འཇམ་དཔལ་བསྟོད་སྒྲུབ་གྱི་ཉམས་ལེན་བྱ་ཚུལ་མདོར་བསྡུས།

༄༅། །འཇམ་དཔལ་བསྟོད་སྒྲུབ་གྱི་ཉམས་ལེན་བྱ་ཚུལ་མདོར་བསྡུས་ནི། ན་མོ་གུ་རུ་མཉྫུ་ཤྲཱི་ཡེ། འཇམ་དཔལ་བསྟོད་སྒྲུབ་གྱི་ཉམས་ལེན་བྱ་ཚུལ་མདོར་བསྡུས་ནི། སྐྱབས་སེམས་སྔོན་དུ་འགྲོ་བས། ༀ་སྭ་བྷ་ཝ་སོགས། ཆོས་ཀུན་སྤྲོས་བྲལ་སྟོང་བའི་ངང་ཉིད་ལས། །རྟེན་འབྱུང་མ་འགགས་གནས་གསུམ་འབྲུ་གསུམ་དང་། །སྙིང་དབུས་ཟླ་སྟེང་དྷཱིཿལས་འོད་འཕྲོས་པས། །འཇམ་དཔལ་ཡེ་ཤེས་སེམས་དཔའ་སྤྱན་དྲངས་ཏེ། །མདུན་མཁར་པད་ཟླར་དགྱེས་རོལ་གུར་གུམ་མདངས། །ཟུང་བཞིའི་ན་ཚོད་རལ་གྲི་པུསྟི་འཛིན། །ཟུར་ཕུད་ལྔ་ལྡན་དར་དང་རིན་ཆེན་བརྒྱན། །རྡོ་རྗེའི་སྐྱིལ་ཀྲུང་མུ་མེད་འོད་ཟེར་འབར། །གནས་གསུམ་འབྲུ་གསུམ་ཐུགས་སྲོག་དྷཱིཿཡིག་ལས། །འོད་འཕྲོས་དབང་ལྷ་སྤྱན་དྲངས་དབང་བསྐུར་ཞིང་། །མི་སྐྱོད་རྒྱས་གདབ་གུས་བསྟོད་གསོལ་བཏབ་མཐུས། །ཐུགས་སྲོག་ཉིད་ལས་བསྟོད་ཚོགས་སྔགས་ཕྲེང་འཕྲོས། །བདག་སྙིང་ལ་ཞུགས་མི་ཤེས་མུན་པ་བསལ། །མཁྱེན་བརྩེ་ནུས་པའི་ཡེ་ཤེས་མཆོག་ཐོབ་གྱུར། །ཞེས་མོས་ལ། གང་བློ་མ་དང་། ཨ་ར་པ་ཙ་ཅི་ནུས་བཟླ། མཐར་བསྟོད་པ་དང་། བརྩེ་ལྡན་ཁྱེད་ཀྱི་སོགས་འདོད་དོན་ལ་གསོལ་བ་གདབ། མདུན་གྱི་ལྷ་རང་ལ་བསྟིམས་ནས་ཞི་ལྷག་ཟུང་འཇུག་གི་རྣལ་འབྱོར་བསྒོམ། དེ་ལས་ལྡང་བ་ན། དགེ་བ་འདི་ཡིས་སོགས་བསྔོ་སྨོན་ཇི་ལྟར་རིགས་པས་མཐའ་བརྒྱན་པར་བྱའོ། །ཞེས་པའང་བསླབ་གསུམ་མཛོད་འཆང་མཁན་པདྨ་འོད་ཟེར་གྱི་ཐུགས་བཞེད་བཞིན། འཇམ་དབྱངས་བློ་གྲོས་རྒྱ་མཚོས་ཉུང་གསལ་སྙིང་པོར་དྲིལ་བ་དགེ །༈ ༀ་སྭ་སྟི། རབ་འབྱམས་རྒྱལ་བའི་མཁྱེན་རབ་ཕུང་པོ་ནི། །ཀུན་ཏུ་བཅུ་དྲུག་གཞོན་ནུའི་ལང་ཚོས་འཁྱུད། །དྲན་པས་སྙིང་གི་མུན་སེལ་ལྷག་པའི་ལྷ། །འཇམ་དཔལ་དཔའ་བོ་ཡིད་མཁར་འབྲལ་མེད་མཛོད། །ངེས་དོན་འཕགས་བཞི་བསྐྱེད་པའི་ཡུམ་གྱུར་མཆོག །རྣམ་རོལ་མ་འགགས་ཚངས་སྲས་ལྷ་མོའི་སྐུ། །སྙན་ངག་ཆུ་བོ་སྟོང་གི་འབབས་སྟེགས་མཆོག །མགྲིན་པའི་འོ་མཚོར་རྟག་ཏུ་རོལ་མཛོད་ཀྱེ། །དཔག་མེད་དུས་ནས་ལེགས་བཤད་གོམས་པའི་ཤུགས། །སོ་སོ་ཡང་དག་རིག་བཞིའི་ཆོས་གཏེར་དབྱེ། །གངས་ཁྲོད་སྨྲ་བའི་སེང་ཆེན་གཅིག་པུ་པ། །འཇམ་མགོན་བླ་མས་བདག་རྒྱུད་བྱིན་གྱིས་རློབས། །དེང་འདིར་ལྷག་བསམ་བརྩོན་པའི་ཁུར་ལེན་ལ། །གེགས་མེད་བསམ་པ་ཡིད་བཞིན་འགྲུབ་པ་དང་། །ཡིད་ལ་ཡེ་ཤེས་སྣང་བ་རབ་ཞུགས་ནས། །རང་གཞན་དོན་གཉིས་གྲུབ་པའི་དངོས་གྲུབ་སྩོལ། །ཅེས་པའང་བློ་གྲོས་རྒྱ་མཚོས་འདོད་པའི་དོན་ལ་གསོལ་བ་བཏབ་པ་དགེའོ། །དགེའོ། །དགེའོ། །