བཀའ་བསྒོ་བྱ་བའི་ཆོ་ག་རྡོ་རྗེའི་འཐོར་རླུང་།

༄༅། །བཀའ་བསྒོ་བྱ་བའི་ཆོ་ག་རྡོ་རྗེའི་འཐོར་རླུང་ཞེས་བྱ་བ་བཞུགས། ན་མོ་གུ་རུ་བཛྲ་ཀྲོ་ངྷཱ་ཡ། སྐྱབས་སེམས་སྔོན་དུ་འགྲོ་བས། ཧཱུྃ་ཧཱུྃ་ཧཱུྃ། རབ་འབྱམས་རྩ་གསུམ་རྒྱལ་བའི་ཡེ་ཤེས་འཕྲུལ། །དྲན་པས་བདུད་བཞིའི་འཇིགས་འཕྲོག་བླ་མ་དང་། །དབྱེར་མེད་སྣང་སྲིད་ཟིལ་གནོན་གུ་རུ་རྗེར། །གསོལ་བ་འདེབས་སོ་ནུས་མཐུའི་བྱིན་ཆེན་ཕོབ། །ཀ་དག་ཆོས་ཀུན་མཉམ་རྫོགས་ཆེན་པོའི་ཀློང་། །ལྷུན་གྲུབ་རིག་པ་རང་སྣང་གཉུག་མའི་ལྷ། །འཆོལ་བའི་ཁྲོ་རྒྱལ་པདྨ་ཧེ་རུ་ཀཿ། །སྐུ་མདོག་དམར་ནག་མེ་ཡི་གཤོག་པ་ཅན། །གཡས་པས་རྡོ་རྗེས་བདུད་སྡེའི་ཀླད་པ་འགེམས། །གཡོན་པས་ལྕགས་སྡིག་རྒྱལ་འགོང་སྙིང་ཁྲག་འཇིབ། །དཔལ་གྱི་ཆས་རྫོགས་གར་དགུའི་ཉམས་ཀྱིས་སྒེག །སྐུ་ལས་མེ་དཔུང་རྡོ་རྗེའི་ཚྭ་ཚྭ་འཕྲོ། །སྲིད་གསུམ་གཡོ་འགུལ་སྡེ་བརྒྱད་བྲན་དུ་བཀོལ། །འཁོར་དུ་རབ་འབྱམས་ཁྲོ་བོའི་སྤྲིན་འཁྲིགས་གསལ། །དཀོན་མཆོག་རྩ་བ་གསུམ་གྱི་བདེན་སྟོབས་དང་། །ཆོས་ཉིད་ཆོས་ཅན་རྒྱུ་འབྲས་རྟེན་འབྱུང་མཐུས། །བསྲུང་བྱ་འདི་ལ་འཚེ་བའི་འབྱུང་པོའི་རིགས། །འདིར་འདུས་རྣལ་འབྱོར་བདག་གི་བཀའ་ལ་ཉོན། །དོན་དམ་ཆོས་ཉིད་མཉམ་པ་ཆེན་པོའི་ཀློང་། །བཟང་ངན་རྟོག་པའི་མཚན་མ་མ་དམིགས་ཀྱང་། །དེ་ལྟར་མ་རྟོགས་གཉིས་འཛིན་འཁྲུལ་པའི་བློས། །རྒྱུན་རིང་སྲིད་པར་འཕྱན་རྣམས་སྙིང་རེ་རྗེ། །ཁྱེད་རྣམས་དུས་རིང་ཐོག་མ་མེད་པ་ནས། །སྲིད་པའི་གྲོང་དུ་ཡང་ཡང་འཁོར་བའི་ཚེ། །ཕན་ཚུན་ཕ་མར་མ་གྱུར་གང་ཡང་མེད། །ཐམས་ཅད་གཉེན་ཡིན་ཁྱེད་ཅག་ཅི་ལྟར་འཚེ། །མ་རིག་འཁྲུལ་པས་བསླད་པའི་མཚང་ཅན་རྣམས། །ཕན་ཚུན་དགྲ་གཉེན་འཛིན་པས་ཉོན་རེ་མོངས། །ཁྱེད་ཅག་རང་གི་ལུས་ལ་དཔེ་ལོངས་ལ། །འགྲོ་བ་གཞན་ལ་གནོད་པའི་བསམ་སྦྱོར་ཐོང་། །རྒྱུ་འབྲས་བདེན་པ་ནམ་ཡང་མི་བསླུ་བས། །གཞན་ལ་གནོད་བྱས་བསྐལ་མང་དམྱལ་མེས་འཚེད། །གཞན་གནོད་སྤངས་ན་འཕྲལ་ཡུན་བདེ་བ་ཐོབ། །དེ་བས་བདེན་པའི་ཚིག་འདི་མཉན་བྱོས་ལ། །བསྲུང་བྱ་འདིས་མཚོན་མཐའ་ཀླས་སྐྱེ་དགུ་ལ། །གནོད་སྦྱོར་སྤོངས་དང་མ་འོངས་བྱང་ཆུབ་དུས། །བདུད་རྩིའི་བགོ་བཤའ་ཐོག་མར་ཁྱོད་ལ་སྦྱིན། །གལ་ཏེ་བདེན་པའི་ཚིག་ལ་མི་ཉན་ན། །བདག་ཉིད་པདྨ་དྲག་པོ་ཐུགས་ཁྲོས་ནས། །ཡཀྴ་ཁྲོ་བོའི་ཚོགས་རྣམས་སྐར་ལྟར་འཕྲོ། །ལྕགས་སྡིག་འབར་བའི་ཚོགས་ཀྱིས་སྙིང་རྩ་གཞིབ། །རྡོ་རྗེ་མེ་འབར་མཚོན་གྱིས་མགོ་ལུས་འགེམ། །རྡུལ་ཕྲན་ཙམ་ཡང་འཇོག་པའི་གནས་མེད་པས། །གནས་འདིར་མ་འདུག་རང་གནས་ཕྱིར་དེངས་ཤིག །ཧཱུྃ་ཧཱུྃ་ཧཱུྃ་དང་། ཨ་རྩིག་ནེ་རྩིག་སོགས། དྲག་སྔགས་བཟླ་ཞིང་ཐུན་གྱིས་བྲབ། ལྟ་བའི་གདེང་བསྐྱེད་དྲག་པོའི་མཚམས་རྔམས་བྱས་པས་བགེགས་ཚོགས་མཐའ་མེད་རྒྱ་མཚོའི་ཕ་རོལ་དུ་སོང་བར་བསམ། དེ་ནས་སྲུང་འཁོར་བསྒོམ་པ་ནི། ཧཱུྃ། བདག་ཉིད་ཆེ་མཆོག་དྲག་པོའི་ཐུགས་ཀ་ནས། །རབ་འབར་རྡོ་རྗེའི་གུར་ཁང་མེ་འོད་སྤྲོས། །བསྲུང་བྱ་ལ་གནོད་འབྱུང་པོའི་རིགས་གྱུར་རྣམས། །དཔག་ཚད་འཁོར་ཡུག་འདའ་བ་མེད་པར་གྱུར། །ཧཱུྃ་བྷྲཱུྃ་བཛྲ་རཀྵ་རཀྵ་ཧཱུྃ། ཞེས་མོས་ལ། བགེགས་རིགས་སྟོང་ཕྲག་བརྒྱད་ཅུ་ཞི་བ་དང་། །སོགས་ཤིས་པ་བརྗོད་པ་ཇི་ལྟར་རིགས་པས་མཐའ་བརྒྱན་པར་བྱའོ། །ཅེས་པའང་འཇམ་དབྱངས་བློ་གྲོས་ཆོས་འཕེལ་གྱི་གསུང་བསྐུལ་བཞིན། སྔགས་བན་རྡོ་རྗེ་དྲག་པོ་རྩལ་གྱིས་བདེ་ཆེན་པདྨ་འོད་གླིང་དུ་བྲིས་པ་འགྲོ་ཀུན་བདུད་སྡེའི་གཡུལ་ལས་རྣམ་པར་རྒྱལ་བར་གྱུར་ཅིག