་ལ་ཞུགས་པའི་ཐབས་སོ། །༢ཅང་ཤེས་རྟས་ཐམས་ཅད་ཤེས་ཤིང་མྱུར་མགྱོགས་ཀྱིས་ས་ཐམས་ཅད་ཡུད་ཙམ་གྱིས་བསྐོར་བ་ལྟར། ཤེས་རབ་ཀྱིས་ཤེས་བྱ་སྤྱི་དང་རང་གི་མཚན་ཉིད་ཐམས་ཅད་ལ་ཐོགས་པ་མེད་པའི་བརྟུལ་ཞུགས་སོ། ༣། གྱི་ལིང་རྩལ་ཆེ་བས་ཅིར་ཡང་འགྱུར་བ་ལྟར་ལུས་གུས་པས་གར་དང་ཕྱག་རྒྱ་འཁྲུལ་འཁོར་ལ་བརྩོན་པ་ལེ་ལོ་གཞོམ་པའི་བརྟུལ་ཞུགས་སོ། ༤། གླང་ཆེན་ཆང་གིས་མྱོས་པས་དགྲ་ཟུན་མི་འབྱེད་པར་གང་སྣང་གཞོམ་པ་ལྟར། འཁོར་འདས་དབྱེར་མེད་དུ་ཤེས་པས་ལྟ་སྤྱོད་ཀྱི་དགྲ་བཞི་བཅོམ་པའི་སྤྱོད་པའོ། ༥། སྟག་དཔའ་བརྟུལ་ཟ་བྱེད་ཀྱི་སེམས་གཏུམ་རྔམ་འཁྲུགས་པ་ལྟར། གནས་ལུགས་རྟོགས་པའི་ཏིང་ངེ་འཛིན་དཔའ་བོའི་བརྟུལ་ཞུགས་སྟོབས་དང་ལྡན་ཅིང་། སྤྱོད་པའི་བརྟུལ་ཞུགས་ཀྱིས་ཞིང་བཅུ་སྒྲོལ་བ་ཟ་བྱེད་གཏུམ་རྔམ་འཁྲུགས་པའི་ཚུལ་གདུལ་བྱ་དང་མཐུན་པ་སྟེ་རུ་ཏྲ་བསྒྲལ་ནས་གནས་སྤར་བ་ལྟ་བུའི་སྤྱོད་པའོ། ༦། ཁྱུང་ཆེན་ནམ་མཁར་ལྡིང་བས་གནམ་འཕང་རྩོལ་མེད་དུ་གཅོད་ཅིང་མ་བལྟས་པར་ཐམས་ཅད་གསལ་བ་ལྟར། ལྟ་བས་དབྱིངས་དང་ཡེ་ཤེས་དབྱེར་མེད་དུ་རྟོགས་པས་རྩོལ་བ་མེད་པའི་སྤྱོད་པའོ། ༧ །དོམ་གྱིས་གང་ལ་དམིགས་པ་ཐེ་ཚོམ་མེད་པར་འཇིག་ཅིང་འབྲལ་བར་བྱེད་པ་ལྟར། རྣམ་འབྱོར་ལྟ་སྤྱོད་ཀྱི་གདིང་དང་ལྡན་པས་ཐེ་ཚོམ་མེད་པར་མངོན་སྤྱོད་ཀྱི་ལས་ལ་སྦྱོར་བའི་བརྟུལ་ཞུགས་སོ། ༨། རྒྱ་མཚོའི་གཏིང་གི་གསེར་འགྱུར་བ་མེད་པ་ལྟར། ཟབ་དོན་གསང་ཐུབ་ཅིང་ཉམས་སུ་ལེན་པ་ལ་བློ་མི་ལྡོག་པར་བརྟན་པའི་བརྟུལ་ཞུགས་སོ། ༩། ལྐུག་པ་གཏི་མུག་ཅན་གྱིས་བླང་དོར་མི་འབྱེད་པ་ལྟར། འཁོར་འདས་སོགས་རིས་སུ་མི་འབྱེད་པའི་མཉམ་བཞག་གིས་བདག་མེད་རྟོགས་པའི་ཤེས་རབ་མཐར་ཕྱིན་པའི་བརྟུལ་ཞུགས་སོ། ༡༠། རི་རབ་མི་གཡོ་བ་ལྟར། བླ་མ་དང་གྲོགས་ལ་དད་གུས་མི་འགྱུར་བ་དང་ཏིང་ངེ་འཛིན་བྱིང་རྒོད་གྱིས་མི་གཡོ་བའི་གཉེན་པོ་བསྟེན་པའི་ཐབས་ཀྱི་བརྟུལ་ཞུགས་སོ། ༡༡། ནམ་མཁའ་ཡངས་ལ་རྒྱ་ཆེ་བས་སྤང་ལེན་མེད་པར་ཅིའང་ཤོང་བ་ལྟར། རྣལ་འབྱོར་པ་མཆེད་ཀྱི་ནང་དུ་ཤོང་ཡངས་ཆེ་བ་དང་བདག་ཉིད་ཆེན་པོའི་ལྟ་སྤྱོད་འདིའི་ནང་དུ་འཁོར་འདས་དང་ཐེག་པ་གང་ཡང་མ་ཤོང་བ་མེད་པར་སྤྱོད་པའི་བརྟུལ་ཞུགས་སོ། ༡༢། ཐོག་གང་ལ་བབས་ཀྱང་འཇོམས་པ་ལྟར། རྣལ་འབྱོར་པ་དྲག་པོའི་ཏིང་ངེ་འཛིན་གྱིས་དགྲ་བགེགས་གང་ཡང་ཐོགས་མེད་དུ་འཇོམས་པའི་བརྟུལ་ཞུགས་སོ། ༡༣། ལག་ན་རྡོ་རྗེས་ལོག་ལྟ་ཅན་ཐམས་ཅད་འཇོམས་པ་ལྟར། རྣལ་འབྱོར་པས་ཁྲོ་བོ་བསྒོམས་ནས་བར་དུ་གཅོད་པ་ཐེ་ཚོམ་མེད་པར་འཇོམས་པའི་བརྟུལ་ཞུགས་སོ། ༡༤། བྱ་རོག་གིས་དགྲ་དང་གཟན་གཉིས་དུས་གཅིག་ཏུ་མིག་གིས་བསྲུངས་པ་ལྟར། ཕྱི་ནང་གི་དམ་ཚིག་འདི་དག་རྒྱུད་དུ་སྤང་ལེན་དུས་གཅིག་ཏུ་བརྩོན་པའི་ཐབས་ཀྱི་བརྟུལ་ཞུགས་སོ། ༡༥། གླང་ཆེན་ཆུ་རབ་བདེ་བ་དང་མི་བདེ་བ་ལ་ལྟོས་པ་མེད་པར་འཇུག་པ་ལྟར། བདག་ཉིད་ཆེན་པོའི་ལྟ་སྤྱོད་གདིང་དང་ལྡན་པས་སྤང་བླང་གཉིས་མེད་དུ་སྤྱོད་པའམ། གདུལ་བྱ་མི་འདམ་པར་ཕྲིན་ལས་བཞིའི་ལས་མཛད་པའི་བརྟུལ་ཞུགས་སོ། ༡༦། སེང་གེ་གྲོགས་མེད་གཅིག་པུར་སྡོད་པ་ལྟར། ལྟ་སྤྱོད་མི་མཐུན་པའི་གྲོགས་སྤངས་ནས་གཅིག་པུར་དགོན་པར་གནས་པས་ལྟ་སྒོམ་སྐྱོང་བའི་བརྟུལ་ཞུགས་སོ། ༡༧། ངང་པ་ཕོ་མོ་མི་འབྲལ་བར་འགྲོགས་པ་ལྟར། སེམས་ཅན་ལ་སྙིང་བརྩེ་བས་ཐར་པའི་བདེ་བ་ལ་འགོད་པའི་ཐབས་དང་མི་འབྲལ་བར་འགྲོགས་པའི་བརྟུལ་ཞུགས་སོ། ༡༨། སྒྱུ་མ་མཁན་གྱིས་བྱས་པའི་གཟུགས་བརྙན་ལྟར། ཕུང་ཁམས་སྐྱེ་མཆེད་རྒྱལ་བའི་དཀྱིལ་འཁོར་སྒྱུ་མ་ལྟ་བུར་ཡིན་པར་ཤེས་ནས་དེ་ལྟར་སྒོམ་ཞིང་སྟོན་པ་ནི་ཐབས་མཁས་ཀྱིས་འདྲིད་པའི་བརྟུལ་ཞུགས་སོ། ༡༩། ཕག་གིས་གཙང་དམེ་མེད་པར་ཐམས་ཅད་བཟའ་བ་ལྟར། དམ་རྫས་ལྔ་བླང་དོར་མེད་པར་མཉམ་པ་ཉིད་དུ་སྤྱོད་པའི་བརྟུལ་ཞུགས་སོ། ༢༠། ཅེ་སྤྱང་ཐོགས་པ་མེད་པར་གསོད་ལ་དགའ་བ་ལྟར། ལྟ་སྤྱོད་གོམས་པའི་ཐུགས་རྗེས་ལོག་ལྟ་ཅན་རྟོགས་པས་བསྒྲལ་ཞིང་རྣམ་ཤེས་ཟག་མེད་ལ་བཀོད་པས་ཚོགས་གཉིས་རྫོགས་པའི་ཐབས་ཀྱི་བརྟུལ་ཞུགས་སོ། ༢༡། གློག་གིས་ཐམས་ཅད་དུས་གཅིག་མྱུར་དུ་གསལ་བ་ལྟར། ལམ་ཉམས་སུ་བླངས་པས་རང་དོན་མྱུར་དུ་འགྲུབ་པར་བརྩོན་པའི་བརྟུལ་ཞུགས་སོ། །༢༢བྱ་རྒོད་ཚུལ་ཁྲིམས་སྲོག་གཅོད་ལ་འཛེམ་པ་ལྟར། བརླང་སྤྱོད་ཀྱི་བརྟུལ་ཞུགས་ཐེག་པ་གཞན་ལ་མི་འཚམ་པ་ལྟར་སྣང་ཡང་འདིར་བདག་ཉིད་ཆེན་པོའི་ཚུལ་དུ་སྤྱད་ན་དམ་ཚིག་སྐྱོང་ཞིང་ཉེས་པ་དག་པའི་བརྟུལ་ཞུགས་སོ། ༢༣། རྒྱལ་པོ་བག་དང་ལྡན་པས་རྒྱལ་ས་གནོན་ཅིང་རང་ལས་འཁོར་གཅེས་པར་སྐྱོང་བ་ལྟར། དབྱིངས་ཡེ་ཤེས་དབྱེར་མེད་བདེ་བ་ཆེན་པོར་རྟོགས་གོམས་ཀྱི་ཐབས་ལ་འབད་པའི་རྣལ་འབྱོར་པས་བརྟུལ་ཞུགས་ཀྱི་རྒྱལ་ས་གནོན་ཅིང་ཆོས་ཐམས་ཅད་རང་ལས་མི་གཞན་པར་རྟོགས་པས་འགྲོ་བ་སྐྱོང་ཞིང་ཉེས་པ་རང་སར་དག་པའི་བརྟུལ་ཞུགས་སོ། །དེ་རྣམས་ཀྱང་བདག་དོན་དང་གཞན་དོན་དང་གཉིས་ཀའི་དོན་བློ་རབ་ཅིག་ཆར་བས་ཉམས་སུ་ལེན་བྱར་གསུངས་སོ། །ལྔ་པ་སྒྲུབ་པའི་ཉི་ཤུ་ནི། མི་ཤིགས་པ་ནི་སེང་གེ་སྟེ། །གཅན་གཟན་རྒྱལ་པོའི་ཁྲི་མི་གཞིག །ཅེས་སོགས་ཀྱིས་བསྟན་པའི་དོན། བདེ་འདུས་ཞི་རྒྱུད་ལས། གཅན་གཟན་རྒྱལ་པོའི་ཁྲི་མི་གཞིག །ཅེས་སོགས་བརྡ་ཡིས་བསྟན་པ་དང་གནད་གཅིག་སྟེ། ༡རྡོ་རྗེ་སློབ་དཔོན་གྱི་སྐུ་ལ་མི་བསྡོ། ༢བླ་མའི་ཡུམ་ལ་མི་སྤྱོད། ༢དད་ཅན་གྱི་ཚོགས་མི་བཅག ༣དཀོན་མཆོག་དང་བླ་མའི་དཀོར་ལ་མི་འབག་ཅིང་ཆང་མྱོས་པར་མི་འཐུང་། ༤མཆེད་ཀྱི་ཡུམ་ལ་མི་སྤྱད། ༥མཚན་དང་མི་ལྡན་པའི་གཟུངས་མ་མི་བསྟེན། ༦མཚན་ཉིད་དང་མི་ལྡན་པའི་དམ་རྫས་མི་བསྟེན། ༧མཁས་པའི་ཡོན་ཏན་ལ་མི་སྨོད། ༨སྣོན་མིན་པ་གསང་ཆོས་མི་སྟོན། ༩མཚན་ལྡན་གྱི་གཟུངས་མ་དང་སྣོད་ལྡན་གྱི་སློབ་མ་མི་སྤང་། ༡༠དོན་བདེ་སྟོང་དང་རྟགས་ཡབ་ཡུམ་མི་འབྲལ། ༡༡མཆེད་ལྕམ་ལ་ཀྱལ་ཁ་ཙམ་དུའང་ནང་འཐབ་མི་བྱེད། ༡༢གཞན་གྱིས་སྤྱད་པའི་ལྷག་མི་སྤྱོད། ༡༣བླ་མའི་གདན་ས་མི་རློམ། ༡༤ རང་གཞན་གྱི་སྒྲུབ་པའི་མཚམས་མི་དབྲལ། ༡༥ཏིང་ངེ་འཛིན་བྱིང་རྒོད་ཀྱི་དབང་དུ་མི་གཏོང་། ༡༦བཟླས་པ་དང་ཆོ་ག་མི་ཚིག་གིས་བར་མི་གཅོད། ༡༧ དབང་རྟགས་ཀྱི་ཕྱག་རྒྱ་ལས་མི་འདའ་ཞིང་བརྡ་མི་བརྗེད་པར་བྱ་བ། ༡༨ རྣལ་འབྱོར་པའི་དཀྱིལ་འཁོར་མི་ད ཀྲུག་ཅིང་སྐྱེ་བོའི་མཐུ་བཟློག་མི་བྱེད་པ། ༡༩སློབ་དཔོན་གཙུག་ཏུ་འཁུར་བ་ལས་ཉམས་པར་མི་བྱ་བ་རྣམས་སོ། ༢༠ །དྲུག་པ་སྤྱོད་ལམ་རྒྱུན་གྱི་བཞི་ནི། རྡོ་རྗེ་གོ་ཕུར་ཊྭཱཾ་ཆེན་སོགས་ཀྱིས་བསྟན་པའི་དོན། ༡བསམ་གཏན་གྱི་སྲོག་གཅོད་པ་གཉིད་སྤང་བ་དང། ༢མྱོས་འགྱུར་ཀྱི་ཆང་སྤང་བ། ༣གསང་སྔགས་བརྡ་སྐད་ཀྱིས་སྨྲ་བ། ༤ ལེ་ལོའི་བདུད་གཞོམ་པའོ། །བདུན་པ་བདུད་ལྔ་སྤོང་བ་ནི། རྣལ་འབྱོར་སྤྱོད་པ་ལ་རྒྱུན་གྱི་བར་དུ་གཅོད་པའི་བདུད་རྣམ་པར་རྟོག་པ། ༡ལེ་ལོ། ༢ འདུ་འཛི། ༣ཚིག་རྩུབ། ༤ཁྲོ་གཏུམ་རྣམས་སྤང་བའོ། ༥། བརྒྱད་པ་དགྲ་བཞི་གཞོམ་པ་ནི། ༡ལྟ་སྒོམ་སྤྱོད་གསུམ་བཅོས་མ་རང་གར་ཤོར་བའི་དགྲ། ༢ལྟ་བ་དམན་ལ་སྤྱོད་པ་རྩིང་བ་འཆལ་བའི་དགྲ། ༣རྩ་བ་ཡན་ལག་གི་དམ་ཚིག་ཉམས་པ་ལྟུང་བའི་དགྲ། ༤ཚོད་ཡོད་ལེ་ལོས་འབྲས་བུ་འཕྲོག་པའི་དགྲ་སྟེ་བཞི་པོ་དེ་གཞོམ་པའོ། །དགུ་པ་ལྟ་བའི་དམ་ཚིག་ནི། སྣོད་རྣམ་པར་དག་པ་འོག་མིན་གྱི་ཞིང་། འདོད་ཡོན་རྣམ་པར་དག་པ་མཆོད་པའི་ཡོ་བྱད། འཁོར་བ་རྣམ་པར་དག་པ་ལྷའི་དཀྱིལ་འཁོར། ཉོན་མོངས་རྣམ་པར་དག་པ་ཡེ་ཤེས་ཆེན་པོར་རྟོགས་པའོ། །དེ་དག་ཀྱང་བསྡུ་ན་བསྲུང་མཚམས་མེད་པར་ཆོས་ཉིད་ཅིག་ཅར་བའི་དམ་ཚིག་དང་། བསྲུང་མཚམས་ཡོད་པ་སྙིང་རྗེའི་དམ་ཚིག་རིམ་གྱིས་པའི་སྡོམ་པ་གཉིས་སུ་འདུ་སྟེ། སྤྱི་མདོ་ལས། བསྲུང་བྱ་བསྲུང་དུ་མེད་པ་ནི། །ཆོས་ཉིད་དམ་ཚིག་དམ་པ་ཡིན། །ཞེས་དང་། །དམ་ཚིག་འདི་ནི་རྨད་པོ་ཆེ། །ཀུན་གྱི་ཐུན་མོང་མ་ཡིན་ཕྱིར། །མོས་པ་ཆུང་དུ་ཐམས་ཅད་ལ། །བསྲུང་བའི་མཚམས་དག་བཟུང་བར་བྱས། །ཞེས་སོ། །སྒོམ་པ་ནི། སྤྱིར་རྟོགས་བྱ་གཞི་དང་རྟོགས་བྱེད་ཀྱི་ལམ་གཉིས་ཀ་རྣལ་འབྱོར་གསུམ་དུ་བསྡུས་ནས་བཤད་དེ། སྤྱི་མདོ་དགོངས་འདུས་ལས། གྲོགས་པོ་དག དེ་བས་ན་བསམ་གྱིས་མི་ཁྱབ་པའི་རྣམ་པ་གང་ཞེ་ན། འདི་ལྟར་བསམ་གྱིས་མི་ཁྱབ་པའི་ཆོས་ཐམས་ཅད་ཀྱི་རྣམ་པ་ནི། རྣལ་འབྱོར་གསུམ་གྱིས་ཡོངས་སུ་འབྲེལ་བ་སྟེ། གསུམ་གང་ཞེ་ན། བྱ་བའི་རྣལ་འབྱོར་དང་། བྱ་བ་བྱེད་པའི་རྣལ་འབྱོར་དང་། བྱ་བ་མེད་པའི་རྣལ་འབྱོར་རོ། །ཞེས་པ་དང་། ཡང་རྒྱུ་ཡི་རྣལ་འབྱོར་དང་། རྐྱེན་གྱི་རྣལ་འབྱོར་དང་། འབྲས་བུའི་རྣལ་འབྱོར་གསུམ་དུ་རྩ་རྒྱུད་ཀུན་འདུས་རིག་པར་གསུངས་ཤིང་། རྩ་བཤད་ཀྱི་རྒྱུད་དེ་གཉིས་ཀྱི་དགོངས་དོན་གཅིག་ཏུ་བསྡུས་ནས་བསྟན་པ་ནི། དོན་བསྡུས་ལས། ཀུན་བཟང་ཐུགས་རྗེས་འགྲོ་དོན་དུ། །ཐེག་པ་གསུམ་སྣང་འདུལ་འཛད་པའི། །དོན་དམ་ངེས་པའི་ཐེག་པ་ལས། །གསང་སྒོ་མཚོན་པའི་མདོ་རྒྱུད་དོན། །རྣམ་པ་གསུམ་དུ་ཤེས་བྱ་སྟེ། །བྱ་བ་རྒྱུད་དང་བྱེད་པ་རྐྱེན། །བྱ་བྲལ་འབྲས་བུའི་རྣལ་འབྱོར་དག །ཇི་སྙེད་ཆོས་ཀྱི་རྩ་བར་བཤད། །ཅེས་གསུངས་པས། བྱ་བ་རྒྱུའི་རྣལ་འབྱོར། བྱེད་པ་རྐྱེན་གྱི་རྣལ་འབྱོར། བྱ་བྲལ་འབྲས་བུའི་རྣལ་འབྱོར་ཏེ་གསུམ་ལས། དང་པོ་ནི། ཆོས་ཐམས་ཅད་ཀྱི་གཤིས་ལུགས་དཀྱིལ་འཁོར་རྣམ་པ་གསུམ་གྱི་རང་བཞིན་དུ་མ་འདྲེས་ཡོངས་སུ་རྫོགས་པར་གནས་པ་ཉིད་ཡིན་ཏེ། དེ་ཉིད་ལས། ཕྱི་ནང་བྱེ་བྲག་ཇིི་སྙེད་པའི། །ཆོས་རྣམས་ཐམས་ཅད་བྱང་ཆུབ་སེམས། །ཇི་བཞིན་ངང་དུ་ཡེ་གནས་པས། །ཤེས་པར་བྱ་བ་རྒྱུད་དོན་ཡིན། །ཞེས་སོ། །གཉིས་པ་ནི། ལམ་གྱི་རྩོལ་བ་དང་བཅས་པའི་བྱེད་པས་སྲིད་པ་ལས་བརྒལ་ཏེ། ཞི་བ་གནས་སྐབས་ཀྱི་འབྲས་བུ་ལ་འཇུག་པར་བྱེད་པས་ཉན་རང་བྱང་སེམས་ཀྱི་ཐེག་པ་གསུམ་སྟེ། སྔ་མ་ལས། རྩོལ་བཅས་སྤྱོད་པས་འདྲེན་འཇུག་པའི། །ཐེག་པ་དེ་ནི་བྱ་བྱེད་རྐྱེན། །ཞེས་སོ། །གསུམ་པ་ནི། སེམས་ཀྱི་ཆོས་ཉིད་གདོད་མ་ནས་རང་བཞིན་གྱིས་རྣམ་པར་དག་པས་འབྲས་བུ་གཞན་ནས་བཙལ་བའི་རྩོལ་སྒྲུབ་ཀྱི་རེ་དོགས་དང་བྲལ་བ་སྔགས་ཕྱི་ནང་གི་ཐེག་པ་སྟེ། དེ་ཉིད་ལས། གཞན་དུ་འབྲས་བུ་རེ་རྩོལ་མེད། །བསྒྲུབ་བྱ་ཉིད་ལ་ལམ་གནས་པས། །ཐབས་ཆེན་ཐེག་འདི་བྱ་བྲལ་ལོ། །ཞེས་སོ། །དེ་ལྟར་རྐྱེན་འབྲས་ཀྱི་རྣལ་འབྱོར་ཕྱི་མ་གཉིས་པོ་དེ་ལ་ཐུན་མོང་སྤྱི་ཡི་ལམ་ཞེས་བྱ་ཞིང་། དེ་ལས་རྣལ་འབྱོར་ཆེན་པོ་མ་ཧཱ་ཡོ་ག་ཕྱིན་གྱི་སྒོམ་རིམ་ཐུན་མོང་བ་ནི་སྔར་སྨོས་པ་བཞིན་ལ། ཐུན་མིན་མདོ་རང་ལུགས་ཀྱི་མན་ངག་དང་སྒོམ་སྐོར་ནི་མདོ་དབང་ཆེན་མོ་སོགས་ལས་ཤེས་པར་བྱ་དགོས་ལ། འདིར་ཨ་ནུའི་རང་ལམ་ཁྱད་པར་བའི་དབང་དུ་བྱས་ཏེ། སྔ་མ་ལས། ངོ་བོ་ཐབས་དང་ཤེས་རབ་སྟེ། །ཞེས་པས་ཐབས་ཀྱིས་ངེས་པའི་ལམ་དང་། ཤེས་རབ་ཀྱིས་རྣམ་པར་གྲོལ་བའི་ལམ་གཉིས་སུ་ངེས་པ་ལས། དང་པོ་ཐབས་ལམ་ནི། སྦྱང་གཞི་མཆོག་ཏུ་མི་འགྱུར་བའི་བདེ་བ་ཆེན་པོ་གཉུག་མ་ལྷན་ཅིག་སྐྱེས་པའི་ཡེ་ཤེས་གནས་ལུགས་རྣམ་ཀུན་མཆོག་ལྡན་གྱི་སྟོང་པ་ཆེན་པོའི་རང་མདངས། ཤིན་ཏུ་ཕྲ་བའི་སྒོ་གསུམ་རྡོ་རྗེ་གསུམ་དུ་སྒྲུབ་གཞིར་རང་བྱུང་རྡོ་རྗེའི་ལུས་ལ་གནས་པའི་རྩ་རླུང་བྱང་སེམས་ཀྱི་དཀྱིལ་འཁོར་ཆེན་པོར། སྦྱང་བྱ་སྣང་གསུམ་འཕོ་བའི་བག་ཆགས་རྐྱེན་གྱུར་གཟུང་འཛིན་ཀུན་རྟོག་གི་གཡོ་བ་ཐ་མལ་སྣང་ཞེན་གྱི་སྒྲིབ་པ་རགས་ཕྲ་རྣམས། སྦྱོང་བྱེད་ཕྱི་སྤྲོས་རྩོལ་གྱི་ལམ་ལ་མི་ལྟོས་པར་ནང་རང་ལུས་རྩ་རླུང་ཐིག་ལེ་ལ་གནད་དུ་བསྣུན་པའི་ཐབས་གང་ཞིག ཞུ་བདེའི་ལམ་ལ་བརྟེན་ནས་རགས་པའི་འགྱུར་བ་ཐམས་ཅད་ཐོག་མར་གང་ལས་བྱུང་བ་འགྱུར་མེད་ཡེ་ཤེས་ཀྱི་དབུ་མའི་དབྱིངས་སུ་བསྟིམས་པ་ལས་དཔེ་དང་དོན་གྱི་ཡེ་ཤེས་བཙན་ཐབས་སུ་འདྲེན་པར་བྱེད་པའི་བདེ་བ་ཆེན་པོའི་མན་ངག་སྟེ། དེ་ཡང་སྟེང་སྒོ་འཁོར་ལོ་བཞིའམ་མེ་རླུང་གཉིས་བསྣན་པའི་འཁོར་ལོ་དྲུག་བསྒོམ་པའི་རྣལ་འབྱོར་གྱིས་ལྷན་སྐྱེས་ཡེ་ཤེས་རིམ་གྱིས་འདྲེན་པར་བྱེད་པ་དང་། འོག་སྒོ་ལས་སམ་ཡེ་ཤེས་ཀྱི་ཕྱག་རྒྱ་གང་རུང་ལ་བརྟེན་ནས་མཁའ་གསང་སྙོམས་འཇུག་གི་ཐབས་ལ་བརྟེན་ནས་འབར་འཛག་གི་སྦྱོར་བས་ཐིག་ལེ་འཛག་མེད་དུ་བཅིངས་ནས་ཡས་བབ་དང་མས་བརྟན་གྱི་དགའ་བས་དྲངས་པའི་འཕོ་མེད་ལྷན་ཅིག་སྐྱེས་པའི་ཡེ་ཤེས་ཅིག་ཅར་དུ་འདྲེན་པའི་ཐབས་གཉིས་ཏེ། དེ་ལས། རོལ་བའི་ཀ་ར་ལ་སོགས་པ། །མན་ངག་ཐབས་ཀྱིས་དེར་འཇུག་དང་། །ཞེས་སོ། །གཉིས་པ་གྲོལ་ལམ་ནི། དེ་ཉིད་ལས། ཐོས་བསམ་སྒོམ་པའི་ཚུལ་འགྲོ་བའི། །དེར་ནི་འཇུག་པ་རྣམ་གསུམ་སྟེ། །རྟོག་དཔྱོད་དོན་དང་ཡི་གེ་ཡིད། །ཅེས་པས། དང་པོ་རྟོག་དཔྱོད་ཀྱི་རྗེས་སུ་འཇུག་པ་ལྟ་བ་གཏན་ལ་ཕབ་པ་ནི། ལམ་གྱི་སྔོན་དུ་འགྲོ་དགོས་ཏེ། དེའང་ཆོས་ཅན་ཤེས་བྱའི་དོན་ལ་ཤེས་བྱེད་རིགས་པའི་གཏན་ཚིགས་རྣམས་ཀྱིས་སོ་སོར་བརྟགས་པས་ཆོས་ཐམས་ཅད་ཀྱི་གནས་ལུགས་ཆོས་ཉིད་ཇི་བཞིན་པ་དཀྱིལ་འཁོར་གསུམ་གྱི་རང་བཞིན་དབྱེར་མེད་སྨྲ་བསམ་བརྗོད་བྲལ་དུ་གཏན་ལ་ཕེབས་པ་ནི། འདི་ཉིད་ཀྱི་གྲུབ་མཐའ་སྟེ་གོང་དུ་སྨོས་ཟིན་ལ། འདིར་དོན་བཀོད་པ་དང་། རྟགས་ཀྱི་རོལ་པ་གཉིས་ལས། དང་པོ་ནི། སྤྲོས་མེད་རྣམ་པར་མི་རྟོག་པའི་ཏིང་ངེ་འཛིན་ལ་གནས་པ་སྟེ། བསྒོམ་བྱ་ཆོས་ཉིད་ཇི་བཞིན་པའི་ངང་ལ་སྒོམ་བྱེད་ཀྱི་བློ་ཡང་དེ་བཞིན་དུ་མ་བཅོས་པར་འཇོག་པ་སྟེ། སྤྱི་མདོ་ལས། ཇི་བཞིན་པ་ཡི་ཆོས་ཉིད་ལ། །དེ་བཞིན་པ་ཡི་བློ་བཞག་ན། །བརྗོད་པ་མེད་པའི་ངང་ཉིད་ལས། །མ་ཡེངས་རྒྱུན་དུ་དྲན་པའོ། །ཞེས་གསུངས་ཏེ། འདི་ལ་དོན་གྱི་རྗེས་སུ་འཇུག་པ་ཞེས་བྱའོ། །གཉིས་པ་ནི། སྤྲོས་བཅས་ལྷ་ཡི་ཏིང་ངེ་འཛིན་སྒོམ་པ་སྟེ། ས་བོན་ནམ་རྟེན་དང་བརྟེན་པ་སོ་སོའི་བསྐྱེད་སྔགས་བརྗོད་པ་ཙམ་གྱིས་ཆུ་ལས་ཉ་ལྡང་བ་ལྟར། སྣོད་བཅུད་ཐམས་ཅད་ལྷའི་གཞལ་ཡས་ཁང་དང་དཀྱིལ་འཁོར་གྱི་འཁོར་ལོར་གསལ་ལ་མ་འདྲེས་པ་ཅིག་ཅར་དུ་བསྒོམ་པ་གཙོ་བོར་བྱེད་པའི་ཉམས་ལེན་ཏེ། བང་མཛོད་འཕྲུལ་ལྡེ་ལས། ཨ་ནུ་ཡོ་གའི་ཐེག་པ་ནི། །སྙིང་པོ་ཙམ་ཞིག་བརྗོད་བྱས་ནས། །མ་བསྐྱེད་རྫོགས་པའི་ལྷ་རུ་བསྒོམ། །ཞེས་གསུངས་ཏེ། འདི་ལ་ཡི་གེའི་རྗེས་སུ་འཇུག་པ་ཞེས་བྱའོ། །དེ་དག་གི་ངེས་རྫོགས་བསྒོམ་པའི་དབང་དུ་བྱས་ན་ཟག་བཅས་དང་། ཟག་མེད་གཉིས་ལས། དང་པོ་ནི། འདུན་པ་སེམས་པའི་རྣལ་འབྱོར་དང་། རིགས་ཆེན་འབྱེད་པའི་རྣལ་འབྱོར་གཉིས་ཏེ། དེ་ཡང་བློ་སྟོབས་ཆེ་བ་རྣམས་རྟོགས་གོམས་ཆིག་ཆོད་དུ་བྱེད་པས་མཐར་ཕྱིན་པས་ན། ས་ལམ་རིམ་བགྲོད་ཀྱི་རྩོལ་བ་དང་བྲལ་ཡང་བློ་འབྲིང་ཐ་གཉིས་ཀྱིས་ནི། ས་བཅུ་པའི་སློབ་ལམ་བཞི་རིམ་གྱིས་སམ་ཐོད་རྒལ་གང་རུང་གིས་བགྲོད་ནས་མི་སློབ་པའི་ལམ་མཐར་ཐུག་གི་འབྲས་བུ་ལ་སྦྱོར་བར་བྱེད་དགོས་པ་ཡིན་པས། ཆོས་ཉིད་སྙིང་པོ་ཇི་བཞིན་པའི་རྗེས་སུ་འཇུག་པའི་རང་སའི་ལམ་ན་འཕར་བའི་རིམ་པ་ལྟར་བསྒོམས་པས། དང་པོ་འགྱུར་བ་མ་ངེས་པའི་ས་དང་། གཉིས་པ་བརྟེན་པ་གཞིའི་ས་གཉིས་ནི་ཚོགས་ལམ་འདུན་པ་སེམས་པའི་རྣལ་འབྱོར་གྱིས་བསྡུས་ཏེ། འདིས་རྐྱེན་འགྱུར་ལས་ཀྱི་བག་ཆགས་རག་ཕྲ་གཉིས་དག་ནས་མོས་སྤྱོད་ཀྱི་ལྷ་སྐུ་གྲུབ། ཐུན་མོང་གི་དངོས་གྲུབ་སྤྱན་དང་མངོན་ཤེས་སོགས་གྲུབ་པས་སངས་རྒྱས་སྤྲུལ་སྐུའི་ཞལ་མཐོང་བ་སོགས་ཚོགས་ལམ་གྱི་ཡོན་ཏན་རྣམས་འཆར་རོ། །གསུམ་པ་གལ་ཆེན་སྦྱོང་བ་དང་། བཞི་པ་བསླབ་པ་རྒྱུན་གྱི་ས། ལྔ་པ་བསོད་ནམས་རྟེན་གྱི་ས་གསུམ་ནི་སྦྱོར་ལམ་རིགས་ཆེན་འབྱེད་པའི་རྣལ་འབྱོར་ཏེ། འདིར་མངོན་དུ་རྒྱུའི་བག་ཆགས་རགས་འབྲིང་ཕྲ་བ་གསུམ་དག་ནས་རླུང་སེམས་ཙམ་གྱི་ལྷ་སྐུ་འགྲུབ་ཅིང་ཉིན་སྣང་དང་མཚན་སྣང་གི་བར་མཚམས་མེད་པར་ཐམས་ཅད་སྒྱུ་མ་ལྟ་བུར་རྟོགས་པ་སོགས་སྦྱོར་ལམ་གྱི་ཡོན་ཏན་རྣམས་འཆར་རོ། །གཉིས་པ་ནི། དབུགས་ཆེན་འབྱིན་པ་དང་ལུང་ཆེན་ཐོབ་པ་དང་། རྩལ་ཆེན་རྫོགས་པའི་རྣལ་འབྱོར་གསུམ་སྟེ། དེ་ཡང་སྦྱོར་ལམ་གྱི་རྟེན་དེ་ལ་ཚོགས་ཀྱི་སྤྱོད་པའི་ཉེར་རྒྱུ་ལ་བརྟེན་ནས། ཁུ་རྡུལ་རླུང་ཡིད་ཀྱི་འགྱུར་བདེ་རགས་པ་བཅོམ་སྟེ། འཇིགས་པ་ལྔ་དང་བྲལ་ཞིང་ཟག་པ་ཐམས་ཅད་ཟད་ནས། དྲུག་པ་བརྟེན་པ་ཁྱད་པར་དུ་འགྲོ་བའི་ས་ནི། མཐོང་ལམ་དབུགས་ཆེན་འབྱིན་པའི་རྣལ་འབྱོར་ཏེ། འདིས་ཀུན་འགྲོའི་སྒྲིབ་པ་དག་ཅིང་ཆོས་ཉིད་རང་མཚན་པ་མངོན་སུམ་དུ་མཐོང་བའི་སྟོབས་ཀྱིས་བདེ་སྟོང་འོད་གསལ་གྱི་ལྷ་སྐུ་འགྲུབ་ཅིང་ཡོན་ཏན་བརྒྱ་ཕྲག་བཅུ་གཉིས་ལ་དབང་ཐོབ། ལོངས་སྐུ་རིགས་ལྔའི་ཞིང་བགྲོད་ནས་ཆོས་ཉན་པ་སོགས་མཐོང་ལམ་གྱི་ཡོན་ཏན་ཐམས་ཅད་འཆར་རོ། །དེ་ནས་མཐོང་ལམ་འོད་གསལ་ལས་ལངས་པའི་རྗེས་ལ། བདུན་པ་དམིགས་པ་འབྲས་བུ་སྐྱེ་བའི་ས་ནི་སྒོམ་ལམ་ལུང་ཆེན་ཐོབ་པའི་རྣལ་འབྱོར་ཏེ། འདིས་ལྷན་ཅིག་གནས་པའི་སྒྲིབ་པ་དག་ནས་ཆོས་ཉིད་རྟོགས་པའི་ཡེ་ཤེས་དང་དག་པ་ལྷ་སྐུའི་སྣང་བ་རྒྱུན་མི་འཆད་པ་སློབ་པའི་ཟུང་འཇུག་གི་སྐུ་འགྲུབ། དེ་ནས་བརྒྱད་པ་གནས་པ་མི་འགྱུར་བ་དང་། དགུ་པ་གདལ་བ་ཆོས་ཉིད་ཀྱི་ས་དང་། བཅུ་པ་རྫོགས་པ་ཅི་ཆིབ་{སྤྱིར་ཆུབ} ཀྱི་ས་གསུམ་པོ་མཐར་ལམ་རྩལ་ཆེན་རྫོགས་པའི་རྣལ་འབྱོར་གྱིས་བསྡུས་ཏེ། འདིས་བག་ཉལ་རགས་འབྲིང་ཕྲ་གསུམ་གྱི་སྒྲིབ་པ་རིམ་པར་དག་ཅིང་། དེ་ལྟར་སྒོམ་མཐར་གྱི་ལམ་བཞི་པོ་དེ། ཐུན་མོང་བ་ལྟར་ན་སྒོམ་ལམ་ས་དགུས་བསྡུས་པས་ན། དེ་རྣམས་སུ་སྔར་མཐོང་ལམ་གྱི་ཡོན་ཏན་བརྒྱ་ཕྲག་བཅུ་གཉིས་པོ་དེ་སྟོང་དུ་འགྱུར་བ་ནས། ཞིང་ཁམས་བརྗོད་དུ་མེད་པ་བྱེ་བ་ཁྲག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དང་མཉམ་པའི་བར་དུ་རིམ་པར་འཕེལ་ཞིང་། ཆོ་འཕྲུལ་བཞི་དང་། དབང་བཅུ་ལ་སོགས་པར་ཡོན་ཏན་འཆར་རོ། །དེའི་མཐར་མི་སློབ་པའི་ལམ་རྒྱུན་མཐའི་བར་ཆད་མེད་ལམ་ལ་བརྟེན་ནས་འདོད་ཆགས་ཆེན་པོའི་ལམ་གྱིས་འབྲས་བུའི་དབང་བསྐུར་བས་དགའ་བཞི་ལུགས་འབྱུང་དང་ལུགས་ལྡོག་གི་མཐར་སྣང་གསུམ་འཕོ་བའི་བག་ཆགས་ཕྲ་བ་རྟེན་ཁུ་རྡུལ་རླུང་གསུམ་གྱི་རྒྱུ་བ་ཤིན་ཏུ་ཕྲ་བའང་རྒྱུན་ཆད་པས། བརྟེན་པ་ཤེས་སྒྲིབ་ཕྲ་བའང་དག་སྟེ། འབྲས་ཆོས་ཉེར་ལྔ་དབྱེར་མེད་ལྷུན་གྱིས་གྲུབ་པའི་བདེ་བ་ཆེན་པོའི་སྐུ་མི་སློབ་པའི་ཟུང་འཇུག་ལ་མངོན་དུ་སྦྱོར་བར་བྱེད་པ་སྟེ། དེ་ལྟར་ས་བཅུ་པོ་རེ་རེ་དང་སྦྱར་བའི་གནས་སྐབས་བཅུར། རང་སའི་ལམ་ན་འཕར་བའི་རིམ་པ་ལྟར་བསྒོམས་པས། རྐྱེན་འགྱུར་ལས་ཀྱི་བག་ཆགས་རགས་ཕྲ་སོགས་གོང་སྨོས་རང་སའི་སྒྲིབ་པ་བཅུ་པོ་རིམ་པར་དག་ནས་གོང་མ་གོང་མ་ལ་སྦྱོར་བའི་ཚུལ་འདི་ནི། གཡོ་བ་བྱང་ཆུབ་སེམས་སོགས་སེམས་བཅུ་པོ། དཔེ་སྐར་མ་ཕྲ་མོ་ལྟ་བུ་ལ་སོགས་པ་བཅུ་དང་སྦྱར་ནས་བགྲོད་པར་རྩ་རྒྱུད་ཀུན་འདུས་ཀྱི་ལེའུ་གཉིས་པ་སོགས་མདོའི་རྩ་བཤད་ཀྱི་རྒྱུད་དང་མན་ངག་ལས་རྒྱས་པར་གསུངས་ཞེས་ཀུན་མཁྱེན་དྷརྨ་ཤྲཱིས་བཞེད་དོ། །དེ་ལས་སྒྲིབ་པ་བཅུ་སྤོང་ཚུལ་གོང་དུ་གསལ་ལ། སེམས་བཅུ་དང་དཔེ་བཅུ་སྦྱར་ཚུལ་ནི། རྣལ་འབྱོར་ཆེན་པོའི་ས་ཞེས་ཐུན་མིན་གྱི་ལམ་སྟེ། སྐྱེ་བའི་ས་དང་རྒྱུའི་ས་གང་ནས་གསང་སྔགས་སུ་སེམས་སྐྱེས་ཀྱང་འདིར་གཞི་ལས་དང་པོར་འགྱུར་ཏེ། རྣལ་འབྱོར་ལྔའི་ཚོགས་ལམ་འདུན་སེམས་ཀྱི་སྐབས་སུ། འགྱུར་བ་མ་ངེས་པའི་སར། ཐོག་མར་སྔགས་ཀྱི་བདེན་གཉིས་སྤྱིའི་མཚན་ཉིད་ཙམ་ཤེས་པའི་སེམས་གཡོ་བ་གཡོ་བའི་སེམས། དཔེ་མུན་པའི་སྤྲིན་རུམ་ནས་སྐར་ཟེར་ཕྲ་མོ་བྱུང་བ་དང་འདྲ། བློ་མུན་པ་ལྟ་བུ་ལས་བྱང་ཆུབ་ཀྱི་སེམས་རྒྱུ་རྐྱེན་གྱིས་དེ་ཙམ་སྐྱེས་པའོ། །བརྟེན་པ་གཞིའི་སར། རྒྱུ་དེས་གསང་སྔགས་ཀྱི་འབྲས་བུའི་དོན་ལ་སློབ་ཅིང་རྟོགས་པར་སྨོན་པ་སྨོན་པའི་སེམས། དཔེ་སྐར་མ་འབྲིང་པོ་ཙམ་སྟེ་ད་དུང་སྔགས་ཀྱི་དེ་ཁོ་ན་ཉིད་ལ་ཞུགས་པ་ནི་མིན་ཏེ་མོས་པ་ཙམ་མོ། །གཉིས་པ་སྦྱོར་ལམ་རིགས་ཆེན་འབྱེད་པའི་སྐབས་སུ་གལ་ཆེན་སྦྱོང་བའི་སར། དེ་གཉིས་ཀྱི་རྒྱུས་སྔགས་ལ་ཞུགས་ནས་བསླབ་པའི་མཐའ་བཅུ་ལ་སློབ་པའི་ཚེ། འོག་མར་མེད་པའི་ལྷག་པའི་སེམས་སྨོན་པ་ལས་གྱེན་དུ་ལྡང་བ་ལྡང་བའི་སེམས། དཔེ་མཚན་མོའི་སྐར་ཆེན་ལྟ་བུ། བསླབ་པ་རྒྱུན་གྱི་སར། རྒྱུ་དེས་སྔགས་ཀྱི་དོན་རྟོགས་པ་ལ་སྦྱོར་བ་སྦྱོར་བའི་སེམས། དཔེ་འགལ་མེའི་འཁོར་ལོ་མྱུར་ལ་རྒྱུན་མི་ཆད་པའམ་ཟླ་བ་ཚེས་གཅིག་པ་ལྟ་བུ། བསོད་ནམས་རྟེན་གྱི་སར། དེས་མཉམ་ཉིད་ཀྱི་དོན་ལ་ཤེས་རབ་ཀྱིས་རྩལ་སྦྱོང་སྟེ་མཐོང་ལམ་ལ་འཇུག་པ་གཉིས་མེད་ཀྱི་དོན་ལ་འཇུག་པའི་སེམས། དཔེ་སྒྲོན་མེའམ་ཟླ་བ་ཚེས་གཉིས་པ་ལྟ་བུའོ། །གསུམ་པ་མཐོང་ལམ་དབུགས་ཆེན་འབྱིན་པའི་སྐབས་སུ་བརྟེན་པར་ཁྱད་པར་གྱི་སར། སྔར་གྱི་རྒྱུ་དེས་ཆོས་ཉིད་ཀྱི་རོ་མྱོང་ཞིང་བདེན་པ་མཐོང་བའི་ཚེ་སྔར་མེད་ཀྱི་དགའ་བ་སྐྱེ་བ་ཤིན་ཏུ་དགའ་བའི་སེམས། དཔེ་བུམ་ནང་གི་མར་མེའམ་ཟླ་བ་ཚེས་གསུམ་པ་ལྟ་བུའོ། །བཞི་པ་སྒོམ་ལམ་ལུང་ཆེན་ཐོབ་པའི་སྐབས་སུ། དམིགས་པ་འབྲས་བུ་སྐྱེ་བའི་སར། རྟོགས་ཟིན་སྒོམ་ལམ་ཆོས་ཉིད་ལ་འཇུག་པའི་ཚེ། ལྟ་བའི་གདེང་དེ་ལས་མི་འགྱུར་བ་མི་འགྱུར་བ་ལྷག་པའི་སེམས། དཔེ་ཚེས་བཞི་པའི་ཟླ་བ་ལྟ་བུའོ། །ལྔ་པ་མཐར་ལམ་རྩལ་ཆེན་རྫོགས་པའི་སྐབས་སུ། གནས་པ་མི་འགྱུར་བའི་སར། ལམ་མཐར་ཕྱིན་ཏེ་ཆོས་ཐམས་ཅད་བདག་ཉིད་ཆེན་པོ་རིག་པའི་ཆོ་འཕྲུལ་དུ་རྟོགས་པ་ཅིར་སྣང་རང་བྱུང་ཡེ་ཤེས་སུ་གསལ་བའི་སེམས། དཔེ་ཚེས་ལྔ་པའི་ཟླ་བ་ལྟ་བུ། གདལ་བ་ཆོས་ཉིད་ཀྱི་སར། ཤིན་ཏུ་གོམས་པ་གདེང་དུ་གྱུར་པས་རང་རིག་པ་མཐའ་དང་བྲལ་བའི་དོན་ཉིད་དང་དབྱེར་མེད་པར་འབད་མེད་དུ་གནས་པའི་སེམས། དཔེ་ཤིན་ཏུ་གསལ་བའི་སྒྲོན་མེའམ་ཟླ་བ་ཚེས་བརྒྱད་པ་ལྟ་བུ། རྫོགས་པ་ཅི་ཆིབ་{སྤྱིར་ཆིབས}ཀྱི་སར། རྒྱུ་དེས་སྒོམ་མི་དགོས་པར་ཏིང་འཛིན་ལས་སུ་རུང་བའི་ཚེ། དབྱིངས་ཡེ་དབྱེར་མེད་མ་འདྲེས་ཡོངས་རྫོགས་སུ་རྟོགས་པ་དེ་ལས་སྐྱེད་བྱར་དུ་མེད་པས་རྫོགས་པའི་སེམས། དཔེ་ཚེས་བཅུ་དྲུག་གི་ཟླ་བ་ལྟ་བུ་གསལ་ཞིང་རྫོགས་པའོ། །དེས་ན་འགྲོ་བའི་སེམས་ཡེ་ནས་ཆོས་སྐུར་ཡོད་ཀྱང་། བརྟག་པའི་སྒྲིབ་པས་བསྒྲིབས་ནས་མ་མཐོང་བ་དེ་སེམས་བཅུས་བསྐྱེད་པས་འབྲས་བུ་གྲུབ་ཅིང་དེ་ལྟར་མཐར་ཕྱིན་པ་ཡིན་ཞེས་གནུབས་ཆེན་གསུངས་སོ། །དེ་ལྟར་བཤད་པའི་རྣལ་འབྱོར་ལྔ་དང་། ས་བཅུ་པོ་དེ་རྣམས་ཀྱི་ངེས་ཚིག་ནི། མདོ་རྩ་བཤད་ཀྱི་རྒྱུད་དང་མན་ངག་ལས་གསལ་བར་བསྟན་པ་མ་མཐོང་ཡང་། སྤྱི་ཙམ་ལ་དཔག་ན་རྣལ་འབྱོར་ལྔའི་དང་པོ་ནི། ཚོགས་ལམ་གྱི་དུས་སུ་འོད་གསལ་དང་ལྷ་སྐུ་གཉིས་ཀ་འདུན་པས་དྲངས་པའི་མོས་པ་ཙམ་གྱིས་ཡུལ་དུ་བྱེད་པས་འདུན་པ་སེམས་པའི་དང་། གཉིས་པ་ནི་སྦྱོར་ལམ་ཐོབ་པའི་ཚེ་ཟག་པ་ཡོད་ཀྱང་ལྡོག་པ་མེད་པས་རིགས་ངེས་པའི་ཕྱིར་རིགས་ཆེན་འབྱེད་པ་དང་། གསུམ་པ་ནི་མཐོང་ལམ་དུ་འཇིགས་པ་ལྔ་དང་བྲལ་བ་སོགས་དང་། ཆོས་ཉིད་མངོན་སུམ་མཐོང་བས་འཇིག་རྟེན་གྱི་ཆོས་ལས་འདས་པས་དབུགས་ཆེན་འབྱིན་པའི་དང་། བཞི་པ་ནི་སྒོམ་ལམ་དུ་དུས་དང་གནས་སོགས་ངེས་པ་ཅན་གྱི་སྒོ་ནས་ལུང་བསྟན་ཆེན་པོ་ཐོབ་པས་ལུང་ཆེན་ཐོབ་པའི་དང་། ལྔ་པ་ནི་མཐར་ལམ་དུ་སློབ་པའི་ཟུང་འཇུག་གི་ཡོན་ཏན་གྱི་རྩལ་མཐར་ཐུགས་པ་རྫོགས་པའི་ཕྱིར་རྩལ་ཆེན་རྫོགས་པའི་རྣལ་འབྱོར་རོ། །ས་ཡང་རྣམ་པ་བཅུ་ལས། དང་པོ་ཚོགས་ལམ་དུ། ཟག་ལྡོག་གཉིས་ཀ་ཡོད་པས་འགྱུར་བ་མ་ངེས་པ་དང་། རྣལ་འབྱོར་དང་པོ་འདིའི་སྐབས་ཀྱི་མངོན་རྟོགས་རྣམས་བརྟེན་པ་སྦྱོར་ལམ་སོགས་བསྐྱེད་པའི་རྟེན་ཡིན་པས་གཉིས་པ་ལ་རྟེན་པ་གཞི་ཡི་ས་ཞེས་བྱ་ཞིང་། སྦྱོར་ལམ་སྐབས། མཐོང་ལམ་དོན་གྱི་འོད་གསལ་ལ་སྒྲིབ་པའི་མངོན་རྒྱུའི་བག་ཆགས་ཐམས་ཅད་སྦྱོང་བས་གསུམ་པ་ལ་གལ་ཆེན་སྦྱོང་བའི་ས་དང་། ཉིན་མཚན་མེད་པར་སྒྱུ་མ་ལྟ་བུའི་ཚུལ་གྱིས་ཟུང་འཇུག་གི་རྒྱུ་ལ་བསླབས་པས་བཞི་པ་ལ་བསླབ་པ་རྒྱུན་གྱི་ས་དང་། ཉེ་རྒྱུའི་སྤྱོད་པའི་བསོད་ནམས་ལ་བརྟེན་ནས་ཟག་མེད་ཀྱི་ཡེ་ཤེས་ལ་སྦྱོར་བས་ལྔ་པ་ལ་བསོད་ནམས་རྟེན་གྱི་ས་ཞེས་བྱའོ། །མཐོང་ལམ་དུ་དོན་གྱི་འོད་གསལ་མངོན་དུ་མཐོང་བས་དེ་ལ་བརྟེན་ནས་ཟག་མེད་ཀྱི་ཡོན་ཏན་ཐམས་ཅད་གོང་ནས་གོང་དུ་ཁྱད་པར་དུ་འགྲོ་བས་དྲུག་པ་ལ་བརྟེན་པས་ཁྱད་པར་དུ་འགྲོ་བའི་ས་ཞེས་བྱ། །སྒོམ་ལམ་དུ་སློབ་པའི་ཟུང་འཇུག་གི་དོན་ལ་དམིགས་ཤིང་གོམས་པས་འབྲས་བུ་མི་སློབ་པའི་ཟུང་འཇུག་གི་སྐུ་འགྲུབ་པས་བདུན་པ་ལ་དམིགས་པས་འབྲས་བུ་སྐྱེ་བའི་ས་ཞེས་བྱ། མཐར་ལམ་དུ་དབྱིངས་ཡེ་དབྱེར་མེད་ཀྱི་དགོངས་པ་ལ་རྟག་ཏུ་གནས་ཤིང་འཕོ་འགྱུར་མེད་པས་བརྒྱད་པ་ལ་གནས་པ་མི་འགྱུར་བའི་ས་དང་། ཆོས་ཉིད་དོན་གྱི་འོད་གསལ་དང་ཆོས་ཅན་ལྷ་སྐུའི་སྣང་བ་གཉིས་འདུ་འབྲལ་མེད་པའི་ཆོས་ཉིད་ཀྱི་ཕྱག་རྒྱས་སྣང་སྤྱོད་ཐམས་ཅད་ལ་ཁྱབ་པར་བརྡལ་བས་དགུ་པ་ལ་བརྡལ་བ་ཆོས་ཉིད་ཀྱི་ས་དང་། རྩལ་སྣང་གཟུགས་སྐུའི་བཀོད་པ་ཐམས་ཅད་སྐྱེ་བ་མེད་པའི་དབྱིངས་སུ་འུ བ་ཆུབ་པར་ཡོངས་སུ་རྫོགས་ཤིང་མཐར་ཕྱིན་པས་རྫོགས་པ་ཅི་ཆིབ་{སྤྱིར་ཆུབ} ཀྱི་ས་ཞེས་བྱའོ། །ས་འདི་རྣམས་ཕལ་ཆེར་ལ་མ་ངེས་པ་ཞེས་པའི་སྒྲ་སྦྱོར་བ་ལྟར་ན་འདི་དག་སློབ་པའི་ས་ཡིན་པས་རང་རང་གི་གནས་སྐབས་ཀྱི་སྒྲིབ་པ་དག་ཅིང་ས་གོང་མའི་ཡོན་ཏན་ལ་སྦྱོར་དུ་ཡོད་པས་རང་རང་གི་སྐབས་སུ་བཞག་པའི་ངེས་ཚིག་དེ་ཉིད་ས་དང་ལྡན་པའི་གང་ཟག་དེ་ལ་རྣམ་པ་ཀུན་ཏུ་མ་ངེས་སོ། །ཡང་ས་ཕྱི་མ་ལ་མི་སློབ་པའི་སར་བཤད་པ་ལྟར་ནའང་དགྲ་བཅོམ་ཞུགས་པའི་ས་བཞིན་བཏགས་པ་བ་ཡིན་གྱི་དངོས་ནི་མིན་ནོ་ཞེས་བདག་གི་མཁན་པོ་རྗེ་དབོན་མཁས་པ་ཆེན་པོ་གུ་ཎས་གསུངས་སོ། །མདོར་ན་ཀུན་རྫོབ་བྱང་སེམས་དང་འབྲེལ་བའི་གདམས་པ་སྟེང་སྒོ་རླུང་དང་འཇུ་འདུལ་གྱི་མན་ངག་དང་། འོག་སྒོ་ཁམས་གསུམ་རོལ་པའི་མན་ངག་གཉིས་ལ་བརྟེན་ནས་འཛག་མེད་བདེ་སྟོང་གི་ཡེ་ཤེས་བསྐྱེད་པ་ལ་བསླབ་པ་དང་། དོན་དམ་བྱང་སེམས་དང་འབྲེལ་བའི་གདམས་པ། རྟེན་ཅན་སྙིང་གའི་མི་ཤིགས་པའི་ཐིག་ལེ་ལ་རླུང་སེམས་ཀྱི་དྭངས་མ་ཐམས་ཅད་ཐིམ་སྟེ་དབྱིངས་རིག་གཉིས་མེད་བདེ་བ་ཆེན་པོའི་ཡེ་ཤེས་འཆར་བས་ཁམས་གསུམ་བདེ་བ་ཆེན་པོར་གྲོལ་བར་བྱེད་པའི་མན་ངག་དང་། རྟེན་མེད་མི་གཡོ་གསུམ་ལྡན་གྱི་གནད་ཀྱིས་རྣམ་པར་མི་རྟོག་པའི་ངང་ལ་བསལ་བཞག་མེད་པར་བསྐྱངས་པ་ཡུལ་ཆོས་ཉིད་དོན་གྱི་ཡེ་ཤེས་དང་། ཡུལ་ཅན་ཆོས་སྐུ་གཞིའི་ཡེ་ཤེས་དབྱེར་མེད་པའི་རིག་པ་དབྱིངས་ཡེ་ཟུང་འཇུག་ཏུ་རྟོགས་པས། དཀྱིལ་འཁོར་གསུམ་མ་འདྲེས་ཡོངས་རྫོགས་སུ་གཏན་ལ་འབེབས་པར་བྱེད་པའོ། །སྤྱོད་པ་ནི། སྤྱིར་མཉམ་པ་ཉིད་ལ་གཙོ་བོར་སྤྱོད་པ་སྟེ། བང་མཛོད་འཕྲུལ་ལྡེ་ལས། རྫོགས་པ་ཨ་ནུ་ཡོ་ག་ནི། །དབྱིངས་དང་ཡེ་ཤེས་ལོངས་སྤྱོད་རྫོགས། །ཞེས་སོ། །བྱེ་བྲག་ཏུ་དབྱེ་ན། བྱིན་གྱིས་རློབ་དང་། དབང་བསྒྱུར་དང་། ཐབས་གྱི་སྤྱོད་པ་གསུམ་སྟེ། སྤྱི་མདོ་ལས། བྱིན་གྱིས་རློབ་ཀྱི་སྤྱོད་པ་དང་། །དབང་བསྒྱུར་ཐབས་ཀྱི་སྤྱོད་པ་སྟེ། །དཔེར་ན་ནམ་མཁའ་རྒྱལ་པོའམ། །ཇི་ལྟར་མེ་དཔུང་ཆུ་བོ་འདྲ། །ཞེས་པས་དབྱིངས་ཡེ་གཉིས་མེད་རྟོགས་པའི་བྱིན་རླབས་ཀྱི་སྤྱོད་པ་ནམ་མཁའ་ལྟ་བུ། དུག་ལྔ་ཡེ་ཤེས་ལྔའི་རང་བཞིན་དུ་དབང་བསྒྱུར་བའི་སྤྱོད་པ་རྒྱལ་པོའམ་མེ་དཔུང་གིས་ཤིང་བསྲེགས་པ་ལྟ་བུ། འཁོར་འདས་གཉིས་མེད་དུ་རྟོགས་པའི་ཐབས་ཀྱི་སྤྱོད་པ་རྒྱུན་མི་འཆད་པ་ཆུ་བོ་ལྟ་བུ་རྣམས་སོ། །འབྲས་བུ་ནི། ཚེ་གཅིག་གིས་མི་སློབ་པའི་ཟུང་འཇུག་འབྲས་ཆོས་ཉེར་ལྔ་དབྱེར་མེད་ལྷུན་གྲུབ་ཀྱི་ངོ་བོ་སྐུ་བཞི་ཡེ་ཤེས་ལྔ་ཡི་བདག་ཉིད་བདེ་བ་ཆེན་པོའི་སྐུ་མངོན་དུ་མཛད་ནས་རྟག་ཁྱབ་ལྷུན་གྱིས་གྲུབ་པའི་ཕྲིན་ལས་ཀྱིས་གདུལ་བྱའི་དོན་མཛད་པ་སྟེ། ཐིག་ལེ་མཆོག་གི་རྒྱུད་ལས། འོད་གསལ་བ་ཡི་སེམས་ཉིད་ནི། །དབྱིངས་དང་ཡེ་ཤེས་དབྱེར་མེད་པར། །བདེ་བ་ཆེ་དེ་སུས་བསྒོམས་པ། །འབྲས་བུ་ཚེ་འདིར་མངོན་འཚང་རྒྱ། །ཞེས་དང་། བང་མཛོད་འཕྲུལ་སྡེ་ལས། ཨ་ནུ་ཡོ་གའི་ཐེག་པ་ནི། །བར་མ་ཆོད་པར་ཚེ་གཅིག་གིས། །སངས་རྒྱས་ས་ལ་ངེས་པར་འགྲོ། །ཞེས་གསུངས། འབྲས་ཆོས་ཉེར་ལྔ་སོགས་ནི་གོང་དུ་སྨོས་པ་ལྟར་ལ། དེ་ཡང་གཞི་ལ་ཡོན་ཏན་ལྷུན་གྲུབ་ཏུ་བཞུགས་པ་ཉིད་མངོན་དུ་གྱུར་པ་ཙམ་སྟེ། སྤྱི་མདོ་ལས། གཞན་ལས་མ་བྱུང་རང་བྱུང་བ། །ཞེས་དང་། ལུང་བསྟན་མ་ལས། ཐ་མ་ཡིད་བཞིན་ནོར་བུ་ལྟར། །མ་བསགས་ཟད་འཕེལ་མེད་པའི་སྐུ། །གདུལ་བྱའི་དོན་སྣང་དངོས་གཞི་མེད། །ལྷུན་གྲུབ་ཡོན་ཏན་རང་སྣང་བའོ། །ཞེས་གསུངས་སོ། །། །གསུམ་པ་གང་ཟག་གཏི་མུག་ཅན་ནམ་དབང་པོ་རབ་ཀྱི་རབ་བྱ་རྩོལ་མེད་པར་འཇུག་པ་ལ་དགོངས་ནས་གསུངས་པ་རྫོགས་པ་ཆེན་པོ་ཨ་ཏི་ཡོ་ག་ནི། རྒྱུད་ལས། རྫོགས་པ་ཆེན་པོ་ཨ་ཏི་ཡོ་ག་ནི་ཆོས་རྣམས་ཀྱི་འབྲས་བུ་ལྟ་བུའོ། །ཞེས་གསུངས་པས་མ་ཧཱ་དང་ཨ་ནུ་གཉིས་ཀའི་མཐར་ཐུག་གི་འབྲས་བུའི་སྐྱེལ་སོ་སྟེ། དབྱིངས་རང་བཞིན་གྱིས་དག་པའི་སེམས་ཉིད་འོད་གསལ་བ་ལྷུན་གྲུབ་རང་གནས་ཆེན་པོར་བཞུགས་པའི་རང་བྱུང་གི་ཡེ་ཤེས་བཅོས་བསྒྱུར་སྤང་ལེན་དང་བྲལ་བར་ལམ་དུ་ཁྱེར་བས་ཐེག་པ་འོག་མ་རྣམས་ལས་ཁྱད་པར་དུ་འཕགས་ཏེ། ཐེག་པ་འོག་མ་རྣམས་བཅོས་བསླད་ཀྱི་རྩོལ་སྒྲུབ་ཀྱིས་བླང་དོར་བྱས་པས་རེ་དོགས་ཀྱི་སྒྲིབ་པས་རང་བྱུང་གི་ཡེ་ཤེས་བསྒྲིབས་ཏེ། རྣལ་མའི་དོན་ལ་རེག་པའི་སྐབས་མེད་པ་ཉིད། ཀུན་བྱེད་ལས། ངེས་པ་ཐོབ་པའི་ཐེག་པ་དྲུག །རྫོགས་པ་ཆེན་པོའི་གོལ་སར་བསྟན། །ཞེས་སོགས་རྒྱ་ཆེར་གསུངས་ཤིང་། འདིར་ནི་རང་བྱུང་གི་ཡེ་ཤེས་རྫོགས་པ་ཆེན་པོ་ཉིད་ཡེ་ནས་སངས་རྒྱས་པའི་ཆེ་བའི་ཡོན་ཏན་ལྷུན་གྲུབ་ཏུ་ཡོད་པས་སྐུ་གསུམ་རང་ཆས་སུ་ཚང་བའི་ཕྱི་ལོགས་ནས་བཙལ་མི་དགོས་པས། འདི་ཉིད་མ་བཅོས་ཇི་བཞིན་པའི་ངང་ནས་མ་གཡོས་པས་འགྲུབ་པར་བསྟན་ཏེ། དེ་ཉིད་ལས། ཀྱེ། སེམས་དཔའ་ཆེན་པོ་ཉོན་ཅིག །ཆོས་ཀྱི་སྐུ་ནི་བྱང་ཆུབ་སེམས། །བྱང་ཆུབ་སེམས་ལས་ཆོས་ཀྱི་སྐུ། །རྡུལ་ཙམ་སུས་ཀྱང་བཅོས་སུ་མེད། །དེས་ན་སངས་རྒྱས་སེམས་ལས་མེད། །ལོངས་སྤྱོད་རྫོགས་སྐུ་བྱང་ཆུབ་སེམས། །བྱང་ཆུབ་སེམས་ལས་ལོངས་སྤྱོད་སྐུ། །སེམས་ལས་བྱུང་བའི་གཟུགས་རྣམས་ལ། །ལོངས་སྤྱོད་རྫོགས་ལས་སྐུ་གཞན་མེད། །སྤྲུལ་བའི་སྐུ་ནི་བྱང་ཆུབ་སེམས། །བྱང་ཆུབ་སེམས་ཀྱི་སྤྲུལ་པ་ལས། །འགྲོ་བའི་དོན་མཛད་གཞན་ན་མེད། །དུས་གསུམ་སངས་རྒྱས་ཐམས་ཅད་ཀྱང་། །བྱང་ཆུབ་སེམས་ལས་གཞན་མེད་དེ། །སྔ་རབས་འདས་པའི་སངས་རྒྱས་རྣམས། །རང་སེམས་མ་བཅོས་སྔར་མཐོང་རྟོགས། །ད་ལྟར་བཞུགས་པའི་སངས་རྒྱས་རྣམས། །མ་བཅོས་པ་ཡི་རང་སེམས་དེ། །མ་བཅོས་ཇི་བཞིན་རྟོགས་གྱུར་པས། །ད་ལྟར་འགྲོ་བའི་དོན་ཡང་མཛད། སླད་ནས་འབྱོན་པའི་སངས་རྒྱས་རྣམས། །རང་སེམས་བྱང་ཆུབ་སེམས་ཉིད་འདི། །སྔ་མ་བཅོས་པར་ལུང་མ་བསྟན། །ད་ལྟར་ཏིང་འཛིན་སེམས་མི་འཆོས། །མ་བཅོས་ལམ་དུ་ཞུགས་ནས་བྱོན། །ཅེས་གསུངས། དེའི་ཕྱིར་སེམས་ཉིད་གཡོ་བ་མེད་པའི་ཆོས་སྐུ་བྱང་ཆུབ་ཀྱི་སེམས་ནི་བྱ་རྩོལ་ལས་འདས་པ་རྫོགས་པ་ཆེན་པོའི་རང་བཞིན་ཏེ། ཀུན་བྱེད་ལས། སེམས་ནི་ཇི་བཞིན་པ་ཡི་དངོས་པོ་སྟེ། །ཆོས་རྣམས་ཐམས་ཅད་དེ་བཞིན་ཉིད་དུ་འགྲུབ། །ཇི་བཞིན་པ་ལ་འཆོས་པར་མ་བྱེད་ཅིག །ངོ་བོ་ཉིད་ལས་གཞན་དུ་མ་བསྒྲུབས་ཤིག །བཙལ་ན་རྒྱལ་བས་དབྱིངས་ནས་རྙེད་མི་འགྱུར། །སྔར་བྱས་ཟིན་པས་ད་ནི་བྱེད་མི་དགོས། །སྔར་བསྒྲུབས་ཟིན་པས་ད་སྒྲུབ་མ་བྱེད་པར། །མི་རྟོག་ཅིར་མི་དགོངས་ལ་མཉམ་པར་ཞོག །ཅེས་གསུངས་ཤིང་། དེར་མ་ཟད་རྫོགས་ཆེན་སྡེ་གསུམ་གྱི་ནང་ནས་ཀྱང་། འོད་གསལ་རྡོ་རྗེ་སྙིང་པོ་གསང་བ་མན་ངག་གི་སྡེ་སྙིང་ཐིག་གི་སྐོར་རྣམས་ནི་རང་བྱུང་གི་ཡེ་ཤེས་སྐད་ཅིག་གིས་ནང་དུ་འཆར་བའི་རྟགས་རང་བཞིན་གྱི་སྣང་བ་ཡེ་ཤེས་ལྔ་ལ་དབང་པོས་བལྟར་ཡོད་པས། ཚིག་དང་ཡི་གེ་དང་རྟོག་དཔྱོད་དང་མི་རྟོག་པའི་ཏིང་ངེ་འཛིན་བློས་བྱས་ཀྱི་སྒོམ་པ་ཀུན་ལས་ཁྱད་པར་དུ་འཕགས་ཏེ་ནོར་ས་དང་འཛོལ་ས་མེད་ཅིང་། བརྩོན་འགྲུས་བསྐྱེད་ན་དབང་པོ་རྣོ་རྟུལ་མེད་པས་རྩོལ་མེད་ཡེ་ཤེས་ཀྱི་རང་སྣང་མངོན་དུ་བྱས་ཏེ། སྐུ་གསུམ་ལྷུན་གྲུབ་ཆེན་པོའི་ཞིང་ལ་ཚེ་འདིར་དངོས་སུ་སྤྱོད་པས་སེམས་ཀློང་སོགས་ལས་ཀྱང་ཆེས་འཕགས་ཏེ། གསང་བ་སྒྲའི་རྒྱུད་ལས། དངོས་གྲུབ་མཆོག་རྣམས་མཐར་ཐུག་པ། །འབད་ཅིང་རྩོལ་བས་མ་ཡིན་པར། །གང་སུ་འཕྲད་པས་གྲོལ་བར་ངེས། །དེས་ན་རྫོགས་ཆེན་བྱ་བ་བྲལ། །གཞན་འབད་པ་ལས་བྱུང་བ་མིན། །ཆོས་ཉིད་མངོན་སུམ་ཁྱད་པར་གྱིས། །དབང་པོ་རྣོ་དང་རྟུལ་མེད་པས། །སེམས་ཅན་ཐམས་ཅད་སངས་རྒྱས་ལས། །གཞན་དུ་གནས་པ་མ་ཡིན་ནོ། །ཞེས་གསུངས་ཤིང་། ཐ་ན་དབང་བསྐུར་བ་དང་ངོ་སྤྲད་པ་ཙམ་ཡང་ཆོས་ཉིད་བདེན་པའི་བྱིན་རླབས་ཀྱིས། རང་བཞིན་སྤྲུལ་པར་དབུགས་འབྱིན་ལ། ཅུང་ཟད་ཉམས་སུ་བླངས་ནས་འདས་ཀྱང་བར་དོར་གྲོལ་བའི་རྟགས་ཚད་མངོན་སུམ་དུ་སྣང་བ་དང་། ཚིག་རྒྱུད་ཀྱི་གླེགས་བམ་བྲིས་ཏེ་བཅང་བ་ཙམ་ལའང་གཞན་ལས་ཕན་ཡོན་ཆེ་བར་བསྔགས་པ་སོགས་འཕགས་ཆོས་བསམ་གྱིས་མི་ཁྱབ་སྟེ། ཞིབ་པར་ཀུན་མཁྱེན་ཆོས་ཀྱི་རྒྱལ་པོའི་གསུང་རབ་རྣམས་དང་། ཀུན་གཟིགས་ཞེ་ཆེན་མ་ཧཱ་པཎྜི་ཏས་མཛད་པའི་ཐིག་ལེ་ཀུན་གསལ་ཆེན་མོའི་རྒྱུད་ཀྱི་རྒྱབ་ཆོས་སོགས་ལས་ཤེས་པར་བྱའོ། །དེ་ལ་ངོ་བོ། ངེས་ཚིག དབྱེ་བ་གསུམ་ལས། ངོ་བོ་ནི། ཡེ་སངས་རྒྱས་པའི་དོན་རང་ཐོག་ཏུ་གྲོལ་བར་བྱེད་པའི་ཐབས་སྤང་བླང་རེ་དོགས་དང་བྲལ་བའི་རང་བཞིན་ཅན་ནོ། །ངེས་ཚིག་ནི། ཨ་ཏི་ཡོ་ག་སྟེ། བསྐྱེད་རྫོགས་གཉིས་ཀའི་རྫོགས་རིམ་མཐར་ཐུག་པ་ཡིན་པའི་ཕྱིར་དང་། ཐེག་པ་ཐམས་ཅད་ཀྱི་རྩེ་མོར་གྱུར་པས་ཤིན་ཏུ་རྣལ་འབྱོར་རོ། །དབྱེ་བ་ལ་དྲུག་ལས། འཇུག་སྒོའི་དབང་ནི། རིག་པའི་རྩལ་དབང་སྟེ། དེ་ཡང་དབང་གསུམ་པའི་དཔེ་ཡི་ཡེ་ཤེས་ལ་ལྟོས་མི་དགོས་པར་ཐོག་མ་ནས་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་འཇུག་ཏུ་རུང་བའི་སྐལ་ལྡན་ལ་རྫོགས་པ་ཆེན་པོའི་རིག་པའི་རྩལ་དབང་བསྐུར་བ་སྟེ། སློབ་དཔོན་འཇམ་དཔལ་བཤེས་གཉེན་གྱིས་མཛད་པའི་འཇམ་དཔལ་སྒྱུ་འཕྲུལ་དྲྭ་བའི་ཁོག་དོན་ལས། ཟབ་པ་དོན་གྱི་དབང་མཆོག་ནི། །རིག་པའི་རྩལ་དབང་ཐོབ་པ་སྟེ། །ཆོས་ཉིད་རྟོགས་པས་དབང་ཞེས་བྱ། །ཡེ་ཤེས་དབང་བསྐུར་ཅོད་པཎ་འཆང་། །ཞེས་གསུངས་པ་ལྟར་རོ། །ཁྱད་པར་མན་ངག་གི་སྡེ་ལྟར་ན། རྫོགས་པ་རང་བྱུང་ལས། སྤྲོས་བཅས་སྤྲོས་པ་མེད་པ་དང་། །ཤིན་ཏུ་སྤྲོས་མེད་རབ་སྤྲོས་མེད། །དབང་ནི་རྣམ་པ་བཞི་ཡིས་ཀྱང་། །སྐལ་བ་ལྡན་ལ་སྨིན་པར་བྱ། །ཞེས་པའི་དབང་བཞིས་རིམ་པ་ལྟར། ལུས་ངག་ཡིད་དང་ཤེས་བྱ་ལ་རྨོངས་པའི་སྒྲིབ་པ་སྦྱོང་། སྐུ་གསུང་ཐུགས་དང་རང་བྱུང་འོད་གསལ་བའི་ནུས་པ་འཇུག བསྐྱེད་རིམ་དང་། གཏུམ་མོ་སྒོམ་པ་བདེ་སྟོང་ཟུང་འཇུག་སྒོམ་ཞིང་ཀ་དག་གི་ཡེ་ཤེས་རྟོགས་པ་དང་། མངོན་སུམ་ལྷུན་གྲུབ་ཀྱི་དོན་ཉམས་སུ་ལེན་པ་བཞི་ལ་དབང་བ་ཡིན་ནོ། །འདི་ནི་དབང་གོང་མ་ཉིད་ལ་དབང་བཞིར་ཕྱེ་བ་ཡིན་པས། བླ་མེད་ཐུན་མོང་བའི་དབང་བཞི་དང་གྲངས་འདྲ་ཡང་དོན་མི་འདྲ་བར་ཤེས་དགོས་ཤིང་། དེར་མ་ཟད་བླ་མེད་ཐུན་མོང་བའི་དབང་བཞི་པའི་སྔགས་སྡོམ་རྒྱུན་ལྡན་ཞིག་གིས་འདི་ཉིད་ཐོབ་ན་སྡོམ་པ་སྔར་མེད་གསར་ཐོབ་ཀྱང་འདོད་དགོས་ཏེ། བླ་མེད་ཀྱི་ཆོ་ག་གཞན་རྣམས་རྒྱས་བསྡུས་དང་རྣམས་གྲངས་མི་འདྲ་བ་ཙམ་ལས་ཕན་ཚུན་གཅིག་གི་དོད་གཅིག་གིས་ཐུབ་པས་མཚུངས་པའི་ཕྱིར། དེ་དག་སོ་སོ་ལས་ཐོབ་པའི་སྡོམ་པ་རྣམས་ཀྱང་ངོ་བོ་གཅིག་ཏུ་འགྱུར་མོད། ཞུ་བདེ་ལྷན་སྐྱེས་ཀུན་རྫོབ་པ་དཔེའི་ཡེ་ཤེས་ཙམ་ལ་ངོ་སྤྲོད་པའི་བཞི་པ་བཏགས་པ་དེས་དོན་དམ་ལྷན་སྐྱེས་ཟུང་འཇུག་གི་ཡེ་ཤེས་ལ་འཇུག་པའི་ཐབས་བཞི་པ་མཚན་ཉིད་པ་འདིའི་དོད་མི་ཐུབ་པས་མཚུངས་པ་མ་ཡིན་པའི་ཕྱིར་གསུངས། བྱ་བའི་འཇུག་སྒོ་ནི། ཅི་ཡང་འཇུག་ཏུ་མེད་པའི་སྒོ་ནས་འཇུག་སྟེ། ཀུན་བྱེད་ལས། ཆོས་ལ་བྱ་རྒྱུ་མེད་པའི་ཕྱིར། །རྩོལ་བ་མེད་པའི་སྒོ་ནས་འཇུག །ཅེས་སོ། །ལྟ་བ་ནི། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཐིག་ལེ་ཆེན་པོ་ཆོས་སྐུ་རང་བྱུང་གི་ཡེ་ཤེས་ཆེན་པོའི་ངོ་བོར་བྱ་རྩོལ་མེད་པར་ཡེ་ནས་སངས་རྒྱས་པར་འདོད་དེ། ནམ་མཁའ་ཆེ་ལས། རང་བྱུང་ཡེ་ཤེས་རྩོལ་མེད་ལ། །གྲོལ་ནས་གྲོལ་བའི་ལམ་ཡང་སྟོན། །ཞེས་གསུངས། དེ་ལ་དབྱེ་ན། ཨ་ཏི་བཀོད་པ་ཆེན་པོ་ལས། ཡིད་ཅན་རྣམས་ལ་སེམས་ཀྱི་སྡེ། །ནམ་མཁའ་ཅན་ལ་ཀློང་གི་སྡེ། །རིམ་རྩོལ་བྲལ་ལ་མན་ངག་སྡེ། །ཞེས་སེམས་ཀློང་མན་ངག་གི་སྡེ་གསུམ་ལས། དང་པོ། ཆོས་ཐམས་ཅད་སེམས་ཉིད་ལས་གུད་ན་མེད་པས་སྤང་བྱའི་མཐའ་ལས་གྲོལ་བ་སེམས་སྡེ་པས་ནི། ངོ་བོ་སྣ་ཚོགས་སུ་སྣང་ཡང་སེམས་ཉིད་གཅིག་གི་རོལ་པ་ལས་མ་འདས་པས་སྣ་ཚོགས་སུ་སྣང་བ་སེམས་ཀྱི་སྣང་བ་ཡིན་ལ། དོན་ལ་མ་གྲུབ་ཅིང་གཉིས་སུ་མེད་པས་སེམས་ཀྱི་ངོ་བོ་འོད་གསལ་བ་རང་བྱུང་གི་ཡེ་ཤེས་སུ་འདོད་དོ། །དབྱེ་ན་བདུན་ལས། དང་པོ་འབྲས་བུ་སེམས་ཀྱི་བྱུང་སར་འདོད་པས་ནི། འབྲས་བུ་གདོད་མའི་དབྱིངས་ལ་འགྱུར་བ་མེད་པས་སེམས་ཉིད་ལ་འཕོ་འགྱུར་མེད་པའི་ངང་ལས། གྲོལ་གཞིའི་ལྷུན་གྲུབ་ཀྱི་སྣང་ཆ་ལས་འཁོར་བ་ལྟར་ཤར་ཀྱང་ངང་ལས་མ་གཡོས་པས་མ་དག་རང་མཚན་གྱིས་སྟོང་ལ། སྣང་བའི་ཆ་ནས་དབྱིངས་ལས་བྱུང་ཞིང་དབྱིངས་ལ་གནས། དབྱིངས་སུ་ཐིམ་པ་ནམ་མཁའི་ཆོ་འཕྲུལ་བཞིན་ཡེ་གྲོལ་རང་བཞག་འབད་རྩོལ་གཉེན་པོ་མེད་པར་ལ་བཟླ་བའོ། །གཉིས་པ་གོལ་སྒྲིབ་ལ་བཟླ་བ་ནི། ཨ་ནུ་མན་ཆོད་ཀྱི་རིམ་པ་བརྒྱད་པོ་རྣམས་ནི་བློས་བཏགས་པས་གཞི་ལས་གོལ་ས་ཡིན་ལས། འདིར་ནི་རང་བྱུང་གི་ཡེ་ཤེས་བློ་དང་བྲལ་བས་རྒྱུ་རྐྱེན་ལས་འདས་པར་ལ་བཟླ་བས་ཆོས་ཉིད་ཡེ་སྟོང་ཆེན་པོ་དྲན་བསམ་ཕྱོགས་འཛིན་དང་བྲལ་པས། སྣང་སྲིད་སྣོད་བཅུད་མ་དག་པ་ལྟར་སྣང་ཡང་གང་ལས་ཀྱང་མ་བྱུང་གང་དུ་འང་མི་གནས། གར་ཡང་མི་འགྲོ་བས། འཁྲུལ་ཞེན་མིང་མེད་ཁམས་གསུམ་གཞི་གྲོལ་སྤང་གཉེན་གཞི་མེད་ཕྱམ་གཅིག་ཏུ་ལ་བཟླ་བར་འདོད། གསུམ་པ་གཏན་ཚིགས་ཁུངས་རྡིབ་པ་ནི། གཞི་སེམས་ཉིད་ལ་ངོས་བཟུང་མེད་པས་ལས་དང་བག་ཆགས་ཀྱི་རྟེན་མེད། གསོག་བྱེད་ཀྱི་སེམས་མ་གྲུབ་པས་ལས་དང་བག་ཆགས་ཀྱི་བྱེད་མཁན་སྟོང་། བསགས་པའི་ལས་ཀྱང་བརྟགས་ན་མ་གྲུབ་པས་རྣམ་སྨིན་དང་འབྲས་བུས་སྟོང་། དེས་ན་འཁོར་བ་མིང་མེད་དུ་གྲོལ་ལ། སེམས་ཉིད་སྐྱེ་མེད་རང་བྱུང་གི་ཡེ་ཤེས་ལས་རོལ་པ་འགག་མེད་ཕྱོགས་ཡན་དུ་ཤར་བས་སྤང་བླང་དགག་སྒྲུབ་མེད་པར་ཡིད་ཆེས་ཏེ། ཆོས་ཉིད་ཡེ་སྟོང་རང་སངས། མཐའ་གྲོལ་ཆེན་པོའི་གཏན་ཚིགས་ཁོང་ནས་ཤར་བས་འཁོར་འདས་ཕྱོགས་འཛིན་ལས་གྲོལ་བའོ། །བཞི་པ་རྒྱ་ཆད་ཕྱོགས་ལྷུང་མེད་པར་འདོད་པ་ནི། སེམས་ཉིད་རང་བྱུང་གི་ཡེ་ཤེས་ཀྱིས་འཁོར་འདས་ཀུན་ལ་ཁྱབ་ཀྱང་། སྣང་བ་དངོས་པོར་རྒྱ་མ་ཆད། སྟོང་པ་དངོས་མེད་དུ་རྒྱ་མ་ཆད། གཉིས་ཀ་མ་ཡིན་པས་ཟུང་འཇུག་གི་ཕྱོགས་སུའང་མ་ལྷུང་། ངོ་བོ་སྟོང་པས་རྟག་པའི་མཐའ་ལས་གྲོལ། རྩལ་མ་འགགས་པས་ཆད་མཐའ་ལས་གྲོལ་བས་བྱ་བྲལ་བདེ་སྡུག་ལས་འདས་བའི་ཆོས་ཉིད་དོ། །ལྔ་པ་ཕྱོགས་འཛིན་གྲུབ་མཐའ་ལས་འདས་པ་ནི། སེམས་ཀྱི་ངོ་བོ་གང་དུའང་མི་གནས་ཤིང་གང་དུའང་མ་གྲུབ་པར་ཅིར་ཡང་སྣང་ལ་ཅིར་ཡང་མ་འགགས་པར་འཆར་བས་ཤར་ཡང་མི་དགག་མི་འཛིན་མི་རྟོག་པའོ། །དྲུག་པ་བློ་བྲལ་ཕྱོགས་འཛིན་ལས་འདས་པས་ནི། རང་བྱུང་གི་ཡེ་ཤེས་བློ་དང་བྲལ་བས་ཇི་ལྟར་སྣང་ཡང་བདེན་རྫུན་གང་དུའང་མ་གྲུབ་པས་ཡོད་མེད་མཐའ་གྲོལ་ཆེན་པོའི་རོལ་པའོ། །བདུན་པ་སེམས་ཀྱི་ཕྱོགས་ཡིན་དུ་སྨྲ་བ་ནི། འདི་ལྟར་སྣང་བ་ཐམས་ཅད་སེམས་ཀྱི་རོལ་པ་ཡིན་པར་སྣ་ཚོགས་སུ་སྣང་ཡང་སེམས་ཉིད་ངོ་བོ་མེད་པས་སྣང་བ་སྣ་ཚོགས་ཀྱང་ངོ་བོ་མེད་པའི་ཕྱིར་སྣང་བརྟགས་ཀྱི་ཆོས་མ་གྲུབ་ཅིང་། གང་ཤར་སེམས་ཀྱི་རྣམ་པ་འཛིན་བྱེད་དང་། སྣང་བ་གཟུང་བར་བྱ་བ་གཉིས་ཀའང་སྣང་བ་ཐ་དད་དུ་སྣང་ཡང་། ཡིན་གང་ཡང་མ་ཡིན་པའི་ཆོས་ཉིད་རང་བྱུང་གི་ཡེ་ཤེས་སུ་དབྱེར་མེད་པས་སྣང་བ་སེམས་ཀྱི་རོལ་པར་འདོད་པ་སྟེ། རང་རྩལ་ལྷུན་གྲུབ་ཀྱི་གདངས་ལས་འཁོར་འདས་གཉིས་སུ་ཤར་ཡང་ཤར་མཁན་ལ་ངོ་བོ་མེད་པས་ཤར་སར་རང་གྲོལ་དུ་འགྲོ་བ་འདིའི་ཁྱད་པར་གྱི་ཆོས་སོ། །གཉིས་པ་ཆོས་ཅན་ཐམས་ཅད་ཆོས་ཉིད་ཀུན་ཏུ་བཟང་མོའི་ཀློང་དུ་འུབ་ཆུབ་པས་གཉེན་པོའི་མཐའ་ལས་གྲོལ་བ་བྱ་བྲལ་ཀློང་གི་སྡེས་ནི། རང་བྱུང་གི་ཡེ་ཤེས་ཆོས་ཉིད་ཀུན་ཏུ་བཟང་པོའི་ཀློང་ཡངས་པར་ཆོས་ཅན་ཇི་ལྟར་སྣང་བ་ཐམས་ཅད་རང་སྣང་བཀོད་པའི་རྒྱན་ཙམ་ལས་འཆིང་གྲོལ་དང་། ཤར་བྱ་ཤར་བྱེད་དུ་མ་གྲུབ་པས། སེམས་སྡེ་ལྟར་རྩལ་དང་རོལ་པར་སྣང་བར་མི་བཞེད་ཅིང་། ལྟོས་གྲུབ་དང་ཡོད་མེད་དང་། ཡིན་མིན་དང་། དག་མ་དག་གང་དུའང་མི་དཔྱོད་པར་ཡེ་གྲོལ་ཕྱོགས་འབྱམས་ཆེན་པོར་གཏན་ལ་འབེབས་པའོ། །དེ་ལ་བྱེ་བྲག་ཏུ་དབྱེ་ན་བཞི་སྟེ། དང་པོ་ཀློང་ནག་པོ་རྒྱུ་མེད་དུ་སྨྲ་བ་ནི། རང་བྱུང་གཉུག་མའི་ཡེ་ཤེས་དེ་ཉིད་འགྱུར་མེད་རྒྱུ་དང་རྐྱེན་ལས་འདས་པའི་རང་བཞིན་ཕྱོགས་ཆར་མེད་པས་ཆོས་ཅན་དང་ཆོས་ཉིད་གཉིས་ཀར་མི་ལྟོས་པར་འདོད་པའོ། །གཉིས་པ་ཀློང་ཁྲ་བོ་སྣ་ཚོགས་སུ་སྨྲ་བ་ནི། རང་བྱུང་གི་ཡེ་ཤེས་དེ་ཉིད་ཀྱི་རོལ་པར་སྣང་བ་རྣམས། ཡིན་སྣ་ཚོགས་རང་ཤར་དུ་སྣང་བ་ཆོས་ཉིད་ཀྱི་རྒྱན་དང་རོལ་པ་ལ། མིན་ཕྱོགས་མེད་ཀུན་ཁྱབ་ཏུ་ཤར་བ་རོལ་པ་དགག་སྒྲུབ་ལས་འདས་པར་འདོད། གསུམ་པ་ཀློང་དཀར་པོ་སེམས་སུ་སྨྲ་བ་ནི། རང་བྱུང་རིག་པའི་ངང་ལས་ཕྱི་སྣང་བ་དང་། ནང་རིག་པར་ཤར་བ་ཐམས་ཅད་སེམས་ཀྱི་རོལ་པ་སྟེ། སྣང་བ་དང་རྐྱེན་རང་སར་གྲོལ་བས་བྱར་མེད་ཀ་ནས་དག་སྟེ། གནས་ལུགས་ལ་བསྒྲུབ་ཏུ་མེད་པར་འདོད་པའོ། །བཞི་པ་ཀློང་རབ་འབྱམས་རྒྱུ་འབྲས་ལ་ཟློ་བ་ནི། རང་བྱུང་གི་ཡེ་ཤེས་ཀྱི་ངང་ལས་སྣང་བའི་ཆོས་ཐམས་¡eཅད་ཞུ་མཆན། ¡fསྣང་བར་སེམས་ཀྱིས་ཤེས་ལ་མི་སྣང་བར་གནས་ལུགས་ཀྱིས་ཤེས་པར་འདོད་པའོ། །དེ་དག་ལ་ནང་གསེས་ཀྱི་དབྱེ་བ་ཞི བ་ཏུ་བྱེད་ན་བཅུ་གཉིས་ཡོད་ཀྱང་། དེ་དག་བསྡུ་ན་རོལ་པ། རྒྱན། ཆོས་ཉིད། བྱ་བྲལ་གྱི་ཀློང་བཞིར་འདུས་པ་ལས། །རོལ་པའི་ཀློང་ནི། སེམས་ཀྱི་རོལ་པ་འགགས་མེད་དུ་ཤར་བའི་ངང་ནས་འཕོ་འགྱུར་མེད་པས་ཅི་ཡང་ཡིན་ལ། དངོས་མེད་ཀྱི་རོལ་པ་མཐར་འཛིན་དུ་མ་གྲུབ་པས་གང་ཡང་མིན་ལ། ཕྱོགས་ཡན་ནམ་མཁའ་དང་འདྲ་བའི་དགོངས་པའོ། །རྒྱན་གྱི་ཀློང་ནི། སྣང་བ་སེམས། སེམས་ཉིད་རང་བྱུང་། རང་བྱུང་བཅོས་བསླད་མེད་པའི་རྒྱན་དུ་ཡེ་ཤར་ཏེ། སྐྱེ་མེད་ཀྱི་ངང་ལས་འགག་མེད་དུ་ཤར་བས་སྣང་སེམས་མི་དགག་མི་བསྒྲུབ་རང་འགྲོས་རང་བཞག་རང་གསལ་ཆེན་པོའི་དགོངས་པའོ། །ཆོས་ཉིད་ཀྱི་ཀློང་ནི། སྐྱེ་འགག་དང་བྲལ་བའི་ཆོས་ཉིད་ཀྱི་ངང་ལས་རོལ་པའམ་རྩལ་སྣ་ཚོགས་སུ་སྣང་ཡང་། འབྱུང་བཞིའི་འཕོ་འགྱུར་ནམ་མཁའི་དབྱིངས་ལས་མ་གཡོས་པ་བཞིན་དུ། ཆོས་ཉིད་ཡེ་སྟོང་ཡེ་གྲོལ་ཡེ་བཞག་ཆེན་པོའི་ངང་དུ་སྤང་བླང་རེ་དོགས་དང་བྲལ་བར་ཕྱམ་གདལ་བའོ། །བྱ་བ་དང་བྲལ་བའི་ཀློང་ནི། ཆོས་གང་ལའང་ཆེད་དུ་འབད་རྩོལ་གྱི་བླང་དོར་མི་དགོས་ཏེ། མ་བྱས་ཡེ་ཟིན། མ་གྲོལ་ཡེ་གྲོལ། མ་སྦྱངས་ཡེ་དག མ་བསྒྲུབས་ཡེ་གྲུབ་ཏུ་འདུག་པས། ནམ་མཁའ་ལྟར་འཕོ་འགྱུར་བཅོས་བསླད་མེད་པར་འདོད་པའོ། །གསུམ་པ་དོན་རང་གི་མཚན་ཉིད་ཡིན་ལུགས་ལྟར་གཏན་ལ་འབེབས་པས་སྤང་གཉེན་གཉིས་ཀའི་མཐའ་ལས་གྲོལ་བས་སྔ་མ་གཉིས་ལས་ཀྱང་ཁྱད་པར་དུ་འཕགས་པ་མན་ངག་གི་སྡེ་བ་ནི། གདོད་མ་ཉིད་ནས་གྲོལ་ཞིང་ཀ་ནས་དག་པའི་ཆོས་ཉིད་ལ་ཉི་ཚེ་བའི་བལྟ་བྱ འི་ཡུལ་དང་། ལྟ་བྱེད་ཀྱི་ཤེས་པ་གཉིས་སུ་མ་ཆད་པས་འཁྲུལ་མ་འཁྲུལ་དང་། རྟོགས་མ་རྟོགས་སུ་བསྒྲུབ་པའི་ལྟོས་གཞི་དང་། ལྟོས་སའི་ཆོས་ལས་ལོག་པས། རང་གི་ངོ་བོ་སྤྲོས་བྲལ་གྱི་ཆ་ནས་ཤེས་བྱ་ཤེས་བྱེད་ཀྱི་ཡུལ་ཡུལ་ཅན་གཉིས་ཀ་ཡང་དག་པ་མ་ཡིན་པར་མཉམ་ཞིང་། ཐ་སྙད་ཙམ་དུ་བཏགས་པ་ལས། དེར་འཛིན་གྱི་བསམ་བརྗོད་ལས་ཡང་དག་པར་འདས་པས་ན། བློ་དང་ཡིད་དཔྱོད་ལས་འདས་པའི་དོན་གནད་ཐོག་ཏུ་འབེབས་པ་མེ་བཙའ་ལྟ་བུ་སྟེ། དེ་ལ་དབྱེ་ན་གསུམ། དང་པོ་ཁ་འཐོར་ནི། ངོ་བོ་བློ་འདས་རང་བྱུང་གི་ཡེ་ཤེས་གནད་ལ་བརྟེན་ནས་སྐད་ཅིག་ལ་འཆར་བར་བྱེད་པའོ། །གཉིས་པ་ཁ་གཏམ་ནི། ངོ་བོ་བློ་བྲལ་མ་འཁྲུལ་པ། རང་བཞིན་རྣམ་རྟོག་གི་ཁུང་རྡིབ་པ། མཚན་ཉིད་གཉིས་མེད་ངོས་བཟུང་དང་བྲལ་བའོ། །གསུམ་པ་རྒྱུད་རང་གཞུང་དུ་བསྟན་པ་ནི། ངོ་བོ་བཀའ་ཐམས་ཅད་ཀྱི་བྱུང་སར་གྱུར་པ། རང་བཞིན་འཁོར་འདས་དང་བྲལ་བས་སྤང་བླང་བྱ་རྩོལ་མེད་པ། ཆོས་ཉིད་སྒྲ་ཚིག་ཏུ་མི་གནས་པས་སྟོང་ཉིད་རྩོད་གཞི་དང་བྲལ་བའོ། །དེ་དག་ལའང་ནང་གསེས་ཀྱི་དབྱེ་བ་མང་ཡང་གཙོ་བོར་ཕྱི་མའི་བྱེ་བྲག་སྙན་བརྒྱུད་དང་བཤད་རྒྱུད་དུ་གྲགས་པ་ལ་སྐོར་བཞི་སྟེ། ལུས་དང་འདྲ་བ་ཕྱི་སྐོར། མིག་དང་འདྲ་བ་ནང་སྐོར། སྙིང་དང་འདྲ་བ་གསང་སྐོར། ཐམས་ཅད་རྫོགས་པ་དང་འདྲ་བ་ཡང་གསང་བླ་ན་མེད་པའི་སྐོར་ཏེ་བཞིའོ། །དང་པོ། ཕྱི་སྐོར་གྱི་ངོ་བོ་ལ་ཉོན་མོངས་མ་གྲུབ་པས་དུག་ལྔ་ལམ་དུ་ཁྱེར། རང་བཞིན་ལ་རྩོལ་སྒྲུབ་མེད་པས་ཅིར་སྣང་ཆོས་ཉིད་དུ་ཤར། མཚན་ཉིད་ལ་ཕྱོགས་ཆ་མེད་པས་སྟོང་སྣང་གང་དུའང་ཕྱེ་བ་མེད་པའོ། །ནང་སྐོར་གྱི་ངོ་བོ་གཟུགས་ཅན་ལས་འདས་པས་མཚན་མ་མེད་པའི་ཆོས་ཉིད། རང་བཞིན་འགྲོ་འོང་མེད་པས་རྟག་པ་རྒྱུན་གྱི་ཡེ་ཤེས། མཚན་ཉིད་འཁོར་འདས་གཉིས་ཀ་ལ་ཟུག་པས་རྩ་བ་ལྟ་བུ། རང་ངོ་ཐ་དད་དུ་འདྲིལ་བས་སྡོང་པོ་ལྟ་བུ། རྩལ་སྣང་ཅིར་ཡང་རྒྱས་པས་ཡལ་ག གསལ་ཆ་མི་འགག་པས་མེ་ཏོག སྣ་ཚོགས་གཅིག་ཏུ་སྨིན་པས་འབྲས་བུ་ལྟ་བུའོ། །གསང་སྐོར་གྱི་ངོ་སྤྲད་པ་དང་རྟོགས་པ་དུས་མཉམ་པས་ཤེས་རབ་གསུམ་ལ་མ་ལྟོས། རང་བཞིན་དབུགས་ཆད་པ་དང་གྲོལ་བ་དུས་མཉམ་པས་གོམས་སྟོབས་ལ་མ་ལྟོས། མཚན་ཉིད་སངས་རྒྱས་པ་དང་ཐུགས་རྗེ་འབྱུང་བ་དུས་མཉམ་པས་རྒྱུ་ཚོགས་གཉིས་ལ་མི་ལྟོས་པའོ། །ཡང་གསང་བླ་ན་མེད་པ་ནི། ངོ་བོ་ཤེས་བྱ་མ་ཡིན་པས་ཤེས་བྱེད་ལ་མི་ལྟོས། རང་བཞིན་མངོན་སུམ་མཐོང་བས་ཆོས་ཉིད་ཡིད་དཔྱོད་དུ་མི་གནས། མཚན་ཉིད་སྣང་བ་བཞིས་འབྲས་བུ་ཕྱི་དུས་ལ་རེ་མི་འཆའ་བར་ཚེ་འདི་ཉིད་ཀྱིས་གདོད་མའི་གཞི་དབྱིངས་སུ་སྦྱོར་བའོ། །འདི་དག་གི་དོན་ཞིབ་པར་ནི་ཀུན་མཁྱེན་ཆོས་ཀྱི་རྒྱལ་པོའི་གསང་མཛོད་རྣམས་ལས་རྟོགས་པར་བྱའོ། །ཚུལ་ཁྲིམས་ལ་གཉིས་ཀྱི་བསྲུང་དུ་ཡོད་པ་ནི། སྐུ་གསུང་ཐུགས་ཀྱི་དམ་ཚིག་རེ་རེ་ལའང་དགུ་དགུར་ཕྱེ་བའི་ཉེར་བདུན་ཏེ། དམ་ཚིག་རྣམ་བཀོད་ལས། སྐུ་དང་གསུང་དང་ཐུགས་དག་ལས། །རེ་རེ་ལའང་དགུ་དགུ་སྟེ། །འཇུག་དང་ལས་ཀྱི་རྣམ་པས་ཤེས། །ཞེས་པས། ཕྱི་ལུས་ཀྱི། མ་བྱིན་ལེན། མི་ཚངས་སྤྱོད། སྲོག་གཅོད་སྤོང་བ་གསུམ། ནང་ཕ་མ་རྡོ་རྗེ་སྤུན་སྲིང་དང་རང་ལུས་ལ་སྨོད་པ། ཆོས་དང་གང་ཟག་ལ་སྨོད་པ། རང་ལུས་ལ་རྡེག་འཚོག་དང་དཀའ་ཐུབ་ཀྱིས་བརྙས་ཤིང་གདུང་བ་སྤོང་བ་གསུམ། གསང་བ་རྡོ་རྗེ་སྤུན་སྲིང་གི་ལུས་ལ་རྡེག་པར་གཟས་ཤིང་རྒྱན་ལ་སྨོད་པ། རྡོ་རྗེ་མཆེད་ལྕམ་ལ་རྡེག་པ་དང་བླ་མའི་ཡུམ་ལ་གཙེས་པ། བླ་མའི་གྲིབ་མར་བགོམས་{ འགོངས}པ་དང་སྤྱན་སྔར་ལུས་ངག་གི་བག་མེད་སྤོང་བ་གསུམ་སྟེ་སྐུ་ཡི་དམ་ཚིག་དགུ། ཕྱི་རྫུན་ཕྲ་མ་ཚིག་རྩུབ་སྤོང་བ་གསུམ། ནང་ཆོས་ཀྱི་ཚིག་སྨྲ་བ། དོན་ཡིད་ལ་བསམ་པ། གནས་ལུགས་སྒོམ་པར་བྱེད་པ་རྣམས་ལ་གཤེ་སྐུར་འདེབས་པ་སྤོང་བ་གསུམ། གསང་བ་རྡོ་རྗེ་སྤུན་སྲིང་གི་ཚིག བླ་མའི་ཕྱག་རྒྱ་དང་ཉེ་འཁོར་གྱི་ཚིག བླ་མའི་གསུང་རྣམས་ལ་བརྙས་ཤིང་གཅོག་པ་སྤོང་པ་གསུམ་བཅས་གསུང་གི་དགུ། ཕྱི་གནོད་སེམས་བརྣབ་སེམས་ལོག་ལྟ་སྤོང་བ་གསུམ། ནང་སྤྱོད་པ་ལོག་པ་བག་མེད། སྒོམ་པ་ལོག་པ་བྱིང་རྒོད་དང་གོལ་སྒྲིབ། ལྟ་བ་ལོག་པ་རྟག་ཆད་མཐར་འཛིན་རྣམས་སྤོང་བ་གསུམ། གསང་བ་ཉིན་ཞག་གི་ཐུན་རེ་རེ་བཞིན་ལྟ་སྒོམ་སྤྱོད་གསུམ་ཡིད་ལ་མ་བྱས་པ། ཡི་དམ་གྱི་ལྷ་ཡིད་ལ་མ་བྱས་པ། བླ་མའི་རྣལ་འབྱོར་དང་མཆེད་ལྕམ་ལ་བརྩེ་གདུང་ཡིད་ལ་མ་བྱས་པ་གསུམ་སྤོང་བ་བཅས་ཐུགས་ཀྱི་དམ་ཚིག་དགུ་སྟེ་ཉི་ཤུ་རྩ་བདུན་ནོ། །བསྲུང་དུ་མེད་པ་ནི། ཐིག་ལེ་ཀུན་གསལ་ཆེན་པོའི་རྒྱུད་ལས། ང་ཡི་དམ་ཚིག་གསང་བ་ནི། །རང་རིག་ཡེ་ཤེས་ཆེན་པོ་ལ། །བསྲུང་བྱ་སྲུང་བྱེད་གཉིས་མེད་པས། །ཉམས་དང་མི་ཉམས་གཉིས་སུ་མེད། །ཐེག་བརྒྱད་བཅོས་པའི་དམ་ཚིག་གྲངས། །ང་ཡིས་བསྲུང་བ་མེད་ཅེས་བྱ། །འོག་མའི་དམ་ཚིག་ལས་གྲོལ་ཞིང་། །རང་གི་སྒོ་བསྲུང་ཡངས་པས་ན། །ཕྱལ་བ་ཞེས་སུ་གྲགས་པ་ཡིན། །བསྲུང་དུ་མེད་པའི་དམ་ཚིག་ལ། །འདའ་མི་སྲིད་པའི་བསྲུང་ཐབས་ནི། །རང་རིག་ཡེ་ཤེས་གཅིག་པུ་བས། །གཅིག་པུ་ཞེས་སུ་བཏགས་པ་ཡིན། །རང་རིག་ཡེ་ཤེས་གཅིག་པུ་ལ། །བྱ་རྩོལ་མེད་པར་ཡེ་བསྲུང་བས། །ལྷུན་གྲུབ་ཅེས་སུ་བཏགས་པ་ཡིན། །ཞེས་པ་ལྟར་ཀ་དག་གི་དམ་ཚིག་མེད་པ་དང་ཕྱལ་བ། ལྷུན་གྲུབ་ཀྱི་དམ་ཚིག་གཅིག་པུ་དང་ལྷུན་གྲུབ་སྟེ། དམ་ཚིག་གི་སྤྱི་སྡོམ་ཆེན་པོ་བཞི་ལ་སོགས་པ་ལས་མི་འདའ་བར་བྱ་བ་སྟེ། ཡང་འབྱེད་འཕྲུལ་ལྡེ་ལས། ཨ་ཏི་ཡོ་གའི་དམ་ཚིག་ནི། །མེད་པ་དང་ནི་ཕྱལ་བ་དང་། །གཅིག་པུ་དང་ནི་ལྷུན་གྱིས་གྲུབ། །དེ་ཡི་དོན་ལས་འདའ་མི་བྱ། །ཞེས་སོ། །སྒོམ་པ་ནི། བསྟན་བཅོས་ཆེན་པོ་ཤེས་བྱ་ཀུན་ཁྱབ་ལས། སྒོམ་པ་སེམས་སྡེ་རིག་སྟོང་ཆོས་ཀྱི་སྐུར། །ཀློང་སྡེ་ཆོས་ཉིད་བྱ་རྩོལ་མེད་པའི་ངང་། །མན་ངག་ཡེ་གྲོལ་སྤང་བླང་བྲལ་བར་འཇོག །ཅེས་གསུངས་པ་ལྟར་རྫོགས་ཆེན་སྡེ་གསུམ་ལས། དང་པོ་སྣང་སྲིད་སྣོད་བཅུད་ཀྱི་སྣང་བ་ཐམས་ཅད་སེམས་ཉིད་རང་བྱུང་གི་ཡེ་ཤེས་བརྗོད་བྲལ་ཆོས་ཀྱི་སྐུར་གཏན་ལ་ཕབ་ནས་རིག་སྟོང་ཆོས་སྐུའི་ངང་དུ་བསལ་བཞག་མེད་པར་སྐྱོང་བ་སེམས་སྡེ་བས་ནི། ཆོས་སུ་ཇི་ལྟར་སྣང་བ་ལ་ཆོས་ཉིད་ཀྱི་ཕྱག་རྒྱས་ཕར་རྒྱས་མི་འདེབས་པར་ཆོས་ཅན་ཇི་ལྟར་སྣང་བ་འདི་ཀུན་ཆོས་ཉིད་བྱང་ཆུབ་ཀྱི་སེམས་སུ་རྫོགས་པས་རྩལ་ལམ་རོལ་པ་ཙམ་དུ་སྣང་རིག་ངོས་བཟུང་དང་བྲལ་བའི་དབྱིངས་སུ་སྐྱེལ་བར་བྱེད་པ་སྟེ། སྣང་བ་ཐམས་ཅད་སེམས་ཀྱི་རང་རྩལ། སེམས་ཉིད་རང་བྱུང་གི་ཡེ་ཤེས་ཡིན་པ་ལ་ཡིན་པར་ཤེས་ནས། དེའི་ངོ་བོར་བཟོ་བཅོས་རྩིས་གདབ་མེད་པར་རྣལ་མ་གཞི་ཐོག་ཏུ་འཇོག་པས་འཁྲུལ་པའི་སྣང་བ་མ་སྤངས་རང་ཐོག་ཏུ་གྲོལ། བསྒོམ་བྱའི་ཡུལ་སྟོང་པར་རྟོགས་པས་སྒོམ་མ་མྱོང་། འཁྲུལ་པའི་ཕུག་རྡིབ་པས་དོན་དང་འབྲལ་མ་མྱོང་བའི་ཕྱིར་རང་སྣང་རིས་མེད་རིག་སྟོང་ཆོས་སྐུའི་ངང་དུ་བཞག་བྱ་འཇོག་བྱེད་དང་བྲལ་བ་ལྷུན་གྲུབ་མཉམ་པ་ཆེན་པོའི་ངང་དུ་འཇོག་པའོ། །དེ་ལྟར་ཡང་། ཀུན་བྱེད་ལས། ཇི་ལྟར་སྣང་བ་དེ་བཞིན་ཉིད་དུ་གཅིག །འདི་ལ་སུས་ཀྱང་འཆོས་པར་མ་བྱེད་ཅིག །མ་བཅོས་མཉམ་པའི་རྒྱལ་པོ་དེ་ལ་ནི། །མི་རྟོག་ཆོས་སྐུའི་དགོངས་པ་དེ་ལ་གནས། །ཞེས་དང་། དྲན་བསམ་ཡིད་ལ་འགྱུ་བ་མ་ལུས་ཀུན། །སྐྱེ་བ་མེད་པའི་ངང་ལས་མ་ཡེངས་པས། གང་ལྟར་བསམས་ཀྱང་སྒོམ་པ་ཡིན་ཤེས་ན། །མ་བསྒོམས་གང་ལྟར་བཞག་ཀྱང་ཡེངས་པ་མེད། །ཅེས་གསུངས། གཉིས་པ། རང་བྱུང་གི་ཡེ་ཤེས་དང་དེ་ལས་ཤར་བའི་ཆོས་ཐམས་ཅད་ཡེ་གྲོལ་རང་དག་ཆོས་ཉིད་ཀུན་ཏུ་བཟང་མོའི་ཀློང་ནས་འགྲོ་ས་གཞན་མེད་པར་གཏན་ལ་ཕབ་ནས་ཆོས་ཉིད་དམིགས་མེད་བྱ་རྩོལ་དང་བྲལ་བའི་ངང་དུ་སྐྱོང་བ་ཀློང་སྡེ་བས་ནི། ད་ལྟའི་དུས་སུ་སྨིན་གྲོལ་གྱི་རྒྱུན་བཞུགས་རྡོ་རྗེ་ཟམ་པ་ལྟར་ན། ལྟ་བ་མ་ནོར་བ། སྒོམ་པ་མ་བཅོས་པ། སྤྱོད་པ་བསམ་ལས་འདས་པ། འབྲས་བུ་བློ་དང་བྲལ་བ་བཞིར་གནད་འདུ་ཞིང་། དེ་ཡང་གནད་བཞི་དང་ལྡན་པའི་ཚུལ་བཞིས་དབང་བཞིའི་དོན་ལམ་དུ་བྱེད་པ་སྟེ། དབང་པོར་རང་ཡན་གསལ་བའི་གནད། སྒྲོན་མ་མི་འགུལ་སྟོང་པའི་གནད། ཐུར་སེར་གྱེན་འཐེན་བདེ་བའི་གནད། སྨྲ་བྱེད་མ་རིག་དབྱེར་མེད་པའི་གནད་བཞིས། ཡེ་ཤེས་ཀྱི་ཚུལ། དབྱིངས་ཀྱི་ཚུལ། བདེ་བའི་ཚུལ། ཆོས་ཉིད་ཀྱི་ཚུལ་ཏེ་རྡོ་རྗེའི་ཚིག་རྐང་གིས་བསྟན་པའི་བརྡའ་བཞིའམ་ཚུལ་བཞི་གནད་དང་འབྲེལ་བར་གཟིར་ཏེ། དབང་བཞིའི་ཡེ་ཤེས་དང་པོས་གསལ་བ་བུམ་དབང་། གཉིས་པས་སྟོང་པ་གསང་དབང་། གསུམ་པས་བདེ་བ་ཤེར་དབང་། བཞི་པས་ཆོས་ཉིད་བཞི་པའི་དོན་ལམ་དུ་བྱེད་པ་སྟེ། རྒྱུད་ལས། མ་ནོར་བ་ཡི་ཆོས་ཉིད་ལ། །མ་བཅོས་གནས་ཤིང་མ་བྱས་གསལ། །མ་འགགས་པ་ཉིད་ཡེ་ཤེས་ཀློང་། །དེ་བཞིན་ཉིད་ཀྱི་གནས་འདི་ལ། །ཡེངས་དང་མ་ཡེངས་མེད་པ་དང་། །གཡོ་དང་མི་གཡོ་མེད་པའི་ཕྱིར། །རྒྱལ་བའི་དགོངས་པ་འདི་ལས་མེད། །ཅེས་གསུངས། འཇོག་ཐབས་ཀྱི་གནད་མདོར་བསྡུ་ན། བྱས་གྲོལ། བཞག་གྲོལ། གཅེར་གྲོལ་གསུམ་དུ་འདུ་ཞིང་དེ་དག་གི་དོན་ཀྱང་དམིགས་གཏད་བྲལ་བའི་གནད་ཟབ་མོས་ཉིད་བྱ་རྩོལ་མེད་པའི་ངང་དུ་འཇོག་པ་ལ་འདུའོ། །གསུམ་པ། ཡེ་གྲོལ་སྤང་བླང་བྲལ་བའི་ཆོས་ཉིད་ཀྱི་ངང་དུ་འཇོག་པ་མན་ངག་གི་སྡེ་ལ་ཕྱི་ནང་གསང་བ་ཡང་གསང་བཞི་ལས། འདིར་ཡང་གསང་བླ་མེད་ཀྱི་དབང་དུ་བྱས་ན། ཡེ་གྲོལ་སྤང་བླང་བྲལ་བ་ཟུང་འཇུག་གཉིས་སུ་མེད་པའི་ཡེ་ཤེས་ཀྱིས་འཁོར་འདས་ཀྱི་ཆོས་ཐམས་ཅད་ཆོས་ཉིད་སྟོང་འཛིན་དང་བྲལ་བའི་ངང་དུ་སྐྱེལ་བའི་གནད་ཀྱིས། འཁོར་འདས་གང་དུའང་མ་ཕྱེ་བའི་རིག་པ་ཆོས་ཉིད་ཡུལ་ལ་མངོན་སུམ་དུ་ཤར་ནས། རང་རིག་ལུ་གུ་རྒྱུད་ཀྱི་སྐུར་སྨིན་པས་གནད་ཐོག་ཏུ་གྲོལ་བར་བྱེད་པ་གནད་ལ་ཐེབས་པ་མེ་བཙའ་ལྟ་བུ་སྟེ། དེ་ལའང་སེམས་གཞི་མེད་རྩ་བྲལ་ཀ་དག་ཏུ་གཏན་ལ་ཕབ་ནས་སྣང་སེམས་ཐམས་ཅད་ཡེ་གྲོལ་སོར་བཞག་ཆེན་པོ་ཁྲེགས་ཆོད་ཀྱི་ཉམས་ལེན་དང་། ལྷུན་གྲུབ་ལུས་ཀྱི་དཀྱིལ་འཁོར་དེ་བཞིན་གཤེགས་པའི་གསང་མཛོད་སྒོ་ཕྱེ་ནས། རང་གནས་ཀྱི་ཡེ་ཤེས་འོད་གསལ་ལྷུན་གྲུབ་ཀྱི་དཀྱིལ་འཁོར་དུ་ཞལ་ལྟ་བ་ཐོད་རྒལ་གྱིི་ཉམས་ལེན་དང་གཉིས་སུ་ཡོད་དེ། མུ་ཏིག་ཕྲེང་བ་ལས། ཉམས་བླངས་ཁྲེགས་གཅོད་ཐོད་རྒལ་ལོ། །ཞེས་གསུངས། དེ་ལས་དང་པོ་ཁྲེགས་ཆོད་ཀྱི་ཉམས་ལེན་ནི། རང་བྱུང་གཞིར་གནས་ཀྱི་རིག་པ་བྱང་ཆུབ་ཀྱི་སེམས་རང་གི་ངོ་བོ་ཡེ་གདོད་མ་ནས་འཁོར་བའི་ཆོས་གང་གིས་ཀྱང་མ་གོས་པས་སྲིད་པའི་ཉེར་ལེན་གྱི་རྒྱུ་ཟད་པས་ཡེ་གྲོལ། གཉེན་པོ་གང་གིས་ཀྱང་མ་བཅོས་པར་གང་ཤར་ཐམས་ཅད་སྦྲུལ་མདུད་རང་ཞིག་པ་བཞིན་འགྲོལ་བྱེད་གཞན་ལ་མ་ལྟོས་པས་རང་གྲོལ། ཚོགས་བརྒྱད་ཀྱི་ཤེས་པ་ཐམས་ཅད་ཀྱང་ཡུལ་ཡུལ་ཅན་གཉིས་སུ་མེད་པ་སྐད་ཅིག་ཉིད་ལ་ཐོག་བབ་ཆེན་པོར་རང་བཞིན་གྱིས་གྲོལ་བས་གཅེར་གྲོལ་དུསགསུམ་དང་ཤེས་བྱ་གང་དུའང་མི་གནས་པས་མཐའ་གྲོལ་ཏེ། དེ་ལྟར་གྲོལ་ལུགས་ཆེན་པོ་བཞིའི་ངང་དུ་གནས་པ་ནི་ལམ་འདི་ཉིད་ཀྱི་ཁྱད་པར་གྱི་ཆོས་སུ་ངེས་པ་རྙེད་ནས། ཀུན་ཏུ་བཟང་པོ་ཡེ་ཤེས་ཟང་ཐལ་གྱི་དགོངས་པ་ཡེ་གདོད་མའི་ཀ་དག་གི་གནས་ལུགས་ཇི་ལྟ་བ་དེ་ད་ལྟ་མངོན་སུམ་རང་ཐོག་ཏུ་ངོ་ཤེས་པས་ངོ་རང་ཐོག་ཏུ་འཕྲོད། ཡུལ་གྱིས་མ་བསྒྱུར། འཛིན་པས་མ་བསླད། སྤང་གཉེན་མ་ཞུགས་པའི་རིག་པ་དེ་ཉིད་ཇི་ལྟར་འདུག་ཀྱང་ཆོས་སྐུ་རང་བྱུང་གི་ཡེ་ཤེས་ལས་མ་འདས་པས་ཐག་གཅིག་ཐོག་ཏུ་ཆོད། ཅི་སྣང་ཅི་ཤར་ཐམས་ཅད་དང་པོ་ཆོས་ཉིད་ཀྱི་རྩལ་དུ་བྱུང་། ད་ལྟ་ཆོས་ཉིད་ཀྱི་ངང་ལ་གནས། མཐར་ཆོས་ཉིད་ཀྱི་ངང་དུ་ཐིམ་པས་གདེང་གྲོལ་ཐོག་ཏུ་བཅའ། དེ་དག་གི་བོགས་འདོན་དུ་ཕྱི་ནང་གསང་བའི་ནམ་མཁའ་སུམ་ཕྲུགས་ཀྱི་གདམས་པ་སོགས་ལ་རྣལ་འབྱོར་དུ་བྱ་བ་སྟེ། མདོར་ན་རི་བོ་ཅོག་བཞག་གི་ལྟ་བས་རང་བྱུང་གི་ཡེ་ཤེས་རིག་སྟོང་ཆོས་སྐུའི་ངོ་བོར་ཐག་བཅད། རྒྱ་མཚོ་ཅོག་བཞག་གི་སྒོམ་པས་རང་གྲོལ་སོར་བཞག་སྣང་སེམས་ཆིག་ཆོད་དུ་གྲོལ་བ་དུ་མ་རོ་མཉམ་ཆེན་པོར་འགག་བསྡམས། སྣང་བ་ཅེར་བཞག་གི་སྤྱོད་པས་སྐྱེས་གྲོལ་ཐུག་ཕྲད་རིས་མེད་དུ་སྦྱངས་པས་བོགས་དབྱུང་། རིག་པ་ཅོག་བཞག་གི་འབྲས་བུས་རང་རྫོགས་ལྷུན་གྲུབ་ཆེན་པོ་ལ་རེ་དོགས་ཀྱི་འཕྲང་མི་བཅའ་བ་དང་བཞིར་འདུའོ། །དེ་ལྟར་ཡང་། ཁྱུང་ཆེན་ལས། ལྷུན་གྱིས་གནས་པས་བཞག་པ་ཡིན། །ཞེས་དང་། སློབ་དཔོན་དགའ་རབ་རྡོ་རྗེས། སེམས་ཀྱི་རང་བཞིན་ཡེ་ནས་བུདྡྷ་སྟེ། །སེམས་ལ་སྐྱེ་འགག་མེད་པ་ནམ་མཁའ་འདྲ། །ཆོས་ཀུན་མཉམ་ཉིད་ཡང་དག་དོན་རྟོགས་ནས། །དེ་ཉིད་མ་བཙལ་བཞག་ན་སྒོམ་པ་ཡིན། །ཞེས་ཨ་ཏི་ཟབ་དོན་སྙིང་པོར་གསུངས་སོ། །དེ་ལྟར་བསྒོམས་པས་ཉམས་ཀྱི་སྐྱེ་རིམ་ཡང་བཞི་སྟེ། མཉམ་དང་མི་གཡོ་མཉམ་ཉིད་ལྷུན་གྱིས་གྲུབ། །ཅེས་པས། དང་པོ་གནས་པའི་ཉམས་ཤེས་པ་ཡུལ་ཕྱིར་མི་འགྲོ་བ་རྩེ་གཅིག་ཐུན་ཐུབ་པ། གཉིས་པ་མི་གཡོ་བའི་ཉམས་ཏིང་ངེ་འཛིན་ལ་བྱིང་རྒོད་ལ་སོགས་པའི་རྐྱེན་དང་བྲལ་བ། གསུམ་པ་མཉམ་པ་ཉིད་ཀྱི་ཉམས་འཁོར་འདས་རོ་མཉམ་པའི་མཉམ་བཞག་ནམ་མཁའ་ལྟ་བུ་དང་རྗེས་ཤེས་སུ་སྒྱུ་མ་ལྟ་བུ་ཁོང་དུ་ཆུད་པས་འཇིགས་བྲལ་གྱི་གདེང་ཐོབ་པ། བཞི་པ་ལྷུན་ཀྱིས་གྲུབ་པའི་ཉམས་ཏིང་ངེ་འཛིན་ཐུན་མཚམས་ལས་འདས་ཤིང་བློ་ཟད་ཆོས་ཟད་དུ་སོང་བའོ། །གཉིས་པ་ལྷུན་གྲུབ་ཐོད་རྒལ་གྱི་ཉམས་ལེན་ནི། ཐོག་མར་སྐུ་གསུམ་གྱི་སྣ་ཁྲིད་པར་བྱེད་པ་འབྱུང་བཞིའི་སྒྲ་དོན་ལ་བསླབ་པ། རིག་པའི་སྣ་ཁྲིད་པར་བྱེད་པ་འཁོར་འདས་རུ་ཤན་འབྱེད་པའི་སྤྱོད་པ། སེམས་ཀྱི་སྣ་ཁྲིད་པར་བྱེད་པ་སྒོ་གསུམ་གྱི་སྔོན་འགྲོ་རྣམས་ལེགས་པར་འབྱོངས་ནས། དངོས་གཞི་ལ། རིག་པ་མི་གནས་པ་གནས་པར་བྱ་བའི་གདམས་ངག་གི་ཤེས་པ་བག་བཙལ་བ། རིག་པ་མ་ཟིན་པ་ཟིན་པར་བྱ་བའི་གདམས་ངག་གི་གནད་རྣམ་པ་གསུམ་ལ་མཁས་པར་བྱ་བ། རིག་པ་མི་བརྟན་པ་བརྟན་པར་བྱ་བའི་གདམས་ངག་གིས་ཡུལ་དང་ཤེས་པ་བསྲེ་བ། རིག་པ་མ་སྐྱེས་པ་སྐྱེས་པར་བྱ་བའི་གདམས་ངག་གིས་སྣང་བའི་ཚད་བཟུང་བ། རིག་པ་མ་ཤེས་པ་ཤེས་པར་བྱ་བའི་གདམས་ངག་གིས་དྲོད་ཚད་གཏན་ལ་དབབ་པ། རིག་པ་མ་གྲོལ་བ་གྲོལ་བར་བྱ་བའི་གདམས་ངག་གིས་སྐུ་གསུམ་གྱི་ས་ལ་གོམས་པར་བྱ་བ་སྟེ་གནད་ཆེན་པོ་དྲུག་གི་སྒྲོམ་དུ་གཞུག་པའམ། ཡང་ན། བཅའ་བ་ལུས་ཀྱི་གནད་གསུམ། འཁྲིད་པ་དབྱིངས་ཀྱི་གནད་གསུམ། སྣང་བ་ཡུལ་གྱི་གནད་གསུམ་སྟེ་གནད་གསུམ་མམ་དགུ་ལ་བརྟེན་ནས་མངོན་སུམ་རང་ཐོག་ཏུ་ཕབ་སྟེ་ཉམས་སུ་བླངས་པས་སྣང་བཞི་རིམ་གྱིས་འཆར་ཏེ། ཤེས་རབ་རང་བྱུང་གི་སྒྲོན་མ་སྤྲོས་བྲལ་གཉུག་མའི་ཡེ་ཤེས་ཀ་དག་ཁྲེགས་ཆོད་ཀྱི་དགོངས་པ་རིག་སྟོང་ཟང་ཐལ་དུ་རྟོགས་པ་དེའི་དབྱིངས་ནས་འོད་གསལ་གྱི་སྣང་བ་དཔག་ཏུ་མེད་པ་འཆར་བའི་སྐབས་སུ། རྒྱང་ཞགས་ཆུའི་སྒྲོན་མ་འོད་རྩ་དར་དཀར་གྱི་སྐུད་པ་ལྟ་བུས་རིག་གདངས་འཆར་བའི་སྒོ་ཕྱེས། དག་པ་དབྱིངས་ཀྱི་སྒྲོན་མ་འོད་ལྔ་འཇའ་ཚོན་གྱི་སྣང་བས་ཞིང་ཁམས་དང་གཞལ་ཡས་ཀྱི་རྒྱན་བཀྲམ་ནས། ཐིག་ལེ་སྟོང་པའི་སྒྲོན་མ་འོད་ཁྱིམ་ཟླུམ་པོའི་རྣམ་པ་ལས་ཞི་ཁྲོའི་དཀྱིལ་འཁོར་དུ་འཆར་བ་སྟེ། དེ་ཡང་དང་པོ་ཆོས་ཉིད་མངོན་སུམ་གྱི་སྐབས་སུ་རྒྱུ་ཡིས་མ་བསྐྱེད་པའི་འོད་ལྔ་འཇའ་ཚོན་གྱི་སྣང་བ་དབྱིངས་སུ་ཤར་ནས་ཞིང་ཁམས་ཀྱི་སྒོ་ཕྱེ། དེ་ལས་ཆེར་མཆེད་དེ་ཐིག་ལེ་སྐུ་རུ་སྨིན་དུ་ཉེ་བ་ཉམས་གོང་འཕེལ་སྤྲུལ་སྐུ། རྐྱེན་གྱིས་མ་བསྐྱེད་པའི་སྣང་ཉམས་རིགས་ལྔའི་ཚོམ་བུའི་སྐུ་རུ་སྨིན་པ་རིག་པ་ཚད་ཕེབས་ལོངས་སྐུ། དེ་ནས་སྣང་བ་ཐམས་ཅད་ཐིག་ལེ་གཅིག་གི་དཀྱིལ་འཁོར་དུ་དག་ནས་བློས་བཏགས་པའི་ཆོས་སོ་ཅོག་ཐམས་ཅད་ཟད་ཅིང་ཆོས་ཉིད་དུ་འཛིན་པ་ཙམ་ཡང་ཟད་པས་ཆོས་སྐུའི་སྣང་བ་མཐོང་སྟེ། ཐལ་འགྱུར་ལས། ཆོས་ཉིད་མངོན་སུམ་མཐོང་བ་ཡིས། །ཡིད་དཔྱོད་འཛིན་པའི་མཐའ་ལས་འདས། །ཉམས་སྣང་གོང་དུ་འཕེལ་བ་ཡིས། །འཁྲུལ་པའི་སྣང་བ་ནུབ་པ་དང་། །བར་དོའི་ཡེ་ཤེས་མངོན་དུ་བྱེད། །རིག་པ་ཚད་ཕེབས་སྣང་བ་ཡིས། །སྐུ་གསུམ་རྟོགས་པའི་ལམ་སྣང་འདས། །ཆོས་ཉིད་ཟད་པའི་སྣང་བ་ཡིས། །ཁམས་གསུམ་འཁོར་བའི་རྒྱུན་ཐག་ཆད། །ཅེས་གསུངས་རྗེས་མཐའ་རྟེན་གྱི་མན་ངག་མི་འགུལ་བ་གསུམ་ལ་གཞི་བཅའ། སྡོད་པ་གསུམ་གྱི་ཚད་བཟུང་། ཐོབ་པ་གསུམ་གྱིས་གཟེར་གདབ། གདེང་བཞིའི་གྲོལ་ཚད་བསྟན་པ་དང་བཞིས་མཐར་དབྱུང་བ་སྟེ། དེ་དག་གི་གནད་ཟབ་མོ་རྣམས་ནི་བླ་མ་ཡང་ཏིག་ཡིད་བཞིན་ནོར་བུ་སོགས་གསང་བ་སྙིང་ཐིག་གི་གཞུང་ཁྲིད་རྣམས་ལས་ཤེས་པར་བྱ་དགོས་ལ། འདིར་མངོན་སུམ་འོད་གསལ་ལ་ལྟ་བའི་རིག་པ་སྐད་ཅིག་དེ་ཉིད་ལ་ཁམས་གསུམ་པའི་སེམས་སེམས་བྱུང་ཀུན་གཞི་དང་བཅས་པ་ལྡོག་ཚུལ། ཡེ་ཤེས་ཀྱི་ངོ་བོ་ལ་དགོངས་པའི་ཚང་ཚུལ། འོག་མའི་སྙིང་པོ་གོང་མར་འདུ་ཚུལ་གསུམ་བརྩི་ན། དང་པོ་མངོན་སུམ་ལ་བལྟས་པས་ནང་ཀུན་རྟོག་གི་འཕྲོ་འདུ་མེད་པས་འདོད་པའི་སེམས་ལོག གསལ་བའི་ངང་ལ་གསལ་བར་འཇོག་བྱེད་ཀྱི་གཉེན་པོ་མེད་པས་གཟུགས་ཀྱི་སེམས་ལོག རྟོག་མེད་རྩེ་གཅིག་ལ་ཆོས་ཉིད་དུ་ཞེན་པའི་བློ་མེད་པས་གཟུགས་མེད་ཀྱི་སེམས་ལོག དྭངས་ལ་རིག་པའི་ཕྱིར་ཀུན་གཞི་ལས་ལོག རང་བྱུང་གི་ཡེ་ཤེས་སུ་ཐག་ཆོད་པས་ཀུན་གཞིའི་རྣམ་ཤེས་ལས་ལོག སྣང་བ་འོད་གསལ་གྱི་ཡུལ་ལས་ཐ་མལ་གྱི་རྫས་སུ་སྣང་བ་མེད་པས་སྒོ་ལྔའི་རྣམ་ཤེས་ལས་ལོག དེའི་ཚེ་དཔྱོད་བྱེད་ཀྱི་རྟོག་པ་དང་ཆགས་སྡང་གི་ཀུན་རྟོག་མེད་པས་ཡིད་ཤེས་དང་ཉོན་ཡིད་ལས་ལྡོག་སྟེ། མདོར་ན་ཁམས་གསུམ་གྱི་སེམས་དང་སེམས་བྱུང་ཐམས་ཅད་ལས་རྣམ་པར་གྲོལ་བ་ནི་སངས་རྒྱས་ཀྱི་ཡེ་ཤེས་ཞི་བ་ཉིད་ལས་གཞན་མ་ཡིན་པས་མཐར་ཐུག་པ་སྟེ། དེའི་ཕྱིར་དཀོན་མཆོག་བརྩེགས་པ་ཆེན་པོའི་ཆོས་ཀྱི་རྣམ་གྲངས་ལས། ཞི་བའི་བློ་གྲོས། དེ་བཞིན་གཤེགས་པའི་ཐུགས་ཀྱི་གསང་བ་འདི་སེམས་དང་ཡིད་དང་རྣམ་པར་ཤེས་པ་དང་ཡང་བྲལ་ལ། ཏིང་ངེ་འཛིན་གྱི་གནས་ཀྱང་མི་འདོར་ལ། འདི་ནི་དེ་བཞིན་གཤེགས་པ་རྣམས་ཀྱི་ཐུགས་ཀྱི་གསང་བ་བསམ་གྱིས་མི་ཁྱབ་པའོ། །ཞེས་གསུངས་པའི་ཕྱིར་རོ། །གང་དག་སྔགས་ཀྱི་གྲུབ་མཐའ་རྒྱུད་སྡེ་འོག་མ་རྣམས་སུ་རོ་རྐྱང་གི་རླུང་དབུ་མར་ཚུད་པས་བདེ་གསལ་མི་རྟོག་པའི་ཡེ་ཤེས་ལ་ལྷན་ཅིག་སྐྱེས་པའི་ཡེ་ཤེས་སུ་འདོད་པ་གང་ཞིག་ཀུན་གཞི་ཚོགས་བརྒྱད་ལས་མ་ལོག་སྟེ། ཚོར་བ་བདེ་བ་ནི་ཡིད་དང་ཉོན་ཡིད་ཀྱིས་རྗེས་སུ་བསྐྱེད་ཅིང་། དྭངས་མ་ཕྱེད་པའི་སེམས་རྟོག་མེད་ཀུན་གཞི། ཅུང་ཟད་གསལ་དྭངས་ཙམ་ཀུན་གཞིའི་རྣམ་ཤེས། གཟུགས་སོགས་ཡུལ་ལྔ་རགས་པ་དང་དབང་ཤེས་སོ་སོ་ལ་སྣང་བ་སྒོ་ལྔའི་རྣམ་ཤེས་ལས་མ་འདས་པས། དེ་དག་མ་ལོག་ན་འཁོར་བ་ལས་མི་གྲོལ་ཏེ། འཁོར་བའི་སེམས་ལས་མ་གྲོལ་བའི་ཕྱིར་རོ། །ཡང་དེ་དག་རྩ་རླུང་ཐིག་ལེ་རོ་གཅིག་ཏུ་འདྲེས་པའི་དགའ་བ་རྣལ་མའི་དོན་དུ་འདོད་པས། རླུང་དང་ཁམས་རྣམས་རོ་རྐྱང་ནས་དབུ་མར་འཇུག་ཅིང་རྩ་མདུད་རེ་གྲོལ་སྟོབས་ཀྱིས་ཡོན་ཏན་རེ་འཆར་བར་འདོད་པས་གེགས་མང་ལ། འགྲོ་དྲུག་གི་རྩ་འདབ་ཏུ་རླུང་སེམས་ཞུགས་པས་མ་དག་པའི་འཁྲུལ་སྣང་མང་པོ་འཆར་བའི་ཕྱིར་གོལ་མ་གོལ་གྱི་གནད་ཀྱང་དེ་ཡིན་ལ། འདིར་ནི་ལས་རླུང་རྣམས་རང་ཞིར་འཇོག་པ་ལས་དབུ་མར་འཇུག་པ་སོགས་ཀྱི་རྩོལ་བ་མེད་ལ་རྩ་འདབ་སོ་སོའི་རླུང་རང་དག་ལ་སོང་དུས། འོད་རྩའི་ཡེ་ཤེས་ཀྱི་རླུང་རང་ས་ན་རང་གསལ་བས་དག་པ་ཡེ་ཤེས་ཀྱི་སྣང་བ་སྐུ་དང་ཞིང་ཁམས་དང་འོད་ཀྱི་རང་བཞིན་ལས་མ་དག་པའི་འཁྲུལ་སྣང་འཆར་བའི་སྐབས་མེད་ཅིང་། དབུ་མའི་འོད་རྩ་རྣམས་འཕེལ་བས་རྩ་མདུད་ཀྱི་རྣམ་པ་རྣམས་རིམ་གྱིས་འོད་དུ་ཡལ་བའི་ཡོན་ཏན་ལས་སའི་མངོན་རྟོགས་རྣམས་རང་སྣང་དུ་འཆར་རོ། །དེ་ཡང་རྩ་མདུད་དང་པོ་གཉིས་འོད་དུ་གྲོལ་བས། ཕྱིར་སྣང་འོད་ཀྱི་ནང་དུ་སངས་རྒྱས་ཀྱི་ཞིང་ཁམས་བརྒྱ་ཕྲག་འཆར་བ་དང་དེ་དག་ཏུ་འོད་ཟེར་འགྱེད་པ་དང་། རང་སྣང་དུ་འདུས་པས་བགྲོད་པ་དང་། ལུས་འགུལ་བས་ཞིང་བརྒྱ་གཡོ་བ་དང་། ནང་དུ་ཆོས་ཉིད་མི་རྟོག་པའི་ཏིང་ངེ་འཛིན་བརྒྱ་ལ་སྙོམས་པར་འཇུག་ཅིང་ལྡང་བ་སོགས་མཐོང་ལམ་གྱི་ཡོན་ཏན་བརྒྱ་ཕྲག་བཅུ་གཉིས་པོ་འབྱོང་ཞིང་། དེས་མཚོན་ཏེ་དབུ་མའི་མདུད་པ་གཉིས་གཉིས་གྲོལ་བ་ལས་ས་གོང་མ་གོང་མའི་ཡོན་ཏན་རྣམས་རྩོལ་བ་མེད་པར་སྣང་བའི་ཕྱིར་འོག་མ་རྣམས་ལས་ཆེས་ཁྱད་པར་དུ་འཕགས་ཤིང་མྱུར་བའི་ལམ་ཡིན་ནོ། །འདི་ལ་ཁ་ཅིག་འདི་སྙམ་དུ། དུས་འཁོར་གྱི་སྟོང་གཟུགས་སོགས་སྒོམ་པ་ལས་བྱུང་བས་མཆོག་ལ། རྫོགས་ཆེན་ཐོད་རྒལ་མ་སྒོམ་པ་ལའང་འཆར་བས་དམན་སྙམ་པ་དང་། དུས་འཁོར་གྱི་བདེ་སྟོང་ཟུང་འཇུག་སྒོམ་པས་སྐྱེ་ལ། རྫོགས་ཆེན་རིག་པ་བསྒོམ་མི་དགོས་པར་ངོ་སྤྲད་པས་དམན་ནོ་སྙམ་པ་གྱི་ན་སྟེ། དུས་འཁོར་དང་རྫོགས་ཆེན་གཉིས་ཀ་ཆོས་ཉིད་ལམ་དུ་བྱེད་པར་འདྲ་ཡང་། ཆོས་ཉིད་ནི་གསར་དུ་བསྒོམས་པས་བྱས་པ་མ་ཡིན་ཏེ། གལ་ཏེ་ཡིན་ན་བཅོས་མ་གློ་བུར་བར་གྱུར་པས་དམན་ནོ། །ཆོས་ཉིད་དེ་གསར་བྱུང་མ་ཡིན་ན་ཡེ་ནས་ཡོད་པ་ཉིད་ངོ་སྤྲད་པ་དང་། བསྟན་ཏེ་ལམ་དུ་བྱས་པས་གྲོལ་བ་ལ་རྫོགས་ཆེན་གྱི་ལམ་མཆོག་ཏུ་གྲུབ་པ་ཡིན་ནོ། །དེ་ལ་རྫོགས་ཆེན་གྱི་རིག་པའང་ངོ་མ་སྤྲད་ན་མི་རྟོགས་ལ། མ་རྟོགས་ན་དེ་ཉིད་བསྒོམ་མི་ཤེས། བསྒོམ་མ་ཤེས་ཤིང་མ་བསྒོམས་ན་མི་གྲོལ་བས་བསྒོམས་པས་གྲོལ་བར་གཉིས་ཀ་འདྲ་ཡང་། རྫོགས་ཆེན་ཁྲེགས་ཆོད་གཉིས་བསྒོམ་དགོས་པས་རྩོལ་བའི་ལམ་དུ་མི་འགྲོ་སྟེ། རྩོལ་བའི་ལམ་གྱིས་ཡེ་ཤེས་གཟོད་འཚོལ་བ་མིན་པར། རྩོལ་མེད་དུ་ཡེ་ཤེས་ལ་འཇུག་པའི་ཆ་ནས་རྩོལ་མེད་ཅེས་བརྗོད་པའི་ཕྱིར་རོ། །དེས་ན་ཐོད་རྒལ་གྱི་སྣང་བ་འདི་རྩོལ་མེད་དུ་ཡོད་ཀྱང་ལམ་དུ་མ་བྱས་ན་མི་རྟོགས་ལ། བྱས་ན་འོད་གསལ་གྱི་རྟགས་སྣང་དེ་ཉིད་ཀྱི་མཐུས་གདོས་བཅས་ཀྱི་ཕུང་པོ་དབྱིངས་སུ་འགགས་ནས་དོན་གྱི་ལྷན་སྐྱེས་བདེ་ཆེན་རྡོ་རྗེའི་སྐུ་འགྲུབ་པར་བྱེད་པས་ན། རླུང་ཉི་ཁྲི་ཆིག་སྟོང་སོགས་མ་དག་པའི་རྩ་རླུང་ཐིག་ལེ་རགས་ལུས་ཀྱི་སྟེང་དུ་འགག་པ་གཙོ་བོར་མི་བྱེད་པར་མ་དག་པའི་རྩ་རླུང་ཐམས་ཅད་རང་འགགས་སུ་སོང་ནས་དོན་དམ་ཡེ་ཤེས་ཀྱི་སྐུ་འགྲུབ་པ་དེ་ལས་ལྷག་པ་གཞན་གསར་རྙིང་གི་རྒྱུད་དང་མན་ངག་གང་ལའང་ཅུང་ཟད་མེད་པས་གསང་སྔགས་ཀྱི་རྒྱུད་སྡེ་ཀུན་གྱི་རྫོགས་རིམ་ཐམས་ཅད་དུས་འཁོར་གྱི་རྫོགས་རིམ་གྱི་གནད་ལ་ཐུག་ཅིང་། དེའི་མཐའ་ཡང་རྫོགས་པ་ཆེན་པོ་ཉིད་ལ་ཐུག་ནས་མཐར་ཕྱིན་པར་བྱེད་པས་ན་ཀུན་གྱི་བླ་མར་གྱུར་པ་སྟེ། འདི་དག་གི་རྣམ་བཞག་རྒྱས་པ་ནི་གཉུག་སེམས་འོད་གསལ་གྱི་དོན་ལ་དཔྱད་པའི་སྐབས་སོགས་ལས་ཤེས་པར་བྱའོ། །གཉིས་པ་ཡེ་ཤེས་ཀྱི་ངོ་བོ་ལ་དགོངས་པའི་ཚང་ཚུལ་ནི། དེ་ལྟར་གནད་ལས་མཐོང་བའི་མངོན་སུམ་ལ་ལྟ་བའི་སྐད་ཅིག་ལ། དྭངས་མ་མི་གཡོ་བ་སྤྲོ་བསྡུ་དང་བྲལ་བའི་ཡེ་ཤེས་ནང་དུ་ཤར་བ་ནི་ཁྲེགས་ཆོད་ཆོས་སྐུ་རང་ཐོག་ཏུ་ཕེབས་པ་ཡིན་ལ། ཕྱིར་སྣང་འོད་གསལ་དུ་སྣང་བའི་ཐབས་ནི་ཐོད་རྒལ་ལྷུན་གྲུབ་ཏུ་ཤར་བའི་གཟུགས་སྐུ་ལམ་དུ་བྱེད་པས། ཕྱིར་སྣང་བསྐྱེད་རིམ་ཐབས་སུ་ཤར་བའི་གནད་ལས། ནང་གསལ་སྐྱེ་མེད་སྤྲོས་ཀུན་ཞི་བའི་རྫོགས་རིམ་མུ་མཐའ་དང་བྲལ་བའི་ཤེས་རབ་མངོན་དུ་གྱུར་པས། ཐབས་ཤེས་དང་། བསྐྱེད་རྫོགས་དང་། སྐུ་གཉིས་དང་། སྣང་སྟོང་དང་། ཚོགས་གཉིས་རྣམས་ཁྲེགས་ཆོད་དང་ཐོད་རྒལ་སྒོམ་པའི་སྐད་ཅིག་ལ་རྫོགས་པའོ། །དེའི་ཚེ་སྐུ་ལྔ་ཡེ་ཤེས་དང་བཅས་པའང་ཚང་སྟེ། རྩེ་གཅིག་སྤྲོས་པ་དང་བྲལ་བས་ཆོས་སྐུ། རང་གསལ་འཛིན་པ་མེད་པས་ལོངས་སྐུ། སྣ་ཚོགས་ཡུལ་ལ་ཤར་བས་སྤྲུལ་སྐུ། ཚོགས་བརྒྱད་རྣམ་ཤེས་ལོག་པས་བྱང་ཆུབ་ཀྱི་སྐུ། དབྱིངས་ལ་འཕོ་འགྱུར་མེད་པས་རྡོ་རྗེའི་སྐུའོ། །ཡེ་ཤེས་ལྔ་ལ། དམིགས་བསམ་སྤྲོས་པ་དང་བྲལ་བ་ཆོས་དབྱིངས་ཡེ་ཤེས། གསལ་ལ་འགྲིབ་པ་མེད་པ་མེ་ལོང་ཡེ་ཤེས། །རོ་མཉམ་ངང་ལ་གནས་པ་མཉམ་ཉིད་ཡེ་ཤེས། སྣང་བ་འོད་ལྔ་མ་འདྲེས་པ་ཀུན་རྟོག་ཡེ་ཤེས། གཟུང་འཛིན་གཉིས་སྣང་གྲོལ་བས་བྱ་གྲུབ་ཡེ་ཤེས་སོ། །ཡེ་ཤེས་དེ་དག་མཁའ་འགྲོ་ལྔའི་རང་བཞིན་དུའང་གནས་ཤིང་། སངས་རྒྱས་ཀྱི་དགོངས་པ། སྐུ་དང་ཡེ་ཤེས་འདུ་འབྲལ་མེད་པའི་དོན་སྐད་ཅིག་ལ་ཚང་བར་གསུངས་པ་དང་། གཞན་ཡང་རིག་པ་རང་ཤར་ལས། ས་ཞེས་བྱ་བ་གུད་ན་ཡོད་པ་མ་ཡིན་ནོ། །བདེན་པ་མཐོང་བའི་གང་ཟག་གཅིག་ལ་ས་རྣམས་རྫོགས་ནས་ཡོད་དེ། དེའང་ངོ་སྤྲོད་བསྟན་པའི་གང་ཟག་དེ། དང་པོ་བདེན་པ་མཐོང་བའི་དུས་ན་དེ་ལ་དགའ་བ་སྐྱེས་པ་ནི་ས་དང་པོ་རབ་ཏུ་དགའ་བའོ། །ཞེས་པ་ནས། ཀ་དག་གི་ས་ལ་ཡེ་ཤེས་ལྷུག་པར་ཤེས་ནས་དེའི་གོང་ན་གཞན་མེད་པ་ནི་བཅུ་དྲུག་ཡེ་ཤེས་བླ་མའི་ས་ཐོབ་པའོ། །ཞེས་པའི་བར་གྱིས་གསུངས་པ་བཞིན། མངོན་སུམ་ལམ་གྱི་བདེན་པ་མཐོང་བ་སོགས་ས་དང་པོ་རབ་ཏུ་དགའ་བ་ནས་ཀུན་འོད་བར་བཅུ་གཅིག་དང་། ཁྱད་པར་གྱི་ས་བཅུ་གཉིས་མ་ཆགས་པདྨ་ཅན་ནས་བཅུ་དྲུག་ཡེ་ཤེས་བླ་མའི་ས་ཡི་བར་དུ་སྦྱོར་བར་མཛད་དོ། གསུམ་པ་འོག་མའི་སྙིང་པོ་གོང་མར་འདུ་ཚུལ་ནི། འོད་གསལ་གྱི་སྐད་ཅིག་ལ་གནས་པ་དེའི་ཚེ། གང་ཟག་དང་ཆོས་ཀྱི་བདག་ཏུ་འཛིན་པ་མེད་པས་ཉན་ཐོས་རང་རྒྱལ་བྱང་ཆུབ་སེམས་དཔའ་གསུམ་གྱི་ལྟ་བའི་དགོངས་པ་འདུས་སོ། །ལུས་ངག་ཡིད་གསུམ་ཉོན་མོངས་པའི་དྲི་མ་མེད་པས་གཙང་སྦྲ་སྤྱོད་པ་ཀྲཱྀ་ཡ་ཨུ་པ་ཡོ་ག་གསུམ་གྱ་ིཡེ་ཤེས་དྲི་མེད་གསུམ་འདུས་སོ། །སྣང་བ་རིག་པ་གཉིས་མེད་གསུམ་ཟུང་དུ་ཆུད་དེ་རྟོགས་པ་ཏིང་ངེ་འཛིན་ཁྱད་པར་ཅན་མངོན་དུ་གྱུར་པས་མ་ཧཱ་ཨ་ནུ་ཨ་ཏི་གསུམ་གྱི་དགོངས་པ་འདུས་སོ། །དེ་བཞིན་དུ་གཟུངས་དང་། ཏིང་ངེ་འཛིན་དང་ས་ལམ་རྣམས་ཀྱང་རིག་པའི་ཡེ་ཤེས་དྲི་མ་མེད་པ་ལ་གནས་པའི་ཆས་བཞག་པས་དེ་དག་ཀྱང་འདུ་སྟེ། ཐེག་པ་འོག་མར་ཉམས་སུ་ལེན་པའི་ཏིང་ངེ་འཛིན་དང་རྟོགས་པའི་ཡོན་ཏན་གྱི་ཆོས་རྣམས་ཀྱང་འདིར་འདུས་ལ། སྐྱོན་གྱི་ཆ་རྣམས་མེད་པས་མ་འདྲེས་ཡོངས་རྫོགས་ཀྱི་ཐེག་པ་ཞེས་བྱའོ། །ཞེས་ཀུན་མཁྱེན་ཆོས་ཀྱི་རྒྱལ་པོས་གསུང་སོ། །སྤྱོད་པ་ནི། ཅིར་སྣང་ཆོས་ཉིད་ཀྱི་རོལ་པར་ཤར་བས་བླང་དོར་མེད་པར་སྤྱོད་པ་སྟེ། ནམ་མཁའ་ཆེ་ལས། བྱ་བ་མེད་པས་ལས་རྣམས་ཟིན། །ཞེས་དང་། བང་མཛོད་འཕྲུལ་སྡེ་ལས། ཨ་ཏི་ཡོ་གའི་སྤྱོད་པ་ནི། །ལྟ་སྒོམ་སྲོག་དང་ལྡན་པ་ཡིས། །ཤུགས་ལས་བྱུང་བའི་སྤྱོད་པ་ནི། །ཇི་ལྟར་སྨྱོན་པའི་སྤྱོད་པ་བཞིན། །གང་ལའང་ཐོགས་པ་མེད་པར་སྤྱོད། །ཅེས་སོ། །དེ་ལའང་དབྱེ་ན། ཉི་ཟླ་ཁ་སྦྱོར་ལས། རྣལ་འབྱོར་དོན་ལ་སུས་སྦྱོར་བ། །སྤྱོད་པ་འདི་རྣམས་གོམས་པར་བྱ། །བུང་བ་ལྟ་བུའི་སྤྱོད་པ་ཡིས། །ཆོས་རྣམས་ཀུན་གྱི་རོ་མྱོང་བྱ། །རི་དྭགས་ལྟ་བུའི་སྤྱོད་པ་ཡིས། །འཁྲུལ་པའི་རྐྱེན་གྱུར་ཡུལ་རྣམས་སྤངས། །ལྐུགས་པ་ལྟ་བུའི་སྤྱོད་པ་ཡིས། །འཁྲུལ་པའི་ངག་རྣམས་རྣམ་པར་སྤངས། །ཐི་བྱ་ལྟ་བུའི་སྤྱོད་པ་ཡིས། །གསང་བའི་སྔགས་ཀྱི་ཐེ་ཚོམ་གཅད། །སྨྱོན་པ་ལྟ་བུའི་སྤྱོད་པ་ཡིས། །གཅིག་ཏུ་གནས་པའི་ཡུལ་རྣམས་སྤངས། །སེང་གེ་ལྟ་བུ་སྤྱོད་པ་ཡིས། །འཇིག་པའི་སེམས་སྤང་དུར་ཁྲོད་རྒྱུ། །ཁྱི་ཕག་ལྟ་བུའི་སྤྱོད་པ་ཡིས། །གཙང་དང་རྨེ་{སྨ ེ}བའི་རྟོག་པ་སྤངས། །སྡོམ་དོམ་ཡང་སྣང་བུ་ལྟ་བུའི་སྤྱོད་པ་ཡིས། །དྲན་བསམ་ཐོག་བབ་ཉིད་དུ་སྤྱོད་གཅད་ཀྱང་སྣང་། །བུ་ཆུང་ལྟ་བུའི་སྤྱོད་པ་ཡིས། །འཁྲུལ་པའི་ཞེན་པ་རྒྱུན་རིང་སྤངས། །ངང་རྔ་བོ་ཡང་སྣང་མོ་ལྟ་བུའི་སྤྱོད་པ་ཡིས། །འཇིག་རྟེན་མཐུན་པའི་ཚིག་གིས་དྲངས། གླང་ཆེན་ལྟ་བུའི་སྤྱོད་པ་ཡིས། །འཁོར་བའི་གཡུལ་རྣམས་གཏིང་ནས་བཟློག་རི་དྭགས་ཀྱང་སྣང་། རི་སྐེགས་ལྟ་བུའི་སྤྱོད་པ་ཡིས། །བུ་དང་དགྲ་ཡི་འདུ་ཤེས་སྤངས། །རྒྱ་མོ་ལྟ་བུའི་སྤྱོད་པ་ཡིས། །འདོད་པ་ཆོག་ཤེས་དུས་ཚོད་གཅད། །དྲེའུ་ལྟ་བུའི་སྤྱོད་པ་ཡིས། །འཁོར་བའི་ས་བོན་སྤེལ་མི་བྱ། །བྲམ་ཟེ་ལྟ་བུའི་སྤྱོད་པ་ཡིས། །གཞན་གྱི་ལོངས་སྤྱོད་ཟས་རྣམས་སྤངས། །དཔའ་བོ་ལྟ་བུའི་སྤྱོད་པ་ཡིས། །འཁོར་འདས་རྣམས་ཀྱི་རུ་ཤན་དབྱེ། །ཆུ་མིག་ལྟ་བུའི་སྤྱོད་པ་ཡིས། །དྲན་པའི་རྟེན་ཉིད་རང་སར་བཞག །ནམ་མཁའ་མདུང་སྐོར་སྤྱོད་པ་ཡིས། །དངོས་པོ་རྣམས་ལ་ཟང་ཐལ་སྤྱད། །བར་སྣང་རླུང་འདྲའི་སྤྱོད་པ་ཡིས། །གཟུང་དང་འཛིན་པའི་རྟོག་པ་སྤངས། །བྱ་ཁྱུང་ལྟ་བུའི་སྤྱོད་པ་ཡིས། །གཡང་ས་རྣམས་ནི་རླབས་ཀྱིས་གཅོད། །རི་བོ་ལྟ་བུའི་སྤྱོད་པ་ཡིས། །འགྱུར་མེད་རང་དག་སྟེང་དུ་སྤྱད། །ཐོག་ཆེན་ལྟ་བུའི་སྤྱོད་པ་ཡིས། །སྣང་བ་ཕྱིར་མི་ཟློག་པར་སྤྱད། །ཅེས་ཉི་ཤུ་རྩ་གཅིག་ཏུ་གསུངས་ཤིང་། དེ་དག་ཀྱང་བསྡུ་ན། ཐོག་མར་སྒོ་ཀུན་ནས་བསྡུད་པ་བུང་བ་ཚང་འཚོལ་བ་ལྟ་བུས་ཤེས་རབ་གསུམ་གྱིས་ཕྱི་ནང་གསང་བའི་སྒྲོ་འདོགས་བཅད། དེའི་གྲོགས་སུ་ཐེ་ཚོམ་མེད་པ་ཐི་བྱ་ཚང་དུ་འཇུག་པ་ལྟ་བུས་རང་ཉིད་གང་ལ་ཡིད་ཆེས་པའི་གདམས་པ་དེ་ཉམས་སུ་ལེན། དེའི་གྲོགས་ཀུན་གྱི་སྤྱོད་ཡུལ་མ་ཡིན་པ་རི་དྭགས་ལྟ་བུས་རྟག་ཏུ་དབེན་པ་བསྟེན། དེའི་གྲོགས་ལྐུག་པ་ལྟ་བུས་སྨྲ་བ་བཅད་དེ་སུ་དང་ཡང་གཏམ་མི་སྨྲ། དེ་ལྟར་བྱས་པས་དྲན་པ་རེངས་པས་སྨྱོན་པ་ལྟ་བུའི་སྤྱོད་པ་དང་། གཙང་རྨེ་{སྨེ} མེད་པ་ཁྱི་ཕག་ལྟ་བུའི་སྤྱོད་པ་ཤུགས་ཀྱིས་འབྱུང་ལ། དེ་དྲུག་རྫོགས་པ་ལས་ཟིལ་གྱིས་མི་ནོན་པ་སེང་གེ་ལྟ་བུའི་སྤྱོད་པ་འབྱུང་སྟེ་རྣལ་འབྱོར་པ་དེ་སུ་ལའང་འཇིགས་པ་དང་བག་ཚ་བ་མེད་པར་འབྱུང་བཞིའི་གནོད་པ་སོགས་ཀྱིས་མི་བརྫི་ཞིང་སྣང་བ་ལ་དབང་བསྒྱུར་བས་སྣང་བ་དབང་བསྒྱུར་གྱི་སྤྱོད་པ་ཞེས་བྱ་སྟེ་མཐར་ཕྱིན་པའོ། །འབྲས་བུ་ནི། ཡང་འབྱེད་ལས། རྫོགས་ཆེན་ཨ་ཏིའི་འབྲས་བུ་ནི། །གདོད་ནས་སྙིང་པོ་བྱང་ཆུབ་ཏུ། །ཐོབ་མེད་འབྲས་བུ་རང་ལ་སྨིན། །ཞེས་གསུངས་ཏེ། ལྷུན་རྫོགས་ཀུན་ཏུ་བཟང་པོའི་ས་ལ་ད་ལྟ་ཉིད་ནས་གནས་པ་མཐར་ཕྱིན་པ་སྟེ། གདེང་བཞི་ཚད་དུ་ཕྱིན་པས་འཁོར་བ་མྱང་འདས་སུ་གྲོལ་བའོ། །གདེང་བཞི་ནི། རིན་པོ་ཆེ་སྤུང་བར། མི་འགྱུར་ལྟ་བའི་གདེང་ཆེན་བཞིས། །མི་ལྡོག་ཡེ་ཤེས་ཚད་ཀྱང་བཟུང་། །ཞེས་པས། ངན་སོང་གསུམ་གྱི་སྡུག་བསྔལ་དང་ཚེ་ཚད་ལ་སོགས་པ་ཐོས་ཀྱང་རང་ངོ་གདོད་ནས་འཁྲུལ་མི་ཤེས་པའི་ཐོག་ཏུ་བདེ་སྡུག་ཤེས་བྱ་ལ་མི་སྲིད་པར་ཐག་ཆོད་པས་ངན་སོང་ལ་བག་མི་ཚ་བའི་གདེང་། རིག་པ་གཞི་ཐོག་ཏུ་ཕེབས་པ་ལ་འཁོར་བའི་མིང་ཙམ་དུའང་མ་གྲུབ་པས་རྒྱུ་འབྲས་རྣམ་སྨིན་ལ་མི་རེ་བའི་གདེང་། ཆོས་ཉིད་ཀྱི་གཤིས་ལ་འདི་ལྟར་གྲོལ་ནས་འདི་ཙམ་དུ་བདེའོ་སྙམ་པའི་མྱང་འདས་རང་མཚན་པ་མེད་པས་ཐོབ་བྱ་ལ་རེ་བ་མེད་པའི་གདེང་། རྒྱལ་བའི་ཁམས་ལ་ཡོན་ཏན་ཚད་མེད་པར་ཐོས་ཀྱང་རང་ངོ་རིག་པ་ལས་ཐ་དད་པའི་སངས་རྒྱས་སྤུའི་རྩེ་མོ་ཙམ་དུའང་མེད་པ་གཤིས་ཐོག་ཏུ་ཕེབས་པས་དགའ་བྲོད་མཉམ་པ་ཉིད་དུ་དག་པའི་གདེང་སྟེ། དེ་ལྟར་གདེང་རྣམ་པ་བཞིས་ཚད་དུ་སྐྱེལ་ནས་མྱ་ངན་ལས་འདས་པའི་གྲོང་ཁྱེར་དམ་པར་འཇུག་པར་ནི། རྡོ་རྗེ་སེམས་དཔའི་སྙིང་གི་མེ་ལོང་གི་རྒྱུད་ལས། མྱ་ངན་ལས་འདས་པ་དེ་ཡང་གཉིས་ཏེ། ཡང་དག་པར་རྫོགས་པར་སངས་རྒྱས་པ་དང་། མངོན་པར་རྫོགས་པར་སངས་རྒྱས་པའོ། །དེ་ལ་ཡང་དག་པར་རྫོགས་པར་སངས་རྒྱས་པ་ནི། ཕུང་པོ་ལྷག་མ་མེད་པར་སངས་རྒྱས་པའོ། །མངོན་པར་རྫོགས་པར་སངས་རྒྱས་པའི་སྐྱེས་བུ་དེ་ལ་འོད་དང་། སྒྲ་དང་། གདུང་དང་། སྐུ་དང་། ས་གཡོ་བ་ལ་སོགས་པར་འབྱུང་ངོ་། །ཞེས་གསུངས་པའི་སྔ་མ་ལྕེ་བཙུན་ཆེན་པོ་སོགས་དང་། ཕྱི་མ་ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་ལྟ་བུ་ཡིན་པར་རིག་འཛིན་འཇིགས་མེད་གླིང་པས་གསུངས་སོ། །དེ་ཡང་ཀ་དག་ཁྲེགས་ཆོད་ཀྱི་ཉམས་ལེན་མཐར་ཕྱིན་པས་ལུས་རྡུལ་ཕྲན་དུ་དེངས་པ་ནམ་མཁའ་དང་མཁའ་འགྲོ་ལྟ་བུའི་འཆི་ལུགས་གཉིས་དང་། ལྷུན་གྲུབ་ཐོད་རྒལ་གྱི་ཉམས་ལེན་མཐར་ཕྱིན་ནས་དྭངས་མ་འོད་ཕུང་དུ་དེངས་པ་རིག་འཛིན་དང་མེ་ཕུང་ལྟ་བུའི་འཆི་ལུགས་གཉིས་ཏེ་བཞིར་གསུངས་ཤིང་། དེ་ལས་སྔ་མ་གཉིས་ནི། ལུས་རྡུལ་ཕྲན་དང་སེམས་ཆོས་ཉིད་དུ་དེངས་ནས་ཀ་དག་གི་སར་སྐད་ཅིག་ལ་གྲོལ་བ་སྤང་མི་ཕམ་མགོན་པོ་བདུན་བརྒྱུད་ལྟ་བུ་སྟེ། འདིའི་ལུགས་ལ་འཕོ་ཆེན་རྡོ་རྗེའི་སྐུར་བཞེངས་མི་ནུས་པར་གསུངས་ཤིང་། ཕྱི་མ་གཉིས་ཀྱི་དབང་དུ་བྱས་ན་སྣང་བ་བཞིའི་ལམ་རྫོགས་ནས། ལུས་དེས་གཞན་དོན་འགྲུབ་པར་གཟིགས་ན་སྲིད་པ་ཇི་སྲིད་བཞུགས་པར་དགོངས་པ་དེ་སྲིད་དུ་སྐུ་དེ་ཉིད་ཆུའི་ཟླ་བ་ལྟར། སྣང་གཟུགས་ཡོད་ཀྱང་རེག་གཟུགས་མེད་པར་བཞུགས་ནས་སེམས་ཅན་གྱི་དོན་མཛད་པ་འཕོ་བ་ཆེན་པོའི་སྐུར་བཞེངས་པ་ནི། སློབ་དཔོན་ཆེན་པོ་བི་མ་ལ་དང་པདྨ་ལྟ་བུ་རྫུ་འཕྲུལ་དང་ཆོས་ཀྱི་རྣམ་གྲངས་བསམ་གྱིས་མི་ཁྱབ་པ་སྐད་ཅིག་གཅིག་ལ་སྟོན་པའོ། །ལུས་དེས་གཞན་དོན་རྒྱ་ཆེན་མི་འགྲུབ་པར་གཟིགས་ན་འོད་གསལ་དུ་གྲོལ་བའི་ངང་དེ་ཉིད་དབྱིངས་གདོད་མའི་སར་སྐུ་དང་ཡེ་ཤེས་ལྷུན་གྱིས་གྲུབ་པས། ཆོས་སྐུའི་ཞིང་ན་ཀུན་ཏུ་བཟང་པོར་བཞུགས་བཞིན་དུ་དེའི་ངང་ལས་ལོངས་སྐུའི་ཞིང་ཁམས་སྟུག་པོ་བཀོད་པར་རང་སྣང་ལོངས་སྤྱོད་རྫོགས་པར་བཞེངས་པའི་བྱིན་རླབས་ལས། དག་པའི་ཞིང་དུ་རིགས་ལྔར་སྣང་བས་ས་ལ་གནས་པའི་སེམས་དཔའ་རྣམས་ཀྱི་དོན་མཛད་ཅིང་། འགྲོ་བ་དྲུག་གི་གནས་སུ་རང་རང་གི་སྟོན་པར་སྣང་ནས་དོན་མཛད་པ་མཆོག་གི་སྤྲུལ་པ་དང་། བཟོ་དང་སྐྱེ་བ་སྤྲུལ་པ་ལ་སོགས་པ་སྲིད་པ་ཇི་སྲིད་བར་འཕྲིན་ལས་རྒྱུན་མི་འཆད་པས་སོ་སོའི་སྣང་བ་བཞིན་དུ་འབྱུང་བ་སྟེ། ཞིབ་པར་དབང་པོ་རབ་འབྲིང་ཐ་གསུམ་གྱི་གྲོལ་ལུགས་དང་། མཐར་ཐུག་འབྲས་བུའི་གྲོལ་ས། སྐུ་དང་ཡེ་ཤེས་ཀྱི་རྣམ་བཞག་སོགས་རྒྱས་པར་ཐེག་མཆོག་རིན་པོ་ཆེའི་མཛོད་སོགས་ཀུན་མཁྱེན་ཆོས་ཀྱི་རྒྱལ་པོའི་གསུང་རབ་རྣམས་ལས་ཤེས་པར་བྱ་བ་ཁོ་ན་སྟེ། མདོར་ན་སྔགས་ཕྱི་རྒྱུད་རྣམས་ལས་སྔགས་གྲུབ་པའི་མཐུས་འདོད་གཟུགས་ཀྱི་ལྷ་དང་སྐལ་བ་མཉམ་པའི་ལུས་སུ་གྱུར་ནས་མཁའ་སྤྱོད་ཀྱི་རིག་འཛིན་གྲུབ་པ་སོགས་དང་། གསང་འདུས་རིམ་ལྔ་སོགས་སུ་ཕྲ་བའི་རླུང་སེམས་ལས་སྒྱུ་མའི་སྐུ་བསྒྲུབ་ཚུལ་དང་། འོད་གསལ་ཐོད་¡eརྒལ་ཞུ་མཆན། ¡fགྱི་སྣང་བཞི་མཐར་ཕྱིན་ནས། གདོས་བཅས་རགས་པའི་ལུས་འདི་ཡང་འོད་དུ་ཡལ་ཏེ། རིག་པའི་ཡེ་ཤེས་འོད་གསལ་ཤིན་ཏུ་རྣམ་དག་གི་ངང་ལས་རང་ཤར་བའི་ཟུང་འཇུག་གི་ལྷ་སྐུ་ནམ་མཁའ་དང་མཉམ་པ་འགྲུབ་པ་ལ་རྙིང་མ་པས་འཇལ་ལུས་འོད་སྐུ་ཞེས་བཏགས་པ་འདི་གསུམ་ལ་རགས་ཕྲ་དང་མ་དག་དང་། དག་པ་དང་ཤིན་ཏུ་རྣམ་པར་དག་པའི་ཁྱད་པར་གནམ་ས་ལྟར་ཡོད་པ་ནི་མདོ་ཙམ་གོང་དུ་སྨོས་ཟིན་ལ། ཞིབ་པར་གཉུག་སེམས་འོད་གསལ་ལ་དཔྱད་པའི་སྐོར་སོགས་ལས་ཀྱང་གསལ་བས་དེར་གཟིགས་པར་མཛོད་ཅིག དེས་དབང་བསྒྱུར་ཐབས་ཀྱི་ཐེག་པ་མ་ཧཱ་ཨ་ནུ་ཨ་ཏི་གསུམ་གྱི་ཐེག་པ་མདོ་ཙམ་བཤད་ཟིན་ཏོ། །། །༈ རྩ་བའི་གསུམ་པ་ལུང་གིས་ཞབས་བསྡུ་བ་ནི། དེ་ལྟར་ཐེག་པ་རིམ་དགུའི་རྣམ་བཞག་ཆོས་ཀྱི་རྒྱལ་པོ་སྨིན་གླིང་པ་སྐུ་མཆེད་ཡབ་སྲས་ཀྱི་བཞེད་པ་རྩ་བར་བཟུང་། གཞན་ཀུན་མཁྱེན་ཆོས་ཀྱི་རྒྱལ་པོ་དང་། ཀུན་གཟིགས་ཀཿཐོག་པ་ཆེན་པོ་དང་ཞེ་ཆེན་པ ཎྜི་ཏ་མཐུ་སྟོབས་མཚན་ཅན་ཡབ་སྲས་དང་། རིགས་བདག་བཀའ་དྲིན་མཚུངས་བྲལ་འཇམ་མགོན་རྣམ་གསུམ་གྱི་གསུང་ལས་བཏུས་ཏེ་ཅུང་ཟད་བཤད་ཟིན་ནས། ད་ནི་དེའི་རྒྱབ་རྟེན་དུ་རྫོགས་པ་ཆེན་པོ་རིག་པ་རང་ཤར་ཆེན་པོའི་རྒྱུད་དང་། བཤད་རྒྱུད་ཐིག་ལེ་ཀུན་གསལ་ཆེན་པོའི་རྒྱུད་ལས་གསུངས་པའི་ལུང་རྣམས་ཀྱང་མདོར་བསྡུས་ཏེ་འབྲི་ན། དང་པོ་ལ་དགུ་ལས། ཉན་ཐོས་ནི། རྒྱུད་དེ་ཉིད་ལས། ཉན་ཐོས་ཐེག་པ་འདི་ལྟ་སྟེ། །འཇུག་པའི་སྒོ་ནི་བདེན་པ་བཞི། །ཉན་ཐོས་སྤྱི་ཡི་འཇུག་སྒོའོ། །དབྱེ་བ་རྣམ་པ་གཉིས་འདོད་དོ། །བྱེ་བྲག་པ་དང་མདོ་སྡེ་པའོ། །བྱེ་བྲག་པ་ཡི་ལྟ་བ་ནི། ཕུང་པོ་ཁམས་དང་སྐྱེ་མཆེད་ལ། གཡག་རྔ་ནེའུ་གསེང་ཚུལ་དུ་འདོད། །རང་གི་བློ་ཡིས་ལྟས་གྱུར་ན། །རྡུལ་དང་རྡུལ་ཕྲན་དག་ཏུ་འདོད། །དེ་བཞིན་རྣམ་པར་གཞིགས་ནས་ནི། །སྟོང་པ་ཉིད་དུ་སྒོམ་པའོ། །མདོ་སྡེ་པ་ཡི་ལྟ་བ་ནི། །ཁ་ཏོན་བྱས་པའི་རང་བཞིན་དང་། །ཐོས་པ་བསམ་པ་སྒོམ་པ་གསུམ། །ཤེས་རབ་རྣམ་གསུམ་བསྒོམ་པ་ཡིས། །ས་བཅུའི་འབྲས་བུ་ཐོབ་པར་འདོད། །ཉན་ཐོས་སྤྱི་ཡི་རྣམ་པ་ནི། །བདེན་པ་རྣམ་པ་བཞི་སྒོམ་ཞིང་། །འབྲས་བུ་རྣམ་པ་བཞིར་འདོད་དོ། །དེ་ཡང་སྒོམ་ལུགས་འདི་ལྟ་སྟེ། །འགོག་པ་བསྒོམ་པར་འདོད་པ་ལ། །ཀུན་འབྱུང་སྤང་བར་འདོད་པའོ། །འགོག་པ་སྒོམ་ལུགས་འདི་ལྟ་སྟེ། །ཕྱི་ཡི་འབྱུང་བ་འདི་དག་ལ། །མི་ཆགས་གནས་སུ་ཞུགས་ནས་ནི། །དང་པོ་ཟས་ལ་གོམས་པར་བྱེད། །ཟས་ལ་གོམས་པར་གྱུར་པ་དང་། བསམ་གཏན་ཏིང་འཛིན་སྒོམ་བྱེད་དེ། །བསམ་གཏན་མི་རྟོག་ཆིག་ཚུགས་སྒོམ། །རྒྱལ་བ་བྱམས་པའི་བསྟན་པ་ལ། །འབྲས་བུ་ཐོབ་པར་འདོད་པའོ། །ཀུན་འབྱུང་སྤོང་བ་འདི་ལྟ་སྟེ། །ཟས་ཀྱི་འདུ་ཤེས་བྲལ་བ་དང་། །ཀུན་འབྱུང་རྒྱུན་ཐག་ཆོད་པར་འདོད། །དེ་ཡང་ཞེ་སྡང་གཉེན་པོར་སྒོམ། །ཉོན་མོངས་ཐམས་ཅད་སྤང་བའོ། །ས་ལམ་སྒོམ་པ་འདི་ལྟ་སྟེ། །འདོད་ཆགས་གཉེན་པོར་སྒོམ་པ་དང་། །གཏི་མུག་གཉེན་པོ་སྒོམ་པ་དང་། །དེ་བཞིན་ལམ་གྱི་སྒོམ་པ་ནི། །སྡུག་བསྔལ་སྤོང་བར་འདོད་པའོ། །ལམ་གྱི་སྒོམ་ལུགས་འདི་ལྟ་སྟེ། །འདོད་ཆགས་དག་གི་གཉེན་པོ་རུ། །རང་གི་དཔྲལ་བའི་དཀྱིལ་འཁོར་དུ། །ཀེང་རུས་དཀར་པོ་མཐེ་བོང་ཙམ། དཀར་པོ་འོད་ཆགས་བསྒོམས་པ་ལས། དེ་ལས་སྐྱེ་ནས་མགོ་བོ་ཙམ། །དེ་ནས་ལུས་པོ་ཙམ་སྒོམ་སྟེ། །དེ་ནས་རང་གི་ཐོ་ཡུལ་ཙམ། །དེ་ནས་ཅིར་སྣང་ཐམས་ཅད་སྒོམ། །དེ་ལྟར་སྟོང་གསུམ་དཀར་པོ་སྟེ། །དེ་ལྟར་དཀར་པོ་གོམས་གྱུར་ནས། །འདོད་ཆགས་སྡུག་བསྔལ་སྤོང་བའོ། །གཏི་མུག་སྡུག་བསྔལ་སྤོང་བ་ནི། །རང་གི་སྤྱི་བོ་གཙུག་ཏུ་ཡང་། །མེ་དམར་གསལ་ལ་གདངས་པ་ཅིག །བསྒོམས་པས་ཤེས་པ་གསལ་བ་དང་། །སེམས་ནི་སྟོང་པར་འདོད་པའོ། །དེས་ནི་གཏི་མུག་སྡུག་བསྔལ་སྤོངས། །དེ་ལྟར་རྣམ་བཞི་བསྒོམས་པ་ཡིས། །འབྲས་བུ་རྣམ་པ་བཞི་ཐོབ་བོ། །འབྲས་བུ་བཞི་པོ་གང་ཞེ་ན། །འགོག་པ་བསྒོམས་པའི་འབྲས་བུ་ནི། །རྒྱུན་དུ་ཞུགས་པ་ཐོབ་པ་སྟེ། །རབ་ཏུ་དགའ་བ་ཐོབ་པ་ནི། །དེ་བཞིན་ས་བདུན་མན་ཆད་དོ། །ཀུན་འབྱུང་བསྒོམས་པའི་རང་བཞིན་གྱིས། །ལན་གཅིག་ཕྱིར་མི་འོང་བ་འཐོབ། །ས་བརྒྱད་མན་ཆད་ཐོབ་པའོ། །ལམ་བསྒོམས་པ་ཡི་ཡོན་ཏན་གྱིས། །དགྲ་བཅོམ་འབྲས་བུ་ཐོབ་པ་སྟེ། །ས་བཅུ་མཐར་ཕྱིན་ཐོབ་པའོ། །ས་དང་ལམ་ལ་གནས་པའི་ཚེ། །ཉན་ཅིང་ཐོས་པར་བྱེད་པའོ། །ས་བདུན་མན་ཆད་སེམས་དཔའ་ནི། །རང་རང་དཔོན་ལ་ཉན་པའོ། །ས་བརྒྱད་ཡན་ཆད་སེམས་དཔའ་ནི། །སྤྲུལ་པའི་སྐུ་ལ་ཉན་པར་འདོད། །དེ་ཡང་དངོས་པོར་མཐོང་མེད་དོ། །བྱིན་གྱིས་རླབས་ཀྱིས་ཐོས་པའོ། །ཅེས་སོ། །རང་རྒྱལ་ནི། དེ་ལས། ཨ་ཧོ་གསང་བའི་བདག་པོ་ཉོན། །རང་རྒྱལ་མདོ་སྡེའི་ཐེག་པ་ནི། །འཇུག་པའི་སྒོ་ནི་རྟེན་འབྲེལ་བཅུ་གཉིས་སོ། །རྟོགས་པའི་ལྟ་བ་གང་ཟག་བདག་མེད་ལ། །ཆོས་ཉིད་བདག་ཕྱེད་ཡོད་པར་བལྟ་བའོ། །བསྲུང་བའི་ཚུལ་ཁྲིམས་ཉིས་བརྒྱ་ལྔ་བཅུ་བསྲུང་། །སྒོམ་པའི་རིམ་པ་མི་རྟོག་ཆོས་ཉིད་བསྒོམ། །ཕྱི་དང་ནང་གི་རྟེན་འབྲེལ་རྣམས། །གོམས་ནས་སྟོབས་སུ་གྱུར་པ་དང་། །འབྲས་བུ་མཐར་ཕྱིན་ཚད་དུ་འདོད། །དེ་ཡང་དཔེ་མཚོན་འདི་ལྟ་སྟེ། །དཔེར་ན་དུར་ཁྲོད་རོ་བཞིན་ཏེ། །དུར་ཁྲོད་དག་ཏུ་སོང་ནས་ནི། །རོ་འདི་དང་པོ་གང་ནས་བྱུང་། །ད་ལྟ་འདི་ཡི་དངོས་པོ་ཅི། །སྙམ་དུ་དཔེ་ཡིས་མཚོན་པར་བྱེད། །དེ་ཡང་མ་རིག་པ་ལས་བྱུང་། །མ་རིག་པ་ལ་འདུ་བྱེད་དོ། །འདུ་བྱེད་རྣམ་པར་ཤེས་པའོ། །རྣམ་པར་ཤེས་ལས་མིང་འབྱུང་ཞིང་། །མིང་ལས་གཟུགས་ཀྱི་རང་བཞིན་འབྱུང་། །གཟུགས་ལས་སྐྱེ་མཆེད་རྣམ་དྲུག་འབྱུང་། །སྐྱེ་མཆེད་དྲུག་ལས་རེག་པ་འབྱུང་། །རེག་ལས་ཚོར་བ་འབྱུང་བར་འགྱུར། །ཚོར་ལས་སྲེད་པ་འབྱུང་བར་འགྱུར། །སྲེད་པ་ལས་ནི་ལེན་པ་འབྱུང་། །ལེན་པ་ལས་ནི་སྲིད་པ་འབྱུང་། །སྲིད་པ་ལས་ནི་སྐྱེ་བ་འབྱུང་། །སྐྱེ་བ་ལས་ནི་རྒས་པ་འབྱུང་། །རྒས་པ་ལས་ནི་ན་བ་འབྱུང་། །ན་བ་ལས་ནི་ཤི་བ་འབྱུང་། །དེ་བཞིན་རྟེན་འབྲེལ་བཅུ་གཉིས་བསྒོམ། །དེ་ལྟར་བསྒོམས་པའི་ཡོན་ཏན་གྱིས། །ས་བཅུ་གཉིས་ཀྱི་འབྲས་བུ་ཐོབ། །མི་སྡུག་རྣམ་པ་བརྒྱད་བསྒོམ་སྟེ། །དུར་ཁྲོད་ཕྱོགས་སུ་ཕྱིན་ནས་ནི། །རང་གི་ལུས་ལ་འདི་ལྟར་རྟོག །དང་པོ་རྣམ་པར་སྔོ་བར་འདོད། །དེ་ནས་རྣམ་པར་དམར་བ་དང་། །རྣམ་པར་གནག་པ་དག་དང་ནི། །དེ་བཞིན་རྣམ་པར་བམ་པ་དང་། །དེ་བཞིན་རྣམ་པར་འབུ་ཞུགས་དང་། །རྣམ་པར་འཐོར་བ་དག་ཏུ་འདོད། །དེ་བཞིན་རྣམ་པར་དཀར་བའོ། །དེ་བཞིན་འདོད་ཆགས་གཉེན་པོ་རུ། །མི་སྡུག་རྣམ་པ་བརྒྱད་བསྒོམ་པའོ། །ཉན་དང་ཐོས་པ་མེད་པ་སྟེ། །དེ་ཕྱིར་རང་རྒྱལ་ཐེག་པར་འདོད། །ཅེས་སོ། །བྱང་སེམས་ནི། དེ་ལས། བྱང་ཆུབ་སེམས་དཔའི་ཐེག་པ་ནི། །འཇུག་པའི་སྒོ་ནི་བདེན་པ་གཉིས། །དོན་དམ་དང་ནི་ཀུན་རྫོབ་བོོ། །བསྲུང་བའི་ཚུལ་ཁྲིམས་ཡན་ལག་ནི། །སྡོམ་པ་བརྒྱད་བཅུ་རྩ་ལྔའོ། །ལྟ་བ་སྟོང་ཉིད་ཡེ་ཤེས་སོ། །དོན་དམ་ཀུན་རྫོབ་འདི་ལྟ་སྟེ། །ཀུན་རྫོབ་རྣམ་པ་གཉིས་སུ་འདོད། །ལོག་པ་དང་ནི་ཡང་དག་གོ །ལོག་པའི་ཀུན་རྫོབ་འདི་ལྟ་སྟེ། །བརྟགས་པར་སྣང་བ་ཐམས་ཅད་ཀུན། །མཐུན་པར་སྣང་ལ་དོན་བྱེད་ནུས། །བརྟགས་ན་ངོ་བོ་ཉིད་ཀྱིས་དབེན། །དོན་ནི་མེད་པ་ལྟར་སྣང་ངོ་། །དེ་ནི་ལོག་པའི་ཀུན་རྫོབ་བོ། །ཡང་དག་ཀུན་རྫོབ་འདི་ལྟ་སྟེ། །དགེ་བ་བཅུ་ཡི་ལས་རྣམས་དང་། །དཀར་པོར་གྱུར་པའི་བསམ་པ་དང་། །མོས་པའི་བསམ་པ་ཇི་སྙེད་པ། །ཡང་དག་ཀུན་རྫོབ་ཆེན་པོར་འདོད། །སྦྱིན་པ་ལ་སོགས་ཚུལ་ཁྲིམས་དང་། །དེ་བཞིན་ཏིང་འཛིན་ལ་སོགས་རྣམས། །ཡང་དག་ཀུན་རྫོབ་ཆེན་པོའོ། །དོན་དམ་ལ་ཡང་རྣམ་པ་གཉིས། །མཚན་མ་ཚིག་གི་དོན་དམ་དང་། །ཡང་དག་སེམས་ཀྱི་དོན་དམ་མོ། །མཚན་མ་ཚིག་གི་དོན་དམ་ནི། །ཐམས་ཅད་སུན་འབྱིན་རྩོད་པའོ། །དེ་ཡང་ཚད་མའི་རིགས་པ་ནི། །གང་དེ་ཉིད་ལ་དེ་ལྟར་སྣང་། །ཚིག་གི་སྟོང་པ་ཆེན་པོ་ལ། །དོན་ལ་སྟོང་ཞིང་མ་རྟོགས་པའོ། །མཚན་མ་ཚིག་གི་དོན་དམ་མོ། །ཡང་དག་སེམས་ཀྱི་དོན་དམ་ནི། །སྟོང་པ་ཅང་མེད་སྒོམ་པར་འདོད། །དཔེར་ན་ནམ་མཁའ་སྟོང་པ་བཞིན། །སྟོང་པའི་དོན་ཉིད་དེ་བཞིན་ཉིད། །སྟོང་ཉིད་ཕྱང་ཆད་མུ་མེད་དོ། །ཞེས་ནི་སྤྱོད་ཅིང་ཆགས་པའོ། །ལམ་ནི་འདི་ལྟར་འདོད་པའོ། །ས་ལ་སྦྱོར་བར་འདོད་པའོ། །དེ་ཡང་དྲོད་སྐྱེ་བཟོད་པ་དང་། །རྩེ་མོ་འཇིག་རྟེན་ཆོས་མཆོག་གོ །དྲོད་ལ་རྣམ་པ་གསུམ་གྱིས་བསྟན། །ཕྱི་དང་ནང་དང་གཉིས་ཀའོ། །ཕྱི་ཡི་དྲོད་སྐྱེ་འདི་ལྟ་སྟེ། །གཉིས་པོ་དྲི་མ་མེད་པ་ལ། །དངོས་པོར་སྣང་བ་སྟོང་པར་སྐྱེ། །དེ་ནི་ཏིང་འཛིན་ཉམས་ལེན་ཏེ། །ས་གཉིས་དག་ལ་སྐྱེ་བར་གསུངས། །ནང་གི་དྲོད་ནི་དྲུག་པ་ལ། །སྟོང་པ་རིག་བྱེད་དག་ཏུ་རྟོགས། །གཉིས་ཀའི་དྲོད་ནི་འདི་ལྟ་སྟེ། བདུན་པ་དག་ལས་སྐྱེ་བར་གསུངས། །བརྒྱད་པ་བཟོད་པ་ཐོབ་པ་སྟེ། །དགུ་པ་རྩེ་མོ་མཐར་ཕྱིན་ནོ། །བཅུ་པ་འཇིག་རྟེན་ཆོས་ཀྱི་མཆོག །དེ་བཞིན་ས་བཅུ་ཐོབ་པར་འདོད། །དེ་ནི་བྱང་ཆུབ་ཐེག་པ་སྟེ། །སྟོང་པའི་ཚིག་མེད་ཡི་གེ་མེད། །ཅང་མེད་སྟོང་པར་འདོད་པའོ། །ཞེས་སོ། །བྱ་བའི་རྒྱུད་ནི། དེ་ལས། ཀྲཱི་ཡའི་ཐེག་པའི་གྲུབ་མཐའ་ནི། །འཇུག་པའི་སྒོ་ནི་དག་པ་གསུམ། །ཁྲུས་དང་གཙང་སྦྲས་འཇུག་པའོ། །བསྲུང་བའི་དམ་ཚིག་འདི་ལྟ་སྟེ། །ལུང་གཅིག་ཆུ་ལ་མི་བཏུང་ཞིང་། །མ་ཡེངས་ངང་ལ་སྤྱོད་པའོ། །བྱ་བ་དག་པ་རྣམ་གསུམ་བྱེད། །དག་པ་རྣམ་གསུམ་གང་ཞེ་ན། །ལྷ་དང་དཀྱིལ་འཁོར་དག་པ་དང་། །རྫས་དང་ལོངས་སྤྱོད་དག་པ་དང་། །སྔགས་དང་ཏིང་འཛིན་དག་པའོ། །རྟོགས་པའི་ལྟ་བ་འདི་ལྟ་སྟེ། །ལྷ་དང་རྣལ་འབྱོར་དག་པ་གཉིས། །རྗེ་དང་འབངས་ཀྱི་ཚུལ་དུ་ལྟ། །སྤང་བའི་རིམ་པ་འདི་ལྟ་སྟེ། །ཤ་དང་ཉ་དང་སྒོག་པ་དང་། །དེ་བཞིན་ཆང་ལ་སོགས་པ་སྤོང་། །ཏིང་ངེ་འཛིན་ལ་ཞེན་པའོ། །ཀྲཱི་ཡའི་ཐེག་པ་དེ་བཞིན་ནོ། །ཞེས་སོ། །ཨུ་པ་ཡ་ནི། འདི་ལྟ་སྟེ། །ལྟ་བ་ཡོ་གར་ལྟ་བ་ལ། །སྤྱོད་པ་ཀྲཱི་ཡར་སྤྱད་པའོ། །དེ་ཕྱིར་གཉིས་ཀའི་རྒྱུད་ཅེས་གྲགས། །ཞེས་སོ། །རྣལ་འབྱོར་གྱི་རྒྱུད་ནི། དེ་ལས། ཡོ་གའི་གྲུབ་མཐའ་འདི་ལྟ་སྟེ། །འཇུག་པའི་སྒོ་ནི་མངོན་པར་བྱང་ཆུབ་ལྔ། །རྟོགས་པའི་ལྟ་བ་ལྷ་དང་གྲོགས་པོའི་ཚུལ། །བསྲུང་བའི་དམ་ཚིག་མ་ཁྲེལ་རྣམ་གསུམ་བསྲུང་། །སྤྱོད་པ་དག་ནི་དགག་སྒྲུབ་མེད་པའོ། །བྱང་ཆུབ་ལྔ་པོ་འདི་ལྔ་སྟེ། །གདན་གྱི་སྒོ་ནས་བྱང་ཆུབ་དང་། །སྐུ་ཡི་སྒོ་ནས་བྱང་ཆུབ་དང་། །ཕྱག་མཚན་སྒོ་ནས་བྱང་ཆུབ་དང་། །བསྐྱེད་པའི་སྒོ་ནས་བྱང་ཆུབ་དང་། །ཡིག་འབྲུའི་སྒོ་ནས་བྱང་ཆུབ་བོ། །དེ་ལྟར་བྱང་ཆུབ་ལྔ་པོ་སྤྱོད། །མ་ཁྲེལ་གསུམ་པོ་གང་ཞེ་ན། །ཡི་དམ་ལྷ་ཡིས་མ་ཁྲེལ་དང་། །སློབ་དཔོན་མཆེད་ཀྱིས་མ་ཁྲེལ་དང་། །རང་གི་སེམས་ཀྱིས་མ་ཁྲེལ་བའོ། །ལྷ་དང་རྣམ་འབྱོར་བདག་ཉིད་ཀྱང་། །སྤུན་དང་གྲོགས་པོའི་ཚུལ་དུ་འདོད། །ལྷ་ཡི་དཀྱིལ་འཁོར་བདག་དང་གཉིས་མེད་བསྒོམས། །ལྷ་ཡང་བདག་ལས་བྱུང་ཞིང་ཐིམ་པར་འདོད། །བདག་དང་ལྷ་ཡི་འཕྲོ་འདུ་འདོད་པའོ། །ཞེས་སོ། །རྒྱུད་མ་ཧཱ་ཡོ་ག་ནི། དེ་ལས། ཀྱེ་མ་གསང་བདག་ངེས་པར་གཟུང་། །མ་ཧཱའི་གྲུབ་མཐའ་འདི་ལྟར་ཏེ། །འཇུག་པའི་སྒོ་ནི་ཏིང་འཛིན་རྣམ་པ་གསུམ། །རྟོགས་པའི་ལྟ་བ་ཅིར་སྣང་ལྷ་རུ་རྟོགས། །བསྲུང་བའི་དམ་ཚིག་རྩ་བ་སྐུ་གསུང་ཐུགས། །འབྲས་བུ་ཐབས་དང་ཤེས་རབ་འདུ་འབྲལ་མེད། །ཏིང་འཛིན་རྣམ་གསུམ་འདི་ལྟ་སྟེ། །དེ་བཞིན་ཉིད་ཀྱི་ཏིང་ངེ་འཛིན། །རྟོག་མེད་ས་ལེ་སིང་{སང} ངེའོ། །ཀུན་ཏུ་སྣང་བའི་ཏིང་ངེ་འཛིན། །གསལ་ལ་མ་ཡེངས་ཚུལ་དུ་བསྒོམ། །དེ་བཞིན་རྒྱུ་ཡི་ཏིང་ངེ་འཛིན། །ཧཱུྃ་ལས་སེམས་དཔའ་སུམ་བརྩེགས་བསྒོམ། །བདག་ཉིད་དམ་ཚིག་སེམས་དཔའ་ལ། །ཕུན་སུམ་ཚོགས་པ་བཞི་དང་ལྡན། །ཏིང་འཛིན་ཡིག་འབྲུའི་སེམས་དཔའ་ལ། །གསལ་བ་རྣམ་པ་གསུམ་དང་ལྡན། །ཡེ་ཤེས་སེམས་དཔའ་རྣམ་གཉིས་ཏེ། །ཞི་བ་དང་ནི་ཁྲོ་བོའོ། །རྒྱུ་ཡི་ཏིང་འཛིན་འདི་ལྟ་སྟེ། །ཡཾ་དང་རཾ་དང་ཁཾ་དང་ནི། །ར་དང་སུ་དང་ཀཾ་དང་ནི། །པཾ་དང་ཨ་དང་མ་དང་ནི། །ཧཱུྃ་དང་ཕཊ་ལ་སོགས་པ་ཡི། །ཡིག་འབྲུའི་འོད་ཟེར་བསམ་མི་ཁྱབ། །རབ་ཏུ་སྤྲུལ་ནས་ང་རྒྱལ་ལྡན། །རྣམ་པའི་ལྷ་དང་སྟོང་པའོ། །དེ་ནི་ཏིང་འཛིན་གསུམ་དུ་འདོད། །དམ་ཚིག་རྣམ་གསུམ་འདི་ལྟ་སྟེ། །སྐུ་ཡི་སྒོ་ནས་སྲོག་གཅོད་སྤང་བར་བྱ། །མ་བྱིན་ལེན་དང་མི་ཚངས་སྤྱོད་པ་སྤང་། །གསུང་གི་སྒོ་ནས་རྫུན་དང་ཕྲ་མ་སྤང་། །ཚིག་རྩུབ་དང་ནི་དེ་བཞིན་ཀྱལ་བ་སྤང་། ཐུགས་ཀྱི་སྒོ་ནས་བརྣབ་སེམས་གནོད་སེམས་སྤང་། །ལོག་པར་ལྟ་བ་རབ་ཏུ་སྤང་པར་བྱ། །ཐབས་དང་ཤེས་རབ་འདུ་འབྲལ་མེད་པར་རྟོགས། །མ་ཧཱ་ཡོ་གའི་གྲུབ་མཐའ་དེ་བཞིན་འདོད། །ཅེས་སོ། །ལུང་ཨ་ནུ་ནི། དེ་ལས། ཀྱེ་མ་རྡོ་རྗེ་འཛིན་པ་ཉོན། །ལུང་ཆེན་ཨ་ནུའི་ཐེག་པ་ནི། །དབྱིངས་དང་ཡེ་ཤེས་རྣམ་པ་གཉིས། །འདུ་འབྲལ་མེད་པའི་རྡོ་རྗེར་འདོད། །འཇུག་པའི་སྒོ་ནི་ཅིག་ཅར་རིམ་གྱིས་སོ། །རྟོགས་པའི་ལྟ་བ་འདུ་འབྲལ་མེད་པའོ། །ཅིག་ཅར་འཇུག་པ་གང་ཞེ་ན། ལྷ་རྣམས་མ་བསྐྱེད་སྙིང་པོ་དྲན་པས་རྫོགས། །རིམ་གྱིས་འཇུག་པ་གང་ཞེ་ན། །དབྱིངས་དང་ཡེ་ཤེས་རིམ་གྱིས་ཞུགས་ནས་ནི། །རྡོ་རྗེ་འཛིན་གྱིས་ས་ལ་འབྲས་བུ་འཐོབ། །བསྲུང་བའི་དམ་ཚིག་འདི་ལྟ་སྟེ། །གསང་སྔགས་དོན་སྟོན་རྟག་ཏུ་བཀུར་བར་བྱ། །གསང་སྔགས་སྟོན་པའི་སློབ་དཔོན་ལ། །ཅི་འབྱོར་པ་ཡིས་མཆོད་པ་དབུལ། །སློབ་དཔོན་དང་ནི་དེ་བཞིན་གཤེགས། །ཁྱད་མེད་གཅིག་གི་ངོ་བོར་བསྟེན། །མདོར་བསྡུས་དབྱིངས་དང་ཡེ་ཤེས་སོ། །ལུང་ཆེན་ཨ་ནུའི་གྲུབ་མཐའ་འོ། །ཞེས་སོ། །མན་ངག་རྫོགས་པ་ཆེན་པོ་ནི། དེ་ཉིད་ལས། ཨེ་མ་གསང་བའི་བདག་པོ་ཉོན། །ངས་བསྟན་ལེགས་པར་ཡིད་ལ་གཟུང་། །རྫོགས་ཆེན་ཨ་ཏི་ཡོ་ག་ལ། །གཅིག་རྫོགས་གཉིས་རྫོགས་ཐམས་ཅད་རྫོགས། །གཅིག་བྱུང་གཉིས་བྱུང་ཐམས་ཅད་བྱུང་། །གཅིག་སྐྱེས་གཉིས་སྐྱེས་ཐམས་ཅད་སྐྱེ། །གཅིག་མེད་གཉིས་མེད་ཐམས་ཅད་མེད། །དེ་བཞིན་རྫོགས་ཆེན་ཨ་ཏི་ལ། །བྱས་པའི་ཆོས་ནི་ཀ་ནས་མེད། །བྱས་དང་བྱེད་པ་མེད་པའོ། །རྫོགས་པ་ཆེན་པོའི་དོན་ཉིད་ལ། དམ་ཚིག་བསྲུང་དུ་མེད་པས་ཡེ་ནས་བསྲུང་དང་བྲལ། །མེད་པ་ཕྱལ་བ་ལྷུན་གྲུབ་གཅིག་པུ་ཉིད། །གསང་སྔགས་ཀུན་གྱི་དགོངས་པ་ཆེན་པོ་ཡིན། །རྫོགས་ཆེན་ཨ་ཏི་ཡོ་ག་ནི། །དཔེར་ན་གཅན་གཟན་སེང་གེ་བཞིན། །གསང་བ་ཨ་ཏི་ཡོ་ག་ནི། །རང་རིག་གཏན་ལ་འབབས་ཤིང་ཐེག་དམན་ཟིལ་གྱིས་གནོན། །རང་བྱུང་རང་ལ་ཐིམ་པས་སྐུ་གསུམ་དོན། །སྐྱེ་མེད་དབྱིངས་ལས་སྒོམ་མེད་ཆེན་པོ་ཡིན། །བསྒོམ་བྱ་སྒོམ་བྱེད་གཉིས་དང་བྲལ། །འཛིན་པ་མེད་པའི་རང་གྲོལ་ནི། །དཔེར་ན་སྦྲུལ་གྱི་མདུད་པ་བཞིན། །རང་གྲོལ་རང་སངས་ཆེན་པོ་ཡིན། །དེ་བཞིན་མཚན་མའི་བསམ་པ་རྣམས། །རང་གྲོལ་རང་སངས་ཆེན་པོའོ། །རྫོགས་ཆེན་ཨ་ཏིའི་ཐེག་པ་ལ། །རེ་དང་དོགས་པ་ག་ལ་ཡོད། །རེ་དོགས་ཡོད་ན་ལྷུང་བའི་རྒྱུ། །དེ་བཞིན་འཛིན་མེད་རང་གྲོལ་ལོ། །ཆོས་ཅན་མཚན་མར་སྣང་བ་ཡང་། །རང་ལས་བྱུང་ཞིག་རང་ལ་ཐིམ། །དེ་བཞིན་རྫོགས་ཆེན་ཨ་ཏི་ལ། །སྒྲུབ་མེད་བསྒྲུབ་དང་བྲལ་བའོ། །བྱས་མེད་བྱུང་བ་མེད་པའོ། །འགག་མེད་ཁྱབ་གདལ་འུབ་ཆུབ་བོ། །འགྱུར་མེད་ཀློང་ཡངས་ཆེན་པོའོ། །ཆོས་མེད་སངས་རྒྱས་ཆེན་པོའོ། །གནས་མེད་ཡེ་ཤེས་མེད་པའོ། །སེམས་མེད་ཡིད་མེད་སངས་རྒྱས་མེད། །ཅེས་སོ། །དེ་ལྟར་རིག་པ་རང་ཤར་ཆེན་པོའི་རྒྱུད་ཀྱི་ལུང་ཚིག་རྣམས་ཐེག་མཆོག་མཛོད་དུ་དྲངས་པ་ལྟར་བསྡུས་པ་ཡིན་ལ་ལུང་གི་དོན་འགྲེལ་ཡང་དེ་ཉིད་དུ་གསལ་ལོ། །གཉིས་པ་བཤད་རྒྱུད་ཐིག་ལེ་ཀུན་གསལ་ཆེན་པོའི་རྒྱུད་ཀྱི་ལུང་སྦྱོར་ལ། ཐོག་མར་ཐེག་པའི་ངོ་བོ་དང་ངེས་ཚིག་སོགས་སྤྱིར་བསྟན་པ་ནི། བཤད་རྒྱུད་དེ་ཉིད་ལས། ཐེག་པའི་ངོ་བོ་ཤེས་རབ་སྙིང་རྗེ་ཡིན། །དེ་གཉིས་ཆེ་ཆུང་ཐེག་པ་མཐོ་དམན་སྣང་། །ཐེག་པའི་ངེས་ཚིག་འདེགས་དང་སྐྱོབ་པ་ཡིན། །དབྱེ་ན་མང་པོའང་བསྡུས་ན་གཉིས་ལས་མེད། །རྒྱུ་རྐྱེན་ལམ་ཁྱེར་མཚན་ཉིད་ཐེག་པ་དང་། །འབྲས་བུ་ལམ་ཁྱེར་གསང་སྔགས་ཐེག་པ་གཉིས། །རྐྱལ་བ་གྲུ་གཟིངས་མཚན་ཉིད་ཐེག་པའི་དཔེ། །ཟམ་པ་ས་གཞི་གསང་སྔགས་ཐེག་པའི་དཔེ། །ཞེས་སོ། །བྱེ་བྲག་སོ་སོའི་ངོ་བོ་ཡང་། དེ་ལས། སྣང་བའི་ངོ་བོ་ངེས་ཚིག་དང་། །དབྱེ་བ་སོ་སོའི་དཔེ་རུ་བཤད། །དང་པོ་དབྱེ་བ་རྒྱས་བསྡུས་གཉིས། །རྒྱས་པ་ལ་ཡང་རྣམ་པ་བཞི། །འགྲོ་དྲུག་ཞེན་པའི་སྣང་བ་དྲུག །རྒྱུ་འབྲས་བློ་ཡི་སྣང་བ་བཅུ། །རྟོགས་ལྡན་དོན་གྱི་སྣང་བ་གཅིག །དབྱེར་མེད་ཀུན་བཟང་སྣང་བའོ། །བསྡུས་པས་སྣང་བ་རྣམ་པ་གསུམ། །མ་དག་འཁྲུལ་པའི་སྣང་བ་དང་། །དག་པ་འཇིག་རྟེན་སྣང་བ་དང་། །ཡང་དག་ཡེ་ཤེས་སྣང་བའོ། །དང་པོ་རྒྱས་པར་བཤད་བྱ་བ། །འགྲོ་དྲུག་ཞེན་པའི་སྣང་བ་དྲུག །ཤེས་བྱའི་དཀྱིལ་འཁོར་མ་འགགས་པའི། །སྣང་བའི་དངོས་པོ་འདི་ཉིད་ལ། །དམྱལ་བ་ཚ་གྲང་གཉིས་སུ་མཐོང་། །ཡི་དྭགས་གསུམ་ལ་སྣང་བ་གསུམ། །ཕྱི་ནང་སྤྱི་མཐུན་སྣང་བ་གསུམ། །ཕྱི་ནི་ཟས་ལ་རྣག་ཁྲག་དང་། །གོས་ལ་ཚེར་མ་ལྟ་བུའོ། །སྤྱི་ལ་ཟས་སྣང་སྲུང་མས་བསྲུངས། །ནང་ནི་སྲུང་མེད་ཟོས་པས་དུག །དེ་ནི་ཡི་དྭགས་གསུམ་ལ་སྣང་། །བྱོལ་སོང་གཉིས་ལ་སྣང་བ་གཉིས། །བྱིང་ན་གནས་པ་མུན་པ་སྟེ། །ཁ་འཐོར་རྣམས་ལ་གྱེན་ཐུར་དང་། །བཟའ་བ ཏུང་མ་འགགས་ཐད་ཀར་སྣང་། །མི་ལ་སྣང་བ་འདི་ཉིད་དེ། །ཡུལ་དང་ས་ཕྱོགས་ཁྱིམ་ལ་སོགས། །ལྷ་མ་ཡིན་ལ་གོ་མཚོན་སྣང་། །ལྷ་ལ་རིན་ཆེན་བདུད་རྩིར་སྣང་། །བློ་སྣང་ཞེན་པའི་བག་ཆགས་ཡིན། །རྒྱུ་འབྲས་བློ་ཡི་སྣང་བ་བཅུ། མུ་སྟེགས་རྟག་པའི་སྣང་བ་ཡང་། །རྟག་པའི་དངོས་ལས་གཞན་མི་སྣང་། །མུ་སྟེགས་ཆད་པའི་སྣང་བ་ཡང་། །འདི་ཡོད་ཕྱི་མ་མེད་པ་སྟེ། །འདི་སྣང་གློ་བུར་བྱུང་བ་ལ། །ཞིག་པས་འབྱུང་ལྔའི་ངང་དུ་ཞི། །མེད་ཆར་སྣང་ལ་གཞན་མི་སྣང་། །ཉན་ཐོས་གཡག་རྔ་ནེའུ་སིང་དང་། །གོང་བུ་ཆ་ཤས་མེད་པར་བལྟ། །གཟུང་འཛིན་ཆོས་ཀྱི་བདག་ཏུ་མཐོང་། །རང་རྒྱལ་གོང་མཐུན་ཕྱོགས་གཅིག་སྟོང་། །ཕུང་པོ་ཁམས་ལ་བདག་མེད་སྟོང་། །མདོ་སྡེ་དོན་དམ་སྟོང་པ་ཉིད། །ཀུན་རྫོབ་སྒྱུ་མ་ཙམ་དུ་སྣང་། །གསང་སྔགས་ཕྱི་ནང་གཉིས་པོ་དང་། །དོན་དམ་མདོ་སྡེ་མཐུན་པ་ལ། །ཀུན་རྫོབ་སྣང་བ་སོ་སོར་མཐོང་། །ཀྲྀ་ཡས་རིགས་གསུམ་རྗེ་ཁོལ་མཐོང་། །ཨུ་པས་ལྷ་དང་དཔོན་གཡོག་མཐོང་། །ཡོ་གས་སྤུན་དང་གྲོགས་པོར་མཐོང་། །མ་ཧཱས་ཕུང་པོ་ལྷར་སྣང་མཐོང་། །ཨ་ནུས་དབྱིངས་དང་ཡེ་ཤེས་མཐོང་། །ཀུན་གྱི་རྒྱུ་འབྲས་མ་སྤངས་ཤིང་། །དངོས་པོར་མི་བདེ ན་བློ་ལ་སྣང་། །རྒྱུ་འབྲས་བློ་ཡི་སྣང་བ་ཡིན། །རྟོགས་ལྡན་དོན་གྱི་སྣང་བ་ནི། །རྫོགས་ཆེན་རྟོགས་པའི་སྣང་བ་ཡིན། །ཐམས་ཅད་ཆོས་སྐུའི་ངོ་བོར་མཐོང་། །ཀུན་ཏུ་བཟང་པོའི་སྣང་བ་ནི། །གོང་མ་དང་མཚུངས་གཉིས་མེད་སྣང་། །ཐོག་མའི་གཞི་སྣང་འདུག་ཚུལ་ནི། །བསྡུས་པས་སྣང་བ་རྣམ་པ་གསུམ། །མ་དག་འཁྲུལ་པའི་སྣང་བ་རིགས་དྲུག་ཡིན། །དག་པ་འཇིག་རྟེན་ས་བཅུའི་བྱང་སེམས་ཡིན། །ཡང་དག་ཡེ་ཤེས་གཞི་སྣང་གོང་དང་མཐུན། །སྣང་བའི་དབྱེ་བ་རྒྱས་བསྡུས་བསྟན་པའོ། །ཞེས་སོ། །ངེས་ཚིག་ཡང་། དེ་ཉིད་ལས། སོ་སོའི་མིང་གི་ངེས་ཚིག་ནི། །ངས་བསྟན་ཁྱོད་ཀྱིས་ལེགས་པར་ཟུང་། །སྟོན་པས་གསུངས་པའི་ཚིག་དོན་རྣམས། །རྣ་བས་ཉན་ཅིང་ཡིད་ཀྱིས་ཐོས། །རང་རིག་ཁོང་ནས་མི་འཆར་བར། །སྟོན་པའི་གསུང་ལ་རག་ལས་པས། །ཉན་ཐོས་མིང་གི་ངེས་ཚིག་ཡིན། །སྟོན་པ་གཞན་ལ་མི་ལྟོས་པར། །རང་གི་མཐུ་ཡིས་རང་སངས་རྒྱས། །རང་རྒྱལ་མིང་གི་ངེས་ཚིག་ཡིན། །སྤངས་དང་ཡེ་ཤེས་ཐུགས་རྗེ་དང་། །ཕྲིན་ལས་ཕུན་སུམ་ཚོགས་པ་ནི། །དེ་དོན་གཞན་ལ་སྒྲོགས་བྱེད་པ། །བྱང་སེམས་མིང་གི་ངེས་ཚིག་ཡིན། །ཁྲུས་དང་གཙང་སྦྲ་གཙོར་བསྟན་པས། །ཀྲྀ་ཡཱ་ཞེས་སུ་བསྟན་པ་ཡིན། །སྤྱོད་པ་མས་འཛེགས་ལྟ་བ་ཡས། །ཨུ་པའི་མིང་གི་ངེས་ཚིག་ཡིན། །རིགས་བཞིའི་སངས་རྒྱས་སྐུ་རྣམས་ལ། །རང་གི་ལུས་ངག་ཡིད་གསུམ་སྦྱོར། །ཡོ་གའི་མིང་གི་ངེས་ཚིག་ཡིན། །ཏིང་འཛིན་གསུམ་དང་ཐབས་ཤེས་གཙོར་བསྟན་པའི། །དོན་ལ་འཇུག་པ་མ་ཧཱའི་ངེས་ཚིག་ཡིན། །མ་བསྐྱེད་རྫོགས་པའི་དོན་ལ་འཇུག་པའི་ཕྱིར། །རྫོགས་པ་ཨ་ནུའི་མིང་གི་ངེས་ཚིག་ཡིན། །སྣང་ཞིང་སྲིད་པས་བསྡུས་པའི་ཆོས་རྣམས་ཀུན། །ལྷུན་གྲུབ་ཆོས་སྐུར་ཡེ་ནས་རྫོགས་སངས་རྒྱས། །གནས་ལུགས་གཉིས་མེད་ཚུལ་གྱིས་འཇུག་པ་ནི། །རྣལ་འབྱོར་རྫོགས་ཆེན་མིང་གི་ངེས་ཚིག་ཡིན། །ཞེས་སོ། །དབྱེ་ན་ཆུང་འབྲིང་ཆེ་གསུམ་ལ་གསུམ་གསུམ་དུ་དབྱེ་བའི་ཐེག་རིམ་དགུ་ལས། སྔ་མ་བརྒྱད་ལ། ལྡེམ་པོའི་ལྟ་བ་འདི་ལྟ་སྟེ། །ཉན་ཐོས་རང་རྒྱལ་སེམས་དཔའ་དང་། །ཀྲི་ཡོག་སྡེ་གསུམ་བསྐྱེད་རྫོགས་གཉིས། །བདེན་པ་ཕྱོགས་རེ་ངོས་བཟུང་ནས། །གཟའ་གཏད་བཅས་པའི་ལྟ་བ་བརྒྱད། །བློ་ཡུལ་གཉིས་ཀྱི་མུར་འཛིན་པས། །རང་རིག་ཡེ་ཤེས་ལ་མ་ཟློས། །དེ་བས་ཕྱིན་ཅི་ལོག་པ་ཡིན། །དོན་ལ་ཉམས་དང་གོལ་བའི་ཕྱིར། །ཞེ་འདོད་བློ་ཡི་ལྟ་བ་ཡིན། །ཞེས་སོགས་ལྟ་བ་བརྒྱད་དང་། དམིགས་གཏད་བཅས་པའི་སྒོམ་པ་བརྒྱད། །རྩོལ་བ་བློ་ཡི་ཡུལ་བཟུང་བས། །རྩོལ་བྲལ་བློ་ལས་གྲོལ་མ་རྟོགས། །དེ་བསྒོམ་མ་ཤེས་འདོད་པ་བསྒོམས། །ཞེས་སོགས་སྒོམ་པ་བརྒྱད་དང་། ཐེག་བརྒྱད་རང་གི་སྤྱོད་པ་བརྒྱད། །སྡུག་བསྔལ་རྩོལ་སྒྲུབ་བཅས་པས་སྤྱོད། །བླང་དོར་མེད་པ་མ་རྟོགས་པས། །ཐུན་མོང་མ་གྱུར་བླང་དོར་སྤྱོད། །ཞེས་སོགས་སྤྱོད་པ་བརྒྱད་དང་། ཐེག་པ་སོ་སོའི་འབྲས་བུ་ནི། །མངོན་དུ་གྱུར་པའི་འབྲས་བུའི་མཆོག །ཉན་ཐོས་དག་གི་འབྲས་བུ་ནི། །ལྟ་སྒོམ་སྤྱོད་པ་མཐར་ཕྱིན་པས། །འབྲས་བུ་ཟུང་བཞི་ཡ་བརྒྱད་སྨིན། །ཞེས་སོགས་འབྲས་བུ་བརྒྱད་བཅས་སོ་སོ་ཕྱེ་སྟེ་རྒྱས་པར་གསུངས་བ་དང་། ཕྱི་མ་ལ། བལྟར་མེད་ལྟ་བའི་དོན་བསྟན་པ། །ཨ་ཏིའི་ལྟ་བ་གཟའ་གཏད་བྲལ། །དངོས་མེད་ཡེ་ཤེས་ཟང་ཐལ་བས། །རང་རིག་ཡེ་ཤེས་ལྷུན་གྱིས་གྲུབ། །དེ་ལས་མ་གཏོགས་གཞན་མེད་པས། །སོ་སོ་རང་རིག་ཡེ་ཤེས་ལ། །ཅིར་སྣང་ཡེ་ཤེས་ཆེན་པོའི་གདངས། །ཡེ་ཉིད་བཅོམ་ལྡན་རྡོ་རྗེ་འཆང་། །ཞེས་སོགས། ཡང་དག་ངེས་པའི་ལྟ་བ་དང་། །ངས་བསྟན་གཉིས་མེད་བདེ་ཆེན་ལ། །སྒོམ་དུ་ཡོད་མེད་ཐ་སྙད་རྣམ་པར་དག །ཤེས་རབ་སྟོབས་ཅན་རང་རིག་དོན་རྟོགས་པས། །གཉིས་མེད་བདེ་ཆེན་ངང་དུ་འདུ་འབྲལ་མེད། །མ་བཙལ་བཞག་པས་ངང་ལས་མ་གཡོས་གསལ། །རྒྱུན་ཆད་མེད་པས་ཆུ་བོ་གངྒཱ་བཞིན། །ཞེས་སོགས་དབང་པོ་རབ་འབྲིང་ཐ་གསུམ་གྱི་སྒོམ་ཐབས་དང་། བླང་དོར་མེད་པའི་སྤྱོད་པ་ནི། །སྤྱད་རྒྱུ་མེད་པ་སྤྱོད་པའི་མཆོག །ཆོས་ཉིད་དོན་གྱི་སྤྱོད་པ་ནི། །མཚན་མ་མེད་པས་ནམ་མཁའ་བཞིན། །ཆོས་ཅན་མཚན་མར་མི་ལྟ་བར། །རྣལ་འབྱོར་ཟག་མེད་ཤེས་རབ་ཀྱིས། །དངོས་མེད་ནམ་མཁའ་བཞིན་དུ་སྤྱད། །ཞེས་སོགས་ཨ་ཏིའི་སྤྱོད་པ་དང་། འབྲས་བུ་ལྟ་བ་མངོན་དུ་གྱུར་པ་སྟེ། །དེ་ཡི་གནས་ལུགས་བསྟན་པ་ནི། །ཆོས་ཉིད་ཕྱི་ནང་མེད་པར་གསལ། །རིག་པ་ཕྱི་ནང་མེད་པར་ཁྱབ། །གཉིས་མེད་ཆོས་སྐུ་རྡོ་རྗེའི་ལུས། །རང་གསལ་འཛིན་མེད་ངང་དུ་གནས། །ཞེས་སོགས་ཡང་དག་དོན་གྱི་འབྲས་བུའི་བར། ལེའུ་དགུས་བསྟན་པ་རྒྱུད་རང་ལས་ཤེས་པར་བྱའོ། །ཐེག་པ་འོག་མ་རྣམས་ལས་གོང་མ་གོང་མ་རྣམས་ཁྱད་དུ་འཕགས་ཚུལ་ཡང་། རྒྱུད་དེ་ཉིད་ལས། མ་རྟོགས་ལོག་པར་རྟོགས་ལས་ཉན་ཐོས་ཁྱད་པར་འཕགས། །དེ་ཡང་ཇི་ལྟར་འཕགས་ཞེ་ན། གང་ཟག་བདག་མེད་རྟོགས་པས་ལྟ་བ་ཁྱད་པར་འཕགས། །དགེ་བཅུ་རང་གི་དོན་ལ་སྤྱད་པས་སྤྱོད་པ་ཁྱད་པར་འཕགས། །བདེན་བཞིའི་སྒོ་ནས་བསྒྲུབས་པས་སྒྲུབ་པ་ཁྱད་པར་འཕགས། །ཟུང་བཞི་ཡ་བརྒྱད་ཐོབ་པས་འབྲས་བུ་ཁྱད་པར་འཕགས། །ཉན་ཐོས་དག་ལས་རང་རྒྱལ་འཕགས་པ་ཡང་། །གཟུགས་ཀྱི་ཕུང་པོ་ཆོས་ཀྱི་ཁམས་དག་ལ། །ཕྱོགས་གཅིག་བདག་མེད་རྟོགས་པས་ལྟ་བ་ཁྱད་པར་འཕགས། །དགེ་བཅུ་རྫུ་འཕྲུལ་སྤྱོད་པས་སྤྱོད་པ་ཁྱད་པར་འཕགས། །དགེ་བའི་བཤེས་གཉེན་མི་བསྟེན་པར། །གོམས་པའི་ཤུགས་ཀྱིས་བསྒྲུབས་པས་སྒྲུབ་པ་ཁྱད་པར་འཕགས། །ནེ་ཙོ་བསེ་རུ་ལྟར་གནས་འབྲས་བུ་ཁྱད་པར་འཕགས། །རང་རྒྱལ་དག་ལས་བྱང་སེམས་འཕགས་པ་ཡང་། །བདག་མེད་རྣམ་གཉིས་རྟོགས་པས་ལྟ་བ་འཕགས། །ཚད་མེད་བསྡུ་བཞིའི་དོན་མཛད་སྤྱོད་པ་འཕགས། །ཕ་རོལ་ཕྱིན་བཅུ་བསྒྲུབས་པས་སྒྲུབ་པ་འཕགས། །ཀུན་ཏུ་འོད་ཀྱི་ས་གནོན་འབྲས་བུ་འཕགས། །བྱང་སེམས་དག་ལས་ཀྲི་ཡཱ་བཞིས་འཕགས་ཏེ། །དོན་དམ་སྐྱེ་བ་མེད་པ་རབ་རྟོགས་ཤིང་། །ཀུན་རྫོབ་བདག་དང་ཡེ་ཤེས་སེམས་དཔའི་ལྷ། །རྗེ་དང་བྲན་དུ་ལྟ་བས་ལྟ་བ་འཕགས། །དག་པ་རྣམ་གསུམ་སྤྱོད་པས་སྤྱོད་པ་འཕགས། །སྒོམ་རྒྱུད་བྱིན་རླབས་བསྒྲུབས་པས་སྒྲུབ་པ་འཕགས། །རིགས་གསུམ་འབྲས་བུ་གནོན་པས་འབྲས་བུ་ཁྱད་པར་འཕགས། །ཀྲི་ཡཱ་དག་ལས་ཨུ་པ་འཕགས་པ་ཡང་། །ལྷ་བདག་དཔོན་གཡོག་ལྟ་བས་ལྟ་བ་འཕགས། །མཚན་མ་ཡོད་མེད་སྤྱོད་པས་སྤྱོད་པ་འཕགས། །ཁོ་ན་ཉིད་བཞི་བསྒྲུབས་པས་སྒྲུབ་པ་འཕགས། །རིགས་བཞིའི་གོ་འཕང་ཐོབ་པས་འབྲས་བུ་འཕགས། །ཨུ་པ་དག་ལས་ཡོ་ག་འཕགས་པ་ཡང་། །ཀུན་རྫོབ་ལྷ་དང་གྲོགས་སུ་ལྟ་བས་ལྟ་བ་འཕགས། །ཕྲིན་ལས་རྣམ་བཞི་སྤྱོད་པས་སྤྱོད་པ་འཕགས། །ཕྱག་རྒྱ་རྣམ་བཞི་བསྒྲུབས་པས་སྒྲུབ་པ་འཕགས། །རིགས་བཞི་སངས་རྒྱས་འགྲུབ་པས་འབྲས་བུ་འཕགས། །ཡོ་ག་དག་ལས་མ་ཧཱ་བཞིས་འཕགས་ཏེ། རང་ལུས་དཀྱིལ་འཁོར་ལྟ་བས་ལྟ་བ་འཕགས། །སྦྱོོར་སྒྲོལ་གཉིས་མེད་སྤྱོད་པས་སྤྱོད་པ་འཕགས། །ཐབས་ཤེས་གཉིས་མེད་བསྒྲུབས་པས་སྒྲུབ་པ་འཕགས། །སྟུག་པོ་བཀོད་པའི་ས་ཐོབ་འབྲས་བུ་འཕགས། །མ་ཧཱ་དག་ལས་ཨ་ནུ་བཞིས་འཕགས་ཏེ། །དབྱིངས་དང་ཡེ་ཤེས་རྟོགས་པས་ལྟ་བ་འཕགས། །དབྱིངས་ཀྱི་ཡེ་ཤེས་དག་ལས་སྤྱོད་པ་དང་། །ཡེ་¡eཤེས་ཞུ་མཆན། ¡fདབྱིངས་ལ་སྤྱོད་པས་སྤྱོད་པ་འཕགས། །ཕུང་པོ་ལྔ་དང་འབྱུང་བ་རྣམ་པ་ལྔ། །རིགས་ལྔ་ཡབ་ཡུམ་བསྒྲུབས་པས་སྒྲུབ་པ་འཕགས། །པདྨ་ཅན་གྱི་ས་ཐོབ་འབྲས་བུ་འཕགས། །ཨ་ནུ་དག་ལས་ཨ་ཏི་བཞིས་འཕགས་ཏེ། །སྣང་སྲིད་ཆོས་སྐུར་སངས་རྒྱས་ལྟ་བ་འཕགས། །ཆོས་སྐུ་འགྲོ་དོན་སྤྱོད་པས་སྤྱོད་པ་འཕགས། །བྱ་རྩོལ་མེད་པར་བསྒྲུབས་པས་སྒྲུབ་པ་འཕགས། །བཅུ་དྲུག་འཁོར་ལོ་ཚོགས་ཆེན་ཡན་ཆོད་ནས། །ཉི་ཤུ་རྩ་གཅིག་མན་ཆོད་འབྲས་བུ་འཕགས། །ཞེས་སོ། །ཁྱད་པར་གྱི་ཆེ་བ་ཡང་། དེ་ཉིད་ལས། གནས་སྐབས་འགྱུར་བའི་ཆེ་བ་རྣམས། །ཐེག་པ་སོ་སོའི་ཆེ་བ་ཡིན། །མཐར་ཐུག་ཆེ་བ་རྣམ་པ་ལྔ། །ཡེ་ནས་འདུ་འབྲལ་མེད་པ་ཡིན། །ཕུན་སུམ་ཚོགས་པ་རྣམ་པ་ལྔས། །མངོན་པར་སངས་རྒྱས་ཆེ་བ་དང་། བཞུགས་གནས་དབྱིངས་ཀྱི་མཚན་ཉིད་ལྔས། །ཆོས་དབྱིངས་སངས་རྒྱས་ཆེ་བ་དང་། །བདག་ཉིད་ཆེན་པོར་རང་རྫོགས་ལྔས། །བདག་ཉིད་སངས་རྒྱས་ཆེ་བ་དང་། གཏན་ལ་འབེབས་པའི་ཐབས་ཆེན་ལྔས། །སངས་རྒྱ་ཡིན་པ་ཆེ་བ་དང་། །དྲི་མེད་རྣམ་དག་མངོན་འཕགས་པས། །ཐམས་ཅད་སངས་རྒྱས་ཆེ་བ་ལྔ། །མཐར་ཐུག་ཆེ་བ་རྣམ་ལྔ་ཡིན། །ཞེས་དེ་དག་གི་དོན་དཀྲོལ་ནས་རྒྱས་པར་གསུངས་པ་དང་ཨ་ནུ་མན་ཆོད་ཡིད་དཔྱོད་དང་འདྲེས་པས་གོལ་སར་བསྟན་ནས། ཨ་ཏི་རང་བྱུང་གི་ཡེ་ཤེས་ལ་གོལ་སྒྲིབ་སོགས་མེད་པར་བསྟན་པ་ཡང་། རྫོགས་ཆེན་ཐིག་ལེ་ཉག་གཅིག་ལ། །གོལ་དང་མ་གོལ་གཉིས་སུ་མེད། །གོལ་ས་རང་བཞིན་རྣམ་པར་དག །ཀུན་བྲལ་ཉག་གཅིག་ཅིར་མ་སྤངས། །ཨ་ཏིའི་ལྟ་སྒོམ་སྤྱོད་པ་དང་། །འབྲས་བུ་ཡེ་ནས་གཉིས་མེད་པས། །གཉིས་སུ་སྣང་བའི་གོལ་སྒྲིབ་མེད། །ལྟ་སྒོམ་སྤྱོད་པ་འབྲས་བུ་བཞི། །ཡེ་ནས་རང་བྱུང་ཡེ་ཤེས་པས། །རྒྱུ་རྐྱེན་འདུས་པའི་གོལ་སྒྲིབ་མེད། །རྫོགས་ཆེན་ལྟ་བ་སྒོམ་པ་དང་། །སྤྱོད་པ་འབྲས་བུ་ལྷུན་གྲུབ་པས། །སྒོམ་སྒྲུབ་རེ་དོགས་རྩོལ་བ་ཡིན། །གོལ་ས་སྒྲིབ་པ་རྣམ་པར་དག །ང་ཡི་གོང་ན་གཞན་མེད་པས། །སྒྲིབ་མེད་གསལ་བའི་ཡེ་ཤེས་ཡིན། །ཐེག་བརྒྱད་འོག་མ་སྣང་བ་ཡང་། །ང་ཡི་ཐུགས་རྗེའི་མཛད་སྤྱོད་ཡིན། །དབྱེར་མེད་ཤེས་རབ་རང་ལ་གནས། །མ་འདྲེས་རྫོགས་པའི་ཡེ་ཤེས་པས། །ལྟུང་བའི་གོལ་ས་རྣམ་པར་དག །དབྱེར་མེད་ཤེས་རབ་རང་གསལ་ལ། གོལ་སྒྲིབ་གཉིས་སུ་འབྱེད་མེད་གསལ། །ཞེས་དང་། མཚོན་ཚིག་སོགས་རྒྱས་པར་གསུངས་ཤིང་། གཞན་ཡང་རྫོགས་ཆེན་གྱི་རྒྱུད་རྣམས་དང་། མདོ་དགོངས་འདུས་སོགས་སྔ་འགྱུར་གྱི་རྒྱུད་གཞུང་རྣམས་དང་། དེ་དག་གི་གསལ་བྱེད། ཀཿདམ་པ་རིན་པོ་ཆེས་མཛད་པའི་ཐེག་དགུའི་སྤྱི་ཆིངས་དང་། དེའི་འགྲེལ་པ་མཁས་གྲུབ་ཡེ་ཤེས་རྒྱ་མཚོས་མཛད་པ་སོགས་མང་དུ་བཞུགས་པ་དེ་དག་འདིར་བསྡུར་མ་ལང་བས་དེ་དང་དེར་གཟིགས་པར་མཛོད་ཅིག །སླར་སྨྲས་པ། བཀྲ་ཤིས་ཡོན་ཏན་བྱེ་བའི་དཔལ་གྱིས་མངོན་འཕགས་ཐུབ་དབང་ལྷ་ཡི་ལྷའི། །དཔལ་གྱི་མགུལ་ལས་ལེགས་འོད་ཟབ་དང་རྒྱ་ཆེའི་ཆོས་མཆོག་ནོར་བུའི་སྒྲོམ། །ཚང་ལ་མ་ནོར་སྔ་འགྱུར་རིག་འཛིན་བརྒྱུད་པའི་ཞལ་གྱི་ལུང་བཟང་པོ། །དེང་ཡང་མ་ཉམ ས་སྤྱོད་ཡོད་ཨེ་མ་སྔོན་གོམས་དགེ་བའི་དཔལ་ལས་སོ། །མཁྱེན་བརྩེའི་སྤྲིན་བཟང་ལས་ཐོན་འཕགས་ལམ་ཡན་ལག་བརྒྱད་ལྡན་བདུད་རྩིའི་ཆར། །གནས་སྐབས་གདུལ་བྱའི་སྣོད་ཀྱི་དབྱེ་བས་དམན་འབྲིང་མཆོག་ཚུལ་ཅིར་སྣང་ཡང་། །མཐར་ཐུག་འོད་གསལ་སྙིང་པོའི་ཀློང་དུ་རོ་མཉམ་ཆུ་བྲན་རྒྱ་མཚོར་བཞིན། །མཐར་ཐུག་ཐེག་གཅིག་འབྲས་བུའི་ཚུལ་ལ་ངེས་དོན་མདོ་རྒྱུད་དགོངས་པ་མཐུན། །ལྷ་མིའི་ཐེག་པའི་ས་གཞི་ལ་བརྟེན་མཚན་ཉིད་སྡེ་གསུམ་གསེར་རིའི་བསྐོར། །རྒྱུད་སྡེ་བཞི་ཡི་བང་རིམ་ལེགས་མཛེས་བསྐྱེད་རྫོགས་ཉི་ཟླའི་རྣ་ཆ་ཅན། །འོད་གསལ་རྡོ་རྗེ་སྙིང་པོའི་ལྷུན་པོ་སྲིད་ཞིའི་བླ་ན་མངོན་འཕགས་པ། །བརྒྱུད་གསུམ་བླ་མ་རིག་འཛིན་ལྷ་དབང་བྱེ་བས་ཉེ་བར་བརྟེན་བྱར་གྱུར། །དེ་སླད་བདག་བློ་དམན་ཡང་ཚུལ་འདིར་གཅིག་ཏུ་གུས་པའི་ཉེར་ལེན་གྱིས། །ཟླ་བྲལ་མཁས་གྲུབ་དུ་མའི་གསུང་ལས་ཅུང་ཟད་འདི་རུ་བསྡུ་བར་བྱས། །ལེགས་བཤད་གསར་དུ་སྤྲོ་བའི་ནུས་པ་བདག་ལྟའི་སྐལ་བར་གྱུར་མིན་ཡང་། །དམ་པའི་གསུངས་ལ་རང་བཟོས་བཅོས་ཤིང་བསླད་པའི་དྲི་མ་མེད་སྙམ་བགྱིད། །འོན་ཀྱང་སྐྱེས་ཐོབ་སྦྱོར་བརྩོན་དམན་དང་བརྗེད་ངེས་བག་མེད་གྱུར་སོགས་ཀྱིས། །ནོངས་པར་གྱུར་ན་སྙིང་ནས་བཤགས་བགྱི་འཕགས་པ་རྣམས་ཀྱིས་ཚངས་པ་སྩོལ། །ལྷག་བསམ་མཐུ་དང་ཅུང་ཟད་ངལ་བ་བགྱིས་ལས་བསོད་ནམས་གང་ཐོབ་པ། །དེ་ཡང་བདག་གཞན་སྐྱེ་ཀུན་ཡང་དག་ལམ་གྱི་སྣང་བ་ཐོབ་ཕྱིར་བསྔོ། །རྨད་བྱུང་འཁོར་ལོ་བཞི་ཡི་བ་དན་ལེགས་མཛེས་དལ་འབྱོར་གྲུབ་བོ་མཆོག །ཡང་དག་ལམ་གྱི་དེད་དཔོན་གྱིས་བསྐུལ་ཐེག་མཆོག་ནོར་བུའི་གླིང་བགྲོད་ནས། །ཟབ་དང་རྒྱ་ཆེའི་འབྱོར་པས་བརྒྱན་བྱས་གཞན་ཕན་ལྷག་བསམ་བརྩོན་པའི་མཐུས། །མ་ལུས་འགྲོ་ལ་ཆོས་མཆོག་འདོད་དགུའི་ཆར་ཆེན་རྟག་པར་འབེབས་བྱེད་ཤོག །སྲིད་ཞིའི་ཕུན་ཚོགས་ཀུན་གྱི་འབྱུང་གནས་རིས་བྲལ་ཐུབ་བསྟན་བ་དན་རྩེར། །གྲོལ་བ་དྲུག་ལྡན་སྔ་འགྱུར་བསྟན་མཆོག་དགོས་འབྱུང་ནོར་བུའི་ཏོག་འབར་བས། །བསྟན་ལ་འཚེ་བྱེད་ལྷ་མིན་ཀླ་ཀློ་གདུག་པའི་ག ཡུལ་ལས་རྣམ་རྒྱལ་ཞིང་། །ཆོས་ལྟར་བཅོས་པའི་མུན་སྤྲུལ་ཀུན་ཞི་བཀྲ་ཤིས་བདེ་ལེགས་འཕེལ་གྱུར་ཅིག །ཅེས་པའང་རང་ཉིད་ཀྱི་དྲན་པའི་གསོས་ཙམ་དུ་སྔར་བྲིས་པ་ལས་ཅུང་ཟད་རྒྱས་པར་ཕྱེས་ཏེ། གདོད་མའི་མགོན་པོ་དང་ཞལ་མི་གཉིས་པ་རྫོགས་ཆེན་རབ་འབྱམས་ལྔ་པའི་ཞབས་རྡུལ་ལ་སྤྱི་བོས་རེག་པའི་རིག་འཛིན་གྱི་བཙུན་པ་རྡོ་རྗེ་ཐུགས་མཆོག་རྩལ་ལམ་མིང་གཞན་འཇམ་དབྱངས་བློ་གྲོས་རྒྱ་མཚོར་འབོད་པས། རང་ལོ་ཞེ་དྲུག་པ་མེ་འབྲུག་ས་ག་ཟླ་བའི་ཚེས་བཅུ་ཉི་མ་མེ་བཞིའི་འགྲུབ་སྦྱོར་གྱི་སྔ་ཆར། རང་གནས་དཔལ་ཞེ་ཆེན་བསྟན་གཉིས་དར་རྒྱས་གླིང་གི་དབེན་སྤྱིིལ་བཀྲ་ཤིས་འཆི་མེད་འོད་སྣང་དུ་གྲུབ་པར་བགྱིས་པ་ལས། ཡི་གེ་གཉིས་པར་སྤེལ་བ་པོ་ནི་སྡོམ་བརྩོན་སྡེ་སྡོད་སྨྲ་བ་ཚུལ་ཁྲིམས་རྣམ་དག་གིས་མཛད་པ་སྟེ། འདིས་ཀྱང་བསྟན་པ་རིན་པོ་ཆེ་ཡུན་དུ་གནས་པའི་རྒྱུར་གྱུར་ཅིག སརྦ་ཐཱ་མངྒ་ལཾབྷ་ཝ་ཏུ། དགེའོ། །།
| 