བཀྲ་ནང་གཞི་བདག་སྤྱིའི་བསང་མཆོད་བཀྲ་ཤིས་དཔལ་སྟེར།

༄༅། །བཀྲ་ནང་གཞི་བདག་སྤྱིའི་བསང་མཆོད་བཀྲ་ཤིས་དཔལ་སྟེར་ཞེས་བྱ་བ་བཞུགས་སོ། །ༀ་སྭསྟི། དྲི་མེད་མདངས་ལྡན་པདྨའི་གེ་སར་རྩེར། །ངོ་མཚར་རྫུས་འཁྲུངས་རང་བྱུང་སྤྲུལ་པའི་སྐུ། །རྒྱལ་ཀུན་འདུས་ཞལ་པད་འབྱུང་ལ་བཏུད་ནས། །ཡུལ་ལྷའི་བསང་མཆོད་བཀྲ་ཤིས་དཔལ་སྟེར་བྲི། །དེ་ཡང་གཟའ་སྐར་ཚེས་གྲངས་བཟང་པོ་སྔ་གྲོའི་ཆ་ལ། གཙོག་ནལ་དམར་གྱིས་མ་སྦགས་བའི་ཟས་སྣའི་རིགས་ཅི་འབྱོར་མཁན་ཤུགས་བལ་བུ་སོགས་དྲི་བཟང་པོ་ཅན་གྱི་ཤིང་སྣའི་མེ་ལ་བསྲེགས་པའ་ིདུད་སྤྲིན་ནམ་མཁའ་གང་བ་བཏང་ཞིང་གཙང་མའི་ཆབ་ཀྱིས་བྲན་ལ་འདི་སྐད་དོ། །ཧྲཱིཿཆོས་ཀུན་སྤྲོས་བྲལ་དེ་བཞིན་ཉིད་ཀྱི་ངང་། །རིག་རྩལ་མ་འགགས་པད་འབྱུང་སྐུར་གསལ་བའི། །ཐུགས་ཀའི་ཧཱུྃ་ལས་རྃ་ཡྃ་ཁྃ་གསུམ་འཕྲོས། །བསང་རྫས་ལ་ཕོག་ཉེས་སྐྱོན་བསྲེགས་གཏོར་བཀྲུས་{བསྐྲུས}། །ༀ་ཨཱཿཧཱུྃ་གིས་ཟག་མེད་འདུད་རྩིར་བསྒྱུར། །འདོད་ཡོན་ལྷ་མོའི་མཆོད་སྤྲིན་སྤྲོ་བར་གྱུར། །ཀྱཻ། ཕུན་ཚོགས་དགེ་བཅུའི་དཔལ་གྱིས་མཛེས་པ་ཡི། །རི་མཐོ་ས་གཙང་ཆུ་དྭངས་ཉམས་དགའ་བའི། །བཀྲ་ཡི་ཕུ་མདའ་ཉིན་སྲིབ་རི་དང་བྲག །ཆུ་དང་ལྗོན་ཤིང་སོགས་ལ་གནས་བཅས་པའི། །ཡུལ་སྐྱོང་དབང་པོ་དཀར་ཡུ་དྲེད་མགོ་དང་། །རྦབ་རི་ལ་སོགས་ལྷ་ཀླུ་གཉན་གྱི་རིགས། །རྨུ་བཙན་ཐེ་བྲང་བྲག་སྲིན་འབྱུང་པོའི་ཚོགས། །གང་མཆིས་མ་ཚང་མེད་པ་སྤྱན་འདྲེན་གྱིས། །ཐོགས་མེད་རྫུ་འཕྲུལ་སྟོབས་ཀྱིས་གཤེགས་ནས་ཀྱང་། །རང་རང་མཐུན་པའི་གདན་ལ་བཞུགས་སུ་གསོལ། །ཀྱཻ། དེ་རིང་བཀྲ་ཤིས་ལྷ་ཡི་ཉི་མ་ལ། །གཟའ་སྐར་དགེ་ཞིང་ཚེས་གྲངས་བཟང་བའི་དུས། །བདག་ཅག་རྣལ་འབྱོར་ཡོན་མཆོད་འཁོར་བཅས་ཀྱིས། །གཙང་ཞིང་དག་པར་སྦྱར་བའི་བཟའ་བཏུང་ཕུད། །བཟང་ཤིང་བདུད་རྩི་ཅན་གྱི་མེ་ལ་བསྲེགས། །དྲི་ཞིམ་དུད་པའི་སྤྲིན་གྱིས་ནམ་མཁའ་ཁེངས། །ཉེར་སྤྱོད་འདོད་པའི་ཡོན་ཏན་ཆར་དུ་འབེབས། །བཀྲ་ཤིས་རྟགས་རྫས་རྒྱལ་སྲིད་རིན་ཆེན་བདུན། །གོས་རྒྱན་ནོར་དབྱིགས་མཐུན་རྫས་གཏོར་མ་དང་། །ཇ་ཆང་འོ་ཞོ་གཙང་མའི་སྐྱེམས་ཀྱི་ཕུད། །རང་རང་ཡིད་ལ་གང་བཞེད་འདོད་དགུའི་སྤྲིན། །མི་འཛད་ནམ་མཁའ་མཛོད་ཀྱི་འཁོར་ལོ་རུ། །ལྷ་སྔགས་ཏིང་འཛིན་ཟབ་མོས་བྱིན་བརླབས་ཏེ། །མོས་ཤིང་དྭངས་པའི་བློ་ཡིས་འབུལ་ལགས་ན། །ཞི་དལ་དགའ་མགུའི་སེམས་ཀྱིས་བཞེས་སུ་གསོལ། །བདག་ཅག་མི་ཤེས་བག་མེད་དབང་གྱུར་པས། །ཐུགས་འགལ་ཉེས་པའི་ཚོགས་རྣམས་ཅི་བགྱིས་དང་། །ཁྱད་པར་རོ་བག་རྨེ་མནོལ་བཙོག་དང་འཁོན། །མཛེ་ཡུགས་ཐབ་གཞོབ་གྲིབ་ཀྱིས་གོས་པ་རྣམས། །བསང་གི་ཆོ་ག་འདི་ཡིས་དག་གྱུར་ཅིག །གྲུབ་པའི་རིག་འཛིན་པདྨ་ཐོད་ཕྲེང་སོགས། །རིག་འཛིན་བརྒྱུད་པའི་བཀའ་དམ་དྲན་གྱིས་ལ། །སངས་རྒྱས་བསྟན་བསྲུང་དཀོན་མཆོག་དབུ་འཕང་བསྟོད། །ཁྱད་པར་བདག་ཅག་ཡོན་མཆོད་འཁོར་བཅས་ཀྱི། །མི་ཡི་ན་ཚ་ཕྱུགས་ཀྱི་གོད་ཁ་ཆོད། །དགྲ་ཇག་ཆོམ་རྐུན་གཅན་སྤྱང་འཚེ་བ་སྐྱོབས། །བསམ་པའི་དོན་ཀུན་ཡིད་བཞིན་འགྲུབ་པར་མཛོད། །བསང་མགྲོན་དགྱེས་པས་རང་རང་གནས་སུ་གཤེགས། །ཞི་དང་བྱམས་པའི་སེམས་ཀྱིས་ཡུལ་འཁོར་སྲུངས། །ལྷ་མི་མཐུན་འགྲོགས་བདེ་སྐྱིད་ཆོས་ལ་སྤྱོད། །བཀྲ་ཤིས་དཔལ་གྱིས་ཕྱོགས་དུས་ཀུན་ཁྱབ་ཤོག །ཞེས་བརྗོད་པས་དོན་འགྲུབ་པ་ཡིན་ནོ། །ཞེས་པའང་དད་ལྡན་བློ་བྲོས་རབ་འཕེལ་ནས་འདི་ལྟ་བུ་ཞིག་དགོས་ཞེས་ནན་གྱིས་བསྐུལ་ངོར་ཟེ་ཆེན་སྤྲུལ་མིང་འཛིན་པ་འཇམ་དབྱངས་མཁས་གྲུབ་རྒྱ་མཚོས་གང་དྲན་ཡི་གེའི་རིས་སུ་བྲིས་པ་འདིས་ཀྱང་བསྟན་འགྲོའི་བདེ་སྐྱིད་དགུང་ལ་རེག་པའི་རྒྱུར་གྱུར་ཅིག