རྩ་གསུམ་ཚོགས་མཆོད་པདྨའི་ཟིལ་དངར།

༄༅། །རྩ་གསུམ་ཚོགས་མཆོད་པདྨའི་ཟིལ་དངར་བཞུགས། ན་མོ་གུ་རུ་དེ་བ་ཌཱ་ཀི་ཡེ། འདིར་དབང་ཐོབ་ཅིང་དམ་ཚིག་ལ་གནས་པའི་སྒྲུབ་པ་པོས། རང་གི་རྩ་བའི་ཡི་དམ་ལྟ་བུའི་ལས་གཞུང་གང་ལ་བརྟེན་པའི་བདག་གི་རྣལ་འབྱོར་སྔོན་དུ་སོང་ནས། ཅི་འབྱོར་པའི་དམ་ཚིག་གི་རྫས་རྣམས་ཚོགས་པར་བྱས་ཏེ། ཐོག་མར་བྱིན་གྱིས་བརླབ་པ་ནི། ༀ་སརྦ་དྲ་བྱཾ་ཤྭ་ངྷ་ཡེ་ཧཱུྃ་ཕཊ། ཧཱུྃ། རྃ་ཡྃ་ཁྃ། རང་ཉིད་གཉུག་མའི་ལྷར་གསལ་ཐུགས་ཀ་ནས། །རྃ་ཡྃ་ཁྃ་འཕྲོས་མ་དག་ཉེས་སྐྱོན་སྦྱངས། །ཚོགས་རྫས་ངོ་བོ་ཤ་ལྔ་བདུད་རྩི་ལྔ། །འདོད་ཡོན་ཟག་མེད་ནམ་མཁའ་མཛོད་དུ་གྱུར། །ༀ་ཨཱཿཧཱུྃ་ཧ་ཧོ་ཧྲཱིཿདེ་ནས་སྤྱན་འདྲེན་པ་ནི། ཧཱུྃ། སྔོན་གྱི་བསྐལ་པའི་དང་པོ་ལ། །ཨོ་རྒྱན་ཡུལ་གྱི་ནུབ་བྱང་མཚམས། །པདྨ་གེ་སར་སྙིང་པོ་ལ། །ཡ་མཚན་མཆོག་གི་དངོས་གྲུབ་བརྙེས། །པདྨ་འབྱུང་གནས་ཞེས་སུ་གྲགས། །འཁོར་དུ་བརྒྱུད་གསུམ་བླ་མ་དང་། །ཡི་དམ་མཁའ་འགྲོ་ཆོས་སྲུང་བསྐོར། །ཁྱེད་ཀྱི་རྗེས་སུ་བདག་སྒྲུབ་ཀྱིས། །བྱིན་གྱིས་བརླབ་ཕྱིར་གཤེགས་སུ་གསོལ། །གནས་ཁང་འདི་རུ་བྱིན་ཕོབ་ལ། །ཚོགས་རྫས་ཟག་མེད་བདུད་རྩིར་བསྒྱུར། །སྒྲུབ་མཆོག་བདག་ལ་དབང་བཞི་བསྐུར། །བགེགས་དང་ལོག་འདྲེན་བར་ཆད་སོལ། །མཆོག་དང་ཐུན་མོང་དངོས་གྲུབ་སྩོལ། །ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་གུ་རུ་ངྷེ་བ་ངྷཱ་ཀི་ནཱི་ཤྲཱི་ངྷརྨ་པཱ་ལ་བ་སུ་དེ་ཝ་ནི་ངྷི་པ་ཏི་ས་པ་རི་ཝཱ་ར་བཛྲ་ས་མ་ཡ་ཛཿཛཿདེ་ནས་ཚོགས་རྫས་ཆ་གསུམ་དུ་སྤྲོས་ལ། དང་པོ་མཆོད་པ་ནི། འདོད་ཡོན་ལྔའི་རང་བཞིན་དུ་དམིགས་ལ། ཧཱུྃ། བླ་མེད་མཆོག་གི་མཆོད་པ་དམ་པ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་བཞིན་ལས་ཅི་བདེར་བཞེས་སུ་གསོལ། །ཧྲཱིཿརྩ་གསུམ་འདུས་ཞལ་ཨོ་རྒྱན་ཐོད་ཕྲེང་རྩལ། །བརྒྱུད་གསུམ་རིག་འཛིན་བླ་མའི་ཚོགས་རྣམས་ལ། །ཟག་མེད་འདོད་ཡོན་ཚོགས་མཆོད་འདི་འབུལ་བས། །དབང་བསྐུར་བྱིན་རློབས་རྡོ་རྗེའི་ཡེ་ཤེས་བསྐྱེད། །འདུས་པ་བདེ་དགྱེས་མདོ་སྒྱུ་སྒྲུབ་སྡེ་བརྒྱད། །རྒྱུད་སྡེ་བཞི་དྲུག་ཡི་དམ་ལྷ་ཚོགས་ལ། །ཟག་མེད་འདོད་ཡོན་ཚོགས་མཆོད་འདི་འབུལ་བས། །མཆོག་དང་ཐུན་མོང་འདོད་དགུའི་དངོས་གྲུབ་སྩོལ། །ཕག་ཁྲོས་སེང་གསུམ་རིགས་བཞིའི་ཌཱ་ཀི་སོགས། །གནས་གསུམ་དཔའ་བོ་མཁའ་འགྲོའི་ཚོགས་རྣམས་ལ། །ཟག་མེད་འདོད་ཡོན་ཚོགས་མཆོད་འདི་འབུལ་བས། །བར་ཆད་ཀུན་སོལ་རྣམ་བཞིའི་ཕྲིན་ལས་སྒྲུབས། །མ་མགོན་གཟའ་རྡོར་ཞིང་སྐྱོང་དབང་མོ་སོགས། །རྒྱུད་གསུམ་དམ་ཅན་སྲུང་མའི་ཚོགས་རྣམས་ལ། །ཟག་མེད་འདོད་ཡོན་ཚོགས་མཆོད་འདི་འབུལ་བས། །འཁོར་སྲུང་རྐྱེན་བཟློག་བཅོལ་པའི་ཕྲིན་ལས་མཛོད། །ཛམ་ལྷ་རིགས་ལྔ་རྒྱལ་ཆེན་རྣམ་ཐོས་སྲས། །ནོར་ལྷ་གཏེར་བདག་འཁོར་དང་བཅས་རྣམས་ལ། །ཟག་མེད༴ ། ཚེ་དབང་ལོངས་སྤྱོད་འདོད་དགུ་ཆར་བཞིན་བསྙིལ། །དགེ་བསྙེན་ཉེར་གཅིག་བརྟན་སྐྱོང་ཡ་མའི་ཚོགས། །ཡུལ་ལྷ་གཞི་གནས་གཏེར་བདག་འཁོར་བཅས་ལ། །ཟག་མེད༴ གངས་ལྗོངས་བདེ་སྐྱིད་རྣལ་འབྱོར་སྡོང་གྲོགས་མཛོད། །མདོར་ན་ཨོ་རྒྱན་རིག་འཛིན་བརྒྱུད་བཅས་ཀྱི། །སྤྱན་སྔར་ཞལ་བཞེས་དམ་ཚིག་ཅན་རྣམས་ལ། །ཟག་མེད་འདོད་ཡོན་ཚོགས་མཆོད་འདི་འབུལ་བས། །དམ་བཅའ་རྗེས་དགོངས་སྒྲུབ་པའི་གྲོགས་མཛོད་ཅིག །དམ་ཚིག་གཅིག་པའི་རྡོ་རྗེ་མཆེད་ལྕམ་དང་། །བདེ་གཤེགས་སྙིང་པོའི་རང་བཞིན་འགྲོ་ཀུན་ལ། །ཟག་མེད་འདོད་ཡོན་ཚོགས་མཆོད་འདི་འབུལ་བས། །ཉེས་ལྟུང་ཀུན་བྱང་དོན་གཉིས་འགྲུབ་པར་མཛོད། །མ་ཧཱ་ག་ཎ་ཙཀྲ་པཱུ་ཛ་ཧོཿབར་པ་བཤགས་པ་བྱ་བ་ནི། ཚོགས་རྫས་ཡེ་ཤེས་བདུད་རྩིར་དམིགས་ལ། ཧོཿརྡོ་རྗེ་སློབ་དཔོན་མཆེད་དང་ལྕམ་དྲལ་དང་། །ཡི་དམ་མཁའ་འགྲོ་ཆོས་སྲུང་དཀར་ཕྱོགས་སྐྱོང་། །ཡེ་ཤེས་སྤྱན་ལྡན་ལེགས་ཉེས་སྟངས་འཛིན་རིགས། །ཀུན་ནས་འདུས་པ་རྒྱ་མཚོ་དགོངས་སུ་གསོལ། །བདག་ནི་མི་ཤེས་ཉོན་མོངས་བག་མེད་པས། །སྡོམ་པ་གསུམ་གྱི་སྲུང་མཚམས་འདས་ཉམས་རལ། །བཅས་དང་རང་བཞིན་ཉམས་པའི་ཉེས་ལྟུང་རིགས། །མི་འོས་ལས་ལ་ཞུགས་ཀུན་མཐོལ་ལོ་བཤགས། །ཁྱད་པར་ལྟ་སྤྱོད་ཏིང་འཛིན་དམན་པའི་དྲིས། །སྣོད་བཅུད་ཕུང་ཁམས་སྐྱེ་མཆེད་ལྷར་མ་ཤེས། །འགྲོ་འོང་སྲོག་རྩོལ་{ཅོལ}དབུ་མར་བསྡམས་མ་ནུས། །བདེ་སྟོང་དགའ་བཞིའི་ཡེ་ཤེས་ལམ་མ་སློབ་། །རིག་སྟོང་བཞི་པའི་ཡེ་ཤེས་ངོས་མ་ཟིན། །ཐ་མལ་གཟུང་འཛིན་འཁྲུལ་པའི་གཞན་དབང་གིས། །དབང་བཞི་སོ་སོའི་དམ་ལས་འགལ་བ་དང་། །བཟའ་བཅའ་བསྲུང་བའི་བརྟུལ་ཞུགས་ལ་སོགས་པ། །གཞུང་བཞིན་མ་འགྲུབ་བགྱི་འོས་ལས་འགལ་དང་། །ཉམས་དང་ཚོགས་འདྲེས་ཉམས་པ་བསྐང་བ་ཡི། །ཉམས་གྲིབ་སྐྱོན་གྱིས་གོས་པར་གྱུར་ཏོ་འཚལ། །འཕྲལ་དང་ཡུན་གྱི་སྒྲིབ་གྱུར་ཇི་སྙེད་པ། །དངོས་སུ་བགྱིས་དང་བགྱིད་དུ་སྩལ་པ་དང་། །ཡི་རངས་བགྱིས་སོགས་ནོངས་པ་གང་ལགས་པ། །སྙིང་ནས་འགྱོད་པས་གདུང་བའི་སྨྲེ་སྔགས་བཅས། །ཚོགས་མཆོད་ཡེ་ཤེས་བདུད་རྩིའི་སྤྲིན་ཆེན་པོས། །མཐོལ་ཞིང་བཤགས་སོ་བྱང་ཞིང་དག་པར་མཛོད། །ཡེ་ཤེས་སྐུ་མཆོག་མཚན་དཔེའི་ལང་ཚོ་ཅན། །ཉི་ལྟར་རྣམ་དག་ཟླ་ལྟར་རབ་གསལ་བ། །སྒྲིབ་མེད་རྩ་གསུམ་རྒྱལ་བའི་དཀྱིལ་འཁོར་ཆེ། །མངོན་སྣང་དགྱེས་པའི་དབུགས་དབྱུང་སྩལ་དུ་གསོལ། །ཕྱི་མཆོད་འདོད་ཡོན་ཉེར་སྤྱོད་སྐར་ལྟར་བཀྲམ། །ནང་མཆོད་སྨན་རཀ་གཏོར་ཚོགས་མཚོོ་ལྟར་བསྐྱིལ། །གསང་བ་བདེ་སྟོང་ལྷ་མོའི་མཆོད་སྤྲིན་སྤྲོ། །དག་པ་རབ་འབྱམས་ཆེན་པོའི་མཆོད་པའི་གར། །ཅིར་སྣང་ཀུན་བཟང་ཕྱག་རྒྱའི་རོལ་མོའི་ཚོགས། །མི་འཛད་ནམ་མཁའ་མཛོད་ཀྱི་འཁོར་ལོ་ཆེས། །རིགས་ཀུན་ཁྱབ་བདག་རྩ་བའི་བླ་མ་དང་། །རྒྱ་བོད་རིག་འཛིན་གྲུབ་པའི་འཁོར་ལོས་སྒྱུར། །མཆེད་དང་ལྕམ་དྲལ་འདུས་པ་རྒྱ་མཚོ་དང་། །རྒྱུད་སྡེ་བཞི་དྲུག་ཡི་དམ་མཁའ་འགྲོའི་ཚོགས། །རྡོ་རྗེའི་ཆོས་སྲུང་ནོར་ལྷ་གཏེར་གྱི་བདག །ཡུལ་ལྷ་གཞི་བདག་དཀར་ཕྱོགས་སྐྱོང་ལ་སོགས། །སྣང་སྲིད་མགྲོན་དུ་གྱུར་པ་ཇི་སྙེད་པ། །མི་ཕྱེད་རོ་མཉམ་ཆེན་པོའི་ཀློང་དུ་བསྐང་། །ཉམས་ཆག་འགལ་འཁྲུལ་མ་ལུས་བྱང་གྱུར་ཅིག །མཆོད་ཡུལ་གོང་མ་རྣམས་ཀྱིས་བྱིན་གྱིས་རློབས། །བར་མ་རྣམས་ཀྱིས་སྲུང་སྐྱོབ་སྡོང་གྲོགས་མཛོད། །སྦྱིན་ཡུལ་འོག་མ་རྣམས་ཀྱི་ཤ་འཁོན་བྱང་། །སྡུག་བསྔལ་ཀུན་བྲལ་བདེ་དགའ་རྒྱ་མཚོས་འཚོ། །ཀུན་ཀྱང་ཐེག་པ་མཆོག་གི་སྣོད་གྱུར་ཅིག །དཀོར་དང་ལོག་འཚོ་ཉམས་པའི་ཉེས་ཀུན་ཞི། །རྨི་ལམ་ལྟས་ངན་བྱད་ཕུར་རྦོད་གཏོང་བཟློག །དུས་མིན་འཆི་བའི་འཇིགས་པ་ཀུན་ཞི་ཞིང་། །ལུས་རྟེན་འདི་ལ་བྱང་ཆུབ་མ་ཐོབ་བར། །ཕྱི་ནང་བར་ཆད་འཚེ་བ་མི་འབྱུང་ཞིང་། །ཚེ་དང་སྒྲུབ་པ་མཐའ་རུ་ཕྱིན་པ་དང་། །དོན་གཉིས་བསམ་པ་ལྷུན་གྱིས་འགྲུབ་བྱིན་རློབས། །རྒྱལ་བསྟན་སྤྱི་དང་ཁྱད་པར་སྒྲུབ་བརྒྱུད་བརྒྱད། །ཤིང་རྟའི་རིང་ལུགས་ཕྱོགས་མཐར་རྒྱས་པ་དང་། །དེར་འཛིན་ཞབས་བརྟན་བཤད་སྒྲུབ་ཕྲིན་ལས་རྒྱས། །བོད་ཡུལ་མཐའ་དབུས་བདེ་སྐྱིད་འཕེལ་བར་མཛོད། །ལམ་ལ་གནས་པའི་རྣལ་འབྱོར་བདག་ཅག་རྣམས། །དམ་ཚིག་མི་ཉམས་བསྙེན་སྒྲུབ་མཐའ་རུ་ཕྱིན། །དབང་བཞིའི་ལམ་ཁྱེར་མཐར་ཕྱིན་གཞན་དོན་འགྲུབ། །འབྲེལ་ཚད་དོན་ལྡན་འཁོར་མཚོ་དོང་སྤྲུག་ཤོག །བདག་ལ་ལྟོས་པའི་འཁོར་སློབ་ཡོན་བདག་སོགས། །ཚེ་དང་ཆོས་འཕེལ་ལེགས་ཚོགས་བསམ་ཀུན་འགྲུབ། །བར་ཆད་ཀུན་ཞི་ཚོགས་གཉིས་དཔལ་གྱིས་འཚོ། །མཐར་ཐུག་རྣམ་མཁྱེན་གོ་འཕང་མངོན་བྱེད་ཤོག །ཐོག་མེད་ལས་ཀྱི་འབྲེལ་བའི་ཕ་མ་ཀུན། །མཐོ་རིས་ཡོན་ཏན་བདུན་གྱིས་ལེགས་འབྱོར་ཞིང་། །རླབས་ཆེན་རྒྱལ་སྲས་སྤྱོད་པ་ལ་བརྟེན་ནས། །རྫོགས་སྨིན་མཐར་ཕྱིན་སངས་རྒྱས་མྱུར་འགྲུབ་ཤོག །ཡིག་བརྒྱ་བཟླ། ཐ་མ་བསྒྲལ་བ་ནི། ཚོགས་ཐ་མ་ལ། ཨེ་ནྲྀ་ཏྲི་སརྦ་ཤ་ཏྲུན་བིགྷ་ན་ཛཿཧཱུྃ་བྃ་ཧོཿས་དམིགས་བྱ་དགུག་བསྟིམས་བྱས་ལ། ཧཱུྃ། མ་རིག་ཉོན་མོངས་དུག་ལྔའི་དགྲ་བོ་རྣམས། །ཡེ་ཤེས་ལྔ་ལྡན་རྡོ་རྗེའི་མཚོན་ཆས་བསྒྲལ། །དུག་གསུམ་རང་བཞིན་ཤ་ཁྲག་རུས་པའི་ཚོགས། །ཞལ་དུ་བསྟབ་བོ་མཉམ་ཉིད་ཀློང་དུ་བཞེས། །མཱ་ར་ཡ་ཕཊ། མ་ཧཱ་མཾ་ས་རཀྟ་ཀིཾ་ནི་རི་ཏི་ཨ་མྲྀ་ཏ་པཱུ་ཛ་ཁཱ་ཧི། དེ་ནས་རོལ་བ་ནི། བདག་ལུས་ཕུང་ཁམས་གདན་གསུམ་ཡོངས་རྫོགས་ལྷ། །རྩ་རླུང་ཐིག་ལེ་རང་བྱུང་བདེ་ཆེན་ཞིང་། །ཨ་ཧཾ་འབར་འཛག་ཟག་མེད་བདེ་སྟོང་རྫས། །དུ་མ་རོ་གཅིག་ཀློང་དུ་ཨེ་མ་ཧོ། །ཞེས་རོལ། རྗེས་ལྷག་མ་རྣམས་གསོག་འཇོག་མེད་པར་བསྡུས་ལ། ༀ་ཨཱཿཧཱུྃ་ཧ་ཧོ་ཧྲཱིཿས་བརླབས། ཕེཾ་གྱི་སྒྲས་མགྲོན་རྣམས་དགུག་ལ། ཧཱུྃ། ལངྐ་གིང་དང་འབར་མ་དབང་ཕྱུག་སོགས། །ལྷག་མའི་དམ་ཚིག་ལ་གཏོགས་མགྲོན་རྣམས་ལ། །ལྷག་གཏོར་འདོད་ཡོན་ཟག་མེད་འདི་འབུལ་བས། །ཐ་ཚིག་རྗེས་དགོངས་བཅོལ་བའི་ཕྲིན་ལས་མཛོད། །ༀ་ཨུ་ཙིཥྚ་བྷ་ལིངྟ་ཁཱ་ཧི། ཞེས་གཙང་སར་འབུལ། རྗེས་ཀྱི་བྱ་བ་རྣམས་སྤྱི་ལྟར་བྱའོ། །ཞེས་པའང་བཟང་ལུང་པདྨ་ལྷ་རྩེར་ལྕགས་བྱ་སྟོན་ཟླ་ར་བའི་དམར་ཕྱོགས་མཁའ་འགྲོ་འདུ་བའི་དུས་ཆེན་ཉིན་ཉེ་བར་མཁོ་བས་མཚམས་སྦྱར་ཏེ་བྱ་བྲལ་བ་པདྨ་རྣམ་པར་རྒྱལ་བའི་སྡེས་གང་ཤར་སྐད་ཅིག་ཉིད་ལ་བཅོས་མེད་དུ་བྲིས་པ་དགེ །ཚོགས་འབུམ་ཐེར་སོགས་གྲངས་གསོག་པའི་ཚེ་ཤིན་ཏུ་བསྡུས་པར་འདོད་ན་གོང་གི་ཚོགས་རྒྱས་པ་སོང་ཕྲལ། རྫས་རྣམས། རྃ་ཡྃ་ཁྃ། ༀ་ཨཱཿཧཱུྃ་གིས་བྱིན་གྱིས་བརླབས་ལ། རབ་འབྱམས་རྩ་གསུམ་དཀྱིལ་འཁོར་ལྷ་ཚོགས་གཤེགས། །འདོད་ཡོན་ལྔ་ལྡན་ཟག་མེད་ཚོགས་མཆོད་འབུལ། །ཐུགས་དམ་བསྐང་ཞིང་ཉམས་ཆག་འགལ་འཁྲུལ་བཤགས། །གཟུང་འཛིན་དབྱིངས་སྒྲོལ་མཆོག་ཐུན་དངོས་གྲུབ་སྩོལ། །ༀ་བཛྲ་ས་ཏྭ་ཨཱཿཞེས་གྲངས་བསགས་མཐར། ཚོགས་ལ་རོལ་ཞིང་ལྷག་མ་བསྔོ་བ་སོགས་རྗེས་སྤྱི་ལྟར་བྱའོ། །སྐབས་དེར་གཏོར་འབུལ་སྤྲོ་ན། ཧཱུྃ། རྒྱལ་བ་རིག་འཛིན་བརྒྱུད་པའི་སྤྱན་ལྔ་རུ། །ཐུགས་དམ་ཞལ་བཞེས་བསྟན་པ་སྲུང་མཛད་པའི། །ཡེ་ཤེས་ལས་དང་འཇིག་རྟེན་ཚུལ་འཛིན་རྣམས། །མཆོད་གཏོར་འདི་བཞེས་བཅོལ་པའི་ཕྲིན་ལས་མཛོད། །མ་ཧཱ་བ་ལིངྟ་ཁཱ་ཧི། ཞེས་དབུལ་ལོ། །