ཞིང་སྐྱོང་དབང་མོ་ལ་ཕྲིན་ལས་སུ་བཅོལ་བ་དཔག་བསམ་གསར་པའི་འཁྲི་ཤིང་།

༄༅། །ཞིང་སྐྱོང་དབང་མོ་ལ་ཕྲིན་ལས་སུ་བཅོལ་བ་དཔག་བསམ་གསར་པའི་འཁྲི་ཤིང་བཞུགས། བྷྱོཿསྐྱེ་མེད༵་ཆོས་ཀྱི་དབྱིངས་ལས་མ་གཡོས་ཀྱང་། །འགག་མེ༵ད་རང་རྩལ་བསྟན་སྲུང་མཐུ་མོ་ཆེ། །ཟོལ་མེ༵ད་གདུང་བའི་དབྱངས་ཀྱིས་འབོད་ལགས་ན། །གཡེལ་མེད༵་འདོད་པའི་འབྲས་བུ་དེང་འདིར་སྩོལ། ༡། མང་མང་འགྲོ་བའི་མགོན་གཅིག་པད་འབྱུང་རྗེའི། །ཡང་ཡང་རྡོ་རྗེའི་ཐ་ཚིག་དྲན་མཛོད་ལ། །མྱུར་མྱུར་ཕྲིན་ལས་རྣམ་བཞིའི་སྒོ་ཕྱེས་ཏེ། །ལེགས་ལེགས་བསྟན་འགྲོའི་ཕན་བདེ་སྤེལ་བར་མཛོད། ༢། མཁན་སློབ་ཆོས་རྒྱལ་སྤྲུལ་པའི་ལོ་པཎ་གྱི། །ཐུགས་བསྐྱེད་ཁྱུང་སྔོན་སྐྱེས་ཀྱིས་བསུས་པའི་མགྲོན། །ཕན་བདེའི་འདབ་སྟོང་བཞད་བྱེད་པདྨོའི་གཉེན། །ངེས་གསང་བསྟན་མཆོག་གང་ན་འདུག་ཀྱང་སྲུངས། ༣། རྒྱལ་དང་དེ་སྲས་འཕགས་པ་ཆེན་པོའི་ཚོགས། །བསམ་བཞིན་སྲིད་པའི་མྱུ་གུ་ལེགས་བཟུང་བའི། །རིས་བྲལ་མཁས་བཙུན་གྲུབ་པའི་སྐྱེས་ཆེན་རྣམས། །འཁོར་ལོ་གསུམ་གྱི་ཕྲིན་ལས་མཁའ་མཐར་དྲོངས། ༤། ངེས་འབྱུང་སོ་ཐར་ཁྲིམས་ཀྱི་རྩ་བ་བརླིང་། །གཞན་ཕན་བྱང་ཆུབ་སེམས་ཀྱི་ཡལ་འདབ་རྒྱས། །རིམ་གཉིས་འབྲས་ཁུར་ལྕི་བའི་དགེ་འདུན་སྡེའི། །སྤང་ཀློག་ཕྲིན་ལས་ཡར་ཟླའི་དཔལ་ལ་སྦྱོར། ༥། བཤད་བརྒྱུད་ཀ་ཆེན་བཅུ་དང་སྒྲུབ་བརྒྱུད་བརྒྱད། །ཤིང་རྟའི་རིང་ལུགས་མ་རྨས་ནོར་བུའི་ཚལ། །མཁས་གྲུབ་ལྷ་ཕྲུག་གཞོན་ནུས་ལེགས་མཛེས་ཤིང་། །ཀུན་ཀྱང་ལྟ་སྤྱོད་དོན་མཐུན་འབྱོར་པར་མཛོད། ༦། ངེས་འབྱུང་རླུང་གིས་སྦར་བའི་དཀའ་ཐུབ་མེས། །སྲིད་རྩའི་བུད་ཤིང་བསྲེག་ལ་ཆེས་བརྩོན་རྣམས། །མེ་ཏོག་མདའ་ཡིས་ནམ་ཡང་རྨས་མིན་པར། །གྲུབ་གཉིས་བཅུད་ལེན་སྨིན་པའི་དགའ་སྟོན་སྩོལ། ༧། མཐོ་རིས་ཡོན་ཏན་བདུན་གྱི་འཁྲི་ཤིང་རྩེར། །སྡེ་བཞིའི་འབྲས་ཁུར་ལྕི་བའི་གྲིབ་བསིལ་བསྣུམ། །སྐྱེ་དགུའི་ངལ་འཚོར་གྲུབ་པའི་ས་སྤྱོད་རྣམས། །དགེ་བཅུའི་ཁྲིམས་ཀྱི་རྩ་བ་བརླིང་པར་མཛོད། ༨། མནར་སྤྱོད་མཚོན་ཆའི་ཆད་པ་སྦྱིན་མིན་པར། །ཐབས་མཁས་འཕྲུལ་གྱིས་དྲེགས་ལྡན་སྐར་མིག་བུ། །བསྐོལ་ལ་མི་ངལ་མཛངས་བློན་ཁྱབ་འཇུག་གཟུགས། །དྲང་པོའི་བློ་གྲོས་དགེ་བའི་ཕྱོགས་སུ་དྲོངས། ༩། ལས་འབྲས་ཡིད་ཆེས་གནའ་བོའི་ཁྲིམས་ཀྱི་སྲོལ། །གཙུག་ན་རབ་བརླིང་ཨར་ཇག་ཆོམ་པོའི་རྒྱུན། །གཅོད་ལ་རབ་དགའི་གཙོ་ཕལ་དམངས་ཀྱི་རིགས། །བསོད་ནམས་དཔུང་པས་གཏོང་མིན་ཤིས་པ་སྒྲུབས། ༡༠། དབྱར་སྐྱེས་ཆུ་ཁུར་གསར་པའི་ཕྲེང་བ་ཡིས། །ཟིལ་བུར་དལ་གྱིས་འབབ་པའི་བདུད་རྩིའི་བཅུད། །ནོར་འཛིན་དཔྱིད་དུ་སྨིན་པས་ལོ་ཏོག་འབྲས། །རབ་རྒྱས་དུས་བཞིར་དགེ་བའི་དངོས་པོ་བྱིན། ༡༡། ནོར་བུ་མཆོག་ལྟར་དྭངས་པའི་འདྲེན་བྱེད་ཅན། །དབེན་པར་རྩྭ་ཆུའི་འཚོ་བའི་རི་སྐྱེས་མོ། །དག་བྱེད་གཏེར་ལ་རོལ་བའི་གསེར་མིག་སོགས། །ཉམ་ཆུང་སྲོག་གི་སྦྱིན་པ་ཁྱོད་ཀྱིས་བྱིན། ༡༢། ལྟ་ངན་ལག་པས་བསྟན་གཉིས་ཉི་ཟླའི་མིག །སྒྲིབ་ལ་མངོན་བརྩོན་ཀླ་ཀློ་བྱིན་སྐྱེས་གཙོ། །མཆོག་བྱིན་རྩེ་བརྒྱ་འབར་བས་ཕྱེ་མ་རུ། །འཐག་པའི་དཔའ་གླུ་སྲིད་ན་སྙན་པར་མཛོད། ༡༣། མི་བསྲུན་སྙིགས་སྤྱོད་བྱ་མ་རྟས་འགུག་མགྲོན། །འབྱུང་བཞིའི་གཡོ་འཕྲུལ་ནད་མཚོན་མུ་གེ་སོགས། །བསིལ་ལྗོངས་སྐྱེ་བོའི་སྙིང་ལ་ཟུག་རྔུའི་དབལ། །མཐའ་དག་ཞི་བའི་སྨན་གྱི་ཆོ་ག་སྒྲུབས། ༡༤། ཚེ་དཔལ་འབྱོར་པའི་རྫོགས་ལྡན་སྤྲིན་ཆར་གྱིས། །སྐབས་གསུམ་གྲོང་ཁྱེར་འཛིན་མར་འཕོས་སམ་ཞེས། །རྒན་པོའི་བློ་ལ་འཁྲུལ་བ་སྦྱིན་ནུས་པའི། །ལེགས་ཚོགས་ཕྲེང་བས་ཕྱོགས་ཀུན་བརྒྱན་པར་མཛོད། ༡༥། འཇམ་མཉེན་མེ་ཏོག་མདའ་ཡིས་བསྐྲུན་མིན་པའི། །དྲེགས་ལྡན་སེམས་ཀྱི་བརྟན་པ་འཕྲོག་པའི་མཚོན། །དབང་མཛད་ཐུགས་རྗེའི་ལྕགས་ཀྱུས་ས་གསུམ་འགྲོ། །རིས་བྲལ་བསྟན་ལ་འདུན་པའི་དགེ་མཚན་ངོམས། ༡༦། ཐབས་སྒྲོལ་ཐུགས་རྗེའི་དཔྱང་ཐག་ཆད་པའི་འགྲོ། །མ་རུངས་ཉམས་པ་བདུན་ལྡན་ཞིང་བཅུའི་ཚོགས། །ཤུགས་སྒྲོལ་དམོད་པའི་མཚོན་ཆས་ལྷག་མེད་དུ། །སྦྱར་བྱེད་དུས་ཀྱི་ཕོ་ཉ་ཁྱོད་ཀྱིས་གྱིས། ༡༧། ཁྱད་པར་དམ་ལྡན་རྣལ་འབྱོར་བདག་ཅག་གི། །སྐུ་གསུང་ཐུགས་རྟེན་དགོན་གནས་མན་ཆོད་ནས། །བརྒྱུད་འཛིན་འཁོར་སློབ་ཡོན་བདག་གནག་ཕྱུགས་ཡན། །ཁྱོད་ལ་གཉེར་དུ་གཏད་དོ་མེལ་ཚེས་སྲུངས། ༡༨། ལས་འབྲས་ཁྱད་གསོད་ནག་པོའི་རྩ་ལག་རིགས། །རང་འབྱོར་དཔལ་གྱིས་ཆོག་མིན་དཀོན་མཆོག་རྫས། །རྐུ་འཕྲོག་ཐབས་ཀྱིས་ཁྱེར་བའི་དམ་ལོག་ལ། །དྲག་པོའི་ལས་ཀྱི་མཐུ་རྩལ་མ་ཆུང་ཞིག༡༩། ཐེག་ཆེན་རྒྱལ་བའི་སྲས་ཀྱི་ཐབས་མཁས་སྒོ། །བསྡུ་བཞིའི་ཕྲིན་ལས་ཟབ་མོས་སྒྱུ་མའི་ནོར། སྙིང་མེད་སྙིང་པོ་མཆོག་ཏུ་བསྒྱུར་བའི་ཚེ། །ནོར་ཕྱིར་མ་འབྲངས་ཀོ་ལོང་སྡོམ་པར་མཛོད། ༢༠། མདོར་ན་བུམ་བཟང་འཆི་མེད་ལྗོན་པ་ཡིས། །མཚོན་མིན་རེ་བའི་མོད་ལ་ཡིད་ཀྱི་དཔལ། །འགེངས་མཛད་རྟག་ཏུ་བརྟེན་པའི་མ་ཁྱོད་ཀྱིས། །བྱང་ཆུབ་བར་དུ་འབྲལ་མེད་གྲོགས་མཛོད་ཅིག༢༡། སྣང་སྲིད་ཆོས་ཀུན་སྐྱེ་མེད་མ་ཡི་ཀློང་། །རོལ་པ་འགག་མེད་མོ་ཡི་གདངས་ཤར་བའི། །བདེ་ཆེན་བྱང་ཆུབ་སེམས་ཀྱི་དོན་རྟོགས་ནས། །འཕོ་མེད་རྟག་པ་དམ་པའི་མཆོག་སྩོལ་ཅིག༢༢། བཀྲ་ཤིས་ཉི་མ་ཕན་བདེའི་འོད་པོ་ཆེས། །བཀྲ་ཤིས་ས་གསུམ་རྒུད་པའི་མུན་བཅིལ་ནས། །བཀྲ་ཤིས་ཐར་གྲོལ་འདབ་སྟོང་བཞད་པའི་གཏམ། །བཀྲ་ཤིས་གྲགས་པའི་རྔ་ཆེན་སྙན་སྒྲོགས་ཤོག༢༣། ཅེས་པའང་མཁས་བཙུན་བཟང་པོའི་ཡོན་ཏན་མངོན་པར་མཐོ་པ་མཆོག་སྤྲུལ་བསོད་ནམས་མཆོག་གྲུབ་ཀྱི་བཞེད་སྐོང་དུ། པདྨ་རྣམ་པར་རྒྱལ་བས་གྲུབ་པའི་སྦྱོར་བ་དང་ལྡན་པའི་ཐུན་གསེང་དུ་ཤར་མར་བྲིས་པ་ཛ་ཡནྟུ།