གསོལ་བསྡུས་དངོས་གྲུབ་རྫིང་བུ།

༄༅། །གསོལ་བསྡུས་དངོས་གྲུབ་རྫིང་བུ་བཞུགས། ཧཱུྃ། ཀུན་བཟང་ཧེ་རུ་ཀ་དཔལ་པདྨ་འབྱུང་། །བརྒྱུད་གསུམ་རིག་འཛིན་བླ་མའི་སྤྱན་སྔ་རུ། །སངས་རྒྱས་བསྟན་པ་སྲུང་བར་དམ་ནོས་པའི། །ཡེ་ཤེས་ལས་དང་འཇིག་རྟེན་དྲེགས་པའི་ཚོགས། །རང་རང་འཁོར་གཡོག་སྤྲུལ་པ་ཡང་སྤྲུལ་བཅས། །འདིར་གཤེགས་རང་མཐུན་གདན་ལ་དགྱེས་པར་བཞུགས། །ཉེར་སྤྱོད་འདོད་ཡོན་ལྷ་མིའི་འབྱོར་བའི་ཚོགས། །དྲག་པོའི་མཐུན་རྫས་སྨན་རཀ་བ་ལིངྟ། །སྦྱོར་སྒྲོལ་གླུ་གར་ཕྱག་རྒྱ་རོལ་མོ་སོགས། །མ་ཚང་མེད་པའི་མཆོད་སྤྲིན་རྒྱ་མཚོས་མཆོད། །ཡེ་ཤེས་སྤྱན་གྱིས་ཁམས་གསུམ་ས་ལེར་གཟིགས། །ཐུགས་རྗེ་ཆེན་པོས་སྒྲུབ་མཆོག་བུ་བཞིན་སྐྱོང་། །ནུས་མཐུ་ཚད་མེད་ཉམས་པ་སྒྲོལ་བའི་གཤེད། །དམ་ལྡན་བསྟན་སྲུང་ཚོགས་ལ་ཕྱག་འཚལ་བསྟོད། །ཏིང་འཛིན་ནམ་མཁའ་མཛོད་ཀྱི་རོལ་མོ་ལས། །བྱུང་བའི་ཕྱི་ནང་གསང་སྒྲུབ་མཆོད་བསྐང་རྫས། །ཆོས་དབྱིངས་རབ་འབྱམས་ནམ་མཁའི་མཐར་ཁྱབ་པས། །རྒྱུད་གསུམ་དམ་ཅན་སྲུང་མའི་ཐུགས་དམ་བསྐང་། །རྩ་བ་ཡན་ལག་དམ་ཚིག་ཆག་ཉམས་སོགས། །མི་མཐུན་ཐུགས་འགལ་ནོངས་པ་ཅི་མཆིས་བཤགས། །དགྱེས་པའི་ཞལ་བཟང་དེང་འདིར་སྟོན་པར་མཛོད། །ཁྱེད་རྣམས་དམ་ལྡན་བསྟན་པའི་གཉེར་ཁ་བ། །བདག་ཅག་རིག་འཛིན་གོང་མའི་རྗེས་སུ་ཞུགས། །གཡོ་སྒྱུ་མེད་པས་དཀོན་མཆོག་གཙུག་ཏུ་ཁུར། །ལྷག་བསམ་དག་པས་སྤང་ཀློག་བྱ་བར་བརྩོན། །རྒྱལ་མཚན་དམ་པར་ཁྱེད་རྣམས་འཕྱར་ལགས་ན། །སྔོན་གྱི་ཐ་ཚིག་གཉན་པོ་རྗེས་དགོངས་ལ། །སྲུང་སྐྱོབ་ཕྲིན་ལས་རྣམ་བཞིའི་སྒོ་འཕར་ཕྱེས། །རྒྱལ་བསྟན་སྤྱི་དང་ཁྱད་པར་སྔ་འགྱུར་གྱི། །བསྟན་པ་རིན་ཆེན་ཕྱོགས་མཐར་རྒྱས་པ་དང་། །དེར་འཛིན་སྐྱེས་བུའི་སྐུ་ཚེ་མཛད་ཕྲིན་སྤེལ། །དགེ་འདུན་སྡེ་ཚོགས་དབྱར་མཚོ་ལྟར་འཕེལ་མཛོད། །ཀུན་ཀྱང་ལྟ་སྤྱོད་ཏིང་འཛིན་དོན་མཐུན་ཞིང་། །ཚུལ་ཁྲིམས་རྣམ་དག་མང་དུ་ཐོས་པས་ཕྱུག །བཤད་སྒྲུབ་བསྟན་པ་ཡར་ཟླའི་དཔལ་ལྟར་འཕེལ། །སྙན་གྲགས་འཛམ་གླིང་ཡོངས་ལ་ཁྱབ་པར་མཛོད། །སྐྱེ་དགུ་མཐའ་དག་དཀོན་མཆོག་བསྟན་ལ་གུས། །ཆོས་སྲིད་ཕྲིན་ལས་མི་ཉམས་སྲིད་མཐར་རྒྱས། །སྣོད་བཅུད་བདེ་སྐྱིད་དགེ་བཅུའི་དཔལ་གྱིས་འཚོ། །རྫོགས་ལྡན་དུས་སྟོན་གསར་དུ་ངོམས་པར་མཛོད། །བསྟན་ལ་འཚེ་བའི་མི་དང་མི་མིན་རིགས། །མཐུ་སྟོབས་གནམ་ལྕགས་རྡོ་རྗེའི་མེ་ཆར་གྱིས། །སྟོབས་འབྱོར་སྡེར་བཅས་ཐལ་བའི་རྡུལ་དུ་རློགས། །ཕྱོགས་ལས་རྣམ་པར་རྒྱལ་བའི་ཕྲིན་ལས་མཛོད། །མདོར་ན་འདི་ནས་བྱང་ཆུབ་སྙིང་པོའི་བར། །མི་འབྲལ་ལུས་དང་གྲིབ་མ་བཞིན་འགྲོགས་ཏེ། །བྱང་ཆུབ་ལམ་གྱི་འགལ་རྐྱེན་ཀུན་སེལ་ཞིང་། །བསམ་པའི་དོན་ཀུན་ཡིད་བཞིན་འགྲུབ་པར་མཛོད། །ཕུན་ཚོགས་དགེ་ལེགས་བྱེ་བའི་སྤྲིན་ཆེན་ལས། །གྲུབ་གཉིས་འདོད་དགུའི་གྲུབ་ཆར་འཇོ་བ་ཡིས། །ས་གསུམ་ཕན་བདེའི་མྱུ་གུ་བསྐྱེད་བསྲིང་བའི། །བཀྲ་ཤིས་ཕྱོགས་དུས་ཀུན་ན་ཁྱབ་གྱུར་ཅིག །ཅེས་པའང་སློབ་གྲྭ་གསར་དུ་འཛུགས་པའི་སྐབས་རིག་འཛིན་གྱི་བཙུན་པ་རྡོ་རྗེ་དབང་མཆོག་དགྱེས་པ་རྩལ་གྱིས་བྲིས་ཤིང་ཕྲིན་ལས་གསོལ་བ་དགེ །