གཡང་བསང་འདོད་དགུའི་ཆར་འབེབས།
༄༅། །གཡང་བསང་འདོད་དགུའི་ཆར་འབེབས་བཞུགས་སོ། །ཀྱེ། ཚོགས་གཉིས་ནོར་བུ་རྒྱས་པའི་སྤྲིན་ཆེན་ལས། །གྲུབ་གཉིས་འདོད་དགུའི་གྲུ་ཆར་འཇོ་བ་ཡིས། །དོན་གཉིས་རེ་སྐོང་རྩ་གསུམ་ནོར་ལྷའི་ཚོགས། །འདིར་གཤེགས་བསང་གི་དགའ་སྟོན་བཞེས་སུ་གསོལ། །རིན་ཆེན་འབྲུ་སྨན་བཟའ་བཏུང་འབྱོར་དགུའི་ཚོགས། །འབར་བྱེད་མེ་དང་སྦྱར་བའི་དུད་པའི་སྤྲིན། །མི་གཙང་ཉེས་ཀུན་སེལ་བྱེད་བདུད་རྩིའི་ཆར། །གང་བཞེད་འདོད་དགུར་འཆར་བའི་རོལ་མོ་འདིས། །རྩ་གསུམ་འདུས་ཞལ་རཏྣ་ཐོད་ཕྲེང་རྩལ། །སྐུ་ལྔ་མཚན་བརྒྱད་རྣམ་འཕྲུལ་བསམ་མི་ཁྱབ། །དགོངས་བརྡའ་སྙན་བརྒྱུད་རིག་འཛིན་བླ་མ་བསང་། །བྱིན་རློབས་དབང་བསྐུར་ཉམས་རྟོགས་གོང་དུ་སྤོར། །བདེ་ཆེན་རྡོ་རྗེའི་རང་གདངས་ལས་ཤར་བའི། །རབ་འབྱམས་ཞི་ཁྲོ་ཁྱབ་བདག་སྒྲུབ་སྡེ་བརྒྱད། །རྒྱུད་སྡེ་བཞི་དྲུག་ཐེག་དགུའི་ཡི་དམ་བསང་། །མཆོག་ཐུན་འདོད་དགུའི་དངོས་གྲུབ་མ་ལུས་སྩོལ། །རྨད་བྱུང་རྡོ་རྗེ་ལུས་ཀྱི་ད་ལ་ནས། །རྩ་རླུང་ཐིག་ལེའི་རང་བཞིན་རྣམ་དག་པའི། །འབུམ་ཕྲག་ཡངས་པའི་དཔའ་བོ་མཁའ་འགྲོ་བསང་། །ཉེས་ལྟུང་ཀུན་སོལ་བདེ་ཆེན་ཡེ་ཤེས་སྐྱེད། །ཡེ་ཤེས་འཇིག་རྟེན་སྣ་ཚོགས་ཚུལ་སྟོན་ཞིང་། །རྣམ་བཞིའི་ལས་སྒྲུབ་མཐུ་སྟོབས་བསམ་མི་ཁྱབ། །རྒྱུད་གསུམ་དམ་ཅན་དྲེགས་པའི་དཔུང་ཚོགས་བསང་། །གང་བརྩམ་ལས་ཀུན་ཐོག་མེད་འགྲུབ་པར་མཛོད། །བསོད་ནམས་བསམ་མི་ཁྱབ་པའི་ནོར་བུའི་གཏེར། །དགེ་ལེགས་ཕན་བདེའི་འདོད་འཇོ་དཔག་བསམ་དབང་། །རབ་འབྱམས་ནོར་ལྷ་གཏེར་བདག་མ་ལུས་བསང་། །ཕུན་ཚོགས་སྡེ་བཞིའི་བང་མཛོད་འགེངས་པར་མཛོད། །ཁྱད་པར་ས་བརྒྱད་སེམས་དཔའ་ནོར་ལྷའི་ཚུལ། །རྒྱལ་ཆེན་རྣམ་ཐོས་སྲས་དང་ཛམ་བྷ་ལ། །ནོར་སྦྱིན་འཕགས་མ་སྤྲུལ་འཁོར་བཅས་རྣམས་བསང་། །ཚེ་བསོད་དཔལ་འབྱོར་ཡར་ཟླ་ལྟར་འཕེལ་མཛོད། །གཞན་ཡང་ཡུལ་ལྷ་གཞི་གནས་གཏེར་གྱི་བདག །ལོ་ཟླ་ཞག་དུས་སྤར་སྨེ་ས་བདག་སོགས། །སྣང་སྲིད་མགྲོན་དུ་འོས་པ་ཐམས་ཅད་བསང་། །ཞི་དང་བཀྲ་ཤིས་བདེ་ལེགས་འཕེལ་བར་མཛོད། །ཕྱི་སྣོད་རྣམ་དག་ཡུམ་ལྔའི་མཁའ་ཀློང་མཆོག །ནང་བཅུད་རྣམ་དག་ལྷ་དང་ལྷ་མོའི་སྤྲིན། །ཕུང་ཁམས་སྐྱེ་མཆེད་གདན་གསུམ་དཀྱིལ་འཁོར་ཆེ། །ཡེ་ནས་དག་མཉམ་ཆོས་སྐུའི་རོལ་པར་བསང་། །དེ་ཕྱིར་བསང་བྱ་བསང་བྱེད་མ་དམིགས་ཀྱང་། །ཀུན་རྫོབ་རྟེན་འབྲེལ་ཆོ་ག་ཟབ་མོའི་མཐུས། །མི་གཙང་ཉེས་ལྟུང་རྒུད་པ་ཀུན་སངས་ཤིང་། །སྲོག་ལུས་དབང་ཀླུང་སྙན་གྲགས་གཟི་མདངས་སྤེལ། །སྣོད་བཅུད་རྫོགས་ལྡན་གསར་པའི་སྒོ་འཕར་ཕྱེས། །བརྟན་གཡོ་སྲིད་ཞིའི་ཕྱྭ་གཡང་དབང་དུ་བསྡུས། །དཔལ་འབྱོར་འཛད་མེད་དབྱར་གྱི་མཚོ་ལྟར་བསྐྱིལ། །ཆོས་སྲིད་མི་ནུབ་ནོར་བུའི་རྒྱལ་མཚན་སྒྲེང་། །དོན་གཉིས་བསམ་ཀུན་འགྲུབ་པའི་བཀྲ་ཤིས་སྩོལ། །ཀུན་བཟང་ཡེ་ཤེས་བཞེད་སྐོང་དུ། །ཀུན་བཟང་བསྟན་པའི་རྒྱལ་མཚན་ཀྱིས། །ཀུན་ཕན་ལྷག་པའི་བསམ་པས་བྲིས། །ཀུན་དགའི་དུས་སྟོན་དར་གྱུར་ཅིག །༈ ཀྱཻ་གང་མཚན་དྲན་པས་ཕུན་ཚོགས་སྡེ་བཞིའི་དཔལ། །ཡིད་ལ་བསམ་པ་ཐམས་ཅད་འགྲུབ་མཛད་པའི། །རབ་འབྱམས་རྩ་གསུམ་དམ་ཅན་སྲུང་མར་བཅས། །རྣམ་རོལ་མ་འགགས་ཅིར་ཡང་སྟོན་པའི་འཕྲུལ། །ཁྱིམ་ལྷ་གེལ་ཐུང་དུང་གི་ཀ་བ་བསྣམས། །ཐབ་ལྷ་ཡུ་མོ་གསེར་གྱི་གཟར་བུ་འཛིན། །ཞིང་ལྷ་ཚངས་པ་སྙེ་མ་བུམ་བཟང་བསྣམས། །ཕྱུགས་ལྷ་རྣམ་སྲས་བེ་ཅོན་ནེའུ་ལེ་འཛིན། །ནོར་བདག་ཛམ་ལྷ་ཤིང་ཐོག་ནོར་རྐྱལ་བསྣམས། །ཕྲག་ལྷ་དཀར་པོ་རྒྱལ་མཚན་མདུང་དར་འཛིན། །སྲོག་ལྷ་དུང་མི་ཤེལ་གྱི་ཚེ་བུམ་བསྣམས། །མ་ལྷ་བུ་རྫི་གྲུ་གུ་འཕང་ལོ་ཐོགས། །དགྲ་བླ་འཐབ་རྐྱེན་རལ་གྲི་རུ་མཚོན་སྒྲེང་། །ཇག་ལྷ་དར་མ་རལ་གྲི་མདུང་དར་ཕྱར། །ཟས་ལྷ་དམར་པོ་གསེར་གྱི་ནོར་བུ་བསྣམས། །མགྲོན་ལྷ་དཀར་པོ་མདུང་དར་ནོར་རྐྱལ་ཐོགས། །ཚོང་ལྷ་ཚོགས་བདག་ནོར་དབྱུག་ནེའུ་ལེ་འཛིན། །རང་རང་འཁོར་གཡོག་ཁྲི་དང་འབུམ་གྱིས་བསྐོར། །འདིར་གཤེགས་འདོད་ཡོན་ཟག་མེད་མཆོད་བསང་མཆོད་སོགས་གཏོར་བཞེས། །ཁྱེད་རྣམས་མཐུ་སྟོབས་རྫུ་འཕྲུལ་བསམ་མི་ཁྱབ། །སྔོན་གྱི་སྨོན་ལམ་ཐུགས་བསྐྱེད་དྲན་མཛོད་ལ། །རྣལ་འབྱོར་བདག་ཅག་དཔོན་སློབ་འཁོར་བཅས་དང་། །ལུས་དང་གྲིབ་མ་བཞིན་དུ་མི་འབྲལ་འགྲོགས། །ནད་གདོན་འགལ་རྐྱེན་དགྲ་འདྲེའི་འཚེ་བ་ལས། །སྲུང་སྐྱོབ་ཕྲིན་ལས་རྣམ་བཞིའི་སྒོ་འཕར་ཕྱེས། །ཁྱིམ་ལྷས་ཁྱིམ་འདིར་བཀྲ་ཤིས་འཕེལ་བ་དང་། །ཐབ་ལྷས་ཐབ་ཏུ་མར་ཁུའི་མཚོ་མོ་ཁོལ། །ཞིང་ལྷས་ཞིང་འདིར་ལོ་གཡང་དཔལ་འབྱོར་ཁུག །ཕྱུགས་ལྷས་ཕྱུགས་སྲུང་ཕྱུགས་གཡང་དབང་དུ་བསྡུས། །ནོར་ལྷས་སྲིད་ཞིའི་ཕྱྭ་གཡང་དཔལ་འབྱོར་སྩོལ། །ཕྲག་ལྷས་འདོད་དོན་ཀུན་འགྲུབ་རྒྱལ་ཁ་ཐོབ། །སྲོག་ལྷས་སྲོག་སྐྱོབ་བླ་ཚེ་འཁྱམས་པ་སྲུངས། །མ་ལྷས་བུ་ཆུང་སྐྱེས་ཀྱི་རྫི་བུ་དང་། །དགྲ་ལྷས་དགྲ་བླའི་མཐུ་སྟོབས་མི་ལ་ཕོབ། །ཇག་ལྷས་དགྲ་ཕམ་བདག་རྒྱལ་དགྲ་བླ་མཛོད། །ཟས་ལྷས་ཟ་ཁ་དང་ནི་འཐུང་ཁ་ཕྱེས། །མགྲོན་ལྷས་གར་འགྲོ་བསུ་སྐྱེལ་སྡོང་གྲོགས་དང་། །ཚོང་ལྷས་ཚོང་ལེགས་ཟས་ནོར་འདུ་བར་མཛོད། །མདོར་ན་རྣལ་འབྱོར་ཡིད་ལ་བསམ་པའི་དོན། །ཆོས་ནོར་འདོད་ཐར་སྡེ་བཞིའི་ཕུན་ཚོགས་དཔལ། །མ་ལུས་དབང་བསྡུས་སྙན་གྲགས་རླུང་རྟ་བསྐྱེད། །ཕྱོགས་ལས་རྣམ་པར་རྒྱལ་བའི་གྲོགས་མཛོད་ཅིག །རྒྱལ་བསྟན་དར་ཞིང་བསྟན་འཛིན་དབུ་རྨོག་མཐོ། །དགེ་འདུན་སྡེ་རྒྱས་བཤད་སྒྲུབ་འདུ་བ་འཕེལ། །རྒྱལ་ཁམས་བདེ་སྐྱིད་དགེ་བཅུའི་དཔལ་གྱིས་འཚོ། །དོན་གཉིས་བསམ་འགྲུབ་བཀྲ་ཤིས་དཔལ་འཕེལ་མཛོད། །ཅེས་པའང་རྣམ་པར་རྒྱལ་བའི་ལྷས་སོ། །༈ ཀྱེ། བསམ་པའི་དོན་ཀུན་སྒྲུབ་མཛད་པའི། །མཐུ་ཆེན་དགྲ་ལྷ་ཝེར་མའི་ཚོགས། །འདིར་གཤེགས་དམ་རྫས་མཆོད་པ་བཞེས། །བསམ་དོན་ཡིད་བཞིན་འགྲུབ་པར་མཛོད། །བདག་དང་རྒྱུ་སྦྱོར་ཡོན་བདག་གི། །སྲོག་ལུས་དབང་ཐང་གུད་པ་སོལ། །མཐུན་པའི་ཀླུང་རྟ་གྱེན་ལ་བསྐྱེད། །སྙན་གྲགས་ནམ་མཁའ་གང་བར་མཛོད། །གཞི་རུ་བདེ་སྐྱིད་ལོངས་སྤྱོད་འཕེལ། །བྱེས་སུ་དོན་གྲུབ་ངོ་སོ་མཐོ། །མི་མཐུན་དགྲ་འདྲེའི་འཚེ་བ་བཟློག །ཕྱོགས་ལས་རྣམ་པར་རྒྱལ་བར་མཛོད། །སངས་རྒྱས་བསྟན་པ་དར་བ་དང་། །བརྒྱུད་འཛིན་མངའ་ཐང་འབྱོར་པ་རྒྱས། །རྣམ་བཞིའི་ལས་ཀུན་འགྲུབ་པ་དང་། །བཀྲ་ཤིས་བདེ་ལེགས་འཕེལ་བར་མཛོད། །ཅེས་པའང་རྣམ་པར་རྒྱལ་བས་སོ། །༈ ཀྱེ། བཀྲ་ཤིས་དོན་ཀུན་འགྲུབ་མཛད་པའི། །འགོ་བའི་ལྷ་སྲུང་གཉན་པོ་རྣམས། །འདིར་གཤེགས་གསེར་སྐྱེམས་མཆོད་པ་བཞེས། །འགོ་ཞིང་སྡོང་གྲོགས་གཡེལ་མེད་མཛོད། །མི་ཤིགས་སྲོག་གི་ཀ་བ་ཚུགས། །དཔལ་འབྱོར་འདོད་དགུའི་བང་མཛོད་ཕྱེས། །རྩོད་དང་དོན་གཉེར་རྒྱལ་ཁ་ལོངས། །མཐུན་རྐྱེན་བསམ་པ་ཀུན་འགྲུབ་མཛོད། །ཀླུང་རྟ་སྙན་པའི་བ་དན་སྒྲེངས། །གྲགས་པ་འབྲུག་སྒྲས་ས་གསུམ་ཁྱབ། །སྟོབས་རྩལ་གདོང་ལྔའི་དཔལ་ལ་འགྲན། །ཆོས་སྲིད་དབྱར་མཚོ་ལྟར་འཕེལ་མཛོད། །མདོར་ན་ཡིད་ལ་བསམ་པའི་དོན། །འབད་མེད་ལྷུན་གྱིས་གྲུབ་པ་ཡི། །ངོ་མཚར་སྙན་པའི་རོལ་མོ་ཡིས། །ཕྱོགས་དུས་ཀུན་ཏུ་ཁྱབ་པར་མཛོད། །ཅེས་པའང་རྣམ་པར་རྒྱལ་བའི་ལྷས་སོ། །༈ ཀྱཻ། འདོད་དགུའི་རེ་བ་སྐོང་མཛད་པའི། །གནོད་སྦྱིན་ནོར་ལྷ་གཏེར་བདག་རིགས། །འདིར་གཤེགས་གཙང་མའི་ཕུད་མཆོད་བཞེས། །དཔལ་འབྱོར་དབྱར་མཚོ་ལྟར་རྒྱས་མཛོད། །སྣོད་བཅུད་སྲིད་ཞིའི་ཕྱྭ་གཡང་བསྡུས། །འདོད་དགུའི་དངོས་གྲུབ་ཆར་དུ་བསྐྱིལ། །ཕུན་ཚོགས་སྡེ་བཞིའི་སྒོ་འཕར་ཕྱེས། །དོན་གཉིས་བསམ་པ་ཀུན་འགྲུབ་མཛོད། །སྙན་གྲགས་དབྱར་གྱི་རྔ་ཆེན་ལྡིར། །འཁོར་སློབ་འདུ་བ་སྤྲིན་བཞིན་འདུ། །བཤད་སྒྲུབ་ཕྲིན་ལས་གྲུ་ཆར་གྱིས། །ཐུབ་བསྟན་དབྱར་མཚོ་འཕེལ་རྒྱས་མཛོད། །མདོར་ན་འཁོར་འདས་ལམ་གྱི་དཔལ། །གང་འདོད་ཡིད་བཞིན་འགྲུབ་པ་དང་། །འབྲེལ་ཚད་དོན་ལྡན་རྣམ་དཀར་གྱི། །ཕྲིན་ལས་འཛམ་གླིང་ཀུན་ཁྱབ་མཛོད། །ཅེས་པའང་རྣམ་པར་རྒྱལ་བས་སོ། །༈ ཛྃཿཏྲཱིཿཡེ་ཤེས་ལྔ་ལྡན་རིགས་ལྔ་གངས་ཆེན་མཚོ། །ཡོན་ཏན་ལྷུན་རྫོགས་རྣམ་འཕྲུལ་བསམ་མི་ཁྱབ། །དབུལ་བའི་གདུང་སེལ་ཨཱརྱ་ཛམ་བྷ་ལ། །སར་གནས་སེམས་དཔའ་ནོར་བདག་ཕོ་མོ་བརྒྱད། །རབ་འབྱམས་རྩ་གསུམ་ནོར་ལྷའི་དཀྱིལ་འཁོར་ཚོགས། །ཐུགས་དམ་གནད་ནས་བསྐུལ་ལོ་དབྱིངས་ནས་བཞེངས། །སྔོན་སྨོན་ཐུགས་བསྐྱེད་གཉན་པོ་རྗེས་དགོངས་ནས། །བདག་ཅག་དཔོན་སློབ་རྒྱུ་སྦྱོར་འཁོར་བཅས་ལ། །འཆི་མེད་ཚེ་དང་རྒས་མེད་ལང་ཚོ་མཆོག །རྒུད་མེད་རྣམ་དཔྱོད་འཛད་མེད་འབྱོར་པའི་རྒྱུན། །ཕྱོགས་ལས་རྣམ་རྒྱལ་ཕུན་ཚོགས་སྡེ་བཞིའི་དཔལ། །སྲིད་ཞིའི་ཕྱྭ་གཡང་དངོས་གྲུབ་ཆར་དུ་བསྙིལ། །འགུགས་བྱེད་ཟེར་གྱིས་བརྟན་གཡོའི་དངོས་ཀུན་བསྡུས། །སྒེག་པའི་ཞལ་ལས་འདོད་དགུའི་ཆར་རྒྱུན་ཕོབ། །གྲགས་པའི་རྔ་ཆེན་མི་ཉམས་སྲིད་མཐར་ཁྱབ། །དོན་གཉིས་བསམ་ཀུན་འགྲུབ་པའི་དཔལ་སྩོལ་ཅིག །བླ་མ་ཡི་དམ་མཁའ་འགྲོ་ཆོས་སྲུང་དང་། །ནོར་ལྷ་གཏེར་བདག་གཞི་གནས་དཀར་ཕྱོགས་སྐྱོང་། །ཀུན་ལ་ཕྱག་འཚལ་སྐྱབས་མཆི་གསོལ་འདེབས་ན། །བར་ཆད་ཀུན་སེལ་བསམ་དོན་མྱུར་འགྲུབ་མཛོད། །ལྕགས་ཁྱི་ཟླ་ཚེས་ལ་བིས་སྤེན་འགྲུབ་པའི་སྦྱོར་བ་དང་ལྡན་པའི་ཚེས་ལ་བི་ཛས་བརྗོད་པ་དགེ་ལེགས་འཕེལ།