རྡོར་སེམས་ཐུགས་ཀྱི་སྒྲུབ་པའི་ལམ་རིམ་དང་འབྲེལ་བར་གསོལ་བ་འདེབས་པ་རྣམ་གྲོལ་དཔྱིད་ཐིག
༄༅། །རྡོར་སེམས་ཐུགས་ཀྱི་སྒྲུབ་པའི་ལམ་རིམ་དང་འབྲེལ་བར་གསོལ་བ་འདེབས་པ་རྣམ་གྲོལ་དཔྱིད་ཐིག་ཅེས་བྱ་བ། ན་མོ་གུ་རུ་བཛྲ་ས་ཏྭ་ཡ། བདེ་ཆེན་ཡེ་ཤེས་རྡོ་རྗེའི་གཟི་བྱིན་གྱིས། །བརྟན་གཡོ་སྲིད་ཞིའི་དངོས་ཀུན་ཁྱབ་པའི་བདག །རིགས་ཀུན་བྱེད་པོ་བླ་མ་རྡོ་རྗེ་སེམས། །སྙིང་ནས་གསོལ་འདེབས་བུ་ལ་བརྩེ་བས་དགོངས། །རྙེད་དཀའི་དལ་འབྱོར་རིན་ཆེན་ཐོབ་དུས་འདིར། །མི་རྟག་འཆི་བ་སྙིང་ལ་ཞེན་པའི་མཐུས། །ཆོས་མིན་བསམ་སྦྱོར་སྐད་ཅིག་མི་སྐྱེ་ཞིང་། །བཅོས་མིན་ངེས་འབྱུང་སྐྱེ་བར་བྱིན་གྱིས་རློབས། །སྲོག་གི་ཕྱིར་ཡང་སྐྱབས་གསུམ་མི་འདོར་བར། །ཐེག་ཆེན་ལམ་རྩ་བྱང་ཆུབ་སེམས་གཉིས་འབྱོངས། །སྒྲིབ་སྦྱོང་ཚོགས་བསགས་བླ་མའི་ལམ་ཁྱེར་གྱིས། །དགོངས་བརྒྱུད་ཡེ་ཤེས་འཕོ་བར་བྱིན་གྱིས་རློབས། །ལམ་གྱི་གཞི་རྟེན་བླ་མ་སངས་རྒྱས་ཀྱིས། །རྗེས་བཟུང་མཉེས་པས་ལེགས་བསྟེན་གསང་མཛོད་བརྡོལ། །དབང་བཞིས་རྒྱུད་སྨིན་དམ་ཚིག་རྣམ་པར་དག །རིམ་གཉིས་བརྟན་པ་ཐོབ་པར་བྱིན་གྱིས་རློབས། །ཕུང་ཁམས་སྐྱེ་མཆེད་གདན་གསུམ་ལྷ་སྐུར་སྨིན། །སྲོག་རྩོལ་བརྗོད་པ་སྒྲ་གྲགས་སྔགས་སུ་དག །འགྱུ་འཕྲོའི་དྲན་རྟོག་འོད་གསལ་ཆོས་སྐུར་གྲོལ། །རྡོ་རྗེའི་གསང་མཆོག་འགྲུབ་པར་བྱིན་གྱིས་རློབས། །ཁྱད་པར་རིག་སྟོང་ཟུང་འཇུག་རྫོགས་པ་ཆེ། །ཤེས་ཉམས་ཡིད་དཔྱོད་སྦུབས་ལས་ངེས་གྲོལ་ནས། །ཟག་བྲལ་བདེ་གསལ་མི་རྟོག་ཡེ་ཤེས་མདངས། །སྙིང་གི་དཔྱིད་དུ་སྨིན་པར་བྱིན་གྱིས་རློབས། །སྤྲོས་མཚན་ཀུན་བྲལ་ཀ་དག་གཞི་དབྱིངས་ཀློང་། །འོད་གསལ་ལྷུན་གྲུབ་གཏིང་གསལ་འགག་མེད་གདངས། །སྒྲོན་དྲུག་སྣང་བ་བཞི་ཡིས་མངོན་བྱས་ནས། །གཞོན་ནུ་བུམ་སྐུར་གྲོལ་བར་བྱིན་གྱིས་རློབས། །གཉིས་འཛིན་འཁྲུལ་རྟོག་སྐྱེ་མེད་དབྱིངས་སུ་ཆོད། །གཏི་མུག་ཉིང་འཁྲུལ་འོད་གསལ་ཀློང་དུ་ཐིམ། །སྐྱེ་འཆིའི་བར་ལག་བཙན་ཐབས་འཕོ་བས་སྦྲེེལ། །གདོད་མའི་གཏན་སྲིད་ཟིན་པར་བྱིན་གྱིས་རློབས། །མདོར་ན་འདི་ནས་བྱང་ཆུབ་མ་ཐོབ་པར། །མགོན་པོ་ཁྱོད་ལས་སྐྱབས་གཞན་མ་མཆིས་པས། །འབྲལ་མེད་ཡེ་ཤེས་གཟིགས་པས་རྗེས་དགོངས་ནས། །གྲུབ་གཉིས་པདྨོ་བཞད་པར་མཛད་དུ་གསོལ། །གནས་སྐབས་སུ་ཡང་མི་མཐུན་ཉེས་ཀུན་ཞི། །མཐུན་རྐྱེན་བསམ་འགྲུབ་བདག་སྣང་དབང་དུ་འདུས། །འབྲེལ་ཚད་དོན་ལྡན་བསྡུ་བཞིའི་ཕྲིན་ལས་རྒྱས། །དོན་གཉིས་མཐའ་རུ་ཕྱིན་པའི་བྱིན་རླབས་སྩོལ། །ངེས་གསང་བསྟན་དར་དེ་འཛིན་ཞབས་པད་བརྟན། །བཤད་སྒྲུབ་སྡེ་རྒྱས་བོད་ཡུལ་མཐའ་དབུས་བདེ། །རྫོགས་ལྡན་ཉི་མ་གསར་དུ་འཆར་བ་ཡི། །སྣང་བ་དམ་པས་འཇིག་རྟེན་མཛེས་གྱུར་ཅིག །ཅེས་པའང་རབ་ཚེས་ཆུ་བྱི་གསར་དུ་བཞད་པའི་དུས་ཚེས་དགེ་བར་རྡོ་རྗེ་དབང་མཆོག་དགྱེས་པ་རྩལ་གྱིས་བྲིས་ཤིང་གསོལ་བ་བཏབ་པ་དགེ །