བླ་མ་མཁྱེན་ནོ།

༄༅། །བླ་མ་མཁྱེན་ནོ། །རྒྱལ་བ་དགོངས་པའི་བརྒྱུད་པའི་བླ་མ་དེ་མཁྱེན་ནོ། །རིག་འཛིན་བརྡ་ཡི་བརྒྱུད་པའི་བླ་མ་དེ་མཁྱེན་ནོ། །གང་ཟག་སྙན་ཁུང་བརྒྱུད་པའི་བླ་མ་དེ་མཁྱེན་ནོ། །བཀའ་བབས་ལུང་བསྟན་བརྒྱུད་པའི་བླ་མ་དེ་མཁྱེན་ནོ། །སྨོན་ལམ་དབང་བསྐུར་བརྒྱུད་པའི་བླ་མ་དེ་མཁྱེན་ནོ། །མཁའ་འགྲོ་གཏད་རྒྱ་བརྒྱུད་པའི་བླ་མ་དེ་མཁྱེན་ནོ། །སྨིན་བྱེད་དབང་བཞི་བསྐུར་བའི་བླ་མ་དེ་མཁྱེན་ནོ། །གྲོལ་བྱེད་གདམས་པ་སྦྱིན་པའི་བླ་མ་དེ་མཁྱེན་ནོ། །རྒྱབ་རྟེན་བཤད་ལུང་འབོག་པའི་བླ་མ་དེ་མཁྱེན་ནོ། །བཀའ་དྲིན་མཚུངས་པ་མེད་པའི་བླ་མ་དེ་མཁྱེན་ནོ། །འབྲེལ་ཚད་དོན་དང་ལྡན་པའི་བླ་མ་དེ་མཁྱེན་ནོ། །ཡང་དག་ཐར་ལམ་འདྲེན་པའི་བླ་མ་དེ་མཁྱེན་ནོ། །མོས་གུས་སྙིང་ནས་བྱས་སོ་དྲིན་ཆེན་གྱི་བླ་མ། །འབྲལ་མེད་ཐུགས་རྗེས་ཟུངས་ཤིག་དྲིན་ཆེན་གྱི་བླ་མ། །དགོངས་བརྒྱུད་བྱིན་རླབས་འཕོས་ཤིག་དྲིན་ཆེན་གྱི་བླ་མ། །རྟོགས་གྲོལ་དུས་མཉམ་མཛོད་ཅིག་དྲིན་ཆེན་གྱི་བླ་མ། །ཚེ་འདིར་མི་མཐུན་འགལ་རྐྱེན་བར་ཆད་ཀུན་ཞི་ཞིང་། །འཆི་ཁར་གནད་གཅོད་དྲག་པོའི་སྡུག་བསྔལ་ཡང་མི་འབྱུང་། །མོས་གུས་དག་པའི་སྣང་ངོར་བརྒྱུད་གསུམ་གྱི་བླ་མས། །མཁའ་སྤྱོད་རིག་འཛིན་ཞིང་དུ་མིག་འཕྲུལ་བཞིན་དྲོངས་མཛོད། །མདོར་ན་འདི་ནས་བྱང་ཆུབ་མ་ཐོབ་ཀྱི་བར་དུ། །རེ་ས་གཞན་ན་མེད་དོ་ཐུགས་རྗེ་ཡིས་དགོངས་མཛོད། །བྱིན་རླབས་ཐུགས་རྗེའི་ཆར་གྱིས་འབྲལ་མེད་དུ་བསྐྱངས་པས། །དོན་གཉིས་ལྷུན་གྱིས་འགྲུབ་པའི་དངོས་གྲུབ་ཞིག་སྩོལ་མཛོད། །ཅེས་པའང་དད་དམ་རྨད་བྱུང་ཆོས་སྐྱོང་དར་རྒྱས་ལགས་ཀྱི་བཞེད་ངོར། རྒན་པོ་བི་ཛས་བྲིས་པ་དགེ །
༄༅། །རབ་འབྱམས་སྲས་བཅས་རྒྱལ་བའི་ཡེ་ཤེས་གར། །སྐལ་བཟང་གདུལ་བྱའི་མོས་ངོར་ཆུ་ཟླའི་ཚུལ། །འགོག་མེད་འཆར་བའི་དཔལ་ལྡན་བླ་མ་ལ། །བཟོད་མེད་གདུང་ཤུགས་དྲག་པོས་གསོལ་བ་འདེབས། །མྱུ་གུ་གསར་པ་ལྟ་བུའི་གནས་སྐབས་འདིར། །གཞན་རྐྱེན་གྲོགས་ཀྱི་འཕེན་པ་གཙོ་ཆེ་ཕྱིར། །སྡིག་པའི་གྲོགས་དང་ནམ་ཡང་མི་འཕྲད་ཅིང་། །རྟག་པར་དགེ་བའི་བཤེས་ཀྱིས་སྐྱོང་བྱིན་རློབས། །དལ་འབྱོར་རྙེད་དཀའ་ནམ་འཆི་ཆ་མེད་དང་། །ལས་འབྲས་བསླུ་མེད་འཁོར་བའི་ཉེས་དམིགས་ཚུལ། །ལེགས་པར་གོམས་པས་སྲིད་ལས་ངེས་འབྱུང་བློ། །བཅོས་མིན་རྒྱུད་ལ་སྐྱེ་བར་བྱིན་གྱིས་རློབས། །སྐྱབས་གནས་དཀོན་མཆོག་མ་གཏོགས་འཇིག་རྟེན་ན། །ཡིད་རྟོན་རུང་བ་སུ་ཡང་མ་དམིགས་ནས། །རང་གཞན་འཇིགས་དང་སྡུག་བསྔལ་དྲན་པའི་བློས། །སྐྱབས་གསུམ་སྙིང་ནས་བསྟེན་པར་བྱིན་གྱིས་རློབས། །བདག་གཅེས་འཛིན་ལས་སྲིད་པའི་སྡུག་བསྔལ་དང་། །གཞན་ཕན་གོམས་ལས་སངས་རྒྱས་ཡོན་ཏན་ཕུལ། །འབྱུང་བར་ངེས་པས་བདག་བས་གཞན་གཅེས་བློས། །བྱང་ཆུབ་སེམས་གཉིས་འབྱོང་བར་བྱིན་གྱིས་རློབས། །སྒྲིབ་གཉིས་མ་སྦྱངས་ཚོགས་གཉིས་མ་བསགས་པར། །ལམ་དང་འབྲས་བུའི་ཡོན་ཏན་སྐྱེ་མིན་པས། །བདེན་གཉིས་ཟུང་འཇུག་རྒྱལ་བ་དགྱེས་པའི་ལམ། །ཚུལ་བཞིན་ཉམས་འོག་ཆུབ་པར་བྱིན་གྱིས་རློབས། །བླ་མའི་བྱིན་རླབས་སེམས་ལ་མ་ཞུགས་ན། །འོད་གསལ་རང་ངོ་འཕྲོད་པའི་ཐབས་མེད་ཕྱིར། །སངས་རྒྱས་ཆོས་སྐུར་ལྟ་བའི་མོས་གུས་ཀྱིས། །དགོངས་བརྒྱུད་ཡེ་ཤེས་འཕོ་བར་བྱིན་གྱིས་རློབས། །དེའི་མཐུས་ཅིར་སྣང་ལྷ་སྐུའི་ཕྱག་རྒྱར་སད། །སྒྲ་གྲགས་སྐྱེ་མེད་སྙིང་པོ་སྔགས་སུ་རྫོགས། །དྲན་རྟོག་འོད་གསལ་ཆོས་སྐུར་སྨིན་པ་ཡི། །རྡོ་རྗེའི་གསང་མཆོག་འགྲུབ་པར་བྱིན་གྱིས་རློབས། །མདོར་ན་འདི་ནས་བྱང་ཆུབ་སྙིང་པོའི་བར། །འབྲལ་མེད་ཡེ་ཤེས་ཆེན་པོས་རྗེས་ཟུངས་ལ། །དོན་གཉིས་བསམ་ཀུན་ཡིད་བཞིན་འགྲུབ་པ་ཡི། །བཀྲ་ཤིས་དགེ་མཚན་རྒྱས་པར་མཛད་དུ་གསོལ། །མོས་ལྡན་མཆེད་ཀྱི་བཞེད་ངོར་བི་ཛ་ཡས་གང་ཤར་བྲིས་པ་དགེ །