སྨིན་གླིང་པའི་བླ་བརྒྱུད་གསོལ་འདེབས།

༄༅། །སྨིན་གླིང་པའི་བླ་བརྒྱུད་གསོལ་འདེབས་ནི། ཡེ་ནས་མངོན་རྫོགས་ཆོས་སྐུར་རྟག་གནས་ཀྱང་། །ལྔ་བདོའི་འགྲོ་ལ་རྗེས་བརྩེས་བཤེས་གཉེན་ཚུལ། །སྔ་འགྱུར་བསྟན་པའི་མེ་རོ་གསོ་མཛད་པ། །ཨོ་རྒྱན་གཏེར་བདག་གླིང་པར་གསོལ་བ་འདེབས། །མཁྱེན་བརྩེ་ནུས་པའི་ཆ་ཤས་ཡོངས་སུ་རྫོགས། །མཁས་བཙུན་བཟང་པོའི་སྣང་བ་འབུམ་བརྡལ་ཞིང་། །འཆད་རྩོད་རྩོམ་པས་གང་ལྗོངས་མུན་སེལ་བ། །ངག་དབང་ཆོས་དཔལ་རྒྱ་མཚོར༴ པདྨ་དབང་ཆེན་ཁྲོས་པའི་སྒྱུ་འཕྲུལ་གར། །དྲི་མེད་བསླབ་གསུམ་ནོར་བུའི་རྒྱན་ཆས་སྒེག །ལུང་རྟོགས་བསྟན་པའི་རྒྱལ་མཚན་སྒྲེང་མཛད་པ། །པདྨ་འགྱུར་མེད་རྒྱ་མཚོར༴ དྲི་མེད་བཤེས་གཉེན་ཐུགས་རྗེའི་ཟླ་ཟེར་ལས། །ཉེར་ཐོན་སྐྱེ་དགུའི་བླ་ན་མངོན་མཐོ་ཞིང་། །ངེས་གསང་བསྟན་སྲོག་མཐུད་པའི་ཕྲིན་ལས་ཅན། །འགྱུར་མེད་རིན་ཆེན་རྣམ་རྒྱལ་གསོལ༴ རྣམ་དག་རྒྱུད་ལུང་མན་ངག་གཙང་བྱེད་འབུམ། །མཆོག་ཐུགས་ཟབ་དབྱིངས་རྒྱ་མཚོར་བསྐྱིལ་ནས་སླར། །གདམས་ཟབ་བདུད་རྩིས་སྐལ་བཟང་གདུང་སེལ་བ། །པདྨ་བསྟན་འཛིན་ཞབས་ལ་གསོལ༴ རིག་འཛིན་བརྒྱུད་པའི་གངས་རིར་གནས་བཅས་ཤིང་། །གྲུབ་གཉིས་རྟོགས་པའི་རྩལ་གསུམ་རབ་རྫོགས་ནས། །ཐེག་མཆོག་ང་རོས་སྲིད་གསུམ་ཁྱབ་མཛད་པ། །ཁྲི་ཆེན་ཀརྨ་བི་ཛར་གསོལ༴ ཁམས་གསུམ་ཆོས་ཀྱི་རྒྱལ་པོ་གཏེར་ཆེན་རྗེ། །སླར་ཡང་བསྟན་འགྲོའི་མགོན་དུ་མངོན་སྣང་བ། །ཐམས་ཅད་མཁྱེན་པ་ལྷར་བཅས་སྐྱེ་{རྐྱེན}དགུའི་མགོན། །པདྨ་དབང་གི་རྒྱལ་པོར༴ མཁྱེན་པའི་མཁའ་ལ་བརྩེ་བའི་ཆུ་འཛིན་དཀྲིགས། །མཛད་པའི་ཕྲིན་ལས་བདུད་རྩིའི་ཟེགས་མ་ཡིས། །མདོ་སྔགས་བསྟན་པའི་མྱུ་གུ་སྐྱེད་མཛད་པ། །འགྱུར་མེད་སངས་རྒྱས་ཀུན་དགར༴ ཐུགས་བསྐྱེད་སྨོན་པའི་རང་གཟུགས་སྨིན་པ་ལས། །བཀའ་གཏེར་ཐེག་མཆོག་ཆོས་ཀྱི་མཛོད་འཆང་ཞིང་། །རྨད་བྱུང་འཁོར་ལོ་གསུམ་གྱི་ཕྲིན་ལས་ཅན། །འགྱུར་མེད་ཡིད་བཞིན་དབང་རྒྱལ༴ ཕུལ་བྱུང་བྱང་ཆུབ་སེམས་ཀྱི་གསེར་སྦྱངས་ཁམས། །བསྡུ་དངོས་བཞི་ཡི་རྩིབས་སྟོང་རྣམ་བཀྲ་བས། །འགྲོ་ཀུན་ཁ་ལོ་དགེ་ལ་སྒྱུར་མཛད་པ། །བདེ་ཆེན་མཆོག་གྲུབ་ཞབས་ལ་གསོལ་བ་འདེབས། །