དམ་ཅན་སྐྱེས་བུའི་གསོལ་མཆོད་ཉུང་ངུ་།

༄༅། །དམ་ཅན་སྐྱེས་བུའི་གསོལ་མཆོད་ཉུང་ངུ་ནི། ཧཱུྃ། རིག་འཛིན་པདྨའི་བཀའ་ཉན་གཏེར་སྲུང་གཙོ། །གནམ་ས་ཕྱེད་ཀྱི་བདག་པོ་རྡོ་རྗེ་ལེགས། །མཆེད་འཁོར་སུམ་བརྒྱ་དྲུག་བཅུའི་ཚོགས་དང་བཅས། །འདིར་གཤེགས་རང་མཐུན་གདན་ལ་དགྱེས་པས་བཞུགས། །ཕྱི་ནང་གསང་མཆོད་སྨན་རཀ་གཏོར་མ་དང་། །མཐུན་རྫས་རྟེན་རྫས་སྤྱན་གཟིགས་དཀོར་ཆའི་རིགས། །མི་འཛད་ནམ་མཁའ་མཛོད་ཀྱི་འཁོར་ལོའི་སྤྲིན། །བསྟན་སྲུང་དབང་པོ་འཁོར་འདས་དགྱེས་ཕྱིར་འབུལ། །སྐྱེ་མེད་སྤྲོས་བྲལ་ཆོས་དབྱིངས་ཕོ་བྲང་ནས། །སྙིང་རྗེས་རབ་ཁྲོས་མཐུ་ལྡན་བསྟན་སྲུང་གཙོ། །རྣམ་བཞིའི་ལས་ཀུན་ཐོག་མེད་སྒྲུབ་མཛད་པའ། །བཛྲ་ས་ངྷུ་འཁོར་དང་བཅས་ལ་བསྟོད། །སྔོན་ཚེ་རིག་འཛིན་བརྒྱུད་པའི་སྤྱན་སྔ་རུ། །ཇི་ལྟར་ཁས་བླང་དམ་བཅས་དྲན་མཛོད་ལ། །རྒྱལ་བའི་བསྟན་སྲུང་དཀོན་མཆོག་དབུ་འཕང་བསྟོད། །དགེ་འདུན་སྡེ་སྐྱོངས་བཤད་སྒྲུབ་ཕྲིན་ལས་སྤེལ། །བོད་ཁམས་བདེ་སྐྱིད་མཐའ་དམག་དུས་འཁྲུགས་ཞི། །རྫོགས་ལྡན་གསར་པའི་དགའ་སྟོན་རྒྱས་པ་དང་། །ཁྱད་པར་རྣལ་འབྱོར་བདག་ཅག་འཁོར་བཅས་ཀྱི། །འདོད་དོན་བཅོལ་པའི་ལས་ཀུན་འགྲུབ་པར་མཛོད། །ཅེས་པའང་། དམ་ཅན་སྐྱེས་བུ་ཆེན་པོའི་སྐུ་མཁར་འོ་ཡུག་གོས་སྔོན་ལྷ་ཁང་དུ། རྒྱལ་དབང་པདྨའི་སྔགས་རིགས་འཆང་བ་རྡོ་རྗེ་དབང་མཆོག་དགྱེས་རབ་རྩལ་གྱིས་འཕྲལ་མར་བྲིས་ཤིང་ཕྲིན་ལས་སུ་གསོལ་བ་དགེ །དགེའོ། །༈ ཧཱུྃ། གང་མཚན་ངོ་མཚར་སྐྱེ་བ་ལྔ་པའི་སྒྲས། །འགྲོ་ཁམས་དུག་གསུམ་རྒྱུ་འབྲས་ནད་ཀྱི་ཚོགས། །རྒྱུན་གཅོད་རྣམ་གྲོལ་སྲོག་ཟུངས་བརྟན་མཛད་པའི། །བདེ་གཤེགས་བརྒྱད་དང་བྱང་སེམས་འཕགས་པའི་ཚོགས། །ཁྱད་པར་ཐུགས་བསྐྱེད་དུས་སྨིན་བསིལ་ལྡན་ལྗོངས། །དྲི་མེད་ཐུབ་བསྟན་སྣང་བས་གསལ་མཛད་པའི། །མཁན་སློབ་ཆོས་རྒྱལ་རིག་འཛིན་བརྒྱུད་བཅས་ཀྱི། །སྤྱན་སྔར་ཞལ་བཞེས་ལྷ་ཡི་དགེ་བསྙེན་རིགས། །བདུད་རྩི་སྨན་གྱི་བཀའ་སྲུང་ཚོགས་རྣམས་ལ། །ཟག་མེད་འདོད་ཡོན་མཆོད་གཏོར་འདི་འབུལ་བས། །སྔོན་གྱི་དམ་ཚིག་གཉན་པོ་རྗེས་དགོངས་ལ། །སྣང་སྲིད་རྩི་བཅུད་བདུད་རྩིའི་དྭངས་མ་ཀུན། །ཡོངས་བསྡུས་བདག་དང་སྒྲུབ་པའི་རྫས་ལ་བསྟིམ། །མི་མཐུན་ནད་དུག་བྱད་ཕུར་རྦོད་གཏོང་བཟློག །མཐུན་རྐྱེན་འདོད་དགུའི་བསམ་ཀུན་འགྲུབ་པ་དང་། །ཁྱད་པར་ནད་མེད་བདེ་བའི་གཟི་བྱིན་བསྐྱེད། །མི་ཤིགས་སྲོག་གི་ཀ་བ་ལོ་བརྒྱར་བརྟན། །རླབས་ཆེན་བསྟན་དང་འགྲོ་བའི་དོན་ཆེན་འགྲུབ། །དོན་གཉིས་བསམ་ཀུན་འགྲུབ་པའི་ཕྲིན་ལས་མཛོད། །བཀྲ་ཤིས་དཔལ་མངའ་སྲས་བཅས་རྒྱལ་ཀུན་གྱི། །བཀྲ་ཤིས་བདེན་ཚིག་ཤིས་པའི་གླུ་དབྱངས་བཅས། །བཀྲ་ཤིས་མེ་ཏོག་ཆར་དུ་བསྙིལ་བ་ཡིས། །བཀྲ་ཤིས་ཕྱོགས་དུས་ཀུན་ཏུ་བདེ་ལེགས་མཛོད། །ཅེས་པའང་བཟང་ལུང་པདྨ་བདེ་ལྡན་དུ་བརྩི་སྨན་གྱི་དགའ་སྟོན་ལོངས་སུ་སྤྱོད་པའི་སྐབས་སུ་བསླབ་གསུམ་ཡོན་ཏན་བྱེ་བའི་གཏེར་མཛོད་ཚེ་ཡི་རིག་བྱེད་འཛིན་པ་མཆོག་སྤྲུལ་པདྨ་བསྟན་འཛིན་གྱི་གསུང་གིས་བསྐུལ་ངོར་རིག་འཛིན་གྱི་བཙུན་པ་བྱ་བྲལ་བ་པདྨ་དགྱེས་པའི་སྡེས་གང་དྲན་སྐད་ཅིག་ལ་བརྗོད་པ་དགེ །མངྒལཾ། ༈ ལྷ་ཀླུ་དྲང་སྲོང་སྨན་ལྷ་རིག་འཛིན་ཚོགས། །ཞང་བློན་སྡེ་དགུ་སྤྲུལ་འཁོར་བཅས་རྣམས་ལ། །ཟག་མེད་འདོད་ཡོན་མཆོད་པ་འདི་འབུལ་བས། །སྨན་མཆོག་བདུད་རྩི་འགྲུབ་པའི་ཕྲིན་ལས་མཛོད། །པདྨ་བི་ཛ་པས་སོ། །༈ ཧྲཱིཿསྟོང་ཉིད་སྤྲོས་བྲལ་ཆོས་དབྱིངས་དག་པ་ལས། །རིག་པ་ཡེ་ཤེས་ཕྱག་རྒྱའི་སྐུར་གསལ་བའི། །ཤེས་རབ་རང་སྣང་ཁྲོ་རྒྱལ་རྟ་མཆོག་དཔལ། །ཡབ་ཡུམ་སྲས་དང་སྡེ་བརྒྱད་སྤྲུལ་འཁོར་བཅས། །འབར་བ་སྤུན་བདུན་ཤ་ཟ་ཁ་མོ་ཆེ། །དགོངས་འདུས་གཉན་པོའི་བཀའ་སྲུང་འཁོར་དང་བཅས། །འདིར་གཤེགས་ཕྱི་ནང་ཉེར་སྤྱོོད་སྨན་རཀ་གཏོར། །དགྲ་བགེགས་བསྒྲལ་པའི་ཤ་རུས་དོན་སྙིང་སོགས། །ཟག་མེད་འདོད་ཡོན་བདུད་རྩིའི་སྤྲིན་ཆེན་པོ། །གུས་པས་འབུལ་བཞེས་མཆོག་ཐུན་དངོས་གྲུབ་སྩོལ། །ཡང་ཟབ་སྙིང་པོའི་བསྟན་པ་དར་བ་དང་། །བསྟན་འཛིན་ཞབས་བརྟན་རྒྱལ་ཁམས་བདེ་ཞིང་སྐྱིད། །བར་ཆད་ཀུན་སེལ་བསམ་དོན་ཡིད་བཞིན་འགྲུབ། །བྱང་ཆུབ་བར་དུ་སྲུང་སྐྱོབས་སྡོང་གྲོགས་མཛོད། །ཅེས་པའང་སྔགས་བཙུན་པདྨ་བསྟན་འཛིན་གྱིས་བྲིས་བ་དགེ །༈ ཧཱུྃ། རྩ་གསུམ་དམ་ཅན་ཆོས་སྐྱོང་སྲུང་མ་དང་། །ཁྱད་པར་དཔལ་ལྡན་རྡོ་རྗེ་ངན་ནེ་མ། །བཀའ་སྡོད་སྤྲུལ་འཁོར་བཅས་པའི་ལྷ་ཚོགས་ཀྱིས། །དམ་རྫས་ཤ་ཁྲག་གཏོར་མ་འདི་བཞེས་ལ། །རྣལ་འབྱོར་བཅོལ་པའི་ཕྲིན་ལས་མྱུར་འགྲུབ་མཛོད། །ཅེས་བི་ཛས་སོ། །༈ བྷྱོ། དབྱིངས་ཕྱུག་ཡེ་ཤེས་མཁའ་འགྲོའི་འཕྲུལ། །གནས་ཡུལ་དུར་ཁྲོད་སྐྱོང་མཛད་པའི། །ཞིང་སྐྱོང་དབང་མོ་འཁོར་བཅས་རྣམས། །གསོལ་ལོ་མཆོད་དོ་ཕྲིན་ལས་མཛོད། །ཅེས་པའང་པདྨ་བི་ཛས་སོ། །༈ ཧཱུྃ། བདེ་ཆེན་ཉམས་བརྒྱས་སྒེག་པའི་རོལ་རྩལ་ནི། །ཞི་ཆགས་ཁྲོ་བོའི་རྣམ་འགྱུར་མཐའ་ཡས་པས། །སྒྲུབ་ལ་མཆོག་ཐུན་འདོད་དགུའི་ཆར་འབེབས་པའི། །རབ་འབྱམས་རྩ་གསུམ་ཆོས་སྲུང་ཚོགས་རྣམས་དགོངས། །ཁྱེད་རྣམས་བྱང་ཆུབ་བར་དུ་བདག་གི་མགོན། །རྟག་ཏུ་བསྙེན་སྒྲུབ་མཆོད་བསྐང་བརྩོན་ལགས་ན། །འབྲལ་མེད་ཡེ་ཤེས་ཆེན་པོས་དགོངས་མཛོད་ལ། །དོན་གཉིས་ཕན་བདེའི་དགའ་སྟོན་རྒྱས་པར་མཛོད། །བདག་ཅག་མི་ཤེས་བག་མེད་དབང་གྱུར་པས། །སྡོམ་པ་གསུམ་གྱི་སྲུང་མཚམས་འདྲལ་བ་དང་། །ཉམས་དང་ཚོགས་འདྲེས་གསང་བ་གཡེལ་ལ་སོགས། །རྩ་བ་ཡན་ལག་ཉམས་ཆག་ཅི་བགྱིས་པ། །སྙིང་ནས་འགྱོད་པས་བཤགས་སོ་ཚངས་པ་སྩོལ། །ཕྱི་རུ་བྱད་ཕུར་ནད་གདོན་འཚེ་བ་བཟློག །ནང་དུ་རྩ་རླུང་ཐིག་ལེ་བརྟན་ཞིང་འཕེལ། །གསང་བ་ཉམས་འཁྲུགས་དུག་ལྔའི་རྟོག་པ་ཞི། །གཉུག་མའི་གཏན་སྲིད་ཟིན་པའི་གྲོགས་མཛོད་ཅིག །མདོར་ན་འདི་ནས་བྱང་ཆུབ་སྙིང་པོའི་བར། །འབྲལ་བ་མེད་པར་ཁྱེད་བརྟེན་ཁྱེད་སྒྲུབ་ན། །དགྱེས་པ་ཆེན་པོས་བདག་ཅག་རྗེས་ཟུང་ལ། །མཆོག་ཐུན་འདོད་འབྲས་མ་ལུས་མཆིས་པར་མཛོད། །ཅེས་པའང་བི་ཛ་ཡས་སོ། །