རིག་གསུམ་པདྨའི་སྒྱུ་འཕྲུལ་འཛམ་གླིང་གེ་སར་རྒྱལ་པོ་བརྟེན་སྒྲུབ་མཆོད་པའི་ལས་རིམ་འདོད་འབྱུང་ནོར་བུའི་དགའ་ཚལ།

༄༅། །རིག་གསུམ་པདྨའི་སྒྱུ་འཕྲུལ་འཛམ་གླིང་གེ་སར་རྒྱལ་པོ་བརྟེན་སྒྲུབ་མཆོད་པའི་ལས་རིམ་འདོད་འབྱུང་ནོར་བུའི་དགའ་ཚལ་ཞེས་བྱ་བ་བཞུགས་སོ། །ན་མོ་གུ་རུ་མཉྫུ་ཤྲཱི་ཡེ། ཤེས་རབ་རལ་གྲི་མདའ་གཞུ་ཐོགས། །ཉོན་མོངས་མི་ཤེས་གཡུལ་ངོ་སེལ། །དཔའ་བོ་བདུད་དགྲ་བདུད་འདུལ་བ། །གང་འདུལ་སྒྱུ་འཕྲུལ་དྲྭ་བར་འདུད། །རིགས་གསུམ་པདྨ་ཐོད་ཕྲེང་གི། །སྒྱུ་འཕྲུལ་འཛམ་གླིང་དགྲ་བླའི་རྒྱལ། །སེང་ཆེན་ཡིད་བཞིན་ནོར་བུ་མཆོག །སྒྲུབ་ཅིང་མཆོད་པའི་ལས་རིམ་བྲི། །འདིར་དབང་ཐོབ་ཅིང་དམ་ཚིག་ལ་གནས་པས་སེང་ཆེན་ཡིད་བཞིན་ནོར་བུ་བསྒྲུབ་པར་འདོད་པས་གནས་གཙང་མར། འཛོམས་ན་དགྲ་བླའི་སྐུ་འབག་དང་བླ་རྡོ་སྲོག་འཁོར་བཤམས་པའི་མདུན་དུ་རྩ་གསུམ་ཆོས་སྲུང་གི་མཆོད་གཏོར་སྤྱི་དང་། ཁྱད་པར་དགྲ་བླའི་གཏོར་མ་མཁར་ཐབས་ཀྱི་རྩེ་མོར་ནོར་བུ་འབར་བས་བརྒྱན་པ། འཁོར་བཤོས་བུ་བཞི་དང་རིལ་བུ་གྲངས་མེད་པས་བསྐོར། རྒྱུན་ཁྱེར་སོགས་ལ་མཆོད་གཏོར་མཐོང་བརྒྱུད་ལྟར་བཤམས་པ་མཆན། བའི་གཡས་གཡོན་དུ་སྨན་རག་དང་མདུན་དུ་ཕྱི་ནང་ཉེར་སྤྱོད་ཚོགས་གཏོར་སོགས་ཅི་འབྱོར་བའི་མཆོད་པ་དང་། གཞན་ཡང་བསྐང་རྫས་སྤྱན་གཟིགས་དཀོར་ནོར་རོལ་མོའི་བྱེ་བྲག་སོགས་ཇི་ལྟ་ར ིགས་པ་མངོན་པར་འདུ་བྱས་ཏེ། སྒྲུབ་པ་པོ་བདེ་བའི་སྟན་ལ་འཁོད་ནས། ཐོག་མར་འཁོར་བར་ངེས་འབྱུང་དང་གཞན་ཕན་བྱང་ཆུབ་སེམས་ཀྱི་ཀུན་ནས་བསླངས་ཏེ། འཁོར་འདས་ཀྱི་ཆོས་ཐམས་ཅད་སྟོང་ཞིང་བདག་མེད་པ་སྤྲོས་པའི་མཚན་མ་མཐའ་དག་དང་བྲལ་བ་ཡིན་ཡང་། རང་བཞིན་འོད་གསལ་ཀྱི་འཆར་སྒོ་ཅིར་ཡང་མ་འགགས་པས། རབ་འབྱམས་རྩ་གསུམ་ཆོས་སྲུང་དགྲ་བླའི་རོལ་པ་བསམ་གྱིས་མི་ཁྱབ་པར་འཆར་བས་ན། དེ་ཐམས་ཅད་ཀྱང་མཁའ་ཁྱབ་ཡེ་ཤེས་སྒྱུ་མའི་རོལ་མོ་གང་འདུལ་སྒྱུ་འཕྲུལ་དྲྭ་བར་སྣང་བའི་ཕྱིར་དངོས་གཅིག་དུ་མར་འཕྲུལ་བའི་ཚུལ་གྱིས་གནས་ཚུལ་ལ་བཟང་ངན་དམན་མཆོག་གི་དབྱེ་བསལ་རྡུལ་ཙམ་མ་དམིགས་ཤིང་། ཀུན་ཀྱང་རང་སེམས་གཉུག་མའི་རང་རྩལ་དུ་རྟོགས་པའི་ལྟ་བའི་གདེང་དང་ལྡན་པའི་ངང་ནས། ཐོག་མར་སྐྱབས་སུ་འགྲོ་བ་ནི། སྐྱབས་ཀྱི་དམ་པ་སྐྱབས་སུ་འོས། །འཇིག་རྟེན་དགྲ་སྟེ་རབ་ཀྱི་མཆོག །འཇིགས་པ་མ་ལུས་སེལ་བ་པོ། །སྐྱབས་གནས་རྣམས་ལ་སྐྱབས་སུ་མཆི། །ལན་གསུམ། སེམས་བསྐྱེད་པ་ནི། མི་ཤེས་འདམ་དུ་བྱིང་བ་ཡི། །སེམས་ཅན་ཀུན་ལ་སྨན་པ་དང་། །བླ་མེད་འབྲས་བུ་འཐོབ་བྱའི་ཕྱིར། །རྫོགས་པའི་བྱང་ཆུབ་སེམས་བསྐྱེད་དོ། །ལན་གསུམ། ཚོགས་བསགས་ཡན་ལག་བདུན་པ་ནི། འགྲོ་བའི་བླ་མ་སྟོན་པ་པོ། །དམ་ཚིག་ཆེན་པོ་དེ་ཉིད་མཁྱེན། །དབང་པོ་བསམ་པ་མཁྱེན་མཆོག་གི། །བཅོམ་ལྡན་འདིར་ནི་དགོངས་པར་མཛོད། །བཅོམ་ལྡན་འདས་ཀྱི་ཡེ་ཤེས་སྐུ། །ཡེ་ཤེས་སྐུ་སྟེ་རང་བྱུང་བ། །རིག་གསུམ་པདྨ་རྒྱལ་པོ་ལ། །གུས་པས་ཕྱག་འཚལ་སྐྱབས་སུ་མཆི། །མཆོག་གི་དང་པོ་སྐུ་གསུམ་འཆང་། །སངས་རྒྱས་སྐུ་ལྔའི་བདག་ཉིད་ཆེ། །ཁྱབ་བདག་ཡེ་ཤེས་ལྔ་ཡི་བདག །དེ་བཞིན་གཤེགས་ལ་ཕྱག་འཚལ་ལོ། །དོན་ཟབ་དོན་ནི་རྒྱ་ཆེ་ཞིང་། །དོན་ཆེན་མཚུངས་མེད་རབ་ཞི་བ། །ཐོག་མ་བར་དང་མཐར་དགེ་བ། །དམ་པའི་ཆོས་ལ་ཕྱག་འཚལ་ལོ། །མྱ་ངན་འདས་ཞི་མྱ་ངན་འདས། །ལེགས་པར་མྱ་ངན་འདས་དང་ཉེ། །བདེ་སྡུག་སེལ་བ་མཐར་གྱུར་པའི། །དགེ་འདུན་ལ་ཡང་ཕྱག་འཚལ་ལོ། །མཆོད་འོས་བསྟོད་འོས་ཕྱག་གི་གནས། །རྟག་ཏུ་རི་མོར་བྱ་བའི་འོས། །བཀུར་འོས་བརྗོད་པར་བྱ་བའི་མཆོག །ཀུན་ལའང་གུས་པས་ཕྱག་འཚལ་ལོ། །ཁྱབ་བདག་བདག་ལ་སྨན་པ་དང་། །བདག་དོན་བདག་ལ་ཐུགས་བརྩེའི་ཕྱིར། །བདག་ལུས་ལོངས་སྤྱོད་དགེ་རྩར་བཅས། །ཀུན་བཟང་མཆོད་པའི་སྤྲིན་དུ་བཞེས། །ཉོན་མོངས་པས་ནི་སེམས་དཀྲུགས་ཤིང་། །མི་ཤེས་འདམ་དུ་བྱིང་བ་ཡི། །བྱིས་པ་བདག་གི་ནོངས་པ་ཀུན། །སྙིང་ནས་འགྱོད་པས་བཤགས་ཤིང་སྡོམ། །སྨོན་ལམ་ཡེ་ཤེས་རྒྱ་མཚོ་སྟེ། །བྱམས་ཆེན་རང་བཞིན་དཔག་ཏུ་མེད། །སྙིང་རྗེ་ཆེན་པོ་བློ་ཡི་མཆོག །དེ་ལ་བདག་ནི་ཡི་རང་ངོ་། །ཉོན་མོངས་མ་ལུས་བསལ་བ་དང་། །མི་ཤེས་མ་ལུས་སྤང་བའི་ཕྱིར། །བསམ་པའི་ཁྱད་པར་ཇི་བཞིན་དུ། །ཆོས་ཀྱི་འཁོར་ལོ་བསྐོར་བར་བསྐུལ། །སངས་རྒྱས་སྤྲུལ་པའི་རྒྱུད་འཆང་བ། །ཕྱོགས་བཅུར་སྤྲུལ་པ་སྣ་ཚོགས་འགྱེད། །ཇི་བཞིན་འགྲོ་བའི་དོན་བྱེད་པ། །ཀུན་ལ་རྟག་པར་བཞུགས་གསོལ་འདེབས། །རྣམ་པར་མི་རྟོག་དབྱིངས་མི་ཟད། །ཆོས་དབྱིངས་དམ་པ་ཟད་མི་ཤེས། །བསོད་ནམས་ལྡན་པ་བསོད་ནམས་ཚོགས། །ཀུན་ཀྱང་ཡེ་ཤེས་ཆེན་པོར་བསྔོ། །ལན་གསུམ། སྤྲོ་ན་སྐབས་འདིར་རྗེ་བླ་མའི་གསུང་ལྟར་གེ་སར་བླ་མའི་རྣལ་འབྱོར་སྦྱར། གང་ལྟར་ཡང་བགེགས་ལ་བཀའ་བསྒོ་བ་ནི། བགེགས་གཏོར་རཾ་ཡཾ་ཁཾ་གིས་བསངས། ༀ་ཨཱཿཧཱུྃ་གིས་བྱིན་གྱིས་བརླབས། ༀ་སརྦ་བྷུ་ཏ་ཨཱ་ཀཪྵཱ་ཡ་ཛཿས་མགྲོན་དགུགས། ༀ་སརྦ་བིགྷྣན་ན་མ་སརྦ་ཏ་ཐཱ་ག་ཏ་བྷྱོ་སོགས་ལན་གསུམ་གྱིས་བསྔོ། ཧཱུྃ། བླ་མ་རྣམས་ཀྱི་བྱིན་རླབས་དང༔ཡི་དམ་ལྷ་ཡི་ཏིང་འཛིན་དངཿམཁའ་འགྲོ་རྣམས་ཀྱི་མཐུ་རྩལ་གྱིསཿདངོས་གྲུབ་བར་ཆད་བྱེད་པའི་བགེགསཿལོག་པར་འདྲེན་པ་བདུད་ཀྱི་ཚོགསཿའདི་རུ་མ་འདུག་གཞན་དུ་དེངས༔ཞེས་དང་ཧཱུྃ་བཞི་པའི་སྔགས་བརྗོད་ཅིང་གཏོར་མ་ཕྱི་རོལ་དོར་ལ་བགེགས་བསྐྲད། མཚམས་གཅོད་པ་ནི། ཧཱུཾ། ང་ནི་ཡེ་ནས་ངང་གིས་ཁྲོ༔མཚམས་གཅོད་ཁྲོ་བོས་ནམ་མཁའ་གང༔བགེགས་འདུལ་ཁྲོ་བོའི་རོལ་མཚམས་ལསཿསུ་ཡང་འདའ་བར་མ་བྱེད་ཅིགཿༀ་བཛྲ་ཀྲོ་ངྷ་རཀྵ་རཀྵ་ཧཱུྃ༔ཞེས་བསྲུང་འཁོར་བསྒོམ། བྱིན་དབབ་པ་ནི། ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམསཿཔདྨ་གེ་སར་སྡོང་པོ་ལ༔ཡ་མཚན་མཆོག་གི་དངོས་གྲུབ་བརྙེས༔བདྨ་འབྱུང་གནས་ཞེས་སུ་གྲགས༔འཁོར་དུ་མཁའ་འགྲོ་མང་པོས་བསྐོར༔ཁྱེད་ཀྱི་རྗེས་སུ་བདག་སྒྲུབ་ཀྱིཿབྱིན་གྱིས་རློབས་ཕྱིར་གཤེགས་སུ་གསོལ༔ད་ལྟ་སྙིགས་མ་ལྔ་ཡི་དུས། །ནག་ཕྱོགས་རྒྱ་འདྲེའི་འཚུབ་འགྱུར་དང་། །མཐའ་དམག་གདུག་པའི་ཁ་གནོན་དུ། །ཁྱོད་ཉིད་དགྲ་བླའི་སྐུར་བཞེངས་པ། །གེ་སར་རྒྱལ་པོའི་བྱིན་ཕོབ་ཅིག༔བཀྲ་ཤིས་གསང་བའི་གནས་མཆོག་འདི། །གཞལ་ཡས་ཁང་དུ་བྱིན་གྱིས་རློབས། །སྒྲུབ་རྫས་རྣམས་ལ་བྱིན་འོད་ཕོབ། །རྣལ་འབྱོར་བདག་ལ་དབང་བཞི་བསྐུར། །བགེགས་དང་ལོག་འདྲེན་བར་ཆད་སོལ༔མཆོག་དང་ཐུན་མོང་དངོས་གྲུབ་སྩོལ༔ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིངྔྷི་ཕ་ལ་ཧཱུྃ༔ཀཱ་ཡ་ཝཱ་ཀ་ཙིཏྟ་ཛྙ་ན་ཨཱ་བེ་ཤ་ཡ་ཨ་ཨཱ༔ཞེས་དབབ། མཆོད་རྫས་བྱིན་གྱིས་རླབས་པ་ནི། རཾ་ཡཾ་ཁཾ་གིས་བསང་སྦྱངས། ཧཱུྃ། རྣམ་དག་ཆོས་དབྱིངས་ངང་ཉིད་ལས༔རང་བྱུང་མཆོད་པའི་ཕུང་པོ་ནིཿཀུན་བཟང་མཆོད་པའི་སྤྲིན་ལྟ་བུ༔དཔག་ཡས་ནམ་མཁའ་གང་བར་གྱུར༔ༀ་བཛྲ་ཨརྒྷཾ་ནས་ཤཔྟ་ཨཱ་ཧཱུྃ་གི་བར་དང་། ༀ་སརྦ་པཉྩ་ཨ་མྲྀ་ཏ་ཨཱཿཧཱུྃ༔ༀ་མ་ཧཱ་རཀྟ་ཨཱཿཧཱུྃ༔ༀ་མ་ཧཱ་བ་ལིངྟ་ཨཱཿཧཱུྃཿགིས་བརླབ། བཛྲ་སྥ་ར་ཎ་ཁཾ་གྱིིས་མཁའ་ཁྱབ་ཏུ་སྤེལ་ལོ། དེས་ཆོ་གའི་སྔོན་འགྲོ་རྣམས་སོང་ནས། དངོས་གཞིའི་ཐོག་མར་བདག་བསྐྱེད་བསྒོམ་པ་ནི། ཆོས་དབང་བླ་མ་གསང་བ་འདུས་པ་ལྟར་བྱ་སྟེ། ༀ། ཆོས་སྐུ་མི་འགྱུར་རྡོ་རྗེའི་སེམས༔པདྨ་རྒྱལ་པོ་འདི་སྐད་སྨྲ༔དང་པོ་ཆོས་རྣམས་དམིགས་མེད་ཅིང༔སྨྲ་བརྗོད་བྲལ་བ་རྫོགས་པ་ཆེ༔བློ་འདས་ཆོས་སྐུ་མི་འགྱུར་བའི༔དེ་བཞིན་ཉིད་ཀྱི་ཏིང་འཛིན་བསྒོམ༔ཨཱཿབློ་བྲལ་དེ་ཡི་ངང་ཉིད་ལས༔སེམས་ཅན་ཀུན་ལ་ཁྱབ་པ་ཡིསཿབརྩེ་བའི་སྙིང་རྗེ་ཆེན་པོ་བསྒོམ༔ཧཱུྃ༔སྟོང་ཉིད་སྙིང་རྗེའི་ངང་ཉིད་ལས༔འགྲོ་དོན་དཔག་མེད་བྱེད་པའི་སླད༔རང་རིག་གསེར་གྱི་རྡོ་རྗེར་བསྒོམ༔རྡོ་རྗེའི་འོད་ལས་གཞལ་ཡས་ཁང༔པདྨ་རིན་ཆེན་འབར་བར་སྤེལ༔འཇའ་ཚོན་བྲེས་པ་ལྟ་བུའི་ནང༔ལྟེ་དབུས་ཉི་ཟླ་པདྨའི་སྟེང༔རྡོ་རྗེ་གནས་གྱུར་དྲན་རྫོགས་སུ༔རྟ་མགྲིན་དབང་ཆེན་སྐུ་མདོག་དམར༔ཞལ་གཅིག་ཕྱག་གཉིས་དབུ་ཡི་གཙུག༔རྟ་མགོ་རྟ་སྐད་ཕྱོགས་བཅུར་སྒྲོག༔ཕྱག་གཡས་དབང་སྡུད་གྲི་གུག་འཕྱར༔ཕྱག་གཡོན་ཐོད་པ་ཁྲག་བཀང་གསོལ༔རུས་པའི་རྒྱན་དྲུག་ཁ་ཊྭཱཾ་བསྣམས༔གཡས་བསྐུམ་གཡོན་བརྐྱང་བདུད་བཞི་བརྫིས༔ཉི་ཟླ་པད་སྟེང་འགྱིང་ཞིང་བརྗིད༔གཡོན་ནས་རྡོ་རྗེ་ཕག་མོ་འཁྱུད༔ཆ་ལུགས་ཡབ་འདྲ་སྤྱི་བོའི་གཙུག༔ཕག་ཞལ་མཐིང་ག་ངུར་སྒྲ་སྒྲོག༔གཞོན་ཚུལ་ནུ་མ་བྷ་ག་རྒྱས༔བསྐལ་པའི་མེ་དཔུང་ཀློང་ན་བཞུགས༔འོད་ཟེར་རྡོ་རྗེའི་ཚྭ་ཚྭ་འཕྲོ༔དེ་ཉིད་སྤྱི་གཙུག་ཉི་ཟླའི་སྟེང༔པདྨ་གེ་སར་སྙིང་པོ་ལ༔བདག་ཉིད་པདྨ་ཐོད་འཕྲེང་རྩལ༔རྡོ་རྗེ་སེམས་དཔའི་ཆ་ལུགས་ཅན༔མཐིང་ནག་ཞལ་གཅིག་ཕྱག་གཉིས་པ༔གཅེར་བུ་སྤྱན་གསུམ་རུས་རྒྱན་ཅན༔ཕྱག་གཡས་རྡོ་རྗེ་ཐུགས་ཀར་འཛིན༔ཕྱག་གཡོན་དྲིལ་བུ་ཡུམ་ལ་འཁྱུད༔ཞབས་གཉིས་རྡོ་རྗེ་སྐྱིལ་ཀྲུང་བཞུགས༔དེ་ཡི་འཕང་གཡོན་རིག་མ་ནི༔ཡེ་ཤེས་མཁའ་འགྲོ་འཚོ་རྒྱལ་མ༔བཅུ་དྲུག་ལོན་པའི་གཞོན་ཚུལ་ཅན༔པད་མདོག་ནུ་མ་བྷ་ག་རྒྱས༔རིན་ཆེན་རུས་རྒྱན་ཅོད་པན་ཅན༔ཕྱག་གཡས་ཡབ་ཀྱི་མགུལ་ནས་འཁྱུད༔ཕྱག་གཡོན་ཐོད་པའི་བདུད་རྩི་སྟོབ༔ཞབས་གཉིས་ཡབ་ཀྱི་སྐེད་ལ་འཁྲིལ༔སྐུ་མདོག་དཀར་དམར་འཛུམ་མདངས་ཅན༔སྐྲ་གྲོལ་གཅེར་བུ་འོད་ལྡན་བསམ༔ཕྱོགས་བཞིར་རིགས་བཞི་ཐོད་ཕྲེང་རྩལ༔དཀར་སེར་དམར་དང་ལྗང་གུའི་མདོག༔ལས་བཞི་བསྒྲུབ་ཕྱིར་མོས་པས་བསྐྱེད༔ཁོར་ཡུག་འཇའ་ཡི་དྲྭ་བར་བསྒོམ༔ཕྱོགས་མཚམས་རིན་ཆེན་ཟུར་བརྒྱད་ཀྱི༔འཛུམ་སྟེང་བར་སྣང་འཇའ་འོད་ཀློང༔སྤྲུལ་པའི་གུ་རུ་མཚན་བརྒྱད་གསལ༔ཧྲཱིཿཕོ་བྲང་ཕྱོགས་བཞིར་པད་འདབ་བཞི༔དཀར་སེར་དམར་ལྗང་རིན་ཆེན་འབྲུའི༔ནང་ཁོང་ཞིང་གི་གདན་བཞི་ལཿརྡོ་རྗེ་རིན་ཆེན་པདྨ་དང༔ལས་ཀྱི་མཁའ་འགྲོ་ཡབ་ཡུམ་རྣམས༔སྐུ་མདོག་རིགས་ཀྱི་ཁ་དོག་ལ༔འཁྲིལ་སྦྱོར་རྒྱན་དང་ཆ་ལུགས་རྣམས༔གཙོ་བོ་ཡབ་ཡུམ་གཉིས་ལྟར་བསྐྱེད༔སྣ་ཚོགས་པད་འཁོར་ཕྱི་མ་ལ༔བདག་སྐྱོབ་ལྷ་དང་རིག་འཛིན་དང༔རིགས་འདུས་མཁའ་འགྲོ་ཆོས་སྐྱོང་རྣམས༔དངོས་གྲུབ་སྟེར་ཞིང་བར་ཆད་སེལ༔གླུ་དང་གར་བྱེད་རོལ་མོ་སྒྲོག༔འདོད་ཡོན་མཆོད་པ་སྣ་ཚོགས་སྟོབ༔ཆར་སྤྲིན་གཏིབས་པ་ལྟ་བུར་བསྐྱེད༔དུ་མར་སྣང་ཡང་རང་དུ་གཅིག༔ཅེས་གསལ་གདབ། བཟླས་པ་བྱ་བ་ནི། སྣང་སྲིད་གཞལ་ཡས་བླ་མ་ལྷ༔ཐམས་ཅད་ཕྱག་རྒྱའི་དཀྱིལ་འཁོར་ཆེ༔དཔེར་ན་ཆུ་ཟླ་འཇའ་ཚོན་ལྟར༔སྣང་ལ་རང་བཞིན་མེད་པར་བསྒོམ༔ཞེས་པའི་དགོངས་པ་སྲོག་ཏུ་བཟུང་ནས་སྤྱི་བོའི་བླ་མ་ལ་སེམས་རྩེ་གཅིག་པའི་མོས་གུས་གདུང་ཤུགས་དྲག་པོས། ༀ་ཨཱཿཧཱུྃ་བཛྲ་གུ་རུ་པདྨ་སིངྔྷི་ཧཱུྃ༔ཞེས་བསྙེན་པའི་ཚུལ་དུ་བཟླ་དབང་བཞི་ལེན་པའི་དམིགས་གནད་དང་སྦྱར་སྟེ། ༀ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛ༔སིངྔྷི་ཕ་ལ་ཧཱུྃ་ཨཱཿཞེས་བཟླས་མཐར། རང་རྟ་མགྲིན་དུ་གསལ་བའི་ཐུགས་རྗེའི་འོད་ཀྱིས་རིགས་བཞིའི་ཐོད་ཕྲེང་བསྐུལ་བས་སྐུ་དང་འོད་ཟེར་གྱི་སྤྲོ་བསྡུས་ཕྲིན་ལས་གང་འདོད་སྒྲུབ་པར་བསམས་པ། ཧྲཱི་མ་ཧ་རི་ནི་ས་ར་ཙ་ཧྲཱི་ཡ་ཙིཏྟ་ཧྲིང་ཧྲིཾ་བཛྲ་སརྦ་སིངྔྷི་ཤནྟིཾ་པུཥྚིང་ཝཱ་ཤཾ་མཱ་ར་ཡ་རྦད༔ཅེས་པའང་ཅི་རིགས་སུ་བཟླའོ། །དེ་ནས་མདུན་བསྐྱེད་ཀྱི་ལས་གཞུང་དངོས་ནི། རྡོ་རྗེ་ཚེ་རྒྱལ་གྱི་བསྐང་གསོལ་འདོད་རྒུ་མྱུར་འགྲུབ་ཉིད་མཐར་ཆགས་སུ་གཏོང་བ་ལས་གཞན་མ་དགོས་ཤིང་བྱིན་རླབས་ཀྱི་ཚན་ཁ་ཆེ་བས་ཚིག་ཉོབ་ཀྱང་མི་དགོས། ལྷ་བསྐྱེད་ཀྱི་སྐུའི་རྣམ་འགྱུར་ཡང་གཞུང་གསལ་ལྟར། སྐབས་སུ་གང་བབ་ཁ་བསྒྱུར་ཀྱང་དེར་གསལ་བ་བཞིན་བྱ་བ་ལས་གཞན་མ་དགོས། སྤྱན་འདྲེན་སོགས་གཞུང་ལྟར་ལ། དམ་བཞག་འཕྲོར་སྤྲོ་ན། ཧཱུྃ། ཤེས་རབ་རལ་གྲི་མདའ་གཞུ་ཐོགས། །ཉོན་མོངས་མི་ཤེས་གཡུལ་ངོ་སེལ། །དཔའ་བོ་བདུད་དགྲ་བདུད་འདུལ་བ། །ཁྱོད་ལ་གུས་པས་ཕྱག་འཚལ་ལོ། །ༀ་ན་མོ་ན་མ་མི། ཞེས་པས་ཕྱག་བྱ། ཧཱུྃ། མཆོད་པ་ཆེན་པོ་དགའ་བ་ཆེ། །དགའ་བ་ཆེན་པོ་མགུ་བ་ཆེ། །དགའ་ཆེན་རོལ་མོ་བསམ་ཡས་པ། །ཀུན་བཟང་མཆོད་པའི་སྤྲིན་གྱིས་མཆོད། །ༀ་ཏྲི་ཞིམ་ཁྱིམ་ས་པཱ་རི་ཝཱར་ཨརྒྷཾ་སོགས་སྦྱར་ཡང་མི་འགལ་ལོ། །བཤགས་པ་ནས་བཟུང་བསྟོད་པའི་བར་དང་། བཟླས་དམིགས་གཞུང་གསལ་ལྟར་གྱིས་བསྙེན་པ་བྱེད་ན་ཡིག་འབྲུ་རེ་ལ་ཁྲི་རེ་ཁ་སྐོང་དང་བཅས་པ་བཟླ་བ་སོགས་སྤྱི་ལྟར། ཐུན་མཐར་དབྱངས་གསལ་ཡིག་བརྒྱ་རྟེན་སྙིང་རྣམས་གསུམ་གསུམ་བཟླས་པས་སྔགས་ཀྱི་ནུས་པ་ཉམས་པ་གསོ་ཞིང་བརྟན་པར་བྱས་ལ། ཧཱུྃ། དངོས་འབྱོར་ཡིད་ལས་བྱུང་བ་ཡི། །ཉེར་སྤྱོད་འདོད་ཡོན་བཀྲ་ཤིས་རྫས། །སྨན་གཏོར་རཀྟ་མཁོ་དགུའི་རྫས། །མི་འཛད་ནམ་མཁའ་མཛོད་དུ་འབུལ། །ཞེས་དང་གོང་གི་མཆོད་སྔགས་ཀྱིས་མཆོད། ཧཱུྃ། རྒྱལ་ཀུན་མཁྱེན་བརྩེ་ནུས་པའི་གར། །རིགས་གསུམ་པདྨའི་སྒྱུ་འཕྲུལ་མཆོག །རྡོ་རྗེ་ཚེ་རྒྱལ་འཁོར་བཅས་ལ། །གུས་པས་བསྟོད་དོ་དངོས་གྲུབ་སྩོལ། །ཞེས་བསྟོད། སྐབས་འདིར་སྤྲོ་ན། ཀུན་མཁྱེན་བླ་མའི་གསུངས་ཝེར་མའི་བསང་དང་གསེར་སྐྱེམས་གསོལ་མཆོད་ཕྲིན་ལས་མྱུར་འགྲུབ་སོགས་ཇི་ལྟར་འོས་པ་བྱ། གཞན་ཡང་ཚོགས་མཆོད་འབུལ་བར་སྤྲོ་ན། དམ་ཚིག་རྫས་རྣམས་ཚོགས་པར་བྱས་ལ་ནང་མཆོད་ཀྱིས་བྲན་ཏེ། རཾ་ཡཾ་ཁཾ། ༀ། ཕྱི་སྣོད་རྣམ་དག་རང་བྱུང་ཀ་པཱ་ལར། །ནང་བཅུད་རྣམ་དག་ཤ་ལྔ་བདུད་རྩི་ལྔ། །འདོད་ཡོན་ཟག་མེད་ཡེ་ཤེས་ཆེན་པོའི་སྤྲིན། །མཁའ་ཁྱབ་ནམ་མཁའ་མཛོད་ཀྱི་འཁོར་ལོར་གྱུར། །ༀ་ཨཱཿཧཱུྃ་ཧ་ཧོ་ཧྲཱིཿབྱིན་གྱིས་བརླབས། ཧྲཱིཿམི་འགྱུར་བདེ་བ་ཆེན་པོའི་ཡེ་ཤེས་ནི། །རྣམ་མང་འགྲོ་བ་འདུལ་ཕྱིར་ཕྱག་རྒྱའི་གར། །གང་འདུལ་སྒྱུ་འཕྲུལ་དྲྭ་བའི་རོལ་གར་མཁན། །རིགས་གསུམ་པདྨའི་སྒྱུ་འཕྲུལ་སེང་ཆེན་རྗེ། །རབ་འབྱམས་རྩ་གསུམ་དགྲ་བླའི་དཔུང་ཚོགས་བཅས། །ཐུགས་རྗེའི་ཐུགས་དམ་དབང་གིས་འདིར་གཤེགས་ལ། །འདོད་ཡོན་ཟག་མེད་བདུད་རྩིའི་ཚོགས་མཆོད་བཞེས། །ཉམས་ཆག་འགལ་འཁྲུལ་ཆོས་དབྱིངས་ཀློང་དུ་བཤགས། །མི་ཕྱེད་རོ་མཉམ་ཆེན་པོར་ཐུགས་དམ་བསྐང་། །བར་ཆད་བདུད་བཞིའི་འཚེ་བ་དབྱིངས་སུ་སྒྲོལ། །བསྟན་དགྲ་དམ་ཉམས་གདུག་པའི་སྙིང་ཁྲག་བཞེས། །ཚེ་བསོད་དབང་ཐང་རླུང་རྟ་རྒུད་པ་གསོས། །ཕྱོགས་ལས་རྣམ་རྒྱལ་སྙན་པའི་འབྲུག་སྒྲ་སྒྲོགས། །བསམ་པའི་དོན་ཀུན་ཡིད་བཞིན་འགྲུབ་པ་དང་། །མཐའ་དམག་དམ་སྲི་རྒྱ་འདྲེས་འཚེ་བ་ཟློག །སངས་རྒྱས་བསྟན་པ་རྒྱས་པའི་ཕྲིན་ལས་མཛོད། །མ་ཧཱ་ག་ན་ཙཀྲ་པཱུ་ཛ་ཁཱ་ཧི། ཞེས་སྤྱན་དྲངས་ལ་ཚོགས་མཆོད་སོགས་ཕུལ་ཞིང་ཕྲིན་ལས་གསོལ་ལ་ཡིག་བརྒྱ་བཟླ། གུ་རུའི་གསོལ་འདེབས་བསམ་པ་ལྷུན་གྲུབ་མ་འདོན་ཞིང་ཚོགས་ལ་རོལ། ལྷག་མ་རྣམས་གསོག་འཇོག་མེད་པར་བསྡུས་ལ། ༀ་ཨཱཿཧཱུྃ་ཧ་ཧོ་ཧྲཱིཿས་བྱིན་གྱིས་བརླབ་ལ། ཨེ་ཨ་རལླི་ཧྲཱིཾ་ཧྲཱིཾ་ཕིཾ་ཕིཾ་གྱིས་ལྷག་མགྲོན་དགུགས་ལ། ཧཱུྃ། རྡོ་རྗེའི་དམ་ཚིག་བླ་མེད་འདོད་ཡོན་རྫས། །བཀའ་ཡི་ཕམ་ཕབ་ཟག་མེད་བདུད་རྩིའི་སྤྲིན། །ལྷག་ལ་དབང་རྣམས་ཅི་བདེར་བཞེས་མཛོད་ལ། །འཁོར་སྲུང་རྐྱེན་ཟློག་བཅོལ་པའི་ཕྲིན་ལས་མཛོད། །ༀ་ཨུཙྪིཥྚ་བ་ལིངྟ་ཁཱ་ཧི། ཞེས་བརྗོད་ལ་ལྷག་མ་ཕྱི་རོལ་དུ་དོར། འདིར་གཏེར་བདག་ཝེར་མའི་བསྐང་བ་ནོར་བུ་རྒྱས་པའི་སྤྲིན་ཆེན་དང་། གཡང་འགུགས་སྲིད་ཞིའི་དྭངས་བཅུད་སྡུས་པའི་ནོར་བུ་སོགས་སྤྲོ་ན་སྦྱར་ཞིང་། གཞུང་གི་མངའ་གསོལ་ཕྲིན་བཅོལ་བཅས་མཐར་དབྱུང་། དེ་ནས་མཆོད་གཏོར་ལ་དགྲ་བགེགས་འགུགས་བསྟིམ་སྤྱི་ལྟར་བྱས་ལ། ༀ་ཨཱཿཧཱུྃ་ཧོཿས་བྱིན་གྱིས་བརླབས། རང་སྔགས་ལ་གཏོར་སྔགས་བཏགས་པ་ལན་གསུམ། ཧཱུྃ་ཧྲཱི༔འཇིགས་རུང་སྲིན་པོའི་གྲོང་ཁྱེར་དཔལ་གྱི་རི། །སོགས་ཕྲིན་སྒྲུབ་ལྟར་གྱི་མཆོད་གཏོར་གཙང་སར་ཕུལ། རྗེས་མཆོད་བསྟོད་སོགས་གོང་བཞིན་དང་། ནོངས་བཤགས་རྟེན་བཞུགས་བཅས་སྤྱི་ལྟར་བྱ། དེ་ནས་བདག་བསྐྱེད་བསྡུ་བ་ནི། བླ་མ་རྡོ་རྗེ་སེམས་དཔའ་ཉིད༔དགྱེས་པ་ཆེན་པོས་རང་ལ་ཐིམ༔རང་ཡང་ཀུན་གཞི་མ་བཅོས་པའི༔ངང་ལ་ཡིད་ནི་འཛིན་པ་བྲལ༔རྣམ་དག་སྤྲོས་བྲལ་ཆོས་ཀྱི་སྐུ༔ཞེས་པས་དཀྱིལ་འཁོར་གྱི་འཁོར་ལོ་ཐམས་ཅད་སྤྱི་བོའི་བླ་མ་ལ་འདུས་ཤིང་དེ་ཉིད་རང་ལ་ཐིམ་པར་མོས་ཏེ། བླ་མ་དང་རང་སེམས་གཉིས་མེད་སྤྲོས་བྲལ་བློ་འདས་ཀྱི་དགོངས་པ་བསྐྱང་ངོ་། །བསྔོ་སྨོན་ནི། ཨེ་མ་ཧོཿབདག་གིས་འགྲོ་བ་ཀུན་དོན་དུ༔བསྐལ་པ་དཔག་མེད་ཚུན་ཆད་ནས༔ཐ་མ་ད་ལྟར་ཐུག་གི་བར༔བདག་གི་ལུས་ངག་ཡིད་གསུམ་ཀྱིས༔བླ་མ་སྐྱེས་མཆོག་ཡི་དམ་ལྷ༔སངས་རྒྱས་བྱང་སེམས་ཌཱ་ཀིའི་ཚོགས༔བསྒོམས་བསྒྲུབས་མཆོད་ཅིང་བསྟོད་པ་དང༔བྲིས་བཀླགས་བཅངས་ཤིང་ཀུན་ཆུབ་བགྱིས༔ལྟ་དགོངས་ལ་སོགས་དགེ་སྤྱད་པའི༔འབྲས་བུ་དུས་འདིར་སྨིན་གྱུར་ནས༔ཀུན་མཁྱེན་ཡེ་ཤེས་མཆོག་ཐོབ་ཤོག༔གཞན་ཡང་ཕྱོགས་བཅུ་དུས་གསུམ་གྱི༔བླ་མའི་ཐུགས་དགོངས་རབ་རྫོགས་ཤིང༔དུས་གསུམ་ཕ་མས་སྣ་དྲངས་པའི༔འགྲོ་དྲུག་སེམས་ཅན་མ་ལུས་ཀུན༔བླ་མ་མཆོག་གིས་རྗེས་བཟུང་ནས༔ཡང་དག་རྡོ་རྗེའི་དོན་རྟོགས་ཤོག༔ཅེས་དང་། ཨེ་མ་ཧོ༔ཤེས་བྱའི་དོན་ལ་མ་རྨོངས་པའི༔བླ་མ་དམ་པའི་བཀྲ་ཤིས་ཤོག༔གང་ལ་བསམ་པའི་དོན་འགྲུབ་པའི༔དོན་འགྲུབ་མཆོག་གི་བཀྲ་ཤིས་ཤོག༔སྐུ་གསུང་ཐུགས་ཀྱི་བྷ་ག་ནས༔ཕྱག་རྒྱ་ཆེན་པོའི་བཀྲ་ཤིས་ཤོག༔ཅེས་ཤིས་བརྗོད་ཀྱི་མཚམས་སྦྱར་ཏེ་སྤྱོད་ལམ་ལ་འཇུག་གོ །ཡང་གཡང་སྒྲུབ་གཙོར་བྱེད་ན་བཅས་བཤམས་སོགས་གཡང་སྒྲུབ་གཞུང་གསལ་ལྟ་བུ་འདུ་བགྱིས་ཤིང་། ཆོ་གའི་སྤྱི་ཁོག་སྐྱབས་སེམས་ནས་བདག་བསྐྱེད་བར་གོང་གསལ་ལྟར་ལ། དེ་ནས་མདུན་བསྐྱེད་རྡོ་རྗེ་ཚེ་རྒྱལ་གྱི་ཚབ་ཏུ་གསང་སྒྲུབ་ཡིད་བཞིན་ནོར་བུ་བསམ་འཕེལ་ལྟར་བྱས་ཏེ། ཛབ་དམིགས་དང་སྦྲགས་བཟླས་པ་ཅི་འགྲུབ་སོགས་རྗེས་དབྱངས་གསལ་རྟེན་སྙིང་ཡིག་བརྒྱ་དང་། གོང་གསལ་ལྟར་མཆོད་བསྟོད་སོང་མཚམས་ཕུད་མཆོད་སོགས་སྤྲོ་ན་བྱ། དེ་ནས་ཚོགས་གོང་གསལ་དང་། རང་གཞུང་བསྐང་བ་དང་གཡང་འགུགས་སོགས་ཇི་ལྟར་རིགས་པ་གྲངས་བསགས། མཐར་ནོངས་བཤགས་དང་མཆོད་བསྟོད་སོང་རྗེས། རྟེན་རྫས་རང་གི་གནས་གསུམ་དུ་རེག་ལ། ཧཱུྃ། ཨོ་རྒྱན་ཡུལ་གྱི་ནུབ་བྱང་མཚམས༔སོགས་གཡང་འགུགས་རང་གཞུང་གི་སྤྱན་འདྲེན་ལྟར། མི་ཤིགས་ཐིག་ལེར་རྒྱས་ཐོབ་ལ༔རྡོ་རྗེའི་ཚེ་གཡང་དངོས་གྲུབ་སྩོལ༔ཞེས་དང་ཐོད་ཕྲེང་རྩལ་དང་རང་སྔགས་མཐར་ཀཱ་ཡ་ཝཱ་ཀ་ཙིཏྟ་སརྦ་སིངྔྷི་ཕ་ལ་ཧཱུྃཿཞེས་བཏགས་ལ་དངོས་གྲུབ་བླངས། ཨཱཿསྣང་སྟོང་མཉམ་པ་ཆེན་པོའི་ཐིག་ལེ་རུ༔སོགས་བརྗོད་ལ་མཉམ་པར་བཞག་པས་རྒྱས་བཏབ། བརྟན་བཞུགས་དང་ཤིས་བརྗོད་རྒྱས་པར་བྱས་ཏེ། བདག་བསྐྱེད་བསྡུ་ལྡང་སོགས་སྤྱི་ལྟར་བྱ། གཞན་རླུང་རྟ་བསྐྱེད་པ། དགྲ་བླ་ལུས་གཞུགདགྲ་བྲུབ། ལྕགས་ཚན་དང་། བ་དན་བསྒྲུབ་པ་སོགས་ནི་རང་རང་གི་གཞུང་ནས་བསྟན་པ་བཞིན་བྱས་པས་དོན་འགྲུབ་པ་ཡིན་ནོ། །གང་མཚན་དཔྱིད་ཀའི་དཔལ་མོའི་གླུ་དབྱངས་ཀྱིས། །བདེ་སྐྱིད་དབྱར་གྱི་རྒྱལ་མོ་མགྲོན་འབོད་པའི། །རིགས་གསུམ་པདྨའི་སྒྱུ་འཕྲུལ་སེང་ཆེན་རྗེ། །སྒྲུབ་ཚུལ་ཁྱབ་བདག་བླ་མའི་གསུང་བཞིན་སྤེལ། །འཁོར་འདས་ཆོས་ཀུན་ཐིག་ལེ་ཉག་གཅིག་ཀློང་། །གདོད་ནས་རོ་མཉམ་མངོན་པར་བྱང་ཆུབ་པའི། །གང་ལ་གང་འདུལ་མཛད་པའི་ཕྲིན་ལས་ནི། །ཅིར་ཡང་འཆར་བ་རྟེན་འབྱུང་ཟབ་མོའི་ཚུལ། །དེ་སླད་བུམ་བཟང་དཔག་བསམ་གཏེར་བཞིན་དུ། །སྐྱེ་རྒུའི་རེ་བ་ཡིད་བཞིན་རྫོགས་མཛད་པས། །སྲས་བཅས་རྒྱལ་བའི་རྣམ་ཐར་ཟབ་མོ་རུ། །ཤེས་ནས་དད་རྣམས་འཕྲལ་ཡུན་ཀུན་ཏུ་དགེ །།ཕུན་ཚོགས་སྡེ་བཞིའི་ས་བོན་མ་རྨས་པ། །ཐབས་མཁས་རྟེན་འབྲེལ་རིག་སྔགས་ཆར་བཟང་གིས། །བརླན་ནས་ཚོགས་གཉིས་དཔག་བསམ་ལྗོན་པའི་རྩེར། །ཐར་གྲོལ་འབྲས་བཟང་སྨིན་པ་སོམ་ཉི་ཅི། །ལེགས་བྱས་ཉིན་མོར་བྱེད་པའི་གཟི་འོད་ཀྱིས། །མི་མཐུན་རྒུད་པའི་གྲང་རེག་གཏན་བཅིལ་ནས། །དོན་གཉིས་ཕན་བདེའི་པད་ཚལ་རབ་བཞད་པའི། །དགེ་ལེགས་སྣང་བས་ཕྱོགས་ཀུན་ཁྱབ་གྱུར་ཅིག །ཅེས་པའང་ལུགས་གཉིས་དཔལ་གྱིས་མངོན་པར་མཐོ་བ་ཨ་དྲན་བུ་བླ་མའི་བཞེད་སྐོང་དུ་སྨུག་པོ་གདོང་གི་རིགས་ལས་སྐྱེས་པའི་བྱ་བྲལ་བ་རྒན་པོ་འཇམ་དབྱངས་བློ་གྲོས་རྒྱ་མཚོའི་སྒྲ་དབྱངས་ཀྱིས་བཀའ་བརྒྱད་བདེ་གཤེགས་འདུས་པའི་ཚོགས་ཁང་དུ་བྲིས་བ་དགེ་ལེགས་ཀྱི་སྣང་བས་ཕྱོགས་ཀུན་ཁྱབ་པའི་རྒྱུར་གྱུར་ཅིགསརྦ་མངྒ་ལཾ། དགེའོ། །དགེའོ། །དགེའོ། །