ཞེ་ཆེན་རྒྱལ་ཚབ་གསུང་འབུམ་པོད་བཅུ་གཅིག་པ།གླེགས་བམ། ད༽ཞེ་ཆེན་རྒྱལ་ཚབ་འགྱུར་མེད་པདྨ་རྣམ་རྒྱལ།
ཞེ་ཆེན་མཁན་པོ་པདྨ་ཀུན་བཟང་ནས་པར་དུ་བསྐྲུན།
མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །
—རྫོགས་ཆེན་དཔོན་སློབ།
དཔེ་སྐྲུན་གསལ་བཤད།
བསྐལ་བཟང་སངས་རྒྱས་སྟོང་གི་གདུལ་ཞིང་། སྟོང་གསུམ་མི་མཇེད་ཀྱི་ཆ་ཤས་འཛམ་གླིང་གི་བྱང་ཕྱོགས། བོད་གངས་ཅན་གྱི་བསྟན་པ་རྒྱ་མཚོའི་ཕྱི་མོ། གསང་སྔགས་སྔ་འགྱུར་བའི་བསྟན་པའི་འབྱུང་གནས། སྟོད་ན་རྡོར་སྨིན་གཉིས། སྨད་ན་ཀཿདཔལ་གཉིས། བར་ན་ཞེ་རྫོགས་གཉིས་ཞེས་གྲགས་པའི་བྱེ་བྲག་གསང་སྔགས་རྙིང་མའི་གདན་ས་ཆེ་རྒུའི་ཡ་རྒྱལ། ཞེ་ཆེན་བསྟན་གཉིས་དར་རྒྱས་གླིང་ཞེས་སྔ་འགྱུར་བཀའ་གཏེར་ཆོས་ཀྱི་རྒྱ་མཚོ་ཆེན་པོ་འཛིན་སྐྱོང་སྤེལ་གསུམ་གྱི་ཕྱག་རྗེས་བཀྲ་ཤིས་རེ་ཁ་ཆེས་ཆེར་བཀྲ་བར། མཁས་གྲུབ་གཉིས་ལྡན་གྱི་སྐྱེས་མཆོག་བགྲང་ལས་འདས་པ་བྱོན་པའི་དབུས་སུ་མངོན་པར་འཕགས་པ། གངས་ལྗོངས་རྒྱལ་བསྟན་ཡོངས་རྫོགས་ཀྱི་ཤིང་རྟ་བཀའ་བབས་བདུན་ལྡན་༧འཇམ་དབྱངས་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པ་དང་། མཁས་གྲུབ་དབང་པོ་མ་ཧཱ་པཎྜི་ཏ་འཇམ་དབྱངས་མི་ཕམ་ཕྱོགས་ལས་རྣམ་རྒྱལ་རྣམ་གཉིས་ཀྱི་ཐུགས་སྲས་ཐུ་བོ། ཞེ་ཆེན་རྒྱལ་ཚབ་རིན་པོ་ཆེ་འགྱུར་མེད་པདྨ་རྣམ་རྒྱལ་དཔལ་བཟང་པོ་གང་གི་གསུང་འབུམ་མདོ་སྔགས་རིག་གནས་ཀྱི་མཛོད་ཆེན་འདི་ཉིད། སྔོན་ཆད་རྗེ་དེའི་སྲས་ཀྱི་ཐུ་བོ་ཞེ་ཆེན་ཀོང་སྤྲུལ་རིན་པོ་ཆེས་གདན་སར་ཤིང་པར་དུ་བཀོད་པ་སྙིགས་དུས་ཀྱི་སྐྱེ་འགྲོ་བསོད་ནམས་དམན་རྐྱེན་ཉམས་རྒུད་རྩ་བརླག་ཏུ་སོང་ཡང་། ཕྱིས་རྒྱ་གར་འཕགས་ཡུལ་དུ་མགོན་པོ་གང་དེའི་དགོངས་བརྒྱུད་ཀྱི་བྱིན་རླབས་ཐོབ་ཅིང་བསྟན་པ་ཡོངས་རྫོགས་ཀྱི་མངའ་བདག ༧སྐྱབས་རྗེ་དིལ་མཁྱེན་རྡོ་རྗེ་འཆང་འགྱུར་མེད་ཐེག་མཆོག་བསྟན་པའི་རྒྱལ་མཚན་མཆོག་གིས་མ་དཔེ་འཚོལ་བསྡུས་ཀྱི་སླར་ཡང་པར་བསྐྲུན་མཛད་ཅིང་བཤད་ལུང་གི་རྒྱུན་ཡང་སྤེལ་བར་མཛད་དེ་རྒྱལ་བསྟན་སྤྱི་བྱེ་ལ་སྨན་པའི་སྐུ་དྲིན་བླ་མེད་བསྐྱངས་པ་དེ་ལྟར་ཡང་། ད་ཆ་མདོ་དབུས་ཁམས་གྱི་མཚོན་པའི་འཛམ་གླིང་མཐའ་གྲུ་ཀུན་ཏུ་རྒྱལ་བསྟན་སྤྱི་དང་། ཡང་སྒོས་སྔ་འགྱུར་བའི་ལྟ་གྲུབ་དྲི་མ་མེད་པ་ཐོས་བསམ་སྒོམ་པས་འཛིན་སྐྱོང་སྤེལ་བའི་བསྟི་གནས་དགོན་སྡེ་ཁག་གི་ནང་སློབ་གཉེར་བ་ལོ་རེ་བཞིན་ཇེ་མང་དུ་འགྲོ་བ་ཚོར། འཁྲུལ་མེད་རྒྱལ་བ་དགྱེས་པའི་ལམ་གནད་གསལ་བོར་སྟོན་པའི་ལེགས་བཤད་རྨད་དུ་བྱུང་བ་རྣམས་གཟིགས་ཆོག་ཡོང་བ་དང་། དེང་གི་ཆར་སྔོན་མེད་འཕྲུལ་ཡིག་ལེགས་ཐོན་གྱིས་དཔེ་དེབ་སྤུས་དག་ཡོང་ངེས་དང་། འཇམ་མགོན་རྒྱལ་བ་ཡབ་སྲས་ཀྱི་རྡོ་རྗེའི་གསུང་གི་ཕྲིན་ལས་འཛམ་གླིང་ཕྱི་ནང་ཀུན་ཏུ་ཁྱབ་བརྡལ་ཡོང་བའི་རེ་འདུན་ཆེན་པོས། རྒྱལ་བསྟན་སྤྱི་དང་རང་བསྟན་ལ་ལྷག་བསམ་རྣམ་པར་དཀར་བ་ཞེ་ཆེན་དགོན་གྱི་མཁན་པོ་པདྨ་ཀུན་བཟང་མཆོག་ནས་དེང་རབས་ཀྱི་གློག་ཀླད་འཕྲུལ་འཁོར་ལ་བརྟེན་ནས་པར་བསྐྲུན་གནང་བཞིན་ཡོད་པར་ཡི་རང་བསྔགས་བརྗོད་བྱེད་པ་དང་ཆབས་ཅིག གསུང་རབ་འདིས་རྒྱལ་བའི་དགོངས་པ་དྲི་མ་མེད་པ་གསང་ཆེན་སྔ་འགྱུར་བའི་ལྟ་གྲུབ་ཀྱི་གནད་གསང་གསལ་བར་སྟོན་པ་ཀུན་གྱིས་མཁྱེན་རྟོགས་ཐུབ་པས་རང་གཞན་གྱི་འདི་ཕྱིའི་དོན་འབྲས་རླབས་ཆེན་ཡོང་རྒྱུའི་རེ་སྨོན་བཅས། ཞེ་ཆེན་རབ་འབྱམས་བདུན་པར་འབོད་པ། དགེ་སྦྱོང་ངག་དབང་ཆོས་དཔལ་རྒྱ་མཚོས་ཕྱི་ལོ་ ༢༠༡༠ ཟླ་ ༢ ཚེས་ ༢༤ བཟང་པོ་ལ།
གསལ་བཤད་ཉུང་ངུ་།
༈ དེ་ཡང་མི་རིང་བའི་འདས་པའི་ལོ་རབས་འགའི་ཡུན་ལ་བོད་གངས་ཅན་གྱི་ཆོས་དང་རིག་གཞུང་ལ་ཉམས་རྒུད་ཚབས་ཆེན་ཐེབས་ནས། དེང་གི་དུས་འདིར་བོད་ཀྱི་རིག་གཞུང་ཟེར་བ་དེ་སྒྲ་གཅན་གྱི་ཁ་ནས་ཕྱེད་ཙམ་ཐར་པའི་ཟླ་བ་ལྟ་བུ་ཞིག་ཡིན་ལ། འདི་ཉིད་ཉམས་པ་སླར་གསོ་དང་མི་ཉམས་ཡུན་རིང་དུ་གནས་པའི་ཆེད་དུ་མཁས་པ་དང་ལྷག་བསམ་ཅན་གྱི་སྐྱེས་བུ་དམ་པ་དག་གིས་སྔ་རབས་ཀྱི་མཁས་པའི་གསུང་རབ་རྣམས་སྤུས་ལེགས་ཀྱི་ཡིག་གཟུགས་སུ་སྤེལ་ནས་འགྲེམ་སྤེལ་གནང་བཞིན་པ་འདི་དག་ནི་འཆི་ཁ་མ་ལ་སྲོག་བསྩལ་པ་ལྟ་བུའི་བསྟན་པའི་སྲོག་སྙིང་གསོ་བའི་བྱ་བ་གལ་ཆེན་ཞིག་ཡིན་ལ། འདིར་ཡང་ཁམས་ཞེ་ཆེན་བསྟན་གཉིས་དར་རྒྱས་གླིང་གི་མཁན་རིན་པོ་ཆེ་པདྨ་ཀུན་བཟང་ལགས་ཀྱིས་མཁས་པའི་དབང་ཕྱུག་ཞེ་ཆེན་རྒྱལ་ཚབ་སྐུ་ཕྲེང་བཞི་པ་འགྱུར་མེད་པདྨ་རྣམ་རྒྱལ་གྱི་གསུང་རབ་འདི་དག་དེབ་ཏུ་བསྐྲུན་པ་འདི་བསྔགས་འོས་ཀྱི་མཛད་པ་བླ་ན་མེད་པ་ཞིག་ཏུ་ཤེས་ཏེ། དེ་ཡང་ཞེ་ཆེན་རྒྱལ་ཚབ་རིན་པོ་ཆེ་ནི་བོད་གངས་ཅན་གྱི་ཆོས་དང་རིག་གཞུང་སྤྱི་དང་ཁྱད་པར་གསང་སྔགས་སྔ་འགྱུར་གྱི་མདོ་རྒྱུད་རྒྱ་མཚོའི་གནས་ལ་ཐུགས་སྤྱན་ནམ་མཁའ་ལྟར་ཡངས་པའི་མཁས་གྲུབ་གཉིས་ལྡན་གྱི་སྐྱེས་ཆེན་དམ་པ་ཞིག་ཡིན་པར་མ་ཟད་འཇམ་མགོན་མི་ཕམ་རིན་པོ་ཆེས་བསྟན་པ་ཡོངས་རྫོགས་ཀྱི་བདག་པོར་མངའ་གསོལ་བའི་གསང་སྔགས་སྔ་འགྱུར་གྱི་བསྟན་པ་ལ་མཛད་རྗེས་བླ་ན་མེད་པའི་མཁས་པའི་དབང་ཕྱུག་ཆེན་པོ་ཞིག་སྟེ། རྗེ་འདི་ཉིད་ཀྱིས་འཇམ་མགོན་བླ་མའི་གསུང་གི་མཛད་པ་ལ་ཆེད་དུ་དམིགས་ཏེ་མཆན་འགྲེལ་དང་ཁ་སྐོང་། གཞན་ཡང་དེ་དག་གི་ཟབ་དོན་རྗེན་པར་ཕྱུང་བའི་ཡིག་ཆ་ངེས་དོན་བདེ་གཤེགས་སྙིང་པོའི་དོན་གཏན་ལ་ཕབ་པའི་ལེགས་བཤད་སོགས་བསྟན་བཅོས་མང་དུ་བཞག་ཡོད་པ་ཡིན་ལ། བཤད་སྲོལ་ལ་ཡང་ངེས་ཤེས་རིན་པོ་ཆེའི་སྒྲོན་མེ་དང་རྗེ་འདི་ཉིད་ཀྱི་བདེན་གཉིས་གློག་གི་སྒྲོན་མ་འདི་གཉིས་ཀྱི་དོན་ཤེས་ན་གསང་སྔགས་སྔ་འགྱུར་གྱི་མདོ་སྔགས་ཀྱི་ལྟ་གྲུབ་ཡོངས་རྫོགས་ཀྱི་གནད་ཟིན་པ་ཡིན་ཞེས་ཟེར་བ་ལྟ་བུ་ཡིན་ནོ། །དེས་ན་འཇམ་མགོན་བླ་མ་ཡབ་སྲས་གཉིས་ཀྱི་གསུང་དག་ནི་གསང་སྔགས་སྔ་འགྱུར་པའི་བསྟན་པའི་ཟབ་གནད་ཀྱི་ཉི་མ་རང་རྒྱུད་ལ་འདྲེན་པའི་སྐྱ་རེངས་དཀར་པོའི་འོད་སྣང་ལྟ་བུ་ཞིག་ཡིན་པས་འཇམ་པའི་དབྱངས་དངོས་ཀུན་མཁྱེན་མི་ཕམ་རྒྱ་མཚོའི་ཡིག་ཆ་དག་ལ་སྦྱང་བརྩོན་བྱེད་པའི་བློ་གསར་དག་གིས་ཀྱང་རྗེ་ཉིད་ཀྱི་མདོ་སྔགས་ཀྱི་གསུང་རབ་དག་ལ་ལྟ་ཀློག་ཡང་ཡང་བྱེད་པ་ཤིན་ཏུ་གལ་ཆེ་བའི་གནས་སུ་སེམས་སོ། །
གསེར་ལྗོངས་བླ་མ་རུང་དུ་འཆི་མེད་རིག་འཛིན་གྱིས་བྲིས།
ཐོག་མའི་སྙན་སྒྲོན།
དེ་ཡང་ཀུན་མཁྱེན་མི་ཕམ་རིན་པོ་ཆེས་བསྟན་བཅོས་བརྩམ་པ་བཀས་སྐུལ་ཞིང་། གསུང་རྩོམ་རིགས་བསྟན་པའི་གཙིགས་སུ་ཆེ་བས་འཐོར་ཟགས་སུ་མ་སོང་བར་ཕྱོགས་གཅིག་ཏུ་བསྡུ་དགོས་པར་ཡང་བཀའ་གནང་ལས་གྲུབ་པའི་བཀའ་འབུམ་འདི་ཉིད་འགྲེམས་སྤེལ་ཞུས་པའི་ཐོག་མའི་སྙན་སྒྲོན་ནི།
ལྷ་མོ་དྲི་མ་མེད་པའི་མདོ་ལས་ལུང་བསྟན་པ་ལྟར་ཆོས་རྒྱལ་ཡབ་མེས་རིམ་བྱོན་དང་འགྱུར་སྔ་ཕྱིའི་ལོ་པཎ་མཁས་གྲུབ་གོང་མ་རྣམས་ཀྱི་ཐུགས་རྗེ་དང་ཕྲིན་ལས་ཚད་མེད་པ་ལས་བྱུང་བའི་དེང་སང་བོད་བརྒྱུད་ནང་བསྟན་རིག་གཞུང་ཞེས་མི་རིགས་གཞན་དང་གཞན་གྱི་མི་སྣ་གཟུར་གནས་ཤེས་ཡོན་ཅན་རྣམས་འགྲམ་ཆུ་ལྡངས་ཏེ་ངོ་མཚར་བའི་གནས། སྔོན་བྱོན་དམ་པ་ཚོའི་མཁྱེན་ནུས་རྩལ་དགུ་ཡོད་ཚད་བོད་བརྒྱུད་ནང་བསྟན་ཆོས་དང་རིག་གཞུང་ནོར་བུ་མཐོན་ཀ་ལྟ་བུ་འདི་ཁོ་ནའི་ཆེད་དུ་འབད་འབད་དུང་དུང་གི་མཛད་འཕྲིན་ལ་གཞིགས་ན་བསམ་ཡུལ་ལས་འདས།
འོན་ཀྱང་འདོད་བྲལ་སྡུག་འཕྲད་ཀྱི་འཕོ་འགྱུར་ནི་སུ་ལའང་བྱུང་དང་འབྱུང་བཞིན་པ་ལྡོག་མེད་ཅིག་ཡིན་སྟབས། གཅིག་དགུ་ལྔ་དགུའི་ཛ་དྲག་ལས་འགུལ་གྱི་འཛིན་ཁྲིས་བདེ་ལྡན་ཁ་བའི་ལྗོངས་ཀྱི་ཆོས་དང་རིག་གཞུང་{སྔ་འགྱུར་པའི་གདན་ས་ཆེན་མོ་འདི་གའི་རིག་གཞུང་ལ་བསམས་ན་ཀུན་གཟིགས་རབ་འབྱམས་གཉིས་པའི་གསུང་འབུམ་པོད་དགུ་ལོངས་པ་དང་། ཀོང་སྤྲུལ་ཡོན་ཏན་རྒྱ་མཚོའི་སྐུ་སྐྱེ་གོང་མ་གྲུབ་ཐོབ་ཆེན་པོ་ཤེས་རབ་ཡར་འཕེལ་གྱི་གསུང་འབུམ་པོད་ལྔ་ཙམ་དང་། རྒྱལ་དབང་བཅུ་བཞི་པས་མ་ཧཱ་པཎྜི་ཏ་ཞེས་མཚན་གྱི་ཅོད་པན་དཔྱངས་པ་མ་ཧཱ་པཎྜི་ཏ་དབོན་སྤྲུལ་མཐུ་སྟོབས་རྣམ་རྒྱལ་གྱི་གསུང་འབུམ་པོད་དྲུག་ལྷག་དང་། རྒྱལ་ཚབ་རིན་པོ་ཆེའི་གསུང་འབུམ་སྤར་ཤིང་སོགས་ནི་ད་ལྟ་མིང་ཙམ་ལས་མེད། གསུང་འབུམ་འདིའི་མ་ཕྱི་ཙམ་ཞིག་ཆོས་བརྒྱུད་འདི་ལ་ལྷག་བསམ་སྟོན་ཟླ་ལྟར་དཀར་བའི་སངས་རྒྱས་བསྟན་འཛིན་ལགས་ཀྱིས་རང་ཉིད་ཀྱི་ལུས་སྲོག་དཀའ་ངལ་གང་ལའང་ལྟོས་མེད་དུ་ཧུར་འབུངས་ཞེ་བསྐྱེད་ཀྱི་དཀའ་དྲིན་ལས་རྣམ་པ་ཚོའི་སྤྱན་ལམ་དུ་འབུལ་ཆོག་ཆོག་བྱུང་འདུག}ཤིན་ཏུ་ཕངས་པ་མི་ཉུང་བ་ཞིག་གྱུར་མིད་གཏོང་བའི་ན་ཟུག་ཟློས་ན་སེམས་བློང་བློང་པོ་ལས་ཅི་ཡོད།
དེ་བས་བོད་བརྒྱུད་ནང་བསྟན་རིག་གཞུང་མྱུར་སྐྱོབ་དང་རྒྱུན་འཛིན་སླར་གསོའི་བྱ་གཞག་འུར་བཤད་ཙམ་དུ་མ་ལུས་པ། མིག་རྒྱང་རིང་པོས་དཔེ་སྐྲུན་འགྲེམས་སྤེལ་སོགས་ཞུས་ཏེ་རྒྱ་ཆེ་བའི་སློབ་གཉེར་བ། ཉམས་ལེན་པ། ཞིབ་འཇུག་པ་དག་གི་སྤྱན་ལམ་དུ་འབུལ་ཐུབ་ན་དོན་དམ་པ་བོད་མི་རིགས་ཀྱི་ཆོས་དང་རིག་གཞུང་རྒྱུན་འཛིན་ནམ་བསྟན་འགྲོའི་དོན་ཕན་འབྲས་མངོན་དུ་འགྱུར་བ་སོགས་ཀྱི་དགེ་མཚན་ལ་སུ་མི་རངས།
ད་ལམ་འདིར་རྙེད་གྲགས་ཀྱི་འདུ་ཤེས་རིང་དུ་དོར་ནས་ལྷག་པའི་བསམ་པ་ཁོ་ནས་མཁན་རིན་པོ་ཆེ་པདྨ་ཀུན་བཟང་མཆོག་གིས༧འཇམ་མགོན་མཁྱེན་ཀོང་ཟུང་དང་ཀུན་མཁྱེན་མི་ཕམ་རིན་པོ་ཆེ་རྣམ་གསུམ་གྱི་སྲས་ཀྱི་ཐུ་བོ་མཁས་གྲུབ་གཉིས་ལྡན༧རྒྱལ་ཚབ་རིན་པོ་ཆེ་འགྱུར་མེད་པདྨ་རྣམ་རྒྱལ་མཆོག་གི་གསུང་འབུམ༼ཆོས་ཚན་ཅི་ཡོད་ཨ་དུམ་ནང་བཞུགས་དཀར་ཆག་ནོར་བུའི་ཕྲེང་བར་གཟིགས། ༽འདི་ཉིད། བོད་བརྒྱུད་ནང་བསྟན་རིག་གཞུང་སྤྱི་དང་། ཁྱད་པར་དུ་སྔ་འགྱུར་པའི་ལྟ་གྲུབ་བམ་ཀུན་མཁྱེན་མི་ཕམ་རིན་པོ་ཆེའི་ཡིག་ཆ་འཛིན་པ་དག་ལ་མེད་དུ་མི་རུང་བ་ཞིག་ཏུ་དགོངས་ཏེ་རྒྱ་ཆེའི་དོན་གཉེར་ཅན་རྣམ་པའི་སྤྱན་ལམ་དུ་འགྲེམས་སྤེལ་གནང་བ་སྟེ། ཞུ་དག་ལག་བསྟར་བྱས་ཚུལ་ནི། དེ་ཡང་ཡིག་ནོར་ངེས་ཅན་རྣམས་ཐད་ཀར་བསྒྱུར་པ་དང་། ལ་ལ་{}གུག་རྟགས་ནང་ལ་དཔེར་ན་་་་་འཆུགས་{འཁྱུགས}འདི་ལྟ་བུ་བསྒྱུར་པའི་དེ་མ་ཐག་གུག་རྟགས་ནང་དུ་བསྒྱུར་ཡིག་དེ་ཁོལ་ཕྱུང་དང་། ཚིག་གཅིག་ཐེངས་མང་ནོར་རིགས་གུག་རྟགས་ནང་དུ་་་སྒེག་{སྒེགས་འདིའི་རིགས་འདི་ལྟར་ཞུས། }འདི་ལྟ་བུ་དང་། གསར་བཏགས་རིགས་[]གུག་རྟགས་ནང་དུ་[གྱིས་ཞུ་མཆན། ]འདི་ལྟ་བུ་དང་། ལྷག་རིགས་{}གུག་རྟགས་ནང་དུ་{ལ་ལྷག}འདི་ལྟ་བུ་དང་། མ་ཕྱི་ནང་མི་གསལ་བའི་རིགས་གུག་རྟགས་ནང་དུ་[ཡང་མ་དཔེ་མི་གསལ། ]འདི་ལྟ་བུ་དང་། ཞེས་མཆན་བླུགས་ཡོད། གཞན་ཡང་མ་ཕྱི་ནང་མི་གསལ་བ་དང་དོགས་ཅན་ཁ་ཤས་སྣང་ཡང་རང་སར་བཞག་པ་ལས་ཕྲི་བསྣན་རྔོ་མི་ཐོགས། དེ་མིན་དཔེར་ན་དགའ་བའི་ཞེ་ས་ལ་དགྱེས་པ་དང་དགེས་པ། ཆུ་བོ་ཆུང་ངུ་ལ་ཆུ་ཕྲན་དང་ཆུ་བྲན་ལྟ་བུ་དང་། བྱ་ཚིག་དང་བྱེད་ཚིག་གང་ལྟར་རུང་རིགས་མ་ཕྱི་ལྟར་རང་སར་བཞག་དགོས་པ་ལ་ཕན་ཚུན་བསྒྱུར་པ་དང་ཆད་ལྷག་གི་ནོངས་པ་སོགས་ནི་བཤགས་ཡུལ་རྣམས་ཀྱི་མདུན་དུ་མཐོལ་བཤགས་བཟོད་གསོལ་ཞུ།
འདི་ལ་ཐེངས་དང་པོ་མཁན་ཀུན་བཟང་བསོད་ནམས་དང་ཕྲན་གཉིས་ཀྱིས་མ་ཕྱི་དང་ལན་གཉིས་བསྡུར་པ་དང་། འཕྲུལ་པར་རྐྱང་ཐོག་ལན་གཅིགཐེངས་གཉིས་པར་དཔལ་ཡུལ་བཤད་གྲྭའི་དགེ་སློབ་རྣམས་ཀྱིས་མ་ཕྱི་དང་འཕྲུལ་པར་གཉིས་སྦྲགས་ཚར་གཅིག་དང་འཕྲུལ་པར་རྐྱང་ཐོག་ལན་གཅིགཐེངས་གསུམ་པ་ཞེ་ཆེན་བཤད་གྲྭའི་དགེ་སློབ་རྣམས་ཀྱིས་མ་དཔེ་དང་ཚར་གཅིག་གཏུགས་པ་དང་འཕྲུལ་པར་རྐྱང་ཐོག་ལན་གཅིགཐེངས་བཞི་པར་ཕྲན་པས་འཕྲུལ་པར་རྐྱང་ཐོག་ཚར་གསུམ་དང་ཞུས་མཐར་མ་ཕྱི་དང་འཕྲུལ་པར་གཉིས་སྦྲགས་ཚར་གཅིག་ཡང་འཕྲུལ་པར་རྐྱང་ཐོག་ཐེངས་གཉིས་བཅས་བསྡོམས་༡༤ལྷག་བསྐྱར་ཞིབ་ཞུས་པ་ཡིན། སྔར་ཤིང་པར་དུ་མ་འཁོད་པའི་ཕྲན་ཚེགས་དང་མ་དཔེ་ནང་མི་གསལ་བ་དང་ལྡེབ་ཆད་རིགས་མཁོ་འདོན་རྒྱབ་སྐྱོར་གནང་མཁན་དག་ལ་སྙིང་ཐག་པ་ནས་ཐུགས་རྗེ་ཆེ་ཞུ། ཕྲན་ནས་ལོ་གཅིག་ལྷག་རིང་ལ་རང་གི་སློབ་སྦྱོང་དང་དཀའ་ཚེགས་ལ་མ་ལྟོས་པ། ཡིད་བཞིན་གྱི་ནོར་བུ་འདི་ལྟ་བུ་ལ་ཞབས་ཕྱི་ཞུ་བའི་གོ་སྐབས་འཕྲད་པ་འདི་སྐལ་བ་རེ་བཟང་སྙམ་པའི་དགའ་སྤྲོ་དང་འགན་འཁྲི་ཞིག་ཏུ་བརྩིས་ཏེ། གཟབ་ཁུལ་གྱིས་སྙམ་འཇོག་དང་ཕོ་ཚོད་ཧམ་ཤེད་དུ་མ་སོང་བ་ཞིག་ཏུ་བསམས་ནས། ཚིག་གསར་གཉིས་སོགས་ལ་ཁུངས་བཅོལ་ཏེ་བརྡ་སྤྲོད་མཁས་དབང་དང་། ཞུ་དག་ཉམས་མྱོང་པ། ཆོས་གྲོགས་རྣམས་ལ་བཀའ་འདྲི་ཞུས་ཏེ་རང་ནུས་ཅི་ཡོད་ཀྱིས་ཞབས་ཕྱི་སེམས་གཏིང་ནས་ཞུས་ཀྱང་། སྐྱེས་སྦྱོང་གི་ཤེས་ཡོན་དང་ཉམས་མྱོང་ཞན་པ་བཅས་ཀྱི་དབང་གིས་སྐྱོན་ཆ་དང་ནོར་འཁྲུལ་རིགས་ཅི་ཡང་ཡོད་ངེས་པས་རྒྱ་ཆེའི་གཟིགས་པ་པོ་རྣམས་ནས་བཀའ་བཀྱོན་དང་བཅས་ལེགས་བཅོས་ཡོ་བསྲང་གི་དགོངས་འཆར་ལྷུག་སྩོལ་ཡོད་པ་ཞུ་རྒྱུ་བཅས།
བསོད་ནམས་ཆོས་འཕེལ་གྱིས་ཁྲིན་ཏུའི་གྲོང་ཁྱེར་ནས། ༢༠༡༡ལོའི་ཟླ་བ་༥ཚེས་༣ལ།
ཐེག་པ་ཆེན་པོ་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ཀྱི་འགྲེལ་ཆུང་པདྨ་དཀར་པོའི་འཁྲི་ཤིང་།
༄༅། །མཧཱཡཱནཨུཔདེཤཤཱསྟྲཙིནྟཱརཏྣཀོཥཔྲྀཏྟིཨལམཱཔུཎྜརིཀཁཊྭངྒནམབིཧརཏིསྨ།
༄༅། །ཐེག་པ་ཆེན་པོ་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ཀྱི་འགྲེལ་ཆུང་པདྨ་དཀར་པོའི་འཁྲི་ཤིང་ཞེས་བྱ་བ་བཞུགས་སོ། །
ན་མོ་གུ་རུ་མཉྫུ་ཤྲཱི་ཡེ། རང་བཞིན་འོད་གསལ་བདེ་གཤེགས་སྙིང་པོའི་ཁམས། །གློ་བུར་སྒྲིབ་པའི་སྦུབས་ལས་ཡོངས་གྲོལ་བས། །ཟག་མེད་ཡོན་ཏན་མཁའ་དང་རབ་མཉམ་པའི། །སྐུ་གསུམ་སྟོན་འཁོར་བསྟན་པར་བཅས་ཀུན་རྒྱལ། །རྒྱལ་བའི་ཆོས་ཚུལ་ཟབ་དང་རྒྱ་ཆེའི་བཅུད། །ཇི་བཞིན་སྡུད་མཁས་ཀུན་མཁྱེན་ཆོས་ཀྱི་རྗེ། །དེ་ཡི་རིང་ལུགས་འཛིན་མཛད་བརྒྱུད་པར་བཅས། །དཔལ་མགོན་བླ་མའི་ཞབས་ལ་ཕྱག་བྱས་ནས། །བསྟན་ལ་གུས་དང་གཞན་ལ་ཕན་འདོད་བློས། །འཇམ་དཔལ་དགྱེས་པའི་གསུང་གི་སྒྲོན་མ་ལ། །བརྟེན་ནས་ཡིད་བཞིན་མཛོད་ཀྱི་ཚིག་གི་འགྲེལ། །ངོ་མཚར་པདྨ་དཀར་པོའི་འཁྲི་ཤིང་སྤེལ། །འདིར་གདོད་མའི་མགོན་པོ་དཔལ་ཀུན་ཏུ་བཟང་པོ་དང་ཞལ་མི་གཉིས་པ་ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་ཀྱི་ཞལ་སྔ་ནས་སྩལ་པའི། ཐེག་པ་ཆེན་པོ་ཟབ་པ་དང་རྒྱ་ཆེའི་གནད་མཐའ་དག་གསལ་བར་སྟོན་པའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་འདི་ཉིད། ཐམས་ཅད་མཁྱེན་པ་མི་ཕམ་འཇམ་དཔལ་དགྱེས་པའི་རྡོ་རྗེའི་གསུང་གི་སྒྲོན་མེའི་སྣང་བ་ལ་བརྟེན་ནས་ཚིག་འགྲེལ་མདོར་བསྡུས་སུ་འཆད་པ་ལ། མཚན་གྱི་དོན། བྱ་བ་རྩོམ་པའི་ཕྱག གཞུང་གི་དོན། མཇུག་གི་དོན་དང་བཞི་ལས། དང་པོ་ནི། རྒྱ་གར་སྐད་དུ། མ་ཧཱ་ཡཱ་ན་ཨུ་པ་དེ་ཤ་ཤསྟྲ་ཙིནྟཱ་རཏྣ་ཀོ་ཥ་ནཱ་མ། བོད་སྐད་དུ། ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའིམཛོད་ཅེས་བྱ་བ། དེ་གཉིས་ཤན་སྦྱར་ན། མ་ཧཱ་ཡཱ་ན། ཐེག་པ་ཆེན་པོའི། ཨུ་པ་དེ་ཤ། མན་ངག་གི་ཤཱསྟྲ། བསྟན་བཅོས། ཙིནྟཱ་རཏྣ་ཡིད་བཞིན་རིན་པོ་ཆེའི། ཀོ་ཥ་མཛོད། ནཱ་མ་ཅེས་བྱ་བ་སྟེ། མཚན་གྱི་དོན་ནི། ཡཱ་ནའི་སྒྲ་ལས་དྲངས་ན་ཁྱོགས་སམ་བཞོན་པ་ལ་འཇུག་པས་གང་དུ་འདེབས་པར་བྱེད་པའི་དོན་གྱིས་ཐེག་པ་སྟེ། དབྱེ་ན་འདིས་འདེགས་པ་ལམ་དང་། འདིར་འདེགས་པ་འབྲས་བུའི་ཐེག་པ་གཉིས་སོ། །དེ་ལ་ཡང་། དམིགས་པ་དང་། སྒྲུབ་པ་དང་། ཡེ་ཤེས་དང་། བརྩོན་འགྲུས་དང་། ཐབས་མཁས་དང་། གྲུབ་པ་དང་། ཕྲིན་ལས་ཏེ་ཆེན་པོ་བདུན་དང་ལྡན་པས་ཆེན་པོ། ཚེགས་ཆུང་ངུས་དོན་ཆེན་པོ་བདེ་བླག་ཏུ་རྟོགས་པར་བྱེད་ནུས་པས་མན་ངག་གི། འཆོས་སྐྱོབ་ཀྱི་ཡོན་ཏན་གཉིས་དང་ལྡན་པས་བསྟན་བཅོས། དམ་ཆོས་རྒྱ་མཚོ་ལྟ་བུའི་སྙིང་པོ་བསྡུས་པའི་ལམ་དང་འབྲས་བུའི་འདོད་པ་ཐམས་ཅད་འཇོ་བས་ཡིད་བཞིན་རིན་པོ་ཆེའི་མཛོད་ཅེས་བྱ་བ་སྟེ་དཔེ་དོན་འབྲེལ་བ་ཅན་གྱི་སྒོ་ནས་སོ། །གཉིས་པ་ནི། ཉོན་མོངས་པ་དང་ཉེས་པའི་ཟུག་རྔུ་ཀུན་དང་བྲལ་བས་འཇམ་ཞིང་། མཁྱེན་གཉིས་སམ་དོན་གཉིས་ལྷུན་གྱིས་གྲུབ་པའི་དཔལ་དང་ལྡན་པ་རྒྱལ་ཀུན་ཡེ་ཤེས་ཀྱི་སྐུ་ཅན་རྟག་པར་བགྲེས་རྒུད་གཞོམ་གཞིག་དང་བྲལ་བ་རྒྱལ་སྲས་གཞོན་ནུའི་ཚུལ་འཆང་བས་གཞོན་ནུར་གྱུར་པ་དེ་ལ་ཕྱག་འཚལ་ལོ། །ཞེས་སོ། །གསུམ་པ་ལ། བསྟན་བཅོས་རྩོམ་པ་ལ་འཇུག་པའི་ཡན་ལག བརྩམ་བྱ་བསྟན་བཅོས་ཀྱི་ལུས་དངོས། མཇུག་ཡོངས་སུ་རྫོགས་པའི་བྱ་བ་དང་གསུམ། དང་པོ་ལ། མཆོད་པར་བརྗོད་པ། རྩོམ་པར་དམ་བཅའ་བ་གཉིས། དང་པོ་ནི། དམིགས་མེད་ཞི་བའི་ཐུགས་རྗེའི་མཁའ་དབྱིངས་རང་བཞིན་གྱིས་འོད་གསལ་ཞིང་ངོ་བོ་ཉིད་ཀྱིས་རྣམ་པར་དག་པ་ནི་ཆོས་ཀྱི་སྐུ་ཡིན་ལ། ལོངས་སྤྱོད་རྫོགས་པའི་སྐུ་ནི་ཤེས་བྱ་ཐམས་ཅད་གཟིགས་པའི་མཁྱེན་པ་དང་སེམས་ཅན་ཐམས་ཅད་ལ་བརྩེ་བའི་བྱམས་པ་ཆེན་པོ་གཉིས་ཀྱི་ཟླ་བའི་དཀྱིལ་འཁོར་ཀུན་ནས་གང་བས་མཛེས་པར་བྱས་ཤིང་། དེ་ཉིད་ཀྱི་ངང་ལས་མཐའ་ཡས་པའི་སྐྱེ་དགུའི་འདོད་པ་ཐམས་ཅད་སྟེར་བའི་སྤྲུལ་པའི་རྣམ་པར་རོལ་པ་ཚད་མེད་པ་མངོན་པར་སྣང་བ་ཅན་ཏེ། དེས་གནས་སྐབས་སུ་ཕན་པ་དང་མཐར་ཐུག་ཞི་བདེའི་དོན་གཉིས་ཀྱི་འོད་ཟེར་སྟོང་ཕྲག་སེམས་ཅན་གྱི་ཁམས་ལ་འཕྲོ་བའི་ཕྲིན་ལས་བསམ་མི་ཁྱབ་པ་མངའ་བ་དེ་ལ་ཕྱག་འཚལ་ལོ། །ཞེས་པའོ། །འདིས་སངས་རྒྱས་དང་བྱང་ཆུབ་སེམས་དཔའ་ཆེན་པོ་རྣམས་ལ་བསྔགས་པ་སྟེ། དེ་ཡང་སངས་རྒྱས་རྣམས་སྐུ་གསུམ་མཚན་ཉིད་པ་དང་། བྱང་སེམས་རྣམས་ཀྱང་རྗེས་མཐུན་ཐོབ་པས་དེ་སྐད་དུ་བྱ་ཞིང་། འདིས་བསྟན་བཅོས་འདི་ཉིད་ཀྱི་རྡོ་རྗེའི་གནས་བརྗོད་བྱ་ཟབ་རྒྱས་ཀུན་བསྡུས་ཏེ། གཞི་སྐུ་གསུམ་དབྱེར་མེད་ལྷུན་གྲུབ། ལམ་སྐུ་གསུམ་དབྱེར་མེད་ཟུང་འཇུག འབྲས་བུ་སྐུ་གསུམ་དབྱེར་མེད་བདེ་བ་ཆེན་པོ་ངོས་བཟུང་པའོ། །དེ་ལྟར་མཆོད་པར་བརྗོད་པས། བསྟན་བཅོས་ཀྱི་རང་བཞིན་རྟོགས་པ། རྩོམ་པ་མཐར་ཕྱིན་པ། བློ་གྲོས་མཆོག་ཏུ་འགྱུར་བ། བར་ཆད་ཞི་བ། རང་ཉིད་དམ་པར་རྟོགས་པ་སྟེ་དགོས་པ་ལྔ་དང་ལྡན་པ་ཡིན་ནོ། །གཉིས་པ་ནི། བྱང་ཆུབ་འདོད་པའི་སྐྱེ་བོ་གང་ཡིན་པ་ནི་ཆོས་ཀྱི་སྐལ་བ་བཟང་པོ་ཅན་ཏེ། དེ་རྣམས་ཀྱིས་དོན་དུ་གཉེར་བར་བྱ་བ་གང་ཡིན་ན། ཐར་པའི་མཆོག་མི་གནས་པའི་མྱང་འདས་ཡིན་ཏེ། མྱང་འདས་དེ་ཉིད་དངོས་སམ་བརྒྱུད་ནས་སྒྲུབ་པའི་ཐབས་མང་དུ་མཆིས་པ་ལས། ཀུན་གྱི་ནང་ནས་རྩེ་མོར་གྱུར་པ་སྟེ་དེ་ལས་གོང་ན་མེད་པ་ཞིག དེང་སང་གི་དུས་འདིར་གཞུང་རྩོམ་པ་པོ་ཀུན་མཁྱེན་ཆོས་རྗེ་བདག་གིས་ཟབ་ཅིང་རྒྱ་ཆེ་བའི་ཚུལ་གྱིས་རབ་ཏུ་གསལ་བར་བྱའོ། །ཞེས་བརྩམ་པ་མཐར་ཕྱིན་པར་བྱ་བའི་ཕྱིར་དམ་བཅའ་བ་སྟེ། གཞན་དུ་བྱ་དཀའ་བ་དང་། སྒྱིད་ལུག་པ་དང་། གཞན་གྱིས་འཚེ་བ་དང་། རང་གི་སྐྱོ་ངལ་མཐོང་ནས་བར་མ་དོར་འདོར་བར་སེམས་པ་ལས་ཡོངས་སུ་བསྲུང་བའི་ཕྱིར་རོ། །བསྟན་བཅོས་འདིའི་དགོས་འབྲེལ་ནི། ཟབ་དང་རྒྱ་ཆེའི་གནས་ཀྱི་ཁྱད་པར་གང་ཞིག་འཁོར་བ་སྤང་ཞིང་ཐར་བ་བསྒྲུབ་པར་འདོད་པས་ཐོས་བསམ་སྒོམ་གསུམ་གྱི་ངོ་བོ་གང་ཡིན་པ་ནི་འདིས་བརྗོད་བྱ། དེའི་རང་བཞིན་ལེའུ་ཉེར་གཉིས་ལས་ལེགས་པར་བརྟགས་ཏེ་འདི་ལ་བརྟེན་ནས་ཐར་ལམ་དུ་ཞུགས་པ་དགོས་པ། ཞུགས་པ་མཐར་ཕྱིན་པའི་བྱང་ཆུབ་འགྲུབ་པ་ཉིང་དགོས། དེ་དག་གཅིག་ལ་གཅིག་བརྟེན་ནས་འབྱུང་བ་འབྲེལ་བའོ། །གཉིས་པ་ལ། འཁོར་བའི་རང་བཞིན་སྤང་བྱར་བསྟན་པ་དང་། མྱ་ངན་ལས་འདས་པའི་རང་བཞིན་བླང་བྱར་བསྟན་པ་གཉིས། དང་པོ་ལ། སྣང་ཚོད་འཇིག་རྟེན་གྱི་བཀོད་པ་དང་། དེ་དག་གི་བདེ་སྡུག་གི་སྣང་ཚུལ་བསྟན་པ་གཉིས། དང་པོ་ལ། གཞི་གང་ལས་སྣང་བ་དང་། གང་སྣང་བའི་འཇིག་རྟེན་གཉིས། དང་པོ་ལ། གཞི་ཆོས་ཉིད་ངོས་བཟུང་བ་དང་། དེ་ལས་ཇི་ལྟར་སྣང་ཚུལ་གཉིས། དང་པོ་ནི། ཐོག་མའི་ཆོས་ཉིད་དེ་ཐོག་མ་མེད་པ་ནས་གནས་པས་འཕོ་འགྱུར་མེད་པ། ཉི་ཟླ་ལྟར་རང་བཞིན་གྱིས་འོད་གསལ་བའི་ལྷུན་གྲུབ་ཆེན་པོ་སྐུ་དང་ཡེ་ཤེས་འདུ་འབྲལ་མེད་པའི་བདེ་གཤེགས་སྙིང་པོ་ཉིད་ཡིན་ལ། དེ་ལ་འཁོར་འདས་ཀྱི་ཆོས་ཀུན་བརྟེན་པའི་ཆ་ནས་གནས་ལུགས་དོན་གྱི་ཀུན་གཞི་ཞེས་བྱ། དེ་ཉིད་རང་བཞིན་གྱིས་སྟོང་ཞིང་བདག་མེད་པ་སྤྲོས་པའི་སྤྱོད་ཡུལ་ལས་འདས་པའི་འདུས་མ་བྱས་ཆེན་པོ། ཡེ་ནས་རྣམ་པར་དག་པ་ཉི་མཁའ་ལྟ་བུ་དེ་ཉིད་ཀྱི་ངང་ལས་མ་རིག་པའི་བག་ཆགས་གཡོས་པས་སེམས་ཅན་རྣམས་འཁྲུལ་ཏེ། དེ་ཡང་ཐོག་མེད་ནས་གནས་པའི་འོད་གསལ་ཆེན་པོ་ཉི་མ་ལྟ་བུ། འདུས་མ་བྱས་ཤིང་ཡེ་ནས་རྣམ་པར་དག་པ་ནམ་མཁའ་ལྟ་བུ་སྟེ། མཁའ་ཉིས་མཚོན་པའི་སྣང་སྟོང་ཟུང་འཇུག་ཆེན་པོ་འཁོར་འདས་ཀུན་ལ་ཁྱབ་པའི་གཞི་དབྱིངས་དེར། འཁོར་ཆོས་ལས་དང་ཉོན་མོངས་པ་རྣམས་བརྟེན་པ་མེད་པའི་ཚུལ་གྱིས་བརྟེན་པ་ནི་ཉི་མཁའི་ངོ་བོ་ལ་སྤྲིན་ཕུང་བརྟེན་པ་ལྟར་གཞི་ལ་མ་རེག་མ་འབྱར་ལ་དེའི་ངང་ལ་གནས་པ་སྟེ། དོན་ལ་རང་བཞིན་མེད་པས་རྟེན་བརྟེན་པར་མ་གྲུབ་བཞིན་དུ་བརྟེན་པར་སྣང་བ་ནི་བཏགས་པ་སྟེ། རྒྱུད་བླ་མ་ལས། ས་ནི་ཆུ་དང་ཆུ་རླུང་ལ། །རླུང་ནི་མཁའ་ལ་རབ་ཏུ་གནས། །མཁའ་ནི་རླུང་དང་ཆུ་དག་དང་། །ས་ཡི་ཁམས་ལ་གནས་མ་ཡིན། །དེ་བཞིན་ཕུང་པོ་ཁམས་དབང་རྣམས། །ལས་དང་ཉོན་མོངས་དག་ལ་བརྟེན། །ལས་དང་ཉོན་མོངས་ཚུལ་བཞིན་མིན། །ཡིད་ལ་བྱེད་ལ་རྟག་ཏུ་གནས། །ཚུལ་བཞིན་མ་ཡིན་ཡིད་བྱེད་ནི། །སེམས་ཀྱི་དག་པ་ལ་རབ་གནས། །སེམས་ཀྱི་རང་བཞིན་ཆོས་རྣམས་ནི། །ཐམས་ཅད་ལ་ཡང་གནས་མ་ཡིན། །ཞེས་སོ། །མྱ་ངན་ལས་འདས་པའི་ཆོས་རྣམས་ཉི་མ་དང་ཟེར་ལྟར་དབྱེར་མེད་དུ་བརྟེན་ཏེ་ཡེ་ནས་འདུ་འབྲལ་མེད་པར་གནས་པའི་ཕྱིར་རོ། །གཉིས་པ་ལ། ཇི་ལྟར་སྣང་ཚུལ་དངོས། དེའི་རང་བཞིན་བརྟག་ཅིང་ཤེས་པར་གདམས་པ་གཉིས། དང་པོ་ལ། བག་ཆགས་གསུམ་གྱིས་སྣང་བ་འབྱུང་ཚུལ་མདོར་བསྟན། དེ་རྒྱས་པར་བཤད་པ་གཉིས། དང་པོ་ནི། ཐོག་མེད་ཀྱི་མ་རིག་པའི་སྟོབས་ཀྱིས་མེད་བཞིན་ཀུན་ཏུ་བརྟགས་པའི་གློ་བུར་སྒྲིབ་པའི་སྤྲིན་དང་འདྲ་བ། གཟུང་བ་དང་འཛིན་པར་འཁྲུལ་པ་མངོན་གྱུར་མིན་པའི་བག་ལ་ཉལ་ལངས་པས། གཟུགས་སོགས་ཡུལ་དང་དེ་འཛིན་པའི་རྣམ་ཤེས་ཀྱི་ཚོགས་དོན་དང་རང་གི་ལུས་སུ་མེད་བཞིན་སྣང་བའི་བག་ཆགས་ཏེ། དེའི་དབང་གིས་རིག་པའི་རང་བཞིན་འོད་གསལ་བའི་སྙིང་པོ་མེ་ལོང་གི་སྟེང་དུ་རྡུལ་ཆགས་པ་ལྟར་བསྒྲིབས་ཏེ། དེ་ཡང་ཐོག་མེད་ནས་རྗེས་སུ་ཞུགས་པའི་མ་རིག་པ་ནི་མེད་བཞིན་ཡོད་པར་སྣང་བའི་རྣམ་རྟོག་ཙམ་ཡིན་པས་འདི་ཙམ་ན་ཡོད་མེད་ཅེས་བཞག་མི་ཤེས་ལ། དངོས་པོའི་དེ་ཁོ་ན་ཉིད་ཇི་བཞིན་མི་མཐོང་བའི་མ་རིག་པ་དེས་ཀུན་བརྟགས་གློ་བུར་གྱི་འཁྲུལ་པ་བསྐྱེད་ལ། དེ་ཡང་གཟུང་འཛིན་གྱི་བདེན་ཞེན་ཕྲ་མོ་ནས་བརྩམས་ཏེ། བག་ཆགས་གསུམ་སྨིན་པའི་ཡུལ་དོན་ལུས་རགས་པ་སྣང་བའི་བར་གྱིས་སྣང་བ་དེ་ཡིས་ཁམས་སྒྲིབ་པ་སྟེ། སྒྱུ་འཕྲུལ་དྲྭ་བ་ལས། ཨེ་མ་ཧོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །ཞེས་པ་ལྟར་རོ། །དེ་ལྟ་བུའི་འཁྲུལ་པ་མ་རིག་པ་བརྟགས་ན་མེད་བཞིན་པ་ཡིན་པ་དེ་མེད་སྣང་སྒྱུ་མའི་རོལ་པ་ལྷན་སྐྱེས་ཀྱི་ཡེ་ཤེས་ལས་མི་འདའ་ཡང་འགྲོ་བ་རྣམས་དེས་འཁྲུལ་གཞི་བྱས་ཏེ་མེད་བཞིན་དུ་སྲིད་པར་འཁྱམས་པའོ། །དཔེ་ཇི་ལྟར་ན་སྤྲིན་གྱིས་མཁའ་དབྱིངས་ལ་གནས་པའི་ཉི་མ་བསྒྲིབས་པར་གྱུར་པ་ན་ཉི་མ་མི་སྣང་སྤྲིན་སྣང་བ་བཞིན་དུ། གདོད་མ་ནས་འོད་གསལ་བའི་དབྱིངས་དང་ཡེ་ཤེས་ཉི་མཁའ་ལྟ་བུ་དང་ཆོས་སྐུ་དང་གཟུགས་སྐུ་ལ་ཡོད་པའི་ཡོན་ཏན་ཚད་མེད་པ་དག་སོ་སྐྱེའི་གནས་སྐབས་ན་མི་མངོན་པར་འཁྲུལ་སྣང་སྤྲིན་འདྲ་བའི་བདེ་སྡུག་སྣ་ཚོགས་སུ་སྣང་བ་ཡིན་ནོ། །དེ་ལྟར་སེམས་ཀྱི་རང་བཞིན་འོད་གསལ་ཞིང་། སྒྲིབ་པ་སྦྱང་རུང་གློ་བུར་བ་ཡིན་ཏེ། རྣམ་འགྲེལ་ལས། སེམས་ཀྱི་རང་བཞིན་འོད་གསལ་ཉིད། །སྒྲིབ་པ་རྣམས་ནི་གློ་བུར་བ། །ཞེས་སོ། །དེ་བཞིན་དུ། འཇིག་རྟེན་ན་སྤྲིན་ལས་ཆར་བྱུང་སྟེ་དེས་ལོ་ཏོག་འཕེལ་བར་བྱེད་པ་བཞིན་དུ། མ་རིག་གཟུང་འཛིན་གྱི་སེམས་སྤྲིན་འོད་གསལ་བའི་དབྱིངས་ལ་རབ་ཏུ་གཡོས་པས། འཁོར་བར་འདུ་བྱེད་པའི་དགེ་བ་དང་སྡིག་པའི་ལས་ཀྱི་ཆར་བབས་པ་སྟེ་རབ་ཏུ་མང་པོ་བསགས་པ་དེས་བསྐྱེད་པའི་འབྲས་བུ་ནི་ཁམས་གསུམ་འཁོར་བའི་རང་བཞིན་ནོ་སྟེ། ལས་སྣང་སོ་སོར་བདེ་སྡུག་སྣ་ཚོགས་ཀྱི་ལོ་ཏོག་འཕེལ་བར་བྱེད་པ་ཡིན་ནོ། །གཉིས་པ་རྒྱས་བཤད་ལ། སྣང་བ་གསུམ་གྱི་རང་བཞིན་དངོས་བསྟན་པ་དང་། དེ་ལ་ལོག་རྟོག་དགག་པ་གཉིས། དང་པོ་ལ་བསྟན་བཤད་བསྡུ་གསུམ་ལས། དང་པོ་ནི། འཁོར་བར་མེད་བཞིན་འཁྲུལ་པའི་སྣང་བ་ཇི་སྙེད་པ་དེ་ཐམས་ཅད་ཀྱང་བསྡུ་ན་གནས་དོན་ལུས་ཀྱི་བག་ཆགས་གསུམ་དུ་འདུ་བ་ཉིད་ལས་ཞེས་སོ། །གཉིས་པ་ནི། ཐོག་མེད་ནས་བག་ཆགས་རྣམ་པ་མི་འདྲ་བ་གསུམ་ཀུན་གཞི་ལ་བཞག་པས་སྣང་བ་མི་འདྲ་བ་གསུམ་འབྱུང་སྟེ། དེ་ཡང་ཡུལ་གྱི་བག་ཆགས་སྣོད་བཅུད་ཀྱི་འཇིག་རྟེན་གྱིས་བསྡུས་པ་དང་། དེ་ལ་བརྟེན་པའི་གཟུགས་སོགས་ཡུལ་ལྔ་པོ་རྣམས་ནི་ཕྱི་ནང་གང་ནའང་མེད་ཀྱང་ཕྱི་རོལ་ན་ཡོད་པ་ལྟར་དོན་དུ་ཞེན་ནས་ཡུལ་དུ་བྱེད་པ་སྟེ། ཞེན་ཡུལ་ལ་འདི་ནི་གཟུགས་སོ་ཞེས་སོགས་ཕྱི་རོལ་དུ་རྟོག་པ་ནི་གཟུང་བའི་རྟོག་པའོ། །ནང་བདག་ཉིད་ཀྱི་སེམས་སུ་སྣང་བ་དོན་གྱི་བག་ཆགས་རྣམ་ཤེས་ཚོགས་བརྒྱད་དེ་བག་ཆགས་སྣ་ཚོགས་པའི་ཀུན་གཞི་ལ་རྟེན་ཀུན་གཞིའི་རྣམ་ཤེས་དང་། དེ་ལས་མཆེད་པ་གཞན་རྣམས་ཏེ། དེ་དག་ལ་རྟོག་པ་ནི་འཛིན་པའི་རྣམ་རྟོག་གོ །ཇི་ལྟར་འཛིན་པ་ཡིན་ཞེ་ན། ཀུན་གཞི་བག་ཆགས་ཀྱི་ས་པ་དེ། ངོ་བོ་ནི་མ་རིག་པ། རྣམ་པ་ཡུལ་སྣང་གང་དང་ཡང་མ་འབྲེལ་བའི་རྟོག་མེད་ཙམ་དུ་གནས་པ་གཟུགས་མེད་པའི་བག་ཆགས་འཛིན་པ་ཡིན་ལ། དེའི་ངང་ལས་གསལ་དྭངས་རིག་པའི་ཆ་ཙམ་ཡུལ་དང་མ་འབྲེལ་བ་ནི་ཀུན་གཞིའི་རྣམ་ཤེས་ཏེ་གཟུགས་ཀྱི་བག་ཆགས་འཛིན་ཅིང་། དེ་ལས་མཆེད་པའི་མིག་སོགས་སྒོ་ལྔའི་རྣམ་ཤེས་རྟོག་མེད་ཀྱང་གཟུགས་ཀྱི་ས་པའི་ཏིང་ངེ་འཛིན་གྱི་བག་ཆགས་འཛིན་ཏོ། །ཉོན་མོངས་པ་ཅན་གྱི་ཡིད་དང་། ཡིད་ཤེས་གཉིས་ཀྱིས་ནི་འདོད་པའི་བག་ཆགས་འཛིན་ཏེ། ཚོགས་བརྒྱད་པོ་དེ་དག་ཀྱང་རང་རང་གི་ཡུལ་རྟོག་མེད་དང་རྟོག་བཅས་ཀྱི་འཛིན་པ་ཡིན་པའི་ཕྱིར་སེམས་ཞེས་བྱ། དེས་ཀུན་ནས་བསླང་སྟེ་བསགས་པའམ་དེ་ལ་བརྟེན་པའི་དགེ་སྡིག་གི་ལས་རྣམས་ནི་སེམས་ལ་བག་ཆགས་པ་གསེར་ལ་གཡའ་བཞིན་དུ་གནས་སོ། །ལུས་ཀྱི་བག་ཆགས་འགྲོ་དྲུག་སོ་སོའི་གཟུགས་སམ་ལུས་སུ་སྣང་ཞིང་མངོན་པར་ཞེན་པ་སྟེ། དེ་ཡང་ལུས་བྱིང་ཙམ་དང་། དེ་ལ་བརྟེན་པའི་ཡན་ལག་དང་ཉིང་ལག་གི་ཚོགས་པ་ཐམས་ཅད་ལ་ལུས་ཞེས་བརྟག་གོ །ཐ་ན་རྨི་ལམ་དུའང་མེ་ཆུ་གཡང་ས་སོགས་ལ་འཇིགས་ཤིང་འཛེམ་པ་དང་། སྡུག་བསྔལ་གྱི་རྣམ་པ་སྣ་ཚོགས་སུ་མྱོང་བར་བྱེད་པའོ། །གསུམ་པ་ནི། དེ་གསུམ་སོ་སོར་སྣང་བའི་དོན། དེ་ལྟར་ཀུན་གཞིའི་སྟེང་དུ་བག་ཆགས་གསུམ་པོ་དེ་ཐོག་མ་མེད་པའི་དུས་ནས་བཞག་པ་དེ་ཡི་རྒྱུན་མཐུད་དེ་གོམས་པས་ཚེ་ར བས་ཀུན་དུ་བག་ཆགས་ཉིད་མ་ཟད་ཀྱི་རིང་ལ་དེ་ལྟར་སྣང་བ་ཡིན་ཏེ། མདོ་རྒྱན་ལས། རྣམ་གསུམ་རྣམ་གསུམ་སྣང་བ་ཅན། །ཞེས་སོ། །གཉིས་པ་ལོག་རྟོག་དགག་པ་ནི། ཐེག་ཆེན་གྱི་ཚུལ་མི་ཤེས་པ་དག་སྣོད་བཅུད་འཁོར་འདས་ཐམས་ཅད་རང་གི་སེམས་ཡིན་ནོ་ལོ་སྟེ་ཡིན་ཞེས་མངོན་རློམ་བཅས་སྨྲ་བར་བྱེད་ལ། དེ་ལྟར་ན་ཐེག་ཆེན་ལས་སྣང་བ་རྣམ་པ་གསུམ་གསུངས་པའི་དོན་ལ་ཤིན་ཏུ་རྨོངས་ཏེ། སེམས་སུ་བག་ཆགས་བཞག་པ་དག་སེམས་ཡིན་གྱི། ལུས་དང་ཡུལ་དུ་བཞག་པ་དག་སེམས་ག་ལ་ཡིན། ཡིན་ན་སྐྱོན་མང་པོ་ཡོད་དེ། ལུས་སྣང་བ་ལྟར་ཡོད་རེག་གཟུགས་སུ་ཡོད་པ་ལྟར། སེམས་ཀྱང་དེར་ཐལ་བ་དང་། སེམས་བཞིན་ལུས་ཀྱང་མཐོང་མི་རུང་བ་དང་། སེམས་ལ་མདོག་དབྱིབས་སོགས་ཡོད་པར་ཐལ་བ་དང་། གཅིག་སངས་རྒྱས་པའམ་ངན་སོང་དུ་སོང་དུས། དེ་ལ་གང་སྣང་ཀུན་དེར་འགྱུར་བ་དང་། མང་པོ་སྣང་ཡུལ་གཅིག་པས་ཤེས་པ་གཅིག་ཏུ་འགྱུར་བ་དང་། སྣང་བ་ཞིག་ན་སེམས་དེར་འགྱུར་བ་དང་། ས་ཆུ་མེ་རླུང་སེམས་པ་ཅན་དུ་འགྱུར་བས་མུ་སྟེགས་རིག་བྱེད་པ་དག་གི་ཕྱོགས་ལ་བསླན་པར་རིགས་སོ། །ཕན་ཚུན་འཆོལ་ཏེ། ཤེས་པས་ཡུལ་རིག་པ་ལྟར་བེམ་པོས་ཀྱང་རིག་པར་ཐལ་ཞིང་། ཕྱི་ནང་ཡོད་གནས་ཀྱང་བརྗེས་ཏེ་སེམས་ཕྱི་ན་ཡོད་པ་དང་། ཕྱི་ནང་དུ་སྣང་བར་མི་འཐད་དེ་ངོ་བོ་གཅིག་པས་སོ། །ཧ་ཅང་ཐལ་ཏེ། རང་མ་སྐྱེས་བའི་དུས་ནས་རང་སེམས་ས་ཕྱོགས་འདིར་གྲུབ་པར་ཐལ་པ་དང་། རང་ཤི་ན་ཕྱོགས་འདིའི་སྣང་བ་ཐམས་ཅད་ཕྱོགས་འདིར་མེད་པར་ཐལ་ཏེ་འདི་རང་གི་སེམས་ཡིན་ལ། སེམས་དེ་རང་གི་རྗེས་སུ་འགྲོ་ལྡོག་བྱེད་པའི་ཕྱིར་རང་ཡུལ་གཞན་དུ་སོང་ན་སྣང་བ་སེམས་འདི་ཡང་དེར་འགྲོ་བར་ཐལ། ཡང་ན་རང་སེམས་འདིར་ལུས་པར་ཐལ། དེ་ལ་སོགས་པ་སྐྱོན་གྱི་རྣམ་གྲངས་རབ་ཏུ་མང་བའི་ཕྱིར་སྐྱོང་བྱེད་ཅེས་བ་ལང་རྫིའི་མིང་སྟེ་དེ་དག་གི་ལུགས་ངན་པ་དེ་སྤོངས་ཤིག དེ་དག་ན་རེ། ཀྱེ་རྒྱལ་བའི་སྲས་དག་ཁམས་གསུམ་པོ་འདི་དག་ནི་སེམས་ཙམ་མོ་ཞེས་སོགས་བཅོམ་ལྡན་འདས་ཀྱིས་གསུངས་པས་སེམས་མ་ཡིན་ནམ་ཞེ་ན། དེ་ནི་སྣང་བ་དང་སྣང་ཡུལ་ཐ་དད་པའི་དབང་དུ་བྱས་པའི་སྣང་བ་སེམས་ཡིན་པར་གསུངས་ཏེ་སྣང་མི་སྣང་དུ་འཛིན་པ་རང་སེམས་ཡིན་གྱི། སྣང་ཡུལ་རི་སོགས་སེམས་ཡིན་པར་མ་གསུངས་སོ། །དེས་ན་ངྷ་དུ་རའི་སྣང་བ་ལྟར་ཕྱི་ནང་གང་དུ་མ་གྲུབ་པས་མེད་སྣང་འཁྲུལ་པའི་སྣང་བ་ཙམ་དོན་ལ་ཡིན་ཀྱང་། ཐ་སྙད་དུ་དེ་གཉིས་གཅིག་མིན་པས། དེ་ལ་སྣང་བ་དང་སྣང་ཡུལ་བྱེད་པ་ཤིན་ཏུ་གཅེས་སོ། །གཉིས་པ་སྣང་བ་དེ་དག་གི་རང་བཞིན་ཤེས་པར་བྱ་བ་ལ། དངོས་དང་། དེ་ལྟར་བརྟགས་པའི་ཕན་ཡོན་གཉིས། དང་པོ་ལ། སྣང་གསུམ་སྒྱུ་མ་ལྟར་སྣང་བར་ཤེས་པ་དང་། སྣང་བ་དེ་དག་སེམས་ལ་རག་ལས་པར་བསྟན་པ་གཉིས། དང་པོ་ནི། འདི་ལྟར་ཡུལ་དུ་སྣང་བ་ལས་གཟུང་བའི་རྣམ་རྟོག་སྐྱེ་བ་དང་། དོན་ཚོགས་བརྒྱད་ལས་འཛིན་པའི་རྣམ་རྟོག་སྟེ་དེ་ལྟར་གཟུང་འཛིན་རྣམ་གཉིས་སྐྱེ་ཞིང་། དེ་ཡི་ལུས་ནི་བདེ་སྡུག་ལས་བྱུང་བའི་ཉོན་མོངས་པ་གསུམ་འཛིན་པའི་གཟེབ་དང་བདེ་སྡུག་བསྒྲུབ་པར་བྱ་བའི་གནས་དང་གཟུང་འཛིན་དུ་སྐྱེ་བའི་རྟེན་བྱེད་དེ། མི་མཁས་པའི་དབང་གིས་སྣང་བ་གསུམ་ལ་བདེན་པར་ཞེན་པས་རྟག་ཏུ་སྲིད་པར་འཁོར་བ་ཡིན་ནོ། །དེ་ལྟར་འཁོར་བ་དང་དེ་བསྐྱེད་པའི་ལས་འདི་དག་ཐམས་ཅད་དོན་དམ་པ་ལ་ལྟོས་ན་རང་བཞིན་གྱིས་གྲུབ་པ་མེད་ན་ཡང་། ཀུན་རྫོབ་ཏུ་གཟུང་བ་དང་འཛིན་པའི་རྣམ་རྟོག་གི་དབང་གིས་རྟེན་འབྲེལ་སྒྱུ་མར་སྣང་བ་འགོག་ཏུ་མེད་པས། ཇི་སྲིད་གཟུང་འཛིན་གྱི་སེམས་དབྱིངས་སུ་མ་ནུབ་ཀྱི་བར་དུ་རྒྱུ་དང་འབྲས་བུ་དང་དགེ་སྡིག་གི་ལས་དང་ལས་དེའི་འབྲས་བུ་བདེ་སྡུག་སོགས་ངེས་པར་ཡོད་དེ་གཟུང་འཛིན་གྱི་རྟོག་པ་མ་རིག་པ་དེ་ཡིས་སྤྲུལ་པ་སྟེ། དེས་ན་ཀུན་རྟོག་དབྱིངས་སུ་མ་ནུབ་ཀྱི་བར་དུ་ལས་འབྲས་ཀྱི་བླང་དོར་ཚུལ་བཞིན་དུ་བྱ་བ་གཅེས་སོ། །གཉིས་པ་ལ་དངོས་དང་། དེའི་དཔེ་འགོད་པ་གཉིས། དང་པོ་ནི། སེམས་ཀྱིས་ཡུལ་ལ་གཡོ་བའི་ལས་འདུ་བྱེད་ཅིང་དེ་ལྟར་གཡོས་ནས་སེམས་ཀྱིས་དགེ་མི་དགེ་ལུང་མ་བསྟན་གྱི་ལས་ཀུན་སོག་པར་བྱེད་ལ། དེའི་འབྲས་བུ་ཡང་སེམས་ལ་རྨི་ལམ་ལྟར་བདེ་སྡུག་སྣ་ཚོགས་པ་སྣང་ཞིང་དེ་ལ་སེམས་ཀྱིས་གཟུང་འཛིན་དུ་བརྟགས་པས་ན། འཁོར་བའི་བྱེད་པ་པོ་འཁྲུལ་པའི་སེམས་ཡིན་པས་འདི་ཉིད་གདུལ་བའི་སླད་དུ་འབད་པར་མཛོད་ཅིག ཅེས་གདམས་པ་སྟེ། གཞི་ལས་གཞི་སྣང་བྱུང་བ་ནི་ད་ལྟའི་རིག་པ་སྐད་ཅིག་གཅིག་གི་སྟེང་ནས་བཞག་ན་ཤེས་ཀྱི། མཚན་འཛིན་རྟོག་དཔྱོད་ཀྱི་བློས་དུས་འདི་ཙམ་ནས་བྱུང་བ་ཞེས་དཔྱད་པར་མི་བྱའོ། །གཉིས་པ་ནི། དཔེ་ཇི་ལྟར་ན་དྷ་དུ་ར་ཡིས་མྱོས་པ་ལས། སྐྱེས་པ་བུད་མེད་སོགས་སྣ་ཚོགས་པའི་སྣང་བ་མི་འདྲ་བ་ཅི་ཤར་ཡང་། ཐམས་ཅད་འཁྲུལ་པའི་གཟུགས་ཏེ་དོན་ལ་མེད་པ་དེ་བཞིན་དུ་རང་སེམས་འཁྲུལ་པ་ཡི་སྟོབས་ཀྱིས་ཉེ་བར་སྦྱར་བ་ཡི། འགྲོ་བ་དྲུག་གི་འཁྲུལ་པའི་སྣང་བ་མ་ལུས་ཇི་སྙེད་པ་ཀུན། ཕྱི་ནང་གང་དུའང་མ་གྲུབ་པའི་མེད་སྣང་སྟོང་པའི་རང་བཞིན་ཅན་གྱིས་གཟུགས་བརྙན་ཡིན་པར་ཤེས་པར་མཛོད་ཅིག གཉིས་པ་བརྟགས་པའི་ཕན་ཡོན་ནི། དེ་ལྟར་ན་འཁོར་བའི་རང་བཞིན་གཟུགས་བརྙན་བཞིན་བདེན་པར་མེད་པ་འདི་ཐོག་མ་གང་ལས་བྱུང་བ་གཞི་འོད་གསལ་ཆེན་པོ་ལ་བརྟག་པར་གྱིས་ཤིག དེ་ཤེས་པ་ཡིས་མྱ་ངན་ལས་འདས་པའི་རང་བཞིན་གཉིས་སུ་མེད་པའི་ཡེ་ཤེས་ཉིད་ཤེས་ཤིང་། འཁོར་བའི་སྣང་བ་ཆ་བཅས་གཞི་མེད་དུ་གྲོལ་ཏེ་སྲིད་ལས་རྣམ་གྲོོལ་བ དེ་གཤེགས་འཇིག་རྟེན་གྱི་དབང་པོར་འགྱུར་བ་ཡིན་ནོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས་གཞི་ལས་འཁོར་བའི་གྲུབ་ཚུལ་བསྟན་པའི་ལེའུ་སྟེ་དང་པོའི་འགྲེལ་པའོ།། །། ༈ གཉིས་པ་གང་སྣང་བའི་འཇིག་རྟེན་བསྟན་པ་ལ། འདུལ་བྱེད་ཀྱི་ཞིང་ཁམས་སྤྱིི་དང་བྱེ་བྲག་མདོར་བསྟན་པ་དང་། བྱེ་བྲག་མི་མཇེད་ཀྱི་ཞིང་རྒྱས་པར་བཤད་པ་གཉིས། དང་པོ་ལ། འདུལ་བྱེད་ཞིང་དང་སྟོན་པ་སྣང་ཚུལ་མདོར་བསྟན། དེ་རྒྱས་པར་བཤད། དེ་དག་གི་དོན་བསྡུས་ཤིང་དེ་ལ་དད་པའི་ཕན་ཡོན་བསྟན་པ་གསུམ། དང་པོ། དེ་ལྟར་མ་རིག་པའི་དབང་གིས་ཁམས་གསུམ་འཁོར་བ་སྒྱུ་མ་ལྟར་སྣང་བ་ན། རྒྱལ་བའི་ཐུགས་རྗེ་ཚད་མེད་པས་གཟིགས་ཏེ་ཡོངས་སུ་གདུལ་བའི་ཞིང་ཁམས་རྣམ་པར་བཀོད་དེ། མཐའ་ཡས་པའི་འགྲོ་བའི་དོན་ཀུན་འབད་མེད་དུ་སྒྲུབ་པ་ལ་ཡིད་བཞིན་གྱི་ནོར་བུ་བཞིན་དུ། གདུལ་བྱའི་སྐལ་བ་ཇི་ལྟ་བ་བཞིན་སྲིད་པ་ནས་ཞི་བར་རབ་ཏུ་འདྲེན་པར་མཛད་དེ། གསང་སྙིང་ལས། མ་རིག་སྨིན་མཛད་འདུལ་བའི་ཕྱིར། །བྱུང་ནས་མྱ་ངན་འདའ་བར་སྟོན། །ཞེས་གསུངས་པ་ལྟ་བུ་སྟེ། ཇི་ལྟར་མཛད་པ་རྒྱ་ཆེ་བའི་ཚུལ། ཕྱོགས་བཅུ་ནམ་མཁའི་མཐའ་ཀླས་པའི་སེམས་ཅན་གྱི་ཞིང་མཐའ་ཡས་པ་རྣམས་སུ། དུས་གསུམ་གྱི་རྒྱལ་བས་ཁྱབ་ཅིང་སེམས་ཅན་གྱི་དོན་ཆེན་པོ་མཛད་པ་བསམ་མི་ཁྱབ་པ་ལས། བྱེ་བྲག་ཞིང་འདིའི་སྟོན་པས་ཇི་ལྟར་འདུལ་བའི་ཚུལ་རྣམས་རེ་ཞིག་མདོར་བསྡུས་ཏེ་རབ་ཏུ་བསྟན་པར་བྱ་བ་ནི་ཞེས་སོ། །གཉིས་པ་ལ་ཞིང་རྒྱས་བཤད་དང་། སྟོན་པ་རྒྱས་བཤད་གཉིས། དང་པོ་ལ་སྐུ་གསུམ་གྱི་ཞིང་སྤྱིར་བསྟན་པ་དང་། གཞི་སྙིང་མེ་ཏོག་གིས་བརྒྱན་ཞིང་བྱེ་བྲག་བསྟན་པ་གཉིས། དང་པོ། གཉིས་སུ་མེད་པའི་ཡེ་ཤེས་ཀྱི་བདག་ཉིད་སྟོན་པ་ཡིད་བཞིན་རྣམ་པར་རོལ་པ་དཔལ་ཀུན་ཏུ་བཟང་པོ་ཉིད་ཐོག་མ་མེད་པའི་དུས་སུ་མངོན་པར་བྱང་ཆུབ་ནས་ཆོས་སྐུའི་ངང་དེ་ལས་ལོངས་སྐུ་རིགས་ལྔའི་སངས་རྒྱས་སུ་ལྷུན་གྱིས་གྲུབ་སྟེ་ལྷུན་གྲུབ་སྟུག་པོ་བཀོད་པའི་རྒྱན་ཉིད་དུ་བཞུགས་ནས་རྒྱལ་དང་སེམས་དཔའ་གྲངས་མེད་པ་སྤྲུལ་པ་ལས། ཁྱད་པར་དུ་ཐུགས་གསུང་སྐུ་ཡི་སེམས་དཔའ་ཕྱག་རྡོར་དང་སྤྱན་གཟིགས་འཇམ་དཔལ་གསུམ་སྤྲུལ་ནས། འགྲོ་བ་དྲུག་གིས་གནས་རིས་སུ་སེམས་ཅན་སོ་སོའི་དོན་མཛད་ཅིང་དུས་རིང་ཐོག་མཐའ་མེད་པར་སྲིད་པ་ཇི་སྲིད་མ་སྟོང་གི་བར་བཞུགས་པ་ལས་ཞེས་སོ། །གཉིས་པ། དེ་ལྟ་བུའི་མཁའ་ཁྱབ་ཀྱི་ཞིང་བཀོད་པའི་ཆས་གཞལ་ན་སྐྲ་རྩེའམ་ཡུང་འབྲུའི་ཁྱོན་ཙམ་དུ་སྣང་བའི། ཁྱད་པར་མི་མཇེད་འཇིག་རྟེན་འདིའི་དོན་མཛད་པ་ཡང་ཆོས་སྐུའི་དབྱིངས་ནས་དེ་དང་དབྱེར་མེད་པའི་ཞིང་ཁམས་ཡེ་ཤེས་རིན་པོ་ཆེའི་སྣང་བ་ལས་རང་ཤར་བ་ནི་ལྷུན་གྲུབ་སྟུག་པོ་བཀོད་པའི་ཞིང་ཡིན་ལ། དེར་སྐུ་དང་ཡེ་ཤེས་འདུ་འབྲལ་མེད་པར་བཞུགས་པའི་དགོངས་པ་ལས་མི་གཡོ་བར་འོད་ཟེར་བསམ་མི་ཁྱབ་པར་སྤྲོས་ཏེ། ལོངས་སྐུའི་ཞིང་དང་སངས་རྒྱས་དཔག་ཏུ་མེད་པར་སྤྲུལ། དེ་དག་རེ་རེས་ཀྱང་བྱང་སེམས་སར་གནས་དཔག་ཏུ་མེད་པའི་དོན་མཛད་པ་དང་། ལོངས་སྐུ་དེ་དག་རེ་རེའི་ཐུགས་ཀ་ནས་ཀྱང་སྤྲུལ་སྐུའི་ཞིང་དང་སངས་རྒྱས་དཔག་མེད་སྤྲུལ་ཏེ་སེམས་ཅན་དཔག་ཏུ་མེད་པའི་དོན་མཛད་པ་ལས། བྱེ་བྲག་བཅོམ་ལྡན་འདས་རྣམ་པར་སྣང་མཛད་ཀྱི་ཞིང་ཁམས་བཀོད་དེ་དོན་མཛད་པའི་ཚུལ་ནི། རང་སྣང་འོད་གསལ་སྟུག་པོ་བཀོད་པ་ནས། ཡེ་ཤེས་རྣམ་ལྔའི་རང་རྩལ་ལས་རང་སྣང་བའི་རིགས་ལྔ་ལས་ཁྱད་པར་རྣམ་སྣང་ལས་འོད་འཕྲོས་པས་ནམ་མཁའ་ལ་འོད་ཟེར་དེ་དག་ཀུན་ཏུ་འཁྱིལ་བས་འོག་གཞི་རིན་པོ་ཆེན་པདྨ་མཁའ་ལྟར་ཡངས་པ། དེ་ལ་བརྟེན་པའི་ཕྱིར་པདྨའི་སྙིང་པོས་བརྒྱན་པའི་ཞིང་། སངས་རྒྱས་ལོངས་སྤྱོད་རྫོགས་སྐུས་ཉེ་བར་བརྟེན་པ་ནི་གཞི་དང་སྙིང་པོ་མེ་ཏོག་གིས་བརྒྱན་པ་ཞེས་བྱ་སྟེ། རྒྱ་ཆེ་བའི་ཚད་མི་མཇེད་འབུམ་ཕྲག་བཅུ་ཡི་རྡུལ་ཕྲན་དང་གྲངས་མཉམ་པའི་ཞིང་གིས་ཞིང་གཅིག་པུ་དེར་བརྒྱན་པའོ། །དེ་ལྟ་བུའི་པདྨ་ཆེན་པོའི་སྟེང་དེ་ན་རྣམ་པར་སྣང་མཛད་གངས་ཆེན་མཚོའི་སྐུའི་སྐྱིལ་ཀྲུང་གཅིག་གིས་པད་སྡོང་ཁེབས་པར་དུས་རྟག་པ་རྒྱུན་དུ་བཞུགས་པ། དེ་ཡི་བ་སྤུའི་བུ་ག་ཐམས་ཅད་ནས་སྤོས་ཆུའི་རྒྱུན་གངས་ཆེན་མཚོ་འབབ་པ་དེ་ཡི་སྟེང་དུ་སངས་རྒྱས་ཀྱི་ཞིང་གྲངས་མེད་ཅིང་བརྗོད་ལས་འདས་པ་བཀོད་པས་སེམས་ཅན་དེ་སྙེད་ཚད་མེད་པའི་དོན་མཛད་ཅིང། ཁྱད་པར་ཕྱག་གཉིས་མཉམ་བཞག་གི་སྟེང་ན་སྤོས་ཆུའི་རྒྱ་མཚོ་ལས་པད་སྡོང་རྒྱ་ཆེན་པོ་ཟེའུ་འབྲུ་དཔག་ཡས་པའི་སྟེང་། ཟེའུ་འབྲུ་རེ་རེ་བཞིན་ཡང་ཞིང་ཁམས་དཔག་ཏུ་མེད་པ་གནས་ཏེ། དེ་ཡང་ཟེའུ་འབྲུའི་སྟེང་གི་ཞིང་རྣམས་ཡས་མན་དུ་ཉེར་ལྔ་བརྩེགས་མར་གནས་ཏེ་ཕན་ཚུན་ཕྲད་དུ་ཞིང་དཔག་ཏུ་མེད་པར་གནས་པ་ནི་སྙིང་པོ་མེ་ཏོག་གིས་བརྒྱན་པའི་ཞིང་ཞེས་སོ། །དེ་ལས་ཁྱད་པར་དུ་ཟེའུ་འབྲུ་དབུས་མའི་སྟེང་ཉིད་ན་སྟོང་གསུམ་ཉི་ཤུ་རྩ་ལྔ་བརྩེགས་མར་གནས་ཏེ། ཕན་ཚུན་གྲངས་མེད་ཟ་འོག་བེར་ཁྱིམ་ཁ་ཕྱེ་བ་བཞིན་གཟུགས་བཀོད་སྣ་ཚོགས་པས་བཀྲ་བའོ། །བརྩེགས་མ་དེའི་འོག་གཞི་དང་པོ་དཔལ་འབྱུང་འོད་ཟེར་རྣམ་སྣང་ཞིང་ཞེས་བྱ་ལ་དེ་ན་བདེ་གཤེགས་དྲི་མེད་མར་མེ་བཞུགས། དེ་ཡི་སྟེང་ན་རིམ་པར་གཉིས་པ་པདྨོ་དཔལ་གྱིས་བརྒྱན་པ་སྟེ་བདེ་གཤེགས་སེང་གེའི་འོད་ཟེར་དྲི་མེད། གསུམ་པ་རིན་པོ་ཆེའི་རྒྱན་སྣང་བ་བཀོད་པའི་ཞིང་ན་སངས་རྒྱས་རྡོ་རྗེ་འོད་ཟེར། བཞི་པ་མེ་ཏོག་སིལ་མ་བཀྲམ་པ་སྟེ་དེ་ན་སངས་རྒྱས་འོད་ཟེར་དགའ་བའི་སྟོབས། ལྔ་པ་དགེ་བ་སྣ་ཚོགས་དག་པའི་ཞིང་ན་སངས་རྒྱས་དབང་པོའི་དཔལ། དྲུག་པ་མེ་ཏོག་ཤིན་ཏུ་རྒྱས་པའི་ཞིང་སྟེ་སངས་རྒྱས་གྲགས་པ་དབང་ཕྱུག བདུན་པ་ཡང་དག་འབྱུང་བའི་གཟི་བརྗིད་དབྱངས་ན་སངས་རྒྱས་ཡེ་ཤེས་རྒྱ་མཚོ། བརྒྱད་པ་སྒྲ་དབྱངས་མི་ཟད་སྒྲོགས་པའི་ཞིང་ན་སངས་རྒྱས་གཟི་བརྗིད་ཐུབ་མེད། དགུ་པ་རྡོ་རྗེ་རྒྱལ་མཚན་ན་སངས་རྒྱས་འཕགས་པའི་རྒྱལ་པོ། བཅུ་པ་ནི་རྣམ་པར་སྣང་བ་ཞེས་བྱ་བ་ཡིན་ལ་དེ་ན་སངས་རྒྱས་ཆོས་ཉིད་ཚད་མེད། བཅུ་གཅིག་པ་སྣང་བའི་མདོག་ཅེས་བྱ་བའི་ཞིང་ནས་སངས་རྒྱས་ཚངས་པའི་དབང་པོ། བཅུ་གཉིས་པ་ནི་རྣམ་སྣང་དང་བའི་ཞིང་སྟེ་དེ་ན་སངས་རྒྱས་འོད་ཟེར་བཀོད་པ་བཞུགས་སོ། །བཅུ་གསུམ་པ་ནི་མི་མཇེད་འཇིག་རྟེན་གྱི་ཁམས་འདི་ཡིན་ལ། འདིར་སྐྱེས་པའི་སེམས་ཅན་རྣམས་དུག་གསུམ་འདྲེས་མར་གྱུར་པས་མི་མཇེད་པའི་ཕྱིར་རམ་ཡང་ན་ལས་ཉོན་ནམ་སྡུག་བསྔལ་ལས་མི་མཇེད་པས་དེ་སྐད་ཅེས་བྱ་སྟེ། དེས་ན་ཐེག་པ་ཆེན་པོ་གསང་སྔགས་ཀྱི་འདུལ་ཞིང་དུ་གྱུར་པ་ཡིན་ནོ། །ཞིང་འདི་ཡི་འདབ་འབྱོར་དུ་ཤར་ན་ཁེབས་པ་དང་ལྡན་པ་དང་། ལྷོ་ན་རྟག་པ་དང་། ནུབ་ན་རྡུལ་བྲལ་དང་། བྱང་ན་ཡོངས་སུ་དགའ་བའི་ཞིང་ཞེས་བྱ་བ་ཡོད་ལ་འདི་ཡི་སྟེང་ན་འོད་འཕྲོ་སྣང་བ་དྲི་མེད་ཅེས་བྱ་བའི་ཞིང་ཁམས་ནི་བཅུ་བཞི་པ་སྟེ་དེ་ན་སངས་རྒྱས་ཉི་མ་དྲི་མེད་སྤྱན་ཞེས་བྱ་བ་བཞུགས་སོ། །དེའི་སྟེང་ནས་ཡར་རིམ་པ་བཞིན་བཅོ་ལྔ་པ་ནི་རིན་ཆེན་འབྱུང་གནས་རབ་ཏུ་བརྒྱན་པའི་སྙིང་པོ་ཞེས་བྱ་བའི་ཞིང་ན་སངས་རྒྱས་ཆགས་མེད་ཡེ་ཤེས་བཞུགས། བཅུ་དྲུག་པ་རྡུལ་དང་བྲལ་བའི་ཞིང་ན་སངས་རྒྱས་དཔལ་གྱི་རྒྱལ་མཚན། བཅུ་བདུན་པ་ཡོངས་སུ་དག་པར་སྣང་བའི་ཞིང་ན་སངས་རྒྱས་ནམ་མཁའ་ཀུན་ཏུ་སྣང་བའི་འོད། བཅོ་བརྒྱད་པ་རིན་ཆེན་འོད་འཕྲོ་ན་སངས་རྒྱས་བསོད་ནམས་སྤྲིན་གྱིས་འཕགས་པ། བཅུ་དགུ་པ་རབ་ཏུ་སྣང་བ་ན་སངས་རྒྱས་སྣང་བྱེད་མར་མེའི་རྒྱལ་པོ། དེ་བཞིན་དུ་ཉི་ཤུ་པ་སྣང་བྱེད་ཀྱི་ཞིང་ན་སངས་རྒྱས་འོད་ཟེར་བཀོད་པ། ཉི་ཤུ་གཅིག་པ་འོད་བྱེད་ཀྱི་ཞིང་ན་སངས་རྒྱས་ཀུན་ཏུ་གཟིགས་པའི་དབང་པོ། ཉེར་གཉིས་པ་འོད་འཕྲོ་བཀོད་པའི་ཞིང་ན་སངས་རྒྱས་འོད་ཟེར་རྒྱལ་པོ། ཉེར་གསུམ་པ་སྣང་ལྡན་གྱི་ཞིང་ན་སངས་རྒྱས་ཀུན་ཏུ་སྣང་མཛད། ཉེར་བཞི་པ་རབ་མཛེས་ཀྱི་ཞིང་ན་སངས་རྒྱས་མེ་ཏོག་ཀུན་ཏུ་རྒྱས་པ། ཉི་ཤུ་ལྔ་པ་མདངས་རབ་ཏུ་དགའ་བའི་ཞིང་ན་སངས་རྒྱས་རབ་ཏུ་དགའ་བའི་དཔལ་ཞེས་བྱ་བ་བཞུགས་སོ། །དེ་ལྟར་ལྔ་ཚན་རྣམ་ལྔའི་རང་བཞིན་གྱི་ཞིང་དེ་ཡང་། ཡས་ནས་མར་སྐུ་གསུང་ཐུགས་དང་ཡོན་ཏན་ཕྲིན་ལས་ཏེ། སྐུ་ཡི་སྐུ་སོགས་ཞིང་ཁམས་ཉི་ཤུ་རྩ་ལྔ་ཡོད་པ་ལས། མི་མཇེད་ནི་ཐུགས་ཀྱི་ཐུགས་ཏེ་ཁྱད་པར་གྱི་ཞིང་ཞེས་བྱ་ལ། གསང་ཆེན་ཚེ་གཅིག་གིས་གྲོལ་བར་ངེས་པའི་སྙིང་པོས་བརྒྱན་པས་ཞིང་ཁྱད་པར་བའོ། །གཉིས་པ་སྟོན་པར་སྣང་ཚུལ་ལ། ཞིང་བྱེ་བྲག་གི་སྟོན་པར་སྣང་ཚུལ་དང་། དེ་ལ་དོགས་པ་སྤང་བ་གཉིས། དང་པོ་ནི། དེ་ལྟར་ལོངས་སྐུའི་གཞིར་གནས་སམ་སྐུའི་སྣང་བ་ལ་བརྟེན་པའི་ཞིང་རྣམས་སུ། ལོངས་སྤྱོད་རྫོགས་པ་རྣམ་སྣང་ཆེན་པོ་ཡི་འོད་ཟེར་འཕྲོས་པའི་རྩེ་མོ་ནས། སྤྲུལ་པས་འདུལ་བྱེད་སྟོན་པ་གང་ལ་གང་འདུལ་སོ་སོར་སྣང་བས་སེམས་ཅན་དེ་དག་གི་དོན་མཉམ་དུ་མཛད་པ་ཡིན་ནོ། །དེ་ལས་ཁོལ་དུ་བྱུང་བ་ཁྱད་པར་སྟོང་གསུམ་མི་མཇེད་འཇིག་རྟེན་འདིར་མཚན་དང་ཆོས་ཐ་དད་པས་འདུལ་བར་གཟིགས་ནས་སངས་རྒྱས་སྟོང་གི་སྒྲོན་མ་རྣམ་པར་བཀོད་པར་མཛད་དེ། དེ་ཡང་སྔོན་ཐོག་མ་བསྐལ་པ་མཛེས་པར་སྣང་བ་ལ་ཁྱེའུ་སྟོང་སྤྲུལ་ནས། གཞན་དོན་དུ་སེམས་བསྐྱེད་པ་ནས་རིམ་གྱིས་ལམ་སྦྱོང་ཚུལ་བསྟན་ཏེ་མཐར་སངས་རྒྱས་པའི་མཛད་པ་ཡོངས་སུ་རྫོགས་པར་སྟོན་པ་ནི་རང་བཞིན་ནམ་ངོ་བོ་གཅིག་ཉིད་དེ་ལྟར་རྣམ་འཕྲུལ་སངས་རྒྱས་སྟོང་དུ་སྣང་བ་ཡིན་ཏེ། ཡབ་སྲས་མཇལ་བའི་མདོ་ལས། དཔའ་བོ་ཆེན་པོ་ཐབས་མཁས་ཏེ། །སེམས་ཅན་རྣམས་ནི་སྨིན་བྱའི་ཕྱིར། བྱེ་བ་ཕྲག་བརྒྱར་རྒྱལ་བ་ཉིད། །རབ་ཏུ་མང་པོ་སྟོན་མཛད་ནས། །ད་དུང་དུ་ཡང་འདྲེན་པ་ཁྱོད། །སངས་རྒྱས་མང་པོ་སྟོན་པར་མཛད། །ཅེས་གསུངས་པ་ལྟར། སེམས་བསྐྱེད་པ་དང་། ལམ་སྦྱོང་པ་དང་། ས་ནས་སར་འཕར་བ་དང་། བྱང་ཆུབ་ཐོབ་པ་སོགས་སྟོན་ཅིང་། ཐ་ན་བྱ་དང་རི་དྭགས་སོགས་ཀྱི་བར་དུའང་སྟོན་པར་བྱེད་དོ། །དེའང་སངས་རྒྱས་སྟོང་གི་ནང་ནས། འཁོར་བ་འཇིགས། གསེར་ཐུབ། འོད་སྲུང་རྣམས་སྔར་བྱོན་ཟིན་ནས། ད་ལྟ་བཞི་པ་ཤཱཀྱ་ཐུབ་པ་སྟེ། སྟོན་པ་འདི་ཉིད་ལ་ཡང་ཐེག་དམན་རྣམས་སོ་སྐྱེ་འཆིང་བ་ཀུན་ལྡ ན་གཅིག་གིས་ལམ་བགྲོད་པས་སངས་རྒྱས་པར་འདོད་ལ། ཐེག་ཆེན་ཁ་ཅིག་དགའ་ལྡན་ནས་འཕོ་བ་ནས་བཟུང་རྡོ་རྗེ་གདན་དུ་མཉམ་པར་བཞག་པ་ཚུན་ས་བཅུའི་སེམས་དཔའ། དེ་ནས་སངས་རྒྱས་པར་འདོད། ཁ་ཅིག་དཀའ་བ་སྤྱད་པའི་ཚེ་ཐུགས་འོག་མིན་དུ་སངས་རྒྱས། དེ་ནས་བྱང་ཆུབ་སྙིང་པོར་བདུད་འདུལ་བ་སོགས་མཛད་ཟེར། ཁ་ཅིག་འོག་མིན་དུ་ཐོག་མར་སངས་རྒྱས་ནས་ཕྱིས་ཞིང་འདིར་མཛད་པ་བཅུ་གཉིས་སྤྲུལ་ལོ་ཞེས་ཟེར། དེ་ཐམས་ཅད་ཀྱི་ལུགས་དང་པོ་སྟོན་པ་འདི་ཚོང་དཔོན་གྱི་ཁྱེའུ་སྣང་བྱེད་དུ་གྱུར་པའི་ཚེ་སངས་རྒྱས་ཤཱཀྱ་ཐུབ་ཆེན་དྲུང་དུ་ཐུགས་བསྐྱེད། བར་དུ་གྲངས་མེད་གསུམ་དུ་ཚོགས་བསགས། མཐར་མཛད་པ་བཅུ་གཉིས་ཀྱི་ཚུལ་གྱིས་སངས་རྒྱས་པར་འདོད། འདིར་ནི་དེ་ཐམས་ཅད་ཐོག་མེད་ནས་སངས་རྒྱས་པ་དེའི་རྣམ་འཕྲུལ་དེ་ལྟར་བསྟན་གྱི་སེམས་ཐོག་མར་བསྐྱེད་དུས་ནས་སངས་རྒྱས་ཀྱི་སྤྲུལ་པ་ཡིན་པར་འདོད་དོ། །གཉིས་པ་ནི། རྒྱུ་འབྲས་ཀྱི་ཐེག་པ་གཉིས་ཀར་སྐབས་འགར་འདོད་པ་མཐུན་པས་ཐུན་མོང་བའི་ལུང་། མདོ་སྡེ་པདྨ་དཀར་པོ་ལས། སྔོན་གྱི་བསྐལ་པ་ཆེན་པོ་མཛེས་པར་སྣང་བ་ནས་འཇིག་རྟེན་གྱི་ཁམས་རྣམ་པར་བརྒྱན་པ་ཞེས་བྱ་བར་དེ་བཞིན་གཤེགས་པ་ཡོན་ཏན་མཐའ་ཡས་རིན་པོ་ཆེ་བཀོད་པའི་རྒྱལ་པོ་ཞེས་བྱ་འཇིག་རྟེན་ན་བྱོན་པའི་ཚེ། རྒྱལ་པོའི་ཕོ་བྲང་གྲོང་ཁྱེར་རྣམ་པར་དག་པ་ཅན་ཞེས་བྱ་བར་འཁོར་ལོས་སྒྱུར་བའི་རྒྱལ་པོ་ཡུལ་འཁོར་སྐྱོང་གི་བུ་སྟོང་རྣམས་སོ་སོར་སེམས་བསྐྱེད་ནས། ཐོག་མར་གཞོན་ནུ་རྣམ་པར་དག་པའི་བློ་གྲོས་ནས། ཐ་ཆུང་བློ་གྲོས་མཐའ་ཡས་ཀྱི་བར་རིམ་པ་བཞིན་སངས་རྒྱས་འཁོར་བ་འཇིགས་ནས་མོས་པར་སྣང་གི་བར་དུ་འཚང་རྒྱ་བར་གསུངས་པ་དང་། འདིར་སངས་རྒྱས་གཅིག་གི་སྤྲུལ་པར་བསྟན་པ་དེ་གཉིས་མི་འགལ་བ་ནི། བསྐལ་པ་བཟང་པོ་འདི་ཡི་གདུལ་བྱའི་ངོར་སངས་རྒྱས་ཀྱི་རྣམ་འཕྲུལ་དེ་ལྟར་བསྟན་པ་སྟེ། བསྟན་པའི་དགོས་ཆེད་ཐེག་དམན་རྣམས་ཐེག་ཆེན་ལ་འཇུག་པ་དང་གནས་སྐབས་དེར་བུ་སྟོང་པོ་ལུང་བསྟན་པས་ནི་ལྷ་མི་ཁྲག་ཁྲིག་ཕྲག་གྲངས་མེད་པ་བཟོད་ཐོབ་བྱང་ཆུབ་ཏུ་ངེས་པའི་ཕྱིར་ཡིན་ཏེ། དེས་ན་དེ་ཐམས་ཅད་སངས་རྒྱས་གཅིག་གི་རོལ་པ་ཡིན་པའི་ཚུལ་འདི་དོན་གྱི་དགོངས་པར་བཟུང་པར་བྱའོ། །མདོར་བསྡུས་ཤིང་དད་པར་གདམས་པ་ནི། དེ་ལྟར་སངས་རྒྱས་ཀྱི་ཐུགས་རྗེས་སྲིད་པ་གསུམ་གྱི་འགྲོ་བ་རྣམ་པར་གྲོལ་བའི་ཕྱིར། སྣ་ཚོགས་པའི་ཐབས་ཆེན་མང་པོས་གནས་སྐབས་དང་མཐར་ཐུག་གི་ཕན་པ་དང་བདེ་བ་ལ་འགོད་པར་མཛད་པའི་སླད་དུ། ཚད་མེད་པའི་ཞིང་ཁམས་དང་སྟོན་པར་སྤྲུལ་པས་འགྲོ་བ་ཀུན་གྱི། མཐའ་ཡས་པའི་རེ་བ་མཐའ་དག་སྐོང་ཞིང་བྱང་ཆུབ་གསུམ་གྱི་ས་མཐོར་འདྲེན་པར་མཛད་པ་ཡིན་པས། རྒྱལ་བའི་བྱིན་རླབས་དང་རྣམ་པར་འཕྲུལ་བ་ནི་དེ་འདྲའོ་སྟེ་ཚད་མེད་བསམ་མི་ཁྱབ་པར་ཤེས་པར་བྱའོ། །དེ་ལྟར་ཐེག་ཆེན་ནས་བཤད་པའི་ཞིང་དང་སྟོན་པ་རྣམ་འཕྲུལ་དང་བཅས་པའི་ཚུལ་རྒྱ་མཚོ་ལྟ་བུ་འདི་ཐོས་ནས་མི་དངངས་ཏེ་མི་སྐྲག་པར་དད་པར་གྱུར་པ་དེ་དག་མྱུར་དུ་བྱང་ཆུབ་ཀྱི་སྙིང་པོ་མཛེས་པར་བྱེད་པའི་འཇིག་རྟེན་གྱི་མགོན་པོར་འགྱུར་ཏེ། སངས་རྒྱས་ཕལ་པོ་ཆེ་ལས། གང་གིས་ཐེག་པ་ཆེན་པོའི་ཚུལ་རྒྱ་མཚོ་མི་ཟད་པ་སྣ་ཚོགས་ལ་འཇུག་པའི་སྒོ་རབ་ཏུ་ཐོས་ནས། མི་དངངས་ཤིང་དད་པར་གྱུར་པ་དེ་དག་ནི་མྱུར་དུ་བྱང་ཆུབ་སྙིང་པོ་མཛེས་པར་བྱེད་པའོ། །ཞེས་རྒྱ་ཆེར་གསུངས་པ་བཞིན་ནོ། །ཐེག་པ་ཆེན་པོ་མན་ངག་གི་བསྟན་བཅོས་ཡིད་བཞིན་རིིན་པོ་ཆེའི་མཛོད་ལས། འགྲོ་བའི་དོན་དུ་ཞིང་ཁམས་རྣམ་པར་འཀོད་པའི་ལེའུ་སྟེ་གཉིས་པའི་འགྲེལ་པའོ།། །། ༈ གཉིས་པ་བྱེ་བྲག་མི་མཇེད་ཀྱི་ཞིང་རྒྱས་པར་བཤད་པ་ལ། སྡོམ་གྱིས་མདོར་བསྟན་པ། ཡན་ལག་རྒྱས་པར་བཤད་པ་གཉིས། དང་པོ་ནི། དེ་ལྟར་རྒྱལ་བའི་ཞིང་ཁམས་བསམ་གྱིས་མི་ཁྱབ་པར་སྣང་བ་ལས། ཁྱད་པར་མི་མཇེད་ཀྱི་འཇིག་རྟེན་བསྟན་པ་ནི། ཆགས་པ་དང་གནས་པ་དང་འཇིག་པ་དང་སྟོང་པའི་བསྐལ་པ་རྣམ་པ་བཞི་ལས་ཞེས་སོ། །གཉིས་པ་ལ། ཆགས་པའི་བསྐལ་པ་བཤད་པ། གནས་བསྐལ་བཤད་པ། འཇིག་སྟོང་གི་བསྐལ་པ་བཤད་པ་གསུམ། དང་པོ་ལ། མདོར་བསྟན། རྒྱས་བཤད། དོན་བསྡུ་གསུམ། དང་པོ་ནི། དེ་ཡང་སྟོང་པའི་བར་བསྐལ་ཉི་ཤུ་རྫོགས་ནས་དང་པོ་ཆགས་པའི་མགོ་འཛིན་པ་ལ་ཡང་བཅུད་རྣམས་ཡས་ནས་མར་རིམ་པས་ཆགས་ཤིང། ནམ་མཁའ་ལ་བརྟེན་པའི་སྣོད་གཞལ་མེད་ཁང་རྣམས་ཀྱང་དེ་བཞིན་ནོ་སྟེ་ཡས་ནས་མར་ཆགས་པ་ཡིན་ལ། ས་གཞི་ལ་བརྟེན་པའི་སྣོད་རྣམས་འོག་མ་ནས་རིམ་པར་མས་ནས་ཡར་ཆགས་ཏེ། འདི་དག་གི་ཚུལ་ཐུན་མོང་བ་མདོ་དང་མཐུན་པ་དག་ནི་འཇིག་རྟེན་གདགས་པ་དང་། ཐུན་མིན་གོང་དུ་འཕགས་པ་དག་ནི་ཕལ་པོ་ཆེ་དང་། རྒྱུད་ཀྱི་གནས་ཇི་ལྟ་བ་བཞིན་དུ་མདོར་བསྡུས་ཏེ་རིམ་པས་དབྱེ་བ་ནི་ཞེས་སོ། །གཉིས་པ་རྒྱས་པར་བཤད་པ་ལ། སྣོད་ཆགས་ཚུལ་དང་། བཅུད་ཆགས་ཚུལ་གཉིས། དང་པོ་ལ། སྣོད་སྤྱིར་བསྟན་པ་དང་། དེ་ལས་སྟོང་དང་པོ་སོགས་སུ་འཇོག་ཚུལ་བཤད་པ་གཉིས་ཀྱི་དང་པོ་ལ། བསྟན་བཤད་གཉིས། དང་པོ་ནི། རྟེན་གཞི་འབྱུང་བ་རྣམས་དང་རྟེན་རི་ལ་སོགས་པ་དང་བརྟེན་པ་སེམས་ཅན་རྣམས་དང་གསུམ་པོ་དག་ལས་ཞེས་སོ། །གཉིས་པ་ལ། རྟེན་གཞི་དཀྱིལ་འཁོར་ལྔ་བཤད་པ། རྟེན་རི་གླིང་མཚོ་གསུམ་བཤད་པ། དེ་ལ་བརྟེན་པ་སེམས་ཅན་གྱི་གནས་བྱེ་བྲག་པ་བཤད་པ་གསུམ། དང་པོ་ནི། དང་པོ་འབྱུང་བ་རིམ་བརྩེགས་ཀྱི་སོ་སོའི་རང་བཞིན་གྱི་ཚུལ་ནི། སྟོང་པའི་བར་བ སྐལ་རྫོགས་པའི་རྗེས་དེ་ཉིད་དུ། སེམས་ཅན་སྤྱི་མཐུན་གྱི་ལས་ལས། དང་པོ་ཡིད་མཁའ་རྣམ་པར་དག་པ་ཞེས་པའི་ནམ་མཁའ་དཀར་ཞིང་གསལ་བའི་འོད་དང་ལྡན་པ། རྒྱ་ཁྱོན་ནི་སྟོང་གསུམ་ཆེན་པོ་གཅིག་གི་སྣོད་དང་ཚད་མཉམ་པ་ཆགས་ཤིང་། དེའི་སྟེང་དུ་རླུང་ཆགས་ཏེ། རླུང་དེ་ཡང་སྲུབ་བྱེད་ཀྱི་རླུང་སྔོ་ལ་འཕྱུར་བ་ལང་བ་ལས། ཀུན་ཏུ་ཁྱབ་བྱེད་ཀྱི་རླུང་ཕྱོགས་ཀུན་ཏུ་བརྡལ་བས་ནམ་མཁའ་ལ་ན་བུན་ལྟ་བུར་འཁྲིགས། རྩུབ་འགྱུར་གྱི་རླུང་ཡཾ་ཞེས་རང་སྒྲ་དང་བཅས་པས་མཁའ་ལ་སྤྲིན་བཞིན་གཏོར། རྣམ་པར་སྡུད་བྱེད་ཀྱི་རླུང་གིས་དེ་དག་བསྡུས་པས་རྒྱ་ཆེ་ཞིང་དཔང་འཐུག་པར་བྱས་པ་དང་། སྨིན་བྱེད་མེའི་རླུང་དམར་གསལ་ལས་མེ་མཆེད་ནས་བསྲེགས་པས་རླུང་དཀྱིལ་འཇམ་ཞིང་ཁོད་སྙོམས་པར་ཆགས། འབྱེད་བྱེད་ཀྱི་རླུང་ཁ་དོག་སྣ་ཚོགས་པ་འུར་གྱིས་ལངས་པ་ལས་དེ་དག་སོ་སོར་གཏོར་ཏེ། དེ་ལྟར་རླུང་རྣམ་པ་དྲུག་པོས་རིམ་པ་བཞིན་བསྲུབས་པ་དང་བརྡལ་བ་དང་གཏོར་བ་དང་སྡུད་པ་དང་ཆགས་པ་དང་སོ་སོར་གཏོར་བར་བྱེད་པ་དེའི་རྗེས་སུ་སྲུབ་བྱེད་ཀྱི་རླུང་གིས་བསྲུབས་པས་ལེགས་པར་ཆགས་ཏེ། དེ་ཡང་མདོག་ལྗང་ཁུ་རྡོ་རྗེ་རྒྱ་གྲམ་གྱི་དབྱིབས་དང་འདྲ་བ་ལ་མུ་ཁྱུད་ཟླུམ་པོས་བསྐོར་བ་དང་བཅས། རྔམས་སུ་དཔག་ཚད་ས་ཡ་དྲུག་འབུམ་ལ། །རྒྱར་ནི་གྲངས་མེད་པ་བྱེད་ལས་སྲ་ཞིང་མཁྲེགས་པ་རྡོ་རྗེ་དང་འདྲ་བ་ཆུ་སོགས་བརྟེན་པའི་ལས་བྱེད་དོ། །དེ་ནས་སྟེང་གི་མཁའ་ལ་གསེར་གྱི་སྙིང་པོ་ཅན་གྱི་སྤྲིན་འདུས་པ་ལས། རླུང་དཀྱིལ་དེ་ཡི་སྟེང་དུ་ཆར་ཤིང་རྟའི་སྲོག་ཤིང་གི་ཚད་ཙམ་དུ་བབས་པས་ཆུ་ཡི་དཀྱིལ་འཁོར་ནི། ཞི་བ་གསལ་དག་གི་ཆུ་ཞེས་བྱ་བ་ཀུན་ནས་ཟླུམ་པ་ཟླ་བ་རྒྱས་པ་ལྟ་བུ། རྔམས་སུ་དཔག་ཚད་འབུམ་ཕྲག་བཅུ་གཅིག་དང་ཉི་ཁྲི་ཡོད་ལ། དེ་གཞིན་དུ་མི་འབོ་བ་ནི་རྟེན་བྱེད་རླུང་གིས་མཐའ་ནས་བསྐོར་ཏེ་གནས་པ་ཡིན་ནོ། །དེ་ནས་རླུང་དཀྱིལ་ལས་སྲུབ་བྱེད་ཀྱི་རླུང་བྱ་བ་གཟིར་སྒྲ་བཅས་བྱུང་བ་དག་གིས་ཆུ་དེ་རྣམས་བསྡུས་ཤིང་བསྲུབས་པས། དེ་སྟེང་གསེར་ལས་གྲུབ་པའི་ས་ཡི་དཀྱིལ་འཁོར་གྲུ་བཞི་པ་མཚོ་ལ་དར་ཆགས་པ་ལྟར་གྱུར་ཏེ། རྔམས་སུ་དཔག་ཚད་སུམ་འབུམ་ཉི་ཁྲི་ལ། རྒྱ་ཁྱོན་འབུམ་ཕྲག་བཅུ་གཉིས་དང་སྟོང་ཕྲག་གསུམ་དང་བརྒྱ་ཕྲག་ཕྱེད་དང་ལྔ་པ་སྟེ་ལྔ་བཅུ་རྩ་ལྔ་དང་བཅས་པའོ། །གཉིས་པ་ལ་བསྟན་བཤད་གཉིས། དང་པོ་ནི། དེ་ཡི་སྟེང་དུ་རྟེན་ནི་རི་དང་མཚོ་དང་གླིང་རྣམས་ལས། ཞེས་སོ། །གཉིས་པ་ལ། རི་བཤད་པ་དང་། མཚོ་བཤད་པ། གླིང་བཤད་པ་གསུམ། དང་པོ་ལ། རི་གླིང་ཐུན་མོང་གི་རྒྱུ་དང་། སོ་སོའི་ངོ་བོ་གཉིས། དང་པོ་ནི། གསེར་གྱི་ས་གཞིའི་སྟེང་དུ་སྨིན་བྱེད་གྱི་རླུང་གིས་ཆུ་དང་ས་ཡི་དཀྱིལ་བསྲུབས་ཤིང་ནམ་མཁའ་ལ་ཁམས་སྣ་ཚོགས་པ་ཅན་གྱི་སྤྲིན་ལས་ཆར་གྱི་རྒྱུན་ཡུན་རིང་དུ་བབས་པས། ལྷུན་པོ་བྱེ་བ་ཕྲག་བརྒྱ་དང་དེ་བཞིན་དུ་གསེར་གྱི་རི་བདུན་དང་ལྕགས་རི་མུ་ཁྱུད་གླིང་བཞི་གླིང་ཕྲན་དང་བཅས་པ་བྱེ་བ་ཕྲག་བརྒྱ་པོ་རྣམས་ནི། ཁམས་འབྱེད་སྡུད་ཀྱི་རླུང་རབ་དང་འབྲིང་དང་ཐ་མའི་རླུང་གིས་རིམ་པར་གྲུབ་པ་ཡིན་ནོ། །གཉིས་པ་ལ་ལྷུན་པོ་བཤད་པ་དང་། རི་བདུན་བཤད་པ་གཉིས། དང་པོ་ལ། དངོས་དང་། རི་གླིང་ཐུན་མོང་གི་ཡས་མན་གྱི་ཚད་བསྟན་པ་གཉིས། དང་པོ། དབུས་ཀྱི་རི་རབ་རིན་པོ་ཆེན་སྣ་བཞིི་ལས་གྲུབ་སྟེ་དེ་ཡང་ཤར་སོགས་ཕྱོགས་བཞི་རིམ་པ་བཞིན་དུ། དངུལ་དང་བཻཌཱུར་དང་པདྨ་རཱ་ག་དང་གསེར་ལས་གྲུབ་པ་སྟེ། དེ་ཡི་དབང་གིས་ཕྱོགས་བཞིའི་ནམ་མཁའ་འང་ཁ་དོག་དཀར་པོ་དང་སྔོན་པོ་སོགས་དེ་བཞིན་དུ་སྣང་བ་ཡིན་ནོ། །དེ་ཉིད་མཛེས་བྱེད་རི་རབ་དེ་ལ་ཆུའི་སྟེང་ན་བང་རིམ་བཞི་ལས་འོག་མ་ནི་རླུང་གི་བང་རིམ་གཡུའི་རྡོ་རྗེ་ཅན་ཏེ་ནང་གི་རི་རབ་ནས་ཞེང་དུའམ་ཕྱིར་དཔག་ཚད་སྟོང་ཕྲག་བཅུ་དྲུག་འཕགས་ལ། ཆུར་ནི་ཇི་ཙམ་ཡོད་པ་ཞེང་དུ་ཟུར་ནས་ཟུར་གྱི་རིང་ཚད་ལ་དེ་སུམ་འགྱུར་ཡིན་པ་ཕྱི་མ་ཀུན་ལ་ཤེས་པར་བྱའོ། །གཉིས་པ་ཆུ་ལས་གྲུབ་པའི་བང་རིམ་རྣམ་པར་སྤུངས་པ་སྟེ་སྟོང་ཕྲག་བརྒྱད་ཞེང་དུ་ཕྱིར་འཕགས་སོ། །གསུམ་པ་ཤེལ་འོད་འབར་བ་བཞི་སྟོང་ཕྱིར་འཕགས་པའོ། །བཞི་པ་འཁོར་ལོ་རྣམ་པར་བརྩེགས་པ་ཉིས་སྟོང་ཕྱིར་འཕགས་པ་སྟེ། བང་རིམ་བཞི་པོ་དེ་དག་ཆུ་མཚམས་ནས་བཟུང་གཅིག་གི་སྟེང་ནས་གཅིག་སྟེང་དུ་འཕགས་པའི་བར་ཐག་ནི་སྟོང་ཕྲག་བཅུ་བཅུ་སྟེ་བཞི་ཁྲི་ཡོད་པས་རི་རབ་ཀྱི་ཕྱེད་དུ་སླེབ་པའོ། །གཉིས་པ་ནི། ཤིན་ཏུ་མཛེས་ཤིང་ལྷུན་ཆགས་པས་ལྷུན་པོ་སྟེ་དེ་ནི་ཆུ་ལས་དཔག་ཚད་བརྒྱད་ཁྲི་གྱེན་དུ་འཕགས་པ་སྟེ། ཆུ་ཡི་ནང་དུ་རི་དགུ་དང་གླིང་བཅུ་གཉིས་པོ་ཀུན་མཚུངས་པར་དཔག་ཚད་བརྒྱད་ཁྲི་ཐུར་དུ་ནུབ་ཅིང་རྩ་བ་གསེར་གྱི་ས་གཞིར་གནས་པའོ། །གཉིས་པ། གསེར་གྱི་རི་བདུན་གྱིས་ལྷུན་པོ་ལ་གྲུ་བཞིར་བསྐོར་བ་ནི། རི་ནང་མ་ཤིང་རྟའི་གཉའ་ཤིང་ལྟར་རྩེ་མོ་དྲངས་པས་གཉའ་ཤིང་འཛིན་དང་། དེ་བཞིན་དུ་དེའི་ཕྱི་རོལ་དུ་རིམ་པ་བཞིན་གཤོལ་མདའ་ལྟར་རྩེ་མོ་དྲངས་པས་གཤོལ་མདའ་འཛིན་དང་། རྩེ་མོ་ན་སེང་ལྡེང་གི་ནགས་ཡོད་པས་སེང་ལྡེང་ཅན་དང་། རྩེ་མོ་མཛེས་པས་ལྟ་ན་སྡུག་པ་དང་། སྟེང་ན་བྲག་རྟའི་རྣ་བ་ལྟ་བུ་ལོགས་སུ་ཆད་པ་གཅིག་ཡོད་པས་རྟ་རྣ་དང་། རྩེ་མོ་ནང་དུ་ཅུང་ཟད་འདུད་པས་རྣམ་འདུད་དང་། དེ་ཀུན་གྱི་མཐར་འཁོར་ལོའི་མུ་ཁྱུད་ལྟར་བསྐོར་བས་མུ་ཁྱུད་འཛིན་རི་རྣམས་ཏེ། ནང་མའི་ཕྱེད་ཕྱེད་དུ་ཕྱི་མའི་གནམ་འཕང་ངམ་རྩེ་མོ་སླེབས་པ་སྟེ། གསེར་རི་དང་པོ་ལ་དཔག་ཚད་བཞི་ཁྲི། གཉིས་པ་ལ་ཉི་ཁྲི། གསུམ་པ་ལ་ཁྲི། བཞི་པ་ལ་ལྔ་སྟོང་། ལྔ་པ་ལ་ཉིས་སྟོང་ལྔ་བརྒྱ། དྲུག་པ་ལ་སྟོང་དང་ཕྱེད་སུམ་བརྒྱ། བདུན་པ་ལ་དྲུག་བརྒྱ་ཉི་ཤུ་རྩ་ལྔའོ། །ཞེང་དུ་ཆུ་ལས་གྱེན་དུ་འཕགས་པའི་དཔང་རང་ལ་ཇི་ཡོད་པ་དེ་ཙམ་མོ། །ཐམས་ཅད་ཀྱི་ཕྱི་རོལ་འཁོར་ཡུག་གི་རི་ནི་ལྕགས་ལས་གྲུབ་པ་སྟེ། ཚད་མུ་ཁྱུད་འཛིན་རིའི་ཕྱེད་དུ་སླེབ་ཅེས་གྲགས་ཏེ་ཆུ་ནས་སུམ་བརྒྱ་དང་ཕྱེད་དང་བཅུ་གསུམ་འཕགས་པ་ཡིན་ནོ། །གཉིས་པ་མཚོ་ནི། རི་དེ་དག་གི་ནང་གི་མཚོ་ཡི་བྱེ་བྲག་ཀྱང་། རྒྱུ་ནི་སྟེང་གི་ནམ་མཁའ་ལས་ཤིང་རྟའི་སྲོག་ཤིང་ཙམ་གྱི་ཆར་བབས་པས་རི་དང་གླིང་ཀུན་གྱི་བར་རྣམས་ཆུས་ཡོངས་སུ་གང་བས་མཚོ་གཅིག་ཏུ་གྱུར་པའོ། །དེ་ལ་ཀླུ་དགའ་བོ་སོགས་ཀླུ་ཆེན་བརྒྱད་རོལ་ཞིང་རྩེ་བའི་གནས་ཡིན་པས་རོལ་མཚོ་སྟེ། དེ་ནི་འདུལ་བ་ལུང་ལས། བསིལ་དང་ཞིམ་དང་ཡང་དང་འཇམ། །དྭངས་དང་དྲི་མ་མེད་པ་དང་། །འཐུངས་ན་ལྟོ་བར་བྱམས་པ་དང་། །མགྲིན་པ་ལ་ཡང་མི་གནོད་དང་། །ཡན་ལག་བརྒྱད་ལྡན་ཆུར་འདོད་དོ། །ཞེས་པ་ལྟར་ཡན་ལག་བརྒྱད་ལྡན་ཆུས་གང་བའི་མཚོ་དེ་དག་གི་ཚད་དམ་ཞེང་རྣམས་ནི་རི་བདུན་རང་རང་སོ་སོ་དང་མཉམ་ཞིང་། ཆུར་ཡང་ཤར་ནུབ་ལྟ་བུའི་རྒྱ་མཚོའི་ཚད་ནི་ཕྱོགས་བཞི་རེ་རེའང་སུམ་འགྱུར་ཀུན་ལ་མཚུངས་པ་ཡིན། དེ་ཡང་རི་རབ་ནི་རྩ་རྩེ་གཉིས་ཀར་བརྒྱད་ཁྲི་ཡིན། རོལ་མཚོ་ནང་མ་རི་རབ་དང་མཉམ་པར་བརྒྱད་ཁྲིའི་ཞེང་ཡིན་ལ། དེ་ལ་སུམ་འགྱུར་ཏེ་ཁྲི་ཕྲག་ཉེར་བཞི་ཡོད། རོལ་མཚོ་ཕྱི་མ་ཕྱི་མ་ལ་ནང་མ་ནང་མ་ཀུན་བསྣན་པའི་ཞེང་སུམ་འགྱུར་ཡིན་ལ། དེའི་སྟེང་དུ་རི་ནང་མའི་ཞེང་གཅིག་གིས་ལྷག་གམ་དཔྱད་གསུངས། མུ་ཁྱུད་འཛིན་ནས་མུ་ཁྱུད་འཛིན་ཆེན་པོའི་བར་ལ་ཁོར་ཡུག་བ་ཚྭ་ཅན་ཕྱི་ཡི་རྒྱ་མཚོའི་ཞེང་དུ་སུམ་འབུམ་དང་སྟོང་ཕྲག་ཉི་ཤུ་རྩ་གཉིས་ཀྱི་དཔག་ཚད་དང་ལྡན་པ་སྟེ་ཡོད་དོ། །གསུམ་པ་གླིང་ནི། རྒྱུ་རླུང་གི་བྱེད་སྡུད་སྔར་དང་འདྲ་བ་ལས་གླིང་རྣམས་ཀྱི་འོག་གི་ས་གཞི་ཆུ་དང་ཁད་མཉམ་པ་ལ་ཅུང་ཟད་མཐོ་ཙམ་པ་སྟེ། དེ་ལས་ཤར་གླིང་ནི། འཛམ་གླིང་གི་མི་ལས་ལུས་ཆེར་འཕགས་པས་ལུས་འཕགས་ཏེ་དབྱིབས་ཟླ་གམ་བཅད་ཁ་རི་རབ་ལ་བསྟན་ཞིང་འབུར་འཁོར་ཡུག་ལ་བསྟན་པའི་ངོས་གསུམ་ངོས་རེ་ལ་དཔག་ཚད་ཉིས་སྟོང་རེ་དང་འབུར་ངོས་ཆུང་བ་ལ་དཔག་ཚད་སུམ་བརྒྱ་ལྔ་བཅུའོ། །ལྷོ་གླིང་ནི། བྱང་ཕྱོགས་མཚོ་མ་དྲོས་པའི་འགྲམ་ན་ཤིང་འཛམ་བུ་བྲྀཀྵ་ཡོད་པས་འཛམ་གླིང་སྟེ་དབྱིབས་སོག་ཁ་ཤིང་རྟ་ལྟ་བུ་ངོས་རིང་བ་གསུམ་དེ་དང་འདྲ་སྟེ་དཔག་ཚད་ཉིས་སྟོང་ཉིས་སྟོང་དང་། ལྷོ་ཕྱོགས་འཁོར་ཡུག་ངོས་ཀྱི་ཐུང་བ་གཅིག་ལ་དཔག་ཚད་ཕྱེད་དང་བཞི་པ་དབུས་སུ་བྱང་སེམས་སྲིད་པ་ཐ་མ་པའི་བཞུགས་གནས་རྡོ་རྗེའི་གདན་དང་སྙིང་པོ་བྱང་ཆུབ་ཀྱི་ཤིང་གིས་བརྒྱན་པའོ། །ནུབ་གླིང་ནི། འདོད་འཇོའི་བ་དང་སྟོབས་ཆེན་གྱི་གླང་པོ་ལ་ཤས་ཆེར་སྤྱོད་པས་བ་གླང་སྤྱོད་དེ་དབྱིབས་ཟླུམ་པོ་ཁོར་ཡུག་ཏུ་དཔག་ཚད་བདུན་སྟོང་དང་ལྔ་བརྒྱ། ཁ་ཞེང་དུ་སྟོང་ཕྲག་ཕྱེད་དང་གསུམ་ཡོད་དོ། །བྱང་གླིང་ནི། ཤ་ཟའི་སྐད་དུ་སྨྲ་བས་སམ་རང་ཉིད་འཆི་བའི་ཞག་བདུན་གྱི་གོང་ནས་དཔག་བསམ་ཤིང་ལས་སྒྲ་མི་སྙན་པར་གྲགས་པས་སྒྲ་མི་སྙན་གྱི་གླིང་སྟེ་དབྱིབས་གྲུ་བཞི་ངོས་རེའི་ཆ་ལ་དཔག་ཚད་ཉིས་སྟོང་མཐའ་བསྐོར་དུ་བརྒྱད་སྟོང་ངོ་། །གླིང་བཞི་པོ་དག་གི་གླིང་ཕྲན། ཤར་གྱི་གླིང་ཆེན་གཡས་གཡོན་དུ་ལུས་དང་ལུས་འཕགས་ཆུང་ངུ་གཉིས། དེ་བཞིན་དུ་ལྷོར་རྔ་ཡབ་དང་རྔ་ཡབ་གཞན། ནུབ་ཏུ་གཡོ་ལྡན་དང་ནི་དེ་བཞིན་ལམ་མཆོག་འགྲོ། བྱང་དུ་སྒྲ་མི་སྙན་དང་སྒྲ་མི་སྙན་གྱི་ཟླ་རྣམས་ནི་མདུན་རི་རབ་ལ་བསྟན་ཞིང་ཚད་ནི་རང་གླིང་གཙོ་བོའི་ཕྱེད་ཆའོ། །གསུམ་པ་བརྟེན་པ་སེམས་ཅན་གྱི་གནས་ལ་བསྟན་བཤད་གཉིས། དང་པོ། བྱེ་བྲག་ཏུ་བརྟེན་པ་སེམས་ཅན་གྱི་གནས་གཞན་མཐོ་རིས་དང་ངན་སོང་རྣམ་པ་གཉིས་ལས་ཞེས་སོ། །གཉིས་པ་ལ། ངན་སོང་དང་མཐོ་རིས་ཀྱི་གནས་གཉིས། དང་པོ་ལ་བསྟན་བཤད་གཉིས། དང་པོ་ནི། ངན་སོང་དག་གི་ཞེས་པས་བསྟན། གཉིས་པ་ལ། དམྱལ་བ། ཡི་དྭགས། དུད་འགྲོ་གསུམ། དང་པོ། དམྱལ་བའི་རང་བཞིན་གྱི་གནས་ནི། འཛམ་གླིང་གི་གངས་ཏི་སེའི་འོག་ནས་དཔག་ཚད་ཉི་ཁྲི་ན་མནར་མེད་པ་ཡོད་ལ། དེའི་སྟེང་ཉི་ཁྲིའི་ཆ་ལ་རབ་ཏུ་ཚ་བ་དང་ཚ་བ་ངུ་འབོད་ཆེན་པོ་དང་ངུ་འབོད་བསྡུས་འཇོམས་ཐིག་ནག་ཡང་སོས་ཏེ་གཞན་བདུན་པོ་བརྩེགས་མར་གནས་ཏེ་དེ་དག་གི་བར་ན་དཔག་ཚད་ཉིས་སྟོང་ཉིས་སྟོང་གིས་བཅད་པའོ། །ཚ་དམྱལ་གྱི་གནས་དེ་དང་འདབ་འབྱོར་གྱི་ཚུལ་དུ་གྲང་དམྱལ་བརྒྱད་པོ་ཡང་ཚ་དམྱལ་རྣམས་ལ་སྡུག་བསྔལ་དང་གནས་སོགས་ཕན་ཚུན་འགྲན་པ་བཞིན་དུ་གནས་ཏེ། དེ་ཡང་ཡང་སོས་ནས་བྱང་དུ་དཔག་ཚད་ཉི་ཤུ་ན་ཆུ་བུར་ཅན་གྱི་གནས་ཡོད་པ་ལྟར་དེའི་འོག་ནས་འོག་ཏུ་རིམ་པ་ལྟར། ཆུ་བུར་རྡོལ་བ། ཨ་ཆུ་ཟེར་བ། ཀྱེ་ཧུད་ཟེར་བ། སོ་ཐམ་ཐམ་པ། ཨུཏྤལ་ལྟར་གས་པ། པདྨ་ལྟར་གས་པ། པདྨ་ཆེན་པོ་ལྟར་གས་པ་རྣམས་གནས་སོ། །ཉི་ཚེ་བའི་གནས་ལ་ཕྱོགས་གཅིག་ཏུ་ངེས་པ་མ་མ ཆིས་ཤིང་སྟེ་མིའི་གནས་སོགས་ཐ་དད་པར་མང་པོའི་གནས་དང་རེ་རེའི་གནས་ཀྱང་ཡོད་དོ། །ཉེ་འཁོར་བ་ནི་ཚ་དམྱལ་རྣམས་ཀྱི་འཁོར་དུ་གནས་ཏེ་ཕྱོགས་བཞིར་ལྷག་པའི་གནོད་པ་བཞི་བཞི་སྟེ་བཅུ་དྲུག་ཡོད་དོ། །གཉིས་པ། ཡི་དྭགས་རྣམས་ནི་རྒྱལ་པོའི་ཁབ་ཀྱི་གྲོང་ཁྱེར་གྱི་འོག་དཔག་ཚད་ལྔ་བརྒྱ་འདས་པ་ན་རྩ་བའི་གནས་ཡོད་ཅིང་། ཡན་ལག་ནི་ལྷ་དང་མིའི་འཇིག་རྟེན་དག་ནའང་ཡོད་དོ། །གསུམ་པ། དུད་འགྲོ་བྱིངས་ཀྱི་གནས་ནི་ཕྱིའི་རྒྱ་མཚོ་ཆེན་པོ་སྟེ། ཁ་འཐོར་བ་ནི་འདོད་པའི་ལྷ་དང་མིའི་ཡུལ་ནའང་གནས་པ་ཡིན་ཏེ་དེ་ཡང་ས་དང་ཐང་དང་རི་དང་ཤིང་དང་ཆུ་དང་ནམ་མཁའ་དང་མེའི་ནང་ན་ཡང་ཡོད་པར་བཤད་དོ། །གཉིས་པ་མཐོ་རིས་ལ། མི་དང་ལྷ་གཉིས་ལས། དང་པོ། མཐོ་རིས་ཀྱི་མི་རྣམས་ཀྱི་གནས་ནི་གླིང་བཞི་གླིང་ཕྲན་གསུམ་བཅས་བདུན་པོ་སྟེ། རྔ་ཡབ་ཀྱི་གླིང་ཕྲན་ནི་སྲིན་པོ་གནས་པའི་ཕྱིར་མི་ལས་གཞན་ཡིན་ནོ་སྟེ་ཡི་དྭགས་ཀྱི་འགྲོ་བར་སྡུད་དེ། གསང་སྙིང་ལས། ཡི་དྭགས་སྲིན་པོ་ཆེན་པོ་ཞེས་གསུངས་པའི་ཕྱིར་རོ། །གཉིས་པ་ལྷ་ལ་བསྟན་བཤད་གཉིས། དང་པོ། ལྷ་ཡི་གནས་ལ་འདོད་གཟུགས་གཉིས་ལས་ཞེས་བསྟན། གཉིས་པ་ལ། འདོད་ལྷ། གཟུགས་ཁམས་གཉིས། དང་པོ་ལ། དངོས་དང་། ཞར་ལ་ལྷ་མིན་བཤད་པ་གཉིས། དང་པོ་ལ་མདོར་བསྟན། རྒྱས་པར་བཤད་པའོ། །དང་པོ། འདོད་ལྷའི་གནས་དྲུག་སྟེ་ཞེས་པས་བསྟན། གཉིས་པ་ལ། ས་ལ་བརྟེན་པ་དང་། མཁའ་ལ་བརྟེན་པ་གཉིས། དང་པོ་ལ། རྒྱལ་ཆེན་རིས་བཞི་དང་སུམ་ཅུ་རྩ་གསུམ་གཉིས། དང་པོ། རྒྱལ་ཆེན་རིས་བཞི་ནི་རི་རབ་ཀྱི་བང་རིམ་བཞི་དང་། ཉི་ཟླ་དང་། སྐར་མའི་གཞལ་མེད་ཁང་ན་གནས་ཏེ། དེ་ཡང་རི་རབ་ཀྱི་བང་རིམ་དང་པོར་ལག་ན་ཡོལ་གོ་ཐོགས་པ། །གཉིས་པར་མེ་ཏོག་ཕྲེང་ཐོགས། གསུམ་པར་སྦྲང་ཆང་གིས་རྟག་མྱོས། བཞི་པར་ཕྱོགས་བཞིར་རྒྱལ་ཆེན་བཞི་འཁོར་དྲི་ཟ་གྲུལ་བུམ་ཀླུ་གནོན་སྦྱིན་གྱི་རིགས་རྣམས་གནས་ཏེ། དེ་རྣམས་ཀྱི་ཕོ་བྲང་། ཤར་ན་ཡུལ་འཁོར་སྲུང་གི་ཕོ་བྲང་ཡུལ་འཁོར་སྲུང་། དེ་བཞིན་དུ་ལྷོོར་འཕགས་སྐྱེས་པོའི་འཕགས་སྐྱེས། ནུབ་ཏུ་སྤྱན་མི་བཟང་གི་སྣ་ཚོགས་གཟུགས། བྱང་ན་རྣམ་ཐོས་སྲས་ཀྱི་ལྕང་ལོ་ཅན་རྣམས་ཀུན་ཀྱང་ངོས་རེར་དཔག་ཚད་ཉིས་བརྒྱ་ལྔ་བཅུ་པ་འབྱོར་པ་ཚད་མེད་པས་བརྒྱན་པའོ། །གཞན་ཡང་གཉའ་ཤིང་འཛིན་རིའི་སྟེང་གི་ཕྱོགས་བཞི་ན་རྒྱལ་ཆེན་བཞིའི་ཕོ་བྲང་ཡོད་ཅིང་། གསེར་གྱི་རི་བདུན་དང་ཁོར་ཡུག་གི་རིའི་རྩེ་མོ་དང་། རི་དང་ཤིང་དང་ནགས་ཀྱི་ལྷ་ཡན་ཆད་རྒྱལ་ཆེན་རིགས་བཞིའི་ལྷར་གཏོགས་པས་དེ་དག་གི་གནས་རིས་ཤིན་ཏུ་མང་པོ། ཁྱད་པར་དུ། ལྷུན་པོའི་ཕྱེད་གཉའ་ཤིང་འཛིན་གྱི་རྩེ་དང་མཉམ་པའི་ཐད་སོ་ན་ཉི་ཟླ་གཟའ་སྐར་རྣམས་འཆར་ཏེ། དེ་ཡང་ཉི་མའི་དཀྱིལ་འཁོར་དཔག་ཚད་ལྔ་བཅུ་ང་གཅིག་ཁ་ཞེང་དང་ཁོར་ཡུག་ལ་སུམ་འགྱུར། འོག་གཞི་མེ་ཤེལ་མཐའ་ཆགས་ཏེ་ཁ་སྐྱོར་རམ་ར་བ་གསེར་ལས་གྲུབ་པ། ཟླ་བའི་དཀྱིལ་འཁོར་དཔག་ཚད་ལྔ་བཅུ་པ་ཁོར་ཡུག་སུམ་འགྱུར། འོག་གཞི་ཆུ་ཤེལ་མཐའ་ཆགས་དངུལ་ལས་གྲུབ་པ་གཉིས་ཀའི་རྔམས་སུ་དཔག་ཚད་ཕྱེད་དང་དྲུག་དང་དཔག་ཚད་གཅིག་གི་བཅོ་བརྒྱད་ཆ་གཅིག་སྟེང་དུ་གནས་སོ། །དེ་གཉིས་ཀའི་ནང་ན་ལྷ་ཡི་གྲོང་ཁྱེར་གནས་སྟེ། སྐྱེད་མོས་ཚལ་དང་རིན་པོ་ཆེའི་རྫིང་བུ་དང་ནང་ན་ལམ་སྲང་དང་རིན་པོ་ཆེན་སྣ་ཚོགས་བཀྲ་བའི་ས་གཞི་ལ་མེ་ཏོག་མན་ད་ར་བའི་ཆར་བ་པུས་ནུབ་ཙམ་དུ་ངང་གིས་འབབ་ཅིང་། མེ་ཏོག་རྙིང་པ་རྣམས་རླུང་གིས་འདོར་ཞིང་གསར་པ་གསར་པར་འགྲེམས་པ། དེ་ན་ལྷའི་བུ་ཉི་མ་དང་ཟླ་བའི་གྲོང་ཁྱེར་རིན་པོ་ཆེ་སྣ་བཞི་ལས་གྲུབ་པ་ལྷ་དང་ལྷ་མོ་མང་པོས་གང་ཞིང་དགའ་བར་བྱས་པའོ། །སྐར་མའི་ཚོགས་ཀྱང་ཆུ་ཤེལ་སྙིང་པོ་ལས་གྲུབ་པ་སྟེ། གསེར་གྱི་ར་བས་ལེགས་པར་བསྐོར་ཞིང་ས་གཞི་དང་ལམ་སྲང་ལྷ་ཡི་གྲོང་ཁྱེར་སོགས་ཀྱིས་བརྒྱན་པ། རྒྱ་ཁྱོན་ཆུང་བ་རྣམས་རྒྱང་གྲགས་གཅིག་ནས་ཆེ་བ་རྣམས་དྲུག་གི་བར་རིམ་པར་ཡིན་ནོ། །འདི་ལ་པནྜི་ཏ་ཛི་ན་མི་ཏྲ་སོགས་ཁ་ཅིག་གིས་སྐར་མའི་རྒྱུ་གསེར་ཟངས་ཆུ་ཤེལ་འཁར་བ་ཅི་རིགས་ལ་ཚད་རྒྱང་གྲགས་གཅིག་ནས་བཅོ་བརྒྱད་པར་ཡིན་ནོ་ལོ་སྟེ་ཞེས་འདོད་དོ། །གཉིས་པ་ལ་གནས་སྤྱི་དང་། འབྱོར་པའི་ཁྱད་པར་གཉིས། དང་པོ། དབུས་ཀྱི་རི་རབ་ཀྱི་སྟེང་ན་དབང་པོ་དང་ཉེ་དབང་བཅས་སུམ་ཅུ་རྩ་གསུམ་འདུག་པའི་གནས་ནི། མ་འདྲེས་པ་དང་ཕྲེང་བ་འབར་དང་གཟི་བརྗིད་མཆོག་ལ་སོགས་པ་ཉེ་དབང་གི་གནས་རིས་སུམ་ཅུ་རྩ་གཉིས་དང་། གཙོ་བོའི་སྟེ་བརྒྱ་བྱིན་གྱི་གནས་བཅས་ཏེ་སུམ་ཅུ་རྩ་གསུམ་པོ་མཐོ་རིས་ཀྱི་ཡུལ་ཡིན་ནོ། །རི་རབ་ཀྱི་རྩེ་མོའི་ངོས་བཞིའི་རྒྱ་ཁྱོན་ལ། ངོས་རེར་དཔག་ཚད་བརྒྱད་ཁྲིར་གནས་པའི་སྟེང་ཞེས་སོ། །གཉིས་པ་ལ་བསྟན་བཤད་གཉིས། དང་པོ། གྲོང་དང་སྐྱེད་ཚལ་དང་ས་གཞི་དང་ཤིང་ཆེན་པོ་དང་འདུན་ས་བཟང་པོ་སྟེ་ལྔར་གནས་པ་ལས་ཞེས་པས་བསྟན། གཉིས་པ་ལ་དེ་ལྟར་ལྔ་ལས། དང་པོ་གྲོང་ནི། རི་རབ་ཀྱི་སྟེང་ལྷའི་གྲོང་ཁྱེར་ལྟ་ན་སྡུག་གི་དབུས་ན་རྣམ་པར་རྒྱལ་བའི་ཁང་བཟང་མཆོག ངོས་རེ་ན་དཔག་ཚད་ཉིས་བརྒྱ་ལྔ་བཅུ་པ། མཐའ་བསྐོར་དུ་སྟོང་ཡོད་པ་ལྷ་ཡི་གྲོང་ཁྱེར་ལྟ་ན་སྡུག་ལས་གྱེན་དུ་དཔག་ཚད་ཕྱེད་དང་ལྔ་འཕགས་ཤིང་། ཁང་བཟང་དེ་ལ་བ་གམ་བརྒྱད་དེ་རེ་རེ་ལ་ཁང་བརྩེགས་བདུན་བདུན་གནས། དེ་དག་རེ་རེར་གནས་ཁང་བདུན་བདུན་གྱིས་བརྒྱན་ནོ། །དེའི་ཕྱི་རོལ་དུ་སྐྱེད་མོས་ཚལ་དང་རིན་ཆེན་གྱི་རྫིང་བུ་བཞི་དང་རྫིང་འགྲམ་ན་འདོད་དགུ་འབྱུང་བའི་དཔག་བསམ་གྱི་ཤིང་དང་བཅས་པའོ། །དེ་ཡི་ཕྱི་རོལ་ན་ལྷ་སྤྱིའི་གྲོང་ཁྱེར་ལྟ་ན་སྡུག་ངོས་རེར་དཔག་ཚད་ཉིས་སྟོང་ལྔ་བརྒྱ་པ་འཕང་དུ་ཕྱེད་དང་གསུམ་སྟེ་རྒྱུ་གསེར་ལས་བྱས་པ། གསེར་གྱི་ར་བས་བསྐོར་ཞིང་མཛེས་པ་སྟེ། དེ་ལ་དགུ་བརྒྱ་དང་དགུ་བཅུ་རྩ་དགུའི་གྲངས་ཀྱི་སྒོ་ཆེན་པོ་རྣམས་དང་ལྡན་ཞིང་། སྒོ་རེ་རེའི་འཕང་དུ་དཔག་ཚད་ཕྱེད་དང་གསུམ་པ་སྟེ། ཞེང་དུ་ཕྱེད་དང་གཉིས་བཅས་སྒོ་རེ་ལ་སྒོ་སྲུང་ལྷའི་བུ་གོ་མཚོན་ཅན་ལྔ་བརྒྱ་རེ་དང་ལྡན་པ། གྲོང་ཁྱེར་དེའི་ལམ་སྲང་རིང་ཚད་སྲིད་དུ་དཔག་ཚད་ཉིས་སྟོང་ལྔ་བརྒྱ་པ། ཞེང་དུ་བཅུ་གཉིས་འཇམ་ཞིང་བདེ་བ་སྟེ། གཡས་གཡོན་ན་རིན་པོ་ཆེའི་རྫིང་བུ་དང་རིན་ཆེན་ལྗོན་ཤིང་དང་པདྨས་བརྒྱན་པའི་རིན་པོ་ཆེའི་རྫིང་བུ་བྱ་སོགས་སྐད་སྙན་པར་སྒྲོགས་པ། གྲོང་ཁྱེར་གྱི་ཕྱི་རོལ་ན་རིན་ཆེན་གྱི་ར་བ་རིམ་པ་བདུན་གྱིས་བསྐོར་བའི་བར་བར་ན་འོ བས་བདུན་ཆུ་མཚོ་ངང་པས་བརྒྱན་པའི་ནང་དུ་རིན་ཆེན་གྱི་གྲུ་ན་ལྷ་རྣམས་ཞུགས་ཏེ་རྩེད་འཇོ་འཕེལ་བ། རི་རབ་ཀྱི་རྩེ་མོའི་མཚམས་བཞིར་ཁང་བརྩེགས་བཞི་ཡོད་དེ། དེ་ཡང་དཔངས་སུ་དཔག་ཚད་ཕྱེད་དང་ལྔ་པ་ལ། ངོས་རེར་དཔག་ཚད་བརྒྱ་དང་ཉི་ཤུ་རྩ་ལྔ་པ། ཁོར་ཡུག་ཏུ་ལྔ་བརྒྱ་ཡོད་པ་ན་གནོད་སྦྱིན་ལག་ན་རྡོ་རྗེའི་ལྷ་རིགས་གནས་སོ། །ཁང་བརྩེགས་བཞི་པོའི་བར་ཐང་རི་རབ་ཆེན་པོའི་ཁ་ཆག་ལ་ཕྱོགས་ཀྱི་རིན་པོ་ཆེའི་ར་བ་དཔག་ཚད་གསུམ་པས་བསྐོར་བའོ། །གཉིས་པ་སྐྱེད་ཚལ་ནི། ལྷ་ཡི་རྩེ་ས་སྐྱེད་མོས་ཚལ་གྱི་ར་བ་རྣམ་པ་བཞི་ཡོད་པ་ཡང་། གྲོང་ཁྱེར་ལྟ་{བལྟ་འདིའི་རིགས་འདི་ལྟར་ཞུས།} ན་སྡུག་ནས་དཔག་ཚད་ཉི་ཤུ་ཉིད་ཕྱོགས་བཞིར་འདས་པའི་མཚམས་ན་གནས་པ་ལས། ཤར་ན་ཤིང་རྟ་སྣ་ཚོགས་ཀྱིས་བརྒྱན་པའི་སྐྱེད་མོས་ཚལ། རོ་བྲོ་བའི་རིན་ཆེན་རྫིང་བུ་བཞི་དང་ལྗོན་ཤིང་སྣ་ཚོགས་དང་ལྷའི་གོས་དང་རྒྱན་དང་ལྷ་ཡི་བུ་མོས་མཛེས་ཤིང་བརྒྱན་པས་དགའ་བར་བྱས་འོ། །ལྷོ་ན་རྩུབ་འགྱུར་ཞེས་བྱ་བའི་སྐྱེད་མོས་ཚལ་རྫིང་དང་མེ་ཏོག་སོགས་རྩུབ་པར་གྱུར་པ་ཡོད་པས། ལྷ་རྣམས་ལྷ་མིན་དང་གཡུལ་འགྱེད་པའི་ཚེ་ན་དེར་ཞུགས་ཤིང་སྤྱོད་པ་ན་ཞེ་སྡང་འཕེལ་བར་བྱེད་པ་སྟེ། ཤིང་ལས་རིན་པོ་ཆེའི་མཚོན་ཆ་དང་གོ་ཆ་ཤིན་ཏུ་སྲ་བ་རྣམས་འབྱུང་བའོ། །ནུབ་ན་འདྲེས་མའི་ཚལ་ཞེས་བྱ་བ་རྫིང་བུ་བཟང་པོ་ནས་སྣ་ཚོགས་པའི་ལོངས་སྤྱོད་མཁོ་དགུ་འདྲེས་མར་འབྱུང་ཞིང་ལྷ་ཕོ་མོ་འདྲེས་མར་རྩེ་བའོ། །བྱང་ན་དགའ་བའི་ཚལ་ཞེས་བྱ་བ་ལྷ་ཡི་བུ་མོས་གང་ཞིང་། བསྐལ་བཟང་འདྲེན་པ་སྟོང་གི་བཞུགས་ཁྲི་རིན་པོ་ཆེའི་ཤིང་གི་ནང་དུ་ཡོད་པ་དང་། དེ་ལས་ལྷ་རྣམས་ཀྱི་ཚེ་སྔ་ཕྱི་ལེགས་ཉེས་འཇིགས་པ་ཡོད་མེད་ཀྱི་མཚན་མ་གསལ་བ་དང་བཅས། དེར་ཕྱིན་ཅིང་ལོངས་སྤྱོད་པས་དགའ་བ་ལྷག་པར་འཕེལ་བ་ཡིན་ནོ། །སྐྱེད་ཚལ་གྱི་གཞི་དེ་དག་ཆུ་དང་ཞེང་གཉིས་ཀར་དཔག་ཚད་ཉིས་བརྒྱ་ལྔ་བཅུ་པ་སྟེ་མཐའ་སྐོར་དུ་དཔག་ཚད་སྟོང་ཡོད་པ། དབྱིབས་ལེགས་ཤིང་གསེར་གྱི་ར་བ་དཔག་ཚད་གཅིག་པས་ཡོངས་སུ་བསྐོར་ཞིང་ར་བ་ལ་རིན་ཆེན་སྣ་བཞིའི་ལྕོག་གིས་ཀུན་ནས་མཛེས་པར་བརྒྱན་པ། ནང་གི་གཞི་རྣམས་ན་གསེར་གྱི་བྱེ་མ་བརྡལ་བ། ཚོན་སྣ་བརྒྱ་རྩ་གཅིག་གིས་སྤེལ་བ། ཤིན་ཏུ་འཇམ་ཞིང་རེག་ན་བདེ་བ་རིན་ཆེན་སྐྱེད་ཚལ་དང་མཚོ་དང་རྫིང་བུ་ཡིད་དུ་འོང་བའི་ཆུ་བྱས་གང་བ། མེ་ཏོག་མནྡར་གསར་པ་ཕང་ཕུང་ཆགས་ཤིང་པུས་ནུབ་ཙམ་དུ་ཁེབས་པ་ལ་བུང་བ་སྙན་པར་སྒྲོགས་པས་གར་བྱེད་པ། དེ་དག་ཏུ་འགྲོ་བའི་ལམ་ཡང་ཆུར་དཔག་ཚད་ཉི་ཤུ་ཞེང་དུ་ཕྱེད་གཉིས་པ། གསེར་གྱི་བྱེ་མ་བརྡལ་ཞིང་ཙནྡན་གྱི་ཆུས། ཆག་ཆག་བཏབ་པའི་འགྲམ་ན་ཤིང་ལྗོན་པ་མེ་ཏོག་དང་འབྲས་བུས་བརྒྱན་པ་ཚར་དུ་སྦྲེང་བ་སོགས་བཀོད་པས་མཛེས་པར་བརྒྱན་པའོ། །གསུམ་པ་ས་གཞི་ནི། ཕྱོགས་བཞིའི་ཚལ་རྣམས་ལས་ཕྱི་རོལ་དུ་གཞལ་བའི་དཔག་ཚད་ཉི་ཤུ་ན། ས་གཞི་བཟང་པོ་རྣམ་བཞི་ནི་ཤར་ནས་རིམ་པ་བཞིན་དུ། ས་གཞི་སྣ་ཚོགས་ཞེས་བྱ་བ་དང་། དེ་བཞིན་དུ་རྩུབ་འགྱུར་དང་འདྲེས་པ་དང་དགའ་བ་སྟེ། རིན་ཆེན་གྱི་ས་གཞིར་ལྗོན་ཤིང་དང་ཆུ་མཚོས་བརྒྱན་པའི་ཐང་ཉམས་བདེ་བ་ཚད་དང་བཀོད་པ་སོགས་ཚལ་རྣམས་དང་འདྲ་བའོ། །བཞི་པ་ཤིང་ནི། ལྷ་རྣམས་ཉེ་བར་སྤྱོད་པའི་དཔག་བསམ་གྱི་ཤིང་ནི་གྲོང་ཁྱེར་མཆོག་དེའི་བྱང་ཤར་ན། ཡོངས་འདུ་ས་བརྟོལ་ཞེས་པ་འཕང་དུ་སྟེ་གྱེན་དུ་དཔག་ཚད་བརྒྱ་འཕགས་ཤིང་། རྩ་བར་དཔག་ཚད་ལྔ་ཐུར་དུ་ཟུག་པ་ཕྱོགས་བཞིའི་ཡལ་ག་ལ་དཔག་ཚད་ལྔ་ཕྲག་བཅུ་བཅུ་སྟེ་ལྔ་བཅུ་ལྔ་བཅུ་རབ་ཏུ་རྒྱས་པ། སྙིང་པོའི་རྩེ་མོ་གདུགས་ལྟར་འདུག་པ་ལའང་དཔག་ཚད་ལྔ་བཅུས་བརྒྱན་པ། དེ་སྙེད་ཤིང་དེའི་འོད་ཀྱིས་ཕྱོགས་རྣམས་གསལ་བར་བྱས་པ་སྟེ་དཔག་ཚད་ལྔ་བཅུ་ཁོ་ར་ཁོར་ཡུག་ཏུ་ཁྱབ་པ། ཤིང་དེ་ལས་དྲི་བསུང་ཞིམ་པོས་རྫི་ཕྱོགས་དཔག་ཚད་བརྒྱ་ཚུན་དང་། རྫི་ཕྱོགས་མ་ཡིན་པར་ལྔ་བཅུར་ཁྱབ་པའི་ལྷ་རྣམས་ཀྱི་འདོད་པའི་ཡོན་ཏན་ཡིད་ལ་བསམ་པ་དང་མཉམ་དུ་འབྱུང་བའི་ཤིང་ཡིན་ལ། དེའི་དྲུང་དུ་རིན་ཆེན་ཨར་མོ་ནིག་དང་འདྲ་བ་རབ་ཏུ་དཀར་བའི་རྡོ་ལེབ་མཛེས་པ་སྟེ། དེའི་ཚད་ཆུ་དང་ཞེང་དུ་དཔག་ཚད་ལྔ་བཅུ་ལྔ་བཅུའི་རང་བཞིན་གྲུ་བཞི་པ་མཐའ་སྐོར་དུ་ཉིས་བརྒྱ་དང་འཕང་དུ་{འཕངས་སུ}དཔག་ཚད་ཕྱེེད་དང་དྲུག་དང་བཅོ་བརྒྱད་ཀྱི་ཆ་གཅིག་གིས་ལྷག་པ་ལ། དབུས་ན་དབང་པོའི་ཁྲི་དང་ལྷ་གཞན་རྣམས་ཀྱི་ཁྲིར་བཅས་བཀོད་པས་མཛེས་ཤིང་མེ་ཏོག་གི་ཆར་པ་འབབ་པར་ལྷ་རྣམས་དབྱར་དུས་སུ་ཟླ་བ་བཞིར་འདོད་ཡོན་ལ་ལོངས་སྤྱོད་ཅིང་གནས་སོ། །ལྔ་པ་འདུན་ས་ནི། གྲོང་ཁྱེར་བལྟ་ན་སྡུག་ནས་དཔག་ཚད་ཕྱེད་དང་བཞིའི་གཞལ་བའི་ལྷོ་ནུབ་ན་ཆོས་བཟང་ལྷ་ཡི་འདུན་ས་སྟེ། ཆུ་དང་ཞེང་དུ་དཔག་ཚད་སུམ་བརྒྱ་མཐའ་སྐོར་དུ་དགུ་བརྒྱ་དབྱིབས་ཟླུམ་པོ། དབུས་ན་རིན་ཆེན་གྱི་ཁང་བརྩེགས་འོད་འབར་བ། ཅུང་ཟད་ཙམ་གྱིས་ས་ལ་མ་རེག་པར་བཏེགས་པའི་ཁང་བུ་དོན་ཐམས་ཅད་གྲུབ་པར་བྱེད་པ་ཞེས་བྱ་བའི་དྲུང་དུ་ལྷ་རྣམས་འདུས་ནས་རང་གི་སྲིད་དང་རང་རང་གི་བྱ་བ་ལས་ཉམས་པ་བསྲུང་བའི་ཕྱིར་འདུས་སར་འགྲོ་བའི་གནས་ཡོད་དོ། །དེས་ས་གཞི་ལ་བརྟེན་པའི་གནས་བཤད་ཟིན་ནས། གཉིས་པ་ནམ་མཁའ་ལ་བརྟེན་པ་ནི། སུམ་ཅུ་རྩ་གསུམ་གྱི་སྟེང་གི་ནམ་མཁའ་ལ་བརྟེན་པའི་འདོད་ལྷའི་གནས་འཐབ་བྲལ་དང་དགའ་ལྡན་དང་འཕྲུལ་དགའ་དང་གཞན་འཕྲུལ་དབང་བྱེད་བཞི་པོ་ནི། རྒྱུ་ཟག་བཅས་བསོད་ནམས་ཆ་མཐུན་གྱི་དགེ་བས། དུས་ནི་སུམ་ཅུ་རྩ་གསུམ་པའི་སྔར་ཆགས་ལ། གནས་ཁང་ནི་གཟའ་སྐར་བཞིན་དུ་ནམ་མཁའ་ལ་སྣང་བ་སྟེ། དེ་དག་གི་རྒྱ་ཚད་སུམ་ཅུ་རྩ་གསུམ་ལས་འཐབ་བྲལ་ཉིས་འགྱུར་གྱིས་ཆེ་བས་མཚོན་དེ་ནས་བཟུང་སྟེ་གོང་ནས་གོང་དུ་ཉིས་འགྱུར་དུ་འཕགས་པ་ཡིན་ནོ། །གཉིས་པ་ལྷ་མིན་ནི། ལུས་དང་རྫུ་འཕྲུལ་ལོངས་སྤྱོད་སོགས་ལྷ་དང་འདྲ་ཡང་རིགས་དང་སྐལ་བ་མི་འདྲ་བས་ལྷ་མ་ཡིན་ཏེ། དེ་དག་གི་རྩ་བའི་གནས་རི་རབ་ཆུ་མཚམས་མན་ཆད་ཀྱི་ཁོང་གསེང་ནང་ནས་རིམ་པས་ཆུ་མཚམས་ན་སྒྲ་གཅན་དང་དེ་འོག་དཀར་ཕྲེང་དེ་འོག་འགུལ་ཕྲེང་དང་དེ་འོག་གསེར་གྱི་ས་གཞིར་ཐགས་བཟང་རིས་རྣམས་གནས་ཏེ་རིམ་པར་སྟོབས་འབྱོར་སོགས་གོང་མ་ལས་འོག་མ་རྣམས་བཟང་ངོ་། །དེ་དག་འཕེན་བྱེད་ཀྱི་རྒྱུ་ནི་ཡི་དྭགས་སུ་སྐྱེ་བའི་ལས་ཀྱིས་ཏེ་མི་དགེ་བས་འཕངས་པ་ལ། རྫོགས་བྱེད་ལྷ་ཡི་ལས་ཀྱིས་ཏེ་དགེ་བས་རྫོགས་པར་བྱས་པས་ལྷ་དང་འགྲན་པའི་དཔལ་དང་འབྱོར་པས་མཛེས་པ་སྟེ་དཀར་ཕྲེང་དང་སྒྲ་གཅན་ནི་རྒྱལ་ཆེན་བཞིའི་ལྷ་དང་འདྲའོ། །རི་རབ་ཁོང་གསེང་གི་འོག་གཞི་གསེར་གྱི་ས་གཞི་བཟང་པོའི་དབུས་སུ་ལྷ་མིན་གྱིས་རྒྱལ་པོ་ཐགས་བཟང་གནས་ཏེ། ལྷའི་དབང་པོའི་ཁང་བཟང་མཆོག་རྣམ་པར་རྒྱལ་བ་ལྟ་བུ་ནི་གདམས་པ་ཅན་ཞེས་བྱ་བ་དང་། དེ་བཞིན་དུ་གྲོང་ཁྱེར་གྱི་མིང་གསེར་ལྡན་དང་འདུན་ས་ནོར་བཟང་དང་། ཕྱོགས་བཞིའི་སྐྱེད་ཚལ་ནི་ཀུན་དགའ་ར་དང་རབ་དགའ་དང་དགའ་བ་དང་དགའ་བའི་ཀུན་དགའ་ར་བ་ཞེས་པ་སྟེ་བཞིའོ། །ས་གཞིའི་མིང་ཡང་ཚལ་དེ་རྣམས་དང་འདྲ་བ་སྟེ། ཤིང་གི་མཆོག་ནི་ཙི་ཏྲ་པ་ཏྲིའོ། །རྡོ་ལེབ་ནི་རབ་ཏུ་བཟང་པོ་དང་སྐྱེད་ཚལ་ན་སྤྱོད་པའི་གླང་ཆེན་ཏི་སེ་གངས་བརྩེགས་དང་། གཡུལ་གྱི་གླང་པོ་བཟོད་པར་དཀའ་བ་དང་རྟ་ཡི་མཆོག་ནི་རབ་མྱུར་ཞེས་བྱ་བ་དག་ཡོད་དོ། །གཞན་ཡང་འཛམ་གླིང་སོགས་ངེས་མེད་ན་ཡོད་པའི་བདུད་རིགས་ཀྱི་མི་མ་ཡིན་ཕལ་དག་ཀྱང་ལྷ་མིན་གྱི་ཁོངས་སུ་གཏོགས་པ་ཡིན་ནོ། །གཉིས་པ་གཟུགས་ཁམས་ལ། གནས་དང་། རྒྱ་ཁྱོན་གཉིས། དང་པོ་ལ། གཟུགས་ཁམས་ཀྱི་གནས་བསྟན་པ། ཞར་ལ་གཟུགས་མེད་ལ་དངོས་སྣང་གི་གནས་མེད་ཚུལ་གཉིས། དང་པོ་ནི། འདོད་ཁམས་ལས་གྱེན་དུ་འཕགས་པའི་གཟུགས་ཁམས་ཀྱི་གནས་རིས་རྣམ་པ་བཅུ་བདུན་ནམ་བཅོ་བརྒྱད་ནི། འཇིག་རྟེན་པའི་བསམ་གཏན་དང་པོ་ནས་བཞི་པའི་བར་ཆུང་འབྲིང་ཆེ་བ་ཐོབ་པས། ཚངས་རིས་ནས་བཟུང་འབྲས་བུ་ཆེའི་བར་རོ་སྟེ། བསམ་གཏན་དང་པོ་ཆུང་ངུ་དང་འབྲིང་དང་ཆེན་པོ་བསྒོམས་པ་རྫོགས་པ་ལས། ཚངས་རིས་དང་། ཚངས་པ་མདུན་ན་འདོན་དང་། ཚངས་ཆེན་གསུམ། དེ་བཞིན་དུ་བསམ་གཏན་གཉིས་པ་ཆུང་འབྲིང་ཆེ་གསུམ་གྱི་འོད་ཆུང་། ཚད་མེད་འོད། འོད་གསལ་གསུམ། གསུམ་པ་ཆུང་འབྲིང་ཆེ་གསུམ་གྱིས། དགེ་ཆུང་། ཚད་མེད་དགེ། དགེ་རྒྱས་གསུམ། བཞི་པའི་གསུམ་གྱིས་སྤྲིན་མེད་དང་། བསོད་ནམས་སྐྱེས་དང་། འབྲས་བུ་ཆེ་བ་སྟེ་སོ་སྐྱེའི་གནས་གཞན་གསུམ་གྱི་བར་དུའོ། །དེའི་གོང་དུ་འཕགས་པའི་གནས། ཟག་མེད་ཐོབ་པའི་གང་ཟག་གིས་བསམ་གཏན་བཞིི་པོ་སྤེལ་མར་རབ་ཏུ་བསྒོོམས་པས་ཏེ། དེ་ཡང་བསམ་གཏན་དང་པོ་དང་བཞི་པ་སྤེལ་བ་ཆུང་ངུ་། བསམ་གཏན་དང་པོ་དང་གཉིས་པ་བསྡོམས་པ་ལས་བཞི་པ་སྤེལ་བ་འབྲིང་། དང་པོ་གཉིས་པ་གསུམ་པ་གསུམ་དང་བཞི་པ་སྤེལ་བ་ཆེན་པོ། བསམ་གཏན་བཞི་པོ་ནང་ཚན་རེ་རེ་ཞིང་བཞི་པ་དང་སྤེལ་བ་ཆེས་ཆེ་བ། དེ་དག་ཐོད་རྒལ་དུ་བསྒོམས་པ་མཆོག་ཏུ་ཆེ་བ་སྟེ། ཐོད་རྒལ་ནི་བསམ་གཏན་བཞི་པོའི་ལ་ལ་དོར་ནས་མཆོངས་{ འཕྱོངས་}པའི་བར་དུ་བཞི་པ་བསྒོམ་པས་ཏེ། མས་ཡར་རིམ་དང་། རིམ་མིན་དུ་གཅིག་ནས་གསུམ་གྱི་བར་ནས། ཡས་མར་བོར་པའི་བར་དུ་བཞི་པ་བསྒོམས་པའོ། །དེ་ལྟར་བསྒོམས་པས་མི་ཆེ་བ་ནས་ཏེ། མི་གདུང་བ་དང་། གྱ་ནོམ་སྣང་བ་དང་། ཤིན་ཏུ་མཐོང་བ་དང་། འོག་མིན་གྱི་བར་དག་ཏུ་འཕགས་པའི་གནས་ཏེ་སྔ་མ་སོ་སྐྱེའི་གནས་རྣམས་ལས་གཞན་གཙང་མའི་རིས་རྣམ་པ་ལྔའོ། །བཅོ་བརྒྱད་པ་ནི་བཅུ་བདུན་པོ་དེ་དག་གི་གོང་ན་སྟེ་གནས་གཙང་ལྔ་ལས་འདས་པ་ན་སྲིད་པ་ཐ་མ་པའི་བྱང་སེམས་སམ་དབང་ཕྱུག་ཆེན་པོའི་གནས། འོག་མིན་རྣམ་མཛེས་ཞེས་ས་བཅུ་ཡོངས་སུ་རྫོགས་པར་ཐོབ་པའི་བྱང་སེམས་འཕགས་པ་འབའ་ཞིག་གི་གནས་དྭངས་ཤིང་གསལ་ལ་བཀོད་པ་ཚད་མེད་པ་ཡོངས་སུ་རྫོགས་པ་ཉན་རང་འཕགས་པས་གཙང་རིས་ལྔ་བགྲོད་པ་ལས་ཆེས་ཁྱད་པར་དུ་འཕགས་པའི་གནས་ཀྱིས་ཕྱེ་བ་ཡིན་ནོ། །གཉིས་པ་ནི། གཟུགས་མེད་པ་བཞི་པོ་ལ་དངོས་སྣང་གཟུགས་སུ་གྲུབ་པའི་གནས་རགས་ཕྲ་གང་ཡང་མེད་དོ། །གཉིས་པ་ལ། གཟུགས་ཁམས་ཀྱི་རྒྱ་ཁྱོན་དང་། ཞར་ལ་གནས་སོ་སོའི་མཐོ་ཁྱད་བསྟན་པ་གཉིས། དང་པོ། གཟུགས་ཁམས་ཀྱི་ལྷ་གནས་དེ་དག་ལ་རྒྱ་ཁྱོན་གྱི་ཚད་ནི་བསམ་གཏན་བཞི་རིམ་པ་བཞིན་ཏེ། བསམ་གཏན་དང་པོའི་ལྷ་གནས་གསུམ་གྱི་རྒྱ་ཁྱོན་དང་གླིང་བཞི་པའི་འཇིག་རྟེན་གྱི་ཚད་དང་མཉམ། དེ་བཞིན་དུ་བསམ་གཏན་གཉིས་པ་དང་སྟོང་གཅིག་པ་སྤྱི་ཕུད་ཀྱི་འཇིག་རྟེན། གསུམ་པ་དང་སྟོང་གཉིས་པ་བར་མའི་ཁམས། བཞི་པའི་སོ་སྐྱེའི་གནས་གཞན་གསུམ་པོ་དང་སྟོང་གསུམ་གྱི་སྟོང་ཆེན་པོ་ཚད་མཉམ་པ་སྟེ་དེ་ལྟར་ཚངས་རིས་ནས་འབྲས་བུ་ཆེ་ཡི་བར་དུ་བསྟན་པ་སྟེ། གནས་གཙང་རིས་ལྔ་ལ་བརྒྱ་ཁྱོན་ཚད་མེད་པ་མཁའ་ལ་གཟའ་སྐར་རམ་འཇའ་ཚོན་ཤར་བ་ལྟར་གནས་པར་འདོད་དོ། །གཉིས་པ། གནས་རིས་དེ་དག་གི་མཐོ་ཁྱད་ཀྱི་བར་ཐང་ལ་གྱེན་དུ་འཛམ་བུའི་གླིང་ཉིད་ནས་རྒྱལ་ཆེན་རིས་བཞིའི་རྩ་བའི་གནས་ཀྱི་བར་དང་དེ་ནས་སུམ་ཅུ་རྩ་གསུམ་གྱི་གནས་ཀྱི་བར་ལ་སོ་སོར་དཔག་ཚད་བཞི་ཁྲི་བཞི་ཁྲི་ཡོད་པ་སྟེ། དེ་ནས་འཐབ་བྲལ་ལམ་མཚེ་མར་བརྒྱད་ཁྲི་དགའ་ལྡན་དུ་ཆིག་འབུམ་དྲུག་ཁྲི་ཡོད་པའི་ཆས་གཞལ་ཏེ་དེ་ལྟར་གོང་ནས་གོང་མར་བགྲོད་པའི་བར་སྣང་ལ་འཛམ་བུའི་གླིང་ནས་རང་རང་གི་གནས་དེར་ཇི་ཙམ་ཞིག་ཡོད་པའི་བར་ཐག་གོང་མ་གོང་མར་བརྩིས་པ་ཡིས་འོག་མིན་གྱི་བར་དུ་མཐོ་ཁྱད་ཤེས་པར་བྱའོ། །གཉིས་པ་དེ་ལས་སྟོང་དང་པོ་སོགས་ཀྱི་འཇོག་ཚུལ་ལ། གླིང་བཞི་རི་རབ་འདོད་ལྷའི་གནས་དྲུག་པོ་དང་ཚངས་པའི་འཇིག་རྟེན་གཅིག་དང་བཅས་པ་ལ་གླིང་བཞི་པ་ཡི་འཇིག་རྟེན་གྱི་ཁམས་ཞེས་བྱ། དེའི་མཐར་ཁོར་ཡུག་གི་མུ་ཁྱུད་དཔག་ཚད་བཞི་ཁྲི་འཕགས་པས་ཉི་ཟླའི་འཆར་ཚད་དང་མཉམ་པས་བསྐོར་བའོ། །དེ་ཉིད་སྟོང་ཕྲག་གཅིག་གི་མཐར་སུམ་ཅུ་རྩ་གསུམ་དང་མཐོ་ཁྱད་མཉམ་པའི་ལྕགས་རིས་བསྐོར་བ་ནི་སྤྱི་ཕུད་སྟོང་གི་འཇིག་རྟེན་གྱི་ཁམས་ཞེས་བྱ། སྤྱི་ཕུད་དེ་ཉིད་གཅིག་ནས་གཉིས་སུ་བགྲངས་པའི་སྟོང་ལ་བར་མའི་འཇིག་རྟེན་གྱི་ཁམས་ཡིན་ཏེ་གཞན་འཕྲུལ་དང་མཉམ་པའི་ལྕགས་རིས་ཀུན་ནས་བསྐོར་བའོ། །དེ་སྟོང་ལ་སྟོང་གསུམ་གྱི་འཇིག་རྟེན་ཆེན་པོ་ཞེས་བྱ་སྟེ་དེའི་མཐར་ཚངས་རིས་དང་མཉམ་པའི་ལྕགས་རིས་བསྐོར་བ་ན། གླིང་བཞི་རི་རབ་ཚངས་པའི་འཇིག་རྟེན་བར་ཐེར་འབུམ་གཅིག་སྟེ་བྱེ་བ་ཕྲག་བརྒྱ་རེ་ཡོད་དེ། འདི་དག་རྣམས་ནི་འོག་གཞི་རླུང་གི་དཀྱིལ་འཁོར་ཡང་གཅིག་ལ་བརྟེན་པས་ཐོག་མར་ཡང་མཉམ་དུ་ཆགས་ཤིང་མཐར་ཡང་མཉམ་དུ་འཇིག་པ་དང་གནས་པ་ཡིན་ནོ། །ཐེག་པ་ཆེན་པོ་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། སྣོད་ཆགས་ཚུལ་བསྟན་པའི་ལེའུ་སྟེ་གསུམ་པའི་འགྲེལ་པའོ།། །། ༈ གཉིས་པ་བཅུད་ཆགས་ཚུལ་ལ། མདོར་བསྟན། རྒྱས་བཤད་གཉིས། དང་པོ། དེ་ནས་ནང་བཅུད་ཀྱི་སེམམ་ཅན་ཆགས་པའི་ཚུལ་ལ་ཡང་། གཟུགས་མེད་ཀྱི་ཁམས་དང་གཟུགས་ཀྱི་ཁམས་དང་འདོད་པའི་ཁམས་ཏེ་གསུམ་དུ་ཡོད་པ་ལས། ཞེས་སོ། །རྒྱས་བཤད་ལ། གཟུགས་མེད། གཟུགས། འདོད་ཁམས་གསུམ། དང་པོ་ལ། དངོས་དང་། སྒྲ་དོན། རྩོད་སྤང་གསུམ། དང་པོ། ཐོག་མར་གཟུགས་མེད་བཞིའི་རང་བཞིན་བསྟན་པ་ནི། སྔར་ལེའུ་དང་པོར་བཤད་པ་བཞིན་ཐོག་མའི་འོད་གསལ་ཆེན་པོ་ལས་འཁྲུལ་ཏེ། ལྷན་ཅིག་སྐྱེས་པའི་མ་རིག་པའི་སས་བསྡུས་པའི་རིག་པ་རྟོག་མེད་བསམ་གཏན་བཞིའི་རྒྱར་ཆུད་དེ་གོལ་བས། གཟུགས་མེད་བཞི་པོ་གོང་ནས་འོག་མར་མཆེད་དེ། དེའི་རྒྱུ་ནི་སོ་སོ་རང་གི་རིག་པ་མདའ་ལྟ་བུ། དེས་ཉེར་ལེན་ཞི་གནས་གོལ་ས་ཅན་སྟོང་ལྟ་བུ། འཕེན་བྱེད་ཀྱི་ལས་བསོད་ནམས་ཆ་མཐུན་གཞུ་རྒྱུད་དང་མཐེབ་མཛུབ་ལྟ་བུས་འཕང་ནས། གཟུགས་མེད་ས་པ་འབེམ་འདྲ་བ་ལ་ཕྱིན་ཏེ་གནས་པའོ། །དེ་ཡང་བསམ་གཏན་བཞི་པ་སྣང་ཡུལ་མ་བཀག་པའི་གསལ་བ་ཙམ་སྟེ། ཞེན་ཡུལ་མི་གསལ་བློས་རྟོག་དཔྱོད་མེད་པ་དང་། ཡོད་པ་གཉིས་ཆར་མ་ཡིན་པའི་རོ་མྱོང་ལ་ཞེན་ནས་བསྒོམས་པས་སྲིད་རྩེ་སྟེ་ཡོད་མིན་མེད་མིན། གསུམ་པ་རྟོག་དཔྱོད་ཞི་བའི་དགའ་བདེས་བརླན་པ་ཅི་ཡང་མི་དམིགས་པའི་ངང་དུ་ཡུལ་དང་བྲལ་བར་བསྒོམས་པས་ཅི་ཡང་མེད་པ། གཉིས་པ་དཔྱོད་པ་ཙམ་དང་བཅས་པའི་བསམ་གཏན་གསལ་བར་བྱུང་ཚོར་བཀག་པའི་རྣམ་ཤེས་ཙམ་དུ་བསྒོམས་པས་རྣམ་ཤེས་མཐའ་ཡས། དང་པོ་རྟོག་བཅས་རགས་པའི་འདུ་ཤེས་ནུབ་པ་ཡུལ་མི་གསལ་བ་ནམ་མཁའ་ལྟར་དངོས་པོ་མེད་པ་བསྒོམས་པས་ནམ་མཁའ་མཐའ་ཡས་སུ་གོལ་ལོ། །དེ་ལྟར་གོལ་བའི་བསམ་གཏན་བཞི་པོ་ཡང་རྩ་བ་འོད་གསལ་སྙིང་པོ་ལས། འཁྲུལ་དུས་གོང་ནས་འོག་ཏུ་མཆེད་ལ། ཕན་ཚུན་འཁོར་དུས་མ་ངེས་སོ། །འོན་ཀྱང་ཕལ་ཆེར་འོག་མ་འོག་མར་ལྷུང་བ་ཤས་ཆེ་སྟེ་འཆི་ཁར་སྔར་གྱི་སྲིད་རྩེའི་ཏིང་འཛིན་ཞིག་ནས། ཅི་ཡང་མེད་པའི་འདུ་ཤེས་ཙམ་དུ་ཤར་བས་ཅུང་ཟད་རགས་པར་སོང་ལ། དེ་ཉིད་ཚོར་བ་བདེ་བས་དེའི་ངང་ལ་ཆགས་པས་དེར་ལྷུང་ལ། དེ་བཞིན་དུ་རྣམས་ཤེས་ཀྱི་འཆི་ཀར་ནམ་མཁའ་མཐའ་ཡས་ཀྱི་སེམས་ཤར་ནས་དེར་རོ་མྱོང་མཚུངས་ལྡན་གྱིས་སྐྱེ་བ་ཡིན་ཏེ། སྔར་ནས་ཏིང་འཛིན་ལ་རྒྱུན་རིང་གོམས་པས། དེར་ཡང་དེའི་སེམས་གྲུབ་སླ་བའི་ཕྱིར་རོ། །དེ་དག་གི་རྟེན་གང་ན་ཡོད་ཅེ་ན། བཀོད་པ་ཆེན་པོ་འཇིག་རྟེན་བཀོད་པའི་ལེའུ་ལས་བྱུང་བ་བཞིན་ནམ་མཁར་བརྟེན་ནས་རིམ་པར་གནས་པའི་ཚུལ་ནི། མཁའ་དབྱིངས་ངང་ན་ཞིང་འདི་བཀོད་པའི་རྩེ་མོའི་ཆ་པདྨ་རྣམ་པར་བརྩེགས་པ་ཞེས་བྱ་བའི་ནམ་མཁའ་ལ། ཡོད་མིན་མེད་མིན་གྱི་སྐྱེ་མཆེད་ཉེར་བར་བརྟེན་ཏེ། ནང་གི་ཏིང་ངེ་འཛིན་སྲིད་རྩེའི་ངང་གཅིག་གིས་བསྐལ་ཆེན་བརྒྱད་ཁྲི་འདའ་སྟེ་དེའི་ཡུན་ལ་གནས་སོ། །དེའི་འོག་དཔག་ཚད་སྟོང་ཕྲག་སུམ་ཅུ་ན། ཡིད་རྣམ་པར་རོལ་པའི་འཁོར་ལོ་ཅན་གྱི་ནམ་མཁའ་ལ། ཅི་ཡང་མེད་པའི་སྐྱེ་མཆེད་ལ་བརྟེན་པའི་ལྷ་རྣམས་ནི་བསྐལ་ཆེན་དྲུག་ཁྲིའི་བར་དུ་གནས་པའོ། །དེ་ནས་དཔག་ཚད་སྟོང་ཕྲག་ཉི་ཤུའི་འོག་ཏུ་ཡིད་རྣམ་པར་རོལ་པའི་འཁོར་ལོ་འཕྲོ་བ་ཞེས་པའི་ནམ་མཁའ་ལ། རྣམ་ཤེས་མཐའ་ཡས་པའི་ལྷ་རྣམས་བསྐལ་ཆེན་བཞི་ཁྲིར་གནས་སོ། །དེའི་འོག་དཔག་ཚད་སྟོང་ཕྲག་གཅིག་ཉིད་གཞལ་བ་ན་སྤྲིན་ཆེན་རྣམ་པར་རོལ་པ་ཞེས་པའི་ནམ་མཁའ་ལ་ནམ་མཁའ་མཐའ་ཡས་ཀྱི་ལྷ་རྣམས་བསྐལ་ཆེན་ཉི་ཁྲིར་གནས་སོ། །འདི་དག་ནང་གི་ཏིང་ངེ་འཛིན་གྱི་དགའ་བདེ་ལ་སྤྱོད་པའོ། །གཉིས་པ་ནི། དེ་ཡང་ཁམས་གཞན་གྱི་གཟུགས་ལྟར་མེད་པའི་ཆ་ནས་དེ་ལྟར་བརྗོད་ཀྱང་། ཏིང་ངེ་འཛིན་གྱི་ལུས་ཙམ་དུ་ཡོད་པར་བསྟན་ཏེ། དེ་ལྟར་ཡང་གཟུགས་མེད་རྣམ་པ་བཞི་པོ་ཡི་ལྷ་དེ་ཡང་། འདོད་ཁམས་དང་གཟུགས་ཁམས་པ་ཇི་བཞིན་དུ་གདོས་བཅས་ཤ་ཁྲག་གི་ལུས་དང་སྣང་བ་འོད་ཀྱི་ལུས་མིན་པས། རྣམ་ཤེས་སམ་རིག་པ་མི་གཡོ་བར་ཏིང་ངེ་འཛིན་གྱི་ལུས་ལ་རྩེ་གཅིག་ཏུ་བརྟེན་པ་ཉིད་དོ། །དེར་མ་ཟད་ཡི་དྭགས་ཕལ་མོ་ཆེ་དག་དང་བར་དོའི་སེམས་ཅན་བཞིན་དུ་གཟུགས་རང་མཚན་པ་མེད་ཀྱང་རྨི་ལམ་ནང་ལྟར་ཡོད་སྙམ་པའི་བག་ཆགས་འགྱུ་བྱེད་ཡིད་ཀྱི་ལུས་སུའང་མེད་པས་ན། རྣམ་ཤེས་སམ་རྣམ་རྟོག་འགྱུ་བ་མངོན་གྱུར་པ་ནུབ་པས་ནང་གསལ་དྭངས་ལ་མི་གཡོ་བའི་ཏིང་འཛིན་ཞི་བདེར་གནས་སོ། །དེ་བཞིན་དུ་དམྱལ་བ་ལྟར་མྱོང་བ་རིག་པའི་སྡུག་བསྔལ་གྱི་ལུས་ཀྱང་མེད་པས་གཟུགས་མེད་དང་། རྩེ་གཅིག་ཞི་བདེའི་བསམ་གཏན་གྱི་ཆུ་བོས་བརླན་པ་དེ་ཡི་ཕྱིར་རིག་པ་ཏིང་འཛིན་གྱི་ངང་དུ་ཤེས་པ་ཙམ་གྱི་ཆར་གནས་པས། སྟོང་པ་ལྟར་སྣང་གི་ལུས་སམ་སྟོང་རིག་ཏིང་འཛིན་གྱི་ལུས་ཞེས་བྱ། འདི་ནི་ཐུན་མིན་སྔགས་དང་ཤིན་ཏུ་མཐུན་པའི་གནད་གལ་པོ་ཆེ་སྟེ། རྡོ་རྗེ་གསུམ་གྱི་བསྒྲུབ་གཞི་གཉུག་མའི་སྒོ་གསུམ་པོ་ནམ་ཡང་འབྲལ་མི་ཤེས་ལ། དེའི་སྟེང་གི་བག་ཆགས་ཕྲ་བའང་འཕོ་མེད་ཀྱི་སྐུ་མཐར་ཐུག་མ་གྲུབ་བར་དུ་མི་ལྡོག་པས་གཟུགས་མེད་ལའང་ཏིང་འཛིན་གྱི་ལུས་ཡོད་ཅིང་། དེ་ལྟ་ན་ཐེག་ཆེན་གྱི་མདོ་རྣམས་ལས་ཀྱང་སྟོན་པ་ལ་གཟུགས་གཟུགས་མེད་ཀྱི་ལྷས་བསྐོར་བ་དང་། སྟོང་གསུམ་དར་ཡུག་གི་དཔེའི་སྐབས་སུ། གཟུགས་མེད་པའི་གཞལ་ཡས་ཁང་གི་ཚད་དུ་ནི་གཟུགས་མེད་པའི་གཞལ་ཡས་ཁང་བྲིས་ཞེས་སོགས་གསུངས་པའི་དོན་རྣམས་ཀྱང་བདེ་བླག་ཏུ་འཆད་ནུས་སོ། །ཁམས་གསུམ་བརྩེགས་མར་གནས་པ་ལུགས་འདིར་མ་ཟད་དུས་ཀྱི་འཁོར་ལོའི་དགོངས་པའང་ཡིན་ནོ། །གསུམ་པ་ནི། དེ་ལྟར་རྟེན་སྟོང་རིག་གི་ལུས་དང་ནམ་མཁའ་བརྟེན་པའི་ཚུལ་ཙམ་ཞིག་བསྟན་པས་གཟུགས་མེད་པ་ལ་གནས་ས་དང་གཟུགས་ཡོད་པར་འདོད་པ་མིན་ཏེ། གནས་ནི་ཁང་ཁྱིམ་དང་ཡུལ་ལ་སོགས་པ་ཡིན་པར་གྲགས་པ་སྟེ། གཟུགས་ནི་རང་གི་མཚན་ཉིད་ཕན་ཚུན་དུ་སྣང་ནུས་པ་ཡིན་ན། དེ་མེད་པའི་ཕྱིར་ན་གཟུགས་དང་གནས་དངོས་སུ་སྣང་བ་མེད་དོ། །གལ་ཏེ་ཕན་ཚུན་བརྟེན་པར་བསྟན་པས་གཟུགས་ཡོད་དགོས་ན་མིང་བཞི་ཡི་ཕུང་པོ་ཉིད་ཀྱང་དེ་ལྟར་གཟུགས་ཡོད་པས་འགྱུར་བ་ཉིད་དེ། གཟུགས་ཕུང་འདི་ལ་སེམས་རྒྱུད་བརྟེན་ནས་གནས་པར་འདོད་པ་བཞིན་གཟུགས་མེད་པ་མིང་བཞིའི་ཕུང་པོ་ལ་སེམས་རྒྱུད་བརྟེན་པར་འདོད་པས་སོ། །ནམ་མཁའི་གོ་རིམ་ཙམ་ཞིག་བསྟན་པས་གནས་དེར་འགྱུར་ན། གཟུགས་མེད་གང་དུ་ཤི་བ་ན། །དེར་ནི་མིང་བཞིའི་ཕུང་པོ་གནས། །ཞེས་གང་དུ་ཤི་ས་དེ་ན་ཡོད་པར་འདོད་པའང་དེ་དང་ཅིས་མི་མཚུངས། ཏིང་ངེ་འཛིན་གྱི་སྟོབས་ཀྱིས་གང་དུ་འགྲོ་བའི་ནམ་མཁའི་རིམ་པ་དེར་ངང་གིས་གནས་ཏེ། ཁམས་གསུམ་གྱི་གོང་མ་ཡིན་པའི་ཕྱིར། དེས་ན་ཚུལ་འདི་ནི་རྒྱུད་སྡེར་རབ་ཏུ་བཤད་དེ། བཀོད་པ་ཆེན་པོ་ཡིད་བཞིན་མཆོག་གི་རྒྱུད་དང་། བི་མ་ལས་མཛད་པའི་མུ་ཏིག་ཕྲེང་བའི་རྒྱུད་འགྲེལ་དང་། པདྨའི་བསྟན་པའི་སྲོག་ཤིང་ལས་གསལ་བར་གསུངས་པའི་ཕྱིར། ལེགས་བཤད་དམ་པའི་ཕུལ་དུ་འདི་ཟུངས་ཤིག་ཅེས་གདམས་པའོ། །གཉིས་པ། དེ་ནས་གཟུགས་ཁམས་པ་དག་གི་རང་བཞིན་བཤད་པ་ནི་རྒྱུ་བསམ་གཏན་བཞི་དང་དགེ་བ་བཅུ་སྤྱོད་འབྲས་ཀྱིས། གདོས་བཅས་ཀྱི་དངོས་པོར་མེད་པའི་འོད་ཀྱི་ལུས་ལ་སེམས་ཀྱི་རྒྱུད་བརྟེན་ནས། ཚ་གྲངས་བཀྲེས་སྐོམ་ན་འཚེ་རྒས་རྒུད་སོགས་མེད་པར་ཏིང་ངེ་འཛིན་གྱི་དགའ་བས་ཉིན་མཚན་རིས་སུ་མེད་པར་དུས་འདའ་བས་ཡུན་རིང་དུ་གནས་པ་ཡིན་ནོ། །དེ་ཡང་འཕགས་པའི་གནས་ལྔ་ནི། ནམ་མཁའ་མཐའ་ཡས་ཀྱི་སྐྱེ་མཆེད་ཀྱི་འོག་དག་ནས་དཔག་ཚད་སྟོང་ཕྲག་ཉི་ཤུ་གཞལ་བ་ན། རིན་ཆེན་འཆིང་བུ་རྣམ་པར་བཀོད་པ་ཞེས་བྱ་བའི་ནམ་མཁའ་ལ། གོང་མ་ནམ་མཁའ་མཐའ་ཡས་པ་མར་ཐིགས་པའི་ཚུལ་དུ་ལྷུང་བ་ལས་མཆེད་པ་ཞེས་ཏིང་འཛིན་གོང་མ་ལས་རགས་པའི་དོན་བཟུང་བའི་འདུ་ཤེས་ཡོད་པ་ལས་སྣང་བ་འོད་གསལ་དྭངས་པའི་གཟུགས་ཕྱི་ནང་མེད་པར་ཟང་ཐལ་ཞིང་རྫུ་འཕྲུལ་གྱིས་འགྲོ་བ་ཏིང་འཛིན་སྐྱོན་མེད་འཕགས་པའི་གནས་ཐོབ་སྟེ། གནས་གཞན་གཟུགས་སུ་སྣང་བ་ཀུན་གྱི་རྩེར་གྱུར་པས་འོག་མིན་ཞེས་བྱ་སྟེ་དེར་གནས་པའི་ལྷ་རྣམས་ཀྱང་། ལུས་བོངས་ཀྱི་ཚད་དཔག་ཚད་ཁྲི་དང་དྲུག་སྟོང་ལ། ཚེ་ཡི་ཚད་ཀྱང་བར་གྱི་བསྐལ་པ་དེ་སྙེད་དེ་ཁྲི་དྲུག་སྟོང་ཐུབ་བོ། །དེ་བཞིན་དུ་རིན་ཆེན་མཐོན་མཐིང་སྤྲས་པའི་ནམ་མཁའ་ལ། ལྟ་བ་རྣམ་པར་དག་པ་མཐོང་བས་ཤིན་ཏུ་མཐོང་བ་སྟེ་ལུས་བོངས་དཔག་ཚད་ནི་བརྒྱད་སྟོང་ལ་ཚེ་ཡང་བར་བསྐལ་གྱི་གྲངས་དེ་སྙེད་དོ། །རིན་ཆེན་རྣམས་མཛེས་ཞེས་བྱའི་ནམ་མཁའ་ལ། གོང་མ་ལས་མཆེད་པ་ལུས་སེམས་ཉེར་ཞིའི་བདེ་བ་གྱ་ནོམ་པ་དང་ལྡན་པས་གྱ་ནོམ་སྣང་བའི་ལྷ་སྟེ། ལུས་བོངས་དཔག་ཚད་བཞི་སྟོང་གསལ་བ་ལས། ཚེ་ཡང་བར་བསྐལ་དེ་སྙེད་དུ་ཐུབ་པ་ཡིན་ནོ། །རིན་ཆེན་ཟེ་བ་སྨུག་གུ་ཞེས་བྱའི་ནམ་མཁའ་ལ། ལུས་སེམས་ལ་འདོད་གདུང་ཉེ་བར་ཞི་བས་མི་གདུང་བ་སྟེ་དཔག་ཚད་ཉིས་སྟོང་གི་ལུས་ལ་ཚེ་ཡང་བར་གྱི་བསྐལ་པ་དེ་སྙེད་དོ། །རིན་ཆེན་ཤེལ་གྱི་ཁང་བུ་བརྩེགས་པའི་ནམ་མཁའ་ལ། སྔར་བས་ཏེ་གོང་མ་ལས་ལུས་བོངས་ཆུང་བས་མི་ཆེ་བ་སྟེ་ལུས་བོངས་དཔག་ཚད་སྟོང་དང་ཚེ་ཡང་བར་བསྐལ་སྟོང་ཕྲག་གཅིག་ཡིན་ནོ། །དེ་ནས་སོ་སྐྱེའི་གནས་རྣམས་ནི། རིན་ཆེན་རབ་མཛེས་རྣམ་པར་བརྡལ་བའི་ནམ་མཁའ་ལ་སོ་སྐྱེའི་བསོད་ནམས་ཆ་མཐུན་གྱི་དགེ་འབྲས་ཆེ་བས་འབྲས་བུ་ཆེའི་ལྷ་དཔག་ཚད་ལྔ་བརྒྱའི་ལུས་དང་། ཚེ་ཡང་བར་གྱི་བསྐལ་པ་དེ་སྙེད་དོ། །རིན་ཆེན་ཀ་ལི་མདོག་མཛེས་ཀྱིས་སྤྲས་པའི་ནམ་མཁའ་ལ་ཚད་མེད་བཞིའི་བསོད་ནམས་ལས་གཙོ་བོར་སྐྱེས་པ་བསོད་ནམས་སྐྱེས་ཀྱི་ལྷ་སྟེ་ལུས་བོངས་དཔག་ཚད་ནི་ཉིས་བརྒྱ་ལྔ་བཅུ་དང་བར་བསྐལ་དེ་སྙེད་ཀྱི་ཚེ་ཐུབ་བོ། །རིན་ཆེན་སྤྲིན་ཚོགས་རྣམ་པར་སྟུག་པོའི་ནམ་མཁའ་ལ། སྤྲིན་མེད་པའི་ཉི་མའི་སྣང་བ་དང་འདྲ་བས་སྤྲིན་མེད་ལྷ་སྟེ་དེ་ཡི་ལུས་བོངས་དཔག་ཚད་ནི་བརྒྱ་དང་ཉེར་ལྔ་བར་གྱི་བསྐལ་པ་དེ་སྙེད་ཀྱི་ཚེའོ། །རིན་ཆེན་འོད་རྣམ་པར་འབྱིན་པ་ཞེས་བྱའི་ནམ་མཁའ་ལ། དགེ་བ་རྒྱ་ཆེར་རྒྱས་པའི་འབྲས་བུས་བསྐྱེད་པའི་ཕྱིར་དགེ་རྒྱས་ཏེ་དཔག་ཚད་དྲུག་ཅུ་རྩ་བཞིའི་ལུས་དང་ཚེ་ཡི་ཚད་ཀྱང་བར་བསྐལ་དེ་སྙེད་དོ། །རིན་ཆེན་ཨིནྡྲ་ནཱི་ལའི་ནམ་མཁའ་ལ། དགེ་རྩ་འབྲིང་དུ་སྤྱད་པ་ཚད་མེད་པའི་འབྲས་བུ་ལས་བྱུང་བས་ཚད་མེད་དགེའི་ལྷ་སྟེ་ལུས་བོངས་དཔག་ཚད་ནི་སུམ་ཅུ་རྩ་གཉིས་བར་བསྐལ་དེ་སྙེད་ཀྱི་ཚེའོ། །རིན་ཆེན་པེ་ཏང་ཀི་ལིང་གིས་སྤྲས་པའི་ནམ་མཁའ་ལ། གོང་མ་ལས་དགེ་རྩ་ཆུང་བས་དགེ་ཆུང་སྟེ་དཔག་ཚད་བཅུ་དྲུག་གི་ལུས་དང་བར་བསྐལ་དེ་སྙེད་ཀྱི་ཚེའོ། །རིན་ཆེན་ཤྲཱི་ཀུ་ཏྲའི་ནམ་མཁའ་ལ་ཁ་དོག་དང་འོད་ཟེར་ཤིན་ཏུ་གསལ་བས་འོད་གསལ་ཏེ་དཔག་ཚད་བརྒྱད་ཀྱི་ལུས་བོངས་དང་ཚེ་ཡང་དེ་དང་མཚུངས་པར་ལྡན་ཏེ་བར་བསྐལ་བརྒྱད་དོ། །རིན་ཆེན་ཀེ་ཀེ་རུས་རྣམ་པར་སྤྲས་པའི་ནམ་མཁའ་ལ། ལུས་ལ་འོད་ཚད་མེད་ཡོད་པས་ཚད་མེད་འོད་ཀྱི་ལྷ་སྟེ་དཔག་ཚད་བཞི་པའི་ལུས་དང་ཚེ་ཡང་བར་གྱི་བསྐལ་པ་དེ་སྙེད་དོ། །རིན་ཆེན་དཔའ་བའི་འོད་ཀྱི་ནམ་མཁའ་ལ། གོང་མ་བས་འོད་འཕྲོ་བ་ཆུང་བས་འོད་ཆུང་སྟེ་དཔག་ཚད་གཉིས་ཙམ་གྱི་ལུས་དང་ཚེ་ཡང་བར་བསྐལ་དེ་མཚུངས་སོ། །རིན་ཆེན་ཀེ་རུ་ཛ་ཡི་ནམ་མཁའ་ལ། འདོད་པའི་སྐྱོན་དག་པས་ཚངས་ལ་འོག་མ་ལས་ལུས་ཆེ་བས་ཚངས་ཆེན་ཏེ་ལུས་བོངས་དཔག་ཚད་ཕྱེད་དང་གཉིས་པ། ཚེ་ཡང་བར་གྱི་བསྐལ་པ་དེ་སྙེད་དོ། །རིན་ཆེན་ས་མི་ཀ་ཡི་ནམ་མཁའ་ལ། ཚངས་པ་ཆེན་པོའི་མདུན་ན་འདོན་བྱེད་པས་ཚངས་པ་ཀུན་འཁོར་ཏེ་དཔག་ཚད་གཅིག་གི་ལུས་དང་ཚེ་ཡང་བར་བསྐལ་གཅིག་གོ །རིན་ཆེན་པི་ཏང་ཀ་ཡི་ནམ་མཁའ་ལ། སྡིག་པ་སྤངས་ཏེ་ཚད་མེད་བཞི་ལ་གནས་པས་ཚངས་རིས་ཏེ་དཔག་ཚད་ཕྱེེད་ཀྱི་ལུས་ཏེ་གཞུ་འདོམ་ཉིས་སྟོང་དང་བར་བསྐལ་ཕྱེད་ཀྱི་ཚེའོ། །དེ་ལྟར་གཟུགས་ཁམས་རྣམས་ཀྱི་ཚེ་ཚད་བར་བསྐལ་ཁོ་ནའི་དབང་དུ་མཛད་པ་འདི་གཞན་དང་ཅུང་མི་འདྲ་ཡང་། སྤྱིར་གནས་རིས་རྣམས་ཀྱི་ཚེ་ཚད་མི་འདྲ་བ་སྣ་ཚོགས་མདོ་ནས་གསུངས་པ་དང་། གནས་ཀྱི་ཚད་དབྱིབས་མི་འདྲ་བ་མདོ་རྒྱུད་སོ་སོར་གསུངས་པ་སྣ་ཚོགས་ཡོད་པས་གཞན་ལ་བརྟེན་ནས་འདི་མི་འཐད་པར་མི་བསམ་སྟེ། འགྲེལ་ཆུང་ལས། གང་གི་ཕྱིར་འདི་ནི་རྣམ་པར་བཞག་པ་གཞན་ཁོ་ན་སྟེ། དེའི་ཕྱིར་ཐེག་པ་གཞན་ལ་བརྟེན་ནས་ནི་ནམ་དུ་ཡང་སུན་འབྱིན་བརྗོད་པར་མི་བྱའོ། །ཞེས་གསུངས་པ་བཞིན་ནོ། །ཐོག་མར་གཟུགས་མེད་ནས་འོག་མིན་དུ་མཆེད་པ་སོགས་འདི་ལ་འཕགས་པ་འོག་སར་ལྷུང་བ་མི་སྲིད་པས་ཐེག་དམན་ལྟར་ན་མི་འདོད་ཀྱང་། ཐེག་ཆེན་གྱི་མདོ་ལས་བྱང་སེམས་རྣམས་གནས་གོང་འོག་ཀུན་ཏུ་སྐྱེ་བ་ལེན་པར་གསུངས་པ་བཞིན་ཤེས་པར་བྱའོ། །གཟུགས་ཁམས་ཀྱི་ལྷ་དེ་དག་རང་རང་གི་གཞལ་མེད་ཁང་དང་བཅས་རྫུས་ཏེ་སྐྱེས་པས་ཕ་དང་མ་མེད་པ་དང་དབང་པོ་ཀུན་རྫོགས་དང་པོ་ནས་གོས་དང་བཅས་སྐྱེ་བ་དང་། ཏིང་ངེ་འཛིན་གྱི་ཟས་ལ་སྤྱོད་པས་ཁམས་ཟས་ཀྱིས་མི་འཚོ་བ་སྟེ། རྣམ་པ་བཞི་ཡོན་ཏན་དེ་དག་གི་རང་བཞིན་ཉིད་དེ། གཞན་ཡང་འདོད་ཁམས་ལྟ་བུའི་སྡུག་བསྔལ་དང་། རྣམ་རྟོག་རགས་པ་མངོན་གྱུར་ཁྲོ་བ་སོགས་མེད་དེ་ཞི་གནས་ཀྱིས་བརླན་པའི་ཕྱིར་རོ། །དེ་དག་བྱམས་སོགས་ཚད་མེད་བཞི་སྔར་བསྒོམས་པའི་འབྲས་བུ་མངོན་དུ་བྱས་པ་སྟེ། འོན་ཀྱང་ཉོན་མོངས་དང་ལྡན་ཞིང་སྒྲིབ་པ་དང་བཅས་པས་འཆི་འཕོ་དང་གནས་པ་ལ་རང་དབང་མེད་ཕྱིར་གནས་ངན་ལེན་གྱི་སྡུག་བསྔལ་ཡོད་ལ། ཁམས་གོང་མའི་ཏིང་འཛིན་གྱི་ཚོར་བདེ་ལ་ཆགས་པ་དེ་དག་ལ་སྲིད་པའི་འདོད་ཆགས་ཞེས་བྱའོ། །གསུམ་པ་འདོད་ཁམས་ལ། མཐོ་རིས་དང་། ངན་སོང་གཉིས། དང་པོ་ལ། ལྷ་དང་མི་གཉིས་ལས། དང་པོ་ལ། དངོས་དང་། ཞར་བྱུང་ལྷ་མིན་གཉིས། དང་པོ་ལ་བསྟན་བཤད་གཉིས། དང་པོ། འདོད་པའི་ཁམས་ལ་ལྷ་ཡི་རིགས་དྲུག་ཡོད་པ་དེ་ཉིད་བཤད་པ་ནི་ཞེས་སོ། །གཉིས་པ་ལ། ནམ་མཁའ་ལ་གནས་པ་དང་། ས་ལ་གནས་པའོ། །དང་པོ་ལ་གནས་སོ་སོའི་བྱེ་བྲག་དང་། གནས་དེ་དག་གི་ཁྱད་པར་གྱི་ཆོས་འགའ་བཤད་པའོ། །དང་པོ་ལ། གནས་རིས་བཞི་ཡོད་པའི་གོང་མ་དེ་ནི་ཚངས་རིས་ནས་འོག་ཏུ་གཞལ་བ་ན་ཡོད་དེ། དཔག་བསམ་གྱི་ཤིང་རིན་ཆེན་རབ་ཏུ་བརྒྱན་པ་ཞེས་པའི་ནམ་མཁའ་ལ། གཞན་གྱིས་སྤྲུལ་པའི་ལོངས་སྤྱོད་ལ་དབང་བྱེད་པས་སམ། སྤྲུལ་བའི་རྫས་རང་གིས་སྤྲུལ་ཡང་གཞན་དུ་སྣང་བའི་འབྱོར་པར་གྱུར་པས་གཞན་འཕྲུལ་དབང་བྱེད་པ་སྟེ་རྒྱང་གྲགས་ཕྱེད་དང་གཉིས་ཀྱི་ལུས་ཏེ་གཞུ་འདོམ་ཕྱེད་དང་བརྒྱད་བརྒྱའི་རང་བཞིན་ཏེ། ཚེ་ཚད་མིའི་ལོ་སྟོང་དྲུག་བརྒྱ་ཉིན་ཞག་གཅིག་ཏུ་བརྩིས་པའི་རང་ལོ་ཁྲི་དང་དྲུག་སྟོང་ཐུབ་པ་ཡིན་ནོ། །དེ་བཞིན་དུ་དེའི་འོག་དཔག་བསམ་གྱི་ཤིང་མཐོང་མཛེས་ཞེས་བྱ་བས་བརྒྱན་པའི་ནམ་མཁའ་ལ། རང་གིས་སྤྲུལ་པ་ལ་དབང་བྱེད་པའི་ལོངས་སྤྱོད་ཡོད་པས་འཕྲུལ་དགའ་བ་སྟེ་རྒྱང་གྲགས་གཅིག་དང་བཞི་ཆའི་ལུས་ཏེ། དེ་གཞུ་འདོམ་དུ་བྱས་ན་ལྔ་བརྒྱ་དང་བརྒྱ་དང་ཉི་ཤུ་རྩ་ལྔའོ། །ཚེ་ཚད་མི་ལོ་བརྒྱད་བརྒྱ་ཉིན་ཞག་གཅིག་ཏུ་བརྩིས་པའི་རང་ལོ་བརྒྱད་སྟོང་གི་བར་དུ་གནས་པ་ཡིན་ནོ། །དེའི་འོག་དཔག་བསམ་གྱི་ཤིང་མིག་མཛེས་ཞེས་པས་བརྒྱན་པའི་ནམ་མཁའ་ལ། དགའ་ལྡན་ཞེས་ཐེག་པ་ཆེན་པོའི་ཆོས་ཀྱི་མཆོག་དང་ལོངས་སྤྱོད་གཉིས་ཀའི་དགའ་བ་དང་ལྡན་པ་ཅན་ཏེ། བསྐལ་བཟང་སངས་རྒྱས་ཀྱི་རྒྱལ་ཚབ་རེ་རྟག་པར་བཞུགས་པའི་གནས། རྒྱང་གྲགས་གཅིག་གི་ལུས་ཡིན་པས་གཞུ་འདོམ་ལྔ་བརྒྱ་སྟེ། མི་ལོ་བཞི་བརྒྱ་ཉིན་ཞག་གཅིག་བརྩིས་པའི་རང་ལོ་བཞི་སྟོང་བར་རྙེད་ཐུབ་པའོ། །དེའི་འོགདཔག་བསམ་གྱི་ཤིང་ཡིད་འགྱུར་བ་ཞེས་པས་བརྒྱན་པའི་ནམ་མཁའ་ལ། ལྷ་མ་ཡིན་གྱི་འཐབ་རྩོད་དང་བྲལ་བས་འཐབ་བྲལ་ལམ་ལྷ་ཁྱེའུ་ཕོ་མོ་གཉིས་པང་ན་དུས་གཅིག་ལ་སྐྱེ་བས་མཚེ་མ་ཞེས་བྱ་སྟེ་ལུས་བོངས་རྒྱང་གྲགས་གཅིག་ལ་ཆ་བཞིར་བྱས་པའི་ཆ་གསུམ་སྟེ་གཞུ་འདོམ་སུམ་བརྒྱ་དང་བདུན་ཅུ་རྩ་ལྔའོ། །མི་ལོ་ཉིས་བརྒྱ་ལ་ཞག་གཅིག་ཏུ་བརྩིས་པ་ཡི་རང་ལོ་ཉིས་སྟོང་གི་བར་སྙེད་དུ་གནས་པའོ། །གཉིས་པ། དེ་ལྟར་འདོད་ལྷའི་ལོངས་སྤྱོད་ནི་ཕུན་སུམ་ཚོགས་ཏེ། བདུད་རྩིའི་ཁ་ཟས་དང་བཏུང་བ་ལྷའི་གོས་དཔག་བསམ་གྱི་ཤིང་ལས་གང་འདོད་འབྱུང་བ་ལ་སོགས་པ་ཤིན་ཏུ་རྒྱ་ཆེ་བ་ཡོད་པའོ། །གཙོ་བོར་ནི་ཁམས་ཀྱི་ཟས་དང་འཁྲིག་པའི་བདེ་བ་ཡིན་པས། ཕོ་མོ་འདོད་པ་སྤྱོད་པ་ལའང་གཞན་འཕྲུལ་ནས་རིམ་པ་བཞིན། གཞན་འཕྲུལ་ལ་ཕན་ཚུན་བལྟས་པ་ཙམ་གྱིས་ཚིམ་པ་དང་དེ་བཞིན་དུ་འཕྲུལ་དགར་དགོད་པས་དང་དགའ་ལྡན་ན་ཕན་ཚུན་ལག་བཅང་གིས་རེག་པས་དང་མཚེ་མ་ན་གཉིས་གཉིས་ཕན་ཚུན་འཁྱུད་པས་ཚིམ་པ་སྟེ། དེ་དག་རིམ་བཞིན་གཞན་འཕྲུལ་ན་གཅིག་དང་འཕྲུལ་དགར་གཉིས་དང་དགའ་ལྡན་ན་གསུམ་དང་མཚེ་མར་བཞིར་ལྡན་པ་ཉིད་དེ་སུམ་ཅུ་རྩ་གསུམ་མན་ཆད་ན་བཞི་ག་ཡོད་པའོ། །ལྷའི་བུ་བུ་མོ་དེ་དག་བཙའ་བའང་པང་ནས་གོས་མེད་པར་གཅེར་བུར་རྫུས་ཏེ་སྐྱེ་བ་སྟེ། གཞན་འཕྲུལ་དབང་བྱེད་ལ་བྱིས་པ་ལོ་བཅུ་ལོན་པའི་ན་ཚོད་ནས་བཟུང་ལོ་ལྔའི་བར་རིམ་བཞིན་ཏེ། འཕྲུལ་དགའ་བ་ལོ་དགུ་པ། དགའ་ལྡན་པ་བརྒྱད་པ། འཐབ་བྲལ་བ་བདུན་པ། སུམ་ཅུ་རྩ་གསུམ་པ་དྲུག་པ། རྒྱལ་ཆེན་བཞི་ལོ་ལྔ་པའི་ཚད་དེ་དེ་ཡང་འཛམ་གླིང་ཚེ་ལོ་བརྒྱ་པའི་དུས་ཀྱི་བྱིས་པ་རྣམས་ཀྱི་ན་ཚོད་དང་མཚུངས་པ་ཉིད་དོ། །གཉིས་པ་ས་ལ་བརྟེན་པ་ལ། རྩ་གསུམ་པ་དང་། རྒྱལ་ཆེན་རིས་བཞི་གཉིས། དང་པོ། དཔག་བསམ་གྱི་ཤིང་ཡོངས་འདུ་ས་བརྟོལ་གྱིས་བརྒྱན་པའི་ས་གཞི་ལ། ཕྲེང་འབར་ལ་སོགས་པ་གནས་སུམ་ཅུ་རྩ་གསུམ་གྱི་དབང་པོར་གྱུར་པས་སུམ་ཅུ་རྩ་གསུམ་པ་སྟེ་རྒྱང་གྲགས་བཞི་ཆ་གཉིས་ཏེ་གཞུ་འདོམ་ཉིས་བརྒྱ་ལྔ་བཅུའི་རང་བཞིན་ཅན་གྱི་ལུས་དང་ལྡན་ཞིང་། ཚེ་ཚད་མི་ཡི་ལོ་བརྒྱ་ལ་ཞག་གཅིག་ཏུ་བྱས་པའི་རང་ལོ་སྟོང་ཕྲག་གཅིག་གོ །གཉིས་པ་ནི། རི་རབ་རིན་ཆེན་སྣ་བཞི་ལས་གྲུབ་པའི་བང་རིམ་ལ་རྩ་གསུམ་ལས་མཆེད་པའི་ལྷ། སྡེ་རིས་བཞིའི་ཁོངས་སུ་གཏོགས་པའི་ཆ་ནས་རྒྱལ་ཆེན་རིས་བཞིའི་ལྷ་རྒྱང་གྲགས་བཞི་ཆའི་ལུས་ཏེ་གཞུ་འདོམ་བརྒྱ་དང་ཉི་ཤུ་རྩ་ལྔའོ། །ཚེ་ཚད་མི་ལོ་ལྔ་བཅུ་ལ་ཉིན་ཞག་གཅིག་ཏུ་བརྩིས་པའི་རང་ལོ་ལྔ་བརྒྱའི་བར་དུ་གནས་པའོ། །གཉིས་པ་ལྷ་མིན་ནི། དེའི་འོག་རི་རབ་ཁོང་གསེང་ལ་གནས་པའི་ལྷ་མིན་ནི་སྔར་ལྷའི་རིགས་མ་རུངས་པ་འགའ་ལས་ཆད་པ་སྟེ་དེ་རྣམས་ལའང་རིགས་ནི་རྣམ་པ་ལྔ་ཡོད་དེ། ཚེ་དཔལ་ལྷ་ཡི་རིགས་ནི་དཔལ་དང་སྐལ་བ་བཟང་ལ་ངང་ཚུལ་དགེ་བས་ཆོས་ལ་དགའ་བ་དང་། སྟོབས་ཆེན་གནོད་སྦྱིན་གྱི་རིགས་འབྱོར་པ་དང་མཐུ་དཔལ་རྫུ་འཕྲུལ་ཆེ་བ་དང་། རྩུབ་འགྱུར་བདུད་ཀྱི་རིགས་ནག་ཕྱོགས་ལ་དགའ་བ་དང་། གསོད་བྱེད་སྲིན་པོའི་རིགས་སེམས་ཅན་ལ་འཚེ་ཞིང་མཁའ་ལ་རྒྱུ་བ་ཡི་དྭགས་དང་ཕྱོགས་མཐུན་པ་དང་། གདུག་པ་ཀླུ་ཡི་རིགས་ཕྱེད་ལུས་ལོངས་སྤྱོད་དང་བདེ་སྡུག་འདྲེས་མར་སྤྱོད་ཅིང་བླུན་པར་གནས་པ་སྟེ་འགྲོ་བའང་དེ་སྟེ་རང་རང་སོ་སོའི་ཁོངས་སུ་བསྡུའོ། །ཁ་ཅིག་གིས་ལྷ་དང་དུད་འགྲོ་གཉིས་སུ་བསྡུ་བར་བཤད། ལུས་དང་ཚེ་ཡང་མ་ངེས་ཏེ་སྣ་ཚོགས་པའོ། །གཉིས་པ་མི་ལ། གླིང་བཞི་སྤྱིར་ཆགས་ཚུལ་དང་། བྱེ་བྲག་འཛམ་གླིང་ཆགས་ཚུལ་གཉིས། དང་པོ། སྔོན་གྱི་བསྐལ་པ་དང་པོའི་མི་རྣམས་འོད་གསལ་གྱི་ལྷའི་རིས་ལས་མཆེད་དེ། དེ་ཡང་རྒྱུད་འགའ་ཞིག་ལས་དགའ་ལྡན་ནས་ལྷའི་བུ་གཉིས་པདྨ་ལས་བརྫུས་ཏེ་སྐྱེས་པ། ལྷའི་བུ་ཉི་མ་རབ་ཏུ་སྣང་བྱེད་དང་ཟླ་བ་དྲི་མ་མེད་པ་ཞེས་བྱ། དེ་གཉིས་འཛམ་གླིང་དུ་འོངས་པ་ལས་མཆེད་པར་བཤད་དེ། འདི་གཉིས་མི་འགལ་ཏེ། དེའི་ཚེ་ཡུལ་འདིའི་མིང་ལ་དགའ་ལྡན་བརྩེགས་པ་ཞེས་གྲགས། དེ་ཡང་མི་མེད་པས་ལྷ་དང་མི་ཞེས་སོ་སོར་ཕྱེ་བ་མེད་དོ། །གང་ལྟར་ཡང་འཛམ་བུའི་གླིང་དུ་མི་ཆགས་ནས་རིང་ཞིག་གནས་པ་ལས་གཉིས་སོགས་མང་དུ་མཆེད་ཅིང་འོད་དང་ཟ་ཐང་ངམ་བསོད་ནམས་བགས་ཀྱིས་བྲི་བ་ན། ཤར་ལུས་འཕགས་སུ་གོང་མའི་ལྷ་ལས་གཅིག་འོང་བའི་འོག་ཏུ་མི་ཕལ་རྫུས་སྐྱེས་ཀྱི་ཚུལ་གྱིས་མཆེད། དེ་ནས་སྒྲ་མི་སྙན་པ་སུམ་ཅུ་རྩ་གསུམ་པའི་ལྷ་ལས་མཆེད་ཅིང་། དེ་ལས་བ་གླང་སྤྱོད་པའང་ལྷ་ལས་ཉེ་བར་མཆེད་ནས་མང་དུ་འཕེལ་ཏེ་སོ་སོའི་གླིང་ཕྲན་གྱི་མི་ཡང་མཆེད་དོ། །གླིང་དེ་དག་གི་མའི་ལུས་བོངས་ཀྱང་། འཛམ་གླིང་གི་ལུས་ཚད་ཚེ་ལོ་དཔག་མེད་ཐུབ་པ་ནས་བཟུང་བརྒྱད་ཁྲི་ཡན་ཆད་དུ་རང་ཁྲུ་སུམ་ཅུ་རྩ་གཉིས་ཡིན་ལ། །ཕྱིས་ནས་རིམ་གྱིས་བྲི་བས་ཚེ་ལོ་བརྒྱ་པའི་དུས་སུ་ཁྲུ་བཞི་དང་ད་ལྟ་ལྔ་བཅུ་རྩ་བཞི་པའི་དུས་ན་ཕྱེད་དང་བཞི་པ་ཉིད། དེ་མཐར་ཚེ་ལོ་བཅུ་པའི་བར་ཇེ་ཐུང་དུ་བྲིའོ། །ཤར་ལུས་འཕགས་ཀྱི་མི་རྣམས་རང་ཁྲུ་བརྒྱད་པ་སྟེ། ཚེ་ལོ་ཉིས་བརྒྱ་དང་ལྔ་བཅུ་ཐུབ་པའོ། །ནུབ་བ་གླང་སྤྱོད་ཀྱི་མི་རྣམས་ལུས་རང་ཁྲུ་བཅུ་དྲུག་པ་ཚེ་ལོ་ལྔ་བརྒྱ་དང་། བྱང་སྒྲ་མི་སྙན་པ་ཚེ་ཚད་ལོ་སྟོང་སྟེ། ལུས་རང་ཁྲུ་སུམ་ཅུ་རྩ་གཉིས་ངེས་པ་ཡིན་ཏེ་ཕྱི་མ་འདི་ལ་དུས་མ་ཡིན་པར་འཆི་བའང་་མི་འབྱུང་ངོ་། །འདིར་རང་ཁྲུ་ཞེས་པ་གཟུགས་མཐའ་བཤད་པའི་སྐབས་ནས་བྱུང་བའི་ཁྲུ་ཚད་རང་དེ་ཡིན་གྱི། སོ་སོའི་ལུས་ཀྱི་ཁྲུ་མིན་ནོ། །གཉིས་པ་ལ། དང་པོ་རྫུས་ཏེ་སྐྱེས་ནས་ཆགས་ཚུལ་དང་། མཐར་སྐྱེ་གནས་ལྷག་མ་རིམ་གྱིས་བྱུང་ཚུལ་གཉིས། དང་པོ་ལ་དངོས་དང་། ཞར་ལ་གླིང་གི་ཁྱད་ཆོས་དང་མཐུན་པའི་སྒྲ་དོན་བཤད་པ་གཉིས། དང་པོ། ཁྱད་པར་འཛམ་བུ་གླིང་གི་སེམས་ཅན་ཆགས་ཚུལ་ནི། འོད་གསལ་གྱི་ལྷ་ལས་བསོད་ནམས་ཆུང་ངུ་ཞིག་གླིང་འདིར་འོངས་པའི་རྗེས་སུ་ཡང་གཅིག་དེ་བཞིན་དུ་བྱུང་བས། དེ་ལ་དགའ་ནས་ཟླ་ཞེས་མངོན་པར་བརྗོད་པའམ་བོས་ཏེ་དེ་ནས་སྔར་ལྟར་མང་ཞིག་མཆེད་དོ། །དེ་ཀུན་ཀྱང་རྫུ་འཕྲུལ་གྱིས་མཁའ་ལ་འགྲོ་ཞིང་གཟུགས་མཛེས་དབང་པོ་ཀུན་ཚང་ཁ་དོག་གསལ་ལ་འོད་དང་བཅས་པ་ཏིང་འཛིན་གྱི་དགའ་བདེའི་ཟས་ལ་སྤྱོད་པ། ཚེ་ལོ་དཔག་མེད་ཐུབ་ཅིང་ཉོན་མོངས་མངོན་གྱུར་མེད་ལ་བདེ་སྐྱིད་ལྷ་དང་འགྲན་པ་སྟེ། དེ་ཡི་ཚེ་བསྐལ་པ་དང་པོ་ཞེས་བྱའོ། །དེའི་ཚེ་གྲོང་སོགས་སོ་སོ་བ་མེད་པས་ས་གཞི་ཁོད་མཉམ་ཞིང་མཛེས་པ་སྟེ། ཉི་ཟླ་གཟའ་སྐར་དང་དུས་ཚིགས་ཀྱི་དབྱེ་བ་མེད་ཅིང་སྐྱེས་པ་དང་བུད་མེད་ཀྱི་རིགས་སོ་སོ་བ་མེད་པས་ཀུན་ཀྱང་རྫུས་ཏེ་སྐྱེས་པ་འབའ་ཞིག་ལ་དེ་དག་སྤྱི་མིང་དུ་སེམས་ཅན་ཞེས་བྱ་བར་གྲགས་སོ། །དེ་ནས་ཡུན་རིང་མོ་ཞིག་ན་མཁའ་དབྱིངས་ཏེ་ནམ་མཁའ་ལས། མི་ཉིད་སྣང་ངོ་ཞེས་པའི་སྒྲ་ཆེན་པོ་བདུན་གྲགས་པས་དེ་ཚུན་ཆད་ནས་བདག་ཅག་ནི་མིའོ་ཞེས་གྲགས་སོ། །དེ་ནས་བཟུང་ཚེ་དང་ལུས་ཀྱི་འོད་ཀྱང་བྲི་བསོད་ནམས་ཀྱང་ཆུང་། ཉོན་མོངས་མངོན་གྱུར་པ་མེད་ཀྱང་ལངས་སུ་ཉེ་སྟེ། འདི་དུས་གླིང་གཞན་གྱི་མི་རྣམས་ཀྱང་མཆེད་པ་ཡིན་ནོ། །གཉིས་པ། འཛམ་བུ་གླིང་ཞེས་མིང་རབ་ཏུ་གྲགས་པ་ཡང་། ཡུལ་དབུས་རྡོ་རྗེ་གདན་ནས་བྱང་དུ་རི་ནག་པོ་དགུ་འདས་པ་ན་གངས་རིའི་རྒྱལ་པོ་ཏི་སེ་ཡོད་ལ་དེའི་བྱང་ན་རི་སྤོས་ངད་ལྡན། དེ་གཉིས་ཀྱི་བར་ན་ཀླུའི་རྒྱལ་པོ་མ་དྲོས་པ་གནས་པའི་མཚོ་ཆེན་པོ་ནི། དབྱིབས་གྲུ་བཞི་ཆུ་ཞེང་དཔག་ཚད་ལྔ་བཅུ་པ་ཡན་ལག་བརྒྱད་ལྡན་གྱི་ཆུ་ཡིས་གང་བའོ། །འདིའི་ཡན་ལག་བརྒྱད་ནི་མིའི་ཆུ་ཡིན་པས་ལྷའི་དེ་དང་མི་འདྲ་སྟེ། འདུལ་བ་ལུང་ལས། གཙང་ལ་འཇམ་དང་དག་པ་དང་། །དྭངས་དང་བསིལ་དང་རྙོག་པ་མེད། །འཐུངས་ན་ལྟོ་ལ་མི་གནོད་དང་། །མགྲིན་པ་ལ་ཡང་བྱམས་པ་སྟེ། །འདི་དག་ཡན་ལག་བརྒྱད་ལྡན་ཆུ། །ཞེས་སོ། །མཚོ་དེའི་ཕྱོགས་བཞིའི་ཁ་འབབ་ཀྱི་ཆུ་ནི་བྲག་གཟུགས་ཐ་དད་པ་བཞི་ཡོད་པའི་ཁ་ལས་འབབ་པའི་ཆུ། ཤར་ཕྱོགས་གླང་པོ་ཆེའི་ཁ་ནས་གངྒཱ། ལྷོོ་ཁྱུ་མཆོག་གི་ཁ་ནས་སིནྡྷུ། ནུབ་རྟ་མཆོག་གི་ཁ་ནས་པཀྵུ། བྱང་སེང་གེའི་ཁ་ནས་སི་ཏའམ། གཞུང་ཁ་ཅིག་ལས། ཤར་རྟ་མཆོག་གི་ཁ་ནས་ལོ་ཧི་ཏ་དངུལ་གྱི་བྱེ་མ་འདྲེན་པ། ལྷོོ་གླང་པོའི་ཁ་ནས་གངྒཱ་གསེར་གྱི་བྱེ་མ་འདྲེན་པ། ནུབ་རྨ་བྱའི་ཁ་ནས་སིནྡྷུ་རིན་ཆེན་སྣ་ཚོགས་ཀྱི་བྱེ་མ་འདྲེན་པ། བྱང་སེང་གེའི་ཁ་ནས་པཀྵུ་རྡོ་རྗེའི་བྱེ་མ་འདྲེན་པར་བཤད་དེ་གང་ལྟར་ཡང་མི་འགལ་ལ། དེ་རྣམས་ཀྱིས་མ་དྲོས་མཚོ་ལ་ལན་བདུན་གཡས་སུ་བསྐོར་བ་ཞེས་ཕྱིའི་རྒྱ་མཚོ་ལ་མ་བསླེབས་པར་འཁྱོགས་བདུན་ལ་སྙན་ངག་ཏུ་བརྗོད་ནས། ལུང་ཆེན་ཐ་དད་ནས་བྱུང་བའི་ཆུ་བྲན་ལྔ་བརྒྱའི་འཁོར་ཏེ་དེར་བབས་ནས་འདྲེས་ཀྱང་ཆེར་སོང་བ་མི་མངོན་པ་དེ་དག་དང་ལྷན་ཅིག་ཏུ་རང་རང་གི་ཕྱོགས་ཀྱི་ཕྱོགས་བཞིའི་མཐའི་རྒྱ་མཚོར་ངང་གིས་འབབ་པ་ཡིན་ནོ། །མཚོ་མ་ཕམ་པ་དེའི་གཡས་འགྲམ་དུ་ཤིང་ཛམྦུ་བྲིཀྵའི་སྡོང་པོ་ལས། ཤིང་ཏོག་མཚོར་ལྷུང་བ་ཆུའི་རྐྱེན་ལས་གསེར་དུ་གྱུར་པ་ནི། གསེར་གཞན་ཕལ་པ་ལན་གྲངས་བཅུ་དྲུག་བཞུས་པའི་གསེར་ཞུན་དང་མཚུངས་སོ། །དེ་ལྟ་བུའི་འཛམ་བུའི་ཤིང་གིས་གླིང་འདི་བརྒྱན་པའི་ཕྱིར་མིང་དེ་སྐད་དུ་གྲགས་སོ། །གཉིས་པ་སྐྱེ་གནས་ལྷག་མ་རིམ་གྱིས་བྱུང་ཚུལ་ནི། དེ་ནས་མི་རྣམས་དགའ་བདེས་གཡེངས་པར་གྱུར་པས་བསོད་ནམས་གསར་དུ་མི་སོགས་པས་བགས་ཀྱིས་ཟད་ནས། ཚེ་ལོ་བྱེ་བ་དག་ཐུབ་པ་ན་མི་རྣམས་སྒོང་སྐྱེས་ཏེ། ཀུན་ཀྱང་འབྱུང་བཞིའི་རྡུལ་ཕྲན་དྭངས་པ་འོད་ལྔའི་སྒོ་ང་ལས་སྐྱེས་ཤིང་། ལུས་ཀྱི་འོད་ནི་འདོམ་བདུན་ཡོད་ལ། གང་བསམ་སར་ལས་ཀྱི་རླུང་གིས་མཁའ་ལ་འགྲོ་བ། ཟས་སུ་འབྱུང་བའི་དྭངས་མ་ཟ་ཞིང་རང་བཞིན་གྱིས་དགེ་བཅུ་ལ་གནས་པའོ། །དེ་ནས་ཡང་སྔོན་ལས་ཀྱིས་ཚེ་ལོ་བགས་ཀྱིས་བྲི་ནས་ས་ཡ་དྲུག་འབུམ་ཐུབ་པ་ན། ལུས་ཀྱི་འོད་ཀྱང་བྲི་ནས་མདའ་གང་ཙམ་དང་། འདིའི་དུས་སུ་དྲོད་དང་རླན་གཤེར་ཙམ་ལས་སྐྱེ་བ་སྟེ། འདོད་འཇོའི་བ་ལས་ནམ་འདོད་པ་ན་བདུད་རྩི་ལྟ་བུའོ་ཞོ་འབྱུང་བས་ལུས་གསོ་བའི་རྐྱེན་བྱེད་པ་དང་འགྲོ་འདོད་པ་ན་མཉམ་དུ་ཅང་ཤེས་ཀྱི་རྟ་མཆོག་རེ་ཡང་མི་དེ་སྐྱེས་པ་དང་མཉམ་དུ་བྱུང་ངོ་། །དེ་ནས་ཀྱང་མི་རྣམས་འདོད་པས་གཡེངས་པར་གྱུར་ནས་ཚེ་དཔལ་འབྱོར་བའང་རིམ་གྱིས་བྲི་བར་གྱུར་ཏེ་ཚེ་ལོ་དགུ་ཁྲི་བར་གྱུར་པ་ན། སླར་ཡང་མི་རེ་སྐྱེ་བ་ན་དཔག་བསམ་གྱི་ཤིང་རེ་ཡང་མཉམ་དུ་སྐྱེ་ཞིང་དེ་ལས་འདོད་པ་འབྱུང་སྟེ། ཤིང་དེའི་འབྲས་བུ་དྲི་རོ་ཕུན་སུམ་ཚོགས་པ་དག་ཟ་ཞིང་ལོ་མ་གོས་སུ་གྱོན། དེའི་ཚེ་ཕོ་མོའི་མཚན་མ་ནི་མ་དོད་ལ། ཕན་ཚུན་མཐོང་བ་དང་རེག་ན་བདེ་བ་འབྱུང་སྟེ་གཏི་མུག་བག་ཉལ་ལངས་པ་ལས་འདོད་ཆགས་བག་ལ་ཉལ་དངོས་སུ་ལངས་སུ་ཉེ་བའི་དུས་སོ། །དེ་ནས་རིང་ཞིག་ན་ཕོ་མོའི་དབང་པོའི་སྲོལ་དོད་དེ་འབུར་འབུར་པོ་དང་ཤོང་བུ་ཙམ་ཞིག་ལས་དངོས་སུ་ནི་མེད་ཅིང་། དེ་དག་ཕན་ཚུན་བལྟས་པས་རེག་པའི་འདོད་ཆགས་བྱུང་། འདིའི་དུས་སུ་ང་རྒྱལ་དང་ཕྲག་དོག་བག་ལ་ཉལ་ལངས་ཤིང་། ཞེ་སྡང་བག་ཉལ་ལངས་པས་ཤིང་དེ་བཅད་པ་ལས་འདོད་འབྱུང་གི་ལྗོན་ཤིང་དེ་ཡང་ནུབ་པར་གྱུར་ཏོ། །དེ་ནས་ཚེ་དང་བསོད་ནམས་ཀྱང་བགས་ཀྱིས་བྲི་བ་ཡིས་ལོངས་སྤྱོད་སྔ་མ་ནུབ་ནས། སྔོན་བསྐལ་པ་ཆགས་རྗེའི་ཆུའི་རྒྱུན་བབ་པས་མཚོ་གླིང་ཐམས་ཅད་གང་བའི་སྟེང་དུ་འོ་སྤྲིས་བཞིན་ཆགས་པས་ས་བཅུད་ཅེས་སྦྲང་རྩིའི་རོ་དང་འདྲ་ཞིང་མར་གསར་གྱི་ཁ་དོག་ལྟ་བུའི་ས་ཡི་བཅུད་ཟ་ཞིང་། ཕོ་མོ་ཕན་ཚུན་དགོད་པས་ཚིམ་པའི་འདོད་ཆགས་བྱུང་། ཁ་ཟས་རགས་པའི་རྒྱུ་དེས་ལུས་ཀྱི་འོད་ཉམས་གཏི་མུག་གི་དབང་གིས་མུན་པ་བྱུང་། དེའི་ཚེ་སྤྱི་མཐུན་གྱི་ལས་ཀྱིས། ཉི་ཟླ་དང་གཟའ་སྐར་ཡང་བྱུང་། དེ་ལ་བརྟེན་ནས་ཉིན་མཚན་ལ་སོགས་པ་དུས་ཚིགས་ཀྱི་དབྱེ་བའང་ཡོད་པར་གྱུར་ཏོ། །དེ་ནས་ང་རྒྱལ་དང་ཕྲག་དོག་མངོན་གྱུར་སྐྱེས་པས་སྔར་གྱི་ས་བཅུད་ཀྱང་ནུབ་ནས་རིམ་པ་བཞིན་དུ་ས་ཡི་ཞག་ཁ་དོག་དོང་ཀའི་མེ་ཏོག་ལྟར་དམར་བ་རོ་སྦྲང་རྩི་མ་བསྐོལ་བ་ལྟ་བུ་བྱུང་བ་ལ་ལོངས་སྤྱོད་པ་དང་ནི། དེ་ཡང་ནུབ་ནས་མྱུ་གུའི་ཚལ་མདོག་སེར་ནང་བརྔས་ན་ནང་སྐྱེ་བ་དང་། དེ་ཡང་ནུབ་ནས་ཡང་མ་རྨོས་ཤིང་མ་བཏབ་པར་རང་སྐྱེས་པ་ཕུབ་མ་མེད་པའི་འབྲས་ས་ལུ་གཙང་མ་ནང་བརྔས་ན་ནུབ་སྐྱེ་བ་བྱུང་ཞིང་། རགས་པའི་ཟས་དེས་བཤང་གཅིའི་ལམ་དང་ནི་ཕོ་མོའི་དབང་པོའང་ལེགས་པར་དོད་པར་གྱུར་པས་དེ་སྦས་ཕྱིར་རས་བལ་ཐགས་སུ་བྱས་པའི་སྨད་གཡོགས་བྱུང་། དེའི་ཚེ་ཕན་ཚུན་ཆགས་པས་འཁྱུད་ཅིང་དབང་པོ་གཉིས་སྦྱོར་བའི་འདོད་ཆགས་བྱུང་སྟེ་སྦྲུམ་པར་ཡང་གྱུར་ཏེ་མངལ་སྐྱེས་བྱུང་། འཁྲིག་པ་ལ་ངོ་ཚའི་དབང་གིས་དེ་སྦད་ཕྱིར་འཇག་མའི་ཁྱིམ་ཡང་བྱུང་བ་སྟེ། དེ་དག་ཡན་ཆད་དགེ་བ་བཅུ་ལ་ངང་གིས་རྫོགས་པར་སྤྱད་པས་བསྐལ་པ་རྫོགས་ལྡན་ནོ། །དེ་ནས་རིང་ཞིག་ལོན་པ་ན་ལེ་ལོས་བསོག་འཇོག་བྱས་པ་ཡིས་འབྲས་ལ་ཕུབ་ཤུན་ཡོད་ཅིང་བརྔས་པའང་མངོན་པར་གྱུར་ཏེ། དེའི་ཚེ་འབྲས་ཞིང་རྣམས་སོ་སོར་བགོས་པས་ཕན་ཚུན་བརྐུ་བ་བྱུང་ཞིང་། དེ་ཡི་ཚེ་མི་རང་བཞིན་བཟང་པོའི་སྐྱེས་བུ་ཞིག་མི་ཀུན་གྱིས་བཀུར་བས་རྒྱལ་པོ་ཞེས་བྱ་སྟེ། མང་པོས་བཀུར་བའི་རྒྱལ་པོ་ཞེས་ཐོག་མར་བྱུང་ངོ། །མི་ཕལ་བ་དེ་དག་གི་ནང་ནས་འགའ་ཞིག་ཁྱིམ་ནས་ཕྱི་རོལ་དུ་ཕྱོགས་པ་ལ་བྲམ་ཟེ་ཞེས་གྲགས་གཙང་སྦྲ་ལ་སྤྱོད་པ་བྱུང་ཞིང་། འགའ་ཞིག་ནི་ཁྱིམ་ལ་གནས་ཤིང་འབྱོར་པ་དང་ལྡན་པར་བྱས་ཏེ་ཕ་མ་བཀུར་བར་བྱེད་དེ། དེ་དག་གི་མིང་ཡང་རྗེའུ་རིགས་ཞེས་སུ་གྲགས། འགའ་ཞིག་ཆོས་མིན་ཏེ་མི་དགེ་བ་ལ་སྤྱོད་པས་དམངས་སམ་གདོལ་པའི་རིགས་ཞེས་མི་རིགས་རྣམ་པ་བཞིར་གྲགས་པའང་དེ་ནས་བྱུང་ངོ་། །གཉིས་པ་ངན་སོང་ལ། དམྱལ་བའི་ཆགས་ཚུལ་དང་། ཡི་དྭགས་དང་དུད་འགྲོའི་ཆགས་ཚུལ་གཉིས། དང་པོ། ངན་སོང་དག་ལས་དམྱལ་བའི་སེམས་ཅན་རྣམས་ནི། སྐྱེས་བུ་གང་ཞིག་དམྱལ་བའི་བདག་པོར་འགྱུར་བའི་ལས་བསགས་པས། ཐོག་མར་གཤིན་རྗེའི་རྒྱལ་པོར་གྱུར་པའི་རྗེས་སུ་དེ་ཡི་འཁོར་དུ་གྱུར་པའི་དམྱལ་བའི་སྲུང་མ་རྣམས་རྫུས་ཏེ་སྐྱེས་པ་དང་ཁྱི་དང་བྱ་དང་མེ་དང་མཚོན་ཆ་ལ་སོགས་པ་རྣམས་ཀྱང་རང་རང་གི་ལས་ཀྱི་དབང་གིས་བྱུང་ལ། དེ་བཞིན་ཚ་གྲང་གི་དམྱལ་བ་རྣམས་ཀྱང་བྱུང་བར་གྱུར་ཏེ། མི་ཤེས་པ་དག་དེ་ཐམས་ཅད་མེད་ཟེར། དོན་དམ་པར་མེད་ཟེར་ན་ད་ལྟའི་སྣང་བའང་མེད་པར་མཚུངས་ལ། ཐ་སྙད་དུ་མེད་ཟེར་ན། དེ་དག་ཀྱང་རྒྱུ་རྐྱེན་གྱིས་ཇི་ལྟར་གསུངས་པ་བཞིན་རྨི་ལམ་གྱི་སྣང་བ་ལྟར་ཡོད་དོ། །དེ་ཡང་བྱེད་པོ་རང་གིས་ལས་ལས་གཞན་དུ་མེད་པ་ཡིན་ཀྱང་། མེད་པར་གྱུར་པ་ནི་མིན་ནོ། །གཉིས་པ། དེ་བཞིན་དུ་ཡི་དྭགས་དང་དུད་འགྲོའི་འགྲོ་བ་ཇི་ལྟར་ཆགས་པའི་ཚུལ་ཡང་། རང་རང་གི་ལས་ཀྱིས་ཏེ་སྔོན་འདོད་ཆགས་ཀྱི་སྒོ་ནས་ལས་བསགས་པ་རྣམས་ཡི་དྭགས་ཕྱི་དང་ནང་དང་སྤྱི་མཐུན་དང་སྒོས་ཁུར་སྒྲིབ་པ་ཅན་རྣམས་དང་། གཏི་མུག་གིས་ལས་བསགས་པ་རྣམས་དུད་འགྲོ་སྟེ་གནས་རིས་དེ་དང་དེར་སྣང་སྟེ། ཡུལ་དོན་ལུས་ཀྱི་སྣང་བ་ཐམས་ཅད་སྡུག་བསྔལ་གྱི་རང་བཞིན་སྣ་ཚོགས་པར་སྣང་བ་ཡིན་ནོ། །གསུམ་པ་སྣོད་བཅུད་ཆགས་པའི་བསྐལ་པའི་མཇུག་བསྡུ་བ། དེ་ལྟར་དང་པོའི་ནམ་མཁའ་རྣམ་དག་ནས་བརྩམས་དམྱལ་བ་མནར་མེད་པའི་གནས་སུ་སེམས་ཅན་གཅིག་སྐྱེས་པ་དེ་སྲིད་ཀྱི་བར་སྙེད་དུ་ཆགས་པའི་བསྐལ་པ་སྟེ། སྣོད་ཆགས་པ་ལ་བར་གྱི་བསྐལ་པ་གཅིག་དང་ནི། བཅུད་ཆགས་པ་ལ་བཅུ་དགུ་སྟེ་བསྡོམས་པས་བར་སྐལ་ཉི་ཤུ་ཉིད་ནི་འཇིག་རྟེན་ཆགས་པའི་བསྐལ་པ་ཡིན་པར་ལགས་པར་གསུངས་སོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། བཅུད་ཀྱི་སེམས་ཅན་ཆགས་པའི་རང་བཞིན་བསྟན་པའི་ལེའུ་སྟེ་བཞི་པའི་འགྲེལ་པའོ།། །། ༈ གཉིས་པ་གནས་པ་ལ། གང་གནས་པའི་འཇིག་རྟེན་བཤད་པ། དེ་དག་གི་རྩོམ་གཞི་ཕྲ་བ་ངོས་བཟུང་བ་གཉིས་ལས། དང་པོ་ལ་བསྟན་བཤད་གཉིས། །དང་པོ། དེ་ནས་གནས་པའི་བར་བསྐལ་ཉི་ཤུ་བསྟན་པ་ནི། ཐོག་མ་དང་བར་དང་ཐ་མ་གསུམ་ཉིད་དེ། དང་པོ་མི་རྣམས་ཚེ་ལོ་དཔག་ཏུ་མེད་པ་ནས་བཟུང་ནས་མཐར་ཚེ་ལོ་བཅུ་པའི་བར་དུ་འབྲི་བའི་ཚུལ་ཡང་དཔག་མེད་ནས་བརྒྱད་ཁྲིའི་བར་དུ་ལོ་ཉིས་བརྒྱ་ཉིས་བརྒྱས་ལོ་རེ་འབྲི་ལ། བརྒྱད་ཁྲི་ནས་བཅུ་པའི་བར་བརྒྱ་རེའི་མཚམས་ནས་ལོ་རེ་རེ་འགྲིབ་རྐྱང་པ་ནི་ཡ་ཐོག་རིང་མོ་འགྲིབ་པའི་བསྐལ་པའོ། །དེ་ནས་ཡར་བརྒྱད་ཁྲིའི་བར་དུ་འཕེལ་བ་དང་བཅུ་པའི་བར་མར་འགྲིབ་པ་གཉིས་ཟུང་གཅིག་གིས་ཏེ་དེ་གཉིས་གཅིག་ཏུ་བསྡོམས་པའི་ཚན་པ་བཅོ་བརྒྱད་ནི་འཕེལ་འགྲིབ་ཀྱི་བར་ཁུག་ཅེས་བྱ་སྟེ། དེ་ཡང་ཁུག་པའི་སྐབས་སུ་ལོ་བརྒྱ་བརྒྱ་དག་ན་སྟེ་ལོ་བརྒྱ་རེའི་མཚམས་སུ་བཅུ་ཉི་ཤུ་བཞི་བཅུ་བརྒྱ་སོགས་སྡེ་ཚན་གྱིས་འཕེལ་འགྲིབ་བྱེད་དོ། །དེ་ལྟར་གྱི་ཟུང་གཅིག་དང་ཡ་ཐོག་མ་ཐོག་གི་བརྒྱད་ཁྲི་དང་བཅུ་པའི་བར་གྱི་འགྲིབ་རྐྱང་གཅིག་དུས་རིང་ཐུང་མཉམ་པར་བཤད། བར་ཁུག་བཅོ་བརྒྱད་རྫོགས་པའི་རྗེས་དེ་ནས་སྔར་བཞིན་ཚེ་ལོ་དཔག་མེད་བར་དུ་སྡེ་ཚན་གྱིས་ཡར་སྐྱེ་སྟེ་འཕེལ་བ་དང་། དཔག་མེད་ནས་མར་བཅུ་པའི་བར་དུ་ཡ་ཐོག་ལྟར་མར་འགྲིབ་པའི་ཁུག་པ་དེ་ལ་ནི་མ་ཐོག་རིང་མོ་ཞེས་སུ་གྲགས་པ་ཡིན། སྐབས་འདིར་ཕྱག་མཆན་དུ། དཔག་མེད་ནས་ཕྲི་བའི་བརྒྱད་ཁྲི་པའི་དུས་སུ་གནས་པའི་མགོ་བརྩམས། བརྒྱད་ཁྲི་ནས་བཅུ་བར་ཡ་ཐོག བར་ཁུག་བཅོ་བརྒྱད། མ་ཐོག་བཅུ་ནས་བརྒྱད་ཁྲི་བར་འཕེལ། དེ་ནས་དཔག་མེད་བར་འཕེལ་ཀྱང་། དེ་ཡན་ཆད་མ་ཐོག་ལ་མི་ཐེ་བར། འཇིག་བསྐལ་ལ་རྩིའི་་་་དཔེ་ནང་མི་གསལ་མ་སྙམ། བར་ཁུག་བཅོ་བརྒྱད་ཀྱི་ཡར་འཕེལ་བརྒྱད་ཁྲི་ལས་འཕེལ་མི་སྲིད་དོ་གསུངས། བར་ཁུག་རྣམས་རྫོགས་རྗེས་ཚེ་ལོ་དཔག་མེད་དུ་འཕེལ་བའི་གཅིག་འགྲིབ་དུས་སངས་རྒྱས་མོས་པ་འབྱོན། ཁ་ཅིག་མ་ཐོག་ལ་བརྒྱད་ཁྲི་ལས་འཕེལ་བར་མི་འདོད་པ་ནི་མི་འཐད་དེ། མོས་པའི་སྐུ་ཚེ་བསྟན་པ་སྔར་གྱི་སངས་རྒྱས་རྣམས་དང་མཉམ་པར་དེ་མི་རྫོགས་པའི་ཕྱིར། དེས་ན་ཚུལ་འདི་མཛོད་སོགས་དང་ཅུང་མི་འདྲ་ཡང་ལུགས་འདི་ལྟར་ན་སངས་རྒྱས་མོས་པའི་སྐུ་ཚེ་དང་མཛད་ཕྲིན་སོགས་མདོ་ནས་ཇི་སྐད་གསུངས་པ་ལྟར་འཇོག་ནུས་པ་སོགས་ཀྱི་འཆད་ཚུལ་བླ་མེད་དོ། །དེས་ན་ཡ་ཐོག་འགྲིབ་རྐྱང་གཅིག་པུ་བར་ཁུག་གཅིག་ལས་ཡུན་རིང་ཞིང་། མ་ཐོག་འཕེལ་འགྲིབ་ཁུག་པ་ཅན་དེ་ལས་ཀྱང་ཤིན་ཏུ་རིང་བས་ཡ་ཐོག་མ་ཐོག་གི་ཡུན་བསྡོམས་པ་དང་། བར་ཁུག་བཅོ་བརྒྱད་པོ་གཅིག་ཏུ་བསྡོམས་པའི་ཡུན་མཉམ་མོ། །དེ་ལྟར་ཡ་ཐོག་མ་ཐོག་བར་ཁུག་དང་བཅས་པ་ལ་བར་བསྐལ་ཉི་ཤུ་ཡོད་པ་ལ་ནི་རང་བཞིན་གྱིས་གནས་པའི་བསྐལ་པར་འདོད་པ་ཡིན་ནོ། །གཉིས་པ་ལ། འཕེལ་འགྲིབ་ཀྱི་ཚུལ་བཤད་པ་དང་། གནས་དུས་ཀྱི་ཆོས་བཤད་པ་གཉིས། དང་པོ་ལ་བསྟན་བཤད་གཉིས་ཀྱི་དང་པོ། གང་སྨོས་འདི་དག་གི་ཡར་འཕེལ་དང་མར་འགྲིབ་ཀྱི་ཁྱད་པར་ཅུང་ཟད་བཤད་པ་ནི། ཞེས་སོ། །གཉིས་པ་ལ། འགྲིབ་ཚུལ་བཤད་པ་དང་། འཕེལ་ཚུལ་གཉིས། དང་པོ། ཚེ་ལོ་བརྒྱད་ཁྲི་པའི་དུས་ན་འཛམ་གླིང་འདིར་རྒྱལ་པོའི་ཕོ་བྲང་དང་གྲོང་ཁྱེར་སོགས་ཀྱི་འབྱོར་པ་ཚད་མེད་པ་ཡིས་ས་བཞི་བརྒྱན་པས་གྲོང་ཕན་ཚུན་བྱ་གག་འཕུར་བས་སླེབ་ཙམ་འདབ་འབྱོར་དུ་གང་སྟེ། བུ་མོ་རྣམས་ལོ་ལྔ་བརྒྱ་ན་ཁྱིམ་ཐབ་ལ་གཏོང་། མི་རྣམས་ཀྱི་ནད་ནི་ཟས་མི་ཟ་བ་དང་། འདོད་པས་གཟིར་བ་ཙམ་ལ་བྱེད། ཚེ་ལོ་དཔག་མེད་ནས་བརྒྱད་ཁྲིའི་བར་དུ་སྤྱི་བོ་སྐྱེས་དང་། གསོ་སྦྱོང་འཕགས་སོགས་གསེར་དངུལ་ཟངས་ལྕགས་ཀྱི་འཁོར་ལོས་སྒྱུར་བ་དག་ཀྱང་མང་དུ་བྱུང་ཞིང་འབྱོར་པ་རྒྱ་ཆེ་བས། འདོད་ལྷའི་ཡུལ་དང་འགྲན་པ་ཡོད་དོ། །དེ་ནས་མི་དགེའི་དབང་གིས་མར་རིམ་པར་འགྲིབ་སྟེ་བདུན་ཁྲི་དང་དྲུག་ཁྲི་པ་དང་ཉི་ཁྲི་པ་ནས་མཐར་ཚེ་ལོ་བཅུ་པའི་བར་དུ་ཚེ་དང་ལོངས་སྤྱོད་དང་མདངས་སྟོབས་དང་ཡུལ་གྱི་ཡོན་ཏན་ཐམས་ཅད་འགྲིབ་ནས། མཐར་ཚེ་ལོ་བཅུ་པའི་ཚེ་ན་མི་རྣམས་རྣམ་རྟོག་དང་ཉོན་མོངས་ལྷག་པར་དུ་རགས་ཤིང་། མི་རྣམས་ཀྱི་ལུས་བོངས་ཚེ་ལོ་བརྒྱ་པའི་མི་རྣམས་ཀྱི་མཐོ་གང་ཆག་གང་ལ། གོས་མེད་པས་ཉིན་འཚིག་ནུབ་འཁྱགས་དབུལ་ཞིང་ཕོངས་ལ་འཚེ་བས་གདུངས་པ། འབྲུ་བཟང་པོ་རྣམས་ནུབ་སྟེ་ཞག་དྲུག་ཅུས་སྨིན་པའི་བྲ་བོ་གཅིག་པུའི་ཁ་ཟས་དང་། གོས་སུ་སྐྲ་ཡི་ལྭ་བ་གྱོན་ཞིང་དར་ཟབ་ལ་སོགས་པ་ནུབ། ལན་ཚ་གཏན་མེད་ཞོ་དང་ཏིལ་སོགས་ལས་མར་མི་འབྱུང་། དེའི་ཚེ་ཕ་མ་དང་དགེ་སྦྱོང་དང་བྲམ་ཟེ་ལ་སོགས་པ་མི་བཀུར་བར་སྨོད་ཅིང་མི་དགེ་བྱེད་པ འི་སྐྱེ་བོ་ངན་པ་རྣམས་ལ་བསྟོད་པར་བྱེད་དོ། །སྐྱེ་བོ་དེ་དག་ཟད་བྱེད་མཚོན་དང་ནད་དང་མུ་གེ་གསུམ་ལས། དང་པོ་མཚོན་གྱི་བསྐལ་པ་འབྱུང་བའི་ཚུལ་ནི། མི་རྣམས་ཕན་ཚུན་གནོད་སེམས་ཀྱིས་འཁྲུགས་ཅིང་ཞེ་སྡང་བ་ལས། དེ་དག་ཕན་ཚུན་འཐབ་པའི་ཚེ་ས་ལས་ཅི་བླངས་པ་ཐམས་ཅད་མཚོན་ཆ འི་རང་བཞིན་དུ་འགྱུར་ཞིང་། མི་རྣམས་གཅིག་གིས་གཅིག་བསད་ནས་ཐམས་ཅད་ངན་སོང་གི་གནས་དམྱལ་བ་རྣམས་སུ་ལྟུང་བར་འགྱུར་རོ། །དེ་ནས་མི་དགེ་སྤྱད་པས་ལྷ་སྲིན་འཁྲུགས་ནས་གཏོང་བའི་གསོར་མི་རུང་བའི་ནད་ཀྱིས་ཐེབས་ཤིང་ཕལ་ཆེར་འཆི་བར་འགྱུར་རོ། །དེ་ནས་མི་རྣམས་ཀྱི་ལྷག་མ་ལུས་པ་རྣམས་མུ་གེས་ཚར་འབྱིན་པར་བྱེད་དེ། དེ་ཡང་འབྲུ་གང་རྙེད་ཟ་མ་ཏོག་ཏུ་བཅུག་ནས་སྲུང་བ་གབ་ཚེ་བ་དང་། སྔོན་མི་ཤི་བའི་རུས་གོང་དཀར་པོ་བསྡུས་ནས་འདི་ཟས་ཟ་བའི་རུས་པའོ་ཞེས་བསྐོལ་ནས་འཐུང་བ་རུས་གོང་བ་དང་། འབྲུའི་བྲེ་ཁ་རྙེད་པ་ཆུ་མང་པོའི་ནང་དུ་བསྐོལ་ནས་འབྲུ་དེ་ཐུར་མས་ཉབ་པར་བྱེད་པ་ཐུར་མ་པ་སྟེ་བཀྲེས་སྐོམ་གྱི་མེ་འབར་བས་རབ་ཏུ་གདུངས་སོ། །དེ་ཡང་མཚོན་བསྐལ་ཞག་བདུན། ནད་བསྐལ་ཟླ་བདུན་ཞག་བདུན། མུ་གེ་ལོ་བདུན་ཟླ་བདུན་ཞག་བདུན་དུ་འབྱུང་བས་མི་རྣམས་ཟད་པར་བྱེད་དོ། །རྣལ་འབྱོར་སྤྱོད་པའི་ས་ལས་ཚེ་ལོ་སུམ་ཅུ་པ་ལ་མུ་གེ། ཉི་ཤུ་པ་ལ་ནད། བཅུ་པ་ལ་མཚོན་འབྱུང་བར་བཤད། འདི་རྣམས་བྱང་གླིང་ལ་གཏན་མི་འབྱུང་། གླིང་གཞན་གཉིས་ལ་འདིའི་ཚེ་བཀྲེས་པ་དང་མདོག་ངན་པ་ཙམ་འབྱུང་བར་བཤད་དོ། །གཉིས་པ། དེ་ནས་གོང་དུ་ཇི་ལྟར་འཕེལ་བའི་རིམ་པ་བསྟན་པ་ནི། དགེ་བ་ཅན་འགའ་ཞིག་ལུས་པ་རིའི་སུལ་སོགས་སུ་ཡིབ་ནས་ཞག་བདུན་ཆུས་འཚོ་སྟེ་སླར་གྲོང་ཁྱེར་དུ་འོངས་པ་ན་དེ་དག་གཅིག་གིས་གཅིག་མཐོང་བ་ན་དགའ་བའི་སེམས་སྐྱེས་ཏེ། ཨེ་མ་མི་གསོན་པོ་དག་མཐོང་ཞེས་དེ་དག་འདུས་ནས་སྔར་མི་དགེའི་རྒྱུ་ལས་བྱུང་བར་རིགས་ནས་རང་རྒྱུད་སྡོམ་པར་བྱེད་ཅིང་། དེ་ནས་བྱམས་པའི་སྤྲུལ་པ་རང་ལས་གཟུགས་དང་ལང་ཚོས་འཕགས་པ་མཐོང་ནས་དེའི་རྒྱུ་དྲིས་ནས་སྲོག་གཅོད་སྤངས་པས་ནད་མེད་ཅིང་མདངས་སྟོབས་དང་ལྡན་པར་གྱུར་ནས་བུ་དང་བུ་མོ་རྣམས་ཀྱང་ཚེ་ལོ་ཉི་ཤུ་པར་གྱུར། དེ་བཞིན་དུ་སྤྲུལ་པར་རེ་རེས་རྐྱེན་བྱས་ཏེ་མ་བྱིན་ལེན་སྤངས་པས་དེ་དག་གི་བུ་བུ་མོ་རྣམས་བཞི་བཅུ་པ་སྟེ་དེ་ནས་རིམ་བཞིན་དུ། འདོད་ལོག་དང་། རྫུན་དང་། ཕྲ་མ་དང་། ངག་འཁྱལ་དང་ཚིག་རྩུབ་མོ་དང་། བརྣབ་སེམས་དང་། གནོད་སེམས་དང་། ལོག་ལྟ་དང་། ཆོམ་རྐུན་དང་མཐུ་སོགས་ཀྱིས་གཞན་ནོར་གཉེར་བ་ལྟ་བུ་མི་རིགས་པའི་འདོད་པ་དང་། གཡེམ་དང་ལིངས་འདེབས་སོགས་ཆོས་མ་ཡིན་པའི་ལོངས་སྤྱོད་ལ་ཆགས་པ་དང་། རྒྱལ་པོ་དང་བྲམ་ཟེའི་བསྟན་བཅོས་སོགས་འཚེ་བ་དང་ལྡན་པ་ལོག་པའི་ཆོས་ཏེ་ཕྱི་མ་གསུམ་བསྡོམས་པ་གཅིག་ཏུ་བརྩིས་པའི་ཕྱིན་ཅི་ལོག་པའི་ལྷག་མ་དགུ་སྟེ། དེ་རྣམས་སྤངས་ནས། ཕ་མ་དགེ་སྦྱོང་བྲམ་ཟེ་རྒན་སོགས་སུ་མི་འཛིན་པ་སྤངས་ཏེ་དེ་དག་གཙོ་བོར་གཟུང་ཞིང་བཀུར་པ་ཡིས། བུ་ཚ་རྣམས་རིམ་པར་ལོ་བརྒྱ་དང་། ཉིས་བརྒྱ་དང་། ལྔ་བརྒྱ་དང་། སྟོང་དང་ནི། ཉིས་སྟོང་དང་། ལྔ་སྟོང་དང་། ཁྲི་དང་། ཉི་ཁྲི་དང་། བཞི་ཁྲི་དང་། བརྒྱད་ཁྲིའི་བར་དུ་གོང་ནས་གོང་དུ་འཕེལ་ལོ། །ཚེ་འཕེལ་བ་བཞིན་དུ་གཟུགས་དང་ལོངས་སྤྱོད་སོགས་ཕུན་གསུམ་ཚོགས་པ་དག་ཀྱང་ཉིས་འགྱུར་གྱིས་འཕེལ་ཏེ། དེ་ལྟར་བར་ཁུག་གི་འཕེལ་འགྲིབ་རྣམས་རེ་རེ་ལ་མི་རབས་བཅུ་གཉིས་རེ་ཡོད་པ་སྟེ། ཡ་ཐོག་མ་ཐོག་གཉིས་ནི་དེ་བས་རིང་བ་ཡིན་ཏེ་སྔར་བཤད་ཟིན་ཏོ། །གཉིས་པ་གནས་དུས་ཆོས་ཀྱི་བྱེ་བྲག་ལ། སྤྱི་དང་། བྱེ་བྲག་གཉིས། དང་པོ། དེ་ལྟར་གནས་པའི་དུས་ཀྱི་རིང་ལ་འཇིག་རྟེན་དུ་གྲགས་པའི་ཆོས་ལུགས་ལ་ཚད་མེད་ཀྱང་འདོར་བསྡུས་པའི་ཆོས་ཀྱི་བྱེ་བྲག་ཀྱང་། ལྷ། ལྷ་མིན། མི། དུད་འགྲོ། ཡི་དྭགས། དམྱལ་བ་སྟེ་འགྲོ་བ་དྲུག་དང་། སྒོང་། མངལ། དྲོད་གཤེར། རྫུས་སྐྱེས་ཏེ་སྐྱེ་བ་རྣམ་པ་བཞི་དང་། ཡོངས་བཟུང་གི་གཞི་དྲུག་ནི། གནས་པའི་གཞི་རླུང་སོགས་འོག་གཞི། བརྟེན་པའི་གཞི་ཁང་ཁྱིམ་སོགས། ཟས་ཀྱི་གཞི་ཁམས་ཟས་ཀྱི་རྒྱུ་ལོ་ལེགས་པ། བདེ་བའི་གཞི་ཟས་གོས་མལ་ཆ་སོགས། སྣང་བའི་གཞི་གཟུགས་སོགས་སྣང་བའི་རྒྱུ་ཉི་ཟླ་སྒྲོན་མེ། ལུས་གནས་པའི་གཞི་ཁམས་རེག་སེམས་ཤེས་ཀྱི་ཟས་བཞིའོ། །ཁ་ཅིག་གིས་ཐོག་ཐ་གཅིག་ཏུ་བྱས་ཏེ། དེའི་སྟེང་དུ་གཏམ་གྱི་གཞི་གླེང་བའི་ཡུལ་དང་འདོད་པའོ། །དུས་བཅུ་ནི། བསྐལ་པ། ལོ། ཟླ་བ། ཟླ་ཕྱེད། ཉིན། མཚན། སྐད་ཅིག ཐང་ཅིག ཡུད་ཙམ། དུས་ཚིགས་རྣམས་སོ། །དེ་ལས་བསྐལ་པ་ལ། བར་བསྐལ་དང་ཆེན་པོ་གཉིས། སྐད་ཅིག་ལ། དུས་མཐའ། དེའི། བྱ་རྫོགས་གསུམ། དུས་ཚིགས་ལ་དགུན་སོགས་བཞིར་དབྱེའོ། །དེ་ལས། དུས་མཐའི་སྐད་ཅིག་ཡུལ་གཅིག་ལ་ཤེས་པ་ལམ་གྱིས་སྐྱེ་བ། དེ་བརྒྱ་ཉི་ཤུའི་ཡུན་ལ་དེའི་སྐད་ཅིག བྱ་རྫོགས་ནི་སེ་གོལ་ནས་སངས་རྒྱས་ཀྱི་བར་བྱ་བ་གཅིག་མགོ་བརྩམས་ནས་གྲུབ་ཚུན་ཆད་དོ། །ཐང་ཅིག་ནི་དེའི་སྐད་ཅིག་མ་དྲུག་ཅུའོ། །དེ་སུམ་ཅུ་ལ་ཡུད་ཙམ་གཅིག ལྷག་མ་གོ་སླའོ། །ཡོངས་སུ་བཟུང་བའི་དངོས་པོ་བཅུ་བདུན་ནི། བདག ཕ་མ། བུ་ཚ། ཆུང་མ། བྲན། འཕྲལ་དགོས་སྒྲུབ་པའི་ལས་བྱེད་པ། གཙོ་བོའི་མཐུ་ལ་བརྟེན་ནས་འཚོ་བ་ཞོ་ཤས་འཚོ་བ། ཡིད་འཐད་ཀྱི་གྲོགས་མཛའ་བཤེས། གྲོས་དང་ལས་ལ་འདུ་བ་བློན་པོ། ཕའི་ཕྱོགས་ཀྱི་ཉེ་དུ། མའི་ཕྱོགས་སྣག་གི་གཉེན་མཚམས། ཞིང་། ཁྱིམ། ཕར་འཚོང་རྒྱུ་ཟོང་དགྲམ་པའི་དངོས་པོ། བསོད་ནམས་དགེ་བ་བསགས་པ། བྱ་བ་སྣ་ཚོགས་ཀྱི་ལས་མཐའ་ལ་སྦྱོར་བ། ནོར་བསོགས་པའི་དངོས་པོའོ། །ལོངས་སྤྱོད་ཀྱི་ཡོ་བྱད་བཅུ་བཞི་ནི། ཟས། སྐོམ། གོས། བཞོན་པ། རྒྱན། གླུ་བྲོ། བཞད་དགད། རོལ་མོའི་སྒྲ། སྤོས། མེ་ཏོག་གི་ཕྲེང་བ་རྒྱུད་པ། བྱུག་པ། སྣོད་སྤྱད། སྣང་བ། ཕོ་མོ་དགའ་མགུར་སྤྱོད་པའོ། །རྒྱུན་གྱི་རྗེས་སུ་སྤྱོད་པ་བརྒྱད་ནི། འདིར་བསྟན་མ་ཡིན་པའི་སྤྱོད་ལམ་གཞན་ལ་ཡོངས་སུ་བརྟག་པ། གོས་ཀྱིས་དཀྲི་བ། ཁ་ཟས་བཟའ་བཏུང་། ལུས་ཀྱི་བསྙེན་བཀུར་བྱ་བ། གཉིད་ལོག་པ། འཁྲིག་སྤྱོད། དེ་དང་ལྡན་པའི་རྩོལ་བ། དེའི་གཏམ་རྣམས་སོ། །འཇིག་རྟེན་གྱི་སྤྱོད་པ་བཅུ་ནི། ཚིག་སྣ་ཚོགས་སྨྲ་བ། ལན་ནམ་སྔོན་བྱུང་གི་གཏམ་བྱེད་པ། ཕན་ཚུན་ནམ་སོ་སོར་དགའ་ཞིང་མགུ་བར་བྱེད་པ། བག་མ་གཏོང་བ། བག་མ་ལེན་པ། མིང་ནས་འབོད་པ་གཡར་འདྲེན་པ་སྟེ་མགྲོན་འབོད་པ། ལྷག་པར་ཟ་བ། འདུས་ཏེ་ཟ་བ། རྩོད་པ་བྱེད་པ་ལ་གཅིག་གྲོགས་གཅིག་གིས་བྱེད་པའོ། །གཏམ་ནི་རྣམ་པ་གསུམ་སྟེ། ངེས་འབྱུང་སོགས་ཡང་དག་པའི་ཆོས་དང་ལྡན་པ། ཉོན་མོངས་ཅན་ཆོས་དང་ལྡན་པ་མ་ཡིན་པ། དེ་ལས་གཞན་ལུང་མ་བསྟན་མེ་ཆུ་སོགས་བརྗོད་པའོ། །ཉེས་རྩོམ་ཉེར་གཉིས་ནི། འབྲུ་སོགས་བྲེས་གཞལ་བླུགས་ལ་སྒྱུ་བྱེད་པ། རིན་ཆེན་སོགས་འདེགས་པའི་སྲང་ལ་སྒྱུ་བྱེད་པ། རས་སོགས་ཚད་ཀྱིས་གཞལ་བ་ལ་སྒྱུ་བྱེད་པ། བྱ་བ་མ་ཡིན་པ་ལོག་པའི་ལས་ལ་སྦྱོར་བ། འཐབ་པ། སྐྱོན་མཚང་འབྲུ་བ། དྲག་ཏུ་རྩོད་པ། ཤགས་འགྱེད་པ། སྐུར་འདེབས་ཀྱིས་གཤེ་བ། འཁུ་སེམས་ཀྱིས་ཁྲོ་བ། གནོད་པ་སོགས་དམ་བཅའ་བ། ལུང་ངག་གིས་བསྡིགས་པ། ཐལ་དབྱུག་སོགས་ཀྱིས་བརྡེག་པ། གསོད་པ། འཆིང་བ། གོ་རར་ཏེ་བརྩོན་སོགས་སུ་འཇུག་པ། རྐང་ལག་སོགས་གཅོད་པ། ཡུལ་གཞན་དུ་སྤྱུག་པ། མགོ་སྐོར་གྱིས་གཡོ་བྱེད་པ། བསླུ་ཐབས་ཀྱིས་འབྲིད་པ། ཁྲོས་རྔམས་ཀྱི་འཇིགས་སྟངས་སྟོན་པ་དྲག་ཤུལ། རྫུན་དུ་སྨྲ་བ་རྣམས་སོ། །དེ་བཞིན་དུ་སེམས་ཅན་གྱི་རིགས་དྲུག་ཅུ་རྩ་གསུམ་ནི། དམྱལ་བ། ཡི་དྭགས། དུད་འགྲོ། ལྷ། མི། ལྷ་མིན། བར་སྲིད། རྒྱལ་རིགས། རྗེའུ་རིགས། དམངས་རིགས། བྲམ་ཟེ། སྐྱེས་པ། བུད་མེད། མ་ནིང། ངན་པ། འབྲིང་། བཟང་པོ། ཁྱིམ་པ། རབ་བྱུང་། དཀའ་ཐུབ་ཅན། དེ་མ་ཡིན་པ། སྡོམ་པ་ཅན། སྡོམ་ཅན་མིན་པ་སྡོམ་མིན། སྡོམ་པ་མེད་པའང་མ་ཡིན་པ་བར་སྡོམ། འདོད་ཆགས་དང་བྲལ་བ། ཆགས་བྲལ་མ་ཡིན་པ། ལོག་པར་ངེས་པ། ཡང་དག་ཉིད་དུ་ངེས་པ། གཉིས་ཀར་མ་ངེས་པའི་ཕུང་པོ། དགེ་སློང་། དགེ་སློང་མ། དགེ་སློབ་མ། དགེ་ཚུལ། དགེ་ཚུལ་མ། དགེ་བསྙེན། དགེ་བསྙེན་མ། ཁ་ཏོན་པ། ཞལ་ཏ་བྱེད་པ། བསྙེན་པར་རྫོགས་ནས་ལོ་བཅུ་ཡན་ལོན་པ་གནས་བརྟན། ལོ་ལྔ་སོགས་ལོན་པ་བར་མ། རིང་པོར་མ་ལོན་པ་གསར་བུ། རབ་བྱུང་གི་མཁན་པོ། བསླབ་པ་སྦྱིན་པ་སོགས་སློབ་དཔོན། མཁན་བུ་རྣམས་ལ་ལྷན་གཅིག་གནས་པ། ཉེ་གནས། གློ་བུར་དུ་ལྷགས་པ། དགེ་བསྙེན་སོགས་དགེ་འདུན་གྱི་ལས་བྱེད་པ། རྙེད་པ་འདོད་པ། བཀུར་སྟི་འདོད་པ། ཡོ་བྱད་སྙུངས་པ། མང་དུ་ཐོས་པ། མཁས་ཤིང་བསོད་ནམས་དང་ལྡན་པ། ཆོས་ཀྱི་རྗེས་སུ་མཐུན་པས་ཆོས་ལ་ཞུགས་པ། འདུལ་བ་འཛིན་པ། མདོ་སྡེ་འཛིན་པ། མ་མོ་འཛིན་པ། སོ་སྐྱེ། བདེན་མཐོང་། སློབ་པ། མི་སློབ་པ། ཉན་ཐོས། རང་རྒྱལ། བྱང་སེམས། འཁོར་ལོས་སྒྱུར་བ་རྣམས་སོ། །དུས་བརྒྱད་ནི། མངལ་ན་གནས་པའི་དུས། ཕྱིར་བཙས་པ། དེ་ནས་རྩེད་མོ་མི་ནུས་པ་བྱིས་པ། རྩེད་མོ་ནུས་པ་གཞོན་ནུ། འདོད་པ་ལ་སྤྱོད་ནུས་པ་ལང་ཚོ། ལྔ་བཅུ་མན་ཆད་དར་བབས། བདུན་ཅུ་མན་རྒས་པ། དེ་ཡན་འཁོགས་པའི་དུས་སོ། །མངལ་དུ་འཇུག་པ་བཞི་ནི། ཤེས་བཞིན་དུ་འཇུག་ལ་མ་ཤེས་པར་གནས་ཤིང་འབྱུང་བ་འཁོར་ལོས་སྒྱུར་བ། ཤེས་བཞིན་འཇུག་ཅིང་གནས་ལ་མི་ཤེས་པར་འབྱུང་བ་ཉན་རང་། གསུམ་ཀ་ཤེས་པ་བྱང་སེམས། གསུམ་ཀ་མི་ཤེས་པ་འགྲོ་བ་གཞན་རྣམས་སོ། །འཚོ་བ་དྲུག་ནི། ཞིང་ལས་འདི་ཕྱག་མཆན་ན་མེད། མཆན། ཚོང་། ཕྱུགས་འཚོ་སྐྱོང་། རྒྱལ་པོ་ལ་བརྟེན་པའི་ཞོ་ཤས་འཚོ་བ། ཡི་གེ་འབྲི་བ་དང་གྲངས་ཀྱི་ཤོད་དགོད་པ། སྐར་རྩིས་སོགས་རྩིས་ཀྱི་ལས། དེ་ལས་གཞན་པའི་བཟོ་གནས་གང་རུང་ལ་བརྟེན་ནས་འཚོ་བའོ། །ཀུན་ནས་བསྲུང་བ་དྲུག་ནི། གླང་པོ་ཆེའི་ཚོགས་དང་། རྟའི། ཤིང་རྟའི། དཔུང་བུ་ཆུང་གི། ནོར་གྱི། མཛའ་བཤེས་ཀྱི་ཚོགས་དང་བཅས་ཏེ་རང་སྡེ་སྲུང་བའོ། །ང་རྒྱལ་བདུན་ནི། ཆུང་ངུ་བས་བདག་འཕགས་པའམ་མཉམ་པ་དང་མཉམ་སྙམ་དུ་སེམས་ཁེངས་པ་ང་རྒྱལ། དེ་བཞིན་མཉམ་པ་ལས་འཕགས་མཆོག་དང་མཉམ་སྙམ་པ་ཆེ་བའི་ང་རྒྱལ། མཆོག་ལས་ཀྱང་བདག་འཕགས་སྙམ་པ་ང་རྒྱལ་ལས་ཀྱང་ང་རྒྱལ། ལྔ་ཕུང་བདག་དང་བདག་གིར་བཟུང་ནས་སེམས་ཁེངས་པ་ངའོ་སྙམ་པའི་ང་རྒྱལ། ཆེས་འཕགས་པ་ལས་བདག་ཅུང་དམན་ཡང་སྤྱིར་རང་བཟང་སྙམ་པ་ཅུང་ཟད་སྙམ་པའི་ང་རྒྱལ། ཡོན་ཏན་གོང་མ་མ ཐོབ་པ་ལ་ཐོབ་པར་རློམ་པ་མངོན་པའི་ང་རྒྱལ། སྐྱོན་ལ་ཡོན་ཏན་དུ་བརླམས་ནས་སེམས་ཁེངས་པ་ལོག་པའི་ང་རྒྱལ་ལོ། །རྒྱགས་པ་རྣམ་པ་བདུན་ནི། ནད་མེད་པས། ལང་ཚོས། གསོན་པས། རིགས་ཀྱིས། གཟུགས་ཀྱིས། དབང་ཕྱུག་གིས། ཐོས་པས་རྒྱགས་པ་སྟེ་དེ་རྣམས་ཀྱིས་ཡིད་མགུ་ནས་འཐིག་པའོ། །ཐ་སྙད་བཞི་ནི། །གཞན་ལས་ཐོས་པ། རང་གིས་བྱེ་བྲག་ཕྱེད་པ། དབང་པོས་མཐོང་བ། རང་རིག་གམ་མངོན་ཤེས་ཀྱིས་རྣམ་པར་ཤེས་པ་སྟེ་དེ་དག་ལ་བརྟེན་ནས་གཞན་ལ་ཐ་སྙད་དུ་བརྗོད་པའོ། །ཐ་སྙད་མང་པོའི་གཞི་ནི་སྤྱིར་ཚོགས་དྲུག་གི་ཡུལ་ལ་དགག་སྒྲུབ་ཀྱི་ཐ་སྙད་སྣ་ཚོགས་རྣམ་པར་གཞག་པ་སྟེ། ཤེས་བརྗོད་འཇུག་གསུམ་གྱི་ཐ་སྙད་རྣམས་གང་ལ་འཇུག་པའི་གཞི་དེར་ངེས་པའི་ཚིག་གི་གཞི་དང་། སྤྲོས་པའི་གཞི་དང་། དོན་བསྡུ་བའི་གཞི་ཞེས་བྱ་སྟེ་རྣམ་གྲངས་སོ། །དེ་ལས་འགྲེལ་ཆེན་དུ་ཡིད་ཡུལ་ཆོས་ཁམས་ཀྱི་རྣམ་དབྱེ་བཅུ་ཙམ་བཀོད་པ་ནི་མཚོན་བྱེད་དུ་མཛད་པ་སྟེ། རྒྱས་པར་ནི་ཕྱི་ནང་གི་སྐྱེ་མཆེད་ཀྱི་རབ་ཏུ་དབྱེ་བ་དྲུག་བརྒྱ་དྲུག་ཅུ་སོགས་སུ་བཤད་པ་ས་སྡེ་ལས་ཤེས་པར་བྱའོ། །མཁས་པར་བྱ་བའི་དོན་རྣམ་པ་དྲུག་ནི། ཕུང་ཁམས་སྐྱེ་མཆེད་རྟེན་འབྲེལ་གནས་གནས་མིན་དབང་པོ་རྣམས་ཏེ། དེ་ལ་ཕུང་པོ་ནི་གཟུགས་ཚོར་འདུ་ཤེས་འདུ་བྱེད་རྣམ་ཤེས་ཏེ་ལྔའོ། །ཁམས་ནི་ས་ཆུ་མེ་རླུང་ནམ་མཁའ་རྣམ་ཤེས་ཀྱི་ཁམས་ཏེ་དྲུག་གོ །སྐྱེ་མཆེད་ནི། མིག་རྣ་སྣ་ལྕེ་ལུས་ཡིད་གཟུགས་སྒྲ་དྲི་རོ་རེག་ཆོས་ཏེ་བཅུ་གཉིས་སོ། །རྟེན་འབྲེལ་ནི་མ་རིག་འདུ་བྱེད་རྣམ་ཤེས་མིང་གཟུགས་སྐྱེ་མཆེད་རེག་ཚོར་སྲེད་ལེན་སྲིད་པ་སྐྱེ་བ་རྒ་ཤི་སྟེ་བཅུ་གཉིས་སོ། །གནས་གནས་མིན་ནི། བདེན་བཞིའི་མྱང་འདས་ཀྱི་རྒྱུ་འབྲས་གཉིས་བླང་བྱ་ཡིན་པས་གནས་དང་། འཁོར་བའི་རྒྱུ་འབྲས་སྤང་བྱ་ཡིན་པས་གནས་མིན་ནོ། །དབང་པོ་ནི་མིག་རྣ་སྣ་ལྕེ་ལུས་ཀྱི་དབང་པོ་ལྔ་དང་དད་བརྩོན་དྲན་ཏིང་ཤེས་རབ་སྟེ་རྣམ་བྱང་གི་དབང་པོ་ལྔ་རྣམ་གྲོལ་གྱི་དབང་པོ་དང་བཅུ་གཅིག་སོགས་ལྟར་རོ། །སངས་རྒྱས་ཀྱི་བཀའ་ཡི་དངོས་པོ་དགུ་ནི། སེམས་ཅན་གྱི་དངོས་པོ་གཟུགས་སོགས་ཕུང་ལྔ། ལོངས་སྤྱོད་ཀྱི་དངོས་པོ་སྐྱེ་མཆེད་བཅུ་གཉིས། སྐྱེ་བའི་དངོས་པོ་རྟེན་འབྲེལ་ལུགས་འབྱུང་བཅུ་གཉིས། གནས་པའི་དངོས་པོ་ཟས་བཞི། ཀུན་ཉོན་དང་། རྣམ་བྱང་གི་དངོས་པོ། སྡུག་ཀུན། འགོག་ལམ་བཞི། སྣ་ཚོགས་ཀྱི་དངོས་པོ་ཁམས་ཚད་མེད་པ། སྟོན་པ་པོའི་དངོས་པོ་སངས་རྒྱས་བྱང་སེམས་ཉན་ཐོས་གསུམ། བསྟན་པར་བྱ་བའི་དངོས་པོ་བྱང་ཕྱོགས་ཀྱི་ཆོས་སུམ་ཅུ་རྩ་བདུན་ཏེ། ལུས་ཚོར་སེམས་ཆོས་ཀྱི་དྲན་པ་ཉེར་བཞག་བཞི། མི་དགེ་བ་མི་སྐྱེད། སྐྱེས་པ་སྤོང་དགེ་བ་སྐྱེད་སྤེལ་གཉིས་བཅས་ཡང་དག་པར་སྤོང་བ་བཞི། འདུན་སེམས་དཔྱོད་ཏིང་སྟེ་རྫུ་འཕྲུལ་གྱི་རྐང་པ་བཞི། དད་བརྩོན་དྲན་ཏིང་ཤེས་རབ་སྟེ་དབང་པོ་ལྔ། དེ་རྣམས་མི་མཐུན་ཕྱོགས་ལས་རྒྱལ་བའི་སྟོབས་ལྔ། དྲན་པ། ཆོས་རབ་རྣམ་འབྱེད། བརྩོན་འགྲུས། ཤིན་སྦྱངས། ཏིང་འཛིན། དགའ་བ། བཏང་སྙོམས་ཡང་དག་སྟེ་བྱང་ཆུབ་ཀྱིི་ཡན་ལག་བདུན། ཡང་དག་པའི་ལྟ་རྟོག་ངག་ལས་མཐའ་འཚོ་བ་རྩོལ་བ་དྲན་པ་ཏིང་འཛིན་ཏེ་འཕགས་ལམ་ཡན་ལག་བརྒྱད་རྣམས་སོ། །འཁོར་གྱི་དངོས་པོ་བརྒྱད་ནི། རྒྱལ་རིགས། བྲམ་ཟེ། ཁྱིམ་བདག་དགེ་སྦྱོང་། རྒྱལ་ཆེན་བཞིའི་རིགས། སུམ་ཅུ་རྩ་གསུམ་པ། བདུད་དང་། ཚངས་པའི་འཁོར་རྣམས་སོ། །དེ་ལ་སོགས་པར་གྲགས་ཞེས་པའི་དོན་ནི་འདི་ཙམ་དུ་མ་ཟད། རྒྱལ་པོ་ལུགས་དང་། བྲམ་ཟེ་དང་། ཁྱིམ་བདག་དང་། དེད་དཔོན་རྣམས་ཀྱི་རྒྱ་མཚོ་དང་ནོར་བུ་བཏགས་པ་སོགས་ཀྱི་བསྟན་བཅོས་ཕྱི་ནང་ཐུན་མོང་དུ་གྲགས་བའི་ཆོས་ལུགས་ཐམས་ཅད་བསྐལ་པ་གནས་པའི་དུས་འདིར་བྱུང་བ་ཡིན་ནོ་ཞེས་པའི་དོན་ཏོ། །གཉིས་པ་ནི། དེ་ལྟར་གནས་པའི་ཚེའམ་བསྐལ་པ་འདི་ལ་ཁམས་གསུམ་འདིར་ཆོས་གང་ལྡན་མི་ལྡན་གྱི་ཁྱད་པར་གཞན་བསྟན་པ་ནི། བཀྲེས་སྐོམ་ནི་འདོད་པ་ན་ཡོད་ལ་གཟུགས་དང་གཟུགས་མེད་གཉིས་ན་མེད་དོ། །གླིང་གཞན་གསུམ་ན་ཁ་ཟས་ཀྱི་རྣམ་པ་མང་པོ་དང་ལྡན་ཞིང་། སྒྲ་མི་སྙན་ན་ས་དང་ཤིང་ལས་བྱུང་བའི་འབྲས་ས་ལུ་གཅིག་པུ་ཉིད་དོ། །འདོད་ལྷ་དྲུག་ནི་བདུད་རྩི་ཁ་དོག་བཞི་ལ་སྤྱོད་ཅིང་དེ་ཡན་ཆད་ཏིང་འཛིན་གྱི་ཟས་ལ་སྤྱོད་དེ་ཁམས་ཀྱི་ཟས་མེད་དོ། །མི་ལ་བཤང་གཅི་ཡོད་ཅིང་ལྷ་རྣམས་ལ་ཡོད་པ་མིན་ནོ། །གླིང་གསུམ་ན་ཆར་འབབ་པ་ལ་ཆེ་ཆུང་སྣང་བ་སྟེ་སྒྲ་མི་སྙན་དང་ལྷ་རྣམས་ལ་དེ་མེད་དོ། །དེ་བཞིན་དུ་ནོར་དང་འབྲུ་ཉོ་ཚོང་དང་ལོ་ལེགས་ཉེས་དང་ཆེད་དུ་བྱས་པའི་གནས་ཁང་ཀྱང་དེ་དང་མཚུངས་པ་ཉིད་དེ་གླིང་གསུམ་ལས་གཞན་གཉིས་ལ་མེད་དོ། །གླིང་གསུམ་དང་འདོད་ལྷའི་གནས་ན་སྔོ་སེར་དཀར་དམར་གྱི་ཁ་དོག་བཞི་ཀ་ཡོད་ལ། གཟུགས་དང་སྒྲ་མི་སྙན་ན་དཀར་པོ་ཉིད་དེ་གཟུགས་མེད་ལ་ཁ་དོག་མེད་དོ། །གླིང་གསུམ་ན་རས་བལ་དང་དར་ཟབ་དང་སྣལ་མའི་གོས་ལྗིད་ཀྱང་ཆེ་ལ། སྒྲ་མི་སྙན་དང་འདོད་ལྷ་དྲུག་ན་དཔག་བསམ་ཤིང་ལས་བྱུང་བའི་གོས་སྲབ་འཇམ་ཡང་བ་སྟེ། བྱང་གི་གོས་ལ་སྲང་གཅིགརྒྱལ་ཆེན་རིགས་བཞི་ལ་སྲང་ཕྱེད། རྩ་གསུམ་པར་བཞི་ཆ། འཐབ་བྲལ་བརྒྱད་ཆ། དགའ་ལྡན་ལ་བཅུ་དྲུག་ཆ། འཕྲུལ་དགར་སུམ་ཅུ་རྩ་གཉིས་ཆ། གཞན་འཕྲུལ་ལ་དྲུག་ཅུ་རྩ་བཞིའི་ཆ་གཅིག་སྟེ། ཚངས་རིས་ཡན་ཆད་གཞལ་དུ་མེད་པའི་གོས་ཡོད་ཅིང་། དེ་ཡན་ཆད་གོས་གྱོན་བཞིན་སྐྱེ་ལ་གོས་ལའང་ཁ་དོག་བཞི་ཀ་ཡོད་དོ། །གླིང་གསུམ་ན་ཚ་གྲང་ཡོད་ལ་སྒྲ་མི་སྙན་དང་ལྷ་ལ་མེད་དོ། །སྒྲ་མི་སྙན་རྣམས་མ་གཏོགས་པའི་འདོད་པའི་ལྷ་དང་མི་རྣམས་ལ་བག་མ་གཏོང་ལེན་ཡོད་ལ་གོང་མའི་གཟུགས་ཀྱི་ཁམས་ན་མེད་དོ། །རྗེ་འབངས་དང་བྲན་གཡོག་ཕོ་མོ་ཉིད་ཀྱང་དེ་དང་མཚུངས་པར་བརྗོད་དེ། བྲན་སོགས་གླིང་གསུམ་དང་འདོད་ལྷར་ཡོད་ལ་བྱང་དང་གོང་མ་གཉིས་ལ་མེད། ཁམས་གོང་མ་གཉིས་ན་ཕ་མ་དང་ཕོ་མོ་མེད་ལ་འོག་མ་ལ་ཡོད་དོ། །འདོད་ལྷ་དྲུག་ལ་ནོར་ཡོད་འབྲུ་མེད་ཅིང་སྒྲ་མི་སྙན་ན་འབྲུ་ཡོད་ནོར་མེད་ལ་གཉེན་ལ་མངོན་ཞེན་མེད་དེ་གཟུགས་ཁམས་དང་འདྲ་བ་ཉིད་ཡིན་ནོ། །གླིང་གཞན་གསུམ་ནི་འབྲུ་དང་ནོར་དང་གཉེན་དང་ལྡན་པ་ཉིད་ཡིན་ལ། ཚངས་རིས་ལ་སོགས་གོང་མའི་ཁམས་ན་དེ་གསུམ་ཆར་མེད་དོ། །རྫུས་སྐྱེས་རྣམས་ཤི་བའི་ཚེ་རོ་མེད་ལ་སྐྱེ་གནས་གཞན་རྣམས་ལ་རོ་དང་བཅས་པའོ། །གོང་དུ་བགྲོད་པའང་རང་གི་རྫུ་འཕྲུལ་གྲུབ་པའམ་ཁམས་གོང་མའི་ལྷ་སོགས་གཞན་ལ་བརྟེན་ནས་གོང་མར་ཕྱིན་པར་འགྱུར་གྱི། དེ་ལས་གཞན་དུ་འོག་མས་གོང་མ་རྣམས་མཐོང་བ་མེད་དོ། །དེ་བཞིན་དུ་ཚངས་རིས་ལ་སོགས་པ་གོང་མ་རྣམས་འཛམ་གླིང་དུ་འོང་བའི་ཚེ་འོག་མའི་སར་བརྟེན་པའི་སེམས་ཀྱིས་སྤྲུལ་པས་འོངས་ཏེ་སེམས་ཅན་གྱི་སེམས་ཀྱི་སྣང་ཚུལ་ཐ་དད་པས་གང་དུ་འཁྲུལ་པའི་རླུང་སེམས་འདུ་བ་ལས་གྱུར་པའི་ཕྱིར་རོ། །གཞན་འཕྲུལ་མན་ཆད་འདོད་པའི་ས་མཚུངས་པས་ལུས་དངོས་ཀྱིས་འོང་བའོ། །གླིང་བཞིའི་མི་ལ་ཉིན་མཚན་སྣང་བའི་ཆ་ནས་བྱེད། བྱང་དུ་ནམ་ཕྱེད་དུས། ཤར་དུ་ཉི་ནུབ། ལྷོར་ཉིན་ཕྱེད། ནུབ་ཉི་མ་འཆར་བ་ལྟ་བུས་འཁོར་བ་ཡིན་ལ། གཉའ་ཤིང་འཛིན་ཡན་ཉི་ཟླ་མེད་ཀྱང་། འདོད་ལྷར་པདྨོ་བྱེ་བ་དང་ཟླུམ་པས་འབྱེད་དེ་སྣང་བའི་བྱ་བ་ནི་ལུས་ཀྱི་འོད་ཀྱི་བྱེད་པ་ཡིན་ནོ། །སྒྲ་མི་སྙན་པ་རྣམས་ཤི་ནས་སུམ་ཅུ་རྩ་གསུམ་དུ་སྐྱེ་ལ་ལྷ་མི་གཞན་རྣམས་ནི་གང་དུ་སྐྱེ་བ་མ་ངེས་ཏེ་ལས་ཀྱིས་དབང་གིས་སྣ་ཚོགས་པ་ཉིད་དོ། །གཉིས་པ་རྩོམ་གཞི་ཕྲ་བ་ངོས་བཟུང་བ་ལ་བསྟན་བཤད་གཉིས། དང་པོ། གོང་བཤད་དེ་དག་རྣམས་ཀྱང་བསྡུ་ན་གསུམ་ཉིད་དེ། བེམ་པོ་རྣམས་གཟུགས་དང་། རྣམ་ཤེས་ནི་དུས་དང་། ལྡན་མིན་སོགས་མིང་ལས་རབ་ཏུ་དབྱེ་བའོ། །གཉིས་པ་ལ། གཟུགས་ཀྱི་མཐའ། དུས་ཀྱི་མཐའ། མིང་གི་མཐའ་གསུམ། དང་པོ། གཟུགས་ཀྱི་མཐའ་ནི་ཕྲ་རབ་ཀྱི་རྡུལ་ཏེ་བདུན་འགྱུར་གྱིས་བརྩི་སྟེ། ཕྲ་རབ་བདུན་ལ་རྡུལ་ཕྲན་གཅིག དེ་བདུན་ལྕགས་རྡུལ་ཏེ་དེ་རས་སོགས་ཀྱིས་ཕྱིས་པས་ཟད་པ་དང་། དེ་བདུན་ཆུ་རྡུལ་ཏེ་རིམ་གྱིས་སྐམ་པ་དང་། དེ་བདུན་རི་བོང་རྡུལ། དེ་བདུན་ལུག་རྡུལ། དེ་བདུན་གླང་རྡུལ་ཏེ་དེ་གསུམ་སོ་སོའི་སྤུ་རྩེའི་ཚད་དང་། དེ་བདུན་ཉི་ཟེར་རྡུལ། དེ་བདུན་སེམས་ཅན་སྲོ་མ། དེ་བདུན་ཤིག དེ་བདུན་ནས། དེ་བདུན་སོར་མོ་གཅིག སོར་མོ་ཉི་ཤུ་རྩ་བཞི་ཁྲུ་གང་སྟེ། ཁྲུ་བཞི་ལ་གཞུ་འདོམ་གང་། དེ་ཉིད་ལྔ་བརྒྱ་ལ་རྒྱང་གྲགས་གཅིག་སྟེ་གྲོང་ལས་དེ་སྲིད་སྤགས་པ་དགོན་པའི་ཚད་དུ་བསྟན། རྒྱང་གྲགས་བརྒྱད་ལ་དཔག་ཚད་ཅེས་བྱ་སྟེ་དེས་རི་གླིང་སོགས་ཀྱི་ཚད་གཞལ་བར་བྱའོ། །གཉིས་པ། དུས་ཀྱི་མཐའ་ནི་དུས་མཐའི་སྐད་ཅིག་མ་སྟེ་དེ་ནི་སྐྱེས་བུ་སྟོབས་ལྡན་གྱི་སེ་གོལ་གྱི་ཡུན་ལ་ཆ་དྲུག་ཅུ་རྩ་བཞིར་ཕྱེ་བ་སྟེ་ཤོ་མང་གི་འདབ་མ་རེ་བཞིའམ་དྲུག་ཅུ་ཕུག་པའི་ཡུན་གྱི་ཆ་གཅིག་སྟེ་རེ་རེ་ཕུག་པའི་ཚད་ཡིན་ལ། དེ་བརྒྱ་ཉི་ཤུ་ལ་དེ་ཡི་སྐད་ཅིག དེ་དྲུག་ཅུ་ལ་ཐང་གཅིག་སྟེ་ཞག་གི་དགུ་བརྒྱའི་ཆའོ། །ཐང་གཅིག་སུམ་ཅུ་ལ་ཡུད་ཙམ་གཅིག དེ་སུམ་ཅུ་ལ་ཉིན་ཞག་གཅིག དེ་སུམ་ཅུ་ཟླ་བ་གཅིག དེ་བཅུ་གཉིས་ལ་ལོ་གཅིག་སྟེ་དེས་ཚེ་དང་དུས་སོགས་ཀྱི་ཚད་འཇོག་གོ །གསུམ་པ། མིང་གི་མཐའི་ནི་ཀ་སོགས་ཡི་གེ་སིལ་བུ་འདུས་པ་ལས་ཀ་བ་ལྟ་བུའི་མིང་འབྱུང་ཡང་དེ་བརྟགས་ན་ཡི་གེ་སིལ་བུ་ཉིད་དེ། དཔེར་ན་སྤུ་དང་དེ་གྲུབ་པས་ཐག་པ་དང་སྤུ་ཉག་ལས་གཡག་རྔ་དང་རྩ་ཉག་རེ་རེ་འདུས་པ་ལས་ནེའུ་གསེང་དུ་གྲུབ་པ་བཞིན། ཀ་བ་རིང་པོ་ལྟ་བུ་མིང་ལས་དོན་ཐ་དད་སྟོན་པའི་ཚིག་འབྱུང་ཞིང་དེ་ལས་བཀའ་དང་བསྟན་བཅོས་ཀྱི་ལེའུ་དང་བམ་པོ་དང་སྡེ་ཚད་དུ་གྲུབ་པ་ཉིད་དེ། དེ་ལྟར་གྲུབ་པ་དེ་ཡང་བརྟགས་ན་མིང་དོན་མི་འབྲེལ་བར་ཡི་གེ་སིལ་བུ་ཕན་ཚུན་རང་ས་ན་གནས་པས་མ་འབྱར་བའོ། །དེའི་ཕྱིར་ཡེ་ནས་སྐྱེ་སོགས་ཀྱི་ངོ་བོར་མེད་བཞིན་སྣ་ཚོགས་སུ་འཆར་བ་མི་འགག་པས། ཆོས་ཐམས་ཅད་སྣང་ལ་རང་བཞིན་མེད་པ་སྤྲུལ་པ་དང་སྒྱུ་མ་ལྟ་བུར་ཤེས་པར་བྱའོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། གནས་པའི་བསྐལ་པ་བསྟན་པའི་ལེའུ་སྟེ་ལྔ་པའི་འགྲེལ་པའོ།། །། ༈ གསུམ་པ་འཇིག་སྟོང་གི་བསྐལ་པ་བཤད་པ་ལ། འཇིག་སྟོང་གི་ཚུལ་བཤད་པ་དང་། དེ་ལས་བརྩམས་ཏེ་ཐར་པར་བསྐུལ་བ་གཉིས། དང་པོ་ལ། འཇིག་པ་དང་། སྟོང་པ་གཉིས། དང་པོ་ལ། འཇིག་པའི་ཐོག་མ་ངོས་བཟུང་བ་དང་། ཇི་ལྟར་འཇིག་ཚུལ་དང་། འཇིག་པའི་ཡུན་བཤད་པ་གསུམ། དང་པོ། གནས་བསྐལ་རྫོགས་པའི་རྗེས་དེ་ནས་འཇིག་པའི་བསྐལ་པ་བསྟན་པ་ནི། གནས་པའི་བསྐལ་པ་རྫོགས་པའི་ཉིན་ནས་དམྱལ་བའི་འཇིག་རྟེན་དུ་སེམས་ཅན་གསར་དུ་སྐྱེ་བར་མི་འགྱུར་བ་གང་ཡིན་པ་དེ་ནི་འཇིག་པའི་ཐོག་མ་དང་པོ་དེ་ནས་འཇོག་པ་སྟེ། གང་དག་དམྱལ་བར་འགྲོ་བའི་ལས་བསགས་པ་རྣམས་ནི་ཞིང་གཞན་གྱི་དམྱལ་བར་འགྲོ་ཡི། འདིའི་དམྱལ་བར་གསར་དུ་སྐྱེ་བ་ཆོས་ཉིད་ཀྱིས་མི་སྲིད་པ་ཡིན་ནོ། །གཉིས་པ་ལ། བཅུད་འཇིག་པ་དང་། སྣོད་འཇིག་པ་གཉིས། དང་པོ་ལ། ངན་སོང་དང་། མཐོ་རིས་གཉིས། དང་པོ། དེའི་དུས་སུ་དམྱལ་བ་དེ་ནས་ལས་ཟད་པ་རྣམས་ནི་མཐོ་རིས་སུ་སྐྱེ་བར་འགྱུར་ཞིང་། དམྱལ་བ་མྱོང་ངེས་ཀྱི་ལས་མ་ཟད་པ་རྣམས་འཇིག་རྟེན་གཞན་དག་གི་དམྱལ་གནས་རྣམས་སུ་འཕོ་བར་འགྱུར་བ་ཡིན་ལ་དེ་ལྟར་གྱིས་དམྱལ་བ་མས་ནས་སྟོང་ཞིང་། དེ་བཞིན་དུ་ཡི་དྭགས་དང་དུད་འགྲོ་རྣམས་ཀྱང་དེ་དང་མཚུངས་ཏེ། ངན་སོང་གསུམ་ན་སེམས་ཅན་གཅིག་ཀྱང་མེད་པར་འགྱུར་རོ། །གཉིས་པ་ལ། མི་དང་། ལྷ་གཉིས། དང་པོ། མི་ཡི་འཇིག་རྟེན་གླིང་བཞིའི་འཇིག་ཚུལ་ཡང་། སྒྲ་མི་སྙན་པ་རྣམས་ཆོས་ཉིད་ཀྱིས་སུམ་ཅུ་རྩ་གསུམ་དུ་སྐྱེ་བར་འགྱུར་ཞིང་། གླིང་གཞན་གསུམ་མཚུངས་པར་བསམ་གཏན་གྱི་སེམས་སྐྱེ་བ་ནི། རྒྱུ་གང་གིས་ན། འཛམ་གླིང་གི་མི་ཞིག་ལ་སློབ་དཔོན་མེད་པར་ཆོས་ཉིད་ཀྱིས་བསམ་གཏན་གཉིས་པའི་ཏིང་ངེ་འཛིན་ཐོབ་ནས་དེས་གཞན་ལ་བསྒྲགས་པ་ནི། འདོད་ཉིན་གྱིས་དབེན་པ་ལས་སྐྱེས་པའི་དགའ་བ་དང་བདེ་བ་དང་ཞི་བ་ནི་འདི་ཡིན་ནོ། །ཞེས་སྨྲས་པས་སྒྲ་དེས་ཚེགས་མེད་པར་འཛམ་གླིང་ཁྱབ་ཅིང་མི་རྣམས་ཀྱང་དེའི་རྗེས་སུ་བསླབས་པས་ཏིང་འཛིན་སྐྱེས་ནས་འོད་གསལ་གྱི་ལྷར་སྐྱེས་ཏེ་འཛམ་གླིང་སྟོང་པ་ན། ཤར་དང་། ནུབ་ཀྱང་དེ་བཞིན་ཏེ་མདོར་ན་གླིང་གསུམ་དུ་བསྒྲགས་པའི་ཚེ་མི་རྣམས་ཀུན་གྱིས་བསམ་གཏན་གཉིས་པ་ཐོབ་ནས་ཤི་འཕོས་ཏེ་འོད་གསལ་གྱི་ལྷར་སྐྱེས་ཏེ་གླིང་རྣམས་སྟོངས་པ་ན་གླིང་ཕྲན་རྣམས་ཀྱང་དེ་དང་འདྲ་བར་སྟོངས་པར་འགྱུར་བ་ཡིན་ནོ། །གཉིས་པ་ལ། འདོད་ལྷ་དང་། གཟུགས་གཉིས། དང་པོ། དེ་བཞིན་དུ་འདོད་ཁམས་ཀྱི་ལྷ་རྣམས་ཀྱིས་ཀྱང་ཆོས་ཉིད་ཀྱིས་བསམ་གཏན་གཉིས་པ་ཐོབ་ནས་སྒྲ་བསྒྲགས་པ་སོགས་ཀྱིས་འོད་གསལ་དུ་སྐྱེས་པའི་ཚེ་འདོད་ཁམས་རིམ་པས་སྟོངས་ཞེས་བྱའོ། །གཉིས་པ། དེ་ནས་གཟུགས་ཁམས་འཇིག་པའང་དེ་བཞིན་ཏེ། ཆོས་ཉིད་ཀྱིས་བསམ་གཏན་གཉིས་པ་ཐོབ་ཅིང་དེ་ཐོབ་པར་བསྒྲགས་པའི་སྒྲ་ཐོས་ནས་བསམ་གཏན་གཉིས་པ་བསྒྲུབས་པས་ཚངས་པའི་ལྷ་རྣམས་ཀུན་ཀྱང་འོད་གསལ་གྱི་ལྷར་སྐྱེས་ཏེ་ཚངས་གནས་རྣམས་སྟོངས་པར་གྱུར་པ་ཡིན་ནོ། །གཉིས་པ་སྣོད་ལ། རྒྱུ་གང་གིས་འཇིག་དང་། ཇི་ལྟར་འཇིག་པའི་ཁྱད་པར་གཞན་བསྟན་པ་གཉིས། དང་པོ། བཅུད་སྟོང་པའི་རྗེས་དེ་ནས་སྣོད་ཀྱི་འཇིག་རྟེན་ཇི་ལྟར་འཇིག་པ་ནི། མེ་དང་ཆུ་དང་རླུང་གིས་རིམ་པར་སྲེག་པ་དང་བཤལ་བ་དང་འཐོར་བར་བྱེད་པ་སྟེ། དེ་ཡང་དཀའ་འགྲེལ་ལས། འཇིག་བསྐལ་ནི་ཡར་སྐྱེ་མར་འགྲིབ་ཉི་ཤུ་ཉི་ཤུ་སྟེ་བཞི་བཅུ་ནས་འཇིག་ལ། དེ་ཡང་གནས་པའི་བར་བསྐལ་ཉི་ཤུ་རྫོགས་པའི་མཐར་བཅུ་པ་ནས་ཡར་འཕེལ་བར་རྩོམ་པ་ན་འཇིག་པའི་མགོ་རྩོམ་སྟེ་ངན་སོང་གསུམ་སྟོངས་ནས་མི་རྣམས་ཆོས་ཉིད་ཀྱིས་བསམ་གཏན་ཐོབ་ནས་གོང་མར་སྐྱེ་བ་སོགས་བསམ་གཏན་གསུམ་པའི་བར་རིམ་པས་སྟོངས་པ་ན། དང་པོ་མེས་ལན་བདུན་འཇིག་ཅེས་ཉི་མ་བདུན་རིམ་བཞིན་ཤར་བས་ཚངས་གནས་མན་བསྲེགས་པ་ལ་བཞེད་ཅིང་། དེའི་རྗེས་ལ་མཁའ་ལས་ཆར་གྱི་རྒྱུན་ཐེངས་བདུན་དུ་བབས་པས་བསམ་གཏན་གཉིས་པའི་ཐོག་མ་མན་ཆད་འཇིག་ལ། སྔར་བསྲེགས་པའི་ཐལ་བ་ཆུ་དང་འདྲེས་པར་གནས་སོ། །དེ་ཡི་རྗེས་ཐོག་ཏུ་རླུང་དྲག་པོ་ལན་གཅིག་ལྡང་བསམ་གཏན་གསུམ་པ་མན་ཆད་དང་སྔར་གྱི་སྐྱོ་མ་དེ་དག་ཀྱང་ཕྱོགས་བཅུར་འཐོར་ཏེ་ཅིང་ཡང་མི་སྣང་བར་བྱེད་དོ། །དེ་ལྟར་འཇིག་ཐེངས་གཅིག་ལ་མེ་ཆུ་རླུང་གསུམ་ག་འབྱུང་ཞིང་བསམ་གཏན་གསུམ་པ་མན་ཆད་འཇིག་པའི་ལུགས་ཡིན་པས་མཛོད་ཀྱིས་ལུགས་སོགས་དང་གཏན་མི་འདྲ་སྟེ། མཛོད་ལས། མེ་ཡིས་བདུན་ནོ་ཆུ་ཡིས་གཅིག །དེ་ལྟར་ཆུ་བདུན་ཐལ་ནས་ཀྱང་། །མཇུག་ཏུ་རླུང་གིས་འཇིག་པ་ཡིན། །ཞེས་གསུངས་ལ་ལུགས་འདིར་མེ་བདུན་དང་ཆུ་བདུན་ཀྱང་རིམ་བཞིན་དུས་གཅིག་ཏུ་བྱུང་བར་འཆད་པ་ཡིན་ནོ། །ལྷ་རྒན་པོ་དག་གིས་སྔོན་ཡང་བྱུང་ཞེས་སྒྲོག་ཅེས་པ་ནི་མཛོད་སོགས་ལྟར་ན་གོང་མའི་ལྷ་རེ་རེའི་ཚེ་ལ་འཇིག་པ་དུ་མ་བྱུང་བས་ཉམས་སུ་མྱོང་བའི་དོན་དུ་འཆད། འདིར་འཇིག་རྟེན་ཆགས་འཇིག་གི་རྒྱུས་ཤེས་པ་དག་གིས་གཏམ་སྨྲ་བ་ཙམ་ལས་སྔར་མཐོང་བར་མི་འཆད་དོ། །ཞེས་སོགས་གསུངས་པ་ལྟར་ཤེས་པར་བྱ་ལ། དེ་ཡང་དང་པོར་སྣོད་སྟོང་པ་འདིར་ཉི་མ་ཤིན་ཏུ་ཚ་བ་གཅིག་གིས་ཏེ་གཅིག་ཡང་ཡང་ཤར་བས་རྩྭ་དང་ཤིང་དང་ནགས་ཚལ་ཐམས་ཅད་སྲེག དེ་ནས་ཡུན་རིང་ཞིག་ན་ཉི་མ་གཉིས་ཀྱིས་ཏེ་གཉིས་ཤར་བས་ལྟེང་{ལྡེང} ཀ་དང་ཆུ་ཀླུང་ཆུང་ངུ་མ་ལུས་པ་རིམ་པར་སྐེམ། དེ་བཞིན་དུ་ཉི་མ་གསུམ་གྱིས་ཆུ་ཀླུང་ཆེན་པོ་ཐམས་ཅད་སྐེམ། བཞི་ཡིས་མ་དྲོས་པའི་མཚོ་ཆེན་པོ་ཡང་སྐེམ་པ་སྟེ། ལྔ་ཡིས་མཐའི་རྒྱ་མཚོ་དཔག་ཚད་བརྒྱར་སྐེམས་ཤིང་དེ་ནས་རིམ་གྱིས་ཉིས་བརྒྱ་ནས་བརྒྱད་ཁྲིའི་བར་དང་མཐར་བ་ལང་གི་རྨིག་རྗེས་ཙམ་ནས་ཆུ་ཐིགས་པ་གཅིག་ཀྱང་མེད་པར་སྐེམ་པར་བྱེད་ཅིང་། དྲུག་གིས་ས་ཆེན་པོ་གངས་རི་དང་བཅས་པའང་སྲེག མཐར་བདུན་གྱིས་ཏེ་ཉི་མ་བདུན་ཤར་བས་རི་གླིང་གསེར་གྱི་ས་གཞིའི་བར་ཐམས་ཅད་ལྷག་མ་མེད་པར་སྲེག་པ་ཡིན་ནོ། །སླར་ཡང་ཐུར་དུ་འབར་བའི་མེ་དེས་དམྱལ་བའི་གཞི་ཐམས་ཅད་དུ་ཁྱབ་པས་དེ་ཡང་སྲེག་ཅིང་འབར་བ་ན། མེ་དེ་གྱེན་དུ་རླུང་གིས་རབ་ཏུ་བསྐྱོད་པ་ཡིས། བསམ་གཏན་དང་པོའི་གནས་ཚངས་པའི་གཞལ་མེད་ཁང་སྟོང་པ་རྣམས་བསྲེགས་པ་ན། འོད་གསལ་གྱི་ལྷ་ཡི་བུ་ཆུང་ངུ་རྣམས་མེ་ལ་དངངས་ཤིང་སྐྲག་པ་དང་། རྒན་པོ་དག་གིས་སྔོན་ཡང་འདི་འདྲ་བ་བྱུང་ཞེས་སྒྲོག་པ་ཐོས་པས་མ་འཇིགས་ཞེས་སྨྲ་བར་བྱེད་ལ་དེ་ལྟར་མེ་ཡིས་ལན་བདུན་བསྲེགས་པའི་རྗེས་སུ། བསམ་གཏན་གཉིས་པ་དང་གསུམ་པའི་ལྷ་རྣམས་ཀྱིས་ཀྱང་ཆོས་ཉིད་ཀྱིས་གོང་མའི་སེམས་གྲུབ་ནས་དགེ་རྒྱས་སོགས་སུ་གོང་བཞིན་སྐྱེ་བར་འགྱུར་ལ། དེ་ནས་ནམ་མཁའ་ལས་ཆར་ལན་བདུན་བབས་པས་སྟོང་གསུམ་ཁྱབ་པ་ལས། བསམ་གཏན་གཉིས་པ་མན་ཆད་ལན་ཚྭ་ཆུར་ཞུ་བར་ལྟར་ཞིག་པར་འགྱུར་ཞིང་། སྔར་མས་བསྲེགས་པའི་ཐལ་བ་ཆུ་དང་འདྲེས་པར་གནས་སོ། །དེ་ནས་སྔར་གྱི་ཆུས་སྦྱངས་པའི་སྐྱོ་མ་དེ་དགས་རླུང་གིས་ཕྱོགས་བཅུར་གཏོར་བ་ཡིས་བསམ་གཏན་གསུམ་པ་མན་ཆད་ཞིག་པར་འགྱུར་ཏེ། རྡུལ་ཕྲན་ཆ་མེད་དུ་བག་ལ་ཞ་ནས་མཁའ་དབྱིངས་གཅིག་ཏུ་འཁྱིལ་ནས་ཅི་ཡང་བལྟར་མེད་པའི་རང་བཞིན་སྟོང་པ་གཅིག་ཏུ་གནས་སོ། །གཉིས་པ། དེ་ལྟར་འཇིག་མི་འཇིག་གི་རྒྱུ་མཚན་ཡང་བསམ་གཏན་གསུམ་པོ་ན་རིམ་པ་བཞིན་དུ། བསམ་གཏན་དང་པོ་མན་ཆོད་དུ་རྟོག་དཔྱོད་མེ་འདྲ་བ་དང་། གཉིས་པར་བསམ་གཏན་གྱི་དགའ་བདེ་ཆུ་དང་འདྲ་བ་དང་། གསུམ་པ་ན་དབུགས་ཀྱིི་འབྱུང་རྔུབ་གཡོ་འགུལ་རླུང་དང་འདྲ་བ་སྟེ་སྐྱོན་གསུམ་དང་མཚུངས་པར་ལྡན་པས་རིམ་པར་འབྱུང་བ་མེ་ཆུ་རླུང་གསུམ་གྱིས་འཇིག་པར་བྱེད་པ་ཡིན་ནོ། །དེས་ན་རྣལ་འབྱོར་པ་ལ་ཡང་བསམ་གཏན་དེ་དང་འདྲ་བར་འབྱུང་བས་གནོད་མི་གནོད་མི་གནོད་ཀྱང་ཤེས་ལ། དེ་ཡང་སེམས་སེམས་བྱུང་གི་རྟོག་པ་མ་འགགས་པར་འགྱུ་བ་རང་ས་ན་གནས་ཏེ་ཚོར་བ་དགའ་མི་དགའ་དང་རླུང་འགྱུ་བ་མ་དག་གཞིན་སངས་རྒྱས་ཀྱི་དགོངས་པའི་ངང་ལ་གནས་པར་འདོད་པ་ནི། འཇིག་རྟེན་པའི་བསམ་གཏན་ཡང་མ་གྲུབ་ན། འཇིག་རྟེན་ལས་འདས་པ་འགྲུབ་རེ་སྐན། དེས་ན་བསམ་གཏན་ཐོབ་པས་བྱུང་ཚོར་གྱི་འདུ་ཤེས་པས་སེམས་སེམས་བྱུང་གི་འཇུག་པ་བཞི་དགོས་པའི་གནད་འདི་ལ་ཐུག་པ་ཡིན་ནོ། །བསམ་གཏན་བཞི་པ་ན་སྐྱོན་དེ་གསུམ་མེད་པས་འབྱུང་བ་གཞན་གྱིས་མི་འཇིག་ཀྱང་། རང་རང་གི་ལས་ཀྱིས་གནས་རིས་དེ་ནས་གཞན་དུ་འཆི་འཕོ་བར་སྣང་བས་རྟག་པ་མིན་ནོ། །འབྱུང་བ་གཞན་གཉིས་ཀྱིས་མི་འཇིག་པ་ཅི་སྙམ་ན། ནམ་མཁའ་ནི་གོ་འབྱེད་པའི་ཆ་ཙམ་ལས་འཇིག་བྱེད་དུ་ཡེ་ནས་མེད་ལ། ས་ཡིས་མི་འཇིག་སྟེ་གཞིག་བྱའི་ཡུལ་ལམ་སྣོད་ཀྱི་རང་བཞིན་དུ་སྐྱེས་ཀྱི་འཇིག་བྱེད་དུ་མ་སྐྱེས་པའི་ཕྱིར་ནའོ། །དེ་ཡང་བསམ་གཏན་གྱི་གནས་གང་འཇིག་ཀྱང་མ་འཇིག་པའི་སྔོན་དུ་དེ་ཡི་ལྷ་རྣམས་ནི་གོང་མར་སྐྱེ་བ་ཆོས་ཉིད་ཀྱིས་ལགས་པར་ཏེ་ཡིན་པར་གསུངས་པ་ནི། ལུང་ལས། དགེ་སློང་དག་འདི་ལྟ་སྟེ་དཔེར་ན་བསམ་གཏན་གྱི་གནས་དག་འཇིག་པའི་སྔོན་རོལ་དུ་ལྷ་དེ་དག་དགེ་རྒྱས་དང་འབྲས་བུ་ཆ ེ་བའི་བར་དུ་འཕོ་བ་ལྟར། དགེ་བ་བཅུ་ལེགས་པར་སྤྱོད་པ་དག་གི་ལུས་བོར་ཏེ་རྣམ་པར་ཤེས་པ་སུམ་ཅུ་རྩ་གསུམ་གྱི་ལྷ་རྣམས་ཀྱི་ནང་དུ་སྐྱེ་བ་ཡིན་ནོ། །ཞེས་སོ། །གསུམ་པ་ཡུན། དེ་ལྟར་འཇིག་པའི་མགོ་བརྩམས་ནས། མཐར་ཞིག་པར་གྱུར་པ་ཡི་བར་དུ་བར་བསྐལ་ཉི་ཤུ་ཡོད་པའོ། །གཉིས་པ་སྟོང་བསྐལ་ཞར་བྱུང་བཅས་པ་ནི། དེ་ལྟར་ཞིག་ནས་སྟོངས་ཏེ་ནམ་མཁའ་གཅིག་གི་ངང་དུ་གནས་པ་ནི་འདུས་བྱས་འདུས་མ་བྱས་ཀྱི་དབྱིངས་སུ་གནས་པ་སྟེ། གཟུགས་སྐུ་ཆོས་སྐུའི་དབྱིངས་སུ་ཞི་བའི་མཚོན་བྱེད་དུ་བྱུང་བའོ། །སྟོང་པའི་ཚད་ནི་བར་བསྐལ་ཉི་ཤུའི་ཡུན་དང་མཉམ་པ་ཡིན་ལ་དེ་ནས་སླར་ཡང་འཇིག་རྟེན་གྱི་ཁམས་གཅིག་གསར་དུ་ཆགས་པའི་མགོ་རྩོམ་མོ་སྟེ་རྩོམ་པར་བྱེད་དོ། །གཉིས་པ་ཐར་པར་བསྐུལ་བ་ནི། དེ་ལྟར་ཕུན་སུམ་ཚོགས་པའི་བཀོད་པ་ཐ་དད་པར་སྣང་བའི་འཇིག་རྟེན་འདི་ཡང་མི་བརྟན་པར་ཞིག་ནས་མེད་པར་འགྱུར་བའི་སྐབས་ཡོད་ན། རང་གི་ཚེ་ལ་ཡིད་བརྟན་མེད་པས་སྲིད་པ་ལ་དགའ་བའི་རང་བཞིན་དེ་སྤོངས་ལ། ཞི་བདེ་གཏན་དུ་ཐར་པའི་མཆོག་རྫོགས་པའི་བྱང་ཆུབ་བསྒྲུབ་པ་ལ་འབད་པར་མཛོད་ཅིག་ཅེས་རྗེས་སུ་གདམས་པའོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། འཇིག་པ་དང་སྟོང་པའི་བསྐལ་པ་བསྟན་པའི་ལེའུ་སྟེ་དྲུག་པའི་འགྲེལ་པའོ།། །། ༈ གཉིས་པ་འཇིག་རྟེན་དེའི་བདེ་སྡུག་སྣང་ཚུལ་ལ། མཚམས་སྦྱོར་བའི་ཚུལ་གྱིས་མདོར་བསྟན། དེ་དག་གི་རང་བཞིན་རྒྱས་པར་བཤད། སྡུག་བསྔལ་གསུམ་བསྟན་ཏེ་བཤད་པའི་མཇུག་བསྡུ་བའོ། །དང་པོ། གོང་དུ་བཤད་པ་དེ་ལྟར་སྣོད་བཅུད་ཀྱི་རང་བཞིན་ཇི་ལྟ་བ་བསྟན་པ་ལས། ད་ནི་དེ་ཡི་བདེ་བ་དང་སྡུག་བསྔལ་དང་བདེ་སྡུག་སྤེལ་མའི་སྣང་ཚུལ་བཤད་པ་ནི། དེ་ཡང་འགྲོ་བ་དྲུག་པོ་རང་རང་གི་ལས་ཀྱིས་བདེ་སྡུག་སོ་སོར་མྱོང་བ་ཡིན་ཏེ། དགེ་བས་བདེ་འགྲོ་ཡི་རྟེན་དང་གཞན་ཡང་བདེ་བ་ཐམས་ཅད་དང་། མི་དགེ་བས་ངན་འགྲོ་དང་སྡུག་བསྔལ་ཐམས་ཅད་བསྐྱེད་དོ། །དགེ་སྡུག་སྤེལ་མས་ནི་བདེ་སྡུག་འདྲེས་མར་མྱོང་བ་སྟེ། དེ་ནི་ལུས་ཚུལ་སྣ་ཚོགས་པའི་དབང་གིས་ད་ལྟའི་སེམས་ཅན་གྱི་བདེ་སྡུག་སྣ་ཚོགས་པ་མངོན་དུ་སྣང་བ་ཡིན་ནོ། །གཉིས་པ་ལ་ཁམས་གོང་མའི་རང་བཞིན་དང་། འདོད་པའི་རང་བཞིན་གཉིས། དང་པོ་ལ། བདེ་བ་ཡོད་ཚུལ་དང་། སྡུག་བསྔལ་ལས་མ་འདས་ཚུལ་གཉིས། དང་པོ། འདི་ལྟར་བསམ་གཏན་བཞི་དང་གཟུགས་མེད་པ་བཞིའི་ཁམས་ན་ཡང་། རྒྱུ་བསམ་གཏན་དང་དགེ་བས་བསྐྱེད་པའི་འབྲས་བུ་བསམ་གཏན་གྱི་ཞི་བའི་བདེ་བ་དང་། ཚེ་རིང་པོ་བསྐལ་པར་གནས་པ་དེ་ལྟ་བུ་ཡོད་ཀྱང་ཞེས་སོ། །གཉིས་པ། འོན་ཀྱང་འདུ་བྱེད་ཟག་བཅས་འཁོར་བའི་ཆོས་ཡིན་པའི་ཕྱིར་རྟག་པ་མེད་དེ། སྔོན་གྱི་མི་དགེའི་ལས་ཀྱི་དབང་གིས་གནས་རིས་དེ་ནས་ཚེ་འཕོ་བའི་སེམས་མངོན་དུ་གྱུར་པའི་ཚེ། ཕྱི་མའི་གནས་རིས་མངོན་ཤེས་ཀྱིས་མཐོང་ནས་དེ་ལ་སེམས་སྐྲག་པའི་སྡུག་བསྔལ་དང་ལྡན་པ་ཡིན་ནོ། །གཉིས་པ་འདོད་ཁམས་ལ་བསྟན་བཤད་གཉིས། དང་པོ། འདོད་པའི་ཁམས་ནའང་ལས་སྣ་ཚོགས་པའི་དབང་གིས་བདེ་བ་དང་སྡུག་བསྔལ་སྣ་ཚོགས་པ་དང་ལྡན་པ་ཡིན་ཏེ། ཞེས་སོ། །གཉིས་པ་ལ་ངན་འགྲོ་དང་། བདེ་འགྲོ་གཉིས། དང་པོ་ལ། སྡུག་བསྔལ་དང་། བདེ་བ་ཡོད་ཚུལ་གཉིས། དང་པོ། སེམས་ཅན་དམྱལ་བ་དང་ཡི་དྭགས་དང་དུད་འགྲོའི་འཇིག་རྟེན་ན། སྔོན་རང་རང་གི་མི་དགེས་བསྐྱེད་པའི་འབྲས་བུ་སྡུག་བསྔལ་བ་ནི། རིམ་པར་ཚ་གྲང་དང་བཀྲེས་སྐོམ་དང་གསོད་གཅོད་བརྡེག་འཚོག་སོགས་བཟོད་པར་དཀའ་བ་རང་རང་གི་ལས་མ་རྫོགས་པར་ཡུན་རིང་དུ་མྱོང་བར་འགྱུར་བའོ། །གཉིས་པ་ནི། གནས་རིས་དེ་རྣམས་སུ་ཡང་རང་རང་གི་སྔོན་གྱི་དགེ་བས་བསྐྱེད་པའི་བདེ་བའི་འབྲས་བུ་ནི། ཡི་དྭགས་ན་ཡང་ཟས་སོགས་རྙེད་པ་དང་། དམྱལ་བ་སོགས་སམ་ནད་ཀྱིས་ཉེན་པ་ན་བར་སྐབས་ཅུང་ཟད་བདེ་བ་དང་། ཉི་ཚེ་བ་དང་ཀླུ་སོགས་ཀྱང་ཉིན་མཚན་དང་སྔ་དྲོ་ཕྱི་དྲོ་སོགས་འགྱུར་ཏེ་བདེ་བར་སྣང་བ་དང་བར་འགའ་སྡུག་བསྔལ་ཆུང་བ་དང་། རྒྱལ་བ་དང་དེའི་སྲས་བྱང་ཆུབ་སེམས་དཔའ་རྣམས་ཀྱི་རྫུ་འཕྲུལ་གྱི་འོད་བཀྱེ་བས་སྡུག་བསྔལ་ཞི་བར་འགྱུར་བ་གང་ཡིན་པ་དེ་ཡང་། རྐྱེན་སངས་རྒྱས་ཀྱི་འོད་ཡིན་ཡང་རྒྱུ་དེའི་བདེ་བ་བསྐྱེད་པའི་རང་གི་ལས་ཀྱི་འབྲས་བུ་སྟེ། འདི་ལྟར་བདེ་སྡུག་གཉིས་དུས་གཅིག་ལ་ཕན་ཚུལ་སྤེལ་མར་སྣང་བ་ནི་རང་རང་གི་ལས་ལས་གྱུར་པ་ཡིན་ནོ། །གཉིས་པ་བདེ་འགྲོ་ལ། མི་དང་། ལྷ་མིན། ལྷ་གསུམ། དང་པོ་ལ། བདེ་བ་དང་། སྡུག་བསྔལ་གཉིས། དང་པོ། འདི་ལྟར་མི་ཡི་འགྲོ་བ་རྣམས་ལ་ཡང་གནས་དང་ལོངས་སྤྱོད་དང་འཁོར་དང་གྲགས་པ་དང་འབྱོར་བ་དང་ཚེ་རིང་བ་དང་ནད་མེད་པ་སོགས་བདེ་བའི་ཆར་སྣང་བ་རྣམས་ནི་དགེ་འབྲས་རྣམ་པ་སྣ་ཚོགས་སུ་སྣང་བའོ། །གཉིས་པ། རྟེན་དེ་ལ་སྡུག་བསྔལ་ཡང་ནི་སྐྱེ་བ་དང་རྒ་བ་དང་ན་བ་འཆི་བ་དང་། བཤེས་བྱམས་པ་དང་བྲལ་བ་དང་དགྲ་སྡང་བ་དང་འཕྲད་ཅིང་མི་འདོད་པ་ཐོག་ཏུ་བབ་པ་དང་། གཉེན་ཤི་བ་སོགས་ཀྱིས་སྡུག་བསྔལ་བ་དང་འབྱོར་པ་རྒུད་ཅིང་བྲེལ་ཞིང་ཕོངས་པས་ཉེན་པ་དང་། གཞན་གྱིས་མི་བསྔགས་པ་སྟེ་གཏམ་ངན་བརྗོད་པ་དང་ཚ་གྲང་དང་བཀྲེས་སྐོམ་ལ་སོགས་པ་སྣ་ཚོགས་མང་པོ་དང་ལྡན་པའི་སྡུག་བསྔལ་བཟོད་པར་དཀའ་བ་རྣམས་དང་ལྡན་ཏེ། དེ་ཀུན་ཀྱང་རང་གི་འཁྲུལ་པའི་སྣང་བ་སྟེ་རྒྱུ་ལས་དང་ཉོན་མོངས་པ་ལས་གྱུར་པའོ། །གཉིས་པ་ལྷ་མིན་ལ། སྡུག་བསྔལ་དང་། བདེ་བ་གཉིས། དང་པོ། ལྷ་མིན་རྣམས་ལའང་རང་བཞིན་གྱིས་ཕྲག་དོག་ཆེ་བས་ལྷ་ཡི་དཔལ་ལ་སྡང་བའི་ཕྱིར་རྒྱུད་འཁྲུགས་པ་དང་ཡིད་མི་བདེ་བ་དང་། ལྷ་མ་ཡིན་ཕན་ཚུན་གཅིག་གིས་གཅིག་གི་བདེ་བ་ལ་མི་བཟོད་པས་འཚེ་ཞིང་རྒྱུད་མ་དུལ་བས་མི་བསྲུན་པའི་རང་བཞིན་རྩུབ་པ་སྟེ་དེ་སོགས་སྡུག་བསྔལ་མང་པོ་དང་ལྡན་པ་ཡིན་ནོ། །གཉིས་པ། དགེ་འབྲས་ཀྱིས་མེ་ཏོག་གི་ཕྲེང་བ་ནོར་བུའི་དྲྭ་བས་བཅིངས་ཤིང་བརྒྱུས་པ་སོགས་ལོངས་སྤྱོད་སྣ་ཚོགས་པས་འབྱོར་བའི་སྐྱེད་མོས་ཚལ་དང་། བདུད་རྩིའི་ཁ་ཟས་དང་། ཁང་བརྩེགས་དང་། རྟ་གླང་བཞོན་པ་སོགས་བདེ་མང་ཡུན་རིང་སྤྱད་ཀྱང་དེས་ངོམས་པར་གྱུར་པ་ནི་མེད་དོ། །གསུམ་པ་ལྷ་ལ། སྤྱི་དང་། བྱེ་བྲག་གཉིས། དང་པོ་ལ། བདེ་བ། སྡུག་བསྔལ་གཉིས། དང་པོ། སྡུག་བསྔལ་གཉིས། དང་པོ། གཞན་འཕྲུལ་དབང་བྱེད་ལ་སོགས་པའི་འདོད་ལྷ་དྲུག་གི་གནས་ན་ཡང་། གོང་དུ་སྨོས་པ་ལྟར་དགེ་འབྲས་བདེ་བ་མང་ཞིང་ལྷ་ཡི་འབྱོར་པས་ཉམས་དགའ་བར་གྱུར་ཡང་ཞེས་སོ། །གཉིས་པ། དེའི་ལས་ཟད་པ་ན་རྨི་ལམ་སད་པ་བཞིན་དུ་དེ་དག་སྤངས་ནས་སྐྱབས་མེད་པར་འཇིག་རྟེན་གཞན་དུ་འགྲོ་དགོས་ལ། དེའི་ཚེ་འཆི་འཕོ་དང་ལྟུང་བའི་སྡུག་བསྔལ་ནི་དཔག་ཏུ་མེད་པ་དང་ལྡན་ནོ། །གཉིས་པ་བྱེ་བྲག་ལ། བདེ་བ་དང་། སྡུག་བསྔལ་གཉིས་ལས། དང་པོ། ཁྱད་པར་དུ་རི་རབ་ཀྱི་རྩེར་གནས་པའི་ལྷ་རྣམས་ཀྱིས་དགེ་བའི་ལས་མཐུན་པར་བསགས་པས་བསྐྱེད་པའི་འབྱོར་པ་དང་བདེ་བ་རབ་ཏུ་མང་པོ་དང་ལྡན་ཏེ། དེ་ཡང་གྲོང་དང་སྐྱེད་ཚལ་དང་རྡོ་ལེབ་དང་ཤིང་ཆེནདང་། དབང་པོའི་བཙུན་མོ་འཁོར་དུ་མས་བསྐོར་བ་དང་། དབང་པོའི་བུ་སྟོང་ཤིན་ཏུ་དཔའ་བ་དང་། མེ་ཏོག་གིས་མགོར་བརྒྱན་པའི་ལྷ་མོ་རྣམས་ཀྱིས་གང་བ། བྱ་བ་ཅི་ཡང་ཤེས་པའི་ཅང་ཤེས་མཐོན་ཀ་སྤྲིན་གྱི་བཞོན་པ་བསྐྱོད་པ་དང་འདྲ་བས་སྤྲིན་གྱི་ཤུགས་འཆང་སྟེ་རྟ་ཡི་མཆོག་དང་། རབ་ཏུ་བརྟན་པའི་གླང་པོ་ཆེ་ས་སྲུང་གི་བུ་མཛེས་པ་ཉིད་ཀྱི་མགོ་བོ་སུམ་ཅུ་རྩ་གསུམ་གྱི་སྟེང་ཉེ་དབང་དབང་པོ་དང་བཅས་པ་རོལ་ཞིང་། རྩེ་དགའི་དུས་སྟོན་ཉིན་མཚན་ཕྱེད་པ་དེ་བར་མེད་དུ་སྤྱོད་པར་བྱེད་དོ། །གཉིས་པ་ལ། སྡུག་བསྔལ་སྤྱིར་བསྟན་པ་དང་། འཐབ་རྩོད་ཀྱི་སྡུག་བསྔལ་བྱེ་བྲག་ཏུ་བཤད་པ་གཉིས། དང་པོ། དེ་ན་སྡུག་བསྔལ་ཡང་ནི་འཆི་འཕོ་ལྟུང་བ་དང་། ལྷ་མིན་རྣམས་དང་འཐབ་རྩོད་ཀྱིས་གཡུལ་འགྱེད་པར་བྱེད་དོ། །གཉིས་པ། དེ་ལྟར་རྩོད་པའི་རྒྱུ་ནི་གསུམ་སྟེ་འཛམ་བུ་གླིང་པས་ལས་དགེ་སྡིག་སྟོབས་ཆེན་པོ་བས གས་པ་དང་ནི། དཔག་བསམ་གྱི་ཤིང་རྩ་བ་ལྷ་མིན་གྱི་གནས་སུ་ཡོད་པས་དེའི་ཕྱིར་རྩོད་པ་དང་། ལྷ་རྣམས་ལྷ་མིན་གྱི་བུ་མོ་ལ་ལྟད་མོ་ལྟ་བ་ལས་དེ་དག་ཕྲག་དོག་པར་གྱུར་ནས་རྩོད་པའོ། །དེ་ལྟར་རྒྱུ་ཚོགས་པའི་ཚེ། དགའ་བོ་དང་ཉེར་དགའ་ལ་སོགས་པའི་དཀར་ཕྱོགས་ཀྱི་ཀླུ་དག་དང་དེ་བཞིན་དུ་ཧུ་ལུ་དང་ཧུ་ལུ་ཀ་ཆེན་པོ་སོགས་ནག་པོ་ཡི་ཀླུ་རྣམས་འཐབ་པ་དང་དེའི་རྗེས་སུ་བར་སྣང་གི་ལྷ་བྲན་རྣམས་དཀར་ནག་སོ་སོའི་ཕྱོགས་བཟུང་ནས་དང་པོར་འཁྲུགས་པ་སྟེ། དེ་དག་རང་རང་གི་ཕྱོགས་སམ་སྲིད་དང་སྡེ་རིས་དང་བཅས་རྩོད་ཅིང་དམག་འགྱེད་པར་བྱེད་པ་ཡིན་ཏེ། དང་པོར་དཀར་ཕྱོགས་ཀྱི་ཀླུ་མཆོག་བརྒྱད་དང་ནག་པོ་ཡི་ཀླུ་རྣམས་གཡུལ་འགྱེད་པ་ན་བར་སྣང་གི་ལྷས་ཀླུའི་དམག་གི་རྒྱབ་དཔུང་གནོན་པར་བྱེད་དོ། །དེའི་ཚེ་ལྷ་མིན་གྱི་སྒྲ་གཅན་འཁྲུགས་ཏེ་རྩོད་པ་ལས་ལྷ་རྣམས་ཕམ་པར་གྱུར་པ་དེ་ཡི་ཚེ་ཀླུ་དང་བར་སྣང་གི་ལྷས་སྦྲན་པས་རྒྱལ་ཆེན་རིས་བཞིའི་ལྷ་མཆོག་རྣམས་ལྷགས་ཏེ་ལྷ་མིན་ཕམ་པ་ན། དཀར་འཕྲེང་གནས་ནས་དང་འགུལ་འཕྲེང་གི་ལྷ་མིན་རྣམས་ཀྱིས་འཁྲུགས་པ་འགྱེད་པ་ལས། ལྷ་མིན་ཕམ་པར་གྱུར་པའི་ཚེ་ཐགས་བཟང་རིས་སྦྲན་པས། དེ་ཁྲོས་ནས་རྐང་པ་ས་ལ་བསྡབས་པའམ་བསྐྱོད་པ་ཡིས། རི་རབ་ཀྱང་འགུལ་བའི་ཚེ་དེའི་ལྟས་སུ་རིག་ནས། དབང་པོ་བརྒྱ་བྱིན་ཉེ་དབང་གི་འཁོར་དང་བཅས་པ་རྩུབ་འགྱུར་གྱི་ཚལ་དུ་སོང་སྟེ་གོ་ཆ་སྲ་བ་དག་རབ་ཏུ་བགོས་ཤིང་མཚོན་བླངས་ཏེ། གཡུལ་གྱི་གླང་པོ་ཆེ་རབ་བརྟན་གྱི་བཞོན་པ་དང་ལྷ་ཡི་དཔུང་དང་བཅས་རི་རབ་ཀྱི་ཆུ་མཚམས་ལ་ཐུག་པར་བསུ་བའི་ཚུལ་ལས། ལྷ་མིན་དང་གཡུལ་འགྱེད་པའི་ཚེ་ན་ཕན་ཚུན་དུ་རི་རབ་འཕེན་ཞིང་སྒྲ་གཅན་གྱི་མིག་གིས་མི་བཟོད་པས་ཉི་ཟླ་ལག་པས་འཛིན་ཅིང་བསྒྲིབས་སོ། །དེའི་ཚེ་ལྷ་རྣམས་ལྷ་མིན་ལས་གྱེན་དུ་མི་འགྲེང་བདུན་ཙམ་དུ་འཕགས་པ་ནི་རབ་དཀར་བསོད་ནམས་ཀྱི་སྟོབས་ལས་གྱུར་པ་ཡིན་ནོ། །དེ་ལྟར་འཐབ་པས་ལྷ་མིན་གྱི་དཔུང་རྣམས་རྒྱལ་ན་གྱེན་དུ་བདས་ཏེ་རི་རབ་ཀྱི་རྩེར་སོན་ཞིང་ལྷ་རྣམས་ཀྱི་གྲོང་ཁྱེར་ལྟ་ན་སྡུག་གི་སྒོ་འཕར་ཞག་བདུན་དུ་གཅོད་ནས་འདུག་གོ །ལྷ་མིན་རྣམས་ཕམ་པར་གྱུར་ན་ལྷ་ཡི་དཔུང་གིས་ཕྱིར་བདས་དེ་གསེེར་གྱི་ས་གཞིའི་སྟེང་གི་ལྷ་མིན་གྱི་གྲོང་ཁྱེར་གསེར་ལྡན་གྱི་སྒོ་འཕར་ཞག་བདུན་དུ་བཅད་དེ་གནས་པ་ཡིན་ནོ། །དེ་ལྟར་ཞག་བདུན་པ་སོང་བ་ན་ན མ་མཁའ་ནས་གང་ཕམ་པ་དེ་ཉིད་རྒྱལ་བ་གྱུར་ཅིག གང་རྒྱལ་བ་དེ་ཕམ་པར་གྱུར་ཅིག ཟེར་བའི་སྒྲ་གྲགས་པའི་རྐྱེན་གྱིས་དམག་རྣམས་སོ་སོའི་གནས་སུ་གྱེས་ཏེ་རང་རང་བདེ་བར་འཁོད་པ་ཡིན་ནོ། །དེ་ལྟར་ལྷ་དང་ལྷ་མིན་གཉིས་པོ་ཕན་ཚུན་རྩོད་པ་ལས་བྱུང་བའི་སྡུག་བསྔལ་མང་པོ་དང་ལྡན་ཏེ་སྡར་མ་རྣམས་འབྲོས་པའམ་བྱེར་ཞིང་། སྒྲ་གཅན་མཐོང་བ་སོགས་ཀྱིས་བརྒྱལ་བར་གྱུར་པ་སོགས་སྙིང་གས་སྙམ་བྱེད་པའི་མྱ་ངན་དང་མཚོན་གྱིས་རྨས་པ་སོགས་ཀྱི་སྡུག་བསྔལ་ཆེན་པོ་སྐྱེ་བ་ཡིན་ནོ། །གསུམ་པ་མཇུག་བསྡུ་བ་ནི། སྔར་སྨོས་པ་དེ་དང་འདྲ་བའི་འཁོར་བ་ནི་བཟོད་པར་དཀའ་བ་སྡུག་བསྔལ་ཆེ་བས་མེ་ཡི་འོབས་དང་འདྲ་བ་དེ་ལས། བློ་དང་ལྡན་པ་རྣམས་ཀྱིས་ངེས་པར་ཐར་པ་བྱང་ཆུབ་བསྒྲུབ་པ་ལ་བརྩོན་པར་བྱ་དགོས་སོ། །ཅིའི་ཕྱིར་ན། འཁོར་བའི་གནས་འདི་ན་ཡིད་བརྟན་དུ་རུང་བ་འགའ་ཡང་མེད་དེ། གནས་སྐབས་སུ་བདེ་བར་སྣང་ཡང་འགྱུར་བའི་སྡུག་བསྔལ་གྱི་རང་བཞིན་ཉིད་ཡིན་ལ། གཏན་དུ་འདུ་བྱེད་ཀྱི་སྡུག་བསྔལ་ཡོད་པས་གཅིག་ནས་གཅིག་ཏུ་འཁོར་བ་ཟོ་ཆུན་གྱི་འཁྱུད་མོ་དང་འདྲ་སྟེ། དེ་ལྟར་སྡུག་བསྔལ་གསུམ་ལས་མ་འདས་པ་དེ་ཡི་ཕྱིར་འཁོར་བ་དེ་ལས་ཐར་བའི་ཕྱིར་བརྩོན་པ་བསྐྱེད་འཚལ་ལོ། །ཐེག་པ་ཆེན་པོའི་མན་ངན་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། སྣོད་བཅུད་ཀྱི་བདེ་སྡུག་བསྟན་པའི་ལེའུ་སྟེ་བདུན་པའི་འགྲེལ་པའོ།། །། ༈ རྡོ་རྗེའི་གནས་གཉིས་པ་མྱང་འདས་ཀྱི་རང་བཞིན་བླང་བྱར་བསྟན་པ་ལ། སྦྱོང་བྱེད་ལམ་བཤད་པ་དང་། སྦྱངས་པའི་འབྲས་བུ་བཤད་པ་གཉིས། དང་པོ་ལ། ལམ་དངོས་དང་། ལམ་དེ་ཇི་ལྟར་བགྲོད་པའི་ཚུལ་གཉིས། དང་པོ་ལ། ཐོས་པ་དང་། བསམ་པ་དང། སྒོམ་པ་གསུམ། དང་པོ། གང་ལས་ཐོས་པར་བྱ་བའི་ཡུལ། ཇི་ལྟར་ཐོས་པར་བྱ་བའི་ཚུལ། ཐོས་པ་དངོས་ཀྱི་དོན་གཏན་ལ་དབབ་པ་གསུམ། དང་པོ་ལ། མཐུན་ཕྱོགས་དགེ་བའི་བཤེས་གཉེན་བསྟེན་པར་གདམས་པ་དང་། མི་མཐུན་ཕྱོགས་སྡིག་གྲོགས་སྤང་བར་གདམས་པ་གཉིས། དང་པོ་ལ། མཚམས་སྦྱར་ཏེ་མདོར་བསྟན་པ་དང་། དེ་རྒྱས་བཤད་གཉིས། དང་པོ། འཁོར་བའི་རང་བཞིན་སྤང་བྱར་ཤེས་པའི་རྗེས་དེ་ནས་ཐར་དཀའ་གཏིང་ཟབ་གནོད་པ་དུ་མའི་གནས་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་དེ་ལས་བརྒལ་བར་བྱ་བའི་ཕྱིར། ཡང་དག་ལམ་གྱི་ས་མཁན་དེད་དཔོན་མཚུངས་མེད་དཔལ་ལྡན་བླ་མ་ཉིད་བསྟེན་པར་བྱའོ། །གཉིས་པ་ལ། བསྟེན་བྱ་དགེ་བའི་བཤེས་གཉེན་གྱི་མཚན་ཉིད། བསྟེན་དགོས་པའི་རྒྱུ་མཚན། ཇི་ལྟར་བསྟེན་ཚུལ་གསུམ། དང་པོ་ལ། བཤེས་གཉེན་གྱི་མཚན་ཉིད་བདུན་བསྟན་པ་དང་། དེ་ལས་ཅི་རིགས་བསྟེན་རུང་བར་བསྟན་པ་གཉིས། དང་པོ་ལ། ཡིད་བཞིན་མཆོག་གི་བླ་མ་ནས་བརྩམས་ཏེ་བདུན་པོ་རིམ་པས། མཚན་ཉིད་དང་པོ། དེ་ཡང་ཚེགས་ཆུང་ངུས་དོན་ཆེན་པོ་འགྲུབ་པའི་ཐབས་ལ་མཁས་པ་དང་། གཞན་ལ་ཕན་པའི་ཐུགས་རྗེ་དཔག་ཏུ་མེད་པ་ཡོད་ཅིང་། ཐུབ་གསུངས་མདོ་དང་རྒྱུད་སྡེ་མང་དུ་ཐོས་པའི་ཡིད་བཞིན་ནོར་བུའི་མཛོད་ཁང་མངའ་བ་འགྲོ་བའི་ཁ་ལོ་གྱེན་དུ་འདྲེན་པའི་ཕྲིན་ལས་ཅན། སྐུ་གསུང་ཐུགས་ལ་ཉེས་པའི་སྐྱོན་ཀུན་དང་བྲལ་ཞིང་ཡོན་ཏན་མཐའ་དག་རྫོགས་པའི་བླ་མ་ནི་ཡིད་བཞིན་མཆོག་གི་བླ་མ་ཞེས་བྱ་སྟེ་བི་མ་དང་བཻ་རོ་ལྟ་བུ་ཡིན་ཏེ། དེ་ནི་སྙིགས་མའི་དུས་སུ་སངས་རྒྱས་དངོས་སུ་བྱོན་པ་དང་མཚུངས་པས་རབ་ཏུ་དྭངས་པའི་སྲི་ཞུ་དང་གུས་པའི་སྒོ་ནས་སྤྱི་བོས་བསྟེན་པར་བྱའོ། །མཚན་ཉིད་གཉིས་པ། རང་བཞིན་ཡོན་ཏན་རྫོགས་པའི་བླ་མ་ནི་ཤིང་རྟ་ཆེན་པོ་ཐོགས་མེད་དང་རྗེ་བཙུན་གྲགས་པ་ལྟ་བུ་སྟེ། དགོངས་འདུས་ལས། རིགས་བཟང་སེམས་དལ་ཁོང་དུལ་དང་། ཞེས་སོགས་ཀྱིས་བསྟན་པ་བཞིན། རིགས་ཀྱི་ཡོན་ཏན་རྒྱལ་རིགས་སོགས་སུ་སྐྱེས་པས་རིགས་བཟང་ཞིང་ངོ་ཚ་ཁྲེལ་ཡོད་དང་ལྡན་པ། སྔོན་ཚོགས་བསགས་པས་དབང་པོ་ཚང་ཞིང་དག་པ། ཐེག་ཆེན་གྱི་རིགས་སུ་སྐྱེས་པས་བྱམས་པ་དང་སྙིང་རྗེ་ཆེ་བ། ཐེག་པ་མཆོག་ལ་མཁས་པས་སྐྱེས་ཐོབ་ཀྱི་ཤེས་རབ་རྒྱ་ཆེ་ཞིང། ཆོས་མང་དུ་ཐོས་པ་དང་གཟུང་འཛིན་ཉོན་མོངས་ཆུང་བས་སྒོ་གསུམ་ངང་གིས་དུལ་ཞིང་བཟོད་པ་ཆེན་པོ་དང་ལྡན་པ། གསོང་བ་སྟེ་རྒྱུད་དྲང་ཞིང་འཇམ་པ་དེས་ལ་སེམས་གྱ་གྱུ་མེད་པ་སྟེ། ཡིད་བཞིན་རིན་པོ་ཆེན་ལྟ་བུ་དེ་ནི་དད་བརྒྱའི་གཙུག་གིས་བསྟེན་པར་བྱའོ། །མཚན་ཉིད་གསུམ་པ། སྲིད་པ་ལས་རྣམ་པར་གྲོལ་བ་མཆོག་རབ་བླ་མ་ནི་རྒྱལ་སྲས་ཞི་བ་ལྷ་དང་འབྲོམ་སྟོན་པ་ཆོས་རྗེ་དཔལ་སྤྲུལ་རིན་པོ་ཆེ་ལྟ་བུ་སྟེ། ཕ་ཡུལ་དང་འབྲེལ་ཐག་ཆོད་པས་རྒྱང་བསྲིང་བ། འཁོར་བར་སྡུག་བསྔལ་ཤེས་པས་མི་ཆོས་རྒྱབ་ཏུ་བོར་བ། ནོར་སྙིང་པོ་མེད་པས་དགོས་མེད་ཀྱི་རང་བཞིན་རྒྱུད་ལ་སྐྱེས་ཏེ་ནོར་རྫས་ལ་ཞེན་པ་ཆུང་བ། རྒྱུ་འབྲས་ལ་ཡིད་ཆེས་པས་དགེ་སྡིིག་བླང་དོར་བྱེད་པ། ཚེ་འདི་སྦུན་པ་ལྟར་བློས་ཐེངས་པས་ཡུན་གྱི་དོན་ཆེན་ཐར་པ་སྒྲུབ་པ་ཐེག་ཆེན་གྱི་དོན་དང་ལྡན་པའི་སྒོ་ནས་འགྲོ་དོན་ཐབས་མཁས་ལ་སྤྱོད་པ་སྟེ་གདུལ་བྱའི་རྒྱུད་བརྟགས་ཤིང་ཆོས་སྟོན་པའི་ངོ་མཚར་ཆེན་པོ་དང་ལྡན་པ་དཔལ་ལྡན་བླ་མ་ཆོས་ཀྱི་རྗེ་དེ་ནི། དུས་རྟག་ཏུ་འབྲལ་བ་མེད་ཅིང་སྐྱོ་ངལ་མེད་པར་བསྟེན་པར་བྱའོ། །མཚན་ཉིད་བཞི་པ། ཤེས་རབ་རྒྱ་ཆེ་བའི་སྐལ་བཟང་བླ་མ་ནི་ཀླུ་སྒྲུབ་དང་རོང་ཟོམ་ཀུན་མཁྱེན་ཆེན་པོ་རང་ཉིད་དང་རྗེ་བླ་མ་མི་ཕམ་ལྟ་བུ་སྟེ། ཕྱི་ནང་གི་རིག་གནས་ཀུན་མཁྱེན་པའི་ཤེས་བྱའི་དཀྱིལ་འཁོར་རྒྱས་ཤིང་། བྱེ་བྲག་ཏུ་ཐོས་བསམ་རྒྱ་ཆེ་བས་གྲུབ་མཐའི་གཞུང་སོ་སོའི་ཚིག་དོན་ལ་མཁས་པ། དེ་ལས་ཀྱང་ཐེག་ཆེན་གྱི་ལྟ་སྤྱོད་ཕུལ་དུ་བྱུང་བ་གཞན་གང་གིས་སྨད་དུ་མེད་པ་ལ་ལུང་རིགས་དང་ལྡན་པར་རམ་དེ་གཉིས་ཀྱི་སྐྱེ་བར་ནས་འདོད་པས་ཆོས་གང་ལ་རང་བཟོ་དང་གཟུ་ལུམ་གཡོ་བག་མེད་པར་གདུལ་བྱའི་བློ་རིགས་བརྟགས་ནས་དེ་དང་མཐུན་པར་ཆོས་སྟོན་ཅིང་། བདུད་དང་གོལ་ས་གཅོད་པ་ལ་མཁས་པས་བྱང་ཆུབ་ཀྱི་ལམ་ལ་འདྲེན་པ་དེ་ནི་དེད་དཔོན་བློ་གྲོས་ཀྱི་མིག་ཅན། རིན་ཆེན་ཐར་གླིང་བགྲོད་པའི་གཉེན་དེ་ནི་གུས་པས་བསྟེན་པར་བྱའོ། །མཚན་ཉིད་ལྔ་པ། རིམ་བརྒྱུད་བྱིན་རླབས་ལྡན་པའི་བླ་མ་ནི་ན་རོ་དང་མི་ལ་ཕྱིས་དུས་འདིར་འཇམ་མགོན་རྣམ་གཉིས་ལྟ་བུ་སྟེ། དགེ་བའི་བཤེས་གཉེན་གོང་མ་མཉེས་བྱས་གྲུབ་ཐོབ་ཀྱི་བརྒྱུད་པ་འཛིན་པ། བླ་མའི་ཐུགས་མཛོད་ལོན་པས་སྙན་བརྒྱུད་གདམས་པ་དང་ལྡན་པ་གོང་མའི་ཕྱག་བཞེས་མཐོང་བས་དོན་གཉིས་ཀྱི་སྒྲུབ་པ་ལ་མཁས་པ། རྟག་ཏུ་སྒྲུབ་ལ་བརྩོན་པས་དངོས་གྲུབ་སྤྲིན་ཚོགས་ལྟར་བརྙེས་པ། གོང་མའི་བྱིན་རླབས་ཞུགས་པས་གཞན་སྣང་བསྒྱུར་ནུས་པ་དང་། སྣ་ཚོགས་ཐབས་མཁས་ཀྱིས་འགྲོ་བ་ཐར་པའི་ལམ་སྣ་འདྲེན་པ། རང་རྒྱུད་ཆོས་དང་འདྲེས་པས་དཀོན་མཆོག་གསུམ་ཚང་བ། རྒྱལ་བའི་བྱིན་གྱིས་བརླབས་པས་མདོ་རྒྱུད་ཀྱི་བཀའ་བབས་པ། གསང་སྔགས་ཀྱི་སྐལ་བ་ཆེ་བས་བཀའ་བབ་ཀྱི་དམ་ཚིག་གཙང་མར་གྱུར་པ། དེ་འདྲའི་མཁས་གྲུབ་འགྲོ་བའི་དཔལ་མགོན་གང་ཡིན་པ་དེ་སྤྱི་བོས་བསྟེན་པར་བྱའོ། །མཚན་ཉིད་དྲུག་པ། ཐུགས་རྗེས་ལམ་སྣ་འདྲེན་པའི་བླ་མ་ནི་ཏེ་ལོ་དང་མར་པ་ལྟ་བུ་སྟེ། བྱང་ཆུབ་ཀྱི་སེམས་འབྱོངས་པས་ཇི་མཛད་རྟག་ཏུ་གཞན་དོན་སྤྱོད་པ། བླ་མའི་བྱིན་རླབས་ཞུགས་པས་གཞན་སྣང་བྱིན་གྱིས་རློབས་ནུས་པ། གནས་ལུགས་ཀྱི་དོན་ལ་སྦྱར་བས་ལྟ་སྒོམ་སྤྱོད་པ་དང་འབྲས་བུའི་ཉམས་མྱོང་གི་དྲོད་རྟགས་དང་ལྡན་པ། རིག་པ་གནད་དུ་ཚུད་པས་ནུས་མཐུ་རབ་ཏུ་ལྡན་ཞིང་གདོན་བགེགས་སོགས་ཀྱི་བར་ཆད་སེལ་བ། རྫུ་འཕྲུལ་དང་ཐབས་ལ་མཁས་པས་ལོག་ལྟ་དབང་དུ་འདུ་བ། གཞན་དོན་ལ་མཁས་པས་ཐར་ལམ་དུ་འགྲོ་བ་འདྲེན་པའི་མཆོག མཚུངས་མེདའཇིག་རྟེན་གྱི་རྒྱན་དུ་གྱུར་པ་དེ་ནི་གུས་པས་བསྟེན་པར་བྱའོ། །མཚན་ཉིད་བདུན་པ། མཐར་ཐུག་སྙིང་པོའི་དོན་སྟོན་པའི་བླ་མ་ནི་ཤྲཱི་སེདྷ་དང་ལྕེ་བཙུན་སེང་གེ་དབང་ཕྱུག་ལྟ་བུ་སྟེ། ཐུགས་རྗེ་ཚད་མེད་པས་འབྲེལ་ཚད་རྣམ་གྲོལ་ཟབ་མོའི་དོན་ལ་སྦྱོར་བ། ལམ་ཟབ་སྙིང་པོའི་དམར་ཁྲིད་ལ་མཁས་པས་རང་གནས་ཆོས་སྐུ་དང་སྤྲོད་པ། རྩལ་སྦྱངས་ཀྱི་བོགས་འདོན་ཟབ་མོས་ཉམས་རྟོགས་གོང་འཕེལ་དུ་བྱེད་པ། མཐར་ཕྱིན་རྟོགས་པ་མངའ་བས་གདུལ་བྱ་གནས་ལུགས་གཞི་ལ་སྐྱེལ་བ་སྟེ་མ་ནོར་བར་ངོ་འཕྲོད་པ། ཐབས་ལམ་ཟབ་མོས་གང་ཡང་ལམ་དུ་སྒྱུར་ནུས་པ། གདམས་པ་མང་པོ་དང་ལྡན་པས་ཤེས་རྒྱུད་འགྲོལ་བ་ལ་མཁས་པ། ཡང་རྩེའི་དགོངས་པ་མངའ་བས་ཚེ་འདིར་འཁོར་བའི་ཆུ་བོ་སྒྲོལ་ནུས་པ། དེད་དཔོན་ཡིད་བཞིན་རིན་པོ་ཆེ་སྨན་པའི་རྒྱལ་པོ་དེ་འདྲ་བ་ནི། ཀུན་ལས་ཀྱང་འཕགས་ཕྱིར་མཚུངས་པ་མེད་པ་ཉིད་གུས་པས་བསྟེན་པར་བྱའོ། །གཉིས་པ། གོང་དུ་ཇི་སྐད་བཤད་པའི་ཡོན་ཏན་གྱི་མཆོག་དེ་དག་ལས། ཀུན་དང་ལྡནཔའི་བླ་མ་ནི་ཨུ་དུམྦཱ་ར་ཙམ་སྟེ་སྙིགས་དུས་རྙེད་པར་དཀའ་ན་ཡང་། དེ་ལས་ཕལ་ཆེར་དང་ལྡན་པའང་སངས་རྒྱས་དང་འདྲ་ཞིང་། དེ་དག་གི་ནང་ནས་ཡོན་ཏན་དྲུག་ཚན་ཙམ་ལྡན་པ་དེ་ཡང་བསྟེན་དུ་རུང་སྟེ། དེ་ལྟ་བུ་ཡང་སྙིགས་མའི་དུས་འདིར་རབ་ཏུ་རྙེད་དཀའི་ཕྱིར་རབ་ཏུ་གུས་པ་ཆེན་པོས་བསྟེན་པར་བྱའོ། །གཉིས་པ་བསྟེན་དགོས་པའི་རྒྱུ་མཚན་ལ། བསྟན་བཤད་གཉིས། དང་པོ། དེ་ལྟའི་དགེ་བའི་བཤེས་གཉེན་ཉིད་འབྲལ་མེད་རྒྱུན་དུ་བསྟེན་པར་གདམས་པ་ལ་ཡང་གཏན་ཚིགས་རྣམ་པ་དྲུག་ལས། ཞེས་པའོ། །གཉིས་པ་ལ། གཏན་གྱིས་འདུན་གྲོས་སྟོན་པ། བླང་དོར་གྱི་མིགས་ཕྱེད་པ། ཞིང་མཆོག་ཏུ་གྱུར་པ། སྐྱབས་བླ་ན་མེད་པ། ཡོན་ཏན་རྒྱས་པར་བྱེད་པ། སྟོན་པ་སངས་རྒྱས་ཀྱི་བྱ་བ་བྱེད་པ་སྟེ། རྒྱུ་མཚན་དྲུག་པོ་རིམ་པར་སྟོན་པ་ལས། རྒྱུ་མཚན་དང་པོ། རང་གཞན་ལ་གཏན་གྱི་འདུན་གྲོས་ཐར་ལམ་ཟབ་མོ་ཉིད་སྟོན་པར་བྱེད་པ་པོ། མཚན་ལྡན་གྱི་བླ་མ་ལས་གཞན་རྒྱལ་བློན་གཙོ་བོ་ཕ་མ་སོགས་གང་གིས་ཀྱང་སྟོན་པར་མི་འགྱུར་བ་དེ་ཡི་ཕྱིར་ན་རྟག་ཏུ་བླ་མ་བསྟེན་པར་བྱའོ། །གཉིས་པ། དགེ་བ་སྒྲུབ་པ་དང་སྡིག་པ་སྤང་བ་སོགས་བླང་དོར་ཟབ་མོ་སྟེ་གཞན་གྱིས་ཤེས་མི་ནུས་པའི་གནད་སྟོནཔར་བྱེད་ཅིང་། སྡུག་བསྔལ་གྱི་ནད་སེལ་ཞིང་མ་རིག་འཐིབ་པོ་སེལ་བ། ཤེས་རབ་ཀྱི་མིག་འབྱེད་ཅིང་ཐར་པའི་ལམ་སྣང་བར་བྱེད་པ། བླ་མ་ལས་གཞན་སུ་ཡང་མེད་པའི་ཕྱིར་རྟག་ཏུ་བསྟེན་དགོས་སོ། །གསུམ་པ། ཐར་ལམ་བྱང་ཆུབ་སྒྲུབ་པའང་ཚོགས་གཉིས་རྫོགས་པ་ལ་རག་ལས་ཤིང་། ཚོགས་གསོག་པ་དེ་ཡི་རྟེན་ཡང་བླ་མ་ལས་ལྷག་པ་གཞན་ལྷ་དང་བཅས་པའི་འཇིག་རྟེན་ཀུན་ན་མེད་པར་གསུངས་པའི་ཕྱིར། ཞིང་གི་མཆོག་ཏུ་གྱུར་པས་ན་གུས་པས་རྟག་ཏུ་བསྟེན་པར་བྱ་སྟེ། ཀུན་ཏུ་ཁ་སྦྱོར་གྱི་རྒྱུད་ལས། ཡེ་ཤེས་ཀུན་སེམས་ཞེས་བྱ་བའི། །རྒྱལ་བ་ཀུན་གྱི་སློབ་དཔོན་མཆོག །དངོས་གྲུབ་སྣ་ཚོགས་སྟེར་བས་ན། །བློ་དང་ལྡན་པས་རྟག་མཆོད་བྱ། །གང་ཕྱིར་ཕྱོགས་བཅུའི་སངས་རྒྱས་དང་། །བྱང་ཆུབ་སེམས་མཆོད་བསོད་ནམས་ལས། །སློབ་དཔོན་བ་སྤུའི་ཁུང་གཅིག་མཆོག །དེ་ཕྱིར་སློབ་དཔོན་མཆོད་བྱེད་པ། །སངས་རྒྱས་བྱང་ཆུབ་སེམས་དཔའ་གཟིགས། །ཞེས་དང་། སྡོང་པོ་བཀོད་པ་ལས། བྱང་ཆུབ་སེམས་དཔའི་སྤྱོད་པ་ཐམས་ཅད་ནི་དགེ་བའི་བཤེས་གཉེན་ལ་རག་ལས་སོ། །སྨོན་ལམ་གྱི་སྒོ་ཐམས་ཅད་ཀྱང་དེ་ལས་འབྱུང་ངོ་། །དགེ་བའི་རྩ་བ་ཐམས་ཅད་ཀྱང་དེས་བསྐྱེད་དོ། །བསོད་ནམས་དང་ཡེ་ཤེས་ཀྱི་ཚོགས་ཐམས་ཅད་ཀྱང་དེས་སྒྲུབ་པའོ། །ཞེས་སོགས་རྒྱ་ཆེར་གསུངས་པ་དང་། དེ་བཞིན་རྣལ་འབྱོར་བསྒོམས་པས་ཀྱང་བསོད་ནམས་དཔག་མེད་ཐོབ་སྟེ། ཡིད་བཞིན་མཆོག་གི་རྒྱུད་ལས། གང་གིས་བླ་མ་འདུན་པའི་ལྷ། །སྤྱི་བོའི་གཙུག་ཏུ་བསྒོམས་པ་ཡིས། །སངས་རྒྱས་དཀྱིལ་འཁོར་སྟོང་ཕྲག་ཉིད། །ལག་མཐིལ་བཞག་ནས་སྟོང་གསུམ་བསྐོར། །སྙིང་གར་ལན་སྟོང་བསྟིམས་བྱས་པས། །བརྒྱ་འགྱུར་རྒྱུ་དང་ཆར་མི་ཕོད། །དེས་ན་རྟག་ཏུ་དྲན་པ་ཡིས། །སྤྱི་གཙུག་འཁོར་ལོའི་རྒྱན་ཉིད་དུ། །དཔལ་ལྡན་བླ་མ་བསམ་པར་བྱ། །ཞེས་གསུངས། བླ་མའི་ཕྱོགས་སུ་བྱ་བ་བྱས་པ ས་ཀྱང་། ཡེ་ཤེས་རྒྱ་མཚོའི་རྒྱུད་ལས། གང་གིས་བླ་མའི་བྱ་བ་ལ། །མཁས་པའི་སྐལ་ལྡན་གང་ཡིན་དེ། །དུས་གསུམ་སངས་རྒྱས་ཐམས་ཅད་ལ། །བསྐལ་པ་བྱེ་བ་དྲུག་འབུམ་དུ། །ཕྱག་བྱས་པས་ནི་འདི་དོན་ཆེ། །བླ་མས་བསྒོ་བ་བཞིན་བསྒྲུབ་ན། །འདོད་པ་ཐམས་ཅད་འགྲུབ་པ་དང་། །བསོད་ནམས་དཔག་ཏུ་མེད་པ་ཐོབ། །རང་གི་རྫས་དང་ཡོ་བྱད་ཀྱིས། །བླ་མ་མཉེས་པར་སུས་བྱས་པ། །འདི་ནི་ཁམས་གསུམ་འཁོར་བ་ལས། །སྤྲུལ་སྐུའི་ཞིང་དུ་དབུགས་ཕྱུང་སྟེ། །མྱ་ངན་འདས་པའི་སར་གཤེགས་སོ། །ཞེས་སོ། །བཞི་པ། ངན་འགྲོའི་སྲིད་པ་དང་བར་ཆད་ཀྱི་འཇིགས་པ་རྣམས་ལས་སྐྱོབ་པའི་ཕྱིར་སྐྱབས་ཀྱི་དམ་པའང་བླ་མ་ལས་གཞན་མེད་དེ་སུས་ཀྱང་མི་ནུས་པའི་ཕྱིར། སྒྱུ་དྲྭ་ལས། འཁོར་བའི་འཇིགས་ལས་ངེས་སྐྱོབ་ཅིང་། །མྱ་ངན་འདས་པར་འདྲེན་པ་མཆོག །བླ་མ་ཉིད་ལས་གཞན་ཡོད་མིན། །ཞེས་གསུངས། སངས་རྒྱས་མེད་དམ་ཞེ་ན། ཡོད་མོད་ཀྱི་སངས་རྒྱས་ཉིད་ཀྱང་བླ་མ་ལ་བསྟེན་པའི་ཕྱིར་ཏེ། དགོངས་འདུས་ལས། བསྐལ་པ་སྟོང་གི་སངས་རྒྱས་པས། །བླ་མ་གཉན་པར་ཤེས་པར་བྱ། །ཅི་ཕྱིར་བསྐལ་པའི་སངས་རྒྱས་རྣམས། །བླ་མ་དག་ལ་བསྟེན་ནས་འབྱུང་། །ཞེས་གསུངས། བླ་མའི་གསུང་བཞིན་སྒྲུབ་ན་སྲུང་མ་དམ་ཅན་རྒྱ་མཚོས་ཀྱང་བར་ཆད་དང་གནོད་པ་ཀུན་ལས་སྐྱོབ་སྟེ། དགོངས་འདུས་ལས། བཀའ་ཟུར་མ་བཅག་ཆོས་བསྲུང་ན། །ཆོས་སྐྱོང་སྲུང་མ་མཐུ་ཆེན་རྣམས། །བུ་བཞིན་རྟག་ཏུ་སྲུང་བར་བྱེད། །ཅེས་སོ། །དེས་ན་ངན་སོང་སོགས་ལོག་འགྲོའི་འཇིགས་པ་དང་བྲལ་བའི་ཕྱིར་ཡང་རྟག་ཏུ་བླ་མ་བསྟེན་པར་བྱ་དགོས་སོ། །ལྔ་པ། རང་རྒྱུད་ལ་ཡོན་ཏན་རྫོགས་པར་བྱེད་པ་ཡང་བླ་མ་ལས་གཞན་མེད་དེ། བླ་མ་ལ་བརྟེན་ན་དེ་ལས་ཕུན་སུམ་ཚོགས་པ་མཐའ་དག་འབྱུང་བའི་ཕྱིར། ལས་དང་པོ་པ་ཐོག་མར་ལམ་དུ་ཞུགས་པ་དང་བར་དུ་ལམ་ལ་སློབ་པ་ན་བདུད་ཀྱི་ལས་ལས་འདའ་བ་དང་། མཐར་ཡང་བྱང་ཆུབ་འདོད་པས། རྣམ་གྲོལ་གྱི་ཡོན་ཏན་ཚད་མེད་པས་འབྱོར་བའི་སླད་དུ་ཡིད་རབ་ཏུ་དང་བ་དང་གུས་པས་བསྟེན་པར་བྱའོ། །དྲུག་པ། ཁྱད་པར་ད་ལྟ་སྙིགས་མའི་དུས་ཀྱི་གདུལ་བྱ་ལ་ཐུགས་བརྩེ་བ་དང་ལྡན་པ་བླ་མ་ལསགཞན་ཞིག་བདག་ཅག་གི་སྟོན་པར་མི་འགྱུར་ཏེ། སངས་རྒྱས་དང་བྱང་ཆུབ་སེམས་དཔའ་སོགས་བཞུགས་མོད་ཀྱི་རང་རང་གི་ལས་ཀྱིས་བསྐལ་པས་ཞལ་མི་སྟོན་ཞིང་གསུང་མི་འབྱོན་ལ། བྱོན་ཀྱང་བླ་མ་དམ་པས་མཛད་རྒྱུ་དང་སྟོན་རྒྱུ་ལས་ལྷག་གཞན་མ་མཆིས་པས། ཡོན་ཏན་སངས་རྒྱས་དང་མཉམ་ཡང་རང་ལ་བཀའ་དྲིན་གྱི་ངོས་ནས་རྒྱལ་བ་ལས་ལྷག་པའི་གུས་པ་ཆེན་པོས་བསྟེན་པར་བྱ་དགོས་ཏེ། གསང་འདུས་ལས། ཁམས་རྣམས་དང་ནི་འཕྲིན་ལས་དང་། །རང་བཞིན་མཉམ་པ་ཉིད་ཀྱི་ཕྱིར། །སངས་རྒྱས་ཀུན་དང་བླ་མ་མཉམ། །འགྲོ་བ་གང་ལ་ལམ་སྟོན་ཕྱིར། །སངས་རྒྱས་ཉིད་ལས་མཆོག་ཏུ་འཕགས། །ཞེས་གསུངས་པ་བཞིན་ནོ། །གསུམ་པ་ཇི་ལྟར་བསྟེན་པའི་ཚུལ་ལ། དངོས་དང་། དེ་ལྟར་བསྟེན་པའི་ཕན་ཡོན་གཉིས། དང་པོ་ལ། ཐོག་མར་དགེ་བའི་བཤེས་གཉེན་བཙལ་ནས་བསྟེན་པ་དང་། བར་དུ་མཉེས་པས་བསྒྲུབས་ཏེ་བསྟེན་ཚུལ་གཉིས། དང་པོ་ལ། གུས་པས་བཙལ་ཞིང་བསྟེན་པ་དང་། དེ་ལྟར་བསྟེན་དགོས་པའི་རྒྱུ་མཚན་དཔེས་བསྟན་པ་གཉིས། དང་པོ། དེ་ཡང་དཔལ་ལྡན་བླ་མ་དམ་པ་གོང་བཤད་ཀྱི་ཡོན་ཏན་ལྡན་པ་དག གནས་གང་ན་བཞུགས་པའི་ཡུལ་ཕྱོགས་དེར་བགྲོད་དེ། ཡིད་དང་བ་དང་། ངག་གུས་པ་དང་། ལུས་ཀྱི་སྲི་ཞུ་ཆེན་པོ་དང་ལྡན་པས་ཐོག་མ་ཉིད་ནས་མཉེས་པར་བྱས་པའི་སྒོ་ནས་བཤེས་གཉེན་ཡང་དག་པར་བཙལ་བར་བྱ་སྟེ་ཐོག་མའི་རྟེན་འབྲེལ་མ་འཕྱུགས་པ་གལ་ཆེ། དེ་ཡང་ཆོས་ནས་བཤད་པའི་མཚན་ཉིད་ཚང་ན་འཇིག་རྟེན་པའི་ལུགས་ཀྱི་སྐྱོན་གཞན་ཡོད་ཀྱང་བསྟེན་པར་བྱ་སྟེ། ཁྱད་པར་དགེ་བའི་བཤེས་གཉེན་ནི་གཡོ་སྒྱུ་མེད་ཅིང་ཡིད་ལ་བསམ་པ་དང་། ངག་ཏུ་བརྗོད་པ་དུས་མཐུན་པ་གཞི་ཆེ་བས་ཅུང་འགྲོགས་དཀའ་བར་མངོན་ཡང་། དཀའ་བ་བཟོད་པས་བསྟེན་དགོས་སོ། །དེ་ལྟར་རྙེད་ནས་ཡིད་སྐྱོ་བ་དང་ལུས་ངལ་དུབ་མེད་པར་བསྟེན་པར་བྱ་སྟེ། གདུལ་བྱའི་སྣོད་བརྟག་པའི་ཕྱིར་མཛད་སྤྱོད་ཞི་དྲག་སོགས་གང་གནང་ཡང་དེས་མི་སུན་པར་དོན་ཆེན་སྒྲུབ་པ་ལ་ངང་མི་ཐུང་བར་ཡུན་ནམ་ངང་ཆེན་གུས་པས་བསྲིང་བར་བྱའོ། །དེའི་ཚེ་བདུད་ཀྱི་བར་དུ་གཅོད་པས་བླ་སློབ་བར་དབྱེན་བཅོས་པ་དང་། མཐུན་རྐྱེན་འབྱོར་དཀའ་བ་དང་མི་མཐུན་པའི་རྐྱེན་རྣམས་གྲངས་མང་པོ་འབྱུང་བས། ལམ་འཕྲང་སོགས་བགྲོད་དཀའ་བས་ཡིད་འབྱུང་བ་དང་། བླ་མ་དང་ཆོས་ལས་བློ་ཕྱིར་ཕྱོགས་པ་སོགས་ཀྱི་བློ་ངན་མང་པོ་སྐྱེ་བ་ལ། དེ་ཉིད་བདུད་དུ་ཤེས་ནས་སྤངས་ཏེ་སླར་ཡང་གུས་པ་མཆོག་གིས་ཡིད་བཞིན་གྱི་ནོར་བུ་རྙེད་པ་མི་འདོར་བ་ལྟར་སྤྱི་བོས་བསྟེན་པར་བྱའོ། །གཉིས་པ་ལ། རང་ལ་ཕན་འདོགས་པའི་རྒྱུ་མཚན་དཔེས་བསྟན་པ་དང་། གུས་པར་བྱ་དགོས་པའི་རྒྱུ་མཚན་དཔེས་བསྟན་པ་གཉིས། དང་པོ། ཇི་ལྟར་ཆུ་རྙོག་པ་ལས་དྭངས་པ་ཡི་ཁྱད་པར་གྱིས་གཟུགས་བརྙན་འཆར་བ་དང་རྐྱེན་གྱིས་རྙོག་པས་ནུབ་པར་བྱེད་ཅིང་ཆུ་རྙོག་པ་དེ་དང་བྲལ་བར་བྱེད་པའི་རྒྱུ་ནོར་བུ་ཆུ་དྭངས་ཡིན་པ་ལྟར། རང་སེམས་སྒྲིབ་པས་རྙོག་པའི་ཆུ་དྭངས་པར་བྱེད་ཅིང་ཡོན་ཏན་གྱི་གཟུགས་བརྙན་སྟོན་པར་བྱེད་པའང་ཡིན་ལ། རྡོ་ཡི་ཁམས་ཀྱི་གསེར་དང་ས་འོག་ན་གནས་པའི་རིན་ཆེན་གྱི་གཏེར་དང་། པདྨའི་ནང་ན་གནས་པའི་བདེ་གཤེགས་ཀྱི་སྐུ་གཟུགས་ཇི་ལྟ་བ་དང་མཚུངས་པར། རང་རྒྱུད་ཀྱི་ཁྱབ་བདག་བདེ་གཤེགས་སྙིང་པོའི་ཁམས་ཡེ་ནས་སྒྲིབ་ཉོན་གྱིས་མ་གོས་པས་གཙང་བ་བྱང་ཆུབ་ཀྱི་སྙིང་པོ་ཅན་ཉེ་བར་སྟོན་པར་བྱེད་ཅིང་། མཚན་མོའི་མུན་ནག་ལ་སྣང་བ་བྱུང་བ་ཇི་ལྟ་བུ་དང་། ཐར་གླིང་གང་དུ་ཉེ་བར་བགྲོད་པ་ལ་དེད་དཔོན་མཁས་པ་བཞིན་དང་འཁོར་བའི་ཆུ་གཏེར་ཟབ་མོའི་འབྱུང་གནས་སམ་ཀློང་དག་ལས་ཕ་རོལ་དུ་བགྲོད་པར་བྱེད་པ་ཡིན་པས། དེ་ལྟར་ཤེས་ནས་དམ་པ་རྣམས་ལ་བསྟེན་པར་བྱ་དགོས་ཏེ། ཇི་ལྟར་བསྟེན་ཚུལ་སྡོང་པོ་བཀོད་པའི་མདོ་སོགས་ལས་རྒྱ་ཆེར་གསུངས་པ་བཞིན་ནོ། །གཉིས་པ། ཕྱི་རོལ་པ་དག་རང་གཞན་ལ་ཕན་པའི་དོན་མེད་པའི་དཀའ་ཐུབ་མེ་ལྔ་བསྟེན་པ་སོགས་ལ་འབད་པ་དང་། འཇིག་རྟེན་པ་དག་ཚེ་འདིའི་དཔུང་གཉེན་གྱི་དོན་དུ་རྗེ་བོ་བཀུར་བ་དང་། དར་ཅིག་འཇིགས་པས་སྐྱེལ་མ་དཔའ་བོ་བསྟེན་པ་དང་། ཡུལ་གྱི་རྒྱལ་པོའང་རིན་པོ་ཆེ་དང་གདུགས་སོགས་ཀྱིས་མཆོད་པ་དང་། བཟོ་སོགས་ཀྱི་རིག་པ་སློབ་པའི་སློབ་དཔོན་ལའང་བསྙེན་བཀུར་བ་དང་། ནད་ལ་ཕན་ཕྱིར་སྨན་པ་མཆོད་པ་དང་། ཟས་གོས་སོགས་ཀྱིས་ཕན་འདོགས་པའི་གྲོགས་ཀྱི་ཕྱིར་རང་གི་སྲོག་ཀྱང་གཏོང་ནུས་པའི་དཔེ་ལ་བསམ་སྟེ། དོན་མེད་པ་དང་གནས་སྐབས་ཀྱི་ཉི་ཚེ་བ་དེ་རྣམས་ལ་གཅེས་སྤྲས་ཀྱིས་བཀུར་ན། གཏན་དུ་ཕན་ཞིང་དོན་ཆེ་སྲིད་ཞིའི་རྒུད་པ་སེལ་ཞིང་དོན་གཉིས་ཀྱི་འདོད་པ་སྦྱིན་པའི་བླ་མ་མཆོག་ལ་བཀུར་སྟི་དང་རིམ་གྲོ་ཅིས་མི་བྱེད་སྙམ་དུ་བསམ་སྟེ་དགེ་བའི་བཤེས་གཉེན་བསྟེན་པ་ལ་བརྩོན་པར་བྱའོ། །དེས་ནི་རྒྱུ་མཐུན་གྱི་འབྲས་བུས་ཚེ་འདིར་བསྟོད་བཀུར་སོགས་དང་ཕྱི་མར་སངས་རྒྱས་ཀྱི་ཞིང་དུ་སྐྱེས་ནས་བྱང་ཆུབ་འགྲུབ་པ་སོགས་འདི་ཕྱིར་བདེ་ལེགས་ཀྱི་ཆོས་ཀུན་ཡིད་བཞིན་དུ་འགྲུབ་བོ། །གཉིས་པ་མཉེས་པས་བསྟེན་པར་བྱ་བ་ལ། ཟང་ཟིང་གིས། སྤྱོད་ལམ་གྱིས། སྒྲུབ་པས་མཉེས་པར་བྱ་བ་གསུམ། དང་པོ། རང་ལ་བདོག་པས་ཏེ་ཡོད་དོ་ཅོག་གིས་བླ་མ་ཉེ་བར་མཉེས་པར་བྱ་དགོས་ཏེ། ཅིའི་ཕྱིར་ན། མདོ་ལས། ཚིགས་སུ་བཅད་པ་གཅིག་ལུང་ནོས་སམ་བླང་བའི་སློབ་དཔོན་དེ་ལ་ཡི་གེའི་གྲངས་ཇི་སྙེད་ཡོད་པའི་བསྐལ་པར་རྙེད་པ་དང་། བཀུར་སྟི་དང་། མཆོད་པ་ཐམས་ཅད་ཀྱིས་བསྙེན་བཀུར་བྱས་ཀྱང་། ད་དུང་སློབ་དཔོན་གྱི་གུས་པ་ཡང་མ་རྫོགས་ན་ཆོས་ཀྱི་གུས་པ་ལྟ་ཅི་སྨོས་ཞེས། ཆོས་ཀྱི་ཚིགས་བཅད་རེ་རེའི་ཡོན་ནི་གཞལ་དུ་མེད་པར་གསུངས་པའི་ཕྱིར་དང་། དེ་ལྟར་མཆོད་ན་གནས་སྐབས་སུ་ཚོགས་རྫོགས་དང་བར་ཆད་ཞི་ཞིང་དཔལ་འབྱོར་ལྡན་པ་དང་། མཐར་བྱང་ཆུབ་ཞི་བ་མྱུར་དུ་ཐོབ་པར་འགྱུར་བས་ན། རང་གིས་ཅུང་ཟད་ཙམ་ཕུལ་བ་ལ་ངས་དེ་ལྟར་ཕུལ་ཡོད་པས། ཆོས་ལོས་གནང་སོགས་ཁེ་རྔམས་དང་། མདུན་དུ་དྲིན་མི་སྒྲོག་ཅིང་། སྐྱེ་བོ་གཞན་དག་གི་གམ་དུ་ཡང་ངས་དེ་ཕུལ་ཞེས་མི་བགྲང་ལ། ཕུལ་བ་དེར་སླར་འགྱོད་པ་ཡང་མི་བྱ་སྟེ། རང་ཉིད་ཀྱི་འདི་ཕྱིའི་དོན་ཆེན་པོ་འགྲུབ་པའི་ཐབས་ཡིན་པའི་ཕྱིར་སུ་ཞིག་ལ་རྔན་བསྒྲང་། རང་གི་དགེ་བ་སྤེལ་བའི་ཕྱིར་ཕུལ་ན་ལེན་མཁན་དྲིན་ཆེའི། ནན་དུ་ཕུལ་ཅིག་མ་བྱས་པས་ཀྱང་དྲིན་དྲང་དུ་ཅི་ཡོད། དེས་ན་བཀའ་དྲིན་ལ་བསམ་ནས་འབྱོར་བ་ལེགས་དགུས་ཏེ་གང་ཅེས་ཤིང་སྙིང་དུ་སྡུག་པ་དེས་མཆོད་ཅིང་རྟག་ཏུ་བསྙེན་བཀུར་བར་བྱའོ། །གཉིས་པ་ལ། བསྟན་བཤད་གཉིས། དང་པོ། ལུས་ངག་གི་སྤྱོད་ལམ་མཆོག་གིས་བླ་མ་མཉེས་པར་བྱ་བ་ཡང་། ཞེས་སོ། །གཉིས་པ་ལ། ལུས། ངག ཡིད་གསུམ། དང་པོ་ལ། བླང་བྱ་དང་། སྤང་བྱ་གཉིས། དང་པོ། བླ་མ་ལ་ལུས་ཀྱིས་ཕྱག་དང་བསྐོར་བ་དང་མེ་ཏོག་དང་ཚོགས་སོགས་མཆོད་པ་འབུལ་བ་དང་། བླ་མ་ལ་མེ་ཆུ་སོགས་ཀྱི་བར་ཆད་བསྲུང་བ་དང་། མངག་གཞུག་སྟེ་བང་ཆེན་གྱི་བྱ་བ་བྱེད་བ་དང་། འཕྲལ་ལ་ཉེར་འཁོའི་གཡོག་བྱ་བ་དང་། གཤེགས་པར་ལྡང་སྟེ་ཞབས་འབྲིང་བྱེད་པ་དང་། བཞུགས་སར་གདན་འདིང་བ་སོགས་བ ཀུར་སྟི་སྣ་ཚོགས་བྱ་ཞིང་བླ་མའི་ཉེ་འཁོར་རྣམས་ལའང་ཚུལ་དེ་དང་མཐུན་པར་བྱའོ། །གཉིས་པ། སྤང་བྱའི་སྤྱོད་ལམ་བླ་མ་མི་གུས་པ་དང་བག་གཟོན་མེད་པ་ནི། བླ་མ་ལ་མ་གུས་པའི་རྣམ་པས་མིག་འབྲུ་ཚུགས་སུ་བལྟ་བ་དང་། བཞིན་གཉེར་ཏེ་བལྟ་བ་དང་། དྲུང་དུ་སེ་གོལ་ལམ་ཐལ་མོ་རྡེབ་པ། ལུས་ཀྱི་རྒྱབ་སྟོན་པ་དང་། ཟུར་སྟོན་པ་དང་། དྲུང་དུ་རྐང་ལག་རྐྱོང་བ་དང་། ཉལ་བ་དང་། གློ་ས་ལ་ཕབ་སྟེ་འཕྲེས་པ་དང་། བླ་མའི་སར་གཞན་དང་འཐབ་པ་དང་། ཀུ་རེས་ཕན་ཚུལ་ལག་འཛིངས་བྱེད་པ་དང་། རྩེད་འཇོ་བཞད་གད་དང་། གོས་སོགས་ཀྱི་འཇོ་སྒེག་བྱེད་པ་དང་། མཆིལ་མ་དང་སྣབ་དྲུང་དུ་འདོར་བ་དང་། སྐུའི་གྲིབ་མ་བགོམ་{འགོང}བ་དང་། བཞུད་ཚེ་མ་གནང་བཞིན་དུ་མདུན་ནས་འགྲོ་བ་དང་། སླད་བཞིན་དུ་ཞབས་རྗེས་བརྫི་སྟེ་འགྲོ་བ་དང་། བླ་མའི་ལྷྭམ་དང་སྟན་དང་བཞོན་པ་དང་ནོར་རྫས་ལ་མ་གནང་བར་སྤྱོད་པ་དང་། སྐུ་ལ་མཐོའ མ་དབྱུག་པ་སོགས་ཀྱིས་ཚད་འཇལ་བ་དང་། ན་བཟའ་དང་བཞུགས་གདན་སོགས་ལ་བགོམ་པ་དང་། དྲུང་དུ་སྐྱིལ་ཀྲུང་སོགས་སྒེག་ཆོས་ཀྱིས་འདུག་པ་སོགས་མཉམ་འགྲོགས་ཀྱི་མ་གུས་པའམ་མི་ཤེས་པའི་དབང་གིས་ཉེས་པ་དེ་དག་སྤང་བར་བྱའོ། །གཉིས་པ་ངག་ལ། བླང་དོར་གཉིས། དང་པོ། ངག་གིས་ཀྱང་འཇམ་ཞིང་སྙན་པའི་སྒོ་ནས་བསྟོད་པ་དང་སྐྱབས་སུ་འགྲོ་བ་དང་། ཚིག་འཇམ་ཞིང་རྣ་བར་སྙན་པས་ཞེ་ས་རིམ་གྲོ་དང་བཅས། ཇི་སྐད་གསུང་པ་བཞིན་སྒྲུབ་ཅིང་ཅི་གསུང་ན་ཡང་མི་ཟློག་པར་ལེགས་ཞེས་བརྗོད། གཞན་དག་ལའང་བླ་མའི་ཡོན་ཏན་བརྗོད་པར་བྱ་ཞིང་། དུས་རྒྱུན་དུ་དབྱངས་སྙན་དད་དད་བཅས་པས་གསོལ་བ་གདབ་པ་སོགས་ལ་བརྩོན་པར་བྱའོ། །གཉིས་པ། ངག་གི་སྒོ་ནས་མི་དགེ་བ་སྣ་ཚོགས་པ་ཐམས་ཅད་སྤང་བར་བྱ་སྟེ། གང་ཞེ་ན། བླ་མའི་དྲུང་དུ་རྫུན་དང་ཕྲ་མ་དང་། ཚིག་རྩུབ་དང་དོན་མེད་ཀྱི་འབྲུ་འབྲེལ་མེད་རང་གའི་ཅ་ཅོ་དང་། དགོས་མེད་ཀྱི་ངག་འཁྱལ་དང་། ཉོན་མོངས་ཅན་གྱི་བྲེ་མོའི་གཏམ་དང་། བླ་མའི་བཀའ་གཅོག་པ་དང་། ཚིག་གདོང་ནས་ཟློག་སྟེ་བར་གཅོད་པ་དང་། སྙིང་ནང་འཇུག་པའི་ཞེ་གཅོད་དང་། ལྐོག་ནས་གཤེ་བ་དང་། རྩོད་པ་སོགས་ཅོ་འདྲི་བ་ལ་སོགས་ངག་གི་སྒྲིབ་པ་རྣམས་སྤང་བར་བྱའོ། །གསུམ་པ་ཡིད་ལ། བླང་བྱ། སྤང་བྱ་གཉིས། དང་པོ། ཡིད་ཀྱིས་ཀྱང་བླ་མའི་ཡོན་ཏན་རྗེས་སུ་དྲན་པ་བྱ་ཞིང་། དད་ཅིང་གུས་པ་ཆེན་པོས་དགེ་བའི་བཤེས་གཉེན་དང་འཕྲད་པར་དཀའ་བའི་བློ་བསྐྱེད་ལ། བླ་མ་དེས་རྗེས་སུ་བཟུང་བའི་འགྲོ་བ་གཞན་ཐམས་ཅད་ལའང་གུས་པར་བྱའོ། །གཉིས་པ། ཡིད་དད་པ་མེད་པ་ཙམ་མ་དད་པ་དང་། གསུང་སོགས་ལ་སླར་ཡང་ལོག་པར་ལྟ་བ་སྟེ་སྐྱོན་དུ་མཐོང་བ་དང་། བླ་མ་ལ་ཁོང་ཁྲོ་བ་དང་། རྟག་ཏུ་བླ་མའི་སྐྱོན་ལ་སེམས་པ་དང་། རིགས་གཟུགས་སོགས་དམན་པ་ལ་བརྙས་བཅོས་ཀྱི་སེམས་དང་། འགྲན་སེམས་དང་འཁོར་སོགས་ལ་གནོད་ཅིང་འཚེ་བའི་སེམས་དང་། བླ་མ་ལས་རང་བཟང་སྙམ་པ་ང་རྒྱལ་གྱི་སེམས་དང་། མཛད་སྤྱོད་གང་ཞིག་མི་ལེགས་པའམ་ཆོས་དང་འགལ་བར་འཛིན་པ་དང་། སྤྱོད་ཡུལ་ཡིད་དུ་མི་འོང་བར་སེམས་པ་མ་དད་པའི་སེམས་དང་། བླ་མའི་རྫས་ལ་བརྣབ་སེམས་དང་། གནོད་སེམས་དང་། གསུང་ལ་བདེན་པར་མི་འཛིན་པའི་ལོག་ལྟའི་སེམས་རྣམས་སྤང་བར་བྱའོ། །གསུམ་པ་སྒྲུབ་པ་ནི། བླ་མས་སྒྲུབ་པ་གྱིས་ཤིག་ཅེས་པའི་གསུང་བཞིན་རྗེས་སུ་བསྒྲུབས་པས་མཆོད་པ་ནི་བླ་མ་ལས་ཇི་ལྟར་ཐོས་པ་དམ་པའི་དོན་རྣམས་ལ་ཡང་ཡང་བསམ་པར་བྱ་སྟེ། འདུ་འཛིས་དབེན་པའི་ནགས་མཐར་སོང་ལ་སྙིང་པོའི་དོན་སྒྲུབ་པ་ལ་འབད་ཅིང་། དེ་ཡང་བརྩོན་པས་ཉིན་མཚན་མེད་པར་སྒྲུབ་པས་དུས་འདའ་བར་གྱུར་ན་གྲུབ་ཐོབ་གོང་མའི་གདུང་འཚོབ་ཅིང་བཟུང་བ་ཡིན་ལ། དཔལ་ལྡན་བླ་མའི་རྣམ་ཐར་བདག་ཉིད་ཀྱིས་བསྒྲུབ་པ་ཡང་ཡིན་པས་བླ་མའི་སྐུ་གསུང་ཐུགས་ཀྱི་ཡོན་ཏན་ལ་བསམ་པར་བྱས་ལ། བདག་ཀྱང་དུས་དེང་ནས་བཟུང་མགོན་དེ་ཡི་རྗེས་སུ་བསླབས་ཏེ། དམ་པའི་གོ་འཕང་མཆོག་ཐོབ་པར་བྱེད་པའི་དོན་དུ་ཐོས་པ་དང་བསམ་པ་དང་བསྒོམ་པའི་ཚུལ་ལ་ནན་ཏན་གྱིས་བརྩོན་པར་བྱའོ་སྙམ་དུ་ཡིད་དམ་བཅའ་བར་བྱའོ། །གཉིས་པ་ཕན་ཡོན་ནི། དེ་ལྟར་སྣ་ཚོགས་པའི་ཐབས་མང་པོ་ཉིད་ཀྱི་སྒོ་ནས་ཚུལ་བཞིན་དུ་བླ་མ་བསྟེན་པའི་ཡོན་ཏན་ནི་མཐའ་ཡས་ཏེ། མདོར་བསྡུ་ན་ཡང་དག་པའི་ལམ་དུ་ཆུད་པ་དང་། རང་གཞན་གྱི་བླང་དོར་དམིགས་རྣམ་ཕྱེད་པ་དང་། ཚོགས་གཉིས་རྫོགས་པ་དང་སྒྲིབ་གཉིས་བྱང་བ་དང་། གནས་སྐབས་དང་མཐར་ཐུག་གི་བར་ཆད་ཐམས་ཅད་རབ་ཏུ་ཞི་ཞིང་། རང་ཡང་སྐྱེ་བོ་དམ་པའི་གྲངས་སུ་བགྲང་བའི་གནས་ཐོབ་ནས། །མྱུར་དུ་མི་གནས་པའི་མྱང་འདས་ཆེན་པོ་ཐར་པའི་གྲོང་དུ་ཕྱིན་པར་འགྱུར་ཏེ། དགོངས་འདུས་ལས། ཆོས་ཀུན་མི་ཤེས་མ་རྟོགས་ཀྱང་། །མཚན་ཉིད་བཟང་ལྡན་བླ་མ་ལ། །བཀུར་ནས་རིམ་གྲོ་ཆེར་བྱས་པས། །འཁོར་བའི་རྒྱ་མཚོ་བརྒལ་བར་འགྱུར། །དཔེར་ན་ཞིང་རབ་གཤིན་པོ་ལ། །ས་བོན་བཏབ་ན་འཕེལ་རྒྱས་བཞིན། །ཞེས་དང་། ཡེ་ཤེས་རྒྱ་མཚོའི་རྒྱུད་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཀོན་མཆོག་བསམ་པའི་ཡུལ། །བླ་མ་མི་སྤང་བླ་མ་བཀུར། །མོས་དང་བསམ་པའི་བྱེ་བྲག་གིས། །བླ་མ་འགྲུབ་འགྱུར་ཐེ་ཚོམ་མེད། །བླ་མ་དང་ནི་རྡོ་རྗེ་འཛིན། །ཐ་དད་པར་ནི་མི་ལྟའོ། །དེ་ལས་བྱུང་བའི་དངོས་གྲུབ་ནི། །རྣལ་འབྱོར་པ་ཡིས་བཟའ་བར་བྱ། །དེ་ཡིས་དཔལ་ལྡན་རྫོགས་སངས་རྒྱས། །དངོས་གྲུབ་ཀུན་གྱི་ལས་ཀྱི་མཐའ། །བླ་མ་མཉེས་པ་ཉིད་ལས་བྱུང་། །ཞེས་དང་། མེ་ལྕེ་འཁོར་ལོའི་རྒྱུད་ལས། འདི་ལས་ཡོན་ཏན་གྱུར་པ་ནི། །སྟོང་གསུམ་འཇིག་རྟེན་གཞལ་མེད་པའི། །རྡུལ་ཕྲན་གྲངས་དང་མཉམ་ནུས་མིན། །དེ་ཕྱིར་བླ་མ་ཉིད་སྨོས་སོ། །ཞེས་དང་། ཀུན་བཟང་ཆེ་བ་རང་གནས་ཀྱི་རྒྱུད་ལས། རྫོགས་པ་ཆེན་པོ་ཨ་ཏི་ལས། །བྱུང་བའི་བླ་མ་དྲིན་ལྡན་ཉིད། །སྙིང་གི་དཀྱིལ་ལམ་ལག་པའི་མཐིལ། །སྤྱི་བོའི་གཙུག་ཏུ་སུས་བསྒོམས་པ། །སངས་རྒྱས་སྟོང་གི་ཡོན་ཏན་ཡང་། །གང་ཟད་དེ་ཡིས་འཛིན་པར་འགྱུར། །ཞེས་གསུངས། ཞར་ལ་བླ་མ་མ་བསྟེན་པའི་སྐྱོན་ཡང་། ཐར་པའི་ལམ་སྣ་མི་ཟིན་པ་དང་། ཡོན་ཏན་གྱི་ཚོགས་དང་མི་འཕྲད་པ་དང་། ལེགས་པའི་ཆོས་ལས་ཉམས་པ་དང་། སྡུག་བསྔལ་གྱི་དྲྭ་བར་ཚུད་པ་དང་། འཁོར་བའི་འདམ་དུ་བྱིང་བ་སོགས་དཔག་ཏུ་མེད་དོ། །དེས་ན་སྐྱོན་ཡོན་ལ་བླང་དོར་ཤེས་པའི་སྒོ་ནས་བླ་མ་དམ་པ་བསྟེན་ཅིང་། མཉེས་པ་སྒྲུབ་པ་ལ་འབད་པར་བྱའོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོའི་མཛོད་ལས་དགེ་བའི་བཤེས་གཉེན་བསྟེན་པའི་ལེའུ་སྟེ་བརྒྱད་པའི་འགྲེལ་པའོ།། །། ༈ གཉིས་པ་མི་དགེ་བའི་བཤེས་གཉེན་སྤང་བ་ལ། མཚམས་སྦྱོར་ཏེ་མདོར་བསྟན། དེ་དག་རྒྱས་པར་བཤད་པ་གཉིས། དང་པོ། དེ་ལྟར་དགེ་བའི་བཤེས་གཉེན་ལེགས་པར་བསྟེན་ནས། དེའི་མི་མཐུན་པའི་ཕྱོགས་སུ་གྱུར་པ་སྡིག་པའི་བཤེས་གཉེན་དང་སྡིག་པའི་གྲོགས་དང་བཅས་པ་སྤང་བར་བྱ་དགོས་ཏེ། སྡོང་པོ་བཀོད་པ་ལས། རིགས་ཀྱི་བུ་དགེ་བའི་རྩ་བ་མངོན་པར་འདོད་པས་དགེ་བའི་བཤེས་གཉེན་ལ་བསྟེན་པར་བྱའོ། །སྡིག་པའི་གྲོགས་པོ་དག་ལ་ནམ་ཡང་བསྟེན་པར་མི་བྱའོ། །དེ་ཅིའི་ཕྱིར་ཞེ་ན། དེ་དག་གིས་དགེ་བའི་ཕྱོགས་ལ་བར་དུ་གཅོད་པའི་ཕྱིར་རོ། །ཞེས་སོ། །གཉིས་པ་ལ། མི་དགེ་བའི་བཤེས་གཉེན་གྱི་མཚན་ཉིད། དེ་སྤོང་དགོས་པའི་རྒྱུ་མཚན། དེ་ལྟར་སྤངས་པའི་ཕན་ཡོན་གསུམ། དང་པོ། དེའི་མཚན་ཉིད་ཅི་ལྟ་བུ་སྙམ་ན། དེ་ཡང་རྩ་བའི་ཉོན་མོངས་པ་དྲུག་ཤས་ཆེ་བས་རང་རྒྱུད་ངན་པ། ཚེ་འདིའི་ཆེ་ཐབས་དོན་དུ་གཉེར་ཞིང་སྲིད་པ་ལས་ཡིད་མ་བྱུང་བ། ཐོས་བསམ་རྒྱ་ཆུང་བས་ཤེས་བྱའི་གནས་ལ་རྨོངས་པ། དད་པ་དང་བརྩོན་འགྲུས་མི་ལྡན་པས་རང་རྒྱུད་དགེ་ཚོགས་ལས་རིང་དུ་བྱེད་པ། ཆོས་དང་རང་རྒྱུད་འཛོལ་{འཇོལ}བས་སྒོོ་གསུམ་མ་དུལ་བ། ང་རྒྱལ་གྱི་རི་མཐོ་བས་ཁེངས་པ་དང་། གཞན་སྣང་ཐབས་ཀྱིས་བསླུ་བ་བཅོས་པའི་ཚུལ་འཆོས་ཅན། ཕྲག་དོག་ཆེ་བས་གཞན་ལ་གཤེ་ཞིང་ཕྱོགས་འཛིན་ཆེ་བས་དག་སྣང་ཆུང་བ། ཡོན་ཏན་ཉམས་མྱོང་མེད་པས་དད་པ་དང་མོས་གུས་མེད་པ། ཏིང་ངེ་འཛིན་གྱིས་མ་བརླན་པས། ཟས་སྐོམ་དང་ནོར་ལ་ཆོག་ཤེས་མེད་པ་དང་། ཐར་ལམ་དང་ལས་འབྲེལ་མེད་པས་ལོག་པའི་ཆོས་ལ་སྲེད་པ། ཡང་དག་པའི་བླ་མ་མེད་པས་བརྒྱུད་པའི་བྱིན་རླབས་མ་ཞུགས་པ། ངོ་ཚ་དང་གཉེན་པོ་ཆུང་བས་སྡོམ་དང་དམ་ཚིག་འཆལ་ཞིང་། ཞི་དུལ་དང་བཟོད་པ་མེད་པས་རང་རྒྱུད་རྩུབ་པ། ཀུན་སྤྱོད་དང་སྐལ་བ་ངན་པས་འགྲོགས་ཚད་ལ་ཉོན་མོངས་འགོ་བ། ཐོས་བསམ་དང་བསགས་པ་ཆུང་བས་རང་གཞན་ལོག་པའི་ལམ་ལ་འགོད་པ། བདུད་དང་བགེགས་ཆེན་ཞུགས་པས་རང་གཞན་བཀྲ་མི་ཤིས་པ། གོམས་པ་ཉོན་མོངས་ཆེ་བས་མི་དགེ་འཕེལ་ཞིང་། ལེགས་པའི་ཆོས་དང་རིང་བས་བཀྲ་ཤིས་དང་དགེ་ལེགས་ཐམས་ཅད་འགྲིབ་པ་སྟེ། དེ་ནི་སྡིག་པའི་བཤེས་གཉེན་དང་སྡིག་པའི་གྲོགས་དང་བཅས་པའི་མཚན་ཉིད་ལགས་སོ། །གཉིས་པ་ལ། དེ་དག་དང་འགྲོགས་པའི་ཉེས་པ་དང་། དེས་ན་དེ་སྤང་བར་གདམས་པ་གཉིས། དང་པོའི་སྤྱི་དང་བྱེ་བྲག་གཉིས། དང་པོ། དེ་ལྟ་བུའི་མི་དགེ་བའི་བཤེས་གྲོགས་དང་འགྲོགས་པའི་ཉེས་པ་ནི་ཚད་མེད་དེ། རེ་ཞིག་བསྡུ་ན། རང་རྒྱུད་ངན་ཞིང་བླ་མ་དང་མཆེད་གྲོགས་ལ་དག་སྣང་ཆུང་བ་དང་ཕྱོགས་རེ་ཙམ་གྱིས་ཁེངས་ཤིང་རང་ཕྱོགས་ལ་མཆོག་ཏུ་འཛིན་པ་དང་། བདག་ལ་བསྟོད་པ་དང་། གཞན་ལ་སྨོད་པ་དང་། ཡང་དག་པའི་དམ་པའི་ཆོས་སྤོང་ཞིང་གྲུབ་མཐའ་གཞན་ལ་ཟུར་གྱིས་སྨོད་པ་དང་། ཐེག་ཆེན་ཚུལ་བཞིན་སྟོན་པའི་དགེ་བའི་བཤེས་གཉེན་ལ་མི་བསྔགས་ཤིང་སྐུར་བ་འདེབས་པ་དང་། ནོར་རྫས་ལ་སྲེད་ཅིང་དུག་ལྔ་རགས་པས་ཆགས་སྡང་གི་དུག་མདའ་འཕེན་པ། འཇིག་རྟེན་ཚེ་འདིའི་དབང་དུ་གྱུར་པ་དང་། ཐར་པའི་ལམ་ལ་རྒྱབ་ཀྱིས་ཕྱོགས་པ་སྟེ། མདོར་ན། དགེ་ལེགས་ཐམས་ཅད་འགྲིབ་ཅིང་མི་དགེ་བ་ཐམས་ཅད་ངང་གིས་འཕེལ་བ་ཡིན་པས་དང་པོ་ནས་སྡིག་པ་འཕེལ་བའི་སློབ་དཔོན་དང་གྲོགས་ལ་བསྟེན་འདྲིས་མི་བྱའོ། །གཉིས་པ། རྣམ་གྲངས་གཞན་ཡང་རང་ཉིད་གང་དང་འགྲོགས་པ་དེ་ཡི་སྐྱོན་ནམ་ཉེས་པ་དེ་འཕྲལ་དུ་འགོ་བར་འགྱུར་སྟེ། གྲོགས་སམ་བླ་མའི་རིགས་གཏི་མུག་ཅན་བསྟེན་ན་ཐོས་བསམ་དང་ཤེས་རབ་འགྲིབ། ཞེ་སྡང་ཅན་དང་འགྲོགས་པ་ལས་གདུལ་བར་མ་རུངས་པའི་རང་རྒྱུད་ངན་ཞིང་གདུག་རྩུབ་ཆེ། དེ་བཞིན་དུ་འདོད་ཆགས་ཅན་ལས་ཡུལ་ཟས་ནོར་དང་བུད་མེད་སོགས་ལ་འདོད་ཅིང་སྲེད་པ་འཕེལ། ང་རྒྱལ་ཤས་ཆེ་བ་དང་འགྲོགས་ན་ཕྱོགས་རིས་སུ་གཅོད་པ་དང་ཕྱོགས་གཉིས་སུ་འཛིན་པའི་ཉེས་པ་འགོ ཕྲག་དོག་ཤས་ཆེ་དང་འགྲོགས་ན་གཞན་ལ་འགྲན་སེམས་ཀྱི་ཟུག་རྔུ་ཉིད་སྐྱེད་དོ། །སྐྱོན་དེ་དག་སྤེལ་མ་དང་འགྲོགས་ན་རང་ལ་ཡང་ཉེས་ཀུན་སྤེལ་མར་འགོ་ཞིང་། གཞན་ཡང་ངེས་འབྱུང་མེད་པ་དང་། ཚེ་འདིར་མངོན་པར་དགའ་བ་དང་། ཚེ་འདིའི་འདུན་གྲོས་མཁན་དང་། རྩེ་འཇོ་མཁན་དང་། འཇོ་སྒེག་ཅན་ཏེ་འཕྱོར་པོ་ལྟ་བུ་དང་། ཆེ་བཙན་ལ་དགའ་བ་དང་། ནོར་ལ་སྲེད་པ་དང་། ཚོང་ཁེ་སྤོགས་མཁན་དང་། བཟོ་ཡི་ལས་བྱེད་པ་ལ་སོགས་གང་དང་འགྲོགས་པར་གྱུར་པ་དེ་དང་དེའི་ཀུན་སྤྱོད་སྐལ་བ་ངན་པ་དག་བདག་ལ་ཡང་འགོས་པར་འགྱུར་བས་དེ་དག་དང་འགྲོགས་པ་སྤང་བར་བྱའོ། །ཁྱད་པར་བཤེས་གཉེན་ཐོས་བསམ་ལ་རྨོངས་པ་དག་དང་འགྲོགས་པའི་ཉེས་པ་ཡང་ཤིན་ཏུ་ཆེ་སྟེ། སྤྱིར་འཁོར་རྩ་མ་རིག་པ་ལས་བྱུང་བའི་ཕྱིར་དང་། བྱེ་བྲག་ལམ་སྒྲུབ་པ་ལ་སློབ་དཔོན་མི་ཤེས་པ་བསྟེན་པ་གྱོང་ཆེ་སྟེ་ལམ་མ་ཡིན་པ་ལ་སྦྱོར་བའི་ཕྱིར། དེ་ཡང་ཐོས་བསམ་ཚིག་གིས་སངས་རྒྱས་མི་ཐོབ་ཅེས་བཀའ་ལུང་ལ་སྐུར་བ་འདེབས་པ་དང་། དེ་བཞིན་དུ། བྱས་ཆོས་འཁོར་བ་ཡིན་པས་བྱར་མེད་ནམ་མཁའ་ལྟ་བུ་སྒོམས་ཤིག་ཅེས་ལམ་ཚོགས་གཉིས་དང་། སངས་རྒྱས་ཀྱི་ས་ན་སྟོབས་སོགས་བཤད་པ་དྲང་དོན་ཡིན། དོན་ལ་ཅི་ཡང་མེད་ཅེས་འབྲས་བུ་དང་། གནས་ལུགས་བདེ་གཤེགས་སྙིང་པོ་ཡོན་ཏན་ལྷུན་གྲུབ་ཏུ་གསུངས་པ་ལ་དྲང་དོན་དུ་འདོད་པས་གཞི་ལ་དང་། ས་ལམ་ཏིང་འཛིན་སོགས་དྲང་བ་ཙམ་ལས་དོན་ལ་མེད་ཅེས་རྣམ་གྲོལ་གྱི་ཡོན་ཏན་ལ་སྐུར་བ་འདེབས་པ་སོགས་མདོ་རྒྱུད་མན་ངག་ལུང་རིགས་གང་དང་ཡང་མི་མཐུན་པར་སྟོན་པ་བླ་མའི་གཟུགས་བརྙན་ཏེ། དེ་ལྟ་བུ་དང་འགྲོགས་ན་དང་པོ་ཤེས་ཀྱང་བརྗེད། ཕྱིས་ཡོན་ཏན་གསར་དུ་སྐྱེ་བའི་གནས་མེད་དེ། སྒྲ་ཚད་སོགས་ཤེས་བྱའི་གནས་ཐམས་ཅད་ལ་རྨོངས་པར་འགྱུར་བ་དང་། གཞུང་ལུགས་ཕྱོགས་རེས་ཁེངས་ནས་གྲུབ་མཐའ་མཐའ་དག་བློར་མི་ཤོང་བ་དང་། ཐར་པར་བགྲོད་པའི་ལམ་ཡང་དག་མི་ཤེས་པ་དང་། ལྟ་སྤྱོད་ཕྱིན་ཅི་ལོག་པའི་ལམ་དུ་བགྲོད་པར་འགྱུར་བས་གཏན་གྱི་འདུན་མ་འཆུགས་པའི་ཉེས་པ་ཡོད་པའི་ཕྱིར་སྤང་བར་བྱ་ཞིང་དེ་ལྟ་བུས་གཞན་ལ་མི་ཤེས་བཞིན་དུ་ཆོས་སྟོན་པ་ནི་སེམས་ཅན་དམྱལ་བ་ཆེན་པོའི་རྒྱུར་སངས་རྒྱས་མཛོད་ཀྱི་མདོ་ལས་གསུངས་སོ། །ཁྱད་པར་རང་གི་བླ་མ་དང་ཆོས་ལ་མི་དད་པ་དང་། དགེ་ཕྱོགས་ལ་བརྩོན་མེད་ལེ་ལོ་ཅན་སོགས་དང་འགྲོགས་པས་བྱིན་རླབས་ཀྱི་ན་བུན་ཡལ། ཐར་པའི་ལམ་དང་བྲལ། དགེ་བ་འགྲིབ་ཅིང་མི་དགེ་བ་འཕེལ། བསྟན་པའི་སྤྱི་སྲོལ་ཉམས། ཚོགས་གཉིས་ཀྱི་འཕེལ་སྒོ་ཆད། སྒྲུབ་ལ་གཡེལ་ཞིང་དངོས་གྲུབ་ཡིད་སྨོན་དུ་ལུས། སྔར་ཡོད་ཀྱི་དད་པ་མོས་གུས་སོགས་ཡོན་ཏན་གྱི་ཚོགས་རྣམས་ཉམས་པར་བྱེད་དེ། དྲན་པ་ཉེར་བཞག་ལས། དགེ་བའི་ཆོས་ཐམས་ཅད་ཀྱི་བར་དུ་གཅོད་པའི་གཙོ་བོ་ནི་སྡིག་པའི་གྲོགས་པོ་ཡིན་ལ། དེ་དང་ལྷན་ཅིག་འགྲོགས་པའམ། གཏམ་སྨྲ་བའམ་གྲིབ་མ་ཕོག་པ་ཙམ་ཡང་སྤང་བར་བྱའོ། །ཞེས་གསུངས། གཞན་ཡང་ཐེག་པ་དམན་པའི་རིགས་ཅན་དང་འགྲོགས་ན་རང་ཉིད་གཅིག་པུ་ཞི་ལ་མོས་ཏེ་ཐེག་ཆེན་གྱི་སྐལ་བ་ཆད། འགྲོ་དོན་ལ་སེམས་སྟོབས་ཆུང་ཞིང་གཞན་དོན་ལ་བརྩོན་པ་གཡེལ། རྩ་བ་སྙིང་རྗེ་མེད་པ་སོགས་ཐེག་པ་མཆོག་གི་དོན་དང་འགལ་བས་ཉེས་པ་མང་པོ་དང་ལྡན་པ་སྟེ་རང་རྒྱུད་ལ་འགོ་བར་འགྱུར་རོ། །དེ་བཞིན་དུ་ཡང་དག་པའི་ལྟ་བ་དང་ཏིང་ངེ་འཛིན་མེད་པ་དང་འགྲོགས་ན་ཆོས་ཉིད་ཀྱི་དོན་ལས་རིང་། བསླབ་པ་འཆལ་བ་དང་འགྲོགས་ན་སྲུང་སྡོམ་འཆོར། སྣང་སྟོང་ཟུང་འཇུག་མཉམ་པ་ཆེན་པོའི་དོན་རིགས་ལམ་གྱིས་མ་དྲངས་པར་ཐ་མལ་རིག་ཅིང་ཤེས་པ་ཙམ་གནས་ལུགས་སུ་བརླམས་ནས་སྐྱོང་བ་དང་འགྲོགས་ན་གནས་ལུགས་ལ་སྒྲོ་འདོགས་མི་ཆོད་པ་དང་། རྙེད་པ་འཚོལ་བ་དང་འགྲོགས་ན་ལྟོ་གོས་ཀྱི་ཁོལ་བོར་འཆོལ། གནད་མེད་དབེན་པར་གཅིག་པུར་ཞེན་པ་དང་འགྲོགས་ན་སངས་རྒྱས་ཀྱི་ཆོས་ལས་ཉམས། སྟོང་པ་ཁ་འབྱམས་ཀྱི་ལྟ་བ་ཅན་དང་འགྲོགས་ན་རྒྱུ་འབྲས་ཁྱད་དུ་གསོད། ཆོས་ལ་ཉམས་ལེན་ཅུང་ཟད་ཀྱང་མེད་པའི་ཐ་སྙད་མཁན་དང་འགྲོགས་པ་ན་དོན་མེད་ཚིག་ལ་དགའ་ཞིང་ཉམས་ལེན་དྲེད་པོར་འཆོར་བ་སོགས་དེ་དག་གི་ཉེས་པའམ་བྱུར་འགོ་བས། ཆོས་ཐམས་ཅད་དོན་མེད་ཚིག་ཕྱིར་ཙམ་དུ་འབྲེང་བ་ནེ་ཙོའི་འདོན་པ་འདྲ་བར་རང་གི་རྒྱུད་ལ་ཕན་པ་ཅུང་ཟད་ཀྱང་མེད་པར་འགྱུར་བ་ཡིན་ནོ། །གཉིས་པ་ལ། དངོས་དང་། བརྟགས་ནས་སྤང་དགོས་པའི་འཐད་པ་དཔེས་འགོད་པ་གཉིས། དང་པོ། གོང་སྨོས་དེ་དག་དང་འགྲོགས་པས་ཐར་ལམ་གྱི་བར་དུ་གཅོད་པར་བྱེད་དེ། ཅིའི་ཕྱིར་ན་སྔར་ཡོད་ཀྱི་དགེ་བ་མཐའ་དག་འགྲིབ་ཅིང་མི་དགེ་བ་འཕེལ་བས་གནས་སྐབས་ཀྱི་བདེ་འགྲོའི་གནས་ཙམ་ཀྱང་མི་འགྲུབ་ན། མཐར་ཐུག་ཞི་བདེའི་བྱང་ཆུབ་འགྲུབ་པ་སྨོས་ཅི་དགོས་ཏེ་གནས་མེད་སྐབས་མེད་དོ། །དེས་ན་སྡིག་པའི་གྲོགས་པོ་སྤང་བ་ལ་བརྩོན་པར་བྱའོ། །གཉིས་པ་ལ། ཆོམ་རྐུན་གྱི་དཔེས་བཤེས་གཉེན་ངན་པ་སྤང་བར་གདམས་པ་དང་། སྐྱེལ་མ་དང་ཉོ་ཚང་གི་དཔེས་སྟོན་པ་དང་ཆོས་ལྟར་སྣང་བ་སྤང་བར་གདམས་པ་གཉིས། དང་པོ། ཇི་ལྟར་ལམ་འཕྲང་འབྲོག་དགོན་པར་བགྲོད་པའི་མགྲོན་པོ་དག་ཆོམ་རྐུན་གྱི་འཇིགས་པས་བཅོམ་པ་ལའང་འཇིགས་པར་ལྟ་ན། ཆོམ་རྐུན་དེ་ཡིས་ཚེ་འདི་ཡི་ནོར་དང་། ཆེས་ན་སྲོག་ཙམ་འདོར་གྱི་དེ་ལས་གཏན་གྱི་བདེ་བ་འཕྲོག་པར་ཡོང་མི་ནུས་ལ། མི་དགེའི་བཤེས་གཉེན་བསྟེན་པའི་འགྲོ་བ་རྣམས་ནི། དམ་པས་བརྙས་ཤིང་སྨད་པ་དང་། དཀར་ཕྱོགས་ཀྱི་ལྷས་འདོར་བས་གནོད་འཚེ་མང་ཞིང་། སྡུག་བསྔལ་འབྱུང་གནས་ཏེ་མི་འདོད་པ་ཐམས་ཅད་ཐོག་ཏུ་འབབ་པས་མཐོང་བའི་ཆོས་ཚེ་འདིར་ཡང་ཕུང་ལ། ཕྱི་མར་ངན་སོང་གི་འགྲོ་བར་འགྲོ་ཞིང་གཏན་དུ་སྲིད་མཚོར་འཁྱམ་མོ། །དེས་ན་གཏན་དུ་བདེ་བའི་ནོར་མཆོག་བྲལ་བར་བྱེད་པ་ལ་མི་འཇིགས་པའི་སྐྱེ་བོ་དེ་ནི་བདུད་ཀྱིས་བསླུས་པ་ལགས་ཏེ་བསླུས་པར་རིགས་སོ། །གཉིས་པ། འདི་ལྟར་འཇིག་རྟེན་ན་ཡང་འཇིག་རྟེན་པ་དག་གིས་རབ་ཏུ་རྟོག་པའི་དཔེ་བཤད་ན། ཇི་ལྟར་སྐྱེལ་མའི་གང་ཟག་གམ་སྐྱེལ་མར་བཟུང་བའི་ཡུལ་དེ་བཟང་པོ་ཞིག་གམ་ངན་པ་ཞེས་རང་གིས་རྟོག་ཅིང་གཞན་ལ་འདྲི་སྟེ། དེས་སྐྱེལ་ཨེ་ཐུབ་རྟོག་པར་བྱེད་དོ། །ཉིན་གཅིག་གི་སྐྱེལ་མ་ལ་དེ་ལྟར་བརྟགས་ན་གཏན་གྱི་ཐར་པ་འདོད་མཁན་རྣམས་ལ་ནི་བཤེས་གཉེན་བཟང་ངན་ཇི་འདྲ་ཞེས་དྲི་རྟོག་མེད་པ་དེ་ནི་བློ་གྲོས་བླུན་པོ་བདུད་སྡེས་དངོས་སུ་བཅོམ་པ་ཞེས་བྱ་སྟེ་ལོག་པའི་བཤེས་གཉེན་ནི་གཏན་བདེ་འཕྲོག་པའི་བདུད་དངོས་ཡིན་པས་སོ། །དར་ཟབ་སོགས་ཕལ་པའམ་དངོས་པོ་དམན་པའི་ནོར་དག་ཉོ་ཚོང་བྱེད་ན་ཡང་། རང་གིས་མི་ཤེས་པ་དག་གཞན་ལ་དྲི་བར་བྱེད་མོད། དེང་སང་གང་བྱུང་གི་ཆོས་ལྟར་སྣང་བ་བཅོས་མ་སྣ་ཚོགས་ཀྱི་ལམ་དེར་འཇུག་པ་དག་ནི་རྣམ་དཔྱོད་ཀྱི་མིག་མེད་པས་ཐོས་བསམ་སྣང་བ་སྒྲིབ་པའམ་མདོངས་པར་སོང་བ་ཡིན་ལ། དེ་དག་གིས་ཐོས་བསམ་གྱི་ཤེས་རབ་ཀྱི་མིག་དང་ལྡན་པ་གཞན་ལ་ཞེན་ལྟའི་དབང་གིས་དྲི་བའི་རྟོག་པ་ཙམ་ཡང་མེད་པར། རྟོག་གེའི་རང་བཟོའི་ཆོས་དེ་སྤེལ་བས་ཐར་འདོད་སྐྱེ་བོ་མང་པོ་བདུད་ཀྱིས་བསླུས་པར་གྱུར་ཏོ། །གསུམ་པ་བརྟགས་ནས་སྤང་བའི་ཕན་ཡོན་ནི། དེས་ན་འདིར་ནི་སྡིག་པའི་གྲོགས་པོ་བརྟགས་ཏེ་སྤང་བར་བྱ་ལ། དེ་ཡི་ཕན་ཡོན་གྱི་མཆོག་དམ་པ་ཚད་མེད་དེ། ལམ་ཕྱིན་ཅི་ལོག་པར་མི་ལྟུང་བ་དང་། དུས་རྟག་ཏུ་དགེ་བ་འཕེལ་བ་དང་། དམ་པས་བསྟོད་ཅིང་ཡོན་ཏན་གྱི་ཚོགས་རྒྱ་ཆེན་པོ་རབ་ཏུ་འགྲུབ་པར་འགྱུར་རོ། །དེ་བཞིན་དུ་མི་བརྗེད་པའི་དྲན་པ་དང་། ཏིང་ངེ་འཛིན་དང་། ཤེས་རབ་རྒྱ་ཆེ་བ་དང་ལྡན་ཞིང་། ཚེ་འདིར་ཡང་བདེ་ལ་ཕྱི་མར་ལེགས་པ་སྟེ། ཕལ་པའི་མཐོ་རིས་ལས་འཕགས་པའི་བདེ་བ་ཅན་སོགས་དག་པའི་ཞིང་ལ་མངོན་བརྗོད་དུ་མཐོ་རིས་གང་གཱའི་ཆུ་ངོགས་སུ་གྲགས་པ་དེར་ལེགས་པར་བགྲོད་པ་སྟེ་ཕྱིན་ཅིང་ཞིང་དེ་རྣམས། རྒྱལ་བའི་སྲས་ས་ལ་གནས་པ་རྣམས་དང་དེ་དག་གི་བསོད་ནམས་དང་ཡེ་ཤེས་ལས་བསྐྲུན་པའི་འབྱོར་པ་དཔག་བསམ་གྱི་ཤིང་ལ་སོགས་པས་ཡོངས་སུ་གང་བ་དག་མཐོང་ཞིང་ས་དང་ལམ་དང་གཟུངས་དང་ཏིང་ངེ་འཛིན་གྱིས་རྣམ་པར་འཕྲུལ་ཞིང་བྱང་ཆུབ་ཐོབ་པར་འགྱུར་རོ། །ཞེས་སོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། སྡིག་པའི་གྲོགས་པོ་སྤང་བའི་ལེའུ་སྟེ་དགུ་པའི་འགྲེལ་པའོ།། །། ༈ གཉིས་པ་ཇི་ལྟར་ཐོས་པ་བྱ་བའི་ཚུལ་ལ། སློབ་དཔོན་གྱིས་འཆད་ཚུལ་དང་། སློབ་མའི་ཉན་ཚུལ་གཉིས། དང་པོ་ལ། ལེའུ་མཚམས་སྦྱོར་བ་དང་། སྐབས་དོན་དངོས་གཉིས། དང་པོ། དེ་ལྟར་སྡིག་པའི་གྲོགས་པོ་བརྟགས་ནས་སྤངས་པར་བྱས་ཤིང་། དགེ་བའི་བཤེས་གཉེན་ཡོངས་སུ་བསྟེན་པ་ན། དེ་ལས་དོན་དུ་གཉེར་བྱ་ཐར་པའི་རྒྱུར། དང་པོ་ཐོས་པའི་ཤེས་རབ་བསྐྱེད་པར་བྱ་དགོས་ཏེ། ཐོས་པའི་ཤེས་རབ་འདི་ནི་ཐར་པའི་རྩ་བ་ལགས་པར་གསུངས་པའི་ཕྱིར། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། ཞེས་སོ། །གཉིས་པ་ལ། གང་ལ་བཤད་པའི་ཡུལ། ཇི་ལྟར་བཤད་པའི་ཚུལ། དེ་ལྟར་བཤད་པའི་ཕན་ཡོན་གསུམ། དང་པོ། དེ་ལ་བླ་མ་གང་ཞིག་མང་དུ་ཐོས་ཤིང་ཡོན་ཏན་བཅུ་ལྡན་གྱི་སྟེ། གདུལ་བྱའི་བློ་རིགས་མི་ཤེས་པ། ཤེས་བྱའི་དོན་ལ་རྨོངས། ངག་ཚིག་གི་སྡེབ་མི་ཤེས་པ། ཟང་ཟིང་གི་རྙེད་པ་ལ་ལྟ་བ། ཆོས་ལ་དཔེ་མཁྱུད་བྱེད། འཇིག་རྟེན་གྱི་གྲགས་པ་འདོད་པ། ཆོས་ལ་སྦྱོར་བ་ཞན་པ། གཞན་དོན་གྱི་ལས་ལ་སྐྱོ་བ། ང་རྒྱལ་དང་ཕྲག་དོག་ཆེ་བ། ཆོས་ལ་སེར་སྣ་བྱེད་པ། ཆོས་དང་རང་རྒྱུད་འཛོལ་བའི་ཉེས་པ་སྟེ་དེ་བཅུ་དང་བྲལ་བའི་ཟློག་ཕྱོགས་ཀྱི་ཡོན་ཏན་བཅུ་དང་ལྡན་པ་ལས་ཐོས་པར་བྱའོ། །དེ་ལྟ་བུའི་བླ་མ་མཆོག་དེས་སྐལ་བཟང་གི་སློབ་མ་རྣམས་ལ་དམ་པའི་ཆོས་ནི་ཡོངས་སུ་འཆད་པ་ན། ཐོག་མར་སྣོད་དེ་ཉེད་ཀྱི་དབང་པོ་ལེགས་པར་བརྟག་པ་གཅེས་ཏེ། སྣོད་དེ་ཡང་བྱིས་པ་བཙས་ནས་རིང་དུ་མ་ལོན་པ་དང་། དེ་ལས་ན་ཚོད་རྒན་པ་བཞིན་ཡིན་ཏེ། དེ་གཉིས་ནི་ཁ་ཟས་ཐ་དད་པ་སྟེ་འཇམ་དང་རྩུབ་ཆེ་བ་ལྟར་གདུལ་བྱ་དེ་ཡི་ཆོས་ཀྱང་རང་བཞིན་ཐ་དད་པ་ཡིན་ཏེ་བློ་དབང་གིས་ཆོས་ཐེག་པ་ཆེ་ཆུང་སྣ་ཚོགས་སུ་སྣང་བ་སྟེ། བཀོད་པ་ཆེན་པོ་ལས། དམན་པ་གསུམ་ལ་བསྟན་པ་ནི། །འདུལ་བ་མདོ་སྡེ་མངོན་པ་སྟེ། །འབྲིང་པོ་གསུམ་ལ་ངས་བསྟན་པ། །ཀྲཱི་ཡ་ཡོ་ག་ཨུ་པའོ། །ཆེན་པོ་རིམ་ལྡན་གསུམ་དག་ལ། །བསྐྱེད་དང་རྫོགས་པ་ཆེན་པོ་བསྟན། །ཞེས་དང་། ཞི་བ་ལྷས། དམན་ལ་མཆོག་གི་ཆོས་མི་བསྟན། །རྒྱ་ཆེན་ཆོས་ཀྱི་སྣོད་གྱུར་པ། །དམན་པའི་ཆོས་ལ་སྦྱར་མི་བྱ། །ཞེས་གསུངས་པ་ལྟར་རོ། །གཉིས་པ་ལ། གོ་རིམ་ཇི་ལྟར་བཤད་པ་དང་། ཆོས་གང་བཤད་པ། ཚུལ་ཇི་ལྟར་འཆད་པ་གསུམ། དང་པོ་ལ། དངོས་དང་། དེ་ལྟར་བཤད་པའི་ཕན་ཡོན། མ་བཤད་པའི་ཉེས་དམིགས་གསུམ། དང་པོ། དེ་ལྟར་བརྟགས་ནས་ཐེག་དམན་ནས་བརྩམས་ཏེ་ཆེན་པོའི་བར་རིམ་པར་ཁྲིད་པའི་ཚུལ་གྱིས་བཤད་པར་བྱ་སྟེ། དེང་སང་རིག་རྐྱང་ངོས་ཟིན་པས་ཆོས་ཟེར་བ་ལྟར་མི་བྱ་སྟེ། དེ་ལྟར་ན་སངས་རྒྱས་ཀྱིས་དེ་ཁོ་ན་ལས་གཞན་དུ་གསུངས་པ་དོན་མེད་དུ་ཐལ་བ་དང་། ཐབས་རྒྱ་ཆེན་པོ་མི་ཤེས་པས་ཐབས་དང་བྲལ་བས་སངས་རྒྱས་མི་འགྲུབ་པ་དང་། ད་ལྟའི་རིག་པ་དེའང་ཐོས་པ་དང་བླ་མའི་རྣལ་འབྱོར་ལ་བརྟེན་དགོས་པས་རང་ཚིག་བསལ་བ་ལ་ཞུགས་པ་ཡིན་ནོ། །སྤྱིར་སློབ་དཔོན་གདུལ་བྱའི་ཁམས་དབང་བསམ་པ་བག་ལ་ཉལ་མཁྱེན་པ་ཞིག་ན་དང་པོ་ནས་ཟབ་མོའི་དོན་བསྟན་ཀྱང་ཐོད་རྒལ་དུ་ཡེ་ཤེས་སྐྱེ་བ་སྲིད་ཀྱང་། མངོན་ཤེས་མེད་པའི་གང་ཟག་གིས་དེ་ལྟར་མི་རུང་ལ་གལ་ཏེ་ཐེག་ཆེན་གྱི་རིགས་ཅན་ལའང་ཐེག་པ་རིམ་གྱིས་བཤད་པ་མི་འགལ་ལོ། །འོ་ན་ཐེག་ཆེན་གྱི་རིགས་ལ་དམན་པ་བཤད་པར་མི་བྱ་ཅི་ལྟར་གསུངས་ཞེ་ན། དེ་ནི་དམན་པ་ངེས་དོན་དུ་བཟུང་ནས་བཤད་པ་ལ་ཟེར་གྱི། ལར་མི་བཤད་པ་མིན་ཏེ། གོང་མ་གོང་མའི་ལམ་སྟེགས་དང་། གོང་མ་རྟོགས་པའི་རྒྱུ་སྟེ་ཆོས་ཐམས་ཅད་དེ་བཞིན་ཉིད་ལ་གཞོལ་ཞིང་འབབ་པ་ཤ་སྟག་ཡིན་པའི་ཕྱིར་རོ། །གཉིས་པ། དེ་ལྟར་བཤད་པ་དེས་ནི་ཐེག་པའི་གོང་འོག་གི་རིམ་པ་ཤེས་པ་དང་། ཡོན་ཏན་གོང་ནས་གོང་དུ་འཕེལ་བ་དང་། ཟབ་མོའི་དོན་རྟོགས་དཀའ་བ་ལ་འཇིགས་དངངས་དང་སྐྲག་པ་མེད་པ་དང་། ལམ་གོང་མ་ལ་ཡང་ཐོས་རྒྱ་ཆོད་པས་ནོར་བ་མེད་ཅིང་། ལྟ་སྤྱོད་ཟུང་འབྲེལ་ཏེ་རིས་སུ་མ་ཆད་པར་འགྱུར་རོ། །དེ་ཡང་ཡེ་ཤེས་རོལ་པ་ལས། སྟོང་པ་ཉིད་དང་སྙིང་རྗེའི་བདག །དཔལ་ལྡན་འབྱོར་པ་དམ་པའི་ལམ། །རྣམ་འབྱོར་ཅན་གྱིས་བརྩོན་བྱས་ན། །མཆོག་དང་ཐུན་མོང་དངོས་གྲུབ་འགྲུབ། །ཅེས་གསུངས་པ་ལྟར་བསོད་ནམས་དང་ཡེ་ཤེས་ཀྱི་ཚོགས་ཀྱིས་ཁམས་ཀྱི་སྐུ་གསུམ་ལ་སྒྲིབ་པའི་དྲི་མ་བསལ་ནས། ཆོས་སྐུ་དང་གཟུགས་སྐུ་མངོན་དུ་བྱེད་ལ། ཐབས་སྙིང་རྗེ་ཆེན་པོས་ཉན་རང་གི་ཞི་བ་ལས་བཟློག་ནས་སེམས་ཅན་གྱི་དོན་བྱེད་ཅིང་། ཤེས་རབ་སྟོང་ཉིད་བསྒོམས་པས་སྲིད་པའི་ཆ་ལས་རྣམ་པར་གྲོལ་བའི་ཕྱིར་ནའོ། །གསུམ་པ། དེ་ལྟར་རིམ་པར་མ་བཤད་པའི་སྐྱོན་ནི་ཚད་མེད་དེ། གོང་འོག་སྔ་ཕྱིའི་རིམ་པ་དང་བྲལ་བས་སངས་རྒྱས་བསྟན་པའི་སྤྱི་སྲོལ་རིམ་གྱིས་འཇོག་པའི་རིམ་པ་ལས་ཉམས་པ་དང་། བློ་ཆུང་བ་རྣམས་ཟབ་མོའི་དོན་ལ་དངངས་སྐྲག་སྐྱེ་ཞིང་ལོག་ལྟས་ཆོས་འདོར་བ་དང་། གོ་རིམ་བཞིན་འོག་མའི་གནད་མ་ཤེས་པས་གོང་མའི་གནད་ཕྲ་བའི་དོན་ཟབ་མོར་ཏེ་ཞིབ་པར་མི་རྟོགས་པ་དང་། རྒྱ་ཆེ་བའི་ཐབས་འདུས་བྱས་ཀྱི་དགེ་བ་ཁྱད་དུ་གསོད་པ་དང་། དངོས་པོའི་དོན་ལ་རང་བཞིན་མིན་པའི་སྒྲོ་སྐུར་རྒྱར་འགྱུར་བ་དང་། དགེ་སྡིག་གི་རྒྱུ་འབྲས་ཞིབ་ཏུ་མི་བྱེད་པར་འཆོལ་བ་དང་། རང་གི་རྒྱུད་དང་བསྟུན་དེ་ལམ་གྱི་བླང་དོར་མི་ཤེས་པ་དང་། ཤེས་བྱ་སྤྱིའི་དོན་ལ་རྨོངས་པ་དང་། ཐེག་ཆེན་གྱི་སེམས་བསྐྱེད་དང་གཞན་དོན་སྙིང་རྗེ་སྤངས་པ་དང་། སྟོང་པ་ཁ་འབྱམས་ཀྱི་ལྟ་བ་དང་ལྡན་ཏེ་ངན་འགྲོར་བསླུས་པ་དང་། ཅིར་ཡང་བྱར་མེད་ཟེར་ནས་ཆོས་མེད་ཐ་མལ་དུ་ལུས་པ་དང་། མ་སྨིན་པའི་འགྲོ་ལ་སྔགས་ཀྱི་ཟབ་དོན་གསང་བ་སྒྲོག་པ་སྟེ། དེ་ལ་སོགས་པའི་ཉེས་པ་མང་པོ་དང་ལྡན་པའི་ཕྱིར་ཐེག་པ་རིམ་གྱིས་བཤད་དགོས་པ་ཡིན་ནོ། །གཉིས་པ་གང་བཤད་པ་ལ། སྤྱི་དང་། བྱེ་བྲག་གཉིས། དང་པོ། གང་བཤད་བྱའི་ཆོས་ནི་གོང་དུ་བགྲོད་པར་བྱ་བའི་ལམ་དང་འབྲས་བུའི་ཆོས་ཐེག་པ་ཆེ་ཆུང་གི་རྣམ་གྲངས་ཐམས་ཅད་དང་། གང་ཞིག་ཤེས་ནས་བླང་བར་བྱ་བ་ལ་འགོག་ལམ་གྱིས་བསྡུས་པ་མྱང་འདས་ཕྱོགས་ཀྱི་ཆོས་དང་། དོར་བར་བྱ་བ་འཁོར་བའི་ཆོས་སྡུག་བསྔལ་ཀུན་འབྱུང་། ཐུན་མོང་དུ་གྱུར་པ་ཤེས་བྱ་རིག་པའི་གནས་སུ་གྱུར་པ་རྣམས་ཐམས་ཅད་དེ། དུས་གཅིག་ལ་ལམ་མི་བགྲོད་ཅིང་ཆོས་གཅིག་ཁོ་ནས་ཐར་པ་མི་འགྲུབ་པའི་ཕྱིར་ཏེ། མདོ་རྒྱན་ལས། རིག་པའི་གནས་ལྔ་དག་ལ་བརྩོན་པར་མ་བྱས་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་ཐོབ་མི་འགྱུར། །གཞན་དག་ཚར་བཅད་རྗེས་སུ་བཟུང་བ་བྱ་ཕྱིར་དང་། །བདག་ཉིད་ཀུན་ཤེས་བྱ་ཕྱིར་དེ་ལ་དེ་བརྩོན་བྱ། །ཞེས་སོ། །གཉིས་པ་ནི། དེ་ལས་ཀྱང་བྱེ་བྲག་དུ་དང་པོའི་ལས་ཅན་རྣམས་ལ་ལས་རྒྱུ་འབྲས་ཀྱི་ཆོས་དང་། ལམ་ལ་ཞུགས་པ་རྣམས་ལ་ཐེག་པ་གོང་འོག་གི་གྲུབ་མཐའི་རྣམ་གྲངས་དང་། གཞན་དོན་སྤྱོད་པ་རྣམས་ལ་རིག་པའི་གནས་ལྔ་སོགས་དང་ཟབ་ཅིང་རྒྱ་ཆེའི་སྟེ་ཟབ་པ་དོན་དམ་དང་། རྒྱ་ཆེ་བ་ཀུན་རྫོབ་དང་ལམ་སོགས་ཀྱི་རིམ་པ་རྣམས་དང་། ཁྱད་པར་ངེས་འབྱུང་སྒྲུབ་པ་སྙིང་པོར་བྱེད་པ་རྣམས་ལ། ཚིག་ཉུང་ལ་དོན་དུ་དྲིལ་བས་མྱུར་དུ་ཐར་པར་བགྲོད་པའི་གནད་ཟབ་མོ་རྣམས་སོ་སོའི་བློ་རིམ་དང་མཐུན་པ་རྣམ་པར་བཤད་དོ། །གསུམ་པ་ཚུལ་ཇི་ལྟར་འཆད་པ་ལ། མི་མཐུན་ཕྱོགས་སྤང་བ་དང་། མཐུན་ཕྱོགས་བསྒྲུབ་པ་གཉིས། དང་པོ། དེ་ལྟར་ཆོས་འཆད་པ་དེ་ལ་ཡང་མི་མཐུན་པའི་རྐྱེན་རྣམས་སྤང་བྱར་བསྟན་པ་ནི། ཕྱི་དང་ནང་གི་འདུ་འཛིར་གྱུར་པ་བསྙེན་བཀུར་ཕྱིར་མགྲོན་དུ་བོས་པས་དུས་འགྱངས་པ། ཟང་ཟིང་གི་རྙེད་པ་དང་། མྱོས་པའི་རྒྱུ་ཆང་དང་། དྲན་པ་མི་གསལ་བའི་རྒྱུ་གཉིད་རྨུགས་དང་། བསྙེལ་ཏེ་དྲན་པ་ཉམས་པ་ལ་སོགས་ཐོས་པའི་དོན་ལ་བར་ཆད་དུ་འགྱུར་བ་རྣམས་སྤང་བར་བྱའོ། །གཉིས་པ་ལ། སྦྱོར་དངོས་རྗེས་གསུམ་ལས། དང་པོ། ཆོས་འཆད་པའི་ཕྱོགས་དེར་ཁྲི་དང་སྟན་བཏིང་ལ་མདུན་སོགས་སུ་མཆོད་པ་སྣ་ཚོགས་དང་། མཎྜལ་ལ་སོགས་པའི་བཀོད་པས་བརྒྱན་པར་བྱ་ཞིང་། དེ་ནས་ཆོས་སྟོན་པ་པོ་བཤམས་པའི་སྟན་ལ་སྐྱིལ་ཀྲུང་དྲང་པོར་བཅསཏེ་དྲན་པ་ཉེ་བར་བཞག་པས་འཁོད་དོ། །གཉིས་པ་ལ། བསམ་པ་ཕུན་སུམ་ཚོགས་པར་བྱ་བ་དང་། སྦྱོར་བ་ཕུན་སུམ་ཚོགས་པར་བྱ་བ་གཉིས། དང་པོ། གཞན་དོན་དུ་སེམས་བསྐྱེད་དེ་སེམས་ཅན་ཐམས་ཅད་ཀྱི་ཆོས་ཀྱི་མིག་རྙེད་པར་བྱ། ཡེ་ཤེས་ཀྱི་སྒྲོན་མེ་སྦར་བར་བྱ། སངས་རྒྱས་ཀྱི་ཆོས་ཡུན་རིང་དུ་གནས་པར་བྱ་སྙམ་པ་དང་། བསྐྱེད་རྫོགས་ཀྱི་ངང་ལ་གནས་བཞིན་གྱིས་བཤད་པར་བྱ་སྟེ། གང་ཞེ་ན། སྤྲུལ་སྐུའི་ཆོས་སྡེ་སྣོད་གསུམ་ལ་རང་ཉིད་ཤཱཀྱའི་རྒྱལ་པོ་དང་། ལོངས་སྐུའི་ཆོས་གསང་སྔགས་ཕྱི་ནང་ལ་རིགས་ལྔའི་གཙོ་བོ་རྡོ་རྗེ་འཆང་དང་། ཆོས་སྐུ་ནམ་མཁའ་འདྲ་བའི་ཆོས་རྫོགས་པ་ཆེན་པོ་རྣམས་ལ། ཀུན་ཏུ་བཟང་པོ་དང་། ཡུམ་ཀུན་ཏུ་བཟང་མོ་ཤེས་རབ་ཀྱི་ཕ་རོལ་ཏུ་ཕྱིན་ཡུམ་བསམ། ཡང་ན། མདོ་རྒྱུད་གང་འཆད་པའི་རང་རང་ཆོས་དེའི་སྟོན་པར་བསམ་ལ་གང་འཆད་པའི་ཆོས་ཀྱི་ཚིག་དོན་གྱི་ཆ་ལ་ཚིག་ནོར་བ་དང་དོན་འཁྲུལ་པའི་སྐྱོན་དང་ངག་ལྡབ་ལྡིབ་ཟློས་པ་སོགས་ཀྱི་སྐྱོན་མེད་པར། དོན་གསལ་ཞིང་དབྱངས་སྙན་པའི་སྒོ་ནས་གདུལ་བྱའི་མོས་པ་དང་འཚམ་པར་ཇི་བཞིན་པར་བཤད་དོ། །དེའི་ཚེ་ཆོས་ཀྱི་སྒྲ་དབྱངས་ཡན་ལག་དྲུག་ཅུར་གྱུར་པ་དེས་འཇིག་རྟེན་གྱི་ཁམས་ཀུན་ཁྱབ་པར་གྱུར་ཏེ། དེ་ཉིད་སེམས་ཅན་ཀུན་གྱིས་ཐོས་ནས་མ་རིག་པ་སངས། གཟུངས་སྤོབས། ཏིང་འཛིན་ཐོབ་པར་བསམ་ལ་རྫོགས་རིམ་ཡང་རང་བཞིན་ལྟ་བའི་རྩིས་ཀྱིས་ཟིན་པའི་ངང་ལས་མི་གཡོ་བར་བྱའོ། །གཉིས་པ། དེ་ཚེ་ཆོས་འཆད་པའི་ཕ་རོལ་ཕྱིན་པ་དྲུག་ནི། ཚིག་དོན་ལེགས་པར་བཤད་པ་ཆོས་ཀྱི་སྦྱིན་པ་སྟེ། ཟང་ཟིང་སོགས་དོན་གཉེར་གྱི་ཉོན་མོངས་མེད་པར་བཤད་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ། སྐྱོ་ངལ་བཟོད་པ་ནི་བཟོད་པ་དང་། འཆད་པ་ལ་སྤྲོ་བས་བརྩོན་འགྲུས་ཏེ། ཚིག་དོན་ལ་མ་ཡེངས་པར་སེམས་པ་བསམ་གཏན་དང་། ཚིག་དོན་རྣམ་པར་འབྱེད་པ་དང་འཆད་དུས་རྨི་ལམ་སྒྱུ་མར་ཤེས་པ་ཤེ་རབ་བློ་སྟེ་དེ་ལྟར་དྲུག་གོ །གསུམ་པ། རྗེས་ལ་སྒྱུ་མ་ལྟ་བུའི་ངང་འཁོར་གསུམ་བདེན་མེད་དུ་ཤེས་པས་ཆོས་བཤད་པའི་དགེ་བསེམས་ཅན་གྱི་དོན་དུ་བསྔོ་བར་བྱ་ཞིང་། འདི་ལྟར་དོན་དམ་པའི་ཆོས་ལ་སྤྱད་དུ་ཡོད་ཅིང་འཆད་ཉན་སོགས་ལ་བར་ཆད་མེད་པ་འདི། རྫོགས་པའི་སངས་རྒྱས་དང་རྩ་བརྒྱུད་ཀྱི་བླ་མ་གྲོགས་ཚངས་པ་མཚུངས་པར་སྤྱོད་པ་མཁའ་འགྲོ་ཆོས་སྐྱོང་གི་ཚོགས་དང་། ཆོས་ལ་སྤྱོད་པའི་ལུས་རྟེན་བསྐྱེད་པའི་ཕ་མ་སོགས་ཀྱི་དྲིན་ཡིན་པས་དེ་རྣམས་ཀྱི་བཀའ་དྲིན་དྲན་པའི་སྒོ་ནས་དམ་ཆོས་ལ་གུས་པ་བསྐྱེད་ཅིང་བསྟན་པ་རིན་པོ་ཆེ་ཡུན་རིང་དུ་གནས་པར་གྱུར་ཅིག་སྙམ་དུ་བསམ་པར་བྱའོ། །གསུམ་པ་ཕན་ཡོན་ནི། དེ་ལྟར་དམ་ཆོས་ལེགས་པར་བཤད་པ་དེ་ཡི་ཕན་ཡོན་ཡང་། རང་རྒྱུད་ལ་དྲན་པ་དང་ཏིང་འཛིན་སྐྱེ་བ་དང་། ཉོན་མོངས་ཀྱི་རྙོག་མ་བྲལ་བ་དང་། གཟུངས་དང་སྤོབས་པ་ཟད་མི་ཤེས་པ་ཐོབ་པ་དང་། སངས་རྒྱས་ཀྱི་ཆོས་མཛོད་འཛིན་པ་དང་། བདེ་བར་གཤེགས་པ་ལས་ཆོས་ཐོས་པའི་སྐལ་བ་ཅན་དུ་འགྱུར་བ་དང་། ལྷ་མིས་བསྟོད་ཅིང་འཇིག་རྟེན་སྙན་པར་གྲགས་པ་དང་། བསམ་དགུ་ཡིད་བཞིན་དུ་འགྲུབ་པ་དང་། ཚེ་རབས་ཀུན་ཏུ་ཆོས་ཀྱི་སྣང་བ་དང་མི་འབྲལ་ཞིང་། མྱུར་དུ་བདེ་བར་གཤེགས་པའི་གོ་འཕང་ཐོབ་ནས་འགྲོ་བ་མཐའ་དག་ལ་ཆོས་ཀྱི་ཆར་འབེབས་པ་སོགས་དོན་གཉིས་ཕུན་སུམ་ཚོགས་པའི་དཔལ་ཐམས་ཅད་ཐོབ་པར་འགྱུར་ཏེ་ཞིབ་པར་མདོ་སྡེ་རྣམས་ནས་རྒྱ་ཆེར་བསྔགས་པ་བཞིན་ནོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། འཆད་པ་པོ་སློབ་དཔོན་གྱི་ལེའུ་སྟེ་བཅུ་པའི་འགྲེལ་པའོ།། །། ༈ གཉིས་པ་སློབ་མས་ཇི་ལྟར་ཉན་ཚུལ་ལ། བསྟན་བཤད་གཉིས། དང་པོ། དེ་ནས་ཉན་པར་བྱེད་པ་སློབ་མའི་ཆོས་ཀྱི་ཚུལ་ནི། ཞེས་སོ། །གཉིས་པ་ལ། སྐྱོན་ཡོན་གྱི་སྒོ་ནས་གང་གིས་ཉན་པ་པོ་བསྟན་པ་དང་། དུས་ནམ་གྱི་ཚེ་ཉན། ཚུལ་ཇི་ལྟར་ཉན་པར་གདམས་པ་གསུམ། དང་པོ་ལ། མདོར་བསྟན་པ་དང་། བྱེ་བྲག་རྒྱས་པར་བཤད་པ་གཉིས། དང་པོ། རྣ་བ་མི་གཏད་ཁ་སྦུབ་ལྟ་བུ། ཡིད་ལ་མ་བཞག་པ་ཞབ་རྡོལ་ལྟ་བུ། ཉོན་མོངས་པ་དང་འདྲེས་པ་དུག་ཆེན་ལྟ་བུ་སྟེ་སྣོད་ཀྱི་སྐྱོན་གསུམ་དང་། ང་རྒྱལ་དང་། མ་དད་པ་དང་། དོན་དུ་གཉེར་བ་མེད་པ་དང་། ཕྱི་རོལ་དུ་རྣམ་པར་གཡེང་བ་དང་། ནང་དུ་སྡུད་པ་དང་། སྐྱོ་བས་ཉན་པ་སྟེ་དྲི་མ་དྲུག་དང་། འཆད་འགྱུར་ཉེས་པ་སོ་དྲུག་བཅས་སྐྱོན་རྣམས་སྤངས་ལ། ཡོན་ཏན་སུམ་ཅུ་རྩ་དྲུག་དང་ལྡན་པས་གུས་པས་མཉན་པར་བྱའོ། །གཉིས་པ་ལ་ཉེས་པ་སུམ་ཅུ་རྩ་དྲུག་བཤད་པ་དང་། ཡོན་ཏན་སུམ་ཅུ་རྩ་དྲུག་བཤད་པ་གཉིས། དང་པོ་ཉེས་པ་སུམ་ཅུ་རྩ་དྲུག་ནི། མ་གུས་ལ་སོགས་དང་པོར་ཆོས་ལ་མི་འཇུག་པའི་བདུད་ཀྱི་ལས་དྲུག་ནི། ཡོན་ཏན་ཡོངས་སུ་བཀོད་པའི་མདོ་ལས། ལེ་ལོ་དང་། སྙོམ་ལས་དང་། ཆོས་དང་ཆོས་སྨྲ་བ་ལ་མ་དད་པ་དང་། དགེ་བའི་བཤེས་གཉེན་ལ་སྲི་ཞུས་མི་འདུད་པ། བསྟན་པ་བཞིན་ཡིད་ལ་མི་བྱེད་པ། འཇིག་རྟེན་འདི་ལ་སེམས་པས་ལས་དང་ལས་ཀྱི་རྣམ་སྨིན་ཁྱད་དུ་གསོད་པའོ། །ཞེས་དང་། ང་རྒྱལ་ལ་སོགས་ཐབས་ལ་སྒྲིབ་པའི་ལས་དྲུག་ནི། བློ་གྲོས་རྒྱ་མཚོས་ཞུས་པའི་མདོ་ལས། རང་གི་རྒྱུད་ལ་བདུད་ཞུགས་པས་ང་རྒྱལ་ཆེ་བ་དང་། ལས་ཀྱི་སྒྲིབ་པས་ཆོས་སྤོང་བ་དང། རྒྱང་འཕེན་པའི་གསང་ཚིག་འཚོལ་བས་ཉེ་བར་བསྟན་པ་ཉན་པ་དང་། བྱང་ཆུབ་སེམས་དཔའི་སྡེ་སྣོད་མི་ཉན་པ་དང་། དགེ་བའི་བཤེས་གཉེན་ལ་ལོག་པར་ལྟ་བ་དང་། ཆོས་ལ་ལོག་པར་ལྟ་བའོ། །ཞེས་དང་། ཚུལ་དུ་འཆོས་པ་ལ་སོགས་ཆོས་ཉན་ཟིན་ཀྱང་སྤང་བའི་ལས་དྲུག་ནི། དེ་ཉིད་ལས། སྡིག་པ་འདོད་པས་ལུས་སེམས་ཚུལ་འཆོས་པ་དང་། ང་རྒྱལ་གྱིས་ཆོས་སྨྲ་བ་ལ་མི་གུས་པ་དང་། ཐེ་ཚོམ་གྱིས་ཆོས་ལ་མི་གུས་པ་དང་། ཚུལ་འཆོས་ཀྱིས་ལོག་པར་འཚོ་བ་དང་། ཕ་མ་དང་མཁན་པོ་དང་སློབ་དཔོན་ལ་མི་གུས་པ་དང་། ལུས་སེམས་རྩུབ་པས་རྟག་ཏུ་མི་མཐུན་པར་རྩོད་པའོ། །ཞེས་དང་། ཟང་ཟིང་གཉེར་སོགས་ཆོས་ཇི་བཞིན་མི་འགྲུབ་པར་གཡེང་བར་བྱེད་པའི་དོན་གྱི་སྐྱོན་དྲུག་ནི། དེ་ཉིད་ལས། འཇིག་རྟེན་གྱི་བྱ་བྱེད་མང་བ། ཟང་ཟིང་གི་རྙེད་པ་མང་བ། ངག་ཚིག་བྲེ་མོའི་གཏམ་གྱི་སྦྱོར་བ་མང་བ། སྡིག་པའི་གྲོགས་ཀྱི་མཛའ་བཤེས་མང་བ། ལོག་པར་རྟོག་པའི་བློ་མང་བ། ལས་ངན་པའི་དབང་གིས་ནད་གདོན་མང་བའོ། །ཞེས་དང་། རྙེད་བཀུར་ཆགས་སོགས་རེ་ཞིག་ཆོས་བཟུང་ཡང་དེ་ལས་ལོག་པར་འཁྱོགས་པའི་སྐྱོན་དྲུག་ནི། ཡུལ་འཁོར་སྐྱོང་གིས་ཞུས་པའི་མདོ་ལས། བཀའ་དྲིན་གྱི་བྱས་པ་མི་གཟོ་ཞིང་གཡོ་བྱེད་པ། རྙེད་པ་དང་བཀུར་སྟི་ལ་ཆགས་པར་ཆོས་སྒྲུབ་པ། ཕ་རོལ་གྱི་རྙེད་པ་ལ་ཕྲག་དོག་སེར་སྣ་བྱེད་པ། ཆོས་སྨྲ་བའི་ཡོན་ཏན་ལ་མི་སེམས་པར་འཁྲུལ་པ་འཚོལ་བ། སྡིག་པའི་སློབ་དཔོན་ལ་དད་ཅིང་བརྟེན་པ། རྟོག་གེ་འཚོལ་གྱི་བསོད་ནམས་ཀྱི་ཡོན་ཏན་མི་འཚོལ་བའོ། །ཞེས་དང་། ཐེག་ཆེན་ཇི་བཞིན་མི་བྱེད་པར་གཞན་དུ་བྱེད་སོགས་གོལ་བའི་ཆོས་དྲུག་སྟེ། འཇམ་དཔལ་རྣམ་པར་འཕྲུལ་བའི་མདོ་ལས། བྱང་ཆུབ་སེམས་དཔའ་སྡེ་སྣོད་མི་འཚོལ་བར་མུ་སྟེགས་བྱེད་ཀྱི་རྫུ་འཕྲུལ་འཚོལ་བ་དང་། འཇིག་རྟེན་པའི་ཞལ་ཏ་བྱེད་ཅིང་མང་དུ་ཐོས་པ་མི་འཚོལ་བ་དང་། ཚིག་གི་ཐོས་པ་འཚོལ་ཞིང་དེའི་རྣམ་པར་གྲོལ་བ་མི་འཚོལ་བ་དང་། ཉན་རང་གི་སྡེ་སྣོད་འཚོལ་གྱི་བྱང་ཆུབ་སེམས་དཔའི་སྡེ་སྣོད་མི་འཚོལ་བ་དང་། ཐབས་ལ་མཁས་པ་མངོན་དུ་མི་བྱེད་པར་ཉོན་མོངས་པ་ཟད་པ་འཚོལ་བ་དང་། རིག་པའི་གནས་ལ་མཁས་པར་འདོད་ཀྱི་དགེ་བའི་བཤེས་གཉེན་མི་འཚོལ་བའོ། །ཞེས་སོ། །དེ་ལྟར་ཉེས་པ་སུམ་ཅུ་རྩ་དྲུག་སྤངས་ལ་ཉན་པར་བྱའོ། །གཉིས་པ། གང་གི་ཚེ་ལེགས་པའི་ཚུལ་གྱིས་ཇི་ལྟར་མཉན་པར་བྱ་བ་ནི། ནོར་བུའི་འདུ་ཤེས་ལ་སོགས་གཅེས་པའི་འདུན་པ་དྲུག་བསྟེན་པ་ནི། ལག་བཟང་གིས་ཞུས་པའི་མདོ་ལས། ཆོས་སྨྲ་བའི་བླ་མ་ལ་རིན་པོ་ཆེའི་གཏེར་དུ་ཤེས་པར་དང་། ཆོས་ལ་ཡིད་བཞིན་ཡི་ནོར་བུར་འདུ་ཤེས་པ་དང་། ཆོས་ཉན་པ་ལ་རབ་ཏུ་དགོན་པའི་འདུ་ཤེས་དང་། ཆོས་འཛིན་ཅིང་བསམ་པ་ལ་གཅེས་པའི་དོན་ཡོད་པར་འདུ་ཤེས་པ་དང་། ཆོས་ལ་སོ་སོར་རྟོག་པ་ལ་ཚེ་རབས་བརྒྱར་མི་རྙེད་པར་འདུ་ཤེས་པ་དང་། ཆོས་འཚོལ་བ་སྤང་བ་རྣམས་ལ་བདུད་རྩི་བོར་ནས་དུག་ལ་སྤྱོད་པར་འདུ་ཤེས་པ་དང་། ཉན་ཅིང་སེམས་པ་རྣམས་ལ་དོན་དང་བཅས་པར་འགྱུར་བའི་འདུན་པ་བསྟེན་པར་བྱའོ། །ཞེས་སོ། །དེ་རྣམས་ཀྱི་རྒྱུ་བྱས་ནས་ཉོན་མོངས་བཟོད་སོགས་དཀའ་བའི་སྤྱོད་པ་དྲུག་གིས་གོ་བགོ་བ་ནི། དེ་ལས། དགེ་བའི་བཤེས་གཉེན་དང་ཆོས་ཀྱི་ཕྱོགས་སུ་ཚ་བ་དང་གྲང་བའི་ཉོན་མོངས་པ་བཟོད་པ། བཀྲེས་པ་དང་སྐོམ་པས་ཉོན་མོངས་པ་བཟོད་པ། ངན་སྨྲས་དང་རྒྱ་གད་ཀྱིས་ཉོན་མོངས་པ་བཟོད་པ། ངལ་དུབ་འགྲོ་ལས་ཀྱིས་ཉོན་མོངས་པ་བཟོད་པ། ཡོ་བྱད་གཏོང་བ་དང་འཚོལ་བས་ཉོན་མོངས་པ་བཟོད་པ། གཅེས་པར་འཛིན་པའི་སྲོག་ལའང་བརྡོས་ཏེ་བཟོད་པར་བྱ་བ་གཅེས་སོ། །ཞེས་སོ། །ཐོས་མང་གཉེེར་སོགས་རྐྱེན་གྱིས་མི་འགྱུར་བ་དྲུག་གིས་བསྟེན་པར་བྱ་ནི། དེ་ཉིད་ལས། ཆོས་སྟོན་པ་དང་ཆོས་ཀྱི་ནན་ཏན་ལྷུར་བྱེད་པ་ལ་མདུང་ཐུང་གིས་ཀྱང་མི་བཟློག་པར་འབད་དོ། །ཐོས་པ་མང་དུ་བསོགས་པ་དང་། ཐོས་པ་མང་དུ་འཛིན་པ་དང་། ཆོས་ཀྱི་དོན་ཤེས་པ་དང་། དེ་ཉིད་ཀྱི་སྤྱོད་པ་དང་ལྡན་པ་དང་། གཞན་ཡང་དེ་ལྟ་བུ་ལ་བསྟེན་པ་དང་། དེ་ལྟ་བུ་ལ་བསྙེན་བཀུར་བྱེད་པའོ། །ཞེས་སོ། །སྙིང་རྗེ་བསྐྱེད་སོགས་ཆེད་དུ་བྱ་བའི་ཁྱད་པར་དྲུག་ནི། དེ་ལས། དགེ་བའི་རྩ་བ་ཐམས་ཅད་ཤེས་པར་བྱ་བ་དང་། ཤེས་ནས་དེ་དག་ཚུལ་བཞིན་དུ་བསྒྲུབ་པ་དང་། སེམས་ཅན་ལ་སྙིང་རྗེ་ཆེན་པོ་བསྐྱེད་པ་དང་། དམ་པའི་ཆོས་ཡོངས་སུ་བཟུང་བ་དང་། དཀོན་མཆོག་གསུམ་གྱི་གདུང་མི་བཅད་པ་དང་། སེམས་ཅན་ཡོངས་སུ་སྨིན་པར་བྱ་བ་སྟེ། ཆེད་དུ་བྱ་བ་དེ་ལྟ་བུ་དང་ལྡན་པར་བྱའོ། །ཞེས་སོ། །བྱེ་བྲག་ཤེས་སོགས་དགོས་པ་རྣམ་པ་དྲུག་དང་མ་བྲལ་བར་བྱ་བ་ནི། འོད་སྲུང་གིས་ཞུས་པ་ལས། ཐོས་ནས་ཆོས་ཀྱི་བྱེ་བྲག་ཤེས་པར་བྱ་བའི་དགོས་པ་དང་། ཤེས་ནས་བྱ་བ་མ་ཡིན་པ་མི་བྱེད་པའི་དགོས་པ་དང་། གཞན་ལའང་དེ་ལྟར་བསྟན་པའི་དགོས་པ་དང་། དེ་ལྟར་བསྟན་པས་རང་དང་གཞན་གྱིས་རྣམ་པར་གྲོལ་བ་ཐོབ་པའི་དགོས་པ་དང་། རང་གཞན་གྱིས་ཤེས་རབ་སྦྱོང་བའི་དགོས་པ་དང་། ཕྱོགས་བཞི་ནས་ལྷགས་པ་རྣམས་ཀྱི་ཐེ་ཚོམ་གཅོད་པའི་དགོས་པ་སྟེ། དེ་ལྟར་དྲུག་གིས་ཉན་པ་ལ་བརྩོན་པར་བྱའོ། །ཞེས་སོ། །ཆོས་འཚོལ་ལ་སོགས་བྱ་བ་རྣམ་པ་དྲུག་ནི། ཤིན་ཏུ་རྒྱས་པ་ཆེན་པོ་སངས་རྒྱས་ཕལ་པོ་ཆེ་ལས། གཡོ་དང་སྒྱུ་མེད་པར་བསམ་པ་ཐག་པ་ནས་ཆོས་འཚོལ་བ་དང་། རང་གི་ཆེད་མ་ཡིན་པར་ཀུན་ལ་ཕན་པའི་ཆེད་དུ་འཚོལ་བ་དང་། རྙེད་པ་དང་བཀུར་སྟི་མི་འདོད་པར་འགྲོ་བའི་ཉོན་མོངས་པ་སྤོང་བར་འདོད་པས་འཚོལ་བ་དང་། གཟུ་ལུམ་མ་ཡིན་པར་ཤེས་རབ་ཀྱི་འཇུག་པས་འཚོལ་བ་དང་། ཡིད་གཉིས་མེད་པར་ཀུན་གྱི་ཐེ་ཚོམ་གཅོད་པའི་ཕྱིར་འཚོལ་བ་དང་། རློམ་སེམས་དང་འདོད་པ་མེད་པར་སངས་རྒྱས་ཀྱི་ཆོས་རྫོགས་པར་བྱ་བའི་ཕྱིར་འཚོལ་བ་སྟེ། ཡོངས་སུ་འཚོལ་བ་དེ་ལྟ་བུས་བཙལ་བར་བྱའོ། །ཞེས་སོ། །དེ་ལྟར་ཡོན་ཏན་སུམ་ཅུ་རྩ་དྲུག་དང་ལྡན་པས་ཉན་པར་བྱ་སྟེ། འདི་རྣམས་ཀྱི་ལུང་ཁུངས་སོགས་མཐའ་དཔྱད་ཞིབ་པར་དཀའ་འགྲེལ་ལས་ཤེས་པར་བྱའོ། །གཉིས་པ། མཉན་པའི་དུས་ནི་རང་གི་ཉོན་མོངས་པའི་གཉེན་པོར་འགྲོ་ཆེ་བའི་དུས་སུ་སྟེ། དེ་ཡང་དོན་གཉེར་གྱི་འདུན་པ་དང་། ན་སོ་གཞོན་པ་སོགས་ཀྱི་སྐབས་སུ་ཐོས་པ་རྒྱ་ཆེར་བྱ་བ་གལ་ཆེ་སྟེ། ཐོག་མར་བསྟན་པ་ལ་ཞུགས་པའི་དུས་འཁོར་འདས་ཀྱི་སྐྱོན་ཡོན་ཤེས་ནས་བླང་དོར་ལ་འཇུག་པའི་ཕྱིར་དང་། རང་རྒྱུད་སྦྱོང་བའི་ཚེ་གང་ལའང་རྨོངས་པ་ཟློག་པའི་ཕྱིར་དང་། རྒྱུན་དུ་ཉམས་སུ་ལེན་པའི་དུས་དགེ་སྦྱོར་བོགས་འབྱིན་པའི་ཕྱིར་དང་། ཤེས་རྒྱུད་འགྲོལ་བ་ལའང་ཉན་དགོས་ཏེ་ཐེ་ཚོམ་གྱི་སྤྲོས་པ་གཅོད་པའི་ཕྱིར། དེས་ན་ད་ལྟ་ལམ་ལ་དང་པོར་ཞུགས་པ་ནས་མཐར་ཕྱིན་གྱི་བར་དུ་དུས་སུ་འདོམས་པ་སྟེ་སྐབས་སུ་བབས་པའི་གདམས་པ་ཟབ་པ་དང་རྒྱ་ཆེ་བ་བཙལ་བར་བྱ་སྟེ་རང་གི་ཉམས་རྟོགས་གོང་དུ་བྱར་ཡོད་པའི་ཕྱིར། དེས་ན་དང་པོར་འདིས་ཆོག་ཅེས་གང་རུང་གཅིག་ལ་ཞེན་ནས་དབེན་པར་བསྒྲུབས་ཀྱང་མཐར་མི་འཁྱོལ་བས། ལམ་གོལ་བ་དང་ལོག་པ་མི་ཚོར། མིས་བལྟས་ན་ཆོས་བྱས་པར་སྣང་ཡང་རང་ལ་སྐྱེད་ཅི་ཡང་མེད་པའི་ཕྱིར་རོ། །གསུམ་པ་ལ། དངོས་དང་། དེའི་ཕན་ཡོན་གཉིས། དང་པོ་ལ། སྦྱོར་དངོས་རྗེས་གསུམ། དང་པོ། དེ་ཡང་འཇིག་རྟེན་པའི་ཚོང་སོགས་རྣམ་གཡེང་དང་། ཡོ་བྱད་ནང་དུ་འདུ་བ་དང་། དེའི་དབང་གིས་སྒོ་གསུམ་བྲེལ་བས་འཛི་བའམ་འཛེང་བ་སྟེ་དེ་རྣམས་སྤངས་ལ། ཆོས་ཀྱི་མཆོད་པ་དངོས་སུ་ཆོས་སྟོན་པ་པོའི་ཁྲི་སྟན་དང་མེ་ཏོག་སོགས་འབུལ་བ་དང་། བདག་པོས་མ་བཟུང་བ་དང་བཟུང་བའི་མཆོད་པའི་སྤྲིན་སྣ་ཚོགས་བསམ་ལ་ཡིད་ཀྱིས་མཆོད་ནས་སྒེག་ཆོས་གདུགས་དང་འཁར་བ་སོགས་སྤང་ཞིང་ལུས་ཀྱིས་ཕྱག་འཚལ་བ་དང་དྲང་པོར་འདུག་སྟེ་ཐལ་མོ་སྦྱར་བས་འཁོད་པར་བྱའོ། །གཉིས་པ་ལ། བསམ་སྦྱོར་ཕུན་ཚོགས་གཉིས། དང་པོ། ཆོས་ཀྱི་ཚིག་དོན་ལས་སེམས་གཞན་དུ་མ་ཡེངས་པར་དགའ་དང་གུས་པའི་ཚུལ་གྱིས་མཉན་པར་བྱ་སྟེ། དེ་ཡང་རང་ཉིད་སྐྱེས་པ་ཡིན་ན་འཇམ་དཔལ་དམར་སེར་ཨུཏྤལ་གྱི་སྟེང་ན་རལ་པོད་འཛིན་པ་དང་། བུད་མེད་ཡིན་ན་སྒྲོལ་མ་ལྗང་གུ་ཨུཏྤལ་འཛིན་པར་བསམ་པ་ཡི་སྙིང་ནང་དུ། ཆོས་འཆད་པ་པོའི་ཞལ་ནས་ཆོས་ཀྱི་འོད་ཟེར་བྱུང་བ་ཕོག་པས་མི་ཤེས་པའི་མུན་པ་སངས། བློ་གྲོས་ཀྱི་པདྨོ་རྒྱས་པར་བསམ་པ་མན་ངག་ཡིན་ནོ། །དེའི་ཚེ་ཐོས་པའི་རྣམ་པ་བརྒྱད་ཅུ་རྩ་བཞི་དང་ལྡན་པར་བྱས་ཏེ་ཡིད་རབ་ཏུ་དང་བ་དང་ལུས་ངག་གུས་པའི་རྣམ་འགྱུར་དང་བཅས། རྩེ་གཅིག་པའི་ཡིད་ཀྱིས་མཉན་པར་བྱ་སྟེ། དེས་ཐོས་པའི་རྣམ་པ་བརྒྱད་ཅུ་རྩ་བཞི་ནི། བློ་གྲོས་མི་ཟད་པས་ཞུས་པའི་མདོ་ལས། འདུན་པའི་རྣམ་པ་དང་། བསམ་པའི་རྣམ་པ་དང་། དེ་བཞིན་དུ་ལྷག་པའི་བསམ་པ་དང་། སྤྱོད་པ་དང་། དགེ་བའི་བཤེས་གཉེན་ཀྱི་རྣམ་པ་དང་། ང་རྒྱལ་མེད་པའི་རྣམ་པ་དང་། བག་ཡོད་པའི་རྣམ་པ་དང་། རི་མོར་བྱེད་པའི་རྣམ་པ་དང་། མཐུན་པའི་རྣམ་པ་དང་། བཀའ་བློ་བདེ་བའི་རྣམ་པ་དང་། བསྙེན་བཀུར་བའི་རྣམ་པ་དང་། རིམ་གྲོ་བསྐྱེད་པའི་རྣམ་པ་དང་། ཕུ་དུད་བྱ་བའི་རྣམ་པ་དང་། རྣ་བ་གཏད་དེ་ཉན་པ་དང་། ཡིད་ལ་བྱེད་པ་དང་། མི་གཡེང་བ་དང་། གནས་པ་དང་། ཡིད་བཞིན་གྱི་ནོར་བུ་དང་། སྨན་དུ་འདུ་ཤེས་པའི་རྣམ་པ་དང་། ཉོན་མོངས་པའི་གཅོང་ནད་འབྱིན་པའི་རྣམ་པ་དང་། དྲན་པའི་སྣོད་ཀྱི་རྣམ་པ་དང་། རྟོགས་པ་ཤེས་པའི་རྣམ་པ་དང་། བློ་གྲོས་འདོད་པའི་རྣམ་པ་དང་། བློ་ལ་འཇུག་པའི་རྣམ་པ་དང་། ཆོས་ཉན་པས་མི་ངོམས་པའི་རྣམ་པ་དང་། གཏོང་བ་སྤེལ་བའི་རྣམ་པ་དང་། དུལ་ཞིང་ཅང་ཤེས་པའི་རྣམ་པ་དང་། མང་དུ་ཐོས་པ་བསྟེན་པའི་རྣམ་པ་དང་། གུས་པས་དགའ་བའི་རྣམ་པ་དང་། ལུས་བདེ་བའི་རྣམ་པ་དང་། ངག་ཞི་བའི་རྣམ་པ་དང་། སེམས་རབ་ཏུ་དགའ་བའི་རྣམ་པ་དང་། མི་སྐྱོ་བར་ཉན་པའི་རྣམ་པ་དང་། ཚིག་ཉན་པའི་རྣམ་པ་དང་། དོན་སེམས་པའི་རྣམ་པ་དང་། ལེགས་པར་སྤྱད་པ་ཉན་པའི་རྣམ་པ་དང་། ནན་ཏན་གྱིས་ཉན་པའི་རྣམ་པ་དང་། གཞན་གྱིས་བསྟན་པ་ཉན་པའི་རྣམ་པ་དང་། བསྡུ་བའི་དངོས་པོ་ཉན་པའི་རྣམ་པ་དང་། ཆོས་མ་ཐོས་པ་ཉན་པའི་རྣམ་པ་དང་། མངོན་པར་ཤེས་པ་ཉན་པའི་རྣམ་པ་དང་། ཐེག་པ་གཞན་མི་འདོད་པའི་རྣམ་པ་དང་། ཕ་རོལ་ཏུ་ཕྱིན་པ་ཉན་པའི་རྣམ་པ་དང་། བྱང་ཆུབ་སེམས་དཔའི་སྡེ་སྣོད་ཉན་པའི་རྣམ་པ་དང་། ཐབས་ལ་མཁས་པ་ཉན་པའི་རྣམ་པ་དང་། ཚངས་པའི་གནས་ཉན་པའི་རྣམ་པ་དང་། དྲན་པ་དང་ཤེས་བཞིན་ཉན་པའི་རྣམ་པ་དང་། སྐྱེ་བ་ལ་མཁས་པ་ཉན་པའི་རྣམ་པ་དང་། མི་སྐྱེ་བ་ལ་མཁས་པའི་རྣམ་པ་དང་། མི་སྡུག་པའི་རྣམ་པ་དང་། བྱམས་པའི་རྣམ་པ་དང་། རྟེན་འབྲེལ་གྱི་རྣམ་པ་དང་། མི་རྟག་པའི་རྣམ་པ་དང་། སྡུག་བསྔལ་གྱི་རྣམ་པ་དང་། བདག་མེད་པའི་རྣམ་པ་དང་། ཞི་བའི་རྣམ་པ་དང་། སྟོང་པ་ཉིད་ཀྱི་རྣམ་པ་དང་། མཚན་མ་མེད་པའི་རྣམ་པ་དང་། སྨོན་པ་མེད་པའི་རྣམ་པ་དང་། མངོན་པར་འདུ་མི་བྱེད་པའི་རྣམ་པ་དང་། དགེ་བ་འདུ་བྱེད་པའི་རྣམ་པ་དང་། བདེན་པས་བྱིན་གྱིས་བརླབས་པའི་རྣམ་པ་དང་། ཆུད་མི་གཟོན་པའི་རྣམ་པ་དང་། རང་དབང་གི་རྣམ་པ་དང་། བདག་གི་སེམས་བསྲུང་བའི་རྣམ་པ་དང་། རང་གི་ཕྱོགས་བསྲུང་བའི་རྣམ་པ་དང་། ཕ་རོལ་གྱི་ཕྱོགས་བདུད་དང་མུ་སྟེགས་དང་། ཉོན་མོངས་པ་ཚར་གཅོད་པའི་རྣམ་པ་དང་། ནོར་བདུན་ལ་བསྟེན་པའི་རྣམ་པ་དང་། དབུལ་བ་ཚར་གཅོད་པའི་རྣམ་པ་དང་། མཁས་པས་བསྔགས་པའི་རྣམ་པ་དང་། མཁས་པས་མངོན་པར་དགའ་བའི་རྣམ་པ་དང་། འཕགས་པ་ཀུན་ཤེས་པའི་རྣམ་པ་དང་། འཕགས་པ་མ་ཡིན་པ་མོས་པར་བྱེད་པའི་རྣམ་པ་དང་། བདེན་པའི་རྣམ་པ་དང་། ཕུང་པོའི་ཉེས་པ་སྤོང་བའི་རྣམ་པ་དང་། འདུས་བྱས་ཀྱི་ཉེས་པ་འཇལ་བའི་རྣམ་པ་དང་། དོན་ལ་རྟོན་པའི་རྣམ་པ་དང་། ཆོས་ལ་རྟོན་པའི་རྣམ་པ་དང་། ཡེ་ཤེས་ལ་རྟོན་པའི་རྣམ་པ་དང་། ངེས་དོན་གྱི་མདོ་སྡེ་ལ་རྟོན་པའི་རྣམ་པ་དང་། སྡིག་པ་ཐམས་ཅད་མི་བྱ་བའི་རྣམ་པ་དང་། རང་གཞན་ལ་ཕན་པའི་རྣམ་པ་དང་། ལེགས་པར་བྱས་པའི་ལས་ཀྱི་རྣམ་པ་ལ་མི་འགྱོད་པའི་རྣམ་པ་དང་། བྱེ་བྲག་ཏུ་འགྲོ་བའི་རྣམ་པ་དང་། སངས་རྒྱས་ཀྱི་ཆོས་ཐམས་ཅད་ཐོབ་པའི་རྣམ་པ་སྟེ་འདི་དག་ནི་བྱང་ཆུབ་སེམས་དཔའ་རྣམས་ཀྱི་ཐོས་པའི་རྣམ་པ་བརྒྱད་ཅུ་རྩ་བཞིའོ། །ཞེས་གསུངས་ཏེ་འདི་དག་གི་དབྱེ་བསལ་ཞིབ་པར་དཀའ་འགྲེལ་ལས་ཀྱང་ཤེས་པར་བྱའོ། །གཉིས་པ། སྦྱོར་བ་ཕར་ཕྱིན་དྲུག་ནི། ཆོས་ཕྱིར་མེ་ཏོག་དང་ཁྲི་སྟན་སོགས་དབུལ་བ་སྦྱིན་པ་སྟེ། སྒོ་གསུམ་གྱི་ཉེས་སྤྱོད་རབ་ཏུ་བསྡམས་ཤིང་སྲོག་ཆགས་ལ་མི་གནོད་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ། ཚ་གྲང་སོགས་ཀྱི་གནོད་པ་བཟོད་པ་བཟོད་པ། བླ་མ་ལ་གསོལ་བ་འདེབས་ཤིང་ཉན་པ་ལ་སྤྲོ་བ་བརྩོན་འགྲུས་ཏེ། སེམས་མ་ཡེངས་པར་རྩེ་གཅིག་ཏུ་ཐོས་པ་འཛིན་པ་བསམ་གཏན་ཉིད་དང་། ཐེ་ཚོམ་གྱི་སྒྲོ་འདོགས་གཅོད་པ་དང་། ཉན་པ་པོ་དང་། ཆོས་དང་བླ་མ་ཐམས་ཅད་སྣང་ལ་རང་བཞིན་མེད་པར་ཤེས་པ་ཤེས་རབ་ཀྱི་ཕ་རོལ་དུ་ཕྱིན་པ་མཆོག་གོ །གསུམ་པ། རྗེས་ལ་ཆོས་ཐོན་དུས་སུ་ཐར་ལམ་སྣང་བའི་ཆོས་དང་། དེ་སྟོན་པའི་བླ་མ་བཀའ་དྲིན་ཆེ་སྙམ་དུ་བསམ་ཞིང་དྲིན་དྲན་པ་དང་། ཆོས་ཐམས་ཅད་རང་བཞིན་མེད་པ་སྒྱུ་མ་ལྟ་བུའི་ཏིང་ངེ་འཛིན་གྱི་ངང་ལས་དགེ་རྩ་བྱང་ཆུབ་ཏུ་ཡོངས་སུ་བསྔོ་བ་དང་བསྟན་པ་རྒྱས་པའི་སྨོན་ལམ་སོགས་ཀྱང་བྱའོ། །གཉིས་པ། ལེགས་པར་ཉན་པ་དེ་ཡི་ཕན་ཡོན་ཤིན་ཏུ་ཚད་མེད་དེ། ཆོས་སྟོན་པའི་རྔའམ་གཎྜི་བསྒྲགས་པ་ཡི་སྒྲ་ཙམ་ཐོས་པའི་སེམས་ཅན་དེ་ཡང་ངན་སོང་ལས་རྣམ་པར་གྲོལ་ནུས་ན་ཚུལ་བཞིན་དུ་ཉན་པ་སོགས་ལ་སྨོས་ཅི་འཚལ་ཏེ། གཎྜིའི་མདོ་ལས། དམ་ཆོས་བཤད་པའི་དུས་བསྟན་ཕྱིར། །རྔའམ་གཎྜི་བརྡུངས་པའི་སྒྲ། །ཐོས་པས་བྱང་ཆུབ་ཐོབ་གྱུར་ན། །ཉན་ཕྱིར་ལྷགས་པ་སྨོས་ཅི་འཚལ། །ཞེས་སོ། །གཞན་ཡང་ཤེས་རབ་དང་ཏིང་ངེ་འཛིན་དང་མི་བརྗེད་པར་དྲན་པའི་གཟུངས་སོགས་ཀྱང་ཐོབ་ཅིང་། སྤང་བླང་གི་མཚམས་ཕྱེད་པ་དང་། རང་རྒྱུད་ཀྱི་དགེ་བ་འཕེལ་ཞིང་སྡིག་པ་ཀུན་སྲབ་ཅིང་བྱང་བ་དང་། ལྷ་དང་མིས་བསྟོད་ཅིང་མ་རིག་པའི་མུན་པ་སངས་པ་དང་། ཤི་འཕོས་ནས་ཀྱང་ཞིང་དག་པར་སྐྱེས་ཏེ་པདྨའི་སྟེང་ན་མཛེས་པའི་རྟེན་ཐོབ་ཅིང་། སངས་རྒྱས་མཆོག་གི་སྤྲུལ་པའི་སྐུ་ལས་ཟབ་པ་དང་རྒྱ་ཆེན་པོའི་ཆོས་ཐོས་ཤིང་མྱུར་དུ་ཆོས་ཀྱི་རྒྱལ་པོ་མྱ་ངན་མེད་པའི་མཆོག་སངས་རྒྱས་ཀྱི་གོ་འཕང་ཐོབ་པར་འགྱུར་བ་སོགས་ཞིབ་པར་མདོ་སྡེ་རྣམས་ནས་རྒྱ་ཆེར་གསུངས་པ་བཞིན་ཤེས་པར་བྱའོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། ཉན་པ་པོ་སློབ་མའི་ཆོས་ཀྱི་ལེའུ་སྟེ་བཅུ་གཅིག་པའི་འགྲེལ་པའོ།། །། ༈ གསུམ་པ་ཐོས་པ་དངོས་ཀྱི་དོན་གཏན་ལ་དབབ་པ་ནི། ལེའུ་འདིའི་གཞུང་གི་དོན་ཤིན་ཏུ་རྒྱ་ཆེ་ཞིང་ཟབ་པས་ཚིག་འགྲེལ་ཉུང་ངུ་ཙམ་གྱིས་དོན་རྫོགས་པར་སྟོན་མི་ནུས་ཤིང་རྩ་བའི་འགྲེལ་ཆེན་དང་། དེའི་དོན་བསྡུས་རྗེ་བླ་མས་མཛད་པ་ཟུར་དུ་བཞུགས་པ་བཅས་ཤིན་ཏུ་གསལ་ཞིང་རྒྱས་པར་དེར་ཤེས་པར་བྱ་ལ། འདིར་ས་ཁོངས་འཛིན་བྱེད་ཙམ་དུ། ས་བཅད་དང་གཞུང་རྩ་བའི་ཚིག་འགྲེལ་ཙམ་ཞིག་འགོད་པ་ལ། མདོར་བསྟན། རྒྱས་བཤད་གཉིས། དང་པོ། ཆོས་འཆད་ཉན་ཇི་ལྟར་བྱ་བའི་ཚུལ་བསྟན་པའི་རྗེས་དེ་ནས་གང་ཞིག་གཏན་ལ་དབབ་བྱའི་ཆོས་བསྟན་པ་ནི། སྤྱིར་སྣང་སྲིད་འཁོར་འདས་ཀྱིས་བསྡུས་པའི་ཆོས་རྣམས་མ་ལུས་པ་སྟེ་མཐའ་ཡས་ཀྱང་། སྐབས་འདིར་བསྡུ་ན། གང་ཞིག་ཤེས་ནས་སྤང་བླང་དུ་བྱ་བའི་དབང་གིས། སྤང་བྱ་ཕྱི་རོལ་མུ་སྟེགས་པ་དང་། བླང་བྱ་ནང་པ་སངས་རྒྱས་པ་གཉིས་སུ་འདུ་བར་བསྟན་པའོ། །གཉིས་པ་ལ། སྤང་བྱ་ཕྱི་རོལ་པ་དང་། བླང་བྱ་ནང་པ་གཉིས། དང་པོ་ལ། བསྟན་བཤད་གཉིས། དང་པོ། དེ་ལ་དང་པོ་ཤེས་ནས་སྤང་བ་བྱ་བ་ཕྱི་རོལ་མུ་སྟེགས་བྱེད་ཀྱི་སྡེ་པ་ལ། སྟོན་པ་དྲུག་དང་། འཇིག་ཚོགས་ལ་ལྟ་བ་ཉི་ཤུ་དང་། ལྟ་བ་ངན་པ་དྲུག་ཅུ་རྩ་གཉིས་དང་། སུམ་བརྒྱ་དྲུག་ཅུ་དང་། སྡེ་ཚན་ངེས་པས་བཅུ་གཅིག་དང་། ཐམས་ཅད་བསྡུ་བ་ཏརྐ་སྡེ་ལྔ་སྟེ་དོན་དྲུག་ཏུ་བསྡུས་ཏེ་བཤད་པར་བྱའོ། །གཉིས་པ་ལ། སྟོན་པ་དྲུགའཇིག་ཚོགས་ཉི་ཤུ། དྲུག་ཅུ་རྩ་གཉིས། སུམ་བརྒྱ་དྲུག་ཅུ། སྡེ་ཚན་བཅུ་གཅིག ཏརྐ་སྡེ་ལྔ་བཤད་པ་དྲུག དང་པོ། སྟོན་པ་དྲུག་ནི་འགྲོ་སྐྱོང་གི་བུ་འོད་སྲུང་རྫོགས་བྱེད་འཇིག་རྟེན་སྔ་ཕྱི་ལས་རྒྱུ་འབྲས་དགྲ་བཅོམ་སོགས་མེད་པར་འདོད་པ་དང་། ཀུན་ཏུ་རྒྱུ་གནག་ལྷས་ཀྱི་བུ་ཆུ་ལྷས་འཆིང་གྲོལ་མེད་དེ་ངོ་བོས་བྱུང་བར་འདོད་པ་དང་། སྨྲ་འདོད་ཀྱི་བུ་མོའི་བུ་ཡང་དག་རྒྱལ་བ་ཅན་དགེ་སྡིག་གི་འབྲས་བུ་མེད་པར་འདོད་པ་དང་། མི་ཕམ་སྐྲ་ཡི་ལྭ་བ་ཅན་ཐམས་ཅད་དུས་ཀྱིས་བྱས་པ་འདོད་པ་དང་། ཀཏིའི་བུ་ནོག་ཅན་གང་དུའང་ཁས་མི་ལེན་པ་ངན་གཡོའི་ལྟ་བ་འཛིན་པ་དང་། གཅེར་བུ་པ་གཉེན་གྱི་བུས་ཐམས་ཅད་སྔོན་ལས་སུ་འདོད་པ་སྟེ། དེ་དག་རང་རང་སོ་སོའི་ལྟ་བ་ངན་པ་ལ་ཆགས་པ་ཏེ་དེ་དག་རིག་པས་དཔྱད་ན་ཀུན་ཏུ་སྨད་པར་བྱ་བ་ཁོ་ནའོ། །གཉིས་པ། གཟུགས་སོགས་ཏེ་ཚོར་བ་འདུ་ཤེས་འདུ་བྱེད་རྣམ་ཤེས་ཏེ་ཕུང་པོ་ལྔ་པོ་དེ་དག་རེ་རེ་བཞིན་བདག་ཡིན་པ་སྟེ་བདག་ཕུང་གཅིག་པར་འདོད་པ་ལྔ་དང་། དེ་བཞིན་ཕུང་པོ་ལྔ་པོ་དེ་རེ་རེར་བདག་གནས་པར་འདོད་པ་དང་། བདག་ལ་བརྟེན་པ་ལས་གཟུགས་སོགས་ལྔ་པོ་དེ་བྱུང་བར་འདོད་པ་དང་། གཟུགས་སོགས་ལྔ་པོ་དེ་ལ་བདག་དེས་དབང་སྒྱུར་ཏེ་ལྡན་པར་འདོད་པ་སྟེ་ཕྱི་མ་བཅོ་ལྔ་བདག་ཕུང་ཐ་དད་དུ་འདོད་པའོ། །དེ་དག་ནི་བདག་ཏུ་རྟོག་པ་ཉི་ཤུ་སྟེ། དཔྱད་ན་བདག་ཕུང་གཅིག་ཐ་དད་གང་དུའང་མ་དམིགས་པས་ན་ཡང་དག་པར་རྟོག་པ་མིན་པའི་ཕྱིར་གཞི་དེ་ལས་ཉོན་མོངས་པ་དང་ཉེས་པ་ཀུན་འཛིན་པར་བྱེད་པའི་ལྟ་བ་ངན་པའོ། །གསུམ་པ། རྟག་པར་སྨྲ་སོགས་ཏེ་ཐམས་ཅད་རྟག་པར་སྨྲ་བ་བཞི། ཁ་ཅིག་ཆད་བར་སྨྲ་བ་བཞི། མཐའ་ཡོད་མེད་དུ་སྨྲ་བ་བཞི། ལྷ་མི་སྤང་བར་སྨྲ་བ་བཞི། རྒྱུ་མེད་པར་སྨྲ་པ་གཉིས་ཏེ་སྔོན་གྱི་མཐའ་ལ་བརྟེན་པ་བཅོ་བརྒྱད་དང་། འདུ་ཤེས་ཡོད་པར་སྨྲ་བ་བཅུ་དྲུག་དང་། སོགས་ཁོང་ནས། མེད་སྨྲ་བརྒྱད། ཡོད་མེད་གཉིས་ཀ་མིན་པའི་འདུ་ཤེས་ཅན་བརྒྱད། ཆད་སྨྲ་བདུན། ཚེ་འདིར་མྱ་ངན་ལས་འདས་པར་སྨྲ་བ་ལྔ་བཅས་ཕྱི་མཐའ་ལ་བརྟེན་པའི་བཞི་བཅུ་ཞེ་བཞི་སྟེ། གཉིས་ཀ་བསྡོམས་པའི་ལྟ་བ་དྲུག་ཅུ་རྩ་གཉིས་པོ་དེ་ཀུན་ཀྱང་དངོས་པོའི་གནས་ཚུལ་བཞིན་མིན་པའི་ལྟ་བ་ངན་པ་ལ་བཞུགས་པས་ན། གནས་ཚུལ་ཡང་དག་པའི་དོན་ལས་ཕྱིན་ཅི་ལོག་ཏུ་འཛིན་པའི་བློ་སྲིད་པ་མཛེས་པར་བྱེད་པ་ཉིད་དེ་འཁོར་བར་འཆིང་བྱེད་འབའ་ཞིག་གོ །བཞི་པ། ལོ་མ་ཅན་དང་། རྒྱལ་དཔོག་པ། འཇིག་རྟེན་མེད་པ་སོགས་སྟོན་པ་བརྒྱ་དང་ཉི་ཤུ་པོའི་ལུགས་དེ་ཉིད་ནི། སྔར་བྱུང་བ། ད་ལྟ་ཡོད་པ། ཕྱིས་འབྱུང་བའི་ཆ་ནས་ཏེ་དུས་གསུམ་དུ་བསྒྲེས་པས་སུམ་བརྒྱ་དྲུག་ཅུ་པོ་ཡང་། ཡང་དག་པའི་ལམ་དང་བྲལ་བ་ཡིན་ཏེ་རྟག་ཆད་ཀྱི་ལྟ་བར་འཁོར་མོར་འཕྱན་ཏེ་སྲིད་པར་འཁྱམས་པས་སོ། །ལྔ་པ་ལ། མདོར་བསྟན། རྒྱས་བཤད། གོང་གི་དོན་བསྡུས་ཏེ་དགག་པ་གསུམ། དང་པོ། སྟོན་པ་དང་གཞུང་ལོག་པའི་སྡེ་ཚན་རྣམ་རིགས་བསྡུ་ན་བཅུ་གཅིག་དང་སྔ་རྗེས་བསྡོམས་པས་སུམ་བརྒྱ་དྲུག་ཅུ་རྩ་གཉིས་ནི། གོང་སྨོས་སྔོན་མཐའ་ལ་བརྟེན་པ་བཅོ་བརྒྱད་དང་། ཕྱི་མཐའ་ལ་བརྟེན་པ་བཞི་བཅུ་རྩ་བཞི་དང་། འཆད་འགྱུར་ད་ལྟ་བའི་མཐའ་ལ་བརྟེན་པ་སྡེ་ཚན་བཅུ་གཅིག་ལས་ཕྱེ་བ་སུམ་བརྒྱ་བཅས་དེ་ལྟར་གསུམ་དུ་ཕྱེ་བ་སྟེ། ཞེས་སོ། །གཉིས་པ། ཉན་ཐོས་ལ་མགོ་སྙོམས་པ་ཐ་སྙད་པ་སོགས་མགོ་སྙོམས་བཅུ་དང་། སྤྱི་རྟག་པར་འདོད་པ་སོགས་རྟག་པ་ཐེར་ཟུག་པ་དགུ་དང་། རྒྱལ་དཔོག་པས་སྐྱེས་བུ་ཐམས་ཅད་མཁྱེན་པར་སྒྲུབ་པ་ལ་མི་སྨྲ་བ་གཏན་ཚིགས་སུ་འགོད་པ་སོགས་བསྙོན་{སྨྱོན་}སྨྲ་དྲུག་དང་། ཕུར་བུ་པས་ཀུན་རྫོབ་ཀྱང་མེད་པར་སྒོམ་པ་སོགས་བསམ་གཏན་ལ་དད་པ་བདུན་དང་། སྔར་སྨོས་པའི་འོད་སྲུང་རྫོགས་བྱེད་སོགས་སྟོན་པ་དྲུག་དང་། འཇིགས་མེད་ཐོབ། ཉི་ཟླ་གྲགས་སོགས་བློན་པོ་རྣམ་པ་དྲུག་དང་། མོས་ཆགས་སོགས་ཀྱི་འདུ་ཤེས་ཅན་ཏེ་ཞར་བྱུང་བཞི་དང་། སེར་བུ་བོང་དེད་ཀྱི་སྡེ་སོགས་ཏརྐ་སྡེ་དྲུག་དང་། རང་བཞིན་རྒྱུར་ལྟ་བ་སོགས་རྒྱུར་ལྟ་བཞི་དང་། ཤང་ཀ་དུང་འཛིན་སོགས་རྟག་ཆད་ཀྱི་མཁན་པོ་རྣམ་པ་གཉིས་དང་། རིག་བྱེད་ཀྱི་མཐའ་གསང་བར་སྨྲ་བ་དང་བཅས་དེ་ལྟར་སྡེ་ཚན་བཅུ་གཅིག་གོ །དེ་དག་ལ་ནང་གི་དབྱེ་བས། མགོ་སྙོམས་པའི་གྲུབ་མཐའ་བརྒྱ། རྟག་པའི་བརྒྱ་རྩ་གཅིགབསྙོན་སྨྲ་བའི་བཅོ་བརྒྱད། བསམ་གཏན་པའི་ཉི་ཤུ་རྩ་བརྒྱད། བློན་པོ་དྲུག་གི་སུམ་ཅུ་རྩ་དྲུགཞར་བྱུང་བཞི། ཏརྐ་སྡེ་དྲུག རྒྱུར་ལྟ་བཞི། མཁན་པོ་གཉིས། གསང་བ་པ་བཅས་ཐམས་ཅད་བསྡོམས་པས་སུམ་བརྒྱ་ཡོད་པ་ནི་ད་ལྟར་གྱི་མཐའ་ལ་བརྟེན་པའོ། །གསུམ་པ། ལྟ་བ་སུམ་བརྒྱ་དང་དྲུག་ཅུ་རྩ་གཉིས་པོ་དེ་དག་ཀྱང་བསྡུ་ན་རྟག་ཆད་གཉིས་སུ་འདུ་བ་ཡིན་ལ། དེ་དགག་པ་ནི། རྟག་པ་ཡིན་ན་དངོས་པོ་རྣམས་རགས་ཕྲའི་འགྱུར་བ་དང་མི་ལྡན་པར་ཐལ་བའི་ཕྱིར་དང་། རྟག་པ་ལ་དོན་བྱེད་པ་མེད་པས་རྟག་པ་མེད་ལ། དེ་ལྟར་དུ་ཆད་པའང་ག་ལ་ཡོད་དེ་དངོས་པོ་རྣམས་རང་གི་རྒྱུ་རྐྱེན་ལ་ལྟོས་པ་དང་། མེད་པ་ནམ་མཁའ་སོགས་ཆད་པའི་རྒྱུར་མ་གྲུབ་བོ། །དྲུག་པ་ལ། བསྟན་བཤད་གཉིས། དང་པོ། དེ་ལྟར་ཕྱི་རོལ་པ་རང་བཞིན་མང་ལྡན་རྣམ་གྲངས་མཐའ་ཡས་པ་དེ་དག་ཉིད་ཀྱང་། གཞུང་བསྡུ་ན་གྲངས་ཅན་པ་དང་། བྱེ་བྲག་པ་དང་། སྤྱོད་པ་པ་དང་། གཅེར་བུ་པ་དང་། ཕུར་བུ་པ་དང་དེ་ལྟར་ཏརྐ་སྡེ་ལྔ་ལས་དང་པོ་བཞི་རྟག་པ་དང་། ཕྱི་མ་གཅིག་ཆད་པར་སྨྲ་བ་ཉིད་དོ། །གཉིས་པ་ལ་དེ་ལྟར་ལྔ་ལས། དང་པོ། གྲངས་ཅན་པ་དག་གིས་ཤེས་བྱ་ཐམས་ཅད་དེ་ཉིད་ཉེར་ལྔར་བསྡུས་ཏེ། དེ་ཡང་། བདག་དང་། གཙོ་བོ་དང་། རྣམ་འགྱུར་དག་གི་རང་བཞིན་ཤེས་པས་གྲོལ་བར་སྨྲ་བ་གང་ཡིན་པ་དེ་ནི་རྫུན་ཏེ། རང་བཞིན་གཅིག་ལ་རྣམ་པ་ཐ་དད་སོགས་འགལ་བ་མང་པོ་ཉེ་བར་སྡུད་པ་ཡིན་པའི་ཕྱིར་རོ། །གཉིས་པ། བྱེ་བྲག་པ་དག་གིས། རྫས་དང་། ཡོན་ཏན་དང་། ལས་དང་། སྤྱི་དང་། བྱེ་བྲག་དང་། འདུ་བ་སྟེ་ཤེས་བྱའི་དོན་དྲུག་ཤེས་པ་དག་གིས་རྣམ་གྲོལ་བསྒྲུབ་པ་སྟེ། དེ་ཆོས་ཅན། ཡང་དག་པ་མ་ཡིན་པ་ཉིད་དེ། རིགས་པས་བརྟགས་ན་འགལ་བའི་ཕྱིར་རོ། །གསུམ་པ། སྤྱོད་པ་བས་ཁྱབ་འཇུག་ལྷར་འཛིན་ཅིང་རིག་བྱེད་བཞི་ཚད་མར་སྨྲ་བ་སྟེ། དེ་ཡང་། འཇུག་པ་བཅུ་ལྡན་གྱི་ཁྱབ་འཇུག སྐྱེས་བུས་མ་བྱས་པའི་རིག་བྱེད། དངོས་པོ་རྒྱུ་མེད། ཤེས་པ་རང་གིས་རང་མི་རིག་པ་སོགས་དམ་བཅའ་བཅུ་ལས་གྲོལ་བ་སྒྲུབ་པར་འདོད་པ་སྟེ། དེ་ཡང་རྒྱུ་འབྲས་ཀྱི་འབྲེལ་བ་མི་འཐད་པས། དམ་བཅའ་དེ་བཅུ་རྣམ་གྲོལ་ལ་ཕན་པའི་དོན་མེད་པས། ཕྱིན་ཅི་ལོག་གི་གཞུང་གང་ཡིན་པ་དེ་ནི་དོར་བར་བྱའོ། །རིག་བྱེད་ཚད་མར་བྱེད་པ་སྤྱོད་པ་པའི་སྡེ་དེ་ལས་ཁྱད་པར་དུ་གསང་ཚིག་ལ་བརྟེན་ནས། སྣོད་བཅུད་ཐམས་ཅད་བདག་གཅིག་གི་ངོ་བོར་བློས་རྣམ་པར་བཏགས་ཏེ་དེས་གྲོལ་བར་སྨྲ་བའི་ཕྱོགས་དེ་ནི། ནམ་མཁའ་ལྟར་ཁྱབ་པ འི་བདག ངོ་བོ་སེམས་ཅན་ཡིན་པ། ལུས་ཡོད་པ། ཁྱབ་པ་རྟག་པ། གཅིག་པུ་སོགས་ཀྱི་ཁྱད་པར་དགུ་དང་ལྡན་པ་ཉིད་དུ་བཏགས་དེ་བསྒོམས་པས་བདག་དེའི་ངང་དུ་གྲོལ་བར་འདོད་པའོ། །ཚུལ་འདི་ལྟ་བུ་ནི་རང་གི་ཡང་དག་མ་ཡིན་པའི་ཀུན་རྟོག རྒྱ་མཚོའི་རླབས་ཅན་གྱི་རང་བཞིན་ཤིན་ཏུ་བརྒལ་དཀའ་བ་སྲིད་པའི་ཆུ་གཏེར་གསར་དུ་བྱེད་པ་དེ་ནི་མཚར་བའི་གནས་ཏེ། བརྟགས་ན་བཞད་གད་ཀྱི་གནས་སུ་འོས་པའི་ཕྱིར་རོ། །བཞི་པ། གཅེར་བུ་པའམ་ནམ་མཁའི་གོས་ཅན་དག་ཚངས་པའི་རྗེས་སུ་འགྲོ་བ་སྟེ་ཚངས་པ་ལྷར་འཛིན་ཞིང་། བྲམ་ཟེའི་སྟོན་པ་རྒྱལ་བ་དམ་པས་བསྟན་པའི་ལམ་དེ་ཉིད་ཚད་མར་བྱེད་པ་ཡིས། དཀའ་ཐུབ། སྡོམ་པ། ཉོན་མོངས། བཅིངས་གྲོལ་སོགས་ཤེས་བྱ་ཚིག་གི་དོན་བདུན་དུ་སྨྲ་ཞིང་། དེ་ཡང་ཡུལ་དུས་གྲངས་ཀྱིས་དུ་མའམ་ཐ་དད་ལ་རང་བཞིན་གཅིག་པར་འདོད་དོ། །དེས་ནི་དངོས་པོའི་གནས་ཚུལ་ལེགས་པར་མ་རྟོགས་པས་དམ་པའི་དོན་དེ་ཁོ་ན་ཉིད་ཇི་ལྟ་བ་སྤངས་པས་ན། སྲིད་པའི་ནགས་ཁྲོད་སྟུག་པོར་གནས་པ་ཡིན་ནོ། །ལྔ་པ། ཕུར་བུ་པའམ་རྒྱང་འཕེན་པ་དག་ལྷ་ཕུར་བུའི་རྗེས་སུ་འབྲང་སྟེ་གཞུང་རྒྱུད་དྲུག་སོགས་ལ་བརྟེན་ནས། འབྱུང་བཞི་དོན་དམ། ལུས་སེམས་རྫས་གཅིག འཇིག་རྟེན་སྔ་ཕྱི་དང་། ལས་རྒྱུ་འབྲས་མེད་པར་འདོད་པ་སོགས་གཞུང་ལམ་བདུན་པོ་ལ་ཉེ་བར་བརྟེན་ནས། ཆད་རྐྱང་སྨྲ་བ་ནམ་མཁའི་རྗེས་སུ་འགྲོ་བས་ན་ལམ་ངན་པ་དེས་རང་གཞན་གཉིས་ཀ་བསླུ་བའི་ཕྱིར་འཇིག་རྟེན་ཀུན་ལ་གནོད་པར་བྱེད་པ་ཡིན་ཏེ། དོ་ཧ་ལས། ནམ་མཁའི་ཡིད་ཅན་གནོད་བྱེད་ལམ་གྱི་གཟུགས། །ཐར་པའི་ཆེད་དུ་བདག་ཉིད་འགྲོ་བྱེད་བསླུ། །ཞེས་གསུངས་པ་བཞིན་ནོ། །གཉིས་པ་བླང་བྱ་ནང་པ་ལ། བསྟན་བཤད་བསྡུ་གསུམ་ལས། དང་པོ། སྤྱིིར་ཕྱི་ནང་གི་ཁྱད་པར་ཡང་། བརྟེན་པ་སྐྱབས་ཀྱི་ཁྱད་པར་མཆོག་གསུམ་སྐྱབས་སུ་ཁས་ལེན་པ་ནང་པ། མི་ལེན་པ་ཕྱི་པ། གནས་ལུགས་ལྟ་བའི་ཁྱད་པར་ཐུན་མོང་བ་ཆོས་ཀྱི་སྡོམ་བཞི་དང་ཐུན་མིན་མཐའ་བྲལ་བསམ་བརྗོད་ལས་འདས་པ་ཁས་ལེན་པ་ནང་པ། མི་ལེན་པར་རྟག་ཆད་ཀྱི་མཐར་ལྷུང་བ་ཕྱི་པ། སྒོམ་པ་གོམས་པའི་ཁྱད་པར་ཐུན་མོང་བ་མཆོག་གསུམ་སྐྱབས་སུ་འཛིན་པས་བདག་མེད་པའི་དོན་ཆོས་སུམ་ཅུ་རྩ་བདུན་གྱི་རིམ་པ་དང་ཐུན་མིན་སྟོང་ཉིད་སྙིང་རྗེའི་སྙིང་པོ་ཅན་དུ་བསྒོམ་པ་ནང་པ། མི་བསྒོམ་པར་རྟོག་པ་བཀག་ཙམ་དང་བདེ་གསལ་མི་རྟོག་ཙམ་ཕྱོགས་རེའི་ངང་ལ་སེམས་འཛིན་པ་ཕྱི་པ། སྤྱོད་པའི་ཁྱད་པར་དུག་གསུམ་གྱི་རང་བཞིན་ཡུལ་ལ་ཞེན་པ་དང་། གཞན་ལ་འཚེ་བ་ལམ་གྱི་གེགས་སུ་འདོད་པ་ནང་པ། མི་འདོད་པ་ཕྱི་པ། འབྲས་བུ་ལམ་དེ་ཉིད་ཀྱིས་དངོས་སུ་ཐར་པ་གསུམ་གང་རུང་ཐོབ་པ་ནང་པ། མི་ཐོབ་པ་ཕྱི་རོལ་པའོ། །ཁྱད་པར་དེ་ལྡན་གྱི། ཐར་པ་དམ་པའི་རྗེས་འགྲོ་ཞེས་ཐར་ལམ་བགྲོད་པ་ལ་མ་ནོར་ཞིང་མི་བསླུ་བ་རྒྱལ་བའི་གཞུང་ལམ་སྟེ་ནང་པ་སངས་རྒྱས་པའི་ལུགས་གང་དག་འཛིན་པ་དེ་ལ་ཡང་རྣམ་པ་གཉིས་ཏེ། ཐེག་པ་དམན་པ་དང་། ཐེག་པ་བླ་ན་མེད་པའོ། །གཉིས་པ་ལ། ཐེག་པ་ཆུང་ངུ་དང་། ཆེན་པོ་གཉིས། དང་པོ་བསྟན་བཤད་གཉིས། དང་པོ། རང་ཉིད་ཞི་བ་ཙམ་མཐར་ཐུག་གི་གཉེར་བྱའི་གཙོ་བོར་བྱས་ཏེ། གཞན་ལ་ཕན་འདོགས་ནའང་རང་དོན་སྒྲུབ་པའི་དགེ་བར་སེམས་པས་བློ་ཆུང་ཞིང་། སྤྱོད་པ་དང་སྨོན་ལམ་རླབས་པོ་ཆེ་གཞན་དོན་དུ་སྒྲུབ་པ་མེད་པས་ཐབས་ཀྱི་རིམ་པ་དམན་པ་དང་། ལྟ་བའང་བདག་མཐའ་དག་གིས་སྟོང་པའི་ཆོས་ཉིད་མ་རྟོགས་པས། རང་གི་ལྟ་བའི་མཐའ་གང་ཟག་གི་བདག་དང་། གཟུང་བ་རང་བཞིན་མེད་པ་ཙམ་ལ་དག་གྲོལ་དུ་ཤེས་ནས་ལམ་བསྒོམ་པ་ལ་འཇུག་པས། ཐེག་ཆེན་ལ་ལྟོས་ནས་དམན་པ་སྟེ། དེ་ལའང་ནང་ཚན་དུ་དབང་པོའི་རིམ་པས་རྣམ་པ་གཉིས་ཏེ། ཉན་ཐོས་པ་དང་ནི། རང་སངས་རྒྱས་ཀྱི་ཐེག་པ་ཉིད་དོ། །གཉིས་པ་ལ། ཉན་ཐོས། རང་རྒྱལ་གཉིས། དང་པོ་ལ་སྤྱི་བྱེ་བྲག་གཉིས། དེའི་དང་པོ་ལ་བསྟན་བཤད་གཉིས་ལས། དང་པོ། དབང་པོ་དམན་པ་ཉན་ཐོས་པ་དེ་ལ་ནི་སྡེ་ཚན་ནམ་སྡེ་བ་སོ་སོའི་དབྱེ་བ་དང་། ཐར་པ་འཚོལ་བའི་རང་བཞིན་དང་། གྲུབ་པའི་མཐའ་རབ་ཏུ་དབྱེ་བ་སྟེ་རྣམ་པ་གསུམ་ཉིད་དོ། །གཉིས་པ་རྒྱས་བཤད་ལ། སྡེ་ཚན། རང་བཞིན། གྲུབ་མཐའ་གསུམ། དང་པོ། ཉན་ཐོས་རྩ་བའི་སྡེ་བ་ཕལ་ཆེན་པ་དང་། གནས་བརྟན་པ་གཉིས་ལས་རབ་ཏུ་དབྱེ་བས་སྡེ་ཚན་བཅོ་བརྒྱད་དེ། ཕལ་ཆེན་པ་ལས་གྱེས་པའི་ཕལ་ཆེན་པ། ཐ་སྙད་གཅིག་པ། འཇིག་རྟེན་ལས་འདས་པར་སྨྲ་བ། མང་དུ་ཐོས་པ། རྟག་པར་སྨྲ་བ། མཆོད་རྟེན་པ། ཤར་གྱི་རི་བོའི་སྡེ། ནུབ་ཀྱི་རི་བོའི་སྡེ་དང་བརྒྱད་གྱེས་ལ། གནས་བརྟན་པ་ལས། གངས་རི་བ། ཐམས་ཅད་ཡོད་པར་སྨྲ་བ། རྒྱུར་སྨྲ་བ། གནས་མ་བུ་བ། ཆོས་མཆོག་པ། བཟང་པོའི་ལམ་པ། ཀུན་གྱིས་བཀུར་བ། མངས་སྟོན་པ། ཆོས་སྟོད་པ། ཆར་བཟང་འབེབས་པ་སྟེ་བཅུར་གྱེས་པས་བཅོ་བརྒྱད་དང་། ཕྱིས་ནི་ཡོད་སྨྲ་ལས། རྣམ་པར་བྱེ་སྟེ་ཡོད་སྨྲ་དང་། གོས་དམར་བ་གཉིས་སུ་གྱེས་པས་མཚོན་གཞན་ཡང་དབྱེ་བ་ཡོད་པར་བཤད་དོ། །གཉིས་པ། ཉན་ཐོས་ཀྱི་ལམ་གང་ཞིག་རྟེན་ཚུལ་ཁྲིམས་རྣམ་དག་ལ་གནས་ནས། ཤེས་བྱ་ཕུང་ཁམས་སྐྱེ་མཆེད་ཀྱི་གཞི་ལ། བདེན་བཞིའི་འཇུག་ལྡོག་མ་ནོར་བའི་ཚུལ་གྱིས་ཐོས་པ་དང་བསམ་པས་སྒྲོོ་འདོགས་ཆོད་པར་བྱས་ནས། གཤེ་ཡང་སླར་མི་གཤེ། ཁྲོས་ཀྱང་སླར་མི་ཁྲོ། བརྡེགས་ཀྱང་སླར་མི་བརྡེག མཚང་བྲུས་ཀྱང་སླར་མཚང་མི་འབྲུ་བ་སྟེ་དགེ་སྦྱོང་གི་ཆོས་བཞི་དང་། འདོད་ཆུང་ཆོག་ཤེས་སྦྱངས་ཡོན་སོགས་ལ་གནས་པ་དང་། དུག་གསུམ་གྱི་གཉེན་པོ་དང་བདེན་བཞི་རྟེན་འབྲེལ་བྱང་ཕྱོགས་སོགས་ལམ་བསྒོམ་པ་དང་། འབྲས་བུ་འཁོར་བ་ལས་ཐར་པ་དག་ཐེག་ཆེན་དང་ཐུན་མོང་དུ་མཐུན་པའི་ཕྱིར་བླང་བར་བྱ་བ་ཡིན་ལ། འོན་ཀྱང་རང་དོན་ཡིད་བྱེད་ཀྱི་བློ་དང་ལམ་དང་འབྲས་བུའི་ཆོས་ལ་བདེན་པར་ཞེན་པ་དག་ཐེག་ཆེན་ལམ་གྱི་དགག་བྱ་ཉིད་དོ། །གསུམ་པ། སྡེ་པ་དེ་ཀུན་གྱི་གྲུབ་པའི་མཐའ་དག་ལ་དབྱེ་ན། རྣམ་པ་གཉིས་ཏེ་ཐུན་མོང་བ་དང་སོ་སོའི་རིམ་པའོ། །དང་པོ་ཐུན་མོང་གི་འདོད་པ་ལ། ཡུལ་བདེན་བཞི། རྩོམ་བྱེད་དོན་དམ། དགྲ་བཅོམ་མཐར་ཐུག ཀུན་གཞི་མེད་པ། ཐེག་ཆེན་མེད་པ། ས་བཅུ་མེད་པ། སངས་རྒྱས་རང་རྒྱུད་པར་འདོད་པ་སྟེ་རྣམ་པ་བདུན་ཉིད་དེ། འདི་ནི་ཐེག་ཆེན་ལམ་གྱི་མི་མཐུན་ཕྱོགས་ལམ་དམན་པ་དགག་བྱ་ཡིན་པས་དེའི་ཚུལ་ནི་སྐབས་འདིར་ཤེས་པར་བྱའོ། །གཉིས་པ་བྱེ་བྲག་ལ་བསྟན་བཤད་གཉིས། དང་པོ། ཉན་ཐོས་ཀྱི་གྲུབ་མཐའ་སོ་སོའི་རང་བཞིན་རྒྱས་པར་བསྟན་པ་ལ་རྣམ་པ་གཉིས་ཉིད་དེ་བྱེ་བྲག་སྨྲ་པ་དང་། མདོ་སྡེ་སྤྱོད་པའོ། །གཉིས་པ་ལ། བྱེ་སྨྲ་དང་། མདོ་སྡེ་པ་གཉིས། དང་པོ། བསྟན་བཅོས་བྱེ་བྲག་བཤད་མཛོད་ཆེན་མོའི་རྗེས་སུ་སྨྲ་བ་བྱེ་བྲག་སྨྲ་བས་ནི། ཤེས་བྱ་གཞི་ལྔ་སོགས་ཏེ། འཇིག་པ་དོན་གཞན། དུས་གསུམ་རྫས་གྲུབ། བརྗོད་མེད་ཀྱི་བདག་ཤེས་པས་རང་དང་ཡུལ་མི་རིག་པ། མཚན་མཚོན་ཐ་དད། ཆུད་མི་ཟ་བའི་རྫས་ཏེ་རྣམ་པ་བདུན་གྱིས་གཞུང་གི་དོན་རིག་པར་བྱ་བའི་གྲུབ་མཐའ་དེ་ཡང་ཡང་དག་པ་ཇི་བཞིན་མིན་ཏེ་གྲུབ་མཐའི་ཞེ་འདོད་ཅི་རིགས་དང་འདྲེས་པའི་ཕྱིར་རོ། །གཉིས་པ། ཉན་ཐོས་མདོ་སྡེ་སྤྱོད་པས་སྐྱེད་བྱེད་རྐྱེན་བཞི་སོགས་ཏེ། སྣང་བ་བློ། ཡུལ་ལྐོག་གྱུར། རྡུལ་བར་མེད། དབང་པོ་ནུས་པ། མི་ལྡན་པ་ཀུན་བཏགས། མྱང་འདས་དངོས་མེད་དེ་གྲུབ་པའི་མཐའ་རྣམ་པ་བདུན་གྱི་ཚུལ་དུ་སྨྲ་བ་དེ་ཡང་ཡང་དག་པའི་ལྟ་བ་མིན་ཏེ་དངོས་པོར་སྨྲ་བའི་སྐྱོན་དང་བཅས་པའི་ཕྱིར་རོ། །གཉིས་པ། དབང་པོ་འབྲིང་རང་རྒྱལ་གྱི་རིགས་དང་ལྡན་པའི་གང་ཟག་རང་སངས་རྒྱས་རྣམས་ནི། སྔོན་གོམས་པའི་སྟོབས་ཀྱིས་སྲིད་པ་ཐ་མའི་དུས་སུ་རྟེན་ཅིང་འབྲེལ་བར་འབྱུང་བ་ཉིད་ཀྱི་སྒོ་ནས། ཡང་དག་པའི་དོན་དམིགས་པར་བྱས་ནས། གང་ཟག་གི་བདག་དང་། གཟུང་བ་རང་བཞིན་མེད་པར་ཤེས་པས་བདག་མེད་ཕྱེད་གཉིས་རྟོགས་པ་དང་འབྲས་བུ་རང་རྒྱལ་དགྲ་བཅོམ་ཐོབ་པའང་། ཐེག་པ་ཆེན་པོའམ་མཐར་ཐུག་གི་དོན་ལས་གཞན་དུ་གྱུར་པ་སྟེ་དམན་པ་ཉིད་དོ། །གཉིས་པ་ཐེག་པ་ཆེན་པོ་ལ། རྒྱུའི་ཐེག་པ་དང་། འབྲས་བུའི་ཐེག་པ་གཉིས། དང་པོ་ལ། སྤྱི་བྱེ་བྲག་གཉིས། དང་པོ། རྒྱ་མཚོ་ནི་ཤིན་ཏུ་ཚད་མེད་པའི་མིང་ཡིན་ལ། དེ་ལས་ཀྱང་ཆེས་ཚད་མེད་པའི་མིང་དུ་གངས་ཆེན་མཚོ་ཞེས་གྲགས་པས་ན། དེ་དང་འདྲ་བ་ཟབ་པ་དང་རྒྱ་ཆེ་བའི་ཡོན་ཏན་ཚད་མེད་པའི་སངས་རྒྱས་ཀྱི་ཐེག་པ་ཆེ་པོ་ནི་འགྲོ་སྒྲོལ་གྱི་གོ་ཆ་མཆོག་ཏུ་བརྟན་པ་སོགས་ཆེན་པོ་བདུན་གྱིས་འཕགས་ཏེ། དེ་ཡང་མདོ་རྒྱན་ལས། དམིགས་པ་ཆེ་བ་ཉིད་དང་ནི། །དེ་བཞིན་སྒྲུབ་པ་གཉིས་དག་དང་། །ཡེ་ཤེས་བརྩོན་འགྲུས་རྩོམ་པ་དང་། །ཐབས་ལ་མཁས་པ་གང་ཡིན་དང་། །ཡང་དག་གྲུབ་པ་ཆེན་པོ་དང་། །སངས་རྒྱས་འཕྲིན་ལས་ཆེན་པོ་སྟེ། །ཆེན་པོ་བདུན་དང་ལྡན་པའི་ཕྱིར། །ཐེག་ཆེན་ཞེས་ནི་ངེས་པར་བརྗོད། །ཅེས་གསུངས་པ་ལྟར། དམིགས་པ་ཆེན་པོ་བདག་ཆོས་ཉིད་ནམ་མཁའ་དང་འདྲ་བ་ལ་དམིགས་པ། སྒྲུབ་པ་ཆེན་པོ་རང་གཞན་གྱི་དོན་གཉིས་སྒྲུབ་པ། ཡེ་ཤེས་ཆེན་པོ་བདག་མེད་གཉིས་རྟོགས་ཀྱི་མཁྱེན་པ་སྙིང་རྗེ་དང་ཟུང་དུ་འཇུག་པ། བརྩོན་འགྲུབ་ཆེན་པོ་བསྐལ་པ་གྲངས་མེད་པར་སེམས་ཅན་གྱི་དོན་དུ་སྤྲོ་བ། ཐབས་ལ་མཁས་པ་ཆེན་པོ་སྲིད་ཞིར་མི་གནས་པ། གྲུབ་པ་ཆེན་པོ་སྟོབས་སོགས་སངས་རྒྱས་ཀྱི་ཡོན་ཏན་ཚད་མེད་པ། ཕྲིན་ལས་ཆེན་པོ་འཁོར་བ་ཇི་སྲིད་བར་གཞན་དོན་ལྷུན་གྲུབ་ཏུ་འབྱུང་བ་རྣམས་ཐེག་དམན་ལ་མེད་ཅིང་ཐེག་ཆེན་ལ་ཡོད་པས་ཁྱད་པར་དུ་འཕགས་པས་ན། ཐེག་པ་ཆེན་པོ་ནི་ཐབས་ཤེས་དང་། རྣམ་གྲོལ་གྱི་སྒོ་ཡངས་པས་ནམ་མཁའ་དང་འདྲ་སྟེ་ལམ་འབྲས་གཉིས་ཆར་ཡང་ཚད་མེད་པའི་བདེ་བ་དང་ཡོན་ཏན་གྱི་གནས་སུ་གྱུར་པས་གཞལ་མེད་ཀྱི་ཁང་ཆེན་ཉིད་དེ། སྡུད་པ་ལས། ཐེག་པ་འདི་ནི་མཁའ་འདྲ་གཞལ་མེད་ཁང་ཆེན་ཏེ། །དགའ་སྐྱིད་བདེ་བ་མངོན་པར་ཐོབ་བྱེད་ཐེག་པའི་མཆོག །དེ་གང་ཞོན་ནས་སེམས་ཅན་ཐམས་ཅད་མྱ་ངན་ཟློ། །རྒྱུ་དེས་དེ་ནི་ཐེག་པ་ཆེ་ཞེས་རབ་བརྗོད་དོ། །ཞེས་སོ། །གཉིས་པ་ལ། བསྟན་བཤད་གཉིས། དང་པོ། ངོ་བོ་ཆོས་ཀུན་བདེན་མེད། ལམ་ཚོགས་གཉིས་ཟུང་འཇུག འབྲས་བུ་བྱང་ཆུབ་ཐོབ་པར་འདྲ་བས་ཐེག་པ་མཆོག་གི་རང་བཞིན་ཡིན་པ་ཙམ་ལ་ཐ་དད་མ་མཆིས་ཀྱང་། དེ་དག་གི་ཤིང་རྟ་འདྲེན་པར་བྱེད་པའི་སྲོལ་འབྱེད་ཀྱི་ལྟ་བ་གསུམ་ཉིད་ལས། སེམས་ཙམ་པ་དང་། རང་རྒྱུད་པ་དང་། ཐལ་འགྱུར་པ་ཞེས་སུ་གྲགས་པ་ཡིན་ནོ། །གཉིས་པ་ལ། སེམས་ཙམ། རང་རྒྱུད། ཐལ་འགྱུར་གསུམ། དང་པོ། རྣལ་འབྱོར་སྤྱོད་པ་སེམས་ཙམ་པ་ནི་ཆོས་ཐམས་ཅད་སེམས་ཙམ་དུ་འདུ་ཞིང་། དེ་ཡང་གཟུང་འཛིན་གཉིས་སྟོང་གི་རྣམ་ཤེས་རང་རིག་རང་གསལ་ཙམ་དོན་དམ་དུ་འདོད་པ་སྟེ། དེ་ལ་སེམས་ཙམ་སྤྱི་ཡི་འདོད་པ་དང་། ཁྱད་པར་རྣམ་བདེན་རྫུན་གྱི་ཚུལ་གཉིས་ཀྱི་རིམ་པ་ཡོད་པ་ལས། འདོད་དོན་ཐུན་མོང་བ་སྤྱིི་ནི་གཟུང་འཛིན་གྱི་ཆར་མེད་པའི་ཤེས་པ་རང་རིག་རང་གསལ་ལམ་ཡེ་ཤེས་དོན་དམ་དུ་འདོད་པ་དང་། ཀུན་བཏགས་གཞན་དབང་ཡོངས་གྲུབ་སྟེ་མཚན་ཉིད་གསུམ་ལ་སོགས་པའི་སྤྱི་ཆིངས་ཀྱིས་ཆོས་ཀུན་བཅིངས་ནས། དམིགས་པའི་ཡུལ། སྤྱོད་པའི་ཚུལ། གྲུབ་པའི་འབྲས་བུ་གསུམ་གྱིས་བསྡུས་ཏེ་གྲུབ་པའི་མཐའ་རྣམ་པར་འཇོག་པ་ཉིད་དོ། །བྱེ་བྲག་སོ་སོའི་དབྱེ་བ་ལ། དོན་དུ་སྣང་བ་འདི་དག་ནང་གི་ཤེས་པ་ཉིད་དུ་བདེན་པར་འདོད་པ་དང་། མི་འདོད་པའི་ཁྱད་པར་ལས་རྣམ་པར་བདེན་པ་དང་། རྣམ་པར་རྫུན་པ་གཉིས་སུ་གྲགས་པ་སྟེ། དེ་ཡང་ནི་རྣམ་ཤེས་བདེན་གྲུབ་ཏུ་འདོད་པ་སོགས་དངོས་པོའི་གནས་ཚུལ་ཡང་དག་མ་ཡིན་པའི་ཀུན་རྟོག་གིས་གསར་དུ་སྦྱར་བ་ཉིད་ཡིན་ནོ། །གཉིས་པ། དབུ་མ་རང་རྒྱུད་པ་དག་གི་སྡེ་པས། གནས་སྐབས་སུ་ཆོས་ཐམས་ཅད་བདེན་པ་གཉིས་སུ་རྣམ་པར་དབྱེ་བ་ཡི་སྒོ་ནས། ཆོས་རྣམས་ལ་ཡོད་པ་བདེན་གྲུབ་དང་ཐ་སྙད་དུ་མེད་པའི་སྤྲོས་པ་དག་རབ་ཏུ་འགོག་པར་བྱེད་ཅིང་ཁྱད་པར་ཐ་སྙད་ཀྱིས་གཞལ་ནས་ཀུན་རྫོབ་ཏུ་སྣང་བའི་རྣམ་གཞག་ཞིབ་མོར་བྱེད་པ་དེ་ལ་ཡང་། དབྱེ་ན་གྲུབ་མཐའ་གོང་འོག་གཉིས་བྱུང་བའི་གཉིས་ཀའང་། རང་བཞིན་ནམ་ཆོས་ཉིད་རྣལ་མའི་དོན་བ དེན་གཉིས་རོ་མཉམ་ལས་གཞན་དུ་གྱུར་པ་སྟེ། སྤྲོས་པའི་དྲྭ་བར་འཆེལ་བ་ཤས་ཆེ་བའི་ཕྱིར་རོ། །གསུམ་པ། རྒྱལ་བའི་དགོངས་པ་མཐར་ཐུག་སྙིང་པོའིདོན་ཏེ་རྒྱུ་མཚན་ཉིད་ཀྱི་ཐེག་པའི་གྲུབ་མཐའི་རྩེ་མོར་གྱུར་པ་དབུ་མ་ཐལ་འགྱུར་པས་ནི་ཡོད་མེད་ཡིན་མིན་གྱི་དམིགས་པ་དང་བཅས་པའི་སྤྲོས་པ་ཀུན་འགོག་པར་བྱེད་པ་སྟེ། གཤིས་ཅི་ཡང་མ་གྲུབ་པའི་གནས་ལུགས་བློ་ལས་འདས་པ་བདེན་པ་དབྱེར་མེད་ཆེན་པོར་ཡེ་ནས་དག་པའི་ཚུལ་གྱིས་སྒྲུབ་པས་ན། རང་ལུགས་ལ་ཁས་ལེན་གྱི་དམ་བཅའ་མེད་པའི་དབང་གིས། ཕ་རོལ་ཁས་ལེན་དང་བཅས་པ་ལ་རང་གི་ཁས་བླང་གི་ཐལ་བ་འཕེན་པ་ལས་དངོས་ཞེན་གྱི་དམ་བཅའ་ཐམས་ཅད་འཇིག་པར་མཛད་པ་སྟེ། འདི་ལྟར་སྣང་སྲིད་ཀྱི་ཆོས་ཀུན་རྟེན་ཅིང་འབྲེལ་བར་འབྱུང་བ་ཙམ་སྟེ། དངོས་པོ་རྣམས་བརྟེན་ནས་སྐྱེ་བ་དང་། དངོས་མེད་རྣམས་བརྟེན་ནས་བཏགས་པའོ། །དེ་ལྟར་རྟེན་འབྲེལ་གྱིས་བསྡུས་པའི་ཆོས་ཐམས་ཅད་སྟོང་ཉིད་དམ་རང་བཞིན་མེད་པ་སྟེ། རང་བཞིན་ཡོད་ན་བརྟེན་ནས་འབྱུང་བ་མི་འཐད་ལ། བརྟེན་ནས་འབྱུང་བའི་ཕྱིར་མཐའ་བཞིའི་སྐྱེ་བ་དང་། གཅིག་ཐ་དད་ཀྱི་ངོ་བོར་གྲུབ་པ་ཅུང་ཟད་ཀྱང་མེད་པས་ན་བདེན་གཉིས་དབྱེར་མེད་སྒྱུ་མ་ལྟ་བུ་རྟག་ཆད་ཀྱི་མཐའ་ཕྲ་བ་དང་བྲལ་བ་ཉིད་ཀྱི་སྒོ་ནས། ལམ་ཚོགས་གཉིས་དང་འབྲས་བུ་སྐུ་གཉིས་ལ་སོགས་པའི་ཐེག་ཆེན་གྱི་ཆོས་རྣམས་མཐར་ཕྱིན་པར་བྱེད་དོ། །གཉིས་པ་འབྲས་བུའི་ཐེག་པ་ལ། ཁྱད་ཆོས་དང་། ཁྱད་གཞི་བཤད་པ་གཉིས། དང་པོ། འབྲས་བུ་བླ་ན་མེད་པ་གསང་སྔགས་རྡོ་རྗེ་ཐེག་པ་ཉིད་ནི། མཚན་ཉིད་རྒྱུ་ཡི་ཆོས་ལས་ཁྱད་པར་དུ་མས་འཕགས་ཏེ། དེ་གཉིས་ཀ་སངས་རྒྱས་སྒྲུབ་པར་དོན་གཅིག་ནའང་མ་རྨོངས་པ་དང་ཐབས་མང་བ་དང་དཀའ་བ་མེད་པ་དང་། དབང་པོ་རྣོན་པོའི་ངོར་བྱས་པས། ཁྱད་པར་དུ་བྱས་པའོ། །དེ་ཡང་རྒྱུའི་ཐེག་པར་ཁམས་བདེ་གཤེགས་སྙིང་པོ་ས་བོན་དུ་ཡོད་པ་རྐྱེན་ཚོགས་གཉིས་ལས་གོང་དུ་འཕེལ་བས་དུས་རིང་མོ་ཞིག་ནས་འབྲས་བུ་སངས་རྒྱས་སུ་འགྲུབ་པར་འདོད་པས་རྒྱུ་འབྲས་སྔ་ཕྱིར་ཁས་ལེན་ལ། རྡོ་རྗེ་ཐེག་པས་ནི། རང་བཞིན་འོད་གསལ་བའི་སྙིང་པོ་ཡོན་ཏན་ལྷུན་གྲུབ་ཏུ་གནས་པ་ནམ་མཁའ་ལྟ་བུའི་ཉིད་སྦྱང་གཞིར་བྱས་ནས། དེའི་སྟེང་ན་སྦྱང་བྱ་འཁོར་བའི་ཆོས་ཚོགས་བརྒྱད་ཡུལ་དང་བཅས་པ་སྤྲིན་ལྟ་བུ་དེ། སྦྱོང་བྱེད་དབང་དང་བསྐྱེད་རྫོགས་ཀྱི་ཐབས་ཟབ་མོ་རླུང་དང་འདྲ་བས་མྱུར་དུ་བསལ་ནས། སྦྱངས་འབྲས་དོན་གྱི་ཀུན་གཞི་མངོན་དུ་གསལ་བའི་སངས་རྒྱས་ཉིད་དུས་ཐུང་ངུས་འགྲུབ་པར་བྱེད་པ་ཡིན་པས་དོན་ལ་རྒྱུ་འབྲས་དབྱེར་མེད་པའི་གྲུབ་མཐའ་སྨྲ་བའོ། །དེ་ཡང་རྒྱུ་འབྲས་དབྱེར་མེད་དངོས་ནི། རྣལ་འབྱོར་བླ་མེད་ན་གསལ་ཞིང་། རྫོགས་པ་ཆེན་པོ་བྱ་རྩོལ་མེད་པར་མཐར་ཕྱིན་པ་ཡིན་མོད། མདོ་ལ་ལྟོས་ནས་བྱ་རྒྱུད་ལའང་མ་རྨོངས་པ་སོགས་ཀྱི་ཁྱད་ཆོས་ཡོད་ལ། རྒྱུད་སྡེ་དྲུག་ཀྱང་སྔ་མ་སྔ་མ་ལ་ལྟོས་ནས་ཕྱི་མ་ཕྱི་མ་མ་རྨོངས་པ་སོགས་ཀྱིས་ཁྱད་པར་དུ་འཕགས་སོ། །གཉིས་པ་ལ། བསྟན་བཤད་གཉིས། དང་པོ། ཁྱད་པར་ཅན་གྱི་གསང་སྔགས་དེ་ལའང་ཡོན་ཏན་གྱི་ཆེ་བ་མཆོག་དང་ལྡན་པའི་རྒྱུད་རྣམ་པ་བཞི་སྟེ། མི་རིགས་བཞི་དང་དབང་པོའི་རིམ་པ་དང་ཉོན་མོངས་ཆེ་ཆུང་སོགས་ལ་ལྟོས་ནས་བྱ་བ་ལ་སོགས་པའི་རྒྱུད་སྡེ་བཞིར་གསུངས་པ་དག་ལས། ཞེས་སོ། །གཉིས་པ་ལ། གསང་སྔགས་ཕྱི་པ་དང་། ནང་པ་གཉིས། དང་པོ་ལ། སོ་སོའི་རྣམ་གཞག་དང་། ཐུན་མོང་གི་རྣམ་བཞག་གཉིས། དང་པོ་ལ། བྱ་བ། སྤྱོད་པ། རྣལ་འབྱོར་གསུམ། དང་པོ། བྱ་བའི་རྒྱུད་དུ་གཞི་སྣང་སྟོང་བདེན་པ་གཉིས་ཀྱི་རང་བཞིན་ཤེས་ཤིང་ལྟ་བས། ཕྱིའི་ཁྲུས་དང་གཙང་སྦྲ་ལ་སོགས་ཀྱི་ལུས་ངག་གི་སྤྱོད་པ་གཙོ་བོར་ཀུན་ཏུ་སྤྱོད་པ་ཡིས་ལྷ་ཡེ་ཤེས་སེམས་དཔའ་རྗེ་བོ་ལྟ་བུ་དངོས་གྲུབ་སྩོལ་བ་པོ་དང་། བདག་དམ་ཚིག་པ་ཁོལ་པོ་ལྟ་བུ་དངོས་གྲུབ་ནོད་པ་པོར་ལྟ་བས་གནས་སྐབས་འདོད་གཟུགས་ཀྱི་རིག་འཛིན་དང་མཐར་ཐུགས་གི་དངོས་གྲུབ་སྐྱེ་བ་བཅུ་དྲུག་ན་སངས་རྒྱས་ཐོབ་པར་འདོད་པའོ། །གཉིས་པ། སྤྱོད་པའི་རྒྱུད་དུ་ནི། ཕྱིའི་ཁྲུས་སོགས་གཙང་སྦྲ་བྱེད་པ་དག་དང་ནང་གི་ཏིང་ངེ་འཛིན་གཙོ་ཆེ་ཆུང་མེད་པར་བྱས་ནས་ནི། བདག་དང་ལྷ་སྤུན་ནམ་གྲོགས་སུ་ལྟ་བའི་ཚུལ་གྱིས་དངོས་གྲུབ་ཐོབ་པར་འདོད་པ་ཡིན་ཏེ། ལྟ་བ་ཡོ་ག་དང་སྤྱོད་པ་ཀྲི་ཡ་ལྟར་རོ། །གསུམ་པ། རྣལ་འབྱོར་ཕྱི་པའི་རྒྱུད་དུ་གཙང་སྦྲ་ལ་སོགས་པའང་ལམ་སྒྲུབ་པའི་གྲོགས་ཙམ་ལ། ནང་གི་སེམས་ཀྱི་སྒོམ་པ་ནི་གཙོ་བོར་འདོད་པ་སྟེ། དམ་ཚིག་དང་ཆོས་དང་ལས་དང་ཕྱག་ཆེན་ཏེ་ཕྱག་རྒྱ་བཞི་དང་། ཞིང་དང་གནས་ཕུན་སུམ་ཚོགས་པའི་རྒྱུ་གདན་པད་ཟླ། ཆོས་ཕུན་ཚོགས་ཀྱི་རྒྱུ་གསུང་ཡིག་འབྲུ། དུས་ཕུན་ཚོགས་རྟག་པ་བསམ་མི་ཁྱབ་པའི་རྒྱུ་ཐུགས་ཕྱག་མཚན། འཁོར་དང་སྟོན་པ་ཕུན་ཚོགས་རྒྱུ་སྐུ་ཡོངས་རྫོགས། སྐུའི་ངོ་བོའམ་ཡེ་ཤེས་ཕུན་ཚོགས་ཀྱི་རྒྱུ་ལྷ་ཡེ་ཤེས་སེམས་དཔའ་ལས་མངོན་པར་བྱང་ཆུབ་པ་སྟེ་མངོན་བྱང་རྣམ་པ་ལྔ་ཡི་སྒོ་ནས་འཇུག་ཅིང་། རང་ཉིད་དམ་ཚིག་པར་གསལ་བ་ལ། གཞན་དག་པའི་ཞིང་ནས་ཡེ་ཤེས་ཀྱི་ལྷ་སྤྱན་དྲངས་ཏེ་བསྟིམས་ནས་གཉིས་མེད་དུ་བསྒོམས་པས་དངོས་གྲུབ་ཐོབ་པར་འདོད་པའོ། །གཉིས་པ། བྱ་སྤྱོད་རྣལ་འབྱོར་ཏེ་སྔགས་ཕྱི་རྒྱུད་གསུམ་པོ་དེ་དག་ཀུན་ཀྱང་བདེན་གཉིས་རེས་འཇོག་ཏུ་འཛིན་པར་བྱེད་དེ། ཆོས་ཅན་སྣང་བ་ཀུན་རྫོབ་ཀྱི་རང་བཞིན་ལྷར་བསྒོམས་ནས། དེའི་རྗེས་སུ་ལྷར་སྣང་བསྡུས་ནས་མི་དམིགས་པ་དོན་དམ་སྤྲོས་བྲལ་དུ་བསྒོམ་པ་ཤས་ཆེའོ། །གཉིས་པ་ནང་པ་ལ། སྔགས་ཕྱི་པ་ལས་འཕགས་ཚུལ་དང་། ནང་པ་དངོས་བཤད་པ་གཉིས། དང་པོ། གཞི་དང་ལམ་དང་འབྲས་བུའི་ཁྱད་པར་གསུམ་གྱིས་སྔགས་ཕྱི་པ་དང་ནང་དང་གསང་བའི་གསང་སྔགས་ཀྱི་རང་བཞིན་ཤེས་པར་བྱ་སྟེ། དེ་ཡང་དང་པོ་གཞི་སྨིན་བྱེད་དབང་གི་དུས་སུ་བུམ་དབང་གཙོ་ཆེ་བ་ཕྱི་པ་དབང་གོང་མ་གསུམ་གཙོ་ཆེ་བ་ནང་པའོ། །གཉིས་པ་ལམ་དག་མཉམ་བླང་དོར་མེད་པར་ལྟ་བའི་དབང་གིས་བསྐྱེད་རྫོགས་ཟུང་འཇུག་རེས་འཇོག་མེད་པར་བསྒོམ་པ་ནང་པ། དེ་མི་ནུས་པ་ཕྱི་པ། དེའི་དབང་གིས་སྤྱོད་པ་བླང་དོར་ཅན་གནས་དང་ཟས་གོས་སོགས་གཙང་བར་སྤྱོད་པ་ཕྱི་པ། མཉམ་པར་སྤྱོད་པ་ནང་པ། གསུམ་པ་འབྲས་བུ་གྲོལ་བ་དུས་ཀྱི་ཁྱད་པར་ནི་ཚེ་འདི་ལས་སངས་རྒྱས་པ་ནང་པ། སྐྱེ་བ་གཞན་དུ་སངས་རྒྱ་བ་ཕྱི་པའོ། །གཉིས་པ་ལ་སྤྱིའི་ངོ་བོ་དང་། བྱེ་བྲག་སོ་སོའི་དབྱེ་བ་གཉིས། དང་པོ། རྣལ་འབྱོར་ཆེན་པོ་སྔགས་ནང་པ་དེ་དག་སྤྱིའི་འདོད་པ་ནི། སྣང་སྲིད་འཁོར་འདས་ཀྱིས་བསྡུས་པའི་ཆོས་ཀུན་དབྱེར་མེད་མཉམ་པའི་ངང་དུ་གནས་པ་སྟེ་དེ་ཡང་མཐའ་བཞིའི་སྤྲོས་པ་ཐམས་ཅད་དང་བྲལ་བའི་དབུ་མ་ཆེན་པོ་རོ་མཉམ་དུ་དག་པ་ནི་ཟབ་པ་དང་། དེ་ལས་ཁྱད་པར་སྣང་ཆ་ཕུང་པོ་ཁམས་དང་སྐྱེ་མཆེད་ཀྱིས་བསྡུས་པ་ཀུན་སངས་རྒྱས་རིགས་ལྔ་ལ་སོགས་པ་དག་པའི་དཀྱིལ་འཁོར་ཆེན་པོ་གཅིག་ཏུ་ཤེས་པས་ཚུལ་དེ་ལྟར་རྣམ་པར་སྒོམ་པ་ནི་རྒྱ་ཆེ་བ་སྟེ་ཀུན་རྫོབ་ཀྱི་སྣང་བ་ལྷ་དང་། དེ་ཡང་དོན་དམ་དང་དབྱེར་མི་ཕྱེད་པའི་ཟུང་འཇུག་གི་ཡེ་ཤེས་ལྷག་པའི་བདེན་པ་དབྱེར་མེད་དོ། །དེའི་དབང་གིས་བཟའ་བཏུང་གོས་རྒྱན་སོགས་འདི་ལྟར་ཚོགས་དྲུག་གི་སྣང་བ་གང་ཡང་མ་སྤངས་རང་སར་གྲོལ་བའི་ཐབས་མཆོག་རྒྱལ་པོས་ལམ་གྱི་གྲོགས་སུ་བསྒྱུར་ནས། སྤྱོད་ལམ་ཐམས་ཅད་དུ་རྒྱ་ཆེ་བ་བསྐྱེད་རིམ་དང་། ཟབ་མོ་རྫོགས་པའི་རིམ་པ་གཉིས་ཡེ་ནས་འདུ་འབྲལ་མེད་པར་ཟུང་དུ་འཇུག་པའི་དོན་ལྷག་པའི་བདེན་པ་དབྱེར་མེད་རང་བྱུང་གི་ཡེ་ཤེས་ཆེན་པོ་ཉིད་དུ་བསྒོམས་པས་ཚེ་འདིར་ཕྱག་རྒྱ་ཆེན་པོ་མཆོག་གི་དངོས་གྲུབ་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པར་བཞེད་པ་ཡིན་ནོ། །གཉིས་པ་ལ། བསྟན་བཤད་གཉིས། དང་པོ། དེ་ལ་བྱེ་བྲག་ཏུ་དབྱེ་ན་ཉོན་མོངས་པ་དུག་གསུམ་གྱི་གཉེན་པོ་དང་། དབང་པོའི་རིམ་པ་སོགས་ལ་ལྟོས་ནས་ཕ་རྒྱུད་དང་མ་རྒྱུད་དང་གཉིས་མེད་ཀྱི་རྒྱུད་གསུམ་དུ་ཡོད་པ་དག་ལས་ཞེས་སོ། །གཉིས་པ་ལ། ཕ་རྒྱུད། མ་རྒྱུད། གཉིས་མེད་རྒྱུད་གསུམ། དང་པོ། དེ་གསུམ་ག་ངོ་བོ་ཟུང་འཇུག་གི་ཡེ་ཤེས་བསྒོམ་པར་འདྲ་ཡང་བསྐྱེད་པའི་རིམ་པ་དང་། དེའི་ཡན་ལག་ཕྲིན་ལས་སྣ་ཚོགས་སྒྲུབ་པའི་ཚུལ་དང་། ཐབས་སྣང་བའི་ཡེ་ཤེས་སྒྱུ་ལུས་དང་། རླུང་གཏུམ་མོའི་རྣལ་འབྱོར་རྫོགས་པའི་རིམ་པ་དང་། མངོན་སྤྱོད་ཀྱི་ལས་གཙོ་བོར་འདོད་པ་ནི། རྣལ་འབྱོར་ཆེན་པོ་ཕ་ཡི་རྒྱུད་བླ་ན་མེད་པ་ཡིན་ཏེ། གདུལ་བྱ་ཞེ་སྡང་ཅན་དང་། ཕྱི་སྤྲོས་པ་ལ་འཆེལ་བའི་གང་ཟག་གདུལ་བའི་ཐབས་སུ་བསྟན་པའོ། །གཉིས་པ། རྒྱུད་གང་དུ་བསྐྱེད་རྫོགས་གཉིས་ལས་རྫོགས་རིམ་དང་། ཐབས་ཤེས་གཉིས་ལས་ཤེས་རབ་སྟོང་པ་ཉིད་དང་། དེའི་ལམ་འོད་གསལ་གྱི་རྣལ་འབྱོར་དང་། ཐབས་ལམ་ཐིག་ལེ་འཇུ་འདུལ་ལ་བརྟེན་པའི་བདེ་བ་དང་། ཕྲིན་ལས་ཀྱི་ནང་ནས་དབང་གི་ལས་སོགས་གཙོ་བོར་འདོད་པ་ནི། རྣལ་འབྱོར་བླ་མེད་མ་ཡི་རྒྱུད་ཅེས་བྱ་སྟེ། གདུལ་བྱ་འདོད་ཆགས་ཅན་དང་། ནང་ལུས་ལ་གནད་དུ་བསྣུན་ནུས་པ་དབང་པོ་འབྲིང་གི་གདུལ་བྱ་འདུལ་བའི་ཐབས་སུ་བསྟན་པའོ། །གསུམ་པ། ཐབས་ཤེས་དང་བསྐྱེད་རྫོགས་ཀྱི་ཕྱོགས་དེ་གཉིས་ཀ་གཙོ་ཆེ་ཆུང་མེད་པར། དག་མཉམ་ཡེ་ཤེས་ཆེན་པོ་ཐིག་ལེ་ཉག་གཅིག་རང་རིག་པ་བྱང་ཆུབ་ཀྱི་སེམས་ཆོས་ཀུན་གྱི་གནས་ལུགས་མཐར་ཐུག་པ་གཙོ་བོར་འདོད་པ་ནི་གསང་སྔགས་གཉིས་སུ་མེད་པའི་རྒྱུད་སྡེ་བླ་ན་མེད་པ་ཞེས་བྱ་སྟེ། གཏི་མུག་ཅན་དང་། དབང་རབ་བྱ་རྩོལ་མེད་པར་འཇུག་པའི་གདུལ་བྱ་འདུལ་བའི་ཐབས་སུ་བསྟན་པ་ཡིན་ནོ། །གསུམ་པ་མཇུག་བསྡུ་བ་ནི། དེ་ལྟར་གདུལ་བྱའི་བློའི་རིམ་པ་དང་སྦྱར་ཏེ་གསུངས་པའི་ནང་པ་སངས་རྒྱས་པའི་ལུགས་ཀྱི་ཆོས་ཀུན་མདོར་བསྡུ་ན་དེ་ཙམ་མོ་སྟེ་དེ་འདིར་འདུ་བར་བསྟན་པ་ཡིན་ནོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། བཤད་བྱ་ཆོས་ཀྱི་རྣམ་གྲངས་རྒྱ་ཆེར་བསྟན་པའི་ལེའུ་སྟེ་བཅུ་གཉིས་པའི་འགྲེལ་པའོ།། །། ༈ གཉིས་པ་བསམ་པའི་ཤེས་རབ་ལ། སྤྱི་དང་། ཁྱད་པར་གྱི་བསམ་བྱ་གཉིས། དང་པོ། དེ་ལྟར་ཕྱི་ནང་གི་གྲུབ་མཐའ་སོགས་ཐོས་པ་དམ་པས་བརྒྱན་པའི་རྗེས་སུ། བསམ་པ་ལས་བྱུང་བའི་ཤེས་རབ་ངེས་པར་རྒྱུད་ལ་བསྐྱེད་པར་བྱ་དགོས་སྟེ། དེ་ཡང་སྔར་བཤད་ཐོས་པའི་དོན་རྣམས་ཐམས་ཅད་ངེས་པ་ནི་བསམ་པ་ལས་བྱུང་བའི་ཤེས་རབ་ལ་རག་ལས་པའི་ཕྱིར་རོ། །གཉིས་པ་ལ། བསྟན་བཤད་གཉིས། དང་པོ། ཁྱད་པར་དུ་བསམ་པར་བྱ་བ་དལ་འབྱོར་རྙེད་དཀའ། ཚེ་མི་རྟག་པ། དད་པའི་ཕན་ཡོན། ལས་རྒྱུ་འབྲས། འཁོར་བའི་ཉེས་དམིགས་ཏེ་རྣམ་པ་ལྔ་པོ་ཉིད་ལས། ཞེས་སོ། །གཉིས་པ་ལ། རྟེན་ཆོས་ལ་ཕྱོགས་པའི་བསམ་བྱ། སེམས་ལ་ཆོས་སྣང་བའི་བསམ་བྱ། ཆོས་ཡང་དག་པར་འགྲུབ་པའི་བསམ་བྱ་གསུམ། དང་པོ་ལ། རྟེན་དོན་ཡོད་པར་བྱ་བའི་བསམ་བྱ་དང་། མྱུར་དུ་དོན་ཡོད་པར་བྱ་བའི་བསམ་བྱ་གཉིས། དང་པོ་ལ། རང་བཞིན་མདོར་བསྟན། རྣམ་གྲངས་རྒྱས་པར་བཤད། དེ་ལྟར་བསམ་པའི་ཕན་ཡོན་གསུམ། དང་པོ་། དེ་ཡང་དང་པོ་བྱང་ཆུབ་སྒྲུབ་པའི་རྟེན་ཕུན་སུམ་ཚོགས་པ་དལ་འབྱོར་རྙེད་པར་དཀའ་བ་བསམ་པ་ནི། ཞེས་སོ། །གཉིས་པ་ལ། རྙེད་དཀའི་ཚུལ་བསམ་པ་དང་། དེ་ཤེས་ནས་དོན་ཡོད་པར་བྱ་བའི་ཚུལ་གཉིས། དང་པོ་ལ། མི་མཐུན་ཕྱོགས་བྲལ་བའི་ཚུལ། མཐུན་རྐྱེན་ཚང་བ། དེ་ལྟ་བུའི་རྙེད་དཀའི་དཔེ་བསམ་པ་གསུམ། དང་པོ་ལ་བསྟན་བཤད་གཉིས། དང་པོ། མི་ཁོམ་པ་བརྒྱད་ལས་ལོག་སྟེ་མིར་གྱུར་བ་དང་། དབང་པོ་ཚང་བ་དང་། ཆོས་ལྡན་གྱི་ཡུལ་དུ་སྐྱེས་པ་དང་། བཟང་པོའི་ལས་འཕྲོ་སད་པ་དང་། ལས་མཐའ་མ་ལོག་པ་དང་། བསྟན་པ་གནས་པ་ལ་དད་པ་དང་། ཆོས་ལྡན་གྱི་གྲོགས་མང་པོ་དང་ལྡན་པ་འདི་ལྟ་བུ་ཤིན་ཏུ་རྙེད་པར་དཀའ་འོ། །གཉིས་པ་ལ། མི་ཁོམ་པ་དང་བྲལ་ཚུལ། མིར་གྱུར་པ། ཕྱི་མ་དྲུག་བཤད་པ་གསུམ། དང་པོ་ལ། བསྟན་བཤད་བསྡུ་གསུམ། དང་པོ། དང་པོ་ཆོས་སྒྲུབ་པར་མི་ཁོམ་པའི་གནས་ལས་བསམ་སྟེ་དལ་བ་རྙེད་དཀའ་བ་བསྟན་པ་ནི། ཞེས་སོ། །གཉིས་པ་ལ་གསུམ། རང་རྒྱུད་རྟེན་གྱི་མི་ཁོམ་པ་བརྒྱད། འཕྲལ་བྱུང་རྐྱེན་གྱིས་མི་ཁོམ་པ་བརྒྱད། རིགས་ཆད་བློ་ཡིས་མི་ཁོམ་པ་བརྒྱད་དོ། །དང་པོ། དམྱལ་བ་དང་། ཡི་དྭགས་དང་། དུད་འགྲོ་གསུམ་ནི་རང་རང་གི་སྡུག་བསྔལ་གྱིས་མནར་ནས་བྲེལ་བས་ཆོས་སྒྲུབ་མི་ཁོམ་ལ། དེ་བཞིན་དུ་ཚེ་རིང་ལྷ་ནི་ཐོས་བསམ་གྱི་རྟེན་འགགས་པས་དང་། མཐའ་འཁོབ་ཀླ་ཀློ་ནི་ཆོས་ཀྱི་སྣང་བ་མེད་པས་དང་། ལོག་པར་ལྟ་བ་མུ་སྟེགས་བྱེད་སོགས་ལྟ་བ་ལོག་པས་དང་། སངས་རྒྱས་ཀྱིས་སྟོང་པ་མུན་བསྐལ་ཏེ་མཆོག་གསུམ་གྱི་སྒྲ་ཙམ་ཡང་མི་གྲགས་པས་དང་། ལྐུགས་པ་ནི་དབང་པོ་སྤྱི་དང་ཁྱད་པར་ཡིད་དབང་བླུན་པས་ཆོས་ལ་མི་འཇུག་པ་དང་། བརྒྱད་པོ་ནི་མི་ཁོམ་པ་སྟེ་དམ་པའི་ཆོས་ཀྱི་སྣོད་དུ་མ་གྱུར་ཏོ། །གཉིས་པ། མིར་གྱུར་པ་གང་ཞིག་ཆོས་སྤྱོད་པའི་ཡུལ་དུ་སྐྱེས་ཀྱང་། དུག་ལྔ་ཤིན་ཏུ་རགས་པས་རང་རྒྱུད་རྟག་ཏུ་འཁྲུགས་པ་དང་། བླུན་རྨོངས་སྡིག་གྲོགས་ཀྱིས་ཁྲིད་པ་དང་། ལྟ་སྤྱོད་ཕྱིན་ཅི་ལོག་ལམ་ནོར་བའི་བདུད་ཀྱིས་ཟིན་པ་དང་། ཆོས་སློབ་འདོད་ཀྱང་བརྩོན་འགྲུས་མེད་པའི་ལེ་ལོ་ཅན་དང་། བརྩོན་ཀྱང་ཡོན་ཏན་མི་སྐྱེ་བ་སྡིག་སྒྲིབ་ཅན་ལས་ངན་གྱི་མཚོ་ཆེན་རྡོལ་བ་དང་། རང་དབང་མེད་པར་བྲན་སོགས་གཞན་དབང་དུ་གྱུར་པ་དང་། ཚེ་འདིའི་ཉེས་པའམ་ནད་སོགས་ཀྱིས་འཇིགས་སྐྱོབ་ཙམ་དུ་ཆོས་སྒོར་ཞུགས་ཀྱང་ཆོས་མིན་བྱེད་པ་དང་། ཆོས་ལྟར་བཅོས་ནས་རྙེད་སོགས་སྒྲུབ་པའི་གཟུགས་བརྙན་པ་སྟེ། འཕྲལ་བྱུང་རྐྱེན་གྱིས་ཆོས་ལ་ལོངས་ཇི་བཞིན་སྤྱོད་མི་ཁོམ་པ་རྣམ་པ་བརྒྱད་དེ། འདི་ནི་ཐར་ལམ་དང་ལས་འབྲས་འབྲེལ་མེད་པས་ཆོས་ཀྱི་སྣོད་མིན་ཏེ་རྟེན་ཕྱིན་ཅི་ལོག་ཡིན་ནོ། །གསུམ་པ། ཚེ་འདིར་ཟས་ནོར་གཉེན་འདུན་སོགས་ཀྱི་འཆིང་བ་དམ་པོ་དང་ལྡན་པ་དང་། མི་གཞི་ངན་པས་ཀུན་སྤྱོད་ཤིན་ཏུ་ངན་པ་བཅོས་སུ་མེད་པ་དང་། ངན་སོང་སོགས་འཁོར་བའི་ཉེས་པ་ཐོས་ཀྱང་དེས་མི་སྐྲག་པ་དང་། དཀོན་མཆོག་གི་ཡོན་ཏན་སངས་རྒྱས་ཀྱི་རྣམ་ཐར་སོགས་ཐོས་ཀྱང་དད་པ་ཅུང་ཟད་མེད་པ་དང་། གཅིག་ཏུ་མི་དགེ་སྡིག་སྤྱོོད་ལ་དགའ་བས་སྒོ་གསུམ་ཉེ་བར་མ་ཞི་བ་དང་། ཁྱི་ལ་རྩྭ་བཞག་པ་བཞིན་དུ་ཆོས་ལ་དོན་གཉེར་གྱི་སེམས་པ་ཅུང་ཟད་མེད་པ་དང་། ཐུན་མོང་གི་སེམས་བསྐྱེད་དང་སྡོམ་པ་རལ་བ་དང་། སྔགས་ལ་ཞུགས་ནས་དམ་ཚིག་ཉམས་པ་ཞེས་བྱ་བ་རྣམས་ནི། རེ་ཞིག་ཐར་པའི་རིགས་ཆད་པ་ཞེས་དམན་པ་ལ་དགག་སྒྲ་སྦྱར་བ་ཡིན་ཏེ་བློ་ཡིས་དབང་གིས་མི་ཁོམ་པ་རྣམ་པ་བརྒྱད་དེ། རང་རྒྱུད་ཆོས་ལས་རིང་གྱུར་ཐར་ལམ་གྱི་སྒྲོན་མེ་ནུབ་པ་ཞེས་བྱའོ། །གསུམ་པ། དེ་ལྟར་ཆོས་ཡང་དག་པ་སྒྲུབ་པ་མི་ཁོམ་པའི་གནས་ཉེར་བཞི་པོ་དེ་དག་རྣམས་སུ་བདག་ཅག་མ་སྐྱེས་པས་དལ་བ་ཐོབ་པ་ལ་སྤྲོ་དགའ་བསྐྱེད་དེ་དམ་པའི་ཆོས་སྒྲུབ་པ་ལ་མྱུར་དུ་འབད་པར་འཚལ་ལོ། །གཉིས་པ་མིར་གྱུར་པ་ནི། འདི་ལྟར་སེམས་ཅན་སྤྱི་བཙན་ལ་བསམ་ན་མཐའ་དང་མུ་མེད། བྱེ་བྲག་ཏུ་འཛམ་བུའི་གླིང་གི་ནགས་ཚལ་དང་ཆུ་ཀླུང་སོགས་གཅིག་ལ་ཡོད་པའི་དུད་འགྲོ་ཙམ་གྱི་ལུས་མཐོང་བ་ལ་དཔགས་ནའང་། མི་ཡི་ལུས་ཐོབ་པ་ནི་འཁོར་ལོས་སྒྱུར་བའི་རྒྱལ་པོ་རྙེད་པ་དང་འདྲ་སྟེ་ཤིན་ཏུ་དཀོན་ལ། མི་ཡི་ལུས་ཀྱི་ནང་ནས་ཀྱང་རྡོ་དང་སོག་པོ་སོགས་ཀྱི་སྐྱེ་བོ་གཞན་ལ་བསམ་ནའང་དད་པ་དང་ལྡན་པ་ཆོས་བྱེད་པའི་རིགས་ཅན་དེ་བས་ཀྱང་དཀོན་པའི་ཕྱིར་སངས་རྒྱས་ཐོབ་པ་དང་མཚུངས་སོ། །དེ་བས་དུས་རྟག་ཏུ་དལ་འབྱོར་རྙེད་དཀའ་བའི་ཚུལ་ལ་བསམ་པར་འབད་འཚལ་ལོ། །གསུམ་པ་ཕྱི་མ་དྲུག་ནི། དེ་བཞིན་དུ་མིག་སོགས་དབང་པོ་མ་ཚང་བ་དང་། སངས་རྒྱས་བསྟན་པ་མེད་པའི་ཡུལ་མཐའ་འཁོབ་ཏུ་སྐྱེས་པ་དང་། དཀོན་མཆོ་གསུམ་སྐད་ཅིག་ཀྱང་མི་དྲན་ཅིང་སྐྱབས་འགྲོ་རྡོག་གཅིག་ཀྱང་བརྗོད་མ་མྱོང་བའི་ཆོས་ལ་ལས་འབྲས་མེད་པ་རྣམས་དང་། དང་པོར་ཆོས་སྒོར་ཞུགས་ཀྱང་ཕྱིས་ལས་ཀྱི་མཐའ་ལོག་ཅིང་སྡིག་པ་རྟག་ཏུ་བྱེད་པ་རྣམས་དང་། སངས་རྒྱས་ཀྱི་བསྟན་པ་ལ་མ་དད་པ་མུ་སྟེགས་བྱེད་སོགས་དང་། ཆོས་མིན་སྡིག་པའི་གྲོགས་པོ་ཤིན་ཏུ་གྲངས་མང་བའི་ཚུལ་ལ་རབ་ཏུ་བསམ་པར་བྱས་ནས། བདག་དེ་དག་རྣམས་སུ་མ་གྱུར་ཅིང་ཆོས་ལྡན་གྱི་གྲོགས་དང་འགྲོགས་སུ་ཡོད་པའི་ལུས་རྟེན་ཁྱད་པར་ཅན་རྙེད་པ་འདི་ཉིན་མཚན་ཀུན་ཏུ་ངེས་པར་བསམ་པར་བྱའོ། །གཉིས་པ་མཐུན་པའི་རྐྱེན་ལ་བསྟན་བཤད་གཉིས། དང་པོ། ཆོས་ལ་སྤྱོད་པའི་འབྱོར་པ་ལེགས་པར་ཚང་བ་ནི། ཞེས་སོ། །གཉིས་པ་ལ་རང་འབྱོར་དང་། གཞན་འབྱོར་གཉིས། དང་པོ། སྔར་གྱི་དཀར་པོའི་ལས་འཕྲོ་སད་པ་སྟེ་དེའི་འབྲས་རྟགས་ཀྱིས་ཡིན་པར་བསྟན་པའམ་སྟོན་པར་བྱེད་པ་ཡང་། བདག་མིར་གྱུར་པ་དང་། བསྟན་པ་གནས་པའི་ཡུལ་དབུས་སུ་སྐྱེས་པ་དང་། ཐོས་བསམ་གྱི་རྟེན་དབང་པོ་ཚང་ཞིང་། ཐར་ལམ་གྱི་གནས་བསྟན་ལ་དད་པ་དང་། འཇུག་པའི་སྒོ་ལས་ཀྱི་མཐའ་མ་ལོག་པར་གྲུབ་མཐའ་ལོག་ལྟའི་རིགས་སུ་མ་སྐྱེས་པས་ཡང་དག་པའི་ལྟ་བ་ཅན་ཏེ། དེ་དག་ཐོབ་པར་ཤིན་ཏུ་དཀའ་བ་ཡིན་ལ་དེ་ཐོབ་པ་ནི་དཀར་པོའི་ལས་འཕྲོར་ལྡན་པ་ཡིན་ནོ། །གཉིས་པ། ཆོས་སྤྱོད་པའི་རྐྱེན་གཞན་འབྱོར་ཚང་བས་རྙེད་པར་དཀའ་བ་ལ་བསམ་ནས་ཀྱང་ཆོས་ལ་བརྩོན་པ་དགོས་ཚུལ་ཡང་། སྟོན་པ་སངས་རྒྱས་འཇིག་རྟེན་དུ་བྱོན་པ་དང་། དེས་ཆོས་གསུངས་པ་དང་། བསྟན་པ་དེ་གནས་པ་དང་། བསྟན་པ་དེ་ཡི་རྗེས་སུ་ཞུགས་ཤིང་ནན་ཏན་བྱེད་པ་གཞན་ཡོད་པ་དང་། བརྩེ་ལྡན་དགེ་བའི་བཤེས་དང་རང་ཆོས་བྱས་ན་སྦྱིན་བདག་སོགས་མཐུན་པའི་རྐྱེན་འབྱོར་པ་འདི་ལྟ་བུ་རབ་ཏུ་དཀོན་པའི་ཕྱིར་བརྩོན་འགྲུས་བརྩམ་འཚལ་ལོ། །གསུམ་པ། དལ་འབྱོར་དེ་ཉིད་དཔེས་མཚོན་ཏེ་རྙེད་པར་དཀའ་བ་ཡང་། མཚོ་དབུས་སུ་རླུང་གིས་གཡེངས་པའི་གཉའ་ཤིང་བུ་ག་གཅིག་པ་རུས་སྦལ་ཞར་བ་ལོ་བརྒྱ་བརྒྱ་ན་ཆུ་ཁར་ལན་རེ་ཡོང་བའི་མགྲིན་པར་ཆུད་པ་ནི་སྲིད་ཀྱི་ངན་སོང་གི་འགྲོ་བ་ལས་ཐར་ཏེ་མིར་གྱུར་པ་ནི་དེ་ལས་ཀྱང་རྙེད་པར་དཀའོ། །དེ་བཞིན་དུ་རྩིག་ངོས་ཀྱི་ཞལ་ཞལ་ལོགས་ལ་སྲན་མ་གཏོར་བ་ཆགས་སྲིད་ཀྱི། མིར་གྱུར་ན་ཡང་ཡུལ་དབུས་སུ་སྐྱེ་བ་དཔེ་དེ་བས་དཀོན་ནོ། །དེ་བཞིན་དུ་མེ་ཏོག་ཨུ་དུམྦཱ་ར་འཇིག་རྟེན་དུ་འབྱུང་དཀའ་བ་དེ་བཞིན་དུ་སངས་རྒྱས་འབྱུང་བ་དཀོན་པ་དང་། ཡང་དཔེ་དེ་བཞིན་དུ་དམ་ཆོས་གསུངས་པ་དང་། དེ་བས་ཀྱང་ཆོས་སྒོར་ཞུགས་པ་དང་། ཞུགས་ཀྱང་ཡང་དག་པའི་ལམ་དང་ཕྲད་པ་དེ་བས་ཀྱང་དཀོན་པ་ཡིན་ནོ། །གཞན་ཡང་ཁབ་མིག་ཏུ་རས་ཡུག་ཆུད་པ་དཀའ་བ་བས་ཀྱང་། ཡང་དག་པའི་ལམ་རྙེད་ནས་དེ་དག་ཚུལ་བཞིན་སྒྲུབ་པ་བྱེད་པ་དཀོན། རྒྱ་མཚོའི་གླིང་དག་ནས་ཡིད་བཞིན་གྱི་ནོར་བུ་རྙེད་པ་བས་ཀྱང་ཡང་དག་པའི་བླ་མ་རྙེད་པར་དཀའ་བས་ན། ཚུལ་དེ་དག་བསམས་ལ་སྙིང་ནས་བརྩོན་པས་དམ་ཆོས་ཚུལ་བཞིན་དུ་སྒྲུབ་པར་འཚལ་ལོ། །གསུམ་པ་དལ་འབྱོར་དོན་ཡོད་པར་བྱ་བ་ལ། དོན་མེད་ཀྱི་བྱ་བ་དོར་བ་དང་། དོན་ཡོད་པར་སྒྲུབ་པ་གཉིས། དང་པོ། རང་གཞན་ལ་གཏན་དུ་ཕན་པའི་དོན་མེད་པ་འཇིག་རྟེན་གྱི་བྱ་བ་རྣམས་དོར་ནས་ཇི་ལྟར་སྒྲུབ་པའི་ཚུལ་ཡང་། སྡུག་བསྔལ་ལས་གཏན་དུ་ཐར་པའི་རྒྱུར་འགྱུར་བའི་དགེ་བ་མ་གཏོགས་པ་གཞན་ཐ་མལ་གྱི་བྱ་བ་གང་ཡང་སྙིང་པོ་མེད་པར་ཤེས་པས་དོར་ནས་ཡང་དག་པའི་ཆོས་ལ་བརྩོན་པར་བྱེད་དགོས་ཏེ། འཇིག་རྟེན་ཚེ་འདིའི་འཁྲུལ་བའི་བྱ་བ་ཐམས་ཅད་ནི་གཏན་དུ་ཕན་པའི་དོན་མེད་ཅིང་སྡུག་བསྔལ་གསུམ་གྱི་རྒྱུའམ་དེ་དང་འབྲེལ་བ་ཡིན་ལ། རང་འཆི་དུས་མི་ཕན་ཞིང་སྙིང་པོ་ཅུང་ཟད་ཀྱང་མེད་པ་དེའི་ཕྱིར། དུག་སྦྲུལ་གྱི་གཟེབ་བརྙེད་པའམ་རིམས་ནད་ཀྱིས་ཤི་བའི་གོས་དང་ཟས་དུག་ཅན་བཞིན་ངེས་པར་སྤང་འཚལ་ལོ། །དེ་ཡང་ཚེ་འདིའི་བྱ་གཞག་སོ་ནམ་ཡུན་གྱི་དོན་སྲིད་མེད་པ་ཡུལ་ཞིང་གི་སོ་ཚིས། དེ་བཞིན་དུ་གྲོགས་དོན་མེད་ཁྱོ་ཤུག་དང་ཉེ་འབྲེལ། གྲོས་འདུན་དོན་མེད་ཚེ་འདིའི་ཆེ་ཐབས་དང་། ལོངས་སྤྱོད་དོན་མེད་ཟས་ནོར་གྱི་གཉེར་ཁ། འཁྲུགས་པ་དོན་མེད་དགྲ་གཉེན་ཕྱོགགས་རིས་ཀྱི་རྩོད་པ། གྲུབ་མཐའ་ཡུན་གྱི་དོན་སྲིད་མེད་པ་མཐར་འཛིན་གྱི་ལྟ་བ་ངན་པ་རྣམས་དལ་འབྱོར་ཆུད་གསོན་པར་བྱེད་ཅིང་ཕུང་ཁྲོལ་གྱི་རྩ་བ་ལགས་པས་སྤང་བར་བྱའོ། །གཉིས་པ། དུས་རྟག་ཏུ་འདྲིས་པའི་དོན་མི་བརྗེད་པའི་དྲན་པ་དང་། དེའི་དོན་ལ་དཔྱོད་པའི་ཤེས་བཞིན་དང་བླང་དོར་ལ་གཟོབ་པ་ལྷུར་ལེན་པ་བག་ཡོད་དང་ལྡན་པས། དལ་འབྱོར་འདི་ལ་བསམས་ཏེ་ཐར་པའི་མཆོག་བྱང་ཆུབ་བསྒྲུབ་པར་བྱ་དགོས་ཏེ། དེ་ཡང་འགྲོ་བ་དང་། ལྡང་བ་དང་། འཆག་པ་དང་། ཉལ་བ་དང་། འདུག་པ་དང་། ཟས་ཟ་བ་ལ་སོགས་པ་ནའང་། ལེ་ལོ་ལ་སོགས་པ་སྟེ་སྙོམ་ལས་དང་། བཏང་སྙོམས་དང་། གཡེངས་པ་དང་། །འདུ་འཛི་དང་། ལུས་ངག་ཡིད་གསུམ་མ་ཞི་བའི་ལུང་མ་བསྟན་བཅས་སྐྱོན་དྲུག་པོ་རྣམས་སྤངས་ནས། མངོན་མཐོ་ལྷ་མི་དང་ངེས་ལེགས་ཐར་པ་མཆོག་སྟེ་གནས་སྐབས་དང་མཐར་ཐུག་གི་དོན་ཆེན་པོ་བསྒྲུབ་པ་ན། བཀྲེས་པས་ཟས་དང་། སྐོམ་པས་ཆུ་དང་། དབུལ་པོས་ནོར་མཐོང་བ་ལ་སོགས་པའི་དཔེས་མཚན་བཅས་མཚན་མེད་ཀྱི་དགེ་སྦྱོར་གང་ལའང་འདོམ་ཀ་མེད་པར་ཐད་ཀར་འཇུག་སྟེ་ཉིན་མཚན་ཀུན་ཏུ་སྡིག་པ་སྤང་ཞིང་དགེ་བ་ལ་བརྩོན་པར་བྱའོ། །གསུམ་པ། དེ་ལྟར་དལ་འབྱོར་རྙེད་དཀའ་བར་བསམ་པ་དེ་ཡི་ཕན་ཡོན་ཚད་མེད་ཀྱང་བསྡུ་ན། ཚེ་འདིའི་བྱ་བ་དོན་མེད་དུ་ཤེས་ནས་བློས་ཐོངས་ཤིང་ཕྱི་མ་དོན་དུ་གཉེར་བས་ལས་འབྲས་དང་མི་འགལ་བར་སྤྱོད་པ་དང་། ཐོས་བསམ་སྒོམ་པའི་དོན་ལ་བརྩོན་འགྲུས་མེ་བཞིན་འབར་བ་དང་། དལ་ཁོམ་མེད་པར་ཉིན་མཚན་དགེ་བས་དུས་འདའ་ཞིང་སྡིག་པའི་གྲོགས་པོ་སྤོང་བ་དང་། འཁོར་བའི་འདུན་མ་བོར་བས་འཆི་དུས་སྤྲོ་དགའ་དང་བཅས་ཏེ་ཐར་པའི་ལམ་སྣ་ཟིན་པས་དམ་ཆོས་ཚུལ་བཞིན་སྒྲུབ་སྟེ་མྱུར་དུ་སྲིད་གསུམ་འཁོར་བའི་རྒྱ་མཚོའི་ཕ་རོལ་ཞི་བ་མྱང་འདས་སངས་རྒྱས་ཀྱི་སར་འགྲོ་བར་འགྱུར་རོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོའི་མཛོད་ལས། དལ་འབྱོར་རྙེད་པར་དཀའ་བ་བསམ་པའི་ལེའུ་སྟེ་བཅུ་གསུམ་པའི་འགྲེལ་པའོ།། །། ༈ གཉིས་པ་རྟེན་མྱུར་དུ་དོན་ཡོད་པར་བྱ་བའི་ཕྱིར་མི་རྟག་པ་བསམ་པ་ལ། བསམ་པར་བྱ་བ་མདོར་བསྟན། དེའི་རང་བཞིན་རྒྱས་པར་བཤད། དེ་བསམ་པའི་ཕན་ཡོན་གསུམ། དང་པོ། ཇི་སྐད་བཤད་པ་དེ་ལྟར་རྙེད་དཀའི་རྟེན་དལ་འབྱོར་ཕུན་ཚོགས་རྙེད་པར་གྱུར་ཀྱང་། འདུས་བྱས་ཡིན་ཕྱིར་སྐད་ཅིག་གིས་མི་རྟག་ཅིང་འཇིག་པའི་ཆོས་ཅན་ཡིན་ཏེ། འདོད་གཟུགས་གཟུགས་མེད་ཀྱི་སྲིད་པ་གསུམ་པོ་མི་རྟག་སྒྱུ་མའི་རང་བཞིན་བསླུ་བར་འགྱུར་བ་སྟེ་མྱུར་དུ་འཆི་བའི་རང་བཞིན་ལས་མ་འདས་སོ། །གཉིས་པ་ལ་མི་རྟག་པའི་ཚུལ་བསམ་པ་དང་། དེ་གོམས་པའི་ཚད་གཉིས། དང་པོ་ལ། འཆི་ངེས་པ། འཆི་ཚེ་གཞན་གྱིས་མི་ཕན་པ། དེས་ན་འཆི་བ་དྲན་པར་གདམས་པ་གསུམ། དང་པོ་ལ། མི་རྟག་པ་སོ་སོའི་རང་བཞིན་བསྟན་པ་དང་། དེ་དག་གི་མཇུག་བསྡུ་བ་གཉིས། དང་པོ་ལ། རགས་པ་རྒྱུན་གྱི་མི་རྟག་པ་དང་། ཕྲ་བ་སྐད་ཅིག་གི་མི་རྟག་པ་གཉིས། དང་པོ་ལ། རྒྱུན་འཇིག་པའི་མི་རྟག་པ་དང་། རྒྱུན་འགྱུར་བའི་མི་རྟག་པ་གཉིས། དང་པོ་ལ། སྣོད་མི་རྟག་པ་དང་། བཅུད་མི་རྟག་པ་གཉིས། དང་པོ། འདི་ལྟར་རི་རབ་དང་བཅས་པའི་གླིང་བཞིའི་འབྱོར་པས་བརྒྱན་པ་ཡི་ཕྱི་སྣོད་ཀྱི་འཇིག་རྟེན་ཀྱང་ནམ་ཞིག་མི་རྟག་པར་འཇིག་སྟེ་ནམ་མཁའ་གཅིག་ཏུ་འགྱུར་བའི་དཔེས་ཆུ་ཡི་དབུ་བ་རྡོས་འདྲའི་སྙིང་པོ་མེད་པའི་ལུས་ཀྱང་དེ་ལྟར་མི་རྟག་སྟེ་མྱུར་དུ་འཇིག་པར་ཤེས་པར་གྱིས་ཤིག གཉིས་པ་ལ། ལུས། འདུས་པ། ལོངས་སྤྱོད། བདེ་བ་མི་རྟག་པ་བཞི། དང་པོ། སྤྱིར་འཛམ་གླིང་གི་ཚེ་ལ་ངེས་པ་མེད་ཅིང་བྱེ་བྲག་ད་ལྟ་ལྔ་བཅུ་ཁ་རལ་དུ་སོང་བས་ཚེ་ཐུང་བ་སྟེ། ད་ལྟའི་ས་སྟེང་ན་ཡོད་པའི་མི་དང་དུད་འགྲོ་སོགས་འགྲོ་བ་འདི་ཀུན་ཀྱང་། ད་སྟེ་ལོ་བརྒྱའི་ནང་དུ་ངེས་པར་མེད་ཅིང་ཤི་བར་འགྱུར་ལ། དེར་མ་ཟད་ཚེ་རིང་བསྐལ་པར་ཐུབ་པ་ནས་ཐུང་བ་སྐད་ཅིག་མ་དང་བར་མ་ལོ་ཟླ་ཞག་སོགས་ཐུབ་པ་གང་ཡིན་ཡང་འདྲ་སྟེ་སྐྱེས་པ་ཐམས་ཅད་རིམ་བཞིན་དུ་རྒས་གཞོན་བར་མའི་གོ་རིམ་མེད་པར་འཆི་བ་མངོན་སུམ་དུ་གྱུར་པས་ཀྱང་བདག་གི་ཚེ་ཡང་དེ་དང་འདྲ་བར་མྱུར་དུ་འགྲོ་ཞིང་འཆི་བར་འགྱུར་བ་སོམས་ཤིག གཉིས་པ། གཞན་ཡང་ཚོང་འདུས་ཀྱི་ས་དང་། ལམ་གྱི་གཞི་མདོ་དང་། མགྲོན་ཁང་གི་གནས་རྣམས་སུ། ཕྱོགས་ཀྱི་སྐྱེ་བོ་མང་པོ་འདུས་ཤིང་མྱུར་དུ་ཕྱོགས་ཕྱོགས་སུ་གྱེས་པའི་དཔེས། ད་ལྟ་བདག་དང་དགྲ་གཉེན་བར་མའི་སེམས་ཅན་གནས་གཅིག་ཏུ་འདུས་པ་འདི་རྣམས་ཀྱང་ཡུན་རིང་མི་འགྲོགས་པར་མྱུར་དུ་འབྲལ་ཞེས་ངེས་པར་སྙིང་ནས་བསམ་པར་བྱའོ། །གསུམ་པ། སྔོན་ལོངས་སྤྱོད་དང་འབྱོར་པ་ཕུན་སུམ་ཚོགགས་པ་དང་ལྡན་པའི་གྲོང་རྣམས་དེང་སང་སྟོངས་ཤིང་མེད་པར་གྱུར་པའི་དཔེས། བདག་གི་ནོར་རྫས་ཁང་པ་སོགས་བསགས་པའང་ངེས་པར་འཛད་ཅེས་ནོར་རྣམས་གང་ལ་ཡང་མི་རྟག་སྙིང་པོ་མེད་པས་གང་ལའང་མ་ཆགས་པར་ཆོས་ཕྱོགས་སུ་བཏང་ནས་སྙིང་པོ་ལེན་པ་ལ་བརྩོན་པར་བྱའོ། །བཞི་པ། མཐོ་རིས་ཀྱི་གྲོང་གི་འབྱོར་པས་མངོན་པར་མཐོ་བ་ལྷའི་དབང་པོ་བརྒྱ་བྱིན་དང་མིའི་འཁོར་ལོས་སྒྱུར་བའི་རྒྱལ་པོ་སོགས་ཀྱང་ཤི་བའི་འོག་ཏུ་རང་དབང་མེད་པར་ངན་འགྲོར་ལྟུང་བའི་དཔེས། རང་ཉིད་ཅུང་ཟད་འབྱོར་ཚེ་དེའི་དྲེགས་པས་སྙེམས་པ་མེད་པར་དུལ་ཞིང་བག་ཡོད་པར་མཛོད་ཅིག གཉིས་པ་རྒྱུན་འགྱུར་བའི་མི་རྟག་པ། ཕྱི་སྣོད་འཇིག་རྟེན་འཛམ་གླིང་འདིར་ཡང་སྔོན་རྫོགས་ལྡན་གྱི་དུས་དང་། སུམ་ལྡན་དང་། ཉིས་ལྡན་དང་། ཐ་མ་རྩོད་ལྡན་གྱི་དུས་བཞིར་འགྱུར་བ་དང་། ནང་བཅུད་མི་ཚེ་གཅིག་ལའང་བཙས་པ་བུ་ཆུང་གི་དུས། བྱིས་པ་གཞོན་པའི་དུས། དར་ལ་བབ་པའི་དུས། རྒས་ཤིང་འཁོགས་པའི་དུས་དང་བཞིར་ན་ཚོད་འགྱུར་བ་དང་། ལོ་གཅིག་ལའང་། དཔྱིད་ས་བོན་རྨོ་རྐོའི་དུས། དབྱར་ལོ་འདབ་རླན་རྒྱས་དུས། སྟོན་འབྲས་བུ་བཅུད་རྫོགས་ཀྱི་དུས། དགུན་ས་སྐམ་རྡོ་འཁྱགས་ཀྱི་དུས་དང་བཞིར་འགྱུར་བས་ཀྱང་མི་རྟག་འཆི་བར་ངེས་ཀྱིས་རྟག་འཛིན་སྤོངས་ལ་མྱུར་དུ་ཆོས་ལ་བརྩོན་པར་མཛོད་ཅིག །གཉིས་པ་ཕྲ་བའི་མི་རྟག་པ། འདི་ལྟར་གཟུགས་སོགས་རགས་པར་སྣང་བའི་ཆོས་རྣམས་ནི་མི་རྟག་ཅིང་བདེན་པར་མེད་དེ་གཟུགས་མཐའ་རྡུལ་ཕྲན་ཆ་མེད་དང་། དུས་ཀྱི་མཐའ་ནི་སྐད་ཅིག་ཆ་མེད་ལས་མ་འདས་ཤིང་། དེ་ཡང་བར་སྣང་གི་གློག་འགྱུ་བ་དང་། རི་གཟར་གྱི་འབབ་ཆུ་བཞིན་དུ་སྐད་ཅིག་གིས་འགྱུར་ཞིང་སྐྱེ་འགག་བྱེད་པས་མི་རྟག་པས་ཡུལ་ལ་ཞེན་པ་སྤོང་ལ་མྱུར་བ་ཉིད་དུ་དམ་པའི་ཆོས་སྒྲུབས་ཤིག་ཅེས་གདམས་པའོ། །གཉིས་པ་དོན་བསྡུ། ཕྱི་སྣ་ཚོགས་སྣང་བ་སྣོད་ཀྱི་ཁྱད་པར་དང་། ནང་བཅུད་ཀྱི་འགྲོ་བ་ཀུན་ཀྱང་མི་བརྟན་པར་གཡོ་སྟེ་འཇིག་པར་འགྱུར་ཞིང་སྒྱུ་མ་དང་ཆུ་ཤིང་བཞིན་དུ་སྙིང་པོ་མེད་པ་ཞིག་གཤིས་ཀྱིས་ཡིན་པ་དེའི་ཕྱིར་མི་རྟག་ཅེས་བྱ་བས་འཁོར་བ་འདི་བདག་ཏུ་བྱས་པའམ་བདག་གིར་བྱས་ནས་བཟུང་ཞེས་པ་ཏིང་ངེ་འཛིན་གྱི་རྒྱན་ཏེ་དགོས་པ་ཚངས་རིས་སོགས་སྣོད་བཅུད་ཀུན་ཀྱང་མི་རྟག་པའི་གཞན་དབང་ཅན་ཡིན་གྱི་རང་དབང་མེད་ཅེས་སྟོན་པའི་ཚིག་གི་ཉམས་བཏོན་པ་ཡིན་ཏེ། རྡོ་འཕང་གི་མདོར། འདི་ལས་སྟོབས་ཆེ་བ་མི་རྟག་པ་ཞེས་གསུངས་པ་བཞིན་ནོ། །དེས་ན་མི་རྟག་པས་བདག་ཏུ་བཟུང་སྟེ་བཏང་བ་འགའ་ཡང་མེད་དོ། །རྒྱུ་འབྱུང་བཞི་འདུས་པ་ལས་བྱུང་བའི་ཕྱིར་སྣོད་བཅུད་ཐམས་ཅད་དུས་ནམ་ཞིག་ངེས་པར་འཇིག་པ་ཅན་ཡིན་ལ། རྒྱུན་མ་ཞིག་གི་བར་དེར་ཡང་ལུས་ཅན་རྣམས་ཀྱང་སྐད་ཅིག་གིས་གཡོ་བའི་གྲོང་ཁྱེར་རྙིངས་ཤིང་མྱགས་པར་འགྱུར་བ་སྟེ། དེ་ཡང་སྐྱེས་པའི་ཐ་མ་འཆི། འདུས་པའི་ཐ་མ་འབྲལ། བསགས་པའི་ཐ་མ་འཛད། མཐོན་པོའི་ཐ་མ་ལྷུང་བ་སྟེ་མི་རྟག་པའི་མཐའ་བཞིས་བསྡུས་པའི་ཕྱིར་རྟག་པ་འགའ་ཡང་མེད་དོ། །ཁྱད་པར་སྐྱེས་བུའི་ཚེ་ལ་ངེས་པ་མེད་ཅིང་ནམ་འཆི་ཆ་མེད་པས་བདག་ངེས་པར་འཆི་ཞེས་སྙིང་ནས་བསམ་པར་བྱའོ། །གཉིས་པ་འཆི་ཚེ་གཞན་གྱིས་མི་ཕན་པ་ལ། འཇིག་རྟེན་གྱི་བྱ་བས་མི་ཕན་པ་དང་། དམ་པའི་ཆོས་ཀྱིས་ཕན་ཚུལ་གཉིས། དང་པོ་ལ། གང་གིས་ཀྱང་འཆི་བ་ལ་མི་བསྟོངས་པ་དང་། གང་ལའང་ཡིད་བརྟན་མེད་ཚུལ་གཉིས། དང་པོ། རང་ཉིད་འཆི་བར་གྱུར་པའི་ཚེ་རྟེན་པའི་གནས་དང་བསགས་པའི་ལོངས་སྤྱོད་དང་འབྲེལ་བའི་གཉེན་དང་ལུས་ཀྱི་དཔའ་རྩལ་དང་མཐུ་སྟོབས་ཀྱི་དཔུང་གཉེན་ཚངས་དབང་སོགས་ལྷ་དང་སྨན་དང་སྨན་པ་ཟས་གོས་ལ་སོགས་ཐམས་ཅད་ཀྱིས་ཀྱང་སྟོངས་པ་སྟེ་ཕན་པ་འགའ་ཡང་མེད་པས་འཆི་དུས་ཕན་པའི་དམ་པའི་ཆོས་སྒྲུབས་ཤིག་ཅེས་གདམས་པའོ། །གཉིས་པ། གང་དུ་ཚོང་འདུས་ཀྱི་མགྲོན་པོ་དར་ཅིག་ཚོགས་ཀྱང་གྱེས་ནས་འགྲོ་ལ་ལམ་དུའང་འཇིགས་པའི་དགྲ་ཡོད་པར་ལྟར་རང་ཅག་སོ་སོར་གྱེས་པའི་ཚེ་ནའང་འཆི་བདག་གི་བདུད་དང་བར་དོའི་འཁྲུལ་སྣང་སོགས་ཀྱི་འཇིགས་པ་མཐའ་ཡས་ཤིང་། རང་གི་ལུས་ནི་ཆུ་འགྲམ་གྱི་ལྗོན་ཤིང་དང་འདྲ་ལ་འཆི་བ དག་ཆུ་བོ་དང་འདྲ་བས་བརྐོ། འབྲུག་དང་བྲག་ཆའི་སྒྲ་རྗེས་མེད་པ་ལྟར་བསྟོད་སྨད་སོགས་ཀྱང་དེ་དང་འདྲ། སྤྲིན་དང་ན་བུན་ལྟར་སེམས་ཀྱི་རྟོག་པ་ཐམས་ཅད་ཀྱང་ཡལ་ནས་འགྲོ། འགྲོ་བ་སྔར་ཤི་བ་དང་ད་ལྟར་ཤི་བ་རྣམས་ལ་བསམས་ཏེ་རང་ལ་ནང་དུ་སྦྱར། ཉི་ཟླའི་འགྲོས་དང་མར་མེ་ཤི་བ་སོགས་ལ་བལྟས་ཏེ། རང་གི་ཚེ་མི་རྟག་ཅིང་གཡོ་བས་མྱུར་དུ་འཆི་བ་སོམས་ཤིག གཉིས་པ་ཆོས་ཀྱིས་ཕན་ཚུལ། འཆི་བའི་དུས་དང་བར་དོ་སོགས་སུ་སྐྱབས་དང་དཔུང་གཉེན་ནི་བླ་མ་དང་དཀོན་མཆོག་རིན་པོ་ཆེ་རྣམ་པ་གསུམ་ཡི་དམ་དང་མཁའ་འགྲོའི་ཚོགས། ཆོས་སྤྱོད་དགེ་སྦྱོར་ཚོགས་གཉིས་སོགས་ཏེ། དེས་ལམ་སྣ་འདྲེན་ཞིང་བར་ཆད་སེལ་ལ་བདེ་ཆེན་ཐར་པའི་གོ་འཕང་མཆོག་ཐོབ་པའི་ཕྱིར། དམ་པ་བསྟེན་ཞིང་དེས་བསྟན་པའི་སྙིང་པོའི་དོན་སྒྲུབ་པར་འཚལ་ལོ། །གསུམ་པ། ཟ་འཆག་ཉལ་འདུག་སོགས་སྤྱོད་ལམ་ཀུན་ཏུ་འཆི་བ་མི་རྟག་པ་དྲན་པར་བྱ་ཞིང་ཡང་དག་པའི་ལམ་ལ་བསྐུལ་མ་གདབ་པར་བྱ་སྟེ། མྱང་འདས་ལས། ཞིང་རྨོ་བ་རྣམས་ཀྱི་ནང་ནས་སྟོན་གྱི་ལོ་ཐོག་རྙེད་པ་འདི་ཉིད་མཆོག་གོ །རྗེས་ཐམས་ཅད་ཀྱི་ནང་ནས་ཁྱུ་མཆོག་གི་རྗེས་མཆོག་གོ །འདུ་ཤེས་ཐམས་ཅད་ཀྱི་ནང་ནས་མི་རྟག་པ་དང་། འཆི་བའི་འདུ་ཤེས་མཆོག་གོ། །འདིས་ནི་ཁམས་གསུམ་གྱི་འདུ་ཤེས་ཐམས་ཅད་ཟློག་པར་བྱེད་དོ། །ཞེས་གསུངས། གཉིས་པ། དེ་ཉིད་གོམས་པའི་ཚད་ནི་ཕྱི་ནང་གི་འདུས་བྱས་ཀྱི་དངོས་པོ་ཐམས་ཅད་མི་རྟག་པར་འཇིག་པར་མཐོང་བས་ཞེན་ཆགས་མི་སྐྱེ་ཞིང་། དགེ་ལ་བརྩོན་འགྲུས་མེ་འབར་བ་དང་འདྲ་བར་ལྡན་པ་དང་། འཁོར་བའི་སྡུག་བསྔལ་ལ་འཇིགས་སྐྲག་སྐྱེ་བ་དང་། དོན་མེད་ཚེ་འདིའི་བྱ་བ་འདོར་བ་དང་། སྐད་ཅིག་ཙམ་ཡང་ཐ་མལ་སོས་དལ་དུ་མི་སྡོད་པར་སྒོ་གསུམ་དགེ་བ་ལ་སྤྱོད་ཅིང་། འཁོར་བ་ལས་ངེས་འབྱུང་དང་སྐྱོ་ཤས་སྐྱེ་བ་དང་ཚེ་འདིའི་བྱ་བ་ལ་བློ་སྣ་ཐུང་བ་འབྱུང་སྟེ་མི་རྟག་པ་སྙིང་ནས་གོམས་པའི་རྟགས་ཚད་དོ། །གསུམ་པ། མི་རྟག་པ་གོམས་པ་དེ་ཡི་ཕན་ཡོན་ཤིན་ཏུ་མཐའ་ཡས་ཏེ། གཤེད་མས་ཟིན་པ་དང་། རི་དྭགས་རྒྱ་ལ་ཆུད་པ་དང་འདྲ་བར་མཐོང་བས་འཁོར་བའི་ཉེས་པ་སྤོང་བ་དང་། སྔར་མེད་པའི་ཡོན་ཏན་མང་པོ་ངང་གིས་འདུ་སྟེ། རྟག་འཛིན་ལས་གྲོལ་བའམ་བློ་ལོག་པ་དང་། དགྲ་གཉེན་ལ་ཆགས་སྡང་ཞིག་པ་དང་། རྟག་ཏུ་དགེ་བ་ལ་རབ་ཏུ་བརྩོན་པ་དང་། ཚེ་འདི་འཁྲུལ་པར་ཤེས་པ་དང་། བསོད་ནམས་དང་ཡེ་ཤེས་ཀྱི་ཚོགས་གཉིས་རབ་ཏུ་རྫོགས་པ་དང་། ཆོས་དང་མཐུན་པའི་གྲགས་པ་དང་ལྡན་པ་དང་། སངས་རྒྱས་དང་བྱང་ཆུབ་སེམས་དཔའ་སོགས་ལྷ་རྣམས་ཀྱིས་དགོངས་པའམ་གཟིགས་ཤིང་། བདེ་བར་ཚེ་ཡི་དུས་བྱེད་པ་དང་། ཤི་ནས་ཀྱང་མཐོ་རིས་ལྷ་མིའི་འཇིག་རྟེན་དུ་འགྲོ་ཞིང་། རྟེན་དེར་ཡང་ལམ་གྱི་མཐུན་རྐྱེན་ཐམས་ཅད་ཚོགས་ནས་མྱུར་དུ་འཆི་བ་མེད་པའི་བདུད་རྩིའི་གོ་འཕང་མཆོག་སངས་རྒྱས་ཉིད་ཐོབ་པར་འགྱུར་རོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། ཚེ་མི་རྟག་པར་བསམ་པའི་ལེའུ་སྟེ་བཅུ་བཞི་པའི་འགྲེལ་པའོ།། །། ༈ གཉིས་པ་སེམས་ལ་ཆོས་སྣང་བའི་བསམ་བྱ་དད་པ་ལ། བསམ་བྱ་མདོར་བསྟན། དེ་རྒྱས་པར་བཤད། དེ་ཡི་ཕན་ཡོན་གསུམ། དང་པོ། དེ་ལྟར་འདུས་བྱས་མི་རྟག་པར་རྟོགས་པའི་རང་བཞིན་གྱི་རྗེས་སུ། དཀར་ཆོས་ཀུན་གྱི་རྩ་བ་གཅིག་ཏུ་གཅེས་པ་དད་བའི་དཔུང་ཚོགས་བསྐྱེད་པར་བྱ་སྟེ། རིན་ཆེན་ཕྲེང་བ་ལས། དད་པ་ཉིད་ཕྱིར་ཆོས་ལ་བརྟེན། །ཤེས་རབ་ལྡན་ཕྱིར་ཡང་དག་རིག །འདི་གཉིས་གཙོ་བོ་ཤེས་རབ་སྟེ། །དེ་ཡི་སྔོན་འགྲོ་དད་པ་ཡིན། །ཞེས་སོ། །གཉིས་པ་ལ། དད་པའི་རང་བཞིན། དེ་བསྐྱེད་དགོས་པའི་རྒྱུ་མཚན། ཇི་ལྟར་བསྐྱེད་པའི་ཚུལ་གསུམ། དང་པོ། སྤྱིར་གཞུང་རྣམས་ལས་དད་པའི་རྣམ་གྲངས་དབྱེ་བསྡུ་མང་དུ་གསུངས་ཀྱང་། འདིར་དྲུག་སྟེ། འདོད་པའི་དད་པ་ནི། ངོ་བོ་འཁོར་འདས་རྒྱུ་འབྲས་བླང་དོར་དུ་བྱེད་པའོ། །ངེས་ཚིག་དཀར་པོའི་ཆོས་ལ་འདོད་ཅིང་སྤྲོ་བས་སོ། །དབྱེ་ན། འཁོར་བ་སྤོང་འདོད། མྱང་འདས་ཐོབ་འདོད། དེ་གཉིས་ཀྱི་རྒྱུ་ཀུན་བྱང་ལ་བླང་དོར་བྱེད་པ་གསུམ་མོ། །མཐུན་དཔེ་ནི། འདོད་ཅན་ནོར་ཚོལ་བ་ལྟ་བུའོ། །རྒྱུད་ལ་སྐྱེས་པའི་རྟགས་ཚད་ནི། འཇིག་རྟེན་གྱི་བྱ་བ་ལ་མི་མོས་ཤིང་ཐོས་བསམ་སྒོམ་སོགས་ལ་འཇུག་པའོ། །ཕན་ཡོན་ནི། ཡོན་ཏན་འཕེལ་ཞིང་ཉེས་ཀུན་འགོག་པའོ། །དེ་བཞིན་དུ། མོས་པའི་དད་པ། ངོ་བོ་བླ་མ་མཆོག་གསུམ་སྟེ་ཡུལ་མཆོག་ལ་སེམས་རབ་ཏུ་གཞོལ་བ་སྟེ་དགའ་བ། ངེས་ཚིག་ཡུལ་མཆོག་དེ་རྣམས་ཀྱི་རྗེས་སུ་འཇུག་པར་མོས་པ། དབྱེ་བ། བླ་མར་བསྟེན་བྱ། སངས་རྒྱས་བསྒྲུབ་བྱར། ཆོས་ལ་ལམ། དགེ་འདུན་གྲོགས་སུ་མོས་པ་བཞི། མཐུན་དཔེ་བུ་མའི་ཕྱིར་འཕྲེང་བ་ལྟ་བུ། རྟགས་ཚད་ཡུལ་དེ་རྣམས་ཀྱི་མཚན་ཐོས་པའམ་དྲན་པ་ཙམ་གྱིས་རྟགས་ལུས་ངག་ལ་འཆར་བ། ཕན་ཡོན་སེམས་མཆོག་སྐྱེ་ཞིང་། རྟག་ཏུ་དཀོན་མཆོག་དང་མི་འབྲལ་བའོ། །གུས་པའི་དད་པ། ངོ་བོ་བཀའ་ལས་མི་འདའ་ཞིང་བག་ཡོད་མཆོག་དང་ལྡན་པ། ངེས་ཚིག་སྒོ་གསུམ་ཡུལ་གོང་མ་ལ་འདུད་པ། དབྱེ་ན། ལུས། ངག་ཡིད་ཀྱིས་བཀུར་བ་གསུམ། མཐུན་དཔེ་རྒྱལ་པོ་ལ་འབངས་ཀྱིས་བཀུར་བ་ལྟ་བུ། རྟགས་ཚད་ང་རྒྱལ་དང་ཁེངས་སེམས་མེད་པ། ཕན་ཡོན་དགེ་རྩ་སྡུད་པ་དང་། རང་གི་སེམས་དུལ་ཞིང་གཞན་སེམས་སྲུང་བའོ། །དང་བའི་དད་པ། ངོ་བོ་ཡུལ་གོོང་མ་རྣམས་ཀྱི་ཡོན་ཏན་ལ་སེམས་རབ་ཏུ་དང་བ། ངེས་ཚིག་གཡོ་སྒྱུའི་དྲི་མ་མེད་པས་སེམས་དང་བ། དབྱེ་ན། ཀུན་རྫོབ་སྣང་ཆའི། དོན་དམ་ཤེས་རབ་ཀྱི། ཟུང་འཇུག་ཆ་མཉམ་གྱི་དགེ་བ་ལ་དང་བའི་དང་བ་གསུམ། མཐུན་དཔེ་ནོར་བུ་ཆུ་དྭངས་ཀྱིས་རྙོག་མ་སེལ་བ་ལྟ་བུ། རྟགས་ནི་སྒོ་གསུམ་སྡིག་དང་མི་འདྲེ་བར་དགེ་ལ་སྤྲོ་བ། ཕན་ཡོན་རྒྱལ་བའི་ཆོས་ལ་རབ་དགའ་སྐྱེ་བ་སོགས་སོ། །ཡིད་ཆེས་པའི་དད་པ་ནི། ངོ་བོ་གཞི་ལམ་འབྲས་བུའི་ཆོས་ལ་ཐེ་ཚོམ་ཟད་པ། ངེས་ཚིག་དེ་སྟོན་པའི་ལུང་དང་རིགས་པ་ལ་ཡིད་ཆེས་པ། དབྱེ་ན། འཁོར་བ་རྒྱུ་འབྲས་སྤང་བྱ། འདས་པ་རྒྱུ་འབྲས་བླང་བྱ། ལུང་མ་བསྟན་དགོས་མེད་དུ་ཡིད་ཆེས་པ་གསུམ། མཐུན་དཔེ་སྟོན་གྱི་ལོ་ཐོག་ལ་ཡིད་ཆེས་པས་སོ་ནམ་བྱེད་པ་ལྟ་བུ། རྟགས་ཚད་བླ་མ་དང་མཆོག་གསུམ་ལ་ཡིད་ཆེས་པའི་ངེས་ཤེས་ཐོབ་པ། ཕན་ཡོན་དབང་པོ་རྣོ་བ་དང་དད་པའི་སྟོབས་ལ་གཞན་གྱིས་མི་བརྫི་ཞིང་ཉོན་མོངས་སེལ་བའོ། །ཆོས་ཟབ་མོ་ལ་ངེས་པར་སེམས་པའི་དད་པ་ནི། ངོ་བོ་ཐོས་བསམ་སྒོམ་པ་ཡི་ཆོས་ཀྱི་མཆོག་ངེས་དོན་སྙིང་པོ་རྣམས་ལ་ལྷག་པར་དད་པའོ། །ངེས་ཚིག་དེའི་དོན་མཐོང་ནས་ངང་ལ་འཇོག་པ། དབྱེ་ན་ངེས་དོན་གྱི་གཞུང་ཐོས་པ་དང་། བསམ་པ་དང་། སྒོམ་པ་ལ་ངེས་པར་སེམས་པའི་དད་པ་གསུམ། མཐུན་དཔེ་རྡོའི་ནང་ནས་གསེར་རྙེད་པ་འཆང་བ་ལྟར་ཡང་དག་པའི་ཆོས་ལ་གཅེས་སྤྲས་བྱེད་པ། རྟགས་ནི་ཉིན་མཚན་དུ་ཉམས་ལེན་དང་མི་འབྲལ་བ། ཕན་ཡོན་ནི་མྱུར་དུ་སངས་རྒྱས་ཀྱི་གོ་འཕང་ཐོབ་པར་བྱེད་པའོ། །དེ་ལྟར་དྲུག་པོའང་བསྡུ་ན་དང་འདོད་ཡིད་ཆེས་ཀྱི་དད་པ་གསུམ་དུ་འདུ་སྟེ། མོས་པ་དང་། གུས་པ་དང་། དང་བ་གསུམ་ནི་དད་པའི་དད་པ་དང་། འདོད་པ་དང་། ཡིད་ཆེས་གཉིས་ནི་ཡིད་ཆེས་ཀྱི་དད་པར་གཏོགས་ལ། ངེས་སེམས་ནི་འདོད་པའི་དད་པ་ཉིད་ཡིན་ཏེ། ལམ་མ་ནོར་བ་ལ་ཞུགས་པས་འཁོར་བ་སྤང་ཞིང་ཐར་པ་འདོད་པའི་ཕྱིར་རོ། །གཉིས་པ་ལ། དད་པ་དང་ལྡན་པའི་ཡོན་ཏན། མི་ལྡན་པའི་ཉེས་དམིགས་གཉིས། དང་པོ། དད་པའི་རང་བཞིན་ས་གཞི་བཟང་པོ་སྟེ་ཞིང་ས་གཤིན་པོ་དང་འདྲ་སྟེ་དཀར་པོའི་ཆོས་ཀུན་གྱི་གཞིར་གྱུར་ཅིང་དགེ་ཚོགས་ཀྱི་ལོ་ཏོག་རྣམ་པར་འཕེལ་བར་བྱེད་དོ། །དེ་བཞིན་དུ་དད་པ་གཟིངས་དང་འདྲ་སྟེ་སྲིད་པའི་ཆུ་བོ་ལས་སྒྲོལ། སྐྱེལ་མ་དཔའ་བོ་དང་འདྲ་སྟེ་བདུད་དང་ཉོན་མོངས་ལས་སྐྱོབ། བཞོན་པ་བཟང་པོ་དང་འདྲ་སྟེ་ཐར་པའི་གླིང་དུ་འདྲེན། ནོར་བུའི་རྒྱལ་པོ་ལྟར་ཅི་བསམ་པའི་རེ་བ་འགྲུབ་པ་སྟེ། དཔའ་བོ་དང་འདྲ་སྟེ་སྡིག་ཏོ་མི་དགེ་བའི་ཆོས་ཀུན་ཟིལ་གྱིས་གནོན། དེས་ན་ཚོགས་བསགས་པར་གྱུར་པའི་དམ་པ་སྟེ་འཕགས་པ་རྣམས་ཀྱི་ནོར་བདུན་གྱི་ནང་ནས་རྩ་བར་གྱུར་པས་ན་མཆོག་ལགས་སོ། །གཉིས་པ། ཆོས་ཀྱི་སྐལ་བ་མེད་པ་རྣམས་ལ་དད་པ་ཅུང་ཟད་ཀྱང་མེད་པས་དེ་ཡི་སྐྱོན་ནི་ཤིན་ཏུ་མཐའ་ཡས་པ་དང་ལྡན་ཀྱང་རེ་ཞིག་བསྡུ་ན། རྒྱ་མཚོའི་གཏིང་གི་རྡོ་སྟེང་དུ་མི་འབྱུང་བ་དང་འདྲ་སྟེ་ཐར་པའི་སྐམ་དང་བྲལ་ཏེ་སྐམ་སར་འབྱུང་མི་སྲིད། མཉེན་པ་མེད་པའི་གྲུ་དང་འདྲ་སྟེ་སྲིད་མཚོ་ལས་སྒྲོལ་དུས་མེད། ལག་རྡུམ་གསེར་གླིང་དུ་ཕྱིན་པ་དང་འདྲ་སྟེ་དགེ་བའི་བགོ་སྐལ་ལོན་པ་མེད། ས་བོན་མེས་ཚིག་པ་དང་འདྲ་སྟེ་བྱང་ཆུབ་ཀྱི་མྱུ་གུ་མེད། ལོང་བ་ལྷ་ཁང་དུ་ཕྱིན་པ་དང་འདྲ་སྟེ་ཆོས་ཀྱི་གཟུགས་སྣང་བ་མེད། རྒྱ་མཚོའི་རྦ་ཀློང་འཁོར་བའི་དོང་ཟབ་མོར་ཆུད་པ་དང་འདྲ་སྟེ་གཏན་དུ་འཁོར་བར་འཁྱམས་སོ། །སྐབས་འདིར་འགྲེལ་ཆེན་དུ་སྦྱང་མོ་ཞེས་འདུག་ཀྱང་སྔོན་གྱི་ཡིག་རྙིང་ཟུར་ཆུང་པའི་ཞལ་གདམས་བརྒྱད་ཅུ་པར། གཡང་མོ་འཁོར་དོང་དུ་ཚུད་པ་དང་འདྲ་སྟེ་སྡུག་བསྔལ་གྱི་གནས་ནས་མི་ཐར་ཞེས་འདུག་པས་གཡང་མོ་ལུག་གི་མིང་ཡིན་པས་དེ་ལྟར་ཡིན་ནམ་སྙམ་སྟེ་བརྟག་པར་བྱའོ། །དེས་ན་ནམ་ཡང་བྱང་ཆུབ་ཐོབ་མི་སྲིད་པའི་སྐྱོན་ཡོད་དོ། །གསུམ་པ་ལ། དང་པོ་དད་པ་བསྐྱེད་པ། མཐར་བརྟན་པར་བྱ་བ་གཉིས། དང་པོ་ལ། རྒྱུ་རྐྱེན་འབྲས་བུའི་རྣམ་པར་གཞག་པ་དང་། དེ་དག་གི་མཇུག་བསྡུས་ཏེ་དད་པར་གདམས་པ་གཉིས། དང་པོ་ལ། དད་པ་སྐྱེ་བའི་རྒྱུ། སྤེལ་བའི་རྐྱེན། འབྲས་བུ་གོམས་པའི་ཚད་གསུམ། དང་པོ་ལ། བླང་བྱ་དད་པ་སྐྱེ་བའི་རྒྱུ། སྤང་བྱ་འགྲིབ་པའི་རྐྱེན་གཉིས། དང་པོ་ལ། ཡུལ་གང་ལས་སྐྱེ་བ་དང་། ཚུལ་གང་གིས་འཕེལ་བ་གཉིས། དང་པོ། ཆོས་དཀར་པོའི་ཕུལ་དུ་བྱུང་བ་དད་པ་སྐྱེ་བའི་ཡུལ་དྲུག་ནི། འདོད་པའི་དད་པ་ཡུལ་སྲིད་པ་ལ་དེའི་རང་བཞིན་མཐོང་སྟེ་སྐྱོ་བས་སྐྱེ། མོས་པའི་དད་པ་སྡིག་པའི་གྲོགས་ངན་པ་ལ་སྐྱོ་བ་སྐྱེས་པ་ལས་སྐྱེ། གུས་པའི་དད་པ་ཚེ་འདིར་མངོན་པར་སྐྱོ་བས་སྐྱེ། དང་བའི་དད་པ་ཡུལ་མཆོག་གི་རྟེན་ནས་རྣམ་ཐར་སོགས་གཏམ་རྒྱུད་ཐོས་པ་དག་ལས་སྐྱེ། ཡིད་ཆེས་པའི་དད་པ་རྒྱུ་འབྲས་ཀྱི་ཆོས་ཐོས་པ་ལས་སྐྱེ། ཆོས་ལ་ངེས་སེམས་ཀྱི་དད་པ་ཆོས་ཟབ་མོ་ལ་ཐོས་བསམ་བྱས་པ་དག་ལས་སྐྱེ་བས་ཡུལ་དེ་དག་གི་རང་བཞིན་ལ་དམིགས་ནས་སྐྱེར་གཞུག་པར་བྱའོ། །གཉིས་པ། དད་པ་འཕེལ་བའི་རྒྱུ་ལ་བརྟེན་ནས་ཉིན་རེ་བཞིན་གོང་དུ་སྤེལ་བ་ཡང་། བླ་མ་དམ་པ་ལ་བསྟེན་ཏེ་མོས་གུས་སྙིང་ནས་བྱས་པ་ལས་འཕེལ་བ་དང་། དེ་བཞིན་དུ། དགེ་བའི་གྲོགས་ཆོས་དང་རང་སེམས་འདྲེས་པ་ལ་བསྟེན་པ་དང་། མདོ་རྒྱུད་ཟབ་མོར་བལྟས་པ་དང་། འཆི་བ་ཡེངས་མེད་དུ་བསམ་པ་དང་། ལས་འབྲས་ལ་ཡིད་ཆེས་བྱས་པ་དང་། ཐོས་བསམ་སྒོམ་པ་ལ་སྔར་བས་བརྩོན་པ་ཆེར་བསྐྱེད་པ་སྟེ། རྒྱུ་དེ་རྣམས་ལས་དད་པ་གོང་འཕེལ་ཉིད་དུ་འགྲུབ་པས་རྟག་ཏུ་སྤེལ་བ་ལ་བརྩོན་པར་བྱའོ། །གཉིས་པ། དད་པ་འགྲིབ་པའི་རྐྱེན་ནི་རང་ཉིད་བདུད་ཀྱིས་བྱིན་གྱིས་བརླབས་པའི་རྟགས་སུ་བླ་མའི་སྐྱོན་ལ་རྟོག་པ་དང་། ཐ་མལ་གྱི་གྲོགས་དད་པ་མེད་པ་དང་འགྲོགས་པ་དང་། འདོད་ཡོན་རང་གར་སྤྱོད་པ་དང་། ལེ་ལོ་སྙོམ་ལས་ཀྱིས་ཉམས་ལེན་གྱི་བརྩོན་འགྲུས་འགྲིབ་པ། འཇིག་རྟེན་གྱི་བྱ་བ་མང་བ། དེ་དག་ལ་སོགས་ཏེ་ཆོས་བྱེད་སྤྱིའི་སྐྱོན་ལ་རྟོག་པ། དཀོན་མཆོག་ལ་མོས་གུས་མེད་པ་སོགས་ཆོས་མིན་གྱི་ལས་རྣམས་ཏེ། མདོར་ན་བདུད་ཀྱིས་བྱིན་གྱིས་བརླབས་པའི་དུས་སུ་འགྲིབ་པར་གསུངས་ཏེ། ཡུམ་ལས། བདུད་སྡིག་ཏོ་ཅན་ནི་ལས་དང་པོ་པ་དག་གི་མདུན་དུ་འོངས་ནས་མོས་པ་དག་ཀྱང་ཟློག་པར་བྱེད། བྱང་ཆུབ་སེམས་དཔའི་སྤྱོད་པ་དག་ཀྱང་ཕྱིར་ཕྱོགས་པར་བྱེད་དོ། །ཞེས་སོ། །འདིའི་དུས་སུ་བཟློག་པའི་ཐབས་ནི། བླ་མ་དཀོན་མཆོག་ཆོས་གྲོགས་དང་བཅས་པའི་ཡོན་ཏན་བསམ། ཆོས་བྱེད་ཐམས་ཅད་ལ་དག་སྣང་མོས་གུས་བསྐྱེད། ཕ་རོལ་ངན་པར་མཐོང་བ་དེ་རང་མ་དག་པའི་རྟགས་ཏེ་དུང་སེར་འཛིན་བཞིན་ནོ་སྙམ་དུ་རང་ལ་གྲོས་གདབ་ལ་ཐ་མལ་པ་དང་མི་འགྲོགས། འདོད་ཡོན་གྱི་ཉེས་དམིགས་བསམ། དད་པ་འགྲིབ་རྐྱེན་དེ་བདུད་དུ་ཤེས་ནས་སྤང་བར་བྱའོ། །གཉིས་པ་སྤེལ་བའི་རྐྱེན་ནི། དད་པ་རྐྱེན་ལས་སྐྱེ་བའི་དུས་སུ་དེ་ལ་བརྟེན་ནས་བསྐྱེད་པ་ནི། སྐྱེ་ཤིའི་འཕོ་འགྱུར་མཐོང་དུས་དད་པ་སྐྱེ་བའི་རྐྱེན་ཡིན་པས་གཞན་པ་ཤི་བ་བགྲངས་ལ་དད་པ་བསྐྱེད་དགོས་པ་དང་། དེ་བཞིན་དུ། ནད་གདོན་བར་ཆད་ཀྱིས་གཙེས་དུས་དགེ་བསྐུལ་གྱི་སློབ་དཔོན་དུ་ཤེས་པར་བྱ། རྐྱེན་ངན་དང་སྡུག་བསྔལ་ཐོག་ཏུ་བབ་དུས་བྱང་ཆུབ་ཀྱི་འདྲེན་པར་ཤེས་པར་བྱ་བ་དང་། དམ་པའི་ཆོས་ཐོས་དུས་ཡང་དག་པའི་འཇུག་ལྡོག་ལ་དམིགས་ནས་བསྐྱེད་པ་དང་། གོང་མའི་རྣམ་ཐར་ཐོས་དུས་དཀར་སྤྱད་ཆོས་ལ་སྤྱོད། སངས་རྒྱས་དང་བྱང་སེམས་ཀྱི་སྐྱེས་རབས་མཐོང་དུས་ཐེག་ཆེན་བྱང་ཆུབ་ལ་དམིགས་ནས་དད་པ་བསྐྱེད་དགོས། དེ་ཡང་ཉིན་རེ་བཞིན་དེ་དག་གི་རྐྱེན་ལས་དད་པ་འཕྲལ་དུ་སྐྱེས་ཚེ་འཕྲོ་མཐུད་ལ་དད་པའི་མཆོག་རབ་རྟག་ཏུ་བསྒོམ་པར་བྱ་སྟེ་གང་ལའང་སྣུམ་དྲེད་མ་ཁྱེར་བ་གཅེས་སོ། །གསུམ་པ། དེ་ལྟར་དད་པ་སྐྱེས་པའི་ཚད་ནི་སྲིད་པའི་འཁྲུལ་སྣང་ལ་སྐྱོ་ཞིང་ཡིད་བྱུང་བ་སྐྱུག་ནད་ཅན་ཟས་མཐོང་བ་ལྟ་བུ། བླ་མ་དཀོན་མཆོག་ལ་གུས་པ་བུ་ཆུང་མ་ལ་གདུང་བ་ལྟ་བུ། ཐོས་བསམ་ལ་དོན་དུ་གཉེར་བ་སྐོམ་པ་ཆུས་གདུང་བ་ལྟ་བུ། བསླབ་པ་གསུམ་ལ་གཅེས་སྤྲས་བྱེད་པ་དབུལ་པོས་གསེར་གཡུ་རྙེད་པ་ལྟ་བུ། དགེ་སྦྱོར་ཉམས་ལེན་ལ་སྤྲོ་བ་ཚོང་པ་གསེར་གླིང་དུ་བྱིན་པ་ལྟ་བུ་འབྱུང་ཞིང་། སྡིག་པ་ལ་ཤིན་ཏུ་འཛེམ་པ་མིག་ཏུ་རྡུལ་སྤངས་པ་ལྟ་བུ། ཐེག་པ་ཐམས་ཅད་ལ་དད་པ་འདོད་ཅན་ཚོང་འདུས་སུ་ཕྱིན་པ་ལྟ་བུས། ཡོན་ཏན་གྱི་ཁྱད་པར་གོང་མ་ཐོབ་པ་རྣམས་སུ་དད་པ་སྐྱེས་པའི་ཚད་དུ་བཞེད་དེ། དེའི་དུས་སུ་རང་རྒྱུད་ཆོས་ཀྱིས་ཐུལ་བས་ཆོས་དང་གང་ཟག་མ་འཛོལ་བ་ཡིན་ནོ། །གསུམ་པ་མཇུག་བསྡུ། དད་པ་འགྲིབ་ན་བསྐྱེད་པའམ་བཙལ་བའི་ཐབས་ཀྱིས་དད་པ་རང་རྒྱུད་ལ་མ་བསྐྱེད་ན། ཡོན་ཏན་གཞན་ཡོད་ཀྱང་མི་ཕན་ཏེ་གཟུགས་མཛེས་ཀྱང་མིག་མེད་པ་དང་འདྲ། དད་པ་མེད་ན་དགེ་ལེགས་ཐམས་ཅད་མི་འགྲུབ་ཅིང་དུས་གཏན་དུ་སྲིད་པར་འཁྱམས་ཏེ་ཐར་པའི་དུས་མེད། དེ་ཡི་ཕྱིར་དུ་མི་རྟག་པ་དང་ལས་རྒྱུ་འབྲས་དང་གོང་མའི་ཡོན་ཏན་དང་ཆོས་ཀྱི་དཀོན་པ་དང་བླ་མའི་བཀའ་དྲིན་དང་མཆེད་གྲོགས་ཀྱི་དག་སྣང་དང་སངས་རྒྱས་ཀྱི་ཡོན་ཏན་བསམ་པ་སོགས་གང་དང་གང་ལ་བརྟེན་ནས་ཀྱང་དད་པ་བསྐྱེད་པའི་ཐབས་ལ་འབད་པར་བྱ་སྟེ་སྐད་ཅིག་ཀྱང་འགྲིབ་ཏུ་ཕོངས་པས་སོ། །གཉིས་པ་བརྟན་པར་བྱ་བ་ལ། སྤང་བྱ་དང་། བླང་བྱ་གཉིས། དང་པོ། དད་པའི་འདྲ་མིན་གྱི་གོལ་ས་དྲུག་ཤེས་ནས་སྤང་བར་བྱ་བ་ནི། ཁ་ཅིག་བླ་མ་དམ་པའི་དྲུང་དུ་འགྲོགས་ཚེ་དད་པ་ཆེ་ལྟར་བྱེད་ཀྱང་དེ་ལས་གཞན་དུ་སོང་ཚེ་དེ་ལྟར་མིན་པ་སྟེ་མི་དད་པ་དང་། དེ་བཞིན་དུ། ཅུང་ཟད་ཙམ་གྱི་རྐྱེན་གྱིས་དད་པ་འཕེལ་བར་སླ་ཡང་མི་བརྟན་ཏེ་མྱུར་དུ་འགྲིབ་པ་ཅན་དང་། ནད་གདོན་སོགས་རྐྱེན་ངན་གྱིས་གཙེས་ཚེ་དད་པ་ཆེ་ཆེ་འདྲ་ཡང་དེ་སོལ་ནས་དད་པ་ཅུང་ཟད་མེད་པ་དང་། བློ་མང་བས་དགེ་སྦྱོར་གཅིག་འཕྲོ་ལ་གཅིག་བརྩེགས་ཏེ་གང་ལའང་འཇུག་ལ་ཐང་མི་ཐུབ་པ་སྟེ་གཅིག་ཀྱང་མཐར་མི་ཐོན་པ་དང་། བླ་མ་དང་ཆོས་ཟབ་མོ་གཅིག་ཏུ་མ་ངེས་པ་སྟེ་གཅིག་ལ་མི་བྱེད་པར་གང་བདེར་གར་བབས་སུ་སྤྱོད་པ་ཅན་དང་། གང་ལ་ཡང་གཏད་སོ་མེད་པར་བ བ་ཅོལ་དུ་དད་པ་ཕྲ་མོའི་རྐྱེན་གྱིས་བཟློག་པ་གློ་བུར་ཡེ་འདྲོག་ཅན་ཏེ། འདི་དྲུག་པོ་སྤངས་ལ་ཐོག་མར་བརྟགས་ནས་ཆོས་དང་བླ་མར་གང་བཟུང་བ་དེ་ལ་ཡིད་ཆེས་ཀྱི་བློ་གཏད་རྒྱུན་དུ་བྱ་བ་གཅེས་སོ། །གཉིས་པ། དང་པོར་ཆོས་དང་བླ་མའི་མཚན་ཉིད་རབ་ཏུ་བརྟགས་ནས་དད་པ་སྐྱེས་པའི་ཡུལ་རྣམས་ལ། ཕྱིས་ནས་རྐྱེན་ཅི་བྱུང་ཡང་མི་འགྱུར་བ་རི་རྒྱལ་ལྟ་བུ་དང་འཕེལ་བ་དང་འགྲིབ་པ་མེད་པ་ཉི་མ་ལྟ་བུ། མཐའ་དབུས་མེད་པ་ནམ་མཁའ་ལྟ་བུ། ཁ་གཏིང་མེད་པ་རྒྱ་མཚོ་ལྟ་བུ། བྱས་ཡུས་མེད་པ་མ་ལྟ་བུ། ཐང་ལྷོད་དམ་གྲིམ་ལྷོད་གཉིས་མེད་པ་གཞུ་མོའི་རྒྱུད་དང་མཚུངས་པ་དང་། སྐྱོ་དུབ་མེད་པའི་དད་པ་གྲུ་ཟམ་ལྟ་བུ་ལ། རྒྱུན་ཆད་མེད་པ་ཆུ་བོའི་གཞུང་ཆེན་པོ་བཞིན་དང་། གུས་པའི་རྒྱུད་མཉེན་ལྕུག་ལྡན་པ་དར་ཐག་ལྟ་བུ་ལ། གཞན་གྱིས་བསྒྱུར་རམ་བཀའ་བཀྱོན་སོགས་རྐྱེན་གྱིས་མི་འཕྲོག་པའི་དད་པ་ནམ་མཁའ་ལྟ་བུར་བསྟེན་པར་བྱའོ། །གསུམ་པ། དད་པའི་ཕན་ཡོན་རྣམ་གྲངས་དཔག་ཏུ་མེད་ཀྱང་མདོར་བསྡུ་ན། དཀར་པོའི་ཆོས་ཀུན་གྱི་གཞིར་གྱུར་པ་དང་། འཁོར་བའི་སྡུག་བསྔལ་སེལ་བ་དང་། བྱང་ཆུབ་ཀྱི་ལམ་སྣ་འདྲེན་པ་དང་། ཆོས་ཟབ་མོའི་སྣོད་དུ་གྱུར་པ་དང་། སངས་རྒྱས་དང་བྱང་སེམས་སོགས་དམ་པ་རྣམས་ཀྱིས་ཐུགས་ལ་དགོངས་ཤིང་། ངོ་ཚ་ཁྲེལ་ཡོད་ཤེས་རབ་སོགས་ཡོན་ཏན་ཕུན་ཚོགས་དང་ལྡན་ཞིང་དཀར་ཕྱོགས་ཀྱི་ལྷས་སྲུང་བ་དང་། བདེ་བར་གཉིད་ལོག་ཅིང་སད་པ་དང་། བདེ་བར་ཚེ་འཕོས་ནས་སངས་རྒྱས་ཀྱི་ཞིང་དག་པར་སྐྱེས་ཏེ་བླ་མ་དང་ཆོས་ཀྱི་སྣང་བ་དང་མི་འབྲལ་ཞིང་དཀོན་མཆོག་གསུམ་གྱི་གདུང་འཚོབ་པ་དང་མྱུར་དུ་སངས་རྒྱས་ཀྱི་གོ་འཕང་ཐོབ་པ་སོགས་འདི་ཕྱིའི་ཕུན་སུམ་ཚོགས་པ་ཐམས་ཅད་དང་ལྡན་པར་འགྱུར་བ་དེའི་ཕྱིར་སྐྱེ་བོ་དམ་པའི་ཚུལ་དགེ་བ་དང་ལྡན་པས། སྔར་སྨོས་ཀྱི་དད་པ་དྲུག་པོ་ཡུལ་དྲུག་ལ་དམིགས་ནས་བརྒྱ་འགྱུར་དུ་བརྩོན་པ་དེ་ཡང་། དགེ་བ་བཅུ་དང་ཕར་ཕྱིན་བཅུ་དང་ཕྱོགས་བཅུའི་བླ་མ་དང་དཀོན་མཆོག་དང་སེམས་ཅན་གྱི་ཚོགས་ལ་དམིགས་པར་འགྲེས་པས་དད་བརྒྱའི་{པའི་ལྷག}འདབ་མ་སྟོང་རྒྱས་པ་ལ་ནན་ཏན་མཛོད་ཅིག་ཅེས་ལེགས་པར་གདམས་པའོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། དད་པའི་རང་བཞིན་བསམ་པའི་ལེའུ་སྟེ་བཅོ་ལྔ་པའི་འགྲེལ་པའོ།། །། ༈ གསུམ་པ་ཆོས་ཡང་དག་པར་འགྲུབ་པའི་བསམ་བྱ་ལ། ཐུན་མོང་སྲིད་ཞིའི་དགེ་བ་འགྲུབ་པའི་བསམ་བྱ་དང་། ཐུན་མིན་ངེས་ལེགས་ཀྱི་ཆོས་འགྲུབ་པའི་བསམ་བྱ་གཉིས། དང་པོ་ལ། མདོར་བསྟན། རྒྱས་བཤད། དོན་བསྡུ་གསུམ། དང་པོ། དེ་ལྟར་དད་པ་བསྟན་པའི་རྗེས་ཐོབ་དེ་ནས་དད་ལྡན་རྣམས་ཀྱིས་བསམ་པར་བྱ་བ། རྒྱུ་འབྲས་ལས་ཏེ་དེ་ཡང་བདེ་བའི་རྒྱུ་ལས་དགེ་བ་དང་། སྡུག་བསྔལ་གྱི་རྒྱུ་མི་དགེ་བ་སྡིག་པ་སྟེ། དེ་གཉིས་ཀྱི་ཁེ་ཉན་ཤེས་པར་བྱས་ཏེ་བླང་དོར་ཚུལ་བཞིན་བྱ་དགོས་ཏེ། སོ་སོ་ཐར་པ་ལས། སྡིག་པ་ཅི་ཡང་མི་བྱ་སྟེ། །དགེ་བ་ཕུན་སུམ་ཚོགས་པར་སྤྱད། །རང་གི་སེམས་ནི་ཡོངས་སུ་གདུལ། འདི་ནི་སངས་རྒྱས་བསྟན་པ་ཡིན། །ཞེས་གསུངས་པ་བཞིན་ནོ། །གཉིས་པ་ལ། ཆ་མཐུན་གཉིས་ཀྱི་དབྱེ་བ་དང་། སོ་སོའི་རང་བཞིན་གཉིས། དང་པོ། དགེ་བའི་ལས་དེ་ལ་ནི་དབྱེ་ན་ཟག་བཅས་བདེ་བའི་རྒྱུར་གྱུར་པ་བསོད་ནམས་ཆ་མཐུན་དང་། ཟག་མེད་མྱང་འདས་ཀྱི་རྒྱུ་ཐར་པ་ཆ་མཐུན་སྟེ་རྣམ་པ་གཉིས་དག་ལས། ཞེས་སོ། །གཉིས་པ་ལའང་བསོད་ནམས་ཆ་མཐུན་དང་། ཐར་པ་ཆ་མཐུན་གཉིས། དང་པོ་ལ། སྤྱི་བྱེ་བྲག་གཉིས། དང་པོ། སྲིད་པའི་བདེ་འབྲས་ཙམ་བསྐྱེད་པའི་དགེ་བ་རྣམས་ནི་བསོད་ནམས་ཆ་མཐུན་ལགས་པར་རམ་ཡིན་པར་ཐུབ་པས་གསུངས་སོ། །གཉིས་པ་ལ། བླང་བྱ་དགེ་བཅུ་དང་། སྤང་བྱ་མི་དགེ་བཅུ་སྟེ་གཉིས། དང་པོ་ལ། ལས་ཀྱི་ངོ་བོ་དང་། འབྲས་བུ་གཉིས། དང་པོ། བསོད་ནམས་ཆ་མཐུན་གྱི་དགེ་བ་དེ་ལ་རྣམ་གྲངས་མང་ཡང་ཆེ་ལོང་ཞིག་བསྡུ་ན་དགེ་བ་བཅུ་སྟེ། སྲོག་གཅོད་མ་བྱིན་ལེན་འདོད་ལོག་གསུམ་སྤངས་པ་ལུས་ཀྱི་དགེ་བ་གསུམ་དང་། དེ་བཞིན་རྫུན་ཕྲ་འཁྱལ་རྩུབ་བཞི་སྤངས་པ་ངག་གི་བཞི་དང་། བརྣབ་གནོད་ལོག་ལྟ་སྤངས་པ་ཡིད་ཀྱི་དགེ་བ་གསུམ་དག་སྟེ། ཞེས་སོ། །གཉིས་པ་ལ་སྤྱི། བྱེ་བྲག མཇུག་བསྡུ་གསུམ། དང་པོ། སྨོས་མ་ཐག་པའི་དགེ་བ་འདི་བཅུ་བསམ་གཏན་བཞི་དང་གཟུགས་མེད་བཞིའི་ཏིང་འཛིན་དང་མ་འབྲེལ་བར་རྐྱང་བས། འདོད་པའི་ཁམས་ཀྱི་ལྷ་མིའི་བདེ་འབྲས་བསྐྱེད་པ་ཉིད་དེ། དགེ་བཅུ་བསམ་གཏན་བཞི་དང་གཟུགས་མེད་ཀྱི་ཏིང་འཛིན་དང་འབྲེལ་ན་ཁམས་གོང་མ་གཟུགས་གཟུགས་མེད་གཉིས་སོ། །གཉིས་པ་ལ། རྣམ་སྨིན་སོགས་ཀྱི་འབྲས་བུ་དང་། མྱོང་བ་རྒྱུ་མཐུན་གྱི་འབྲས་བུ་གཉིས། དང་པོ། དགེ་བཅུའི་འབྲས་བུ་ལས། རྣམ་སྨིན་གྱི་འབྲས་བུ་དགེ་བས་བདེ་འགྲོ་མཐོ་རིས་ཀྱི་ལྷ་མིའི་རྟེན་དང་གནས་སྐབས་བདེ་བའི་རིགས་ཀུན་བསྐྱེད་པར་བྱེད་དོ། །གཉིས་པ། སྤྱིར་བདག་འབྲས་ཡུལ་ལ་སྨིན་པས་མེ་འབྲས་ཀྱིས་བརྒྱན་ཅིང་འཚེ་བ་མེད་ལ་བགྲོད་བདེ་བ་སོགས་ཕུན་སུམ་ཚོགས་པ་དང་། རྒྱུ་མཐུན་ལ་བྱེད་པ་རྒྱུ་མཐུན་གང་དུ་སྐྱེས་ཀྱང་དགེ་བཅུ་སོ་སོ་རང་རང་དེ་བྱེད་པར་སྤྲོ་བ་དང་། མྱོང་བ་རྒྱུ་མཐུན། སྲོག་གཅོད་སྤངས་པས་ཚེ་རིང་ཞིང་ནད་མེད་པ་ཡི་བདེ་བ་ཐོབ་ཅིང་། དེ་བཞིན་དུ། མ་བྱིན་ལེན་སྤངས་པས་འབྱོར་པ་ཕུན་སུམ་ཚོགས་པ་དང་། ལོག་པར་གཡེམ་པ་སྤངས་པས་ཁྱིམ་ཐབ་ཀྱི་བུད་མེད་དགྲ་ཟླ་མེད་པར་རང་དབང་ཐོབ་པ་དང་། རྫུན་དུ་སྨྲ་བ་སྤངས་པས་གང་ཟག་གཞན་གྱིས་བསྟོད་པ་དང་། ཚིག་རྩུབ་མོ་རྣམས་སྤངས་པས་སྙན་པར་སྨྲ་བས་བདེ་བ་ཐོབ་པ་དང་། ཕྲ་མ་རྣམས་པར་སྤངས་པས་གཞན་གྱིས་མཐོང་ན་མི་མཐུན་མེད་པ་དང་། ངག་འཁྱལ་བ་སྤངས་པས་ཚིག་བཟུང་བར་འོས་པར་འགྱུར་བ་དང་། བརྣབ་སེམས་སྤངས་པས་ཡིད་ལ་རེ་བ་འགྲུབ་པ་སྟེ། གནོད་སེམས་སྤངས་པས་ཡིད་འོང་མཐོང་ན་ཞི་ཞིང་ངེེས་པར་གཞན་གྱིས་སེམས་པ་དང་། ལོག་ལྟ་སྤངས་པས་རྒྱུ་འབྲས་ལ་ཡིད་ཆེས་པ་སོགས་ལྟ་བ་བཟང་པོ་རྒྱུད་ལ་སྐྱེ་སྟེ། རྒྱུ་མཐུན་གྱི་འབྲས་བུའོ། །གསུམ་པ་མཇུག་བསྡུ་བ། དེ་ལྟར་མཐོ་རིས་སུ་བགྲོད་པའི་ཤིང་རྟ་ནི་དགེ་བ་བཅུ་ཡིན་པས་མངོན་མཐོ་དང་བདེ་བ་འདོད་པ་རྣམས་ཀྱིས་དང་དུ་ལོངས་ཤིག གཉིས་པ་མི་དགེ་བ་ལ། མི་དགེའི་འབྲས་བུ་བསྟན་པ་དང་། དེའི་མཇུག་བསྡུ་བ་གཉིས། དང་པོ་ལ། སྤྱི་བྱེ་བྲག་གཉིས། དང་པོ། དེ་ལྡོག་མི་དགེའི་ལས་སྲོག་གཅོད་པ་སོགས་བཅུ་པོ་ནི། རྣམ་སྨིན་ངན་སོང་གསུམ་དུ་སྡུག་བསྔལ་མྱོང་བའི་རྒྱུ་ཡིན་ནོ། །གཉིས་པ་ལ། རྣམ་སྨིན་དང་། མྱོང་བ་རྒྱུ་མཐུན་གཉིས། དང་པོ། དེ་ལྟ་བུའི་མི་དགེ་བ་བཅུ་ཆེ་པོ་དང་འབྲིང་དང་ཆུང་ངུས་སྤྱད་པས་གོ་རིམ་བཞིན། རྣམ་སྨིན་གྱི་འབྲས་བུ་དམྱལ་བ་དང་ཡི་དྭགས་དང་དུད་འགྲོར་ལྷུང་བར་འགྱུར་ཏེ་ཚ་གྲང་བཀྲེས་སྐོམ་བཀོལ་སྤྱོད་སོགས་སྣ་ཚོགས་པའི་སྡུག་བསྔལ་དང་ལྡན་པ་ཡིན་ནོ། །གཉིས་པ། གལ་ཏེ་མཐོ་རིས་ཐོབ་ཀྱང་དེ་ཡི་འབྲས་བུ་སྡུག་བསྔལ་བ་འགྲུབ་སྟེ། དབང་གི་འབྲས་བུས་ཡུལ་ཚེར་མ་ཅན་དང་ལོ་ཏོག་མི་སྨིན་པ་སོགས་ཡུལ་ཡིད་དུ་མི་འོང་ཞིང་བཀྲ་མི་ཤིས་པའོ། །བྱེད་པ་རྒྱུ་མཐུན་མི་དགེ་གང་བྱེད་དེར་སྐྱེ་ལ། མྱོང་བ་རྒྱུ་མཐུན་གྱིས་འདི་ལྟར་སྲོག་བཅད་པས་ནི་གང་དུ་སྐྱེས་ཀྱང་ཚེ་ཐུང་བ་དང་ནད་མང་ཞིང་། མ་བྱིན་པ་བླངས་པས་དབུལ་ཞིང་ཕོངས་པར་འགྱུར་བ་དང་། ལོག་པར་གཡེམ་པས་ཁྱིམ་ཐབ་དགྲ་ཟླར་བཅས་པར་འགྱུར་ལ། རྫུན་དུ་སྨྲས་པས་རང་ལ་སྐྱོན་མེད་ཀྱང་སྐུར་བ་འདེབས་པ་མང་བར་འགྱུར་ཞིང་། ཕྲ་མས་མཛའ་བཤེས་དང་བྲལ་བ་དང་འཁོར་ཕན་ཚུན་མི་མཐུན་པར་འགྱུར། རྩུབ་མོས་རང་ལ་མི་སྙན་པ་བརྗོད་པ་མང་བ་དང་། འཁྱལ་བས་ངག་མི་བཙུན་ཏེ་སུས་ཀྱང་བདེན་པར་མི་འཛིན་པ་དང་། བརྣབ་སེམས་ཀྱིས་ཡིད་ལ་རེ་བ་མི་འགྲུབ་ཅིང་། གནོད་སེམས་ཀྱིས་གཞན་གྱིས་འཇིགས་ཤིང་བག་ཚ་བ་དང་བཅས། ལོག་ལྟས་ལྟ་བ་ངན་པ་ཉིད་རྒྱུད་ལ་སྐྱེ་བར་འགྱུར་རོ། །གསུམ་པ་མཇུག་བསྡུ་བ། དེ་ལྟར་མི་དགེ་བའི་ལས་བཅུ་པོ་བདེ་བའི་སྲོག་འཕྲོག་པའི་ཕྱིར་དུག་དང་འདྲ་བས་བདག་དོན་སེམས་ཤེས་པ་རྣམས་ཀྱིས་ངོས་ལྐོག་གང་དུའང་རབ་ཏུ་སྤང་བར་བརྩོན་འཚལ་ལོ། །གཉིས་པ་ཐར་པ་ཆ་མཐུན་ལ། མཚན་ཉིད་དང་ངོ་བོ་གཉིས། དང་པོ། ཐར་པའི་ལམ་ནི་ཞི་བ་བྱང་ཆུབ་གསུམ་གང་རུང་གི་གོ་འཕང་སྒྲུབ་པར་བྱེད་ཅིང་། རྒྱུ་སྲིད་པ་ལས་འདའ་བར་བྱེད་པ་དང་འབྲས་བུ་སྡུག་བསྔལ་མཐའ་དག་སྤོང་བར་བྱེད་པའོ། །གཉིས་པ་ལ་ཐེག་གསུམ་སྤྱིར་བསྟན་པ་དང་། ཐེག་ཆེན་བྱེ་བྲག་ཏུ་བཤད་པ་གཉིས། དང་པོ། སྐྱེས་བུ་གང་ཞིག་ཐེག་པ་གསུམ་གྱི་ལམ་ལ་ཞུགས་པའི་འགྲོ་བ་ནི་ཉན་ཐོས་ཀྱི་ལམ་འཚོལ་བར་སེམས་བསྐྱེད་ནས་ལམ་དང་པོ་དྲན་པ་ཉེར་བཞག་བསྒོམ་པ་ནས་ཡོངས་རྫོགས་ཀྱི་བར་སྤྱོད་པའི་གང་ཟག་ནི་སྐྱེས་བུ་ཆུང་ངུ་། དེ་བཞིན་དུ་རང་སངས་རྒྱས་ཀྱི་ལམ་དུ་ཞུགས་པ་འབྲིང་པོ། ཐེག་པ་ཆེན་པོར་སེམས་བསྐྱེད་ནས་ལམ་སྒྲུབ་པ་ཆེན་པོ་སྟེ། དེ་རྣམས་ཀྱིས་ལེགས་པར་བསྒྲུབ་པ་ནི། སྐྱེས་བུ་གསུམ་གྱི་སོ་སོའི་སེམས་བསྐྱེད་ནས་དམིགས་རྣམ་སོགས་རང་གཞུང་ནས་བཤད་པ་ལྟར་རང་ལམ་གྱིས་བྱམས་སོགས་ཚད་མེད་བཞི་བསྒོམ་ཞིང་། སྦྱིན་སོགས་ཕར་ཕྱིན་དྲུག་སྤྱོོད་པ་དང་། བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་བ སྒྲུབ་པ་སྟེ། ཉིན་མཚན་གྱི་དུས་ཀུན་ཀྱང་བརྩོན་པའི་སྟོོབས་ཀྱིས་དགེ་བར་འགྱུར་བ་རྣམས་བྱ་བ་ཡིན་ནོ། །གཉིས་པ་ལ་ལམ་གྱི་མདོ་གནད་བསྟན་པ་དང་། ལམ་གྱི་ཆིངས་བཤད་པ་གཉིས། དང་པོ། ཁྱད་པར་ཐེག་པ་ཆེན་པོའི་ལམ་གྱི་དགེ་བ་རླབས་པོ་ཆེ་མཐའ་དག་བསྡུ་ན། སྦྱོར་བ་སེམས་བསྐྱེད། དངོས་གཞི་དམིགས་པ་མེད་པ། རྗེས་ལ་བསྔོ་བས་ཡོངས་སུ་ཟིན་པ་ནི། ཐར་ལམ་བགྲོད་པའི་གཅེས་པ་རྣམ་གསུམ་ཉིད་དེ་མོས་སྤྱོད་ཀྱི་སྐབས་འདིར་དེ་གསུམ་གྱིས་མ་ཟིན་ན་ཕལ་ཆེར་དོན་མེད་དུ་འགྱུར་བ་དང་། དེ་གསུམ་གར་ཡང་ཐབས་ཤེས་འདུ་འབྲལ་མེད་པའི་ཕྱིར་རོ། །གཉིས་པ། གང་ཞིག་རྩོམ་པ་ཐམས་ཅད་གཞན་དོན་འབའ་ཞིག་སྤྱོད་པ་ནི་ཐེག་པ་ཆེན་པོ་ཡིན་ལ། དེ་ཡང་གཞུང་བསྡུ་ན་ལྟ་བ་ཆོས་ཉིད་སྤྲོས་བྲལ་ནམ་མཁའ་དང་འདྲ་བ་ཕྱི་དང་ནང་དང་ཕྱི་ནང་སྟོང་པ་ཉིད་སོགས་སྟོང་པ་བཅོ་བརྒྱད་དམ་ཉི་ཤུ་པོ་དང་། སྒོམ་པ་རང་བཞིན་གྱིས་འོད་གསལ་བ་ཉི་མ་ལྟ་བུ་དང་ཐེག་ཆེན་རང་ལམ་གྱི་དྲན་པ་ཉེ་བར་བཞག་པ་བཞི་སོགས་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་པོ་དང་། སྤྱོད་པ་སེར་སྣ་སོགས་མི་མཐུན་ཕྱོགས་ཀྱིས་སྐྱོན་མེད་པའི་ཕ་རོལ་ཏུ་ཕྱིན་པ་དྲུག་དང་། འབྲས་བུ་བླ་མེད་བྱང་ཆུབ་སྟེ་སངས་རྒྱས་པའི་སྤངས་རྟོགས་ཀྱི་ཡོན་ཏན་ཇི་སྙེད་པ་རྣམས་འགྲུབ་པ་ཡིན་ཏེ་ཐེག་ཆེན་གྱི་གཞི་ལམ་འབྲས་བུའི་ཆོས་ཀུན་དེ་ཙམ་དུ་འདུས་པར་བསྟན་ཏོ། །གསུམ་པ་ལས་ཀྱིི་མཇུག་བསྡུ་བ་ལ། སྤང་བླང་སོ་སོའི་མཇུག་བསྡུ་བ་དང་། མཐར་ཐུག་གི་བླང་བྱ་ངོས་བཟུང་བའོ། །དང་པོ། སྤང་བྱ་སྤང་བའི་ཚུལ། བླང་བྱ་བླང་བའི་ཚུལ་གཉིས། དང་པོ། འདི་ལྟར་སྣང་ཞིང་སྲིད་པས་བསྡུས་པའི་འཁོར་བའི་ཆོས་གནས་དང་བདེ་སྡུག་ལ་སོགས་པའི་སྣང་ཚུལ་མི་འདྲ་བ་འདི་རྣམས་ཀུན་ཀྱང་ཀུན་གཞི་ལ་དགེ་དང་མི་དགེའི་བག་ཆགས་བཞག་པ་ལས་བྱུང་བའི་སྣང་གཟུགས་ཏེ། དེས་ན་དགེ་མི་དགེའི་ལས་མ་ཟད་ཀྱི་བར་དུ་འཁྲུལ་པའི་སྣང་བ་འདིས་ཀྱང་སྟོངས་མི་སྲིད་དེ། དྷ་དུ་རའི་འཁྲུལ་སྣང་བཞིན་ནོ། །རྒྱུ་མཚན་དེ་ཡི་ཕྱིར་ན་མི་དགེ་བ་སྤང་བར་བྱ་དགོས་པས་སེམས་ཉིད་རྟོགས་པ་གཅིག་པུས་ཆོག་གི་ལས་འབྲས་ལ་བརྩོན་མི་དགོས་སོ་ཞེས་ནམ་ཡང་སྨྲ་བར་མི་བྱའོ། །གཉིས་པ། དགེ་བའི་འབྲས་བུས་སྤྱིར་བདེ་བ་ཐམས་ཅད་དང་ཁྱད་པར་དག་པའི་རྒྱལ་སྲས་རྣམས་ཀྱི་ལམ་གྱི་ཡོན་ཏན་སྤྱན་དང་མངོན་ཤེས་རྫུ་འཕྲུལ་སོགས་དང་། མཐར་ཐུག་སྒྲིབ་པ་ལས་རྣམ་པར་གྲོལ་བ་རྒྱལ་བའི་ཡོན་ཏན་གྱི་འབྱོར་པ་ཕུན་སུམ་ཚོགས་པ་ཀུན་ཀྱང་བསོད་ནམས་དང་ཡེ་ཤེས་ཀྱི་ཚོགས་གཉིས་བསགས་པས་ཁམས་བདེ་བར་གཤེགས་པའི་སྙིང་པོ་ལ་སྒྲིབ་བྱེད་གློ་བུར་པ་ཉོན་ཤེས་ཀྱི་སྒྲིབ་གཉིས་བྲལ་སྟོབས་ཀྱིས་ཡིན་ལ། དེ་ཡང་བྲལ་བྱེད་ཀྱི་རྒྱུ་ཐེག་ཆེན་ལམ་གྱི་དགེ་ཚོགས་ལས་བྱུང་བར་ཤེས་ནས་འབད་པར་མཛོད་ཅིག ཅེས་གདམས་པའོ། །གཉིས་པ་མཐར་ཐུག་གི་བླང་བྱ་ལ། དངོས་དང་། ཇི་ལྟར་བླང་ཚུལ་གཉིས། དང་པོ། གོང་དུ་སྨོས་པ་ལྟར་དགེ་བའང་མཆོག་ཕལ་གཉིས་ལས་ཕལ་པ་བསོད་ནམས་ཆ་མཐུན་ཙམ་ནི་འཁོར་བའི་རྒྱུ་ཡིན་པས། དེ་ལས་ལོག་སྟེ་ཐར་པ་ཆ་མཐུན་གྱི་དགེ་བ་དམ་པ་གསུམ་ལྡན་གྱིས་བསྒྲུབ་པར་བྱ་སྟེ། འཁོར་བ་སྤང་དགོས་པའི་ཕྱིར་ན་དེའི་རྒྱུ་ཟག་བཅས་ཀྱི་ལས་ཀྱང་སྤང་བར་འཚལ་ལོ་སྟེ་བསོད་ནམས་ཆ་མཐུན་ནི་སྲིད་པའི་རྒྱུ་བྱེད་པས་དོན་གྱིས་མི་དགེ་བར་གཏོགས་པའི་ཕྱིར། ཀླུ་སྒྲུབ་ཀྱིས། དགེ་བ་ལས་ནི་བདེ་འགྲོ་དང་། །མི་དགེ་བ་ལས་ངན་འགྲོ་སྟེ། །གཉིས་ལ་མི་རྟེན་ཐར་པ་ལགས། །ཞེས་གསུངས་པ་བཞིན་ནོ། །གཉིས་པ། དེ་ལྟ་བུའི་ཐར་པ་ཆ་མཐུན་དེ་གང་ཞེ་ན། སྦྱིན་སོགས་ཕ་རོལ་ཏུ་ཕྱིན་པ་སྔ་མ་ལྔ་སྣང་བཅས་བསོད་ནམས་ཀྱི་ཚོགས་དང་། ཤེས་རབ་ནི་སྣང་མེད་ཡེ་ཤེས་ཀྱི་ཚོགས་ཏེ་དེ་ལྟར་ཚོགས་གཉིས་ལ་བསྟེན་པར་མཛོད་ཅིག་ཅེས་གདམས་སོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། ལས་རྒྱུ་འབྲས་བསམ་པའི་ལེའུ་སྟེ་བཅུ་དྲུག་པའི་འགྲེལ་པའོ།། །། ༈ གཉིས་པ་ཐུན་མིན་ངེས་ལེགས་འགྲུབ་པའི་བསམ་བྱ་ལ། འཁོར་བ་སྡུག་བསྔལ་གྱི་རང་བཞིན་དུ་བསམ་པ་དང་། མྱང་འདས་ཞི་བདེར་བསམ་པ་གཉིས། དང་པོ་ལ་བསྟན་བཤད་བསྡུ་གསུམ། དང་པོ། ལས་འབྲས་བསམ་པའི་རྗེས་དེ་ནས་ལས་ཉོན་གྱི་དབང་གིས་རང་དབང་མེད་པར་འཁོར་བའི་སྡུག་བསྔལ་བསམ་པར་བྱ་སྟེ། འཁོར་བ་འདི་ལ་བླང་བྱའི་སྙིང་པོ་མེད་ཅིང་རང་བཞིན་གྱིས་འགྱུར་བས་རྟག་མི་ཐུབ་པའི་ཕྱིར། ཁམས་གསུམ་དང་རིགས་དྲུག་གི་སྲིད་པའི་གནས་ན་བདེ་བ་མེད་ཅིང་སྡུག་བསྔལ་གསུམ་གྱི་རང་བཞིན་ལས་མ་འདས་པས། དེ་ལས་དུས་མྱུར་དུ་འདའ་བའི་ཐབས་ལ་བརྩོན་པས་འབད་པར་བྱའོ། །གཉིས་པ་ལ། དམྱལ་བ། ཡི་དྭགས། དུད་འགྲོ། མི། ལྷ་མིན། ལྷ་ཡི་སྡུག་བསྔལ་དྲུག དང་པོ་ལ། བསྟན་བཤད་གཉིས། དང་པོ། ངན་སོང་དམྱལ་བའི་གནས་ན་ཚ་གྲང་བཅད་གཏུབ་སོགས་སྡུག་བསྔལ་གྱི་སྡུག་བསྔལ་དཔག་ཏུ་མེད་པ་དང་ལྡན་པ་ཉིད་དོ། །གཉིས་པ་ལ། ཚ་དམྱལ། གྲང་དམྱལ་གཉིས། དང་པོ་ལ། དངོས་དང་། ཚེ་ཚད་གཉིས། དང་པོ་ལ། དངོས་གཞིའི་གནས་དང་། ཉེ་འཁོར་གཉིས། དང་པོ། ཚ་དམྱལ་བརྒྱད་པོ་གོང་མ་གོང་མ་ལས་འོག་མ་འོག་མ་བདུན་འགྱུར་གྱིས་སྡུག་བསྔལ་ཆེ་སྟེ། དེ་ལ་ཡང་སོས་པ་རྣམས་ཕན་ཚུན་མཐོང་བ་ན་ཞེ་སྡང་གིས་མཚོན་གྱིས་འདེབས་རེས་བྱས་པ་ལས་ཐམས་ཅད་ཤི་བ་ན། ནམ་མཁའ་ནས་ཡང་སོས་པར་གྱུར་ཅིག་ཅེས་པའི་སྒྲ་བྱུང་མ་ཐག་སྔར་ལྟར་སོས་ཏེ། དེ་ལྟར་ཡང་ཡང་སྐྱེ་ཞིང་ཤི་བའི་སྡུག་བསྔལ་བཟོད་གླགས་མེད་དོ། །ཐིག་ནག་པ་ནི་ལུས་ལ་ཐིག་ནག་པོ་བརྒྱད་དམ་བཅུ་དྲུག་སོགས་བཏབ་སྟེ་ལྕགས་ཀྱི་སོག་ལེ་མེ་འབར་བས་ཡང་ཡང་གཤོག་ཅིང་འབྱར་བས་སྡུག་བསྔལ་བ་སྟེ། བསྡུས་འཇོམས་ནི་རི་ཡི་བར་དང་གཏུན་དང་ལྗོངས་སུ་ནམ་མཁའ་ནས་ལྕགས་ཀྱི་ཐོ་བ་མེ་འབར་བས་བཙིར་{རྩི} བཞིན་འཐག་པ་དང་། ངུ་འབོད་ནི་ལྕགས་ཀྱི་ཁྱིམ་སྒོ་མེད་པ་མེ་འབར་བར་སྲེག་པར་བྱེད་ཅིང་། ངུ་འབོད་ཆེན་པོ་ལྕགས་ཁྱིམ་སྔ་མ་ལྟ་བུ་ཉིས་རིམ་དུ་ཆུད་ནས་སྲེག་པར་བྱེད་དོ། །ཚ་བ་ནི་མདག་མེ་བར་བའི་ས་གཞི་ལ་ལུས་ཀྱི་པགས་པ་བཤུས་ཏེ་ལྕགས་ཀྱི་ཕུར་བུས་བརྒྱངས་པའི་སྟེང་དུ་ཐོ་བས་བརྡུང་བ་དང་། རབ་ཏུ་ཚ་བ་ནི་ཕྱི་ནས་སྟེང་འོག་ཕྱོགས་མཚམས་ཀྱི་མེ་འབར་བ་དང་ནང་གློ་སྙིང་ལས་འབར་བའི་མེས་གདུང་ཞིང་གཞན་ཡང་ལྕགས་ཀྱི་ཐོ་ལུམ་མེ་འབར་བ་དང་ཟངས་ཞུན་བསྐོལ་མ་ཁར་དབང་མེད་དུ་བླུགས་པས་ལུས་ཀུན་རྡུལ་དུ་སྲེག་པ་དང་། མནར་མེད་ནི་སྡུག་བསྔལ་གྱིས་དེ་ལས་ཆེར་མནར་དུ་མེད་པས་དེ་སྐད་ཅེས་བྱ་སྟེ་ལྕགས་ཁང་མེ་ཆེས་འབར་བས་བསྲེག་སྟེ་དངུལ་དང་དངུལ་སྐོང་ལྟར་སྡུག་བསྔལ་བཟོད་གླགས་མེད་དེ། གཤིན་རྗེའི་སྐྱེས་བུ་རྣམས་ཀྱིས་ཐོ་བས་བརྡུང་བ་དང་། དགྲ་སྟྭས་འཚོག་པའམ་གཤོག་པ་དང་སོག་ལེས་གཤོག་པ་དང་གཏུན་དུ་ཕྱེ་མར་འཐག་པ་དང་། ཟངས་ཁོལ་མར་འཚོད་པ་དང་མདུང་རྩེ་གསུམ་སོགས་ཀྱིས་འབིགས་པ་དང་། ལྕགས་ལེབ་མེ་འབར་བས་མགོ་མཇུག་ཐག་པས་འཆིང་བ་ལྟར་དཀྲི་བ་སོགས་ཀྱི་སྡུག་བསྔལ་དཔག་ཏུ་མེད་དོ། །གཉིས་པ། ཚ་དམྱལ་གྱི་ཕྱི་རོལ་ཕྱོགས་བཞིར་ཉེ་འཁོར་བཅུ་དྲུག་སྟེ། རོ་མྱགས་ཤིང་རུལ་བའི་འདམ་ན་སྲིན་བུ་ལྕགས་ཟངས་ཀྱི་མཆུ་ཅན་མང་པོས་ཟ་བ་དང་། ཐལ་ཚན་གྱི་ཆུ་བོ་རབ་མེད་དུ་ཤ་རུས་ཚིག་ཅིང་འབྲལ་བ་དང་། སྤུ་གྲིའི་ཐང་དུ་རྐང་པ་གཤོག་པ་དང་། རལ་གྲི་ལོ་མའི་ཚལ་གྱིས་ལུས་གཅོད་པ་དང་། ལྕགས་ཀྱི་ཤལ་མ་རིའི་སྡོང་པོར་འབབ་འཛེགས་བྱས་པས་ལྕགས་ཀྱི་ཐུར་མས་འབིགས་པ་སྟེ་དེ་དག་ཕྱོགས་བཞི་ན་བཞི་བཞིས་ཀུན་ནས་འཁོར་ལྷགས་པ་བཅུ་དྲུག་ཅེས་བྱ་སྟེ། གནས་དེར་ངན་སོང་དམྱལ་བ་པ་རྣམས་བར་བསྐལ་ཕྱེད་དུ་སྡུག་བསྔལ་སྣ་ཚོགས་པ་ལ་སྤྱོད་པར་དྲན་ཉེ་ལས་གསུངས་ཤིང་ཉི་ཚེ་ལ་གནས་དང་སྡུག་བསྔལ་ཚེ་ཚད་སོགས་གཅིག་ཏུ་ངེས་པ་མེད་པ་ཡིན་ནོ། །གཉིས་པ། དེ་དག་གི་ཚེ་ཚད་ནི། ཡང་སོས་ལ་སོགས་དྲུག་པོ་ནི་འདོད་ལྷའི་ཚེ་དང་ཉིན་ཞག་མཉམ་པ་ཡི་རང་ལོ་དེ་སྙེད་བར་དུ་ཐུབ་པ་སྟེ། དེ་ཡང་རྒྱལ་ཆེན་རིས་བཞིའི་རང་ལོ་ལྔ་བརྒྱ་ཡང་སོས་ཀྱི་ཞག་གཅིག་ཏུ་བརྩིས་པའི་རང་ལོ་ལྔ་བརྒྱ་ཐུབ་བོ། །དེ་བཞིན་སུམ་ཅུ་རྩ་གསུམ་པའི་ལོ་སྟོང་དང་། མཚེ་མའི་ཉིས་སྟོང་དང་། དགའ་ལྡན་པའི་བཞི་སྟོང་དང་། འཕྲུལ་དགའི་བརྒྱད་སྟོང་དང་། གཞན་འཕྲུལ་དབང་བྱེད་པའི་ཁྲི་དྲུག་སྟོང་རྣམས་རང་རང་གི་ཉིན་ཞག་རེར་བྱས་པའི་ཐིག་ནག་གིས་རང་ལོ་སྟོང་དང་། བསྡུས་འཇོམས་ཀྱིས་ཉིས་སྟོང་དང་། ངུ་འབོད་ཀྱིས་བཞི་སྟོང་དང་། ངུ་འབོད་ཆེན་པོས་བརྒྱད་སྟོང་དང་། ཚ་བས་རང་ལོ་ཁྲི་དྲུག་སྟོང་དང་། རབ་ཏུ་ཚ་བས་བར་བསྐལ་ཕྱེད་ཐུབ་ཅིང་། མནར་མེད་པ་ནི་བར་བསྐལ་གཅིག་ཏུ་གནས་པར་གསུངས་སོ། །གཉིས་པ་གྲང་དམྱལ་ལ། དངོས་དང་། ཚེ་ཚད་གཉིས། དང་པོ། གངས་རི་སོགས་ཀྱི་གནས་དང་ཁ་བའི་བུ་ཡུག་ལངས་པ་ཡིས་རབ་ཏུ་སྦྲེབས་པ་སྟེ་འཁྱགས་པའི་ལུས་ཅན་རྣམ་པ་བརྒྱད་ནི། ལུས་ལ་ཆུ་བུར་མཐེ་བོང་ཙམ་པ་ཅན་དང་། དེ་དག་བརྡོལ་ནས་རྨར་སོང་བ་ཆུ་བུར་རྡོལ་བ་ཅན་དང་། ཨ་ཆུ་ཆུ་ཟེར་ནས་སྨྲེ་སྔགས་འདོན་པ་དང་། ཀྱི་ཧུད་ཀྱི་སྒྲ་ཙམ་ལས་མི་ཐོན་པ་དང་། སོ་འཐམ་ཞིང་སྐད་མི་ཐོན་པ་དང་། པདྨ་ལྟར་ལུས་བཞི་ཚལ་དུ་གས་པ་དང་། རྨ་དེ་དག་ཕྱི་ནང་ལོག་ནས་ཆུ་རྒྱུས་ཕྲ་མོས་སྒྲེལ་བ་ཨུཏྤལ་ལྟར་གས་པ། ཚལ་བ་བཅུ་དྲུག་གམ་སུམ་ཅུ་རྩ་གཉིས་ནས་བརྒྱ་སྟོང་དུ་གས་པ་པདྨ་ཆེན་པོ་ལྟར་གས་པ་སྟེ། གྲང་བས་ཉམ་ཐག་པའི་སྡུག་བསྔལ་ཕ་མཐའ་ཡས་སོ། །གཉིས་པ། དེ་དག་གི་ཚེ་ཚད་ཡུལ་ཀོ་ས་ལའི་ཏིལ་ཁལ་བརྒྱ་ཤོང་བའི་སྣོད་ལ་ཏིལ་སྦྱངས་ཟེར་ལ་དེ་ཏིལ་གྱིས་ཕྱུར་བུར་བཀང་བའི་ནང་ནས་ལོ་བརྒྱ་རེ་སོང་བ་ན་ཏིལ་གཅིག་སྟེ་རེ་རེ་ཕྱུང་བས་ཏིལ་དེ་ཀུན་ཟད་པར་གྱུར་པ་ན་ཆུ་བུར་ཅན་གྱི་ཚེ་ཚད་རྫོགས་པ་ཡིན་ལྷག་མ་གཞན་རྣམས་གོང་གི་ཚད་དེ་ཉི་ཤུར་འགྱུར་གྱིས་རིང་བ་ཡིན་ནོ། །གཉིས་པ་ཡི་དྭགས་ལ། དངོས་དང་། ཚེ་ཚད་གཉིས། དང་པོ། ཟས་སྐོམ་ཡིད་ལ་བཏགས་པས་ཡི་དྭགས་ཏེ་རྟག་ཏུ་བཀྲེས་སྐོམ་དང་གཞན་གྱིས་འཚེ་བས་སྡུག་བསྔལ་བ་སྟེ། དབྱེ་ན། ཕྱི་ཡི་སྒྲིབ་པ་ཅན་ནགས་ཚལ་དང་ཆུ་ཀླུང་སོགས་ཡུལ་བཟང་དགུ་མཐོང་ནའང་བལྟས་པའི་མོད་ལ་བསྐམས་ཤིང་མགལ་དུམ་སོགས་སུ་སྣང་བ་དང་། དབྱར་ཟླ་བས་ཀྱང་བསྲེག་ལ་དགུན་ཉི་མའང་གྲང་བ་སོགས་དུས་ཚིགས་ཀྱང་ཕྱིན་ཅི་ལོག་ཏུ་སྣང་བ་དང་། ནང་གི་སྒྲིབ་པ་ཅན་གློ་སྙིང་ལས་མེ་འབར་ཞིང་ཁ་ནས་དུད་པ་མེ་ལྕེར་བཅས་པ་འཐུལ་བ་དང་། སྤྱི་མཐུན་གྱི་སྒྲིབ་པ་ཅན་ཟས་སྐོམ་ཡིད་ལ་བཏགས་བཞིན་བཅུ་གཉིས་ཀྱི་ལོར་ཡང་ཆུ་ཡི་སྒྲ་ཙམ་ཡང་མི་ཐོས་ཤིང་ཚུར་གཞན་གྱིས་འཚེ་བ་དང་། ཟས་སོགས་མཐོང་ཡང་གཞན་གྱིས་བསྲུང་བར་སྣང་བས་སྤྱད་དབང་མེད་པ་དང་། ལུས་རི་རབ་ཙམ་ལ་ཁ་ཁབ་མིག་ཙམ་ཡོད་པས་མི་གཙང་གྱི་ནར་བོར་བའི་ཁ་ཟས་ཀྱང་དང་པོ་ཁར་མི་ཚུད་ཚུད་ཀྱང་མགུལ་བར་མ་བསླེབས་པར་ཁ་ཡི་དུག་གིས་སྐམ་པ་སོགས་སྡུག་བསྔལ་ཤིན་ཏུ་མི་བཟད་པ་དང་ལྡན་པའོ། །གཉིས་པ། ཚེ་ཚད་ནི་མི་ཡི་ལོ་བརྒྱ་ཡི་དྭགས་ཀྱི་ཞག་གཅིག་ཏུ་བྱས་པའི་རང་ལོ་ལྔ་བརྒྱར་ཏེ་མི་ལོ་ཁྲི་དང་ལྔ་སྟོང་དུ་སྡུག་བསྔལ་ཉམས་སུ་མྱོང་བ་ཡིན་ནོ། །གསུམ་པ་དུད་འགྲོ་ལ། དངོས་དང་། ཚེ་ཚད་གཉིས། དང་པོ། དུད་འགྲོ་རྣམས་ལ འང་བྱིང་ན་གནས་པ་སོགས་གཅིག་གིས་གཅིག་ཟ་ཞིང་འཚེ་བ་དང་། ཁ་འཐོར་བ་བདག་ཏུ་བཟུང་བ་རྣམས་ལ་རྨོས་རྨོ་བ་སོགས་བཀོལ་སྤྱོད་དང་ཤ་ལྤགས་སོགས་ཀྱི་ཕྱིར་གསོད་པ་དང་རྐང་ལག་དང་ཤ་སོགས་གཅོད་པས་མཚོན་སྡུག་བསྔལ་མང་པོ་དང་ལྡན་པ་ཡིན་ནོ། །གཉིས་པ། ཚེ་ཚད་ལ་མ་ངེས་ཏེ། དེ་ཡང་རིང་བ་ཀླུ་སོགས་བསྐལ་པ་རེ་ཙམ་དང་ཐུང་བ་རྣམས་སྐད་ཅིག་ཙམ་ལ་སོགས་ཏེ་མ་ངེས་སོ། །བཞི་པ། མི་རྣམས་ལ་ཡང་བདེ་བའི་གོ་སྐབས་མེད་དེ། སྐྱེ་རྒ་ན་འཆི་སྟེ་རྩ་བའི་སྡུག་བསྔལ་བཞི་དང་། དགྲ་སྡང་བ་དང་ཕྲད་པ་དང་གཅན་གཟན་སོགས་ཀྱི་འཚེ་བ་མང་ཞིང་། བཤེས་བྱམས་པ་དང་བྲལ་བ་དང་། ཡོ་བྱད་དང་བུ་ལ་སོགས་པ་འདོད་པས་ཕོངས་པ་དང་། ནད་གདོན་སོགས་མི་འདོད་པ་མྱོང་ཞིང་ཐོག་ཏུ་བབ་པ་དང་། རྙེད་བཀུར་གྲགས་པ་སོགས་འདོད་པ་མ་གྲུབ་པ་དང་ཚ་གྲང་དང་ངལ་དུབ་དང་། རང་གིས་ཕར་ཕན་བཏགས་པའི་ལན་དུ་ཚུར་གནོད་སྐྱེལ་བ་དང་། བྱས་པའི་དྲིན་མི་གཟོ་བ་དང་། འཁོར་གྱིས་ལོག་པར་སྒྲུབ་པ་དང་། དོན་མེད་པར་གཞན་གྱིས་ཕྲག་དོག་དང་། དེའི་དབང་གིས་མི་བསྔགས་ཏེ་ངན་པར་སྒྲོགས་པ་དང་། དོན་མེད་པར་སྒྲོ་སྐུར་བྱུང་བ་སྟེ་སྡུག་བསྔལ་དཔག་ཏུ་མེད་ཅིང་ཚེ་ཚད་ཀྱང་སྒྲ་མི་སྙན་ལས་གཞན་གླིང་གསུམ་ན་ཕལ་ཆེར་དུས་མིན་དུ་འཆི་བ་སོགས་ཀྱིས་ངེས་པ་མེད་དོ། །ལྔ་པ། རི་རབ་ཀྱི་ཁོང་གསེང་ན་གནས་པའི་ལྷ་མིན་རྣམས་ལའང་གཞན་ལ་ཁོང་ཁྲོ་བ་དང་། ལྷ་སོགས་དང་གཡུལ་འཁྲུགས་པ་དང་། འདོད་པ་མ་གྲུབ་ལ་མི་འདོད་པ་ཐོག་ཏུ་འབབ་པ་དང་། འཆི་བ་ལ་སོགས་ཏེ་སྣ་ཚོགས་པའི་སྡུག་བསྔལ་མང་པོ་དང་ལྡན་པས་བདེ་བའི་གོ་སྐབས་མེད་ཅིང་ཚེ་ཚད་ཡང་གཅིག་ཏུ་ངེས་པ་མེད་དོ། །དྲུག་པ། ལྷ་རྣམས་ལ་ཡང་འདོད་པ་ན་འཆི་འཕོ་བ་དང་ལྟུང་བ་ལ་སོགས་པའི་སྡུག་བསྔལ་དང་། གོང་མ་གཉིས་ནའང་སྲིད་པར་ཉིང་མཚམས་སྦྱོར་བའི་སྡུག་བསྔལ་གྱི་ཆུ་མཚོ་མཐའ་ཡས་ཤིང་དཔག་ཏུ་མེད་ལ་ཚེ་ཚད་ནི་སྔར་བཤད་པ་བཞིན་ནོ། །གསུམ་པ་དོན་བསྡུ། དེ་ལྟར་འཁོར་བ་མེ་ཡི་འོབས་དང་འདྲ་སྟེ་བདེ་བའི་སྐབས་མེད། ཟོ་ཆུན་འཁྱུད་མོ་བཞིན་དུ་གནས་རིས་སོ་སོར་གཅིག་ནས་གཅིག་ཏུ་སྐྱེ་ཤིའི་ཁ་བརྒྱུད་དེ། དུས་ཐོག་མ་མེད་པ་ནས་བདེ་སྡུག་འདི་མ་སྤྱད་བྱ་བ་དང་། གནས་འདིར་མ་བསྡད་པ་དང་། འདིའི་མངལ་དུ་མ་གནས་པ་མེད་ཅིང་ནུ་ཞོ་རྒྱ་མཚོ་བས་ལྷག་པ་འཐུང་སྟེ་ད་དུང་ལམ་ལ་མ་འབད་ན་འདི་ཙམ་ན་ཐར་ཞེས་ཐ་མ་མེད་པས། དེ་ལས་བློ་བཟང་རྣམས་ཀྱིས་ཐར་པའི་ཕྱིར་བརྩོན་པས་སྤྲོ་བ་བསྐྱེད་པར་བྱའོ། །གཉིས་པ་མྱང་འདས་ཞི་བདེར་བསམ་པ་ནི། མི་བརྟན་གཡོ་ཞིང་སྙིང་པོ་མེད་པ་དེ་འདྲ་བའི་འཁོར་བ་ལས་གཏན་དུ་ཐར་པའི་མཆོག་ནི་མྱ་ངན་ལས་འདས་པ་སྟེ། ཉོན་མོངས་པའི་ནད་ཞི་བ་དང་། སྡུག་བསྔལ་དང་བྲལ་བས་བདེ་བ་དང་། མྱ་ངན་གྱི་མེ་གཞིལ་བས་བསིལ་བའི་ཆོས་གསུམ་དང་ལྡན་པའི་བདུད་རྩི་བླ་ན་མེད་པ། རྒྱུན་འགག་པ་དང་རྒྱུན་འགྱུར་བ་དང་ཕྲ་བའི་མི་རྟག་པ་གསུམ་མེད་པས་རིམ་པར་རྟག་པ་དང་བརྟན་པ་དང་འཕོ་འགྱུར་མེད་ཅིང་རང་བཞིན་སྤྲོས་དང་བྲལ་བ་སྟོབས་སོགས་ཡོན་ཏན་གྱི་རང་བཞིན་གྱིས་ལུས་རྫོགས་པ་སྟེ། དེ་ཕན་ཆོད་རྒ་བ་དང་ཤི་བའི་འཇིགས་པ་མེད་ཅིང་སྒྲིབ་པ་གཉིས་དང་བྲལ་བ། ལས་ཉོན་གྱིས་རྙོག་པ་མེད་ཅིང་འགྲོ་བ་ཀུན་གྱི་ཕན་བདེའི་གནས་ཏེ། སྡུག་བསྔལ་ལས་སྐྱོབ་པས་འགྲོ་བའི་སྐྱབས་དང་ཐར་པའི་ལམ་སྟོན་པས་དཔུང་གཉེན་དུ་གྱུར་པ་དེར་བློ་གྲོས་བཟང་པོ་དང་ལྡན་པ་རྣམས་ཀྱིས་བགྲོད་པའི་ཕྱིར་བརྩོན་པར་བྱའོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། འཁོར་བ་སྡུག་བསྔལ་དུ་རྟོག་ཅིང་མྱང་འདས་བདེ་བར་བསམ་པའི་ལེའུ་སྟེ་བཅུ་བདུན་པའི་འགྲེལ་པའོ། །། །༈ གསུམ་པ་བསྒོམ་པའི་ཤེས་རབ་ལ། མདོར་བསྟན། རྒྱས་བཤད་གཉིས། དང་པོ། དེ་ལྟར་བསམ་བྱའམ་བསམ་པའི་ཤེས་རབ་ཡོངས་སུ་རྫོགས་པ་ན། སྒོམ་བྱུང་གི་ཤེས་རབ་ཉིད་རྒྱུད་ལ་བསྐྱེད་པར་བྱ་དགོས་སོ། །དེ་ལ་ཉན་ཐོས་རང་རྒྱལ་ཐེག་ཆེན་ཏེ་ཐེག་པ་གསུམ་གྱིས་ངེས་པར་འབྱུང་བའི་ལམ་གསུམ་བསྒོམ་པ་ཡོད་ཀྱང་དེ་དག་ལས་འདིར་ནི་ཐེག་པ་ཆེན་པོ། དེ་ལས་ཀྱང་འབྲས་བུ་བླ་ན་མེད་པ་གསང་བ་སྔགས་ཀྱི་རྩེ་མོར་གྱུར་པ་རྫོགས་རིམ་འོད་གསལ་སྙིང་པོའི་དོན་ལ་འཇུག་པར་བྱ་བ་ཡིན་ནོ། །གཉིས་པ་ལ། གནས་ལུགས་གཏན་ལ་དབབ་པ་དང་། སྒོམ་པས་ཉམས་སུ་བླང་བ་གཉིས། དང་པོ་ལ། དགོས་པ་དང་བཅས་ཏེ་མདོར་བསྟན། དེའི་རང་བཞིན་རྒྱས་པར་བཤད། དེ་ལྟར་རྟོགས་པའི་ཕན་ཡོན་གསུམ། དང་པོ། དེ་ལ་དང་པོ་བསྒོམ་པའི་སྔོན་དུ་གནས་ལུགས་ཤེས་པ་གཅེས་ཏེ། ལྟ་བ་ནི་མིག་དང་འདྲ་བའི་ཕྱིར་རོ། །གནས་ལུགས་དེ་ལའང་ཐེག་པའི་དབང་གིས་ཕྱོགས་རེ་ནས་གཏན་ལ་ཕབ་པ་སོགས་རྣམ་པ་མང་ན་ཡང་མདོ་རྒྱུད་ཐམས་ཅད་ཀྱི་ངེས་པའི་སྙིང་པོ་བདེན་པ་དབྱེར་མེད་དེ་ནི་སངས་རྒྱས་ཀུན་གྱི་ཐུགས་ཀྱི་གསང་བ་མཐར་ཐུག་པ་ན་གནས་པའི་མཛོད་ཁང་ཡིན་ཏེ། དེ་ཡང་རྡོ་རྗེ་ཐེག་པ་ཕྱི་རྒྱུད་གསུམ་ལྟ་བ་མཚན་ཉིད་ཐེག་པ་དང་ཆ་འདྲ་བར་དོན་དམ་པར་གང་ཡང་མ་གྲུབ་པའི་རང་བཞིན་དུ་གཏན་ལ་འབེབས་ལ། དེང་སང་གི་སྔགས་པ་ཕལ་ཆེར་དེའི་རྗེས་སུ་འབྲང་ངོ་། །ནང་པ་གསུམ་གྱིས་ཀུན་རྫོབ་ལྷའི་རང་བཞིན་དུ་སྣང་བ་ཉིད་ནས་བདེན་པ་དབྱེར་མེད་དུ་འཇོག་པས་བདེན་པ་ཐ་དད་དུ་འཛིན་པ་དོར་ནས་ཆོས་ཐམས་ཅད་ངེས་དོན་འབའ་ཞིག་གི་སྙིང་པོར་གཏན་ལ་འབེབས་པས། ལྷུན་གྲུབ་སྙིང་པོའི་ཁམས་ཀྱི་གློ་བུར་གྱི་སྒྲིབ་པ་སེལ་བ་ཙམ་ལས། ངོ་བོ་རྒྱུ་འབྲས་ཐ་དད་དུ་མི་འདོད་པས། འདུས་མ་བྱས་རང་སྣང་བའི་དཀྱིལ་འཁོར་དུ་ཤེས་པར་བྱེད་དོ། །དེ་ལམ་དུ་བྱེད་ཚུལ་ཕ་མ་གཉིས་མེད་ཀྱི་རིམ་པས་ཐ་དད་ཀྱང་ངོ་བོ་གྲུབ་སྡེ་གཅིག་པར་ཁས་ལེན་ཏེ་དཔེར་ན་བུམ་པའི་བདེན་འཛིན་ལོག་ཀྱང་སྣང་ཙམ་གྱི་བུམ་པར་རྣམ་པར་འཇོག་པ་སྟེ། དོན་ལ་བུམ་པ་བཀག་ཤུལ་གྱི་མེད་རྐྱང་གི་རྗེས་སུ་འབྲང་བ་མིན་པར། བུམ་པ་ཁེགས་ཀྱང་བུམ་སྣང་དེ་ཡོད་པར་འཇོག་ཤེས་དགོས་པ་བཞིན་དངོས་པོའི་བདེན་འཛིན་གཞིག་པའི་ཕྱིར་དང་པོར་རིགས་པས་དཔྱད་ནས་བཀག་ཀྱང་དོན་ལ་དགག་རྐྱང་ཙམ་ཞིག་མཐར་ཐུག་ཏུ་མ་གྲུབ་སྟེ་སྣང་སྟོང་འདུ་འབྲལ་མེད་པ་ཉིད་གནས་ལུགས་ཡིན་གྱི་ཕྱོགས་སུ་ལྷུང་བ་མ་ཡིན་ནོ། །དེས་ན་རྣལ་དོན་དུ་བདེན་གྲུབ་དང་དགག་རྐྱང་འཛིན་པ་གཉིས་ཀ་བློས་ཕར་ཀུན་ཏུ་བཏགས་པ་ཙམ་དུ་ཟད་ལ། ཆོས་ཉིད་གཤིས་ལ་གང་དུའང་མ་གྲུབ་སྟེ་སྣང་སྟོང་མཉམ་པ་ཉིད་དུ་གནས་པས་ན་སྣང་སྟོང་འདི་གཉིས་གཅིག་སྤངས་ནས་གཅིག་ལ་མཆོག་ཏུ་ཞེན་པར་མི་བྱའོ། །དེ་ལྟར་མ་གོ་བར་ཅི་ཡང་མེད་པར་འཛིན་པ་ནི། ཕྱང་ཆད་ཐེག་ཆེན་གྱི་ལམ་དང་རིང་བ་ཞེས་བྱ་ལ། སྒོས་སུ་རྡོ་རྗེ་ཐེག་པའི་སྐལ་བ་མེད་པ་ཞེས་བྱའོ། །གཉིས་པ་ལ། གཞི་བདེན་གཉིས་དབྱེར་མེད་དུ་གཏན་ལ་ཕབ་པ། ལམ་འཁོར་འདས་དབྱེར་མེད་དུ་ཉམས་སུ་ལེན་པ། ཐོབ་བྱ་གཞི་འབྲས་དབྱེར་མེད་དུ་ལ་བཟླ་བ་གསུམ། དང་པོ་ལ། བདེན་གཉིས་དབྱེར་མེད་ཀྱི་ངོ་བོ། དབྱེར་མེད་པའི་རྒྱུན་མཚན་གཉིས། དང་པོ། རྡོ་རྗེ་ཐེག་པའི་སྙིང་པོའི་དོན་ཀུན་གཅིག་ཏུ་དྲིལ་ནས་ཉམས་སུ་ལེན་པ་ལ། ཕ་རྒྱུད་ཀྱི་རྫོགས་རིམ་ཟབ་གསལ་གཉིས་མེད་ཀྱི་ཡེཤེས་ཐབས་རླུང་གི་རྣལ་འབྱོར་དང་། མ་རྒྱུད་ཀྱི་བདེ་གསལ་བསམ་མི་ཁྱབ་པའི་ཐབས་ཐིག་ལེའི་རྣལ་འབྱོར་དང་། གཉིས་མེད་ཀྱི་རྫོགས་རིམ་འོད་གསལ་རྣམ་པར་མི་རྟོག་པའི་ཡེ་ཤེས་ཐབས་ཕྲ་མོའི་རྣལ་འབྱོར་དུ་བྱ་བ་གསུམ་ཆར་མན་ངག་འདིར་ཆ་མཉམ་དུ་སྟོན་པ་སྟེ། ཆ་མཉམ་ནི་རང་བཞིན་ལྷན་ཅིག་སྐྱེས་པའི་ཡེ་ཤེས་ཡིན་པས་དེ་གཏན་ལ་འབེབས་པའི་ཕྱིར་རོ། །དེས་ན་དེ་དག་གི་གཞི་ཡི་གནས་ཚུལ་མ་ཤེས་ན་གང་ཡང་མི་འབྱུང་བས། རིག་པའི་ཡེ་ཤེས་བདེན་པ་དབྱེར་མེད་དེ་ཡི་རང་བཞིན་ཇི་ལྟ་བུ་ཞེ་ན། གདོད་མ་ནས་རྣམ་པར་དག་ཅིང་རང་བཞིན་གྱིས་འོད་གསལ་བའི་ཡེ་ཤེས་བདེ་བར་གཤེགས་པའི་སྙིང་པོ་ཡིན་ཏེ། དེ་ཡང་ཐོག་མ་མེད་པ་ནས་ཡོད་མེད་ལ་སོགས་པའི་མཐའ་བཞིའི་སྤྲོས་པ་རབ་ཏུ་ཞི་བའི་སྤྲོས་མེད་ཀྱི་བདག་དམ་པ། ཡོན་ཏན་གྱི་དཀྱིལ་འཁོར་གང་བས་མཛེས་པ་ཉི་མ་ལྟ་བུ་དང་སྒྲིབ་པ་མེད་པའི་དབྱིངས་སམ་ཆོས་ཉིད་ནམ་མཁའ་བཞིན་ཏེ། འོད་གསལ་དེའི་རང་བཞིན་ལས་གཞི་ལམ་འབྲས་བུའི་གནས་སྐབས་ནམ་དུ་ཡང་མི་གཡོ་བས་ལྷུན་གྲུབ་འདུས་མ་བྱས། རང་བཞིན་གྱིས་སྒྲིབ་གཉིས་རྣམ་དག་ཆེན་པོར་ཡེ་ནས་གནས་ཏེ་ཐ་དད་དུ་བྱ་བ་ཡོད་མ་མྱོང་བས་སྣང་སྟོང་ཐ་དད་དུ་དབྱེར་མེད་པ་སྟེ། མཚན་བརྗོད་ལས། རང་བཞིན་གྱིས་ནི་དག་པའི་བདག །ཐོག་མ་མེད་ནས་སྤྲོས་མེད་བདག །ཅེས་དང་། དྲི་མ་མེད་པས་གཙང་བ། ཀུན་ལ་ཁྱབ་པས་བདག་དམ་པ། འགྱུར་བཅས་ཀྱི་ཟུག་རྔུ་མེད་པས་སམ་སྡུག་བསྔལ་གྱིས་ཟིལ་གྱིས་མི་ནོན་པས་བདེ་བ། འཕོ་འགྱུར་མེད་པས་རྟག་པ་སྟེ། ཚུ་རོལ་མཐོང་བའི་བློ་ལས་བསྐལ་དོན་ཕ་རོལ་ཏུ་གྱུར་པའི་དབང་དུ་བྱས་ནས། མདོ་སྡེ་རྒྱན་ལས། བཙང་བདག་བདེ་དང་རྟག་ཉིད་ཕྱིར། །ཡོན་ཏན་ཕ་རོལ་ཕྱིན་པ་འབྲས། །ཞེས་སོ། །དེ་ཡང་སྔར་མེད་པའི་ཡོན་ཏན་སོ་མ་དེའི་སྟེང་དུ་གྲུབ་པའམ་གཞག་ཏུ་མེད་ལ། གློ་བུར་པ་ཙམ་ལས། རང་བཞིན་པའི་སྐྱོན་ནམ་དྲི་མ་ཕྱིར་བསལ་དུ་མེད་པས་སྐྱོན་སྤང་བ་ཕྱིར་འགྲོ་བ་དང་། ཡོན་ཏན་ནང་དུ་འོང་བ་མེད་པ་ཉིད་ནི་གནས་ལུགས་ཡང་དག་པའི་དོན་ཏེ། དེ་རྟོགས་པའམ་མཐོང་བས་གྲོལ་ནུས་པར། མངོན་རྟོགས་རྒྱན་ལས། འདི་ལ་བསལ་བྱ་ཅི་ཡང་མེད། །བཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་བལྟ། །ཡང་དག་མཐོང་ན་རྣམ་པར་གྲོལ། །ཞེས་སོ། །གཉིས་པ་ལ་བསྟན་བཤད་གཉིས། དང་པོ། འོད་གསལ་བའི་ཡེ་ཤེས་དེ་ལ་འཁོར་བ་ཀུན་རྫོབ་པའི་སྣང་བ་སྤྲིན་དང་འདྲ་བས་མ་རེག་པའམ་སྒྲིབ་པའི་གཞི་མེད་པས་འཁྲུལ་པར་སྣང་བ་ཙམ་ཡང་དོན་ལ་རང་བཞིན་གྱིས་མ་གྲུབ་པས་རྣམ་པར་ཆད་ལ། དེ་མ་གྲུབ་ན་སྣང་ཚོད་སྟོང་ཉིད་དུ་གཞལ་བའི་དོན་དམ་པའང་མ་གྲུབ་པས་བདེན་གཉིས་སུ་རྣམ་པར་དབྱེ་བའི་ཡུལ་ལས་འདས་པས་ན། དབྱིངས་ལ་གྲུབ་མཐའི་བློས་བཏགས་པའི་བདེན་པ་གཉིས་ལས་འདས་པའི་ཕྱིར་བློས་དམིགས་པའི་སྤྲོས་པ་ཀུན་ཞི་བ་འདི་ལེགས་པར་རྟོགས་ན། དབྱིངས་ལ་བདེན་པ་གཉིས་མ་གྲུབ་པས་བདེན་པ་དབྱེར་མེད་ཞེས་བརྗོད་པ་འདི་ལ་ནི་ཀུན་རྫོབ་ཏུ་གྲུབ་པ་དང་དོན་དམ་དུ་མ་གྲུབ་ཅེས་ཀྱང་བརྗོད་དུ་མེད་དོ། །དེས་ན་སྣང་སྟོང་ཕྱོགས་རེ་བ་མིན་པ་ལ་བདེན་པ་དབྱེར་མེད་ཅེས་བརྗོད་པའང་། བདེན་པ་ཡོད་པའི་བློ་ལ་ལྟོས་ནས་དེ་དབྱེར་མེད་དུ་བཞག་གི། རང་གི་ངོ་བོ་ལ་དབྱེར་ཡོད་མེད་སོགས་ཀྱང་མེད་དེ་སྤྲོས་པ་དབྱིངས་སུ་ཞི་བ་ཉིད་དོ། །དེ་ལྟར་ན་དབྱིངས་དེ་ལ་སྣང་ངོ་ཞེས་སམ་མི་སྣང་སྟེ་སྟོང་ངོ་ཞེས་པའི་རང་བཞིན་གཉིས་ཆར་ཡང་མེད་པས། བདེན་པ་གཉིས་པོ་དེ་ཡང་དབྱེར་མེད་ཅེས་སུ་བརྗོད་དེ། སྒྱུ་འཕྲུལ་བླ་མ་ལས། དོན་དམ་ཀུན་རྫོབ་དབྱེར་མེད་པ། །མཉམ་པའི་དཀྱིལ་འཁོར་ཆེན་པོ་རུ། །ཞེས་གསུངས། དེས་ན་ཐ་སྙད་དུ་བཏགས་པའི་བདེན་གཉིས་སྣང་ཚོད་འདི་ལ་ཡང་སོ་སོར་དབྱེར་མེད་ན། གཤིས་འོད་གསལ་ལ་ལྟ་ཅི་སྨོས་ཏེ་གསལ་འགྲིབ་མེད་པ་ཉི་མའི་དཀྱིལ་འཁོར་བཞིན་ནོ། །གཉིས་པ་རྒྱས་བཤད་ལ། སྣང་ཚུལ་ཐ་སྙད་ལ་བདེན་པ་གཉིས་སུ་དབྱེ་བ། གནས་ཚུལ་དོན་དམ་པར་དབྱེར་མེད་གཅིག་ཏུ་བསྟན་པ་གཉིས། དང་པོ། དོན་ལ་དེ་ལྟར་དབྱེར་མེད་ཀྱང་ཐ་སྙད་དུ་དབྱེར་ཡོད་དེ། སྤྱིར་དོན་དམ་དང་ཀུན་རྫོབ་ཀྱི་འཇོག་ཚུལ་འདི་ལ་སྣང་ཚུལ་དང་གནས་ཚུལ་གྱིས་བཞག་པ་ནི་སྣང་ཆ་དང་སྟོང་ཆ་ལ་འཇོག་པས་དེ་ནི་འཁོར་འདས་གཉིས་ཀ་འདྲ་ཞིང་མཉམ་ལ། འདིར་གནས་ཚུལ་དང་སྣང་ཚུལ་མཐུན་པ་དང་མི་མཐུན་པ་ལ་དོན་དམ་དང་ཀུན་རྫོབ་ཏུ་འཇོག་པའི་ལུགས་ཏེ། འདི་ཐ་སྙད་དཔྱོད་པའི་ཚད་མས་ཡང་དག་དང་ཡང་དག་མིན་པར་ཕྱེས་ནས་བདེན་གཉིས་འཇོག་ཚུལ་ཡིན་པས་དེའི་ཚུལ་གྱིས་རབ་ཏུ་དབྱེ་ན། འདི་ལྟར་དོན་གྱི་སྙིང་པོ་འོད་གསལ་ལ་སྒྲིབ་པའི་བག་ཆགས་སྣ་ཚོགས་པའི་ཀུན་གཞི་ཚོགས་བརྒྱད་ཡུལ་སེམས་གཉིས་སུ་སྣང་ཞིང་གཉིས་སུ་ཞེན་པའི་འཁྲུལ་སྣང་འཁོར་བའི་ཆོས་རྣམས་ཀུན། སྣང་བ་ལྟར་མི་བདེན་ཞིང་སྙིང་པོ་མེད་པས་བསླུ་བའི་ཕྱིར་ཀུན་རྫོབ་ཀྱི་བདེན་པ་ལགས་ཤིང་། ཟབ་པ་སྟོང་ཉིད་དང་ཞི་བ་སྤྲོས་པའི་མཚན་མ་དང་བྲལ་བ་དང་རང་བཞིན་གྱིས་འོད་གསལ་བ་ཟག་པ་མེད་པའི་ཡོན་ཏན་གྱི་ཆོས་ཡེ་ནས་ལྷུན་གྱིས་གྲུབ་པས་འབྲས་བུ་ལ་སྨོན་པ་མེད་པས་རང་བཞིན་གྱིས་མྱ་ངན་ལས་འདས་པའི་ཆོས་ནི་ནམ་ཡང་རྫུན་པ་དང་བསླུ་བའི་ཆོས་ཅན་མིན་པས་འགྱུར་བ་མེད་པའི་རང་བཞིན་ཡིན་པའི་ཕྱིར་དོན་དམ་བདེན་པར་འདོད་དེ། དཔེར་ན་སྤྲིན་དང་ཉི་མ་ལྟར་སྒྲིབ་ཡུལ་འོད་གསལ་དེ་དོན་དམ་བདེན་པ། སྒྲིབ་བྱེད་འཁོར་བའི་ཆོས་ཕུང་པོ་ཁམས་དང་སྐྱེ་མཆེད་རྣམས་ཀུན་རྫོབ་བདེན་པའོ། །དེས་ན་བདེན་གཉིས་འདི་ལ་དོན་བྱེད་ནུས་མི་ནུས་དང་། སྐྱེ་སོགས་ཡོད་མེད་དང་། བསླུ་མི་བསླུ་སོགས་དབྱེ་སྒོ་མང་ཡང་། འདིར་བསླུ་མི་སླུ་སྟེ། དེ་ལྟར་འཇོག་པའི་གནད་ནི་འཁོར་འདས་དབྱེར་མེད་པར་སྒྲུབ་པའི་གནད་ཀྱིས་ཏེ། དེ་ལྟའི་སྒྲིབ་པ་སྣང་ལ་མ་གྲུབ་པས་ནམ་ཡང་འོད་གསལ་ལ་གོས་སུ་མེད་པའི་ཕྱིར། དབྱེ་བ་ལ་འདྲེས་དགོས་པ་ལས་དྲི་མ་གློ་བུར་པ་དང་། འོད་གསལ་རང་བཞིན་གྱིས་གནས་པ་དང་། དེ་གཉིས་མཚན་ཉིད་མི་མཐུན་པས་གཅིག་དང་ཐ་དད་གང་དུའང་འདྲེས་པ་མེད་པས་དབྱེར་མེད་ཅེས་བཏགས་པའོ། །གཉིས་པ། གཉིས་སྣང་དང་བཅས་པའི་སྤྱོད་ཡུལ་དུ་མི་བརྟན་གཡོ་བའི་ངང་ཚུལ་ཅན་གྱི་ཀུན་རྫོབ་འདི་ལྟར་སྣ་ཚོགས་སུ་སྣང་བ་འདི་ཡང་། སྒྱུ་མ་ཆུ་ཟླ་སྤྲུལ་པ་གཟུགས་བརྙན་བཞིན་དུ་བརྟགས་ན་རང་བཞིན་དུ་གྲུབ་པ་རྡུལ་ཙམ་མེད་ལ། མེད་ཀྱང་སྣང་ནི་སྣང་བ་གང་ཡིན་པ་འདི་དག་དོན་དམ་དཔྱོད་བྱེད་ཀྱི་རིགས་པས་ཤིན་ཏུ་བརྟགས་ན་རགས་པའི་གཞི་དང་ཕྲ་བའི་རྩ་བར་གྱུར་པའི་དངོས་པོ་ཕྲ་རབ་རྡུལ་ཙམ་ཡང་གྲུབ་པ་མེད་པས་རང་བཞིན་གྱིས་ནམ་མཁའ་དང་འདྲ་བར་སྟོང་ཞིང་། ཆོས་རང་རང་གི་མཚན་ཉིད་ཀྱིས་གྲུབ་པ་རྣམ་པར་ཆད་པའམ་བྲལ་བ་སྟེ། མ་བརྟགས་མ་དཔྱད་པར་བག་ཡང་ཉམས་དགའ་བ་ཙམ་གྱི་སྤྱོད་ཡུལ་དུ་ནི་རྣམ་པ་སྣ་ཚོགས་པའི་རང་བཞིན་དུ་སྣང་བ་ནི་དཔེར་ན་མེད་བཞིན་སྣང་བ་སྒྱུ་མ་བཞིན་ནོ། །མེད་བཞིན་དུ་སྣང་བའི་རྒྱུ་ཅི་སྙམ་ན་ཐོག་མེད་ནས་གོམས་པའི་བག་ཆགས་གང་ཞིག་འཁྲུལ་པའི་རང་བཞིན་ཅན་གྱི་རྟེན་འབྲེལ་གྱི་དབང་ལས་བྱུང་བ་ཡིན་ཏེ་བརྟགས་ན་མེད་ལ་མ་བརྟགས་ན་ཡོད་པས་འཁྲུལ་སྣང་ཞེས་བྱ། ཇི་ལྟར་དྷ་དུ་ར་ཟོས་པ་ཡི་གང་ཟག་གི་མིག་ལམ་དུ་གླང་པོ་སོགས་སྣ་ཚོགས་སུ་སྣང་བ་བཞིན་ནོ། །དེ་ལྟར་འཁྲུལ་པའི་སྣང་བ་འདི་དག་རང་བཞིན་གྱིས་ཆོས་ཀྱི་བདག་གིས་སྟོང་ཞིང་གང་ཟག་གི་བདག་མེད་པ་དེ་ཉིད། སྣང་བ་དེ་ཡི་གནས་ལུགས་ཡིན་པའི་ཕྱིར་སྟོང་པའི་ཆ་དེ་ལ་དོན་དམ་ཞེས་བྱ་ཞིང་དེའི་སྣང་ཆ་ལ་ཀུན་རྫོབ་ཅེས་སུ་བཞག་པ་སྟེ། དེ་ལྟར་སྣང་བའི་དུས་ཉིད་ནས་ཀྱང་སྐྱེ་བ་དང་། གནས་པ་སོགས་སུ་རང་བཞིན་གྱིས་གྲུབ་པ་མེད་པས་ན། ཆོས་དེ་དང་དེའི་རང་བཞིན་ནམ་གནས་ལུགས་ནི་སྣང་སྟོང་འདུ་འབྲལ་མེད་པར་གནས་པ་དེ་ཡིན་པའི་ཕྱིར་བདེན་པ་དབྱེར་མེད་པ་ཉིད་དོ། །མདོར་ན་ཀུན་རྫོབ་སྣང་སྟོང་གི་ཟླས་ཕྱེ་བའི་བདེན་པ་གཉིས་པོ་ངོ་བོ་ལ་དབྱེ་བ་ཐ་དད་སོ་སོ་བ་མ་གྲུབ་སྟེ་གཉིས་ཆར་གཞི་མེད་པའི་ཕྱིར། སེམས་འགྲེལ་ལས། དེ་ཕྱིར་ཆོས་རྣམས་ཀུན་གྱི་གཞི། །གནས་མེད་སྒྱུ་མ་དང་མཚུངས་ཤིང་། །ཞི་བ་སྲིད་པ་གཉིས་མེད་པ། །སྟོང་པ་ཉིད་ནི་རྟག་ཏུ་སྒོམ། །ཞེས་གསུངས། དེ་ལྟར་ཐ་སྙད་ཀྱི་བདེན་པ་གཉིས་རིལ་པོ། འདིར་ཀུན་རྫོབ་ཏུ་བཞག་ནས་མ་གྲུབ་པ་ཉིད་གཏན་ལ་འབེབས་ཏེ། མདོ་རྒྱན་ལས། གཞན་གྱི་མར་ནི་གང་འདོད་པ། །དེ་ནི་གཞན་གྱི་ཆུང་མ་ཉིད། །གཞན་གྱི་དོན་དམ་གང་ཡིན་པ། །དེ་ནི་གཞན་གྱི་ཀུན་རྫོབ་ཉིད། །ཅེས་སོ། །དེས་ན་ཐ་སྙད་པས་དོན་དམ་དུ་འདོད་ཀྱང་བློས་དཔྱད་པ་ལ་དངོས་པོ་དང་དོན་སྤྱི་དངོས་མེད་འཛིན་པ་ལས་མེད་པས་ན་ཀུན་རྫོབ་ཉིད་དུ་འགྱུར་བའི་ཕྱིར་རོ། །གཉིས་པ་ལམ་འཁོར་འདས་དབྱེར་མེད་ལ། དངོས་དང་། དེ་ལ་ལོག་རྟོག་དགག་པ་གཉིས། དང་པོ་ལ། གནས་ལུགས་ལ་འཁོར་འདས་དབྱེར་མེད་དུ་བསྟན་པ་དང་། སྣང་ཚུལ་གྱིས་མི་གནོད་པར་བསྟན་པ་གཉིས། དང་པོ། འཁོར་བར་སྣང་བའི་ཆོས་དེ་ཡི་རང་བཞིན་གདོད་ནས་རྣམ་པར་དག་པ་སྐྱེ་མེད་སྟོང་ཆ་དབྱིངས་དོན་དམ་དང་། མཁྱེན་ཆ་འོད་གསལ་བའི་དོན་དམ་ཞེས་ཡེ་ཤེས་དང་འབྲས་བུའི་དོན་དམ་བསྟན་ཏེ། དེ་ཡང་རིག་པ་རང་བྱུང་གི་ཡེ་ཤེས་ལ་ལྡོག་ཆས་ཕྱེ་ན་མེ་ལོང་མཉམ་ཉིད་སོགས་ལྔ་དང་། དེ་ལ་བརྟེན་ནས་སྐུ་ལྔ་འབྱུང་བས་ན་འབྲས་བུ་དང་ཡེ་ཤེས་ཀྱི་དོན་དམ་ནི་འོད་གསལ་ལ་འདུ་བས། དེ་ལྟར་དབྱིངས་ཡེ་གཉིས་པོ་གཉིས་སུ་མེད་ཅིང་གཉིས་སུ་བྱར་མེད་པས་ན། སྣང་ཚུལ་འཁོར་བ་མ་གྲུབ་པས་གནས་ཚུལ་རང་བཞིན་གྱིས་མྱ་ངན་ལས་འདས་པ་སྟེ་གཤིས་ལ་འཁོར་འདས་གཉིས་སུ་མེད་ཅིང་བདེན་པ་གཉིས་སུ་དབྱེར་མེད་པའི་ཚུལ་གཅིག་པུ་ཉིད་དོ། །དེས་ན་འོད་གསལ་དོན་དམ་མྱ་ངན་ལས་འདས་པའི་རང་བཞིན་དང་། འཁོར་བ་གདོད་ནས་དག་པའམ་རང་བཞིན་མེད་པ་གཉིས་གྲུབ་མ་གྲུབ་ཆོས་འགལ་བས་དབྱེ་བ་མེད་པས་དབྱེར་མེད་དུ་ཤེས་པར་བྱའོ། །འོ་ན་མྱང་འདས་མ་གྲུབ་པར་བཤད་མོད་ཅེ་ན། བཏགས་པའི་ཞེན་པ་འགོག་པ་ལ་དགོངས་ཀྱི་མཚན་ཉིད་ཆད་པའི་མ་གྲུབ་པ་མིན་ནོ། །གཉིས་པ། འདི་ལྟར་འཁྲུལ་སྣང་འཁོར་བའི་ཆོས་སུ་སྣང་ཡང་སྣང་བ་ལྟར་དུ་འཁོར་བ་བདེན་པར་མ་གྲུབ་པས་ན་རང་བཞིན་མེད་པ་ཉིད་དེ། གལ་ཏེ་སྣང་བ་ལྟར་བདེན་པར་གྲུབ་ན་མྱང་འདས་སུ་མི་རུང་བའི་ཕྱིར། དེས་ན་དབྱིངས་ཀྱི་དོན་དམ་དང་འཁོར་བ་གཉིས་ཐ་དད་སོ་སོར་དབྱེ་བའི་ཆོས་རིགས་པས་དཔྱད་བཟོད་དུ་མེད་པས། འཁོར་འདས་གཉིས་དབྱེར་མེད་མཉམ་པ་ཉིད་དུ་བསྟན་པ་ཡིན་ནོ། །དོན་དམ་པར་འཁོར་བ་སྣང་ལ་མ་གྲུབ་པའི་མ་གྲུབ་པའི་ཆ་དེ་དང་། དབྱིངས་ངོ་བོ་ཉིད་ཀྱི་དག་པའི་དོན་དམ་ལ་གཅིག་ཆོས་འགལ་བས་ཀྱང་འདྲེར་མེད་དོ། །འཁོར་བས་གོས་པ་མེད་པའི་ཕྱིར་ངོ་བོ་ཉིད་ཀྱིས་རྣམ་དག་ཏུ་བསྟན་པས་དེ་ཉིད་དབྱེར་མེད་དོ། །སྣང་མུན་འདྲེས་པའི་དབྱེར་མེད་ཅེས་བྱ་བ་མེད་པ་བཞིན་ནོ། །འཁོར་བ་མ་གྲུབ་པས་དབྱེ་ཆོས་མེད་པ་དེའི་ཕྱིར་ཡང་འོད་གསལ་དང་དབྱེར་མེད་ཅེས་བརྗོད་དེ། ཉིན་མཚན་གྱི་དབྱེར་མེད་དང་། དངོས་པོ་དང་རི་བོང་གི་རྭ་བཞིན་ནོ། །གཉིས་པ། བདེན་པའམ་འཁོར་འདས་དབྱེར་མེད་ཀྱི་དོན་འདི་ལས་གཞན་དུ་རྟོག་པ་ནོར་བའམ་ལོག་པའི་བློ་དེ་ནི་གནས་ལུགས་ཐེག་པ་བླ་ན་མེད་པའི་དོན་ལ་རབ་ཏུ་རྨོངས་པ་ཡིན་ཏེ། གང་ཞེ་ན། འཁོར་འདས་གཉིས་སྣང་ཙམ་དུ་གྲུབ་པ་ཡང་ངོ་བོ་རང་བཞིན་མེད་པས་དབྱེར་མེད་ལ། དོན་དམ་པར་གཉིས་ཀ་གཞི་མ་གྲུབ་པས་དབྱེ་བའི་ཡུལ་མེད་ཅེས་འདོད་པའང་། ཐེག་པ་བླ་མེད་ཀྱི་དོན་ལ་རྨོངས་ཤིང་གཏི་མུག་པ་ཞེས་བྱ་སྟེ། རང་བཞིན་མ་གྲུབ་པར་འདྲ་བ་ཙམ་དང་སྟོང་རྐྱང་ཕྱང་ཆད་ལ་བདེན་པ་དབྱེར་མེད་ཀྱི་དོན་རྫོགས་པར་བཟུང་བ་མི་འཐད་དེ། ཅིའི་ཕྱིར་ན། འཁོར་འདས་སྣང་ཙམ་གྱི་ཐ་དད་ལ། དོན་དམ་རང་བཞིན་མ་གྲུབ་པའི་དགག་ཆ་ཙམ་དུ་དབྱེར་མེད་པ་ཙམ་གྱིས་འཁོར་འདས་དབྱེར་མེད་ཆེན་པོའི་དོན་རྟོགས་པ་མིན་ཏེ། འཁོར་འདས་དབྱེར་མེད་ཆེན་པོ་ནི་རང་བཞིན་གཉུག་མ་གྲུབ་བསལ་མེད་པ་ཙམ་ཞིག་ཆོས་ཀུན་གྱི་རང་བཞིན་ནམ་གནས་ལུགས་སུ་གྲུབ་པ་དེ་ལ་མྱང་འདས་ཆེན་པོ་ཞེས་ཐ་སྙད་གདགས་པ་ཡིན་ལ། དེའི་དོན་ཇི་ལྟ་བ་བཞིན་བློ་ཡུལ་ལས་འདས་ཤིང་གཉིས་ཆོས་འཁོར་འདས་ཀྱི་ཟླས་ཕྱེ་བའི་མྱང་འདས་མིན་པས། སྣང་ཆ་ནས་དེ་གཉིས་སོ་སོར་དབྱེ་ཞིང་སྟོང་ཆ་ནས་དབྱེར་མེད་ཅེས་པ་དེ་ལ་བརྟགས་ན། འཁོར་འདས་སྣང་དུས་སོ་སོར་དབྱེ་བར་སྣང་བཞིན་དུ་དབྱེར་མེད་མི་འཐད་དེ། ཀ་བུམ་སོ་སོར་སྣང་བཞིན་ཀ་བུམ་དབྱེར་མེད་པ་མི་འཐད་པ་བཞིན་དང་། སྟོང་པར་འདྲ་བ་ཙམ་གྱིས་དབྱེར་མེད་དོ་སྙམ་ན་མ་ཡིན་ཏེ། འཁོར་འདས་དབྱེར་སྣང་ན་སྣང་བ་ཐ་དད་ལ་ལྟོས་པའི་སྟོང་པའམ་རང་བཞིན་མེད་པའང་དབྱེར་ཡོད་ཁོ་ནའམ་ཐ་དད་དེ། ཀ་བའི་སྟེང་གི་དངོས་པོ་དང་། བུམ་པའི་སྟེང་གི་དངོས་པོ་བཞིན་ནོ། །གལ་ཏེ་འདྲ་བ་ཙམ་གྱིས་དབྱེར་མེད་ཡིན་ན་ཆོས་ཐམས་ཅད་ཤེས་བྱར་མཚུངས་པས་རང་བཞིན་དབྱེར་མེད་པའི་གཅིག་པར་འགྱུར་བས་གཅེར་བུ་པའི་ལུགས་རྣལ་མ་ཁས་བླངས་པ་ཡིན་ནོ། །དེས་ན་རང་བཞིན་མ་གྲུབ་ཙམ་གྱི་ཆ་ཁོ་ན་བཟུང་བའི་སྟོང་རྐྱང་ནི་འཁོར་བ་མིན་ལ་མྱང་འདས་ཀྱང་མིན་ཞིང་། དེ་གཉིས་ཀའི་རང་བཞིན་ནམ་གནས་ལུགས་མཐར་ཐུག་ཀྱང་མིན་ཏེ་སྟོང་པ་ཆིག་རྐྱང་གི་ཕྱོགས་སུ་ལྷུང་བའི་ཕྱིར་རོ། །དགག་པ་དེ་རང་ལའང་མཚུངས་ཏེ་འཁོར་འདས་གཉིས་པོ་སྣང་ཙམ་དུ་དབྱེར་མེད་པ་སུས་ཀྱང་ཁས་བླང་མི་ནུས་པའི་ཕྱིར་སྙམ་ན་མི་མཚུངས་ཏེ། འཁོར་འདས་ཞེས་སོ་སོར་སྣང་བའི་གཉིས་ཆོས་ཀྱི་རྣམ་པར་དབྱེ་བ་མཐར་ཐུག་གི་དོན་ལ་ཡེ་ནས་མ་གྲུབ་པའི་ཕྱིར་ན་གཉིས་སུ་སྣང་བའང་མེད་ཅིང་དེ་ལྟར་ན་སོ་སོའི་ཆོས་ཉིད་ཅེས་བློས་རྣམ་པར་གཞག་པའི་ཡུལ་ཡང་ཡེ་ནས་མེད་པས་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བ་ཞེས་གསུངས་ཏེ། རྣམ་གྲངས་མིན་པའི་མྱང་འདས་ཡིན་ནོ། །དེས་ན་ཐ་དཔྱོད་ངོར་དོན་དམ་དུ་འཁོར་བ་མེད་ཀྱང་གྲོལ་བའང་མེད་ན། འབད་པ་དོན་མེད་པ་དང་ཡང་འཁོར་བ་སོགས་ཀྱི་སྐྱོན་མང་ངོ་། །དེའི་ཕྱིར་མིག་སྐྱོན་ཅན་གྱི་དུང་ལ་སེར་འཛིན་བཞིན་གནས་ལུགས་མཐར་ཐུག་གཉུག་མའི་གཤིས་ལ། འཁོར་བ་མ་གྲུབ་ཀྱང་ད་ལྟ་འཁྲུལ་ངོ་ན་སྣང་། དོན་དམ་འོད་གསལ་སྐུ་དང་ཡེ་ཤེས་ཀྱི་ཆོས་ཀུན་ཡེ་ནས་འདུ་འབྲལ་མེད་པར་བྲལ་མི་ཤེས་ཀྱི་ཆོས་ཉིད་དུ་གྲུབ་ཀྱང་ད་ལྟ་གློ་བུར་གྱི་སྒྲིབ་པ་ཅན་ལ་མི་སྣང་། སྒྲིབ་བྱེད་དེ་དང་བྲལ་ཏེ་སངས་རྒྱས་དུས་གནས་ཚུལ་ཇི་ལྟ་བ་བཞིན་སྣང་བ་ཡིན་ཞེས་བྱ་བར་བཞག་གོ །དེས་ན་ད་ལྟ་ཡིད་དཔྱོད་ཀྱི་རྣམ་པས་གང་ཡང་མེད་པར་འཛིན་པ་དེ་ཉིད་ཆད་པར་ལྟ་བ་ཡིན་པས། ཐར་པར་འདོད་པ་རྣམས་བརྟེན་པར་མི་བྱའོ། །དེའི་ཕྱིར་གཤིས་སྤྲོས་བྲལ་མཉམ་པ་ཉིད་ལ་སྒྲོ་བཏགས་པའི་གྲུབ་མ་གྲུབ་མེད་ཀྱང་། ཐ་དཔྱོད་ངོར་གནས་ཚུལ་མཐར་ཐུག་གཟིགས་པའི་སངས་རྒྱས་ཀྱི་མཁྱེན་པ་བཞིན་རང་བཞིན་རྣམ་དག་ཆེན་པོར་དོན་ལ་གྲུབ་པ་ཉིད་ཡོད་པར་རྒྱུད་སྡེ་ཟབ་མོར་གསུངས་པ་ཡིན་པས། རྟོག་གེའི་རིགས་པ་ངན་སྐྱུགས་དང་འདྲ་བས་ནམ་ཡང་སུན་དབྱུང་བར་མི་བྱའོ། །མདོར་ན་དོན་དམ་པར་འཁོར་འདས་ཐ་དད་ན་སྲིད་ཞི་མཉམ་ཉིད་དང་འབྲས་བུའི་ཐེག་པ་འགྲུབ་ཐབས་མེད། ཐ་སྙད་དུ་འཁོར་འདས་འདྲ་བར་བྱས་ནས་མཉམ་པའི་དོན་གདེང་དུ་མ་གྱུར་ན་རྒྱུ་འབྲས་འཆོལ་བས་གཉིས་ཀ་བཀག་པ་སྟེ་དེས་ན་ཕྱོགས་རེ་བའི་ལམ་ལ་ཞེན་པར་མི་བྱ་ཞིང་། དེ་ལྟར་འཁོར་བ་མ་གྲུབ་ལ་སྣང་བ་འདི་གློ་བུར་རྒྱུ་རྐྱེན་འཁྲུལ་པའི་དབང་གིས་སྣང་བའི་ཕྱིར། ཇི་སྲིད་འཁྲུལ་སྣང་མ་ལོག་གི་རིང་ལ། འཁྲུལ་ངོོར་ཇི་ལྟར་སྣང་བ་བཞིན་བདེ་སྡུག་དང་རྒྱུ་འབྲས་སོགས་བསླུ་མེད་དུ་ཡོད་པས། དེ་ཡི་ཕྱིར་དུ་དགེ་སྡིག་གི་བླང་དོར་ཚུལ་བཞིན་དུ་ཤེས་ཤིང་བརྩོན་པས་ལག་ཏུ་ལོན་པ་གཅེས་སོ། །གསུམ་པ་ཐོབ་བྱ་གཞི་འབྲས་དབྱེར་མེད་ལ། ངོ་བོ་མདོར་བསྟན། རང་བཞིན་རྒྱས་པར་བཤད། དེ་དག་གི་མཇུག་བསྡུ་བ་གསུམ། དང་པོ། དུས་ཀུན་ཏུ་འགྱུར་བ་མེད་ཅིང་འཕགས་པ་རྣམས་ཀྱི་གཟིགས་ངོར་མི་བསླུ་བའི་དོན་དམ་བདེན་པའི་ངོ་བོའམ་རང་བཞིན་དེ་ནི། ཡེ་ནས་སྒྲིབ་པ་མེད་ཅིང་རང་བཞིན་གྱིས་འོད་གསལ་བའི་ཡེ་ཤེས་བདེ་བར་གཤེགས་པའི་སྙིང་པོ་རྒྱུ་རྐྱེན་ལ་མ་ལྟོས་པར་ཡེ་ནས་གནས་པའམ་ལྷུན་གྱིས་གྲུབ་པའི་འདུས་མ་བྱས་ཆེན་པོ་ཉིད་ཡིན་ཏེ། དེ་ནི་ངོ་བོ་སྟོང་ཞིང་རང་བཞིན་གསལ་བ། དེ་ཡང་མི་ཤེས་པ་ལས་ལོག་པའི་རིག་པ་ཡེ་ཤེས་གང་ཞིག་གསལ་སྟོང་དབྱེར་མེད་ཡུལ་ཡུལ་ཅན་དང་བྲལ་བའི་ཚུལ་གྱིས་རང་གསལ་བའི་རང་བཞིན་ཅན་ཏེ་གསལ་སྟོང་རིག་པ་དེ་གསུམ་དབྱེར་མེད་མཉམ་པ་ཆེན་པོའི་ཆོས་ཉིད་དེ། རྒྱུད་བླ་མ་ལས། ཇི་ལྟར་སྔོན་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་གསུངས་པ་བཞིན་ནོ། །གཉིས་པ་ལ། རང་བཞིན་ལྷུན་གྲུབ་ཀྱི་དཀྱིལ་འཁོར་ངོས་བཟུང་བ། དེ་མ་རྟོགས་པའི་ཕྱོགས་གཞན་དགག་པ་གཉིས། དང་པོ་ལ་དངོས་དང་། དེའི་མིང་གི་རྣམ་གྲངས་གཉིས། དང་པོ་ལ། དོན་གྱི་ངོ་བོ་མདོར་བསྟན། དེ་དཔེས་རྒྱས་པར་བཤད། དེ་དག་གི་མཇུག་བསྡུ་བ་གསུམ། དང་པོ། རང་བཞིན་འོད་གསལ་བདེ་གཤེགས་སྙིང་པོ་འདི་ཉིད་ལ མ་རྐྱེན་ལ་མ་ལྟོས་པར་འཁོར་འདས་ཀུན་གྱི་སྤྱི་གཞིར་གནས་པས་འབྲས་བུ་གསང་སྔགས་ཀྱི་སྐབས་སུ་གཞི་རྒྱུད་རང་བཞིན་ལྷུན་གྲུབ་ཀྱི་དཀྱིལ་འཁོར་ཞེས་ཆོས་ཐམས་ཅད་གདོད་ནས་རྣམ་པར་དག་པ་ལས་ཐ་དད་དུ་དབྱེ་བའི་ཀུན་རྫོབ་མི་རྙེད་པའི་རང་བཞིན་གྱི་དབྱིངས་དེ་ལ་རང་བཞིན་རྣམ་དག་ཅེས་བྱ་ཞིང་། དེའི་ངང་དུ་དུས་གསུམ་རྟོག་པས་བཟོ་རྒྱ་དང་བྲལ་ཏེ་རང་བྱུང་ལྷུན་གྲུབ་ཆེན་པོར་སྐུ་དང་ཡེ་ཤེས་ཀྱི་དཀྱིལ་འཁོར་དུ་བབས་ཀྱིས་གནས་པས་དེ་སྐད་ཅེས་བྱ་སྟེ། གསར་དུ་རྒྱུ་རྐྱེན་གྱིས་སྒྲུབ་པ་མིན་པར་ཡེ་ནས་རྒྱལ་བའི་དཀྱིལ་འཁོར་རབ་འབྱམས་དང་སངས་རྒྱས་ཀྱི་ཆོས་ཀུན་ལྷུན་གྱིས་རྗོགས་པས་བྱང་ཆུབ་བླ་ན་མེད་པའི་སྙིང་པོ་ཅན་ཏེ་སྙིང་པོ་ནི་ཡོན་ཏན་གྱི་ཆོས་ཀུན་གྱི་གཞིའམ་རྟེན་ཡིན་པའི་དོན་གྱིས་སོ། །དེ་ལྟ་བུའི་རང་བཞིན་སྒྲིབ་པའི་དྲི་མ་ཀུན་ཡེ་ནས་མི་གནས་པའི་ཚུལ་གྱིས་རྣམ་པར་དག་ཅིང་། དྲི་མ་དེའི་རྒྱུ་རྣམ་པར་རྟོག་པའི་སྤྲོས་པ་མ་ལུས་པ་དང་བྲལ་བས་ན་མཐའ་འམ་ཕྱོགས་སུ་ལྷུང་བ་ཀུན་དང་བྲལ་བ་ནི་སྤངས་པ་ཆེན་པོ་དང་། དབྱིངས་དེ་ཉིད་ཟབ་མོ་སྐུ་དང་རྣམ་རྟོག་ཞི་བའི་ཡེ་ཤེས་དང་གདོད་ནས་འདུ་འབྲལ་མེད་པའི་རྟོགས་པ་ཆེན་པོ་དང་ལྡན་པའི་ཕྱིར་རོ། །སྐུ་ལྔ་དང་འདུ་འབྲལ་མེད་ཀྱང་མེན་ཤེལ་གྱི་རང་མདངས་རྐྱེན་དང་མ་ཕྲད་པ་ལྟར་སོ་སྐྱེའི་ངོར་མི་སྣང་ཞིང་བློས་བརྟག་དཔྱད་ཀྱིས་ཇི་བཞིན་རྟོགས་པར་མི་ནུས་པས་ཟབ་པའོ། །འོད་གསལ་བའི་རང་གདངས་མཁྱེན་ཆ་ཡེ་ཤེས་མ་འགགས་པར་ཡོད་ཀྱང་། མཐའ་བཞིའི་རྣམ་པར་རྟོག་པའི་གཟེབ་ཏུ་མ་ཚུད་པར་སྤྲོས་པ་ཀུན་རྣམ་པར་ཞི་བའི་ངང་ཚུལ་ཅན་དུ་གནས་པས་ན་ཤིན་ཏུ་རྟོགས་པར་དཀའ་བ་སྟེ། དེ་ལྟར་བདེ་གཤེགས་སྙིང་པོའི་ཚུལ་ནི་ས་བཅུའི་སེམས་དཔའ་ཆེན་པོ་རྣམས་ཀྱིས་ཀྱང་མཚན་མོའི་གཟུགས་མཐོང་བ་ལྟར་ཡོད་པར་ཤེས་ཀྱི་ཇི་བཞིན་རྟོགས་མི་ནུས་པར་མདོ་ལས་གསུངས་སོ། །དེ་ལྟ་ནའང་བླ་མའི་མན་ངག་སྙིང་པོར་བྱས་ན་སོ་སྐྱེའི་ས་ནའང་ཡིད་ཆེས་ཤིང་དེ་ལ་རྣལ་འབྱོར་དུ་བྱེད་པ་ཡོད་པ་ནི་སྔགས་ཀྱི་ཁྱད་ཆོས་ཏེ་ཚུལ་དེས་སྔགས་ལམ་ཟབ་ཅིང་མྱུར་བར་གྲུབ་པ་ཡིན་ནོ། །དོན་འདི་ནི་མདོ་སྡེའི་ཡང་བཀའ་ཐ་མ་དོན་དམ་རྣམ་པར་ངེའི་པའི་ཆོས་ཀྱི་རྣམ་གྲངས་སུ་གཙོ་བོར་གསུངས་ལ། རྒྱུད་ཀྱི་དངོས་གཞི་ཡིན་པས། འདིར་དེའི་རང་བཞིན་རྟོགས་པར་བྱ་བ་ནི། རྒྱུད་བླ་མ་དང་། མྱ་ངན་ལས་འདས་པ་དང་། སྒྱུ་འཕྲུལ་ཆེན་པོ་ལ་སོགས་པའི་གནས་ཇི་ལྟ་བ་བཞིན་རྟོགས་པར་བྱ་སྟེ། སྒྱུ་འཕྲུལ་ལས། རང་བྱུང་ཡེ་ཤེས་བྱང་ཆུབ་སེམས། །བྱང་ཆུབ་སྙིང་པོ་འདུས་མ་བྱས། །ཀུན་རྫོགས་ཡོན་ཏན་འབར་བས་བརྒྱན། །ལྷུན་གྲུབ་དཀྱིལ་འཁོར་བླ་མེད་པའོ། །ཞེས་དང་། བརྟག་གཉིས་ལས། ལུས་ལ་ཡེ་ཤེས་ཆེན་པོ་གནས། །རྟོག་པ་ཐམས་ཅད་ཡང་དག་སྤངས། །དངོས་པོ་ཀུན་ལ་ཁྱབ་པ་པོ། །ལུས་གནས་ལུས་ལས་མ་སྐྱེས་པའོ། །ཞེས་དང་། རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་སངས་རྒྱས་སྙིང་པོ་ཅན། །ཞེས་སོ། །གཉིས་པ་དཔེ་ལ་བསྟན་བཤད་བསྡུ་གསུམ་ལས། དང་པོ། གཞི་ལྷུན་གྲུབ་ཀྱི་དཀྱིལ་འཁོར་བདེ་བར་གཤེགས་པའི་སྙིང་པོའི་ཁམས་འདི་ཉིད་འགྲོ་བ་ཀུན་ལ་སེམས་ཀྱི་ཆོས་ཉིད་ཀྱི་ཚུལ་དུ་ཡོད་པའི་དཔེ་ནི། ས་འོག་གི་གཏེར་དང་། བུམ་ནང་གི་མར་མེ་དང་། པད་ནང་གི་སྐུ་དང་འདྲ་བར་ཟབ་མོའི་དོན་ལ་ཕྱིན་ཅི་མ་ལོག་པར་དཔྱོད་ནུས་པའི་མཁས་པས་ཤེས་པར་བྱའོ། །གཉིས་པ་ལ། གཞི་སོ་སྐྱེའི་གནས་སྐབས་ཀྱི་དཔེ། འཕགས་པའི་སའི་གནས་སྐབས་ཀྱི་དཔེ། མཐར་ཐུག་དག་པའི་སྐབས་ན་ཡོད་ཚུལ་གྱི་དཔེ་གསུམ། དང་པོ། ཇི་ལྟར་མི་དབུལ་པོའི་ཁང་པའི་ས་འོག་ན་རིན་ཆེན་ཟད་མི་ཤེས་པའི་གཏེར་ཡོད་པ་དེ་གཞན་དུ་བཙལ་མི་དགོས་པར་རང་ཁྱིམ་ལ་ཡོད་ཀྱང་དེ་ཉིད་མ་ཤེས་པར་དབུལ་ཞིང་ཕོངས་པ་ལྟར། ལྷུན་གྲུབ་གཞིར་གནས་ཀྱི་སངས་རྒྱས་རང་ལ་ཡོད་པར་གྱུར་ཀྱང་། ལུས་དང་ངག་དང་སེམས་ཏེ་ཚོགས་བརྒྱད་ས་ལྟ་བུས་བསྒྲིབས་པས། སྲིད་པའི་ཉེས་ཚོགས་ལས་ཉོན་སྡུག་བསྔལ་གསུམ་གྱི་དབུལ་བས་དུས་རྒྱུན་དུ་ཕོངས་པ་དེ་ལས། དེ་ལྟར་ཡོད་པར་རྟོགས་པའི་ལྷ་ཡི་མིག་དང་ལྡན་པའི་མིས་མཐོང་ནས། གཏེར་དེ་ཉིད་འབྱིན་པའི་ཐབས་བསྟན་པ་བཞིན་དབུལ་པོ་དེས་ཕྱུང་བས། རང་གཞན་གྱི་དབུལ་བ་སེལ་ཞིང་འབྱོར་པ་ཕུན་སུམ་ཚོགས་པ་བྱེད་པ་ལྟར། བླ་མ་དགེ་བའི་བཤེས་གཉེན་སོགས་དམ་པ་རྣམས་ཀྱིས་གདོད་མའི་གཞི་ཡི་གནས་ལུགས་དག་མཉམ་སྤྲོས་བྲལ་བདེ་བ་ཆེན་པོ་དེ་ཉིད་ངོ་སྤྲད་པའམ་བསྟན་པས། དེའི་དོན་ཇི་བཞིན་པར་རྟོགས་པའམ་ལྟ་བས་རྙེད་པ་ལྟར་ལམ་སྒྲུབ་པས་སངས་རྒྱས་རང་ལས་རྙེད་པས། རང་གཞན་གྱི་དོན་གཉིས་ཕུན་སུམ་ཚོགས་པ་ཆོས་ཀྱི་རྒྱལ་པོ་ཡིད་བཞིན་གྱི་ནོར་བུ་ལྟ་བུའི་གྱུར་པ་ཡིན་ཏེ། རྒྱུད་བླ་མ་ལས། ཇི་ལྟར་མི་དབུལ་ཁྱིམ་ནང་ས་འོག་ན། །མི་ཟད་པ་ཡི་གཏེར་ནི་ཡོད་གྱུར་ལ། །མི་དེས་ས་དེ་མ་ཤེས་གཏེར་དེས་ཀྱང་། །དེ་ལ་ང་འདིར་ཡོད་ཅེས་མི་སྨྲ་ལྟར། །དེ་བཞིན་ཡིད་ཀྱི་ནང་ཆུད་རིན་ཆེན་གཏེར། །དྲི་མེད་བསལ་དང་བཞག་མེད་ཆོས་ཉིད་ཀྱང་། །མ་རྟོགས་པས་ན་དབུལ་བའི་སྡུག་བསྔལ་ནི། །རྣམ་མང་རྒྱུན་དུ་སྐྱེ་དགུ་འདིས་མྱོང་ངོ་། །ཞེས་སོ། །གཉིས་པ། དཔེ་ཇི་ལྟར་ན་བུམ་པའི་ནང་གི་སྒྲོན་མེ་རྟག་ཏུ་འོད་གསལ་ཡང་། བུམ་པས་བསྒྲིབས་ཏེ་ཕྱི་རོལ་དུ་འོད་ཀྱི་སྣང་བ་མི་མངོན་པ་ལྟར། སྙིང་པོའི་ཆོས་སྐུ་རང་བཞིན་གྱིས་འོད་གསལ་བའི་མར་མེ་རང་ལ་གནས་ན་ཡང་། གློ་བུར་ཉོན་ཤེས་ཀྱི་སྒྲིབ་པའི་བུམ་པས་བསྒྲིབས་པའི་ཕྱིར་ཡོན་ཏན་གྱི་ཚོགས་ཡོངས་སུ་མི་སྣང་ངོ་། །དེ་ལས་བུམ་པ་བཅག་ན་བུམ་ནང་གི་སྒྲོན་མེའི་འོད་སྣང་བ་ལྟར། ས་རྣམས་ཀྱི་རང་རང་གི་ངོ་སྐལ་གྱི་སྒྲིབ་པ་གང་ཡིན་པ་རིམ་པས་བྲལ་བའམ་མཐར་ཐུག་རྡོ་རྗེ་ལྟ་བུའི་ཡེ་ཤེས་ཀྱིས་བཅོམ་པ་ན། འཇིག་རྟེན་གྱི་མུན་པ་སེལ་བའི་སྒྲོན་མེ་ཆེན་པོ་སངས་རྒྱས་ཉིད་འཇིག་རྟེན་ཁམས་ཀུན་ཏུ་སྣང་བར་བྱེད་པ་ཡིན་ཏེ། དཔལ་མགོན་ཀླུ་སྒྲུབ་ཀྱིས། ཆོས་ཀྱི་དབྱིངས་སུ་བསྟོད་པ་ལས། ཇི་ལྟར་བུམ་ནང་མར་མེ་ནི། །ཕྱི་རོལ་ཀུན་ཏུ་མི་སྣང་ལྟར། །དེ་བཞིན་ཆོས་ཀྱི་དབྱིངས་འདི་ཡང་། །འཁོར་བར་འོད་ནི་གསལ་མ་ཡིན། །བུམ་པ་དེ་ཉིད་བཅག་གྱུར་ན། །ཐམས་ཅད་ཀུན་ཏུ་སྣང་བ་ལྟར། །གང་ཚེ་ཏིང་འཛིན་རྡོ་རྗེ་ཡིས། །སྒྲིབ་པ་ཀུན་ཏུ་བཅོམ་གྱུར་པ། །དེ་ཚེ་ནམ་མཁའི་མཐར་ཐུག་གསལ། །ཞེས་སོ། །གསུམ་པ། ཇི་ལྟར་པདྨའི་ནང་དུ་བདེ་གཤེགས་ཀྱི་སྐུ་མཚན་དཔེ་ལྡན་པ་ཡོད་ཀྱང་། པདྨས་གཏུམས་པའི་ཕྱིར་སྐུ་དེ་ཕྱི་རོལ་དུ་སྣང་བ་མེད་པ་དེ་བཞིན་དུ་གཟུང་འཛིན་འཁྲུལ་པའི་བག་ཆགས་འདབ་སྟོང་གིས་བསྒྲིབས་པས་རང་བཞིན་གྱིས་འོད་གསལ་བའི་རྒྱལ་བའི་དབང་པོ་མཐོང་བར་མི་ནུས་སོ། །ནམ་ཞིག་ན་པདྨའི་འདབ་མ་ཁ་ཕྱེ་བ་ན་སྐུ་དེ་གསལ་བར་སྣང་བ་ལྟར། གཟུང་འཛིན་འཁྲུལ་སྣང་གི་འདབ་མ་ལས་གྲོལ་བའི་ཚེ། སྤངས་རྟོགས་མཐར་ཕྱིན་པའི་བྱང་ཆུབ་སྐུ་གསུམ་པོ་རང་ལ་སྣང་བར་འགྱུར་ཏེ། རྒྱུད་བླ་མ་ལས། ཇི་ལྟར་མདོག་ངན་པདྨའི་སྦུབས་གནས་པ། །མཚན་སྟོང་གིས་འབར་དེ་བཞིན་གཤེགས་པ་ཉིད། །དྲི་མེད་ལྷ་ཡི་མིག་ལྡན་མིས་མཐོང་ནས། །ཆུ་སྐྱེས་འདབ་མའི་སྦུབས་ནས་འབྱིན་བྱེད་པ། །དེ་བཞིན་བདེ་གཤེགས་མནར་མེད་གནས་རྣམས་ལའང་། །སངས་རྒྱས་སྤྱན་གྱིས་རང་ཆོས་ཉིད་གཟིགས་ཏེ། །སྒྲིབ་མེད་ཕྱི་མཐའི་མུར་གནས་ཐུགས་རྗེ་ཡི། །བདག་རྐྱེན་སྒྲིབ་པ་ལས་ནི་གྲོལ་བར་མཛད། །ཅེས་སོ། །གསུམ་པ། རྒྱུ་མཚན་དེའི་ཕྱིར་ཆོས་ཀྱི་དབྱིངས་དོན་དམ་པ་རང་བཞིན་གྱིས་འོད་གསལ་བ་སྙིང་པོའི་དཀྱིལ་འཁོར་ནི། །གསར་དུ་རྒྱུས་སྒྲུབ་པ་མིན་པར་རང་ལ་གཞི་དུས་ན་ཡོད་པའི་གནས་ལུགས་སུ་ཤེས་པའམ་མཁྱེན་པར་མཛོད་ཅིག སེམས་ཅན་དང་སངས་རྒྱས་ཀུན་ལ་ཁྱད་མེད་པར་སངས་རྒྱས་ཀྱི་སྙིང་པོས་དབྲི་བསྣན་མེད་པར་ཁྱབ་པས་གྲོལ་གཞི་ལྷུན་གྱིས་གྲུབ་པའི་ཆོས་ཉིད་འདི་ཡོད་པར་ཤེས་པར་བྱའོ། །འདི་ལྟ་བུའི་དགོངས་པ་དྲང་དོན་དུ་བྱེད་པས་སྟོང་པ་སྤྲོས་བྲལ་དོན་དམ་དུ་འདོད་པ་དག་ཆད་པའི་མཐར་ལྷུང་ངོ་། །བྲལ་བའི་གཞི་མེད་ན་གང་གི་སྟེང་དུ་སངས་པ་དང་རྒྱས་པ་དང་། གྲོལ་བ་དང་འདས་པའི་ཐ་སྙད་གདགས། གཞི་མེད་ནི་གང་གིའང་གཞིར་མི་རུང་བས་སྤྲོས་པ་དང་བྲལ་བའི་དོན་དམ་གྱི་ཆ་འབྲལ་གཞིར་མེད་དོ། །དེས་ན་དོན་འདི་ནི་ངེས་པའི་སྙིང་པོ་ཡིན་པས། ཐར་པ་འདོད་པ་དག་གིས་རྟོགས་བྱའི་གཞི་དང་། ལྟ་བ་རྣམས་ཀྱི་རྩེ་མོར་ཟུངས་ཤིག ཅེས་གསུངས་ཏེ། འདིའི་དོན་བྲལ་གཞི་ཡེ་ནས་གནས་པའི་ཆོས་ཉིད་ཟུང་འཇུག་སྤྲོས་བྲལ་ཆེན་པོ་ཀུན་མ་ཤེས་པར། སྤྲོས་པའི་རྒྱུན་ཆད་པའི་མཐར་དབྱིངས་སྒྲིབ་བྲལ་འབའ་ཞིག་དོན་དམ་དུ་འདོད་པ་ན། སྔ་རབས་པ་འགའ་ཞིག་གི་ལུགས་ཐེག་དམན་མྱང་འདས་དང་འདྲ་ཞིང་མར་མེ་འགགས་པ་ལྟར་མེད་པ་ཙམ་གྱིས་རབ་ཏུ་ཕྱེ་བ་ཡིན་པས་དངོས་པོའི་གནས་ཚུལ་མ་ཡིན་པས་རིགས་པའི་ལམ་གྱིས་ཤིན་ཏུ་ཡང་དགག་བྱར་གྱུར་པའོ། །བྲལ་གཞི་ཆོས་ཀུན་གྱི་གནས་ལུགས་ཟུང་འཇུག་འོད་གསལ་ཆེན་པོ་གློ་བུར་གྱི་དྲི་མ་མཐའ་དག་དང་བྲལ་བ་ན། བྲལ་འབྲས་རང་བྱུང་ཡེ་ཤེས་ཀྱི་སྐུ་ཞེས་བྱ་ལ། ངོ་བོའི་ཆ་ནས་གཞི་འབྲས་དབྱེར་མེད་དུ་བཞུགས་པའི་གནད་འདི་ངེས་དོན་གྱི་མདོ་སྡེ་རྣམས་དང་། ཟབ་མོའི་སྔགས་རྒྱུད་རྣམས་ཀྱི་བསྟན་བྱའི་སྙིང་པོ་དྲི་མ་མེད་པ་ཡིན་པས་དེའི་ཚུལ་ཇི་ལྟ་བ་བཞིན་དུ་གཏན་ལ་དབབ་པར་བྱའོ། །དེས་ན་རིགས་གཉིས་ཀྱང་དབྱིངས་སྣང་སྟོང་གི་ཆར་འཇོག་པ་དང་། མཐར་ཐུག་འཆར་གཞི་དོན་དམ་དབྱིངས་ཀྱི་སྐུ་གསུམ་པོ་བྲལ་འབྲས་དང་། དེ་ལས་ཤར་བའི་གདུལ་བྱ་གཞན་སྣང་ཀུན་རྫོབ་ཀྱི་སྐུ་གཉིས་སྨིན་འབྲས་སུ་འཇོག་པའི་གནད་ཀྱང་འདི་ལ་ཐུག་པ་ཡིན་ཏེ་ཇི་བཞིན་ཤེས་པ་དེང་སང་དཀོན་ནོ། །གཉིས་པ་ཐ་སྙད་ལ་རྨོངས་པ་བཟློག་པའི་ཕྱིར་མིང་གི་དབྱེ་བ་བསྟན་པ་ནི། དབྱིངས་ལྷུན་གྱིས་གྲུབ་པའི་རང་རིག་པ་རང་བྱུང་གི་ཡེ་ཤེས་འདི་ལ་མིང་གི་རྣམ་གྲངས་མང་དུ་ཡོད་དེ། གང་ཞེ་ན། མ་རྟོགས་ན་འཁོར་བ་དང་རྟོགས་ན་མྱང་འདས་འབྱུང་བའི་ཆ་ནས་དབྱིངས་ཞེས་རབ་ཏུ་བརྗོད་ཅིང་། སེམས་ཀྱི་དམ་པ་ཞེས་བྱ་སྟེ། དོ་ཧ་ལས། སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལ་སྲིད་དང་མྱ་ངན་འདས་འཕྲོ་བ། །འདོད་པའི་འབྲས་བུ་སྟེར་བར་བྱེད་པ་ཡི། །ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ། །ཞེས་སོ། །ཡེ་ནས་རང་བཞིན་འདུས་མ་བྱས་རང་ལ་རང་ཆས་སུ་ཡོད་པས་རང་བཞིན་ལྷུན་གྲུབ་ཀྱི་དཀྱིལ་འཁོར་རམ་སངས་རྒྱས་ཅེས་ཀྱང་བྱ། ཡོན་ཏན་རྫོགས་ཀྱང་དྲི་མས་བསྒྲིབས་པ་ལྟར་སྣང་བའི་ཕྱིར་སངས་རྒྱས་ཀྱི་སྙིང་པོའི་ཁམས་དང་ནི། ཆོས་ཀུན་གྱི་རང་བཞིན་ནམ་གནས་ལུགས་ཡིན་པའི་ཕྱིར་དོན་དམ་བདེན་པ་དང་། གདོད་ནས་སྒྲིབ་གཉིས་གྱི་དྲི་མ་དག་པའི་ཕྱིར་འོད་གསལ་དྲི་མེད་ཀྱི་ཡེ་ཤེས་ཉིད་དང་། ཡོད་མེད་དམ་སྒྲོ་སྐུར་གྱི་མཐའ་གཉིས་ཀྱི་གནས་བསལ་བའམ་སྤངས་པས་དབུ་མའི་རང་བཞིན་དང་། མཐའ་བཞིའི་སྤྲོས་པ་ཀུན་ལས་འདས་ཕྱིར་ཤེས་རབ་ཀྱི་ཕ་རོལ་དུ་ཕྱིན་པ་དང་། སྟོང་གསལ་གཉིས་སུ་མེད་པ་རང་བཞིན་རྣམ་དག་ཆེན་པོ་ཡིན་པའི་ཕྱིར་བདེན་པ་དབྱེར་མེད་དང་། རྒྱུན་དང་སྐད་ཅིག་མའི་ཆོས་ལས་འདས་པའི་ཕྱིར་འཕོ་འགྱུར་མེད་པས་ན་ཆོས་ཉིད་དེ་བཞིན་ཉིད་དང་། འདི་ལ་སྐྱོན་རྣམས་སྦྱང་དུ་ཡོད་ལ་བྲལ་ཤེས་པས་སྟོང་ལ། ཡོན་ཏན་དབྱེར་མེད་པས་མི་སྟོང་སྟེ། རྒྱུད་བླ་མ་ལས། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གིས། །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱིས་སྟོང་མ་ཡིན། །ཞེས་སོ། །གཞན་ཡང་ལྷག་པའི་བདེན་གཉིས་དབྱེར་མེད། དང་པོའི་སངས་རྒྱས། གཉུག་མའི་སེམས་ཀུན་ཏུ་བཟང་པོ་ལ་སོགས་པར་བློ་གྲོས་ཀྱི་མིག་མདོ་རྒྱུད་སྙིང་པོའི་དོན་ལ་རྒྱས་པའམ་ལྡན་པའི་མཁས་པ་རྣམས་བཞེད་དོ། །གཉིས་པ། ཚུལ་དེ་མི་ཤེས་པའི་ཕྱོགས་བཀག་པ། ཟུང་འཇུག་གི་རང་བཞིན་གཞིའི་གནས་ཚུལ་འདི་ལྟ་བུའི་མི་ཤེས་པར་སྟོང་པ་ཕྱང་ཆད་པ་སྟེ། སྣང་བ་འགོག་པའི་སྟོང་རྐྱང་ཙམ་ལ་ཚིག་ཏུ་ཡོད་མེད་མཐའ་བྲལ་ཞེས་སྨྲ་ཡང་དོན་དུ་མེད་པ་ལས་མ་འདས་པས། བྲལ་རྒྱུའི་དྲི་མ་ཉོན་མོངས་གང་གི་སྟེང་དུ་བྲལ་བའི་གཞི་ཟུང་འཇུག་གི་ཡེ་ཤེས་དགོས་པ་ལ་དེ་མི་ཤེས་པར་གཉིས་ཀ་མེད་པར་འཛིན་པ་ཕལ་ཆེར་ལེགས་ནའང་སྲིད་རྩེའི་ལྟ་བ་ཅན་ཏེ་འཁོར་བའི་ས་བོན་འདེབས་ཤིང་། ཕལ་ཆེར་ངན་སོང་དུ་བགྲོད་པའི་ཕྱིར། དེ་དག་ཤཱཀྱའི་བསྟན་པ་འདི་ལས་ཕྱི་རོལ་དུ་གྱུར་པའི་ཕྱིར། ཅི་ཡང་མེད་པ་ཕྱང་ཆད་ནམ་མཁའ་ལྟ་བུའི་ཡིད་ཅན། ལོག་པར་ལྟ་བ་འཛིན་པ་ཕུར་བུ་པའི་ཁོངས་སུ་གཏོགས་པ་ལ་ཆ་ལུགས་འཛོལ་བ་ཙམ་དུ་ཟད་དེ། དེ་ནི་གོས་ངུར་སྨྲིག་སྤངས་ནས་ཐལ་བའི་སྐྱོ་མས་བྱུགས་པར་བྱས་ན་རུང་སྟེ་ཐམས་ཅད་མཚུངས་པས་རྒྱང་འཕེན་པར་ཕྱོགས་ཀུན་མཚུངས་པར་རུང་བ་ཡིན་ནོ། །གསུམ་པ་མཇུག་བསྡུ་བ། གང་འདིར་ལྷ་མིའི་སྟོན་པ་རྫོགས་པའི་སངས་རྒྱས་ཀྱིས་བཀའ་འཁོར་ལོ་ཐ་མར་བདེ་གཤེགས་སྙིང་པོའི་མིང་ཙམ་དང་སྔགས་སུ་དེའི་དོན་གསལ་རྒྱས་སུ་བསྟན་པའི་ཕྱིར་ངེས་དོན་མདོ་རྒྱུད་ཀྱི་ཆོས་ཀྱི་མཛོད་ཇི་སྙེད་ཅིག་གསུངས་པ་ཀུན་གྱི་སྙིང་པོ་མཐར་ཐུག་པ་ནི་འོད་གསལ་རྡོ་རྗེ་རྩེ་མོའི་ལམ་གྱི་ཉམས་ལེན་ལྷུན་གྲུབ་གཞི་ཡི་གནས་ལུགས་འདི་ཡིན་ནོ་ཞེས་ཤེས་པར་བྱའོ། །གསུམ་པ་དེ་ལྟར་རྟོགས་པའི་ཕན་ཡོན་ནི། ཟབ་པ་ལས་ཀྱང་ཆེས་ཟབ་པས་ཡང་ཟབ་ལྟ་བའི་མཐར་ཐུག་དེ་ལས་གོང་ན་མེད་པ་འདི་ཤེས་པས། ཉན་རང་དང་སྲིད་རྩེའི་ཏིང་འཛིན་དུ་མི་གོལ་བ་དང་སྒྲིབ་གཉིས་ལས་གྲོལ་ནུས་པ་དང་རྟག་ཆད་སོགས་ཀྱི་མཐའ་ཀུན་དང་བྲལ་ཞིང་ལམ་འདིས་སངས་རྒྱས་བསྒྲུབ་པ་དོན་ཡོད་པའམ་ལམ་བླ་ན་མེད་པ་ཡིན་པས་མྱུར་དུ་འཚང་རྒྱ་ཞིང་ངེས་དོན་གྱི་མདོ་རྒྱུད་ཀུན་གྱི་སྙིང་པོ་རྟོགས་པས་དེ་ཀུན་ལ་ལྟ་བའི་བློ་གྲོས་ཀྱི་མིག་དང་ལྡན་པ་ཡིན་པས། དེའི་ཕྱིར་གནས་ལུགས་གཞི་ཡི་འོད་གསལ་མཁྱེན་པར་མཛོད་ཅིག འདིར་ཁ་ཅིག་གིས་གསང་སྔགས་འདི་སེམས་ཙམ་པ་དང་ལྟ་བ་གཅིག་སྟེ། རྩེ་མོ་དབུ་མའོ་ཞེས་ཟེར་བའང་ཕྱོགས་མ་གོ་བར་སྣང་སྟེ། སེམས་ཙམ་པས་འགྱུར་མེད་རྟག་པ། རིག་ཙམ་རང་གསལ་དུ་འདོད་ལ། འདིར་ལྷུན་གྲུབ་འདུས་མ་བྱས་རྟག་ཆད་ལས་འདས་པ། ཡོན་ཏན་ལྷུན་གྱིས་གྲུབ་པའི་ཁམས་འདོད་པས་མི་མཚུངས་ལ། སེམས་ཙམ་པས་ཀུན་གཞི་ཚོགས་བརྒྱད་དེ་ཉིད་གནས་འགྱུར་བས་ཡེ་ཤེས་སུ་འདོད་ལ། འདིར་དེ་དག་བསལ་བས། རང་བྱུང་གི་ཡེ་ཤེས་མངོན་དུ་གྱུར་པ་ཙམ་ལ་གནས་གྱུར་ཏུ་བཏགས་པ་གཉིས་ཁྱད་པར་ཤིན་ཏུ་ཆེའོ་གསུངས། ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། གནས་ལུགས་གཏན་ལ་དབབ་པའི་ལེའུ་སྟེ་བཅོ་བརྒྱད་པའི་འགྲེལ་པའོ།། །། ༈ གཉིས་པ་སྒོམ་པས་ཉམས་སུ་ལེན་པ་ལ། སྔོན་འགྲོ། དངོས་གཞི་རྗེས་གསུམ། དང་པོ་ལ་མདོར་བསྟན། རྒྱས་བཤད་གཉིས། དང་པོ། སྨོས་མ་ཐག་པ་དེ་ལྟར་ལྷུན་གྲུབ་གཞི་ཡི་གནས་ལུགས་ཟབ་མོ་ཤེས་ནས་ཐེག་ཆེན་གསང་སྔགས་ཀྱི་རྣལ་འབྱོར་པས། བསྐྱེད་རྫོགས་ཟུང་འབྲེལ་དུ་ཉམས་སུ་ལེན་པའམ་བསྒོམ་པར་བྱ་སྟེ། དེ་ལ་ཐོག་མར་སྔོན་དུ་འགྲོ་བ་ནི། སྐྱབས་སུ་འགྲོ་ཞིང་བྱང་ཆུབ་མཆོག་ཏུ་སེམས་བསྐྱེད་ནས། གསང་སྔགས་ཕྱི་ནང་རྒྱུད་སྡེ་གང་མོས་ཀྱི་བསྐྱེད་པའི་རིམ་པ་རྒྱས་བསྡུས་གང་རུང་ཞིག་བསྒོམ་པ་སྔོན་དུ་འགྲོ་བར་བྱའོ། །གཉིས་པ་ལ། ལམ་གྱི་གཞི་སྐྱབས་འགྲོ། ལམ་གྱི་རྩ་བ་སེམས་བསྐྱེད། ལམ་གྱི་རྟེན་བསྐྱེད་རིམ་བསྒོམ་པ་གསུམ། དང་པོ་ལ། སྐྱབས་སུ་འགྲོ་བའི་ཡུལ། སྐྱབས་སུ་འགྲོ་བའི་ཚུལ། སྐྱབས་སུ་སོང་བའི་ཕན་ཡོན་གསུམ། དང་པོ་ལ། བསྟན་བཤད་གཉིས། དང་པོ། སྐྱབས་སུ་འགྲོ་བའི་ཡུལ་ནི་སངས་རྒྱས་ཆོས་དང་དགེ་འདུན་ཏེ་དཀོན་མཆོག་རིན་པོ་ཆེ་རྣམ་པ་གསུམ་ཉིད་དེ། དེ་ཡང་སྤྱིར་རྒྱུ་ཡི་ཡུལ་ནི་གཞན་རྒྱུད་ཀྱིས་བསྡུས་པའི་དཀོན་མཆོག་གསུམ་ཡིན་ལ། སྐྱབས་འགྲོ་ནི་འབྲས་བུ་གྲུབ་པར་བྱ་བའི་དོན་དུ། སྟོན་པ་ལམ་གྲོགས་ཀྱི་ཚུལ་གྱིས་སྐྱབས་སུ་འགྲོའོ། །འབྲས་བུའི་ཡུལ་ནི་མ་འོངས་པ་ན་རང་རྒྱུད་ལ་འཁྲུངས་པའི་དཀོན་མཆོག་གསུམ་ཡིན་ལ། སྐྱབས་འགྲོ་ནི་དེ་འགྲུབ་པར་བྱ་བའི་སྨོན་པས་དགེ་བ་བྱེད་ཅིང་རྒྱུ་ལ་འཇུག་པའོ། །སྐབས་འདིར་བསྐྱེད་རྫོགས་ལྷ་ཡི་དཀྱིལ་འཁོར་དུ་སྒྲུབ་པ་ནི་འབྲས་བུའི་དོན་ལ། བསོད་ནམས་ཀྱི་ཞིང་ལ་ཚོགས་གསོག་པ་ནི་རྒྱུའི་དོན་ནོ། །དེ་ལྟར་ན་སྐྱབས་སུ་འགྲོ་བར་ཆོས་ཉམས་སུ་ལེན་པ་ཀུན་འདུས་སོ། །གཉིས་པ་ལ། རྒྱུའི་སྐྱབས་འགྲོ་དང་། འབྲས་བུའི་སྐྱབས་སུ་འགྲོ་བ་གཉིས། དང་པོ་ལ། གནས་སྐབས་སྐྱབས་གསུམ་གྱི་རྣམ་པར་བཞག་པ་དང་། མཐར་ཐུག་སྐྱབས་གཅིག་ཏུ་སྒྲུབ་པ་གཉིས། །དང་པོ། རྒྱུ་ཡི་སྐྱབས་འགྲོའི་ཡུལ་དུ་གྱུར་པ་ནི་གཞན་རྒྱུད་ཀྱིས་བསྡུས་པ་བྱོན་ཟིན་པའི་སངས་རྒྱས་ནི་སྐུ་གསུམ་གྱི་བདག་ཉིད་སྤང་བྱ་ཀུན་སྤངས་ཤིང་རྟོགས་བྱ་ཀུན་རྟོགས་པས་གཞན་དོན་གྱི་ཕྲིན་ལས་རྒྱུན་ཆད་པ་མེད་པ་དང་ལྡན་པ་དང་། ཆོས་ནི་འགོག་པ་དང་ལམ་གྱིས་བསྡུས་པའི་བདེན་པ་རྣམ་པ་གཉིས་སོ། །དགེ་འདུན་ནི་ཐེག་པ་ཆེན་པོའི་སར་བཞུགས་པའི་རྒྱལ་སྲས་འཕགས་པ་རྣམས་ཏེ། གནས་སྐབས་དེ་གསུམ་སྟོན་པ་ལམ་གྲོགས་ཀྱི་ཚུལ་དུ་མཚུངས་པར་སྐྱབས་སུ་འགྲོ་བ་ཡིན་ནོ། །གཉིས་པ། མཐར་ཐུག་གི་སྐྱབས་ནི་སངས་རྒྱས་ཆོས་ཀྱི་སྐུ་ཉག་གཅིག་སྟེ། དེ་ནི་དཀོན་མཆོག་མཐར་ཐུག་ཡིན་པ་དང་སྐྱབས་ཀྱི་དམ་པ་གཏན་དུ་བ་ཉིད་ཡིན་པའི་ཕྱིར་རོ། །དེ་ལས་གཞན་གཏན་སྐྱབས་མིན་པ་ཅིས་ན། ལམ་བདེན་ཀུན་རྫོབ་ཡིན་པ་དང་། རྒྱལ་སྲས་རྣམས་སྒྲིབ་པ་དང་བཅས་པའི་ཕྱིར། འགོག་པ་མཐར་ཐུག་པའི་སངས་རྒྱས་ཉིད་ལས་མ ཐར་ཐུག་གི་སྐྱབས་གང་ཞིག་ཡོད་དེ་མེད་དོ། །གཉིས་པ་འབྲས་སྐྱབས་ལ། དངོས་དང་། རྒྱུ་འབྲས་ཀྱི་འབྲེལ་བ་བསྟན་པ་གཉིས། དང་པོ། འབྲས་བུའི་སྐྱབས་འགྲོ་དཀོན་མཆོག་རྣམ་པ་གསུམ་པོ་དེ་མ་འོངས་པ་ན་རང་རྒྱུད་ལ་གྲུབ་པར་འདོད་པའི་སླད་དུ་སྨོན་པ་ཡིན། དེའང་སྨོན་པ་སེམས་བསྐྱེད་དང་མི་འདྲ་སྟེ། སེམས་བསྐྱེད་གཞན་དོན་དང་། འདིར་རང་དོན་ལ་དམིགས་པ་སོགས་ཀྱི་ཁྱད་པར་ཡོད་དོ། །གཉིས་པ། དེ་ཡང་ཐུན་མོང་བ་རྒྱུ་ཡི་སྐྱབས་འགྲོས་རྒྱུ་བྱས་ཏེ་ལམ་སློབ་མཐར། ཐུན་མིན་མཐར་ཐུག་རང་རྒྱུད་ལ་འོད་གསལ་ལྷུན་གྲུབ་ཀྱི་སངས་རྒྱས་སམ་དཀོན་མཆོག་འབྲས་བུའི་སྐྱབས་འགྲོ་ཉིད་མངོན་སུམ་དུ་གྲུབ་པར་འདོད་པ་ཡིན་ནོ། །གཉིས་པ་ཇི་ལྟར་སྐྱབས་སུ་འགྲོ་བའི་ཚུལ་ལ། འདུན་པ་དང་། ཆོ་གའི་ཚུལ་གཉིས། དང་པོ། སངས་རྒྱས་ལ་ལམ་སྟོན་པ་པོ་དང་། ཆོས་ལ་ལམ་དངོས་དང་ནི། དགེ་འདུན་ལ་ལམ་སྒྲུབ་པའི་གྲོགས་ཀྱི་ཚུལ་དུ་ཤེས་པས་སྐྱབས་སུ་འགྲོ་བ་སྟེ་མགོན་སྐྱབས་སུ་ཁས་ལེན་པ་ཡིན་ནོ། །གཉིས་པ། དེ་ལྟར་སྐྱབས་ཡུལ་རྣམས་ཤེས་ནས་སྐྱབས་སུ་འགྲོ་བ་དངོས་ལ། མདུན་གྱི་ནམ་མཁར་སེང་ཁྲི་པད་ཉི་ཟླ་བའི་གདན་སྟེང་རྩ་བའི་བླ་མ་རྡོ་རྗེ་འཆང་ལ་དཀོན་མཆོག་གསུམ་པོ་དེས་བསྐོར་བར་རབ་ཏུ་བསམས་ལ། དངོས་བཤམས་དང་ཡིད་སྤྲུལ་གྱི་མཆོད་སྤྲིན་རྒྱ་མཚོས་མཆོད་ཅིང་། ཕྱག་འཚལ་བ་དང་། སྡིག་པ་བཤགས་པ་དང་། གསོལ་བ་གདབ་པ་སོགས་བྱས་ནས། བདག་དང་སེམས་ཅན་ཐམས་ཅད་ཀྱིས་ཐལ་མོ་སྦྱར་ཏེ། དཀོན་མཆོག་གསུམ་ལ་གདོང་ཕྱོགས་པས་བྱང་ཆུབ་བར་དུ་ཁྱོད་ཁོ་ན་བརྟེན་ནོ་སྙམ་པས་སྐྱབས་སུ་འགྲོ་བར་བསམ་ལ། བླ་མ་དང་སངས་རྒྱས་དང་ཆོས་དང་ཚོགས་མཆོག་དགེ་འདུན་རྣམས་ལ། ལན་གསུམ་གྱི་བར་དུ་སྐྱབས་སུ་འགྲོ་བར་བསམ་ཞིང་བརྗོད་པར་བྱའོ། །གསུམ་པ། དེ་ཡི་ཕན་ཡོན་གནས་སྐབས་སུ་བསམ་པ་འགྲུབ་པ་དང་། ནང་པ་སངས་རྒྱས་པར་ཚུད་པ་དང་། ཡོན་ཏན་གྱི་ཆོས་ཀུན་གྱི་རྟེན་དུ་འགྱུར་པ་དང་། མི་དང་མི་མིན་སོགས་ཀྱིས་གནོད་པས་མི་བརྫི་བ་དང་སངས་རྒྱས་ཀྱི་ཞབས་དྲུང་དུ་སྐྱེ་བ་དང་། མཐར་ཐུག་དོན་དམ་གྱི་དཀོན་མཆོག་གསུམ་པོ་འགྲུབ་པར་འགྱུར་བ་སོགས་ཕན་ཡོན་ཚད་མེད་པས། དེའི་ཕྱིར་ཐོག་མར་སྐྱབས་སུ་འགྲོ་བར་བྱའོ། །བསླབ་བྱ་དུས་རྒྱུན་དུ་སྐྱབས་འགྲོ་བྱ་བ་དང་། བླ་མར་སྐྱབས་སུ་སོང་བས་དགེ་བའི་བཤེས་གཉེན་ལ་གུས་ཤིང་སྡིག་གྲོགས་མི་བསྟེན། །སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་ལ་ཕྱག་མི་འཚལ། ཆོས་ལ་སོང་བས་སེམས་ཅན་ལ་འཚེ་བ་སྤང་། དགེ་འདུན་ལ་སོང་བས་མུ་སྟེགས་བྱེད་དམ་རྒྱུ་འབྲས་ལ་སྐུར་པ་འདེབས་པའི་མི་དང་མི་འགྲོགས་པ་དང་། སྐུ་གཟུགས་སོགས་མཐོང་ནའང་དད་པས་ཕྱག་མཆོད་བྱ་ཞིང་མ་གུས་པ་མི་བྱའོ། །གཉིས་པ་སེམས་བསྐྱེད་ལ། ངོ་བོ། དབྱེ་བ། བསྐྱེད་ཚུལ། ཕན་ཡོན་བཞི། དང་པོ་ལ། མཚན་ཉིད། རང་བཞིན། གང་ལྟར་བསྐྱེད་པའི་ཁྱད་པར་དཔྱད་པ་གསུམ། དང་པོ། དེ་ནས་ཐེག་པ་ཆེན་པོའི་བྱང་ཆུབ་སེམས་མཆོག་བསྐྱེད་པ་ལ། མཚན་ཉིད་ནི་སེམས་ཅན་གཞན་གྱི་དོན་ཕྱིར་བདག་ཉིད་སངས་རྒྱས་ཐོབ་པར་འདོད་པ་སྟེ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་སངས་རྒྱས་འདོད། །ཅེས་སོ། །གཉིས་པ་ནི། གཞན་གྱི་དོན་ཕྱིར་སངས་རྒྱས་ཐོབ་པར་འདོད་པ་སྟེ་སྨོན་པ་དང་། དེ་ཐོབ་པའི་བྱ་བ་ལ་འཇུག་པ་འཇུག་པ་སེམས་བསྐྱེད་དེ་སྦྱོར་བ་ལག་ལེན་གྱིས་དངོས་སུ་མ་ཟིན་པ་དང་ཟིན་པའི་ཁྱད་པར་རམ་རང་བཞིན་གྱིས་དབྱེ་བ་རྣམ་པ་གཉིས་ཡིན་ནོ། །གསུམ་པ་ལ། སེམས་སེམས་བྱུང་གང་ལྟར་བསྐྱེད། རྣམ་ཤེས་ཡེ་ཤེས་གང་ལྟར་བསྐྱེད་པའི་ཁྱད་པར་གཉིས། དང་པོ། ཉི་མ་དང་ཟེར་བཞིན་དུ་སེམས་དང་སེམས་བྱུང་མཚུངས་པར་འཇུག་པས་ན་གཙོ་སེམས་བསྐྱེད་པས་ནི་དེའི་འཁོར་དུ་གྱུར་པའི་སེམས་བྱུང་རྣམས་ཀྱང་ཞར་ལ་བསྐྱེད་པར་འགྱུར་ཏེ། དེ་ཡང་སེམས་ནི་དོན་གྱི་ངོ་བོ་ཀ་བ་ལྟ་བུ་རང་སྟོབས་ཀྱིས་རིག་ལ། སེམས་བྱུང་གིས་དོན་གྱི་ཁྱད་པར་སྦོམ་ཕྲ་སོགས་རང་སྟོབས་ཀྱིས་རིག་པར་བྱེད་པ་བཞིན་ནོ། །གཉིས་པ། དང་པོ་ནས་རྣམ་པར་མི་རྟོག་པའི་ཡེ་ཤེས་བསྐྱེད་པས་ཆོག་མོད། ཉེས་པའི་ཆ་ཅན་སེམས་ཅིའི་ཕྱིར་བསྐྱེད་ཅེ་ན། བདེན་མོད་འཁོར་བའི་དུས་འདི་ན་སེམས་དང་སེམས་བྱུང་གིས་བྱ་བ་བྱེད་པ་ཁོ་ན་རྣམ་པར་གཡོ་བས་ན། ཡེ་ཤེས་དེ་དངོས་སུ་མི་སྣང་བའི་ཕྱིར་ན་ཡེ་ཤེས་ལ་ནུས་པ་འཇོག་ཕྱིར་སེམས་བསྐྱེད་དེ་དགོས་པར་བྱུང་སྟེ། དེ་བསྐྱེད་པས་ཡེ་ཤེས་རབ་ཏུ་གསལ་བའི་དོན་ལ་ནུས་པ་འཇོག་པ་ཡིན་ནོ། །གཅིག་ཏུ་ན་སྨོན་པ་རྗེས་སྦྱོར་གྱི་ཡུལ་ཅན་ནི་སེམས་བསྐྱེད་པ་ཡིན་ལ། འཇུག་པ་མཉམ་བཞག་གི་དུས་ན་སེམས་ཡེ་ཤེས་སུ་བསྐྱེད་པ་ཡིན་ཏེ། སྒྱུ་འཕྲུལ་ལས། སེམས་ཡེ་ཤེས་སུ་བསྐྱེད་པ་འདི་གསུངས་སོ། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་པ་ཉིད་ན་སྐྱེ་བ་མེད། །ཅེས་སོ། །ས་བཅུའི་རྒྱུན་མཐར་སངས་རྒྱས་ཀྱི་ཡེ་ཤེས་སྐད་ཅིག་དང་པོའི་ཚེ་སེམས་སེམས་བྱུང་གཉིས་ཆར་འགག་པས། དེས་བསྐྱེད་པའི་སེམས་བསྐྱེད་པ་ཆོ་ག་ལས་ཉེ་བར་ཐོབ་པའི་སེམས་བསྐྱེད་རྒྱུན་ཆད་པའམ་ལྡོག་ན་ཡང་དེས་སེམས་བསྐྱེད་རྒྱུན་ཆད་པའི་སྐྱོན་དུ་མི་འགྱུར་ཏེ། སྔར་དོན་དམ་པའི་ཡེ་ཤེས་སུ་བསྐྱེད་པ་དང་། སེམས་བསྐྱེད་དེ་ཡི་ནུས་ལྡན་ཏེ་ནུས་པ་ཡེ་ཤེས་ལ་བགོས་པའམ་བཞག་པ་ཡིན་ལ། ཡེ་ཤེས་ནི་མ་འགགས་པས་སངས་རྒྱས་ཀྱི་སར་ཡང་ཁམས་དེའི་སྒྲིབ་པ་བྲལ་སྟོབས་ཀྱིས་གསལ་དུ་སོང་ནས་སངས་རྒྱས་ཀྱི་ཐུགས་རྗེས་སེམས་ཅན་གྱི་དོན་མཛད་པ་དེ་ལ་སྒྲིབ་པ་སྤངས་པའི་སེམས་བསྐྱེད་ཅེས་བྱར་བརྗོད་དེ། དེ་ཡང་སྔར་སེམས་བསྐྱེད་པ་ནི། སེམས་ཅན་གྱི་དོན་བྱ་བར་དམ་བཅས་པ་མི་གཏོང་བ་ཙམ་ཡིན་ལ། ད་འབྲས་བུ་དམ་བཅས་པ་དེ་མངོན་དུ་གྱུར་པ་ན། ཡེ་ཤེས་ཟད་པ་མེད་པས་སེམས་ཅན་གྱི་དོན་རྟག་ཏུ་མཛད་པ་ཡིན་པས། སེམས་བསྐྱེད་ནས་ད་དུང་དོན་མཛད་དོ་སྙམ་པ་མེད་ཀྱང་སེམས་ཅན་གྱི་དོན་ལ་བསྙེལ་བ་མེད་པས། རྒྱུའི་ནུས་པ་ནམ་ཡང་མི་ཆད་པ་ཡིན་པས་ཡེ་ཤེས་ལ་བགོས་པ་ཞེས་བྱ་ཡི། རང་མཚན་པར་མི་བཟུང་ངོ་། །དེས་ན་སེམས་བསྐྱེད་པ་སོགས་ནི། ཁམས་ཀྱི་དྲི་མ་བྲལ་བར་བྱེད་པ་ཙམ་དུ་ཟད་ཀྱི། དྲི་མ་བྲལ་བའི་སངས་རྒྱས་ཀྱི་ས་ན་སེམས་ཀྱིས་བསྡུས་པའི་ལམ་ཀུན་འགགས་ཀྱང་། དེ་དག་གི་འབྲས་བུ་ཡེ་ཤེས་ལ་ཆད་པ་མེད་པར་ཤེས་པར་བྱའོ། །སངས་རྒྱས་ཀྱི་ས་ན་དོར་བ་མེད་པའི་སྟོང་པ་ཉིད་ཡོད་པའི་ཕྱིར་དང་། དོན་དམ་སེམས་བསྐྱེད་ཐོབ་ལ་ཉམས་པ་མེད་པའི་ཕྱིར་དོན་དམ་སེམས་བསྐྱེད་ཡོད་ལ། ཀུན་རྫོབ་སེམས་བསྐྱེད་ཀྱང་། ཆོ་གས་ཐོབ་པ་དང་། ད་གཟོད་ཐོབ་བྱའི་སེམས་བསྐྱེད་དུ་མེད་ཀྱང་། ཐུགས་རྗེ་ཆེན་པོས་དོན་མཛད་པ་དུས་ལས་མི་ཡོལ་བའི་སེམས་བསྐྱེད་ཡོད་པར་གསུངས་སོ། །གཉིས་པ་དབྱེ་བ། ཐེག་ཆེན་ཚོགས་ལམ་དང་སྦྱོར་བར་ཏེ་སྦྱོར་ལམ་དེ་གཉིས་སུ་སྙིང་པོ་ཡེ་ཤེས་ཀྱི་ཁམས་དེའི་རང་བཞིན་ཉིད་ལུང་ལ་བ རྟེན་ནས་མོས་པས་དོན་སྤྱིའི་ཚུལ་དུ་མཇལ་བས་ན། སྨོན་འཇུག་གི་སེམས་བསྐྱེད་དེ་ཡང་མོས་པ་ལས་བྱུང་བའི་སེམས་བསྐྱེད་ཞེས་བརྗོད་དོ། །དེ་བཞིན་དུ་དང་པོའི་ས་ནས་བདུན་པའི་བར་ཉིད་དུ་ཉོན་མོངས་པ་ཅན་གྱི་ཡིད་ཀྱི་ལོག་པས། ཞིང་དང་ཡོན་ཏན་བརྒྱ་ཕྲག་བཅུ་གཉིས་ལ་སོགས་པ་གཟིགས་པས་ཁམས་ཀྱི་སྒྲིབ་པ་ཕྱོགས་རེ་རྣམ་པར་དག་པས་ཡེ་ཤེས་རྒྱ་ཆེ་སྤྲིན་བར་གྱི་ཉི་ཟེར་གྱི་སྣང་བ་ལྟར་ལྷག་བསམ་དག་པས་ལྷག་བསམ་དག་པའི་སེམས་བསྐྱེད་ཅེས་བརྗོད་དོ། །དག་པའི་སར་ནི་སྟེ་དག་ས་གསུམ་གྱིས་བརྒྱད་པར་ཡིད་ཤེས་ལོག་པས་རྣམ་པར་མི་རྟོག་པའི་ཡེ་ཤེས་དང་། དགུ་པར་སྒོ་ལྔ་ཡི་རྣམ་ཤེས་ལོག་པའི་ཞིང་དག་པ་དང་། བཅུ་པར་ཀུན་གཞིའི་རྣམ་ཤེས་རྣམ་པར་དག་པས་ཡེ་ཤེས་ཕུན་སུམ་ཚོགས་པ་ལ་དབང་ཐོབ་པའི་ཕྱིར་སྨོན་ལམ་དང་ཡོན་ཏན་རྒྱ་ཆེ་བས་རྣམ་པར་སྨིན་པའི་སེམས་བསྐྱེད་ཅེས་སུ་བརྗོད་དོ། །རྒྱུན་མཐར་སེམས་སེམས་བྱུང་གི་བག་ཆགས་ཀུན་གཞི་དང་བཅས་པ་གཏན་ནས་ཟད་པས་ཁམས་ལ་སྒྲིབ་བྱེད་མཐའ་དག་དང་བྲལ་བ་སངས་རྒྱས་ཀྱི་ས་སྟེ། དེ་ནི་ཉི་མ་སྤྲིན་བྲལ་བཞིན་དུ་ཁམས་དེའི་ཡོན་ཏན་ཅི་ཡོད་པ་ཐམས་ཅད་མངོན་དུ་གྱུར་པས་སྒྲིབ་པ་སྤངས་པའི་སེམས་བསྐྱེད་ཅེས་བྱ་བར་བརྗོད་དེ་དག་པའི་སེམས་དཔའ་རྣམས་ཀྱིའང་སྤྱོད་ཡུལ་ལས་འདས་པ་ཡིན་ནོ། །གསུམ་པ། ཇི་ལྟར་སེམས་བསྐྱེད་པའི་ཚུལ་ཡང་རྣམ་པ་གཉིས་ཡིན་ཏེ་བླ་མ་མཆོག་དང་དཀོན་མཆོག་གི་རྟེན་གྱི་དྲུང་དུ་ལེན་པ་གཉིས་སོ། །དང་པོ་ལྟར་བླ་མར་ལེན་པའི་ཚེ་བླ་མ་དེ་ཡིས་འཁོར་བའི་ཉེས་དམིགས་ཐར་པའི་ཕན་ཡོན་སེམས་བསྐྱེད་ཀྱི་རང་བཞིན་སོགས་ཀྱི་ཆོས་བཤད་དེ་བློ་བཅོས་ནས། སྔོན་འགྲོ་ཡན་ལག་བདུན་པ་དང་རྟེན་སྐྱབས་འགྲོར་བཅས་པ་སོང་ནས། དངོས་གཞི་རྒྱལ་བ་སངས་རྒྱས་དང་དེ་སྲས་བྱང་སེམས་རྣམས་དང་བླ་མ་རྡོ་རྗེ་འཛིན་པ་མཆོག་རྣམས་དགོངས་སུ་གསོལ། ཞེས་དགོངས་གསོལ་ལེགས་པར་བརྗོད་པའི་རྗེས་སུ། ཇི་ལྟར་སྔོན་གྱི་རྒྱལ་བ་སྲས་དང་བཅས་པ་རྣམས་ཀྱིས་བྱང་ཆུབ་མཆོག་ཏུ་ཐུགས་བསྐྱེད་པ་དང་བསླབ་པ་ལ་གནས་པ་ལྟར། དེ་བཞིན་དུ་བདག་གིས་ཀྱང་འགྲོ་བ་ཀུན་ལ་ཕན་པའི་དོན་དུ། བྱང་ཆུབ་མཆོག་ཏུ་སེམས་བསྐྱེད་ཅིང་བྱང་ཆུབ་སེམས་དཔའི་བསླབ་པ་ལ་རིམ་པ་བཞིན་དུ་སློབ་ཅིང་གནས་པར་བགྱིའོ། །དེ་སྐད་ཅེས་ནི་ལན་གསུམ་བརྗོད་པར་བྱ་ཞིང་། རྗེས་རང་གཞན་དགའ་བ་བསྒོམ་པ་སོགས་བྱའོ། །གཉིས་པ་གང་ཟག་དམ་པ་ཁ་ཅིག་གིས་ཐོག་མ་ནས་སམ། ཕལ་གྱིས་ཕྱིས་གསོ་དུས་སམ་ཡང་ནས་ཡང་དུ་བསྐྱེད་དུས་བླ་མ་ལས་གཞན་དཀོན་མཆོག་གི་རྟེན་གྱི་དྲུང་སོགས་སུ་ལེན་པ་སྟེ། ལེན་ཚུལ་སྔར་དང་འདྲའོ། །བཞི་པ། སེམས་བསྐྱེད་དེ་ཡི་ཕན་ཡོན་དམ་པ་ཚད་མེད་དེ། སེམས་བསྐྱེད་ཐོབ་མ་ཐག་ནས་མ་ཉམས་པར་ཡོད་རིང་ཐམས་ཅད་དུ་མིང་དོན་གནས་གྱུར་ཏེ་རྒྱལ་སྲས་བྱང་ཆུབ་སེམས་དཔའི་མིང་ཐོབ་ཅིང་ལྷ་དང་བཅས་པའི་འཇིག་རྟེན་ཀུན་གྱི་མཆོད་སྡོང་སྟེ་མཆོད་གནས་སུ་འགྱུར་བ་དང་། དགེ་བ་ཐམས་ཅད་ཐར་པའི་མཆོག་མི་གནས་པའི་མྱང་འདས་ཀྱི་ལམ་དུ་འགྱུར་ཞིང་ལུང་མ་བསྟན་ཆད་ནས་རྟག་ཏུ་བསོད་ནམས་རྒྱ་ཆེན་ཐོབ་པ་དང་། སྡིག་པ་མཐའ་ཡས་པའི་ཉེས་པ་ཟད་པ་དང་། བསོད་ནམས་དཔག་ཏུ་མེད་པ་ངང་གིས་འཕེལ་བ་དང་། ཐར་ལམ་མ་ནོར་བར་རྙེད་ཅིང་། གནས་སྐབས་མངོན་མཐོ་དང་། མཐར་ཐུག་ངེས་ལེགས་རྣམ་མཁྱེན་སངས་རྒྱས་ཀྱི་གོ་འཕང་མཆོག་འགྲུབ་པ་ཡིན་ནོ། །གསུམ་པ་བསྐྱེད་རིམ་ལ། བསྟན་བཤད་གཉིས། དང་པོ། དེ་ལྟར་སྐྱབས་སུ་འགྲོ་བ་དང་སེམས་མཆོག་བསྐྱེད་པར་གྱུར་མ་ཐག་ཐེག་ཆེན་གྱི་ལམ་དུ་ཚུད་པས། འབྲས་བུ་གསང་སྔགས་རྡོ་རྗེ་ཐེག་པའི་རྗེས་སུ་ཞུགས་པར་འདོད་པའི་སྐལ་བ་བཟང་པོ་དང་ལྡན་པའི་འགྲོ་བ་མཆོག་གིས། ཐོག་མར་རང་རང་གང་ལ་མོས་པའི་ཡི་དམ་གྱི་ལྷར་བསྐྱེད་པའི་རིམ་པ་བསྒོམ་མོ། །གཉིས་པ་ལ། སྔོན་དུ་འགྲོ་བའི་ཆོས་དང་། དངོས་གཞི་གཉིས། དང་པོ། བསྐྱེད་རིམ་དེའི་སྔོན་དུ་བདེ་བར་གཤེགས་པའི་ཐུགས་རིག་སྔགས་ཀྱི་ངོ་བོར་ཤར་བའི་ལྷའི་རིག་གཏད་དང་། ལྷ་བསྒོམ་པ་སོགས་ཀྱི་རྗེས་སུ་གནང་བ་དང་། སྔགས་བླ་མེད་ཀྱི་དབང་བཞི་ལ་སོགས་པ་བརྒྱུད་སྡེ་མཆོག་ལས་གསུངས་པ་བཞིན་ནུས་རུང་གིས་འབྲས་བུ་སྨིན་ངེས་སུ་སྨིན་པར་བྱས་ལ་དེ་རྗེས་ལམ་བསྒོམ་པར་བྱའོ། །གཉིས་པ་ལ་བསྟན་བཤད་གཉིས། དང་པོ། དེ་ལྟར་སྨིན་པ་དེ་ཉིད་གྲོལ་བར་བྱེད་པ་ཐབས་བསྐྱེད་པ་དང་ཤེས་རབ་རྫོགས་པའི་རིམ་པའི་དོན་ལ་བསྒོམ་པར་བྱའོ། །གཉིས་པ་ལ། དངོས་གཞི་བསྐྱེད་རིམ་དང་། ཞར་བྱུང་རྫོགས་པའི་རིམ་པ་བསྟན་པ་གཉིས། དང་པོ་ལ་དངོས་དང་། དེའི་ཕན་ཡོན་གཉིས། དང་པོ། རྣལ་འབྱོར་ཆེན་པོའི་དབང་དུ་བྱས་ཏེ་འདི་ལྟར་ཕྱི་སྣོད་དུ་སྣང་བ་འོག་མིན་གྱི་ཞིང་ཁམས་དང་། ནང་བཅུད་ཀྱི་སེམས་ཅན་ལྷ་དང་ལྷ་མོ། རང་ལུས་འོད་གསལ་གྱི་དཀྱིལ་འཁོར་ཏེ་གཞལ་ཡས་ཁང་མཛེས་མཚན་ཉིད་ཚང་བ། ངག་གསང་སྔགས་ཀྱི་རང་བཞིན་ཏེ་སེམས་ནི་རིགས་ལྔ་ཡེ་ཤེས་ཀྱི་ལྷར་གསལ་བའོ། །གཉིས་པ། དེས་མ་དག་ཐ་མལ་གྱི་ཞེན་པ་འགོག་ཅིང་། དབྱིངས་ཀྱི་རྗེས་འགྲོ་སྟེ་དབྱིངས་རང་བཞིན་གྱིས་འོད་གསལ་བའི་སྣང་ཆ་སྐུ་དང་ཡེ་ཤེས་ལམ་དུ་བྱེད་པས་འབྲས་བུ་དེའི་རྗེས་སུ་འགྲོ་སྟེ་དེ་འདྲ་འགྲུབ་པ་ལ་མི་བསླུ་ཞིང་གཟུགས་སྐུ་ལ་སྒྲིབ་པའི་དྲི་མ་སེལ་བའི་དགོས་པ་ཡོད་དོ། །གཉིས་པ། རྫོགས་རིམ་ནི་བསྐྱེད་རིམ་གྱི་ངང་དེ་ཉིད་དམ། ལས་དང་པོ་པས་བསྐྱེད་རིམ་བསྒོམ་པ་དེའི་རྗེས་སུ་བསྐྱེད་རིམ་བསྡུས་ནས་སེམས་ཉིད་མི་དམིགས་པ་ཆོས་ཉིད་སྟོང་པ་ཉིད་དང་སེམས་ཉིད་རང་བཞིན་གྱིས་འོད་གསལ་བ་ཟུང་དུ་འཇུག་པ་རྫོགས་པའི་རིམ་པ་བསྒོམ་པར་བྱ་སྟེ། དེ་ཡང་བསྐྱེད་རིམ་བསྡུས་ནས་སྟོང་པར་བསྒོམས་པས་བསྐྱེད་རིམ་སྒྱུ་མར་ཞེན་པ་འགོག བསྐྱེད་རིམ་ཉིད་ཀྱི་ངང་དུ་རྫོགས་རིམ་བསྒོམས་པས་སྟོང་པར་ཞེན་པ་འགོག སྔར་སེམས་ལྷར་གསལ་ནས་འདིར་སེམས་ཉིད་རྫོགས་རིམ་དུ་བསྒོམ་པ་ནི་གཟུགས་སྐུ་དང་ཆོས་སྐུ་སྣང་བ་དང་སྟོང་པ་ལམ་དུ་བྱེད་པ་ཡིན་ནོ། །མི་ཤེས་པ་དག་སེམས་ཀྱི་འཕྲོ་འདུ་དང་། རྣམ་པ་ལ་རྫོགས་རིམ་དུ་འདོད་པ་འཁྲུལ་ཏེ། སྣང་བ་དང་རྣམ་པ་ཆོས་ཅན་ཡུལ་དུ་བྱེད་པའི་ཕྱིར་རོ། །རྫོགས་པ་ནི་སྟོང་པ་དང་རྣམ་མེད་ཆོས་ཉིད་ཡུལ་དུ་བྱེད་པ་ཡིན་ནོ། །བརྟན་པ་ཐོབ་ནས་དབྱེར་མེད་ཟུང་དུ་འཇུག་དུས་ཀྱང་སྣང་སྟོང་ངམ་བསྐྱེད་རྫོགས་ལྡོག་པ་དེ་བཞིན་དུ་གནས་སོ། །འདི་ནི་ངེས་དོན་གྱི་རྒྱུད་སྡེའི་དགོངས་པ་ཡིན་པས་སྐལ་བཟང་རྣམས་ཀྱིས་དང་དུ་ལེན་པར་རིགས་སོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། བསམ་གཏན་གྱི་སྔོན་དུ་འགྲོ་བའི་ལེའུ་སྟེ་བཅུ་དགུ་པའི་འགྲེལ་པའོ།། །། ༈ གཉིས་པ་དངོས་གཞི་ལ། བསྟན་བཤད་གཉིས། དང་པོ། དེ་ལྟར་སྔོན་འགྲོ་རྫོགས་པའི་རྗེས་དེ་ནས་དངོས་གཞི་ཇི་ལྟར་བསྒོམ་པ་ནི། དང་པོར་དབེན་ཞིང་ཡིད་དུ་འོང་བའི་གནས་དག་ཏུ་སྟན་བདེ་བར་འདུག་ནས། སྔོན་དུ་འགྲོ་བའི་ཆོས་སྐྱབས་སེམས་བསྐྱེད་རིམ་རྒྱས་བསྡུས་རྣམས་རིམ་པར་རྫོགས་མ་ཐག་པར། དངོས་གཞི་རྫོགས་རིམ་འོད་གསལ་ཡེ་ཤེས་ཀྱི་དོན་ལ་མཉམ་པར་བཞག་པའམ་བསྒོམ་པར་བྱའོ། །གཉིས་པ་ལ། ཐབས་ཞི་གནས་སྒྲུབ་པ་དང་། ཐབས་བྱུང་ལྷག་མཐོང་བསྒོམ་པ་གཉིས། དང་པོ་ལ། སྤྱི་དང་ཁྱད་པར་གཉིས། དང་པོ། འོད་གསལ་དེ་ཡང་ཐབས་མེད་པར་ཤེས་རབ་ཀྱི་ཕར་ཕྱིན་མི་སྐྱེ་བས། ཐོག་མར་སྣ་ཚོགས་པའི་ཐབས་ཀྱིས་བསམ་གཏན་ནམ་ཞི་གནས་བཙལ་བར་བྱ་སྟེ། དང་པོར་དམིགས་པའི་རྟེན་ལ་བརྟེན་ནས་མི་དམིགས་པ་སྐྱེ་བ་སྟེ། མི་དམིགས་པ་དེ་ལས་ཆོས་ཉིད་ཡེ་ཤེས་མཐའ་དང་བྲལ་བ་འཆར་བས་ན། དང་པོ་ཞི་གནས་བསྐྱེད་པའི་རིམ་པ་དེ་ཡང་རང་རང་གི་རྒྱུད་ལས་མི་འདྲ་བའི་སྒོ་དུ་མ་ཇི་སྐད་གསུངས་པ་བཞིན་དུ་བསྒོམ་པར་བྱའོ། །གཉིས་པ་ལ། མདོར་བསྟན། རྒྱས་བཤད། དེ་ཐབས་ཡིན་ཚུལ་གསུམ། དང་པོ། བླ་མེད་ཕ་མ་གཉིས་སུ་མེད་པ་གསུམ་ཆར་དྲིལ་ནས་ཉམས་སུ་ལེན་པའི་སྐབས་འདིར་ནི་མདོར་བསྡུས་ཏེ་ཅུང་ཟད་བསྟན་པ་ནི། རྡོ་རྗེའི་ལུས་ལ་རྩ་གནས་དེ་ལ་རླུང་དང་ཁམས་རང་བཞིན་གྱིས་བརྟེན་པའི་ཕྱིར་དེ་དག་ལ་གནད་དུ་བསྣུན་པ་གཅེས་ཏེ། དེ་ཡང་རྩ་རླུང་ཁམས་ཀྱི་འདུ་འཕྲོ་ལ་བརྟེན་ནས་སྣང་བ་སྣ་ཚོགས་འཆར་ཞིང་། དེ་དག་ལ་གནད་དུ་བསྣུན་པས་རང་བྱུང་ཡེ་ཤེས་ཀྱི་ཐིག་ལེ་རང་གནས་ལམ་དུ་བྱེད་ནུས་པས་རྩ་གནད་དུ་འགྲོ་བ་ལུས་གནད། རླུང་གནད་དུ་འགྲོ་བ་ལ་སྲོག ཐིག་ལེ་གནད་དུ་འགྲོ་བ་ལ་རྩོལ་བ་གལ་ཆེའོ། །འདིར་ཕ་རྒྱུད་པ་ཁ་ཅིག་རླུང་ཁོ་ནའི་ཐབས་ལས་སྐྱེས་པའི་ཤེས་པ་གསལ་བ་དེ་ཙམ་དོན་དམ་དུ་འདོད་པ་དང་། མ་རྒྱུད་ཁ་ཅིག་ཐིག་ལེ་ལས་སྐྱེས་པའི་བདེ་གསལ་རྟོག་མེད་ཙམ་དོན་དུ་འདོད་ཅིང་། དེ་དག་གི་ཐབས་ཁོ་ན་ལ་ལྟ་བ་མཆོག་ཏུ་འཛིན་པའང་ཐར་པའི་ལམ་མ་ཡིན་ཏེ། ཡེ་ཤེས་གྲུབ་པ་ལས། ལུས་ཀྱི་སྦུད་པ་གང་ཡིན་དང་། །སྦུད་པ་འབུད་པར་བྱེད་པ་དག །དེ་དག་ཁྱད་པར་མ་མཐོང་སྟེ། །དེ་ཉིད་མཐོང་བའི་རྣལ་འབྱོར་པས། །སྦུད་པ་ཡིན་ནི་བྱ་བ་ནོན། །ཞེས་དང་། དབང་པོ་གཉིས་བྱུང་བདེ་བ་ནི། །དེ་ཉིད་ཡེ་ཤེས་སྐྱེད་ན་སྨྲ། །དེ་ནི་བདེ་བ་ཆེ་ཡིན་ཞེས། །རྒྱལ་བ་མཆོག་གིས་མ་གསུངས་སོ། །བདེ་ཆེན་མི་རྟག་མ་ཡིན་ཏེ། །བདེ་བ་ཆེན་པོ་རྟག་ཏུ་རྟག །མཆན་ཁུང་གཡའ་འཕྲུགས་ལས་བྱུང་བ། །ཅི་ཡི་ཕྱིར་ན་བདེ་ཆེན་མིན། །ཞེས་སོ། །དེས་ན་ལམ་དངོས་མ་ཡིན་པས་ཞེན་པར་མི་བྱ་ལ། ལམ་གྱི་ཆ་རྐྱེན་ཡིན་པས་མ་རྫོགས་རིང་ལ་དོར་བ་ཡང་མི་བྱ་བར་འབད་པར་བྱའོ། །གཉིས་པ་ལ། རྟེན་རྩ་ལུང་གི་རྣལ་འབྱོར་དང་། བརྟེན་པ་ཁམས་ལ་བསླབ་པའི་རྣལ་འབྱོར་གཉིས་གཉིས། དང་པོ། སྲོག་གི་སྦྱོར་བས་རླུང་ལ་མ་བསླབས་ན་ཁམས་ལས་སུ་མི་རུང་བའི་ཕྱིར་རླུང་བསྒོམ་པ་ནི། རྩ་གནད་དུ་འགྲོ་ཕྱིར་ལུས་ཀྱི་ཆ་བསྲངས་ཏེ་རྡོ་རྗེ་སྐྱིལ་ཀྲུང་བཅས་ལ། ལག་པ་པུས་མོ་ལ་བཀབ། མཇིང་པ་ཅུང་ཟད་དགྱེ། དབུགས་ནི་ཐད་སོར་དར་ཅིག་བཞག མིག་ནི་འགུལ་བར་མི་བྱ་བར་ཧ་རེ་བལྟ། རླུང་རོ་གསུམ་མམ་དྲུག་ཕྱིར་སངས་ཀྱིས་གདོན། དེ་ནས་འཇམ་རླུང་དལ་བུས་ནང་དུ་བཟུང་སྟེ་སྟེང་འོག་གི་རླུང་གཉིས་ནི་ཁ་སྦྱར་དུ་འཆིང་། དམིགས་པ་ལུས་དབུས་སུ་རྩ་གསུམ་ཀ་བ་ལྟར་ཡོད་པའི་སྤྱི་མགྲིན་སྙིང་ལྟེ་བ ཞིར་འཁོར་ལོ་བཞི་གདུགས་ལྟར་གསལ། རོ་རྐྱང་གཉིས་ཀྱི་མར་སྣ་སྤུ་ནག་གུ་ལ་ཐུག་པ་དབུ་མར་འདུད་ནས་ཡོད་པ། ཡར་སྣ་སྣ་བུག་གཉིས་ན་ཡོད་པ་ནས་རླུང་ཞུགས་ནས་དབུ་མར་སོང་བས་གསལ་བདེ་མི་རྟོག་པའི་ཡེ་ཤེས་སྐྱེ་བར་བསྒོམ། དེ་ཡང་དབྱར་མེ། སྟོན་རླུང་། དགུན་ཆུ། དཔྱིད་སའི་རླུང་རྒྱུ་བས་དེའི་གཉེན་པོར་གོ་བཟློག་པའམ། ནམ་མཁའི་རླུང་འབའ་ཞིག་གམ་ནད་ཁམས་དང་བསྟུན་ནས་གང་འཕྲོད་སྒོམ་པའོ། །དེ་ལ་ཁ་དོག་དང་གྲངས་དང་རེག་བྱ་དང་དབྱིབས་བསྒོམ་སྟེ། ཁ་དོག་ནི་ས་རླུང་སེར། ཆུ་དཀར། མེ་དམར། རླུང་ལྗང་། ནམ་མཁའི་རླུང་མཐིང་གའོ། །གྲངས་ནི་ཕྲེང་བ་ལ་བགྲངས་པས་སྔར་ལས་ཉུང་ངུ་འགྲོ་ཞིང་རེག་བྱ་ནི་ལྕི་གཡོ་བསྲེག་སོགས་འབྱུང་བ་སོ་སོའི་མཚན་ཉིད་བཞིན་ལ། དབྱིབས་ཀྱང་རིམ་པ་ལྟར། གྲུ་བཞི་དང་། ཟླ་གམ་དང་། གྲུ་གསུམ་དང་། གཞུ་བདུང་བ་ལྟ་བུ་དང་། ཀུན་ནས་ཟླུམ་པར་བསྒོམ་པ་ཡིན་ནོ། །དེའང་རླུང་ཁ་སྦྱར་ནས་དལ་གྱིས་ཕྱིར་སོང་དུས། ལྷག་མ་ཅུང་ཟད་བཟུང་ལ་སྔ་མ་བཞིན་ཁ་དོག་དང་དབྱིབས་དབུ་མའི་ནང་སྙིང་གི་ཐད་སོར་བསྒོམས་ནས། འཁོར་ལོ་བཞི་ཡི་དབུས་སུ་ཡང་། སྤྱི་བོ་བདེ་ཆེན་གྱི་འཁོར་ལོར་ཆུ་རླུང། མགྲིན་པ་ལོངས་སྤྱོད་དུ་ས་རླུང། སྙིང་ནང་དུ་ནམ་མཁའི་རླུང་། ལྟེ་བར་མེ་རླུང་རྣམས་ཀྱི་ཁ་དོག་དང་དབྱིབས་བསྒོམ་པར་བྱ་སྟེ་དེ་ལྟར་གཅིག་བརྟན་ནས་གཅིག་བསྒོམས་པས་རླུང་ལྔ་ལས་སུ་རུང་བའི་རྟགས་ནང་ཤེས་པ་གསལ་ལ་རྟོག་མེད་དང་། སྣང་བ་སྣ་ཚོགས་ཀྱི་སྟོང་གཟུགས་མཐོང་སྟེ། དེ་ཡང་གཡས་རླུང་དབུ་མར་ཚུད་རྟགས་དུ་བ། གཡོན་རླུང་ཚུད་པས་སྨིག་རྒྱུ་དེ་བཞིན་དུ་གཡོན་མེ་རླུང་ལ་མར་མེ་དང་འོད་འབར། ཆུ་རླུང་ལ་སྤྲིན་དང་མཐོང་ཁུང་གི་ཟླ་ཟེར། ས་རླུང་ལ་གསེར་མདོག་དང་གློག་ལྟ་བུ་དང་། ནམ་མཁའི་རླུང་ལ་དང་པོར་མཐིང་ག་ལས་འོད་ལྔའི་ཐིག་ལེའོ། །ཐམས་ཅད་དབུ་མར་ལས་སུ་རུང་བའི་རྟགས་སུ་འོད་ལྔའི་འཇའ་ཚོན་དང་ཐིག་ལེ་ལྷ་སྐུ་མཆོད་རྟེན་གཞལ་མེད་ཁང་དྲྭ་བ་དྲྭ་ཕྱེད་པདྨ་སོགས་དང་། དེའི་དུས་སུ་འགྲོ་དྲུག་གི་འཁོར་ལོར་རླུང་སེམས་འདུས་རྟགས་རིགས་དྲུག་སོ་སོའི་ཡུལ་སྣང་ཡང་འཆར་བས་གནས་སྦྱོང་གི་གདམས་ངག་གིས་ཐམས་ཅད་འཁྲུལ་པར་ཤེས་ནས་སེམས་ཅན་ལ་སྙིང་རྗེ་བསྐྱེད། རྨི་ལམ་དང་སྒྱུ་མ་ལྟ་བུར་ཐག་བཅད། ལུས་གནད་དང་དམིགས་གནད་བསྒྱུར་ལ་བསྒོམ། དེའི་ཚེ་ཐབས་དེས་རྣམ་རྟོག་རང་འགག་ཤེས་པ་གསལ་དྭངས་ཕྱེད་པར་གནས་པ་འབྱུང་བས་དེ་ཉིད་ངོ་བོ་ཡོད་མེད་སྤྲོས་བྲལ་ནམ་མཁའ་ལྟ་བུ་མི་རྟོག་ཡེ་ཤེས་སུ་ངོ་སྤྲད་ནས། གང་དུ་ཡང་དམིགས་པ་མེད་པར་བསྒོམ་ན་ཆོས་ཉིད་དོན་གྱི་ཡེ་ཤེས་ལྷག་མཐོང་གི་ངོ་བོ་ཤེས་རབ་ཀྱི་ཕ་རོལ་དུ་ཕྱིན་པ་བསྒོམས་པ་ཡིན་ནོ། །དེ་ལྟ་མ་ཡིན་པར་མཐོང་སྣང་ལ་དགག་སྒྲུབ་དང་ཞེན་ན་ཕྱི་རོལ་པའི་ལམ་དང་ཁྱད་མེད་པས་སྣང་བ་འཛིན་མེད་ཀྱི་ཤེས་རབ་དང་མ་བྲལ་བ་གལ་ཆེའོ། །དེ་ལྟར་བསྒོམས་པས་ཇི་ཞིག་ན་ད་ལྟའི་རླུང་ཉིས་བརྒྱ་ལྔ་བཅུ་རྩ་བརྒྱད་ཀྱི་རིང་ལ། དེ་དུས་དབུགས་གཅིག་ལས་མི་རྒྱུ་ཞིང་མཐར་ཉི་ཁྲི་ཆིག་སྟོང་དྲུག་བརྒྱའི་རླུང་དབུགས་གཅིག་གི་རིང་ལ་འགག་སྟེ། རླུང་ལས་སུ་རུང་བའི་ཡོན་ཏན། ལུས་ཡང་བ་དང་། འཇགས་མའི་རྩེ་ལ་སྐྱིལ་ཀྲུང་བཅའ་ནུས་པ་དང་། མངོན་ཤེས་དང་རྫུ་འཕྲུལ་རྐང་མགྱོགས་སོགས་དངོས་གྲུབ་ཕྲན་ཚེགས་འགྲུབ་བོ། །གཉིས་པ། དེ་ནས་རྩོལ་བའི་སྦྱོར་བས་ཁམས་ལ་མ་བསླབས་ན་ཏིང་འཛིན་བསམ་གྱིས་མི་ཁྱབ་པ་མི་འགྲུབ་པས་དེའི་ཚུལ་ལ་བསླབ་པའི་རིམ་པ་ཡང་། སྤྱིར་གཏུམ་མོ་ཡེ་ཤེས་ཀྱི་འཁོར་ལོ། བདེ་བ་ཆོས་ཉིད་ཀྱི་འཁོར་ལོ། རྩལ་སྦྱོང་བོགས་འབྱིན་གྱི་འཁོར་ལོ་དང་གསུམ་ཡོད་ཀྱང་། ཕྱི་མ་གཉིས་དམིགས་རྣམ་མི་འདྲ་བ་ཙམ་སྟེ། འདིར་སྔ་མ་ལྟར་བཤད་ན་ལུས་གནད་དང་རྩ་འཁོར་སྔར་དང་འདྲ་བ་ལས། ལྟེ་བའི་ཐད་དབུ་མའི་ནང་ན་ཨ་ཤད་རེག་བྱ་ཚ་བ་རྟ་རྔ་ཙམ་ལས་འབར་བའི་མེ་ཡིས། སྤྱི་བོའི་ཧམ་ཐུར་བལྟ་རི་བོང་ཅན་ཏེ་ཟླ་བ་ལྟ་བུ་བཞུ་བས་བྱང་སེམས་ཀྱིས་དབུ་མའི་ནང་གང་བས་བདེ་བ་ཆེན་པོ་རྒྱས་པའི་ངང་ལ་བཞག་སྟེ་དར་གཅིག་མི་རྟོག་པར་སྦྱངས་པའི་རྗེས་སུ། འཁོར་ལོ་བཞི་ཡི་དབུས་སུ་རྩ་དབུ་རྐྱང་རོ་གསུམ་གྱི་དབུས་མར་སྟེང་འོག་གི་གནས་ལས་རོ་རྐྱང་གི་དྭངས་མ་ཉི་ཟླའི་འགྲོས་ཅན་ཁམས་དཀར་དམར་ཏེ། རོ་མའ་ིདྭངས་མ་དཀར་པོ་དང་། རྐྱང་མའི་དམར་པོ་གཉིས་དབུ་མར་ཡར་སྣ་དང་མར་སྣ་ནས་མཉམ་དུ་ཞུགས་ཏེ། སྙིང་གི་དབུས་སུ་དེ་གཉིས་རྣམ་པར་འདྲེས་ཏེ་བདེ་སྟོོང་ངམ་ཨེ་ཝཾ་ཟུང་དུ་འཇུག་པ་ནི། ཐིག་ལེ་འོད་ཁ་དོག་ལྔ་ལྡན་དུ་གསལ་བ་ཆེས་ཕྲ་སྟེ་ཇེ་ཕྲར་གྱུར་ནས་མཐར་འོད་གསལ་མི་དམིགས་པའི་ངང་ཉིད་དུ་གཞག་པར་བྱ་སྟེ། བདེ་མཆོག་ལས། རྟག་ཏུ་སྙིང་ལ་གནས་པ་ཡི། །ཐིག་ལེ་གཅིག་ལ་འགྱུར་བ་མེད། །དེ་སྒོམ་བྱེད་པའི་སྐྱེ་བོ་ལ། །ངེས་པར་ཡེ་ཤེས་སྐྱེ་བར་འགྱུར། །ཞེས་སོ། །ཐབས་དེ་ལས། གང་ཟག་མཆོག་རབ་རྣམས་ལ་བདེ་སྟོང་མི་ཤིགས་པའི་ཡེ་ཤེས་རང་ལུས་ཐབས་ལྡན་གྱིས་སེམས་སེམས་བྱུང་འགགས་ནས་ཞི་གནས་ཀྱི་ངང་དུ་རིག་པ་ཡེ་ཤེས་ནམ་མཁའི་གཟུགས་ཅན་ཏེ་རྡོ་རྗེ་ནམ་མཁའི་དཀྱིལ་ལམ་ཉི་མ་སྤྲིན་བྲལ་ལྟ་བུ་འཆར་ཏེ་སྒྲིབ་བྱེད་མེད་པས་སོ། །གཞན་ཕལ་པའང་མི་རྟོག་པའི་ཞི་གནས་འགྲུབ་པ་ཡིན་ནོ། །གསུམ་པ། ཁ་ཅིག་རྩ་རླུང་དེ་འདྲ་ཕྱི་རོལ་པ་ལའང་ཡོད་པས་དམན་སྙམ་ན། རླུང་ནི་སྔགས་ཁོ་ནས་ཀྱང་མིན་ཏེ། ཉི་མའི་སྙིང་པོའི་མདོ་དང་བསྟན་བཅོས་མཛོད་སོགས་ཐེག་པ་ཆེ་ཆུང་དག་ལས་རྣམ་རྟོག་གི་གཉེན་པོར། རླུང་བསྒོམས་པ་དང་ནི། ཕྱི་རོལ་གྱི་དམིགས་པའི་རྟེན་ལ་སེམས་བཟུང་བས་ཞི་གནས་སྒྲུབ་ཚུལ་གསུངས་པ་དང་འདི་ནི་མཚུངས་པར་བསྟན་པ་ཡིན་ཀྱང་དོན་ལ་འདི་ཉིད་ཁྱད་པར་འཕགས་སོ། །གཉིས་པ་ཐབས་བྱུང་ལ། རང་བྱུང་འོད་གསལ་གྱི་ལྷག་མཐོང་ངོས་བཟུང་བ་དང་། ལོག་པར་རྟོག་པ་གཞན་གྱི་ལུགས་དགག་པ་གཉིས། དང་པོ་ལ་ཐོག་མར་ངོ་སྤྲོད་པའི་ཚུལ། བར་དུ་ངང་སྐྱོང་བའི་ཚུལ། མཐར་དེ་ལས་ཡོན་ཏན་འབྱུང་བའི་ཚུལ་གསུམ། དང་པོ། ཐབས་དེས་འགྲུབ་པའི་ལྷག་མཐོང་ངམ་རང་གསལ་ལྷན་ཅིག་སྐྱེས་པའི་ཡེ་ཤེས་རང་ལ་ཡོད་པ་ཉིད་ངོ་སྤྲད་པ་ནི། སྔར་རླུང་དུས་ཀྱི་རིག་པ་གསལ་ལ་རྟོག་མེད་དང་ཐིག་ལེའི་དུས་ན་བདེ་བའི་རིག་པ་གཉིས་པོའ་ིངང་དེར་རིག་ངོ་ལ་ཅེར་གྱིས་བལྟས་པས། བདེ་གསལ་མི་རྟོག་ཙམ་དུའང་གནས་པ་དང་མི་གནས་པ་དང་། ཡོད་པ་དང་མེད་པ་དང་ཡིན་པ་དང་མིན་པ་སོགས་དཔེས་མཚོན་པ་དང་ངག་གིས་བརྗོད་པ་ཀུན་ལས་འདས་པའི་དོན་རང་མདངས་རང་རིག་མཐའ་བཞིའི་སྤྲོས་པ་དང་བྲལ་བ། ཡིད་ཆེས་ངེས་ཤེས་ཀྱི་ངང་ནས་དྭངས་གསལ་ལྷག་གེ་བ། རྒྱ་ཡོངས་སུ་མ་ཆད་ཅིང་ཕྱོགས་རིས་སུ་ཆད་པ་མེད་པ་ནམ་མཁའ་ལྟ་བུ་ལ། དྭངས་གསལ་མི་གཡོ་བ་ཉི་ཟླའི་དཀྱིལ་འཁོར་བཞིན་དང་། ཀུན་རྟོག་གི་རྙོག་མ་དང་བྲལ་བ་རྒྱ་མཚོ་ལྟ་བུ་དེ་ནི། རང་བྱུང་གི་ཡེ་ཤེས་སམ་དབང་བཞི་པའི་ཡེ་ཤེས་སེམས་ཉིད་འོད་གསལ་བའི་ཀྱིལ་འཁོར་དུ་དམ་པ་རྣམས་ཀྱིས་ངོ་སྤྲད་པར་མཛད་དེ། སེམས་སེམས་བྱུང་གི་སྤྲོས་པ་ཞི་བའི་རང་རིག་དེ་ཉིད་ཆོས་ཀྱི་སྐུ་ཕྱག་རྒྱ་ཆེན་པོ་རང་བྱུང་གི་ཡེ་ཤེས་དང་། རྫོགས་པ་ཆེན་པོ་དང་། དབུ་མ་ཆེན་པོ་དང་། སྦྱོར་བ་ཡན་ལག་དྲུག་གི་སྙིང་པོ་དང་། ལམ་འབྲས་བུ་དང་བཅས་པའི་ངོ་བོ་དང་། སྤྲོས་པ་མ་ལུས་པ་ཞི་བའི་ཞི་བྱེད་དང་། གནས་ལུགས་དོན་གྱི་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་དེ་ཡིན་ནོ་ཞེས་བླ་མས་གསུངས་ཤིང་ཁོ་བོས་ཀྱང་ཉམས་སུ་མྱོང་བ་ཅུང་ཟད་སྐྱེས་པའི་དོན། མདོ་རྒྱུད་ན་ལེགས་པར་བཞུགས་པར་མཐོང་སྟེ། གསང་འདུས་ལས། སྒོམ་པ་མེད་པ་སྒོམ་པ་དངོས། །སྒོམ་པ་ཉིད་ནི་སྒོམ་པ་མིན། །དེ་ལྟར་དངོས་པོ་དངོས་མེད་པས། །སྒོམ་པ་དམིགས་སུ་མེད་པའོ། །ཞེས་དང་། གཞན་ཡང་བསམ་གྱིས་མི་ཁྱབ་པའི་རིམ་པ་སོགས་ལས་རྒྱ་ཆེར་གསུངས་ཤིང་། མདོ་ལས་ཀྱང་། ཀུན་ཏུ་རྟོག་པས་མ་བརྟགས་པ། །རབ་ཏུ་མི་གནས་པ་ཡི་ཡིད། །དྲན་པ་མེད་ཅིང་ཡིད་བྱེད་མེད། །དམིགས་པ་མེད་ལ་ཕྱག་འཚལ་འདུད། །ཅེས་སོགས་གསུངས་པའི་བཀའ་ལུང་ལ་ཡིད་ཆེས་པ་ཡིན་པས་རང་བྱུང་ལྷན་ཅིག་སྐྱེས་པའི་ཡེ་ཤེས་དེ་ཐར་པ་འདོད་པའི་མཁས་པ་དག་གིས་རྟག་ཏུ་བསྒོམ་པར་བྱའོ། །ཞེས་གདམས་པར་མཛད་དོ། །གཉིས་པ། དེ་ལྟར་ཟབ་ཞི་སྤྲོ་བསྡུ་མེད་པ་རྒྱ་མཚོ་དང་འདྲ་བའི་ངང་དུ་བསྒོོམ་དུས་ཕྱི་ནང་གི་མཚན་མའི་རྣམ་རྟོག་གང་དང་གང་ཤར་ཡང་དེའི་རྗེས་སུ་མི་འབྲང་ཞིང་མི་དགག་པར་གཞག་པར་བྱ་སྟེ། དེ་ཡང་ཡུལ་ལ་འཕྲོ་བའི་རྟོག་པ་ཤར་ན་ཤར་བ་ངོས་བཟུང་ལ་རྗེས་སུ་མི་འབྲང་། ངོ་བོ་མི་དགག རང་ཞི་ལ་གློད་ནས། བསྒོམ་པ་སྔ་མའི་རང་མདངས་མ་ཤོར་བར་བྱས་པས། གནས་ལུགས་འོད་གསལ་གྱི་ངང་དེར་རྣམ་རྟོག་རྦ་རླབས་དང་འདྲ་བ་ཆུ་ལ་རླབས་བཞིན་རང་ཐིམ་རང་ཞིར་འགྲོ་སྟེ། སེམས་ཉིད་ལས་བྱུང་ཞིང་དེའི་ངང་དུ་གྲོལ་བའི་ཕྱིར་ཐ་དད་མེད་པའོ། །དེས་ན་ངོ་ཤེས་པ་དང་རང་སར་གློད་པས་རྣམ་རྟོག་རང་བཞིན་གྱིས་ཞི་ནས་བསྒོམ་པ་སྔ་མའི་ངང་གི་དྭངས་ཆ་ལྷག་མཐོང་གི་གདངས་དེ་མ་ཤོར་བར་གཅེས་ཏེ། ཀུན་བྱེད་ལས། བསྒོམ་དུ་མེད་པའི་ཆོས་ཉིད་བྱང་ཆུབ་དང་། །མ་ཡེངས་རེ་དོགས་ཆད་ན་སྒོམ་པ་ཡིན། །ཞེས་སོ། །ཇི་ལྟར་བསྒོམས་ཡང་ཤེས་པ་མ་བྱིང་བ་དང་མ་རྨུགས་པ་དང་རྟོག་པ་རྒོད་པར་མ་གྱུར་ཅིང་། སྒོམ་ཉམས་ལ་མ་ཆགས་པ་དང་ངང་ལས་མི་གཡོ་བ། དབུགས་འབྱུང་རྔུབ་ཀྱི་རྒྱུ་བ་ཀུན་དང་བྲལ་ཏེ་མི་ཚོར་བ་ལྟ་བུ་སྟེ། དེ་ལྟར་རྟོག་དཔྱོད་དགའ་བདེ་རླུང་འབྱུང་རྔུབ་སྟེ་སྐྱོན་རྣམས་དང་བྲལ་བའི་བསམ་གཏན་དྭངས་པས་རང་བྱུང་འོད་གསལ་གྱི་ཤེས་རབ་དང་དབྱེར་མེད་པ་རྒྱུན་ཆད་མེད་པའི་རང་བཞིན་ཅན་གྱི་རང་བྱུང་ཡེ་ཤེས་ལྷན་ཅིག་སྐྱེས་པ་བསྒོམ་པར་བྱ་སྟེ། འདི་ནི་ཡང་ཟབ་སྙིང་པོའི་གདམས་པ་ཡིན་ནོ། །གསུམ་པ། དེ་ལྟར་མ་ནོར་བའི་ཏིང་འཛིན་འདི་ཉིད་གོམས་པ་ལས་ཆུ་དྭངས་པར་གཟུགས་བརྙན་སྣང་བ་ལྟར་རིག་པ་དྭངས་པའི་ཆ་ལས་བར་དུ་ཆོད་ཅིང་བསྒྲིབ་པའི་གཟུགས་མཐོང་བ་སོགས་སྤྱན་ལྔ་དང་། མངོན་པར་ཤེས་པ་དྲུག་སོགས་སྐྱེ་བར་འགྱུར་ཞིང་། ཉིན་མཚན་ཁོར་ཡུག་ཏུ་ཏིང་ངེ་འཛིན་གཅིག་གིས་དུས་འདའ་བས་ཁྱད་པར་ཏེ་ཁྱད་མེད་པར་འགྲོ་བ་དང་། མི་བརྗེད་པའི་གཟུངས་ཀྱི་སྤྲིན་དང་། ལྷག་མཐོང་གི་ཡེ་ཤེས་ཀྱི་ཉི་མ་ཁོང་ནས་འཆར་བ་སྟེ་ནང་ནས་རྡོལ་བའི་ཚུལ་གྱིས་སོ། །ཐབས་འདིས་རྩ་རླུང་ལས་སུ་རུང་བས་ལུས་སེམས་ལ་དགའ་བདེ་དང་། ཏིང་ངེ་འཛིན། སྤྲུལ་བསྒྱུར་ལ་སོགས་པའི་ཡོན་ཏན་གྱི་ཚོགས་གོང་དུ་འཕེལ་བས། ས་དང་ལམ་རྣམ་གོང་ནས་གོང་དུ་བགྲོད་ཅིང་ཐུན་མོང་དང་མཆོག་གི་གྲུབ་པ་རྣམ་གཉིས་ཐོབ་པར་འགྱུར་བ་ཡིན་པས། དེའི་ཕྱིར་ན་འདི་འདྲའི་གནད་ལ་གོམས་པར་མཛོད་ཅིག གཉིས་པ་ལོག་རྟོག་དགག་པ་ལ། ཕྱོགས་སྔ་གསུམ་སོ་སོའི་ལུགས་འབྲེལ་མེད་དུ་བསྟན་པ་དང་། དེ་འདྲའི་རིགས་ཅན་གཞན་དང་ཡང་ཐུན་མོང་དུ་དགག་པའི་མཇུག་བསྡུ་བ་གཉིས། དང་པོ། བསམ་གཏན་པ་གང་ལ་འདི་ལྟར་ཟབ་མོའི་གནད་མེད་པར་སྤྲོས་བྲལ་ཚིག་ཙམ་ཏུ་ཤོར་ཏེ་ད་ལྟའི་ཤེས་པ་འོག་འགྱུ་འཕྲེང་གསུམ་འདི་ག་སྤྲོས་བྲལ་ཡིན་པས་གང་ཤར་ཅི་འགྱུས་སེམས་སུ་ངོ་ཤེས་ན་དེས་ཆོག་ཅེས་ཡེ་ཤེས་སྤངས་པའི་ཐ་མལ་གྱི་རྣམ་པར་རྟོག་པའི་བཟོ་རྒྱས་ཏེ་བཟོས་པའི་རྒྱས་མཐའ་བྲལ་ཡིན་པར་གདེང་བཅས་པའམ་གདེང་བསྐྱེད་དེ། རྟོག་བཟོའི་རྒྱ་དེས་རྣམ་རྟོག་ཅི་སྐྱེས་པ་ཐམས་ཅད་སྐྱེ་འགགས་གྲངས་སུ་འདེབས་པར་བྱེད་པ་རྣམས་ཀྱང་། གནས་ལུགས་ཡང་དག་པའི་དོན་དང་རྒྱང་རིང་སྟེ་གནམ་ས་བཞིན་ཡིན་ནོ། །ཡང་ཁ་ཅིག་མདོ་རྒྱུད་ཀྱི་ལུང་མེད་པར་སྙན་རྒྱུད་ཡིན་ཟེར་ད་ལྟའི་ཤེས་པ་ཟང་ཐལ་ཆིག་རྫོགས་སམ་ཆིག་ཆོད་ཡིན་ཞེས་འདས་མ་འོངས་ཀྱི་རྣམ་ཤེས་འབྲེལ་ཐག་ཆད་པ་ཡི་ད་ལྟའི་བར་གྱི་ཤེས་པ་སྟོང་ཧད་དེ་བ་ཅིར་ཡང་མ་གྲུབ་པ་ངོས་བཟུང་ནས་ཚིག་གིས་ཀྱང་ས་ལེ་ཧྲིག་གེ་ཞེས་སྔ་ཕྱིའི་བར་མཚམས་ངོས་བཟུང་ནས་དེས་གནས་ལུགས་རང་བྱུང་གི་ཡེ་ཤེས་ཀྱི་དོན་མཐོང་བར་འདོད་པས་དོན་མེད་ཕྱིན་ཅི་ལོག་ཏུ་སོང་བ་ཡིན་ཏེ། གནད་གཞན་མེད་པར་ཤེས་པ་སྐད་ཅིག་ཡུད་ཙམ་ངོས་བཟུང་དུ་འགྱུར་བའི་ཕྱིར་འདས་འོངས་གཉིས་དང་ཅིས་མི་འདྲ། སྔ་ཕྱི་གཉིས་པོ་སྒོམ་མིན་པ་བཞིན་དུ་བར་དེར་ཡང་སུ་ཡིས་བཅུག་སྟེ་གསུམ་ག་འདྲ་བས་སོ། །དེས་ན་དེ་འདྲའི་ལམ་ངན་མདོ་རྒྱུད་དང་འགལ་བས་ཐར་པ་འདོད་ན་དེ་རིང་དུ་སྤང་བར་བྱའོ། །ཡང་ཁ་ཅིག་གང་ཡང་ཡིད་ལ་མ་བྱས་པ་དེ་གཅིག་པུས་ཆོག་བྱས་པས་ལན་པ་ཡིན། དེས་ན་རབ་ཀྱིས་ད་ལྟའི་ཤེས་པ་རང་སོར་ཐ་མལ་དུ་བཞག འབྲིང་གིས་སྐྱོན་ཡོན་ཕྱེས་ནས་ས་ལེ་ཧྲིིག་གེའི་ངང་ལ་བསྐྱངས་པས་ཕྱིས་འཆར། ཐ་མས་འགྱུ་བའམ་གནས་པ་གང་རུང་གཅིག་གམ་སོ་སོར་རྩལ་སྦྱང་བའམ་བསྐྱངས་པས་ཕྱིས་འབྲིང་དང་རབ་ཏུ་འགྱུར་རོ་ཞེས་སྨྲ་བ་ནི། མུན་པ་ལྟ་བུའི་བློ་ཅན་སྔོན་མེད་པའི་བླུན་པོ་གླང་ཆེན་མྱོས་པ་ཞིག་གོ །གཤིས་ལ་དེ་གསུམ་གང་གནས་པ་ཡིན། མི་གནས་པ་བསྒོམས་ནས་གཟོད་གནས་སུ་རེ་ན་མི་སྲིད་དེ་སོལ་བ་ནག་པོ་ལས་གཞན་དུ་མི་འགྱུར་བ་བཞིན་ནོ། །སོར་བཞག་ཀྱང་རབ་མ་ཡིན་ཏེ། འཁོར་བ་བརྒྱུད་དུས་དེ་འབའ་ཞིག་ཡོད་པས་འཁོར་བ་དང་ཐ་མལ་པ་ཡང་གྲོལ་བར་རིགས་པ་དང་། གཞག་བྱ་འཇོག་བྱེད་འགལ་བས་མ་གྲུབ་པ་དང་། གཏི་མུག་ལུང་མ་བསྟན་ལ་སྒོམ་དུ་རེ་བ་ཡིན་ནོ། །མདོར་ན་དེ་དང་དེ་འདྲ་བའི་སྐྱེ་བའི་ལོག་རྟོག་མཐའ་མེད་ཡོད་དེ། ཡོད་མེད་གཉིས་བྲལ་གྱི་སེམས་གཞི་གྲུབ་ཏུ་འདོད་པ་བསམ་མི་ཁྱབ་པའི་བདག་བསྒོམ་པ་དང་དོན་གཅིག་པ་སོགས་དེ་དག་ཀུན་ཀྱང་ངེས་དོན་གྱི་ཆོས་སྐལ་མེད་པ་འབའ་ཞིག་གོ །གཉིས་པ། ངེས་དོན་མཐར་ཐུག་སྟོན་པའི་མདོ་རྒྱུད་ཀྱི་གཞུང་ལུགས་ཀུན་ལས་སེམས་སེམས་བྱུང་གི་འཇུག་པ་དབྱིངས་སུ་ཞི་བའི་རྣམ་པར་མི་རྟོག་པའི་ཡེ་ཤེས་མཆོག་ཏུ་ཟབ་ཅིང་ཞི་བ་ཡོད་མེད་སོགས་མཐའ་བཞིའི་སྤྲོས་པ་དང་བྲལ་བའི་གནས་ལུགས་བསྒོམ་པར་གསུངས་ཏེ། རྒྱ་ཆེར་རོལ་པ་ལས། ཟ བ་ཞི་སྤྲོས་བྲལ་འོད་གསལ་འདུས་མ་བྱས། །ཞེས་དང་། རྡོ་རྗེ་བཀོད་པ་ལས། འོད་གསལ་བ་ཡི་ཡེ་ཤེས་ནི། །སེམས་དང་སེམས་བྱུང་ཀུན་དང་བྲལ། །བསམ་མེད་བརྗོད་པ་ལས་འདས་པ། །མཐའ་བྲལ་ནམ་མཁའ་ལྟ་བུའོ། །ཞེས་དང་། དཀོན་མཆོག་བརྩེགས་པ་ལས། ཞི་བའི་བློ་གྲོས་དེ་བཞིན་གཤེགས་པའི་ཐུགས་ཀྱི་གསང་བ་ནི། སེམས་དང་ཡིད་དང་རྣམ་པར་ཤེས་པ་དང་བྲལ་ལ། ཏིང་ངེ་འཛིན་གྱི་གནས་ཀྱང་མི་འདོར་བ་སྟེ། ཞེས་གསུངས་པ་ཡིན་པས་ན། དེ་དང་འགལ་བར་གྱུར་པའི་སེམས་ཕྱང་ཆད་སྟོང་པ་དང་བདེན་གྲུབ་ཀྱི་རྟག་པ་དང་། ཡོད་མེད་གཉིས་བྲལ་གྱི་སེམས་གཞི་གྲུབ་ཏུ་འདོད་པ་སོགས་ལམ་ངན་ཇི་སྙེད་པ། དེང་སང་ཤིན་ཏུ་དར་བས་ཐར་པར་འདོད་པ་རྣམས་ཀྱིས་བརྟགས་ཏེ་སྤང་བར་བྱའོ། །རྩ་བའི་ས་བཅད་གསུམ་པ་རྗེས་ཀྱི་བྱ་བ། བསྐྱེད་རྫོགས་གང་བསྒོམ་པའི་མཉམ་བཞག་དངོས་གཞིའི་ངང་དེ་ལས་ལངས་མ་ཐག རང་གཞན་ཐམས་ཅད་སྒྱུ་མར་ཤེས་པའི་སྒོ་ནས་དགེ་རྩ་གཞན་དོན་དུ་རྫོགས་པའི་སངས་རྒྱས་ཐོབ་པའི་རྒྱུར་ཡོངས་སུ་བསྔོ་བར་བྱ་ཞིང་། རྗེས་ཐོབ་ཀྱི་སྣང་བར་སྣང་སྲིད་ཐམས་ཅད་སྐུ་གསུང་ཐུགས་ཀྱི་དཀྱིལ་འཁོར་གསུམ་དུ་ཤེས་པར་བྱ་སྟེ། དེ་ཡང་བདེན་མེད་སྒྱུ་མའི་དཔེ་བརྒྱད་ཀྱི་ཚུལ་གྱིས་སྤྱད་པར་བྱའོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། འོད་གསལ་མཆོག་གི་བསྒོམ་པ་བསྟན་པའི་ལེའུ་སྟེ་ཉི་ཤུ་པའི་འགྲེལ་པའོ།། །། ༈ གཉིས་པ་ལམ་ཇི་ལྟར་བགྲོད་ཚུལ་ལ། མདོར་བསྟན། རྒྱས་བཤད་གཉིས། དང་པོ། དེ་ལྟར་བསྒོམས་པས་གང་དུ་བགྲོད་པའི་ལམ་གྱི་རིམ་པ་ཡང་། ཕྱི་མདོ་དང་ནང་གསང་སྔགས་པས་ཇི་ལྟར་གསུངས་པ་གཉིས་སྦྱར་ཏེ་ལེགས་པར་བཤད་པ་ནི་ཚོགས་ལམ་དང་སྦྱོར་ལམ་དང་མཐོང་ལམ་དང་སྒོམ་པའི་ལམ་བཞི་པོ་ཡོངས་སུ་རྫོགས་པས་མཐར་འབྲས་སངས་རྒྱས་འགྲུབ་པ་དེའི་ཕྱིར། བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ནི་མདོ་ལམ་དུ་བསྟན་པ་དང་། སྔགས་སུ་དཀྱིལ་འཁོར་དག་གིའང་རྣམ་དག་གི་ཆོས་སུ་གསུངས་པས། མདོ་དང་སྔགས་གསར་རྙིང་གུང་མཐུན་པར་འབྱུང་སྟེ། འཁོར་ལོ་བཞི་པོའི་རླུང་སེམས་ལས་སུ་རུང་བའི་ཚེ་ཚོགས་སྦྱོོར་བསྒོམ་གྱི་ལམ་བཞིའི་ཡོན་ཏན་རྣམས་རིམ་བཞིན་གྱིས་འཆར་བ་ཡིན་སྟེ། དབུ་མ་ལ་རོ་རྐྱང་གཉིས་ཀྱི་མདུད་པ་ཉེར་གཅིག་རེ་ཡོད་པའི་རྩ་མདུད་གཉིས་གཉིས་གྲོལ་བ་ལ་ས་ས་རེ་རེ་སྟེ། ས་བཅུའི་ཡོན་ཏན་ནང་ནས་འཆར་ཞིང་ཐ་མ་གྲོལ་བས་སངས་རྒྱས་ཀྱི་ས་འགྲུབ་པར་བི་མ་དང་པད་འབྱུང་སོགས་མཁས་གྲུབ་རྣམས་བཞེད་དོ། །དེ་ཡང་ས་ལམ་དང་ཡོན་ཏན་ཕྱི་ནས་མིན་པར་ནང་གི་རྟོགས་པའི་རྩལ་ཆ་ཞིག་ལ་བཞེད་པས། དེ་ལ་ཕྱི་ནང་འཇུག་པ་གཅིག་པའི་དབང་གིས་ནང་གི་ས་ལམ་ནི། སྤྱིར་རྟེན་པ་ཡེ་ཤེས་ཀྱི་ཐིག་ལེ་བདེ་གཤེགས་སྙིང་པོ་སྒྲིབ་པའི་དྲི་མ་དང་བྲལ་བའི་ཆ་ལ་ས་ལམ་སོགས་བཏགས་ཏེ། དེ་ཡང་སྒྲིབ་བྱེད་འཁོར་བའི་རླུང་སེམས་འགགས་པས་ཡེ་ཤེས་ཀྱི་རང་བཞིན་དེ་ཙམ་སྟོབས་འཕེལ་བ་ཡིན་ལ། དེ་ལ་རླུང་སེམས་ལས་སུ་རུང་བ་དང་། འབྱོངས་པ་གཉིས། དང་པོ་ནི་དེར་ཚུད་དུས་ཡིན་ལ། འབྱོངས་པ་ནི་དེ་དག་གི་རྩ་ཕྲན་དང་བཅས་པའི་མདུད་པ་གྲོལ་དགོས་སོ། །གཉིས་པ་ལ། དངོས་དང་། ས་ལམ་གྱི་ཡོན་ཏན་ལྡན་ཚུལ་ལ་སྤྱད་པ་གཉིས། དང་པོ་ལ། ཚོགས་སྦྱོར་མཐོང་སྒོམ་བཞི། དང་པོ་ལ། སྤྱི་བྱེ་བྲག་གཉིས། དང་པོ། དེ་ཡང་ཇི་ལྟ་ན། ལྟེ་བ་སྤྲུལ་པའི་འཁོར་ལོར་རླུང་སེམས་ལས་སུ་རུང་བས་ཚོགས་ལམ་ཆུང་འབྲིང་ཆེ་གསུམ་པོའི་དྲོད་རྟགས་འཆར་བ་སྟེ། སངས་རྒྱས་སྤྲུལ་སྐུའི་ཞལ་མཐོང་བ་དང་། སྤྱན་དང་མངོན་ཤེས་རྫུ་འཕྲུལ་ཕྲ་མོ་གྲུབ་པས་སྤྲུལ་པ་འགྱེད་ནུས་པ་ཡིན་ནོ། །གཉིས་པ་ལ། ཚོགས་ལམ་ཆུང་ངུ། འབྲིང་། ཆེན་པོ་གསུམ། དང་པོ། ཚོགས་ལམ་ཆུང་ངུར་དྲན་པ་ཉེར་བཞག་བཞི་བསྒོམ་པ་སྟེ། དེ་ཡང་ཐེག་པ་འོག་མ་ལས་འཕགས་པས་ལུས་ལྷར་བསྐྱེད་པ་ནི་ལུས་དྲན་པ་ཉེར་བར་བཞག་པ། བྱུང་ཚོར་གྱི་རྣམ་རྟོག་བདེ་ཆེན་གྱི་ཡེ་ཤེས་བསྒྱུར་བ་ནི་ཚོར་བ་དྲན་པ་ཉེ་བར་བཞག་པ་སྟེ། སེམས་དང་སེམས་བྱུང་གི་སྤྲོས་པ་མཐའ་དག་ཉེར་ཞིའི་བསྒོམ་པ་དེ་སེམས་དྲན་པ་ཉེར་བཞག་རྫོགས་པའི་རིམ་པ་སྟེ། སྣང་བཏགས་ཀྱི་ཆོས་འདི་ཀུན་བདེན་མེད་སྒྱུ་མར་ཤེས་པ་ནི་ཆོས་དྲན་པ་ཉེར་བཞག་ལགས་པར་རྒྱུད་ལས་གསུངས་ཏེ། སྒྱུ་འཕྲུལ་དམ་པ་ལས། སྔགས་པ་གང་ཞིག་རྣལ་འབྱོར་ལ་བརྩོན་པས། བདག་བྱིན་གྱིས་བརླབ་པ་ནི་ལུས་དྲན་པ་ཉེ་བར་བཞག་པ་སྟེ། ལྷའི་ངོ་བོ་ཉིད་དུ་སྣང་བ་གཟུགས་བརྙན་ལྟ་བུའོ། །ཀུན་ཏུ་རྟོག་པ་ཡེ་ཤེས་ཆེན་པོ་གནས་སྐབས་ནི་ཚོར་བའི་ངོ་བོ་ཉིད་བདེ་བ་ཆེན་པོའོ། །སྤྲོས་པའི་ཕྱོགས་ལས་རྣམ་པར་རྒྱལ་བ་ནི་འདིར་སེམས་མི་དམིགས་པ་ཉིད་དོ། །གཟུགས་བརྙན་གྱི་ངོ་བོ་ཉིད་དུ་སྒྱུ་མར་སྦྱོང་བ་ནི་ཆོས་ཀྱི་རང་བཞིན་ནོ། །ཞེས་སོ། །དེ་ཡང་ལམ་འོག་མར་ལུས་སོགས་དེ་དག་སྟོང་བདག་མེད་དུ་བསྒོམ་པ་ཡིན་ཀྱང་། འདིར་ཆོས་ཅན་སྣང་བ་དེ་ཡང་རང་བཞིན་གྱིས་དག་པས་ན་ལྷའི་རྣམ་རོལ་དུ་ཤེས་ཤིང་། དེ་ཡང་བདེན་མེད་དུ་ལྟ་བས་ལྷ་སྐུ་སྣང་ལ་རང་བཞིན་མེད་པར་བསྒོམས་པས་ཁྱད་པར་དང་བཅས་པ་ཉིད་དོ། །གཉིས་པ། ཚོགས་ལམ་འབྲིང་དུ་ཡང་དག་སྤོང་བ་བཞིའི་རིམ་པ་ནི། དེ་ལྟར་སྔར་གྱི་དྲན་པ་ཉེར་བཞག་བཞི་པོ་བསྒོམས་པས། དགེ་དང་མིི་དགེ་ཡི་སྤང་གཉེན་ལ་བདེན་པར་ཞེན་པ་བཞི་པོ་ཡང་དག་པར་སྤོང་བ་སྟེ། བཞི་གང་ཞེ་ན་མི་དགེའི་ཆོས་རྣམས་ད་ལྟ་མ་སྐྱེས་པ་སླར་མི་བསྐྱེད་ཅིང་། སྐྱེས་པ་གཞོམ་པའི་ཕྱིར་ལུས་ཀྱིས་འབད་ངག་གིས་རྩོལ་ཡིད་ཀྱིས་བརྩོན་འགྲུས་བརྩམ་པ་དང་། དགེ་བའི་ཆོས་རྣམས་སྔར་མ་སྐྱེས་པ་རང་རྒྱུད་ལ་བསྐྱེད་པ་སྟེ། སྐྱེས་པ་སྤེལ་བའི་ཕྱིར་སྒོ་གསུམ་གྱིས་འབད་རྩོལ་བརྩོན་འགྲུས་བརྩམ་པའི་སྤང་གཉེན་རང་བཞིན་དུ་ཞེན་པའོ། །འདིར་ནི་སྤང་གཉེན་རང་གྲོལ་མཉམ་པ་ཉིད་རྟོགས་པས་འོག་མ་ལས་འཕགས་པར་བསྟན་པའོ། །གསུམ་པ། ཚོགས་ལམ་ཆེན་པོར་རྫུ་འཕྲུལ་གྱི་རྐང་པ་བཞི་བསྒོམ་པ་ཡང་། བསྐྱེད་རྫོགས་ཀྱི་དོན་ལ་མ་ཡེངས་པར་རྩེ་གཅིག་ཏུ་དྲན་པས་དོན་འཛིན་པ་དང་འདུན་པས་བསྒོམ་པ་དང་དཔྱོོད་པས་གོལ་ས་ཡིན་མིན་རྟོག་པ་དང་སེམས་པས་རྩེ་གཅིག་ཏུ་བསྒོམ་པ་རྣམས་ཀྱིས། ཏིང་ངེ་འཛིན་མི་མཐུན་ཕྱོགས་ཀྱི་སྐྱོན་མེད་ཅིང་ཞི་བ་བསྒོམ་པ་ལས་རླུང་སེམས་ལས་སུ་རུང་བས་རྫུ་འཕྲུལ་ལེགས་པར་གྲུབ་ནས་པདྨ་ཅན་སོགས་དག་པའི་ཞིང་བགྲོད་དེ་སངས་རྒྱས་སྤྲུལ་པའི་སྐུར་ཆོས་རབ་ཉན་པས་ཁམས་ཀྱི་དྲི་མ་སྦྱོང་ཞིང་ཡི་དམ་ལྷའི་ཞལ་མཐོང་བ་དང་། ལུང་བསྟན་ཐོབ་པའོ། །གཉིས་པ་སྦྱོར་ལམ་ལ། སྤྱི་བྱེ་བྲག་གཉིས། དང་པོ། སྙིང་ཁ་ཆོས་ཀྱི་འཁོར་ལོའི་རླུང་སེམས་ལས་སུ་རུང་བས་སྦྱོར་བའི་ལམ་གྱི་ཡོན་ཏན་འཆར་བ་ནི་ཞེས་སོ། །གཉིས་པ་ལ། དྲོད་རྩེ་གཉིས་དང་། བཟོད་མཆོག་གཉིས་བཤད་པ་གཉིས། དང་པོ། སྔར་གྱི་བསྐྱེད་རྫོགས་ཟུང་འཇུག་གི་དོན་དེ་ལ་དད་པ་དང་། བརྩོན་འགྲུས་དང་། དྲན་པ་དང་། ཏིང་ངེ་འཛིན་དང་། ཤེས་རབ་ཀྱི་རྣམ་པས་བསྒོམ་པ་རང་དབང་དུ་གྱུར་ཏེ་སྤང་བྱ་འཇོམས་པ་ལ་ནུས་ལྡན་དུ་གྱུར་པ་ནི་དབང་པོ་ལྔ་ཉིད་དོ། །དེ་དྲོད་དང་རྩེ་མོར་བསྒོམས་པ་ཡིས། དྲོད་སྣང་བའི་ཡེ་ཤེས་མི་རྟོག་པ་ལ་ཐེ་ཚོམ་དང་མི་ཁོམ་པ་ཟད་པ་སོགས་ཀྱི་རྟགས་ཀྱིས་མཚན་པ་དང་། རྩེ་མོ་མཆེད་པའི་ཡེ་ཤེས་དགེ་རྩ་བརྟན་པ་ལ་སོགས་ཐོབ་ཅིང་། ཆོས་ཀུན་ལ་མངོན་ཞེན་མེད་པའི་རྨི་ལམ་དང་སྒྱུ་མའི་རང་བཞིན་དུ་འབྱོངས་པ་དང་། ངག་གི་བདེན་པའི་ཚིག་འགྲུབ་པ་དང་། སྦྱངས་པའི་ཡོན་ཏན་བཅུ་གཉིས་དང་དང་ལྡན་པ་དང་། ལུས་ཀྱི་ཤིག་སྲོ་དང་འབུ་སྲིན་མེད་པ་ཡིན་ནོ། །གཉིས་པ། དད་སོགས་ལྔ་པོ་དེ་མིི་མཐུན་པས་བརྫི་མི་ནུས་པ་སྟོབས་ལྔའི་རང་བཞིན་ཅན་དེ་བཟོད་པ་དང་ཆོས་མཆོག་ཏུ་བསྒོམས་པས། བཟོད་པ་དེ་ཁོ་ན་ཉིད་ཀྱི་ཕྱོགས་གཅིག་ལ་ཞུགས་པ་ཐོབ་པའི་ཡེ་ཤེས་ངན་སོང་རྣམས་ཆད་པ་དང་། ཆོས་མཆོག་དེ་མ་ཐག་པའི་ཏིང་འཛིན་ཉེ་བར་ཐོབ་པའི་ཡེ་ཤེས་དགེ་རྩ་བརྟན་པ་སྟེ་ཐར་པ་བྱང་ཆུབ་ལས་མི་འགྱུར་བ་དང་། ཏིང་ངེ་འཛིན་དང་རྫུ་འཕྲུལ་སོགས་སྔོན་ལས་མཆོག་ཏུ་འཕགས་པ་ཐོབ་པའོ། །གསུམ་པ་མཐོང་ལམ། མགྲིན་པ་ལོངས་སྤྱོད་ཀྱི་འཁོར་ལོའི་རླུང་སེམས་ལས་སུ་རུང་བས། རྣམ་པར་མི་རྟོག་པའི་ཡེ་ཤེས་བདེན་པ་དངོས་སུ་མཐོང་ནས་འཕགས་པས་དང་པོ་མཐོང་ལམ་གྱི་ཡོན་ཏན་དུས་སྐད་ཅིག་མ་རེ་ལ་ཏིང་ངེ་འཛིན་བརྒྱ་ཐོབ་པ། སངས་རྒྱས་བརྒྱ་མཐོང་བ། སངས་རྒྱས་བརྒྱས་བྱིན་གྱིས་བརླབས་པར་ཤེས་པ། འཇིག་རྟེན་གྱི་ཁམས་བརྒྱ་བསྐྱོད་པ། ཞིང་བརྒྱར་འགྲོ་བ། ཞིང་བརྒྱ་སྣང་བར་འོད་ཟེར་འགྱེད་པ། སེམས་ཅན་བརྒྱ་སྨིན་པ། བསྐལ་པ་བརྒྱར་གནས་པ། སྔོན་དང་ཕྱི་མའི་མཐའ་བརྒྱ་ལ་ཡེ་ཤེས་འཇུག་པ། ཆོས་ཀྱི་སྒོ་བརྒྱ་འབྱེད་པ། ལུས་བརྒྱར་སྟོན་པ། ལུས་རེ་རེ་ལ་འཁོར་ཕུན་སུམ་ཚོགས་པ་བརྒྱ་བརྒྱས་བསྐོར་བར་སྟོན་པ་སྟེ་བརྒྱ་ཕྲག་བཅུ་གཉིས་ལ་དབང་སྒྱུར་ཞིང་། ལོངས་སྐུའི་ཞིང་དུ་བགྲོད་ནས་རིགས་ལྔའི་སངས་རྒྱས་ཀྱི་ཞལ་མཐོང་ཞིང་ཆོས་ཉན་པ་ཡིན་ནོ། །དེའི་ཚེ་དྲན་པ་དང་། ཏིང་ངེ་འཛིན་དང་ཤེས་རབ་དང་བརྩོན་འགྲུས་དང་བཏང་སྙོམས་དང་དགའ་བ་དང་ཤིན་ཏུ་སྦྱངས་པ་སྟེ་དེ་ལྟར་ཡང་དག་བྱང་ཆུབ་ཀྱི་ཡན་ལག་བདུན་པོ་དག་ཀྱང་རྫོགས་པར་ཡོད་པར་འགྱུར་རོ། །བཞི་པ་བསྒོམ་ལམ་ལ། སྤྱི། བྱེ་བྲག་གཉིས། དང་པོ། སྐྱི་བོ་བདེ་ཆེན་གྱི་འཁོར་ལོའི་རླུང་སེམས་ལས་སུ་རུང་བས་སྒོམ་ལམ་གྱི་ས་དགུའི་ཡོན་ཏན་རྣམས་འཆར་བ་སྟེ་ཞེས་སོ། །གཉིས་པ་ལ། སའི་ངོ་བོ། ཡོན་ཏན། ནང་དང་སྦྱར་བ་གསུམ། དང་པོ། སྤྱིར་ས་དང་པོ་ནས་བཅུ་པའི་བར་ལ་རིམ་པ་བཞིན་སྦྱིན་ཚུལ་བཟོད་བརྩོན་བསམ་གཏན་ཤེས་རབ་ཐབས་སྟོབས་སྨོན་ལམ་ཡེ་ཤེས་ཀྱི་ཕ་རོལ་དུ་ཕྱིན་པ་དེ་བཅུ་པོ་རེ་རེ་གཙོ་བོར་ལྡན་ལ། གཞན་དགུ་དགུ་འཁོར་དུ་ལྡན། དེའང་ས་དང་པོའི་སྐད་ཅིག་བཅུ་དྲུག་པ་ནས་སྒོམ་ལམ་དུ་གཏོགས་པས་སྐད་ཅིག་བཅོ་ལྔ་པོ་དེ་ལ་རབ་ཏུ་དགའ་བ་ཞེས་བྱ། སྐད་ཅིག་བཅུ་དྲུག་པ་ནས་བཟུང་རིམ་པར་སྒོམ་ལམ་གྱི་ས་དགུ་སྟེ། དེ་ཡང་ཆུང་ངུའི་ཆུང་ངུ་ས་གཉིས་པ་དྲི་མ་མེད་པ། ཆུང་ངུའི་འབྲིང་ས་གསུམ་པ་འོད་བྱེད་པ། ཆུང་ངུའི་ཆེན་པོ་ས་བཞི་པ་འོད་འཕྲོ་བ་སྟེ་ཆུང་ངུ་གསུམ་དང་། དེ་བཞིན་དུ་འབྲིང་གི་ཆུང་ངུ་ས་ལྔ་པ་སྦྱང་དཀའ་བ། འབྲིང་གི་འབྲིང་ས་དྲུག་པ་མངོན་དུ་གྱུར་པ། འབྲིང་གི་ཆེན་པོ་ས་བདུན་པ་རིང་དུ་སོང་བ་སྟེ་འབྲིིང་པོ་གསུམ་དང་། ཆེན་པོའི་ཆུང་ངུ་ས་བརྒྱད་པ་མི་གཡོ་བ། ཆེན་པོ་འབྲིང་ས་དགུ་པ་ལེགས་པའི་བློ་གྲོས། ཆེན་པོའི་ཆེན་པོ་ས་བཅུ་པ་ཆོས་ཀྱི་སྤྲིན་ཏེ་ཆེན་པོ་གསུམ་མོ། །དེ་ལྟར་སྒོམ་ལམ་གྱི་ས་དགུ་པོའི་ཡེ་ཤེས་ཀྱིས། སྒོམ་སྤང་གི་དྲི་མ་དགུ་པོ་རགས་རིམ་ནས་སྤོང་སྟེ། སྒོམ་ལམ་ཆུང་ངུའི་ཆུང་ངུ་ས་གཉིས་པ་དྲི་མ་མེད་པས་སྒོམ་སྤང་ཆེན་པོའི་ཆེན་པོ་སྤོང་བ་ནས། སྒོམ་སྤང་ཆུང་ངུའི་ཆུང་ངུ་སྒོམ་ལམ་ཆེན་པོའི་ཆེན་པོ་ས་བཅུ་པས་སྤང་བའི་བར་གྱིས་སོ། །གཉིས་པ། ས་དེ་དག་སོ་སོའི་ཡོན་ཏན་རླབས་ཆེ་བ། སྔར་བཤད་པ་རྒྱ་ཕྲག་བཅུ་གཉིས་པོ་ས་འདི་དག་དུ་སྐད་ཅིག་རེ་ལ་དུས་མཉམ་པར་གོང་དུ་འཕེལ་བ་ནི། ས་གཉིས་པར་སྟོང་ཕྲག་བཅུ་གཉིས་ལ་སོགས་པ་སྟེ། གསུམ་པར་འབུམ་ཕྲག་བཅུ་གཉིས། བཞི་པར་ཁྲག་ཁྲིག་བརྒྱ། ལྔ་པར་ཕྲག་ཁྲིག་ཕྲག་སྟོང་། དྲུག་པར་ཁྲག་ཁྲིག་ཕྲག་འབུམ། བདུན་པར་བྱེ་བ་ཁྲག་ཁྲིག་འབུམ། བརྒྱད་པར་སྟོང་གསུམ་འཇིག་རྟེན་འབུམ་གྱི་རྡུལ་ཕྲན་གྱི་གྲངས་སྙེད་དང་། དགུ་པར་སངས་རྒྱས་ཀྱི་ཞིང་ཁམས་གྲངས་མེད་འབུམ་ཕྲག་བཅུའི་རྡུལ་ཕྲན་གྱི་གྲངས་དང་མཉམ་པའི་དང་། ས་བཅུ་པར་ཞིང་ཁམས་བརྗོད་དུ་མེད་པ་བྱེ་བ་ཁྲག་ཁྲིག་བརྒྱ་སྟོང་ཕྲག་བཅུའི་རྡུལ་ཤིན་ཏུ་ཕྲ་བ་སྙེད་དང་མཉམ་པའི་སངས་རྒྱས་ཀྱི་ཞལ་ལྟ་བ་ལ་སོགས་པ་བཅུ་གཉིས་སྐད་ཅིག་གཅིག་ལ་བྱེད་པའོ། །དེ་ལ་སོགས་པ་གཞན་ཡང་རྒྱ་ཆེན་པོ་དང་ལྡན་ཏེ་ས་བརྒྱད་པར་ཡིད་ཤེས་གནས་གྱུར་པས་རྣམ་པར་མི་རྟོག་པ་དང་། དགུ་པར་འཛིན་བཅས་སྒོ་ལྔའི་རྣམ་ཤེས་གནས་གྱུར་པས་ཞིང་དག་པ་དང་། བཅུ་པར་ཀུན་གཞིའི་རྣམ་ཤེས་གནས་གྱུར་པས་ཕྲིན་ལས་ཕུན་སུམ་ཚོགས་པ་རྣམས་ལ་དབང་འབྱོར་པ་དང་། དེ་བཞིན་དུ་ཚེ་དང་། སེམས་དང་། ཡོ་བྱད་དང་། ལས་དང་། སྐྱེ་བ་དང་། མོས་པ་དང་། སྨོན་ལམ་དང་། རྫུ་འཕྲུལ་དང་། ཡེ་ཤེས་དང་། ཆོས་ལ་དབང་བ་སྟེ་དབང་བཅུ་ཡང་ཐོབ་སྟེ། སྤྱིར་དབང་བཅུ་ཐོབ་པ་ཙམ་ནི། མ་དག་ས་བདུན་ནས་ཡོད་ལ། ཕུལ་བྱུང་ནི་དག་པ་ས་གསུམ་ན་ཡོད། ཤིན་ཏུ་རྣམ་དག་ནི་སངས་རྒྱས་ཀྱི་ས་ན་ཡོད་དོ། །གསུམ་པ་ལ་སྤྱི་བྱེ་བྲག་གཉིས། དང་པོ། དེའི་ཚེ་འཁོར་ལོ་སོ་སོའི་རྩ་འདབ་ཕྲ་མོའི་མདུད་པ་རབ་ཏུ་གྲོལ་བས། དེར་ཡེ་ཤེས་ཀྱི་རླུང་ཆུད་པ་དང་། འཁོར་བའི་རང་བཞིན་ཉོན་མོངས་ཅན་གྱི་རླུང་སེམས་ནུབ་པ་དུས་མཚུངས་པར། མྱ་ངན་འདས་ཞི་ཡེ་ཤེས་ཀྱི་རླུང་མཆོག་ཏུ་འཕེལ་པའམ་གྲུབ་པ་ཡིན་ནོ། །གཉིས་པ། དེ་ལྟར་ས་བཅུའི་བགྲོད་པ་དེ་དག་ལས་ཀྱང་། རིམ་བཞིན་དབུ་མར་རོ་རྐྱང་གིས་མདུད་པ་ཉི་ཤུ་རྩ་གཅིག་ཡོད་པ་ལས། དང་པོ་གཉིས་གྲོལ་བས་ས་དང་པོ་དང་དེ་ནས་གཉིས་གྲོལ་བས་ས་གཉིས་པ་སོགས་རིམ་པ་ས་བཅུ་པོ་རེ་རེ་ཐོབ་ཅིང་། མཐར་ཐ་མ་གྲོལ་བས་གཙུག་ཏོར་རྩེ་མོའི་ས་མཆོག་སྟེ་རྡོ་རྗེ་འཆང་འ གྲུབ་པ་ཡིན་ནོ། །གཉིས་པ་ཡོན་ཏན་གྱི་ཚུལ་ལ་དཔྱད་པ་ལ། སྤྱི་བྱེ་བྲག་གཉིས། དང་པོ། དུས་གང་གི་ཚེ་ས་གོང་མ་གོང་མའི་རྟོགས་པར་ཕྱིན་པར་གྱུར་ཅིང་། སངས་རྒྱས་ཀྱི་སའི་བར་དུ་བགྲོད་པ་དེ་དག་ལ་ནི། སའི་ཡོན་ཏན་འདི་དག་ཆོས་ཉིད་ཀྱིས་ཉི་མ་དང་འོད་ཟེར་བཞིན་དུ་འབྲལ་མེད་དུ་ཡོད་པ་ཡིན་ནོ། །གཉིས་པ་ལ། གཞན་ལུགས་དགག་པ། རང་ལུགས་བཞག་པ་གཉིས། དང་པོ། སྟོང་ལྟའི་ཕྱོགས་ལ་ཞེན་པ་ཁ་ཅིག་གིས་ས་དང་ལམ་གྱི་ཡོན་ཏན་རྣམས་དོན་ལ་མེད་པས་དྲང་དོན་ཡིན་ཟེར་བ་དང་། ལ་ལ་ན་རེ་ས་དེའི་རྟོགས་པ་ནི་ཐོབ་ཀྱང་ས་དེ་ཡི་ཡོན་ཏན་མེད་པའི་མུ་དང་། ཡོད་པ་དང་མེད་པ་གཉིས་ཀའི་མུ་སྟེ་ཆ་གཉིས་སུ་འདོད་པ་རྣམས་ནི་རྨོངས་པའི་བློ་ཡིན་ཏེ། འཇིག་རྟེན་ན་ཉི་མ་མེད་ཅེས་པའམ། ཡོད་ཀྱང་འོད་མེད་པའམ་འོད་ཡོད་མེད་གཉིས་ཀ་ཡིན་ཟེར་བ་དང་འདྲའོ། །དེས་ན་དེ་དག་གི་ས་རང་རང་གི་ལྟ་བ་ལ་ཆགས་ཤིང་ཞེན་པར་བྱས་ནས། མ་ནོར་བའི་ཆོས་ལ་སྐུར་བ་འདེབས་པ་ཡིན་པས་འདི་ཉིད་སྤང་བར་བྱའོ། །འོན་ཀྱང་རང་བཞིན་དུ་ནོར་མ་ནོར་དཔྱད་ནས་འདོར་ལེན་བྱེད་པ་ཙམ་ལས། སྡང་ཞེན་གྱི་བསམ་པས་མི་བྱ་སྟེ་རྩ་ལྟུང་སྐྱེད་པ་སོགས་སྡིག་པ་འཕེལ་བའི་ཕྱིར། དེས་ན་དེ་དག་སྙིང་རྗེའི་སེམས་ཀྱིས་བཟློག་ཐུབ་ན་བཟློག མི་ཐུབ་ན་མི་རྩོད་པར་ནམ་ཞིག་ལམ་ངན་འདི་ལས་ལོག་པར་གྱུར་ཅིག་སྙམ་དུ་བྱ་ཞིང་། ཆོས་ཐམས་ཅད་མཉམ་པ་ཉིད་ཕྱོགས་ཞེན་མེད་པ་ལ་སེམས་བཞག་གོ །གཉིས་པ། རང་གི་ལུགས་སམ་གང་འདིར་ནི་ལམ་བསྒོམས་པ་ལས་དེའི་ཡོན་ཏན་གྱི་ཚོགས་རྣམས་དབྱར་ཁའི་མེ་ཏོག་བཞིན་དུ་རྣམ་པར་འཕེལ་ཞིང་། ཡོན་ཏན་དང་ལྡན་པའི་ས་ལམ་དེ་ལྟ་བུ་བགྲོད་ནས་སངས་རྒྱས་གྲུབ་པར་འདོད་པ་དེའི་ཕྱིར། སངས་རྒྱས་ཀྱི་སྐུ་དང་ཡེ་ཤེས་ནི་གདུལ་བྱའི་དོན་གྲུབ་པ་ལ་ཡིད་བཞིན་གྱི་ནོར་བུ་དང་འདྲ་ཡང་། དེ་ཉིད་བེམ་པོའི་དཔེ་མིན་ཏེ་མཁྱེན་ཆའི་ཡེ་ཤེས་དང་བཅས་པར་རྟོག་མེད་ལྷུན་གྱིས་གྲུབ་པའི་ཚུལ་འདི་ལས་མཐའ་ཡས་པའི་འགྲོ་བ་ཀུན་ལ་སྲིད་རྩེའི་སྟེ་སྲིད་པའི་མཐའི་བར་དུ་ཁྱབ་པ་ཡིན་ནོ། །དེ་ལྟ་བུའི་ཚལ་འདི་ནི་ངེས་པ་དོན་གྱི་མདོ་རྒྱུད་ཀུན་ལས་དགོངས་པ་མཐུན་པར་གསུངས་པས་ཤེས་རབ་མིག་ཅན་རྣམས་ཀྱིས་རིག་པར་བྱའོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས་ལམ་བགྲོད་པའི་ས་མཚམས་བསྟན་པའི་ལེའུ་སྟེ་ཉི་ཤུ་རྩ་གཅིག་པའི་འགྲེལ་པའོ།། །། ༈ གཉིས་པ་འབྲས་བུ་ལ། བསྟན། བཤད། བསྡུ་གསུམ། དང་པོ། དེ་ལྟར་བསྒོམས་པས་དྲི་མ་མ་ལུས་པ་ཀུན་གཞི་བག་ཆགས་དང་བཅས་པ་དང་སེམས་སེམས་བྱུང་གི་འཇུག་པ་མཐའ་དག་འགགས་ཏེ་རྣམ་པར་དག་པའི་འབྲས་བུ་ནི། སྒྲིབ་གཉིས་བག་ཆགས་དང་བཅས་པ་སྤངས་པ་དང་རྟོགས་པ་མཐར་ཕྱིན་ཏེ་སྐུ་དང་ཡེ་ཤེས་ཀྱི་ཚོགས་མངོན་དུ་གྱུར་པ་སྟེ། དཔེ་ཇི་ལྟར་ན་ཉི་ཟླ་སྒྲིབ་བྱེད་ཀྱི་སྤྲིན་དང་བྲལ་བ་བཞིན་དུ། རིགས་ཁམས་ཀྱི་སྒྲིབ་པ་ཀུན་དང་བྲལ་བ་ན་བྱང་ཆུབ་ཅེས་བྱ་སྟེ་ལྷུན་གྱིས་གྲུབ་པའི་ཡོན་ཏན་གྱི་ཚོགས་རང་སྣང་བ་ཡིན་ཏེ། འཇུག་པ་ལས། ཞི་སྐུ་དཔག་བསམ་ཤིང་ལྟར་གསལ་གྱུར་ཅིང་། །ཡིད་བཞིན་ནོར་བུ་ཇི་བཞིན་རྣམ་མི་རྟོག །འགྲོ་གྲོལ་བར་དུ་འཇིག་རྟེན་འབྱོར་སླད་རྟག །འདི་ནི་སྤྲོས་དང་བྲལ་ལ་སྣང་བ་ཡིན། །ཞེས་སོ། །གཉིས་པ་ལ། སྤྱི་བྱེ་བྲག་གཉིས། དང་པོ། འདི་ལྟར་ལུས་དང་དོན་དང་ཡུལ་དུ་སྣང་བ་ཡི་སྒྲིབ་པའི་བག་ཆགས་གསུམ་པོ་ལས་རབ་ཏུ་གྲོལ་ཏེ། ཇི་ལྟར་བུམ་པ་ཆག་པ་ན་མར་མེ་གསལ་བ་དང་། པདྨ་ཁ་བྱེའི་ནང་གི་སྐུ་མཐོང་བ་བཞིན་དུ་ལྷུན་གྱིས་གྲུབ་པའི་ཡོན་ཏན་རྣམས་རྫོགས་པ་སྟེ་མངོན་སུམ་དུ་སྣང་བ་ཡིན་ནོ། །དེ་ཡང་སྒྲིབ་གསུམ་གྱི་བག་ཆགས་སོ་སོར་གྲོལ་བ་ལས། ཡུལ་དུ་སྣང་བའི་བག་ཆགས་གྲོལ་བས་འོག་མིན་སོགས་ཞིང་ཁམས་མི་ཟད་པ་རྒྱན་གྱི་འཁོར་ལོ་སྣང་བ་དང་། དོན་དུ་སྣང་བའི་བག་ཆགས་རྣམ་ཤེས་ཚོགས་བརྒྱད་ལས་གྲོལ་བས་ཡེ་ཤེས་ལྔར་སྣང་སྟེ། ཀུན་གཞི་དབྱིངས་སུ་ནུབ་པ་ཆོས་དབྱིངས། ཀུན་གཞིའི་རྣམ་ཤེས་ནུབ་པ་མེ་ལོང་། ཉོན་ཡིད་ནུབ་པ་མཉམ་ཉིད། ཡིད་ཤེས་ནུབ་པ་སོར་རྟོག སྒོ་ལྔའི་རྣམ་ཤེས་ནུབ་པ་བྱ་གྲུབ་ཡེ་ཤེས་སུ་རང་སྣང་བ་དང་། ལུས་སུ་སྣང་བའི་བག་ཆགས་སམ་སྒྲིབ་པ་ལས་གྲོལ་བས་རྒྱལ་བའི་སྐུ་རྡོ་རྗེ་རིགས་ལྔ་སྣང་བ་སྟེ། དེ་དག་ཀྱང་བསྡུ་ན་ཇི་སྙེད་པ་དང་ཇི་ལྟ་བ་བཞིན་གཟིགས་པའི་ཡེ་ཤེས་གཉིས་པ་རྣམ་པར་དག་པ་ཡིན་ཏེ་ཆོས་ཉིད་ངོ་བོ་ཉིད་ཀྱི་སྐུ་བདེ་བ་ཆེན་པོ་ནི་གཅིག་དང་དུ་མའི་སྤྲོས་པ་མེད་པས་ཇི་ལྟ་བ་མཁྱེན་པའི་ཡེ་ཤེས་ཡིན་ལ། ཆོས་ཅན་སྣང་བ་ལོངས་སྤྱོད་རྫོགས་པ་དང་ཡེ་ཤེས་ལྔ་སོ་སོར་མ་འདྲེས་པའི་ཆ་ནི་ཇི་སྙེད་མཁྱེན་པའི་ཡེ་ཤེས་ཏེ། གཉིས་ཀ་ཡང་སོ་སོ་མ་ཡིན་ངོ་བོ་གཅིག་པས་ལྷུན་གྱིས་གྲུབ་པ་ཉིད་དོ། །ཕྱིར་གདུལ་བྱ་ལ་ལྟ་བའི་ཡེ་ཤེས། ཇི་སྙེད་པས་གདུལ་བྱའི་ཁམས་དང་མོས་པ་སོགས་རྒྱུ་འབྲས་རྡུལ་ཕྲན་གྱི་གྲངས་སོགས་མ་འདྲེས་པར་འགྲོ་ལ་ཇི་ལྟར་སྣང་བ་དེ་ལྟར་ཡེ་ཤེས་སྐད་ཅིག་པོ་དེས་མཁྱེན། ཇི་ལྟ་བས་ངོ་བོ་ཉིད་མེད་པ་ནམ་མཁའ་ལྟ་བུ་གཞི་མེད་གདོད་ནས་དག་པར་གཟིགས་ཏེ། དེ་གཉིས་མིི་འགལ་བར་བདེན་གཉིས་ཀྱི་རིམ་པའི་ཆོས་སྤང་བླང་ཀུན་རྫོབ་ཇི་སྙེད་དང་། སྤང་བླང་མེད་པ་དོན་དམ་ཇི་ལྟ་བ་ལས་བརྩམས་ཏེ་སྡེ་སྣོད་དང་རྒྱུད་སྡེའི་ཆོས་ཀུན་གསུངས་པས་སོ། །དེས་ན་ཞི་སྐུ་སོགས་དེ་ཐམས་ཅད་ཡེ་ཤེས་འབའ་ཞིག་གི་རང་བཞིན་དུ་ཤེས་པར་བྱའོ། །གཉིས་པ་ལ། རྟེན་སྐུ། བརྟེན་པ་ཡེ་ཤེས། མཛད་པ་ཕྲིན་ལས་གསུམ། དང་པོ་ལ་སྐུ་ལྔ་སོ་སོར་བཤད་པ་དང་། རང་བཞིན་གཅིག་ཏུ་བསྟན་པ་གཉིས། དང་པོ་ལ། སྐུ་གསུམ་བཤད་པ། བདེ་ཆེན་གྱི་སྐུ་བཤད་པ། མངོན་བྱང་རྡོ་རྗེའི་སྐུ་བཤད་པ་གསུམ། དང་པོ། དེ་ཡང་ཆོས་ཀྱི་སྐུ་སྤྲོས་པ་མེད་ཅིང་ཡོན་ཏན་གྱི་གོ་སྐབས་ཡངས་པའི་འབྱུང་གནས་དམ་པར་གྱུར་པ་དང་། དེའི་ངང་ལས་ལོངས་སྤྱོད་རྫོགས་པ་མཚན་རྫོགས་རིགས་ལྔའི་སངས་རྒྱས་སུ་རང་གསལ་བའི་སྣང་བ་ཉིད། ས་བཅུའི་བྱང་ཆུབ་སེམས་དཔའ་ལའང་དེ་དང་ཆ་འདྲར་སྣང་བ་དང་། མ་དག་པའི་འགྲོ་བ་རྣམས་ལ་བྱང་ཆུབ་མཆོག་གི་སྤྲུལ་པའི་སྐུ་སོགས་བཟོ་དང་སྐྱེ་བ་སྣ་ཚོགས་པ་རྣམས་སུ་སྣང་བ་ནི་རིམ་པར་ནམ་མཁའ་དང་དེའི་ངང་དུ་ཉི་ཟླ་བཞིན་དང་། དེའི་གཟུགས་བརྙན་དྭངས་པའི་མ ཚོར་སྣང་བ་བཞིན་ནོ། །གཉིས་པ། བསམ་གྱིས་མི་ཁྱབ་པའི་བདེ་བ་ཆེན་པོའི་ཡེ་ཤེས་ཀྱི་སྐུ་ནི། སྐུ་གསུམ་དང་ཡེ་ཤེ་ཀུན་གྱི་བདག་ཉིད་དེ། དེ་དག་གཅིག་ཐ་དད་དང་བྲལ་བའི་རང་བཞིན་ཏེ་ཟག་པ་མེད་པའི་ཡེ་ཤེས་ཀྱི་རང་བཞིན་མཚོན་བརྗོད་ལས་འདས་པ་ངོ་བོ་ཉིད་ཀྱི་སྐུ་དེ་ནི་སྐུ་དང་ཡེ་ཤེས་ཀུན་ལ་ཁྱབ་པའི་བདག་ཉིད་དབྱེར་མེད་པའི་ཆོས་ཉིད་དེ། རང་བྱུང་ཟག་མེད་ཀྱི་ཡེ་ཤེས་བདེ་ཆེན་གཅིག་པུ་ཉིད་ལས་གཞན་ཞིག་ཡོད་པ་མ་ཡིན་ནོ། །གསུམ་པ། མངོན་པར་བྱང་ཆུབ་པ་མི་འགྱུར་རྡོ་རྗེའི་བདག་ཉིད་ཀྱི་སྐུ་ནི། སྤངས་རྟོགས་མཐར་ཕྱིན་པ་དེ་ལ་ནམ་ཡང་གཞན་དུ་འཕོ་འགྱུར་མེད་པ་ཡིན་ནོ། །གཉིས་པ་རང་བཞིན་གཅིག་ཏུ་བསྟན་པ་ནི། དེ་ལྟར་སྐུ་ལྔ་པོ་རྣམས་ཀྱང་ངོ་བོ་དབྱེར་མེད་གཞི་དབྱིངས་གཅིག་སྟེ། གང་དུ་གཅིག་ན་འོད་གསལ་སྙིང་པོ་སྒྲིབ་ཀུན་བྲལ་བས་མངོན་དུ་གྱུར་པ་གཅིག་པུ་ཉིད་དེ། དེ་ལ་ལྡོག་ཆས་དབྱེ་ན། ངོ་བོ་སྟོང་ཆ་ཆོས་སྐུ་དང་། རང་བཞིན་སྣང་ཆ་ལོངས་སྐུ་དང་། སྣ་ཚོགས་འཕྲོ་བའི་ཆ་སྤྲུལ་སྐུ་དང་། སྤངས་རྟོགས་དབྱེར་མེད་པས་མངོན་བྱང་རྡོ་རྗེའི་སྐུ་དང་། བདེ་ཆེན་གཅིག་པུར་དབྱེར་མེད་པ་བདེ་ཆེན་ངོ་བོ་ཉིད་སྐུ་སྟེ། དེ་ལྟར་སྐུ་ལྔ་ཐ་དད་དུ་བརྗོད་ཀྱང་བརྡ་ཙམ་དང་བཏགས་པ་ཙམ་ཉིད་ཡིན་གྱི་དོན་ལ་ཐ་དད་དུ་མེད་དོ། །གཉིས་པ། ཡེ་ཤེས་སྐུ་ལྔ་པོ་དེ་ལ་བརྟེན་པའི་ཡེ་ཤེས་རྣམ་པ་ལྔ་ཡང་། ངོ་བོ་ཆོས་ཉིད་སྤྲོས་པ་ཞི་བ་ཆོས་དབྱིངས། རང་བཞིན་འོད་གསལ་བ་མེ་ལོང་། ཐམས་ཅད་རོ་མཉམ་པ་མཉམ་ཉིད། མ་འདྲེས་པ་སོ་སོར་རྟོག་པ། ཤེས་བྱ་ཐོགས་མེད་དུ་མཁྱེན་པ་བྱ་གྲུབ་ཡེ་ཤེས་ཏེ། དེ་ལྔ་ནི། རང་བཞིན་གྱིས་རིག་པ་དང་དབྱེར་མེད་ལྷུན་གྲུབ་ཏུ་གནས་ཏེ། དང་པོ་ཆོས་དབྱིངས་ཆོས་སྐུའི་ཡེ་ཤེས་དང་། དེ་བཞིན་གཉིས་པ་མེ་ལོང་ལོངས་སྐུའི་བདག་ཉིད་དང་། གསུམ་པ་མཉམ་ཉིད་བདེ་བ་ཆེན་པོའི་དང་། ལྷག་མ་སོར་རྟོག་བྱ་གྲུབ་གཉིས་སྤྲུལ་སྐུའི་ཡེ་ཤེས་སྟེ་མངོན་བྱང་ནི་ལྔ་ཀའི་འོ། །དེ་ལྔ་ངོ་བོ་དབྱེར་མེད་ལ་ལྡོག་པ་ཐ་དད་ཉིད་དེ། དེ་ཡང་ཡེ་ཤེས་འདི་ལྔ་ངོ་བོ་ལྷུན་གྲུབ་ཀྱི་རིག་པ་དང་དབྱེར་མེད་དུ་ཡོད་ཀྱང་སློབ་ལམ་དུ་བསྒྲིབས་ནས་མི་མངོན་པའོ། །དེ་ལ་སྒྲིབ་པའི་ཆ་ལྔ་ནི་ཀུན་གཞི་སོགས་གོང་སྨོས་ལྔ་དང་། གཞན་ཡང་འདོད་ཆགས་སོར་རྟོག ཞེ་སྡང་མེ་ལོང་། གཏི་མུག་ཆོས་དབྱིངས། ང་རྒྱལ་མཉམ་ཉིད། ཕྲག་དོག་བྱ་གྲུབ་སྟེ་དག་བྱ་གནས་གྱུར་རྒྱུའི་ཆ་འདི་རྣམས་སྤྲིན་དང་འདྲ་བ་ཡིན་ལ། དེ་སེལ་བྱེད་ཆོས་ཀྱི་ཚིག་དོན་འཛིན་པས་མེ་ལོང་ཡེ་ཤེས་མཐོང་བའི་སྒྲིབ་པ་སེལ། དེ་བཞིན་དུ་སེམས་ཅན་རྣམས་ལ་མཉམ་ཉིད་བྱང་ཆུབ་སེམས་བསྒོམས་པས་མཉམ་ཉིད་དང་། གཞན་ལ་ཆོས་བསྟན་པས་སོར་རྟོག་དང་། གཞན་དོན་བྱས་པས་བྱ་གྲུབ། དེ་ཁོོ་ན་ཉིད་བསྒོམས་པས་ཆོས་དབྱིངས་ཡེ་ཤེས་ལ་སྒྲིབ་པའི་དྲི་མ་བསལ་ནས་ཡེ་ཤེས་དེ་རྣམས་སྣང་བ་ཡིན་ནོ། །དེ་དག་ཀྱང་བསྡུ་ན་གཉིས་སུ་འདུ་སྟེ། ཆོས་དབྱིངས་མཉམ་ཉིད་གཉིས་ཇི་ལྟ་དང་། གཞན་གསུམ་ཇི་སྙེད་མཁྱེན་པའི་ཡེ་ཤེས་སུ་ཤེས་པར་བྱ་སྟེ་ཞིབ་པར་སངས་རྒྱས་ཀྱི་ཡེ་ཤེས་བསམ་མི་ཁྱབ་པ་ལ་ཡིད་ཆེས་ཤིང་དད་པར་བྱའོ། །གསུམ་པ། མཛད་པའི་ཕྲིན་ལས་ནི་བྱ་བ་གྲུབ་པའི་ཡེ་ཤེས་ཉིད་སྤྲུལ་སྐུའི་རྣམ་པར་རོལ་པ་སྟེ། འགྲོ་བ་གང་ལ་ཐབས་གང་གིས་འདུལ་བ་དེ་ལ་ཆོས་དང་སྐུ་སོགས་དེ་ལྟར་དུ་སྣང་ཞིང་། སེམས་ཅན་གྱི་མོས་པའི་རྗེས་སུ་འགྲོ་བ་དང་རང་རང་གི་བློ་དང་འཚམ་པར་སྐད་ཅིག་སྔ་ཕྱི་མེད་པར་འབྱུང་སྟེ། རྒྱུད་བླ་མ་ལས། གདུལ་བྱའི་ཁམས་དང་འདུལ་བའི་བྱ་བ་དང་། །གདུལ་བྱའི་ཐབས་དང་དེ་ཡི་རང་བཞིན་ལ། །ཁྱབ་བདག་རྟག་ཏུ་ལྷུན་གྱིས་གྲུབ་པར་འཇུག །ཅེས་སོ། །ཕྲིན་ལས་དེ་ཡང་དུས་སྲིད་པ་ཇི་སྲིད་ཀྱི་བར་དུ་མཐར་ཐུག་གི་ཕན་པ་དང་གནས་སྐབས་ཀྱི་བདེ་བ་མཐའ་དག་ལ་འགོད་པར་མཛད་པ་སྟེ། དེ་དག་ཀྱང་བསྡུ་ན་ལམ་གྱི་རྟེན་མཐོ་རིས་ལ་འགོད་པ་དང་། དེ་ལ་སོགས་པའི་འགྲོ་བ་རྣམ་བྱང་ཆུབ་གསུམ་གྱི་ལམ་ལ་འགོད་པ་དང་། མཐར་ཐུག་དེ་ཐམས་ཅད་འབྲས་བུ་སངས་རྒྱས་ཀྱི་ས་ལ་འགོད་པར་མཛད་པའི་ཚུལ་གྱིས་འགྲོ་བ་ཀུན་ཀྱང་ཐར་པའི་ལམ་དུ་འདྲེན་པར་མཛད་པའོ། །དེའང་བསྡུ་ན་ཕྲིན་ལས་རྒྱ་ཆེ་བ་སེམས་ཅན་གྱི་གནས་རིས་ཁྱབ་པར་འཇུག་པ་དང་། གཅིག་ཏུ་ཕན་པ་རྒྱུན་མི་ཆད་པ་འཁོར་བ་མ་སྟོང་གི་བར་དང་། མཛད་པ་དུས་ལས་མི་ཡོལ་བར་མཁའ་ཁྱབ་གདུལ་བྱའི་དོན་དུས་མཉམ་དུ་མཛད་པ་དང་གསུམ་དུ་འདུ་སྟེ། བཞི་བརྒྱ་པ་ལས། སངས་རྒྱས་རྣམས་ཀྱི་མཛད་པ་ནི། །རྒྱུ་མེད་འགའ་ཡང་ཡོད་མ་ཡིན། །དབུགས་ཀྱང་སེམས་ཅན་རྣམས་ལ་ནི། །སྨན་སླད་ཁོ་ནར་ཡང་དག་འབྱུང་། །ཞེས་དང་། ལས་བརྒྱ་པ་ལས། རྒྱ་མཚོ་ཆུ་སྲིན་རྣམས་ཀྱི་རླབས། །དུས་ལས་ཡོལ་བར་གྱུར་སྲིད་ཀྱི། །གདུལ་བར་བྱ་བའི་སྲས་རྣམས་ལས། །སངས་རྒྱས་དུས་ལས་ཡོལ་མི་མངའ། །ཞེས་སོ། །གསུམ་པ་དོན་བསྡུ་བ། མདོར་ན་སངས་རྒྱས་ཀྱི་སའི་སྤངས་རྟོགས་ཀྱི་ཡོན་ཏན་མངོན་པར་བྱང་ཆུབ་པ་ཞི་བ་ཆོས་སྐུའི་ངང་ན་མཚན་དཔེ་དང་སྟོབས་སོགས་ཇི་སྙེད་ཅིག་བསྟན་པ་འདི་དག་རྣམ་གྲོལ་འབྲས་བུའི་མཆོག་རབ་བླ་ན་མེད་པའི་མེ་ཏོག་རབ་ཏུ་རྒྱས་པའི་བྱང་ཆུབ་དམ་པ་སྟེ། དེ་ཡང་ལོག་ཞིག་ནས་མིན་པར་སྔར་གཞི་དུས་སུ་རང་ལ་ཡོད་པའི་འོད་གསལ་བླ་མས་ངོ་སྤྲོད་པའི་དོན་ཉམས་སུ་བླངས་པས་སྒྲིབ་པ་མཐའ་དག་དང་བྲལ་བའི་འོད་གསལ་མཐར་ཐུག་པའམ་ཡོངས་སུ་རྫོགས་པ་མངོན་དུ་གྱུར་པས། འཇིག་རྟེན་གསུམ་གྱི་མགོན་པོ་ཆོས་ཀྱི་རྗེ་དོན་གཉིས་ལྷུན་གྱིས་གྲུབ་པའི་གོ་འཕང་ཐོབ་པ་ཡིན་ནོ། །ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ལས། སྒོམ་པ་མཐར་ཕྱིན་པ་འབྲས་བུའི་ལེའུ་སྟེ་ཉི་ཤུ་རྩ་གཉིས་པའི་འགྲེལ་པའོ།། །། ༈ གསུམ་པ་མཇུག་ཡོངས་སུ་རྫོགས་པའི་བྱ་བ་ལ། ཚུལ་ཇི་ལྟར་བརྩམས་པ་དང་། དེ་ལྟར་བརྩམས་པའི་དགེ་བ་བསྔོ་བ་གཉིས། དང་པོ་ལ། དགོས་པ་དང་བཅས་པའི་གཞུང་ཇི་ལྟར་བརྩམས་ཚུལ་དང་། རྩོམ་པ་པོ་ཅི་ལྟ་བུས་བརྩམས་ཚུལ་གཉིས། དང་པོ། དེ་ལྟར་མདོ་དང་རྒྱུད་དང་དགོངས་འགྲེལ་དང་བླ་མ་དམ་པའི་མན་ངག་རྣམས་ཀྱི་སྙིང་པོའི་དོན་གཅིག་ཏུ་བསྡུས་ནས། དོན་དེ་ལྟ་བུ་ཕྱི་རབས་སྐལ་བཟང་རྣམས་ཀྱིས་རབ་ཏུ་རྟོགས་པར་བྱ་བའི་ཕྱིར། དང་པོ་ཐོས་པའི་ཤེས་རབ་དང་། དེ་ནས་བསམ་པ་དང་སྒོམ་པའི་རིམ་པ་མ་ནོར་བའི་ལམ་དེ་ཡིས་འཁོར་འདས་སྤང་བླང་དུ་བྱ་བའི་ཚུལ་གྱིས་ལེགས་པར་བཤད་པ་ཡིན་ནོ། །གཉིས་པ། དེ་ལྟ་བུའི་ཚུལ་འདི་ནི་རྩོམ་པ་པོ་ཐེག་པ་མཐའ་དག་གི་དོན་ལ་བློ་གྲོས་ཡངས་པའི་མཁྱེན་རབ་ནམ་མཁའ་ལྟ་བུ་ལ། ཐོས་བསམ་སྒོམ་པའི་ཆུ་འཛིན་ཚད་མེད་པ་རབ་ཏུ་འཁྲིགས་ཏེ། འགྲོ་ཁམས་ལ་དམིགས་པའི་བྱང་ཆུབ་ཀྱི་སེམས་དྲི་མ་མེད་པ་ནི་གནས་སྐབས་ཕན་པ་དང་། མཐར་ཐུག་བདེ་བར་འདོད་པའི་བརྩེ་བའི་གློག་ཕྲེང་རབ་ཏུ་གསལ་ཞིང་། གདུལ་བྱའི་ཁམས་སུ་ཆོས་དབྱིངས་རབ་ཏུ་དགའི་ལེགས་བཤད་ཀྱི་འབྲུག་སྒྲ་སྒྲོགས་པ་ལས་འཐོན་པའི་རིན་ཆེན་ཆོས་ཆར་ལྷ་དང་བཅས་པའི་འཇིག་རྟེན་ན་བསྟན་པ་གསལ་ཞིང་ཡུན་རིང་དུ་གནས་པའི་རྒྱན་དུ་གྱུར་པ་ཞིག་བརྩམས་སོ། །གཉིས་པ་ལ་གཞུང་བརྩམས་པའི་དགེ་བ་བསྔོ་བ་དང་། བསྔོ་བ་དེའི་དོན་བསྡུས་ཏེ་བསྔོ་བ་གཉིས། དང་པོ་ལ། རིགས་ལྔ་ལས་རྣམ་སྣང་གང་ཆེན་མཚོ་ཐོབ་པར་བསྔོ་བ་ནི། བསོད་ནམས་བྱ་བའི་དངོས་པོ་རྣམས་ལས་ཆོས་སྐྱི་སྦྱིན་པ་མཆོག་ཏུ་གྱུར་པས་སྟོན་ཀའི་ཟླ་བ་རྒྱས་པ་དང་འདྲ་བ་ཤིན་ཏུ་དཀར་བ་དེས། འགྲོ་བ་ཀུན་གྱི་ཆོས་དབྱིངས་རྣམ་པར་དག་པའི་ནམ་མཁའ་ལ་ཤིན་ཏུ་མི་གཡོ་བ་སྟེ། རྟག་ཏུ་མཉམ་པར་བཞག་པ་ཟག་མེད་ཀྱི་ཡེ་ཤེས་དང་། མཚན་དཔེའི་རོལ་པས་འོག་མིན་ན་བྱང་སེམས་རྣམས་ཀྱི་དོན་རྟག་ཏུ་མཛད་པའི་ཐུགས་རྗེའི་ལྷ། མགོན་པོ་རྣམས་སྣང་གང་ཆེན་མཚོར་གྱུར་པ་དེ་ཐོབ་པར་ཤོག་ཅིག རྡོ་རྗེ་མི་བསྐྱོད་པར་བསྔོ་བ་ནི། ཆོས་དཀར་རབ་ཏུ་དགེ་བ་དྲི་མ་མེད་པ་བདུད་རྩིའི་ཆུ་ཀླུང་དུ་བཀོད་པ་གང་དེས་སྐྱེ་དགུའི་ཚོགས་འདི་ཀུན་གྱི་ཉོན་མོངས་པའི་རྙོག་མ་དང་བྲལ་ཞིང་མེ་ལོང་ལྟ་བུའི་ཡེ་ཤེས་ཀླུ་དབང་གིས་གནས་སུ་གྱུར་པ་དང་། གཏིང་དཔག་དཀའ་བས་ཟབ་ཅིང་རྒྱ་ཆེའ་ིཡངས་པར་གྱུར་པའི་བརྩེ་བའི་སྤྲིན་གསེར་གྱི་སྙིང་པོ་ཅན་དང་ལྡན་པར་ཤར་ཕྱོགས་མངོན་དགའི་ཞིང་གི་མགོན་པོ་མི་འཁྲུགས་པའི་མཚོ་ཆེན་པོ་དེ་ཐོབ་པར་ཤོག་ཅིག རིན་ཆེན་འབྱུང་གནས་སུ་བསྔོ་བ་ནི། ཡོན་ཏན་གྱི་ཚོགས་རྒྱ་ཆེན་པོ་མངའ་བའི་མཆོག་དགེ་དྲི་མ་མེད་པ་དེ་ཉིད་ཀྱིས་རྒྱུ་ཚོགས་གཉིས་ལས་གྲུབ་པ་ཡོན་ཏན་མ་ལུས་པ་རྫོགས་པའི་གཙོ་བོ། སྲིད་ཞིའི་བདེ་བ་མ་ལུས་པའི་འབྱུང་གནས་ཕན་བདེའི་ཆར་འབབ་པ། མགོན་པོ་རིན་ཆེན་འབྱུང་ལྡན་ཡོན་ཏན་གྱི་འབྱོར་པ་མཐའ་ཡས་པ་དེ་ཐོབ་པར་ཤོག་ཅིག སྣང་བ་མཐའ་ཡས་སུ་བསྔོ་བ་ནི། ཀུན་ཏུ་དགེ་བའི་དགེ་བ་འདི་ཡིས་བདག་དང་མཐའ་ཡས་པའི་འགྲོ་བ་ཀུན། གནས་སྐབས་སུ་དུས་མ་ཡིན་པ་འཆི་བ་དང་། མཐར་ཐུག་འཆི་བདག་ལ་སོགས་པའི་བདུད་བཞི་པོ་རྣམ་པར་བཅོམ་སྟེ། སྐྱེ་རྒ་ན་འཆིའི་མཚོ་ཆེན་ལས་སྒྲོལ་བར་བྱེད་པ་པོ། མགོན་པོ་ཚེ་མཐའ་ཡས་པ་དེ་ཉིད་ཐོབ་པར་ཤོག་ཅིག དོན་ཡོད་གྲུབ་པར་བསྔོ་བ་ནི། ཚིག་དོན་རྒྱན་གྱི་བཀོད་པ་ཕུན་སུམ་ཚོགས་པའི་ཡིད་བཞིན་དགེ་མཆོག་རྒྱ་ཆེན་ལྷུན་མཐོ་བ་འདི་ཡིས། འགྲོ་བ་ཀུན་ཀྱང་སྐྱེ་དགུ་མཐའ་དག་གི་འདོད་དགུའི་རེ་བ་ཡིད་བཞིན་དུ་རྫོགས་པའི་དཔལ་མངའ་བའི་ཕྲིན་ལས་མཐར་ཕྱིན་པ། མཆོག་ཐུན་གྱི་དངོས་གྲུབ་ཆར་བཞིན་དུ་འབེབས་པའི་མགོན་པོ་དོན་ཀུན་གྲུབ་པ་ལས་རབ་རྫོགས་པའི་ཞིང་གི་འདྲེན་པ་དེ་ཐོབ་པར་ཤོག་ཅིག གཉིས་པ་ལ། གཏན་དང་སྐབས་ཀྱི་ཕན་བདེའི་རྒྱུར་བསྔོ་བ་དང་། ཕན་བདེའི་རྒྱུའི་གཙོ་བོ་ཆོས་ཚུལ་རྒྱས་པའི་ཆེད་དུ་བསྔོ་བ་གཉིས། དང་པོ། རིགས་ལྔའི་རྒྱལ་པོར་ཡོངས་སུ་བསྔོས་པ་ལས་བྱུང་བའི་ཡིད་བཞིན་བསྔོ་བ་རྒྱ་ཆེན་པོར་གྱུར་པ་དེས། རང་གཞན་སེམས་ཅན་ཐམས་ཅད་སྲིད་པའི་རྒྱ་མཚོ་ལས་བརྒལ་ནས་དྲུག་པ་རྡོ་རྗེ་འཆང་ཆེན་ཀུན་ཏུ་བཟང་པོའི་གོ་འཕང་ལ་གནས་པས་མཐར་ཐུག་གི་རེ་བ་འགྲུབ་ཅིང་། གནས་སྐབས་སུ་ཚེ་རབས་ཀུན་ཏུ་སྒོ་གསུམ་གྱི་རྩོམ་པ་ཅི་བྱེད་གཞན་ལ་ཕན་ཕྱིར་བརྩོན་ཞིང་། ཆོས་ཀྱི་རྔ་བོ་ཆེ་བསྒྲགས་པས་འཇིག་རྟེན་གསུམ་དུ་གྲགས་ཤིང་མ་རིག་པའི་མུན་པ་ཐམས་ཅད་བདག་ཁོ་ནས་བསལ་བར་ཤོག་ཅིག་ཅེས་སྤྱོད་པ་རླབས་པོ་ཆེར་བསྔོ་བའོ། །གཉིས་པ། བདག་གིས་གཅིག་ཏུ་ཕན་པའི་བློས་སྦྱར་བའི་ཆོས་ཚུལ་འདི་ཡང་ཉི་ཟླའི་དཀྱིལ་འཁོར་བཞིན་དུ་ཕྱོགས་ཀྱི་ཐ་གྲུ་ཀུན་ཏུ་དར་ཞིང་རྒྱས་པས་གྲགས་པའི་འོད་སྟོང་འཕྲོ་བར་གྱུར་ཏེ། འགྲོ་བ་ཀུན་གྱི་བློ་གྲོས་ཀྱི་པདྨོ་རབ་ཏུ་རྒྱས་པར་བྱེད་ཅིང་། སངས་རྒྱས་ཀྱི་བསྟན་པ་རིན་པོ་ཆེ་དར་ཞིང་རྒྱས་པས་འགྲོ་བའི་བདེ་སྐྱིད་མངོན་པར་འཕེལ་བའི་དཔལ་དུ་འབར་བར་ཤོག་ཅིག བཞི་པ་མཇུག་གི་དོན་ལ་མཛད་བྱང་ནི། ཐེག་པ་ཆེན་པོའི་མན་ངག་གི་བསྟན་བཅོས་ཡིད་བཞིན་རིན་པོ་ཆེའི་མཛོད་ཅེས་བྱ་བ། རང་གཞན་གྱི་གྲུབ་པའི་མཐའ་རྒྱ་མཚོའི་ཕ་རོལ་ཏུ་སོན་པའི་དགེ་སློང་རྡོ་རྗེ་འཛིན་པ་ཚུལ་ཁྲིམས་བློ་གྲོས་ཀྱིས་ལེགས་པར་སྦྱར་བ་རྫོགས་སོ། །དགེའོ། །དགེའོ། །དགེའོ།། །། ཞེས་ཐོག་ཐ་བར་གསུམ་ཀུན་ཏུ་དགེ་ལེགས་ཀྱི་སྣང་བ་ཆེན་པོས་མཛེས་པར་བྱས་པའོ། །སྨྲས་པ། ཟབ་དང་རྒྱ་ཆེའི་ཆོས་མཛོད་དག་བྱེད་གཏེར། །ཀུན་མཁྱེན་ཆོས་རྗེའི་མཁྱེན་རབ་ལྷུན་པོ་ཡིས། །བསྲུབས་ལས་ཉེར་ཐོན་ལེགས་བཤད་རི་བོང་ཅན། །མཁས་མང་དབང་ཕྱུག་རལ་པའི་རྩེ་ན་མཛེས། །ཐ་སྙད་ཤེས་བྱའི་ར་བས་ལེགས་བསྐོར་གཞིར། །ཐོས་བསམ་སྒོམ་པའི་རི་གླིང་བཀོད་ལེགས་ཤིང་། །ངེས་དོན་མན་ངག་ཉི་ཟླའི་རྣ་ཆ་ཅན། །ཐུབ་བསྟན་མཛེས་པའི་རྒྱན་མཆོག་འདི་མཚུངས་སུ། །ཆོས་ཉིད་བདེན་པ་ལེགས་གཟིགས་འཕགས་ཆེན་གྱིས། །ཟང་ཟིང་མེད་པར་བརྩེ་བས་རྗེས་འཇུག་ལ། །ལེགས་འདོམས་རབ་འབྱམས་ཤེས་བྱའི་ཆོས་ཚུལ་འབུམ། །གཅིག་བསྡོམས་འདི་འདྲ་གཞན་ན་འདུག་གམ་སོམས། །གཞན་བརྗོད་བྲག་ཆའི་ལད་མོས་ཡིད་ཚིམ་པའི། །དེང་སང་སྐྱེ་བོ་ཕལ་ལ་ཅི་ཆ་ཡང་། །ཟོལ་མེད་སྔ་འགྱུར་བརྒྱུད་པ་འཛིན་རྣམས་ལ། །མན་ངག་རིན་ཆེན་སྲིད་གསུམ་འབྱོར་ལས་ལྷག །དེས་ན་མཁྱེན་བཟང་ཟུར་ཕུད་ལྔ་པའི་གར། །འཇམ་དཔལ་དགྱེས་པའི་ལེགས་བཤད་ཉི་གཞོན་གྱིས། །ཆེས་ཆེར་བཞད་པའི་རྣམ་འགྲེལ་པདྨ་དཀར། །དེང་དུས་སྤྱོད་ཡོད་བཀའ་དྲིན་མི་ཆེའམ། །དེ་སླད་དམ་པའི་བཀའ་དྲིན་གསོ་འདོད་དང་། །སྐལ་མཉམ་གཞན་ལའང་ཕན་འདོད་ལྷག་བསམ་གྱིས། །བདག་བློ་དམན་ཞིང་སྦྱང་བའི་མཐུ་ཆུང་ཡང་། །ཚུལ་འདིར་ཞུགས་ལ་སྤྲོ་བས་བརྩོན་པ་ལགས། །འདི་ན་བླ་མའི་གསུངས་དང་གཞུང་འགྲེལ་ལས། །ཅུང་ཟད་བཏུས་ལས་རང་བཟོ་མེད་རློམ་ཡང་། །རྨོངས་དང་མ་རིག་འཁྲུལ་པས་བསླད་གྱུར་ན། །འཕགས་དང་མཁས་པའི་སྤྱན་སྔར་མི་འཆབ་མཐོལ། །དེ་ལས་བྱུང་བའི་རབ་དགེ་དྲི་མེད་ཀྱིས། །མཁའ་ཁྱབ་འགྲོ་ཀུན་ལམ་གྱི་སྣོད་གྱུར་ནས། །དཀའ་བ་མེད་པར་རྫོགས་སྨིན་སྦྱངས་མཐར་ཕྱིན། །ཁྱབ་བདག་དྲུག་པའི་གོ་འཕང་མངོན་བྱེད་ཤོག །ཆོས་ཚུལ་དྲི་མེད་ནོར་བུའི་རྒྱལ་མཚན་མཆོག །སྲིད་མཐའི་བར་དུ་མི་ཉམས་ཆེས་བརྟན་ཞིང་། །ཕན་བདེའི་གྲུ་ཆར་ཕྱོགས་ཀྱི་མཐར་ཁྱབ་པའི། །གྲགས་པའི་རྔ་སྒྲས་ས་གསུམ་མཛེས་གྱུར་ཅིག །བདག་ཀྱང་སྐྱེ་ཀུན་སྔ་འགྱུར་བརྒྱུད་པ་ཡི། །རིང་ལུགས་དྲི་མེད་མཆོག་དང་མི་འབྲལ་ཞིང་། །ཆོས་བརྒྱད་བྲལ་བའི་འཆད་རྩོད་རྩོམ་གསུམ་གྱིས། །བསྟན་པ་རིན་ཆེན་ཕྱོགས་བརྒྱར་སྤེལ་བྱེད་ཤོག །བཀྲ་ཤིས་གང་ཞིག་གཞི་རྒྱུད་འོད་གསལ་ཁམས། །ལམ་རྒྱུད་ཐོས་བསམ་སྒོམ་པས་ལེགས་སྦྱངས་པས། །འབྲས་རྒྱུད་སྐུ་དང་ཡེ་ཤེས་ཕྲིན་ལས་ཆེ། །མངོན་སྣང་དོན་གཉིས་འབྱོར་པས་མཛེས་གྱུར་ཅིག །ཅེས་པའང་ཀུན་མཁྱེན་བླ་མ་འཇམ་དཔལ་དགྱེས་པའི་ཞལ་སྔ་ནས་སྩལ་པའི་ས་བཅད་དང་རྩ་མཆན་གཉིས་རྩ་བར་བཟུང་རྗེ་དེ་ཉིད་ཀྱིས་མཛད་པའི་དཀའ་འགྲེལ་དང་། གཞུང་གི་འགྲེལ་ཆེན་ལས་ཀྱང་ཚིག་རེ་གཉིས་བླང་སྟེ། འཇམ་མགོན་རྣམ་གསུམ་གྱི་ཞབས་རྡུལ་ལ་སྤྱི་བོས་རེག་པའི་སྙོམ་ལས་པ་འཇམ་དབྱངས་བློ་གྲོས་རྒྱ་མཚོས་རང་ལོ་ང་གསུམ་པ་ས་ཟླའི་ཚེས་ལ་དབང་ལུང་ཕྲན་ཚེགས་འཆད་སྤེལ་གྱི་ཞར་ལ་རང་གནས་བདེ་མཆོག་བཀྲ་ཤིས་དགེ་འཕེལ་གྱི་དབེན་སྤྱིལ་དུ་བྲིས་པའི་ཡི་གེ་པ་ནི་བསླབ་གསུམ་ལྡན་པ་ཨ་ཌི་ཡཱ་ནས་མཛད་པ་སྟེ། འདིས་ཀྱང་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བའི་རྒྱུར་གྱུར་ཅིག། །།
སྔ་འགྱུར་ཐེག་དགུའི་ཚོགས་བཤད་མདོར་བསྡུས་ནོར་བུའི་ཏམྦུ་ར།
སྔ་འགྱུར་ཐེག་དགུའི་ཚོགས་བཤད་མདོར་བསྡུས་ནོར་བུའི་ཏམྦུ་ར།
༄༅། །པྲཱཀབརྟིཏིཡཱནནབསྱསཾགྷདྷེཤནསཾཀྵིབྟམཎིཀསྱཏམཱུརནཱམབིཧརཏིསྨ།
༄༅། །སྔ་འགྱུར་ཐེག་དགུའི་ཚོགས་བཤད་མདོར་བསྡུས་ནོར་བུའི་ཏམྦུ་ར་ཞེས་བྱ་བ་བཞུགས་སོ། །
ཤིན་ཏུ་ཞི་བ་དམ་པའི་དབྱིངས་ལས་བརྩེ་ཆེན་སྙིང་རྗེའི་སྤྲིན་བཀོད་དེ། །མཐའ་ཀླས་གདུལ་བྱའི་མོས་པའི་རྗེས་འགྲོ་སྣ་ཚོགས་སྤྲུལ་སྐུའི་རྣམ་རོལ་གྱིས། །ལམ་བདེན་བདུད་རྩིའི་གྲུ་ཆར་འབེབས་པས་རིགས་ཅན་གསུམ་གྱི་འགྲོ་ཀུན་ལ། །ཐར་པ་མཆོག་གི་ངལ་འཚོ་སྦྱིན་མཛད་ཤཱཀྱའི་གཙོ་བོས་དགེ་ལེགས་མཛོད། །གང་མཚན་ངོ་མཚར་ལྷ་ཡི་རྔ་སྒྲ་ཡིས། །བག་མེད་སྲིད་པའི་འཇིགས་ལས་དབུགས་འབྱིན་ཞིང་། །རྣམ་གྲོལ་ཞི་བའི་དགའ་སྟོན་སྦྱིན་མཛད་པ། །དཀོན་མཆོག་རིན་ཆེན་གསུམ་གྱིས་ཤིས་པ་རྩོལ། །དགེ་ལེགས་བྱེ་བའི་དཔལ་གྱིས་འབྱོར་པའི་གཞི། །དྲི་མེད་ཐུབ་བསྟན་ཡིད་བཞིན་དབང་གི་རྒྱལ། །གངས་ལྗོངས་དད་བསོད་རྒྱལ་མཚན་རྩེ་མོ་རུ། །འགོད་མཛད་མཁན་སློབ་ཆོས་གསུམ་སྤྱི་བོས་མཆོད། །སྐད་གཉིས་སྨྲ་བ་བཻ་རོ་སྐ་ཅོག་ཞང་། །རྣམ་གསུམ་ཡོ་གའི་སྲོག་འཛིན་གཉགས་གནུབས་ཟུར། །ལུང་རིགས་བྱེ་བའི་འབྱུང་གནས་རོང་ཀློང་སོགས། །སྔ་འགྱུར་རིག་འཛིན་བརྒྱུད་པར་བཅས་ཀུན་རྒྱལ། །ཁྱད་པར་ཆེར་སྙིགས་ལྔ་བརྒྱའི་ཐ་མ་རུ། །ངེས་གསང་བསྟན་པའི་རྒྱལ་མཚན་སྲིད་མཐའ་རུ། །སྒྲེང་མཛད་ཆོས་ཀྱི་རྒྱལ་པོ་སྨིན་གླིང་པ། །ཡབ་སྲས་བརྒྱུད་པའི་བཀའ་དྲིན་སུ་ཡིས་དཔོག །ངོ་མཚར་བཀའ་བབས་བདུན་ལྡན་མདོ་སྔགས་གླིང་། །རྒྱལ་བསྔགས་མཛོད་ལྔའི་ཤིང་རྟ་གུ་ཎའི་ཞབས། །ལུང་རིགས་སེང་གེའི་སྒྲ་སྒྲོགས་ཨ་ཛི་ཏ། །རྩོད་པའི་དུས་འདིར་རྒྱལ་བ་གཉིས་པ་ཡིན། །རྒྱལ་བསྟན་ཡོངས་སུ་རྫོགས་པའི་ལྷུན་པོའི་རྩེར། །ལུང་རིགས་རྩེ་བརྒྱ་འཆང་བའི་ལྷ་དབང་ཚོགས། །བསྙིང་བྲལ་བཤད་སྒྲུབ་དགའ་སྟོན་དར་བའི་དཔལ། །དེང་དུས་སྔ་འགྱུར་མཐོ་རིས་གྲོང་ན་མཛེས། །དེ་ཕྱིར་བདག་བློ་ཤེར་བརྩོན་དམན་ན་ཡང་། །དམ་པའི་དྲིན་གྱིས་བསྐྱངས་པའི་བཀའ་དྲིན་དཔལ། །རྗེས་སུ་འཚོ་སླད་ལེགས་བཤད་མཆོད་པའི་སྤྲིན། །ཅུང་ཟད་འབུལ་བར་སྤྲོ་ལ་སྐབས་སྩོལ་ཅིག །ཅེས་ཡུལ་དམ་པ་ལ་བསྔགས་ཤིང་ཤིས་པར་བརྗོད་པའི་ཚིགས་སུ་བཅད་པའི་དབྱངས་ཀྱི་དགེ་ལེགས་སུ་བྱ་བས་མདུན་བསུས་ནས། དེང་གི་ཆར་ལྷ་དང་བཅས་པའི་འགྲོ་བ་མཐའ་དག་གི་གཙུག་གི་ནོར་བུས་ཞབས་ཀྱི་པདྨ་ལ་ཡང་དང་ཡང་དུ་འདུད་ཅིང་། རྨད་བྱུང་འཁོར་ལོ་གསུམ་གྱི་ཕྲིན་ལས་ཀྱིས་རྒྱལ་བསྟན་རིན་པོ་ཆེ་སྤྱི་དང་། ཁྱད་པར་རང་ལུགས་གསང་ཆེན་སྔ་འགྱུར་གྱི་རིང་ལུགས་དྲི་མ་མེད་པ་ཉིད་འཛིན་སྐྱོང་སྤེལ་གསུམ་ལ་འགྲན་ཟླ་དང་བྲལ་བའི་མཐུ་ཐོབ་པ། དུས་གསུམ་རྒྱལ་བའི་སྤྱི་གཟུགས་མཆོག་གི་སྤྲུལ་པའི་སྐུ་རིན་པོ་ཆེ་དང་། མཁན་སློབ་རིག་པ་འཛིན་པ་ལུང་རིགས་སྨྲ་བའི་ཁྱུ་མཆོག་ཆེན་པོ་རྣམས་ཀྱི་དབུ་མཛད། ལམ་བསླབ་པ་གསུམ་གྱིས་ཐུགས་རྒྱུད་ཡོངས་སུ་དུལ་ཞིང་། ལུང་སྡེ་སྣོད་གསུམ་གྱི་འཆད་ཉན་ལ་རྟག་པར་ཐུགས་གཞོལ་བའི་འཕགས་ཚོགས་གསེར་རིའི་ཕྲེང་བཟང་ཚར་དུ་དངར་བའི་སྙན་ལམ་དུ། ཇི་སྐད་དུ། མཁས་མཆོག་དཔའ་བོས། ཡ་རབས་རྣམས་དང་འཕྲད་ན་སྐྱེས་ཀྱི་མཆོག །ཚོགས་ཀྱི་ནང་དུ་མ ཁས་པ་དགའ་བྱེད་ཡིན། །ཞེས་གསུངས་པ་ལྟར། སྐུ་གསུམ་སྟོན་པའི་རྣམ་གཞག་དང་འབྲེལ་བར་ཕུན་སུམ་ཚོགས་པ་ལྔས་ཁོག་ཕུབ་སྟེ། སྔ་འགྱུར་ཐེག་པ་རིམ་དགུའི་ལྟ་གྲུབ་ཀྱི་དབྱེ་བ་མདོ་ཙམ་ཞིག་ཞུ་ན། ཐོག་མར་བསྟན་པ་རིན་པོ་ཆེ་གང་ལས་བྱུང་བའི་ཁུངས་སམ་བརྒྱུད་པའི་ཆེ་བ་ཕུན་སུམ་ཚོགས་པ་ལྔ་བཤད་པ་ལ་གསུམ་ལས། དང་པོ་ཆོས་སྐུའི་ཕུན་སུམ་ཚོགས་པ་ལྔ་ནི། གནས་ཕུན་སུམ་ཚོགས་པ་འོག་མིན་ཆོས་དབྱིངས་སྤྲོས་པ་དང་བྲལ་བར། སྟོན་པ་ཕུན་སུམ་ཚོགས་པ་དཔལ་ཀུན་ཏུ་བཟང་པོ་ཉིད་གདོད་ནས་མངོན་པར་བྱང་ཆུབ་པའི་རང་བཞིན་དུ་བཞུགས་ནས། འཁོར་ཕུན་སུམ་ཚོགས་པ་ཡེ་ཤེས་རྒྱ་མཚོའི་ཚོགས་ལ། ཆོས་ཕུན་སུམ་ཚོགས་པ་རྫོགས་པ་ཆེན་པོ་སྒྲ་ཚིག་བྱ་རྩོལ་ལས་འདས་པ། དུས་ཕུན་སུམ་ཚོགས་པ་དུས་བཞི་མཉམ་པ་ཉིད་ཀྱི་ངང་དུ་གསུངས། གཉིས་པ་ལོངས་སྐུའི་ཕུན་སུམ་ཚོགས་པ་ལྔ་ནི། གནས་ཕུན་སུམ་ཚོགས་པ་རང་སྣང་སྟུག་པོ་བཀོད་པར། སྟོན་པ་ཕུན་སུམ་ཚོགས་པ་དྲུག་པ་རྡོ་རྗེ་འཆང་ཆེན་པོ་ཉིད་རང་རང་གི་རིགས་ཀྱི་གཙོ་བོར་སྣང་བས། འཁོར་ཕུན་སུམ་ཚོགས་པ་རང་ལས་མི་གཞན་པ་རིགས་ལྔའི་སངས་རྒྱས་ཞི་བ་དང་ཁྲོ་བོའི་རྣམ་རོལ་ཚད་མེད་པར་སྣང་བ་ལ། ཆོས་ཕུན་སུམ་ཚོགས་པ་རིག་པ་འཛིན་པའི་སྡེ་སྣོད་བསམ་གྱིས་མི་ཁྱབ་པ་ནང་རྒྱུད་སྡེ་གསུམ་གཙོ་བོར་གྱུར་པ། དུས་ཕུན་སུམ་ཚོགས་པ་རྟག་པ་རྒྱུན་གྱི་འཁོར་ལོར་གསུངས་པ་ཡིན་ལ། གསུམ་པ་སྤྲུལ་སྐུའི་ཕུན་སུམ་ཚོགས་པ་ནི་ཐེག་པ་ཆེ་ཆུང་དང་། མདོ་སྔགས་གསར་སྙིང་གི་དགོངས་པས་འཆད་ཚུལ་ཐ་དད་པ་མང་ན་ཡང་། རང་ལུགས་ཐུན་མིན་རྫོགས་པ་ཆེན་པོའི་དབང་དུ་བྱས་ན། སྟོན་པ་རྡོ་རྗེ་འཆང་ཉིད་ལོངས་སྤྱོད་རྫོགས་པའི་སྐུ་ལས་མ་གཡོས་བཞིན་དུ། འགྲོ་བ་རྣམས་ཀྱི་ཕུང་པོ་ལྔ་གནས་སུ་དག་པར་བྱ་བའི་ཕྱིར། ཕུན་སུམ་ཚོགས་པ་ལྔའི་ཚུལ་གྱིས་སྤྲུལ་པའི་རྣམ་རོལ་ལན་བཅུ་གཉིས་སུ་སྟོན་པར་མཛད་དེ། དང་པོ། ཡུལ་དགའ་ལྡན་བརྩེགས་པར། གནས་ཕུམ་སུམ་ཚོགས་པ་མེ་ཏོག་པདྨའི་ལྟེ་བར། སྟོན་པ་ཕུན་སུམ་ཚོགས་པ་ཁྱེའུ་སྣང་བ་དམ་པ་བསམ་གྱིས་མི་ཁྱབ་པ་ཉིད་བྱོན་ཏེ། བསྐལ་པ་བཟང་པོ་འདི་ལ་སངས་རྒྱས་སྟོང་དང་། སེམས་དཔའ་གཉིས་ཀྱིས་འདུལ་བའི་མཚོན་བྱེད་དུ་འོད་ཀྱིས་སྣང་བའི་སངས་རྒྱས་སྟོང་རྩ་གཉིས་ཀྱིས་བསྐོར་བའི་འཁོར་ཕུན་ཚོགས་པ་ལ། ཆོས་ཕུན་སུམ་ཚོགས་པ་བསྟན་པ་ཀུན་གྱི་རྩ་བ་སྒྲ་ཐལ་འགྱུར་རྩ་བའི་རྒྱུད། དུས་ཕུན་སུམ་ཚོགས་པ་ཚེ་ལོ་དཔག་ཏུ་མེད་པའི་དུས་སུ་གསུངས་ཏེ། ལྷའི་བུ་དགའ་བྱེད་དབང་ཕྱུག་དང་། ཉི་མ་རབ་ཏུ་སྣང་བྱེད་གཉིས་ཀྱིས་བསྡུས་སོ། །གཉིས་པ། གནས་ཕུན་སུམ་ཚོགས་པ་འཇིག་རྟེན་མི་མཇེད་དུ། སྟོན་པ་ཕུན་སུམ་ཚོགས་པ་ཁྱེའུ་མི་འཁྲུགས་པ་ཉིད་འོད་ལྔའི་སྒོ་ང་ལས་འཁྲུངས་ཏེ། འཁོར་ཕུན་སུམ་ཚོགས་པ་མཁའ་འགྲོ་མ་འབུམ་ཕྲག་གཉིས་ལ། ཆོས་ཕུན་སུམ་ཚོགས་པ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱུད་ལྔ། དུས་ཕུན་སུམ་ཚོགས་པ་ཚེ་ལོ་བྱེ་བ་ཐུབ་པའི་དུས་སུ་གསུངས། གསུམ་པ། གནས་ཕུན་སུམ་ཚོགས་པ་དྲོད་གཤེར་འདུས་པ་འོད་ཀྱི་སྤུངས་པར། སྟོན་པ་ཕུན་སུམ་ཚོགས་པ་འཇམ་དཔལ་འཇིག་པ་སྐྱོབ་པའི་ཡིད་ཅེས་བྱ་བས། འཁོར་ཕུན་སུམ་ཚོགས་པ་བྱང་ཆུབ་སེམས་དཔའ་འབུམ་ཕྲག་དྲུག་ལ། ཆོས་ཕུན་ཚོགས་པ་འཁོར་བ་དོང་སྤྲུགས། རྨ་བྱ་འཇིང་བསྣོལ། འབྱུང་བཞི་ཟད་པའི་རྒྱུད་སོགས། དུས་ཕུན་སུམ་ཚོགས་པ་ཚེ་ལོ་བདུན་པའི་དུས་སུ་གསུངས། བཞི་པ། གནས་ཕུན་སུམ་ཚོགས་པ་ཆགས་འབྱུང་མངལ་དུ་སྣང་བར། སྟོན་པ་ཕུན་སུམ་ཚོགས་པ་གཞོན་ནུ་རོལ་པ་རྣམ་པར་བརྩེ་བས། འཁོར་ཕུན་སུམ་ཚོགས་པ་གནོད་སྦྱིན་དང་བྲག་སྲིན་སྟོང་ཕྲག་གཅིག་ལ། ཆོས་ཕུན་སུམ་ཚོགས་པ་སེམས་སྡེ་རྩ་བའི་རྒྱུད་ལྔ། ཡན་ལག་གི་རྒྱུད་དྲུག་སྟེ་བཅུ་གཅིག དུས་ཕུན་སུམ་ཚོགས་པ་ཚེ་ལོ་བརྒྱད་ཁྲི་བའི་དུས་སུ་གསུངས། ལྔ་པ། གནས་ཕུན་སུམ་ཚོགས་པ་འཚོ་བྱེད་གཞོན་ནུའི་ལྡུམ་རར། སྟོན་པ་ཕུན་སུམ་ཚོགས་པ་དྲུག་པ་རྡོ་རྗེ་འཆང་གིས། འཁོར་ཕུན་སུམ་ཚོགས་པ་སངས་རྒྱས་རབ་བདུན་ལ། ཆོས་ཕུན་སུམ་ཚོགས་པ་ཕ་རོལ་དུ་ཕྱིན་པ་དྲུག དུས་ཕུན་སུམ་ཚོགས་པ་ཚེ་ལོ་བདུན་ཁྲི་བའི་དུས་སུ་གསུངས། དྲུག་པ། གནས་ཕུན་སུམ་ཚོགས་པའི་རིརབ་ཀྱི་བྱང་ཕྱོགས་དུར་ཁྲོད་མེ་རི་འབར་བར། སྟོན་པ་ཕུན་སུམ་ཚོགས་པ་གཞོན་ནུ་དཔའ་བོ་སྟོབས་ལྡན་ཆེན་པོ་ལ། འཁོར་ཕུན་སུམ་ཚོགས་པ་བྱང་ཆུབ་སེམས་དཔའ་སྤྲིན་གྱི་ཤུགས་ཅན་བདུན་དང་། མཁའ་འགྲོ་མ་དང་ལྷ་ཀླུ་ལ་སོགས་པ་དཔག་ཏུ་མེད་པར། ཆོས་ཕུན་སུམ་ཚོགས་པ་རིག་པ་རང་ཤར་ཆེན་པོའི་རྒྱུད་ལ་སོགས་པ་མངོན་སུམ་འོད་གསལ་གྱི་རྒྱུད་རྣམས་དང་། གཞན་ཡང་དཔག་ཏུ་མེད་པ། དུས་ཕུན་སུམ་ཚོགས་པ་ཚེ་ལོ་དྲུག་ཁྲི་པའི་དུས་སུ་གསུངས། བདུན་པ། གནས་ཕུན་སུམ་ཚོགས་པ་སྲིན་པོའི་ཡུལ་རུ་ལུའི་སྒྲ་དང་ལྡན་པའི་བྲག་ཕུག་ཏུ། སྟོན་པ་ཕུན་སུམ་ཚོགས་པ་དྲང་སྲོང་ཁྲོས་པའི་རྒྱལ་པོས། འཁོར་ཕུན་སུམ་ཚོགས་པ་སྲིན་པོ་བྱེ་བ་གཅིག་ལ། ཆོས་ཕུན་སུམ་ཚོགས་པ་རག་པ་འདུས་པའི་རྒྱུད་བཅུ་སོགས། དུས་ཕུན་སུམ་ཚོགས་པ་ཚེ་ལོ་ཁྲི་པའི་དུས་སུ་གསུངས། བརྒྱད་པ། གནས་ཕུན་སུམ་ཚོགས་པ་བྱ་རྒོད་སྤུངས་པར། སྟོན་པ་ཕུན་སུམ་ཚོགས་པ་གསེར་འོད་དམ་པས། འཁོར་ཕུན་སུམ་ཚོགས་པ་ཉན་ཐོས་གྲངས་མེད་པ་ལ། ཆོས་ཕུན་སུམ་ཚོགས་པ་འདུལ་བ་ཁྲི་ཕྲག་དཔག་ཏུ་མེད་པ། དུས་ཕུན་སུམ་ཚོགས་པ་ཚེ་ལོ་ལྔ་སྟོང་པའི་དུས་སུ་གསུངས། དགུ་པ། གནས་ཕུན་སུམ་ཚོགས་པ་སོག་པོ་གཡུ་ཡི་སྨིན་མ་ཅན་གྱི་ཡུལ་བྱང་ཆུབ་ཀྱི་ཤིང་དྲུང་དུ། སྟོན་པ་ཕུན་སུམ་ཚོགས་པ་བརྩེ་བས་རོལ་པའི་བློ་གྲོས་ཀྱིས། འཁོར་ཕུན་སུམ་ཚོགས་པ་བྱང་སེམས་དཔག་ཏུ་མེད་པ་ལ། ཆོས་ཕུན་སུམ་ཚོགས་པ་འཕྲ་རྒྱུད་བདུན་ལ་སོགས་པ་རྣམས། དུས་ཕུན་གསུམ་ཚོགས་པ་ཚེ་ལོ་སྟོང་གི་དུས་སུ་གསུངས། བཅུ་པ། གནས་ཕུན་སུམ་ཚོགས་པ་བྱ་རྒོད་སྤུངས་པར། སྟོན་པ་ཕུན་སུམ་ཚོགས་པ་འོད་སྲུང་བགྲེས་པོས། འཁོར་ཕུན་སུམ་ཚོགས་པ་སྐར་མ་འོད་བཟང་ལ་སོགས་པ་བདུན་ལ། ཆོས་ཕུན་སུམ་ཚོགས་པ་མདོ་སྡེ་དང་། ཀྲི་ཡ་དང་། ལུང་ཨ་ནུ་ཡོ་ག་ལ་སོགས་པ་ཁྲི་ཕྲག་བརྒྱད། དུས་ཕུན་སུམ་ཚོགས་པ་ཚེ་ལོ་ལྔ་བརྒྱ་པའི་དུས་སུ་གསུངས། བཅུ་གཅིག་པ། གནས་ཕུན་སུམ་ཚོགས་པ་རྡོ་རྗེའི་གདན་དུ། སྟོན་པ་ཕུན་སུམ་ཚོགས་པ་མངོན་རྫོགས་རྒྱལ་པོས། འཁོར་ཕུན་སུམ་ཚོགས་པ་རིགས་གསུམ་མགོན་པོ་ལ། ཆོས་ཕུན་སུམ་ཚོགས་པ་ངེས་པ་དོན་གྱི་ཐེག་པ་འབའ་ཞིག དུས་ཕུན་སུམ་ཚོགས་པ་ཚེ་ལོ་སུམ་བརྒྱ་པའི་དུས་སུ་གསུངས། བཅུ་གཉིས་པ་ནི། གནས་ཕུན་སུམ་ཚོགས་པ་ཝཱ་རཱ་ཎ་སཱི་ལ་སོགས་པར། སྟོན་པ་ཕུན་སུམ་ཚོགས་པ་ཤཱཀྱ་ཐུབ་པས། ཆོས་ཕུན་སུམ་ཚོགས་པ་སྡེ་སྣོད་གསུམ་ལ་སོགས་པ། འཁོར་ཕུན་སུམ་ཚོགས་པ་ཉན་ཐོས་དང་། བྱང་ཆུབ་སེམས་དཔའ་དང་། ལྷ་དང་ཀླུ་ལ་སོགས་པ་དཔག་ཏུ་མེད་པར། དུས་ཕུན་སུམ་ཚོགས་པ་ཚེ་ལོ་བརྒྱ་ཐུབ་པའི་དུས་སུ་གསུངས་སོ། །དེ་ལས་ཁྱད་པར་ད་ལྟའི་དུས་སུ་འབྲས་བུ་རྡོ་རྗེ་ཐེག་པ་བྱོན་ཚུལ་ནི། དགོངས་པ་ལུང་སྟོན་ལས། རྒྱུ་ལ་མོས་པར་རྒྱུ་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། །ཞེས་ལུང་བསྟན་པ་ལྟར། སྟོན་པ་མཆོག་གི་སྤྲུལ་པའི་སྐུ་ཐུབ་པ་ཆེན་པོ་ཉིད་འཇིག་རྟེན་འདི་ན་མི་སྣང་ནས་ལོ་ཉི་ཤུ་རྩ་བརྒྱད་ན། རི་མ་ལ་ཡ་ཡི་རྩེ་མོར། སྟོན་པ་གསང་བའི་བདག་པོས། འཁོར་དམ་པའི་རིགས་ཅན་དྲྭ་མ་ལྔ་སོགས་ལ། སྔར་འོག་མིན་སོགས་སུ་གསུངས་པའི་གསང་བའི་ཏནྟྲ་རྣམས་སླར་ཡང་བཟླས་ཏེ་གསུངས་པ། སྐལ་ལྡན་རྒྱལ་པོ་ཛཿསོགས་རིག་པ་འཛིན་པ་རྣམས་ལས་བརྒྱུད་དེ་མི་ཡུལ་དུ་དར་བར་མཛད་པ་དང་། སྒྲུབ་སྡེ་རྣམས་མཁའ་འགྲོ་མ་ལས་ཀྱི་དབང་མོ་ཆེས་མཆོད་རྟེན་བདེ་བྱེད་བརྩེགས་པར་སྦས་པ་གྲུབ་པ་བརྙེས་པའི་སློབ་དཔོན་རྣམ་བརྒྱད་ཀྱིས་སྤྱན་དྲངས་པ་དང་། རྫོགས་པ་ཆེན་པོའ་ིརྒྱུད་འབུམ་ཕྲག་དྲུག་ཅུ་རྩ་བཞི་སྤྲུལ་པའི་སྐུ་དགའ་རབ་རྡོ་རྗེ་སྟོན་པ་རྡོ་རྗེ་སེམས་དཔའ་ལས་དངོས་སུ་གསན་ཅིང་སྤེལ་བར་མཛད་པས་མཚོན། མདོ་སྒྱུ་སེམས་གསུམ་སོ་སོའི་བབས་ལུགས་དང་བརྒྱུད་པའི་ལོ་རྒྱུས་ཁྱད་འཕགས་ངོ་མཚར་ཅན་མཐའ་ཡས་པ་ཞུ་རྒྱུ་ཡོད་མོད། ད་རེས་ཀྱི་སྐབས་སུ་དེ་ཙམ་ལགས། དེ་ལས་བྱུང་བའི་བསྟན་པ་དམ་པའི་ཆོས་ཀྱི་རྣམ་པར་གཞག་པ་ལའང་། སྤྱིར་ལངྐར་གཤེགས་པ་ལས། ཇི་སྲིད་སེམས་ནི་འཇུག་པའི་བར། །ཐེག་པའི་མཐའ་ལ་ཐུག་པ་མེད། །ཅེས་གསུངས་པ་ལྟར། གདུལ་བྱ་སེམས་ཅན་གྱི་ཁམས་དབང་བསམ་པ་དང་མཐུན་པར་ཆོས་སྒོ་བསམ་གྱིས་མི་ཁྱབ་པ་ཞིག་གསུངས་པས་འདི་ཙམ་ཞེས་སུས་ཀྱང་ཚད་བཟུང་དུ་མེད་མོད་ད་ལམ་གྱི་སྐབས་སུ་སྔ་འགྱུར་རང་སྐད་ཐུན་མིན་སྤྱི་མདོ་དགོངས་པ་འདུས་པ་ལས། ལངྐའི་བདག་པོ་གཞན་ཡང་གང་། །དོན་དམ་ངེས་པའི་ཐེག་པ་ནི། །གསུམ་དུ་ངེས་པར་བསྟན་པ་སྟེ། །ཀུན་འབྱུང་འདྲེན་དང་དཀའ་ཐུབ་རིག །དབང་བསྒྱུར་ཐབས་ཀྱི་ཐེག་པའོ། །ཞེས་གསུངས་པར་ལྟར། དེ་རེ་རེ་ལའང་དབང་པོའི་ཁྱད་པར་གྱིས་གསུམ་གསུམ་གྱིས་དབྱེ་བའི་ཐེག་པ་རིམ་པ་དགུའི་རྣམ་བཞག་མདོ་ཙམ་ཞུ་བ་ལ། སྤྱིར་ཡཱ་ན་ཞེས་པའི་སྒྲ་ལས་ཁྱོགས་སམ་བཞོན་པ་ལ་འཇུག་སྟེ། རང་ལམ་གང་ལ་ཞུགས་ཀྱང་དེའི་འབྲས་བུ་ལ་སྦྱོར་ནུས་པའི་དོན་གྱིས་ནི་ཐེག་པ་ཞེས་བྱ། དེ་ལའང་ནང་གི་དབྱེ་བ། ཐབས་གང་གིས་མཐར་ཕྱིན་པར་བ སྒྲུབས་པས་འབྲས་བུ་འཇིག་རྟེན་ལས་འཕགས་མ་ནུས་པ་དང་ནུས་པའི་ཁྱད་པར་ལས་འཇིག་རྟེན་པ་དང་། འཇིག་རྟེན་ལས་འདས་པའི་ཐེག་པ་གཉིས་ཏེ། རང་ཤར་ལས། ཀྱེ་ཧོ་གསང་བའི་རྡོ་རྗེ་འཛིན། །ང་ཡི་ཐེག་པ་བསམ་ཡས་ཀྱང་། །བཤད་ལུགས་རྣམ་པ་གཉིས་སུ་འདུས། །འཁོར་བ་དང་ནི་མྱ་ངན་འདས། །ཞེས་སོ། །དང་པོ་འཇིག་རྟེན་པའི་ཐེག་པ་ལ། སོར་བཞག་ལྷ་མིའི་ཐེག་པ་དང་། འཕྲོས་དོན་མ་རྟོགས་ལོག་རྟོགས་ཀྱི་ལྟ་བ་བཤད་པ་གཉིས་ལས། དང་པོ་ལ་གསུམ། ངོ་བོ། ངེས་ཚིགདབྱེ་བའོ། །དང་པོ་ངོ་བོ་ནི། ལྷ་མིའི་བདེ་བ་མཐར་ཐུག་གི་བར་དུ་འགོད་པའི་ཐབས་གང་ཞིག འཁོར་བ་ལས་འཕགས་མི་ནུས་པའོ། །གཉིས་པ་ངེས་ཚིག་ནི། ལྷ་མིའི་བདེ་འབྲས་སྤྱི་དང་ཁྱད་པར་ཁམས་གོང་མ་གཉིས་ཙམ་ལ་སྦྱོར་ཞིང་འགོད་ནུས་པའི་ཕྱིར་ཐེག་པའོ། །གསུམ་པ་དབྱེ་བ་ལ་དྲུག་ལས། འཇུག་པའི་སྒོ་ནི། ངན་སོང་གསུམ་མམ་ས་འོག་མ་རྣམས་ནི་སྡུག་བསྔལ་བ་དང་མ་ཞི་བའི་རང་བཞིན་ཅན་དུ་མཐོང་ནས། དེར་སྐྱེ་བའི་རྒྱུ་མི་དགེ་བའི་ལས་རྣམས་དང་། ས་འོག་མའི་རང་སའི་སྐྱོན་རྣམས་སྤོང་བའི་སྒོ་ནས་འཇུགལྟ་བ་ནི། འཇིག་རྟེན་ཕ་རོལ་ཡོད་པ་དང་། ལས་རྒྱུ་འབྲས་མི་བསླུ་བའི་ཚུལ་ལ་ཡིད་ཆེས་པ་སྟེ་འཇིག་རྟེན་པའི་ཡང་དག་པའི་ལྟ་བ་ཞེས་བྱ། ཚུལ་ཁྲིམས་ནི། ལུས་ངག་ཡིད་གསུམ་གྱི་སྒོ་ནས་མི་དགེ་བ་བཅུ་པོ་སྤོང་བའི་ཚུམ་ཁྲིམས་ཏེ་དུས་དང་གཏན་ཁྲིམས་ཅི་རིགས་པ། སྒོམ་པ་ནི། སྤྱི་རང་གི་འབྲས་བུ་འབྱིན་ནུས་ཀྱི་བར་དུ་གོམས་པར་བྱེད་པ་སྟེ། བྱེ་བྲག་བསམ་གཏན་བཞི་དང་། གཟུགས་མེད་པ་བཞིའི་སྙོམས་འཇུག་ལ་གོམས་པར་བྱེད་པའོ། །སྤྱོད་པ་ནི། མི་དགེ་བ་བཅུའི་ལྡོག་ཕྱོགས་ཟག་བཅས་ཀྱི་དགེ་བ་བཅུ་དང་བསྙེན་གནས་བསྲུང་བ། བྱམས་སོགས་ཚད་མེད་བཞི་ལ་སྤྱོད་པའོ། །འབྲས་བུ་ནི། དགེ་བའི་ལས་སྟོབས་ཆེ་ཆུང་གིས་གླིང་བཞིའི་མི་དང་འདོད་ལྷ་དྲུག་སྟེ། མཐོ་རིས་ཀྱི་གནས་བཅུ་དང་། ཁྱད་པར་བསམ་གཟུགས་ཀྱི་ཏིང་འཛིན་གང་ལ་གོམས་པ་དེ་སྟོབས་ཆེ་ཆུང་གིས་གཟུགས་དང་གཟུགས་མེད་ཀྱི་གནས་རྣམས་ཏེ། སྒྱུ་འཕྲུལ་རྒྱས་པ་ལས། དགེ་བཅུ་སྤྱད་ཅིང་མི་དགེ་སྤོང་བྱེད་པ། །འདོད་ཁམས་ལྷ་དང་མི་རུ་སྐྱེ་བའི་རྒྱུ། །ཚད་མེད་བཞི་སྤྱོད་མི་གཡོ་སྒོམ་བྱེད་པ། །ཚངས་གནས་ལ་སོགས་སྐྱེ་བའི་རྒྱུ་ཡིན་ནོ། །ཞེས་སོ། །འདི་ལ་ལྷ་མིའི་ཐེག་པ་དང་ཚངས་པའི་ཐེག་པ་ཞེས་གཉིས་སུ་དབྱེ་བའང་ཡོད་དོ། །གཉིས་པ་ནི། མན་ངག་ལྟ་བའི་ཕྲེང་བར་བཞི་གསུངས་ཏེ། དེ་ལ་ཕྱལ་བ་ནི། ཆོས་ཐམས་ཅད་རྒྱུ་དང་འབྲས་བུ་ཡོད་མེད་དུ་མ་རྟོགས་ཏེ་ཀུན་ཏུ་རྨོངས་པའོ། །རྒྱང་འཕེན་ནི། ཚེ་སྔ་ཕྱི་ཡོད་མེད་དུ་མ་རྟོགས་ཤིང་། ཚེ་གཅིག་ལ་བཙན་ཕྱུག་དང་མཐུ་སྟོབས་སྒྲུབ་པ་སྟེ། འཇིག་རྟེན་པའི་གསང་ཚིག་ལ་བརྟེན་པའོ། །མུར་ཐུག་པ་ནི། ཆོས་ཐམས་ཅད་ལ་རྒྱུ་དང་འབྲས་བུ་མེད་པ་སྟེ། ཚེ་གཅིག་ལ་སྐྱེས་པའི་ཆོས་ཐམས་ཅད་གློ་བུར་དུ་སྐྱེས་ནས་མཐའ་ཆད་པར་ལྟ་བའོ། །མུ་སྟེགས་པ་ནི། ཆོས་ཐམས་ཅད་ལ་ཀུན་ཏུ་བརྟགས་པས་བདག་རྟག་པ་ཞིག་ཡོད་པར་བལྟ་བ་སྟེ། དེ་ལ་ཡང་རྒྱུ་མེད་ལ་འབྲས་བུ་ཡོད་པར་ལྟ་བ་དང་རྒྱུ་འབྲས་ལོག་པར་ལྟ་བ་དང་། རྒྱུ་ཡོད་པ་ལ་འབྲས་བུ་མེད་པར་ལྟ་བ་སྟེ་འདི་དག་ནི་མ་རིག་པའི་ལྟ་བའོ། །ཞེས་སོ། །དེ་ལས་སྔ་མ་རྣམས་གོ་སླ་ལ། ཕྱི་མ་ལས། རྒྱུ་མེད་ལ་འབྲས་བུ་ཡོད་པར་ལྟ་བ་ནི་རང་བཞིན་རྒྱུར་ལྟ་བ་སྟེ་ཆོས་ཐམས་ཅད་ངོ་བོ་ཉིད་ཀྱིས་བྱུང་བར་འདོད་པའོ། །རྒྱུ་འབྲས་ལོག་པར་ལྟ་བ་ནི་དབང་ཕྱུག་རྒྱུར་ལྟ་བ་སྟེ་དེ་མཉེས་པའི་སླད་དུ་སྲོག་ཆགས་མང་པོའི་སྦྱིན་སྲེག་སོགས་མི་དགེ་བའི་ལས་ཀྱིས་འབྲས་བུ་མཐོ་རིས་ཀྱི་བདེ་བ་ཐོབ་པར་འདོད་པའོ། །རྒྱུ་ཡོད་ལ་འབྲས་བུ་མེད་པར་ལྟ་བ་ནི་བྱེད་པོ་རྒྱུར་ལྟ་བ་སྟེ། བདག་བྱེད་པ་པོ་རྟག་གཅིག་རང་དབང་བས་བྱས་པའི་འབྲས་བུའི་ཆོས་རྣམས་ངོ་བོ་མི་རྟག་ཅིང་མཐར་རྒྱུན་ཆད་པར་འདོད་པའོ། །གཉིས་པ་འཇིག་རྟེན་ལས་འདས་པའི་ཐེག་པ་ནི། སྤྱིར་དཀོན་མཆོག་གསུམ་ལ་སྐྱབས་སུ་བཟུང་ཞིང་ལྟ་བ་བཀའ་རྟགས་ཀྱི་ཕྱག་རྒྱ་བཞི་ཁས་ལེན་པ་དང་། ཡང་དག་པའི་བསླབ་པ་གསུམ་ལ་སློབ་པས་འབྲས་བུ་སྲིད་རྩེ་ལས་བརྒལ་ནུས་པའི་ཕྱིར་སྔ་མ་ལས་ཁྱད་པར་དུ་འཕགས་པའོ། །དེ་ལའང་གཉིས་ཏེ། ཀུན་བྱེད་ལས། ཐེག་པ་རྣམ་པ་གཉིས་ཡིན་ཏེ། །མཚན་ཉིད་རྒྱུ་ཡི་ཐེག་པ་དང་། །འབྲས་བུ་རྡོ་རྗེ་ཐེག་པའོ། །ཞེས་དང་། ཐལ་འགྱུར་ལས། རྒྱུ་ལ་གསུམ་དང་འབྲས་ལ་གཉིས། །གཉིས་པོ་ལས་ཕྱེ་དྲུག་ཏུ་འགྱུར། །འདི་དག་དབང་པོའི་རིམ་པས་སོ། །ཞེས་གསུངས་པས། དང་པོ་མཚན་ཉིད་རྒྱུའི་ཐེག་པའམ་ཀུན་འབྱུང་འདྲེན་པའི་ཐེག་པ་དེ་ལའང་གསུམ་སྟེ། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའི་ཐེག་པའོ། །དང་པོ་ཉན་ཐོས་ཀྱི་ཐེག་པའི་ངོ་བོ་ནི། འཁོར་བ་ནས་རང་གཅིག་པུ་ཐར་འདོད་ཀྱི་བློས་གང་ཟག་གི་བདག་མེད་རྟོགས་པའི་ཐབས་སུ་གྱུར་པའོ། །ངེས་ཚིག་ནི། ཤྲ་བ་ཀཿཞེས་པའི་སྒྲ་ཉན་པ་དང་ཐོས་པ་གཉིས་ཀ་ལ་འཇུག་པས་ཉན་ཐོས་སམ། ཡུལ་གཅིག་ལས་ཐོས་ཤིང་ཡུལ་གཅིག་ལ་སྒྲོགས་པའི་ཕྱིར་ཐོས་སྒྲོགས་ཞེས་བྱའོ། །དབྱེ་བ་ལས། འཇུག་སྒོ་ནི། འཁོར་བ་མཐའ་དག་སྡུག་བསྔལ་གྱི་རང་བཞིན་དུ་མཐོང་བས་ཡིད་སྐྱོ་ནས། རང་ཉིད་ཞི་བདེ་དོན་གཉེར་གྱི་བསམ་པས། ཡུལ་བདེན་པ་བཞི་ལ་དམིགས་ཏེ་རྒྱུ་འབྲས་སྤང་བླང་གི་སྒོ་ནས་འཇུག ལྟ་བ་ནི། གཟུང་ཡུལ་དངོས་པོ་རགས་སྣང་འདི་གཉེན་པོ་དང་བློས་གཞིག་ཅིང་གཞོམ་དུ་རུང་བའི་ཕྱིར་དང་། འཛིན་པ་སེམས་ཀྱི་རྒྱུན་དུས་གསུམ་ཆས་གཞིག་ཏུ་རུང་བའི་ཕྱིར། གཟུང་འཛིན་རགས་པ་འདི་ཀུན་རྫོབ་ཏུ་སྣང་བ་ཙམ་ལས་རང་བཞིན་མེད་པས་གང་ཟག་གི་བདག་ངོ་བོ་ཉིད་ཀྱིས་མེད་པར་རྟོགས་ཀྱང་། གཟུང་ཡུལ་དངོས་པོ་རགས་སྣང་རྩོམ་གཞི་རྡུལ་ཕྲ་རབ་འདི་ལ་གཉེན་པོ་དང་བློས་གཞོམ་དུ་མེད་པ་དང་། འཛིན་སེམས་སྐད་ཅིག་མ་དུས་ཀྱི་ཆ་དང་བྲལ་བས་གཟུང་འཛིན་ཕྲ་བ་དོན་དམ་དུ་འདོད་པའི་ཕྱིར་ཆོས་ཀྱི་བདག་མེད་མ་རྟོགས་པ་སྟེ། དབྱེ་ན་བྱེ་མདོ་གཉིས་སོ། །ཚུལ་ཁྲིམས་ནི། སོར་ཐར་རིགས་བརྒྱད་གང་རུང་ངམ། ཁྱད་པར་སངས་རྒྱས་ཀྱི་རྗེས་སུ་མཐུན་པར་སློབ་དགོས་པའི་ཕྱིར། མཆོག་དགེ་སློང་གི་སྡོམ་པ་ལ་བརྟེན་པར་བྱ་སྟེ། དེ་དག་ཀྱང་ཟེ་ཆེན་མ་ཧཱ་པཎྜི་ཏས་མཛད་པའི་ཐེག་དགུའི་རྣམ་བཞག་ལས། སོ་ཐར་རིགས་བརྒྱད་གང་རུང་གི། །སྡོམ་པ་ལེགས་བསྲུང་ཚུལ་ཁྲིམས་ཏེ། །བསྙེན་གནས་དགེ་བསྙེན་ཕ་མ་དང་། །དགེ་ཚུལ་ཕ་མ་དགེ་སློབ་མ། དགེ་སློང་ཕ་མ་སོ་ཐར་བརྒྱད། །སྡོམ་པ་གསོད་རྐུ་རྫུན་སྨྲ་བ། །འདོད་ལོག་རྩ་བཞི་སྤྱིའི་སྤང་བྱ། །ཆང་དང་མལ་ཆེ་མཐོ་གར་ཕྲེང་། །ཕྱི་དྲོའི་ཁ་ཟས་བསྙེན་གནས་ཁྲིམས། །རྩ་སྟེང་ཆང་བསྣན་དགེ་བསྙེན་སྡོམ། །བསྙེན་གནས་སྡོམ་སྟེང་གར་ཕྲེང་དབྱེ། གསེར་དངུལ་སྤངས་པ་དགེ་ཚུལ་བསྲུང་། །དེ་སྟེང་གཅིག་འགྲོ་ཆུར་རྐྱལ་པ། །སྐྱེས་རེག་ལྷན་འདུག་སྨྱན་བྱས་པ། །ཉེས་འཆབ་རྩ་དྲུག་གསེར་བཟུང་དང་། །འདོམ་སྤུ་འདྲེགས་དང་ས་རྐོ་བ། །རྩྭ་སྔོན་སོགས་གཅོད་བྱིན་ལེན་མེད། །གསོག་འཇོག་བྱས་ཟ་རྗེས་མཐུན་དྲུག དགེ་སློབ་ཁྲིམས་ཡིན་ཕམ་པ་བཞི། །ལྷག་མ་བཅུ་གསུམ་སྤང་ལྟུང་གྲངས། །སུམ་ཅུ་ལྟུང་བྱེད་བཅུ་ཕྲག་དགུ། །སོར་བཤགས་བཞི་དང་ཉེས་བྱས་པ། །བརྒྱ་དང་བཅུ་གཉིས་དགེ་སློང་ཁྲིམས། །ཞེས་སོ། །བསྒོམ་པ་ནི། གཞི་ཚུལ་ཁྲིམས་རྣམ་པར་དག་པ་ལ་བརྟེན་ནས། །དགེ་བའི་བཤེས་གཉེན་ལས་ཉན་ཐོས་ཀྱི་སྡེ་སྣོད་ཚུལ་བཞིན་ཐོས། ཐོས་དོན་བསམ། བསམ་དོན་བསྒོམ་པ་སྟེ། དེ་ཡང་དང་པོར་འདོད་ཆགས་ཀྱི་གཉེན་པོར་མི་སྡུག་པ་བསྒོམ་པ་སོགས་ཞི་གནས་ཀྱིས་སེམས་ལས་སུ་རུང་བར་བྱས་རྗེས། ལྷག་མཐོང་ནི། བདེན་བཞི་རི་རེ་ལའང་བཞི་བཞིར་ཕྱེ་བས། མི་རྟག སྡུག་བསྔལ། སྟོང་པ། བདག་མེད་དེ་སྡུག་བདེན་གྱི་བཞི་དང་། རྒྱུ། ཀུན་འབྱུང་། རབ་སྐྱེ། རྐྱེན་ཏེ་ཀུན་འབྱུང་གི་བཞི་དང་། འགོག་པ་ཞི་བ། གྱ་ནོམ་པ། ངེས་འབྱུང་སྟེ་འགོག་པའི་བཞི་དང་། ལམ། རིགས་པ། སྒྲུབ་པ། ངེས་འབྱིན་ཏེ་ལམ་གྱི་བཞི་བཅས་བདེན་བཞི་བཅུ་དྲུག་པོ་བསྒོམ་སྟེ་གཙོ་བོར་གང་ཟག་གི་བདག་མེད་རྟོགས་པའི་སྒོའོ། །གཞི་དེ་ལས་ཁམས་གསུམ་གྱི་ཉོན་མོངས་མཐོང་བས་སྤང་བར་བྱ་བ་དང་བསྒོམས་པས་སྤང་བར་བྱ་བ་རྣམས། སྤང་ཚུལ་ཤེས་བཟོད་ཀྱི་ཡེ་ཤེས་བཅུ་དྲུག་པོས་རིམ་པར་སྤོང་བར་བྱེད་དོ། །སྤྱོད་པ་ནི། སྔ་མ་ལས། བསོད་སྙོམས་སྟན་གཅིག་ཕྱིས་མི་ལེན། །ཕྱགས་དར་ཁྲོད་འཕྱིང་ཆོས་གོས་གསུམ། །དགོན་པ་བླ་གབ་མེད་པ་དང་། །ཤིང་དྲུང་དུར་ཁྲོད་ཙོག་པུ་པ། །གཞི་ཇི་བཞིན་ཏེ་སྦྱངས་ཡོན་སྤྱོད། །ཅེས་པ་ལྟར་སྦྱངས་པའི་ཡོན་ཏན་བཅུ་གཉིས་ལ་གནས་ནས་རང་དོན་གཙོ་བོར་སྤྱོད་པའོ། །འབྲས་བུ་ནི། རྒྱུན་དུ་ཞུགས་པ་དང་། ལན་གཅིག་ཕྱིར་འོང་བ་དང་། ཕྱིར་མི་འོང་བ་སྟེ་གནས་སྐབས་ཀྱི་འབྲས་བུ་གསུམ་དང་། མཐར་ཐུག་ཟད་པ་དང་མི་སྐྱེ་བ་ཤེས་པའི་ཡེ་ཤེས་གཉིས་དང་ལྡན་པའི་ལྷག་བཅས་ལྷག་མེད་ཀྱི་དགྲ་བཅོམ་པ་ཉིད་ཐོབ་པ་སྟེ། འབྲས་བུ་གཉིས་པོ་རེ་རེ་ལའང་ཞུགས་གནས་གཉིས་གཉིས་སུ་ཕྱེ་བས་བརྒྱད་དེ་དབྱེ་གཞི་ལ་ལྟོས་ནས་སྐྱེས་བུ་ཟུང་བཞི་དང་། དབྱེ་ཆོས་ལ་ལྟོས་ནས་གང་ཟག་ཡ་བརྒྱད་ཅེས་བྱའོ། །དེ་ལྟར་ཡང་སྒྱུ་འཕྲུལ་རྒྱས་པ་ལས། བདེན་བཞིའི་དོན་རྟོགས་རབ་ཏུ་སྤོང་བ་ཡི། །ཡེ་ཤེས་བཅུ་དྲུག་ཆས་སྦྱངས་རབ་ཞི་བ། །རྒྱུན་ཞུགས་ལ་སོགས་རིམ་པས་སྦྱངས་ནས་ནི། །ཉོན་མོངས་དགྲ་རྣམས་ཞི་བའི་ས་རུ་འགྲོ། །ཞེས་སོ། །གཉིས་པ་རང་རྒྱལ་གྱི་ཐེག་པ་ལ། ངོ་བོ་ནི། སློབ་དཔོན་མ་བསྟེན་པར་སྲིད་པ་ཐ་མའི་ཚེ་བྱང་ཆུབ་མངོན་དུ་བྱེད་པའི་ཐབས་བདག་མེད་ཕྱེད་དང་གཉིས་རྟོགས་ཀྱི་སྒོ་ནས་རྟེན་འབྲེལ་གྱི་ལམ་བསྒོམ་པའོ། །ངེས་ཚིག་ནི་པྲ་ཏྱེ་ཀ་བུདྡྷའི་སྒྲ་ལས་རང་གི་བྱང་ཆུབ་རང་གིས་རྟོགས་པར་བྱེད་པའི་ཕྱིར་རམ། སོ་སོའམ་རང་གཅིག་པུ་བྱང་ཆུབ་སྒྲུབ་པས་ན་རང་རྒྱལ་ལོ། །དབྱེ་བ་ལས། འཇུག་སྒོ་ནི། རྟེན་འབྲེལ་བཅུ་གཉིས་ཀྱི་སྒོ་ནས་འཇུག་སྟེ། དེ་ཡང་ཕྱི་ཡི་རྟེན་འབྲེལ་ནི། ས་བོན་ནས་འབྲས་བུའི་བར་རྒྱུ་དང་འབྲེལ་བ་དྲུག་དང་། འབྱུང་ལྔ་དུས་ཀྱི་འགྱུར་བ་བཅས་རྐྱེན་དང་འབྲེལ་བ་དྲུག་གོ །ནང་གི་རྟེན་འབྲེལ་ནི། །མ་རིག་པ་ནས་རྒ་ཤིའི་བར་བཅུ་གཉིས་ཏེ། དེ་ཡང་མ་རིག སྲེད་པ། ལེན་པ་གསུམ་ནི་ཉོན་མོངས་པ་དང་། འདུ་བྱེད་དང་། སྲིད་པ་གཉིས་ནི་ལས་དང་། རྣམ་ཤེས་སོགས་ལྷག་མ་བདུན་ནི་སྡུག་བསྔལ་ལོ། །དེ་ལྟར། ལས་ཉོན་ལྔ་པོ་རྒྱུ་དང་། ཕྱི་མ་བདུན་འབྲས་བུ་སྟེ་འཁོར་བ་མངོན་པར་འགྲུབ་པའི་རྒྱུ་འབྲས་ཀྱི་དབྱེ་བ་སྟེ། དེ་དག་ཇི་ལྟར་འཁོར་ན། ཕྱིའི་རྟེན་འབྲེལ་མང་ཉུང་གི་ཚུལ་དང་། ནང་གི་རྟེན་འབྲེལ་ལུས་མེད་རྣམས་ལ་བག་ཆགས་དང་། ལུས་ཅན་རྣམས་ལ་དངོས་སུ་འཁོར་རོ། དེའི་སྒོ་ནས་ཇི་ལྟར་འཇུག་ན། རང་རྒྱལ་གྱི་རིགས་ཅན་དབང་རྣོན་བ སེ་རུ་ལྟ་བུ་ཐེག་དམན་རང་ལམ་གྱི་ཚོགས་བསྐལ་པ་བརྒྱར་བསགས་པ་དང་། དབང་འབྲིང་ཚོགས་སྤྱོད་ཆེ་བ་བཟོད་འབྲིང་མན་ཆོད་ཀྱི་ཚོགས་མི་ཚེ་བརྒྱར་བསགས་པ་དང་། དབང་བརྟུལ་ཚོགས་སྤྱོད་ཆུང་བ་མཐོང་ལམ་སྐད་ཅིག་བཅོ་ལྔ་མན་ཆད་ཀྱིས་བསྡུས་པའི་ཚོགས་མི་ཚེ་བཅུ་གསུམ་དུ་བསགས་པ་དང་གསུམ་ཡོད་ཀྱང་། གསུམ་གས་རྟེན་དེ་ལ་བྱང་ཆུབ་ཐོབ་པའི་སྐལ་བ་མེད་པར་ཤེས་ནས། མཁས་བྱའི་གནས་དྲུག་ལ་བརྩོན་པས་དབང་པོ་ཡོངས་སུ་སྨིན་པར་བྱས་ཏེ་འཆི་ཁར་སྨོན་ལམ་བཏབ་པའི་དབང་གིས། སངས་རྒྱས་དང་ཉན་ཐོས་ཀྱིས་མ་བཟུང་བའི་འཇིག་རྟེན་དུ་སྐྱེས་ནས། རྟེན་དེར་མཁན་སློབ་མེད་པར་རང་བྱུང་གི་དགེ་སློང་དུ་གྱུར་ཏེ། དུར་ཁྲོད་དུ་བོར་བའི་རུས་པ་སོགས་མཐོང་བའི་རྐྱེན་གྱིས་འཁོར་བ་ལས་ཡིད་འབྱུང་ཞིང་རྟེན་འབྲེལ་ལུགས་འབྱུང་ལྡོག་གི་དོན་རྟོགས་པའི་སྒོ་ནས་འཇུག ལྟ་བ་ནི་ཉན་ཐོས་ཀྱིས་རྟོགས་པའི་གང་ཟག་གི་བདག་མེད་ཀྱི་སྟེང་དུ་ཆོས་ཀྱི་བདག་ཕྱེད་གཟུང་བ་རང་བཞིན་མེད་པར་རྟོགས་པས། བདག་མེད་ཕྱེད་གཉིས་རྟོགས་པའོ། །ཚུལ་ཁྲིམས་ནི། ཉན་ཐོས་དང་མཚུངས་ཏེ་ཉིས་བརྒྱ་ལྔ་བཅུའི་འདུལ་ཁྲིམས་སོ། །སྒོམ་པ་ནི་ཉན་ཐོས་ཀྱི་བདེན་བཞི་རྣམ་པ་བཅུ་དྲུག་གི་སྟེང་དུ་རྟེན་འབྲེལ་ལུགས་འབྱུང་བཀག་པའི་ལུགས་ལྡོག་སྟོང་པ་བཅུ་གཉིས་ཁྲིགས་ཆགས་སུ་སྒོམ་པར་བྱེད་དོ། །སྤྱོད་པ་ནི། རང་དོན་གཙོ་བོར་སྤྱོད་ཅིང་། གཞན་ལ་ཆོས་སྟོན་པ་ན་ངག་གིས་མི་གསུང་བར་ལུས་ཀྱི་རྫུ་འཕྲུལ་གྱི་བརྡས་གོ་བར་བྱེད་དོ། །འབྲས་བུ་ནི་བསེ་རུ་ལྟ་བུ་གཅིག་པུར་བཞུགས་པ་དང་། ནེ་ཙོ་ལྟ་བུ་ཁྱུས་འཚོ་བ་ཚོགས་ན་སྤྱོད་པ་ཆེ་ཆུང་གཉིས་ཏེ། དེ་གསུམ་པོས་རིམ་པར། ལམ་ལྔ་དང་། བཞི་དང་། གསུམ་སྟན་ཐོག་གཅིག་ཏུ་རྫོགས་ནས་ཡིད་བཞིན་བདེ་བ་མཆོག་གིས། ཟད་དང་མི་སྐྱེ་ཤེས་པའི་དགྲ་བཅོམ་མངོན་དུ་མཛད་དེ། སྔ་མ་ལས། ཕྱི་ནང་རྟེན་འབྲེལ་སྒྱུ་མ་མིག་ཡོར་ཚུལ་ཤེས་ཤིང་། །དངོས་པོའི་གཟུགས་ལ་ཐོགས་མེད་རབ་ཏུ་འཇུག །དགེ་བཤེས་མི་སློབ་རང་གི་རིགས་པས་རྟོགས། །བྱང་ཆུབ་སར་བགྲོད་ཡིད་བཞིན་བདེ་བ་མཆོག །ཅེས་སོ། །གསུམ་པ་བྱང་ཆུབ་སེམས་དཔའི་ཐེག་པ་ནི། ཤེས་རབ་ཆེ་བས་བདག་མེད་གཉིས་ཀ་རྣལ་མར་རྟོགས་ནུས་པ་དང་། སྙིང་རྗེ་ཆེ་བས་གཞན་དོན་འབའ་ཞིག་ལ་སྤྱོད་ནུས་པས་དམན་པ་ཉན་རང་གི་ལམ་ལས་ཁྱད་པར་འཕགས་པ་ཡིན་ཏེ། རྒྱུད་ལས། ཐུགས་རྗེས་སེམས་ཅན་ལ་དམིགས་ཤིང་། །ཤེས་རབ་ཆོས་ཀྱི་དབྱིངས་སུ་ཁྱབ། །ཐེག་པ་ཆེན་པོ་ཞེས་བཤད་དེ། །གཞན་དག་དེ་ལ་བཟློག་པའོ། །ཞེས་དང་། ཤེར་ཕྱིན་སྡུད་པ་ལས། ཐབས་མེད་ཤེས་རབ་བྲལ་བ་ཉན་ཐོས་ཉིད་དུ་ལྷུང་། །ཞེས་སོ། །དེ་ལ་ངོ་བོ་ནི། ཆོས་ཐམས་ཅད་བདག་མེད་པར་རྟོགས་ཤིང་། སྙིང་རྗེ་ཆེན་པོས་གཞན་དོན་རླབས་པོ་ཆེ་ལ་སྤྱོད་པའི་ཐབས་སུ་གྱུར་པའོ། །ངེས་ཚིག་ནི། བོ་དྷི་ས་ཏྭའི་སྒྲ་ལས། སེམས་སྟོབས་ཆེན་པོས་བླ་ན་མེད་པའི་བྱང་ཆུབ་སྒྲུབ་པ་ལ་གཅིག་ཏུ་དཔའ་མི་ཞུམ་པའི་ཕྱིར་བྱང་ཆུབ་སེམས་དཔའ་ཞེས་བྱའོ། །དབྱེ་བ་ལས། འཇུག་པའི་སྒོ་ནི། བདེན་པ་གཉིས་ཀྱི་སྒོ་ནས་འཇུག་སྟེ། དེ་ཡང་དབུ་མའི་གཞུང་ལྟར་ན་མ་བརྟགས་མ་དཔྱད་པའི་སྣང་བ་འདི་སྣང་ཡང་བདེན་མེད་སྒྱུ་མ་ལྟ་བུར་ཤེས་པའི་བློས་སྣང་ཙམ་འདི་ཁྱད་དུ་མི་གསོད་པར་བྱམས་སྙིང་རྗེ་བྱང་ཆུབ་སེམས་ཀྱིས་ཟིན་པར་བྱས་ཏེ་དགེ་མི་དགེའི་འཇུག་ལྡོག་གི་ཚུལ་གྱིས་ཀུན་རྫོབ་ཀྱི་བདེན་པ་ལ་འཇུག དོན་དམ་པར་གཤིས་ལུགས་སྤྲོས་བྲལ་དུ་ཤེས་པར་བྱས་ཏེ་གང་ལའང་དམིགས་པ་མེད་པའི་ཚུལ་གྱིས་ཟུང་འཇུག་མཉམ་པ་ཆེན་པོའི་དོན་ལ་འཇུག་པར་བྱེད་དོ། །ལྟ་བ་ནི། བདག་མེད་པ་གཉིས་ཀ་ཕྱིན་ཅི་མ་ལོག་པར་རྟོགས་པ་སྟེ། དེ་ལ་དབྱེ་ན། སེམས་ཙམ་དང་། དབུ་མ་གཉིས་ཀྱི། སེམས་ཙམ་ལས། ཀུན་གཞི་ལ་ཐོག་མེད་ནས་བག་ཆགས་སྣ་ཚོགས་བཞག་པ་ཉིད་ཕྱི་རོལ་དུ་དོན་གྱི་རྣམ་པར་སྣང་ཡང་། དེ་ཉིད་དུ་བདེན་པར་གྲུབ་པ་མེད་པས་རྡུལ་དང་སྐད་ཅིག་མའི་ཆོས་ཅན་གྱི་ཡུལ་ཡུལ་ཅན་ནམ་གཟུང་འཛིན་གྱི་བདེན་པ་བཀག་ནས། གཟུང་འཛིན་གཉིས་མེད་ཀྱི་ཡེ་ཤེས་རང་རིག་རང་གཟུལ་དུ་གནས་པ་དོན་དམ་པར་གྲུབ་པར་འདོད་དེ། འདི་ལའང་རྣམ་བདེན་པས་ཕྱི་དོན་དུ་སྣང་བ་འདི་ནང་སེམས་ཀྱི་བག་ཆགས་འཁྲུལ་པའི་གཟུགས་བརྙན་ཡུལ་དང་དོན་དུ་སྣང་བ་ལས་གྲུབ་པར་འདོད་ཅིང་། གཉིས་མེད་ཀྱི་ཤེས་པ་དོན་དམ་དུ་བདེན་པར་ཁས་ལེན། རྣམ་རྫུན་པས། ཕྱི་དོན་གྱི་རྣམ་པ་འདི་སྣང་སེམས་ལ་སྣང་ཡང་། རྣམ་པ་སེམས་དང་སེམས་ལས་གཞན་དུ་གྲུབ་པ་མེད་པས་རྫུན་པ་རྨི་ལམ་དང་འདྲ་ལ། ཡེ་ཤེས་དེ་ཡང་བརྫུན་པའི་རང་བཞིན་ཙམ་དུ་གྲུབ་པར་ཁས་ལེན་ནོ། །དབུ་མ་པ་ལ། རང་རྒྱུད་པས། ཕྱི་ནང་འཁོར་འདས་ཀྱི་བསྡུས་པའི་ཆོས་སྣ་ཚོགས་སུ་སྣང་བ་འདི་དག་ཀུན་རྫོབ་ཏུ་རང་རང་གི་རྒྱུ་རྐྱེན་ལས་སྐྱེས་པའི་ཕྱིར་ཇི་ལྟར་སྣང་བ་བཞིན་དུ་བདེན་ལ། དེའི་ངོར་དོན་བྱེད་ཅིང་། དོན་དམ་པར་གང་གིའང་དངོས་པོར་གྲུབ་པ་མེད་པ་ནམ་མཁའ་ལྟ་བུར་འདོད། ཐལ་འགྱུར་པས། བདེན་པ་གཉིས་ཆར་དུ་ཡང་། ཆོས་ཐམས་ཅད་རང་བཞིན་མེད་པས་ཡོད་མེད་སོགས་སྤྲོས་པའི་མཐའ་ཐམས་ཅད་དང་བྲལ་བར་འདོད་དེ། འཇུག་པ་ལས། བདེན་པ་གཉིས་ཆར་དུ་ཡང་རང་བཞིན་མེད་པའི་ཕྱིར། འདི་དག་རྟག་པ་མ་ཡིན་ཆད་མ་ཡིན། ཞེས་གསུངས། ཐ་སྙད་ཙམ་དུ་དབྱེ་ན་སྣང་བའི་ཆ་ཀུན་རྫོབ་དང་། རང་བཞིན་མེད་པའི་ཆ་དོན་དམ་སྟེ་བདེན་གཉིས་ངོ་བོ་གཅིག་ལ་ལྡོག་པ་ཐ་དད་ཙམ་དུ་བཞག་ཀྱང་། དོན་དམ་པར་དེ་གཉིས་ཀའང་ངོ་བོ་མེད་པའི་ཕྱིར་གཅིག་ཐ་དད་སོགས་གང་དུའང་གྲུབ་པ་མེད་པས་རང་བཞིན་དབྱེར་མེད་ཟུང་འཇུག་མཉམ་པར་ཆེན་པོའི་ཀློང་དུ་གྲུབ་མཐའི་བློས་བཏགས་པའི་ཁས་ལེན་གྱི་སྤྲོས་པ་མཐའ་དག་ཞི་བ་སྟེ། འདི་ནི་མཚན་ཉིད་རྒྱུའི་གྲུབ་མཐའ་སྨྲ་བ་རྣམས་ཀྱི་རྩེ་མོར་གྱུར་པའོ། །ཚུལ་ཁྲིམས་ནི། སྡོམ་སྡུད་དོན་བྱེད་གསུམ་སྟེ། ཉེས་སྤྱོད་སྡོམ་པ་ལའང་། དབུ་མའི་ལུགས་ལ་སེམས་བསྐྱེད་ཀྱི་རྟེན་དུ་སོ་ཐར་དགོས་པ་མ་ངེས་ཀྱང་། བྱང་སར་སྡོམ་པའི་ཚུལ་ཁྲིམས་སོ་ཐར་རིགས་བདུན་ལ་བཤད་པ་ལྟར་ན། དེ་དག་གི་བསླབ་བྱ་ལ་གནས་པ་གཞིར་བཞག་ཐོག རྙེད་བཀུར་གྱི་ཕྱིར་དུ་བདག་བསྟོད་གཞན་སྨོད། སེར་སྣའི་དབང་གིས་ཆོས་ནོར་མི་སྟེར་བ། ཁྲོ་བས་བཤགས་ཀྱང་སླར་འཚོག་པ། ཐེག་ཆེན་སྤོང་ཞིང་དམ་ཆོས་འདྲ་སྣང་སྟོན་པ་སྟེ་སེམས་ཙམ་ལུགས་ཀྱི་རྩ་ལྟུང་བཞི་དང་། དབུ་མ་ལུགས་ལ། དཀོན་མཆོག་གི་དཀོར་འཕྲོག་པ། དམ་པའི་ཆོས་སྤོང་བ། རབ་བྱུང་ལ་ཆད་ལ་གཅོད་པ། མཚམས་མེད་གང་རུང་བྱེད་པ། ལོག་པར་ལྟ་བ་འཛིན་པ་སྟེ་བྱང་སེམས་རྒྱལ་པོ་ལ་འབྱུང་ཉེ་བ་ལྔ་དང་། སྔ་མ་བཞིའི་སྟེང་དུ་གྲོང་ལྗོངས་གྲོང་ཁྱེར་སོགས་འཇོམས་པ་བསྣན་པ་སྟེ་བློན་པོ་ལ་ཉེ་བ་ལྔ། བློ་མ་སྦྱངས་པར་སྟོང་ཉིད་སྟོན་པ། ཐེག་ཆེན་གྱི་རིགས་ཅན་ཐེག་དམན་ལ་འགོད་པ། སོ་ཐར་སྤོང་དུ་བཅུག་པ། ཐེག་དམན་གྱི་ལམ་ལ་འབྲས་བུ་མེད་པར་འཛིན་པ། ཕྲག་དོག་གིས་བདག་བསྟོད་གཞན་སྨོན། རྙེད་བཀུར་གྱི་ཆེད་དུ་བདག་ཉིད་ལ་བསྟོད་པ། དགེ་སློང་གི་རྫས་དབང་པོ་ཆེ་གཞན་ལ་སྦྱིན་པ། སྤོང་བའི་ལོངས་སྤྱོད་ཁ་བཏོན་པར་བྱིན་ནས་ཞི་གནས་འདོར་དུ་བཅུག་པ་སྟེ་ཕལ་བ་ལ་ཉེ་བ་བརྒྱད་དང་། དེའི་སྟེང་དུ་སྨོན་འཇུག་གི་སེམས་གཉིས་འདོར་བ་སྟེ་དབུ་མ་ལུགས་ཀྱི་རྩ་ལྟུང་ཉི་ཤུ་དང་། གཉིས་ཀའི་ཆར་གཏོགས་ཕྱོགས་མཐུན་གྱི་ཉེས་བྱས་ཀྱི་རིགས་རྣམས་སྤོང་བའི་སེམས་པ་ས་བོན་དང་བཅས་པའོ། །དགེ་བ་ཆོས་སྡུད་ནི། དེའི་སྟེང་དུ་ཕར་ཕྱིན་དྲུག་སོགས་བསོད་ནམས་དང་ཡེ་ཤེས་ཀྱིས་བསྡུས་པའི་ཚོགས་གཉིས་རླབས་པོ་ཆེ་ལ་སྤྱོད་པའོ། །སེམས་ཅན་དོན་བྱེད་ནི་བསྡུ་དངོས་བཞི་སོགས་བསམ་སྦྱོར་ཐམས་ཅད་སེམས་ཅན་གྱི་དོན་དུ་སྤྱོད་པ་སྟེ། དེ་གསུམ་ཀའང་བསྲུང་ཚུལ་དྲན་ཤེས་བག་ཡོད་དང་ལྡན་པས་དཀར་ནག་ཆོས་བཞིར་བླང་དོར་བྱེད་པ་སོགས་རང་རང་གི་མི་མཐུན་པའི་ཕྱོགས་ཀྱི་ཉེས་ལྟུང་གི་དྲི་མས་མ་གོས་པའི་ཐབས་ལ་བརྩོན་པར་བྱའོ། །བསྒོམ་པ་ནི། སྤྱིར་སློབ་ལམ་བཞིན་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་བསྒོམ་པ་སྟེ། དེ་ཡང་ཚོགས་ལམ་ཆུང་ངུར་དྲན་པ་ཉེ་བར་བཞག་པ་བ ཞི་དང་། འབྲིང་དུ་ཡང་དག་པར་སྤོང་བ་བཞི། ཆེན་པོར་རྫུ་འཕྲུལ་གྱི་རྐང་པ་བཞི། སྦྱོར་ལམ་དྲོད་རྩེ་གཉིས་སུ་དབང་པོ་ལྔ། བཟོད་མཆོག་གཉིས་སུ་སྟོབས་ལྔ། མཐོང་ལམ་དུ་བྱང་ཆུབ་ཡན་ལག་བདུན། སྒོམ་ལམ་དུ་འཕགས་པའི་ལམ་ཡན་ལག་བརྒྱད་བསྒོམ་པ་རྣམས་སོ། །བྱེ་བྲག་ཏུ། ཐོག་མ་ནས་ཇི་ལྟར་ཉམས་སུ་ལེན་པའི་ཚུལ། འཁོར་ལོ་ཐ་མ་ཉིད་ངེས་པ་དོན་གྱི་མདོ་སྡེའི་དབང་དུ་བྱས་ཏེ། དེ་བཞིན་གཤེགས་པའི་སྙིང་པོའི་ཚུལ་རྒྱ་ཆེར་གསུངས་པ་རྣམས་ཁོང་དུ་ཆུད་པར་བྱས་ལ། རིགས་ཅན་དེས་བྱང་ཆུབ་མཆོག་ཏུ་སེམས་བསྐྱེད་ནས། སྣང་ཡུལ་མ་འགགས་ལ་འཛིན་རྟོག་ཞི་བའི་ཏིང་ངེ་འཛིན་སྐྱེ་བའི་ཞི་གནས་དང་། ལྷག་མཐོང་ནི། ཕྱིའི་སྣང་བ་ཐམས་ཅད་བདེན་མེད་སྒྱུ་མའི་དཔེ་བརྒྱད་དུ་བལྟ་བ་དང་། ནང་འཛིན་པའི་སེམས་གཟུང་འཛིན་ཕྲ་རགས་ཐམས་ཅད་དོན་དམ་སྟོང་པ་ཉིད་དུ་ལེགས་པར་གཏན་ལ་ཕབ་ནས། མཐའ་བྲལ་དབུ་མ་ཆེན་པོའི་དོན་བསལ་བཞག་མེད་པའི་ཆོས་ཉིད་མཉམ་པ་ཆེན་པོར་དེར་འཛིན་གྱི་དམིགས་གཏད་དང་བྲལ་བར་མཉམ་པར་འཇོག་པ་སྟེ་ཞི་ལྷག་ཟུང་འབྲེལ་གྱི་སྒོ་ནས་བསྒོམ་པར་བྱའོ། །སྤྱོད་པ་ནི། རྗེས་ཐོབ་ཀྱི་སྐབས་སུ་བདག་ལས་གཞན་གཅེས་ཀྱི་སྒོ་ནས་སེམས་ཅན་གྱི་དོན་བྱེད་པ་སྟེ། སྤྱོད་པའི་རང་བཞིན་ནི་ཕ་རོལ་དུ་ཕྱིན་པ་དྲུག་གམ་བཅུ་སྟེ། དེ་ལ་རྣམ་པའི་དབྱེ་བའང་ཐེག་དགུ་ལས། ཟང་ཟིང་མི་འཇིགས་ཆོས་བྱམས་སྦྱིན། །ཆོས་སྡུད་དོན་བྱེད་ཉེས་སྤྱོོད་ཁྲིམས། །དང་ལེན་ངེས་སེམས་གནོད་པ་བཟོད། །གོ་ཆ་སྦྱོར་ཆོག་བརྩོན་འགྲུས་བརྩམས། །བྱིས་པ་ཉེར་སྤྱོད་ཞི་ལྷག་བསྒོམ། །ཐོས་བསམ་སྒོམ་པའི་ཤེས་རབ་སྤྱོད། །དེ་ཆར་ཐབས་སྟོབས་སྨོན་ལམ་དང་། །ཡེ་ཤེས་བཞི་བཞིར་ཕྱིན་བཅུར་འདོད། །ཅེས་སོ། །འབྲས་བུ་ནི། དེ་ཉིད་ལས། འབྲས་བུ་ཚོགས་སྦྱོར་མཐོང་སྒོམ་པ། །མི་སློབ་ལམ་ལྔ་སའི་རིམ་པ། །རབ་དགའ་དྲི་མེད་འོད་བྱེད་དང་། །འོད་འཕྲོ་སྦྱང་དཀའ་མངོན་དུ་གྱུར། །རིང་སོང་མི་གཡོ་ལེགས་བློ་གྲོས། །ཆོས་སྤྲིན་ཀུན་འོད་ས་བཅུ་གཅིག །ཅེས་པའི་ལམ་ལྔ་ས་བཅུ་རིམ་གྱིས་བགྲོད་ནས། མི་སློབ་པའི་ལམ་བཅུ་གཅིག་ཀུན་ཏུ་འོད་ཀྱི་ས་ལ་རང་དོན་དུ་ཆོས་ཀྱི་སྐུར་གྲོལ་ཏེ། གཞན་དོན་དུ་གཟུགས་སྐུ་གཉིས་ལ་བརྟེན་ནས་སེམས་ཅན་གྱི་དོན་འཁོར་བ་མ་སྟོངས་ཀྱི་བར་དུ་མཛད་པ་ཡིན་ཏེ། རྒྱས་པ་ལས། བདག་མེད་གཉིས་རྟོགས་ཕ་རོལ་ཕྱིན་རྫོགས་པའི། །ས་བཅུ་རིམ་གྱིས་འགྲོད་པའི་རྣལ་འབྱོར་པས། །སངས་རྒྱས་སར་འགྲོད་གོ་འཕང་འཐོབ་པའི་ལམ། །བདེན་པ་གཉིས་ཀྱིས་རབ་ཏུ་འཐོབ་པར་འགྱུར། །ཞེས་སོ། །དེས་ཀུན་འབྱུང་འདྲེན་པའི་ཐེག་པ་སྡེ་སྣོད་གསུམ་གྱི་རྣམ་གཞག་མདོ་ཙམ་ཞུས་གྲུབ་ནས། །གཉིས་པ་འབྲས་བུ་གསང་སྔགས་རྡོ་རྗེ་ཐེག་པ་ནི། རྒྱུ་ལམ་དུ་བྱེད་པ་ཕར་ཕྱིན་གྱི་ཐེག་པ་དེ་ཉིད་ལས། འབྲས་བུ་ལམ་དུ་བྱེད་པའི་ཆ་ནས་ཁྱད་པར་དུ་འཕགས་ཏེ། གལ་པོ་ལས། མཚན་ཉིད་རྒྱུ་ཡི་ཐེག་པ་ཡིས། །སེམས་ཉིད་སངས་རྒྱས་རྒྱུ་རུ་ཤེས། །འབྲས་བུ་སྔགས་ཀྱི་ཐེག་པ་ཡིས། །སེམས་ཉིད་སངས་རྒྱས་ཉིད་དུ་བསྒོམ། །རྒྱུ་དང་འབྲས་བུ་གང་ཡིན་པའི། །ཕྱོགས་ཀྱང་རབ་ཏུ་ཤེས་པར་བྱ། །ཞེས་གསུངས། གཞན་ཡང་ཀུན་རྫོབ་ལམ་དུ་བྱེད་ནུས་མི་ནུས་དང་། ཐབས་ལ་མ་རྨོངས་པ་དང་། ཐབས་མང་བ་དང་། ཐབས་སླ་བ་དང་། དབང་པོ་རྣོན་པོའི་ངོ་སྐལ་དུ་གསུངས་པ་སོགས་ཁྱད་པར་དུ་མས་འཕགས་པ་ཡིན་ནོ། །དེ་ལ་དབྱེ་ན་གཉིས་ཏེ། རང་ཤར་ལས། རྡོ་རྗེ་ཐེག་པ་རྣམ་པ་གཉིས། །ཕྱི་པ་ཐུབ་པ་རྒྱུད་དང་ནི། །ནང་པ་ཐབས་ཀྱི་རྒྱུད་དུ་གསུངས། །ཞེས་གསུངས་པས། ཕྱི་ཐུབ་པ་རྒྱུད་ཀྱི་ཐེག་པ་དང་། ནང་པ་ཐབས་ཀྱི་རྒྱུད་ཀྱི་ཐེག་པའོ། །འདི་གཉིས་ཀྱི་ཁྱད་པར་ལ་དབྱེ་སྒོ་མང་ཡང་། རྗེ་སྒྲོལ་གཡུང་གཉིས་ནི། ལྟ་སྤྱོད་ཏིང་འཛིན་གསུམ་དབྱེར་མེད་དུ་འདོད་པ་སྔགས་ནང་པ། མི་འདོད་པ་ཕྱི་པ། འདི་དང་མཚན་ཉིད་གཉིས་ཀུན་རྫོབ་ལམ་དུ་བྱེད་ནུས་མི་ནུས་ཀྱིས་འབྱེད་པར་བཞེད་དོ། །དང་པོ་ཕྱི་ཐུབ་པ་རྒྱུད་ཀྱི་ཐེག་པ་དེ་ལའང་གསུམ་སྟེ། བྱ་བའི་རྒྱུད་དང་། གཉིས་ཀའི་རྒྱུད་དང་། རྣལ་འབྱོར་རྒྱུད་ཀྱི་ཐེག་པའོ། །དང་པོ་བྱ་བའི་རྒྱུད་ཀྱི་ཐེག་པའི་ངོ་བོ་ནི། དོན་དམ་པར་མཐའ་བཞི་དང་བྲལ་བའི་དག་པར་རྟོགས་པས། ཀུན་རྫོབ་ཏུ་དངོས་གྲུབ་གཞན་ལ་རེ་ཞིང་རྩོལ་བའི་ཐབས་སུ་གྱུར་པའོ། །ངེས་ཚིག་ནི། ཀྲཱི་ཡའི་སྒྲ་ལས་བྱ་བ་སྟེ། ཕྱིའི་བྱ་བ་གཙོ་བོར་སྟོན་པའི་ཕྱིར་རོ། །དབྱེ་བ་ལས། འཇུག་སྒོ་ལ་གཉིས་ཀྱི་སྨིན་བྱེད་ཀྱི་འཇུག་སྒོ་ཆུ་དང་ཅོད་པཎ་གྱི་དབང་འཁོར་དང་བཅས་པ་བསྐུར་བས་སློབ་མ་སྣོད་རུང་དུ་བྱས་རྗེས། བྱ་བའི་འཇུག་སྒོ་ཁྲུས་གསུམ་བྱེད་པ། གོས་གསུམ་བརྗེ་བ། དཀར་གསུམ་བསྟེན་པ་སོགས་ཁྲུས་དང་གཙང་སྦྲ་ལ་གནས་པས། ལྷ་དང་དཀྱིལ་འཁོར་དག་པ། རྫས་དང་ཡོ་བྱད་དག་པ། སྔགས་དང་ཏིང་འཛིན་དག་པ་སྟེ་དག་པ་གསུམ་གྱི་སྒོ་ནས་འཇུག ལྟ་བ་ནི་བདེན་པ་གཉིས་ཏེ། དོན་དམ་བདེན་པ། སེམས་ཉིད་དག་པ་སྟོང་གསལ་གྱི་ཡེ་ཤེས་ཡོད་མེད་སྣང་སྟོང་གི་མཐའ་བཞི་དང་བྲལ་བ་དང་། ཀུན་རྫོབ་དབུ་མ་མན་ཆོད་ཀྱིས་མཐོང་བ་རྣམས་ལོག་པའི་ཀུན་རྫོབ་དང་། ཡང་དག་པའི་ཀུན་རྫོབ་ཆོས་ཉིད་རྟོགས་པའི་ཡོན་ཏན་རིགས་གསུམ་ལྷའི་དཀྱིལ་འཁོར་དུ་སྣང་བར་འདོད་དོ། །ཚུལ་ཁྲིམས་ནི། ཁྲི་ལ་ཉལ་བར་མི་བྱ་ཞིང་། ༡ ། ཤ་མི་བཟའ་ཞིང་༢ཆང་མི་འཐུང་། ༣ ། སྒོག་པ་༤ ལ་ཕུག་༥ བཟའ་མི་བྱ། །ཞེས་རྩ་བའི་དམ་ཚིག་ལྔ་དང་། དཀོན་མཆོག་གསུམ་དང་༡བྱང་ཆུབ་སེམས། ༢ ། སྔགས་དང་ཕྱག་རྒྱ་མི་སྤང་ཞིང་། ༣ ། རྡོ་རྗེ་དྲིལ་བུ་སྤང་མི་བྱ། ༤ ། ལྷ་དང་༥བླ་མ་༦དེ་བཞིན་ནོ། །ཞེས་ཡན་ལག་གི་དམ་ཚིག་དྲུག་བཅས་བཅུ་གཅིག་དང་། གཞན་ཡང་གསང་བ་སྤྱི་རྒྱུད་ལས་གསུངས་པའི་སྤྱི་ཡི་དམ་ཚིག་གསུམ་དང་བྱེ་བྲག་གི་དམ་ཚིག་བཅུ་གསུམ་སོགས་སོ། །སྒོམ་པ་ལ། མཚན་བཅས་མཚན་མེད་གཉིས་ཀྱི། མཚན་བཅས་ནི། སྤྱིིར་བྱ་རྒྱུད་ལ་ཙམ་ཁྱད་གཉིས་ཀྱི། ཙམ་པོ་པ་ལ་བདག་བསྐྱེད་དངོས་སུ་བསྟན་པ་མེད་ཀྱང་། ཁྱད་པར་པའི་དབང་དུ་བྱས་ཏེ། སྟོང་པ་ཉིད་དང་། ཡི་གེ་དང་། སྒྲ་དང་། གཟུགས་དང་། ཕྱག་རྒྱ་དང་། མཚན་མའི་ལྷ་སྟེ་ཀྲི་ཡ་དོན་གྱི་ལྷ་དྲུག་གི་སྒོ་ནས་དམ་ཚིག་པ་བསྐྱེད་པའི་མདུན་དུ། ཡེ་ཤེས་པ་སྤྱན་དྲངས་ཏེ་མཆོད་བསྟོད་དང་བཟླས་པ་སོགས་བྱས་ལ། དམ་ཡེ་རྗེ་ཁོལ་གྱི་ཚུལ་དུ་བལྟས་ནས་དངོས་གྲུབ་བླང་བའོ། །མཚན་མེད་ནི། མཚན་བཅས་ཀྱི་སྣང་བ་དེ་ཡང་མི་དམིགས་པ་དག་པ་མཐའ་བཞི་དང་བྲལ་བའི་ངང་དུ་འཇོག་པས་བདེན་གཉིས་རེས་འཇོག་ཏུ་བསྒོམ་པའོ། །སྤྱོད་པ་ནི། བྱ་བ་དྲུག་སྟེ། འཇུག་པའི་དུས་དང་། ཟས་དང་། གོས་དང་གཙང་སྦྲ་དང་། དམིགས་རྟེན་དང་། བཟླས་བརྗོད་སྔགས་ཀྱི་བྱ་བ་རྣམས་སོ། །འབྲས་བུ་ནི། མི་ཚེ་བདུན་ན་རིགས་གསུམ་རྡོ་རྗེ་འཛིན་པའི་ས་སྐུ་གསུམ་ཡེ་ཤེས་ལྔ་ཡི་བདག་ཉིད་ཐོབ་པར་འདོད་པ་སྟེ། ལམ་རིམ་ལས། གཉིས་མེད་མཉམ་པར་མ་ཤེས་པས། །དོན་དམ་དག་པ་ཆོས་ཉིད་ཙམ། །ཡེ་ཤེས་བཞི་ཡོན་ཀུན་རྫོབ་ལྷ། །རེས་སྒོམ་བྱེད་པ་ལས་ཀྱི་ས། །ཞེས་སོ། །གཉིས་པ་ཨུ་པ་ཡའི་ཐེག་པའི་ངོ་བོ་ནི། ལྟ་སྒོམ་ཡོ་ག་དང་། སྤྱོད་པ་བྱ་བ་ལྟར་སྤྱོད་པས་དངོས་གྲུབ་སྒྲུབ་པའི་ཐབས་སུ་གྱུར་པའོ། །ངེས་ཚིག་ནི། ཨུ་པ་ཡའི་སྒྲ་ལས། ཕྱིའི་བྱ་བ་དང་ནང་གི་རྣལ་འབྱོར་གཉིས་ཆ་མཉམ་དུ་སྤྱོད་པའི་ཕྱིར་གཉིས་ཀའི་རྒྱུད་ཀྱི་ཐེག་པ་ཞེས་བྱའོ། །དབྱེ་བ་ལས། དབང་གི་འཇུག་སྒོ་ཆུ་དང་ཅོད་པཎ་གཉིས་ཀྱི་སྟེང་དུ་རྡོ་རྗེ་དྲིལ་བུའི་མིང་སྟེ་གསུམ་བསྣན་པ་ཐུན་མོང་རིག་པའི་དབང་ལྔའོ། །བྱ་བའི་འཇུག་སྒོ་དང་། ཚུལ་ཁྲིམས། སྤྱོད་པ་རྣམས་ནི་བྱ་རྒྱུད་དང་མཐུན་ཞིང་། རྒྱལ་བ་རིགས་བཞིར་བལྟ་ཞིང་བསྒོམ་པ་སོགས་ཁྱད་པར་ཅུང་ཟད་ལས་ལྟ་སྒོམ་ཡོ་ག་དང་ཤས་ཆེར་མཐུན་ནོ། །འབྲས་བུ་ནི། མི་ཚེ་ལྔ་ན་རིགས་བཞི་རྡོ་རྗེ་འཛིན་པའི་ས་ཐོབ་པར་འདོད་པ་སྟེ། རིགས་བཞི་ནི་ལས་ཀྱི་རིགས་རིན་པོ་ཆེའི་རིགས་ལ་བསྡུས་པའོ། །དེ་ལྟར་ཡང་། རང་ཤར་ལས། ཨུ་པ་ཡ་ནི་འདི་ལྟ་སྟེ། ལྟ་བ་ཡོ་གར་བལྟ་བ་ལ། སྤྱོད་པ་ཀྲི་ཡར་སྤྱོད་པའོ། །དེ་ཕྱིར་གཉིས་ཀའི་རྒྱུད་ཅེས་གྲགས། །ཞེས་དང་། གཡུ་ཐང་ལས། གཉིས་ཀ་རྒྱུད་ཀྱི་འདོད་པ་ནི། །སྤྱོད་པ་བྱ་བའི་རྗེས་མཐུན་ཡང་། །ལྟ་བ་རྣལ་འབྱོར་རྗེས་མཐུན་ཕྱིར། །རིགས་དང་ལྟ་བས་ཁྱད་པར་འཕགས། །ཞེས་སོ། །གསུམ་པ་ཡོ་གའི་ཐེག་པའི་ངོ་བོ་ནི། དོན་དམ་མཚན་མ་མེད་པའི་ཆོས་ཉིད་ཀྱི་བྱིན་རླབས་ཀུན་རྫོབ་རྡོ་རྗེ་དབྱིངས་ཀྱི་ལྷར་བརྟགས་ཏེ་རྟོག་པ་བཟང་ངན་བླང་དོར་གྱི་རྩོལ་བས་འབྲས་བུ་སྒྲུབ་པར་འདོད་པའོ། །ངེས་ཚིག་ནི། ཡོ་གའི་སྒྲ་ལས་ནང་གི་རྣལ་འབྱོར་གཙོ་བོར་བྱེད་པའམ་སྟོན་པས་རྣལ་འབྱོར་གྱི་རྒྱུད་ཅེས་བྱ། དབྱེ་བ་ལས། འཇུག་སྒོའི་དབང་ནི། རིག་པའི་དབང་ལྔའི་སྟེང་དུ་རྡོ་རྗེ་སློབ་དཔོན་གྱི་དབང་དང་དྲུག་བསྐུར། བྱ་བའི་འཇུག་སྒོ་མཚན་བཅས་དང་མཚན་མེད་ཀྱིི་ཏིང་ངེ་འཛིན་ཀྱི་སྒོ་ནས་འཇུག ལྟ་བ་ནི། བདེན་པ་གཉིས་ཏེ། དོན་དམ་མཚན་མ་མེད་པའི་ཆོས་ཉིད་རང་བཞིན་གྱིས་འོད་གསལ་བར་རྟོགས་པས། དེའི་བྱིན་རླབས་ཡང་དག་པའི་ཀུན་རྫོབ་རྡོ་རྗེ་དབྱིངས་ཀྱི་དཀྱིལ་འཁོར་དུ་སྣང་བའི་ཕྱིར། སྐྱེ་བོས་སྣང་བ་རང་རྒྱུད་དུ་བརྟགས་པ་འདི་མེད་པར་འདོད་དེ། རྟ་རིམ་ལས། ཡོ་ག་དོན་དམ་རྣམ་དག་པའི། །ཆོས་ཀྱི་དབྱིངས་ཀྱི་ཡེ་ཤེས་སུ། །རྟོགས་པའི་བྱིན་རླབས་ལྷར་སྣང་བ། །དེ་ཕྱིར་སྐྱེ་བོ་ལྟར་སྣང་འཁྲུལ། །ཞེས་སོ། །ཚུལ་ཁྲིམས་ནི། རྩེ་མོར་གསུངས་པའི་རིགས་ལྔ་སྤྱི་དང་བྱེ་བྲག་སོ་སོའི་དམ་ཚིག་རྣམས་དང་། ཡང་འབྱེད་འཕྲུལ་སྡེར་གསུངས་པ་རྣམས་ཏེ་ཞིབ་པར་ཐེག་དགུ་ལས། ཚུལ་ཁྲིམས་རིགས་ལྔ་སྤྱིའི་དམ་ཚིག །བྱང་ཆུབ་སེམས་མཆོག་དང་པོར་བསྐྱེད། །དེ་རྗེས་ཚུལ་ཁྲིམས་གསུམ་ལ་བསླབ། །བྱེ་བྲག་སྣང་མཛད་དམ་ཚིག་གསུམ། །སེམས་བསྐྱེད་ཚུལ་ཁྲིམས་སྐྱབས་འགྲོ་བའོ། །མི་བསྐྱོད་རྡོར་དྲིལ་ཕྱག་རྒྱ་དང་། །སློབ་དཔོན་བཟུང་བཞི་རིན་ཆེན་ལ། །ནོར་ཆོས་མི་འཇིགས་བྱམས་སྦྱིན་བཞི། །པདྨར་ཐེག་པ་ཀུན་འཛིན་གཅིག །ལས་རིགས་ཀུན་མཛིན་མཆོད་བརྩོན་གཉིས། །གཞན་དུ་བྱ་རྒྱུད་དམ་ཚིག་སྟེང་། །ལུང་གཅིག་ཆུ་ལ་མི་བཏུང་ཞིང་། །ཉམས་དང་ཁ་མི་བསྲེ་བ་དང་། །ཡི་དམ་ལྷ་དང་སློབ་དཔོན་མཆེད། །རང་སེམས་མ་ཁྲེལ་སོགས་ཀྱང་བཤད། །ཅེས་སོ། །སྒོམ་པ་ནི། མཚན་བཅས་མཚན་མེད་གཉིས་ཀྱི། མཚན་བཅས། སྟོང་པ་ཉིད་དང་། ཟླ་གདན་དང་། གསུང་ཡིག་འབྲུ་དང་། ཐུགས་ཕྱག་མཚན་དང་། སྐུ་ཡོངས་སུ་རྫོགས་པ་ལས་མངོན་པར་བྱང་ཆུབ་པ་སྟེ་མངོན་བྱང་ལྔ་དང་། ཏིང་ངེ་འཛིན་དང་། དབང་བསྐུར་བ་དང་། བྱིན་གྱིས་རློབ་པ་དང་། མཆོད་པའི་ཚེ་འཕྲུལ་ཏེ་ཆོ་འཕྲུལ་བཞིའི་སྒོ་ནས་ལྷ་དང་ལྷ་མོའི་རྣལ་འབྱོར། སྐུ་ཕྱག་ཆེན། གསུང་ཆོས་རྒྱ། ཐུགས་དམ་རྒྱ། ཕྲིན་ལས་ལས་རྒྱ་སྟེ་ཕྱག་རྒྱ་བཞིས་རྒྱས་བཏབ་ནས་རང་དམ་ཚིག་པར་བསྐྱེད་པ་ལ། ཡེ་ཤེས་སེམས་དཔའ་སྤྱན་དྲངས་ནས་སྤུན་ནམ་གྲོགས་ཀྱི་ཚུལ་དུ་བཟང་ངན་མེད་པར་བལྟས་ཏེ་མཆོད་བསྟོད་བཟླས་པ་བྱ་བ་ནི་ཡོ་ག་ཙམ་པོ་པའི་ལུགས་ཡིན་ལ། ཡོ་ག་ཁྱད་པར་པའི་དབང་དུ་བྱས་ན་དང་པོའི་སྦྱོར་བ་བདག་ཉིད་ལྷའི་གཙོ་བོར་བསྒོམ་རྗེས། དཀྱིལ་འཁོར་རྒྱལ་མཆོག་མདུན་དུ་ཡེ་ཤེས་ཀྱི་འཁོར་ལོ་རྫོགས་པར་བསྒོམ་སྟེ། ལས་རྒྱལ་མཆོག་དེ་གཉིས་ཀ་ལ། ཡེ་ཤེས་པ་དགུག་བསྟིམ་གཉིས་མེད་དུ་བྱས་ནས་མཆོད་བསྟོད་བཟླས་པ་སོགས་བྱས་རྗེས་སླར་གཤེགས་སུ་གསོལ་བའི་ཁྱད་པར་ཡོད་དོ། །མཚན་མེད་ནི། དོན་དམ་མཚན་མ་མེད་པའི་ངོ་བོ་ཉིད་དང་། དེའི་བྱིན་རླབས་ལྷར་སྣང་ཡེ་ཤེས་ཀྱི་སྣང་ཆ་གཉིས་གཉིས་སུ་མེད་པའི་ངང་ལ་མཉམ་པར་འཇོག་པའོ། །སྤྱོད་པ་ནི། གཙང་སྦྲ་སོགས་ཕྱིའི་ཀུན་སྤྱོད་ཀྱི་གྲོགས་དང་ལྡན་པའི་སྒོ་ནས་གཙོ་བོར་ལྷའི་རྣལ་འབྱོར་ལ་གནས་པས་རང་གཞན་གྱི་དོན་སྤྱོད་པའོ། །འབྲས་བུ་མི་ཚེ་གསུམ་ན་སྟུག་པོ་བཀོད་པའི་ས་ལ་སྐུ་གསུམ་ཡེ་ཤེས་ལྔ་ཡི་བདག་ཉིད་དུ་སངས་རྒྱས་པར་འདོད་དེ། ལམ་རིམ་ལས། ལྷུན་གྲུབ་མཉམ་པ་མ་མཐོང་བས། །ཆོས་ཀུན་རྣམ་དག་ཡེ་ཤེས་ཀྱི། །བྱིན་རླབས་རྡོ་རྗེ་དབྱིངས་སྤྲུལ་པ། །བླང་དོར་བྱེད་པ་རྣལ་འབྱོར་ས འོ། །ཞེས་དང་། ཀུན་བྱེད་ལས། ཡོ་ག་སྟུག་པོ་བཀོད་འདོད་པས། །མི་ཚེ་གསུམ་ན་གྲོལ་བར་འདོད། །ཅེས་སོ། །དེས་ན་སྔགས་ཕྱི་རྒྱུད་རྣམས་སུ་ཀུན་རྫོབ་ལྷར་བལྟ་བའང་། ཆོས་ཉིད་དག་པར་རྟོགས་པའི་དབང་གིས་ཆོས་ཅན་ལྷར་སྣང་བར་འདོད་ཀྱི། སྔགས་ནང་པ་བཞིན་དུ་རྟོགས་རུང་མ་རྟོགས་རུང་འདི་ལྟར་སྣང་བའི་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་མཉམ་པ་ཉིད་དུ་རྟོགས་པ་མ་ཡིན་ལ། དེའི་དབང་གིས་སྤྱོད་པ་བླང་དོར་མེད་པ་མཉམ་པ་ཉིད་ལ་མངོན་དུ་སྤྱོད་ནུས་པ་མ་ཡིན་ཞིང་། འབྲས་བུ་ཐོབ་པའི་དུས་ཀྱི་ཡུན་མི་ཚེ་བདུན་སོགས་གསུངས་པའང་རིག་འཛིན་གྲུབ་པའི་དབང་གིས་ཡུན་རིང་དུ་གནས་པའི་དབང་དུ་མཛད་ཀྱི། གཞན་དུ་བྱ་རྒྱུད་རང་ལམ་གྱིས་བསྐལ་ཆེན་བརྒྱད་ནས་མཐར་འབྲས་ལ་སྦྱོར་བར་གསུངས་པ་སོགས་གནད་ཀྱིས་མི་འགལ་ཞིང་དོན་གཅིག་ཏུ་འབབ་པ་ཡིན་ནོ། །དེ་ལྟར་ཕྱི་རྒྱུད་སྡེ་གསུམ་པོ་དེ་ལའང་དག་པ་མཐར་ཕྱིན་པ་འབྲས་བུ་སྐུ་དང་ཡེ་ཤེས་ཀྱི་རང་བཞིན་དུ་གྱུར་པའི་ལྷ་ཉིད་མཚན་མ་དང་སྔགས་ཀྱི་རྣམ་པར་ཤར་བ་ལམ་དུ་བྱེད་པའི་སྒོ་ནས་སངས་རྒྱས་ཀྱི་མཛད་པ་ལ་ད་ལྟ་ནས་ཅི་རིགས་པར་འཇུག་པའི་ཆ་ནས་འབྲས་བུ་ལམ་བྱེད་ཀྱི་ཚུལ་ཡོད་ཅིང་། དེའི་དབང་གིས་མདོ་ལམ་ལས་ཐབས་ཀྱིས་འཕགས་ཤིང་མྱུར་བའི་ལམ་ཡིན་ནོ། །དེས་དཀའ་ཐུབ་རིག་བྱེད་ཀྱི་ཐེག་པ་སྔགས་ཕྱི་རྒྱུད་གསུམ་གྱི་རྣམ་བཞག་མདོ་ཙམ་ཞུས་གྲུབ་ནས། གཉིས་པ་ནང་པ་ཐབས་ཀྱི་རྒྱུད་ཀྱི་ཐེག་པ་ནི། ལྟ་བ་བདེན་པ་དབྱེར་མེད་དུ་རྟོགས་པ་དང་། སྒོམ་པ་ལྷ་ཞལ་སྦྱོར་དུ་སྒོམ་པ། སྤྱོད་པ་གཙང་དམེ་བླང་དོར་ལས་འདས་པ་དང་། འབྲས་བུ་ཚེ་གཅིག་གིས་བྱང་ཆུབ་མངོན་དུ་བྱེད་ནུས་པ་སོགས་ཀྱི་སྔགས་ཕྱི་པ་ལས་ཁྱད་པར་དུ་འཕགས་སོ། །དེ་ལའང་ཆོས་ཐམས་ཅད་སེམས་ཉིད་སྣང་སྟོང་དབྱེར་མེད་ཀྱི་ཆོ་འཕྲུལ་དུ་རྟོགས་པ་མ་ཧཱ། ཆོས་ཐམས་ཅད་སེམས་ཉིད་དབྱིངས་ཡེ་གཉིས་སུ་མེད་པའི་རྩ ལ་དུ་རྟོགས་པ་ཨ་ནུ། ཆོས་ཐམས་ཅད་སེམས་ཉིད་ཡེ་ནས་སྐྱེ་འགག་མེད་པའི་རང་བྱུང་གི་ཡེ་ཤེས་རང་སྣང་བར་རྟོགས་པ་ཨ་ཏི་གསུམ་སྟེ། རང་ཤར་ལས། ནང་པ་ལ་ནི་གསུམ་དུ་འདོད། །མ་ཧཱ་ཨ་ནུ་ཨ་ཏིའོ། །ཞེས་དང་། རྩལ་རྫོགས་ལས། བསྐྱེད་པ་མ་ཧཱ་ཡོ་ག་ནི་ཆོས་ཐམས་ཅད་ཀྱི་གཞི་ལྟ་བུའོ། །ལུང་ཨ་ནུ་ཡོ་ག་ནི་ཆོས་ཐམས་ཅད་ཀྱི་ལམ་ལྟ་བུའོ། །རྫོགས་པ་ཨ་ཏི་ཡོ་ག་ནི་ཆོས་རྣམས་ཀྱི་འབྲས་བུ་ལྟ་བུའོ། །ཞེས་སོ། །དེ་ལས། དང་པོ་མ་ཧཱ་ཡོ་གའི་ཐེག་པའི་ངོ་བོ་ནི། ཐབས་བ སྐྱེད་པའི་རིམ་པ་ལ་གཙོ་བོར་བརྟེན་ནས་ལྷག་པ་བདེན་པ་དབྱེར་མེད་ཀྱི་དོན་ལ་རྟོགས་གོམས་ཀྱི་སྦྱོར་བས་གྲོལ་བ་ཐོབ་པའི་རང་བཞིན། ངེས་ཚིག་ནི། མ་ཧཱ་ཡོ་གའི་སྒྲ་ལས་རྣལ་འབྱོར་ཆེན་པོ་སྟེ། གཉིས་མེད་ཀྱི་དོན་ལ་བློ་འབྱོར་བས་ཡོ་ག་ཕྱི་པ་ལས་ཆེས་འཕགས་པའི་ཕྱིར་རོ། །དབྱེ་བ་ལས། འཇུག་སྒོ་དབང་ནི། ཐུན་མོང་བ་བུམ་དབང་གི་སྟེང་དུ། ཐུན་མིན་མཆོག་དབང་གོང་མ་གསུམ་བསྣན་པས་དབང་བཞིའི་ངེས་པ་ཅན་ཏེ། སྒྱུ་འཕྲུལ་ལྟར་ན་བུམ་དབང་ལ་གཉིས་སུ་ཕྱེ་བའི་ཕན་ནུས་ཟབ་མོའི་དབང་ལྔའོ། །བྱ་བའི་འཇུག་སྒོ་ནི། ཤེས་རབ་སྟོང་པ་ཆེན་པོའི་རྣལ་འབྱོར་དང་། ཐབས་སྙིང་རྗེ་སྒྱུ་མ་དང་། ཕྱག་རྒྱ་ཕྲ་རགས་ཀྱི་ཏིང་ངེ་འཛིན་རྣམ་པ་གསུམ་གྱི་སྒོ་ནས་འཇུག་སྟེ་བསྐྱེད་རིམ་གཙོ་བོར་སྟོན་པའི་ལམ་ཡིན་པའི་ཕྱིར་རོ། །ལྟ་བ་ནི། རིག་པ་སྤྲོས་བྲལ་ལ་སྣང་བ་སྐུ་གསུང་ཐུགས་ཡོན་ཕྲིན་ལས་ཏེ་དབྱིངས་ཡེ་འབྲས་བུའི་དོན་དམ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་ལྷག་པའི་དོན་དམ་དང་། དེ་ཉིད་ཀྱི་རྩལ་ཕུང་ཁམས་སྐྱེ་མཆེད་ཀྱིས་བསྡུས་པའི་རྟོག་ཚོགས་ཐམས་ཅད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བ་ལྷག་པ་ཀུན་རྫོབ་སྟེ། བདེན་པ་དེ་གཉིས་ཀྱང་སྣང་སྟོང་ཕྱོགས་རེ་བ་མ་ཡིན་པར། གསེར་དང་གསེར་གྱི་སེར་པོ་དང་། གཡུ་དང་གཡུའི་ཁ་དོག་བཞིན་དུ། ངོ་བོ་དབྱེར་མེད་པར་མཉམ་པ་ཉིད་དུ་སྣང་བའི་ཕྱིར། ཐ་སྙད་དུ་དབྱེར་མེད་བརྗོད་ཀྱང་། དེར་འཛིན་གྱི་བསམ་བརྗོད་ཀྱི་ཡུལ་ལས་འདས་པའི་ཕྱིར་དབྱེར་མེད་སྤྱོད་ཡུལ་དང་བྲལ་བ་ཞེས་བྱའོ། །ཚུལ་ཁྲིམས་ལ། སྔགས་ཕྱི་འགྱུར་བ་རྣམས། བླ་མ་ལ་སྨོད་པ། བདེ་གཤེགས་བཀའ་འདས། མཆེད་ལ་འཁུ་བ། བྱམས་པ་བཏང་བ། བྱང་སེམས་སྤངས་པ། གྲུབ་མཐའ་སྨོད་པ། གསང་བ་སྒྲོགས་པ། ཕུང་པོ་བརྙས་པ། རང་བཞིན་དག་པའི་ཆོས་ལ་སོམ་ཉི་ཟ་བ། ཞིང་བཅུ་མི་སྒྲོལ་བ། དོན་དམ་ལ་རྟོག་དཔྱོད་ཀྱི་བློས་འཇལ་བ། དད་ལྡན་སུན་འབྱིན་པ། སྐབས་བབས་ཀྱི་དམ་རྫས་མི་བསྟེན་པ། ཤེས་རབ་མ་ལ་སྨོད་པ་སྟེ་རྩ་ལྟུང་བཅུ་བཞི་དང་། མ་སྨིན་པའི་རིག་མ་བསྟེན་པ། ཚོགས་འཁོར་གྱི་དུས་སུ་ཀྱལ་ཀའི་རྩོད་པ། མཚན་ངན་ལས་འདུད་རྩི་ལེན་པ། སྣོད་ལྡན་ལ་གསང་སྔགས་མི་སྟོན་པ། དད་ལྡན་ལ་ཆོས་མི་སྟོན་པ། ཉན་ཐོས་ནང་དུ་ཞག་བདུན་བསྡད་པ། ང་རྒྱལ་གྱིས་སྔགས་པར་རློམ་པ། སྣོད་མིན་ལ་ཆོས་བཤད་པ་སྟེ་ཡན་ལག་གི་ལྟུང་བ་བརྒྱད་བཅས་སྤང་བ་དང་། སྤྱད་བྱའི་དམ་ཚིག་ཤ་ལྔ་བདུད་རྩི་ལྔའི་རང་བཞིན་ཤེས་ནས་སྤྱོད་པ་གཉིས་སུ་བཞེད། སྔ་འགྱུར་གྱི་རང་སྐད་དུ། རྣལ་འབྱོར་ཆེན་པོའི་དམ་ཚིག་ཉི་ཤུ་རྩ་བརྒྱད་དེ། བླ་མ་དང་མཆེད་ལ་གུས་པ་སྐུ། སྔགས་དང་ཕྱག་རྒྱ་ལ་བརྩོན་པ་གསུང་། བླ་མེད་བྱང་ཆུབ་ཀྱི་སེམས་མི་སྤང་ཞིང་གསང་བ་བསྲུང་བ་ཐུགས་ཀྱི་དམ་ཚིག་སྟེ་རྩ་བ་གསུམ། ཏ་ན་ག་ན་མ་བྱིན་ལེན་རྫུན་ཚིག་བརླང་སྟེ་སྤྱད་བྱ་ལྔ། ཆགས་སྡང་གཏི་མུག་ང་རྒྱལ་ཕྲག་དོག་སྟེ་མི་སྤང་བ་ལྔ། དྲི་ཆེན་དྲི་ཆུ་བྱང་སེམས་དཀར་དམར་མམ་ས་སྟེ་དང་དུ་བླང་བ་ལྔ། ཕུང་པོ་འབྱུང་བ་ཡུལ་དབང་ཁ་དོག་རྣམས་ལྷར་ཤེས་པ་ཤེས་བྱ་ལྔ། དེ་བཞིན་གཤེགས་པ་དང་། རྡོ་རྗེའི་རིགས་སོགས་བདེ་གཤེགས་རིགས་ལྔ་སྒྲུབ་པ་བསྒྲུབ་བྱ་ལྔ་སྟེ་ཡན་ལག་གི་དམ་ཚིག་ཉེར་ལྔ་པོ་ཐབས་ཤེས་ཁྱད་པར་ཅན་གྱིས་ཟིན་པའི་སྒོ་ནས་སྤྱོད་པར་གསུངས་པ་དང་། ཁྱད་པར་གསང་བ་སྒྱུ་འཕྲུལ་ལྟར་ན། བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །ཞེས་རྩ་བའི་དམ་ཚིག་ལྔ་དང་། དུག་ལྔ་མི་སྤང་བ་དང་། བདུད་རྩི་ལྔ་མི་འདོར་བ་སྟེ་ཡན་ལག་གི་དམ་ཚིག་བཅུར་བཞེད་དོ། །བསྒོམ་པ་ལ། སྒྲུབ་སྡེ་གཙོ་བོ་བྱས་པ། འཇམ་དཔལ་སྐུ། པདྨ་གསུང་། ཡང་དག་ཐུགས་སོགས་སྒྲུབ་པ་ཆེན་པོ་བཀའ་བརྒྱད་སྤྱི་བྱེ་བྲག་སོ་སོའི་དགོས་ཆོས་གྲུབ་པ་བརྙེས་པའི་སློབ་དཔོན་རྣམས་ཀྱིས་མན་ངག་གིས་བཀྲལ་པའི་དོན་བཞིན་སྒྲུབ་པ་དང་། རྒྱུད་སྡེ་གཙོ་བོར་བྱས་ན་ཕ་མ་གཉིས་མེད་ཀྱི་རྒྱུད་གསུམ་ལས། གསང་འདུས་སོགས་ཕ་རྒྱུད་རྣམས་སུ་བསྐྱེད་རིམ་ཐབས་ཀྱི་ཆ་དང་། རྫོགས་རིམ་རླུང་གཙོ་བོར་བྱེད་པས་གསལ་སྟོང་རྣམ་པར་མི་རྟོག་པའི་ཚུལ་གྱིས་ཉམས་སུ་ལེན་པར་འདོད། བདེ་དགྱེས་སོགས་མ་རྒྱུད་རྣམས་སུ་བསྐྱེད་རིམ་གྱི་སྤྲོས་པ་ཤས་ཆུང་ཞིང་། ཤེས་རབ་རྫོགས་པའི་རིམ་པ་ཁམས་གསུམ་བྱང་ཆུབ་སེམས་ཐིག་ལེའི་རྣལ་འབྱོར་གཙོ་བོར་བྱེད་པས་བདེ་སྟོང་རྣམ་པར་མི་རྟོག་པའི་ཚུལ་གྱིས་ཉམས་སུ་ལེན་པར་འདོད། སྒྱུ་འཕྲུལ་དྲྭ་བ་སོགས་གཉིས་མེད་དམ་མ་ནིང་གི་རྒྱུད་རྣམས་སུ་བསྐྱེད་རྫོགས་ཟུང་དུ་འཇུག་ཅིང་། དེའང་རྫོགས་རིམ་རྩ་ཐིག་རླུང་གསུམ་ལས་སྐྱེས་པའི་བདེ་གསལ་མི་རྟོག་པའི་ཡེ་ཤེས་དང་། ཁྱད་པར་འོད་གསལ་ཡེ་ཤེས་ཆེན་པོ་ལ་གཙོ་བོར་བྱེད་པའི་ཚུལ་གྱིས་ཉམས་སུ་ལེན་པར་འདོད་དོ། །འདིར་གསང་བ་སྒྱུ་འཕྲུལ་གྱི་དབང་དུ་བྱས་ཏེ་བཤད་ན། མཚན་བཅས་དང་། མཚན་མེད་གཉིས་ཀྱི། དང་པོ་ལ་བསྐྱེད་རྫོགས་གཉིས་ལས། བསྐྱེད་རིམ་ནི། ཏིང་ངེ་འཛིན་གསུམ་ལ་བརྟེན་ནས་དཀྱིལ་འཁོར་རིམ་གྱིས་བསྐྱེད་པ་གཙོ་བོར་བྱེད་པའི་སྒོ་ནས་ལྷ་རྟོག་དབྱེར་མེད་དུ་བསྒོམ་པའི་ཉམས་ལེན། དེ་ལའང་མོས་བསྒོམ་དང་། ངེས་རྫོགས་གཉིས་ལས། དང་པོ་ནི། ཏིང་ངེ་འཛིན་ལ་བརྟན་པ་མ་ཐོབ་ཀྱང་རྣམ་པ་ཙམ་བསྒོམ་པ་ནུབ་གཅིག་ལ་བསྐྱེད་རིམ་གྱི་ཆོ་གའི་ཡན་ལག་ཚང་བ་ཉམས་སུ་ལེན་པ་ལྟ་བུ། གཉིས་པ་ནི། བསྐྱེད་རིམ་གྱི་ཡན་ལག སྟོང་པ་ཆེན་པོ། སྙིང་རྗེ་སྒྱུ་མ། ཕྱག་རྒྱ་གཅིག་པ། ཕྱག་རྒྱ་སྤྲོས་བཅས། ཚོམ་བུ་ཚོགས་སྒྲུབ་སྟེ་ཟག་བཅས་ཚོགས་སྦྱོར་གྱི་རྣལ་འབྱོར་ལྔ་དང་། མཐོང་ལམ་ལ་ནུས་པ་ཐོབ་མ་ཐོབ་ཀྱི་ཁྱད་པར་གྱིས་རྣམ་སྨིན་དང་ཚེ་དབང་གཉིས། སྒོམ་ལམ་ཕྱག་ཆེན། མཐར་ལམ་ལྷུན་གྲུབ་སྟེ་ཟག་མེད་རིག་འཛིན་བཞིའོ། །རྫོགས་རིམ་ལ་སྟེང་སྒོ་འཇུ་འདུལ་གྱི་མན་ངག་དང་། འོག་སྒོ་ཁམས་གསུམ་རོལ་བའི་མན་ངག་གཉིས་ཡོད། གཉིས་པ་མཚན་མེད་ནི། ཆོས་ཉིད་དེ་བཞིན་ཉིད་ཀྱི་ཏིང་ངེ་འཛིན་བསྒོམ་པའོ། །སྤྱོད་པ་ནི། ཐབས་ལ་མཁས་པའི་གདེང་གིས་ཟིན་པས་འཁོར་བའི་ཆོས་ཅི་ལའང་མ་ཆགས་པར་སྤྱོད་པའོ། །འབྲས་བུ་ནི། ཚེ་འདིའམ་བར་དོར་སྐུ་ལྔ་ལྷུན་གྱིས་གྲུབ་པའི་བདག་ཉིད་མངོན་དུ་བྱེད་པ་སྟེ། རང་ཤར་ལས། འཇུག་པའི་སྒོ་ནི་ཏིང་འཛིན་རྣམ་པ་གསུམ། །རྟོགས་པའི་ལྟ་བ་ཅིར་སྣང་ལྷ་རུ་རྟོགས། །བསྲུང་བའི་དམ་ཚིག་རྩ་བ་སྐུ་གསུང་ཐུགས། །འབྲས་བུ་ཐབས་དང་ཤེས་རབ་འདུ་འབྲལ་མེད། །ཅེས་སོ། །གཉིས་པ་ལུང་ཨ་ནུ་ཡོ་གའི་ཐེག་པ་ལ། ངོ་བོ་ནི། ཤེས་རབ་རྫོགས་པའི་རིམ་པ་ལ་གཙོ་བོར་བརྟེན་པའི་སྒོ་ནས་དབྱིངས་དང་ཡེ་ཤེས་གཉིས་སུ་མེད་པའི་དོན་རྟོགས་གོམས་ཀྱི་སྦྱོར་བས་གྲོལ་པ་ཐོབ་པའི་རང་བཞིན་ནོ། །ངེས་ཚིག་ནི། ཨ་ནུ་ཡོ་ག་སྟེ་ཤེས་རབ་རྗེས་ཆགས་ཀྱི་ལམ་གཙོ་བོར་སྟོན་པའི་ཕྱིར་རྗེས་སུ་རྣལ་འབྱོར་རོ། །དབྱེ་བ་ལ། འཇུག་སྒོ་དབང་ནི། ཨ་ནུའི་དཀྱིལ་འཁོར་དུ། ཕྱི་དབང་རྒྱུད་ཀྱི་ཆུ་བོ་བཅུ། ནང་དབང་འབྱུང་བའི་ཆུ་བོ་བཅུ་གཅིག སྒྲུབ་དབང་གྲགས་པའི་ཆུ་བོ་བཅུ་གསུམ། གསང་དབང་རྫོགས་པའི་ཆུ་བོ་གཉིས་བཅས་ཕྱི་ནང་སྒྲུབ་གསང་བཞིས་བསྡུས་པའི་དབང་ཆོག་སུམ་ཅུ་རྩ་དྲུག་གོ །བྱ་བའི་འཇུག་སྒོ་ནི། དབྱིངས་དང་ཡེ་ཤེས་གཉིས་སུ་མེད་པའི་སྒོ་ནས་འཇུག་སྟེ། མ་བསྐྱེད་རྫོགས་པའི་ཚུལ་གྱིས་སོ། །ལྟ་བ་ནི། ཆོས་ཐམས་ཅད་རང་གི་སེམས་ཡིན་ལ། དེ་ཉིད་སྐྱེ་མེད་སྤྲོས་པ་དང་བྲལ་བའི་རང་བཞིན་ཡུམ་ཀུན་ཏུ་བཟང་མོའི་མཁའ་ཀློང་རྣམ་པར་དག་པ་ཡེ་ཇི་བཞིན་པའི་དཀྱིལ་འཁོར་དང་། སྐྱེ་མེད་དེ་ཉིད་ཐམས་ཅད་དུ་མི་འགག་པར་རང་སྣང་རིས་མེད་ཀུན་ཁྱབ་ཏུ་ཤར་བ་ནི་ཡེ་ཤེས་ཀུན་ཏུ་བཟང་པོའམ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དང་། དེ་གཉིས་ཀྱང་ངོ་བོ་ཐ་མི་དད་པར་ཟུང་འཇུག་ཏུ་གནས་པ་ནི། དབྱིངས་དང་ཡེ་ཤེས་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཏེ། ཆོས་ཐམས་ཅད་དཀྱིལ་འཁོར་རྣམ་གསུམ་དབྱེར་མེད་པའི་རང་བཞིན་རྩ་བ་བྱང་ཆུབ་སེམས་ཀྱི་དཀྱིལ་འཁོར་དུ་ཡེ་ནས་སངས་རྒྱས་པར་བལྟ་ཞིང་། ཀུན་ཏུ་བཟང་པོའི་རོལ་པ་མ་འགགས་པའི་རྩལ་སྣང་ལྷ་སྐུར་འཆར་བར་འདོད་དོ། །ཚུལ་ཁྲིམས་ནི། དབྱེ་ན། གལ་མདོ་ངེས་པའི་དམ་ཚིག་བཞི། ཐུན་མོང་གི་ཉེར་བརྒྱད། ལྷག་པའི་བཞི། བརྟུལ་ཞུགས་ཀྱི་ཉེར་གསུམ། སྒྲུབ་པའི་ཉི་ཤུ། སྤྱོད་ལམ་རྒྱན་གྱི་བཞི། བདུད་ལྔ་སྤང་བ། དགྲ་བཞི་གཞོམ་པ། ལྟ་བའི་དམ་ཚིག་སྟེ་རྣམ་གྲངས་དགུར་སྤྱི་མདོའི་ལེའུ་རེ་དྲུག་པར་གསུངས་ཀྱང་། བསྡུ་ན་བསྲུང་མཚམས་མེད་པ་ཅིག་ཅར་བའི་དམ་ཚིག་དང་། བསྲུང་མཚམས་ཅན་རིམ་གྱིས་པའི་དམ་ཚིག་གཉིས་སུ་འདུའོ། །བསྒོམ་པ་ནི་ཐབས་གྲོལ་གཉིས་ཀྱི། ཐབས་ལམ་སྟེང་སྒོ་འཁོར་ལོ་བཞིའམ་དྲུག་བསྒོམ་པའི་རྣལ་འབྱོར་དང་། འོག་སྒོ་མཁའ་གསང་གཉིས་ཀྱི་སྙོམས་འཇུག་ལ་བརྟེན་ནས་ལྷན་སྐྱེས་ཡེ་ཤེས་བསྐྱེད་པའི་ཐབས་ཏེ། གཙོ་བོར་རང་ལུས་ཐབས་ལྡན་དང་། གཞན་ལུས་ཕོ་ཉའི་ལམ་གང་རུང་ལ་བརྟེན་ནས་རྡོ་རྗེའི་ལུས་ལ་གནད་དུ་བསྣུན་པའི་ཐབས་ཀྱིས། ཐབས་བྱུང་བདེ་བ་ཆེན་པོའི་ཡེ་ཤེས་བཙན་ཐབས་སུ་འདྲེན་པའི་མྱུར་ལམ་མོ། །གྲོལ་ལམ་ལ། དོན་རྟོགས་གཉིས་ཀྱི། དང་པོ། སྤྲོས་མེད་རྣམ་པར་མི་རྟོག་པའི་ཏིང་ངེ་འཛིན་ནི་དོན་བཀོད་པ་སྟེ། ཆོས་ཉིད་སྙིང་པོ་ཇི་བཞིན་པའི་ངང་ལ་སྒོམ་བྱེད་ཀྱི་བློ་མ་བཅོས་པར་འཇོག་པའོ། །གཉིས་པ། སྤྲོས་བཅས་ལྷ་ཡི་ཏེང་ངེ་འཛིན་ནི་རྟགས་ཀྱི་རོལ་པ་སྟེ། སྔགས་བརྗོད་པ་ཙམ་གྱིས་ཆུ་ལས་ཉ་ལྡང་བ་ལྟར། སྣོད་བཅུད་ལྷ་ཡི་དཀྱིལ་འཁོར་གསལ་ལ་མ་འདྲེས་པར་ཅིག་ཅར་དུ་བསྒོམ་པ་གཙོ་བོར་བྱེད་པའི་ཉམས་ལེན་ནོ། །དེ་ཡང་སྤྱིར་ངེས་རྫོགས་བསྒོམ་པའི་ལམ་ལ་ཟག་བཅས་དང་ཟག་མེད་གཉིས་ལས། ཟག་བཅས་ཚོགས་ལམ་འདུན་པ་སེམས་པའི་རྣལ་འབྱོར། སྦྱོར་ལམ་རིགས་ཆེན་འབྱེད་པའི་རྣལ་འབྱོར་གཉིས། ཟག་མེད་མཐོང་ལམ་དབུགས་ཆེན་འབྱིན་པའི་རྣལ་འབྱོར། སྒོམ་ལམ་ལུང་ཆེན་ཐོབ་པའི་རྣལ་འབྱོར། མཐར་ལམ་རྩལ་ཆེན་རྫོགས་པའི་རྣལ་འབྱོར་གསུམ་བཅས་ལྔའོ། །སྤྱོད་པ་ནི། སྤྱིར་མཉམ་པ་ཉིད་ལ་གཙོ་བོར་སྤྱོད་ཅིང་། བྱེ་བྲག་ཏུ་དབྱེ་ན། དབྱིངས་ཡེ་གཉིས་མེད་རྟོགས་པའི་བྱིན་རླབས་ཀྱི་སྤྱོད་པ་ནམ་མཁའ་ལྟ་བུ། དུག་ལྔ་ཡེ་ཤེས་ལྔ་ཡི་རང་བཞིན་དུ་དབང་བསྒྱུར་བའི་སྤྱོད་པ་རྒྱལ་པོའམ་མེ་དཔུང་གིས་བུད་ཤིང་བསྲེགས་པ་ལྟ་བུ། འཁོར་འདས་མཉམ་ཉིད་དུ་རྟོགས་པའི་ཐབས་ཀྱི་སྤྱོད་པ་རྒྱུན་མི་འཆད་པ་ཆུ་བོ་ལྟ་བུ་སྟེ་གསུམ་མོ། །འབྲས་བུ་ནི། ཚེ་གཅིག་གི་འབྲས་ཆོས་ཉེར་ལྔ་དབྱེར་མེད་ལྷུན་གྲུབ་ཀྱི་ངོ་བོ་སྐུ་བཞིའི་བདག་ཉིད་བདེ་བ་ཆེན་པོའི་སྐུ་མངོན་དུ་བྱེད་པ་སྟེ། རང་ཤར་ལས། ལུང་ཆེན་ཨ་ནུའི་ཐེག་པ་ནི། །དབྱིངས་དང་ཡེ་ཤེས་རྣམ་པ་གཉིས། །འདུ་འབྲལ་མེད་པའི་རྡོ་རྗེར་འདོད། །ཅེས་དང་། བང་མཛོད་འཕྲུལ་ལྡེ་ལས། ཨ་ནུ་ཡོ་གའི་ཐེག་པ་ནི། །བར་མ་ཆོད་པའི་ཚེ་གཅིག་གིས། །སངས་རྒྱས་ས་ལ་ངེས་པར་འགྲོ། །ཞེས་སོ། །གསུམ་པ་མན་ངག་ཨ་ཏི་ཡོ་གའི་ཐེག་པ་ནི། དབྱིངས་རང་བཞིན་གྱིས་དག་པའི་སེམས་ཉིད་འོད་གསལ་བ་ལྷུན་གྲུབ་རང་གནས་ཆེན་པོར་གནས་པའི་རང་བྱུང་གི་ཡེ་ཤེས་ཉིད་བཅོས་བསྒྱུར་སྤང་ལེན་དང་བྲལ་བར་ལམ་དུ་ཁྱེར་བས་རྩོལ་བཅས་ཀྱི་ཐེག་པ་འོག་མ་ཀུན་ལས་ཁྱད་པར་དུ་འཕགས་སོ། །དེ་ལ་ངོ་བོ་ནི། ཡེ་ནས་སངས་རྒྱས་པའི་དོན་རང་ཐོག་ཏུ་གྲོལ་བར་བྱེད་པའི་ཐབས། སྤང་བླང་རེ་དོགས་དང་བྲལ་བའི་རང་བཞིན་ཅན་ནོ། །ངེས་ཚིག་ནི། ཨ་ཏི་ཡོ་ག་སྟེ། བསྐྱེད་རྫོགས་གཉིས་ཀའི་རྫོགས་རིམ་མཐར་ཐུག་པའི་ཕྱིར་དང་། ཐེག་པ་ཐམས་ཅད་ཀྱི་རྩེ་མོར་གྱུར་པས་ཤིན་ཏུ་རྣལ་འབྱོར་རོ། །དབྱེ་བ་ལས། དབང་གི་འཇུག་སྒོ་ནི། རིག་པའི་རྩལ་དབང་ལ་སོགས་པས་སྨིན་པར་བྱེད་པ་སྟེ། གསང་བ་སྙིང་ཐིག་ལྟར་ན། སྤྲོས་བཅས། སྤྲོས་མེད། ཤིན་ཏུ་སྤྲོས་མེད། རབ་ཏུ་སྤྲོས་མེད་དེ་རྣམ་པ་བཞིའི་སྒོ་ནས་སོ། །བྱ་བའི་འཇུག་སྒོ་ནི། ཅི་ཡང་འཇུག་ཏུ་མེད་པའི་སྒོ་ནས་འཇུག་གོ །ལྟ་བ་ནི། སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་ཐིག་ལེ་ཆེན་པོ་ཆོས་ཀྱི་སྐུ་རང་བྱུང་གི་ཡེ་ཤེས་ཆེན་པོའི་ངོ་བོར་བྱ་རྩོལ་མེད་པར་ཡེ་ནས་སངས་རྒྱས་པར་འདོད་དེ། དེ་ལའང་བསྐྱེད་རྫོགས་གསུམ་གྱི་དབང་བཞི་པའི་ཡེ་ཤེས་ཀྱི་ལུས་རྫོགས་པར་སྟོན་པའི་ཆ་ནས་སེམས་ཀློང་མན་ངག་གི་སྡེ་གསུམ་ལས། སེམས་སྡེ་པས་འདི་ལྟར་སྣང་ཞིང་མྱོང་བའི་ཆོས་ཐམས་ཅད་སེམས་ཉིད་གཅིག་གི་རོལ་པ་ལས་མ་འདས་པས་ཆོས་ཐམས་ཅད་རང་བྱུང་གི་ཡེ་ཤེས་བརྗོད་བྲལ་དུ་འདོད། ཀློང་སྡེ་པས་རང་བྱུང་གི་ཡེ་ཤེས་དང་དེའི་ངང་ངམ་རྩལ་ལས་ཤར་བའི་ཆོས་སོ་ཅོག་ཆོས་ཉིད་ཀུན་ཏུ་བཟང་མོའི་ཀློང་ལས་འགྲོ་ས་གཞན་མེད་པར་ཡེ་གྲོལ་རང་དག་ཏུ་འདོད། མན་ངག་སྡེས་འཁོར་འདས་སྤང་བླང་དང་བྲལ་བའི་ཡིན་ལུགས་གནད་ཐོག་ཏུ་འབེབས་པའི་ཐབས་ཀྱིས་བློ་འདས་རང་བྱུང་གི་ཡེ་ཤེས་སྐད་ཅིག་ལ་འཆར་བར་བྱེད་པས་སྔ་མ་གཉིས་ལས་ཀྱང་ཁྱད་པར་དུ་འཕགས་པའོ། །ཚུལ་ཁྲིམས་ནི། བསྲུང་དུ་ཡོད་པ་སྐུ་གསུང་ཐུགས་ཀྱི་དམ་ཚིག་རེ་རེ་ལའང་དགུ་དགུར་དབྱེ་བས་ཉེར་བདུན་ཏེ། ཕྱི་ལུས་ཀྱི་མི་དགེ་བ། མ་བྱིན་ལེན། མི་ཚངས་སྤྱོད། སྲོག་གཅོད་སྤོང་བ་གསུམ། ནང་ཕ་མ་རྡོ་རྗེའི་སྤུན་སྲིང་དང་རང་ལུས་ལ་སྨོད་པ། ཆོས་དང་གང་ཟག་ལ་སྨོད་པ། ལུས་ལ་རྡེག་འཚོག་དང་དཀའ་ཐུབ་ཀྱིས་བརྙས་ཤིང་གདུང་བ་སྤོང་བ་གསུམ། གསང་བ་རྡོ་རྗེའི་སྤུན་སྲིང་གི་ལུས་ལ་རྡེག་པར་གཟས་ཤིང་རྒྱན་ལ་སྨོད་པ། རྡོ་རྗེའི་མཆེད་ལྕམ་ལ་རྡེག་པ་དང་བླ་མའི་ཡུམ་ལ་གཙེས་པ། བླ་མའི་གྲིབ་མར་འགོང་བ་དང་སྤྱན་སྔར་ལུས་ངག་གི་སྤྱོད་པ་བག་མེད་སྤོང་བ་གསུམ་སྟེ་སྐུ་ཡི་དམ་ཚིག་དགུ། ཕྱི་ངག་གི་ལས་རྫུན། ཕྲ་མ། ཚིག་རྩུབ་སྤོང་བ་གསུམ། ནང་ཆོས་ཀྱི་ཚིག་སྨྲ་བ། དོན་ཡིད་ལ་བསམ་པ། གནས་ལུགས་སྒོམ་པར་བྱེད་པ་རྣམས་ལ་གཤེ་སྐུར་འདེབས་པ་སྤོང་བ་གསུམ། གསང་བ་རྡོ་རྗེའི་སྤུན་སྲིང་གི་ཚིག བླ་མའི་ཕྱག་རྒྱ་དང་ཉེ་འཁོར་གྱི་ཚིག བླ་མའི་གསུང་རྣམས་ལ་བརྙས་ཤིང་གཅོག་པ་སྤོང་བ་གསུམ་སྟེ་གསུང་གི་དགུ། ཕྱི་ཡིད་ཀྱི་ལས་བརྣབ་སེམས། གནོད་སེམས། ལོག་ལྟ་སྤོང་བ་གསུམ། ནང་སྤྱོད་པ་ལོག་པ་བག་མེད། སྒོམ་པ་ལོག་པ་བྱིང་རྒོད་དང་གོལ་སྒྲིབ། ལྟ་བ་ལོག་པ་རྟག་ཆད་མཐར་འཛིན་སྤོང་བ་གསུམ། གསང་བ་ཉིན་ཞག་གི་ཐུན་རེ་བཞིན་ལྟ་སྒོམ་སྤྱོད་གསུམ་ཡིད་ལ་མ་བྱས་པ། ཡི་དམ་གྱི་ལྷ་ཡིད་ལ་མ་བྱས་པ། བླ་མའི་རྣལ་འབྱོར་དང་མཆེད་ལྕམ་ལ་བརྩེ་གདུང་ཡིད་ལ་མ་བྱས་པ་གསུམ་སྤོང་བ་སྟེ་ཐུགས་ཀྱི་དགུ་སྟེ་དེ་ལྟར་ཉེར་དགུའོ། །བསྲུང་དུ་མེད་པ་དག་གི་དམ་ཚིག་མེད་པ་དང་ཕྱལ་བ་གཉིས། ལྷུན་གྲུབ་ཀྱི་དམ་ཚིག་གཅིག་པུ་དང་ལྷུན་གྲུབ་གཉིས་ཏེ་དམ་ཚིག་སྤྱི་སྡོམ་ཆེན་པོ་བཞི་ལས་ནམ་ཡང་མི་འདའ་བར་བྱ་བའོ། །སྒོམ་པ་ལ་གསུམ་ལས། འདི་ལྟར་སྣང་སྲིད་སྣོད་བཅུད་ཀྱི་སྣང་བ་ཐམས་ཅད་སེམས་ཉིད་རང་བྱུང་གི་ཡེ་ཤེས་བརྗོད་བྲལ་ཆོས་ཀྱི་སྐུར་གཏན་ལ་ཕབ་ནས་བསལ་བཞག་དང་བྲལ་བར་རིག་སྟོང་ཆོས་སྐུའི་ངང་དུ་འཇོག་པ་སེམས་སྡེ། རང་བྱུང་གི་ཡེ་ཤེས་དང་དེ་ལས་ཤར་བའི་ཆོས་ཐམས་ཅད་ཡེ་གྲོལ་རང་དག་ཆོས་ཉིད་ཀུན་ཏུ་བཟང་མོའི་ཀློང་ལས་འགྲོ་ས་གཞན་མེད་པར་གཏན་ལ་ཕབ་ནས་ཆོས་ཉིད་དམིགས་མེད་བྱ་རྩོལ་དང་བྲལ་བའི་ངང་དུ་འཇོག་པ་ཀློང་སྡེ། ཡེ་གྲོལ་སྤང་བླང་དང་བྲལ་བའི་ཆོས་ཉིད་ཀྱི་ངང་དུ་འཇོག་པ་མན་ངག་གི་སྡེ་སྟེ། དེ་ལའང་སེམས་ཉིད་གཞི་མེད་རྩ་བྲལ་ཀ་དག་ཏུ་གཏན་ལ་ཕབ་ནས་སྣང་སེམས་ཐམས་ཅད་ཡེ་གྲོལ་སོར་བཞག་ཆེན་པོ་ཁྲེགས་ཆོད་ཀྱི་ཉམས་ལེན་དང་། ལྷུན་གྲུབ་ལུས་ཀྱི་དཀྱིལ་འཁོར་དེ་བཞིན་གཤེགས་པའི་གསང་མཛོད་སྒོ་ཕྱེས་ནས། རང་གནས་ཀྱི་ཡེ་ཤེས་འོད་གསལ་ལྷུན་གྲུབ་ཀྱི་དཀྱིལ་འཁོར་དུ་རང་ཞལ་ལྟ་བ་ཐོད་རྒལ་གྱི་ཉམས་ལེན་གཉིས་སོ། །སྤྱོད་པ་ནི། ཅིར་སྣང་ཆོས་ཉིད་ཀྱི་རོལ་པར་ཤར་བས་གང་ལའང་བླང་དོར་དང་ཆེད་འཛིན་མེད་པར་གཉིས་མེད་མཉམ་པ་ཉིད་ཀྱི་ངང་དུ་སྤྱོད་པའོ། །འབྲས་བུ་ནི། ལྷུན་རྫོགས་ཀུན་ཏུ་བཟང་པོའི་ས་ལ་ད་ལྟ་ཉིད་ནས་གནས་པ་མཐར་ཕྱིན་པ་སྟེ། དེ་ཡང་ཕྱི་སྣང་བ་ལ་དབང་ཐོབ་པས་སྣང་རྐྱེན་ཞིང་ཁམས་སུ་གྲོལ། ནང་ཕུང་པོ་ལ་དབང་ཐོབ་པས་སྒྱུ་ལུས་འོད་གསལ་དུ་གྲོལ། གསང་བ་དབྱིངས་རིག་ལ་དབང་ཐོབ་པས་འཁྲུལ་སྣང་རང་འགགས་སུ་སོང་བས། ཡར་སངས་རྒྱས་ལ་ཐོབ་ཏུ་རེ་བ་དང་། མ་ཐོབ་པའི་དོགས་པ་མེད། མར་འཁོར་བ་ལ་མི་སྐྱེ་བའི་རེ་བ་དང་། སྐྱེས་ཀྱི་དོགས་པ་མེད་པ་སྟེ། གདེང་བཞི་ཚད་དུ་ཕྱིན་ནས་འཁོར་བ་མྱང་འདས་སུ་གྲོལ་བ་ཞེས་བྱ་སྟེ། བཤད་རྒྱུད་ཐིག་ལེ་ཀུན་གསལ་ལས། རང་རིག་ཡེ་ཤེས་ལྷུན་གྱིས་གྲུབ། །དེ་ལས་མ་གཏོགས་གཞན་མེད་པས། །སོ་སོ་རང་རིག་ཡེ་ཤེས་ལ། །ཅིར་སྣང་ཡེ་ཤེས་ཆེན་པོའི་གདངས། །ཞེས་དང་། སྒོམ་དུ་ཡོད་མེད་ཐ་སྙད་རྣམ་པར་དག །ཤེས་རབ་སྟོབས་ཅན་རང་རིག་དོན་རྟོགས་པས། །གཉིས་མེད་བདེ་ཆེན་ངང་དུ་འདུ་འབྲལ་མེད། །མ་བཙལ་བཞག་པས་ངང་ལས་མི་གཡོ་གསལ། །ཞེས་དང་། ཆོས་ཉིད་དོན་གྱི་སྤྱོད་པ་ནི། མཚན་མ་མེད་པས་ནམ་མཁའ་བཞིན། །ཆོས་ཅན་མཚན་མར་མི་ལྟ་བར། །རྣལ་འབྱོར་ཟག་མེད་ཤེས་རབ་ཀྱིས། །དངོས་མེད་ནམ་མཁའ་བཞིན་དུ་སྤྱོད། །ཅེས་དང་། འབྲས་བུ་ལྟ་བ་མངོན་གྱུར་ཏེ། །ཆོད་ཉིད་ཕྱི་ནང་མེད་པར་གསལ། །རིག་པ་ཕྱི་ནང་མེད་པར་ཁྱབ། །གཉིས་མེད་ཆོས་སྐུ་རྡོ་རྗེའི་ལུས། །རང་གསལ་འཛིན་མེད་ངང་དུ་གནས། །ཞེས་དང་། ཡང་འབྱེད་ལས། རྫོགས་ཆེན་ཨ་ཏིའི་འབྲས་བུ་ནི། །གདོད་ནས་བྱང་ཆུབ་སྙིང་པོ་རུ། །ཐོབ་མེད་འབྲས་བུ་རང་ལ་སྨིན། །ཞེས་གསུངས་སོ། །དེ་རྣམས་ཀྱིས་དབང་བསྒྱུར་ཐབས་ཀྱི་ཐེག་པ་མ་ཧཱ་ཨ་ནུ་ཨ་ཏི་གསུམ་གྱི་ཐེག་པའི་རྣམ་གཞག་མདོ་ཙམ་ཞུས་གྲུབ་པ་ལགས་ཏེ། དེ་ལྟ་བུའི་ཐེག་པ་རིམ་པ་དགུ་པོའང་། གནས་སྐབས་གདུལ་བྱའི་བློ་རིམ་དང་བསྟུན་ནས་ལམ་ལ་བཀྲི་བའི་ཚུལ་ཙམ་ལས། ཆོས་ཐ་དད་པ་རིམ་པ་དགུ་ནི་ཡོད་པ་མ་ཡིན་ཏེ། འཕགས་པ་ཀླུའི་རིན་ཆེན་ཕྲེང་བ་ལས། དང་པོ་མངོན་པ་མཐོ་བའི་ཆོས། །ཕྱིས་ནས་ངེས་པར་ལེགས་འབྱུང་བ། །གང་ཕྱིར་མངོན་པར་མཐོ་ཐོབ་ནས། །རིམ་ཀྱིས་ངེས་པར་ལེགས་པའོ། །ཞེས་དང་། དགྱེས་རྡོར་ལས། དགེ་བ་བཅུ་ལས་བརྩམས་ནས་ནི། །དེ་ཡི་ཆོས་ནི་རབ་ཏུ་དབྱེ། །ཞེས་གསུངས་པ་ལྟར། སོར་བཞག་ལྷ་མིའི་ཐེག་པ་ནི་མྱ་ངན་ལས་འདས་པར་བགྲོད་པའི་ལམ་ཐམས་ཅད་ཀྱི་རྟེན་གཞི་ཡིན་པས། ལམ་རིམ་ལས། གཞི་ཡི་ཐེག་པ་དང་པོར་ཞོག །ཅེས་གསུངས། ཉན་རང་གི་ཐེག་པས་དངོས་སུ་ལམ་དང་འབྲས་བུ་ཐར་པའི་ཆ་ཤས་ཙམ་ལས། རྣམ་གྲོལ་གྱི་ལམ་རྫོགས་པར་མ་བསྟན་ཞིང་རང་འབྲས་མཐར་ཕྱིན་ནས་ཀྱང་ཐེག་ཆེན་ལ་འཇུག་དགོས་པས་རང་རྐྱ་མ་ཐུབ་པའི་ཕྱིར་ཐེག་ཆེན་དུ་འདུ་སྟེ། ལང་གཤེགས་ལས། སྲིད་པའི་ལམ་གྱིས་དུབ་པ་རྣམས། །ངལ་གསོའི་དོན་ཏེ་དེ་ཉིད་མིན། །ཞེས་གསུངས། ཐེག་ཆེན་ཕ་རོལ་ཏུ་ཕྱིན་པ་དང་སྔགས་ཕྱི་རྒྱུད་གསུམ་དུ་མཐར་ཐུག་གི་འབྲས་བུའི་རྣམ་བཞག་བསྟན་ནའང་། དེར་བགྲོད་བྱེད་ཀྱི་ལམ་རྫོགས་པར་མ་བསྟན་ཅིང་། སྔགས་བླ་མེད་ཀྱི་ཐེག་པས་ནི་ལམ་ཡོངས་རྫོགས་བསྟན་པས་འཕགས་པར་མ་ཟད། ཡོ་ག་མན་ཆད་ཀྱི་རྒྱུ་དང་འབྲས་བུའི་ཐེག་པའི་ལམ་དང་། འབྲས་བུའི་རྣམ་བཞག་ཐམས་ཅད་སྔགས་བླ་མེད་དུ་ཚང་ལ། བླ་མེད་ཐུན་མོང་མ་ཡིན་པའི་ཁྱད་ཆོས་རྣམས་དེ་དག་ཏུ་མེད་ཅིང་། དེ་དང་དེའི་དོད་ཐུབ་ཀྱང་བཞག་ཏུ་མེད་པའི་དོན་གྱིས་ནང་པ་བསྐྱེད་རྫོགས་གསུམ་གྱི་ནང་དུ་ཐམས་ཅད་འདུ་བ་ཡིན་ཞིང་། དེ་ལས་ཀྱང་མ་ཧཱ་དང་ཨ་ནུ་སྟེ་བསྐྱེད་རྫོགས་རྣམ་པ་གཉིས་ཀྱི་རྫོགས་རིམ་མཐར་ཐུག་པ་དབང་བཞི་པའི་ཡེ་ཤེས་ཉིད་ཇི་ལྟ་བ་བཞིན་མངོན་སུམ་དུ་གཏན་ལ་འབེབས་པ་ནི་རང་བཞིན་རྫོགས་པ་ཆེན་པོ་འབའ་ཞིག་ལས་གཞན་དུ་མ་དམིགས་པའི་ཕྱིར། སྔ་མ་སྔ་མ་རྣམས་ཕྱི་མ་ཕྱི་མའི་ལམ་སྟེགས་ཀྱི་ཚུལ་དུ་འགྱུར་ཞིང་། མཐར་ཐུག་དུས་གསུམ་གྱི་རྒྱལ་བ་རྣམས་གང་ལས་གཤེགས་ཤིང་གཤེགས་ལ་གཤེགས་པར་འགྱུར་བའི་བགྲོད་པ་གཅིག་པའི་ལམ་མཆོག་མཐར་ཐུག་པ་ནི། འོད་གསལ་རྡོ་རྗེ་སྙིང་པོའམ་བླ་མེད་གསང་མཆོག་རྒྱལ་པོའི་ཐེག་པ་གཅིག་པུ་ཉིད་དེ། དམ་ཆོས་པད་དཀར་ལས། དྲང་སྲོང་རྣམས་ཀྱིས་ཐེག་པ་གསུམ་བསྟན་པ། །རྣམ་འདྲེན་རྣམས་ནི་ཐབས་ལ་མཁས་པས་ཏེ། །ཐེག་པ་གཅིག་ལས་གཉིས་སུ་ཡོད་མ་ཡིན། །བཀྲི་བའི་དོན་དུ་ཐེག་པ་གསུམ་བསྟན་ཏོ། །ཞེས་དང་། འཇམ་དཔལ་ལས། ཐེག་པ་སྣ་ཚོགས་ཐབས་ཚུལ་གྱིས། །འགྲོ་བའི་དོན་ལ་རྟོག་པ་པོ། །ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་དང་། ནམ་མཁའ་ཆེ་ལས། རྒྱ་མཚོ་ཆེན་པོ་ཆུ་ཀླུང་ཀུན་འབབ་ཅིང་། །རྒྱ་མཚོའི་ངང་དུ་རོ་གཅིག་གནས་པ་ལྟར། །ཆོས་རྣམས་རྫོགས་པ་ཆེན་པོར་འདུས་གསལ་ཞིང་། །མ་བཅོས་ལྷུན་གྱིས་གྲུབ་པའི་ངང་དུ་གནས། །ཞེས་གསུངས་སོ། །དེ་ལྟར་གངས་ཅན་མིག་གཅིག་ལོ་ཆེན་དྷརྨཱ་ཤྲཱི་སོགས་སྔ་འགྱུར་མཁས་གྲུབ་དུ་མའི་གསུང་གི་སྒྲོན་མ་ལ་བརྟེན་ནས། གནས་སྐབས་རང་བློས་གང་སྤོག་ཙམ་ཞིག་ཞུས་པ་ཡིན་ཡང་། བདག་ལྟ་བུའི་རྨོངས་པ་མི་མཁས་ཤིང་མ་སྦྱངས་པར་གྱུར་པའི་དབང་གིས། དོན་ལ་འགལ་བ་དང་། མ་ཚང་བ་དང་། མ་འབྲེལ་བ་དང་། ཟློས་པའི་སྐྱོན་ལ་སོགས་པ་ངག་གི་ཉེས་པར་གྱུར་པའི་ཆ་གང་དང་ཅི་མཆིས་པ་དེ་དག ཚེ་རབས་ཐོག་མེད་ནས་བསགས་པའི་སྡིག་ལྟུང་སྒྲིབ་པའི་ཚོགས་དང་ལྷན་ཅིག་ཏུ། འཕགས་པ་རྣམས་ལྐོག་ཏུ་མ་གྱུར་པའི་སྤྱན་སྔར་མཐོལ་ཞིང་བཤགས་ན་བྱང་ཞིང་དག་ནས་འཕྲལ་དང་ཡུན་གྱི་སྒྲིབ་རྐྱེན་དུ་མི་འགྱུར་བ་དང་ཡང་དག་པའི་ལུང་དང་མཐུན་པར་ལེགས་བཤད་གཏམ་གྱི་མཆོད་སྤྲིན་ཕུལ་བ་འདི་ཉིད་ཀྱིས་མཚོན་རྟེན་དུ་བྱས་ཏེ། དུས་གསུམ་དུ་བསགས་ཤིང་གསོག་པར་འགྱུར་བའི་དགེ་བའི་རྩ་བ་ཇི་སྙེད་ཅིག་མཆིས་པའི་མཐུས། སྤྱིར་སངས་རྒྱས་ཀྱི་བསྟན་པ་དར། སེམས་ཅན་ལ་བདེ་སྐྱིད་འབྱུང་། སྒོས་དཔལ་ལྡན་བླ་མའི་སྐུ་ཚེ་བརྟན། དམ་ཚིག་གཅིག་པའི་རྡོ་རྗེའི་མཆེད་གྲོགས་རྣམས་ཐུགས་མཐུན་ཞིང་ཁྲིམས་གཙང་བ་དང་། བཤད་སྒྲུབ་བསྟན་པའི་མངའ་ཐང་རྒྱས་ཤིང་ནག་ཕྱོགས་གདུག་པའི་རྩུ བ་འགྱུར་མཐའ་དག་ཞི་བ་དང་། ཕ་མས་ཐོག་དྲངས་མཁའ་ཁྱབ་ཀྱི་སེམས་ཅན་ཐམས་ཅད་གནས་སྐབས་ལམ་གྱི་རྟེན་དང་། ལམ་གྱི་སྒྲུབ་པ་དང་། ལམ་གྱི་འབྲས་བུ་ལ་སྦྱོང་ཞིང་། མཐར་ཐུག་སྐུ་བཞི་ཡེ་ཤེས་ལྔ་ཡི་བདག་ཉིད་ཁྱབ་བདག་གདོད་མའི་མགོན་པོ་རིགས་ལྔ་གངས་ཅན་མཚོའི་གོ་འཕང་ལ་དཀའ་བ་མེད་པར་འགོད་ནུས་པའི་ཆེད་དུ་བསྔོ་བ་དང་སྨོན་ལམ་ཟབ་མོ་ཐུགས་ལ་འདོགས་པར་ཞུ་ལགས། ཞེས་དང་། སྲིད་ཞིའི་དཔལ་འབྱོར་མ་ལུས་འབྱུང་བའི་གཞི། །སོགས་དང་། ཨོ་རྒྱན་སངས་རྒྱས་གཉིས་པ༴ ས་ལ་འོག་མིན༴ མདོ་སྔགས་ལུང་རྟོགས༴ ཐུབ་བསྟན་ཡོངས་སུ་རྫོགས་པའི་ལུས་གཅིག་པུ། །སྔོན་མེད་མཛོད་ཆེན་ལྔ་ཡི་རིང་ལུགས་དང་། །འཇམ་དཔལ་དགྱེས་པའི་རིགས་ལམ་སེང་གེའི་སྒྲས། །ཕྱོགས་དུས་འཇིག་རྟེན་ཀུན་ན་ཁྱབ་གྱུར་ཅིག །རྒྱལ་བ་ཀུན་གྱི་ཉེ་ལམ༴ སྟོན་པ་འཇིག་རྟེན༴ བསླབ་པ་གསུམ་ལྡན༴ བསོད་ནམས་འདི་ཡིས༴ འཇིག་རྟེན་བདེ་ཞིང་༴ ཉིན་མོ་བདེ་ལེགས་སོགས་ཇི་ལྟར་རིགས་པའི་ཤིས་བརྗོད་ཀྱིས་མཐའ་བརྒྱན། འདི་ཉིད་ཉིན་གྲངས་སམ་ཇ་སྐབས་སོ་སོར་ཕྱེ་ན། དང་པོར་ཕུན་སུམ་ཚོགས་པ་ལྔ་ཙམ་དང་། གཉིས་པར་བྱང་སེམས་ཡན་དང་། གསུམ་པར་ཡོ་ག་ཡན། བཞི་པར་མ་ཧཱ་ནས་བཟུང་མཐར་ཆགས་བྱ། ཉིན་གཉིས་ལྟ་བུ་ཡིན་ན། སྔ་ཉིན་ཀུན་འབྱུང་འདྲེན་པའི་མཇུག་ཡན་ཆོད་དང་། ཕྱི་ཉིན་དཀའ་ཐུབ་རིག་བྱེད་ནས་བཟུང་སྔགས་ཕྱི་ནང་རྫོགས་པར་བཤད། གང་ལྟར་ཡང་གནས་སྐབས་ཀྱི་མཚམས་སྦྱོར་དང་། བར་སྐབས་བསྔོ་སྨོན་ཤིས་བརྗོད་སོགས་ཇི་ལྟར་འཚམ་པ་འཕྲུལ་ཤེས་པར་བྱའོ། །སྨྲས་པ། བུང་བ་པདྨའི་ཚལ་ན་རྒྱུ་བ་བཞིན། །ལེགས་བཤད་གཏམ་གྱིས་མགྲིན་པ་བརྒྱན་བྱས་པའི། །བློ་གསལ་བློ་ལྡན་ཚོགས་དབུས་གཟེངས་བསྟོད་ནས། །བག་ཕེབས་རོལ་བའི་དགའ་སྟོན་འདི་ཀོ་རྨད། །མཁས་པ་རྣམས་ནི་ལེགས་བཤད་གཏམ་གྱིས་མཚོ། །བཙུན་པ་རྣམས་ནི་རྣམ་དག་ཁྲིམས་ཀྱིས་ཏེ། །ས་གཞི་སྐྱོང་དག་རང་སྲིད་དཔལ་དང་ནི། །ཕལ་དག་རང་རང་བྱ་བའི་ལས་ཀྱིས་སོ། །དེ་སླད་གཏམ་གྱི་སྦྱོར་བ་འདི་ཉིད་ཀྱང་། །བློ་གསལ་མགྲིན་པའི་རྒྱན་དུ་རྟག་གནས་ནས། །མཁས་མང་དགྱེས་པའི་མཆོད་སྤྲིན་ཉིད་གྱུར་ཏེ། །ངག་ལ་གསུང་གི་བདེན་ཚིག་འགྲུབ་གྱུར་ཅིག །ཅེས་པའང་བློ་གསལ་དོན་གཉེར་ཅན་གྱིས་བསྐུལ་ངོར། འཇམ་དབྱངས་བློ་གྲོས་རྒྱ་མཚོའི་སྒྲ་དབྱངས་ཀྱིས་བྲིས་པ་དགེ། །།
སྡོམ་གསུམ་འགལ་མེད་ཉམས་ལེན་གནད་བསྡུས་ཀྱི་ཚོགས་བཤད་པུཎྜ་རི་{རཱི}ཀའི་ཕྲེང་བ།
༄༅། །སྡོམ་གསུམ་འགལ་མེད་ཉམས་ལེན་གནད་བསྡུས་ཀྱི་ཚོགས་བཤད་པུཎྜ་རི་{རཱི}ཀའི་ཕྲེང་བ་ཞེས་བྱ་བ་བཞུགས་སོ། །ཨོཾ་སྭསྟི་སིདྡྷཾ། གཞི་རྒྱུད་ཟབ་གསལ་དབྱེར་མེད་སྙིང་པོའི་ཁམས། །ལམ་རྒྱུད་སྡོམ་པ་གསུམ་གྱིས་ཡོངས་སྦྱངས་མཐུས། །འབྲས་རྒྱུད་སྐུ་བཞིའི་སྣང་བ་འབྱིན་མཛད་པ། །རྒྱལ་དང་རྒྱལ་སྲས་རིག་པ་འཛིན་རྣམས་རྒྱལ། །བསིལ་ལྗོངས་བཀའ་དྲིན་ཟླ་མེད་པདྨ་འབྱུང་། །ཐུབ་དབང་གཉིས་པ་མཁན་ཆེན་ཞི་བ་འཚོ། །སད་མི་བདུན་དང་རྗེ་འབངས་གྲུབ་རིགས་ཚོགས། །སྔ་འགྱུར་ལོ་པཎ་བརྒྱུད་པར་བཅས་ལ་འདུད། །བསྟན་པའི་སྲོག་མཐུད་བླ་ཆེན་དགོངས་པ་གསལ། །ཀུན་མཁྱེན་ཆོས་རྗེ་པདྨ་དབང་གི་རྒྱལ། །འཇིག་རྟེན་མིག་གཅིག་དྷརྨ་ཤྲཱི་སོགས། །དངོས་བརྒྱུད་བླ་མ་རྣམས་ལ་ཕྱག་བྱས་ནས། །སྡོམ་གསུམ་མེ་ཏོག་རྣམ་བཀྲའི་སྐྱེད་ཚལ་ནས། །གཅེས་བཏུས་པུཎྜ་རི་ཀའི་ཕྲེང་བ་ཞིག །དད་པའི་ལག་གིས་བསྟར་ཏེ་གུས་འབུལ་ན། །མཁས་མང་དགྱེས་སྤྱན་འབབ་སྟེགས་ཡུད་ཙམ་ཞུ། །དེང་གནས་དུས་ཕུན་སུམ་ཚོགས་པར། མདོ་སྔགས་བསྟན་པ་རྒྱ་མཚོའི་མགོན་གཅིག ཨོ་རྒྱན་དུས་གསུམ་མཁྱེན་པའི་ཞལ་ཚབ། བསྟན་འཛིན་དགེ་འདུན་བྱེ་བའི་གཙུག་ནོར། ས་གསུམ་ན་འགྲན་ཟླ་དང་བྲལ་བ་སྐྱབས་མཆོག་འཁོར་ལོའི་མགོན་པོས་དབུ་མཛད། མཁན་སློབ་རིག་པ་འཛིན་པའི་དགེ་འདུན་སུམ་ལྡན་རྡོ་རྗེ་འཛིན་པ་ཡོངས་ཀྱི་སྙན་དབང་དུ། ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་གྱིས། ཉན་ཐོས་བྱང་ཆུབ་སེམས་དཔའ་རིག་པ་འཛིན། །སྡོམ་པ་གསུམ་པོ་དག་དང་མ་འགལ་བར། །རང་རྒྱུད་སྡོམ་ཞིང་གཞན་ཕན་ཅི་འགྲུབ་དང་། །ཅིར་སྣང་དག་པའི་ལམ་དུ་བསྒྱུར་བར་བྱ། །ཞེས་རྫོགས་པ་ཆེན་པོ་བསམ་གཏན་ངལ་གསོ་རྩ་འགྲེལ་དུ་གསུངས་པ་སོགས་ཀྱི་དགོངས་པ་བཞིན། སྡོམ་པ་གསུམ་འགལ་མེད་གནད་གཅིག་པར་ཉམས་སུ་ལེན་པའི་ཚུལ། རང་གི་གོ་ཚོད་ཙམ་ཞིག་ཞུ་ན། དམ་ཆོས་པདྨ་དཀར་པོ་ལས། བསྐལ་པ་བྱེ་སྟོང་བསམ་གྱིས་མི་ཁྱབ་པ། །དེ་ཡི་ཚད་ནི་ནམ་ཡང་མེད་པ་ནས། །བྱང་ཆུབ་མཆོག་རབ་དེ་ནི་ངས་ཐོབ་སྟེ། །ད་ནི་རྟག་ཏུ་ཆོས་ཀྱང་རབ་འཆད་དོ། །ཞེས་གསུངས་པ་ལྟར། འོ་སྐོལ་རྣམས་ཀྱི་སྟོན་པ་ཐབས་མཁས་ཤིང་ཐུགས་རྗེ་ཆེན་པོ་དང་ལྡན་པ། སྐལ་བཟང་རྣམ་འདྲེན་བཞི་པ་མཉམ་མེད་ཐུབ་པའི་དབང་པོ་ཉིད། ངེས་པ་དོན་གྱི་དབང་དུ་བྱས་ན། ཡེ་གདོད་མ་ནས་མངོན་རྫོགས་ཆོས་ཀྱི་རྒྱལ་པོར་གྱུར་ཟིན་ནའང་། གདུལ་བྱ་རྣམས་དྲང་བའི་ཆེད་དུ། ཐབས་ལ་མཁས་པའི་མཛད་པས། དང་པོར་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་པ་གྲངས་མེད་གསུམ་དུ་ཚོགས་གཉིས་ཡོངས་སུ་བསགས་པའི་མཐར། བྲམ་ཟེའི་ཁྱེའུ་བླ་མར་གྱུར་ཏེ། དེ་བཞིན་གཤེགས་པ་འོད་སྲུང་ལ་མཆོད་ཅིང་། དེ་ནས་ཚེ་འཕོས་ཏེ་དགའ་ལྡན་ལྷའི་ཡུལ་དུ་ལྷའི་བུ་དམ་པ་ཏོག་དཀར་པོར་སྐྱེ་བ་བཞེས་ཤིང་། ལྷ་རྣམས་ལ་འཆི་འཕོ་རྣམ་པར་སྦྱོང་བའི་ཆོས་སྒོ་མང་དུ་བསྟན་ནས་བཞུགས་པར་གྱུར་ཏོ། །དེ་ནས་གདུལ་བྱ་དུས་ལ་བབས་པའི་ཚེ་དགའ་ལྡན་ལྷའི་གནས་ནས་འཕོ་བ་ལ་སོགས་པའི་མཛད་པ་བཅུ་གཉིས་ཀྱི་སྒོ་ནས་མི་མཇེད་ཀྱི་ཞིང་འདིའི་འགྲོ་བ་རྣམས་ཀྱི་དོན་ཇི་ལྟར་མཛད་པའི་ཚུལ་ནི། རྒྱུད་བླ་མ་ལས། དགའ་ལྡན་གནས་ནས་འཕོ་བ་དང་། །ལྷུམས་སུ་ཞུགས་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་གྱིས་རོལ་བ་དང་། །ངེས་འབྱུང་དཀའ་བ་སྤྱད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་བཅོམ་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་བསྐོར། །མྱ་ངན་འདའ་བར་མཛད་པ་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་གསུངས་པ་ལྟར་མཛད་པ་བཅུ་གཉིས་སུ་བསྟན་པ་ལས། འདིར་ཆོས་འཁོར་བསྐོར་བའི་མཛད་པ་ལས་འཕྲོས་ཏེ་མདོ་དང་སྔགས་ཀྱི་གཞུང་ལུགས་ཇི་སྙེད་བསྟན་པ་ཐམས་ཅད་སྟོན་པ་གཅིག་གིས་བསྟན་པ་གང་ཟག་གཅིག་འཚང་རྒྱ་བའི་ཐབས་ཁོ་ན་ཡིན་པའི་ཕྱིར། དེ་དག་འགལ་བ་མེད་པར་ཉམས་སུ་ལེན་དགོས་པའི་ཚུལ་ཡང་། སྒྱུ་འཕྲུལ་གསང་སྙིང་ལས། ཨེ་མ་ཧོ་བདེ་གཤེགས་སྙིང་པོ་ལས། །རང་གི་རྣམ་རྟོག་ལས་ཀྱིས་སྤྲུལ། །ཞེས་གསུངས་པ་ལྟར། ཆོས་ཐམས་ཅད་ཀྱི་གནས་ལུགས་སེམས་ཉིད་བདེ་བར་གཤེགས་པའི་སྙིང་པོའི་ངོས་ནས་གཞལ་ན། འཁོར་བ་དང་མྱང་འདས་གང་གི་ཐ་སྙད་ཀྱང་མེད་མོད་དེ། འོན་ཀྱང་གནས་ལུགས་དེ་ཉིད་རང་ངོ་ཤེས་པ་དང་མ་ཤེས་པའི་ཁྱད་པར་ལས། ཡང་དག་པར་མྱ་ངན་ལས་འདས་པ་ལ་དབང་བསྒྱུར་བའི་སངས་རྒྱས་དང་། མར་མ་དག་པ་འཁོར་བ་ལ་དབང་བསྒྱུར་བའི་སེམས་ཅན་ཞེས་འཁོར་འདས་གཉིས་སུ་གྲགས་སོ། །དེས་ན་འཁོར་བའི་སེམས་ཅན་རྣམས་ལ་གཞི་ལ་གཞི་སྣང་ཤར་བ་རང་ངོ་མ་རིག་པའི་རྐྱེན་གྱིས། འདོད་ཆགས་ལ་སོགས་པ་ཉོན་མོངས་པའི་ཀུན་ཏུ་འབྱུང་བ་རྣམས་ཀྱིས། ལས་ཀྱི་ཀུན་འབྱུང་མི་དགེ་བ་དང་། དགེ་བ་ཟག་བཅས་ཀྱི་ལས་མང་དུ་བསགས། དེ་དག་གི་འབྲས་བུ་སྡུག་བསྔལ་གྱི་བདེན་པའི་རང་གཟུགས་ཁམས་གསུམ་གྱི་འཁོར་བའི་གནས་རིས་མཐོ་དམན་ཐ་དད་པ་འདི་དག་མེད་པ་ལ་ཡོད་ཡོད་ལྟར་སྣང་བ་ཡིན་ནོ། །དེ་ལྟར་ན་འཁོར་བ་སྡུག་བསྔལ་གྱི་བདེན་པ་འདི་དག་ལས་དཀར་ནག་གི་འབྲས་བུ་ཁོ་ན་ཡིན་ཏེ། །ཆོས་མངོན་པ་ལས། ལས་ལས་འཇིག་རྟེན་གསུམ་བྱུང་ཞིང་། །ཞེས་སོ། །ལས་དེ་དག་གང་གིས་གསོག་པ་པོ་ནི་ཉོན་མོངས་པའི་ཀུན་འབྱུང་རྣམས་ཡིན་ལ། དེ་དག་སྤོང་བའི་ཐབས་སུ། རྒྱལ་བ་རྫོགས་པའི་སངས་རྒྱས་བཅོམ་ལྡན་འདས་ཀྱིས་བསྟན་པ་དམ་པའི་ཆོས་ལམ་གྱི་བདེན་པ་གང་ཞིག་བསྟན་པ་ཡིན་ནོ། །དེ་ཡང་ཉོན་མོངས་པའི་ཀུན་རྟོག་རྣམས་ཀྱི་གཉེན་པོར་ལམ་གྱི་བདེན་པ་དམ་པའི་ཆོས་ཇི་ལྟར་བསྟན་པའི་ཚུལ་ནི། ཀུན་བྱེད་རྒྱལ་པོའི་རྒྱུད་ལས། འདོད་ཆགས་འདུལ་བའི་གཉེན་པོ་གསུངས་པར་ནི། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཞེ་སྡང་འདུལ་བའི་གཉེན་པོར་གསུངས་པ་ནི། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །གཏི་མུག་འདུལ་བའི་གཉེན་པོར་གསུངས་པ་ནི། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། དུག་གསུམ་ཆ་མཉམ་འདུས་བའི་གཉེན་པོ་རུ། །སྡེ་སྣོད་བཞི་པ་ཉི་ཁྲི་ཆིག་སྟོང་གསུངས། །མདོར་ན་བརྒྱད་ཁྲི་བཞི་སྟོང་གསུངས་པ་ཀུན། །ཉོན་མོངས་འདུལ་པའི་གཉེན་པོར་གསུངས་པར་ཟད། །ཅེས་དང་། མཛོད་ལས། སྤྱོད་པ་རྣམས་ཀྱི་གཉེན་པོར་ནི། །ཆོས་ཀྱི་ཕུང་པོ་མཐུན་པར་གསུངས། །ཞེས་སོ། །སྤང་བྱ་ཉོན་མོངས་པའི་ཀུན་རྟོག་དེ་དག་ཀྱང་བསྡུ་ན་དུག་གསུམ་དུ་འདུ་ལ། སྤོང་བྱེད་གཉེན་པོ་ལམ་བདེན་དམ་པའི་ཆོས་ཀྱི་རྣམ་གྲངས་ཀྱང་བསྡུ་ན། ལྷག་པའི་བསླབ་པ་རིན་པོ་ཆེ་གསུམ་ཡིན་ཏེ། སློབ་དཔོན་ཀླུ་སྒྲུབ་ཀྱིས། ལྷག་པའི་ཚུལ་ཁྲིམས་ལྷག་པའི་ཤེས་རབ་དང་། །ལྷག་པའི་སེམས་ལ་རྟག་ཏུ་གནས་པར་གྱིས། །བསླབ་པ་བརྒྱ་རྩ་ལྔ་བཅུ་ལྷག་ཅིག་ཀྱང་། །གསུམ་པོ་འདི་ལ་ཡང་དག་འདུ་བར་འགྱུར། །ཞེས་གསུངས་པའི་ཕྱིར། རྒྱལ་བའི་བཀའ་ཐམས་ཅད་བསྡུ་ན། རྗོད་བྱེད་ཚིག་གི་དབང་དུ་བྱས་ན་འདུལ་བ་མདོ་སྡེ་མངོན་པ་གསུམ་དུ་འདུ་ལ། བརྗོད་བྱ་དོན་གྱི་དབང་དུ་བྱས་ན་ཚུལ་ཁྲིམས་ཏིང་འཛིན་ཤེས་རབ་ཀྱི་བསླབ་པ་གསུམ་དུ་འདུ་བ་དང་། དེ་དག་གི་ཉམས་ལེན་གྱི་དབང་དུ་བྱས་ན། སོ་ཐར་བྱང་སེམས་རིག་པ་འཛིན་པ་སྔགས་ཀྱི་སྡོམ་པ་སྟེ་སྡོམ་པ་གསུམ་དུ་འདུ་བ་ཡིན་ཏེ། སྔ་འགྱུར་བསྟན་པའི་ཉི་མ་རྗེ་གཏེར་ཆེན་བླ་མས། ཟླ་མེད་སྟོན་པ་རྫོགས་སངས་རྒྱས་དེ་ཡིས། །རང་གིས་བརྙེས་པའི་ཆོས་ཀྱི་རྒྱལ་ཐབས་ལ། །འགོད་ཕྱིར་གདུལ་བྱའི་སྐལ་བ་དང་འཚམས་པར། །ཐེག་གསུམ་ཆོས་སྒོ་བརྒྱད་ཁྲི་བཞི་སྟོང་བསྟན། །སྲིད་མཚོ་ཉམ་ངའི་གྲོང་ལས་རིང་བརྒལ་ནས། །རྣམ་གྲོལ་རིན་ཆེན་ལེན་པ་གྲུ་ཡི་རྟེན། །སོ་ཐར་བྱང་སེམས་རིག་འཛིན་སྡོམ་པ་ཡི། །མཐུན་པའི་རླུང་གིས་བསྐུལ་བ་ཉིད་ལ་རག །ཅེས་གསུངས། འོན་ཀྱང་དེང་སང་ནི་ཚུལ་འདི་ལྟ་བུ་སྟོན་པའི་གཞུང་བཟང་ཡིད་བཞིན་གྱི་ནོར་བུ་ལ་གཅེས་སྤྲས་ཀྱིས་འཆད་ཉན་བྱེད་པ་དང་། སྡོམ་གསུམ་འགལ་མེད་གཅིག་ཏུ་དྲིལ་ནས་ལམ་ཉམས་སུ་ལེན་པ་ནི་ཤིན་ཏུ་དཀོན་པར་སྣང་ངོ་། །དེ་ལ་སྡོམ་གསུམ་སོ་སོའི་ངོ་བོའམ་མཚན་ཉིད་ནི། རྗེ་གཏེར་ཆེན་བླ་མས། དང་པོ་བླང་ཡུལ་མཁན་སློབ་དགེ་འདུན་ལས། །སྲོག་འཚོའི་བར་དུ་གཞན་གནོད་ལས་ལྡོག་པ། །བདག་དོན་ཉིད་དུ་དགྲ་བཅོམ་རྗེས་སློབ་ཚུལ། །འབྲས་བུ་མྱང་འདས་རྣམ་གཉིས་ཐོབ་ཕྱིར་རོ། །གཉིས་པ་སློབ་དཔོན་ཉིད་དམ་རྟེན་ལས་ཀྱང་། །བྱང་ཆུབ་བར་དུ་ཚུལ་ཁྲིམས་རྣམ་པ་གསུམ། །གཞན་དོན་ཉིད་དུ་བྱང་སེམས་རྗེས་སློབ་ཚུལ། །འབྲས་བུ་ས་བཅུའི་གོ་འཕང་ཐོབ་ཕྱིར་རོ། །གསུམ་པ་བླ་མ་དཀྱིལ་འཁོར་འཁོར་ལོ་ལས། །ནམ་མཁའ་ཇི་སྲིད་གཉིས་དོན་ཡེ་ཤེས་ཀྱི། །འཁོར་ལོར་རྒྱས་འདེབས་སངས་རྒྱས་རྗེས་སློབ་ཚུལ། །འབྲས་བུ་རྡོ་རྗེ་འཆང་གི་ས་ཐོབ་ཕྱིར། །གང་ཡང་སྲིད་པའི་འདོད་ཆགས་དུག་ཆེན་ཁམས། །སྤོང་སྦྱོང་ལམ་དུ་བྱེད་པའི་ཁྱད་པར་གྱི། །ཐབས་ལས་ཉོན་མོངས་རང་མཚན་ཉིད་སྤོང་བར། །རྣམ་དབྱེར་མེད་ཕྱིར་དོན་གྱི་དགོངས་པ་མཐུན། །ཞེས་གསུངས་པས། རྒྱུ་ཀུན་སློང་ངེས་འབྱུང་རྣམ་པར་དག་པས་གཞི་བཟུང་ཞིང་། སྦྱོར་བ་གཞན་གནོད་གཞི་དང་བཅས་པ་སྤོང་བ་སྟེ། བདག་དོན་དུ་སྔོན་གྱི་འཕགས་པ་དགྲ་བཅོམ་པ་རྣམས་ཀྱི་རྗེས་སུ་སློབ་པར་བྱེད་པ་ནི་སོ་སོ་ཐར་པའི་སྡོམ་པ་དང་། གང་དག་བདག་བས་གཞན་གཅེས་ཀྱི་སྙིང་རྗེ་ཆེན་པོའི་ཀུན་ནས་བསླང་ཞིང་། སྦྱོར་བ་གཞན་ལ་ཕན་པ་གཞི་དང་བཅས་པ་སྒྲུབ་སྟེ། གཞན་དོན་དུ་ས་ཆེན་པོ་ལ་བཞུགས་པའི་བྱང་ཆུབ་སེམས་དཔའ་རྣམས་ཀྱི་རྗེས་སུ་སློབ་པ་ནི་བྱང་ཆུབ་སེམས་དཔའི་སྡོམ་པ། ཆོས་ཐམས་ཅད་ལ་མཉམ་པ་ཆེན་པོའི་དགོངས་སྤྱོད་ཀྱིས་ཟིན་པས། སྒོ་གསུམ་སྐུ་གསུང་ཐུགས་སུ་སྦྱོར་ཞིང་གཉིས་དོན་དུ་སངས་རྒྱས་ཀྱི་མཛད་པ་རྗེས་སུ་སྒྲུབ་པ། བདེ་གཤེགས་ཉིད་ཀྱི་རྗེས་སུ་སློབ་པར་བྱེད་པ་ནི་གསང་སྔགས་ཀྱི་སྡོམ་པ་སྟེ། སྨྲ་བའི་སེང་གེ་རོང་ཟོམ་པ་ཆེན་པོས་དམ་ཚིག་མདོ་རྒྱས་ལས། མདོར་བསྡུ་ན། སོ་སོར་ཐར་པའི་སྡོམ་པ་ནི་ལས་དགེ་སྡིག་གཙོར་བསྟན་ཏོ། །བྱང་ཆུབ་སེམས་དཔའི་སྡོམ་པ་ནི་སྙིང་རྗེ་ཆེན་པོ་གཙོར་བསྟན་པའོ། །གསང་སྔགས་ཀྱི་སྡོམ་པ་ནི་སྐུ་གསུང་ཐུགས་རྡོ་རྗེ་ལྟ་བུ་གཙོར་བསྟན་ཏོ། །ཡང་སོ་ཐར་གྱི་སྡོམ་པ་ནི་སེམས་ཅན་ལ་གནོད་པར་སྦྱོར་བ་ལས་ལོག་པའོ། །བྱང་ཆུབ་སེམས་དཔའི་སྡོམ་པ་ནི་དེའི་སྟེང་དུ་སེམས་ཅན་ལ་ཕན་འདོགས་པར་ཞུགས་པའོ། །གསང་སྔགས་ཀྱི་སྡོམ་པ་ནི་དེ་དག་གི་སྟེང་དུ་སངས་རྒྱས་ཀྱི་མཛད་པ་ཉམས་སུ་བླང་བའོ། །ཡང་སོ་སོར་ཐར་པའི་སྡོམ་པ་ནི་སྔོན་གྱི་འཕགས་པ་དགྲ་བཅོམ་པ་རྣམས་ཀྱི་རྗེས་སུ་སློབ་པའོ། །བྱང་ཆུབ་སེམས་དཔའི་སྡོམ་པ་ནི་ས་ཆེན་པོ་ལ་གནས་པའི་བྱང་ཆུབ་སེམས་དཔའ་རྣམས་ཀྱི་རྗེས་སུ་སློབ་པའོ། །གསང་སྔགས་ཀྱི་སྡོམ་པ་ནི་དེ་བཞིན་གཤེགས་པ་ཉིད་ཀྱི་རྗེས་སུ་སློབ་པའོ་ཞེས་གྲགས་སོ། ཞེས་གསུངས། དེ་ལྟ་བུའི་སྡོམ་པ་གསུམ་པོ་དེ་ཇི་ལྟར་ཐོབ་ཚུལ་ཡང་། སྤྱིར་གང་ཟག་རབ་འབྲིང་ཐ་མ་ལ་ལྟོས་པའི་ཐོབ་ཚུལ་གསུམ་སྟེ། དང་པོ་དབང་པོ་ཡང་རབ་སྦྱངས་པའི་སྐལ་ལྡན་མཆོག་ཏུ་གྱུར་པ་རྣམས་ཡེ་ཤེས་ཁོང་ཆུད་ཀྱིས་ཐོབ་པ་སོགས་དང་། ཆོ་ག་སོ་སོ་ལ་མ་ལྟོས་པ་དབང་བསྐུར་བ་ཁོ་ནས་སྡོམ་པ་གསུམ་ཅིག་ཅར་དུ་སྐྱེ་བ་ཡོད་དེ། པཎ་ཆེན་པདྨ་དབང་རྒྱལ་གྱིས་སྡོམ་གསུམ་རྣམ་ངེས་སུ། རབ་མཆོག་སྦྱངས་པ་མཐར་སོན་སྐལ་ལྡན་དེ། །དབང་བསྐུར་ཐོབ་པས་སྡོམ་གསུམ་ཅིག་ཅར་སྐྱེ། །རྟོགས་གྲོལ་དུས་མཉམ་ཨིནྡྲ་བྷཱུ་ཏི་བཞིན། །ཞེས་གསུངས་པ་ལྟར་སྔགས་སྡོམ་ཁོ་ན་ལས་ཕྱེ་བའི་སྡོམ་པ་གསུམ་ཅིག་ཅར་དུ་སྐྱེས་པ་སྟེ། སྔགས་སྡོམ་ཁོ་ན་ལས་གཞན་གནོད་གཞི་བཅས་སྤོང་བ་དང་། གཞན་ལ་ཕན་པ་སྒྲུབ་པ་དང་། དེ་ཐམས་ཅད་ཀྱང་ཆོས་ཉིད་མཉམ་པ་ཆེན་པོའི་ཐབས་མཁས་ཀྱིས་ཟིན་པའི་སྡོམ་པ་ཐོབ་པའི་ཕྱིར། གསང་སྙིང་ལས། བླ་མེད་མཆོག་གི་དམ་ཚིགཏུ། །འདུལ་བའི་དབང་གིས་ཚུལ་ཁྲིམས་དང་། །ཇི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཅེས་སོ། །གཉིས་པ་དབང་པོ་འབྲིང་གིས་སྡོམ་གསུམ་ཐོབ་ཚུལ་ཡང། རྣམ་ངེས་ལས། འབྲིང་ནི་སྡོམ་གསུམ་སོ་སོའི་ཆོ་ག་ལ། །བརྟེན་ནས་རིམ་ཐོབ་ནཱ་ག་རྫུ་ན་ལྟར། །ཞེས་པ་ལྟར་གང་ཟག་དབང་འབྲིང་རྣམས་ནི་འཕགས་མཆོག་ཀླུ་སྒྲུབ་ཀྱི་རྣམ་ཐར་ལྟར་སྡོམ་གསུམ་སོ་སོའི་ཆོ་ག་ལ་བརྟེན་ནས་རིམ་པར་ཐོབ་པ་སྟེ། ཉན་ཐོས་དང་ཐུན་མོང་བའི་འདུལ་བའི་ཆོ་གས་སོ་ཐར་རིགས་བདུན་དང་། སྲོལ་གཉིས་གང་རུང་གི་ཆོ་གས་བྱང་སྡོམ། གསང་སྔགས་ཕྱི་ནང་གང་རུང་གི་ཆོ་གས་རིག་པ་འཛིན་པ་སྔགས་ཀྱི་སྡོམ་པ་བླངས་ཏེ་སྡོམ་པ་གསུམ་ལྡན་དུ་ཉམས་སུ་ལེན་པའོ། །གསུམ་པ་སྐལ་དམན་རིམ་འཇུག་གི་དཀྲི་ཚུལ་ནི། ཐ་མ་སྐལ་དམན་ཤིན་ཏུ་གདུལ་དཀའ་དེ། །གསོ་སྦྱོང་བསླབ་པའི་གནས་བཅུ་གྲུབ་མཐའ་བཞི། །བྱ་སྤྱོད་རྣལ་འབྱོར་རྒྱུད་ཀུན་རིམ་ཤེས་ནས། །བླ་མེད་འཇུག་པར་བརྟག་པ་གཉིས་པར་གསུངས། །ཞེས་པ་ལྟར། ཐོག་མར་གསོ་སྦྱོང་བསྙེན་གནས་ཡན་ལག་བརྒྱད་པ་དང་། དེ་རྗེས་སྐྱབས་གསུམ། སྣ་གཅིག སྣ་འགའ། ཕལ་ཆེར། ཡོངས་རྫོགས་ཚངས་སྤྱོད། གོ་མའི་དགེ་བསྙེན་རྣམས་དང་། དགེ་ཚུལ་དགེ་སློབ། དགེ་སློང་སྟེ་བཅུའམ། ཡང་ན། སྐྱབས་འགྲོ། དུས་ཚིགས་ཀྱི་གསོ་སྦྱོང་། སོ་ཐར་གྱི་གཏན་ཁྲིམས་བདུན། དུས་ནམ་སྐྱེ་མེད་པའི་ཐེག་ཆེན་གྱི་སེམས་བསྐྱེད་དེ་བཅུ་དང་། ཡང་སོ་ཐར་རིག་བདུན་པོའི་སྟེང་དུ། སྐྱབས་སྡོམ། གོ་མའི་དགེ་བསྙེན། བར་མ་རབ་བྱུང་གསུམ་བསྣན་པའི་བཅུ་དང་། ཁ་ཅིག་ཏུ་དགེ་ཚུལ་གྱི་རགས་པ་བཅུར་བཞག་པ་སོགས་འདི་ལ་ནང་གི་དབྱེ་བའི་ཁྱད་པར་ལ་བཞེད་ཚུལ་འདྲ་མིན་འགའ་ཞིག་མཐོང་མོད། དོན་ལ་དེ་ཐམས་ཅད་ཀྱི་བསླབ་བྱ་བསྡུ་ན། ལ་ལ་ནི་ལུས་ཀྱི་གསུམ། ལ་ལ་ངག་གི་བཞི། ལ་ལ་ཡིད་ཀྱི་གསུམ་སྟེ་སྒོ་གསུམ་གྱི་མི་དགེ་བ་བཅུ་ཆ་དང་བཅས་པ་སྤོང་བའི་བསླབ་པའི་ནང་དུ་མ་འདུས་པ་གང་ཡང་མེད་པས་དེ་བཅུ་ལ་བསླབ་པའི་གནས་བཅུར་བཞེད་པ་ལ་རྒྱ་བོད་ཀྱི་རྒྱུད་འགྲེལ་རྣམས་དགོངས་པ་མཐུན་པས། དེ་ལྟ་བུའི་བསླབ་གནས་བཅུ་པོ་བྱིན་པའི་རྗེ་སུ། ཐེག་དམན་བྱེ་མདོ་གཉིས། ཐེག་ཆེན་དབུ་སེམས་གཉིས་ཏེ་གྲུབ་མཐའ་བཞི་ལ་བསླབས་ནས་སྔགས་ཕྱི་རྒྱུད་གསུམ་མམ་གང་རུང་ལ་ཞུགས་རྗེས། གཟོད་སྔགས་བླ་མེད་ལ་ཞུགས་པར་གསུངས་སོ། །དེ་གསུམ་པོ་སྤྱིར་གང་ཟག་སོ་སོའི་བློ་རིམ་དང་བསྟུན་པ་ལས་མཐའ་གཅིག་ཏུ་ངེས་བཟུང་བྱར་མེད་ཀྱང་གཙོ་བོར་སྔ་འགྱུར་གསང་ཆེན་རྙིང་མའི་རང་ལུགས་ནི་དབང་འབྲིང་ནཱ་ག་རྫུ་ནའི་རྣམ་མཐར་ལྟར་རིམ་གྱིས་འཇུག་པ་ཡིན་ཏེ། དཔལ་རོང་ཟོམ་པ་ཆེན་པོས། ད་ནི་དམ་ཚིག་ཇི་ལྟར་བླང་བ་བཤད་དེ། དེ་ཡང་གང་ཟག་མོས་པ་དང་རྩོལ་བ་ཆེ་བ་རྣམས་ཀྱིས་ནི། སོ་སོ་རིམ་གྱིས་འཇུག་པར་བྱ་སྟེ། དེ་ལ་དང་པོ་སོ་སོར་ཐར་པའི་སྡོམ་པ་ཁྱིམ་པའམ་རབ་བྱུང་གི་སྡོམ་པ་ཇི་ལྟར་ནུས་པ་གཅིག་ནོས་ནས། དེ་ནས་ཐེག་པ་ཆེན་པོའི་དགེ་བའི་བཤེས་གཉེན་ལས། བྱང་ཆུབ་སེམས་དཔའི་སྡོམ་པ་མནོས་ཏེ། དེ་ནས་གསང་སྔགས་ཀྱི་དཀྱིལ་འཁོར་དུ་འཇུག་པར་བྱ་སྟེ། ཞེས་སོགས་རྒྱ་ཆེར་གསུངས་པ་བཞིན་ནོ། །དེ་ཡང་དང་པོ་ཕྱི་སོ་སོ་ཐར་པའི་སྡོམ་པའི་ངོ་བོ་ནི་ངེས་འབྱུང་ཡིན་པའི་ཕྱིར། ཐོག་མའི་འཇུག་སྒོ་ལེགས་སྨོན་དང་འཇིགས་སྐྱོབ་ཙམ་གྱིས་མི་ཕན་པས། འཁོར་བ་ལས་བློ་ལྡོག་བྱེད་ཀྱི་ཆོས་རྣམས་པ་བཞི་ལ་བརྟེན་ནས། ཁམས་གསུམ་གྱི་འཁོར་བ་མཐའ་དག་འཕྲལ་དང་ཡུལ་དུ་སྡུག་བསྔལ་བའི་རང་བཞི་ཅན་དུ་མཐོང་ནས། དེ་ལས་ཐར་པ་མྱང་འདས་བྱང་ཆུབ་རྣམ་གསུམ་གང་རུང་ཞིག་ཐོབ་འདོད་ངེས་འབྱུང་གི་བསམ་པ་རྣམ་པར་དག་པས་ཀུན་ནས་བསླངས་ཏེ། དམ་པའི་ཆོས་འདུལ་བའི་སྡེ་སྣོད་ལྷག་པ་ཚུལ་ཁྲིམས་ཀྱི་བསླབ་པའི་ཉམས་ལེན་ཕྱི་སོ་ཐར་གྱི་སྡོམ་པ་རིགས་བདུན་གང་རུང་དང་། དེ་ལས་ཀྱང་རབ་ཏུ་བྱུང་བའི་ཕྱོགས་དགེ་ཚུལ་དང་། དགེ་སློང་གི་སྡོམ་པ། འགལ་རྐྱེན་ངེས་པ་ལྔ་དང་བྲལ་ཞིང་བར་ཆད་བཞི་མེད་ལ། མཐུན་རྐྱེན་མངོན་གྱུར་བཅུ་སོགས་ཚང་བའི་སྒོ་ནས། མཁན་སློབ་སོགས་འཕགས་པའི་དགེ་འདུན་གྲངས་ཚོགས་ཀྱི་སྤྱན་སྔར། ལས་བརྒྱ་རྩ་གཅིག་པའི་ཆོ་གས་གཞུང་བཞིན་དུ་ལེགས་པར་ནོད་ཅིང་། ཐོབ་མཚམས་བརྗོད་པ་གསུམ་གྱི་མཐའ་ལ་ཐོབ་ཤེས་ཀྱི་ངེས་པ་བསྐྱེད། ཇི་ལྟར་བསྲུང་བའི་ཐབས། དགེ་ཚུལ་ལྟར་ན། རྩ་བ་བཞི། ཆང་། གར་ཕྲེང་གཉིས། མལ་ཆེ་མཐོ། གསེར་དངུལ་བདག་ཏུ་འཛིན་པ། ཕྱི་དྲོའི་ཁ་ཟས་སྤོང་བ་སྟེ་རག་པ་བཅུ་སོགས་དང་། དགེ་སློང་ལྟར་ན། ཕམ་པ་བཞི། ལྷག་མ་བཅུ་གསུམ། སྤང་ལྟུང་སུམ་ཅུ། ལྟུང་བྱེད་འབའ་ཞིག་པ་དགུ་བཅུ། སོར་བཤགས་བཞི། ཉེས་བྱས་བརྒྱ་དང་བཅུ་གཉིས་ཏེ། ཁྲིམས་ཉིས་བརྒྱ་དང་ལྔ་བཅུ་རྩ་གསུམ་པོ་སྲུང་བ་དང་། སྒྲུབ་པའི་བསླབ་བྱ་རབ་བྱུང་གསོ་དགག་དབྱར་གནས་སོགས་གཞི་བཅུ་བདུན་པོ་རྣམས་ཇི་ལྟར་ཉམས་སུ་ལེན་པ་གལ་ཆེའོ། །དེ་ལྟ་བུའི་ཚུལ་ཁྲིམས་རྣམ་པར་དག་པ་མ་ཉམས་པར་བསྲུང་བ་འདི་ནི་རང་རྒྱུད་ལ་སྤངས་པ་དང་རྟོགས་པའི་ཡོན་ཏན་ཐམས་ཅད་སྐྱེ་བའི་རྟེན་གཞི་སའམ་རྩིག་རྨིས་ལྟ་བུ་སྟེ། བཤེས་སྤྲིང་ལས། ཁྲིམས་ནི་རྒྱུ་དང་མི་རྒྱུའི་ས་བཞིན་དུ། །ཡོན་ཏན་ཀུན་གྱི་གཞི་རྟེན་ལགས་པར་གསུངས། །ཞེས་སོ། །དེར་མ་ཟད་གཞན་གནོད་སྤངས་པའི་ཚུལ་ཁྲིམས་རྣམ་དག་བསྲུང་བ་འདི། རྒྱལ་སྲས་བྱང་ཆུབ་སེམས་དཔའ་རྣམས་ལའང་ཤིན་ཏུ་གལ་ཆེ་སྟེ། གནོད་སྦྱོར་གྱི་གཞི་ལས་མ་ལོག་པར་གཞན་ཕན་སྒྲུབ་པའི་ཐབས་མེད་པ་དང་། ལམ་ཕར་ཕྱིན་དྲུག་ལ་སློབ་དགོས་པའི་ཕྱིར། རྒྱལ་སྲས་ཐོགས་མེད་ཀྱིས། ཚུལ་ཁྲིམས་མེད་པར་རང་དོན་མི་འགྲུབ་ན། །གཞན་དོན་འགྲུབ་པར་འདོད་པ་གད་མོའི་གནས། །དེ་ཕྱིར་སྲིད་པའི་འདུན་པ་མེད་པ་ཡི། །ཚུལ་ཁྲིམས་བསྲུང་བ་རྒྱལ་སྲས་ལག་ལེན་ཡིན། །ཞེས་སོ། །དེ་བཞིན་དུ་གསང་སྔགས་རྡོ་རྗེ་ཐེག་པའི་ལམ་ལ་ཞུགས་ཏེ་བསྐྱེད་རྫོགས་ཀྱི་ལམ་རིམ་པ་གཉིས་ཉམས་སུ་བླང་ཡང་། ཚུལ་ཁྲིམས་འཆལ་བར་གྱུར་ན་འབྲས་བུ་གང་ཡང་མེད་པའི་ཚུལ། ཇི་སྐད་དུ། ཚུལ་ཁྲིམས་འཆལ་ལ་ཐུབ་དབང་གིས། །སྔགས་འགྲུབ་པར་ནི་མ་གསུངས་སོ། །ཞེས་གསུངས་། དེར་མ་ཟད་སྔགས་པ་རྟེན་ཁྱིམ་པ་ཡིན་ཡང་། རབ་བྱུང་གི་རྟགས་དང་ཆོ་ག་ཙམ་མ་གཏོགས་གཞན་ཐམས་ཅད་སྲུང་དགོས་པར་ཡང། དཔུང་བཟང་ལས། རྒྱལ་བ་ངས་གསུངས་སོ་སོ་ཐར་པ་ཡི། །ཚུལ་ཁྲིམས་རྣམ་དག་འདུལ་བ་མ་ལུས་ལས། །སྔགས་པ་ཁྱིམ་པས་རྟགས་དང་ཆོ་ག་སྤང་། །ལྷག་མ་རྣམས་ནི་ཉམས་སུ་བླང་བར་བྱ། །ཞེས་སོ། །དེ་ལས་ཀྱང་ཨོ་རྒྱན་སངས་རྒྱས་གཉིས་པ་དང་མཁན་ཆེན་བྱང་ཆུབ་སེམས་དཔའ་གཉིས་ཀྱི་རྗེས་འཇུག་ཏུ་ཁས་འཆེ་བ་དག་གིས་ནི། ཕྱི་ལྟར་འདུལ་བའི་ཀུན་སྤྱོད་དབུ་རེག་ཞབས་རྗེན། ཆོས་གོས་རྣམ་གསུམ་བགོ་བ་སོགས་ཐུབ་པའི་གནས་བརྟན་ཡིན་པ་ལྟར་ལམ་ཉམས་སུ་ལེན་པ་འདི་ཅིས་ཀྱང་གལ་ཆེ་སྟེ། མཁན་ཆེན་ཞི་བ་འཚོས། སོ་སོར་ཐར་པའི་མདོ་འདི་ནི། སྟོན་པ་མྱ་ངན་འདས་འོག་ཏུ། །དགེ་འདུན་རྣམས་ཀྱི་སྟོན་པར་གསུངས། །འདི་ལ་ཤིན་ཏུ་གུས་པར་གྱིས། །ཞེས་དང་། བདག་གིས་བསླབ་པ་དེ་བཞིན་དུ། །ཕྱི་ལྟར་འདུལ་ཁྲིམས་མ་ཉམས་ཤིང་། །ནང་ལྟར་བྱང་ཆུབ་སེམས་སྦྱངས་པ། །གསང་བ་སྔགས་ཀྱི་རིམ་གཉིས་བསྒོམ། །ཞེས་དང་། སྟོན་པའི་བསྟན་པ་རིན་ཆེན་འདི། །གངས་ཅན་ལྗོངས་སུ་ངས་གསལ་བས། །བདག་གི་རྗེས་སུ་ཞུགས་ནས་ཀྱང་། །སྟོན་པའི་བསྟན་པ་མཆོག་ཏུ་ཟུངས། །ཞེས་དང་། ཨོ་རྒྱན་ཆེན་པོས། ཕྱི་ལྟར་ལག་ལེན་མདོ་སྡེའི་ལུགས་སུ་གྱིས། །ཞེས་དང་། ཐང་ཡིག་ལས། དབུ་རེག་ཞབས་རྗེན་ངུར་སྨྲིག་འཆང་བ་དང་། །མི་དགེ་བཅུ་སྤོང་སྤྱོད་པ་ཞིབ་པ་ལ། །དགེ་འདུན་ཞེས་སུ་མཚན་དུ་བཏགས་པ་ཡིན། །ཞེས་དང་། ཕྱི་ངུར་སྨྲིག་དགེ་སློང་གི་ཆ་ལུགས་འཛིན། །ནང་གསང་སྔགས་བླ་མེད་ཀྱི་རྣལ་འབྱོར་པ། །ཞེས་གསུངས་པས་མཚོན་མཁན་སློབ་རྣམ་གཉིས་ཀྱིས་བཀས་བཅད་པའི་ཕྱིར་རོ། །དེས་ན་སྔགས་རྙིང་མའི་སྔགས་པར་རློམ་པ་དག་གིས། ངེད་ཀྱི་ལུགས་ལ་དགེ་ཚུལ་སློང་གི་སྡོམ་པ་བསྲུང་ནས་ཆོས་གོས་སོགས་རབ་བྱུང་གི་རྟགས་དང་ཆས་གོས་སོགས་མི་དགོས་མ་ཟེར་ཅིག ད་རེས་ཀྱི་བསྟན་པ་འདི་ལ་སྟོན་པ་ཐུབ་པའི་དབང་པོ་གཅིག་ལས་མེད་པའི་ཕྱིར་དེའི་རྗེས་འཇུག་མིན་པར་འགྱུར་ཏེ། ཇི་སྐད་དུ། བསྟན་པ་གཅིག་ལ་སྟོན་པ་གཉིས་མི་འབྱུང་། །བྱུང་ན་མི་སྲིད་མདོ་སྔགས་ལུང་དང་འགལ། །ཞེས་དང་། ཤཱཀྱ་ཐུབ་པའི་རྒྱལ་ཚབ་ང་ཡིན་པས། །ཆོས་ལུགས་པདྨ་ང་ཡི་རྗེས་སུ་སློབས། །ང་ཡི་རྣམ་ཐར་མདོ་སྡེ་རྣམས་སུ་ལྟོས། །ཞེས་གསུངས་པའི་ཕྱིར། ཡང་གསར་མའི་ཕྱོགས་འཛིན་པ་རྣམས་ནས་ཀྱང་། ཁྱེད་རྙིང་མ་པ་ལ་འདུལ་བའི་བསྟན་པ་མེད་མ་ཟེར་ཅིག གསར་རྙིང་ཞེས་པའི་ཐ་སྙད་འདི་རྒྱ་གར་འཕགས་པའི་ཡུལ་ན་མེད་ཀྱང་། བོད་གངས་ཅན་གྱི་ལྗོངས་འདིར་བསྟན་པ་འགྱུར་སྔ་ཕྱིའི་ཁྱད་པར་ཙམ་ལ་བཏགས་པའི་ཚུལ་ནི་སྨོས་མ་དགོས་སོ། །དེས་ན་ངེད་ཅག་རྙིང་མ་པའི་བསྟན་པའི་མཚན་གཞི་ཞིག་བཞག་ན། བསྟན་པའི་སྦྱིན་བདག་ལྷ་ཐོ་རི་སྙན་ཤལ་ནས། མངའ་བདག་ཁྲི་རལ་པ་ཅན་གྱི་བར་དང་། བསྒྱུར་ཡུལ་པཎྜིཏ་ལྷ་རིག་པའི་སེང་གེ་ནས་སྨྲི་ཏའི་ཛྙ་ནའི་བར་དང་། སྒྱུར་བྱེད་ལོ་ཙཱ་བ་ཆོས་བློན་ཐུ་མི་སམ་བྷོ་ཊ་ནས་རོང་ཟོམ་ཆོས་ཀྱི་བཟང་པོའི་བར་ལ་བསྒྱུར་པའི་མདོ་རྒྱུད་དགོངས་འགྲེལ་དང་བཅས་པ་ལ་ངེད་རྙིང་མ་པ་ཞེས་ཟེར་ན། དེའི་རིང་ལ་མ་འགྱུར་བའི་འདུལ་བའི་སྡེ་སྣོད་གང་ཡིན་གྱི་རྒྱུ་མཚན་སྨོས་ཤིག དེས་ན་དམ་ཆོས་འདུལ་བའི་སྡེ་སྣོད་ལུང་བཞི་པོ། སྟོན་པ་ཐུབ་པའི་དབང་པོས། གནས་ཝཱ་ཱརཱ་ཎ་སཱིར། འཁོར་ལྔ་སྡེ་བཟང་པོ་སོགས་ལ་བསྟན་པ་ཉིད། པཎྜི་ཏ་ཡོན་ཤཱཀ་རྣམ་གཉིས་དང་མཁན་ཆེན་བོ་དྷི་ས་ཏྭ་སོགས་ཀྱིས་ལེགས་པར་འཛིན་སྐྱོང་སྤེལ་བར་མཛད་ཅིང་། ཁྱད་པར་མཁན་ཆེན་ཞི་བ་འཚོས། བོད་ཀྱི་སད་མི་མི་བདུན་དང་། དགེ་སློང་མི་ལྔ་སོགས་རབ་ཏུ་བྱུང་བ་ནས་བརྩམས་ཏེ་ད་ལྟའི་བར་ལ་བརྒྱུད་པའི་ཟམ་མ་ཆད་པར་བ ཞུགས་པ་ནི་ཐམས་ཅད་ཡོད་སྨྲའི་ལུགས་སྨད་འདུལ་བརྒྱུད་པ་དང་བཅས་པ་ཡིན་ཏེ། བརྒྱུད་པ་འདི་ལ་བསྟན་པའི་སྲོག་མཐུད་པ་པོ་ནི། སྔོན་དུ་བླ་ཆེན་དགོངས་པ་རབ་གསལ་དང་། ཕྱིས་སུ་མཁན་ཆེན་ཐམས་ཅད་མཁྱེན་པ་དྷརྨ་ཤྲཱི་གཉིས་ཁོ་ན་ཡིན་ཞིང་། ཁྱད་པར་ད་ལྟའི་དུས་སུ་སྔ་འགྱུར་གྱི་ཆོས་སྡེ་ཆེ་ཕྲ་རྣམས་སུ་སྨད་འདུལ་གྱི་སྡོམ་རྒྱུན་རྣམ་པར་དག་པ་དང་། འདུལ་བ་གཞི་གསུམ་གྱི་ཕྱག་བཞེས། རང་ལུགས་སྡོམ་པ་གསུམ་གྱི་ཁས་ལེན་དང་། གནང་བཀག་གི་ཁྱད་པར་སོགས་ཅུང་ཟད་ཤེས་པ་དང་། སྡོམ་གསུམ་སོགས་གཞུང་གི་འཆད་ཉན་སྲོལ་མ་ཆད་ཙམ་བྱུང་བ་འདི་ཐམས་ཅད་ལོ་ཆེན་རིན་པོ་ཆེའི་བཀའ་དྲིན་དང་ཕྲིན་ལས་ཀྱི་རྒྱུན་ཁོ་ན་ལས་བྱུང་བ་ཡིན་པ་འདིའང་རང་ལུགས་སྔ་འགྱུར་གྱི་བརྒྱུད་འཛིན་རྣམས་ནས་ཤེས་དགོས་སོ། །ཡང་རབ་བྱུང་རྣམས་ནས་ཀྱང་། སྔགས་འཆང་རྡོ་རྗེ་འཛིན་པ་ཆེན་པོ་ཁྱིམ་པའི་རྟགས་སུ་བཞུགས་པ་རྣམས་ལའང་འཕྱ་སྨོད་དང་ཁྱད་གསོད་སོགས་བྱར་མི་རུང་སྟེ། རྟེན་ཁྱིམ་པ་ཡིན་ཡང་། ས་ཐོབ་པའམ་གནས་ལུགས་ཟབ་མོའི་དོན་ཇི་བཞིན་གཟིགས་པ་ནི་ཡེ་ཤེས་དང་ལྡན་པ་སྟེ། དེ་ནི་དོན་དམ་པའི་དགེ་སློང་ཡིན་པར་ཐེག་པ་གསུམ་ག་ནས་བཤད་དེ། དུས་འཁོར་ལས། ས་ཐོབ་མ་གཏོགས་ཁྱིམ་པ་ནི། །རྒྱལ་པོའི་བླ་མཆོད་མི་བྱའོ། །ཞེས་དམིགས་ཀྱིས་བསལ་བ་དང་། ས་སྙིང་འཁོར་ལོ་བཅུ་པའི་མདོ་ལས། དོན་དམ་པའི་དགེ་སློང་དང་། ཀུན་རྫོབ་ཀྱི་དགེ་སློང་དང་། ལུག་ལྐུག་པ་ལྟ་བུ་དང་། ཁྲེལ་དང་ངོ་ཚ་མེད་པའི་དགེ་སློང་ཞེས་རྣམ་གྲངས་བཞིར་གསུངས་པའི་ནང་ཚན་མཆོག་སྔ་མའི་ཁོངས་སུ་བསྡུས་པ་དང་། འདུལ་བ་ལུང་ལས། རྒྱན་གྱིས་བརྒྱན་པར་བྱས་ཀྱང་ཆོས་སྤྱོད་ཅིང་། །དུལ་ཞིང་ཡང་དག་སྡོམ་ལ་ཚངས་པར་སྤྱོད། །འབྱུང་པོ་ཀུན་ལ་ཆད་པ་སྤངས་པ་ནི། །དགེ་སློང་དགེ་སྦྱོང་དེ་ཡིན། །ཞེས་ཁྱིམ་བདག་གྲགས་པ་དགེ་སློང་དུ་གསུངས་པ་བཞིན་ནོ། །དེས་ན་དཀོན་མཆོག་བརྩེགས་པ་ལས། འོད་སྲུང་ང་དང་ང་འདྲ་བས་གང་ཟག་གི་ཚོད་གཟུང་དུ་རུང་གི་གཞན་དག་གིས་ནི་མ་ཡིན་ཏེ་ལོག་པར་ལྟུང་བའི་ཕྱིར་རོ། །ཞེས་གསུངས་། སྤྱིར་ཡང་ངག་གི་ཉེས་པར་སྤྱོད་པ་ཞིག་ལ་ཆོས་དང་གང་ཟག་ལ་སྐུར་བ་གདབ་པ་འདི་ལས་ཉེས་པ་ལྕི་བ་མེད་དེ། དེས་འཕྲལ་དུ་ཆགས་སྡང་གསོག ཕུགས་སུ་བསྟན་པ་ལ་གནོད། རང་གཞན་ཆོས་སྤང་ལ་སྦྱོར་བའི་ཕྱིར་རྟག་ཏུ་བག་ཡོད་པར་བྱ་དགོས་ཏེ། རྒྱན་ལས། ཡིད་ཀྱི་རང་བཞིན་ཤིན་ཏུ་གདུག་པ་སྟེ། །མི་རིགས་པ་ཡི་གཟུགས་ལའང་མི་རིགས་ན། །ཐེ་ཚོམ་ཟ་བའི་ཆོས་ལ་སྨོས་ཅི་དགོས། །དེ་བས་བཏང་སྙོམས་བཞག་ལེགས་ཉེས་པ་མེད། །ཅེས་དང་། བཅོམ་ལྡན་འདས་ཀྱིས། ཐ་ན་འགལ་དུམ་ལའང་ཁྲོ་བར་མི་བྱ་ན། སེམས་དང་ལྡན་པ་ལ་ལྟ་ཅི་སྨོས། ཞེས་གསུངས། དེ་ལས་གཞན་དུ་ན། རྒྱན་ལས། རབ་ཏུ་བྱུང་བའི་ཕྱོགས་དག་ནི། །ཡོན་ཏན་ཚད་མེད་རྣམས་དང་ལྡན། །དེ་ལྟས་སྡོམ་བརྩོན་ཁྱིམ་པ་ཡི། །བྱང་སེམས་རྣམས་ལས་མཆོག་ཏུ་བཤད། །ཅེས་དང་། དུས་འཁོར་ལས། གསུམ་ལས་དགེ་སློང་མཆོག་ཡིན་འབྲིང་། །དགེ་ཚུལ་ཞེས་བྱ་དེ་དག་ལས། །ཁྱིམ་ན་གནས་པ་ཐ་མའོ། །ཞེས་རྡོ་རྗེ་འཛིན་པའི་རབ་འབྲིང་ཐ་གསུམ་དུ་གསུངས་པ་སོགས་ནི་སྨོས་མ་དགོས་སོ། །དེས་ན་དེ་ལྟར་གཞི་ཚུལ་ཁྲིམས་ཀྱི་བསླབ་པས་རྒྱུད་བསྡམས་ཏེ་ཕྱི་སོ་ཐར་གྱི་སྡོམ་པ་བསྲུང་བ་གཞིར་བཞག་གི་སྟེང་དུ། ནང་བྱང་ཆུབ་སེམས་དཔའི་སྡོམ་པས་རང་རྒྱུད་སྡོམ་པ་ལ། རྒྱུ་ཐེག་པ་ཆེན་པོའི་རིགས་སད་པ་དང་། རྐྱེན་ཐེག་ཆེན་ཚུལ་བཞིན་དུ་སྟོན་པའི་དགེ་བའི་བཤེས་གཉེན་ལ་བསྟེན་ནས། སྔར་གྱི་འཁོར་བ་ལས་ཐར་འདོད་ངེས་འབྱུང་གི་བསམ་པ་དེ་ཡང་། རང་ཉིད་གཅིག་པུར་ཞི་བདེ་དོན་གཉེར་ཐེག་དམན་རང་གི་ལམ་དུ་ཤེས་ནས། རང་ཉིད་ཁོ་ན་ཙམ་མིན་པར་མཐའ་ཡས་པའི་སེམས་ཅན་རྣམས་ཕ་མ་ཡིན་པར་སྙིང་ནས་ངེས་ཤེས་འདྲོངས་པར་བྱས་ལ། སེམས་ཅན་ཐམས་ཅད་ཀྱི་དོན་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འདོད་པས། བྱང་ཆུབ་ཀྱི་སེམས་རིན་པོ་ཆེས་ཀུན་ནས་བསླངས་ཏེ། དམ་པའི་ཆོས་ཐེག་ཆེན་མདོ་སྡེ་དང་མངོན་པའི་སྡེ་སྣོད། ལྷག་པ་ཏིང་ངེ་འཛིན་དང་ཤེས་རབ་ཀྱི་བསླབ་པའི་ཉམས་ལེན། ནང་བྱང་ཆུབ་སེམས་དཔའི་སྡོམ་པ་སྲོལ་གཉིས་གང་རུང་དང་། ཁྱད་པར་ཟབ་མོ་ལྟ་བའི་སྲོལ་ལྟར་སྡོམ་པ་ལེན་དགོས་པས། དེ་ལ་སྦྱོར་དངོས་རྗེས་གསུམ་ལས། དང་པོ་ལ་ཁྱད་པར་གྱི་ཆོས་བཞི་སྟེ། གདམས་ངག་ཁྱད་པར་ཅན་སྲིད་མཐར་སྐྱོ་བ་སྐྱེད། ཞི་མཐར་ཞེན་པ་དགག མཐའ་གཉིས་ལ་མི་གནས་པའི་ལམ་ལ་སྔགས་པ་བརྗོད་པས་སྤྲོ་བ་སྐྱེད་དེ་བློ་བཅོས་པ་དང་། ཡུལ་ཁྱད་ཅན་བླ་མ་ལ་མཎྜལ་ཕུལ་ཞིང་གསོལ་བ་གདབ་པ། རྟེན་ཁྱད་པར་ཅན་དཀོན་མཆོག་གསུམ་ལ་སྐྱབས་སུ་འགྲོ་བ། ཐབས་ཁྱད་པར་ཅན་ཡན་ལག་བདུན་པས་ཚོགས་བསགས་པའོ། །དངོས་གཞི་ལ། ཚད་མེད་བཞི་ལ་བློ་སྦྱོང་བ་དང་། དགོངས་གསོལ་སྔོན་དུ་འགྲོ་བས་སྨོན་པ་དང་འཇུག་པའི་སེམས་དང་། དེའི་སྡོམ་པ་ལ་དམ་བཅའ་བ་སྤྱོད་འཇུག་ནས་གསུངས་པ་ལྟར་རང་རྒྱུད་ལ་ལེན་ཅིང་སྐྱེ་བར་བྱེད་པའོ། །རྗེས་ལ་རང་གཞན་དགའ་བ་བསྒོམ་པ་སོགས་ཏེ། འདིའི་ཐོབ་མཚམས་ཀྱང་སྡོམ་གསུམ་རྩ་འགྲེལ་དུ་བརྗོད་པ་གསུམ་མཐར་གསུངས་པ་གཙོ་བོར་སྨོན་འཇུག་སོ་སོར་ལེན་པའི་དབང་དུ་མཛད་པ་ཡིན་ལ། རྒྱ་མཚོའི་སྤྲིན་དང་ཤིང་རྟ་ཆེན་མོར་བརྗོད་པ་དང་པོས་སྨོན་སེམས་། གཉིས་པས་འཇུག་སྡོམ། གསུམ་པས་གཉིས་ཀ་བརྟན་ཞིང་དག་པར་བྱེད་པའི་ཚུལ་གྱིས་ཐོབ་པར་གསུངས་པ་ནི་གཉིས་ཀ་སྟབས་གཅིག་ཏུ་ལེན་པའི་དབང་དུ་མཛད་པ་སྟེ་མི་འགལ་ཞིང་། གལ་ཏེ་བླ་མ་མེད་ནའང་དཀོན་མཆོག་གསུམ་གྱི་རྟེན་གྱི་དྲུང་སོགས་ལས་ཀྱང་སྐྱེ་བར་གསུངས་སོ། །དེ་ལ་སེམས་བསྐྱེད་དང་སྡོམ་པའི་ཁྱད་པར། སེམས་བསྐྱེད་ནི་གཞན་དོན་དུ་སངས་རྒྱས་ཐོབ་པར་འདོད་པ་སྟེ། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་སངས་རྒྱས་འདོད། །ཅེས་སོ། །སྡོམ་པ་ནི་དེའི་མི་མཐུན་ཕྱོགས་རང་དོན་ཡིད་བྱེད་དང་གནོད་སྦྱོར་སོགས་སྤངས་པའི་སེམས་ཏེ། ཞི་བ་ལྷས། སྤོང་བའི་སེམས་ནི་ཐོབ་པ་ལ། །ཚུལ་ཁྲིམས་ཕ་རོལ་ཕྱིན་པར་བཤད། །ཅེས་སོ། །ཐེག་ཆེན་གྱི་ལྟ་བ་ལ་དབུ་སེམས་སོ་སོའི་སློབ་དཔོན་རྗེས་འབྲང་དང་བཅས་པའི་བཞེད་ཚུལ་མང་ཡང་། མདོ་ལམ་གྱི་གྲུབ་མཐའི་རྩེ་མོར་གྱུར་པ་ནི་དབུ་མ་སྟེ། དེ་ཡང་རང་ལུགས་ཀུན་མཁྱེན་ཆེན་པོ་དང་། ཐམས་ཅད་མཁྱེན་པ་མི་ཕམ་རིན་པོ་ཆེའི་དགོངས་པ་ལྟར་སྣང་སྟོང་ཟུང་འཇུག་རབ་ཏུ་མི་གནས་པའི་དབུ་མ་ཆེན་པོ་ཉིད་ལེགས་པར་གཏན་ལ་ཕེབས་ན། རྒྱལ་བའི་བཀའ་འཁོར་ལོ་བར་ཐ་དང་། ཤིང་རྟ་ཆེན་པོ་གཉིས་རྗེས་འབྲང་དང་བཅས་པའི་འཕགས་པ་རྣམས་ཀྱི་ཟབ་དགོངས་མཐའ་ཐུག་སྦྲང་རྩིའི་རོ་བཞིན་འགལ་མེད་དོན་གཅིག་ཏུ་འབབ་པ་ཡིན་ཞིང་། དེར་མ་ཟད་དེ་ཉིད་སྔགས་ཀྱི་རྒྱུ་རྒྱུད་དུ་བཞག་པའི་ཚེ། མ་ཧཱའི་བདེན་གཉིས། ཨ་ནུའི་དབྱིངས་ཡེ། ཨ་ཏིའི་ཀ་ལྷུན་ཟུང་འཇུག་སོགས་ཀྱང་ཐམས་ཅད་མི་འགལ་བར་དོན་གྱི་གནད་གཅིག་པ་ཡིན་པས། ཆོས་ཀྱི་རྒྱལ་པོ་སྨིན་གླིང་པ་སྐུ་མཆེད་ཀྱི་བཞེད་པའང་འདི་ཁོ་ན་ཡིན་མོད། དེ་ལྟར་མ་རྟོགས་པར། འཕགས་པ་ཀླུ་སྒྲུབ་ཀྱི་དགོངས་པ་ནི་མེད་དགག་ཕྱོགས་གཅིག་པའོ་ཞེས་སྟོང་འཛིན་གྱི་སྤྲོས་པའི་ཕྱོགས་འབའ་ཞིག་ཏུ་ཞེན་ཅིང་རློམ་པ་རྣམས་ཀྱི་ཞེན་ལྟ་བཟློག་པའི་ཆེད་དུ། ཀུན་མཁྱེན་ཆེན་པོས། བྲལ་གཞི་མི་ཤེས་སྲིད་རྩེའི་ལྟ་བ་ཅན། །ཞེས་སོགས་གསུངས་པ་དང་མཐུན་པར། རྣམ་འགྲེལ་དཔག་བསམ་སྙེ་མར། སྐབས་འདིར། སྔ་འགྱུར་གྱི་རིང་ལུགས་པ་རྣམས་ཀྱི་སེམས་བསྐྱེད་ཀྱི་ཆོ་གའི་ཕྱག་བཞེས་ནཱ་ག་རྫུ་ན་དང་མཐུན་པར་བྱེད་མོད། འོན་ཀྱང་ལྟ་བ་ནི་དེར་མ་ངེས་ཏེ། ཀླུ་སྒྲུབ་ཀྱི་བསྟོད་ཚོགས་དང་མི་འགལ་ཡང་གཙོ་བོར་ཐོགས་མེད་སྐུ་མཆེད་ཀྱིས་ཇི་ལྟ་བ་བཀྲལ་བ་དང་མཐུན་ཏེ། ཞེས་གསུངས་པ་སོགས་ཀྱིས་འཁྲུལ་གཞི་བྱས་ཏེ། གནས་སྣང་ངམ་བདེན་གཉིས་དཔྱོད་པའི་ཚད་མ་སོ་སོར་ཤན་མ་ཕྱེད་པའི་བློ་གྲོས་གསར་བུ་པ་ཁ་ཅིག་དབུ་འཁོར་ནས་དོན་དཔྱོད་ངོར་སྟོང་ཉིད་བདེན་གྲུབ་ཏུ་སྒྲུབ་འདུག་སྙམ་པ་མང་དུ་འདུག་མོད། དེ་ལྟར་མ་ཡིན་ཏེ་རྟོགས་བྱ་མཐར་ཐུག་པ་གཏན་ལ་དབབ་བྱའི་ཆོས། རྣམ་གྲངས་མ་ཡིན་པའི་དོན་དམ་གྱི་ངོར་མེད་དགག་དང་མ་ཡིན་དགག་གི་འཛིན་སྟངས་སོགས་སྤྲོས་པ་གང་ཡང་ཡོད་མི་སྲིད་པས་སྤྲོས་བྲལ་ཙམ་དུའང་འཛིན་པ་མེད་པའི་ཆོས་དབྱིངས་མཉམ་པ་ཆེན་པོ་ཉིད་ཡིན་ལ། རྗེས་ཐོབ་ཐ་སྙད་སྤྱོད་པའི་ཚད་མའི་ངོར་ཡོད་མེད་སོགས་ལེགས་པར་ཤན་འབྱེད་པའི་སྐབས། མཐར་ཐུག་ཟག་པ་མེད་པའི་ཆོས་སྐུ་དང་ཡེ་ཤེས་སོགས་ཡེ་ནས་སྟོང་པའི་དབྱིངས་དང་འདུ་འབྲལ་སྤང་བའི་ཚུལ་གྱིས་གནས་པ་ལ་མ་ཡིན་དགག་ཏུ་གསུངས་པ་ཡིན་པས་དེ་ལྟར་ལེགས་པར་ཤན་ཕྱེད་ན་ཐེ་ཚོམ་གྱི་འགག་ཐམས་ཅད་རང་གྲོལ་དུ་འགྲོ་བ་ཡིན་པས་གནད་འདི་ཤིན་ཏུ་གལ་ཆེའོ། །དེ་ལྟར་ཤེས་ནས་སྲུང་མཚམས་དངོས་ལ། སྨོན་པའི་བསླབ་བྱ་ཚད་མེད་བཞི་ལ་བློ་སྦྱོང་བ་དང་། དཀར་ནག་ཆོས་བཞིར་འཇུག་ལྡོག་བྱེད་པ། འཇུག་པའི་བསླབ་བྱ་ཚུལ་ཁྲིམས་གསུམ་ལས། ཉེས་སྤྱོད་སྡོམ་པ། རྒྱལ་བློན་གྱི་རྩ་ལྟུང་ལྔ་ལྔ་སྟེ་བཅུ་དང་། ཕལ་པའི་བརྒྱད་དང་བཅོ་བརྒྱད་སྟེང་། སྨོན་འཇུག་གི་སེམས་གཉིས་འདོར་བ་སྟེ་རྩ་ལྟུང་ཉི་ཤུ་དང་། ཡན་ལག་གི་ཉེས་བྱས་བརྒྱད་ཅུ་བསླབ་བཏུས་ནས་བཤད་པ་ལྟར་སྤོང་བའོ། །དགེ་བ་ཆོས་སྡུད་ཐབས་ལ་མཁས་པས་ཕར་ཕྱིན་དྲུག་ལ་སློབ་པ་དང་། སེམས་ཅན་དོན་བྱེད་བསྡུ་དངོས་བཞིས་དངོས་བརྒྱུད་ནས་སེམས་ཅན་ལ་གང་ཕན་བྱེད་པ་སྟེ། བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་བསྒོམ་པ་སོགས་རྒྱལ་སྲས་བྱང་ཆུབ་སེམས་དཔའི་སྡོམ་པ་འདིས་རྒྱུད་ལེགས་པར་སྡོམ་པ་འདི་ཉིད་ཤིན་ཏུ་གལ་ཆེ་སྟེ། ལམ་འདི་ཉིད་གཞན་དུ་འདོར་བའི་གང་ཟག་དེ་ནི་སྔགས་པ་སོགས་མིང་ཇི་ལྟར་བཏགས་ཀྱང་དོན་དུ་རྣམ་པ་ཐམས་ཅད་མཁྱེན་པ་ཐོབ་པའི་ཐབས་ནི་མེད་དེ། ཀླུ་སྒྲུབ་ཀྱིས། བྱང་ཆུབ་སེམས་ནི་མ་བསྐྱེད་པར། །སངས་རྒྱས་ནམ་ཡང་ཐོབ་མིན་ཅིང་། །འཁོར་བར་རང་གཞན་དོན་སྒྲུབ་པའི། །ཐབས་འགའ་ཡོད་པ་མ་ཡིན་ནོ། །ཞེས་དང་། རྒྱུད་ལས། རིག་དང་དམ་ཚིག་མ་མཐོང་སྙིང་རྗེ་མེད། །དེ་བཞིན་བྱང་ཆུབ་སེམས་ནི་མ་བསྐྱེད་ཅིང་། །སངས་རྒྱས་མ་དད་ལྷ་གཞན་ལ་བརྟེན་པས། །ང་ཡི་གསང་སྔགས་བཟླས་ན་ཕུང་བར་འགྱུར། །ཞེས་གསུངས། དེའི་ཕྱིར་སེམས་བསྐྱེད་ཀྱི་ཕན་ཡོན་དཔག་ཏུ་མེད་དེ། སྤྱོད་འཇུག་ལས། བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་ཚུད་པའི་ཉམ་ཐག་འགྲོ། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་སྟེ། །འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་སོ། །དེ་ལྟར་དུ་བྱང་ཆུབ་སེམས་དཔའི་སྡོམ་པས་རྒྱུད་བསྡོམས་ཏེ། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་བསྒྲུབ་པ་དེ་ཡང་། མདོ་ལམ་ན་བསྐལ་པ་གྲངས་མེད་གསུམ་མམ་བདུན་ནམ་སུམ་ཅུ་རྩ་བདུན་གང་རུང་ཞིག་ལས་མྱུར་དུ་ཐོབ་པའི་ཐབས་མེད་པས། ད་ལྟའི་ཚེ་ལུས་གཅིག་པོ་འདི་ཉིད་ཀྱི་སྟེང་དུ་ཟུང་འཇུག་རྡོ་རྗེ་འཆང་གི་གོ་འཕང་སྒྲུབ་པའི་ཐབས། གསང་སྔགས་རྡོ་རྗེ་ཐེག་པའི་ལམ་མ་གཏོགས་གཞན་ལ་མེད་པའི་ཚུལ་ཤེས་ནས། གསང་བ་རིག་འཛིན་སྔགས་ཀྱི་སྡོམ་པས་རྒྱུད་སྡོམ་དགོས་པ་ཡིན་ལ། དེ་ལྟ་ན་གསང་སྔགས་ཐེག་པའི་གཞུང་ལམ་ཐམས་ཅད་ནི་གོང་དུ་བཤད་པའི་བྱང་ཆུབ་སེམས་དཔའི་སྡེ་སྣོད་དེ་དག་གི་མན་ངག་ཡིན་པའི་ཕྱིར་དེ་ལས་གཞན་མ་ཡིན་པའི་ཚུལ་ནི། ཡོན་ཏན་རིན་པོ་ཆེའི་མཛོད་ལས། བྱང་ཆུབ་སེམས་དཔའ་སྔགས་ཀྱི་ཐེག་པ་ལ། །འབྲས་བུའམ་ནི་རྡོ་རྗེའི་ཐེག་པའམ། །ཐབས་ཀྱི་ཐེག་པ་རིག་པ་འཛིན་པ་ཡི། །སྡེ་སྣོད་ཅེས་གྲགས་རྒྱུ་ལས་ཁྱད་པར་འཕགས། །ཞེས་སོ། །འོ་ན་གོང་དུ་སྡེ་སྣོད་བཞི་པར་བཞག་པ་དང་མི་འགལ་ལམ་སྙམ་ན་མི་འགལ་ཏེ། འདི་ཉིད་དུག་གསུམ་ཆ་སྙོམས་སུ་འདུལ་བའི་གཉེན་པོར་གསུངས་པས་གོང་གི་སྡེ་སྣོད་གསུམ་ཆར་གྱི་བསྟན་བྱའི་སྙིང་པོ་ཤིན་ཏུ་སྦས་པའི་མན་ངག་མཐར་ཐུག་པར་གྲུབ་པ་ཡིན་ནོ། །དེ་ལྟ་བུའི་ཚུལ་ངེས་པར་བྱས་ཏེ། བླ་མ་ལྟ་དགོངས་དང་ལྡན་པ་ཞིག་བསྟེན་ནས། རྒྱུད་སྡེ་བཞི་གང་རུང་གི་སྒོ་ནས་རང་རྒྱུད་མ་སྨིན་པ་སྨིན་པར་བྱེད་པ་དབང་བསྐུར་ལེགས་པར་ཐོབ་དགོས་ཤིང་། དེ་ལས་ཁྱད་པར་དུ་སྔགས་བླ་མེད་ཀྱི་དབང་དུ་བྱས་ན་དབང་བཞིའི་ངེས་པ་ཅན་ཡིན་པས། དང་པོ་གནས་གསུམ་རྡོ་རྗེ་གསུམ་བསྐྱེད་པ་ནས་བཟུང་། མཇུག་དབང་བཞི་ཡོངས་སུ་རྫོགས་པ་ཐོབ་པའི་ཚེ་རིག་འཛིན་སྔགས་ཀྱི་སྡོམ་པ་ཐོབ་པ་ཡིན་ཞིང་། དེ་ཡང་ཐབས་ཤེས་ཁྱད་པར་ཅན་གྱིས་མ་དག་པའི་མཚན་རྟོག་དག་པ་ལྷ་དང་ཡེ་ཤེས་ཀྱི་རང་བཞིན་དུ་སྡོམ་པས་སྡོམ་པ་དང་དེ་ལས་འདའ་བར་མི་རུང་བའི་ཆ་ནས་དམ་ཚིག་ཅེས་བྱ་སྟེ། དབང་དང་འབྲེལ་བའི་ལྟ་བ་ཟབ་མོའང་། རོང་ཟོམ་པ་ཆེན་པོས་མན་ངག་ལྟ་ཕྲེང་གི་འགྲེལ་པར། ཕ་རོལ་ཏུ་ཕྱིན་པའི་ཐེག་པ་སྤྱི་ཡི་ཚུལ་ཆོས་ཉིད་སངས་རྒྱས་སུ་ལྟ། ཆོས་ཅན་མཚན་མ་རང་ཀ་མ་ཇི་ལྟར་སྣང་ཙམ་དུ་འཛིན། ངེས་དོན་གྱི་མདོ་སྡེ་དང་གསང་སྔགས་ཀྱི་ཚུལ་ནི། བདེན་གཉིས་དབྱེར་མེད་པར་ལྟ་ཞིང་། ཕུང་པོ་ལྔ་ཡང་སངས་རྒྱས་སུ་ལྟ་ཞེས་གསུངས་པ་ལྟར། ངེས་དོན་བཀའ་འཁོར་ཐ་མ་དང་སྔགས་ཀྱི་ལྟ་གྲུབ་ཚུལ་མཐུན་ནོ། །དེ་ལ་དབུ་མ་ཐལ་འགྱུར་གྱི་ཆོས་ཅན་ཀུན་རྫོབ་ལྟ་བའི་ལྟ་བ་དག་གཞན་དབང་རྟེན་འབྱུང་སྒྱུ་མ་དང་རྨི་ལམ་ལྟ་བུའི་རང་བཞིན་དེ་ཡང་། དག་པ་གཞན་དབང་ལྷའི་དཀྱིལ་འཁོར་ཆེན་པོར་ཡེ་ནས་ཡིན་པ་ལ་ཡིན་པར་ཤེས་པའི་ངེས་ཤེས་དང་ལྡན་པར་ལྟ་བའི་ཆ་ནས་ལྷག་པའི་ཀུན་རྫོབ་བདེན་པ་དང་། ཆོས་ཉིད་དོན་དམ་ལྟ་བའི་ལྟ་བའང་། སྟོང་ཉིད་སྤྲོས་པའི་མཐའ་བརྒྱད་དང་བྲལ་བའི་ཁས་ལེན་གང་ཡང་མེད་པ་ཉིད། སྔགས་ཀྱི་སྐབས་འདིར་དབྱིངས་རྣམ་ཀུན་མཆོག་ལྡན་གྱི་སྟོང་ཉིད་སྐུ་དང་ཡེ་ཤེས་འདུ་འབྲལ་མེད་པའི་ཆ་ནས་ལྷག་པའི་དོན་དམ་བདེན་པ་དང་། དེ་ལྟ་བུའི་བདེན་པ་གཉིས་པོ་དེ་ཡང་ཐ་དད་པ་གཉིས་ཡོད་ནས། གཟོད་ཆུ་དང་འོ་མ་འདྲེས་པ་ལྟ་བུའི་ཟུང་དུ་འཇུག་པ་མ་ཡིན་ལ། གསེར་དང་གསེར་གྱི་ཁ་དོག་དང་། མེ་དང་མེ་ཡི་ཚ་བ་བཞིན་དུ་གཉིས་ཀྱི་སྒྲོ་བཏགས་ཀྱི་{བརྟག་གི}རྟོག་པ་རྣམ་པར་ཆད་པའི་སེམས་ཉིད་ཡེ་ནས་སྣང་སྟོང་དབྱེར་མེད་པའི་ཆ་ནས་ལྷག་པའི་བདེན་པ་དབྱེར་མེད་དང་། དེ་ལྟ་བུའི་ལྷག་པའི་བདེན་པ་དབྱེར་མེད་དེ་ཡང་། ཤེས་བྱེད་ཀྱི་བློ་ཡིས་ཡུལ་དང་ཡུལ་ཅན་གྱི་ཚུལ་དུ་གཏན་ལ་ཕེབས་པ་ལྟ་བུ་ནི་མ་ཡིན་ཏེ། གསང་སྙིང་ལས། གཅིག་དང་དུ་མར་བྲལ་བ་ཡི། །མཐའ་དང་དབུས་མེད་དེ་བཞིན་ཉིད། །སངས་རྒྱས་ཀྱིས་ཀྱང་མི་གཟིགས་ཏེ། །རང་བྱུང་ཡེ་ཤེས་གནས་མེད་སྣང་། །ཞེས་དང་། སྤྱོད་འཇུག་ལས། དོན་དམ་བློ་ཡི་སྤྱོད་ཡུལ་མིན། །བློ་ནི་ཀུན་རྫོབ་ཡིན་པར་འདོད། །ཅེས་སོ། །དེས་ན་ཡུལ་ཡུལ་ཅན་གཉིས་སུ་མེད་པར་བལྟ་བྱ་ལྟ་བྱེད་ལས་འདས་པར་གཏན་ལ་འབེབས་པའི་ཆ་ནས་བློའི་སྤྱོད་ཡུལ་ལས་འདས་པ་ཞེས་བཏགས་པའི་ལྟ་བ་ལྡོག་ཆོས་བཞི་ལྡན་དུ་གཏན་ལ་ཕབ་ནས། བྱ་སྤྱོད་སོགས་སྤྱི་དང་། ཁྱད་པར་སྔགས་བླ་མེད་གསར་རྙིང་སྤྱི་དང་བྱེ་བྲག་གི་ལུགས། ཐོག་མའི་བརྟུལ་ཞུགས་ཉེར་ལྔ། རིགས་ལྔའི་སྡོམ་པ། རྩ་བའི་དམ་ཚིག་གསུམ་མམ་ལྔའམ་བཅུ་བཞི་སོགས་དང་། ཡན་ལག་གི་དམ་ཚིག་ཉེར་ལྔའམ་བཅུ་དང་བརྒྱད་ལ་སོགས་པ་རྒྱུད་སྡེ་རྣམས་ནས་ཇི་སྐད་གསུངས་པ་ལྟར་སྤྱི་དང་ཁྱད་པར་ལྷག་པས་བསྡུས་པའི་དམ་ཚིག་དང་སྡོམ་པ་རྣམས་ལེགས་པར་སྲུང་ཞིང་། ལམ་ཟབ་མོ་བསྐྱེད་རྫོགས་ཀྱི་རིམ་པ་གཉིས་པོ་རྒྱུད་ནས་ཇི་སྐད་གསུངས་པ་བཞིན་ཉམས་སུ་ལེན་པ་དང་། གྲོགས་སྤྱོད་པ་དུས་ཚོད་དང་འབྲེལ་བར་སྤྱད་པས། གནས་སྐབས་ཀྱི་འབྲས་བུ་རིག་འཛིན་བཞི་དང་། མཐར་ཐུག་རྡོ་རྗེ་འཆང་གི་གོ་འཕང་ལ་དབང་སྒྱུར་བར་བྱེད་པ་ཡིན་ནོ། །དེ་ལྟ་བུའི་སྡོམ་པ་གསུམ་པོ་དེ་གང་ཟག་གཅིག་གི་རྒྱུད་ལ་ཇི་ལྟར་ཉམས་སུ་ལེན་སྙམ་ན། འདི་ལ་འཕགས་བོད་གསར་རྙིང་གི་མཁས་པ་རྣམས་བཞེད་པ་མི་འདྲ་བ་མང་ཡང་། དེ་དག་གི་དགག་སྒྲུབ་སོགས་ཀྱི་སྤྲོས་པ་རེ་ཞིག་བཞག་ནས། རང་ལུགས་སྡོམ་གསུམ་རྣམ་ངེས་ལས། དེ་ལྟའི་སྡོམ་གསུམ་གང་ཟག་རྒྱུད་གཅིག་ལ། །རང་ལྡོག་མ་འདྲེས་དགག་དགོས་ཡོངས་རྫོགས་དང་། །ངོ་བོ་གནས་འགྱུར་ཡོན་ཏན་ཡར་ལྡན་པས། གནད་ཀྱིས་མི་འགལ་དུས་སྐབས་གང་གཙོར་སྤྱད། །ཅེས་དང་། རྗེ་གཏེར་ཆེན་བླ་མས། དེ་ཡང་རྒྱུད་གཅིག་ཉིད་ལ་སྡོམ་པ་གསུམ། །མཚན་ཉིད་དྲུག་ལྡན་ངོ་བོ་གཅིག་ཏུ་གནས། །ལེན་ཅིང་རྟེན་དང་ཕྱིར་འཆོས་འཁྲུལ་མེད་དུ། །སྤྱོད་པ་སྡེ་སྣོད་གསུང་རབ་ཤེས་ལ་རག །ཅེས་གསུངས་པ་བཞིན་ཁྱད་ཆོས་དྲུག་ལས། དང་པོ་རང་ལྡོག་མ་འདྲེས་པ་ནི། རྣམ་ངེས་ལས། དེ་ཡང་བླང་ཡུལ་བསམ་པ་ཆོ་ག་རྣམས། །སོ་སོར་ངེས་ཕྱིར་རང་ལྡོག་མ་འདྲེས་ཡིན། །ཞེས་པས། སྡོམ་གསུམ་སོ་སོར་གང་ལས་བླང་བའི་ཡུལ། གང་གིས་ལེན་པའི་བསམ་པ། ཇི་ལྟར་ལེན་པའི་ཆོ་ག ཇི་སྲིད་དུ་ལེན་པའི་དུས་རྣམས་སོ་སོར་ངེས་པའི་ཕྱིར། རང་རང་གི་ལྡོག་པ་མ་འདྲེས་པར་ཐ་དད་དུ་ཡོད་དོ། །གཉིས་པ་དགག་དགོས་ཡོངས་རྫོགས་ནི། དག་བྱ་ཉོན་མོངས་དགོས་པ་མི་འཆིང་བ། །རང་རང་ལམ་གྱི་ངོས་ནས་ཡོངས་སུ་རྫོགས། །སྤོང་བསྒྱུར་ལམ་དུ་བྱེད་པ་སོ་སོ་ཡང་། །ཉོན་མོངས་རང་མཚན་སྤོང་བར་མཁས་རྣམས་མཐུན། །ཞེས་པས། ཉན་རང་གིས་ཉོན་མོངས་པ་དུག་བཞིན་དུ་སྤོང་བ་དང་། བྱང་ཆུབ་སེམས་དཔས་གཉེན་པོས་བསྒྱུར་བ་དང་། གསང་སྔགས་རྡོ་རྗེ་ཐེག་པས་མི་སྤོང་བར་ལམ་དུ་བྱེད་པ་སྟེ། གསུམ་ཀས་དོན་དུ་ཉོན་མོངས་པ་རང་མཚན་པ་ནི་འགོག་ཅིང་། དེའི་དགོས་པ་ནི་རང་རྒྱུད་འཁོར་བར་མི་འཆིང་བའི་ཐབས་སུ་གནད་གཅིག་གོ །གསུམ་པ་ངོ་བོ་གནས་འགྱུར་ནི། སོ་ཐར་ཀུན་སློང་སེམས་བསྐྱེད་ཀྱིས་ཟིན་ན། །ཉེས་སྤྱོད་སྡོམ་པ་ཞེས་བྱའི་ཚུལ་ཁྲིམས་ཡིན། །དབང་ཐོབ་རྡོ་རྗེ་འཛིན་པའི་སྡོམ་པར་འགྱུར། །དེ་ཕྱིར་ངོ་བོ་གནས་འགྱུར་ཡིན་ནོ་ཞེས། །འབུམ་ཕྲག་ལྔ་པའི་ལུང་གིས་གསལ་བར་གྲུབ། །ཅེས་པས། སྔོན་སོ་ཐར་གྱི་སྡོམ་པ་ཞུས་པའི་སྟེང་དུ་བྱང་སེམས་ཀྱི་སྡོམ་པ་ཞུས་ཚེ། སྔར་གྱི་ཉན་རང་དམན་སེམས་ཀྱིས་བླངས་པའི་སོ་ཐར་གྱི་སྡོམ་པ་དེ་ཉིད། གཞན་ཕན་ལྷག་བསམ་གྱིས་ཟིན་པས་བྱང་ཆུབ་སེམས་དཔའི་ཉེས་སྤྱོད་སྡོམ་པའི་ཚུལ་ཁྲིམས་སུ་གནས་འགྱུར། དེའི་སྟེང་དུ་གསང་སྔགས་ཀྱི་དབང་ཐོབ་ཚེ་མཉམ་པ་ཆེན་པོའི་ཐབས་ཀྱིས་ཟིན་པས་སྔ་མ་གཉིས་ལ་ཐ་མལ་སྣང་ཞེན་གྱི་ལྡོག་ཆ་རེ་ཡོད་པ་དེ་བཏང་ནས་རྡོ་རྗེ་འཛིན་པ་སྔགས་ཀྱི་སྡོམ་པ་རུ་གནས་འགྱུར་བའི་ཚུལ། དཔེར་ན་གསེར་འགྱུར་གྱི་རྩིས་རྡོ་ཁམས་ལྕགས་ཟངས་དངུལ་གསུམ་གསེར་དུ་འགྱུར་བ་ལྟ་བུ་སྟེ་འབུམ་ལྔའི་རྒྱུ་ལས། རྡོ་ཡི་རིགས་ཀྱི་བྱེ་བྲག་ཞིག །བཞུ་བས་ལྕགས་དང་ཟངས་དངུལ་འབྱུང་། །གསེར་འགྱུར་རྩི་ཡི་དངོས་པོ་ཡིས། །ཀུན་ཀྱང་གསེར་དུ་སྒྱུར་བར་བྱེད། །དེ་བཞིན་སེམས་ཀྱི་བྱེ་བྲག་གིས། །རིགས་ཅན་གསུམ་གྱི་སྡོམ་པ་ཡང་། །དཀྱིལ་འཁོར་ཆེན་པོ་འདིར་ཞུགས་ན། །རྡོ་རྗེ་འཛིན་པ་ཞེས་བྱའོ། །ཞེས་སོ། །བཞི་པ་ཡོན་ཏན་ཡར་ལྡན་ནི། སྔ་མ་ལས། འཇིག་རྟེན་འཇིག་རྟེན་རྣལ་འབྱོར་བློ་ཁྱད་ཀྱིས། །གོང་མ་གོང་མས་གནོད་ཕྱིར་འོག་མ་ཡི། །ཡོན་ཏན་ཡར་ལྡན་འོག་མ་ཟིལ་གྱིས་གནོན། །ཞེས་པས། སྡོམ་པ་འོག་མ་གཉིས་རིག་པ་འཛིན་པ་སྔགས་ཀྱི་སྡོམ་པར་གནས་འགྱུར་བའི་ཚེ་སྡོམ་པ་འོག་མའི་སྤང་བྱའི་རྣམ་གྲངས་དག་ཀྱང་དེར་འདུས་ཤིང་ཚང་སྟེ། དེ་ཡང་སོ་ཐར་གྱི་གཞན་གནོད་གཞིར་བཅས་སྤོང་བ་དེ་ཉིད་བྱང་སེམས་ཀྱི་གཞན་ལ་ཕན་འདོགས་པའི་ནང་དུ་ཚང་ཞིང་། དེ་གཉིས་ཀའང་གསང་སྔགས་ཀྱི་སངས་རྒྱས་ཀྱི་མཛད་པ་སྒྲུབ་པ་སྟེ་མཉམ་པ་ཆེན་པོའི་ངང་ནས་གཞན་དོན་རྩོལ་མེད་དུ་མཛད་པའི་ཐབས་མཁས་ཀྱི་ནང་དུ་ཡོན་ཏན་ཡར་ལྡན་གྱིས་གོང་འཕེལ་གྱི་ཚུལ་དུ་གནས་པ་ཡིན་ཏེ། གསང་སྙིང་ལས། བླ་མེད་མཆོག་གི་དམ་ཚིག་ཏུ། །འདུལ་བའི་དབང་གིས་ཚུལ་ཁྲིམས་དང་། །ཇི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཅེས་སོ། །ལྔ་པ་སྡོམ་པ་གསུམ་གནད་ཀྱིས་མི་འགལ་བ་ནི། རྣམ་ངེས་ལས། འདུ་ཤེས་གསུམ་གྱིས་འཁྲིགས་ན་རྣལ་འབྱོར་དེ། །ཡུལ་བསམ་སྦྱོར་བ་མཐར་ཐུག་མ་ཚང་བས། །རྨི་ལམ་ཇི་བཞིན་གནད་ཀྱིས་འགལ་མི་སྲིད། །ཅེས་པས། སོ་ཐར་གྱི་ཕམ་པ་འཆབ་བཅས་སྤང་བྱར་བསྟན་པ་ཉིད། བྱང་སེམས་ཀྱིས་གཞན་ལ་ཕན་ན་སྤྱད་པར་བསྟན་པ་དང་། སྔགས་ཀྱི་སྐབས་སུ་དེ་དག་མ་སྤྱད་ན་དམ་ཚིག་ཉམས་པར་བསྟན་པ་ནང་འགལ་བ་ལྟར་སྣང་ཡང་། དོན་དུ་དེ་གསུམ་གང་ཡིན་ཡང་ཉོན་མོངས་རང་མཚན་པ་ནི་སྤོང་བ་ཡིན་པས་ལས་མ་བསགས་ཤིང་དེ་མ་བསགས་པས་འབྲས་བུ་སྡུག་བསྔལ་མི་བསྐྱེད་པས། རྣམ་པ་ཉོན་མོངས་ལྟར་སྣང་ཡང་དོན་དུ་ཐབས་ཤེས་ཁྱད་པར་ཅན་གྱིས་ཟིན་པས་ཉོན་མོངས་པའི་གཟུགས་བརྙན་ཡིན་པས་གནད་གཅིག་ཏུ་འབབ་པ་ཡིན་ཏེ། གསང་སྙིང་ལས། བླ་མེད་ཐེག་པར་རབ་ངེས་ན། །ཉོན་མོངས་ལས་རྣམས་ཀུན་སྤྱད་ཀྱང་། །བྱས་ལ་མི་གསོག་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་དང་། ཡེ་ཤེས་རྒྱས་པའི་མདོ་ལས་ཀྱང་། ཇི་ལྟར་སྒྱུ་མའི་མཁན་པོ་དག །རང་གིས་སྤྲུལ་པའི་སྒྱུ་མ་ལ། །དགེ་དང་མི་དགེ་འདུ་བྱེད་པ། །ཉེས་པ་གང་གིས་མི་གོས་ལྟར། །ཐབས་ལ་མཁས་པས་རྣམ་པར་སྤྱོད། །ཅེས་སོ། །དྲུག་པ་དུས་སྐབས་གཙོ་བོར་བྱེད་པ་ནི། །རྣམ་ངེས་ལས། སྡིག་ཏོ་མི་དགེའི་ཕྱོགས་དང་ཚོགས་པའི་གསེབ། །འོག་མ་གཙོར་བྱེད་འདོད་པས་དབེན་པ་དང་། །སྤྱོད་པའི་དུས་དང་དབེན་པར་གསང་སྔགས་སྤྱད། །ནང་མ་འདོམ་ན་མ་འདྲེན་ཡོངས་རྫོགས་བསྲུང་། །འདོམ་ན་དགག་དགོས་བརྩི་ཞེས་མཁས་རྣམས་བཞེད། །ལས་དང་པོ་དང་རྣལ་འབྱོར་གྲུབ་ཐོབ་དང་། །ཐམས་ཅད་མཁྱེན་པའི་སྤྱོད་པ་གང་ཡིན་པ། །དུས་ཚོད་འབྲེལ་བར་དགོས་ཞེས་དུས་འཁོར་བཤད། །ཅེས་ལས་དང་པོ་བའི་དུས་དང་། མི་དགེ་བ་མང་དུ་དར་བའི་ས་ཕྱོགས་དང་། ཚོགས་པ་མང་པོའི་གསེབ་ཏུ་ནི་འདུལ་བ་གཙོ་བོར་བྱེད་ཅིང་རབ་བྱུང་གིས་ཆས་སྤྱོད་ཁོ་ནར་བྱེད་པ་དང་། འདོད་པའི་ཡུལ་ལྔ་ལ་རང་འདོད་ཀྱི་ཞེན་པ་མེད་པ་དང་། རྟོགས་པས་ཡུལ་རྐྱེན་ཐུབ་པའི་དུས་རྣལ་འབྱོར་པའི་སྤྱོད་པ་སྐྱོང་བ་སོགས་མདོར་ན་སྤྱོད་པ་དུས་ཚོད་དང་འབྲེལ་བ་འདི་ནི་རང་རེ་སྔ་འགྱུར་པའི་ལུགས་དྲི་མ་མེད་པ་ཡིན་ཏེ། ཨོ་རྒྱན་ཆེན་པོས། ཕྱི་ལྟར་ལག་ལེན་མདོ་སྡེའི་ལུགས་སུ་སྤྱད། །རྒྱུ་འབྲས་སྤང་བླང་ཞིབ་པའི་དགོས་པ་ཡོད། །ནང་ལྟར་གསང་སྔགས་ཐུན་མོང་ལུགས་ལྟར་སྤྱད། །བསྐྱེད་རྫོགས་དོན་དང་འབྲེལ་བའི་དགོས་པ་ཡོད། །གསང་བ་གསང་ཆེན་ཨ་ཏིའི་ལུགས་ལྟར་སྤྱད། །ཚེ་གཅིག་འོད་སྐུར་གྲོལ་བའི་དགོས་པ་ཡོད། །ཅེས་སོ། །མདོར་ན་དུས་འཁོར་འགྲེལ་ཆེན་ལས། དེའི་ཕྱིར་ལས་དང་པོ་པས་རྣལ་འབྱོར་པའི་བྱ་བ་མི་བྱའོ། །རྣལ་འབྱོར་པས་གྲུབ་པའི་བྱ་བ་མི་བྱའོ། །གྲུབ་པས་ཐམས་ཅད་མཁྱེན་པའི་བྱ་བ་མི་བྱའོ། །ཞེས་གསུངས་པ་ལྟར་སྤྱོད་པ་དུས་ཚོད་དང་འབྲེལ་བ་གལ་ཆེ་ཞིང་། ཁྱད་པར་སྡོམ་གསུམ་སོ་སོའི་ཐོབ་ཚུལ་དང་གནང་བཀག ཉེས་ལྟུང་འབྱུང་བའི་རྒྱུ། ལྕི་ཡང་གི་ལྡང་ཚད། ལྟུང་དང་ལྟུང་མེད་ཀྱི་དབྱེ་བ་ལས། བཤགས་ཚད་ལས་འདས་མ་འདས་དང་གསོར་རུང་མི་རུང་གིས་མཚམས་སོ་སོའི་ལུགས་ཀྱི་ཕྱིར་བཅོས་བྱ་ཚུལ་སོགས་ཞིབ་པར་རྣམ་འགྲེལ་དཔག་བསམ་སྙེ་མ་སོགས་ཚད་ཐུབ་ཀྱི་གཞུང་ཆེན་པོ་རྣམས་ལ་གོམས་འདྲིས་ཀྱིས་ངེས་པར་བྱས་ཏེ། རྟག་ཏུ་དྲན་ཤེས་བག་ཡོད་དང་མ་འབྲལ་བར་རང་རྒྱུད་ཉེས་ལྟུང་གིས་མ་གོས་པར་བསྔོ་བགྲང་བྱ་སྟེ། རྡོ་རྗེ་བཀོད་པ་ལས། མདོར་ན་བདག་གི་སྒོ་གསུམ་པོ། །དག་པ་གསུམ་གྱིས་མཐའ་བཟུང་ནས། །ལྷ་དང་གྲོགས་དང་སློབ་དཔོན་དང་། །བདག་ཉིད་བདག་ལ་མ་ཁྲེལ་བའི། །ཚུལ་གསུམ་མི་གཏོང་དང་བཅས་གསུམ། །མཐར་ཕྱིན་རྒྱ་རྟགས་རྣམ་བཞིར་བཅས། །མདོ་དོན་དྲན་ལ་བསྔོ་བགྲང་བྱ། །ཞེས་གསུངས་པ་ལྟར། རང་གི་སྒོ་གསུམ་པོ་བྱ་བ་མ་ཡིན་པ་ལས་ལྡོག བྱ་བར་འོས་པ་ལ་འཇུག་སྟེ། སྔགས་དང་ཕྱག་རྒྱ་དང་ཏིང་ངེ་འཛིན་དང་མཆོད་པ་སོགས་ཀྱི་སྒོ་ནས། ཡོན་ཏན་མངོན་པར་སྒྱུབ་ཅིང་། དགེ་བའི་ཆོས་བསྡུ་བ་དང་སེམས་ཅན་གྱི་དོན་བྱ་བ་རྣམས་ཇི་ལྟར་རང་གི་བློ་ཡི་ནུས་ཚོད་དང་སྦྱར་ཏེ། སྒོམ་སྒྲུབ་ལྷས་མ་ཁྲེལ། དད་མོས་སློབ་དཔོན་གྱིས་མ་ཁྲེལ། བརྩེ་གདུང་གྲོགས་ཀྱིས་མ་ཁྲེལ། གཡོ་སྒྱུའི་རང་སེམས་ཀྱིས་མ་ཁྲེལ་བར་བྱ་སྟེ། ཀུན་གཟིགས་རོང་པས་དམ་ཚིག་མདོ་རྒྱས་སུ། མདོར་ན་རྣམ་པ་ཐམས་ཅད་དུ། སེམས་བསྲུང་སྡོམ་བརྩོན་མ་གཏོགས་པ། །སྡོམ་པ་གཞན་བརྩོན་ཅི་ཞིག་དགོས། །ཞེས་གསུངས། ཐ་ནའང་སོ་ཐར་གྱི་སྡོམ་ཁྲིམས་རྩ་བཞི་ཆང་ལྔ་ངོས་ལྐོག་མེད་པར་བསྲུང་བའི་སྟེང་། བྱང་སེམས་ཀྱི་བསླབ་པ་འགྲོ་སྒྲོལ་གྱི་སླད་དུ་རྫོགས་བྱང་དོན་གཉེར་གྱི་སྨོན་པ་སྲོག་གི་ཕྱིར་ཡང་མི་གཏོང་ཞིང་དགེ་རྩ་ཅི་བྱེད་དམ་པ་གསུམ་གྱིས་ཟིན་པར་བྱ་ཞིང་། དེའི་སྟེང་དུ་གསང་སྔགས་ཀྱི་དམ་ཚིག་རྩ་བ་སྐུ་གསུང་ཐུགས་ཀྱི་དམ་ཚིག་དང་མ་འགལ་བར་སྒོ་གསུམ་རྡོ་རྗེ་གསུམ་དུ་ཤེས་པས་བསྐྱེད་བཟླས་རྫོགས་གསུམ་ལ་ཅི་ནུས་སུ་བརྩོན་པར་བྱ་དགོས་ཏེ། དེ་ལྟར་བརྩོན་པའི་ཕན་ཡོན་ཀྱང་། ཏིང་འཛིན་རྒྱལ་པོ་ལས། བསྐལ་པ་བྱེ་བ་གངྒཱའི་བྱེ་སྙེད་དུ། །དད་པའི་སེམས་ཀྱིས་ཟས་དང་སྐོམ་རྣམས་དང་། །གདུགས་དང་བ་དན་མར་མེའི་ཕྲེང་བ་ཡིས། །སངས་རྒྱས་བྱེ་བ་ཁྲག་ཁྲིག་རིམ་གྲོ་བྱས། །གང་ཞིག་དམ་ཆོས་རབ་ཏུ་འཇིག་པ་དང་། །བདེ་གཤེགས་བསྟན་པ་འགག་པར་འགྱུར་བའི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་པ། །བསོད་ནམས་འདི་ནི་དེ་བས་ཁྱད་པར་འཕགས། །ཞེས་གསུངས། གལ་ཏེ་བག་མེད་པ་དང་ཉོན་མོངས་སྟོབས་ཆེན་སོགས་ཀྱིས་ཉེས་ལྟུང་བྱུང་ཡང་དེ་འཕྲལ་དུ་བཤགས་ཏེ་སྡོམ་པ་སླར་བླང་བ་སོགས་ལ་བརྩོན་པར་བྱ་ཞིང་། དེ་ཡང་སོ་ཐར་གྱི་ཕམ་པ་འཆབ་བཅས་རྫའི་བེའུ་ཆག་པ་ལྟར་གསོར་མི་རུང་བར་གསུངས་པའང་། བྱང་ཆུབ་སེམས་དཔའི་སྡོམ་པ་ལ་བརྟེན་ནས་གསོར་རུང་བས་མཚོན། གསང་སྔགས་ཀྱི་སྡོམ་པའི་བར་རིམ་གྱིས་འོག་མ་འོག་མ་ལ་བརྟེན་ཅིང་གོང་མ་གོང་མ་བླང་བ་ཡིན་ན་གོང་མའི་མཐུ་ལ་བརྟེན་ནས་འོག་མ་སོར་གཞུག་ཅིང་། གསང་སྔགས་ཀྱི་ལུགས་ལའང་བུམ་དབང་སོགས་བཞི་པོ་སྔ་མ་སྔ་མའི་དམ་སྡོམ་ཉམས་པ་ཕྱི་མ་ཕྱི་མ་ལ་བརྟེན་ནས་གསོ་ནུས་པ་དང་། གོང་མ་གོང་མ་ཉམས་ན་དེ་ཐབས་འོག་མས་བསྐང་མི་ནུས་པར་དམ་ཚིག་མདོ་རྒྱས་ཀྱི་གཞུང་དེ་ཉིད་ལས་གསུངས་ཏེ། ཕམ་ལྟུང་ཆེན་པོ་བྱུང་ཡང་སེམས་སྟོབས་སླར་བསྐྱེད་དེ། །བྱང་ཆུབ་སེམས་ལ་བརྟེན་ནས་དེ་ཉིད་སླར་བླང་བྱ། །ཐེག་མཆོག་སྨོན་པ་བློ་གྲོས་གླང་པོའི་སྟོབས་བསྐྱེད་ནས། །སྡོམ་པ་གང་ཤོར་དེ་གང་བླང་ཡང་མི་ཐོབ་མེད། །རྟ་རྒོད་རང་གི་སྟོབས་ཀྱིས་ཤོར་ཅིང་འཁྱམས་པ་དང་། །གླང་ཆེན་མགྲིན་པར་བཏགས་ན་འཛིན་ཅིང་རྗེས་སུ་འབྲང་། །འཇིག་རྩིའི་རྐྱེན་གྱིས་ཞིག་པའི་ལྕགས་རོ་བོར་བ་ཡང་། །བཅུད་ལེན་རྩི་དང་འཕྲད་ན་སླར་ཡང་བཟང་པོར་འགྱུར། །བསླབ་པ་གཞན་གྱི་ཡོན་ཏན་མཐོང་གྱུར་ཀྱང་། །རང་གི་སྡོམ་པ་སྔ་མ་མི་དབྲི་ཞིང་། །སྡོམ་པ་སྔ་ཕྱི་བརྗེ་བར་མི་བྱ་སྟེ། །ཅི་ནུས་སྔ་མ་བསྣན་ཞིང་ཕྱི་མ་སྤེལ། །ཞེས་སོ། །དེའི་རྒྱུ་མཚན་ཡང་། གསང་སྔགས་ཀྱི་སྡོམ་པ་ཐབས་ཆེ་ལ་སྒོ་ཡངས་པར་གསུངས་པས། སེམས་ཅན་གྱི་རྣམ་པར་རྟོག་པ་ཇི་སྙེད་པ་མི་འདུལ་བ་མེད་དོ། །ཞེས་གསུངས་པས། གསང་སྔགས་ཀྱི་སྡོམ་པ་ནི་སོ་ཐར་བྱང་སེམས་ཀྱི་སྡོམ་པ་ལས་ཁྱད་པར་བདུན་གྱིས་འཕགས་ཏེ། ཐམས་ཅད་སངས་རྒྱས་པར་རྟོགས་པས་ཀུན་ཏུ་བཟང་པོའི་ཕྱག་རྒྱས་ཐེབས་པ་དང་། འཇིག་རྟེན་གྱི་ལྷ་ཆེན་པོ་དམ་ཚིག་ཅན་རྣམས་ཀྱིས་བཀུར་གནས་སུ་མཐོང་བས་མཐུ་དང་བྱིན་རླབས་འཕགས་པ་དང་། རྒྱལ་བ་སྲས་དང་བཅས་པས་རྒྱུད་དག་པ་ལ་དགོངས་ཤིང་བྱིན་གྱིས་རློབ་པར་འགྱུར་བས་རྒྱུ་རྐྱེན་དེའི་མཐུས་དངོས་གྲུབ་མྱུར་བ་དང་། བདེ་གཤེགས་རྣམས་དང་སྤྱོད་ཡུལ་མཐུན་པ་དང་། འཁོར་བ་དང་ངན་སོང་གིས་མི་འཇིགས་ཤིང་དབུགས་ཕྱིན་པ་ཡང་། སྡོམ་པ་ཇི་སྙེད་པ་ཐམས་ཅད་འདུས་ཤིང་རྣམ་པར་དག་པ་དང་། ཉམས་ཀྱང་གཞན་ལ་ལྟོས་པ་མེད་པར་རང་གི་རྩལ་གྱིས་སྐོང་བར་འགྱུར་བའོ། །ཞེས་གསུངས་པའི་ཕྱིར་རོ། །མདོར་ན། ནམ་མཁའ་ཀློང་ཡངས་ཀྱི་རྒྱུད་ལས། ནོར་བུ་རིན་ཆེན་རྙེད་པའི་མིས། །འཇིག་རྟེན་སོ་ནམ་མི་དགོས་བཞིན། །མ་བསྒོམས་སེམས་ཀྱི་དོན་རྟོགས་ན། །ཡོན་ཏན་མ་ལུས་ལྷུན་གྱིས་གྲུབ། །དེ་ལས་མི་འདའ་དམ་ཚིག་མཆོག །ཅེས་གསུངས་པས་ཆོས་ཐམས་ཅད་ཡེ་ནས་སངས་རྒྱས་པའི་རང་བཞིན་རང་བྱུང་ཡེ་ཤེས་ཆེན་པོའི་ངོ་བོ་མཉམ་ཉིད་ཕྱོགས་ལྷུང་དང་བྲལ་བ་རང་བཞིན་རྫོགས་པ་ཆེན་པོའི་དོན་རྟོགས་ན་དམ་ཚིག་དང་སྡོམ་པ་ཐམས་ཅད་མཐར་ཕྱིན་པ་ཡིན་ནོ། །དེས་ན་དེ་ལྟར་ཤེས་ནས་ཚུལ་བཞིན་དུ་བརྩོན་པས། གནས་སྐབས་གྲགས་པ་འཕེལ་ཞིང་འཁོར་དང་ལོངས་སྤྱོད་འདུ། བར་ཆད་ཞི་ཞིང་བསམ་པ་ཡིད་བཞིན་དུ་འགྲུབ། རྟག་ཏུ་ལྷ་དང་བླ་མས་བྱིན་གྱིས་རློབ་ཅིང་མཁའ་འགྲོ་དང་ཆོས་སྲུང་འདུ། མཆོག་ཐུན་གྱི་དངོས་གྲུབ་སྒྲུབ་པ་ཐམས་ཅད་ཆུད་མི་ཟ་ཞིང་། མཐར་ཐུག་བླ་མེད་བྱང་ཆུབ་ཀྱི་འབྲས་བུ། རབ་ཚེ་འདི་ཉིད་དང་། འབྲིང་བར་དོ། ཐ་མ་རང་བཞིན་སྤྲུལ་སྐུའི་ཞིང་དུ་སྐྱེས་ནས་ལམ་གྱི་སྦྱང་བ་འཕྲོ་མཐུད་དེ་དཀའ་བ་མེད་པར་འགྲུབ་པར་གདོན་མི་ཟ་སྟེ། མདོར་ན་དཀར་ཆོས་ཡོན་ཏན་ཀུན་གྱི་གཞི་དང་སྲོག་འཛིན་པ་ཡིན་པས་བདག་ལེགས་སུ་འདོད་པ་དག་གིས་བརྩོན་པ་ཆེན་པོས་འབད་དེ་རྟག་ཏུ་བསྲུང་བར་བྱ་དགོས་ཏེ། པཎ་ཆེན་ཆོས་ཀྱི་བཟང་པོས། དཔེར་ན་ལོ་ཏོག་ཐམས་ཅད་ས་དག་ལ། །བརྟེན་ནས་སྐྱོན་མེད་པར་ནི་སྐྱེ་བ་ལྟར། །དེ་བཞིན་ཚུལ་ཁྲིམས་བརྟེན་ནས་ཆོས་དཀར་མཆོག །སྙིང་རྗེའི་ཆུས་བརླན་པས་ནི་རྣམ་པར་སྐྱེ། །ཇི་ལྟར་སྐྱེ་བུ་སྲོག་དབང་འགགས་གྱུར་ན། །དབང་པོ་གཞན་རྣམས་གནས་པར་མི་འགྱུར་བཞིན། །དམ་ཚིག་སྲོག་གི་དབང་པོ་འགགས་གྱུར་ན། །དགེ་བའི་དབང་པོ་གཞན་རྣམས་གནས་མི་འགྱུར། །དེ་ཕྱིར་ཐར་པ་འདོད་པས་དད་བརྟེན་ནས། །དགེ་བའི་གཞི་སྲོག་སྡོམ་ལ་ནན་ཏན་བསྐྱེད། །ཅེས་དང་། དམ་ཚིག་གསུམ་བཀོད་ལས། གསང་སྔགས་རྡོ་རྗེའི་དམ་ལ་གནས། །དེ་ཡིས་སྨོན་པ་ཀུན་འགྲུབ་ཅིང་། །ལྷ་རྣམས་ཀྱིས་ཀྱང་རྟག་ཏུ་སྲུང་། །རྒྱལ་བ་རྒྱལ་མཆོག་སྲས་བཅས་ཀྱིས། །བུ་བཞིན་དགོངས་པ་དམ་པ་མཛད། །ཏིང་འཛིན་ཡོན་ཏན་དཔག་ཡས་ཤིང་། །ཀུན་བཟང་རིགས་ཀྱི་དམ་པ་འགྲུབ། །ཅེས་གསུང་པ་བཞིན་ནོ། །དེ་ལྟར་རང་ལུགས་རྣམ་པར་དག་པའི་ཕྱོགས་ཀྱི་སྡོམ་པ་གསུམ་ཉམས་སུ་ལེན་ཚུལ་གནད་འགག་གང་གཙོ་རགས་པ་ཙམ་ཞིག སྔོན་གྱི་དམ་པ་རྣམས་ཀྱི་གསུང་སྒྲོས་དང་། དགེ་བའི་བཤེས་གཉེན་གྱི་བཀའ་དྲིན་ལས་ཐོས་པའི་དོན་རང་བློར་གང་ངེས་ཙམ་ཞིག་ཞུས་ཟིན་པ་ལགས་ན། འདི་ལ་བདག་བློ་དམན་པའི་སྐྱོན་གྱིས་འགལ་འཁྲུལ་ནོངས་པ་གང་མཆིས་སྙིང་ནས་བཤགས་ཤིང་། དགེ་བས་རྒྱལ་བསྟན་རིན་པོ་ཆེ་སྤྱི་དང་། ཁྱད་པར་སྔ་འགྱུར་རྡོ་རྗེ་ཐེག་པའི་རིང་ལུགས་དྲི་མ་མེད་པ་ཉིད་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པ་དང་། དེར་འཛིན་གྱི་སྐྱེས་བུ་དམ་པ་རྣམས་སྐུ་ཚེ་བརྟན་ཞིང་མཛད་ཕྲིན་ཡར་ངོའི་ཟླ་ལྟར་རྒྱས་པ་དང་། དགེ་འདུན་འདུས་པའི་སྡེ་རྣམས་རྟག་ཏུ་ཐུགས་མཐུན་ཞིང་ཁྲིམས་གཙང་། ལམ་བསླབ་པ་གསུམ་གྱི་ཉམས་བཞེས་དང་། ལུང་སྡེ་སྣོད་གསུམ་གྱི་འཆད་ཉན་གོང་ནས་གོང་དུ་འཕེལ་ཞིང་། དེའི་མཐུས་ཡངས་པའི་རྒྱལ་ཁམས་ཀུན་ཏུ། ཆར་ཆུ་དུས་སུ་བབས། ལོ་ཕྱུགས་རྟག་ཏུ་ལེགས། ནད་མུག་མཚོན་འཁྲུགས་སོགས་བསྐལ་ངན་དུས་ཀྱི་རྒུད་པ་མཐའ་དག་ཞི་ཞིང་། བདེ་སྐྱིད་རྫོགས་ལྡན་གྱི་དཔལ་ལ་ལོངས་སྤྱོད་པ་དང་། བདག་ཅག་དཔོན་སློབ་འདིར་འདུས་ཤིང་འཚོགས་པ་ཐམས་ཅད་ཀྱང་། སྡོམ་གསུམ་ལ་ཉེས་ལྟུང་གི་དྲི་མས་མ་གོས་ཤིང་། རང་དོན་དུ་ཐོས་བསམ་བསྒོམ་གསུམ། གཞན་དོན་དུ་འཆད་རྩོད་རྩོམ་གསུམ། གཉིས་དོན་དུ་བཤད་སྒྲུབ་ལས་གསུམ་སྟེ། མཁས་ཚུལ་དགུའི་ཕྲིན་ལས་དབྱར་གྱི་གངྒཱ་བཞིན་གོང་ནས་གོང་དུ་འཕེལ་ཞིང་། མཐུར་ཐུག་འོག་མིན་གསང་བ་མཆོག་གི་ཕོ་བྲང་དུ་སྟོན་འཁོར་ཚོམ་བུ་གཅིག་ཏུ་མངོན་པར་བྱང་ཆུབ་པའི་བསྔོ་བ་སྨོན་ལམ་གྱིས་མཐའ་བརྒྱན་པར་ཞུ་ལགས། སྲིད་ཞིའི་དཔལ་འབྱོར་སོགས་དང་། མདོ་སྔགས་བསྟན་པའི་སྲོག་ཤིང་སྨིན་གླིང་པ། །ཡོངས་རྫོགས་བསྟན་པའི་སྙིང་པོ་མཛོད་ཆེན་ལྔ། །རིགས་ལམ་སེང་གེའི་སྒྲ་སྒྲོགས་ཨ་ཛི་ཏའི། །རིང་{རིགས་}ལུགས་ཕྱོགས་མཐར་ཁྱབ་པའི་བཀྲ་ཤིས་ཤོག །ཅེས་སོགས་ཇི་ལྟར་རིགས་པའི་བསྔོ་སྨོན་དང་ཤིས་བརྗོད་ཀྱིས་མཐའ་བརྒྱན་པར་བྱའོ། །བློ་མཆོག་མངའ་རྣམས་གསུང་གི་རྗེས་འབྲང་ནས། །བློ་གསལ་དོན་གཉེར་ཅན་གྱིས་བསྐུལ་བའི་ངོར། །བློ་གྲོས་རྒྱ་མཚོས་བྲིས་དགེས་རང་གཞན་འགྲོ། །བློ་ལྡན་མཆོག་སྲས་གོ་འཕང་མངོན་བྱེད་ཤོག །ཅེས་པའང་འགྱུར་མེད་པདྨ་རྣམ་རྒྱལ་གྱིས་རང་གནས་ཞེ་ཆེན་ཡང་དབེན་དུ་བྲིས་པ་དགེ། །།
སྒྱུ་འཕྲུལ་གསང་བ་སྙིང་པོའི་སྤྱི་དོན་གྱི་ཚོགས་བཤད་ནོར་བུའི་ཕྲེང་བ།
༄༅། །སྒྱུ་འཕྲུལ་གསང་བ་སྙིང་པོའི་སྤྱི་དོན་གྱི་ཚོགས་བཤད་ནོར་བུའི་ཕྲེང་བ་ཞེས་བྱ་བ་བཞུགས་སོ། །ན་མོ་གུ་རུ་བཛྲ་ས་ཏྭ་ཛྙཱ་ན་ཀཱ་ཡ་ཡ། གཞི་རྒྱུད་དག་མཉམ་བདེན་པ་དབྱེར་མེད་ཆེ། །ལམ་རྒྱུད་ཐབས་གྲོལ་མན་ངག་ཟབ་མོའི་མཐུས། །འབྲས་རྒྱུད་སྐུ་བཞི་ཡེ་ཤེས་ལྔར་སྦྱར་བའི། །བླ་མ་ཧེ་རུ་ཀཿཡིས་དགེ་ལེགས་སྩོལ། །འོག་མིན་ཆེན་པོར་གསང་ཆེན་རྒྱུད་སྡེའི་བཅུད། །དུས་བཞི་མཉམ་པ་ཉིད་དུ་ལེགས་གསུངས་པ། །གསང་བདག་བཀའ་བསྡུས་རིགས་ཅན་དྲྭ་མ་ལྔ། །སྐལ་ལྡན་རྒྱལ་པོ་ཛ་ཡི་སྐལ་བར་བབས། །དེ་ལས་མི་ཡི་རིག་འཛིན་གྲངས་མེད་པ། །ཚོམ་བུ་དང་བཅས་མི་སློབ་ཟུང་འཇུག་ཆེར། །མངོན་དུ་སྦྱོར་བའི་ཉེ་ལམ་ཟླ་མེད་པ། །མདོ་སྒྱུ་སེམས་ཕྱོགས་རིང་ལུགས་འདི་རྨད་བྱུང་། །དེ་ལས་སྒྱུ་འཕྲུལ་སྙིང་པོ་ལུང་གི་སྤྱི། །གཉགས་གནུབས་ཟུར་གསུམ་ཀུན་མཁྱེན་ཀློང་རོང་དང་། །ཁྱད་པར་མྱོས་སྟོན་སྐུ་མཆེད་བཀའ་དྲིན་ལས། །དེང་དུས་མ་ཉམས་སྤྱོད་ཡོད་ངོ་མཚར་འབར། །དེ་སླད་བརྒྱུད་པའི་བཀའ་དྲིན་འཚོབ་འདོད་བློས། །སྤྱི་དོན་རགས་པར་འགྲོལ་བའི་ལེགས་བཤད་སྐྱེས། །ངོ་མཚར་ནོར་བུའི་ཕྲེང་བ་འབུལ་སྤྲོ་ན། །བརྩེ་བས་དགོངས་ལ་གནང་བའི་སྐབས་སྩོལ་ཅིག །དེང་རིགས་དང་དཀྱིལ་འཁོར་རྒྱ་མཚོའི་སྤྱི་དཔལ། སྟོན་པ་རྡོ་རྗེ་རྒྱལ་པོས་དབུ་མཛད། འཕགས་ཚོགས་རིག་པ་འཛིན་པའི་དགེ་འདུན་འདུས་པའི་ཚོགས་གྲལ་དུ། རྒྱུད་ཐམས་ཅད་ཀྱི་རྒྱལ་པོ། ལུང་ཐམས་ཅད་ཀྱི་སྤྱི་འགྲེལ། མན་ངག་ཐམས་ཅད་ཀྱི་འཕྲོ་གཞིའམ་རྩ་བར་གྱུར་པ། དཔལ་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཆེན་པོའི་རྒྱུད་གསང་བ་སྙིང་པོ་དེ་ཁོ་ན་ཉིད་ངེས་པའི་རྒྱུད་ཀྱི་སྤྱི་དོན་རགས་པ་ཙམ་ཞིག་གསོལ་ན། རྣ་རྒྱུད་ལུང་གི་ཕྲེང་བར་ལས། རྒྱལ་བ་རྣམས་ནི་འཇིག་རྟེན་བྱོན་པའི་ཚེ། །དེ་ཡི་གསུངས་པའི་ལུང་ཆེན་རྣམས་ལ་ནི། །ཕྱི་རོལ་རྒོལ་བ་ངན་པ་འབྱུང་སྲིད་པས། །དང་པོ་སྲིད་པ་ཆོས་ཀྱི་ལོ་རྒྱུས་སྨྲོས། །ཞེས་གསུངས་པ་ལྟར། ཐོག་མར་བརྒྱུད་པའི་ཁུངས་དང་ལོ་རྒྱུས་ལ། སྤྱིར་འོག་མིན་དང་། རི་རབ་ཀྱི་རྩེ་དང་། འཛམ་བུ་གླིང་འདིར་བྱང་ཆུབ་སེམས་དཔའ་དང་། ལྷ་དང་། མིའི་གདུལ་བྱ་རྣམས་ཀྱི་དོན་དུ། སངས་རྒྱས་རྡོ་རྗེ་འཆང་ཆེན་པོ་དང་། སྤྲུལ་སྐུ་འཁོར་ལོས་སྒྱུར་བ་དང་། ཤཱཀྱ་ཐུབ་པ་ཉིད་ཀྱིས་ཇི་ལྟར་གསུངས་པའི་ཚུལ་གྱི་གླིང་གཞི་རྣམ་པ་གསུམ་སོགས་འཆད་ཚུལ་མང་དུ་ཡོད་ཀྱང་། ད་ལམ་གྱི་སྐབས་སུ། བཤད་རྒྱུད་རྒྱས་པ་ལས། རྒྱལ་བ་སེམས་དཔའ་རྣལ་འབྱོར་པ། །དགོངས་པ་རིག་པ་རྣ་བར་བརྒྱུད། །ཅེས་གསུངས་པ་ལྟར་གསུམ་ལས། དང་པོ་རྒྱལ་བ་དགོངས་བརྒྱུད་ནི། རྒྱལ་བ་ཀུན་ཏུ་བཟང་པོས་འོག་མིན་ཆེན་པོའི་གནས་སུ། ཉིད་ལས་མི་གཞན་པའི་འཁོར་རྒྱལ་བ་རིགས་ལྔ་ལ། ཆོས་འོད་གསལ་གྱི་དགོངས་པ་ཟང་ཐལ་དུ། དུས་རྒྱུན་ཆད་མེད་པར་གསུངས་པའོ། །གཉིས་པ་རིག་འཛིན་བརྡ་བརྒྱུད་ནི། རྒྱལ་བ་རིགས་ལྔས་རྒྱས་སྲས་སེམས་དཔའི་འཁོར་ལ། བརྗོད་མེད་རིག་པའི་གསུང་དབྱངས་ཀྱི་བརྡས་གོ་བར་མཛད་དོ། །གསུམ་པ་གང་ཟག་སྙན་བརྒྱུད་ནི། རྒྱལ་སྲས་སེམས་དཔའི་འཁོར་རྣམས་ཀྱི་ནང་ནས། འཇམ་དཔལ་གྱིས་ལྷའི་གནས་སུ་ལྷ་གྲགས་ལྡན་མཆོག་སྐྱོང་ལ་བཤད། སྤྱན་རས་གཟིགས་ཀྱིས་ཀླུའི་གནས་སུ་ཀླུ་རྒྱལ་མགྲིན་པ་ནག་པོ་ལ་བཤད། ཕྱག་ན་རྡོ་རྗེས་གནོད་སྦྱིན་གྱི་གནས་སུ་གནོད་སྦྱིན་ཀུན་ཏུ་བཟང་པོ་ལ་བཤད་དེ་དེ་ལྟར་རིམ་པར་ལྷ་ཀླུ་གནོད་སྦྱིན་གྱི་རིག་འཛིན་རྣམས་ལ་དར་བར་མཛད་པ་སྟེ། བརྒྱུད་པ་འདི་གསུམ་ལ་ངོས་འཛིན་གྱི་འཆད་ཚུལ་གཞན་ཡང་ཡོད་དོ། །དེ་ནས་མི་ཡུལ་དུ་དར་ཚུལ་ནི། སྡོམ་འབྱུང་གི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། །ལོ་ནི་བརྒྱད་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །འཛམ་གླིང་ཤར་གྱི་ཕྱོགས་མཚམས་ཀྱི། །རྒྱལ་པོ་ཛཿཞེས་བྱ་བ་ལ། །བསོད་ནམས་ཆེན་པོའི་མཐུས་སྣང་བའི། །གསང་བའི་བདག་པོས་གནང་བར་འགྱུར། །ཞེས་གསུངས་པ་དང་མཐུན་པར། སངས་རྒྱས་མཆོག་གི་སྤྲུལ་པའི་སྐུ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་འདས་པ་ན། དམ་པའི་རིགས་ཅན་དྲྭ་མ་ལྔ་ནང་དུ་ཡང་དག་འཇོག་པ་ལས་ལངས་ནས། རྫུ་འཕྲུལ་གྱི་བྱ་བས་རི་མ་ལ་ཡའི་རྩེར་འདུས་ནས། ཕྱོགས་བཅུའི་སངས་རྒྱས་ཡིད་ལ་བྱས་ཏེ། གདུང་ཚིག་ཉེར་གསུམ་པ་བཏོན་པས། སྟོན་པ་རིགས་དྲུག་པ་དཔལ་ཀུན་ཏུ་བཟང་པོ་ཉིད། གསང་བའི་བདག་པོ་ཕྱག་ན་རྡོ་རྗེའི་རྣམ་པར་བསྟན་ནས། སྔར་འོག་མིན་དུ་གསུངས་པ་ཉིད་བཟླས་ཏེ་གསུངས་པ། སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་ལ་བྲིས་ནས་དགོངས་པའི་རྩལ་བདུན་གྱིས་ནམ་མཁར་སྦས་སོ། །དེའི་ཚེ་ཟ་ཧོ་རའི་རྒྱལ་པོ་ཛཿལ་རྨིས་ལྟས་ངོ་མཚར་བ་བདུན་བྱུང་བ་དང་མཐུན་པར། རྒྱུད་སྡེའི་གླེགས་བམ་རྣམས་དངོས་སུ་མི་ཡུལ་དུ་བབས་པ་ལས། ཏནྟྲ་ཆེན་པོ་སྡེ་བཅོ་བརྒྱད་རྒྱལ་པོ་ཛས་སློབ་དཔོན་ཀུ་ཀུ་རཱ་ཛ་དང་། དེས་སེང་ཧ་རཱ་ཛ་སོགས་ལ་བསྟན་ཏེ། རིམ་པར་འཁོར་ཚོམ་བུ་དང་བཅས་པ་རིགས་འཛིན་གྱི་སར་གཤེགས། དེ་ནས་སྒེག་པ་རྡོ་རྗེ་དང་སངས་རྒྱས་གསང་བ་གཉིས་ལས། པཎ་ཆེན་བི་མ་ལ་དང་པདྨ་གཉིས་ཀྱིས་གསན་ཏེ། ལོ་ཙཱ་བ་རྨ་གཉགས་སོགས་ལ་བརྒྱུད་དེ་བདེ་གཤེགས་ཟུར་ཆེ་ཆུང་སོགས་ལ་བཀའ་བབས། ཕྱིས་སྙིང་པོའི་རྒྱུད་བཤད་གཙོས་སྔ་འགྱུར་བཀའ་གཏེར་གྱི་བརྒྱུད་པ་མཐའ་དག་ཉག་ཕྲར་གྱུར་པའི་སྐབས། ལོ་ཆེན་བཻ་རོ་ཙ་ན་དང་རྒྱལ་མོ་གཡུ་སྒྲ་གཉིས་བསམ་བཞིན་སྐྱེ་བ་བཞེས་པ། གཏེར་ཆེན་ཆོས་ཀྱི་རྒྱལ་པོ་འགྲོ་འདུལ་གཏེར་བདག་གླིང་པ་དང་། ལོ་ཆེན་དྷརྨ་ཤྲཱི་སྐུ་མཆེད་ཀྱིས་འབད་པ་ཆེན་པོས་བཙལ་ཞིང་སྒྲུབ་དཀྱིལ་འགྲེལ་ཊཱི ཀསོགས་ལེགས་བཤད་ཕུལ་དུ་བྱུང་བ་ཡི་བསྟན་བཅོས་ཀྱང་མང་དུ་མཛད་དེ་སྤེལ་བའི་རྒྱུན་ལས་ད་ལྟའི་བར་དུ་མ་ཉམས་པར་བཞུགས་སོ། །དེ་ལྟ་བུའི་བརྒྱུད་པ་ཟམ་མ་ཆད་པ་ལས་བྱུང་བའི་རྒྱུད་ཀྱི་རྒྱལ་པོ་གསང་བའི་སྙིང་པོ་འདི་ཉིད་ལ་འཆད་ཚུལ་གྱི་རྣམ་པ་མང་ཡང་། འདིར་ནི་པཎ་ཆེན་བི་མ་ལས། རབ་ལ་མཚན་བསྟན་འབྲིང་ལ་དབྱེ། ཐ་མ་འབྲུ་རེ་གཉེར་བའོ། །ཞེས་གསུངས་པ་ལྟར་གྱི། སྔ་མ་གཉིས་པོ་མདོ་ཙམ་ཞུ་བ་ལ། ཐོོག་མར་མཚན་བསྟན་པ་ནི། རབ་མཚན་ཐ་སྙད་གསུམ་དུ་གྲགས། །སྒྱུ་འཕྲུལ་སྙིང་པོ་ལུང་གི་སྤྱི། །ལག་གི་རྩ་བཞིན་དབུ་ཞབས་རྟོགས། །སྐལ་བ་ཅན་གྱི་ཆེད་ཕྱིར་རོ། །ཞེས་གསུངས་པས། རྒྱུད་དང་མཐུན་པའི་མཚན་རྡོ་རྗེ་སེམས་དཔའ་སྒྱུར་འཕྲུལ་དྲྭ་བ་ཞེས་བྱ་སྟེ། རྡོ་རྗེ་ནི་རང་བཞིན་དབྱེར་མི་ཕྱེད་པས་ཤེས་རབ་སྟོང་པ་ཉིད་དང་། སེམས་དཔའ་ནི་ཐབས་རིག་པ་རང་བྱུང་གི་ཡེ་ཤེས་ཏེ། དེ་ཡང་ཤེས་རབ་སྟོང་པ་ཉིད་དང་རོ་གཅིག་པའི་ཟུང་འཇུག་རང་བཞིན་གྱིས་རྣམ་པར་དག་པས་རྡོ་རྗེ་ལྟར་བརྟན་པས་སམ། དེ་ཉིད་ཀྱི་ཕྱག་རྒྱས་འཁོར་འདས་ཀྱི་ཆོས་ཐམས་ཅད་ལ་བཏབ་པས་མཉམ་པ་ཉིད་དུ་བསྡུས་པས་སམ། དེ་ཉིད་མངོན་གྱུར་དུ་རྟོགས་པའི་ཆ་ནས་རྡོ་རྗེ་སེམས་དཔའ་ཞེས་བྱ་སྟེ། སྔ་མ་གཉིས་པོ་གཞི་འབྲས་གཉིས་སུ་མེད་པའི་སེམས་ཉིད་ཀྱི་གནས་ལུགས་ཀྱི་ངོས་ནས་དང་། ཕྱི་མ་ནི་འབྲས་བུ་མངོན་གྱུར་སྣང་ལུགས་ཀྱི་ངོས་ནས་བཞག་ལ། གང་རྟོགས་པའི་ཡེ་ཤེས་དེ་ཡང་རྡོ་རྗེ་ལྟར་གཉིས་སུ་མེད་པར་གྱུར་པའི་ཕྱིར། དེ་ཉིད་མཚོན་བྱེད་མཚན་མའི་ཕྱག་རྒྱར་སྣང་བ་དཀྱིལ་འཁོར་གྱི་གཙོ་བོ་དང་འཆད་པའི་སྐྱེས་བུ་ལའང་དེ་སྐད་ཅེས་གྲགས་སོ། །སྒྱུ་འཕྲུལ་དྲྭ་བ་ནི། ཐབས་དང་ཤེས་རབ་འབྲེལ་བའམ་ཟུང་འཇུག་གི་དོན་ཏེ། དེ་ཡང་རྒྱུ་འབྱུང་བ་རིས་སུ་མ་ཆད་པ་ལས་འབྲས་བུ་ཕུང་ལྔར་འཕྲུལ་བའི་ཕྱིར་རྟོག་ཚོགས་སྒྱུ་དྲྭ། ཤེས་རབ་དབྱིངས་སྟོང་པ་ཉིད་ཀྱི་རྩལ་སྣང་ཐབས་རིག་པ་རང་བྱུང་གི་ཡེ་ཤེས་སུ་འཆར་བས་དེ་གཉིས་ཟུང་དུ་འཇུག་པ་ནི་ངེས་དོན་སྒྱུ་དྲྭ། དེ་ཉིད་ཀྱི་རྟགས་ཀྱི་ཕྱག་རྒྱ་ལྷ་ཡབ་ཡུམ་ཐབས་ཤེས་ཞལ་སྦྱོར་རམ་ཟུང་འབྲེལ་དུ་སྟོན་པ་ནི་དྲང་དོན་སྒྱུ་དྲྭ། ཕུང་ཁམས་སོགས་རྟོག་ཚོགས་ཀྱི་ཆོས་རྣམས་ཡེ་ནས་ལྷ་ཡི་དཀྱིལ་འཁོར་དུ་གནས་པ་ཆོས་ཅན་དང་ཆོས་ཉིད་དུ་འབྲེལ་བ་ལྷ་རྟོག་དབྱེར་མེད་ཀྱི་སྒྱུ་དྲྭ་སྟེ། དེ་ལྟ་བུའི་གཞི་འབྲས་གཉིས་པོ་ཤེས་ཐོབ་བྱ་[ཐོབ་ཞུ་མཆན། ]བྱེད་དང་འབྲེལ་བའི་ལམ་གྱི་རྒྱུད་དང་། དེ་མཚོན་བྱེད་ཡི་གེའི་རྒྱུད་ལའང་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་ཞེས་བྱའོ། །གཉིས་པ་ལུང་དང་མཐུན་པ་ཆེ་བ་ལས་མཚན་དུ་བཏགས་པ་ལུང་གི་སྤྱི་ནི། སྟོན་པས་གདུལ་བྱའི་བློ་རིམ་དང་འཚམས་པར་བསྟན་པའི་རྣམ་གྲངས་ནི་ཟབ་ཅིང་རྒྱ་ཆེ་བས་རྒྱ་མཚོའི་རྒྱུད་དེ། དེ་ལྟར་བུའི་བསྟན་པ་དང་ཐེག་པ་ཐམས་ཅད་ཀྱི་དོན་འདིའི་ནང་དུ་སྟོན་པའི་ཕྱིར་དང་། བསྟན་པ་དང་ཐེག་པ་ཐམས་ཅད་རྒྱུད་འདིས་རྫོགས་པར་སྟོན་པའི་ཕྱིར་དང་། དེ་ཐམས་ཅད་ཀྱང་འདི་ཉིད་རྟོགས་པའི་ཐབས་སུ་སྟོན་པའི་ཕྱིར། ཐེག་པ་ཐམས་ཅད་ཀྱི་དོན་རྒྱུ་འདི་ལ་ཡོངས་སུ་རྫོགས་པས་ལུང་གི་སྤྱི་ཞེས་བཤད་ལ། དེ་ཡང་གསང་བ་སྤྱི་རྒྱུད་ལྟ་བུ་མ་ཡིན་པར་བསྟན་པ་དང་ཐེག་པ་ཐམས་ཅད་ཀྱི་ལུང་གི་སྤྱི་ཡིན་པས་ན། མཚན་ཉིད་དང་རྒྱུད་ཐམས་ཅད་ཀྱི་ལུང་གི་སྤྱི་ཞེས་བྱའོ། །གསུམ་པ་དོན་རང་གི་ངོ་བོ་ལས་བཏགས་པའམ་མན་ངག་དང་མཐུན་པའི་མཚན་གླེགས་བམ་གྱི་ཀླད་དུ་དཀོད་པ་ནི། གསང་བའི་སྙིང་པོ་དེ་ཁོ་ན་ཉིད་ངེས་པའོ་ཞེས་པ་སྟེ། གསང་བ་ནི་གཞི་རྒྱུད་རྟོགས་དཀའ་བ་དང་། སྙིང་པོ་ནི་ལམ་གྱི་རྒྱུད་དེ་བསྟན་པ་ཐམས་ཅད་ཀྱི་བཅུད་འདུས་པ་དང་། དེ་ཁོ་ན་ཉིད་ནི་གཞི་མི་འགྱུར་བ་དང་ལམ་གྱིས་དེ་རྟོགས་པ་ལ་མི་བསླུ་བ་དང་། ངེས་པ་ནི་སྒྲོ་སྐུར་དང་བྲལ་བར་གཏན་ལ་ཕབ་པའི་དོན་ནོ། །ཡང་ན་གཞི་རྒྱུད་དེ་བཞིན་ཉིད་རྟོགས་དཀའ་ཞིང་ཀུན་གྱི་སྙིང་པོར་བཞུགས་པས་གསང་བའི་སྙིང་པོ། ལམ་རྒྱུད་ནི་གཞི་རྟོགས་པ་དང་འབྲས་བུ་ཐོབ་པ་ལ་མི་བསླུ་བས་དེ་ཁོ་ན་ཉིད། འབྲས་བུའི་རྒྱུད་ནི་སྐུ་དང་ཡེ་ཤེས་སུ་ངེས་པའོ་ཞེས་བཤད་ཀྱང་རུང་སྟེ། རྡོ་རྗེའི་ཚིག་ཡིན་པའི་ཕྱིར། དེ་ལྟར་མཚན་དོན་སྨོས་པས། སྨན་པ་མཁས་པས་ནད་པའི་ལག་གི་རྩ་ལ་བརྟེན་ནས་ལུས་མགོ་མཇུག་གི་ནད་ཐམས་ཅད་ངོས་ཟིན་པ་བཞིན་དུ། དབང་རབ་ཀྱིས་རྒྱུད་ལུང་མན་ངག་གི་མཚན་གསུམ་པོ་དེ་ལ་བརྟེན་ནས་རྒྱུད་དབུ་ཞབས་ཀྱི་དོན་རྟོགས་པ་དང་། འབྲིང་གིས་དོན་གྱི་རྣམ་གྲངས་ཙམ་བརྡ་འཕྲོད་པ་དང་། ཐ་མས་ཀྱང་སྨན་སྣོད་ཀྱི་ཁ་བྱང་ལྟར་གླེགས་བམ་བཙལ་སླ་བའི་དགོས་པ་ཡོད་དོ། །གཉིས་པ་སྤྱི་དོན་དངོས་རྣམ་པར་བཞག་པ་ལ། དོན་གྱི་རྣམ་གྲངས་རྣམ་པར་དབྱེ་བ་དང་། ཚིག་གི་རྣམ་གྲངས་རྣམ་པར་དབྱེ་བ་གཉིས་ལས། དང་པོ་ལ། རྒྱུད་འབྱུང་བའི་གླེང་གཞི། རྐྱེན་གླེང་སློང་། འབྲས་བུ་ཡོངས་ཤེས་ཀྱི་རྒྱུད་དོན། རྒྱུད་ཀྱི་དགོས་འབྲེལ། འཁོར་ལ་གདམས་ཤིང་བསྟན་པ་གཏད་པ་དང་ལྔ་ལས། དང་པོ་གླིང་གཞིའི་ངོ་བོ་ནི། གནས་གང་དུ། སྟོན་པ་གང་དུ། འཁོར་གང་དང་། དུས་ལྷན་ཅིག་ཏུ་འཚོགས་པ་དེའི་ཚེ། རྒྱུད་དོན་འབྱུང་བར་ངེས་པའི་ཕྱིར་ཕུན་སུམ་ཚོགས་པ་ལྔའོ། །ངེས་ཚིགས་ནི། དཱ་ནའི་སྒྲ་ལས་སྦྱིན་པ་སྟེ། བཀའ་ཡིན་མིན་དུ་རྟོག་པའི་ཐེ་ཚོམ་ཅན་ལ། ཕུན་སུམ་ཚོགས་པ་ལྔའི་ལོ་རྒྱུས་བཤད་པས་ཡིད་ཆེས་ཀྱི་ངེས་པ་སྦྱིན་པའི་ཕྱིར་རམ། ཡང་ན་གང་གླེང་བར་བྱ་བའི་རྒྱུད་ཀྱི་དོན་འབྱུང་བའ་ིགཞིར་གྱུར་པས་ན་གླེང་གཞིའོ། །དབྱེ་ན་ཐུན་མིན་དང་ཐུན་མོང་གཉིས་ལས། དང་པོ་ལ། ནང་ཐབས་ལམ་སྟེང་སྒོ་དང་སྦྱར་ཏེ་བཤད་རྒྱུད་རྒྱ་མཚོ་ལྟར་བཤད་པ་དང་། གསང་བ་འོག་སྒོ་དང་སྦྱར་ཏེ་བཤད་རྒྱུད་ཐལ་བ་ལྟར་བཤད་པ་གཉིས་ལས། དང་པོ་ནི། གནས་ཕུན་སུམ་ཚོགས་པ་སྙིང་ག་ཆོས་ཀྱི་འཁོར་ལོ། སྟོན་པ་ཕུན་སུམ་ཚོགས་པ་སྲོག་མི་ཤིགས་པའི་ཐིག་ལེས། འཁོར་ཕུན་སུམ་ཚོགས་པ་རྣམ་ཤེས་ཚོགས་བརྒྱད་ལ། ཆོས་ཕུན་སུམ་ཚོགས་པ་གནས་ལུགས་ཀྱི་ཆོས་ཉིད་ཟབ་མོ། དུས་ཕུན་སུམ་ཚོགས་པ་དུས་གསུམ་མཉམ་པ་ཉིད་དུ་གསུངས་སོ། །གཉིས་པ་ནི། གནས་ཕུན་སུམ་ཚོགས་པ་ཡུམ་གྱི་མཁའ་གསང་། སྟོན་པ་ཕུན་སུམ་ཚོགས་པ་ཡབ་ཀྱི་རྡོ་རྗེ་ཀུན་རྫོབ་བྱང་ཆུབ་ཀྱི་སེམས་དང་བཅས་པ། འཁོར་ཕུན་སུམ་ཚོགས་པ་བྱེད་པ་སྡོམ་པའི་ཐབས་དང་བཅས་པའི་གསང་བའི་རྣམ་ཤེས། ཆོས་ཕུན་སུམ་ཚོགས་པ་རང་བཞིན་ལྷན་ཅིག་སྐྱེས་པའི་ཡེ་ཤེས། དུས་ཕུན་སུམ་ཚོགས་པ་བསམ་གྱིས་མི་ཁྱབ་པའི་དུས་སུའོ། །འདི་གཉིས་གླེང་གཞིར་ཕྱེ་བའི་འཐད་པ་ནི། རྒྱུན་མཐར་འབྲས་དུས་ཀྱི་དབང་བསྐུར་བས་ནང་གི་མངོན་བྱང་ལྔ་ལ་བརྟེན་ནས་སྟོན་འཁོར་དགོངས་པ་དབྱེར་མེད་དུ་གྱུར་པའི་དུས་དེར་སྙིང་གསང་གི་འོག་མིན་དུ་མངོན་པར་འཚང་རྒྱ་བའི་གནད་ཀྱིས་ཏེ། དེའི་ཕྱིར་ཐུམ་མོང་མ་ཡིན་པའི་གླེང་གཞི་ཞེས་བྱའོ། །གཉིས་པ་ཐུན་མོང་གི་གླེང་གཞི་ལའང་གསུམ་ལས། དང་པོ་ལོངས་སྐུའི་གླེང་གཞིའ མ་རྒྱུད་འབྱུང་བ་ཁྱད་པར་ཅན་གྱི་གླེང་གཞི་ནི། གནས་ཕུན་སུམ་ཚོགས་པ་འོག་མིན་གྱི་གནས་མཐའ་དང་དབུས་མེད་པ་ན། སྟོན་པ་ཕུན་སུམ་ཚོགས་པ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་ལོངས་སྤྱོད་ཆེན་པོ་རིགས་དྲུག་པས། འཁོར་ཕུན་སུམ་ཚོགས་པ་རང་བཞིན་གཉིས་མེད་པའི་འཁོར་ལོར་དང་། རིག་པ་ཁྱད་པར་ཅན་གྱི་འཁོར་རྣམས་ལ། ཆོས་ཕུན་སུམ་ཚོགས་པ་རང་བཞིན་གསང་བའི་སྙིང་པོའི་རྒྱུད་དོན་རྫོགས་པར། དུས་ཕུན་སུམ་ཚོགས་པ་རྟག་པ་རྒྱུན་གྱི་འཁོར་ལོར་གསུངས་སོ། །གཉིས་པ་ཞར་བྱུང་ཁྲོ་བོའི་གླེང་གཞི་ནི། གནས་ཕུན་སུམ་ཚོགས་པ་བཟོད་པར་དཀའ་བའི་དུར་ཁྲོད་ཆེན་པོར། སྟོན་པ་ཕུན་སུམ་ཚོགས་པ་དགྱེས་པ་ཆེན་པོ་དཔལ་ཧེ་རུ་ཀས། འཁོར་ཕུན་སུམ་ཚོགས་པ་གདུལ་བྱ་གདུག་པ་ཅན་གྱི་འཁོར་དང་། འདུལ་བྱེད་གཉེན་པོའི་འཁོར་རྣམས་ལ། ཆོས་ཕུན་སུམ་ཚོགས་པ་སྦྱོར་སྒྲོལ་གྱི་ཐབས་རྨད་དུ་བྱུང་བ། དུས་ཕུན་སུམ་ཚོགས་པ་དེའི་ཚེ་དེའི་དུས་སུ་སྟོན་པར་མཛད་དོ། །གསུམ་པ་སྤྲུལ་སྐུ་འགྲོ་བ་འདུལ་བའི་གླེང་གཞིའམ་བསྟན་སྤྱིའི་གླིང་གཞི་ནི། གནས་ཕུན་སུམ་ཚོགས་པ་འཇིག་རྟེན་དྲུག་གི་ཕྱོགས་བཅུ་ཐ་དད་མུ་མེད་པའི་སྟོང་གསུམ་གྱི་སྟོང་ཆེན་པོ་རེ་རེར། སྟོན་པ་ཕུན་སུམ་ཚོགས་པ་མཆོག་གི་སྤྲུལ་པའི་སྐུ་རེ་རེས། །འཁོར་ཕུན་སུམ་ཚོགས་པ་འགྲོ་བ་རིས་ལྔའམ་ཐེག་པ་ལྔའི་རིགས་ཅན་གྱི་གདུལ་བྱ་རྣམས་ལ། ཆོས་ཕུན་སུམ་ཚོགས་པ་འདུལ་བ་བཞིའི་སྒོ་ནས་ཐེག་པ་ལྔའམ་ཆོས་ཕུང་བརྒྱད་ཁྲི་བཞི་སྟོང་སོགས། དུས་ཕུན་སུམ་ཚོགས་པ་སྒྲོན་མ་བཀོད་པའི་དུས་སུ་གསུངས་སོ། །གཉིས་པ་རྐྱེན་གླེང་སློང་ལ། ངོ་བོ་ནི། སྟོན་འཁོར་དྲི་ལན་གྱི་སྦྱོར་བས་རྒྱུད་དོན་གདུལ་བྱའི་བློ་དང་འཚམ་པར་འབྱུང་མ་རག་པ། ངེས་ཚིག་ནི། གང་གླེང་བར་བྱ་བའི་རྒྱུད་དོན་དེ་ཉིད་གླེང་བར་བསྐུལ་བ་ནི་གླེང་སློང་བ་སྟེ། བསྟན་པ་འབྱུང་བའི་རྐྱེན་བྱེད་པའི་ཕྱིར་རོ། །དབྱེ་ན། ཐུན་མོང་མ་ཡིན་པ་དང་། ཐུན་མོང་གི་གླེང་སློང་གཉིས་ལས། དང་པོ་ལ། སྟོན་པ་ཡབ་ཡུམ་ཐབས་ཤེས་གཉིས་སུ་མེད་པར་རོལ་ནས། ཡབས་ཀྱིས་ཐབ་ཀྱི་ཆ་བཟུང་སྟེ། རྟོག་ཚོགས་ཐམས་ཅད་ཕྱག་རྒྱའི་དཀྱིལ་འཁོར་དུ་དག་ཚུལ་གྱིས་གླེང་བསླངས་པས་འཁོར་རྣམས་ཀྱི་ལྷག་པ་ཀུན་རྫོབ་ཀྱི་བདེན་པ་རྟོགས་པར་བྱས། ཡུམ་གྱིས་ཤེས་རབ་ཀྱི་ཆ་བཟུང་ནས་དངོས་པོ་བཞིས་བསྡུས་པའི་ཆོས་ཐམས་ཅད་ཆོས་ཉིད་སྐྱེ་མེད་ཀྱི་ངོ་བོར་སངས་རྒྱས་པར་གླེང་བསླངས་པས་དོན་དམ་རྟོག་མེད་ཀྱི་ཡེ་ཤེས་མངོན་དུ་བྱས་ཏེ་གསང་དབང་བསྐུར་བའི་རྗེས། འཁོར་གྱི་རྒྱུན་མཐའི་སེམས་དཔའ་རྣམས་རང་སྣང་ཡེ་ཤེས་ཀྱི་ཕྱག་རྒྱ་དང་སྙོམས་པར་ཞུགས་པས་སེམས་ལྔ་བསྐྱེད་པ་སྔོན་དུ་འགྲོ་བས། དངོས་གཞི་ཐབས་ཤེས་གཉིས་མེད་དུ་སྦྱོར་བ་གསུམ་གྱིས། ཡས་བབ་ལྷན་ཅིག་སྐྱེས་པའི་ཡེ་ཤེས་ཉམས་སུ་མྱངས་ཏེ་ཤེས་རབ་ཡེ་ཤེས་ཀྱི་དབང་ཐོབ་ནས། མས་བརྟན་དགའ་བ་བཅུ་དྲུག་གི་མཐར་སྣང་གསུམ་གྱི་འགྱུར་བ་མྱོང་བའི་ཤེས་རིག་ཀྱང་རྒྱུན་ཆད་དེ་བདེ་བ་ཆེན་པོའི་དབང་ཐོབ་ནས་སྟོན་འཁོར་དགོངས་པ་འབྱེར་མེད་དུ་གྱུར་པའོ། །གཉིས་པ་ཐུན་མོང་གི་གླེང་སློང་ནི། འཁོར་རྣམས་ཀྱིས་གཞན་དོན་དུ་གསང་བ་བཞིས་ཆོད་པ་རྣམས་ལ་ཐུགས་རྗེས་བཟུང་བར་རིགས་ཞེས་གསོལ་བ་བཏབ་པས། སྟོན་པའི་ཐུགས་རྗེ་སྐྱེས་ཏེ་རྒྱུད་འདིས་དངོས་སུ་འདུལ་བའི་ཡུལ་དུ་མ་གྱུར་པ་རྣམས་ལ་བརྒྱུད་ནས་བསྟན་པར་བྱ་བའི་ཕྱིར་བསམ་གྱིས་མི་ཁྱབ་པའི་སྤྲུལ་སྐུ་ཐུབ་པ་དྲུག་སྤྲོ་བ་སོགས་ཐུགས་རྗེ་ཆེན་པོའི་རོལ་པ་སྣ་ཚོགས་པར་སྟོན་པར་མཛད་པའོ། །གསུམ་པ་འབྲས་བུ་ཡོངས་ཤེས་ཀྱི་རྒྱུད་དོན་བཤད་པ་ལ། རྒྱུད་གསུམ་གྱི་རྣམ་བཞག་སྤྱིར་བཤད་པ་དང་། ལམ་གྱི་ཆ་རྐྱེན་རྒྱུད་ཀྱི་དངོས་པོ་བྱེ་བྲག་ཏུ་བཤད་པ་གཉིས་ལས། དང་པོ་ནི། རྒྱུད་ཕྱི་མ་ལས། རྒྱུད་ནི་རྒྱུན་ཆགས་ལ་བཤད་དེ། །ཐབས་དང་རྒྱུ་ལས་འབྲས་བུའོ། །ཞེས་པས། སྤྱིར་རྒྱུན་ཆགས་པའི་དོན་གྱིས་ན་རྒྱུད་ཅེས་བྱ་ལ། དབྱེ་ན་གང་རྟོགས་པར་བྱ་བ་གཞིའམ་རྒྱུའི་རྒྱུད་དང་། གང་གིས་རྟོགས་ཤིང་བགྲོད་པ་ཐབས་སམ་ལམ་གྱི་རྒྱུད་དང་། གང་དུ་མཐར་ཕྱིན་པ་འབྲས་བུའི་རྒྱུད་དང་གསུམ་ལས། དང་པོ་གཞི་རྒྱུད་ལ། ངོ་བོ་ནི། གཞི་འཆིང་གྲོལ་མེད་པའི་སེམས་ཀྱི་གནས་ལུགས་རིག་པ་བྱང་ཆུབ་ཀྱི་སེམས་ལྷག་པའི་བདེན་པ་དབྱེར་མེད་བློའི་སྤྱོད་ཡུལ་དང་བྲལ་བར་ཡེ་ནས་གནས་པ་སྟེ། རྩ་རྒྱུད་ལས། བཅིངས་མེད་རྣམ་པར་གྲོལ་མེད་པའི། །ཡེ་ནས་ལྷུན་རྫོགས་སངས་རྒྱས་ཆོས། །ཞེས་སོ། །ངེས་ཚིག་ནི། གཞིའམ་རྒྱུ་ཡི་རྒྱུད་དེ། དེ་ཉིད་ཐབས་ཀྱིས་ཟིན་པ་དང་མ་ཟིན་པ་ལས་འཁོར་བ་དང་མྱང་འདས་སུ་འགྲུབ་པར་བྱེད་པས་ན། འཁོར་འདས་གཉིས་ཀའི་འབྱུང་གཞིའམ་རྒྱུར་གྱུར་པའི་ཕྱིར་དང་། དེ་ནི་སེམས་ཅན་ནས་སངས་རྒྱས་ཀྱི་བར་དུ་རང་བཞིན་འགྱུར་བ་མེད་པའི་རྒྱུན་ཆགས་སུ་འཇུག་པའི་ཕྱིར། དབྱེ་ན། རིམ་གསུམ་ལས། ངོ་བོའི་གཞི་དང་བཏགས་པའི་གཞི། །ཞེས་གསུངས་པ་ལྟར་གཉིས་ཀྱི། དང་པོ་ངོ་བོའི་གཞི་ནི། སེམས་ཀྱི་ཆོས་ཉིད་རང་བཞིན་གྱིས་རྣམ་པར་དག་པ་དྲི་མ་སྦྱང་བའི་གཞི་ནོར་བུ་ལྟ་བུའོ། །དེ་ཡང་སེམས་ཉིད་སྤྲོས་པ་དང་བྲལ་བའི་ཆ་ནས་དབྱིངས། རང་གསལ་སྒྲིབ་གཡོགས་དང་བྲལ་བའི་ཆ་ནས་ཡེ་ཤེས། དེ་ལས་སྐུ་གསུང་ཐུགས་ཡོན་ཕྲིན་ལས་ཏེ་འབྲས་ཆོས་ལྔ་འཆར་རུང་གི་ཆ་ནས་འབྲས་བུ་སྟེ། དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་ལྷག་པ་དོན་དམ་དང་། དེའི་རྩལ་སྣང་སྣོད་བཅུད་སྐུ་དང་ཡེ་ཤེས་ཀྱི་དཀྱིལ་འཁོར་རབ་འབྱམས་སུ་འཆར་བ་ལྷག་པ་ཀུན་རྫོབ་སྟེ། དེ་གཉིས་གསེར་དང་གསེར་གྱི་སེར་པོ་བཞིན་ངོ་བོ་དབྱེར་མེད་པས་བདེན་གཉིས་ཟུང་འཇུག་དང་། དེ་ཉིད་བསམ་བརྗོད་ཀྱི་ཡུལ་ལས་འདས་པས་སྤྱོད་ཡུལ་དང་བྲལ་བར་ཞེས་བཏགས་ཤིང་། འདིས་བརྟན་གཡོ་འཁོར་འདས་ཀྱི་ཆོས་ཐམས་ཅད་ལ་ཁྱབ་ཅིང་ཆོས་ཀུན་གྱི་འབྱུང་གནས་སུ་གྱུར་པས་དབྱིངས་སམ་ཁམས་ཞེས་བྱ་ལ། དེ་བཞིན་དུ། དྲི་མ་དང་འབྲེལ་ཡང་ངོ་བོར་རང་བཞིན་རྣམ་དག་སངས་རྒྱས་ཡིན་པས་བདེ་གཤེགས་སྙིང་པོ། དེའི་སྟོང་ཆ་ནས་ཆོས་སྐུ་དང་སྣང་ཆ་ནས་གཟུགས་སྐུའི་ཡོན་ཏན་རྫོགས་པར་ལྡན་ཡང་དྲི་མ་མ་དག་གི་བར་དུ་བྱ་བ་བྱེད་མི་ནུས་པས་རང་བཞིན་གྱིས་གནས་པའ་ིརིགས་རང་གི་ངོ་བོ་རང་བྱུང་གི་ཡེ་ཤེས་ཡིན་ཡང་རྟོགས་མ་རྟོགས་ཀྱིས་འཁོར་འདས་ཀུན་གྱི་འཆར་གཞིར་གྱུར་པས་ཀུན་གཞིའི་ཡེ་ཤེས། དེ་ཉིད་སེམས་ཅན་གྱི་སྐབས་གློ་བུར་གྱི་དྲི་མས་སྒྲིབ་པ་ལྟར་སྣང་བས་དྲི་བཅས་དེ་བཞིན་ཉིད་དང་། གཞན་ཡང་སྔགས་ཀྱི་རྒྱུད་དུ། ཀྲི་ཡས་བདག་གི་དེ་ཁོ་ན་ཉིད། ཨུ་པ་དང་ཡོ་གས་ཐོག་ཐ་མེད་པའི་བྱང་ཆུབ་ཀྱི་སེམས་ཀུན་ཏུ་བཟང་པོ། ནང་རྒྱུད་དུ། མ་ཧཱས་ལྷག་པའི་བདེན་པ་དབྱེར་མེད་ཆོས་སྐུ་ཆེན་པོ། ཨ་ནུས་དབྱིངས་ཡེ་གཉིས་སུ་མེད་པའི་སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར། ཨ་ཏིས་འོད་གསལ་བྱང་ཆུབ་ཀྱི་སེམས་སྟོང་གསལ་འགག་མེད་ཀྱི་གནས་ལུགས་ངོ་བོ་རང་བཞིན་ཐུགས་རྗེའི་དཀྱིལ་འཁོར་ཞེས་བྱ་སྟེ། རྒྱུ་རྒྱུད་དེ་ཉིད་གཞི་ལམ་འབྲས་གསུམ་ལྡོག་ཆ་གང་རུང་དང་མ་བསྟུན་པར་སྤྱིར་བཞག་པ་ནི་རང་བཞིན་ནམ་གནས་ལུགས་ཞེས་བྱའོ། །གཉིས་པ་འཁྲུལ་པ་བརྟགས་པའི་གཞི་ནི། ལོག་པའི་ཞེན་སྣང་ཡུལ་དང་བཅས་པ་སྦྱང་བྱའི་དྲི་མ་འདམ་རྫབ་ལྟ་བུ་སྟེ། མེད་སྣང་གློ་བུར་བ་ཡིན་པས་དེ་སྐད་ཅེས་བྱའོ། །ཞེན་སྣང་ཉིད་འཁོར་བ་འགྲུབ་བྱེད་ཀྱི་རྒྱུ་དང་། རྣམ་ཤེས་ཀྱི་འཇུག་པ་མ་ཟད་པར་རྒྱུན་ཆགས་པ་ཙམ་ཡིན་ཀྱང་བཅོས་མ་གློ་བུར་གྱི་ཆོས་ཡིན་པས། འབྲས་བུའི་ཉེར་ལེན་དུ་གྱུར་པའི་རྒྱུ་རྒྱུད་མ་ཡིན་ཞིང་། རིགས་པས་དཔྱད་དོན་གྱི་སྟོང་ཉིད་ཀ་བ་ཀ་བས་སྟོང་པ་ལྟ་བུ་མེད་དགག་ཀྱང་རྒྱུ་རྒྱུད་མཚན་ཉིད་པ་མ་ཡིན་ཏེ། ཉེར་ལེན་གྱི་རྒྱུ་དང་རྒྱུན་གྱི་དོན་གཉིས་ཀ་མི་གནས་པའི་ཕྱིར། འོན་ཀྱང་རྒྱུ་རྒྱུད་བཏགས་{བརྟགས}པ་པར་བཞག་པ་ལ་འགལ་བ་མེད་དེ། དེ་ལ་དམིགས་ན་སྐྱོན་ཡོན་སྐྱེ་བ་དང་། གནས་སྐབས་རིག་ངོ་རྒྱུན་ཆགས་པ་ཙམ་ཡིན་པའི་ཕྱིར་རོ། །གཉིས་པ་ཐབས་སམ་ལམ་གྱི་རྒྱུད་ལ། ངོ་བོ་ནི། སྔར་སྨོས་པའི་རྒྱུ་རྒྱུད་དེ་གློ་བུར་གྱི་དྲི་མ་དང་བྲལ་བར་བྱེད་པའི་ཐབས་ཤེས་འཇུག་གི་བྱེད་རྩོལ་དང་བཅས་པ། ངེས་ཚིག་ནི། ཐོབ་བྱ་འབྲས་རྒྱུད་ཉིད་མངོན་དུ་བྱེད་པའི་ལྷན་ཅིག་བྱེད་རྐྱེན་ཡིན་པས་ཐབས་དང་། གང་གིས་གང་དུ་བགྲོད་བྱའི་རྟེན་ཡིན་པས་ལམ། གཞི་འབྲས་གཉིས་ཤེས་ཐོབ་ཀྱི་བྱ་བྱེད་འབྲེལ་བ་ཅན་དུ་གནས་པའི་ཕྱིར་ཐབས་བར་མ་ཆད་པར་རྒྱུན་ཆགས་སུ་འབྱུང་བས་ན་རྒྱུད་དོ། །དབྱེ་ན། ཐབས་ཀྱིས་ངེས་པའི་ལམ་དང་། ཤེས་རབ་རྣམ་པར་གྲོལ་བའི་ལམ་གཉིས་ལས། དང་པོ་ནི། གཙོ་བོ་ཐབས་ཀྱི་ཁྱད་པར་བརྟུལ་ཞུགས་ཀྱི་སྤྱོད་པ་རྨད་དུ་བྱུང་བའི་སྒོ་ནས་འབྲས་བུ་མྱུར་དུ་བྱེད་པ་སྟེ། མཀྵི་ཀས་ལྕགས་ཁམས་ཡུད་ཙམ་གྱིས་གསེར་དུ་བསྒྱུར་བ་བཞིན། འདི་ལའང་འཁོར་ལོ་དྲུག་ལ་བརྟེན་ནས་འབར་འཛག་གི་སྦྱོར་བས་འཁོར་ལོ་བཞིར་བདེ་བའི་ཡེ་ཤེས་བསྐྱེད་པ་ལ་བསླབ་པ་རིམ་གྱིས་པ་དང་། འོག་སྒོ་མཁའ་གསང་གཉིས་ལ་བརྟེན་ནས་དབབ་བཟུང་ལྡོག་ཁྱབ་ཀྱི་སྦྱོར་བས་སྐད་ཅིག་ལ་བདེ་སྟོང་གཉིས་མེད་ཀྱི་ཡེ་ཤེས་བསྐྱེད་པ་ཐབས་ལམ་ཅིག་ཅར་བ་སྟེ་གཉིས་ཡོད་དོ། །གཉིས་པ་གྲོལ་ལམ་ནི། གཙོ་བོར་ཤེས་རབ་རྣམ་གསུམ་གྱི་སྒོ་ནས་རང་རྒྱུད་ཀྱི་འཆིང་བ་ཆོས་ཉིད་དུ་གྲོལ་བར་བྱེད་པ་སྟེ། རིན་པོ་ཆེ་ཀོ་སྟུ་བྷ་དང་ལྷན་ཅིག་བཞག་པའི་རྡོ་ཁམས་རིམ་གྱིས་གསེར་དུ་འགྱུར་བ་བཞིན། འདི་ལ་དབང་པོ་ཡང་རབ་ཁ་ཅིག་དབྱེར་མེད་ཆིག་ཆོད་དུ་རྟོགས་གོམས་མཐར་ཕྱིན་པར་བྱེད་པ་ཡོད་དེ་ཅིག་ཅར་བ་ཞེས་བྱ་ཞིང་། ཡང་རིམ་གྱིས་རྟོགས་གོམས་མཐར་ཕྱིན་པར་བྱེད་པ་ནི་རིམ་གྱིས་པ་སྟེ། དེ་ཅུང་ཟད་བཤད་ན། རྒྱུད་ལས། ཤེས་འཇུག་མཚན་ཉིད་འབྱོར་པའི་གཟུངས། །འབྲས་བུ་སྨིན་བྱེད་རྒྱུ་དང་རྐྱེན། །ནུས་མཐུ་ཅན་དུ་གང་གྱུར་པ། །རིག་འཛིན་རྒྱལ་བའི་ཞིང་དུ་གྲགས། །ཞེས་གསུངས་པས་མཚན་ཉིད་གསུམ་སྟེ། རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་ངེ་འཛིན། ལམ་གྱུར་གྱི་འབྲས་བུ་རིག་འཛིན་བཞིའོ། །དང་པོ་ནི། གཞལ་བྱ་ཞེན་སྣང་ཉིད་འཇལ་བྱེད་གཏན་ཚིགས་རྣམས་ཀྱིས་གཏན་ལ་ཕབ་པས་རྟོགས་བྱའི་ལྟ་བ་རང་བཞིན་རྒྱུ་རྒྱུད་གནས་ལུགས་ཀྱི་དོན་དེ་བཞིན་ཉིད་དེ་རང་རིག་མངོན་སུམ་གྱིས་ཡུལ་མེད་རང་གསལ་དུ་རྗེན་པར་རྟོགས་པ་ནི་གྲུབ་མཐའ་སྟེ། དེ་ལ་འཇལ་བྱེད་ཀྱི་གཏན་ཚིགས་དཔྱད་དུ་མེད་པས་གོ་བ་སྐུ་བཞིའི་གཏན་ཚིགས་དང་། དཔྱད་དུ་ཡོད་པ་སྤྲུལ་སྐུའི་གཏན་ཚིགས་གཉིས་ཀྱི་ཕྱི་མ་ལ་ཚིག་དོན་མཐུན་པ་དང་མི་མཐུན་པའི་གཏན་ཚིགས་གཉིས་སོགས་ནང་གི་དབྱེ་སྒོ་དང་། རིམ་ཅིག་ཅར་གྱི་འགོད་ལུགས་སོགས་བཞེད་པ་མང་ཡང་། འདིར་རིགས་པས་སྒྲུབ་ཚུལ་ཐུན་མིན་གྱི་དབང་དུ་བྱས་ན་གསུམ། ཚད་མ་བཀའ་གཞུང་། སྒྲ་མཐུན་དོན་སྤགས། ཚིག་དོན་མི་མཐུན་པའི་གཏན་ཚིགས་སོ། །དང་པོ་ལ་བཞི། རྟོགས་པ་བཞི། དག་པ་གསུམ། མཉམ་པ་བཞི། བདག་ཉིད་ཆེན་པོའི་གཏན་ཚིགས་རྣམས་སོ། །དང་པོ་རྟོགས་པ་བཞི་ལས། རྒྱུ་གཅིག་པ་ནི། སྣང་སྲིད་ཀྱི་ཆོས་རྣམས་ཆོས་ཅན། དོན་དམ་དབྱིངས་ཡེ་ཟུང་འཇུག་རང་བྱུང་གི་ཡེ་ཤེས་སུ་རྒྱུའམ་ཚུལ་གཅིག་པ་ཡིན་ཏེ། ཆོས་ཐམས་ཅད་དེའི་ངང་ཚུལ་ལས་མ་འདས་པའི་ཕྱིར། ཡིག་འབྲུའི་ཚུལ་ནི། དབྱིངས་ལས་ཤར་བའི་སྣང་བ་རྣམས་ཆོས་ཅན། དཔེ་ཡིག་འབྲུའི་ཚུལ་གྱིས་ཀུན་རྫོབ་སྐུ་དང་ཡེ་ཤེས་སུ་སྣང་བ་ཡིན་ཏེ། དབྱིངས་ཀྱི་རང་བཞིན་ལས་མ་འདས་པའི་སྣང་བ་ཡིན་པའི་ཕྱིར། བྱིན་གྱིས་བརླབས་པ་ནི། ཀུན་རྫོབ་དང་དོན་དམ་གཉིས་ཆོས་ཅན། ཕན་ཚུན་གཅིག་གིས་གཅིག་བྱིན་གྱིས་བརླབས་ཤིང་དབྱེར་མེད་པ་ཡིན་ཏེ། ངོ་བོ་ཐ་དད་དུ་མ་གྲུབ་པའི་ཕྱིར། མངོན་སུམ་པའི་གཏན་ཚིགས་ནི། དབྱེར་མེད་པའི་གནས་ལུགས་ཆོས་ཅན། བློས་སྤྱོད་ཡུལ་ཐམས་ཅད་དང་བྲལ་བ་ཡིན་ཏེ། ཐ་སྙད་ཀྱི་བློས་བསམ་གྱིས་མི་ཁྱབ་པ་སོ་སོ་རང་རིག་པའི་ཡེ་ཤེས་ཀྱིས་སྤྱོད་ཡུལ་ཡིན་པའི་ཕྱིར་རོ། །གཉིས་པ་དག་པ་གསུམ་ནི། འབྱུང་ལྔ་ཕུང་ལྔ་རྣམ་ཤེས་ཚོགས་བརྒྱད་རྣམས་ཆོས་ཅན། དག་པ་གསུམ་གྱི་བདག་ཉིད་དུ་གནས་ཏེ། ཡུམ་ལྔ་རིགས་ལྔ་ཡེ་ཤེས་ལྔའི་རང་བཞིན་དུ་གནས་པའི་ཕྱིར་རོ། །གསུམ་པ་མཉམ་པ་བཞི་ནི། སྤྲོས་པ་ཕྱོགས་རེ་ཆོད་པའི་རྣམ་གྲངས་པའི་དོན་དམ་དང་། སྤྲོས་པ་མཐའ་དག་ཆོད་པའི་རྣམ་གྲངས་མ་ཡིན་པའི་དོན་དམ་གཉིས་ཆོས་ཅན། དོན་དམ་ཙམ་དུ་མཉམ་པ་ཡིན་ཏེ། རང་བཞིན་མ་གྲུབ་ཙམ་གྱིས་རབ་ཏུ་མཉམ་པའི་ཕྱིར། སྣང་ལ་དོན་བྱེད་ནུས་པ་ཡང་དག་ཀུན་རྫོབ་དང་། སྣང་ཡང་དོན་བྱེད་མི་ནུས་པ་ལོག་པའི་ཀུན་རྫོབ་གཉིས་ཆོས་ཅན། ཀུན་རྫོབ་ཙམ་དུ་མཉམ་པ་ཡིན་ཏེ། རང་ངོའི་སྣང་བ་དང་ལྷན་ཅིག་བརྟགས་ན་དབེན་པའི་ཕྱིར། རྣམ་གྲངས་དང་རྣམ་གྲངས་མ་ཡིན་པའི་དོན་དམ་གཉིས་ཆོས་ཅན། ལྷག་པའི་དོན་དམ་དཀོར་བདུན་ཉིད་དུ་ལྷུན་གྱིས་གྲུབ་པར་མཉམ་སྟེ། དབྱིངས་དེ་ནི་ཡེ་ནས་ཡེ་ཤེས་དང་གཉིས་སུ་མེད་པའི་གནས་ལུགས་ཡིན་པའི་ཕྱིར། ཡང་ལོག་གི་ཀུན་རྫོབ་གཉིས་ཆོས་ཅན། སྐུ་དང་ཡེ་ཤེས་ཀྱི་དཀྱིལ་འཁོར་དུ་མཉམ་སྟེ། སྣང་བའི་གནས་ཚུལ་ཡེ་ཤེས་ནས་དག་པའི་བདག་ཉིད་ཡིན་པའི་ཕྱིར་རོ། །བཞི་པ་བདག་ཉིད་ཆེན་པོའི་གཏན་ཚིགས་ནི། སྣང་ལུགས་ནས་དུ་མར་སྣང་བའི་འཁོར་འདས་ཀྱི་ཆོས་རྣམས་ཆོས་ཅན། གནས་ལུགས་བདག་ཉིད་ཆེན་པོ་རང་བྱུང་གི་ཡེ་ཤེས་གཅིག་ཏུ་ངེས་པ་ཡིན་ཏེ། གནས་ལུགས་མཐར་ཐུག་དཔྱོད་པའི་རིགས་ཤེས་ཀྱིས་དེ་ལྟར་གྲུབ་པའི་ཕྱིར་རོ། །གཉིས་པ་སྒྲ་མཐུན་དོན་འཕགས་ཀྱི་གཏན་ཚིགས་ནི། སྔགས་ན་མི་སྤང་བར་བསྟན་པའི་དུག་ལྔ་ཆོས་ཅན། སྒྲ་མཐུན་ཀྱང་དོན་འཕགས་པ་ཡིན་ཏེ། གཉེན་པོས་སྤོང་བ་མ་ཡིན་ལ། དེ་ཉིད་རྟོགས་པའི་ཐབས་ཀྱིས་ཡེ་ཤེས་ལྔར་ཤར་བའི་ཕྱིར་རོ། །གསུམ་པ་ཚིག་དོན་མི་མཐུན་པའི་གཏན་ཚིགས་ནི། ཆོས་རྣམས་ཀྱི་ཆོས་ཉིད་ཅན། སྤྲོས་པའི་རང་བཞིན་ཅིར་ཡང་མཐའ་གཅིག་ཏུ་གྲུབ་པ་མ་ཡིན་ཏེ། འཁོར་འདས་ཀྱི་སྣང་བ་སྣ་ཚོགས་པ་ཅིར་ཡང་འཆར་བ་ཡིན་པའི་ཕྱིར། ཀུན་རྫོབ་ཀྱི་སྣང་བ་འདི་ཆོས་ཅན། མཐའ་གཅིག་ཏུ་ངེས་པ་མེད་པར་ཅིར་ཡང་འཆར་བ་ཡིན་ཏེ། རང་གི་རང་བཞིན་ཅིར་ཡང་མ་གྲུབ་པའི་ཕྱིར་རོ། །ཞེས་ཀུན་མཁྱེན་བླ་མ་འཇམ་དཔལ་དགྱེས་པས་གསུངས། གང་དག་སྔགས་ཀྱི་གྲུབ་མཐའ་ནི་ལྟ་བ་དབུ་མ་ལས་ཐབས་ཁྱད་པར་དུ་འཕགས་པས་ཕྱེ་བ་ཙམ་དུ་འདོད་པ་ནི་མི་རིགས་ཏེ། དབུ་མ་དང་སྔགས་གཉིས་དོན་དམ་སྤྲོས་བྲལ་ཀུན་རྫོབ་སྒྱུ་མ་ཙམ་དུ་མཉམ་པར་ལྟ་བ་མཐུན་ན་ཡང་། དེ་ཙམ་གྱིས་སྔགས་ཀྱི་ལྟ་བ་གཏན་ལ་མི་ཕེབས་ཏེ། སྔགས་ཀྱི་ཐུན་མོང་མ་ཡིན་པའི་ལྟ་བ་ནི་བདེན་གཉིས་དབྱེར་མེད་སྣོད་བཅུད་དག་མཉམ་ཆེན་པོར་གཏན་ལ་ཕེབས་དགོས་པའི་ཕྱིར། ལུང་གིས་ཀྱང་གནོད་དེ། མདོ་གདམས་ངག་འབོག་པའི་རྒྱལ་པོར། འདྲེན་པའི་ཐེག་པ་གསུམ་པོ་དག །བཅོམ་ལྡན་ངེས་པར་གསུང་ལགས་ན། །རྒྱུ་འབྲས་ལྷུན་གྲུབ་ཏུ་སྤྱོད་ཅིང་། །སངས་རྒྱས་གཞན་ནས་མི་འཚོལ་བའི། །ངེས་པའི་ཐེག་པ་ཅིས་མ་གསུངས། །ཞེས་པའི་ལན་དུ། རྒྱུ་ལ་མོས་པ་རྒྱུ་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་ན་འབྱུང་བར་འགྱུར། །ཞེས་སྔགས་ནི་འབྲས་བུ་ལམ་བྱེད་དང་། སངས་རྒྱས་རང་ལ་ཡོད་པ་ངེས་དོན་མཐར་ཐུག་གི་ཐེག་པར་གསུངས་པའི་ཕྱིར། འོ་ན་རྒྱུ་རྒྱུད་དེ་རིག་པ་འགྱུར་མེད་ལ་དེ་བཞིན་དུ་བྱེད་པར་འདུག་པས། དེ་འདྲ་དེ་འཁོར་ལོ་ཐ་མའི་ངེས་དོན་གྱི་མདོ་སྡེ་ཟབ་མོ་རྣམས་དང་། དེའི་དགོངས་འགྲེལ་རྒྱུད་བླ་མ་སོགས་ལས་ཀྱང་འབྱུང་བས་རྟོགས་བྱའི་ཡུལ་ལ་ཁྱད་མེད་དམ་སྙམ་ན། རིག་པ་འགྱུར་མེད་ལ་རྒྱུ་རྒྱུད་བྱེད་པ་འཁོར་ལོ་ཐ་མ་ནས་གསུངས་པ་དང་འདྲ་བ་བདེན་མོད་ཀྱང་། ད་དུང་དེས་སྔགས་ཐུན་མིན་གྱི་ལྟ་བ་གཏན་ལ་འབེབས་པར་མི་འགྱུར་ཏེ། དེ་བཞིན་ཉིད་དེ་བླ་མེད་ཀྱི་རྒྱུད་འདིར་རྒྱུད་དུ་འཇོག་པའི་ཚེ་ལྷན་སྐྱེས་མི་འགྱུར་བའི་བདེ་བ་ཆེན་པོའི་རང་བཞིན་དུ་བྱས་པ་ནི་སྔགས་ཀྱི་ཁྱད་ཆོས་སུ་དེ་བཞིན་གཤེགས་པ་སྲས་དང་བཅས་པས་བཞེད་པའི་ཕྱིར་ཏེ། སྤྲོས་པས་ཆོག་གོ །གཉིས་པ་རྐྱེན་འཇུག་པའི་མཚན་ཉིད་ཏིང་ངེ་འཛིན་ལ། སྤྱིར་ཏིང་ངེ་འཛིན་ལ་བརྟན་པ་མ་ཐོབ་ཀྱང་། ཐུན་གཅིག་ལ་སྲུང་འཁོར་ནས་བཟུང་ཆོ་གའི་བྱ་བ་ཚར་གཅིག་རྫོགས་པར་སྤྱིའི་རྣམ་པ་ཙམ་བསྒོམ་པ་མོས་སྒོམ་དང་། ལམ་སོ་སོའི་ཏིང་ངེ་འཛིན་ལ་གཡོ་ཐོབ་གོམས་བརྟན་གྱི་ཉམས་མཐར་ཕྱིན་པར་བསླབ་པ་སྟེ་ངེས་རྫོགས་གཉིས་ལས། ཕྱི་མའི་ལམ་དངོས་སྒོམ་ཚུལ་ནི། ལམ་རིམ་ལས། སྲིད་པ་རིམ་པར་སྨིན་ཚུལ་གྱིས། །འཇུག་པའི་ཡན་ལག་ལྔ་རུ་བཞག །གང་དག་དངོས་ཀུན་རང་རིག་ཕྱིར། །ཤི་བ་དོན་དམ་བདེན་པ་སྟེ། །སྐྱེ་བ་བར་མ་ཀུན་རྫོབ་ཡིན། །སྐྱེས་པའི་རིམ་གསུམ་གཉིས་མེད་དོ། །ཞེས་པས་སྐྱེ་འཆི་བར་དོ་གསུམ་ཕྲུགས་གཅིག་སྦྱོང་བའི་ལམ་རྫོགས་པར་སྟོན་པ་སྟེ། དེ་ཡང་འཆི་བ་འོད་གསལ་དང་རྗེས་སུ་མཐུན་པའི་ལམ་སྟོང་པ་ཆེན་པོ། དེ་བཞིན་དུ་བར་དོ་དང་རྗེས་སུ་མཐུན་པའི་ལམ་སྙིང་རྗེ་སྒྱུ་མ་སྐྱེ་བའི་རིམ་པ་གསུམ་གྱི་དྲི་ཟའི་སེམས་མངལ་དུ་ཞུགས་ནས་ལུས་རིམ་གྱིས་གྲུབ་སྟེ་སྐྱེས་པའི་བར་སྦྱོང་བྱེད་ཕྱག་རྒྱ་གཅིག་པའི་རྣལ་འབྱོར། སྐྱེས་ནས་བུ་ཚ་འཁོར་འདབས་རྒྱས་པའི་བར་སྦྱོང་བྱེད། དཀྱིལ་འཁོར། ཚོམ་བུ། གྲངས། ཞལ་ཕྱག་སྤྲོ་བ་སྟེ་ཕྱག་རྒྱ་སྤྲོས་བཅས། བློ་གྲོས་ནར་སོན་ནས་བཅད་རིས་དང་ཁེ་གྲགས་སྒྲུབ་པ་སྟེ་ནར་སོན་ནས་རྒན་པོའི་བར་གྱི་བག་ཆགས་སྦྱོང་བྱེད། ཕུན་སུམ་ཚོགས་པ་ལྔས་སྒྲུབ་པའི་གཞི་གཟུང་། བསྙེན་སྒྲུབ་ཡན་ལག་བཞིས་སྒྲུབ་པའི་གཞུང་བསྲང་། འབྲས་བུ་རིག་འཛིན་གྲུབ་པའི་དུས་བསྟན་པ་གསུམ་གྱིས་ཁོག་ཕུབ་པ་སྒྲུབ་པ་ཆེན་པོའམ་ཚོམ་བུ་ཚོགས་སྒྲུབ་སྟེ་ཟག་པ་དང་བཅས་པའི་ལམ་གྱི་རྣལ་འབྱོར་ལྔ་སྟེ། དེ་ལས་ཀྱང་སྔ་མ་བཞི་ནི་ཟག་ལྡོག་གཉིས་ཀ་ཡོད་པ་ཚོགས་ལམ་དང་། ཚོགས་སྒྲུབ་ནི་སྦྱོར་ལམ་གྱི་རྣལ་འབྱོར་ཡིན་པས་ཟག་པ་ཡོད་ཀྱང་ལྡོག་པ་མེད་པའི་ལམ་སྟེ། ཟླ་བ་དྲུག་སོགས་སྤྱོད་པའི་དུས་གྲངས་ངེས་པས་ཟག་མེད་ལ་དངོས་སུ་སྦྱོར་བའི་བར་ཆད་མེད་ལམ་ཡིན་པའི་ཕྱིར། འདི་དག་ལ་སྦྱང་བྱའི་དྲི་མ་རགས་པ་སྦྱོང་བྱེད་བསྐྱེད་རིམ་དང་། ཕྲ་བ་སྦྱོང་བྱེད་རྫོགས་རིམ་དང་སྦྱར་ཏེ་འཆད་ཚུལ་གཉིས་ཡོད་དོ། །གསུམ་པ་ལམ་གྱུར་གྱི་འབྲས་བུ་ནི། ཟག་ལྡོག་གཉིས་ཀ་མེད་པའི་ལམ་མཐོང་སྒོམ་མཐར་ལམ་གསུམ་གྱིས་བསྡུས་པའི་རིག་འཛིན་བཞི་སྟེ། དེ་ཡང་མཐོང་ལམ་པ་ལ་ཆོས་ཉིད་ཀྱི་བདེན་པ་མཐོང་ཡང་བློའི་ནུས་སྟོབས་ཆེ་ཆུང་གིས་འབྱུང་བ་སྙིགས་མའི་ལུས་ཡེ་ཤེས་ཀྱི་མེས་སྦྱང་བར་མ་ནུས་པ། ལུས་རྣམ་སྨིན་ཤ་ཁྲག་གི་ཕུང་པོ་དང་མ་བྲལ་བ་དང་། ཡིད་འོད་གསལ་གྱི་ལྷ་སྐུར་སྨིན་པ་དང་། ཇི་ལྟར་འདོད་པ་བཞིན་ལུས་རྒྱ་དང་བྲལ་མ་ཐག་ཕྱག་རྒྱ་ཆེན་པོའི་རིག་འཛིན་ལ་སྦྱོར་ངེས་པ་སྟེ་ཆོས་གསུམ་ལྡན་རྣམ་སྨིན་རིག་འཛིན་དང་། སྦྱོང་བར་ནུས་པས། སེམས་འོད་གསལ་གྱི་ལྷ་སྐུར་སྨིན་ཅིང་ཕྲ་ཡང་ལ་སོགས་པའི་འཇའ་ལུས་ཀྱི་ཡོན་ཏན་ཁྱད་པར་ཅན་སྐྱེ་འཇིག་མེད་པ་དྭངས་མའི་ལུས་རྡོ་རྗེ་ལྟ་བུ་མངོན་དུ་གྱུར་པ་ལམ་མཆོག་ཡོངས་རྫོགས་ཚེ་དབང་རིག་འཛིན་ཏེ་གཉིས་དང་། སྒོམ་ལམ་དུ་ཡེ་ཤེས་སྒྱུ་མའི་སྐུ་ཅན་ཏེ། སྔར་རང་ཉིད་ཀྱི་གང་བསྒོམས་པའི་ལྷག་པའི་ལྷ་རིགས་ལྔ་གང་རུང་གི་ཆ་ལུགས་འཛིན་པའམ། ཡང་ན་ས་གཉིས་པ་ནས་ལྔ་པའི་བར་ལ་རྡོ་རྗེའི་རིག་འཛིན། དྲུག་པ་དང་བདུན་པར་འཁོར་ལོའི་རིག་འཛིན། བརྒྱད་པར་རིན་པོ་ཆེའི། དགུ་པར་པདྨའི། བཅུ་པར་རལ་གྲིའི་རིག་འཛིན་ཏེ་ཕྱག་ཆེན་རིག་འཛིན་དང་། མཐར་ལམ་དུ་སྐུ་ལྔ་ལྷུན་གྲུབ་རྡོ་རྗེ་འཆང་གི་ཆ་ལུགས་འཛིན་པ་སྟེ། དྲུག་པའི་རྒྱལ་ཚབ་མཛད་པ་པོ་གསང་བདག་ལྟ་བུ་ལྷུན་གྲུབ་རིག་འཛིན་རྣམས་སོ། །དེ་རྣམས་ཀྱང་རྣམ་སྨིན་འཛིན་དང་རྒྱུའི་ཐེག་པའི་མཐོང་ལམ་ས་དང་པོ་ལ་གནས་པའི་སེམས་དཔའ་གཉིས་དགོངས་པ་མཉམ་ཞིང་། དེ་ལས་གཞན་པ་ཚེ་དབང་སོགས་གསུམ་ནི་རྒྱུའི་ཐེག་པའི་ས་དང་པོ་དང་། བརྒྱད་པ་དང་བཅུ་པ་རྣམས་སྐལ་བ་མཉམ་མོད་ཀྱི་འོན་ཀྱང་དགོངས་སྤྱོད་ཀྱིས་ཁྱད་པར་དུ་གྱུར་པ་ཡིན་ཏེ། རྒྱུའི་ས་བརྒྱད་པ་དང་ཚེ་དབང་། བཅུ་པ་དང་ཕྱག་ཆེན། མི་སློབ་པའི་ཀུན་ཏུ་འོད་དང་ལྷུན་གྲུབ་རྣམས་མཉམ་པར་གསུངས་སོ། །གསུམ་པ་གང་དུ་མཐར་ཕྱིན་པ་འབྲས་བུའི་རྒྱུད་ལ། ངོ་བོ་ནི། སྦྱང་གཞིའམ་རྒྱུ་རྒྱུད་བདེ་གཤེགས་སྙིང་པོ་གདོད་མ་ནས་རང་ཆས་སུ་གནས་པ་ཉིད། སྦྱང་བྱ་མེད་སྣང་གློ་བུར་པའི་དྲི་མ་ཕྲ་བ་སྣང་གསུམ་འཕོ་སྒྲིབ་དང་བཅས་པ། སྦྱོང་བྱེད་རིིམ་གཉིས་དང་བཅས་པའི་ལམ་གྱིས། སྦྱངས་འབྲས་གཞི་ལ་ཡོད་པའི་ཡོན་ཏན་རྣམས་ཇི་ལྟ་བར་མངོན་གྱུར་དུ་སྣང་བའོ། །ངེས་ཚིག་ནི། བླ་མེད་མཆོག་གི་འབྲས་བུ་མཐར་ཐུག་པ་ཡོངས་སུ་རྫོགས་པ་འབྲས་བུ་དང་། ནམ་ཡང་རྒྱུན་མི་ཆད་པས་ན་རྒྱུད་དོ། །དབྱེ་ན། ཁོག་གཞུང་ལས། འབྲས་བུའི་ངོ་བོར་སྐུ་གསུང་ཐུགས། །ཡོན་ཏན་ཕྲིན་ལས་རྣམ་པ་ལྔ། །དེ་ཡང་སྐབས་ཀྱི་ལྔ་ལྔ་སྟེ། །ཞེས་གསུངས་པ་ལྟར་འབྲས་ཆོས་ཉེར་ལྔ་སྟེ། དེ་ལ་སྐུ་ལྔ་ནི། ཆོས་སྐུ། ལོངས་སྐུ། སྤྲུལ་སྐུ། མངོན་བྱང་། རྡོ་རྗེའི་སྐུ་སྟེ་ལྔའོ། །གསུང་ལྔ་ནི། ཆོས་སྐུ་བརྗོད་མེད་དོན་གྱི་གསུང་། ལོངས་སྐུ་དགོངས་པ་བརྡ་ཡི་གསུང་། སྤྲུལ་སྐུ་བརྗོད་པ་ཚིག་གི་གསུང་། མངོན་བྱང་རིག་པ་བྱིན་རླབས་ཀྱི་གསུང་། དབྱེར་མེད་རྡོ་རྗེའི་གསུང་དང་ལྔའོ། །ཐུགས་ལྔ་ནི། ཆོས་སྐུའི་ཐུགས་ཆོས་དབྱིངས། ལོངས་སྐུའི་ཐུགས་མཉམ་ཉིད། སྤྲུལ་སྐུའི་ཐུགས་བྱ་གྲུབ། མངོན་བྱང་ཐུགས་མེ་ལོང་། རྡོ་རྗེའི་ཐུགས་སོར་རྟོག་ཡེ་ཤེས་ཏེ་ལྔའོ། །ཡོན་ཏན་ལྔ་ནི། རྣམ་པར་དག་པའི་ཞིང་ཁམས། རྒྱ་ཚད་དང་བྲལ་བའི་གཞལ་ཡས། གསལ་ཞིང་དག་པའི་འོད་ཟེར། ཁྱད་པར་འཕགས་པའི་གདན་ཁྲི། དགྱེས་དགུར་སྤྱོད་པའི་ལོངས་སྤྱོད་དང་ལྔའོ། །ཕྲིན་ལས་ལྔ་ནི། ཞི་བ། རྒྱས་པ། དབང་། དྲག་པོ། ལྷུན་གྱིས་གྲུབ་པའི་ཕྲིན་ལས་དང་ལྔའོ། །དེ་དག་ཀྱང་བསྡུ་ན། རྟེན་སྐུ། བརྟེན་པ་ཡེ་ཤེས། མཛད་པ་ཕྲིན་ལས་དང་གསུམ་དུ་འདུ་ཞིང་། རྒྱས་པར་དབྱེ་ན་ཚད་མེད་དོ། །དེས་རྒྱུད་གསུམ་གྱི་རྣམ་བཞག་མདོ་ཙམ་ཞུས་གྲུབ་ནས། གཉིས་པ་ལམ་གྱི་ཆ་རྐྱེན་རྒྱུད་ཀྱི་དངོས་པོ་བྱེ་བྲག་ཏུ་བཤད་པ་ལ། ལྟ་སྤྱོད་དཀྱིལ་འཁོར་དབང་དམ་ཚིག །མཆོད་སྔགས་ཏིང་འཛིན་ཕྲིན་སྒྲུབ་ཀྱིས། །གསང་སྔགས་རྒྱུད་ཀྱི་དབྱེ་བ་བྱ། །ཞེས་པ་ལྟར་བཅུ་ལས། དང་པོ་དེ་ཁོ་ན་ཉིད་ལྟ་བ་བཤད་པ་ལ། ལྟ་བའི་ངོ་བོ་ནི། ལམ་རིམ་ལས། ཐབས་ཀྱི་ལྟ་སྤྱོད་ཆེན་པོ་ནི། །བླ་མེད་ཐེག་པ་ལས་འཕགས་པ། །དོན་དམ་དུ་ནི་དཀོར་བདུན་ལ། །ཀུན་རྫོབ་ཏུ་ནི་མཉམ་རྫོགས་སོ། །ཡང་དག་སྐྱེས་མཆོག་དམ་པ་ཡིས། །དོན་དམ་ཀུན་རྫོབ་དབྱེར་མེད་པར། །ཡང་དག་ཉིད་དུ་རབ་ཏུ་རྟོགས། །ཞེས་པས། སྤྲོས་པའི་མཐའ་གང་དུའང་མ་རིག་པའི་ཆ་ནས་དབུ་མ་དང་། ཆོས་ཐམས་ཅད་སེམས་ཀྱི་རང་རྩལ་ཙམ་དུ་འདུ་བའི་ཆ་ནས་སེམས་ཙམ་དང་ཕྱོགས་མཚུངས་ཀྱང་། སྔགས་ཀྱི་ལྟ་བ་ནི་དེ་ལས་ཁྱད་པར་དུ་གྱུར་པ་སྟེ། དེ་ཡང་ཡེ་གདོད་མ་ནས་དབྱིངས་ཡེ་འབྲས་བུའི་དོན་དམ་དཀོར་བདུན་ངོ་བོ་ཉིད་དུ་ལྷུན་གྱིས་རྫོགས་པ་ལྷག་པའི་དོན་དམ་དང་། དེ་ཉིད་ཀྱི་རྩལ་སྣང་སྣོད་བཅུད་སྐུ་དང་ཡེ་ཤེས་ཀྱི་དཀྱིལ་འཁོར་དུ་རང་སྣང་བས་འཁོར་འདས་བཟང་ངན་མེད་པར་མཉམ་པ་ཉིད་དུ་རྫོགས་པ་ལྷག་པ་ཀུན་རྫོབ་སྟེ། བདེན་པ་དེ་གཉིས་ཀྱང་ཕྱོགས་སུ་ལྷུང་བ་མ་ཡིན་པར། ལྷག་པའི་བདེན་པ་ཟུང་འཇུག་ངོ་བོ་དབྱེར་མི་ཕྱེད་པར་མཉམ་པ་ཉིད་དུ་གནས་ཤིང་། དེར་འཛིན་ཀྱི་བསམ་བརྗོད་ལས་ཀྱང་འདས་པས་ན་ཐ་སྙད་ཙམ་དུ་ལྷག་པ་བདེན་པ་དབྱེར་མེད་སྤྱོད་ཡུལ་དང་བྲལ་བ་ཞེས་བྱ་སྟེ་རྒྱུའི་ཐེག་པའི་ལྟ་བ་ལས་ཁྱད་པར་དུ་འཕགས་པའོ། །ངེས་ཚིག་ནི། དྲྀཥྭཱའི་སྒྲ་ལས་ལྟ་བ་སྟེ། གནས་ལུགས་ཀྱི་དོན་ལ་དེ་དང་རྗེས་སུ་མཐུན་པའི་ཤེས་རབ་ཀྱིས་སྒྲོ་འདོགས་གཅོད་པའི་ཕྱིར་རོ། །དབྱེ་ན། གང་ཟག་དབང་པོ་ཡང་རབ་རྣམས་གོང་སྨོས་ཀྱི་གཏན་ཚིགས་ཙམ་ལ་བརྟེན་ནས་མངོན་སུམ་ཡུལ་མེད་རང་གསལ་དུ་རྟོགས་པར་བྱ་བ་དང་། དབང་འབྲིང་ལ་ཆོས་ཐམས་ཅད་རིགས་ལྔ་ཡེ་ཤེས་ལྔའི་རང་བཞིན་དུ་གནས་པ་ཁ་དོག་ལྔ་སོགས་ཀྱིས་མཚོན་པ་དང་། མཐར་ཕྱིན་འབྲས་བུའི་དཀྱིལ་འཁོར་སེམས་ཉིད་ལ་ཡེ་ནས་རྫོགས་པའི་དོན་རྟགས་ཆུ་ཚོན་གྱི་དཀྱིལ་འཁོར་སོགས་ཀྱིས་མཚོན་ནས་རྟོགས་པར་བྱ་བ་དང་། དབང་རྟུལ་ལ་བརྒྱུད་དེ་རྟོགས་པར་བྱ་བ་ལ། རྩ་མདུད་གྲོལ་བའི་དམིགས་པ་ཕྲ་མོ་ཞིག་ལ་བརྟེན་ནས་ནང་གི་རྩ་མདུད་གྲོལ་བས་གདོད་གནས་ལུགས་རྟོགས་པ་ཉེ་བ་དང་། སྒྲིབ་སྦྱང་དང་ཚོགས་བསགས་ལ་ཡུན་རིང་འབད་སྟོབས་ཀྱིས་རྟོགས་པར་བྱ་བ་རིང་ལམ་གཉིས་རྣམས་སོ། །གཉིས་པ་ལ་དོར་བ་སྤྱོད་པ་ལའང་། ངོ་བོ་ནི། གཙོ་བོར་རྗེས་ཐོབ་ཀྱི་སྐབས་སུ། གསང་སྔགས་དང་འབྲེས་བའི་ཐབས་ཤེས་ཁྱད་པར་ཅན་གྱིས་ཟིན་པའི་ལམ་པའི་སྒོ་གསུམ་གྱི་བྱ་བར་གྱུར་པ། ངེས་ཚིག་ནི། ཙཪྻའི་སྒྲ་ལས་སྤྱོད་པ་སྟེ། གང་སྤྱད་བྱའི་ཡུལ་ལ་དུས་ཚོད་དང་འབྲེལ་བར་ཚུལ་བཞིན་དུ་སྤྱོད་པའི་དོན་གྱིས་སོ། །དབྱེ་ན། སྤྱིར་ལུས་ངག་ཡིད་གསུམ་ཡོངས་སུ་དག་པར་བྱ་བ་ཡིན་ལ། དེ་ཡང་དུས་ཚོད་དང་འབྲེལ་བར་བསླབ་སྟེ། ལས་དང་པོ་པའི་དུས་སུ་སྡོམ་པ་གསུམ་གྱི་གནང་བཀག་གི་ཚུལ་ལ་གཟབས་ཤིང་བག་ཡོད་པ་དགེ་སྦྱོང་གཞོན་ནུའི་སྤྱོད་པ་དང་། དེ་ལས་ཅུང་ཟད་གོམས་ཏེ་མཉམ་རྗེས་བསྲེ་བར་ནུས་པ་ན་རྟོགས་པ་རྐྱེན་ཐུབ་ཏུ་བྱེད་པ་སྨྱོན་པ་བརྟུལ་ཞུགས་ཀྱི་སྤྱོད་པ་དང་། བརྟན་པ་ཆེར་ཐོབ་ནས་རྟོགས་པ་བྲི་གང་མེད་པར་གྱུར་པ་ན་གཞན་ཕན་ཁོ་ན་ལ་བསླབ་པ་རྒྱལ་པོ་ས་འཛིན་གྱི་སྤྱོད་པ་ལྟ་བུ་སྟེ་གསུམ་དང་། བྱེ་བྲག་ཏུ། ཐབས་ལམ་བརྟུལ་ཞུགས་ཀྱི་སྤྱོད་པ་དང་། གྲོལ་ལམ་བག་ཡོད་ཀྱི་སྤྱོད་པ་གཉིས་སུ་བཤད་ཅིང་། ཕྱི་མ་ལ་ལྟ་བ་གཏན་ལ་འབེབས་པའི་སྐབས་སུ་དད་བརྩོན་གྱི་སྤྱོད་པ། སྟོང་ཆེན་གྱི་དུས་སུ་ཤེས་རབ་དང་མཐུན་པའི་སྤྱོད་པ། སྙིང་རྗེ་སྒྱུ་མའི་སྐབས་སུ་ཐབས་དང་མཐུན་པ། ཕྱག་རྒྱ་གཅིག་པའི་སྐབས་སུ་ཕྱོགས་གཅིག་པ། ཕྱག་རྒྱ་སྤྲོས་བཅས་ཀྱི་སྐབས་སུ་སྤྲོས་པ་དང་བཅས་པ། ཚོགས་སྒྲུབ་ཀྱི་སྐབས་སུ་ཚོགས་ཀྱི་སྤྱོད་པ། ཟག་མེད་ལ་བསླབ་པའི་རིག་འཛིན་བཞིའི་སྐབས་སུ་རྫུ་འཕྲུལ་གྱི་སྤྱོད་པ་བཅས་རིམ་གྱིས་པའི་སྤྱོད་པ་བདུན་དང་། བླང་དོར་མེད་པ་ཅིག་ཅར་བའི་སྤྱོད་པ་གཅིག་བཅས་བརྒྱད་དོ། གསུམ་པ་བཀོད་པ་དཀྱིལ་འཁོར་ལ། ངོ་བོ་ནི། ཕྱི་ནང་གསང་བ་ཡང་གསང་ལྟར་འགོད་པ་བཀོད་པ་ལྷའི་འཁོར་ལོར་རྫོགས་པར་སྣང་བའོ། ངེས་ཚིག་ནི། མཎྜ་ལའི་སྒྲ་ལས་སྙིང་པོའི་བཅུད་འཛིན་པ་སྟེ། སྙིང་པོའི་ཡོན་ཏན་གྱི་གཞི་འཛིན་པས་སྙིང་པོ་ལེན་པའམ། ཡང་ན་སྒྲ་གཟུག་པོ་ཟླུམ་པོའམ་བསྐོར་བའི་དོན་ལ་འཇུག་པས་གང་གཙོ་བོ་ལ་འཁོར་གྱིས་བསྐོར་བའི་ཕྱིར་དཀྱིལ་འཁོར་རོ། །དབྱེ་ན། སངས་རྒྱས་གསང་བས་ཆོས་དོན་དུ། རང་བཞིན་ཏིང་འཛིན་གཟུགས་བརྙན་གསུམ་དང་། རྒྱུད་ཕྱི་མ་ལས་སྐུ་གསུངས་ཐུགས་ཀྱི་དཀྱིལ་འཁོར་གསུམ་དང་། འགྲེལ་ཆུང་ལས། དེ་བཞིན་ཉིད་དང་རང་བཞིན་ཐུགས་རྗེ་སོགས་བཅུ་གཉིས་སུ་དབྱེ་ཡང་། འདིར་རྒྱས་པ་ལས། འདིས་ནི་རང་བཞིན་དཀྱིལ་འཁོར་དང་། །གཟུགས་བརྙན་ལྷག་པའི་གཟུགས་བརྙན་གསུམ། །ཏིང་འཛིན་ལྷག་པའི་ཏིང་འཛིན་དང་། །བྱང་ཆུབ་སེམས་དང་ཚོགས་མཆོག་བསྟན། །ཞེས་གསུངས་པ་ལྟར་བདུན་ལས། དང་པོ་རང་བཞིན་གྱི་དཀྱིལ་འཁོར་ལ། རང་བཞིན་ཉིད་ཀྱི་དཀྱིལ་འཁོར་ཆོས་ཐམས་ཅད་ཡེ་ནས་རང་བཞིན་གྱིས་རྣམ་པར་དག་པ་དང་། འབྲས་བུ་མཐར་ཕྱིན་པའི་དཀྱིལ་འཁོར་རང་རིག་གི་ཡེ་ཤེས་མངོན་དུ་གྱུར་པས་འོག་མིན་གྱི་གནས་སུ་སྐུ་དང་ཡེ་ཤེས་འདུ་འབྲལ་མེད་པའི་དཀྱིལ་འཁོར་དུ་བཞུགས་པ་གཉིས་སོ། །གཉིས་པ་གཟུགས་བརྙན་གྱི་དཀྱིལ་འཁོར། དོན་དམ་པའི་གཟུགས་བརྙན་ཀུན་རྫོབ་ལྷའི་དཀྱིལ་འཁོར་དུ་ཤར་བའོ། །གསུམ་པ་ལྷག་པ་གཟུགས་བརྙན་གྱི་དཀྱིལ་འཁོར་ནི། ས་གཞི་མཉམ་དང་ཚད་ཐིག་དང་། །ཚོན་དང་བྲི་བ་རྣམ་པ་དང་། །རབ་གནས་སྦྱིན་སྲེག་དཀྱིལ་འཁོར་དུ། །འཇུག་དང་ཞུགས་པའི་ཡོན་ཏན་ནོ། །ཞེས་བསྟན་པ་བཞིན། ས་ཡི་ཆོ་ག་ནས་བཟུང་དཀྱིལ་འཁོར་བཞེངས་ཤིང་སྒྲུབ་ནས་རང་དང་སློབ་མ་འཇུག་པ་སོགས་སོ། །བཞི་པ་ཏིང་ངེ་འཛིན་གྱི་དཀྱིལ་འཁོར། རང་བཞིན་གྱི་དཀྱིལ་འཁོར་ཉིད་ངེ་འཛིན་ཀྱི་ཡུལ་དུ་བྱས་ནས། རང་རིག་མ་བཅོས་པའི་དོན་ལ་མཉམ་པར་བཞག་པས་རང་རྩལ་ཡེ་ཤེས་ལྔར་འགགས་མེད་དུ་འཆར་བའོ། །ལྔ་པ་ལྷག་པ་ཏིང་ངེ་འཛིན་གྱི་དཀྱིལ་འཁོར་ཐུགས་རྗེ་ཞི་བ་དང་། བདུད་འདུལ་ཁྲོ་བོའི་དཀྱིལ་འཁོར་གཉིས་ཀ་མཚུངས་པར། སྔོན་འགྲོ་ལས་བདུན་ནས་བརྩམས་གོ་བགོ་ལུས་བསྲུང་གི་བར་ཏིང་ངེ་འཛིན་གྱིས་གསལ་བོར་སྒྲུབ་པའོ། །དྲུག་པ་བྱང་ཆུབ་སེམས་ཀྱི་དཀྱིལ་འཁོར་ཕྱི་བྱང་ཆུབ་ཀྱི་སེམས་རྩ་རླུང་། ནང་བྱང་ཆུབ་ཀྱི་སེམས་ཐིག་ལེ། གསང་བ་བྱང་ཆུབ་ཀྱི་སེམས་བདེ་བ་ཆེན་པོའི་ཡེ་ཤེས་བསྐྱེད་པའོ། །བདུན་པ་ཚོམ་བུ་ཚོགས་ཀྱི་དཀྱིལ་འཁོར་ནི། ཞི་ཁྲོ་གཉིས་ཀ་ལ་ཚོམ་བུ་གཅིག་གསུམ་ལྔ་པ་གསུམ་མོ། །བཞི་པ་རིམ་པ་བགྲོད་པ་དབང་ལ། ངོ་བོ་ནི། རྒྱུ་གཉིས་དང་རྐྱེན་བཞི་ཚོགས་པ་ལ་བརྟེན་ནས་གོ་འཕང་གི་ཆོས་དབང་གི་ཡེ་ཤེས་རྒྱུད་ལ་འཇོག་པའི་ལས་ཀྱིས་ཐར་པའི་མྱུ་གུ་མངོན་དུ་བསྐྱེད་པའམ་སྐྱེ་ངེས་ཀྱི་ནུས་རུང་དུ་སྨིན་པར་བྱེད་པ་སྟེ། རྒྱུ་གཉིས་ནི། མཚུངས་ལྡན་གྱི་རྒྱུ་གདོད་མ་ནས་རང་ལ་རང་ཆས་སུ་བཞུགས་པའི་ཆོས་ཉིད། ལྷན་ཅིག་བྱེད་པའི་རྒྱུ་དབང་རྫས་རབ་གནས་ཀྱིས་བྱིན་གྱིས་བརླབ་པ་ཅན་ནོ། །རྐྱེན་བཞི་ནི་ཕན་ནུས་ཟབ་མོའི་དབང་གསུམ་བསྐུར་དུ་རུང་བའི་སྣོད་ལྡན་གྱི་སློབ་མ་རྒྱུའི་རྐྱེན། དབང་གསུམ་བསྐུར་ནུས་པའི་སློབ་དཔོན་ཚད་ལྡན་བདག་པོའི་རྐྱེན། རྫས་སྔགས་ཏིང་ངེ་འཛིན་གསུམ་འཛོམས་པའི་ནུས་པ་ཁྱད་པར་ཅན་དམིགས་པའི་རྐྱེན། དབང་སྔ་མ་སྔ་མས་གོ་ཕྱེ་ནས་ཕྱི་མ་ཕྱི་མ་འབྱུང་བ་དེ་མ་ཐག་རྐྱེན་ནོ། །ངེས་ཚིག་ནི། ཨ་བྷི་ཥིཉྩའི་སྒྲ་ལས་གཏོར་བའམ་བླུགས་པ་སྟེ། དབང་གིས་སྒོ་གསུམ་གྱི་དྲི་མ་འཁྲུད་པའི་ཆ་ནས་མངོན་པར་གཏོར་བ་དང་། འབྲས་བུ་ཡེ་ཤེས་ཀྱི་ནུས་པ་ཁྱད་པར་ཅན་འཇོག་པའི་ཆ་ནས་མངོན་པར་བླུགས་པའི་དོན་གྱིས་དབང་ངོ་། །དབྱེ་ན། སྤྱིར་གཞི་ལམ་འབྲས་བུའི་དབང་གསུམ་དང་། བྱེ་བྲག་ཏུ་བུམ་གསང་ཤེས་རབ་ཡེ་ཤེས་བདེ་བ་ཆེན་པོའི་དབང་བཞི་ལས། བུམ་དབང་ལ་གཉིས་སུ་ཕྱེ་བའི་ལྔ་སྟེ། གང་ཟག་དད་པ་ཅན་ལ་ཕྱི་ཕན་པའི་དབང་བཅུ། བརྩོན་འགྲུས་ཅན་བདག་གཞན་གྱི་དོན་སྒྲུབ་ནུས་པ་ལ་ནང་ནུས་པའི་དབང་ལྔ། སྤྱོད་རིག་མཉམ་པའི་བརྟུལ་ཞུགས་ཅན་གསུམ་ལ་གསང་བ་ཟབ་མོའི་དབང་གསུམ་བསྐུར་བ་སྟེ། དེ་ལྟར་ཞི་བ་ལ་ཕན་དབང་བཅུ། ནུས་དབང་ལྔ། ཟབ་དབང་གསུམ་སྟེ་བཅོ་བརྒྱད་དང་། ཁྲོ་བོ་ལ་ཕན་དབང་ཉེར་བརྒྱད་དུ་ཕྱེ་བས་སུམ་ཅུ་རྩ་དྲུག་གོ །ལྔ་པ་མི་འདའ་བ་དམ་ཚིག་ལ། ངོ་བོ་ནི། གང་བསྲུང་བྱའི་དམ་ཚིག་ཁྱད་པར་ཅན་རྩ་བ་དང་ཡན་ལག་གི་དམ་ཚིག་རྣམས་ལས་ནམ་ཡང་མི་འདའ་བར་སྡོམ་པའི་སེམས་པ་རྒྱུན་ཆགས་དང་། གཉིད་དང་སེམས་ཡེངས་པ་སོགས་ཀྱི་གནས་སྐབས་སུ་ཡང་སྡོམ་པའི་ས་བོན་དང་བཅས་པའོ། །ངེས་ཚིག་ནི། ས་མ་ཡའི་སྒྲ་ལས་དངོས་སུ་ཡལ་གམ་བཅས་པའི་ཐ་ཚིག་ལ་འཇུག་སྟེ། སྔོན་རང་གིས་ཇི་ལྟར་དམ་བཅས་པ་ལས་མི་འདའ་བར་བྱ་བའི་ཕྱིར་དམ་ཚིག་གོ །དབྱེ་ན། སྐུ་གསུང་ཐུགས་ཀྱི་དམ་ཚིག་གསུམ་མམ། རྩ་བ་དང་ཡན་ལག་གི་དམ་ཚིག་གཉིས་ལས་རྩ་བའི་དམ་ཚིག་ལ། བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །ཞེས་པས་ལྔ་སྟེ། བླ་མེད་མི་སྤང་བ་ཡུལ་བླ་ན་མེད་པའི་བྱང་ཆུབ་ཀྱི་སེམས་ལྷག་པའི་བདེན་གཉིས་མི་སྤང་བ་སྟེ་དེ་ལྟར་རྟོགས་པའི་སྒོ་ནས་སྒོ་གསུམ་སྐུ་གསུང་ཐུགས་ཀྱི་ཕྱག་རྒྱ་ལས་མི་འདའ་བར་བྱེད་པའོ། །བླ་མ་བཀུར་བ་ནི། སྤྱིར་སློབ་དཔོན་དྲུག་དང་། ཁྱད་པར་དབང་བསྐུར་རྒྱུད་བཤད་མན་ངག་ནོད་པ་གསུམ་དཔྲལ་བའི་མིག་དང་སྙིང་བས་ལྷག་པའི་ཚུལ་གྱིས་བསྟེན་ཅིང་བཀུར་བའོ། །སྔགས་དང་ཕྱག་རྒྱ་རྒྱུན་མི་བཅད་པ་ནི། རྩ་བསྐྱེད་ལས་ཀྱི་སྔགས་གསུམ་དང་ཕྱག་རྒྱ་བཞིར་རབ་ཆུ་བོའི་རྒྱུན་བཞིན། འབྲིང་དུས་དྲུག ཐ་མ་ལོ་ཟླ་ལས་མི་འདའ་བར་བརྩོན་པའོ། མཆེད་ལ་བྱམས་པ། སྤྱི་རིང་ཉེ་འདྲེས་ཀྱིས་བསྡུས་པའི་རྡོ་རྗེའི་མཆེད་རྣམས་དང་བྱང་ཆུབ་བར་དུ་མི་འབྲལ་བའི་ལྷག་བསམ་རྒྱུན་མི་བཅད་པའོ། །གསང་བ་མི་སྨྲ་བ་ནི། སྤྱི་གསང་བཞི་དང་། བར་གསང་བཞི། གསང་བར་འོས་པ་དང་། གསང་བར་གཉེར་གཏད་པ་རྣམས་སྣོད་མིན་སོགས་ལ་གསང་བའོ། །ཡན་ལག་གི་དམ་ཚིག་ལ། རྣལ་འབྱོར་པའི་བློའི་རྩལ་དང་སྦྱར་ཏེ་ཡང་དག་ལོག་པའི་དུག་ལྔ་མི་སྤང་བ་དང་། བདུད་རྩི་ལྔ་དང་དུ་ལེན་པ་དང་བཅུ་སྟེ། དེ་ལྟར་རྩ་བ་དང་ཡན་ལག་གི་དམ་ཚིག་ལ་ཐབས་ཤེས་སོགས་ཀྱི་དབྱེ་བས་སུམ་བརྒྱ་དང་དྲུག་ཅུར་འགྱུར་རོ། །དྲུག་པ་རོལ་བ་ཕྲིན་ལས་ལ། ངོ་བོ་ནི། ཚད་མེད་བཞིའི་རྒྱུ་ལས་བྱུང་བའི་བྱང་ཆུབ་ཀྱི་སེམས་དང་། འཁོར་གསུམ་རྣམ་པར་མི་རྟོག་པའི་ཤེས་རབ་ཀྱིས་ཟིན་པའི་སྒོ་ནས་གཙོ་བོར་གཞན་དོན་ལ་དམིགས་པའི་ཐབས་མཁས་ཀྱི་མཛད་སྤྱོད་དོ། །ངེས་ཚིག་ནི། ཀརྨའི་སྒྲ་ལས། ལུས་ངག་ཡིད་གསུམ་གྱིས་བསྡུས་པའི་བྱ་བའི་མཚན་ཉིད་ཅན་གྱི་ལས་ཏེ་བྱེད་པ་པོའི་འདོད་པའོ། །དབྱེ་ན། ནད་གདོན་སོགས་མི་མཐུན་པའི་ཕྱོགས་ཞི་བ་དང་། ཚེ་དཔལ་སོགས་མཐུན་ཕྱོགས་རྒྱས་པ་དང་། ལོག་ལྟ་ཅན་དབང་དུ་བསྡུ་བ་དང་། གདུག་པ་ཅན་ཚར་གཅོད་པ་དྲག་པོའི་ཕྲིན་ལས་ཏེ་བཞི། དེ་དག་ཀྱང་གང་གིས་བྱ་བའི་ཐབས་ཀྱི་རིམ་པ། མེ་དང་། རྫས་དང་། ལུ་གུ་རྒྱུད་དང་། མཆོད་རྟེན་དང་། ཕྱག་རྒྱའི་སྒོ་ནས་བྱ་བ་རྣམས་སོ། །བདུན་པ་དོན་སུ་གཉེར་བ་སྒྲུབ་པ་ལ། ངོ་བོ་ནི། ཐབས་ཁྱད་པར་བསྐྱེད་རྫོགས་ཀྱི་ལམ་གྱིས་ཐུན་མོང་དང་མཆོག་གི་དངོས་གྲུབ་རྣམ་པ་གཉིས་གང་འདོད་དོན་དུ་གཉེར་ཞིང་སྒྲུབ་པའོ། །ངེས་ཚིག་ནི། སིདྡྷིའི་སྒྲ་ལས་དྲངས་ན་དངོས་གྲུབ་དང་། སཱ་དྷ་ནའི་སྒྲ་ལས་ཀུན་ཏུ་ལེན་པ་སྟེ། འདོད་པའི་དོན་ལེན་ཅིང་ཐོབ་པར་བྱེད་པའམ་སྒྲུབ་པར་བྱེད་པས་ན་སྒྲུབ་པ་ཞེས་བྱའོ། །དབྱེ་ན་ཐུན་མོང་དང་མཆོག་གཉིས་ཀྱི། དང་པོ་ལ། བཤད་རྒྱུད་རྒྱ་མཚོ་ལས་བསྟན་པ། རོ་ལངས་དང་། ཚེ་དང་། པྲ་དང་། ལྷ་ཆེན་པོ་དང་། རྒྱལ་ཆེན་བཞི་རྣམས་སྒྲུབ་པ་དང་། ཀླུ་གདོན་འདུལ་བ། རྒྱལ་བློན་གྱི་ཆུང་མ་དང་། ཡུལ་ཁམས་དབང་དུ་བྱ་བ། ལྕེ་སྤྱང་དང་། རྐང་མགྱོགས་སྒྲུབ་པ། བསྐྲད་པ་དང་། མི་སྣང་བ་དང་། ཕྱག་རྒྱ་དགུག་པ་དང་། རྒྱལ་བློན་དམག་དཔོན་ཞང་བློན་སྒྲུབ་པ་སོགས་དང་། རྩ་རྒྱུད་གཞུང་གི་དངོས་བསྟན། ཟས་བདུད་རྩིར་བསྒྱུར་བ་སོགས་འབྱུང་བའི་དངོས་གྲུབ་ལྔ་དང་། ནམ་མཁའ་རྡོ་རྗེའི་སྐས་འབྱུང་བ་སོགས་རྫུ་འཕྲུལ་ཐོགས་མེད་དུ་སྟོན་པ་འབྱུང་བའི་དངོས་གྲུབ་ལྔ། དགུག་གཏད་བཅིངས་བཀྲོལ་གསོ་བསད་ཕམ་རྒྱལ་ཏེ་ལས་ཕྲན་ཚེགས་བརྒྱད་རྣམས་སོ། །གཉིས་པ་མཆོག་ལ། བཤད་རྒྱུད་ནས་བསྟན་པ། ཁོག་གཞུང་ལས། ཡི་གེ་སྒྱུ་འཕྲུལ་ཚོགས་སྒྲུབ་དང་། །རྡོ་རྗེ་སེམས་དང་སྨན་སྒྲུབ་དང་། །རིགས་ལྔ་སྒྲུབ་དང་ཡུམ་ལྔ་སེམས། །བྱིན་དབབ་སྒྲུབ་པ་རྣམ་གཉིས་སོ། །ཞེས་དང་། རྒྱུད་འདིར་བསྟན། སྒྱུ་འཕྲུལ་དཀྱིལ་འཁོར་བཞི་བཅུ་གཉིས། །དྲྭ་བའི་དཀྱིལ་འཁོར་མངོན་རྫོགས་པ། །ཕྱོགས་བཅུ་དུས་བཞིར་རྫོགས་པ་ཡི། །དཀྱིལ་འཁོར་ཐམས་ཅད་འགྲུབ་པར་འགྱུར། །ཞེས་པ་སྟེ། ཇི་ལྟར་སྒྲུབ་པའི་ཚུལ། ཞི་ཁྲོའི་ཆོ་ག་གཞུང་ལ་སོགས་པས་མཚོན། བྱེ་བྲག་སོ་སོའི་སྒྲུབ་ཐབས་གུད་དུ་ཕྱུང་བ་རྣམས་དང་། གཙོ་བོར་སྟོན་པ་ནི་ཚོམ་བུ་ཚོགས་ཀྱི་སྒྲུབ་པ་སྟེ། ཕུན་སུམ་ཚོགས་པ་ལྔས་སྒྲུབ་པའི་གཞི་བཟུང་བ། བསྙེན་སྒྲུབ་ཡན་ལག་བཞིས་གཞུང་བསྲང་བ། འབྲས་བུ་རིག་འཛིན་འགྲུབ་པའི་དུས་བཤད་པ་དང་གསུམ་གྱིས་བསྟན་པ་བཞིན་ནོ། །བརྒྱད་པ་མི་གཡོ་བ་ཏིང་འཛིན་ལ། ངོ་བོ་ནི། བསྒོམ་བྱའི་དོན་ཁྱད་པར་ཅན་བསྐྱེད་རྫོགས་ཀྱི་ཏིང་ངེ་འཛིན་ལས་མི་གཡོ་བར་གནས་པའི་སེམས་རྩེ་གཅིག་པའོ། །ངེས་ཚིག་ནི། ས་མ་དྷཱིཿའི་སྒྲ་ལས་མཉམ་པའི་བློ་སྟེ། གང་བསྒོམ་བྱའི་དོན་ལ་སེམས་རྩེ་གཅིག་ཏུ་ཟིན་པའི་དོན་གྱིས་ན་ཏིང་ངེ་འཛིན་ནོ། །དབྱེ་ན། ཀུན་བརྟགས་བསྐྱེད་རིམ་གྱི་རྣལ་འབྱོར་དང་། ཡོངས་གྲུབ་རྫོགས་རིམ་གྱི་རྣལ་འབྱོར་གཉིས་ལས། དང་པོ་ནི། སྐྱེ་གནས་བཞིའི་བག་ཆགས་འཁོར་དང་བཅས་པ་སྦྱོང་བའི་ལམ་བསྒོམ་ཚུལ་རྒྱས་འབྲིང་བསྡུས་གསུམ་ཤིན་ཏུ་བསྡུས་པ་དང་བཞིའམ་ཡང་ན་ལམ་རིམ་ལྟར་སྲིད་པ་མངལ་སྐྱེས་དང་བརྫུས་སྐྱེས་གཉིས་དང་བསྟུན་ནས་སྒོམ་ཚུལ་གཉིས་ཏེ། རྡོ་རྗེ་ཐེག་པའི་ལམ་གྱིས་གདུལ་བྱའི་གཙོ་བོ་ཁམས་དྲུག་ལྡན་གྱི་མི་ཡིན་པའི་ཕྱིར་མིའི་རྟེན་ཅན་ཕལ་ཆེར་མངལ་སྐྱེས་དང་བརྫུས་སྐྱེས་གཉིས་སུ་འགྱུར་བས་སམ། ཡང་ན་ཆེད་དུ་བྱ་བའི་གདུལ་བྱ་དེ་ལ་རིམ་གྱིས་པ་དང་ཅིག་ཆར་པ་གཉིས་ཡོད་པས་དེ་ལྟར་བསྡུའོ། །གཉིས་པ་རྫོགས་རིམ། སྟེང་སྒོ་འཇུ་འདུལ་དང་། འོག་སྒོ་ཁམས་གསུམ་རོལ་པ་སྟེ་ཐབས་ལམ་སྟེང་འོག་གི་སྒོ་ལ་བརྟེན་པ་དང་། གྲོལ་ལམ་ཟུང་འཇུག་གི་རྣལ་འབྱོར་རིམ་ཅིག་ཅར་གཉིས་ཀྱིས་བསྡུས་པ་རྣམ་པར་མི་རྟོག་པའི་ཏིང་འཛིན་ནོ། །དགུ་པ་གནས་སུ་སྟོབ་པ་མཆོད་པ་ལ། ངོ་བོ་ནི། མཆོད་པའི་ཡུལ་དུ་གྱུར་པ་རྣམས་བཀུར་ཞིང་མཆོད་པའི་བསམ་པས་སྒོ་གསུམ་གྱིས་མཉེས་པ་སྒྲུབ་པ་དང་། ཡོ་བྱད་སྟོབ་པའི་སྒོ་ནས་ཀྱང་མཉེས་པར་བྱེད་པའོ། །ངེས་ཚིག པཱུ་ཛའི་སྒྲ་ལས་སྔོན་དུ་བསྐྱེད་པ་དང་། ཡང་ནས་ཡང་དུ་དགྱེས་པ་བསྐྱེད་པ་དང་། བཀུར་བའི་དོན་གྱིས་གནས་སུ་སྟོབ་པའི་ཕྱིར་མཆོད་པའོ། །དབྱེ་ན། སྤྱིར་ཞིང་དང་། དམིགས་པ་དང་། བསྔོ་བ་དང་། དངོས་པོའི་ཁྱད་པར་གྱིས་འཇིག་རྟེན་པ་དང་། འཇིག་རྟེན་ལས་འདས་པའི་མཆོད་པ་གཉིས། བྱེ་བྲག་ཏུ། མདོ་སོགས་དང་ཐུན་མོང་དུ་གྱུར་པ་མེ་ཏོག་སོགས་ཕྱི་ཉེར་སྤྱོད། སྔགས་ཕྱི་རྒྱུད་མན་ངག་[མན་ཞུ་མཆན། ]ཆད་དུ་མ་གྲགས་པའི་ནང་དམ་རྫས་བདུད་རྩི་སྨན་རཀ དེ་དག་ལ་ཤིན་ཏུ་གསང་བར་བྱ་བའི་ཐབས་ཤེས་ཀྱི་སྤྱོད་པ་གསང་བ་སྦྱོར་སྒྲོལ་ཟབ་མོའམ། སྐབས་དོན་ཉེ་བར་འབྲེལ་བ་ཞི་ཁྲོའི་ཆོ་ག་གཞུང་གི་དབང་དུ་བྱས་ན་ཞི་བ་ལ་ལྷག་ཏིང་དང་། ཁྲོ་བོ་ལ་དེའི་ཚབ་རཀྟ་ཚར་གསུམ་བྱས་པའི་བཅུ་བཞི་སྟེ། གུས་པ་ཕྱག་དང་ཕྱག་རྒྱ་གར། །ཀུན་བཟང་ཞབས་བསིལ་བཞི་བསྣོལ་ཏེ། །བདུད་རྩི་གཏོར་མ་གསང་བསྣན་དང་། །ལྷག་པ་ཏིང་འཛིན་སྦྱོར་དང་སྒྲོལ། །འདོད་ཡོན་རོལ་མོ་གླུ་ཡེ་ཤེས། །ཞེས་སྡོམ་དུ་བསྡུས་པས་མཚོན་མཆོད་པའི་རྣམ་གྲངས་ཇི་སྙེད་པའོ། །བཅུ་པ་འཆིང་ཟློས་སྔགས་དང་ཕྱག་རྒྱ་ལ་གཉིས་ཀྱི། སྔགས་ཀྱི་ངོ་བོ་ནི། ཐབས་ཤེས་ཀྱི་ཡི་གེ་ཨཱ་ལི་ཀཱ་ལིར་འདུས་ཤིང་། དེ་ཉིད་ཆོས་ཉིད་ངོ་བོས་གྲུབ་པ། ཆོས་ཅན་རང་བཞིན་གྱིས་གྲུབ་པ། བྱིན་གྱིས་བརླབས་ཀྱིས་གྲུབ་པ། ནུས་པའི་མཐུས་གྲུབ་པ་སྟེ་གྲུབ་པ་བཞིས་བྱིན་གྱིས་ས རླབས་པའི་ནུས་པ་མཐུ་ཅན་དུ་གྱུར་པ། ཕྱག་རྒྱའི་ངོ་བོ་ནི། རིག་པ་ཕྱག་རྒྱ་བཞི་རྫོགས་ཀྱི་ལྷའི་སྐུར་གསལ་བ་ལས་མི་འདའ་བའོ། །སྔགས་ཀྱི་ངེས་ཚིག། མཎྟྲའི་སྒྲ་ལས་ཡིད་ཤེས་བདེ་མྱུར་དུ་སྐྱོབ་པས་ཏེ། བདེ་བ་ནི་འདོད་ཡོན་མ་སྤངས་ལམ་དུ་བྱེད་པ་དང་། མྱུར་བ་ནི་ཚེ་གཅིག་སོགས་ཀྱིས་འབྲས་བུ་འགྲུབ་ནུས་པའི་ཕྱིར་རོ། །ཕྱག་རྒྱའི་ངེས་ཚིག་མུ་དྲའི་སྒྲ་ལས་འདེབས་ཤིང་མཚོན་པར་བྱེད་པའམ། ཕྱག་རྒྱ་བཞིས་རྒྱས་བཏབ་པ་ལས་འདའ་བར་དཀའ་བའི་ཕྱིར་མཚན་མའི་དོན་གྱིས་ན་ཕྱག་རྒྱའོ། །དབྱེ་ན། སྔགས་ལ་སྤྱིིར་ཐབས་དང་ཤེས་རབ་ཀྱི་བདག་ཉིད་གསང་སྔགས། ཤེས་རབ་དང་ཡེ་ཤེས་ཀྱི་བདག་ཉིད་རིགས་སྔགས། དྲན་པ་དང་ཤེས་རབ་ཀྱི་བདག་ཉིད་གཟུངས་སྔགས་ཏེ། དེ་གསུམ་མཚོན་པའི་རྟགས་ལྷར་སྣང་ཚུལ་ཡང་། གསང་སྔགས་རྣམས་ལྷ་མོའི་དབྱིབས་ཅན་དང་། ཕྱི་མ་གཉིས་ལྷ་མོའི་གཟུགས་སུ་བཞུགས་པར་གསུངས། བྱེ་བྲག་ཏུ་དེ་དག་གི་སྒོར་གྱུར་པའི་སྔགས་ལ། ཧཱུྃ་མཱུྃ་སོགས་རིགས་ཀྱི་ས་བོན་གྱི་རྒྱུ་མ་ནོར་བ་རྩ་བའི་སྔགས། བཛྲ་དྷྲྀཀ྄་སོགས་བསྐྱེད་པ་རྐྱེན་གྱི་སྔགས། རྩ་བསྐྱེད་དེ་གཉིས་སྦྲེལ་ནས་བཟླ་བ་བཟླས་པ་ལས་ཀྱི་སྔགས་རྣམས་ཏེ། དེ་ཉིད་རྫོགས་རིམ་དང་སྦྱར་ན། ཆོས་སྐུ་བདེ་ཆེན་གྱི་ཐེག་ལེ་གདོད་ནས་རང་ཆས་སུ་བཞུགས་པ་རྒྱུ་མ་ནོར་བ་རྩ་བའི་སྔགས། དེ་ལ་གནད་དུ་བསྣུན་པའི་ཐབས་ཀྱིས་བྱེད་རྩོལ་ནི་བསྐྱེད་པ་རྐྱེན་གྱི་སྔགས། དེ་བཟླ་ཞིང་སྒོམ་པ་བཟླས་པ་ལས་ཀྱི་སྔགས་སོ། །ཕྱག་རྒྱ་ལ། སྤྱིར་རྟོག་ཚོགས་ཐམས་ཅད་ཡེ་ནས་ལྷ་ཡི་དཀྱིལ་འཁོར་དུ་གནས་པ་རང་བཞིན་གྱི་ཕྱག་རྒྱ། དེའི་དོན་ལ་ཤེས་རབ་ཀྱི་མིག་གིས་ལྟ་ཞིང་སྒྲོ་འདོགས་གཅོད་པ་ལྟ་བའི་ཕྱག་རྒྱ། རང་འབྲས་ཇི་བཞིན་མངོན་དུ་གྱུར་པ་འབྲས་བུའི་ཕྱག་རྒྱ་སྟེ་གསུམ་དང་། བྱེ་བྲག་ཏུ་ལྷག་པ་ཏིང་ངེ་འཛིན་གྱི་དབང་དུ་བྱས་ན། རང་ལུས་ལྷའི་སྐུར་གསལ་སྐུ་ཕྱག་ཆེན། ཐུགས་ཀ་སོགས་སུ་རང་རང་གི་ས་བོན་བསམ་ཞིང་ངག་ནས་ཚིག་བརྗོད་པ་གསུང་ཆོས་རྒྱ། ཕྱག་མཚན་འཛིན་པའི་ཕྱག་རྒྱ་བཅའ་ཞིང་བསམ་པ་ཐུགས་དམ་རྒྱ། ཕྱག་རྒྱ་བཅས་ནས་མདུན་དུ་བསྒྱུར་ཏེ་འགྲོལ་བ་འཕྲིན་ལས་ལས་ཀྱི་ཕྱག་རྒྱ་སྟེ་བཞི་ལ། ནང་གསེས་སུ་ཕྱེ་ན་ཕྱི་མ་གསུམ་ལ་གཉིས་རེར་དབྱེ་བའི་བདུན་ལྡན་དུའང་འགྱུར་བ་ཡིན་ནོ། དེས་ལམ་རྒྱུད་དངོས་པོ་བཅུ་མདོ་ཙམ་ཞུས་གྲུབ་ནས། བཞི་པ་རྒྱུད་ཀྱི་དགོས་འབྲེལ་ལ། ངོ་བོ་ནི། བརྗོད་བྱ་རྗོད་བྱེད་དགོས་པ་ཉིང་དགོས་དང་བཞི་སྟེ། མཚོན་བྱ་རང་བཞིན་གྱི་རྒྱུད་གནས་ལུགས་དེ་བཞིན་ཉིད་ནི་བརྗོད་བྱ། དེ་ཁོང་དུ་ཆུད་པར་བྱ་བའི་ཕྱིར་མཚོན་བྱེད་ལམ་རྐྱེན་ཡི་གེའི་རྒྱུད་སྒྲར་སྣང་ཞིང་སྒྲར་གྲགས་པ་སྒྱུ་འཕྲུལ་དྲྭ་བའི་རྒྱུད་ནི་རྗོད་བྱེད། རྗོད་བྱེད་ལ་བརྟེན་ནས་བརྗོད་བྱའི་དོན་གོ་བ་ནི་དགོས་པ། དེ་ལྟར་ཤེས་ནས་བསྐྱེད་རྫོགས་ཀྱིས་དོན་ཉམས་སུ་བླངས་པས་རོ་ལངས་ཚེ་པྲ་སོགས་ཐུན་མོང་གི་གྲུབ་པ་དང་། མཆོག་གི་གྲུབ་པ་སློབ་པའི་རིག་འཛིན་བཞི་དང་མི་སློབ་པའི་ཟུང་འཇུག་སངས་རྒྱས་ཉིད་མངོན་དུ་བྱེད་པ་ཉིང་དགོས་ཏེ་བརྗོད་བྱ་རྗོད་བྱེད་གཉིས་ཤེས་བྱ་ཤེས་བྱེད་དང་། རྗོད་བྱེད་དགོས་པ་གཉིས་ཐབས་ལས་ཐབས་བྱུང་དང་། དགོས་པ་ཉིང་དགོས་གཉིས་དེ་ལས་དེ་བྱུང་དང་། ཉིང་དགོས་བརྗོད་བྱ་གཉིས་ངོ་བོ་བདག་གཅིག་གིས་འབྲེལ་བའོ། །ངེས་ཚིག་ནི། དགོས་སོགས་ཆོས་བཞི་པོ་དེ་ཕན་ཚུན་འབྲེལ་བར་གྲུབ་པས། ཐོབ་བྱ་མཐར་ཐུག་གི་འབྲས་བུ་སྒྲུབ་པ་ལ་མེད་ན་མི་འབྱུང་བའི་འབྲེལ་བར་གྲུབ་པའི་ཕྱིར་རྒྱུད་ཀྱི་དགོས་འབྲེལ་ཞེས་བྱ། དབྱེ་ན། གྲོལ་ལམ་དབང་བཙན་དུ་བྱས་པ་དང་། ཐབས་ལམ་དབང་བཙན་དུ་བྱས་པ་གཉིས་ཀྱི། སྔ་མ་ནི་སྔར་ངོ་བོའི་སྐབས་སུ་བཤད་པ་ལྟར་ལ། ཕྱི་མ་ནི། ལྷན་ཅིག་སྐྱེས་པའི་ཡེ་ཤེས་གདོད་མ་ནས་རང་ལ་བཞུགས་པ་མཚོན་བྱ་རང་བཞིན་གཞིའི་རྒྱུད། དེ་རྟོགས་བྱེད་ཀྱི་མན་ངག་ཐིག་ལེ་ཆེན་པོའི་མན་ངག་དང་བཅས་པ་ནི་མཚོན་བྱེད་ལམ་རྐྱེན་ཡི་གེའི་རྒྱུད། དེའི་དོན་ཉམས་སུ་བླངས་པས་བདེ་ཆེན་གྱི་ཡེ་ཤེས་ཁྱད་པར་ཅན་རྒྱུད་ལ་སྐྱེས་པ་དགོས་པ། དེ་ལ་གོམས་པར་བྱས་པས་མཆོག་ཏུ་མི་འགྱུར་བའི་ཡེ་ཤེས་ཆེན་པོ་མངོན་དུ་བྱས་པ་ནི་ཉིང་དགོས་སོ། །ལྔ་པ་འཁོར་ལ་གདམས་ཤིང་བསྟན་པ་གཏད་པ་ལ། ངོ་བོ་ནི། བསྟན་པའི་སྙིང་པོ་རང་བཞིན་གསང་བའི་སྙིང་པོ་མཚོན་བྱེད་ལམ་རྐྱེན་གྱི་རྒྱུད་དང་བཅས་པ་འདི་ཉིད་མི་ཉམས་པར་བསྲུང་བའི་ཆེད་དུ་འཁོར་རྣམས་ལ་གདམས་ཤིང་གཏད་པའོ། །ངེས་ཚིག་ནི། རང་བཞིན་གཞིའི་རྒྱུད་ཀྱི་དོན་ལས་མི་འགྱུར་བར་གདམས་པའང་ཡིན་ལ། ལམ་རྒྱུད་དེ་གཞི་རྟོགས་བྱེད་ཀྱི་ཐབས་སུ་མི་ནུབ་པར་ཟུངས་ཤིག་ཅེས་གཏད་པའང་ཡིན་པའི་ཕྱིར་གདམས་གཏད་ཅེས་བྱའོ། །དབྱེ་ན་གཉིས་ལས། གདམས་པ་ལ། ཀྱེ་ཀྱེ། ཕྱོགས་བཅུ་དུས་བཞིའི་རང་བཞིན་འདི། །དེ་བཞིན་གཤེགས་པའི་ངོ་བོ་ཉིད། །ཅེས་པས་སྦྱང་གཞིའམ་གཞི་རྒྱུད་རང་བཞིན་གྱི་སྣང་བ་རྟོགས་བྱར་གདམས་པ་དང་། གཟུང་འཛིན་སྤྲོས་ལ་འཆེལ་བ་ཡིས། །རྣམ་རྟོག་ཞགས་པས་སོ་སོར་འཛིན། །ཞེས་པས ། སྦྱང་བྱ་གློ་བུར་གྱི་དྲི་མ་ལོག་རྟོག་འཁྲུལ་པའི་སྣང་བ་དག་བྱར་གདམས་པ་དང་། ས་རྣམས་ཁྱད་པར་བཀོད་པ་ཡང་། །གསང་བའི་སྙིང་པོར་འགྲོ་བའི་ལམ། །ཞེས་པས། སྦྱོང་བྱེད་ཐུན་མོང་དང་ཁྱད་པར་གྱིས་བསྡུས་པ་གདུལ་བྱ་ལམ་གྱི་སྣང་བ་བགྲོད་བྱར་གདམས་པ་དང་། ཡེ་ཤེས་ངོ་མཚར་རབ་འབྱམས་ཀྱི། །དོན་དུ་མི་འགྱུར་ཡོངས་མ་གསུངས། །ཞེས་པས། སྦྱངས་འབྲས་སྐུ་གསུམ་གྱི་རང་བཞིན་བདེ་གཤེགས་ཀྱི་སྣང་བ་ཐོབ་བྱར་གདམས་པ་བཞི་སྟེ། རྒྱུ་མཚན་དེས་རྒྱུད་ཀྱི་དོན་ཐམས་ཅད་སྣང་བ་བཞིར་བསྡུས་ནས་གསུངས་པའི་ཕྱིར། རལ་གྲི་ལྟར་ཡུ་བ་ནས་བཟུང་སྟེ་བཤད་པ་ཞེས་བྱའོ། །གཏད་པ་ནི། ཁོག་གཞུང་ལས། སྡུད་པ་པོ་དང་བུད་མེད་དང་། །རྣལ་འབྱོར་མིག་ལྡན་སོགས་ལའོ། །ཞེས་གསུངས་པ་ལྟར། དེ་བཞིན་གཤེགས་པ་ཐམས་ཅད་ཀྱི་བཀའི་བསྡུ་བ་པོ་གསང་བའི་བདག་པོ་ལག་ན་རྡོ་རྗེ་ལ་གཏད་པ་དང་། མ་འོངས་ཕྱི་རབས་ཀྱི་གང་ཟག་ཆོས་ཀྱི་སྤྱན་ལྡན་ལ་གཏད་ཅིང་དེ་ཉིད་ངེས་པར་ལུང་བསྟན་པ་དང་། འཁོར་གྱི་མ་མོ་མཁའ་འགྲོ་རྣམས་ལ་བསྟན་པ་སྐྱོང་ཞིང་ཕྱོགས་བཅུར་སྤེལ་བར་གཉེར་གཏད་པ་དང་གསུམ་མོ། །གཉིས་པའི་ཚིག་གི་རྣམ་གྲངས་རྣམ་པར་དབྱེ་བ་ལ། ངོ་བོ་ནི། རྒྱུད་ཕྱི་མ་ལས། གང་གིས་བརྗོད་བྱ་འཆད་བྱེད་པ། །དེ་ནི་རྗོད་བྱེད་དུ་བཤད་དོ། །ཞེས་པས་བརྗོད་བྱ་དེ་ཉིད་འཆད་པར་བྱེད་པ་ནི་རྗོད་བྱེད་དོ། སྒྲར་སྣང་ཞིང་སྒྲར་གྲགས་པའི་བདག་ཉིད་སྒྲའི་རྒྱུད་དམ་གླེགས་བམ་དུ་སྣང་བ་ཡི་གེའི་རྒྱུད་དེ། དེ་ཡང་ཡི་གེ་འདུས་པ་ལས་མིང་། མིང་འདུས་པ་ལས་ཚིག ཚིག་འདུས་པ་ལས་ལེའུ་སོགས་གླེགས་བམ་གྱི་བར་རྒྱུན་ཆགས་པའི་ངོ་བོ་ཚོགས་པ་གསུམ་ལྡན་ཡི་གེའི་རྒྱུད་དམ། བརྗོད་བྱ་དོན་གྱི་རྒྱུན་མཚོན་པར་ནུས་པའི་རྗོད་བྱེད་སྒྲའི་རྒྱུད་དུ་གྲུབ་པ་ཡིན་ཏེ། རྩ་བའི་རྒྱུད་ལས། ཡི་གེ་སྒྲ་བཏགས་མིང་ཚོགས་ལ། །བརྟེན་པའི་ཚིག་གིས་རབ་མཚོན་ཏེ། །ཞེས་སོ། །དེ་དག་ཀྱང་དཔྱད་ན། སྟོན་པའི་ཡེ་ཤེས་ཀྱི་རྣམ་པར་འཕྲུལ་བ་ལས་ལོངས་སྐུ་དགོངས་པ་བརྡའི་ཚིག་མི་གསུང་བ་གསུང་བ་ཆེན་པོའི་སྒོ་ནས་དངོས་ཀྱི་འཁོར་འབྲས་དབང་ཐོབ་པས་སྟོན་འཁོར་དགོངས་པ་དབྱེར་མེད་དུ་གྱུར་པ་རྣམས་ཀྱི་ཡིད་ལ་རྒྱུད་དོན་རང་སྣང་བའམ། དེ་ཉིད་མ་འོངས་པའི་གདུལ་བྱ་གོ་ཕྱེ་བའི་འཁོར་རྣམས་ཀྱི་ཡིད་ལའང་རྒྱུད་དོན་སྒྲ་སྤྱིའི་རྣམ་པར་ཤར་བའི་མིང་ཚིག་ཡི་གེ་གསུམ་ཚོགས་པའི་རྒྱུད་གཞུང་སྟེ་སྒྲར་སྣང་བའི་རྒྱུད་དང་། དེ་དང་མཐུན་པའི་སྒྲ་བརྗོད་འདོད་ཀྱི་དབང་གིས་སྤྱི་བོ་སོགས་གནས་དང་ལྕེ་མཆུའི་སྦྱོར་བའི་བྱེད་པ་སོགས་འཕྲད་པ་ལས་ངག་ཏུ་བརྗོད་པ་ནི་སྒྲར་གྲགས་པའི་རྒྱུད་དང་། དེ་བརྗོད་པའི་རྟེན་ཕྱི་རོལ་གྱི་ཡི་གེའི་གཟུགས་བརྙན་གླེགས་བམ་ལ་བཀོད་པ་ནི་བརྡར་གྱུར་པའི་རྒྱུད་གཞུང་སྟེ། རྗོད་བྱེད་ཀྱི་སྒོ་ནས་ཕྱེ་ན་དེ་ཙམ་མོ། །ངེས་ཚིག་ནི། སྒྲའི་རྒྱུད་དེ། བརྗོད་བྱའི་དོན་དེ་ཉིད་རྟོགས་བྱེད་ཀྱི་ཐབས་རྗོད་བྱེད་ཀྱི་སྒྲར་སྣང་ཞིང་སྒྲར་གྲགས་པའི་དོན་གྱིས་ན་སྒྲ་དང་ཚིགས་སུ་བཅད་པ་སོགས་གཞུང་གི་ཚོགས་རྒྱུན་ཆགས་པའམ། གླེང་གཞི་ལ་སོགས་པ་ལྔ་རྒྱུ་རྐྱེན་འབྲས་བུའི་ཚུལ་དུ་འབྲེལ་བས་ན་རྒྱུད་དོ། །གཞན་དུ་ན་བརྗོད་བྱ་ལ་རྒྱུད་ཀྱི་མིང་ཐོབ་པས་རྗོད་བྱེད་ལའང་རྒྱུད་ཅེས་བཏགས་སོ། །དབྱེ་ན། རྩ་བའི་རྒྱུད་དང་། བཤད་པའི་རྒྱུད་གཉིས་ཏེ། དེ་གཉིས་ཀྱི་བསྟན་དོན་དབུ་ཞབས་ཀྱིས་བསྡུས་པའི་གཞུང་གི་དོན་རྣམས་ནི་རྣམ་དཔྱོད་མཆོག་དང་ལྡན་པ་རྣམས་ཀྱིས་གཞུང་དོན་ལ་ཕྱིན་ཅི་མ་ལོག་པའི་ཤེས་རབ་དྲི་མ་མེད་པས་བརྟགས་ཏེ་རྟོགས་པར་བྱ་བ་ཡིན་ལ། ཞིབ་པར་ནི་རིག་འཛིན་བརྒྱུད་པའི་མན་ངག་གི་གཞུང་ལ་འདྲིས་པར་བྱ་བ་ཤིན་ཏུ་གལ་ཆེ་བ་ལགས་སོ། །དེ་ལྟར་ཆོས་ཀྱི་རྒྱལ་པོ་སྨིན་གླིང་པ་ཡབ་སྲས་བརྒྱུད་པ་དང་བཅས་པའི་གསུང་གི་སྣང་བ་ལ་བརྟེན་རང་བློས་གང་དཔོགས་ཞུས་པ་ལགས་ན། འདི་ལ་མ་འབྲེལ་བ་དང་། མ་ཚང་བ་དང་། ཟློས་པ་དང་། གཞུང་དོན་ལོག་པར་བཤད་པ་སོགས་ཀྱི་ཉེར་པ་གང་མཆིས། འཕགས་ཚོགས་རིག་པ་འཛིན་པའི་དགེ་འདུན་ཆོས་སྤྱན་ལྡན་པ་རྣམས་ཀྱི་སྤྱན་སྔར་བཤགས་ན། འཕྲལ་དང་ཡུན་གྱི་སྒྲིབ་རྐྱེན་དུ་མི་འགྱུར་བར་ཚངས་པ་དམ་པ་རྩལ་བར་མཛད་པ་དང་། ལེགས་པར་བཤད་པའི་དགེ་ཚོགས་ཇི་སྙེད་པ་དེ་དག་གི་མཐུ་ལ་བརྟེན་ནས། སྤྱིིར་རྒྱལ་བསྟན་རིན་པོ་ཆེ་དང་། དགོས་སྔ་འགྱུར་ཡོ་ག་རྣམ་གསུམ་གྱི་བཤད་སྒྲུབ་ཀྱི་བསྟན་མཆོག་མི་ནུབ་སྲིད་མཐའི་བར་དུ་དར་ཞིང་རྒྱས་ལ་ཡུན་རིང་དུ་གནས་པ་དང་། དེ་འཛིན་པའི་སྐྱེས་བུ་དམ་པ་རྣམས་སྐུ་ཚེ་མཛད་ཕྲིན་ཡར་ངོའི་ཟླ་བ་ལྟར་གོང་ནས་གོང་དུ་འཕེལ་བ་དང་། རྒྱལ་ཁམས་སྤྱིིར་ནག་ཕྱོགས་གདུག་པའི་རྩུབ་འགྱུར་ཞི་ཞིང་དཀར་ཕྱོགས་ཀྱི་ལྷ་རྣམས་ཀྱིས་སྲུང་བས་བདེ་སྐྱིད་དགེ་བཅུའི་དཔལ་གྱིས་རྫོགས་ལྡན་གྱི་དུས་བཞིན་འབྱོར་པ་དང་། འདིར་འདུས་ཤིང་ཚོགས་པ་ཐམས་ཅད་དམ་ཚིག་མི་ཉམས་ཤིང་བསྐྱེད་རྫོགས་ཀྱི་ལམ་རིམ་པ་གཉིས་པོ་ལ་བརྟེན་ནས། གནས་སྐབས་སུ་གྲུབ་པ་བརྒྱད་དང་། མཐར་ཐུག་རིག་འཛིན་རྣམ་བཞིའི་ལམ་ནས་མི་སློབ་པའི་ཟུང་འཇུག་སྐུ་བཞི་ཡེ་ཤེས་ལྔ་ཡི་བདག་ཉིད་ཁྱབ་བདག་རིགས་དྲུག་པའི་གོ་འཕང་ལ་དཀའ་བ་མེད་པར་སྦྱོར་བའི་ཐུགས་བསྐྱེད་ཡང་དག་པས་བསྔོ་བ་དང་སྨོན་ལམ་གྱིས་མཐའ་བརྒྱན་པར་ཞུ་ལགས། བླ་མ་ཡི་དམ་ལྷ་ཚོགས་དགོངས་སུ་གསོལ། །སོགས་དང་བསྟན་རྒྱས་སྨོན་ལམ་སོགས་ཇི་ལྟར་རིགས་པས་མཐའ་བརྒྱན་པར་བྱའོ། །མཁས་གྲུབ་ཀླུ་མཆོག་བྱེ་བས་ཉེར་བརྟེན་པའི། །གདོད་མའི་མགོན་པོའི་དགོངས་བཅུད་བདུད་རྩིའི་ཀླུང་། །རྟོག་གེ་ངན་པས་རང་བཟོས་མ་རྙོག་པ། །རྣམ་གྲོལ་སྲོག་ཟུང་བརྟན་བྱེད་བཅུད་ལེན་རྨད། །ངེས་དོན་མཐར་ཐུག་གསང་མཆོག་ཏནྟྲ་ཆེ། །གང་དང་སུ་འབྲེལ་སྲིད་པ་ཐ་མ་སྟེ། །ས་ར བ་རིག་པ་འཛིན་པ་མཆོག་ཡིན་ཞེས། །རྡོ་རྗེའི་ལུང་གིས་གྲུབ་པའི་བསྙོན་དུ་ཅི། །དེ་སླད་ཚད་མའི་གཞུང་འགྲེལ་ལ་བརྟེན་ནས། །མདོ་ཙམ་བསྡུས་འདིར་རང་གཞན་སྐྱེ་ཀུན་ཏུ། །ཟབ་གསང་ཐེག་མཆོག་སྙིང་པོའི་སྣོད་གྱུར་ཏེ། །དོན་གཉིས་མཐར་ཕྱིན་རྣམ་གྲོལ་མངོན་བྱེད་ཤོག །བཀྲ་ཤིས་མཆོག་སྩོལ་བླ་མ་ལྷག་པའི་ལྷས། །བཀྲ་ཤིས་བདེན་ཚིག་ཤིས་པའི་མེ་ཏོག་གིས། །བཀྲ་ཤིས་ཕྱོགས་དུས་ཀུན་ཏུ་ཁྱབ་གྱུར་ནས། །བཀྲ་ཤིས་རྟག་པ་དམ་པའི་མཆོག་གྱུར་ཅིག །ཅེས་པའང་སྔགས་བཙུན་རྡོ་རྗེ་དབང་མཆོག་དགྱེས་པ་རྩལ་གྱིས། ཤིང་བྱི་ཟླ་བ་བཞི་པའི་འཕེལ་ཕྱོགས་ཀྱི་ཚེས་བཅུ་ལ་བདེ་མཆོག་བཀྲ་ཤིས་དགེ་འཕེལ་གྱི་དབེན་སྤྱིིལ་དུ་བྲིས་པ་དགེ།
རྒྱུད་བཤད་སྐབས་ཉེར་མཁོའི་དམ་ཚིག་གི་རྣམ་གྲངས་འཛིན་བདེ།
༄༅། །རྒྱུད་བཤད་སྐབས་ཉེར་མཁོའི་དམ་ཚིག་གི་རྣམ་གྲངས་འཛིན་བདེ་བཞུགས། །ན་མོ་གུ་རུ་བཛྲ་པཱ་ཎི་ཡེ། འདིར་སྙིང་པོའི་རྒྱུད་བཤད་སྐབས་ཉེར་མཁོ་དམ་ཚིག་གི་རྣམ་གྲངས་བློ་ལ་འཛིན་རྒྱུར། གསང་སྔགས་རྡོ་རྗེ་ཐེག་པའི་ལམ་ཐམས་ཅད་ཀྱི་རྩ་བ་སྨིན་བྱེད་ཀྱི་དབང་དང་། དེའི་སྲོག་དམ་ཚིག་ལ་ཐུག་པས། རྒྱུད་སྡེ་གོང་འོག་དང་། སྔགས་གསར་སྙིང་གི་དགོངས་པ་མཐའ་ཡས་མོད། འདིར་སྒྱུ་འཕྲུལ་གསང་བ་སྙིང་པོའི་བསྟན་དོན་ཅུང་ཟད་བཤད་ན། སྤྱིར་སློབ་དཔོན་སྒེག་པ་རྡོ་རྗེ། དམ་ཚིག་གི་ངོ་བོ། རྣམ་གྲངས། སྲུང་ཐབས། ཉམས་པའི་རྒྱུ། ཉམས་པའི་རྟགས། ཉམས་པའི་སྐྱོན། མ་ཉམས་པའི་ཡོན་ཏན། བསྐང་བའི་ཐབས། ཁེ་ཉན་གྱི་དཔེ། མདོ་བཞི་བཅས་སྤྱི་སྡོམ་བཅུའི་སྒོ་ནས་དམ་ཚིག་གསལ་བཀྲར་གསུངས་ཀྱང་། འདིར་བསྡུས་པའི་དབང་དུ་བྱས་ཏེ། ངོ་བོ། ངེས་ཚིག དབྱེ་བ། བསྲུང་ཚུལ། ཆེ་ཡོན་བཤད་པ་དང་ལྔ་ལས། དང་པོ་ངོ་བོ་ནི། རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོངས། །རྨི་ལམ་དུའང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་གསུངས་པས། གང་བསྲུང་བྱའི་དམ་ཚིག་རྣམས་ལས་ནམ་ཡང་མི་འདའ་བར་སྡོམ་བྱེད་ཀྱི་སེམས་པ་རྒྱུན་ཆགས་པ། གཉིད་དང་སེམས་གཡེང་བ་ལ་སོགས་པའི་སྐབས་སུའང་སྡོམ་པའི་ས་བོན་དང་བཅས་པའོ། །གཉིས་པ་ངེས་ཚིག་ནི། ས་མ་ཡའི་སྒྲ་ལས། དངོས་སུ་ཡལ་གམ་བཅས་པའི་ཐ་ཚིག་ལ་འཇུག་སྟེ། སྔོན་རང་གིས་ཇི་ལྟར་དམ་བཅས་པ་ལས་འདའ་བར་བྱ་བ་མ་ཡིན་པའི་ཕྱིར་དམ་ཚིག་ཞེས་བྱ་སྟེ། ཀུན་འདུས་ལས། འདའ་དཀའ་རྡོ་རྗེའི་དམ་ཚིག་གཏན་གྱི་གཉེར། །ཞེས་དང་། ཧེ་རུ་ཀ་འདུས་པ་ལས། མི་འདའ་དམ་པ་མཆོག་གྱུར་པ། །འདས་པར་གྱུར་ན་ཚིག་པར་བཤད། །ཅེས་སོ། །གསུམ་པ་དབྱེ་བ་ལ། དབྱེ་གཞི་དངོས་ཀྱི་རྣམ་གྲངས་དང་། དེ་ལས་ཕྱི་པའི་རྣམ་གྲངས་གཉིས། དང་པོ་ལ། རྩ་བ་དང་ཡན་ལག་གཉིས་ལས། དང་པོ་ནི། རྩ་རྒྱུད་གསང་བ་སྙིང་པོ་ལས། བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །འདི་དག་རྩ་བ་ལྔ་རྣམས་ཏེ། །སྒྲུབ་དང་བསྲུང་བའི་དམ་ཚིག་མཆོག །ཅེས་གསུངས་པ་ལྟར་ལྔ་ལས། དང་པོ་བླ་མེད་མི་སྤང་བ་ནི། ཡུལ་བླ་ན་མེད་པའི་བྱང་ཆུབ་ཀྱི་སེམས་ལྷག་པའི་བདེན་གཉིས་དབྱེར་མེད་ཀྱི་གནས་ལུགས་ཟབ་མོ་རྟོགས་ནས། སྒོ་གསུམ་ལྷ་ཡི་སྐུ་གསུམ་ཐུགས་ལས་མི་འདའ་བར་བྱེད་པ་སྟེ། འདིའི་དོན་ཅུང་ཟད་བཀྲོལ་ན། འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་སེམས་དང་ཡེ་ཤེས་ཀྱི་རང་སྣམ་ཙམ་ལས་གཞན་དུ་མ་དམིགས་ལ། དེའི་རྩ་བ་རིག་པ་བྱང་ཆུབ་ཀྱི་སེམས་ཡེ་ནས་འཆིང་གྲོལ་ལས་འདས་པ། དབྱིངས་དང་ཡེ་ཤེས་འབྲས་བུའི་དོན་དམ་སྟེ་དཀོར་བདུན་ངོ་བོ་ཉིད་རྒྱུར་ལྷུན་གྱིས་གྲུབ་པ་ལྷག་པའི་དོན་དམ་བདེན་པ་དང་། དེ་ལས་ཤར་བའི་ཕུང་ཁམས་སྐྱེ་མཆེད་ཀྱི་ཆོས་རྣམས་སྐུ་དང་ཡེ་ཤེས་ཀྱི་རོལ་པར་ཡེ་ནས་གནས་པ་ལྷག་པའི་ཀུན་རྫོབ་སྟེ། བདེན་པ་དེ་གཉིས་ཀྱང་སྣང་སྟོང་ཕྱོགས་རེ་བ་མ་ཡིན་པར། ངོ་བོ་གསེར་དང་གསེར་གྱི་སེར་པོ་དང་། གཡུ་དང་གཡུའི་སྔོན་པོ་བཞིན་དུ་དབྱེར་མེད་མཉམ་པ་ཉིད་དུ་གནས་པ་ནི་ལྷག་པའི་བདེན་པ་དབྱེར་མེད་ཅེས་བྱ། དེ་ཡང་ཐ་སྙད་ཙམ་དུ་དབྱེར་མེད་དུ་བརྗོད་ཀྱང་དེར་འཛིན་གྱི་བསམ་བརྗོད་ཐམས་ཅད་ཀྱི་ཡུལ་ལས་འདས་པས་སྤྱོད་ཡུལ་དང་བྲལ་བ་ཞེས་བྱ། དེ་ལྟ་བུའི་རང་སེམས་ཀྱི་ཆོས་ཉིད་གདོད་མ་ནས་རྣམ་པར་དག་པ་དེ་ནི་སངས་རྒྱས་རྣམས་ཀྱི་ཐུགས་གཉིས་སུ་མེད་པའི་ཡེ་ཤེས་ཆོས་ཀྱི་སྐུ་བདེ་བར་གཤེགས་པའི་སྙིང་པོ་སྟེ། སེམས་ཅན་ནས་སངས་རྒྱས་ཀྱི་བར་རང་བཞིན་འགྱུར་མེད་དུ་བཞུགས་པ་ནི་གནས་ལུགས་ཡང་དག་པའི་དཀོན་མཆོག་གསུམ་གྱི་རང་བཞིན་གང་བསྒྲུབ་བྱའི་ལྷ་དང་བླ་མ་སྔགས་དང་ཕྱག་རྒྱ་སོགས་ཐམས་ཅད་དེའི་ངང་དུ་འདུ་ཞིང་དེ་ལས་མ་འདས་ཏེ། ཡེ་ཤེས་གྲུབ་པ་ལས། དག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་རྫོགས་དགེ་འདུན་ཉིད། །ཡིན་ཕྱིར་རང་གི་སེམས་ཉིད་མཆོག །ཅེས་དང་། དཔལ་རོང་ཟོམ་པ་ཆེན་པོས་ཀྱང་། དཀོན་མཆོག་གསུམ་གྱི་རང་བཞིན་བྱང་ཆུབ་སེམས། །དེ་རྩོལ་བླ་མ་དེ་རྒྱ་ལྷག་པའི་ལྷ། །དེ་དབང་སྤྲུལ་པའི་འཁོར་ལོར་བཅས་པ་ལ། །ཞེས་གསུངས། དེ་ཉིད་རྟོགས་པ་དང་ཐོབ་པ་ལས་གོང་དུ་གྱུར་པའི་ལམ་དང་འབྲས་བུའི་ཆོས་གཞན་མི་སྲིད་པས་བླ་ན་མེད་པའི་སྒྲས་བསྟན། དེ་ལྟ་བུའི་བདེན་གཉིས་དབྱེར་མེད་ཀྱི་བྱང་ཆུབ་ཀྱི་སེམས་དེ་ཤེས་འཇུག་གི་སྦྱོར་བས་རང་རྒྱུད་ལ་བཟུང་ཞིང་མི་སྤང་བར་དམ་བཅའ་བ་སྟེ། ཇི་ལྟར་བཟུང་ཚུལ་ཡང་། སྨོས་མ་ཐག་པའི་བདེན་གཉིས་དབྱེར་མེད་ཀྱི་དོན་ལྟ་བས་གཏན་ལ་ཕབས་ནས་རང་བཞིན་ཡོངས་ཤེས་ཀྱི་རྫོགས་རིམ་གྱི་ངང་དེ་ལས་མ་གཡོས་པར་སྒོ་གསུམ་སྐུ་གསུང་ཐུགས་ཀྱི་ཕྱག་རྒྱར་བསྒོམ་ཞིང་། སྣང་སྤྱོད་ཐམས་ཅད་ཡེ་ཤེས་ཆེན་པོའི་རོལ་པར་ལམ་དུ་ཁྱེར་བ་སྟེ། དེ་ལྟར་ཤེས་ཤིང་ནུས་ན། གསང་སྔགས་རྡོ་རྗེ་ཐེག་པའི་དམ་ཚིག་ས་མ་ཡ་འབུམ་སྡེའང་དེའི་ནང་དུ་འདུ་སྟེ། པཎ་ཆེན་པདྨ་དབང་གི་རྒྱལ་པོས། མདོར་ན་རང་ལུས་རྡོ་རྗེ་གསུམ་ཤེས་ན། །སྔགས་ཀྱི་དམ་ཚིག་ས་ཡ་འབུམ་སྡེ་ཚང་། །ཞེས་གསུངས། རྒྱུ་དེས་དོན་དམ་ཀུན་རྫོབ་ཀྱི་བྱང་ཆུབ་ཀྱི་སེམས་གཉིས་ཀྱང་བཟུང་བར་འགྱུར་ཏེ། དོན་དམ་མཐར་ཐུག་གནས་ལུགས་དག་མཉམ་བདེན་པར་དབྱེར་མེད་བཟུང་བའི་ཕྱིར་དང་། སེམས་ཅན་ཐམས་ཅད་རྒུད་པ་ལས་སྐྱོབ་པའི་དོན་དུ་བདག་ཉིད་སངས་རྒྱས་སུ་འགྲུབ་པའི་བསམ་སྦྱོར་མི་གཏོང་བ་ནི་ཀུན་རྫོབ་སེམས་བསྐྱེད་ཡིན་པས། འདིར་མཐའ་ཡས་པའི་སེམས་ཅན་གྱི་དོན་རྟག་ཁྱབ་ཏུ་མཛད་པའི་སངས་རྒྱས་ཉིད་འགྲུབ་ངེས་པར་མཐོང་བས། དེ་ལས་ཕྱིར་ཕྱོགས་པ་དང་སེམས་ཞུམ་པ་དང་འཁོར་བར་སྐྱོ་བ་སོགས་དམན་ལམ་ཡིད་བྱེད་ཀྱི་དྲི་མ་གཏན་ཁེགས་སུ་འགྱུར་བས་རྒྱུ་མཚན་ཉིད་ཀྱི་ཐེག་པའི་སེམས་བསྐྱེད་ལས་ཁྱད་པར་དུ་འཕགས་སོ། །དེའི་ཕྱིར་ལྟ་བ་དེ་ལྟ་བུ་དང་ལྡན་པ་ལ་རྡོ་རྗེ་འཛིན་པ་ཞེས་བྱ་སྟེ། སྔགས་ཀྱི་དེ་ཁོ་ན་ཉིད་རྡོ་རྗེ་ལྟ་བུ་རང་རྒྱུད་ལ་བཟུང་ན་སྲིད་ཞིའི་རྒུད་པ་ཀུན་གྱི་ཕྱོགས་འཇོམས་པའི་ནུས་པ་དང་ལྡན་པའི་ཕྱིར། སྔགས་ཀྱི་དེ་ཁོ་ན་ཉིད་ལ་ཞུགས་པའི་གང་ཟག་ལས་དང་པོ་པའང་ཕྱིར་མི་ལྡོག་པའི་བྱང་སེམས་དང་སྐལ་བ་མཉམ་པར་གསུངས་ཏེ། རྡོ་རྗེ་རྩེ་མོ་ལས། ཇི་སྲིད་ས་བརྒྱད་མ་ཐོབ་བར། །དེ་སྲིད་ཐེག་པ་དམན་པས་འཇིགས། །གསང་ཆེན་ཐེག་པ་འདི་རུ་ནི། །གཞུག་པ་གང་དང་གང་ཡིན་པ། །དེ་ནི་རྒྱལ་སྲས་ས་པའོ། །ཞེས་སོ། །འདི་ལྟ་བུའི་རང་བཞིན་ཡོངས་ཤེས་ཀྱི་ལྟ་བའི་དམ་ཚིག་གི་རྩིས་ཟིན་ན་ཉོན་མོངས་པ་དང་། ལས་སོགས་གང་གིས་ཀྱང་གོས་པར་མི་འགྱུར་ཏེ། རྒྱུད་ལས། བླ་མེད་ཐེག་པར་རབ་ངེས་ན། །ཉོན་མོངས་ལས་རྣམས་ཀུན་སྤྱད་ཀྱང་། །བྱས་ལ་མི་སོགས་ཚོགས་འགྱུར་ཏེ། །ཚུལ་ཁྲིམས་སྡོམ་པ་ཕུན་སུམ་ཚོགས། །ཞེས་གསུང་། འདིར་འོག་མའི་འདུལ་སྡོམ་སོགས་ཀུན་ཀྱང་ཚང་ཞིང་རྣམ་པར་དག་པའང་། བླ་མེད་མཆོག་གི་དམ་ཚིག་ཏུ། །འདུལ་བའི་དབང་གིས་ཚུལ་ཁྲིམས་དང་། །ཇི་སྙེད་སྡོམ་པ་བསམ་ཡས་པ། །མ་ལུས་ཀུན་འདུས་རྣམ་པར་དག །ཅེས་སོ། །ཐབས་ཤེས་ཁྱད་པར་ཅན་འདི་ལྟ་བུས་ཟིན་པའི་ལམ་ཀུན་ནི་བླ་མེད་རྡོ་རྗེ་ཐེག་པའི་མྱུར་ལམ་ཟབ་མོ་ཡིན་གྱི། དེ་ལས་གཞན་དུ་གྱུར་པ་རྣམས་ནི་ལམ་གྱི་གཟུགས་བརྙན་དུ་འགྱུར་བས། རྒྱུད་དོན་གྱི་དངོས་པོ་བཅུ་སོགས་ཐམས་ཅད་འདིའི་སྟེང་དུ་གནད་དྲིལ་ནས་ཉམས་སུ་ལེན་ཤེས་པ་གལ་ཆེའོ། །མདོར་ན་དམ་ཚིག་གསལ་བཀྲ་ལས། རང་ལུས་རྒྱལ་བའི་ཕྱག་རྒྱ་ཆེ། །སེམས་ཅན་ཁམས་ཀྱང་དེར་ཤེས་ཤིང་། །སྣང་སྟོང་དབྱེར་མེད་རྡོ་རྗེའི་སྐུ། །བྱས་མཐོང་ཟོས་པ་ཐམས་ཅད་ཀྱང་། །སེམས་ཕྱིར་གང་ཡང་བྱས་སྣང་མེད། །དུས་གསུམ་རྒྱུན་དུ་མ་དྲན་ན། །ཐེག་ཆེན་སྔགས་པར་ཅི་ཡིས་ཚུད། །ཅེས་དང་། རྒྱུད་ལས། མཉམ་ལ་མཉམ་པར་སྦྱོར་བ་ཡི། །མཉམ་པའི་དམ་ཚིག་ལ་གནས་ན། །མཉམ་རྫོགས་ཆེན་པོ་ཐོབ་པར་འགྱུར། །འདས་ན་སངས་རྒྱས་མ་ཡིན་ནོ། །ཞེས་གསུངས། འདི་གལ་ཆེ་བས་ཅུང་ཟད་བཀྲོལ་ནས་བཤད་པ་ཡིན་ལ། གཉིས་པ་བླ་མ་བཀུར་བ་ནི། ཡུལ་ཀུན་གྱིས་དམ་པར་བཀུར་ཞིང་བཀའ་དྲིན་ཅུང་ཟད་ཐོབ་པ་སྤྱི་དང་། རབ་བྱུང་གི་མཁན་པོ་ལྟ་བུ་འདྲེན་པའི་དང་། དམ་ཚིག་འབོག་ཅིང་དབང་བསྐུར་བ་པོ་དམ་ཚིག་དབང་གི་དང་། བཤགས་ཡུལ་དུ་གྱུར་པ་ཉམས་ཆག་སྐོང་བའི་དང་། ཆོས་འཆད་པའི་སློབ་དཔོན་ལྟ་བུ་ཤེས་རྒྱུད་འགྲོལ་བའི་དང་། ཟབ་ཁྲིད་སོགས་མན་ངག་སྟོན་ཅིང་ལུས་འབོག་པ་པོ་མན་ངག་ལུང་གི་སློབ་དཔོན་ཏེ། གསལ་བཀྲ་ལས། སྤྱི་དང་འདྲེན་དང་དམ་ཚིག་དབང་། །ཉམས་ཆག་བསྐང་དང་ཤེས་རྒྱུད་འགྲོལ། །མན་ངག་ལུང་གི་སློབ་དཔོན་དྲུག །ཅེས་སོ། །དེ་རྣམས་བཀུར་ཚུལ་ཡང་རིམ་པ་བཞིན་དུ། ཡུལ་ལ་དབང་བའི་རྒྱལ་པོ་དང་། །ཁུ་བོ་ཕ་དང་མ་དང་མིག །སྙིང་བས་ལྷག་པའི་ཚུལ་གྱིས་སོ། །ཞེས་གསུངས། ཁྱད་པར་དུ་དབང་བསྐུར། རྒྱུད་བཤད། མན་ངག་ནོད་པ་གསུམ་ནི་བཀའ་དྲིན་གསུམ་ལྡན་གྱི་བླ་མ་ཡིན་པས། སངས་རྒྱས་ལས་ཀྱང་ལྷག་པའི་མོས་གུས་ཀྱིས་རབ་བསྒྲུབ་པ། འབྲིང་ཞབས་ཏོག ཐ་མ་ཟང་ཟིང་གི་སྒོ་ནས་ཅི་མཉེས་དང་ཐུགས་ཅི་ཟིན་བྱ། གསུང་གི་ཟུར་ཡང་མི་བཅག་བསྐྱེད་རྫོགས་སོགས་གང་སྒོམ་ཡང་བླ་མའི་སྐུ་གསུམ་ཐུགས་རྡོ་རྗེའི་རང་བཞིན་དུ་ཤེས་པར་བྱ་དགོས་ཏེ། རྡོ་རྗེ་ཐེག་པའི་ལམ་གྱི་རྩ་བ་གཅིག་པུར་མ་ཟད། ཁེ་ཉན་ཤིན་ཏུ་ཆེ་བས་དམ་ཚིག་གི་གཞུང་ཆེན་པོ་གཞན་རྣམས་ནས་ཀྱང་རྩ་བའི་ལྟུང་བ་དང་པོ་དེར་འཇོག་པར་མཛད་པ་ཡིན་ནོ། །གསུམ་པ་སྔགས་དང་ཕྱག་རྒྱ་རྒྱུན་མི་བཅད་པ་ལ། གཉིས་ཀྱི་སྔགས་ལ། ངོ་བོ་ནི་ཐབས་ཤེས་ཀྱི་ཡི་གེ་ཨཱ་ལི་ཀཱ་ལིར་འདུས་ཤིང་གྲུབ་པ་བཞིའི་བྱིན་གྱིས་བརླབ་པའི་ནུས་མཐུ་ཅན་དུ་གྱུར་པ་སྟེ། གྲུབ་པ་བཞི་ནི། ཆོས་ཉིད་ངོ་བོས་གྲུབ་པ་ཡི་གེ་ཐམས་ཅད་སྟོང་ཆེན་མཉམ་པ་ཉིད་ཀྱི་ངོ་བོ་ཅན་དུ་ཡེ་ནས་གྲུབ་པ། ཆོས་ཅན་རང་བཞིན་གྱིས་གྲུབ་པ་རང་རང་ངོ་བོ་ཐུན་མོང་མིན་པར་སྣང་བའི་རང་བཞིན་བསླུ་མེད་དུ་གྲུབ་པ། བྱིན་གྱིས་བརླབས་ཀྱིས་གྲུབ་པ་སངས་རྒྱས་རྣམས་ཀྱི་ཡི་གེ་གཅིག་ནས་མང་པོའི་རབ་གྱི་སྔགས་རྣམས་སུ་ཡེ་ཤེས་ཉིད་རྣམ་པར་འཕྲུལ་བ་ལས་གྲུབ་པ། ནུས་པའི་མཐུས་གྲུབ་པ་སྨན་དང་ནོར་བུ་བཞིན་དུ་སྔགས་དེ་དག་ལ་དངོས་གྲུབ་སྒྲུབ་པའི་ནུས་པ་ཐོགས་མེད་མི་བསླུ་བར་ཡོད་པའོ། །ངེས་ཚིག་ནི་མཎྟྲའི་སྒྲ་ལས་ཡིད་ཤེས་བདེ་མྱུར་དུ་སྐྱོབ་པའི་དོན་གྱིས་སྔགས་སོ། །དབྱེ་ན་གསང་སྔགས་རིགས་སྔགས་གཟུང་སྔགས་གསུམ་དུ་དབྱེ་བ་སོགས་ཡོད་ཀྱང་། འདིར་རྩ་བ་བསྐྱེད་དང་ལས་སྔགས་དང་། ཞེས་པ་ལྟར་གསུམ་ལས། རྒྱུ་མ་ནོར་བ་རྩ་བའི་སྔགས། གཞལ་ཡས་ཁང་བསྐྱེད་པའི་ས་བོན་བྷྲཱུྃ་ཡིག་དང་། ལྷ་བསྐྱེད་པ་ལ་ཞི་བར། ཨ་ཀ་ཁ་ག་གྷ་ང་སོགས་ཡི་གེ་འཁོར་ལོའི་ས་བོན་དང་། ཧཱུྃ་མཱུྃ་སོགས་རིགས་ཀྱི་ས་བོན་གཉིས། ཁྲོ་བོ་ལ། ཧཱུྃ་ཧ་ཧེ་ཕཊ་བྷྱོ་ཞེས་པའོ། །བསྐྱེད་པ་རྐྱེན་གྱི་སྔགས། ས་བོན་བོར་བའི་བསྐྱེད་སྔགས་རྐྱང་པ་སྟེ། བཛྲ་དྷྲཱིཀ྄་སོགས་དང་། བཛྲ་ཤྲཱི་ཧེ་རུ་ཀ་ཧཱུྃ་སོགས་སོ། །བཟླས་པ་ལས་ཀྱི་སྔགས་རྩ་སྔགས་བསྐྱེད་སྔགས་སྦྲེལ་ནས་ཛབ྄་ཏུ་བཟླ་བའོ། །དེ་ཉིད་རྫོགས་རིམ་དང་སྦྱར་ན། ཆོས་སྐུ་བདེ་ཆེན་གྱི་ཐིག་ལེ་གདོད་ནས་རང་ཆས་སུ་བཞུགས་པ་རྒྱུ་མ་ནོར་བ་རྩ་བའི་སྔགས། དེ་ལ་གནད་དུ་བསྣུན་པའི་ཐབས་ཀྱི་བྱེད་རྩོལ་ནི་བསྐྱེད་པ་རྐྱེན་གྱི་སྔགས། དེ་བཟླ་ཞིང་སྒོམ་པ་ལས་ཀྱི་སྔགས་སོ། །ཕྱག་རྒྱ་ལ། ངོ་བོ་རིག་པ་ཕྱག་རྒྱ་བཞི་རྫོགས་ཀྱི་ལྷའི་སྐུར་གསལ་བ་ལས་མི་འདའ་བ། ངེས་ཚིག་མུ་དྲའི་སྒྲ་ལས་འདེབས་ཤིང་མཚོན་པར་བྱེད་པའམ། ཕྱག་རྒྱ་བཞིས་རྒྱས་བཏབ་པ་ལས་འདའ་བར་དཀའ་བའི་ཕྱིར་ཕྱག་རྒྱའོ། །དབྱེ་ན་སྤྱིར་རྟོག་ཚོགས་ཡེ་ནས་ལྷའི་དཀྱིལ་འཁོར་དུ་གནས་པ་རང་བཞིན་གྱི་ཕྱག་རྒྱ། དེའི་དོན་ལ་ཤེས་རབ་ཀྱི་མིག་གིས་བལྟ་ཞིང་སྒྲོ་འདོགས་གཅོད་པ་ལྟ་བའི་ཕྱག་རྒྱ། རང་འབྲས་མངོན་དུ་གྱུར་པ་འབྲས་བུའི་ཕྱག་རྒྱ་སྟེ་གསུམ་དང་། བྱེ་བྲག་ལྷག་པ་ཏིང་ངེ་འཛིན་གྱི་དབང་དུ་བྱས་ན། དམ་ཚིག་ལས་དང་ཆོས་དང་ནི། །སྐུ་ཉིད་ཕྱག་རྒྱ་ཆེན་པོ་བཞི། །ཞེས་གསུངས་པས། རང་ལུས་ལྷའི་སྐུར་གསལ་བ་སྐུ་ཕྱག་ཆེན། ཐུགས་ཀ་སོགས་རང་རང་གི་ས་བོན་བསམ་ཞིང་ཚིག་ངག་ཏུ་བརྗོད་པ་གསུང་ཆོས་རྒྱ། ཕྱག་མཚན་འཛིན་པའི་ཕྱག་རྒྱ་བཅའ་ཞིང་དེ་ལྟར་བསམ་པ་ཐུགས་དམ་རྒྱ། ཕྱག་རྒྱ་བཅས་ནས་མདུན་དུ་བསྒྱུར་ཞིང་དགྲོལ་བ་དང་དོན་དམིགས་པ་ཕྲིན་ལས་ལས་རྒྱ་སྟེ། ཕྱི་མ་གསུམ་ལ་བཅའ་བསམ་སོགས་གཉིས་རེར་ཕྱེས་པས་ཕྱག་རྒྱ་བདུན་རྫོགས་སུའང་འགྱུར་རོ། །དེ་ཉིད་རྫོགས་རིམ་དང་སྦྱོར་ན། སྟེང་སྒོ་གཏུམ་མོའི་ཙཎྜ་ལི་ནི་དམ་ཚིག་གི་ཕྱག་རྒྱ། འོག་སྒོ་ཕྱག་རྒྱ་གསུམ་ནི་ལས་ཀྱི་ཕྱག་རྒྱ། སྒྱུ་ལུས་སྙིང་རྗེ་ཆེན་པོ་ཆོས་ཀྱི་ཕྱག་རྒྱ། རྣམ་པར་མི་རྟོག་པ་རང་བཞིན་གྱི་ཡེ་ཤེས་ནི་ཕྱག་རྒྱ་ཆེན་པོ་ཞེས་བྱའོ། །དེ་གཉིས་རྒྱུན་མི་བཅད་པར་ཇི་ལྟར་བཟུང་བའི་ཚུལ་ནི། རབ་ཀྱིས་ཆུ་བོའི་རྒྱུན་བཞིན་ནམ། །ཉིན་གསུམ་མཚན་གསུམ་གཉིས་གཅིག་ཏུ། །མ་ཡེངས་ཙམ་དུ་ངང་གིས་བཟླ། །འབྲིང་གི་ཟླ་གཅིག་དུས་དྲུག་དང་། །དུས་བཞིའི་བར་དུ་མི་བཅད་ཅིང་། །ཐ་མ་བྱ་བའི་རྣལ་འབྱོར་པས། །ཟླ་རེའམ་ར་བའི་དུས་དག་ཏུ། །བརྩོན་པས་འབད་དེ་མི་བྱེད་ན། །བྱང་ཆུབ་ས་བོན་བརླག་པ་ཡིན། །ཚོགས་དང་གཏོར་མའང་དེ་བཞིན་ཏེ། །ཐ་ན་ལོ་ཟླར་མི་འདའ་འོ། །ཞེས་གསུངས་པ་བཞིན་ནོ། །བཞི་པ་མཆེད་ལ་བྱམས་པ་ནི། །མཐའ་ཡས་སེམས་ཅན་རང་རིག་ཕྱིར། །གང་ཡང་བདག་ལས་གཞན་མིན་དང་། བདེ་གཤེགས་སྙིང་པོའི་སྤུན་ཡིན་ཕྱིར། །མ་འོངས་སངས་རྒྱས་རང་བཞིན་ནི། །སྤྱི་ཡི་མཆེད་དེ་ཕ་ཚན་བཞིན། །སངས་རྒྱས་ཆོས་ཞུགས་རིང་བ་དང་། །ལྟ་སྤྱོད་མཐུན་པ་ཉེ་བར་བཤད། །ཕ་གཅིག་དམ་ཚིག་ནང་འདྲེས་པ། །ཞེས་པས་སྤྱིའི་མཆེད་སེམས་ཅན་ཐམས་ཅད། རིང་བའི་མཆེད་བསྟན་པ་ལ་ཞུགས་སོ་ཅོག ཉེ་བའི་མཆེད་སྔགས་ཀྱི་ཐེག་པར་ཞུགས་པ། འདྲེས་པའི་མཆེད་བླ་མ་གཅིག་གིས་བསྡུས་པ་ཕ་གཅིག་པའི་སྤུན་དང་། དེའི་ཤུགས་ཀྱིས་དཀྱིལ་འཁོར་གཅིག་གིས་བསྡུས་པ་མ་གཅིག་གི་སྤུན་ལྟ་བུ་སྟེ། དེ་ལས་ཕྱི་མ་གསུམ་ནི་ཡང་དག་ལམ་དུ་ཞུགས་པའི་མཆེད་ཐུན་མིན་ཏེ། འདི་ནས་བྱང་ཆུབ་ཀྱི་བར་དུ་མེ་མར་དང་སྡོང་བུ་བཞིན་དུ་འགྲོགས་དགོས་པས། ཐ་ན་རྩེད་མོ་ཙམ་དུའང་ངན་སེམས་དང་དཔྱ་སེམས་སོགས་མི་བྱ་ཞིང་། རྟག་ཏུ་ཕན་འདོགས་པའི་ལྷག་བས མ་གྱིས་བརྩེ་གདུང་རྒྱུན་མི་ཆད་པར་བྱའོ། །ལྔ་པ་གསང་བ་མི་སྨྲ་བ་ནི། གང་ལ་གསང་བའི་ཡུལ། དམ་ཉམས་དམ་ལས་ལོག་པ་དང་། །དམ་མེད་དཀྱིལ་འཁོར་མ་མཐོང་དང་། །འདྲེས་དང་མ་འདྲེས་ཐམས་ཅད་ལ། ཞེས་སོ། །ཇི་ལྟར་གསང་བའི་ཚུལ། སྤྱིར་གསང་སྔགས་ཀྱི་ཚིག་དོན་སོགས་སྣོད་མ་ཡིན་པ་ལ་གསང་བར་བྱ་བ་སྟེ། གང་གསང་བའི་དངོས་པོ། སྤྱི་དང་བར་གསང་བཞི་བཞི་དང་། །འོས་དང་གཉེར་གཏད་རྣམ་པ་བཅུ། །ཞེས་སོ། །དེ་ལས་སྤྱི་གསང་བཞི་ནི། ལྟ་ཟབ་སྤྱོད་པ་བརླང་པོ་དང་། །ལྷའི་མིང་གཟུངས་དང་གྲུབ་རྟགས་གསང་། །ཞེས་པས། ལྟ་ཟབ་ནི་ཐེག་དམན་སོགས་བློ་དམན་པ་དང་། སྤྱོད་པ་ནི་འདྲེས་པ་རྣམས་དང་། ཡི་དམ་གྱི་ལྷ་སྔགས་གྲུབ་རྟགས་ནི་མ་འདྲེས་པ་ལ་བསྟན་ན་དམ་ཚིག་ཉམས། འདྲེས་པར་བསྟན་ནའང་དངོས་གྲུབ་ཉམས་པའི་རྒྱུར་གསུངས་པས་ཐམས་ཅད་དུ་གསང་བར་བྱའོ། །བར་གསང་བཞི་ནི། བསྒྲུབ་པའི་གནས་དུས་གྲོགས་དང་རྫས། །བར་དུ་གསང་ལ་སྒྲུབ་པ་བྱ། །ཞེས་གསུངས་པས་དེ་བཞི་པོ་སྒྲུབ་པ་ཐོན་པའི་བར་དེ་སྲིད་དུ་གསང་དགོས་ཏེ་མ་གསང་ན་དངོས་གྲུབ་འཕྲལ་དུ་ཐོབ་པ་ལ་གེགས་བྱེད། གསང་བར་འོས་པ་ནི། གཞན་མ་དད་པ་སྐྱེ་བར་འགྱུར་བའི་རྫས་དང་སྤྱོད་པ་ཐམས་ཅད་དང་། གསང་བར་གཉེར་གཏད་པ་ནི། སློབ་དཔོན་དང་མཆེད་ཀྱིས་གསང་བར་གདམས་པ་སྟེ། ཞི་རྒྱུད་ལས། གཞན་ཡང་སློབ་དཔོན་མཆེད་ལྕམ་གྱིས། །གསང་བར་བསྒྲགས་དང་གནས་སྐབས་སུ། །དེ་ལྟར་འོས་པ་ཤིན་ཏུ་གསང་། །ཞེས་སོ། །དེ་དག་གཞན་ལ་སྟོན་པ་དང་སྨྲ་བར་བྱ་བ་མ་ཡིན་ནོ། །འདི་ལྔ་ནི་ལྗོན་ཤིང་གི་རྩ་བ་ལྟར་ཡོན་ཏན་གྱི་རྟེན་གཞི་ཡིན་པས་རྩ་བ་ལྔ་ཞེས་བྱ་སྟེ། དེ་ལས་བྱང་སེམས་དང་སྔགས་རྒྱ་གཉིས་སྒྲུབ་པའི་དམ་ཚིག གཞན་གསུམ་བསྲུང་བའི་དམ་ཚིག་དང་། ཡང་རྩ་བ་གསུམ་དུ་བསྡུ་ན། བླ་མ་དང་མཆེད་ལ་སྲུང་བ་སྐུ། སྔགས་རྒྱ་གསུང། གསང་བ་དང་བྱང་སེམས་གཉིས་ཐུགས་གྱི་དམ་ཚིག་ཏུ་འདུ་བ་ཡིན་ནོ། །གཉིས་པ་ཡན་ལག་གི་དམ་ཚིག་ལ། མི་སྤང་པ་ལྔ་དང་། མི་དོར་བ་ལྔ་ལས། དང་པོ་ནི། རྩ་རྒྱུད་ལས། གཏི་མུག་ཆགས་དང་ཞེ་སྡང་དང་། །ང་རྒྱལ་ཕྲག་དོག་མི་སྤང་ངོ། །ཞེས་གསུངས་ཏེ། འདི་ལ་དབྱེ་ན། གསལ་བཀྲ་ལས། ཡང་དག་དུག་ལྔ་ལོག་དུག་ལྔ། །ཞེས་པས་ཡང་ལོག་གཉིས་ཀྱི། ཡང་དག་པའི་དུག་ལྔ་ནི། ཆོས་ཐམས་ཅད་མཉམ་པ་ཉིད་དུ་རྟོགས་པས་ལྟ་བ་ལ་ཕྱོགས་རིས་དང་སྤྱོད་པ་ལ་བླང་དོར་གྱིས་འབྱེད་པ་མེད་པའི་གཏི་མུག དམིགས་མེད་ཀྱི་སྙིང་རྗེས་འགྲོ་ལ་ཆགས་པའི་འདོད་ཆགས། རིག་པ་ཡེ་ཤེས་ཀྱིས་ལོག་རྟོག་འཇོམས་པའི་ཞེ་སྡང་། མཉམ་ཉིད་ཀྱི་ལྟ་བ་གཤོངས་སུ་མི་འབེབས་པའི་ང་རྒྱལ། མཉམ་ཉིད་ཀྱི་ཀློང་དུ་གཉིས་འཛིན་མི་ཤོང་བའི་ཕྲག་དོག་སྟེ། རྟོགས་གོམས་ཀྱི་སྦྱོར་བས་མི་སྤང་བའོ། །ལོག་པའི་དུག་ལྔ་མི་སྤང་བ་ནི། ཉོན་མོངས་པའི་རང་བཞིན་ཤེས་ན། སྤང་བྱའི་རྫས་མ་གྲུབ་པའི་ཕྱིར་སྨིག་རྒྱུ་ལ་ཆུ་རགས་མི་དགོས་པ་བཞིན་དང་། སྐྱེད་རྫོགས་ཟབ་མོའི་ཐབས་ཀྱིས་ཟིན་ན་མི་འཆིང་བར་རྣམ་པར་གྲོལ་བའི་ལམ་ཡིན་པའི་ཕྱིར། དཔེ་རྨ་བྱ་དུག་གིས་མི་གནོད་པ་བཞིན་དང་། ཡེ་ནས་རྣམ་སྣང་སོགས་རིགས་ལྔའི་རང་བཞིན་ཡིན་པས་མི་སྤང་སྟེ། དཔེ་སྣུམ་འདོད་པས་ཏིལ་ལ་དོ་གལ་བྱེད་པ་བཞིན་ནོ། །དེས་ཐབས་ཀྱི་ལམ་ཟབ་མོ་ལ་ངེས་ཤེས་སྐྱེ་ཞིང་ཆོས་ཉིད་ཟབ་མོ་རྟོགས་པ་ལ་བློ་མྱུར་བའི་དགོས་པ་ཡོད་དེ་ཐ་མལ་རང་མཚན་དུ་ཞེན་པས་ནི་མ་ཡིན་ནོ། །གཉིས་པ་མི་དོར་བ་ལྔ་ནི། དཀར་རྩི་དམར་རྩི་དྲི་ཤ་ཆེན། །དག་པའི་སྣོད་ཆུ་མི་འདོར་རོ། །ཞེས་པས། བྱང་སེམས་དཀར་དམར་དྲིན་ཆེན་དྲི་ཆུ་ཤ་ཆེན་གྱི་དྭངས་མ་སྟེ་ལྔ་པོ། ཅིའི་ཕྱིར་མི་དོར་ན། སྒེག་པའི་གཞུང་ལས། གྲུབ་པ་བཞི་དང་ནད་ལྔ་བསལ། །ཐུན་མོང་དགོངས་པ་ལྔ་དོན་གཉེར། །གཙང་རྨེའི་རྟོག་པ་གཞོམ་ཕྱིར་བླང་། །ཞེས་གསུངས་ཏེ། གྲུབ་པ་བཞི་ནི། ཆོས་ཉིད་ངོ་བོར་གྲུབ་པ་བདུད་རྩི་ལྔ་སོགས་གཙང་རྨེ་མེད་པར་རང་བཞིན་མཉམ་པ་ཉིད་དུ་གནས་པ་སྟེ། ཐལ་རྒྱུད་ལས། དངོས་པོ་མ་ལུས་སེམས་ཉིད་ཕྱིར། །མཚན་ཉིད་བྲལ་བ་ཆོས་ཀྱི་དབྱིངས། །ཞེས་སོ། །ཆོས་ཅན་རང་བཞིན་གྱིས་གྲུབ་པ་ཇི་ལྟར་སྣང་བའི་ཆོས་ཐམས་ཅད་རང་བཞིན་གྱིས་དག་པ་རིགས་ལྔ་ཡེ་ཤེས་ལྔ་སོགས་སུ་གནས་པ་སྟེ། རང་བཞིན་མེད་པ་ཡེ་ཤེས་ལྔ། །བྱེད་པ་མེད་པར་སྣང་བའོ། །ཞེས་སོ། །ནུས་པའི་མཐུས་གྲུབ་པ་དེ་དག་ལ་བརྟེན་ནས་མཆོག་ཐུན་གྱི་གྲུབ་གཉིས་སྒྲུབ་ནུས་པ་སྟེ། ཤེས་རབ་ཏིང་འཛིན་ཐབས་དག་གིས། །ནུས་མཐུ་ངེས་པར་འབྱིན་པར་འགྱུར། །ཞེས་སོ། །བྱིན་གྱིས་བརླབས་ཀྱིས་གྲུབ་པ་དམ་རྫས་རྣམས་སྔོན་དཔལ་ཆེན་པོས་བྱིན་གྱིས་བརླབས་པའི་དབང་གིས། དེ་ཉིད་བརྟེན་པའི་དམ་ལྡན་གྱི་སྒྲུབ་པ་པོ་རྣམས་ལ་མ་མོ་མཁའ་འགྲོ་རྣམས་དགྱེས་ཤིང་འདུ་བས་བྱིན་གྱིས་རློབ་ཅིང་སྒྲུབ་པའི་གྲོགས་མཛད་པས་དངོས་གྲུབ་མྱུར་དུ་འགྲུབ་པའི་དགོས་པ་ཡོད་དེ། འདི་ལྟའི་ལམ་ལ་གང་གནས་པ། །ཕྱོགས་དུས་ཀུན་ནས་བྱིན་གྱིས་རློབ། །ཅེས་གསུངས་པའི་ཕྱིར་རོ། །ནད་ལྔ་ཇི་ལྟར་སེལ་ན། དྲི་ཆེན་གྱིས་དུག་ནད། དྲི་ཆུས་གག་པ། རཀྟས་གྲང་བ། ཤ་ཆེན་གྱིས་མཛེ་ནད། བྱང་སེམས་ཀྱིས་ཚ་བའི་ནད་རྣམས་སེལ་ལོ། །ཐུན་མོང་གི་དགོས་པ་ནི་རང་བཞིན་གྱིས་ནུས་པ་ལྔ་ཡོད་དེ། དྲི་ཆེན་གྱིས་ཚེ་རིང་། དྲི་ཆུས་སྐད་སྙན། ཤ་ཆེན་གྱིས་མཐུ་ཆེ། རཀྟས་མདངས་གསལ། བྱང་སེམས་ཀྱིས་མི་བརྗེད་པའི་གཟུངས་ཐོབ་པའོ། །མཆོག་གི་དགོས་པ་ཡང་རིགས་དང་ཡེ་ཤེས་དང་སྐུ་ལ་སོགས་པ་ལྔ་ལྔ་འགྲུབ་སྟེ། དྲི་ཆེན་གྱིས་བུདྡྷའི་རིགས་ཆོས་དབྱིངས་ཡེ་ཤེས་ཆོས་ཀྱི་སྐུ། དྲི་ཆུས་ལས་ཀྱི་རིགས་བྱ་གྲུབ་ཡེ་ཤེས་སྤྲུལ་པའི་སྐུ། ཤ་ཆེན་གྱིས་རིན་པོ་ཆེའི་རིགས་མཉམ་ཉིད་ཡེ་ཤེས་རྡོ་རྗེའི་སྐུ། རཀྟས་པདྨའི་རིགས་སོར་རྟོག་ཡེ་ཤེས་མངོན་བྱང་། བྱང་སེམས་ཀྱིས་རྡོ་རྗེའི་རིགས་དང་མེ་ལོང་ཡེ་ཤེས་ལོངས་སྤྱོད་རྫོགས་པའི་སྐུ་འགྲུབ་བོ། །དེ་ལྟར་མཆོག་ཐུན་གཉིས་སྒྲུབ་བྱེད་ཀྱི་རྫས་ཡིན་པ་དང་གཙང་རྨེའི་རྟོག་པ་གཞོམ་པའི་ཕྱིར་དང་དུ་བླང་བར་བྱ་བ་སྟེ། དེ་ལྟར་ཡན་ལག་གི་དམ་ཚིག་བཅུ་པོ་དག་པ་གསུམ་དང་མཉམ་པ་བཞིའི་དགོངས་སྤྱོད་ལས་མ་གཡོས་པའི་ངང་ནས་མི་སྤང་བ་དང་དུ་བླང་བར་བྱའོ། །གཉིས་པ་དེ་ལས་དབྱེ་བའི་རྣམ་གྲངས་ལ་གཉིས། སུམ་བརྒྱ་དྲུག་ཅུར་དབྱེ་བ་དང་། མཐའ་ཡས་པར་བསྟན་པའོ། །དང་པོ་ནི། རྩ་བའི་དམ་ཚིག་ལྔ་ལ་ནི། །གཅིག་ལའང་གཉིས་དང་བཅུ་ཕྲག་གསུམ། །ཡན་ལག་དམ་ཚིག་ལྔ་ཉིད་ལས། །གཅིག་ལའང་བཅུ་ཕྲག་གཉིས་སུ་དབྱེ། །ཞེས་གསུངས་ཏེ། འདི་ལ་སློབ་དཔོན་ཧཱུྃ་ཀ་ར། རྡོ་རྗེ་བཞད་པ། པད་འབྱུང་། བི་མ། ཛྙ་ན་ཀུ་མ་ར་སྟེ་བཞེད་པ་མི་འདྲ་བ་ལྔ་ཡོད་པར་བཤད་ལ། ད་ལྟའི་དུས་སུ་མཐོང་བ་སློབ་དཔོན་སྒེག་པ་རྡོ་རྗེའི་གཞུང་དམ་ཚིག་ཕྲ་རྒྱས་དང་གསལ་བཀྲ་གཉིས་ལས། སྔ་མའི་བཞེད་པ་རྩ་བ་ལ་བརྒྱ་དྲུག་ཅུ་དང་། ཡན་ལག་ཉིས་བརྒྱའི་གྲངས་སུ་དབྱེ་ཚུལ་ནི་སྤྱི་དོན་ཞལ་ལུང་དང་ཁྱད་པར་གཡུང་ཊཱིཀ་དུ་གསལ་བ་བཞིན་ལ། འདིར་གསལ་བཀྲ་ལྟར་དབྱེ་ན། རྩ་བ། ཡན་ལག ཉམས་རྒྱུ། སྤྱི་སྡོམ་བཞི་ལས། དང་པོ་རྩ་བ་ལ། བྱང་སེམས་གཉིས། སློབ་དཔོན་དྲུག མཆེད་བཞི། སྔགས་གསུམ། ཕྱག་རྒྱ་བཞི། གསང་བ་བཅུ་སྟེ། གོང་དུ་བསྟན་པ་ལྟར་ཉི་ཤུ་རྩ་དགུའོ། །ཡན་ལག་ལ་ཐུན་མིན། ཐུན་མོང་གཉིས་ལས། དང་པོ་ནི། གསལ་བཀྲ་ལས། སྤྱད་པ་ལྔ་དང་མི་སྤང་ལྔ། །དང་དུ་བླང་དང་སྒྲུབ་དེ་བཞིན། །ཤེས་བྱ་ལྔ་རྣམས་ཐུན་མིན་བཤད། །ཅེས་པས་ལྔ་ཚན་ལྔའི་དང་པོ་སྤྱད་བྱ་ལྔ་ལས། སྦྱོར་བ་ལ་ཉི་ཤུ་སྟེ་པད་ཅན། དུང་ཅན། རི་མོ་ཅན། བན་གླང་ཅན། ལྕུག་ཕྲན། སྡོང་གཅིག མེ་རེག ཕྱལ་བ་སྟེ་གཟུངས་{གཟུགས}མའི་རིས་བརྟགས་པ་བརྒྱད། མཉེན་ཅིང་དྲང་བ། སྟོད་སྨད་ཕྱེད་པ། ཡན་ལག་ཕྲ་བ། དཔྲལ་དབྱེ་ཆེ་བ། མིག་དཀྱུས་རིང་བ། སྨིན་མ་ནག་པ། ཆུ་ཞིང་རན་པ། ལུས་དག་ཅིང་ག་བུར་གྱི་དྲི་བྲོ་བ་སྟེ་མཚན་བརྟགས་པ་བརྒྱད། གསང་ཐུབ། ཤེས་རབ་ཆེ། སྤྱོད་ལམ་དལ། དད་པ་དང་ལྡན་པ་སྟེ་སྤྱོད་ལམ་བརྟགས་པ་བཞི་རྣམས་སོ། །སྒྲོལ་བ་ལ་བཅུ་བཞི་སྟེ། དཀོན་མཆོག་དང་སློབ་དཔོན་གྱི་སྐུ་དགྲ་གཉིས། དམ་ལས་ལོག་པ། མཆེད་ལ་འཁུ་བ། འདུ་བར་འོང་བ་ལ་གནོད་པ། སེམས་ཅན་ཡོངས་ལ་གནོད་པ། དམ་དགྲ་ངན་པའི་ངང་ཚུལ་ཅན་ཏེ་རྒྱུ་བདུན་དང་། འབྲས་བུ་ངན་སོང་གསུམ་བཅས་བསྒྲལ་ཞིང་བཅུ་དང་། སྒྲལ་མཁན། བསྒྲལ་ཐབས། དགོས་ཆེད། ཐེག་འོག་གི་རྩོད་སྤང་དང་བཞི་བཅས་སམ། ཡང་ན་བསྒྲལ་ཞིང་ལ། དཀོན་མཆོག་གསུམ་སློབ་དཔོན་མཆེད་བཅས་ཀྱི་སྐུ་དགྲ་ལྔ་དང་། དམ་དགྲ་དང་ངན་པའི་ངང་ཚུལ་སོ་སོར་དབྱེ་བའི་མི་བཅུ་གཅིག ངན་སོང་གསུམ་དང་བཅུ་བཞིའོ། །མ་བྱིན་ལེན་པ་ལ་བཅུ་བདུན་ཏེ། ཞིང་བཅུའི་ནོར་བཅུ། གཟུངས་མ། བཀྲ་ཤིས་པའི་རྫས། སྦས་ཆོས། བྱིན་ཆེན་རྫས། བསྲུང་བ་ཡོད་པ། བསྲུང་བ་མེད་པ། ཕྱུག་པོ་སེར་སྣ་ཅན་གྱི་ནོར་རྣམས་ལེན་པའོ། །བརྫུན་ལ་བཅུ་བདུན་ཏེ། ཀུན་རྫོབ་ཀྱི་ཆོས་མཚན་ཉིད། རྣམ་གྲངས། ལྟོས་བཏགས་ཏེ་གསུམ་རང་བཞིན་མེད་པར་སྨྲ་བ་ལྟ་བའི་རྫུན་གསུམ། དཀོན་མཆོག་སློབ་དཔོན་མཆེད། སེམས་ཅན་ཡོངས་ལ་གནོད་པ་བསྲུང་བའི་ཕྱིར་སྨྲ་བ་སྤྱོད་པའི་རྫུན་བཞི། གསང་བཅུ་སྲུང་བའི་རྫུན་བཅུ་རྣམས་སོ། །ངག་བརླང་ལ་བཅོ་ལྔ་ཏེ། ཞིང་བཅུ་ལ་བརླང་ཚིག་བཅུ། དྲག་ཤུལ་གྱི་སྔགས། གཟུངས་མ་ལ་བརླང་པོར་སྦྱོར་བ། སློབ་བུའི་ཞེ་གཅོད་པ། འབྱུང་པོའི་ཞེ་གཅོད་པ། སྣོད་ལྡན་བུ་ལ་བརླང་ཆོས་བཤད་པ་རྣམས་ཏེ་སྤྱད་བྱ་ལྔ་ལ་བརྒྱད་ཅུ་རྩ་གསུམ། གཉིས་པ་མི་སྤང་བ་ལྔ་ལ། ཡང་དག་པའི་དུག་ལྔ་ལ་ལྟ་སྤྱོད་གཉིས་སུ་ཕྱེ་བས་བཅུ། ལོག་པའི་དུག་ལྔ་མི་སྤང་བ་སྟེ་བཅོ་ལྔའོ། །གསུམ་པ་དང་བླང་ལ། རྩ་བའི་བདུད་རྩི་ལྔ། མཐུས་གྲུབ་པ་ལྔ། བྱིན་གྱིས་བརླབས་ཀྱིས་གྲུབ་པ་ལྔ། ངོ་བོས་གྲུབ་པ་ལྔ། རང་བཞིན་གྱིས་གྲུབ་པ་ལ་ཡེ་ཤེས་ལྔ་དང་། རིགས་ལྔ་སྟེ་སུམ་ཅུའོ། །བསྒྲུབ་པ་བྱ་བ་ལ། རིགས་ལྔ། ཡེ་ཤེས་ལྔ། ཡབ་ལྔ། ཡུམ་ལྔ། སྐུ་ལྔ། གསུང་ལྔ། ཐུགས་ལྔ། ཡོན་ཏན་ལྔ། ཕྲིན་ལས་ལྔ་སྟེ་ཞེ་ལྔའོ། །ཤེས་པར་བྱ་བ་ལ། ཕུང་ལྔ་རིགས་ལྔ། འབྱུང་ལྔ་ཡུམ་ལྔ། དབང་པོ་ལྔ་རིགས་ལྔ། ཡུལ་ལྔ་ཡུམ་ལྔ་ཡན་ལག་ལྔ་རིགས་ལྔ། ཉིང་ལག་གཡས་ཀྱི་སོར་མོ་ལྔ་ཡབ་ལྔ། གཡོན་གྱི་ལྔ་ཡུམ་ལྔ། ཉོན་མོངས་ལྔ་ཡེ་ཤེས་ལྔ། དམ་རྫས་ལྔ་རིགས་ལྔ། ཤ་ལྔ་ཡུམ་ལྔ། ཕྱོགས་ལྔ་རིགས་ལྔ། ཁ་དོག་ལྔ་ཡེ་ཤེས་ལྔ། དུས་སོགས་སྙིགས་མ་ལྔ་སྐུ་ལྔ། ཉོན་ཡིད་འཁོར་བཞི་དང་བཅས་བདག་ཆགས་ལྔ་ཡེ་ཤེས་ལྔ་སྟེ་བདུན་བཅུ། དེ་ལྟར་ཐུན་མིན་གྱི་ཡན་ལག་ཉེར་ལྔ་ལ་ཉིས་བརྒྱ་ཞེ་གསུམ་མོ། །གཉིས་པ་ཡན་ལག་ཐུན་མོང་བ་ལ་བདག་གཞན་གཉིས་ཀྱི། བདག་དོན་དུ་བསྲུང་བ་ལ་ཉེར་གཅིག་སྟེ། རྒྱན་པོ་འགྱེད་དང་སྒེག་ཆོས་སྤོང་བ། དེ་བཞིན་དུ་དམག་སོགས་འདུས་སར་འགྲོ་བ། ཆང་དད་ཆེ་བ། ང་རྒྱལ་གྱིས་ལུས་ངག་གི་སྤྱོད་པ་མ་ཞི་བ། ཁེངས་སེམས་ཀྱིས་མ་གུས་ཤིང་སྙིང་རྗེ་མེད་པ། སྒོ་གསུམ་ལྷར་གསལ་ནས་ཡུལ་དམན་པ་ལ་ཕྱག་བྱེད་པ། རང་ལ་ཡོན་ཏན་མེད་ཀྱང་གོང་མར་བཅོས་པ། གཞན་གྱི་དགེ་བ་ལ་སྨད་པ། སྡིག་པ་ལ་བསྟོད་པ། བརྩོན་མེད་ལེ་ལོ་ཆེ་བ། སེར་སྣ་ཆེ་བ། གཉིད་ལ་དགའ་བ། འཇིག་རྟེན་གྱི་བྱ་བས་གཡེང་བ། ཁྲོ་གཏུམ་ཞེ་སྡང་ཆེ་བ། སྐྱོན་ཡོན་མི་ཤེས་ཤིང་གཞན་གྱིས་བཅོས་ཀྱང་མི་ཉན་པ། བླ་མ་དང་མཆེད་ཀྱི་བཀའ་གཅོག་པ། སྡིག་གྲོགས་ལ་བརྟེན་པ། གོང་མའི་ཐུགས་དཀྲུགས་པ་སོགས་བག་མེད་ཀྱི་སྤྱོད་པ། དགེ་བའི་དམ་བཅའ་འདོར་བ། ཡོ་བྱད་ལ་ཆོག་མི་ཤེས་པ། ཁེ་དྲག་གིས་རང་གི་ཕུན་ཚོགས་གཞན་ལ་ངོམ་པ་སྟེ་དེ་རྣམས་སྤང་ན་གཞན་གྱིས་བདག་ཉིད་གཙུག་ཏུ་བཀུར་བར་འགྱུར་རོ། །གཞན་དོན་དུ་བསྲུང་བྱ་གདུལ་བྱ་མི་སྤང་བ་ལ་ཞེ་བཞི་སྟེ། ཕར་ཕྱིན་དྲུག ཆོས་སྤྱོད་བཅུ། བསྡུ་དངོས་གཞི། ནང་པའི་ཐེག་པ་རིམ་དགུ། མུ་སྟེགས་ཀྱི་མགོ་སྙོམས་དགུ། འགྲོ་བ་དྲུག་གང་ལ་གང་འདུལ་གྱིས་སེམས་ཅན་གྱི་དོན་བྱེད་པ་སྟེ། དེ་ལྟར་ཐུན་མོང་བ་གཉིས་ལ་དྲུག་ཅུ་རེ་ལྔའོ། །གསུམ་པ་ཉམས་རྒྱུ་ལ་ཉི་ཤུ་སྟེ། བདག་རྒྱལ་གཞན་ཕམ་གྱི་ཐབས་ལ་བརྩོན་པ། བདག་གི་སྐྱོན་སྦ་ཞིང་ཡོན་ཏན་སྒྲོགས་པ། གཞན་གྱི་སྐྱོན་བརྗོད་ཅིང་ཡོན་ཏན་རྣམས་གསང་བ། གཞན་ལ་ཕྲག་དོག་གིས་ཐབས་ཀྱིས་སྨད་པ། རང་ཁེ་གྲགས་སོགས་འདོད་ཕྱིར་འབུལ་འགྱེད་སོགས་བྱེད་པ། ནོར་རྫས་རྣམས་ལ་ཆགས་སེམས་ཀྱིས་སྦར་མོ་བསྡམས་པ། ཅི་བྱེད་རང་འདོད་ཆེ་བས་གཞན་ཕྱོགས་འདོར་བ། ཆུང་དད་ཆེ་བ། རང་མཐོང་ཕོ་སྒོ་ཆེ་བ། ལྟ་སྒོམ་སྤྱོད་གསུམ་སྙོམས་ལས་སུ་བཏང་བ། ཆོས་ལ་ཕྱོགས་རིས་ཆེ་བ། ཡོན་ཏན་གཞན་ལ་ངོམ་སྐྱེན་པ། གསང་བར་གདམས་པ་སོགས་གལ་ཆུང་ངུ་འཇོག་པ། བརྩོན་འགྲུས་ཆུང་ཞིང་ལེ་ལོ་ཆེ་བ། གཙང་རྨེ་གཉིས་རྟོག་ཆེ་བ། བླ་མ་དང་མཆེད་ཀྱི་སྐྱོན་ཡོན་ལ་སྒྲོ་སྐུར་འདེབས་པ། གྲོགས་ཀྱི་ཚོད་ཉུལ་ཞིང་སྐྱོན་གང་ཡོད་གཞན་ལ་སྒྲོགས་པ། རིགས་བརྒྱུད་དང་བུ་ཚ་སོགས་སྤེལ་བའི་དོན་དུ་བརྩོན་པ། གཅིག་པུར་དབེན་པ་མི་བསྟེན་པ། འདུ་ཚོགས་གར་ཆེ་ལ་དགའ་བ་སྟེ། དེ་རྣམས་དམ་ཚིག་ཉམས་པའི་རྒྱུར་འགྱུར་རོ། །བཞི་པ་སྤྱི་སྡོམ་ལ་གསུམ་སྟེ། སྣོད་བཅུད་དག་མཉམ་ཆེན་པོར་རྟོགས་པ་ཤེས་བྱ་ལྟ་བའི་མདོ། དེའི་ངང་ལས་མི་འདའ་ཞིང་མ་ཡེངས་པ་གོམས་བྱེད་ཏིང་ངེ་འཛིན་གྱི་མདོ། དེ་ལྟར་རྟོགས་པའི་བློ་ངོར་དམ་ཚིག་བསྲུང་མཚམས་ལས་འདས་པ་བླང་དོར་མེད་པ་སྤྱོད་པའི་མདོ་སྡེ། དམ་ཚིག་དམ་ཚིག་ཞེས་བྱ་བ། །གུད་ན་ཡོད་པ་མ་ཡིན་ཏེ། །རང་གི་སེམས་ཉིད་དམ་ཚིག་ཡིན། །ཞེས་གསུང་། དེ་ལྟར་དམ་ཚིག་རྩ་བའི་ཉེར་དགུ། ཡན་ལག་ཐུན་མིན་གྱི་ཉིས་བརྒྱ་ཞེ་གསུམ། ཐུན་མོང་བདག་གཞན་གཉིས་ཀྱི་རེ་ལྔ། ཉམས་རྒྱུ་ཉི་ཤུ། མདོ་གསུམ་བཅས་སུམ་བརྒྱ་དྲུག་ཅུར་བཞེད་པ་ནི་སློབ་དཔོན་སྒེག་པའི་རྡོ་རྗེའམ་གསང་མཚན་རྡོ་རྗེ་བཞད་པས་མཛད་པའི་དམ་ཚིག་གསལ་བཀྲའི་དགོངས་པ་མཁས་གྲུབ་ཡེ་ཤེས་རྒྱལ་མཚན་གྱིས་བཀྲལ་བ་བཞིན་ཡིན་ལ། གཞན་ཀུན་མཁྱེན་རོང་ཀློང་གི་དགོངས་པའི་དབྱེ་ཚུལ་སོགས་ནི་རང་རང་གི་གཞུང་བཞིན་ཤེས་པར་བྱའོ། །གཉིས་པ་མཐའ་ཡས་པར་དབྱེ་བ་ནི། རྒྱུད་ལས། དམ་ཚིག་འདི་ནི་རྨད་པོ་ཆེ། །འཇིག་རྟེན་དྲུག་གི་ཕྱོགས་བཅུ་ན། །སྲིད་གསུམ་འགྲོ་བ་ཇི་སྙེད་པའི། །རྟོག་འདུལ་དམ་ཚིག་དེ་སྙེད་སྤྲོ། །ཞེས་གསུངས་པས། སེམས་ཅན་གྱི་རྟོག་ཚོགས་ཇི་སྙེད་པའི་གཉེར་པོར་དམ་ཚིག་ཀྱང་དེ་སྙེད་དུ་སྤྲོ་བས་ཚད་དང་བརྗོད་པའི་ཡུལ་ལས་འདས་པས་མཐའ་ཡས་པའོ། །བཞི་པ་ཇི་ལྟར་བསྲུང་བའི་ཚུལ་ལ། ཉམས་པའི་ཉེས་དམིགས། མ་ཉམས་པའི་ཡོན་ཏན། བསྲུང་ཐབས་དངོས་དང་གསུམ་ལས། དང་པོ་ནི། རྒྱུད་ལས། རྩ་བའི་དམ་ཚིག་ཉམས་གྱུར་ན། །སྒྲུབ་པ་ཐམས་ཅད་ལོག་པར་འགྱུར། །ཡིད་དུ་མི་འོང་སྣ་ཚོགས་པའི། །འབྲས་བུ་མི་འདོད་བཞིན་དུ་འདུ། །ཡན་ལག་དམ་ཚིག་ཉམས་གྱུར་ན། །འབྲས་བུ་མེད་ཅིང་ངན་སོང་ལྟུང། །ཞེས་སོ། །གཉིས་པ་ནི། དམ་ཚིག་འདི་ནི་རྡོ་རྗེ་ཆེ། །སངས་རྒྱས་ཀུན་གྱི་བདག་ཉིད་ཡིན། །ཞེས་དང་། རྡོ་རྗེ་ལས། དམ་པའི་ཚུལ་བཞིན་ངེས་སྤྱད་ན། །མི་མཐུན་ཚོགས་རྣམས་ཚིག་པར་འགྱུར། །ཞེས་སོ། །གསུམ་པ་ནི། ལུང་རྡོ་རྗེ་བཀོད་པ་ལས། མདོར་ན་བདག་གི་སྒོ་གསུམ་པོ། །དག་པ་གསུམ་གྱི་མཐའ་བཟུང་ནས། །ལྷ་དང་གྲོགས་དང་སློབ་དཔོན་དང། །བདག་ཉིད་བདག་ལ་མ་ཁྲེལ་བའི། །ཚུལ་གསུམ་མི་གཏོང་དང་བཅས་གསུམ། །མཐར་ཕྱིན་རྒྱ་རྟགས་རྣམ་བཞི་བཅས། །མདོ་དོན་དྲན་པས་བསྔོ་བགྲང་བྱ། །ཞེས་གསུངས་པ་བཞིན། རྒྱུན་དུ་རང་རྒྱུད་ལ་བརྟགས་ཏེ། སྒོ་གསུམ་གྱི་བྱ་བ་མ་ཡིན་པ་ལས་ལྡོག་ཅིང་། བྱ་བར་འོས་པ་རྣམས་ལ་འཇུག་པ་སྟེ་ཉེས་པའི་སྐྱོན་མེད་པར། སྒོ་གསུམ་རྡོ་རྗེ་གསུམ་དུ་ཤེས་པས་ལྷ་སྔགས་ཕྱག་རྒྱ་ཏིང་ངེ་འཛིན་དང་མཆོད་པ་སོགས་ལ་བརྩོན་པས་དངོས་གྲུབ་སྒྲུབ་པ་སྟེ། དེ་ཡང་བསྒོམ་སྒྲུབ་ལྷས་མ་ཁྲེལ། དད་མོས་སློབ་དཔོན་གྱིས་མ་ཁྲེལ། བརྩེ་གདུང་མཆེད་ལྕམ་གྱིས་མ་ཁྲེལ། བསྲུང་མཚམས་གཡོ་སྒྱུ་རང་སེམས་ཀྱིས་མ་ཁྲེལ་བ་སྟེ་བཞིའི་སྒོ་ནས། ལྟ་སྤྱོད་ཏིང་ངེ་འཛིན་གསུམ་ལ་རང་དབང་འབྱོར་པས། མངོན་རྟགས་ལམ་མཐར་ཕྱིན་གྱི་རྒྱ་རྟགས། དམ་ཅན་མགུ་ཞིང་མཐུ་རྩལ་ཆེ་བ། བྱིན་རླབས་ཆེ་ཞིང་རྟོགས་པ་འཆར་བ། ཡིད་འོང་འབྱུང་ཞིང་འདོད་པ་འགྲུབ་པ། མང་པོས་བཀུར་ཞིང་སྙན་གྲགས་འབྱུང་བ་སྟེ། དེ་ལྟ་བུའི་ཚུལ་གྱིས། དམ་ཚིག་གི་ངོ་བོ་དང་། རྣམ་གྲངས། ཁེ་ཉན་སོགས་མ་བརྗེད་པར་དྲན་པའི་གཟུངས་སུ་བཟུང་ནས། ཉིན་མཚན་དུས་དྲུག་སོགས་སུ་བསྔོ་བགྲང་བྱ་ཞིང་དྲན་ཤེས་བག་ཡོད་ཀྱི་སྒོ་ནས་བསྲུང་བ་ལ་འབད་དགོས་ཏེ། སྡོམ་འབྱུང་ལས། ཅི་ནས་དངོས་གྲུབ་མཆོག་འདོད་ན། །སྲོག་ནི་ཡོངས་སུ་གཏོང་ཡང་སླ། །འཆི་བའི་དུས་ལ་བབ་ཀྱང་སླའི། །རྟག་ཏུ་དམ་ཚིག་བསྲུང་བར་བྱ། །ཞེས་སོ། །ལྔ་པ་ཆེ་ཡོན་བཤད་པ་ནི། གསང་སྔགས་བླ་མེད་ཀྱི་དམ་ཚིག་འདི་ནི་འོག་མའི་འདུལ་སྡོམ་སོགས་ལས་ཁྱད་ཆོས་དུ་མའི་སྒོ་ནས་ཁྱད་པར་དུ་འཕགས་ཏེ། ཐམས་ཅད་སངས་རྒྱས་པར་རྟོགས་པས་ཀུན་ཏུ་བཟང་པོའི་ཕྱག་རྒྱས་ཐེབས་པའི་ཆེ་བ་དང་། འཇིག་རྟེན་གྱི་ལྷ་ཆེན་པོ་རྣམས་ཀྱིས་བཀུར་གནས་སུ་མཐོང་བས་མཐུ་དང་བྱིན་རླབས་ཀྱི་ཆེ་བ་དང་། རྒྱལ་བ་སྲས་དང་བཅས་པས་རྒྱུད་དག་པ་ལ་དགོངས་ཤིང་བྱིན་གྱིས་རློབ་པས་དངོས་གྲུབ་མྱུར་བའི་ཆེ་བ་དང། བདེ་བར་གཤེགས་པ་རྣམས་དང་སྤྱོད་ཡུལ་མཐུན་པས་འཁོར་བ་དང་ངན་སོང་གིས་མི་འཇིགས་ཤིང་དབུགས་ཕྱིན་པའི་ཆེ་བ་དང་། འོག་མའི་སྡོམ་པ་ཇི་སྙེད་པ་ཐམས་ཅད་འདུས་ཤིང་རྣམ་པར་དག་པའི་ཆེ་བ་དང་། གལ་ཏེ་ཉམས་ཀྱང་གཞན་ལ་ལྟོས་པ་མེད་པར་རང་སྟོབས་ཀྱིས་སྐོང་ནུས་པའི་ཆེ་བ་སོགས་འཕགས་ཆོས་དང་ཡོན་ཏན་བསམ་གྱིས་མི་ཁྱབ་པ་དང་ལྡན་ཏེ་། རྒྱུད་ལས། གཞན་ཡང་རྒྱལ་མཆོག་ཀུན་བཟང་གི། །ཐམས་ཅད་མ་ལུས་ཕྱག་རྒྱ་ཡིས། །སྒྲུབ་མེད་མ་ལུས་ཐམས་ཅད་འགྲུབ ། །དེ་ལ་སོགས་ཏེ་མཐའ་ཡས་མཆོག །རྒྱལ་བའི་རིགས་མཆོག་འཛིན་པ་དེ། །འཇིག་རྟེན་གཙོ་དང་འཁོར་གྱིས་བཀུར། །དམ་པའི་མཆོག་དང་དམ་པ་ཡི། །སྲས་དང་སྤུན་དགོངས་བྱིན་གྱིས་རློབ། །བདེ་གཤེགས་ཉིད་ཀྱི་ཡུལ་ལ་ཞུགས། །འཇིགས་མེད་ཀུན་ཏུ་བཟང་པོར་སྦྱོར། །ཞེས་སོགས་གསུངས་པ་བཞིན་ནོ། །འདིས་ཀྱང་གཞི་རྒྱུད་སྙིང་པོའི་ཁམས། །ལམ་རྒྱུད་དབང་དང་དམ་ཚིག་དང་། །རིིམ་གཉིས་ཟབ་མོའི་ཐབས་བརྟེན་ནས། །འབྲས་རྒྱུད་སྐུ་བཞི་མངོན་བྱེད་ཤོག །ཅེས་པའང་སྐྱབས་རྗེ་རབ་འབྱམས་དྲུག་པའི་གཟིགས་དཔེ་དང་སྔ་འགྱུར་བསྟན་པའི་ཆུ་མགོ་འོག་མིན་ཨོ་རྒྱན་སྨིན་གྲོལ་གླིང་ནས་བྱོན་པའི་དགེ་སྔགས་འགྱུར་མེད་དཀོན་མཆོག་འོད་ཟེར་དང་འགྱུར་མེད་ཐུབ་བསྟན་ཡོན་ཏན་ཟུང་དང་བློ་གསལ་འགྱུར་མེད་ཚུལ་ཁྲིམས་བཅས་ཀྱི་བཞེད་ངོར་སྔགས་བཙུན་འགྱུར་མེད་པདྨ་རྣམ་རྒྱལ་གྱིས་ཤིང་གླང་ཟླ་ཚེས་བདེན་བཞིའི་ཆོས་འཁོར་བསྐོར་བའི་དུས་ཆེན་ཉིན་བྲིས་པ་མངྒལཾ། དགེའོ། །དགེའོ། །དགེའོ།། །།
རྫོགས་པ་ཆེན་པོ་སེམས་ཉིད་ངལ་གསོའི་མཆན་འགྲེལ་བསྡུས་དོན་པདྨ་དཀར་པོའི་ཕྲེང་བ།
༄༅། །མཧཱསནྡྷིཙིཏྟཱབིསྲནྟྲསྱཔིབྀཏྟིཙིཏཱིརྠཔུཎྜརིཀམཱལྱནཱམཏིསྨ།
༄༅། །རྫོགས་པ་ཆེན་པོ་སེམས་ཉིད་ངལ་གསོའི་མཆན་འགྲེལ་བསྡུས་དོན་པདྨ་དཀར་པོའི་ཕྲེང་བ་ཞེས་བྱ་བ་བཞུགས་སོ། །
༄༅། །དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །ཆོས་ཐམས་ཅད་གཞུང་ལམ་གཅིག་ཏུ་སྟོན་པ་རྫོགས་པ་ཆེན་པོ་སེམས་ཉིད་ངལ་གསོ་འདི་ཉིད་འཆད་པར་བྱེད་པ་ལ། ཀླད་ཀྱི་དོན་བསྟན་བཅོས་རྩོམ་པ་ལ་འཇུག་པའི་ཚུལ་བརྗོད། གཞུང་གི་དོན་དངོས་རྒྱ་ཆེར་བཤད། མཐར་ཕྱིན་པ་མཇུག་གི་དོན་བསྟན་པ་དང་གསུམ་ལས། དང་པོ་ཀླད་ཀྱི་དོན་ལ་གསུམ། མཚན་དོན། ཕྱག་གི་དོན། བརྩམ་པར་དམ་བཅའ་བའོ། །དང་པོ་མཚན་དོན་ལ། མཚན་བསྒྱུར་བ། རྒྱ་གར་སྐད་དུ། མཧཱསནྡྷིཙིཏྟབིསྲནྟནཱམ། བོད་སྐད་དུ། རྫོགས་པ་ཆེན་པོ་སེམས་ཉིད་ངལ་གསོ་ཞེས་བྱ་བ། ཤན་སྦྱར་བ། མ་ཧཱ་ཆེན་པོ། སནྡྷི་རྫོགས་པ། ཙིཏྟཱ་སེམས། ཏ་ལ་རིང་ཆ་བྱིན་པའི་ཁོང་ནས་ཤུདྡྷ་ཞེས་འབྱུང་བ་དེ་ཁོ་ན་ཉིད་དུ་དག་པར་སྦྱོར་བ་སྟེ། སྒྲ་བསྒྲུབས་པས་སེམས་ཉིད་ཅེས་པའོ། །བིསྲནྟ་ངལ་གསོ། ནཱམ། ཞེས་བྱ་བའོ། །མཚན་བཤད་པ། འཁོར་འདས་ཀྱི་ཆོས་ཐམས་ཅད་རང་བྱུང་གི་ཡེ་ཤེས་སུ་ཡེ་ནས་ཚང་ཞིང་དེ་ལས་ཆོས་ཐམས་ཅད་འབྱུང་བས། རྫོགས་པ་དེའི་གོང་ན་རྟོགས་བྱ་གཞན་མེད་པས་ཆེན་པོ་འཁོར་བར་དུབ་པའི་སེམས་ཉིད་ཞི་བའི་དབྱིངས་སུ་ངལ་གསོ་ཞེས་བྱ་བ། ཞེས་དོན་ལ་མཚན་དུ་གསོལ་བའོ། །གཉིས་པ་ཕྱག་གི་དོན་ལ་གཉིས། དང་པོ་མདོར་བསྟན་པ། དཔལ་གཉིས་སུ་མེད་པའི་ཡེ་ཤེས་ཀུན་ཏུ་བཟང་པོ་ཡོན་ཏན་དཔག་ཏུ་མེད་པས་བརྒྱན་པས་གཞན་དོན་འཕྲོ་བ་དེ་ལ་ཕྱག་འཚལ་ལོ། །གཉིས་པ་རྒྱས་པར་བཤད་པ། གཞི་གདོད་མའི་དབྱིངས་སུ་མངོན་པར་བྱང་ཆུབ་པའི་མགོན་པོ་བཅོམ་ལྡན་འདས་སྤངས་པ་དང་རྟོགས་པའི་ཡོན་ཏན་གངས་ཆེན་མཚོ་ཡི་རང་བཞིན། མཁྱེན་བརྩེའི་རང་བཞིན་ཚུ་རོལ་གྱི་བློས་གཏིང་མཐའ་དཔག་ཡས་ཤིང་། དེའི་གསུང་བསྒྲུབས་པས་རྒྱལ་བ་རྒྱལ་སྲས་ཡིད་བཞིན་གྱི་ནོར་བུ་འབྱུང་བའི་གནས་མཁའ་ཁྱབ་སེམས་ཅན་གྱི་ཁམས་ཀུན་ལ་གནས་སྐབས་དང་མཐར་ཐུག་གི་ཕན་བདེའི་སྤྲིན་ཕུང་འཕྲོ་བའི་ཕྱོགས་དུས་ཀྱི་རྒྱལ་བ་སྲས་དང་བཅས་པ་ཐམས་ཅད་ལ་ཕྱག་འཚལ་ལོ། །གཉིས་པ་བརྩམ་པར་དམ་བཅའ་བ། སེམས་ཀྱི་རང་བཞིན་ཡེ་ནས་འོད་གསལ་བའི་ཆོས་སྐུ་དྲི་མ་མེད་པ་རྒྱལ་བའི་ཁམས་རང་ལ་ཡོད་ཀྱང་མ་རིག་པ་བདག་ཏུ་འཛིན་པས་རང་ཞལ་བསྒྲིབས་ནས་སྲིད་པ་འདིར་འཁྱམས་ཏེ་རྒྱུ་ལས་དང་ཉོན་མོངས་པས་བསྐྱེད་པའི་འབྲས་བུ་སྡུག་བསྔལ་གསུམ་གྱི་མྱ་ངམ་གྱི་ཐང་དཀྱིལ་དུ་དུས་རིང་མོ་ནས་དུབ་པའི་འགྲོ་བ་རྣམས་ལ་ངེས་དོན་སྙིང་པོ་བསྟན་ནས་སེམས་ཉིད་དེ་རིང་རྣམ་གྲོལ་མཆོག་ལ་ངལ་གསོ་བར་བྱའོ། །གཉིས་པ་གཞུང་གི་དོན་དངོས་རྒྱ་ཆེར་བཤད་པ་ལ་ལེའུ་བཅུ་གསུམ་ལས། དང་པོ་དལ་འབྱོར་རྙེད་དཀའ་བསམ་པའི་ལེའུ་ལ་གསུམ་སྟེ། ལེའུ་ལ་འཇུག་པ་རྒྱུའི་དོན། ལེའུ་དངོས་ཀྱི་དོན། ལེའུ་རྫོགས་པ་མཇུག་གི་དོན་བསྟན་པའོ། །དང་པོ། བྱང་ཆུབ་སྒྲུབ་པའི་རྟེན་དལ་འབྱོར་ཡིན་པས་དེ་བསྔགས་པའི་རིམ་པ་ནི། བྱང་ཆུབ་སྒྲུབ་པའི་གྲོགས་དག་དལ་འབྱོར་རིན་ཆེན་སྙིང་པོའི་ལུས། འགྲོ་དྲུག་ནང་ནས་རྙེད་པར་ཤིན་ཏུ་དཀའ། །ཇི་ལྟར་ལོང་བས་རིན་ཆེན་གཏེར་རྙེད་བཞིན། །རབ་ཏུ་དགའ་བས་ཕན་བདེ་བསྒྲུབ་པར་བྱ། །གཉིས་པ་ལ་ལྔ་སྟེ། དལ་འབྱོར་གྱི་དབྱེ་བ། དེ་ཐོབ་དུས་ཆོས་ལ་འབད་དགོས་པའི་རྒྱུ་མཚན། དབྱེ་བའི་གནས་གཞན། ཆོས་ལ་ངེས་པས་དལ་འབྱོར་དོན་ཡོད་པར་གདམས་པ། སྤྲོ་དགའ་བསྐྱེད་ནས་དལ་འབྱོར་སྙིང་པོ་ལོན་པར་གདམས་པའོ། །དང་པོ་ནི། དལ་དང་འབྱོར་པ་དེ་ཡང་གང་ཞེ་ན། །བདག་ནི་སེམས་དམྱལ་ཡི་དྭགས་མ་སྐྱེས་ཤིང་། །དུད་འགྲོ་འདི་གསུམ་ལུས་མི་ཁོམ། ཚེ་རིང་ལྷ་དང་ཀླ་ཀློ་དང་ལོག་ལྟ་སངས་རྒྱས་ཀྱིས་སྟོངས་འདི་བཞི་སེམས་མི་ཁོམ་པས་སོ། །ལྐུགས་པ་འདི་དག་མི་ཁོམ་པ་སྟེ་མི་ཁོམ་བརྒྱད་པོ་དག་ལས་རབ་འདས་ཤིང་། མིར་གྱུར་ཡུལ་དབུས་སྐྱེས་དང་དབང་པོ་ཚང་། །ལས་མཐའ་མ་ལོག་གནས་ལ་དད་པ་སྟེ། །རང་འབྱོར་དམ་པ་ལྔ་ཡང་ཚང་གྱུར་ཅིང་། །སངས་རྒྱས་བྱོན་དང་ཆོས་གསུང་བསྟན་པ་གནས། །གནས་ཕྱིར་ཞུགས་དང་གཞན་གྱིས་སྙིང་བརྩེ་བ། །གཞན་འབྱོར་ལྔ་སྟེ་དལ་འབྱོར་བཅོ་བརྒྱད་པོ། །དལ་བ་ངོ་བོ་དང་འབྱོར་པ་ཁྱད་པར་གྱི་ཆོས་ཏེ་ཨུཏྤལ་དང་སྔོན་པོ་བཞིན་ནོ། །དེ་རྣམས་རང་ལ་ལེགས་པར་ཚང་བའི་གནས་སྐབས་འདིར་སྙིང་ནས་བརྩོན་པས་ཐར་པ་བསྒྲུབ་པར་བྱ། གཉིས་པ་ལ་བདུན་ཏེ། དང་པོ། ད་རེས་ཆོས་ལ་མ་འབད་ན་འཁོར་བ་མཐའ་མེད་དུ་འཁྱམས་པ་ལ་བསམ་ནས་ཀྱང་ཆོས་ལ་འབད་དགོས་པ། དེ་ལྟར་དལ་འབྱོར་ཕུན་སུམ་ཚོགས་པའི་རྟེན་ཐོབ་ཀྱང་སྲིད་པའི་བདེ་བ་ཅུང་ཟད་ལ་ཆགས་པའི་དབང་གིས་གལ་ཏེ་ཚེ་འདིར་ཕན་པ་མ་བསྒྲུབས་ན། ཕྱིས་ནས་བདེ་འགྲོའི་སྒྲ་ཡང་མི་ཐོས་ཤིང་། །ངན་འགྲོར་རྒྱུན་རིང་ཡང་དང་ཡང་འཁོར་ཏེ། །སྤང་བླང་མི་ཤེས་ལོག་པའི་ལམ་འགྲོ་ཞིང་། །ཐོག་མཐའ་དུས་མེད་འཁོར་བར་འཁྱམས་འཚལ་ལོ། །གཉིས་པ་རང་དབང་ཡོད་དུས་ཐར་པའི་ལམ་སྣ་ཟིན་དགོས་པས་ཀྱང་ཆོས་ལ་འབད་དགོས་པ། དེ་ལྟ་བུའི་གཏིང་མཐའ་མེད་པའི་འཁོར་བ་ནས་ཐར་པའི་གོ་སྐབས་དཀའ་བས་དམ་ཆོས་ལ་སྙིང་ནས་བརྩོན་པར་གདམས་པ་དེ་བས་ད་ལྟ་རྒ་བ་དང་རྒུད་པ་དང་འཆི་བས་མ་ཟིན་ཅིང་རང་དབང་ཡོད་དུས་འདིར། ལེགས་པའི་ལམ་ལ་མཐུན་པའི་རྟེན་འབྲེལ་གྱིས་ལམ་སྣེ་ཟིན་པར་བྱས་ཏེ། དགེ་ཆོས་མི་ཟད་ཚོགས་གཉིས་བསྟེན་བྱས་ཏེ། །སྲིད་པའི་གྲོང་ལས་རབ་ཏུ་འདའ་བར་མཛོད། །གསུམ་པ་དུས་སྐབས་འཛོམས་པའི་གྲུ་བོ་རྙེད་དཀའ་བས་ཀྱང་ཆོས་ལ་འབད་པ། ད་རེས་བླང་དོར་གྱི་གནས་ཤེས་ཤིང་བསྒྲུབ་ཏུ་ཡོད་པའི་དལ་འབྱོར་གྱི་རྟེན་དགེ་བའི་བཤེས་གཉེན་གྱིས་ཟིན་པའི་དུས་འདིར་ཚད་དང་མཐའ་མི་མངོན་ཞིང་འཇིགས་སུ་རུང་བའི་འཁོར་བའི་ཆུ་གཏེར་ཕ་མཐའ་ཡས་འདི་ལས། རིན་ཆེན་གྲུ་བོ་ཐོབ་དུས་མ་བརྒལ་ན། །གཏན་དུ་ཉོན་མོངས་སྡུག་བསྔལ་དབའ་ཀློང་དུ། །རབ་ཏུ་འཁྲུགས་ཚེ་བདག་གིས་ཇི་ལྟར་བྱ། །བཞི་པ་ཀུན་རྟོག་མཐའ་དག་ཞི་བར་བྱ་བའི་ཕྱིར་ཡང་ཆོས་ལ་འབད་པ། དེ་བས་མྱུར་དུ་བརྩོན་པའི་གོ་བགོས་ཏེ། དབུས་མཐའ་ལས། དེ་ལ་དོན་མཐོང་རྣམ་པར་ཤེས། །དེ་ཡི་ཁྱད་པར་སེམས་ལས་བྱུང་། །ཞེས་གསུངས་པ་ལྟར། སྐབས་འདིར་རྟོག་པ་སེམས་དང་དཔྱོད་པ་སེམས་བྱུང་གི་རྙོག་པ་རབ་ཞིའི་ཕྱིར་བརྩོན་པས་གཟུང་འཛིན་མེད་པའི་ཡེ་ཤེས་དྲི་མེད་སེམས་ཉིད་འོད་གསལ་གྱི་དོན་མཐོང་བར་འགྱུར་བའི་ལམ་ལ་འཛེགས་ཏེ། དེ་ལྟ་བུའི་བྱང་ཆུབ་ཀྱི་ལམ་ཉམས་སུ་ལེན་པ་ལ་བར་ཆད་ལེ་ལོ་སོགས་ཀྱི་རྐྱེེན་མེད་པར་མཛོད། དེ་ལྟར་ཡང་རིམ་ལྔ་ལས། སེམས་དང་སེམས་བྱུང་སྤྲོས་པ་ཀུན། །ཉེ་བར་ཞི་བ་དེ་ཡི་ཚེ། །འོད་གསལ་བ་ཡི་ཡེ་ཤེས་ནི། །མི་རྟོག་མཐའ་དབུས་མེད་པར་འཆར། །ཞེས་གསུངས། དེ་ལྟར་རྟོག་དཔྱོད་ལ། སེམས་སེམས་བྱུང་བག་ཆགས་སུ་བཏགས་པ་བ་མཐའ་དག་སངས་རྒྱས་ཀྱི་སར་འགགས་པ་ཡིན་ཏེ། འཇུག་པ་ལས། ཤེས་བྱའི་བུད་ཤིང་སྐམ་པོ་མ་ལུས་པ། །བསྲེགས་པས་ཞི་སྟེ་རྒྱལ་རྣམས་ཆོས་ཀྱི་སྐུ། །དེ་ཚེ་སྐྱེ་བ་མེད་ཅིང་འགགས་པ་མེད། །སེམས་འགགས་པ་སྟེ་སྐུ་ཡི་མངོན་སུམ་མཛད། །ཅེས་གསུངས། མཉམ་བཞག་གི་ཚེ་ནའང་འགགས་ཏེ། འདུལ་བ་ལུང་ལས། དགེ་སློང་བསམ་གཏན་ལ་མཉམ་པར་བཞག་པའི་སེམས་ཀྱི་རྒྱུ་བ་ཡང་འགགས་ཀྱང་དབང་པོའི་ཤེས་པ་ཡུལ་ལ་མི་སྣང་བ་མ་ཡིན་ཏེ། ཡུལ་འཁོར་སྐྱོང་། རྫིང་གཡོ་བ་མེད་པར་གཟུགས་བརྙན་ཤར་བ་བཞིན་ནོ་ཞེས་སོ། །སངས་རྒྱས་ཀྱི་ས་ན་སེམས་ཆེན་པོ་ཡོད་པར་བཤད་པ་ནི་ཡེ་ཤེས་ཆེན་པོ་ཉིད་ཡིན་ནོ། །ལྔ་པ་མ་འབད་ན་ཡུན་དུ་གདུང་བས་ཀྱང་ཆོས་ལ་འབད་པ། དེ་ལྟར་སྔོན་གྱི་དགེ་བའི་སྟོབས་ཀྱིས་ཐོབ་པའི་སྐྱེ་བ་གང་ལ་བདེ་ལེགས་ཆོས་ཀྱི་གཞིར་གྱུར་པ། རིན་ཆེན་དྲི་མ་མེད་པའི་སྣོད་རྙེད་ནས། །བདུད་རྩིའི་ཆོས་ཆར་བསིལ་བ་མི་འཛིན་ན། །འཁོར་བའི་གདུང་བས་རང་ཉིད་བརླག་པར་ཟད། །དྲུག་པ་སངས་རྒྱས་ཀྱི་ཆོས་ཟབ་མོ་འགྲུབ་སླ་བས་ཀྱང་ཆོས་ལ་འབད་པ། དལ་བ་གང་ལ་ཡོད་པའི་རྟེན་ལ་ཐར་པའི་ཆོས་ཀྱང་ངང་གིས་འབྱུང་བས་འདི་ལྟར། དཔལ་ལྡན་བདེ་ཆེན་ཕན་བདེའི་སྤྲིན་ཚོགས་ཅན། །ཡེ་ཤེས་ཆུ་བསིལ་དམ་པའི་ཆར་ཆེན་ཡང་། །དལ་འབྱོར་ས་གཞི་འགྲོ་སེམས་གཙང་མར་འབབ། །དེ་ཕྱིར་སྤྲོ་བས་སྙིང་ནས་ཆོས་མཛོད་ཅིག །བདུན་པ་རྙེད་དཀའ་བ་དཔེས་བསྟན་པས་ཀྱང་ཆོས་ལ་འབད་པ། ཇི་ལྟར་མཚོ་དབུས་གཡེངས་པའི་གཉའ་ཤིང་གི་བུ་གར་རུས་སྦལ་མགྲིན་ཆུད་སྲིད་པས་ཀྱང་། །མི་ཡི་ལུས་ཙམ་ཉིད་རྙེད་དཀར་ལྷ་མིའི་སྟོན་པས་མེ་ཏོག་གི་ཚོམ་ལས་གསུངས་ན་དལ་འབྱོར་རིན་ཆེན་ལུས་རྙེད་སྨོས་ཅི་དགོས། དེ་བས་དེ་རིང་ཉིད་ནས་བརྩོན་འཚལ་ལོ། །དོན་གསུམ་པ་དབྱེ་བའི་གནས་གཞན་བསྟན་པ་ལ་གསུམ། མདོར་བསྟན་རྒྱས་པར་བཤད་དོན་བསྡུ་བའོ། །དང་པོ། འདི་ལྟར་མི་ཡི་ལུས་རྙེད་ཙམ་པོ་དང་། །ཁྱད་པར་ཅན་དང་མི་ལུས་རིན་པོ་ཆེ། །གཉིས་པ་རྒྱས་བཤད་ལ་གསུམ། དང་པོ་མི་ལུས་ཕལ་པ། རིམ་བཞིན་དགེ་སྡིག་མི་ཤེས་ཆོས་མིན་སྤྱོད། །དབང་པོ་ཚང་ཡང་མི་ལུས་ཕལ་པ་སྟེ། །ཡུལ་དབུས་སྐྱེས་ཀྱང་མཐའ་འཁོབ་ཀླ་ཀློ་ཉིད་དེ་ཕལ་པའོ། །གཉིས་པ་མི་ལུས་ཁྱད་པར་ཅན། བསྟན་ལ་མ་ཞུགས་པ་དང་དགེ་སྡིག་འཆོལ། །ཚེ་འདི་གཉེར་ཞིང་འདུ་འཛི་རྣམ་པར་གཡེངས། །སྒོ་གསུམ་མི་བསྲུན་འཕྱར་ལ་ཕྱི་མ་རྒྱང་བསྲིངས་ཏེ། ཐར་པ་མི་གཉེར་དེ་དག་ཆོས་ཐོས་ནའང་། །མཆོག་གི་ལུས་མིན་རང་བཞིན་བར་མ་སྟེ། །སྐབས་འགར་དགེ་ལ་ཅུང་ཟད་སེམས་གཞོལ་ཞིང་། །ཕལ་ཆེར་སྡིག་པས་བློ་མིག་ཁེབས་པའི་ཕྱིར། །རྟགས་ཙམ་བཟུང་བས་རང་གཞན་ཕན་ཅི་ཡོད། །དེ་དག་ཁྱིམ་པའམ་དགེ་སྦྱོང་གཟུགས་བཟུང་རུང་། །གནས་སྐབས་ངན་འགྲོར་འགྲོ་ཡང་། སངས་རྒྱས་ཀྱི་ཐུགས་རྗེས་གཟིགས་ཏེ་རིང་མོ་ཞིག་ནས་ཐར་པའི་ས་བོན་དང་ལྡན་པས་ངན་འགྲོ་རྣམས་ལས་ཅུང་ཟད་འཕགས་པའི་ཕྱིར། མི་ལུས་ཁྱད་པར་ཅན་ཞེས་རྒྱལ་བས་ནམ་མཁའ་རིན་པོ་ཆེའི་མདོ་ལས་གསུངས། གསུམ་པ་མི་ལུས་རིན་པོ་ཆེ། རབ་མཆོག་སྐྱེ་བོ་དྲི་མེད་ཆོས་ཀྱི་སྣོད། །ཐོས་བསམ་སྙིང་པོའི་དོན་ལ་རྣལ་འབྱོར་དུ་གནས་པས་དབང་འབྱོར་ཞིང་། རང་ཉིད་བཏུལ་ནས་གཞན་དག་དགེ་ལ་འགོད། །སྒྲུབ་པའི་རི་རྒྱལ་རབ་ཏུ་མི་གཡོ་བ། །དྲང་སྲོང་རྒྱལ་མཚན་ཆེན་པོའི་སྟེ་གོས་ཀྱི་ཆ་ལུགས་ཙམ་མིན་པས་རྣམ་པ་དེ་དག་ཀུན་ཁྱིམ་པའམ་རབ་ཏུ་བྱུང་བའི་གཟུགས་སླ་ཡིས། མི་ལུས་རིན་ཆེན་ལགས་པར་སྟོན་པས་དཔལ་སྦས་ཀྱིས་ཞུས་པའི་མདོ་ལས་གསུངས། གསུམ་པ་དོན་བསྡུ་བ་ལ་གཉིས། དང་པོ་ཆོས་སྒྲུབ་པར་གདམས་པ། དེ་ལྟར་དལ་འབྱོར་ཐོབ་པའི་སྐྱེ་བོས་རྟག་ཏུ་ཆོས་འབའ་ཞིག་བསམ་དགོས་པའི་རྒྱུ་མཚན་ཡོད་པ་དེ་ཕྱིར་དམ་པ་རྣམས་ལས་ཆོས་ཐོས་ཏེ། ཆོས་བཞིན་བསྒྲུབ་ཕྱིར་ཆོས་ལ་གནས་པ་དག །ཆོས་ལྡན་རྒྱུན་བསྲིང་ཆོས་མིན་འགོག་བྱེད་ཅིང་། །ཆོས་དོན་བསྒྲུབས་པས་ཆོས་ལ་གནས་པར་མཛོད། །གཉིས་པ་དེའི་ཕན་ཡོན་བསྟན་པ། དེ་ལྟར་བརྩོན་པའི་ཕན་ཡོན་རིང་པོར་མི་ཐོགས་སྲིད་མཚོ་མཐར་བརྒལ་ནས་ཞི་བའི་གླིང་དུ་མྱུར་འགྲོ་མྱ་ངན་འདའ། དོན་བཞི་པ་ཆོས་ལ་ངེས་པའི་དལ་འབྱོར་དོན་ཡོད་པར་གདམས་པ་ལ་གཉིས། དང་པོ་མ་འབད་ན་བློ་གྲོས་བླུན་པས་ཀྱང་ཆོས་ལ་ངེས་པ། འཛམ་གླིང་ལས་ཀྱི་ས་པ་དགེ་བའི་བགོ་སྐལ་བསྐྲུན་{བཀྲུན}དུ་ཡོད་པའི་འདིར་སྐྱེས་པའི་སྐྱེ་བོ་གང་ཞིག་མིར་གྱུར་དགེ་གོམས་མི་བྱེད་ན། དེ་ལས་བློ་གྲོས་བླུན་པ་གཞན་མེད་དེ། །རིན་ཆེན་གླིང་ནས་སྟོང་ལོག་བྱེད་པ་བཞིན། །དལ་འབྱོར་དོན་མེད་ཆུད་གསོན་བྱེད་པ་ཟད། །དེ་བས་རྟག་ཏུ་ཞི་བའི་ཆོས་མཛོད་ཅིག །གཉིས་པ་ལུས་སེམས་རྟེན་འབྲེལ་གྱི་ཚོགས་དོན་ལ་བསམ་སྟེ་ཆོས་ལ་ངེས་པ། རྟེན་དང་བརྟེན་པའི་རང་བཞིན་ལས་བརྩམས་པས་གཅིག་ཏུ་ངེས་པར་དཔྱད་པ་ཀུན་བྱེད་ལས། མ་ལུས་ཇི་ལྟར་སྣང་བའི་ཆོས་རྣམས་ཀུན། །སེམས་ཀྱིས་སྤྲུལ་ཞིང་སེམས་ཀྱིས་བྱས་པ་ཡིན། །ཞེས་གསུངས་པ་ལྟར། ཆོས་ཐམས་ཅད་ཀྱང་སེམས་ལ་རག་ལས་སེམས་དེ་ཡང་ནི་དལ་འབྱོར་ལ་བརྟེན། རྟེན་ཅིང་འབྲེལ་བར་འབྱུང་བས་དགེ་བའི་སེམས་ཆོས་སྒྲུབ་པའི་རྒྱུ་དང་རྐྱེན་རྣམས་དུ་མ་ཚོགས་དུས་འདིར་ཆོས་ཀྱི་གཙོ་བོ་རང་གིས་སེམས་ཐུལ་ཅིག དོན་ལྔ་པ་སྤྲོ་དགའ་བསྐྱེད་ནས་དལ་འབྱོར་སྙིང་པོ་ལེན་ཚུལ་ལ་གདམས་པ་ལ་ལྔ། དང་པོ་དལ་འབྱོར་རྙེད་དཀའ་བསམ་མ་བསམ་གྱི་སྐྱོན་ཡོན་ལ་གདམས་ནས་སྤྲོ་དགའ་བསྐྱེད་པ། འཁོར་བར་ཡང་ཡང་རྒྱུ་བ་དེའི་ཚེ་འཆི་བས་འཇིགས་པའི་སྐྱེ་བ་སྡུག་བསྔལ་གྱི་རྒྱ་མཚོ་མཐའ་མེད་དུ། འདོད་པས་ཕོངས་པ་དང་མི་འདོད་པའི་སྡུག་བསྔལ་ཆར་བཞིན་དུ་འབབ་པ་ཡང་། དལ་འབྱོར་རྙེད་དཀའ་མ་བསམས་པར་དོན་མེད་ཚེ་འདིར་རྣམ་པར་གཡེང་བ་ལས་བྱུང་བ། དེ་ཕྱིར་གང་དག་མངོན་མཐོ་དང་ངེས་ལེགས་ཀྱི་ཆོས་རྣམས་ཀུན་ཀྱང་། དལ་འབྱོར་རྙེད་དཀའ་བསམ་ལས་བྱུང་བས་ན། །ཉིན་མཚན་མི་དལ་བརྩོན་པས་སྤྲོ་བ་བསྐྱེད། །གཉིས་པ་འདི་ཕྱིའི་ལེགས་དགུ་དལ་འབྱོར་སྙིང་པོར་བྱས་པ་ལས་བྱུང་བའི་སྤྲོ་དགའ་བསྐྱེད་པ་ཕན་ཡོན་གྱི་སྒོ་ནས་སྤྲོ་བས་གདམས་པ། འདིར་ནི་སྔོན་གྱི་དུས་ན་འདྲེན་པ་སངས་རྒྱས་མཐོང་ཞིང་གྲོལ་བ་དོན་ཡོད་ཅིང་གནས་སྐབས་སུ་ཆོས་ཐོས་པ་དང་བསྒྲུབ་པའང་དོན་ཡོད་ལ། དགེ་བ་ལ་སྦྱོར་བས་ཆོས་ཀྱིས། ཚེ་འདི་དོན་ཡོད་ཕྱི་མ་ཐར་པའི་ས་བོན་ཐེབས་པས་འབྲས་བཅས་ཀུན། དལ་འབྱོར་རྙེད་ལས་བྱུང་བ་དེ་ཡི་ཕྱིར། །རབ་ཏུ་དགའ་བ་ཡང་དང་ཡང་སྒོམས་ཤིག །གསུམ་པ་སངས་རྒྱས་གང་ལས་འབྱུང་བའི་རྟེན་ཡང་དལ་འབྱོར་ཡིན་པའི་སྤྲོ་དགའ་བསྐྱེད་པ། ལྷར་བཅས་འཇིག་རྟེན་དབུས་ན་འགྲོ་བའི་གཙོ། །ཉན་རང་སྲས་ཀྱིས་བསྐོར་བའི་མགོན་པོ་ཡིས། །འཆི་མེད་བདུད་རྩིའི་གོ་འཕང་བརྙེས་པ་ཡང་། །མི་ལུས་རིན་ཆེན་མཆོག་ལས་བྱུང་བས་ན། །ལྷ་བས་ལྷག་པའི་ལུས་ཞེས་དལ་འབྱོར་བསྔགས་ཏེ། མངོན་པར་བྱང་ཆུབ་མདོ་ལས། ལྷའི་གནས་སུ་མངོན་པར་བྱང་མི་ཆུབ་པ་ནི་གནས་རིས་ལ་ང་རྒྱལ་བྱེད་པས་བདེན་པ་མངོན་པར་མི་རྟོགས་པའི་ཕྱིར་དང་། དལ་བ་དང་འབྱོར་པ་ཕུན་སུམ་ཚོགས་པ་མི་ཉིད་ཁོ་ནར་གཟིགས་ནས་སེར་སྐྱའི་གནས་སུ་གཤེགས་ཏེ་ཞེས་སོ། །དེ་ཕྱིར་མི་ཉིད་ཐོབ་ལ་སྤྲོ་བ་བསྐྱེད། །བཞི་པ་ལམ་དང་མངོན་པར་རྟོགས་པའི་རྟེན་ཡང་དལ་འབྱོར་ཡིན་པས་སྤྲོ་དགའ་བསྐྱེད་པ། རྣམ་པར་མི་རྟག་བདེན་མཐོང་ཡེ་ཤེས་སོ། །ལྷ་མིའི་ནང་ནས་མི་གྱུར་རྙེད་སླ་སྟེ། །མཛོད་ལས། གསུམ་དུའོ་གོང་ན་མཐོང་ལམ་མེད། །མི་སྐྱེ་ལུང་ལས་འདིར་རྩོམ་ཞིང་། །དེ་མཐར་ཕྱིན་ཅེས་གསུང་ཕྱིར་རོ། །ཞེས་སོ། །རྡོ་རྗེ་ཐེག་པའི་ལམ་ཟབ་སྙིང་པོ་ཡང་། །མི་ཡི་ལུས་རྙེད་འབྲས་བུས་འགྲུབ་པར་སླ། །འབྱུང་བཞི་ཟད་པའི་རྒྱུད་ལས། གསང་སྔགས་རྒྱལ་པོ་རྨད་བྱུང་འདི། །མི་རྣམས་ཀྱིས་ནི་བརྩོན་བྱས་ན། །ཚེ་འདི་ཉིད་ལ་འགྲུབ་པར་འགྱུར། །རྣལ་འབྱོར་དངོས་གྲུབ་གཞན་ཅི་སྨོས། །ཞེས་སོ། །དེ་ཕྱིར་ཐེག་པ་ཆེ་ཆུང་ཆོས་ཀྱི་རྟེན། །དལ་འབྱོར་མི་ལུས་མཆོག་ཏུ་འཕགས་པར་གསུངས། །ལྔ་པ་དགའ་བ་ཁྱད་པར་ཅན་གྱི་བློས་དལ་འབྱོར་རྙེད་པ་ལ་སྤྲོ་དགའ་བསྐྱེད་པ། དེ་ཉིད་ཇི་ལྟར་བསྒོམ་པའི་ཚུལ། སྟན་བདེ་བ་ལ་འདུག་ནས་སྐྱབས་སེམས་སྔོན་དུ་འགྲོ་བས། རང་གི་དལ་འབྱོར་ལ་བསམ་སྟེ་ཇི་ལྟར་ཕོངས་པས་ནོར་མཆོག་རྙེད་པ་ལྟར་དལ་འབྱོར་ནི། རྨི་ལམ་ཉིད་མིན་ནམ་ཅེས་དོགས་དང་འཇིགས་བཞིན་དུ་ད་རེས་ལན་གཅིག་རྙེད་པ་འདི་རེ་འཚེང་། ཆོས་ཁོ་ན་སྒྲུབ་དགོས་སྙམ་དུ་དགའ་ཞིང་སྤྲོ་བས་དལ་འབྱོར་བསམ་པར་བྱ་ཞིང་རྗེས་བསྔོ་བ་བྱ་སྟེ། ལུང་རྣམ་འབྱེད་ལས། མོང་འགལ་གྱི་བུ་གཅིག་ཏུ་བསམ་པར་བྱ་བ་ནི་དལ་བ་སྟེ་སྤྲོ་བས་རྗེས་སུ་དྲན་པར་གྱིས་ཤིག ཅེས་གསུངས། དེས་ནི་འདི་ཕྱིའི་ཕན་བདེ་དམ་པའི་ཆོས་འགྲུབ་བོ། །དོན་གསུམ་པ་ལེའུ་རྫོགས་པ་མཇུག་གི་དོན་བསྟན་པ་ལ་གཉིས། དང་པོ་སྐབས་ཀྱི་དགེ་བ་བསྔོ་བ། དེ་ལྟར་དགེ་ལེགས་སྙན་པའི་བདུད་རྩི་བསྟབས་ཏེ་བཤད་པ་འདིས་འགྲོ་ཀུན་དལ་འབྱོར་ཆུད་གསོན་པའི་རྒྱུ་དོན་མེད་ཚེ་འདིའི་གཡེངས་པ་རྣམས་རབ་ཏུ་ཞི་ནས། དབེན་པའི་ནགས་མཐར་སོང་སྟེ་ཡུན་རིང་སྲིད་པར་ཉོན་མོངས་པའི་ཚང་ཚིང་གིས་དུབ་པའི་སེམས་ཉིད་དེ་རིང་ངལ་སོས་ཏེ་འཚོ་བར་ཤོག་ཤིག ཤླ་ཀ་འདིས་དོན་ཡོད་བགྱིད་པའི་གནས་ལ་གདམས་ཤིང་། དོན་བསྡུ་བསྔོ་བ་དང་བཅས་པ་སྟེ་ཕྱི་མ་རྣམས་ལའང་འགྲེའོ། །གཉིས་པ་ལེའུའི་མཚན། རྫོགས་པ་ཆེན་པོ་སེམས་ཉིད་ངལ་གསོ་ལས་དལ་འབྱོར་རྙེད་དཀའ་བའི་ལེའུ་སྟེ་དང་པོའོ། །༈ གཉིས་པ་ཚེ་མི་རྟག་པ་བསམ་པའི་ལེའུ་ལ་གསུམ་སྟེ། ལེའུ་ལ་འཇུག་པ་རྒྱུའི་དོན། ལེའུ་དངོས་ཀྱི་དོན། ལེའུ་རྫོགས་པ་མཇུག་གི་དོན་ནོ། །དང་པོ་ནི། དེ་ལྟར་ཐོབ་ཀྱང་ཡིད་བརྟན་མི་རུང་བས་བརྩོན་པར་གདམས་པ། དེ་ལྟར་རྙེད་དཀའི་དལ་བ་ཐོབ་གྱུར་ཀྱང་། སྐད་ཅིག་མི་རྟག་འཇིག་པའི་ཆོས་ཅན་ཏེ། །རྣམ་པར་བརྟགས་ན་ཆུ་ཤིང་ལྟར་སྙིང་པོ་འགའ་མེད་ལ། སྐྱེ་འཇིག་གི་རང་བཞིན་དཔྱད་མི་བཟོད་པས་དབུ་བ་རྡོས་འདྲ་ཡིད་བརྟན་མི་རུང་བས་ཉིན་མཚན་ཀུན་ཏུ་ངེས་པར་འཆི་བ་བསམ། གཉིས་པ་ལེའུ་དངོས་ཀྱི་དོན་ལ་བདུན། གང་མི་རྟག་པ་ཕུང་པོའི་རང་བཞིན་ལ་བསམ་སྟེ་ཆོས་ལ་བསྐུལ་བ། དུས་རིང་བས་རྒྱུ་མཚན་དཔྱད་དེ་ཆོས་ལ། དུས་ཉེ་བར་སྣ་ཚོགས་ཀྱི་རྐྱེན་ལ་བསམ་སྟེ་ཆོས་ལ། སྔ་ཕྱི་ད་ལྟའི་རང་བཞིན་ལ་བསམ། འཇིག་ངེས་རྐྱེན་གྱི་གཏན་ཚིགས་ངེས་པས་ཆོས་ལ། རང་གཞན་རྟག་འཛིན་སྐྱོ་ཤེས་འཕེལ་བས། མི་རྟག་བསྒོམ་ཚུལ་ཕན་ཡོན་ཅན་དང་བཅས་པས་ཆོས་ལ་བསྐུལ་བར་གདམས་པའོ། །དང་པོ་གང་མི་རྟག་པ་ཕུང་པོའི་རང་བཞིན་ལ་བསམ་སྟེ་ཆོས་ལ་བསྐུལ་བ། མི་རྟག་སྙིང་པོ་མེད་པའི་ལུས་ལ་ཆགས་པ་བཏང་ཞིང་ཉིན་མཚན་དུ་མི་རྟག་པ་ལ་བློ་གཞོལ་བར་གདམས་པ། སྡུག་བསྔལ་ཡིད་མི་བདེ་བ་ཀུན་གྱི་གཞི། །ཉོན་མོངས་འབྱུང་ཁུངས་ཆེར་གྱུར་ལུས་འདིི་ལ། །གོས་རྒྱན་མེ་ཏོག་ཕྲེང་སོགས་བཀླུབས་གྱུར་ཅིང་། །བཟའ་བཏུང་བཟང་དགུས་མཆོད་ཅིང་བསྙེན་བཀུར་ཡང་། །དུས་མཐར་མི་རྟག་འཇིག་ཅིང་འབྲལ་བ་སྟེ། །ཝ་དང་བྱ་རྒོད་ཅེ་སྤྱང་ཟས་འདི་ལ། །གཅེས་སྤྲས་རྟག་འཛིན་གཙང་བའི་སེམས་བོར་ལ། །ཚེ་འདིའི་སྣང་བ་གང་གིས་ཀྱང་མི་བསྟོངས་པར་ཤེས་ནས་ད་ལྟ་ཉིད་ནས་དམ་པའི་ཆོས་མཛོད་ཅིག གཉིས་པ་དུས་རིང་བའི་རྒྱུ་མཚན་དཔྱད་པ་ལ་བཞི་སྟེ། དང་པོ་ཚེ་བསྐལ་བར་ཐུབ་པའི་ལྷ་ཆེན་པོ་རྣམས་ཀྱང་མི་རྟག་པ། ས་གསུམ་འབྱོར་པ་དམ་པའི་གཞིར་གྱུར་པ་ལྷའི་དབང་པོ་ཚངས་པ་དང་བདེ་འབྱུང་སྟེ་དབང་ཕྱུག་དང་མིག་སྟོང་ཅན་རྒྱ་བྱིིན་དང་འཇིག་རྟེན་སྐྱོང་བའི་དབང་པོ་རྒྱལ་ཆེན་བཞི་སོགས་གྲགས་དང་བསོད་ནམས་གཟི་འོད་འབར་བ་ཡང་འཆི་བདག་གནས་ལས་རྒྱལ་བའི་སྐབས་མེད་ལ། བསམ་གཏན་གྲུབ་པས་བསྐལ་པར་གནས་པ་ཁམས་གོང་མའི་འགྲོ་བ་རྣམས་ཡང་ལས་ཟད་ཚེ་ན་འཆི་བའི་སྐབས་མཆིས་ཤིང་། དེ་བཞིན་འདོད་པའི་ལྷ་དང་ལྷ་མིན་དང་དཀའ་ཐུབ་གྲུབ་པ་དང་རིག་སྔགས་འཆང་དང་། མི་དབང་འཁོར་ལོས་སྒྱུར་རྒྱལ་དང་བདེ་སྐྱོང་བྲམ་ཟེ་སོགས་འགྲོ་བ་ཕལ་པ་ཇི་སྙེད་ཀྱང་འཆི་བས་འཇིགས་པའི་སྐྱེ་བོ་ཕ་མཐའ་ཡས། གཉིས་པ་ཁམས་གསུམ་སྤྱི་བཙན་གྱི་སྐྱེ་དགུ་རྣམས་ཀྱང་མི་རྟག་པ། འཕོ་ཞིང་འགྱུར་བས་ཚེ་འདི་མི་རྟག་པས་རོལ་པའི་ཆར་སྤྲིན་ནང་། རང་ཆས་སུ་འགྱུ་བའི་འཆི་བདག་གློག་གི་ཕྲེང་བ་གར་བྱེད་ཅིང་ཉིན་མཚན་སྐད་ཅིག་གིས་དུས་རྣམས་འགྱུར་ཞིང་འཆི་བར་ཉེ་བའི་ཆར་འབབས་པས་ས་གསུམ་མྱུ་གུ་ཇི་སྙེད་ཁྱབ་པར་བརླན་པར་གྱུར། གསུམ་པ་སྣོད་བཅུད་བརྟན་གཡོའི་འཇིག་རྟེན་ཀྱང་མི་རྟག་པ། སྟོང་གསུམ་མི་མཇེད་ཀྱིས་མཚོན་པའི་ཕྱི་སྣོད་བཅུད་འཇིག་པའི་དཔེས་ནང་གི་སྣོད་བཅུད་མི་རྟག་སྟེ་ཕྱི་སྲིད་པ་སྣོད་བཅུད་རྣམས་ཐོག་མར་ཆགས། བར་བསྐལ་ཉི་ཤུ་གནས། མཐར་འཇིག་གི་ཚེ་མེ་བདུན་གྱིས་བསྲེགས་པའི་ཐལ་བ་ཆུས་བཤར་བ་གཅིག་དང་། མཐར་རླུང་གིས་འཐོར་བའི་ཚེ། ཕྱི་རོལ་གྱི་ཁོར་ཡུག་གིས་བསྐོར་བའི་རྒྱ་མཚོ་ཆེན་པོ་གླིང་བཞི་གླིང་ཕྲན་དང་གསེར་རིས་བསྐོར་བའི་རི་རབ་ལྷུན་པོ་རིན་ཆེན་བཞི་ལས་གྲུབ་པ་ཡང་མི་རྟག་ཅིང་། མཐར་ཐམས་ཅད་སྟོང་ནས་ནམ་མཁའ་གཅིག་ཏུ་གྱུར་པའི་སྐབས་ཡོད་དོ། །དཔེ་དེས་མཚོན་ནས་ནང་གི་ལུས་འདི་ཡང་ཟག་བཅས་ལས་ཉོན་གྱི་དབང་གིས་དང་པོར་མངལ་དུ་ཆགས་ཤིང་། མཐར་འཆི་བའི་ཚེ་ལུས་ཀྱི་འབྱུང་བཞི་བསྡུས་རྩ་རླུང་ཐིག་ལེ་གསུམ་སྟོང་པས་མེ་འདུན་དང་། སྲོག་འཕོ་བ་ཆུས་གཅིག དབུགས་འབྲེལ་ཐག་ཆད་པས་མཇུག་ཏུ་རླུང་གིས་གཏོར་ཏེ་ལུས་ཀྱང་སོ་སོར་འབྲལ་ཞིང་དེངས་ནས་མཐར་ཅི་ཡང་མེད་པ་ནམ་མཁའ་ལྟ་བུ་སྔོན་ལུས་མ་ཆགས་པའི་དུས་ལྟར་འབྱུང་བའི་སྐབས་ཡོད་པས་ཚུལ་དེ་ལྟ་བུ་ལ་ངེས་པར་བསམས་ཏེ་སྙིང་ནས་ཆོས་མཛོད་ཅིག བཞི་པ་སྔོན་རབ་འབྱོན་པའི་འཕགས་པ་རྣམས་ཀྱང་མི་རྟག་པ་ལ་བསམ་སྟེ་ཆོས་ལ་བསྐུལ་བ། གཞན་ཡང་འཇིག་རྟེན་གྱི་འདྲེན་པ་རྣམ་གཟིགས་གཙུག་ཏོར་ཅན་སོགས་སངས་རྒྱས་རང་རྒྱལ་དང་སློབ་མའི་ཚོགས་སྔར་བྱོན་པ་དང་ད་ལྟར་གྱི་སྟོན་པ་ཐུབ་དབང་སྲས་བྱང་སེམས་དང་ཉན་ཐོས་སོགས་ཀྱིས་བསྐོར་བའི་མགོན་པོ་རྣམས། དཔེ་སྟོན་དུས་ཀྱི་དྭངས་པའི་མཁའ་ལ་སྔོན་མེད་རི་བོང་འཛིན་ཏེ་ཟླ་བ་རྒྱས་པ་རྒྱུ་སྐར་ཕྲེང་བ་རྣམས་ཀྱིས་ཡོངས་སུ་བསྐོར་བ་བཞིན་སྐུ་འོད་ཟེར་གྱི་དཔལ་གྱིས་ལྷམ་མེ་གསུང་ཅ་ཅོ་མེད་པས་ལྷང་ངེ་ཐུགས་དྲི་མ་མེད་པས་ལྷན་ནེར་གསལ་བ་རྡོ་རྗེ་ལྟར་བརྟན་པ་ཡང་མི་རྟག་མྱ་ངན་འདའ་བའི་ཚུལ་སྟོན་པར་མཛད་ཅིང་། ད་ལྟར་གྱི་ཐུབ་པའི་དབང་པོའི་བསྟན་པ་འདི་ལས་གཞན་པའི་བསྟན་པ་རིན་ཆེན་ཉི་མ་དཔག་ཏུ་མེད་པ་རྣམས་ཀྱང་། སྔོན་རབས་སྔོན་རབས་རྣམས་རིམ་གྱིས་ནུབ་པར་གྱུར་པ་ལ་ལྟོས། དཔེ་ཆུའི་ལྦུ་བའམ་ཆུ་ཤིང་སྙིང་པོ་མེད་པ་དང་འདྲ་བའི་རང་གི་ལུས་མི་རྟག་པ་སྒྱུ་མའི་ཁང་པ་དང་འདྲ་བ་འདི་ཅིས་མི་འཇིག གསུམ་པ་དུས་ཉེ་བའི་རྐྱེན་བསམ་པ་བཞི། དང་པོ་གཅིག་ཏུ་ངེས་པ་མེད་པས་མི་རྟག་པ། དེ་ཕྱིར་ངེས་པར་འཆི་བ་དང་དེའང་དུས་ནམ་འཆི་དང་གནས་འདིར་འཆི་རྐྱེན་འདིས་འཆི་ཞེས་ངེས་པ་འགའ་མེད་དེ། ཚེ་འདི་སྣོན་མེད་རྟག་ཏུ་གོད་འགྱུར་ཞིང་། །འཆི་བའི་རྐྱེན་མང་འཚོ་བའི་རྐྱེན་ཏེ་ཤས་ཉུང་བས། ཚེ་ལ་ལོང་མེད་བློ་སྣ་བསྟུངས་བྱས་ཏེ། །དེ་རིང་ཉིད་ནས་ཆོས་ལ་བརྩོན་པར་རིགས། །གཉིས་པ་གྲོང་ཁྱེར་རྙིང་པ་བཞིན་དུ་མི་རྟག་པ། རང་གི་ལུས་འབྱུང་བཞི་འདུས་པའི་ལྡིང་ཁང་ན་སེམས་པ་ཡིད་ཀྱི་རྟེན་ཅན། སྐད་ཅིག་ཀྱང་མི་བརྟན་པར་གཡོ་བའི་ཀུན་རྟོག་སྐྱེ་བོས་བརྒྱན་པ་སྟེ་ལུས་སེམས་ཀྱི་ཚོགས་པ་འདི་ཡང་། རྒྱུ་དང་རྐྱེན་ལས་སྐྱེས་ཕྱིར་འདུས་བྱས་འཇིག་པའི་ཆོས་ཅན་ཡིན་ཏེ། དཔེར་ན་ཕྱི་རོལ་གྱི་གྲོང་ཁྱེར་རྙིང་པ་བཞིན་དུ་མི་རྟག་གིས་དུས་མྱུར་བ་ཉིད་དུ་དམ་པའི་ཆོས་མཛོད་ཅིག གསུམ་པ་རླུང་ནང་གི་མར་མེ་བཞིན་དུ་མི་རྟག་པ། དཔེ་ཇི་ལྟར་རླུང་དམར་གྱི་ནང་ཞུགས་མར་མེ་རྐྱེན་གྱིས་གློ་བུར་དུ་འཆི་བ་བཞིན། སྐད་ཅིག་ཀྱང་མི་རྟག་གཡོ་བའི་རང་བཞིན་དང་། །གློ་བུར་འཆི་རྐྱེན་དྲག་པོས་གཏུགས་པའི་ཚེ། །ཡུན་དུ་མི་གནས་ངེས་པར་འཆི་བས་ན། །ད་ལྟ་ཉིད་དུ་དམ་པའི་ཆོས་མཛོད་ཅིག །བཞི་པ་ཐམས་ཅད་བོར་ནས་འགྲོ་བས་མི་རྟག་པ། རང་འཆི་བའི་ཚེ་འཁོར་དང་ལོངས་སྤྱོད་ཉེ་བར་འབྲེལ་བའི་གཉེན། གཟུགས་དང་ལང་ཚོ་དབང་ཕྱུག་རིགས་བཟང་ཡང་། །ཐམས་ཅད་བོར་ཏེ་གཅིག་པུར་འགྲོ་དགོས་ཤིང་། །དེ་དག་གང་གིས་ཀྱང་མི་བསྟོངས་པར་ལས་དཀར་ནག་གཉིས་ཁོ་ན་རྗེས་སུ་འབྲང་བ་ཡིན་པས། དེ་ཚེ་ཆོས་ལས་སྐྱབས་གཞན་འགའ་མེད་ན། །དེང་དུ་བརྩོན་པས་ཅི་ཕྱིར་འདའ་མི་བྱེད། །རྒྱལ་པོ་ལ་གདམས་པའི་མདོ་ལས། དུས་ཀྱིས་བསྙེན་ནས་རྒྱལ་པོ་འགྲོ་འགྱུར་ན། །ཞེས་སོགས་སོ། །བཞི་པ་སྔ་ཕྱི་ད་ལྟའི་རང་བཞིན་བསམ་པ་ལ་གཉིས། དང་པོ་སྔོན་རབས་འདས་པའི་ཚུལ་ལ་དཔགས་ཏེ་མི་རྟག་པ་བསམ་པ། ཡང་འདི་ལྟར་འཇིག་རྟེན་སྔ་ཕྱིའི་རྒྱུད་སོམས་དང་། སྔ་རབས་སྐྱེ་བོ་དཔག་མེད་འདས་གྱུར་ཅིང་། །ད་ལྟའི་ས་སྟེང་འགྲོ་བ་ཕལ་ཆེར་ཡང་། །ལོ་བརྒྱའི་ནང་དུ་ངེས་པར་མི་རྟག་ལ། །མ་འོངས་རྣམས་ཀྱང་ཚུལ་དེའི་རྗེས་སུ་འགྲོ་སྟེ་དེ་དག་དང་ཚུལ་མཚུངས་པས་རང་གི་རིང་ལ་རྒན་རབས་གཞོན་རབས་རང་དང་སྐལ་མཉམ་དུ་མ་འདས་ལ་ལྟོས། བདག་ཀྱང་རང་བཞིན་དེ་ལས་མ་འདས་པས། །ངེས་པར་འཆི་བ་བསམས་ནས་ཆོས་མཛོད་ཅིག །ཆེད་དུ་བརྗོད་པའི་ཚོམ་ལས། སྐྱེས་པ་བུད་མེད་མང་པོ་དག །དར་ལ་བབས་པའང་འཆི་འགྱུར་ནས། །དེ་ལ་མི་འདི་གཞོན་ཞེས་ཏེ། །གསོན་པའི་གདེང་དྲོད་ཅི་ཞིག་ཡོད། །ཅེས་སོ། །གཉིས་པ་ད་ལྟ་འཕོ་འགྱུར་མི་རྟག་པའི་ཚུལ་ལ་བསམ་པ། ས་གསུམ་སྟེ་དམྱལ་བ་ནས་སྲིད་རྩེའི་བར་དག་ན་འཆི་བདག་གནས་ལས་ཐར་པ་འགའ་མེད་དེ། འདུལ་བ་ལུང་ལས། གང་དུ་གནས་ན་འཆི་བས་མི་ཚུགས་པའི། །ས་ཕྱོགས་དེ་ནི་ཡོད་པ་མ་ཡིན་ཏེ། །བར་སྣང་ན་མེད་རྒྱ་མཚོའི་ནང་ནའང་མེད། །རི་རབ་རྣམས་ཀྱི་གསེབ་ཏུའང་ཞུགས་པ་མེད། །ཅེས་གསུངས། ཀུན་ཀྱང་མི་རྟག་འགྱུར་ཞིང་སྙིང་པོ་མེད། །ཡིད་བརྟན་མི་རུང་ཤིང་རྟའི་འཕང་ལོ་འདྲ། །རྒྱ་རོལ་ལས། སྲིད་སྲེད་མ་རིག་དབང་གིས་སྐྱེ་བོ་རྣམས། །ཞེས་སོགས་དང་། ཁྱད་པར་མི་ཡི་འཇིག་རྟེན་འཚེ་བ་མང་། །རླུང་མཁྲིས་སོགས་ནད་དང་ཤ་ཟས་སོགས་གདོན་གནོད་པ་དུ་མའི་གཞིར་གྱུར་ཅིང་། མཚོན་དང་མེ་དང་གཡང་ས་གཅན་གཟན་དུག །རྒྱལ་པོ་དགྲ་དང་ཆོམ་རྐུན་ལ་སོགས་ཀྱིས། །འཚོ་བའི་སྲོག་འཇོམས་ཕུན་ཚོགས་འཇིག་པར་བྱེད། །ལྔ་པ་འཇིག་ངེས་རྐྱེན་གྱི་གཏན་ཚིགས་ངེས་པ་ལ་གཉིས། དང་པོ་ཉིན་མཚན་སྐད་ཅིག་ཐང་ཅིག་འགྱུར་བས་མི་རྟག་པ། གལ་ཏེ་དེ་ལྟ་བུའི་འཚེ་བ་མེད་ཀྱང་སྐྱེས་བུའི་ཚེ་འགྲོ་སྟེ། ཉིན་མཚན་སྐད་ཅིག་ཐང་ཅིག་འགྱུར་བས་ཀྱང་། །འཆི་བདག་གནས་སུ་ཉེ་བར་གྱུར་པ་ནི། །འབབ་ཆུས་ཚོགས་རྣམས་རྒྱ་མཚོར་སྙེག་པའམ། །ཉི་མའི་དཀྱིལ་འཁོར་ནུབ་རི་ལྟུང་བ་བཞིན། །གཉིས་པ་འཆི་རྐྱེན་མ་ངེས་སྣ་ཚོགས་ཡོད་པས་མི་རྟག་པ། ཟས་བཅས་འཚོ་བའི་རྐྱེན་རྣམས་ཕུན་ཚོགས་ཀྱང་། །དུག་བཞིན་སྡུག་བསྔལ་བྱེད་པའི་སྐབས་མཆིས་ན། །མི་མཐུན་གནོད་མང་ཕུན་ཚོགས་ཅིས་མི་འཇིག །དེས་ན་འཆི་བའི་རྐྱེན་དུ་མ་གྱུར་མེད། །གནས་གར་འཆི་རྐྱེན་ཅིས་འཆིི་དུས་ནམ་འཆི་ཆ་མེད་ཀྱི། དོན་མེད་བསླུ་བ་འཇིག་རྟེན་ཆོས་སྤོངས་ལ། །སྙིང་ནས་མི་རྟག་འཆི་ཆོས་སྒྲུབ་པར་མཛོད། །དྲུག་པ་རང་གཞན་རྟག་འཛིན་སྐྱོ་ཤས་འཕེལ་བས་ཆོས་ལ་བསྐུལ་བ་ལ་གསུམ། དང་པོ་འཆི་བ་མ་དྲན་ཚེ་འདིས་བསླུས་པ་ལ་སྐྱོ་བ། དལ་འབྱོར་ཐོབ་ཚེ་འཁོར་བ་ལས་སྒྲོལ་དགོས་པར་གདམས་པ། འདིར་ནི་བདག་གིས་དལ་འབྱོར་གྲུ་རྙེད་ཅིང་། །བླ་མའི་མན་ངག་གྲུ་འཛིན་ཏེ་སྐྱ་བ་ཡོད་བཞིན་དུ། སྡུག་བསྔལ་ཆུ་བོ་བརྒལ་ཕྱིར་མི་བརྩོན་ན། །དེ་ལས་བསླུས་པ་འདི་ན་གཞན་མེད་དོ། །གཉིས་པ་འཆི་བ་མ་དྲན་འཁོར་བར་འཆིང་བ་ལ་སྐྱོ་བ། གང་ཕྱིར་སྟོན་པས་རབ་བསྔགས་རིན་ཆེན་སྣོད། །ཉེས་ཀུན་མཐར་འབྱིན་དལ་འབྱོར་ཕུན་སུམ་ཚོགས་པའི་རྟེན་ཡང་དག་ཐོབ་བཞིན་དུ། རང་གཞན་དོན་གཉིས་འབྱོར་པ་མི་འཛིན་ན། །འཁོར་བའི་བཙོན་རར་རང་ཉིད་འཆིང་བར་ཟད། །གསུམ་པ་འཆི་བ་མ་དྲན་མཁས་བླུན་བར་གསུམ་ལ་སྐྱོ་བ། ཀྱེ་མ་ཇི་ལྟར་རྡོ་ལ་འདོམས་པ་བཞིན། འཇིག་རྟེན་ཕལ་ཆེར་བསམས་ཤིང་སྐྱོ་བ་འཕེལ་ཏེ་བརྡ་ཐབས་རྣམ་པ་ཚད་མེད་པས་བསྟན་པས་མི་རྟོགས་ཤིང་བཤད་པས་གོ་བ་མེད། སང་ཉིན་འཆི་ཡང་རྒྱུན་རིང་བསྐལ་པའི་བར་དུ་སྡོད་པ་ལྟར་རྟག་པར་འཛིན་ཏེ་ཚེ་འདིའི་བྱ་བ་འབའ་ཞིག་ལ་གཡེང་། འཁོར་བའི་སྐྱོན་རྣམས་མཐོང་བས་ཀྱང་མི་སྐྱོ་ལ་ངེས་འབྱུང་རྡུལ་ཙམ་མེད། ལ་ལ་དག་ཅུང་ཟད་ཐོས་པ་དང་ཤེས་བཞིན་ཕྱི་བཞིན་དུ་ང་རྒྱལ་ཏེ་གོ་བཞིན་འཁྲུལ་པ་བྱེད་དེ་གཞན་ལ་བརྙས་པ་དང་སྐུར་འདེབས་སོགས་རང་གཞན་གྱི་རྒྱུད་བསྲེག འདུ་འཛིས་གཡེངས་ལ་ཉོན་མོངས་པས་དམ་སྡོམ་འཆལ་ཞིང་མི་དགེའི་ཆར་འབབ་པའི་འགྲོ་ལ་ནམ་ཞིག་བདག་གིས་ཕན་ཐོགས་འགྱུར་ཞེས། ཕལ་ཆེར་སྙིང་རྗེའི་དབང་གིས་འདི་དག་ལ་ནམ་ཞིག་བདག་གིས་ཕན་པར་ནུས་ཞེས་སེམས་སྟོབས་བསྐྱེད་དེ་སྤྲོ་བ་བསྐྱེད་ནས་བྲག་རིའི་དྲུང་དུ་གནས་པ་ཡིན་ནོ། །བདུན་པ་མི་རྟག་སྒོམ་ཚུལ་ཕན་ཡོན་དང་བཅས་པ་ལ་གཉིིས། དང་པོ་མི་རྟག་པ་སྒོམ་ཚུལ་ནི། འཁོར་བ་ལས་བློ་མ་ལོག་གི་བར་དུ་བརྩོན་པས་བསྒོམ་དགོས་པར་བསྟན་པ། འདིར་ནི་ཉེས་པའི་ཆུ་གཏེར་བརྒལ་འདོད་ཅིང་། །ལེགས་པའི་ཡོན་ཏན་རྨད་བྱུང་བསྒྲུབ་འདོད་པས། །གང་ཅི་མཐོང་ཐོས་དྲན་ཡང་མི་རྟག་པའི་རང་བཞིན། མི་རྟག་པའི་དཔེ། མི་རྟག་པའི་སྐུལ་མར་དྲན་པར་བྱས་ཏེ། ད་ལྟ་རང་ཉིད་དུ་ངེས་པར་འཆི་སྙམ་དུ་འཆི་བ་བསམ་སྟེ། ཉིན་མཚན་ཀུན་ཏུ་མི་རྟག་འབའ་ཞིག་བསྒོམ་དགོས་ཏེ། སྤྱོད་འཇུག་ལས། ཉིན་མཚན་རྟག་ཏུ་བདག་གིས་ནི། །འདི་ཉིད་འབའ་ཞིག་བསམ་པར་རིགས། །ཞེས་གསུངས། དེ་ལྟར་མ་བསམས་ན་ཚེ་འདིའི་དབང་དུ་སོང་ནས། རེས་འགའ་བའི་ཆོས་ལས་མི་འབྱུང་། ཐ་མལ་གྱི་བྱ་བ་ལའང་རེས་འགའ་བའི་དལ་ཁོམ་གྱིས་མི་འགྲུབ་ན་ཐར་པའི་བྱང་ཆུབ་ལྟ་ཅི་ཞེས་ཡང་དང་ཡང་དུ་བསམས་ནས་ངེས་འབྱུང་སྐྱོ་ཤས་བསྐྱེད་དོ། །གཉིས་པ་དེའི་ཕན་ཡོན་ནི། དེས་ནི་དད་སོགས་ཡོན་ཏན་གསར་དུ་སྐྱེ། སངས་རྒྱས་དང་བྱང་སེམས་ཀྱིས་དགོངས། འབྱུང་པོས་གླགས་མི་རྙེད། དཀར་ཕྱོགས་ཀྱི་ལྷས་སྲུང་། བདེ་བར་ཚེའི་དུས་བྱས་ནས་མཐོ་རིས་དང་ཐར་པ་ཐོབ་པ་སོགས་འདི་ཕྱིར་ཕན་བདེའི་ཆོས་འགྲུབ་ཅིང་། ཆོས་ལ་བརྩོན་འགྲུས་དྲག་པོས་སྒྲུབ་པ་ལ་བརྩོན་པ་དང་། རྙེད་གྲགས་ཆོས་བརྒྱད་སོགས་ཚེ་འདི་བློས་ཐོངས་ནོར་རྫས་ཆགས་སྡང་སོགས་བདག་འཛིན་གྱི་འཁྲུལ་པ་ཀུན་འཇིག་པས་ལས་མི་སོག མདོར་ན་ལེགས་པའི་ཡོན་ཏན་ཐམས་ཅད་འགྲུབ་པ་དང་། ཉེས་ཀུན་མཐར་འབྱིན་ཞིང་མཐར་ཐུགས་གི་ཐར་པ་དམ་པའི་རྒྱུ་ཡིན་པས་ན། ཆོས་ཀུན་གྱི་རྩ་བ་མི་རྟག་པ་བསྒོམས་ཤིང་བློ་སྣ་སྟུངས་པར་མཛོད་ཅིག དོན་གསུམ་པ་ལེའུ་རྫོགས་པ་མཇུག་གི་དོན་ལ་གཉིས། དང་པོ་སྐབས་ཀྱི་དགེ་བ་བསྔོ་བ། དེ་ལྟར་ཆོས་ཚུལ་རྒྱ་མཚོ་ལས་ཐོན་པའི་སྤྲིན་གྱི་ཁ་གླལ་བ་ལྷའི་རྔ་སྒྲ་ལས་ཆེས་ལྷག་པ་ཕན་བདེའི་གདམས་ངག་དོན་ཟབ་ཅིང་ཚིག་སྙན་པའི་སྒྲ་བསྒྲགས་པས། འགྲོ་ཀུན་རྣམ་གཡེང་ཉོན་མོངས་རྟག་འཛིན་གྱིས་རྒྱུན་རིང་སྲིད་པར་དུབ་པའི་སེམས་ཉིད་རྙོག་པ་མཐའ་དག་རབ་ཏུ་ཞི་ནས་དེ་རིང་ཞི་བའི་དབྱིངས་སུ་ངལ་སོས་ཤིག གཉིས་པ་ལེའུ་མཚན། རྫོགས་པ་ཆེན་པོ་སེམས་ཉིད་ངལ་གསོ་ལས། ཚེ་མི་རྟག་པའི་ལེའུ་སྟེ་གཉིས་པའོ།། །། ༈ གསུམ་པ་འཁོར་བའི་སྡུག་བསྔལ་བསམ་པའི་ལེའུ་ལ་གསུམ་སྟེ། ལེའུ་ལ་འཇུག་པ་རྒྱུའི་དོན། ལེའུ་དངོས་ཀྱི་དོན། ལེའུ་རྫོགས་པ་མཇུག་གི་དོན་ནོ། །དང་པོ་ནི། བཤད་མ་ཐག་པ། དེ་ལྟར་མི་རྟག་ཁམས་གསུམ་འཁོར་བའི་ཆོས། །རྣམ་པར་འགྱུར་བས་ཤིན་ཏུ་སྡུག་བསྔལ་ཏེ། །སྡུག་བསྔལ་འགྱུར་དང་འདུ་བྱེད་ཉིད་གསུམ་གྱིས། །གྲོང་ཁྱེར་དྲུག་གི་འགྲོ་ཀུན་རྩེན་ཞིང་སྡུག་བསྔལ་གྱི་རྒྱ་མཚོར་བྱིང་སྟེ་ཉམ་རེ་ཐག གཉིས་པ་ལ་བཞི། རང་གཞན་མངོན་པར་སྐྱོ་བས་འཁོར་བ་སྡུག་བསྔལ་ལ་བསམ་པ། སྡུག་བསྔལ་སེམས་ཀྱི་འཁྲུལ་སྣང་རྟེན་གཞི་དང་བཅས་པ་ལ། འགྲོ་དྲུག་འཁོར་བའི་སྡུག་བསྔལ་སྣ་ཚོགས་ལ། ཐམས་ཅད་རང་ལ་ཐུག་པས་རང་ལས་རང་གིས་སྤྱོད་པ་ལ་བསམ་པའོ། །དང་པོ་ལ་བདུན། དང་པོ་སྡུག་བསྔལ་བརྒྱུད་མས་མནར་བས་འཁོར་བ་ལ་སྐྱོ་བ། སྡུག་བསྔལ་གྱི་དཔེ་ཇི་ལྟར་བསིལ་མེད་པས་མེ་ནང་འཇིགས་ཤིང་ཉམ་ང་བས་གཅན་གཟན་མི་རྒོད་ཁྲོད། ཐར་དཀའ་བ་རྒྱལ་པོའི་བརྩོན་རར་ཆུད་པའི་འགྲོ་བ་ལྟར་སྡུག་བསྔལ་སྔ་མ་མ་སངས་བཞིན་དུ་ཕྱི་མ་ཕྱི་མས་བརྒྱུད་མས་མནར་བཞིན་དུ་ད་དུང་ཐར་པའི་སྐབས་མེད་སྐྱོ་བ་འཕེལ། གཉིས་པ་སྤང་བླང་གནས་ལ་རྨོངས་པའི་འཁོར་བ་པ་ལ་སྐྱོ་བ། འདོད་པས་བསླུས་པའི་དཔེ་འདི་ལྟར་སེམས་ཅན་ཐམས་ཅད་བདེ་ཐོབ་སྡུག་བསྔལ་བྲལ་འདོད་བློ་ཡོད་ཀྱང་། སྡུག་བསྔལ་རྒྱུ་ཀུན་འབྱུང་འབྲས་བུ་སྡུག་བསྔལ་ཉིད་ལ་མངོན་པར་ཏེ་རྐུན་པོའི་ལག་པ་གཅོད་པས་ཡང་བརྐུས་པས་མགོ་གཅོད་པ་ལྟར་ཡང་ཡང་རྒྱུག མར་མེའི་འོད་ལ་ཕྱེ་མ་ལེབ་བཞིན་དུ། །འདོད་པའི་ཡུལ་ལ་ཆགས་སྲེད་འཛིན་པས་བསླུས། །དེ་བཞིན་རི་དྭགས་བུང་བ་ཉ་དང་གླང་། །སྒྲ་དང་དྲི་རོ་རེག་གིས་བསླུ་བ་ལྟར། །འདོད་པའི་ཡུལ་ལྔ་དག་གིས་འགྲོ་བ་བསླུས། །ནམ་ཡང་བདེ་མེད་སྡུག་བསྔལ་གྱུར་ལ་ལྟོས། །གསུམ་པ་འཁྲུལ་སྣང་མཐོ་དམན་དུ་བརྒྱུད་པས་འཁོར་བ་པ་ལ་སྐྱོ་བ། སྲིད་པ་འདི་དག་ཕན་ཚུན་འཁོར་ཞིང་སྡུག་བསྔལ་བ། ལྷ་དང་ལྷ་མིན་དམྱལ་བ་ཡི་དྭགས་མི། །བྱོལ་སོང་རིགས་དྲུག་ཟོ་ཆུན་རྒྱུད་མོ་བཞིན། །གཅིག་ནས་གཅིག་བརྒྱུད་སྡུག་བསྔལ་ཕ་མཐའ་ཡས། །རིན་ཆེན་ཕྲེང་བ་ལས། ལམ་གསུམ་ཐོག་མཐའ་དབུས་མེད་པར། །འཁོར་བའི་དཀྱིལ་འཁོར་འགལ་མེ་ཡི། །འཁོར་ལོ་ལྟ་བུ་ཕན་ཚུན་དུ། །རྒྱུ་ཅན་འདི་ནི་འཁོར་བར་འགྱུར། །ཞེས་སོ། །བཞི་བ་དགྲ་གཉེན་ངེས་མེད་དུ་བྱས་པས་འཁོར་བ་པ་ལ་སྐྱོ་བ། དེ་ལྟར་འཁོར་བ་ན་འཁོར་དུས་ཀྱི་ཚེ་རབས་བགྲངས་ཚེ་སེམས་ཅན་རེ་རེས་ཀྱང་། མཛའ་བཤེས་དགྲ་དང་བར་མའི་ཁུར་ཁྱེར་ནས། །བདེ་སྡུག་ཕན་གནོད་སྦྱིན་པ་གྲངས་མཐའ་ཡས། །ཕ་ཉིད་མར་གྱུར་མ་ཉིད་སྲིང་མོ་ཉིད། །དེ་ཉིད་བུར་གྱུར་ངེས་པ་མ་མཆིས་ཤིང་། །མཛའ་བོ་དགྲར་གྱུར་པ་ཡང་ཐུག་པ་མེད། །ལྔ་པ་ལུས་དང་ལས་སྣང་མང་བས་འཁོར་བ་པ་ལ་སྐྱོ་བ། གཞན་ཡང་། འདི་ལྟར་འཇིག་རྟེན་སྔ་ཕྱིའི་ལས་བསམས་ན། །སྐྱོ་བ་བས་ཀྱང་ཤིན་ཏུ་སྐྱོ་བ་འཕེལ། །རང་ཉིད་གྲོག་སྦུར་གྱུར་པའི་ལུས་རྣམས་ཀུན། །གཅིག་ཏུ་བསྡོམས་ཏེ་ཕུང་པོར་བྱར་ཡོད་ན། །ལྷུན་པོ་རིན་ཆེན་བཞི་བས་ཆེས་མཐོ་ཞིང་། །ངུས་པའི་མཆི་མ་རྒྱ་མཚོ་བཞི་བས་ལྷག །སེམས་དམྱལ་ཡི་དྭགས་གྱུར་ཚོ་འཐུངས་གྱུར་པའི། །ཟངས་ཞུན་རྣག་ཁྲག་མི་གཙང་ཁུ་བ་རྣམས། །ཕྱོགས་མཐའ་གཏུགས་པའི་སྟེ་གླིང་བཞིའི་ནང་ནས་རྒྱ་མཚོར་འབབ་པའི་ཆུ་ཀླུང་ཆེན་པོ་བཞིས་ཆར་མི་ཕོད་དེ་མང་ཞིང་དེ་བཞིན་གཞན་རྣམས་དཔག་ཡས་ནམ་མཁའ་འདྲ། འདོད་པའི་ཕྱིར་མགོ་དང་མིག་དང་ཡན་ལག་ཉིང་ལག་བཅད་པའི་གྲངས། འཇིག་རྟེན་གྱི་ཁམས་ན་འབྱུང་བཞིའི་རྡུལ་ཕྲན་སྙེད་ཀྱིས་ཆར་མི་ཕོད། དྲུག་པ་བདེ་སྡུག་སྣ་ཚོགས་མྱོང་བས་འཁོར་བ་པ་ལ་སྐྱོ་བ། གཞན་ཡང་འཁོར་བ་ན་སྤྱོད་པའི་ཚེ་བྱོལ་སོང་གྲུལ་བུམ་གནོད་སྦྱིན་ལྟོ་འཕྱེ་སོགས། འགྲོ་བའི་ཁམས་གྱུར་བདེ་སྡུག་གྲངས་མེད་མྱོང་། །ཚངས་དང་བརྒྱ་བྱིན་བསམ་གཏན་གཟུགས་མེད་དང་། །ས་གཞི་རིན་ཆེན་བདུན་གྱིས་ལེགས་སྐྱོང་བའི། །མི་དབང་དཔལ་སྡེ་ཕུན་ཚོགས་དེ་ཐོབ་ཀྱང་། །སླར་ངན་འགྲོར་ལྟུང་བས་ཆེས་ཆེར་སྡུག་བསྔལ་ལོ་སྟེ་དེ་ལྟར་འཁོར་བར་བདེ་སྡུག་གྲངས་མེད་པ་མྱོང་ཡང་ངོམས་པ་དང་སུན་པ་མེད་པར་ད་དུང་ཆགས་པ་དང་བྲལ་དཀའ་བས་ཆེས་སྐྱོ་སྟེ། སློབ་སྤྲིང་ལས། འགྲོ་བ་ལན་བརྒྱར་མ་སོང་འགྲོ་དེ་གང་ཞིག་ཡོད། །སྔོན་ཆད་ལན་མང་མ་མྱོང་བདེ་བ་དེ་གང་ཞིག །རྔ་ཡབ་དཀར་མཛེས་ལྟ་བུའི་དཔལ་གང་མ་ཐོབ་པ། །དེ་ཡང་གང་ཞིག་ཡོད་ན་འོན་ཀྱང་འདོད་ཆགས་འཕེལ། །ཞེས་སོ། །བདུན་པ་ཤིན་ཏུ་འགྱུར་ཞིང་འཕོ་བས་འཁོར་བ་པ་ལ་སྐྱོ་བ། གཞན་ཡང་ཚེ་འདིར་འབྱོར་པ་མཐའ་ཡས་ཉམས་དགའ་བ་ལྷ་དང་མིའི་དབང་པོ་སོགས་མཐོན་པོའི་རང་བཞིན་ཅན་རྣམས་ཚེ་འཕོས་ནས། སྔོན་གྱི་ལས་དེ་ཟད་ནས། དབུལ་བས་ཉམ་ཐག་ཡང་བྲན་ཉིད་གྱུར་པ། །རྨི་ལམ་འབྱོར་པ་གཉིད་སད་མེད་པ་བཞིན། །བདེ་སྡུག་མི་རྟག་འགྱུར་བའི་སྡུག་བསྔལ་ནི། །ཤིན་ཏུ་བསམས་ན་ཆེས་ཆེར་སྐྱོ་བ་འཕེལ། །དེ་བས་གྲོང་ཁྱེར་ཁམས་གསུམ་གྱི་སེམས་ཅན་རྣམས། འཁོར་བའི་བདེ་བ་ཅུང་ཟད་ལ་ཆགས་པ་མེད་པར་བྱང་ཆུབ་སྒྲུབས་ཤིག་ཅེས་བསྐུལ་ལོ། །གཉིས་པ་སྡུག་བསྔལ་སེམས་ཀྱི་འཁྲུལ་སྣང་རྟེན་གཞི་དང་བཅས་པ་ལ་གསུམ། དང་པོ་རྟེན་སྒོ་གསུམ་གྱི་དབྱེ་བ་ངེས་པ། སྡུག་བསྔལ་ཇི་སྙེད་པའི་རྟེན་ནང་གི་ཁམས་གསུམ་ཡིན་ཏེ་ལུས་ངག་ཡིད་གསུམ་པོ་འདོད་གཟུགས་གཟུགས་མེད་དེ། ལུས་རགས་པ་སྣང་དང་ངག་ཕྲ་བ་ཕྱེད་སྣང་ཡིད་ཤིན་ཏུ་ཕྲ་བ་མི་སྣང་གྲོང་ཁྱེར་ན། སྡུག་བསྔལ་འགྱུར་དང་འདུ་བྱེད་གསུམ་གྱིས་གདུངས། ཡུལ་སྤྱི་ཡི་རྣམ་པ་རིག་པ་སེམས་དང་དེའི་ཁྱད་པར་ལ་དཔྱོད། ཆགས་རྟོག་སོགས་རྒྱུན་མཐུད་པ་ཡིད་དང་གཟུགས་སོགས་སོ་སོར་ཤར་བའི་ཆ་རྣམ་ཤེས་ཏེ་སྐབས་འདིར། བྱང་ས་ལས། དེ་ལ་ཡུལ་དུ་སྣང་བ་ནི་རྣམ་པར་ཤེས་པའོ། །དང་པོར་རྟོག་པ་ནི་སེམས་སོ། །ཕྱིས་དེའི་ཁྱད་པར་ལ་དཔྱོད་པ་ནི་སེམས་ལས་བྱུང་བ་སྟེ་ཡོད་དོ། །ཞེས་སོ། །ཡང་ན་ཡུལ་གྱི་རྣམ་པ་དང་འདྲ་བའི་བློ་སྐྱེ་བ་ནི་རྣམ་ཤེས། ཡུལ་དང་པོ་འདིའོ་ཞེས་རིག་པའི་ཆ་ནས་སེམས། དེའི་ཁྱད་པར་ལ་དཔྱོད་པས་རྒྱུན་འབྲེལ་བ་འབྱུང་བའི་ཕྱིར་ཡིད་ཅེས་བྱའོ། །དེ་ལྟར་མཆེད་པ་ཡིས་ཡུལ་རྣམས་ལ་ཆགས་ཞེན་དང་། སྡང་བ་སོགས་ཀྱིས་བདེ་སྡུག་འཁྲུལ་འཁོར་རྒྱུན་མི་ཆད། གཉིས་པ་བརྟེན་པ་ཚོགས་བརྒྱད་ཀྱི་དབྱེ་བ་ངེས་པ། ཚོགས་བརྒྱད་འཁྲུལ་གཞིར་བསྟན་པ། དེ་ལ་ཆ་ཤས་དབྱེ་ན་ཡུལ་ཤེས་འཆར་ཚེ་སལ་གྱིས་རྣམ་དབྱེ་མེད་པར་རིག་པ་གང་ཡིན་པའི་སེམས་ལ་ཀུན་གཞིའི་རྣམ་ཤེས་ཡུལ་ཕྲ་རགས་དཔྱོད་པ་ཡིད་ཤེས་དང་དབང་པོ་ལ་བརྟེན་པའི་གཟུགས་མཐོང་བའི་ཆ་མིག་ཤེས་སོགས་སྒོ་ལྔའི་ཤེས་པ་དག་གོ་རིམ་བཞིན་མཆེད་པ་སྔ་མ་ལས་ཕྱི་མ་མཆེད་པའི་རིམ་པ་ཡིན། མདོར་ན་ཡུལ་དབང་ཡིད་བྱེད་གསུམ་ཚོགས་པ་ལས་ཉོན་མོངས་དང་དེ་ལས་སྲིད་པའི་སྡུག་བསྔལ་རྒྱུ་ཟག་བཅས་དགེ་མི་དགེའི་ལས་དང་། དེ་ལས་འབྲས་བུ་སྲིད་པའི་སྡུག་བསྔལ་རྣམས་འབྱུང་། དེས་ན་རྩ་བ་རང་བྱུང་གི་ཡེ་ཤེས་མ་རིག་པར་རྩལ་སྣང་ལ་བདག་ཏུ་བཟུང་བའི་གཟུང་འཛིན་གྱི་འཁྲུལ་པ་ཅན་ཡིན་ཏེ་མེད་སྣང་དུ་མ་ཤེས་པར་ཕྱི་ཡུལ་དང་དོན་ལུས་དང་སེམས་སུ་བག་ཆགས་བཞག་པས། འཁྲུལ་པའི་རྩ་བ་བདག་ཏུ་འཛིན་བྱེད་ང་དང་གཟུང་ཡུལ་ང་ཡིར་འཛིན་པས་འཁོར་བ་མེད་སྣང་རྨི་ལམ་བཞིན་དུ་བདེན་བདེན་ལྟར་གྲུབ་བོ། །གསུམ་པ་ཀུན་གཞི་བག་ཆགས་སྦྱོང་ཚུལ་གྱི་དབྱེ་བ་ངེས་པ། དེའང་རྣལ་འབྱོར་སྤྱོད་པའི་གཞུང་ལས། སེམས་ཉིད་འགྱུར་མེད་ཡོངས་གྲུ བ་རང་བཞིན་གྱིས་དག་པའི་གཤིས་ལུགས་སྟོང་པ་ཆོས་སྐུ་ཡང་རང་ངོ་མ་རིག་པར་གཉིས་སུ་འཛིན་པས་རྟོག་པས་སྒྲོ་བཏགས་མཚན་ཉིད་ཆད་པ་དང་འཁྲུལ་ངོར་སྣང་བ་རྣམ་གྲངས་པའི་ཀུན་བརྟགས་གཉིས་ལ་གོམས་པ་ཡིས། མ་དག་གཞན་དབང་དོན་ལ་མེད་ཀྱང་ཡོད་པ་ལྟར་བག་ཆགས་དབང་གིས་སྣང་བའི་འཁྲུལ་པ་ཅན། ས་རྡོ་རི་བྲག་སོགས་སྣོད་བཅུད་ཀྱི་རྣམ་པ་མ་དག་པ་ལྟར་དབང་པོའི་སྒོ་སོ་སོ་ལ་ཤར་བའི་སྣང་བ་འཁྲུལ་པ་རྣམས་ཏེ། སྣང་སྣང་ཡུལ་དོན་ལ་ཐ་དད་མེད་ཀྱང་གཉིས་སུ་སྣང་བ་ཅན་ཏེ། རྣལ་འབྱོར་སྤྱོད་པའི་ས་མང་པོ་པ་ལས། ཇི་ལྟར་སྣང་བ་སེམས་སྙེད་དེ། །སྣང་བའི་ཡུལ་ཉིད་དེ་ལྟ་མིན། །ཐོག་མ་མེད་དུས་བག་ཆགས་ཅན། །འཁྲུལ་པས་སྐྲ་ཤད་འཛིངས་པ་བཞིན། །ཞེས་གསུངས་པ་ལྟར་ཡུལ་སྣང་སེམས་ཀྱི་བག་ཆགས་བརྟས་པ་ལས་བྱུང་བས་མེད་སྣང་རབ་རིབ་ཅན་ལ་སྐྲ་ཤད་ལྟར་ཕྱི་ནང་གང་ནའང་མེད་དོ། །ཕྱི་དོན་རང་མཚན་པ་མེད་པས་བྱེ་སྨྲ་དང་མི་མཚུངས་སོ། །ཕྱི་ཡུལ་ནང་དོན་བདག་གཞན་གཉིས་སུ་སྣང་ཞིང་གཉིས་སུ་གཟུང་བ་དེ་ལས་སྲིད་པའི་སྡུག་བསྔལ་དཔག་མེད་ལྷུན་གྱིས་གྲུབ་སྟེ་བྱུང་བ་ཡིན་ནོ། །ནམ་ཞིག་རང་བཞིན་དག་པའི་ཆོས་ཉིད་འགྱུར་མེད་ཡོངས་གྲུབ་སེམས་ཉིད་ཀྱི་དོན་རྟོགས་ནས་ཕྱིན་ཅི་མ་ལོག་ཡོངས་གྲུབ་ཚོགས་གཉིས་ཐབས་ཤེས་ཟུང་འབྲེལ་གྱི་ལམ་བསྒོམས་པས། དག་པ་གཞན་དབང་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཞིང་དུ་ལེགས་པར་སོན་ཏེ། དབང་འབྱོར་པས་སྲིད་པའི་གྲོང་ལས་རྣམ་གྲོལ་གྱི་སར་ངལ་གསོ་བར་བྱེད་པར་འགྱུར། མདོར་ན་སེམས་ཉིད་འོད་གསལ་བ་འགྱུར་བ་མེད་པའི་དེ་ཁོ་ན་ཉིད་ཁོང་དུ་ཆུད་ཅིང་ཆོས་ཐམས་ཅད་ཀུན་ཏུ་བརྟགས་པ་ཙམ་དུ་སྟོང་པར་རྟོགས་ནས། ལམ་བསྒོམས་ན་མ་དག་པའི་འཁྲུལ་སྣང་ཀུན་བརྟགས་པའི་བློ་དང་བཅས་པ་གནས་གྱུར་པའམ་དག་ནས། གདོད་མའི་ངང་དུ་ཕྱིན་ཏེ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཞིང་ཁམས་དག་པ་ལ་མངའ་དབང་རྫོགས་པར་འགྱུར་བ་ནི་བསྟན་པ་དམ་པའི་ཆོས་རྣམས་གཅིག་ཏུ་དྲིལ་བ་ཡིན་ནོ། །གསུམ་པ་འགྲོ་དྲུག་འཁོར་བའི་སྡུག་བསྔལ་སྣ་ཚོགས་བསམ་པ་ལ་གསུམ། རང་སྣང་འཁོར་བའི་སྡུག་བསྔལ་སྤྱིར་བཤད་པ། འགྲོ་དྲུག་སོ་སོའི་སྡུག་བསྔལ་ལ མ་བྱེ་བྲག་ཏུ་བསྟན་པ། འཁོར་བ་དགའ་བའི་སྐྱེ་བ་རྟག་ཏུ་སྡུག་བསྔལ་བར་བསྟན་པའོ། །དང་པོ་ནི། ཨེ་མ་བརྟག་དཀའ་འཁོར་བའི་ཕ་མཐའ་ཡས་ཏེ་ལུང་རྣམ་འབྱེད་ལས། མི་གཙང་བ་ལ་དྲི་ཞིམ་མེད། །དེ་བཞིན་འགྲོ་དྲུག་བདེ་བ་མེད། །འབར་བའི་འོབས་ནས་བསིལ་བ་མེད། །སྲིད་པ་དག་ནའང་དགའ་བ་མེད། །ཅེས་གསུངས་པ་ལྟར། འདོད་པ་ནས་གཟུགས་གཟུགས་མེད་དུ་འཕོ་བའི་སྲིད་པ། གཟུགས་གཟུགས་མེད་ནས་འདོད་པར་འཕོ་བའི་སྲིད་པ། གཟུགས་ནས་གཟུགས་མེད་དུ་འཕོ་བའི་སྲིད་པ་སྟེ་སྲིད་པ་གསུམ་གྱི་ལམ་དུབ་པ་དག་གི་སྡུག་བསྔལ་ནི། འགྲོ་བ་གང་དུ་སྐྱེས་ཀྱང་བདེ་བ་འགའ་མེད་དེ། མི་དགེས་བསྐྱེད་པའི་འབྲས་བུ་མི་བཟད་པ། །རང་སྣང་ལོག་པས་རྨི་ལམ་ནང་བཞིན་དུ། །འགྲོ་དྲུག་སོ་སོར་མྱོང་བའི་རང་བཞིན་ནོ། །མེད་སྣང་འཁྲུལ་པས་སྡུག་བསྔལ་དཔག་ཏུ་མེད། །རེ་ཞིག་མདོར་བསྡུས་དྲན་པ་ཉེར་བཞག་སོགས་ཀྱི་ལུང་བཞིན་བཤད་ཀྱིས་ཉོན། གཉིས་པ་འགྲོ་དྲུག་སོ་སོའི་སྡུག་བསྔལ་ལམ་ལ་དྲུག དམྱལ་བ། ཡི་དྭགས། དུད་འགྲོ། མི། ལྷ་མིན། ལྷའི་སྡུག་བསྔལ་ལོ། །དང་པོ་དམྱལ་བ་ལ། ཚ་དམྱལ། ཉི་ཚེ་ཉེ་འཁོར། གྲང་དམྱལ་དང་གསུམ་ལས། དང་པོ་ཚ་དམྱལ་ལ་གཉིས། སྡུག་བསྔལ་སོ་སོར་བསྟན་པ་དང་། ཐུན་མོང་དུ་བཤད་པའོ། །དང་པོ་ལ་བརྒྱད་ཀྱི་དང་པོ་ཡང་སོས་ལའང་གཉིས་ཏེ། དང་པོ་སྡུག་བསྔལ། དེ་ལ་དམྱལ་བ་ཡང་སོས་ལྕགས་ཀྱི་མདག་མེ་འབར་བའི་སྟེང་། ཕན་ཚུན་འདུས་ནས་མཚོན་གྱིས་སྲོག་དང་འབྲལ། ཡང་སོས་སྒྲ་ཡིས་སོས་ཏེ་སྔར་བཞིན་སྡུག་བསྔལ་བ། སྤྱིར་རང་རང་གི་ལས་མ་ཟད་ཀྱི་བར་དུ་དེ་ལྟར་མྱོང་འཚལ་ལོ། །གཉིས་པ་ཚེ་ཚད། བྱེ་བྲག་ཐུན་མོང་གི་མདོ་སྡེ་ལས་བྱུང་བ་ཚེ་ཚད་མི་ཡི་ལོ་གྲངས་ལྔ་བཅུ་ལ། རྒྱལ་ཆེན་རིགས་བཞིའི་ལྷ་ཡི་ཉིན་ཞག་གཅིག །དེ་ཉིད་སུམ་ཅུ་ཟླ་བ་བཅུ་གཉིས་ལོ། །ལྔ་བརྒྱས་ཡང་སོས་ཞག་གཅིག་གོང་འཕེལ་བས། །རང་ལོ་ལྔ་བརྒྱར་སྡུག་བསྔལ་བརྣག་དགོས་སོ། །དེ་ཉིད་དྲན་ཉེ་དང་ལས་རྣམ་འབྱེད་དུ་གསུངས་པ་ལྟར་རབ་ཏུ་དབྱེ་བའི་གྲངས་བཤད་པ། མི་ལོ་བྱེ་བ་ཕྲག་འབུམ་དང་དྲུག་ཁྲི་དང་སྟོང་ཕྲག་གཉིས་སུ་ངེས་པར་མདོ་ལས་གསུངས། གཉིས་པ་ཐིག་ནག་ནི། ཐིག་ནག་འབར་བའི་སོགས་ལེས་གཤག་བཞིན་འབྱར། འབྱར་བཞིན་གཤོགས་པས་ཤིན་ཏུ་སྡུག་བསྔལ་བ། །མི་ཡི་ལོ་བརྒྱ་རྩ་གསུམ་ཞག་གཅིག་སྟེ། །དེ་ཡི་ལོ་སྟོང་ཐིག་ནག་ཞག་གཅིག་ལ། །རང་ལོ་སྟོང་ཐུབ་མི་ལོ་བྱེ་བ་ཕྲག །ས་ཡ་ཉིས་འབུམ་དང་དགུ་ཁྲི་དྲུག་སྟོང་རྩ་བཅུ་གཉིས་བར་དུ་ཐུབ་པར་སྟོན་པས་གསུངས། གསུམ་པ་བསྡུས་འཇོམས་ནི། བསྡུས་འཇོམ་བྲག་རི་རྟ་དང་རྔ་མོ་དང་། །སྟག་དང་སེངྒེ་ལ་སོགས་འདྲ་བའི་བར། །རྡུལ་ཕྲན་བཞིན་འཇོམས་གྱེས་པས་སྔར་བཞིན་འཚོ། །ལྕགས་ཀྱི་ལྗོངས་སུ་ཐོ་བས་རྡུལ་བཞིན་འཐག །རབ་ཏུ་བཙིར་བས་ཁྲག་གི་རྒྱུན་འབབ་པ། །མི་ལོ་ཉིས་བརྒྱ་མཐའ་བྲལ་ཞག་གཅིག་སྟེ། །འཚེ་མའི་ཉིས་སྟོང་བསྡུས་འཇོམས་ཉིན་ཞག་གཅིག །རང་ལོ་སྟོང་ཕྲག་གཉིས་སུ་སྡུག་བསྔལ་ལོ། །དེ་ཡང་མི་ལོ་བྱེ་བ་ཕྲག་སུམ་འབུམ་དང་དྲུག་ཁྲི་བརྒྱད་སྟོང་རྩ་གཅིག་ཐུབ་པར་གསུངས། བཞི་པ་ངུ་འབོད་ནི། ངུ་འབོད་འབར་བའི་མེས་ཚིག་འོ་དོད་འབོད། །ལྕགས་ཞུན་བསྐོལ་བར་འཚེད་པས་སྡུག་བསྔལ་བ། །མི་ལོ་བཞི་བརྒྱ་དགའ་ལྡན་ཉིན་ཞག་གཅིག །དེ་ཡི་བཞི་སྟོང་ངུ་འབོད་ཞག་གཅིག་སྟེ། །རང་ལོ་བཞི་སྟོང་བར་དུ་སྡུག་བསྔལ་བ། །མི་ལོ་བྱེ་བ་ཕྲག་ས་ཡ་གཉིས་དང་། །བྱེ་བ་ཕྲག་དགུ་འབུམ་བཞི་ཁྲི་དང་ཡང་སྟོང་དང་བྱེ་བ་བདུན་ཕྲག་བར་དུ་ཐུབ་པའོ། །ལྔ་པ་ངུ་འབོད་ཆེན་པོ་ནི། འབོད་སྒྲོགས་ཆེན་པོ་ལྕགས་ཁྱིམ་འབར་བ་རུ། །འབར་བའི་མེས་བསྲེགས་གཤིན་རྗེས་འཚོག་བར་བགྱིད། །མི་ལོ་བརྒྱད་བརྒྱ་འཕྲུལ་དགའི་ཞག་གཅིག་སྟེ། །དེ་ལོ་བརྒྱད་སྟོང་ངུ་འབོད་ཆེའི་ཞག་གཅིག །རང་ལོ་བརྒྱད་སྟོང་ཉིད་དུ་སྡུག་བསྔལ་བ། །མི་ལོ་བྱེ་བ་ཕྲག་ས་ཡ་གསུམ་དང་། །བྱེ་བ་ཕྲག་ལྔ་འབུམ་ལྔ་ཁྲི་ཉིས་སྟོང་དང་དྲུག་ཅུ་རྩ་དྲུག་བར་དུ་ཐུབ་པ་ཡིན། དྲུག་པ་ཚ་བ་ནི། ཚ་བ་ལྕགས་ཁང་ནང་བཞུགས་མདུང་ཐུང་གིས། ཀླད་པ་འགེམས་ཤིང་ཀླད་པ་འབྲུ་བ་དང་ཐོ་བས་རབ་ཏུ་བརྡུང་། འབར་བའི་མེ་ལྕེས་ཕྱི་ནང་ཀུན་ཏུ་བསྲེག །མིའི་ལོ་སྟོང་དང་དྲུག་བརྒྱ་གཞན་འཕྲུལ་ཞག །དེ་ཡི་ལོ་ཁྲི་དྲུག་སྟོང་ཚ་བའི་ཞག །རང་ལོ་ཁྲི་དང་དྲུག་སྟོང་བར་ཐུབ་པ། །མི་ལོ་བྱེ་བ་ཕྲག་ས་ཡ་བརྒྱད་དང་། །བཞི་འབུམ་དང་ནི་བྱེ་བ་ཁྲག་ཁྲིག་ཕྲག་དྲུག་སྟོང་ལྔ་བརྒྱ་དང་སུམ་ཅུ་སྙེད་མཆིས་སོ། །བདུན་པ་རབ་ཏུ་ཚ་བ་ནི། རབ་ཏུ་ཚ་བ་ལྕགས་ཁྱིམ་ཉིས་རིམ་ནང་། །འབར་བའི་མེ་དང་མདུང་རྩེ་གསུམ་པས་བསྣུན། །སྤྱི་བོ་ཕྲག་པ་གཉིས་བྱུང་ལེབ་མས་དཀྲིས། །ཟངས་ཆེན་ཁོལ་མར་འཚེད་པས་སྡུག་བསྔལ་བ། །ཚེ་ཚད་བར་གྱི་བསྐལ་པ་བསྐལ་པ་ཆགས་འཇིག་སྟོངས་གནས་བཞིའི་རིམ་པར་བར་བསྐལ་དུ་བརྩིས་པའི་ཕྱེད་ཐུབ་སྟེ། མི་ལོའི་གྲངས་ཀྱིས་གཞལ་བའི་ཡུལ་ལས་འདས། སྤྱིར་འཇིག་རྟེན་ཆགས་གནས་འཇིག་སྟོངས་བསྐལ་ཆུང་བཞི་ལ་བར་བསྐལ་གཅིག་སྟེ་བརྒྱད་ཅུ་བསྐལ་ཆེན་ནོ། །བརྒྱད་པ་མནར་མེད་ནི། མནར་མེད་ལྕགས་ཁང་མེ་ལྕེ་འབར་བའི་ནང་། །སེམས་དམྱལ་ཀུ་ཅོ་སྨྲེ་སྔགས་འདོན་པ་ལས། །མེ་དང་སེམས་ཅན་སོ་སོར་མཐོང་བ་མེད། །མར་མེ་འབར་བ་སྙིང་པོ་ལ་ཞེན་བཞིན། །སྲོག་གི་ཟུངས་ཙམ་མེ་ནང་དབུས་གནས་པ། །ལས་རྣམ་འབྱེད་ལས། མནར་མེད་པའི་སྒོ་ན་ལྕགས་ཀྱི་རི་དཔག་ཚད་སྟོང་དྲུག་ཁྲི་པ་ཞིག་ཡོད་པ་དེ། དེ་ཉིད་སེམས་ཅན་དམྱལ་བ་དག་གིས་དོར་བས་ཟད་པ་ན་དེ་དག་གི་ཚེ་འཕོ་བ་ཡིན་ཏེ་དཔག་ཏུ་མེད་དོ། །ཞེས་གསུངས་པ་ནི་ལས་ཤིན་ཏུ་འཐུག་པ་ཆོས་སྤངས་པ་དང་། དམ་ཚིག་ཉམས་པ་ལ་སོགས་པ་ཡིན་པར་མངོན་ནོ། །དྲན་ཉེར། བར་བསྐལ་གནས་པའི་ཡུན་གཅིག་བརྣག་དགོས་ཏེ། །དེ་ལས་ཆེ་བའི་སྡུག་བསྔལ་གཞན་མེད་པས། །མནར་མེད་བསྟིར་མེད་ཅེས་སུ་བཤད་པ་ཡིན། །གཉིས་པ་ཚ་དམྱལ་གྱི་སྡུག་བསྔལ་ཐུན་མོང་དུ་བསྟན་པ་ནི། གོང་དུ་སྨོས་པའི་དམྱལ་བ་དེ་དག་ཀྱང་། རྣམ་འབྱེད་ལས། ཐ་མལ་ཙནྡ་དུས་མཐའ་དང་། །དམྱལ་མེ་རྣམས་ཀྱང་གོ་རིམ་བཞིན། །བདུན་འགྱུར་གྱིས་ནི་རབ་ཏུ་ཚ། །དེ་བཞིན་སྡུག་བསྔལ་བདུན་ཕྲག་འགྱུར། །ཞེས་གསུངས་པས། རིམ་བཞིན་མེ་ལྕེ་བདུན་འགྱུར་གྱིས་ཚ་ལ། འོག་མར་སྔ་མའི་སྡུག་བསྔལ་ལྷག་དང་བཅས། །ཇི་སྲིད་ལས་མ་ཟད་པར་སྡུག་བསྔལ་མྱོང་། །གཉིས་པ་ཉི་ཚེ་ཉེ་འཁོར་ལ་གཉིས། ཉི་ཚེ་བ་དང་། ཉེ་འཁོར་བའོ། །དང་པོ་ལ་གཉིས་སྡུག་བསྔལ་བསྟན་པ། ཉི་ཚེ་རི་དང་ལྗོན་ཤིང་ནམ་མཁའ་དང་། །བྲག་བར་མེ་ཆུ་ངེས་མེད་གནས་རྣམས་སུ། །ཉུང་ངུ ར་གནས་དང་འདུས་དང་གཅིག་པུར་གནས། །དེར་ནི་སྡུག་བསྔལ་གང་རུང་རེ་རེས་གདུངས། །དེ་ཕྱིར་ཉི་ཚེ་བ་ཞེས་བཤད་པ་ཡིན། །གཉིས་པ་ལོག་རྟོག་དགག་པ་ནི། གཞན་དག་ཚེ་ཉི་མ་གཅིག་ལས་མེད་པས་དང་ཁ་ཅིག་འདུས་པ་ཉུང་སྟེ་གཅིག་པུར་གནས་པ། དེ་ཡིས་ཉི་ཚེར་འདོད་པ་ནི་འཁྲུལ་པ་སྟེ། བྲག་བར་སྡིག་གཟུགས་ཚེ་ཡང་རིང་ཡོད། ལྕགས་ཀྱི་ཁྱིམ་ན་གནས་པའི་རབས་ལས། ད་དུང་ལོ་ནི་མང་པོ་ཞིག ཕྱིར་ཡང་དམྱལ་བ་འདིར་གནས་སོ། །ཞེས་བཤད་ལ། ཉི་ཚེར་གདུགས་ཚོད་འདུས་པའི་ཉན་ཐོས་གཟུགས། །ལྔ་བརྒྱ་ཕན་ཚུན་མཚོན་གྱིས་འདེབས་པར་གསུངས། །གཉིས་པ་ཉེ་འཁོར་ལ་གསུམ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་ནི། ཉེ་འཁོར་མནར་མེད་ཁང་པའི་ཕྱི་རོལ་བཞིར། །མེ་མ་མུར་དང་རོ་མྱགས་མཚོན་ཆའི་ཐང་། །ཆུ་བོ་རབ་མེད་བཞི་བཞི་བཅུ་དྲུག་གོ །གཉིས་པ་རྒྱས་པར་བཤད་པ་ལ་དྲུག དང་པོ་མེ་མ་མུར་གྱི་འོབས་ནི། མནར་མེད་སྒོ་བྱེ་སྙམ་ལས་ཕྱིར་འཐོན་པས། །འོབས་བཟང་གྲིབ་མ་མཐོང་ནས་ཕྱིན་མ་ཐག །མདག་མེ་འབར་བ་པུས་མོ་ནུབ་བརྒལ་བས། །ཤ་ཀུན་ཚིག་ནས་རུས་པ་ཀུན་དའི་མདོག །ཡང་སོས་སྔར་བཞིན་ཤིན་ཏུ་སྡུག་བསྔལ་ལོ། །གཉིས་པ་རོ་མྱགས་ཀྱི་འདམ་ནི། ཡང་ནི་བསིལ་བའི་འདམ་མཐོང་ཞུགས་མ་ཐག །རོ་མྱགས་རུལ་དྲི་ང་བའི་འདམ་བྱིང་ནས། །ལྕགས་ཟངས་གསེར་གྱི་མཆུ་ཅན་སྲིན་བུས་འབིགས། །གསུམ་པ་སྤུ་གྲིའི་ཐང་། སླར་ཡང་ཐང་ཉམས་དགའ་མཐོང་ཕྱིན་མ་ཐག །སྤུ་གྲི་འབར་བས་དུམ་བུར་གཏུབས་ཤིང་འཚོ། །བཞི་པ་རལ་གྲིའི་ནགས། ནགས་འདབས་ཡིད་འོང་གང་དུ་ཕྱིན་པ་ལས། །རལ་གྲིའི་ནགས་ཚལ་ལས་རླུང་འཁྲུག་པས་བཅོམ། །ལྔ་པ་ཤལ་མ་རི། དེ་འདས་རི་བོ་རབ་ཏུ་ཉམས་དགའི་རྩེར་སྔོན་གྱི་ཆགས་ཡུལ་དང་ཉེ་དུ་སོགས་ཀྱིས་འབོད་མཐོང་སྟེ་ཕྱིན་པ་ལས། ལྕགས་ཀྱི་ཐུར་མ་རྣོན་པོས་ཤ་ཁྲག་གཟགས། །སྟེང་དུ་སོན་ཚེ་བྱ་རྒོད་ཀླད་པ་འགེམས། །སླར་ཡང་རི་ཡི་དྲུང་ནས་འབོད་པ་སྙམ། །འཐུར་དུ་འབབས་པས་ཐུར་མས་གྱེན་དུ་གཟགས། །ཐང་མཚམས་སྐྱེས་པ་བུད་མེད་མཆེ་རྣོན་ཅན། །འབར་བས་འཁྱུད་དེ་ཤིན་ཏུ་སྡུག་བསྔལ་ཞིང་། །ཁྱི་དང་ཅེ་སྤྱང་མང་པོས་ཟ་བར་བགྱིད། །དྲུག་པ་ཐལ་ཚན་གྱི་ཆུ་བོ་རབ་མེད། ཡང་ནི་བསིལ་བའི་ཆུ་ཀླུང་འབབ་མཐོང་ནས། །དགའ་བས་སོང་སྟེ་རབ་ཏུ་འབོག་མ་ཐག །ཐལ་ཚན་རྐེད་ནུབ་ཤ་རུས་ཚིག་གྱུར་ཅིང་། །འགྲམ་གཉིས་གཤིན་རྗེའི་སྐྱེས་བུས་བསྲུང་བར་མཐོང་། །དེར་ནི་ལོ་སྟོང་མང་པོར་སྡུག་བསྔལ་ལོ། །གསུམ་པ་དོན་བསྡུ་བ། དེ་ལྟའི་དམྱལ་བར་སུ་ཞིག་འཇིགས་མི་བྱེད། །སྲིད་ན་དེ་འདྲའི་སྡུག་བསྔལ་དཔག་ཏུ་མེད། །རང་བཞིན་ཤེས་ནས་འདའ་བའི་ཐབས་འཚལ་ལོ། །གསུམ་པ་གྲངས་དམྱལ་ལ་གསུམ། དང་པོ་སྡུག་བསྔལ་དངོས། གྲང་བས་ཉམ་ཐག་པ་ཡང་རྣམ་པ་བརྒྱད། །གངས་སོགས་ཤིན་ཏུ་གྲང་བའི་གནས་དག་ཏུ། །མུན་ནག་བུ་ཡུག་འཚུབས་པས་སྦྲེབས་པའི་ལུས། །ཆུ་བུར་ཅན་དང་ཆུ་བུར་རྡོལ་བ་ཅན། །གྲང་བས་སོ་འ ཐམས་སྨྲེ་སྔགས་ཨ་ཆུ་ཟེར། །ཀྱི་ཧུད་ཨུཏྤལ་ལྟར་གས་པདྨ་དང་། །པདྨ་ཆེ་ལྟར་གས་པའི་རྨ་ནང་དུ། །སྲོག་ཆགས་མཆུ་རྣོན་འབར་བས་ཟ་བ་ནི། །ཇི་སྲིད་ལས་མཐའ་གཏུགས་ཚེ་གཡོ་བར་འགྱུར། གཉིས་པ་ཚེ་ཚད། ཚེ་ཡི་ཚད་ནི་ཀོ་ས་ལ་ཡི་ཁལ། །བཅུ་ཚད་ཉི་ཤུ་ཤོང་བའི་ཏིལ་རྫང་ནས། །ལོ་བརྒྱར་ཏིལ་གཅིག་ཕྱུང་བས་ཟད་གྱུར་པ། །ཆུ་བུར་ཅན་ཚེ་ལྷག་མ་ཉི་ཤུ་འགྱུར། །གསུམ་པ་དེ་དག་ལས་འདའ་བར་གདམས་པ། །སེམས་ལྡན་དག་གིས་སེམས་དམྱལ་འཇིག་རྟེན་ལས། །རབ་ཏུ་རྒྱལ་ཕྱིར་བརྩོན་པའི་སྟོབས་བསྐྱེད་ཅིག །གསུམ་པ་ཡི་དྭགས་ལ་གསུམ། དང་པོ་བྱིང་ན་གནས་པ། ཡི་དྭགས་བྱིངས་མཁར་རྒྱུ་བའི་བྱིངས་གནས་པ། ཕྱིའི་སྒྲིབ་པ་ཅན་ལུས་ཆེ་རྐང་ལག་ཕྲ་ཞིང་ལྟོ་བ་ཡངས། མགྲིན་པ་ཕྲ་ཞིང་ཁབ་ཀྱི་མིག་ཙམ་ཁ། །ཟས་སྐོམ་མི་རྙེད་བཀྲེས་སྐོམ་འབར་བས་གདུངས། །སྨན་ཤིང་མེ་ཏོག་ལ་སོགས་མཐོང་བས་བསྐམས། །གང་འདོད་མི་ཐོས་པས་ཕྱི་རོལ་ཡིད་དུ་མི་འོང་ངན་སྐྱུགས་ཟ། །ཟས་སྐོམ་མཐོང་ཡང་བསྲུང་བར་སྣང་བ་དང་། །ནང་གི་སྒྲིབ་པས་ལྟོ་བར་མེ་འབར་ཞིང་། །ཁ་ནས་མེ་ལྕེ་དུད་པར་བཅས་པ་འཐུལ། །སྤྱི་མཐུན་སྒྲིབ་པས་དབུལ་ཕོངས་འཇིགས་སྔངས་འཚེ། །ཉམ་ངའི་གནས་སུ་མགོན་མེད་སྡུག་བསྔལ་ཉེན། །གཉིས་པ་མཁའ་ལ་རྒྱུ་བ། སྡུག་བསྔལ་སྣ་ཚོགས་དང་ལྡན་མཁའ་ལ་རྒྱུ་བའི་ཡི་དྭགས་འདྲེ་རྣམས་དང་། གནོད་སྦྱིན་སྲིན་པོ་བཙན་དང་རྒྱལ་པོ་སོགས། །ལས་ཀྱི་རྫུ་འཕྲུལ་ཐོགས་མེད་ཀུན་ཏུ་རྒྱུ། །གནོད་པ་སྣ་ཚོགས་མངོན་པར་བསྒྲུབ་པ་སྟེ། །ནད་གཏོང་མདངས་འཕྲོག་ཚེ་ལ་བར་དུ་གཅོད། །ཚེ་ཚད་མི་ཡི་ཟླ་བ་ཉིན་ཞག་གཅིག །རང་ལོ་ལྔ་བརྒྱ་མི་ལོ་ཁྲི་ལྔ་སྟོང་། །གཤིན་རྗེའི་འཇིག་རྟེན་དག་ཏུ་སྡུག་བསྔལ་ལོ། །གསུམ་པ་དེ་དག་ལས་འདའ་བར་བསྟན་པ། དེ་ལྟའི་རང་བཞིན་སྐྱོ་བའི་ཚུལ་མཐོང་ནས། །དོན་མཐུན་སྐྱེ་བོས་ཐར་པ་བསྒྲུབ་པའི་ཕྱིར། །སྲིད་པར་དགའ་བའི་བློ་གྲོས་རྒྱང་བསྲིངས་ཏེ། །ངེས་པར་ཞི་བ་དམ་པའི་ཆོས་བསྒྲུབ་བོ། །གསུམ་པ་དུད་འགྲོའི་སྡུག་བསྔལ་བསམ་པ་ལ་གཉིས། དང་པོ་སྡུག་བསྔལ་དངོས། དུད་འགྲོ་བྱིངས་གནས་ཆུ་གཏེར་གླིང་བཞིའི་བར་ཐང་བཞི་ཡི་ཁྱོན་ན་གནས་པ་ཉ་དང་ཆུ་སྲིན་སོགས་གཅིག་གིས་གཅིག་ཟ་སྡུག་བསྔལ་དཔག་ཏུ་མེད། གླིང་བར་གླིང་འདིའི་ལྕགས་རི་ཕར་འདས་གཞན་གྱི་ཚུར་འདས་པ་ཞིབ་མ་བསྒྲིགས་པའི་ཕྱི་མཐའ་ལྟ་བུའི་གླིང་བར་གྱི་བར་གྱི་མུན་པ་སྟེ། ཉི་ཟླའི་སྣང་བ་མེད་པའི་ཕྱིར་མུན་ནག་རྒྱ་མཚོར་གནས་པ་ཡང་། ཚ་གྲང་བཀྲེས་སྐོམ་གཅིག་ཟའི་འཚེ་བས་འཇིགས། །ཁ་འཐོར་མི་ཡུལ་བྱ་དང་རི་དྭགས་སོགས། །རྔོན་པས་གཙེ་ཞིང་རང་རང་གནོད་པས་ཉེན། །བདག་ཏུ་བཟུང་བའི་རྟ་གླང་རྔ་མོ་ར་དང་བོང་བུ་སོགས། བཀོལ་སྤྱད་རྡེག་འཚོག་སྡུག་བསྔལ་མཐའ་ཡས་ཤིང་། །ཤ་དང་པགས་པ་རུས་པའི་ཕྱིར་འཆི་བས། །རང་བཞིན་སྡུག་བསྔལ་ཕ་མཐའ་མི་མངོན་ཞིང་། །ཀླུ་རྣམས་ཉིན་མཚན་ཕྱེད་མའི་བདེ་སྡུག་དང་། །སྔ་དྲོ་ཕྱི་དྲོ་འགྱུར་བའི་བདེ་སྡུག་དང་། ཁ་ཅིག་གནས་སུ་བྱེ་ཚན་ཆར་འབབས་ལ། །ལ་ལ་གཅིག་པུར་གྲོགས་བྲལ་ཕོངས་པས་ཉེན། །ཕལ་ཆེར་རྨོངས་དང་མཁའ་ལྡིང་འཇིགས་ལ་སོགས། །སྡུག་བསྔལ་རྣམ་པ་སྣ་ཚོགས་དུ་མ་ལྡན། །ཚེ་ཡང་མ་ངེས་ཁ་ཅིག་ཉིན་རེ་ལ། །འཇོག་པོ་ལ་སོགས་བསྐལ་པར་གནས་པའང་གསུངས། །གཉིས་པ་དེ་ལས་འདའ་བར་གདམས་པ། འདི་དག་བསམས་ནས་དགེ་བ་སོགས་ལེགས་པའི་ཆོས་ལས་བྱོལ་ནས་སོང་བས་དུད་འགྲོའི་འཇིག་རྟེན་ལས་ཐར་འདོད་རྣམས་ཀྱིས་ཕན་བདེ་བསྒྲུབ་པའི་ཕྱིར། མངོན་མཐོ་ངེས་ལེགས་ལམ་བཟང་སྲོལ་བཏོད་ལ། །ཉིན་མཚན་བརྩོན་པས་དགེ་ལ་གཞོལ་བར་མཛོད། །བཞི་པ་མིའི་སྡུག་བསྔལ་བསམ་པ་ལ་གསུམ། སྡུག་བསྔལ་ཉིད་གསུམ་བརྒྱད་ཀྱི་ངོ་བོ་སྤྱིར་བསྟན། རྣམ་པ་བརྒྱད་ཀྱི་དབྱེ་བ་བྱེ་བྲག་ཏུ་བཤད། དེ་ལས་འདའ་བར་གདམས་པའོ། །དང་པོ་ནི། མཐོ་རིས་མི་རྣམས་ལ་ཡང་བདེ་བའི་སྐབས་མེད་དེ། མྱ་ངན་ཡིད་མི་བདེ་དང་འཁྲུག་ལ་སོགས། །གཅིག་མ་སངས་པར་གཅིག་གིས་སྡུག་བསྔལ་བ་སྡུག་བསྔལ་གྱི་སྡུག་བསྔལ་དང་། ཟས་སོགས་དུག་འདྲེས་ཟོས་པས་མཚོན་འགྱུར་བ་ཡི་སྡུག་བསྔལ་དང་། ཟས་གོས་སྤྱོད་ལམ་ཉེས་པས་ནད་སོགས་སུ་ཕྱི་མའི་སྡུག་བསྔལ་འདུ་བྱེད་མཚོན་པ་ཁྱབ་པ་འདུ་བྱེད་སྟེ། སྡུག་བསྔལ་ཉིད་གསུམ་དག་དང་དེ་བཞིན་དུ། །སྐྱེ་རྒ་ན་འཆི་མི་སྡུག་ཕྲད་པ་དང་། །སྡུག་བྲལ་འདོད་པས་ཕོངས་དང་ཉེ་བར་ལེན། །རྣམ་པ་བརྒྱད་ཀྱིས་སྡུག་བསྔལ་ཚད་མེད་དེ། །ཚད་བཟུང་དུ་མེད་པའི་ཕྱིར་རོ། །གཉིས་པ་རྣམ་པ་བརྒྱད་ཀྱི་དབྱེ་བ་ལ་བརྒྱད། དང་པོ་སྐྱེ་བའི་སྡུག་བསྔལ། བར་དོར་འཁྱམས་པའི་དྲི་ཟ་ཉེ་བར་ལེན་པས་མངལ་གནས་འཛིན་པ་ལ། མ་རིག་རྣམ་ཤེས་རླུང་སེམས་ཐིག་ལེར་འདུས། ཕ་མའི་འདུ་འཕྲོད་ལས་ཐིག་ལེ་དཀར་དམར་འདྲེས་པའི་སྦུབས་སུ་རྣམ་ཤེས་ཞུགས་ཏེ། ཞག་བདུན་ཕྲག་དང་པོར་མེར་མེར་གྱུ་གྱུ་བ་དངུལ་ཆུའི་རྣམ་པ་ལྟ་བུ། གཉིས་པར་ནུར་ནུར་པོ་བལ་སྣབས་ཀྱི་རྣམ་པ་ལྟ་བུ། གསུམ་པར་ལྟར་ལྟར་པ་མཐེབ་མཛུབ་ཀྱི་རྣམ་པ་ལྟ་བུ། བཞི་པར་མཁྲང་གྱུར་སྒོ་ངའི་རྣམ་པ་ལྟ་བུ། ལྔ་པར་གོར་གོར་པོ་པདྨའི་འདབ་མ་ལྟ་བུ། དྲུག་པ་ལ་ཁྱབ་འཇུག་ཉའི་རྣམ་པ་ལྟ་བུ། བདུན་པར་རུས་སྦལ་གྱི་རྣམ་པ་ལྟ་བུ། དཔེར་ན་མགོ་དང་རྐང་ལག་ཅུང་ཟད་དོད་པས་སྦལ་བའི་རྣམ་པ་ལྟ་བུའོ། །དེ་ལྟར་མེར་ནུར་ལྟར་མཁྲང་གོར་ཉ་རུས་སྦལ་འདྲ། །རིམ་བཞིན་བདུན་ཕྲག་བདུན་དུ་ཆགས་པའི་ལུས། །མ་ཡི་ངལ་དུབ་བཀྲེས་སྐོམ་ཚ་གྲང་སོགས། །ཅུང་ཟད་ཙམ་ལའང་སྡུག་བསྔལ་དཔག་ཏུ་མེད། །མུན་ནག་དོག་ཅིང་ཉམ་ང་དྲི་མི་ཞིམ། །འཁུམས་པའི་སྡུག་བསྔལ་མི་བཟད་བརྣག་དགོས་སོ། །དེ་ནས་བདུན་ཕྲག་བདུན་ནས་ཉི་ཤུ་རྩ་དྲུག་གི་བར་ལུས་ཀྱི་དབང་པོ་ཡན་ལག་བ་སྤུ་ལ་སོགས་འགྲུབ། དེ་ནས་བདུན་ཕྲག་སུམ་ཅུ་རྩ་དྲུག་བར་སྙེད་དུ། །ལུས་ཟུངས་བརྟས་དང་ཆེར་བསྐྱེད་གཡོ་བར་བྱེད། །དེ་ནས་རུས་པའི་འཁྲུལ་འཁོར་བཙིར་བའི་བར། །ལས་གྱི་རླུང་གིས་མགོ་མཇུག་སློག་པས་བཙའ། །འཆི་བས་ཉེན་པའི་སྡུག་བསྔལ་བསྡུས་འཇོམས་འདྲ། །བཙས་ནས་རེག་པས་པགས་པ་བཤུས་པ་བཞིན། །ཁྲུས་བྱས་ཤ་བུར་སྤུ་གྲིས་རེག་དང་མཚུངས། །གཉིས་པ་རྒས་པའི་སྡུག་བསྔལ། དེ་ནས་རྒས་པའི་སྡུག་བསྔལ་ཤིན་ཏུ་བཟོད་དཀའ་བ། །ལང་ཚོ་ཉམས་པས་ཀུན་གྱི་ཡིད་མི་འོང་། །སྟོད་སྨད་མི་ཐེག་འཁར་བ་ལ་བརྟེན་ཅིང་། །ལུས་ཀྱི་དྲོད་ཉམས་ཟས་ཀྱང་འཇུ་བར་དཀའ། །མཐུ་སྟོབས་ཉམས་པས་འགྲོ་འདུག་བསྒུལ་བསྐྱོད་དཀའ། །འདོད་སར་མི་ཕྱིན་ལྷུ་ཚིགས་རྣམ་པར་འགྱུར། །དབང་པོ་ཉམས་པས་མིག་འགྲིབ་གཟུགས་མི་མཐོང་། །སྒྲ་སྐད་མི་ཐོས་དྲི་རོ་རེག་མི་ཚོར། །དྲན་པ་མི་གསལ་གཏི་མུག་གཉིད་དུ་བྱིང་། །ཡུལ་གྱི་ལོངས་སྤྱོད་ཉམས་པས་ཡོན་ཏན་ཆུང་། །ཟས་སོགས་ཞིམ་པོའང་དེ་ལས་ལོག་པར་སྣང་། །ཚེ་ཉམས་འཆི་བས་འཇིགས་དང་འདུ་ཤེས་འཁྲུག་ཚིག་པ་ཟ་བྱིས་པ་བཞིན་དུ་བཟོད་པའི་སྟོབས་ཆུང་ལ་བསྲན་མི་བཟོད། སྣུམ་ཟད་མར་མེ་ཇི་བཞིན་མྱུར་དུ་འགྲོ། །གསུམ་པ་ན་བའི་སྡུག་བསྔལ། དེ་ནས་ན་བའི་སྡུག་བསྔལ་ཤིན་ཏུ་བཟོད་དཀའ་བ། ལས་བརྒྱ་པའི་སྟོད་འགྲེལ་ལས། ན་བས་གདུང་བའི་ལུས་ཅན་ནི། །དམྱལ་བའི་ཚོར་བ་དེ་འདྲ་སྟེ། །དེ་སྙེད་ཕྱིར་ཕྱིར་ལྡང་གྱུར་པ། །སྲེད་ཅན་སྲིད་པའི་ཟུག་རྔུ་འདྲ། །ཞེས་གསུངས་པ་བཞིན། ལུས་ཀྱི་རང་བཞིན་འགྱུར་དང་ཡིད་མི་བདེ། །ཡུལ་གྱི་ལོངས་སྤྱོད་ཡིད་དུ་མི་འོང་ཞིང་། །སྲོག་དང་བྲལ་བར་དོགས་པས་མྱ་ངན་སྐྱེ། །སྡུག་བསྔལ་མི་བཟོད་སྨེ་སྔགས་འབྱིན་པར་བྱེད། །བཞི་པ་འཆི་བའི་སྡུག་བསྔལ། ཚེ་ཟད་པའམ་མ་ཟད་རུང་སྟེ་བར་མ་དོར་འཆི་བའི་སྡུག་བསྔལ་ཤིན་ཏུ་ཆེན་པོ་ཡང་། ཟས་གོས་གཏམ་དང་མལ་གྱི་ཐ་མལ་ཉལ། །སྲོག་ལུས་འཁོར་གཡོག་གཉེན་མདུན་ལོངས་སྤྱོད་འདོར། །གཅིག་པུ་ས་ཚུགས་མེད་པར་འགྲོ་བས་འཇིགས། །ལྔ་པ་མི་སྡུག་པ་དང་འཕྲད་པའི་སྡུག་བསྔལ། མི་སྡུག་པ་དང་ཕྲད་པའི་སྡུག་བསྔལ་ཡང་། །ཡིད་དུ་མི་འོང་གནོད་འཚེའི་འཇིགས་པས་ཉེན། །དྲུག་པ་སྡུག་པ་དང་བྲལ་བའི་སྡུག་བསྔལ། བྱམས་ཤིང་སྡུག་པའི་ཡུལ་དང་བྲལ་བ་ཡང་། །མྱ་ངན་སྨྲེ་སྔགས་ཡིད་མི་བདེ་བའི་གཞི། །ཡོན་ཏན་རྗེས་དྲན་འདོད་པས་གདུང་བར་བྱེད། བདུན་པ་འདོད་པས་ཕོངས་པའི་སྡུག་བསྔལ། འདོད་པ་རྣམས་ཀྱིས་ཕོངས་པའི་སྡུག་བསྔལ་ནི། །དོན་མ་གྲུབ་པས་སེམས་ཀྱི་ཟུག་རྔུ་ལྡང་། །དབུལ་བས་ཉམ་ཐག་བཀྲེས་སྐོམ་ཡི་དྭགས་འདྲ། །བརྒྱད་པ་ཉེར་ལེན་ཕུང་པོའི་སྡུག་བསྔལ། གཟུགས་ཚོར་འདུ་ཤེས་འདུ་བྱེད་རྣམ་ཤེས་ཏེ། །ཉེ་བར་ལེན་པའི་ཕུང་པོ་ལྔ་པོ་ཡང་། །ཟག་བཅས་ཉིད་ཕྱིར་སྡུག་བསྔལ་ཀུན་གྱི་གནས། །རྟེན་དང་སྣོད་དང་འབྱུང་ཁུངས་ལགས་པར་གསུངས། །གསུམ་པ་དེ་ལས་འདའ་བར་གདམས་པ། དེ་ལྟར་མི་ཡི་འཇིག་རྟེན་མཐའ་དག་ནའང་། ཕྱི་མའི་སྡུག་བསྔལ་རྒྱུ་དང་སྔ་མའི་མི་དགེའི་འབྲས་བུ་ཉིད་ལ་སྤྱོད་པའི་ཕྱིར་བདེ་བ་མེད། དེ་ལས་ཐར་ཕྱིར་ལེགས་པའི་ཆོས་བསམས་ཏེ། །འཁོར་བའི་གནས་ལས་ཐར་པའི་ཐབས་འཚལ་ལོ། །ལྔ་པ་ལྷ་མིན་ལ་གཉིས། དང་པོ་སྡུག་བསྔལ་དངོས། ལྷ་མིན་རྣམས་ལའང་བདེ་བའི་སྐབས་མེད་དེ་རང་སྡེ་རྣམས་དོན་མེད་འཐབ་རྩོད་འཁྲུག་ཅིང་ཞེ་སྡང་ལ། ལྷ་ཡི་དཔལ་ལ་མི་བཟོད་ཕྲག་དོག་ལྡན། །གཡུལ་ངོར་སྡུག་བསྔལ་བརྒྱ་ཕྲག་བརྟེན་འཚལ་ལོ། །ལྷ་མིན་རྣམས་རྣམ་སྨིན་གྱི་སྒྲིབ་པ་ཅན་ཡིན་པས་ཉན་རང་གི་བདེན་མཐོང་མེད་ཀྱང་། སྤྱིར་ཐེག་ཆེན་གྱི་བདེན་མཐོང་ཡོད་པར་དཀོན་བརྩེགས་ལ་སོགས་པ་ལས་གསུངས་སོ། །གཉིས་པ་ཆུ་བོ་དེ་ལས་འདའ་བར་གདམས་པ། དེ་བས་དགེ་ལེགས་ཞི་བའི་འགྲོ་བ་དག །མྱུར་བ་ཉིད་དུ་ཐར་པའི་ཆོས་མཛོད་ཅིག །དྲུག་པ་ལྷའི་སྡུག་བསྔལ་བསམ་པ་ལ་གཉིས། དང་པོ་འདོད་ལྷའི་སྡུག་བསྔལ་བསྟན་པ། འདོད་ལྷའི་གནས་ནའང་སྡུག་བསྔལ་ཚད་མེད་དེ། །བག་མེད་འདོད་པས་མྱོས་དང་འཆི་འཕོ་ལྟུང་། །མེ་ཏོག་བརྙིངས་དང་སྟན་ལ་ཉམ་མི་དགའ། །གྲོགས་ཀྱིས་སྤོང་དང་ཕྱི་མའི་གནས་ལ་འཇིགས། །ཚོར་བ་མི་བཟད་ལྷ་ཡི་ཞག་བདུན་འབྱུང་། །གཉིས་པ་ཁམས་གོང་མ་གཉིས་ཀྱི་སྡུག་བསྔལ། ཚངས་རིས་ལ་སོགས་གཟུགས་ཁམས་བསམ་གཏན་ལྷ། །སྔ་མའི་ལས་ཟད་སྲིད་པ་འོག་མར་ལྷུང་། །འགྱུར་བའི་སྡུག་བསྔལ་མཐོང་ནས་སྡུག་བསྔལ་ལ། །གཟུགས་མེད་ཞི་གནས་ལས་ཟད་ཚུལ་མཐོང་ནས། །སྲིད་པ་ཕྱི་མར་འདུ་བྱེད་སྡུག་བསྔལ་ལྡན། །མཐོ་རིས་ཐོབ་ཀྱང་ཡིད་བརྟན་མི་རུང་བས། །སྐལ་བཟང་རྣམས་ཀྱིས་ཐར་པ་བསྒྲུབ་པར་བྱ། །གསུམ་པ་འཁོར་བར་དགའ་བའི་སྐྱེ་བོ་རྟག་ཏུ་སྡུག་བསྔལ་བ་བསྟན་པ། འཁོར་བའི་བདེ་ལ་ཆགས་པའི་འགྲོ་བ་ཀུན། །མེ་ཡི་འོབས་སུ་སྲེད་པས་གདུང་བར་ཟད། །བཞི་པ་ཐམས་ཅད་རང་ལ་ཐུགས་རང་ལས་རང་གིས་སྤྱོད་པར་བསྟན་པ་ལ་ལྔ། དང་པོ་ཐར་པ་རང་ལ་རག་ལས་པས་རང་གི་བརྩོན་པར་བསྟན་པ། ངན་འགྲོའི་གནས་དེ་སངས་རྒྱས་ཀྱིས་སྐྱོབ་མོད་སྙམ་ན། རང་གི་ཉེས་པ་སྐྱོབ་པར་དཀའ་སྟེ། འདི་ལྟར་ཐར་པ་རང་ལ་རག་ལས་ཤིང་། །ཐར་པའི་ཐབས་ནི་ལྷ་མའི་སྟོན་པས་གསུངས། །གཞན་གྱིས་གློ་བུར་འབྱིན་པའི་སྐབས་མེད་དེ། །གཉིད་མྱོས་རྨི་ལམ་སུས་ཀྱང་དགག་མེད་བཞིན། །གལ་ཏེ་ནུས་ན་བདེ་གཤེགས་སྲས་བཅས་ཀྱི། །ཐུགས་རྗེའི་ཟེར་གྱིས་འཁོར་བ་སྟོངས་ཟིན་ངེས། །དེ་བས་རང་ཉིད་བརྩོན་པའི་གོ་བགོས་ཏེ། །ཐར་ལམ་འཛེག་ལ་བརྩོན་པའི་དུས་ལ་བབས། །གཉིས་པ་རང་གི་ལས་སྨིན་པ་ལ་གཞན་གྱིས་དགག་དཀའ་བར་བསྟན་པ། གྲངས་མེད་འདས་པའི་སངས་རྒྱས་དེ་དག་གིས། །གསོ་བའི་སྤྱོད་ཡུལ་མ་གྱུར་བདག་ལྟ་བུ། །སྡིག་པའི་རང་བཞིན་སྲིད་ལམ་དགོན་པར་འཁྱམས། །སྔར་བཞིན་བརྩོན་པ་མེད་ན་ཡང་དང་ཡང་། །འགྲོ་དྲུག་གནས་སུ་སྡུག་བསྔལ་བྱེད་འདི་སོམས། །གསུམ་པ་རྒྱལ་བའི་ཐུགས་རྗེས་འདྲེན་པའང་རང་གི་ལས་སུ་བསྟན་པ། འཁོར་བའི་སྡུག་བསྔལ་མཁའ་ལྟར་མཐའ་ཡས་ཤིང་། མེ་ལྟར་མི་བཟད་སྡུག་བསྔལ་རིགས་མི་འདྲ་བ་དཀར་དམར་ལ་སོགས་པའི་ཡུལ་ལྟར་སྣ་ཚོགས་ལ། བཟོད་པའི་སེམས་ཁྱོད་གནས་མིན་སྨད་པའི་གནས་ངོ་ཚ་མི་ཤེས་ཁྲེལ་བག་བྲལ་བ་ལ། ཐུགས་རྗེའི་གོ་སྐབས་འཇུག་པ་ག་ལ་འགྱུར། །ཐབས་མཁས་མཛད་པའི་ཕྲིན་ལས་དེ་ཡང་ནི། །གདུལ་བྱའི་ལས་རྐྱེན་དག་ལས་འབྱུང་བར་གསུངས་ཏེ། སངས་རྒྱས་ཕལ་པོ་ཆེ་ལས། ཟླ་བའི་དཀྱིལ་འཁོར་ཤར་གྱུར་ཀྱང་། །སྣོད་དུ་མ་གྱུར་མི་སྣང་ལྟར། །སངས་རྒྱས་ཐུགས་རྗེའི་ཟླ་བ་ཡང་། །སྐལ་བ་མེད་གྱུར་མི་སྣང་ངོ་། །ཞེས་སོ། །བཞི་པ་རང་གི་ལས་སུ་མ་རྟོགས་པའི་སྐྱེ་བོ་ལ་སྐྱོ་བར་བསྟན་པ། དེ་བས་རང་གི་ཉེས་ཀུན་ཤེས་བྱས་ཏེ། །འཁོར་བའི་སྡུག་བསྔལ་སྙིང་ནས་དྲན་བྱས་ལ། །བདག་དང་འགྲོ་ཀུན་སྲིད་ལས་ཐར་བྱའི་ཕྱིར། །ཞི་བའི་ལམ་ལ་ཡང་དག་འཛེག་པར་གྱིས། །ད་ལྟའི་སྡུག་བསྔལ་ཅུང་ཟད་མི་བཟོད་ན། །སྲིད་པའི་སྡུག་བསྔལ་མི་བཟད་ཇི་ལྟར་བཟོད། །དེ་ལྟར་བཤད་ཀྱང་ཅུང་ཟད་མི་སྐྱོ་བ། །བདག་སྙིང་ལྕགས་ཀྱི་གར་བུ་ཆེན་པོའམ། །རྡོ་ཡི་ཁམས་བཞིན་སེམས་པ་མེད་པར་མངོན། །ལྔ་པ་ལས་ངན་འཁོར་བའི་བག་ཆགས་སྦྱང་དགོས་པར་བསྟན་པ། འཁོར་བ་མི་བཟད་སྡུག་བསྔལ་ཅན་ཕུང་པོ། དེའི་རྒྱུ་རྩ་ཉོན་དྲུག་ཉེ་ཉོན་ཉི་ཤུ་སྟེ་ཉོན་མོངས་ཉེ་བའི་ཉོན་མོངས་ཀུན་ནས་ཉོན་མོངས་ཕྱོགས་ཀྱིས་བསྡུས་པ་ནད་དང་གནོད་པ་རྣམ་པ་སྣ་ཚོགས་དུ་མའི་འབྱུང་ཁུངས་ལ། སེམས་ཤེས་སུ་ཞིག་སྲེད་པ་འཕེལ་བར་བྱེད། །དེ་བས་མྱུར་དུ་སྲིད་ལས་རྒྱལ་བར་མཛོད། །དོན་གསུམ་པ་ལེའུ་རྫོགས་པ་མཇུག་གི་དོན་ལ་གཉིས། དང་པོ་སྐབས་ཀྱི་དགེ་བ་སྔོ་བ། དེ་དག་གི་རང་བཞིན་དབྱངས་སུ་བསྙད་པའི་དགེ་བ་སེམས་ཅན་ལ་ཕན་པའི་རྒྱུར་བསྔོ་བ་དེ་ལྟར་བདེ་འབྱུང་ཆོས་ཀྱི་དགའ་སྟོན་གྱིས་གྲོང་ཁྱེར་ཁམས་གསུམ་གྱི་འགྲོ་བ་ཇི་སྙེད་ཀུན། འཕགས་པའི་འབྱོར་པས་བདེ་དགའི་ཤས་འཚོ་སྣ་ཚོགས་སྡུག་བསྔལ་གྱིས་དུབ་པའི་སེམས་ཉིད་དེ་རིང་ངལ་སོས་ཤིག གཉིས་པ་ལེའུའི་མཚན། རྫོགས་པ་ཆེན་པོ་སེམས་ཉིད་ངལ་གསོ་ལས། འཁོར་བ་སྡུག་བསྔལ་གྱི་ལེའུ་སྟེ་གསུམ་པའོ།། །། ༈ བཞི་པ་ལས་རྒྱུ་འབྲས་བསམ་པའི་ལེའུ་ལ་གསུམ་སྟེ། ལེའུ་ལ་འཇུག་པ་རྒྱུའི་དོན། ལེའུ་དངོས་ཀྱི་དོན། ལེའུ་རྫོགས་པ་མཇུག་གི་དོན་ནོ། །དང་པོ་ནི། དེ་ལྟར་སྲིད་པའི་བདེ་སྡུག་མཐོ་དམན་རྣམས། །སྔོན་བསགས་ལས་ལས་བྱུང་བ་ཐུབ་པས་གསུངས། །གཉིས་པ་ལ་གསུམ་སྟེ། སྲིད་པ་སྒྲུབ་པའི་ལས་དང་། ཞི་བར་སྦྱོར་བའི་ལས། དེ་གཉིས་ཀྱི་གནས་སྐབས་གཞན་བསྟན་པའོ། །དང་པོ་གསུམ་སྟེ། ལས་ཀྱི་ངོ་བོར་མདོར་བསྟན། དེའི་རྟེན་གཞི་བྱེ་བྲག་ཏུ་བཤད། རྟེན་ཆོས་ལས་ཀྱི་རབ་ཏུ་དབྱེ་བའོ། །དང་པོ་མདོར་བསྟན་ནི། འཁོར་བར་འདུ་བྱེད་ལས་དེ་དཀར་ནག་གཉིས། །དགེ་དང་མི་དགེ་བཅུ་བཅུའི་རང་བཞིན་ནོམ། །གཉིས་པ་རྟེན་གཞི་བྱེ་བྲག་ཏུ་བཤད་པ་ལ་བཅུ་གཉིས། དང་པོ་ཀུན་གཞི་དང་ཚོགས་བརྒྱད་ཀྱི་ངོ་བོར་སྤྱིར་བསྟན་པ། དེ་ཡི་རྟེན་གཞི་བག་ཆགས་སྣ་ཚོགས་པའི་ཀུན་གཞི་ངོ་བོ་གཏི་མུག་ཡིན་པས་ལུང་མ་བསྟན་ཏེ། དེ་ཡང་འཁོར་འདས་ཀྱི་སྤྱི་གཞི་ལུང་མ་བསྟན་དབྱིངས་དེ་བཞིན་ཉིད། དེའི་ངང་ན་རིག་པ་འདུས་མ་བྱས་པའི་རང་གཞིན་ཡོན་ཏན་ལྷུན་གྲུབ་ཏུ་བརྟེན་པའི་ཆ་ནས་སྦྱོར་བ་དོན་གྱི་ཀུན་གཞིའམ་བདེ་གཤེགས་སྙིང་པོ། དེ་ཉིད་མ་རིག་པས་གཞི་བྱས་དགེ་སྡིག་ཚོགས་བརྒྱད་ཀྱི་རྟེན་གྱི་ཆ་ནས་བག་ཆགས་སྣ་ཚོགས་པ་ཡི་ཀུན་གཞིའམ་ལྷན་ཅིག་སྐྱེས་པའི་མ་རིག་པ། དེ་ནི་སེམས་ཉིད་དག་པ་ལ་བརྟེན་པ་མེད་པའི་ཚུལ་གྱིས་བརྟེན་ཏེ་མཁའ་ལ་སྤྲིན་ལྟར་རོ། །ལམ་བདེན་འདུས་བྱས་ཀྱི་ཆ་ཐམས་ཅད་ཀྱང་བག་ཆགས་སྣ་ཚོགས་པའི་ཀུན་གཞི་ལ་བརྟེན་ནས་དེ་ལ་གནོད་པར་ཡང་བྱེད་དེ་བུད་ཤིང་ལ་བརྟེན་པའི་མེས་དེ་ཉིད་བསྲེགས་པ་བཞིན་ནོ། །དེས་ན་རྣམ་བྱང་བརྟེན་ཚུལ་ལམ་གྱི་རྣམ་བྱང་ཙམ་ལས། དག་པ་མཐར་ཐུག་གི་རྣམ་བྱང་ཆོས་སོ་བདུན་སོགས་འདི་ལ་མི་བརྟེན་ཏེ་སྦྱོར་བ་དོན་གྱི་ཀུན་གཞི་སྙིང་པོའི་ཁམས་ལ་བརྟེན་ནོ། །དེས་ན་བྲལ་གཞི་ནི་ཁམས་སམ་སྙིང་པོ། བྲལ་རྒྱུ་ནི་དེ་སྟེང་གི་དྲི་མ་སྦྱོང་བྱེད་ཐར་པ་ཆ་མཐུན་གྱི་དགེ་བ་ལམ་བདེན། བྲལ་འབྲས་ནི་སྙིང་པོའི་ཡོན་ཏན་རྣམས་མངོན་དུ་གྱུར་པ། བྲལ་བྱ་ནི་བག་ཆགས་སྣ་ཚོགས་པའི་ཀུན་གཞི་ལ་བརྟེན་པའི་ཚོགས་བརྒྱད་བག་ཆགས་དང་བཅས་པ་སྟེ། འདི་དག་གསང་སྔགས་ལྟར་ན་སྦྱང་གཞི་སྦྱོང་བྱེད། སྦྱངས་འབྲས། སྦྱང་བྱ་དང་བཞིར་བཤད་པ་དང་དོན་གཅིག དེས་ན་བག་ཆགས་སྣ་ཚོགས་པའི་ཀུན་གཞི་མེ་ལོང་དང་འདྲ་རྟོག་མེད་ངོ་བོའི་སྟེང་ཀུན་གཞིའི་ཤེས་པ་གསལ་བ་ཡུལ་དུ་མི་རྟོག་ཅིང་། འཆར་གཞི་བྱེད་པས་མེ་ལོང་དྭངས་དང་འདྲ། དེ་ལས་གཟུགས་སོགས་ཡུལ་འཛིན་དབང་ཤེས་ལྔ་པོ་རང་ངོ་མི་རྟོག་མེ་ལོང་གི་གཟུགས་བརྙན་བཞིན། དེ་རྗེས་ཡུལ་ངོ་བོ་ཙམ་པ་ཡིད་ལ་ཡུལ་དུག་གསུམ་མཚུངས་ལྡན་དུ་ཤར་བ་ནི་ཉོན་ཡིད་དེ་གཟུང་འཛིན་ཡུལ་འབྱེད་ཤེས་པ་རྣམས་ཏེ། དེ་ཡང་ལས་སོག་པའི་སྒོ་ནི་ཡིད་ཀྱི་དབང་པོ་དང་། སྒོ་ལྔའི་རྣམ་ཤེས་རྟེན་དང་བཅས་པའོ། །སོག་བྱེད་ཉོན་མོངས་པ་ཅན་གྱི་ཡིད་དང་། དགེ་བར་སེམས་པའི་ཡིད་དང་། ཡིད་ཤེས་བར་མའོ། །གང་ལ་སོག་ན་ཀུན་གཞིའི་སྟེང་དུ་སོག་གོ །དེ་དག་འཕེལ་འགྲིབ་གོ་འབྱེད་པ་ནི་ཀུན་གཞིའི་རྣམ་ཤེས་སོ། །སྐད་ཅིག་རྗེས་འཐུད་དེ་ལ་འཛིན་པ་སྟེ་མིག་ཤེས་ནི་གཟུགས་རྣམ་པར་ཤེས་པའི་ཆ་ཙམ་ཡིན། ཡུལ་ཤེས་པའི་ཆ་ནས་རྣམ་ཤེས་ཞེས་བྱ། ཀུན་གཞིའི་རྣམ་ཤེས་ནི་ཡུལ་མི་འཛིན། དེའི་རྗེས་ལ་དཔྱོད་པ་ཞིབ་མོ་རྟོག་དང་གཟུགས་སོགས་ལ་ཞིབ་མོར་མི་རྟོག་པ་ཡིད་སེམས་ཡིན་པས་ཉོན་ཡིད་ཡིད་ཤེས་ཏེ། དེ་རྗེས་དཔྱོད་པ་ཞི བ་མོ་ཐམས་ཅད་ནི་འཛིན་པའི་རྟོག་པར་བཤད་དོ། །དེའང་ཡིད་ཀྱིས་སྐད་ཅིག་དང་པོར་ཡུལ་རིག་ཀྱང་དཔྱོད་པས་རྗེས་མ་མཐུད་ན་ལས་མི་སོག་གོ། གཉིས་པ་དེ་ལ་ལས་སོག་པ་དང་བརྟེན་ཚུལ་བྱེ་བྲག་ཏུ་བསྟན་པ། དེ་ཡང་ཆགས་རྟོག་གཟུང་འཛིན་རགས་པའི་དགེ་སྡིག་གིས་འདོད་པར་འདུ་བྱེད་བག་ཆགས་ཀུན་གཞིར་བརྟེན། གནས་ལུགས་ཀྱིས་མ་ཟིན་པའི་ཏིང་འཛིན་སྣང་ཡུལ་ལ་རྟོག་པ་མ་སྐྱེས་པའི་མི་རྟོག་གསལ་སྣང་གཟུགས་སུ་འདུ་བྱེད་ལ། སྣང་ཡུལ་འགག་པའི་མི་རྟོག་རྩེ་གཅིག་གཟུགས་མེད་བག་ཆགས་ཀུན་གཞི་ལ་བརྟེན། འཁོར་བའི་རང་བཞིན་གློ་བུར་སྒྲིབ་པ་གཉིས། །དུས་རྣམས་ཀུན་ཏུ་ཉེ་བར་བརྟེན་པ་ཡིན། །གསུམ་པ་ཚོགས་བརྒྱད་ཀུན་གཞི་དང་བཅས་པའི་རང་དུས་ངོས་བཟུང་བ། ཤེས་པ་གང་དུའང་མི་རྟོག་ཡེངས་ཐབས་ཚེ། སྣང་ཡུལ་མི་འཛིན་རྩེ་གཅིག་ཀུན་གཞིའི་དུས་སོ། །ཡུལ་སྣང་ས་ལེར་མཐོང་དུས་གསལ་སྣང་གང་ལའང་དེར་འཛིན་མི་འཇུག་པ། ཀུན་གཞིའི་རྣམ་ཤེས་དྭངས་གསལ་གཡོ་བ་མེད། དེའི་ཚེ་ཡུལ་སོ་སོར་གསལ་ལ་རིག་པ་སྒོ་ལྔའི་ཡུལ་དང་རྟོག་དཔྱོད་དགག་སྒྲུབ་ཤར་བ་གཟུང་འཛིན་གྱིས་ཡིད་ཀྱི་རྣམ་ཤེས་དང་ཉོན་ཡིད་ཀྱི་སྐབས་སོ། །ཚོགས་བདུན་ཡུལ་ལ་རགས་པ་རྟོག་པ་ན། །རྣམ་ཤེས་བདུན་ཞེས་ཉེ་བར་བཏགས་པ་ཡིན། །བཞི་པ་དེ་གོམས་པས་ཁམས་གསུམ་གྱི་འཁྲུལ་སྣང་འགྲུབ་ཚུལ། འདི་དག་གོམས་པས་ཁམས་གསུམ་སྲིད་པ་རུ། །སྒོ་གསུམ་འཁྲུལ་ཞིང་སྡུག་བསྔལ་འདུ་བྱེད་ཡིན། །ལྔ་པ་ཁམས་གསུམ་སོ་སོའི་སར་གང་གཙོ་ངོས་བཟུང་བ། དེ་ཡང་འདོད་པར་ཚོགས་བདུན་གཙོ་བོ་ལ། །གཟུགས་སུ་ཀུན་གཞིའི་རྣམ་ཤེས་གཟུགས་མེད་དུ། །མི་རྟོག་ཀུན་གཞི་འབའ་ཞིག་གཙོ་བོར་ལྡན། །གཞན་གཉིས་འཁོར་གྱི་ཚུལ་དུ་བག་ལ་ཉལ། །རང་རང་ས་དེར་ལྡན་པ་ཤེས་པར་བྱ། །དྲུག་པ་འདོད་པར་ཉིན་མཚན་ངེས་པའི་ཤེས་པ་ངོས་བཟུང་བ། འདི་ལྟར་འདོད་ན་མཚན་མོ་ཉལ་བའི་ཚེ། །ཡུལ་ལྔའི་ཤེས་པ་ཉོན་ཡིད་དང་བཅས་པ་རིམ་གྱིས་ཡིད་ཤེས་དུ་ཐིམ། དེ་ཡང་ཀུན་གཞི་རྣམ་ཤེས་དང་དེ་ཉིད་ཀུན་གཞིར་ཐིམ་པས་གསལ་ལ་མི་རྟོག་པ་རྩེ་གཅིག་སྣང་ཡུལ་མེད་པ་དེའང་རྟོག་པ་གཡོ་བའི་རླུང་རྣམས་དང་། ཚོགས་བདུན་བརྟེན་པའི་རྩའི་རླུང་རོ་རྐྱང་དུ་ཆུད་ནས་དབུ་མའི་ནང་དུ་འཇུག་པའི་ཚེ་ཀུན་གཞི་སུམ་མཉམ་གྱི་རྣམ་པར་ཤེས་པ་ཞེས་བྱ་སྟེ། རླུང་སུམ་མདོ་གཅིག་ཏུ་མཉམ་པའི་ཕྱིར་རོ། །དེ་ནས་དབུ་མར་ཚུད་དེ་རོ་གཅིག་པ་ཀུན་གཞིའི་དུས་ཏེ་གཉིད་འཐུག་པོར་སོང་སྟེ་རྨི་ལམ་མེད་པའོ། །དེ་ནས་ཀུན་གཞི་ཆོས་དབྱིིངས་སུ་ཐི མ་པ་ནི་དབུ་མའི་ནང་ན་འོད་གསལ་མཆོག་མི་འགྱུར་གྱི་རྩ་རགས་པའི་ཁམས་དང་། རླུང་མི་རྒྱུ་བའི་དྭངས་མ་འོད་ཀྱི་རང་བཞིན་ཡོད་པ་དེར་དབུ་མའི་རླུང་དྭངས་མ་ཤེས་པ་ཉིད་ཚུད་པའི་ཚེ་སྣང་བའི་འོད་གསལ་ཐིག་ལེ་སོགས་དང་། སྟོང་པའི་འོད་གསལ་སེམས་ཉིད་སྤྲོས་བྲལ་འཆར་པའི་ངང་དེ་ཉིད། ཆོས་དབྱིངས་ཐིམ་པས་ཕྲ་རགས་ཀྱི་རྟོག་པ་ནུབ་སྟེ་རང་བཞིན་སྤྲོས་དང་བྲལ་བ་དར་ཅིག་འཆར་བས་དེ་ངོས་ཟིན་ན་འཁྲུལ་པ་བཟློག་གོ །སླར་ཡང་མཆེད་པས་ཆོས་དབྱིངས་ལས་ཀུན་གཞི། དེ་ལས་ཀུན་གཞིའི་རྣམ་ཤེས། དེ་ལས། ཡིད་ཉིད་གཅིག་པུ་ལངས་པས་རྨི་ལམ་སེམས་སྣ་ཚོགས་དགག་སྒྲུབ་མེད་བཞིན་སྣང་བར་བྱེད་དེ་སྲོག་རྩའི་ཡིད་དྲན་པ་རྣམ་རྟེན་གྱི་སྦུབས་མཆེད་པའི་དུས་སོ། །དེ་ལས་མཆེད་པས་དེ་ནས་དབང་པོ་སོ་སོ་ལ་བརྟེན་པའི་རྩ་རླུང་ཞུགས་པས་གཉིད་སད་ཉིན་དུས། ཚོགས་དྲུག་གི་རྣམ་ཤེས་ཡུལ་ལ་འཇུག་པས་ལས་འདུ་བྱེད། ཉིན་མཚན་ཁོར་ཡུག་དེ་ལྟར་སྣང་བ་ཡིན། བདུན་པ་གཟུགས་ཁམས་རང་སའི་ཤེས་པ་ངོས་བཟུང་བ། གཟུགས་སུ་རང་སའི་ཤེས་པ་བསམ་གཏན་བཞི། །ཀུན་གཞིའི་ཤེས་ཉིད་ངང་དུ་གནས་པ་ལས། །ཡུལ་རྣམས་འཛིན་པའི་ཤེས་པ་ཕྲ་མོ་རྣམས། །སྐབས་འགར་ཉེ་བར་འབྱུང་གིས་ཕལ་ཆེར་ནི། །ཏིང་འཛིན་གོམས་པས་ཉེ་བར་གནས་པ་ཡིན། །བརྒྱད་པ་གཟུགས་མེད་རང་སའི་ཤེས་པ་ངོས་བཟུང་བ། གཟུགས་མེད་རང་སའི་ཤེས་པ་ཀུན་གཞིའི་ངང་། །མཁའ་སོགས་རྣམ་བཞི་ཞི་གནས་རྩེ་གཅིག་ཏུ། །ཉེ་བར་གནས་པས་ཤིན་ཏུ་ཕྲ་བ་ཡི། །ཚོར་བ་འདུ་ཤེས་འདུ་བྱེད་རྣམ་པར་ཤེས། །མིང་བཞིའི་ཕུང་པོར་སེམས་ཀྱི་རྒྱུད་བརྟེན་ནས། །ཞི་གནས་རྩེ་གཅིག་བསྐལ་པར་མི་སད་དེ། །རྣམ་དཔྱོད་དགེ་བའི་ས་བོན་འདེབས་པའང་མེད། །དགུ་པ་ཁམས་གོང་མའི་སེམས་ལས་གྲོལ་དགོས་པར་གདམས་པ། དེ་ལྟར་བསམ་གཏན་གཟུགས་མེད་སེམས་དེ་ཡང་། །སྔ་མའི་འབྲས་ཡིན་ཟད་ནས་ཚེ་འཕོ་ལ། །ངོ་བོ་ལུང་མ་བསྟན་ཡིན་གཏི་མུག་ཕྱིར། །འཁོར་བའི་གནས་སུ་ཕྱིན་ཅི་ལོག་རྒྱུ་འབྲས། །ཡང་ཡང་བསྐྱེད་ཕྱིར་དེ་ལས་ཐར་དགོས་སོ། །བཅུ་པ་འདོད་པར་ལས་ཁྱད་པར་ཅན་གྱི་བསགས་བྱང་དགོས་པར་གདམས་པ། འདོད་པའི་སེམས་དེ་གོམས་ཚུལ་ཇི་བཞིན་ཉིད་རགས་པ་ཡིན། ལས་ཀྱི་ས་ཡིན། ཆོས་སྤྱོད་པའི་སྣོད་ཁྱད་ཅན་ཡིན་ཕྱིར་མཐོ་དམན་ཐར་པའི་རྒྱུ་ཡང་བྱེད། བཅུ་གཅིག་པར་འདོད་པར་ཉིན་དུས་ཀྱི་ཤེས་པའི་ཆ་དབྱེ་བ། ཉིན་དུས་ཕལ་ཆེར་ཚོགས་བདུན་ཤེས་པ་གཙོ། །གཞན་གཉིས་ངོ་བོ་གཅིག་པའི་འཁོར་དུ་ཡོད། །དེ་ཡང་གཟུགས་འཛིན་པའམ་མཐོང་བའི་ཆ་མིག་གི་རྣམས་ཤེས་ཏེ། དེར་གསལ་རྟོག་བྲལ་གྱི་ཤེས་པ་གསལ་ཆ་ནི་ཀུན་གཞིའི་རྣམ་ཤེས། དེ་ཡི་མི་རྟོག་པའི་ཆ་ཉིད་ཀུན་གཞིའོ། །ལྷག་མ་སྒྲ་ཐོས། རོ་མྱོང་། རེག་བྱ་རེག དྲན་པའི་ཡུལ་ལ་ཡིད་ཀྱིས་རིག་པའི་རྣམ་ཤེས་སོགས་དྲུག་ཀྱང་དེ་བཞིན་ཤེས་པར་བྱ། བཅུ་གཉིས་པ་འདོད་པར་ཉིན་མཚན་གྱི་ཤེས་པ་ལ་ངོ་བོ་གཅིག་པའི་གནས་སྐབས་བསམ་པ། གཉིད་དུ་རྩེ་གཅིག་རྨི་ལམ་སད་དུས་ན། །ཀུན་གཞི་ཀུན་གཞིའི་རྣམ་ཤེས་ཡིད་དང་ནི། །ཚོགས་དྲུག་རིམ་བཞིན་གཉིད་འཐུག་གི་ཚེ་ཀུན་གཞ་ིགཅིག་དང་རྨི་ལམ་གྱི་དུས་ཀུན་གཞི་རྣམ་ཤེས་དང་། ཡིད་ཤེས་གཉིས་ངོ་བོ་གཅིག་པ་དང་། སད་དུས་ཚོགས་བརྒྱད་ཐམས་ཅད་ངོ་བོ་གཅིག་པའི་དུས་སུ་ཤེས་བྱ། གསུམ་པ་རྟེན་ཆོས་ལས་ཀྱི་རབ་ཏུ་དབྱེ་བ་ལ་གསུམ། རྩ་བའི་ལས་མདོར་བསྟན། དེའི་བསྐྱེད་པའི་ལས་དངོས་རྒྱས་པར་བཤད། སྐབས་ཀྱི་དོན་བསྡུ་བའོ། །དང་པོ་རྩ་བའི་ལས་ནི། དེ་ལ་རྟེན་པའི་ཆོས་ལས་ཀྱི་རྩ་བ་སེམས་ཉིད་འོད་གསལ་བའི་རང་ངོ་མ་རིག་པ་གཟུང་འཛིན་གྱི་རྩལ་ངོ་བོ་འདོད་ཆགས་ཞེ་སྡང་གཏི་མུག་གསུམ། དེས་བསྐྱེད་སྲིད་པར་འདུ་བྱེད་དགེ་མི་དགེའི་ལས་དཀར་ནག་གཉིས་ཏེ། གཉིས་པ་དེས་བསྐྱེད་པའི་ལས་ལ་གཉིས། མི་དགེ་བ་བཅུ་དང་། དགེ་བ་བཅུའོ། །དང་པོ་མི་དགེ་བཅུ་ལ་གཉིས་ཏེ། རང་བཞིན་དང་འབྲས་བུའོ། །རང་བཞིན་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་མདོར་བསྟན་པ་ནི། འཁོར་བར་མཐོ་རིས་ནས་དམན་སར་ལྟུང་ཞིང་སྡུག་བསྔལ་འབའ་ཞིག་བསྐྱེད་ཕྱིར་མི་དགེ་བ་སྟེ། དབྱེ་ན་བཅུ་ཉིད་སོ་སོར་སྣང་བ་ཡིན། །མི་དགེའི་ལས་བཅུ་ལུས་གསུམ་ངག་གི་བཞི། །ཡིད་གསུམ་རིམ་བཞིན་སོ་སོར་དབྱེ་བ་ནི། །གཉིས་པ་རྒྱས་པར་བཤད་པ་ལ་གསུམ། དང་པོ་ལུས་ཀྱི་ལས་གསུམ་ནི། སྲོག་གཅོད་བསམ་བཞིན་མ་ནོར་གཞན་བསད་ལ། །ཕྱོགས་མཐུན་རྡེག་འཚོག་ལ་སོགས་སྲོག་ལ་འཚེ། །མ་བྱིན་ལེན་པ་གཞན་ནོར་བརྐུ་བ་སྟེ། །ཕྱོགས་མཐུན་མཐུན་པའི་རིམ་གྲོ་བསྟེན་པ་སོགས་གཡོ་སྒྱུས་ཕ་རོལ་ནོར་ལ་ལེན། འདོད་ལོག་གཞན་གྱིས་བདག་བཟུང་ཉེ་དུ། དབང་པོའི་སྒོ་གཞན་གནས་དང་དུས་མི་རུང་བ་ཉིད་ལ་སྤྱོད། །ཕྱོགས་མཐུན་ལག་པ་སོགས་གཞན་གྱིས་བགྲོད་{བསྒྲོད}བྱ་མིན་པར་རྩོལ་སོགས་འཁྲིག་པའི་ཆོས། གཉིས་པ་ངག་གི་ལས་བཞི། བརྫུན་ཚིག་འདུ་ཤེས་གཞན་བསྒྱུར་ཚིག་དོོན་གོ །ཕྱོགས་མཐུན་དྲང་སོགས་གཞན་སེམས་སླུ་བ་ཉིད་དེ་དྲང་པོར་བརྗོད་པས་ཕ་རོལ་བསླུ་བར་མཐོང་ནས་དེ་བརྗོད་པའོ། །ཕྲ་མ་ཕ་རོལ་འབྱེད་ཚིག་སྨྲ་བ་སྟེ། །ཕྱོགས་མཐུན་གཞན་ཚིག་གཞན་ཟློས་མི་མཐུན་བྱེད། །ངག་འཁྱལ་བསྟན་བཅོས་ངན་དང་བྲེ་མོའི་གཏམ། །ཕྱོགས་མཐུན་འབྲེལ་མེད་བརྗོད་སོགས་ཆོས་མིན་གཏམ། །ཚིག་རྩུབ་ཕ་རོལ་ཞེར་འདེབས་རྩུབ་མོའི་ཚིག །ཕྱོགས་མཐུན་འཇམ་སོགས་གཞན་ཡིད་མི་བདེའི་གཏམ། །གསུམ་པ་ཡིད་ཀྱི་ལས་གསུམ། བརྣབ་སེམས་གཞན་འབྱོར་མི་བཟོད་བདག་གིར་བྱེད། ཕྱོགས་མཐུན་ཕ་རོལ་པོ་ལ་ཁྲོ་བཞིན་པས་ཐོས་སོགས་ཕ་རོལ་དཔལ་ལ་བརྐམ། གནོད་སེམས་གཞན་ལ་གནོད་འཚེས་ཞེ་སྡང་ཞིང་། །ཕྱོགས་མཐུན་ཕན་པར་མི་འདོད་ཁྲོ་བའི་སེམས། །ལོག་ལྟ་རྟག་ཆད་རྒྱུ་འབྲས་མེད་པར་བལྟ། །ཕྱོགས་མཐུན་ཆོས་དང་གང་ཟག་ལ་སྒྲོ་སྐུར་འདེབས་སོགས་ཕྱིན་ཅི་ལོག གཉིས་པ་འབྲས་བུ་ལ་གསུམ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་མདོར་བསྟན་ནི། ཡུལ་དང་ཀུན་སློང་བསམ་སྦྱོར་ངན་པ་ཡིས། །མི་དགེའི་ལས་བཅུ་སྤྱད་པའི་འབྲས་བུ་ནི། །རྣམ་སྨིན་རྒྱུ་མཐུན་དབང་དང་མན་ངག་གིས་བསྟན་པའི་བྱེད་པ་བཞི། གཉིས་པ་ལ་ལྔ། དང་པོ་རྣམ་སྨིན་གྱི་འབྲས་བུ། ལས་བཅུ་ཆུང་ངུས་དུད་འགྲོ་འབྲིང་ཡི་དྭགས། །ཆེན་པོས་དམྱལ་བར་སྡུག་བསྔལ་རྣམ་སྨིན་འབྲས། །གཉིས་པ་བྱེད་པ་རྒྱུན་མཐུན། རྒྱུ་མཐུན་གཉིས་ལས་གང་བྱེད་དེར་སྐྱེ་བ། །བྱེད་པ་རྒྱུ་མཐུན་འབྲས་བུ་ལགས་པར་གསུངས། །གསུམ་པ་མྱོང་བ་རྒྱུ་མཐུན། མཐོ་རིས་ཐོབ་ནའང་ཚེ་ཐུང་ནད་མང་ཞིང་། །ཡོ་བྱད་མི་འབྱོར་དགྲ་དང་ཐུན་མོང་འགྱུར། །ཁྱིམ་ཐབ་མི་མཛེས་དགྲ་ཟླར་འགྱུར་བ་དང་། །ལས་བརྒྱ་པ་ལས། ཁྱིམ་ཐབ་ཡིད་དུ་མི་འོང་ཞིང་། །གཞན་དང་ཐུན་མོང་དུ་འགྱུར་རོ། །ཞེས་སོ། །སྐུར་བ་མང་ལ་གཞན་གྱིས་སླུ་བ་དང་། །གཡོག་འཁོར་མི་འདུམ་འཁོར་གཡོག་ངན་པ་དང་། །མི་སྙན་ཐོས་དང་འཐབ་མོའི་ཚིག་ཏུ་འགྱུར། །ཚིག་བཟུང་མི་འོས་མ་ངེས་སྤོབས་པ་དང་། །ཆོག་མི་ཤེས་དང་འདོད་པ་ཆེ་བར་འགྱུར། །ཕན་པ་མི་ཚོལ་གཞན་གྱིས་གནོད་པའི་གནས། །ལྟ་བ་ངན་དང་གཡོ་སྒྱུ་ཆེ་བ་སྟེ། །དེ་ཡང་མི་དགེ་བཅུ་ལ་རིམ་བཞིན་གཉིས་གཉིས་ལྡན། མྱོང་བ་རྒྱུ་མཐུན་འབྲས་བུ་ལགས་པར་གསུངས། །བཞི་པ་དབང་འབྲས། དབང་གི་འབྲས་བུ་ཕྱི་རོལ་ཡུལ་ལ་སྨིིན། །དེ་ཡང་མ་དག་གཞན་དབང་གནས་སྐབས་འདིར། །སྲོག་བཅད་པས་ནི་ས་ཕྱོགས་གཟི་བརྗིད་ཆུང། །སྨན་ཤིང་ལོ་འབྲས་མེ་ཏོག་བཟའ་བཏུང་སོགས། །མཐུ་ཆུང་འཇུ་དཀའ་ཚེ་ལ་བར་དུ་གཅོད། །མ་བྱིན་ལེན་པས་ལོ་ཐོག་འབྲས་མི་སྨིན། །སད་སེར་མུ་གེས་འཇིགས་པའི་ཡུལ་དུ་སྐྱེ། །ལོག་པར་གཡེམ་པས་བཤང་གཅི་འདམ་རྫབ་ཁྲོད། །ལྗན་ལྗིན་མི་གཙང་དྲི་ང་སྐྱེ་བའི་ཡུལ། །དོག་ཅིང་ཉམ་ང་ཉམས་མི་དགའ་བར་སྐྱེ། །བརྫུན་གྱིས་ཡུལ་རྣམས་མི་མཐུན་འཇིགས་དང་བཅས། །འབྱོར་པ་གཡོ་ཞིང་གཞན་གྱིས་སླུ་བར་སྐྱེ། །ཕྲ་མས་ས་ཕྱོགས་བགྲོད་དཀའ་མཐོ་དམན་ཅན། །ངམ་གྲོག་གཡང་ས་གཅོང་རོང་ལ་སོགས་པ། །རེག་ན་མི་བདེ་སྣ་ཚོགས་ཡུལ་དུ་སྐྱེ། །རྩུབ་མོས་སྡོང་དུམ་རྡོ་གསེག་ཚེར་མ་དང། །རྡུལ་དང་ཉལ་ཉིལ་འབྲས་ངན་རྩུབ་པ་དང། །ཚ་སྒོ་ལ་སོགས་མི་དགེའི་ཡུལ་དུ་སྐྱེ། །བཀྱལ་བས་ལོ་འབྲས་མི་སྨིན་དུས་ཚིགས་ལོག །རིང་དུ་མི་བརྟན་མི་གནས་ཡུལ་དུ་སྐྱེ། །བརྣབ་སེམས་འབྲས་སོགས་ཉུང་ཞིག་སྦུན་པ་མང། །བཟང་པོའི་དུས་ཚིགས་འགྱུར་བ་མཐོང་བར་སྐྱེ། །གནོད་སེམས་ལོ་ཐོག་འབྲས་བུ་ཚ་ཞིང་ཁ། །རྒྱལ་པོ་ཆོམ་རྐུན་མི་རྒོད་སྦྲུལ་ལ་སོགས། །རང་བཞིན་གནོད་པ་མང་བའི་ཡུལ་དུ་སྐྱེ། །ལོག་ལྟས་རིན་ཆེན་འབྱུང་ཁུངས་མི་ལྡན་ཞིང་། །སྨན་ཤིང་མེ་ཏོག་འབྲས་བུ་ཉུང་བ་དང་། །སྐྱབས་དང་སྐྱོབ་པ་དཔུང་གཉེན་མེད་པར་སྐྱེ། །ལྔ་པ་སྐྱེས་བུ་བྱེད་འབྲས། སྐྱེས་བུ་བྱེད་པའི་འབྲས་བུ་མི་དགེ་བ། །གང་བྱས་དེ་ཉིད་འཕེལ་བྱས་སྡུག་བསྔལ་བསྐྱེད། །གསུམ་པ་དོན་བསྡུ་བ། མདོར་ན་རང་བཞིན་མི་དགེ་བཅུ་པོ་རྣམས། །དུག་དང་འདྲ་སྟེ་གང་གིས་ལོངས་སྤྱད་པ། །ཆེ་འབྲིང་ཆུང་ངུས་སྡུག་བསྔལ་ཆེར་བསྐྱེད་པས། །དགྲ་བཞིན་རབ་ཏུ་སྤང་ལ་འབད་འཚལ་ལོ། །གཉིས་པ་དགེ་བ་བཅུའི་ལས་ལ་གཉིས། དང་པོ་ངོ་བོ་སྤྱིར་བསྟན་པ། མཐོ་རིས་འཕེན་པ་དགེ་བའི་ལས་བཅུ་ཡང་། མི་དགེ་བཅུ་ལས་ལོག་ཙམ་གྱིས་དགེ་བཅུར་མི་འགྱུར་ཏེ། རྒྱུད་བསྡམས་པ་མེད་པའི་ཕྱིར། དེས་ན་མི་དགེ་བཅུ་སྤོང་བའི་སེམས་པ་དགེ་བ་བཅུ་ཡིན་སྟེ། སྲོག་མི་གཅོད་དང་མ་བྱིན་ལེན་པ་སྤངས། །ལོག་པ་མི་གཡེམ་བརྫུན་དང་ཕྲ་མ་སྤོང་། །ངག་འཁྱལ་ཚིག་རྩུབ་མི་སྨྲ་བརྣབ་སེམས་མེད། །གནོད་སེམས་ལོག་ལྟ་རིང་དུ་སྤངས་པ་སྟེ། །གཉིས་པ་འབྲས་བུ་བྱེ་བྲག་ཏུ་བསྟན་པ། ཆུང་ངུས་མི་དང་འབྲིང་གིས་འདོད་པའི་ལྷ། །ཆེན་པོས་བསམ་གཏན་གཟུགས་མེད་ཏིང་འཛིན་འབྲེལ། །གོང་མའི་ཁམས་གཉིས་བདེ་བ་འཛིན་པར་བྱེད། །འབྲས་བུ་བཞི་སྟེ་སྔར་གྱི་ལྡོག་པའི་དཔེས། །དགེ་བཅུའི་འབྲས་བུ་མཐོ་རིས་ཤེས་པར་བྱ། །གསུམ་པ་སྐབས་ཀྱི་དོན་བསྡུ་བ། དེ་ལྟར་དགེ་བ་བསོད་ནམས་ཆ་མཐུན་བཅུས། །བདེ་འགྲོར་འཕེན་ཞིང་རང་བཞིན་མི་དགེ་བཅུས། །ངན་འགྲོར་ལྟུང་བའི་རྒྱུ་འབྲས་དཀར་ནག་ལས། །བླང་དོར་བྱེད་པ་འཇིག་རྟེན་དགེ་བའི་ལམ། །ལྷ་མིའི་ཐེག་པ་ལགས་པར་ཐུབ་པས་གསུངས་ཏེ་སྙིང་པོ་མཆོག་ལས། ལྷའི་ཐེག་པ་བསམ་གཏན་བཞི་དང་། གཟུགས་མེད་པ་བཞི་དང་། མིའི་ཐེག་པ་དགེ་བ་བཅུ་སྟེ། འདི་ནི་ལེགས་པའི་ཆོས་རྣམས་ཀྱི་རྟེན་དུ་གྱུར་པའོ། །ཞེས་སོ། །དགེ་བཅུ་འདིས་ནི་ཕྱི་མར་བདེ་འགྲོ་བསྒྲུབ་པས་ན། ཐར་པའི་རྟེན་དུ་ཡང་དག་གཞག་པར་མཛད། ལེགས་པའི་ཆོས་ཀྱི་རྟེན་འདི་ལེགས་ལྡན་འགྲོ་བ་རྣམས་ཀྱིས་བསྟེན་པར་མཛོད། གཉིས་པ་ཞི་བར་སྦྱོར་བའི་ལས་ལ་གསུམ། ལས་ཀྱི་ངོ་བོ་སྤྱིར་བསྟན་པ། དེའི་རྟེན་གཞི་བྱེ་བྲག་ཏུ་བཤད། རྟེན་ཆོས་ལས་ཀྱི་དབྱེ་བ་ངེས་པའོ། །དང་པོ་ལས་ཀྱི་ངོ་བོ་ལ་གཉིས། དང་པོ་ངོ་བོ་དངོས་བསྟན་པ། ཐར་པའི་དགེ་མཆོག་འཁོར་བ་རིང་དུ་བྱེད། །དེ་ཡང་སྲིད་པར་འདུ་བྱེད་མཐོ་དམན་ལས། །དཀར་ནག་གཉིས་ཀ་ལས་འདས་ཞི་ལ་གཞོལ། །ཐར་པའི་ཆ་མཐུན་ལ་སོགས་ཟག་མེད་རྒྱུ། །དགེ་བ་བཅུ་དང་བསམ་གཏན་གཟུགས་མེད་དང་། །ཕ་རོལ་ཕྱིན་དྲུག་ལ་སོགས་ལམ་ལྔས་བསྡུས། །དེ་ཡང་གང་ཟག་ཆོས་བདག་མེད་རྟོགས་ནས། །ཐབས་དང་ཤེས་རབ་ཟུང་འབྲེལ་དགེ་བ་ཡིས། །སྲིད་ཞིར་མི་གནས་འགྲོ་བའི་དོན་བྱེད་ཅིང་། །རྒྱལ་བའི་གོ་འཕང་མཐའ་ཡས་བསྒྲུབས་པས་ན། །རྣལ་འབྱོར་དགེ་བ་འཇིག་རྟེན་ཀུན་ལས་འདས། །གཉིས་པ་དེ་ཉིད་སྒྲུབ་ཚུལ་བསྟན་པ། དེ་ཡང་སྦྱིན་སོགས་ལྔ་དམིགས་བཅས་བསོད་ནམས་ཀྱི་ཚོགས་ཡིན་ལ། ཤེས་རབ་དམིགས་མེད་ཡེ་ཤེས་ཚོགས་ཏེ་ཟུང་འབྲེལ་གྱིས་སྒྲིབ་གཉིས་སྦྱངས་ནས་སྐུ་གཉིས་མངོན་དུ་བྱེད། དེ་ཡང་ས་མཚམས་ཀྱི་ཟག་བཅས་ཟག་མེད་ཆོས་མཆོག་མན་སོ་སོའི་སྐྱེ་བོའི་ཟག་བཅས་ཏེ། དེ་ཡན་འཕགས་པའི་ཟག་མེད། མཉམ་བཞག་ཟག་མེད། རྗེས་ཐོབ་ཟག་བཅས་ཏེ་སྤྱོད་ཡུལ་ཅན་ལམ་ཟག་བཅས་ཟག་མེད་གཉིས། ཕར་ཕྱིན་ལྔ་ཟག་བཅས། ཤེས་རབ་ཟག་མེད་ཉིད་དགེ་བ་ཟག་བཅས་ཟག་མེད་དོ། །རིམ་བཞིན་སྤྱད་པས་ཐར་པ་ཐོབ་པ་ཡིན། །གཉིས་པ་རྟེན་གཞི་ནི། ཐར་ཆ་བྲལ་རྒྱུས་བསྡུས་པ་བག་ཆགས་སྣ་ཚོགས་པའི་ཀུན་གཞི་ལ་བརྟེན་པ། དེའི་བྲལ་འབྲས་རིགས་སམ་སྙིང་པོ་ལ་བརྟེན་པའི་ཚུལ་ནི་ཐར་པ་དགེ་བའི་རྟེན་ནི་རིགས་ཡིན་ལ། དེ་ཡང་སེམས་ཀྱི་རང་བཞིན་འོད་གསལ་བ་རང་བཞིན་གྱི་དྲི་མེད་སངས་རྒྱས་ཀྱི་ཁམས་ཏེ་རང་བཞིན་གནས་པའི་རིགས་ཏེ། དེའང་སེམས་ཅན་གྱི་དུས་ན་སེམས་ཀྱི་ཆོས་ཉིད་ལ་སྣང་ཆ་ནས་གཟུགས་སྐུའི་ཡོན་ཏན་དང་། སྟོང་ཆ་ནས་ཆོས་སྐུའི་ཡོན་ཏན་རྫོགས་པར་ལྡན་ཡང་། དྲི་མས་བསྒྲིབས་པས་མངོན་སུམ་དུ་མི་གསལ་བའི་ཕྱིར་ཁམས་སམ་རིགས་ཞེས་བཏགས་ཤིང་། སངས་རྒྱས་པའི་ཚེ་དྲི་མ་ཐམས་ཅད་བྲལ་བས་བྱང་ཆུབ་ཅེས་བརྗོད་ཀྱང་། ངོ་བོ་སེམས་ཉིད་ཀྱི་ནུས་པ་རྫོགས་པར་སྣང་མི་སྣང་ཙམ་ལས། དང་པོ་སེམས་ཅན་གྱི་དུས་ན་མེད་པའི་ཡོན་ཏན་ཕྱིིས་གསར་དུ་བསྐྱེད་པར་འདོད་པ་ནི་མ་ཡིན་ཏེ་འཕོ་འགྱུར་མེད་པའི་ཕྱིར་རོ། །དེས་ན་ཚོགས་གཉིས་དང་སྐུ་གཉིས་བསྐྱེད་བྱ་སྐྱེད་བྱེད་ཀྱི་རྒྱུ་འབྲས་མིན་ཏེ། རིགས་གཉིས་རིམ་བཞིན་སྐུ་གཉིས་ཀྱི་བྲལ་རྒྱུ་ཡིན་པས། དེ་ཡི་སྣང་ཆ་སྐུ་གཉིས་དཔེ་རྣམ་དགུ། །སྙིང་རྗེའི་རང་བཞིན་ཡེ་ནས་གནས་པ་ནི། །དྲི་མ་སྦྱངས་ནས་ཡོན་ཏན་རྒྱས་པར་མངོན་པས་རྒྱས་འགྱུར་རིགས་ཞེས་བདེ་བར་གཤེགས་པས་གསུངས་ཏེ་བཀའ་ཐ་མ་ངེས་པ་དོན་གྱི་མདོ་སྡེ་སངས་རྒྱས་ཀྱི་གསང་བ་ཆེན་པོ་ཇི་ལྟ་བ་བཞིན་མངོན་སུམ་དུ་སྟོན་པ། གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ་དང་། དཔལ་ཕྲེང་སེངྒེའི་ང་རོ་སྒྲས་ཞུས། བུ་མོ་རིན་ཆེན་གྱིས། ལྷ་མོ་དྲི་མ་མེད་པས་ཞུས། སོར་ཕྲེང་ཅན་གྱི་མདོ་དང་། མྱང་འདས་ཆེན་པོ་དང་། བྱམས་ཞུས་དང་། དེ་བཞིན་གཤེགས་པའི་སྙིང་པོའི་མདོ་སོགས་ནས། གྱད་ཀྱི་དཔྲལ་བའི་ནོར་བུའི་དཔེ་དང་། སྟོང་གསུམ་དར་ཡུག་གི་དཔེ་དང་། རྒྱུད་བླར། སངས་རྒྱས་པད་ངན་སྦྲང་རྩི་སྦྲང་མ་དང་། །སྦུན་ལ་སྙིང་པོ་མི་གཙང་ནང་ན་གསེར། །ས་ལ་གཏེར་དང་སྨྱུག་སོགས་འབྲས་ཆུང་དང་། །གོས་ཧྲུལ་ནང་ན་རྒྱལ་པའི་སྐུ་དང་ནི། །བུད་མེད་ངན་པའི་ལྟོོ་ན་མི་བདག་དང་། །ས་ནང་རིན་ཆེན་གཟུགས་ཡོད་ཇི་ལྟ་བར། །གློ་བུར་ཉོན་མོངས་དྲི་མས་བསྒྲིབས་པ་ཡི། །སེམས་ཅན་རྣམས་ལ་དེ་བཞིན་ཁམས་འདི་གནས། །ཞེས་དཔེ་དགུ་དང་། ཀླུ་སྒྲུབ་ཀྱིས་སེམས་ཀྱི་རྡོ་རྗེའི་བསྟོད་པར། ས་ཡི་དཀྱིལ་ན་ཡོད་པའི་ཆུ། །དྲི་མ་མེད་པར་གནས་པ་ལྟར། །ཉོན་མོངས་ནང་ན་ཡེ་ཤེས་ཀྱང་། །དེ་བཞིན་དྲི་མ་མེད་པར་གནས། །ཞེས་དང་གཞན་ཡང་རྡོ་ཁམས་གསེར་དང་བུམ་ནང་མར་མེ་སོགས་དཔེ་དུ་མས་བསྟན་པ་དང་། དེ་ཉིད་ཕལ་གྱིས་རྟོགས་དཀའ་བའི་དཔེ། དམུས་ལོང་གིས་མར་གྱི་ཁ་དོག་དྲིས་པ་དང་གླང་པོ་ཆེའི་གཟུགས་ལ་རྟོག་པའི་དཔེ་དང་། རིམ་གྱིས་འཕགས་པ་རྣམས་ཀྱིས་མཐོང་བའི་དཔེ། སྨན་པས་མིག་ཐུར་བཏང་སྟེ་དམུས་ལོང་གི་མིག་ཕྱེ་བའི་དཔེ་དང་། དེ་ཉིད་སེམས་ཅན་ལ་བསྟན་པའི་དགོས་པ་སྐྱོན་ལྔ་སྤངས་ཤིང་ཡོན་ཏན་ལྔ་སྐྱེ་ཚུལ། དེ་ལ་ལོག་རྟོག་གི་སྐྱོན་སྤོང་བ། དཀའ་འཁོར་དྲང་ངེས་དང་། བུད་མེད་བུ་གསོ་བའི་དཔེ་སོགས། མདོ་ནས་གསུངས་པའི་དོན་རྒྱས་པར་འགྲེལ་ཆེན་དུ་གསལ་བ་ལྟར་ལ། རྩ་བ་རིག་པའི་ཡེ་ཤེས་འོད་གསལ་ལ། །ངོ་བོ་དུག་གསུམ་མེད་པས་དགེ་བ་ཡིན། །གསུམ་པ་རྟེན་ཆོས་ལས་ཀྱི་དབྱེ་བ་ལ་གསུམ། ཐར་པ་ཆ་མཐུན་གྱི་རྩ་བའི་ལས། དེའི་བསྐྱེད་པ་ཡན་ལག་གི་ལས། ལས་ཀྱི་འབྲས་བུ་བསྟན་པའོ། །དང་པོ་རྩ་བའི་ལས་ནི། རང་བཞིན་ཆོས་སྐུའི་རིགས་སད་པའི་རྟགས་འཇུག་པ་ལས་གསུངས་པ་དང་། གཟུགས་སྐུ་ཆོས་ཅན་གྱི་རིགས་སད་པའི་རྟགས་མདོ་རྒྱན་ནས་གསུངས་པ་ལྟར། རིགས་དེ་སད་ལས་སེམས་གཉིས་རབ་བསྐྱེད་དུས། །སྙིང་རྗེ་མངོན་བསྒྲུབས་ཀུན་རྫོབ་བསོད་ནམས་ཚོགས། །བུམ་སོགས་གསང་ཤེར་གསུམ་དབང་བསྐྱེད་རིམ་དག་པར་བྱེད་པ་སྟེ་དམིགས་བཅས་བསོད་ནམས་ཀྱི་ཚོགས་སོ། །སྟོང་པ་རང་བཞིན་དོན་དམ་ཡེ་ཤེས་ཚོགས། །བཞི་པ་ཚིག་དབང་རིན་པོ་ཆེ་རྫོགས་རིམ་དག་པར་བྱེད་པའི་ཡེ་ཤེས་ཕྱག་རྒྱ་ཆེ། འོད་གསལ་སོགས་སྤྲོས་མེད་ཐམས་ཅད་དོ། །ལེགས་པར་བསྒོམས་ཤིང་རིམ་གཉིས་སྤེལ་བ་ཡིས། །ཉོན་མོངས་ཡེ་ཤེས་གནས་གྱུར་དགེ་བ་རྣམས། །ཆེས་ཆེར་འཕེལ་བས་ཁམས་ཀྱི་སྒྲིབ་སྦྱངས་ཏེ། །ཆོས་གཟུགས་དྲི་མེད་ཉི་མ་མཐོང་བར་འགྱུར། །གཉིས་པ་དེའི་བསྐྱེད་པ་ཡན་ལག་གི་ལས་ལ་གཉིས། དང་པོ་ཟུང་འབྲེལ་ཁྱད་པར་ཅན་གྱི་ལས་བསྟན་པ། འཇིག་རྟེན་ཆོས་རབ་དགེ་བ་རྣམ་པ་བཅུ། །བསམ་གཏན་གཟུགས་མེད་ལ་སོགས་སྣང་བཅས་ཚོགས། །བསོད་ནམས་ཆ་མཐུན་ཡིན་ཡང་ཐབས་ཤེས་ཀྱིས་ཟིན་པས་ཐར་པ་ཆ་མཐུན་དུ་འགྱུར་བས། འཇིག་རྟེན་འདས་གང་ཤིན་ཏུ་སྤྲོས་པ་མེད་། །དོན་དམ་ཡེ་ཤེས་ཚོགས་ཏེ་མཉམ་རྗེས་ཡུལ། །ཟུང་དུ་འབྲེལ་བར་སྤྱད་ལས་ལེགས་དགུ་འགྲུབ། །གཉིས་པ་ལས་སུ་བརྟགས་པའི་ངེས་ཚིག་བཤད་པ། དེ་ཡང་སྲིད་པར་འདུ་བྱེད་དགེ་བ་ལྟར། །ལས་རང་བཞིན་མེད་པར་ཤེས་ཤིང་ཐབས་ཤེས་ཟུང་དུ་ཚུད་པས། ཞི་བར་འདུ་བྱེད་ཚུལ་གྱིས་ལས་སུ་བཤད། །སྲིད་ལས་འདའ་ཕྱིར་ལས་ལས་ཐར་པ་ལགས། །གསུམ་པ་འབྲས་བུ་ལ་གཉིས། འབྲས་བུ་བཞིའི་རང་བཞིན་སྤྱིར་བསྟན་པ་དང་། སྦྱིན་སོགས་ཁྱད་པར་ཅན་གྱི་འབྲས་བུ་བྱེ་བྲག་ཏུ་བསྟན་པའོ། །དང་པོ་ལ་མདོར་བསྟན་བ་དང་། རྒྱས་པར་བཤད་པ་གཉིས། དང་པོ་མདོར་བསྟན་ནི། ལམ་ཞུགས་དགེ་བ་བཅུ་ཡི་འབྲས་བུ་ཡང་། །རྣམ་སྨིན་རྒྱུ་མཐུན་དབང་དང་བྱེད་ལས་ཏེ། །གཉིས་པ་རྒྱས་བཤད་ལ་བཞི། དང་པོ་རྣམ་སྨིན་གྱི་འབྲས་བུ་ནི། དེ་དག་ཆུང་འབྲིང་ཆེན་པོ་སྤྱད་པ་ཡིས། །གནས་སྐབས་ལྷ་མི་མཐར་ཐུག་ངེས་ལེགས་འགྱུར། །གཉིས་པ་རྒྱུ་མཐུན་གྱི་འབྲས་བུ་ནི། རྒྱུ་མཐུན་བྱེད་པས་ངང་གིས་དགེ་ལ་གཞོལ། །མྱོང་བས་ཚེ་རིང་བ་དང་ལོངས་སྤྱོད་ཆེ། །མཐུན་པའི་ཁྱིམ་ཐབ་དགྲ་ཟླ་མེད་པ་དང་། །སྐུར་བ་མི་འབྱུང་ཕན་ཚུན་མཛའ་བཤེས་བཞིན། །ཚིག་གཟུང་འོས་དང་ཀུན་གྱི་རྣ་བར་སྙན། །ཆོག་ཤེས་བྱམས་ལྡན་ལྟ་བ་བཟང་པོར་འགྱུར། །གསུམ་པ་དབང་གི་འབྲས་བུ་ནི། དབང་གིས་ཡུལ་བཟང་གཟི་བརྗིད་ཕུན་སུམ་ཚོགས། །བཟའ་བཏུང་སྨན་སོགས་འཇུ་སླ་མཐུ་ཆེ་ཞིང་། །ཕྱོགས་གཙང་སྨན་སོགས་དྲི་ཞིམ་ངད་དང་ལྡན། །གཞན་གྱིས་མི་བསླུ་འཇིགས་བྲལ་གནོད་འཚེ་མེད། །སྐྱེ་དགུ་མཐུན་དང་རྡོ་གསེག་ཚེར་མ་མེད་པས་རེག་ན་མཆོག་ཏུ་བདེ། དུས་ཀྱི་རྗེས་འགྲོ་ལོ་ལེགས་སྨིན་འབྲས་བུས་ཕྱུག ས་ཕྱོགས་མཉམ་ལ་མཚོ་བསིལ་རྫིང་བུས་བརྒྱན། །མེ་ཏོག་འབྲས་མང་བཟང་དགུ་འཕེལ་བ་མཐོང་། །ལོ་འབྲས་སྨིན་སོགས་རོ་མཆོག་བདའ་བ་དང་། །འབྱུང་ཁུངས་བཟང་ཞིང་དཔུང་གཉེན་ལྡན་པར་སྐྱེ། །བཞི་པ་བྱེད་པའི་འབྲས་བུ་ནི། སྐྱེས་བུ་བྱེད་པ་དགེ་ལས་དགེ་འཕེལ་བས། །ལེགས་དགུའི་བསམ་པ་ཡིད་བཞིན་འགྲུབ་པ་ཡིན། །གཉིས་པ་སྦྱིན་སོགས་ཁྱད་པར་ཅན་གྱི་འབྲས་བུ་ལ་གཉིས། དང་པོ་སྦྱིན་སོགས་དྲུག་གི་འབྲས་བུ་ནི། གཞན་ཡང་སྦྱིན་པས་ལོངས་སྤྱོད་ཁྲིམས་ཀྱིས་བདེ། །བཟོད་པས་གཟུགས་བཟང་བརྩོན་འགྲུས་ཡོན་ཏན་བརྗིད། །བསམ་གཏན་སེམས་ཞི་བློ་ཡིས་གྲོལ་བ་འཐོབ། །གཉིས་པ་བྱམས་སོགས་བཞིའི་འབྲས་བུ་ནི། བྱམས་པས་ཡིད་འོང་སྙིང་རྗེས་ཕན་པ་འགྲུབ། དགའ་བས་ཕུན་ཚོགས་བཏང་སྙོམས་རྙོག་པ་མེད་པ་སེམས་ལས་སུ་རུང་ངོ་། །མདོར་ན་བསོད་ནམས་ཡེ་ཤེས་ཚོགས་རབ་འབྲས། །གནས་སྐབས་མངོན་མཐོ་མཐར་ཐུག་ངེས་ལེགས་འགྲུབ། །འདི་ནི་ལམ་བཟང་དམ་པའི་འཇུག་ངོགས་ཤིང་རྟ་ཆེན་པོའི་སྲོལ། དུས་གསུམ་རྒྱལ་བས་ཕུན་ཚོགས་སྒྲུབ་བྱེད་ཡིན། །དོན་གསུམ་པ་དེ་གཉིས་ཀྱི་གནས་སྐབས་གཞན་བསྟན་པ་ལ་གསུམ་ལས་རྒྱུ་འབྲས་ཀྱི་རང་བཞིན་བསྟན་པ། ཚུལ་གཞན་གྱི་ལོག་རྟོག་དགག་པ། ཡང་དག་པའི་རྒྱུ་འབྲས་སྒྲུབ་པའོ། །དང་པོ་རྒྱུ་འབྲས་ཀྱི་རང་བཞིན་ལ་གསུམ། དང་པོ་ལས་འབྲས་ཀྱི་ངོ་བོ་རྟེན་འབྲེལ་དུ་བསྟན་པ། དེ་ལྟར་སྲིད་ཞི་འདུ་བྱེད་ལས་རྣམས་ནི། །སེམས་ལ་བརྟེན་ཞིང་སེམས་ཉིད་རང་བཞིན་གྱིས་འོད་གསལ་བ་ལ། ནམ་མཁའ་བཞིན་བྱེད་པོ་མི་དམིགས་ཤིང་སྤྲོས་དང་བྲལ་ཡང་། དེ་ལ་དེ་བརྟེན་གྱི་ཚུལ་གྱིས་བདེན་པ་གཉིས་དོན་རྟེན་ཅིང་འབྲེལ་བར་འབྱུང་། གཉིས་པ་ལས་འབྲས་ཀྱི་སྣང་ཚུལ་སྒྱུར་མར་བསྟན་པ། གདོད་ནས་སྤྲོས་བྲལ་རྣམ་དག་ལ་མེད་བཞིན་སྣང་བ་ཡི་ལས་ནི་རྩ་བ་མ་རིག་པ་ལ་བརྟེན་པ། རྐྱེན་ཡུལ་ལས་སྐྱེས་པ། རྒྱུ་དུག་གསུམ་དང་འབྲེལ་བ་སྟེ། དཔེ་ཀུན་བྱེད་རི་མོ་མཁན་འདྲ་ཞིང་། རྟག་ཏུ་རྗེས་འགྲོ་ལུས་ཀྱི་གྲིབ་མ་འདྲ། །གཞན་དུ་མི་འཕོ་ལུས་ཀྱི་བདེ་སྡུག་བཞིན། །རང་བཞིན་བཟློག་དཀའ་ཆུ་ཀླུང་འབབ་འདྲ་ཞིང་། །མཐོ་དམན་ལྟུང་བྱེད་འགྲོ་ཀུན་དབང་པོ་རྒྱ་པོ་དང་འདྲ་སྟེ་བདེ་སྡུག་ལ་དབང་བྱེད་པས་སོ། །ཤིན་ཏུ་རྒྱ་ཆེན་ནམ་མཁའི་དབྱིངས་འདྲ་ཞིང་། །དཀར་ནག་མི་འགྱུར་ཀུན་ད་ཨུཏྤ ལ་འདྲ། །གསུམ་པ་ལས་འབྲས་ཀྱི་རང་བཞིན་སྣང་ལ་རང་བཞིན་མེད་པར་བསྟན་པ། ལས་རྣམས་བརྟགས་ན་ངོ་བོ་འགའ་མེད་ཀྱང། །རྨི་ལམ་བཞིན་དུ་བདེ་སྡུག་སྣ་ཚོགས་བྱེད། །བློས་བཏགས་ལས་རྣམས་དངོས་པོ་མཚན་མ་མེད། །རྒྱུ་འབྲས་མི་བསླུ་རྟེན་འབྲེལ་ཟབ་མོ་ཉིད། །ཡོད་མིན་མེད་མིན་རང་བཞིན་གཉིས་སུ་མེད། །ཇི་ལྟར་སྤྱད་པ་དེ་ལྟར་རྣམ་པར་སྨིན། །འདི་ནི་ཇི་སྙེད་ཇི་བཞིན་གཟིགས་པའི་ཡུལ། །རྣམ་ཀུན་མཁྱེན་པ་དེ་ཡིས་ལེགས་པར་གསུངས། །གཉིས་པ་ཚུལ་གཞན་གྱི་ལོག་རྟོག་དགག་པ་ལ་བཞི། དང་པོ་ཚུལ་གཞན་གྱི་རང་བཞིན་བརྗོད་པ། ནམ་མཁའ་ལྟ་བུའོ་ཞེས། གང་ཞིག་ལས་འབྲས་ཁྱད་དུ་གསོད་པ་དག །མུ་སྟེགས་ཆད་པར་ལྟ་བའི་སློབ་མ་སྟེ། །སྟོང་པའི་ལྟ་ལ་གདེང་ཙམ་སུ་འཆའ་བ། །ཆད་པའི་མཐར་ལྷུང་འོག་ནས་འོག་ཏུ་འགྲོ། །ལམ་ངན་ཞུགས་པ་དེ་དག་གནས་ངན་ལས། །ནམ་ཡང་མི་ཐར་བདེ་འགྲོ་རིང་དུ་བྱེད། །གཉིས་པ་དེ་དག་གི་ཁས་བླངས་དགོད་པ། རྒྱུ་འབྲས་སྙིང་རྗེ་བསོད་ནམས་ཚོགས་འདི་དག །དྲང་དོན་བྱིས་པའི་ཆོས་ཏེ་སངས་མི་རྒྱ། །ངེས་དོན་བྱར་མེད་ནམ་མཁའ་ལྟ་བུའི་དོན། །རྣལ་འབྱོར་ཆེན་པོ་རྣམས་ཀྱིས་སྒོམས་ཤིག་ལོ། །གསུམ་པ་བཞད་གད་ཀྱི་གནས་སུ་བསྟན་པ། ཆད་པ་རྒྱང་འཕེན་པས་ཀྱང་མངོན་སུམ་པ་འདི་མེད་པར་མི་སྨྲ་ན་དེ་ལས་ཀྱང་ཆད་པའི་ལྟ་བ་ཅན་དམན་པ་ལས་ཀྱང་དམན་པའི་ལམ་ཞུགས་དག ཐར་པའི་རྒྱུ་ཉིད་བཀག་ནས་འབྲས་བུ་བསྒྲུབ་པ་མཚར། བཞི་པ་ཚར་བཅད་ཀྱི་རིགས་པ་དགོད་པ། ནམ་མཁའ་ཡིན་ན་གྲུབ་ཟིན་པས་བསྒོམ་ཡང་ཅི་ཞིག་དགོས། སྔར་མིན་ན་བསྒོམས་ཀྱང་ངལ་བ་དོན་མེད་དོ། །ཅང་མེད་བསྒོམས་པས་ཐར་པ་ཐོབ་འགྱུར་ན། །ཚུ་རོལ་མཛེས་པ་ནམ་མཁའི་ཡིད་ཅན་རྣམས་ཀྱང་སངས་རྒྱས་འགྱུར། ཉོན་མོངས་ལས་གྲོལ་བའི་ཕྱིར་ཞེ་ན། བསྒོམ་པར་ཁས་བླངས་ནས་ཀྱང་རྒྱུ་འབྲས་གྲུབ། །དེ་ཕྱིར་ལམ་ངན་དེ་འདྲ་རྒྱང་སྲིངས་ཤིག །གསུམ་པ་ཡང་དག་པའི་རྒྱུ་འབྲས་བསྒྲུབ་པ་ལ་གཉིས། དང་པོ་རྟེན་འབྲེལ་སྒྱུ་མའི་ལས་རྣམ་པར་བཞག་པ། ཡང་དག་ལམ་ནི་རྒྱུ་འབྲས་རྟེན་འབྲེལ་ཏེ་ཚོགས་གཉིས་ལས་སངས་རྒྱས་འགྲུབ་སྟེ། ཐབས་དང་ཤེས་རབ་མཉམ་སྦྱོར་ལྷུན་གྱིས་གྲུབ། །སྣང་ལ་རང་བཞིན་མེད་པའི་ལས་འབྲས་ཀྱིས། །སྣང་ལ་རང་བཞིན་མེད་པའི་ལམ་བསྒོམས་ཏེ། །སྣང་ལ་རང་བཞིན་མེད་པའི་འབྲས་བུ་འཐོབ། །སྣང་ལ་རང་བཞིན་མེད་པའི་སེམས་ཅན་དོན། །སྣང་ལ་རང་བཞིན་མེད་པར་མཛད་པ་ནི། །དག་པའི་རྒྱུ་འབྲས་ཟབ་མོའི་རྟེན་འབྲེལ་ཡིན། །དེ་བས་ངེས་དོན་མདོ་རྒྱུད་སྙིང་པོའི་དོན། །ཚོགས་གཉིས་ཟུང་འཇུག་རིམ་གཉིས་བསྐྱེད་རྫོགས་ཀྱིས། །མྱུར་དུ་རྫོགས་པའི་སངས་རྒྱས་སྒྲུབ་བྱེད་ཡིན། །གཉིས་པ་དགེ་སྡིག་བླང་དོར་དུ་བྱ་བའི་མཆོག་ཐར་པའི་ལས་སྒྲུབ་པར་གདམས་པ། འདིར་ནི་སྲིད་པར་འདུ་བྱེད་རྒྱུ་འབྲས་ཀུན། །ཆ་དང་བཅས་པ་མ་ལུས་རབ་སྤངས་ནས། །ཐར་པའི་རྒྱུ་འབྲས་ནན་ཏན་སྙིང་པོར་བྱ། །མྱུར་དུ་མངོན་མཐོ་ངེས་ལེག་བྱང་ཆུབ་འགྲུབ། །དོན་གསུམ་པ་ལེའུ་རྫོགས་པ་མཇུག་གི་དོན་ལ་གཉིས། དང་པོ་སྐབས་ཀྱི་དགེ་བ་བསྔོ་བ། དེ་ལྟར་བདེ་ཆེན་ཆོས་ཀྱི་ཆར་བསིལ་བས། །འགྲོ་སེམས་ས་བཞིར་ཚོགས་གཉིས་རབ་རྒྱས་ཏེ། །ལས་དང་ཉོན་མོངས་ཡོངས་གང་སྲིད་པ་འདིར། །དུབ་པའི་སེམས་ཉིད་དེ་རིང་ངལ་སོས་ཤིག །གཉིས་པ་ལེའུ་མཚན། རྫོགས་པ་ཆེན་པོ་སེམས་ཉིད་ངལ་གསོ་ལས། ལས་རྒྱུ་འབྲས་ཀྱི་ལེའུ་སྟེ་བཞི་པའོ།། །། ༈ ལྔ་པ་དགེ་བའི་བཤེས་གཉེན་བསྟེན་པའི་ལེའུ་ལ་གསུམ་སྟེ། ལེའུ་ལ་འཇུག་པ་རྒྱུའི་དོན། ལེའུ་དངོས་ཀྱི་དོན། ལེའུ་རྫོགས་པ་མཇུག་གི་དོན་ནོ། །དང་པོ་ནི། དེ་ལྟར་ལས་འབྲས་མ་ནོར་ལེགས་པའི་ལམ། །དམ་པ་རྣམས་ལ་ཉེ་བར་བརྟེན་ལས་འབྱུང་། །གཉིས་པ་ལེའུ་དངོས་ལ་བདུན། གང་ལ་བརྟེན་པ་བླ་མའི་རང་བཞིན། གང་གིས་བརྟེན་པ་སློབ་མའི་ཁྱད་པར། ཇི་ལྟར་བརྟེན་ཚུལ་ཐབས་ཀྱི་ཡན་ལག འགལ་ཟླ་སྡིག་པའི་རྩ་ལག་སྤང་བ། མཐུན་རྐྱེན་དགེ་བའི་རྩ་བ་བསྟན་པ། ལམ་ཟབ་བླ་མའི་རྣར་འབྱོར་བསྟན་པ། རྟག་ཏུ་དགེ་བའི་བཤེས་གཉེན་བསྟེན་པར་གདམས་པའོ། །དང་པོ་ལ་ལྔ། ལེགས་དགུའི་འབྱུང་གནས་དམ་པ་བསྟེན་པ། བསྟེན་པ་བཟང་ངན་གྱི་ལེགས་ཉེས་བསམ་པ། བཤེས་གཉེན་དམ་པའི་མཚན་ཉིད་བསྟན་པ། དེའི་ཡོན་ཏན་རླབས་ཆེན་བསམ་པ། དམ་པ་བསྟེན་པའི་མན་ངག་སྦྱིན་པའོ། །དང་པོ་ནི། དུས་གསུམ་རྒྱལ་བ་སྲས་བཅས་ཉན་རང་ཚོགས། །བྱང་ཆུབ་གསུམ་བརྙེས་དགེ་བའི་བཤེས་ལས་བྱུང་། །སྲིད་ན་མངོན་མཐོ་བདེ་བའི་ཤས་ཐོབ་པ། །དེ་ཡང་དམ་པ་དག་ལ་བརྟེན་ནས་འབྱུང་། །དེ་ཕྱིར་སྐྱེ་བོ་དམ་པ་བསྟེན་པར་བྱ། །གཉིས་པ་ནི། ཇི་ལྟར་ཙནྡན་ཤིང་ལ་འཁྲི་ཤིང་དེ་བས་ཀྱང་མཐོ་ཞིང་བསུང་ཞིམ་པ་དང་། མི་གཙང་འདམ་དུ་བརྟེན་པའི་རྐུ་ཤ་ཡང་གཙོག་པ་ལྟར། དམ་པ་བསྟེན་པས་རང་ཉིད་དམ་པར་འགྱུར། །ངན་པ་བསྟེན་པས་རང་ཉིད་ངན་པར་འགྱུར། །དེ་ཕྱིར་སྐྱེ་བོ་དམ་པ་བསྟེན་པ་དང་། །སྡིག་པའི་བཤེས་གཉེན་སྤངས་ལ་ནན་ཏན་བྱ། །གསུམ་པ་བཤེས་གཉེན་དམ་པའི་མཚན་ཉིད་ལ་གསུམ། དང་པོ་བཤེས་གཉེན་སྤྱིའི་མཚན་ཉིད། དམ་པ་དེ་ཡང་ཆོས་ཚུལ་དུ་ཞེ་ན། །འཇིག་རྟེན་འདྲེན་ཕྱིར་ཀུན་དང་ཆ་མཐུན་ལ། །འཇིག་རྟེན་འདས་ཕྱིར་ཀུན་དང་ཆ་མི་མཐུན། །སྒོ་གསུམ་སྤྱོད་པ་ཀུན་ལས་ཁྱད་པར་འཕགས། །གཉིས་པ་ཁྱད་པར་གྱི་མཚན་ཉིད། ཞི་སྐུ་ཀུན་སྤྱོད་གཙང་ཞིང་སྐྱོན་མེད་པ། །ཐེ་ཚོམ་གཅོད་མཁས་གསུང་སྙན་དྲི་མ་མེད། །ཐུགས་ནི་ཟབ་ཞི་ཀུན་མཁྱེན་ཡེ་ཤེས་མཛོད་དེ་སྐུ་གསུང་ཐུགས་ཀྱི་ཡོན་ཏན་མཐའ་ཡས་པས་སེམས་ཅན་ལ་ཕན་ཞིང་ཐོས་དང་སྙིང་རྗེ་ཆེ། ཤེས་རབ་རྒྱ་ཆེ་དགོངས་སྤྱོད་ནམ་མཁའ་འདྲ། །ཕྲིན་ལས་ཚད་མེད་འབྲེལ་ཚད་དོན་དང་ལྡན། །བྱམས་ལྡན་སྐྱོ་ངལ་སྤངས་ཤིང་རྟག་ཏུ་བརྩོན། །འགྲོ་བའི་ཁ་ལོ་གྱེན་དུ་བསྒྱུར་ལ་བརྟེན། །གསུམ་པ་གསང་སྔགས་བླ་མའི་མཚན་ཉིད། ཁྱད་པར་གསང་སྔགས་བླ་མའི་མཚན་ཉིད་ནི། དཀྱིལ་འཁོར་ཕྱི་ནང་གི་དབང་དང་སྡོམ་པ་དམ་ཚིག་གཙང་ལྡན་ཞིང་། རྒྱུད་དོན་མན་ངག་རྒྱ་ཚོའི་ཕ་རོལ་ཕྱིན་ཏེ་མཁས་པ། བསྙེན་སྒྲུབ་ལས་སྦྱོར་ཕྲིན་ལས་ལ་སྦྱངས་པས་མངའ་བརྙེས་ཤིང་། རྟོགས་བྱ་ལྟ་བ་ལ་མ་རྨོངས། ཉམས་མྱོང་བསྒོམ་པ་ལ་འདྲིས། སྣ་ཚོགས་སྤྱོད་པ་དང་འབྲེལ་ཏེ་ལྟ་སྒོམ་སྤྱོད་འབྲས་ཉམས་རྟགས་དྲོད་ཚད་ཐོབ། བརྩེ་ཆེན་སྙིང་རྗེས་ཐབས་མཁས་གདུལ་བྱ་སྨིན་གྲོལ་འགོད་པ་སྟེ་བི་མ་ལའི་དགོངས་པའོ། །དེའི་སྟེང་དུ་བརྒྱུད་པ་ལ་སེལ་མེད་པའི་བྱིན་རླབས་སྤྲིན་ཕུང་མ་ཡལ་བ་སྟེ་དེ་འདྲའི་མཁས་གྲུབ་དཔལ་ལྡན་བླ་མ་བསྟེན། བཞི་པ་ཡོན་ཏན་བསམ་པ་ལ་ལྔ། དང་པོ་མཐའ་ཡས་ཡོན་ཏན་ལྷུན་གྱིས་གྲུབ་པའི་ཡོན་ཏན་ལ་བསམ་པ། དེ་ལྟ་བུའི་བླ་མ་གང་གི་ཡོན་ཏན་ཤིན་ཏུ་མཐའ་ཡས་ཏེ། འགྲོ་བའི་གཉེན་གྱུར་ཕྱོགས་ཙམ་རབ་བསྔགས་ན། སྡོང་པོ་བཀོད་པ་ལས་གསུངས་པ་རྣམས་ཏེ། སྲིད་མཚོ་སྒྲོལ་བས་གྲུབ་ཆེན་མཉེན་པ་སྟེ། །ལམ་ཞུགས་རྣམས་ཀྱི་དེད་དཔོན་བླ་ན་མེད། །རྒུད་པ་སེལ་བས་ཡིད་བཞིན་ནོར་བུ་སྟེ། །ལས་དང་ཉོན་མོངས་མེ་འཇིལ་བདུད་རྩིའི་ཆུ། །ཆོས་ཆར་བསིལ་བས་ཆར་སྤྲིན་བཟང་པོ་སྟེ། །འགྲོོ་ཀུན་དགའ་བསྐྱེད་ལྷ་ཡི་རྔ་བོ་ཆེ། །དུག་གསུམ་ནད་སེལ་སྨན་པའི་རྒྱལ་པོ་སྟེ། །མ་རིག་མུན་སེལ་སྒྲོན་མེ་འོད་པོ་ཆེ། །སྐྱེ་དགུའི་བདེ་འབྱུང་དཔག་བསམ་ཤིང་ཆེན་ཏེ། །ཅི་བསམ་འདོད་དགུ་ལྷུན་གྲུབ་རིན་ཆེན་བུམ་པ་བཟང་། བྱམས་ཆེན་ཉི་མ་འོད་ཟེར་དཔག་མེད་དེ། །ཉོན་མོངས་གདུངས་སེལ་ཟླ་བ་ཕན་བདེའི་འོད་དཀར་ཅན། ཚད་མེད་ཡོན་ཏན་གཞལ་དུ་མེད་པའི་ཡོན་ཏན་ལ་བསམ། མདོ་ཕལ་ཆེར་ལས་དགོངས་ཀློང་ཡངས་པས་དྲི་མེད་མཁའ་འདྲ་ལ། གཟུངས་དང་ཏིང་འཛིན་འོད་གསལ་གཟའ་སྐར་ལྷུན་གྲུབ་འདྲ། མཁྱེན་བརྩེའི་རང་བཞིན་དཔག་མེད་མཚོ་འདྲ་ཞིང་། །ཐུགས་རྗེའི་རླབས་ཆེན་གཡོ་བས་ཆུ་ཀླུང་འདྲ། །རྣམ་གཡེང་མི་བསྐྱོད་གངས་རིའི་དཔལ་འདྲ་ཞིང་། །དེ་བཞིན་ཉིད་ལས་མཆོག ཏུ་མི་གཡོ་རི་རྒྱལ་ལྷུན་པོ་འདྲ། སྲིད་གནས་མི་གོས་འདམ་སྐྱེས་པད་འདྲ་ཞིང་། །ཀུན་ལ་ཐུགས་སྙོམས་བྱམས་སྡུག་ཕ་མ་འདྲ། །ཡོན་ཏན་མཐའ་ཡས་རིན་ཆེན་གཏེར་འདྲ་ཞིང་། །འཇིག་རྟེན་འདྲེན་པས་རྒྱལ་བའི་དབང་པོ་འདྲ། །ས་ཆེན་འགྲོ་བའི་རྟེན་དུ་གྱུར་པའི་ཡོན་ཏན་དེ་འདྲའི་བླ་མ་དཔལ་ལྡན་ཆོས་ཀྱི་རྗེ་གང་ན་བཞུགས་རྣམས་སངས་རྒྱས་ཀུན་དང་མཉམ་སྟེ། རྡོ་རྗེ་མེ་ལོང་གི་རྒྱུད་ལས། རྡོ་རྗེ་སེམས་དཔའ་དཀྱིལ་འཁོར་གཙོ། །བླ་མ་སངས་རྒྱས་ཀུན་དང་མཉམ། །ཞེས་གསུངས་པ་དེའི་རྒྱུ་མཚན། སངས་རྒྱས་མཉམ་སྦྱོར་ལས། སངས་རྒྱས་ཆོས་དང་དགེ་འདུན་དང་། །བླ་མ་ཡང་ནི་བཞི་པ་ཡིན། །ཞེས་པ་དང་། གསང་བ་རབ་འབྱམས་ལས། དཀྱིལ་འཁོར་དབང་ཕྱུག་ཧེ་རུ་ཀ །བླ་མ་མཆོག་ཡིན་དངོས་གྲུབ་ཆེ། །ཞེས་སོ། །དེའི་རྒྱུ་མཚན་མཐོང་ཐོས་དྲན་རེག་འཁོར་བ་ཕྱིར་བསྙིལ་ཞིང་། རང་དོན་མི་གཉེར་བས་རླབས་ཆེན་ཕྲིན་ལས་ཁུར་ཆེན་དཔག་ཏུ་མེད། སྐྱོ་ངལ་མེད་པས་ས་ཆེན་འགྲོ་བ་ཀུན་གྱི་རྟེན་བཞིན་ནོ། །རྒྱལ་བ་ཀུན་དང་སྐལ་བ་མཉམ་པའི་ཡོན་ཏན། དཀོན་མཆོག་བཞི་པ་བླ་མ་སངས་རྒྱས་ཏེ། །དཀྱིལ་འཁོར་དབང་ཕྱུག་ཧེ་རུ་ཀ་དཔལ་ཉིད། །སྙིགས་དུས་འགྲོ་བ་གདུལ་དཀའི་དོན་མཛད་པས། །གདུལ་བྱའི་ངོར་ནི་སངས་རྒྱས་ཀུན་བས་ལྷག །ནམ་མཁའ་དྲི་མ་མེད་པའི་མདོ་ལས། ཀུན་དགའ་བོ། དེ་བཞིན་གཤེགས་པ་ནི་སེམས་ཅན་ཐམས་ཅད་ལ་སྣང་བ་ཡང་མ་ཡིན་གྱི། དགེ་བའི་བཤེས་གཉེན་ནི་ཡོངས་སུ་སྣང་བས་ཆོས་སྟོན་ཅིང་ཐར་པའི་ས་བོན་འདེབས་པའི་ཕྱིར། དེ་བཞིན་གཤེགས་པ་རྣམས་ལས་དགེ་བའི་བཤེས་གཉེན་ལྷག་པར་ཡང་ཟུངས་ཤིག ཅེས་དང་། དོ་ཧ་ལས། དངོས་གྲུབ་ཀུན་གྱི་རྩ་བ་རྡོ་རྗེ་སློབ་དཔོན་ཉིད། ཅེས་གསུངས་པ་ལྟར། དངོས་གྲུབ་རྩ་བ་རྡོ་རྗེ་སློབ་དཔོན་ལ། །སྒོ་གསུམ་ཟོལ་མེད་གཙང་མའི་སྤྱི་བོས་བསྟེན། །བྱིན་རླབས་ཕན་བདེའི་སྤྲིན་ཚོགས་མངའ་བའི་ཡོན་ཏན། དེ་དག་གིས་ནི་ངན་འགྲོའི་ལམ་འགོག་ཅིང་། །བདེ་འགྲོའི་སྐས་འཛུགས་འདི་ཕྱིར་ཕན་བདེ་མཛད། །ཡང་དག་དོན་སྟོན་སེམས་རྒྱུད་བྱིན་གྱིས་རློབས། །ཚེ་འདིར་སྨིན་གྲོལ་ལམ་ལ་འགོད་པས་ན། །རྟག་བརྟན་འཕོ་འགྱུར་མེད་པའི་དད་པ་ཡིས། །དུས་རྣམས་ཀུན་ཏུ་སྐྱོ་ངལ་མེད་པར་བསྟེན། །ལྔ་པ་དམ་པ་བསྟེན་པའི་མན་ངག་ལ་གཉིས། དང་པོ་མདོར་བསྟན། ཇི་ལྟར་ཉོན་མོངས་པའི་ནད་ཞི་བའི་ཕྱིར། ནད་པས་སྨན་པའི་རྒྱལ་པོ་དང་། ཉེས་པའི་འཇིགས་པས་སྐྱབས་ཕྱིར་དམངས་ཀྱི་རྒྱལ་པོ། སྐྱེ་ཤིའི་འཇིགས་པ་ལས་ཐར་པའི་ཕྱིར་འགྲོན་པོས་སྐྱེལ་མ་དང་། རང་གཞན་དོན་གཉིས་འགྲུབ་པའི་ཕྱིར་ཚོང་པས་དེད་དཔོན་འཁོར་བའི་རྒྱ་མཚོ་ལས་བརྒལ་བའི་ཕྱིར་གྲུབ་པས་མཉེན་པ་ལྟར། ཉོན་མོངས་ཞི་ཕྱིར་ཉེས་ཀུན་གནོད་བྲལ་ཕྱིར། །སྐྱེས་ཤིས་འཇིགས་ཕྱིར་དོན་གཉིས་ལྷུན་གྲུབ་ཕྱིར། །སྲིད་མཚོ་བརྒལ་ཕྱིར་བླ་མ་བསྟེན་པར་བྱ། །གཉིས་པ་རྒྱས་པར་བཤད་པ། བླ་མ་སྨན་པ་གདམས་ངག་སྨན་དང་ནི། །རང་ལ་ནད་པའི་འདུ་ཤེས་ཉེར་བཞག་སྟེ། །ནན་ཏན་བརྩོན་པས་སྨན་ཉིད་བསྟེན་ཚུལ་དང་། །ཞི་བདེ་ནད་ལས་གྲོལ་བའི་འབྲས་ཐོབ་བཞིན། །བསྟེན་ཚུལ་གཞན་རྣམས་ཚུལ་དེས་དཔག་བྱས་ལ། །དག་པའི་འདུ་ཤེས་བཞི་ཡིས་བསྟེན་པར་བྱ། །གཉིས་པ་གང་གིས་བསྟེན་པ་སློབ་མའི་ཁྱད་པར་ལ་གསུམ། དང་པོ་སློབ་མ་ངན་པའི་རང་བཞིན་སྤང་བ། གཞན་དུ་སྐལ་ངན་སློབ་མ་ཉེས་ཀུན་གཞི། །དད་དང་ངོ་ཚ་ཁྲེལ་མེད་སྙིང་རྗེ་ཆུང་། །རིགས་དང་རང་བཞིན་ཀུན་སྤྱོད་སྐལ་བ་ངན། །སེམས་དང་ལས་དང་ཉོན་མོངས་དུག་ལྔ་རགས། །ཆོས་དང་ཆོས་མིན་དགེ་སྡིག་བསླབ་པ་འཆལ། །སྡོམ་དང་དམ་ཚིག་མི་བསྲུང་གཉེན་པོ་མེད་པས་རབ་རྨོངས་པ་བློ་གྲོས་ཆུང་ཞིང་དགང་སྟེ་མ གུ་དཀའ་བ། ཁྲོ་དང་ཚིག་རྩུབ་འཕེལ་བ་དེ་དག་གིས། །བླ་མ་རི་དྭགས་ཆོས་ལ་གླ་རྩི་དང་། །རང་ལ་རྔོན་པ་ནན་ཏན་མདའ་འཕེན་དང་། །ཆོས་གྲུབ་འབྲས་བུ་གཞན་དུ་འཚོང་བའི་ཚུལ། །འདུ་ཤེས་ལོག་པ་ལྔ་ཡིས་བསྟེན་པ་ནི། །དམ་ཚིག་མེད་པས་འདི་ཕྱིར་སྡུག་བསྔལ་འཐོབ། །དམ་ཚིག་གསུམ་བཀོད་པའི་རྒྱུད་འགྲེལ་དུ། གསང་སྔགས་རྡོ་རྗེ་སློབ་དཔོན་སྨོད། །ཆོས་ལ་དབང་ཟ་ནོར་དང་བརྗེས། །རིགས་པས་དམ་ཚིག་མི་བསྲུང་བ། །དེ་དག་ཚེ་འདིར་ཚེ་ཐུང་ཞིང་། །དཔལ་དང་སྐལ་བ་བཟང་པོ་ཉམས། །མཁའ་འགྲོའི་ཆད་པས་སྡུག་བསྔལ་ཞིང་། །ཕྱི་མ་ངན་སོང་ཉིད་དུ་ལྷུང་། །ཞེས་སོ། །གཉིས་པ་ངན་པའི་ཀུན་སྤྱོད་སྤང་བ། ལ་ལས་ཐོག་མར་མ་བརྟགས་བབ་ཅོལ་འཇུག །གསར་ངེས་ཡོན་ཏན་བརྗོད་ཅིང་ཕྱི་ནས་སྨོད། །ཁ་ཅིག་འདྲེས་མས་ངོ་ལྐོག་གིས་བསྟོད་སྨད་ངན་གཡོའི་ཚུལ། ཟུར་གྱིས་བླ་མ་ཉེ་འཁོར་སུན་འབྱིན་པ། །དེ་དག་གིས་ནི་འབྲས་བུ་མནར་མེད་ཉིད། །གསུམ་པ་སློབ་མ་བཟང་པོའི་རང་བཞིན་བསྟན་པ། སྐལ་བཟང་སློབ་མ་དད་དང་ཤེས་རབ་ཆེ། །བརྩོན་འགྲུས་བག་ཡོད་དྲན་དང་ཤེས་བཞིན་ལྡན། །བཀའ་ལས་མི་འདའ་སྡོམ་དང་དམ་ཚིག་བསྲུང་། །སྒོ་གསུམ་དུལ་ཞིང་སྙིང་རྗེ་ཕན་སེམས་ཆེ། །ཁོངས་ཡངས་སྤྲོ་རིང་གཏོང་ཕོད་དག་སྣང་ཆེ། །བརྟན་ཞིང་མོས་གུས་ཆེ་བ་དེ་དག་གིས། །གསུམ་པ་ཇི་ལྟར་བསྟེན་པ་ཐབས་ཀྱི་ཡན་ལག་ལ་གསུམ། སྤང་བྱ་སྤང་བའི་ཐབས། བླང་བྱ་བསྟེན་པའི་ཐབས། དེ་གྲུབ་པའི་འབྲས་བུ་བསྟན་པའོ། །དང་པོ་སྤང་བྱ་ལ་དྲུགདང་པོ་བླ་མའི་ཉེས་སྐྱོན་བརྟག་པ་སྤང་བ། རྟག་ཏུ་བླ་མའི་ཡོན་ཏན་དྲན་བྱ་ཞིང་། །སྐྱོན་ལ་མི་རྟོག་མཐོང་ཡང་ཡོན་ཏན་བསམ། །རང་སྣང་ཡིན་ངེས་ཁོང་ལ་མི་མངའ་ཞེས། །སྐྱོན་གཅིག་སེམས་ན་ཡོན་ཏན་བརྒྱ་འགྱུར་དུ་སྙིང་ནས་བསམ་ཞིང་བཤགས་སྡོམ་གཉེན་པོ་བསྟེན། གཉིས་པ་བླ་མའི་ཐུགས་དང་འགལ་བ་སྤང་བ་ནི། བླ་མ་མི་མཉེས་ཆ་དང་བཅས་སྤངས་ཤིང་། །ཇི་ལྟར་མཉེས་པའི་ཐབས་ལ་འབད་པར་བྱ། །བླ་མས་བཀའ་སྩལ་ནམ་ཡང་མི་བཅག་ཅིང་། །བླ་མའི་ཉེ་འཁོར་སྡུག་པའང་བླ་མ་བཞིན། །བླ་མའི་འཁོར་གཡོག་སློབ་མར་མི་བསྡུ་ཞིང་། །ཆོས་བཤད་དབང་བསྐུར་ལ་སོགས་ཞུས་ཏེ་བྱ། །གསུམ་པ་ལུས་ཀྱི་མ་གུས་པ་སྤང་བ། བླ་མའི་སྤྱན་སྔར་ལུས་ངག་ཡིད་སྡོམ་ཞིང་། །རྐང་པ་བརྐྱང་དང་སྐྱིལ་ཀྲུང་རྒྱབ་མི་བསྟན། །ངོ་འཛུམ་མི་གནག་ཁྲོ་གཉེར་བསྟན་མི་བྱ། །བཞི་པ་ངག་གིས་མ་གུས་པ་སྤང་བ། བབ་ཅོལ་མི་སྨྲ་བརྫུན་ཚིག་ཕྲ་མ་དང་། །གཞན་གྱི་སྐྱོན་བརྗོད་མི་སྙན་རྩུབ་མོའི་ཚིག །མ་བརྟགས་འབྲེལ་བ་མེད་རྣམས་སྨྲ་མི་བྱ། །ལྔ་པ་ཡིད་ཀྱིས་མ་གུས་པ་སྤང་བ། བླ་མའི་རྫས་ལ་བརྣབ་སེམས་མི་བྱ་ཞིང་། །སློབ་འབངས་ཡོན་བདག་སྡེར་བཅས་གནོད་སེམས་ཆ་དང་བཅས་ཀུན་བསྡམ། དགོས་དབང་གིས། བླ་མའི་མཛད་སྤྱོད་སྣ་ཚོགས་ཆོ་འཕྲུལ་ལ། །འཇིག་རྟེན་མཐུན་འཇུག་ཅུང་ཟད་ལ། ཁ་ཞེ་འཛོལ་བས་འཁྲུལ་པར་མི་བརྟག་ཅིང་། །འདི་ནི་མི་རིགས་ཁོ་རང་མཛད་མོད་སྙམ། །ཅུང་ཟད་འགལ་འདུ་ཉེས་སྐྱོན་ལོག་ལྟ་དོར། །དྲུག་པ་བླ་མར་རང་སྣང་ལོག་པ་སྤང་བ། གལ་ཏེ་བླ་མ་སྡང་བར་མངོན་ན་ཡང་། །རང་སྐྱོན་ཡོད་ངེས་བརྟགས་ལ་བཤགས་སྡོམ་བྱ། །སྤྱི་གཙུག་བསྒོམས་ལ་ཀྱེ་ཀྱེ་བླ་མ་རིན་པོ་ཆེ་སོགས་གསོལ་བ་དྲག་པོ་ཉིན་མཚན་ཐུན་བཞིར་ལན་བདུན་བདུན་གདབ། དེ་ཡིས་མཉེས་ཤིང་དངོས་གྲུབ་མྱུར་དུ་འཐོབ། །གཉིས་པ་བླང་བྱ་བསྟེན་ཐབས་ལ་བཞི། དང་པོ་ལུས་ངག་མདང་གསལ་གྱིས་མཉེས་པ། བླ་མ་མཐོང་ཚེ་ལྡང་དང་ཕྱག་ཚལ་ཞིང་། །བཞུགས་ཚེ་སྟན་སོགས་མཁོ་བའི་ཡོ་བྱད་དབུལ། །སྙན་པར་སྨྲ་བས་བསྟོད་ཅིང་ཐལ་མོ་སྦྱོར། །བཞུད་ཚེ་ལྡང་དང་ཞབས་འབྲིང་བསྙེན་བཀུར་བྱ། །གཉིས་པ་རང་སེམས་རྣམ་དག་གིས་མཉེས་པ། རྟག་ཏུ་དྲན་དང་ཤེས་བཞིན་བག་ཡོད་ཅིང། །གུས་དང་འཇིགས་བཅས་ཞུམ་པས་གནས་པར་བྱ། །ཇི་ལྟར་བག་མ་གསར་པའི་ཚུལ་བཞིན་དུ། །སྒོ་གསུམ་ཞི་བས་བླ་མའི་དྲུང་འདུག་གིས། །འཕྱར་ཞིང་གཡེང་ལ་རྒོད་བག་བྱ་བ་མིན། །ཕྱོགས་རིས་མ་ཡིན་ཁེ་དང་གྲགས་པས་མིན། །གཡོ་སྒྱུས་མ་ཡིན་དེ་བཞིན་ཚུལ་འཆོས་མིན། །ངོ་ལྐོག་མ་ཡིན་ཉེ་རིང་ཆགས་སྡང་མིན། །གསུམ་པ་བསྙེན་བཀུར་ཞབས་ཏོག་གིས་མཉེས་པ། རང་ལ་འབྱོར་པ་ཡོད་ན་བླ་མ་མཆོད། །ལུས་ངག་ཞབས་ཏོག་བསྙེན་བཀུར་སྲི་ཞུ་དང་། །ཚེ་འདི་བློས་བཏང་བསྒྲུབ་པས་མཉེས་པར་བྱེད། །བཞི་པ་རང་ཕྱོགས་འགྱུར་མེད་ཀྱིས་མཉེས་པ། གཞན་གྱིས་མི་སྙན་བརྗོད་ནའང་དེ་ཟློག་ཅིང། །ནུས་པ་མེད་ན་སླར་ཡང་ཡོན་ཏན་བསམ། །རྣ་བ་དགབ་ཅིང་སྙིང་རྗེས་ཕན་པ་བསྒྲུབ། །དེ་ལ་མི་བརྟེན་བག་ཕེབས་སྨྲ་བ་མིན། །གསུམ་པ་དེེས་འགྲུབ་པའི་འབྲས་བུ། དེས་ནི་ཚེ་རབས་ཀུན་དུ་ཕན་པ་འགྲུབ། །དམ་པ་རྣམས་དང་ཕྲད་ཅིང་ཆོས་རབ་ཐོས། །ས་དང་ལམ་དང་གཟུངས་དང་ཏིང་ངེ་འཛིན། །སྣ་ཚོགས་ཡོན་ཏན་འབྱོར་པས་ཡོངས་གང་ཞིང་། །འགྲོ་ལ་ཞི་བདེའི་དགའ་སྟོན་འབྱེད་པ་ཡིན། །བཞི་པ་འགལ་ཟླ་སྡིག་པའི་རྩ་ལག་སྤང་བ་ལ་གསུམ། དང་པོ་སྡིག་པའི་བཤེས་གཉེན་སྤང་བ། དེ་ལྟར་དམ་པ་རྣམས་ལ་ལེགས་བསྟེན་པས། །སྡིག་པའི་བཤེས་གཉེན་ངན་པའང་ཀུན་དུ་སྤང་། །དེ་ཡང་སྔར་བཤད་ཡོན་ཏན་མི་ལྡན་ཞིང་། །ལོག་པའི་སྐྱོན་མང་སྡོམ་དང་དམ་ཚིག་འཆལ། །བྱམས་དང་སྙིང་རྗེ་ཤེས་རབ་ཐོས་པ་ཆུང་། །ལེ་ལོ་སྙོམ་ལས་མི་ཤེས་ང་རྒྱལ་ཆེ། །ཀོ་ལོང་གདུག་རྩུབ་ཉོན་མོངས་དུག་ལྔ་རགས། །དབེན་པར་གནས་ཀྱང་འདུ་འཛི་དང་ཉོན་མོངས་པའི་ཆར་འབབ་པས་ཚེ་འདི་དོན་གཉེར་ཕྱི་མ་རྒྱང་རིང་འཕང་། ཆོས་ལྟར་སྟོན་ཡང་ཆོས་མིན་ཟོག་པོའི་རིགས་ཏེ་ཚིག་དོོན་འཛོལ་བའོ། །མི་གཙང་ཕུང་པོ་ལྟ་བུའི་བླ་མ་ནི། །གདུལ་བྱའི་བུང་བ་མང་པོ་འདུ་ཡང་རིང་དུ་སྤང། །དད་ལྡན་ལོག་ལམ་ངན་འགྲོར་འཁྲིད་པས་ན། །ཐར་ལམ་འདོད་པས་ནམ་ཡང་བསྟེན་མི་བྱ། །གཉིས་པ་སྡིག་པའི་གྲོགས་པོ་སྤང་བ། སྡིག་པའི་གྲོགས་པོ་དེ་ཡང་སྤང་བྱ་སྟེ། །ཇི་ཙམ་འགྲོགས་པ་དེ་ཙམ་སྡིག་པ་འཕེལ། །དགེ་བ་འགྲིབ་ཅིང་ཉོན་མོངས་ཆར་བཞིན་འབབ། །བདེ་འགྲོ་འགོག་ཅིང་ངན་འགྲོའི་འབབ་སྟེགས་ཏེ། །དམ་པ་སྨོད་ཅིང་དཀར་པོའི་ཆོས་ལ་སྡང། །ངན་པ་བསྟོད་ཅིང་ནག་པོའི་ཆོས་ལ་བསྟེན། །སྐལ་མཉམ་མི་དགེ་སྤྱོད་རྣམས་བསྔགས་པ་སྟེ། །རྟག་ཏུ་ལོག་ལམ་ངན་འགྲོར་འཁྲིད་པས་ན། །བློ་མིག་ལྡན་པས་རིང་དུ་སྤང་བར་བྱ། །གསུམ་པ་བཤེས་དང་གྲོགས་ངན་སྤང་བའི་ཕན་ཡོན། སྡིག་པའི་བཤེས་གཉེན་གྲོགས་བཅས་སྤངས་པ་ཡིས། །འདི་ཕྱིར་བདེ་ཞིང་ལེགས་པའི་ཡོན་ཏན་འགྲུབ། །རྟག་ཏུ་དགེ་འཕེལ་ཐར་ལམ་ཟབ་མོ་ཟིན། །སྐྱེ་བོ་ངན་པ་ནམ་ཡང་མི་མཐོང་ཞིང་། །བདེ་གཤེགས་སྲས་ཀྱིས་བསྐོར་བའི་མགོན་པོ་ཡིས། །བདག་ལ་དགོངས་ཤིང་བྱིན་གྱིས་རློབ་པར་མཐོང་། །བདེ་བར་ཚེ་ཡི་དུས་བྱེད་མཐོ་རིས་འགྲོ། །དེ་སོགས་བསམ་གྱིས་མི་ཁྱབ་ཡོན་ཏན་ལྡན། །ལྔ་པ་མཐུན་རྐྱེན་དགེ་བའི་རྩ་ལག་བསྟེན་པ་ལ་གསུམ། དང་པོ་དགེ་གྲོགས་བསྟེན་པར་འོས་པ། དགེ་བའི་གྲོགས་པོ་དམ་པ་རྟག་ཏུ་བསྟེན། །དེ་དག་གིས་ནི་དགེ་བའི་ལས་འཕེལ་ཞིང་། །སྡིག་དང་ཉོན་མོངས་འགྲིབ་ལ་ཉེས་པ་འགོག །སྲིད་ལས་མཐར་འབྱིན་མངོན་མཐོ་ངེས་ལེགས་འགྲུབ། །ཚེ་འདིར་བདེ་ཞིང་ཕྱི་མ་འབྲས་དང་བཅས། །རྟག་ཏུ་དོན་ཡོད་ལྷ་མིའི་འདྲེན་པར་འགྱུར། །གཉིས་པ་དེའི་ཕན་ཡོན་ལ་བསྔགས་པ། དགེ་བའི་བཤེས་དང་དགེ་གྲོགས་བསྟེན་པ་ཡིས། །དགེ་ཚོགས་འཕེལ་ཞིང་འབྲས་བུ་བདེ་བ་འཐོབ། །སྲིད་ན་མི་འཇིགས་ཕན་བདེ་དཔག་མེད་ཅིང་། །འགྲོ་བའི་དོན་གཉིས་འབྱོར་པ་མཐའ་ཡས་འགྲུབ། །འདི་ནི་རྣམ་འདྲེན་རྒྱལ་བའི་སྤྲུལ་པ་སྟེ། །སྙིགས་མའི་དུས་སུ་དེ་ལྟར་སྣང་བ་ཡིན། །དེ་བས་ཇི་སྲིད་བྱང་ཆུབ་སྙིང་པོའི་བར། །སྐྱེ་བོ་དམ་པ་རྣམས་ལ་བརྟེན་པར་བྱ། །གསུམ་པ་ཡོན་ཏན་གཞན་ཡང་བསྟན་པ། དེ་ཡིས་དག་སྣང་ཕྱོགས་མེད་འཆར་བ་དང་། །བྱམས་དང་སྙིང་རྗེ་བྱང་ཆུབ་སེམས་འབྱོངས་ཤིང་། །ཉམས་དང་རྟོགས་པ་རང་བཞིན་གོང་དུ་འཕེལ། །གཞན་དོན་དཔག་མེད་ཅི་བསམ་ཆོས་བཞིན་འགྲུབ། །དྲུག་པ་ལམ་ཟབ་བླ་མའི་རྣལ་འབྱོར་བསྟན་པ་ལ་གསུམ། རྒྱུན་དུ་བསྒོམ་པ་ལས་ཚོགས་དང་བཅས་པ། བར་ཆད་བཟློགས་པ་དམིགས་གནད་དང་བཅས་པ། ཐབས་དེས་གྲུབ་པ་ཕན་ཡོན་དང་བཅས་པའོ། །དང་པོ་རྒྱུན་དུ་བསྒོམ་པ་ལས་ཚོགས་དང་བཅས་པ་ལ་གསུམ། སྒོམ་ཚུལ། ལས་ཚོགས། ཆ་རྐྱེན་ནོ། །དང་པོ་སྒོམ་ཚུལ་ལ་གཉིས། དང་པོ་བསྐྱེད་པ་སྐུའི་ལམ་ཁྱེར། ཇི་ལྟར་བསྒོམ་ཞིང་གསོལ་བ་གདབ་པ་ནི། །རྒྱུན་དུ་ཚོགས་བསག་སྒྲིབ་པ་སྦྱོང་བ་ལ། །སྟན་བདེ་བར་སྐྱབས་སེམས་སྔོན་དུ་འགྲོ་བས་རང་ཡི་དམ་གང་མོས་བསྒོམ་པའི་ཉིན་མོ་སྤྱི་གཙུག་མཚན་མོ་སྙིང་ནང་དུ། རྩ་བའི་བླ་མ་གང་མོས་ཡི་དམ་དང། །མཁའ་འགྲོ་གཉིས་མེད་མཚན་དཔེས་བརྒྱན་པའི་མཐར། །བརྒྱུད་པའི་བླ་མ་དཔའ་བོ་མཁའ་འགྲོས་བསྐོར། །ཡིད་ཀྱིས་མཆོད་ཅིང་འདོད་དོན་གསོལ་བ་གདབ། །འདི་གུ་རུ་པདྨའི་མན་ངག་རྩ་བ་གསུམ་བསྒྲིལ་དུ་སྒྲུབ་པ་སྟེ། བླ་མས་བྱིན་གྱིས་རློབས། ཡི་དམ་གྱིས་མཆོག་གི་དངོས་གྲུབ་སྟེར། མཁའ་འགྲོས་བར་ཆད་སེལ་ཞིང་གཙོ་བོ་ཐུན་མོང་གི་དངོས་གྲུབ་འགྲུབ་པ་སྟེ་མདོར་ན། ཀུན་འདུས་རིན་པོ་ཆེའི་རྒྱུད་ལས། གང་གིས་བསྐལ་པ་འབུམ་ཕྲག་ཏུ། །ལྷ་སྐུ་འབུམ་ཕྲག་བསྒོམས་པ་ལས། །བླ་མ་ཅུང་ཟད་དྲན་པ་མཆོག །བསོད་ནམས་འདི་ནི་ཕ་མཐའ་ཡས། །ཞེས་སོ། །གཉིས་པ་གྲགས་སྟོང་གསུང་གི་ལམ་ཁྱེར། མཚན་དེ་ཤེས་ན་རྒྱ་སྐད་མ་ཤེས་ན་དེ་རང་བཅུག་ནས་ཐོག་མར་སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་ངོ་བོར་ལྷུན་གྱིས་གྲུབ་པས་ༀ་སྦྱིན་ཞིང་ཐ་མར་ཨཱ་ཧཱུྃ་ལས་དམིགས་གང་འདོད་ཞི་བ་ལ་ཤིནྟིང་ཀུ་རུ་སོགས་ཤམ་བུར་གདགས། གཉིས་པ་ལས་ཚོགས་ལ་བཞི། དང་པོ་ཞི་བ། དམིགས་པ་ནད་གདོན་སྡིག་སྒྲི་བ་ཞི་བར་འདོད་པ་ཡིས། ཐམས་ཅད་དཀར་པོའི་འོད་ཟེར་རབ་འཕྲོས་པས། །མི་མཐུན་ཕྱོགས་ཞི་དངོས་གྲུབ་ཐོབ་པར་བསམ། །གཉིས་པ་རྒྱས་པ། ཚེ་དཔལ་འབྱོར་སོགས་རྒྱས་པའི་ལས་འདོད་པས། །སེར་པོ་འདོད་དགུའི་ཆར་པ་འབེབས་ལུས་དང་གནས་ཁང་གང་བར་བསམ། གསུམ་པ་དབང་། དབང་དང་དགུག་པ་ལ་སོགས་དབང་རྣམས་ལ། ཐམས་ཅད་དམར་པོ་འོད་ཟེར་ལྕགས་ཀྱུའི་ཚུལ་གྱིས་གང་འདོད་དྲངས་ཏེ་རྐང་འོག་ཚུད་པར་བསམ། བཞི་པ་དྲག་པོ། བགེགས་དང་གདོན་སོགས་ཚར་གཅོད་མངོན་སྤྱོད་ལ། །ཐམས་ཅད་མཐིང་ནག་འོད་ཟེར་མཚོན་ཆ་འཕྲོ། །མེ་དཔུང་རྩིབས་སྟོང་འཁོར་ལོས་འཇོམས་པར་བསམ། །གསུམ་པ་ཆ་རྐྱེན་ལ་གསུམ། དང་པོ་སྔགས་ཀྱི་གནད། ཁྱད་པར་དུ་སྔགས་བཟླས་རང་སྒྲས་སྟོང་གསུམ་གཡོ་འགུལ་ལྡེག་ཅིང་འཕར། མེར་མེར་འུར་འུར་ཡོད་པར་བསམ་པས་ལས་རྣམས་འགྲུབ་ཅིང་ལས་བཞི་སོ་སོའི་ལྷག་པའི་བསྐྱེད་རིམ་བཞིན་བསྒོམ་པར་བྱའོ། །གཉིས་པ་རྫོགས་རིམ་གྱི་རྣལ་འབྱོར། རྗེས་རྣམས་སྣང་སྲིད་རང་ལ། རང་བླ་མ་རིམ་བསྡུ་དེ་མི་དམིགས་སྟོང་པའི་ངང་དར་ཅིག་གློད་ལ་དགེ་བ་བྱང་ཆུབ་བསྔོ། གསུམ་པ་ཕན་ཡོན་གྱི་རང་བཞིན། སོ་སོའི་ལས་དང་རྗེས་མཐུན་དངོས་སམ་རྨི་ལམ་དུ་རྟགས་རྣམས་འབྱུང་བ་འདི་ནི་ཟབ་ལམ་བདེ་ཆེན་རྒྱ་མཚོ་ཡིན། གཉིས་པ་བར་ཆད་བཟློགས་པ་བླ་མའི་རྣལ་འབྱོར་ལ་ལྔ། དང་པོ་མགྲོན་བསམ་པ། ཁྱད་པར་ནད་གདོན་བར་ཆད་འཆི་བླུས་ཚེ། །མདུན་གྱི་ནམ་མཁར་པད་སྡོང་སེངྒའི་ཁྲིར། །མི་འཇིགས་ཡངས་པ་ཅན་སྟེང་བླ་མ་དང་། །སངས་རྒྱས་དབྱེར་མེད་འཛུམ་མདངས་ལྡན་པ་ལ། །བརྒྱུད་པའི་བླ་མ་བྱང་སེམས་མཁའ་འགྲོས་བསྐོར། །འོག་ཏུ་རིགས་དྲུག་ལན་ཆགས་སྙིང་རྗེའི་མགྲོན། །དུས་གསུམ་ཕ་མ་འཁོར་བའི་སེམས་ཅན་བསམ། །སྤྱན་དྲངས་མཆོད་བསྟོད་བསྡུས་པ་བྱས་ལ། གཉིས་པ་མཆོད་རྫས་སྤྲུལ་པ། རང་སེམས་སྤྱི་གཙུག་ཧཱུྃ་དཀར་པོ་འཐོན་དཔའ་བོའི་སྐུ་དཀར་པོ་རལ་གྲིའམ་ཆུ་གྲི་ཐོད་པ་ཐོགས་པའི་རྣམ་པ་ཡིས། ལུས་ཀྱི་ཐོད་པ་སྨིན་མཚམས་མཛོད་སྤུར་བཅད། །ཐོད་པའི་སྒྱེད་པུ་གསུམ་སྟེང་བཞག་པའི་ནང་། །ལུས་ཀྱི་ཤ་ཁྲག་རུས་པས་ཁེངས་པ་ལ། །སྟེང་ནས་བདུད་རྩིའི་ཆར་བབ་འོག་ནས་ཡཾ་ལས་རླུང་རམ་རཾ་ལས་མེ་འབར་བས། ཐོད་པ་སྟོང་གསུམ་དང་མཉམ་བདུད་རྩིས་ཁེངས། གསུམ་པ་མཆོད་པ་འབུལ་ཞིང་དངོས་གྲུབ་བླང་བ། རང་སེམས་དཔའ་བོ་གྲངས་མེད་སྤྲུལ་པ་ཡིས། །ཐོད་པས་ཐམས་ཅད་དུས་མཉམ་བདུད་རྩི་བཀྱེ། །ཞི་བའི་མགྲོན་མཉེས་ཚོགས་རྫོགས དངོས་གྲུབ་ཐོབ། །སྲིད་པའི་མགྲོན་མཉེས་ཐོག་མེད་ལན་ཆགས་འཁོར། །ཁྱད་པར་གང་གནོད་གདོན་མཉེས་བར་ཆད་ཞི། །ཐམས་ཅད་མཉེས་པའི་འོད་ཟེར་བདག་ལ་ཕོག །ནད་ཞི་གདོན་ཞི་བར་ཆ ད་རང་སར་ཞི། །འཆི་བ་བསླུས་ཤིང་དངོས་སྒྲུབ་ཐོབ་པར་བསམ། །བཞི་པ་རྒྱས་གདབ་བྱ་བ། རྗེས་ལ་ཐམས་ཅད་མི་དམིགས་སེམས་ཀྱི་ངང་། །སེམས་ཉིད་མི་དམིགས་ཆོས་དབྱིངས་མཉམ་པར་བཞག །སྒྱུ་མའི་རང་བཞིན་དག་པས་བསྔོ་བར་བྱ། །ལྔ་པ་ཕན་ཡོན་བསྟན་པ། རྣལ་འབྱོར་ཀུ་སཱ་ལི་རྣམས་ཀྱི་ནང་གི་ཚོགས་འཁོར་བཟང་པོ་འདིས་ནི་མི་མཐུན་རྐྱེན་རྣམས་ཞི་བ་དང་། ཚོགས་ཆེན་རབ་རྫོགས་སྒྲིབ་ཀུན་བྲལ་བ་སྟེ། །བྱིན་རླབས་ཚད་མེད་རྟོགས་པ་རྒྱུད་ལ་སྐྱེ། །བདག་འཛིན་མེད་ཅིང་ངེས་འབྱུང་བློ་སྣ་ཐུང་། །བསམ་པ་འགྲུབ་ཅིང་སྣང་སྲིད་བླ་མར་འཆར། །གནད་གཅོད་མེད་ཅིང་འཆི་ཀའི་འོད་གསལ་འགྲུབ། །བར་དོར་གྲོལ་ཞིང་དོན་གཉིས་ཕུན་སུམ་ཚོགས། །དེ་ཕྱིར་བླ་མ་བསྒྲུབ་ལ་ནན་ཏན་བྱ། །གསུམ་པ་ཐབས་དེས་གྲུབ་པའི་ཕན་ཡོན། གང་གིས་བསྐྱེད་རིམ་བསྐལ་པར་བསྒོམས་པས་ཀྱང་། །བླ་མ་སྐད་ཅིག་དྲན་པ་མཆོག་ཏུ་གསུངས། །འཁོར་ལོར་ཆུབ་པ་རོལ་བའི་རྒྱུད་ལས། གང་གིས་བསྐལ་པ་བྱེ་བ་རུ། །ལྷ་ཡིས་སྐུ་ནི་བསྒོམས་བྱས་པས། །མགོན་པོ་ཀུན་གྱི་དབང་ཕྱུག་ཅེས། །བླ་མ་དྲན་པ་མཆོག་ཏུ་བཤད། །ཅེས་སོ། །བདུན་པ་རྟག་ཏུ་དགེ་བའི་བཤེས་གཉེན་བསྟེན་པར་གདམས་པ་ལ་གཉིས། དང་པོ་ཕན་བདེའི་འབྱུང་གནས་བཤེས་གཉེན་བསྟེན་པར་གདམས་པ། དོན་གཉིས་ཀྱི་དཔལ་ལྡན་ཆོས་ཀྱི་འབྱོར་པ་དམ་པའི་གཞིར་གྱུར་པ་ཡི་སངས་རྒྱས། ཡོན་ཏན་ཡོངས་གང་ཕན་བདེའི་སྤྲིན་ཚོགས་ཅན། །ས་གསུམ་གདུལ་བྱ་དབང་པོ་ཆུང་འབྲིང་ཆེན་པོའམ། དང་པོ་འཇུག་པའི་གཞི། བར་དུ་འཇུག་པའི་ལམ། ཐ་མར་དོན་གྱི་སྙིང་པོ་གསུམ་ལ་དགོངས་པའི་ཆོས་འཁོར་རིམ་པ་གསུམ་གྱི་བདུད་རྩི་དམ་པའི་ཆར་འདོད་པས། ཐུགས་རྗེའི་ངང་ཅན་རྣམས་ལ་ཐོབ་པར་འདོད་པ་དེས་དགེ་བའི་བཤེས་གཉེན་བརྟེན་པར་བྱའོ། །གཉིས་པ་སྐྱོ་དུབ་སྤངས་ཏེ་བསྟེན་པར་གདམས་པ། ཐོག་མེད་དུས་ནས་ཉེ་བར་གོམས་པ་ཡི། །ཡིད་མཁའི་ཉོན་མོངས་གདུང་བ་ཞི་བའི་ཕྱིར། །ཚོང་དཔོན་གྱི་བུ་ནོར་བཟང་གིས་འཇམ་དཔལ་སོགས་ཀྱིས་ལུང་སྟོན་ཅིང་བྱིན་གྱིས་རློབ་པའི་བླ་མ་ལྔ་བཅུ་ང་བཞི། དེ་དག་གིས་གདམས་པས་རྗེས་སུ་བསྟན་པའི་བླ་མ་ང་བཞི་སྟེ་བརྒྱ་རྩ་བརྒྱད་བསྟེན་པའམ་རྟག་ཏུ་ངུ་ཡིས་ལུས་བཙོངས་ཏེ་ཆོས་འཕགས་ལ་བཀུར་བ་བཞིན་ཆོས་ཚོལ་བས། སྐྱོ་ངལ་སྤངས་ལ་དགེ་བའི་བཤེས་གཉེན་བསྟེན་པར་བྱའོ། །དོན་གསུམ་པ་ལེའུ་རྫོགས་པ་མཇུག་གི་དོན་ལ་གཉིས། དང་པོ་སྐབས་ཀྱི་དགེ་བ་བསྔོ་བ། དེ་ལྟར་དགེ་བའི་བཤེས་གཉེན་བརྟེན་ཚུལ་གྱི་མན་ངག་དོན་སྤྱོད་དབང་པོའི་རྒྱུད་སྟོང་ལྡན་པ་ལས་ཀྱང་། སྐྱེ་དགུ་སྐལ་བཟང་རྣ་བའི་བདུད་རྩིར་ལྷུང་བའི་བསོད་ནམས་ལས། ཉེས་གྱུར་ལོག་པའི་ལམ་སྡིག་བཤེས་ལ་བསྟེན་པ་ཡིས། །དུབ་པའི་སེམས་ཉིད་དེ་རིང་ངལ་སོས་ཤིག །གཉིས་པ་ལེའུའི་མཚན། རྫོགས་པ་ཆེན་པོ་སེམས་ཉིད་ངལ་གསོ་ལས། དགེ་བའི་བཤེས་གཉེན་བསྟེན་པའི་ལེའུ་སྟེ་ལྔ་པའོ། །། ༈ དྲུག་པ་སྐྱབས་སུ་འགྲོ་བའི་ལེའུ་ལ་གསུམ་སྟེ། ལེའུ་ལ་འཇུག་པ་རྒྱུའི་དོན། ལེའུ་དངོས་ཀྱི་དོན། ལེའུ་རྫོགས་པ་མཇུག་གི་དོན་ནོ། །དང་པོ་ནི། དེ་ལྟར་དགེ་བའི་བཤེས་གཉེན་ལེགས་བསྟེན་ནས། མྱང་འདས་ལས། ཇི་ལྟར་སྐས་ཀྱི་རིམ་པ་བཞིན། །ང་ཡི་བསྟན་པ་ཟབ་མོ་ཡང་། །རིམ་གྱིས་བསླབ་ཅིང་ནན་ཏན་བྱ། །ཐོད་རྒལ་མ་ཡིན་ཐར་ཆགས་སོ། །ཞེས་སོགས་གསུངས་པ་ལྟར། ཐར་པའི་ལམ་ལ་རིམ་གྱིས་བསླབ་པར་བྱའོ། །གཉིས་པ་ལ་བཞི་སྟེ། གང་གིས་སྐྱབས་སུ་འགྲོ་བའི་གང་ཟག གང་ལ་སྐྱབས་སུ་འགྲོ་བའི་ཡུལ། ཇི་ལྟར་སྐྱབས་སུ་སོང་བའི་བསླབ་བྱ། སྐྱབས་འགྲོ་རྒྱུད་ལ་བསྟེན་པའི་ཕན་ཡོན་ནོ། །དང་པོ་ལ་གཉིས། དང་པོ་སྐྱེས་བུ་གསུམ་གྱི་དབྱེ་བ་བསྟན་པ། དེ་ལ་ཐོག་མར་ལམ་རྣམས་ཀུན་གྱི་གཞི་རྟེན་སྐྱབས་སུ་འགྲོ། སྐྱེས་བུ་ཆུང་རྣམས་ངན་འགྲོས་འཇིགས་པ་སྟེ། །འབྲིང་གཉིས་སྲིད་པས་འཇིགས་དང་ཆེན་པོ་རྣམས། །འཁོར་བའི་སྡུག་བསྔལ་ཆ་དང་བཅས་མཐོང་ནས། །གཞན་གྱི་སྡུག་བསྔལ་མི་བཟོད་ཞི་བདེས་འཇིགས། །རྒྱལ་སྲས་ཐེག་པ་ཆེ་རྣམས་འགྲོ་བའི་ཕྱིར། །སྐྱབས་སུ་འགྲོ་བྱེད་གང་ཟག་གསུམ་དང་བསམ་པ་གསུམ་ཕལ་པ་མཆོག་དང་བླ་ན་མེད་པའོ། །གཉིས་པ་བློ་རིགས་གསུམ་གྱི་དུས་ཚིགས་ངོས་བཟུང་བ། དུས་ཀྱང་བསམ་པའི་རྗེས་འགྲོ་ཆུང་ངུ་རྣམས། །ཕྱི་མའི་བདེ་འབྲས་བར་དུ་འགྲོ་བ་སྟེ། །འབྲིང་གཉིས་གནས་སྐབས་ཇི་སྲིད་འཚོ་བ་དང་། །མཐར་ཐུགས་ཉན་རང་འབྲས་ཐོབ་བར་དུ་འགྲོ། །མཆོག་རྣམས་བྱང་ཆུབ་བར་དུ་རྟག་འགྲོ་ཞིང་། །ཡེ་ཤེས་གཞལ་མེད་བསམ་ཡས་བར་དུའོ་ཞེས་སངས་རྒྱས་ཀྱི་ཡེ་ཤེས་མ་ཐོབ་བར་དུའོ། །གཉིས་པ་གང་ལ་སྐྱབས་སུ་འགྲོ་བའི་ཡུལ་ལ་གཉིས། ཡུལ་གྱི་དབྱེ་བ་སྤྱིར་བསྟན་པ། མཆོག་གསུམ་བྱེ་བྲག་སོ་སོར་བཤད་པའོ། །དང་པོ་ནི། ཡུལ་རྣམས་གཉིས་ཏེ་སྐྱེས་བུ་ཆུང་འབྲིང་གཉིས་ཐུན་མོང་རྒྱུ་དང་ནི། སྐྱེས་བུ་ཆེན་པོའི་ཡུལ་ཐུན་མོང་མ་ཡིན་འབྲས་བུའི་སྐྱབས་གནས་གཉིས། རྒྱུ་དང་འབྲས་བུར་དམ་བཅའ་དེ་ཡང་ནི། དུས་གཞན་དུ་རང་འབྲས་ཀྱི་བྱང་ཆུབ་གསུམ་གང་ཡིན་རང་རྒྱུད་ལ་འགྲུབ་འདོད་རྒྱུ་ཡི་ཐེག་པ་དང་། ད་ལྟ་ཉིད་གྲུབ་རང་སེམས་འབྲས་བུའི་ཚུལ། །རྡོ་རྗེ་ཐེག་པ་དག་གི་དབྱེ་བས་བཞག །ཡེ་ཤེས་གྲུབ་པ་ལས། འོད་གསལ་བ་ཡི་སེམས་ཉིད་ནི། །དཀྱིལ་འཁོར་གསུམ་གྱི་བདག་ཉིད་དུ། །རྟོགས་ནས་རྩེ་གཅིག་མཉམ་འཇོག་པ། །འབྲས་བུའི་མཆོག་ཏུ་ཡང་དག་བཤད། །ཅེས་སོ། །མཚན་ཉིད་ཐེག་ལས་དེ་ཉིད་གསུངས་པ་ནི། །མིང་ཙམ་མཐུན་པའི་ཕྱོགས་གཅིག་ངེས་པར་བྱ། །གཉིས་པ་མཆོག་གསུམ་བྱེ་བྲག་ཏུ་བཤད་པ་ལ། སངས་རྒྱས་དང་ཆོས་བསྟན། ལུང་དང་རྟོགས་པའི་ཆོས་བྱེ་བྲག་ཏུ་བཤད། དགེ་འདུན་དཀོན་མཆོག་གི་གནས་བསྟན་པའོ། །དང་པོ། ཐུན་མོང་རྒྱུ་ཡི་ཡུལ་ནི་དམིགས་བཅས་དཀོན་མཆོག་གསུམ། སངས་རྒྱས་ཐེག་དམན་པས་སྤྲུལ་སྐུ་མཆོག་ཡིན་མཚན་དཔེས་བརྒྱན་པ། ཐེག་ཆེན་པས་སྐུ་གསུམ། ཆོས་རྣམ་གཉིས་ཏེ་དྲི་མེད་ལུང་གི་ཆོས། །མདོ་དང་རྒྱུད་སྡེ་ཐེག་པ་སྣ་ཚོགས་དོན། །གསུང་རབ་ཡི་གེར་སྣང་བའི་གཟུགས་བརྙན་ཡིན། །གཉིས་པ་ལུང་དང་རྟོགས་པའི་ཆོས་བྱེ་བྲག་ཏུ་བཤད་པ་ལ་གཉིས་ལུང་དང་། རྟོགས་པའི་ཆོས་སོ། །དང་པོ་ལུང་ལ་གཉིས། དང་པོ་ཕྱིའི་ལུང་གི་ཆོས་ནི། དེ་ཡང་མདོ་སྡེ་གསུང་རབ་བཅུ་གཉིས་ཏེ། སྡེ་ཚན་མཐུན་པར་གཅིག་ཏུ་བསྡུས་པ་མདོ་སྡེ་དང་པོ་ལྷུག་པའི་མཐར་ཚིགས་བཅད་ཀྱིས་བསྡུས་པ་དབྱངས་བསྙད་སངས་རྒྱས་ལ་སོགས་པར་ལུང་བསྟན་ཐོག་མ་ནས་ཚིགས་སུ་བཅད་འབའ་ཞིག་པ། ཆོས་ཉན་པ་པོ་ལ་བསྐུལ་ནས་བསྟན་པ་ཆེད་བརྗོད། རང་རང་གི་རྟོགས་པ་བརྗོད་དང་སྔོན་གྱི་རབས་བསྟན་པ་དེ་ལྟར་བྱུང་། གཞི་འགའ་ཞིག་གིས་རྐྱེན་ནས་བཅས་པ་གླེང་གཞི། གང་སྟོན་པ་རྒྱས་པ་མཐའ་ཡས་པ་ཤིན་ཏུ་རྒྱས་དང་། ངང་པ་ལ་སོགས་པར་སྐྱེས་པའི་ཚུལ་སྐྱེས་རབས་བཅས། དོན་གཅིག་མདོར་བསྟན་ནས་སླར་དེའི་འགྲེལ་བར་བསྟན་པ་གཏན་ཕབ། ངོ་མཚར་བ་སྙིང་པོའི་དོན་བསྟན་པ་ནི་རྨད་དུ་བྱུང་བའི་སྡེ་རྣམས་སོ། །གཉིས་པ་ནང་ལུང་གི་ཆོས་ནི། རྒྱུད་ནི་བྱ་སྤྱོད་རྣལ་འབྱོར་ཕྱི་ཐུབ་པ་རྒྱུད། ནང་ཐབས་ཤེས་གཉིས་མེད་ཕ་མ་གཉིས་སུ་མེད། ནང་པ་སྔགས་ཏེ་རྣལ་འབྱོར་ཆེན་པོའོ། །དེ་ཡི་ཡི་གེ་གླེགས་བམ་ལ་སོགས་ཡིན། །གཉིས་པ་རྟོག་པའི་ཆོས་ལ་བཞི། དང་པོ་དབྱེ་བ་སྤྱིར་བསྟན་པ། རྟོགས་པའི་ཆོས་ནི་ས་ལམ་བསྐྱེད་རྫོགས་ཏེ། །གཟུངས་དང་ཏིང་འཛིན་ཡེ་ཤེས་སྙིང་པོ་ཅན། །ཐུགས་རྗེའི་རང་བཞིན་ཐབས་ཚུལ་དཔག་མེད་དོ། །གཉིས་པ་ལམ་རྟོགས་པའི་ཆོས་བྱེ་བྲག་ཏུ་བཤད་པ། དེ་དག་གི་རྟེན་དེ་ཡང་ཐེག་དམན་ལྟར་དམན་ལམ་ས་བརྒྱད་དང་། ཐེག་ཆེན་ལྟར་ན་རབ་དགའ་དྲི་མེད་འོད་བྱེད་པ། འོད་འཕྲོ་སྦྱང་དཀའ་མངོན་གྱུར་རིང་དུ་སོང་། །མི་གཡོ་ལེགས་པའི་བློ་གྲོས་ཆོས་ཀྱི་སྤྲིན་ཏེ། དེ་དག་སོ་སོའི་ངེས་ཚིག་དང་། སྐྱེ་བ་འཛིན་པའི་ཁྱད་པར། ཀུན་རྫོབ་ཀྱི་ཡོན་ཏན་བརྒྱ་ཕྲག་བཅུ་གཉིས་སོགས་རྒྱས་པར་གསུངས་སོ། །གསུམ་པ་འབྲས་བུ་རྟོགས་པའི་ཆོས་ཁྱད་པར་དུ་བཤད་པ། སློབ་པའི་ས་བཅུ་བཅུ་གཅིག་ཀུན་ཏུ་འོད། །སྤྲུལ་སྐུའི་ས་སྟེ་རྒྱུ་ཡི་ཐེག་པས་བཞག །ངོ་བོ་ཉིད་སྐུ། ཆོས་སྐུ། ལོངས་སྐུ་སོགས་རྒྱས་པར་གསུངས། རྡོ་རྗེའི་ཐེག་པར་ཡོན་ཏན་རིགས་དབྱེ་བས། དེ་སྟེང་བཅུ་གཉིས་མ་ཆགས་པདྨ་ཅན་སེམས་དཔའ་ལ་མི་སྣང་བ་སངས་རྒྱས་ལོངས་སྤྱོད་ཆེན་པོའི་སྐུ་གཅིག་དང་དུ་མ་མེད་པ་ལྷུན་གྱིས་གྲུབ་པ། ཡང་དེའི་སྟེང་དུ་བཅུ་གསུམ་རྡོ་རྗེ་འཛིན་པའི་ས། བཅུ་བཞི་པ་བདེ་བ་ཆེན་པོ། བཅོ་ལྔ་པ་ཏིང་ངེ་འཛིན། བཅུ་དྲུག་ཡེ་ཤེས་བླ་མ་ལ་སོགས་རྣམ་བཞག་དཔག་ཏུ་མེད་ཀྱང་ངོ་བོ་གཅིག་ལ་ལྡོག་པས་ཕྱེ་བའོ། །བཞི་པ་དེ་དག་གི་དོན་བསྡུ་བ། ཚོགས་སྦྱོར་མཐོང་སྒོམ་མི་སློབ་ལམ་ལྔ་དང་། །རིམ་གཉིས་ལ་སོགས་ཟབ་མོ་སེམས་དང་ཡེ་ཤེས་ཀྱི་ཡུལ། དམ་ཆོས་ཉི་མ་དྲི་མེད་འོད་མངའ་འོ། །གསུམ་པ་དགེ་འདུན་དཀོན་མཆོག་གི་གནས་བསྟན་པ། དགེ་འདུན་ཐེག་དམན་སོ་སྐྱེ་དང་འཕགས་པ་ཉན་རང་སྐྱེས་བུ་ཟུང་བཞི་དང་ཐེག་ཆེན་རྒྱལ་སྲས་སར་གནས་ཕྱི་སྟེ་ནང་མཁའ་འགྲོ་ཤུགས་འགྲོ། སྔགས་སྐྱེས་སོགས་དང་། གསང་སྔགས་རྗེས་སློབ་རིགས་འཛིན་བཞི་སྟེ། ཚོགས་སྦྱོར་དུ་བསྐྱེད་རྫོགས་སྒྲུབ་པས་ལུས་ཐ་མལ་དུ་ཡོད་ལ་སེམས་ལྷ་སྐུར་གྲུབ་པ་རྣམ་སྨིན། འདིས་ཆོས་མཆོག་མ་ཐོབ་པར་འདས་ན་བར་དོར་ཕྱག་ཆེན་ལ་སྦྱོར། ཆོས་མཆོག་ཐོབ་ན་ཚེ་དབང་ལ་དངོས་སུ་སྦྱོར་རོ། །ཚེ་འདིར་ཆོས་མཆོག་མཐར་ཕྱིན་ནས། ལུས་རྡོ་རྗེའི་སྐུ་ཐོབ་པས་སྐྱེ་ཤི་མེད་ཅིང་སེམས་མཐོང་ལམ་སྐྱེ་བས་ཚེ་དབང་། སྤྲུལ་པ་དང་ཡོན་ཏན་ནི་ས་དང་པོའི་ཇི་སྙེད་པའོ། །ས་གཉིས་པ་ནས་བཅུ་པའི་བར་སྒོམ་ལམ་ས་དགུ་ལ་གནས་པ་ནི་ཕྱག་ཆེན་ཏེ། ས་གཉིས་པ་ནས་ལྔ་པའི་བར་རྡོ་རྗེའི་རིག་འཛིན། དྲུག་བདུན་གཉིས་འཁོར་ལོའི། བརྒྱད་པར་རིན་པོ་ཆེའི། དགུ་པར་པདྨའི། བཅུ་པར་རལ་གྲིའི་རིག་འཛིན་ནོ། །ལྷུན་གྲུབ་རིག་འཛིན་ནི་སངས་རྒྱས་ཀྱི་ས་སྟེ། དེ་ལྟར་རིག་འཛིན་བཞིས་བསྡུས་པའི་ལམ་ལྔ་པོ་གོང་ནས་གོང་དུ་འགྲོ་བ་རྣམས་ནི་ནང་དུ་འདོད་དོ། །གསུམ་པ་ཇི་ལྟར་སྐྱབས་སུ་འགྲོ་ཚུལ་ལ་གཉིས། རྒྱུའི་སྐྱབས་སུ་འགྲོ་ཚུལ་དང་། འབྲས་བུའི་སྐྱབས་སུ་འགྲོ་ཚུལ་ལོ། །དང་པོ་རྒྱུའི་སྐྱབས་འགྲོ་ལ་གསུམ། དང་པོ་རྒྱུའི་སྐྱབས་ཡུལ་བསམ་པ། འདི་དག་དམིགས་པའི་ཡུལ་ཏེ་ནམ་མཁར་སྤྲིན་ཕུང་བཞིན་དུ་བསམ། ཁྱད་པར་ནང་ལྟར་ན་བླ་མ་ཕྱི་ལྟར་སངས་རྒྱས་གཙོ་བོར་འདོད། གཉིས་པ་དེ་ལ་སྐྱབས་སུ་འགྲོ་བ། རྣམ་པ་དངོས་ཕྱི་མཆོད་སྤོས་དང་མེ་ཏོག་སོགས། ནང་མཆོད་བདུད་རྩི་སོགས། ཡིད་གསང་གསང་མཆོད་དགྱེས་མཉམ་བྱང་ཆུབ་མཆོག་གི་མཆོད་པས་རབ་མཆོད་དེ། བདག་དང་འགྲོ་ཀུན་གུས་པས་ཐལ་སྦྱར་ཞིང་། །བླ་མ་སངས་རྒྱས་ཆོས་དང་དགེ་འདུན་ལ། །བྱང་ཆུབ་བར་དུ་གཞན་དོན་སྐྱབས་སུ་འགྲོ། །སྙིང་ཁོང་རུས་པའི་གཏིང་ནས་ཡང་ཡང་བྱ། །གསུམ་པ་དེའི་ཕན་ཡོན། དགྱེས་ཤིང་འོད་ཟེར་བཀྱེ་བས་རང་གཞན་གྱི། །སྒོ་གསུམ་སྒྲིབ་སྦྱངས་དངོས་གྲུབ་ཐོབ་པར་བསམ། །དེ་ཡིས་བསོད་ནམས་ཚོགས་རྫོགས་གཟུགས་སྐུ་འགྲུབ། །གཉིས་པ་འབྲས་བུའི་སྐྱབས་འགྲོ་ལ་གསུམ། དང་པོ་སྐྱབས་ཡུལ་ངོས་བཟུང་བ། མཐར་ཐུག་འབྲས་བུའི་སྐྱབས་གནས་ཆོས་སྐུ་སྟེ། །སངས་རྒྱས་ཆོས་ཚོགས་སྙིང་པོ་དོན་གྱི་ལྷ། །རང་སེམས་འོད་གསལ་སྤྲོས་ཀུན་བྲལ་བ་ཡིན་ཏེ་དཀོན་མཆོག་གསུམ་གྱི་རང་བཞིན་དེ་ལ་སྐྱབས་སུ་འགྲོའོ། །གཉིས་པ་དེ་ལ་སྐྱབས་འགྲོ་བྱེད་ཚུལ་ནི། དེ་ཡི་ལམ་འཁྱེར་སྐྱབས་སུ་འགྲོ་བ་ནི་རྟེན་གྱི་སྤྱན་སྔར་ཡང་ཡང་སྐྱབས་འགྲོ་ཞིང་། རྒྱུ་ཡི་ཐུན་རྗེས་སྐྱབས་སུ་འགྲོ་བྱ་འགྲོ་བྱེད་ཐམས་ཅད་རང་གི་སེམས་ཡིན་པས། དོན་ལ་འགྲོ་བྱ་འགྲོ་བྱེད་གཉིས་མེད་པས། །ཇི་བཞིན་ངང་ལ་དེ་བཞིན་མཉམ་པར་བཞག །ཡུལ་སེམས་གཉིས་སུ་འཛིན་ན་མཐར་ཐུག་མིན། །འབྲས་བུའི་སྐྱབས་འགྲོ་སྨོན་པ་མེད་པ་ཡིན། །གསུམ་པ་དེའི་ཕན་ཡོན་བསྔགས་པ། དེས་ནི་ཡེ་ཤེས་ཚོགས་རྫོགས་ཆོས་སྐུ་འགྲུབ། །རྗེས་སྣང་རྨི་ལམ་སྒྱུ་མར་བསྔོ་བ་བྱ། །བཞི་པ་དེ་ལྟར་སྐྱབས་སུ་སོང་བའི་བསླབ་བྱ་བསྟན་པ་ལ་གསུམ། རྒྱུའི་བསླབ་བྱ། འབྲས་བུའི་བསླབ་བྱ། ཐུན་མོང་དུ་གདམས་པའོ། །དང་པོ་རྒྱུའི་བསླབ་བྱ་ལ་བཞི། དང་པོ་སྤྱིར་བསྟན་པ། བསླབ་བྱ་གཉིས་ལས་རྒྱུ་ཡི་རིམ་པ་ནི། །སྲོག་དང་རྒྱལ་སྲིད་བྱ་དགའ་ལ་སོགས་ཕྱིར། །བླ་མ་དང་ནི་དཀོན་མཆོག་སྤང་མི་བྱ། །གཉིས་པ་དམིགས་ཀྱི་བསལ་བ། བླ་མར་སྐྱབས་སོང་མཆོད་འོས་མི་བསླུ་ཞིང། །དམ་པ་རྣམས་ལ་སྐུར་འདེབས་མི་སྙན་སྤང་། །གསུམ་པ་ཆ་ཤས་ཀྱི་དབྱེ་བ། སངས་རྒྱས་སྐྱབས་སོང་ལྷ་གཞན་ཕྱག་མི་འཚལ་{བཙལ}། །ཆོས་ལ་སྐྱབས་སོང་སེམས་ཅན་འཚེ་བ་སྤང་། །དགེ་འདུན་སྐྱབས་སོང་མུ་སྟེགས་ཅན་མི་འགྲོགས། །རྔ་བོ་ཆེ་ལས། ང་ཉིད་སྙིགས་མའི་དུས་ཀྱི་ཚེ། །དགེ་བའི་བཤེས་གཉེན་ཉིད་སྤྲུལ་ནས། །ཁྱོད་ལ་སོགས་པའི་དོན་བྱེད་འགྱུར། །ཞེས་དང་། པདྨ་དཀར་པོ་ལས། སྐུ་གཟུགས་རྣམ་པ་མང་པོ་དེར་སྤྲུལ་ནས། །འགྲོ་བ་དགེ་ལ་སྦྱོར་བའི་དོན་བྱེད་དོ། །ཞེས་དང་། སྙན་གྱི་གོང་རྒྱན་ལས། ལྔ་བརྒྱའི་ཐ་མར་གྱུར་པ་ན། །ང་ཉིད་ཡི་གེའི་གཟུགས་སུ་གནས། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པ་གྱིས། །ཞེས་སོ། །བཞི་པ་དོན་བསྡུ་བ། དེས་ན་དེ་དག་གཟུགས་ལའང་དད་པས་རབ་མཆོད་ཅིང་། ཉིན་མཚན་འཁོར་མོའི་དུས་དྲུག་སོགས་སུ་རྗེས་དྲན་རྟག་པར་སྐྱབས་སུ་འགྲོ། གཉིས་པ་འབྲས་བུའི་བསླབ་བྱ་ནི། འབྲས་བུའི་བསླབ་བྱ་མཉམ་པ་ཉིད་ལ་ནན་ཏན་དུ་བསམ་པར་བྱ། བཟང་ངན་མི་རྟོག་མཆོག་དམན་བླང་དོར་མིན། །སྤྲོས་ལ་མི་བརྟེན་ཆོས་ཉིད་གཉུག་མར་སྦྱང་། །ཆོས་ཐམས་ཅད་གཉིས་འཛིན་དང་བྲལ་བར་སློབ། ཐམས་ཅད་ལྷུན་རྫོགས་དཀྱིལ་འཁོར་གཅིག་ཏུ་སྤྱད། གསུམ་པ་ཐུན་མོང་དུ་གདམས་པ། གཏོང་རྒྱུ་བཏགས་པ་བ་བྱང་ཆུབ་ཐོབ་ཚེ་ཁས་ལེན་མཐར་ཕྱིན་པས་ཁས་ལེན་འདས་པ་དང་། མཚན་ཉིད་པ་ནི་ལོག་ལྟ་སྐྱེས་པ་དང་བསླབ་པ་ཕུལ་བས་གཏོང། བསླབ་བྱ་ཉམས་པས་དམན་པར་ལྟུང་བ་སྟེ། །བག་ཡོད་དྲན་པས་བསྒྲིམས་ཏེ་བླང་དོར་བྱ། །ལྔ་པ་སྐྱབས་འགྲོའི་ཕན་ཡོན་ལ་བདུན། དང་པོ་རྟག་ཏུ་ཕན་བདེས་སྐྱོབ་པའི་ཕན་ཡོན། སྐྱབས་གཞན་དབང་ཕྱུག་སོགས་གང་གིས་སླུ་བ་དེ་མཐོང་ནས། ལྷག་པར་ཐུགས་རྗེའི་ལྷ་ལ་དད་པ་ཉིད། །ཚེ་རབས་ཀུན་དུ་ངན་སོང་གི་འཇིགས་བྲལ་སྐྱོབ་པ་སྟེ། དེ་ལས་ཕན་བདེ་བྱེད་པ་གང་ཞིག་ཡོད། །གཉིས་པ་ཐར་པའི་ལོ་ཏོག་འཕེལ་བའི་ཕན་ཡོན། སྐྱབས་སུ་འགྲོ་བའི་གང་ཟག་དེ་ནི་སེམས་གཙང་དད་པའི་ས་གཞི་ལ། བསོད་ནམས་ཡེ་ཤེས་ཆར་ཆུས་ལེགས་བྲན་ཏེ། །ཆོས་ཁམས་དགེ་བའི་མྱུ་གུ་ཆེར་འཕེལ་བས། །རྒྱལ་བའི་ཕུན་ཚོགས་ལོ་ཐོག་སྨིན་པར་བྱེད། །གསུམ་པ་ཡོན་ཏན་རླབས་ཆེན་འགྲུབ་པའི་ཕན་ཡོན། གང་ཟག་དེའི། ཆོས་ཚུལ་དགེ་བ་ངོ་ཚ་ཁྲེལ་ཡོད་ཤེས། །བག་ཡོད་དྲན་པ་ཡོན་ཏན་ཚོགས་མང་ཞིང་། །གཟུངས་སྤྲིན་ཡེ་ཤེས་ཉི་མ་སེམས་ལ་འཆར། །རྨི་ལམ་ན་ཡང་མི་འབྲལ་མཐོང་བ་དང་། །ཚེ་རབས་དྲན་ཞིང་རིགས་དང་འབྱོར་པས་མཛེས། །བཞི་པ་མཐར་ཐུག་བྱང་ཆུབ་ཐོབ་པའི་ཕན་ཡོན། འགྲོ་ཀུན་ལྷ་རྣམས་དགའ་བས་བསྲུངས་ཤིང་དགེ་བ་འཕེལ་བས་དོན་གཉིས་ལྷུན་གྱིས་གྲུབ། །མཐར་ཡང་རང་ཉིད་ལུས་ཅན་ཀུན་གྱི་སྐྱབས། །དཔུང་གཉེན་བྱེད་པས་སྐུ་གསུམ་འབྱོར་པ་འཛིན། །ལྔ་པ་བསོད་ནམས་ཚད་མེད་འགྲུབ་པའི་ཕན་ཡོན། སྐྱབས་སོང་ཡོན་ཏན་གལ་ཏེ་གཟུགས་མཆིས་ན། །ནམ་མཁའ་ཆེས་ལྷག་བསོད་ནམས་ཕ་མཐའ་ཡས། །དྲུག་པ་ལེགས་དགུའི་ཡོན་ཏན་འཕེལ་བའི་ཕན་ཡོན། ལེགས་པའི་ཡོན་ཏན་ཀུན་གྱི་གཞིར་གྱུར་པ། །དེ་ལ་མཁས་པ་སུ་ཞིག་བརྟེན་མི་བགྱིད། །བདུན་པ་དོན་གཉིས་ལྷུན་གྱིས་གྲུབ་པའི་ཕན་ཡོན་བསྔགས་པ། མཆོག་གསུམ་ནི། ཉེས་སྤོང་ཞི་བ་འགྲོ་བ་ཀུན་གྱི་གཉེན། །དད་བརྒྱའི་སྤྱི་བོས་རབ་ཏུ་ཕྱག་འཚལ་ཞིང་། །ས་གསུམ་བསོད་ནམས་འདྲེན་མཆོག་དཔག་བསམ་ཤིང་། །ཕན་བདེའི་འབྱུང་གནས་དེ་ལ་སྐྱབས་སུ་མཆི། །དོན་གསུམ་པ་ལེའུ་རྫོགས་པ་མཇུག་གི་དོན་ལ་གཉིས། དང་པོ་སྐབས་ཀྱི་དགེ་བ་བསྔོ་བ། དེ་ལྟར་བདེ་ཆེན་ཆོས་ཆར་ཡོན་ཏན་མཆོག་བསྒྲགས་པས། །སྐྱེ་དགུ་དམ་པའི་སྤྱོད་ལ་ལེགས་གཞོལ་ཞིང་། །ཉེས་གྱུར་དམན་པའི་ཡུལ་ལ་བརྟེན་པ་ཡིས། །དུབ་པའི་སེམས་ཉིད་དེ་རིང་ངལ་སོས་ཤིག །གཉིས་པ་ལེའུའི་མཚན། རྫོགས་པ་ཆེན་པོ་སེམས་ཉིད་ངལ་གསོ་ལས། སྐྱབས་སུ་འགྲོ་བའི་ལེའུ་སྟེ་དྲུག་པའོ།། །། ༈ བདུན་པ་ཚད་མེད་བཞིའི་ལེའུ་ལ་གསུམ་སྟེ། ལེའུ་ལ་འཇུག་པ་རྒྱུའི་དོན། ལེའུ་དངོས་ཀྱི་དོན། ལེའུ་རྫོགས་པ་མཇུག་གི་དོན་ནོ། །དང་པོ་ནི། དེ་ལྟར་སྐྱབས་སོང་རྟེན་གྱི་གང་ཟག་གིས་ནགས་ནང་ཡིད་འོང་དཔེར་བྱས་ནས། བྱམས་པའི་ས་གཞིར་སྙིང་རྗེའི་མེ་ཏོག་བཀྲམ། །དགའ་བའིི་ནགས་ཀྱི་གྲིབ་བསིལ་བཏང་སྙོམས་ཀྱི་མཚོ་རྫིང་ཕུ་ཆུ་སོགས་ཆུ་གཙང་གིས། སྲིད་པར་དུབ་པའི་འགྲོ་ལ་ཕན་ཕྱིར་རང་གི་སེམས་སྦྱང་ངོ་། །གཉིས་པ་ལ་བཞི། ཚད་མེད་དང་ཚངས་གནས་ཀྱི་ཁྱད་པར། ཚད་མེད་པ་བཞིའི་བསྒོམ་ཚུལ། སྒོམ་པ་དག་གི་འབྲས་བུ། ཐར་ལམ་ངེས་པའི་གཞུང་ལམ་བསྟན་པའོ། །དང་པོ་ལ་བཞི། དང་པོ་རྒྱུ་དང་བྱེད་ལས་ཀྱི་ཁྱད་པར། དེ་ཡང་ཐར་པའི་ལམ་སེམས་བསྐྱེད་དང་མ་འབྲེལ་ན་ཚངས་པའི་གནས་པ་བཞི་སྟེ་སྲིད་པའི་རྒྱུ། ཞི་བའི་ལམ་སེམས་བསྐྱེད་གྱིས་ཟིན་པའི་དེ་རྣམ་བཞི། སྲིད་པའི་ཆུ་གཏེར་འདའ་ཕྱིར་ཚད་མེད་བཞི། གཉིས་པ་ངོ་བོ་དམིགས་པ་ཡུལ་གྱི་ཁྱད་པར། དམིགས་བཅས་ཀྱི་ཚད་མེད་བཞིའི་ཡུལ་མཐའ་ཡས་འགྲོ་བ་དམིགས་མེད་ཀྱི་ཚད་མེད་བཞིའི་ཡུལ་ཆོས་ཉིད་ལ། རྣམ་པ་ཀུན་ཁྱབ་དམིགས་བཅས་དམིགས་པ་མེད། གསུམ་པ་གནས་བཞི་ངེས་པའི་ཁྱད་པར། སྔ་མ་ཚངས་གནས་བཞིའི་དམིགས་ཡུལ་ཚད་ཡོད་ཉུང་ཟད་འགྲོ་བ་ལ། དམིགས་རྣམས་སེམས་བསྐྱེད་ཀྱིས་མ་ཟིན་པས་མ་དག་དམིགས་བཅས་ཚངས་པའི་རྒྱུ། བཞི་པ་ཐར་ལམ་སྙིང་པོའི་ཁྱད་པར། འདི་ནི་དམིགས་མེད་ཐར་པར་གཞོལ་བས་ན། །སྙིང་རྗེའི་རང་བཞིན་ཅན་གྱིས་བསླབ་པར་བྱ། །གཉིས་པ་སྒོམ་ཚུལ་ལ་གསུམ། གོ་དོན་ངེས་པས་སྤྱིར་བསྟན་པ། གོ་རིམ་ངེས་པས་བྱེ་བྲག་ཏུ་བཤད་པ། རྩལ་སྦྱངས་ངེས་པས་དོན་བསྡུ་བའོ། །དང་པོ་གོ་དོན་ངེས་པ་ལ་གསུམ། དང་པོ་ཚད་མེད་བཞིའི་དམིགས་ཡུལ། དམིགས་ཡུལ་བདེ་བ་མི་ལྡན་སྡུག་བསྔལ་གྱིས་ཉམ་ཐག སྐྱིད་ཅིང་འབྱོར་ལ་ཉེ་རིང་ཆགས་སྡང་ཅན་བཞི་པོ་རིམ་པར་བྱམས་དང་སྙིང་རྗེ་དགའ་བ་བཏང་སྙོམས་ཡུལ། གཉིས་པ་རང་རང་གི་བློའི་རྣམ་པ་བསྟན་པ། རྣམ་པ་བདེ་ཐོབ་སྡུག་བསྔལ་བྲལ་བ་དང་། །དགའ་དང་མི་འབྲལ་སེམས་སྙོམས་ལས་རུང་འདོད། །གསུམ་པ་ཐོག་མར་འཇུག་པའི་གོ་རིམ། སྒོམ་ཚུལ་གོ་རིམ་ངེས་པ་མེད་ན་ཡང་། །དང་པོའི་གང་ཟག་ཐོག་མར་བཏང་སྙོམས་ཏེ། །ཉེ་རིང་བསྙམས་ནས་དེ་ནས་གཞན་གསུམ་སྒོམ། །གཉིས་པ་གོ་རིམ་ངེས་པས་བྱེ་བྲག་ཏུ་བཤད་པ་ལ་བཞི། བཏང་སྙོམས། བྱམས་པ། སྙིང་རྗེ། དགའ་བ་བསྒོམ་པའི་ཚུལ་ལོ། །དང་པོ་བཏང་སྙོམས་སྒོམ་པ་ལ་བཅུ་གཉིས། དང་པོ་ཆགས་སྡང་གི་སེམས་ལ་རྔན་བགྲང་བ། དེ་ཡང་དམིགས་ཡུལ་སེམས་ཅན་ཐམས་ཅད་ལ། །བློ་ཡི་རྣམ་པ་འདི་ལྟར་བརྟག་པར་བྱ། །ད་ལྟ་ཕ་དང་མ་དང་བཤེས་ལ་ཆགས། །དགྲ་ལ་སྡང་བ་འདི་འདྲའི་སེམས་ཁྱོད་ངན། །གཉིས་པ་ཆགས་སྡང་མི་རིགས་པ་གྲོས་གདབ་པ། ཐོག་མཐའ་དུས་མེད་འཁྱམས་ཚེ་དགྲ་འདིས་ཀྱང་། །ཕ་མ་ལ་སོགས་བཤེས་བྱས་ཕན་པ་བསྒྲུབས། །དེ་ཡི་དྲིན་ལན་གནོད་སེམས་སྒོམ་བྱེད་དམ། །གསུམ་པ་ཆགས་སྡང་མི་འཐད་པའི་རིགས་པ་དགོད་པ། གཉེན་འདིས་ཀྱང་ནི་དགྲ་བྱས་གནོད་པ་བསྒྲུབས། །ད་ལྟ་ན་ཡང་དེ་ཡི་སྡུག་བསྔལ་འགོ །དེ་ཡི་ལན་དུ་ཕན་པ་ཇི་ལྟར་རིགས། །བར་མ་ཡང་ནི་མཛའ་དང་མི་མཛར་འགྱུར། །ཕན་གནོད་མ་ངེས་ཆགས་སྡང་རིགས་པ་མིན། །བཞི་པ་ཆགས་སྡང་མེད་པའི་བཏང་སྙོམས་ལ་སྦྱང་བ། དེ་བས་ཐོག་མར་མཛའ་བཤེས་ཕྱོགས་རྣམས་ལ། །བར་མ་བཞིན་དུ་ཆགས་པ་སྤང་བྱ་ཞིང་། །དེ་ནས་དགྲ་ལ་བར་མ་བཞིན་དུ་ནི། །སྡང་བ་སྤངས་ལ་ཉེ་རིང་མེད་པར་བྱ། །ལྔ་པ་རྨོངས་པ་མེད་པའི་བཏང་སྙོམས་ལ་དགོད་པ། བར་མའི་ཕྱོགས་ལའང་གཏི་མུག་དབྲལ་བའི་ཕྱིར། །འགྲོ་བའི་ཉོན་མོངས་མཉམ་དུ་སེལ་བའི་བློ། །སྲིད་དང་བྲལ་བ་དེ་འདྲ་རྣམ་པར་བསྒོམ། །ཐམས་ཅད་ཆགས་སྡང་ཉོན་མོངས་ཞི་ཞིང་སེམས་ལས་སུ་རུང་བར་ཤོག་ཅིག དྲུག་པ་སྙིང་རྗེ་ཆེན་པོའི་བཏང་སྙོམས་ལ་སྦྱང་བ། ཐམས་ཅད་བདེ་འདོད་སྡུག་བསྔལ་འདོར་འདོད་གཅིག །འོན་ཀྱང་མི་ཤེས་སྡུག་བསྔལ་རྒྱུ་ལ་སྤྱོད་པ་འདི་བཟློག་པར་བྱའོ། །བདུན་པ་ཉོན་མོངས་ཞི་བའི་བཏང་སྙོམས་སྒོམ་པ། ཀྱེ་མ་ཉམ་ཐག་འགྲོ་བའི་ཉོན་མོངས་ཚོགས། །བག་ཆགས་བཅས་ཀུན་ཞི་ལ་སེམས་སྙོམས་ཤོག །ཆགས་སྡང་དྲག་པོས་གཟིར་བའི་ལུས་ཅན་ཀུན། །ཉེ་རིང་སེམས་སྙོམས་ཆགས་སྡང་བྲལ་བར་ཤོག །བརྒྱད་པ་ཇི་ལྟར་སྒོམ་ཚུལ་དངོས། ཅེས་བསམ་འགྲོ་བ་གཅིག་ནས་གཉིས་དང་གསུམ། །ཡུལ་གྲུ་གཅིག་ནས་གླིང་གཅིག་གླིང་བཞི་ནས། །སྟོང་གཅིག་གཉིས་གསུམ་འཇིག་རྟེན་ཀུན་ལ་བསྒོམ། །དགུ་པ་སྒོམ་པའི་རྟགས་དང་ཚད་བཟུང་བ། འབྱོངས་པའི་ཚད་ནི་བདག་གཞན་དགྲ་གཉེན་མཉམ། །བཅུ་པ་དམིགས་པ་མེད་པའི་བཏང་སྙོམས་ལ་བློ་སྦྱངས། རྗེས་ལ་དམིགས་པ་མེད་པའི་བཏང་སྙོམས་ཡུལ། །ཐམས་ཅད་སེམས་ཏེ་སེམས་ཉིད་ནམ་མཁའ་འདྲ། །དོན་དམ་མ་སྐྱེས་སྟོང་པའི་ངང་དེ་ལ། །བློ་ཡིས་རྣམ་པ་སྤྲོས་དང་བྲལ་བར་གཞག །བཅུ་གཅིག་པ་དེས་ཚད། འབྱོངས་པའི་ཚད་ནི་ཟབ་ཞིའི་རྟོགས་པ་སྐྱེ། །བཅུ་གཉིས་པ་བཏང་སྙོམས་སྒོམ་པའི་འབྲས་བུ། འབྲས་བུ་ཉེ་རིང་རྙོག་པ་མེད་པའི་སེམས། །གནས་ལུགས་དོན་ལ་རང་བཞིན་ལྷུན་གྱིས་གྲུབ། །གཉིས་པ་བྱམས་པ་སྒོམ་ཚུལ་ལ་ལྔ། དང་པོ་བྱམས་པ་སྒོམ་པ་གདམས་པ། དེ་ལྟར་ཀུན་ལ་སེམས་སྙོམས་གྱུར་པ་ན། །རང་ཉིད་མ་ལ་བདེ་དང་ཕྲད་འདོད་ལྟར། །ལུས་ཅན་ཀུན་ལ་དེ་བཞིན་བསམ་པར་བྱ། །གཉིས་པ་ཇི་ལྟར་སྒོམ་ཚུལ། བྱམས་པའི་དམིགས་ཡུལ་སེམས་ཅན་ཐམས་ཅད་ལ། །རྣམ་པ་གནས་སྐབས་ལྷ་མིའི་བདེ་བ་དང་། །མཐར་ཐུག་བྱང་ཆུབ་བདེ་དང་འཕྲད་པར་ཤོག །སྙམ་དུ་གཅིག་ནས་འགྲོ་བ་ཀུན་གྱི་བར། །ཕྱོགས་མཐའ་གཏུགས་པར་དེ་སྙེད་བསྒོམ་པར་བྱ། །གསུམ་པ་སྒོམ་པའི་རྟགས་ཚད། རྟགས་ནི་ཀུན་ལ་ཁྱབ་པའི་བྱམས་པ་མཆོག །བུ་གཅིག་བརྩེ་བའི་མ་བས་ལྷག་པ་འབྱུང་། །བཞི་པ་དམིགས་པ་མེད་པའི་བྱམས་པ། དེ་རྗེས་ཐམས་ཅད་མཉམ་པའི་ངང་ལ་གཞག །དམིགས་པ་མེད་པའི་བྱམས་པ་ཆེན་པོ་སྟེ། །བྱམས་དང་སྟོང་པ་ཟུང་དུ་ཆུད་པ་རྟགས། །ལྔ་པ་བྱམས་པའི་འབྲས་བུ་བརྗོད་པ། འབྲས་བུ་ཐམས་ཅད་དགའ་ཞིང་མཐོང་ན་ཡིད་འོང་སེམས་ལ་ཆགས་སྡང་གི་རྙོག་པ་མེད་པའི་སེམས་དག་པ་འཐོབ། གསུམ་པ་སྙིང་རྗེ་སྒོམ་ཚུལ་ལ་ལྔ། དང་པོ་སྙིང་རྗེ་སྒོམ་པར་གདམས་པ། བྱམས་པས་འགྲོ་ལ་ཁྱབ་པའི་རྗེས་ཉིད་དུ། །ཕ་མའི་སྡུག་བསྔལ་བློས་མི་བཟོད་པ་བཞིན། །འགྲོ་བའི་སྡུག་བསྔལ་བསམས་ལ་སྙིང་རྗེ་བསྐྱེད། །གཉིས་པ་སྒོམ་ཚུལ་དངོས་བསྟན་པ་ལ་གསུམ། དང་པོ་སྙིང་རྗེ་བསྐྱེད་པ། དེ་ཡང་བདག་གི་ཕ་མ་དྲིན་ཅན་རྣམས། །བདག་གི་ཆེད་དུ་སྡིག་པའི་ལས་བྱས་པས། །ཚ་གྲང་བཀྲེས་སྐོམ་གསད་གཅད་ལས་ཀྱིས་མནར། །སྐྱེ་རྒ་ན་འཆིའི་ཆུ་ཆེན་འཁྲུག་པར་བྱིང་། །སྡུག་བསྔལ་སྣ་ཚོགས་དུ་མས་ཉམ་རེ་ཐག །གཉིས་པ་ངེས་པ་དགོད་པ། དེ་ལས་ཐར་པའི་ལམ་མི་ཤེས་ཤིང་ཐར་འདོད་ཞི་བའི་སེམས་མེད་ལ། ཡང་དག་ལམ་སྟོན་དགེ་བའི་བཤེས་མེད་པས། །མཐའ་མེད་འཁོར་བར་འཁྱམས་པ་སྙིང་རེ་རྗེ། །འདི་དག་མཐོང་ནས་ཡལ་བར་འདོར་ཕོད་དམ། །གསུམ་པ་རང་བཞིན་བསམ་པ། དེ་བས་བདག་གི་ལུས་དང་ལོངས་སྤྱོད་དང། །དུས་གསུམ་དགེ་བས་འགྲོ་བའི་སྡུག་བསྔལ་དག །སྐད་ཅིག་ཉིད་ལ་བྲལ་བར་ཤོག་ཅིག་ཅེས། །སྙིང་ཁོང་རུས་པའི་གཏིང་ནས་བསམ་པར་བྱ། །གསུམ་པ་སྒོམ་པའི་རྟགས་ཚད། འགྲོ་བའི་སྡུག་བསྔལ་མི་བཟོད་རྟགས་སུ་བཤད། །བཞི་པ་དམིགས་པ་མེད་པའི་སྙིང་རྗེ། དམིགས་མེད་སྙིང་རྗེས་དེ་རྗེས་མཉམ་པར་བཞག །རྟགས་ནི་སྟོང་ཉིད་སྙིང་རྗེ་ཟུང་དུ་འབྲེལ། །ལྔ་པ་སྙིང་རྗེ་སྒོམ་པའི་འབྲས་བུ། འབྲས་བུ་གནོད་སེམས་རྣམ་འཚེ་བྲལ་བའི་སེམས། །ལས་རུང་ཐོབ་ཅིང་གདོད་ནས་དག་པ་ཉིད་དེ་སངས་རྒྱས་བྱང་ཆུབ་དུ་འགྲུབ། བཞི་པ་དགའ་བ་སྒོམ་པ་ལ་དྲུག་ལས། དང་པོ་དགའ་བ་བསྒོམ་པར་གདམས་པ། དེ་ལྟར་སྙིང་རྗེས་བརླན་པའི་འགྲོ་བ་ལ། །རང་རང་བདེ་བར་གནས་ཏེ་དགའ་བ་བསྒོམ། །གཉིས་པ་སྒོམ་པ་དངོས་ཀྱི་རིམ་པ། དེ་ཡང་དམིགས་ཡུལ་བདེ་ལྡན་སེམས་ཅན་ཏེ། །རྣམ་པ་ཨེ་མ་འགྲོ་བ་འདི་དག་ཀུན། །བདག་གིས་བདེ་ལ་དགོད་པར་མ་དགོས་པར། །རང་རང་བདེ་བ་བདག་གིས་རྙེད་པ་རབ། །ད་ནི་དེང་ནས་བྱང་ཆུབ་སྙིང་པོའི་བར། །བདེ་ཞིང་སྐྱིད་པ་འདི་དང་མི་འབྲལ་ཤོག །སྙམ་དུ་གཅིག་ནས་ཀུན་ལ་བསྒོམ་པར་བྱ། །གསུམ་པ་འབྱོངས་པའི་ཚད། རྟགས་སུ་ཕྲག་དོག་མེད་ཅིང་དགའ་བ་སྐྱེ། །བཞི་པ་དམིགས་པ་མེད་པའི་དགའ་བ། དེ་རྗེས་མི་དམིགས་བསམ་གཏན་དགའ་བ་ཉིད། །སྣང་སྟོང་ཟུང་འཇུག་ཏུ་བསྒོམ། ལྔ་པ་དེའི་སྒོམ་ཚད། ལུས་ངག་སེམས་ལ་ཞི་བདེ་ལྷུན་གྱིས་གྲུབ་སྟེ་ཚེགས་མེད་དོ། །དྲུག་པ་དགའ་བ་བསྒོམ་པའི་འབྲས་བུ། འབྲས་བུ་འབྱོར་པས་ཉན་རང་གིས་མི་འཕྲོག་པས་བརྟན་ལ་དགའ་བ་འགྲུབ། གསུམ་པ་རྩལ་སྦྱང་ངེས་པའི་དོན་བསྡུ་བ་ལ་བདུན། དང་པོ་ཆ་ཤས་ནས་བསླབ་ཚུལ། དེ་ལྟར་གོམས་རྗེས་བྱམས་ནས་རིམ་པར་བསྒོམ། །དེ་ཡི་བཞི་པོའི་ཞེན་པ་རིམ་གྱིས་འགོག །གཉིས་པ་བྱམས་པའི་གེགས་སྙིང་རྗེའི་འགོག་ཚུལ། བྱམས་བསྒོམས་གཉེན་བཞིན་ཀུན་ལ་ཆགས་པ་ན། །སྙིང་རྗེས་སྡུག་བསྔལ་རྒྱུ་འབྲས་ཞེན་པ་འགོག །གསུམ་པ་སྙིང་རྗེའི་གེགས་དགའ་བས་འགོག་པ། སྙིང་རྗེ་དམན་པས་དམིགས་དང་བཅས་པ་ན། །དམིགས་མེད་དགའ་བས་སྐྱོ་བ་རྣམ་པར་འགོག །བཞི་པ་དགའ་བའི་གེགས་བཏང་སྙོམས་ཀྱིས་འགོག་པ། དགའ་བས་སེམས་གཡེངས་སྤྲོས་ལ་འཆེལ་བ་ན། །ཉེ་རིང་ཆགས་བྲལ་བཏང་སྙོམས་ཆེན་པོ་བསྒོམ། །ལྔ་པ་བཏང་སྙོམས་ཀྱི་གེགས་བྱམས་པས་འགོག་པ། བཏང་སྙོམས་བར་མ་ལུང་མ་བསྟན་བཞིན་ན། །སྔར་བཞིན་བྱམས་སོགས་རིམ་པས་བསྒོམ་པར་བྱ། །དེ་ཡིས་འབྱོངས་པར་སླ་ཞིང་བརྟན་པ་འཐོབ། །དྲུག་པ་སྤེལ་མ་སྒོམ་ཚུལ། གོམས་པ་ཤིན་ཏུ་བརྟན་པའི་རྣལ་འབྱོར་པས། །རིམ་དང་རིམ་མིན་སྤེལ་མ་ཐོད་རྒལ་བསྒོམ། །བདུན་པ་དེ་ལྟར་སྒོམ་པའི་ཡོན་ཏན། དེ་ཡིས་རྟོགས་པ་སོ་མར་ཐོབ་པ་དང་མི་བརྟན་པ་བོགས་འབྱིན་ཞིང་ཤིན་ཏུ་བརྟན་པས་ཆེས་བརྟན་ཉིད་དུ་འགྱུར། གསུམ་པ་སྒོམ་པ་དག་པའི་འབྲས་བུ་ལ་གཉིས། ཐུན་མོང་གི་འབྲས་བུ་སྤྱིར་བསྟན་པ། མཆོག་གི་འབྲས་བུ་བྱེ་བྲག་ཏུ་བཤད་པ་གཉིས་སོ། །དང་པོ་ཐུན་མོང་གི་འབྲས་བུ་ལ་བཞི། དང་པོ་རྣམ་སྨིན་གྱི་འབྲས་བུ། དེ་ལྟར་བསྒོམས་པའི་འབྲས་བུ་བཞི་དག་ལས། །རྣམ་སྨིན་མངོན་མཐོ་ངེས་ལེགས་གཉིས་འཐོབ་ལ། །འདོད་པར་ལྷ་མའི་ལུས་འགྲུབ་ཕན་བདེ་བྱེད། །གཉིས་པ་རྒྱུ་མཐུན་གྱི་འབྲས་བུ། རྒྱུ་མཐུན་བྱེད་པས་དེ་ཉིད་བྱེད་པ་དང་། །མྱོང་བས་མི་མཐུན་ཕྱོགས་གནོད་སེམས་རྣམ་འཚེ་མི་དགའ་བ་ཆགས་སྡང་བཞི་དང་བྲལ་བའི་བདེ་བ་འཐོབ། གསུམ་པ་བདག་པོའི་འབྲས་བུ། དབང་གིས་བྱམས་པས་ཡུལ་ཡིད་འོང་སྙིང་རྗེས་བདེ་ཞིང་དགའ་བས་སྨན་དང་མེ་ཏོག་སོགས་མང་བ་རབ་དགའི་ཡུལ། བཏང་སྙོམས་ཀྱིས་འགྲོ་བ་མཐུན་ཅིང་གནོད་པ་མེད་པ་འབྱོར་པས་བརྒྱན་པར་སྐྱེ། བཞི་པ་བྱེད་པའི་འབྲས་བུ། བྱེད་པས་བཞི་པོ་ཆེས་ཆེར་རབ་འཕེལ་བས། །རང་གཞན་དོན་གཉིས་འབྱོར་པ་ལྷུན་གྲུབ་འགྱུར། །གཉིས་པ་མཆོག་གི་འབྲས་བུ་ལ་བཞི། དང་པོ་བྱམས་པའི་འབྲས་བུ། བྱམས་པས་ཞེ་སྡང་མེད་ཅིང་ལོངས་སྤྱོད་རྫོགས། །མེ་ལོང་ཡེ་ཤེས་རབ་ཏུ་ཐོབ་པར་འགྱུར། །ལོངས་སྤྱོད་རྫོགས་པའི་སྐུ་ནི་མཚན་དཔེས་བརྒྱན་པའོ། །གཉིས་པ་སྙིང་རྗེའི་འབྲས་བུ། སྙིང་རྗེས་འདོད་ཆགས་མེད་ཅིང་ཆོས་ཀྱི་སྐུ། །སོ་སོར་རྟོག་པའི་ཡེ་ཤེས་མངོན་དུ་བྱེད། །ཆོས་ཀྱི་སྐུ་ནི་སྟོབས་སོགས་མ་འདྲེས་ཆོས། གསུམ་པ་དགའ་བའི་འབྲས་བུ། དགའ་བས་ཕྲག་དོག་མེད་ཅིང་སྤྲུལ་པའི་སྐུ། །བྱ་གྲུབ་ཡེ་ཤེས་དམ་པ་ཐོབ་པར་འགྱུར། །སྤྲུལ་པའི་སྐུ་ནི་མ་ངེས་སྣ་ཚོགས་གཟུགས། །མཛད་པ་ལྷུན་གྱིས་གྲུབ་པའི་སྐུ་སྟེ་ཕྲིན་ལས་ཕུན་སུམ་ཚོགས་པ་ཡིན། བཞི་པ་བཏང་སྙོམས་ཀྱི་འབྲས་བུ། བཏང་སྙོམས་ང་རྒྱལ་རྨོངས་མེད་དེ་གཏི་མུག་གནས་སུ་དག་པའི་ངོ་བོ་ཉིད། མཉམ་ཉིད་ཆོས་དབྱིངས་ཡེ་ཤེས་མངོན་དུ་བྱེད། །ངོ་བོ་ཉིད་སྐུ་ཆོས་ཉིད་སྤྲོས་དང་བྲལ། །བཞི་པ་ཐར་ལམ་ངེས་པའི་གཞུང་ལམ་དུ་བསྟན་པ་ལ་བཞི། དང་པོ་ཚད་མེད་བཞི་པོ་རྒྱལ་བས་བསྔགས་པ། དེ་ལྟར་བྱམས་སོགས་ཡོན་ཏན་མཐའ་ཡས་ཤིང་། །མཚུངས་བྲལ་ལྷ་མའི་སྟོན་པས་རབ་བསྔགས་མཛད། །དཔལ་ཕྲེང་གི་མདོ་ལས། གང་གིས་ཚད་མེད་བཞི་བསྒོམས་པས། །དེ་ནི་བདེ་གཤེགས་ཀུན་གྱིས་དགོངས། །ཀུན་ཏུ་ཡོན་ཏན་ཚད་མེད་དེ། །ནམ་མཁའི་ལམ་ལས་རབ་འདས་པའོ། །ཞེས་སོ། །གཉིས་པ་ཚད་མེད་ཡོད་མེད་ཀྱིས་ཐར་ལམ་ཡིན་མིན་དུ་བསྟན་པ། དེ་དག་མི་ལྡན་ལམ་དེ་ཕྱིན་ཅི་ལོག །སྟོན་པ་གཞན་ལ་སྐྱབས་སོང་ལམ་ངན་ཡིན། །ཚད་མེད་བཞི་པོ་དེས་བཟུང་ལམ་ནི་ཐར་པ་དྲི་མ་མེད། །དུས་གསུམ་རྒྱལ་བ་སྔ་ཕྱིའི་གཤེགས་ཤུལ་ཡིན། [གསུམ་པ་ཞུ་མཆན། ]རྒྱུ་འབྲས་གཞུང་ལམ་གཅིག་པས་ཚད་མེད་བཞིར་བསྟན་ཚུལ། རྒྱུ་ཡི་ཐེག་པས་ས་བོན་མྱུ་གུ་བཞིན། །ཐབས་ཤེས་སྐུ་གཉིས་བསྐྱེད་པར་འདོད་ན་ཡང་། །འབྲས་བུའི་ཐེག་པས་སྐུ་ཡི་སྒྲིབ་པ་གཉིས། །སེལ་བྱེད་རྐྱེན་གྱི་རྣམ་པར་ཁས་ལེན་པས། །ཐབས་ཉིད་སྙིང་རྗེ་ཚད་མེད་ལམ་ལ་བརྟེན། །དོན་ལ་གཅིག་སྟེ་སྟོང་ཉིད་སྙིང་རྗེ་ཅན། །རྒྱུ་འབྲས་གཉིས་ཀས་མཐུན་པར་ཉམས་སུ་ལེན། །[བཞི་པ་ཞུ་མཆན། ]མདོ་རྒྱུད་མཐུན་པར་དབྱིངས་ཀྱི་དྲི་མ་སྦྱོོང་བྱེད་དུ་སྒོམ་ཚུལ། གཞན་ཡང་ཐོག་མེད་དགེ་བ་ཁམས་རང་བཞིན་གྱིས་དག་པ་ཡོན་ཏན་ཡེ་ལྡན་ཉིད་ས་བོན་ཚུལ། མ་བྱས་ཡེ་ནས་གནས་པར་འཁོར་ལོ་ཐ་མའི་མདོ་ནས་གསུངས། དེ་དང་སྔགས་སུ་རང་བཞིན་ཀྱི་དཀྱིལ་འཁོར་སྐུ་གསུམ་ཡེ་ལྡན་དུ་གསུངས་པ་ཉིད་གློ་བུར་གྱི་སྒྲིབ་པས་བསྒྲིབས་ཏེ་སེལ་འདོད་སྔགས་ཉིད་མཚུངས། མདོར་ན་མདོ་རྒྱུད་ལམ་རྣམས་ཀྱི་གཞི་ལམ་འབྲས་བུ་དངོས་བསྟན་སྦས་དོན་གྱི་ཚུལ་གཅིག་ཉིད་དུ། པད་འབྱུང་སོགས་སྔོན་གྱི་མཁས་གྲུབ་རྣམས་ཀྱིས་ཕྱི་ནང་བཤད་པ་མཛད། དེ་ཕྱིར་རྒྱལ་སྲས་དམ་པའི་རྗེས་འགྲོ་ཞིང་། །ཚད་མེད་རྣམ་པ་བཞི་ལ་འབད་པར་མཛོད། །གསུམ་པ་ལེའུ་རྫོགས་པ་མཇུག་གི་དོན་ལ་གཉིས། དང་པོ་སྐབས་ཀྱི་དགེ་བ་བསྔོ་བ། དེ་ལྟར་ལེག་གསུངས་ཞི་བའི་རང་བཞིན་གྱིས། །འགྲོ་ཀུན་སེམས་ཀྱི་རྙོག་པ་རབ་ཞི་ནས། །ལམ་གོལ་ཉན་རང་ལོག་པ་མུ་སྟེགས་བྱེད་དང་དམན་པ་ཡོངས་སུ་མ་རྫོགས་པར་ཞུགས་པ་དང་སྲིད་པའི་ལམ་པོ་ཆེ་ཡིས། དུབ་པའི་སེམས་ཉིད་དེ་རིང་ངལ་སོས་ཤིག །གཉིས་པ་ལེའུའི་མཚན། རྫོགས་པ་ཆེན་པོ་སེམས་ཉིད་ངལ་གསོ་ལས། ཚད་མེད་བཞིའི་ལེའུ་སྟེ་བདུན་པའོ།། །། ༈ བརྒྱད་པ་བྱང་ཆུབ་མཆོག་ཏུ་སེམས་བསྐྱེད་པའི་ལེའུ་ལ་གསུམ། ལེའུ་ལ་འཇུག་པ་རྒྱུའི་དོན། ལེའུ་དངོས་ཀྱི་དོན། ལེའུ་རྫོགས་པ་མཇུག་གི་དོན་ནོ། དང་པོ་ནི། དེ་ལྟར་ཚད་མེད་ལེགས་པར་གོམས་པ་ཡིས། །ཆོས་ཀུན་རྩ་བ་བྱང་ཆུབ་སེམས་གཉིས་བསྒོམ། །གཉིས་པ་ལ་གསུམ། སེམས་བསྐྱེད་ཀྱི་ཕན་ཡོན། ཇི་ལྟར་བསྐྱེད་པའི་ཚུལ། སེམས་བསྐྱེད་ཀྱི་བསླབ་བྱ་བསྟན་པའོ། །དང་པོ་ཕན་ཡོན་ལ་དྲུག དང་པོ་འཁོར་བ་ལས་ངེས་པར་འབྱིན་པའི་ཕན་ཡོན། དེ་ཡང་གྲུ་བོ་ཆེ་ལྟར་ཉོན་མོངས་སྲིད་མཚོ་མཐར་འབྱིན་ཞིང་། སྐྱེལ་མ་དཔའ་བོ་བཞིན་དུ་འཇིགས་དང་མྱ་ངན་སྡིག་ཀུན་སེལ་བྱེད་དེ། མེ་ལྟར་ལས་ཉོན་དང་སྡུག་བསྔལ་འདུ་བྱེད་རྣམ་པར་འཇོམས། དེད་དཔོན་དང་འདྲ་སྟེ་སྲིད་ནས་ཞི་བར་འགྲོ་བ་འདྲེན་བྱེད་ཡིན། གཉིས་པ་དགེ་ཚོགས་ཐེག་ཆེན་དུ་འགྱུར་བའི་ཕན་ཡོན། སེམས་བསྐྱེད་དེ་ཐོབ་ལ་མ་ཉམས་པར་ཡོད་པ་གང་ལ། སུམ་ཅུ་པ་ལས། སེམས་མེད་གཉིད་དང་བརྒྱལ་བ་དང་། །སྙོམས་པ་འཇུག་པ་རྣམ་པ་གཉིས། །རྟག་ཏུ་འདུ་ཤེས་མེད་པའོ། །ཞེས་པ་ལྟར། སེམས་པ་མངོན་གྱུར་མེད་པའི་གནས་སྐབས་ལྡན་ན་ཡང་སྙིང་རྗེའི་དགེ་རྒྱུན་གོང་ནས་གོང་འཕེལ་ཞིང་། མཉམ་བཞག་ན་ཡང་བྱང་སེམས་དང་ཐབས་ཤེས་ཟུང་དུ་འབྲེལ། སེམས་བསྐྱེད་ཡོད་ན་ཐམས་ཅད་དགེ་བའི་ཕྱིར་ལུས་ངག་རྩོམ་པ་ལུང་མ་བསྟན་ཐམས་ཅད་དོན་ཡོད་ཅིང་། ལྷར་བཅས་འཇིག་རྟེན་ཀུན་གྱི་མཆོད་སྡོང་འགྱུར། །གསུམ་པ་དགེ་རྩ་མི་ཟད་འཕེལ་བའི་ཕན་ཡོན། དགེ་གཞན་འབྲས་བུ་དམན་ཏེ་ཟད་པ་ལྟར། །རིན་ཆེན་སེམས་ཟིན་དགེ་བ་མི་ཟད་འཕེལ། །ཇི་ལྟར་རྒྱ་མཚོ་དྭངས་པའི་ཆུ་འབབ་དང་། །ས་གཞི་བཟང་པོར་ཏིལ་སོགས་ལོ་ཐོག་ཕུན་ཚོགས་བཞིན། བཞི་པ་དགེ་རྩ་བརྟན་ཞིང་ཐར་ལམ་སྙིང་པོ་བྱེད་པའི་ཕན་ཡོན། ལེགས་པའི་ཆོས་ཀུན་ཀྱི་རྩ་བ་ས་བོན་སྙིང་རྗེའི་བདག སྲིད་པ་ན་ཡང་བདེ་བའི་འབྲས་མང་ཞིང་། །ཞི་བའི་རང་བཞིན་བྱང་ཆུབ་མཆོག་གི་རྒྱུ། །རིན་ཆེན་སེམས་ལེགས་བསྐྱེད་ལ་འབད་པར་མཛོད། །ལྔ་པ་བསམ་དགུའི་རེ་བ་འགྲུབ་པའི་ཕན་ཡོན། དེ་ནི་དཔལ་རྒྱས་ཡིད་བཞིན་བུམ་པ་བཟང་། །འགྲོ་བའི་ནད་གསོ་བདེ་འབྱུང་སྨན་གྱི་མཆོག །ཡེ་ཤེས་ཉི་མ་གདུང་སེལ་ཟླ་བ་སྟེ། །མཁའ་བཞིན་དྲི་མེད་ཡོན་ཏན་རྒྱུ་སྐར་ཚོགས། །རྟག་ཏུ་ཕན་བདེ་བྱེད་པའི་རང་བཞིན་ལ། །དྲུག་པ་སངས་རྒྱས་ཀྱི་ཆོས་ཐམས་ཅད་ཀྱི་གཞིར་གྱུར་པའི་ཕན་ཡོན། བློས་བསམ་ཡས་བསོད་ནམས་སྤྲིན་ཚོགས་དཔག་ཏུ་མེད་དེ། གསང་བ་བསམ་གྱིས་མི་ཁྱབ་པའི་མདོ་ལས། བྱང་ཆུབ་སེམས་ཀྱི་བསོད་ནམས་གང་། །དེ་ལ་གལ་ཏེ་གཟུགས་མཆིས་ན། །ནམ་མཁའི་ཁམས་ནི་ཀུན་བཀང་སྟེ། །དེ་ནི་དེ་ལས་ལྷག་པར་འགྱུར། །ཞེས་དང་། སྡོང་པོ་བཀོད་པ་ལས། མདོར་ན་སངས་རྒྱས་བཅོམ་ལྡན་འདས་རྣམས་ལ་ལེགས་པ་ཡོད་པ་ཇི་ལྟ་བར་བྱུང་ཆུབ་ཏུ་སེམས་བསྐྱེད་པའི་ལེགས་པ་དང་། ཡོན་ཏན་ཡང་དེ་ཙམ་སྟེ། ནམ་མཁའི་ཁམས་དང་ཆོས་ཀྱི་དབྱིངས་ལྟར་རྒྱ་ཆེའོ། །ཞེས་གསུངས་པ་ལྟར། རྒྱལ་བའི་ཡོན་ཏན་ཤིན་ཏུ་རྨད་བྱུང་དང་། །ཆོས་ཀྱི་དབྱིངས་ལྟར་དཔག་ཡས་རྒྱ་ཆེའོ། །གཉིས་པ་ཇི་ལྟར་བསྐྱེད་པའི་ཚུལ་ལ་གཉིས། སེམས་བསྐྱེད་ཀྱི་རང་བཞིན་ཤེས་པར་བྱ་བ། ཤེས་ནས་ཇི་ལྟར་བསྐྱེད་པའི་ཚུལ་ལོ། །དང་པོ་རང་བཞིན་ཤེས་པར་བྱ་བ་ལ་བདུན། དང་པོ་སེམས་བསྐྱེད་ཀྱི་མཚན་ཉིད། སེམས་བསྐྱེད་པ་ནི་ཚད་མེད་འགྲོ་བའི་ཕྱིར། །ཡང་དག་སངས་རྒྱས་ཐོབ་པར་འདོད་པ་སྟེ། །སྨོན་དང་འཇུག་པའི་རང་བཞིན་གཉིས་ཡིན་ནོ། །དེ་ཡང་བསམ་པས་སྨོན་དང་སྦྱོར་བས་ལག་ལེན་ལ་ཁྱབ་པ། འགྲོ་བར་འདོད་དང་འགྲོ་བ་ཉིད་བཞིན་ནོ། །གཞན་ཡང་ཀུན་རྫོབ་དོན་དམ་དང་། སྐྱེ་འཕགས་ཀྱི་སེམས་བསྐྱེད་སོགས་ཡོད། གཉིས་པ་སྨོན་འཇུག་གི་རང་བཞིན། སྨོན་པ་ཚད་མེད་བཞི་ཡི་ངོ་བོ་ལ་འཇུག་པར་ཕ་རོལ་ཕྱིན་པ་དྲུག་དུ་འདོད་དེ། བྱམས་པས་ཞུས་པའི་མདོ་ལས། བྱམས་པ་དེ་ལ་གཞན་གྱི་དོན་དུ་སྨོན་པ་ཡང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། དགའ་བ་ཆེན་པོ་དང་། བཏང་སྙོམས་ཆེན་པོ་ཡིན་ལ། ཡང་དག་པར་སྤྱོད་པ་དེ་ཡང་ཕ་རོལ་དུ་ཕྱིན་པ་དྲུག་སྟེ། ཞེས་སོ། །གསུམ་པ་སྨོན་པའི་ཕན་ཡོན། འགྲོ་བ་གང་གིས་ཕྱོགས་མཐའ་གཏུགས་པའི་སངས་རྒྱས་ལ། བསྐལ་པ་བྱེ་བ་མང་པོར་བསྙེན་བཀུར་ཏེ། །རང་ཉིད་ལེགས་པ་ཙམ་ཞིག་དོན་གཉེར་བའི། །བསོད་ནམས་དེ་ཡིས་སྨོན་པའི་ཆར་མི་ཕོད། བཞི་པ་དེའི་འཐད་པ། འགྲོ་བའི་སྡུག་བསྔལ་ཉུང་ཟད་སེལ་བའི་བློ། །སྐད་ཅིག་སྐྱེས་པས་ངན་སོང་ཐར་གྱུར་ཅིང་། །ལྷ་མིའི་འདེ་བ་དཔག་མེད་མྱོང་བར་གསུངས་ཏེ་མཛའ་བོའི་བུ་མོ་དགའ་ལྡན་དང་། གྱད་བག་ཤི་ཏ་སུམ་ཅུ་རྩ་གསུམ་པའི་ལྷར་སྐྱེས་པར་གསུངས་པ་ལྟ་བུའོ། །ལྔ་པ་འཇུག་པའི་ཕན་ཡོན། དེ་བས་འཇུག་པའི་ཕན་ཡོན་མཐའ་ཡས་ཏེ་དངོས་སུ་སྦྱོར་བས་ཡང་དག་ཁྱབ་པའི་ཕྱིར། སྐད་ཅིག་སྦྱོོར་བས་ཁྱབ་པའི་སེམས་མཆོག་གིས། །བསྐལ་པ་མང་པོའི་ཚོགས་གཉིས་བཟླུམས་པར་བཤད། །དེད་དཔོན་སྙིང་རྗེ་ཅན་གྱིས་བསྐལ་པ་བཞི་ཁྲི་དང་། བྲམ་ཟེའི་ཁྱེའུ་ཀརྨ་ལ་དགའ་བས་བསྐལ་པ་ཉི་ཁྲིའི་ཚོགས་བཟླུམས་པར་གསང་ཆེན་ཐབས་མཁས་ཀྱི་མདོ་ལས་གསུངས་པ་བཞིན་ནོ། །དྲུག་པ་གཞན་གྱི་ལོག་རྟོག་དགག་པ། དེ་ཕྱིར་བྱང་སེམས་དབང་རྣོན་གྱིས་གྲངས་མེད་གསུམ་དང་འབྲིང་གིས་བདུན། རྟུལ་པོས་སུམ་ཅུ་རྩ་གསུམ་སོགས་གསུངས་པ་ཀུན། མྱུར་དུ་རྫོགས་དང་རིང་དུ་རྫོགས་པ་དང་། གསང་སྔགས་པས་ཚེ་གཅིག་གྲོལ་བ་བློ་ཡི་སྟོབས་ལ་རག སྔགས་ཀྱི་རིག་འཛིན་དང་འཕགས་པ་དབང་རྣོན་མྱུར་བུལ་ཁྱད་མེད་གསུངས། དེ་ཡང་ཐབས་དང་བརྩོན་འགྲུས་ཤེས་རབ་མཆོག །གསུམ་གྱིས་བསྒྲུབ་གང་བླ་མེད་སྟོབས་ཆེའོ། །བདུན་པ་སྤྲོ་དགའ་མཆོག་ཏུ་བསྐྱེད་པ། འདི་ནི་སྙིང་རྗེའི་ལྗོན་ཤིང་སྙིང་པོ་ཅན། །འགྲོ་བའི་བྱ་ཚོགས་བསྟེན་པའི་ཁུར་ཆེན་ལེགས་པར་ཁྱེར་བ་ནི། ཚངས་སོགས་འཇིག་རྟེན་ན་ཡང་སྔོན་མེད་ཅིང་། །རང་ཉིད་ཕྱིར་ཡང་རྨི་ལམ་མ་རྨིས་ན། །གཞན་ཕྱིར་སྨོས་ཅི་འཚལ་བའི་བྱང་ཆུབ་སེམས། །སྔ་ན་མེད་པ་འཁྲུངས་ལ་དགའ་བ་བསྐྱེད། །གཉིས་པ་ཤེས་ནས་ཇི་ལྟར་བསྐྱེད་པའི་ཚུལ་ལ་གསུམ། སྦྱོར་བ། དངོས་གཞི། མཇུག་གོ །དང་པོ་སྦྱོར་བ་ལ་བཞི། དང་པོ་རྟེན་དགེ་བའི་བཤེས་གཉེན། དེ་ཡང་རང་སྟོབས་ཀྱི་ནུས་པ་ཡོད་ན་མདུན་མཁར་སངས་རྒྱས་བྱང་སེམས་སྤྱན་དྲངས་ནས་དེའི་སྤྱན་སྔར་ལེན་པའམ། རང་ལ་ནུས་པ་མེད་པའམ་ཡོད་ཀྱང་བླ་མ་ལས་ལེན་པར་འདོད་ན། སེམས་བསྐྱེད་དེ་ཡང་དགེ་བའི་བཤེས་ལས་བྱུང་བ་སྟེ། ཡིད་བཞིན་དག་ལས་འདོད་དགུའི་ཆར་འབེབས་བཞིན། །དེ་ཡང་ཇི་ལྟ་བུ་ཞེ་ན། སྡོམ་པ་ཉི་ཤུ་པ་ལས། བླ་མ་སྡོམ་ལ་གནས་ཤིང་མཁས། །ནུས་དང་ལྡན་ལས་བླང་བར་བྱ། །ཞེས་སོགས་གསུངས་པ་ལྟར་རོ། །གཉིས་པ་དེས་བློ་བཅོས་པའི་རིམ་པ། སྐྱོན་བྲལ་ཡོན་ཏན་རྫོགས་པའི་བླ་མ་ཡིས། །སྐལ་བཟང་སློབ་མ་སྤྲོ་བ་བསྐྱེད་པ་ནི། །འཁོར་བའི་ཉེས་དམིགས་ཐར་པའི་ཕན་ཡོན་ཞི་མཐར་ཞེན་པ་དགག་པ་སོགས། ཐོག་མ་བར་དང་མཐར་དགེའི་ཆོས་རྣམས་དང་མཐའ་གཉིས་སྤངས་པའི་བྱང་ཆུབ་སེམས་ཀྱི་བསྔགས་པ་མཐའ་ཡས་བརྗོད། གསུམ་པ་གནས་དང་བཀོད་པ་བཤམས་པ། གནས་གཙང་མཆོད་པས་མཛེས་ཤིང་ཉམས་དགའ་བར། །རྒྱལ་བའི་སྐུ་གཟུགས་ལ་སོགས་སྟ་གོན་བྱ། །བཞི་པ་སྔོན་འགྲོ་ཡན་ལག་བདུན་པ་བསྟན་པ་ལ་གསུམ། བསོད་ནམས་ཀྱི་ཞིང་བསམ་པ། ཡན་ལག་བདུན་པ་དངོས་བྱ་བ། དེའི་འཐད་པ་དགོད་པའོ། །དང་པོ་ལ་གསུམ། དང་པོ་དམིགས་པའི་རྟེན་བསམ་པ། ནམ་མཁའི་གནས་སུ་ནམ་མཁའ་གང་བ་ཡི། །རྒྱལ་བ་སྲས་བཅས་རྒྱ་མཚོའི་སྤྲིན་ཕུང་མཁའ་དབྱིངས་ཁྱབ་པར་བསམ་ཞིང་། ཟླ་བ་སྒྲོན་མེའི་མདོ་ལས་གསུངས་པ་ལྟར། སེམས་ནི་རྒྱ་ཆེན་མཆོག་ཏུ་རབ་བསྐྱེད་དེ། །འགྲོ་བ་འདི་དག་མ་ལུས་སངས་རྒྱས་རྒྱུ། །འདི་ན་སྣོད་མིན་སེམས་ཅན་གང་ཡང་མེད། །བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ། །སོགས་ནས། རྒྱལ་བ་འཁོར་བཅས་མ་ལུས་གཤེགས་སུ་གསོལ། །ཞེས་ལན་གསུམ་སོགས་བརྗོད་པས་དངོས་སུ་འབྱོན་པའོ། །གཉིས་པ་དེའི་འཐད་པ་དགོད་པ། འདི་ནི་རང་གི་སེམས་སྟོབས་དྲི་མེད་དང་། །མཁྱེན་བརྩེའི་དབང་ཕྱུག་རྣམས་ཀྱི་ཐུགས་རྗེ་ཡིས། །ཇི་ལྟར་བསམ་པ་དེ་བཞིན་འགྲུབ་པར་གསུངས་ཏེ། དཀོན་མཆོག་བརྩེགས་པ་ལས། གང་གིས་རྒྱལ་བ་ཡིད་བྱེད་པ། །དེ་ཡི་མདུན་ན་དེ་བཞུགས་ཏེ། །རྟག་པར་བྱིན་གྱིས་རླབས་པར་བྱེད། །ཉེས་པ་ཀུན་ལས་རྣམ་པར་གྲོལ། །ཞེས་སོ། །གསུམ་པ་བཀུར་སྟི་རིམ་གྲོ་བྱ་བ། དེ་ནས་ཐལ་སྦྱར་མེ་ཏོག་སྙིིམ་བཀང་ནས། །མ་ལུས་སེམས་ཅན་ཀུན་གྱི་མགོན་གྱུར་ཅིང་། །སོགས་རིག་པ་མཆོག་ལས་གསུངས་པ་ལྟར་གནས་ཁང་དུ་སྤྱན་དྲང་བཞུགས་གསོལ་ཁྲུས་རྒྱན་གོས་སོགས་དབུལ། གཉིས་པ་ཡན་ལག་བདུན་པ་དངོས་ལ་བདུན། དང་པོ་ཕྱག་འཚལ་བའི་ཡན་ལག་ལ་གཉིས། དང་པོ་འཚལ་ཚུལ་དངོས། ཡིད་འོང་རྫིང་བུའི་ནང་ན་གནས་པ་ཡི། །འཆར་ཀའི་པདྨ་ཁ་འབུས་བྱེ་འདྲ་བ། །ལག་གཉིས་སྤྱི་བོར་ཐལ་སྦྱར་བསྟོད་དབྱངས་བཅས། །ལུས་དཔག་མེད་པར་སྤྲུལ་ནས་གུས་ཕྱག་འཚལ། །གཉིས་པ་དེའི་ཕན་ཡོན། ས་འདི་རིར་བཅས་རྒྱ་མཚོའི་རྡུལ་སྙེད་དུ། །བྱང་ཆུབ་ཏུ་སེམས་བསྐྱེད་པའི་དོན་དུ་ཕྱག་འཚལ་བའི་བསོད་ནམས་དེ་འདྲ་འཇིག་རྟེན་གསུམ་ན་མེད། ལུས་བཏུད་དབང་ཆེན་བར་གྱི་རྡུལ་རྣམས་དང་། །མཉམ་པའི་གྲངས་སྙེད་འཁོར་ལོས་སྒྱུར་འགྲོ་ཞིང་། །མཐར་ཐུག་ཞི་བ་མཆོག་གི་གོ་འཕང་འཐོབ། །གཉིས་པ་མཆོད་པའི་ཡན་ལག་ལ་གཉིས། མདོར་བསྟན་པ་རྒྱས་བཤད་དོ། །དང་པོ་མདོར་བསྟན་ནི། དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །མཆོད་པ་བླ་མེད་རྒྱ་ཆེན་རྣམས་ཀྱིས་མཆོད། །གཉིས་པ་རྒྱས་བཤད་ལ། དངོས་འབྱོར་དང་ཡིད་སྤྲུལ་གཉིས། དང་པོ་དངོས་འབྱོར་ནི། དེ་ཡང་དངོས་སུ་བཤམས་པའི་མཆོད་པ། མེ་ཏོག་སྤོས་དང་མར་མེ་ཞལ་ཟས་ཆུ། །བླ་རེ་འཕན་ལྡིང་གདུགས་དང་རོལ་མོའི་སྒྲ། །རྒྱལ་མཚན་རྔ་ཡབ་རྫ་རྔ་ལ་སོགས་དང་། །ལུས་དང་ལོངས་སྤྱོད་མཁོ་དགུའི་ཡོ་བྱད་ཀྱིས། །འགྲོ་བའི་བླ་མ་དཀོན་མཆོག་སྲས་བཅས་མཆོད། །གཉིས་པ་ཡིད་སྤྲུལ་ལ་ཐུན་མོང་དང་ཁྱད་པར་གཉིས། དང་པོ་ཐུན་མོང་ལ་བདུན། དང་པོ་གཞལ་ཡས་ཁང་རོལ་མོའི་སྤྲིན་ཅན་གྱི་མཆོད་པ། ཡིད་ལས་བྱུང་བ་ལྷ་སོགས་འཇིག་རྟེན་ཀུན་ན་ཡིད་འོང་བའི། །གཞལ་མེད་ཁང་བརྩེགས་རིན་ཆེན་དྲྭ་བ་ཅན། །གླུ་གར་སིལ་སྙན་བསྟོད་དབྱངས་ཆར་འབབ་ཅིང་། །རྒྱན་མཆོག་བརྒྱ་ཕྲག་མངའ་བ་རྣམས་ཀྱིས་མཆོད། །གཉིས་པ་ཉེ་འཁོར་ཀུན་ནས་དགའ་བའི་མཆོད་པ། གཞན་ཡང་བདག་པོས་མ་བཟུང་བའི་རིན་ཆེན་རི་བོ་ནགས་ཚལ་པདྨའི་མཚོ། ངང་མོའི་འགྲོས་ཀྱིས་གཉེར་བ་དེ་དག་དང་། །སྨན་སོགས་དྲི་ཞིམ་ངད་ལྡང་དཔག་བསམ་ཤིང་། །མེ་ཏོག་འབྲས་བུ་དུད་པའི་ཚོགས་ཀྱིས་མཆོད། །གསུམ་པ་པདྨོ་རིན་ཆེན་མཛེས་པའི་མཆོད་པ། འདབ་སྟོང་གཡོ་བས་བུང་བ་བཟུང་བ་ཡི། །ལག་པའི་གདུ་བུ་ཀུ་མུ་ཏས་མཚན་ཞིང་། །སྤྲིན་བྲལ་ཉི་ཟླའི་ཟེར་གྱིས་རབ་ཕྱེ་བའི། །ཨུཏྤ་ལ་སོགས་ཡིད་འོང་རྣམས་ཀྱིས་མཆོད། །བཞི་པ་ཚལ་སོགས་ཀུན་ནས་དགེ་བའི་མཆོད་པ། ཙནྡན་བསིལ་བའི་ཁ་ཡི་སྦུབས་བསྐྱོད་པའི། །དྲི་ཞིམ་སེར་བུ་བདེ་བའི་ངད་རྣམས་དང་། །ཕུག་དང་བྲག་རི་སྨན་ལྗོངས་ཉམས་དགའ་བ། །ཆུ་བསིལ་རྫིང་བུ་གང་བ་རྣམས་ཀྱིས་མཆོད། །ལྔ་པ་ཉི་ཟླ་རིན་ཆེན་བཀོད་པའི་མཆོད་པ། སྟོན་ཀའི་མཚན་མོ་དཀར་བའི་རི་བོང་འཛིན། །གཟའ་བྲལ་རྒྱུ་སྐར་ཕྲེང་བས་བསྐོར་བ་དང་། །ཉིན་བྱེད་འོད་སྟོང་དྲྭ་བས་མཛེས་འབར་བ། །གླིང་བཞིའི་འཇིག་རྟེན་རྒྱན་གྱུར་རྣམས་ཀྱིས་མཆོད། །དྲུག་པ་ཞིང་ཁམས་རྒྱ་མཚོའི་རྡུལ་གྱིས་མཆོད་པ། ཁོར་ཡུག་རིར་བཅས་བྱེ་བ་ཕྲག་བརྒྱའི་ཞིང་། །མ་ལུས་ཡོངས་བཀོད་འདོད་དགུའི་འབྱོར་པ་དང་། །ཕྱོགས་བཅུའི་ཞིང་ཁམས་རྒྱ་མཚོའི་རྡུལ་སྙེད་ཀུན། །བློ་ཡིས་བླངས་ཏེ་ཐུབ་དབང་སྲས་བཅས་མཆོད། །བདུན་པ་རྒྱལ་སྲིད་རིན་པོ་ཆེའི་མཆོད་པ། བདག་པོས་ཡོངས་སུ་བཟུང་བའི་འདོད་དགུ་འབྱུང་བའི་བུམ་བཟང་དཔག་བསམ་ཤིང་དང་འདོད་འཇོའི་བ། འཁོར་ལོ། ནོར་བུ། བཙུན་མོ། བློན་པོ། རྟ་མཆོག གླང་པོ། དམག་དཔོན་ཏེ་རྒྱལ་སྲིད་བདུན་དང་། ཡུངས་དཀར་བཱུར་བ། བིལྦ། ལི་ཁྲི། ཞོ། གི་ཝང་། མེ་ལོང་། དུང་གཡས་འཁྱིལ་ཏེ་བཀྲ་ཤིས་རྫས་བརྒྱད་དང་། ལྷམ་སྟན། བཞོན་པ། མལ་ཆ་དང་། ཁྲི་དང་། རལ་གྲི་དང་། པགས་པ་སྟེ་ཉེ་བའི་རིན་ཆེན་བདུན་སོགས་རྒྱ་ཆེ་བས། ཡོན་གནས་དམ་པ་ཐུགས་རྗེ་ཆེ་རྣམས་མཆོད། །གཉིས་པ་ཁྱད་པར་གྱི་མཆོད་པ་ལ་གསུམ། དང་པོ་ཏིང་འཛིན་རྒྱལ་པོའི་མཆོད་སྤྲིན་མདོོར་བསྟན། ཏིང་ངེ་འཛིན་གྱི་མཆོད་པ་བཟང་སྤྱོད་ནས་འབྱུང་བ་ལྟར། ཏིང་འཛིན་ཡིད་ཀྱིས་ནམ་མཁའི་དབྱིངས་ཁྱབ་པར། །ཕྱི་ནང་གསང་བའི་མཆོད་སྤྲིན་རྒྱ་མཚོས་མཆོད། །གཉིས་པ་ཕྱི་མཆོད་ཡིད་བཞིན་སྤྲིན་གྱི་རང་བཞིན་རྒྱས་པར་བཤད་པ། མེ་ཏོག་སྤྲིན་མཛེས་ལྡིང་ཁང་མཛེས་འབར་བ། །ཚུལ་ཇི་ལྟར་ན། དཀོན་མཆོག་ཏ་ལ་ལས། མེ་ཏོག་ཕལ་ཆེར་མེ་ཏོག་བླ་རེ་དང་། །མེ་ཏོག་བཀོད་པའི་འོད་ཟེར་རབ་བཀྱེ་སྟེ། །མེ་ཏོག་སྣ་ཚོགས་ཀུན་ཏུ་བཀྲམ་བྱས་ཏེ། །བདག་ཉིད་ཆེན་པོ་རྒྱལ་བ་སྲས་བཅས་མཆོད། །ལག་པའི་མཐིལ་ནས་མཆོད་པ་བསམ་ཡས་རྣམས། །རྒྱལ་བ་གཅིག་ལ་མཆོད་པ་བྱེད་པ་ལྟར། །རྒྱལ་བ་མ་ལུས་ཀུན་ལའང་དེ་བཞིན་ཏེ། །དྲང་སྲོང་ཏིང་འཛིན་རྣམ་འཕྲུལ་དེ་འདྲའོ། །ཞེས་པ་ལྟར། སྤོས་དང་སྨན་སྦྱར་བདུད་རྩིའི་སྤྲིན་ཕུང་དང་། །གཟི་ལྡན་སྒྲོན་མ་ཞལ་ཟས་རོལ་མོའི་སྤྲིན། །བསྟོད་དབྱངས་ཡན་ལག་རྒྱ་མཚོའི་སྤྲིན་གྱིས་མཆོད། །གསུམ་པ་ནང་མཆོད་ཡེ་ཤེས་རྒྱ་མཚོའི་རོལ་པ་ཀུན་ནས་སྤྲོ་བ། ནང་གསང་བའི་མཆོད་པ། བློ་ཡིས་འཇུག་པའི་སྤྲིན་ཅན་ཤིན་ཏུ་མཐའ་ཡས་པ། སྒེག་མོ་ཕྲེང་ཐོགས་རིན་ཆེན་གླུ་གར་སོགས། །མཆོད་པའི་ལྷ་མོ་སྣ་ཚོགས་སྤྲིན་འཕྲོ་བས། །རྒྱལ་བ་སྲས་བཅས་མ་ལུས་མཉེས་གྱུར་ཅིག །གསུམ་པ་སྡིག་པ་བཤགས་པའི་ཡན་ལག སྦྱང་བྱ་སྡིག་པའི་སྒོ་དྲུག འགྲིམ་པའི་སྒོ། ལུས་ངག་ཡིད་གསུམ། ཀུན་སློང་ཉོན་མོངས་དུག་གསུམ། ཡུལ་ཕ་མ་མཁན་སློབ་སོགས་ལ། དུས་ཐོག་མ་མེད་ནས་ད་ལྟའི་བར། ངོ་བོ་རང་བཞིན་དང་བཅས་པའི་ཁ་ན་མ་ཐོ་བ། སྦྱོར་བ་རང་གིས་བྱས་པའམ་གཞན་ལ་བྱེད་དུ་བཅུག་པའམ། རྗེས་སུ་ཡི་རང་བ་སྟེ། ཐོག་མེད་དུས་ནས་གོམས་པའི་བག་ཆགས་ཀྱིས། །ལས་དང་ཉོན་མོངས་སྡིག་པ་ཅི་མཆིས་པ། །བྱེད་ལས་མཐོ་རིས་དང་ཐར་པ་ལ་སྒྲིབ་ཅིང་ངན་སོང་སོགས། སྲིད་པའི་རྒྱུར་གྱུར་དེ་ཀུན་བཤགས་པར་བགྱི། །བཤགས་ཚུལ་སྦྱོར་དངོས་རྗེས་གསུམ་ལས། སྦྱོར་བ་སངས་རྒྱས་བྱང་སེམས་དཔག་ཏུ་མེད་པ་གསལ་གདབ་པ་སོགས་ཀྱི་སྤྱན་སྔར་སྐྱབས་སུ་འགྲོ་ཞིང་། དངོས་གཞི་སྟོབས་བཞིའི་དམིགས་གནད་དང་ལྡན་པས་བཤགས་ཤིང་། རྗེས་རང་གཞན་གྱི་སྡིག་པ་ཐམས་ཅད་ལྕེ་ཐོག་ཏུ་ནག་ལིང་ངེ་འདུས་པ། སངས་རྒྱས་དང་བྱང་སེམས་སོགས་ཀྱི་སྨིན་མཚམས་སོགས་ལས་བྱུང་བའི་འོད་ཟེར་གྱིས་དག་པར་བསམ་ཞིང་། སྡིག་ལྟུང་རང་བཞིན་མེད་པའི་ངང་ལ་བཞག བཞི་པ་རྗེས་སུ་ཡི་རང་བ། འགྲོ་བའི་བསོད་ནམས་ཕུང་པོ་མཐའ་ཡས་ལ། །རྟག་པར་བདག་ནི་རྗེས་སུ་ཡི་རང་ངོ་། །འདིས་དགེ་རྩ་མཉམ་པར་ཐོབ་ཅིང་བསོད་ནམས་ཚད་མེད་ཐོབ། ལྔ་པ་ཆོས་ཀྱི་འཁོར་ལོ་བསྐོར་བར་བསྐུལ་བ། མ་ལུས་སྐྱེ་དགུའི་ཚོགས་རྣམས་བསྒྲལ་བའི་ཕྱིར། །ཆོས་ཀྱི་འཁོར་ལོ་བླ་མེད་བསྐོར་བར་བསྐུལ། །འདིས་ཆོས་སྤང་གི་སྒྲིབ་པ་དག་པ་དང་ཚེ་རབས་ཐམས་ཅད་ཆོས་དང་མི་འབྲལ། དྲུག་པ་མྱ་ངན་ལས་མི་འདའ་བར་གསོལ་བ། དེང་ནས་སྲིད་པའི་རྒྱ་མཚོ་མ་སྟོངས་བར། །མྱ་ངན་མི་འདའ་རྟག་ཏུ་བཞུགས་པར་གསོལ། །འདིས་དུས་མ་ཡིན་པའི་འཆི་བ་ཞི་ནས་ཚེ་རིང་པོ་འཚོ། བདུན་པ་བསྔོ་བའི་ཡན་ལག རང་གཞན་གཉིས་ཀས་དུས་གསུམ་དུ་བསགས་པའི་བསྔོ་རྒྱུའི་དགེ་བ་དེ་ཉིད་རྣམ་པ་སྒྱུ་མ་ལྟ་བུ་ཡིས་ཆེད་དུ་བྱ་བ་བདག་དང་འགྲོ་བ་ཀུན། མ་ལུས་ཕྱམ་གཅིག་གང་དུ་བསྔོ་ན་སངས་རྒྱས་ཁོ་ན་ཡིན་པས་དེ་འགྲུབ་པར་ཤོག འདིར་བསྔོ་སྨོན་གྱི་ཁྱད་པར་རྒྱུ་དགེ་བ་སྔོན་དུ་སོང་བ་དང་མ་སོང་བའི་ཁྱད་པར་གྱིས་དབྱེའོ། །གཉིས་པ་ཡན་ལག་བདུན་གྱི་འཐད་པ་དགོད་པ་ལ་གཉིས། དང་པོ་སྤང་བྱ་གེགས་ཀྱི་དྲི་མ་འབྱངས་པས་བྱང་ཆུབ་ཀྱི་སེམས་བསྐྱེད་སླ་བའི་འཐད་པ། ཇི་ལྟར་ཁྲུས་ཀྱིས་སྦྱངས་པའི་རས་ཡུག་དག །ཚོན་གྱིས་བསྒྱུར་བས་ཁ་དོག་གསལ་བ་བཞིན། །དེ་ལྟར་སྔོན་དུ་འགྲོ་བས་སེམས་སྦྱངས་པའི། །རྒྱུད་ལ་དངོས་གཞིའི་སེམས་མཆོག་གསལ་བར་སྐྱེ། །གཉིས་པ་བླང་བྱ་དགེ་བའི་དཔུང་ཚོགས་བསྐྱེད་པས་སེམས་བསྐྱེད་སྐྱེ་སླ་བའི་འཐད་པ། ཡན་ལག་འདུན་པ། འདི་ནི་བསོད་ནམས་འབྲས་བུ་ཚད་མེད་དེ། །ཆོས་དབྱིངས་ཇི་བཞིན་ནམ་མཁའི་དབྱིངས་ཀུན་ཁྱབ། །གཉིས་པ་དངོས་གཞིའི་ཆོ་ག་ནི། དེ་ནས་དངོས་གཞི་སངས་རྒྱས་ཆོས་དང་ཚོགས་མཆོག་ལ། །ལན་གསུམ་བར་དུ་སྐྱབས་སུ་འགྲོ་བྱས་ཏེ། །མགོན་པོ་སྲས་དང་བཅས་རྣམས་དགོངས་སུ་གསོལ། །ཇི་ལྟར་སྔོན་གྱི་བདེ་གཤེགས་སྲས་བཅས་ཀྱིས། །བྱང་ཆུབ་ཐུགས་བསྐྱེད་བསླབ་ལ་གནས་པ་ལྟར། །དེང་ནས་བདག་གིས་འགྲོ་ལ་ཕན་དོན་དུ། །བྱང་ཆུབ་སེམས་བསྐྱེད་བསླབ་ལ་གནས་པར་བགྱི། །མ་བརྒལ་བ་རྣམས་བདག་གིས་བསྒྲལ་བར་བགྱི། །མ་གྲོལ་བ་རྣམས་བདག་གིས་དགྲོལ་བགྱི་ཞིང་། །དབུགས་མ་ཕྱུང་རྣམས་བདག་གིས་དབུགས་དབྱུང་སྟེ། །སེམས་ཅན་རྣམས་ནི་མྱ་ངན་འདས་ལ་འགོད། །གསུམ་པ་མཇུག་ལ་གསུམ། དང་པོ་དུས་གཞན་དུས་སེམས་བསྐྱེད་བཟུང་བའི་རིམ་པ། དེ་ལྟར་ཉིན་དང་མཚན་མོ་ལན་གསུམ་དུ། །བྱང་ཆུབ་སེམས་གཉིས་སྐྱེད་ལ་འབད་པར་བྱ། །གཉིས་པ་ལན་གསུམ་བརྗོད་པའི་འཐད་པ། དེ་ལྟར་ལན་གསུམ་གྱི་བརྗོད་པ་དང་པོས་སྨོན་པ་སེམས་བསྐྱེད་ལ། གཉིས་པས་འཇུག་པ་སེམས་བསྐྱེད་གསུམ་པ་ཡིས། གཉིས་ཀ་བརྟན་ཞིང་དག་པ་ཐོབ་པར་འགྱུར་ཏེ་སྨོན་འཇུག་ངོ་བོ་གཅིག་ལ། ཆོ་ག་ལས་ཐ་དད་པ་ལྟར་ལྡོག་པ་གསུམ། བརྗོད་པ་གསུམ་ལས་སྐྱེ་བར་བཞེད་དོ། །གསུམ་པ་སྤྲོ་དགའ་བསྐྱེད་པ། དེང་ནས་བདག་ནི་འགྲོ་ཀུན་ཉེར་འཚོའི་གཞི། །རྒྱལ་སྲས་བྱང་ཆུབ་སེམས་དཔའི་མིང་ཡང་ཐོབ། །སྲིད་ན་མི་འཇིགས་འགྲོ་བའི་དོན་བྱེད་ཅིང་། །རྟག་ཏུ་ཕན་པ་འབའ་ཞིག་ལྷུར་ལེན་པས། །མི་ཡི་སྲིད་པ་དོན་དང་བཅས་པར་གྱུར། །དོན་གསུམ་པ་སེམས་སྐྱེད་ཀྱི་བསླབ་བྱ་བསྟན་པ་ལ་གཉིས། བསླབ་མདོའི་གནས་སྤྱིར་བསྟན་པ་དང་། སྤྱོད་པ་རླབས་པོ་ཆེའི་གནས་བྱེ་བྲག་ཏུ་བཤད་པའོ། །དང་པོ་བསླབ་མདོའི་གནས་སྤྱིར་བསྟན་པ་ལ་ལྔ། དང་པོ་བསླབ་གཞི་བྱང་ཆུབ་ཀྱི་སེམས་ལ་གདམས་པ། ད་ནི་སེམས་གཙང་རིགས་ཡོད་པས་ནོར་བུ་རིན་པོ་ཆེ་འོད་འབར་བའི་འབྱུང་གནས་ལ་བྱི་དོར་བྱས་ན་དེ་བས་ཀྱང་མཛེས་པ་ལྟར་དགེ་བའི་ས་གཞི་ལ། བྱང་ཆུབ་སེམས་གཉིས་མྱུ་གུ་རབ་བསྐྱེད་དེ། དེ་གཟུང་བ་དང་དྲི་མ་དག་པ་དང་དགེ་བ་སྤེལ་ཕྱིར་བརྩོན་པར་བྱ། ཚུལ་ཇི་ལྟར། གཟུང་དག་སྤེལ་སྙམ་ན། སྨོན་པ་དང་འཇུག་པའི་རང་བཞིན་ལ་གནས་པ་ནི་སེམས་བཟུང་བའོ། །དེའི་མི་མཐུན་ཕྱོགས་སྤང་བའི་ཕྱིར་འབད་པ་ནི་དག་པར་བྱ་བའོ། །བདག་གི་བདེ་བ་དང་། སེམས་ཅན་གྱི་སྡུག་བསྔལ་བརྗེ་བ་ལ་སྤེལ་མར་བྱ་བ་ནི་སེམས་སྤེལ་བའོ། །དེ་ཡང་འདི་ལྟར་སྤྲོ་བ་དང་། དགེ་ཚོགས་མང་དུ་བསྟེན་པ་དང་། ཀུན་ཏུ་དགེ་བ་འབའ་ཞིག་པ་དང་། སེམས་ཅན་ཐམས་ཅད་བདག་ཉིད་ཀྱི་ཁུར་དུ་འཁུར་བ་དང་། བདག་དང་གཞན་དུ་མཉམ་པ་དང་། བདག་དང་གཞན་དུ་བརྗེ་བར་བྱ་བ་ནི་བསླབ་པའི་མདོ་བསྡུས་པ་སྟེ། སྤྱོད་འཇུག་ལས། སྒྱིད་ལུག་མེད་དང་དཔུང་ཚོགས་དང་། །ལྷུར་བླང་བདག་ཉིད་དབང་བྱ་དང་། །བདག་དང་གཞན་དུ་མཉམ་པ་དང་། །གཞན་དང་བདག་ཏུ་བརྗེ་བར་གྱིས། །ཞེས་སོ། །གཉིས་པ་སྨོན་འཇུག་བློའི་སྤྱོད་ཚུལ་བསྟན་པ། དེས་ན། འགྲོ་བའི་སྡུག་བསྔལ་བདག་གིས་བླང་བྱ་ཞིང་། །བདག་གི་བདེ་བས་འགྲོ་བ་བདེར་འགྱུར་ཏེ། །བྱང་ཆུབ་བར་དུ་དེ་དང་མི་འབྲལ་ཤོག །སྙམ་དུ་གཏོང་ལེན་སྤེལ་མར་སྦྱང་བྱ་ཞིང་། །དེ་ལྟར་བསྒོམས་ཀྱང་དངོས་སུ་འཕོ་བ་ནི་མེད་དེ་ལས་འབྲས་མི་བསླུ་བའི་ཕྱིར། དཔེར་ན་འཇམ་དཔལ་བཞིན། དེའི་སྨོན་ལམ་དུ། སེམས་ཅན་རེ་རེའི་ཕྱིར་ཡང་ནི། །ཕྱི་མའི་མུ་མཐར་གནས་པར་ཤོག །ཅེས་བཏབ་པའི་ཕྱིར། སྨོན་པའི་བསླབ་བྱ་ཚད་མེད་བཞི་པོ་བསྒོམ། གཞན་ཡང་ཐེག་ཆེན་མན་ངག་ལས་བྱུང་བ་ལྟར། རྣམ་པ་བཅུ་གསུམ་གྱིས་ཕན་པ་བསྒྲུབ་དགོས་ཏེ། ཚེ་རབས་ཀྱི་ཕ་མ་ཡིན་པས་དྲིན་ཆེ་བ་དང་། བྱས་པ་མི་གཟོ་བ་དམན་པར་འགྱུར་བ་དང་། བདག་གི་ཕྱིར་སྔོན་སྡིག་པ་བྱས་པས་དེ་དག་ངན་སོང་དུ་གཞོལ་བ་དང་། དེ་དག་བདེ་སྡུག་འདོར་ལེན་གྱི་ཐབས་ལ་རྨོངས་པ་དང་། སྔར་སངས་རྒྱས་ཐམས་ཅད་ཀྱིས་བོར་བ་འདི་རྣམས་ངས་མ་དྲངས་ན་ཐེག་ཆེན་གྱི་རིགས་ཆད་པར་འགྱུར་བ་དང་། བདག་འཛིན་ཉོན་མོངས་ཀྱིས་དཀྲུགས་ཏེ་ཕྱིན་ཅི་ལོག་པས་ཀྱང་འདུལ་བའི་ཕྱིར་འབད་པས་སྨོན་ལམ་འདེབས་ལགས་གསུངས་པའི་ཕྱིར་དང་། ཆོས་ཐམས་ཅད་སྟོང་ཞིང་བདག་མེད་པ་ལ། དེ་ལྟར་མ་རྟོགས་པས་ཀྱང་སྙིང་རྗེ་བ་དང་། དེ་དག་གི་དོན་མ་བྱས་ན་རང་གི་བསླབ་པའང་འདོར་བར་འགྱུར་བ་དང་། རང་གི་བྱང་ཆུབ་སྒྲུབ་པའི་དམིགས་ཡུལ་ཡང་ཡིན་པ་དང་། གཞན་དོན་བྱས་ན་རང་དོན་ཀྱང་ཤུགས་ལ་འགྲུབ་པ་དང་། དེས་སངས་རྒྱས་མཉེས་པར་འགྱུར་བ་དང་། སེམས་ཅན་གྱི་དོན་མ་བསྒྲུབས་ན་རང་ཉིད་ཉན་རང་དུ་ལྟུང་བ་དང་། དོན་དམ་པར་དམིགས་སུ་མེད་པས་ཀུན་རྫོབ་ཏུ་གཞན་དོན་བྱེད་པ་ལ་མི་དཀའ་བས་ཀྱང་ཕན་པ་བསྒྲུབ་དགོས་པས། དེ་ལྟར་བརྩོན་པ་ཆེན་པོས། སེམས་བསྐྱེད་དེ་ཡི་མི་མཐུན་ཕྱོགས་སེམས་ཞུམ་པ་སོགས་སྤང་སེམས་བསྲུང་བར་བྱ། འཇུག་པའི་བསླབ་བྱ་ཕ་རོལ་ཕྱིན་དྲུག་སྤྱད། །དེ་ཡི་མི་མཐུན་ཕྱོགས་སྤང་བརྩོན་པར་བྱ། གསུམ་པ་དྲན་ཤེས་བག་ཡོད་ཀྱི་གནས་ལ་གདམས་པ། རྟག་ཏུ་དྲན་དང་ཤེས་བཞིན་བག་ཡོད་ཀྱིས། །མི་དགེ་སྤང་ཞིང་དགེ་ཆོས་རྒྱ་མཚོ་བསྒྲུབ། །བཞི་པ་བསྲུང་བྱ་བསླབ་མདོའི་རབ་{རང}ཏུ་དབྱེ་བ། བྱང་ཆུབ་སེམས་གཉིས་མི་ཉམས་བསླབ་བྱ་སྟེ། །ལོག་པར་ལྟ་སོགས་རྒྱལ་པོའི་ལྟུང་བ་ལྔ། །གྲོང་སོགས་བློན་པོའི་ལྔ་དང་ཕལ་པའི་བརྒྱད། །ཐུན་མོང་གཉིས་ཏེ་ཉི་ཤུ་ལྟུང་བྱེད་ལ། །ལོག་ལྟའི་ཕྱོགས་མཐུན་མ་གུས་པ་ཙམ་སོགས་ཀྱིས་མཚོན། དེ་དང་ཕྱོགས་མཐུན་ཉེས་བྱས་ཤེས་པར་བྱ། །ལོག་ལྟ་སོགས་དེ་དག་མི་ལྡན་པ་སྤང་སེམས་དགེ་བ་ལྟུང་དང་ཉེས་མེད་དེ་ཕྱོགས་མཐུན་གྱིས་ཀྱང་མ་གོས་པའོ། །དགེ་བའི་ཕྱོགས་མཐུན་ཇི་སྙེད་པ་ནི་བསླབ་བྱར་ཤེས་པར་བྱ། ལྔ་པ་སྤང་བླང་ངེས་པའི་གནས་གཞན་བསྟན་པ་ལ་གསུམ། ཆོས་བཞི་ངེས་པའི་བླང་དོར་བསམ་པ། གཞན་དོན་ངེས་པའི་བླང་དོར། གང་དག་ངེས་པའི་དབྱེ་བ་བསམ་པའོ། །དང་པོ་ཆོས་བཞི་ངེས་པའི་བླང་དོར་བསམ་པ་ལ་གསུམ། དང་པོ་ཆོས་བཞི་བླང་དོར་མདོར་བསྟན་པ། མདོར་ན་སྨོན་པའི་སྲུང་མཚམས་ནག་པོའི་ཆོས་བཞི་སྤང་བྱ་ཞིང་། དཀར་པོའི་ཆོས་བཞི་དག་ལ་ནན་ཏན་བྱ། གཉིས་པ་ནག་པོའི་ཆོས་བཞི་རྒྱས་པར་བཤད་པ། བླ་མ་དང་མཆོད་འོས་བསླུ་དང་གཞན་འགྱོད་པ་མེད་ལ་འགྱོད་པ་བསྐྱེད། རྒྱལ་སྲས་དམ་པ་རྣམས་ལ་མི་སྙན་སྒྲོགས་པ་དང་། འགྲོ་བའི་ནང་ན་གཡོ་དང་སྒྱུའི་སྤྱོད་པ། །ནག་པོའི་ཆོས་བཞི་ལགས་པས་སྤང་འཚལ་ལོ། །གསུམ་པ་དཀར་པོའི་ཆོས་བཞི་རབ་ཏུ་དབྱེ་བ། ཤེས་བཞིན་རྫུན་སྨྲ་སྤངས་ནས་དམ་པ་བསྟེན་ཞིང་ཡོན་ཏན་བསྔགས་པ་བརྗོད། སེམས་ཅན་རྣམས་ནི་ཡང་དག་དགེ་ལ་བསྐུལ། །རྒྱལ་སྲས་རྣམས་ལ་སྟོན་པའི་དུ་ཤེས་བསྐྱེད། །གཡོ་སྒྱུ་མེད་པའི་ལྷག་པའི་བསམ་པས་འགྲོ་ལ་ཕན་བདེ་བྱེད་པ་སྟེ། དཀར་པོའི་ཆོས་རབ་བཞི་པོ་བསྟེན་པར་མཛོད། གཞན་ཡང་ཏིང་འཛིན་རྒྱལ་པོ་ལས་གསུངས་པ། དགེ་བའི་བཤེས་གཉེན་ལ་སངས་རྒྱས་ཀྱི་འདུ་ཤེས། དེའི་ཆོས་ལ་ལམ་གྱི་འདུ་ཤེས། དེ་སྒྲུབ་པ་གྲོགས་ཀྱི་འདུ་ཤེས། སེམས་ཅན་ཐམས་ཅད་ལ་བུ་གཅིག་པའི་འདུ་ཤེས་ཏེ་འདུ་ཤེས་བཞི་ཡང་བསྐྱེད་པར་བྱའོ། །གཉིས་པ་གཞན་དོན་ངེས་པའི་བླང་དོར་བསམ་པ། འཇུག་སེམས་ཀྱི་བསྲུང་ཚུལ་རང་དོན་ལས་ཀྱང་གཞན་ཕན་གཙོར་འཛིན་པ། བྱང་ཆུབ་སེམས་དཔའ་རྣམས་ཀྱི་བསླབ་པ་སྟེ། གཞན་དོན་དུ་འགྱུར་བ་དང་། འགྱུར་བ་ཤེས་པ་དང་། དགེ་ཚོགས་མི་འགྲིབ་པ་གསུམ་ཚང་ན་ལུས་ངག་མི་དགེ་བ་བདུན། གནང་བའི་སྐབས་ཡོད་དོན་ལ་དགེ་བ་ཡིན། །ཡིད་གསུམ་ནམ་ཡང་གནང་བའི་སྐབས་མེད་དོ། །རང་དོན་ཞི་བདེ་འདོད་པའི་དགེ་བ་ཡང་། །རྒྱལ་སྲས་བྱང་ཆུབ་སེམས་དཔའི་ལྟུང་བ་སྟེ། །གཞན་ཕྱིར་ཕན་ན་མི་དགེ་གང་ལགས་པ། །དེ་ཡང་བསླབ་བྱ་ལགས་པར་རྒྱལ་བས་གསུངས། །དེའང་སྤང་བྱ་སྤོང་བའི་ཚུལ། ཤེས་བྱ་ཤེས་པའི་ཚུལ། བསྒྲུབ་བྱ་སྒྲུབ་པའི་ཚུལ་གྱིས་བསླབ་པ་གསུམ་ལས། སྔ་མ་ནི་རྩ་ལྟུང་དང་། མི་དགེ་བ་སོགས་གནང་བཀག་ཤེས་པས་བསྡོམ་པའོ། །བར་པ་ནི་སྤྱིར་ཤེས་བྱ་རིག་པའི་གནས་ལྔ་ལ་བསླབ་པ་དང་། ཁྱད་པར་བསླབ་སྡོམ་གྱི་རིམ་པ་ཤེས་པར་བྱ་བ་སྟེ་ལྟུང་ལྟུང་མེད་ཀྱི་དབྱེ་བསལ་དང་། བྱེ་བྲག སྨོན་སེམས་ཉམས་པའི་རྐྱེན་ཞུམ་པ་སྒྱིད་ལུག ལམ་གཞན་ལ་འཇུག་པ་སྟེ་གསུམ་དང་། འཇུག་སེམས་ཉམས་རྐྱེན། རྟེན་གཞི་སྨོན་པ་ཤོར་བ། འགལ་ཟླ་རྩ་ལྟུང་བྱུང་བ། སྤོང་རྐྱེན་བསླབ་པ་ཕུལ་བ་གསུམ་སོགས་ཤེས་པར་བྱས་ནས། ཉམས་པའི་ཉེས་པ་དང་། གོམས་ཐབས་སོགས་ལ་མཁས་པར་བྱ་བའོ། །ཕྱི་མ་བསྒྲུབ་ཚུལ་ལས། ཐེག་ཆེན་དབུ་མ་ལུགས་ལ། ནམ་མཁའི་སྙིང་པོའི་མདོ་ཡི་རྗེས་སུ་འབྲངས་ཏེ། དཀོན་མཆོག་གི་དཀོར་འཕྲོག་པ། དམ་པའི་ཆོས་སྤང་བ། རབ་བྱུང་ལ་ཆད་པ་གཅོད་པ། མཚམས་མེད་ལྔ་ལས་གང་རུང་བྱེད་པ། ལོག་པའི་ལྟ་བ་འཛིན་པ་སྟེ་བྱང་སེམས་རྒྱལ་པོ་ལ་འབྱུང་ཉེ་བ་ལྔ་དང་། སྔ་མ་བཞི་པོའི་སྟེང་དུ། གྲོང་། ལྗོངས། གྲོང་ཁྱེར། གྲོང་རྡལ། ཡུལ་འཁོར་འཇོམས་པ་རྣམས་བསྣན་པ་བློན་པོ་ལ་ཉེ་བ་ལྔ། བློ་མ་སྦྱངས་པར་སྟོང་ཉིད་སྟོན་པ། ཐེག་ཆེན་གྱི་རིགས་ཅན་ཐེག་དམན་ལ་འགོད་པ། སོ་ཐར་སྤང་དུ་བཅུག་པ། ཐེག་དམན་གྱི་ལམ་ལ་འབྲས་བུ་མེད་པར་འཛིན་པ། ཕྲག་དོག་གིས་བདག་བསྟོད་གཞན་སྨོད། རྙེད་བཀུར་གྱི་ཆེད་དུ་བདག་ཉིད་ལ་བསྟོད་པ། དགེ་སློང་གི་རྫས་དབང་པོ་ཆེ་གཞན་ལ་སྦྱིན་པ། སྤོང་བའི་ལོངས་སྤྱོད་ཁ་ཏོན་པ་ལ་བྱིན་ནས་ཞི་གནས་འདོར་དུ་བཅུག་པ་སྟེ་ཕལ་ལ་ཉེ་བ་བརྒྱད་དང་། དེའི་སྟེང་ཐུན་མོང་དུ་སྨོན་འཇུག་གི་སེམས་གཉིས་འདོར་བ་སྟེ་རྩ་ལྟུང་ཉི་ཤུའོ། །རྣལ་འབྱོར་སྤྱོད་པའི་ལུགས། རྙེད་བཀུར་གྱི་ཕྱིར་དུ་བདག་བསྟོད་གཞན་སྨོད། སེར་སྣའི་དབང་གིས་ཆོས་ནོར་མི་སྟེར་བ། ཁྲོ་བས་བཤགས་ཀྱང་སླར་འཚོག་པ། ཐེག་ཆེན་སྤངས་ཤིང་དམ་ཆོས་འདྲ་སྣང་སྟོན་པ་སྟེ་རྩ་ལྟུང་བཞིར་གསུངས། ལེན་ཚུལ་ཡང་སེམས་ཙམ་ལུགས་ལ་ལན་གསུམ་ལས་ལྷག་པར་བླང་དུ་མེད་པར་བྱང་ས་ལས་བཤད་། དབུ་མའི་ལུགས་ལ་ལན་གྲངས་ཇི་ཙམ་བླང་ཡང་སྐྱེ་བར་བཞེད་དོ། །གསུམ་པ་གང་ཟག་ངེས་པའི་དབྱེ་བ་བསམ་པ། གང་གིས་སྒྲུབ་པའི་གང་ཟག་གི་རིམ་པ། རྒྱལ་སྲས་དེ་ཡང་རྣམ་པ་གསུམ་ཉིད་དེ། །རང་ཉིད་གྲོལ་ནས་འགྲོ་བ་སྒྲོལ་འདོད་པ། །རྒྱལ་པོ་ལྟ་བུའི་བྱང་ཆུབ་སེམས་དཔའ་དང་། །རང་དང་འགྲོ་བ་མཉམ་དུ་ཐར་འདོད་པ། །གྲུ་བ་ལྟ་བུའི་བྱང་ཆུབ་སེམས་དཔའ་དང་། །འགྲོ་བ་བསྒྲལ་ནས་རང་ཉིད་ཞི་འདོད་པ། །རྫི་བོ་ལྟ་བུའི་བྱང་ཆུབ་སེམས་དཔའ་གསུམ། །རིམ་བཞིན་གྲངས་མེད་སུམ་ཅུ་རྩ་གསུམ་དང་། །བདུན་དང་གསུམ་གྱིས་གྲོལ་བ་ཐོབ་པ་ནི། །དབང་པོའི་རིམ་པར་ལགས་པ་མདོ་ལས་གསུངས། །གཉིས་པ་སྤྱོད་པ་རླབས་པོ་ཆེའི་གནས་བྱེ་བྲག་ཏུ་བཤད་པ་ལ་གསུམ། མདོར་བསྟན། རྒྱས་པར་བཤད། དོན་བསྡུ་བའོ། །དང་པོ་མདོར་བསྟན། རྒྱལ་སྲས་རྣམས་ཀྱིས་ཀུན་ལ་བསླབ་པ་སྟེ། །གཙོ་བོ་ཕ་རོལ་ཕྱིན་པ་དྲུག་ལ་བསླབ། །ཡོན་ཏན་བཞི་སོགས་སྤྱིར་བསྟན་ནས། གཉིས་པ་རྒྱས་པར་བཤད་པ་ལ་དྲུག་ལས། དང་པོ་སྦྱིན་པའི་ཕ་རོལ་ཏུ་ཕྱིན་པ་ནི། བྱེ་བྲག་འགྲོ་བ་དབུལ་བས་ཉམ་ཐག་མཐོང་ནས་ནི། ཟས་གོས་རྟ་དང་ཤིང་རྟ་གླང་པོ་སོགས། །མཁོ་དགུའི་ཡོ་བྱད་དཔག་མེད་གཏོང་བ་སྟེ། །བུ་དང་བུ་མོ་ལ་སོགས་གཏོང་བ་ཆེ། །མགོ་དང་མིག་སོགས་ཤིན་ཏུ་གཏོང་བ་སྟེ། །ཟང་ཟིང་དང་ནི་ཆོས་ཀྱིས་ཕན་པ་བསྒྲུབ། །དེའང་ངོ་བོ་སེར་སྣ་མེད་པ་རྒྱུ་གཏོང་སེམས་དག་པ། འབྲས་བུ་ལུས་ལོངས་སྤྱོད་ཕུན་སུམ་ཚོགས་པ་བསྒྲུབ་པ། བྱེད་ལས་རང་གཞན་གཉིས་རྗེས་སུ་འཛིན་ཅིང་ཚོགས་གཉིས་རྫོགས་པར་བྱེད་པས། དེས་ནི་རང་གི་སེར་སྣའི་ཚོགས་འཇོམས་ཤིང་། གཞན་དོན་གྱི་འབྱོར་པ་ཉེ་བར་སྐྱེ་བར་འགྱུར། གཉིས་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་གསུམ། དང་པོ་བསླབ་གསུམ་སྤྱིར་བསྟན་པ། ཕྱི་རོལ་པ་ལ་མེད་པས་ལྷག་པའི་ཚུལ་ཁྲིམས་ཀྱིས་ནི་རྒྱུད་ཉེས་སྤྱོད་བསྡོམས་ཤིང་། སེམས་ཀྱིས་དགེ་བ་ཆོས་སྡུད་ཞི་བ་རྣམས་བསྒྲུབས་ལ། ཐབས་ལ་མཁས་པས་གཞན་དོན་སྒྲུབ་པ་ཤེས་རབ་ཀྱིས་ནི་དོན་གཉིས་ཕུན་ཚོགས་འཐོབ་སྟེ། སངས་རྒྱས་པ་ན་སྡོམ་པས་སྒྲིབ་པ་སྤང་། ཆོས་སྡུད་ཀྱིས་ཇི་ལྟ་ཇི་སྙེད་གཉིས་འགྲུབ། དོན་བྱེད་ཀྱིས་ཕྲིན་ལས་ལྷུན་གྱིས་གྲུབ་པ་ཐོབ། གཉིས་པ་ཚུལ་ཁྲིམས་གསུམ་བསྟན་པ། སྡོམ་དང་ཆོས་སྡུད་སེམས་ཅན་དོན་བྱེད་དེ། །རྒྱལ་སྲས་རྣམས་ཀྱིས་ཚུལ་ཁྲིམས་གསུམ་རྟག་བསྲུང་། །གསུམ་པ་བསྲུང་བྱ་ངེས་པར་བཟུང་བ། ཁྱིམ་པས་དགེ་བསྙེན་བསྙེན་གནས་སྨོན་འཇུག་ལ། །རབ་ཏུ་བྱུང་བས་དགེ་སློང་དགེ་ཚུལ་དང་། །དགེ་སློབ་མ་ཡི་སྡོམ་པ་གང་ཡིན་སྟེང་། །བྱང་ཆུབ་སེམས་གཉིས་བསྲུང་བ་ཚུལ་ཁྲིམས་ཡིན། །གསུམ་པ་བཟོད་པ་ལ་བདུན། དང་པོ་བཟོད་པ་གསུམ་གྱི་དབྱེ་བ། ཕྱི་ནང་གནོད་པ་སྣ་ཚོགས་ལ་མི་ཁྲོ་བའི་བཟོད་པའམ། ཆོས་ཕྱིར་དཀའ་སྤྱད་ཀྱི་སྡུག་བསྔལ་ལ། ཇི་མི་སྙམ་དང་ལེན་དང་སྙིང་རྗེས་གཞན་དོན་ལ་སྐྱོ་ངལ་མེད་པ་དང་ཆོས་ལ་སོམ། དམིགས་མེད་ལ་མི་སྐྲག་པའི་བཟོད་པ་གསུམ་ཡང་བསྒྲུབ་པར་བྱ། གཉིས་པ་བཟོད་པ་སྒོམ་པའི་འཐད་པ། ཞེ་སྡང་ལྟ་བུའི་སྡིག་པ་འགའ་མེད་ལ། །བཟོད་མཚུངས་དཀའ་ཐུབ་བསོད་ནམས་གཞན་མེད་པས། །སྣ་ཚོགས་ཚུལ་གྱིས་བཟོད་ལ་ནན་ཏན་དུ། །ཁྲོ་བའི་མེ་ཆེན་འཇིལ་ལ་བརྩོན་པར་བྱ། །གསུམ་པ་རང་སེམས་འདུལ་བའི་རྒྱུ་མཚན། གནོད་པའི་ཡུལ་རྣམས་མི་བསྲུན་གྲངས་མེད་པས། །རེ་རེ་ཞིང་ཡང་གདུལ་བར་ཡོང་མི་ལོང་། །སེམས་གཅིག་བཏུལ་བས་ཐམས་ཅད་དུལ་འགྱུར་བ། །སེམས་འདུལ་བརྟུལ་ཞུགས་བསྲུང་ལ་ནན་ཏན་མཛོད། །བཞི་པ་ཡུལ་ལ་བཟོད་པའི་རིགས་པ་བརྗོད་པ། གནོད་ལ་བརྟེན་ནས་བཟོད་པའི་ལེགས་པ་འགྲུབ། །སྙིང་རྗེ་དང་ནི་བྱམས་སོགས་ཡོན་ཏན་སྐྱེ། །བྱང་ཆུབ་གྲོགས་གྱུར་དགྲ་ལ་སྟོན་པ་བཞིན། །གུས་དང་སྤྲོ་བས་བཟོད་པ་ཉེ་བར་བསྟེན། །ལྔ་པ་རང་གིས་ཉེས་པའི་རྒྱུན་མཚན་བསམ་པ། གཞན་ཡང་བདག་ཉིད་མེད་ན་མི་འབྱུང་ལ། །བྲག་ཅ་བཞིན་དུ་ཕན་ཚུན་བརྟེན་པ་ཅན། །རང་གིས་ཉེས་གྱུར་གནོད་པའི་ཚོགས་རབ་འདི། །འཕྲལ་གྱི་རྐྱེན་དང་སྔོོན་ལས་རྒྱུས་བསྐྱེད་ཕྱིར། །འདི་འབྱུང་རིགས་ཏེ་ལས་ཟད་ཐབས་འདི་ལ། །ཅི་ནས་སེམས་འདུལ་གཅིག་པུ་བསྲན་ཚུགས་བྱ། །དྲུག་པ་སེམས་ལོག་པའི་གློད་ཐབས་བསྟན་པ། མི་འདོད་ཐོག་ཏུ་བབ་ལ་མི་དགའ་བཏང་། །བཅོས་སུ་ཡོད་ན་མི་དགའ་ཅི་དགོས་ལ། །མེད་ན་ཕན་པ་མེད་པས་ཅི་བྱར་ཡོད། །དེ་བས་རྐྱེན་རྣམས་བཟོད་ལ་ནན་ཏན་བྱ། །བདུན་པ་ཆོས་ཀྱི་དོན་གྱི་བཟོད་པ་བཤད་པ། བརྟགས་ན་མཁའ་བཞིན་སྟོང་པའི་རང་བཞིན་ལ། །དགའ་དང་མི་དགའ་ཤོར་གོད་ལེགས་ཉེས་མེད། །དེ་ལ་གཉིས་སུ་བཟུང་ཡང་དོན་མེད་ཀྱིས། །ཐམས་ཅད་མཉམ་ཉིད་ངང་ལ་ནན་ཏན་མཛོད། །བཞི་པ་བརྩོན་འགྲུས་གྱི་ཕ་རོལ་ཏུ་ཕྱིན་པ་ལ་བཞི། དང་པོ་བརྩོན་འགྲུས་བསྐྱེད་པའི་འཐད་པ་དགོད་པ། གང་ལ་བརྩོན་པའི་རང་བཞིན་དགེ་ལ་སྤྲོ། །དེ་ལ་དགེ་ཆོས་མི་ཟད་སྤྲིན་བཞིན་འདུ། །དྲི་ཞིམ་པདྨའི་ཚལ་དུ་བུང་བ་བཞིན། །གཉིས་པ་དེའི་མི་མཐུན་ཕྱོགས་བསྟན་པ། དེ་ཡི་མི་མཐུན་ཕྱོགས་གང་ལེ་ལོ་གསུམ། །བྱ་བ་ངན་ཞེན་ཚོང་སོ་ནམ་སོགས་འཇིག་རྟེན་པའི་དང་། དཀའ་བ་མཐོང་ནས་མི་འགྲུབ་སྙམ་སྟེ་སྦྱོར་བ་བཏང་བ་སྒྱིད་ལུག་པ། བདག་འདྲས་མི་ནུས་ཞེས་བདག་ཉིད་བརྙས། ལེགས་པ་མི་འགྲུབ་ཉེས་ཀུན་འབྱུང་བའི་གཞི། །ཕུན་ཚོགས་ཉམས་ལ་རྒུད་པ་སྐྱེ་བར་འགྱུར། །གསུམ་པ་དེའི་གཉེན་པོ་བརྩོན་འགྲུས་ཀྱི་ཡོན་ཏན་བསྔགས་པ། བརྩོན་འགྲུས་ལྡན་པ་འཇིག་རྟེན་གྱིས་བསྟོད་ཅིང་། །བརྩོན་འགྲུས་ལྡན་པ་མི་ཡི་བསམ་པ་འགྲུབ། །བརྩོན་འགྲུས་ལྡན་པ་ཡོན་ཏན་ཚོགས་འཕེལ་ཞིང་། །བརྩོན་འགྲུས་ལྡན་པ་མྱ་ངན་འདའ་བར་འགྱུར། །བཞི་པ་བརྩོན་འགྲུས་དངོས་ཀྱི་བརྩམས་ཚུལ་བསྟན་པ། དེ་ཡང་འཇིག་རྟེན་དགེ་ཆོས་མཆོག་རྣམས་དང་། །འཇིག་རྟེན་འདས་པའི་ལམ་ནི་གང་ཡིན་པ། །ཟག་བཅས་ཟག་པ་མེད་པའི་ཆོས་རྣམས་ལ། །མི་དགེ་སྤང་ཞིང་དགེ་བ་བསྒྲུབ་པའི་ཕྱིར། །ལུས་ཀྱིས་འབད་ཡིད་ཀྱིས་རྩོལ་ངག་གིས་བརྩོན་པས་ཡང་དག་གནས་པར་བྱ། དེའང་དབྱེ་ན། དགེ་བ་བསྒྲུབ་ཅིང་བདུད་བཞི་འཇོམས་པའི་རྒྱུ་གོ་ཆའི་བརྩོན་འགྲུས་དང་། ལམ་ལྔ་ས་བཅུ་རྫོགས་པར་བྱེད་པའི་རྒྱུ་སྦྱོར་བའི་བརྩོན་འགྲུས། རང་གཞན་གྱི་དོན་འགྲུབ་པའི་རྒྱུ་སེམས་ཅན་དོན་བྱེད་ཀྱི་བརྩོན་འགྲུས་གསུམ་མམ། ཡང་ན་ཀུན་བཏུས་ལས། གོ་ཆ། སྦྱོར་བ། མི་འགོད་པ། མི་ལྡོག་པ། ཆོག་པར་མི་འཛིན་པ་ལ་སེམས་མངོན་པར་སྤྲོ་བ། ཞེས་སོ། །ཇི་སྲིད་སངས་རྒྱས་མ་ཐོབ་བར་དུ་ནི། །ཆེས་ཆེར་གོང་དུ་ཡང་དག་འགྲོར་ཡོད་པས། །དེ་སྲིད་མི་ངལ་འབད་པས་བརྩོན་འགྲུས་བརྩམས། །ལྔ་པ་བསམ་གཏན་གྱི་ཕ་རོལ་ཏུ་ཕྱིན་པ་ལ་བཅུ་གཅིག དང་པོ་འགྱུར་ཞིང་མི་རྟག་པའི་རང་བཞིན་བསམ་ནས་བསམ་གཏན་ལ་བསྐུལ་བ། བསམ་གཏན་འདོད་པས་རྣམ་གཡེང་འདུ་འཛི་སྤང་། །ཡུལ་གྱི་དགའ་བ་སྟོན་ཀའི་སྤྲིན་འདྲ་ཞིང་། །གློག་ལྟར་མི་བརྟན་གཡོ་བའི་རང་བཞིན་ཏེ། །ལོངས་སྤྱོད་མི་རྟག་སྒྱུ་མའི་ཁང་བཟང་འདྲ། །ནམ་ཡང་ཡིད་བརྟན་མི་རུང་དེ་སྤངས་ཏེ། མྱུར་བ་ཉིད་དུ་ཞི་བའི་ནགས་འདབ་བསྟེན། །གཉིས་པ་འདོད་པ་རྣམས་ཀྱི་ཉེས་དམིགས་ལ་བསམས་ནས་བསམ་གཏན་ལ་བསྐུལ་བ། འདོད་པ་རྣམས་ནི་ཕུང་ཁྲོལ་བསྐྱེད་པ་སྟེ། །བསག་དང་བསྲུང་དང་ཚོལ་བས་སྡུག་བསྔལ་ཞིང་། །ཁེངས་དང་སྲེད་དང་འཇུངས་པས་སེར་སྣ་འཕེལ། །ངན་འགྲོར་འཁྲིད་ཅིང་བདེ་འགྲོའི་ལམ་འགོག་པས། །འདོད་པ་ཆུང་དང་ཆོག་ཤེས་ལྡན་པར་བྱ། །གསུམ་པ་ཡོ་བྱད་བསྙུངས་པའི་ཕན་ཡོན་ལ་བསམས་ནས་བསམ་གཏན་ལ་བསྐུལ་བ། ལུས་རྨ་ཇི་སྙེད་སྡུག་བསྔལ་ཁྱབ་པ་ལྟར། །ནོར་མང་ཇི་སྙེད་སྡུག་བསྔལ་དེ་བས་མང་། །ཡོ་བྱད་བསྙུངས་རྣམས་བདེ་བ་མཐའ་ཡས་ཏེ། །འཚེ་བ་ཉུང་ཞིང་དགྲ་རྐུན་འཇིགས་པ་མེད། །ཀུན་གྱིས་བསྟོད་ཅིང་འཕགས་པའི་ལམ་ལ་གནས། །བྱ་བ་ཉུང་ཞིང་སེམས་ལས་ཆུང་བས་ན་ཏིང་ངེ་འཛིན་འགྲུབ་པས། རྟག་ཏུ་འདོད་པ་ཆུང་ལ་བསླབ་པར་བྱ། །བཞི་པ་བཤེས་དང་འགྲོགས་པའི་ཉེས་པ་བསམས་ནས་བསམ་གཏན་ལ་བསྐུལ་བ། བྱིས་དང་འགྲོགས་པའི་ཉེས་པ་ཚད་མེད་དེ། །སྡིག་པ་འཕེལ་ཞིང་མི་དགེ་ངང་གིས་འགོ །དགེ་བ་འགྲིབ་ཅིང་རྩོད་དང་ཉོན་མོངས་སྐྱེ། །བྱས་པ་མི་གཟོ་ནམ་ཡང་མགུ་བ་དཀའ། །དོན་མེད་བྱ་བ་མང་ཞིང་འདུ་འཛིའི་གཡེང་། །མེ་དང་སྦྲུལ་དང་གཅན་གཟན་ཁྲོད་འདྲ་བའི། །བྱིས་པ་རྣམས་ལས་ཐག་རིང་འབྱོལ་བར་བྱ། །ལྔ་པ་འདུ་འཛིས་བསླུ་བའི་རྒྱུ་མཚན་བསམས་ནས་བསམ་གཏན་ལ་བསྐུལ་བ། ཇི་སྲིད་སེམས་ལ་བརྟན་པ་མ་ཐོབ་པར། །ཕྱི་རོལ་ཡུལ་གྱིས་རབ་ཏུ་སླུ་བས་ན། །དབེན་པའི་གནས་སུ་སྤྲོ་བས་གནས་པར་བྱ། །དྲུག་པ་གཅིག་པུར་འགྲོ་བའི་རང་བཞིན་བསམས་ནས་བསམ་གཏན་ལ་བསྐུལ་བ། ཇི་སྲིད་སྐྱེས་བུ་བཞི་ཡིས་བཏེག་པའི་ལུས། །ངུད་མོའི་སྒྲ་དང་བཅས་པར་མ་གྱུར་བར། །བདག་ནི་ཞི་བའི་དགོན་པར་རབ་ཕྱོགས་ཏེ། །ལུས་སེམས་འདུ་འཛིའི་དགྲ་ལས་རྒྱལ་བར་བྱ། །བདུན་པ་ནགས་ཁྲོད་དབེན་པའི་ཡོན་ཏན་བསམས་ནས་བསམ་གཏན་ལ་བསྐུལ་བ། ནགས་ནི་ཆུ་གཙང་མེ་ཏོག་འབྲས་མང་ཞིང་། །བྲག་རིའི་ཕུག་དང་རྡོ་ལེབ་ཁང་བཟང་མང་། །དུད་པའི་ལྗོན་ཤིང་གྲིབ་མས་བརྒྱན་པའི་ཁྲོད། །བྱ་དང་རི་དྭགས་མང་པོ་གར་བྱེད་ཅིང་། །ཆུ་འགྲམ་མེ་ཏོག་བུང་བ་གླུ་ལེན་མཛེས། །བརྒྱད་པ་དེའི་གནས་ཀྱི་བཀོད་པ་བསམ་ནས་བསམས་གཏན་ལ་བསྐུལ་བ། སྤོས་དང་སྨན་སོགས་དྲི་ཞིམ་ངད་ལྡང་ཞིང་། །དབེན་ཞིང་ཉམས་དགའ་བསམ་གཏན་ངང་གིས་འཕེལ། །དུས་བཞིར་དགའ་བས་{བ་ལ}པདྨའི་མཚོ་འདྲ་སྟེ་སེར་བུའི་རླུང་གིས་སྨན་དང་མེ་ཏོག་གི་དྲི་ཞིམ་གྱི་ངད་ལྡང་ཞིང་། སོ་ཀ་དབྱར་དང་སྟོན་དུས་དགུན་དང་དཔྱིད། །རིམ་གྱིས་འགྱུར་བས་མི་རྟག་སྐྱོ་ཤས་འཕེལ། །དགུ་པ་མི་རྟག་སྐྱོ་བའི་རང་བཞིན་བསམས་ནས་བསམ་གཏན་ལ་བསྐུལ་བ། དུར་ཁྲོད་རུས་པ་འཐོར་བའི་ཚུལ་མཐོང་ནས། །བདག་གི་ལུས་ཀྱང་དེ་འདྲའི་ངང་ཚུལ་ཅན། །སོ་སོར་འགྱེས་ཆོས་ཅན་དུ་མཐོང་བར་འགྱུར། །འདུས་བྱས་སྙིང་པོ་མེད་པའི་འཁོར་བ་ལ། །དགའ་བའི་བློ་གྲོས་གང་ཡིན་རིང་དུ་བྱེད། །རྩོད་དང་ཉོན་མོངས་མེད་ཅིང་རྟག་ཞི་བས། །རང་གི་སེམས་ནི་ལས་རུང་བདེ་བ་འཐོབ། །བཅུ་པ་ནགས་ཚལ་བསྔགས་པའི་ཕན་ཡོན་བསམས་ནས་བསམ་གཏན་ལ་བསྐུལ་བ། དེ་འདྲའི་ནགས་ནི་རྒྱལ་བ་རྣམས་ཀྱིས་བསྔགས། །སྲིད་ལ་སྐྱོ་བས་དགོན་པར་རབ་ཕྱོགས་ཏེ། །གོམ་པ་བདུན་ཙམ་བོར་བའི་བསོད་ནམས་ནི། །གང་གིས་བསྐལ་པ་གངྒཱའི་སངས་རྒྱས་ལ། །བསྐལ་པར་མཆོད་པའི་བསོད་ནམས་ཕུང་པོ་ཡིས། །སྔ་མའི་བསོད་ནམས་བརྒྱ་སྟོང་ཆར་མི་ཕོད། །ཅེས་ཏིང་འཛིན་རྒྱལ་པོ་ལས་སོ། །དེ་ཕྱིར་ཞི་བའི་ནགས་འདབས་བསྟེན་པར་བྱ། །བཅུ་གཅིག་པ་བསམ་གཏན་སྒོམ་ཚུལ་དངོས་ལ་གདམས་པ། དེར་ནི་སྟན་ལ་སྐྱིལ་ཀྲུང་རབ་བཅས་ནས། །རྩེ་གཅིག་སེམས་ལ་མི་གཡོ་མཉམ་པར་བཞག །བྱིས་པ་ཉེར་སྤྱོད་དོན་རབ་འབྱེད་པ་དང་། །དེ་བཞིན་གཤེགས་དགེའི་བསམ་གཏན་དམ་པ་བསྒྲུབ། །དེ་དག་རིམ་པར་བསམ་གཏན་བཞི་དང་དེ་བཞིན་གཟུགས་མེད་བཞི། ལམ་ལ་མ་ཞུགས་པའི་རྒྱུད་ཀྱི་ཏིང་ངེ་འཛིན་བྱིས་པ་ཉེར་སྤྱོད་དང་ལམ་ལ་ཞུགས་ཟིན་པ། ཚོགས་སྦྱོར་གྱི་ལམ་པའི་ཏིང་འཛིན་ཐར་པའི་རྒྱུར་གྱུར་དོན་རབ་འབྱེད་པ། ས་དང་པོ་ཡན་གྱི་འཕགས་རྣམས་ཀྱིས། ཏིང་འཛིན་ཟག་མེད་དེ་བཞིན་གཤེགས་དགེའི་བསམ་གཏན་དེ་གསུམ་གྱི་མིང་རྣམས་ཤེས་པར་བྱ། དེས་ནི་འདོད་ཡོན་དགའ་བའི་སེམས་སྤོང་ཞིང་། །རིག་དང་མངོན་ཤེས་ཏིང་འཛིན་མངོན་པར་འགྲུབ། །སྤྱན་དང་རྫུ་འཕྲུལ་སེམས་ལ་རང་དབང་བསྒྱུར། །དྲུག་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གསུམ། དང་པོ་ཤེས་རབ་གསུམ་གྱི་རང་བཞིན་ལ་གདམས་པ། ཤེས་རབ་གསུམ་སྟེ་ཐོས་བསམ་སྒོམ་པ་ཉིད་དེ། འདིར་གཞལ་བྱེད་དྲང་ངེས། དགོངས་ལྡེམ་བཞི་སྟེ། གཤིས་གྱི་གནས་ལུགས་སྟོན་པ་ངེས་དོན། གཤིས་ལ་འཇུག་པའི་ཐབས་བསྟན་པ་དྲང་དོན། དགོངས་པ་ནི་ཡིད་ལ་རྣམ་པར་བཞག་པ་ཙམ་སྟེ། དབྱེ་ན། མཉམ་པ་ཉིད་དང་། དོན་གཞན་དང་། དུས་གཞན་དང་། གང་ཟག་གི་བསམ་པ་ལ་དགོངས་པ་བཞི། ལྡེམ་དགོངས་ནི་ཕ་རོལ་གཟུད་པ་ལ་ལྟོས་པ་སྟེ། ཞུགས་པ་དང་། མཚན་ཉིད་དང་། གཉེན་པོ་དང་། བསྒྱུར་བ་ལྡེམ་དགོངས་བཞིའོ། །གཞལ་བྱ་བདེན་གཉིས་དང་། རྟེན་འབྲེལ་ལས། བདེན་གཉིས་ནི། སྣང་ལུགས་ཀུན་རྫོབ་སྟེ་མ་དག་པ་འཁོར་བའི་འཁྲུལ་སྣང་དང་། དག་པ་འོག་མིན་ན་བཞུགས་པའི་གཟུགས་སྐུ་སོགས་འཁྲུལ་མ་འཁྲུལ་ཐམས་ཅད་དང་། དེའི་གནས་ལུགས་ནི་དོན་དམ་སྟེ། མཚན་ཉིད་སྤྲོས་པ་ཐམས་ཅད་དང་བྲལ་བ་སྟེ། རྩ་ཤེས་ལས། གཞན་ལས་ཤེས་མིན་ཞི་བ་དང་། །སྤྲོས་པ་རྣམས་ཀྱིས་མ་སྤྲོས་པ། །རྣམ་རྟོག་མེད་དོན་ཐ་དད་མེད། །དེ་ནི་དེ་ཡི་མཚན་ཉིད་དོ། །ཞེས་སོ། །དེས་ན་དོན་དམ་པར་དབྱེར་མེད་ལ། ཐ་སྙད་དུ་དབྱེར་ཡོད་དེ་ངོ་བོ་གཅིག་ལ་ལྡོག་པ་ཐད་དོ། །ཡང་ན་ཡུལ་གྱི་རྣམ་པ་ནི་ཡུལ་ཅན་ལ་ལྟོས་ནས་འཇོག་པས། ཆོས་ཅན་འཁྲུལ་པའི་སྣང་བ་ཀུན་རྫོབ་དང་། ཆོས་ཉིད་མ་འཁྲུལ་པའི་གཤིས་ལུགས་རང་བཞིན་གྱིས་འོད་གསལ་བ་དོན་དམ་སྟེ་གཉིས་སོ། །རྟེན་འབྲེལ་ལ་གསུམ་ལས། གཤིས་ཀྱི་རྟེན་འབྲེལ་ཆོས་ཐམས་ཅད་ཀྱི་རང་བཞིན་ཡེ་ནས་སྤྲོས་བྲལ་རྣམ་པར་དག་པ། འཁོར་བའི་རྟེན་འབྲེལ་ཕྱི་ནང་གཉིས་སུ་འཁོར་ཏེ། མ་རིག་པ་ནས། འདུ་བྱེད། རྣམ་ཤེས། མིང་གཟུགས། སྐྱེ་མཆེད་དྲུག རེག་པ། ཚོར་བ། སྲེད་པ། ལེན་པ། སྲིད་པ། སྐྱེ་བ། རྒ་ཤིའི་ལུགས་ལས་འབྱུང་བ་བཅུ་གཉིས་སོ། །མྱང་འདས་ཀྱི་རྟེན་འབྲེལ་ལུགས་ལྡོག་སྟོང་པ་བཅུ་གཉིས། ལམ་དང་འབྲས་བུ་སངས་རྒྱས་ནས་སེམས་ཅན་གྱི་དོན་མཛད་པ་རྣམས་སོ། །དེ་ལྟར་ཤེས་པའི། ལྷག་མཐོང་གྲུབ་པས་ཉོན་མོངས་ཚོགས་སྤོང་ཞིང་། །ཆོས་དང་ཆོས་ཅན་གནས་ལུགས་རབ་ཤེས་ནས། །སྲིད་པའི་གྲོང་ལས་མྱ་ངན་འདས་ཞིར་འགྲོ། །གཉིས་པ་ཤེས་རབ་རང་གི་ངོ་བོ་བསྟན་པ། དེ་ལྟར་གཏན་ལ་ཕབ་པའི་དོན། སྣང་འདི་གདོད་ནས་མ་སྐྱེས་གཟུགས་བརྙན་བཞིན། །ངོ་བོ་མེད་ལ་སྣ་ཚོགས་སྣང་བ་སྟེ། །རིམ་ལྔ་ལས། ཀུན་རྫོབ་དང་ནི་དོན་དམ་དག །སོ་སོའི་ཆར་ནི་ཤེས་གྱུར་ཏེ། གང་དུ་ཡང་དག་འདྲེས་གྱུར་པ། །ཟུང་དུ་འཇུག་པ་དེ་བཤད་དོ། །ཞེས་གསུངས་པ་ལྟར། གཤིས་སྣང་སྟོང་ཟུང་འཇུག་སྨྲ་བསམ་བརྗོད་མེད་བློ་འདས་ཆེན་པོ་ཉིད་རྟོགས་པར་བྱ་སྟེ། དེ་ལ་དོན་དམ་བདེན་པ་བློས་རྟོགས་སམ་མི་རྟགས་ཞེ་ན། དོན་དམ་བདེན་པའི་ངོ་བོ་རྟོགས་བྱ་རྟོགས་བྱེད་ལས་འདས་པས་རྟོགས་པར་གཞག་ཏུ་མེད་དེ། དཀོན་བརྩེགས་ལས། འོད་སྲུང་། དོན་དམ་པ་སྟོང་པ་ཉིད་གང་ཡིན་པ་དེ་ནི་སུས་ཀྱང་བལྟར་མེད་པ། མངོན་དུ་བྱར་མེད་པ། ཐོབ་པ་མེད་པ། མ་ཐོབ་པ་མེད་པ་ཡིན་ནོ་ཞེས་སོ། །འོ་ན་འཕགས་པས་མ་རྟོགས་ས མ་ཞེ་ན། དོན་དམ་པ་དང་མཐུན་པའི་བློ་སྐྱེས་པ་ལས་དེ་སྐད་དུ་བཏགས་ཏེ། ཟླ་གྲགས་པས། སྟོང་པ་ཉིད་དང་རྗེས་སུ་མཐུན་པའི་བློ་སྐྱེ་བ་ལས་ནི་སྟོང་པ་ཉིད་རྟོགས་སོ་ཞེས་བརྗོད་ཀྱི་སྟོང་པ་ཉིད་ནི་རྟོགས་པ་མ་ཡིན་ནོ། །ཞེས་བཤད། དཔེར་ན་ནམ་མཁའི་རང་བཞིན་གོ་འབྱེད་པར་རྟོགས་པས། ནམ་མཁའ་ཉིད་བློ་དང་དབྱེར་མེད་དུ་མ་གྱུར་པ་བཞིན། རྡོ་གཅོད་ལས། ཆོས་ཉིད་ཤེས་པར་བྱ་མིན་པས། །དེ་ནི་རྣམ་པར་ཤེས་མི་ནུས། །ཞེས་གསུངས་པ་བཞིན་ནོ། །དེས་ན་དོན་དམ་མཐར་ཐུག་རྟོགས་བྱ་རྟོགས་བྱེད་མེད་པར་བཤད་པ་ལ། གང་ཟག་གིས་དེ་མི་རྟོགས་པར་ཐལ་ཟེར་བ་ནི་འབྲེལ་མེད་དེ་བཞད་གད་ཀྱི་གནས་སོ། །དེ་ལྟར་རང་བཞིན་དག་པའི་རྟེན་འབྲེལ་མཐོང་ནས་ནི། དེའི་ཆེ་བས་མི་གནས་མཆོག་གི་གོ་འཕང་མྱུར་དུ་རེག གསུམ་པ་ཤེས་རབ་དགོས་པའི་རྒྱུ་མཚན་བཤད་པ། དེ་ལྟར་ཤེས་རབ་ལྡན་པ་ཐབས་ཀྱིས་གྲོལ་འགྱུར་ཏེ། ཇི་ལྟར་དུག་ལ་སྔགས་ཀྱིས་བཏབ་པ་བཞིན། །ཤེས་རབ་མེད་ན་ཐབས་ཀྱིས་འཆིང་འགྱུར་ཏེ། །སྨན་ཉིད་ནད་དུ་སོང་བས་གདུང་བ་བཞིན། །དེ་ཕྱིར་གནས་ལུགས་རྟོགས་པའི་ཤེས་རབ་བསྐྱེད། །གསུམ་པ་ཕ་རོལ་ཏུ་ཕྱིན་པ་དྲུག་གི་དོན་བསྡུས་པ་ནི། ཕ་རོལ་ཕྱིན་པ་དྲུག་ལ་སྤྱོད་པ་ན། །སྒྱུ་མའིི་སྐྱེ་བོ་ཇི་བཞིན་ཤེས་རབ་བྱ། །བྱེད་པོ་བདག་དང་བྱ་བའི་ཡུལ་བྱས་པའི་དགེ་བ་སྟེ། འཁོར་གསུམ་མི་རྟོག་དགེ་བའི་ཚོགས་གཉིས་ཀྱིས། །རྒྱལ་བའི་གོ་འཕང་ཞི་བ་ཐོབ་པར་འགྱུར། །དོན་གསུམ་པ་ལེའུ་རྫོགས་པ་མཇུག་གི་དོན་ལ་གཉིས། དང་པོ་སྐབས་ཀྱི་དགེ་བསྔོ་བ། དེ་ལྟར་དགེ་ལེགས་སྤྲིན་གྱི་བཞོན་པ་ལས་བྱུང་བའི་ཆོས་ཆར་བསིལ་པོ་ཡིས། འགྲོ་སེམས་གཙང་མའི་ལོ་ཐོག་ལེགས་བསྐྲུན་ཏེ། །སྲིད་པའི་ཉེས་ཚོགས་དབུལ་བས་རབ་ཕོངས་པའི། །དུབ་པའི་སེམས་ཉིད་དེ་རིང་ངལ་སོས་ཤིག །གཉིས་པ་ལེའུའི་མཚན། རྫོགས་པ་ཆེན་པོ་སེམས་ཉིད་ངལ་གསོ་ལས། བྱང་ཆུབ་མཆོག་ཏུ་སེམས་བསྐྱེད་པའི་ལེའུ་སྟེ་བརྒྱད་པའོ།། །། ༈ དགུ་པ་བསྐྱེད་རྫོགས་ཟུང་འཇུག་ཆེན་པོའི་ལེའུ་ལ་གསུམ་སྟེ། ལེའུ་ལ་འཇུག་པ་རྒྱུའི་དོན། ལེའུ་དངོས་ཀྱི་དོན། ལེའུ་རྫོགས་པ་མཇུག་གི་དོན་ནོ། །དང་པོ་ལེའུ་ལ་འཇུག་པ་རྒྱུའི་དོན་ནི། དེ་ལྟར་བྱང་ཆུབ་མཆོག་ཏུ་སེམས་བསྐྱེད་ནས། །གསང་སྔགགས་ཕྱི་ནང་བསྐྱེད་རྫོགས་དོན་ལ་འཇུག །གཉིས་པ་ལེའུ་དངོས་ཀྱི་དོན་ལ་གཉིས། གསང་སྔགས་ཀྱི་གོ་དོན་སྤྱིིར་བསྟན་པ་དང་། སྒྱུ་འཕྲུལ་དྲྭ་བ་བྱེ་བྲག་ཏུ་བཤད་པའོ། །དང་པོ་ལ་གསུམ་སྟེ། རྒྱུད་སྡེའི་གནས་སྤྱིར་བསྟན་པ། བསྐྱེད་རྫོགས་ཀྱི་གནས་བྱེ་བྲག་ཏུ་བསྟན་པ་སྐབས་ཀྱི་དོན་བསྡུ་བའོ། །དང་པོ་རྒྱུད་སྡེའི་གནས་སྤྱིར་བསྟན་པ་ལ་གསུམ། དང་པོ་སྔགས་ཀྱི་ཐེག་པའི་འཕགས་ཚུལ་བཤད་པ། དེ་ཡང་ཐབས་མང་དཀའ་བ་མེད་ཕྱིར་དང་། དོན་གཅིག་ན་ཡང་འཇུག་སྒོ་དང་འཇུག་ཚུལ་མ་རྨོངས་ཏེ་མདོ་ལམ་ནས་སྤང་བྱ་ལམ་དུ་བསྒྱུར་མི་ནུས་པ་ལ་འདིར་ལམ་དུ་བྱེད་པ་ལྟ་བུ་དང་། དབང་པོ་ཤིན་ཏུ་རྣོན་པོའི་དབང་མཛད་དེ། །བྱ་སྤྱོད་རྣལ་འབྱོར་བླ་ན་མེད་བཞི་བསྟན། །གཉིས་པ་སྡེ་ཚན་བཞིར་ངེས་པའི་རྒྱུ་མཚན་དགོད་པ། དུས་དང་མི་རིགས་དབང་པོའི་རིམ་པ་སྟེ། །རྫོགས་ལྡན་སུམ་ལྡན་ཉིས་ལྡན་རྩོད་ལྡན་དང་། །བྲམ་ཟེ་རྗེའུ་རིགས་རྒྱལ་རིགས་གདོལ་པའམ་དམངས། །རྟུལ་པོ་འབྲིང་རྣོན་ཤིན་ཏུ་རྣོན་པོ་ལ། །ཁྲུས་དང་གཙང་སྦྲ་གཙོར་སྟོན་རིག་པ་མཆོག་དང་། ལེགས་པར་གྲུབ་པ་དང་། འཇིག་རྟེན་གསུམ་སྣང་སོགས་བྱ་བའི་རྒྱུད། ལུས་ངག་བྱ་དང་སེམས་ཀྱི་སྒོམ་པ་ཀུན། ཆ་མཉམ་སྟོན་པ་པདྨ་རྩེ་མོ། རིགས་གསུམ་གྲུབ་པ་སོགས་སྤྱོད་པའི་རྒྱུད་སྡེ་དང་། སྒོམ་པ་གཙོར་སྟོན་ལུས་ངག་སྤྱོད་པ་ཀུན། གྲོགས་ཙམ་སྟོན་པ་ངན་སོང་སྦྱོར་བ། རྡོ་རྗེ་དབྱིངས་སོགས་རྣལ་འབྱོར་རྒྱུད་དང་ནི། སྒོ་གསུམ་གྱི་བྱ་བ་ཐམས་ཅད་དང་བྲལ་བ་གཟུང་འཛིན་མི་དམིགས་པའི་ངང་ནས་སྤང་བླང་དགག་སྒྲུབ་གཉིས་སུ་མེད་པར་སྤྱོད་ཅིག སེམས་ཀྱི་ཆོས་ཉིད་འོད་གསལ་ཡེ་ནས་སངས་རྒྱས་པའི་ཆེ་བ་རང་ལ་གནས་པའི་བརྟུལ་ཞུགས་མཆོག གཙང་སྦྲ་ཆུང་རྣམས་ངོར་ནི་སྒྱུ་འཕྲུལ། བདེ་མཆོག་གསང་འདུས་སོགས་རྣལ་འབྱོར་ཆེ། གསུམ་པ་གསང་སྔགས་ཕྱི་ནང་གི་ཁྱད་པར་བཤད་པ་ལ་གཉིས། སྤྱིའི་ཁྱད་པར་དང་། བྱེ་བྲག་གི་ཁྱད་པར་རོ། །དང་པོ་སྤྱིའི་ཁྱད་པར་ལ་གཉིས། གསང་སྔགས་ཕྱི་པ་དང་། ནང་པའི་ཁྱད་པར་རོ། །དང་པོ་ཕྱི་རྒྱུད་ཀྱི་ཁྱད་པར་ལ་གཉིས། དང་པོ་དབྱེ་བ་མདོར་བསྟན་པ་ནི། དེ་ཡང་བྱ་སྤྱོད་རྣལ་འབྱོར་ཐུབ་པ་རྒྱུད། །ཀྲི་ཡ་ཨུ་པ་ཡོ་ག་ཞེས་བྱའོ། །གཉིས་པ་ཁྱད་པར་རྒྱས་པར་བརྗོད་པ། དེ་དག་གསང་སྔགས་ཕྱི་སྟེ་ལྷ་རྣམས་ཀྱང་། །ཡབ་ཡུམ་ཟུང་འབྲེལ་བསྒོམ་པར་མི་ནུས་ཤིང་། །ཤ་ལྔ་བདུད་རྩི་ལྔ་སོགས་བསྟེན་མི་བྱེད། །གཙང་སྦྲ་ཀུན་དུ་སྤྱོད་པས་གནས་པ་ཡིན། །གཉིས་པ་ནང་རྒྱུད་གསུམ་གྱི་ཁྱད་པར། རྣལ་འབྱོར་བླ་མེད་རྒྱུད་ལའང་གསུམ་ཡིན་ཏེ། །ཕ་མ་གཉིས་སུ་མེད་པ་བླ་ན་མེད། །བསྐྱེད་རྫོགས་གཉིས་མེད་གཙོ་བོར་སྟོན་པ་སྟེ། །གསང་འདུས་དང་འཇམ་དཔལ་གཤིན་རྗེ་སོགས་མ་ཧཱ། ཡང་དག་ཕུར་པ་འཁོར་ལོ་སྡོམ་པ་ཀྱེ་རྡོར་སོགས་ཨ་ནུ། སྒྱུ་འཕྲུལ་སོགས་ཨ་ཏི་ཞེས་བྱའོ། །ལྷ་ཡང་འཁྲིལ་སྦྱོར་དམ་རྫས་ཁྱད་པར་ཅན། །གཙང་བཙོག་གཉིས་མེད་ཐམས་ཅད་རོ་གཅིག་ཏུ། །ཡེ་ནས་སངས་རྒྱས་པའི་དཀྱིལ་འཁོར་གཅིག་གི་རོལ་པར་སྟོན་པ་ཡིན། གཉིས་པ་བྱེ་བྲག་གི་ཁྱད་པར་ལ་གཉིས། ཐུབ་པ་བརྒྱུད་གསུམ་དང་། ནང་བརྒྱུད་གསུམ་གྱི་ཁྱད་པར་རོ། །དང་པོ་ཐུབ་པ་རྒྱུད་གསུམ་ནང་ཚན་གྱི་ཁྱད་པར་ནི། བྱ་བས་རང་ཉིད་དམན་ལ་ལྷ་ཉིད་མཆོག །རྗེ་ཁོལ་ཚུལ་དུ་བསྒྲུབ་པས་དངོས་གྲུབ་ལེན། །སྤྱོད་པས་རང་དང་ལྷ་ཉིད་མཉམ་པར་བལྟ། །རང་ཉིད་དམ་ཚིག་མདུན་དུ་ཡེ་ཤེས་ལྷ། །གྲོགས་པོའི་ཚུལ་གྱིས་དངོས་གྲུབ་ལེན་པ་ཡིན། །རྣལ་འབྱོར་དངོས་གཞི་གཉིས་སུ་མེད་པ་ལ། །སྦྱོར་རྗེས་ལྷ་ནི་དགུག་གཤེགས་གཉིས་སུ་བྱེད། །ཆུ་ལ་ཆུ་བཞག་གཉིས་མེད་དངོས་གྲུབ་ལེན། །གཉིས་པ་ནང་པ་རྒྱུད་གསུམ་གྱི་ཁྱད་པར་ལ་གཉིས། དང་པོ་སོ་སོའི་ངོ་བོའི་ཁྱད་པར། མ་ཧཱས་རླུང་དང་བསྐྱེད་རིམ་ཐབས་གཙོ་ལ། །ཨ་ནུས་ཁམས་དང་རྫོགས་རིམ་ཤེས་རབ་གཙོ། །ཨ་ཏིའི་བསྐྱེད་རྫོགས་ཐམས་ཅད་གཉིས་མེད་བསམ་གྱིས་མི་ཁྱབ་པའི་འོད་གསལ་ཡེ་ཤེས་གཙོ་བོར་སྟོན་ཏེ་ནང་རྒྱུད་གསུམ་ཀུན་ཀྱང་ཐབས་ཤེས་ཟུང་འཇུག་ཆོས་ཀུན་ཡེ་ནས་སངས་རྒྱས་པའི་དཀྱིལ་འཁོར་མཉམ་པ་ཉིད་ཡིན་པ་ལ་ཡིན་པར་ཤེས་པའི་ཚུལ་གྱིས་ཉམས་སུ་ལེན། གཉིས་པ་རྣམ་དག་ཤེས་པའི་ཁྱད་པར། འདིར་ཆོས་ཐམས་ཅད་ཡེ་ནས་སངས་རྒྱས་པའི་དཀྱིལ་འཁོར་གསུམ་གྱི་རང་བཞིན་དུ་ཤེས་པར་བྱ་བ་ལ་གསུམ་སྟེ། གཞི་རང་བཞིན་ལྷུན་གྱིས་གྲུབ་པའི་དཀྱིལ་འཁོར་དུ་ལྟ་བས་ཐག་བཅད་པ། ལམ་ཏིང་ངེ་འཛིན་ཟབ་མོའི་དཀྱིལ་འཁོར་དུ་བསྒོམས་པས་ཉམས་སུ་བླང་བ། འབྲས་བུ་བྱང་ཆུབ་མཆོག་གི་དཀྱིལ་འཁོར་དུ་དོན་གཉིས་ཕུན་སུམ་ཚོགས་པ་བསྟན་པའོ། །དེ་ལ་དང་པོ་ཆོས་ཐམས་ཅད་དཀྱིལ་འཁོར་གསུམ་གྱི་རང་བཞིན་དུ་མངོན་པར་རྫོགས་པ་སངས་རྒྱས་པའི་ཚུལ་བསྟན་པ་ནི། བདག་དང་འགྲོ་ཀུན་ཡེ་ནས་སངས་རྒྱས་པས། །ཕུང་པོ་ཁམས་དང་སྐྱེ་མཆེད་ལ་སོགས་ཀུན། །དཀྱིལ་འཁོར་གཅིག་ཏུ་གསལ་བཏབ་རིམ་གཉིས་བསྒོམ། འདིར་དག་པ་གཞི་ཡི་གནས་ལུགས་དང་། མ་དག་པ་གཞི་ཡི་འགྲུབ་ཚུལ། དེ་ལས་བསྐྱེད་པའི་རྡོ་རྗེ་ལུས་ཀྱི་གནས་ལུགས། དེ་ལ་ཡེ་ཤེས་ཆེན་པོ་ཁྱབ་ཚུལ། དེ་ཐམས་ཅད་ཡེ་ནས་སངས་རྒྱས་པར་བསྟན་པ་རྣམས་གཞུང་འགྲེལ་བཞིན་ཤེས་པར་བྱ་སྟེ། མདོར་ན། ཀུན་བྱེད་ལས། སེམས་ལས་མ་གཏོགས་པ་ཡི་སངས་རྒྱས་ནི། །ཀུན་བྱེད་རྒྱལ་པོས་སྔར་ཡང་ལུང་མ་བསྟན། །ཕྱིས་ནས་མི་སྟོན་ད་ལྟ་སྟོན་མི་མཛད། །དེ་བས་སངས་རྒྱས་སེམས་སུ་ཤེས་པར་བྱ། །ཞེ་གསུངས། དེས་ན་སྣང་བ་སྐུ། གྲགས་པ་གསུང་། དྲན་རྟོག་ཐུགས་རྡོ་རྗེའི་དཀྱིལ་འཁོར་གསུམ་དུ་ཤེས་པར་བྱ་སྟེ། ཀུན་བྱེད་ང་ཡི་སྐུ་གསུང་ཐུགས་ཉིད་ནི། །མ་བཅོས་རྣལ་དུ་བཞག་པའི་དཀྱིལ་འཁོར་གསུམ། །མ་བཀོད་དུས་གཅིག་རྫོགས་པའི་དོན་སྟོན་པས། །ལྷུན་གྲུབ་སྙིང་པོའི་དོན་ལ་རྟོགས་པར་བྱེད། །ཅེས་སོ། །དེའང་སྣ་ཚོགས་སུ་སྣང་བ་ཉིད་ནི་བསྐྱེད་པ་ཡིན་ལ། རང་བཞིན་མེད་པས་རྫོགས་པ་ཡིན་ཏེ། གཞི་དོན་གྱི་དཀྱིལ་འཁོར་ནི་བསྐྱེད་བྱ་སྐྱེད་བྱེད་དང་བྲལ་བར་ཤེས་པར་བྱའོ། །གཉིས་པ་བསྐྱེད་རྫོགས་ཀྱི་གནས་བྱེ་བྲག་ཏུ་བཤད་པ་ལམ་ཏིང་འཛིན་ཟབ་མོས་ཉམས་སུ་ལེན་པ་ལ་གསུམ། ཐབས་བསྐྱེད་རིམ་གྱི་སྒོམ་ཚུལ་དབྱེ་བ་དང་། ཤེས་རབ་རྫོགས་རིམ་སྒོམ་ཚུལ་དབྱེ་བ། དེ་གཉིས་ཀྱི་དགོས་པ་བསྟན་པའོ། །དང་པོ་བསྐྱེད་རིམ་སྒོམ་ཚུལ་ལ་ལྔ། དང་པོ་སྒོང་སྐྱེས་ཀྱི་བག་ཆགས་སྦྱོང་བ་རྒྱས་པ་ཆེན་པོའི་བསྐྱེད་རིམ་སྒོམ་ཚུལ། དེ་ཡང་སྐྱེ་བཞིའི་རིམ་པས་སྒོམ་ཚུལ་ལ་བ ཞི། །སྒོང་སྐྱེས་བག་ཆགས་སྦྱང་ཕྱིར་སྔོན་འགྲོའི་ཚེ། །སྐྱབས་འགྲོ་སེམས་བསྐྱེད་རང་ཉིད་གཙོ་བོ་ཡབ་ཡུམ་གྱི་བསྐྱེད་རིམ་མདོར་བསྡུས་བསྒོམ་ནས། བསོད་ནམས་ཞིང་རབ་སྤྱན་དྲངས་མཆོད་སོགས་ཡན་ལག་བདུན་པའི་མཐར། གཤེགས་སུ་གསོལ་བའམ་རང་བཞིན་མེད་བསྒོམ་ཚོགས་གཉིས་སྔོན་སོང་ནས། གདོད་ཀྱིས་བསྐྱེད་རྫོགས་རྒྱས་པར་བསྒོམ་པ་ནི། །ཐོག་མར་སྒོ་ང་དེ་ལས་བྱ་སྐྱེ་བཞིན། །མདོར་བསྡུས་རྒྱས་པའི་བསྐྱེད་རྫོགས་རིམ་པས་བསྒོམ། །གཉིས་པ་མངལ་སྐྱེས་ཀྱི་བག་ཆགས་སྦྱོང་བ་རྒྱས་པའི་བསྐྱེད་རིམ་སྒོམ་ཚུལ། མངལ་སྐྱེས་བག་ཆགས་སྦྱང་ཕྱིར་བསྟན་པ་ནི། སྐྱབས་འགྲོ་སེམས་བསྐྱེད་སྟོང་པའི་ངང་ལས་མངལ་དུ་ཐིག་ལེ་དཀར་དམར་འདུས་པར་རྣམ་ཤེས་ཞུགས་པ་ལྟར་ས་བོན་དང་མེར་ནུར་ལྟར་དེ་ལས་ཕྱག་མཚན་དང་། ལྟར་མཁྲང་ལྟར་དེ་ལས་ནི་སྐུ་དེའི་རྒྱུ་འོད་ལྔའི་གོང་བུ་དང་། ཁྱབ་འཇུག་ཉ་དང་རུས་སྦལ་ལས་ལུས་ཕྱིར་རྫོགས་པ་ལྟར་འོད་ལས་སྐུར་བསྒོམ་པ་དང་འོད་ཟེར་སོགས་རིམ་གྱིས་རྒྱས་པར་བསྒོམ་གྱིས་ཡང་སྔར་བཞིན་དུ། ས་བོན་ལས་འོད་གོང་ཕྱག་མཚན་ལས་སྐུར་བཞེངས་པ་མདོར་བསྡུས་དང་སྔོན་དུ་ཚོགས་གསོག་རྣམས་མི་འགྲོའི་སྤྲོས་པ་ཆུང་བའི་བསྐྱེད་རྫོགས་ནི། ཇི་ལྟར་རླུང་སེམས་ཐིག་ལེ་དཀར་དམར་ལས། །མེར་ནུར་ལྟར་དང་མཁྲང་གྱུར་ལ་སོགས་ནས། །ལུས་ཡོངས་རྫོགས་ཏེ་བཙའ་བའི་བར་བཞིན་ནོ། །གསུམ་པ་དྲོད་གཤེར་སྐྱེས་ཀྱི་བག་ཆགས་སྦྱོང་བ་འབྲིང་གི་བསྐྱེད་རིམ་སྒོམ་ཚུལ། དྲོད་གཤེར་ལས་སྐྱེས་བག་ཆགས་སྦྱང་བྱའི་ཕྱིར། །སྐྱབས་འགྲོ་སེམས་བསྐྱེད་སྟོང་ལས་ལྷ་རྣམས་ཀྱི། །མཚན་ཙམ་བརྗོད་ལས་ལྷར་གསལ་བསྐྱེད་རྫོགས་བསྒོམ། །ཇི་ལྟར་དྲོད་གཤེར་འདུས་ལས་གྲུབ་པའི་ལུས། །ཤིན་ཏུ་འགྲུབ་པར་སླ་བས་བཙའ་བ་བཞིན། །ས་བོན་ཕྱག་མཚན་སྤྲོས་པ་དགོས་པ་མེད། །བཞི་པ་བརྫུས་སྐྱེས་ཀྱི་བག་ཆགས་སྦྱོང་བ་བསྡུས་པའི་བསྐྱེད་རིམ་སྒོམ་ཚུལ། བརྫུས་ཏེ་སྐྱེ་བའི་བག་ཆགས་སྦྱང་བྱའི་ཕྱིར། །སྐད་ཅིག་ཙམ་གྱིས་ཝལ་གྱིས་བསྐྱེད་རྫོགས་བསྒོམ། །ཇི་ལྟར་བརྫུས་སྐྱེས་སྐད་ཅིག་སྣང་བ་བཞིན། །མིང་ལས་རིམ་གྱིས་བསྐྱེད་རྫོགས་བསྒོམ་མི་དགོས། །ལྔ་པ་སྒོམ་ཚུལ་བཞིའི་རྣམ་གྲངས་བསམ་པ། དེ་ལྟར་བསྒོམ་ཚུལ་རྣམ་པ་བཞི་ཉིད་ཀྱང་། །གཙོ་བོར་སྐྱེ་བ་གང་བསྡུས་དེས་བསྒོམ་ལ། །བག་ཆགས་སྦྱང་ཕྱིར་ཀུན་གྱིས་དེ་བཞིན་བསྒོམ། །ཁྱད་པར་ལས་དང་པོ་ཡིས་སྒོང་སྐྱེས་བཞིན། །ཅུང་ཟད་བརྟན་པས་མངལ་སྐྱེས་བཞིན་བསྒོམས་ལ། །བརྟན་པ་ཆེ་བས་དྲོད་ཤེར་སྐྱེས་བཞིན་བསྒོམ། །ཤིན་ཏུ་གོམས་པ་ཡང་དག་བརྟན་པ་ཡིས། །རྫུས་སྐྱེས་བཞིན་དུ་སྐད་ཅིག་དཀྲོང་བསྐྱེད་བྱ། །གཉིས་པ་ཤེས་རབ་རྫོགས་རིམ་གྱི་སྒོམ་ཚུལ་དབྱེ་བ་ལ་གཉིས། དང་པོ་རྫོགས་རིམ་གྱི་རང་བཞིན་བསྟན་པ། རྫོགས་རིམ་དེ་ཡང་སྣང་བཅས་སྣང་མེད་དེ། བསྐྱེད་རིམ་ཐུགས་སྲོག་ན་དའི་བར་བསྡུས་ནས་དེ་ཡང་མཁའ་ལ་སྤྲིན་དེངས་བཞིན། མི་དམིགས་ངང་དུ་འཇོག་པ་སྣང་བ་མེད་དེ་ལས་དང་པོ་པས་སོ། །བསྐྱེད་རིམ་དེ་ཉིད་མི་དམིགས་པའི་ངང་ལ་འཇོག་པ་སྣང་མེད་ཀྱི་རྫོགས་པར་ཤེས་པར་བྱ་སྟེ། ཅུང་ཟད་གོམས་པས་སྣང་དུས་ཉིད་ནས་བསྐྱེད་རིམ་རང་བཞིན་མེད་པ་སྤྲོས་དང་བྲལ། མ་ཡེངས་བསྒོམ་པ་ཡིས་བདེ་གསལ་མི་རྟོག་པར་འཆར་བ་ནི་སྣང་བཅས་ཏེ། དེ་གཉིས་རིམ་པ་བཞིན་དུ། སྣང་མེད། ལས་དང་པོ་ཡིས་བསྐྱེད་རིམ་ཞེན་པ་དགག སྣང་ལ་བདེན་པར་ཞེན་པའི་གཉེན་པོར་བྱེད། །སྣང་བཅས། བརྟན་པ་རྣམས་ཀྱིས་རྫོགས་རིམ་ཞེན་པ་དགག །སྟོང་ལ་མཚན་མར་ཞེན་པའི་གཉེན་པོ་བྱེད། །གཉིས་པ་བསྒོམ་པ་བརྟན་པའི་འཆར་ཚུལ། དེ་ལྟར་གོམས་པས་ཕྱི་ནས་གང་སྣང་བསྐྱེད་རིམ་ཐབས་ཉིད་ལ། སྣང་སྟོང་གྲགས་སྟོང་རིག་སྟོང་གི་ཆོས་ཉིད་བདེན་མེད་དམ། འཛིན་མེད་དུ་ཤེས་པ་རྫོགས་རིམ་ཤེས་རབ་ཉིད་དུས་རྣམས་ཀུན་དུ་འདུ་འབྲལ་མེད་པར་འཆང་། །གསུམ་པ་བསྐྱེད་རྫོགས་གཉིས་ཀྱི་དགོས་པ་བསྟན་པ། རྟེན་བརྟེན་པའི་བསྐྱེད་རིམ་གྱིས་ཕྱི་ནང་སྣོད་བཅུད་ཀྱི་སྣང་བ་འདིའི་བདེན་ཞེན་འགོག་པ་སྟེ། དེས་གཟུགས་སྐུའི་སྒྲིབ་སྦྱོང་བསོད་ནམ་ཀྱི་ཚོགས་རྫོགས། ཞི་གནས་ཀྱི་ཏིང་འཛིན་སྐྱེ། རྫོགས་རིམ་གྱིས་བསྐྱེད་རིམ་སྒྱུ་མར་ཞེན་པའི་རྟོག་པ་སྤོང་། ཆོས་སྐུའི་སྒྲིབ་པ་སྦྱོང་། ཡེ་ཤེས་ཀྱི་ཚོགས་རྫོགས། ཕྱག་རྒྱ་ཆེན་པོའི་དོན་རྟོགས། མདོར་ན། གང་ལ་སྣང་སྟོང་བདེན་ཞེན་མེད་པ་ན། བསྐྱེད་རྫོགས་གཉིས་མེད་རང་བཞིན་དག་པ་ཡིན། །སྤྱིར་ཆོས་དྲུག་སོགས་རང་ལུས་ཐབས་ལྡན་དང་། གཞན་ལུས་ཕོ་ཉའི་ལམ་བསྟན་པ་སོགས་རྫོགས་རིམ་རྣམ་གྲངས་མང་པོ་གསུངས་ཀྱང་། རྫོགས་རིམ་གྱི་དགོས་པ་ནི། བསྐྱེད་རིམ་གྱི་ཞེན་པ་སྤངས་པས་ལྷ་ཆོས་ཉིད་དུ་རྟོགས་པ་དང་། ཐབས་ཁྱད་པར་ཅན་གྱིས་བདེ་གསལ་མི་རྟོག་པ་སྐྱེ་བ་དང་། ཐམས་ཅད་ལམ་དུ་འགྲོ་བས་ཅིར་སྣང་ཆོས་ཉིད་དུ་འཆར་བ་དང་། རང་བཞིན་ལྷན་ཅིག་སྐྱེས་པའི་ཡེ་ཤེས་རྟོགས་པས་གནས་ལུགས་ཀྱི་ཕུ་ཐག་འཁྲུས་པ་ལ་སོགས་པ་དཔག་ཏུ་མེད་དོ། །གསུམ་པ་སྐབས་ཀྱི་དོན་བསྡུ་བ་ལ་གསུམ། དང་པོ་གསང་སྔགས་ཐེག་པར་འཇུག་པར་གདམས་པ། ཚུལ་འདི་ནི་མཐར་ཐུག་རྡོ་རྗེ་ཐེག་པ་སྟེ། དབང་པོ་རྣོན་པོ་ཚེ་འདིར་རྫོགས་སངས་རྒྱ། །དེ་རྗེས་གདུལ་བྱའི་འཇིག་རྟེན་གང་ཡོད་དེར། །སངས་རྒྱས་མཛད་པ་སྣ་ཚོགས་ལྷུན་གྱིས་གྲུབ། །འདི་ནི་གྲངས་མེད་རྡོ་རྗེ་འཆང་རྣམས་ཀྱི། །ཉེ་ལམ་སྦས་པ་ཤིན་ཏུ་ཟབ་མོ་སྟེ། །སྐལ་བཟང་ཚེ་འདིར་གྲོལ་འདོད་རྣམས་ཀྱིས་བསྟེན། །གཉིས་པ་ལམ་བཞིར་དབང་དང་བྱིན་རླབས་བསྟན་པ། དེ་ཡང་གང་མོས་རྒྱུད་སྡེའི་རིམ་པ་ལ། །བརྟེན་ནས་རྫོགས་པའི་བྱང་ཆུབ་བསྒྲུབ་པར་བྱ། །ཐོག་མར་རིག་གཏད་རྗེས་གནང་དབང་ལ་སོགས། དེ་ཡང་བྱ་རྒྱུད་དུ་རིག་གཏད་པ་དང་། རྗེས་སུ་གནང་བ་དང་། མཎྜལ་ཙམ་ལ་བརྟེན་ནས་བུམ་པའི་ཆུས་དབང་བསྐུར། སྔགས་ཀྱི་རྗེས་གནང་སྦྱིན་པ་ཙམ་མོ། །སྤྱོད་རྒྱུད་དུ། རིག་པའི་དབང་ལྔ་རྡོ་རྗེ་བརྟུལ་ཞུགས་ཀྱི་དབང་དང་དྲུག རྣལ་འབྱོར་རྒྱུད་དུ་རིག་དབང་ལྔས་ཐོག་དྲངས་སློབ་མའི་དབང་དང་རྡོ་རྗེ་སློབ་དཔོན་གྱི་དབང་རྫོགས་པར་བསྐུར། རྣལ་འབྱོོར་བླ་མེད་ལས་དབང་བཞི་རྫོགས་པར་བསྐུར་བ་སྟེ། རང་རང་གཞུང་ནས་གསུངས་པའི་ལུང་མནོས་ཏེ། །རང་གི་སེམས་འདི་ཡོངས་སུ་སྨིན་པར་བྱ། །གསུམ་པ་ནང་པ་དབང་གིས་སྨིན་པར་བསྟན་པ། ཁྱད་པར་མཆོག་གསང་རྣལ་འབྱོར་ཆེན་པོའི་ལམ། །སྨིན་བྱེད་དབང་བཞི་གྲོལ་བྱེད་བསྐྱེད་རྫོགས་ཏེ། །བུམ་དབང་གིས་ལུས་སྒྲིབ་སྦྱངས། བསྐྱེད་རིམ་བསྒོམ་པ་ལ་དབང་བ་དང་གསང་བས་ངག་སྒྲིབ་དག གཏུམ་མོ་བསྒོམ་པ་ལ་དབང་བ་དང་ནི། ཤེས་རབ་ཡེ་ཤེས་ཡིད་སྒྲིབ་སྦྱོང་། བདེ་སྟོང་རྣམ་པར་མི་རྟོག་པའི་ཡེ་ཤེས་བསྒོམ་པ་ལ་དབང་བ་དང་ཚིག་དབང་གིས་བག་ཆགས་མཐའ་དག་སྦྱོང་ཞིང་གནས་ལུགས་ཕྱག་ཆེན་བསྒོམ་པ་ལ་དབང་དངོས་གྲུབ་སྟེར་ཏེ། དེ་ཡང་། དང་པོ་གསུམ་གྱིས་བསོད་ནམས་ཚོགས་རྫོགས་ལ། །བཞི་པས་ཡེ་ཤེས་ཚོགས་རྫོགས་དེ་བཞིན་དུ། །དང་པོ་གསུམ་གྱིས་ཉོན་མོངས་པ་དང་བཞི་པས་ཤེས་བྱའི་སྒྲིབ་ཀུན་སྦྱོང་། ས་ལམ་གྱི་དག་པ་དང་སྦྱར་ན། བུམ་དབང་གིས་ཚོགས་ལམ། གསང་དབང་གིས་སྦྱོར་ལམ། ཤེས་རབ་ཡེ་ཤེས་ཀྱིས་མཐོང་ལམ། ཕྱག་རྒྱ་ཆེན་པོ་དོན་གྱི་དབང་གིས་སྒོམ་ལམ་རྫོགས་པར་བྱེད་པ་ཡིན་ནོ། །དེ་ཕྱིར་སྨིན་བྱེད་དབང་བཞི་ཐོབ་པ་ཡིས། །གྲོལ་བྱེད་བསྐྱེད་རྫོགས་དོན་ལ་བསླབ་པར་བྱ། །དོན་གཉིས་པ་སྒྱུ་འཕྲུལ་དྲྭ་བའི་ཚུལ་སྒོམ་པ་ལ་གསུམ། སྨིན་བྱེད་དབང་གི་རིམ་པ་སྤྱིར་གདམས། གྲོལ་བྱེད་བསྐྱེད་རྫོགས་ཀྱི་རིམ་པ་བྱེ་བྲག་ཏུ་གདམས་པ། གནས་སྐབས་སྒྲུབ་ཚུལ་ངེས་པས་དོན་བསྡུ་བའོ། །དང་པོ་སྨིན་བྱེད་ནི། རྒྱུད་ཐམས་ཅད་ཀྱི་རྩེ་མོ་སྒྱུ་འཕྲུལ་དྲྭ་བ་ཆེན་པོའི་སྐབས་འདིར་ནི་ཕན་དབང་བཅུ་ནུས་དབང་ལྔ་ལས། དང་པོ་བཅུ་བུམ་དབང་། གསང་དབང་ལས་གསང་ཤེར་གཉིས། རྡོ་རྗེ་རྒྱལ་པོ་ཚིག་དབང་། འཆང་ཕྲིན་གཉིས་དེའི་བྱེད་ལས། ཉན་པ་ནི་གོང་དུ་སྤེལ་བའི་ཐབས་ཡིན་པས་དེར་བསྡུའོ། །དབང་རྫོགས་དམ་ཚིག་ལྡན་པ་ཡིས། དེ་ལ་དམ་ཚིག་གི་ངོ་བོ་སྔགས་ལ་ཞུགས་པའི་བརྟུལ་ཞུགས་བཟང་པོ་མི་ཉམས་པར་བསྲུང་བའི་ལྷག་བསམ། ངེས་ཚིག་དམ་དུ་བསྲུང་ན་མི་དགེ་བ་ཚིག་པའམ་ཡང་ན་སྐུ་གསུང་ཐུགས་སོགས་དམ་པའི་རྒྱར་གྱུར་པ་དེ་ལས་ཉམས་ནས་དམྱལ་མེས་ཚིག་པས་དམ་ཚིག་གོ །དབྱེ་ན། རྩ་བ་དང་ཡན་ལག་གཉིས་ཀྱི་སྤྱིར་སྒོ་གསུམ་མི་དགེ་བཅུ་ལས་བཟློག་ཅིང་བསྐྱེད་བཟླས་ཏིང་འཛིན་གསུམ་ལ་བརྩོན་པ། རྩ་བ་སྐུ་གསུང་ཐུགས་ཀྱི་དམ་ཚིག་གསུམ་དང་། དེ་རེ་རེ་ལ་དགུ་དགུར་ཕྱེས་པས་ཉེར་བདུན། ཡན་ལག་གི་དམ་ཚིག ཤེས་བྱ། སྤྱད་བྱ། དང་བླང་། མི་སྤང་། བསྒྲུབ་བྱ་ལྔ་ལྔ་སྟེ་ཉེར་ལྔ། བྱེ་བྲག་གསང་སྙིང་ལྟར་ན། དཀོན་མཆོག་གསུམ་མི་སྤང་བ། བླ་མ་བཀུར་བ། སྔགས་དང་ཕྱག་རྒྱ་རྒྱུན་མི་བཅད་པ། མཆེད་ལ་བྱམས་པ། གསང་བ་མི་སྨྲ་བ་སྟེ་རྩ་བ་ལྔ། དུག་ལྔ་མི་སྤང་བ་དང་། བདུད་རྩི་ལྔ་དང་དུ་བླང་བ་སྟེ་ཡན་ལག་གི་དམ་ཚིག་བཅུར་བཞེད། གཞན་སྔགས་གསར་མ་ལྟར་ན། བསྲུང་བྱའི་དམ་ཚིག་རྩ་ལྟུང་བཅུ་བཞི་སྤྱད་བྱའི་དམ་ཚིག་ལྔ་ལྔ་བདུད་རྩི་ལྔ་ལ་ལོངས་སྤྱོད་པ་གཉིས་སུ་བཞེད་དེ། དེ་ལྟར་དམ་ཚིག་གི་རྣམ་གྲངས་དང་། བསྲུང་ཚུལ། བསྲུང་བའི་ཕན་ཡོན་ཉམས་པའི་ཉེས་དམིགས། བཤགས་ཐབས་བསྐང་ཚུལ། སོར་ཆུད་པའི་རྟགས་ཚད་རྣམས་དང་། ཞར་བྱུང་གྲོགས་སྤྱོད་པའི་ཁྱད་པར་དང་། དེས་ལམ་གྱི་བོགས་ཕྱིན་ནས་དངོས་གྲུབ་ཐོབ་ཚུལ་སོགས་ཞིབ་ཏུ་ཤེས་པར་བྱས་ནས། གཉིས་མེད་ཨ་ཏིའི་དགོངས་པར་འཇུག་འདོད་པས། གཉིས་པ་གྲོལ་བྱེད་ལ་གསུམ། བསྐྱེད་པ་སྐུའི་རྣལ་འབྱོར། བཟླས་བརྗོད་གསུང་གི་རྣལ་འབྱོར། དྲན་རིག་ཐུགས་ཀྱི་རྣལ་འབྱོར་རོ། །དང་པོ་བསྐྱེད་པ་སྐུའི་རྣལ་འབྱོར་ལ་གཉིས། ཁྲོ་བཅུའི་སྲུང་འཁོར་གྱི་མཚམས་བཅད་པ་དང་། དེའི་དབུས་སུ་རྡོ་རྗེ་དབྱིངས་ཀྱི་དཀྱིལ་འཁོར་ཇི་ལྟར་བསྒོམ་ཚུལ་ལོ། །དང་པོ་ནི། ཐོག་མར་བདེ་བའི་བསྟན་ལ་སྐྱིལ་ཀྲུང་རབ་བཅས་ནས། །སྐྱབས་སུ་འགྲོ་དང་བྱང་ཆུབ་སེམས་བསྐྱེད་དེ། །དེ་བཞིན་ཉིད་ཀྱི་ཏིང་ངེ་འཛིན་ཆོས་རྣམས་ཐམས་ཅད་སྟོང་ཞིང་བདག་མེད་པ། རང་བཞིན་སྤྲོས་དང་བྲལ་བའི་ངང་ཉིད་ལས། ཀུན་ཏུ་སྣང་བའི་ཏིང་ངེ་འཛིན་སྙིང་རྗེ་ཆེན་པོ་སྒྱུ་མ་ལྟ་བུར་བསྒོམས་རྗེས། རྒྱུའི་ཏིང་ངེ་འཛིན་ལ་གཉིས་ཀྱི་སྔོན་རོལ་བ་ནི་སྲུང་བའི་འཁོར་ལོ་ཏེ། དེའང་རྒྱུའི་ཧཱུྃ་ལས་བྷཱུྃ་འཕྲོས་པས་སྟེང་འོག་ཕྱོགས་མཚམས་ཐམས་ཅད་དུ་ཁྱབ་པའི་བསྲུང་བའི་འཁོར་ལོ་ཁོག་སྟོང་རྩིབས་བཅུ་པ་ཡངས་ཤིང་རྒྱ་ཆེ་བ་ཆོས་དབྱིངས་དང་མཉམ་པའི་རྩིབས་ནང་བཅུ་ལ་པད་ཉིའི་སྟེང་དུ་ཧཱུྃ་ལས་ཁྲོ་བོ་བཅུ་ཡིས་མཚན་པ་སྟེ། ཕྱི་ནང་མེ་དཔུང་འབར་བའི་དབུས་ན། གཉིས་པ་རྡོ་རྗེ་དབྱིངས་ཀྱི་དཀྱིལ་འཁོར་བསྒོམ་ཚུལ་ལ་གསུམ། དང་པོ་རྟེན་གཞས་ཡས་ཁང་གདན་དང་བཅས་པ་བསྐྱེད་པ། འོད་གསལ་བའི་སེམས་ཉིད་ལ་ཞིང་ཁམས་དང་གཞལ་ཡས་ཁང་གི་བཀོད་པ་ཅི་ཡོད་པ་དེ་ཉིད་ཀུན་ཏུ་བཟང་པོའི་བཞུགས་གནས་ཡིན་པས་དཔལ་ཀུན་ཏུ་བཟང་པོའི་དཀྱིལ་འཁོར་ཆེན་པོ་ནི། དངོས་གཞི་རྒྱུ་ཡི་ཏིང་ངེ་འཛིན། གཞལ་ཡས་ཁང་བསྐྱེད་མ་བསྐྱེད་གང་ལྟར་རུང་རང་ཉིད་གཙོ་བོ་མདོར་བསྡུས་སུ་བསྒོམས་ནས་སྟོང་ཉིད་དུ་བསམ་པའི་བར་ཡིན་ལ། སྐབས་འདིར་གཙོ་བོ་བསྐྱེད་པའི་ས་བོན་བསྒོམ་པ་ལ་སྦྱོར། དེ་ཡང་སྲུང་གུར་ནང་ཁང་འཁོར་ལོ་རྩིབས་བཞིའི་ལྟེ་བར། བྷཱུྃ་ལས་གཞས་ཡས་ཁང་སྒོ་བཞི་པ། སྒོ་རེ་རེ་ལ་རྣམ་ཐར་གསུམ་མཚོན་པའི་ཁྱུད་འགྲམ་ལོགས་གསུམ་དང་། གྲུ་ཆད་བཞི། སྒོ་བཞིར་རྟ་བབས་བཞིས་བརྒྱན་པ། ནང་ནས་རིམ་བཞིན་མཐིང་ལྗང་དམར་སེར་དཀར་བའི་རྩིག་པ་རིམ་པ་ལྔ་དང་། རྩ་བར་འདོད་སྣམ་དམར་པོ་ལ་མཆོད་བའི་ལྷ་མོ་འཁོད་པ། རྩིག་སྟེང་ཕ་གུ་སེར་པོ་དེ་སྟེང་མངའ་ཡབ་ཕིབ་ཆུང་གི་ཚུལ་དུ་ཕྱིར་འཕྱང་བའི་གདུང་སྣར་དྲྭ་བ་དང་དྲྭ་བ་ཕྱེད་པས་འཕྱང་བའི་གདུང་སྣ་གནོན་པ་ལ་པུ་ཤུ་མཆོད་རྟེན་བརྩེགས་སུ་བསྒྲིགས་པ། མེ་ལོང་ལྟ་བུ་སོགས་ཡེ་ཤེས་བཞིའི་གློ་འབུར་དང་། ཆོས་དབྱིངས་ཡེ་ཤེས་དབུས་མའི་བུམ་པ་ཟླུམ་པོའི་སྟེང་གི་ཆར་ཁེབས་ནི་དབུས་ཕྱུར་པོའི་ཡ་ཕིབས་ཏེ་མདའ་ཡབ་སྟེང་གི་ནམ་མཁར་ནོན་པར་ཕུབས་པའི་ཕིབས་ཉིས་རིམ་གྱི་རྣམ་པ་དབུས་དང་ཕྱོགས་བཞིར་རྡོ་རྗེ་རྩེ་ལྔ་པའི་རྭ་གྱེས་པ་འདྲ་བའི་རྩེ་མོ་ལ་རྡོ་རྗེ་དང་ནོར་བུའི་ཏོག་གིས་མཛེས་པ། ཕྱི་རོལ་དུ་དུར་ཁྲོད་བརྒྱད་ཀྱིས་ཡོངས་སུ་བསྐོར་བའོ། །སྲུང་འཁོར་གྱི་ནང་ཁང་འཁོར་ལོ་རྩིབས་བཞིའི་ལྟེ་བར་བྷྲཱུྃ་ལས་གཞལ་ཡས་ཁང་སྒོ་བཞི་གྲུ་བཞི་རྟ་བབས་བཞིས་བརྒྱན་ཅིང་། རྩིག་པ་ལྔ་དང་འདོད་ཡོན་སྣམ་བུ་དང་། །ཕ་གུ་དྲྭ་ཕྱེད་མདའ་ཡབ་པུ་ཤུའི་མཛེས། །ཕྱུར་བུའི་ཐོད་པ་རིན་ཆེན་རྡོ་རྗེའི་ཏོག །དུར་ཁྲོད་བརྒྱད་ཀྱིས་བསྐོར་བའི་དེ་ལྟ་བུའི་དཀྱིལ་འཁོར་གྱི་ནང་དབུས་སུ་སེངྒེ་ཤར་གླང་ཆེན་ལྷོོར་རྟ་དང་ནུབ་རྨ་བྱ་དང་བྱང་ཤང་ཤང་དང་པདྨ་ཉི་ཟླས་སྤྲས་པའི་སྟེང་། དེ་ལྟ་བུའི་དཀྱིལ་འཁོར་ཡང་གཞི་ལམ་འབྲས་བུའི་དག་པ་གསུམ་དང་སྦྱར་ན། གཞི་སེམས་ཅན་གྱི་སྐབས་སྐྱོན་ཡོན་གྱི་ཆ་གཉིས་གཉིས་རྩི་སྟེ། དཔེར་ན་ཡེ་ཤེས་ལྔའི་ཆ་ཉོན་མོངས་པ་ལྔར་རྩི་བ་བཞིན་ནོ། །ལམ་དང་སྦྱར་ན་བྱང་ཕྱོགས་སོ་བདུན་ཏེ་རྟ་བབས་བཞི་དྲན་པ་ཉེར་བཞག་བཞི། འཕན་བཞི་ཡང་དག་སྤོང་བ་བཞི། འཁོར་ལོ་སོགས་རྒྱན་བཞི་རྫུ་འཕྲུལ་རྐང་པ་བཞི། རྩིག་པ་ལྔ་དབང་པོ་ལྔ། ཕ་གུ་དྲྭ་ཕྱེད་མདའ་ཡབ་པུ་ཤུ་ཕྱུར་བུ་ལྔ་སྟོབས་ལྔ། སེངྒེ་སོགས་ལྔ་ཉི་ཟླ་བཅས་གདན་ཀུན་བྱང་ཆུབ་ཡན་ལག་བདུན། ཀ་བ་བརྒྱད་འཕགས་ལམ་ཡན་ལག་བརྒྱད་སྒོ་བཞི་ཚད་མེད་བཞི་སོགས་ཚོགས་ལམ་ནས་བསྒོམ་ལམ་བར་གྱི་ཡོན་ཏན་རྣམས་དང་སྦྱར། འབྲས་དུས་སུ་སངས་རྒྱས་ཀྱི་སའི་ཡོན་ཏན་དང་སྦྱོར་ཏེ། ལམ་མཐར་ཐུག་པའི་ཆོས་སུམ་ཅུ་རྩ་བདུན་དང་སྦྱར་ཞིང་། ཁྱད་པར་མི་འཇིགས་བཞི་སེང་ཁྲི། སྟོབས་བཅུ་གླང་ཆེན། དབང་བཅུ་རྨ་བྱ། རྫུ་འཕྲུལ་བཞི་རྟ། ཤེས་བྱ་ཐམས་ཅད་ལ་ཐོགས་པ་མེད་པ་ཤང་ཤང་གི་ཁྲི་སོགས་ཏེ་མཐར་ཐུག་པའི་ཡོན་ཏན་དང་སྦྱར་རོ། །སྔགས་པ་ཁ་ཅིག་དེ་ལྟར་དག་པ་སྦྱར་བ་ཙམ་ཡིན་གྱི་དོན་ལ་མེད་ཟེར་བ་ལོག་རྟོག་སྟེ། བྱད་ཡོད་པའི་མཚོན་བྱེད་དུ་མེ་ལོང་དུ་གཟུགས་བརྙན་ཤར་བ་ལྟར། ཡོན་ཏན་དེ་ལྟ་བུའི་རྩལ་ལས། གཞལ་ཡས་ཁང་དང་ལྷ་རྣམས་རང་ཤར་དུ་ཡེ་ནས་ལྷུན་གྲུབ་ཏུ་ཡོད་པར་ཤེས་པར་བྱའོ། །གཉིས་པ་བརྟེན་པ་ལྷའི་དཀྱིལ་འཁོར། དམ་ཚིག་སེམས་དཔའ་གསལ་འདེབས་པ་ནི། དཀྱིལ་འཁོར་གྱི་ནང་གདན་སོ་སོའི་སྟེང་དུ་ལྷ་སོ་སོའི་ས་བོན་ཡོངས་སུ་གྱུར་པ་ལས། དབུས་སུ་རྣམ་སྣང་གཙོ་བོར་གྱུར་པའི་འོག་གཞི་འཁོར་ལོའ་ིརྩིབས་བཞིར། རིགས་ལྔ་སོ་སོའི་ཡུམ་དང་བཅས་པ། ཕྱི་རོལ་གྱི་གྲ་བཞི་དང་གྲུ་ཆད་བཞིར་སེམས་དཔའ་བརྒྱད་དང་། སེམས་མ་བརྒྱད་དང་སྒོ་བཞིར་སྒོ་བ་ཡབ་ཡུམ་བརྒྱད། བར་ཁྱམས་ཀྱི་སྣམ་བུ་ལ་ཐུབ་པ་དྲུག་རྣམས་སོ་སོའི་གནས་བཞུགས་ཏེ། སྐུ་མདོག་ཕྱག་མཚན་བརྒྱན་རྣམས་ཞིབ་པར་སྒྱུ་འཕྲུལ་རྔམ་གློག་ལས་འབྱུང་བ་ལྟར་རྫོགས་པ་ལས། མུ་མེད་འོད་ཟེར་ཕྱོགས་མཐའ་གཏུགས་པར་འཕྲོ། གསུམ་པ་རང་བྱུང་ཡེ་ཤེས་མཚོན་བྱེད་ཡེ་ཤེས་སེམས་དཔས་བྱིན་གྱིས་བརླབ་པའི་ཚུལ། བར་ཁྱམས་སུ་བྱ་བྱེད་གཉིས་བཀོད་པར་གསུངས་པ་ནི་རྣམ་སྣང་གི་ལྟོ་བའི་བར་ཁྱམས་ཏེ། གཙོ་བོའི་ཐུགས་ཀར་གཞི་ཡི་ཀུན་ཏུ་བཟང་། ཡབ་ཡུམ་འཁྲིལ་སྦྱོར་མཚན་དཔེས་བརྒྱན་པའི་སྐུ། །མཁའ་ལྟར་དྲི་མེད་མཐོན་མཐིང་སྐྱིལ་ཀྲུང་ཚུལ། །ཚོན་གང་འོད་ཀྱི་གོང་བུ་འབར་བར་བསྒོམ། །དེ་ལས་འོད་འཕྲོས་སྣང་སྲིད་སྣོད་བཅུད་སྦྱངས། །ཐམས་ཅད་རྣམ་དག་ལྷ་དང་ལྷ་མོའི་ངང་། །དེ་ཡང་ཕུང་པོ་ལྔ་རིགས་ལྔ། དེའི་སྟོང་ཆ་ཡུམ་ལྔ། མིག་སོགས་ཤེས་བཞི་དང་དེའི་ཡུལ་གཟུགས་སོགས་བཞི་ནང་སེམས་ཡབ་ཡུམ། དབང་པོ་བཞི་དང་དུས་བཞི་ཕྱི་སེམས་ཡབ་ཡུམ། རེག་སོགས་བཞི་དང་། དུས་བཞི་སྒོ་བ་ཡམ་ཡུམ། ཉོན་དྲུག་སོགས་ཐུབ་དྲུག ཀུན་གཞི་དང་དེའི་རྣམ་ཤེས་དག་པ་ཀུན་བཟང་ཡབ་ཡུམ་གཉིས་སོ། །གཉིས་པ་བཟླས་བརྗོད་གསུང་གི་རྣལ་འབྱོར་ནི། ལྷ་རྣམས་ཀྱི་ཐུགས་སྲོག་ལས་སྔགས་ཕྲེང་ཡབ་ཡུམ་ཞལ་དང་མཁའ་གསང་ནས་འཁོར་བའི་འོད་ཟེར་གྱི་རྩེ་ལས་སྐུ་དང་ཡིག་འབྲུ་ཕྱག་མཚན་འཕྲོས་པས་དོན་གཉིས་བྱེད་པར་མོས་ལ། ཡི་གེ་གསུམ་དང་རིགས་ལྔའི་ས་བོན་བཟླས། །གྲགས་སྟོང་སྐྱེ་མེད་བྲག་ཅ་ཇི་བཞིན་ནོ། །དེ་ཉིད་ངང་ལ་མ་བཅོས་མཉམ་པར་བཞག །གསུམ་པ་དྲན་རིག་ཐུགས་ཀྱི་རྣལ་འབྱོར་ལ་གསུམ། དང་པོ་ཐམས་ཅད་དཀྱིལ་འཁོར་གསུམ་གྱི་རང་བཞིན་གཉིས་མེད་མཉམ་པར་བསྟན་པ། འཇོག་ཚུལ་དངོས་ནི། རང་སེམས་ཡེ་ནས་ལྷ་ཡི་རང་བཞིན་ལ། །ལུས་ནི་དཀྱིལ་འཁོར་སྒྲ་ཚིག་གསང་སྔགས་ཉིད། །ཐམས་ཅད་རང་གི་སེམས་ཉིད་ལྷུན་རྫོགས་ཡེ་ཤེས་ཆེན་པོའི་ངང་ནས་བཟླས་པ་དང་མཆོད་བསྟོད་སོགས་བྱེད་པ་ཡིན་གྱི། དམ་ཚིག་ཡེ་ཤེས་གཉིས་མེད་དགུག་གཞུག་མེད། །གཤེགས་གསོལ་མི་དགོས་བཟང་ངན་བླང་དོར་མེད། །འོན་ཀྱང་ལས་དང་པོ་པ་དང་སྤྲོས་པ་ལ་དགའ་བ་རྣམས་ཀྱིས་སྤྱན་དྲངས་སོགས་བྱས་ཀྱང་འགལ་བ་ནི་མེད་ལ། དོན་དུ་ལུས་ལྷ། ངག་སྔགས། སེམས་ཏིང་ངེ་འཛིན་ཏེ། ཡེ་ནས་དཀྱིལ་འཁོར་གསུམ་དུ་གྲུབ་པའམ་ཡིན་པའི་བདག་ཉིད་ལ། ཡིན་པར་ཤེས་པའི་ཚུལ་གྱིས་གསལ་འདེབས་ལས། །མ་གྲུབ་པ་ལ་ཡང་གྲུབ་བྱེད་པ་མིན་ནོ། །གཉིས་པ་བློའི་རིམ་པ་དང་སྦྱར་ཏེ་རྫོགས་རིམ་སྒོམ་ཚུལ་བསྟན་པ། རྗེས་ལ་ལས་དང་པོ་པས་ཞེན་པ་ཡོད་ན་སྣོད་བཅུད་རྟེན་བརྟེན་པའི་དཀྱིལ་འཁོར་རིམ་གྱིས་བསྡུ། ཡོད་མེད་སོགས་གང་དུའང་མི་དམིགས་ཏེ་སྤྲོས་དང་བྲལ་བར་གཞག སྦྱངས་པ་བྱས་པས་ཞེན་འཛིན་མེད་ན་བསྐྱེད་པ་དེ་ཉིད་རྫོགས་པར་ཤེས་པས་སྣང་སྟོང་སྒྱུ་མ་ཆུ་ཟླའི་ངང་ཉིད་ནས། རྗེས་དགེ་བ་སེམས་ཅན་གྱི་དོན་དུ་བསྔོ་བར་བྱ། གསུམ་པ་ཐུན་མཚམས་སྤྱོད་ལམ་གྱི་རྣལ་འབྱོར་བསྟན་པ། ཐུན་མཚམས་ཀྱི་སྤྱོད་ལམ་ཀུན་དུ་མཉམ་བཞག་ལ་ལྷའི་དཀྱིལ་འཁོར་བསྒོམ་པ་ལྟར་རྗེས་ཐོབ་ཏུ་ཡང་སྟོང་གསལ་སྒྱུ་མའི་ཚུལ། སྣང་དང་གྲགས་པ་ཐམས་ཅད་ལྷ་དང་སྔགས། སེམས་ཀྱི་དྲན་རིག་ཐམས་ཅད་རང་བྱུང་ཡེ་ཤེས་ཤར་གྲོལ་འཛིན་མེད་ཆེན་པོར་ཕྱམ་ཕྱམ་བཞག་པ་སྟེ། དྲན་དང་སེམས་པ་ཐམས་ཅད་ཡེ་ཤེས་སུ་བཞག་ཅིང་། ཐ་མལ་གྱི་སྣང་བ་དང་ཆགས་སྡང་ཉོན་མོངས་ཀྱི་དབང་དུ་མ་ཤོར་བར་སྐད་ཅིག་སྐད་ཅིག་ཙམ་ཡང་མ་ཡེངས་ཤེས་པར་བྱའོ། །གསུམ་པ་གནས་སྐབས་སྒྲུབ་ཚུལ་ངེས་པས་དོན་བསྡུ་བ་ལ་གསུམ། དང་པོ་རྩ་བ་དམ་ཚིག་བསྟན་པ། གྲོགས་རྩ་བ་ཡན་ལག་དམ་ཚིག་གཙང་མ་བསྲུང་། དེ་ཡང་། ཤེས་དང་མི་སྤང་སྤྱད་དང་དང་དུ་བླང་། །བསྒྲུབ་པར་བྱ་བའི་དམ་ཚིག་ལྔ་ལྔ་སྟེ། །ཡན་ལག་དམ་ཚིག་ཉི་ཤུ་རྩ་ལྔ་མདོར་བསྡུས་སྐུ་གསུང་ཐུགས་ཀྱི་དམ་ཚིག་གསུམ་སྟེ། དེ་ཡང་རང་སེམས་རྣམ་དག་ཚུལ་ལ་བསླབ་པ་སྟེ་མདོར་ན་རང་སེམས་དྲི་མས་གཙང་བའོ། །གཉིས་པ་གྲོགས་ཚོགས་མཆོད་སོགས་བསྟན་པ། བསྐང་བའི་དུས་ལ་དྲུག་ནི། ཉ་དང་གནམ་སྟོང་ཚེས་བརྒྱད་ཉི་ཤུ་དགུ། །ཚེས་བཅུ་ཡར་ངོ་མར་ངོའི་ཉིན་དང་མཚན། །ཕྱིར་མཁའ་འགྲོ་རྒྱུ་ཞིང་ནང་དུ་རྩ་རླུང་ཁྱད་པར་ཅན་འདུ་བས་ཉེ་བའི་འདུ་བ་ཞེས་བྱ། ཁྱད་པར་ཡར་མར་གྱིས་ཚེས་བཅུ་ལ་བསྙེན་སྒྲུབ་ཚོགས་མཆོད་བསྐང་བཤགས་འབད་པར་བྱ། དེས་ཟླ་བ་དེའི་རིང་ལ་ཉམས་པ་ཐམས་ཅད་སོས་པ་དང་དངོས་གྲུབ་མྱུར་དུ་འགྲུབ་བོ། །གསུམ་པ་ཟབ་དོན་སྙིང་པོ་བསྟན་པ། ཡོན་ཏན་མངོན་དུ་བྱེད་ཚུལ། རླུང་སེམས་རྩ་དང་ཐིག་ལེའི་རྣལ་འབྱོར་འཁོར་ལོ་བཞི་ཡི་མན་ངག་སོགས། རྫོགས་རིམ་ཡང་ཟབ་གནད་ལ་ན ན་ཏན་སྙིང་པོར་བྱ། བསྡུ་ན་བསྐྱེད་རིམ་བསྡུས་པ་གཞིའི་ཀུན་བཟང་ཡབ་ཡུམ་དང་། རྫོགས་རིམ་བསྡུས་པར་སྙིང་གར་འོད་ལྔའི་ཐིག་ལེ་ལ་སེམས་འཛིན་པ་སོགས་བདེ་གསལ་མི་རྟོག་ཟུང་དུ་འཇུག་པའི་ལམ་བསྒོམས་པས། རྡོ་རྗེ་འཛིན་པ་དེ་ནི་ཚེ་འདིར་རྫོགས་སངས་རྒྱའོ། །དོན་གསུམ་པ་ལེའུ་རྫོགས་པ་མཇུག་གི་དོན་ལ་གཉིས། དང་པོ་སྐབས་ཀྱི་དགེ་བ་བསྔོ་བ། དེ་ལྟར་རབ་གསང་བླ་མེད་སྙིང་པོ་འདིས། །རང་བཞིན་ལྷུན་གྲུབ་ཧེ་རུ་ཀ་དཔལ་གྲོང་དུ་ཉེར་འཚོ་ཞིང་། འགྲོ་ཀུན་ལས་དང་ཉོན་མོངས་སྲིད་པ་འདིར། །དུབ་པའི་སེམས་ཉིད་དེ་རིང་ངལ་སོས་ཤིག །གཉིས་པ་ལེའུའི་མཚན། རྫོགས་པ་ཆེན་པོ་སེམས་ཉིད་ངལ་གསོ་ལས། བསྐྱེད་རྫོགས་ཟུང་དུ་འཇུག་པའི་ལེའུ་སྟེ་དགུ་པའོ།། །། ༈ བཅུ་པ་གནས་ལུགས་གཞིའི་རང་བཞིན་མཐའ་བྲལ་རྫོགས་པ་ཆེན་པོ་དོན་གྱི་ལེའུ་ལ་གསུམ་སྟེ། ལེའུ་ལ་འཇུག་པ་རྒྱུའི་དོན། ལེའུ་དངོས་ཀྱི་དོན། ལེའུ་རྫོགས་པ་མཇུག་གི་དོན་ནོ། །དང་པོ་ནི། ཆོས་ཐམས་ཅད་ཀྱི་རང་བཞིན་གཉུག་མ་ལྷན་ཅིག་སྐྱེས་པའི་ཡེ་ཤེས་གདོད་མ་ནས་ངོ་བོ་ཉིད་མེད་པ། ཆོས་ཀུན་གྱི་སྙིང་པོའི་བསྟན་པ་ལ་གོང་དུ་སྨོས་པའི་ཚུལ་དེ་ལྟར་བསྐྱེད་རྫོགས་ཟུང་འབྲེལ་རྣལ་འབྱོར་པས། ཆོས་རྣམས་མ་སྐྱེས་སྟོང་པའི་ཚུལ་ལ་འཇུག་སྟེ། དེའང་ཕྱི་དོན་དུ་ཞེན་པ་རང་སེམས་སུ་ཤེས་པའམ་ལྷ་དང་གཞལ་ཡས་ཁང་དུ་ཤེས་པས་སྤོང་། དེ་ཡང་སྐྱེ་མེད་དུ་ཤེས་པས་གཉེན་པོ་ཉིད་ཀྱང་ངོ་བོ་མེད་པས་ཆོས་ཐམས་ཅད་ཀྱི་རང་བཞིན་ལ་འཇུག་གོ །གཉིས་པ་ལེའུ་དངོས་ཀྱི་དོན་ལ་གསུམ། གནས་ལུགས་དོན་གྱི་རང་བཞིན་མདོར་བསྟན་པ། གཉིས་མེད་མཐའ་བྲལ་ཆེན་པོའི་ངོ་བོ་རྒྱས་པར་བཤད་པ། གཟུང་འཛིན་ཡེ་སྟོང་རྩ་བྲལ་དུ་དོན་བསྡུའོ། །དང་པོ་གནས་ལུགས་དོན་གྱི་རང་བཞིན་མདོར་བསྟན་པ་ནི། དེ་ཡང་སྣང་སྲིད་འཁོར་འདས་ཆོས་རྣམས་ཀུན་ཡེ་ནས་ཆོས་དང་གང་ཟག་གི་བདག་མེད་ཅིང་སྤྲོས་དང་བྲལ་བ་ལ། དེ་ལྟར་མ་ཤེས་པའམ་མ་རིག་པས་ང་དང་ང་ཡིར་འཛིན་པས་རྨི་ལམ་དང་འདྲ་བའི་སྲིད་པ་འདིར་འཁྱམས་ཏེ་འཁོར་འདས་བདེ་སྡུག་སོགས་སྣ་ཚོགས་སྣང་མོད་ཀྱང་། སྣང་བའི་དུས་ཉིད་ནས་རང་བཞིན་མ་གྲུབ་པས་སྟོང་པའི་ངང་། དཔེ་སྒྱུ་མའམ་རྨི་ལམ་དང་འདྲ་བར་མཁྱེན་པར་མཛོད། དེའང་འཇམ་དཔལ་རྣམ་པར་རོལ་པ་ལས། ཕྱི་རོལ་གྱི་ཡུལ་རྣམས་སེམས་སམ། རྟོག་པའི་བག་ཆགས་ཀྱི་སྣང་བའི་ཚུལ། ཝཱ་རཱ་ཎ་སཱི་ན་བྲམ་ཟེ་མེ་སྦྱིན་གྱིས་ལུས་སྟག་ཏུ་བསྒོམས་པས། གྲོང་ཁྱེར་པས་དེར་མཐོང་སྟེ་བྲོས་པས་གྲོང་ཁྱེར་སྟོང་པ་དང་། ཟད་པར་དང་མི་སྡུག་པ་སོགས་བསྒོམས་པས་དེ་དང་དེར་འཕྲལ་དུ་སྣང་བ་ཡིན་ན། ཐོག་མེད་བག་ཆགས་ཀྱི་ལྟ་ཅི་སྨོས། སྣང་བ་ཐམས་ཅད་མ་ངེས་ཏེ། ལ་ལའི་སྣང་བ་ལ་ལའི་མུན་པ་སོགས་ངེས་པ་མེད་པའི་ཕྱིར་བག་ཆགས་ཀྱིས་དབང་གིས་གང་ལྟར་ཡང་སྣང་བ་ཡིན་ནོ་གསུངས། གཞན་ཡང་མི་གཅིག་ལའང་དགྲ་གཉེན་སོགས་སུ་མཐོང་བ་དང་། ཆུ་གཅིག་ཉིད་རླུང་གིས་དབའ་རླབས་མང་པོར་སྣང་བ་དང་། མར་མེ་གཅིག་ཉིད་མིག་བཙིར་{རྩིར}བས་གཉིས་སུ་སྣང་བ་དང་། ས་ར་ཧ་གཅིག་ཉིད་བཟང་ངན་གཉིས་སུ་མཐོང་བ་ལྟར། ཆོས་ཐམས་ཅད་དོན་ལ་གཉིས་སུ་མེད་པ་ལ་གཉིས་སུ་འཛིན་པས་བསླད་པ་དེ་དང་འདྲའོ་གསུངས། གཉིས་པ་གཉིས་མེད་མཐའ་བྲལ་ཆེན་པོའི་ངོ་བོ་རྒྱས་པར་བཤད་པ་ལ་གཉིས། ཕྱི་ཡུལ་སྣང་སྐྱེ་མེད་སྟོང་པའི་གཟུགས་བརྙན་དུ་ཐག་བཅད་པ། ནང་འཛིན་རྟོག་སྟོང་ཉིད་རྩལ་བྲལ་དུ་ལ་ཟླ་བའོ། །དང་པོ་ཕྱི་ཡུལ་སྣང་སྐྱེ་མེད་སྟོང་པའི་གཟུགས་བརྙན་དུ་ཐག་བཅད་པ་ལ་དྲུག དང་པོ་ཡུལ་སྣང་སྟོང་པའི་རང་གཟུགས་སུ་བསྟན་པ། འདི་ལྟར་ཕྱི་རོལ་རི་ལ་སོགས་པའི་སྣང་བའི་དངོས་པོ་ཀུན། རང་གི་སེམས་ལ་སྣང་ཡང་སྣང་ཡུལ་རི་སོགས་སེམས་སུ་གྲུབ་པ་མེད་དེ་རང་སེམས་ཀྱི་རྗེས་སུ་འགྲོ་ལྡོག་མི་བྱེད་ཅིང་ཁ་དོག་དང་དབྱིབས་སུ་སྣང་བའི་ཕྱིར། འོན་ཀྱང་སེམས་ལས་གཞན་དུའང་དངོས་པོར་གྲུབ་པ་འགའ་མེད་དེ། ཐོག་མེད་ནས་གོམས་པའི་བག་ཆགས་དབང་གིས་གཟུང་འཛིན་གཉིས་སུ་སྐྲ་ཤད་ལྟར་སྣང་ཡང་སྣང་དུས་ཉིད་ནས་གཟུང་འཛིན་གཉིས་མེད་པ། འདིར་གཟུང་བ་ནི་གཟུང་ཡུལ་ལས་སྐད་ཅིག་དང་པོར་སྐྱེས་པའི་རྟོག་པ་སྟེ་སེམས་ཉིད་གཟུང་བར་སྐྱེས་པ་ཅན་དང་། འཛིན་པ་ནི་རྗེས་ལས་སྐྱེས་ཀྱི་དཔྱོད་པ་སེམས་ལས་བྱུང་བ་རྣམས་སོ། །ཁ་ཅིག་རི་སོགས་གཟུང་བ་དང་། ཤེས་པ་འཛིན་པར་སྨྲ་བ་ནི་མ་ཡིན་ཏེ། དེ་ལྟར་འཕགས་པ་ལ་གཟུང་འཛིན་སྣང་བའམ། ཡང་ན་ཡུལ་སྣང་སྒྱུ་མ་ལྟ་བུ་མི་སྣང་བ་དང་། སངས་རྒྱས་ཀྱི་ཇི་སྙེད་མཁྱེན་པའི་ཡེ་ཤེས་མི་འཐད་པ་སོགས་སྐྱོན་མང་ངོ། །བཞིན་དང་མེ་ལོང་ནང་གི་གཟུགས་བཞིན་ནོ། །གཉིས་པ་དེ་ཉིད་སེམས་དང་གཞན་དངོས་སུ་མ་གྲུབ་པ། །མེ་ལོང་གི་ནང་དེར་ནི་བྱད་ཉིད་སྣང་ཡང་མ་གྲུབ་ལ། བྱད་ལས་གཞན་གྱི་རྣམ་པ་བཏོད་བྱེད་མེད། །མེད་བཞིན་གཉིས་སུ་སྣང་བ་མངོན་སུམ་ལྟར། །སྣ་ཚོགས་ཆོས་རྣམས་དེ་བཞིན་ཤེས་པར་བྱ། །གསུམ་པ་སྣང་དུས་མཐའ་བྲལ་བརྗོད་མེད་དུ་བསྟན་པ། མ་བརྟགས་ན་བདེན་བདེན་ལྟར་སྣང་བས་ཉམས་དགའ་ཡང་རིགས་པས་བརྟགས་ན་ཡུལ་སེམས་གཉིས་ཀ་མ་གྲུབ་པས་ངོས་བཟུང་མེད། ཤིན་ཏུ་བརྟགས་ན་སྨྲ་བསམ་བརྗོད་ལས་འདས། །ཡོད་མེད་མི་དམིགས་མཐའ་བྲལ་མ་བྲལ་མེད། །བཞི་པ་སྐྱེ་སོགས་སྐྱེ་མེད་སྒྱུ་མ་ལྟར་བསྟན་པ། སྒྱུ་མའི་ཚུལ་དུ་སྐྱེ་སོགས་སྣང་ན་ཡང་། །སྣང་དུས་ཉིད་ནས་སྐྱེ་སོགས་རང་བཞིན་མེད། །སྨིག་རྒྱུའི་ཆུ་དང་རྫིང་བུའི་ཟླ་གཟུགས་བཞིན། །ལྔ་པ་ཡུལ་སྣང་སེམས་ཀྱི་བག་ཆགས་སུ་བསྟན་པ། ཁྱད་པར་མ་དག་འགྲོ་དྲུག་སྣང་བ་འདི། །མེད་བཞིན་སྣང་ལ་བག་ཆགས་འཁྲུལ་པའི་གཟུགས། །རབ་རིབ་ཅན་ལ་སྐྲ་ཤད་སྣང་བ་བཞིན། །དེ་བསལ་འདོད་པས་བད་ཀན་སྦྱོང་བ་ལྟར། །འཁྲུལ་སྣང་དག་འདོད་མ་རིག་ལིང་ཏོག་བསལ། །དྲུག་པ་འཁྲུལ་སྣང་གཞི་མེད་རྩ་བྲལ་དུ་སྦྱང་བར་བསྟན་པ། དེ་ཡི་གཉེན་པོར་རིག་པའི་ཡེ་ཤེས་ཀྱིས། །འཁོར་བའི་བག་ཆགས་སྟོང་པར་ལ་བཟླ་ཞིང་། །མ་དྲོས་པས་ཞུས་པའི་མདོ་ལས། གང་ཞིག་རྐྱེན་ལས་སྐྱེས་པ་དེ་མ་སྐྱེས། །ཞེས་སོགས་གསུངས། སྟོང་པའི་རང་བཞིན་སྣང་བ་ཐག་བཅད་དེ་གཟུགས་སྟོང་པ། སྟོང་པ་ཉིད་གཟུགས་སོགས་བཞིན་སྣང་སྟོང་གཉིས་མེད་པའི་བདེན་པ་གཉིས་ཀྱི་དོན་ཤེས་པས། རྟག་ཆད་འཁོར་འདས་ཀྱི་མཐའ་གཉིས་གནས་བསལ་དབུ་མར་བསླབ་པ་ཡིས། སྲིད་ཞི་མི་གནས་ནམ་མཁའི་ངང་དུ་གྲོལ། །ཆོས་ཐམས་ཅད་འབྱུང་བ་མེད་པའི་མདོ་ལས། འདོད་ཆགས་མི་དམིགས་དེ་བཞིན་ཞེ་སྡང་དང་། །གཏི་མུག་འདི་ལ་ནམ་ཡང་མི་དམིགས་ཏེ། །ཆོས་རྣམས་ཀུན་དང་ནམ་མཁའ་འདྲའོ་ཞེས། །དེ་ལྟར་གང་ཤེས་དེ་ནི་རྒྱལ་བར་འགྱུར། །འདི་ནི་ངེས་དོན་སྙིང་པོའི་དམ་པ་སྟེ། །རང་བཞིན་རྫོགས་པ་ཆེན་པོའི་ཆེན་པོའི་གནས་ལུགས་ཡིན། །གཉིས་པ་ནང་འཛིན་རྟོག་སྟོང་ཉིད་རྩ་བྲལ་དུ་ལ་ཟློ་བ་ལ་དོན་བཅོ་ལྔ་སྟེ། དང་པོ་སེམས་ཀྱི་རྩ་བ་བཅད་པའི་འཐད་པ་དགོད་པ། ཕར་མ་ཞེན་ན་ཚུར་མི་གོས་པའི་ཕྱིར། སྣང་བའི་དངོས་ཀྱིས་ཕན་གནོད་གཉིས་སུ་མེད་དེ་འབྲེལ་བ་མ་གྲུབ་པའི་ཕྱིར། དེར་བདེན་པར་འཛིན་ཅིང་ཞེན་པས་སྲིད་པར་འཆིང་བས་ན། ཡུལ་སྣ་ཚོགས་སྣང་བ་ལ་བདེན་བརྫུན་སོགས་བརྟག་དཔྱད་མི་དགོས་ཀྱི། ནང་འཛིན་པའི་སེམས་ཀྱི་གཞིའམ་རྩ་བ་བཅད་པར་མཛོད། དོ་ཧ་ལས། གང་ལ་ཞེན་པ་ཡོད་ན་དེ་ཡང་ཐོང་། །རྟོགས་པར་གྱུར་ན་ཐམས་ཅད་དེ་ཡིན་པས། །དེ་ལས་གཞན་དུ་སུས་ཀྱང་ཤེས་མི་འགྱུར། །ཀློག་པ་དེ་ཡིན་འཛིན་དང་བསྒོམ་པའང་དེ། །བསྟན་བཅོས་སྙིང་ལ་འཆང་བའང་དེ་ཡིན་ནོ། །ཞེས་དང་། དཀོན་བརྩེགས་ལས། ཁྱི་ལ་རྡོ་འཕང་གི་དཔེས། ཡུལ་གཟུགས་སོགས་རེ་རེ་ལ་ཕར་རྟོག་དཔྱོད་ཀྱིས་རང་བཞིན་མེད་པ་དང་། མི་རྟག་སོགས་ཤེས་ཀྱང་དེས་གཉེན་པོ་མི་ནུས་ཤིང་། སེངྒེ་ལ་རྡོ་འཕང་བའི་དཔེས་ནང་སེམས་ལ་དངོས་པོ་མེད་པར་ཤེས་ན་གྲོལ་བར་གསུངས་ཏེ། སེངྒེ་མི་ལ་ཟ་བ་ལྟར། དགེ་སློང་རྣལ་འབྱོར་སྤྱོད་པ་ཡིས། །ཕྱི་རོལ་འདོད་ཡོན་མཐོང་གྱུར་ན། །སེམས་ལས་བྱུང་བ་ཤེས་ནས་ནི། །སེམས་ཉིད་སྟོང་པར་ཤེས་པ་ཡིས། །དེས་ནི་རྣལ་འབྱོར་གྲོལ་བར་འགྱུར། །ཞེས་སོ། །གཉིས་པ་གཞི་མེད་སྟོང་པ་ཆེན་པོར་བསྟན་པ། སེམས་ནི་སྣང་ལ་རང་བཞིན་འགའ་མེད་དེ། །བཙལ་བས་མི་རྙེད་བལྟས་པས་མཐོང་བ་མེད། །ཁ་དོག་དབྱིབས་མེད་ངོ་བོ་ངོས་བཟུང་མེད། །ཕྱི་དང་ནང་མེད་དུས་གསུམ་སྐྱེ་འགག་མེད། །ཕྱོགས་དང་རིས་མེད་གཞི་རྩ་དངོས་པོ་མེད། །འདི་ཞེས་མི་མཚོན་བསམ་ཡུལ་འདས་པའི་སེམས། །གསུམ་པ་དུས་གསུམ་དུས་མེད་ཆེན་པོར་བསྟན་པ། དུས་གསུམ་དུ་འཆར་འཆར་འདྲ་ཡང་འདས་པའི་སེམས་འགགས་པ་མི་དམིགས་མ་འོངས་པ་མ་སྐྱེས་ཕྱོགས་ན་མེད། ད་ལྟར་མི་གནས་ཏེ་སེམས་ལ་སྐྱེ་འགག་གནས་གསུམ་གྱི་ཆ་མེད་ཅིང་། མེད་པའང་མ་གྲུབ་པས། རང་བཞིན་མཉམ་པའི་ངང་དུ་བཞག་པ་ཉིད་དོ། །བལྟ་ས་དང་ལྟ་མཁན་གཉིས་སུ་མ་གྲུབ་པའི་ཕྱིར་སེམས་ཀྱིས་སེམས་མ་ཚོལ་བར་དལ་དུ་ཆུག བཞི་པ་སྔ་ཕྱི་རིས་མེད་ཆེན་པོར་བསྟན་པ། སེམས་འཕྲོ་དུས་ཉིད་ནས། དགག་སྒྲུབ་དྲན་རིག་སྐད་ཅིག་ཡིད་ཀྱི་ཡུལ། །སྣང་ཙམ་ཉིད་ནས་ཕྱི་དང་ནང་གང་དུ་བཙལ་ནའང་མེད་དེ། བཙལ་བྱའི་དོན་གྱིས་ཚོལ་མཁན་བྱས་པས་བསླད། །རང་གིས་རང་བཙལ་ནམ་ཡང་རྙེད་མི་འགྱུར། །ངེས་པ་བརྟགས་ན་རང་གང་ཡང་མེད་དེ་གང་དུའང་དམིགས་པ་ཐམས་ཅད་ཉེ་བར་ཞི་བའི་ཕྱིར་རོ། །ལྔ་པ་གདོད་ནས་རྣམ་དག་ཆེན་པོར་བསྟན་པ། དེ་ལྟའི་དོན་དེ། ཡེ་ནས་སྐྱེ་མེད་རང་བཞིན་གཉུག་མའི་དོན། །མི་གནས་འགག་པ་མེད་པའི་སེམས་ཉིད་ནི། །དུས་གསུམ་གཞི་རྩ་མེད་པས་སྟོང་པའི་ངང་། །སྣ་ཚོགས་འཆར་གཞི་མ་འགགས་སྣང་བ་ལ། །བརྟགས་ན་དངོས་པོ་མཚན་མ་མེད་པས་རྟག་པ་མེད། རིག་ཙམ་དུ་རང་ཤར་འགག་པ་མེད་པས་ཆད་པ་མེད། གཉིས་དང་གཉིས་མེད་མེད་པས་བརྗོད་པས་བརྗོད་དུ་མེད། ཕུང་གསུམ་མིན་པས་འདི་ཞེས་གྲུབ་པ་མིན་པས་ངོས་བཟུང་མེད། མཐའ་ཡིས་མ་གོས་པའི་ཡེ་ཤེས་རང་བཞིན་གདོད་ནས་དག་པར་ཤེས་པར་བྱ། དྲུག་པ་བརྟག་དཔྱད་གཉིས་མེད་ཆེན་པོར་བསྟན་པ། བརྟགས་པས་མེད་ལྟར་མ་བརྟགས་དུས་ནའང་མེད། །རང་བཞིན་གཉིས་མེད་གདོད་མའི་ངོ་བོ་ལ། །བཟང་ངན་བླང་དོར་རེ་དོགས་མི་དམིགས་པས། །བརྟག་དང་དཔྱད་པས་འདི་ལ་ཅི་བྱར་ཡོད། །དུས་གསུམ་ཡིད་ཀྱིས་ཚོལ་ཁྲོ་མ་བྱེད་ཞོག །དོ་ཧ་ལས། གླང་ཆེན་ལོན་ནས་སེམས་ཚགས་ཆུད་པ་ན། །དེར་ནི་འགྲོ་འོང་བཅད་ནས་དལ་བ་སྟེ། །འདི་ལྟར་རྟོགས་ན་སུ་ལའང་འདྲི་ས་མེད། །མཁས་པ་ངོ་ཚ་མེད་པས་དེ་མ་རྟོགས། །ཞེས་དང་། སེམས་ཀྱི་གླང་པོ་ཆེ་ནི་ཡན་དུ་ཆུག །དེ་ཉིད་ཀྱིས་ནི་བདག་ཉིད་ལ་དྲིས་ཤིག །ཅེས་གསུངས། བདུན་པ་གྲུབ་མཐའི་ཡུལ་འདས་ཆེན་པོར་བསྟན་པ། ལང་གཤེགས་ལས། བྱིས་པ་ངན་པ་རྟོག་གེ་བ། །རོ་དང་འདྲ་བས་དེ་དག་བརྟག །ཅེས་གསུངས་པས། རྟོག་གེ་སྤྲོས་པའི་སྤུན་པས་བསྐྱོད་པའི་སེམས་རྣམ་གཡེང་རླུང་ལྟར་གཡོ་བས་མི་རྟོགས་ཀྱི། ནམ་མཁའ་རིན་པོ་ཆེའི་མདོ་དང་། གཤེད་དམར་རྒྱུད་དང་། བྱམས་ཆོས་ལས། འདི་ལ་བསལ་བྱ་སོགས། བ སལ་བཞག་འགྲོ་འོང་མེད་པའི་བྱང་ཆུབ་སེམས་ཏེ་དྲི་མ་ཡེ་ནས་མེད་པས་བྱང་། ཡོན་ཏན་ཡེ་ནས་རྫོགས་པས་ཆུབ། འཆར་ཚུལ་ཅིར་ཡང་མ་འགགས་པས་སེམས་ཉིད་སྐུ་གསུམ་ཡེ་ནས་ལྷུན་གྱིས་གྲུབ་པས། ཀུན་བྱེད་ཡེ་ཤེས་དྲི་མེད་ངོ་བོ་ཉིད། །ཇི་བཞིན་བཞག་པས་དེ་བཞིན་མཐོང་བ་ཡིན། །དེ་ཡང་གནད་མཐོང་གྲོལ་བ་ནི་ཡུལ་སྤངས་པ་ལ་མི་ལྟོས་ཏེ། སྣང་ཙམ་གྱིས་མི་འཆིང་བས་ཞེན་པ་སྤང་དགོས་ཏེ། ཏི་ལི་པས། བུ་སྣང་བས་མི་འཆིང་ཞེན་པས་འཆིང་། །ཞེན་པ་ཆོད་ཅིག་ན་རོ་པ། །ཞེས་དང་། དོ་ཧ་ལས། གལ་ཏེ་ཡིད་དུ་འོང་ངོ་སྙམ་པའི་སེམས། །སྙིང་ལ་འབབ་ཅིང་གཅེས་པར་བྱས་ན་ནི། །ཏིལ་གྱི་ཤུན་པ་ཙམ་གྱི་ཟུག་རྔུས་ཀྱང་། །ནམ་ཡང་སྡུག་བསྔལ་འགའ་ཞིག་བསྐྱེད་པར་ཟད། །ཅེས་སོ། །དེས་ན་རང་སེམས་སྐྱེ་མེད་དུ་དང་པོ་རྟོགས་པར་བྱ་བ་ཙམ་ལས། དུས་ཐམས་ཅད་དུ་རྟོག་དཔྱོད་ཀྱི་སྤྲོས་པས་བསླད་པར་མི་བྱ་སྟེ། ཀུན་བྱེད་ལས། རང་བཞིན་མ་བཅོས་ནམ་མཁའ་ལྟ་བུ་ལ། །བརྟག་དང་དཔྱད་པ་མང་པོས་ཅི་ཞིག་བྱ། །ཞེས་དང་། ཆོས་ཀྱི་རྒྱལ་པོའི་མདོར། མི་ལ་དུག་མདའ་ཕོག་པའི་དཔེས་གཏན་ཚིགས་མང་པོ་ལ་རྟོག་དཔྱོད་བྱས་པས། སེམས་རྟོག་པའི་དབང་དུ་སོང་བས་ཉོན་མོངས་པས་འཆིང་ལ། དེ་བས་རྣམ་པར་མི་རྟོག་པའི་སེམས་ལ་གནས་པར་བྱའོ། །ཞེས་དང་། དགོངས་འགྲེལ་ལས། སོ་སོར་རང་རིག་མཚན་ཉིད་སྤྱོད་ཡུལ་ནི། །བརྗོད་དུ་མེད་ཅིང་ཐ་སྙད་ཡོངས་ཆད་པས། །རྩོད་དང་བྲལ་བ་དོན་དམ་ཆོས་ཡིན་ཏེ། །དེ་ནི་རྟོག་གེའི་ཡུལ་ལས་འདས་པའོ། །ཞེས་སོ། །དེའང་ཚིག་ཙམ་གྱིས་མི་ཕན་ཏེ། ཕལ་ཆེན་ལས། དཔེར་ན་འོན་པ་རོལ་མོ་མཁན། །གཞན་དག་དེ་ཡིས་དགའ་བྱེད་ཀྱང་། །བདག་ཉིད་ཀྱིས་ནི་མི་ཐོས་པ། །མ་བསྒོམས་ཆོས་ཀྱང་དེ་བཞིན་ནོ། །ཞེས་གསུངས། དེས་ན་དོ་ཧ་ལས། གང་གིས་བླ་མའི་མན་ངག་བདུད་རྩིའི་ཆུ། །གདུང་སེལ་བསིལ་བ་ངོམས་པར་མི་འཐུང་བ། །དེ་ནི་བསྟན་བཅོས་དོན་མང་མྱ་ངན་གྱི། །ཐང་ལ་སྐོམ་པས་གདུང་སྟེ་འཆི་བར་ཟད། །ཅེས་དང་། རྩ་བ་བྲལ་བའི་དེ་ཉིད་གང་སེམས་པ། །བླ་མའི་མན་ངག་ཐོབ་པ་དེ་ཡིས་ཆོག །ཞེས་སོ། །བརྒྱད་པ་བློ་བྲལ་བརྗོད་མེད་ཆེན་པོར་བསྟན་པ། འདིར་ནི་སྣ་ཚོགས་གྲུབ་མཐའ་མང་པོ་དང་། །བསམ་བརྗོད་རྟོག་པ་དུ་མས་ཅི་ཞིག་བྱ། །ངེས་པའི་དོན་ལ་གྲུབ་དང་མ་གྲུབ་མེད། །མཐའ་དང་དབུས་མེད་ཐེག་པའི་རྣམ་དབྱེ་མེད། །མཁའ་བཞིན་རྣམ་པར་དག་པས་འདི་ཞེས་རྒྱ་ཆད་དེའི་ཕྱོགས་ལྷུང་བ་མེད་དེ། དེ་ལ་ཡོད་མེད་བློས་བརྟགས་འཁྲུལ་པས་ན། །བརྗོད་དུ་མེད་གང་ཇི་ལྟར་བཤད་དུ་ཡོད། །དོན་མེད་གནས་ལ་རབ་ཏུ་ངལ་བར་ཟད། །དགུ་པ་བློས་བཏགས་དོན་མེད་ཆེན་པོར་བསྟན་པ། རང་རང་གི་གྲུབ་མཐས་མཇལ་བ་ཐམས་ཅད་དཔེ་ཇི་ལྟར་མཁའ་དབུས་དྭངས་པའི་སྐྱེད་མོས་ཚལ། མེ་ཏོག་འབྲས་མང་འབབ་ཆུས་བརྒྱན་པ་ཞིག །མངོན་དུ་བསམས་ནས་དེ་ཡི་རྣམ་དབྱེ་དང་། །མཐུན་ཕྱོགས་མི་མཐུན་ཕྱོགས་གང་རྩོད་པ་བཞིན། །འཁྲུལ་སྣང་གཞི་མེད་པ་ལ། གསར་དུ་སྒྲོ་བཏགས་ཤེས་བྱ་སྤྱི་བྱེ་བྲག དངོས་དངོས་མེད་སོགས་རྣམ་དབྱེ་གཞི་བཅས་ཀྱི་གྲུབ་མཐའ་འཆིང་བ་དར་གྱི་སྲིན་བུ་རང་གི་ཁ་ཆུས་འཆིང་བ་བཞིན། ངེས་ན་གཤིས་དོན་ནམ་མཁའ་འདྲ་བས་རྣམ་དབྱེ་ངོ་བོ་ཉིད་ཀྱིས་མེད་པར་རྟོགས་པར་བྱ་སྟེ། ཀུན་བྱེད་ལས། ཆོས་ཀུན་བྱང་ཆུབ་སེམས་ཡིན་དེ་དཔེ་ནི། ཀུན་དཔེ་ནམ་མཁའ་ལྟ་བུའི་རང་བཞིན་དུ། །བྱང་ཆུབ་སེམས་ཀྱི་དོན་ཡང་དེ་བཞིན་ནོ། །ཞེས་སོ། །བཅུ་པ་དམིགས་འཛིན་འཆིང་ཞེན་ཆེན་པོར་བསྟན་པ། དེས་ན་གློ་བུར་གྱི་སྒྲིབ་པའམ། རང་བཞིན་གྱི་སྒྲིབ་པ་ལ་སོགས་པའི་རྣམ་པ་གང་གི་ཡང་དྲི་མ་མེད་པ་སེམས་ཉིད་དག་པ་གཟོད་ནས་རང་བཞིན་ལྷུན་གྱིས་གྲུབ་པའི་རང་བཞིན་ལ། བཅོས་བསྒྱུར་དྲི་མས་བསྒྲིབས་པ་ནམ་ཡང་མཐོང་བ་མེད་པས། དེ་ལ་བསྐྱེད་དང་རྫོགས་པའི་སྤྲོས་པས་ཅི་ཞིག་བྱ། འཛིན་ཞེན་མེད་པའི་དང་བའི་བསམ་གཏན་བློས་བྱས་ཀྱི་བསྒོམས་པས་བསླད་པར་ཟད། བཅུ་གཅིག་པ་འཛིན་མེད་གནས་ལུགས་ཆེན་པོར་བསྟན་པ། གདོད་ནས་རང་བཞིན་གྱིས་དག་པའི་སེམས་ཉིད་ལ། སྤང་བྱ་དང་གཉེན་པོས་བྲལ་ཐོབ་མེད་ཀྱིས་དམིགས་གཏད་ཤོལ། ཕྱི་ནང་གཟུང་འཛིན་མེད་ཀྱིས་ཆེད་འཛིན་ཐོང་། །ཉམས་མྱོང་ལ་འདི་ཞེས་ངོས་གཟུང་མེད་ཀྱིས་ཞེན་པ་ཆོད། འབྲས་བུ་ཐོབ་དང་མ་ཐོབ་མེད་ཀྱིས་རེ་དོགས་སྤོངས། བཅུ་གཉིས་པ་ཤར་གྲོལ་ཆོས་སྐུའི་རོལ་པར་བསྟན་པ། གཞི་གདོད་མ་ནས་འཕོ་འགྱུར་མེད་པའི་རིག་པ་ལ། བདེ་སྡུག་སོགས་སྣ་ཚོགས་རྐྱེན་གྱི་རྣམ་པ་གློ་བུར་དུ་ཅི་ཤར་ཡང་། སྐད་ཅིག་དེ་ལ་དེར་འཛིན་མེད་པར་ཤར་བ་དེ་ཉིད་རང་གི་ཐོག་ཏུ་གྲོལ་ཏེ། ཆུ་དང་རླབས་བཞིན་དུ་ཆོས་སྐུར་ཕྱམ་གཅིག་གོ །བཅུ་གསུམ་པ་གང་ཤར་གཞི་མེད་ཆེན་པོར་བསྟན་པ། དགག་སྒྲུབ་ཀྱི་བློ་རྟོག་གང་དུ་བལྟས་ཚེ་བལྟ་མཁན་ཁོ་རང་གི་ངོ་བོ་སྟོར་ཏེ། བཙལ་བས་མི་རྙེད་ཡུལ་དང་ཕྱོགས་ན་མེད་པར་མ་ཟད། འཚོལ་མཁན་ཉིད་ཀྱང་མི་དམིགས་སྤྲོས་དང་བྲལ། ཚོལ་བར་བྱེད་པོ་ཤེས་པ་མི་གནས་བཙལ་བར་བྱ་བའི་ཡུལ་དགག་སྒྲུབ་གྱིས་སྟོང་། བཅུ་བཞི་པ་དེ་ཉིད་རྟོགས་པའི་ཚུལ་ཆེན་བསྟན་པ། དེ་ལྟར་རྟོགས་ན་རང་གནས་ཆོས་སྐུའི་བཙན་ས་ཟིན་ཏེ། མཁའ་བཞིན་དྲི་མེད་གདོད་མའི་ངང་དུ་ཕྱིན་པ་དེའི་ཕྱིར། ལྡོག་པའི་གནས་མེད་ད་ནི་གང་དུ་འགྲོ། །ཆོས་ཟད་པའི་སར་ཐུག་སྟེ་མཚན་འཛིན་གྱི་དྲི་མ་བྲལ་བ་དང་འགྲོ་འོང་མེད་པའི་དོན་རྟོགས་པས་འཁོར་བར་འོང་བ་འགའ་ཡང་མེད། སེམས་ཉིད་དབྱིངས་ཀྱི་ངང་དུ་ཕྱིན་པའི་དུས་འདི་ན། འཛིན་རྟོག་གདོད་མའི་གཞིར་དག་པས། སྒོ་གསུམ་རྩོལ་མེད་དུ་གྲོལ་བས་ཁོ་བོ་གང་ན་འདུག་པའི་དོན་མཐོང་ངམ་སྟེ་སྐལ་བ་དམན་པས་སུས་ཀྱང་མི་མཐོང་ཁོ་བོ་གང་ན་འདུག བཅོ་ལྔ་པ་ཀློང་གྱུར་རྟོགས་པའི་རྩལ་ཆེན་བསྟན་པ། དེ་ཉིད་ཤེས་ན་གཞན་ཞིག་དགོས་མི་འགྱུར། རྣལ་འབྱོར་པ་རྣམས་ཀྱང་ངས་ཇི་ལྟར་རྟོགས་པ་ལྟར་རྟོགས་ན་གྲོལ་བས་ན། གྲོལ་བ་རྣམས་ནི་ང་བཞིན་འཁྲུལ་པ་ཆད། དེས་ན་ད་ནི་མི་འདྲི་སེམས་ཀྱི་གཞི་རྩ་སྟོར། སེམས་ཀྱི་གཞི་རྩ་སྟོང་པར་རྟོགས་པས་གཏད་མེད་ཇི་ལྟར་ཤར་ཡང་བདེན་མེད་འཛིན་མེད་ངེས་མེད་སྣང་ལ་ངོས་བཟུང་གི་འདི་ཡིན་མེད། བྱ་བའི་རང་བཞིན་ཁྲིགས་སུ་མེད་པས་ཕྱལ་བ་ལྷུག་པ་ཡངས་པ་གཏད་སོའི་ཞེན་འཛིན་ལས་འདས་པར་ཕྱམ་གཅིག་པ། འདི་ལྟར་རྟོགས་ནས་ད་ནི་སེམས་ཉིད་རང་བྱུང་གི་ཡེ་ཤེས་གཉུག་མ་དོན་གྱི་གླུ་ལེན་ཏེ། དྲི་མེད་འོད་ཟེར་ཤར་བས་བསྟན་ནས་སོང་། །ཞེས་གནས་ལུགས་ཡིན་མིན་ལས་འདས་པའི་ཕྱོགས་བྲལ་ཆེན་པོའི་གནད་རྟོགས་པ་ཉི་མ་ལྟར་སྣང་བ་བྱས་ཏེ་ཐར་འདོད་ཀྱི་པད་ཚལ་དུ་བསྟན་ནས་བདེ་ཆེན་ཀུན་ཏུ་བཟང་པོའི་ས་ལ་སོང་ངོ་། །གསུམ་པ་གཟུང་འཛིན་ཡེ་སྟོང་རྩ་བྲལ་དུ་དོན་བསྡུ་བ་ལ་བཅུ་གསུམ། དང་པོ་ཡུལ་སྣང་རང་བཞིན་སྟོང་པར་བསྟན་པ། སྣང་སེམས་ཡེ་གྲོལ་དུ་གདམས་པ། ཀྱེ་ཧོ་གྲོགས་དག་སྣང་བའི་ཡུལ་ལ་ལྟོས། །ཐམས་ཅད་མ་སྐྱེས་སྟོང་པར་མཉམ་པ་ཉིད། །མེ་ལོང་གཟུགས་བརྙན་སྣ་ཚོགས་ཅི་ཤར་ཡང་། །མེ་ལོང་ངོས་ཡིན་དྭངས་པར་གཅིག་པ་བཞིན། །གཉིས་པ་སེམས་ཉིད་གཞི་མེད་རྩ་བྲལ་དུ་བསྟན་པ། སྣང་བ། དེ་ཉིད་འབྱེད་པའི་ཡིད་ལ་ཚུར་ལྟོས་དང་། །སེམས་ནི་མཁའ་འདྲ་དགག་སྒྲུབ་ཀུན་དང་བྲལ། །ལྟ་བྱེད་ཀྱི་ཤེས་པ་ཡུལ་ཐོག་ལ་གྲོལ་ཞིང་། ཡུལ་སྣང་གི་རྣམ་པ་འཛིན་མེད་དུ་སངས་པ་ནི། མཁའ་ལ་སྤྲིན་རྣམས་བྱུང་ནས་ཞིག་ན་ཡང་། །ནམ་མཁའི་ཆོ་འཕྲུལ་གཉིས་མེད་དག་པ་བཞིན། །རྣམ་པ་གཅིག་ཏུ་ན། ཆོས་ཐམས་ཅད་དང་པོ་ཡང་དབྱིངས་སྐྱེ་མེད་ལས་བྱུང་། ད་ལྟ་ཡང་དེར་གནས་མཐར་ཡང་དེར་གྲོལ། གང་ཤར་གྱི་ཤེས་པ་དེ་ཡང་། དང་པོ་སེམས་ཉིད་སྟོང་པའི་ངང་ལས་བྱུང་། ད་ལྟ་ཡང་དེར་གནས། མཐར་ཡང་དེར་ཡལ་བ་ཞེས་ཤེས་པར་བྱའོ། །དེ་ལྟ་བུའི་རང་བཞིན་ཡེ་ནས་སངས་རྒྱས་ཡིན་པར། ཀུན་བྱེད་ལས། སེམས་ཉིད་ནམ་མཁའ་ལྟ་བུའི་རང་བཞིན་ནི། །ཡེ་ནས་སངས་རྒྱས་སྙིང་པོ་བྱང་ཆུབ་ལ། །རྩོལ་ཞིང་བསྒྲུབས་པས་སངས་རྒྱས་འགྲུབ་པ་མེད། །མ་སྐྱེས་རང་བཞིན་དག་པའི་ངང་དེར་ཞོག །ཅེས་གསུངས། དེས་ན་སེམས་ཉིད་རང་བཞིན་དྲི་མེད་གདོད་མའི་སངས་རྒྱས་ཏེ། མ་བྱས་ལྷུན་གྱིས་གྲུབ་པའི་ཆོས་ཉིད་དོ། །གསུམ་པ་གཉིས་མེད་རིས་མེད་སྟོང་པར་བསྟན་པ། ཡུལ་སེམས་གཉིས་ཀ་རྨི་ལམ་གྱི་ནང་ལྟར་དོན་ལ་གཉིས་མེད་ཡེ་ནས་རྣམ་པར་དག་པ་ལ། སྤང་བླང་གཉིས་སུ་བྱར་མེད་ཅིང་ཕྱོགས་རིས་དང་དགག་སྒྲུབ་མེད། ཡུལ་གང་སྣང་བདེན་མེད་ཡུལ་ཅན་གང་ཤར་སྟོང་པ་ཉིད་དེ། ཐམས་ཅད་མཉམ་ཉིད་འདི་ཞེས་གཟའ་གཏད་ཀུན་དང་བྲལ། བཞི་པ་ཡུལ་སེམས་གཏད་མེད་ཕྱོགས་བྲལ་དུ་བསྟན་པ། ཡུལ་ལ་གཅིག་ཏུ་ངེས་པ་མེད་པ་སྣང་བ་སྣ་ཚོགས་པ་ལྟར། བློ་ལ་ཡང་གཟའ་གཏད་མེད་པའི་ཕྱོགས་བྲལ་ཆེན་པོ་ཉིད་དུ་གྲོལ་བ་རང་བཞིན་རྫོགས་པ་ཆེན་པོར་ཤེས་པར་བྱ། ལྔ་པ་ཐམས་ཅད་མཉམ་ཉིད་གཞི་རྫོགས་སུ་བསྟན་པ། འདི་ལྟར་སྣང་སྲིད་འཁོར་འདས་ཆོས་རྣམས་ལ། །མཉམ་ཉིད་ལྔར་བལྟ་སྟེ་སྔར་འདས་པའི་ཆོས་རྣམས་འགགས་པས་མི་དམིགས་མཉམ་པ་ཉིད། མ་འོངས་ཆོས་རྣམས་མ་སྐྱེས་པས་ཕྱོགས་ན་མེད་པར་མཉམ་པ་ཉིད། ད་ལྟའི་ཕྱི་ནང་གི་ཆོས་རྣམས་ངོ་བོ་ངོས་བཟུང་མེད་པས་མི་གནས་མཉམ་པ་ཉིད། དུས་གསུམ་དུས་མེད་གཞི་བྲལ་གང་དུའང་མ་གྲུབ་པར་མཉམ་པ་ཉིད། ཐམས་ཅད་ཡེ་ནས་རྫོགས་པའི་ངང་ཉིད་ཅེས་གཟོད་མ་ནས་སྐྱེས་འགག་གནས་མེད་མཉམ་པ་ཉིད་དོ། །དྲུག་པ་ཕྱི་ནང་ཆོས་ཉིད་ཀུན་བཟང་དུ་བསྟན་པ། སྣང་སྲིད་འཁོར་འདས་སེམས་ཀྱི་གཟུགས་བརྙན་ནམ་འཁྲུལ་པའི་བག་ཆགས་ཏེ། སྣང་བ་སེམས་ཀྱི་འཁྲུལ་སྣང་དུ་ཐག་བཅད། སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། །ནམ་མཁའི་རང་བཞིན་དུས་གསུམ་འཕོ་འགྱུར་མེད། །འགྱུར་མེད་རང་བཞིན་གཟོད་ནས་མྱ་ངན་འདས། །འགྱུར་བ་མེད་པའི་དོན་དེ་གཟོད་མ་ནས་ཞི་ཞིང་མྱང་འདས་ཀུན་ཏུ་བཟང་པོའི་རང་བཞིན་ཡིན་པས་གཞི་ནས་བྱང་ཆུབ་ཀུན་ཏུ་བཟང་པོ་ཡིན། བདུན་པ་དབྱིངས་གཅིག་གདོད་ནས་མཁའ་མཉམ་དུ་བསྟན་པ། ཆོས་ཐམས་ཅད་སྣང་དང་སྟོང་པ་དབྱེར་མེད་གདོད་མའི་ངང་། གཅིག་དང་དུ་མར་མི་དམིགས་སྤྲོས་དང་བྲལ། །ནམ་མཁའ་བཞིན་དུ་ཕྱོགས་དང་རིས་མེད་ཐམས་ཅད་མཉམ་པ་ཉིད་དེ། མེ་ལོང་ནང་གི་གཟུགས་བརྙན་བཞིན་སྣང་མཉམ་དེ་ལ་རང་མཚན་མེད་པས་སྟོང་མཉམ། བློ་འཁྲུལ་ངོར་བདེན་མཉམ། གཤིས་ལ་བརྫུན་པར་མཉམ། སྣང་ཙམ་དུ་ཡོད་མཉམ་རང་བཞིན་མ་གྲུབ་པས་མེད་མཉམ། དོན་མཐའ་ལས་འདས་པར་མཉམ། དབྱིངས་གཅིག་གདོད་ནས་དག་པའི་ངང་ཉིད་དོ། །བརྒྱད་པ་གཟུང་འཛིན་འབྲེལ་མེད་སྒྲོ་བཏགས་སུ་བསྟན་པ། བློ་ཡིས་བརྟགས་པ་ཕུང་ཁམས་སོགས་ཆོས་ཐམས་ཅད་ངོ་བོས་སྟོང་། མིང་རྣམས་དོན་དེའི་ཕྱི་ནང་གང་དུའང་མེད་པས། གློ་བུར་བ་དོན་རང་མཚན་ཞེས་པའང་མིང་དང་རྟོག་པའི་རི་མོས་སྒྲོ་བཏགས་ཉིད། ཇི་ལྟར་སྣང་དུས་ནས་བདེན་རྫུན་གཉིས་མེད་དཔྱད་ན་ཡུལ་སེམས་གཉིས་འབྲེལ་བ་མེད་དེ་གཉིས་ཀ་དོན་ལ་མ་གྲུབ་པའི་ཕྱིར། དེས་ན་ཡུལ་སེམས་གཅིག་གིས་གཅིག་ལ་མ་གོས་གཟུང་འཛིན་མེད། དེ་ལྟར་གཟུང་འཛིན་གཉིས་མེད་ཀྱི་དོན་ལ་རྨོངས་པས་འཛིན་པ་ཐམས་ཅད་འཁྲུལ་པ་སྟེ། དེའང་བུ་ཆུང་གི་དུས་ན་དེ་ལྟ་བུའི་གྲུབ་མཐའ་དང་། རྣམ་དབྱེ་སྒྲོ་བཏགས་པ་མེད་པ་ལས། ཕྱིས་སྒྲོ་བཏགས་གོམས་པ་ནི། གྲུབ་མཐའ་ངན་པའི་དོན་ཐོས་པ་ལས་བྱུང་སྟེ། རྣམ་ངེས་ལས། སྐྱེ་བོ་རེང་བུར་སྐྱེ་འགྱུར་ཞིང་། །ཡོན་ཏན་ཉེས་པ་མ་མཐོང་ལ། །ཀྱེ་མ་གྲུབ་མཐའ་མི་བཟད་པའི། །གདོན་འདི་སུ་ཡིས་བགོས་པ་ཡིན། །ཞེས་བཤད་པ་བཞིན་ནོ། །དགུ་པ་ཡུལ་སེམས་འབྲེལ་མེད་སྟོང་པར་བསྟན་པ། ཇི་ལྟར་མེ་ལོང་གཟུགས་བཞིན་སྣང་བ་ནི། །ཡུལ་གྱི་རྣམ་པ་དབང་པོའི་ཤེས་ལ་ཤར། །དེ་ཉིད་བཟུང་བས་ཆགས་སྡང་སྲིད་པར་འཁྲུལ། །ནན་ཏར་གཏུགས་ན་ནི་སེམས་ནི་ཕར་ཡུལ་ལ་མ་འཕོས་ཤིང་། ཡུལ་གྱི་རྣམ་པ་ཚུར་ཤར་ཞེས་པའང་དཔྱད་ན་སེམས་ལ་ཚུར་ཤར་བ་མེད། ཡུལ་སེམས་གཉིས་ཀ་ངོ་བོ་མེད་ཕྱིར་གཉིས་སུ་མ་གྲུབ་བོ། །བཅུ་པ་གཞི་གྲོལ་ཡང་མཉམ་དབྱིངས་གཅིག་ཏུ་བསྟན་པ། དེས་ན་རྨི་ལམ་སྣ་ཚོགས་གཉིད་ཀྱི་ངང་དུ་གཅིག་པ་ལྟར་སྣང་བའི་ཡུལ་རྣམས་ཐམས་ཅད་རང་བཞིན་མེད་པར་གཅིགརྦ་རླབས་ཆུའི་ངང་དུ་གཅིག་པ་ལྟར་ཡུལ་ལ་འཆར་བའི་བློ་རྣམས་ཐམས་ཅད་ངོས་གཟུང་མེད་པར་གཅིག རབ་རིབ་དང་དེར་འཛིན་པའི་མིག་ཤེས་འཁྲུལ་པར་གཅིག་པ་བཞིན་སྣང་སེམས་གཉིས་མེད་གདོད་ནས་དག་པར་གཅིག གང་ལའང་བརྟག་དཔྱད་མི་དགོས་གཞི་ནས་གྲོལ་བར་གཅིག་སྟེ་ནམ་མཁའི་སྐྱེད་ཚལ་བཞིན་ནོ། །བཅུ་གཅིག་པ་ཆོས་རྣམས་དབྱིངས་གཅིག་སྟོང་མཉམ་དུ་བསྟན་པ། འཁོར་འདས་གཉིས་མེད་སེམས་ཀྱི་ངང་དུ་གཅིག་སྟེ་དཔེ་ཕྱོགས་བཞི་ནས་འབབ་པའི་ཆུ་བོ་སྣ་ཚོགས་རྒྱ་མཚོའི་ངང་དུ་གཅིག་པ་བཞིན་ནོ། །ལྟ་སྒོམ་སྤྱོད་འབྲས་ཉམས་མྱོང་གི་རྣམ་པ་ཅི་ཤར་ཐམས་ཅད་རོ་མཉམ་ལྷན་ཅིག་སྐྱེས་པར་གཅིག་སྟེ། འབྱུང་བཞིའི་འཕོ་འགྱུར་ནམ་མཁའི་ངང་དུ་གཅིག་པ་བཞིན་སེམས་ཀྱི་དགག་སྒྲུབ་སྟོང་པའི་ངང་དུ་གཅིག རྣམ་རྟོག་གང་ཤར་སྐྱེ་མེད་དུ་རང་གྲོལ་བས་གཉིས་སུ་མེད་པར་དག་པར་གཅིག་པ་ནི་དབའ་རླབས་རོལ་པ་ཆུ་བོའི་ངང་དུ་གཅིག་པ་བཞིན་ནོ། །དེ་ལྟར་སེམས་ཉིད་སྤྲོས་པ་དང་བྲལ་བར་རྟོགས་ན་སྐྱེས་བུ་མཁས་པ་ཡིན་ཏེ། ཕལ་ཆེན་ལས། དོན་ལ་རྣམ་པར་དཔྱོད་པ་ནི་མཁས་པ་ཡིན་གྱི་ཚིག་ལ་རྟོག་པས་མ་ཡིན་ནོ། །ཞེས་སོ། །བཅུ་གཉིས་པ་ཐམས་ཅད་གཉིས་མེད་རང་བཞག་ཏུ་བསྟན་པ། སྣ་ཚོགས་ངེས་གཟུང་མེད་པའི་ཆོས་རྣམས་ཀུན། །རང་བཞིན་གཉིས་སུ་མེད་པའི་གཟུགས་བརྙན་ཏེ། །བཟང་ངན་བླང་དོར་མེད་པའི་རོལ་པ་ལ། །བློ་ཡིས་གཉིས་སུ་མ་འཛིན་གང་བདེར་ཞོག །བཅུ་གསུམ་པ་རིག་སྟོང་རྣམ་ཡིན་ཆོས་སྐུར་བསྟན་པ། དེ་ལྟར་བཞག་དུས་གཏད་མེད་ཡུལ་ལ་ངེས་མེད་ཀྱི་སྣང་བ་ཤར། འཛིན་མེད་རིག་པ་རང་ཡན་དུ་ཤར་བས། རྣམ་ཡིན་ཆེན་པོ་ནི་རང་བཞིན་རྫོགས་པ་ཆེན་པོའི་གནས་ལུགས་ཡིན། དོན་གསུམ་པ་ལེའུ་རྫོགས་པ་མཇུག་གི་དོན་ལ་གཉིས། དང་པོ་སྐབས་ཀྱི་དགེ་བ་བསྔོ་བ། དེ་ལྟར་ཆོས་ཀུན་མཉམ་པའི་རང་བཞིན་གྱིས། བློ་བྲལ་ངང་དུ་འཛིན་མེད་ལ་བཟླས་ནས་བསྟན་པའི་དགེ་བས། འགྲོ་བ་གང་དག་དབྱིངས་ཕྱོགས་བྲལ་ཆེན་པོ་རིག་པ་ཁོང་དུ་མ་ཆུད་པར་གྲུབ་མཐའི་ཕྱོགས་འཛིན་གྱིས་ཁོལ་བུར་དགག་སྒྲུབ་ཏུ་བཅིངས་པ་ཡིས། འཆིང་འགྲོལ་མེད་པའི་དོན་ལ་མ་རེག་པས་དུབ་པའི་སེམས་ཉིད་དེ་རིང་ངལ་སོས་ཤིག །གཉིས་པ་ལེའུའི་མཚན། རྫོགས་པ་ཆེན་པོ་སེམས་ཉིད་ངལ་གསོ་ལས། གཞི་རྟོགས་པའི་ཤེས་རབ་མཐའ་གཉིས་ལ་མི་གནས་པའི་ལེའུ་སྟེ་བཅུ་པའོ།། །། ༈ བཅུ་གཅིག་པ་རང་བཞིན་ལམ་གྱི་སྒོམ་ཚུལ་བསམ་གཏན་དྲི་མ་མེད་པའི་ལེའུ་ལ་གསུམ། ལེའུ་ལ་འཇུག་པ་རྒྱུའི་དོན། ལེའུ་དངོས་ཀྱི་དོན། ལེའུ་རྫོགས་པ་མཇུག་གི་དོན་ནོ། །དང་པོ་ནི། དེ་ལྟར་ཆོས་ཀུན་མཉམ་པའི་དོན་མཐོང་ནས། མ་བསྒོམས་ན་མི་གྲོལ་བས་ངེས་པར་གནས་ལུགས་རེ་དོགས་ཀྱི་སྤྲོས་པ་ཆོད། ངང་ལ་ཇི་བཞིན་གཞག་པ་གཅེས་ཏེ། དེ་ཁོ་ན་ཉིད་བསྟན་པའི་མདོ་ལས། བསྐལ་པ་བཅུར་མཉན་པ་ལས་སེ་གོལ་གཏོགས་པ་ཙམ་དུ་དེ་ཁོ་ན་ཉིད་ཀྱི་ཏིང་འཛིན་བསྒོམ་ན་བསོད་ནམས་ཆེ་བར་གསུངས་སོ། །གཉིས་པ་ལེའུ་དངོས་ཀྱི་དོན་ལ་གསུམ། དབང་པོ་གསུམ་གྱི་རིམ་པ་མདོར་བསྟན། འབྲིང་དང་ཐ་མའི་རིམ་པ་རྒྱས་པར་བཤད། ས་དང་ལམ་གྱི་རིམ་པས་དོན་བསྡུ་བའོ། །དང་པོ་དབང་པོ་གསུམ་གྱི་རིམ་པ་མདོར་བསྟན་པ་ལ་གསུམ། དབང་པོ་རབ་ཀྱི་རིམ་པ། འབྲིང་དང་ཐ་མའི་རིམ་པ། དབང་པོ་གསུམ་གྱི་དོན་བསྡུ་བའོ། །དང་པོ་དབང་རབ་ལ་གཉིས། དང་པོ་རྟོགས་པ་ཆུ་བོ་རྒྱུན་གྱི་རྣལ་འབྱོར་བསྟན་པ། བསྒོམ་པ་དེ་ཡང་དབང་པོའི་རིམ་པས་བསྟན་པ་སྟེ། སྔོན་བསོད་ནམས་བསགས་པའི་དབང་པོ་ཡང་རབ་བླ་མའི་བརྡ་ཐབས་ཀྱི་རྐྱེན་ཙམ་གྱིས་གནས་ལུགས་རྟོགས་པས་གྲོལ་ཏེ། འབད་རྩོལ་ལ་མ་ལྟོས་པར། སྒོམ་དང་བསྒོམ་བྱ་གཉིས་མེད་སེམས་ཉིད་རྣལ་མའི་དོན་མཐོང་ནས། སྣང་སྲིད་གཞི་གྲོལ་སེམས་ཉིད་བྱ་རྩོལ་མེད་པ། ཕྱོགས་བྲལ་རིག་པ་ཆུ་བོའི་རྒྱུན་བཞིན་འཆར་ཏེ། ཀློང་དུ་གྱུར་ན་བདེན་འཛིན་དང་བྲལ་བས་གཉེན་པོས་བསྒོམ་དུ་མེད་པས་ཞེན་མེད་ཀྱི་ངང་དུ་རྒྱུན་དུ་གནས་པ་ལས། གཉིས་པ་ཀློང་རྒྱུར་རྟོགས་པའི་གདེང་ཚད་བསྟན་པ། ཐུན་མཚམས་ཀྱི་རིས་མེད་འདི་ཡིན་འདི་མིན་ཞེས་ངོས་གཟུང་བྱར་མེད་དེ། ཆོས་ཐམས་ཅད་རང་གྲོལ་ཀུན་ཏུ་བཟང་པོའི་ཞིང་ལ་སྤྱོད་པས་དངོས་པོ་དང་མཚན་མའི་སྒོམ་པ་ལྟར་ངོས་བཟུང་གི་རྟགས་དང་ཚད་མེད། གོལ་སྒྲིབ་ནི་སྦྱང་བསྒྲོད་ལྟ་སྒོམ་གྱི་རྩོལ་ཞེན་ལས་འབྱུང་བས། འདིར་ནི་རང་བྱུང་གཞི་ཀློང་ཡངས་པའི་དོན་ཇི་བཞིན་ངང་ལ་ཡེ་བཞིན་གནས་པས་གང་དུའང་མ་ཕྱིན། གང་ལའང་མ་བལྟས་པས་ན། སྐྱོན་ཡོན་གཉིས་མེད། གོལ་དང་གོལ་ས་མེད། གོང་དུ་རྩལ་སྦྱོང་བ་དང་བོགས་འབྱིན་པ་མེད། ཐོབ་དང་མ་ཐོབ་མེད་པར་རང་སེམས་དོན་གྱི་སངས་རྒྱས་ཡེ་ནས་ལྷུན་གྲུབ་ཏུ་ཐག་ཆོད་པས། དེ་ལས་གཞན་པའི་འབྲས་བུར་ཕྱིས་ཐོབ་འདོད་ཀྱི་སྨོན་པ་མེད་པར་ད་ལྟ་ནས་རྫོགས་སངས་རྒྱས་པས། དེ་འདྲའི་རྣལ་འབྱོར་ནམ་མཁའ་རབ་འབྱམས་ཡིན་ཏེ། ཀུན་བྱེད་ལས། ལུས་ནི་གང་ཟག་ལྷ་མི་ཡང་། །དགོངས་པ་ཆོས་ཉིད་སངས་རྒྱས་ཡིན། །ཞེས་སོ། །གཉིས་པ་འབྲིང་དང་ཐ་མའི་རིམ་པ་ལ་གསུམ། དང་པོ་ཆེད་དུ་རྩོལ་བས་སྒོམ་པའི་འཐད་པ་དགོད་པ། དབང་པོ་འབྲིང་དང་ཐ་མས་གོམས་ལ་བརྩོན་དགོས་ཏེ། ཇི་སྲིད་འཁོར་བའི་རྒྱུ་བདག་འཛིན་དབྱིངས་སུ་མ་ནུབ་པར། དེ་སྲིད་སྣ་ཚོགས་ཐབས་ཀྱིས་བསྒོམ་པར་བྱ་སྟེ། སྒོམ་མི་སྒོམ་གྱི་མཚམས་ཀྱང་སེམས་ལ་གཟུང་འཛིན་དབྱིངས་ནུབ་མ་ནུབ་ལ་བྱེད་དོ། །གཉིས་པ་མ་བསྒོམས་འཁོར་བར་འཁྱམས་པས་སྒོམ་དགོས་པའི་རྒྱུ་མཚན་བསྟན་པ། ཁྱད་པར་རྣམ་རྟོགས་ངན་པས་སྲིད་པར་འཁྲིད་དེ། ཕྱོགས་ཀྱི་གླང་པོས། རྣམ་རྟོག་མ་རིག་ཆེན་པོ་སྟེ། །འཁོར་བའི་རྒྱ་མཚོར་ལྟུང་བྱེད་ཡི། །ཞེས་སོ། །དེ་ཉིད་ལས་གྲོལ་ཕྱིར་བསམ་གཏན་གྱི་ཐབས་ལ་བརྟེན་པ་དུས་ཕྱི་ནས་ཤེས་རབ་ཆོས་ཀུན་མཐའ་གྲོལ་ཀློང་ཡངས་ཆེན་པོར་འཆར་ངེས་སོ། །གསུམ་པ་ཞི་གནས་ལྷག་མཐོང་ཟུང་དུ་འབྲེལ་བའི་དགོས་ཆེད་བསྟན་པ། སེམས་རྩེ་གཅིག་པའི་ཞི་གནས་ཀྱིས་ནི་ཉོན་མོངས་མགོ་གནོན་ལ། ཆོས་ཀུན་རང་བཞིན་མེད་རྟོགས་ཀྱི་ལྷག་མཐོང་གིས་ནི་ཉོན་མོངས་རྩ་བ་འབྱིན། དེའང་ཞི་ལྷག་ངོ་བོ་གཅིག་པ་དང་། སོ་སོ་བ་གཉིས་ལས། དང་པོ་ནི། གནས་ཆ་ཞི་གནས་གསལ་ཆ་ལྷག་མཐོང་སྟེ། གསལ་སྟོང་མཐའ་བྲལ་དུ་རྟོགས་པ་ཞི་ལྷག་ཟུང་འབྲེལ་ལོ། །ཐ་དད་པ་ལ་གཉིས་ཏེ། སྒྲའི་རྗེས་སུ་མཐུན་པ་དང་དོན་གྱི་རྗེས་སུ་མཐུན་པའོ། །དང་པོ་ནི། ཐོས་པའི་དོན་ལ་སེམས་རྩེ་གཅིག་པ་ཞི་གནས་དང་། དེ་ལས་དོན་རྟོགས་པ་ལྷག་མཐོང་ངོ་། །གཉིས་པ་ནི། བསྒོམས་པས་དང་པོར་རྩེ་གཅིག་ཏུ་ཟིན་པ་ཙམ་ཞི་གནས་ལ། ཕྱིས་དེ་ཡང་རང་བཞིན་མེད་པར་རྟོགས་པ་ལྷག་མཐོང་སྟེ། དགོངས་པ་ངེས་འབྲེལ་ལས། ཞི་གནས་དང་ལྷག་མཐོང་ནི་གཉིས་ཏེ། ཤེས་རབ་ལས་བྱུང་བ་དང་། གདམས་ངག་ལས་བྱུང་བའོ། །ཤེས་རབ་ལས་བྱུང་བ་ནི། མདོ་སྡེ་བཅུ་གཉིས་ཀྱི་ཚིག་ཡིད་ལ་བྱེད་པ་ནི་ཞི་གནས་སོ། །དེའི་དོན་རྟོགས་པ་ནི་ལྷག་མཐོང་ངོ་། །གདམས་ངག་ལས་བྱུང་བ་ནི། མན་ངག་གིས་སེམས་མི་གཡོ་བར་བྱེད་པ་ནི་ཞི་གནས་སོ། །དེའི་དོན་རྟོགས་པ་ནི་ལྷག་མཐོང་ངོ་། །ཞེས་གསུང། གསུམ་པ་དབང་པོ་གསུམ་གྱི་དོན་བསྡུ་བ། དེས་ན་རབ་ཀྱིས་གསེར་གླིང་ནས་རྡོ་མི་རྙེད་པ་ལྟར་ངན་རྟོག་ཐམས་ཅད་ཆོས་སྐུར་ལྷོངས་ཏེ། གང་ཤར་ཆོས་ཉིད་དུ་གྲོལ་བས། བཟང་ངན་མེད་ན་གཉེན་པོ་བསམ་གཏན་ཐུན་འཇོག་ཏུ་བསྒོམ་མི་དགོས་སོ། །འབྲིང་གིས་ལྟ་བ་རྟོགས་པས་སྐྱེ་བ་མེད་པའི་ངང་བྱིང་རྒོད་དང་བྲལ་བའི་དྭངས་རྫིང་བུ་རྙོགས་བྲལ་མི་གཡོ་བ་ལྟར་བཞག་པས་ཞི་ལྷག་ཟུང་འབྲེལ་བསྒོམས་པ་ཡིས། བཟང་ངན་གྱི་རྣམ་པར་རྟོག་པ་དབྱིངས་སུ་ནུབ་པར་གྱུར་ནས་ཞི་ལྷག་ཟུང་འབྲེལ་རྟོགས་པ་ནམ་མཁའ་ལྟ་བུ་འཆར་ཏེ། ཏིང་འཛིན་དམ་པའི་མདོ་ལས། ཇི་བཞིན་པ་ཡི་ཆོས་ཉིད་ལ། །དེ་བཞིན་པ་ཡི་བློ་བཞག་ན། །མིང་དུ་མི་ཐོགས་ཉམས་མྱོང་འབྱུང་། །དེས་ན་ཏིང་ངེ་འཛིན་ཞེས་བྱ། །ཞེས་སོ། །དབང་པོ་ཐ་མས་ཐོག་མར་སེམས་མི་གནས་པ་གནས་པར་བྱ་བའི་ཐབས་སུ་ཞི་གནས་བཙལ་བ་ཡིས། གང་ལ་དམིགས་དེ་ལ་བརྟན་པ་ཐོབ་པར་སླ། དེ་ནས་སྣང་སྟོང་ཟུང་དུ་འཇུག་པའི་ལྷག་མཐོང་སོ་སོར་རྟོག་པ་ཉིད་བསྒོམས་པས། སྐྱེ་བ་མེད་པའི་དོན་རྟོགས་ཏེ། ཕྱི་ནང་སྣང་སེམས་གཞི་གྲོལ་ཆེན་པོར་འཆར། །དེས་ན་དབང་པོའི་རིམ་པ་ཤེས་པ་གཅེས། །དོན་གཉིས་པ་འབྲིང་དང་ཐ་མའི་རིམ་པ་རྒྱས་པར་བཤད་པ་ལ་གསུམ། དབང་པོ་འབྲིང་གི་སྒོམ་ཚུལ། ཐ་མའི་སྒོམ་ཚུལ། སྒོམ་པ་ཐོབ་པའི་ཏིང་ངེ་འཛིན་གྱི་དབྱེ་བའོ། །དང་པོ་འབྲིང་གི་སྒོམ་ཚུལ་ལ་གསུམ། རྣམ་པར་མི་རྟོག་པའི་ཡེ་ཤེས་སྒོམ་པར་གདམས་པ། དེའི་དོན་ལ་ཇི་ལྟར་སྒོམ་པ་དངོས་བསྟན་པ། ཡེ་ཤེས་བཞིའི་འཆར་ཚུལ་བསྟན་པའོ། །དང་པོ་རྣམ་པར་མི་རྟོག་པའི་ཡེ་ཤེས་སྒོམ་པར་གདམས་པ་ལ་ལྔ། དང་པོ་མཉམ་པར་འཇོག་པའི་འཐད་པ་དགོད་པ། ད་ནི་དབང་པོ་འབྲིང་གི་སྒོམ་པ་བསྟན། ཇི་ལྟར་ཆུ་ནི་དབའ་རླབས་ཀྱིས་རྙོག་པ་ན། དྭངས་པའི་གཟུགས་བརྙན་མི་འཛིན་ཅིང་མི་གསལ་གཡོ་བ་ལྟར། ཡིད་ནི་མི་བསྲུན་ཀུན་ཏུ་རྟོག་པས་འཕྱར་ཞིང་གཡོ་སྟེ། སྣ་ཚོགས་པའི་སྤྲོས་པ་ལ་ཀུན་དུ་འཆེལ་བ་ན། མངོན་ཤེས་སོགས་ཡོན་ཏན་ལྷུན་གྲུབ་ཏུ་ཡོད་པའི་སེམས་ཉིད་འོད་གསལ་དྭངས་པའི་ཡེ་ཤེས་དང་། སྤྱན་དང་མངོན་ཤེས་ཀྱི་གཟའ་སྐར་མི་འཆར་བས། གཅིག་ཏུ་མི་གཡོ་རྒྱ་མཚོ་དངས་པ་ལྟར་མཉམ་པར་བཞག་པ་གཅེས། གཉིས་པ་མཐའ་བྲལ་སྒོམ་པའི་མན་ངག་བསྟན་པ། བཞག་ཚུལ་མི་གཡོ་གསུམ་ལྡན། ལུས་ནི་མི་གཡོ་བ་ཆོས་བདུན་རི་རྒྱལ་ལྟ་བུ་ལ། རྐང་པ་སྐྱིལ་ཀྲུང་། ལག་པ་མཉམ་བཞགསྒལ་ཚིགས་དྲངས་པོ། ལྕེ་ཡ་སྐན། དབུགས་དལ་བ། མིག་སྣ་རྩེ། མགྲིན་པ་ཡིད་ཙམ་དགུག་པའོ། །དབང་པོ་མི་གཡོ་བ་ནི་དབང་པོ་དྲུག་མ་འགགས་ཤིང་ཡུལ་ལ་མི་རྟོག་ན་སྤྱན་དང་མངོན་ཤེས་སོགས་དབང་པོ་དང་བའི་ཡོན་ཏན་ཀུན་འཆར་བས། དབང་པོ་ལ་དགག་སྒྲུབ་མེད་པར་མཐའ་བྲལ་དཔེ་རྫིང་བུའི་ནང་དུ་ཡུལ་སྣང་གཟའ་སྐར་ཤར་བ་དང་འདྲ་སྟེ། དེའང་ཡུལ་སོ་སོ་ལ་རྟོག་པས་དེར་མ་བཟུང་ན་མི་གནོད་ཀྱི་སྟེང་དུ་སོ་སོའི་ཡོན་ཏན་འཆར་ཞིང་རྣམ་པར་སྣང་ལ་མི་རྟོག་པས་རྣམ་པར་མི་རྟོག་པའི་ཡེ་ཤེས་ཞེས་བྱ། རྣམ་པ་མེད་ན་རྟོག་མི་རྟོག་གི་དཔྱད་ར་མེད་པའི་ཕྱིར་མི་རྟོག་ཡེ་ཤེས་ཀྱང་མེད་དོ། །དེས་ན་དབང་པོ་ལ་ཡུལ་སྣང་དུས་མི་རྟོག་པའི་ངང་དུ་བཞག་པས་སོ་སོར་རང་རིག་པའི་བློས་རྟོག་པ་འགྲོ་འོང་ཆད་པ་ལ་རླུང་འགགས་པར་བཤད་དེ། ཁ་སྣའི་རླུང་འགྱུ་ཡང་རྟོག་པ་མི་གཡོ་བས་སྤྲོས་པ་ཆད་པ་ལ་རྟོག་པ་ཤི་བར་བཏགས་པས། དེའི་དུས་སུ་གཉེན་པོ་ཤེས་རབ་ཀྱང་བསྐྱེད་ནས་བསྒོམ་མི་དགོས་ཏེ། དོ་ཧ་ལས། མིག་ནི་མི་འཛུམ་སེམས་ཀྱང་མི་འགོག་དང་། །རླུང་འགགས་པ་ནི་དཔལ་ལྡན་བླ་མས་རྟོགས། །གང་ཚེ་རླུང་རྒྱུ་དེ་ནི་མི་གཡོ་སྟེ། །འཆི་བའི་ཚེ་ན་རྣལ་འབྱོར་པས་ཅི་བྱ། །ཞེས་སོ། །སེམས་མི་གཡོ་བ་སྤྲོས་པའི་མཐའ་དང་བྲལ་བར་བཞག་པ་ནི། ལུས་དང་དབང་པོ་མི་གཡོ་བ་ན་ཞར་ལ་འབྱུང་སྟེ། སྤྲོ་བསྡུ་མེད་པའི་སེམས་ཉིད་ལྷན་སྐྱེས་བདེ་གཤེགས་སྙིང་པོ་སྟོང་གསལ་འཁོར་འདས་བཟང་ངན་ནམ་ཐ་ན་རང་གི་ཏིང་འཛིན་ལའང་ཞེན་འཛིན་མེད་པས་དྭངས་པའི་ནམ་མཁའ་བཞིན། བྱིང་རྒོད་གཉིས་མེད་སྤྲོས་དང་བྲལ་བར་གཞག གསུམ་པ་དེ་ལས་སྐྱེས་པས་ཉམས་མྱོང་བསྟན་པ། དེའི་ཡོན་ཏན་དེ་ཚེ་དུས་གསུམ་དང་སྣང་སེམས་སོགས་རང་བཞིན་གཅིག་སྟེ་ཀུན་རྟོག་དབྱིངས་སུ་ཐིམ་ནས་གདོད་མའི་ངང་དུ་གཟུང་དང་འཛིན་པ་གཉིས་ཀ་མི་དམིགས་པའི་ཆོས་ཀྱི་སྐུ། དྲི་མེད་འོད་གསལ་བ་ཉི་མའི་སྙིང་པོ་ནི། །བདེ་གསལ་མི་རྟོག་མཐའ་དབུས་མེད་པ་འཆར། །བཞི་པ་དེ་ཚེ་རྟོགས་པའི་འཁྲུང་ཚུལ་བསྟན་པ། རང་བྱུང་ལྷན་ཅིག་སྐྱེས་པའི་ཡེ་ཤེས་ཤར་བ་དེའི་བློ་ངོར། ཆོས་ཅན་ཐམས་ཅད་སྒྱུ་མའི་དཔེ་བརྒྱད་དང་། །དེའི་ཆོས་ཉིད་སྐྱེ་མེད་དུ་མཐོང་བས། །སྣང་དང་སྟོང་པ་ཐམས་ཅད་ཕྱམ་གཅིག་ལ། །ཡོད་དང་མེད་པ་ཀུན་གྱི་མཐའ་ལས་འདས། །སྲིད་དང་ཞི་བ་གཉིས་སུ་མི་རྟོག་པ། །ཤེས་དང་ཤེས་བྱ་རོ་གཅིག་པའི་ཡེ་ཤེས་འཆར་བ་སྟེ་གཅིག་པའི་ངོ་བོ་ཉིད། དེའང་མཉམ་པ་ཉིད་དུ་རྟོགས་པས་མཉམ་དང་མི་མཉམ་མེད་པའི་ཆོས་ཉིད་མཐོང་། ལྔ་པ་དེ་ཉིད་དོན་ལ་སྒོམ་པར་གདམས་པ། འདི་ནི་འཕགས་པའི་བདེན་མཐོང་ཡེ་ཤེས་ཀྱི་དངོས་རྒྱུ་ཡིན་པས་ཆེས་ཆེར་གོམས་ན་ཕྱི་ནས་དེ་བཞིན་ཉིད་མངོན་སུམ་དུ་མཐོང་བའི་བློ་མིག་གིས། རྒྱལ་བའི་ཆོས་སྐུ་ཕུན་ཚོགས་བསྒྲུབ་པས་ན། །སྐལ་བཟང་རྣམས་ཀྱིས་རྟག་ཏུ་མཉམ་པར་ཞོག །གཉིས་པ་དེའི་དོན་ལ་ཇི་ལྟར་སྒོམ་ཚུལ་དངོས་བསྟན་པ་ལ་དགུ། དང་པོ་སྟོང་གསལ་མཁའ་ལྟར་དག་པའི་སྒོམ་ཚུལ། བཞག་ཐབས་བརྒྱད་ལས། སེམས་ཉིད་མ་སྐྱེས་མཁའ་ལྟར་དག་པའི་ངང་། སེམས་བྱུང་མི་དམིགས་སྤྲིན་ཚོགས་དེངས་པ་བཞིན། །ཡེང་མེད་སྤྲོས་དང་བྲལ་བའི་ཤེས་པ་ཡིས། །ཇི་བཞིན་ངང་ལ་ཡེ་བཞིན་མཉམ་པར་ཞོག །གཉིས་པ་དྭངས་གསལ་རྒྱ་མཚོ་ལྟ་བུའི་སྒོམ་པ། མ་བྱིང་བས་དྭངས་ཤིང་མི་རྒོད་པས་སྟོང་པ་རྒྱ་མཚོ་རང་སར་གནས་པ་ལྟ་བུ་ལ་གཟུང་འཛིན་རྣམ་རྟོག་གི་རྙོག་བྲལ་དབའ་རླབས་མེད་པར་དྭངས་སང་ངེ་ཞོག གསུམ་པ་ནམ་མཁའ་སྤྲིན་དེངས་པ་ལྟ་བུའི་སྒོམ་པ། སྟོང་ཞིང་གསལ་བ་ནམ་མཁའ་ལྟ་བུ་ལ། ཀུན་རྟོག་སྤྲིན་མེད་ཕྱོགས་ལྷུང་བྲལ་བར་ཏེ་སེམས་ཉིད་ཡེ་སྟོང་ནམ་མཁའ་ལྟ་བུའི་ངང་ལ་རྣམ་རྟོག་གི་སྤྲོ་བསྡུ་མེད་པར་ཞོག བཞི་པ་མི་གཡོ་རི་རྒྱལ་ལྟ་བུའི་སྒོམ་པ། སེམས། བརྟན་ཞིང་མི་གཡོ་རི་རྒྱལ་ལྟ་བུ་ལ། །དགག་སྒྲུབ་གཉིས་མེད་རེ་དོགས་བྲལ་བར་ཞོག །ལྔ་པ་གསལ་དག་མེ་ལོང་ལྟ་བུའི་སྒོམ་པ། སེམས་གསལ་དྭངས་བྱེད་པ་དག་ཅིང་གསལ་བ་མེ་ལོང་ལྟ་བུ་ལ། སྒོ་ལྔའི་སྣང་ཡུལ་མ་འགགས་གཟུགས་བརྙན་ལྟ་བུར་འཛིན་རྟོག་མེད་པར་ཞོག དྲུག་པ་སྟོང་གསལ་འཇའ་ཚོན་ལྟ་བུའི་སྒོམ་པ། གཉེན་པོས་མ་བསླད་པར་ཡེ་གྲོལ་སོར་བཞག་སྣང་བ་སྟོང་པར་རྟོགས་པ་འཇའ་ཚོན་ལྟ་བུ་ལ་བྱིང་རྒོད་གཉིས་མེད་དག་ཅིང་གསལ་བར་ཞོག བདུན་པ་མ་ཡེངས་མདའ་མཁན་ལྟ་བུའི་སྒོམ་པ། སེམས་ཆོས་ཉིད་ཀྱི་ངང་ལས་གཞན་དུ་མ་ཡེངས་པར་རྩེན་ནེ་དཔེ་མདའ་མཁན་མདའ་སྲང་བ་ལྟ་བུ་ལ། དོན་གཉུག་མའི་ཡེ་ཤེས་སྤྲོ་བསྡུ་བྲལ་བར་ཞོག བརྒྱད་པ་བློ་བདེ་ལས་ཟིན་ལྟ་བུའི་སྒོམ་པ། རང་བཞག་ཆོས་སྐུར་ཐག་ཆོོད་ཤེས་པ་ལས་ཟིན་སྐྱེས་བུ་ལྟ་བུ་ལ་རེ་དོགས་གཉིས་མེད་རང་བབས་ལྷུན་གྱིས་གྲུབ་པར་ཞོག ཧ་ཅང་དྲན་པས་བསྒྲིམ་པའང་མི་དགོས་རྒྱ་ཡན་དུ་ཡེངས་ན་ཐ་མལ་དུ་ལྷུང་བས་རིང་བབས་ལྷུག་པར་བཞག་གོ །དགུ་པ་ཞི་ལྷག་ཟུང་དུ་འབྲེལ་བའི་སྒྲུབ་བྱེད་བསྟན་པ། བཞག་ཐབས་བརྒྱད་ཀྱི་ཚུལ་འདི་ནི་གཟུང་འཛིན་མེད་པས་རང་བཞིན་དག་པའི་ཏིང་ངེ་འཛིན་གཉུག་མའི་ཞི་གནས་ལྷག་མཐོང་ཟུང་དུ་འབྲེལ་བ་ཡིན་ཏེ། སྐྱེ་མེད་ངང་ཡིན་ཐོག་དེར་གནས་པས་ཞི་གནས་ལ། དེ་དུས་གསལ་སྟོང་སྤྲོས་དང་བྲལ་བས་ལྷག་མཐོང་ཉིད་ཅེས་བརྗོད་ཀྱང་དབྱེར་མེད་ངོ་བོ་གཅིག་པས་ཟུང་དུ་འབྲེལ་ཏེ། བྱང་ཆུབ་སེམས་དཔའི་སྡེ་སྣོད་ཀྱི་མདོ་ལས། བྱང་ཆུབ་སེམས་དཔའི་ཞི་གནས་ནི། ཡང་དག་པའི་བསམ་པ་སྟེ་ཞི་བའི་འདུ་ཤེས་ལའང་མི་གནས་སོ། །ལྷག་མཐོང་ནི་ལྟ་བ་མཐོང་བ་སྟེ། ལྟ་བ་ཉིད་ཀྱང་རྗེས་སུ་མི་མཐོང་ངོ་། །གང་གིས་དེ་ལྟར་མཐོང་བ་དེ་ཉིད་ཡང་དག་པར་མཐོང་བའོ། །ཞེས་སོ། །གསུམ་པ་ཡེ་ཤེས་བཞིའི་འཆར་ཚུལ་ངེས་པ་ལ་བཞི། དང་པོ་སྣང་བའི་ཡེ་ཤེས་ལ་གཉིས། དང་པོ་ཡེ་ཤེས་དངོས། དེ་ལྟར་བཞག་པས་ཡེ་ཤེས་བཞིའི་རིམ་པས་ལམ་གྱི་བསྒྲོད་ཚུལ་ཡང་། བཞག་ཐབས་བརྒྱད་ཀྱིས་སེམས་གཉུག་མར་གནས་པ་དེ་ཚེ་སྒྲ་བློ་ཞེན་ཡུལ་ལས་འདས་པའི་ཟབ་ཞི་སྤྲོས་དང་བྲལ་བའི་སེམས་ཉིད་སྨྲ་བསམ་བརྗོད་དུ་མེད་པའི་དོན་ཐོག་མར་མཐོང་བས། དེ་ནི་སྣང་བའི་ཡེ་ཤེས་ཞེས་བྱ་སྟེ་ཤིན་ཏུ་མི་རྟོག་པ་ཡི་འོད་གསལ་{གསར་པ་ཞུ་མཆན།} ཤེས་རབ་ཀྱི་ཕ་རོལ་དུ་ཕྱིན་ཞེས་བྱའོ། །གཉིས་པ་དེའི་ཡོན་ཏན། དེ་ཉིད་མཐོང་སྟེ་ཀུན་རྟོག་རང་སར་གྲོལ་བས་འོད་གསལ་མ་བུ་འདྲེས་པས་སེམས་ནི་རབ་ཏུ་ཞི་ཞིང་། ཕྱི་ཡི་ཆོས་ཡུལ་ལྔ་ནང་གི་ཆོས་སེམས་ལ་དགག་སྒྲུབ་ཀྱི་ཞེན་པ་ཆུང་། སེམས་ཉིད་སྟོང་པའི་ངང་ནས་འགྲོ་ལ་སྙིང་རྗེ་ཕྱོགས་མེད་དུ་འཆར་བས། རང་གཞན་གྱི་དོན་དུ་རང་དགེ་བ་ལ་སྤྱོད་ཅིང་གཞན་ཡང་དགེ་ལ་བསྐུལ། རྟག་ཏུ་དབེན་པར་དགའ་ཞིང་རྣམ་གཡེང་དང་འདུ་འཛི་ཉུང་། ཐ་ན་རྨི་ལམ་ན་ཡང་མི་དགེ་བའི་སེམས་མེད་པར་དགེ་བའི་ཆོས་ལ་སྤྱོད་ཅིང་། སྒོ་གསུམ་ལ་ཤིན་སྦྱངས་ཐོབ། ཚོགས་ལམ་གྱི་ཡོན་ཏན་སྐྱེ། འོད་གསལ་གྱི་སྣང་བ་འབྱུང་། དེས་ནི་ཐར་པའི་ལམ་སྣ་ཟིན་པ་ཡིན་ནོ། །གཉིས་པ་མཆེད་པའི་ཡེ་ཤེས་ལའང་གཉིས། དང་པོ་ཡེ་ཤེས་དངོས། དེ་ནས་སྔར་གྱི་དོན་ལ་ཆེས་ཆེར་གོང་དུ་གོམས་པ་ཡིས། སེམས་སྟོང་གསལ་རང་བྱུང་གི་ཡེ་ཤེས་མཐོང་བའི་ཡོན་ཏན་ནམ་ཉམས་མྱོང་སྔོན་བས་རྒྱ་ཆེ་ཞིང་། ཕྱིའི་སྣང་བའང་ངང་གིས་རྨི་ལམ་སྒྱུ་མར་རབ་ཏུ་རྟོགས་ཏེ། ཆོས་རྣམས་རང་བཞིན་གཉིས་མེད་ཀྱི་ངང་དུ་དུ་མ་རོ་གཅིག་པར་རྟོགས་པས། ཉོན་མོངས་རྣམ་རྟོག་སོགས་སྐྱེས་དང་མ་སྐྱེས་མེད་པར་མཉམ་པར་མཐོང་བའི་ཚེ། གཉིས་པ་མཆེད་པའི་ཡེ་ཤེས་ཞེས་བྱ་ཤིན་ཏུ་མི་རྟོག་པ་ཤེས་རབ་དང་ཏིང་ངེ་འཛིན་ཤིན་ཏུ་རླབས་ཆེ་ཞིང་བསམ་གཏན་གྱི་དགའ་བས་བརྒྱན་པ་ཐོབ་པ་ཡིན་ནོ། །གཉིས་པ་ཡོན་ཏན་བརྗོད་པ། སྦྱོར་ལམ་དེ་ཡི་ཚེ་ལུས་སེམས་ཤིན་སྦྱངས་ཀྱི་རྟགས་ཁྱད་པར་ཅན་སྔོན་བས་རབ་ཏུ་དག་ཅིང་། ཐབས་དང་ཤེས་རབ་ཟུང་འཇུག་དྲི་མ་མེད་པའི་རྟོགས་པ་འཆར་ཏེ། མངོན་ཤེས་ལྡན་ཞིང་སྙིང་རྗེས་སེམས་ཅན་ལ་ཕན་པ་འགྲུབ། སྲིད་པ་ལ་སྐྱོ་བས་སེམས་ནི་ངེས་པར་འབྱུང་ཞིང་། རྨི་ལམ་ན་ཡང་ཆོས་ཀུན་རྨི་ལམ་དང་སྒྱུ་མ་སོགས་དེ་འདྲར་རྟོགས། ལུས་ཀྱི་ཕྱི་ནང་ཤིག་སྲོ་དང་འབུ་སྲིན་མེད། བྱིང་རྒོད་དང་བྲལ་ཞིང་ཉིན་མཚན་དུ་འབྲལ་མི་ཕོད་པའི་ཏིང་འཛིན་འགྲུབ་པ་སོགས་སྦྱོར་ལམ་གྱི་རྟགས་དང་ལྡན་པའི། སྐྱེ་བོ་དེས་ནི་འཕགས་ལམ་ཆོས་ཉིད་ཀྱི་བདེན་པ་མྱུར་དུ་མཐོང་བར་འགྱུར་རོ། །གསུམ་པ་ཐོབ་པའི་ཡེ་ཤེས་ལ་གཉིས། དང་པོ་ཉམས་རྟགས། དེ་ནས་ཆེས་ཆེར་གོམས་པས་སྔོན་སྦྱོར་ལམ་བས་ལྷག་སྟེ་ཉོན་མོངས་པའི་རླུང་བརྒྱ་ཕྲག་བཅུ་གཉིས་དག ཏིང་འཛིན་རྟོགས་པའི་ཉི་མ་སྔོན་མེད་འཆར། ཆོས་ཀུན་དེ་བཞིན་ཉིད་དུ་ཚུལ་གཅིག་པས་མཉམ་པའི་དོན་མཐོང་ནས། སྤྱན་དང་མངོན་ཤེས་སྒྲིབ་པ་མེད་མངའ་བས། སྔགས་ལྟར་ན་རང་གི་ཁམས་ཡེ་ལྡན་གྱི་ཞིང་ཁམས་དང་། མཚན་ཉིད་ལྟར་ན། སངས་རྒྱས་བརྒྱའི་ཞལ་ལྟ་བ་སོགས་ཕྱིའི་ཞིང་ཁམས་བརྒྱ་སྟོང་བྱེ་བ་དཔག་མེད་མཐོང་། གཉིས་པ་ཡེ་ཤེས་དངོས། དེ་ཡི་ཚེ་ཟག་མེད་འཕགས་པའི་ཡེ་ཤེས་སྔར་མ་མཐོང་བ་གསར་དུ་མཐོང་བས་མཐོང་བའི་ལམ་ཏེ། གསུམ་པ་ཐོབ་པ་ཞེས་བྱ་ཆོས་ཉིད་ཀྱི་བདེན་པ་མངོན་དུ་གྱུར་པ་ཡིན་ཏེ། ཕལ་ཆེན་ལས། འཚོ་བ་ཆད་དང་མི་བསྔགས་ངན་འགྲོ་དང་། །འཁོར་གྱི་འཇིགས་བྲལ་ཉམས་ངའི་གནོད་པ་མེད། །ཅེས་འཇིགས་པ་ལྔ་ལས་གྲོལ་ལོ། །བཞི་པ་ཉེ་བར་ཐོབ་པའི་ཡེ་ཤེས་ལ་གཉིས། དང་པོ་ཉམས་རྟགས། དེ་ལས་ཆེས་ཆེར་སྒོམ་ལ་ཆུང་འབྲིང་ཆེར་གོང་དུ་འཕེལ་བ་ཡིས། ཆོས་ཉིད་རྟོགས་པའི་ཏིང་འཛིན་གྱི་ཡོན་ཏན་གྲངས་མེད་ཅིང་། ས་དང་པོ་ནས་བདུན་པའི་བར་རྗེས་ཐོབ་ལ་རྟོག་པ་ཡོད་པས་མཉམ་རྗེས་ཐ་དད་པ་དང་། དག་ས་གསུམ་ན་མངོན་གྱུར་གྱི་རྟོག་པ་མེད་པས་མི་རྟོག་མཉམ་པའི་ཆོས་ཉིད་ལས། གཟུངས་སྤྲིན་ཡེ་ཤེས་དྲི་མེད་སྔར་མཐོང་ལམ་སོགས་ལས་རྒྱ་ཆེ་ཞིང་། མཉམ་པར་བཞག་དང་མ་བཞག་གཉིས་མེད་པར། རྟག་ཏུ་མཉམ་བཞག་སྤྲུལ་པ་བསམ་ཡས་སྟོན་ཏེ། རྒྱལ་སྲས་ས་བཅུ་པ་དང་སངས་རྒྱས་གཉིས་གཞན་དོན་མཛད་པ་ལ་མཉམ་པར་གསུངས་པ་བཞིན་ཚད་མེད་ཞིང་དང་ཡེ་ཤེས་གཟིགས་པ་འཇུག གཉིས་པ་ཡེ་ཤེས་དངོས། དེའི་ཚེ་རྩ་ཁམས་དག་ཅིང་རླུང་སེམས་ལས་སུ་རུང་བའི་ཡོན་ཏན་མཆོག་ཤིན་ཏུ་རྒྱ་ཆེ་དྲི་མ་མེད་པ་ནི། སྒོམ་ལམ་གྱི་ཡེ་ཤེས་ཉེ་བར་ཐོབ་པ་ཞེས་བྱའི་ཡེ་ཤེས་ཏེ། འཕགས་ལམ་བརྒྱད་རྫོགས་ནས་མྱུར་དུ་བྱང་ཆུབ་འཐོབ། ཡོན་ཏན་དེ་དག་ཀྱང་རྡོ་རྗེའི་ལུས་ཀྱི་ལྟེ་བའི་འཁོར་ལོ་ལས་སུ་རུང་བས་ཚོགས་སྦྱོར་གྱི་ཡོན་ཏན་འཆར། སངས་རྒྱས་སྤྲུལ་སྐུའི་ཞལ་མཐོང་། དེ་བཞིན་སྙིང་གསང་མཐོང་ལམ་སྐྱེ། མགྲིན་པས་ས་དང་པོ་ནས་བདུན་གྱི་བར་ལོངས་སྐུ་མཇལ། སྤྱི་བོས་དག་པ་ས་གསུམ་སྟེ། དབུ་མའི་མདུད་པ་ཉེར་གཅིག་གི་དང་པོ་གཉིས་གྲོལ་བས་ས་དང་པོ་ནས། ཉི་ཤུ་པ་གྲོལ་བས་ས་བཅུ་པའི་བར་གྱི་ཡོན་ཏན་རྣམས་འཆར་ཞིང་། ཉེར་གཅིག་པ་གྲོལ་བས། ཤིན་ཏུ་དག་པ་སངས་རྒྱས་ཀྱི་སྐུ་དང་ཡེ་ཤེས་ཐམས་ཅད་འཆར་རོ། །དེའི་འཕྲོས་དོན་བར་དོའི་ཐིམ་རིམ་ཐམས་ཅད་རྫོགས་ནས་མཐར་འོད་གསལ་འཆར་ཏེ། དེའང་སེམས་ལ་སངས་རྒྱས་རང་ཆས་སུ་ཡོད་པ་ཉིད་རང་ལ་སྣང་སྟེ། སེམས་ཉིད་སྟོང་པའི་ངང་ལས་ཆོས་སྐུའི་འོད་གསལ་བཞི་དང་། སྣང་བའི་ཆ་ལས་གཟུགས་སྐུའི་འོད་གསལ་ལྔར་ཤར་ཏེ། དང་པོ་ནི། སྣང་མཆེད་ཐོབ་པ་ཉེར་ཐོབ་ཀྱི་ཡེ་ཤེས་བཞི་སྐྱེ་རིམ་བཞིན། སྔ་མ་གསུམ་པོའི་སྐབས་ཞེ་སྡང་གི་རྟོག་པ་སོ་གསུམ། འདོད་ཆགས་ཀྱི་བཞི་བཅུ། གཏི་མུག་གི་བདུན་ཏེ་རགས་པ་དང་། ཕྱི་མའི་དུས་ཕྲ་བ་འགགས་ཏེ་ཀུན་གཞི་ཆོས་སྐུར་ཐིམ་པའི་ཚེ་གཞིའི་འོད་གསལ་ཇི་བཞིན་པ་ཉིད་འཆར་བས། དེ་ཉིད་ངོ་ཤེས་ན་གྲོལ། དེའི་རྩལ་ལས་ལྷུན་གྲུབ་གཟུགས་སྐུའི་འོད་གསལ་རིགས་ལྔའི་ཚོམ་བུ་འཆར། དེ་རྣམས་ངོ་མ་ཤེས་ན། སྲིད་པ་བར་དོའི་སྣང་བ་འཆར་བས། རབ་ཀྱིས་བདེན་མེད། འབྲིང་གི་བསྐྱེད་རྫོགས་སྒྱུ་མ་ལྟ་བུ། ཐ་མས་སྐྱབས་འགྲོ་སོགས་ཀྱིས་བར་དོའི་འཇིགས་པ་ལས་ལོག་ནས་མཐོ་རིས་སུ་སྐྱེ་སྟེ་ཕྱི་མ་ལ་གྲོལ་བར་གསུངས་སོ། །འདི་ནི་འོད་གསལ་རྡོ་རྗེ་སྙིང་པོའི་ཐེག་པ་སྟེ། སྐལ་བཟང་དབང་རབ་རྣམས་འབྲས་བུ་ཚེ་འདིར་གྲོལ་བ་ཡིན་ནོ། །གཉིས་པ་ཐ་མའི་སྒོམ་ཚུལ་ལ་གསུམ། ཞི་ལྷག་གི་གནས་ལ་སྤྱིར་གདམས། སོ་སོའི་རིམ་པ་བྱེ་བྲག་ཏུ་བཤད་པ། ཟུང་འཇུག་གི་ཁྱད་པར་ངོས་བཟུང་བའོ། །དང་པོ་ཞི་ལྷག་གི་གནས་སྤྱིར་གདམས་པ་ནི། དབང་པོ་ཐ་མས་ཇི་ལྟར་བསྒོམ་པའི་རིམ་པ་ཡང་། དང་པོར་ཞི་ལྷག་སོ་སོར་རྩལ་སྦྱང་སྟེ། བརྟན་པར་གྱུར་ནས་གཉིས་ཀ་ཟུང་འཇུག་དབྱེར་མེད་དུ་བསྒོམ་པར་བྱའོ། །དེ་ཡང་ཇི་ལྟར་བསྒོམ་པའི་ཐབས་ཚུལ་དཔག་ཏུ་མེད་པའི་ཚུལ་ལ་བསླབ་དགོས་སོ། །གཉིས་པ་སོ་སོའི་རིམ་པ་ལ་གཉིས། ཞི་གནས་དང་ལྷག་མཐོང་ངོ་། །དང་པོ་ཞི་གནས་ལ་གསུམ། དང་པོ་སྦྱོར་བ་དང་པོའི་ཏིང་ངེ་འཛིན་གྱིས་ལུས་སེམས་ཁོད་མཉམ་པ། ཐོག་མར་ཞི་གནས་བཙལ་བའི་རིམ་པ་ནི། གནས་དབེན་པའི་ཕྱོགས་སུ་བདེ་བའི་སྟན་ལ་རབ་ཏུ་འདུག་ནས། དབུགས་ཕྱིར་དབྱུང་བ་དང་ནང་དུ་རྔུབ་པའི་ཁ་དོག་དང་གྲངས་རྣམས་ཀྱིས། ཉིན་ཞག་འགར་རྣམ་རྟོག་འདུལ་ཞིང་སེམས་གནས་པར་བྱའོ། །དེའང་ལུས་གནད་སྐྱིལ་ཀྲུང་ལག་པ་པུས་མོར་བཀབ། རྩ་གསུམ་གསལ་བའི་རོ་མ་དཀར་པོ་སྣ་བུག་གཡས་ལ་རླུང་ཕར་འགྲོ་བའི་ཚེ་ནད་གདོན་སྡིག་སྒྲིབ་དག་པར་བསམ། རྔུབ་ཚེ་གཡོན་རྐྱང་མ་ནས་སངས་རྒྱས་སོགས་ཀྱི་ཏིང་འཛིན་ཡོན་ཏན་སོགས་འོད་དུ་ཞུ་ནས་ཞུགས་པ་དབུ་མར་ཐིམ་པར་བསམ་ལ་རླུང་ཁ་སྦྱར་དལ་བུ་བཟུང་། རླུང་གི་ཁ་དོག་བད་ཀན་གཉེན་པོར་རླུང་གི་རླུང་ལྗང་གུ། དབྱར་ཚ་བའི་གཉེན་པོ་ཆུ་རླུང་དཀར་པོ། སྟོན་མཁྲིས་པའི་གཉེན་པོ་ས་རླུང་སེར་པོ། དགུན་གྲང་བའི་གཉེན་པོ་མེ་རླུང་དམར་པོ་སྟེ་འདུ་ནད་ཀྱི་གཉེན་པོའོ། །དབྱིབས་སྙིང་ནང་རླུང་སེམས་ཀྱི་དྭངས་མ། གཞུ། གྲུ་གསུམ། ཟླུམ་པོ། གྲུ་བཞི་རྣམས། རེག་བྱ་དེ་མཐུན། གྲངས་ཁུག་པ་བདུན་ཚུན་ཆོད་དོ། །རླུང་དེ་སྣ་བུག་ནས་ཁྲུ་གང་ནས་སྟོང་གསུམ་བར་དུ་ཇེ་རིང་ལ་སྤྲོ། ཁམས་འདུས་ཚེ་ཧས་བསལ། དད་པ་དང་བདེ་བ་སོགས་སྐྱེས་ཚེ་ནང་དུ་བཟུང་། དེས་རྣམ་པར་མི་རྟོག་པའི་ཞི་གནས་སྐྱེ་ཞིང་ལྷན་ཅིག་སྐྱེས་པའི་ཡེ་ཤེས་ངོས་ཟིན་པར་འགྱུར་རོ། །གཉིས་པ་ཡོངས་སུ་བཟུང་བའི་ཏིང་ངེ་འཛིན་གྱིས་མཉམ་པར་བཞག་པ། དེ་ནས་བྱམས་སོགས་ཚད་མེད་བཞི་དང་སྨོན་འཇུག་གི་སེམས་གཉིས་དང་། བསྐྱེད་རིམ་དང་ནི་བྲིས་སྐུ་དང་གླེགས་བམ་སོགས། དགེ་བའི་ཡུལ་ནི་གང་ཡང་རུང་བ་ཞིག་ལ། དམིགས་པ་རྩེ་གཅིག་པས་སེམས་མ་ཡེངས་མཉམ་པར་གཞག་གོ །གསུམ་པ་ཡོངས་སུ་རྫོགས་པ་ཏིང་ངེ་འཛིན་གྱིས་དབང་བསྒྱུར་བ། དེ་ལྟར་བཞག་པས་སེམས་ནི་བཏང་འགྲོ་བཞག་སྡོད་ལ་ལས་སུ་རུང་ཞིང་། ཡུལ་གཞན་དུ་མི་འཕྲོ་དམིགས་པ་གར་གཏད་ཀྱི་ཡུལ་ལ་ཟིན་ཅིང་། ཡུན་ཇི་ཙམ་དུ་བཞག་པ་དེ་ཙམ་དུ་མཉམ་པར་གནས་ཤིང་། ལུས་ཀྱི་མདོག་སྣུམ་ངག་སྨྲ་བ་ཉུང་སེམས་ནི་དགའ་བདེས་ཁྱབ་པ་ན། རྩེ་གཅིག་མི་གཡོའི་ཞི་གནས་གྲུབ་པ་ཡིན་ནོ། །གཉིས་པ་ལྷག་མཐོང་ལ་གཉིས་ཏེ། ཕྱི་གཟུང་བ་རང་བཞིན་མེད་པར་བརྟགས་པ་དང་། ནང་འཛིན་པ་རང་བཞིན་མེད་པར་བསམ་པའོ། །དང་པོ་གཟུང་བ་རང་བཞིན་མེད་པར་བརྟགས་པ་ལ་གཉིས། དང་པོ་གཟུང་ཡུལ་སྣང་སྟོང་རྩ་བྲལ་དུ་བསྟན་པ། དེ་ནས་ལྷག་མཐོང་གི་དོན་ལ་བསླབ་པ་ནི། ཕྱི་རོལ་སྣང་སྲིད་འཁོར་འདས་ཀྱི་ཆོས་འདི་རྣམས། དོན་ལ་མེད་བཞིན་སྣ་ཚོགས་སུ་སྣང་བས་མི་བདེན་པ་རྨི་ལམ་དང་སྒྱུ་མ་འདྲ་ཞིང་། དེ་བཞིན་གཟུགས་བརྙན་དང་སྤྲུལ་པ་དང་སྒྲ་བརྙན་དང་དྲི་ཟའི་གྲོང་ཁྱེར་དང་། མིག་ཡོར་དང་སྨིག་རྒྱུ་འདྲ་ཞིང་སྙིང་པོ་མེད་པ་སྣང་བས་ཏེ་སྣང་དུས་ནས་སྟོང་སྟེ་རང་བཞིན་སྟོང་པའི་ངང་ཉིད་དོ། །དེ་ཡང་འཁྲུལ་ངོར་སྣང་བའི་སངས་རྒྱས་བརྫུན་པ་སྤྲུལ་པའི་རང་བཞིན་ཆུ་ཟླ་ལྟར་དབྱིངས་ཆོས་སྐུ་དང་ལོངས་སྐུ་ལས་མ་གཡོས་བཞིན་སྣང་བ་བརྫུན་གྱི། དག་པ་སངས་རྒྱས་ཀྱི་རང་བཞིན་འོག་མིན་ན་བཞུགས་པ་མེད་པའི་བརྫུན་པ་ནི་མིན་ནོ། །འཁྲུལ་རྟོག་འཁོར་བའི་བདེ་སྡུག་སོགས་གཅིག་ནས་གཅིག་ཏུ་བརྒྱུད་ཅིང་ཚེ་རབས་བགྲངས་པ་འདྲ་ཡང་། དོན་ལ་སྐྱེ་བ་མེད་པས་འཁོར་མ་འཁོར་གཉིས་ཀ་མེད་དེ་སྒྱུ་མའི་དཔེ་བརྒྱད་བཞིན་ནོ། །གཉིས་པ་དེའི་ངང་ལ་འཛིན་མེད་དུ་མཉམ་པར་བཞག་པ། དེ་ལྟར་སྒྱུ་མར་འཛིན་པ་ཙམ་ཡང་དོན་ལ་མི་དམིགས་པས་སྣང་བཏགས་ཀྱི་ཆོས་ཐམས་ཅད་ཡོད་མེད་སོགས་སྤྲོས་པའི་ཡུལ་ལས་འདས་པས་ནམ་མཁའ་དང་འདྲ་ཞིང་བདག་མེད་པས། སྐྱེ་མེད་སྤྲོས་དང་བྲལ་བར་མཉམ་པར་བཞག་གོ །དེ་ཡིས་ཕྱི་རོལ་ཆོས་ལ་བདག་མེད་པར་མཐོང་ཅིང་། བདེན་མེད་དུ་འཛིན་པའི་རྟོག་པའང་ལྡོག་པས། གཟུང་རྟོག་གི་བློ་དང་གཟུང་ཡུལ་གཉིས་ཀ་རང་བཞིན་མེད་པར་རྟོགས་པར་འགྱུར་རོ། །གཉིས་པ་འཛིན་པ་རང་བཞིན་མེད་པར་བསམ་པ་ལ་བཞིི། དང་པོ་སེམས་དང་སེམས་བྱུང་རང་ངོ་བརྟགས་པ། དེ་ནས་ནང་གི་སེམས་ལ་འདི་ལྟར་བརྟག་སྟེ། བཟང་ངན་སོགས་ཡུལ་སྣ་ཚོགས་སུ་རྟོག་ལ་བརྟགས་ན་ངོ་བོ་མེད་པའི་འཁྲུལ་པའི་སེམས། བླང་དོར་དགག་སྒྲུབ་དང་བདེན་བརྫུན་བདེ་སྡུག་བཏང་སྙོམས་སོགས་ཀྱི། ཡུལ་ལ་ཤ་ར་ར་འཕྲོ་ཞིང་འདི་ཞེས་ངོས་བཟུང་མེད་པ་ཁྱོད། དང་པོ་གང་ནས་འོངས་ད་ལྟ་གང་ན་གནས། ཐ་མ་གར་འགྲོ་དབྱིབས་དང་ཁ་དོག་ཅི་ལྟ་བུ་འདུག་སྙམ་དུ་སྐད་ཅིག་ཀྱང་མ་ཡེངས་པར་བརྟགས་ཤིང་དཔྱད་པའི་ཚེ་འདི་ལྟར་ཡུལ་ཤེས་གཉིས་ཀ་ངོ་བོ་མེད་པར་མཐོང་བར་འགྱུར་ཏེ། དཀོན་བརྩེགས་ལས། དཔེར་ན་ཤིང་ཉིད་རླུང་གིས་དྲུད་པ་ལས། །མེ་བྱུང་ནས་ནི་དེ་ཡིས་སྲེག་པར་བྱེད། །དེ་བཞིན་ཤེས་རབ་དབང་པོ་སྐྱེས་ནས་ནི། །སོ་སོར་རྟོག་པ་དེ་ཉིད་སྲེག་པར་བྱེད། །ཅེས་སོ། །གཉིས་པ་སྟོང་པར་རྟོགས་པས་རྩ་བ་བཅད་པ། དགག་སྒྲུབ་ཀྱི་ཡུལ་ལ་འཕྲོ་བ་དང་། དེ་ལ་སོ་སོར་དཔྱོད་པའི་འཛིན་པའི་སེམས་ནི་ཡོད་པ་ལྟར་སྣང་བ་རྟོག་པས་བསླད་པ་སྟེ་དོན་ལ་ངོ་བོ་གང་ཡང་མེད་པ་ལ་སྐྱེ་རྒྱུ་མེད་པས། དང་པོར་སྐྱེ་བའི་རྒྱུས་སྟོང་ཞིང་། མ་སྐྱེས་པ་ལ་བར་དུ་གནས་མཁན་དང་ཐ་མར་འགག་རྒྱུ་མེད་པས་སྟོང་། དེ་བཞིན་ཁ་དོག་དང་དབྱིབས་མེད་ངོ་བོ་འདི་ཞེས་ངོས་བཟུང་བྱར་མེད། སེམས་འདས་པ་འགགས་ཤིང་མ་འོངས་པ་མ་སྐྱེས་ལ། ད་ལྟ་བ་གང་དུའང་མི་གནས་ཏེ་ཕྱི་ནང་གང་ནའང་མེད་དེ་བཙལ་བས་མི་རྙེད་དཔེར་ན་ནམ་མཁའ་དང་འདྲ་ཞིང་ངོས་བཟུང་དཔྱད་ར་མེད་པར་ཡངས་ཕྱམ་མེ་བ་བྱ་བྱེད་སྤྲོས་དང་བྲལ་བར་འཆར་བ་ནི་ཆོས་སྐུ་རང་ལུགས་ཀྱི་དགོངས་པར་ཤེས་པར་བྱའོ། །བདེ་བ་རབ་འབྱམས་ལས། རྩ་བ་མེད་པའི་སེམས་ཉིད་ནི། །བཙལ་བས་མ་རྙེད་ངོས་བཟུང་མེད། །ཇི་བཞིན་ཡེ་བཞིན་སྟོང་པའི་ངང་། །བརྗོད་བྲལ་རང་བྱུང་ཡེ་ཤེས་སོ། །ཞེས་སོ། །གསུམ་པ་དེའི་ངང་ལ་སྒོམ་ཚུལ་བསྟན་པ། དེ་ཚེ་སེམས་ལ་རྟོག་དཔྱོད་ཀྱིས་གང་ཡང་མི་བསམ་པར། ཁུར་གྱིས་དུབ་པའམ་ཆད་པ་ངལ་གསོ་བ་བཞིན་དུ་དཔྱད་པའི་རྗེས་སུ་ལྷོོད་ཀྱིས་གློད་དེ། ཅི་ཡང་མི་བསམ་གང་ཡང་ཡིད་ལ་བྱེད་པ་བོར་ཏེ། རིག་མདངས་བདེ་བ་དང་བཅས་མ་འགགས་པར་སྣང་བ་ཐམས་ཅད་རང་བཞིན་གཉིས་མེད་མཉམ་པའི་ངང་ལ་ཁྲོལ་ལེ་ཤིགས་སེ་བུན་ནེ་བཞག་སྟེ། དོ་ཧ་ལས། འཇུར་བུས་བཅིངས་པའི་སེམས་དེ་ནི། །གློད་ན་གྲོལ་བར་ཐེ་ཚོམ་མེད། །རྨོངས་རྣམས་གང་གིས་འཆིང་གྱུར་པ། །མཁས་རྣམས་དེ་ཡིས་རྣམས་པར་གྲོལ། །ཞེས་སོ། །སྤྱིར་ཡང་སེམས་བསྒྲིམས་ཏེ་བཟུང་ན་འཕྲོ་ཞིང་། གང་དགར་སོང་ཞིག་ཅེས་གློད་ན་རང་སོར་གནས་པ་ཆོད་ཉིད་ཡིན་ཏེ། དེ་ཉིད་ལས། བཅིངས་པ་དག་ནི་ཕྱོགས་བཅུར་འགྲོ་བར་རྩོམ། །ཐོངས་པར་གྱུར་ན་མི་གཡོ་བརྟན་པར་གནས། །གོ་ལྡོག་རྔ་མོ་ལྟ་བུར་བདག་གིས་མཐོང་། །བུ་ཁྱོད་རྣམས་ཀྱང་རང་ལ་ཅེར་ཏེ་ལྟོས། །ཞེས་སོ། །དེ་བཞིན་གཟིངས་ཀྱི་བྱ་རོག་ལྟར་སེམས་འཕྲོ་རུ་བཅུག་ནས། ད་ཅུང་ཟད་ཀྱང་ནང་དུ་མ་འོང་ཞིག་ཅེས་བྱས་ན། ཕྱི་ཡུལ་ལ་འཕྲོ་བ་བཞིན་བྱས་ཀྱང་ནང་དུ་ལོག་ནས་རང་སར་གནས་པ་འབྱུང་སྟེ། ཇི་ལྟར་གཟིངས་ལ་འཕུར་བའི་བྱ་རོག་ནི། བསྐོར་ཞིང་བསྐོར་ཞིང་སླར་ཡང་དེ་རུ་འབབ་ཞེས་སོ། །བཞི་པ་དེ་ལྟར་སྒོམ་པའི་དགོས་པ་བརྗོད་པ། བསྒོམ་ཚུལ་དེ་ཡིས་ངར་འཛིན་གྱི་རྣམ་རྟོག་རྩད་བཅད་པས་གང་ཟག་གི་བདག་མེད་ཅིང་། འཛིན་པའི་སེམས་ལ་རང་བཞིན་མེད་པར་རྟོགས་ཏེ་སྔར་གཟུང་ཡུལ་ངོ་བོ་མེད་པས་གཟུང་བ་བདག་མེད་པར་རྟོགས་པས་བདག་མེད་གཉིས་ཀྱི་དོན་མཐོང་བས་གྲོལ་བར་འགྱུར་རོ། །གསུམ་པ་ཟུང་འབྲེལ་གི་ཁྱད་པར་ངོས་བཟུང་བ་ལ་གསུམ། ཟུང་འཇུག་དོན་གྱི་སྒོམ་ཚུལ། འོད་གསལ་རྟོགས་པའི་འཆར་ཚུར། ཞི་ལྷག་ངེས་པའི་རང་བཞིན་ནོ། །དང་པོ་ཟུང་འཇུག་དོན་གྱི་སྒོམ་ཚུལ་ལ་གསུམ། དང་པོ་གནས་ལུགས་དོན་གྱི་ཟུང་འཇུག ཞི་ལྷག་སོ་སོར་བརྟན་པ་ཐོབ་པ་དེ་ནས་ཞི་ལྷག་ཟུང་འཇུག་གཉུག་མའི་ཡེ་ཤེས་ནི། སྣང་བ་གཟུང་བ་དང་དེ་འཛིན་པའི་སེམས་སྣང་སྟོང་གཉིས་མེད་ཆུ་དང་ཆུ་ཟླ་དབྱེར་མེད་པ་བཞིན་ནོ། །གཉིས་པ་གཉིས་མེད་བློས་སྒོམ་ཚུལ། དེ་ལྟར་མ་རྟོགས་པར་བདག་གཉིས་སུ་གཟུང་བས་བག་ཆགས་ཀྱི་དབང་གིས་མེད་བཞིན་སྲིད་པར་འཁྲུལ་ན་ཡང་། རང་བཞིན་གཉིས་སུ་མེད་པར་ཤེས་པས་འབྲས་བུ་མྱ་ངན་འདས་ཞིར་འགྲོ། དེ་བས་གཉིས་མེད་མཉམ་པའི་དོན་ལ་འདི་ལྟར་བསླབ་པར་བྱ་སྟེ། འཁོར་འདས་ཀྱི་ཆོས་རྣམས་གདོད་མ་ནས་མ་སྐྱེས་མི་འགག་སེམས་ཀྱི་ངོ་བོ་ཉིད་དེ། སེམས་ཀྱི་རང་བཞིན་ནམ་མཁའ་ལྟར་ཡེ་ནས་དག་ཅིང་དྲི་མ་མེད་པ་རང་བཞིན་གྱི་འོད་གསལ་བ་ཡིན་པས། མཐའ་ཡིས་མ་གོས་པའི་སེམས་ཉིད་དྲི་མེད་སྟོང་གསལ་སྤྲོས་པ་དང་བྲལ་བར་བློ་ཡི་རྩོལ་བས་མ་བཅོས་པར་གཞག མི་ཟད་པའི་གཏེར་མཛོད་མན་ངག་གི་གླུ་ལས། སེམས་ཉིད་རྣལ་མའི་དོན་ནི་ཀུན་གྱིས་རྟོགས་དཀའ་བས། །མཐའ་ཡིས་མ་གོས་དྲི་མ་མེད་པའི་སྙིང་པོ་ནི། །རང་བཞིན་གདོད་ནས་དག་པས་ཀུན་གྱིས་དཔྱད་མི་བྱ། །གལ་ཏེ་དཔྱད་ན་དུག་སྦྲུལ་རྩེས་པ་ཁོ་ནར་ཟད། །ཅེས་དང་། ཀུན་བྱེད་ལས། ཇི་ལྟར་སྣང་བ་དེ་བཞིན་ངང་དུ་གཅིག །འདི་ལ་སུས་ཀྱང་འཆོས་པར་མ་བྱེད་ཅིག །མ་བཅོས་མཉམ་པའི་རྒྱལ་པོ་དེ་ལ་ནི། །མི་རྟོག་ཆོས་སྐུའི་དགོངས་པ་ངང་གིས་གནས། །ཞེས་སོ། །གསུམ་པ་དྲོད་རྟགས་ཡོན་ཏན་གྱི་སྐྱེ་ཚུལ། དེ་ཡིས་ཉོན་མོངས་པའི་རྙོག་པ་རབ་ཏུ་ཞི་ཞིང་། རྣམ་པར་མི་རྟོག་པའི་ཡེ་ཤེས་ཆེན་པོར་གནས་ཏེ། རིག་པ་དང་གྲོལ་པའི་ཡོན་ཏན་མངོན་ཤེས་དང་ཏིང་འཛིན་སོགས་འགྲུབ་པར་འགྱུར་ཞིང་། གཟུང་འཛིན་གཉིས་སུ་མེད་པའི་རྟག་ཆད་མཐའ་བྲལ་དབུ་མར་རྟོགས་པ་ཡིན་ནོ། །གཉིས་པ་འོད་གསལ་ལ་གསུམ། དང་པོ་སེམས་ཉིད་གཞིའི་འོད་གསལ། མཉམ་བཞག་དེ་ཡི་ཚེ་སེམས་ནི་སྤྲོ་བསྡུ་བྲལ་བ་ནམ་མཁའ་ལྟ་བུ་ལ། སྣང་ཡུལ་ནི་མ་འགགས་ཤིང་མི་དམིགས་པས་རང་བཞིན་གྱིས་སྤྲོས་དང་བྲལ་བ་སྟེ། སྒོམ་མཁན་དང་བསྒོམ་བྱ་གཉིས་སུ་མེད་པའི་ཆོས་ཉིད་ལ། བྱ་རྒྱུ་དང་བྱེད་མཁན་མེད་པས་རང་སར་གྲོལ་བའི་གདོད་མའི་ངང་། སེམས་སེམས་བྱུང་གི་དྲི་མ་མེད་པའི་རང་བཞིན་དག་པའི་སེམས་ཉིད་དོན་གྱི་སངས་རྒྱས་ཆོས་ཀྱི་སྐུ་ཡིན་ནོ། །གཉིས་པ་དེ་ཉིད་བློས་རྟོགས་ཚུལ། དེའི་ཚེ་ཕྱི་གཟུང་བའི་ཡུལ་ལྔ་མི་དམིགས་ཏེ་ཆུ་ཟླ་དང་མིག་ཡོར་ལྟ་བུ་ལ། ནང་འཛིན་མཁན་གྱི་ཤེས་པ་ཆ་མེད་པས་ནམ་མཁའ་ལྟར་མི་དམིགས་ཤིང་གཡོ་བ་མེད་པའི་ཕྱོག་ལྷུང་དང་བྲལ་ཏེ། སྣང་སེམས་གཉིས་མེད་སྤྲོ་བསྡུ་དང་བྲལ་བའི་ཤེས་རབ་ཀྱི་ཕ་རོལ་ཕྱིན་པའི་ངང་། ཟབ་ཞི་སྤྲོས་བྲལ་རང་བཞིན་གྱིས་འོད་གསལ་འདུས་མ་བྱས་པ། སོ་སོ་རང་རིག་པའི་ཡེ་ཤེས་བདུད་རྩི་ལྟ་བུའི་ཆོས་ཉིད་ཁོང་དུ་ཆུད། གསུམ་པ་གནས་ལུགས་ངང་དུ་ཕྱིན་ཚུལ། དེ་ལྟའི་ལྟ་བ་འཛིན་མེད་ཡངས་པ་ཆེན་པོའི་དོན་རྟོགས་ཤིང་དེའི་ངང་ལ་གནས་པའི་ཏིང་ངེ་འཛིན་གྱི་གྲུ་ཆེན་གྱིས། སྲིད་གསུམ་འཁོར་བའི་རྒྱ་མཚོའི་ཕ་རོལ་བརྒལ་བས་ན། ཡེ་ནས་སྤྲོས་པ་མེད་པས་གཞི་བདེའི་སྟེང་དུ་བློ་སྤྲོས་པ་མེད་པར་འདྲེས་པའི་དུས་དེར་བདེ་བ་རྒྱུན་མི་འཆད་དེ། དབྱིངས་ཡེ་དབྱེར་མེད་རང་བཞིན་རྫོགས་པ་ཆེན་པོའི་ངང་དུ་ཕྱིན་པ་ཡིན་ནོ། །གསུམ་པ་ཞི་ལྷག་ངེས་པའི་རང་བཞིན་ལ་གསུམ། དང་པོ་ངོ་བོ་ངེས་པའི་གྲུབ་ཚུལ། སེམས་སྤྲོ་བསྡུ་དང་བྲལ་བར་གནས་པས་ཞི་གནས་ཆོས་སྐུ་ཡི་རྒྱུ་ཅན་སྟོང་ཆ་ཡེ་ཤེས་ཀྱི་ཚོགས་ཤེས་རབ་རྫོགས་པའི་རིམ་པ་ཡིན་ལ། གསལ་བས་ལྷག་མཐོང་གཟུགས་སྐུ་ཡི་རྒྱུ་ཅན་སྣང་བ་ཉིད་བསོད་ནམས་ཀྱི་ཚོགས་ཐབས་བསྐྱེད་པའི་རིམ་པ་སྟེ། དེ་ལྟར་ཐབས་དང་ཤེས་རབ་ཚོགས་གཉིས་བསྐྱེད་རྫོགས་ལྷུན་གྱིས་གྲུབ་བོ། །དེའི་དུས་སུ་དམིགས་པ་མེད་པས་ཕྱིན་དྲུག་རྫོགས་པར་ཡང་། ཚངས་པ་ཁྱད་པར་སེམས་ཀྱིས་ཞུས་པའི་མདོ་ལས། མི་འཛིན་པ་ནི་སྦྱིན་པའོ། །མི་བསྲུང་བ་ནི་ཚུལ་ཁྲིམས་སོ། །མི་གནས་པ་ནི་བཟོད་པའོ། །མི་བརྩོན་པ་ནི་བརྩོན་འགྲུས་སོ། །མི་སེམས་པ་ནི་བསམ་གཏན་ནོ། །མི་དམིགས་པ་ནི་ཤེས་རབ་བོ། །ཞེས་སོ། །གཉིས་པ་རང་བཞིན་ངེས་པའི་སྒོམ་ཚུལ། དེ་ཡང་ཐོག་མར་ལྷག་མཐོང་རྟོགས་པའི་ཤེས་རབ་བསྐྱེད་བྱས་ནས། དེའི་རྗེས་སུ་ཞི་གནས་ཀྱིས་ནི་དེ་ཡི་ངང་ལ་གནས་པས་ཟུང་དུ་ཆུད་པར་ཤེས་པར་བྱའོ། །གསུམ་པ་གནས་ལུགས་ངེས་པའི་སྐྱེས་ཚུལ། མཉམ་པར་འཇོག་པའི་དུས་གང་ཚེ་གཟུང་འཛིན་གྱི་དངོས་པོ་དང་དངོས་མེད་དུ་འཛིན་པ་དག བློ་ཡི་མདུན་ནམ་རྣམ་པར་རབ་ཏུ་མི་གནས་པ། དེ་ཡི་ཚེ་དབྱིངས་དང་ཡེ་ཤེས་གཉིས་མེད་པར་ཟུང་དུ་འཇུག་པས་སེམས་དང་སེམས་བྱུང་གི་སྤྲོས་པའི་དམིགས་པ་མེད་པར་རབ་ཏུ་ཞི་བ་ཉིད་དོ། །དོན་གསུམ་པ་བསྒོམས་པས་ཐོབ་པ་ཏིང་ངེ་འཛིན་གྱི་རང་བཞིན་ལ་གསུམ། སེམས་ཉིད་ཡོན་ཏན་གྱི་འཆར་གཞི་མདོར་བསྟན། དེ་ལས་ཤར་བའི་ཡོན་ཏན་དངོས་རྒྱས་པར་བཤད། ཞི་ལྷག་ངེས་པས་དོན་བསྡུ་བའོ། །དང་པོ་ནི། རང་བཞིན་གདོད་ནས་དག་པའི་སེམས་ཉིད་ལ་ཡོན་ཏན་ཡེ་ལྡན་དུ་ཡོད་ཀྱང་། གནས་སྐབས་གློ་བུར་ཀུན་རྟོག་གི་དྲི་མས་བསྒྲིབས་པའི་ཚེ་མི་སྣང་བས། ཞི་ལྷག་ཟུང་འབྲེལ་གྱི་ལམ་བསྒོམས་པས་ཅི་རིགས་སུ་དག་པ་ན། བསམ་གཟུགས་སོགས་སྙོམས་འཇུག་དགུ་དང་རྫུ་འཕྲུལ་དང་མངོན་ཤེས་འགྲུབ། ཏིང་འཛིན་གྱི་རྣམ་པ་གྲངས་མེད་པ་དང་ཚིག་དང་དོན་གྱི་གཟུངས་སོགས་ཡོན་ཏན་གྱི་ཚོགས་དུ་མ་སྤྲིན་ལྷུན་གྱིས་གྲུབ་པ་ཡིན་ནོ། །གཉིས་པ་ལ་གཉིས། སྙོམས་འཇུག་དགུའི་སྒོམ་ཚུལ་དང་། ཏིང་ངེ་འཛིན་གྱི་ཐོབ་ཚུལ་ལོ། །དང་པོ་སྙོམས་དགུའི་སྒོམ་ཚུལ་ལ་གསུམ། དང་པོ་བསམ་གཏན་བཞིའི་སྒོམ་ཚུལ། སྙོམས་འཇུག་དགུ་ནི་སྐབས་འདིར་རང་གི་རྟེན་དལ་འབྱོར་ཐོབ་པས་མི་ལ་སྦྱར་ཏེ། རང་ས་འདོད་པའི་སེམས་གང་རྩེ་གཅིག་པ་སྔར་སྨོས་པའི་བདེ་གསལ་མི་རྟོག་པའི་ཉེར་བསྡོགས་{བལྡོག་འདིའི་རིགས་འདི་ལྟར་ཞུས།} དེ་ལས་དངོས་གཞི་རྟོག་པ་དང་དཔྱོད་པ་དང་བཅས་པའི་ཏིང་ངེ་འཛིན། དགའ་བདེའི་ཡན་ལག་ཅན་གྱི་བསམ་གཏན་དང་པོ་སྐྱེ་སྟེ། དང་པོ་འདོད་སེམས་རྩེ་གཅིག་ཏུ་འཇོག་དུས་བསམ་གཏན་དང་པོའི་ཉེར་བསྡོགས་མི་ལྕོགས་མེད་པ་སྟེ། དེའང་མཉམ་པར་འཇོག་དགོས་སྙམ་དུ་རྟོག་པ་དང་བཅས་ཤིང་། དེ་ཉིད་གང་དུའང་མི་རྟོག་པའི་ངང་དུ་འཇོག་པའི་དྲན་རྩིའི་དཔྱོད་པ་དང་བཅས་པའི་སྦྱོར་བ་ལས་དངོས་གཞི་མི་རྟོག་པའི་ཡེ་ཤེས་སྐྱེའོ། །ཐུན་རྗེས་དང་ཐུན་མཚམས་སུ་རྟོག་དཔྱོད་དང་ལྡན་པའོ། །བསམ་གཏན་གཉིས་པ་ནི། བསམ་གཏན་དང་པོའི་སེམས་ཀྱི་ཉེར་བསྡོགས་དེ་ལས་དངོས་གཞི་རྟོག་པ་མེད་ལ་དཔྱོད་པ་དང་བཅས་པའི་ཏིང་ངེ་འཛིན། སེམས་གསལ་ལ་མི་རྟོག་པ་དགའ་བདེའི་རང་བཞིན་ཅན་གྱི་བསམ་གཏན་གཉིས་པ་སྐྱེ། ཉེར་བསྡོགས་དེ་ལས་དངོས་གཞི་རྟོག་དཔྱོད་གཉིས་ཀ་མེད་པའི་ཏིང་ངེ་འཛིན་དགའ་བདེས་བརླན་པའི་ཡན་ལག་ཅན་བསམ་གཏན་གསུམ་པ་སྐྱེ། ཉེར་བསྡོགས་དེ་ལས་གསུམ་པའི་དགའ་བདེ་དང་བཅས་པའི་དངོས་གཞི་ཁྱད་པར་ཅན་དགའ་བ་སྡུད་པའི་ཏིང་ངེ་འཛིན། བསམ་གཏན་བཞི་པ་ཕན་ཡོན་ཡན་ལག་བཅས་པ་སྐྱེ། ཡུམ་བར་མ་ལས། རྟོག་པ་དང་བཅས་ཤིང་དཔྱོད་པ་དང་བཅས་པ་ནི་བསམ་གཏན་དང་པོའོ། །རྟོག་པ་མེད་ལ་དཔྱོད་པ་ཙམ་དང་བཅས་པ་ནི་བསམ་གཏན་གཉིས་པའོ། །རྟོག་པ་ཡང་མེད་དཔྱོད་པ་ཡང་མེད་པའི་ཡིད་ལ་བྱེད་པ་ནི་བསམ་གཏན་གསུམ་པའོ། །དགའ་བ་སྡུད་པའི་ཡིད་ལ་བྱེད་པ་ནི་བསམ་གཏན་བཞི་པའོ། །ཞེས་སོ། །གཉིས་པ་ལྷག་མ་ལྔའི་སྒོམ་ཚུལ། བསམ་གཏན་གྱི་སེམས་ཐོབ་པའི་རྟེན་དེ་ལས་གཟུགས་མེད་ཀྱི་སེམས་ཁྱད་པར་ཅན་སྐྱེ་བས་ཆོས་ཐམས་ཅད་ནམ་མཁའ་ལྟར་དག་ཅིང་དྭངས་པ་དྲི་མ་མེད་པའི་ངོ་བོ་ཉིད་ཡིད་ལ་བྱེད་པའི་སེམས་ནམ་མཁའ་མཐའ་ཡས་ཀྱི་སྐྱེ་མཆེད་ཐོབ་པར་འགྱུར། རྟེན་དེ་ལས་ཆོས་ཀུན་སེམས་ཙམ་ལ་སེམས་ཉིད་ཐོག་ཐ་སོགས་སྤྲོས་པ་མེད་པའི་རྣམ་ཤེས་ཙམ་སྟོན་པས་རྣམ་ཤེས་མཐའ་ཡས་སྐྱེ་མཆེད་ཐོབ་པར་འགྱུར། རྟེན་དེ་ལས་སྣང་སེམས་གཉིས་ཀ་མི་དམིགས་པས་སྤྲོས་དང་བྲལ་བས་གང་དུའང་མི་མཐོང་བའི་སེམས་ཅི་ཡང་མེད་པའི་སྐྱེ་མཆེད་འགྲུབ་པར་འགྱུར། རྟེན་དེ་ལས་ཡོད་མེད་གང་གིའང་མཐའི་སྤྲོས་ཀུན་བྲལ་བས་སེམས། ཡོད་མིན་མེད་མིན་ཏེ་སྲིད་རྩེའི་སྐྱེ་མཆེད་འགྲུབ་པར་འགྱུར་རྟེན་དེ་ལས་སྣ་ཚོགས་ཉོན་མོངས་ཅན་གྱི་སྤྲོས་པའི་སེམས་མ་ལུས་པ་རང་བཞིན་གྱིས་འགོག་པ་ཞི་བ་ཐོབ་པར་འགྱུར། དབྱེ་ན། བློས་གཞིགས་ཤིང་དཔྱད་ནས་སོ་སོར་བརྟགས་པའི་འགོག་པ་དང་། མ་གཞིགས་པར་ཆོས་ཉིད་ཀྱི་ངང་ལ་འཇོག་པ་སོ་སོར་བརྟགས་མིན་གྱི་འགོག་པ་གཉིས་སོ། །དེའང་བྱང་ཆུབ་སེམས་དཔའི་འགོག་པ་ནི་སྙིང་རྗེས་སེམས་ཅན་རྗེས་སུ་འཛིན་པ་ཡིན་ཡང་། རྣམ་པར་མི་རྟོག་པའི་ཡེ་ཤེས་ཀྱིས་སྙིང་རྗེ་སྐྱེ་བས་སྤྲོས་པ་ཡོད་པ་མིན་ནོ། །སྤྱིར་སྐྱེ་འཕགས་ཀྱི་བསམ་གཏན་ནི་འབྲས་བུ་ཆེའི་སེམས་བར་མཉམ་དུ་ཐོབ་པ་ལས། བྱིས་པ་རྣམས་ཞི་གནས་ཀྱི་བདེ་བ་ལ་ཕྱོགས་ཏེ་ནམ་མཁའ་ལྟ་བུའོ་སྙམ་པ་དེའི་ངང་དུ་བློ་འཇུག་པ་ནུབ་པས། གཟུགས་མེད་ཀྱི་སེམས་ཀྱིས་སྲིད་རྩེར་འཕེན་ལ། འཕགས་པ་རྣམས་ལྷག་མཐོང་གི་ཡེ་ཤེས་ཀྱིས་བདག་མེད་པའི་དོན་རྟོགས་པའི་ཟུང་འབྲེལ་ཁྱད་པར་ཅན་གྱིས། མི་ཆེ་བའི་སེམས་ཐོབ་ནས་འོག་མིན་གྱི་བར་མཐོང་སྒོམ་གྱི་ཡེ་ཤེས་གོང་མ་ཐོབ་ནས་མྱ་ངན་ལས་འདའོ། །འཕགས་པ་དེའི་སེམས་ལ་བསམ་གཟུགས་ཀྱི་ཆའི་ཡོན་ཏན་ཚང་བས་ཏིང་འཛིན་དེ་དག་ལ་འཇུག་གི། སོ་སྐྱེས་ལྟར་ཁམས་དེ་དག་གི་སེམས་རང་མཚན་པ་མེད་དེ་ཐེག་ཆེན་འཕགས་པ་རྣམས་ཁམས་གོང་མར་སྐྱེ་བ་མི་འཛིན་པའི་ཕྱིར་རོ། །གསུམ་པ་མངོན་ཤེས་རྫུ་འཕྲུལ་ཐོབ་ཚུལ། དེ་ལྟར་མཐར་གྱིས་གནས་པའི་ཏིང་ངེ་འཛིན་གྱི་སྙོམས་འཇུག་དགུ་པོ་ཡང་ཡས་མར་གོ་རིམ་བཞིན་རིམ་པར་བསྒོམ་པ་སེངྒེ་རྣམ་བསྒྱིངས་དང་། རིམ་དང་རིམ་མིན་ཐོད་རྒལ་དུ་རྩལ་སྦྱངས་པས་སྔར་མི་ཤེས་པའི་རང་གཞན་གྱི་སྔ་ཕྱིའི་ཚེ་རབས་དེར་བསགས་པའི་ལས་རྣམས་དང་། དགེ་མི་དགེ་སོགས་སེམས་ཀྱི་སྤྱོད་ཡུལ་གང་ཡིན་ཤེས་པ་དང་། གནས་གང་དུ་འཆི་འཕོ་བ་དང་སྐྱེ་བ་དང་། རི་སོགས་སྒྲིབ་པས་ཆོད་ཀྱང་མ་བསྒྲིབས་པར་མཐོང་། དངོས་པོ་རྣམས་གཅིག་དང་དུ་མར་རྫུ་ཞིང་རྣམ་པར་འཕྲུལ་བ་དང་། ཉོན་མོངས་པ་མེད་ཅིང་ཇི་སྙེད་པའི་ཆོས་ཀུན་ཇི་ལྟ་བ་བཞིན་དུ་ཤེས་པ་དང་། ཞིང་རྣམ་བདེ་གཤེགས་སྲས་བཅས་ཀྱིས་གང་བ་མཐོང་བ་དང་། གཉིས་པ་ཏིང་ངེ་འཛིན་གྱི་ཐོབ་ཚུལ། དེ་ཚེ་དག་མ་དག་གི་སྣང་བ་སྒྱུ་མར་རབ་ཏུ་རྟོགས་པས། སྒྱུ་མ་ལྟ་བུའི་ཏིང་ངེ་འཛིན་ཉིད་དང་ནི། སེམས་ཉོན་མོངས་ཀྱི་གདུང་བ་དང་བྲལ་བས་རྙོག་པ་རབ་ཏུ་ཞིའི་ཕྱིར། ཟླ་བ་དྲི་མ་མེད་པའི་ཏིང་ངེ་འཛིན་དང་། ཆོས་ཀུན་མི་དམིགས་མཉམ་པའི་ངང་དུ་རོ་གཅིག་པར་རྟོགས་པས། ནམ་མཁའ་ལྟར་གོས་པ་མེད་པའི་ཏིང་ངེ་འཛིན་སོགས། བློ་རྫས་གཅིག་ལ་ཆའི་ཡོན་ཏན་ཇེ་མང་དུ་གོང་དུ་འཕེལ་བས་བརྒྱ་སྟོང་གྲངས་མེད་པ་རབ་ཏུ་འགྲུབ་པར་འགྱུར། གསུམ་པ་ཞི་ལྷག་ངེས་པའི་དོན་བསྡུ་བ། དོན་གསུམ་པ་ས་དང་ལམ་གྱི་ཡོན་ཏན་ལ་དྲུག་ལས། དེའང་སོ་སོར་རྟོག་པའི་ལྷག་མཐོང་གིས་ནི་ཆོས་རབ་ཏུ་རྟོགས་པའི་དོན་རྣམས། ཞི་གནས་དམ་པས་རྩེ་གཅིག་ཏུ་རྒྱུད་ལ་གཟུང་བའི་ཕྱིར་ལྷག་མཐོང་ནི་གཟུངས་དང་ཞི་གནས་ནི་ཏིང་འཛིན། དེ་གཉིས་ཟུང་འབྲེལ་དུ་ལྷུན་གྱིས་གྲུབ་པ་ཡིན་ནོ། །དང་པོ་ཚོགས་ལམ་ལ་གསུམ། དང་པོ་ཆུང་ངུ་། བྱེ་བྲག་ལམ་གྱི་དབྱེ་བ་སངས་རྒྱས་རྣམས་ལམ་ལྔའི་རིམ་པ་བགྲོད་ལས་གྲོལ་བ་སྟེ། དེའང་ཚོགས་ལམ་གྱི་རྒྱུ་ཐེག་ཆེན་སེམས་བསྐྱེད་གསར་དུ་སྐྱེ་བའི་རྟེན་རིགས་སད་པ། འབྲས་བུ་ནི་ལམ་ཕྱི་མ་བཞི། ངེས་ཚིག་ཐོས་བསམ་དང་བསོད་ནམས་ཀྱི་ཚོགས་གཙོ་བོར་གྱུར་པས་སོ། །དབྱེ་ན་ཆུང་འབྲིང་ཆེ་གསུམ་ཏེ་ཆུང་ངུར་ལུས་ཚོར་སེམས་དང་ཆོས། དྲན་པ་ཉེ་བར་བཞག་པ་བཞི་བསྒོམ་ཞིང་འདིའི་སྐབས་སུ་སྦྱོར་ལམ་སྐྱེ་བའི་དུས་མ་ངེས་པའོ། །འབྲིང་པོར་ཡང་དག་སྤོང་བ་བཞི། སྦྱོར་ལམ་ཚེ་ཕྱི་མར་སྐྱེ་ངེས་པ། ཆེན་པོར་རྫུ་འཕྲུལ་གྱི་རྐང་པ་བཞི། སྦྱོར་ལམ་ཚེ་འདིར་སྐྱེ་ངེས་པའོ། །ལམ་འདི་ཡི་གཉེན་པོའི་ཁྱད་པར་འདུ་བྱེད་ལ་ཉེས་དམིགས་སུ་ལྟ་བས་སུན་འབྱིན་པ། སྤངས་པ་ནི་ཟག་བཅས་ལ་སྐྱོན་དུ་མཐོང་བས་མངོན་ཞེན་མངོན་གྱུར་པའི་ངོ་སྐལ་དུ་གྱུར་ཚད། རྟོགས་པ་ནི་བདག་མེད་གཉིས་ཐོས་བསམ་གྱིས་དོན་སྤྱིའི་ཚུལ་དུ་རྟོགས་པ་ཤས་ཆེ། སྒོམ་བྱུང་གི་རྟོགས་པའང་ཡོད། ཡོན་ཏན་སྤྱན་དང་མངོན་ཤེས་སོགས་ཅི་རིགས་ཡོད། བསྒོམ་པའི་ཁྱད་པར་ཆོས་ཀྱི་སྡོམ་བཞི་དང་། དད་སོགས་ལྔ་དབང་པོའི་ངོ་བོར་མ་སྐྱེས་པའི་ཐར་ཆ་ལྔ་དང་། སྐྱེས་བུ་ཆེན་པོའི་རྣམ་རྟོག་བརྒྱད་དང་། མི་སྡུག་པ་སོགས་དུག་གསུམ་གྱི་གཉེན་པོར་གྱུར་པ་རྣམས་སོ། །ཚོགས་ལམ་ཆུང་ངུར་ལུས་ཚོར་སེམས་དང་ཆོས། དྲན་པ་ཉེ་བར་བཞག་པ་དོན་དམ་རང་བཞིན་མེད་པ་དང་ཀུན་རྫོབ་ཏུ་མི་གཙང་བ་སོགས་བཞི་བསྒོམ་ཞིང་། གཉིས་པ་འབྲིང་། འབྲིང་དུ་འདུན་དང་འབད་རྩོལ་བརྩོན་འགྲུས་བཞིས། དགེ་བ་མ་སྐྱེས་པ་བསྐྱེད་པ་དང་སྐྱེས་པ་སྤེལ་བ་མི་དགེ་མི་སྐྱེད་སྐྱེས་སྤང་གི་ཞེན་བཞི་ཡང་དག་སྤོང། གསུམ་པ་ཆེན་པོར། ཆེན་པོར་འདུན་སེམས་དཔྱོད་དང་དྲན་པ་བཞིས། རྫུ་འཕྲུལ་རྟེན་འགྲུབ་རྐང་པ་བཞི་པོ་བསྒོམ་གཞན་ཡང་བྱང་ཆུབ་ལ་དམིགས་པའི་ཚུལ་ཁྲིམས་དང་། དབང་པོའི་སྒོ་བསྡམས་པ་དང་ཟས་ཀྱི་ཚོད་རིག་པ་སོགས་ཚོགས་ལམ་གྱི་རྣལ་འབྱོར་བདུན་ཀྱང་ངོ་། །གཉིས་པ་སྦྱོར་ལམ། སྦྱོར་ལམ་གྱི་རྟེན་ནི་ཚོགས་ལམ་ཆེན་པོ་གང་ལ་སྐྱེས་པ་སྟེ། བྱེ་བྲག་བསམ་གཏན་ས་དྲུག རྒྱུ་ཚོགས་ལམ་མཐར་ཐུག ངོ་བོ་ནི་སྒོམ་བྱུང་འཇིག་རྟེན་པའི་ཡེ་ཤེས། དབྱེ་ན་དྲོད་རྩེ་བཟོད་མཆོག་བཞི། དང་པོ་གཉིས་སུ་དབང་པོ་ལྔ། ཕྱི་མ་གཉིས་སུ་སྟོབས་ལྔ། གཉེན་པོའི་ཁྱད་པར་མགོ་གནོན་གྱིས་སྤོང་། སྤངས་པའི་ཁྱད་པར་སྒྲིབ་པའི་ས་བོན་དང་མངོན་གྱུར་ཉམས་སྨད། རྟོགས་པའི་ཁྱད་པར་འཇིག་རྟེན་པའི་སྒོམ་བྱུང་གི་ཡེ་ཤེས་ཀྱིས་བདག་མེད་གཉིས་དོན་སྤྱིའི་ཚུལ་གྱིས་རྟོགས། ཡོན་ཏན་གྱི་འཕགས་ཆོས་གཟུངས་དང་མངོན་ཤེས་སོགས་དུ་མ་ཡོད། ཚོགས་ལམ་ཆེན་པོ་དང་འདི་གཉིས་སྒོམ་བྱུང་དུ་ཁྱད་མེད་ཀྱང་རྣམ་པར་མི་རྟོག་པའི་ཡེ་ཤེས་ཅུང་ཟད་གསལ་བས་མཐོང་ལམ་ལ་ཉེ་རིང་གི་ཁྱད་ཡོད་དོ། །སྦྱོར་ལམ་བཞི་སྟེ་དྲོད་སྣང་བ་ཐོབ་པའི་ཡེ་ཤེས་དང་རྩེ་མོ་རུ་སྣང་བ་མཆེད་པའི་ཡེ་ཤེས་སུ། དད་བརྩོན་དྲན་དང་ཏིང་འཛིན་ཤེས་རབ་ཀྱིས། རྣམ་བྱང་ལ་དབང་བྱེད་པས་དབང་པོ་ལྔ་དང་བཟོད་པ་དེ་ཁོ་ན་ཉིད་ཕྱོགས་གཅིིག་ལ་ཞུགས་པའི་ཡེ་ཤེས། ཆོས་མཆོག་དེ་མ་ཐག་པའི་ཡེ་ཤེས་སུ། དད་སོགས་མི་མཐུན་པའི་གཡོ་བས་མི་བརྩི་བའི་སྟོབས་ལྔ་པོ་རབ་ཏུ་སྒོམ་པར་བྱེད་དོ། །གསུམ་པ་མཐོང་ལམ། མཐོང་ལམ་སྐྱེ་བའི་རྟེན་ཆོས་མཆོག་ཆེན་པོ་དང་གཅིག་པས་འགྲོ་དྲུག་གང་རུང་། བསམ་པའི་རྟེན་བསམ་གཏན་བཞི་པ། རྒྱུ་ཆོས་མཆོག་མཐར་ཐུག་དངོས་རྒྱུ་དང་གཞན་བརྒྱུད་རྒྱུ། འབྲས་བུ་ཕྱི་མ་གཉིས། ངོ་བོ་བདེན་བཞིའི་དབྱེ་བས་ཁམས་ཀྱི་དྲི་མ་སྤོང་བ་ལ་ལྟོས་ན་ཡེ་ཤེས་སྐད་ཅིག་བཅུ་དྲུག་སྟེ། དེ་ཡང་བདེན་པ་བཞི་རེ་རེ་བཞིན། ཆོས་བཟོད། ཆོས་ཤེས། རྗེས་བཟོད། རྗེས་ཤེས་བཞི་བཞི་བཅུ་དྲུག སྤང་བྱའི་དྲི་མ། འཇིག་མཐར་ལོག་གསུམ་མཆོག་འཛིན་གཉིས་ཏེ་ལྟ་བ་ལྔ། ཆགས་ཁྲོ་ང་རྒྱལ་མ་རིག་ཐེ་ཚོམ་སྟེ་ལྟ་མིན་ལྔ་བཅས་བཅུ་པོ་འདོད་ཁམས་སུ་བདེན་བཞི་རེ་རེ་ལ་བཅུ་ཆར་ལོག་པར་ཞུགས་པས་བཞི་བཅུ། ཁམས་གོང་མ་གཉིས་སུ་ཁོང་ཁྲོ་མ་གཏོགས་དགུ་དགུ་སྟེ་བདུན་ཅུ་རྩ་གཉིས་བཅས་མཐོང་སྤང་བརྒྱ་དང་བཅུ་གཉིས་སོ། །ལོག་པར་འཇུག་ཚུལ། འཇིག་ལྟས་ཡུལ་བདེན་བཞི་ལ་དམིགས་ནས་བདག་དང་བདག་གིར་འཛིན། མཐར་འཛིན་གྱིས་རྟག་ཆད་དུ་འཛིན། ལོག་ལྟས་མེད་པར་འཛིན། མ་རིག་པས་མི་ཤེས་བཞིན་དུ་འཇུག ཐེ་ཚོམ་གྱིས་ཐེ་ཚོམ་ཟ་བཞིན་འཇུག་པས་དངོས་སུ་ལོག་ཞུགས་སོ། །དེ་ལྔ་ལ་འདོད་ཆགས་ཀྱིས་ཞེན་ཅིང་ཆགས། ང་རྒྱལ་གྱིས་རློམ་ཞིང་ཁེངས། ལྟ་བ་མཆོག་འཛིན་གྱིས་དམ་པར་འཛིན། ཚུལ་བརྟུལ་གྱིས་དག་གྲོལ་གྱི་ལམ་དུ་འཛིན། ཁོང་ཁྲོས་དེ་དང་མི་མཐུན་པ་ལ་ཁྲོ་བའི་སེམས་སུ་བྱེད་དེ་ཕྱི་མ་ལྔ་ལོག་པ་ལ་ལོག་ཞུགས་སོ། །མནར་སེམས་དགུ་ནི། བདག་ལ་དགྲས་སྔར་གནོད་པ་བྱས། ད་ལྟ་མ་འོངས་པ་ན་བྱེད་པའི་འགྱུར་སྙམ་པ་གསུམ། དེ་བཞིན་གཉེན་ལ་གསུམ། བདག་གི་དགྲ་ལ་ཕན་བཏགས་སོ། །འདོགས་སོ། །གདགས་པར་འགྱུར་སྙམ་པ་གསུམ་སྟེ་དགུའོ། །གཉེན་པོ་ནི། ཁམས་གསུམ་ཀའི་མཐོང་སྤང་དྲིལ་ནས་སྤོང་བས། སྡུག་ཀུན་འགོག་ལམ་གྱི་ཆོས་བཟོད་བཞི་བློ་རྫས་གཅིག་ལ་ལྡོག་པ་ཐ་དད་པས་སྐད་ཅིག་གཅིག་ལ་སྐྱེ་དུས་མཐོང་སྤང་ས་བོན་རྩ་བ་ནས་སྤང་བའི་གཉེན་པོ་བར་ཆད་མེད་ལམ་ཡིན་པས་མཐོང་སྤང་བརྒྱ་བཅུ་གཉིས་པ་སྐད་ཅིག་ལ་སྤངས། དེའང་བདེན་བཞི་སོ་སོའི་ཆོས་བཟོད་ཀྱི་ཉེ་རྒྱུ་དང་དེའི་ངོ་སྐལ་གྱི་སྤང་བྱ་ནུས་ལྡན་གཉིས་འཕྲད། དུས་གཉིས་པ་ལ་དངོས་རྒྱུ་དང་སྤང་བྱ་ནུས་མེད་གཉིས་འཕྲད། དུས་གསུམ་པ་ལ་ཆོས་བཟོད་བཞི་སྐྱེ་བ་དང་། དེའི་ངོ་སྐལ་གྱི་ས་བོན་ཕྲ་མོ་མཐའ་དག་འགགས་པ་དུས་མཉམ། དེ་ནས་ཆོས་ཤེས་བཞི་བློ་རྫས་གཅིག་པས་ཁམས་གསུམ་གྱི་སྤང་བྱ་ལས་གྲོལ། གཉེན་པོ་རྣམ་གྲོལ་གྱི་ལམ། དེ་བཞིན་དུ་རྗེས་བཟོད་བཞི་དང་། རྗེས་ཤེས་བཞི་ནི་ཐག་བསྲིང་གི་གཉེན་པོ་ཁྱད་པར་གྱི་ལམ་མོ། །སྤང་བ་དེ་དག་ཀྱང་སྒྲིབ་པ་གཉིས་ཡིན་ཏེ། སེམས་རབ་ཏུ་མ་ཞི་བར་བྱེད་པ་སེར་སྣ་སོགས་ཉོན་སྒྲིབ། འཁོར་གསུམ་བདེན་ཞེན་གཟུང་འཛིན་གྱི་རྟོག་པའི་ཡུལ་ཡུལ་ཅན་ཤེས་སྒྲིབ་དེའང་ཉོན་སྒྲིབ་ཀུན་བརྟགས་མཐོང་སྤང་། ལྷན་སྐྱེས་སྒོམ་སྤང་། ཤེས་སྒྲིབ་གཟུང་འཛིན་གྱི་རྟོག་པར་རགས་པ་མཐོང་སྤང་། ཕྲ་བ་སྒོམ་སྤང་ངོ་། །རྟོགས་པའི་ཁྱད་པར་འཇིག་རྟེན་ལས་འདས་པའི་ཤེས་རབ་ཀྱིས་བདག་མེད་གཉིས་མངོན་སུམ་དུ་མཐོང་བའི་ལམ་སྟེ་ས་དང་པོ་རབ་ཏུ་དགའ་བའི་སར། ཡོན་ཏན་གྱི་ཁྱད་པར་བརྒྱ་ཕྲག་བཅུ་གཉིས་སོགས། དུས་ཀྱི་ཁྱད་པར་བྱ་རྫོགས་ཀྱི་སྐད་ཅིག་བཞི་ལ་ངོ་བོ་རིག་བཞི་ལྡོག་པ་བཅུ་དྲུག་ཏུ་སྐྱེ། དེའི་ཚེ་བསྒོམ་པ་ནི་དད་པ་དང་བརྩོན་འགྲུས་དང་དྲན་པ་དང་ཏིང་ངེ་འཛིན་དང་ཤེས་རབ་དང་དགའ་བ་དང་། ཤིན་ཏུ་སྦྱངས་པ་མཐོང་སྤང་དང་བྲལ་བས་ཡང་དག་མཐོང་ལམ་བྱང་ཆུབ་ཀྱི། ཡན་ལག་ཡིན་པས་བདུན་པོ་དག་ནི་ལེགས་བསྒོམ་ཞིང་། བཞི་པ་སྒོམ་ལམ། དེ་ནས་མཐོང་ཟིན་གོང་ནས་གོང་དུ་གོམས་པར་བྱེད་པས་སྒོམ་ལམ། དབྱེ་ན་ཆུང་འབྲིང་ཆེན་པོ་རེ་རེ་ཞིང་། ཆུང་ངུའི་ཆུང་ངུ་ཆུང་ངུའི་འབྲིང་དང་ནི། །ཆུང་ངུའི་ཆེ་སོགས་ས་དགུ་རིམ་པ་བཞིན་ཏེ། དེ་ཡང་ཆུང་ངུའི་ཆུང་འབྲིང་ཆེ་གསུམ་ནི། ས་གཉིས་པ་དྲི་མ་མེད་པ་དང་། གསུམ་པ་འོད་བྱེད། བཞི་པ་འོད་འཕྲོ་ཅན་གསུམ། འབྲིང་གི་ཆུང་འབྲིིང་ཆེ་གསུམ། ལྔ་པ་སྦྱང་དཀའ་བ། དྲུག་པ་མངོན་དུ་གྱུར་པ། བདུན་པ་རིང་དུ་སོང་བ་གསུམ། ཆེན་པོའི་ཆུང་འབྲིང་ཆེ་གསུམ། བརྒྱད་པ་མི་གཡོ་བ། དགུ་པ་ལེགས་པའི་བློ་གྲོས། བཅུ་པ་ཆོས་ཀྱི་སྤྲིན་ནོ། །དེའི་ངོ་སྐལ་གྱི་སྒོམ་སྤང་ཡང་། ཆེ་འབྲིང་ཆུང་གསུམ་ལ། ཆེན་པོའི་ཆེན་པོ་དང་། ཆེན་པོའི་འབྲིང་སོགས་གསུམ་གསུམ་དུ་དབྱེ་བའི་དགུའོ། །སྤོང་ཚུལ་སྒོམ་ལམ་ཆུང་ངུའི་ཆུང་ངུ་ས་གཉིས་པས་སྒོམ་སྤང་ཆེན་པོ་སྤོང་བ་ནས་མཐར་སྒོམ་སྤང་ཆུང་ངུའི་ཆུང་ངུ་ས་བཅུ་པས་སྤོང་བ་ཡིན་ནོ། །དེ་ལྟ་བུའི་སྒོམ་ལམ་སྐྱེ་བའི་རྟེན་ནི་མཐོང་ལམ་དང་གཅིག་སྟེ། གླིང་གསུམ་གྱི་སྐྱེས་པ་བུད་མེད་དང་། འདོད་གཟུགས་ཀྱི་ལྷ་ལ་སྐྱེ་བ་ཤས་ཆེ་བ། གཞན་ལའང་སྐྱེ་སྲིད། གནས་པའི་རྟེན་ནི་ཐམས་ཅད་ལ་རུང་། སེམས་ཀྱི་རྟེན་ནི་བསམ་གཏན་བཞི་པ་ལ་བརྟེན་པ་ཤས་ཆེ་གཞན་ལའང་རུང་བར་འཆད། རྒྱུ་ནི་ལམ་དང་པོ་གསུམ། འབྲས་བུ་ནི་མི་སློབ་པའི་ལམ་མོ། །ངོ་བོ་ནི་ས་དགུའི་རང་རང་གི་དྲི་མ་སྤོང་བའི་གཉེན་པོ་ལ་ལྟོས་ནས། སྦྱོར་བ་དང་། བར་ཆད་མེད་ལམ། རྣམ་གྲོལ་གྱི་ལམ། ཁྱད་པར་གྱི་ལམ་སྟེ་བཞིའོ། །དེ་དག་ཀྱང་ས་རང་རང་གི་སྒྲིབ་པ་སྤོང་བ་ལ་སྦྱོར་བ་སྟེ་རང་སའི་ཡེ་ཤེས་སྐྱེ་བའི་སྔ་ལོགས་སུ་སྒྲིབ་པ་མངོན་གྱུར་གྱི་ཉོན་མོངས་མགོ་ག ནོན་གྱིས་སྤོང་། དངོས་གཞིའི་ཡེ་ཤེས་སྐྱེ་བཞིན་པ་བར་ཆད་མེད་ལམ་དེས་རང་སྐལ་འཆལ་ཚུལ་སོགས་ཀྱི་ས་བོན་རྩ་བ་ནས་སྤོང་བས་འདི་གཉིས་ནི་སྤོང་བའི་གཉེན་པོའོ། །སྐད་ཅིག་གཉིས་པ་ནས་སའི་དངོས་གཞི་རྣམ་གྲོལ་གྱི་ལམ་ནི་རྟེན་གྱི་གཉེན་པོའོ། །སའི་མཇུག་གི་ཁྱད་པར་གྱི་ལམ་ནི་ཐག་བསྲིང་གི་གཉེན་པོའོ། །ས་དེའི་སྐད་ཅིག་དང་པོ་ནས་རྫོགས་ཀྱི་བར་རང་རང་གི་དྲི་མ་ཐམས་ཅད་ཚུལ་དེས་སྤོང་ཞིང་། དྲི་མ་ཡོངས་རྫོགས་ས་དེ་འགགས་པ་དང་མཉམ་པ་སྤོང་བའོ། །ཡོན་ཏན་ནི། སྟོང་ཕྲག་བཅུ་གཉིས་སོགས། སྤང་བྱའི་དྲི་མ་ནི། ལྷན་སྐྱེས་ཀྱི་དྲི་མ་དྲུག་སྟེ། འདོད་ཆགས། ཁོང་ཁྲོ། ང་རྒྱལ། མ་རིག་པ། འཇིག་ལྟ། མཐར་ལྟའོ། །དེ་དག་ཁམས་ཀྱི་དབྱེ་བས་འདོད་པ་ན་དྲུག གཟུགས་ཁམས་ན་ཁོང་ཁྲོ་མ་གཏོག་ལྔ་ལྔ་སྟེ་བཅུ་དྲུག་གོ །སའི་སྒོ་ནས་དབྱེ་ན་འདོད་པ་ན་དྲུག བསམ་གཟུགས་བརྒྱད་ན་ལྔ་ལྔ་བགྲངས་པས་ཞེ་དྲུག་གོ །དེ་དག་ཀྱང་ཆེ་འབྲིང་གིས་དབྱེ་ན། འདོད་པར་དྲུག་ལ་དགུ་དགུར་ཕྱེ་བས་ལྔ་བཅུ་རྩ་བཞི། ཁམས་གོང་མ་གཉིས་ན་ཁོང་ཁྲོ་བོར་བའི་ལྷག་ལྔ་ལ་དགུ་དགུར་ཕྱེ་བས་བཞི་བཅུ་རྩ་ལྔ་སྟེ། དེ་ལྟར་ཚན་བརྒྱད་ལ་སུམ་བརྒྱ་དྲུག་ཅུ་དེ་དང་འདོད་པའི་རེ་བཞི་བསྡོམས་པས། བསྒོམ་སྤང་བཞི་བརྒྱ་དང་བཅུ་བཞིའོ། །སྤོང་ཚུལ་གོང་སྨོས་སྦྱོར་བས་མགོ་སྨད། བར་ཆད་མེད་པས་དངོས་སུ་སྤངས། རྣམ་གྲོལ་གྱིས་རྟེན་གཉེན་པོ་བྱས། ཁྱད་པར་གྱི་ལམ་གྱིས་ཐག་བསྲིང་གི་གཉེན་པོ་བྱེད་ཚུལ་གྱིས་ས་དགུ་པོ་རྣམས་སུ་མངོན་གྱུར་དང་། ས་བོན་རྣམས་སྤང་བ་ཡིན་ནོ། ས་དགུ་པོ་དེ་དག་རྣམས་སུ། ཡང་དག་པའི་ལྟ་བ་དང་རྟོག་པ་དང་ངག་དང་ལས་ཀྱི་མཐའ་དང་། འཚོ་བ་དང་རྩོལ་བ་དང་དྲན་པ་དང་ཏིང་འཛིན་ཏེ་འཕགས་པའི་ལམ་བརྒྱད་བསྒོམ། ས་འདི་དག་རང་རང་གི་ངོ་བོ་ལ་ལྟོས་ན་དམིགས་བསམ་ལས་འདས་ཀྱང་། ཁམས་ཀྱི་སྒྲིབ་པ་རྣམས་རིམ་པར་བསལ་ཚུལ་ལ་ལྟོས་ཏེ་ཐ་དད་དུ་བཞག་གོ །དྲི་མ་སོ་སོ་བ་རྣམས་དག་པ་མཐར་ཐུག་ཏུ་གདོད་མའི་དབྱིངས་སམ་འོད་གསལ་བའི་སངས་རྒྱས་རང་གསལ་དུ་མཐོང་བས་ཚེས་ཀྱིས་དབང་གིས་ཟླ་བ་ལྟར་སྣང་བ་ཡིན་ནོ། །ལྔ་པ་མི་སློབ་པའི་ལམ། དེ་ལྟར་བྱང་ཆུབ་ཕྱོགས་ཆོས་སུམ་བཅུ་བདུན་པོ། ཚོགས་སྦྱོར་མཐོང་སྒོམ་སྟེ་སློབ་པའི་ལམ་བཞི་རིམ་པ་བཞིན་བསྒོམ་པའི་འཇུག་ཐོགས་སུ། མི་སློབ་པའི་ལམ་ནི། སློབ་ལམ་གྱིས་བསྡུས་པའི་བྱང་ཕྱོགས་ཀྱི་ཆོས་རྣམས་ཡོངས་སུ་རྫོགས་པའི་མཐར་མི་སློབ་པའི་བྱང་ཆུབ་མངོན་དུ་བྱེད་པ་སྟེ། ལུས་ཀྱི་རྟེན་ཐེག་པ་ཐུན་མོང་བ་ལྟར་ན་འཛམ་གླིང་གི་རྒྱལ་རིགས་སམ་བྲམ་ཟེ་གང་རུང་། ཐེག་ཆེན་ལྟར་ན་ལོངས་སྐུ་འོག་མིན་དུ་ཐོབ་པས་དེའི་རྟེན་མདོར་ན་བྱང་སེམས་ས་བཅུ་པ་དེའི་རྟེན་གང་ཡིན་པའོ། །བསམ་པའི་རྟེན་བསམ་གཏན་{ རྟན}བཞི་པ། རྒྱུ་ནི་ཐེག་ཆེན་སློབ་ལམ་བཞི། འབྲས་བུ་ནི་ཕྲིན་ལས་ཆེན་པོས་འགྲོ་བ་མཐའ་དག་བྱང་ཆུབ་ལ་འགོད་པ། ངོ་བོ་ནི་སངས་རྒྱས་ཀྱི་སའི་སྐུ་གསུང་ཐུགས་ཡོན་ཏན་ཕྲིན་ལས་ཏེ་མི་ཟད་རྒྱན་འཁོར་ལྔ། སྤངས་པ་ནི། སྒྲིབ་གཉིས་བག་ཆགས་དང་བཅས་པ་སྤངས་པ། རྟོགས་པ་ནི་ཆོས་སྐུ་ཡོངས་རྫོགས་མངོན་སུམ་དུ་རྟོགས་པ། ཡོན་ཏན་ནི་འཇིག་རྟེན་ལས་འདས་པའི་ཡོན་ཏན་མཐའ་ཡས་པ་ཐམས་ཅད་རྫོགས་པར་མཐར་ཕྱིན་མི་སློབ་པ་སྟེ་སངས་རྒྱས་ས་ཀྱི་ལ་མི་གནས་པའི་མྱ་ངན་ལས་འདའ་བར་འགྱུར་རོ། །དྲུག་པ་ས་ལམ་བགྲོད་པའི་ངེས་བཟུང་། ས་ལམ་གྱི་དགོས་པ། དེ་ལྟར་ས་དང་ལམ་རྣམས་ཡོངས་སུ་རྫོག་པར་མ་བགྲོད་པའི། བླ་ན་མེད་པའི་སངས་རྒྱས་དེ་འདྲ་དུས་ནམ་ཡང་འབྱུང་བ་མེད་དོ། དུས་ཀྱི་ཡུན་བསྐལ་པ་མང་པོའམ་མི་ཚེ་བཅུ་དྲུག་སོགས་ཚེ་རབས་དུ་མའམ་ད་ལྟའི་ཚེ་གང་སྟེ་ཚེ་གཅིག་གི་སངས་རྒྱས་ཏེ་གྲོལ་བ་ཐོབ་ཀྱང་རུང་། དེ་དག་ཀུན་ཀྱང་ས་དང་ལམ་འདིར་བརྟེན་ནས་བགྲོད་དགོས་ཏེ་སྒྲིབ་པ་དག་ཅིང་ཡོན་ཏན་རྫོགས་པར་ཐོབ་དགོས་པས་ན། རྒྱུ་འབྲས་ཐེག་པ་གང་ལ་ཞུགས་ཀྱང་རུང་སྐལ་བཟང་རྣམས་ཀྱིས་ས་དང་ལམ་གྱི་ཁྱད་པར་རྣམས་མཁྱེན་ནས་ཡང་དག་པར་བགྲོད་པར་མཛོད་ཅིག གསུམ་པ་ལེའུ་རྫོགས་པ་འཇུག་གི་དོན་ལ་གཉིས། དང་པོ་སྐབས་ཀྱི་དགེ་བ་བསྔོ་བ། དེ་ལྟར་ཡང་དག་པའི་ལམ་ཟབ་ཞི་འོད་གསལ་སྙིང་པོ་ཅན་གྱི་ཆོས་ཆར་ལེགས་པར་ཕབ་པའི་དགེ་བ་ཡིས་མཐའ་ཡས་པའི་འགྲོ་བ་ཀུན་གྱི་སེམས་ཀྱི་རྙོག་པ་ཉོན་མོངས་པའི་ཚོགས་རྣམས་རབ་ཏུ་ཞི་ནས་ཐོག་མ་མེད་པའི་སྲིད་འདིར་དུས་ཡུན་རིང་དུ་ཀུན་རྟོག་གི་སྤྲོས་ལ་འཆེལ་བ་ཡིས། དུབ་པའི་སེམས་ཉིད་འདི་རང་བཞིན་གྱིས་དག་པའི་ཆོས་སྐུ་བདེ་བ་ཆེན་པོའི་དགོན་པར་དེ་རིང་ངལ་སོས་ཤིག་སྟེ་སོས་པར་གྱུར་ཅིག གཉིས་པ་ལེའུའི་མཚན། རྫོགས་པ་ཆེན་པོ་སེམས་ཉིད་ངལ་གསོ་ལས། ལམ་བསམ་གཏན་དྲི་མ་མེད་པ་ཞི་ལྷག་ཟུང་དུ་འབྲེལ་བའི་ལེའུ་སྟེ་བཅུ་གཅིག་པའོ།། །། ༈ བཅུ་གཉིས་པ་སྒྲུབ་ཚུལ་ཐབས་ལ་མཁས་པའི་ལེའུ་ལ་གསུམ་སྟེ། ལེའུ་ལ་འཇུག་པ་རྒྱུའི་དོན། ལེའུ་དངོས་ཀྱི་དོན། ལེའུ་རྫོགས་པ་མཇུག་གི་དོན་ནོ། །དང་པོ་ནི། གོང་དུ་བཤད་མ་ཐག་པ་དེ་ལྟར་ཞི་ལྷག་ཟུང་འཇུག་བསམ་བཏན་འགྲུབ་པའི་རྒྱུ་ནི། ལམ་གྱི་ངོ་བོ་ཡང་དག་པའི་ཏིང་འཛིན་མི་གཡོ་བ་དེ་ཡང་སྦྱོར་བ་ཡན་ལག་གསུམ་གྱིས་འགྲུབ་པས་དེ་ལ་བསླབ་པར་བྱ་དགོས་ཏེ། གཉིས་པ་ལེའུ་དངོས་ཀྱི་དོན་ལ་གཉིས། སྒྲུབ་ཚུལ་གསུམ་གྱི་ངོ་བོ་མདོར་བསྟན་པ་དང་། དབྱེ་བ་རྒྱས་པར་བཤད་པའོ། །དང་པོ་ནི། གསུམ་གང་ཞེ་ན། གང་ཟག་གང་གིས་བསྒྲུབ་པ་ཆོ་གའི་ཡན་ལག་དང་། ཚུལ་ཇི་ལྟ་བུས། ཇི་ལྟར་བསྒྲུབ་པ་ཐབས་ཀྱི་ཡན་ལག་དང་། གཉིས་མེད་བསྒྲུབ་པ་ངོ་བོའི་ཡན་ལག་གོ །གཉིས་པ་རྒྱས་པར་བཤད་པ་ལ་གསུམ། གང་གིས་སྒྲུབ་པའི་གང་ཟག ཇི་ལྟར་གྲུབ་པའི་ཐབས། གང་སྒྲུབ་པའི་ངོ་བོ་བསྟན་པའོ། །དང་པོ་གང་གིས་སྒྲུབ་པའི་གང་ཟག་ལ་ལྔ། དང་པོ་བསྲིང་བ་གཉིས་ལྡན་གྱིས་འགྲུབ་པ། གང་གིས་བསྒྲུབ་པའི་གང་ཟག་གམ་སྐྱེ་བོ་སྲིད་ལས་ངེས་པར་འབྱུང་བའི་བློ་ཅན་གྱིས། ལུས་ནི་འདུ་འཛིའི་གྲོང་ལས་དབེན་པར་རྒྱང་བསྲིངས་ཤིང་། སེམས་ནི་རྣམ་རྟོག་གི་སྤྲོས་པའི་ཚོགས་ལས་རིང་དུ་བསྲིང་དགོས་ཏེ། ཏིང་འཛིན་རྒྱལ་པོ་ལས། གང་དག་ཁྱིམ་གྱི་ནང་ན་འདུག་བཞིན་དུ། །བྱང་ཆུབ་དམ་པ་ཡོངས་དག་རྙེད་པ་ནི། །དེ་འདྲའི་སངས་རྒྱས་སྔོན་ཆད་མ་བྱུང་ཞིང་། །ད་ལྟ་མི་གནས་མ་འོངས་པ་ན་མེད། །ཅེ་གསུངས། དེས་ན་ལུས་སེམས་རབ་ཏུ་དབེན་ཞིང་། ཞི་གནས་ཀྱི་བརླན་དང་ལྡན་པ་དེ་ཡིས་ཏིང་འཛིན་མཆོག་འདི་ནི་མྱུར་དུ་འགྲུབ། གཉིས་པ་རང་རྒྱུད་དག་པས་འགྲུབ་པ། དད་པ་དང་ལྡན་ན་ཆོས་ལ་འཇུག་ཅིང་གོང་དུ་འཕེལ་བའི་ཕྱིར་དང་། ངོ་ཚ་ཤེས་ཤིང་ཁྲེལ་ཡོད་ན་བསྒོམ་ལ་སྤྲོ་བ་དང་མི་འདོར་བས་རྣལ་འབྱོར་དུ་བྱེད་ལ། བག་ཡོད་པས་རྣམ་གཡེངས་ལས་སེམས་བསྲུང་བ་དང་། དེ་བཞིན་ཚུལ་ཁྲིམས་དག་ཅིང་དགེ་ལ་སྤྲོ་བ་དང་། མང་དུ་ཐོས་པ་དང་འདོད་པ་ཆུང་ཞིང་ཆོག་ཤེས་དང་ལྡན་ན། རྒྱུ་དེ་ཡིས་ཏིང་འཛིན་འདི་ནི་མྱུར་དུ་འགྲུབ་པར་འགྱུར་ཏེ། དཀོན་བརྩེགས་ལས་། དད་པ་ཅན་གྱི་མི་རྣམས་ལ། །དཀར་པོའི་ཆོས་ནི་ངང་གིས་འབྱུང་། །ཞེས་དང་། ཟླ་བ་སྒྲོན་མེར། ཡོན་ཏན་ཚོགས་རབ་འདོད་དང་ཆོག་ཤེས་ལྡན། །མང་དུ་ཐོས་ཤིང་ཡོ་བྱད་བསྙུང་བ་དང་། །དགོན་པར་གནས་ཤིང་གཅིག་པུར་དབེན་ལ་དགའ། །དེ་ཡིས་ཏིང་འཛིན་མཆོག་འདི་རྙེད་མི་དཀའ། །ཞེས་སོ། །གསུམ་པ་རང་སེམས་དད་པས་འགྲུབ་པ། ལུས་སེམས་རྒོད་བག་གི་རྣམ་པ་རྣམས་བསྡམས་ཤིང་གཡེངས་རྐྱེན་སྤངས་ཏེ་དབེན་པར་གནས་པ་ལ་དགའ་ཞིང་། ཏིང་འཛིན་བསྒོམ་པའི་དུས་གཉིད་རྨུགས་དང་སྙོམ་ལས་ཀྱིས་ཞི་གནས་ལ་བར་དུ་གཅོད་པ་དང་། སྨྲ་བ་ལ་དགའ་བ་ཡིས་ཏིང་འཛིན་སྔར་ཡོད་འགྲིབ་ཅིང་ཕྱིས་སྐྱེ་བའི་གེགས་བྱེད་པས་སྤངས། དེ་བཞིན་ལྷག་མཐོང་གི་གེགས་ཕྱི་རོལ་དུ་གཡེངས་རྐྱེན་རྒོད་འགྱོད་གཉིས་མེད་ཅིང་ཆགས་སྡང་གི་རྒྱུ་སྐྱེ་བོ་གཞན་དང་འདྲིས་པ་ཉུང་བ་དེ་ཡིས་ཏིང་འཛིན་འདི་ནི་མྱུར་དུ་འགྲུབ་སྟེ། སྔ་མ་ལས། འདུ་འཛི་མེད་ཅིང་དབེན་ལ་དགའ་བ་དང་། །འདྲིས་པ་ཉུང་ཞིང་གཉིད་དང་སྙོམ་ལས་སྤངས། །མི་ཞུམ་རྒོད་པ་མེད་ཅིང་ལུས་སེམས་བསྡམས། །དེ་ཡིས་ཏིང་འཛིན་མཆོག་འདི་རྙེད་མི་དཀའ། །ཞེས་དང་། ཡེ་ཤེས་ཕྱག་རྒྱ་ལས། ཚོགས་ལས་བསྲིངས་ཤིང་རབ་ཏུ་ཞི་ལ་མོས། །རི་དྭགས་ལྟ་བུར་མཛེས་ཤིང་གནས་མེད་རྒྱུ། །མཁའ་ལ་རླུང་བཞིན་རྙེད་ལ་མི་ཆགས་པ། །དེ་འདྲ་དེ་ནི་རྒྱལ་བའི་ཆོས་འཛིན་ཡིན། །ཞེས་སོ། །བཞི་པ་ངང་གིས་དབེན་པས་འགྲུབ་པ། གྲོང་དང་གྲོང་འདབས་{འདབ}ཀྱི་སྐྱེ་བོའི་འདུ་འཛི་མེད། ས་མདོ་ལ་སོགས་པའི་གནས་དང་དགོན་པར་རབ་བྱུང་སོགས་སྐྱེ་བོ་མང་པོའི་རྟེན་འདྲིས་མེད། ཚེ་འདིའི་དོན་དང་བྱ་བ་སྣ་ཚོགས་པས་བྲེལ་བ་མེད་པ་དེ་ཡིས་ཏིང་འཛིན་འདི་ནི་མྱུར་དུ་འགྲུབ། ལྔ་པ་ངེས་པར་འབྱུང་བས་འགྲུབ་པ། ཚེ་འདིའི་བདེ་དང་ཕྱི་མ་ལྷ་མིའི་བདེ་འབྲས་དང་། རང་དོན་གཅིག་པུར་ཉན་རང་གི་ཞི་བ་གཉེར་བ་མིན་པར་མཐའ་ཡས་པའི་འགྲོ་བའི་ཕྱིར། སྲིད་ལས་ཐར་འདོད་མི་རྟག་པའི་ཚུལ་སོགས་བཞིའི་ངེས་འབྱུང་སྐྱོ་ཤས་ཅན། དེ་ཡིས་ཏིང་འཛིན་མཆོག་འདི་མྱུར་དུ་འགྲུབ་སྟེ། ཏིང་འཛིན་མཆོག་དམ་པ་ལས། སྲིད་པའི་བདེ་ལ་རབ་ཏུ་མ་ཆགས་ཤིང་། །གཅིག་པུར་ཞི་བ་ཚོལ་བའི་སེམས་བྲལ་ཏེ། །འདུས་བྱས་རྣམས་ལ་སྐྱོ་བའི་ཡིད་ལྡན་པ། །དེ་ཡིས་ཏིང་འཛིན་མཆོག་རབ་དམ་པ་འགྲུབ། །ཅེས་གསུངས། དེ་ལ་ཚེ་འདིའི་བདེ་བ་སྤྱི་དང་། ཁྱད་པར་གྱི་ཡོ་བྱད་དམ་ནོར་ལ་སྲེད་པ་སྤང་དགོས་ཏེ། བཤེས་སྤྲིང་ལས། འདོད་པ་རྣམས་ནི་ཕུང་ཁྲོལ་བསྐྱེད་པ་སྟེ། །ཐུབ་པའི་དབང་པོའི་ཀིམ་པའི་འབྲས་འདྲར་གསུངས། །དེ་དག་སྤང་བགྱི་དེ་ཡི་ལྕགས་སྒྲོག་གིས། །འཁོར་བའི་བརྩོན་རར་འཇིག་རྟེན་འདི་དག་བཅིངས། །ཞེས་སོ། །ནང་སེམས་ཅན་ལ་ཆགས་པ་སྤངས་དགོས་ཏེ། དྲན་པ་ཉེར་བཞག་ལས། བུད་མེད་ཕུང་བར་བྱེད་པ་སྟེ། །འཇིག་རྟེན་འདི་དང་ཕ་རོལ་ཕུང་། །གལ་ཏེ་བདག་ལ་ཕན་འདོད་ན། །དེ་བས་བུད་མེད་རྣམ་པར་སྤངས ། །ཞེས་སོ། །མདོར་ན་རང་རྒྱུད་ལ་གང་ཤས་ཆེ་བའི་ཉོན་མོངས་པ་དེ་དང་པོར་བརྟགས་ནས་གཙོ་བོར་སྤོང་ཞིང་། དབང་པོ་དྲུག་གི་ཡུལ་ལ་ཞེན་པ་དང་། རྒྱན་པོ་འགྱེད་སོགས་གྲགས་པ་ཉམས་པའི་རྒྱུ་དང་། ཚུལ་བརྟུལ་མཆོག་འཛིན། ཆོས་བརྒྱད་ལ་ཞེན་པ་སོགས་ཉེས་པའི་ཚོགས་སྤང་ཞིང་། དད་སོགས་འཕགས་པའི་ནོར་བདུན་བསྒྲུབ་པ་དང་། སྐྱེ་བོ་གཞན་རྣམས་དགེ་བ་ལ་བསྐུལ་བ་སོགས། བསམ་གཏན་པ་དགོན་པར་གནས་པས་སྡོམ་སྡུད་དོན་བྱེད་ཀྱི་ཚུལ་ཁྲིམས་གསུམ་དང་མ་འགལ་བར། ཐ་ན་བྱ་དང་རི་དྭགས་འབུ་སྲིན་སོགས་ལའང་མི་འཚེ་ཞིང་ཟས་སོགས་བྱིན་ནས། དཀོན་མཆོག་གསུམ་གྱི་མཚན་དང་གཟུངས་སྔགས་སོགས་རྣ་བར་བསྒྲགས། ནམ་ཞིག་འདི་རྣམས་ཀྱང་སངས་རྒྱས་ངེས་སྙམ་པ་དང་། འདི་དག་བདག་གིས་འཁོར་བ་ལས་ཐར་བར་བྱ། འདི་དག་སྤྲུལ་པ་ཡིན་པའང་སྲིད་སྙམ་དུ་གུས་པ་བསྐྱེད་ཅིང་དག་སྣང་སྦྱང་། མི་རྟག་པ་ཉིད་ཡིད་ལ་བྱ་ཞིང་། སྐད་ཅིག་ཀྱང་མ་ཡེངས་པར་དགེ་བས་དུས་འདའ་བར་བྱའོ། །གཉིས་པ་ཇི་ལྟར་སྒྲུབ་པའི་ཐབས་ལ་བཞི། ཞི་ལྷག་སྒྲུབ་ཚུལ་གྱི་གོ་དོན་སྤྱིར་བཞག ཞི་གནས་སྒྲུབ་པའི་ཐབས་བྱེ་བྲག་ཏུ་བཤད། ལྷག་མཐོང་སྒྲུབ་པའི་ཐབས་རྒྱ་ཆེར་བཤད། ཟུང་འཇུག་སྒྲུབ་པའི་ཐབས་རབ་ཏུ་དབྱེ་བའོ། །དང་པོ་ཞི་ལྷག་སྒྲུབ་ཚུལ་གྱི་གོ་དོན་ལ་གསུམ། དང་པོ་བསམ་གཏན་གྱི་སྒྲིབ་པ་ལྔ་སྤང་བར་གདམས་པ། ཇི་ལྟར་བསྒྲུབ་པ་ཐབས་ཀྱི་ཡན་ལག་ཀྱང་། གཉིད་ནི་འཇུག་པ་རང་དབང་མེད་པར་སེམས་ནང་དུ་སྡུད་པ། རྨུགས་པ་ནི་ཡུལ་མི་གསལ་བའི་ཤེས་པ་ལུང་མ་བསྟན། རྒོད་པ་ནི་ཡུལ་ཕྱིར་འཕྲོ་བ། འགྱོད་པ་ནི་བྱ་བ་འགའ་ཞིག་ཡིད་ལ་བཅགས་པས་མངོན་པར་མི་དགའ་བ། ཐེ་ཚོམ་ནི་གཉིས་བཅས་ཀྱི་བློས་ཟིན་མེད་པས་བྱ་བ་བསྒྲུབ་པ་ལ་བར་དུ་གཅོད་པ་སྟེ། དེ་ལྟར་གཉིད་རྨུགས་རྒོད་འགྱོད་ཐེ་ཚོམ་སྟེ་བསམ་གཏན་ལ་སྒྲིབ་པའི་སྒྲིབ་པ་ལྔ་པོ་དེ་དང་གཞན་འདོད་འདུན་གནོད་སེམས་སོགས་སྤངས་ཏེ་ཞི་ལྷག་ཟུང་འབྲེལ་ཚུལ་གྱིས་བསྒྲུབ་པར་བྱའོ། །དེའང་གཉིད་རྨུགས་གཉིས་ཀྱིས་ཞི་གནས་གསལ་དྭངས་ཕྱེད་པ་ལ་བྱིང་པར་བྱེད་པས་རབ་ཏུ་སྒྲིབ། རྒོད་འགྱོད་གཉིས་ཀྱིས་ལྷག་མཐོང་དྭངས་ལ་རྩེ་གཅིག་པ་འཕྲོ་བར་བྱེད་ཅིང་རྣམ་པར་གཡེང་། ཐེ་ཚོམ་གཉིས་ཀའི་གནོད་བྱེད་དེ་མི་འགྲུབ་པའི་རྒྱུ་མི་མཐུན་པའི་ཕྱོགས་སོ། །གཉིས་པ་དེའི་གཉེན་པོ་བསྟེན་པར་གདམས་པ། དེ་ལྟར་ལྔ་པོ་ཉིད་བྱིང་རྒོད་གཉིས་སུ་འདུ་སྟེ་གཉིད་རྨུགས་གཉིས་བྱིང་། གཞན་རྣམས་རྒོད་པའོ། །དེས་ན། བྱིང་ན་གསེང་ཞིང་ཡིད་བྱེད་བཅུ་གཅིག་བསྒོམ། །རྒོད་ན་རྩེ་གཅིག་གནས་པའི་ཐབས་དགུ་བསྒོམ། །གསུམ་པ་ཟུང་འབྲེལ་སྒྲུབ་པའི་གཉེན་པོར་བསྟན་པ། ཞི་གནས་མེད་པའི་ལྷག་མཐོང་སྤྲོས་ལ་རྒོད་དེ་ཚིག་གི་གོ་ཡུལ་ཙམ་དང་། ལྷག་མཐོང་མེད་པའི་ཞི་གནས་ལུང་མ་བསྟན། འཁོར་བའི་ས་བོན་ལས་མི་འཕགས་པས། དེ་གཉིས་ཟུང་འབྲེལ་ནི་སྒྲིབ་པའི་གཉེན་པོ་མཆོག་གི་ལམ་ཡིན་པས་འབད་པར་བྱའོ། །གཉིས་པ་ཞི་གནས་སྒྲུབ་པ་ལ་བཞི་སྟེ། དང་པོ་དལ་ལ་མ་ཡེངས་པ་ཐབས་ཀྱི་མཆོག་ཏུ་བསྟན་པ། དེའང་ཞི་གནས་ནི་ལུས་ངག་ཡིད་སེམས་དལ་བས་ཏེ། ལུས་དལ་བས་རྩ་དལ། རྩ་དལ་བས་རླུང་དལ། རླུང་དལ་བས་ཁམས་རང་བཞིན་གྱིས་གནས་པ་འགྲུབ་སྟེ། དེ་ཡང་ཆོས་ཀུན་རང་བཞིན་སྤྲོ་བསྡུ་དང་བྲལ་བ་མཉམ་པའི་ངང་དེར། གཟུང་འཛིན་གྱི་དམིགས་པ་རབ་ཞི་སྤྲོ་བསྡུ་མེད་པ་ནི་ཞི་གནས་ཀྱི་ངོ་བོའམ། གཙོ་བོའི་ཡན་ལག་ཡིན་ལ། དེ་བརྟན་པར་བྱ་བའི་དོན་དུ་དམིགས་པ་ཡུལ་གཅིག་ལ་སེམས་འཛིན་པས་ཅུང་ཟད་མི་རྟོག་པ་འཁོར་གྱི་ཚུལ་ཏེ། དེའང་གཤིས་ལ་སེམས་འདིའི་རང་བཞིན་གང་ནས་ཀྱང་མ་འོངས་མི་འགྲོ་མི་གནས་པའི་རང་ལུགས་ཕྱམ་ཕྱལ་ལེ་བ་ཞིག་དུས་རྒྱུན་ཡོད་དེ། གསལ་དྭངས་ཕྱེད་པའི་ཆ་ལྷག་མཐོང་། གནས་ཆ་དེ་ཞི་གནས། གཉིས་སུ་མེད་པས་ཟུང་འབྲེལ་ཏེ། ཡོད་ནི་སེམས་ཅན་ཀུན་ལ་རྟག་ཏུ་ཡོད་ཅིང་། གསལ་བ་ནི་ངང་གིས་མི་གཡོ་བ་ངལ་སོས་པ་ལ་སོགས་པའི་དུས་སུ་ངོ་འཕྲོད་པར་སླ་བ་ཡིན་ནོ། །རྣལ་འབྱོར་པས་ནི་འཕྲོས་སམ་གནས་ཀྱང་རང་བབས་བཅོས་བསླད་མེད་པའི་ཞི་ལྷག་ཤེས་པར་གྲོལ་བ་ཡིན་ནོ། །གཉིས་པ་དམིགས་རྟེན་ཡུལ་གྱི་བྱེ་བྲག་བསྟན་པ། དམིགས་པ་ལ་སེམས་འཛིན་ལུགས། དེ་ཡང་སྣང་བཅས་སྣང་མེད་རྣམ་པ་གཉིས། །ཕྱི་ནང་གཉིས་ཏེ་བཞི་ཡིས་ཟིིན་པར་འགྱུར། །སྣང་བཅས་ལ་སེམས་བཟུང་ཚུལ་གཟུགས་སོགས་སྒོ་ལྔའི་ཡུལ་རྣམས་ལ་སེམས་མ་ཡེངས་པར་གཏད་དེ་འཇོག དེ་བརྟན་སྣང་མེད་ལ་སེམས་བཟུང་བ་གང་དུའང་མི་རྟོག་པ་སེམས་རྩེ་གཅིག་པའི་ངང་ལ་འཇོག དེ་བཞིན་ཕྱི་ནི་ཕྱི་རོལ་རྡོའམ། ཤིང་ངམ་སྐུ་གཟུགས་ལ་སོགས་པའི་རྟེན་ཞིག་ལ་སེམས་མ་ཡེངས་པར་བཟུང་བ་དང་། ནང་ཉིད་ལུས་ནང་དུ་ལྷ་སྐུའམ། ཡི་གེ་སྙིང་གར་པདྨ་འཐུར་འཕྱང་དང་ཕྱག་མཚན་འོད་སོགས་ལ་སེམས་འཛིན་ཏེ། དེའང་སྤྲོས་པ་ཤས་ཆེ་བས་ཕྱིར་བཟུང་ན་འཕྲོ་བས་ནང་དུ་བ ཟུང་། རྟོག་པ་ཉུང་བས་ནང་དུ་བཟུང་ན་བྱིང་བས་ཕྱིར་བཟུང་། དང་པོ་མཚན་བཅས་གང་རུང་ཞིག་ལ་སེམས་བཟུང་བས་རྗེས་ལ་མཚན་མེད་ངང་གིས་འབྱུང་ངོ་། །གསུམ་པ་རྣམ་པ་བློས་འཇོག་ཚུལ་བསྟན་པ། མདོར་ན། དམིགས་ཡུལ་གཅིག་ལ་རྩེ་གཅིག་སེམས་འཇོག་པ། །ཞི་གནས་བསྒྲུབ་པའི་ཐབས་ཀྱི་ཡན་ལག་ཡིན། །དེ་ནས་སེམས་གནས་པའི་ཐབས་དགུས་བརྟན་པར་བྱ་སྟེ། དམིགས་པ་དེ་ལ་སེམས་རྒྱུན་དུ་འཇོག་པར་བྱེད། ཕྱིར་འཕྲ་ོན་སེམས་བརླན་ཏེ་འཇོག་པར་བྱེད། ཕྱི་ཕྱིར་བཏུད་དེ་ཉེ་བར་འཇོག་པར་བྱེད། དེ་ལ་དགའ་བ་བསྐྱེད་ནས་འདུལ་བར་བྱེད། རྣམ་གཡེང་གི་ཉེས་པ་ཞི་བར་བྱེད། གཉིད་རྨུགས་ལ་སོགས་བསལ་ནས་རྣམ་པར་ཞིི་བར་བྱེད། གཞན་ལ་མི་འཕྲོ་བར་རྩེ་གཅིག་ཏུ་བྱེད། དེ་ལ་མི་རྩོལ་བར་མཉམ་པར་འཇོག་པར་བྱེད་པ་སྟེ་དགུའོ། །བཞི་པ་རྩལ་སྦྱོང་བོགས་ཀྱི་འབྱིན་ཚུལ་བསྟན་པ། ཐབས་དེ་ཡིས་རྩེ་གཅིག་ཞི་གནས་སྐྱེས་པའི་ཚེ་སེམས་རྩེ་གཅིག་ཟིན་པ་ཙམ་གྱིས་རྐྱེན་མི་ཐུབ་ཅིང་། ལྷག་མཐོང་དང་ཡང་འབྲེལ་མི་རུང་བས། སྣང་བ་སྒྱུ་མ་སོགས་སུ་སྤེལ་ཞིང་བརྟན་པའི་ཕྱིར་ལྷག་མཐོང་ཡེ་ཤེས་སྤྲོ། བོགས་འབྱིན་དུ་འགྲོ་འདུག་སོགས་སྤྱོད་ལམ་ཀུན་དང་བསྲེ་ཞིང་བསྒོམ་པ་གཅེས། སྟེངས་ཏེ་བོགས་སྐྱེད་མེད་ན་ལུས་སེམས་གསེངས་ཏེ་གཡེངས་པའི་རྗེས་ལ་སྔར་བཞིན་དུ་སྒོམ་སྟེ་འདིས་ནི་དམིགས་པ་གང་ལ་འཇོག་འདོད་པ་དང་། དུས་ནམ་གྱི་ཚེ། ཡུན་ཇི་ཙམ། ཚུལ་ཇི་ལྟར་འཇོག་པ་རྣམས་ལ་རང་དབང་ཐོབ་པས་དུས་མྱུར་དུ་འགྲུབ་པར་འགྱུར་བ་ཡིན་ནོ། །གསུམ་པ་ལྷག་མཐོང་སྒྲུབ་པ་ལ་གསུམ། དང་པོ་གསལ་དྭངས་ཕྱེད་ལ་མ་ཡེངས་པ་ཐབས་ཀྱི་མཆོག་ཏུ་བསྟན་པ། ཞི་གནས་ཀྱི་ཚེའང་ལྷག་མཐོང་འདོད་པས་སེམས་གསལ་ལ་དྭངས་པའི་ངང་ལས་ཆོས་ཐམས་ཅད་རང་བཞིན་མེད་པར་ལྟ་བ་སོ་སོར་རྟོག་པ་ན་གཙོ་བོའི་ཡན་ལག་ཡིན་ལ། བློ་མི་རྟོག་པའམ་མི་འཕྲོ་བར་མཉམ་པར་འཇོག་པ་ཡི་གསལ་ཆ་འཁོར་གྱིས་ཕལ་པའི་ཚུལ་དུ་ཡོད། གཉིས་པ་དམིགས་རྣམ་ངེས་པའི་སྒོམ་ཚུལ་བསྟན་པ། སོ་སོར་རྟོག་པའི་ལྷག་མཐོང་དེ་ཡང་ཆོས་ཅན་དང་ཆོས་ཉིད་རྣམ་པ་གཉིས་ཏེ། མཉམ་བཞག་བརྟན་པའི་ངང་ལས་ཆོས་ཅན་ཕྱི་རོལ་གྱི་སྣང་བ་ཐམས་ཅད་བདེན་མེད་སྒྱུ་མའི་དཔེ་བརྒྱད་དུ་བལྟ་བྱ་ཞིང་། ས་སྙིང་འཁོར་ལོ་བཅུ་པའི་མདོ་ལས། ཆོས་ཚུལ་འདི་དག་སྒྱུ་མ་སྨིག་རྒྱུ་དང་། །རྨི་ལམ་མིག་ཡོར་སྒྲ་བརྙན་སྤྲུལ་པ་འདྲ། །གར་མཁན་ཚོན་འདྲ་གང་གིས་རྟོགས་གྱུར་པ། །བསོད་ནམས་ཞིང་རབ་དེ་ལ་ཕྱག་འཚལ་ལོ། །ཞེས་སོ། །ཆོས་ཉིད་རང་བཞིན་གྱིས་མ་སྐྱེས་པ་མཁའ་ལྟར་སྟོང་པའི་རྩལ་སྦྱང་བྱ། དེའི་ངང་ལ་མ་བཅོས་པར་འཇོག་པའོ། །སྐྱེ་མེད་རིན་པོ་ཆེའི་མཛོད་ལས། གར་ཡང་མ་རྟོག་ཅིར་ཡང་མ་བསམས་ཤིག །བཅས་བཅོས་མ་བྱེད་རང་བཞིན་ལྷུག་པར་ཞོག །མ་བཅོས་པ་དེ་སྐྱེ་མེད་རིན་ཆེན་མཛོད། །དུས་གསུམ་རྒྱལ་བ་ཀུན་གྱི་གཤེགས་ཤུལ་ཡིན། །ཞེས་སོ། །དེས་ན་བློའི་ཚོལ་ཁྲོ་དང་བྲལ་བར་ཆོས་ཉིད་དམ། གནས་ལུགས་ཇི་བཞིན་པའ་ིངང་ལ་བཞག་པས་སྣང་ཡུལ་སྒྱུ་མར་རྟོགས་ལ་འཛིན་བྱེད་མ་ཞུགས་པ་སྟོང་གསལ་སྤྲོས་བྲལ་རང་བྱུང་གི་ཡེ་ཤེས་འཆར་བར་འགྱུར་རོ། །གསུམ་པ་རྩལ་སྦྱོང་བོགས་ཀྱི་འབྱིན་ཚུལ་བསྟན་པ། ལྷག་མཐོང་སྟེངས་ནས་སྐྱེད་མེད་ན་སྣ་ཚོགས་ཆོས་ལ་དགག་སྒྲུབ་སོགས་མང་པོ་སྤྲོས་ཏེ་སྒྱུ་མ་ལྟ་བུར་ཝལ་ཝལ་རྩལ་སྦྱང་སྟེ། སྒྱུ་མ་ཡང་སྟོང་པ་གཉིས་མེད་དུ་ལ་བཟླ་བས་དག་པར་བལྟ་བ་དང་། རྟོག་པ་འཕྲོ་ན་སྔར་བཞིན་ཞི་གནས་ངང་ལ་མཉམ་པར་བཞག དེའི་ངང་དུ་སྟེང་ན་ཡིད་བྱེད་བཅུ་གཅིིག་བསྒོམ་པར་བྱ་སྟེ། དེའང་རྟེན་འབྲེལ་ལ་སོགས་པའི་ཆོས་ལ་རྟོག་པ་དང་བཅས་ཤིང་དཔྱོད་པ་དང་བཅས་པའི་ཡིད་ལ་བྱེད་པ་དང་། དེས་འཕྲོ་ན་ཞི་གནས་ལ་བཞག་སྟེ་རྟོག་པ་མེད་ཅིང་དཔྱོད་པ་ཙམ་དང་བཅས་པའི་ཡིད་ལ་བྱེད་པ་དང་། དེས་རྟོག་ན་རྟོག་དཔྱོད་མི་འགྱུར་བའི་ངང་དུ་མི་རྟོག་པ་སྟེ་རྟོག་པ་ཡང་མེད་དཔྱོད་པ་ཡང་མེད་པའི་ཡིད་ལ་བྱེད་པ་དང་། དེའི་དོན་ལ་མ་ཡེངས་པའི་ཞི་གནས་ཡིད་ལ་བྱེད་པ་དང་། དེ་ཡང་གསལ་དྭངས་ཕྱེད་པའི་ལྷག་མཐོང་ཡིད་ལ་བྱེད་པ་དང་། དེའི་ཚེ་གསལ་སྟོང་གཉིས་སུ་མེད་པའི་ཟུང་དུ་འབྲེལ་བ་ཡིད་ལ་བྱེད་པ་དང་། དེའི་ངང་ལ་རྒྱུན་བསྲིང་བའི་ཕྱིར་སེམས་རབ་ཏུ་འཛིན་པའི་རྒྱུ་མཚན་ཡིད་ལ་བྱེད་པ་དང་། དེའི་དུས་སུ་སེམས་གནས་པའི་ངང་ལས་མི་གཡོ་བ་ཞི་གནས་ཀྱིས་མཚན་མ་ཡིད་ལ་བྱེད་པ་དང་། གསལ་དྭངས་ཕྱེད་པ་ལྷག་མཐོང་གི་རྒྱུ་མཚན་ཡིད་ལ་བྱེད་པ་དང་། སྟོང་གསལ་གཉིས་མེད་དུ་འབྲེལ་བ་ཟུང་འཇུག་གི་རྒྱུ་མཚན་ཡིད་ལ་བྱེད་པ་དང་། ཆོས་ཐམས་ཅད་རང་བཞིན་མེད་པར་མཉམ་པ་བཏང་སྙོམས་ཀྱི་རྒྱུ་མཚན་ཡིད་ལ་བྱེད་པ་རྣམས་སོ། །དེ་ལྟར་སེམས་འཕྲོ་ན་བཏུལ་བྱིང་ན་གསེང་། ཞི་ལྷག་གཉིས་སུ་མེད་པ་རྩལ་སྦྱངས་པས། དེ་ཚེ་ནམ་མཁའ་ལྟ་བུའི་འོད་གསལ་ནི། །ཞི་ལྷག་ཟུང་འཇུག་སྟོང་གསལ་སྤྲོས་དང་བྲལ་བའི་ངོ་བོ་མཐོང་། དེ་ཡིས་བྱིང་རྒོད་སྒྲིབ་གཉིས་སྤྲིན་ལས་གྲོལ་བ་འགྲུབ། རེས་འགའ་ཞི་གནས་ཀློང་དུ་གྱུར་པ་རྒྱ་མཚོ་ལྟ་བུའི་འོད་གསལ་ཏེ་སེམས་གསལ་དྭངས་འཛིན་མེད་དུ་འཆར་རོ། །རྟོག་པའི་འགྱུ་བ་ཤར་གྲོལ་ལྷག་མཐོང་འོད་གསལ་ཀློང་དུ་གྱུར་པས་ངང་དྭངས་རྟོག་མེད་ལྷུན་གྱིས་གྲུབ། བོགས་འབྱིན་དུ་སྤྱོད་ལམ་ཀུན་དང་དེ་ཉིད་བསྲེ། འདིས་ནི་ལྷག་མཐོང་མྱུར་དུ་འགྲུབ་པར་འགྱུར་ཏེ་སེམས་ཉིད་འཕོ་འགྱུར་བཅོས་བསླད་དང་བྲལ་བ་སྟོང་གསལ་རྗེན་པའི་ངོ་བོ་མཐོང་དུས། སེམས་གནས་ཀྱང་ཆོས་ཉིད་ཀྱི་ངང་དུ་གནས་པས་ཡིན་མིན་གདོད་ནས་དག་པའི་གདེང་ཐོབ། འཕྲོ་བ་ཆོས་ཉིད་ཀྱི་རོལ་པར་ཤར་བས་གང་སྣང་ཡེ་ཤེས་ཀྱི་རྩལ་དུ་ཤེས་ཏེ་རྐྱེན་སྣང་རང་བྱུང་གི་ཡེ་ཤེས་སུ་གྲོལ་བའི་དུས་སོ། །དེའི་ཚེ་རང་སེམས་སྐུ་གསུམ་གྱི་ངོ་བོར་མཐོང་བས་རྩོལ་སྒྲུབ་མཚན་མའི་ཆོས་ལས་གྲོལ་བ་ནི། ཀུན་བྱེད་ལས། ཆོས་ཀྱི་སྐུ་ནི་བྱང་ཆུབ་སེམས། །བྱང་ཆུབ་སེམས་ལས་ཆོས་ཀྱི་སྐུ། །རྡུལ་ཙམ་སུས་ཀྱང་བཅོས་སུ་མེད། །དེས་ན་སངས་རྒྱས་སེམས་ལས་མེད། །ཅེས་སོགས་གསུངས་པ་བཞིན་ནོ། །གཉིས་པ་ཟུང་འཇུག་སྒྲུབ་པའི་ཐབས་ལ་ལྔ། དང་པོ་ཕྱམས་བརྡལ་འཛིན་མེད་ཐབས་ཀྱི་མཆོག་ཏུ་བསྟན་པ། ཞི་ལྷག་གི་ངོ་བོ་གསལ་སྟོང་ཟུང་འཇུག་ཏུ་ཤེས་པ་ལ་འཕྲོ་གནས་གཉིས་མི་འགལ་བས་མཉམ་པའི་ངང་། གསལ་སྟོང་ངམ་འཕྲོ་གནས་གཉིས་ཀར་རྣམ་པར་མི་རྟོག་པའི་ཡེ་ཤེས་གཙོ་བོ་ལ། དེའི་ངང་ལས་ཡེངས་མེད་སྤྲོས་དང་བྲལ་བ་འཁོར་གྱི་ཚུལ་དུ་གནས་སོ། །དེའང་དུས་ཐམས་ཅད་དུ་སེམས་ཉིད་གཉིས་མེད་གཙོ་བོ་ཡིན་ཡང་། དེ་ཞི་ལྷག་གིས་མཉམ་པར་བཞག་དུས་རྟོགས་པར་སླ་བས། ཐབས་ཡེངས་མེད་དེ་འཁོར་རམ་ཡན་ལག་ཏུ་ལྡན་པ་ཡིན་ནོ། །དེའི་ཚེ་སེམས་གཞི་མེད་དུ་གློ་བུར་གྱི་སྤྲོས་པ་ནུབ་པས་ཆུ་ལ་ཆུ་བཞག་པ་ལྟར་རོ་མཉམ་དབྱེར་མེད་དུ་ཤེས་པར་བྱའོ། །གཉིས་པ་དམིགས་རྣམས་ངེས་པའི་སྒོམ་ཚུལ་བསྟན་པ། དེའི་ངང་ལས་རྟོག་པ་ཇི་ལྟར་ཤར་རམ་གནས་ཀྱང་དེ་ཡི་ངང་ལ་མ་བཅོས་པར་བཞག་པས། ཆུ་ལ་རླབས་ཞི་བ་ལྟར། རྣམ་རྟོག་གང་ཤར་ཤར་བས་གྲོལ་ཏེ་ཤར་དུས་སུ་གྲོལ་ལ་གྲོལ་ཐོག་ཏུ་གནས་པས་ཤར་གྲོལ་མཉམ་པ་ཉིད་དེ། དེ་ལྟར་ཞི་ལྷག་ཟུང་འབྲེལ་བས་ཉམས་བདེ་གསལ་མི་རྟོག་པ་འཆར་རོ། །དེའི་ཚེ་ཤར་བས་གྲོལ་བ་ལྷག་མཐོང་ཡིན་ལ་སྣང་བཅས་བསོད་ནམས་ཀྱི་ཚོགས་བསྐྱེད་རིམ་དུ་ལྷུན་གྱིས་གྲུབ་ཅིང་། རང་ཞི་བའི་རང་རིག་པ་དྭངས་གསལ་དང་བཅས་པ་ལ་གནས་པ་ཞི་གནས་ཏེ། སྣང་མེད་ཡེ་ཤེས་ཀྱི་ཚོགས་རྫོགས་པའི་རིམ་པར་གྲུབ་པས། ཟུང་འཇུག་གི་རང་བཞིན་དུ་ཡེ་ནས་སེམས་ལ་སྣང་སྟོང་དང་ཐབས་ཤེས་དང་བསྐྱེད་རྫོགས་ལྷུན་གྱིས་གྲུབ་སྟེ་གནས་སོ། །གསུམ་པ་གེགས་ཀྱི་དྲི་མ་སེལ་ཐབས། དེ་ལྟར་ཟུང་འཇུག་བཅོས་བསླད་མེད་པར་བསྒོམས་པས་སྟེངས་ན་ཞི་ལྷག་སོ་སོར་རྩལ་སྦྱང་སྟེ། ཞི་གནས་སྟེངས་ན་ལྷག་མཐོང་དང་། ལྷག་མཐོང་སྟེངས་ན་ཞི་གནས་བསྒོམ་ཞིང་། བྱིང་རྒོད་ཚེ་ན་ལྡོག་ལ་ཏེ་བྱིང་ན་ལྷག་མཐོང་རྒོད་ན་ཞི་གནས་བསྒོམ་པར་བྱ་སྟེ་དེས་སྐྱོན་ལས་གྲོལ་ལོ། །བཞི་པ་བོགས་འབྱིན་གནད་ཀྱི་མན་ངག དེའི་བོགས་འབྱིན་ནམ་མཁའ་དྭངས་ཤིང་སྤྲིན་མེད་པའི་ཚེ། ཉི་མར་རྒྱབ་ཕྱོགས་པས་གཙུག་ཏོར་རྣམ་པར་ལྟ་བའི་ལྟ་སྟངས་ཀྱིས་མཁའ་ལ་རབ་ཏུ་བལྟས་པས། སེམས་སྟོང་གསལ་གྱི་ཤེས་པ་སྤྲོས་པ་དང་བྲལ་བ་འཆར་བ་ནི་ཟུང་འཇུག་གི་ཡེ་ཤེས་སོ། །ལྔ་པ་རྩལ་སྦྱོང་ཟབ་དོན་སྙིང་པོ། དེའི་ཚེ་ཕྱི་རོལ་གྱི་དཔེ་ཡི་ནམ་མཁའ་དག་པ་ལས། དེས་མཚོན་པའི་ནང་གི་ཤེས་པ་སྟོང་གསལ་འགག་མེད་ནི་ཆོས་ཉིད་དོན་གྱི་ནམ་མཁའ་ཆེའོ། །དེ་ལས་སྟོང་གསལ་སྤྲོས་པ་དང་བྲལ་བའི་ཡེ་ཤེས་བདེ་གསལ་མི་རྟོག་པའི་ཉམས་དང་། ལྷན་གཅིག་ཤར་བས། ཆོས་ཉིད་ནམ་མཁའི་མཚན་ཉིད་དུ་རང་གྲོལ་ཏེ་དངོས་པོ་དང་མཚན་ཉིད་ཐམས་ཅད་ལས་གྲོལ་བ་ནི། གསང་བ་འོད་གསལ་སྙིང་པོའི་ནམ་མཁའ་སྟེ། །ནམ་མཁའ་སུམ་སྤྲུགས་དགོངས་པ་ཤེས་པར་བྱ། །དེའི་དུས་སུ་དུ་བ་ལ་སོགས་པའི་རྟགས་བཅུ་དང་། འོད་ལྔའི་སྣང་བའང་རླུང་སེམས་དབུ་མར་ཚུད་པའི་རྟགས་རྣམས་ཀྱང་ངང་གིས་འབྱུང་ངོ་། །གསུམ་པ་གང་སྒྲུབ་པའི་ངོ་བོ་བསྟན་པ་ལ་བརྒྱད། དང་པོ་བརྗོད་བྲལ་གྱི་ངོ་བོ་བསྟན་པ། གཉིས་མེད་བསྒྲུབ་པ་ངོ་བོའི་ཡན་ལག་ནི། ཆོས་ཐམས་ཅད་རྩོལ་སྒྲུབ་སྤང་བླང་ལས་འདས་པས་རོ་མཉམ་རྫོགས་པ་ཆེན་པོའི་ངང་སྟེ། དེའི་དོན་རྟོགས་པས་ལྟ་བ། དེའི་ངང་ལས་མ་ཡེངས་པས་བསྒོམ་པ། དེ་ཡང་ཡོད་མེད་རེ་དོགས་ལས་འདས་པས། སྤང་བླང་མི་བྱ་བར་གང་ལའང་དམིགས་གཏད་དང་ཞེན་པ་དོར། འཛིན་ཞེན་ཡོད་ན་དེ་ཐམས་ཅད་སྲིད་པའི་འདུ་བྱེད་དེ་སྲིད་ལས་གྲོལ་མི་ནུས་ལ། གང་ལའང་དམིགས་གཏད་ཀྱི་མཚན་མ་མེད་ན་མཁའ་བཞིན་དུ་བཅིངས་གྲོལ་མེད་དོ། །གཉིས་པ་སྣ་ཚོགས་དུ་མ་རོ་གཅིག་ཏུ་བསྟན་པ། ཇི་ལྟར་གཟུགས་བརྙན་སྣ་ཚོགས་མེ་ལོང་ངང་ལས་གཞན་མིན་པ། དེ་ལྟར་ཆོས་རྣམས་སྣ་ཚོགས་སྟོང་པའི་ངང་དུ་ཤེས་པར་བྱ། གསུམ་པ་འཆར་ཚུལ་ངང་དྭངས་སྐྱེ་མེད་དུ་བསྟན་པ། ཇི་ལྟར་སྤྲིན་རྣམས་སྣ་ཚོགས་ནམ་མཁའི་ངང་ལས་མ་གཡོས་པ་དེ་བཞིན་བློ་ལ་དགག་སྒྲུབ་སྣ་ཚོགས་ཅི་ཤར་ཡང་སེམས་ཉིད་ཀྱི་ངང་ལས་མ་གཡོས་སོ། །བཞི་པ་ཉམས་རྟོགས་རོལ་པའི་རྩལ་སྣང་དུ་བསྟན་པ། ཇི་ལྟར་ཆུ་བོ་སྣ་ཚོགས་རྒྱ་མཚོའི་ངང་དུ་རོ་གཅིག་པ་དེ་བཞིན་དུ་ཉམས་རྟོགས་སྣ་ཚོགས་སྒོམ་པའི་ངང་དུ་རོ་གཅིག་གོ །ལྔ་པ་འཁོར་འདས་རིག་པའི་རང་སྣང་དུ་བསྟན་པ། ཇི་ལྟར་སྒྱུ་མ་སྣ་ཚོགས་སྤྲུལ་པའི་ངང་སྟེ་སྣང་དུས་ནས་རང་བཞིན་མེད་པ་དེ་བཞིན་འཁོར་འདས་སྣ་ཚོགས་ཆོས་ཉིད་ངང་ལས་མི་གཡོའོ། །དྲུག་པ་ཆོས་རྣམས་ཡེ་གྲོལ་དབྱེར་མེད་དུ་བསྟན་པ། ཇི་ལྟར་ཕྱོགས་བཅུའི་ནམ་མཁའ་གཞི་བྲལ་ངང་སྟེ་ཐ་དད་མེད་པ་ལྟར། དེ་བཞིན་ཡེ་གྲོལ་ཆོས་རྣམས་ལྟ་བའི་ངང་ལ་རང་བཞིན་གཉིས་སུ་མེད་དོ། །ཇི་ལྟར་ཆུ་ལ་ཆུ་བཞག་པ་འདྲེས་ནས་གཉིས་མེད་ངང་། དེ་བཞིན་སེམས་དང་སེམས་ཉིད་ཀྱི་ངང་དུ་སེམས་བྱུང་གི་རྟོག་པ་རང་ཞིར་ཐིམ་པས་དབྱེར་མེད་ངང་། བདུན་པ་སྣང་སེམས་སྒྱུ་མ་གཉིས་མེད་དུ་བསྟན་པ། ཇི་ལྟར་སྣ་ཚོགས་རྨི་ལམ་གཉིད་ཀྱི་ངང་ལས་མ་གཡོས་པ་དེ་བཞིན་བླང་དོར་གཉིས་མེད་སྤྱོད་པའི་ངང་དུ་རོ་གཅིག་པའོ། །ཇི་ལྟར་མཚོ་དང་དབའ་རླབས་ཆུ་བོའི་ངང་ལས་གཞན་མིན་པ་དེ་བཞིན་རྟོག་པ་དང་མི་རྟོག་པ་མཉམ་པའི་ངང་ཉིད་དོ། །བརྒྱད་པ་རིག་སྟོང་ཆོས་དབྱིངས་ཁྱབ་བརྡལ་དུ་བསྟན་པ། ཇི་ལྟར་ཚོང་པ་དོན་གྲུབ་པ་རེ་དོགས་མེད་པའི་ངང་དུ་བློ་བདེ་བའི་ངང། དེ་བཞིན་སངས་རྒྱས་རང་སེམས་སུ་ཐག་ཆོད་པས་རེ་དོགས་གཉིས་མེད་འབྲས་བུའི་ངང་དུ་བློ་བདེ། སེམས་ཉིད་རང་བྱུང་གི་ཡེ་ཤེས་བླང་དོར་མེད་པའི་ངང་འདིར་ཆོས་ཐམས་ཅད་ཕྱམ་གཅིག་རྫོགས་པས་རྫོགས་པ་ཆེན་པོའི་ངང་སྟེ། བྱ་རྩོལ་མཚན་མའི་འདུ་ཤེས་ལས་གྲོལ་བས་ཁྱབ་གདལ་དབྱིངས་ཀྱི་ཆོས་ཉིད་ཤེས་པར་བྱའོ། །དོན་གསུམ་པ་ལེའུ་རྫོགས་པ་མཇུག་གི་དོན་ལ་གཉིས། དང་པོ་སྐབས་ཀྱི་དགེ་བ་བསྔོ་བ། དེ་ལྟར་རྨད་དུ་བྱུང་བའི་དགེ་བ་དྲི་མེད་སྣ་ཚོགས་གཉིས་མེད་ནམ་མཁའ་ལྟར་ཡངས་ཤིང་རོ་གཅིག་གིས། འགྲོ་ཀུན་བདག་གཞན་གཟུང་འཛིན་གྱི་འཆིང་བ་ལས་གྲོལ་ཏེ། དུས་རིང་མོ་ནས། འདི་ཞེས་དམིགས་པས་འཁྲུལ་པའི་སྲིད་པ་འདིར། །དུབ་པའི་སེམས་ཉིད་དེ་རིང་ངལ་སོས་ཤིག །གཉིས་པ་ལེའུའི་མཚན། རྫོགས་པ་ཆེན་པོ་སེམས་ཉིད་ངལ་གསོ་ལས། ཏིང་ངེ་འཛིན་བསྒྲུབ་པའི་ཡན་ལག་ཐབས་ལ་མཁས་པའི་ལེའུ་སྟེ་བཅུ་གཉིས་པའོ།། །། ༈ བཅུ་གསུམ་པ་འབྲས་བུ་ལྷུན་གྲུབ་ཆེན་པོའི་ལེའུ་ལ་གསུམ་སྟེ། ལེའུ་ལ་འཇུག་པ་རྒྱུའི་དོན། ལེའུ་དངོས་ཀྱི་དོན། ལེའུ་རྫོགས་པ་མཇུག་གི་དོན་ནོ། །དང་པོ་ནི། དེ་ལྟར་ཐབས་དང་ཤེས་རབ་མཐར་ཕྱིན་ནས། སྐུ་དང་ཡེ་ཤེས་ཕྲིན་ལས་ལྷུན་གྱིས་གྲུབ་སྟེ་ལམ་གྱི་ཡོན་ཏན་རྫོགས་པ་ན་སེམས་ཉིད་འོད་གསལ་བའི་ཁམས་ཀྱི་སྒྲིབ་བྱེད་དྲི་མ་མཐའ་དག་དང་བྲལ་བའི་སངས་རྒྱས་སམ་བྱང་ཆུབ་ཅེས་བྱ་བ་སྐུ་དང་ཡེ་ཤེས་འདུ་འབྲལ་མེད་ཅིང་ལྷུན་གྱིས་གྲུབ་པའི་ནུས་པ་ཅི་ཡོད་པ་མངོན་དུ་ཐོབ་པའོ། །དེ་ལ་འོག་མིན་དུ་སངས་རྒྱས་ཚུལ་དང་། སྐུ་དང་ཡེ་ཤེས་ཀྱི་རྣམ་བཞག་མི་འདྲ་བར་མདོ་རྒྱུད་ལས་གསུངས་པ་འགྲེལ་ཆེན་ལྟར་ཤེས་པར་བྱའོ། །འདིར་སྒྱུ་འཕྲུལ་དྲྭ་བ་ཆེན་པོའི་རྣམ་བཞག་བརྗོད་པ། གཉིས་པ་ལེའུ་དངོས་ཀྱི་དོན་ལ་གསུམ། ཞི་བ་བྱང་ཆུབ་བརྙེས་ཚུལ་སྤྱིར་བསྟན། སྐུ་ལྔ་ལྷུན་གྲུབ་ཀྱི་རང་བཞིན་བྱེ་བྲག་ཏུ་བཤད། ནང་དབྱིངས་རྣམ་དག་གི་འཆར་གཞིའི་དོན་བསྡུ་བའོ། །དང་པོ་ཞི་བ་བྱང་ཆུབ་བརྙེས་ཚུལ་ལ་གཉིས། དང་པོ་དག་པ་གཉིས་ལྡན་གྱི་ཆོས་དབྱིངས་བརྙེས་ཚུལ། ལམ་གྱི་ཡེ་ཤེས་དག་པ་མཐར་ཐུག་པ་དེའི་ཚེ་སྤང་བྱ་གཟུང་བ་དང་འཛིན་པའི་རང་བཞིན་སེམས་དང་སེམས་བྱུང་ཚོགས་བརྒྱད་ཀུན་གཞིར་བཅས་པ་ཀུན་སེམས་ཉིད་འོད་གསལ་བ་ཆོས་ཀྱི་དབྱིངས་སུ་འཇུག་པ་རབ་ཞིའི་ཚེ་དབྱིངས་གདོད་མའི་གཞི་དང་ཡེ་ཤེས་ཐིམ་བྱའི་རིག་པ་གཉིས་སུ་མེད་པར་འདྲེས་ཏེ་རོ་གཅིག་ཏུ་གྱུར་པ་དེ་ཚེ་ཡེ་ནས་དྲི་མ་མེད་པ་རང་བཞིན་རྣམ་དག་དང་གློ་བུར་གྱི་དྲི་མ་ཆ་དང་བཅས་པ་དག་པ་གཉིས་ལྡན་གྱི་སེམས་ཀྱི་དམ་པ་སྤྲོས་ཀུན་ཞི་བ་སྟེ་སེམས་འགག་པ་དེ་སྐུ་ཡི་མངོན་སུམ་མཛད། ཅེས་སོ། །གཉིས་པ་ཞི་བ་ནང་དབྱིངས་ལས་རྟག་ཏུ་མི་གཡོ་བར་བསྟན་པ། དེའི་ཚེ་ཆོས་སྐུ་སྤྲོས་ཀུན་ཞི་བ་ཆེན་པོ། ཤིན་ཏུ་སྐྱེ་མེད་འོད་གསལ་སྙིང་པོའི་ངང་དུ་ཕྱིན་པ། དབྱིངས་ནམ་མཁའི་ངང་དུ་ཡེ་ཤེས་གནམ་གང་གི་ཟླ་བ་ནང་གསལ་ཐམས་ཅད་མཁྱེན་པའི་ཡོན་ཏན་གྱི་རྟེན་ནམ་མཆར་གཞིར་གནས་པ་ལས། ཕྱིར་སྣང་ལོངས་སྐུའམ་གདུལ་བྱའི་སྣང་ངོར་སྣང་བ་ནི་ཡེ་ཡོད་པ་མ་ཡིན་ཏེ། མཐའ་བཞིའི་དྲི་མ་ལས་འདས་པ་ཆོས་སྐུ་ཉག་གཅིག་གི་དུས་ཡིན་པའི་ཕྱིར་རོ། །གནམ་གང་ན་ནམ་མཁའ་ལ་ཟླ་བ་ཡོད་ཀྱང་དབྱིངས་སུ་ནུབ་པ་ལྟར་གཞན་གྱིས་བལྟར་རུང་བའི་མངོན་གསལ་དུ་མེད་པ་བཞིན་དུ་ཟབ་ཅིང་ཕྲ་བའི་ཆོས་སྐུའི་ཡེ་ཤེས་མཁའ་དབྱིངས་པདྨོར་འཁྱིལ་བ་གང་དུའང་མི་རྟོག་ཞི་བ་བརྙེས་པའི་ཚེ་དབྱིངས་ཀྱི་སྐུ་གསུམ་ནང་དབྱིངས་ཕྲ་བའི་ཡེ་ཤེས་སུ་བཞུགས་པ་སྟེ། ཡེ་ཤེས་སྣང་བ་ལས། དབྱིངས་སུ་འཁྱིལ་བས་མཐོང་དུ་མེད། །མེད་པ་མིན་ཏེ་ཕྲ་བའི་ཕྱིར། །ཚེས་ཀྱི་སྔོན་རོལ་ཟླ་བ་བཞིན། །ཟབ་པ་ཞི་བ་ཆེས་ཕྲ་བའོ། །ཞེས་སོ། །གཉིས་པ་སྐུ་ལྔ་ལྷུན་གྲུབ་ཀྱི་རང་བཞིན་བྱེ་བྲག་ཏུ་བཤད་པ་ལ་གསུམ། ནང་དབྱིངས་སྐུ་གསུམ་གྱི་རང་བཞིན་མདོར་བསྟན་པ། རང་སྣང་ལོངས་སྐུའི་ཞིང་ཁམས་རྒྱས་པར་བཤད་པ། ཕྱིར་སྣང་སྤྲུལ་སྐུའི་རབ་དབྱེ་རྒྱ་ཆེར་བཤད་པའོ། །དང་པོ་ལ་གཉིས། རྣམ་དབྱེ་སྤྱིར་བསྟན་པ་དང་། དབྱིངས་ལས་གཞན་དུ་མི་སྣང་བར་བསྟན་པའོ། །དང་པོ་རྣམ་དབྱེ་སྤྱིར་བསྟན་པ་ལ་གསུམ། དང་པོ་མི་འགྱུར་རྡོ་རྗེའི་སྐུ་ནི། བསམ་བརྗོད་སྤྲོས་པའི་ཡུལ་ལས་འདས་པའི་ཆོས་ཉིད་མི་དམིགས་དུས་གསུམ་འཕོ་འགྱུར་མེད་པས། རང་བཞིན་གདོད་ནས་དག་པའི་ཆ་དེ་ལ། །མི་འགྱུར་རྡོ་རྗེའི་སྐུ་ཞེས་བརྗོད་པ་སྟེ། །གཞི་དབྱིངས་ཟད་པའི་ཆོས་ཉིད་འོད་གསལ་བ་སངས་རྒྱས་ཀྱི་བགྲོད་པ་མཐར་ཐུག་པའོ། །ཡེ་ཤེས་དྲྭ་བ་ལས། དབྱིངས་ཀྱི་དག་པ་རྡོ་རྗེའི་སྐུ། །མི་འགྱུར་མི་ཤིགས་བསམ་ལས་འདས། །ཞེས་སོ། །གཉིས་པ་མངོན་པར་བྱང་ཆུབ་པའི་སྐུ་ནི། སེམས་ཉིད་འོད་གསལ་བ་དག་པ་གཉིས་ལྡན་མཐར་ཐུག་གི་ཚེ་རང་བཞིན་གྱིས་དག་པ་དང་གློ་བུར་སྒྲིབ་གཉིས་ལས་རྣམ་པར་དག་ཅིང་། ཤེས་བྱ་ཐམས་ཅད་མཁྱེན་པའི་ཆོས་ཚུལ་རྒྱ་མཚོ་བརྙེས་ཏེ། སྤངས་དང་རྟོགས་པའི་ཡོན་ཏན་མཐར་ཕྱིན་པས། སྟོབས་བཅུ། མི་འཇིགས་པ་བཞི། མ་འདྲེས་པ་བཅོ་བརྒྱད། ཐུགས་རྗེ་ཆེན་པོ་ཆོས་སུམ་ཅུ་རྩ་བདུན་སོགས་མཁྱེན་བརྩེ་ནུས་པའི་ཕ་རོལ་དུ་ཕྱིན་པའི་ཆས་གཞལ་ན་མངོན་པར་བྱང་ཆུབ་སྐུ་ཞེས་བཏགས་པ་སྟེ། མ་འདྲེས་པའི་ཡོན་ཏན་ཐམས་ཅད་ཀྱི་འཆར་གཞི་མཐར་ཐུག་པ་གང་ཡིན་པའོ། །དེའང་ཡེ་དྲྭ་ལས། དྲི་མ་བྲལ་ཕྱིར་བྱང་བ་སྟེ། །ཡོན་ཏན་རྒྱས་པས་ཆུབ་པ་ཉིད། །གཉིས་མེད་འདྲེས་ཕྱིར་ཟུང་འཇུག་ཕྱིར། །མངོན་པར་བྱང་ཆུབ་སྐུར་བརྗོད་པའོ། །ཞེས་སོ། །གསུམ་པ་ཞི་བ་ཆོས་སྐུ་ནི། དབྱིངས་སེམས་ཉིད་ནམ་མཁའི་ངང་དུ་ཡེ་ཤེས་རོ་གཅིག་ཏུ་འདྲེས་པ་གནམ་གང་ལྟ་བུའི་ཚེ་ན་ཤེས་བྱའི་ཡུལ་ལ་དེ་བློ་མི་འཇུག་ཅིང་། ཤེས་བྱེད་བློ་ལ་འཛིན་པ་མི་དམིགས་ཀྱང་དབྱིངས་ནང་གསལ་ཆེས་ཕྲའི་ཡེ་ཤེས་མཁའ་དབྱིངས་ནུབ་པའི་ཟླ་བ་ལྟར་སྤྲོས་པའི་ཚོགས་རྣམས་ཞི་ལ་ཐམས་ཅད་མཁྱེན་ཆ་མ་འགགས་པས་ཐིམ་ལ་མ་རྨུགས་པའི་ཕྲ་བའི་ཡེ་ཤེས་མཆོག ཐམས་ཅད་མཁྱེན་ཆས་འཆར་གཞི་ངོ་བོའི་ཚུལ་ཏེ། ནང་གསལ་ཡེ་ཤེས་མཉམ་བཞག་གི་ཆ་ལ་ཕྱིར་གསལ་གྱི་ཡེ་ཤེས་མཆེད་པའི་སྙིང་པོ་བྱེད་པ་སྟེ། དེའི་བྱིན་རླབས་དང་གདུལ་བྱའི་སྨོན་ལམ་གྱིས་དེ་ལས་གཟུགས་སྐུ་རྣམ་མཁྱེན་མཆེད་འགྱུར་ཞིང་། གདུལ་བྱ་གཞན་ལ་སྣང་མཛད་ཡོན་ཏན་གཏེར་ཡིན་ཕྱིར། ཤིན་ཏུ་ཆེས་ཕྲའི་ཡེ་ཤེས་རབ་ཞིའི་ཆས། རྟོག་མེད་ཡེ་ཤེས་ཁྱད་པར་ཅན་ནི་ཞི་བ་ཆོས་ཀྱི་སྐུ་ཞེས་རབ་ཏུ་བརྗོད་དེ། སྒྱུ་འཕྲུལ་བླ་མ་ལས། ཆེས་ཕྲའི་ཡེ་ཤེས་ནང་དུ་གསལ། །དམིགས་མེད་འཆར་གཞི་ཆོས་ཀྱི་སྐུ། །ཞེས་སོ། །དེའང་སྟོང་རྐྱང་ལ་ཆོས་སྐུར་མི་འདོད་དེ། རིག་པའི་ཡེ་ཤེས་མ་ཡིན་པའི་ཕྱིར་རོ། །ཆོས་ཉིད་ལ་ཆོས་སྐུ་འདོད་པ་ལྟར་ན་རྡོ་རྗེའི་སྐུ་སྟེ་བཤད་ཟིན་ཏོ། །གཉིས་པ་དབྱིངས་ལས་གཞན་དུ་མི་སྣང་བར་བསྟན་པ་ལ་གསུམ། དང་པོ་རྒྱལ་བ་ཁོ་ནས་སྤྱོད་ཡུལ་དུ་བསྟན་པ། དབྱིངས་ནང་གསལ་དུ་གནས་པའི་སྐུ་གསུམ་པོ་འདི་དག་ཕྱི་རོལ་ཡུལ་ལ་མི་འཇུག་ཅིང་ཕྱིར་གསལ་དུ་འཆར་བའི་རྟེན་ཡིན་པ་ཉིད་དང་། ཆད་པ་མ་ཡིན་ཏེ་ཤིན་ཏུ་ཕྲ་བའི་ཡེ་ཤེས་ཡིན་པའི་ཕྱིར། རྟག་དང་ཆད་སོགས་མུ་བཞིའི་མཐའ་ལས་འདས། །སྨྲ་བསམ་བརྗོད་མེད་ཕ་རོལ་ཕྱིན་པའི་ངང་། །སྟོང་པའི་རང་བཞིན་དམིགས་པ་རབ་ཞི་བས། །རྒྱལ་བ་རྣམས་ལས་གཞན་གྱི་སྤྱོད་ཡུལ་མིན། །དེའང་འཆར་གཞི་བྱེད་པས་ན་རྒྱས་སྲས་སར་གནས་དང་སེམས་ཅན་གྱི་ཚོགས་ལ་གཟུགས་སྐུ་མིག་ལ་སྣང་བ་སོགས་དབང་པོ་དྲུག་གི་དོན་དྲུག་ཉམས་སུ་མྱོང་བའི་རྒྱུ་བྱེད་པ་ཡང་ནང་གསལ་གྱི་ཡེ་ཤེས་ཟླ་བ་དབྱིངས་སུ་ནུབ་པ་ལྟ་བུའི་ནམ་མཁའ་བཞིན་དུ་གནས་པ་ལས་བྱུང་བས་སངས་རྒྱས་ལས་གཞན་གྱི་སྤྱོད་ཡུལ་མ་ཡིན་ནོ། །གཉིས་པ་གཟིགས་སྣང་ཀུན་ལས་འདས་པར་བསྟན་པ། དེ་ལྟར་ནང་གསལ་གྱི་དུས་སུ་ཆོས་ཉིད་ཀྱི་ཞིང་ན་སྟོན་པ་ཀུན་ཏུ་བཟང་པོ་ཆོས་དབྱིངས་སྤྲོས་པ་བྲལ་བའི་ཕོ་བྲང་ཤིན་ཏུ་སྐྱེ་མེད་ན། དུས་གསུམ་མམ་བཞིའི་རྒྱལ་བ་ཐམས་ཅད་དགོངས་པ་སྔ་ཕྱི་མེད་པར་རྟག་བཞུགས་ཀྱང་གཅིག་གི་གཅིག་མི་གཟིགས་ཏེ་ཆོས་ཉིད་ཕྱིར་དེ་ཉིད་གཟིགས་བྱ་གཟིགས་བྱེད་ཀྱི་ཡུལ་ལས་འདས་པར་རྟག་ཏུ་ལྷུན་གྱིས་གྲུབ་པས་རང་བཞིན་ཟབ་ཕྱིར་བཞུགས་ཞེས་རྒྱུད་ལས་གསུངས་པ་ཡིན་ནོ། །དེ་ཉིད་ངང་དུ་རྒྱལ་བ་རྣམས་དགོངས་ཀློང་གཅིག །བུམ་མཁའ་སྔ་ཕྱིའི་ནམ་མཁའ་གཅིག་ཏུ་འདྲེས་པ་བཞིན། ཡེ་ནས་དབྱེར་མེད་པ་ཉིད་དུ་དེར་རོ་གཅིག་ཏུ་གྱུར་ནས་ཆོས་ཉིད་དམིགས་མེད་དུ་བཞུགས་པ་ཡིན་ནོ། །གསུམ་པ་གནས་ལུགས་རྫོགས་རིམ་མཐར་ཐུག་བསྟན་པ། ཚུལ་འདི་ནི་ཆོས་ཉིད་སྟོང་པ་ཤེས་རབ་དང་། ཡེ་ཤེས་ཚོགས་དང་རྫོགས་རིམ་མཐར་ཐུག་པའོ། །དེའང་ཡེ་ཤེས་ཀྱི་ཚོགས་མཐར་ཐུག་པ་ཤེས་རབ་རྫོགས་རིམ་སྟོང་པ་ཉིད་བསྒོམས་པས་སེམས་ཉིད་ཀྱི་སྒྲིབ་པ་གསལ་བའི་ནང་གསལ་ཆོས་སྐུ་མཐའ་དབུས་མེད་པའི་དབྱིངས་རྫོགས་པར་མངོན་དུ་བྱེད་པའོ། །གཉིས་པ་རང་སྣང་ལོངས་སྐུའི་ཞིང་ཁམས་བཤད་པ་ལ། ཕུན་སུམ་ཚོགས་པ་ལྔའི་ངོ་བོ་མདོར་བསྟན། དེའི་རང་བཞིན་རྒྱས་པར་བཤད། སྐབས་དོན་ངེས་པར་དོན་བསྡུ་བའོ། །དང་པོ་མདོར་བསྟན་ནི། ནང་གསལ་གྱི་དབྱིངས་དེ་ཉིད་ངང་ལས་ཕྱིར་གསལ་དུ་རང་སྣང་བའི་ལོངས་སྤྱོད་རྫོགས་སྐུ་ངེས་པ་ལྔ་ལྡན་སྣང་བ་ནི་རྒྱལ་ཚབ་ཀྱི་སྟོན་པ་རིགས་ལྔ་སྟེ་སྟོང་གཟུགས་ལྟར་སངས་རྒྱས་ཉིད་ཀྱི་སྣང་བ་ལས་གཞན་དང་ཐུན་མོང་མ་ཡིན་པའི་གནས་དུས་སྟོན་པ་ཆོས་འཁོར་ཕུན་ཚོགས་ལས་ཞིང་འདིའི་གཞལ་ཡས་ཁང་པ་ལ་སོགས་པ་ནི་རང་སྣང་གཞིའི་འོད་གསལ་ལས་གྲུབ་ཀྱི། ག་ཤེད་ན་རང་མཚན་པ་ཡོད་པ་མ་ཡིན་ནོ། །གཉིས་པ་རྒྱས་པར་བཤད་པ་ལ་ལྔ། གནས། དུས། སྟོན་པ། ཆོས། འཁོར་ཕུན་སུམ་ཚོགས་པའོ། །དང་པོ་གནས་ལ་གསུམ། དང་པོ་ཞིང་དང་གཞལ་ཡས་ཁང་གི་སྣང་ཚུལ། གནས་ནི་རང་སྣང་འོད་གསལ་སྟུག་པོ་བཀོད་པའི་ཞིང་ནི། སྙིང་གའི་ཡེ་ཤེས་ཀྱི་འོད་ལྔ་རང་གསལ་བའི་གཞི་མཐར་ཐུག་པའི་ཚེ་སྣང་བ་སྟེ། ལྔ་ལྡན་འོད་ཀྱིས་ལྷུན་སྟུག་ཁ་དོག་གསལ་ཞིང་འོད་འཚེར་བ་འཇའ་ཚོན་གདངས་གསལ་ནམ་མཁའ་གང་བ་བཞིན། སྟེང་འོག་ཕྱོགས་མཚམས་ཀྱི་ནམ་མཁའི་དབྱིངས་འོད་ཁྱིམ་བཀོད་ལེགས་པས་ཁྱབ་པར་སྣང་བའི་དབུས་ན། ཡེ་ཤེས་རིན་ཆེན་པོ་ཆེའི་གཞལ་མེད་ཁང་མཛེས་འོག་གཞི་ཡེ་ཤེས་ཀྱི་འཁོར་ལོའི་སྟེང་ན་གྲུ་བཞི་སྒོ་བཞི་སྒོ་ཁྱུད་གློ་འབུར་རྟ་བབ་བང་རིམ་བཞི་དང་ལྡན་པ། རྩིག་པ་ལྔ་དང་རིན་པོ་ཆེའི་ཕ་གུ་དྲྭ་བ་དྲྭ་ཕྱེད་དང་། མདའ་ཡབ་དང་པུ་ཤུ་རྩེ་མོ་བུམ་པ་ཟླུམ་པོ་གཙང་ཁང་ཕྱུར་བུས་མཛེས་པའོ། །གཉིས་པ་བརྒྱན་དང་བཀོད་པའི་ཁྱད་པར། རིན་པོ་ཆེ་དང་དར་གྱི་འཕན་གདུགས་རྔ་ཡབ་དྲིལ་བུའི་ཕྲེང་བ་དང་། བླ་རེ་རྒྱལ་མཚན་ལ་སོགས་ནམ་མཁའ་གང་བར་བརྒྱན་ཞིང་། འདོད་ཡོན་ལྷ་མོ་མཆོད་པའི་སྤྲིན་ཕྱོགས་བཅུར་འཕྲོ་ཞིང་། དབུས་མཐིང་ག་ལ་སོགས་པའི་ཡེ་ཤེས་ཀྱི་འོད་ཟེར་འཁྱིལ་བས་ཕྱི་ནང་ཀུན་ཏུ་ཁྱབ་པ། དབུས་དང་ཕྱོགས་བཞི་སོ་སོའི་ཁ་དོག་ལ། མཐུན་པའི་བརྒྱན་དང་ཁ་དོག་རྣམ་པར་བཀྲ། ཚད་ཆེ་ཆུང་མ་ངེས་གང་བལྟས་དེ་ལྟར་སྣང་སྟེ་མཐའ་མི་མངོན་ལ། གྲངས་ནི་ཚད་མེད་ནམ་མཁའི་དབྱིངས་ཀུན་ཁྱབ། །ཇི་ལྟར་ཏིལ་གྱི་གོང་བུ་ཕྱེ་བ་བཞིན། །གསུམ་པ་གདན་ཁྲིའི་རང་བཞིན། གཞལ་ཡས་ཁང་ཀུན་གྱི་ནང་ན་མི་འཇིགས་པ་སེང་གེ། སྟོབས་གླང་ཆེན། རྫུ་འཕྲུལ་རྟ། དབང་རྨ་བྱ། ཐོགས་པ་མེད་པ་ཤང་ཤང་། རང་བཞིན་གྱིས་འོད་གསལ་བ་ཉི་ཟླ། གོས་པ་མེད་པ་པདྨས་སྤྲས་པ་སྟེ་ཡོན་ཏན་གྱི་བརྡ་དོན་དུ་མ་མཚོན་པའི་ཕྱིར་གདན་ཁྲི་དེ་དག་ཏུ་སྣང་བའོ། །གཉིས་པ་དུས་ཕུན་སུམ་ཚོགས་པ་ནི། དུས་ནི་མ་ངེས་གཞི་རྫོགས་འཕོ་འགྱུར་མེད། །དུས་གསུམ་དུས་མེད་ཀུན་ཏུ་བཟང་པོའི་དུས། །ཐམས་ཅད་མཉམ་རྫོགས་ཆོས་ཉིད་གདལ་བ་ཆེ། །རང་བཞིན་གདོད་ནས་དག་པའི་ངང་ཉིད་དོ། །སྟེ་བསམ་གྱིས་མི་ཁྱབ་པ་ཆོས་ཉིད་སྤྲོས་པ་དང་བྲལ་བ་དུས་གསུམ་འཕོ་འགྱུར་མེད་པ་ཀུན་དུ་བཟང་པོའི་དུས་རང་བཞིན་རྫོགས་པ་ཆེན་པོའི་ངང་སྟེ་མཚན་བརྗོད་ལས། དུས་གསུམ་དུས་མེད་རྟོགས་པར་གནས་། །ཞེས་པའི་དུས་སོ། །གསུམ་པ་སྟོན་པ་ཕུན་སུམ་ཚོགས་པ་ནི། སྟོན་པ་མཚན་རྫོགས་དཔེེ་བྱད་འབར་བའི་སྐུ། །རྣམ་སྣང་མི་བསྐྱོད་རིན་འབྱུང་འོད་དཔག་མེད། །དོན་གྲུབ་ལྔ་པོ་ལྔ་ལྔས་བསྐོར་བ་ལ། །ནམ་མཁའ་དབྱིངས་ཕྱུག་རྡོ་རྗེ་མཱ་མ་ཀཱི། །སངས་རྒྱས་སྤྱན་དང་གོས་དཀར་དམ་ཚིག་སྒྲོལ། །ཡབ་ཡུམ་མཉམ་སྦྱོར་སོ་སོའི་རྒྱན་རྣམས་རྫོགས། །མཐིང་ག་དཀར་སེར་དམར་ལྗང་འོད་ཟེར་འཕྲོ། །འོག་གཞི་ཞི་བ་སྟེང་གཞིི་ཁྲོ་བོའི་ཚུལ། །བུདྡྷ་བཛྲ་རཏྣ་པདྨ་ཀར། །ཧེ་རུ་ཀ་དཔལ་ལྔ་ལྔས་བསྐོར་བ་ཡང་། །ཀྲོ་ངྷཱིི་ཤྭ་རི་ལྔ་དང་མཉམ་པར་སྦྱོར། །དེ་སོགས་རྣམ་པ་བརྗོད་ཀྱིས་མི་ལང་ངོ་། །སྟེ་ཞི་བའི་སངས་རྒྱས་བཞི་བཅུ་རྩ་གཉིས་ཀྱི་གཙོ་བོ་རིགས་ལྔ་ཡབ་ཡུམ་འཁྲིལ་སྦྱོར་དུ་བཞུགས་པ་ཡང་མཉེན་དང་ལྕུགས་སོགས་ཚུལ་དགུས་འོག་གཞི་ལ་མཚན་དང་དཔེ་བྱད་འབར་བར་བཞུགས་སོ། །སྟེང་གཞི་ལ་ཁྲོ་བོ་རིགས་ལྔ་ཡང་སྒེག་པ་དཔའ་བ་སོགས་ཚུལ་དགུས་བཞུགས་སོ། །ཁྲོ་དཀྱིལ་གདན་དང་བཅས་པ། རྔམ་གློག་ལས་གསུངས་པ་བཞིན་ནོ། །དེ་སོགས་ཞི་ཁྲོའི་དཀྱིལ་འཁོར་ནི་ནམ་མཁའི་མཐའ་དང་མཉམ་པ་ཀུན་ཏུ་ཁྱབ་པས་བསམ་གྱིས་མི་ཁྱབ་བརྗོད་ལས་འདས་པའོ། །བཞི་པ་ཆོས་ཕུན་སུམ་ཚོགས་པ་ནི། ཆོས་ནི་རང་བཞིན་རྫོགས་པ་ཆེན་པོའི་ངང་། །སྨྲ་བསམ་བརྗོད་དུ་མེད་པའི་ཀློང་ཉིད་དོ། །སྟེ་སྣང་བ་དེའི་ཚེ་གཅིག་དང་དུ་མ་མེད་པའི་ཆོས་ཕུན་སུམ་ཚོགས་པ་བརྗོད་དུ་མེད་པའོ། །ལྔ་པ་འཁོར་ཕུན་སུམ་ཚོགས་པ་ལ་གཉིས། དང་པོ་ཞི་བའི་འཁོར་ནི། རང་སྣང་ལོངས་སྐུའི་ཞིང་ན་གཙོ་འཁོར་དུ་སྣང་ཡང་བཟང་ངན་མེད་པས་ཡེ་ཤེས་གཅིག་གི་རོལ་བར་རང་ཤར་བ་སྟེ། འཁོར་ནི་ཉིད་ལས་མི་གཞན་རང་སྣང་འཁོར། །སེམས་དཔའ་བརྒྱད་དང་དེ་བཞིན་སེམས་མ་བརྒྱད། །སྒོ་བ་བཞི་དང་སྒོ་མ་རྣམ་པ་བཞི། །ཞི་བ་རང་བཞིན་བཞི་བཅུ་རྩ་གཉིས་ལས། ཐུབ་པ་དྲུག་ནི་གཞན་ལ་སྣང་ཕྱིར་སྤྲུལ་པ་སྟེ་འདིར་མི་སྣང་ངོ་། །ཀུན་བཟང་ཡབ་ཡུམ་གཉིས་ནི་ནང་གསལ་ཆོས་སྐུའི་སྟོན་པར་དབྱིངས་ན་གནས་ཕྱིར་ཆོས་ཀྱི་སྐུ་རུ་བཞུགས་པས་འདིར་མི་སྣང་ངོ་། །གཙོ་བོ་རྣམ་སྣང་ཡབ་ཡུམ་དུ་བྱས་དུས་རིགས་བཞི་ཡབ་ཡུམ་བརྒྱད་བཅས། རང་སྣང་ཞི་བ་ལོངས་སྐུ་སུམ་ཅུ་རྩ་བཞི་ནི་འཁོར་དང་། གཙོ་བོ་རིགས་ལྔ་ཡབ་ཡུམ་བཅུར་བྱས་ན་ཁྱད་པར་འཁོར་ནི་ཉི་ཤུ་བཞིར་གནས་སོ། །གཉིས་པ་ཁྲོ་བའི་འཁོར་ནི། དེ་བཞིན་ཏུ་སྟེང་གཞིར་ཁྲོ་བོའི་འཁོར་ནི་ཀོ་སིང་ཕྲ་མེན་བརྒྱད། སྒོ་སྐྱོང་བཞི་དང་དབང་ཕྱུག་ཉི་ཤུ་བརྒྱད། །ཁྲོ་བོ་རང་བཞིན་ལྔ་བཅུ་རྩ་བརྒྱད་ལས། གཙོ་བོ་ཡབ་ཡུམ་བཅུར་བྱས་ན། ཁྱད་པར་འཁོར་ནི་བཞི་བཅུ་བརྒྱད་དང་བཅས་ཏེ། བྷུདྡྷ་ཧེ་རུ་ཀ་ཡབ་ཡུམ་གཉིས་བྱས་ན་ལྔ་བཅུ་རྩ་དྲུག་འཁོར་དུ་རང་སྣང་བ་ཐམས་ཅད་ཀྱང་། འབར་བའི་ཆ་ལུགས་ཟ་བྱེད་རྔམ་སྟབས་ཅན། །ཤིན་ཏུ་མི་བཟད་གར་དགུས་རོལ་བར་བཞུགས་པའོ། །གསུམ་པ་དོན་བསྡུ་བ་ལ་བཞི། དང་པོ་དཀྱིལ་འཁོར་གཞན་ཡང་ཚུལ་འདིས་དཔག་པ། དེ་ལྟར་སྒྱུ་འཕྲུལ་ཁྲོ་བོའི་དཀྱིལ་འཁོར་བཀོད་པ་ལས་ཚུལ་གཞན་ཡང་གསང་འདུས། ཀྱེ་རྡོར། འཁོར་ལོ་བདེ་མཆོག་ལ་སོགས་པའི་རྒྱུད་བླ་ན་མེད་པ་ལས། ལུས་གྲུབ་དཀྱིལ་འཁོར་ཇི་སྙེད་གསུངས་པ། དེ་སྙེད་རང་སྣང་ལོངས་སྐུའི་ཞིང་ཁམས་ཡིན་གྱི་གཞན་ལ་སྣང་བ་མ་ཡིན་ནོ། །གཞན་སྣང་གདུལ་བྱའི་ཞི་ཁྲོ་ཇི་སྙེད་པ། སྤྲུལ་སྐུས་{ སྐུའི་}བསྡུས་ཕྱིར་རང་སྣང་ལོངས་སྐུ་མིན། །སྟེ་གདུལ་བྱའི་རང་སྣང་ཡིན་པའི་ཕྱིར་རྨི་ལམ་བཞིན་ནོ། །གཉིས་པ་བདེ་གཤེགས་ལོངས་སྐུའི་སྣང་བ་བསྟན་པ། དེ་ལྟར་ཡེ་ཤེས་ཕྱིར་གསལ་དུ་སྣང་བའི་ཕུན་སུམ་ཚོགས་པ་རྣམ་ལྔའི་ཞིང་། ཐམས་ཅད་རང་སྣང་ཡིན་ཕྱིར་བཟང་ངན་མེད། །དེ་དག་ཀུན་ཀྱང་གསལ་འཚེར་ལྷུན་སྟུག་འོད་ཟེར་འཕྲོ། ཐུགས་རྣམ་པར་མི་རྟོག་པས་ལྷམ་མེ་བ་གསུང་བརྗོད་བྲལ་ཆེན་པོས་ལྷན་ནེ་བ་སྐུ་གཟི་བརྗིད་ཆེན་པོས་ལྷང་ངེའི་ཚུལ་གྱིས་བཞུགས་སོ། །འདི་ནི་འདྲེན་པ་རྣམས་ཀྱི་སྤྱོད་ཡུལ་ཏེ། འདི་དག་ཕྱིར་སྣང་དུ་མཐོང་བ་དག་པའི་སྤྱན་གྱི་དཀྱིལ་འཁོར་ལ་རང་སྣང་བའི་ཕྱིར། སངས་རྒྱས་ཐམས་ཅད་གཅིག་གིས་གཅིག་སྒྲིབ་པ་མེད་པར་གཟིགས་པས་དེ་ཡི་ཡོན་ཏན་དང་བསྔགས་པ་བརྗོད་རེས་མཛད་དོ། །གསུམ་པ་གདུལ་བྱའི་སྣང་ཡུལ་མིན་པར་བསྟན་པ། དེ་ལྟར་ཡིད་འོང་ཀུན་ནས་བཀོད་པའི་ཞིང་སངས་རྒྱས་རང་སྣང་གི་ལོངས་སྐུ་འདི་ཉིད་ས་དང་པོ་ནས་བཅུ་པའི་བར་གྱི་དག་པའི་གདུལ་བྱ་ཡིས་ཀྱང་མཐོང་མི་ནུས་ཏེ། ད་དུང་སྒྲིབ་པ་མཐའ་དག་དང་མ་བྲལ་བའི་ཕྱིར་རོ། །བཞི་པ་དུས་གསུམ་རྒྱལ་བའི་རང་སྣང་དུ་བསྟན་པ། འོ་ན་སུ་ཡི་ཡུལ་ཡིན་ཞེ་ན། རྣལ་འབྱོར་པ་ལ་རང་སྣང་སྟོང་གཟུགས་སྣང་ཡང་གཞན་གྱིས་མི་མཐོང་བ་བཞིན་དུ་ལོངས་སྐུའི་ཞིང་ཁམས་བསམ་མི་ཁྱབ་པ། དུས་གསུམ་རྒྱལ་བ་རྣམས་ཀྱི་རང་སྣང་ངོ་། །སྟེ་ལྷུན་གྱིས་གྲུབ་པའི་དབྱིངས་ཀྱི་སྣང་བ་ཡིན་པའི་ཕྱིར་རོ། །གསུམ་པ་ཕྱིར་སྣང་སྤྲུལ་སྐུའི་རབ་ཏུ་དབྱེ་བ་ལ་གཉིས། དང་པོ་མདོར་བསྟན་ནི། རང་སྣང་ལོངས་སྐུའི་ཞིང་དེ་ཉིད་ངང་ལས་གདུལ་བྱའི་འཇིག་རྟེན་དུ། འདུལ་བྱེད་སྟོན་པ་རིམ་གྱིས་སྣང་བ་ནི། །རང་བཞིན་འགྲོ་འདུལ་སྣ་ཚོགས་སྤྲུལ་པའི་སྐུ། །རྣམ་པ་གསུམ་གྱིས་འགྲོ་བའི་དོན་མཛད་དོ། །གཉིས་པ་རྒྱས་པར་བཤད་པ་ལ་གསུམ། རང་བཞིན་སྤྲུལ་སྐུ། འགྲོ་འདུལ་སྤྲུལ་སྐུ། སྣ་ཚོགས་སྤྲུལ་སྐུའོ། དང་པོ་རང་བཞིན་སྤྲུལ་སྐུ་ལ་གསུམ། འདུལ་བྱེད་སྟོན་པའི་རང་བཞིན་སྤྱིིར་བསྟན། འཁོར་དུས་རིགས་ལྔའི་རང་བཞིན་བྱེ་བྲག་ཏུ་བཤད། གནས་སྐབས་ངེས་པའི་རང་བཞིན་དོན་བསྡུ་བའོ། །དང་པོ་འདུལ་བྱེད་སྟོན་པའི་རང་བཞིན་ལ་གཉིས། རྟེན་སྐུའི་སྣང་ཚུལ་དང་། བརྟེན་པ་ཡེ་ཤེས་ཀྱི་སྣང་ཚུལ་ལོ། །དང་པོ་སྐུའི་སྣང་ཚུལ་ནི། བྱང་སེམས་རྣམས་ལ་སྣང་བ་གཟུགས་བརྙན་ལོངས་སྐུའི་སྟོན་པ་ནི་རང་སྣང་ལོངས་སྐུ་དང་ཆ་འདྲ་ལ་དངོས་མ་ཡིན་པ་བཞིན་དང་མེ་ལོང་ནང་གི་གཟུགས་བརྙན་ལྟ་བུ་སྟེ་ཕུན་སུམ་ཚོགས་པ་ལྔས་བཤད་པར་བྱ་བའི་ཚུལ་ལས། དེ་ཡང་རང་བཞིན་སྤྲུལ་སྐུའི་སྟོན་པ་ནི། །དབུས་འོག་མིན་ཤར་མངོན་དགའ་ལྷོ་དཔལ་ལྡན་ནུབ་པདྨ་བརྩེགས། བྱང་ལས་རབ་གྲུབ་པའི་འཇིག་རྟེན་རྣམ་པ་ལྔར། སྟོན་པ་རྣམ་སྣང་མི་བསྐྱོད་ལ་སོགས་རིགས་ལྔའི་སྐུ་སྟེ་རིན་འབྱུང་། འོད་དཔག་མེད། དོན་གྲུབ་རྣམས་མཚན་དང་དཔེ་བྱད་འོད་ཟེར་འབར་བ་ལ། ཞི་དང་ཁྲོ་ཚུལ་དཔག་མེད་ཚུལ་འཆང་བས། །འགྲོ་བའི་དོན་གཉིས་ལྷུན་གྱིས་གྲུབ་པར་མཛད། །དེའང་དག་དབྱིངས་ལོངས་སྐུ་སངས་རྒྱས་ཀྱིས་མཐོང་བ་དང་གཟུགས་བརྙན་ལོངས་སྐུ་སེམས་དཔས་མཐོང་བ་གཉིས་སོ། །ཞར་ལ་མཆོག་གི་སྤྲུལ་པ་མཚན་དཔེས་བརྒྱན་པ་ཡང་དེའི་ཆ་མཐུན་ཡིན་པས་སོ་སོའི་སྐྱེ་བོ་ལ་སོགས་པས་མཐོང་བ་ལ་སྦྱར་བ་ཡིན་ནོ། །གཉིས་པ་ཡེ་ཤེས་ཀྱི་གནས་ཚུལ་ལ་གཉིས། དང་པོ་མདོར་བསྟན་པ་ནི། ལོངས་སྐུ་ལྔ་པོ་དེ་ཡང་ཡེ་ཤེས་ལྔ་ལྔའི་རང་བཞིན་ཏེ་ཡེ་ཤེས་ཉི་ཤུ་རྩ་ལྔ་དང་ལྡན་པ། འདི་ལྟར་རྣམ་སྣང་ལ་ཆོས་དབྱིངས་ཡེ་ཤེས། མི་བསྐྱོད་པ་ལ་མེ་ལོང་། རིན་འབྱུང་ལ་མཉམ་ཉིད། སྣང་མཐའ་ལ་སོ་སོར་རྟོག དོན་གྲུབ་ལ་བྱ་གྲུབ་ཡེ་ཤེས་རྣམ་པ་ལྔ་པོ་ཡང་། རེ་རེའི་འཁོར་དུ་གཞན་བཞི་བཞི་ལྡན་པ་སྟེ། དེ་ཐམས་ཅད་རོ་མཉམ་རང་བཞིན་གཅིག་གི་ངང་ལས་མ་གཡོས་པ་ཉིད་དོ། །གཉིས་པ་རྒྱས་པར་བཤད་པ་ལ་ལྔ། དང་པོ་ཆོས་ཀྱི་དབྱིངས་ཀྱི་ཡེ་ཤེས་ནི། ཆོས་དབྱིངས་ཡེ་ཤེས་ཤིན་ཏུ་མི་གཡོ་བར། གཟུང་འཛིན་སྤྲོས་པའི་མཐའ་ལས་འདས་པ་ཡིན་ཏེ་གཏི་མུག་དབྱིངས་སུ་ཞི་བས་སྤྲོས་བྲལ་ནམ་མཁའ་ལྟ་བུའི་ཡེ་ཤེས་སོ། །གཉིས་པ་མེ་ལོང་ཡེ་ཤེས། མེ་ལོང་ཡེ་ཤེས་སྟོང་གསལ་འཆར་གཞིའི་ཚུལ། ཡེ་ཤེས་ཀུན་གྱི་འབྱུང་གནས་ཆེན་པོ་ཡིན་ཏེ། ཀུན་གཞིའི་རྣམ་ཤེས་གཞན་གྱི་འཆར་གཞི་དབྱིངས་སུ་ནུབ་པ་ལས་ཡེ་ཤེས་ལྷག་མ་གསུམ་གྱི་འཆར་གཞིར་གྱུར་པ་མེ་ལོང་དག་པའི་ངོས་ལྟ་བུ་གཟུང་འཛིན་གྱི་དྲི་མ་མེད་པའོ། །གསུམ་པ་མཉམ་ཉིད་ཡེ་ཤེས། མཉམ་ཉིད་ཡེ་ཤེས་ཆོས་ཀུན་མཉམ་པའི་ངང་། འཁོར་འདས་གཉིས་མེད་མཉམ་རྫོགས་ཆེན་པོ་ཡིན་ཏེ། ང་རྒྱལ་དབྱིངས་སུ་ཞི་བས་བདག་གཞན་མཉམ་པ་ཉིད་དུ་མཁྱེན་ཅིང་འཁོར་འདས་གཉིས་སུ་མེད་པའོ། །བཞི་པ་སོ་སོར་རྟོག་པའི་ཡེ་ཤེས། ཀུན་རྟོག་ཡེ་ཤེས་ཤེས་བྱ་མ་འདྲེས་མཁྱེན། ཇི་སྙེད་ཇི་བཞིན་གཟིགས་པ་རྣམ་དག་ཡིན་ཏེ། འདོད་ཆགས་དབྱིངས་སུ་ནུབ་པས་སོར་རྟོག་ཡེ་ཤེས་ཤེས་བྱ་ཇི་ལྟ་ཇི་སྙེད་པ་ཐམས་ཅད་མཁྱེན་པའོ། །ལྔ་པ་བྱ་གྲུབ་ཡེ་ཤེས། བྱ་གྲུབ་ཡེ་ཤེས་ཕྲིན་ལས་ཕུན་སུམ་ཚོགས། ཤེས་བྱ་ཀུན་ལ་རྟག་ཐོགས་མེད་པ་ཡིན་ཏེ། ཕྲག་དོག་དབྱིངས་སུ་ནུབ་པས་འགྲོ་བའི་དོན་མཛད་པ་ཐོགས་པ་མེད་པ་བྱ་བ་ནན་ཏན་གྱི་ཡེ་ཤེས་ཡིན་ནོ། །གཉིས་པ་འཁོར་དུས་རིགས་ལྔའི་རང་བཞིན་ལ་བདུན། དང་པོ་འཁོར་གྱི་སྒྲིབ་པ་སྦྱོང་ཚུལ། གདུལ་བྱའི་འཁོར་ཕུན་ཚོགས་ནི་ས་བཅུའི་སེམས་དཔལ་ལ། དེའང་ཆོས་ཕུན་ཚོགས་ནི་ཐེག་པ་ཆེན་པོ་ཏིང་འཛིན་འོད་ཟེར་རབ་བཀྱེ་བས་སྣང་བར་མཛད་དེ། མེ་ལོང་ལ་བལྟས་པར་བྱད་ཀྱི་དྲི་མ་སེལ་བ་ལྟར། སེམས་དཔའ་དེས་སྟོན་པ་ལོངས་སྐུ་ལ་བལྟས་པས་རང་གི་ས་དེའི་སྒྲིབ་པ་མཚང་སྟེ་སྦྱོང་བའི་བློ་སྐྱེས་ནས། །སེར་སྣ་ལ་སོགས་སྤངས་ཏེ་རྒྱལ་ལ་བལྟ་ཞིང་། ད་དུང་དེ་འདྲའི་སྟོན་པ་རྣམ་དག་དང་། བདག་ཉིད་མ་དག་པས་ཁྱད་ཞུགས་པར་མཐོང་ནས་སྒྲིབ་པ་སྦྱོང་བར་བྱས་ཏེ། ཀུན་ཏུ་འོད་ཀྱི་བར་དུ་འགོད་པ་སྟེ། གཟུགས་བཟང་མེ་ལོང་བསྟན་པས་དོན་མཛད་དོ། །གཉིས་པ་རྟག་ཏུ་གཞན་དོན་མཛད་ཚུལ། དུས་ནི་འགྲོ་གྲོལ་བར་དུ་རྒྱུན་མི་འཆད། །ལོངས་སྐུའི་ཞིང་ན་འཁོར་མོར་སྣང་བ་ཡིན་ཏེ། ས་བཅུའི་བྱང་སེམས་རྣམས་བྱང་ཆུབ་མ་ཐོབ་པ་དེ་སྲིད་དུ་བཞུགས་པས་མི་ཟད་པ་རྒྱན་གྱི་འཁོར་ལོའི་དུས་ཏེ་རྟག་པ་རྒྱུན་གྱི་འཁོར་མོར་བཞུགས་པའོ། །གསུམ་པ་རིགས་ལྔར་འཐད་པ་རང་བཞིན། ཚུལ་དེ་ལྟར་རིགས་ལྔར་ངེས་པའི་རང་བཞིན་ཡང་། བྱང་སེམས་རྣམས་ཀྱང་ཡེ་ཤེས་ལྔ་དང་སྐུ་ལྔ་ཐོབ་པར་བྱེད་ཅིང་ཉོན་མོངས་པ་ལྔ་སྦྱོང་བའི་རིམ་པས་སྟོན་པ་དང་ཞིང་དང་ཆོས་སོགས་ལྔར་སྣང་བ་ལས། གདུལ་བྱ་གཏི་མུག་ཤས་ཆེར་སྦྱོང་བའི་ཚེ། ཞིང་ནི་འོག་མིན་སྟོན་པ་རྣམ་སྣང་ལ། ཆོས་ནི་ཆོས་དབྱིངས་ཡེ་ཤེས་རྣམ་པར་དག་པ་འོག་མིན་ཏུ་ཐོས་པའོ། །བཞི་པ་དེའི་ཁྱད་པར་སྣང་ཚུལ། ཚུལ་དེ་བཞིན་ཞེ་སྡང་སྦྱང་ཕྱིར་མི་བསྐྱོད་པས་མེ་ལོང་ཡེ་ཤེས་ཀྱི་ཆོས་སྟོན་པ་མངོན་དགའི་ཞིང་དང་། ང་རྒྱལ་ལ་རིན་འབྱུང་གིས་མཉམ་ཉིད། འདོད་ཆགས་ལ་འོད་དཔག་མེད་ཀྱིས་སོར་རྟོག ཕྲག་དོག་སྦྱང་ཕྱིར་དོན་གྲུབ་ཀྱིས་བྱ་གྲུབ་ཡེ་ཤེས་ཀྱི་ཆོས་སྟོན་པར་སྣང་བ་ཡིན་ནོ། །ལྔ་པ་ཕྱེད་སྣང་སྤྲུལ་སྐུའི་ངེས་ཚིག དེ་ལྟར་ལོངས་སྐུའི་གཟུགས་བརྙན་སྟོན་པ་ལོངས་སྤྱོད་རྫོགས་པར་སྣང་ན་ཡང་འཁོར་དང་ཞིང་སོགས་སྟོན་པ་ཉིད་ལས་གཞན་དུ་སྣང་ཞིང་ས་བཅུའི་སྣང་བས་བསྡུས་པ་ཡིན་པས་ཕྱེད་སྤྲུལ་ལོངས་སྐུ་ཞེས་བྱ་བར་ཉི་ཟླ་ཁ་སྦྱོར་ལ་སོགས་པའི་རྒྱུད་ལས་གསུངས་སོ། །ཞིང་འདི་ཡང་ས་བཅུའི་བྱང་སེམས་ལས་གཞན་ལ་མི་སྣང་བའི་ཕྱིར་ཡང་ཕྱེད་སྤྲུལ་ཞེས་བྱ་ལ། ཐམས་ཅད་ལོངས་སྤྱོད་རྫོགས་སྐུར་སྣང་ཡང་དངོས་རང་སྣང་ལས་གཞན་མིན་པས་དེ་ཡི་གཟུགས་བརྙན་བྱེད་པ་ལྟར་སྣང་བའི་ཕྱིར་ནའང་ཕྱེད་སྤྲུལ་ཉིད་དེ་རང་སྣང་གི་རང་བཞིན་འཕྲུལ་མས་རང་བཞིན་སྤྲུལ་པའི་སྐུ་ཞེས་ཀྱང་བཤད་དོ། །དག་པའི་འགྲོ་བ་རྣམས་ལ་སྣང་བ་ཡིན། །སར་གནས་རྣམས་ལས་གདུལ་བྱ་གཞན་ལ་མིན། །དེ་ཕྱིར་ཕྱེད་སྣང་སྤྲུལ་པའི་སྐུ་ཞེས་བྱ། །དྲུག་པ་ཞིང་ཁམས་དེའི་སྣང་ཚུལ། དེ་ལྟ་བུའི་རིགས་ལྔའི་ཞིང་དེ་ཁོད་མཉམ་ཡིད་འོང་གཞ ལ་མེད་ཁང་། རིན་ཆེན་བདུན་ལྡན་འོད་ཟེར་ཕྱོགས་བཅུར་འཕྲོ་བའི་དྲྭ་བས་བརྒྱན་པ་དང་། པདྨ་ལས་སྐྱེས་རྒྱལ་སྲས་དཔག་ཏུ་མེད། གང་ཅི་འདོད་པའི་ལོངས་སྤྱོད་སྣ་ཚོགས་འདོད་དགུའི་ཆར་པ་ནམ་མཁའ་ལས་འབབ་པ་ལ་སོགས་པ་དང་དུས་བཞིར་ཆོས་གསུངས་དྲི་མེད་གཡེར་ཁའི་སྒྲ། དཔག་བསམ་རིན་ཆེན་ཆུ་མཚོས་རབ་ཏུ་མཛེས་པ་སྟེ། ཏ་ལའི་ལྗོན་པར་དྲིལ་བུ་དང་གཡེར་ཁ་ཚར་དུ་སྦྲེང་{ བསྒྲེང་} བ་ལས་རྣམ་ཐར་སྒོ་གསུམ་ལ་སོགས་པའི་ཆོས་ཀྱི་སྒྲས་ཉོན་མོངས་པའི་གནོད་པ་ཞི་བར་བྱེད་པ་རྣམས་རང་འབྱུང་བ། རྫིང་བུ་ཡན་ལག་བརྒྱད་ལྡན་སྤྲུལ་པའི་བྱ་ཚོགས་སྣ་ཚོགས་བརྩེ་བ་ལས་ཉོན་མོངས་པས་གདུང་བ་སེལ་བ་ལ་སོགས་པའི་ཡོན་ཏན་དཔག་ཏུ་མེད་པར་སྣང་བ་འདི་ནི་ཞི་བ་རང་བཞིན་སྤྲུལ་པ་ཡིན་ནོ། །དེ་དག་ཀྱང་རང་སེམས་དག་པའི་སྣང་བ་ཙམ་ལས་ལོགས་ཤིག་ཏུ་བགྲོད་ནས་ཕྱིན་དུ་ཡོད་པ་མ་ཡིན་ཏེ། རྨི་ལམ་ལྟར་བྱང་སེམས་རྣམས་ལ་རང་སྣང་བ་ནི་སངས་རྒྱས་ཀྱི་ཕྱེད་སྤྲུལ་དང་ཐུན་མོང་དུ་སྤྱོད་པ་མཐུན་པར་སྣང་བའོ། །བདུན་པ་མཁའ་སྤྱོད་ཚུལ་འདིར་བསྡུ་ཚུལ། ཞི་བ་རང་བཞིན་སྤྲུལ་པའི་སྐུ་བྱང་སེམས་སར་བཞུགས་རྣམས་ལ་སྣང་བ། དེ་བཞིན་ཁྲོ་ཚུལ་དཀྱིལ་འཁོར་དཔག་ཏུ་མེད། །མཁའ་འགྲོའི་སྤྲིན་ཕུང་འཕྲོ་བའི་མཁའ་སྤྱོད་གནས། ནང་གསལ་ལས་རང་སྣང་ཕྱིར་གསལ་དུ་བཞེངས་པ། ཧེ་རུ་ཀ་དཔལ་རིགས་ལྔའི་ཞིང་ཁམས་ཉིད་ལས་ཟླ་བའི་གཟུགས་བརྙན་ཆུར་སྣང་བ་བཞིན་གསང་སྔགས་ཀྱི་རིག་པ་འཛིན་པའི་གྲུབ་པ་ཚེ་དབང་དང་ཕྱག་ཆེན་རིག་འཛིན་རྣམས་ལ། དུག་ལྔ་སྦྱོང་བའི་ཕྱིར་སྐུ་ལྔ་དང་ཡེ་ཤེས་ལྔའི་ཆོས་རང་བྱུང་དུ་རབ་ཏུ་སྣང་བ་ཡིན་པ་ལས། གཏི་མུག་འདུལ་བའི་ཚེ་དེ་བཞིན་གཤེགས་པའི་རིགས་ཀྱི་ཁྲོ་བོ་བུདྡྷ་ཧེ་རུ་ཀའི་དཀྱིལ་འཁོར་འོག་མིན་དུ་གསལ་ཞིང་། དེར་བགྲོད་ནས་མཁའ་འགྲོ་དང་རྣལ་འབྱོར་དབང་ཕྱུག་རིག་པ་འཛིན་པ་གཞན་རྣམས་དང་སྐལ་བ་གཅིག་པས་སྔགས་ཀྱི་ལྟ་སྤྱོད་རླབས་པོ་ཆེ་ལ་སྤྱོད་པའོ། །དེ་བཞིན་དུ་རྡོ་རྗེའི་ཞིང་ན་བཛྲ། རིན་པོ་ཆེའི་ཞིང་ན་རཏྣ། པདྨ་ཞིང་ན་པདྨ། ལས་ཀྱི་ཞིང་ན་ཀརྨ་ཧེ་རུ་ཀའི་དཀྱིལ་འཁོར་དང་ཞིང་གི་བཀོད་པ་དང་། མཁའ་འགྲོ་གྲུབ་པ་ཅན་གྱི་གྲོགས་དང་རྣལ་འབྱོར་མའི་ཚོགས་དང་སྐལ་བ་མཉམ་ཞིང་སྡོང་གྲོགས་བྱེད་པས་འཆི་ཁར་ཞིང་དེར་གདུགས་དང་རྒྱལ་མཚན་རོལ་མོའི་སྤྲིན་ཕུང་གིས་བསུ་ཞིང་རིག་འཛིན་གྱི་བླ་མ་རྣམས་ཀྱིས་གཟིགས་ནས་དྲངས་ཏེ་རིག་འཛིན་གྱི་གྲལ་ལ་འཇོག་པའི་གནས་ལྔ་པོ་འདི་ནི་དེང་སང་བདེ་ཆེན་མཁའ་སྤྱོད་ཅེས། མཁས་གྲུབ་རྣམས་ལ་རབ་ཏུ་གྲགས་པ་ཡིན་ཏེ་ས་ཐོབ་རྣམས་དང་སྐལ་བ་མཚུངས་པའི་ཞིང་དང་། ཆོས་དང་། སྟོན་པ་དང་། གྲོགས་སུ་གཅིག་པས་རང་རང་གི་ལྟ་བ་དང་ཏིང་ངེ་འཛིན་གྱི་དངོས་གྲུབ་ཅན་གང་ན་སྤྱོད་པ་ལས་གཞན་ཞིག་ཏུ་བསམ་པར་མི་བྱའོ། །འདི་ཉིད་དུ་ལམ་སྦྱོང་བའི་རིག་པ་འཛིན་པ་རྡོ་རྗེའི་བླ་མ་རྣམས་བཞུགས་སོ་ཞེས་གྲགས་པ་ཡིན་ནོ། །གཉིས་པ་འགྲོ་འདུལ་སྤྲུལ་སྐུ་ལ་གསུམ། འགྲོ་འདུལ་སྤྲུལ་པའི་རང་བཞིན་བསྟན་པ། དེ་ལ་བརྟེན་པའི་ཡེ་ཤེས་བསྟན་པ། དེ་ཉིད་ངེས་པའི་རྒྱུ་མཚན་བསྟན་པའོ། །དང་པོ་འགྲོ་འདུལ་སྤྲུལ་པའི་རང་བཞིན་བསྟན་པ་ལ་གསུམ། དང་པོ་ཐུབ་པ་དྲུག་གི་རང་བཞིན་བསྟན་པ། འོག་མིན་གྱི་ལོངས་སྐུའི་གནས་དྲུག་ནས་འོད་ཟེར་དྲུག་འགྲོ་དྲུག་གི་གནས་སུ་འཕྲོས་པའི་རྩེ་མོ་ལས་ཡི་གེ་ཕྲེང་བའི་འཁོར་ལོ་སོ་སོའི་སྟོན་པར་སྣང་བས་དོན་མཛད་པ། དེ་ཉིད་ངང་ལས་འགྲོ་འདུལ་སྤྲུལ་པའི་སྐུ། །འགྲོ་དྲུག་གནས་སུ་རང་རང་སྟོན་པར་སྣང་། །དེ་ཡང་ལྷའི་གནས་སུ་བརྒྱ་བྱིན་ལ་སོགས་པ་ལྷའི་ཐུབ་པ་དང་། ལྷ་མིན་གནས་སུ་ཐགས་བཟང་རིས་དང་ནི། མི་ཡི་གནས་སུ་ཤཀྱ་ཐུབ་པ་ཆེན་པོ། དུད་འགྲོའི་གནས་སུ་སེངྒེ་རབ་བརྟན་དང་། ཡི་དྭགས་གནས་སུ་ཁ་འབར་དེ་བ། དམྱལ་གནས་སུ་ཨ་བ་གླང་མགོ་ལ་སོགས་པ་སྟེ། ཐུབ་པ་དྲུག་གིས་ཕྱོགས་བཅུའི་ཞིང་རྣམས་སུ། འགྲོ་བ་དྲུག་གི་རྒྱུད་དྲུག་སོ་སོར་སྦྱོང་བའི་དོན་མཛད་པའོ། །གཉིས་པ་རེ་རེའང་དཔག་མེད་མཐའ་ཡས་པར་བསྟན་པ། ཐུབ་པ་དྲུག་ཅེས་སྨོས་པ་ནི་སེམས་ཅན་གྱི་རིག་དྲུག་ཏུ་འདུས་པ་འདུལ་བ་ལ་དགོངས་ཏེ། དེ་ཡང་བརྒྱ་བྱིན་ལ་སོགས་པ་གཙོ་བོའི་གྲངས་ཏེ་མཚོན་པ་ཙམ་སྟེ་དབྱིངས་ལས་སྤྲུལ་པ་དང་། སྤྲུལ་པ་དེས་ཀྱང་། ཡང་སྤྲུལ་རྣམས་ནི་བསམ་གྱིས་མི་ཁྱབ་སྟེ་ཚད་མེད་པས་ལྷ་ཡི་གནས་སུའང་རྒྱལ་ཆེན་བཞི་ནས་གནས་རིས་སོ་སོ་རུ། ཚངས་དང་དབང་ཕྱུག་འོག་མིན་བར་སྙེད་ཏུ་རང་རང་འདུལ་བྱེད་སྟོན་པའི་ཚུལ་རྣམས་སྣང་ནས་དོན་མཛད་པའོ། །གསུམ་པ་དེའི་རྒྱུ་མཚན་འཐད་པ་འགོད་པ། དེ་བཞིན་དུ་མི་ལའང་ཐུབ་པ་གཅིག་པུར་མ་ཟད་དེ། རྒྱལ་རིགས་དང་། བྲམ་ཟེ་དང་། བུད་མེད་ལ་སོགས་པ་གང་འདུལ་དེ་ལ་དེར་སྣང་སྟེ་འདུལ་ཞིང་། ཐུབ་པ་གཅིག་པུས་ཀྱང་། ཉན་ཐོས་རང་རྒྱལ་བྱང་ཆུབ་སེམས་དཔའ་དང་། །རྒྱལ་པོ་ལ་སོགས་པར་སྤྲུལ་ནས་མི་རྣམས་འདུལ་བའི་དོན་མཛད་པ་བཞིན་ནོ། །དེ་བཞིན་ལྷ་མིན་གནས་སུའང་སོ་སོའི་འདུལ་བྱེད་དང་། དུད་འགྲོའི་རིས་སུའང་བྱ་ལ་བྱར་སྣང་ཞིང་། །རི་དྭགས་རྣམས་ལ་སེངྒེ་མཆོག་ལ་སོགས། །སོ་སོའི་འདུལ་བྱེད་སྟོན་པ་བསམ་མི་ཁྱབ། །དེ་བཞིན་ཡི་དྭགས་དམྱལ་བའི་འཇིག་རྟེན་དུ། །རང་རང་མཐུན་པའི་གཟུགས་གྱིས་དོན་མཛད་དོ། །དེ་ཡང་ཕལ་པོ་ཆེ་ལས། ཀྱེ་རིགས་ཀྱི་བུ། དེ་བཞིན་གཤེགས་པའི་སྤྲུལ་པ་ནི་ཚད་མེད་དེ་འགྲོ་བ་གང་དང་གང་གིས་འདུལ་བ་དེ་དང་དེའི་གཟུགས་དང་ཞེས་པ་ནས། དགེ་སྦྱོང་དང་། བྲམ་ཟེ་དང་། ཡི་དྭགས་དང་དམྱལ་བའི་གཟུགས་ཀྱིས་འདུལ་བ་རྣམས་ལ་ཡང་དེའི་གཟུགས་སུ་སྤྲུལ་ཞིང་དོན་མཛད་དོ། །ཞེས་སོ། །གཉིས་པ་དེ་ལ་བརྟེན་པའི་ཡེ་ཤེས་ལ་གཉིས། དང་པོ་ཡེ་ཤེས་ཀྱི་ངོ་བོ་བསྟན་པ། དེ་ལྟར་འགྲོ་འདུལ་རྣམས་ལ་ཡེ་ཤེས་གཉིས། །ཇི་ལྟ་ཇི་སྙེད་མཁྱེན་པའི་རྣམ་པ་སྟེ། །ཆོས་ཉིད་དང་ནི་ཆོས་ཅན་མ་འདྲེས་པར། །སོ་སོར་མཁྱེན་ནས་གདུལ་བྱའི་དོན་གཉིས་མཛད་སྟེ། འགྲོ་བ་འདུལ་བ་དང་། མཆོག་གི་སྤྲུལ་པའི་ཡེ་ཤེས་ནི། ཆོས་ཉིད་ལ་ལྟོས་ཏེ་ཇི་ལྟ་བ་དང་། ཆོས་ཅན་ལ་ལྟོས་ཏེ་ཇི་སྙེད་པ་མཁྱེན་པ་སྟེ། གཉིས་པ་ཡེ་ཤེས་གཉིས་ཀྱི་དབྱེ་བ་བསྟན་པ། འདི་ལྟར་ཇི་ལྟའི་ཡེ་ཤེས་ཆོས་ཉིད་སྟོང་པའི་ངོ་བོ་ཉིད་དངོས་མཁྱེན་ནས། འགྲོ་བ་རྣམས་ལ་རང་བཞིན་གྱིས་མ་སྐྱེས་པས་ཉེ་བར་ཞི་བའི་ཆོས་སྟོན་ཅིང་། ཇི་སྙེད་ཡེ་ཤེས་གདུལ་བྱའི་སེམས་དང་དབང་པོ་དང་བག་ཉལ་སོགས། མ་འདྲེས་མཁྱེན་ནས་དེ་དང་མཐུན་པའི་ཆོས་ཚུལ་བསམ་ཡས་སྟོན་པའོ། །གསུམ་པ་དེ་ཉིད་ངེས་པའི་རྒྱུ་མཚན་བསྟན་པ་ལ་གསུམ། དང་པོ་མ་དག་གདུལ་བྱའི་སྟོན་པར་བསྟན་པ། དེ་ལྟར་ཐུབ་པ་དྲུག་འདི་ནི་མ་དག་འགྲོ་ལ་སྣང་བ་སྟེ། དེ་ཡང་སྤྲུལ་སྐུའི་གནས་སམ་ཞིང་ནི་འགྲོ་དྲུག་གི་སྣང་བའི་འཇིག་རྟེན་དྲུག་རྣམས་སུ། སྟོན་པ་འགྲོ་འདུལ་དེའི་རང་གི་སྣང་བ་དང་མཐུན་པ་ཡིས། ཆོས་ནི་སེམས་ཅན་གྱི་བློ་རྟོག་དང་དབང་པོ་ཐ་དད་པའི་དབང་གིས་མ་ངེས་ཐེག་པ་སྣ་ཚོགས་ཉིད། དུས་ནི་གདུལ་བྱའི་སྐལ་བར་མཚུངས་པར་སྣང་བ་སྟེ་སྟོན་པ་གནས་དང་འཁོར་རྣམས་ཚོགས་པའི་དུས་དེར་གསུངས་སོ། །གཉིས་པ་འགྲོ་སེམས་མཐུན་པའི་ལས་སྣང་དུ་བསྟན་པ། ཚུལ་དེ་ལྟར་འགྲོ་དྲུག་འཇིག་རྟེན་དྲུག་པོ་ཡང་། འགྲོ་བའི་ལས་དང་བག་ཆགས་དགེ་སྡིག་རྒྱུ་འབྲས་ཀྱིས། བདེ་སྡུག་འཁོར་བ་མཐོ་དམན་དུ་རྣམ་པ་སྣ་ཚོགས་ཉིད་མྱོང་བ་དང་། སྟོན་པ་དྲུག་ཀྱང་འགྲོ་སེམས་རང་སྣང་སྟེ་འཁྲུལ་སྣང་གི་སྣོད་བཅུད་རྫུན་པ་ལྟར་དེ་ལ་སྣང་བའི་སངས་རྒྱས་ལ་སོགས་པའང་བརྫུན་ལ། ཡོད་པ་མ་ཡིན་པ་སྟེ་མེད་བཞིན་སྣང་བའི་ཕྱིར་རྨི་ལམ་ནང་གི་སངས་རྒྱས་སེམས་ཅན་བཞིན་ནོ་དེས་ན་འཁོར་འདས་རྨི་ལམ་ལྟ་བུར་སྣང་དུས་འདིར་ངོ་བོ་ཡེ་ནས་དག་པའི་སངས་རྒྱས་ཡིན་ཀྱང་རྣམ་པ་མ་དག་པས་འགྲོ་དྲུག་གི་སེམས་ཅན་དང་། དེ་འདུལ་བའི་སྟོན་པའང་དེ་དག་གི་གཟུགས་ངན་པ་ལ་སོགས་པ་སྣ་ཚོགས་སྣང་ལ་ཐུགས་རྗེའི་རོལ་བར་ཤར་བ་སྟེ་དེ་ལྟ་བུའི་སེམས་ཅན་ལ་སངས་རྒྱས་ཀྱི་ཐུགས་རྗེས་གཟིགས་པ་ཡང་གདུལ་བྱ་དང་གདུལ་བྱེད་དུ་འབྲེལ་བས་དོན་མཛད་དོ། །གསུམ་པའི་ཐུགས་རྗེ་སྤྲུལ་པའི་བྱིན་རླབས་བསྟན་པ། སྤྲུལ་སྐུ་ཆེན་པོ་རྣམ་དྲུག་པོ་འདི་ནི་དབྱིངས་ཀྱི་ངང་ནས་ཡེ་ཤེས་ཀྱི་ངོ་བོ་ཚད་མེད་པའི་ཐུགས་རྗེའི་བྱིན་རླབས་ལས་རང་སྣང་བའི་སྤྲུལ་པ་ཡིན་པས་སེམས་ཅན་གྱི་དོན་རང་རང་གི་སྐལ་བ་བཞིན། འབད་རྩོལ་མེད་པར་སྲིད་པ་ཇི་སྲིད་བར་འཁོར་བ་ལས་འདྲེན་ཞིང་སྡུག་བསྔལ་ལས་སྐྱོབ་པའི་ཕྲིན་ལས་རྒྱུན་མི་འཆད་པར་དངོས་དང་བརྒྱུད་ནས་མཛད་དེ། མངོན་རྟོགས་རྒྱན་ལས། དེ་བཞིན་འཁོར་བ་ཇི་སྲིད་འདིའི། །ལས་ནི་རྒྱུན་མི་འཆད་པར་འདོད། །ཅེས་དང་། རྣམ་པ་ནི་སྐུ་སྣང་བ་བརྒྱ་བྱིན་ལ་སོགས་པ་དཔེ་དགུས་མཚོན་པའོ། །གསུམ་པ་སྣ་ཚོགས་སྤྲུལ་སྐུ་ལ་གཉིས། དང་པོ་སྤྲུལ་སྐུའི་སྣང་ཚུལ། འགྲོ་འདུལ་སྤྲུལ་པའི་དུས་དང་ཡེ་ཤེས་ཀྱི་དོན་མཛད་པ་ནམ་མཁའ་ལྟ་བུའི་ཕྲིན་ལས་ཕུན་སུམ་ཚོགས་པ། དེ་ཉིད་ངང་ལས་སྣ་ཚོགས་སྤྲུལ་པའི་སྐུ། །སེམས་མེད་བེམ་པོའི་ཚུལ་གྱིས་སྣང་བ་སྟེ། །ཇི་ལྟར་འཇིག་རྟེན་གྱི་ཁམས་ན་སངས་རྒྱས་ཀྱི་སྐུས་དོན་མཛད་པའི་བྱེ་བྲག་ལ། རིས་སུ་བྲིས་དང་འབུར་དུ་དོད་པ་དང་། སྐུ་གསུང་ཐུགས་རྟེན་རང་བྱོན་དང་ཡི་གེ་དང་ལྷ་ལ་སོགས་མཆོད་པའི་རྟེན་དང་ནི། དེས་མཚོན་ཏེ་རྟེན་གང་ཞིག་ཐར་པའི་ས་བོན་འཇོག་ཅིང་ཕན་པར་བྱེད་པ་ཐམས་ཅད་དེ། མདོ་རྒྱན་ལས། བཟོ་དང་སྐྱེ་དང་བྱང་ཆུབ་ཆེ། །མྱ་ངན་འདས་པ་རྟག་སྟོན་པས། །སངས་རྒྱས་སྤྲུལ་པའི་སྐུ་འདི་ནི། །རྣམ་པར་གྲོལ་བའི་ཐབས་ཆེན་ནོ། །ཞེས་པས། བཟོ་ནི་བཟོའི་རྣམ་པར་སྣང་བ་བཤད་མ་ཐག་པ་རྣམས་སོ། །སྐྱེ་བ་ནི་སེམས་ཅན་ལ་དངོས་སུ་ཕན་པ་དེའི་ལུས་སུ་སྤྲུལ་པ་སྟེ། ཉ་བོ་ཆེ་དང་། སྲོག་ཆགས་དེས་པ་དང་། རྟ་རྒྱལ་བ་ལ་ཧ་ལ་སོགས་པར་སྤྲུལ་ནས་དོན་མཛད་པའོ། །མཆོག་གི་སྤྲུལ་པ་ནི་མཛད་པ་བཅུ་གཉིས་སྟོན་པའོ། །དེ་བཞིན་དུ་པདྨ་དཔག་བསམ་ཤིང་དང་སྐྱེད་མོས་ཚལ། ཁང་བཟང་མཆོག་དང་ཀུན་དགའི་ར་བ་དང་། ཚོང་པ་སོགས་ལ་སྤྲུལ་པའི་གྲོང་དང་གྲུ་གཟིངས་ཟམ་པ་དང་། མར་མེ་ནོར་བུ་ཟས་གོས་གཞོན་པ་སོགས་སུ་སྤྲུལ་ནས། འགྲོ་བའི་དོན་མང་བྱེད་པའི་བེམ་པོར་སྣང་ཞིང་གང་ལ་གང་ཕན་ཁོ་ན་བསྒྲུབ་པར་མདོ་སྡེ་རྣམས་ལས་གསུངས་སོ། །གཉིས་པ་འགྲོ་དོན་མཛད་ཚུལ། སྤྲུལ་པའི་རོལ་པ་དེས་ཀྱང་གནས་སྐབས་སུ་སེམས་ཅན་སོ་སོའི་ཡིད་དང་ལུས་ངག་དགའ་སྐྱིད་བདེ་བའི་གནས་མཛད་ནས། མཐར་ཐུག་ཞི་བའི་ལམ་སངས་རྒྱས་ཀྱི་ས་ལ་འགོད་པས་ན། སྣ་ཚོགས་སྤྲུལ་པས་འགྲོ་དོན་ལྷུན་གྱིས་གྲུབ་པ་སྟེ། རྒྱུད་བླ་ལས། སྣང་བ་དེ་ནི་ཤིན་དུ་ཡང་། །རྟོག་པ་མེད་ཅིང་གཡོ་བ་མེད། །དེ་ལྟ་མོད་ཀྱི་ས་སྟེང་ན། །དོན་ཆེན་གྱིས་ནི་ཉེ་བར་གནས། །ཞེས་སོ། །དོན་གསུམ་པ་དབྱིངས་རྣམ་དག་གི་འཆར་གཞིའི་དོན་བསྡུ་བ། སྐུ་དེ་དག་དབྱིངས་ལས་བྱུང་ཞིང་དབྱིངས་སུ་ཐིམ་པའི་ཚུལ་གྱིས་མཇུག་བསྡུ་དེ་ནི། གདུལ་བྱ་མེད་ན་གདུལ་བྱེད་དབྱིངས་སུ་ནུབ། །རང་སྣང་ལོངས་སྐུ་ཆོས་སྐུའི་ངང་དུ་ཐིམ། །ཆུ་སྣོད་མེད་ན་ཆུ་ཟླ་མཁའ་ལ་ཐིམ། །ཚེས་ཀྱི་དབང་གིས་ཟླ་བ་དབྱིངས་སུ་ནུབ། །གནམ་གང་ཟླ་བ་འཕེལ་འགྲིབ་མེད་པ་བཞིན། །གདུལ་བྱ་ཡོད་ན་སྔོན་བཞིན་རིམ་གྱིས་སྣང་། །འདི་ནི་འབྲས་བུ་ལྷུན་གྱིས་གྲུབ་པ་ཡིན། །ཅེས་པ་སྟེ། ཇི་ལྟར་ཆུ་སྣོད་མེད་དུས་ཟླ་བའི་ངང་དུ་ཆུ་ཟླའི་གཟུགས་བརྙན་རང་ཐིམ་པ་ལྟར། གདུལ་བྱའི་ཆུ་སྣོད་མེད་ན་དེའི་ངོར་སྣང་བའི་སངས་རྒྱས་སྤྲུལ་སྐུའི་ཟླ་གཟུགས་རང་སྣང་ལོངས་སྐུའི་ངང་ཙམ་ལས་མེད་པས་དེར་ཐིམ་པའོ་ཞེས་བཏགས་ཀྱང་གཅིག་ནས་སོང་སྟེ་གཅིག་ཏུ་ཐིམ་པ་ལྟར་མ་ཡིན་ནོ། །ཟླ་བའང་གནམ་གང་གི་ཚེ་ན་ནང་གསལ་དུ་ཐིམ་པ་ལྟར། རང་སྣང་གི་ལོངས་སྐུའང་ནང་གསལ་ཆོས་སྐུའི་དབྱིངས་སུ་ཐིམ་པས་ཡེ་ཤེས་དབྱིངས་སུ་ཐིམ་པས་ཡེ་ཤེས་དབྱིངས་སུ་འཁྱིལ་བ་ཞེས་བྱའོ། །དེའི་ཚེ་སོ་སོར་རང་རིག་པའི་ཡེ་ཤེས་ཉིད་ཕྲ་བའི་ཡེ་ཤེས་སུ་གྱུར་པས་ཤིན་ཏུ་མཉམ་པར་བཞག་པའི་གནས་སྐབས་སོ། །དབུ་མ་ལས། དེའི་ཚེ་འཇུག་པ་ཆོས་ཀྱི་དབྱིངས་སུ་ཞི་བས་གང་དུའང་དམིགས་སུ་མེད་པ་འགོག་པ་དམ་པའི་ངང་ལ་མཉམ་པར་བཞག་པའི་ཞེས་འདོད་པ། རྒྱུད་བླ་མ་ལ་སོགས་པ་ནས། མཉམ་པར་བཞག་པའི་ཡེ་ཤེས་ཞེས་འདོད་དོ། །ཡང་གདུལ་བྱ་ཡོད་ན་གཡོ་བ་དང་འབད་པའི་རྩོལ་བ་མེད་པར་སྐད་ཅིག་གིས་ཕྱིར་གསལ་དུ་རང་སྣང་བ་ལོངས་སྤྱོད་རྫོགས་པའི་སྐུ་དང་སྤྲུལ་པའི་སྐུ་རྣམས་སྔ་ཕྱི་མེད་པར་དོན་མཛད་པ་སྔ་མ་བཞིན་མི་རྟོག་པའི་ངང་ནས་འབྱུང་ངོ་། །འདི་ལ་དབུ་མ་ནས་སྔོན་གྱི་སྨོན་ལམ་ལས་གཞན་སྣང་དུ་དོན་མཛད་ཅེས་འདོད་ལ། རྒྱུད་བླ་མ་ལ་སོགས་པ་ནས་རྗེས་ཐོབ་ཏུ་དོན་མཛད་ཀྱང་མཉམ་བཞག་གི་ངོ་བོ་ལས་མ་གཡོས་པ་ཞེས་འདོད་དེ། རྒྱུད་བླ་མ་ལས། མི་རྟོག་པ་དང་དེ་ཡི་ནི། །རྗེས་ཐོབ་དེ་ནི་ཡེ་ཤེས་འདོད། །ཅེས་དང་། བྱང་ཆུབ་སེམས་དཔའི་ཚུལ་འདི་ནི། །རྗེས་ཐོབ་དེ་བཞིན་གཤེགས་རྣམས་དང་། །སེམས་ཅན་ཡང་དག་སྒྲོལ་བ་ལ། །འཇིག་རྟེན་ན་ནི་མཉམ་པ་ཉིད། །དེ་ལྟ་མོད་ཀྱི་ས་རྡུལ་དང་། །རྒྱ་མཚོ་བ་ལང་རྨིག་རྗེས་ཀྱི། །ཁྱད་པར་གང་ཡིན་སངས་རྒྱས་དང་། །བྱང་ཆུབ་སེམས་དཔའི་ཁྱད་དེ་ཉིད། །ཅེས་སོ། །གསུམ་པ་ལེའུ་རྫོགས་པ་མཇུག་གི་དོན་ལ་གཉིས། དང་པོ་སྐབས་ཀྱི་དགེ་བ་བསྔོ་བ། དེ་ལྟར་སྙིང་པོའི་དེ་ཁོ་ན་ཉིད་ཀྱི་དགེ་བ་ཞི་བ་མཆོག་གི་རང་བཞིན་གྱིས། འགྲོ་ཀུན་སེམས་ཉིད་འོད་གསལ་དབྱིངས་གཞོལ་ཏེ། འགྲོ་བ་ཐམས་ཅད་སྲིད་ཞིའི་མཐར་འཛིན་པའི་ཉེས་ཆའི་དྲི་མ་ཡིས། དུབ་པའི་སེམས་ཉིད་ཐམས་ཅད་མཁྱེན་པའི་བདེ་བ་ཚད་མེད་པས་དབང་འབྱོར་པའི་ས་ལ་དེ་རིང་ངལ་སོས་ཤིག་ཅེས་སྨོན་པའོ། །གཉིས་པ་ལེའུའི་མཚན། རྫོགས་པ་ཆེན་པོ་སེམས་ཉིད་ངལ་གསོ་ལས་འབྲས་བུ་ལྷུན་གྲུབ་ཆེན་པོའི་ལེའུ་སྟེ་བཅུ་གསུམ་པའོ། །༈ སྤྱི་དོན་གསུམ་པ་མཐར་ཕྱིན་པ་མཇུག་གི་དོན་ལ་ལྔ། དང་པོ་དགེ་བ་གཞན་དོན་དུ་བསྔོ་བ། དེ་ལྟར་དྲི་མ་མེད་པའི་ཡིད་མཁར་ལེགས་པར་བཤད་པའི་བསོད་ནམས་ཀྱི་སྤྲིན་ཕུང་ཆེན་པོ་ཐོས་བསམ་སྒོམ་པ་ལས་བྱུང་བའི་ཤེས་རབ་ཀྱི་འབྲུག་ལྟར་སྒྲོགས་ཤིང་། ལུང་རིགས་མན་ངག་གི་གློག་ཕྲེང་བཟང་པོ་འགྱུར་བ་ལས་འཐོན་པའི། ཞི་བདེའི་རང་བཞིན་དགེ་བའི་ཆར་གྱི་ཚོགས་མང་པོས། ས་གསུམ་གྱི་འགྲོ་བའི་སེམས་ཀྱི་ས་གཞི་ཆོས་ཁམས་དགེ་བ་སྙིང་པོའི་ས་བོན་ཅན་གྱི་རྒྱུད་བརླན་པས་ལེགས་པར་རབ་ཏུ་རྒྱས་ཏེ་མཐར་ཕྱིན་པ་རྒྱལ་བའི་འབྱོར་ཚོགས་ལྷུན་གྱིས་གྲུབ་པ་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་ཡོན་ཏན་དང་། འཕྲིན་ལས་ཆེན་པོའི་མངའ་དབང་རྫོགས་པར་ཤོག་ཅིག་ཅེས་པའོ། །གཉིས་པ་ལེགས་བཤད་བརྩམ་པའི་འཐད་པ་འགོད་པ། དུས་དེང་སང་སྔོན་གྱི་མཁས་གྲུབ་རྣམས་ནི་གཤེགས་ལ། དེ་དག་གི་གཞུང་ལུགས་ཆེན་པོ་རྣམས་ཀྱང་ཕལ་གྱི་བློ་མིག་མ་དག་པས་རང་རང་གི་ངན་རྟོག་གིས་དཀྲུགས་པས་གསལ་བར་མེད་ལ། སྔགས་ཀྱི་རྒྱུད་སྡེ་ཆེན་པོ་རྣམས་དང་ཕ་རོལ་ཏུ་ཕྱིན་པའི་གཞུང་སོ་སོའི་ལམ་གྱི་དགོངས་པ་ཤིན་ཏུ་བརླིང་པས། མང་དུ་མ་ཐོས་ཤིང་རྟོག་གེའི་ངན་རྟོག་ཙམ་གྱིས་དཀྲུགས་ནས་བླུན་པོ་མཁས་པའི་མངོན་རློམ་ཅན་རྣམས་ཀྱིས་འགལ་བར་འཛིན་པས་དགོངས་པ་ཟབ་མོ་རྣམས་གཅིག་ཏུ་སྡུད་མི་ཤེས་པ། དེ་ཕྱིར་དེ་དག་ཅུང་ཟད་རེའི་ཚིག་ཙམ་ལྷུར་ལེན་པས་ཕྱོགས་རེའི་མིག་ཅན་དུ་གྱུར་པ་ཡིན་ནོ། །གསུམ་པ་གཞན་དོན་དུ་བསྟན་བཅོས་ཇི་ལྟར་བརྩམ་ཚུལ། ཚུལ་དེ་དག་མཐོང་ནས་གཞུང་འདིར་ནི་རྒྱུ་མཚན་ཉིད་ཀྱི་ཐེག་པའི་ངེས་དོན་གཞི་ལམ་འབྲས་བུ་དང་བཅས་པ་དང་། འབྲས་བུ་གསང་སྔགས་ཀྱི་ཐེག་པའི་གཞི་ལམ་འབྲས་བུའི་དོན་རྣམས་མདོ་དང་། རྒྱུད་དང་། ལུང་དང་། རིགས་པ་དང་། མན་ངག་གི་གནས་བསྟན་པ་ལས་ཇི་སྐད་འབྱུང་བ་དང་། བླ་མ་དམ་པ་ལས་འོངས་པའི་ཟབ་མོའི་དེ་ཁོ་ན་ཉིད་ཀྱི་དོན་མཆོག་རྣམས། གཅིག་ཏུ་བསྡུས་ནས་ཉམས་སུ་ལེན་པའི་ཐབས་གངས་རི་ཐོད་དཀར་རང་བྱུང་པདྨས་བྱིན་གྱིས་བརླབས་པས་ཨོ་རྒྱན་རྫོང་ཞེས་བཏགས་པ་གྲུབ་པས་རྟེན་པའི་གནས་སུ་དྲི་མེད་འོད་ཟེར་ཤར་བས་ལེགས་པར་བཀོད་པའོ། །བཞི་པ་བསྟན་བཅོས་བཀྲ་ཤིས་ཤིང་དགེ་བ་རླབས་ཆེ་བར་བསྔོོ་བ། དེ་ལྟར་ཟབ་ཅིང་རྒྱ་ཆེ་བར་བསྟན་ནས་བཀོད་པ་ལས་བྱུང་བའི་དགེ་བ་མཆོག་ཏུ་གྱུར་པ་དེ་ཡིས་ཁམས་གསུམ་རིགས་དྲུག་སྲིད་པ་གསུམ་གྱིས་བསྡུས་པའི་སེམས་ཅན་ཇི་སྙེད་པ་རྣམས། མ་ལུས་པར་འབད་པས་རྩོལ་བ་མེད་པར་ཉེར་ཞིའི་གོ་འཕང་མཆོག་ཀུན་ཏུ་བཟང་པོ་ཐོབ་ནས། སྐུ་དང་ཡེ་ཤེས་འདུ་འབྲལ་མེད་པ་ཡིས། ཕྱོགས་དང་དུས་དང་། གནས་སྐབས་ཀུན་ཏུ་བཀྲ་ཤིས་པའི་འོད་ཟེར་བརྒྱ་སྟོང་བྱེ་བ་ཁྲག་ཁྲིག་དཔག་གིས་མི་ལང་བསམ་གྱིས་མི་ཁྱབ་པ་དག་ཀུན་ནས་འཕྲོ་ཞིང་བྱེད་པར་ཤོག་ཅིག་ཅེས་གྲགས་{ཁྲགས་}པར་བྱས་པ་ཤིས་པ་བརྗོད་པའི་རྒྱན་ཡིན་ནོ། །ལྔ་པ་ཡོངས་སུ་རྫོགས་པའི་སྦྱར་ཚུལ། རྫོགས་པ་ཆེན་པོ་སེམས་ཉིད་ངལ་གསོ་ཞེས་བྱ་བ། དཔལ་ཨོ་རྒྱན་གྱི་སློབ་དཔོན་ཆེན་པོ་བློ་ལྡན་མཆོག་སྲེད་ཀྱིས་རྗེས་སུ་བཟུང་བའི་བདེ་བར་གཤེགས་པའི་བཀའ་རབ་འབྱམས་ལ་མང་དུ་ཐོས་པའི་ནོར་གྱིས་ཕྱུག་ལ་ཐེག་པ་མཆོག་གི་རྣལ་འབྱོར་པ་དྲི་མེད་འོད་ཟེར་གྱིས། གངས་རི་ཐོད་དཀར་གྱི་མགུལ་དུ་ལེགས་པར་སྦྱར་བ་རྫོགས་སོ། །དེ་ལྟར་ཡང་རྒྱལ་བས་ལུང་བསྟན་པར་གྲགས་ཤིང་གྲུབ་པས་བསམ་ཡས་པ་ངག་གི་དབང་པོ་ཀུན་མཁྱེན་དྲི་མེད་འོད་ཟེར་འདི་ཉིད་སངས་རྒྱས་རི་རབ་མར་མེའི་རྒྱལ་མཚན་དུ་འགྱུར་ཞེས་དཔལ་ལྡན་སངས་རྒྱས་པདྨ་སྐྱེས་ཉིད་ཀྱིས་རྗེས་སུ་བཟུང་ཞིང་ལུང་བསྟན་ལ། བློ་གྲོས་རྒྱ་མཚོས་ཞུས་པའི་མདོ་ལས། ས་བཅུ་པོ་ནི་གནོན་པར་འགྱུར་ཞིང་ཆགས་པ་མེད། །བྱང་ཆུབ་སྙིང་པོ་སྤྱད་ཕྱིར་ཤིན་ཏུ་རྫོགས་པར་སྨྲ། །དེ་ནི་མི་དགེ་ཀུན་སྤངས་དགྲ་ལས་རྒྱལ་བར་འགྱུར། །དགེ་བའི་ཆོས་རྣམས་ཀུན་གྱིས་འཕགས་པ་རི་རབ་བཞིན། །དེ་ནི་བསམ་ཡས་དྲི་མེད་འོད་འདི་རབ་ཏུ་ཐོབ། །ཅེས་གང་གསུང་བ་འདིས་ཀྱང་དམ་པ་དེ་ཉིད་གསལ་བར་ལུང་བསྟན་པར་བདག་ཅག་སྙམ་ནའང་གཟུར་གནས་བློ་གསལ་དམ་པ་རྣམས་ཀྱིས་མཁྱེན་པར་འཚལ་ཞིང་། གཞུང་འདིར་ཀུན་མཁྱེན་ཉིད་ཀྱིས། ཕྱི་རབས་སྐལ་བཟང་བྱང་ཆུབ་འདོད་པ་དག །ཡི་གེ་འདི་ལ་རྟག་ཏུ་ནན་ཏན་མཛོད། །མདོ་རྒྱུད་མན་ངག་སྙིང་པོ་འདིར་ཚང་ཞིང་། །ཟབ་དོན་བརྒྱུད་པའི་བྱིན་རླབས་སྤྲིན་ཕུང་མཆིས། །ཞེས་འདི་ཉིད་མདོ་སྔགས་ཡོངས་རྫོགས་ཀྱི་ལམ་རིམ་ཀུན་གྱི་རྩེ་མོ་སྔ་འགྱུར་པའི་ཆོས་ཀྱི་ཁུད་པ་ལགས་པའི་ཕྱིར་ཐུགས་བརྩེ་བས་གདམས་པར་མཛད་པས་བདག་ལེགས་སུ་འདོད་པ་དག་གིས་གཞུང་འདི་ཁོ་ན་ཉམས་ལེན་སྙིང་ནོར་དུ་འཆང་བར་ཕྱོགས་དུས་ཀུན་ཏུ་ཐལ་མོ་སྦྱར་ཞིང་གསོལ་བ་འདེབས་པ་ལགས་སོ།། །། འདིར་སྨྲས་པ། མདོ་རྒྱུད་མན་ངག་སྙིང་པོའི་རིན་ཆེན་གཏེར། །སྐལ་བཟང་སྐྱེ་བོའི་ཕན་བདེའི་དཔྱིད་དཔལ་མཆོག །སྲིད་{སྲིན་}ན་མངོན་པར་མཐོ་འདིར་ལེགས་ཞུགས་ན། །བསྟན་འགྲོའི་དོན་ཆེན་འགྲུབ་ལ་སོམ་ཉི་བྲལ། །དེ་ཕྱིར་དེར་བརྩོན་དགེ་ཚོགས་རྒྱ་ཆེན་པོ། །མཁའ་ཁམས་དོག་པོར་བགྱིད་གང་མཁའ་ཁྱབ་ཀྱི། །ཕན་བདེའི་འབྱུང་གནས་རྒྱལ་བསྟན་དར་རྒྱས་ཏེ། །མཐའ་ཡས་འགྲོ་ཀུན་ཕྱམས་གཅིག་སངས་རྒྱས་ཤོག །བསྟན་འཛིན་སྐྱེས་བུའི་སྐུ་ཚེ་རབ་བརྟན་ཅིང་། །བསྟན་པའི་སྦྱིན་བདག་བདེ་ཞིང་སྐྱིད་པ་ཡིས། །ཀུན་མཁྱེན་རྒྱལ་བའི་བསྟན་ལ་རབ་ཞུགས་ཏེ། །ཀུན་ཀྱང་ཀུན་བཟང་གོ་འཕང་མྱུར་ཐོབ་ཤོག །ཅེས་པ་འདི་ཡང་བདག་ཅག་གི་རྗེ་བླ་མ་མཁས་ཤིང་གྲུབ་པའི་དབང་པོའི་ཞེ་ཆེན་རྒྱལ་ཚབ་རིན་པོ་ཆེས་འདི་ལ་མཆན་འགྲེལ་ཞིག་དགོངས་ཏེ་ལེའུ་བཅུ་གསུམ་པ་ཡན་རང་འགྲེལ་ལྟར་རྩོམ་གཞིར་ཕྱག་མཆན་དུ་བཏབ་པ་ཉིད། ལུགས་གཉིས་ཀྱི་མཛད་བཟང་རྒྱལ་བསྟན་སྤྱི་དང་བྱེ་བྲག་ལ་བཀའ་དྲིན་སྲིད་ན་མངོན་པར་མཐོ་བ་བླ་མ་དམ་པ་ཞིང་སྐྱོང་གི་བདག་རྐྱེན་ལས་ཞལ་བཤུས་གྲུབ་ནས་སླར་ཕྲན་བུ་ལའང་ས་བཅད་དཀྱུས་བཀོད་དང་། བཅུ་གསུམ་པ་འབྲས་བུའི་ལེའུ་མཇུག་དང་བཅས་པའི་མཆན་འགྲེལ་མཐའ་ཕུད་ཀྱི་བཀའ་གནང་སྤྱི་བོར་རྩལ་བ་དང་བླང་གིས་བཀའ་དྲིན་དང་བརྩོན་པ་དོན་ཡོད་ལ་བསམ་སྟེ་སྒོ་གསུམ་རྒན་རྒུད་པས་ཆེས་མནར་ཡང་སྤྲོ་དགས་བརྩོན་པ་བསྐྱེད་དེ་ཀུན་མཁྱེན་ཉིད་ཀྱིས་བསྡུས་དོན་པདྨ་དཀར་པོའི་ཕྲེང་བ་དཔལ་སྤྲུལ་རིན་པོ་ཆེའི་བསྡུས་པ་དཀྱུས་བཀོད་བཅས་རབ་བྱུང་བཅུ་དྲུག་པའི་ཤིང་ཁྱི་རང་ལོ་བདུན་ཅུ་རྩ་གསུམ་པར་དགེ་གོང་དགོན་གྱི་རི་ངོགས་བཀྲ་ཤིས་ཆོས་གླིང་དུ་མཚམས་མལ་དུ་ཉལ་བའི་རྒན་བུ་གྱི་ན་བ་དམ་པ་དུ་མའི་ཞབས་རྡུལ་ལ་རེག་པས་སྙོམ་པས་སྔ་འགྱུར་པའི་གྲལ་ཐ་པ་ཀུན་མཁྱེན་ཡབ་སྲས་ཀྱི་རྒྱུད་པར་མངོན་རློམ་ཅན་སྤྱི་རྟོལ་རྨོངས་པ་ས་མནྟ་དྷརྨ་ཀིཪྟིས་གྲུབ་པར་བགྱིས་པ་དགེ་ཞིང་བཀྲ་ཤིས་པར་གྱུར་ཅིག དགེའོ། །དགེའོ། །དགེའོ། །སརྦ་མངྒལཾ།། །།
ཚེས་བཅུའི་རྣམ་བཤད།
༄༅། །ཚེས་བཅུའི་རྣམ་བཤད། ༀ་སྭ སྟི། གང་མཚན་ནོར་བུའི་ཨུཏྤ་ལ། །རྣ་བའི་རྒྱན་དུ་དཔྱངས་ཙམ་གྱིས། །གྲུབ་གཉིས་འདོད་པ་འཇོ་བའི་དཔྱིད། །མཚོ་སྐྱེས་རྒྱལ་བ་གཉིས་པས་སྐྱོངས། །འདིར་སྣོན་ཟླའི་སྤྲོས་བཅས་ཚེས་བཅུ་ཆེན་མོའི་ལོ་རྒྱུས་དང་འབྲེལ་བར་སྐབས་སུ་བབས་པའི་གཏམ་གྱི་སྦྱོར་བ་ཅུང་ཟད་ཅིག་ཞུ་ན། སྤྱིར་བདེ་མཆོག་རྩ་རྒྱུད་ལས། རང་འདོད་ལས་ལ་རྣལ་འབྱོར་པས། །ཆོ་ག་ཇི་བཞིན་སྦྱིན་པར་བྱས། །མར་གྱི་ངོ་ཡི་ཚེས་བཅུ་དང་། །ཟླ་བ་ཡར་ངོར་གང་གྱུར་ལ། །མྱུར་དུ་འབད་པས་མཆོད་བྱ་སྟེ། །ཞེས་དང་། རྣལ་འབྱོར་པ་ཀུན་ཏུ་སྤྱོད་པ་ལས། དགུན་འབྲིང་ལ་སོགས་ཟླ་བ་ཡི། །བཅུ་པ་ལ་ནི་རབ་ཏུ་མཆོད། །ཅེས་དང་། ཀུན་མཁྱེན་ཆོས་རྗེས། ཚེས་བཅུ་ཡར་ངོ་མར་ངོའི་ཉིན་དང་མཚན། །བསྙེན་སྒྲུབ་ཚོགས་མཆོད་བསྐང་བཤགས་འབད་པར་བྱ། །ཞེས་གསུངས་པར་ལྟར། དུས་དེ་དག་ལ་ཕྱིའི་གནས་ཡུལ་རྣམས་སུ་དཔའ་བོ་མཁའ་འགྲོ་རྣམས་ཚོགས་ཀྱི་འཁོར་ལོ་ལ་འདུས་ཏེ་བདེ་ཆེན་གྱི་ཡེ་ཤེས་བསྐྱེད་པ་དང་། ནང་དུ་རྣལ་འབྱོར་པ་རྣམས་ཀྱི་རྡོ་རྗེའི་ལུས་ཀྱི་གནས། སྤྱི་བོ་བུལླི་ར་མ་ཎ་དང་། སྤྱི་གཙུག་ཛ་ལནྡྷ་ར་སོགས་སུ་དྭངས་མའི་རླུང་སེམས་འདུ་བས་ཡེ་ཤེས་སྐྱེད་པའི་དུས་ཁྱད་པར་ཅན་ཏེ། དེ་ཡང་གསང་སྔགས་མ་རྒྱུད་ཀྱི་ཉམས་ལེན་དང་འབྲེལ་བའི་རིགས་ལ་སྡིག་སྒྲིབ་སྦྱང་བར་འདོད་ན་མར་ངོའི་ཚེས་བཅུ་དང་། ཉམས་རྟོགས་འཕེལ་བར་འདོད་ན་ཡར་ངོའི་ཚེས་བཅུའི་མཆོད་པ་གཙོ་བོར་བཟུང་དགོས་པར་གསུངས་ཤིང་། དེ་ཡང་མར་ངོའི་མཚན་མོ་དང་། ཡར་ངོའི་ཉིན་མོ་དངོས་གྲུབ་མྱུར་བའི་དུས་ཆེན་ཁྱད་པར་ཅན་ཡིན་པས། འཕགས་བོད་གསར་སྙིང་གི་རྡོ་རྗེ་འཛིན་པ་ཆེན་པོ་རྣམས་ཀྱིས་ཀྱང་ཡར་མར་གྱི་ཚེས་བཅུའི་དུས་མཆོད་མི་གཅོག་པར་དེ་ལྟར་དུ་ཕྱག་ལེན་དུ་གནང་བ་ཡིན་ཞིང་། བྱེ་བྲག་ཏུ་རྒྱལ་ཀུན་གསུང་རྡོ་རྗེ་སྣང་བ་མཐའ་ཡས་ཀྱི་སྤྲུལ་པའི་རང་གཟུགས། ངོ་མཚར་བའི་རྣམ་ཐར་ཞིང་ཁམས་རྒྱ་མཚོར་ཡོངས་སུ་གྲགས་པ་ཅན། གནས་རིས་དྲུག་གི་འགྲོ་བ་སྤྱི་དང་ཁྱད་པར་རང་ཅག་གངས་ཅན་པ་རྣམས་ལ་བཀའ་དྲིན་སངས་རྒྱས་ལས་ཀྱང་ལྷག་པའི་ཨོ་རྒྱན་དུས་གསུམ་མཁྱེན་པ་དེ་ཉིད་ཀྱིས། ངོ་མཚར་བའི་མཛད་པ་བསམ་མི་ཁྱབ་པར་བསྟན་པ་རྣམས་དང་། རྗེས་འཇུག་རྣམས་ལ་ཐུགས་རྗེའི་འཇུག་པས་ལྷག་པར་དགོས་པའི་དུས་ཆེན་ནི། ཡར་མར་གཉིས་ཀྱི་ནང་ནས་ཀྱང་ཡར་ངོའི་ཚེས་བཅུ་འདི་ཉིད་ཡིན་ཏེ། བྱང་གཏེར་ལས། བོད་ལ་བདེ་སྐྱིད་འབྱུང་འདོད་ན༔ ཡར་ངོའི་ཚེས་བཅུ་ནམ་ཤར་ཚེ༔ ཨོ་རྒྱན་པདྨའི་སྤྲུལ་པ་འབྱུང༔ ཞེས་དང་། ར ཏ་གླིང་གཏེར་བྱོན་ཚེས་བཅུའི་བསྐུལ་བྱང་ལས། ང་ཉིད་སྲིན་ཡུལ་འགྲོ་བའི་ཚེ༔ བོད་ཀྱི་རྒྱལ་བློན་སྔགས་སློབ་ལ༔ བྱུང་ངོ་ཅོག་གི་ཚེ་བཅུ་ལ༔ ང་ཉིད་འབྱོན་པའི་དབུ་སྙུང་བཞེས༔ པདྨ་འབྱུང་གནས་གཞན་མི་བསླུ༔ ཐེ་ཚོམ་སྤོངས་ཤིག་རྗེས་འཇུག་རྣམས༔ ཞེས་དང་། གཞན་ཡང་། ནངས་རེ་དགོང་རེ་བོད་ཀྱི་དོན་ལ་བྱོན༔ ཉི་ཟེར་འཆར་སྡུད་མདངས་ལ་བཅིབས་ཏེ་བྱོན༔ ཡར་ངོ་ཚེས་བཅུའི་དུས་སུ་དངོས་སུ་བྱོན༔ ཅེས་ཞལ་གྱིས་བཞེས་ཤིང་། གཏེར་སྟོན་མགོན་པོ་རིན་ཆེན་སོགས་ཀྱི་གཏེར་ཁ་ནས་བྱོན་པའི་ཚེས་བཅུའི་ཕན་ཡོན་གྱི་གཞུང་རྣམས་སུ། སྤྲེལ་ཟླའི་ཚེས་བཅུར་ལྷོོ་ནུབ་འོ་མ་ཅན་མཚོར་ངོ་མཚར་པདྨའི་སྡོང་པོ་ལས་སྐུ་འཁྲུངས་ཏེ་མཚན་པདྨ་འབྱུང་གནས་སུ་གྲགས་པའི་དུས་ཆེན་ཏེ། དེར་མ་ཟད་ཕྱིས་སྲིན་པོ་འདུལ་དུ་བྱོན་པའི་དུས་ཆེན་ཀྱང་ཡིན་པས། འདི་ཉིད་ཀྱི་དུས་མཆོད་བཟུང་ན་དད་ལྡན་མི་རེའི་མདུན་ན་སྤྲུལ་པ་རེ་བྱོན་པས། གནས་སྐབས་ནད་གདོན་སྡུག་བསྔལ་ཐམས་ཅད་སེལ་ཞིང་། མཐར་ཐུག་སྐལ་བཟང་གི་སངས་རྒྱས་སྟོང་མཆོད་པའི་བསོད་ནམས་འབྱུང་བ་དང་། མྱུར་དུ་ཕྱག་རྒྱ་ཆེན་པོའི་རིག་འཛིན་འཐོབ་པར་གསུང་། དེ་བཞིན་དུ་བྱ་ཟླའི་ཚེས་བཅུར་མཐའ་འཁོབ་མུ་སྟེགས་ཟངས་གླིང་རྒྱལ་པོས་སློབ་དཔོན་ཉིད་ཟངས་ཁ་སྦྱར་དུ་བཅུག་སྟེ་གངྒཱའི་ཆུར་འཕངས་པས་མ་ཚུགས་ཏེ་ཆུའི་སྟེང་རྫུ་འཕྲུལ་གྱི་བྲོ་གར་མཛད་པས་མཚན་གུ་རུ་མཁའ་ལྡིང་རྩལ་དུ་གྲགས་པའི་དུས་མཆོད་འདི་བཟུང་ན། དད་ལྡན་གང་དག་ལུས་བདེ། ངག་ནུས་ཆེ། སེམས་ལ་བདེ་གསལ་མི་རྟོག་པའི་ཏིང་འཛིན་སྐྱེ། དབང་གི་ཕྲིན་ལས་འགྲུབ། བླ་མ་དང་ཡི་དམ་ལྷ་ཡིས་འབྲལ་མེད་དུ་སྐྱོབ། ཁྱི་ཟླའི་ཚེས་བཅུར་སློབ་དཔོན་ལ་མུ་སྟེགས་རྣམས་ཀྱིས་ཟས་དུག་ཅན་དང་། མཐོང་དུག་རེ་དུག་སོགས་ཀྱིས་མཐོ་འཚམ་{བརྩམ}པས་མ་ཚུགས་པར་སླར་ཡང་མཚན་དཔེའི་གཟི་བྱིན་འབར་བས་མཚན་མཚོ་སྐྱེས་རྡོ་རྗེར་གྲགས་པའི་དུས་མཆོད་འདི་བཟུང་བས་ཚེ་རབས་མང་པོའི་སྡིག་སྒྲིབ་བྱང་ཞིང་། བདུན་ཟུར་བཞི་གཤེད་དགུ་དུར་ཀེག་སྲི་མི་ཁ་ངན་པ་ལས་ཐར་ཞིང་། ཆོས་མཐུན་གྱི་བསམ་དགུ་འགྲུབ་པ་དང་། ཡིད་ཀྱི་སྡིག་སྒྲིབ་དག ཕག་ཟླའི་ཚེས་བཅུར་སློབ་དཔོན་ཆེན་པོས་བལ་ཡུལ་དུ་བསེ་མོ་བཞི་སོགས་ལྷ་འདྲེ་ཐམས་ཅད་དམ་ལ་བཏགས་པའི་མཚན་པདྨ་བཛྲ་དུ་གྲགས་པའི་དུས་མཆོད་བཟུང་ན་གནས་སྐབས་གཤིན་རྗེའི་འཁོར་ལོ། མ་མོའི་ཡམས་ནད། འབྱུང་པོའི་འཚེ་བ། བྱད་ཕུར་རྦོད་གཏོང་། ལྟས་ངན་ཡེ་འདྲོགས་ཐམས་ཅད་ཞི་ཞིང་། མཐར་ཐུག་རྣམ་སྨིན་རིག་འཛིན་འཐོབ། བྱི་ཟླའི་ཚེས་བཅུར་བོད་ཡུལ་དབུས་སུ་བྱོན་ནས་ལྷ་སྲིན་དམ་ལ་བཏགས་སངས་རྒྱས་བསྟན་པའི་གཞི་བཙུགས་པའི་མཚན་པདྨ་འབྱུང་གནས་སུ་གྲགས་པའི་དུས་མཆོད་འདི་བཟུང་བས། བསྐལ་པ་གཅིག་ཏུ་སགས་པའི་དམ་ཚིག་དང་སྡོམ་པ་ཉམས་པ་ལ་སོགས་པའི་སྡིག་པ་དག་ཅིང་། མངོན་སྤྱོད་ཀྱི་ཕྲིན་ལས་འགྲུབ། གླང་ཟླའི་ཚེས་བཅུར་བོད་ཡུལ་དུ་གཏེར་ཁ་བྱེ་བ་ས་ཡ་སྦས་ཏེ་མཚན་རྡོ་རྗེ་གྲོ་ལོད་དུ་གྲགས་པའི་དུས་མཆོད་འདི་བཟུང་ན་སྒྲིབ་པ་གཉིས་དག་གནས་སྐབས་བདེ་སྐྱིད་ཕུན་སུམ་ཚོགས། མཐར་ཐུགས་སངས་རྒྱས་འབུམ་ཕྲག་མཆོད་པའི་བསོད་ནམས་འཐོབ། པདྨར་སྐྱེས་ནས་སློབ་དཔོན་ཆེན་པོས་རྗེས་སུ་བཟུང་སྟེ་མཁའ་འགྲོའི་ཚོགས་དཔོན་དུ་འགྱུར་ཞིང་འགྲོ་བའི་དོན་དཔག་མེད་འགྲུབ། སྟག་ཟླའི་ཚེས་བཅུར་ཨོ་རྒྱན་གྱི་རྒྱལ་སྲིད་བཟུང་བའི་མཚན་པདྨ་རྒྱལ་པོར་གྲགས་པའི་དུས་མཆོད་འདི་བཟུང་བས། གནས་སྐབས་ནད་རིགས་ཀྱིས་མི་ཚུགས་ཤིང་། གལ་སྲིད་ནད་བྱུང་ཡང་མྱུར་དུ་གྲོལ་ཞིང་ལུས་སེམས་བདེ་བ་རྙེད་པ་དང་། ཤེས་རབ་ཀྱི་རྩལ་རྫོགས། ཕས་ཀྱི་རྒོལ་བ་ཞི། གུ་རུ་ཉིད་ཀྱིས་བུ་ལྟར་དུ་ཐུགས་རྗེས་སྐྱོང་། མཐར་ཐུག་ལྷུན་གྲུབ་རིག་འཛིན་གྱི་གོ་འཕང་འཐོབ། ཡོས་ཟླའི་ཚེས་བཅུར་ཨོ་རྒྱན་གྱི་རྒྱལ་སྲིད་སྤངས་ཏེ་བརྟུལ་ཞུགས་ཀྱི་སྤྱོད་པ་བསྐྱང་བའི་མཚན་པདྨ་ཐོད་ཕྲེང་དུ་གྲགས་པའི་དུས་མཆོད་འདི་བཟུང་བས་ལོངས་སྤྱོད་འཕེལ་ཞིང་། ཡུལ་ལྷས་སྡོང་གྲོགས་བྱེད། ཡུལ་ཁམས་ཀྱི་ནད་མུག་མཚོན་འཁྲུགས་ཞི། ལོ་ཕྱུགས་ལེགས། ཞི་བའི་ཕྲིན་ལས་འགྲུབ། འབྲུག་ཟླའི་ཚེས་བཅུར་སློབ་དཔོན་པྲ་བྷ་ཧ་སྟིའི་དྲུང་དུ་རབ་ཏུ་བྱུང་བའི་མཚན་ཤཱཀྱ་སེང་གེ་གསོལ་བའི་དུས་མཆོད་འདི་བཟུང་བས་བཞི་བརྒྱ་རྩ་བཞིའི་ནད་ཞི། སྡེ་བརྒྱད་འབྱུང་པོའི་གནོད་པས་མི་ཚུགས། ལུས་ཀྱི་སྡིག་པ་འདག བདེ་སྐྱིད་དང་སྙན་གྲགས་འཕེལ། སྦྲུལ་ཟླའི་ཚེས་བཅུར་ཟ་ཧོར་རྒྱལ་པོས་གསོན་སྲེག་ཞུས་པས་མེ་དཔུང་མཚོར་བསྒྱུར་ཡུལ་ཁམས་ཆོས་ལ་བཀོད་པའི་མཚན་ཤཱཀྱ་འོད་དུ་གྲགས་པའི་དུས་མཆོད་འདི་བཟུང་བས་གནས་སྐབས་ནང་འཁོར་སྙིང་ཉེ། ཕྱི་ཡི་འཁོར་འདུ། མི་ནོར་བུ་དཔལ་འཛོམས། ཀུན་གྱིས་བཀུར་ཞིང་བཀྲ་ཤིས། བསམ་པ་འགྲུབ། མཐར་ཐུག་ཚེ་དབང་རིག་འཛིན་འཐོབ། རྟ་ཟླའི་ཚེས་བཅུར་ཨོ་རྒྱན་རྒྱལ་པོས་མེ་བསྲེགས་པས་མ་ཚུགས་ཏེ། རྫུ་འཕྲུལ་གྱི་བཀོད་པས་ཨོ་རྒྱན་རྒྱལ་ཁམས་ཆོས་ལ་བཀོད་པའི་མཚན་ཨོ་རྒྱན་གུ་རུ་རྡོ་རྗེར་གྲགས་པའི་དུས་མཆོད་འདི་བཟུང་ན། ཕྱོགས་ངན་བདུད་གཅོད་སོགས་སྤར་སྨེ་གཟའ་སྐར་ལོ་ཟླ་ཞག་དུས་ཀྱི་ཉེས་པ་དང་ལྷ་འདྲེས་མི་ཚུགས་ཤིང་། རྒྱས་པའི་ལས་འགྲུབ། ལྷ་སྲུང་གིས་མགོན་སྐྱབས་བགྱིད། ལུག་ཟླའི་ཚེས་བཅུར་མུ་སྟེགས་སྟོན་པ་ལྔ་བརྒྱའི་རྩོད་པ་བཟློག་ཅིང་ངན་སྔགས་བདག་པོ་གནམ་ལྕགས་ཐོག་གིས་བསྒྲལ། འགྲོ་བ་མང་པོ་སངས་རྒྱས་ཀྱི་ས་ལ་བཀོད་པའི་མཚན་སེང་གེ་སྒྲ་སྒྲོགས་སུ་གྲགས་པའི་དུས་མཆོད་འདི་བཟུང་ནས་སངས་རྒྱས་སྟོང་ལ་མཆོད་པ་ཕུལ་བ་དང་། སྟོང་གསུམ་གྱི་འགྲོ་བ་ཟས་གོས་ལོངས་སྤྱོོད་བྱིན་པའི་ཕན་ཡོན་དང་མཚུངས། ངག་གི་སྒྲིབ་པ་དག་སོགས་ཕན་ཡོན་མཐའ་ཡས་རྣམས་རྡོ་རྗེའི་ལུང་གིས་བསྟན་པ་ལྟར་ཡིན། དེ་དག་གི་ནང་ནས་ཀྱང་སྤྲེལ་ལོ་སྤྲེལ་ཟླ་དང་ཁྱད་པར་སྤྲེལ་ཟླའི་ཚེས་བཅུ་གཙོ་བོར་གསུངས་ཏེ། གསང་འདུས་ཐེམ་མེད་ཞལ་གདམས་ལས། དབང་ཆེན་སྤྲེལ་ཟླའི་ཚེས་བཅུ་དང་། །དུས་ཀྱི་ཚེས་བཅུ་ཐམས་ཅད་ལས། །སྤྲུལ་པ་འཛམ་གླིང་ཁྱབ་པར་འགྱེད། །མཆོག་ཐུན་དངོས་གྲུབ་ང་ཡིས་སྟེར། །མི་ཚེ་བླ་མ་སྒྲུབ་པ་ལ། །བསྐྱལ་ན་ཚེ་ཡི་དུས་བྱེད་ཚེ། །ཨོ་རྒྱན་ང་ཡི་ཐུགས་ཀར་ཐིམ། །ཞེས་དང་། པད་གླིང་གཏེར་བྱོན་ཚེས་བཅུའི་ཕན་ཡོན་ལས། དུས་ཀྱི་རྒྱལ་པོ་ཚེས་བཅུ་ཐམས་ཅད་ལ༔ དབང་ཁྲིད་ལ་སོགས་དཀར་པོ་དགེ་བའི་ལས༔ བྱས་ན་ཡོན་ཏན་ཁྲི་དང་འབུམ་དུ་འགྱུར༔ འཆུགས་མེད་སྤྲེལ་ལོ་སྤྲེལ་ཟླའི་ཚེས་བཅུ་ལ༔ པདྨ་ང་ཉིད་འབྱོན་པའི་ཚེས་གྲངས་ཡིན༔ འདི་ལ་ཆོས་བཅུ་བྱས་པའི་ཕན་ཡོན་ལྷག་པར་ཆེ༔ ཞེས་གསུངས། སྤྲེལ་ཟླའི་ངོས་འཛིན་ཀྱང་། ཕུག་ལུགས་རྗེས་འབྲང་དབུས་གཙང་མཁས་པ་ཡོངས་ལ་གྲགས་ཤིང་གྲུབ་པ་ནི་ཧོར་ཟླ་ལྔ་པ་སྣོན་གྱི་ཟླ་བ་འདི་ཉིད་ཡིན་པས། འགྲན་ཟླ་དང་བྲལ་བའི་མཁས་གྲུབ་ཆེན་པོ་ཆོས་རྒྱལ་གཏེར་བདག་གླིང་པ་ཡབ་སྲས་སོགས་ཚད་མར་གྱུར་པའི་སྐྱེས་ཆེན་ཁྱད་པར་དུ་འཕགས་པ་རྣམས་ཀྱིས་ཚེས་བཅུའི་དུས་མཆོད་ཟླ་ཁོངས་འདིར་མཛད་པ་བཞིན། སྐྱབས་རྗེ་གོང་མ་རིམ་བྱོན་རྣམས་ཀྱི་ཐུགས་བསྐྱེད་རྨད་དུ་བྱུང་བའི་རྒྱུ་ལས། ཆོས་གྲྭ་ཆེན་པོ་འདི་ཡང་། རིག་འཛིན་བརྒྱུད་པའི་ཕྱག་སྲོལ་རྨ་མེད་པའི་མཐོང་བརྒྱུད་སྔོན་ནས་ད་བར་གཏན་འཇགས་སུ་གྱུར་པས། འཆམ་དབྱངས་རོལ། བཅའ་འབུད་བརྡུང་དཀྲོལ། འགྲིགས་ལམ་ཀུན་སྤྱོད་གང་ཅིའི་ཐད་གཞན་ལ་འགྲམ་ཆུ་ལྡང་མི་དགོས་པར། མིས་སྨོན་རང་སྐྱིད། ཡ་དཔེ་ཞྭ་ཡི་དཔེ་ལྟར་ཡོད་བཞིན་ལ། གསར་དུ་ཞུ་མ་དགོས་ཀྱང་། མཆེད་གསར་རྣམས་ཀྱི་ཐུགས་ལ་གསལ་འདེབས་ཙམ་དུ་ཅུང་ཟད་ཞུ་ན། འོག་མིན་གཉིས་པ་ཨོ་རྒྱན་སྨིན་གྲོལ་གླིང་ནས་གནང་བའི་བཅའ་ཡིག་ཆེན་མོ་སོགས་བཅའ་ཡིག་སྔ་མ་རྣམས་ཀྱི་དགོངས་དོན་ལྟར། དབུ་ཞྭ། ན་བཟའ། རྡོར་དྲིལ། འདོན་པ་བློ་རྒྱུགས་སོགས་སྒྲིགས་{འགྲིགས་}ཁྲིམས་ཚང་མ་གཞིར་བཞག་ཐོག་ཆང་དང་ཀུན་དོང་ཐ་མ་ཀ་སོགས་སྨད་འོས་ཀྱི་རིགས་རྣམས་དུག་བཞིན་དུ་སྤངས་ཤིང་། ཆབ་ལེན་ལྷྭམ་ཕུད་སོགས་དམ་པའི་ཆོས་འདུ ལ་བ་ནས་ཇི་སྐད་གསུངས་པའི་སྤྱོད་ལམ་རྣམ་བཞི་གང་ལའང་ཉེས་ལྟུང་གི་དྲི་མས་མ་སྦགས་པར་དད་ལྡན་དང་བ་འདྲེན་གནས་སུ་མཛད་དགོས་ཤིང་། ཁྱད་པར་དབྱངས་རོལ་གར་འཆམ་སོགས་སྤྲོས་བཅས་ཀྱི་ཕྱག་ལེན་འདི་རྣམས་ནི་ར ང་བཞིན་གྱིས་མཚར་འདོད་ལྟ་བུས་མ་ཡིན་ཏེ། བཅོམ་ལྡན་འདས་ཀྱིས་ཁྱིམ་བདག་མ་དད་པ་རྣམས་དད་པར་བྱ་བ་དང་དཀོན་མཆོག་གསུམ་མཆོད་པའི་དོན་དུ་དབྱངས་ཀྱི་ང་རོ་བྱ་བར་འདུལ་བ་ལས་ཀྱང་རྗེས་སུ་གནང་ཞིང་། སྔགས་ཀྱི་སྐབས་སུ། ཆེན་པོ་དྲུག་ལ་མ་གྱེར་ན། །ཡོ་ག་དབྱངས་ཀྱི་བསྟན་པ་ནུབ། །ཅེས་གསུང་ཤིང་། ཆེན་པོ་དྲུག་ནི། སྒྲུབ་མཆོད་དབང་བསྐུར་རབ་ཏུ་གནས། །དུས་མཆོད་གཞན་དོན་སྦྱིན་སྲེག་རྒྱས། །ཞེས་དབྱངས་བྱ་བའི་དུས་དང་། དབྱངས་རང་གི་ངོ་བོ་ང་རོ་བཞི་ཡན་ལག་བཅུ་གཉིས། སྤེལ་མའི་སྦྱོར་བ་མཐའ་ཡས་པ་དང་། དབྱངས་བཏང་ཚུལ་ཚོགས་སུ་སེང་གེའི་ང་རོ་ལྟ་བུ་ལ་སོགས་པའི་ལེན་ཚུལ་བཅུ་གཉིས་སོགས་དབྱངས་ཀྱི་ངེས་པ་མང་དུ་གསུངས་ནའང་། ཡེང་བ་སོགས་བློ་ཡི་སྐྱོན། ཟུར་མ་ཕྱིན་པ་སོགས་ཚིག་གི་སྐྱོན། འཕེལ་འགྲིབ་སོགས་གདངས་ཀྱི་སྐྱོན། ཡ་ཡོ་སོགས་ལུས་ཀྱི་སྐྱོན། མི་འགྲིགས་པ་གྲོགས་ཀྱི་སྐྱོན། སྨྲ་དགོད་སོགས་ཉན་པ་པོའི་སྐྱོན་ཏེ་སྐྱོན་དྲུག་སོགས་དང་བྲལ་བ་དང་། ཡོན་ཏན་གྱི་ཁྱད་པར། རིང་ཡང་མགོ་ལུས་འཚམ་པ་དང་། ཐུང་ཡང་ལན་ལག་རྫོགས་པའོ། །བརྗིད་དང་ལྡན་ཡང་སྒེག་ཆགས་པ། །སྙན་ཡང་རུས་པ་མ་ཤོར་དང་། །གྱོང་ཡང་སྐབས་སུ་ཁུག་པ་དང་། །དིག་ཀྱང་ཚིག་གི་གོ་གསལ་དང་། །མགྲིན་པ་མང་ཡང་སྐད་ཅིག་དང་། །སྐད་གཅིག་ང་རོ་དུ་མས་བརྒྱན། །མདོར་ན་བླུན་པོ་ཡིད་འཛིན་ཅིང་། །མཁས་པ་དགྱེས་པ་བསྐྱེད་པའོ། །ཡོན་ཏན་མཆོད་འོས་ཐམས་ཅད་མཉེས། །ཡ་རབས་དང་འདྲེན་དམན་པ་མ གུ། །ཟིལ་ཆགས་མང་པོའི་དབུས་ན་བརྗིད། །མཁས་པའི་ཡིད་འཕྲོག་ཀུན་གྱིས་བསྔགས། །དགྲ་བགེགས་འབྱེར་ཞིང་དངོས་གྲུབ་འདུ། །འདི་ལས་བདེན་འབྲས་འབྱུང་བར་ངེས། །ཞེས་གསུངས་པའི་མཚན་ཉིད་དང་ལྡན་པར་སྔོན་གྱི་སློབ་དཔོན་མཁས་པའི་ཁྲིད་རྒྱུན་ལས་ཇི་ལྟར་འབྱུང་བ་ལྟར་ཚངས་པའི་དབྱངས་ལྡན་བྱང་འདྲེན་མཁས་ཆེན་རྣམས་ལ་ཀུན་གྱིས་འཁྲི་དགོས་ཤིང་། རོལ་མོ་བརྡུང་ཚུལ་ཡང་། སྤྱིར་གྱི་རོལ་མོ་གང་དཀྲོལ་ཡང་། །དམ་དུ་བཏུང་བར་མི་བྱ་ཞིང་། །བྲང་ལག་མི་སྦྱོར་མན་ངག་ཡིན། །དབྱུག་པ་ལྟ་བུར་མི་ཕྱར་ཞིང་། །ཀ་བ་ལྟ་བུར་བསྲང་མི་བྱ། །ཞེས་དང་། དཔུང་པ་ལག་དར་ཚིགས་ནས་ལྷོོད། །ལག་པའི་མཐིལ་ནས་འཕྲུལ་ཆགས་ཆོད། །རང་ལྗིད་ཁོ་ནས་སྒྲ་བསྐུལ་གྱིས། །འདབ་མའི་རྩེ་མོ་རྩལ་གྱིས་མིན། །ཞེས་སོགས་སྤང་བླང་དང་། འཇབ་འཕར་འུར་དིར་{དིང}སྙན་རྩུབ་དང་། ཕྲ་སྦོམ་དྭངས་འཁྲོལ་ལ་སོགས་པའི། །སྒྲ་ཐབས་རྣམ་དབྱེ་རྟོགས་པར་བྱོས། །ཞེས་སྐབས་དང་བསྟུན་པའི་སྒྲ་ཐབས་ཀྱི་རྣམ་དབྱེ་ལ་མཁས་པས་འདྲ་དཔེ་བཅུ་གཉིས་ཀྱི་སྒོ་ནས་རྔ་སྒོ་དང་སྦྱར་དགོས་པར་གསུངས་ཤིང་། རྔ་རྡུང་ཚུལ་ཡང་། རྒྱ་མཚོ་ཆེན་པོའི་ཀློང་མི་དཀྲུགས། །རི་རབ་གླིང་བཞི་མཐའ་མི་སྐོར། །རི་ཐང་མཚམས་ཀྱི་བྲག་མི་བཤིག །རི་དྭགས་རྒྱལ་པོའི་གདོང་མི་བསྣུན། །ཞེས་དང་། ཚུལ་བརྒྱད་འོག་ངོས་མཁྱིད་གང་བོར། །རྔ་གཡོག་རང་ལྗིད་ཉིད་ཀྱིས་ནི། །བསྐུལ་མ་ཐག་ཏུ་སོ་སོར་ཕྲལ། །གྲལ་ལ་བསྒྲིགས་ཏེ་བརྡུང་བ་ན། །ཕན་ཚུན་གཅིག་གིས་གཅིག་ནོན་ཙམ། །ནོར་བུ་བསྟར་ལ་བརྒྱུས་པ་ལྟར། །མཐོ་དམན་འབུར་ཁྱོད་སྤང་བར་བྱ། །སྙོམས་ཤིང་མཛེས་པར་བསྟར་ལ་བསྒྲིགས། །ཞེས་དང་། ཞི་བའི་རྔ་བརྡུང་བྱེད་པ་ན། །རྔ་ཐབས་དལ་ལ་ལྷོོད་པས་བརྡུང་། །རྒྱས་པའི་རྔ་བརྡུང་བྱེད་པ་ན། །རྔ་ཐབས་གསལ་ལ་འཁྲོལ་བར་བརྡུང་། །དབང་གི་རྔ་བརྡུང་བྱེད་པ་ན། །རྔ་ཐབས་སྙན་ལ་འཇེབས་པར་བརྡུང་། །དྲག་པོའི་རྔ་བརྡུང་བྱེད་པ་ན། །རྔ་ཐབས་དྲག་ལ་མྱུར་བར་བརྡུང་། །དྲག་བརྡུང་རྒྱུན་ཆགས་བྱེད་པ་ན། །གནམ་ལྕགས་ལྟར་ཡང་དབབ་པར་བྱ། །ཞེས་སོ་སོའི་ཉམས་སོགས་རྒྱས་པར་བཤད་པ་ལྟར་མདོར་ན་ཟུར་གསུམ་སྤྲད། ལྷོོད་གསུམ་དང་ལྡན་པའི་ངོས་ཤད་སོགས་མཐོང་བརྒྱུད་ལྟར་རིམ་པར་རྔ་དཔོན་ལ་འཁྲི་དགོས་ཤིང་། འཆམ་ནི་གསར་སྙིང་གི་རྒྱུད་སྡེ་ཆེན་པོ་རྣམས་ལས་བཤད་ཅིང་དགོན་གནས་ཐམས་ཅད་ལ་ཇི་སྙེད་ཡོད་པ་ཀུན་སྤྱིར་གར་གྱི་ཉམས་དགུའི་རྣམ་པ་དང་ལྡན་ཞིང་། ཁྱད་པར། ལུས་ཀྱི་སྟོད་ལ་སེང་ཆགས་དང་། །སྐེད་པ་ལ་ནི་འཁྲིལ་ཆགས་དང་། །ཚིག་བཞི་ལ་ནི་འཕྲུལ་ཆགས་དང་། །བཞག་ཤ་ལ་ནི་ལྷོད་ཆགས་དང་། །ཤ་འགྱུར་ལ་ནི་མེར་ཆགས་དང་། །རྣམ་འགྱུར་ལ་ནི་འགྱིང་ཆགས་དང་། །སྤྱོད་པ་ལ་ནི་དལ་ཆགས་དང་། །སྒྱིད་པ་ལ་ནི་ལྡེམ་ཆགས་དང་། །རྐང་མགོ་ལ་ནི་བདེ་ཆགས་དང་། །ཀུན་ཏུ་དཔའ་ཞིང་བརྗིད་ཆགས་པའོ། །ཞེས་དང་། འཇིགས་ཤིང་རྔམས་པའི་གར་དག་ལ། །ཧ་ཅང་གསོར་ན་སྐྱོན་ཡིན་ནོ། །འགྱིང་ཞིང་གཉེན་པའི་གར་རྣམས་ལ། །ཧ་ཅང་བཅོས་ཆུང་སྐྱོན་ཡིན་ནོ། །འཁྱུག་ཅིང་བདེ་བའི་གར་རྣམས་ལ། །ཧ་ཅང་རྟབ་རྟོབ་སྐྱོན་ཡིན་ནོ། །དལ་ཞིང་ལྷོད་པའི་གར་རྣམས་ལ། །ཧ་ཅང་སྒྱིད་ལུག་སྐྱོན་ཡིན་ནོ། །སྒེག་ཅིང་ཆགས་པའི་གར་རྣམ་ལ། །ཧ་ཅང་བསྒྱུར་ན་སྐྱོན་ཡིན་ནོ། །ཞེས་དང་། གཞན་ཡང་སྤང་བླང་ནི་བྱེ་བྲག་སྤྱིའི་གདམས་པ་བཅས་ཞིབ་པར་བསྟན་པ་རྣམས་ཤེས་དགོས་ཤིང་། བྱེ་བྲག་རང་རང་གི་ལུགས་སྲོལ་འཁྲུལ་མེད་རྩ་བའི་ཁུངས་གང་ཡིན་ལ་མཁས་པར་བསླབ་དགོས་པས། སྐབས་འདིར་ནི། སྤྲུལ་པའི་གཏེར་ཆེན་གུ་རུ་ཆོས་ཀྱི་དབང་ཕྱུག་དག་པའི་སྣང་བར་ཟངས་མདོག་དཔལ་རིར་སློབ་དཔོན་ཆེན་པོའི་སྤྱན་སྔར་བྱོན་པའི་ཚེ་ཇི་ལྟར་མཇལ་ཞིང་རྗེས་སུ་གདམས་པ་སྩལ་པའི་དོན་མ་ནོར་གཏན་ལ་ཕབ་པའི་རྒྱུན། ཆོས་ཀྱི་རྒྱལ་པོ་སྨིན་པ་ཡབ་སྲས་བརྒྱུད་པའི་ཕྱག་བཞེས་རྨ་མེད་སྤྲོས་བཅས་ཚེས་བཅུའི་གར་འཆམ་ཞེས་ཡོངས་སུ་གྲགས་པ་སྟེ། ཐ་ན་དུད་འགྲོ་ཡན་ཆོད་གང་གིས་མཐོང་ཚད་སློབ་དཔོན་ཆེན་པོའི་གདུལ་བྱར་འགྱུར་བའི་ཕན་ཡོན་དང་ལྡན་པར་རྗེས་སུ་བསྔགས་པ་ཡིན་པས་གང་བྱུང་སླ་ཆོས་དང་དེས་ཆོག་གི་དབང་དུ་མི་གཏོང་བར་སློབ་དཔོན་མཁས་པ་ལས་སྦྱང་བརྩོན་གནད་ཁེལ་ངེས། འཆམ་དངོས་གཞིའི་སྐབས་ཀྱང་འཆམ་དཔོན་སོགས་ལ་ཚུལ་བཞིན་འཁྲི་ཞིང་ལུས་ཉམས་སོགས་དང་བྲེལ་གང་གི་སྐབས་ཀྱང་རང་ཚུགས་མ་ཤོར་བ་གལ་ཆེ་ཞིང་། དེ་བཞིན་དུ་དུང་རྒྱགས་སོགས་འབུད་ཀྱི་རིག་གཞན་རྣམས་ཀྱང་མཐོང་བ་བརྒྱུད་པའི་ཕྱག་བཞེས་ཕན་ཡོན་དང་དགོས་ཆེད་དུ་མས་ཁྱད་པར་དུ་བྱས་པ་ཡིན་པས་འབུད་ཚིག་སོགས་རང་ལུགས་རྐང་ཐོན་ཁོ་ན་ལས། ཨ་གསར་ཀླད་ཡང་གིས་འདི་བས་འདི་ལེགས་སོགས་བཅོས་བསྒྱུར་བྱས་ན། རང་ལུགས་ཀྱི་རྐང་མ་ཟིན། གཞན་ལུགས་ཀྱི་ཟླ་མ་སྙོགས། བསྟན་པའི་བླ་འཚོང་དང་རྐང་འདྲེན་གྱི་རྒྱུར་འགྱུར་བས་ཀུན་གྱིས་ཐུགས་ཁུར་ཆེ་བཞེས་ཀྱི་སྔོན་སྲོལ་མ་ཉམས་གོང་འཕེལ་ཉམས་པ་སོར་ཆུད་ཀྱིས་བསྟན་པའི་མིག་རྐྱེན་དང་ཞབས་ཏོག་ཏུ་གང་འགྲོ་མཛད་གལ་ཆེ་ཞིང་། ན་བཟའ་སྐུ་ཆས་གཟབ་འཆོར་སོགས་ཀྱང་གནའ་ནས་གནང་སྲོལ་ཡོད་བཞིན་འདི་སྒེག་ཆོས་དང་སྣང་ཤས་ཀྱིས་མ་ཡིན་པས་དཀོན་མཆོག་མཆོད་པའི་ཡོ་བྱད་དུ་ལེགས་པར་བསྟར་ན། གཞན་དང་བ་འདྲེན་ཞིང་། རང་གི་བསོད་ནམས་ཀྱི་ཚོགས་རྫོགས་རང་ལུས་ཕུང་ཁམས་སྐྱེ་མཆེད་གདོད་ནས་གདན་གསུམ་ཡོངས་རྫོགས་ལྷའི་འཁོར་ལོ་གནས་པ་ལ་ལྷ་ལ་ལྷ་རོལ་བའམ། ཆོས་ཉིད་ལ་ཆོས་ཉིད་རོལ་བའི་ཚུལ་གྱིས་ཞེན་པ་མེད་པར་ལོངས་སྤྱོད་པས་གསང་སྔགས་རྡོ་རྗེ་ཐེག་པའི་ཉེ་རྒྱུའི་སྤྱོད་པ་བླ་ན་མེད་པར་འགྱུར་བ་ཡིན་པས་ཀུན་གྱིས་དེ་བཞིན་དུ་གནང་བ་དང་། དེ་ལྟར་གནང་ན་དཀོན་མཆོག་ལ་དམིགས་པའི་ལས་ནི་ནམ་ཡང་བྱས་པ་ཆུད་མི་ཟ་ཞིང་འབྲས་བུ་རྒྱ་ཆེན་པོ་སྐྱེད་པ་ཡིན་ཏེ། སྔོན་བཅོམ་ལྡན་འདས་ལ་བཟང་སྡེ་དྲུག་ཅུས་རོལ་མོ་ཕུལ་བས་རྒྱུ་དེས་བསྐལ་པ་དྲུག་ཅུར་ངན་འགྲོ་ལོག་པར་མི་ལྟུང་ཞིང་མཐར་རང་སངས་རྒྱས་དབྱངས་སྙན་བྱ་བ་འབའ་ཞིག་ཏུ་འགྱུར་བར་གསུངས་སོགས་ལུང་མཐའ་ཡས་ཏེ། མདོར་ན། ཁང་བུ་བརྩེགས་པའི་མདོ་ལས། ཀུན་དགའ་བོ་སངས་རྒྱས་དང་ཆོས་དང་དགེ་འདུན་ལ་དགེ་བའི་རྩ་བ་བསྐྱེད་པ་གསུམ་པོ་འདི་ནི་འཁོར་བར་ཟད་པར་མི་འགྱུར་ཞིང་ཡོངས་སུ་གཏུགས་པར་མི་འགྱུར་ལ། ཟད་མི་ཤེས་པས་མྱ་ངན་ལས་འདས་པ་ཐོབ་པར་འགྱུར་བ་ཡིན་ནོ། །ཞེས་གསུངས་ཤིང་། ཁྱད་པར་དེང་སང་ལྟ་བུའི་དུས་ཀྱི་མཐའ་སངས་རྒྱས་ཀྱི་བསྟན་པ་འཇིག་ལ་ཉེ་བའི་སྐབས་འདིར་བསྟན་ལ་ལྷག་བསམ་གྱིས་ཞབས་ཏོག་སྲི་ཞུ་ཅུང་ཟད་རེ་འགྲུབ་ན་དོན་ཤིན་ཏུ་ཆེ་སྟེ། ཏིང་འཛིན་རྒྱལ་པོ་ལས། བསྐལ་པ་བྱེ་བ་གངྒཱའི་བྱེ་སྙེད་དུ། །དང་བའི་སེམས་ཀྱིས་ཟས་དང་སྐོམ་རྣམས་དང་། གདུགས་དང་བ་དན་མར་མེའི་ཕྲེང་བ་ཡིས། །སངས་རྒྱས་བྱེ་བ་ཁྲག་ཁྲིག་རིམ་གྲོ་བྱས། །གང་ཞིག་དམ་ཆོས་རབ་ཏུ་འཇིག་པ་དང་། བདེ་གཤེགས་བསྟན་པ་འགག་པར་འགྱུར་བའི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་ན། །བསོད་ནམས་འདི་ནི་དེ་བས་ཁྱད་པར་འཕགས། །ཞེས་དང་། བློ་གྲོས་རྒྱ་མཚོས་ཞུས་པའི་མདོ་ལས། སངས་རྒྱས་སྤྱན་གྱིས་གཟིགས་པའི་ཞིང་མང་པོ། །རིན་ཆེན་བཀང་སྟེ་དེ་བཞིན་གཤེགས་ལ་ཕུལ། །ཟད་པའི་དུས་ན་ཇི་ལྟར་ཆོས་འཛིན་ལྟར། །བསོད་ནམས་ཕུང་པོ་དེ་ཙམ་འཕེལ་མ་ཡིན། །ཞེས་གསུངས་ཤིང་། མདོ་འདུལ་སོགས་ཕར་ཕྱིན་གྱི་ཆོས་ལ་བརྩོན་པ་བས་ཀྱང་གསང་མཆོག་བླ་ན་མེད་པ་རྡོ་རྗེ་ཐེག་པའི་དཀྱིལ་འཁོར་ཟབ་མོ་འདི་ལྟ་བུ་ལ་འབྲེལ་བ་བཞག་ན་ཕན་ཡོན་དང་དགོས་པ་ཆེ་བར་གསུངས་ཏེ། སྤྱི་མདོ་ལས། དབུ་མ་རྣམ་ཐར་གསུམ་སྒོར་དཀའ་སྤྱད་ཀྱང་། །དེ་ལ་རྒྱལ་བས་མི་དགོངས་བཀུར་མི་མཛད། །སྙིང་པོའི་དོན་རིགས་སྐད་ཅིག་ཙམ་གྱིས་ཀྱང་། །བྱིན་རླབས་ཡོན་ཏན་རྒྱལ་བས་བཤད་མི་རྫོགས། །དཀར་པོ་མཐར་ཐུག་བསོད་ནམས་ཀུན། །སེན་མོའི་ཐོག་གི་ས་རྡུལ་འདྲ། །རྡོ་རྗེ་སྙིང་པོར་གཅིག་བསྐྱེད་པས། །ས་ཡི་དཀྱིལ་འཁོར་ཆེན་པོ་ཙམ། །དཀར་པོའི་ཕྱོགས་ཀྱི་མཐར་ཐུག་པ། །དེ་ནི་མུན་ཁང་སྒྲོན་མེ་ཙམ། །རྡོ་རྗེ་སྙིང་པོ་གཅིག་རིག་པ། །དུས་མཐའི་བསྐལ་པའི་མེ་ཆེན་འདྲ། །ཞེས་སོགས་རྒྱ་ཆེར་གསུངས་པ་དང་། རྣམ་སྣང་མངོན་བྱང་ལས་ཀྱང་། བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་བྱས་པ་གང་། །དཀྱིལ་འཁོར་འདི་འདྲ་མཐོང་མ་ཐག །དེ་དག་ཟད་པར་འགྱུར་ཡིན་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །ཞེས་དང་། རྡོ་རྗེ་རྩེ་མོ་ལས། སྔགས་རྣམས་ཀུན་གྱི་མཚན་ཉིད་ནི། །སངས་རྒྱས་ཀུན་གྱི་ཐུགས་ཡིན་ཏེ། །ཆོས་ཀྱི་སྙིང་པོ་སྒྲུབ་བྱེད་པས། །ཆོས་ཀྱི་དབྱིངས་དང་ཡང་དག་ལྡན། །ཞེས་གསུང་ཤིང། །སྔགས་ཆོག་ཀུན་གྱི་ནང་ནས་ཀྱང་ལམ་ཟབ་མོ་བླ་མ་སྒྲུབ་པ་ནི་གཞན་ལས་ཁྱད་པར་དུ་འཕགས་ཏེ། ཀུན་ཏུ་ཁ་སྦྱོར་གྱི་རྒྱུད་ལས། ཡེ་ཤེས་ཀུན་སེམས་ཞེས་བྱ་བའི། །རྒྱལ་བ་ཀུན་གྱི་སློབ་དཔོན་མཆོག །དངོས་གྲུབ་སྣ་ཚོགས་སྟེར་བས་ན། །བློ་དང་ལྡན་པས་རྟག་མཆོད་བྱ། །གང་ཕྱིར་ཕྱོགས་བཅུའི་སངས་རྒྱས་དང་། །བྱང་ཆུབ་སེམས་མཆོད་བསོད་ནམས་ལས། །བླ་མའི་བ་སྤུའི་ཁུང་གཅིག་མཆོག །དེ་ཕྱིར་སློབ་དཔོན་མཆོད་བྱེད་པ། །སངས་རྒྱས་བྱང་ཆུབ་སེམས་དཔས་གཟིགས། །ཞེས་དང་། དགོངས་འདུས་ལས། བསྐལ་པ་སྟོང་གི་སངས་རྒྱས་པས། །བླ་མ་གཉན་པར་ཤེས་པར་བྱ། །ཅི་ཕྱིིར་བསྐལ་པའི་སངས་རྒྱས་རྣམས། །བླ་མ་དག་ལ་བརྟེན་ནས་འབྱུང་། །དེས་ན་སངས་རྒྱས་སྟོང་ཕྲག་ལས། །བསྐལ་པ་སྟོང་དུ་མཆོད་བྱས་པས། །བླ་མའི་བ་སྤུའི་ཁུང་རེ་ལ། །ཙནྡན་ཐིགས་པ་གཅིག་བྱུགས་པའི། །སྟོང་ཕྲག་ཆར་ཡང་ཕོད་པ་མིན། །ཞེས་དང་། གསང་འདུས་ལས། དུས་གསུམ་སངས་རྒྱས་ཀུན་མཆོད་པས། །བླ་མའི་བ་སྤུའི་ཁུང་རེ་ལ། །མར་གྱི་ཐིགས་པ་གཅིག་བྱུགས་ན། །དེ་ཡི་བསོད་ནམས་ཁྱད་པར་འཕགས། །ཞེས་དང་། འཁོར་ལོ་ཆུབ་པ་རོལ་པའི་རྒྱུད་ལས། གང་གིས་བསྐལ་པ་བྱེ་བ་རུ། །ལྷ་ཡི་སྐུ་ནི་བསྒོམས་པ་བས། །མགོན་པོ་ཀུན་གྱི་དབང་ཕྱུག་ཆེ། །བླ་མ་དྲན་པ་མཆོག་ཏུ་བཤད། །ཅེས་དང་། ཀུན་ཏུ་བཟང་པོ་ཆེ་བ་རང་ལ་གནས་པའི་རྒྱུད་ལས། རྫོགས་པ་ཆེན་པོ་ཨ་ཏི་ལས། །བྱུང་བའི་བླ་མ་དྲིན་ལྡན་ཉིད། །སྙིང་གི་དཀྱིལ་ལམ་ལག་པའི་མཐིལ། །སྤྱི་བོའི་གཙུག་ཏུ་གང་བསྒོམས་པ། །སངས་རྒྱས་སྟོང་གི་ཡོན་ཏན་ཡང་། །གང་ཟག་དེ་ཡིས་འཛིན་པར་འགྱུར། །ཞེས་དང་། ཡིད་བཞིན་མཆོག་གི་རྒྱུད་ལས། གང་གིས་བླ་མ་ལྷག་པའི་ལྷ། །སྤྱི་བོའི་གཙུག་ཏུ་བསྒོམས་པ་ཡིས། །སངས་རྒྱས་དཀྱིལ་འཁོར་སྟོང་ཕྲག་ཉིད། །ལག་མཐིལ་བཞག་ནས་སྟོང་གསུམ་བསྐོར། །སྙིང་ཁར་ལན་སྟོང་བསྟི་བྱས་པས། །བརྒྱ་སྟོང་རྒྱུ་དང་ཆར་མི་ཕོད། །ཅེས་དང་། གཞན་ལས་ཀྱང་། མཆོད་པ་ཐམས་ཅད་ཡོངས་སྤངས་ནས། །བླ་མ་མཆོད་ལ་ཡང་དག་བརྩོན། །དེ་བརྙེས་པས་ནི་ཀུན་མཁྱེན་གྱི། །ཡེ་ཤེས་མཆོག་དེ་ཐོབ་པར་འགྱུར། །ཞེས་གསུངས་ཤིང་། གུ་རུ་ཉིད་ཀྱི་རྡོ་རྗེའི་གསུང་ལས་ཀྱང་། ང་སྒྲུབ་སངས་རྒྱས་ཐམས་ཅད་སྒྲུབ། །ང་འགྲུབ་སངས་རྒྱས་ཐམས་ཅད་འགྲུབ། །ང་མཐོང་སངས་རྒྱས་ཐམས་ཅད་མཐོང་། །ང་ནི་བདེ་གཤེགས་འདུས་པ་ཡིན། །ཞེས་གུ་རུ་རིན་པོ་ཆེ་ཉིད་སྒྲུབ་ཅིང་མཆོད་པས་སངས་རྒྱས་ཐམས་ཅད་སྒྲུབ་ཅིང་མཆོད་པར་འགྱུར་བར་གསུངས་ཤིང་། སྒྲུབ་ཐབས་ཡང་ལུགས་སྲོལ་ཀུན་གྱི་རྩེ་མོར་གྱུར་པ་འདི་ཉིད་ཡིན་ཏེ། བླ་མའི་སྒྲུབ་ཐབས་མོས་གུས་ཆོས་མང་གིས། །རང་དང་དབྱེར་མེད་སྒྲུབ་པ་འདི་ན་མཆིས། །དེ་གང་ཞེ་ན་བླ་མ་གསང་འདུས་སྐོར། །མཐར་ཐུག་ཡིན་ནོ་སྙིང་གི་དཀྱིལ་དུ་ཆོངས། །ཞེས་དང་། སྒྲུབ་ཐབས་གང་བྱེད་བསྐྱེད་རིམ་གྱི། །བཅའ་གཞི་བཤམས་པའི་དུས་སུ་ཡང་། །ང་ཉིད་ཐེ་ཚོམ་མེད་པར་འབྱོན། །ཞེས་དང་། ཤ་མེད་འོད་ཀྱི་གཟུགས་ཅན་ནི། །པདྨ་འབྱུང་གནས་སྐུ་རུ་སྒོམ། །དེ་དུས་ཆེ་བའི་ང་རྒྱལ་སྐྱེད། །སྲོག་གི་སྙིང་པོ་ཐོད་ཕྲེང་རྩལ། །བྲག་ཁ་དག་ནས་ཆུ་འབབ་བཞིན། །དྲག་པོ་བར་མཚམས་མེད་པར་སྒྲོངས། །ང་ཉིད་རང་དབང་མེད་པར་འབྱོན། །ཨོ་རྒྱན་པདྨ་ང་ཉིད་ལ། །བློ་ནི་ཡང་ཡང་གཏད་པར་བྱ། །ཞེས་སོགས་རྗེས་སུ་གདམས་པར་མཛད་པ་ལྟར་ཡིན་པས། འདི་ལྟ་བུའི་སྒྲུབ་པ་ཟབ་མོ་ལ་འབྲེལ་བ་ཐོབ་པ་ནི་མི་ལུས་དོན་དང་ལྡན་ཞིང་མཐར་ཐུག་པདྨ་འོད་ཀྱི་ཞིང་ཁམས་སུ་རིག་འཛིན་རྒྱ་མཚོའི་གྲལ་དུ་ངེས་པར་དབུགས་འབྱིན་པ་ལགས་ན་ཀུན་གྱིས་དགའ་བ་དང་སྤྲོ་བ་ཚད་མེད་པའི་ངང་ནས་བརྩོན་པ་ལྟ་བུ་བཞེས་པར་གསོལ་བ་འདེབས་པ་ལགས། ས་བོན་ཙམ་འདི་རིག་པའི་འཆར་གཞིར་བྲིས། །རྩ་བ་འདི་ལས་སྤྲོས་པའི་ལེགས་བཤད་བརྒྱ། །ཞིབ་མོར་སྤྲོས་ཏེ་བློ་དང་ལྡན་རྣམས་ཀྱི། །རྣ་བའི་རྒྱན་དུ་ཅི་དག ར་དཔྱང་མཛོད་ཀྱེ། །འདི་ཡང་རྣམ་དཔྱོད་ཡངས་པའི་རྡོ་རྗེའི་མཆེད་ཀྱིས་བསྐུལ་ངོར་བི་ཛ་ཡས་གང་དྲན་ཤར་མར་བྲིས་པ་དགེ། །།
ལམ་ཟབ་བླ་མའི་རྣལ་འབྱོར་གྱི་སྐོར་བྱིན་རླབས་རྒྱ་མཚོའི་སྤྲིན་ཆེན།
༄༅། །ལམ་ཟབ་བླ་མའི་རྣལ་འབྱོར་གྱི་སྐོར་བྱིན་རླབས་རྒྱ་མཚོའི་སྤྲིན་ཆེན་ཞེས་བྱ་བ་བཞུགས་སོ། །ན་མོ་གུ་རུ་དེ་ཝ་ཌཱ་ཀི་ཡེ། སྐྱབས་ཀུན་འདུས་དཔལ་ལྡན་བླ་མ་ལ། །བདག་སྒོ་གསུམ་གུས་པས་སྐྱབས་མཆི་ཞིང་། །མ་འགྲོ་ཀུན་སངས་རྒྱས་ལ་འགོད་ཕྱིར། །ལམ་ཟབ་མོ་བླ་མའི་རྣལ་འབྱོར་བསྒོམ། །རང་མདུན་མཁར་འཇའ་ཟེར་ཐིག་ལེའི་ཀློང་། །གདན་ཉི་ཟླ་པདྨ་བརྩེགས་པའི་སྟེང་། །རང་དྲིན་ཐོབ་རྩ་བའི་བླ་མ་དང་། །དོན་དབྱེར་མེད་ཨོ་རྒྱན་རྡོ་རྗེ་འཆང་། །དཔལ་རྡོ་རྗེ་སེམས་དཔའི་ཆ་ལུགས་ཅན། །སྐུ་མཐིང་གསལ་མཚན་དཔེའི་ལང་ཚོ་རྒྱས། །ཕྱག་བདེ་སྟོང་རྡོར་དྲིལ་ཡུམ་ལ་འཁྱུད། །ཞབས་སྲིད་ཞི་མཉམ་སྦྱོར་སྐྱིལ་ཀྲུང་བཞུགས། །ཡུམ་ཡེ་ཤེས་མཁའ་འགྲོ་མཚོ་རྒྱལ་མ། །སྐུ་དམར་གསལ་གྲི་ཐོད་འཛིན་པས་འཁྲིལ། །རྒྱན་རིན་ཆེན་རུས་རྒྱན་ཅོད་པཎ་མཛེས། །སྐུའི་གནས་བཞིར་འཁོར་ལོ་པདྨ་དང་། །རྡོ་རྗེ་དང་རྒྱ་གྲམ་ལྟེ་བ་རུ། །ༀ་དཀར་དང་ཨཱཿདམར་ཧཱུྃ་མཐིང་ཀ །ཧྲཱིཿམ་དམར་འོད་ཟེར་འབར་བར་བསྒོམ། །ཕྱིའི་མཐའ་བསྐོར་དགོངས་བརྡ་སྙན་བརྒྱུད་ཀྱི། །དཔལ་རིག་འཛིན་རྩ་བརྒྱུད་བླ་མ་དང་། །དོན་རྒྱུད་སྡེ་བཞི་དྲུག་ཡི་དམ་ལྷ། །མ་མཁའ་འགྲོ་ཆོས་སྐྱོང་སྤྲིན་ལྟར་གསལ། །ཐུགས་སྲོག་གི་འོད་དཀྱིལ་ཡེ་ཤེས་པ། །འོག་མིན་ནས་སྤྱན་དྲངས་གཉིས་མེད་བསྟིམས། །མི་བདག་དང་མཁའ་མཉམ་འགྲོ་ཀུན་གྱིས། །ལུས་ཞིང་རྡུལ་སྤྲུལ་ནས་གུས་ཕྱག་འཚལ། །ལུས་ལོངས་སྤྱོད་ཀུན་བཟང་མཆོད་སྤྲིན་འབུལ། །སྐྱེ་ཚེ་རབས་བསགས་པའི་སྡིག་ལྟུང་བཤགས། །རྣམ་དཀར་གྱི་ཚོགས་ལ་ཡི་རང་འབུལ། །ངེས་གསང་གི་ཆོས་འཁོར་བསྐོར་བར་བསྐུལ། །གཟུགས་སྐུ་ཡི་བཀོད་པ་གཡོ་མེད་གསོལ། །དགེ་ཚོགས་རྣམས་འགྲོ་བའི་རྒྱུད་ལ་བསྔོ། །རྗེ་སྐུ་ལྔ་ལྷུན་གྲུབ་རྡོ་རྗེ་ཅན། །དོན་སྐྱེ་འཆི་གཉིས་སྤངས་འཕོ་ཆེན་སྐུ། །མ་འགྲོ་ཀུན་སྐྱོབ་པའི་ཐུགས་རྗེ་ཅན། །དཔལ་ཨོ་རྒྱན་རྗེ་ལ་གསོལ་བ་འདེབས། །ཀྱེ་གངས་ཅན་བླ་མ་པདྨ་འབྱུང་། །བདག་གསོལ་འདེབས་བུ་ལ་ཐུགས་རྗེས་གཟིགས། །སྙིང་རུས་པའི་གཏིང་ནས་རྗེ་ཁྱེད་དྲན། །ངག་གདུང་བའི་དབྱངས་ཀྱིས་འབོད་ལགས་ན། །ཕ་ཐུགས་རྗེ་བཏང་སྙོམས་མ་མཛད་པར། །སྔོན་ཐུགས་དམ་ཞལ་བཞེས་དགོངས་མཛོད་ལ། །བདག་སྐྱབས་མེད་པོ་ལ་ཐུགས་རྗེ་གཟིགས། །གསོལ་བཏབ་ཀྱི་འབྲས་བུ་མཆིས་པར་མཛོད། །དུས་ད་རེས་ཐོབ་པའི་དལ་འབྱོར་འདི། །དོན་ངོ་བོ་རྒྱུ་རྐྱེན་དཔེ་གྲངས་སོགས། །ཚུལ་གང་ལ་བསམས་ཀྱང་རྙེད་དཀའ་ཞིང་། །དོན་ཆེ་བ་ཡིད་བཞིན་ནོར་ལས་ལྷག །སྔོན་བསོད་ནམས་བསགས་པའི་འབྲས་བུ་ཡིས། །དུས་ལན་གཅིག་རྙེད་པའི་རིན་ཆེན་འདི། །ད་དོན་མེད་ངང་དུ་མ་སོང་བར། །བློ་ཆོས་སུ་འགྲོ་བར་བྱིན་གྱིས་རློབས། །ཕྱི་ན མ་ཟླ་དུས་བཞི་འཕོ་ཞིང་འགྱུར། །ནང་དགྲ་གཉེན་བར་མ་སྐྱེ་ཞིང་འཆི། །གསང་ཕུང་ལྔའི་ཚོགས་པ་རྒུད་ཅིང་རྙིང་། །ཚུལ་གང་ལ་བསམས་ཀྱང་སྐྱོ་བའི་རྒྱུ། །དུས་དེ་སྔོན་དོན་མེད་ལས་ལ་གཡེངས། །ད་ནམ་འཆི་ཆ་མེད་ཨ་ཙ་མ། །བློ་རྟག་འཛིན་འགོང་པོས་མི་བསླུ་བར། །ཆོས་བརྩོན་པས་སྒྲུབ་པར་བྱིན་གྱིས་རློབས། །དཔེ་དཔྱིད་དུས་ས་བོན་གང་བཏབ་པས། །སྟོན་འབྲས་བུ་དེ་དེར་སྨིན་པ་བཞིན། །ལས་དཀར་ནག་རྒྱུ་འབྲས་ཟབ་མོའི་ཚུལ། །དུས་ནམ་ཡང་མི་བསླུ་ངོ་མཚར་ཆེ། །མ་ཆགས་དང་མི་སྡང་གཏི་མུག་མེད། བློ་དེས་བསྐྱེད་ལས་ཀུན་དགེ་བ་སྟེ། །འབྲས་འཕྲལ་ཡུན་བདེ་དགེའི་དཔལ་ལ་སྦྱོར། །སེམས་ཆགས་སྡང་རྨོངས་པས་ཀུན་བསླངས་པའི། །ལས་བསགས་ཀུན་སྡིག་པའི་རང་བཞིན་ཏེ། །འབྲས་འཕྲལ་ཀུན་སྡུག་བསྔལ་བཟོད་པར་དཀའ། །ཚུལ་དེ་ལ་ཡིད་ཆེས་རབ་སྐྱེས་ནས། །སྡིག་མི་དགེའི་ལས་རྣམས་དུག་ལྟར་སྤོངས། །སྔར་བྱས་ཀྱི་ལས་ལ་གནོང་འགྱོད་བཤགས། །དགེ་བཅུ་ཡི་ཚུལ་ལ་འཇུག་པ་དང་། ཁྱད་པར་དུ་ཐར་པ་ཆ་མཐུན་ལམ། །ཚུལ་དམ་པ་གསུམ་གྱིས་རྩིས་ཟིན་པའི། །ཆོས་རྣམ་དག་སྒྲུབ་པར་བྱིན་གྱིས་རློབས། །སྤྱིིར་སྐྱེ་བཞི་བརྒྱུད་ལྔའི་འཁོར་བ་པ། །དོན་བདེ་མེད་སྡུག་བསྔལ་རང་བཞིན་ཅན། །དཔེ་འཇིགས་རུང་སྲིན་མོའི་གླིང་དང་འདྲ། །ད་ཐར་པའི་དུས་མེད་ཡ་རེ་ང་། །དགོས་དམྱལ་བ་ཚ་གྲང་དུཿཁས་གཟིར། །ཡི་དྭགས་རྣམས་བཀྲེས་ཤིང་སྐོམ་པས་ཉམས། །དུད་འགྲོ་རྣམས་གླེན་ལྐུག་བཀོལ་སྤྱོད་ཉེན། །མི་སྐྱེ་རྒ་ན་འཆིའི་ཆད་པས་གཙེས། །ལྷ་མ་ཡིན་འཐའ་རྩོད་བཅད་གཏུབ་མྱོང། །ལྷ་འཕོ་ལྟུང་སྡུག་བསྔལ་བཟོད་པར་དཀའ། །འགྲོ་སྡུག་བསྔལ་གསུམ་གྱི་འཁོར་ལོ་བསྐོར། །ང་བཟོད་ཐབས་མེད་པ་ཨ་ཙ་མ། །དུས་ད་ལྟ་མེ་སྟག་ཕོག་ཙམ་ཡང་། །བཟོད་དཀའ་ན་བསྐལ་པར་དམྱལ་མེ་ཡིས། །བསྲེག་མཆི་ན་བདག་གིས་ཇི་ལྟར་བཟོད། །རྗེ་མཁྱེན་ནོ་བླ་མ་དཀོན་མཆོག་མཁྱེན། །བློ་སྲེད་ལེན་འཆིང་བའི་ཞགས་པ་ཡིས། །དུས་ད་བར་སྲིད་པའི་བརྩོན་རར་བཅིངས། །ད་ཞེན་པ་གཏིང་ནས་ལོག་པ་ཡིས། །ལམ་བྱང་ཆུབ་སྒྲུབ་པར་བྱིན་གྱིས་རློབས། །གནས་འཇིགས་རུང་སྲིད་པའི་སྡུག་བསྔལ་ལས། །སྐྱོབ་ནུས་པ་བླ་མ་དཀོན་མཆོག་གསུམ། །སྐྱབས་དེ་ཡིས་བསླུ་བ་ནམ་ཡང་མེད། །ཚུལ་དེ་ཡིས་ཡིད་ཆེས་རབ་སྐྱེད་ནས། །རྒྱུ་དད་པ་བརྟན་པོས་སྐྱབས་འགྲོ་ཞིང་། །དགག་སྒྲུབ་དང་ཆ་མཐུན་བསླབ་བྱ་རྣམས། །ཚུལ་བཞིན་དུ་ཉམས་མེད་སྲུང་བ་ཡིས། །གནས་འཇིགས་པ་གསུམ་གྱི་གཡང་ས་ལས། །དུས་ད་ལྟ་སྐྱོབས་པར་བྱིན་གྱིས་རློབས། །ཆོས་ཐེག་པ་ཆེན་པོ་ལམ་གྱི་བཅུད། །དཔལ་རྒྱལ་བ་སྲས་བཅས་འབྱུང་བའི་དབྱིངས། །ཚུལ་ཡོན་ཏན་བསམ་མི་ཁྱབ་པའི་གཏེར། །མ་འགྲོ་ཀུན་སྲིད་ལས་སྒྲོལ་བའི་ཕྱིར། །དོན་རྫོགས་པའི་བྱང་ཆུབ་ཐོབ་འདོད་བློས། །སྲོལ་གཉིས་དང་ལྡན་པའི་བྱང་ཆུབ་སེམས། །རྒྱུ་འབྲས་བུར་དམ་བཅའ་སྨོན་འཇུག་ཚུལ། །དུས་འདི་ནས་བྱང་ཆུབ་སྙིང་པོའི་བར། །འཆི་སྲོག་ལ་བབས་ཀྱང་མི་འདོར་ཞིང་། །ལས་ཆོས་སྤོང་སྒྲིབ་པས་མི་བརྗེད་དང་། །གྲོགས་ངན་པའི་རྐྱེན་གྱིས་མི་བསྒྱུར་བར། །རྒྱུ་ཚད་མེད་བཞི་ལ་བློ་སྦྱོང་ངོས། །ལམ་ཕ་རོལ་ཕྱིན་པའི་ཉམས་ལེན་ལ། །ཚུལ་བཞིན་དུ་སློབ་པར་བྱིན་གྱིས་རློབས། །ཐབས་ཁྱད་འཕགས་གསང་སྔགས་རྡོ་རྗེའི་ཐེག །དབང་རྣོན་རྣམས་ཚེ་འདིར་གྲོལ་བྱེད་པའི། །སྨིན་གྲོལ་གྱི་གདམས་པ་སྩོལ་མཁས་པ། །དྲིན་འཁོར་མཐའ་བྲལ་བའི་བླ་མ་རྗེ། །སྐྱབས་ཀུན་གྱི་ངོ་བོ་ཤེས་པའི་བློས། །ཡིད་ཁྱེད་ཤེས་མོས་པའི་དད་པ་དང་། །དབང་བཞི་ཡི་དམ་ཚིག་བསྲུང་མཚམས་རྣམས། །དུས་ནམ་ཡང་ཉམས་མེད་བྱིན་གྱིས་རློབས། །གཞི་རང་རིག་བདེ་གཤེགས་སྙིང་པོའི་ཁམས། །ཀ་དག་དང་ལྷུན་གྲུབ་ཟུང་འབྲེལ་བ། །དོན་སྐུ་གསུམ་གྱི་ངོ་བོར་ཡེ་གནས་ཀྱང་། །དུས་ད་བར་མ་རིག་འཁྲུལ་པས་སྒྲིབ། །མེད་བཞིན་དུ་སྲིད་པའི་འཁོར་ལོར་འཁྱམས། །རྨི་ལམ་བཞིན་བདེ་སྡུག་སྣ་ཚོགས་མྱོང་། །ད་ཆོས་རྗེ་བླ་མའི་བྱིན་རླབས་ཀྱིས། །དབང་བཞི་ཡི་ཡེ་ཤེས་ཚང་སྤྲུགས་བསྐུར། །ལས་ཉོན་མོངས་གཟུང་འཛིན་སྒྲིབ་པ་སོལ། །ལམ་རིམ་གཉིས་ཟབ་མོ་སྒོམ་ལ་དབང་། །འབྲས་སྐུ་བཞི་མངོན་བྱེད་བྱིན་གྱིས་རློབས། །གཞིའི་སྦྱང་བྱ་ལུས་ཀྱི་སྒྲིབ་པ་རྣམས། །ལམ་སྦྱོང་བྱེད་བསྐྱེད་རིམ་རྣལ་འབྱོར་གྱིས། །འབྲས་སྤྲུལ་སྐུའི་ཡེ་ཤེས་མངོན་བྱེད་པར། །ཕ་སྤྲུལ་པའི་སྐུ་ཡིས་བྱིན་གྱིས་རློབས། །གཞིའི་སྦྱང་བྱ་ངག་གི་སྒྲིབ་པ་རྣམས། །ལམ་སྦྱོང་བྱེད་རླུང་སྦྱོར་རྡོར་བཟླས་ཀྱིས། །འབྲས་ལོངས་སྐུའི་ཡེ་ཤེས་མངོན་བྱེད་པར། །ཕ་ལོངས་སྤྱོད་རྫོགས་སྐུས་བྱིན་གྱིས་རློབས། །གཞིའི་སྦྱང་བྱ་སེམས་ཀྱི་སྒྲིབ་པ་རྣམས། །ལམ་སྦྱོང་བྱེད་ཐིག་ལེའི་རྣལ་འབྱོར་གྱིས། །འབྲས་ཆོས་སྐུའི་ཡེ་ཤེས་མངོན་བྱེད་པར། །ཕ་ཆོས་ཀྱི་སྐུ་ཡིས་བྱིན་གྱིས་རློབས། །གཞིའི་སྦྱང་བྱ་ཤེས་བྱའི་སྒྲིབ་པ་རྣམས། །ལམ་སྦྱོང་བྱེད་ཁྲེགས་ཆོད་ཐོད་རྒལ་གྱིས། །འབྲས་ངོ་བོ་ཉིད་སྐུ་མངོན་བྱེད་པར། །ཕ་ངོ་བོ་ཉིད་སྐུས་{སྐུའི} བྱིན་གྱིས་རློབས། །རྗེ་དྲན་ནོ་དྲིན་ཆེན་བླ་མ་དྲན། །མི་བདག་ལ་རེ་ས་གཞན་ན་མེད། །དུས་ད་ལྟ་དབང་བསྐུར་བྱིན་རློབས་ལ། །མཆོག་ཐུན་མོང་དངོས་གྲུབ་སྩལ་དུ་གསོལ། །ཚུལ་དེ་ལྟར་མོས་གུས་གདུངས་དབྱངས་ཀྱིས། །སྙིང་རུས་པའི་གཏིང་ནས་གསོལ་བ་འདེབས། །ངག་སྙིང་པོ་བཛྲ་གུ་རུ་བགྲངས། །ལས་གང་འདོད་དམིགས་པའི་འཕྲོ་འདུ་བྱ། །མཐར་འཁོར་གྱི་རྩ་གསུམ་དཀྱིལ་འཁོར་སྤྲིན། །འཇའ་ཟེར་ལྔའི་རྣམ་པས་འོད་དུ་ཞུ། །དབུས་རིགས་བདག་བླ་མའི་སྐུ་ལ་ཐིམ། །སྐུ་མཚན་དཔེའི་གཟི་བྱིན་ཡ་ལ་ལ། །གསུང་ཨ་ཧཾ་བདེ་སྐད་འུ་རུ་རུ། །ཐུགས་མཁྱེན་བརྩེའི་ཡེ་ཤེས་ཏ་ལ་ལ། །བདག་གསོལ་འདེབས་བུ་ལ་བྱིན་གྱིས་རློབས། །རྗེ་ཡབ་ཡུམ་སྐུ་ཡི་གནས་བཞི་ནས། །འཇའ་འོད་ཟེར་ཡིག་འབྲུ་ལྔ་ལྡན་འཕྲོས། །མི་བདག་གི་ལུས་ཀྱི་གནས་བཞིར་ཐིམ། །དོན་དབང་བཞི་ཐོབ་ཅིང་སྒྲིབ་བཞི་སྦྱོངས། །ལམ་བསྐྱེད་རླུང་ཐིག་རྫོགས་སྒོམ་ལ་དབང་། །འབྲས་སྐུ་བཞི་ཐོབ་པའི་རྟེན་འབྲེལ་སྒྲིགས། །མཐར་བླ་མ་འོད་ཞུ་རང་ལ་ཐིམ། །རང་རིག་པ་བླ་མའི་ངོ་བོར་ཤར། །ཆོས་བློ་འདས་རྫོགས་ཆེན་དགོངས་པ་སྐྱོངས། །ད་ཚུར་ལྟོས་རང་གི་སེམས་ལ་ལྟོས། །སེམས་བྱུང་ཁུངས་གནས་མལ་འགྲོ་ས་དང་། །གཟུགས་ཁ་དོག་དངོས་པོ་ཅིར་འདུག་ལྟོས། །བལྟ་བྱ་དང་རྟོག་བྱེད་གཉིས་ཀར་རྟོག །ཚུལ་གང་ཡང་མ་གྲུབ་ཅིར་ཡང་འཆར། །བློ་དཔྱད་པས་མི་མཚོན་གཉུག་མའི་གཤིས། དོན་སྐྱེ་འགག་གནས་གསུམ་བྲལ་བའི་ངང་། །ངག་བརྗོད་དུ་མེད་ཀྱང་མྱོང་དུ་ཡོད། །དཔེ་ལྐུག་པས་བུ་རམ་ཟོས་པ་བཞིན། །དོན་མཐོང་མེད་ཚུལ་གྱིས་མཐོང་བ་ན། །རང་བབས་ཀྱི་ངང་དུ་ལྷོོད་དེ་ཞོག །འཛིན་མེད་ཀྱི་ངང་དུ་ཁྲོལ་ལེར་ཞོག །དགག་སྒྲུབ་དང་བྲལ་བར་ཤིགས་སེ་ཞོག །གཏད་མེད་ཀྱི་ངང་དུ་ཧར་རེ་ཉོལ། །ཕྱི་སྣང་བ་སྣ་ཚོགས་མཐོང་ཙ་ན། །སྣང་ཡུལ་ལ་མ་ཞེན་སྣང་མཁན་ལྟོས། །གཟུགས་སྣང་སྟོང་ལྷ་སྐུའི་ཕྱག་རྒྱར་འཆར། །བུམ་དབང་གི་ལམ་ཁྱེར་འདི་ལ་འདུ། །སྙན་མི་སྙན་གྱི་སྒྲ་སྐད་ཐོས་ཙ་ན། །སྒྲ་ཡུལ་རྗེས་མ་འབྲངས་ཐོས་མཁན་ལྟོས། །སྒྲ་གྲགས་སྟོང་སྙིང་པོ་སྔགས་ཀྱི་དབྱངས། །གསང་དབང་གི་ལམ་ཁྱེར་འདི་ལ་འདུ། །སེམས་འདུ་འཕྲོའི་རྟོགས་ཚོགས་ཅི་ཤར་ཡང་། །སེམས་ཤར་རྗེས་མ་གཅོད་ཤར་མཁན་ལྟོས། །སེམས་གང་ཤར་ཕྱག་རྒྱ་ཆེན་པོའི་ངང་། །ཤེར་དབང་གི་ཉམས་ལེན་འདི་ལ་འདུ། །སེམས་གནས་འགྱུ་སྣ་ཚོགས་འཁྲུལ་པའི་གཞི། །དེ་བལྟས་པས་ཆོས་ཉིད་དོན་ལ་རིང་། །ནང་རིག་མཁན་སོ་མའི་ངང་ལ་ཞོག །དོན་བློ་བྲལ་གྱི་ཡེ་ཤེས་འཆར་ཏེ་མཆི། །ཕྱི་ཐ་སྙད་ཚིག་ལ་འཛད་པ་མེད། །དོན་བློ་བྲལ་དགོངས་པ་མ་རྟོགས་ན། །ཚིག་ཇི་ལྟར་བཤད་ཀྱང་སྙིང་པོ་མེད། །ཡིད་དཔྱོད་ཀྱི་ལྟ་བས་འཚང་མི་རྒྱ། །ལྟ་བ་དེ་བློ་དང་བྲལ་བར་མཛོད། །སྒོམ་སེམས་འཛིན་མཐའ་ལ་ཐུག་པ་མེད། །ད་ཅོག་བཞག་ངང་དུ་མ་བསྡད་ན། །བློ་སྤྲ་སྤྲོ་མང་པོ་འཆིང་བའི་རྒྱུ། །ཡིན་སྙམ་གྱི་སྒོམ་གྱིས་བསླུ་ཉན་གདའ། །དོན་དབྱིངས་རིག་གཉིས་དང་མ་འབྲལ་ན། །ཆོས་ཉིད་ཀྱི་ཀློང་ནས་འདའ་ས་མེད། །ཀུན་བཟང་གི་དངོས་པའི་ཀློང་རེ་ཡངས། །གཏད་མེད་ཀྱི་ཤེས་པ་རྒྱ་རེ་ཆེ། །རྫོགས་ཆེན་གྱི་རྣལ་འབྱོར་གུ་རེ་ཡངས། །རྒྱ་གྲོལ་གྱི་སྐྱེས་བུ་བློ་རེ་བདེ། །སྒོམ་འཛིན་ཞེན་དང་ཕྲོལ་ལ་ལྷོོད་དེ་ཞོག །ཉམས་སྣ་ཚོགས་ཀྱི་ཕྲེང་བ་འཛད་དུས་མེད། །རང་གྲོལ་གྱི་གནད་དང་མི་ལྡན་ན། །ཚུལ་ཇི་ལྟར་ཤར་ཡང་འཆིང་བའི་རྒྱུ། །བཅོས་མ་ཡི་སྤྱོད་པས་འཆིང་ཉན་གདའ། །བཟང་རྟོག་གི་ཉམས་ལ་ཕཊ་ཀྱིས་རྒྱོབས། །ངན་རྟོག་རྣམས་རང་གྲོལ་ལམ་དུ་ཁྱེར། །དཔེ་སྦྲུལ་མདུད་རང་གིས་འགྲོལ་བ་བཞིན། །གཞན་གཉེན་པོ་མི་དགོས་ངོ་མཚར་ཆེ། །ཀ་དག་གི་གཏན་སྲིད་འཛིན་རེ་རན། །གང་ཤར་ཀུན་ཆོས་སྐུའི་རོལ་རྩལ་ལགས། །འདི་ཚིག་དབང་ཐོབ་པའི་ལམ་ཁྱེར་ཡིན། །ཉིན་མོ་རུ་སྣང་བ་རྒྱ་ཡིས་ཐོབ། །མཚན་མོ་རུ་འོད་གསལ་སྦུབས་འཇུག་བསྒོམ། །བདེ་སྡུག་དང་རྐྱེན་ངན་ལམ་དུ་ཁྱེར། །འཆི་ཁ་རུ་ཆོས་སྐུའི་ངང་དུ་འཕོ། །བར་དོ་རུ་འོད་གསལ་མ་བུ་འཕྲད། །གྲོལ་གཞི་ཡི་ཀློང་དུ་མྱ་ངན་འདའ། །འདི་ཟབ་རྒྱས་གདམས་པའི་ཉིང་ཁུ་ཡིན། །ཚུལ་དེ་ལྟར་ཉམས་སུ་ལེན་ནུས་ན། །རྟེན་མི་ལུས་ཐོབ་པ་དོན་ལྡན་ཉིད། །ཚིག་དེ་སྐད་པདྨ་བི་ཛ་ཡས། །ལུས་བསྐྱེད་པའི་དྲིན་ལྡན་པྲཛྙཱའི་ངོར། །ཚིག་ཉུང་གསལ་གོ་བདེའི་ཚུལ་གྱིས་གདམས། །དགེ་དེ་ཡིས་མཐའ་ཡས་སྐྱེ་དགུ་ཀུན། །མགོན་དགེ་བའི་བཤེས་ཀྱི་རྗེས་བཟུང་ཞིང་། །ཆོས་ཐེག་མཆོག་སྙིང་པོའི་གསེང་ལམ་ནས། །ཀུན་བཟང་གི་དགོངས་པ་མངོན་བྱེད་ཤོག །
༄༅། །ན་མོ་གུ་རུ། གནས་མཐའ་མེད་འཁོར་བའི་འཇིག་རྟེན་ན། །སྡུག་བསྔལ་དང་འཇིགས་ཚོགས་བསམ་མི་ཁྱབ། །དེ་བསམ་བཞིན་སྙིང་རླུང་ལྡང་ལ་ཉེ། །ཚུལ་དེ་ལས་སྐྱོབ་ནུས་དཀོན་མཆོག་གསུམ། །དོན་དེ་ཕྱིར་སྙིང་ནས་སྐྱབས་སུ་མཆི། །དུས་ཐོག་མེད་འཁོར་བར་ཡུན་རེ་རིང་། །ལུས་མ་བླངས་བྱ་བ་གཅིག་ཀྱང་མེད། །དོན་དེ་ཕྱིར་འགྲོ་ཀུན་ཕ་མ་དངོས། །ཁོང་སྟོང་ཉིད་སྙིང་རྗེས་སྒྲོལ་བའི་ཕྱིར། །ལམ་ཟབ་མོ་བླ་མའི་རྣལ་འབྱོར་བསྒོམ། །རང་ཐ་མལ་གནས་པའི་སྤྱི་བོའི་གཙུག །གདན་སེང་ཁྲི་པདྨ་ཉི་ཟླའི་སྟེང་། །རང་དྲིན་ཐོབ་རྩ་བའི་བླ་མ་དེ། །སྐུ་ཐ་མལ་མ་ཡིན་དྭངས་མའི་ལུས། །དཔལ་བཞད་པ་རྡོ་རྗེ་རིན་པོ་ཆེ། །སྐུ་སྔོ་སངས་རས་དཀར་བླ་གོས་ཅན། །ཕྱག་གཡོན་པ་བདེ་སྟོང་ཐོད་ཞལ་འཛིན། །གཡས་སོར་མོ་ཞལ་འགྲམ་ལོགས་སུ་སྦྱར། །སྐུ་མཚན་དཔེའི་གཟི་མདངས་ཡ་ལ་ལ། །གསུང་གང་འདུལ་ཆོས་དབྱངས་འུ་རུ་རུ། །ཐུགས་བདེ་སྟོང་མཁྱེན་བརྩེའི་ཡེ་ཤེས་རྒྱས། །བདག་མོས་པའི་བུ་ལ་ཐུགས་རྗེས་གཟིགས། །རྗེ་དྲན་ནོ་དྲིན་ཆེན་བླ་མ་དྲན། །བདག་གསོལ་འདེབས་ཀྱི་བུ་ལ་ཐུགས་རྗེས་གཟིགས། །མི་བདག་ལ་རེ་ས་ཁྱེད་ལས་མེད། །རྗེ་ཁྱེད་ཀྱི་ཐུགས་རྗེས་བཟུང་དུ་གསོལ། །ཕྱི་སྣང་བའི་ཡུལ་ལ་ཕར་བལྟས་པས། །དོན་མི་རྟག་སྒྱུ་མའི་གྲོང་ཁྱེར་འདྲ། །མི་སྐྱེས་པ་འདི་ཚོའི་འཆི་ལུགས་ལ། །རང་སྒྱུ་མའི་ལུས་འདིས་བསླུ་བསླུ་འདྲ། །སྤྲང་གློ་བུར་ཤི་ན་ཅི་ཙུག་བྱེད། །འདི་བསམ་ཞིང་སྐྱོ་བ་གཏིང་ནས་སྐྱེས། །ཕ་ཐུགས་རྗེས་གཟིགས་ཤིག་དྲིན་ཆེན་རྗེ། །སྒོས་{དགོས}འདུས་པ་འདི་ཚོའི་འབྲལ་ལུགས་ལ། །གཉེན་མཛའ་གྲོགས་འདིས་ཀྱང་བསླུ་བསླུ་འདྲ། །སྤྲང་གཏན་གྱི་གྲོགས་པོ་གང་དུ་འཚོལ། །འདི་བསམ་ཞིང་༴ ཕ་ཐུགས་རྗེས༴ ནོར་བསགས་པ་འདི་ཚོའི་འཛད་ལུགས་ལ། །ཟང་ཟིང་གི་ནོར་འདི་བསླུ་བསླུ་འདྲ། །སྤྲང་གཏན་གྱི་ནོར་སྐལ་གང་དུ་བཙལ། །འདི་བསམ་ཞིང་༴ ཕ་ཐུག་རྗེས༴ སྔོན་བརྩེགས་པ་འདི་ཚོའི་ཞིག་ལུགས་ལ། །རང་གནས་མལ་འདིས་ཀྱང་བསླུ་བསླུ་འདྲ། །སྤྲང་གཏན་གྱི་ས་མཁར་གང་དུ་འཛིན། །འདི་བསམ་ཞིང་༴ ཕ་ཐུགས་རྗེས༴ ཁོང་མཐོན་པོའི་ཐ་མ་ལྷུང་ལུགས་ལ། །སྟོབས་ཁེ་གྲགས་འདིས་ཀྱང་བསླུ་བསླུ་འདྲ། །ད་སྤྲང་བའི་འདུན་མ་གང་དུ་འཆའ། །འདི་བསམ་ཞིང་༴ ཕ་ཐུགས་རྗེས༴ ནང་སྒྱུ་མའི་ལུས་ལ་ཚུར་བལྟས་པས། །ལུས་མི་རྟག་ཆུ་ཡི་ལྦུ་བ་འདྲ། །དབུགས་མི་རྟག་སྟོན་ཀའི་ན་བུན་བཞིན། །ཚེ་ངེས་མེད་རླུང་གསེབ་མར་མེ་དངོས། །འདི་བསམ་ཞིང་༴ ཕ་ཐུགས་རྗེས༴ གཞོན་སོ་དཀར་གྱི་སྣང་བ་ཡུད་ཀྱིས་ཐལ། །རྒས་འཇིགས་གཟུགས་གཤིན་རྗེའི་ཕོ་ཉས་ཟིན། །ལུས་སྒྱུ་མའི་གཡར་ཁང་འཇིག་ལ་ཉེ། །འདི་བསམ་ཞིང་༴ ཕ་ཐུགས་རྗེས༴ ཚུར་རང་གི་སེམས་ལ་ནན་བརྟགས་པས། །རྒྱུད་མ་དུལ་ནགས་མཐའི་མི་རྒོད་འདྲ། །ཆོས་ཐོས་པ་ཡོད་དེ་ཉམས་ལེན་མེད། །ཚིག་ཁ་བཤད་ཤེས་ཀྱང་ལག་ལེན་དཀོན། །དོན་རང་རྒྱུད་མ་དུལ་སུ་བས་ལོད། །འདི་བསམ་ཞིང་༴ ཕ་ཐུགས་རྗེས༴ ཚེ་གང་དུ་དགྲ་བཏུལ་གཉེན་བསྐྱངས་ཀྱང་། །དགྲ་ཐུལ་དང་གཉེན་ལ་འཁྱོང་དུས་ཅི། །ལས་ཅི་བྱས་རང་ཐོག་ས་སྤུངས་དངོས། །འདི་བསམ་ཞིང་༴ ཕ་ཐུགས་རྗེས༴ མགོན་ཐུབ་པའི་བསྟན་སྒོར་ཞུགས་རློམ་ཡང་། །ངེས་འབྱུང་དང་ཕན་སེམས་དག་སྣང་བྲལ། །སྡོམ་གསུམ་ཡང་མིང་སྐམ་ཙམ་དུ་ལུས། །འདི་བསམ་ཞིང་༴ ཕ་ཐུགས་རྗེས༴ རྒྱུད་དྲན་པ་དང་ཤེས་བཞིན་ཉམས་པའི་རྒྱུས། །སྡིག་ལྟུང་དང་ཉེས་བྱས་ཆར་བཞིན་བབས། །བཤགས་སྡོམ་དང་གཉེན་པོའི་དགེ་སྦྱོར་དབེན། །འདི་བསམ་ཞིང་༴ ཕ་ཐུགས་རྗེས༴ དོན་འཆི་བ་སྐད་ཅིག་མ་དྲན་རྒྱུས། །ཅི་བྱེད་ཀུན་ཚེ་འདིའི་ལག་ཆར་སོང་། །དུས་དོ་ནུབ་འཆི་ན་ཅི་ཚུག་བྱེད། །འདི་བསམ་ཞིང་༴ ཕ་ཐུགས་རྗེས༴ སྤྱིིར་གནད་གཅོད་ཀྱི་སྡུག་བསྔལ་བཟོད་གླགས་མེད། །སྒོས་{དགོས}བར་དོའི་ཡུལ་ན་འཇིགས་པ་ཆེ། །ཡང་དགོས་སུ་འཁོར་བའི་སྡུལ་བསྔལ་ཚད་བཟུང་བྲལ། །འདི་བསམ་ཞིང་༴ ཕ་ཐུགས་རྗེས༴ དུས་ལན་གཅིག་རྙེད་པའི་དལ་འབྱོར་འདི། །དོན་མེད་དུ་གཏོང་བའི་སྙིང་རུལ་པོ། །གནས་ངན་འགྲོའི་གཅོང་རྡོ་བྱས་ཀྱིས་དོགས། །འདི་བསམ་བཞིན་སྐྱོ་བ་གཏིང་ནས་སྐྱེས། །འདི་བསམ་བཞིན་འགྱོད་པའི་མེ་ཡིས་གདུང་། །འདི་བསམ་བཞིན་སྙིང་རྩ་དབང་མེད་འདར། །ཕ་ཐུགས་རྗེས་གཟིགས་ཤིག་དྲིན་ཆེན་རྗེ། །ཚེ་འདིར་སྣང་ཞེན་པ་ཆོད་པ་དང་། །ལས་ཅི་བྱེད་གཞན་དོན་འགྱུར་བ་རུ། །ཕ་ཐུགས་རྗེ་ཅན་གྱིས་བྱིན་གྱིས་རློབས། །སེམས་རང་ངོ་སྤྲོད་ཅིག་རས་པ་རྗེ། །ཚིག་དེ་སྐད་སྙིང་ནས་གསོལ་བཏབ་རྒྱུས། །ཕ་བླ་མ་རྗེ་བཙུན་སྤྲུལ་པའི་སྐུས། །ཐུགས་དགྱེས་པའི་ཉམས་འགྱུར་དང་བཅས་ཏེ། །གསུང་གྲགས་སྟོང་མགུར་དབྱངས་འདི་ལྟར་སྒྲོགས། །ཀྱེ་ལེགས་པར་གསོན་དང་དད་པ་ཅན། །ངག་ལྷང་ལྷང་འབོད་པའི་གདུང་ཡུས་ཅན། །སྙན་ལྷན་ནེར་གཏོད་དང་ཕ་ཡི་བུ། །དོན་སེམས་ལ་སྐོར་དང་སྐལ་བ་ཅན། །ནང་རང་རྒྱུད་ཆོས་ཀྱིས་མ་ཐུལ་ན། །ཚིག་གོ་བ་ཡོད་པས་ཅི་ལ་ཕན། །ཞེ་གཏིང་ནས་ངེས་འབྱུང་མ་སྐྱེས་ན། །གཏམ་སྨྲ་བ་མང་པོས་སུ་ལ་ཅི། །སེམས་མོས་གུས་སྙིང་ལ་མ་ཤར་ན། །ངག་འོ་དོད་བོས་པས་ཅི་ལ་ཕན། །ཆོས་རང་གི་སེམས་དང་མ་འདྲེས་ན། །མིང་ཆོས་པར་བཏགས་ཀྱང་དགོས་པ་ཆུང་། །དོན་དེ་ཕྱིར་རང་གི་སེམས་ལ་སྐོར། །མགོན་མཚུངས་མེད་རྫོགས་པའི་སངས་རྒྱས་དེས། །ཆོས་ཐམས་ཅད་མི་རྟག་ཉིད་དུ་གསུངས། །འདི་གདམས་ངག་ཡིན་ཀྱང་གོ་མཁན་དཀོན། །ཚིག་ཁ་ལ་ཁྱེར་ཀྱང་བསམ་མཁན་མེད། །དོན་བསམས་ཀྱང་རྒྱུད་ལ་འབྱོར་པ་དཀོན། །དེ་དཀོན་པས་ཅི་བསམ་ཕྱིན་ཅི་ལོག །ལས་ཅི་བྱེད་ཚེ་འདིའི་ལག་ཆར་ཤོར། །ཆོས་བྱེད་སྙམ་ངང་དུ་མི་ཚེ་ཟད། །ཚུལ་གང་ལྟར་བསམས་ཀྱང་ཡི་མུག་རྒྱུ། །མིང་ཇི་ལྟར་བཏགས་ཀྱང་ཐ་མལ་པ། །འདི་འཆི་བ་སྙིང་ནས་མ་དྲན་སྐྱོན། །དོན་དེ་ཕྱིར་མི་རྟག་སྐྱོ་ཤས་བསྐྱེད། །ལམ་ཟབ་མོ་བླ་མའི་གདམས་ངག་གིས། །རྒྱུ་ཀུན་འབྱུང་ས་བོན་མ་བཅོམ་ན། །འབྲས་འཁོར་བའི་སྐྱེ་རྒྱུན་མི་ཆད་པས། །འགོག་ཞི་བའི་བདེ་བ་ནམ་ཞིག་ཐོབ། །དོན་དེ་ཕྱིར་བླ་མའི་གདམས་ངག་སྒོམས། །སྤྱིར་ངེས་འབྱུང་རྒྱུད་ལ་མ་སྐྱེས་ན། །གཞི་ཚུལ་ཁྲིམས་བསྲུང་ཡང་ལེགས་སྨོན་ཙམ། །དེས་ཐར་པར་བགྲོད་ལ་ཕན་རྒྱུ་ཆུང་། །དོན་དེ་ཕྱིར་བཅོས་མིན་ངེས་འབྱུང་བསྐྱེད། །བྱམས་སྙིང་རྗེ་གཏིང་ནས་མ་འབྱོངས་ན། །མིང་བྱང་སེམས་བཏགས་ཀྱང་བཟང་བརྫུ་ཡིན། །རྣམ་མཁྱེན་གྱི་འབྲས་བུ་དེ་ལ་རིང་། །བུ་གཞན་ཕན་སྒོམས་ཤིག་སྐལ་བ་ཅན། །ཅིར་སྣང་ཀུན་བདེན་མེད་མ་ཤེས་ན། །བདེན་ཞེན་གྱི་དམིགས་པའི་འཛིན་སྟངས་འདིས། །སྲིད་རྩ་ཡི་བདག་འཛིན་མི་ཆོད་པས། །བུ་བདག་མེད་གཉིས་ལ་གོམས་འདྲིས་མཛོད། །རང་སེམས་སངས་རྒྱས་སུ་ངོ་སྤྲོད་བླ་མ་དེ། །ཆོས་མདོ་རྒྱུད་ཀུན་ནས་རྒྱལ་བར་བསྟན། །ཡོན་ཏན་ལ་བསམས་ན་ཚད་བཟུང་བྲལ། །བཀའ་དྲིན་ལ་བསམས་ན་འཁོར་ཐབས་ཅི། །སྐྱོན་མཐོང་ཀུན་རང་བློའི་དྲི་མ་ཡིན། །དཔེ་མིག་སྐྱོན་ཅན་གྱི་དུང་མཐོང་འདྲ། །བུ་མོས་གུས་མ་ལྡོག་གསོལ་བ་ཐོབ། །ཐབས་ལམ་གྱི་ཁ་ཕོ་མང་ལགས་ཀྱང་། །ཚེ་འདི་ལ་གྲོལ་བྱེད་ཐེག་རྩེའི་གནད། །ལྷན་སྐྱེས་ཀྱི་བདེ་བ་ཆེན་པོ་དེ། །མོས་གུས་ཀྱི་ཕ་ཕོག་མ་ལགས་སམ། །སྣང་སྲིད་ཀུན་དག་མཉམ་ཆོས་སྐུའི་ཞིང་། །སྡུག་ཀུན་འདི་བདེ་བར་མ་ཤར་ན། །མཚན་རྟོག་གི་ལྷ་སྒོམ་འཆིང་བའི་རྒྱུ། །བུ་དག་པ་རབ་འབྱམས་འཁོར་ལོར་སྦྱོངས། །ཅིར་སྣང་ཀུན་བླ་མར་མ་ཤར་ན། །གཟུང་འཛིན་གྱི་དགྲ་ལ་ཟད་མཐའ་མེད། །རེ་དོག་གི་འཕྲང་ལས་ཐར་དུས་ཅི། །ཐམས་ཅད་ཀུན་བླ་མར་ཤེས་ཙ་ན། །བྱིན་རླབས་ལ་མི་འབྱུང་གཅིག་ཀྱང་མེད། །སྣང་སྲིད་ཀུན་བླ་མའི་རོལ་པར་ཤར། །གདམས་ངག་ལ་མི་འཆར་གང་ཡང་མེད། །ཕྱི་ཡུལ་གྱི་སྣང་བ་སྣ་ཚོགས་འདི། །དོན་མ་བརྟགས་ཉམས་དགའ་བརྟགས་ན་དབེན། །ནན་བརྟགས་ན་སྐྱེ་སོགས་མཚན་མས་སྟོང་། །གཟུགས་སྣང་སྟོང་སྒྱུ་མའི་རོལ་མོ་འདི། །དོན་བླ་མའི་སྐུ་ཡི་རྡོ་རྗེ་ཡིན། །བསྐྱེད་རིམ་གྱི་ཉམས་ལེན་འདི་ལ་འདུས། །བུམ་དབང་གི་ལམ་ཁྱེར་འདི་རང་ལགས། །སྙན་མི་སྙན་གྱི་སྒྲ་སྐད་སྣ་ཚོགས་པ། །འདི་དོན་ལ་མེད་དེ་བྲག་ཆ་འདྲ། །མིང་ཚིག་ཀུན་བརྗོད་པའི་མཐའ་ཡིས་སྟོང་། །གྲགས་སྟོང་འདི་གསུང་གི་རྡོ་རྗེ་ཡིན། །བརྗོད་བྲལ་འདི་གཉུག་མ་ནཱ་དའི་སྒྲ། །གསལ་སྟོང་འཛིན་མེད་འདི་གསང་དབང་ལམ་ཁྱེར་ལགས། །ནང་ཡིད་ཀྱི་འགྱུ་བ་སྣ་ཚོགས་འདི། །དཔེ་དངོས་མེད་བར་སྣང་བསིར་བུ་འདྲ། །འདི་བཟུང་བས་མི་ཟིན་བཏང་ན་ཟིན། །བདེ་སྡུག་གི་མཚན་མ་རང་སར་ཞིག །ཅིར་ཤར་ཀུན་ཆོས་སྐུའི་ཡོ་ལང་ཆེ། །སེམས་དྲན་སྟོང་འདི་ཐུགས་ཀྱི་རྡོ་རྗེ་ཡིན། །སེམས་ཉིད་བདེ་སྟོང་འདི་གསང་དབང་ལམ་ཁྱེར་ལགས། །དབྱིངས་ཀ་དག་གདོད་མའི་གཤིས་ལུགས་སུ། །གཟུང་འཛིན་གྱི་སྤྲོས་པ་རང་སར་གྲོལ། །ཚིག་ཐ་སྙད་ཀྱི་བརྗོད་པས་མ་བསླེབས་པའི། །བློ་བྲལ་གྱི་རིག་པ་རྗེན་ནེ་བ། །དོན་རིག་སྟོང་འདི་ཡེ་ཤེས་རྡོ་རྗེ་ལགས། །ཚིག་དབང་གི་ངོ་ཏི་འདི་རང་ཡིན། །ལམ་ཀུན་གྱི་སྐྱེལ་སོ་འདི་ལ་ཐུག །དོན་དབང་བཞི་སེམས་ལ་མ་རྫོགས་ན། །གཞན་བསྐུར་ཐོབ་མང་པོ་སྤྲོས་པའི་རྒྱུ། །ནང་རང་སེམས་སངས་རྒྱས་སུ་མ་ཤེས་ན། །ཚིག་ཐ་སྙད་མང་ཡང་འཆིང་བའི་གཟེབ། །དོན་བློ་བྲལ་གྱི་གཤིས་ལ་མ་ཕེབས་ན། །ཉམས་ཟ་ཟི་མང་ཡང་མགོ་སྐོར་ཡིན། །རང་སེམས་གཉུག་མ་འདི་བླ་མར་མ་རྟོགས་ན། །ཀུན་རྫོབ་ཀྱི་བླ་མ་འདུ་འབྲལ་བྱེད། །འདི་གོའམ་སྐལ་ལྡན་དད་པ་ཅན། །དེ་གོ་ན་བདག་དང་འདུ་འབྲལ་མེད། །གཉིས་བརྗོད་མེད་ངང་དུ་ཨེ་མ་ཧོ། །མདངས་འགག་མེད་ཀྱི་རོལ་པ་ཨ་ལ་ལ། །རྩལ་ཤར་གྲོལ་རྗེས་མེད་ཀྱི་ཀློང་དུ་ཨ། །དོན་སྐུ་གསུམ་དང་འདུ་འབྲལ་མེད་དོ་ཧོ། །ཚིག་དེ་སྐད་གསུངས་ནས་སྙིང་དབུས་བྱོན། །རང་གཉུག་མའི་སེམས་དང་ལྷན་ཅིག་འདྲེས། །དཔེ་ཆུ་ལ་ཆུ་བཞག་ཇི་བཞིན་དུ། །དོན་བསྒོམ་བྱ་སྒོམ་བྱེད་ཀྱི་འཛིན་རྟོག་ཞིག །ལྷན་སྐྱེས་ཀྱི་འོད་གསལ་མངོན་དུ་བྱས། །རྗེས་ཐོབ་ཏུ་ཅིར་སྣང་བླ་མར་ཤར། །དགེ་འདི་ཡིས་བདག་དང་མཁའ་མཉམ་འགྲོ། །དཔལ་བཞད་པ་རྡོ་རྗེའི་སྐུ་འགྲུབ་ནས། །དོན་གཉིས་ཀྱི་འབྲས་བུའི་གཏེར་ཁ་བཞད། །ཁམས་གསུམ་གྱི་འཁོར་བ་དོང་སྤྲུགས་ཤོག །ཚུལ་དེ་སྐད་དད་དམ་ལྡན་པ་འགས། །ཡང་ཡང་དུ་ནན་གྱིས་བསྐུལ་བའི་ངོར། །བན་ཅོལ་ཆུང་པདྨ་རྣམ་རྒྱལ་གྱིས། །འཕྲལ་གང་ཤར་མགྲིན་པའི་རྟ་ལ་བསྐྱོན། །ཐུགས་དགྱེས་པར་མཛོད་ཅིག་གྲོགས་པོ་དག །དོན་ཅི་བསམ་ཡིད་བཞིན་འགྲུབ་པར་ཤོོག །
༄༅། །རིག་འཛིན་ཤྲཱི་སེདྷ་ལ་བརྟེན་པའི་བླ་མའི་རྣལ་འབྱོར་བཞུགས། ཨཱཿ ཡེ་གྲོལ་ཀ་དག་གཉུག་མའི་མཁར། །རང་གྲོལ་གདོད་མའི་ཧེ་རུ་ཀ །ཞལ་ཕྱག་འཛིན་པ་ལས་འདས་དབྱིངས། །གང་འདུལ་ཕྱག་རྒྱར་རོལ་པའི་གར། །དཔལ་གྱི་སེང་གེ་གྲུབ་བརྒྱའི་མེས། །འོད་གསལ་ཐིག་ལེ་ཉག་གཅིག་ཞལ། །རྡོ་རྗེའི་ལྟ་སྟངས་མཁའ་ལ་བསྒྱུར། །ལྔ་ལྡན་འཇའ་འོད་ཟེར་ཕྲེང་ཀློང་། །སྡིགས་མཛུབ་རྡོ་རྗེའི་ཐོད་ཞལ་བསྣམས། །དར་དང་རིན་ཆེན་རུས་པས་བརྒྱན། །བདེ་སྟོང་རྡོ་རྗེའི་བརྡ་གླུ་བསྒྱུར། །དྲན་པ་ཙམ་གྱིས་མཆོག་སྟེར་བའི། །སྐྱབས་ཀུན་ངོ་བོར་ལྷམ་མེར་གསལ། །ཐ་དད་ཞེན་རྟོག་འཛིན་བྲལ་བར། །རོ་མཉམ་རྟོག་པའི་དཔའ་གདེང་གིས། །རང་ངོ་ཤེས་པའི་ཕྱག་གིས་འདུད། །ཡིད་དཔྱོད་བྲལ་བའི་མཆོད་སྤྲིན་འབུལ། །འཁྲུལ་རྟོག་ཡེ་སངས་ཆེན་པོར་བཤགས། །བཏང་བཞག་བྲལ་བར་རྗེས་ཡི་རང་། །རྒྱུད་ཆད་མེད་པའི་ཆོས་འཁོར་བསྐོར། །བློ་བྲལ་རྗེན་པར་བཞུགས་གསོལ་འདེབས། །དགེ་ཚོགས་འོད་གསལ་ཆེན་པོར་བཤགས། །རང་བྱུང་འདུས་མ་བྱས་པའི་དབྱིངས། །ཟབ་གསལ་གཉིས་མེད་བདེ་བ་ཆེ། །མཆོག་ཏུ་མི་འགྱུར་གདོད་མའི་མགོན། །མཁས་པ་ཤྲཱི་སེདྷ་ཀྱེ། །བདག་ལ་རེ་ས་གཞན་ན་མེད། །འབྲལ་མེད་ཐུགས་རྗེས་རྗེས་དགོངས་ཏེ། །དགོངས་བརྒྱུད་བྱིན་རླབས་འཕོ་བ་ཡི། །དབང་བཞི་སྐུར་ཅིག་དྲིན་ཆེན་རྗེ། །བླ་མའི་གནས་གསུམ་རྡོ་རྗེའི་ཟེར། །རང་གི་སྒོ་གསུམ་ལ་ཐིམ་པས། །དབང་བཞིས་རྒྱུད་སྨིན་སྒྲིབ་བཞི་སྦྱངས། །སྐུ་བཞིའི་ཡེ་ཤེས་མངོན་བྱེད་གྱུར། །མཐར་ནི་བླ་མ་རང་ལ་ཐིམ། །འོད་གསལ་གཉུག་མའི་ཐིག་ལེ་ཆེ། །བློ་བྲལ་ཆོས་སྐུ་རྗེན་པའི་ཞལ། །རིག་སྟོང་ཟང་ཐལ་ཀློང་དུ་ཨཱཿ། །དེ་སྐད་རྣམ་པར་རྒྱལ་བའི་སྡེས། །ཡིད་ལ་གང་ཤར་ཐོལ་བྱུང་ཕྲེང་། །ཞིང་སྐྱོང་དགྱེས་པའི་གསོས་སུ་ཕུལ། །དགེ་བས་སྐུ་གསུམ་ཀློང་གྲོལ་ཤོག །༈ ཚོགས་མཆོད་སྤྲོ་ན། ཨཱཿ གཟུང་འཛིན་མཚན་བྲལ་ཀ་པཱ་ལར། །ཅིར་སྣང་འདོད་ཡོན་ཚོགས་སུ་བཤམས། །ཞེན་འཛིན་བྲལ་བའི་བདུད་རྩིར་བརླབས། །རིག་སྟོང་སྐུ་གསུམ་ལྷ་ལ་འབུལ། །འཁྲུལ་རྟོག་ཡེ་གྲོལ་ཆེན་པོར་བཤགས། །གཉིས་འཛིན་དགྲ་བགེགས་དབྱིངས་སུ་སྒྲོལ། །ཀ་དག་རྒྱལ་ས་ཟིན་པར་མཛོད། །ཅེས་པའང་བི་ཛས་སོ། །༈ ཨེ་མ་ཧོ། མཐའ་བརྒྱད་སྤྲོས་བྲལ་དབུ་མའི་གྲོང་ཁྱེར་མཆོག །སྙིང་དབུས་ཟངས་མདོག་དཔལ་རིའི་ཕོ་བྲང་ན། །རིག་སྟོང་མི་ཤིགས་ཐིག་ལེ་མཚོ་སྐྱེས་རྗེ། །ཚོགས་བརྒྱད་དག་པའི་རིག་འཛིན་ཚོམ་བུས་མཛེས། །དུས་གསུམ་གཤེགས་བཞུགས་འཕོ་འགྱུར་བགྲེས་རྒུད་བྲལ། །འོད་གསལ་རང་བཞིན་བདེ་ཀློང་གཅིག་ཏུ་འཁྱིལ། །ཐིག་ལེ་ཉག་ཅིག་འཁོར་འདས་ཀུན་གྱི་གཞི། །ཞལ་ཕྱག་འཛིན་པ་དག་པའི་དབྱིངས་ཆེན་པོར། །འཁོར་འདས་རོ་མཉམ་རྟོགས་པའི་ཕྱག་གིས་འདུད། །ཚོགས་དྲུག་རང་སར་གྲོལ་བའི་འདོད་ཡོན་སྤྲིན། །ཨ་ཧཾ་འབར་འཛག་ཞུ་བདེ་ལྷན་ཅིག་སྐྱེས། །རྣམ་ཀུན་མཆོག་ལྡན་ཟག་མེད་མཆོད་སྤྲིན་གྱིས། །བློ་བྲལ་གཉུག་མ་དོན་གྱི་གུ་རུ་མཆོད། །ཀ་དག་ཕྱམས་བདལ་ཆེན་པོའི་གཤིས་ལུགས་ལ། །གཟུང་འཛིན་མཚན་མའི་རྟོག་ཚོགས་རང་སར་དག །འཁོར་འདས་སྤང་བླང་འཁྲུལ་གྲོལ་གཉིས་ཆོས་ཚོགས། །གཉིས་མེད་བྱང་ཆུབ་སེམས་ཀྱི་ཀློང་དུ་བཤགས། །ཡེ་གྲོལ་ཀུན་ཏུ་བཟང་མོའི་མཁའ་ཀློང་ལས། །རོལ་པ་འཁོར་འདས་སྤྲིན་ཚོགས་ཅིར་སྣང་ཡང་། །གདོད་ནས་རྣམ་དག་དབྱིངས་ཀྱི་རྒྱན་ཆེན་པོར། །རྫོགས་པས་བསལ་བཞག་བྲལ་བར་རྗེས་ཡི་རང་། །ཅེར་གྲོལ་ཅོག་བཞག་ཆེན་པོའི་སྨན་ཆེན་གྱིས། །ཀུན་རྟོག་བརྒྱད་ཁྲི་བཞི་སྟོང་རིམས་ནད་དཔུང་། །མ་བཅོས་གཉུག་མའི་ཀློང་དུ་གཞིལ་མཛད་པའི། །བརྗོད་བྲལ་དོན་གྱི་ཆོས་འཁོར་བསྐོར་བར་བསྐུལ། །མཐའ་གྲོལ་བློ་འདས་རིག་པའི་དཔའ་བོ་ཡིས། །མཐར་འཛིན་བློས་བྱས་གྲུབ་མཐའི་འཆི་བདག་དཔུང་། །མཐར་བྱས་འཆི་མེད་གཉུག་མའི་ཐིག་ལེ་ཆེར། །དུས་གསུམ་དུས་མེད་རྟག་པར་བཞུགས་གསོལ་འདེབས། །སྒྱུ་མ་མཁན་གྱི་སྒྱུ་མའི་རོལ་གར་བཞིན། །ཟག་མེད་རང་ངོ་ཤེས་པའི་དགེ་ཚོགས་རྒྱུན། །འོད་གསལ་ཆོས་ཉིད་ཀློང་དུ་བསྔོ་བགྱིད་ན། །འགྲོ་ཀུན་ཡེ་དག་ཀུན་བཟང་གནས་ཐོབ་ཤོག །སྐུ་གསུམ་མཉམ་ཉིད་རང་རིག་བྱང་ཆུབ་སེམས། །དོན་དམ་མ་ཧཱ་གུ་རུའི་དཀྱིལ་འཁོར་ལྷར། །རང་བབས་གཉུག་མ་དོན་གྱིས་གསོལ་འདེབས་ན། །བསྐུར་ཐོབ་བྲལ་བའི་དབང་མཆོག་སེམས་ལ་བསྐུར། །སེམས་བྱུང་རྟོག་པའི་དྲི་མ་དབྱིངས་སུ་སངས། །ཀ་དག་ཆོས་ཟད་དགོངས་པ་མངོན་གྱུར་ནས། །འོད་གསལ་ལྷུན་གྲུབ་སྣང་བཞིའི་གསེང་ལམ་ཆེར། །འཕོ་ཆེན་འཇའ་ལུས་རྡོ་རྗེའི་དངོས་གྲུབ་སྩོལ། །བདེ་གཤེགས་སྙིང་པོའི་རང་བཞིན་འགྲོ་བ་རྣམས། །གཟུང་འཛིན་འཁྲུལ་པའི་སྦུབས་རྒྱ་ལས་གྲོལ་ནས། །རྣམ་གྲོལ་ཡོན་ཏན་འཛད་མེད་རྒྱལ་བའི་ཁམས། །ཀ་དག་གདོད་མའི་གྲོལ་སར་དབང་འབྱོར་ཤོག །ནང་གི་རྣལ་འབྱོར་ཟབ་མོ་དང་། །འབྲེལ་བའི་བླ་མ་སྒྲུབ་པའི་ཐབས། །སྔགས་བན་པདྨ་རྣམ་རྒྱལ་གྱིས། །བདེ་ཆེན་འོད་གསལ་ཕུག་ཏུ་བཀོད། །༈ ཨེ་མ་ཧོ། གཟུང་འཛིན་རྟོག་ཚོགས་དབུ་མར་ཐིམ་པའི་རྩལ། །འོག་མིན་གསང་ཆེན་རྡོ་རྗེའི་ཕོ་བྲང་དབུས། །རང་ཉིད་གཞི་ལུས་ཀུན་བཟང་ཡབ་དང་ཡུམ། །མཉམ་པའི་ཕྱག་རྒྱ་རྡོར་དཀྱིལ་པད་ཟླར་རོལ། །སྤྱི་བོར་དྭངས་མ་ལྔ་ལྡན་ཐིག་ལེའི་དབུས། །ཤེས་རིག་མ་བཅོས་དོན་གྱི་ཀློང་ཆེན་པ། །དཀར་གསལ་ཞི་འཛུམ་པཎྜི་ཏ་ཡི་ཆས། །ངལ་གསོའི་ཕྱག་རྒྱ་རྡོ་རྗེའི་སྐྱིལ་ཀྲུང་བཞུགས། །ཐུགས་སྲོག་འོད་ཀྱིས་རྩ་རྒྱུད་བླ་མ་དང་། །ཡི་དམ་ཞི་ཁྲོ་དཔའ་བོ་མཁའ་འགྲོའི་སྤྲིན། །ཉི་ཟེར་རྡུལ་ལྟར་སྤྱན་དྲངས་གཉིས་མེད་ཐིམ། །ཡོངས་གྲུབ་གདན་གསུམ་འཁོར་ལོའི་དཀྱིལ་འཁོར་ལྷར། །སྲིད་ཞི་མཉམ་ཉིད་རྟོགས་པའི་ཕྱག་གིས་འདུད། །སྒོ་ལྔ་རང་ཡན་ཚོགས་དྲུག་མཆོད་པ་འབུལ། །ཀུན་བརྟགས་གཞན་དབང་ཡོངས་གྲུབ་ཀློང་དུ་བཤགས། །འཁོར་འདས་རོ་མཉམ་ངང་དུ་རྗེས་ཡི་རང་། །ལྷན་སྐྱེས་གཉུག་མ་དོན་གྱི་ཆོས་འཁོར་བསྐོར། །འཕོ་མེད་རྟག་པ་དམ་པའི་ངོ་བོར་བཞུགས། །ཟུང་འཇུག་འོད་གསལ་ཆེན་པོར་བསྔོ་བར་བགྱི། །ཀུན་ཁྱབ་ཀུན་བྱེད་བྱང་ཆུབ་སེམས་ཀྱི་དབྱིངས། །འཁོར་འདས་ཡེ་དག་འོད་གསལ་འདུས་མ་བྱས། །མ་བཅོས་རང་ཤར་དོན་གྱི་ཀློང་ཆེན་པར། །འདུད་དོ་འཁོར་འདས་གཞི་ཟད་ས་ལ་སྐྱོལ། །བླ་མའི་སྐུ་ལས་འོད་ཟེར་བདུད་རྩིའི་རྒྱུན། །ཆར་ལྟར་བབས་པས་རང་ལུས་ལྟེམ་གྱིས་གང་། །དབང་བསྐུར་སྒྲིབ་བྱང་གདོད་མའི་གྲུབ་མཐའ་སྙེགས། །དེ་མཐར་བླ་མ་འོད་ཞུ་རང་ལ་ཐིམ། །དུས་གསུམ་རྟོག་པས་མ་བསླད་གཉུག་མའི་གཤིས། །བརྗོད་བྲལ་ལྷན་སྐྱེས་ཡེ་ཤེས་ཀློང་དུ་ཨཱཿ། །རྗེས་ཐོབ་ཅིར་སྣང་བླ་མའི་ངོ་བོར་སད། །དགེ་བས་འགྲོ་ཀུན་ཀུན་བཟང་ཀློང་གྲོལ་ཤོག །མོས་གུས་ཉམས་ཀྱི་རྩལ་སྒོ་ལས། །གང་ཤར་བློ་ཡིས་མ་བཅོས་པར། །སྔགས་བན་པདྨ་རྣམ་རྒྱལ་གྱིས། །བདེ་ཆེན་འོད་གསལ་ཕུག་ཏུ་བཀོད། །
༄༅། །བླ་མའི་རྣལ་འབྱོར་འཁྲུལ་རྟོག་དབྱིངས་གཅོད་བཞུགས། ཕཊཿ སྨྲ་བསམ་བརྗོད་མེད་ཤེར་ཕྱིན་ཉིད། །གང་འདུལ་སྒྱུ་འཕྲུལ་དྲྭ་བའི་གར། །སྟོན་མཛད་ཨ་མ་ལབ་སྒྲོན་དང་། །དབྱེར་མེད་རང་རིག་བླ་མར་འདུད། །ཕཊཿ སྐྱབས་གནས་རྣམས་ལ་སྐྱབས་སུ་མཆི། །འགྲོ་ཀུན་སྒྲོལ་བར་སེམས་བསྐྱེད་དོ། །སེམས་ཅན་བདེ་ལྡན་སྡུག་བསྔལ་བྲལ། །བདེ་མཆོག་བཏང་སྙོམས་ལ་གནས་ཤོག །ཕཊཿ རང་ལུས་ཐ་མལ་གནས་པ་ཡི། །མདུན་མཁར་པདྨ་ཉི་མའི་སྟེང་། །དྲིན་ལྡན་རྩ་བའི་བླ་མ་དང་། །དབྱེར་མེད་ཨ་མ་ལབ་ཀྱི་སྒྲོན། །དཀར་གསལ་ཕྱག་གཉིས་ཌཱ་དྲིལ་འཁྲོལ། །སྤྱན་གསུམ་མཁར་གཟིགས་བརྐྱང་བསྐུམ་རོལ། །སྙན་གོང་དམ་པ་རྒྱ་གར་དང་། །ཕག་མོ་ལྷ་ལྔ་དབུ་ཡི་སྟེང་། །ཤཱཀྱ་ཐུབ་རྣམ་སྣང་སྒྲོལ་མ་ཡུམ། །དཀོན་མཆོག་གྲུབ་ཐོབ་རྒྱ་མཚོས་བསྐོར། །སྐྱབས་ཀུན་འདུས་པའི་ངོ་བོར་གྱུར། །ཕཊཿ དོན་དམ་ཤེས་རབ་ཕར་ཕྱིན་ལ། །རང་ངོ་ཤེས་པའི་ཕྱག་གིས་འདུད། །འདུ་འབྲལ་མེད་པའི་མཆོད་པ་འབུལ། །གཟུང་འཛིན་འཁྲུལ་རྟོག་དབྱིངས་སུ་བཤགས། །སྲིད་ཞི་མཉམ་ཉིད་རྗེས་ཡི་རང་། །སྨྲ་བསམ་བརྗོད་བྲལ་ཆོས་འཁོར་བསྐོར། །དགེ་ཚོགས་ཆོས་དབྱིངས་ཆེན་པོར་བསྔོ། །ཡུམ་ཆེན་དགོངས་པ་མངོན་གྱུར་ཤོག །ཕཊཿ སྐྱབས་ཀུན་འདུས་ཞལ་བླ་མ་དང་། །དབྱེར་མེད་ཨ་མ་ལབ་ཀྱི་སྒྲོན། །གྲུབ་ཐོབ་གཅོད་ཡུལ་བརྒྱུད་པ་ལ། །གསོལ་བ་འདེབས་སོ་བྱིན་གྱིས་རློབས། །ཕཊཿ མ་གཅིག་གཙོ་མོའི་གནས་གསུམ་གྱི། །འབྲུ་གསུམ་བདུད་རྩིའི་འོད་ཟེར་འཕྲོས། །བདག་གི་གནས་གསུམ་ཐིམ་པ་ཡིས། །སྒོ་གསུམ་རྡོ་རྗེ་གསུམ་ཐོབ་ཤོག །ཕཊཿ རང་སེམས་དབྱིངས་ཐོན་རྣལ་འབྱོར་མས། །རང་ལུས་ཐོད་བྲེགས་སྒྱེད་པུར་བཙུགས། །ཤ་ཁྲག་དྲོད་དབུགས་བདུད་རྩིར་སྦར། །ཟག་མེད་འདོད་ཡོན་མཁའ་ཁྱབ་སྤེལ། །ༀ་ཨཱཿཧཱུྃ། ཕཊཿ བདག་ལུས་ཟག་མེད་ཚོགས་མཆོད་འདིས། །མཆོད་ཡུལ་རྒྱལ་མཚོའི་ཐུགས་དམ་བསྐང་། །སྦྱིན་ཡུལ་ཡན་ཆགས་མགྲོན་ཀུན་ཚིམ། །བར་ཆད་ཀུན་ཞི་ཚོགས་རྫོགས་ཤོག །ཕཊཿ ཐོགས་བཅས་ཡུལ་གྱི་འཁྲི་བ་ཆོད། །ཐོགས་མེད་རེ་དོགས་གཉིས་འཛིན་དག །དགའ་བྲོད་ཉམས་ཀྱི་འཆིང་ལས་གྲོལ། །སྙེམས་བྱེད་བདག་འཛིན་རྩད་ཆོད་ཤོག །ཕཊཿ ཅེས་འདི་གཅོད་མཁན་ཕུར་ལོ་ཡིས། །རིང་མོའི་ལམ་ནས་བསྐུལ་བའི་ངོར། །པདྨ་རྣམ་པར་རྒྱལ་བས་བྲིས། །དགེ་བས་ཡུམ་དོན་མངོན་གྱུར་ཤོག །༈ ཨེ་མ་ཧོཿ རང་སྣང་ལྷུན་གྲུབ་འོད་གསལ་དག་པའི་ཞིང་། །ཕུན་ཚོགས་མཆོད་པའི་སྤྲིན་ཕུང་གཏིབས་པའི་དབུས། །རྩ་བའི་བླ་མ་ཨོ་རྒྱན་པདྨ་འབྱུང་། །སྐྱབས་ཀུན་འདུས་པའི་ངོ་བོར་ལྷམ་མེར་གསལ། །བདག་དང་འགྲོ་ཀུན་གུས་པས་ཕྱག་འཚལ་ཞིང་། །མཆོད་ཚོགས་ཀུན་འབུལ་སྡིག་ལྟུང་འགྱོད་བཤགས་སྡོམ། །དགེ་ལ་ཡི་རང་ཆོས་འཁོར་བསྐོར་བཞིན་དུ། །བསྐལ་བརྒྱར་བཞུགས་གསོལ་དགེ་ཚོགས་འགྲོ་ལ་བསྔོ། །རྒྱལ་ཀུན་འདུས་ཞལ་རང་བྱུང་སྤྲུལ་པའི་སྐུ། །འཕགས་བོད་ཀུན་དུ་བསྟན་པའི་སྒྲོན་མེ་སྦར། །གདུལ་དཀའ་འདུལ་མཛད་ཨོ་རྒྱན་རིན་པོ་ཆེ། །གསོལ་བ་འདེབས་སོ་བདག་རྒྱུད་བྱིན་གྱིས་[རློབས་ཞུ་མཆན། ]། །འབྱུང་བཞིའི་གཡོ་འཁྲུགས་ནད་མཚོན་དུག་སྦྱོར་སོགས། །ཕྱི་ནང་གསང་བའི་འགལ་རྐྱེན་ཀུན་ཞི་ཞིང་། །ཆོས་མཐུན་བསམ་པའི་དོན་ཀུན་འགྲུབ་པ་དང་། །དབང་བསྐུར་བྱིན་རློབས་སྨིན་གྲོལ་དངོས་གྲུབ་སྩོལ། །ཅེས་མོས་ལ་སིདྡྷི་ཅི་འགྲུབ་གསོལ་འདེབས་ཀྱི་ཚུལ་དུ་བཟླ། མཐར། གུ་རུ་དགྱེས་པས་འོད་ཞུ་རང་ལ་ཐིམ། །དབང་དང་བྱིན་རླབས་དངོས་གྲུབ་དུས་གཅིག་ཐོབ། །སྒོ་གསུམ་གཟུང་འཛིན་འཁྲུལ་པའི་དྲི་མ་སྦྱངས ། །ཅིར་སྣང་ལྷ་སྔགས་ཆོས་སྐུའི་རོལ་པར་ཤར། །དགེ་བ་འདི་ཡིས་བདག་དང་འགྲོ་བ་ཀུན། །མཚོ་སྐྱེས་རྒྱལ་བས་འབྲལ་མེད་རྗེས་བཟུང་ནས། །ས་བཅུ་ལམ་ལྔའི་ཡོན་ཏན་རབ་རྫོགས་ཏེ། །ཨོ་རྒྱན་བླ་མའི་གོ་འཕང་མྱུར་ཐོབ་ཤོག །ཅེས་པའང་རྣམ་པར་དཀར་བའི་ཐུགས་འདུན་ཅན་མཚོ་སྣ་རྫོང་ལྕམ་བཀྲ་ཤིས་ལྷ་མོའི་ཞལ་འདོན་རྒྱུར་ཞེ་ཆེན་པས་འཕྲལ་མར་སྤེལ་བ་དགེ། ༈ ན་མོ་གུ་རུ། དང་བའི་ཡིད་མཁར་དད་བརྒྱའི་ཆུ་འཛིན་དབུས། །དྲན་མཆོག་མགོན་པོ་རྩ་བའི་བླ་མ་དང་། །དབྱེར་མེད་མཚོ་སྐྱེས་རྡོ་རྗེ་ཐོད་ཕྲེད་རྩལ། །སྐྱབས་ཀུན་འདུས་པའི་ངོ་བོར་ལྷམ་མེར་གསལ། །སྒོ་གསུམ་གུས་པས་ཕྱག་འཚལ་མཆོད་སྤྲིན་དབུལ། །སྡིག་ལྟུང་ཀུན་བཤགས་དགེ་ལ་རྗེས་ཡི་རང་། །ཆོས་འཁོར་སྐོར་བཞིན་རྟག་པར་བཞུགས་གསོལ་འདེབས། །འདིས་མཚོན་དགེ་ཚོགས་བྱང་ཆུབ་ཆེན་པོར་བསྔོ། །སངས་རྒྱས་ཀུན་དངོས་རྩ་བའི་བླ་མ་ལ། །བཟོད་མེད་གདུང་ཤུགས་དྲག་པོས་གསོལ་བ་འདེབས། །བྱང་ཆུབ་བར་དུ་འབྲལ་མེད་རྗེས་བཟུང་ནས། །དབང་བསྐུར་བྱིན་རློབས་མཆོག་ཐུན་དངོས་གྲུབ་སྩོལ། །གུ་རུའི་གནས་གསུམ་རྡོ་རྗེའི་འབྲུ་གསུམ་ལས། །འོད་ཟེར་བདུད་རྩི་བདག་གི་གནས་གསུམ་ཐིམ། །དབང་བསྐུར་སྒྲིབ་སྦྱངས་སྨིན་གྲོལ་མཆོག་ཐོབ་ནས། །བླ་མ་འོད་ཞུ་རང་དང་གཉིས་མེད་གྱུར། དགེ་བ་འདི་ཡིས་བདག་སོགས་ཡིད་ཅན་ཀུན། །འཁོར་ལོའི་མགོན་དང་ནམ་ཡང་མི་འབྲལ་ཞིང་། །ས་བཅུ་ལམ་ལྔའི་ཡོན་ཏན་རབ་རྫོགས་ནས། །རྡོ་རྗེ་འཆང་གི་གོ་འཕང་མྱུར་ཐོབ་ཤོག །ཅེས་པའང་དད་དམ་རྨད་བྱུང་གར་དབང་ཆེ་མཆོག་ལགས་ཀྱི་ཞལ་འདོན་རྒྱུར་སྙོམ་ལས་པ་འགྱུར་མེད་པདྨ་རྣམ་རྒྱལ་གྱིས་བྲིས་པ་དགེ།
༄༅། །བླ་མའི་རྣལ་འབྱོར་བྱིན་རླབས་འདོད་སྟེར་ཞེས་བྱ་བ་བཞུགས་སོ། །ན་མོ་གུ་རུ་པདྨ་ཀ་ར་ཡེ། འདིར་དད་དམ་སྐལ་བ་དང་ལྡན་པའི་གང་ཟག་གིས་ལམ་ཟབ་མོ་བླ་མའི་རྣལ་འབྱོར་ཉམས་སུ་ལེན་པར་འདོད་པས། སྐྱབས་སེམས་སྔོན་དུ་འགྲོ་བས་རྟེེན་བསྐྱེད་པ་ནི། མདུན་གྱི་ནམ་མཁའ་འཇའ་ཟེར་ཐིག་ལེའི་དབུས། །སེང་ཁྲི་པད་ཟླར་རྩ་བའི་བླ་མ་དང་། །དབྱེར་མེད་མཚོ་སྐྱེས་རྡོ་རྗེ་དཀར་དམར་མདངས། །མཚན་དཔེའི་གཟི་འབར་རྡོ་རྗེ་ཐོད་པ་འཛིན། །ཁ་ཊྭཱཾ་གཡོན་བརྟེན་ཤ་བའི་སྙན་ཞུ་གསོལ། །གསང་ཕོད་སྣམ་སྦྱར་ཟབ་བེར་བརྗིད་པར་བཀླུབས། །རྡོ་རྗེའི་སྐྱིལ་ཀྲུང་དགྱེས་འཛུམ་འོད་ཟེར་འབར། །མཐའ་བསྐོར་རྩ་གསུམ་དཀྱིལ་འཁོར་སྤྲིན་ལྟར་གཏིབས། །དྲན་པས་གདུང་སེལ་མཆོག་གི་ངོ་བོར་བཞུགས། །ཞེས་མོས་ལ་ཡན་ལག་བདུན་པ་འབུལ་པ་ནི། གང་འདུལ་སྒྱུ་འཕྲུལ་དྲྭ་བའི་དཀྱིལ་འཁོར་སྤྲིན། །སྤྲོ་བསྡུའི་བྱེད་པོ་ཨོ་རྒྱན་རྡོ་རྗེ་འཆང་། །གང་དང་དབྱེར་མེད་དཔལ་ལྡན་བླ་མ་ལ། །སྒོ་གསུམ་གུས་པ་ཆེན་པོས་ཕྱག་བགྱིའོ། །ཕྱི་ནང་གསང་མཆོད་དངོས་འབྱོར་ཡིད་སྤྲུལ་འབུལ། །རྩ་བ་ཡན་ལག་དམ་ཚིག་ཆག་ཉམས་བཤགས། །ཟག་བཅས་ཟག་མེད་དགེ་ལ་རྗེས་ཡི་རང་། །ཐེག་མཆོག་བླ་མེད་ཆོས་འཁོར་བསྐོར་བཞིན་དུ། །མྱ་ངན་མི་འདའ་བསྐལ་བརྒྱར་བཞུགས་གསོལ་འདེབས། །འདིས་མཚོན་དགེ་ཚོགས་བྱང་ཆུབ་ཆེན་པོར་བསྔོ། །ཞེས་མོས་ལ། གསོལ་འདེབས་ཀྱི་དངོས་གཞི་གུ་རུ་རིན་པོ་ཆེའི་རྡོ་རྗེའི་གསུང་ཚིག་བདུན་གསོལ་འདེབས་དང་བཛྲ་གུ་རུ་ལ་སྙིང་པོ་བྱ། མཐར། དུས་གསུམ་རྒྱལ་བའི་སྐུ་གསུང་ཐུགས་རྡོ་རྗེའི། །ཡེ་ཤེས་གཅིག་བསྡུས་མཉམ་མེད་གུ་རུ་རྗེར། །སྙིང་ནས་གསོལ་བ་འདེབས་སོ་ཐུགས་རྗེས་དགོངས། །དབང་བསྐུར་བྱིན་རློབས་སྨིན་གྲོལ་དངོས་གྲུབ་སྩོལ། །ཅེས་གསོལ་བ་བཏབ་པས། འཁོར་རྣམས་འོད་ཞུ་གཙོ་བོའི་སྐུ་ལ་ཐིམ། །གུ་རུའི་གནས་གསུམ་འབྲུ་གསུམ་རྡོ་རྗེའི་ཟེར། །བདག་ལ་ཐིམ་པས་དབང་བསྐུར་སྒྲིབ་བཞི་བྱང་། །ལམ་བཞིའི་སྣོད་གྱུར་སྐུ་བཞིའི་སྐལ་ལྡན་གྱུར། །ཅེས་མོས་ལ། མཐར་ནི་བླ་མ་འོད་ཞུ་རང་ལ་ཐིམ། །ཐུགས་ཡིད་གཅིག་འདྲེས་དགོངས་པའི་རྩལ་ཆེན་རྫོགས། །དུས་གསུམ་རྟོག་པས་མ་བསླད་གཉུག་མའི་མདངས། །རྗེས་ཐོབ་གང་ཤར་བླ་མའི་རོལ་པར་བལྟ། །ཞེས་པའི་ལམ་ཁྱེར་དང་མ་བྲལ་བར་དགེ་བ་བྱང་ཆུབ་ཏུ་བསྔོ་ཞིང་སྤྱོད་ལམ་ཐམས་ཅད་དོན་ཡོད་པར་བྱའོ། །ཞེས་པའང་དད་དམ་བསླབ་གསུམ་རྨད་བྱུང་ལུང་རྟོགས་མཐར་ཕྱིན་གྱི་ཐུགས་བཞེད་བཞིན། ཤཱཀ་བཙུན་རྒན་བུ་ཨོ་རྒྱན་མི་འགྱུར་ཀུན་བཟང་བསྟན་པའི་རྒྱལ་མཚན་གྱིས་དམར་སེར་ཅན་གྱི་ལོ་ས་ག་ཟླ་བའི་འཕེལ་ཕྱོགས་ཀྱི་ཚེས་བཅུ་ཉིན་བྲིས་པ་སྐྱེ་ཀུན་རྗེ་བཙུན་མ་ཧཱ་གུ་རུས་རྗེས་སུ་འཛིན་པའི་གྱུར་གྱུར་ཅིག། །།
༄༅། །ཀུན་མཁྱེན་ཆོས་ཀྱི་རྒྱལ་པོའི་བླ་མའི་རྣལ་འབྱོར་བྱིན་རླབས་མཆོག་སྩོལ་བཞུགས། ཨཱཿ སྟོང་དང་རྟེན་འབྱུང་ཟུང་དུ་ཚོགས་པ་ཡི། །འོད་གསལ་རང་མདངས་དག་པའི་ཞིང་གི་དབུས། །རང་ལུས་རྡོ་རྗེ་རྣལ་འབྱོར་མར་གསལ་བའི། །སྤྱི་བོར་ཆུ་སྐྱེས་ཉི་ཟླའི་གདན་གྱི་སྟེང་། །དུས་གསུམ་རྒྱལ་བའི་ཡེ་ཤེས་གཅིག་བསྡུས་དཔྱིད། །རྣམ་རོལ་མ་འགགས་ཀུན་མཁྱེན་ཀློང་ཆེན་པ། །ཞི་འཛུམ་དགྱེས་ཉམས་པཎྜི་ཏ་ཡི་ཆས། །ངལ་གསོའི་ཕྱག་རྒྱས་ཨུཏྤལ་གླེགས་རལ་འཛིན། །འཁོར་དུ་རབ་འབྱམས་རྩ་གསུམ་སྤྲིན་ལྟར་འཁྲིགས། །ཐུགས་ཀའི་འོད་ཀྱིས་དགོངས་བརྒྱུད་བླ་མའི་ཚོགས། །སྤྱན་དྲངས་དམ་ཚིག་རྟེན་དང་གཉིས་མེད་བཞུགས། །ཞིང་རྡུལ་ལུས་སྤྲུལ་གུས་པས་ཕྱག་འཚལ་ཞིང་། །ལུས་དང་ལོངས་སྤྱོད་དུས་གསུམ་དགེ་ཚོགས་འབུལ། །ཚེ་རབས་བསགས་པའི་སྡིག་ལྟུང་འགྱོད་བཤགས་བསྡོམ། །འཁོར་འདས་ལམ་གྱི་དགེ་རྩར་རྗེས་ཡི་རངས། །སྲིད་ཞི་མཉམ་ཉིད་ངང་དུ་རྟག་བཞུགས་ནས། །ངེས་དོན་ཆོས་ཀྱི་འཁོར་ལོ་བསྐོར་བར་བསྐུལ། །འདིས་མཚོན་དགེ་ཚོགས་བླ་མེད་བྱང་ཆུབ་ཆེར། །ཡོངས་བསྔོ་རྒྱལ་བ་དགྱེས་པའི་འབབ་སྟེགས་ཤོག །མཁྱེན་རབ་ཟུར་ཕུད་ལྔ་པའི་རང་མདངས་གར། །བརྩེ་ཆེན་ཕྱག་ན་པདྨའི་མཁའ་དབྱིངས་སུ། །མངོན་སྣང་གསང་བདག་ནུས་པའི་ཚ་ཟེར་ཅན། །འཇིག་རྟེན་མིག་གཅིག་ངག་གི་དབང་པོར་འདུད། །རབ་འབྱམས་ཤེས་བྱའི་ཆོས་ཀུན་ཧུབ་གཅིག་གིས། །ཉེར་དྲངས་གཙུག་ལག་བྱེ་བའི་གངྒཱའི་རྒྱུན། །ལེགས་སྐྱུག་ཐུབ་བསྟན་མཚོ་ཆེན་རྒྱས་མཛད་པའི། །སྨྲ་བའི་ཟླ་བ་ཀུན་མཁྱེན་བླ་མར་འདུད། །རྒྱ་ཆེན་སྤྱོད་གཞུང་གཏིང་ཟབ་ཆུ་གཏེར་ཆེ། །ཟབ་མོ་ལྟ་བའི་ནོར་བུའི་བཅུད་ཀྱིས་གཏམས། །རྣམ་དག་རིགས་པའི་རླབས་ཕྲེང་འབུམ་གཡོ་བའི། །ཐུབ་བསྟན་ཡོངས་ཀྱི་མངའ་བདག་ཁྱོད་ལ་འདུད། །ཟབ་གསང་རྒྱུད་སྡེ་རྒྱ་མཚོའི་གོས་བཟང་རྩེར། །འོད་གསལ་རྡོ་རྗེ་སྙིང་པོའི་ཏོག་མཛེས་པས། །གྲོལ་བ་དྲུག་ལྡན་འདོད་དགུའི་ཆར་སྦྱིན་པའི། །ས་གསུམ་འགྲན་བྲལ་མཆོག་ལ་གསོལ་བ་འདེབས། །མཚན་ཐོས་ཙམ་གྱིས་སྙིང་གི་མུན་སེལ་ཞིང་། །ལྷན་སྐྱེས་ཡེ་ཤེས་རྩོལ་མེད་བསྐྱེད་མཛད་པའི། །ཡེ་ཤེས་སྒྱུ་མའི་གར་མཁན་ཀློང་ཆེན་པར། །སྙིང་ནས་གསོལ་བ་འདེབས་སོ་ཐུགས་རྗེས་དགོངས། །དེང་སང་སྙིགས་མ་ལྔ་ཡི་མཐར་ཐུག་པས། །ཐུབ་བསྟན་སྤྱི་དང་ཁྱད་པར་སྔ་འགྱུར་གྱི། །བསྟན་པའི་སྙིང་པོ་ཕལ་ཆེར་ནུབ་ལ་ཉེ། །འདི་ལ་ཐུགས་རྗེས་དགོངས་ཤིག་ཀུན་མཁྱེན་རྗེ། །ཀློག་པ་ཕལ་ཆེར་རང་འདོད་གྲུ་མཐའ་འཆའ། །སྒོམ་པ་ཕལ་ཆེར་ཡིད་དཔྱོད་མཐའ་ལ་ཞེན། །ཟབ་གནད་འདི་ཞེས་ངེས་པ་རྙེད་དཀའ་བས། །ཡིད་ལ་ཡེ་ཤེས་འཇུག་པ་མྱུར་སྩོལ་མཛོད། །ཟབ་ཞི་སྤྲོས་བྲལ་འོད་གསལ་འདུས་མ་བྱས། །སྟོང་དང་རྟེན་འབྱུང་ཟུང་འཇུག་དབུ་མ་ཆེར། །བྱམས་འཇམ་བརྒྱུད་པའི་མན་ངག་གཅིག་ཏུ་འདྲེས། །ངེས་དོན་ཟབ་མོའི་སྤོབས་པ་རྒྱས་བྱིན་རློབས། །ཁྱད་པར་རྒྱལ་བ་རིག་འཛིན་བརྒྱུད་པ་ཡི། །དགོངས་པའི་གསང་མཛོད་ཡོ་ག་རྣམ་གསུམ་གྱི། །བསྟན་པའི་སྙིང་པོ་ཕྱོགས་མཐར་རྒྱས་པ་དང་། །ཟབ་དགོངས་མཐའ་དག་ཇི་བཞིན་རྟོགས་བྱིན་རློབས། །རང་དོན་ཐོས་བསམ་སྒོམ་པའི་ལུས་སྟོབས་རྒྱས། །གཞན་དོན་འཆད་རྩོད་རྩོམ་པའི་གད་རྒྱངས་སྒྲོགས། །གཉིས་དོན་འཁོར་ལོ་གསུམ་གྱི་གཡུ་རལ་མཛེས། །སྨྲ་བའི་སེང་གེ་ཁྱེད་དང་མཚུང་པར་ཤོག །ཅེས་མོས་ལ། ༀ་ཨཱཿབཛྲ་མ་ཧ་གུ་རུ་བི་མ་ལ་རསྨི་སརྦ་སིདྡྷི་ཧཱུྃ། ཞེས་བཟླ་ཞིང་དབང་བཞི་ལེན་པའི་དམིགས་གནད་ཡང་ཡང་བྱའོ། །མཐར། བླ་མ་དགྱེས་པས་འོད་ཞུ་རང་ལ་ཐིམ། །ཐུགས་ཡིད་གཅིག་འདྲེས་དགོངས་པའི་རྩལ་ཆེན་རྫོགས། །རིག་སྟོང་ཟུང་འཇུག་ལྷན་སྐྱེས་བདེ་བ་ཆེ། །མ་བཅོས་རྫོགས་པ་ཆེན་པོའི་ཀློང་དུ་ཨཱཿ། །ཞེས་མོས་ལ་མཉམ་པར་བཞག་ཅིང་དགེ་བ་བསྔོའོ། །ཞེས་པའང་ཚེ་རབས་ཀུན་ཏུ་ཀུན་མཁྱེན་བླ་མའི་བྲན་དུ་སྨོན་པ་གཞན་ཕན་ཆོས་ཀྱི་བློ་གྲོས་ཀྱིས་གསོལ་བ་བཏབ་པ་དགེ། ༈ སྐྱེ་མེད་ཀ་དག་སྤྲོས་པ་བྲལ་བའི་ཀློང་། །འོད་གསལ་ལྷུན་གྲུབ་ཡེ་ཤེས་ཆེན་པོའི་གདངས། །ཤར་གྲོལ་རྗེས་མེད་རིག་རྩལ་རོལ་པའི་གར། །རང་རིག་དཔལ་མགོན་བླ་མར་གསོལ་བ་འདེབས། །ཡིད་དཔྱོད་གཟུང་འཛིན་སྦུབས་རྒྱ་ལས་གྲོལ་བའི། །བརྗོད་བྲལ་ཟང་མ་ཐལ་བྱུང་རིག་པའི་གཤིས། །ངོ་ཤེས་རྩལ་རྫོགས་བརྟན་པ་ཐོབ་པ་ཡིས། །གཞོན་ནུ་བུམ་སྐུར་གཏན་སྲིད་ཟིན་བྱིན་རློབས། །ཞེས་པའང་རྗེ་དབོན་དམ་པ་ན་ཐའི་མཚན་ཅན་གྱི་བཞེད་ངོར་བི་ཛས་གང་ཤར་བརྗོད་པ་དགེ།
༄༅། །ཀུན་མཁྱེན་ཆེན་པོའི་བླ་མའི་རྣལ་འབྱོར་ནི། ཨཱཿ འོད་གསལ་ལྷུན་གྲུབ་འཇའ་ཟེར་ཐིག་ལེའི་ཀློང་། །ཀ་དག་གདོད་མའི་མགོན་པོ་ཀློང་ཆེན་པ། །དཀར་གསལ་མཛེས་འཛུམས་ངལ་གསོའི་ཕྱག་རྒྱ་ཅན། །དྲན་པས་མཆོག་སྟེར་སྐྱབས་ཀུན་ངོ་བོར་གསལ། །ཡེ་ཤེས་སྐུ་ཅན་གདོད་མའི་མགོན་པོ་ལ། །གུས་པས་ཕྱག་འཚལ་མཆོད་འབུལ་གསོལ་བ་འདེབས། །ཚེ་རབས་ཕྲེང་བར་འབྲལ་མེད་རྗེས་ཟུངས་ལ། །ཐུགས་ཡིད་གཅིག་ཏུ་འདྲེས་པར་བྱིན་གྱིས་རློབས། །ཞེས་དང་། ༀ་ཨཱཿཧཱུྃ་བཛྲ་མ་ཧཱ་གུ་རུ་བི་མ་ལ་རསྨི་སརྦ་སདྡྷི་ཧཱུྃ། ཞེས་བཟླ། མཐར། བླ་མ་དགྱེས་པས་འོད་ཞུ་རང་ལ་ཐིམ། །ཡེ་ཤེས་དགོངས་པའི་རྩལ་དབང་སེམས་ལ་རྫོགས། །རིག་སྟོང་ཆོས་ཟད་དགོངས་པ་བླ་མའི་ཞལ། །དུས་བཞི་མཉམ་ཉིད་ཀློང་དུ་ཨེ་མ་ཧོ། །ཞེས་མོས་ལ་མཉམ་པར་བཞག་གོ །ཞེས་པའང་རང་བཞིན་རྫོགས་པ་ཆེན་པོའི་རྣལ་འབྱོར་པ་བླ་མ་དམ་པ་འོད་གསལ་འཇའ་ལུས་རྡོ་རྗེའི་ཐུགས་བཞེད་བཞིན་པདྨ་དགྱེས་པས་བྲིས་པ་དགེ། ༄༅། །རྗེ་བླ་མའི་རྣལ་འབྱོར་སྙིང་པོར་དྲིལ་བ་ནི། ཨཱཿ ཀ་དག་སྤྲོས་པ་བྲལ་བའི་དབྱིངས། །ལྷུན་གྲུབ་འཇའ་ཟེར་ཐིག་ལེའི་སྦུབས། །རིག་རྩལ་མ་འགགས་བླ་མ་རྗེ། །ཀུན་མཁྱེན་འཇམ་དཔལ་དགྱེས་པའི་ཞབས། །ཞི་འཛུམ་པཎྜི་ཏ་ཡི་ཆས། །དཀར་གསལ་ཆོས་འཆད་གླེགས་རལ་འཛིན། །མཚན་དཔེའི་གཟི་འབར་ལྷམ་མེར་བཞུགས། །རང་རིག་དོན་གྱི་བླ་མ་ལ། །རང་ངོ་ཤེས་པའི་ཕྱག་གིས་འདུད། །ཅིར་སྣང་རྒྱན་ཤར་མཆོད་སྤྲིན་འབུལ། །རང་གྲོལ་མཚན་མེད་དབྱིངས་སུ་བཤགས། །ཡིད་དཔྱོད་བྲལ་བས་རྗེས་ཡི་རང་། །དྲན་པ་རང་ཟད་ཆོས་འཁོར་བསྐོར། འོད་གསལ་འཁོར་ཡུག་ཀློང་དུ་བཞུགས། །དགེ་ཚོགས་འདུས་མ་བྱས་དབྱིངས་བསྔོ། །སྲིད་ཞི་མཉམ་ཉིད་རྟོགས་གྱུར་ཅིག །ཅེས་དང་ཞལ་གསུང་གསོལ་འདེབས་གང་འོས་མཚན་སྔགས་ཀྱང་བཟླས་མཐར། ཐུགས་ཡིད་བསྲེས་ལ་མཉམ་པར་བཞག་ཅིང་ཅིར་སྣང་བླ་མའི་རོལ་པར་ལྟ་བའི་མོས་གུས་དང་མ་བྲལ་བར་བྱའོ། །ཞེས་པའང་བླ་མ་རིན་པོ་ཆེ་འོད་གསལ་མཆོག་གི་བཞེད་སྐོང་དུ་བི་ཛ་ཡས་བྲིས་ཤིང་གསོལ་བ་བཏབ་པ་དགེ།
༄༅། །དོན་དམ་བླ་མའི་རྣལ་འབྱོར་བཞུགས། ན་མོ་མ་ཧཱ་སིནྡྷ་ཡེ། ཡེ་གྲོལ་ཀ་དག་གདོད་མའི་གཤིས། །སྐུ་གསུམ་འདུ་འབྲལ་མེད་པ་ལ། །རང་ངོ་ཤེས་པས་སྐྱབས་མཆི་ཞིང་། །ཅོག་བཞག་ཆེན་པོར་སེམས་བསྐྱེད་དོ། །ཨཱཿ ཀ་དག་གཏིང་གསལ་འདུས་མ་བྱས། །ལྷུན་གྲུབ་འོད་ལྔའི་ཐིག་ལེ་ཆེར། །རིག་རྩལ་མ་འགགས་བླ་མའི་སྐུ། །ཞལ་ཕྱག་འཛིན་པ་ལས་འདས་པའི། །ཝཾ་ཡིག་འགྱུར་མེད་བདེ་བ་ཆེ། །ཨེ་ཡིག་སྟོང་ཆེན་ཡུམ་དང་སྦྱོར། །ཟུང་འཇུག་སྤྲོས་པ་ཀུན་བྲལ་བའི། །ཡེ་ཤེས་རྒྱ་མཚོའི་འཁོར་དང་བཅས། །སྲིད་ཞི་ཀུན་ཁྱབ་ཆེན་པོར་གསལ། །མཉམ་ཉིད་ཀློང་ནས་སྤྱན་འདྲེན་གཤེགས། །དབྱིངས་རིག་འདུ་འབྲལ་མེད་པར་བཞུགས། །ཡིད་དཔྱོད་མཚན་འཛིན་བྲལ་བས་འདུད། །གང་ཤར་རང་གྲོལ་མཆོད་སྤྲིན་འབུལ། །གཟུང་འཛིན་དབུ་མའི་དབྱིངས་སུ་བཤགས། །བློ་བྲལ་ཆེན་པོར་རྗེས་ཡི་རང་། །ཡེ་གྲོལ་གཉུག་མའི་ཆོས་འཁོར་བསྐོར། །རྒྱུན་ཆད་མེད་པར་བཞུགས་གསོལ་འདེབས། །འཁོར་གསུམ་རྟོག་བྲལ་དབྱིངས་སུ་བསྔོ། །ༀ། སྣང་སྟོང་སྐུ་ཡི་རྡོ་རྗེ་ལ། །ཞེན་འཛིན་བྲལ་བས་གསོལ་བ་འདེབས། །གཟུགས་སྣང་ལྷ་སྐུའི་ཕྱག་རྒྱར་གྲོལ། །བུམ་དབང་རྟོགས་པ་མཐར་ཕྱིན་ཤོག །ཨཱཿ གྲགས་སྟོང་གསུང་གི་རྡོ་རྗེ་ལ། །སྨྲ་བརྗོད་བྲལ་བས་གསོལ་བ་འདེབས། །འགྲོ་འོང་སྲོག་རྩོལ་དབུ་མར་དག །གསང་དབང་རྟོགས་པ་མངོན་གྱུར་ཤོག །ཧཱུྃ། བདེ་སྟོང་ཐུགས་ཀྱི་རྡོ་རྗེ་ལ། །གཟུང་འཛིན་བྲལ་བས་གསོལ་བ་འདེབས། །འཕོ་མེད་བདེ་ཆེན་རྡོ་རྗེར་བསྡོམས། །ཤེར་དབང་རྟོགས་པ་མངོན་གྱུར་ཤོག །ཧྲཱིཿ། རིག་སྟོང་ཡེ་ཤེས་རྡོ་རྗེ་ལ། །དབྱིངས་རིག་འབྲལ་མེད་གསོལ་བ་འདེབས། །འོད་གསལ་སྣང་བཞིའི་གསེང་ལམ་ནས། །བཞི་པའི་ཡེ་ཤེས་མཐར་ཕྱིན་ཤོག །ཨེ་མ་ཧོ། ཅིར་སྣང་བླ་མའི་རོལ་པ་སྟེ། །གང་ཤར་ཀུན་བཟང་སྤྱོད་པའི་རྒྱན། །ཐམས་ཅད་ལྷུན་མཉམ་བདེ་བ་ཆེ། །མཉམ་རྫོགས་ཆེན་པོས་བཀྲ་ཤིས་ཤོག །དེ་སྐད་གང་ཤར་ཐོལ་བྱུང་ཚིག །འཁོར་ལོའི་དབང་ཕྱུག་སྤྲུལ་པའི་སྐུར། །དགྱེས་སྐོང་མཆོད་པའི་རྫས་སུ་ཕུལ། །རེ་དོགས་མེད་པའི་ཀློང་དུ་ཨཱཿ། །
༄༅། རྗེ་བླ་མའི་རྣལ་འབྱོར་བྱིན་རླབས་བདུད་རྩིའི་སྤྲིན་ཕུང་བཞུགས། ཨཱཿ འཁོར་འདས་ཆོས་ཀུན་འོད་གསལ་སྟོང་པའི་དབྱིངས། །མ་འགགས་རང་སྣང་དག་པའི་ཞིང་གི་དབུས། །ཕུལ་བྱུང་མཆོད་པའི་སྦྲིན་ཕུང་འཁྲིགས་པའི་ཀློང་། །རང་ཉིད་གཞི་ལུས་ཚངས་སྲས་འཕགས་མའི་སྐུའི། །མདུན་གྱི་ནམ་མཁར་སེང་ཁྲི་པད་ཟླའི་སྟེང་། །དྷཱིཿཡིག་དམར་སེར་འོད་ཀྱི་འཕྲོ་འདུ་ལས། །རིགས་ཀུན་ཁྱབ་བདག་འཇམ་དཔལ་དགྱེས་པའི་ཞབས། །རྣམ་པ་སྨྲ་བའི་སེང་གེ་རྒྱལ་ཀུན་ཡབ། །གུར་གུམ་མདོག་ཅན་བརྒྱད་གཉིས་ལང་ཚོས་སྒེག །ཟུར་ཕུད་ལྔར་འཆིང་དར་དང་རིན་ཆེན་བརྒྱན། །ཕྱག་ཟུང་ཤེས་རབ་རལ་གྲི་གླེགས་བམ་འཛིན། །རྡོ་རྗེའི་སྐྱིལ་ཀྲུང་མུ་མེད་འོད་ཟེར་འབར། །ཐུགས་སྲོག་ཟླ་སྟེང་དྷཱིཿལས་འོད་འཕྲོས་པས། །རབ་འབྱམས་ཕྱོགས་དུས་བདེ་གཤེགས་སྲས་སློབ་བཅས། །རིགས་འདུས་བླ་མའི་ངོ་བོར་སྤྱན་དྲངས་ཐིམ། །རྒྱལ་ཀུན་མཁྱེན་རབ་ཡེ་ཤེས་གཅིག་བསྡུས་པ། །དྲན་པས་གདུང་སེལ་འཇམ་མགོན་བླ་མ་ལ། །སྒོ་གསུམ་གུས་པ་ཆེན་པོས་ཕྱག་འཚལ་ཞིང་། །ལུས་དང་ལོངས་སྤྱོད་ཀུན་བཟང་མཆོད་སྤྲིན་འབུལ། །ཚེ་རབས་བསགས་པའི་སྡིག་ལྟུང་སྙིང་ནས་བཤགས། །བྱང་ཆེན་སྤྱོད་པ་རྒྱ་མཚོར་རྗེས་ཡི་རངས། །འགྲོ་གནས་བར་བཞུགས་ཆོས་འཁོར་བསྐོར་བར་བསྐུལ། །འདིས་མཚོན་དགེ་ཚོགས་བྱང་ཆུབ་ཆེན་པོར་བསྔོ། །འགྲོ་རྣམས་བླ་མེད་ཐེག་པའི་སྣོད་གྱུར་ཅིག །རབ་འབྱམས་རྒྱལ་ཀུན་བསྐྱེད་པའི་ཡབ་གྱུར་ཀྱང་། །སྙིང་རྗེ་ཆེན་པོས་རྒྱལ་སྲས་གཞོན་ནུའི་ཚུལ། །སྲིད་པ་ཇི་སྲིད་སྟོན་པའི་ཐུགས་རྗེ་ཅན། །ཁྱབ་བདག་འཇམ་དཔལ་རྡོ་རྗེར་གསོལ་བ་འདེབས། །གང་གི་ཐུགས་བསྐྱེད་ཆུ་གཏེར་བསྲུབས་པ་ལས། །ཉེར་ཐོན་མཁྱེན་བརྩེའི་དཀྱིལ་འཁོར་གང་བའི་ཟླ། །མཐའ་ཡས་སྐྱེ་དགུའི་ཀུ་མུད་བཞད་པའི་མཉེན། །འཇམ་དཔལ་དགྱེས་པའི་རྡོ་རྗེར་གསོལ་བ་འདེབས། མཁྱེན་རབ་ཕ་མཐའ་ཡས་པས་འཇམ་པའི་དབྱངས། །བརྩེ་ཆེན་ཐུགས་རྗེ་མཚུངས་མེད་པད་དཀར་འཆང་། །ནུས་མཐུ་ཚད་མེད་གསང་བདག་རྡོ་རྗེ་ཅན། །རིགས་གསུམ་དབྱེར་མེད་བླ་མར་གསོལ་བ་འདེབས། །ཟབ་མོ་ལྟ་བའི་གནད་ལ་ནཱ་ག་རྫུ། །རྒྱ་ཆེན་སྤྱོད་པའི་གཞུང་ལ་ཐོགས་མེད་ཞབས། །རྣམ་དག་རིགས་པའི་སྒོ་འབྱེད་ཆོས་གྲགས་དངོས། །ཟླ་བྲལ་པཎ་ཆེན་བླ་མར་གསོལ་བ་འདེབས། །གསང་ཆེན་རྒྱུད་སྡེའི་མངའ་བདག་རྒྱལ་པོ་ཛཿ། །ཟབ་དོན་སྒྲུབ་སྡེའི་མཛོད་འཛིན་རྡོ་རྗེ་ཆོས། །འོད་གསལ་ཐེག་མཆོག་བསྟན་བདག་དགའ་རབ་དངོས། །གྲུབ་བརྒྱའི་གཙུག་ནོར་མཆོག་ལ་གསོལ་བ་འདེབས། །ཁྱད་པར་ལྔ་བདོའི་རྒུད་པས་ཉམ་ཐག་ཚེ། །ཐུག་བསྐྱེད་བརྩོན་པས་ངེས་གསང་སྙིང་པོའི་བསྟན། །དབྱར་གྱི་མཚོ་ཆེན་བཞིན་དུ་རྒྱས་མཛད་པའི། །བཀའ་དྲིན་བསམ་མི་ཁྱབ་ལ་གསོལ་བ་འདེབས། །དེ་སླད་གཅམ་བུ་མིན་པའི་གདུང་དབྱངས་ཀྱིས། །རྩེ་གཅིག་གསོལ་བ་འདེབས་པ་བདག་ཅག་ལ། །ཡེ་ཤེས་དགོངས་པའི་བྱིན་ཆེན་དབབ་མཛོད་ལ། །གཟུངས་སྤོབས་བློ་གྲོས་གཏེར་ཁ་འབྱེད་དུ་གསོལ། །རྒྱ་ཆེན་ཤེས་བྱའི་གནས་ལ་རབ་ཏུ་མཁས། །བསླབ་གསུམ་ཉེས་པས་མ་གོས་བཙུན་མཐར་ཕྱིན། །བསྟན་འགྲོར་ཕན་པ་བཟང་པོའི་ཕྲིན་ལས་རྒྱས། །འབྲེལ་ཚད་དོན་དང་ལྡན་པར་མཛད་དུ་གསོལ། །མང་དུ་ཐོས་པའི་མངའ་འབངས་རྒྱ་ཆེ་ཞིང་། །བསམ་བྱུང་ཤེས་རབ་རིན་ཆེན་བདུན་དང་ལྡན། །སྒོམ་པའི་ཡོན་ཏན་སྲིད་ཞིའི་བླ་ན་འཕགས། །ངེས་དོན་ཆོས་ཀྱི་རྒྱལ་སྲིད་སྦྱིན་པར་མཛོད། །འཆད་པས་བློ་ལྡན་བྱེ་བའི་ཡིད་འཕྲོག་ཅིང་། །ལུང་རིགས་རྩོད་པས་ཕས་རྒོལ་དྲེགས་པ་བསྙིལ། །ལེགས་བཤད་རྩོམ་པས་ཐུབ་བསྟན་གསལ་ནུས་པའི། །རྣམ་དཔྱོད་མཚུངས་མེད་བདག་ལ་སྩལ་དུ་གསོལ། །ཀློག་པ་ཐོས་བསམ་རྟག་པར་གཞན་ལ་ཕན། །སྤོང་བ་བསམ་གཏན་དྲོད་རྟགས་མངོན་དུ་གྱུར། །རྣམ་དཀར་ཕྲིན་ལས་ས་གསུམ་ཡོངས་ལ་ཁྱབ། །དོན་གཉིས་མཐའ་རུ་ཕྱིན་པར་མཛད་དུ་གསོལ། །མདོར་ན་འདི་ནས་བྱང་ཆུབ་སྙིང་པོའི་བར། །ཁྱོད་མིན་བདག་ལ་སྐྱབས་གཞན་མ་མཆིས་པས། །འབྲལ་མེད་ཡེ་ཤེས་གཟིགས་པས་རྗེས་དགོངས་ཏེ། །མགོན་པོ་ཁྱེད་དང་མཚུངས་པར་བྱིན་གྱིས་རློབས། །ཞེས་གསོལ་བ་དྲག་ཏུ་བཏབ་ལ། བླ་མའི་ཐུགས་སྲོག་སྔགས་ཕྲེང་འཁོར་བ་ལས། །འོད་འཕྲོས་ཕྱོགས་དུས་བདེ་གཤེགས་སྲས་བཅས་ཀྱི། །རྡོ་རྗེའི་དམ་ཚིག་ཆེན་པོ་ཉེར་བསྐུལ་ནས། །ཕུལ་བྱུང་མཁྱེན་བརྩེ་ནུས་པའི་བྱིན་མཐུ་ཀུན། །ཡོངས་བསྡུས་ཐུགས་དབུས་སྔགས་ཀྱི་རྒྱལ་པོ་ལས། །དབྱངས་གསལ་ཡི་གེ་མར་མེའི་ཕྲེང་བ་ལྟར། །བརྒྱུད་མར་བྱུང་བ་ཞལ་ནས་རང་སྒྲར་བཅས། །བདག་གི་སྙིང་དབུས་ཞུགས་ཤིང་ཐིམ་པ་ཡིས། །མི་བརྗེད་གཟུངས་སྤོབས་བློ་གྲོས་སྣང་བ་རྒྱས། །སྐུ་གསུང་ཐུགས་ཀྱི་དངོས་གྲུབ་ཐོབ་པར་གྱུར། །ཞེས་མོས་ལ། ༀ་ཨཱཿབཛྲ་མ་ཧཱ་གུ་རུ་ཨ་ཛི་ཏ་བི་ཛ་ཡ་ཨ་ར་པ་ཙ་ན་དྷཱིཿསརྦ་སིདྡྷི་ཧཱུྃ་ཧཱུྃ་ཨཱཿ ཞེས་ཅི་ནུས་བཟླ་ཞིང་། སྤྲོ་ན། ༀ་ཧྲཱིིཿདྷཱི་མ་མེ་སོགས་དང་། མཚན་བརྗོད་རྒྱས་བསྡུས་ཀྱང་བཀླག་གོ །མཐར། བླ་མའི་གནས་གསུམ་རྡོ་རྗེའི་འབྲུ་གསུམ་ལས། །འོད་འཕྲོས་བདག་ཐིམ་སྒྲིབ་དག་དབང་བཞི་ཐོབ། །མཐར་ནིི་བླ་མ་འོད་ཞུ་རང་ལ་ཐིམ། །རང་ཡང་མི་དམིགས་སྤྲོས་བྲལ་དབྱིངས་སུ་ཡལ། །དུས་གསུམ་རྟོག་པས་མ་བསླད་གཉུག་མའི་གཤིས། །རིག་སྟོང་ཟུང་འཇུག་དགོངས་པ་བླ་མའི་ཞལ། །གཟུངས་སྤོབས་བློ་གྲོས་འཛད་མེད་འབྱུང་བའི་སྒོ། །གང་ཤར་སྤང་བླང་བྲལ་བའི་དབྱིངས་སུ་ཨཱཿ། །ཞེས་མཉམ་པར་བཞག་ཅིང་། སླར་ཡང་ཅིར་སྣང་བླ་མའི་རོལ་པར་ཤེས་པའི་དག་སྣང་དང་མ་བྲལ་བར་དགེ་བ་བསྔོ་ཞིང་སྨོན་ལམ་གྱིས་མཐའ་བརྒྱན་པར་བྱའོ། །ཞེས་པའང་རང་གཞན་མང་པོ་ལ་སྨན་པའི་བསམ་པས། མགོན་པོ་གང་གི་ཞབས་རྡུལ་ལ་སྤྱི་བོས་རེག་པའི་རྒྱལ་སྲས་གཞན་ཕན་ཆོས་ཀྱི་བློ་གྲོས་ཀྱིས་བརྒྱུད་པའི་མན་ངག་གི་གནད་སྙིང་པོར་དྲིལ་ནས་བཀོད་པ་སྟེ། འདིས་ཀྱང་རང་གཞན་ཀུན་གྱི་རྒྱུད་ལ་དཔལ་ལྡན་བླ་མའི་བྱིན་རླབས་ཞུགས་ཏེ་སྙིང་པོའི་བསྟན་པ་ཡུན་དུ་གསལ་བའི་རྒྱུར་གྱུར་ཅིག། །།
༄༅། །མི་ཕམ་འཇམ་པའི་དབྱངས་ལ་བརྟེན་པའི་བླ་མའི་རྣལ་འབྱོར་ཟབ་དོན་སྤྲིན་ཀྱི་རོལ་མོ་བཞུགས། ན་མོ་གུ་རུ་མཉྫུ་ཤྲཱི་ཡེ། དེ་ལ་འདིར་སྐལ་བ་མཆོག་དང་ལྡན་པ་རྣམས་ཀྱི་ཉམས་སུ་བླང་བར་བྱ་བའི་གཙོ་བོ་ནི་ལམ་ཟབ་མོ་བླ་མའི་རྣལ་འབྱོར་ཡིན་ཏེ། དེའི་ཚུལ་ཉམས་སུ་ལེན་པར་འདོད་པས་ངེས་འབྱུང་དང་བྱང་ཆུབ་ཀྱི་སེམས་བསྒོམ་པ་སྔོན་དུ་འགྲོ་བས། ཐོག་མར་རྟེན་བསྐྱེད་པ་ནི། དྷཱིཿ ཆོས་ཀུན་རྣམ་དག་རང་བྱུང་བདེ་ཆེན་ཞིང་། འོད་གསལ་རང་མདངས་དག་པའི་ཞིང་གི་དབུས། །ཕུལ་བྱུང་མཆོད་པའི་སྤྲིན་གྱི་ལྡིང་ཁང་དུ། །མདུན་མཁར་སེང་ཁྲི་པད་ཟླའི་གདན་གྱི་སྟེང་། །རིགས་ཀུན་ཁྱབ་བདག་བློ་གྲོས་དྲི་མེད་ཞབས། །རྣམ་རོལ་མ་འགགས་སྨྲ་བའི་སེང་གེའི་སྐུ། །གུར་གུམ་མདོག་ཅན་མཚན་དཔེའི་གཟི་བྱིན་འབར། །ཕྱག་གཡས་རལ་གྲི་གཡོན་པས་གླེགས་བམ་བསྣམས། །ཟུར་ཕུད་ལྔ་ལྡན་དར་དང་རིན་ཆེན་སྤྲས། །རྡོ་རྗེའི་སྐྱིལ་ཀྲུང་འོད་ཕུང་ཀློང་ན་འགྱིང་། གནས་གསུམ་འབྲུ་གསུམ་ཐུགས་སྲོག་དྷཱིཿཡིས་མཚན། །དམ་ཡེ་དབྱེར་མེད་གདོན་ནས་ལྷུན་གྱིས་གྲུབ། །དྲན་པས་སྲིད་ཞིའི་འཇིགས་འཕྲོག་ཆེན་པོར་གསལ། །ཞེས་མོས་ལ། དེ་ནས་ཚོགས་བསགས་པ་ནི། རྒྱལ་ཀུན་ཡེ་ཤེས་གཅིག་བསྡུས་འཇམ་པའི་དབྱངས། །གང་འདུལ་མཚན་དཔེའི་གར་རོལ་ཐམས་ཅད་མཁྱེན། །དྲན་པས་མཆོག་སྟེར་དཔལ་ལྡན་བླ་མ་ལ། །སྒོ་གསུམ་གུས་པ་ཆེན་པོས་ཕྱག་འཚལ་ལོ། །ཉེར་སྤྱོད་འདོད་ཡོན་བཀྲ་ཤིས་རྫས་རྟགས་བརྒྱད། །རིན་ཆེན་སྣ་བདུན་ལྷ་མིའི་འབྱོར་པའི་ཚོགས། །བདག་ལུས་ཕུང་ཁམས་དུས་གསུམ་དགེ་རྩར་བཅས། །ཀུན་བཟང་མཆོད་སྤྲིན་རྒྱ་མཚོར་དམིགས་ཏེ་འབུལ། །ཐོགས་མེད་དུས་ནས་ད་ལ་ཐུག་གི་བར། །མི་ཤེས་བག་མེད་ཉོན་མོངས་དབང་གྱུར་པས། །བཅས་དང་རང་བཞིན་ཉམས་པའི་སྡིག་ལྟུང་ཚོགས། །སྙིང་ནས་འགྱོད་བཤགས་ཕྱིན་ཆད་མི་བགྱིད་དོ། །བླ་མ་རྒྱལ་བ་སྲས་དང་བཅས་རྣམས་ཀྱི། །གསང་གསུམ་ཡོན་ཏན་གཞན་ཕན་ཕྲིན་ལས་སོགས། །འཇིག་རྟེན་འཇིག་རྟེན་འདས་པའི་དགེ་ཚོགས་རྒྱུན། །ཀུན་ལ་དགའ་བས་རྗེས་སུ་ཡི་རང་ངོ་། །མཁའ་མཉམ་འགྲོ་ཀུན་བདེ་གཤེགས་སྙིང་པོ་ཅན། །རང་བཞིན་དག་པའི་ཆོས་ཉིད་རྟག་བཞུགས་པས། །འདི་ན་སྣོད་མིན་སེམས་ཅན་གང་ཡང་མེད། །དེ་སླད་གང་འདུལ་ཆོས་འཁོར་བསྐོར་བར་བསྐུལ། །འཕགས་རྣམས་བདུད་བཞིའི་གཡུལ་ལས་རྣམ་རྒྱལ་ཞིང་། །དབང་བཅུའི་གོ་འཕང་མཆོག་ལ་རྟག་གནས་ཕྱིར། །མཁའ་ཁྱབ་གདུལ་བྱ་ཡལ་བར་འདོར་མིན་པར། །གཟུགས་སྐུ་སྲིད་པ་ཇི་སྲིད་རྟག་སྣང་མཛོད། །དེ་ལས་བྱུང་བའི་རབ་དགེ་དྲི་མེད་རྒྱུན། །འཁོར་གསུམ་རྟོག་པའི་རྙོག་མས་སླད་མིན་པར། །འོད་གསལ་ཆོས་དབྱིངས་ཆེན་པོར་བསྔོ་བགྱིད་ན། །འགྲོ་ཀུན་དཔལ་ལྡན་བླ་མའི་གནས་ཐོབ་ཤོག །མཁའ་ཁྱབ་འགྲོ་ཀུན་སྲིད་ལས་ངེས་སྒྲོལ་ཕྱིར། །བསླུ་མེད་དཀོན་མཆོག་གསུམ་ལ་སྐྱབས་མཆི་ཞིང་། །སྨོན་འཇུག་རང་བཞིན་ཀུན་རྫོབ་དོན་དམ་སེམས། །བྱང་ཆུབ་སྙིང་པོའི་བར་དུ་བཟུང་བར་བགྱི། །སྒོ་གསུམ་བརྩོན་པ་རྟག་ཏུ་དོན་ཡོད་ཅིང་། །ཉིན་མཚན་མི་དལ་ཐེག་ཆེན་ཆོས་མཆོག་བཟུང་། །སྲས་བཅས་རྒྱལ་བའི་ཕྲིན་ལས་ཁུར་ཁྱེར་བས། །བསྟན་འགྲོའི་དོན་ཆེན་འགྲུབ་པར་བྱིན་གྱིས་རློབས། །སླར་ཡང་རྩེ་གཅིག་ཏུ་འདོད་པའི་དོན་ལ་གསོལ་བ་བཏབ་པ་ནི། རབ་འབྱམས་རྒྱལ་བའི་མཁྱེན་རབ་ཕུང་པོ་ལ། །འཇམ་པའི་རྡོ་རྗེར་རབ་བསྔགས་ཡེ་ཤེས་སེམས། །གང་དང་དབྱེར་མེད་དཔལ་ལྡན་བླ་མ་ལ། །རྩེ་གཅིག་གསོལ་བ་འདེབས་སོ་ཐུགས་རྗེས་གཟིགས། །ཤིན་ཏུ་རྙེད་དཀའི་རྟེན་བཟང་ཐོབ་དུས་འདིར། །མི་རྟག་འཆི་བ་དྲན་པའི་བརྩོན་འགྲུས་ཀྱིས། །སྲིད་པའི་ཕུན་ཚོགས་ཀུན་ལ་མ་ཆགས་པའི། །བཅོས་མིན་ངེས་འབྱུང་སྐྱེ་བར་བྱིན་གྱིས་རློབས། །ཚུལ་ཁྲིམས་དག་ཅིང་མང་དུ་ཐོས་པས་ཕྱུག །བྱང་ཆུབ་སེམས་འབྱོར་ཟབ་མོའི་གནས་ལུགས་རྟོགས། །རིམ་གཉིས་མཐར་ཕྱིན་ས་ལམ་དྲོད་ཚད་རྙིང་། །དོན་གཉིས་བསམ་ཀུན་འགྲུབ་པར་བྱིན་གྱིས་རློབས། །ཁྱད་པར་འཇམ་མགོན་ཐུགས་རྗེའི་ཟླ་ཟེར་གྱིས། །གཟུངས་སྤོབས་བློ་གྲོས་བྱེ་བའི་ཀུ་མུཏ་བཞད། །ཕུལ་བྱུང་འཆད་རྩོད་རྩོམ་པའི་ཟིལ་དངར་གྱིས། །སྐལ་བཟང་རྐང་དྲུག་རེ་སྐོང་བྱིན་གྱིས་རློབས། །དེ་ལྟར་གསོལ་བ་བཏབ་མཐུས་བླ་མ་ཡི། །ཐུགས་སྲོག་དྷཱིཿལས་དབྱངས་གསལ་སྔགས་ཀྱི་ཕྲེང་། །མར་མེའི་ཕྲེང་ལྟར་རང་སྒྲ་སྒྲོག་བཞིན་པ། །དཔག་མེད་འཕྲོས་ནས་རང་གི་སྙིང་དབུས་ཞུགས། །ཇི་ལྟ་ཇི་སྙེད་མཁྱེན་པའི་དཔལ་ཐོབ་གྱུར། །ཅེས་མོས་ལ་གསོལ་འདེབས་ཀྱི་ཚུལ་དུ། ༀ་ཧྲཱིིཿདྷཱིཿམ་མེ་དཱི་པྃ་མཉྫུ་ཤྲཱི་མུྃ་ཧྲཱིིཿ པྲཛྙཱ་ཝརྡྷ་ནི་ཧྲཱིཿངྷཱིིཿསྭཱ་ཧཱ། ཞེས་དང་། སྤྲོ་ན་མཚན་སྔགས་དང་དབྱངས་གསལ་ཡང་བརྗོད་ཅིང་ཡི་གེའི་སྒྲ་དོན་ལའང་སེམས་གཞོལ། མཐར། བླ་མའི་གནས་གསུམ་འབྲུ་གསུམ་ཐུགས་སྲོག་ལས། །འོད་འཕྲོས་བདག་ཐིམ་དབང་ཐོབ་སྒྲིབ་བཞི་སྦྱངས། །ལམ་བཞིའི་སྣོད་གྱུར་སྐུ་བཞིའི་རྟེན་འབྲེལ་སྒྲིགས། །མཐར་ནི་དགྱེས་པས་རང་གི་སྙིང་གར་བྱོན། །བྱང་ཆུབ་བར་དུ་འབྲལ་བ་མེད་བཞུགས་ནས། །ཟབ་གསལ་གཉིས་མེད་ཡེ་ཤེས་ཆེན་པོའི་མདངས། །གཟུངས་སྤོབས་བློ་གྲོས་མུ་མེད་འཆར་བར་མོས། །དགེ་བ་འདི་ཡིས་བདག་གཞན་འགྲོ་བ་ཀུན། །སྐྱེ་ཀུན་འཇམ་མགོན་བླ་མས་རྗེས་བཟུང་མཐུས། །མཁྱེན་གཉིས་ཡེ་ཤེས་སྣང་བ་སྒྲིབ་མེད་རྒྱས། །སྐུ་བཞིའི་གོ་འཕང་མངོན་དུ་བྱེད་པར་ཤོག །ཅེས་སོགས་བསྔོ་སྨོན་གྱིས་མཚམས་སྦྱར་ནས། དུས་རྒྱུན་དུ་བདེན་གཉིས་དབྱེར་མེད་ཟབ་མོའི་གནས་ལུགས་ལ་མཉམ་པར་བཞག་ཅིང་ཅིིར་སྣང་བླ་མའི་རོལ་པར་བལྟ་བའི་ལམ་ཁྱེར་དང་སྙིང་རྗེ་ཆེན་པོས་གཞན་ཕན་གྱི་ཕྲིན་ལས་ལ་རྟག་ཏུ་རོལ་པས་རང་གཞན་བསྟན་འགྲོའི་དོན་རྒྱ་ཆེན་པོ་ལ་བརྩོན་པར་བྱའོ། །ཞེས་པའང་འཁོར་ལོའི་མགོན་པོ་འཇམ་དབྱངས་མཁྱེན་བརྩེའི་དབང་པོའི་ཡང་སྤྲུལ་བཀའ་དྲིན་ཟླ་བྲལ་འཇམ་དབྱངས་དགའ་བའི་གོ་ཆས་བཀའ་སྩལ་སྤྱི་བོར་ཕེབས་པ། གུས་པ་མཆོད་དེ་རྒྱལ་སྲས་འཇམ་དབྱངས་བློ་གྲོས་རྒྱ་མཚོའི་སྒྲ་དབྱངས་སུ་འབོད་པས་འོག་མིན་བླ་མའི་གཟིམས་སྤྱིལ་དུ་གང་ཤར་ཡུད་ཙམ་ལ་བྲིས་ཏེ་ཕུལ་བའི་ཡི་གེ་པ་ནི་མཆོག་སྤྲུལ་པདྨ་དྲི་མེད་ལེགས་པའི་བློ་གྲོས་ཀྱིས་མཛད་པ་སྟེ། འདིས་ཀྱང་སྐྱེ་ཀུན་བླ་མ་མཆོག་གིས་རྗེས་སུ་འཛིན་པའི་རྒྱུར་གྱུར་ཅིག
༄༅། །རྒྱལ་བའི་སྲས་པོ་ཀརྨ་བཀྲ་ཤིས་འོད་ཟེར་ལ་བརྟེན་པའི་བླ་མའི་རྣལ་འབྱོར་གྲུབ་གཉིས་མཆོག་སྦྱིན་ཞེས་བྱ་བཞུགས། ན་མོ་གུ་རུ་བཛྲ་དྷཱ་ར་ཡ། འདིར་སྐལ་བ་མཆོག་དང་ལྡན་པ་རྣམས་ཀྱི་དོན་དུ་གཉེར་བར་བྱ་བ་ནི་ལམ་ཟབ་མོ་བླ་མའི་རྣལ་འབྱོར་ལ་བརྩོན་པ་ཉིད་ཡིན་ལ། དེའི་ཚུལ་ཉམས་སུ་ལེན་པ་ལ། ངེས་འབྱུང་དང་བྱང་ཆུབ་ཀྱི་སེམས་ཀྱིས་ཀུན་ནས་བསླངས་ཏེ། སྐྱབས་སེམས་སྔོན་དུ་འགྲོ་བས། རྟེན་བསྐྱེད་པ་ནི། ཨཱཿ འཁོར་འདས་ཆོས་ཀུན་མི་དམིགས་སྟོང་པའི་དབྱིངས། །འོད་གསལ་རང་མདངས་གྲུབ་པའི་གཞལ་མེད་ཁང་། །ཕུན་ཚོགས་མཆོད་པའི་སྤྲིན་ཕུང་གཏིབ་པའི་དབུས། །མདུན་གྱི་ནམ་མཁར་སེང་ཁྲི་པད་ཟླའི་སྟེང་། །རྒྱལ་ཀུན་འདུས་ཞལ་དྲིན་ཆེན་མངྒ་ལ། །དཀར་གསལ་བགྲེས་ཚུལ་སྒོམ་ཞུ་ཆོས་གོས་གསོལ། །ཕྱག་གཉིས་མཉམ་བཞག་ལྟ་སྟངས་མཁའ་ལ་གཟིགས། །རབ་འབྱམས་རྩ་གསུམ་རྒྱ་མཚོའི་འཁོར་གྱིས་བསྐོར། །དམ་ཡེ་དབྱེར་མེད་གདོད་ནས་ལྷུན་གྱིས་གྲུབ། །དྲན་པས་སྲིད་ཞིའི་འཇིགས་འཕྲོག་ཆེན་པོར་གསལ། །ཞེས་མོས་ལ་ཡན་ལག་བདུན་པ་འབུལ་བ་ནི། རབ་འབྱམས་རྒྱལ་བའི་ཡེ་ཤེས་གཅིག་བསྡུས་དཔྱིད། །ལུང་རྟོགས་ཐེག་གསུམ་ཆོས་ཀྱི་འབྱུང་གནས་ཆེ། །བསྟན་འཛིན་མཁས་གྲུབ་བྱེ་བའི་གཙུག་ནོར་མཆོག །མཚུངས་མེད་བླ་མའི་ཞབས་ལ་ཕྱག་འཚལ་ལོ། །སྣོད་བཅུད་དཔལ་འབྱོར་ལྷ་མིའི་འབྱོར་པའི་ཚོགས། །བདག་ལུས་ལོངས་སྤྱོད་དུས་གསུམ་དགེ་རྩར་བཅས། །མ་ལུས་བློས་བསྡམས་ཡིད་སྤྲུལ་ཀུན་བཟང་སྤྲིན། །ཕྱི་མའི་མུ་མཐར་ཁྱབ་པས་ཀུན་ཏུ་མཆོད། །ཐོག་མེད་དུས་ནས་ད་ལ་ཐུག་གི་བར། །བཅས་དང་རང་བཞིན་འགལ་བའི་ཉེས་ལྟུང་ཚོགས། །བྱང་ཆུབ་ལམ་གྱི་གེགས་གྱུར་མཆིས་སོ་ཅོག །སྙིང་ནས་འགྱོད་པས་མཐོལ་བཤགས་སྡོམ་པར་བགྱི། །འཕགས་དང་སོ་སོའི་སྐྱེ་བོ་ཇི་སྙེད་ཀྱི། །ལེགས་སྤྱད་དགེ་བའི་དངོས་པོ་མཆིས་ཀུན་ལ། །སྡང་དང་ཕྲག་དོག་བློ་ངན་ཀུན་བཏང་ནས། །སྙིང་ནས་དགའ་བས་རྗེས་སུ་ཡི་རང་ངོ་། །སྡུག་བསྔལ་སྲིད་པའི་འཁྲི་ཤིང་དྲུང་འབྱིན་ཅིང་། །ཀུན་འབྱུང་ཉེས་པའི་དྲི་མ་འཁྲུད་པའི་ཆབ། །ལམ་བདེན་ཟག་མེད་བདུད་རྩིའི་ཆར་ཆེན་པོ། །གདུལ་བྱའི་ཞིང་སར་རྟག་པར་འཇོོ་བར་མཛོད། །ཆོས་ཀྱི་དབང་ཕྱུག་འཆི་བདག་བདུད་བཅོམ་པས། །སྐྱེ་འཇིག་མཚན་མའི་སྤྲོས་པ་ལས་འདས་ཀྱང་། །གདུལ་བྱའི་ཡུལ་ལ་སྣང་བ་གཟུགས་ཀྱི་སྐུ། །སྲིད་པ་ཇི་སྲིད་ནམ་ཡང་མི་སྒྲིབ་གསོལ། །འདིས་མཚོན་དུས་གསུམ་བསགས་པའི་དགེ་ཚོགས་རྣམས། །འཁོར་གསུམ་དམིགས་པའི་མཚན་མས་བསླད་མིན་པར། །འོད་གསལ་ཆོས་དབྱིངས་ཆེན་པོར་བསྔོ་བགྱིད་ན། །སྲས་བཅས་རྒྱལ་བའི་དགོངས་མཚོར་རོ་མཉམ་ཤོག །ཅེས་དང་། ཀརྨ་བཀའ་བརྒྱུད་བསྟན་པའི་སྣང་བྱེད་མཆོག །བཀྲ་ཤིས་ཡོན་ཏན་བྱེ་བའི་འོད་ཟེར་ཅན། །ཞི་བའི་སྙིང་པོ་དཔལ་ལྡན་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། ཞེས་ཕུར་ཚུགས་སུ་གསོལ་བ་གདབ། སྤྲོ་ན། ༀ་ཨཱཿགུ་རུ་ཀརྨ་མངྒ་ལ་རསྨི་སརྦ་སིདྡྷི་ཧཱུྃ། ཞེས་བཟླ། མཐར་དབང་ལེན་པ་ནི། འཁོར་རྣམས་འོད་ཞུ་བླ་མའི་སྐུ་ལ་ཐིམ། །བླ་མའི་གནས་གསུམ་འབྲུ་གསུམ་བདུད་རྩིའི་ཟེར། །བདག་ཐིམ་དབང་ཐོབ་སྒྲིབ་སྦྱང་རྡོ་རྗེ་བཞིའི། །རྟེན་འབྲེལ་ལེགས་འགྲིགས་སྐུ་བཞིའི་སྐལ་ལྡན་གྱུར། །མཐར་ནི་བླ་མ་འོད་ཞུ་རང་ལ་ཐིམ། །ཐུགས་ཡིད་གཅིག་འདྲེས་དགོངས་པའི་རྩལ་ཆེན་རྫོགས། །དུས་གསུམ་རྟོག་པས་མ་བསླད་གཉུག་མའི་གཤིས། །འོད་གསལ་ཕྱག་རྒྱ་ཆེན་པོའི་ཀློང་དུ་ཨཱཿ། །ཞེས་ཅི་གནས་སུ་མཉམ་པར་བཞག་ལ་བསྔོ་བ་བྱ། རྗེས་ཅིར་སྣང་བླ་མའི་ལམ་ཁྱེར་དང་མ་འབྲལ་བར་བྱའོ། །ཞེས་པའང་སྒྲུབ་བརྒྱུད་བསྟན་པའི་སྣང་བྱེད་ཚབ་ཚ་ཉ་སྤྲུལ་རིན་པོ་ཆེའི་ཐུགས་བཞེད་བཞིན། མགོན་པོ་གང་གི་ཞབས་ཀྱི་ཆུ་སྐྱེས་སྤྱི་བོས་ལེན་པའི་བཙུན་པ་ཀརྨ་གཞན་ཕན་ཆོས་ཀྱི་བློ་གྲོས་ཀྱིས་བྲིས་ཤིང་གསོལ་བ་བཏབ་པའི་ཡི་གེ་པ་ནི་མཁྱེན་རབ་དང་ལྡན་པར་རུ་སྤྲུལ་སྐུ་འཇམ་དབྱངས་ལགས་ཀྱིས་བགྱིས་པ་སྟེ། འདིས་ཀྱང་རང་རིག་བླ་མའི་ངོ་བོར་རྟོགས་པའི་རྒྱུར་གྱུར་ཅིག ༈ ཚོགས་མཆོད་འབུལ་བར་སྤྲོ་ན། ༀ་ཨཱཿཧཱུྃ། ཟག་མེད་ཏིང་འཛིན་སྒྱུ་མའི་བཀོད་པའི་སྤྲིན། །ཕུལ་བྱུང་འདོད་ཡོན་ཡེ་ཤེས་རོལ་པའི་རྒྱན། །མ་ཚང་མེད་པའི་མཆོད་ཚོགས་རྒྱ་ཆེན་པོ། །ཡེ་ཤེས་སྐུ་ཅན་རྩ་གསུམ་འདུས་པའི་བདག །དཔལ་མགོན་བླ་མ་གདན་གསུམ་འཁོར་ལོར་འབུལ། །སྡོམ་དང་དམ་ཚིག་ཉམས་ཆག་འགལ་འཁྲུལ་བཤགས། །སྒྲིབ་མེད་ཚངས་པའི་དངོས་གྲུབ་སྩལ་ནས་ཀྱང་། །རྡོ་རྗེའི་ཡེ་ཤེས་དེང་འདིར་འབེབས་པར་མཛོད། །ཅེས་བརྗོད་ལ་འབུལ་ལོ། །ཞེས་པའང་དམ་པ་མཆོག་གི་བཞེད་ངོར་སླར་བྲིས་པ་དགེ།
༄༅། །བླ་མའི་རྣལ་འབྱོར་མོས་གུས་སྤྲིན་གྱི་རོལ་མོ་བཞུགས་སོ། །ན་མོ་གུ་ར་བྷྱཿ རང་སེམས་ཆོས་སྐུར་སྟོན་མཛད་པའི། །བླ་མ་མཆོག་ལ་ཕྱག་བྱས་ནས། །མདོ་སྔགས་ལམ་གྱི་ཟབ་གནད་ཕུལ། །བླ་མ་སྒྲུབ་པའི་མན་ངག་བྲི། །ན་མོ། ཕྱོགས་བཅུ་དུས་བཞིའི་སྐྱབས་ཀུན་འདུས་པའི་བདག །རིགས་འདུས་མ་ཧཱ་གུ་རུ ར་སྐྱབས་སུ་མཆི། །འགྲོ་ཀུན་གདོད་མའི་གྲོལ་སར་དབུགས་དབྱུང་ཕྱིར། །ཟབ་ལམ་བླ་མའི་རྣལ་འབྱོར་བསྒོམ་པར་བགྱི། །ཨེ་མ་ཧོ། སྣོད་བཅུད་རྣམ་དག་འོག་མིན་བདེ་ཆེན་ཞིང་། །སྐུ་དང་ཐིག་ལེ་འཇའ་འོད་ཟེར་འཕྲེང་འཕྲོ། །ཡེ་ཤེས་རང་རྩལ་མཆོད་པའི་ལྡིང་ཁང་དབུས། །རང་ཉིད་གཞི་ལུས་རྣལ་འབྱོར་མར་གསལ་བའི། །མདུན་གྱི་ནམ་མཁའ་ཆུ་སྐྱེས་ཉི་ཟླའི་སྟེང་། །རིགས་ཀུན་བདག་པོ་པདྨ་གར་གྱི་དབང་། །རྣམ་རོལ་མ་འགགས་ཨོ་རྒྱན་རྡོ་རྗེ་འཆང་། །དཀར་དམར་མཛེས་འཛུམ་རྡོ་རྗེ་ཐོད་བུམ་འཛིན། །གྲུ་མོར་གསང་བའི་ཡུམ་མཚོན་ཁ་ཊྭཱཾ་འཁྱུད། །པད་ཞྭ་གསང་ཕོད་ཆོས་གོས་བེར་ཕྱམ་གསོལ། །རིན་ཆེན་རྒྱན་ལྡན་རྡོ་རྗེའི་སྐྱིལ་ཀྲུང་བཞུགས། །ཤར་དུ་བཀའ་བབས་བདུན་ལྡན་མདོ་སྔགས་གླིང་། །ལྷོོ་རུ་ཤེས་བྱ་ཀུན་གཟིགས་ཨ་ཛི་ཏ། །ནུབ་ཏུ་རྒྱལ་བའི་སྲས་པོ་མངྒ་ལ ། །བྱང་དུ་བཀའ་དྲིན་མཚུངས་མེད་བདེ་ཆེན་རྒྱལ། །ཤར་ལྷོོར་མཁས་མཆོག་འཇིགས་མེད་ཆོས་ཀྱི་དབང་། །ལྷོོ་ནུབ་མཁན་ཆེན་པདྨ་བཛྲ་རྗེ། །ནུབ་བྱང་ཀརྨ་ཆོས་ཀྱི་ཉིན་མོར་བྱེད། །བྱང་ཤར་འཇམ་དབྱངས་དགའ་བའི་བློ་གྲོས་སོགས། །དབང་བསྐུར་རྒྱུད་བཤད་མན་ངག་ལུང་འབོག་དང་། །ཉམས་ཆག་སྐོང་དང་ཤེས་རྒྱུད་འགྲོ ལ་མཛད་པའི། །རྩ་རྒྱུད་བླ་མ་པཎ་གྲུབ་རིག་འཛིན་ཚོགས། །ཡི་དམ་མཁའ་འགྲོ་ཆོས་སྐྱོང་སྲུང་མར་བཅས། །ངོ་བོ་གཅིག་ལ་རྣམ་པ་ཐ་དད་ཚུལ། །མོས་པའི་ཡིད་མཁར་མངོན་སུམ་ལྷམ་མེར་གསལ། །ༀ། དད་པའི་ལྕགས་ཀྱུས་དབྱིངས་ནས་ཐུགས་དམ་བསྐུལ། །མོས་གུས་ཞགས་པས་རྟེན་དང་དབྱེར་མེད་བསྲེ། །དམ་ཚིག་སྒྲོག་གིས་འདུ་འབྲལ་མེད་པར་བཅིངས། །གདུང་ཤུགས་དྲིལ་བུས་གཉིས་མེད་དགྱེས་པར་མཛོད། །ཧོཿ མཁྱེན་རབ་མཁའ་འདྲ་ཐུགས་རྗེ་ཚད་བཟུང་མེད། །ནུས་མཐུ་རྨད་བྱུང་བཀའ་དྲིན་བསམ་མི་ཁྱབ། །ཡེ་ཤེས་སྐུ་ཅན་བླ་མ་རྩ་གསུམ་ལྷར། །སྒོ་གསུམ་གུས་པས་ཕྱག་འཚལ་སྐྱབས་སུ་མཆི། །ལུས་དང་ལོངས་སྤྱོད་དུས་གསུམ་དགེ་ཚོགས་འབུལ། །རྩ་བ་ཡན་ལག་དམ་ཚིག་ཉམས་ཆག་བཤགས། །སྲིད་ཞིའི་ལེགས་སྤྱད་ཀུན་ལ་རྗེས་ཡི་རང་། །གང་འདུལ་ཐེག་གསུམ་ཆོས་འཁོར་བསྐོར་བར་བསྐུལ། །འགྲོ་གནས་བར་དུ་གཟུགས་སྐུ་རྟག་སྣང་མཛོད། །འདིས་མཚོན་བདག་གཞན་དུས་གསུམ་བསགས་པའི་དགེ། །རིགས་འདུས་བླ་མའི་གོ་འཕང་ཐོབ་ཕྱིར་བསྔོ། །ཀུན་ཀྱང་རྡོ་རྗེ་འཛིན་པའི་ས་ཐོབ་ཤོག །རབ་འབྱམས་ཕྱོགས་དུས་བདེ་གཤེགས་རྩ་གསུམ་ལྷའི། །ཡེ་ཤེས་གཅིག་བསྡུས་དྲན་པས་མཆོག་སྦྱིན་མཁན། །མདོ་རྒྱུད་ཀུན་ནས་སངས་རྒྱས་དངོས་སུ་བསྟན། །བཀའ་དྲིན་ཆེན་པོའི་ཞབས་ལ་གསོལ་བ་འདེབས། །རྣམ་སྣང་ལོ་ཙཱའི་ཡེ་ཤེས་སྒྱུ་མའི་འཕྲུལ། །ཐུབ་པས་ལུང་བསྟན་མཛོད་ལྔའི་ཤིང་རྟ་པ། །བདག་ལ་སངས་རྒྱས་ལས་ཀྱང་བཀའ་དྲིན་ཆེ། །བློ་གྲོས་མཐའ་ཡས་ཞབས་ལ་གསོལ་བ་འདེབས། །དྲི་མེད་བཤེས་གཉེན་སྙིགས་འགྲོ་སྐྱོབ་པའི་མགོན། །ངོ་མཚར་བཀའ་བབས་བདུན་གྱི་གསང་མཛོད་འཛིན། །གངས་ཅན་མཁས་གྲུབ་ཡོངས་ཀྱི་གཙུག་རྒྱན་མཆོག །འཇམ་དབྱངས་མཁྱེན་བརྩེའི་དབང་པོར་གསོལ་བ་འདེབས། །མཁྱེན་པའི་ཆུ་གཏེར་འཇམ་མགོན་ཟླ་བས་བསྐྱེད། །བརྩེ་བའི་པད་དཀར་སྙིང་རྗེའི་ལྷ་ཡིས་བསྐྲུན། །ནུས་མཐུ་ཚད་མེད་རྒྱལ་ཀུན་གསང་མཛོད་འཛིན། །འཇམ་དཔལ་དགྱེས་པའི་རྡོ་རྗེར་གསོལ་བ་འདེབས། །རྨད་བྱུང་བྱང་ཆུབ་སེམས་ཀྱི་ཆུ་གཏེར་ཆེ། །གཞན་ཕན་ཕྱིན་དྲུག་སྤྱོད་པའི་རླབས་ཕྲེང་གཡོ། །དོན་གཉིས་ནོར་བུའི་གཏེར་གྱིས་ཡོངས་ཕྱུག་པའི། །བཀྲ་ཤིས་འོད་ཟེར་ཞབས་ལ་གསོལ་བ་འདེབས། །རྨད་བྱུང་ཐུགས་བསྐྱེད་བརྩོན་པའི་སྤྲིན་ཆེན་ལས། །སྨིན་གྲོལ་བདུད་རྩིའི་ཆར་རྒྱུན་འབུམ་འཇོ་བས། །སྐལ་བཟང་གདུལ་བྱའི་མྱུ་གུ་བསྐྱེད་བསྲིང་པའི། །ཀུན་བཟང་བདེ་ཆེན་རྒྱལ་པོར་གསོལ་བ་འདེབས། །མཁྱེན་བརྩེ་ནུས་པའི་ཡོན་ཏན་བླ་ན་མཐོ། །འཆད་རྩོད་རྩོམ་པའི་འོད་སྣང་ཕྱོགས་བརྒྱར་འགྱེད། །སྙིགས་འགྲོའི་རྒུད་མུན་སེལ་མཛད་པདྨའི་གཉེན། །འཇིགས་མེད་ཆོས་ཀྱི་དབང་པོར་གསོལ་བ་འདེབས། །མཁྱེན་རབ་རྒྱ་ཆེ་དགོངས་པའི་རྩལ་ཆེན་རྫོགས། །བསླབ་གསུམ་རྣམ་དག་བསྡུ་བཞིའི་ཕྲིན་ལས་རྒྱས། །ངེས་གསང་སྙིང་པོའི་བསྟན་པ་རྒྱས་མཛད་པའི། །པདྨ་བཛྲ་ཞབས་ལ་གསོལ་བ་འདེབས། །མཁྱེན་རྟོགས་རྩལ་རྫོགས་གཞན་ཕན་ཕྲིན་ལས་རྒྱས། །ངོ་མཚར་རྣམ་ཐར་ཆེ་ཡོན་རྨད་དུ་བྱུང་། །འབྲེལ་ཚད་དོན་ལྡན་སྒྲུབ་བརྒྱུད་བསྟན་པའི་མགོན། །ཆོས་ཀྱི་ཉིན་བྱེད་ཞབས་ལ་གསོལ་བ་འདེབས། །འཇམ་དབྱངས་བླ་མའི་ཐུགས་རྗེའི་འོད་ཟེར་ལས། །ཡོངས་ཤར་མཁས་ཚུལ་གསུམ་གྱི་ཕྲིན་ལས་ཀྱིས། །རིས་བྲལ་ཐུབ་བསྟན་རྒྱལ་མཚན་སྒྲེང་{སྦྲེང}མཛད་པ། །ཆོས་ཀྱི་བློ་གྲོས་ཞབས་ལ་གསོལ་བ་འདེབས། །མདོ་སྔགས་བསྟན་འཛིན་ཨ་བྷ་ཡ་བཛྲ། །ཚུལ་ཁྲིམས་རྒྱ་མཚོ་གུ་ཎ་ས་མུ་དྲ། །རྡོ་རྗེ་བདེ་གཤེགས་དྷརྨ་ཝརྦྷ་སོགས། །དྲིན་ཐོབ་བླ་མ་རྣམས་ལ་གསོལ་བ་འདེབས། །གཞན་ཡང་སྔ་འགྱུར་བཀའ་གཏེར་བཀའ་གདམས་པ། །ལམ་འབྲས་མར་ཤངས་བཀའ་བརྒྱུད་ཞི་གཅོད་དང་། །སྦྱོར་དྲུག་ཨོ་རྒྱན་བསྙེན་སྒྲུབ་སྒྲུབ་བརྒྱུད་བརྒྱད། །འཛིན་མཛད་དངོས་བརྒྱུད་བླ་མར་གསོལ་བ་འདེབས། །བྱིན་རླབ་སྤྲིན་འཁྲིགས་བརྒྱུད་གསུམ་བླ་མ་དང་། །དངོས་གྲུབ་ཆར་འབེབས་ཡི་དམ་ཞི་ཁྲོའི་ལྷ། །ཕྲིན་ལས་ཐོགས་མེད་མཁའ་འགྲོ་ཆོས་སྐྱོང་སྟེ། །རྩ་གསུམ་དཀྱིལ་འཁོར་འཁོར་ལོར་གསོལ་བ་འདེབས། །དེ་ལྟར་མི་ཕྱེད་གུས་པས་གསོལ་བཏབ་མཐུས། །ཚེ་རབས་ཕྲེང་བར་འབྲལ་མེད་རྗེས་བཟུང་ཞིང་། །དགོངས་རྒྱུད་བྱིན་རླབས་འཕོ་བའི་དབང་བསྐུར་མཆོག །བདག་ལ་ད་ལྟ་ཉིད་དུ་སྩལ་ཏུ་གསོལ། །སྲིད་ལས་ངེས་འབྱུང་ཐར་པ་དོན་གཉེར་བློས། །སོར་བྱང་སྔགས་ཀྱི་དམ་སྡོམ་རྣམ་པར་དག །བྱང་ཆུབ་སེམས་འབྱོངས་རིམ་གཉིས་ལམ་མཐར་ཕྱིན། །རང་གཞན་དོན་གཉིས་འགྲུབ་པར་བྱིན་གྱིས་རློབས། །མང་དུ་ཐོས་པས་གྲུབ་མཐའི་ཕྱོགས་འཛིན་ཞིག །རྩེ་གཅིག་བསམ་པས་ཐེ་ཚོམ་སྒྲོག་ལས་གྲོལ། །ཟབ་དོན་སྒོམ་པས་ཡེ་ཤེས་ཁོང་ནས་སད། །བསྟན་པ་འགལ་མེད་རྟོགས་པར་བྱིན་གྱིས་རློབས། །རླབས་ཆེན་མཁས་བཙུན་བཟང་པོའི་ཡོན་གྱིས་འབྱོར། །འཆད་རྩོད་རྩོམ་པས་བསྟན་དང་འགྲོ་ལ་ཕན། །སྤང་ཀློག་ལས་ཀྱི་བྱ་བ་གེགས་མེད་འགྲུབ། །འབྲེལ་ཚད་དོན་དང་ལྡན་པར་བྱིན་གྱིས་རློབས། །སྣང་སྲིད་རྣམ་དག་དཀྱིལ་འཁོར་གསུམ་དུ་རྫོགས། །འགྲོ་འོང་སྲོག་རྩོལ་དབུ་མའི་དབྱིངས་སུ་ཐིམ། །ཀ་དག་ལྷུན་གྲུབ་དགོངས་པའི་བཙན་ས་ཟིན། །གདོད་མའི་གསང་མཆོག་འགྲུབ་པར་བྱིན་གྱིས་རློབས། །གསོལ་བ་འདེབས་སོ་བཀའ་བརྒྱུད་བླ་མའི་ཚོགས། །བྱིན་གྱིས་རློབས་ཤིག་རིག་འཛིན་རྩལ་འཆང་རྣམས། །རྟོགས་པ་སྤོར་ཅིག་དྲིན་ཆེན་ཆོས་ཀྱི་རྗེ། །ཐུགས་ཡིད་གཅིག་ཏུ་འདྲེས་པར་བྱིན་གྱིས་རློབས། །ཞེས་མོས་ལ། ༀ་ཨཱཿབཛྲ་མ་ཧཱ་གུ་རུ་སརྦ་སིདྡྷི་ཧཱུྃ། ཞེས་བཟླ། མཐར། འཁོར་རྣམས་འོད་ཞུ་གཙོ་བོའི་སྐུ་ལ་ཐིམ། །དེ་ཡི་གནས་བཞིའི་རྡོ་རྗེའི་ཡིག་འབྲུ་ལས། །འོད་འཕྲོས་བདག་ཐིམ་སྒྲིབ་སྦྱངས་དབང་བཞི་ཐོབ། །ལམ་བཞིའི་སྣོད་རུང་སྐུ་བཞིའི་རྟེན་འབྲེལ་སྒྲིག །མཐར་ནི་དགྱེས་པས་འོད་ཞུ་རང་ལ་ཐིམ། །ཐུགས་ཡིད་གཅིག་འདྲེས་དགོངས་པའི་རྩལ་ཆེན་རྫོགས། །ཤེས་ཉམས་ཡིད་དཔྱོད་འཛིན་པས་བསླད་མིན་པའི། །རང་གྲོལ་རྫོགས་པ་ཆེན་པོའི་ཀློང་དུ་ཨཱཿ། །ཞེས་མཉམ་པར་བཞག་ལ། དེ་ལས་ལྡང་བ་ན། དགེ་བ་འདི་ཡིས་བདག་གཞན་སྐྱེ་ཀུན་ཏུ། །འཁོར་ལོའི་མགོན་གྱིས་འབྲལ་མེད་རྗེས་བཟུང་སྟེ། །དད་དང་དམ་ཚིག་མོས་གུས་རྣམ་དག་པས། །རིགས་བདག་བླ་མའི་གོ་འཕང་མྱུར་ཐོབ་ཤོག །ཅེས་སོགས་བསྔོ་སྨོན་ཇི་ལྟར་རིགས་པས་མཐའ་བརྒྱན་ཅིང་ཅིར་སྣང་བླ་མའི་རོལ་བར་ཤར་བའི་མོས་གུས་གྱི་རྩལ་སྦྱང་བར་བྱའོ། །ཞེས་པ་འདི་ཡང་སྐྱེ་ཀུན་བླ་མའི་བྲན་དུ་སྨོན་པ་ཀུ་སཱ་ལི་འགྱུར་མེད་པདྨ་རྣམ་རྒྱལ་གྱིས་རང་ཉིད་ཀྱི་དད་པའི་གསོས་སུ་བྲིས་པ་དགེ།
༄༅། །ན་མོ་གུ་རུ། ལམ་ཟབ་མོའི་རྣལ་འབྱོར་ལ་བརྩོན་པར་འདོད་པས། སྐྱབས་སེམས་སྔོན་དུ་འགྲོ་བས། ཨཱཿ བདག་ལུས་ཡི་དམ་ལྷར་གསལ་སྤྱི་བོ་རུ། །རབ་མཛེས་ད་དཀར་ཟླ་བ་རྒྱས་པའི་སྟེང་། །རྒྱལ་ཀུན་ཡེ་ཤེས་གཅིག་བསྡུས་འཁོར་ལོའི་མགོན། །མཛོད་ལྔའི་སྒོ་འབྱེད་ཀུན་མཁྱེན་གར་གྱི་དབང་། །བློ་གྲོས་མཐའ་ཡས་བགྲེས་ཚུལ་པཎ་གྲུབ་ཆས། །ཕྱག་གཉིས་ཐབས་ཤེས་རྡོར་དྲིལ་ཐུགས་ཀར་བསྣོལ། །གཡས་སུ་པད་ཟླར་འདྲེན་མཆོག་དྷརྨའི་མཚན། །སྒོམ་ཞྭ་ཆོས་གོས་ཆོས་འཆད་པད་དཀར་འཛིན། །གཡོན་དུ་རྡོ་རྗེ་དབང་མཆོག་རབ་བྱུང་ཆས། །གོང་ཞུ་རྩེ་ཟླུམ་མཉམ་བཞག་ཕྱག་རྒྱ་འཆིང་། །མཐའ་བསྐོར་བརྒྱུད་པ་དྲུག་ལྡན་བླ་མའི་ཚོགས། །ཡི་དམ་ཞི་ཁྲོ་དཔའ་བོ་མཁའ་འགྲོ་དང་། །ཆོས་སྲུང་གཏེར་བདག་ནོར་ལྷའི་སྤྲིན་ཕུང་འཁྲིགས། །ཀུན་ཀྱང་ཡེ་ཤེས་གཅིག་གི་རང་རྩལ་དུ། །དྲན་པས་མཆོག་སྟེར་གཟི་བྱིན་ལམ་མེར་གསལ། །སྐྱབས་ཀུན་འདུས་ཞལ་བླ་མ་ཡབ་སྲས་ལ། །སྒོ་གསུམ་གུས་པས་ཕྱག་འཚལ་མཆོད་པ་འབུལ། །སྡིག་ཚོགས་ཀུན་བཤགས་དགེ་ལ་རྗེས་ཡི་རང་། །མྱ་ངན་མི་འདས་ཆོས་འཁོར་རྟག་བསྐོར་གསོལ། །དགེ་ཚོགས་འགྲོ་ཀུན་རྣམ་གྲོལ་འཐོབ་ཕྱིར་བསྔོ། །དུས་གསུམ་རྒྱལ་བ་ཀུན་གྱི་ཡེ་ཤེས་སྐུ། །མཐའ་ཀླས་གདུལ་བྱ་སྐྱོབ་པའི་མགོན་གཅིག་པུ། །ཚད་མེད་ཐུགས་རྗེའི་གཏེར་ཆེན་བླ་མ་རྗེར། །གསོལ་བ་འདེབས་སོ་དབང་བཞིའི་ཡེ་ཤེས་སྩོལ། །འཁོར་རྣམས་གཙོ་བོ་གསུམ་གྱི་སྐུ་ལ་ཐིམ། །ཀུན་ཀྱང་དགྱེས་པའི་ཉམས་འགྱུར་དང་བཅས་ཏེ། །འོད་ཞུ་བདུད་རྩི་དཀར་དམར་མཐིང་གའི་རྒྱུན། །སྤྱི་བོ་ནས་ཞུགས་ལུས་ཀུན་ལྟེ མ་གྱིས་གང་། །སྒྲིབ་དག་དབང་ཐོབ་སྐུ་བཞིའི་རྟེན་འབྲེལ་སྒྲིགས། །ཐུགས་ཡིད་གཅིག་འདྲེས་དགོངས་པའི་རྩལ་ཆེན་རྫོགས། །དུས་གསུམ་རྟོག་པས་མ་བསླད་གཉུག་མའི་གཤིས། །བློ་བྲལ་རྫོགས་པ་ཆེན་པོའི་ཀློང་དུ་ཨཱཿ། །དགེ་བ་འདི་ཡིས་ཚེ་རབས་ཕྲེང་བ་རུ། །དམ་པའི་མགོན་གྱིས་འབྲལ་མེད་རྗེས་བཟུང་མཐུས། །རང་གཞན་དོན་གཉིས་དཀའ་བ་མེད་པར་འགྲུབ། །འཁོར་བ་དོང་སྤྲུག་འབྲེལ་ཚད་དོན་ལྡན་ཤོག །ཅེས་བརྗོད་ལ་ཅིར་སྣང་བླ་མའི་ལམ་ཁྱེར་དང་མ་བྲལ་བར་བྱའོ། །ཞེས་པའང་མོས་ལྡན་རིག་བཟང་ལགས་ཀྱིས་ལོ་གསུམ་གྱི་བཅད་རྒྱའི་ཁས་ལེན་དང་བཅས་ནན་གྱིས་བསྐུར་ངོར། རིག་འཛིན་གྱི་བཙུན་པ་པདྨ་བདེ་བ་རྩལ་གྱིས་གང་ཤར་སྨྲས་པ་བླ་མའི་བྱིན་རླབས་སེམས་ལ་འཇུག་པའི་རྒྱུར་གྱུར་ཅིག
༄༅། །བླ་མའི་རྣལ་འབྱོར་བྱིན་རླབས་མྱུར་འཇུག་བཞུགས་སོ། །ན་མོ་གུ་རུ་བཛྲ་ས་ཏྭ་ཡ། རྟེན་གྱི་གང་ཟག་དབང་ཐོབ་ཅིང་དམ་ཚིག་ལ་གནས་ཏེ་ལམ་ཟབ་མོ་བླ་མའི་རྣལ་འབྱོར་ཉམས་སུ་ལེན་པར་འདོད་པས། ཐོག་མར་སྐྱབས་སེམས་ནི། ན་མོ་སྐྱབས་གནས་ཀུན་འདུས་དཔལ་ལྡན་བླ་མ་ལ། །མི་ཕྱེད་སྙིང་ནས་གུས་པས་སྐྱབས་མཆི་ཞིང་། །འགྲོ་ཀུན་སྲིད་པའི་མཚོ་ལས་བསྒྲལ་བྱའི་ཕྱིར། །ལམ་ཟབ་བླ་མའི་རྣལ་འབྱོར་བསྒོམ་པར་བགྱི། །དངོས་གཞི་རྟེན་བསྐྱེད་པ་ནི། ༀ་སྭ་བྷཱ་ཝས་སྦྱངས། མི་དམིགས་སྤྲོས་བྲལ་འོད་གསལ་སྟོང་པའི་དབྱིངས། །གནས་ཡུལ་རྣམ་དག་འོག་མིན་སྟུག་པོ་བཀོད། །ཕུན་ཚོགས་མཆོད་པའི་སྤྲིན་ཕུང་མཛེས་པའི་དབུས། །དགོངས་བརྡ་སྙན་བརྒྱུད་བླ་མའི་ཚོགས་རྣམས་ཀྱི། །ཡེ་ཤེས་གཅིག་ཏུ་བསྡོམས་པའི་སྤྱི་དཔལ་མཆོག །རྩ་བའི་བླ་མ་བཅོམ་ལྡན་རྡོ་རྗེ་སེམས། །དཀར་གསལ་ཕྱག་གཉིས་རྡོ་རྗེ་དྲིལ་བུ་འཛིན། །མཚན་དཔེའི་གཟི་འབར་ལོངས་སྐུའི་རྒྱན་གྱིས་སྤྲས། །པད་ཟླའི་སྟེང་ན་སྐྱིལ་མོ་དཀྲུང་གིས་བཞུགས། །དྲན་པས་སྲིད་ཞིའི་འཇིགས་འཕྲོག་ཆེན་པོར་གསལ། །ཞེས་མོས་ལ། ཡན་ལག་བདུན་པ་འབུལ་བ་ནི། སྐྱབས་ཀུན་འདུས་ཞལ་དཔལ་ལྡན་བླ་ལ། །མི་ཕྱེད་སྙིང་ནས་གུས་པས་ཕྱག་འཚལ་ཞིང་། །ལུས་དང་ལོངས་སྤྱོད་ཀུན་བཟང་མཆོད་སྤྲིན་འབུལ། །ཚེ་རབས་བསགས་པའི་སྡིག་ལྟུང་འགྱོད་བཤགས་བསྡམས། །འཁོར་འདས་དགེ་བའི་རྩ་ལ་རྗེ་ཡི་རང་། །ཟབ་རྒྱས་ཆོས་འཁོར་རྟག་པར་བསྐོར་བར་བསྐུལ། །གཟུག་སྐུ་མྱ་ངན་མི་འདའ་བཞུགས་གསོལ་འདེབས། །འདིས་མཚོན་དགེ་ཚོགས་རྣམ་མཁྱེན་རྒྱུ་རུ་བསྔོ། །འགྲོ་ཀུན་བླ་མེད་རྫོགས་བྱང་མྱུར་ཐོབ་ཤོག །ཅེས་ཅི་ནུས་དང་། སྤྲོ་ན་རང་རང་གང་མོས་ཀྱི་གསོལ་འདེབས་བྱེ་བྲག་དང་། སྤྱི་ཙམ་དུ། རབ་འབྱམས་རྒྱལ་བ་ཀུན་གྱི་ཡེ་ཤེས་འཕྲུལ། །བགྲང་{བསྒྲངས}ཡས་སྐྱེ་དགུ་འདྲེན་པའི་དེད་དཔོན་མཆོག །བཀའ་དྲིན་ཟླ་བྲལ་རྩ་བའི་བླ་མ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་དད་མོས་རྩེ་གཅིག་པས་གྲངས་མང་གསོལ་བ་གདབ། མཐར་དབང་བླང་བ་ནི། བླ་མའི་གནས་གསུམ་འབྲུ་གསུམ་བདུད་རྩིའི་ཟེར། །སྒོ་གསུམ་ལ་ཐིམ་སྒྲིབ་ངག་དབང་བཞི་ཐོབ། །ལམ་བཞིའི་སྣོད་རུང་སྐུ་བཞིའི་རྟེན་འབྲེལ་སྒྲིགས། །མཐར་ནི་བླ་མ་འོད་ཞུ་རང་ལ་ཐིམ། །དུས་གསུམ་རྟོག་པས་མ་བསླད་གཉུག་མའི་གཤིས། །བློ་འདས་འོད་གསལ་ཆོས་སྐུའི་རང་ཞལ་བལྟ། །དགེ་འདིས་འགྲོ་ཀུན་བླ་མས་རྗེས་བཟུང་མཐུས། །དད་དང་མོས་གུས་དམ་ཚིག་{མཆོག་ལྷག}རྣམ་དག་པས། །ཡང་དག་ལམ་གྱི་རྟེན་འབྲེལ་ལེགས་འགྲིགས་ཏེ། །རིགས་བདག་བླ་མའི་གོ་འཕང་མྱུར་ཐོབ་ཤོག །ཅེས་སོགས་བསྔོ་སྨོན་ཅི་རིགས་ཀྱིས་མཐའ་བརྒྱན་ཏེ་ཅིར་སྣང་བླ་མའི་ལམ་ཁྱེར་དང་མ་བྲལ་བར་བྱའོ། །འདི་ཡང་བསླབ་གསུམ་ཡོན་ཏན་བཟང་པོའི་དཔལ་གྱིས་མངོན་པར་མཐོ་བའི་འཇུ་བླ་མ་ཨ་ཡུ་དང་མ་ཏིའི་མཚན་ཅན་ཟུང་གི་བཞེད་ངོར་སྙིགས་དུས་ཀྱི་བཙུན་གཟུགས་དུག་ལྔ་མེ་ལྟར་དུ་འབར་བའི་དཀོར་ཟན་བི་ཛས་བྲིས་པ་དགེ་ལེགས་སུ་གྱུར་ཅིག ༈ བླ་མའི་རྣལ་འབྱོར་མདོར་བསྡུས་ནི། ཨེ་མ་ཧོ། རང་སྣང་རྣམ་དག་བདེ་བ་ཅན་གྱི་ཞིང་། །རིན་ཆེན་སྣ་ལྔ་ལས་གྲུབ་གཞལ་མེད་ཁང་། །ཕུན་ཚོགས་མཆོད་སྤྲིན་རྒྱལ་མཚོ་འཁྲིགས་པའི་དབུས། །རང་ཉིད་གཞི་ལུས་འཕགས་པ་སྤྱན་རས་གཟིགས། །གངས་རིའི་མདངས་ཅན་མཚན་དཔེའི་ལང་ཚོ་རྒྱས། །ཞལ་གཅིག་ཕྱག་གཉིས་མཆོག་སྦྱིན་པད་དཀར་འཛིན། །ཐོར་ཚུགས་དར་དང་རིན་ཆེན་རྒྱན་གྱིས་སྤྲས། །པད་ཟླའི་སྟེང་ན་བཞེངས་པའི་སྟབས་ཀྱིས་རོལ། །སྤྱི་བོར་རྨ་བྱ་བརྒྱད་ཀྱིས་བཏེགས་པའི་ཁྲིར། །རབ་མཛེས་པདྨ་ཟླ་བའི་གདན་གྱི་སྟེང་། །རྩ་བའི་བླ་མ་མགོན་པོ་འོད་དཔག་མེད། །དམར་གསལ་མཉམ་བཞག་བདུད་རྩིའི་ལྷུང་བཟེད་འཛིན། །མཚན་དཔེའི་གཟི་འབར་མཆོག་གི་སྤྲུལ་སྐུའི་ཆས། །སྲིད་ཞི་མཉམ་ཉིད་རྡོ་རྗེའི་སྐྱིལ་ཀྲུང་བཞུགས། །དེ་ཡི་གཡས་སུ་འཕགས་མཆོག་སྤྱན་རས་གཟིགས། །གཡོན་དུ་སེམས་དཔའ་མཐུ་ཆེན་ཐོབ་ལ་སོགས། །སངས་རྒྱས་བྱང་སེམས་དཔག་མེད་འཁོར་གྱིས་བསྐོར། །གཙོ་བོའི་གནས་གསུམ་འབྲུ་གསུམ་འོད་ཟེར་གྱིས། །དབྱིངས་ནས་ཡེ་ཤེས་སྤྱན་དྲངས་གཉིས་མེད་གྱུར། །སངས་རྒྱས་སྲས་ཀྱིས་བསྐོར་བའི་མགོན་རྣམས་ལ། །སྒོ་གསུམ་གུས་པས་ཕྱག་འཚལ་སྐྱབས་སུ་མཆི། །ཕྱི་ནང་གསང་མཆོད་དངོས་འབྱོར་ཡིད་སྤྲུལ་འབུལ། །བཅས་དང་རང་བཞིན་ཉམས་པའི་སྡིག་ཀུན་བཤགས། །འཁོར་འདས་དགེ་རྩ་ཡོངས་ལ་རྗེས་ཡི་རངས། །ཆོས་འཁོར་སྐོར་བཞིན་རྟག་པར་བཞུགས་གསོལ་འདེབས། །དགེ་ཚོགས་འགྲོ་ཀུན་རྣམ་མཁྱེན་ཐོབ་ཕྱིར་བསྔོ། །སྐྱབས་ཀུན་འདུས་ཞལ་དཔལ་ལྡན་བླ་མ་དང་། །དབྱེར་མེད་འོད་དཔག་མེད་མགོན་སྲས་བཅས་ལ། །མི་ཕྱེད་སྙིང་ནས་གུས་པས་གསོལ་བ་འདེབས། །བདེ་བ་ཅན་དུ་སྐྱེ་བར་བྱིན་གྱིས་རློབས། །འཁོར་རྣམས་འོད་ཞུ་གཙོ་བོའི་སྐུ་ལ་ཐིམ། །གཙོ་བོ་འོད་ཞུ་རང་ཐིམ་རང་ཉིད་ཀྱང་། །འོད་དུ་ཡལ་ནས་མི་དམིགས་ངང་དུ་བཞག །དེ་ལས་རྗེས་ཐོབ་སྒྱུ་མའི་སྐུར་ལངས་ནས། །སྣང་སྲིད་ལྷ་དང་གཞལ་ཡས་ཁང་དུ་བལྟ། །དགེ་བ་འདི་ཡིས་བདག་དང་མཐའ་ཡས་འགྲོ། །ཞིང་མཆོག་བདེ་བ་ཅན་དུ་མྱུར་སྐྱེས་ནས། །སངས་རྒྱས་འོད་དཔག་མེད་མགོན་མཉེས་བྱས་ནས། །དབང་བསྐུར་ལུང་ནོད་མངོན་པར་སངས་རྒྱས་ཤོག །བདེ་བར་གཤེགས་པ་ཚེ་དང་ཡེ་ཤེས་དང་། །འོད་དང་གཟི་བརྗིད་དཔག་མེད་རྒྱལ་པོོ་ཡིས། །ཐུགས་བསྐྱེད་སྨོན་ལམ་ཞིང་སྐུ་སྐུ་ཚེའི་ཚད། །རྣམ་ཐར་དཔག་ཡས་བདག་གིས་འཛིན་གྱུར་ཅིག །ཅེས་འདི་གྲོགས་ཀྱིས་བསྐུལ་བའི་ངོར་། །དབུར་སྟོད་རྒྱ་མ་ཁྲི་ཁང་དུ། །བན་ཆུང་པདྨ་བི་ཛས་བྲིས། །དགེ་བས་འགྲོ་ཀུན་སངས་རྒྱས་ཤོག །༈ ཨེ་མ་ཧོ། རང་སྣང་རྣམ་དག་བདེ་བ་ཅན་གྱི་ཞིང་། །བཀོད་པ་ལྷུན་གྲུབ་ངོ་མཚར་གཞལ་མེད་ཁང་། །ཕུལ་བྱུང་མཆོད་པའི་སྤྲིན་ཕུང་གཏིབས་པའི་དབུས། །རྔ་སྒྲའི་རྒྱལ་པོ་འདྲེན་པ་འོད་དཔག་མེད། །རྒྱལ་སྲས་ཐུ་བོ་གཉིས་སོགས་སེམས་དཔའི་འཁོར། །གྲངས་མེད་སྤྲུལ་དང་ཡང་སྤྲུལ་བསམ་མི་ཁྱབ། །ངོ་མཚར་རྟེན་དང་བརྟེན་པའི་བཀོད་པའི་སྤྲིན། །དད་པའི་ཡིད་མཁར་ཡང་ཡང་གསལ་བཏབ་ནས། །རྡུལ་སྙེད་ལུས་སྤྲུལ་སྒོ་གསུམ་གུས་ཕྱག་འཚལ། །ལུས་དང་ལོངས་སྤྱོད་དུས་གསུམ་དགེ་རྩ་བཅས། །ཀུན་བཟང་མཆོད་པའི་སྤྲིན་དུ་སྤྲོས་ཏེ་འབུལ། །བཅས་དང་རང་བཞིན་ཉམས་པའི་སྡིག་ལྟུང་ཀུན། །སྙིང་ནས་འགྱོད་པས་བཤགས་ཤིང་སྡོམ་པར་བགྱི། །འཕགས་དང་སོ་སོའི་སྐྱེ་བོ་ཇི་སྙེད་ཀྱི། །རྣམ་དཀར་དགེ་ཚོགས་ཀུན་ལ་རྗེས་ཡི་རང་། །གདུལ་བྱ་རྒྱ་མཚོ་ཡོངས་སུ་སྨིན་བྱའི་ཕྱིར། །ཐེག་གསུམ་ཆོས་ཀྱི་འཁོར་ལོ་བསྐོར་བར་བསྐུར། །སེམས་ཅན་རྒྱ་མཚོ་མ་སྒྲོལ་དེ་སྲིད་དུ། །གཟུགས་སྐུའི་བཀོད་པ་གཡོ་མེད་རྟག་བཞུགས་གསོལ། །འཁོར་གསུམ་དམིགས་པའི་དུག་གིས་ཡོངས་བཏང་བའི། །ཟག་མེད་དགེ་ཚོགས་ཆོས་དབྱིངས་ཆེན་པོར་བསྔོ། །འགྲོ་ཀུན་སྲིད་པའི་མཚོ་ལས་བསྒྲལ་བྱའི་ཕྱིར། །བསླུ་མེད་སྐྱབས་གནས་ཡོངས་ལ་སྐྱབས་མཆི་ཞིང་། །རིན་ཆེན་བྱང་ཆུབ་སེམས་མཆོག་བསྐྱེད་བགྱིས་ནས། །སྨོན་འཇུག་བསླབ་བྱའི་ཚོགས་ལ་སློབ་པར་བགྱི། །འདིས་མཚོན་དགེ་བས་བདག་གཞན་མཁའ་མཉམ་འགྲོ། །ཚེ་འདིར་མི་མཐུན་ཉེས་བརྒྱའི་གནོད་པ་ཞི། །ཆོས་མཐུན་བསམ་སྦྱོར་འབད་མེད་ཡོངས་འགྲུབ་ངོས། །ཚུལ་ཁྲིམས་ཏིང་འཛིན་ཤེས་རབ་རིན་པོ་ཆེ། །རྒྱལ་བ་དགྱེས་པའི་ལམ་ལ་སློབ་པར་ཤོག །ཁྱད་པར་འདིར་སྣང་ནུབ་པར་གྱུར་པའི་ཚེ། །གནད་གཅོད་དྲག་པོའི་སྡུག་བསྔལ་མི་འབྱུང་ཞིང་། །དག་པའི་སྣང་བ་ཆེན་པོའི་མདུན་བསུས་ནས། །བདེ་ལྡན་པདྨའི་སྙི་པོར་རྫུས་སྐྱེས་ཤོག །ལག་མཐིལ་ལས་སྤྲུལ་ཀུན་བཟང་མཆོད་སྤྲིན་གྱིས། །སྟོབས་བཅུའི་དབང་ཕྱུག་འཁོར་བཅས་མཉེས་བྱས་ཚེ། །བྱང་ཆུབ་ལུང་བསྟན་དམ་པ་མཆོག་ཐོབ་ནས། །རྫོགས་སྨིན་སྦྱངས་གསུམ་མཐར་ཕྱིན་སངས་རྒྱས་ཤོག །བདེ་བར་གཤེགས་པ་ཚེ་དང་ཡེ་ཤེས་དང་། །འོད་དང་གཟི་བརྗིད་དཔག་མེད་རྒྱལ་པོ་ཡི། །སྐུ་གསུང་ཐུགས་ཡོན་ཕྲིན་ལས་རྨད་པོ་ཆེའོ། །རྣམ་ཐར་དཔག་ཡས་བདག་གིས་འཛིན་གྱུར་ཅིག །ཅེས་པའང་རྣམ་པར་དཀར་བའི་ཐུགས་འདུན་ཅན་ལྕམ་ཚེ་བརྟན་སྒྲོལ་དཀར་གྱི་ཞལ་འདོན་རྒྱུར། མདོ་ཁམས་ཞེ་ཆེན་རྒྱལ་ཚབ་སྤྲུལ་མིང་པ་འགྱུར་མེད་པདྨ་རྣམ་རྒྱལ་དཔལ་བཟང་པོས་བོད་ཡུལ་དབུས་ཀྱི་རྡོ་རྗེ་གདན་དཔལ་འཕྲུལ་སྣང་གི་གཙུག་ལག་ཁང་ཆེན་པོའི་ཉེ་གམ་ཕྱག་ནང་ལྡིང་མཁར་ཤག་ཏུ་གང་དྲན་འཕྲལ་མར་བྲིས་པ་སྟེ། འདིས་ཀྱང་འགྲོ་ཀུན་བདེ་བ་ཅན་དུ་སྐྱེ་བའི་རྒྱུར་གྱུར་ཅིག
༄༅། །འཕགས་པ་སྤྱན་རས་གཟིགས་ལ་བརྟེན་པའི་བླ་མའི་རྣལ་འབྱོར་ནི། དཀོན་མཆོག་གསུམ་ལ་སྐྱབས་མཆི་ཞིང་། །འགྲོ་དོན་བླ་མའི་རྣལ་འབྱོར་བསྒོམ། །མདུན་གྱི་ནམ་མཁར་པད་ཟླའི་སྟེང་། །ངོ་བོ་རྩ་བའི་བླ་མ་ཉིད། །རྣམ་པ་འཕགས་པ་སྤྱན་རས་གཟིགས། །དཀར་གསལ་ཞལ་གཅིག་ཕྱག་བཞི་པ། །ཐལ་སྦྱར་བསྒྲང་ཕྲེང་པད་དཀར་འཛིན། །དར་དང་རིན་ཆེན་རྒྱན་གྱིས་མཛེས། །ཞབས་གཉིས་རྡོ་རྗེའི་སྐྱིལ་ཀྲུང་བཞུགས། །གནས་གསུམ་ༀ་ཨཱཿཧཱུྃ་གིས་མཚན། །འོད་འཕྲོས་ཡེ་ཤེས་སྤྱན་དྲངས་བསྟིམ། །སྐྱབས་ཀུན་འདུས་པའི་ངོ་བོར་གྱུར། །བླ་མ་སྤྱན་རས་གཟིགས་དབང་ལ། །སྒོ་གསུམ་གུས་པས་ཕྱག་འཚལ་ཞིང་། །ལུས་དང་ལོངས་སྤྱོད་མཆོད་སྤྲིན་འབུལ། །ཚེ་རབས་ནས་བསགས་སྡིག་ལྟུང་བཤགས། །འཁོར་འདས་དགེ་ལ་རྗེས་ཡི་རང་། །ཐེག་མཆོག་ཆོས་འཁོར་བསྐོར་བ་དང་། །འགྲོ་གནས་བར་དུ་བཞུགས་གསོལ་འདེབས། །དགེ་ཚོགས་འགྲོ་བའི་རྒྱུད་ལ་བསྔོ། །བླ་མེད་བྱང་ཆུབ་མྱུར་ཐོབ་ཤོག །སྐྱབས་ཀུན་འདུས་ཞལ་དྲིན་ཆེན་རྗེ། །བླ་མ་སྤྱན་རས་གཟིགས་དབང་ལ། །སྙིང་ནས་གུས་པས་གསོལ་བ་འདེབས། །དབང་བསྐུར་བྱིན་རློབས་དངོས་གྲུབ་སྩོལ། །བླ་མའི་གནས་གསུམ་འབྲུ་གསུམ་ལས། །འོད་འཕྲོས་བདག་དང་འགྲོ་ཀུན་གྱི། །སྒྲིབ་གསུམ་བག་ཆགས་ལྷག་མེད་སྦྱངས། །རིགས་དྲུག་སྐྱེ་བའི་རྒྱུན་ཐག་བཅད། །དབང་དང་བྱིན་རླབས་དུས་གཅིག་ཐོབ། །རྡོ་རྗེའི་ཡེ་ཤེས་མངོན་བྱས་བསམ། །ཡིག་དྲུག་ཆུ་བོའི་རྒྱུན་བཞིན་བསྒྲངས། །དད་དང་མོས་གུས་གསལ་ངར་གདགས། །སྟོང་ཉིད་སྙིང་རྗེའི་རང་མདངས་སྐྱོངས། །ཐུན་མཐར་བླ་མ་རང་ལ་བསྡུ། །བློ་འདས་ཆོས་སྐུའི་རང་ཞལ་བལྟ། །རྗེས་ཐོབ་དགེ་བ་འགྲོ་ལ་བསྔོ། །ངེས་འབྱུང་མོས་གུས་སྙིང་རྗེ་དང་། །སྟོང་ཉིད་ལམ་ཁྱེར་རྩི་ཡིས་གདབ། །ལས་འབྲས་བླང་དོར་ལྷོོད་མེད་བྱ། །འདི་ནི་ཆོས་ཀྱི་སྙིང་པོ་ཡིན། །དད་ལྡན་ཀུན་དགའི་བཞེད་སྐོང་དུ། །བི་ཛས་གང་དྲན་འཕྲལ་མར་བྲིས། །དགེ་བས་འགྲོ་ཀུན་ཡོངས་གྲོལ་ཤོག །
༄༅། །མགོན་པོ་འོད་དཔག་མེད་ལ་བརྟེན་པའི་བླ་མའི་རྣལ་འབྱོར་ནི། བླ་མ་དཀོན་མཆོག་གསུམ་ལ་སྐྱབས་མཆི་ཞིང་། །འགྲོ་ཀུན་སྒྲོལ་ཕྱིར་ཟབ་མོའི་རྣལ་འབྱོར་བསྒོམ། །མི་དམིགས་སྤྲོས་བྲལ་སྟོང་པའི་ངང་ཉིད་ལས། །གནས་ཡུལ་རྣམ་དག་བདེ་བ་ཅན་གྱི་ཞིང་། །ངོ་མཚར་མཆོད་པའི་སྤྲིན་ཕུང་གཏིབས་པའི་དབུས། །རང་ཉིད་གཞི་ལུས་འཕགས་མཆོག་སྤྱན་རས་གཟིགས། །དཀར་གསལ་ཕྱག་བཞི་ཐལ་སྦྱར་པད་ཕྲེང་འཛིན། །སྤྱི་བོར་རྨ་བྱ་བརྒྱད་བསྣོལ་རིན་ཆེན་ཁྲི། །མ་ཆགས་པདྨ་ཟླ་བའི་གདན་གྱི་སྟེང་། །སྐྱབས་ཀུན་འདུས་ཞལ་དྲིན་ཆེན་བླ་མ་དང་། །དབྱེར་མེད་བཅོམ་ལྡན་མགོན་པོ་འོད་དཔག་མེད། །སྐུ་མདོག་དམར་གསལ་མཚན་དཔེའི་ལང་ཚོ་རྒྱས། །ཕྱག་གཉིས་མཉམ་བཞག་བདུད་རྩིའི་ལྷུང་བཟེད་འཛིན། །ཆོས་གོས་གསུམ་གསོལ་རྡོ་རྗེའི་སྐྱིལ་ཀྲུང་བཞུགས། །མཐའ་བསྐོར་རྒྱལ་སྲས་ཐུ་བོ་རྣམ་གཉིས་སོགས། །དཀོན་མཆོག་རྩ་གསུམ་རྒྱ་མཚོ་སྤྲིན་ལྟར་གསལ། །ཐུགས་སྲོག་འོད་ཀྱིས་ཡེ་ཤེས་སྤྱན་དྲངས་བསྟིམས། །བདག་དང་མཐའ་ཡས་སེམས་ཅན་ཐམས་ཅད་ཀྱི། །སྒོ་གསུམ་འཇུག་པ་གཅིག་པས་ཕྱག་འཚལ་ཞིང་། །མཆོད་ཚོགས་ཀུན་འབུལ་སྡིག་ལྟུང་འགྱོད་བཤགས་སྡོམ། །དགེ་ལ་ཡི་རངས་ཆོས་འཁོར་བསྐོར་བར་བསྐུལ། །བསྐལ་བརྒྱར་བཞུགས་གསོལ་དགེ་ཚོགས་འགྲོ་ལ་བསྔོ། །རིན་ཆེན་བྱང་ཆུབ་སེམས་མཆོག་བསྐྱེད་བགྱི་ཞིང་། །བསླབ་བྱའི་ཚོགས་ལ་རིམ་བཞིན་སློབ་པར་བགྱི། །དེ་བཞིན་གཤེགས་པ་ཚེ་དང་ཡེ་ཤེས་དང་། །འོད་དང་གཟི་བརྗིད་དཔག་མེད་རྒྱལ་པོ་དང་། །དབྱེར་མེད་དྲིན་ཆེན་རྩ་བའི་བླ་མ་ལ། །མི་ཕྱེད་སྙིང་ནས་གུས་པས་གསོལ་བ་འདེབས། །རྨད་བྱུང་ཐུགས་རྗེ་ཆེན་པོས་རྗེས་དགོངས་ལ། །དབང་བསྐུར་བྱིན་རློབས་སྨིན་གྲོལ་དངོས་གྲུབ་སྩོལ། །བདག་སོགས་འདི་ནས་ཚེ་འཕོས་གྱུར་མ་ཐག །རྣམ་དག་བདེ་ཆེན་ཞིང་དུ་འདྲེན་དུ་གསོལ། །རིགས་འདུས་བླ་མའི་སྐུ་ལས་འོད་ཟེར་འཕྲོས། །འཁོར་གྱི་ལྷ་རྣམས་གཙོ་བོའི་སྐུ་ལ་འདུས། །བླ་མ་འོད་དཔག་མེད་པའི་གནས་བཞི་ནས། །བདུད་རྩིའི་རྒྱུན་བབས་རང་ལུས་ལྟེམ་གྱིས་གང་། །དབང་བསྐུར་སྒྲིབ་སྦྱངས་སྨིན་གྲོལ་དངོས་གྲུབ་ཐོབ། །སྣོད་བཅུད་འོད་ཞུ་རང་ཐིམ་རང་ཉིད་ཀྱང་། །འོད་དུ་ཡལ་ནས་བླ་མའི་ཐུགས་ཀར་ཐིམ། །བླ་མ་བདེ་ཆེན་ཞིང་དུ་གཤེགས་པར་བསྒོམ། །མ་བཅོས་རང་རིག་བློ་འདས་རྫོགས་པ་ཆེ། །དོན་དམ་བླ་མ་ཆོས་སྐུའི་རང་ཞལ་བལྟ། །དགེ་བ་འདི་ཡིས་བདག་དང་མཐའ་ཡས་འགྲོ། །ཚེ་འདི་འཕོས་མ་ཐག་པར་བདེ་ཆེན་ཞིང་། །རྣམ་དག་པདྨའི་སྦུབས་སུ་བརྫུས་སྐྱེས་ཏེ། །ལུང་བསྟན་དབུགས་དབྱུང་མངོན་པར་སངས་རྒྱས་ཤོག །ཅེས་པའང་དད་དམ་རྨད་བྱུང་བཙུན་པ་འགྱུར་མེད་ཕུན་ཚོགས་ཀྱིས་བསྐུལ་ངོར་སྔགས་བཙུན་པདྨ་བི་ཛས་ཟབ་རྒྱས་གདམས་པའི་སྙིང་པོ་ཉུང་ངུར་དྲིལ་ཏེ་གང་ཤར་སྐད་ཅིག་ཉིད་ལ་བྲིས་པ་དགེ།
༄༅། །ན་མོ་རཏྣ་ཏྲ་ཡཱ་ཡ། བདེ་གཤེགས་འོད་སྣང་སྐུ་ཚེ་དཔག་མེད་མགོན། །རྒྱལ་སྲས་ཐུབ་བོ་གཉིས་སོགས་སེམས་དཔའི་འཁོར། །བདེ་ཆེན་ཞིང་གི་བཀོད་པ་ཡོངས་རྫོགས་སྤྲིན། །དད་པའི་ཡིད་མཁར་ཡང་ཡང་བཀོད་བྱས་ནས། །སྒོ་གསུམ་གུས་པས་རྟག་ཏུ་ཕྱག་འཚལ་ལོ། །ལུས་དང་ལོངས་སྤྱོད་ཀུན་བཟང་མཆོད་སྤྲིན་འབུལ། །ཚེ་རབས་བསགས་པའི་སྡིག་སྟུང་སྙིང་ནས་བཤགས། །འཕགས་སྐྱེའི་རྣམ་དཀར་ཚོགས་ལ་རྗེས་ཡི་རང་། །འགྲོ་ལ་སྨན་སླད་ཆོས་འཁོར་བསྐོར་བར་བསྐུལ། །འཕགས་རྣམས་མྱ་ངན་མི་འདའ་བཞུགས་གསོལ་འདེབས། །དགེ་ཚོགས་འགྲོ་ཀུན་རྣམ་མཁྱེན་ཐོབ་ཕྱིར་བསྔོ། །དཀོན་མཆོག་རིན་ཆེན་གསུམ་ལ་སྐྱབས་མཆི་ཞིང་། །བྱང་ཆུབ་སེམས་བསྐྱེད་བསླབ་ལ་གནས་པར་བགྱི། །དེའི་མཐུས་བདག་སོགས་ཚེ་འཕོས་གྱུར་མ་ཐག །རིགས་དྲུག་འཁོར་བའི་གཡང་ས་མི་མཐོང་བར། །རྒྱལ་སྲས་སློབ་མའི་ཚོགས་ཀྱིས་མདུན་བསུས་ཏེ། །བདེ་བ་ཅན་དུ་བརྫུས་ཏེ་སྐྱེ་བར་ཤོག །བདེ་གཤེགས་འོད་དཔག་མེད་མགོན་སྲས་བཅས་ཀྱིས། །ལུང་བསྟན་དབུགས་འབྱུང་བྱང་ཆེན་སྤྱོད་པའི་མཐུས། །རྫོགས་སྨིན་སྦྱངས་གསུམ་ཡོན་ཏན་མཐར་ཕྱིན་ནས། །མགོན་པོ་ཚེ་འོད་དཔག་མེད་ཉིད་གྱུར་ཅིག །ཆོས་ཉིད་རྣམ་དག་ཆོས་ཅན་རྒྱུ་འབྲས་དང་། །མཆོག་གསུམ་ཐུགས་རྗེས་བསླུ་མེད་བདེན་པའི་སྟོབས། །བདག་ཅག་ལྷག་བསམ་རྣམ་པར་དཀར་བའི་མཐུས། །སྨོན་ལམ་བཏབ་པ་དེ་བཞིན་འགྲུབ་གྱུར་ཅིག །ཅེས་པའང་མོས་ལྡན་འགའ་ཡི་བཞེད་སྐོང་དུ་བདེ་བ་ཅན་དུ་སྐྱེ་བའི་རྒྱུ་བཞི་ཚང་པའི་ཁུལ་གྱིས། པདྨ་བི་ཛས་འཕྲལ་མར་བྲིས་པ་སྟེ་འདིས་ཀྱང་འགྲོ་ཀུན་བདེ་བ་ཅན་དུ་སྐྱེ་བའི་རྒྱུར་གྱུར་ཅིག། །།
༄༅། །འཕགས་སྤྱན་རས་གཟིགས་ལ་བརྟེན་པའི་བླ་མའི་རྣལ་འབྱོར་གཞན་ཕན་མཆོག་སྦྱིན་ནི། ན་མོ་བླ་མ་དཀོན་མཆོག་གསུམ་ལ་སྐྱབས་མཆི་ཞིང་། །འགྲོ་ཀུན་སྲིད་ལས་སྒྲོལ་བར་སེམས་བསྐྱེད་དོ། །སེམས་ཅན་བདེ་ལྡན་སྡུག་བསྔལ་རྒྱུར་བཅས་བྲལ། །བདེ་མཆོག་བཏང་སྙོམས་ཆེན་པོར་གནས་གྱུར་ཅིག །ༀ་སྭ་བྷཱ་སོགས། རྣམ་ཀུན་མཆོག་ལྡན་སྟོང་ཆེན་སྒྱུ་མའི་རྩལ། །གནས་ཡུལ་རྣམ་དག་གྲུ་འཛིན་གཞལ་མེད་ཁང་། །བཀོད་པ་ར བ་རྫོགས་མཆོད་སྤྲིན་འཁྲིགས་པའི་དབུས། །པད་ཟླའི་གདན་ལ་བླ་མ་སྤྱན་རས་གཟིིགས། །དཀར་གསལ་མཛེས་འཛུམ་མཚན་དཔེའི་གཟི་བྱིན་འབར། །དར་དང་རིན་ཆེན་རི་དྭགས་པགས་པས་མཛེས། །ཕྱག་གཞི་ཐལ་སྦྱར་བསྒྲང་ཕྲེང་པད་དཀར་འཛིན། །སྐྱབས་ཀུན་འདུས་པའི་ངོ་བོར་ལྷམ་མེར་བཞུགས། །དྲན་པས་སྲིད་ཞིིའི་འཇིགས་འཕྲོག་བླ་མ་རྗེར། །གུས་པས་ཕྱག་འཚལ་མཆོད་འབུལ་སྡིག་ལྟུང་བཤགས། །དགེ་ལ་ཡི་རང་བསྐུལ་ཞིང་གསོལ་བ་འདེབས། །དགེ་ཚོགས་འགྲོ་ཀུན་རྣམ་མཁྱེན་ཐོབ་ཕྱིར་བསྔོ། །རྒྱལ་ཀུན་ཐུགས་རྗེའི་དབང་ཕྱུག་བླ་མ་རྗེར། །བཟོད་མེད་སྒོ་གསུམ་གདུང་བས་གསོལ་བ་འདེབས། །བྱམས་དང་སྙིང་རྗེས་བདག་རྒྱུད་བརླན་པ་དང་། །དོན་གཉིས་ལྷུན་གྱིས་འགྲུབ་པར་བྱིན་གྱིས་རློབས། །འཕགས་པའི་སྐུ་ལས་འོད་འཕྲོས་བདག་གཞན་ལ། །ཕོག་པས་ལས་ཉོན་ཤེས་བྱའི་སྒྲིབ་པ་སྦྱངས ། །རིགས་དྲུག་སྡུག་བསྔལ་འཁྲུལ་སྣང་དབྱིངས་སུ་ཞི། །སྣོད་བཅུ་ལྷ་སྔགས་ཡེ་ཤེས་འཁོར་ལོར་གྱུར། །ༀ་མ་ཎི་པདྨེ་ཧཱུྃ་ཧྲཱིིཿ འཕགས་མཆོག་འོད་ཞུ་རང་ཐིམ་རང་ཉིད་ཀྱང་། །གསལ་སྟོང་སྒྱུ་མ་ཆུ་ཟླའི་སྐུར་གྱུར་ནས། །སྟོང་དང་སྙིང་རྗེ་ཟུང་དུ་འཇུག་པ་ཡིས། །འཁོར་བ་དོང་སྤྲུགས་ཕྲིན་ལས་མཁའ་མཉམ་གྱུར། །དགེ་བ་འདི་ཡིས་བདག་སོགས་ཡིད་ཅན་ཀུན། །འཁོར་ལོའི་མགོན་གྱིས་འབྲལ་མེད་རྗེས་བཟུང་མཐུས། །ས་བཅུ་ལམ་ལྔའི་ཡོན་ཏན་རབ་རྫོགས་ནས། །སྤྱན་རས་གཟིགས་དབང་གོ་འཕང་མྱུར་ཐོབ་ཤོག །ཅེས་པའང་རྣམ་ཐར་གཙང་མ་སྙིགས་སྤྱོད་ཀྱི་དྲི་མས་མ་སྦགས་པ། དམ་པའི་ངང་ཚུལ་གསེར་ལྟར་འགྱུར་བ་མེད་པའི་དགེ་བའི་གཤེས་གཉེན་ཆེན་པོ་ཤཱི་ལའི་མཚན་ཅན་གྱི་བཞེད་ངོར། སྙོམ་ལས་པ་འཇམ་དབྱངས་མཁས་གྲུབ་རྒྱ་མཚོས་བྲིས་པ་སྟེ། འདིས་ཀྱང་གཞན་ཕན་ཕྲིན་ལས་ཀྱི་སྒོ་འཕར་བརྒྱ་ཕྲག་འབྱེད་པའི་རྒྱུར་གྱུར་ཅིག
༄༅། །རྒྱལ་དབང་རང་བྱུང་རྡོ་རྗེ་ལ་བསྟེན་པའི་བླ་མའི་རྣལ་འབྱོར་འོད་གསལ་སྤྲིན་གྱི་རོལ་མོ་ཡེ་ཤེས་མཆོག་གི་ཆར་འབེབས་ཅེས་བྱ་བ་བཞུགས་སོ། །རང་རིག་དོན་གྱི་བླ་མ་ལ། །རང་ངོ་ཤེས་པས་ཕྱག་བྱས་ནས། །ཚེ་འདིར་གྲོལ་བ་རྙེད་འདོད་པས། །ལམ་ཟབ་བླ་མའི་རྣལ་འབྱོར་བསྒོམ། །ཨ། གདོད་ནས་རྣམ་དག་རིག་པའི་གཤིས། །ཡེ་ནས་བླ་མའི་ངོ་བོ་སྟེ། །བྲལ་སྨིན་ཡོན་ཏན་གཞི་ལ་རྫོགས། །བློ་བྲལ་ཆེན་པོས་སྐྱབས་སུ་མཆི། །རང་སེམས་བླ་མར་མ་རྟོགས་པས། །གཉིས་འཛིན་འཁྲུལ་པའི་གཞན་དབང་གིས། །མེད་སྣང་སྲིད་ལམ་དུབ་པའི་འགྲོ། །སྐུ་གསུམ་ས་ལ་འགོད་པར་བྱ། །ཨ། ཡེ་གྲོལ་ཀུན་ཏུ་བཟང་མོའི་ཀློང་། །ལྷུན་འགྲུབ་འཇའ་ཟེར་ཐིག་ལེའི་སྦུབས། །རིག་རྩལ་མ་འགགས་སྤྲུལ་པའི་སྐུ། །ཀུན་མཁྱེན་ཆོས་རྗེ་ཁ་བསྒྱུར་ན་གདོད་མའི་མགོན་པོ་ཀློང་ཆེན་པ། མཆན། རང་བྱུང་རྡོ་རྗེ་ཀརྨ་པ། །དཀར་གསལ་ཞི་འཛུམ་དགྱེས་པའི་ཉམས། །ཆོས་གོས་གསུམ་གསོལ་པཎ་ཞུ་མཛེས་མཆན། ཞྭ་ནག་ཅན། །སེམས་ཉིད་ངལ་གསོའི་ཕྱག་རྒྱ་མཛད། །སྲིད་ཞི་མཉམ་ཉིད་སྐྱིལ་ཀྲུང་གིས། །ཐབས་ཤེས་པད་ཟླའི་གདན་ལ་རོལ། །ཤངས་རྩེར་སྐྱེ་མེད་ཨ་ཡིས་མཚན། །གནས་གསུམ་རྡོ་རྗེའི་འབྲུ་གསུམ་དང་། །ཐུགས་སྲོག་འོད་ལྔའི་ཏི་ལ་ཀར། །རྗེ་བཙུན་བི་མ་མི་ཏྲ་བཞུགས། །གཞན་ཡང་དགོངས་བརྡ་སྙན་བརྒྱུད་ཀྱི། །རྩ་བརྒྱུད་བླ་མ་ཡི་དམ་ལྷ། །མཁའ་འགྲོ་ཆོས་སྐྱོང་སྲུང་མའི་ཚོགས། །ཡོངས་གྲུབ་གདན་གསུམ་འཁོར་ལོར་རྫོགས། །སྐྱབས་ཀུན་འདུས་པའི་ངོ་བོར་གྱུར། །ཨ། དབྱིངས་རིག་ཟུང་འཇུག་བླ་མ་ལ། །འདུ་འབྲལ་མེད་པའི་ཕྱག་གིས་འདུད། །གཟུང་འཛིན་བྲལ་བའི་མཆོད་སྤྲིན་སྟོབ། །འཁྲུལ་རྟོགས་ཡེ་གྲོལ་ཀློང་དུ་བཤགས། །ཟག་མེད་དགེ་ལ་རྗེས་ཡི་རང་། །འཆི་མེད་གཉུག་མའི་ཐིག་ལེར་བཞུགས། །བརྗོད་བྲལ་དོན་གྱི་ཆོས་འཁོར་བསྐོར། །དགེ་ཚོགས་འོད་གསལ་སྙིང་པོར་བསྔོ། །འགྲོ་ཀུན་རང་བྱུང་སྐུ་ཐོབ་ཤོག །ཨ། ཡེ་གྲོལ་སྟོན་པ་ཀུན་ཏུ་བཟང་། །ལྷུན་འགྲུབ་རང་མདངས་རྡོ་རྗེ་སེམས། །དགའ་རབ་རྡོ་རྗེ་སྤྲུལ་པའི་སྐུར། །གསོལ་བ་འདེབས་སོ་བྱིན་གྱིས་རློབས། །འཇམ་དཔལ་བཤེས་གཉེན་འཇིག་རྟེན་མིག །དཔལ་གྱི་སེང་གེ་གྲུབ་བརྒྱའི་གཙོ། །འོད་ལུས་མངོན་རྫོགས་ཡེ་ཤེས་མདོར། །གསོལ༴ འཕོ་ཆེན་རྡོ་རྗེའི་སྐུར་བཞེངས་ནས། །སྡེ་གསུམ་སྙིང་པོའི་སྲོག་འཛིན་པའི། །བི་མ་པད་འབྱུང་བཻ་རོ་རྗེར། །གསོལ་བ་འདེབས༴ ཀུན་བཟང་དགོངས་ཀློང་མངོན་གྱུར་ནས། །འོད་གསལ་བསྟན་མཆོག་སྤེལ་མཛད་པའི། །རང་བྱུང་རྡོ་རྗེ་ཀརྨ་གདོད་མའི་མགོན་པོ་ཀློང་ཆེན་པར། མཆན། ཀར། །གསོལ་བ་འདེབས་སོ་བྱིན་གྱིས་རློབས། །ཀྱེ་ཀྱེ་མཁས་པ་འཇིག་རྟེན་མིག །རྣམ་གྲོལ་ཡོན་ཏན་རྒྱ་མཚོའི་གཏེར། །གདོད་མའི་མགོན་པོ་བླ་མ་རྗེར། །གསོལ་བ་སྙིང་གི་དཀྱིལ་ནས་འདེབས། །ཁ་ཙམ་ཚིག་ཙམ་མ་ཡིན་ནོ། །བྱིན་རླབས་ཐུགས་རྗེའི་ཀློང་ནས་སྩོལ། །དབང་མཆོག་བསྐུར་ལ་བྱིན་ཆེན་ཕོབ། །འོད་ལུས་འགྲུབ་པར་བྱིན་གྱིས་རློབས། །ༀ་ཨཱཿཧཱུྃ་གུ་རུ་བི་མ་ལ་རསྨི་སརྦ་སིདྡྷི་ཧཱུྃ། མཆན། ༀ་ཨཱཿགུ་རུ་ཀརྨ་སརྦ་སིདྡྷི་ཧཱུྃ། རྗེ་བཙུན་གུ་རུ་སྤྲུལ་པའི་སྐུའི། །སྐུ་ནི་བདེ་ཆེན་གཟི་བྱིན་འབར། །གསུང་ནི་བརྗོད་བྲལ་སྔགས་སྒྲ་སྒྲོགས། །ཐུགས་ནི་འོད་གསལ་ཟང་ཐལ་ལེ། །ཡོན་ཏན་ཕྲིན་ལས་དཔལ་དུ་འབར། །ཁྱད་པར་རྡོ་རྗེའི་གནས་གསུམ་དང་། །ཐུགས་སྲོག་འོད་ལྔའི་ཐིག་ལེ་ལས། །དཀར་དམར་མཐིང་དང་ལྔ་ལྡན་གྱི། །འོད་འཕྲོས་བདག་གི་གནས་གསུམ་དང་། །སྙིང་དབུས་དཔལ་གྱི་བེའུར་ཞུགས། །དབང་བཞིའི་ཡེ་ཤེས་ཅིག་ཅར་ཐོབ། །སྒྲིབ་བཞི་བྱང་ཞིང་ལམ་བཞི་འབྱོངས། །སྐུ་བཞི་ཐོབ་པའི་སྐལ་ལྡན་གྱུར། །མཐར་ནི་བླ་མ་རང་ལ་བསྟིམ། །བློ་འདས་ཆོས་སྐུའི་རང་ཞལ་བལྟ། །འདི་ལྟར་སྣང་སྲིད་ཆོས་རྣམས་ཀུན། །ཆོས་སྐུའི་ཀློང་ནས་བྱུང་ཞིང་གནས། །མཐར་ཡང་ཆོས་སྐུའི་ཀློང་དུ་གྲོལ། །ཆོས་སྐུའི་ཀློང་ལས་འདའ་ས་མེད། །དེ་ཕྱིར་འཁྲུལ་གྲོལ་སྤང་གཉེན་དག །གཟུང་འཛིན་འཆིང་བའི་རྒྱ་ལས་གྲོལ། །བལྟ་བྱ་མེད་ཅིང་ལྟ་བྱེད་མེད། །བློ་ཡིད་མཚན་མའི་ཆོས་ལས་འདས། །གཟའ་གཏད་བྲལ་བའི་ངང་དུ་བཞག །སྟོང་གསལ་རིག་པའི་སྙིང་པོ་ཅན། །སྐུ་གསུམ་དགོངས་པ་གཞི་ལ་རྫོགས། །ཡེ་ནས་གྲོལ་བའི་ཆོས་ཉིད་ལ། །ཡོངས་གྲོལ་སྒོམ་གྱི་འཛིན་པ་བཤིག །དགག་སྒྲུབ་གཉིས་མེད་ཟང་ཐལ་ལེ། །རང་བབ་གཉུག་མའི་ངང་དུ་བཞག །རྩལ་གྱི་རྟོག་པའི་སྤྲིན་རིས་ཀུན། །ཆོས་ཉིད་མཁའ་ལས་བྱུང་ཞིང་ཐིམ། །རྩལ་གྱིས་ཆོས་ཉིད་བསྒྱུར་དུ་མེད། །རང་བབ་བཞག་ན་རང་སར་གྲོལ། །ཡེ་ཤེས་ཆེན་པོར་ལྷུན་གྱིས་གྲུབ། །གྲོལ་ལུགས་གདེང་དང་ལྡན་པས་བཞག །སྤྲོས་པ་བྲལ་བའི་ཆོས་སྐུ་དང་། །མཚན་དཔེས་བརྒྱན་པའི་གཟུགས་སྐུ་གཉིས། །གུད་ན་མེད་དེ་རང་ལ་གནས། །ཀ་དག་ལྷུན་གྲུབ་དབྱིངས་སུ་རྫོགས། །གང་ཤར་ཆོས་སྐུའི་ཡོ་ལང་སྟེ། །ཅིར་སྣང་ཀུན་བཟང་སྤྱོད་པའི་རྒྱན། །ཡིད་སྨོན་བྲལ་བའི་ངང་ལ་བཞག །ཨ་ཨ་ཨ། སྣང་བ་ཐམས་ཅད་བླ་མའི་སྐུ། །གྲགས་པ་རང་བྱུང་རྡོ་རྗེའི་གསུང་། །དྲན་པར་རང་དག་རྒྱལ་བའི་ཐུགས། །ཅིར་སྣང་བླ་མའི་འཁོར་ལོར་སད། །དགེ་འདིས་མཐའ་ཀླས་འགྲོ་བ་ཀུན། །མེད་སྣང་གཟུང་འཛིན་འཁྲུལ་པ་དག །ཀ་དག་ཀུན་ཏུ་བཟང་པོའི་ཀློང་། །འཕོ་མེད་གཏན་སྲིད་ཟིན་གྱུར་ཅིག །ཆོས་ཉིད་མངོན་སུམ་རིག་པའི་ཀློང་། །སྒྲོན་དྲུག་ཉམས་སྣང་གོང་དུ་འཕེལ། །རིག་པ་ཚད་ཕེབས་རྡོ་རྗེའི་སྐུ། །ཆོས་ཟད་བློ་འདས་བཀྲ་ཤིས་ཤོག །དེ་ལྟར་དད་དམ་ལྡན་པ་ཡིས། །ཉིན་མཚན་བརྩོན་པས་གསོལ་བཏབ་ན། །དགོངས་བརྒྱུད་བྱིན་རླབས་འཕོ་བ་ཡི། །ཡེ་ཤེས་ཆེན་པོ་བརྙེས་པར་འགྱུར། །ཚུལ་འདི་འོག་མིན་ཀརྨ་ཡི། །ཡང་དབེན་རང་བྱུང་གཟིམས་སྤྱིལ་དུ། །མོས་གུས་ཉམས་ཀྱི་རྩལ་ལས་ཤར། །དགེ་བས་འགྲོ་ཀུན་ཀློང་གྲོལ་ཤོག །ཅེས་པའང་སྐལ་ལྡན་པདྨའི་བི་ཛ་ཡ་རེ་ཞིག་ལྗོངས་{རྒྱང}རྒྱུ་བར་ཆས་པའི་སྐབས། འོག་མིན་ཀརྨའི་ཡང་དབེན། ཆོས་རྗེ་རང་བྱུང་ཞབས་ཀྱིས་ཨ་ཏི་མན་ངག་སྡེའི་ཆོས་ཀྱི་འཁོར་ལོ་རྒྱ་ཆེན་པོ་བསྐོར་བའི་གཟིམས་སྤྱིལ་དུ་གང་ཤར་གསོལ་བ་བཏབ་པ་བཞིན་ནགས་ཚལ་དྲྭ་བས་མཛེས་པའི་སྨན་ལྗོངས་ཉམས་དགའ་བར་རས་དཀར་གྱི་ལྡིང་གུར་ཕུབ་པའི་ནང་དུ་ཡི་གེར་བཏབ་པ་སྟེ་འདིས་ཀྱང་འགྲོ་ཀུན་བླ་མ་མཆོག་གིས་རྗེས་སུ་བཟུང་ནས་ཟབ་གསང་རྟོག་པའི་ཡོན་ཏན་ཡར་ཟླ་ལྟར་རྒྱས་པའི་རྒྱུར་གྱུར་ཅིག དགེའོ། །དགེའོ། །དགེའོ། །
༄༅། །བླ་མ་ལ་ཕྱག་འཚལ་ལོ། །སྔོན་འགྲོ་སྦྱངས་པ་མཐར་ཕྱིན་པས། །བྱུང་གནས་འགྲོ་གསུམ་ཨར་ལ་གཏད། །སྐྱེ་འགག་གནས་བྲལ་སྐུ་གསུམ་ཀློང་། །སྒོམ་མེད་ཡེངས་མེད་བཙན་ས་འཛིན། །ཡེ་གྲོལ་ཕྱམ་བདལ་ལྟ་བའི་གནད། །ཅེར་གྲོལ་ཅོག་བཞག་སྒོམ་པའི་བཅུད། །རང་གྲོལ་ཞེན་བྲལ་སྤྱོད་པའི་སྲོག །མཐའ་གྲོལ་བློ་ཟད་འབྲས་བུའོ། །སྐུ་གསུམ་བཞུགས་སྟངས་གཟིགས་སྟངས་ཀྱིས། །སྒོ་ཡུལ་རླུང་གསུམ་གཅིག་ཏུ་དྲིལ། །དབྱིངས་རིག་འབྲལ་མེད་སྐྱོང་མཁས་ན། །ཆོས་ཉིད་མངོན་མཐོང་ཉམས་གོང་འཕེལ། །རིག་པ་ཚད་ཕེབས་ཟད་སར་འཁྱོལ། །ཚེ་འདི་ཉིད་དུ་བུདྡྷའོ། །རྟོགས་པ་དོན་བརྒྱུད་མན་ངག་ཡིན། །ཟབ་དོན་ཡལ་བར་མ་དོར་ཅིག །མན་ངག་གི་ཡི་གེ་ཚིགས་སུ་བཅད་པ་བཞི་པ་རྫོགས་སོ། །དོན་དམ་ཆོས་སྐུའི་ནམ་མཁའ་ལ། །འགྱུར་མེད་རིག་པའི་དཀྱིལ་འཁོར་ཤར། །སྣང་སྲིད་བདེ་ཆེན་ཆོས་སྐུ་རུ། །ཡེ་གྲོལ་ཆེན་པོའི་བཀྲ་ཤིས་ཤོག །མཆན།
༄༅། །ཚོགས་མཆོད་ཀྱི་རིམ་པ་འོད་གསལ་ཉི་ཟླའི་རྒྱན་ཅེས་བྱ་བ་བཞུགས་སོ། །རང་རིག་སྐུ་གསུམ་ལྷ་ལ་འདུད། །ཐུན་མཚམས་ཚོགས་མཆོད་རིམ་པ་ནི། །ཐབས་ཤེས་རྫས་རྣམས་འདུ་བྱས་ལ། །ལྟ་དགོངས་གདེང་བསྐྱེད་འདི་སྐད་དོ། །ཨ། གཟུང་དང་འཛིན་པ་རྣམ་དག་དུང་ཆེན་གྱི་སྣོད་དུ། །ཅིར་སྣང་རྒྱན་དུ་ཤར་བ་འདོད་ཡོན་ཀྱི་དམ་རྫས། །བདེ་ཆེན་ཡེ་ཤེས་ཆེན་པོར་བྱིན་གྱིས་རང་བརླབས་པས། །བདེ་སྟོང་ཟག་མེད་འོད་གསལ་བདུད་རྩི་རུ་བསྐྱིལ་ལོ། །གཞི་དབྱིངས་ཀ་ནས་དག་པ་སྤྲོས་བྲལ་གྱི་ཞིང་ནས། །གཞི་སྣང་ཡེ་ཤེས་རོལ་པ་ཕྱག་རྒྱ་རུ་བཞེངས་པའི། །བླ་མ་ཡི་དམ་ཌཱ་ཱཀི་ཆོས་སྲུང་གི་ཚོགས་རྣམས། །བདེ་སྟོང་ཟག་མེད་ཚོགས་ཀྱི་འདུ་བ་ལ་ཕེབས་ཤོག །ཡུལ་དང་དབང་པོ་རྣམ་དག་འདོད་ཡོན་གྱི་ཕྱི་མཆོད། །ཨ་ཧཾ་འབར་འཛག་ཟག་མེད་བདེ་སྟོང་གི་ནང་མཆོད། །འོད་གསལ་བསམ་མི་ཁྱབ་པ་གསང་བ་ཡི་ཚོགས་མཆོད། །བློ་བྲལ་དོན་གྱི་ལྷ་ལ་འབྲལ་མེད་དུ་འབུལ་ལོ། །གཟུང་འཛིན་འཁྲུལ་པའི་དྲི་མ་དངོས་གནས་ལ་མ་གྲུབ། །གེགས་དང་གོལ་ས་མཐའ་དག་རེ་དོགས་ཀྱི་ཆོ་འཕྲུལ། །དངོས་དང་དངོས་མེད་གཉིས་ཀ་མཐའ་གྲོལ་ལ་ཐིམ་པའི། །འོད་གསལ་གཉུག་མའི་ཀློང་དུ་བསྐང་བཤགས་དེ་འབུལ་ལོ། །གཟུང་འཛིན་ཉོན་མོངས་འཁྲུལ་པའི་དགྲ་བགེགས་ཀྱི་དཔུང་ཚོགས། །རང་གྲོལ་རྟོགས་པའི་མཚོན་ཆས་སྐྱེ་མེད་དུ་བསྒྲལ་ནས། །རིག་སྟོང་མི་ཤིགས་ཐིག་ལེ་ཧེ་རུ་ཀའི་ཞལ་དུ། །ཀུན་རྟོག་བརྒྱད་ཁྲི་བཞི་སྟོང་ལྷག་མེད་དུ་བསྟབ་བོ། །ཡོངས་གྲུབ་ཕུང་ཁམས་སྐྱེ་མཆེད་གདན་གསུམ་གྱི་འཁོར་ལོ། །ཨ་ཧཾ་འབར་འཛག་ཞུ་བདེ་བདེ་སྟོང་གི་མཆོད་སྤྲིན། །ཟག་མེད་དགའ་བཞིའི་ཡེ་ཤེས་ངོ་བོ་རུ་བསྙེན་ནས། །ཅིར་སྣང་ཀུན་བཟང་སྤྱོད་པར་ལྷུན་འབྱམས་སུ་སྤྱོད་དོ། །སེམས་བྱུང་ལྟར་སྣང་འཁྲུལ་པ་ལྷག་སྡུད་ཀྱི་ཚོགས་རྣམས། །སེམས་ཉིད་སྐྱེ་མེད་རྟོགས་པའི་ཕམ་ཕབ་འདི་བཞེས་ལ། །གཟུང་འཛིན་འཁྲུལ་པའི་དགྲ་བོ་ཆོས་དབྱིངས་སུ་བསྒྲལ་ནས། །གཉུག་མའི་གཏན་སྲིད་ཟིན་པའི་ཕྲིན་ལས་དེ་སྒྲུབ་མཛོད། །དུས་གསུམ་མཉམ་ཉིད་ཀློང་དུ་ཤེས་རིག་གི་རྒྱལ་པོས། །རིག་སྟོང་སྐྱེ་མེད་བརྗོད་བྲལ་ཆོས་འཁོར་དེ་བསྐོར་ཚེ། །འཁྲུལ་པ་དབྱིངས་སུ་བཟློག་པར་དམ་བཅས་ཀྱི་ཚོགས་ཀྱིས། །གང་ཤར་སྤང་བླང་བྲལ་བའི་མཆོད་གཏོར་འདི་བཞེས་ཤིག །རྟེན་འབྲེལ་རླུང་སྦྱོར་འཕོ་བ་གནས་དག་གི་ཌཱ་ཀིས། །གང་ཤར་འཛིན་སྟངས་བྲལ་བའི་མཆོད་གཏོར་འདི་བཞེས་ལ། །ཡིད་དཔྱོད་འཛིན་པའི་ཀླ་ཀློ་ཆོས་དབྱིངས་སུ་བཟློགས་ནས། །སྣང་བཞི་ཟད་སར་འཁྱོལ་བའི་ཕྲིན་ལས་དེ་སྒྲུབ་མཛོད། །སྣང་སྟོང་གཉིས་མེད་རིགས་ལྔའི་དཔའ་བོ་དང་མཁའ་འགྲོས། །ཡེ་ཤེས་ལྔ་ཡི་གླུ་ལེན་བྲོ་བརྡུང་ལ་བརྩོན་པས། །གནས་ལུགས་རྣམ་ཐར་གསུམ་ལྡན་ཨེ་དབྱིངས་ཀྱི་ཀློང་དུ། །རྣམ་རྟོག་དུག་ལྔའི་དགྲ་བོ་ལྡང་མེད་དུ་མནན་ནོ། །ཆོས་ཉིད་མངོན་སུམ་འཇའ་ཟེར་ཐིག་ལེ་ཡི་སྦུབས་ནས། །སྒྲོན་དྲུག་ཉམས་སྣང་གོང་འཕེལ་ལྔ་ལྡན་གྱི་ཚོམ་བུར། །རིག་པ་རྡོ་རྗེའི་སྐུར་སྨིན་ལོངས་སྐུ་ཡི་ཞིང་སྦྱངས། །འཇའ་ལུས་ཆོས་སྐུར་གྲོལ་བའི་བྱིན་རླབས་དེ་ཞུའོ། །དེ་ལྟར་བརྩོན་པའི་སྐལ་ལྡན་ཀུན། །མྱུར་དུ་ཚོགས་རྫོགས་སྒྲིབ་གཉིས་བྱང་། །ཉམས་རྟོགས་ཡོན་ཏན་གོང་དུ་འཕེལ། །ཡེ་ཤེས་ཆེན་པོ་མངོན་བྱེད་འགྱུར། །ཚུལ་འདི་སྟག་ལུང་མར་ཐང་དུ། །བཤེས་གཉེན་དམ་པའི་གསུང་བསྐུལ་ངོར། །གང་ཤར་བློ་ཡི་མཚོ་ལས་ཕྱུང་། །དགེ་བས་འགྲོ་ཀུན་ཀློང་གྲོལ་ཤོག །ཅེས་པའང་མཁས་བཙུན་བཟང་པོའི་ཡོན་ཏན་གྱིས་མངོན་པར་མཐོ་ལ་བླ་མ་བསོད་ནམས་རབ་བརྟན་གྱིས་ལྷ་རྫས་དང་དྲི་བཟང་བམ་གྱི་རྟེན་བཅས་གསུང་བསྐུལ་གནང་ངོར། རང་བཞིན་རྫོགས་པ་ཆེན་པོའི་ལམ་ལ་མོས་པས་སྤྱོད་པ་ཞེ་སྤྲུལ་འཇམ་དབྱངས་མཁས་གྲུབ་རྒྱ་མཚོའི་སྡེས་མདོ་ཁམས་ས་ཡི་ཐིག་ལེ་དཔལ་རི་བོ་ཆེའི་ཆོས་གྲྭར་གང་ཤར་སྐད་ཅིག་ཉིད་ལ་བྲིས་པ་དགེ། འདིར་རང་བྱུང་བླ་སྒྲུབ་གྱི་ཚོགས་མཆོད་ཡིན་ནའང་རྩ་གསུམ་གང་ལ་སྦྱར་ཡང་རུང་ངོ་། །དགེའོ། །དགེའོ། །དགེའོ། །།
| 