ཡུལ་སྐྱོང་འབྲིི་རྫི་ཕྱུག་མོའི་བསང་མཆོད་བཀྲ་ཤིས་ཆར་འབེབས།

༄༅། །ཡུལ་སྐྱོང་འབྲིི་རྫི་ཕྱུག་མོའི་བསང་མཆོད་བཀྲ་ཤིས་ཆར་འབེབས་ཞེས་བྱ་བ་བཞུགས་སོ། །ན་མོ་པདྨ་ཀ་ར་ཡེ། སངས་རྒྱས་ཀུན་གྱི་ཡེ་ཤེས་སྐུ། །པདྨ་འབྱུང་གནས་ལ་བཏུད་ནས། །ཡུལ་སྐྱོང་དབང་མོ་དགྱེས་བསྐྱེད་པའི། །བསང་མཆོད་བཀྲ་ཤིས་ཆར་འབེབས་བྲི། །དེ་ལ་འདིར་ཡུལ་ལྷའི་གཙོ་མོར་བསང་མཆོད་འབུལ་ན། གང་ལ་ཚེས་བཟང་པོའི་སྔ་གྲོའི་ཆར། གཙོག་ནལ་དམར་སོགས་དང་མ་འདྲེས་པའི་རིན་ཆེན་འབྲུ་སྨན་ཟས་སྣའི་རིགས་ཅི་འཛོམས་ཤུག་པ་སོགས་དྲི་ལྡན་གྱི་མེར་བསྲེགས་ཤིང་ཆུ་གཙང་འཐོར་ལ་འདི་སྐད་དོ། །ཧྲཱིཿཀ་དག་སྤྲོས་བྲལ་ཆོས་དབྱིངས་ལས། །མ་འགགས་རང་ཤར་པད་མ་འོད། །ངོ་མཚར་ཞིང་གི་བཀོད་པའི་དབུས། །བདག་ཉིད་སྐད་ཅིག་དྲན་རྫོགས་སུ། །པདྨ་འབྱུང་གནས་སྐུ་རུ་གསལ། །ཐུགས་སྲོག་ཧཱུྃ་གི་འོད་ཟེར་གྱིས། །བསང་རྫས་མི་གཙང་ཉེས་སྐྱོན་སྦྱངས། །འདོད་ཡོན་བདུད་རྩིར་བྱིན་གྱིས་རླབས། །ནམ་མཁའ་རབ་འབྱམས་གང་བར་སྤེལ། །རྃ་ཡྃ་ཁྃ། ལན་གསུམ། ༀ་ཨཱཿཧཱུྃ༔ལན་གསུམ། ཀྱཻ། ཆོས་ཀྱི་དབྱིངས་ཉིད་སྤྲོས་པ་བྲལ་བ་ལ། །གཟུང་དང་འཛིན་པའི་མཚན་མ་མི་དམིགས་ཀྱང་། །ཀུན་རྫོབ་རྟེན་འབྲེལ་སྣང་བའི་གཟུགས་ཤར་བ། །རྨ་རི་རྡོ་རྗེ་དྲག་མོའི་འཕྲུལ་བའི་ཆ། །སིབ་ཀྱི་ཡུལ་སྐྱོང་འབྲི་རྫི་ཕྱུག་མོ་ཆེ། །གཙོ་འཁོར་བྲན་བཅས་བསང་མཆོད་མགྲོན་དུ་འབོད། །ཐོགས་མེད་རྫུ་འཕྲུལ་སྟོབས་ཀྱིས་འདིར་གཤེགས་ལ། །ཞི་དང་དགའ་བས་རང་མཐུན་གདན་ལ་བཞུགས། །ཀྱཻ། རྣམ་པར་དག་པ་ཡུམ་ལྔའི་མཁའ་དབྱིངས་ལས། །འབད་མེད་རྟེན་འབྲེལ་རྫས་སུ་ཡོངས་ཤར་བ། །རིན་ཆེན་སྨན་སྤོས་མེ་ཏོག་འབྲས་བུ་རིགས། །དཀར་གསུམ་མངར་གསུམ་གཙང་མའི་ཟས་སྣའི་ཕུད། །ལྷ་ཤིང་བདུད་རྩི་ཅན་གྱི་དྲི་དང་སྦྱར། །འབར་བྱེད་ཀློང་དུ་བསྲེགས་པའི་དུ་བའི་རྩེར། །གཟུགས་སོགས་མཛེས་སྡུག་ལྷ་མོ་གྲངས་མེད་འཕྲོས། །འདོད་ཡོན་ལྔ་དང་བཀྲ་ཤིས་རྫས་རྟག་བརྒྱད། །རིན་ཆེན་དར་གོས་འབྲུ་སྨན་དཀོར་ནོར་རྫས། །བཞེད་དགུའི་འབྱོར་པ་རྒྱ་མཚོའི་སྤྲིན་སྤྲོ་བས། །ཡུལ་སྐྱོང་སྨན་བཙུན་ལྷ་མོ་བསངས་ཤིང་མཆོད། །མི་གཙང་གྲིབ་ཀྱིས་གོས་པའི་ནད་ཀུན་བསལ། །ཕོག་ཐུག་འགྲམ་འཁྲུགས་འགལ་བ་མ་ལུས་ཞི། །སྟོབས་རྩལ་གཟི་མདངས་ཕུན་སུམ་ཚོགས་པར་ཤོག །ཀྱཻ། པདྨའི་བཀའ་ཉན་བོད་ཁམས་སྐྱོང་བའི་གཙོ། །རྨ་རི་རབ་འབྱམས་རྡོ་རྗེ་དྲག་མོའི་འཕྲུལ། །སྨན་བཙུན་བཀྲ་ཤིས་འབྲི་རྫི་ཕྱུག་མོ་ནི། །སྐུ་མདོག་དཀར་གསལ་གཞོན་མཛེས་ལྟ་ན་སྡུག །ཕྱག་གཡས་མདའ་དར་སྲིད་ཞིའི་ཕྱྭ་གཡང་སྡུད། །གཡོན་པས་མེ་ལོང་ལེགས་ཉེས་པྲ་རུ་སྟོན། །དར་གོས་རིན་ཆེན་རྒྱན་གྱིས་རྣམ་པར་མཛེས། །འཁོར་དུ་སྨན་ཕྲན་དུ་མས་བརྩེ་འཇོ་བསྒྱུར། །བསྟན་ལ་རབ་དགའི་མཐུ་དང་རྫུ་འཕྲུལ་ལྡན། །དཀར་ཕྱོགས་སྐྱོང་བའི་ཡུལ་ལྷ་ཆེན་མོ་ལ། །མཆོད་ཅིང་བསྟོད་པས་རབ་ཏུ་མཉེས་གྱུར་ཅིག །ཁྱོད་ལ་བཅོལ་ཞིང་ཕྲིན་ལས་ཞུ་བ་ནི། །སངས་རྒྱས་བསྟན་དར་སེམས་ཅན་བདེ་ཞིང་སྐྱིད། །ཁྱད་པར་ཡུལ་འདིས་མི་ཕྱུགས་མཐའ་དག་གི། །ནད་མུག་ཀུན་ཞི་ཆོས་འབྱོར་བདེ་བས་འཚོ། །རྫོགས་ལྡན་ལང་ཚོ་རབ་ཏུ་དར་བར་མཛོད། །ཡུལ་སྐྱོང་དབང་མོ་དགྱེས་བཞིན་རང་གནས་གཤེགས། །ཞི་དང་བྱམས་པའི་སེམས་ཀྱིས་ཡུལ་རིས་སྲུངས། །ལྷ་མི་མཐུན་འགྲོགས་བདེ་སྐྱིད་ཆོས་ལ་སྤྱོད། །བཀྲ་ཤིས་དཔལ་གྱིས་ཕྱོགས་དུས་ཀུན་ཁྱབ་ཤོག །ཅེས་ཨར་རྒོད་བླ་མ་པདྨ་རང་བྱུང་གིས་སྐྱེས་བཅས་བསྐུལ་ངོར། ར་ཉག་གྲུབ་དབང་རིན་པོ་ཆེའི་གསུང་རྒྱུན་དང་རང་གི་རྣམ་རྟོག་གོ་སྦྱར་ནས་མི་འགལ་བའི་ཁུལ་གྱིས་ཞེ་ཆེན་སྤྲུལ་གཟུགས་འཛིན་པ་འགྱུར་མེད་པདྨ་རྣམ་རྒྱལ་དཔལ་འཟང་པོས་བྲིས་པ་དགེ་ཞིང་བཀྲ་ཤིས་པར་གྱུར་ཅིག༈ རྃ་ཡྃ་ཁྃ། ༀ་ཨཱཿཧཱུྃ། གསེར་སྐྱེམས་ཟག་མེད་འདོད་ཡོན་བདུད་རྩིའི་སྤྲིན། །མགྲོན་རིགས་ཐུག་ལ་གང་བཞེད་དེ་འཆར་བའི། །ངོ་མཚར་ཀུན་བཟང་མཆོད་པའི་སྤྲིན་ཆེན་འདི། །རིགས་ཀུན་ཁྱབ་བདག་རྩ་བརྒྱུད་བླ་མ་དང་། །ཡི་དམ་ཞི་ཁྲོ་མཁའ་འགྲོ་ཆོས་སྐྱོང་ཚོགས། །ཡུལ་ལྷ་གཞི་བདག་སྲིད་ཞི་མགྲོན་ཀུན་དང། །ཁྱད་པར་ས་བརྒྱད་ནོན་པའི་སེམས་དཔའ་མཆོག །རྨ་རྒྱལ་སྤོམ་ར་རྡོ་རྗེ་གྲགས་མོ་རྒྱལ། །གཉན་ཆེན་གཡུ་རྩེ་རྫ་ཡི་གསེར་ཁྲབ་སོགས། །རྨ་ལུང་སྟོད་སྨད་སྲིད་པའི་གཞི་བདག་དང་། །གཡས་གཡོན་མདུན་རྒྱབ་ཕུ་མདའ་ཉིན་སྲིབ་ཀྱི། །གནས་བདག་ལྷ་ཀླུ་གཉན་བཙན་རྨུ་བདུད་རིགས། །རང་རང་མིང་དང་མཚན་ནས་མ་ཐོན་པར། །ང་ཆེ་ང་བཙན་དྲག་སེམས་འཆང་བ་ཡི། །ཕན་གནོད་ལས་ལ་དབང་བའི་མགྲོན་ཀུན་མཆོད། །གནས་མགྲོན་དམ་ཚིག་གཉན་པོ་རྗེས་དགོངས་ལ། །རུ་ང་ཕྲག་དོག་འཁྲེན་གཟེར་མ་མཛད་པར། །དཀར་ཕྱོགས་སྡོང་གྲོགས་མཐུན་རྐྱེན་ཡིད་བཞིན་སྒྲུབས། །འདོད་དོན་བསམ་པའི་དོན་ཀུན་འགྲུབ་པར་མཛོད། །ཅེས་པའང་དད་པ་དང་སྨོན་ལམ་དཀར་བ་དགེ་བའི་བསམ་པ་ལྡན་པའི་བཞེད་སྐོང་དུ་འདུ་གསུམ་པ་པདྨ་བི་ཛས་བྲིས་པ་དགེ །