རྒྱུན་བསང་ཉུང་བསྡུས།
༈ རྒྱུན་བསང་ཉུང་བསྡུས་ཆག་མེད་བྱེད་འདོད་ཚེ། །དཀར་གསུམ་ལ་སོགས་ཟས་སྣའི་ཕུད་གཙང་མ། །བཟང་ཤིང་དྲི་ལྡན་མེར་བསྲེགས་ཆུ་གཙང་བྲན། །སངས་རྒྱས་ཆོས་ཚོགས་སོགས་ཀྱི་སྐྱབས་སེམས་མཐར། རྃ་ཡྃ་ཁྃ། ༀ་ཨཱཿཧཱུྃ། ཀྱཻ། བརྟན་གཡོ་སྲིད་པའི་རྩི་བཅུད་དྭངས་མའི་སྨན། །འབར་བྱེད་མེ་དང་སྦྱར་བའི་དུད་པའི་སྤྲིན། །མགྲོན་རིགས་ཐུགས་ལ་གང་བཞེད་དེར་འཆར་བའི། །ཟག་མེད་བསང་མཆོད་བདུད་རྩིའི་རྒྱ་མཚོ་འདིས། །སྲི་ཞུའི་མགྲོན་གྱུར་བླ་མ་དཀོན་མཆོག་བསང་། །ཡོན་ཏན་མགྲོན་གྱུར་དཔལ་མགོན་ཆོས་སྲུང་བསང་། །ཁྱད་པར་མགྲོན་གྱུར་ཡུལ་ལྷ་གཞི་བདག་བསང་། །སྙིང་རྗེའི་མགྲོན་གྱུར་རིགས་དྲུག་ཕ་མ་བསང་། །ལན་ཆགས་མགྲོན་གྱུར་བགེགས་རིགས་འབྱུང་པོ་བསང་། །དེ་ལྟར་འཁོར་འདས་སྣང་སྲིད་མགྲོན་རིགས་རྣམས། །བདུད་རྩི་བསང་གི་མཆོད་པས་དགྱེས་བསྐྱེད་མཐུས། །ཉམས་གྲིབ་མི་གཙང་ཀུན་ཞི་ཚོགས་གཉིས་རྫོགས། །སྣོད་བཅུད་ཕྱྭ་གཡང་དཔལ་འབྱོར་ཕུན་སུམ་ཚོགས། །བསྟན་འགྲོའི་དགེ་མཚན་རྒྱས་པའི་བཀྲ་ཤིས་ཤོག །ཅེས་པའང་མོས་ལྡན་འགའ་ཞིག་གི་བཞེད་ངོར་སྤྲུལ་མིང་པདྨ་བི་ཛས་བྲིས་པ་དགེ་ལེགས་འཕེལ།