འཇམ་དཔལ་ཞི་བའི་རྒྱུན་ཁྱེར།
༄༅། །འཇམ་དཔལ་ཞི་བའི་རྒྱུན་ཁྱེར་བཞུགས། ན་མོ་མཉྫུ་ཤྲི་ཡེ། འདིར་དབང་ཐོབ་ཅིང་དམ་ཚིག་ལ་གནས་པས་འཇམ་དཔལ་ཡེ་ཤེས་སེམས་དཔའི་སྒོམ་བཟླས་བྱ་བར་འདོད་པས་ངེས་པར་འབྱུང་བ་དང་བྱང་ཆུབ་ཀྱི་སེམས་བསྒོམ་པ་སྔོན་དུ་འགྲོ་བས། ཨ། འཁོར་འདས་ཆོས་ཀུན་མི་དམིགས་སྟོང་པའི་ངང་། །མཁའ་ཁྱབ་འགྲོ་ལ་སྙིང་རྗེ་ཆེན་པོའི་མདངས། །ངྷིཿཡིག་དམར་སེར་འོད་ཀྱི་འཕྲོ་འདུ་ལས། །སེང་ཁྲི་པད་ཟླར་རང་ཉིད་འཇམ་དཔལ་དབྱངས། །གུར་གུམ་མདོག་ཅན་གཞོན་ཚུལ་མཛེས་པའི་སྐུ། །ཞལ་གཅིག་ཕྱག་གཉིས་རལ་གྲི་པུསྟི་འཛིན། །ཟུར་ཕུད་ལྔ་པ་མཚན་དཔེའི་ལང་ཚོ་རྒྱས། །ལོངས་སྐུའི་རྒྱན་རྫོགས་སྐྱིལ་མོ་དཀྲུང་གིས་བཞུགས། །གནས་གསུམ་འབྲུ་གསུམ་ཐུགས་སྲོག་འོད་ཟེར་གྱིས། །ཡེ་ཤེས་སྤྱན་དྲངས་རྟེན་དང་གཉིས་མེད་བསྟིམ། །དབང་ལྷས་དབང་བསྐུར་དཔག་ཡས་མཆོད་པས་མཆོད། །ཐུགས་སྲོག་ཟླ་སྟེང་སྔགས་ཕྲེང་གཡས་སུ་འཁོར། །དེ་ལས་འོད་འཕྲོས་བདེ་གཤེགས་སྲས་བཅས་མཆོད། །མཁྱེན་བརྩེ་ནུས་པའི་བྱིན་རླབས་མ་ལུས་བསྡུས། །འགྲོ་བའི་སྒྲིབ་སྦྱངས་སངས་རྒྱས་ས་ལ་བཀོད། །སྣོད་བཅུད་ལྷ་སྔགས་ཡེ་ཤེས་རོལ་པ་གྱུར། །ཞེས་མོས་ལ། ༀ་ཨ་ར་པ་ཙ་ན་དྷཱིཿཞེས་ཅི་ནུས་སུ་བཟླའོ། །མཐར། སྲས་བཅས་རྒྱལ་བའི་མཁྱེན་རབ་ཡེ་ཤེས་མཆོག །དྲན་པས་སྙིང་གི་མུན་པ་ཀུན་འཕྲོག་ཅིང་། །ཟབ་དང་རྒྱ་ཆེའི་བློ་མཆོག་སྦྱིན་མཛད་པའི། །མགོན་པོ་འཇམ་པའི་དབྱངས་ལ་ཕྱག་འཚལ་བསྟོད། །ཁྱོད་ལ་གསོལ་བཏབ་སྒོམ་བཟླས་བགྱིས་པའི་མཐུས། །བདག་བློའི་ཉོན་མོངས་རྟོག་པ་རབ་ཞི་ནས། །མཁྱེན་གཉིས་ཡེ་ཤེས་སྣང་བ་རྒྱས་པ་དང་། །མཐར་ཐུག་ཆོས་དབྱིངས་ཆེན་པོར་བྱང་ཆུབ་ཤོག །ཅེས་བརྗོད་ཅིང་གསོལ་བ་གདབ་ནས་བསྐྱེད་རིམ་འོད་གསལ་དུ་བཅུག་སྟེ་བསྐྱེད་རྫོགས་དབྱེར་མེད་ཀྱི་དགོངས་པ་བསྐྱངས་རྗེས་བསྔོ་སྨོན་ཤིས་བརྗོད་ཇི་ལྟར་རིགས་པས་མཐའ་བརྒྱན་པར་བྱའོ། །ཞེས་པའང་བསླབ་གསུམ་ལྡན་པ་འབྲོག་པ་བླ་མ་ཚུལ་རྣམ་གྱི་བཞེད་སྐོང་དུ་འཇམ་དབྱངས་བློ་གྲོས་རྒྱ་མཚོས་གྲུབ་པའི་སྦྱོར་བ་བཟང་པོ་ལ་བྲིས་པ་དགེའོ། །