རྩ་གསུམ་གྱི་གཏོར་འབུལ་ཁྱེར་བདེ་གྲུབ་གཉིས་ཆར་འབེབས།

༄༅། །རྩ་གསུམ་གྱི་གཏོར་འབུལ་ཁྱེར་བདེ་གྲུབ་གཉིས་ཆར་འབེབས་བཞུགས་སོ། །ན་མོ་པདྨཱ་ཀ་ར་ཡེ། འདིར་སྐྱབས་སེམས་སྔོན་དུ་འགྲོ་བའི་རང་ཉིད་གཉུག་མའི་ལྷ་གང་ཡང་རུང་བའི་སྐུར་ལམ་གྱིས་གསལ་ཞིང་མཆོད་གཏོར་སོགས་འབྲུ་གསུམ་གྱི་སྔགས་ཀྱིས་བྱིན་གྱིས་རླབས་ལ་འདི་སྐད་དོ། །ཧྲཱིཿཡེ་གྲོལ་ཀ་དག་སྤྲོས་པ་བྲལ་བའི་ཀློང་། །ལྷུན་གྲུབ་ཡེ་ཤེས་ལྔ་ལྡན་གཞལ་མེད་དབུས། །རིག་རྩལ་མ་འགགས་རྩ་གསུམ་འཁོར་ལོའི་སྤྲིན། །དམ་ཡེ་དབྱེར་མེད་དཀྱིལ་འཁོར་ཆེན་པོར་བཞུགས། །སྣང་སྲིད་བྷནྡྷ་འབར་བའི་གཏོར་གཞོང་དུ། །ཚོགས་དྲུག་རང་གྲོལ་འདོད་ཡོན་དམ་ཚིག་རྫས། །མ་ཚང་མེད་པའི་ཟག་མེད་མཆོད་སྤྲིན་འདིས། །རིགས་ཀུན་ཁྱབ་བདག་རྩ་རྒྱུད་བླ་མ་དང་། །དངོས་གྲུབ་ཆར་འབེབས་ཡི་དམ་ཞི་ཁྲོའི་ལྷ། །གནས་གསུམ་མཁའ་འགྲོ་དམ་ཅན་གཏེར་སྲུང་ཚོགས། །རབ་འབྱམས་རྩ་གསུམ་དཀྱིལ་འཁོར་ལྷ་ཚོགས་མཆོད། ཁྱད་པར་དཔལ་མགོན་ལེགས་ལྡན་ཚོགས་ཀྱི་བདག །ཕྱག་བཞི་པ་དང་མགོན་དཀར་ཚེ་ཡི་བདག །མ་ནིང་སྟག་ཞོན་བིང་ལ་སོགས་པ་ཡིས། །ཡེ་ཤེས་མགོན་པོ་འཁོར་དང་བཅས་ཀུན་མཆོད། །ཨེ་ཀ་ཛ་ཊི་སྡེ་བདུན་གཙོ་རྐྱང་དང་། །རང་བྱུང་རྒྱལ་མོ་གཤོག་རྒོད་སྲོག་སྒྲུབ་རྣམས། །གཟའ་རྒོད་བཤན་པ་དམར་ནག་རྡོ་རྗེ་ལེགས། །ཞིང་སྐྱོང་སེང་གདོང་དུར་ཁྲོད་དབང་མོ་དང་། །བསྟན་མ་བཅུ་གཉིས་དཀོར་བདག་པེ་ཧར་སོགས། །བསྟན་སྲུང་གཉན་པོ་འཁོར་དང་བཅས་ཀུན་མཆོད། །རྣམ་སྲས་ཕྱི་ནང་གསང་བ་ཡང་གསང་བཅས། །ཞང་བློན་ཛམ་དམར་དབང་ཕྱུག་ཆེན་པོ་སོགས། །ནོར་ལྷ་གཏེར་བདག་དཀར་ཕྱོགས་སྐྱོང་བའི་གཉན། །དམ་ལྡན་ཆོས་སྲུང་འཁོར་དང་བཅས་ཀུན་མཆོད། །ཡེ་ནས་དག་མཉམ་ཆོས་སྐུའི་ཀློང་ཡངས་སུ། །མ་དག་གཟུང་འཛིན་རྡུལ་ཙམ་མ་དམིགས་ཀྱང་། །ཀུན་རྫོབ་སྣང་ངོར་འདས་དང་མ་འདས་ཚུལ། །རབ་འབྱམས་དཀྱིལ་འཁོར་འཁོར་ལོ་སྟོན་ལ་འདུད། །དུག་ལྔ་རང་སར་གྲོལ་བའི་ཨམྲྀ་ཏ། །གཟུང་འཛིན་ཉོན་མོངས་བསྒྲལ་བའི་དམར་ཆེན་བཅུད། །བདེ་སྟོང་འདུ་འབྲལ་མེད་པའི་གཏེར་ཆེན་པོས། །རང་བྱུང་རང་ཤར་དཀྱིལ་འཁོར་ལྷ་ཚོགས་བསྐང་། །ཉམས་ཆག་འགལ་འཁྲུལ་ཆོས་ཀྱི་དབྱིངས་སུ་བཤགས། །ཕྱི་ནང་གསང་བའི་བར་ཆད་དབྱིངས་སུ་བཟློག །འདི་ནས་བཟུང་སྟེ་བྱང་ཆུབ་མ་ཐོབ་བར། །མི་འབྲལ་རྩ་གསུམ་ཆོས་སྲུང་གཉན་པོའི་ཚོགས། །བརྟེན་སྒྲུབ་མཆོད་ཅིང་བསྙེན་པའི་ལེགས་བྱས་ཀྱིས། །དོན་གཉིས་བསམ་ཀུན་འགྲུབ་པའི་དགའ་སྟོན་སྩོལ། །རྒྱལ་བའི་བསྟན་དར་བསྟན་འཛིན་ཞབས་པད་བརྟན། །གང་ལྗོངས་བདེ་སྐྱིད་ཀླ་ཀློའི་འཇིགས་ཀུན་ཞི། །བཤད་སྒྲུབ་སྡེ་འཕེལ་དགེ་བཅུའི་མངའ་ཐང་དང་། །རྫོགས་ལྡན་དཔལ་འབྱོར་དར་བའི་བཀྲ་ཤིས་ཤོག །ཅེས་བརྗོད་མཆོད་གཏོར་གཙང་སར་འབུལ་བ་སོགས་རྗེས་སྤྱིར་ལྟར་བྱའོ། །འདི་ཡང་དམ་པ་དུ་མས་གསུང་བསྐུལ་གནང་ངོར་སྙོམ་ལས་པ་གཞན་ཕན་ཆོས་ཀྱི་བློ་གྲོས་ཀྱིས་བྲིས་པ་དགེ །༈ ན་མོ་གུ་རུ་བཛྲ་ངྷཱ་ར་ཡ། རྒྱུན་གྱི་གསོལ་མཆོད་ཤིན་ཏུ་བསྡུས་པར་སྤྲོ་ན། མཆོད་གཏོར་སོགས་གང་འཛོམས་བཤམས་ལ། རང་ཉིད་ལྷར་གསལ་ཐུགས་ལས་རྃ་ཡྃ་ཁྃ། །འཕྲོས་པས་མཆོད་རྫས་མ་དག་ཉེས་སྐྱོན་སྦྱངས། །ༀ་ཨཱཿཧཱུྃ་གིས་ཟག་མེད་བདུ་རྩིའི་བཅུད། །མི་འཛད་ནམ་མཁའ་མཛོད་ཀྱི་འཁོར་ལོར་གྱུར། །ཧཱུྃ། འོག་མིན་གནས་དང་དུར་ཁྲོད་དྲག་པོའི་ཞིང་། །རང་རང་གནས་ནས་རྒྱུད་གསུམ་དམ་ཅན་ཚོགས། །ཐུགས་དམ་དབང་གིས་སྤྱན་འདྲེན་འདིར་གཤེགས་ལ། །རང་མཐུན་གདན་ལ་དགྱེས་པར་བཞུགས་སུ་གསོལ། །སྒོ་ལྔ་ལོངས་སྤྱོད་ཕྱི་ཡི་མཆོད་པ་དང་། །སྨན་རཀ་གཏོར་གསུམ་སྦྱོར་སྒྲོལ་ནང་གི་མཆོད། འཁོར་འདས་མཉམ་སྦྱོར་བདེ་ཆེན་གསང་མཆོད་རྣམས། །གུས་པས་འབུལ་གྱི་བརྩེ་བས་བཞེས་སུ་གསོལ། །བདེ་ཆེན་བྱང་ཆུབ་སེམས་ཀྱི་རང་རྩལ་ལས། །ཡེ་ཤེས་འཇིག་རྟེན་སྣ་ཚོགས་སྐུར་སྟོན་པས། །རྒྱལ་བསྟན་སྲུང་ཞིང་སྒྲུབ་མཆོག་སྐྱོང་མཛད་པའི། །དམ་ཅན་སྲུང་མའི་ཚོགས་ལ་ཕྱག་འཚལ་བསྟོད། །འཇིག་རྟེན་ལྷ་མིའི་དཀོར་ནོར་སྤྱན་གཟིགས་རིགས། །ཕྱི་ནང་གསང་བ་སྒྲུབ་དང་མཆོད་སྐོང་རྫས། །དངོས་འབྱོར་ཡིད་སྤྲུལ་ནམ་མཁའ་མཛོད་ཀྱི་སྒོ། །བཞེད་དགུར་འཆར་བས་ཐུགས་དམ་གཉན་པོ་བསྐང་། །མི་མཐུན་ཐུགས་འགལ་ཉམས་ཆག་མ་ལུས་བཤགས། །སྒྲུབ་མཆོག་རྣལ་འབྱོར་མགོན་དུ་མངའ་གསོལ་ན། །སྔོན་གྱི་ཐ་ཚིག་གཉན་པོ་རྗེས་དགོངས་ལ། །དོན་གཉིས་འདོད་དགུར་འཇོ་བའི་ཕྲིན་ལས་མཛོད། །ནད་མུག་མཚོན་འཁྲུགས་འབྱུང་བཞིའི་འཇིགས་སོགས་ཞི། །ཚེ་བསོད་དཔལ་འབྱོར་བཤད་སྒྲུབ་བསྟན་པ་རྒྱས། སྣང་སྲིད་སྐྱེ་འགྲོ་མོས་བཞིས་དབང་དུ་བསྡུས། །ཕས་རྒོལ་བསམ་ངན་སྦྱོར་རྩུབ་ཚར་གཅོད་མཛོད། །དམ་ཉམས་དགྲ་བོའི་ཤ་རུས་ཞལ་དུ་བཞེས། །ཕྱོགས་ལས་རྣམ་རྒྱལ་ཕན་བདེའི་དགའ་སྟོན་གྱིས། །སྒྲུབ་མཆོག་བྱང་ཆུབ་བར་དུ་རྗེས་སྐྱོངས་ལ། །མཐུན་པའི་རྟེན་འདིར་རྟག་པར་དགྱེས་བཞུགས་མཛོད། །རྩ་བརྒྱུད་བླ་མའི་བྱིན་རླབས་སྤྲིན་ཆེན་འཁྲིགས། །ཡི་དམ་ཞི་ཁྲོའི་དངོས་གྲུབ་ཆར་རྒྱུན་འཇོ། །མཁའ་འགྲོ་དམ་ཅན་ཕྲིན་ལས་གློག་ཕྲེང་མཛེས། །བདེ་ལེགས་འབྲུག་སྒྲས་ཕྱོགས་ཀུན་ཁྱབ་གྱུར་ཅིག །ཅེས་མཆོད་གཏོར་གཙང་སར་འབུལ་ལོ། །ཞེས་པའང་རིག་འཛིན་གྱི་བཙུན་པ་བི་ཛ་ཡས་སོ། །