ཡས་བརྫུའི་གསོལ་མཆོད་ཉུང་ངུ་།
༄༅། །ཡས་བརྫུའི་གསོལ་མཆོད་ཉུང་ངུ་ནི། རྃ་ཡྃ་ཁྃ། ༀ་ཨཱཿཧཱུྃ། སྣང་སྲིད་ཟིལ་གནོན་པདྨ་ཐོད་ཕྲེང་གི། །སྤྱན་སྔར་ཁས་བླངས་ཕུར་སྲུང་ཡོངས་ཀྱི་རྗེ། །ཡས་བརྫུ་མཆེད་འཁོར་སུམ་བརྒྱ་དྲུག་བཅུའི་ཚོགས། །འདིར་བྱོན་དགྱེས་པའི་གདན་ལ་བཞུགས་སུ་གསོལ། །ལྷ་སྔགས་ཏིང་འཛིན་ཟབ་མོས་བྱིན་རླབས་པའི། །ཕུན་ཚོགས་མཆོད་པའི་སྤྲིན་ཕུང་མི་ཟད་རྒྱན། །དགྱེས་དགུར་འཆར་བའི་ལོངས་སྤྱོད་རྒྱ་ཆེན་པོ། །རབ་དྭངས་བློ་ཡིས་འབུལ་ལོ་བཞེས་སུ་གསོལ། །རྟོགས་ན་གདོད་མའི་མགོན་དང་དབྱེར་མེད་ཀྱང་། །མ་རྟོགས་སྣང་ངོར་དྲེགས་པ་ཡོངས་ཀྱི་རྗེ། །དམ་ལྡན་བསྟན་སྐྱོང་ཉམས་པ་སྒྲོལ་བའི་གཤེད། །ཡས་བརྫུ་མཆེད་འཁོར་སྤྲུལ་པར་བཅས་ལ་བསྟོད། །སྔོན་ཚེ་རིག་འཛིན་བརྒྱུད་པའི་བཀའ་མ་བཅག །ད་ལྟ་དམ་ལྡན་མཆོད་པ་ཆུད་མ་གསོན། །མ་གདུང་བུ་ལ་བརྩེ་བ་ཇི་བཞིན་དུ། །སྒྲུབ་མཆོག་ལུས་དང་གྲིབ་མ་བཞིན་དུ་འགྲོགས། །ཉམས་ཆག་ཕོག་ཐུག་འགལ་འཁྲུལ་བཟོད་བགྱིས་ལ། །འདོད་དོན་བཅོལ་པའི་ལས་ཀུན་འགྲུབ་པར་མཛོད། །འདི་ཡང་དགོས་གལ་བྱུང་ཚེ་པདྨ་བི་ཛས་ཉུང་ངུར་བྲིས་པ་དགེ །