ཡུལ་སྐྱོང་དགེ་བསྙེན་ཆེན་པོ་ནོར་བུ་དབང་རྒྱལ་གྱི་གསོལ་མཆོད་འདོད་འཇོའི་ལྗོན་བཟང་།

༄༅། །ཡུལ་སྐྱོང་དགེ་བསྙེན་ཆེན་པོ་ནོར་བུ་དབང་རྒྱལ་གྱི་གསོལ་མཆོད་འདོད་འཇོའི་ལྗོན་བཟང་ཞེས་བྱ་བ་བཞུགས་སོ། །ན་མོ་གུ་རུ་པདྨ་ཀ་ར་ཡེ། འོད་མཚན་མཐའ་ཡས་སྤྲུལ་པའི་སྐུ། །ཐུགས་རྗེའི་སྟོབས་ཀྱིས་དྲེགས་པ་འདུལ། །པདྨ་འབྱུང་གནས་ལ་བཏུད་ནས། །ཡུལ་སྐྱོང་དབང་པོ་མཆོད་ཐབས་བྲི། །དེ་ལ་ཡུལ་འདི་སྐྱོང་བའི་ལྷ་ཡི་གཙོ་བོ་དགེ་བསྙེན་ཆེན་པོ་ནོར་བུ་དབང་རྒྱལ་གསོལ་མཆོད་བྱེད་པར་སྤྲོ་ན་རིན་པོ་ཆེ་ལ་སོགས་པའི་སྣོད་དུ་གཙང་ཞིང་དག་པའི་ཟས་སྣ་གཏོར་མ་བསང་གསུར་{བསུར}སོགས་ཇི་ལྟར་འབྱོར་པའི་མཆོད་རྫས་རྣམས་བཤམས་ལ་བསང་ཆུས་བྲན། རྃ་ཡྃ་ཁྃ། ལན་གསུམ་གྱིས་སྦྱངས། དངོས་སུ་བཤམས་པ་དང་། ཡིད་ལས་སྤྲུལ་པའི་མཆོད་པ་ནམ་མཁའ་མཛོད་ཀྱི་འཁོར་ལོའི་སྤྲིན་ཆེན་པོ་ལས་འདོད་དགུའི་ལོངས་སྤྱོད་ཆར་བཞིན་དུ་འབེབས་པར་བསམ་ལ་ནམ་མཁའ་མཛོད་ཀྱི་སྔགས་རྒྱས་ལན་གསུམ་གྱིས་སྤེལ། དེ་ནས་རྔ་རོལ་སྙན་པའི་དབྱངས་བཅས་འདི་སྐད་དོ། །ཧྲཱིཿརྩ་གསུམ་ཀུན་འདུས་པདྨ་འབྱུང་གནས་ཀྱི། །བཀའ་དང་དམ་ལ་གནས་པའི་དགེ་བསྙེན་ཆེ། །ཡུལ་སྐྱོང་ཟོ་དོར་ནོར་བུ་དབང་རྒྱལ་མཆོག །བཙུན་མོ་སྲས་བློན་བྲན་དང་བཅས་པ་རྣམས། །ཀི་བསོ་སྙན་པའི་དབྱངས་བཅས་མདའ་དར་གཡབ། །ཕུན་ཚོགས་མཆོད་པའི་མགྲོན་དུ་སྤྱན་འདྲེན་ན། །ཁུ་བྱུག་དཔྱིད་ཀྱི་དཔལ་མོས་བསུས་པ་བཞིན། །དམ་བཅས་དུས་ལ་བབས་ཀྱིས་མྱུར་བར་གཤེགས། །གེ་སར་རབ་མཛེས་ཆུ་སྐྱེས་གསར་པ་སོགས། །རང་རང་མཐུན་པའི་གདན་ལ་བཞུགས་ནས་ཀྱང་། །ངོ་མཚར་སྟོན་ཟླའི་གསལ་བ་ལ་འཁུ་བའི། །དགྱེས་ཞལ་མིག་གི་བདུད་རྩིར་སྟོན་པར་མཛོད། །ཅི་ནས་ལྷ་ཁྱོད་དགྱེས་པ་བསྐྱེད་པའི་ཕྱིར། །རིན་ཆེན་དུ་མ་ལས་གྲུབ་སྣོད་མཆོག་ན། །ཆུ་གཙང་སྦྱར་བའི་གསེར་སྐྱེམས་གཡུ་སྐྱེམས་དང་། །རྒྱ་ཇ་འབྲུ་ཆང་འོ་མའི་ཕུད་གཙང་མཆོད། །ཇི་{ཇེ}ཞིག་མ་ཡིན་ཉོན་མོངས་གདུང་སེལ་བའི། །དྲི་བཟང་ཤིང་སྣ་སྨན་སྤོས་འབྲུ་ཡི་རིགས། །ཉོ་ཚོང་བཟའ་བཏུང་གཙང་མའི་ཕུད་བསྒྱུར་ནས། །བསྲེགས་པའི་དྭངས་མར་བདུད་རྩིར་འཆར་བས་མཆོད། །ཏི་རིའི་ཁྱུ་དང་ཅང་ཤེས་གླང་པོ་ཆེ། །ནོར་བུའི་གོ་ཁྲབ་ལྷ་ཡི་གཞལ་མེད་ཁང་། །ཐུ་བོ་སྲིད་ན་ཆེ་དགུའི་དཀོར་ཆའི་རིགས། །མ་ཚང་མེད་པའི་དངོས་པོ་དུ་མས་མཆོད། །དེ་ལས་ཁྱད་པར་མཐུན་པའི་དམ་རྫས་རིགས། །དཀར་དམར་གཏོར་མ་རིན་ཆེན་སྨན་འབྲུ་གོས། །ནོ་པའི་ཀ་ཡི་འབྱོར་པ་རྒྱ་མཚོ་ཡི། །ཐུགས་དམ་བསྐོངས་ཤིང་ཕོག་ཐུགས་འགྲམས་འཁྲུགས་བཤགས། །པི་ཝང་སྒྲ་ཡིས་མི་མཚོན་སྙན་ཚིག་གིས། །བསྟོད་ཅིང་སྲིད་པའི་ལྷ་ཆེན་མངའ་གསོལ་ན། །ཕུ་མདའ་ཉིན་སྲིབ་ཡུལ་འདིས་ས་གཞིས་ཁྱོན། །དབང་བཟུང་ལེགས་ཉེས་མཁྱེན་པའི་བྱ་ར་མཛོད། །བོ་ལོ་རྩྭ་ཆུས་འཚོ་བའི་རི་སྐྱེས་ལ། །ཁྱོད་ལས་སྐྱབས་གཞན་མེད་པས་འཚོ་སྐྱོང་རེམ། །མོ་རྩིས་རྨིས་འཁྲུགས་ལྟས་ངན་ཆོ་འཕྲུལ་གྱིས། །འདོད་སྲེད་སྲིན་པོའི་རིགས་རྣམས་ཚར་གཅོད་མཛོད། །ཙི་ན་འཕགས་བལ་ཡུལ་གྱི་མཐའ་བསྐོར་བའི། །ལྟ་ལོག་ཕྱི་རོལ་ཀླ་ཀློའི་རྒྱུ་འཕྲུལ་ཀུན། །ཚུ་རོལ་གངས་ལྗོངས་མཐའ་དབུས་ཀུན་ཏུ་སྲུངས། །བསྟན་དང་འགྲོ་བའི་བདེ་སྐྱིད་འཕེལ་བར་མཛོད། །ཛེ་ཏའི་ཚལ་དུ་རྒྱལ་བའི་ཕྲིན་ལས་བཞིན། །གནས་འདིར་མཁས་བཙུན་གྲུབ་པའི་ཚོགས་གྱིས་གང་། །ཝོ་ཛི་ཧས་ཀྱང་བསྔགས་པ་བརྗོད་དཀའ་བའི། །བཤད་སྒྲུབ་བསྟན་པ་དར་རྒྱས་ཡུན་གནས་མཛོད། །ཞི་བའི་ཏིང་འཛིན་སྒོམ་ཞིང་སྒྲུབ་པའི་སྡེ། །ཉམས་དང་རྟོགས་པའི་ཡོན་ཏན་ཆེས་དཀར་བ། །ཟུ་ལེའི་གངས་ཀྱི་རི་བོའི་རྗེས་འགྲོ་ཞིང་། །དོན་གཉིས་མཐའ་རུ་ཕྱིན་པའི་ལེགས་པ་བྱིན། །འོ་{འ}ཞེས་འབོད་ཚེ་ལྷ་ཁྱོད་སྙན་མ་སྲ། །ལས་ལ་བསྐུལ་བའི་དུས་སུ་སྒབ་མ་ལྗི། །ཡོ་ག་སྡེ་གསུམ་བསྟན་ལ་འཚེ་བྱེད་པ། །བསྒྲལ་བའི་ཞིང་གྱུར་གང་ན་འདུག་ཀྱང་སྒྲོལ། །རི་གླིང་དགོན་གནས་ལྟོས་འཁོར་བཅས་པ་རྣམས། །ཁྱེད་ལ་གཉེར་དུ་བཅོལ་བས་སྲུང་སྐྱོབས་གྱིས། །ལུ་མའི་རྫིང་བཞིན་ཕྱྭ་གཡང་ལོངས་སྤྱོད་སྤེལ། །ཆོས་འབྱོར་བདེ་བའི་ལང་ཚོ་དར་བར་མཛོད། །ཤེ་མུན་ལྟ་བུའི་དུས་ཀྱི་རྒུད་པ་སངས། །འབྱུང་བ་ཁོད་སྙོམས་ལོ་ལེགས་ཕྱུག་འཕེལ་སོགས། །སོ་སོ་ཡིད་ལ་གང་འདོད་བསམ་པའི་དོན། །མཐའ་དག་འབད་མེད་ཡོངས་སུ་འགྲུབ་པར་མཛོད། །ཧི་ཧི་བཞད་པའི་སྒྲ་དང་ལྷན་ཅིག་པར། །ཞི་དང་བྱམས་པའི་སེམས་ཀྱིས་ཡུལ་འདི་སྐྱོངས། །ཨུ་རྒྱན་རིག་འཛིན་བརྒྱུད་པར་བཅས་པ་ཡི། །ཕྲིན་ལས་རྣམ་བཞི་ལྷུན་གྱིས་འགྲུབ་པར་མཛོད། །སངས་རྒྱས་བསྟན་པ་རིན་ཆེན་དར་ཞིང་རྒྱས། །བསྟན་འཛིན་སྐྱེས་བུའི་སྐུ་ཚེ་མཛད་འཕྲིན་འཕེལ། །ཡངས་པའི་རྒྱལ་ཁམས་ནད་མུག་འཁྲུགས་རྩོད་ཞི། །བདེ་སྐྱིད་དཔལ་ལ་རོལ་བའི་ཀྲ་ཤིས་ཤོག །ཅེས་བརྗོད་པས་དོན་འགྲུབ་པ་ཡིན་ནོ། །ཡུལ་རིས་དཀར་ཕྱོགས་སྐྱོང་བའི་དགེ་བསྙེན་ཆེ། །མཆོད་ཐབས་སྔོན་མེད་དཔག་བསམ་ལྗོན་བཟང་ལས། །ཅི་འདོད་དངོས་ཀུན་འཇོ་བའི་དགེ་མཚན་གྱིས། །བསྟན་འགྲོའི་བདེ་སྐྱིད་ཡུན་དུ་བརྟན་གྱུར་ཅིག །ཅེས་པའང་པདྨ་བི་ཛས་སོ། །