གར་གྱི་དབང་ཕྱུག་ལྷ་ཆེན་ལྕམ་དྲལ་གྱི་གཏོར་ཆོག་འདོད་འཇོའི་བུམ་བཟང་།
༄༅། །གར་གྱི་དབང་ཕྱུག་ལྷ་ཆེན་ལྕམ་དྲལ་གྱི་གཏོར་ཆོག་འདོད་འཇོའི་བུམ་བཟང་བཞུགས་སོ། །ཧྲཱིཿཐུགས་རྗེ་ཆེན་པོ་སྤྱན་རས་གཟིགས་དབང་གིས། །གསང་ཆེན་དཀྱིལ་འཁོར་གཉེན་པོའི་བཀའ་སྲུང་ཆེ། །འཇིག་རྟེན་མེས་པོ་སྲིད་གསུམ་དབང་དུ་བྱེད། །ལྷ་ཆེན་དབང་ཕྱུག་ཨུ་མ་ཡུམ་འཁོར་བཅས། །སྐུ་མདོག་དམར་གསལ་མཛེས་འཛུམ་ཆགས་ཉམས་རྒྱས། །དར་དང་མེ་ཏོག་དམར་པོའི་རྒྱན་གྱིས་བརྒྱན། །ཕྱག་མཚན་ལྕགས་ཀྱུ་ཞགས་པས་སྐྱེ་འགྲོ་ཀུན། །འགུགས་འཆིང་འོད་ཟེར་དམར་པོས་དབང་དུ་སྡུད། །ཆེ་བཙན་དྲེགས་པ་ཡོངས་ཀྱི་རྗེ་བོོ་ཆེ། །དད་པ་དམ་ཚིག་དབང་གིས་སྤྱན་འདྲེན་གཤེགས། །པད་རཀ་ཁང་བཟང་ཟླ་གམ་དབང་གི་ཁྲིར། །དགྱེས་པར་བརྟན་བཞུགས་གུས་པས་ཕྱག་ཀྱང་འཚལ། །དངོས་སུ་བཤམས་དང་ཡིད་ལས་སྤྲུལ་པ་ཡི། །ཕྱི་ནང་གསང་མཆོད་སྨན་རཀ་གཏོར་མ་དང་། །ཁྱད་པར་མཐུན་ཞིང་དགྱེས་པའི་དམ་རྫས་རིགས། །མ་ཚང་མེད་པའི་འདོད་ཡོན་རྒྱ་མཚོ་འབུལ། །མཐུ་སྟོབས་དབང་ཕྱུག་བསྐལ་པའི་མེ་ལྟར་འབར། །འདོད་པའི་ཆགས་པ་ཆེན་པོས་བདེ་ལ་རོལ། །སྣོད་བཅུད་ཡོན་ཏན་མ་ལུས་དབང་དུ་སྡུད། །སྲིད་གསུམ་དབང་ཕྱུག་ཆེན་པོ་ཁྱོད་ལ་བསྟོད། །དབང་དང་དངོས་གྲུབ་ཀུན་གྱི་འབྱུང་གནས་ཆེ། །ཁྱད་པར་ཅན་གྱི་སྲུང་མར་མངའ་དབང་གསོལ། །མི་ཤེས་མ་རིག་བག་མེད་དབང་གྱུར་བའི། །ནོངས་པ་གང་མཆིས་རབ་གནོང་བཟོད་པར་གསོལ། །ལྷ་ཆེན་དབང་ཕྱུག་ཡབ་ཡུམ་འཁོར་དང་བཅས། །སྔོན་ཚེ་པདྨ་གར་དབང་ཨོ་རྒྱན་རྗེ། །རིག་འཛིན་བརྒྱུད་པས་བཀའ་བསྒོས་དམ་བཞག་ཚེ། །ཇི་ལྟར་ཁས་བླངས་བཅོལ་བའི་ཕྲིན་ལས་སྒྲུབས། །སངས་རྒྱས་བསྟན་སྲུངས་དཀོན་མཆོག་དབུ་འཕང་བསྟོད། །དགེ་འདུན་སྡེ་རྒྱས་བཤད་སྒྲུབ་ཕྲིན་ལས་སྤེལ། །འབྱུང་བ་ཁོད་སྙོམས་སྐྱེ་འགྲོ་བདེ་ཞིང་སྐྱིད། །སྣོད་བཅུད་ཕུན་ཚོགས་དཔལ་གྱིས་འབྱོར་པར་མཛོད། །ཁྱད་པར་ཆེ་བཙན་སྟོབས་འབྱོར་དྲེགས་པ་ཅན། །དམིགས་བྱའི་སྙིང་ལ་འགུགས་བྱེད་ལྕགས་ཀྱུས་ཐོབ། །གློག་གི་ཞགས་པས་ཡིད་ཆིང་དབང་མེད་དྲོང་། །མོས་པ་རྣམ་བཞིས་དབང་དུ་བསྡུ་བར་མཛོད། །ལྷག་བསམ་དག་པས་བསྟན་དང་འགྲོ་བའི་དོན། །བསྒྲུབ་ལ་ཕྲིན་ལས་རྣམ་བཞི་ལྷུན་གྱིས་འགྲུབ། །དངོས་གྲུབ་རྒྱ་མཚོའི་དཔལ་གྱིས་འབྱོར་པ་ཡི། །འདོད་དོན་བཅོལ་པའི་ཕྲིན་ལས་འགྲུབ་པར་མཛོད། །ཅེས་པའང་ཁྱད་པར་གྱི་སྲུང་མ་ལྷ་ཆེན་ལྕམ་དྲལ་ལ་ཕྲིན་ལས་སུ་བཅོལ་བ་འདིའང་། དུས་ཚེས་བཟང་པོར་སྤྲུལ་མིང་པདྨ་བི་ཛས་བྲིས་པ་དགེ །༈ ཛཿཀ་ར་བུ་རའི་མེ་ཏོག་མདངས་འཕྲོག་པའི། །ཁ་དོག་རབ་དམར་ཁྲོ་ཆགས་སྒེག་པའི་ཉམས། །ག་རུ་བལྟས་ཀུན་འདོད་པས་དབང་བྱེད་པའི། །ང་ཡི་གྲོགས་པོ་མ་ཧཱ་དེ་ཝར་འབོད། །ཅ་ག་ལྷ་རྫས་འདོད་ཡོན་དཀོར་ནོར་རིགས། །ཆ་ཤས་ཡོངས་རྫོགས་མཆོད་སྐོང་སྒྲུབ་པའི་རྫས། །ཇ་ཆང་མངར་གསུམ་ཕུད་ཀྱིས་མཆོད་ལགས་ན། །ཉ་རྒྱས་ཟླ་འདྲའི་དགྱེས་པའི་ཞལ་རས་སྟོན། །ཏ་ཐཱ་ག་ཏའི་བསྟན་སྲུང་མཐུ་བོོ་ཆེ། ཐ་ཚིག་རྡོ་རྗེའི་དམ་ལ་རྟག་གནས་ཤིང་། །ད་ལྟ་སྒྲུབ་མཆོག་བུ་བཞིན་སྐྱོང་མཛད་པའི། །ན་ཆུང་ཨུ་མའི་བདག་པོ་ཁྱོད་ལ་བསྟོད། །པ་ལ་ལོ་ཀ་ཡོངས་ཀྱི་སྡེ་དཔོན་མཆོག །ཕ་ཁུ་རིགས་ཀྱི་ལྷ་བཞིན་བསྐུར་བྱེད་ན། །བ་གླང་སྤྱོད་སོགས་གླིང་བཞི་རྒྱུ་བའི་འགྲོ། །མ་ལུས་བདག་གི་དབང་དུ་བསྡུ་བར་མཛོད། །ཙ་ར་དཀོར་ནོར་སྲིད་པའི་མཁོ་དགུའི་རྫས། །ཚ་གྲངས་ནད་སེལ་སྨན་མཆོག་བདུད་རྩིའི་རིགས། །ཛྭ་ལ་རིགས་སྔགས་ལས་སྦྱོར་ནུས་མཐུ་ཡི། །ཝ་ཆུའི་རྒྱུན་བཞིན་དངོས་གྲུབ་ཆར་དུ་བསྙིལ། །ཞྭ་ལྟར་ལྷ་ཁྱོད་བསྐུར་ཞིང་མཆོད་སྒྲུབ་ན། །ཟ་མ་ཙམ་ཡང་འབྲལ་མེད་རྗེས་སུ་འགྲོགས། །འ་འུར་ཙམ་མིན་རྣམ་བཞིའི་ཕྲིན་ལས་དོན། །ཡ་མཚན་རྟགས་བཅས་མྱུར་བ་ཉིད་དུ་སྒྲུབས། །ར་བ་བརྟན་ལྡན་ནོར་འཛིན་ཡོངས་པའི་ཁྱོན། །ལ་ལུང་མདོ་གཙང་ཀུན་ལ་དབང་བྱེད་པའི། །ཤ་ཟ་གནོད་སྦྱིན་ཚོགས་རྣམས་ཁྱོད་ཀྱི་འབངས། །ས་བཅུའི་བཀའ་རྟགས་ངེས་པའི་ཆོ་ག་བྱིན། །ཧ་སེ་དགྱེས་པའི་འགྱུར་དབྱངས་དང་བཅས་ཏེ། །དགེ་མཚན་མེ་ཏོག་སིལ་མའི་ཆར་ཆེན་པོས། །རྫོགས་ལྡན་དབྱར་གྱི་དཔལ་མོ་མགྲོན་བོས་པས། །ཨ་ཏིའི་བསྟན་མཆོག་དར་བའི་བཀྲ་ཤིས་ཤོག །ཅེས་དབང་མཛད་ལྷ་ཆེན་མ་ཧཱ་དེ་ཝར་ཕྲིན་ལས་སུ་གསོལ་བ་འདིའང་སྤྲུལ་མིང་པདྨ་བི་ཛས་ཤར་མར་བྲིས་པ་དགེ །