སྲུང་མའི་འཁོན་སྦྱོང་ཟ་ངུ་མདོར་བསྡུས་བྱ་བ།

༄༅། །སྲུང་མའི་འཁོན་སྦྱོང་ཟ་ངུ་མདོར་བསྡུས་བྱ་བར་སྤྲོ་ན། རྒྱུན་གསོལ་གྱི་འཇུག་གམ། སྒེར་དུ་བྱས་ན་དམར་གཏོར་ཤ་ཁྲག་གིས་བརྒྱན་པ་ལ་དམིགས་བྱ་དགུག་བསྟིམ་བྱ། ཁྲག་ཆང་གིས་བྲན་ལ། ཧཱུྃ། ཡེ་ཤེས་དབྱིངས་ལས་འབར་བའི་སྐུར་བཞེངས་པ། །བདུད་སྡེ་ཚར་གཅོད་ཉམས་པ་སྒྲོལ་བའི་གཤེད། །ལེགས་ཉེས་སྟངས་འཛིན་སྒྲུབ་མཆོག་སྐྱོང་བའི་གཉན། །དཔལ་མགོན་ཕོ་རྒྱུད་སྔགས་སྲུང་མོ་རྒྱུད་དང་། །མ་ནིང་གཉིས་མེད་རྒྱུད་གསུམ་དམ་ཅན་ཚོགས། །སྤྲུལ་པ་ཡང་སྤྲུལ་བཀའ་ཉན་སྡེ་དང་བཅས། །ལས་དང་དངོས་གྲུབ་ཐོགས་མེད་སྒྲུབ་མཛད་པའི། །སྣང་སྲིད་དྲེགས་པའི་དམག་ཚོགས་འཁོར་བཅས་ཀྱིས། །གནོད་བྱེད་དགྲ་བགེགས་བསྒྲལ་པའི་ཤ་ཁྲག་རུས། །ཟག་མེད་འདོད་ཡོན་མཆོད་གཏོར་འདི་བཞེས་ཏེ། །བདག་ཅག་རྣལ་འབྱོར་འཁོར་དང་བཅས་རྣམས་ལ། །དགྱེས་པའི་ལྷ་ཞལ་ཟླ་ལྟར་དཀར་བར་མཛོད། །རྩ་བ་ཡན་ལག་དམ་ཚིག་ཆག་ཉམས་སོགས། །མི་ཤེས་སྒྲིབ་པའི་ཉེས་ལྟུང་ཅི་མཆིས་པ། །མཐོལ་ཞིང་བཤགས་སོ་བྱང་ཞིང་དག་གྱུར་ནས། །ལྷ་སྲིན་འཁྲུགས་པའི་གཡོ་འཕྲུལ་དགྲ་ལ་བཟློག །ཁྱད་པར་སྨོན་འཇུག་བྱང་ཆུབ་སེམས་བསྐྱེད་ནས། །གདུལ་དཀའ་ཡལ་བར་མི་འདོར་ཐབས་མཁས་ཀྱིས། །རྗེས་སུ་འཛིན་འདི་འཕགས་པའི་རང་གཤིས་ཕྱིར། །དམ་ཅན་རྒྱ་མཚོས་རུ་ང་ཕྲག་དོག་སྤོངས། །ཁྱེད་རྣམས་སྒྲིབ་མེད་ཡེ་ཤེས་སྤྱན་ལྡན་ཕྱིར། །བསྟན་ལ་འཚེ་དང་ཡོངས་ལ་གནོད་བྱེད་སོགས། །བསྒྲལ་བའི་ཞིང་གྱུར་ཟ་ཁ་ཟུག་རྣམས་ཀྱི། །མཆོད་རྗེས་མ་འབྲངས་སླར་ལ་ཟ་ངུ་གྱིས། །གྲུབ་པའི་རིག་འཛིན་བརྒྱུད་པའི་སྤྱན་སྔ་རུ། །ཇི་ལྟར་ཞལ་བཞེས་དམ་བཅས་དྲན་མཛོད་ལ། །ཞི་རྒྱས་དབང་དྲག་གང་གིས་འདུལ་འོས་པ། །དེ་དང་དེ་ཡི་ཕྲིན་ལས་མ་གཡེལ་ཅིག །རྒྱལ་བའི་བསྟན་སྲུང་དཀོན་མཆོག་དབུ་འཕང་བསྟོད། །བསྟན་འཛིན་སྐྱེས་བུའི་སྐུ་ཚེ་མཛད་ཕྲིན་སྤེལ། །སྙན་པའི་དར་ཕྱོར་གྲགས་པའི་དུང་བུས་ལ། །ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད། །དམ་ཚིག་ལྡན་པའི་རྣལ་འབྱོར་བདག་ཅག་ལ། །ལུས་དང་གྲིབ་མ་བཞིན་དུ་མི་འབྲལ་འགྲོགས། །བར་ཆོད་ཀུན་སོལ་བསམ་དོན་ཡིད་བཞིན་སྒྲུབས། །བཀྲ་ཤིས་བདེ་ལེགས་ཆེན་པོས་ཁྱབ་པར་མཛོད། །ཅེས་བརྗོད། མཆོད་གཏོར་དགྲ་ཕྱོགས་སུ་ཕུལ་ལ་གནོད་བྱེད་ལྷག་མེད་དུ་གསོལ་བར་མོས། རྗེས་སྤྱི་ལྟར་བྱའོ། །ཞེས་པའང་མཆོག་སྤྲུལ་དམ་པའི་བཞེད་སྐོང་དུ། རྡོ་རྗེ་ཐུགས་མཆོག་རྩལ་གྱིས་བྲིས་བ་དགེ །༈ ཧཱུྃ། བརྒྱུད་གསུམ་རིག་འཛིན་བླ་མའི་སྤྱན་སྔ་རུ། །རང་རྟགས་སྲོག་སྙིང་ཕུལ་ཞིང་བྲོོ་བོར་བའི། །ཡེ་ཤེས་ལས་དང་འཇིག་རྟེན་ཚུལ་འཛིན་པ། །བསྟན་སྲུང་གཉན་པོ་སྤྱི་དང་ཁྱད་པར་དུ། །གྲུབ་པའི་སློབ་དཔོན་མཚོ་སྐྱེས་རྡོ་རྗེ་ཡིས། །འཇིག་རྟེན་མཆོད་བསྟོད་དཀྱིལ་འཁོར་ཆེན་པོ་རུ། །དབང་བསྐུར་དམ་ལ་བཞག་པའི་མཐུ་རྩལ་ཅན། །སྣང་སྲིད་སྡེ་བརྒྱད་དྲེགས་པའི་དམག་ཚོགས་ཀྱིས། །དགྲ་བགེགས་ཤ་ཁྲག་གཏོར་མ་འདི་བཞེས་ཤིག །བདག་ཅག་དཔོན་སློབ་ཡོན་མཆོད་འཁོར་བཅས་ལ། །བསམ་ངན་སྤྱོར་རྩུབ་ཤོམ་པའི་འབྱུང་པོའི་རིགས། །གནོད་བྱེད་དགྲ་ཇག་ཆོམ་རྐུན་བྱད་མའི་ཚོགས། །མིང་གི་ལྷག་མར་བཞེས་ཤིག་མཐུ་ལྡན་རྣམས། །བསམ་པ་ངན་པའི་སྙིང་ལ་མཱ་ར་ཡ། །སྦྱོར་བ་རྩུབ་མོའི་འདུན་གྲོས་རྗེས་མེད་ཐོངས། །བྱད་མ་གདུག་པའི་རིགས་སྔགས་རང་གཤེད་ཕོབ། །བསྟན་སེལ་འཇུག་པའི་དམ་ཉམས་སྙིང་ཁྲག་རོལ། །སྨོན་ལོག་དམ་སྲིའི་མངའ་ཐང་རྗེས་མེད་བསྡུས། །ཡོངས་ལ་གནོད་པའི་མཐའ་དམག་དུས་འཁྲུགས་བཟློག །ནད་མཚོན་དུག་སྦྱོར་འབྱུང་བཞིའི་བྱད་གཏད་དང་། །རྨི་ལམ་ལྟས་ངན་མི་ཁ་སྨྲ་མཆུ་སོགས། །ཆག་ཆེན་ཉམས་ང་ཐམས་ཅད་དགྲ་ལ་བསྒྱུར། །བཟློག་བསྒྱུར་བཅོལ་པའི་ཕྲིན་ལས་འགྲུབ་པར་མཛོད། །རྣལ་འབྱོར་བདག་ཅག་དཔོན་སློབ་འཁོར་བཅས་རྣམས། །ཁྱོད་ལ་གཏད་དོ་དུས་དྲུག་མེལ་ཚེས་སྐྱོངས། །མཐུ་རྩལ་མ་ཆུང་སྡང་བྱེད་ཆོམ་ལ་ཕོབ། །ཕྱོགས་ལས་རྣམ་རྒྱལ་སྙན་གྲགས་ཀླུང་རྟ་སྤེལ། །ཆོས་མཐུན་བསམ་ཀུན་འགྲུབ་པའི་ཕྲིན་ལས་མཛོད། །ཅེས་པའང་སྔགས་ནག་ཞེ་སྡང་རྡོ་རྗེས་སོ། །