རྟེན་ལ་མེ་ཏོག་འབུལ་ན།

༄༅། །རྟེན་ལ་མེ་ཏོག་འབུལ་ན། དེ་བཞིན་གཤེགས་པ་མེ་ཏོག་དཔལ་ལ་ཕྱག་འཚལ་ལོ། །ཏདྱ་ཐཱ། པུཥྤེ་པུཥྤེ་སུ་པུཥྤེ་ཡེ་སྭཱ་ཧཱ། ན་མོ་བྷ་ག་ཝ་ཏེ་པུཥྤ་ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཱཡ་ཨརྷ་ཏེ་སམྱཀྶཾ་བུདྡྷ་ཡ། ཏདྱ་ཐཱ། ཨོཾ་པུཥྤེ་པུཥྤེ་མ་ཧཱ་པུཥྤེ། སུ་པུཥྤེ་པུཥྤ་ཨུཏྦྷ་ཝེ། པུཥྤ་སམྦྷ་ཝེ། པུཥྤ་ཨ་བ་ཀི་ར་ཎི་སྭཱ་ཧཱ། མེ་ཏོག་ཕལ་ཆེར་མེ་ཏོག་བླ་བྲེ་དང་། །མེ་ཏོག་བཀོད་པའི་འོད་ཟེར་རབ་བཀྱེ་ཞིང་། །མེ་ཏོག་སྣ་ཚོགས་ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་རྒྱལ་བ་སྲས་བཅས་མཆོད། །ཕུལ་བྱུང་བརྟན་གཡོ་སྲིད་པའི་མཛེས་ཆོས་དཔལ། །བྱེད་པོའི་ཕྱག་རྒྱས་གཅིག་ཏུ་བསྡོམས་པ་ལྟའི། །དབང་ལྔ་སིམ་པར་བྱེད་པའི་ལྷ་རྫས་འདི། །འགྲོ་ལ་ཕན་ཕྱིར་བརྩེ་བས་བཞེས་སུ་གསོལ། །ཆོས་དབྱིངས་དང་མཉམ་ཕྱོགས་དང་དུས་ཀྱི་མཐར། །ཡོངས་ཁྱབ་པདྨའི་འོད་ཟེར་རྩེ་མོ་ལས། །ཟག་མེད་མཆོད་སྤྲིན་ནམ་མཁའ་མཛོད་ཀྱི་སྒོ། །ཀུན་བཟང་སྨོན་ལམ་སྟོབས་བཞིན་འབྱུང་གྱུར་ཅིག །འོད་ཟེར་རྩེ་ལས་སྤྲུལ་པའི་སངས་རྒྱས་ཚོགས། །ཐེག་གསུམ་ཆོས་སྒྲ་སྒྲོགས་པས་ཞིང་ཀུན་ཁེངས། །འགྲོ་ཚོགས་རིགས་ཁམས་ས་བོན་གསོས་བཏབ་པས། །རྣམ་གྲོལ་ཡོན་ཏན་འདབ་སྟོང་བཞད་གྱུར་ཅིག །བདག་ཀྱང་སྐྱེ་ཀུན་པདྨའི་སྙིང་པོ་ལས། །བརྫུས་སྐྱེས་རྒྱལ་རྣམས་མཆོད་ཅིང་དམ་ཆོས་འཛིན། །སེམས་ཅན་མགུ་བྱས་རྫོགས་སྨིན་སྦྱངས་མཐར་ཕྱིན། །འཇིག་རྟེན་ཀུན་ཏུ་པད་དཀར་ལྟར་འཕགས་ཤོག །བདེ་གཤེགས་སྲས་བཅས་ཀུན་གྱི་ཐུགས་བསྐྱེད་དང་། །མཛད་པ་སྨོན་ལམ་མཁྱེན་བརྩེ་ནུས་པའི་ཚུལ། །བླ་མེད་ཡེ་ཤེས་སྒྱུ་འཕྲུལ་ཇི་འདྲ་བ། །དེ་འདྲ་ཁོ་ནར་བདག་སོགས་འགྱུར་བར་ཤོག །ཅེས་གོང་འོག་གི་ཤླཽ་ཀ་གཉིས་མདོ་དང་བླ་མའི་གསུང་ལས་འབྱུང་བ་ལ་བར་གྱི་ཚིགས་སུ་བཅད་པ་བཞི་འཇམ་དབྱངས་བློ་གྲོས་རྒྱ་མཚོས་བསྣན་པ་སྟེ། དེ་ལྟར་སེམས་དྭངས་ཤིང་གུས་པའི་སྒོ་ནས་དཀོན་མཆོག་གསུམ་ལ་མེ་ཏོག་གི་མཆོད་པ་བགྱིས་པའི་ཕན་ཡོན་ནི་མཐའ་ཡས་ཏེ། མདོ་སྡེ་ལས་རྣམ་འབྱེད་ལས། དེ་བཞིན་གཤེགས་པའི་མཆོད་རྟེན་ལ་མེ་ཏོག་ཕུལ་བའི་ཕན་ཡོན་བཅུ་ཡོད་དེ། བཅུ་གང་ཞེ་ན། འཇིག་རྟེན་ན་མེ་ཏོག་ལྟ་བུར་འགྱུར་བ་དང་། དེའི་སྣའི་དབང་པོ་ནམ་ཡང་ཉམས་པར་མི་འགྱུར་བ་དང་། ལུས་ལ་དྲི་ང་བ་མེད་པར་འགྱུར་བ་དང་། ལུས་ལ་དྲི་ཞིམ་པོ་འབྱུང་བར་འགྱུར་བ་དང་། ཕྱོགས་དང་ཕྱོགས་མཚམས་རྣམས་སུ་དེའི་ཚུལ་ཁྲིམས་ཀྱི་དྲི་ངད་ལྡང་བར་འགྱུར་བ་དང་། འཇིག་རྟེན་པ་རྣམས་འཁོར་ཞིང་འདུ་བར་འགྱུར་བ་དང་། ཡིད་དུ་འོང་བའི་ཆོས་རྣམས་ཐོབ་པར་འགྱུར་བ་དང་། ལོངས་སྤྱོད་ཆེ་བར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བ་སྟེ། ཆོས་བཅུ་པོ་དེ་དག་ནི་དེ་བཞིན་གཤེགས་པའི་མཆོད་རྟེན་ལ་མེ་ཏོག་ཕུལ་བའི་ཕན་ཡོན་ནོ། །ཞེས་དང་། ལས་ཀྱི་རྣམ་པར་འགྱུར་བ་ཞེས་པའི་མདོ་ལས། ཡང་དག་པར་གཤེགས་པའི་མཆོད་རྟེན་ལ་མེ་ཏོག་ཕྲེང་བ་ཕུལ་ན་དེའི་ལེགས་པ་བཅུ་ཐོབ་པར་འགྱུར་ཏེ། བཅུ་གང་ཞེ་ན། འཇིག་རྟེན་གྱི་ནང་ན་མེ་ཏོག་གི་ཕྲེང་བ་དང་འདྲ་བར་ལུས་ལ་མནམ་པའི་དྲི་ཞིམ་པར་འགྱུར། ལུས་གཙང་བར་འགྱུར། རྟག་ཏུ་དྲི་ཞིམ་པར་འགྱུར། རྒྱན་དང་ལྡན་པར་འགྱུར། འཁོར་རྣམས་ཉེ་བར་འགྱུར། ཕོ་མོ་ཐམས་ཅད་ཀྱིས་ཡིད་དུ་འོང་བར་འགྱུར། ལོངས་སྤྱོད་མང་དུ་འགྱུར། མཐོ་རིས་སུ་སྐྱེ་བར་འགྱུར། མྱུར་དུ་མྱ་ངན་ལས་འདའ་བར་འགྱུར་རོ། །ཞེས་དང་། སྤྱན་རས་གཟིགས་ཀྱི་མདོ་ལས། སུ་ཞིག་དགའ་བའི་ཡིད་ཀྱིས་མེ་ཏོག་བླང་། །དད་སྐྱེས་འཇིག་རྟེན་མགོན་ལ་ཆར་དུ་གཏོར། །དེ་ནི་མི་ཡི་འཇིག་རྟེན་བསོད་ནམས་ལྡན། །རྒྱལ་སྲིད་གནས་ནས་རྒྱལ་བ་མཆོག་བཀུར་འགྱུར། །མྱ་ངན་བསྐམས་ཤིང་ཐ་བ་དྲིར་ལྡན་ལུས། །ཡན་ལག་ལེགས་གནས་མཚུངས་མེད་ཐོབ་པར་འགྱུར། །སྐྱེ་བོ་མང་པོ་བལྟ་བའི་འོས་ཡིན་ཏེ། །དམྱལ་བ་དགྲ་རྩ་འདོད་པ་སྤང་བར་འགྱུར། །སྤྱད་པ་རྣམ་པར་སྤྱོད་ཚེ་འདོད་པ་ལ། །ངན་སྐྱུགས་ཁུང་ལྟར་སྨད་པར་ཤེས་པར་འགྱུར། །ཚངས་སྤྱོད་དགེ་བ་ཁྱད་པར་འཕགས་པ་སྤྱོད། །དགའ་བའི་སེམས་ཀྱིས་རྟག་ཏུ་སྤྱོད་པར་འགྱུར། །བསྐལ་པ་མཐའ་ཡས་མང་དུ་དེ་ཁ་ནས། །རབ་འཛེས་ཨུཏྤལ་བསུང་ནི་འབྱུང་བར་འགྱུར། །དེ་ཡི་ལུས་ནི་གསེར་གྱི་མདོག་འདྲ་ཞིང་། །ཙནྡན་ལྟ་བུའི་དྲི་ཞིམ་ངད་ཀྱང་འབྱུང་། །སྤྱད་པ་རྣམ་པར་སྤྱོད་ཚེ་ཁྲོ་བ་དང་། །ཐ་བ་དྲི་སྐྱོན་གཏི་མུག་གནོད་མི་བྱེད། །དམན་པ་མེད་པའི་སེམས་ཀྱིས་དབུགས་ཕྱིན་སྙེད། །བག་ཡོད་ལྷ་ཡི་ནང་ན་རྒྱལ་པོ་འཐོབ། །ཅེས་དང་། མེ་ཏོག་ཕྲེང་བ་བྱས་ནས་སུ། །མཆོད་རྟེན་རྣམས་ལ་སུས་འབུལ་བ། །དེ་ནི་ནམ་ཡང་ཕོངས་མི་འགྱུར། །མི་ཡི་ནང་ནས་ཤི་འཕོས་ནས། །སུམ་ཅུ་རྩ་གསུམ་འགྲོ་བར་འགྱུར། །དེར་ནི་རིན་ཆེན་སྣ་ཚོགས་ཀྱིས། །གཞལ་མེད་ཁང་པ་འཐོབ་པར་འགྱུར། །ཞེས་དང་། སྦྱིན་པའི་ཕན་ཡོན་བསྟན་པ་ལས། མེ་ཏོག་སྦྱིན་པ་བྱིན་ན་རྣམ་པར་སྨིན་པ་བྱང་ཆུབ་ཀྱི་ཡན་ལག་འཐོབ་པར་འགྱུར་རོ། །ཕྲེང་བ་བྱིན་ན་རྣམ་པར་སྨིན་པ་འདོད་ཆགས་དང་ཞེ་སྡང་དང་གཏི་མུག་གི་དྲི་མ་རྣམ་པར་དག་པ་རབ་ཏུ་འཐོབ་པར་འགྱུར་རོ། །ཞེས་དང་། མེ་ཏོག་མེ་ཏོག་ཕྲེང་བྱིན་པས། །གང་དང་གང་དུ་སྐྱེ་བ་དེར། །རྒྱལ་པོ་བློན་པོ་ཞང་བློན་གྱིས། །རྟག་ཏུ་མཆོད་ཅིང་རིམ་གྲོ་བྱེད། །ཅེས་དང་། མཆོད་རྟེན་བསྐོར་བའི་ཚིགས་བཅད་ལས། མཁས་པ་གང་གིས་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་མེ་ཏོག་སིལ་མ་སྤུངས། །འཛམ་བུའི་ཆུ་ཀླུང་གསེར་སྣོད་འབུམ་བཞག་པ། །དེ་ནི་དེ་དང་མཚུངས་པ་ཡོད་མ་ཡིན། །མཁས་པ་གང་གིས་སངས་རྒྱས་མཆོད་རྟེན་ལ། །དགའ་བའི་སེམས་ཀྱིས་མེ་ཏོག་ཕྲེང་བ་ཐོགས། །འཛམ་བུའི་ཆུ་ཀླུང་གསེར་ཁལ་བྱེ་བ་གཉིས། །དེ་ནི་དེ་དང་མཚུངས་པ་ཡོད་མ་ཡིན། །ཞེས་དང་། གསལ་རྒྱལ་གྱི་ཚིགས་བཅད་ལས། སུ་དག་དཀོན་མཆོག་གསུམ་ལ་མེ་ཏོག་དང་། །འབྲས་བུ་གསར་ཐོག་བྱུང་བ་འབུལ་བྱེད་པ། །དེ་དག་འགྲོ་བ་རྣམས་སུ་འཁོར་བ་ན། །རོ་མཆོག་ཀུན་ཐོབ་མི་བརྫི་སྟོབས་དང་ལྡན། །ཕྲེང་བ་མེ་ཏོག་རྒྱ་ཆེན་ཆར་རྣམས་ཀྱིས། །སུ་དག་འདིར་ནི་རྒྱལ་བའི་གཟུགས་ལ་མཆོད། །དེ་དག་ལྷ་དང་མི་ཡི་འཇིག་རྟེན་དུ། །ཆ་བྱད་ཡིང་འོད་སྣ་ཚོགས་ལེགས་པར་བརྒྱན། །ཞེས་དང་། གཞན་ཡང་མེ་ཏོག་བརྩེགས་པའི་གཟུངས་ལས། རྟེན་ལ་མེ་ཏོག་འབུལ་ན་བསྐལ་པ་བརྒྱ་ཕྲག་སྟོང་དུ་ངན་འགྲོ་ལོག་པར་ལྟུང་བའི་གནས་སུ་མི་སྐྱེ་བར་གསུངས་པ་དང་། པད་དཀར་ལས། སངས་རྒྱས་ལ་དམིགས་ནས་མེ་ཏོག་རྡོག་གཅིག་ཙམ་ནམ་མཁར་གཏོར་ཡང་བྱང་ཆུབ་ཐོབ་པར་གསུངས་པ་དང་། མདོ་གཞན་ལས། སངས་རྒྱས་ཀྱི་ཞིང་དུ་པདྨའི་སྙིང་པོ་ལས་བརྫུས་ཏེ་སྐྱེ་བའི་རྒྱུའི་གཙོ་བོར་གསུངས་པ་སོགས་ཕན་ཡོན་མཐའ་ཡས་པས་བདག་ལེགས་སུ་འདོད་པ་དག་གིས་བྱ་སླ་ལ་དོན་ཆེ་བ་འདི་ཙམ་ཡང་ཡལ་བར་མི་འདོར་བར་དལ་འབྱོར་གྱི་རྟེན་ལ་སྙིང་པོ་ལེན་པར་གསོལ་བ་འདེབས་པ་ལགས་ན་དེ་དེ་བཞིན་དུ་མཛད་དུ་གསོལ།