རྡོ་རྗེ་ཕུར་པའི་བསྐང་བཤགས་དངོས་གྲུབ་དགའ་སྟོན།

༄༅། །རྡོ་རྗེ་ཕུར་པའི་བསྐང་བཤགས་དངོས་གྲུབ་དགའ་སྟོན་བཞུགས། ན་མོ་གུ་རུ་བཛྲ་ཀཱི་ལ་ཡ། བླ་མ་དཔལ་ཆེན་ཀཱི་ལ་ཡར། །བཏུད་ནས་བསྐང་བཤགས་ལས་རིམ་བསྟན། །ཕྱི་ནང་གསང་བའི་མཆོད་བསྐང་རྫས། །གང་འཛོམས་དངོས་བཤམས་ཡིད་ཀྱིས་སྤྲུལ། །ཏིང་འཛིན་དགོངས་པའི་རྩལ་གྱིས་བརླབ། །མི་ཐོད་གསང་བའི་རྔ་ཡིས་བསྐུལ། །སྙན་པའི་དབྱངས་ཀྱིས་འདི་སྐད་བརྗོད། །ༀ། སྣང་སྲིད་རྣམ་དག་ཡུམ་གྱི་ཨེ་དབྱིངས་སུ། །རིག་པ་བཅུད་དུ་སྨིན་པ་ཨ་ཏིའི་ལྷ། །དཔལ་ཆེན་རྡོ་རྗེ་གཞོན་ནུ་སྲས་དང་འཁོར། །རིག་འཛིན་རྩ་བརྒྱུད་བླ་མའི་ཚོགས་དང་བཅས། །ཡེ་ཤེས་དབྱིངས་ནས་དགོངས་པའི་རྩལ་བསྐྱེད་ལ། །ཞལ་ཕྱག་མཚན་མ་རྟགས་ཀྱི་སྐུར་བཞེངས་ནས། །རྣལ་འབྱོར་སྒྲུབ་པའི་རྫས་ལ་བྱིན་ཆེན་ཕོབ། །རིག་རྩལ་ཉམས་རྟོགས་ཡོན་ཏན་གོང་དུ་སྦོར། །ཨཱཿཕྱི་མཆོད་སྲིད་ཞིའི་དཀོར་ནོར་འདོད་ཡོན་སྤྲིན། །ནང་མཆོད་སྨན་གཏོར་རཀྟ་གསང་བའི་རྫས། །བདེ་སྟོང་དགའ་བཞིའི་ཡེ་ཤེས་རིགས་མའི་བཅུད། །ཡང་གསང་དབྱིངས་རིག་འདུ་འབྲལ་མེད་པའི་དཔལ། །སྐུ་དང་ཐིག་ལེ་འཇའ་འོད་ཟེར་ཕྲེང་འཁྲིགས། །རང་བྱུང་རང་ཤར་རྒྱན་གྱི་དམ་རྫས་མཆོག །མི་ཟད་ནམ་མཁའ་མཛོད་ཀྱི་འཁོར་ལོ་འདིས། །རབ་འབྱམས་རྩ་གསུམ་དགྱེས་པ་སྐོང་གྱུར་ཅིག །ཧཱུྃ། དགོངས་བརྒྱུད་བླ་མ་རྒྱལ་བ་རྒྱ་མཚོའི་དལ། །སྨིན་པ་རྒྱ་མཚོ་བརྡ་བརྒྱུད་ཚོམ་བུའི་སྤྲིན། །མོས་པ་རྒྱ་མཚོ་སྙན་བརྒྱུད་དལ་ཞལ་འབྱེད། །བརྒྱུད་གསུམ་རིག་འཛིན་བླ་མའི་ཐུགས་དམ་བསྐང་། །རྡོ་རྗེ་ཁྲོས་པ་ཞེ་སྡང་ངང་གིས་གཅོད། །མཚོན་ཆེན་སྔོན་པོ་ནམ་མཁའི་ཐིག་པར་ཤར། །གང་འདུལ་འགྲོ་ལ་རྟགས་ཀྱི་ཕྱག་རྒྱར་འབར། །སྐུ་གསུམ་ཁྲོ་འཕྲེང་ཡོངས་རྫོགས་ཐུགས་དམ་བསྐང་། །ཨེ་དབྱིངས་འགྱུར་མེད་ཡུམ་གྱི་བྷ་གའི་ཀློང་། །ཝཾ་ཡིག་ཐབས་མཆོག་ཡབ་ཀྱི་གདངས་ཤར་བའི། །རིག་པ་རང་སྣང་བཛྲ་ཀཱི་ལ་ཡ། །སྣང་སྟོང་གཉིས་མེད་ཡབ་ཡུམ་ཐུགས་དམ་བསྐང་། །ཕུང་ལྔ་དག་པ་ཡེ་ཤེས་ལྔ་ཡི་འཕྲུལ། །ཁམས་ལྔ་དག་པའི་ཡུམ་དང་གཉིས་མེད་སྦྱོར། །དུག་ལྔ་རྩད་གཅོད་སྲིད་གསུམ་སྐུ་ལྔར་སྒྲོལ། །སྲས་མཆོག་ཀཱི་ལ་རིགས་ལྔའི་ཐུགས་དམ་བསྐང་། །མི་དགེ་ཚར་གཅོད་དགེ་བཅུའི་དོན་དང་སྦྱོར། །ཕ་རོལ་ཕྱིན་བཅུའི་ཡང་དག་དོན་དང་ལྡན། །ཕྱོགས་བཅུའི་བགེགས་འདུལ་འབར་པ་ཆེན་པོའི་སྐུ། །ཁྲོ་བཅུ་ཡབ་ཡུམ་ཟ་གསོད་ཐུགས་དམ་བསྐང་། །རྟག་ཆད་མུ་བཞིའི་ཡང་དག་དོན་ལྡན་ཅིང་། །ཚད་མེད་རྣམ་བཞིས་འགྲོ་ཁམས་རྗེས་སུ་འཆིང་། །ཕྲིན་ལས་རྣམ་བཞིས་བསྟན་པ་སྲུང་མཛད་པའི། །སྒོ་སྐྱོང་གདོང་ཅན་བཞི་ཡི་ཐུགས་དམ་བསྐང་། །སྐྱེ་མཆེད་བཅུ་གཉིས་ཡང་དག་དོན་ལྡན་ཅིང་། །རྟེན་འབྲེལ་བཅུ་གཉིས་གནས་སུ་དག་པའི་མདངས། །འཕོ་བ་བཅུ་གཉིས་དྷཱུ་ཏིར་བསྡོམས་མཛད་པའི། །ཕུར་སྲུང་དབང་མོ་བཅུ་གཉིས་ཐུགས་དམ་བསྐང་། །སྣང་སྲིད་ཡེ་གྲོལ་རྫོགས་པ་ཆེན་པོའི་ངང་། །ཕུང་ཁམས་སྐྱེ་མཆེད་གདན་གསུམ་ཡོངས་རྫོགས་ལྷ། །རྩ་རླུང་ཐིག་ལེ་སྐུ་གསུམ་མཁའ་འགྲོའི་སྤྲིན། །དག་པ་རབ་འབྱམས་འཁོར་ལོའི་ཐུགས་དམ་བསྐང་། །ཧྲཱིཿསྣང་སྲིད་གཞིར་བཞེངས་རང་བྱུང་དཀྱིལ་འཁོར་ཆེར། །ཡེ་ནས་རང་ཤར་རྩ་གསུམ་ཆོས་སྲུང་ཚོགས། །ཅིར་སྣང་རང་གྲོལ་རྒྱན་གྱི་ལོངས་སྤྱོད་འདིས། །ཡོངས་གྲོལ་ཆོས་དབྱིངས་ཀློང་དུ་བསྐང་བའི་མཐུས། །དགོངས་སྤྱོད་རྒྱ་མཚོ་གདིང་དུ་མ་གྱུར་བས། །རྩ་བ་ཡན་ལག་དམ་ཚིག་ཆག་ཉམས་སོགས། །འཕྲལ་དང་ཡུན་དུ་སྒྲིབ་པར་གྱུར་ཏོ་འཚལ། །མི་སྒྲིབ་ཚངས་པ་མཆོག་གི་དངོས་གྲུབ་སྩོལ། །ཚད་མེད་སྙིང་རྗེས་འགྲོ་ཁམས་སྲུང་མ་ནུས། །དྲག་པོར་འཕྲུལ་བའི་རྫས་ཏིང་ཤེར་བརྩོན་དམན། །སྒྲོལ་བ་གཉིས་ཀྱི་ཕྲིན་ལས་མ་སྐྱོང་བས། །རྫས་ཀྱི་ཕུར་པའི་དམ་ལས་འགལ་བ་བཤགས། །ཐ་མལ་སྣང་ཞེན་ལྷ་སྐུར་ཁྱེར་མ་ཤེས། །སྲོག་རྩོལ་རྒྱུ་བ་སྔགས་སུ་བསྡོམ་མ་ནུས། །དུས་བཞིར་བསྙེན་སྒྲུབ་བསྐང་བཤགས་ཆག་ལ་སོགས། །སྲིད་པ་ཕུར་པའི་དམ་ལས་འགལ་བ་བཤགས། །དངོས་ཡིད་ལས་ཀྱི་ཕྱག་རྒྱ་མ་བརྟེན་ཅིང་། །བདེ་སྟོང་དགའ་བཞིའི་ཉམས་མྱོང་སྐྱོང་མ་ནུས། །ཉི་ཟླ་སྒྲ་གཅན་དབྱིངས་སུ་མ་ཚུད་པའི། །བྱང་སེམས་ཕུར་པའི་དམ་ལས་འགལ་བ་བཤགས། །དབྱིངས་རིག་འདུ་འབྲལ་མེད་པར་སྐྱོང་མ་ནུས། །སྒྲོན་དྲུག་སྣང་བ་བཞི་ཡི་འཕེལ་མ་རྫོགས། །ཐེག་བརྒྱད་བློ་ཡི་ཞེན་པ་དག་མིན་པའི། །རིག་པའི་ཕུར་བུས་དམ་ལས་འགལ་བ་བཤགས། །ཧོཿདེ་ལྟར་བསྐང་ཞིང་བཤགས་པའི་བསོད་ནམས་ཀྱིས། །རྩ་གསུམ་སྲུང་མའི་བཀའ་ཆད་མི་འབྱུང་ཞིང་། །མི་མཐུན་བར་ཆད་བྱད་ཕུར་ཉམས་ཆག་གྲིབ། །དུས་མིན་འཆི་བའི་མཚན་ལྟས་ངན་པ་བཟློག །རྩ་གསུམ་རྒྱལ་བས་དབྱིངས་ནས་བྱིན་གྱིས་རློབས། །མཁའ་འགྲོ་ཆོས་སྲུང་ལུས་དང་གྲིབ་བཞིན་འགྲོགས། །བསྙེན་སྒྲུབ་མཐར་ཕྱིན་ཐལ་འབྱིན་གྲུབ་མཐའ་བསྙེགས། །རྣམ་བཞིའི་རིག་འཛིན་གྲུབ་པའི་དགའ་སྟོན་སྤེལ། །མདོར་ན་རྣལ་འབྱོར་ཡིད་ལ་གང་བསམ་པའི། །ལས་བཞི་གྲུབ་པ་བརྒྱད་སོགས་ཐུན་མོང་དང་། །མཆོག་དངོས་དཔལ་ཆེན་ཕུར་པའི་གསང་གསུམ་དཔལ། །འཕོ་མེད་རྟག་པ་དམ་པའི་མགོན་སྩོལ་ཅིག །ཅེས་བརྗོད་དབང་བཞིའི་ལམ་ཁྱེར་དང་། །ཐལ་འབྱིན་དགོངས་པ་གནད་དུ་དྲིལ། །རྩེ་གཅིག་བརྩོན་པའི་དཔུང་བསྐྱེད་ན། དཔལ་ཆེན་དགོངས་པ་མངོན་བྱེད་འགྱུར། །འདི་ཡང་ཕུར་པའི་གནད་ཏིག་གི། །ཡན་ལག་ཉེར་མཁོའི་གསོས་ཙམ་དུ། རྡོ་རྗེ་དབང་མཆོག་རྩལ་གྱིས་བྲིས། །དགེ་བས་བདུད་བཞི་ལས་རྒྱལ་ཤོག །